རྫོགས་ཆེན་སྐོར་ཕྱོགས་བསྡུས།
རྫོགས་ཆེན་ཁྲེགས་ཆོད་ཀྱི་གདམས་པ་ཉུང་བསྡུས་སྒྲོན་མེའི་སྣང་བ་ཞེས་བྱ་བ་བཞུགས་སོ། །
གང་གི་དྲིན་གྱིས་ཐེག་མཆོག་རྫོགས་པ་ཆེའི། །ལམ་འདིར་རྒྱུ་མཚན་ཤེས་ནས་དད་ཐོབ་པ། །མཉམ་མེད་རྡོ་རྗེ་འཆང་དབང་བླ་མའི་ཞབས། །བཏུད་ནས་སྒོམ་ཆེན་དགྱེས་པའི་མཆིད་འདི་གླེང༌། །འདི་ན་རྫོགས་ཆེན་སྨྲ་བ་མང་མོད་དེ། །ཕྱོགས་འདིའི་ཤིང་རྟ་ཀུན་མཁྱེན་ཀློང་ཆེན་པའི། །རང་ལུགས་རི་མོའི་མར་མེ་ལྟར་གྱུར་པས། །ཡང་དག་ལྟར་སྣང་བྱེད་པ་ཤིན་ཏུ་ཉུང༌། །དེ་སླད་སྨྲ་བ་མང་ན་རྩོད་པའི་རྒྱུ། །མ་སྨྲ་བག་ཡངས་སྡོད་པ་མཆོག་ཡིན་ཡང༌། །ཆོས་དོན་གཉེར་བའི་ནན་ངོ་མ་ལྡོག་པས། །ཤུགས་འབྱུང་སྣང་བ་བྱུང་རྒྱལ་གཏམ་ལབ་བྱ། །དབང་གྱུར་ལུང་དང་རྣམ་དག་རིགས་པའི་མཐུས། །རྒྱ་ཆེར་འཆད་ལའང་
ཅུང་ཟད་དབང་མོད་ཀྱི། །ངོ་སྤྲོད་གནད་ལ་བསྒྲིལ་བ་ཉུང་ངུའི་ངག །བསྡུས་ལ་དགའ་བའི་བློ་དང་བསྟུན་ཏེ་འཆད། །དེ་ཡང་རྫོགས་ཆེན་མན་ངག་སྡེའི་ཤིང་རྟ་ཆེན་པོ་རྣམས་ཀྱི་བཞེད་པ་ལྟར་ན་ཆོས་འདི་སྙིང་རྗེ་བྱང་ཆུབ་ཀྱི་སེམས་ལ་བློ་སྦྱང་བ་དང༌། སྒྲ་ཐལ་འགྱུར་ཆེན་པོ་ནས་བཤད་པའི་སྤྲོས་བཅས་དང་སྤྲོས་མེད་ལ་སོགས་པའི་དབང་བཞི་རྫོགས་པར་ཐོབ་ནས་དམ་ཚིག་ཚུལ་བཞིན་སྲུང་ནུས་པ་དང༌། ཁྱད་པར་དུ་ཡང་རྡོ་རྗེའི་ལམ་གྱི་ཉམས་རྟོགས་བཙན་ཐབས་སུ་འཆར་བ་དོན་བརྒྱུད་དགོངས་པའི་བྱིན་རླབས་འཕོ་བ་ལ་རག་ལས་པས་སློབ་དཔོན་སྒོ་དུ་མ་ནས་མཉེས་པར་བྱེད་ནུས་པའི་སྣོད་ལྡན་གྱི་སློབ་མ་ཁོ་
ན་ལ་སྟོན་པར་བཞེད་ཀྱི། །རྟེན་འབྲེལ་ཐོག་མ་ནས་འཆུག་པའི་ལམ་མགོ་མཇུག་མེད་པ་དུར་ཁྲོད་ཀྱི་མགལ་བ་ལྟ་བུ་འདི་ནི་མི་བཞེད་དོ། །དེའི་ཕྱིར་མཐའ་ཡས་པའི་སེམས་ཅན་ཐམས་ཅད་བརྣག་པར་དཀའ་བའི་སྡུག་བསྔལ་གྱི་ཁུར་ཆེན་པོས་སྐད་ཅིག་རེ་རེ་བཞིན་དུ་གཙེར་བ་འདི་ལ་ཁ་ཙམ་མིན་པར་སྙིང་ཐག་པ་ནས་མ་བཟོད་པའི་སེམས་ཀྱིས་དུས་ཆུ་ཚོད་སྔ་ཕྱིར་ཡང་རྫོགས་བྱང་ཐོབ་པ་ལ་ཡིད་རིངས་པ་ཞིག་གིས་ལམ་འདི་ལ་བརྟེན་ནས་ཚེ་གཅིག་ལུས་གཅིག་པོ་འདིའི་སྟེང་ནས་འཇའ་ལུས་འཕོ་བ་ཆེན་པོའི་ཡེ་ཤེས་ཀྱི་སྐུ་བསྒྲུབས་ཏེ་སེམས་ཅན་མ་ལུས་པ་འཁོར་བ་ལས་སྒྲོལ་བའི་དེད་དཔོན་གཅིག་པུར་འགྱུར་ནུས་པ་དེ་བས་ན་ཐེག་མཆོག་རྒྱལ་པོ་ཞེས་བྱ་བའི་མིང་གྲགས་སྐམ་ཙམ་དུ་མ་ལུས་པར་མཐོང་ངོ། །གོ་འཕང་དེ་ལྟ་བུ་སྒྲུབ་པ་ལ་ཟབ་པ་ཁྲེགས་ཆོད་དང་རྒྱ་ཆེ་བ་ཐོད་རྒལ་གྱི་ལམ་གཉིས་ཟུང་འབྲེལ་དུ་ཉམས་སུ་བླངས་ནས་ཉམས་མྱོང་མཐར་དབྱུང་བ་ཞིག་དགོས་ལ། །དེའི་ནང་ནས་ཀྱང་སློབ་རིམ་གྱི་དང་པོ་ཁྲེགས་ཆོད་ནས་འཇུག་དགོས་པས་འདིར་རེ་ཞིག་དེ་བཤད་པར་བྱ་སྟེ། དེ་ལ་ཁྲེགས་ཆོད་ཅེས་པའི་མཚན་དོན་ནི། ཤེས་རབ་ཀྱི་ཕར་ཕྱིན་བསྒོམས་པའི་མཐུ་ལས་གཟུང་དང་འཛིན་པའི་སྣང་བ་ཐད་ཀར་གཅོད་པ་ལ་སྒྲ་ཐལ་འགྱུར་ནས་གསུངས་ཤིང༌། །སྐབས་འདིའི་ཤེར་ཕྱིན་
ནི་སེམས་དང་རིག་པ་གཉིས་ཀྱི་ཟླས་ཕྱེ་བའི་རིག་པ་ཡིན་ལུགས་ཀྱི་ལྟ་བ་ཕུ་ཐག་ཆོད་པའི་ས་ནས་རྙེད་པ་དེའོ། །རིག་པ་དེ་ངོ་འཕྲོད་ཕན་ཆད་སེམས་མ་བཅོས་པར་སྐྱོང་བའི་བཞག་ཐབས་ཁོ་ནས་གནས་ལུགས་ཀྱི་རང་ཞལ་ལྟ་བ་མ་གཏོགས་འདི་བྱ་དང་འདི་སྒོམ་གྱི་སྤྲོས་པའི་དམིགས་གཏད་ཕྲ་མོ་ཡང་དགོས་རྒྱུ་མེད་མོད། །འོན་ཀྱང་དེའི་སྔོན་དུ་ངོ་སྤྲོད་སྤྲས་པའི་རྒྱུད་ལས་གསུངས་པའི་རིམ་འཇུག་གི་ངོ་སྤྲོད་འདི་ཡང་ངེས་པར་དགོས་ཏེ། །འདི་སྔོན་དུ་མ་སོང་ན་ཆོས་ཉིད་ཀྱི་བཞུགས་ཚུལ་རྗེན་པར་མཐོང་བ་དཀའ་འོ། །གདུལ་བྱ་ཚེ་སྔ་མ་ལ་ལམ་འདིར་རྒྱུད་སྦྱངས་པའི་གང་ཟག་གཅིག་ཡིན་ན་ནི་ངོ་སྤྲོད་ཀྱི་གོ་རིམ་འདི་ལྟར་བྱེད་དགོས་པའི་ཁྱབ་མཐའ་མེད་ཀྱི་དེ་དང་གཞན་མི་འདྲའོ། །དེས་ན་ངོ་སྤྲོད་འདི་ལ་གསུམ། །སྣང་བ་སེམས་སུ་ངོ་སྤྲད་དེ་ད་ལྟ་རང་རེ་རྣམས་ལ་ཡུལ་སྣང་ཕྱི་དོན་དུ་འཆར་བ་འདི་རྣལ་འབྱོར་པའི་ནང་སེམས་ཀྱི་སྣང་ཆ་ཙམ་དུ་མཐོང་བ་དང༌། །སེམས་ཉིད་སྟོང་པར་ངོ་སྤྲད་དེ་འཛིན་པ་རང་མཚན་ལྟར་སྣང་བ་འདི་ཡང་དོན་དམ་པར་ན་གྲུབ་པའི་དངོས་པོ་ཅུང་ཟད་ཀྱང་མེད་པར་མཐོང་བ་དང༌། སྟོང་པ་རིག་པར་ངོ་སྤྲད་དེ་ཀུན་རྫོབ་ཀྱི་སྣང་བ་ཡུལ་དང་ཡུལ་ཅན་ཐམས་ཅད་བདེན་མེད་སྒྱུ་མ་དང་རྨི་ལམ་གྱི་འཆར་སྒོ་ལྟར་མཐོང་བ་ལ་བསླབ་པར་བྱ་བ་སྟེ། གང་ཟག་གི་རིགས་ཁ་ཅིག་དེ་ཁོ་ན་ཉིད་
ལ་རིམ་གྱིས་བཀྲི་བའི་ཐབས་མཁས་ཀྱི་སྒོ་གཅིག་གོ །འོན་ཀྱང་མཐར་ཐུག་གི་དོན་ལ་སྣང་བ་སེམས་སུ་ངོ་སྤྲད་པ་ཡང་བདེན་ཞེན་གྱིས་བཏང་བ་མིན་པར་དཔལ་ལྡན་ཟླ་བའི་ཞབས་དང་ཀུན་མཁྱེན་ཀློང་ཆེན་པའི་བཞེད་པ་ལྟར་ཐམས་ཅད་མཁྱེན་པ་འཇིགས་མེད་གླིང་པས་ཀྱང་རྩལ་དུ་བཏོན་ནས་བཤད་དེ། །ཤེས་དང་ཤེས་བྱ་བདེན་རྫུན་གྱི་རྣམ་དབྱེ་མི་འདྲ་བར་འཐད་པ་མིན་པའི་ཕྱིར་རོ། །དེ་བས་ན་ཁམས་གསུམ་ལ་སོགས་པའི་སྣང་བ་ཐམས་ཅད་རྟོག་པའི་རང་མདངས་དང་རིག་པའི་རྩལ་ཤུགས་ཙམ་ལས་ཡུལ་དང་ཡུལ་ཅན་རང་རང་གི་སྟེང་ནས་རྙེད་རྒྱུ་ཞིག་གཏན་ནས་མེད་པས་ཤེས་བྱ་ལ་ལྟོས་ཏེ་ཤེས་པ་དང་ཤེས་པ་ལ་ལྟོས་ནས་ཤེས་བྱ་ཞེས་བཏགས་པའི་ཐ་སྙད་ཀྱི་རྫུན་རིས་ཁོ་ནར་མཚང་རྡོལ། དེ་ལ་བརྟེན་ནས་ཡོད་མེད་ཡིན་མིན་ལ་སོགས་པའི་མཐར་འཛིན་གྱི་འཆིང་བ་རྡུལ་ཙམ་ཡང་མ་དམིགས་པའི་འོད་གསལ་སྟོང་པ་ཉིད་ཀྱི་དབྱིངས་སོ་སོ་རང་གིས་རིག་པར་བྱ་བ་དེ་གཞན་ཟེར་གྱི་རྗེས་བརྗོད་ཁོ་ནས་ཡིད་གང་བ་མ་ཡིན་པར་ངེས་ཤེས་ཕུ་ཐག་ཆོད་པར་བྱ་སྟེ། འདི་གཉིས་ཀ་རྒྱུད་ཀྱི་དགོངས་པའི་ཕྱོགས་རེ་རེར་ཁས་བླང་ངོ༌། །དེ་ནས་དངོས་གཞིའི་ངོ་སྤྲོད་ནི། །སྤྱིར་དཔེ་དོན་སྦྱར་བའི་ངོ་སྤྲོད་ཉེར་གཅིག་སོགས་མང་དུ་གསུངས་ཀྱང་སྐབས་འདིའི་ངོ་སྤྲོད་ཀྱི་མདོ་འགག་སེམས་རིག་ཤན་འབྱེད་ལ་ཐུག་པར་
གཟིགས་ནས་ཀུན་མཁྱེན་རྣམ་པ་གཉིས་ཀས་ཚུལ་འདི་སྒོ་དུ་མ་ནས་གཏན་ལ་ཕབ་སྟེ་བཤད་མོད། །འོད་གསལ་གྱི་རྒྱུད་ངོ་སྤྲོད་སྤྲས་པ་སོགས་ནས་གནས་དང་སྒོ་དང་བཞུགས་ཚུལ་ལ་སོགས་པས་སེམས་རིག་གི་ཁྱད་པར་ཞིབ་ཏུ་གསུང་བ་ལ་བལྟ་རྟོག་ཆུང་ཞིང་རྒྱུད་དོན་མན་ངག་གིས་ཕྱེ་བའི་བཀའ་དྲིན་ལ་མི་སེམས་པ་ཚོས་སེམས་དང་རིག་པའི་ཤན་འབྱེད་ཀྱི་འཕྱོང་ཟེར་རྒྱུ་ཞིག་སྔོན་གྱི་ལོ་པཎ་རྣམས་ལ་མ་གྲགས་ཀྱང་རིག་འཛིན་འཇིགས་གླིང་གིས་རང་བཟོ་ཡིན་ཞེས་ཟེར་བ་ནི་ཁ་བདུད་ཀྱིས་བསྐུལ་བའི་སྨྲེ་སྔགས་ཤིག་ཐེག་པའི་རྒྱལ་པོའི་གྲུབ་མཐའ་ལ་ཐན་སྐྱེལ་དུ་འོང་བ་ཁོ་ནར་ཟད་དེ། དེ་ལ་སེམས་ཞེས་བྱ་བ་ནི། ད་ལྟའི་ཐ་མལ་གྱི་རྣམ་རྟོག་དགའ་སྡུག་དང་རེ་དོགས་ལ་སོགས་པའི་རྣམ་པ་གཞན་དང་གཞན་དུ་འགྱུར་བའི་མཚན་ཉིད་ཅན་འདི་དང༌། སྒོ་ལྔའི་ཤེས་པ་གཟུང་ཡུལ་ལ་འཇུག་པ་རྣམས་ཏེ། །འདི་དང་འདིའི་ཕྱོགས་གཏོགས་འཕྲོ་གནས་ཀྱི་ཤེས་ཉམས་ཐམས་ཅད་ལས་རླུང་གི་བཞོན་པ་ཅན་ལས་མ་འདས་པར་རྟ་ལོང་བ་རྐང་ཅན་དང་མི་འཕྱེ་བོ་མིག་ལྡན་གཉིས་ཚོགས་པའི་དཔེས་སེམས་ཡུལ་ཐོག་ཏུ་གཡོ་བ་དང༌། ཡུལ་འཛིན་པ་གཉིས་ཀྱི་བྱེད་ལས་ཀྱང་རླུང་སེམས་ཚོགས་པའི་ནུས་མཐུར་ཀུན་མཁྱེན་གཉིས་པས་བཤད་དེ། རྒྱུད་མུ་ཏིག་ཕྲེང་བ་ལ་
སོགས་པར་སྲིད་པ་སྐྱེད་སྡུད་ཀྱི་བདག་པོ་རླུང་དུ་བཤད་པ་ཡང་འདི་འདྲ་བའི་དོན་མང་པོ་ཞིག་ལ་དགོངས་ནས་ཡིན་ནོ། །སེམས་དེ་ངོས་ཟིན་པ་གཅིག་པུས་མི་ཆོག་པས་ད་དུང་ཞིབ་ཏུ་དཔྱད་ན་འཁོར་བ་ཐོག་མ་མེད་པ་ནས་མ་རིག་པའི་རྣམ་རྟོག་སྟོབས་སུ་གྱུར་ཅིང༌། །རང་རྒྱུད་ལ་ལས་ཀྱིས་བཞག་པའི་བག་ཆགས་ཡོངས་སུ་སྨིན་ནས་ཉེར་ལེན་གྱི་ཕུང་པོའི་སྟེང་དུ་བདེ་བ་དང་སྡུག་བསྔལ་བྱིས་པའི་རྡོལ་ཐབས་བཞིན་དུ་འབྱུང་ཞིང༌། །དེའི་རྗེས་ལ་དེ་ལྟར་ཞེན་པའི་སེམས་འབྲང་བས་མཚོན་ཏེ་ཟག་བཅས་ཀྱི་གནས་ལུས་ལོངས་སྤྱོད་ལ་སོགས་པ་འཁྲུལ་སྣང་ཐ་མལ་དུ་ཞེན་པའི་སེམས་ཀྱི་རྒྱུ་བ་ཇི་སྙེད་པ་ཐམས་ཅད་རྒྱུ་རྐྱེན་གློ་བུར་བའི་དབང་གིས་འཁྲུལ་པ་ཉིད་འཁྲུལ་དུ་ཤར་ནས་རང་སྣང་ལ་གཞན་དུ་བཟུང་བ་མ་གཏོགས་སེམས་ཀྱི་གཤིས་ལ་འཁྲུལ་སྣང་གིས་བསྒྱུར་བའི་ཚོས་མདོག་དེ་ལྟ་བུ་ཞིག་ཡོད་རྒྱུར་མི་འདུག་སྙམ་དུ་ལེགས་པར་རྩད་བཅད། དེའང་བླ་མའི་མན་ངག་དང་བྲལ་བའི་གང་ཟག་རྣམས་ལ་གློ་བུར་གྱི་ཡུལ་དང་བཅས་པའི་སེམས་འདི་ལས་ལྷག་པའི་ཡེ་ཤེས་གཞན་ཞིག་ད་ལྟ་ནས་ངོ་འཕྲོད་པ་མེད་ཀྱང༌། ཐེག་པ་འདིའི་ལུགས་ལ་ནི་དེ་འདྲ་བའི་ནང་གི་ཡེ་ཤེས་སེམས་ཅན་ཐམས་ཅད་ཀྱི་རྒྱུད་ལ་གཟོད་མ་ནས་འབྲལ་མ་མྱོང་བའི་ཆོས་སྐུའི་རང་ཞལ་རྗེན་པ་ཞིག་བླ་མའི་མན་ངག་གིས་བསྟན་རྒྱུ་
ཡོད་དེ། །དེ་ངོ་ཤེས་ན་ཐེག་པ་གཞན་གྱི་ལྷག་མཐོང་བསྐལ་པ་མང་པོར་བསྒོམ་པ་ལས་ཀྱང་ལམ་འདིའི་མཉམ་བཞག་ཐུན་གཅིག་ས་ཆོད་ཆེ་བའི་གནད་ཟབ་མོ་ཡོད་དོ། །ཡེ་ཤེས་དེའི་བཞུགས་ཚུལ་ངོ་འཕྲོད་པའི་སྒོ་ཡང་མདོར་བསྡུ་ན་གསུམ་སྟེ། ངོ་བོ་སྟོང་པར་བཞུགས་པས་དགག་སྒྲུབ་ཆེད་འཛིན་ལ་མ་ལྟོས་པར་ཡིད་དཔྱོད་ཀྱི་འཆིང་བ་རྡུལ་ཙམ་ཡང་ངོ་བོའི་སྟེང་ན་ཡོད་མ་མྱོང་སྟེ་རྡོ་རྗེ་ནམ་མཁའི་ཀློང་ཆེན་ལྟ་བུ། །རང་བཞིན་གསལ་བར་བཞུགས་པས་བསལ་བཞག་སྤྲོ་བསྡུ་ལ་མ་ལྟོས་པར་བྱིང་འཐིབས་ཀྱི་མུན་པ་ཆ་ཙམ་ཡང་གཤིས་ཀྱི་སྟེང་ན་འཇུག་མ་མྱོང་བས་འོད་གསལ་ཉི་མའི་དཀྱིལ་ཡངས་པ་ལྟ་བུ། །ཐུགས་རྗེ་ཀུན་ཁྱབ་ཏུ་བཞུགས་པས་བྱ་རྩོལ་གྱི་ངལ་བ་ལ་མ་ལྟོས་པར་འཁྲུལ་གྲོལ་ཐམས་ཅད་གཉུག་མའི་རང་རྩལ་ལས་གཞན་དུ་གྲུབ་མ་མྱོང་བས་གཉིད་མོ་ཆེའི་རྨི་ལམ་ལྟ་བུ་སྟེ། རིག་པའི་ངོ་བོ་ལ་ཀ་དག་གི་བཞུགས་ཚུལ་དེ་ལྟ་བུ་ཡོད་པས་འབྲས་བུ་རྣམ་པར་མི་རྟོག་པ་ཆོས་སྐུའི་ཡེ་ཤེས་གདལ་ཁྱབ་སྟོང་པ་ཉིད་ཀྱི་རྣམ་པ་ཅན་འགྲུབ་པའི་གོ་འབྱེད། རིག་པའི་རང་བཞིན་ལ་ལྷུན་གྲུབ་ཀྱི་གསལ་ཆ་དེ་ལྟ་བུ་ཡོད་པས་འབྲས་བུ་རྣམ་པ་ཐམས་ཅད་པ་ལོངས་སྐུའི་ཡེ་ཤེས་གསལ་མདངས་འགགས་པ་མེད་པའི་རྣམ་པ་ཅན་འཆར་བའི་གོ་འབྱེད། རིག་པའི་རང་
རྩལ་ལ་ཀུན་ཁྱབ་ཀྱི་ཐུགས་རྗེ་དེ་ལྟ་བུ་ཡོད་པས་འབྲས་བུ་རོལ་པ་སྣ་ཚོགས་པ་སྤྲུལ་སྐུའི་ཡེ་ཤེས་གང་འདུལ་དེར་སྣང་གི་རྣམ་པ་ཅན་འབྱུང་བའི་གོ་འབྱེད། །དེ་ལྟར་གདོད་མའི་ཡེ་གཞི་སྟོང་པ་ལ་ཕྱལ་ཆད་མིན་པ། བདེ་བ་ལ་ཞེན་པ་མེད་པ། གསལ་བ་ལ་རྟོག་པས་མ་གོས་པ་སལ་ལེ། །སིང་ངེ༌། །ཡེར་རེ། མཚན་ཉིད་གཞན་དུ་མི་འགྱུར་བར་རིན་པོ་ཆེ་གསེར་གྱི་ཁམས་ལྟར་བཞུགས་ཀྱང་ཐ་མལ་པའི་སྒོ་གསུམ་བག་ཆགས་དང་བཅས་པའི་སྦུབས་སུ་འཐུམས་ཏེ་རང་ངོ་རང་གིས་མ་མཐོང་བའི་ཆ་ནས་ནང་གསལ་གཞོན་ནུ་བུམ་པའི་སྐུ་ཞེས་བཏགས་པ་ཡིན་ནོ། །ངོ་རང་ཐོག་ཏུ་སྤྲོད་ལུགས་འདིའི་སྟེང་ནས་འཆུག་ན་ཐག་གཅིག་ཐོག་ཏུ་གཅོད་པ་དང་གདེངས་གྲོལ་ཐོག་ཏུ་བཅའ་བའང་དེའི་རྗེས་སུ་སྙོགས་འགྲོ་བས་ཤིན་ཏུ་གཟབ་པར་བྱ་ལ། །ངོ་སྤྲོད་ལུགས་ཀྱང་དགེ་རྩ་ཡོངས་སུ་སྨིན་པའི་གང་ཟག་འགའ་ཞིག་ལ་བྱིན་རླབས་བཙན་ཐབས་སུ་འཕོ་བའི་སྟོབས་ཀྱིས་དབང་དུས་ལ་སོགས་པར་ཡེ་ཤེས་ངོ་འཕྲོད་པའང་ཡོད་མོད་ཀྱི། །སྤྱིར་བཏང་ནི་བརྡ་ཐབས་གཏན་ཚིགས་དུ་མས་ཡིན་ལུགས་ཀྱི་ངོ་བོ་ཕུ་ཐག་ཆོད་པར་བཤད་ནས་སློབ་མའི་རྒྱུད་ལ་གོ་བ་ཁྱད་པར་ཅན་སྐྱེ་ངེས་སུ་བྱས་པ་དེ་དགོས་ཤིང༌། གོ་བ་དེའི་སྟེང་ནས་ཇི་སྲིད་སྒོམ་བྱུང་གི་མྱོང་བ་མ་སྐྱེས་ཀྱི་བར་དུ་རང་ཉིད་ཀྱིས་བརྩོན་འགྲུས་ཆེན་པོས་ཉམས་ལེན་སྐྱོང་ཚུལ་ལ་སློབ་དགོས་
པ་ཡིན་གྱིས། །ལྟ་སྒོམ་ཡིན་སྙམ་ལ་བཞག་པ་གཅིག་པུས་མི་ཆོག་གོ །མདོར་ན་སྐབས་འདིའི་སེམས་དང་ཡེ་ཤེས་ཞེས་པ་ནི་གཞུང་ལུགས་ཕལ་ལ་གྲགས་པའི་སེམས་དང་ཡེ་ཤེས་ཀྱི་བརྡ་ཆད་དང་བསྲེ་མི་རུང་བའི་ཟབ་གནད་ཐུན་མོང་མ་ཡིན་པ་ཡོད་ལ། ཡེ་ཤེས་དེ་མངོན་དུ་བྱེད་པའང་སེམས་ཅན་ཐ་མལ་པ་རྣམས་འཆི་བའི་དུས་སུ་ལས་རླུང་མ་ལུས་པ་དབུ་མའི་དབྱིངས་སུ་བསྡུས་པ་ལ་བརྟེན་ནས་ཀུན་ཏུ་བཟང་པོའི་རིག་པ་ཟང་ཐལ་ཕྱི་ནང་མེད་པའི་ཚུལ་དུ་དར་གཅིག་སྣང་ཡང་ངོས་མི་ཟིན་པ་ཡིན། རྣལ་འབྱོར་པས་ནི་ད་ལྟ་བཞག་ཐབས་ཀྱི་གདམས་ངག་ལ་བརྟེན་ནས་མངོན་དུ་བྱེད་ལུགས་ཤིག་ཡོད་དེ། དེ་ཇི་ལྟར་ཡིན་ན། བཤད་མ་ཐག་པའི་ཡེ་ཤེས་ཀྱི་རང་ངོ་དེ་ཚུལ་བཞིན་དུ་ཆོས་ཉིད་མ་བཅོས་པའི་དྲན་པའི་སྟེང་ནས་སྐྱོང་ཤེས་ན་རྩལ་གྱི་རྣམ་རྟོག་ཆགས་སྡང་གཏི་མུག་གི་ཆར་གྱུར་པ་ཐམས་ཅད་སྤྲིན་ནམ་མཁའི་ངང་དུ་བག་ལ་ཞ་བ་ལྟར་དེངས་ནས་རིག་པའི་ངོ་བོ་ཇེ་གསལ་དུ་འོང་བ་ཡིན་ནོ། །འོ་ན་ཡེ་ཤེས་ཀྱི་ངོ་བོ་དྲན་པས་སྐྱོང་ལུགས་དེ་གང་ཡིན་སྙམ་ན། །འདི་ལ་བཞག་ཐབས་བདུན་དང་གྲོལ་ལུགས་གསུམ་ལ་སོགས་པ་མང་པོ་ཞིག་འབྱུང་ཡང༌། དོན་བསྡུས་ན། སྔར་ངོ་སྤྲོད་པའི་རིག་པ་དེ་ཉིད་ད་ལྟའི་རྣམ་རྟོག་ཐ་མལ་པ་འདི་ཀའི་དོད་པོར་བཞག་ནས་དེའི་ངོ་བོ་སྐད་ཅིག་ཀྱང་མ་
བརྗེད་པར་དྲན་པས་རྒྱུན་སྐྱོང་ཞིང༌། དེའང་དྲན་བྱ་དང་དྲེན་བྱེད་འབེན་དང་མདའ་ལྟ་བུའི་གཟའ་གཏད་ཅན་མ་ཡིན་པ་གཉུག་མའི་རང་ཞལ་མ་བོར་བ་ཙམ་གྱིས་ཆོག་ཤེས་པར་བྱས་ནས་བློ་བདེ་ལ་གུ་ཡངས་པ་ཞིག་གི་ངང་ནས་གཟུང་འཛིན་གྱི་འཁྲུལ་པ་ཐད་ཀར་འཇིག་ནུས་པ་སྟེ། རྟོག་པ་གང་ཤར་གྱི་སྐྱེ་འགགས་གྲངས་སུ་འདེབས་པ་ཙམ་མ་ཡིན་པར་རྣམ་རྟོག་འཆར་མཁན་གྱི་ངོ་བོ་ལ་ཅེར་གྱིས་བལྟ་ཞེས་སྒོམ་ཆེན་པ་དག་སྨྲ་བའང་བློ་རྩེ་འདི་ཉིད་ལ་བཅོལ་དགོས་སོ། །སྒོམ་བྱེད་པ་ལ་ཉམས་ཀྱི་གེགས་སེལ་ཀྱང་ཤེས་དགོས་པ་མང་པོ་ཡོད་མོད། །འོན་ཀྱང་གཙོ་བོར་བྱིང་རྒོད་གཅོད་པ་ལ་མཁས་ན་གེགས་སེལ་ཕལ་ཆེར་དེའི་ནང་དུ་ཚང་བས། འདི་ལ་སེམས་ཧ་ཅང་བཅིངས་པ་དྲག་ནས་ཤེས་རིག་གི་ངར་ཆག་པ་དང༌། ཀློད་པ་དྲག་ནས་སེམས་རང་ཚུགས་མ་ཟིན་པའི་བྱིང་ཉམས་གཉིས་དང༌། འགྱུ་བ་ཆུ་རླབས་ལྟར་ཡུལ་ཐོག་ཏུ་གཡོ་བའི་འཕྲོ་རྒོད་རྣམས་ལས་བྱིང་བ་གཅོད་པ་ནི། སྡུག་བཙིར་ཨ་འཐས་ཀྱི་དྲན་པས་སེམས་གཅུར་བ་ལྟ་བུ་མ་ཡིན་པར་ཤུགས་བྱུང་རང་བབས་ཀྱི་དྲན་པ་སོ་མའི་ངར་ཐོགས་ནས་རིག་པ་ཧུར་བཏོན་ནས་བསྒོམ་པ་ཉིད་ཀྱིས་འགྲུབ་ཅིང༌། འཕྲོ་རྒོད་གཅོད་པའང་གནས་དགའ་འགྱུ་སྡུག་གི་རྟོག་པ་ཉིང་འཁྲུལ་དུ་འབྱམས་པ་ལས་ཆེས་འཕགས་པ་འགྱུ་བའི་ཡལ་ས་མཐར་
ཐུག་གི་སྟེང་དུ་བློའི་འཇུག་པ་ཐམས་ཅད་རོ་གཅིག་པར་བསྲེས་ནས་བཞག་པས་དེ་ལས་གཞན་པའི་ཅི་ཤར་དང་ཅི་སྣང་ཐམས་ཅད་ཆོས་སྐུའི་རོལ་རྩལ་དུ་བུན་ཤིག་གིས་འཆར་བ་མ་གཏོགས་མཉམ་བཞག་འཕྲོག་ནུས་ཀྱི་གེགས་སུ་འབྱུང་མི་སྲིད་པས་རང་གྲོལ་ཕྱོགས་རིས་ལས་འདས་པའི་རྟོགས་པ་གདེངས་སུ་གྱུར་པ་སྟེ། འདི་ནི་གནས་ཆ་བརྟན་པོ་རྙེད་པའི་ཞི་གནས་ཀྱི་ཤེས་ཉམས་ཐུན་མོང་བ་འགའ་ཞིག་ལ་བརྟེན་ནས་རྣམ་རྟོག་ཐམས་ཅད་ཆོས་སྐུ་ཡིན་ཟེར་བ་ཚོ་དང་ཡང་ཤིན་ཏུ་མི་མཚུངས་ཏེ། རྒྱ་ཆེར་ཆོས་དབྱིངས་མཛོད་འགྲེལ་ལ་བལྟས་པས་ཤེས་སོ། །དེའི་ཕྱིར་བཞག་ཐབས་སྐྱོན་མེད་གཅིག་ཤེས་ན་དེ་ཁོ་ནའི་མཐུས་བྱིང་རྒོད་ཆོད་པ་དགོས་ཀྱི། ཁྱི་མང་གིས་རུབ་དུས་གཅིག་ལ་ཁ་བལྟས་ན་གཞན་གྱིས་རྒྱབ་ནས་འཇུ་བ་ལྟ་བུའི་གེགས་སེལ་ལ་སྙིང་པོ་མེད་དོ། །མདོར་ན་མན་ངག་གི་གནད་ཟབ་མོ་འགག་བརྒྱ་ཆིང་ས་གཅིག་གིས་བསྡམས་པ་མ་མཐོང་བར་སྒོམ་མེད་དང༌། ཁྱབ་གདལ་ལ་སོགས་ཆོས་སྐད་ཚོན་པོ་ཁོ་ན་ལ་མཐོ་རྙབ་ཤེས་པ་ཙམ་གྱིས་ས་བཅད་པ་ཅི་ཡང་མེད་པས་ངོ་སྤྲོད་དང་བཞག་ཐབས་སྙིང་པོའི་དོན་ལ་མཁས་པར་བྱའོ། །ཉམས་མྱོང་རང་གི་རྒྱུད་ལ་མི་མཆི་ཡང༌། །བརྒྱུད་ལྡན་བླ་མའི་མན་ངག་མང་ཐོས་པས། །མ་མཐོང་མཐོང་འདྲའི་
ངག་སྒྲོས་གཙང་མ་བརྒྱ། །ལྷུང་ལྷུང་འབབ་པའི་མགྲིན་པ་ཆོས་ཀྱི་དུང༌། །དེ་སླད་བླུན་པོ་རང་གཙིགས་ཆེ་བ་དང༌། །མཁས་རློམས་རྟོག་གེའི་སྙེམས་པས་བསྒྱིང་བ་ཡི། །འཆལ་གཏམ་མ་འདྲེས་སྔོན་བྱུང་རིག་འཛིན་གྱི། །གསུང་རྒྱུན་ཡི་གེར་བཀོད་ལ་སྐྱོན་ཡོད་མིན། །གོ་སླ་ཉུང་ངུར་བརྗོད་པའི་ལྡེའུ་མིག་འདི། །བཟུང་ནས་ཀུན་མཁྱེན་གསུང་རབ་སྒོ་བརྒྱའི་ལྕགས། །རྣམ་པར་ཕྱེ་སྟེ་སྒྲུབ་པ་ནན་ཏན་གྱིས། །རྟོགས་པའི་ཁྱད་ནོར་ལག་ཏུ་ལོངས་པར་མཛོད། །དེ་ལྟར་ཟབ་དོན་མན་ངག་སྙིང་པོའི་གཏམ། །བརྗོད་པའི་དགེ་འདིས་མཐའ་ཀླས་ཡིད་ཅན་ཀུན། །རྡོ་རྗེ་རྩེ་མོའི་གསེང་ལམ་ལ་བརྟེན་ནས། ཁྱད་ཆོས་དྲུག་ལྡན་དབྱིངས་སུ་འཚང་རྒྱ་ཤོག །ཅེས་པའང་གམ་དུ་འཁོད་པའི་ཡོངས་འཛིན་བཤེས་གཉེན་དལ་པ་བློ་གྲོས་བཟང་པོས་རིང་མོ་ནས་བསྐུལ་ཞིང༌། ཉེ་ཆར་སྒྲུབ་པ་ནན་ཏན་ལ་གུས་པའི་བཙུན་པ་རྟ་མགྲིན་ནས་ཀྱང་བསྐུལ་བ་ལྟར་མདོ་ཁམས་ཀྱི་སྤྲང་སྨྱོན་ཆོས་སྨྲ་བའི་གཟུགས་བརྙན་འཇིགས་མེད་བསྟན་པའི་ཉི་མས་ཡར་ལུང་པདྨོ་བཀོད་ཀྱི་སྒྲུབ་སྡེར་སྦྱར་བ་ཕྱོགས་དུས་ཐམས་ཅད་དུ་དགེ་ཞིང་བཀྲ་ཤིས། །དགེའོ། །དགེའོ། །དགེའོ།། ༈ །།གཞི་ཡེ་གྲོལ་རང་བཞིན་གཉུག་མ་ལ། །ལམ་མ་བཅོས་ཅོག་བཞག་ཕྱག་གིས་འདུད། །དེ་བཏུད་ནས་འོད་གསལ་ལྟ་བའི་བབ། །དོན་སྙིང་པོར་དྲིལ་ནས་ཅུང་ཟད་འཆད། །དེ་ལ་ཀུན་འབྱུང་གི་སྒོམ་པ་སྡུག་
བཙིར་ཨ་འཐས་ཀྱི་དྲན་པ་དང༌། རང་བཞིན་རྫོགས་པ་ཆེན་པོ་ཡིན་ལུགས་མ་བཅོས་པའི་དྲན་པ་གཉིས་ཀྱི་ཤན་མ་ཕྱེ་ན་སྒོམ་ཆེན་པ་རྐང་འཁྱམས་རྨུགས་པའི་ནང་དུ་སོང་བ་ལྟར་མཐར་ཐུག་གི་སྐྱེལ་སོ་ཇི་བཞིན་པར་མི་ངེས་པ་ཡིན་པས་ལྷུན་གྲུབ་རང་གནས་ཀྱི་ཡེ་ཤེས་རྗེན་ལ་ཕྱུང་བར་འདོད་པ་རྣམས་ཀྱིས་སེམས་དང་རིག་པ་ལ་ཤན་ཕྱེད་པ་ཅི་ནས་ཀྱང་དགོས་སོ། །དེ་ལ་སེམས་ནི་འགྱུ་བ་རིག་པ་ནི་གནས་པ། སེམས་ནི་ཉོན་མོངས་པ། རིག་པ་ནི་ཉོན་མོངས་པར་མ་འགྱུས། སེམས་ནི་རླུང་ལྟ་བུ། རིག་པ་ནི་ནམ་མཁའ་ལྟ་བུ། །ཞེས་བྱ་བ་ལ་སོགས་པ་ནི་སེམས་རིག་གི་ཁྱད་ཕྱེ་བའི་ཆ་ཕྲ་མོ་ནས་གསུང་བར་ཟད་ཀྱི། དེ་ཙམ་ཞིག་གིས་དོན་ཇི་བཞིན་པར་ངེས་པ་ནི། བླ་མ་བྱིན་བརྒྱུད་ཀྱི་ཕ་ཕོག་ཅན་དང༌། སློབ་མ་མོས་གུས་དང་ལས་འཕྲོ་ཤོན་ཏུ་ཆེ་བ་རྣམས་མ་གཏོགས་པ་གཞན་ལ་མི་འོང་བས། ཞི་གནས་ཀྱི་ཏིང་འཛིན་བསམ་གཏན་དང་གཟུགས་མེད་ཀྱི་སྙོམས་འཇུག་ལ་སོགས་པ་ལ་མི་འཁྲུལ་བར་བྱེད་པའི་གནམ་ཐིག་ནི་འདི་ཡིན་ཏེ། སེམས་ནི་འདུས་བྱས་ཀྱི་རྣམ་རྟོག །རིག་པ་ནི་འདུས་མ་བྱས་ཀྱི་ཡེ་ཤེས་ཡིན་པས། འདི་ལས་ངེས་པར་བྱའོ། །དེ་ལ་ཇི་ལྟར་ན། རྫོགས་ཆེན་གྱི་རིག་པ་འདུས་བྱས་ཡིན་ཏེ། དེ་སྟོང་ཉིད་ལ་སོགས་པ་
འདུས་མ་བྱས་ཀྱི་ཆོས་གང་ཡང་མིན་པའི་ཕྱིར་ཞེ་ན། དོན་འདི་ནི་དེ་ལྟ་བུ་ཆེས་ཤིན་ཏུ་མ་ཡིན་ཏེ་རྒྱལ་བ་དྲི་མེད་འོད་ཟེར་གྱི་མན་ངག་ལས། རིག་པ་རང་གནས་ཀྱི་ཡེ་ཤེས་འདུས་མ་བྱས་ཡིན་པའི་རྒྱུ་མཚན་དུ་རྒྱུ་རྐྱེན་གྱི་གསར་དུ་མ་བཟོས་པ་དང༌། འཇིག་འབྲལ་མེད་པ་སྟེ། འདི་དག་རྣམ་པར་བཤད་པའི་ཕྱིར། འཁྲུལ་པའི་ཀུན་རྟོག་རྣམས་ནི་དྲི་མ་གློ་བུར་བ་ཡིན་པས་སེམས་ཀྱི་གཤིས་ལ་ཞུགས་པ་མ་ཡིན་ཞིང་ཆོས་ཉིད་བར་དོའི་སྣང་བ་འཆར་བ་ན་འོད་གསལ་ཀ་ནས་དག་པའི་དབྱིངས་སུ་ན་བུན་ནམ་མཁའ་ལ་ཡལ་བ་ལྟར་རང་གྲོལ་དག་སངས་ཆེན་པོར་འགྲོ་ཞིང༌། སླར་ཡང་ཤེས་རབ་སྲོག་ཏུ་གྱུར་པའི་རླུང་ལྔས་གཞི་སྣང་ལྷུན་གྲུབ་རིན་པོ་ཆེའི་སྦུབས་ནས་བསྐྱོད་དེ་ཀུན་རྟོག་འཁྲུལ་པའི་ཡོ་ལང་མཐའ་དག་འགྲོ་འོང་མེད་པའི་དབྱིངས་ལས་འགྲོ་འོང་ལྟར་སྣང་བར་འགྱུར་བའི་ཕྱིར་རོ། །དེ་ལ་ནི་ད་ལྟའི་ཐ་མལ་གྱི་ཤེས་པ་ཞེས་མི་བརྗོད་དེ། སྐབས་ཁ་ཅིག་ཏུ་ད་ལྟའི་ཤེས་པར་ཡོད་ལ་ཁ་ཅིག་ཏུ་འགགས་ནས་མེད་པའི་ཕྱིར་རོ། །རིག་པ་ནང་གསལ་གྱི་ཡེ་ཤེས་ནི། ཉི་ཟླ་ཁ་སྦྱོར་ལས། ཙིཏྟ་རིན་ཆེན་གཞལ་ཡས་ན། །སྟོང་གསལ་འདུས་པ་སྐུའི་གདངས། །ཞལ་ཕྱག་རྫོགས་པ་བུམ་སྐུའི་ཚུལ། །ཆ་ཕྲ་འོད་གསལ་སྙིང་པོར་བཞུགས། །
ཞེས་གསུངས་པ་ལྟར། ཨ་ཝ་དྷུ་ཏི་ཕྲ་རགས་གཉིས་ཐེག་པ་འདིའི་ཐུན་མོང་མ་ཡིན་པའི་ལུགས་ལ་གྲགས་པའི་དབུ་མ་ཤིན་ཏུ་ཆ་ཕྲ་བ་ཤེལ་གྱི་སྦུ་གུ་ཅན་དྭངས་མ་འོད་ཀྱི་རང་བཞིན་དུ་གནས་པའི་གྲོང་ཁྱེར་ན། དཔལ་ཀུན་ཏུ་བཟང་པོ་ཐོག་མ་དང་ཐ་མ་མེད་པའི་སྟོན་པ་ཀུན་བྱེད་ཡེ་ཤེས་ཀྱི་རྒྱལ་པོ། སྣང་སྲིད་དུ་མ་རོ་མཉམ་གྱི་དཀྱིལ་འཁོར་ཆེན་པོ། སེམས་ལས་མ་བྱུང་བའི་སངས་རྒྱས། རྟོག་པས་མ་བཟོས་པའི་གཤིས་ལུགས། དྲི་མ་མཐའ་དག་གིས་མ་གོས་པ་རང་བཞིན་རྣམ་པར་དག་པའི་སངས་རྒྱས་སུ་གདོད་ནས་བཞུགས་པ་ལ། རྒྱུད་སྡེ་གཞན་ལས་གཉུག་མའི་སེམས་ཐམས་ཅད་སྟོང་པ་ཞེས་ཐ་སྙད་འདོགས་ཏེ་དེས་ན་གཉུག་མའི་སེམས་ཞེས་པ་དང༌། འདུས་མ་བྱས་ཀྱི་ཡེ་ཤེས་ཞེས་པ་སྐབས་འདིར་དོན་གཅིག་པ་ཡིན་ནོ། །དེ་ཉིད་གྲུབ་ནས་འཕོ་མ་མྱོང༌། གྲོལ་ནས་འཁྲུལ་མི་སྲིད། བྱུང་ནས་འཆི་མི་ཤེས་པའི་ཆོས་ཉིད་ཡིན་ནའང༌། སྣང་གསུམ་ཀུན་རྟོག་དང་བཅས་པས་རང་ཞལ་སྒྲིབ་ཅིང་ལས་རླུང་གི་གཡོ་བ་ཉི་ཁྲི་ཆིག་སྟོང་ལ་སོགས་པས་རང་ངོ་མི་མཐོང་བར་བྱས་པས་སུས་ཀྱང་རྟོགས་པར་དཀའ་བ་ནི། སྒྱུ་འཕྲུལ་ལས། ཨེ་མ་ཧོ་ཡེ་ནས་གསང་བའི་ཆོས། །སྣ་ཚོགས་སྣང་ལ་རང་བཞིན་གསང༌། །ངོ་བོ་ཉིད་ཀྱིས་
རབ་ཏུ་གསང༌། །གཞན་དུ་མིན་ལས་ཤིན་ཏུ་གསང༌། །ཞེས་གསུངས་པ་བཞིན། རྒྱུ་མཚན་དེ་ལ་བརྟེན་ནས་ནང་གསལ་གཞོན་ནུ་བུམ་པའི་སྐུ་ཞེས་རྣམ་པར་བཞག་པ་ཡིན་གྱི། ཤེལ་སྒོའི་ནང་གི་གསེར་སྐུ་འདྲ་བ་གཅིག་ལ་སངས་རྒྱས་ཞེས་གོ་བ་བླང་བ་གཏན་ནས་མིན་པར་ཤེས་པར་གྱིས་ཤིག །དེ་ལྟར་སེམས་དང་རིག་པའི་ཤན་འབྱེད་ལ་ཤེས་རབ་དམ་པའི་མིག་མ་རྙེད་པ་དེ་སྲིད་དུ་ནི་འཇོག་སྒོམ་གྱི་ཨུ་ཚུགས་ཆེ་དྲག་ན་རྡོ་རྗེ་རྩེ་མོ་འོད་གསལ་སྙིང་པོ་མཆོག་གི་ལམ་མིན་པར་མ་ཟད་དབུ་མ་ཆེན་པོའི་ལྟ་སྒོམ་དུ་ཡང་འགྲོ་དཀའ་བ་ཡིན་པས་རྟོགས་ལྡན་རྒན་པོ་སེང་གེའི་གསོབ་དང༌། ཟོག་པོ་ཆོས་རྫུ་བོང་ཤ་རི་ཚོས་གཡམ་ལ་མ་རྒྱུག་པར། རྫོགས་པའི་སངས་རྒྱས་དྲི་མེད་འོད་ཟེར་གྱི་རྣམ་ཐར་ཟུངས་ཤིག །སེམས་རིག་ལ་ཤན་ཕྱེད་པ་རྫོགས་པ་ཆེན་པོའི་མན་ངག་གི་གནད་ཇི་ལྟར་ཡིན་ན། དཔེར་ན་ལྷའི་རྣལ་འབྱོར་སྒོམ་པའི་ཚེ་ཞི་བ་འཛུམ་མུལ་མུལ། ཁྲོ་བོ་མིག་ཅེར་ཅེར་ཙམ་སྒོམ་པ་ནི་སངས་རྒྱས་ང་རྒྱལ་གྱི་རྣལ་འབྱོར་དུ་འགྲོ་བ་མིན་གྱི། བྱང་ཆུབ་ཕྱོགས་ཀྱི་ཆོས་ཡོངས་སུ་རྫོགས་པའི་ལྷར་སྣང་གི་ང་རྒྱལ་བརྟན་པ་ཁོ་ན་ཁག་ཆེ་བ་བཞིན་དུ་འདིར་ཡང་སེམས་ས་ལེ་ཧྲིག་གེ་བའི་ངོ་བོ་ལ་བལྟ་བ་དང་འགྱུ་དྲན་གྱི་རྟོག་པ་ལ་གཡག་སྣ་ཁུ་ཚུར་མི་བྱེད་པར་ལྷོད་དེ་འཇོག་པ་ཙམ་འབའ་
ཞིག་སྒོམ་གྱི་སྙིང་རྡོ་མ་ཡིན་པས། དཔལ་ལྡན་ཏོག་རྩེ་པས། འཇུར་བུས་བཅིངས་པའི་སེམས་ཉིད་ནི། །གློད་ན་གྲོལ་བར་ཐེ་ཚོམ་མེད། །ཅེས་གསུངས་པ་ལྟར། སྔར་བླ་མས་ངོ་སྤྲོད་པའི་འོད་གསལ་ལྷན་ཅིག་སྐྱེས་པ་རང་བྱུང་ནམ་མཁའི་གཟུགས་ཅན་དེ་ཉིད་མངོན་དུ་བྱ་བའི་ཕྱིར། དེ་དང་རྣམ་པ་མཐུན་པའི་ལམ་མ་བཅོས་ཅོག་བཞག་ཆེན་པོའི་དགོངས་པའི་གནད་ལ་གཟིར་ཏེ། ཀློང་ཆེན་ཀ་དག་གི་རིག་པ་ཡིན་ལུགས་བསམ་མནོ་དང་བྲལ་བའི་ངང་མདངས་སྐྱོང་ཞིང་བསྒྱུར་བཀོད་ཕྲི་བསྣན་སྤུ་ཙམ་ཡང་བྱ་རྒྱུ་མེད་པའི་ཁྲེགས་ཆོད་ཀྱི་ཤེས་པ་རྒྱ་ཡན་རང་གྲོལ་ཕྱལ་བ་ཆེན་པོ། །དྲན་རིག་ཐུག་ཕྲད་རྗེས་མེད། རྟོག་ཚོགས་ཤར་གྲོལ་དུས་མཉམ། ཁམས་གསུམ་གཞི་གྲོལ་གྱི་རིག་པ། བྱུང་ཚོར་ཆོས་སྐུའི་རང་རྩལ་དུ་གདོད་ནས་དག་པས་བྱ་བྱེད་བྱིས་པའི་འཁྲུལ་སྣང་གིས་ཕན་གནོད་སྐད་ཅིག་ཀྱང་མ་སོང་བའི་མཐའ་གྲོལ་ཡངས་པ་ཆེན་པོའི་བདེ་ཀློང༌། བལྟ་བས་མི་མཐོང༌། བརྗོད་པས་མི་རྟོགས། བཙལ་བས་མི་རྙེད། བདས་པས་མི་ཟིན། ཕྱིན་པས་མི་སླེབ་པའི་ནང་དབྱིངས་ཆོས་སྐུའི་རྒྱལ་སའི་གཏན་སྲིད་དུ། ཕྱི་སྣང་བའི་རྫུན་ཕུག་རང་སར་རྡིབ་ཏེ་དམིགས་གཏད་ཀྱི་ཡུལ་མེད། ནང་འཛིན་པའི་མཁན་པོ་རྩ་བ་ཆོད་པས་རྗེས་འབྲང་གི་རྒྱུན་ཆད། བར་ལས་རླུང་
གི་འགྱུ་བ་གཞི་གནས་སངས་པས་གཡོ་བྱེད་ཀྱི་མཐུ་ཟད་དེ། བློ་ཟད་ཀྱི་རིག་པ་ཆོས་ཟད་མཉམ་པའི་ངང་ལ་བག་ཕེབས་ནས་སྣང་སྲིད་དབྱིངས་རིག་རོ་མཉམ་གྱི་གཤིས་སུ་ཆམ་བརྡལ་ཞིང་ཇི་ལྟར་བྱས་ཀྱང་བློ་བདེ་བ་ཡིན་ནོ། །དེ་དག་ཐམས་ཅད་ཀྱི་མདོ་འགག་ཆེ་ཤོས་ནི་སེམས་ཀུན་རྟོག་བརྒྱད་ཅུ་སྣང་གསུམ་དང་བཅས་པ་ཡིན་ལ་རིག་པ་ཐ་མལ་གྱི་དྲན་རིག་འོད་གསལ་བསམ་གྱིས་མི་ཁྱབ་པའི་ཡེ་ཤེས་ཡིན་པར་ངོ་འཕྲོད་ཐག་ཆོད། །གདེང་འཆོས་ནས་དེ་ཉིད་དུ་ཉམས་ལེན་སྐྱོང་ཤེས་པ་འདི་ལ་ཐུག་གོ །ལམ་འདི་སྐྱོང་བ་ལ་འཇོག་སྒོམ་ཁོ་ན་གལ་ཆེ་བའི་གནད་ཀ་གཅིག །ལམ་འདིའི་བོགས་འདོན་མཐའ་དག་གི་གཙོ་བོར་བྱ་བ་དགུ་ཕྲུགས་སུ་གཏོང་དགོས་པའི་གནད་ཀ་གཉིས། ལམ་འདིའི་གྲོལ་བ་ལ་རགས་ལུས་འོད་སྐུར་ལྡང་བའི་གནད་ཀ་གསུམ། དེ་ལ་སོགས་པ་མང་པོ་ཞིག་ཡེ་ཤེས་ཆེན་པོ་དེའི་ཞོན་པ་སྙིང་པོ་དངས་མའི་རླུང་གིས་བྱེད་ཚུལ་ནི་ཤིན་ཏུ་གལ་ཆེ་ནའང༌། གཞན་ནི་གཏམ་ཤིན་ཏུ་མང་བར་འགྱུར་བས་འདིར་མི་བརྗོད་ལ། གནད་སྔ་མ་གཉིས་པོ་ལས་དང་པོ་པའི་དུས་ནས་ཤེས་དགོས་པ་ཡོང་བས་སྡོམ་ཚིག་བརྗོད་ན། ལུས་ཀྱི་ཕྱིའི་བྱ་བ་ཁྱིམ་གྱི་སོ་ནམས་ལ་སོགས་པ་དང༌། ནང་གི་བྱ་བ་ཕྱག་སྐོར་དཀའ་སྤྱད་ལ་སོགས་པ་དང༌། གསང་བའི་བྱ་བ་ཕྱག་རྒྱ་གར་མཆོད་ལ་སོགས་པ་དང༌། ངག་གི་ཕྱིའི་བྱ་བ་བྲེ་
མོའི་ཀྱལ་ཀ་དང༌། ནང་གི་ཁ་ཏོན་ཀློག་བཟླས། གསང་བའི་བསྙེན་སྔགས་བཟླས་སྒྲུབ་ལ་སོགས་པ་དང༌། སེམས་ཀྱི་ཕྱིའི་བྱ་བ་ཆགས་སྡང་འཁོན་འཛིན་ལ་སོགས་པ་དང༌། ནང་གི་ལྟ་བ་གྲུབ་མཐའི་རྗེས་དཔྱོད་ལ་སོགས་པ་དང༌། གསང་བའི་ལྷའི་བསྐྱེད་རིམ་གྱི་སྤྲོས་པ་ལ་སོགས་པ་དེ་དག་ཐམས་ཅད་ལས་རླུང་འཕེལ་བ་མཐུ་ཆེ་བར་བྱེད་པ་ཤ་སྟག་ཏུ་ངེས་ཤིང༌། ཇི་ལྟ་ཇི་ལྟར་ལས་ཀྱི་རླུང་རྣམ་རྟོག་སྤྲོས་པའི་ཁ་ལོ་པ་དབང་བཙན་པ་དེ་ལྟ་དེ་ལྟར་འོད་གསལ་གཉུག་མ་ཆོས་ཟད་ཀྱི་ཡེ་ཤེས་ཆེན་པོའི་བཞོན་པའི་ཤིན་ཏུ་ཕྲ་བའི་རླུང་བག་ལ་ཞ་བར་འགྱུར་ལ། ཇི་སྲིད་དེ་མངོན་དུ་མ་གྱུར་པ་དེ་སྲིད་དུ་རང་བཞིན་ཡེ་གནས་ཀྱི་རིག་པ་ཐེར་ལ་མི་འབུད་པ་ཡིན་པས་རྩ་བ་འདི་ལ་ཐུག་གོ །གཞན་དུ་ན་ལམ་དེ་ལྟར་བསྒོམས་པའི་བཞག་སྟོབས་ཀྱིས་རླུང་དབུ་མར་འཇུག་ནུས་ཚུལ་དང༌། བསྐྱེད་རིམ་སྔོན་སོང་ལ་མི་ལྟོས་པར་རྫོགས་རིམ་དང་པོ་ནས་བསྒོམ་དུ་རུང་བའི་གནད་ཀ་དང་འོད་གསལ་མྱོང་སྟོབས་ཀྱིས་ཤར་བའི་རྣལ་འབྱོར་ལའང་དབང་ཤེས་ནུབ་པ་གཉིས་འོང་ཚུལ་དང༌། འཇོག་ས་ཀ་དག་གི་ནང་དབྱིངས་གཅིག་ལས་མེད་ཀྱང་འཇོག་ཚུལ་ལ་གྲོལ་ལུགས་རྣམ་པ་གསུམ་ཡོད་པའི་འགག་དོན་ལ་སོགས་པ་ཁྲེགས་ཆོད་དང་ཐོད་རྒལ་གྱི་ལམ་གནད་རྒྱུད་སྡེ་གཞན་དང་ཐུན་མོང་བ་དང་ཐུན་མོང་མ་ཡིན་པའི་རང་བཞིན་རྫོགས་
པ་ཆེན་པོའི་ལམ་གྱི་ཆེ་བ་དེང་སང་གི་སྟོན་རློམ་ཕལ་མོ་ཆེའི་སྤྱོད་ཡུལ་དུ་མ་གྱུར་པ་མང་པོ་ཞིག་བཤད་དུ་ཡོད་མོད་དེ་རེ་ཞིག་དེ་ཙམ་མོ། །ཧོ་ཧོ། ཕྱི་སྣང་བའི་བཟོ་རྒྱ་ཐིག་པོ་དང༌། །ནང་རྗེས་དཔྱོད་གྲུབ་མཐའི་ཁ་འཛིན་གཉིས། །དེ་རང་གྲོལ་གཉུག་མར་ཟད་ཀྱང་ཟད། །དཔལ་ཀུན་བཟང་དགོངས་པ་ལྷག་གེར་མཐོང༌། །སྒོམ་བློས་བྱས་རྟོག་པའི་དྲྭ་བ་དང༌། །སེམས་འཁྲུལ་སྣང་རྟོག་པའི་རི་མོ་གཉིས། །གཤིས་རྫོགས་པ་ཆེན་པོར་མཉམ་ལ་ཁད། །ད་སྒོམ་ན་འོད་གསལ་ཉལ་སྒོམ་ཞུ། །སྙིང་གཞོན་ནུ་བུམ་སྐུའི་ཁང་བཟང་ན། །བདེ་སྟོང་གི་ཆོ་འཕྲུལ་ཅིར་ཡང་རྩེ། །དེ་མངོན་སུམ་མཐོང་འདོད་ཀྱི་སྒོམ་ཕྲུག་ཚོ། །མ་བཅོས་ཅོག་བཞག་གི་ཉེ་ལམ་སྐྱོངས། །དུས་དེང་སང་གི་སྒོམ་ཆེན་ཕལ་མོ་ཆེས། །ཧ་ཤང་གི་མུན་སྒོམ་དྲན་མེད་དང༌། །གཞི་དྲན་པ་རང་སྟོང་ཆོས་སྐུའི་ཞལ། །དེ་གཅིག་ཏུ་འཁྲུལ་བ་མང་རབས་ཡོད། །དོན་ཡིད་དཔྱོད་འཇུར་བུའི་ཐུགས་དམ་པ། །མིང་ངེད་ལ་བརྐུས་ནས་རྫོགས་ཆེན་བཏགས། །ཀློང་ཆེན་གྱི་མགོན་པོ་པདྨའི་ཞལ། །གསུང་འོ་རྒྱལ་དུ་དོགས་ནས་མཆི་མ་བཀུ། །ད་མང་མང་བཤད་ན་ལྕོ་ཀའི་ཁ། །དོན་རྫོགས་པ་ཆེན་པོར་བློ་ཕུགས་གཏོད། །སྒོམ་ཡིན་མིན་མཛོད་ཆེན་བདུན་ལ་དྲིས། །སྒྲུབ་རྒྱུད་ཀྱི་མེ་རོ་གཞི་ནས་སློང༌། །
ང་སྤྲང་འཁྱམ་སྨྱོན་པའི་ཕྲུ་གུ་ལ། །གློ་བ་ཆེ་ལྟ་རྒྱུ་ཅི་ཡོད་དེ། །ངའི་ཞེ་ཕུགས་རིགས་འཛིན་བརྒྱུད་པའི་ལམ། །དེ་ཡིན་མིན་པདྨ་རྒྱལ་པོས་ཕྱེས། །ཞེས་པའང་ལམ་འདི་ལ་མི་ཕྱེད་པའི་གདུང་ཤུགས་ཅན་སྒྲུབ་བརྩོན་རྣལ་འབྱོར་གྱི་དབང་པོ་པདྨ་མ་ཧཱ་སུ་ཁའི་བཞེད་སྐོང་དུ་སྤྲང་སྨྱོན་འཇིགས་མེད་པས་གང་དྲན་ཡུད་ཙམ་ལ་བྲིས་པ་དགེ་ཞིང་བཀྲ་ཤིས།། ༈ །།བླ་མ་ལ་ཕྱག་འཚལ་ལོ། །འདིར་བདག་ཅག་གི་བླ་མ་དམ་པ་ཤེས་བྱ་རིག་པའི་གནས་ལྔ་ལ་སྦྱངས་ཤིང༌། རྫོགས་པ་ཆེན་པོའི་སྙིང་ཐིག་གི་ལམ་ནས་གྲོལ་བ་བརྙེས་པ་ཨོ་རྒྱན་བསྟན་འཛིན་ནོར་བུའི་ཞལ་སྔ་ནས་ཀྱིས་འདའ་ཁར་ཞལ་ཆེམས་སུ་སྩལ་བའི་ཚིགས་བཅད། །ང་ཨོ་རྒྱན་གུ་རུ་པདྨ་འབྱུང༌། །སྐྱེ་འཆི་བྲལ་བའི་སངས་རྒྱས་ཡིན། །བྱང་ཆུབ་སེམས་ལ་ཕྱོགས་རིས་མེད། །ཟུང་བཞི་ཡ་བརྒྱད་ཀྱི་མིང་འདོགས་བྲལ། །ཞེས་པ་འདིའི་དོན་རགས་པ་ཙམ་ཞིག་བཀྲལ་ན། སྤྱིར་བཅོམ་ལྡན་འདས་ཀྱིས་ཆོས་ཀྱི་འཁོར་ལོ་བསྐོར་བ་ཐམས་ཅད་གདུལ་བྱ་སྐྱེ་ཤི་བར་དོའི་འཁྲུལ་འཁོར་གྱིས་ཉམ་ཐག་པ་ལས་སྐྱོབ་པའི་ཆེད་དུ་གསུངས་པ་ཁོ་ན་ཡིན་ཞིང༌། དེ་དག་གི་ནང་ནས་མཐར་ཐུག་པ་སྙིང་ཐིག་རྡོ་རྗེ་རྩེ་མོའི་ལུགས་ལ། ཐོག་མའི་གཞི་ཀ་དག་ཆེན་པོའི་གཤིས་ལ་འཁྲུལ་པ་མེད་ཀྱང༌། དེ་ངོ་མ་ཤེས་པར་རིག་རྩལ་འཁྲུལ་པའི་སྣང་ཆར་ཤར་ཏེ། བདག་
ཉིད་གཅིག་པ་དང༌། ལྷན་ཅིག་སྐྱེས་པ་དང༌། ཀུན་ཏུ་བཏགས་པ་སྟེ་མ་རིག་པ་གསུམ་གྱི་རིམ་པས་གཟུང་འཛིན་གྱི་རྟོག་པ་ལུ་གུ་རྒྱུད་ཀྱི་ཕྲེང་བ་མུ་མེད་དུ་མཆེད། དེའི་རྗེས་སུ་ཞེན་ནས་ལས་ཉོན་སྡུག་བསྔལ་གྱི་འཁོར་ལོ་བར་མཚམས་མེད་པར་འཇུག་པ་ཡིན་པས། ངོ་བོའི་བཞུགས་ཚུལ་འཁྲུལ་པའི་དྲི་མས་མ་གོས་པ་བཞིན་དུ་ངོ་འཕྲོད་ནས་བསྒོམས་པ་ཉིད་ཀྱིས་སྐྱེ་འཆིའི་འཁྲུལ་པ་རང་ལོག་ཏུ་འགྲོ་བར་བཞེད་པ་ཡིན་ལ། ངོ་བོའི་བཞུགས་ཚུལ་དེའང་རྟོག་གེ་དང་བཅོས་མའི་སེམས་འཛིན་གྱིས་མི་མཐོང་གི༌།དོན་བརྒྱུད་ཀྱི་ཕ་ཕོག་ཐོབ་པའི་བླ་མ་མཚན་ཉིད་དང་ལྡན་པ་ལས་སྨིན་གྲོལ་གྱི་བདུད་རྩི་བླངས་ཏེ། དེ་འདྲའི་བླ་མ་དེ་ཉིད་ཨོ་རྒྱན་རྡོ་རྗེ་འཆང་དང་དབྱེར་མེད་དུ་མཐོང་བའི་མོས་གུས་རྣལ་འབྱོར་དུ་བྱས་པས་རྒྱུད་བྱིན་གྱིས་བརླབས་ཏེ་ཐུགས་ཡིད་དབྱེར་མི་ཕྱེད་པར་འདྲེས་ནས་རང་སེམས་གདོད་མའི་གནས་ལུགས་བཅོས་སླད་དང་བྲལ་བ་འདི་ཀ་ཀུན་བཟང་དོན་གྱི་འཆི་མེད་པདྨ་འབྱུང་གནས་སུ་ངོ་ཤེས། ཐག་ཆོད། བརྟན་པ་ཐོབ། དེ་ཉིད་གློ་བུར་རྒྱུ་རྐྱེན་གྱིས་མ་བསྐྱེད་པས་སྐྱེ་བ་དང་བྲལ། བྲི་གང་འཕོ་འགྱུར་མི་དམིགས་པས་འཆི་བ་དང་བྲལ་ཏེ། སྐྱེ་འཆི་མེད་པའི་དངོས་གྲུབ་ཀྱི་ཕམ་ཕབ་རང་མལ་ནས་རྙེད་ཅིང༌། སངས་རྒྱས་གཞན་དུ་མི་འཚོལ་བའི་གདེང་ཆེན་ཐོབ་པ་ན། ང་ཨོ་རྒྱན་
གུ་རུ་པདྨ་འབྱུང༌། །སྐྱེ་འཆི་བྲལ་བའི་སངས་རྒྱས་ཡིན། །ཞེས་སེང་གེའི་སྒྲ་སྒྲོག་གོ །དེ་ལྟ་བུའི་རིག་པ་བྱང་ཆུབ་སེམས་ཀྱི་བཞུགས་ཚུལ་མངོན་དུ་གྱུར་པ་ན། སྐྱེ་འཆིའི་ཡུལ་སྣང་ཕྱིར་སྤངས། དེར་ཞེན་གྱི་འཛིན་སེམས་ནང་དུ་བཅད། སྤྲོས་པའི་འཁོར་བ་རྒྱབ་ཏུ་བོར། སྤྲོས་མེད་མྱང་འདས་ལ་དམིགས་གཏད་བཅོལ་བའི་སྤང་བླང་རེ་དོགས་མང་པོས་རྟེན་མེད་ཀྱི་རིག་པ་ཁོལ་བུར་འདོན་དུ་མེད་ཀྱི། ཇི་ལྟར་སྣང་ཡང་རང་སྣང༌། གང་ལྟར་ཤར་ཡང་རང་རྩལ། འཁོར་འདས་གཟུང་འཛིན་དུ་བཏགས་པ་ཐམས་ཅད་ཕྱོགས་དང་རིས་མེད་པར་རིག་པའི་ཡོ་ལང་དུ་ཤར་ཏེ། རྩལ་གཞི་ཐོག་ཏུ་ཐིམ། གཞི་རང་མལ་དུ་བཙན་ས་ཟིན་ནས། དང་པོའི་གཞི་ལས་འཕགས་ཏེ། རྒྱ་ཆད་ཕྱོགས་ལྷུང་དང་བྲལ་བའི་འོད་གསལ་གཞོན་ནུ་བུམ་པ་སྐུའི་དབྱིངས་སུ་མངོན་པར་བྱང་ཆུབ་པར་འགྱུར་བ་ལ། བྱང་ཆུབ་སེམས་ལ་ཕྱོགས་རིས་མེད། །ཅེས་བྱའོ། །དེའི་ཕྱིར་འཁྲུལ་སྣང་ལ་སྐྱོན་དུ་བལྟ་སྟེ། ནང་གི་རྣལ་འབྱོར་ཉི་ཚེ་བ་ལ་བསླབ་པས་ཁམས་གསུམ་གྱི་མཐོང་སྤང་སྤངས་ཀྱང་འདོད་པའི་སྒོམ་སྤང་མ་སྤངས་པ་དང༌། དེ་སྤོང་ཕྱིར་དུ་ཞུགས་པ་དང༌། འདོད་ཉོན་ཕལ་ཆེར་སྤངས་པ་དང༌། དེ་མཐའ་དག་སྤངས་ཀྱང་གོང་མའི་ཉོན་མོངས་ཟད་པར་མ་སྤངས་
པས་སྐྱེ་འཆིའི་སྡུག་བསྔལ་ལྷག་མེད་དུ་མ་ལོག་པ་སོགས་ཀྱི་སྒོ་ནས་འབྲས་བུ་ཐ་དད་དུ་བཞག་པའི་ཟུང་བཞི་ཡ་བརྒྱད་ལྟ་བུའི་རྣམ་བཞག་ཐེག་པ་འདི་ལ་བརྩིར་མེད་དེ། ཀ་དག་རང་སྣང་རིས་མེད་གདལ་བ་ཆེན་པོའི་དགོངས་ཀློང་ནས་ས་ལམ་ཆིག་ཆོད་དུ་བགྲོད་པའི་ཕྱིར་ཏེ། འདི་ལ་ཞིབ་ཆ་དགོས་སོ། །དོན་འདིའི་ཕྱིར། ཟུང་བཞི་ཡ་བརྒྱད་ཀྱི་མིང་འདོགས་བྲལ། །ཞེས་གསུངས་ཏེ། འདིས་ནི་ཐེག་པ་འོག་མ་གཞན་རྣམས་ལས་འཕགས་པ་ཡང་མཚོན་ནོ། །དོན་ཧྲིལ་གྱིས་དྲིལ་ན། བླ་མ་དང་རང་སེམས་གཉིས་མེད་དུ་བསྲེས་ཏེ་རིག་སྟོང་གཉུག་མའི་ཀློང་དུ་བསལ་བཞག་དང་བྲལ་བར་མཉམ་པར་བཞག་ལ། འཆི་ཀ་དང་པོར་བར་དོའི་འཇིགས་སྐྲག་འཁྲུལ་སྣང་གང་གིས་ཀྱང་རིག་པ་རང་མལ་ནས་མི་གཡོ་བར་བཙན་ས་བཟུང་བ་ནི་རྐང་པ་དང་པོ་གསུམ་གྱི་སྙིང་པོའི་དོན་ཏེ། ཕྱོགས་འདིའི་འཆི་ཀ་མའི་མན་ངག་མཐར་ཐུག་པ་ཡིན་ཞིང༌། འདི་ལ་རབ་ཆོས་སྐུ་ལྟ་བ་རྒྱས་འདེབས་ཀྱི་འཕོ་བ་ཞེས་ཀྱང་གྲགས་སོ། །དེའང་ད་ལྟ་ནས་སྐྱོང་ཚུལ་དང༌། འཆི་དུས་སུ་ལས་ལ་སྦྱར་ཚུལ་སོགས་ཤེས་པར་བྱའོ། །རྐང་པ་ཐ་མས་ནི་ལམ་འདི་རྩོལ་བཅས་ཀྱི་ཐེག་པ་གཞན་ལས་འཕགས་པའི་ཆེ་བ་སྟོན་ཏེ། རང་གི་ལམ་ལ་ངེས་པ་བརྟན་པར་བྱ་བའི་དོན་ཏོ། །ཡང་ན་རྐང་པ་དང་པོ་གཉིས་ཀྱིས། ལམ་འདིའི་འཆི་མེད་
སྒྲུབ་ཚུལ་བསྟན་པ་ན། དེ་ཙམ་གྱིས་ཐེག་པའི་རྩེ་མོར་མི་འགྱུར་ཏེ། ཉན་རང་ལའང་སྐྱེ་འཆིའི་སྡུག་བསྔལ་རྒྱུན་ཆད་པའི་ལམ་ཡོད་པའི་ཕྱིར་རོ་སྙམ་པ་ལ། ལན་རྐང་པ་ཐ་མ་དང༌། དེའི་རྒྱུ་མཚན་སྒྲུབ་པ་ལ་རྐང་པ་གསུམ་པ་སྦྱར་ནའང་རུང་ངོ༌། །ཞེས་པའང་དད་བརྩོན་བློ་ལྡན་འདས་ཤུལ་གྲགས་ལྡན་ནས་ནན་གྱིས་བསྐུལ་བའི་ངོར། བསྟན་པའི་ཉི་མས་ས་བྱ་དབོ་ཟླ་བའི་དམར་ཕྱོགས་ཀྱི་བཟང་པོ་གསུམ་པར་གང་དྲན་མྱུར་པོར་བྲིས་པ་དགེ་བར་གྱུར་ཅིག། ༈ །།གདམས་ངག་རྡོ་རྗེའི་གཏུན་ཁུང་ཡོད། །པདྨའི་ཞལ་བཟང་ཡིད་ལ་དྲན་པས་ཀྱང༌། །མི་ཟད་དཔལ་སྟེར་དྲིན་ཆེན་བླ་མ་དང༌། །དབྱེར་མེད་ལི་ཁྲིའི་འོད་མངའ་ལྷག་པའི་ལྷས། །དེ་ཉིད་འབྱེད་པའི་བློ་གྲོས་སྙིང་ལ་ཕོབས། །ཤིན་ཏུ་བརྒལ་དཀའ་ཐེག་མཆོག་རྒྱུད་སྡེའི་མཚོར། །ཉལ་བའི་ཟབ་དོན་ཡིད་བཞིན་དབང་གི་རྒྱལ། །བདག་འདྲས་རྙེད་པར་དཀའ་ཡང་བླ་མ་ཡི། །དྲིན་ལ་བརྟེན་ནས་བྲག་ཆའི་དབྱངས་ལྟར་སྒྲོག །ལམ་འདི་ཤིན་ཏུ་ཟབ་དང་རྒྱ་ཆེ་བས། །བློ་གྲོས་མ་སྦྱངས་རྣམས་ཀྱིས་རྟོགས་པར་དཀའ། །དེ་ཕྱིར་སྐྱེས་བུ་གསུམ་གྱི་ལམ་རིམ་ལ། །ལེགས་པར་སྦྱངས་པས་དགེ་རྩ་སྨིན་པར་མཛོད། །བྱང་ཆུབ་སེམས་དང་རྒྱལ་སྲས་སྤྱོད་པ་ལ། །སློབ་འདོད་རྣམ་དག་གཅིག་ཀྱང་མི་སྐྱེ་རུང༌། །ཤེས་
ཉམས་སྟོང་གསལ་སྣང་ཉམས་ཁྲ་ཁྲ་ཙམ། །ཤར་བ་ཁྲེགས་ཆོད་ཐོད་རྒལ་རྣམ་དག་མིན། །དེ་ལྟ་མིན་ན་རྫོགས་ཆེན་མན་ངག་སྡེའི། །གཞུང་བརྒྱའི་ནང་དུ་སྔོན་འགྲོའི་ཁྲིད་རིམ་དང༌། །རྫོགས་ཆེན་ལམ་གཉིས་གོ་རིམ་མ་འཆོལ་བར། །བསྟན་པའི་གནད་ལའང་ངེས་པ་ཇི་ལྟར་དྲངས། ཁྱད་པར་བླ་མེད་སྤྱི་དང་བྱེ་བྲག་འདིའི། །དབང་བཞིས་རྒྱུད་སྨིན་རྩ་བ་ཡན་ལག་གི༌།དམ་ཚིག་མིག་བཞིན་སྲུང་བའི་སྐལ་བཟང་རྣམས། །འབའ་ཞིག་ཆོས་འདིར་འཇུག་ལ་དབང་བ་ཡིན། །གཅིག་བརྗེད་གཉིས་ཤེས་གསུམ་བོར་བཞི་པ་རྙེད། །གྲུབ་འབྲས་ལག་སྟོང་ཁར་འཇུག་བྱིས་པ་དང༌། །རང་གི་རྒྱུད་ཚོད་ཚུར་ལ་མི་སེམས་པར། །སློབ་དཔོན་ཆོས་ལ་སེར་སྣ་བྱེད་སྙམ་དང༌། །ཟབ་ཅིང་རྒྱ་ཆེའི་གནད་གསང་མི་འཚོལ་བར། ཁ་འཕང་མིག་འཕང་མཐོ་བ་ལྷུར་ལེན་སོགས། །རང་གིས་རང་ལ་སྙིང་རྗེ་མ་བལྟས་པར། །སྟོང་འུར་ལངས་ནས་ལྕེབ་གྲིར་འགག་པ་ཡིན། །དེ་ཕྱིར་ཕྱོགས་ཀྱི་འཁོར་ལོ་འཆིང་བ་ལྟའི། །སྨིག་རྒྱུའི་ཀླུང་དང་བཏུང་དུ་རུང་ངེས་པའི། །འབབ་ཆུའི་གདམ་ཁ་མ་ནོར་ཤེས་པ་ཞིག །བྱས་ན་རང་དྲིན་རང་ལ་ཆེ་བ་ལགས། །འདི་ལས་བརྩམས་ཏེ་བརྗོད་བྱ་མང་མཆིས་ཀྱང༌། །སྣང་བ་དགྲར་ལང་བདག་འདྲའི་མཐོང་ཚུལ་རྣམས། །རྒྱས་པར་བཤད་ན་ཕྱག་དར་བརྡལ་འདྲ་
བས། །དམ་པ་རྣམས་ཀྱི་སྙན་དབང་གཙེར་མི་བགྱི། ༈ །རྟོགས་བྱེད་ཐེག་པའི་རྣམ་གྲངས་མང་བསྟན་ཀྱང༌། །རྟོགས་བྱའི་སྙིང་པོའི་ཚུལ་སྒོ་གཅིག་ལས་མེད། །སྐྱེ་འགག་གནས་གསུམ་བྲལ་བའི་རང་སེམས་གཤིས། །ཕྱོགས་འདིར་བློ་གྲོས་མིག་ཡངས་དང་པོར་སྒྲུབས། །བྱུང་ཁུངས་གནས་གཞི་འགྲོ་བའི་ཡུལ་ས་གསུམ། །མ་མཐོང་ཙམ་ཞིག་གནས་ལུགས་རྙེད་མིན་པས། །གཞི་མེད་རྩ་བྲལ་ཟེར་བའི་གྲགས་ལྡན་དེ། །ཚིག་རྐྱང་ཙམ་མིན་རྩད་གདར་ཆོད་པ་དགོས། །བདེན་པའི་དམིགས་གཏད་རྡུལ་ཙམ་མི་འཇོག་ཀྱང༌། །སྣང་རིག་རྫུན་པའི་མཐོང་བ་འགོག་མིན་པས། །ཟབ་མོའི་གནད་འདི་ཚིམ་སྔ་མ་བྱེད་པར། །པཎ་གྲུབ་གཞུང་ལ་བརྟེན་ནས་ཞིབ་ཏུ་ཚོལ། །འཁོར་བའི་འཁྲུལ་སྣང་དབྱེ་བ་མཐའ་ཡས་ཀྱང༌། །རྩ་བ་གཅིག་ཏུ་ཟད་དེ་བདེན་ཞེན་ཉིད། །དེ་སླད་འཁྲུལ་པའི་མདུད་པ་ཡོད་དགུ་ཀུན། །ཆོས་ཀྱི་གནད་གསང་གཅིག་འདི་ཤེས་པས་གྲོལ། །འདི་མེད་དབྱིངས་རིག་དབྱེར་མེད་རྫོགས་པ་ཆེའི། །རང་ཞལ་མཐོང་བའི་གོ་སྐབས་མ་གཟིགས་ནས། །ནམ་མཁའ་ལྟ་བུའི་ཐུགས་ཅན་ཡབ་མེས་ཀྱིས། །དང་པོར་བདག་ཅག་རྣམས་ལ་ཚུལ་འདི་གདམས། །རིག་དང་སྟོང་པ་སྲང་མདའི་མཐོ་དམན་བཞིན། །མི་འདོད་འོན་
ཀྱང་གདུལ་བྱའི་རྟོགས་རིམ་ལ། །དགོངས་ཏེ་སྟོང་པ་ངོ་སྤྲོད་མཇུག་ཐོགས་སུ། །རིག་པ་ངོ་སྤྲོད་ཟབ་མོ་ཤེས་རྣམས་བཞེད། །རིག་པའི་དོན་ནི་ས་ལེ་སང་ངེ་བ། །ཟང་མ་ཐལ་བྱུང་མཉམ་ཡངས་གདལ་བ་ཞེས། །སྨྲ་མཁན་མང་མོད་དེ་འདྲའི་ཁྱད་པར་རྣམས། །སེམས་དང་རིག་པ་གཉིས་ཆར་ཡོད་པ་ཡིན། །དེས་ན་ཁྱད་གཞི་གདོད་མའི་འོད་གསལ་དུ། །ཤེས་པར་བྱ་སྟེ་གློ་བུར་ཆོས་དང་ནི། །གདོད་མའི་རང་བཞིན་བསྲེས་ཀྱང་མི་འདྲེས་པས། །སེམས་རིག་དབྱེ་བའང་འདི་ལ་ལེགས་པར་གནས། །དེ་ཡི་བཞུགས་ཚུལ་རྒྱ་ཆེར་ངེས་པའི་ཕྱིར། །ཡེ་གྲོལ་གཉུག་མ་གཟོད་ནས་མ་བཅོས་དང༌། །ངང་གིས་གདལ་ཁྱབ་གཏིང་གསལ་ཆ་ཕྲ་སོགས། །དཔག་དཀའི་ཐ་སྙད་རབ་འབྱེད་བཏགས་པ་ཡིན། །དེ་འདྲའི་བརྗོད་ཚུལ་རེ་རེར་ཐུན་མིན་གྱི། །ཆོས་སྐུ་ངོ་སྤྲོད་སྒོ་རེ་མི་ཤེས་པར། །བྱིས་པའི་མདུན་སར་མེ་མདའི་ཚམ་རྔམ་ལྟར། བརྩི་བའི་རྫོགས་ཆེན་པ་རྣམས་ད་དུང་དཔྱོད། །རིག་པའི་ཡེ་ཤེས་འོད་གསལ་དེ་ཉིད་ནི། །གདོད་མ་ཡིན་ཕྱིར་གསར་དུ་སྒྲུབ་མི་དགོས། །རྒྱུན་ཆད་མེད་ཕྱིར་ད་ལྟ་ཤེས་པས་ཆོག །མི་འགྱུར་ཕྱིར་ན་སྟོང་གསལ་ཞི་བ་ཡིན། །ཤེས་པའི་ཆ་ཀུན་རིག་པར་བརྗོད་མི་བྱ། །སེམས་རིག་དབྱེ་བ་བྱར་མེད་ཐལ་འགྱུར་ཕྱིར། །ད་ལྟའི་ཤེས་མིན་རིག་པར་བརྗོད་མི་བྱ། །རང་གི་རིག་པ་
གཞན་དུ་ཐལ་འགྱུར་ཕྱིར། །གང་ཕྱིར་སེམས་དང་རིག་པ་ད་ལྟར་གྱི། །ཤེས་པའི་གོང་བུ་གཅིག་ཏུ་འདྲེས་པ་ལས། །ཐབས་མཁས་ཟབ་མོས་ཆབ་ལས་དྭངས་མ་བཞིན། །རིག་པ་འབྱིན་ཚུལ་ཤེས་ན་མཁས་པ་ཡིན། །ཆོས་སྐུ་ངོ་སྤྲོད་སྒོ་རྣམས་གཡས་བཞག་ནས། །རིག་ཞལ་རྗེན་ལ་དབྱུང་བའི་མན་ངག་གནད། །ཟུར་དུ་འཚོལ་བ་གྲུབ་པའི་ལུགས་སྲོལ་འདིར། །གླང་པོ་རྙེད་ནས་གླང་རྗེས་ནགས་ཚོལ་འདྲ། །རྟོག་ཚོགས་གཅུར་བས་མི་ནོན་ནང་དུ་ཞུམ། །ལས་རླུང་ལྷོད་པས་མི་ཐུལ་ཕྱི་རོལ་གཡོ། །གྲིམ་ལྷོད་པི་ཝཾ་རྒྱུད་བཞིན་ཆ་མཉམ་པས། །ཆུ་ཡི་རྙོག་པ་བགྲུང་བའི་ཚུལ་གྱིས་ཞོག །འགྱུས་པ་ངོ་ཤེས་རང་གྲོལ་ཁུངས་སྟོར་བའི། །གྲོལ་ལུགས་རྣམ་གསུམ་བཞག་ཐབས་གཅིག་ཉིད་ཀྱི། །ན་ཚོད་སྨིན་པའི་གནས་སྐབས་ལས་འོང་གི༌།སོ་སོར་སྒྲུབ་པའི་རྩོལ་བ་གཞན་མི་དགོས། །ལུས་ནི་མི་གཡོ་མིག་ཀྱང་མི་འཛུམ་པར། །བྱ་བྱེད་རི་མོ་མ་བྲིས་རང་བཞག་པས། །ཡིད་ཀྱི་ན་བུན་རླུང་གི་བཞོན་པ་ཅན། །བལྟར་མི་མངོན་པར་དང་པོའི་གནས་སུ་འགྲོ། །དེ་ཚེ་ཕྱི་ནང་རིས་སུ་མ་ཆད་ཅིང༌། །ཉི་ལྟར་རབ་གསལ་གཡོ་བའི་རླབས་དང་བྲལ། །བཅོས་སུ་མེད་ཀྱང་མཆོག་ཏུ་ལས་རུང་བ། །ཉམས་སུ་མྱོང་བཞིན་བསྙད་མི་ཤེས་པ་འབྱུང༌། །
མཐའ་བྲལ་ངོ་བོ་སྟོང་པའི་དབྱིངས་སུ་ནི། །བློ་འདས་རང་བཞིན་གསལ་བའི་ཡེ་ཤེས་ཁམས། །དབྱེར་མེད་ངང་ལ་རྩེ་གཅིག་མཉམ་བཞག་པའི། །གཞི་དེའི་མལ་དུ་བློ་བདེ་རྒྱུན་མི་ཆད། །ཆོས་སྐུ་དེ་ཡིན་ཀུན་བཟང་དགོངས་པ་དེ། །ཞི་བྱེད་གཅོད་ཡུལ་དབུ་མའི་ལྟ་བའང་དེ། །ལུས་རྒྱའི་ནང་ནས་རྟོགས་པའི་རྩལ་རྒྱས་པ། །སངས་རྒྱས་རློན་པ་ཟེར་ནའང་དེ་ལ་ཟེར། །འོན་ཀྱང་ལུགས་འདིའི་ཐུན་མོང་མ་ཡིན་པའི། །ལྷག་མཐོང་ལམ་གནད་དང་པོ་ངོ་ཤེས་དང༌། །དེ་ནས་རྩལ་འབར་བརྟན་པ་འཐོབ་དགོས་པས། །དབྱིངས་རིག་མཇལ་ཙམ་སྒོམ་མེད་སླེབས་པ་མིན། །ནམ་མཁའི་རྣལ་འབྱོར་ཡུལ་གྱི་སྒྱུ་མ་ལ། །རོལ་ཚེ་རྨི་ལམ་གཉིད་ཀྱི་ཆོ་འཕྲུལ་ལྟར། །ཅིར་སྣང་ཀློང་ཆེན་རིག་པའི་རྩེ་འཇོ་རུ། །མཐོང་ནས་རྟོགས་པའི་མེ་ཆེན་ལྷག་པར་འབར། །དེ་ལྟར་མཉམ་རྗེས་རྣལ་འབྱོར་གཅིག་ལ་གཅིག །གྲོགས་སུ་སོང་བའི་མན་ངག་ལ་སྦྱངས་པས། །འཁྲུལ་པའི་སྣང་ཤེས་ཧྲལ་མ་ཧྲོལ་དུ་ནི། །བཤིགས་ཏེ་འཕགས་ལམ་ཟབ་མོའི་མཁའ་དབྱིངས་འཕྱོ། །སངས་རྒྱས་རྣམས་ཀྱི་ཟབ་དང་རྒྱ་ཆེའི་སྐུ། །ཡ་བྲལ་མི་སྲིད་སངས་རྒྱས་སྒྲུབ་བྱེད་ཀྱང༌། །ཟབ་དང་རྒྱ་ཆེ་ཕྱོགས་རེས་མི་ཆོག་པས། །ཐེག་རྒྱལ་འདི་ཡི་རྒྱ་ཆེ་སྒྲིམ་ལ་ཚོལ། །སྙིང་དབུས་རང་བྱུང་
གཞོན་ནུ་བུམ་པ་སྐུའི། །རང་མདངས་དབྱིངས་རིག་ཐིག་ལེའི་སྣང་བ་ནི། །རྒྱ་མཚོ་གསེར་གྱི་ཉི་མའི་མེ་ལོང་ནང༌། །ཤར་བའི་ལྷུན་གྲུབ་སྦུབས་སུ་རྩེ་གཅིག་ཞུགས། །གཏིང་གསལ་ཤིན་ཏུ་ཕྲ་བ་འོད་ལྔའི་ཁམས། །མཁའ་ཁྱབ་འོད་ཀྱི་ཞིང་དང་ཡེ་ཤེས་སྐུར། །བཞེངས་པའི་འཕོ་ཆེན་ཆུ་ཟླའི་རོལ་རྩེད་ནི། །རིག་པ་རྩལ་གྱི་དབང་ཆེན་ཐོབ་ལས་འབྱུང༌། །དེ་སྐད་རྡོ་རྗེ་སྙིང་པོའི་ལམ་གྱི་གནད། །མདོར་བསྡུས་ཤ་ཟིན་སྤུ་ཟིན་བསྙད་པའི་དགེས། །འགྲོ་ཀུན་ཁྱད་ཆོས་དྲུག་ལྡན་གདོད་མའི་དབྱིངས། །མངོན་པར་བྱང་ཆུབ་མཆོག་གི་བཀྲ་ཤིས་ཤོག །ཅེས་པའང་བློ་གསལ་ཆེ་མཆོག་གིས་རིང་མོ་ནས་བསྐུལ་ཞིང༌། ཉེ་ཆར་མཆོག་སྤྲུལ་དམ་པ་འགྱུར་མེད་པདྨ་བསྟན་འཕེལ་ནས་བཀའ་འདྲི་གནང་ལན་མདོར་བསྡུས་འབུལ་ཆེད་དང༌། དད་མོས་ལྡན་པ་བོད་ཆུང་ལུང་རྟོགས་དང༌། གསུང་མཆོག་པད་རྡོར་རྣམས་ནས་ཀྱང་བསྐུལ་བའི་ངོ་མི་ལྡོག་ཙམ་དུ་དཔལ་ལྡན་བླ་མ་རྗེ་བཙུན་བརྟན་པའི་འཁོར་ལོ་མིའི་ཤ་ཚུགས་ཅན་འོད་གསལ་སྤྲུལ་པའི་རྡོ་རྗེའི་བཀའ་དྲིན་གྱིས་འཚོ་བའི་རྡོ་རོང་གི་སྨྱོན་པ་འཇིགས་མེད་བསྟན་པའི་ཉི་མས་གང་དྲན་མགྱོགས་བྲིས་སུ་སྦྱར་བ་དགེ་ཞིང་བཀྲ་ཤིས།། ༈ །།བླ་མ་ལ་ཕྱག་འཚལ་ལོ། །རང་བཞིན་རྫོགས་པ་ཆེན་པོ་བྱ་རྩོལ་འཛིན་ཞེན་ལས་འདས་པའི་ངེས་དོན་བླ་ན་མེད་པ་ནི་ཁོ་བོས་འདི་ལྟར་རྟོགས་ཏེ། །གཟོད་མ་ནས་ཤིན་ཏུ་རྣམ་པར་དག་པ་རང་བཞིན་
གཉུག་མའི་ཡེ་ཤེས། སེམས་འཛིན་དམིགས་གཏད་ཀྱི་སྤྲོས་པ་དང་བྲལ་ཞིང༌། བློས་བྱས་གཟུང་འཛིན་གྱི་མདུད་པ་ལྷོད་པོར་གྲོལ་བས་ཀ་དག་གི་ཡིན་ལུགས། །གཞི་རྫོགས་ཐིག་ལེ་ཆེན་པོ་ཞེས། །འཁོར་འདས་མ་ལུས་པ་དག་མཉམ་རིག་སྟོང་རྗེན་པའི་གཤིས་སུ་ཕྱམ་གདལ་བའི་རང་ཡན་ཕྱི་ནང་བར་མེད། ཟང་ཐལ་གཞི་རྩ་ལས་འདས་པ། ལྷོད་དེ་བ་ལ་འཁྲུལ་འབྱམས་སུ་མ་སོང༌། ཕྱལ་ལེ་བ་ལ་ཐ་མལ་དུ་མ་ལུས། །ཕྱི་གསལ་ཐིག་ལེའི་རོལ་རྩལ་དུ་སྣོད་བཅུད་ཆུ་ནང་གི་ཟླ་བ་ལྟར་ཤར་ཡང༌། ནང་གསལ་ལྷུན་གྲུབ་ཀྱི་ཡེ་ཀློང་ཆེན་པོར་གཞི་གྲོལ་གཏད་མེད་མཉམ་པའི་ངང་ལས་ལམ་སྣང་གི་རིག་པ་རྡོ་རྗེ་ལུ་གུ་རྒྱུད་ཀྱི་ཐིག་ལེ་ཞིང་ཁམས་ཀྱི་བཀོད་པ་སྒྱུ་མའི་བརྟན་གཡོ་རབ་འབྱམས་སུ་འཆར་བའི་ཡེ་ཤེས་དབྱིངས་ཀྱི་སྟོང་གཟུགས་རྣམ་བཅས་ཞལ་ཕྱག་གི་སྤྲོས་པར་འབར་བའི་ལྷའི་ཕྱག་རྒྱ་དང༌། རྣམ་མེད་སྟོང་པ་ཉིད་ཀྱི་ཨེ་ཡིག་ཆེན་པོར་བདེ་ཆེན་གཉུག་མའི་ཝཾ་ཡིག་རོ་མཉམ་དུ་སྦྱར་བའི་ཁ་སྦྱོར་གྱི་གོ་འཕང་རྡོ་རྗེ་སེམས་དཔའ་མ་ནིང་གི་བྱང་ཆུབ་ཅེས་སྔགས་རྒྱུད་རྒྱ་མཚོ་ནས་ཡོངས་སུ་བསྔགས་པའི་གྲུབ་པ་ཆེན་པོའི་དགའ་སྟོན་འདོད་དགུར་འཇོ་བའི་དཔྱིད་གཅིག་པུར་གྱུར་པ་ནི་སེམས་ཅན་རྣམས་ཀྱི་སྙིང་དབུས་སུ་ཤིན་ཏུ་ཕྲ་བའི་སྒོ་གསུམ་ཟབ་གསལ་གཉིས་
སུ་མི་ཕྱེད་པའི་ངོ་བོར་ལྷུན་གྱིས་གྲུབ་ཀྱང་འཁྲུལ་རྟོག་ཨ་འཐས་ཀྱིས་འཆིང་བ་དང༌། གཟུང་འཛིན་ལས་རླུང་གི་རྒྱུ་བ་ཉི་ཁྲི་ཆིག་སྟོང་དྲུག་བརྒྱས་སངས་རྒྱས་རྣམས་ཀྱི་བདེ་བ་ཆེན་པོའི་དེ་ཉིད་མི་ཤེས་ཤིང༌། རྣམ་པ་ཐམས་ཅད་པའི་ཕྱག་རྒྱ་ཆེན་མོའི་མཚན་དཔེ་ཡང་དག་པར་མི་མཐོང་ཞེས་རྡོ་རྗེ་འཛིན་པ་རང་གི་ངེས་གསང་བསྟན་པའོ། །དེ་ལྟ་མོད་ཀྱི་བླ་ན་མེད་པའི་རྒྱུད་ཀྱི་རྒྱལ་པོ་གཞན་རྣམས་སུ་རྩ་རླུང་ཐིག་ལེའི་འཛིན་རྩོལ་ལ་བསྟེན་པའི་འཇོག་སྒོམ་གྱི་སྦྱོར་བ་ཁྱད་པར་ཅན་རྩལ་དུ་བཏོན་ནས་འཆད་ནའང༌། རྒྱུད་ཀྱི་རྩེ་མོ་འདིར་དེ་ལྟ་བུའི་ངལ་བ་ཡུན་དུ་བསྟེན་མི་དགོས་པར་ཀུན་རྟོག་སྤྲོས་པའི་དྲྭ་བ་མཐའ་དག་རང་གྲོལ་རྒྱ་མཚོ་ཅོག་བཞག་གི་མན་ངག་ཟབ་མོས་སྣང་བ་ཐད་ཀར་བཅད་དེ་འཁྲུལ་སྣང་གཞི་ལ་ཐིམ་པའི་ལག་རྗེས་སུ་ལྷན་གཅིག་སྐྱེས་པའི་ཉི་མ་ནང་ནས་ཤར་ཏེ། མ་དག་ཕུང་ཁམས་དུ་མའི་ལྕགས་ནག་གི་རྡུལ་ཡོངས་སུ་དག་པའི་ཡེ་ཤེས་གསེར་འགྱུར་གྱི་སྦྱོར་བས་རྣམ་པར་སྦྱངས་ཤིང༌། བདེ་བ་མཆོག་གི་ཐུགས་ཀྱི་རྒྱས་བཏབ་པ་ལས་འཆི་མེད་འཇའ་ལུས་རྡོ་རྗེའི་དྭངས་མ་འོད་ལྔའི་ཞལ་སྐྱིན་དུ་བཞེངས་པའི་ཀུན་ཏུ་བཟང་པོའི་ཁྱད་ཆོས་དྲུག་ལྡན་གྱི་ངོ་བོ་ལ་མངོན་བྱང་ཆུབ་པ་ཐེག་པའི་རྒྱལ་པོ་འདིའི་རང་ལུགས་སོ་ཞེས་སྨྲའོ། །བྱང་ཕྱོགས་ཀྱི་བན་རྒན་
འབའ་ལ་མས་རྟོགས་ལྡན་རྐང་རིང་ལ་གདམས་པ་རྫོགས་སོ།། ༈ །།ཡེ་ནས་རྣམ་གྲོལ་ལྷུན་གྲུབ་རིག་པའི་གཤིས། །སྤྲོས་པ་ཀུན་གྱིས་ཡུལ་མིན་ཡེ་ཤེས་ཆེ། །སྙིང་དབུས་གཞོན་ནུ་བུམ་སྐུའི་ཏི་ལ་ཀར། །ཡང་དག་གཉུག་མའི་དྲན་པས་ཕྱག་བགྱིའོ། །གང་ཚེ་ནགས་རིའི་ནང་ན་བྱ་ཝང་ལྟར། །སྙིང་ལ་ཀུན་རྨོངས་མུན་ནག་འཐིབ་བཞིན་དུ། །ཆོས་གཏམ་གྲེ་བའི་ནང་ནས་བྲག་ཆ་ལྟར། །འབབ་པའི་སྤྲང་སྨྱོན་གཞོན་ནུ་འཇིགས་མེད་པ། །རིང་ནས་གོམས་པའི་ཆོས་མིན་སྤྱོད་པ་བརྒྱས། །འཆད་རྩོད་རྩོམ་པའི་གློ་ཞབས་རྡོལ་མཐོང་ཡང༌། །གསེར་དང་བོང་བ་མཉམ་པའི་ཡེ་རྒྱམ་དེས། །རྟ་ཆད་ལྕགས་གིས་གཞུས་འདྲས་བསྐུལ་མ་མཛད། །ཕ་མས་རིག་འཛིན་བརྒྱུད་པ་བཟང་མོད་དེ། །བུ་ཕྲུག་ཆོས་མེད་སྐལ་བ་ངན་སྟབས་འདིས། ཁྱེད་ལ་རྒན་ཉམས་དྲང་པོའི་གདམས་པ་ཞིག །ཐུགས་ལ་ཕྲོད་པའི་ཞུ་བྱར་འབུལ་རྒྱུ་མེད། །འོན་ཀྱང་ཁྱོད་ཐུགས་བཞེད་དོན་སྐོང་བ་དང༌། །དཔྱིད་ཀའི་ཉི་མ་རིང་པོ་འཕུལ་བའི་ཕྱིར། །བྱུང་རྒྱལ་གཏམ་གྱི་བསླུ་བྲིད་བརྫུས་མ་འདིས། །ནགས་ཀྱི་ནང་ན་འདུ་འཛི་ཡོ་ལང་འགྱེད། །ཀྱེ་ལགས་ཐེག་མཆོག་རྒྱལ་པོའི་ཆོས་སྐད་འདི། །སྒོམ་ཆེན་སྟོང་གི་མདུན་ན་མར་མེ་བཞིན། །ལམ་ལམ་ཉིན་མཚན་མེད་པར་འབར་མོད་ཀྱི། །དངོས་དང་
རི་མོའི་རྣམ་འགྱུར་གང་ཡིན་ཨང༌། །གང་གིས་འོད་གསལ་གཉུག་མ་མི་ཤེས་པར། །ལྟར་སྣང་རྟོགས་པའི་ཟབ་ཁྱད་སྟོང་བཏོན་ཀྱང༌། །ལྷུན་གྲུབ་སྣང་བཞིའི་ས་རྒྱ་མི་ཆོད་པས། །རྫོགས་ཆེན་བཞེད་ན་འོད་གསལ་ངང་སྒོམ་ཞུ། །སྙིང་དབུས་ལྔ་ལྡན་གཞོམ་མེད་ཐིག་ལེ་རུ། །ནང་གསལ་ཁྱད་ཆོས་དྲུག་ལྡན་བུམ་པའི་སྐུ། །ཀློང་ཆེན་དགོངས་པའི་མེ་ལོང་འོད་པོ་ཆེར། །འཆར་བའི་ཉམས་མྱོང་ཐེག་མཆོག་རྒྱལ་པོ་ཡིན། །གཟོད་ནས་ཀུན་རྟོག་སྤྲོས་པའི་མཚན་མ་རྣམས། །རྟོག་མེད་ནམ་མཁའི་རྡོ་རྗེར་རྣམ་གྲོལ་བས། །གཟུང་འཛིན་གཉིས་སུ་མི་དམིགས་བློ་འདས་དབྱིངས། །དེ་ལྟར་ཤེས་ནས་སེམས་རིག་ལ་ཤན་འབྱེད། །ཀུན་ཏུ་བཟང་པོ་གདོད་ནས་སྟོང་པ་ཉིད། །སྟོང་པའི་ནང་ན་ཤིན་ཏུ་སྟོང་པ་སྟེ། །ཐམས་ཅད་སྟོང་པ་ཁྱབ་གདལ་ཆེན་པོའི་ཀློང༌། །སྟོང་དང་མི་སྟོང་སྤྲོས་ཀུན་ཞི་བ་ཡིན། །རྒྱུ་དང་མི་རྒྱུ་སྲིད་པའི་དངོས་སྣང་ཀུན། །འོད་གསལ་ཀློང་ན་ཤིན་ཏུ་མ་སྐྱེས་ཏེ། །རིག་རྩལ་རྟོག་པ་སྨིག་རྒྱུའི་ཕུང་པོ་ལྟས། །འགྲོ་དང་འོང་མེད་སྒྱུ་མ་བཞིན་དུ་སྤྲུལ། །མྱ་ངན་འདས་པའི་རྣམ་གྲོལ་ཁམས་མང་ཡང༌། །ཆོས་ཉིད་ཀློང་ན་ཡང་དག་གྲུབ་མེད་དེ། །གཉུག་མའི་ཆོས་སྐུ་མ་བཅོས་ཕྱལ་བ་ལས། །འཇུག་ལྡང་གཉིས་མེད་རྨི་ལམ་བཞིན་དུ་སྣང༌། །
དེ་ལྟར་ཤེས་ནས་ཡེ་གྲོལ་རྫོགས་པ་ཆེ། །གཞི་མེད་རྩ་བྲལ་ནམ་མཁའ་ལྟ་བུའི་ཀློང༌། །རྩལ་གྱི་ཀུན་རྟོག་རང་སྟེང་མ་བཞག་ན། །སྲིད་པའི་ལས་སྣང་གཞན་ནས་ཇི་ལྟར་ལྡོག །སེམས་ཀྱི་རྡོ་རྗེ་མ་བཅོས་ཅོག་བཞག་པས། །གློ་བུར་ཉོན་མོངས་ཤུགས་ཀྱིས་ཟིལ་གནོན་ཕྱིར། །མི་སྒོམ་བསྐྱུར་བའི་ཉེ་ལམ་འབའ་ཞིག་གིས། །སྒོམ་པའི་ཡིད་དཔྱོད་རྒྱབ་ཏུ་བོར་ཞེས་གླེང༌། །ཕྱི་རུ་ཡུལ་ལྔའི་རྗེས་དཔྱོད་སྤྲིན་བཞིན་དེངས། །ནང་དུ་འཛིན་པའི་རྣམ་རྟོག་མཁའ་ལྟར་དག །གསང་བ་རིག་སྟོང་ཁ་སྦྱོར་གཉུག་མའི་ཡིད། །ཅེར་གྲོལ་རང་བཞིན་མེད་པའི་ངང་འདིར་གཟིགས། །བླང་དང་དོར་མེད་ཀུན་བཟང་དགོངས་པའི་བབ། །ཕྱོགས་མེད་རིས་མེད་མཉམ་ཉིད་ནམ་མཁའ་ཆེར། །སྤང་དང་སྒྲུབ་མེད་རང་བཞིན་བབ་བཞག་ན། །གཟུང་དང་འཛིན་མེད་ཆོས་སྐུའི་དགོངས་པ་རྙེད། །དང་པོ་བལྟར་མེད་འོད་གསལ་ལྟ་བའི་ངང༌། །བར་དུ་སྒོམ་མེད་ཅོག་བཞག་འཁྱིལ་བའི་ཀློང༌། །ཐ་མ་བྱར་མེད་ཟང་ཐལ་རིག་པའི་གཤིས། །གཏད་མེད་ངང་ལ་ས་ལམ་རྫོགས་པ་ལགས། །སྣང་བའི་དངོས་ཀུན་ཀུན་བྱེད་རིག་པའི་གདངས། །ཆོས་སྐུའི་རང་གདངས་གཞན་ནས་སུས་འགོག་སྟེ། །ཆོས་སྐུའི་ཀློང་དུ་ཆོས་ཅན་ཉེར་ཞི་བས། །རྩོལ་དང་སྒྲུབ་མེད་སྣང་བ་
རྒྱ་གྲོལ་ཡིན། །རྟོག་པའི་འགྱུ་དྲན་གཉུག་མའི་ཆོ་འཕྲུལ་ཏེ། །ཀློང་ཆེན་རིག་རྩལ་གཞན་དུ་ཇི་ལྟར་སྤངས། །འཁྲུལ་པའི་ལས་རླུང་དབྱིངས་སུ་ཐིམ་པ་ན། །མ་འཁྲུལ་རིག་པ་ད་གདོད་སྒྲུབ་ཏུ་མེད། །གང་ལྟར་ཤེས་ན་སྲིད་དང་ཞི་བའི་ཁམས། །སྒྲོ་དང་སྐུར་མེད་ཡོངས་སུ་ཤེས་གྱུར་པ། །དེ་ལྟར་ཤེས་ནས་རྣལ་འབྱོར་རྒྱལ་པོ་རྣམས། །རྟོག་པའི་རྡུལ་ཕྲན་བགྲང་དུ་ཅི་སྟེ་འབྱོན། །གང་མ་ཤེས་པས་བསྟན་བཅོས་ཁྲི་བཀླག་ཀྱང༌། །རྡོ་རྗེ་འཛིན་པའི་ངེས་གསང་མི་རྙེད་པ། །དེ་ཉིད་མ་ཤེས་ཀུན་ཤེས་གཅིག་སྡུག་འདིས། །རྟོག་མེད་རིག་པའི་ཞལ་ངོ་བསྐུངས་ཀྱིས་དོགས། །བྱས་བྱས་ཟིན་པ་མེད་པའི་ལས་རླུང་རྟ། །བསམ་བསམ་འགྲུབ་དུས་མེད་པའི་ཀུན་རྟོག་བློ། །བསྒོམ་བསྒོམ་རྟོགས་དུས་མེད་པའི་ཡིད་དཔྱོད་སེམས། །ཐམས་ཅད་བཞག་སྟེ་འདིར་ཉལ་སྤྲོ་ལ་བཞུགས། །འཕྲོས་དོན་དུ་ཞུ་བ། ལར་ཀུན་མཁྱེན་འཇིགས་མེད་གླིང་པའི་ཞལ་ནས། །ང་མིག་འགྲིབ་ན་སོ་རྒས་པ་ལ། །རེ་ཆེ་དང་ཨུ་ཚུགས་མ་མཛད་ཨང༌། །ཞེས་གསུངས་པ་ཉིད། ངེད་ནས་ཀྱང༌། ང་བློ་རྟུལ་ཁ་ལྕེ་ལྐུགས་པོ་ལ། །འོས་མེད་ཀྱི་ཡུས་ཆེ་མི་མཛད་འཚལ། །ཞེས་འདོན་པ་བསྒྱུར་ཆོག་པས་གཏི་ཐུག་གི་བཀའ་གནང་མི་མཛད་པར་ཞུ། །འོན་ཀྱང་
རང་གིས་གོ་ཚོད་དང་སེམས་ལ་ཤར་ལུགས་མདོར་བསྡུས་ཙམ་ཞུ་ན། ཀ་དག་ཁྲེགས་ཆོད་ཀྱི་ལྟ་སྒོམ་སྤྱོད་འབྲས་ཐམས་ཅད་ཧྲིལ་གྱིས་དྲིལ་ན། གཞི་གང་ལ་རྟེན་བཅའ་བ། ལམ་གང་གིས་ཉམས་སུ་བླང་བ། དེ་ལྟར་བསྒོམས་པའི་ལག་རྗེས་འབྱུང་ལུགས་རྣམས་སུ་འདུ་བར་སྣང་ལ། གཞི་ནི་གཉུག་མའི་ཡེ་ཤེས་རང་བྱུང་རིག་པ་ཉིད་ཡིན་ཏེ། ཚིགས་བཅད་སྨྲས་མ་ཐག་པ་རྣམས་སུ་རིག་པའི་ཡིན་ལུགས་མདོ་ཙམ་ཞུས་ཟིན་ལགས། ལམ་ནི་ལྟ་བའི་ཡིན་ལུགས་ཐག་ཆོད་པ་སྔོན་དུ་བཏང་སྟེ་ཐག་ཆོད་ཐོག་དེར་འཇོག་དགོས་པ་ཡིན། འཇོག་ལུགས་ཀྱང་ཉུང་ལ་གསལ་བར་ཞུས་མ་ཐག་པ་དེ་ཡིན། དོན་རྩར་འོད་གསལ་བའི་ཡེ་ཤེས་དེའི་རྣམ་པ་དེ་ཉིད་མ་བརྗེད་ཙམ་དུ་བསྡད་ན་མ་ཡེངས་མི་སྒོམ་པའི་དོན་ཚང་བ་ཡིན། འོད་གསལ་གྱི་དགོངས་པའི་བབ་ནི། ངོ་བོའི་ཆ་ནས་སྟོང༌། རང་བཞིན་གྱི་ཆ་ནས་གསལ། ཐུགས་རྗེའི་གདངས་འགག་མེད་དུ་འཆར་བའི་གནས་ལུགས་སེམས་ཀྱི་རྡོ་རྗེ་ཉིད་དེ། དེ་ཉིད་དེ་དང་རྣམ་པ་འདྲ་བའི་ལམ་གྱིས་མངོན་དུ་བྱས་ནས། ཕྱིའི་ཡུལ་དུ་མ་སྤྲོས། ནང་གི་སེམས་སུ་མ་བཅིང༌། བར་གྱི་གནས་ཉམས་ལ་མ་ཞེན་པར། ཧ་རེ། སང་ངེ༌། ཁྲེས་སེ། སོ་མ་རང་བཞག་ཆེན་པོའི་ཀློང་དུ་བཟོ་བཅོས་མེད་པར་ངང་གིས་གནས་
ན་གཟུང་འཛིན་དམིགས་གཏད་ཀྱི་མཚན་མའི་སྤུ་རིས་ཐམས་ཅད་ཆུའི་རི་མོ་ཡལ་བ་ལྟར་རང་གྲོལ་དུ་འགྲོ། སྒོམ་ཆེན་ཟེར་བ་ཁྱིས་རྡོ་བསྙགས་པ་ལྟ་བུ་ཞིག་མ་ཡིན་པར། རྟོག་ཚོགས་ཅེར་གྲོལ་གྱི་གནད་ལ་མཁས་པས་སེམས་ཀྱི་ཡལ་ས་ཁོ་ནའི་སྟེང་དུ་འཇོག་སྒོམ་བྱེད་པ་ཞིག་གནད་དུ་ཆེ། །དེ་ལྟར་བྱས་ན་བཟང་ངན་གྱི་རྟོག་པ་ག་འདྲ་ཞིག་ཤར་ཀྱང༌། དེ་དག་ཐམས་ཅད་རྩིས་མེད་དུ་སོང་ནས་ཐ་མལ་གྱི་ཤེས་པ་འདི་སྒོམ་དུ་ཧྲིལ་གྱིས་འཆར་རྒྱུ་ཡོང༌། གཞན་དུ་ན་རྣམ་རྟོག་ཤར་བ་ན་གཡག་སྣ་ཁུ་ཚུར་གྱི་གཉེན་པོས་སླེབས་པ་དང༌། བསམ་གཏན་གྱི་གནས་ཆ་གྲུང་པོ་ལ་ལྷོད་ཀྱིས་འཇོག་པ་སོགས་ཐུགས་དམ་ཇི་ཙམ་བཟང་ཡང་རང་བཞིན་རྣམ་དག་གི་དྲན་པ་མི་ཟེར་བ་ཡིན། ལར་རྫོགས་པ་ཆེན་པོའི་ལམ་འདིས་བསོད་ནམས་ཀྱི་ཚོགས་འདུམ་ལུགས་ཐམས་ཅད་འོད་གསལ་གཞོན་ནུ་བུམ་སྐུར་གནད་དུ་བསྣུན་པ་ལ་ཐུག་ཅིང༌། ཡེ་ཤེས་ཀྱི་ཚོགས་འདུམ་ལུགས་ནི་དེའི་དབྱིངས་དང་ཡེ་ཤེས་དབྱེར་མི་ཕྱེད་པའི་མཉམ་བཞག་ལ་ཐུག་ཡོད་པས་དེ་གཉིས་ཐུགས་དམ་གྱི་སྙིང་པོ། ཨོ་སོ་གསུམ་གྱི་མདོ་སོ། །ལུང་པ་ཕུ་དགུའི་མདོ་འགགས་སུ་མཁྱེན་པར་མཛོད་ལ། ཡུལ་ཅན་གྱི་རིག་པ་རྗེན་པར་བྱུང་རྗེས་ཡུལ་ཆོས་ཉིད་ཁྱབ་གདལ་ཆེན་པོའི་ངང་ལ་ཀློད་དེ། སྣང་བ་གདོང་འདེད་ཀྱི་ཉམས་ཤིགས་སེ་བའི་
རྒྱུན་སྐྱོངས། ཡུལ་དང་ཡུལ་ཅན་བཤད་མ་ཐག་པའི་དོན་ཡང་ནམ་གཉུག་མའི་དྲན་རིག་གི་སྟེང་དུ་སླེབ་ཀྱང་རུང༌། དེ་ཉིད་ཀྱི་ངོ་བོ་ལ་ཅེར་གྱིས་བལྟས་པས་ཆོས་ཉིད་ཀྱི་དྲན་པ་ཡེ་སྟོང་བབས་སྟོང་ཆེན་པོ། གཞི་སྟོང་ཡོངས་སྟོང་གི་རང་བཞིན་ལས་སྐད་ཅིག་ཀྱང་གཡོ་མ་མྱོང་བའི་གནད་ཀྱིས། ཁོའི་ངོ་བོ་ལ་དབྱིབས་དང་ཁ་དོག །རྟགས་དང་མཚན་མ། ངོ་བོ་ངོས་བཟུང་ཐམས་ཅད་ལས་འདས་པས་སྨྲ་བསམ་བརྗོད་མེད་ཆེན་པོར་གཉིས་འཛིན་གྱི་ཀུན་རྟོག་རགས་པ་ནུབ་པའི་རྣམ་ལྡན་དུ་འཆར་བ་ལ། དབྱིངས་དང་ཡེ་ཤེས་གཉིས་ཡུལ་ཡུལ་ཅན་དུ་ཐ་སྙད་སྦྱར་བ་ཡིན་གྱི། རྟོག་གེའི་དཔྱད་སྒོམ་ལ་ཡུལ་ཡུལ་ཅན་འཆར་ལུགས་དང་གཏན་ནས་མི་འདྲ་བར་ཤེས་པར་གྱིས་ཤིག །དེ་དག་ཐམས་ཅད་མདོར་བསྡུ་ན་རིག་པའི་ཡིན་ལུགས་ཤེས་པ་དང་གཅིག །ཤེས་ཐོག་དེར་རྩོལ་མེད་ཀྱི་དྲན་པས་ངང་ལ་གནས་པ་དང་གཉིས། རྟོག་ཚོགས་ཤར་གྲོལ་དུས་མཉམ་ཐད་ཀར་བཅད་པ་དང་གསུམ། ཀུན་ཏུ་རྨོངས་པ་ཆ་དང་བཅས་པའི་ཞེན་ཡུལ་གཞི་མེད་དུ་མཐོང་བའི་སྒོ་ནས་སེམས་ལ་ཕན་པ་དང་བཞི། ལས་རླུང་འཁྲུལ་རྟོག་དང་བཅས་པ་ཡེ་གྲོལ་ཀ་ནས་དག་པའི་ཆོས་ཉིད་དུ་སྦྱངས་པས་རྟོག་པར་མ་འགྱུས་པ་དང་ལྔ། ཤར་བ་དང་གནས་པ་གང་གི་ཚེ་ཡང་རེ་དོགས་མེད་པའི་ཅོག་བཞག་གི་དྲན་པ་མ་ཉམས་པ་དང་དྲུག་ཁྱི་ལྡོམ་སྐོར་འགྲོས་ལ་སོང་བ་ལྟར་ངེས་
མེད་ཀྱི་གླེན་སྒོམ་ཨུ་ཚུགས་ཅན་མ་ཡིན་པར་ལྷུན་གྲུབ་ཕྱོགས་མེད་ཀྱི་དགོངས་པ་ཀློང་དུ་གྱུར་པ་དང་བདུན་པོ་དེ་དག་ཏུ་མི་འདུ་བ་མེད་དོ། །ཞེས་ཆོས་ཀྱི་རྒྱལ་པོ་ཀློང་ཆེན་ཞབས་ཀྱིས་གསུངས་སོ། །གཞན་ཡང་ལྟ་སྒོམ་གྱི་མན་ངག་སྙིང་བསྒྲིལ་ཚིག་གསུམ་གནད་ལ་འབེབས་པ། ངོ་མཚར་ཚིག་ཆེན་རྣམ་བརྒྱད། རྡོ་རྗེའི་གད་མོ་བཅུ་གཉིས། གྲོལ་ལུགས་གསུམ། ཅོག་བཞག་རྣམ་པ་བཞི། བཞག་ཐབས་ཆེན་པོ་བཅུ་གཉིས་ལ་སོགས་རྒྱ་ཆེར་ན་མཐའ་ཡས་པ་ཞིག་ཡོད་མོད་ཀྱི། མདོ་དོན་གོ་བདེ་ཙམ་ཞིག་བརྗོད་པ་ལགས། སྤྱིར་ཡང་དེང་སང་གི་རྟོགས་ལྡན་པ་རྡོ་རྗེ་ཐེག་པའི་མགོ་མཇུག་ཀྱང་གང་ཡིན་རྡོ་མ་ཐོགས་པ་རྣམས་ཀྱི་ཉམས་མྱོང་འཇང་གི་གཟུགས་པོ་ལྟ་བུ་རྡོ་རྗེ་འཆང་གི་ཉེ་ལམ་མ་ཡིན་པས། མོས་གུས་སྲོག་ཏུ་བཟུང༌། དབང་བཞིའི་ཉམས་ལེན་དང་སྦྱར། དམ་ཚིག་ལ་སྙིང་ལྟར་བཙའ། གྲོགས་སུ་བྱང་ཆུབ་ཀྱི་སེམས་རིན་པོ་ཆེ་ཕུར་ཚུགས་སུ་བསམ་པའི་སྒོ་ནས་སྐུ་ཚེ་དོན་ཡོད་པར་མཛད་ན་རང་དྲིན་རང་ལ་ཆེ་བ་ཡིན་ནོ། །སྤྲོས་བཤད་ཚིག་གི་ལོ་འདབ་མི་ཆེ་ཡང༌། །དོན་བཤད་ཉམས་ལེན་གདམ་པའི་སྙིང་པོ་འདི། །བསྡུས་བཤད་རྒྱལ་བ་ཁ་བཅིང་ཡིག་ཆུང་དུ། །རྡོ་རོང་གོག་པ་ཁ་ཤད་དེས་བྲིས་སོ། །ཞེས་པའང་བླ་མ་ཡེ་ཤེས་རྒྱ་མཚོའི་ངོར་རྡོ་སྨད་ཀྱི་བནྡྷེ་གཞོན་ནུ་ཆོས་སྨྲ་བ་འཇིགས་མེད་བསྟན་པའི་རྒྱལ་མཚན་
དུ་འབོད་པས་སུག་ལས་སུ་བགྱིས་པ་དགེ་བར་གྱུར་ཅིག། ༈ །།དྲི་མེད་མཁྱེན་པའི་ཆུ་གཏེར་ལས། །སྙན་བརྒྱུད་བསྟན་པའི་ཆུ་ཀླུང་འབེབས། །ཐེག་མཆོག་རྡོ་རྗེའི་ཆུ་དབང་ཆེ། །མཁྱེན་བརྩེའི་འོད་ཟེར་ཞབས་ལ་འདུད། །འདིར་ངེས་གསང་རྫོགས་པ་ཆེན་པོའི་ལྟ་སྒོམ་གྱི་གནད་སྙིང་པོར་དྲིལ་བ་དྲན་པ་དྲུག་གི་རྣམ་བཞག་ཏུ་བསྡུས་ཏེ་འཆད་པ་ལ། སྤྱི་སྡོམ་དང་བྱེ་བྲག་བཤད་པ་གཉིས་ལས། དང་པོ་ནི། ཀུན་མཁྱེན་བླ་མས། དང་པོའི་ལས་ཅན་འདུ་བྱེད་མ་ཡེངས་བྱ། །མཉམ་རྗེས་སློབ་རྣམས་ཆོས་ཉིད་མ་ཡེངས་བྱ། །གོམས་པའི་དྲན་སྣང་ཡེ་ཤེས་མ་ཡེངས་བྱ། །ཀློང་གྱུར་དུས་སུ་ཡེངས་མེད་ཡེངས་མཁན་མེད། །བརྟན་པ་མཐར་ཕྱིན་ཡེངས་ཡུལ་ཆོས་ཉིད་ངེས། །ཆོས་ཟད་དུས་ན་མཚོན་བརྗོད་ཡུལ་ལས་འདས། །དེ་འདྲའི་ཚད་དུ་སྐྱོལ་བ་མཛད་པར་ཞུ། །ཞེས་སོ། །གཉིས་པ་ལ། འདུ་བྱེད་ཀྱི་དྲན་པ། ཆོས་ཉིད་ཀྱི་དྲན་པ། རྗེས་སྣང་གི་དྲན་པ། མངོན་སུམ་གྱི་དྲན་པ། སྤྱོད་ཡུལ་གྱི་དྲན་པ། ཆོས་ཟད་ཀྱི་དྲན་པ་སྟེ་དྲུག་ལས། དང་པོ་ནི། སློབ་དཔོན་ཆེན་པོ་བི་མ་ལས། གྲོལ་ལུགས་རྣམ་པ་གསུམ་བཤད་པའི། དང་པོ་རྣམ་རྟོག་ངོ་ཤེས་པས་གྲོལ་བ་སྔར་འདྲིས་ཀྱི་མི་དང་འཕྲད་པ་ལྟ་བུ་གསུངས་པའི་དོན་དང་གཅིག་པ་སྟེ།
འདི་ལ་སྤྱིར་སྔགས་བླ་མེད་ཀྱི་བསྐྱེད་རིམ་སྔོན་སོང་ཡིན་ན། དེ་ལས་ལོགས་སུ་ཞི་གནས་སྒྲུབ་མི་དགོས་མོད་དེ། འོན་ཀྱང་རྣམ་པ་ཀུན་ཏུ་བསྐྱེད་རིམ་ལ་མ་བརྟེན་པར་རྫོགས་རིམ་སྒོམ་ཚུལ་གཏན་ནས་མེད་པ་མིན་ཏེ། ཀ་དག་གི་རིག་པ་རྗེན་དེད་འབའ་ཞིག་པས་ཀྱང་འོད་གསལ་མངོན་དུ་འགྱུར་བར་ཐེག་པའི་རྒྱལ་པོ་འདིའི་ལུགས་ལ་གྲགས་པའི་ཕྱིར་རོ། །དེའང་དང་པོ་རྣམ་རྟོག་གི་རྒྱུ་བ་ཧ་ཅང་རགས་ཆེས་པས་ཏིང་འཛིན་ལ་བློ་ལས་སུ་མི་རུང་བའི་རིགས་ཁ་ཅིག །སེམས་དང་རིག་པའི་ལ་ཤན་ཉམས་མྱོང་གི་སྟེང་ནས་མྱུར་བར་མི་ཕྱེད་དེ། སེམས་དང་རིག་པའི་དྭངས་ཆ་མཐར་གཏུག་ན་རིག་པ་ཡིན་ལ། དེ་རྗེན་ལ་འབྱིན་པ་སེམས་རྙོགས་པ་ཅན་ལ་ཤིན་ཏུ་དཀའ་བའི་ཕྱིར་རོ། །དེའི་ཕྱིར་དེ་དག་གི་ཐོག་མར་རིག་ངོ་བསྐྱང་བའི་སྔ་ལོགས་སུ་སེམས་ངོ་ལ་བལྟ་བ་འདི་གནད་ཆེ་བས། གནས་འགྱུ་རིག་གསུམ་ལ་ཤན་ཕྱེས་ཏེ། འགྱུ་བ་ཞེས་པ་བཟང་ངན་གྱི་རྟོག་པ་ཕྲ་རགས་གང་ཡང་རུང་སྟེ་འཕྲོ་བའི་ཆར་གཏོགས་རྣམས་ཡིན། གནས་པ་ཞེས་པ་སེམས་ས་ལེ་ཧྲིག་གེ་བའི་ངོ་བོ་ལ་བྱིང་རྒོད་མ་ཞུགས་པ་དེ་ཡིན། རིག་པ་ཞེས་བྱ་བ་གནས་པའི་རྒྱུན་སྐྱོང་བ་ན་འགྱུ་བའི་གཞན་དབང་བཙན་ནམ་མི་བཙན་རྟོག་བྱེད་ཀྱི་ཤེས་རིག་དེ་
ཡིན། ལར་ཤེས་པ་སྤྲོ་བའི་དུས་སུ་བསྡུས་ཏེ་འགྲོ་བ་དང༌། རྟོག་པ་བསྡུས་ན་འཕྲོ་རྒོད་དུ་འགྲོ་བ་གཉིས་ཀ་སྤྱིར་བཏང་དུ་ཏིང་འཛིན་གྱི་གེགས་ཡིན་པས། འགྱུ་བ་བཟང་ངན་ཐམས་ཅད་གནས་པའི་ངང་གཅིག་ཏུ་ལྷོད་དེ་འཇོག་པ་ཞིག་དགོས་རྒྱུ་ཡིན། དེའང་བྱིང་བའི་དུས་སུ་སེམས་ཀྱི་གསལ་ཆ་བགྲུངས་པ་དང༌། རྒོད་པའི་དུས་སུ་སེམས་ཁོ་རང་གི་ངོ་བོ་ལ་ཅེར་གྱིས་བལྟ་བ་སོགས་གེགས་སེལ་གྱི་མན་ངག་ནི་ཤིན་ཏུ་གལ་ཆེ་སྟེ། གཞན་དུ་ན་བྱིང་བ་ཕྲ་མོ་བསགས་དྲག་པས་ཀྱང་ཞི་གནས་དང་འཁྲུལ་ཚབས་ཆེས་ཆེ་བཞིག་འོང་བའི་ཕྱིར་རོ། །མདོར་ན་སེམས་དམིགས་ལས་སུ་རུང་བའི་ཤིན་སྦྱང་དང་འབྲེལ་བ་ཡང་དག་པའི་ཏིང་འཛིན་ནི་ལེ་ལོ་དང་བྱིང་རྒོད་སོགས་བསམ་གཏན་གྱི་ཉེས་པས་མ་བསླད་པའི་ཤེས་རིག་གི་རང་ཚུགས་མ་ཤོར་བ་ཉིད་ཀྱིས་ཕྱེ་ཞིང༌། དེའང་སྐྱོང་ཚུལ་གྱི་གཙོ་བོ་སེམས་ཁོ་རང་གི་ངོ་བོ་མ་བརྗེད་པའི་ངང་ལ་གནས་པ་འདི་ཡིན་ལ་དེ་འདྲའི་སྐྱོང་ལུགས་ནི་དྲན་པ་འབའ་ཞིག་གཙོ་ཆེ་བའི་སྒོ་ནས་འཇོག་དགོས་ཏེ། སེམས་ངོ་བོ་མི་བརྗེད་པ་ནི་དྲན་པའི་ར་བ་ལས་འདའ་བ་མེད་པའི་ཕྱིར་རོ། །དེ་ལ་འདུ་བྱེད་ཀྱི་ཐ་སྙད་སྦྱར་བ་ནི། དེ་སྒོམ་པ་ན་ཏིང་ངེ་འཛིན་ལ་རྩོལ་བ་མ་ཉམས་པ་ཁོ་ན་ཞིག་སྙིང་པོར་འདུག་པའི་ཕྱིར་རོ། །དེ་
ལྟར་ན་འདུ་བྱེད་ཀྱི་དྲན་པ་ཞེས་བྱའོ། །གཉིས་པ་ནི། འདུ་བྱེད་ཀྱི་དྲན་པས་བློ་ལས་སུ་རུང་བར་གྱུར་པ་ན་རང་བཞིན་རྫོགས་པ་ཆེན་པོའི་ལམ་གྱིས་གྲོལ་ལུགས་གཉིས་པ་རྣམ་རྟོག་སྦྲུལ་གྱི་མདུད་པ་ཞིག་པ་ལྟ་བུའི་མན་ངག་ལ་བརྟེན་ནས་སེམས་ལས་འདས་པའི་རིག་པ་ལམ་དུ་བྱ་སྟེ། དེ་ལ་ནི་རྟོག་གེས་དཔྱད་ར་དང་སྟོང་ཉིད་དཔྱད་སྒོམ་རྐྱང་པ་ཙམ་ཞིག་གིས་མི་ཆོག་པས། སངས་རྒྱས་སྒྲུབ་པའི་ལམ་མྱུར་བའི་ནང་ནས་མཐར་ཐུག་པ་ཞིག་ཡོད་པ་དེ་ཉིད་ཁོ་ན་ལ་ཆིག་སྒྲིལ་བྱ་བ་ཡིན་ནོ། །དེའང་མཉམ་པར་འཇོག་ས་ཤ་སེལ་རུས་སེལ་ཞིག་ལ་སྟོང་ཉིད་ལས་ལྷག་པ་མེད་མོད་ཀྱི། འཇོག་བྱེད་ཀྱི་ཐབས་ལ་ནི་རྡོ་རྗེ་ཐེག་པ་བླ་མེད་ཤིན་ཏུ་འཕགས་ཏེ། རྒྱུད་ལས། གང་ཕྱིར་དམ་པའི་བདེ་བས་ཁྱོད། །ཚེ་འདི་ཉིད་ལ་རབ་འགྲུབ་འགྱུར། །ཞེས་གསུངས་པ་ལྟར་རང་བཞིན་ལྷན་ཅིག་སྐྱེས་པ་ཡེ་གྲོལ་ཐོག་མའི་མགོན་པོ་ཉིད་མངོན་དུ་བྱས་པ་ལ་བརྟེན་ནས་སྐད་ཅིག་རེ་རེས་ཀྱང་བསྐལ་པ་མང་པོའི་ཚོགས་ཀྱི་དོད་ཐུབ་ཡོང་བས། སྤྱིར་སྔགས་བླ་མེད་ཀྱི་རིམ་པ་གཉིས་པ་ནས་ཡོངས་སུ་གྲགས་པའི་མཆོག་ཏུ་འགྱུར་མེད་ཀྱི་ཡེ་ཤེས་ཉིད་ཟབ་མོའི་ཕྱོགས་ཐུན་མོང་མ་ཡིན་པ་དང༌། དེ་མངོན་དུ་བྱ་ལུགས་ཀྱང་དང་པོ་བླ་མེད་ཀྱི་སྔགས་
ལམ་དུ་ཞུགས་ནས་རིག་པ་རྗེན་འདེད་འབའ་ཞིག་ཏུ་གཏོང་བའི་ཉམས་ལེན་བསྟན་བྱའི་གཙོ་བོར་མཛད་པ་ནི་རྫོགས་པ་ཆེན་པོའི་གཞུང་གི་ཚོགས་ཁོ་ནར་ཟད་པའི་ཕྱིར་ལམ་གྱི་གནད་ཤེས་ནས་མྱོང་བ་འདོན་དགོས་སོ། །འདོན་ལུགས་དངོས་ནི། སྔར་བླ་མས་ངོ་སྤྲད་པའི་རིག་པ་དེ་ཉིད་ཉམས་ལེན་གྱི་དངོས་གཞིར་བཞག་སྟེ་དེ་ཀའི་ངང་ལ་བཟོ་བཅོས་མེད་པར་ཕྱམ་གྱིས་བཞག་པས་གཟུང་འཛིན་གྱི་རྟོག་པ་ཐམས་ཅད་དབྱིངས་སུ་ནུབ་པ་ཙམ་དང་པོ་ནས་མ་བྱུང་རུང༌། དེ་དག་ཐམས་ཅད་རྩིས་མེད་དུ་སོང་ནས་ནད་ཆེན་པོས་གཟིར་བའི་མི་ལ་ཟ་འོག་གི་ལྟད་མོ་ཇི་ལྟར་བསྟན་ཡང་བློའི་འཛིན་སྟངས་སྡུག་བསྔལ་གྱིས་ནོན་པའི་ཕྱིར་དེ་ལ་བལྟ་རྟོག་མི་གཏོང་བ་བཞིན་དུ། བློའི་འཛིན་སྟངས་འོད་གསལ་གྱི་རྣམ་པས་འཕྲོག་པ་དུང་དུང་བ་ཞིག་ཡོང་རྒྱུ་ཡིན། དེའང་རིག་པ་རྒྱུན་སྐྱོང་ཟེར་བ་བླ་མའི་ངོ་སྤྲོད་པའི་ཡེ་ཤེས་དེ་ངའོ་སྙམ་པ་དང་སྔར་གྱི་ངོ་སྤྲོད་བཏབ་ལུགས། བསམ་མནོ་བཏང་བ་ལྟ་བུ་ཞིག་མིན་གྱི་ཀུན་རྟོག་བརྒྱད་ཅུ་ལས་རླུང་བག་ཆགས་དང་བཅས་པའི་མཐར་ཐུག་གི་ཡལ་ས་ངོས་བཟུང་ནས་དེའི་རྣམ་པ་མ་བརྗེད་ཙམ་དུ་བསྡད་ན་ཁྲེགས་ཆོད་ཀྱི་སྒོམ་ཐམས་ཅད་ཀྱི་སྙིང་རྡོ་དེ་ཀ་རང་ཡིན། དེ་ལྟར་རིག་ངོ་མ་བརྗེད་པའི་དྲན་པ་ལ་ཆོས་ཉིད་ཀྱི་དྲན་པ་ཟེར་བའི་གནད་ནི། སྤྱིར་རྒྱུད་སྡེ་མང་པོ་ནས་འོད་གསལ་དོན་དམ་བདེན་པའི་
ཐ་སྙད་སྦྱར་བ་ཆེས་མང་ཞིང་དེའི་དོན་ཡང༌། དོན་གྱི་འོད་གསལ་མ་མཐོང་བར་རིག་སྟོང་ཁ་སྦྱར་དཔྱིས་ཕྱིན་པ་ཞིག་མི་འོང་ཡང༌། ཁོ་རང་གི་ངོ་བོ་ཡེ་ནས་སྟོང་གསལ་བརྗོད་དུ་མེད་པའི་རྣམ་པ་ཅན་ཡིན་པ་ལྟར། འདིར་ཡང་རྒྱུ་མཚན་དེ་ཉིད་ཀྱི་སྒོ་ནས་ཆོས་ཉིད་དུ་བཏགས་པའི་ཁྱད་པར་སྟོང་ཉིད་བཅུ་དྲུག་སོགས་ཕྱེ་བའི་རྣམ་པའང་སྟོང་གཞིའི་སྟེང་ནས་ཡིན་པ་ལྟར། འདིར་ཡང་སྟོང་ལུགས་དབུ་མའི་གཞུང་ནས་བཤད་ཚུལ་དང་ཁྱད་མེད་མོད་ཀྱི། སྟོང་གཞི་རིག་པ་ཡིན་པའི་སྒོ་ནས་དེའི་སྟོང་ཉིད་ཀྱང་ཁྱད་པར་བ་ཞིག་འཇོག་རྒྱུ་ཡོད་དེ། སེམས་ཅན་དང་སངས་རྒྱས་འཕགས་པ་གཉིས་ཀྱི་སྟོང་ཉིད་ལ་སྟོང་ལུགས་འདྲ་ཡང་སྟོང་གཞི་མི་འདྲ་བའི་སྟེང་ནས་ངོ་བོ་ཉིད་སྐུ་ཡིན་མིན་གཉིས་འོང་བ་བཞིན་ནོ། །དེ་ཕྱིར་དེ་འདྲའི་འོད་གསལ་གྱི་སེམས་སྟོང་གཞིར་བྱས་པའི་ཆོས་ཉིད་ཀྱི་ངང་མ་བརྗེད་པའི་དྲན་པ་ཡིན་པས་ཕྱིར་བརྡ་ཆད་དེ་ལྟར་མཛད་དོ། །གསུམ་པ་ནི། མཉམ་བཞག་ཏུ་རིག་ངོ་དེ་ལྟར་སྐྱོང་བར་མ་ཟད་རྗེས་ཐོབ་ཏུའང་ཡུལ་དྲུག་ཤེས་དབང་དང་བཅས་པའི་སྤྲོས་པའི་མཐའ་ཀ་ནས་དག་པ་འོད་གསལ་གྱི་སེམས་སམ་ཀུན་ཏུ་བཟང་པོ་གཞི་གྲོལ་གཉུག་མའི་སྐུ་ལས་མ་གཡོས་བཞིན་དུ་རིག་པའི་རྩལ་དེ་ལྟར་ཤར་བ་ལ་ངེས་པ་དྲངས་ཏེ་ལྷུན་གྲུབ་ཀྱི་གདངས་དག་པ་རབ་འབྱམས་ཀྱི་
ལམ་ཁྱེར་ལ་སྒྲིལ་ལུགས་ཀུན་མཁྱེན་བླ་མ་གཉིས་པའི་སྒོམ་ཕྱོགས་དྲིས་ལན་སྐོར་དུ་གསལ་བ་བཞིན་ཉམས་སུ་བླང༌། འདིར་ཡང་སྤྱིར་ལྷ་བཙུན་མཁའ་འགྲོའི་དབང་ཕྱུག་གིས། ང་རྫོགས་པ་ཆེན་པོའི་རྣལ་འབྱོར་པ། །ཆོས་ཐམས་ཅད་རིག་པ་རྗེན་པར་རྟོགས། །ཞེས་གསུངས་པ་ལྟར་གནད་གོ་ན་རྫོགས་ཆེན་ཁྲེགས་ཆོད་ཀྱི་ལམ་ཕལ་མོ་ཆེ་སྣང་ཤེས་གཞི་གྲོལ་གྱི་གོ་དོན་ལ་ཐུག་པ་ཡིན་ཏེ། འཇིག་རྟེན་ན་བརྟན་པ་དང་གཡོ་བའི་སྣང་ཆ་ཐམས་ཅད་ལས་ལས་བྱུང་ཞིང་ལས་ཀྱི་རྩ་བ་སེམས་ཡིན་ལུགས་ནི་ཁམས་གསུམ་ན་སེམས་གཙོ་བོར་ཟླ་བའི་ཞབས་ཀྱིས་འཇུག་འགྲེལ་དུ་སྒྲུབ་ཅིང༌། འདིར་ནི་དེ་ཙམ་གཞིར་བཞག་ཏུ་མ་ཟད་ཁམས་གསུམ་ན་གཙོ་བོར་གྱུར་པའི་སེམས་དེའང་རླུང་གི་བཞོན་པ་ཅན་དང༌། རླུང་ཐམས་ཅད་ཀྱི་སྐྱེད་སྡུད་བྱ་བ་མཐར་ཐུག་དུར་ཁྲོད་ཕུང་པོའི་བར། སེམས་ཀྱི་ངོ་བོ་ཡེ་ཤེས་ཏེ། །དེ་ལ་གཟུང་འཛིན་རྩལ་དུ་ཤར། །ཞེས་སེམས་ཀྱི་བདག་པོའམ་བསྐྱེད་གཞིའི་མཐར་ཐུག་འོད་གསལ་གྱི་ཡེ་ཤེས་ཡིན་པར་གསུངས་པ་ལྟར། རིག་པ་ཉིད་ལ་ཐུག་ལུགས་ཀྱི་གོ་བ་ཞིབ་ཏུ་སྦྱང་བ་ན། དེང་སང་གི་བླུན་སྒོམ་མ་རྟོགས་རྟོགས་བརྫུའི་རིགས་ཕལ་ཆེར་རིག་པའི་རྩལ་ཞེས་པའི་གོ་དོན་མཐར་ཐུག་རྣམ་རྟོག་ལ་ཕོ་གྲི་མོ་མདུང་གིས་ངན་སྐྱེལ་མི་བྱེད་ཙམ་
ལས་ཅི་ཡང་མེད་པར་གྲུབ་མཐའ་འཆའ་བ་རྣམས་ཀྱི་རྫུན་རྐུབ་རྡོལ་བ་ཡིན། དེ་ལྟར་རྗེས་སྣང་གི་སྤྱོད་ཡུལ་ཐམས་ཅད་རིག་རྩལ་སྒྱུ་མའི་རྣལ་འབྱོར་དུ་ཁྱེར་བ་ནི། དེའི་ཚུགས་མི་འཆོར་བའི་ཁྱབ་གདལ་གྱི་དྲན་པའི་ངང་བསྐྱང་ན་སྤར་དེ་ཉིད་ལ་བརྟེན་ཏེ་མཉམ་བཞག་གི་རིག་པ་འདྲེན་ནུས་ཚུལ་ནི་རྒྱུད་སྡེ་འདིར་མ་ཟད་རྣལ་འབྱོར་ཆེན་པོའི་རྒྱུད་དགོངས་འགྲེལ་དང་བཅས་པ་ལས་ཤིན་ཏུ་གསལ་བར་བཤད་དོ། །བཞི་པ་ནི། གྲོལ་ལུགས་གསུམ་གྱི་རྣམ་བཞག་ཀྱང་རྫོགས་ཆེན་སྒོམ་པའི་དུས་ལ་ལྟོས་ནས་ཡིན་གྱིས། རྟོགས་པའི་དུས་ཀྱི་དབང་དུ་བཤད་པ་མིན་ནོ། །དེའི་རྒྱུ་མཚན་རྫོགས་པ་ཆེན་པོའི་བསམ་གྱིས་མི་ཁྱབ་པའི་རིག་པ་ནི་ཀུན་རྟོག་གི་མཚན་མ་མ་ཟད་སྣང་བ་གསུམ་གྱི་སེམས་ལས་ཀྱང་རྣམ་པར་གྲོལ་བའི་འོད་གསལ་ཡིན་པར་ཐེག་པའི་རྒྱལ་པོ་འདིའི་དོན་གྱི་ཤིང་རྟ་ཆེན་པོ་ཀུན་མཁྱེན་འཇིགས་མེད་གླིང་པའི་ཞབས་ཀྱང་བཤད་དེ། སྐུ་གསུམ་ཞིང་སྦྱོང་དུ་སྣང་གསུམ་འཆར་ལུགས་བཤད་ནས། མཐར་དོན་གྱི་འོད་གསལ་གྱི་རྣམ་པ་བསྟན་པའི། དེ་མ་ཐག་པར། དེ་ཚེ་ད་ལྟའི་ཀ་དག་བློ་བྲལ་དབྱིངས། །ཐ་མལ་ཤེས་པ་ཟང་ཀ་རྒྱ་ཡན་ལ། །ངེས་པ་རྙེད་དེ་མཉམ་པར་བཞག་པའི་མཐུས། །གདོད་མའི་གཞི་དབྱིངས་ནང་གསལ་གསང་བའི་
སྦུབས། ཁྱད་ཆོས་དྲུག་ལྡན་གཞོན་ནུ་བུམ་སྐུའི་ཀློང༌། །སྐད་ཅིག་ཉིད་ལ་བཙན་ས་ཟིན་པར་ཤོག །ཅེས་སོགས་བརྗོད་ཀྱིས་མི་ལང་བ་ཞིག་བཤད་པ་ཡིན་ཏེ། དེ་ལྟར་འོད་གསལ་འཆར་བ་དང་རྫོགས་ཆེན་མངོན་སུམ་རྟོགས་པ་དོན་གཅིག་ཏུ་དགོས་ཤིང༌། རླུང་དབུ་མར་མ་ཞུགས་ཀྱི་རིང་ལ་དེ་མི་འོང་བར། ཀུན་མཁྱེན་གྱིས། གཟུང་འཛིན་གྱི་ལས་རླུང་དབུ་མ་རུ་ཚུད་པས། །རྫོགས་ཆེན་ཁོས་བསླུས་ཡོང་བསམ་པ་རང་མི་གདའ། །ཞེས་སོགས་གསུང༌། དེ་ཙ་ན་རླུང་དབུ་མར་འདུ་ཤུགས་ཅུད་དྲག་པ་ནས་བརྩམ་སྟེ། མཉམ་བཞག་གི་དངོས་གཞིར་ལས་རླུང་དང༌། དེ་ལ་བརྟེན་པའི་རྣམ་རྟོག་གི་རྒྱུ་བ་རྣམས་རང་འགགས་སུ་འགྲོ་བ་ཡིན་ན། གྲོལ་ལུགས་གསུམ་ནི་རྣམ་རྟོག་མ་ནུབ་པའི་ཐད་ནས་ཉམས་ལེན་སྐྱོང་ལུགས་སུ་འདུག་པའི་ཕྱིར་རོ། །རྫོགས་ཆེན་མངོན་སུམ་དུ་མཐོང་བ་རྫོགས་པ་ཆེན་པོའི་སྦྱོར་ལམ་ནས་འོང་ཞིང༌། རྫོགས་ཆེན་སྒོམ་པ་ཚོགས་ལམ་ནས་ཡོད་པ་དང༌། རྣམ་རྟོག་ལ་འདོར་ལེན་གཙོ་བོར་མི་བྱེད་པར་འཇོག་པ་ཕྱི་མ་དང༌། དེའི་སྟོབས་ཀྱིས་སྔ་མའི་དྲོད་ཚད་ཀྱང་ཞར་ལ་འབྱུང་བ་སོགས་རྡོ་རྗེའི་ལམ་འདིའི་འགྲོ་ཕྱོགས་ཙམ་ཡང་མ་མཐོང་བའི་སྒོམ་ཆེན་པ་ཁ་ཅིག་ལ། ངེད་ཀྱི་ཀུན་རྟོག་དབྱིངས་སུ་ནུབ་པའི་ཉམས་ལེན་གྱི་གནད་ལབ་པ་
ཡང་སྔོན་མེད་བྱ་རོག་དཀར་པོ་མཐོང་གིན་གདའ་སྟེ། འོན་ཀྱང་གཡག་སྣ་ཁུ་ཚུར་གྱི་གཏམ་སྨྱོ་འགྲོས་མར་བཤད་པ་ཡིན་ལགས། དེ་ལྟར་ཚུལ་འདིས། ཀློང་གྱུར་དུས་སུ་ཡེངས་མེད་ཡེངས་མཁན་མེད། །ཞེས་པའང་རྫོགས་པ་ཆེན་པོའི་འོད་གསལ་གྱི་སེམས་དེ་ཉིད་ལྷག་གེར་མཐོང་བ་ན་ཡེངས་ཡུལ་དྲུག་དང་ཡེངས་མཁན་གྱི་གཉིས་འཛིན་ཐམས་ཅད་ལས་རླུང་ཟད་པའི་ལག་རྗེས་སུ་རང་དེངས་ཆེན་པོར་ཐལ་བའི་དོན་ཡིན་གྱི་ཡེངས་མི་དགོས་པའི་བརྟན་ཆ་ཙམ་ཞིག་བསྟན་པ་མིན། འདི་ལ་ནི་ཇི་སྲིད་དུ་རླུང་གི་གཡོ་བ་ལ་བརྟེན་ནས་མཉམ་བཞག་གི་རིག་པ་རྩལ་གྱི་རྣམ་པར་རྟོག་པ་སྣང་གསུམ་དང་བཅས་པས་རང་ཞལ་བསྒྲིབས་ཏེ། རྣལ་འབྱོར་པས་ཉམས་མྱོང་རང་མལ་ནས་བསླང་བར་མ་གྱུར་པ་དེ་སྲིད་དུ་སེམས་ཀྱི་རྡོ་རྗེའི་ངང་མ་ཤོར་བ་ཉིད་ལ་དྲན་པའི་ཐ་སྙད་བཞག་གིས། དྲན་ལུགས་སྔ་མ་རྣམས་དང་ཡེ་མི་མཐུན་པར་ཤེས་དགོས་སོ། །ལྔ་པ་ནི། མཉམ་བཞག་གི་ཉམས་ལེན་དེ་དང་རྗེས་ཐོབ་ཀྱི་སྣང་ཆ་གཉིས་ནུས་པ་བསྲེས་ཏེ། སྣང་རིག་འོད་གསལ་གྱི་གདངས་སུ་རྟོགས་པའི་མྱོང་བ་ལ་རྩལ་འདོན་བྱ་བ་སྟེ། འདི་དང་ས་བཅད་གསུམ་པ་གཉིས་པོ་ཕྱོགས་མཚུངས་ཡང༌། སྔ་མ་ནི། རིག་ངོ་སྒོམ་པའི་དུས་མཐུན་མཚམས་ཀྱི་ཉམས་ལེན་སྐྱོང་
ལུགས་དང༌། འདི་ནི་མྱོང་སྟོབས་ཀྱིས་རིག་པ་འདྲེན་ནུས་པའི་ས་མཚམས་ནས་རྗེས་སྣང་ལམ་ཁྱེར་བྱ་ལུགས་ཡིན་པས། དེ་གཉིས་མཉམ་བཞག་ཏུ་རླུང་དབུ་མར་ཞུགས་མ་ཞུགས་ཀྱི་སྟེང་ནས་ཉམས་ལེན་ལ་ངར་ཆེ་ཆུང་གི་ཁྱད་ཐང་ཆེན་པོ་འོང་བ་བཞིན་དུ། རྗེས་སྣང་དུའང་ནུས་པ་བསྲེ་ལུགས་ལ་ཁྱད་ཆེན་པོ་ཞིག་འོང་ངོ། །དྲུག་པ་ནི། རྫོགས་པ་ཆེན་པོའི་ལམ་ལྔའི་རྣམ་བཞག་ཡང་ཡིག་ནམ་མཁའ་ཀློང་ཡངས་སུ་ཇི་སྐད་བཤད་པའི་ནང་མཐོང་ལམ་གྱི་རྟོགས་པ་མངོན་དུ་གྱུར་ཕན་ཆད་དྲན་པ་འདི་ཉིད་འོང་བ་བཤད་པར་སྣང་ལ། དེའི་ཚུལ་ཡང་སྤྱིར་རྫོགས་པ་ཆེན་པོ་མཐོང་མ་མཐོང་དང༌། རྫོགས་ཆེན་ལྷུན་གྲུབ་ཀྱི་རིག་པ་ཆོས་ཉིད་ཟབ་མོའི་དེ་ཁོ་ན་ཉིད་མངོན་སུམ་དུ་མཐོང་མ་མཐོང་ལ་ཁྱད་པར་ཆེན་པོ་ཡོད་དེ། སྔ་མ་འདི་སྦྱོར་ལམ་དང༌། ཕྱི་མ་མཐོང་ལམ་ནས་འབྱུང་བའི་ཕྱིར་ཏེ། ལམ་ལྔའི་རྣམ་བཞག་རགས་པ་ཙམ་རེ་ཆགས་ཀྱང་འདི་འདྲའི་གོ་བ་ནི་ཤིན་ཏུ་སླ་མོད་དེ། དེང་སང་ནི་རིག་སྟོང་ཁ་སྦྱར་གྱི་འབྲུ་དོན་འདི་ཙམ་ཡིད་ངོར་འཆར་བ་ཉུང་ངུར་བས་སོ། །དེའི་ཕྱིར་འོད་གསལ་གྱི་རིག་པ་འཁྲུལ་རྟོག་ཐམས་ཅད་ཀྱིས་མ་བསླད་པའི་ཕྱིར་རྟོག་མེད་ནམ་མཁའ་ལྟ་བུའི་ཐ་སྙད་སྦྱར་བ་ནི་ཕྱོགས་སྔ་མར་ཡང་ཡོད་མོད་ཀྱི་དེ་ཉིད་བསམ་གྱིས་མི་ཁྱབ་པའི་མཐའ་བྲལ་སྟོང་པ་ཉིད་དུ་
གཉིས་སྣང་ཕྲ་མོ་ཡང་ནུབ་པའི་ཡེ་ཤེས་ཀྱི་ངོར་སོན་པ་ནི་ཕྱོགས་ཕྱི་མ་ཁོ་ན་ལ་བཞག་དགོས་པས་མཚོན་བརྗོད་ལས་འདས་ལུགས་ཁྱད་པར་བ་ཞིག་ཡིན་ནོ། །དེ་དག་གི་རྣམ་བཞག་རྒྱ་ཆེར་ཀུན་མཁྱེན་ཆོས་ཀྱི་རྒྱལ་པོ་ཡབ་སྲས་རྗེས་འབྲང་དང་བཅས་པའི་གསུང་རབ་ཀྱི་ཕུང་པོ་མཐའ་ཡས་པ་ཞིག་རྒྱབ་ཆོས་སུ་བྱར་ཡོད་མོད་དེ་རེ་ཞིག་བཞག་གོ །སྤྱིར་ཆོས་ཟད་ཞེས་པ་སྣང་བཞིའི་ནང་ཚན་གྱི་དེ་དང༌། སྐབས་འདིའི་དེ་ལ་ཁྱད་པར་ཡོད་པའི་ཕྱོགས་བཟུང་ན་སྣང་བཞིའི་ནང་ཚན་གྱི་ཚད་ཕེབས་ཀྱང་དེར་འདུ་ལ། དེ་གཉིས་ལ་ཁྱད་པར་མེད་པའི་ཕྱོགས་བཟུང་ན་ཚད་ཕེབས་དང༌། མཐར་ཐུག་ལྷུན་གྲུབ་རིན་པོ་ཆེའི་སྦུབས་གཉིས་ཕྱོགས་མཐུན་དུ་བསྡུ་བ་སོགས་ཤེས་པར་བྱའོ། །དེ་ལྟར་ན་ཚིགས་སུ་བཅད་པ་འདི་དག་གིས། དང་པོ་ཞི་གནས་བསྒྲུབ་ཚུལ། བར་དུ་འོད་གསལ་སྒོམ་ལུགས། ཐ་མ་རྫོགས་ཆེན་འཆར་ལུགས། དེ་ལས་འབྲས་བུ་འགྲུབ་ཚུལ་ཏེ། ཐེག་པའི་རྒྱལ་པོ་འདིའི་ལམ་འབྲས་བུ་དང་བཅས་པ་ཞིག་བསྡུས་པར་གྱུར་པ་ཡིན་ནོ། །ཐེག་མཆོག་རྨད་བྱུང་རྒྱལ་པོའི་གཏམ། །ཟིལ་པའི་ནང་ནས་ཟིལ་པ་དང༌། །དུམ་བུ་ལས་ཀྱང་དུམ་བུ་ཞིག །བྲིས་འདིས་འཇིག་རྟེན་དགེ་བྱེད་ཤོག །ཅེས་པའང་དད་ལྡན་གྱི་སློབ་མ་འགྱུར་མེད་རྡོ་རྗེའི་ངོར། སྤྲང་པོ་
འཇིགས་མེད་པས་ཇ་བར་ཞིག་ལ་ཤར་མར་བྲིས་པ་དགེ་ཞིང་བཀྲ་ཤིས་སོ། །དགེའོ།། ༈ །།བླ་མ་དྲི་མེད་འོད་ཟེར་ལ། །གུས་འདུད་སྙིམ་པས་རབ་མཆོད་དེ། །ཀུན་མཁྱེན་བླ་མའི་མན་ངག་གི༌།ཟིལ་ཐིགས་ཉུང་ཟད་ཙམ་ཞིག་བརྗོད། །སེམས་དང་རིག་པ་ཞེས་བྱ་བ་འདི་ཐུན་མོང་གི་གཞུང་ཁ་ཅིག་ཏུ་གཙོ་སེམས་ཐམས་ཅད་སེམས་ཡིན་ལ། གསལ་ཞིང་རིག་པ་ཤེས་པ་ཡིན་ཏེ། སེམས་དང་རྣམ་ཤེས་དོན་གཅིག །ཤེས་པ་དང་རིག་པ་དོན་གཅིག་ཏུ་འདོད་ཀྱང་རྫོགས་ཆེན་གྱི་གཞུང་ལས་བཤད་པའི་སེམས་རིག་གི་ངོས་འཛིན་ནི་དེ་ཙམ་ལ་མི་བྱེད་དེ། སྲིད་པའི་རྩ་བ་བདེན་འཛིན་ཆ་དང་བཅས་པ་ནི་སེམས་ཡིན་ལ། ཆོས་ཉིད་ཀྱི་དོན་ལ་མཉམ་པར་བཞག་པའི་ཡེ་ཤེས་ནི་རིག་པ་སྟེ། དེ་ཡང་དབུ་མའི་ལྟ་བ་ཐུན་མོང་བ་ཙམ་དང་མི་འདྲ་སྟེ། སངས་རྒྱས་རྣམས་ཀྱི་ཇི་ལྟ་བ་གཟིགས་པ་དེ་ཉིད་སེམས་ཅན་རྣམས་ཀྱི་གནས་ཚུལ་ལ་གཞི་རྫོགས་སུ་བཞུགས་པར་རིགས་པའི་ལམ་ནས་དྲང་བའི་ངེས་ཤེས་ཁྱད་པར་ཅན་བསྐྱེད་དེ་གཅིག་ཏུ་ན་དོན་དམ་པར་བདེན་གྲུབ་དང་བདེན་མེད་གཉིས་ཀ་མེད་མཉམ་ཡིན་པར་རྟོགས་པས་དོན་དམ་རིགས་ཤེས་ཀྱི་ངོར་ལྟ་བའི་འཛིན་སྟངས་ཞིག་པ་དང༌། གཉིས་སུ་ན་ཐ་སྙད་ཀྱི་གནས་ཚུལ་དུ་ཆོས་ཐམས་ཅད་དག་པ་རབ་འབྱམས་སུ་བལྟ་བའི་ཉམས་ལེན་
གྱིས་འཕགས་པའི་ཕྱིར་རོ། །སྔགས་ཕྱི་པ་ལས་འཕགས་ཏེ། སྐུ་དང་ཡེ་ཤེས་སུ་བལྟས་ནས་དེའི་གཤིས་ལུགས་ཆེན་པོར་མ་བཅོས་པར་འཇོག་པའི་ཚུལ་གཉིས་ཀ་དང་ལྡན་པ་ཞིག་གནད་ཟབ་པ་ལགས། གནས་འདི་ཕར་ཕྱིན་ཐེག་པ་ལས་འཕགས་ཏེ། དག་པ་རབ་འབྱམས་སུ་ལྟ་བའི་ཉམས་ལེན་གྱིས་འཕགས་པའི་ཕྱིར་རོ། །སྔགས་ཕྱི་པ་ལས་ཀྱང་འཕགས་ཏེ། ཕྱི་རྒྱུད་དུ་ལྷའི་རྣལ་འབྱོར་ཡོད་ཀྱང་སྣང་བ་འདི་ཉིད་གནས་ཚུལ་ལ་སྐུ་དང་ཡེ་ཤེས་སུ་གདོད་ནས་སངས་རྒྱས་པར་ལྟ་བ་མེད་པའི་ཕྱིར་རོ། །མ་ཧཱ་དང་ཨ་ནུ་ལས་ཀྱང་ཟབ་སྟེ། རྩོལ་བ་དང་བཅས་པའི་བསྐྱེད་རྫོགས་ལ་བསླབ་མི་དགོས་པར། ཆོས་ཐམས་ཅད་གདོད་ནས་དག་ཆེན་ཡེ་ཤེས་ཆེན་པོའི་གདངས་སུ་སངས་རྒྱས་ཟིན་པས་དེ་ལྟར་ངོ་ཤེས་ཐོག་ཏུ་བཞག་པས་ཆོག་པར་ཁས་བླང་སྟེ་གཞིའི་ཡིན་ལུགས་ཀྱི་སྟེང་དུ་གློད་པའི་ཕྱིར་རོ། །དེང་སང་གི་བསམ་གཏན་པ་ཁ་ཅིག་དང་ཡང་མི་འདྲ་སྟེ། དེང་སང་གི་བསམ་གཏན་པ་ཁ་ཅིག་ནི་འཁྲུལ་སྣང་འདིའི་སྟེང་དུ་འཇོག་པ་མ་གཏོགས་བདེན་ཞེན་གྱི་རྩ་བ་བཅད་པ་དང༌། དག་པ་རབ་འབྱམས་ཀྱི་གནས་ལུགས་རྟོགས་པ་མི་འདུག་པའི་ཕྱིར་རོ། །དེ་ལ་གནས་ཚུལ་སྐུ་དང་ཡེ་ཤེས་སུ་འདོད་པའང་ཐ་སྙད་ཀྱི་གནས་ལུགས་ལ་འཇོག་པ་དང༌།
དོན་དམ་པར་དག་མ་དག་གཉིས་ཀ་རང་བཞིན་མེད་པར་མཉམ་པ་དང༌། སྣང་བ་འདི་དག་པ་རབ་འབྱམས་ཡིན་པའི་སྒྲུབ་བྱེད་སོགས་ནི། ཀུན་གཟིགས་རོང་ཟོམ་པ་དང་རྒྱལ་བ་ཀློང་ཆེན་པའི་གཞུང་ལས་རྟོགས་པར་གྱིས་ཤིག །མདོར་ན་ཚུལ་དེ་དག་ལ་ངེས་ཤེས་མི་སྐྱེ་བའི་ཚེ་དཔྱད་སྒོམ་དང་ངེས་ཤེས་མ་ཉམས་པའི་སྐབས་བཞག་ནས་སྒོམ་པ་རེས་མོས་སུ་སྤེལ་བས་སྐྱོང་ཚུལ་རྣལ་མ་ཞིག་ཡིན་ནམ་སྙམ་ལགས། བླུན་པོས་ལོག་དཔྱད་འཆལ་བ་དང༌། །བླུན་ཚིག་དཔྱད་གསུམ་མ་དག་པ། །གང་ཞིག་ཁོ་བོས་འདིར་བཞག་པ། །དེ་ཀུན་ཁོ་བོ་བླུན་པས་ཡིན། །འདིར་ནི་ལེགས་པའི་ཆ་འགའ་དག །མཆིས་ན་ཁྱོད་རང་རྒྱུན་དུ་བཞེས། །ཞེས་པའང་དཔལ་སིང་གི་ངོར་གཞོན་ནུ་འཇིགས་མེད་པས་སོ།། །།དགེའོ།། ༈ །།བླ་མ་ལ་ཕྱག་འཚལ་ལོ། །སྤྲུལ་པའི་སྐུ་འཇིགས་མེད་རབ་བརྟན་ནས་རྗེ་བཙུན་བླ་མ་དམ་པ་སུ་མནྡྲའི་ཞལ་སྔ་ནས་མཛད་པའི་རྫོགས་ཆེན་གྱི་ལྟ་མགུར་ཤོ་ལོ་ཀའི་ཆིངས་སུ་བཅིང་ལུགས་ཤིག་དང༌། ལམ་དེ་ལ་ཐོག་མར་འཇུག་ཚུལ་གྱི་སྒོ་རགས་བསྡུས་ཙམ་ཞིག་བྲི་དགོས་ཞེས་གནང་བ་ལ། ལར་ངེད་ལྟ་བུའི་བྱིས་པ་ཤེད་མ་ཕྱེ་བ། རང་ཕྱོགས་བཟུང་ན་ཚུགས་མི་ཟིན། གཞན་རྗེས་བསྙེགས་ན་ས་མི་ཆོད་པའི་བླུན་པོ་འུག་ཁྲ་མགོ་ཞིག་གིས་རང་བཞིན་ཐེག་མཆོག་རྒྱལ་པོའི་དགོངས་པ་འགྲེལ་བ་འདི་ཡི་
མུག་ལ་དགོད་བྲོ་བར་འདུག་མོད་ཀྱི། མི་ཤུལ་དུ་ཁྱི་སྐྱེས། སྔོ་ཤུལ་རམ་བུས་བཟུང་བའི་གནས་སྐབས་སུ་གྱུར་པས་མ་བཤད་ན་སྙིང་པོ་བོ། བཤད་ན་ཁ་སྔར་སྔར་ཞིག་ལས་མི་འདུག་མོད། ལར་སྤྱིའི་ས་རྒྱ་རླབས་ཀྱིས་གཅོད་ན་བཤད་རྒྱུ་ཆེ་ཡང༌། ད་ལམ་ཁ་ར་བརྒྱང་ར་ཚོ་བཞག་ནས་གཡུ་ཕོ་ཤུལ་ལམ་དུ་ཞུགས་པ་ལྟར་གང་བྱུང་གི་ཚིག་ཉག་ཉོག་འཕྲེང་གཅིག་ཞུ་ན། རྒྱལ་དབང་པདྨས་ཞུས་ལན་བདུད་རྩི་གསེར་ཕྲེང་ལས། ཐེག་པ་ཆེན་པོ་གསང་སྔགས་སེམས་བསྐྱེད་ཁྱད་པར་ཞིག་གིས་རབ་ཏུ་ཕྱེ། ཞེས་གསུངས་པ་ལྟར། སྤྱིར་ཐེག་ཆེན། དགོས་གསང་སྔགས། ཡང་དགོས་སུ་རྫོགས་ཆེན་གྱི་ལྟ་སྒོམ་འདི་བྱང་ཆུབ་ཀྱི་སེམས་རིན་པོ་ཆེས་གཞི་བླང་བ་ལ་རག་ལས། སེམས་བསྐྱེད་དེ་ལ། སེམས་ཅན་ལ་སྙིང་རྗེ་ཆེན་པོ་དང༌། སངས་རྒྱས་ཀྱི་ཡོན་ཏན་ལ་ཡིད་ཆེས་གཉིས་གལ་ཆེ། དེ་དག་གི་རྩ་བ་བློ་ལྡོག་རྣམ་བཞི་དང༌། སྐྱབས་འགྲོ་གལ་ཆེ། རྫོགས་ཆེན་ལ་དང་པོ་འཇུག་པ། བར་དུ་བོགས་འདོན། ཐ་མ་འབྲས་བུ་མཆོག་འགྲུབ་པ་ཐམས་ཅད་བྱང་ཆུབ་ཀྱི་སེམས་ལ་ཐུག་ཡོད། སེམས་བསྐྱེད་འབྱོངས་ནས། བླ་མ་སངས་རྒྱས་སུ་ལྟ་བའི་དད་པ་འདི་གལ་ཆེ། ལར་དགེ་ཚུལ་གྱི་ཀཱ་རི་ཀ་ནས། ཐེག་མཆོག་རྒྱལ་པོའི་བར་གྱི། ལམ་སྤྱིའི་མགོ་བླ་མ་བསྟེན་པ་འདི་ཡིན་
པས། སེམས་བསྐྱེད་ལས་ཀྱང་སྔ་བར་འདི་གལ་ཆེན་དུ་ཤེས་ནས་སྒོམ་དགོས། ཁྱད་པར་རྫོགས་ཆེན་རྟོགས་པ་ལ་འདི་མེད་ན་རྩ་བ་ཆད་པ་ཟེར་ཆོག །དེ་དག་གི་གྲོགས་སུ་ཚོགས་བསགས་སྒྲིབ་སྦྱངས་འདི་གནད་རང་ཟབ། འུ་ཅག་འདྲ་བའི་སེམས་ཅན་བསམ་བསྒོམ་གནད་དུ་མི་འཁྱོལ་ཞིང༌། ཐོས་དོན་རྒྱུད་ལ་མི་འབྱོར་བ་འདི་གཅིག་ཏུ་ན་ལས་འཕྲོ་དམན་ཞིང༌། གཉིས་སུ་ན་ཆོས་ལ་བརྩོན་འགྲུས་ཆུང་བ། གསུམ་དུ་ན་སྡིག་སྒྲིབ་ཆེ་བའི་ལས་ལན་གྱིས་ཡིན་པས། འདི་དག་ལ་ལྷག་པར་སྒྲིབ་སྦྱང་ལ་འབད་དགོས། དེ་དག་ཐམས་ཅད་ཀྱི་དང་པོའི་རྨིང་རྡོ་དང༌། བར་དུ་སྐྱེལ་མ་ལྟར་གཅེས་པ་ཚེ་འདི་བློས་བཏང་འདི་ཡིན་ཏེ། བློ་ལྡོག་རྣམ་བཞི། ཞེས་པའི་ས་ཁོང་གིས་བསྡུས་ཆགས་བྱས་པ་ཡིན། དེང་སང་ང་བྱ་བྲལ་དང༌། འཁྲུལ་ཞིག་ཡིན་ཟེར་བ་ཚོ་ཡང་ད་དུང༌། བདག་ནི་རྙེད་མང་བཀུར་སྟི་བཅས། །བདག་ལ་མང་པོ་དགའ་འོ་ཞེས། །དེ་འདྲའི་སྙེམ་པ་འཆང་གྱུར་ན། །ཞེས་གསུངས་པའི་བསྟན་དོན་ལ་གཙིགས་ཆེ་བར་མཛད་པ་དེ་ཚོ་ཐམས་ཅད་ཀྱང་ཆོས་བརྒྱད་ཀྱི་འགོང་པོ་འདིས་ལན་པ་ཡིན་པས་ཅི་ཐུལ་ཅིག་དགོས་པ་ཡིན། དེ་དག་གིས་བཀའ་སྩལ་ཕྱི་མ་མི་བཟློག་ཙམ་ཞིག་བྱས་ནས། སྔ་མའི་ཕྱོགས་ལ། ངོས་ནས་ཡག་པོ་ཞིག་བཤད་མི་ཤེས་ཀྱང༌། རྒད་པོ་ཚོས་སྒྲུང་བླངས་པ་ལྟར་ས་
ཟེར་རྡོ་གཏམ་གྱི་དཔེར་བརྗོད་བྱས་ན། རྫོགས་ཆེན་ངས་ཤེས་སྙམ་ནས། མི་ཤེས་ཁ་ལ་བཏགས། ཤེས་རློམ་གྱིས་ཞི་རྩ་སྦོས། འདི་ལྟ་བ་མཐོ་ཡིན་འདུག །འདི་ཚོས་ཅང་མི་ཤེས་ཟེར་བའི་ཤན་འབྱེད་ཀྱི་ངང་མཆུ་ཅན་རྣམ་པ་ཚོ་ཡང༌། ཕལ་ཆེར་འདི་སེང་ལྕམ་དཀར་པོའི་ཕྲུ་གུ་རེ་ལོས་ཡིན་ཏེ། གཅིག་དང་གཉིས་གསུམ་ཚོར་སྤུའི་འུར་ཞོག་ལས་མི་འདུག་སྙམ་སྟེ། ངེད་མ་མེ་ལོང་ཡག་པོ་ཞིག་མེད་མ་གཏོགས། རྨིག་རྡོག་རྣོན་པོ་ཡོད་པས་འབྱུང་པོའི་རང་གཟུགས་དེ་རྗེན་ཅེར་གྱིས་བསྟན་པ་ཡིན། ངེད་དེ་ལྟར་ཟེར་བའི་གནད་ཅི་ཡིན་ན། རྫོགས་ཆེན་ཤེས་ན། གཅིག་ཏུ་རྫོགས་ཆེན་གྱི་སྒོམ་འདིས་སྲིད་རྩ་གཅོད་ལུགས་ཤིག་ཡོད་ཨ། གཉིས་སུ་རྫོགས་ཆེན་འདི་མདོ་ལས་ཁྱད་དུ་འཕགས་ལུགས་ཤིག་ཡོད་ཨ། གསུམ་དུ་འདི་ལ་བརྟེན་ནས་བསྐལ་ཆེན་གྲངས་མེད་གསུམ་གྱི་ཚོགས་གཉིས་རྒྱ་ཆེན་པོའི་དོད་ཐུབ་འཇོག་ལུགས་ཤིག་ཡོད་ཨ། མཁས་ནི་མཁས། རྟོགས་ནི་རྟོགས། གཞན་མི་ཚད། རང་གི་བླ་མས་ཀྱང་ང་རང་ལ་འགྲན་མི་ཐུབ་ཅེས་ཧམ་པ་ནི་གནམ་སྔོན་པོ་ཙམ་ཞིག་བཟུང་ནས། ཨ་ཧ་ཧ། གནད་ཆེ་ས་ནས་བཤད་རྒྱུ་ནི་གཅིག་ཀྱང་མེད། དྲིས་ན་སྒྲོ་འདོགས་གཅིག་ཀྱང་གཅོད་མི་ཐུབ་པའི་བདག་ཉིད་ཆེན་པོ་དེ་ཚོ་ཡ་མཚན། ལྷུན་གྲུབ་འཁོར་
འདས་གཡོ་བའི་ཆོས་སོ་ཅོག །གསུངས་པའི་གནད་འདི་རྒྱ་བོས་ཁ་ཡངས་མའི་ནང་དུ་མདའ་རྡིལ་འཕང་བ་འདྲ་བ་ཅིག་བྱེད་ན། འཁོར་འདས་ཐམས་ཅད་ལྷུན་གྲུབ་རེད། སེམས་རེད། སངས་རྒྱས་རེད། ཟེར་གྱིན་བསྡད་པས་སྨྱོན་པའི་ཁ་ལ་རྡལ་རྒན་བརྒྱུག་ནས་རྐྱལ་སྟོང་དབུགས་ཀྱིས་གཏང་བ་འདྲ་བ་ཅིག་ཡོང་བར་འདུག་སྟེ། ཧོབ་འགྲོས་རང་མགོ་སྟོང་སྐོར་གྱི་འགྲིལ་ཚུལ་ཡིན་ལ། ངེད་ཚོའི་བསམ་རྒྱུར། གསུང་འདིའི་གནད་ལ། གཞི་ལས་གཞི་སྣང་གི་འཆར་ཚུལ་ཤེས་པ་གལ་ཆེ་བར་སྣང་སྟེ། འཆི་སྲིད་ཆོས་སྐུའི་འོད་གསལ་ལ་རྫོགས་ཆེན་ཟེར་བ་དང་གཅིག །སེམས་ཅན་སྐྱེ་འཆི་དང་བདེ་སྡུག་ལ་སོགས་པའི་སྣང་བ་ཡོད་ཚད་པོ་རྟོག་པས་བཏགས་ཤིང༌། རྟོག་པའི་དབང་གིས་བྱུང་བ་དང་གཉིས། རྟོག་པ་ཐམས་ཅད་ཀྱི་རྩ་བ། རླུང་ཐམས་ཅད་ཀྱི་སྐྱེད་སྡུད་ཀྱི་བདག་པོ་འཆི་སྲིད་ཀྱི་སྐབས་སུ་འཆར་རྒྱུའི་འོད་གསལ་རང་རིག་པའི་ཡེ་ཤེས་དེ་ཉིད་ཡིན་པ་དང་གསུམ་པོ་འདིས། འཁོར་བ་ལྷུན་གྲུབ་ཀྱི་རིག་གདངས་སུ་གོ་ནུས་ལ། དེ་གོ་ཐུབ་ན་མདའ་བསྣུན་ཆེན་པོས། གང་ཞིག་བླངས་ནས་སྐྱེ་འཆིའི་གནས་གྱུར་པ། །དེ་ཉིད་བླངས་ནས་བདེ་ཆེན་མཆོག་འགྲུབ་ཅེས། །སྐད་གསང་མཐོན་པོས་མདའ་བསྣུན་སྨྲ་བྱེད་ཀྱང༌། །བྱོལ་སོང་འཇིག་རྟེན་མི་གོ་ཇི་ལྟར་བྱ། །ཞེས་པའི་རྐང་པ་
གཉིས་པའི་བསྟན་དོན་ཡང་གོ་ཐུབ། དེ་ཐུབ་ན་རྣམ་བྱང་གི་གྲོས་མོ་ལེའུ་ཚན་ཐམས་ཅད་ཀྱང་ཞར་ལ་ལྷུན་གྲུབ་ཀྱི་སྣང་ཆར་གོ་ཐུབ་སྙམ་པ་ཡིན་ཏེ། བཤད་ལུགས་གཡག་ཀོ་ཙམ་ཞིག་བྱས་པ་ཡིན་གྱི། ཞིབ་མོ་དར་ཚག་ལྟ་བུའི་གོ་བ་བླངས་ན་དེ་འདྲའི་ཐབས་རྡུགས་ཅིག་ཅུད་མིན། ངས་འདི་ཐབས་རྡུགས་པ་བྱས་ནས་འཆད་པ་འདི་ཆོས་ཕྱེད་ཁ་མགོ་རྣ་དང་ཕོ་རུས་སུ་མ་སོང་བའི་སྙོམ་ཆུང་ལས་དང་པོ་འཚོ་ལ་བསམ་བློ་བཏང་བ་ཡིན། ཀ་དག་རིག་པའི་རྩལ་དུ་ཐག་ཆོད་པས། གསུངས་པའི་དོན་འདི། ཀ་དག་གི་རིག་པ་ཟེར་རྒྱུ་དེ་སྒོམ་ཆེན་འགའ་རེས། ཕྱི་ཐོས་ཀོག་གྱོང་པོའི་ཚིག་ཚོགས་དེ་མི་དགོས་ཀྱི། ནང་འདི་ན་ཅིག་ཡོད་ཟེར་ནས་གཡུ་ལོའི་ཐད་དུ་མཛུབ་མོ་འཛུག་པར་གདའ་སྟེ། རྩ་དབུ་མའི་ནང་གི་ཡེ་ཤེས་ཆེན་པོའི་བཞོན་པའི་རླུང་ལ་བརྟེན་པའི་འོད་གསལ་གྱི་རིག་པ་འདིའི་མིང་ལ་ཀ་དག་གི་རིག་པ་ཟེར་བ་ཡིན། ཀ་དག་ཟེར་བའི་གནད་ཀ་ཅི་ཡིན་ན། ཀ་སྨད་སུམ་ཅུའི་དང་པོ་ཀ་ཡིན་པ་ལྟར། དང་པོ་ནས་དག །མགོ་ནས་དག །ཟེར་བ་ཡིན། འདི་སྒྲིབ་བྱེད་ཀྱི་དྲི་མ་མང་པོ་ཡོད་ཀྱང་ཁོ་རང་གི་གཤིས་ལ་ཞུགས་མེད་པས་ཁོ་རང་ཤ་སེལ་རུས་སེལ་དེ་ལ་ཀ་དག་ཟེར་བ་ཡིན་གྱི། ཁྱི་བཏུམ་སྤུ་བཏུམ་བྱེད་མི་ཉན། རྩལ་ཞེས་པ་སྟོབས་དང་ཤུགས་ཅེས་པའི་དོན་ཡིན་པས། རྩལ་ཡིན་
ལུགས་དང་ལྷུན་གྲུབ་ཀྱི་སྣང་ཆ་ཡིན་ལུགས་གཉིས་གནད་གཅིག་ཡིན། རྟོག་གེའི་ཡུལ་ལ་དཔྱོད་པའི་བྲོད་པ་བཞི། །ཞེས་པ་འདི། རྫོགས་ཆེན་གྱི་འཇོག་སྒོམ་བྱེད་ལུགས་གསུང་བའི་ཚིག་རྩ་ཡིན་ཏེ། འོད་གསལ་དེའི་སྟེང་དུ་དེ་དང་རྣམ་པ་འདྲ་བའི་ལམ་གྱིས་འཇོག་ཐུབ་ན། འོད་གསལ་ཡང་འཆར་ཡོང༌། རླུང་དབུ་མར་ཡང་འཇུག་ཡོང༌། ལར་འདི་ལ་འོད་གསལ་ངོ་འཕྲོད་པ་ཞིག་དགོས་ཀྱི། མ་འཕྲོད་པར་ས་འཇོག་རྡོ་འཇོག་བྱས་ན་བེད་མེད། དེ་ངོ་འཕྲོད་ནས་སྒོམ་ན་དེའི་མཐུས་མྱོང་སྟོབས་ཀྱིས་ཤར་བའི་འོད་གསལ་དེ་ངོས་ཟིན་ཡོང༌། དེ་ཟིན་ན་དེའི་སྟེང་གི་སྟོང་ཉིད་ཟེར་ཀྱང༌། དེའི་གནས་ལུགས་ཟེར་ཀྱང༌། དེའི་ཆོས་ཉིད་ཟེར་ཀྱང་འདྲ་སྟེ། དེའི་ངང་ལ་མཉམ་པར་བཞག་ནས་བསྡད་པས། ཤིང་རྟ་རྣམ་བདུན་ལྟ་བུའི་རིགས་པས་དཔྱད་མི་དགོས་པར་རིག་སྟོང་ཁ་སྦྱོར་དུ་ཆམ་གྱིས་འགྲོ་བའི་དོན་ཡིན། བརྒྱུད་ལྡན་བླ་མའི་བྱིན་རླབས་འཕོས་སམ་སྙམ། །ཞེས་པ། ཟབ་མོའི་ལྟ་བ་རྟོགས་པ་འདི་བླ་མའི་བྱིན་རླབས་ཡིན་ཞེས་པའི་ཚིག་རྩ་ཡིན་ཏེ། ཀ་རྐང་གསུམ་ཤེས་པ་ཡན་ཆད་ནས། །ཨ་སྐྱེ་མེད་རང་ངོ་འཕྲོད་ཀྱི་བར། །རང་ཚོད་ཀྱི་ཧམ་པ་ཆེ་དྲག་ན། །བཀའ་དྲིན་ལ་མཛུབ་མོ་བཙུག་ས་མེད། །ཅེས་པ་ལྟར་བྱིན་རླབས་ཀྱི་རྩ་བ་བླ་མ་ཡིན་པས། །དངོས་གྲུབ་ཐམས་ཅད་བླ་མའི་བཀའ་དྲིན་གྱིས་འཐོབ་
པའི་དོན་ཡིན། དེ་ཙམ་ཞིག་གིས་བཀའ་སྩལ་སྔ་མ་མི་བཟློག་ཙམ་ཞིག་བྱས་པ་ཡིན། ཞེས་སྤྲང་པོ་འཇིགས་མེད་བསྟན་རྒྱམ་ནས་བྲིས་པ་སྟེ། །བརྒྱག་ཆེས་རྩེ་གདན་བྱས་ཀྱང་ཆོག །འདོན་ངན་སྨྱོ་ཁ་བླས་ཀྱང་ཆོག །སྒོམ་ཆེན་ཞེ་འདྲེ་སློང་བྱེད་ཡིན། །མི་གོ་བ་ཅན་གྱིས་བལྟས་ན་གསལ།། ༈ །།གཉུག་མ་ཟང་ཐལ་གྱི་སྒྲུབ་ཐབས་ཆོས་ཉིད་རང་བྱུང་གི་སྒྲ་དབྱངས་ཞེས་བྱ་བ་བཞུགས། དབྱིངས་རིག་དབྱེར་མེད་བླ་མ་ལ། །བློ་བྲལ་ལྟ་བས་ཕྱག་བགྱིའོ། །རྣལ་འབྱོར་མཆོག་ལ་མོས་གྱུར་ཀྱང༌། །རྟོགས་པའི་གདེང་དང་མི་ལྡན་པའི། །སྐལ་བཟང་གཞོན་ནུ་འཇིགས་མེད་པ། །སྐྱིད་པོའི་མལ་ན་ཉལ་བའི་ཚེ། །བགྲང་བྱ་མང་པོར་དཀའ་ཐུབ་ཀྱིས། །ངལ་བའི་སྒྲུབ་པ་བྱེད་པའི་མི། །རྒན་པོའི་ལུས་ཅན་མང་ཞིག་མཐོང༌། །དེ་ཚེ་ཡིད་དཔྱོད་ཐེག་པའི་ལམ། །འབད་པའི་སྒོམ་པའི་སྐྱེ་བོ་ལ། །གད་མོ་ཁོང་ནས་ལྡང་གྱུར་ཏེ། །ཉམས་མཚར་གླུ་འདི་ཐལ་ནས་འོང༌། །ཀ་དག་རིག་པའི་ཉི་དཀྱིལ་ལ། །རྣམ་བྱང་ཡོན་ཏན་སྣང་ཟེར་འབུམ། །ལྷུན་གྲུབ་གདོད་ནས་རྫོགས་པ་ལ། །བསྒྲུབ་འབྲས་གཞན་ནས་ཚོལ་བ་མཚར། །རྒྱལ་ཀུན་ཐུགས་དང་དབྱེར་མེད་ཅིང༌། །སོ་སོ་མ་ཡིན་ཐ་མི་དད། །ཤེས་རིག་ཀུན་ཏུ་བཟང་པོ་སྟེ། །ཡེ་ཤེས་ནམ་མཁའི་གཟུགས་ཅན་ནོ། ཁྱབ་
བདག་ཆོས་སྐུའི་རང་ཞལ་ནི། །དམིགས་མེད་དགོངས་པའི་ཡེ་ཤེས་ཀྱིས། །མངོན་སུམ་ལྟ་འདོད་རྣལ་འབྱོར་པས། །མཐའ་བྲལ་གཉུག་མའི་དུར་ཁྲོད་དུ། །ཡིད་དཔྱོད་སྤྲོས་པས་མི་གཡོ་བའི། །མཁའ་མཉམ་དཀྱིལ་འཁོར་བཀོད་ནས་ནི། །ཟབ་མོའི་སྒྲུབ་པ་འདི་བཞིན་བྱ། །རང་བྱུང་ཡེ་ཤེས་རྒྱལ་བ་ལ། །གཉིས་མེད་ལྟ་བས་སྐྱབས་སུ་མཆི། །གཉིས་འཛིན་སྒྲོག་ལས་གྲོལ་བའི་ཕྱིར། །འོད་གསལ་ཆེན་པོ་བསྒྲུབ་པར་བགྱི། །ཀུན་ཁྱབ་ཆོས་སྐུའི་སྟོན་པ་ལ། །སྣང་བཞི་ལམ་གྱིས་ཚོགས་བསག་བྱ། །ཆེད་འཛིན་དམིགས་གཏད་ཞེན་པའི་བགེགས། །འགྲོ་འོང་མེད་པའི་དབྱིངས་སུ་བསྐྲད། །དག་པ་རབ་འབྱམས་ཆེན་པོའི་ཀློང༌། །མ་དག་རྒྱུ་བའི་གོ་སྐབས་མེད། །སྐུ་ལྔ་ལྷུན་རྫོགས་རྡོ་རྗེའི་བྱིན། །མི་འགྱུར་གདོད་མའི་ངང་དུ་རྫོགས། །སྲིད་གསུམ་བདེ་ཆེན་ངོ་བོ་རུ། །གདོད་ནས་གྲུབ་པའི་བདག་ཉིད་དོ། །མ་བཅོས་རང་བབ་ཕྱལ་བ་རུ། །ཡེ་དག་རྣམ་གྲོལ་ངང་ཉིད་ལས། །རྩོལ་མེད་རང་གསལ་སྙིང་རྗེའི་མདངས། །མ་གཡོས་མི་འགགས་མི་འགྱུར་བར། །རང་སྣང་དཀྱིལ་འཁོར་འཁོར་ལོ་རྫོགས། །ཡེ་ཤེས་རིན་ཆེན་འབར་བའི་གཞིར། །དེ་བཞིན་ཉིད་ཀྱི་གཞལ་མེད་ཁང༌། །གང་ཤར་རང་གྲོལ་རྒྱན་ཕྲེང་བཅིང༌། །སྤྲོས་པའི་གྲྭ་ཟུར་མི་དམིགས་པར། །
སྟོན་པ་མཉམ་ཉིད་རྒྱལ་པོ་ནི། །ཞལ་ཕྱག་མཚན་མ་ལས་འདས་པ། །ཅོག་བཞག་འཁྱིལ་བའི་ཀློང་དུ་བཞུགས། །བསམ་གྱིས་མི་ཁྱབ་མཐའ་ཡས་པའི། །ཡེ་ཤེས་རྒྱ་མཚོའི་འཁོར་ཚོགས་བཅས། །ཆོས་ཉིད་ངང་དུ་དགྱེས་དགུར་སྤྱོད། །གཞི་ཡང་ཆོས་ཉིད་རོལ་པའི་གཞི། །གནས་ཀྱང་འཐའ་དབུས་མེད་པར་གནས། །ལྷ་ཡང་མི་འགྱུར་རྡོ་རྗེའི་ལྷ། །སྣང་སྟོང་སྒྱུ་འཕྲུལ་དྲ་བ་ལས། །དམ་ཚིག་ཡེ་ཤེས་གཉིས་སུ་མེད། །འབྱོན་པའི་ལྷ་ཞེས་དམིགས་མེད་ན། །བཞུགས་པར་གསོལ་བ་གང་ལ་འབུལ། །ལྷ་དང་རང་ཞེས་དམིགས་མེད་པས། །ཕྱག་འཚལ་ཡུལ་དང་མཁན་པོ་མེད། །མཉམ་རྫོགས་ལྟ་བའི་བརྡ་ཕྱག་ནི། །རང་གིས་རང་ལ་རྫོགས་པར་འབུལ། །མ་བཅོས་ཕྱག་རྒྱ་ཆེན་པོ་ལ། །ཚོགས་བརྒྱད་དག་པའི་བཀྲ་ཤིས་རྟགས། །གང་སྣང་རོལ་པའི་འདོད་ཡོན་ལྔ། །ཆོས་ཁམས་ཀུན་དག་རྒྱལ་སྲིད་བདུན། །གཞི་རྫོགས་མཆོད་པ་རང་ལ་འབུལ། །ངོ་བོ་ཀ་དག་ལས་གཞལ་ན། །གཞི་མེད་ལམ་མེད་འབྲས་བུ་མེད། །འཁྲུལ་མེད་བཅིང་མེད་གྲོལ་བ་མེད། །མིང་མེད་ཚིག་མེད་ཡི་གེ་མེད། །མཐའ་མེད་དབུས་མེད་སྤྲོས་པ་མེད། །སྟོང་ཆེན་དེ་བཞིན་ཉིད་ལ་བསྟོད། །རང་བཞིན་ལྷུན་གྲུབ་ལས་གཞལ་ན། །འཁོར་བ་ཡོད་ལ་འདས་པ་
ཡོད། །ཆོས་ཡོད་ཆོས་མིན་ཡོད་པ་སྟེ། །ལམ་ཡོད་གཡང་སའང་ཡོད་པ་ཡིན། །དགེ་བ་ཡོད་ཅིང་སྡིག་པ་ཡོད། །ཀུན་སྣང་ཡེ་ཤེས་ཆེན་པོར་བསྟོད། །གང་ཡང་ཡིན་ཏེ་གང་ཡང་མིན། །ཐམས་ཅད་བདེན་ཏེ་ཐམས་ཅད་རྫུན། །ཡོད་ལ་མེད་པའི་རང་བཞིན་ཏེ། །ཟུང་འཇུག་ཀུན་ཁྱབ་ཆེན་པོར་བསྟོད། །བདེ་སྟོང་འོད་གསལ་ཉི་ཟླའི་དབུས། །སྐྱེ་མེད་དོན་གྱི་རྡོ་རྗེ་བསྒོམ། ཨཱཿ མི་བསྒོམ་མ་བསྒོམས་སེལ་བ། །གཏད་མེད་རྒྱ་ཡན་དོན་གྱི་སྔགས། །བརྗོད་མེད་ལྷུག་པའི་ངང་དུ་བཟླ། །དུས་གསུམ་དུས་མེད་ཆེན་པོ་རུ། །བཟླས་པ་འདི་བཞིན་གང་བྱས་པས། །བློ་ཟད་ཆོས་ཟད་རྟགས་མཐོང་འགྱུར། །སཱ་མཱ་ཡཱ། དྲན་རིག་གཉུག་མའི་ཚོགས་འཁོར་ནི། །སྲིད་གསུམ་རྣམ་དག་ཚོགས་རྫས་དགྲམ། །སྣང་སྲིད་བདེ་བ་ཆེན་པོའི་རྫས། །མི་ཟད་ཡེ་ཤེས་འཁོར་ལོར་གྱུར། །རིག་རྩལ་རང་བྱུང་རོལ་པའི་མགྲོན། །གཤེགས་བཞུད་མེད་པར་གདོད་ནས་གྲུབ། །རང་སྣང་གཉུག་མའི་ལོངས་སྤྱོད་ནི། །ཐམས་ཅད་གཞི་ལྡན་ལྷ་ལ་འབུལ། །ཤིན་ཏུ་རྣམ་དག་ཆོས་ཀྱི་དབྱིངས། །དྲི་མའི་སྦུབས་ལས་ངེས་གྲོལ་བས། །སྒྲིབ་པ་ཞེས་པའང་བླ་དགས་ཙམ། །གསང་ཆེན་རྡོ་རྗེ་བཙུན་མོའི་མཁར། །ཡིད་དཔྱོད་མཐར་ལྟའི་དགྲ་བགེགས་གདོན། །རྟོགས་པ་གདེང་གྱུར་མཚོན་གྱིས་བསྒྲལ། །གཞི་
རྩ་མེད་དབྱིངས་ཨ་ལ་ལ། །ཤར་གྲོལ་དུས་མཉམ་ལྷག་མགྲོན་ལ། །རྣམ་རྟོག་རྒྱན་གྱི་གཏོར་མས་མཆོད། །ཆོས་ཉིད་སྤྲོས་བྲལ་ཕོ་བྲང་ནས། །ལྷུན་གྲུབ་རིག་པ་ཀུན་ཏུ་བཟང༌། །མ་བཅོས་ལྟ་བས་བསྐུལ་བའི་མོད། །རྟོག་ཚོགས་འཇུར་དྲན་ཐལ་བར་རློག །སྔ་ཕྱིའི་འཛིན་སྟངས་མི་དམིགས་པའི། །མཉམ་ཉིད་དོན་གྱི་བསྐལ་པ་ལ། །བཅོམ་ལྡན་རིག་བདག་དྲུག་པ་ཡིས། །རྟོག་ཚོགས་ལྷ་སྲིན་དྲེགས་པའི་སྡེས། །རང་གྲོལ་གཏོར་མ་ལེན་པར་ཆེད། །མ་སྤང་གནས་དག་དམ་ནོས་པ། །དེ་ལས་འདའ་བའི་གོ་སྐབས་མེད། །ཆོས་སྐུ་རྒྱལ་པོའི་བཀའ་ཉན་པའི། །ཕུང་ཁམས་སྐྱེ་མཆེད་བརྟན་མའི་ཚོགས། །ཅེར་གྲོལ་བྷ་ལིང་གཏོར་མཆོད་བཞེས། །རང་དག་ཕྲིན་ལས་ཐོགས་མེད་སྒྲུབ། །ཐེག་མཆོག་རྒྱལ་པོའི་དགོངས་ཀློང་དུ། །བློས་བྱས་འཛིན་པའི་རྣམ་པ་ཅན། །རྒྱས་བཏབ་ལྟ་བས་བྲོ་བརྡུང་བས། །གནས་ལུགས་ཨ་ཏིའི་རང་བཞིན་ལ། །གཞན་དུ་འདའ་བའི་སྐལ་བ་མེད། །དེ་བཞིན་ཉིད་དུ་ནར་སོན་ཅིང༌། །མཉམ་པ་ཉིད་ལ་དབང་བསྒྱུར་ཚེ། །ལོངས་སྤྱོད་ཆེན་པོ་དེ་ལ་ཟེར། །དབང་མཛད་རྒྱལ་པོ་དེ་ཀ་རང༌། །རིག་པ་དབྱིངས་སུ་རྣམ་གྲོལ་བས། །རིལ་འཛིན་རྗེ་གཞིག་མིང་དུ་ཟད། ཁམས་གསུམ་རྒྱལ་བའི་དཀྱིལ་འཁོར་ཕྱིར། །ཐོབ་བྱ་
གཞན་དུ་མི་དམིགས་པས། །བསྔོ་བའི་དོན་འབྲས་གཞི་ལ་རྫོགས། །གང་སྣང་རིག་པ་ཆོས་སྐུའི་གདངས། །ཅི་འགྱུ་ཀུན་བཟང་ཡངས་པའི་ཀློང༌། །ཅི་བྱས་ཀློང་ཆེན་རབ་འབྱམས་ཏེ། །ཐམས་ཅད་གདོད་མའི་དབྱིངས་སུ་བསྔོ། །བྱ་རྩོལ་མེད་པ་རྫོགས་ཆེན་ལམ། །བློ་བྲལ་རང་ཡན་ཆེན་པོ་རུ། །ཉམས་བླང་བསྒོམ་པའི་བྱིན་རླབས་ཀྱིས། །འཕོ་ཆེན་རྡོ་རྗེའི་བཀྲ་ཤིས་ཤོག །ས་མ་ཡཱ། ཨྠིྀ། ཨྠིྀ། ཨྠིྀ།། ཀློང་གསལ་ནམ་མཁའ་དྲི་མེད་དོན། །ལྷུག་པར་བཀྲོལ་བའི་མན་ངག་འདི། །བཅུ་བདུན་རྒྱུད་ཀྱི་བསྡུས་འགྲེལ་ཏེ། །ཀུན་མཁྱེན་བླ་མའི་ཞལ་ལུང་ཡིན། །མདོ་རྒྱུད་རྒྱ་མཚོའི་བཅུད་ཕྱུང་བའི། །གདམས་ངག་སྙིང་ལས་གཅེས་པ་ཡི། །ཤིན་ཏུ་རྣལ་འབྱོར་གྲུབ་མཐའ་ལ། །སྦྱང་བའི་མང་ཐོས་མི་ལྡན་ཞིང༌། །རྟོགས་པའི་དྲོད་ཚད་མ་ཐོབ་ཀྱང༌། །མཚུངས་མེད་བླ་མའི་བཀའ་དྲིན་ལས། །ལམ་འདིར་སྤྲོ་བ་ཐོབ་པའི་མི། །གཞོན་ནུ་བསྟན་པའི་རྒྱལ་མཚན་གྱིས། །ཡི་གེའི་གཟུགས་སུ་སྤེལ་བའོ། །སླད་ནས་ལམ་འདི་མི་ནུབ་པར། །འཛིན་མཛད་ནག་མོ་ཁྲོས་མ་དང༌། །བཀའ་སྲུང་གཟའ་བདུད་རཱ་ཧུ་ལར། །མ་གཡེལ་བསྲུང་བའི་གཉེར་ཁ་གཏད། །ན་ར་ཀན། །དྷ་ཐིམ། དེ་སྐད་ཅེས་བྲིས་ནས་བཙུན་པ་བློ་གྲོས་བཟང་པོའི་གླེགས་བམ་དུ་བཀོད་དེ་འཇམ་དབྱངས་ལ་བྱིན་པ།
ཡི་གེའི་ལམ་དུ་མ་བཞག་པར་ཉམས་སུ་ལོངས་ཤིག། ༈ །།མཆོག་གསུམ་ཡོངས་འདུས་བླ་མའི་ཞབས་ལ་གུས་པ་ཆེན་པོས་ཕྱག་འཚལ་ལོ། །དེ་ལ་འདིར་འོད་གསལ་མྱོང་སྟོབས་ཀྱིས་མངོན་དུ་འགྱུར་བར་བྱེད་པ་ལམ་གྱི་སྒོམ་ཚུལ་གཉིས་ཡོད་པ་ལས། བླ་མེད་ཀྱི་རྒྱུད་སྡེ་གཞན་གྱི་རྩ་ཐིག་རླུང་གསུམ་ལ་གནད་དུ་བསྣུན་ནས་མངོན་དུ་འགྱུར་ཚུལ་ནི། །དང་པོ་ནས་འོད་གསལ་གྱི་རྣམ་པ་བཤད་མི་དགོས་པར་སྙིང་གའམ་ལྟེ་བའི་རྩ་འཁོར་སོགས་ལ་གནད་དུ་བསྣུན་ན་འོད་གསལ་ཤར་འོང༌། འོད་གསལ་ཤར་བའི་ཚེ་ཡུལ་སྣང་ཐམས་ཅད་བདེ་བ་ཆེན་པོར་འཆར་བའི་གང་ཟག་ཁྱད་པར་བ་དེས་མཉམ་བཞག་གི་འོད་གསལ་དེ་ཉིད་རྗེས་ཐོབ་ཏུ་དྲན་པར་བྱེད་པའི་སྟོབས་ཀྱིས་ཀྱང་འོད་གསལ་དྲང་ཡོང༌། །དེའི་རྒྱུ་མཚན་ནི་དཔེར་ན་མའི་བུ་གཅིག་པུ་ཤིན་མ་དེ་སྡུག་བསྔལ་གྱིས་གདུང་བས་སྐྱེད་མོའི་ཚལ་ལ་སོགས་པའི་ཉམས་དགའི་གནས་སུ་ཕྱིན་ན་དགའ་བར་མི་འགྱུར་ལ་གང་དུ་ཕྱིན་ཀྱང་སྡུག་བསྔལ་བའི་རྣམ་པ་མ་གཏོགས་བདེ་བའི་རྣམ་པ་ནི་མི་འབྱུང༌། དེ་བཞིན་དུ་མི་ནོར་ལ་སྲེད་སེམས་ཅན་གྱི་ལག་ཏུ་ཡིད་བཞིན་ནོར་བུ་རྙེད་ན་མི་དེའི་སེམས་དགའ་བའི་ཚོས་མདོག་གིས་བསྒྱུར་ཡོད་པས་མི་དེ་རྟ་རྫང་ངམ་རྟའི་ར་བའི་ནང་དུ་འདུག་ཀྱང་དགའ་བའི་རྣམ་པ་མ་གཏོགས་སྡུག་བསྔལ་བའི་རྣམ་
པ་མི་འབྱུང༌། དེ་ལྟར་མཉམ་བཞག་གི་སྐབས་སུ་བདེ་བ་ཆེན་པོའི་ཡེ་ཤེས་ལ་གོམས་འདྲིས་ཡོད་པས་ན་ཕྱིས་རྗེས་ཐོབ་ཀྱི་སྐབས་སུ་རྩ་ཐིག་རླུང་ལ་གནད་དུ་བསྣུན་མི་དགོས་པར་བདེ་བ་ཆེན་པོའི་ཡེ་ཤེས་དེའི་རྣམ་པ་དྲན་ཙམ་གྱིས་དེ་ཉིད་འདྲེན་ཐུབ། རྫོགས་པ་ཆེན་པོའི་ལམ་ལ་དེ་ལྟར་རྩ་ཐིག་རླུང་སོགས་ལྷག་པར་བསྒོམ་མི་དགོས་པར། དང་པོ་བླ་མའི་མན་ངག་ལ་བརྟེན་ནས་རིག་པ་ཐུ་རེ་དྲན་པའི་དྲན་པ་རྒྱུན་ཆགས་སུ་བསྟེན་པ་ནི་རིག་པའི་སྐྱོང་ཚུལ་ཡིན། དེ་ལ་བླ་མའི་མན་ངག་ནི་འཆི་སྲིད་ཀྱི་འོད་གསལ་དེ་ཉིད་ཚེ་འདིའི་སྣང་སེམས་ཐམས་ཅད་སྡུད་ས་དང་ཕྱི་མའི་སྣང་བ་ཐམས་ཅད་མཆེད་པའི་གཞི་ལྟ་བུ་ཡིན་ལ། དེ་ཀ་རང་འོད་གསལ་ཐམས་ཅད་སྟོང་པའམ་ཡེ་གྲོལ་འདུས་མ་བྱས་ཀྱི་རིག་པ་ཡིན། དེ་ནི་སྣང་མཆེད་ཀྱི་མཐའི་ཤེས་པ་ཕྲ་མོ་སྟེ། དེ་ལ་རིག་པའམ་འོད་གསལ་ཟེར། འོད་གསལ་དེ་ལ་འགྱུར་བ་ཡེ་ནས་ཡོད་མ་མྱོང༌། གློ་བུར་བའི་སེམས་རིག་པ་དེའི་གཤིས་སུ་ཞུགས་མ་མྱོང་བ་ཡིན། གློ་བུར་བའི་སེམས་ཞེས་པ་ནི། གློ་བུར་དུ་སྐྱེས་པའི་ཤེས་པ་སྟེ། དབང་ཤེས་དང་དེ་ལས་ཕྲ་བའི་ཡིད་ཤེས་རྣམས་ཡིན། འོད་གསལ་དེའི་རྣམ་པ་ནི་ཡེ་གདོད་མ་ནས་གློ་བུར་བའི་རྐྱེན་གྱིས་གཤིས་མ་བསླད་པས་ན་ཀ་དག་ཟེར། ཀ་སྨད་སུམ་ཅུའི་བཞུགས་ཚུལ་
འཆུག་ན་ལྷག་མ་ཐམས་ཅད་འཆུག་འགྲོ་བ་བཞིན་དུ་ཀ་དག་གི་བཞུགས་ཚུལ་གྱི་གོ་དོན་འཆུག་ན་རྫོགས་པ་ཆེན་པོའི་ལམ་གྱི་ཁོག་རྟ་ཐམས་ཅད་འཆུག་འགྲོ་བ་ཡིན། ཀ་དག་དང་གདོད་མ་ཐོག་མ་སོགས་དོན་གཅིག་གི་གནད་ཀྱིས་ཡིན་པར་གསུང༌། །གཞན་ཡང་འཕྲོ་རྒོད་དང་བྱིང་རྨུག་གི་འབར་འབུར་དང་བྲལ་བ་མཉམ་ཡང༌། །དབང་ཤེས་དང་ཡིད་ཤེས་དེའི་བཞིན་པའི་རླུང་སོགས་གཤིས་ལ་མ་ཞུགས་པས་སེམས་ཀྱི་ཕྱོགས་སུ་གྱུར་པ་ཐམས་ཅད་ཀྱིས་མི་ཚོགས་པས་ཟད་ཐལ། མར་མེ་བུམ་ནང་དུ་ཡོད་པ་བཞིན་དུ། ནང་གསལ་ལམ་གཏིང་གསལ་གཞོན་ནུ་བུམ་སྐུ་ཟེར། རིག་པ་དེ་གསལ་བར་ཉི་མ་བརྒྱ་བས་ལྷག་པས་ན་རང་གསལ། བདེ་གསལ་མི་རྟོག་གསུམ་རང་ཆས་སུ་ཡོད་པས་ན་ལྷུན་གྲུབ། འདོད་སེམས་ལས་བསམ་གཏན་དང་པོ་ཕྲ། །དང་པོ་ལས་གཉིས་པ་ཕྲ་བ་སོགས་རིམ་བཞིན་འོག་མ་ལས་གོང་མ་རྣམས་ཆེས་ཕྲ་བ་ཡིན་ལ། དེ་དག་ལས་ཀྱང་ཆེས་ཕྲ་བའི་ཤེས་པ་ཡིན་པས་ཆེས་ཕྲ་སྟེ། དེ་ཐམས་ཅད་ཀྱིས་འོད་གསལ་རིག་པའི་ཁྱད་ཆོས་མི་འདྲ་བ་རེ་དྲངས་ཏེ་སྟོན་རྒྱུ་ཡོད་པ་གོ་དགོས། དེ་ལྟ་བུའི་འོད་གསལ་གྱི་བཞུགས་ཚུལ་རང་གི་གོ་བའི་སྟེང་ནས་ངོ་འཕྲོད་དགོས། འོད་གསལ་ལ་དམར་འཇུས་བྱེད་ན་དྲན་པས་སྐྱོང་རྒྱུ་ཁོང་
དུ་ཆུད་དགོས། འོད་གསལ་གྱི་བཞུགས་ཚུལ་བླ་མའི་མན་ངག་གིས་ངོ་སྤྲད་པ་དེ་སེམས་ལས་མ་བོར་བར་ཡིད་ངོར་འདྲིས་ཐུབ་པ་ཞིག་དགོས། དེ་བོར་ན་ཁྲེགས་ཆོད་ཀྱི་ལམ་གྱི་སྲོག་སྟོར་བ་ཡིན། དེ་ནི་དཔེར་ན་བླ་མེད་རྒྱུད་སྡེ་གཞན་གྱི་རྩ་ཐིག་སོགས་ལ་གནད་དུ་བསྣུན་པ་དགོས་མེད་དུ་བཞག་ན་རྫོགས་རིམ་གྱི་སྲོག་སྟོར་བ་ཡིན་པ་དང་མཚུངས། དྭངས་སྙིགས་གཉིས་སུ་ཕྱེ་བའི་སེམས་ནི་སྙིགས་མ་དང༌། རིག་པ་ནི་དྭངས་མའི་ཡང་ཞུན་བཅུད་དུ་དྲིལ་བ་ལྟ་བུ་ཡིན་ནོ། །མ་རིག་པའི་བག་ཆགས་ཟད་ནས་སངས་རྒྱས་ཀྱི་སྒྲུབ་བྱེད་རིག་པ་ཡིན། རིག་པ་ལམ་དུ་བྱས་ནས་སྐད་ཅིག་ཀྱང་འབྲལ་བ་མེད་པར་དྲན་པས་བསྐྱངས་ཏེ་བློ་ཤིན་ཏུ་རྒྱས་པར་བྱས་ནས་ཡོད་ན་རིག་པ་ལ་དམར་འཇུས་བྱེད་རྒྱུ་རྙེད་ནས་རིག་པ་ངོ་འཕྲོད་པ་ཡིན། གློ་བུར་བའི་སེམས་ཀྱི་ངོ་བོ་སྐྱེ་མི་སྲིད་པ་དང་གནས་ལུགས་ལ་འགྱུར་བ་མེད་པས་ན་མ་བཅོས་པ་དང༌། ཆོས་སྐུའི་རིག་པ། ཆོས་སྐུའི་བསྒྲུབ་གཞི་ཡིན་པ་ཤེས་དགོས། རྫོགས་ཆེན་ལ་རིག་པ་ཞེས་མིང་གི་ཐ་སྙད་འདོགས་པ་དེ་ནི་སྣང་གསུམ་ལས་འདས་པའི་ཤེས་པ་སངས་རྒྱས་ཀྱི་བསྒྲུབ་གཞི་ཡིན་པས་རིག་པ་ཞེས་གསུངས་ལ། རིག་པའི་སྟེང་ན་མུན་པ་ཡོད་མ་མྱོང་བས་ན་འོད་གསལ་ཟེར། མ་རྒྱུད་ལས་བདེ་ཆེན་ལྷན་སྐྱེས་ཀྱི་ཡེ་ཤེས་ཟེར་བ་ནི་ཡེ་ནས་བདེ་
ཆེན་དང་ཡེ་ཤེས་གཉིས་འབྲལ་མ་མྱོང་བར་ལྷན་སྐྱེས་ཀྱི་ཚུལ་དུ་ཡོད་པས་ན་ལྷན་སྐྱེས་ཀྱི་ཡེ་ཤེས་ཟེར། ཚེ་འདིའི་སྣང་སེམས་ཐམས་ཅད་ཕར་སྡུད་ས་ཚེ་ཕྱི་མའི་སྣང་སེམས་ཐམས་ཅད་ཚུར་མཆེད་པའི་སྤྲོ་གཞི་འོད་གསལ་ཡིན། འོད་གསལ་ཉིད་ཀུན་རྟོག་དང་སེམས་ཀྱིས་ལྡེ་ཁ་བསྒྱུར་ནས་འགྲོ་མི་ཤེས་པས་ན་ཡེ་གྲོལ་འདུས་མ་བྱས་པ་ཞེས་བརྗོད། ངོ་རང་ཐོག་ཏུ་སྤྲད་པའི་ཚུལ་ནི། རང་ཐོག་ཅེས་པ་འོད་གསལ་རང་གི་ཐོག་ཏུ་སྤྲད་པ་ཡིན། ངོ་སྤྲོད་ཚུལ་ནི་གོང་སྨོས་བཞིན། བླ་མའི་མན་ངག་གིས་འོད་གསལ་གྱི་རྣམ་པའམ་བཞུགས་ཚུལ་ཇི་ལྟ་བ་བཞིན་བསྟན་ནས་སློབ་མ་ལ་གོ་བ་ཆགས་ངེས་ཅན་བྱེད་དགོས་པ་ཡིན། ༈ །ངོ་སྤྲོད་ཚུལ་གྱི་དཔེ་ནི། ནམ་མཁའ་སྤྲིན་འཐུག་གིས་བསྒྲིབ་སྐབས་ན་ནམ་མཁའི་ངོ་སྤྲད་ན་ངོ་འཕྲོད་པ་ཅུང་དཀའ་ལ། ནམ་མཁའི་ཕྱོགས་འགའ་ཞིག་ན་སྤྲིན་མེད་པའི་ནམ་མཁའ་ཅུང་ཟད་མཐོང་སར་ཕྱིན་ཏེ་ལྷོ་འཛམ་བུའི་གླིང་འདིའི་ནམ་མཁའ་ཐམས་ཅད་སྔོན་པོ་འདི་ལྟ་བུ་ཡིན་ཟེར་ནས་ངོ་སྤྲད་ན་ངོ་འཕྲོད་སླ་མོ་ཡོད། །དེ་ལྟར་དུ་ད་ལྟ་ཀུན་རྟོག་དང་སེམས་ཀྱི་སྤུན་ཐག་སྤྲིན་འཁྲིགས་པ་ལྟ་བུའི་གནས་སྐབས་ན་འོད་གསལ་ངོ་སྤྲད་ན་ངོ་འཕྲོད་ཅུང་ཟད་དཀའ་སྟེ། འཆི་ཁ་དང་ཆོས་ཉིད་བར་དོའི་སྐབས་འོད་གསལ་འཆར་བ་དེ་ལྟར་དུ་ངོ་སྤྲད་ན་ངོ་
འཕྲོད་པ་ཡིན། དེ་ནི་བླ་མས་འཆི་ཁ་དང་བར་དོའི་སྐབས་སུ་འོད་གསལ་འཆར་ཚུལ་སློབ་མ་ལ་ཞིབ་ཏུ་གསུངས་པ་ལྟར། སློབ་མ་རང་གི་གོ་བའི་སྟེང་ནས་མྱོང་བ་ཞིབ་མོ་ཆགས་དགོས། དེ་རྣམས་ངོ་རང་ཐོག་ཏུ་སྤྲད་པ་ཡིན། ༈ །ཐག་གཅིག་ཐོག་ཏུ་བཅད་པ་ནི། འོད་གསལ་དེ་ནི་ད་ལྟ་རང་གི་ཤེས་པ་འདིའི་ཕུག་ན་ཏིལ་ལ་སྣུམ་གྱིས་ཁྱབ་པ་བཞིན་དུ་སྐད་ཅིག་ཙམ་ཡང་འབྲལ་མ་མྱོང་བར་ཡོད་ལ། བྲལ་ན་སངས་རྒྱས་ཡང་མི་འཚོ། །སེམས་ཅན་ཡང་མི་འཚོ། དེ་ཉིད་ཡོད་པ་ཐག་གཅིག་ཏུ་བཅད་ཐུབ་དགོས། དེ་ལྟར་ཡོད་ནའང་འོད་གསལ་དེ་ཉིད་འཆི་དུས་མ་གཏོགས་ད་ལྟ་རང་ཉིད་ལ་འཆར་བར་མི་འགྱུར་རམ་སྙམ་ན། མ་ཡིན་ཏེ་གཉིད་དུས་དང་བརྒྱལ་བ་ལ་སོགས་པའི་སྐབས་སུ་ཡང་འཆར། ད་ལྟའི་སྐབས་སུ་འོད་གསལ་དེ་ཉིད་ངོ་སྤྲད་པ་ལྟར་དྲན་བྱ་དང་དྲན་བྱེད་འབེན་བཙུག་པ་ལྟ་བུ་མ་ཡིན་པར། གང་ཟག་རང་གིས་རང་དྲན་པ་བཞིན་དུ་དང་པོ་དྲན་པས་སེམས་ཀྱི་ཕྱོགས་ཐམས་ཅད་རྩིས་མེད་དགོས་མེད་དུ་བཞག་ནས། རིག་པའི་ཕྱོགས་ཁོ་ན་ཡིད་ངོར་ཤར་བར་བྱས་ནས་རིག་པའི་རང་བཞིན་མ་བཅོས་པར་བསྒོམ་དགོས། དྲན་པས་རིག་པའི་རྣམ་པ་དེ་ཉིད་བོར་ན་སེམས་ཀྱི་ཐོག་ཏུ་ཐོན་པ་ཡིན། དཔེར་ན་ཁྱིམ་གྱི་གནས་ཀྱི་ཁྲོ་ཐོག་ནས་ལྷུང་ན་ཁྱིམ་ལས་
འདའ་བ་མེད་པའི་དཔེ་དེ་བཞིན་དུ་རིག་པ་དེ་ཉིད་དྲན་པས་བོར་སོང་ན་སེམས་ལས་འདའ་བ་མེད་པ་ཡིན། སེམས་སལ་ལེ་ཧྲིག་གེ་བ་བསྒོམ་ན་རིག་པ་བསྒོམ་པའི་གོ་མི་ཆོད་པ་ཡིན། ཡང་དཔེ་གཅིག་ནི་བཞི་ཆ་གསུམ་བྲལ་ཏེ། གསུམ་དང་བྲལ་བའི་བཞི་པའི་ཆ་ནི་རིག་པ་ཞེས་བརྗོད་ཆོག་སྟེ། དེའི་རྒྱུ་མཚན་སེམས་ཀྱི་ཆ་གཅིག་རིག་པ་ཡིན་པའི་གནད་ཀྱིས་རིག་པ་ཞེས་བཏགས་ན་ཆོག །གསུམ་དང་བྲལ་བའི་བཞི་ཆའི་སྐབས་ན་རིག་པ་ངོ་སྤྲད་ན་འཕྲོད་སླ་བ་ཡིན་གསུང༌། དེའི་སྐབས་ན་ལྷ་བཟོའི་ཚོན་གྱིས་སྐྱ་རིས་བྱེད་པ་དང་འདྲ་བ་ཡིན་གསུང༌། དྲན་པས་རིག་པ་བསྐྱངས་པའི་གནས་སྐབས་ན་རིག་པ་མངོན་དུ་གྱུར་ཡོད་ཨེ་དགོས་སྙམ་ན་མི་དགོས་ཏེ། དཔེར་ན་ཁང་པའི་ནང་ཞིག་ན་མི་གྲལ་གང་ཡོད་སྐབས་ན། དེའི་གྲལ་གྱི་མི་གཅིག་ལ་དམིགས་ནས་སྡོད་པའི་སྐབས་མི་གཞན་རྣམས་ལ་ཅང་མི་སེམས་པར་གྱུར་ཏེ་མི་གཞན་རྣམས་རིམ་པ་བཞིན་དུ་མི་གཅིག་ལ་ཐིམ་སོང་བ་ཡང་མ་ཡིན། དེ་རྣམས་ལ་སེམས་ཀྱི་ཟུར་གྱིས་བལྟས་ནས་སྡོད་པ་ཡང་མ་ཡིན། མི་དེ་རྣམས་ལ་ཅི་ཡང་མི་སེམས་པ་བཞིན་དུ་དྲན་པས་རིག་པ་ལ་བལྟས་ནས་བསྒོམ་པའི་སྐབས་དྲན་པ་རིག་པ་ལ་འདྲེས་སོང་ལྟ་བུ་འབྱུང་མོད། འདྲེས་སོང་སྙམ་པའི་མོས་པ་བྱེད་མི་དགོས། ད་ལྟ་རང་
ལ་འོད་གསལ་འཆར་ཡོད་པ་ཡང་བསམ་མི་དགོས། དཔེར་ན་སངས་རྒྱས་མཚན་བཟང་པོས་བརྒྱན་པ་ཞིག་སྒོམ་ནས་སངས་རྒྱས་ཀྱི་རྣམ་པ་ཡིད་ལ་ཤར་ཡོད་པའི་དུས་ན་ངའི་སངས་རྒྱས་བསྒོམ་ཡོད་བསམ་མི་དགོས། སངས་རྒྱས་ཡིད་ལ་སྒོམ་ཡོད་པའི་ཕྱིར་རོ། །དེ་བཞིན་དུ་ང་ལ་འོད་གསལ་ཤར་ཡོད་བསམ་དགོས་པ་མ་ཡིན་ཏེ། སྔར་བླ་མས་ངོ་སྤྲད་པའི་འོད་གསལ་དེ་ཉིད་རང་གིས་སྒོམ་བཞིན་པའི་དུས་ཡིན་པས་སོ། །ཨོ་རྒྱན་རིན་པོ་ཆེའི་ཞལ་ནས། ཕྱི་ལྟར་གཟུང་བའི་སོགས་ལྟར་འོད་གསལ་རང་ངོ་ཤེས་པ་སྟེ། བླ་མའི་མན་ངག་གིས་རིག་པ་ངོ་སྤྲད་པ་དེ་ལ་དྲན་པས་རིག་པ་བསྐྱངས་ནས་འདུག་ན་བར་དུ་འོད་གསལ་རང་ངོ་ཤེས་ནས་ཕྱི་ལྟར་གཟུང་བའི་ཡུལ་སྣང་རྣམས་རང་ཤུགས་ཀྱིས་དག་འགྲོ་བ་ཡིན། དྲན་པ་དང་རིག་པ་བསྲེས་ནས་སྒོམ་བསྡད་ན་ནང་དུ་འཛིན་པའི་སེམས་རྣམས་རིག་པ་ལ་ཐིམ་པའམ་རང་བཞིན་གྱིས་དྭངས་འགྲོ་བ་ཡིན། དེ་བཞིན་དུ་རིག་པ་དྲན་པས་མ་བརྗེད་པར་སྐྱོང་ནས་སྡོད་ན་བར་དུ་འོད་གསལ་རང་ངོ་ཤེས་ནས་འགྲོ་ངེས་པ་ཡིན་གསུང༌། རིག་པ་དེ་ཉིད་བསྐྱང་བསྡད་ན་རླན་གར་ཡོད་སར་ཆུ་འགྲོ་བ་བཞིན་དུ། རིག་པའི་རྩལ་ལས་སེམས་རྣམས་འཕྲོས་པ་ཡིན་པས། མཐར་སེམས་རྣམས་རིག་པ་རང་ཉིད་ལ་ཐིམ་ནས་
འགྲོ་བ་ཡིན་ཏེ། རིག་པ་རང་གི་ཚང་ངམ་མལ་གྱི་ལམ་རྙེད་འོང་བ་ཡིན། དཔེར་ན་རྒྱ་མཚོའི་རྦ་རླབས་རྒྱ་མཚོ་ལས་བྱུང་ནས་མཐར་རྒྱ་མཚོ་ལ་ཐིམ་འགྲོ་བ་བཞིན་དུ་རིག་པའི་རྩལ་གྱི་སེམས་རྣམས་རིག་པ་ལས་འཕྲོ་ཞིང་མཐར་ལམ་བསྒོམ་སྟོབས་ཀྱིས་རྩལ་རྣམས་རིག་པ་རང་ཉིད་ལ་ཐིམ་པའམ་རིག་པའི་དབྱིངས་སུ་དྭངས་ནས་འགྲོ་བ་ཡིན་པས་དེའི་ཚེ་འགྱུ་བ་རང་དག་གི་དགོངས་པ་ཞེས་བརྗོད་དོ། །དབང་པོའི་སྒོ་སྡོམ་པ་ཡང༌། བསྐྱེད་རིམ་དུ་ནི་རྗེས་ཐོབ་ཏུ་སྣོད་བཅུད་དག་པ་རབ་འབྱམས་ལྷའི་དཀྱིལ་འཁོར་དུ་བལྟ་བ་དང༌། རྫོགས་རིམ་དུ་གང་སྣང་བ་བདེ་ཆེན་གྱི་རྣམ་རོལ་དུ་ལྟ་བ་དང༌། སྐབས་འདིར་གང་སྣང་རིག་པའི་རྩལ་ལམ། གང་སྣང་རིག་པའི་རྣམ་འཕྲུལ་དུ་དྭངས་གསལ་བདེ་བའི་རྣམ་པར་རྩལ་སྦྱང་བ་དེའོ། །མདོར་ན་སེམས་དང་རིག་པ་གཉིས་ཀྱི་སྤང་བླང་ཕྱེས་ནས་དྲན་པས་རིག་པའི་བཞུགས་ཚུལ་སྐྱོང་དགོས། དེ་ལྟར་སྐྱོང་བ་ལ་ཡང་དང་པོ་རྩོལ་བའི་དྲན་པས་རིག་པ་དང་བསྲེས་ནས་བསྒོམ་དགོས། མཐར་འདུ་བྱེད་ཀྱི་དྲན་པ་རྣམས་རང་དགལ་སོང་ནས་རིག་པའི་རང་མདངས་ཁོང་ནས་འཆར་ཡོང༌། དེའི་སྐབས་སུ་རྩོལ་མེད་རང་བཞག་གི་དྲན་པ་ཞེས་ཟེར་རོ། །ཡེ་གྲོལ་འདུས་མ་བྱས་ཀྱི་རིག་པ་དེ་རང་གི་
ཤེས་པའི་ཆ་ན་ཡོད་པ་བླ་མའི་མན་ངག་གིས་ངོ་སྤྲད་ནས་ཐག་ཆོད་པ་ཞིག་དགོས་ཞེས་ཡང་ནས་ཡང་དུ་ནན་ཆེ་བར་གསུངས་པས། །འདིར་ཡང་ཟློས་སྐྱོན་ལ་མ་བསམ་པར་གསུང་རིམ་ལྟར་བརྗེད་བྱང་དུ་བྱས་པ་ཡིན། དེ་ལྟ་བུའི་འོད་གསལ་རིག་པ་དེ་ཉིད་རྫོགས་ཆེན་གྱི་རྒྱུད་ནས་གཏན་ལ་ཕབ་ཚུལ། །རྡོ་རྗེའི་གད་མོ་བཅུ་གཉིས། །ཚིག་ཆེན་པོ་བརྒྱད། བཞག་ཐབས་རྣམ་པ་བདུན། ཅོག་བཞག་རྣམ་པ་བཞི་ལ་སོགས་པའི་སྒོ་ནས་གཏན་ལ་ཕབ་ཚུལ་མང་དུ་གསུངས་ཀྱང༌། མདོར་ན་སྐབས་འདིར་བསྟན་པའི་ཚིགས་གསུམ་གནད་དུ་བསྡུ་བའི་ཁོངས་སུ་དེ་ཐམས་ཅད་ཚིག་གི་ཆ་ནས་མ་འདུན་ཡང་དོན་གྱི་ཆ་ནས་འདུ་བ་ཡིན། རྡོ་རྗེའི་གད་མོ་བཅུ་གཉིས་ཀྱི་ནང་ནས། རྫོགས་པ་ཆེན་པོ་ནི་རྒྱུ་འབྲས་ལས་འདས་པའི་ཆོས་ཡིན་ཧ་ཧ། ཞེས་བརྗོད་པའི་དོན་ནི། ཐེག་པ་གཞན་གྱི་རྒྱུ་འབྲས་ལ་སྐུར་བ་བཏབ་པ་མིན་ཏེ། རྒྱུ་འབྲས་གཉིས་ཀ་སྣང་གསུམ་ཚུན་ཆད་ཀྱི་སེམས་ཀྱི་སྟེང་ན་ཡོད་པས་སོ། །རྫོགས་པ་ཆེན་པོའི་གཤིས་དེར་ཕེབས་པ་རྣམས་ལ་མཚམས་མེད་པ་ལྔ་བྱས་པ་དང་བསྐལ་པ་མང་པོར་ཚོགས་བསོགས་པ་གཉིས་སངས་རྒྱས་པར་ཁྱད་མེད་གསུངས་པ་ནི། ཡེ་གྲོལ་འདུས་མ་བྱས་ཀྱི་རིག་པ་ལ་དགོངས་ནས་གསུངས་པ་
འདི་ལྟ་བུ་ལ་དགེ་སྡིག་གིས་མི་གོས་པ་སྒྲ་དྲང་ཐད་རང་དུ་བསྟན་པ་ཡིན་ལ། གཤིས་དེར་མ་ཕེབས་པ་དག་ལ་དེ་ལྟར་བསྟན་པར་མ་བཤད་པ་མིན་ནོ། །མཆན། ཡིན་ལ་མཚན་གཞི་གཤིས་དེར་ཕེབས་པའི་རྣལ་འབྱོར་པ་ཏེ་ལོ་པ་དང་བི་མ་ལ་ལྟ་བུའོ། །ཀུན་ཏུ་བཟང་པོ་ཉིད་ཀྱིས་ཀྱང་དགེ་བ་ཅུང་ཟད་མ་བྱས་སྡིག་པ་ཅུང་ཟད་ཙམ་ཡང་མ་སྤངས་ནས་སངས་རྒྱས་སོ་ཞེས། དགེ་སྡིག་ལས་འདས་པར་གསུངས་པ་ཡང༌། །འོད་གསལ་ཉག་གཅིག་ལ་དགོངས་ཏེ་གསུངས་པ་ཡིན་ལ། དེའི་རྒྱུ་མཚན་ནི་འོད་གསལ་ཉིད་ནི་དམྱལ་བའི་མེ་དང་གྲང་བའི་ངད་དང་ཡི་དྭགས་སུ་བཀྲེས་སྐོམ་གྱི་སྡུག་བསྔལ་སོགས་ཐམས་ཅད་ཀྱིས་གོས་མ་མྱོང་ལ་འོད་གསལ་དེ་ཉིད་སྡུག་བསྔལ་གྱི་ངོ་བོར་སྐྱེ་མི་སྲིད་པས་དེ་ཉིད་སྒྲ་དྲང་ཐད་དུ་གསུངས་པ་ཡིན། མདོར་ན་སྣང་མཆེད་ཐོབ་གསུམ་གྱི་སྔོན་གྱི་སྣང་སེམས་རགས་པའི་སྟེང་ནས་རྒྱུ་བསགས་ནས་འབྲས་བུ་མྱོང་བ་སོགས་འཇོག་པ་ཡིན་པ་གལ་ཆེ། ཀུན་བཟང་དགེ་བ་རྡུལ་ཙམ་མ་བྱས་པར། །ཟག་མེད་རང་ངོ་ཤེས་པའི་དགེ་ཚོགས་ཀྱིས། །ཞེས་གསུངས་པ་ལྟར་རོ། །ཕྱི་འདུ་འཛི་ལས་ལོ་བརྒྱར་བསྒྲུབས་པ་ལས་རི་ཁྲོད་དབེན་པར་གཅིག་པུར་གནས་ནས་ཉིན་གཅིག་དགེ་བ་བསྒྲུབ་པ་ཁེབས་ཆེ་བ་དང༌། རང་གི་སེམས་གཙང་སིང་ངེ་བ་ཡིན་པས། དེ་ཕྱི་རི་ཁྲོད་ཀྱི་དབེན་པ་ཡིན་ནོ། །ནང་
རྣམ་རྟོག་ལས་དབེན་པ་ནི། སྤྱིར་ན་ཕར་ཕྱིན་ཐེག་པའི་གཞི་ལྷག་གྲུབ་ནས་སེམས་བཏང་འགྲོ་བཞག་སྡོད་ལ་རང་དབང་བའི་ལུས་སེམས་ལས་སུ་རུང་བས་གང་ལ་དམིགས་ཀྱང་དགེ་བ་ལ་བཀོལ་དུ་རུང་བ་ཡིན་ནོ། །རྣམ་རྟོག་སྤུན་ཐག་ཆད་པའི་ནམ་མཁའ་ལྟ་བུའི་འོད་གསལ་ནི་གསང་བའི་རི་ཁྲོད་དུ་འཇོག་ཏེ། འོད་གསལ་དེ་ལ་ལྟོས་ནས་སེམས་བཏང་འགྲོ་བཞག་སྡོད་ལ་དབང་བའི་རྣམ་པ་དེ་ཡང་སྐེབ་ཞད་ཅན་ཞིག་ཡིན་པར་གསུངས་ལ། དེ་གསང་བ་སེམས་ཀྱིས་དབེན་པའི་རི་ཁྲོད་ཡིན། དེ་ལྟར་ལམ་གྱི་མྱུར་བུལ་ཡང་ཕར་ཕྱིན་ཐེག་པའི་ཟབ་རྒྱས་གཉིས་ལྡན་གྱི་ལམ་བསྐལ་པ་གྲངས་མེད་མང་པོར་བསྒྲུབས་ནས་མཐར་མངོན་པར་རྫོགས་པར་སངས་རྒྱས་པ་ཡིན་ལ། སྔགས་ཀྱི་ལམ་ནི་དེ་ལས་ཤིན་ཏུ་མྱུར་སྟེ་ཕྱི་རྒྱུད་སྡེ་གསུམ་གྱི་ལམ་གྱིས་ཐུན་མོང་གི་དངོས་གྲུབ་སོགས་བསྒྲུབས་ནས། དེ་ལས་ཚེ་བསྐལ་པ་མང་པོར་བསྲིང་ནས་ད་གཟོད་མཆོག་གི་དངོས་གྲུབ་ཐོབ་པ་ཡིན་གསུང༌། བླ་མེད་ཀྱི་རྒྱུད་སྡེ་གཞན་གྱི་ལམ་ལ་ཚེ་བསྲིང་མི་དགོས་པར་མི་ལོ་བཅུ་གཉིས་ཀྱིས་མཆོག་གི་དངོས་གྲུབ་ཐོབ། ཐེག་དགུའི་ཡང་རྩེ་འདི་ཉིད་ཀྱི་ལམ་གྱིས་མི་ལོ་དྲུག་གིས་མཆོག་གི་དངོས་གྲུབ་ཐོབ་སྟེ་མྱུར་བུལ་གྱི་ཁྱད་པར་ཡང་དེ་ལྟ་བུ་ཡིན་ནོ། །མདོར་ན་ཀ་དག་ཁྲེགས་ཆོད་ཀྱི་རིག་
པའི་བཞུགས་ཚུལ་དེ་ཉིད་འཆི་སྲིད་ཀྱི་འོད་གསལ་ཇི་ལྟ་བ་བཞིན་དུ་ངོ་སྤྲོད་ནས། དེའི་ཁྱད་ཆོས་ཀ་དག་ཟང་ཐལ་ལ་སོགས་པའི་བརྗོད་ཚུལ་སྣ་ཚོགས་པའི་སྒོ་ནས་ཡོན་ཏན་གྱི་ཆ་མི་འདྲ་བ་རེ་རེ་བསྟན་ནས་རིག་པའི་བཞུགས་ཚུལ་ཇི་ལྟ་བ་བཞིན་བླ་མའི་མན་ངག་གིས་ངོ་ལེགས་པར་སྤྲད་དེ་ད་ལྟ་རང་གི་དྲན་པ་ལ་ལེགས་པར་འདྲིས་ངེས་སུ་བྱེད། དེ་འདྲ་བའི་རིག་པ་དེ་དོན་གཞན་དུ་ཡོད་པ་མ་ཡིན་ཏེ། ད་ལྟའི་རང་གི་ཤེས་པ་འདི་ཉིད་ཀྱི་ཆ་བཤད་མ་ཐག་པ་དེ་ཉིད་ཡིན་པར་ཐག་བཅད་ནས་བཅད་ཐོག་དེ་ནས་རིག་པའི་རྣམ་པ་དེ་ཉིད་དྲན་པས་སྐད་ཅིག་ཀྱང་མི་བརྗེད་པར་བདག་གི་སེམས་འདི་ཉིད། རིག་པའི་ངོ་བོར་གྱུར་སོང་སྙམ་པ་ལྟ་བུའི་མོས་པ་སྒོམ་ཡང་མ་ཡིན་པར་ད་ལྟའི་རང་གི་ཤེས་པའི་ཆ་འདི་དག་ཐམས་ཅད་རིག་པའི་རང་བཞིན་དུ་བལྟས་ནས་སེམས་ཀྱི་ཕྱོགས་ལ་ཅུང་ཟད་ཙམ་ཡང་མི་གཡེང་བར་རིག་པའི་ཕྱོགས་ལེགས་པར་བསྒོམ་པར་བྱ་བ་ནི་གནད་དོན་ཐུན་མོང་མ་ཡིན་པ་ཡིན་ནོ། །དེས་ཐག་གཅིག་ཐོག་ཏུ་བཅད་པ་སོད། ༈ །གསུམ་པ་གདེངས་གྲོལ་ཐོག་ཏུ་བཅའ་བ་ནི། སྒོམ་པ་རབ་དང༌། འབྲིང་དང༌། ཐ་མ་གསུམ་ལས། བསྒོམ་པ་རབ་སེང་གེ་ལ་རྡོ་འཕང་བ་ལྟ་བུ་ཡིན་ཏེ། སེང་གེ་ལ་རྡོ་འཕངས་ཀྱང་རྡོ་རྩར་མི་འདེད་པར་
རྡོ་འཕང་མཁན་ཁོ་རང་དེད་ནས་ཉེས་ལན་གྱི་ཆད་པ་གཅོད་ནས་རྡོ་དེ་སླར་མི་ཕོག་པར་བྱེད་པ་ལྟར། སྒོམ་རབ་ཀྱིས་རྣམ་རྟོག་ཐོལ་གྱིས་སྐྱེས་ཚེ་རྣམ་རྟོག་གི་རྗེས་སུ་མི་འབྲང་ཞིང་རྣམ་རྟོག་འཆར་མཁན་ཁོ་རང་དྲན་པས་ཧད་ཀྱིས་བཟུང་ནས་རྣམ་རྟོག་གང་ཤར་རྣམས་རང་གྲོལ་དུ་གཏོང་བ། འགའ་ཞིག་གིས་དེའི་སྐབས་རྣམ་རྟོག་ལ་ཅེར་རེ་ལྟོས་ཞེས་པའི་དོན་དེ་རྣམ་རྟོག་ཁོ་རང་ལ་བལྟ་བ་ཡང་ཡོད། འགའ་ཞིག་གིས་རྣམ་རྟོག་སྔ་ཕྱིའི་བར་སེམས་ས་ལེ་ཧྲིག་གེ་བ་ལ་བལྟ་བ་ཡང་ཡོད། དེ་གཉིས་གང་ཡང་མ་ཡིན་པར་རང་ལུགས་ལ་ཅེ་རེ་ལྟོས་ཞེས་པའི་དོན་ནི། རིག་པ་ཁོ་རང་ལ་བལྟ་བ་ཡིན་ལ། རིག་པ་ལ་བལྟ་བ་དེའི་སྐབས་སེམས་ཀྱི་ཕྱོགས་ལ་དྲན་པས་བདག་ཅུང་ཟད་ཙམ་ཡང་མི་བྱེད་པ་ནི་སྐབས་འདིའི་གནད་དོན་གཅིག་གོ །སྒོམ་པ་ཐ་མ་ནི་ཁྱི་ལ་རྡོ་འཕངས་པ་ལྟར་རྡོ་འཕེན་པ་པོ་དེ་བསྐྱར་ནས་རྡོ་རྩ་དེད་པ་ལྟར། དེ་བཞིན་དུ་རྣམ་རྟོག་ཤར་མཁན་བསྐྱར་ཏེ། སྒོམ་རྣམ་རྟོག་གི་རྩ་དེད་པ་དེ་འདྲ་མིན་པར་ཤར་ཁན་ཁོ་རང་ལ་བལྟ་བ་དེ་ཡིན། གྲོལ་ལུགས་གསུམ་ནི། རྣམ་རྟོག་ངོ་ཤེས་པ་སྔར་འདྲིས་ཀྱི་མི་དང་འཕྲད་པ་ལྟ་བུ། རིག་པའི་རྣམ་པ་བརྗེད་ན་ཇེ་ཞིག་ན་རྣམ་རྟོག་ཤར་ཡོང་བ་དེ་ངོ་ཤེས་ནས་དེ་ལ་སྐྱོན་དུ་བལྟས་ནས་སྔར་གྱི་རིག་པའི་བཞུགས་ཚུལ་གྱི་སྟེང་དུ་འཇོག་པ་དེའོ། །རྣམ་རྟོག་རང་གིས་རང་གྲོལ་བ་སྦྲུལ་གྱི་མདུད་པ་ཞིག་པ་ལྟ་བུའི་གྲོལ་ཚུལ་ནི། འོད་གསལ་
གྱི་རྣམ་པ་དེ་ཉིད་ཀྱི་བཞུགས་ཚུལ་ལམ་དུ་བྱེད་དུས་རྣམ་རྟོག་གཞན་གྱིས་བར་གཅོད་མི་ནུས་ནའང༌། དྲན་པས་རིག་པ་ཅུང་ཟད་བསྒྲིམས་ནས་མ་བསྐྱང་ན་ཡེངས་ནས་འགྲོ་ཉེན་ཡོད་པས་ཅུང་ཟད་བསྒྲིམས་པའི་སྟོབས་ཀྱིས་རྣམ་རྟོག་གི་ཚུགས་མི་ཐུབ་པར་རང་སར་གྲོལ་བ་དེའོ། །གསུམ་པ་རྣམ་རྟོག་ཕན་མེད་གནོད་མེད་དུ་གྲོལ་ཚུལ་ཁང་སྟོང་ནང་དུ་རྐུན་མ་བྱུང་ན་རྐུན་མ་ལ་ཐོབ་པ་དང་ཁང་པའི་ནང་གི་རྒྱུ་རྫས་ལ་ཤོར་བ་མེད་པ་ལྟར། དེའི་དུས་སུ་དྲན་པས་རིག་པའི་མཁར་ཚུགས་ནས། ཐ་མལ་གྱི་རྣམ་རྟོག་ཐལ་ཐོལ་རེ་སྐྱེས་ན་ཡང༌། རྣམ་རྟོག་ལ་ཐོབ་རྒྱུ་དང་འོད་གསལ་ལ་འཆོར་རྒྱུ་མེད་པ་དེའོ། །མདོར་ན་དྲན་པའི་མདུང་དེ་ཉིད་རིག་པའི་གཏིང་དུ་འཛུགས་ནས་གཞན་རྐྱེན་གྱིས་བརྫི་མི་ནུས་པ་དགོས་ཏེ། ཆུའི་ཁར་རྩམ་སྐྱ་གཏོར་བ་ལྟ་བུར་ཡར་མར་དུ་ཡ་ལ་ལ་བྱེད་པ་ལྟ་བུ་ནི་མ་ཡིན་ནོ། །དེ་ནས་རིམ་པ་བཞིན་འཇུར་དྲན་གྱི་དྲན་པའམ་འདུ་བྱེད་ཀྱི་དྲན་པ་ཇེ་ཟད་དུ་སོང་ནས། འོད་གསལ་རང་གི་ངོས་ནས་དྲན་པ་ཞིག་སད་ཆས་སད་ཆས་བྱེད་པ་ཡིན་ཏེ། དེ་སད་ནས་རིག་པ་རང་ལ་ཡོད་པའི་དྲན་པ་ཁྱད་པར་བ་ཞིག་འབྱུང་ལ། དེ་ལ་རྩོལ་མེད་རང་བཞག་གི་དྲན་པ་ཞེས་བརྗོད་དོ། །རིག་པའི་རྩལ་སྦྱང་བ་ནི་མཉམ་བཞག་གི་སྐབས་རིག་པ་ལ་མཉམ་པར་བཞག་པའི་སྟོབས་ཀྱིས་རྗེས་ཐོབ་ཀྱི་སྐབས་ཐམས་ཅད་དྭངས་གསལ་བདེ་བའི་རྣམ་པར་
འཆར་སྟེ། དཔེར་ན་མི་ཞིག་གིས་ཡིད་འོང་གི་བུམ་པ་མཐོང་བའི་དཔེ་དེ་བཞིན་དུ་མཉམ་བཞག་གི་གནས་སྐབས་སུ་རིག་པའི་བཞུགས་ཚུལ་གྱི་རྣམ་པ་ལས་སེམས་གཞན་དུ་མ་ཡེངས་པའི་སྟོབས་ཀྱིས་རྗེས་ཐོབ་ཏུ་ཡུལ་སྣང་ཐམས་ཅད་དྭངས་གསལ་བདེ་བའི་རྣམ་པ་ཅན་དུ་འཆར་སྟེ། དེ་ལྟར་འཆར་བའི་གང་ཟག་དེས་གང་སྣང་ཐམས་ཅད་རིག་པའི་རྣམ་འཕྲུལ་དུ་འཆར་ཐུབ་ལ། དེ་ཐུབ་ན་དེ་འདྲའི་སྔགས་པ་དེས་ཕྱི་ནང་གི་སྣོད་བཅུད་ཐམས་ཅད་ཀྱང་རིག་པའི་རྣམ་འཕྲུལ་དུ་འཇོག་ཐུབ་པ་ཡིན་ནོ། །རྒྱུ་མཚན་དེས་ན་སྣོད་བཅུད་ཐམས་ཅད་རང་ངོས་ནས་མ་གྲུབ་པའི་གནད་ཀྱིས་རྣལ་འབྱོར་པས་ལམ་བསྒོམས་སྟོབས་ཀྱིས་རིག་པའི་རྣམ་འཕྲུལ་དུ་འཇོག་ཐུབ་པས་སྣོད་བཅུད་གཉིས་བདེན་མེད་དུ་གཏན་ལ་ཕབ་ནུས་པ་ཡིན་ནོ། །དེ་ཡང་དང་པོ་ནས་བྱུང་གནས་འགྲོ་གསུམ་གྱི་སྐབས་སུ་སེམས་གཞི་མེད་རྩ་བྲལ་དུ་གཏན་ལ་ཕབ་དགོས་ཏེ། རིག་པའི་རྣམ་པ་ལམ་བྱེད་བསྒོམ་པའི་མཉམ་བཞག་དེ་ལས་ལྡང་བའི་རྗེས་ཐོབ་ཏུ་རིག་པའི་རྩལ་སྦྱངས་པའི་སྒོ་ནས་ཡུལ་སྣང་བདེན་མེད་དུ་གཏན་ལ་ཕབ་པའི་སྐབས་ཡིན་པས་སོ། །དེ་ལྟར་དང་པོ་སྟོང་པ་ཉིད་ལ་བློ་སྦྱང་བར་བྱས་ནས་གཞི་གྲོལ་ཀ་དག་གི་རིག་པ་ལ་མཉམ་པར་བཞག་པའི་སྐབས་སུ་རིག་པའི་བཞུགས་ཚུལ་ཁོ་ན་མ་གཏོགས་སྟོང་ཉིད་སོགས་ལ་དཔྱད་པ་བྱས་ནས་རིག་པའི་མལ་ས་
འཕྲོག་པར་མི་བྱེད་པ་ཡང་གནད་དོ། །རིག་པ་མངོན་དུ་གྱུར་ཚེ་ཁྲེགས་ཆོད་ཀྱི་སྐབས་སུ་དབྱིངས་རིག་སྲེ་དགོས་ཏེ། དེ་ནི་རིག་པའི་ངོ་བོ་རང་བཞིན་གྱིས་མ་གྲུབ་པའི་སྟོང་ཉིད་དམ་དབྱིངས་གཉིས་དོན་གཅིག་སྟེ། སྟོང་པའི་རང་མདངས་གསལ་ལ་འགགས་པ་མེད་པའི་རང་བཞིན་ཅན་དེ་ཉིད་རིག་པ་ཡིན་ལ། དེ་དང་དེའི་དབྱིངས་སྟོང་ཉིད་གཉིས་བསྲེས་ནས་བསྒོམ་ན་ནི་དབྱིངས་རིག་བསྲེས་པ་ཡིན་ཏེ། དེ་ནི་ཕར་ཕྱིན་ཐེག་པའི་ལམ་གྱིས་སྟོང་ཉིད་ལ་ཅི་ཙམ་གོམས་པར་བྱས་ཀྱང་ཟབ་ལམ་འདི་ཉིད་ཀྱིས་དབྱིངས་རིག་བསྲེས་ནས་བསྒོམ་པ་ནི་སྔ་མ་ལ་ལྟོས་ནས་འགྲན་ཟླ་དང་བྲལ་བ་ཡིན་ལ། དེ་ནི་ཡུལ་སྣང་སྟོང་ཉིད་ལ་བཟང་ངན་མེད་ཀྱང་ཡུལ་ཅན་གྱི་རིག་པའམ་བསྒྲུབ་གཞིའི་ཁྱད་པར་ལས་ཡིན་པ་ཤེས་དགོས། དེ་འདྲའི་ལམ་ཟབ་མོ་འདི་ཉིད་རང་ཁོ་ན་ཞི་བདེ་དོན་དུ་གཉེར་ནས་ཉམས་སུ་ལེན་པར་འདོད་པ་ནི། ཙནྡན་ས་མཆོག་སོལ་བ་བྱེད་པ་དང་འདྲ་གསུངས་ཏེ། རང་ཁོ་ནའི་དོན་དུ་གཉེར་བ་ཙམ་ཞིག་ནི་ཐེག་མཆོག་རྫོགས་པ་ཆེན་པོའི་ལམ་མིན་ཏེ། ངེས་འབྱུང་གི་བསམ་པ་དང་ལྡན་པས་སྟོང་ཉིད་ཁོ་ན་བསྒོམ་པར་བྱེད་ན་ཐར་པ་ཙམ་ཞིག་ནི་ཐོབ་ནུས་ལ། དེ་ཙམ་ཞིག་གིས་ནི་ཆོག་པ་མིན་ཏེ། སེམས་ཅན་ཐམས་ཅད་ཀྱི་སྡུག་བསྔལ་ཆུ་ཚོད་གཅིག་གི་ཡུན་ལའང་མི་བཟོད་པའི་སེམས་ཀྱིས་ཀུན་ནས་བསླངས་ཏེ། སྙིགས་དུས་ཀྱི་ཚེ་ཐུང་ངུ་གཅིག་ལ་སངས་
རྒྱས་ཀྱི་གོ་འཕང་དུས་མྱུར་བ་ཉིད་དུ་ཐོབ་པའི་ཆེད་དུ་རྫོགས་པ་ཆེན་པོའི་གདམས་ངག་ཉན་ནས་ཉམས་སུ་ལེན་པ་ཞིག་དགོས་སོ། ༈ །མདོ་སྔགས་གང་ཡིན་ཀྱང་བསྒྲུབ་བྱ་ཆོས་གཟུགས་ཀྱི་སྐུ་གཉིས་ལ་ཁྱད་པར་མེད་ཀྱང༌། སྒྲུབ་བྱེད་ཀྱི་ལམ་ལ་ཁྱད་པར་ཡོད་པ་ཡིན་ཏེ། དེ་རྣམས་མདོར་བསྡུས་ནས་འདིར་སྐབས་སུ་བབས་པའི་རྣམ་བཞག་ཅུང་ཟད་བརྗོད་ན། བླ་མེད་ཀྱི་རྒྱུད་སྡེ་གཞན་གྱི་ལམ་རྩ་ཐིག་རླུང་སོགས་ལ་བསྟེན་ནས་གནད་དུ་བསྣུན་སྟོབས་ཀྱིས་སློང་བྱེད་ཀྱི་རྐྱེན་གསུམ་དང་བྲལ་བའི་ནམ་མཁའ་ལྟ་བུའི་བདེ་བ་ཆེན་པོའི་ཡེ་ཤེས་མངོན་དུ་བྱས་ནས་ཡེ་ཤེས་ཆོས་སྐུ་ཉིད་སྒྲུབ་པ་དང༌། རིག་པ་དེ་ལས་ཅུང་ཟད་གཡོ་བར་རྩོམ་པ་དང་འོད་གསལ་གྱི་ལྷན་ཅིག་བྱེད་རྐྱེན་དང་རླུང་འོད་ཟེར་ལྔ་པའི་ཉེར་ལེན་གྱི་རྒྱུ་བྱས་ནས་རྟེན་དང་བརྟེན་པ་ལྷའི་དཀྱིལ་འཁོར་གྱི་རྣམ་པར་ལྡང་ནས་སངས་རྒྱས་ཀྱི་གཟུགས་སྐུ་སྒྲུབ་པ་དང༌། འོད་གསལ་རྫོགས་པ་ཆེན་པོའི་ལམ་གྱིས་ཆོས་གཟུགས་ཀྱི་སྐུ་གཉིས་མངོན་དུ་བྱེད་ཚུལ་ནི། སྔར་ངོ་སྤྲད་པའི་གཞི་དུས་ཀྱི་རིག་པ་དེ་ཉིད་ངོ་མཚར་བའི་ཆོས་དུ་མ་དང་བཅས་པའི་སྒོ་ནས་གཏན་ལ་ཕབ་ནས་རིག་པའི་བཞུགས་ཚུལ་ཇི་ལྟ་བ་བཞིན་དུ་བསྒོམས་ནས་ཡེ་ཤེས་ཆོས་ཀྱི་སྐུ་སྒྲུབ་པ་དང༌། དེ་ལྟ་བུའི་གཞི་དུས་ཀྱི་འོད་གསལ་དེར་སྣང་བ་སྣ་ཚོགས་དང་དྲན་རིག་སྣ་ཚོགས་བསྐྱེད་པའི་ནུས་པ་ཡོད་ཀྱང་མ་སད་པའི་གནས་སྐབས་ཡིན་ལ་
གཞི་སྣང་གི་དུས་སུ་སྐྱེད་བྱེད་ཀྱི་ནུས་པ་མཐའ་དག་རྫོགས་ནས། སྐུ་དང་ཐིག་ལེ་ཞིང་ཁམས་ཀྱི་བཀོད་པ་སོགས་བསམ་གྱིས་མི་ཁྱབ་པ་འཆར་བས་གཞི་དུས་ཀྱི་འོད་གསལ་དེ་ཉིད་འཆར་གཞིའི་ཚུལ་དུ་ཡོད་པ་དེ་གཞི་སྣང་གི་དུས་སུ་ཡོངས་སུ་རྫོགས་ལ། དེ་ལྟར་ཐོད་རྒལ་གྱི་ལམ་གྱིས་གཏན་ལ་ཕབ་ནས་གོམས་པའི་མཐུས། གཟུགས་སྐུའི་རྣམ་པ་སྒྲུབ་པ་ནི་ལམ་འདིའི་ཁྱད་ཆོས་ཡིན་ནོ། །སྔགས་བླ་མེད་ཀྱི་ལུགས་ཀྱིས་གཞི་ན་ཡོད་པ་ལྟར་ལམ་དུ་བྱེད་པས་ན་དེ་ཉིད་མྱུར་བའང་གནད་དེས་ཡིན་ནོ། །ཕར་ཕྱིན་ཐེག་པ་ལྟར་ན་ལམ་དེ་ལྟར་དུ་བསྒོམ་པའམ། དེ་ལྟར་ལམ་དུ་བྱེད་པའི་ཐབས་མ་བཤད་པའི་རྒྱུ་མཚན་ཤེས་པའང་གལ་ཆེ་གསུང༌། ༈ །རྫོགས་པ་ཆེན་པོ་དང་དུས་འཁོར་གཉིས་ཀྱི་གཟུགས་སྐུ་གཉིས་སྟོང་གཟུགས་ལ་བརྟེན་ནས་བསྒྲུབ་པ་ཙམ་ཞིག་ལ་འདྲ་ན་ཡང་ལམ་གྱི་ཆ་ཐམས་ཅད་ནས་ཐམས་ཅད་དུ་འདྲ་བ་གཏན་མིན་ཏེ། རྫོགས་པ་ཆེན་པོའི་རང་ལམ་ལ་འཆར་གཞི་དང་ལམ་དང་རྩའི་བྱེ་བྲག་སོགས་དང༌། ལམ་གྱི་བྱེད་བཅིང་ཐུན་མོང་མ་ཡིན་པ་གཞན་ལས་ལྷག་པའི་ཁྱད་པར་དུ་མ་ཡོད་གསུང༌། དུས་འཁོར་དུ་རྟགས་བཅུ་གསུངས་ཀྱང་སྒྲོན་བཞི་དང་སྣང་བཞི་སོགས་མ་གསུང༌། རྫོགས་ཆེན་དུ་སྒྲོན་བཞི་སོགས་ཁྱད་པར་དུ་མ་ཞིག་གསུངས་ཀྱང་དུ་བ་ལ་སོགས་པའི་རྟགས་བཅུ་དང་ལམ་གྱི་བྱེད་བཅིང་མང་པོ་མ་
གསུངས་པས་སྟོང་གཟུགས་འཆར་ཚུལ་ཙམ་ཞིག་འདྲ་ནའང་ནང་གསེས་ཀྱི་མི་འདྲ་བ་དུ་མ་ཡོད་པ་ནི་ཤེས་སླ་བ་ཡིན་གསུང༌། ༈ །དྲན་རིག་སྣ་ཚོགས་དང་སྣང་བ་སྣ་ཚོགས་བསྐྱེད་པའི་ནུས་པ་རིག་པ་རང་གི་སྟེང་ནས་མ་སད་པའི་གཞི་དུས་ཀྱི་ཆ་དེ་ཉིད་ལམ་ཁྲེགས་ཆོད་ཀྱིས་ཉམས་སུ་ལེན་པ་ནི་གཞི་སྣང་ལམ་དུ་བྱེད་པ་ལ་ལྟོས་ནས་ཅུང་ཟད་བུལ་བ་ཡིན་ལ། རིག་པ་རང་གི་དྲན་རིག་དང་སྣང་བ་སྣ་ཚོགས་བསྐྱེད་པའི་ནུས་པ་སད་པའི་གཞི་སྣང་གི་ཆ་དེ་ཉིད་ལམ་ཐོད་རྒལ་གྱིས་ཉམས་སུ་ལེན་པ་ནི་གཞི་ལམ་དུ་བྱེད་པ་ལ་ལྟོས་ནས་ཤིན་ཏུ་མྱུར་བ་ཡིན་པས་དེ་གཉིས་ཀྱི་ཟབ་ཁྱད་ཤེས་པ་འདི་ཉིད་ཀྱང་ལམ་གནད་གལ་ཆེན་ཡིན་ནོ། ༈ །ལར་རྫོགས་པ་ཆེན་པོའི་ལམ་ལ་ལྟོས་ན་སྔགས་བླ་མེད་གཞན་གྱི་ལམ་རྩ་ཐིག་རླུང་གསུམ་ལ་གནད་དུ་བསྣུན་པས་བདེ་ཆེན་གྱི་ཡེ་ཤེས་འཇལ་བར་བྱེད་པའང་རྩུབ་མོའི་སྦྱོར་བ་ཡིན་ཏེ། ཐོག་མར་འོད་གསལ་བདེ་བ་ཆེན་པོའི་ཡེ་ཤེས་མངོན་དུ་གྱུར་པར་བྱེད་པ་ཙམ་ལ་རྩ་རླུང་སོགས་ལ་གནད་དུ་བསྣུན་པའི་ལམ་འདི་ཉིད་ཤིན་ཏུ་མྱུར་ཀྱང༌། དེ་ཡང་ཡུན་རིང་མི་བརྟན་པ་སོགས་ཀྱི་སྐྱོན་མང་དུ་ཡོད་དེ། ལམ་འདི་ཉིད་ཡུན་རིང་མོ་ཞིག་གོམས་པར་བྱས་ཏེ་ཐོག་མར་ལམ་རྟགས་ཀྱི་ཡོན་ཏན་རྒྱུད་ལ་སྐྱེས་དགོས་པས་ཀྱང་ཅུང་རིང་ན་ཡང༌། །གོམས་པའི་ཡེ་ཤེས་རྒྱུད་ལ་སྐྱེས་ཚེ་རྒྱ་ཆེ་ལ་ཡུན་རིང་བ་སོགས་ཀྱི་ཡོན་ཏན་གྱི་ཆ་དུ་མའི་སྒོ་ནས་ལམ་འདི་མྱུར་བ་དང་
ཟབ་པས་ཐེག་པའི་རྩེ་རྒྱལ་ཡིན་པ་སོགས་ཀྱི་ཁྱད་ཆོས་མང་པོ་ཞིག་གསུང་ངོ། །ད་ནི་ཐོད་རྒལ་སྤྱི་ལ་གཅེས་པའི་ཆིང་སྒྲོན་མ་བཞིའི་རྣམ་བཞག་ཅུང་ཟད་བཤད་ན། རྩ་དབུ་མའི་ནང་དུ་རྒྱུད་སྡེ་གཞན་ལ་མ་གྲགས་པའི་རྩ་ཀ་ཏི་ཤེལ་སྦུག་ཅན་ཞེས་པ་ཁྲག་དང་ཆུ་སེར་གང་གིས་ཀྱང་མ་བསྐྱེད་པའི་མིང་གཞན་རྒྱ་མཚོ་གསེར་གྱི་ཉི་མ་ཡང་ཟེར་ལ་དོན་དུ་དེ་གཉིས་གཅིག་ཡིན་ཏེ། དེ་འདྲའི་རྩ་ཀ་ཏི་ཤེལ་སྦུག་དེ་ཉིད་ཀྱིས་དབུ་མའི་ནང་བརྒྱུད་ནས་སྙིང་ག་ནས་ལྔར་གྱེས་ནས་གཅིག་དབུ་མའི་ནང་བརྒྱུད་དེ་སྤྱི་གཙུག་ཏུ་ཟུག་ལ། གཉིས་མིག་དང༌། གཉིས་རྣ་བ་གཉིས་ལ་ཟུག་ནས་ཡོད་པའི་རྩ་དེ་རྣམས་གཅིག་གི་སྒོ་ཕྱེད་ཐུབ་ན་ལྔ་ཀའི་ཁ་ཕྱེད་ལ། གཅིག་ཁ་ཟུམ་ན་ཀུན་གྱི་ཁ་ཟུམ་ནས་འགྲོ་བ་ཡིན་པས་ཐོག་མར་རྒྱང་ཞགས་ཀྱི་ལམ་གྱི་རྩའི་ཁ་ཕྱེ་བའི་ཐབས་བསྟན་པ་ཡིན་ནོ། །དེ་ནས་སྒྲོན་མ་བཞི་ནི། རྒྱང་ཞགས་ཆུའི་སྒྲོན་མ། དབྱིངས་རྣམ་དག་གི་སྒྲོན་མ། ཐིག་ལེ་སྟོང་པའི་སྒྲོན་མ། རིག་པ་ལུ་གུ་རྒྱུད་ཀྱི་སྒྲོན་མ་དང་བཞིའོ། །དང་པོ་ནི་མིག་གི་ཨ་འབྲས་ལ་ཟུག་པའི་འོད་རྩ་ཤེལ་སྦུག་ཅན་ཞེས་པ་དེ་ལ་བརྗོད། དེ་ནི་ཁ་ཕྱིར་ཕྱོགས་ནས་ཐ་མལ་གྱི་ས་རྡོ་སོགས་མ་དག་པའི་ཆ་རྣམས་མི་འཛིན་ལ་ཞལ་ནང་དུ་ཕྱོགས་ནས་རིག་པའི་བཞུགས་ཚུལ་གཏིང་གསལ་གཞོན་ནུ་བུམ་སྐུ་ཁོ་ན་ལ་ཞལ་ཕྱོགས་པ་ཡིན། གཉིས་པ་ནི། དབྱིངས་རྣམ་དག་གི་སྒྲོན་མ་སྟེ་ནམ་མཁའ་གོ་
འབྱེད་པའི་ཆ་ནས་ནམ་མཁའི་རང་མདོག་གི་གདངས་སྔོ་རིབ་པའི་རྣམ་པ་དེ་ཡིན། གསུམ་པ་ནི། ཐིག་ལེ་སྟོང་པའི་སྒྲོན་མ་ཉའི་མིག་ལྟ་བུ་འོད་ལྔའི་ཐིག་ལེ་དབུས་མཐིང་ག་ཅན་དེ་ཉིད་ཡིན། །བཞི་པ་ནི། རིག་པ་ལུ་གུ་རྒྱུད་ཀྱི་སྒྲོན་མ་ལྕགས་ཀྱུ་ལྟ་བུའམ། གསེར་གྱི་སྐུད་པ་བཅུ་ཐིག་གི་མདུད་པ་འདྲ་བ་ཐིག་ལེ་དང་ཐིག་ཕྲན་གྱིས་སྦྲེལ་བ་དེ་ཉིད་ཡིན་ལ། དེ་ལ་དབྱེ་ན། ངོ་བོ། རྩལ། གདངས་གསུམ་ལས། དང་པོ་ནི། ཁྲེགས་ཆོད་ཀྱི་རིག་པའམ་རིག་པ་རང་བྱུང་གི་ཡེ་ཤེས་དེ་ཉིད་ཡིན། གཉིས་པ་ནི། ཤེས་རབ་དང་ཏིང་ངེ་འཛིན་དང་གཟུངས་དང་སྤོབས་པ་དང་ཚིག་དོན་ཀློང་རྡོལ་བ་སོགས་དེ་ཉིད་ཡིན། གསུམ་པ་ནི། གདངས་རིག་པ་རྡོ་རྗེ་ལུ་གུ་རྒྱུད་ལྕགས་ཐག་བསྒྲིལ་བ་ལྟ་བུའམ། བཅུ་ཐིག་གི་མདུད་པ་ལྟ་བུ་དེ་ཉིད་ཡིན། དེ་ལ་ཤེས་རབ་རང་བྱུང་གི་སྒྲོན་མ་ཡང་ཟེར་བ་ཡིན་ནོ། །མཐར་དབྱིངས་རྣམ་དག་གི་སྒྲོན་མ་ཡར་ལྡན་དུ་སོང་བ་ནི་སྔར་རིག་པའི་རྩལ་དབང་གི་སྐབས་སུ་འོག་མིན་སྟུག་པོ་བཀོད་པའི་ཞིང་ཁམས་བཤད་པ་དེ་ཉིད་ཡིན། ཐིག་ལེ་སྟོང་པའི་སྒྲོན་མ་ཡར་ལྡན་དུ་སོང་བ་ནི་ལོངས་སྤྱོད་རྫོགས་སྐུའི་གཞལ་ཡས་ཁང་དུ་གྱུར་པ་དང༌། ཤེས་རབ་རང་བྱུང་གི་སྒྲོན་མ་ཡར་ལྡན་དུ་སོང་བ་ནི། སངས་རྒྱས་ལོངས་སྤྱོད་རྫོགས་སྐུར་འགྱུར་བ་དང༌། ངོ་བོའམ་རྩལ་ཡར་ལྡན་དུ་སོང་བ་ནི་སངས་རྒྱས་ལོངས་སྤྱོད་རྫོགས་སྐུའི་ཐུགས་རྣམ་པ་ཐམས་ཅད་མཁྱེན་པའི་ཡེ་ཤེས་སུ་འགྱུར་བ་དང༌། ཆོས་ཉིད་ཀྱི་རང་སྒྲ་དེ་ཉིད་
ཡར་ལྡན་དུ་སོང་བ་ནི་སངས་རྒྱས་ལོངས་སྤྱོད་རྫོགས་སྐུའི་གསུང་ཚངས་དབྱངས་ཡན་ལག་དྲུག་ཅུ་གྲུབ་པ་ཡིན་ནོ། །མདོར་ན་ཁྲེགས་ཆོད་དང་ཐོད་རྒལ་གཉིས་ཀྱི་ལམ་ཉམས་སུ་ལེན་ཚུལ་ཉིད་ཧྲིལ་གྱིས་དྲིལ་ན། གཞི་ཀ་དག་དང་ཁྲེགས་ཆོད་ཀྱི་རིག་པའི་བཞུགས་ཚུལ་དེ་ཉིད་འཆི་སྲིད་ཀྱི་འོད་གསལ་ཁྱད་གཞིར་བྱས་ནས། དེའི་ཁྱད་ཆོས་ཀ་དག་ཟང་ཐལ་རྒྱ་ཡན་ཡེ་གྲོལ་མ་བཅོས་ཁྱབ་གདལ་གཞོན་ནུ་བུམ་སྐུ་ལ་སོགས་པའི་རིག་པའི་ཁྱད་ཆོས་དུ་མའི་སྒོ་ནས་དེའི་ཡོན་ཏན་གྱི་ཆ་མི་འདྲ་བ་རེ་རེ་བསྟན་ནས་དེ་ལྟར་བླ་མའི་མན་ངག་གིས་ངོ་སྤྲད་པའི་དོན་རང་གི་དྲན་པ་ལ་ལེགས་པར་འདྲིས་ངེས་སུ་བྱ། དེ་ལྟ་བུའི་རིག་པ་དེ་ཉིད་གཞན་ན་ཡོད་པ་མ་ཡིན་ཏེ། ད་ལྟའི་ཤེས་པ་འདི་ཉིད་ཀྱི་ཆ་གཅིག་བཤད་མ་ཐག་པའི་ཁྱད་ཆོས་དུ་མ་དང་ལྡན་པའི་རིག་པ་ཉིད་ཡིན་པར་ཐག་གཅིག་ཐོག་ཏུ་བཅད། བཅད་ཐོག་དེ་ནས་རིག་པའི་བཞུགས་ཚུལ་དེ་ཉིད་དྲན་པའི་དྲན་པ་ཐུ་རེ་བ་དེའི་རང་བཞིན་སྐད་ཅིག་ཀྱང་མ་བརྗེད་པར་ད་ལྟའི་སེམས་འདི་ཉིད་དེའི་ངོ་བོར་གྱུར་སོང་སྙམ་པ་ལྟ་བུའི་མོས་སྒོམ་མ་ཡིན་པར། ད་ལྟའི་ཤེས་པའི་ཆ་འདི་དག་ཐམས་ཅད་རིག་པ་འདུས་མ་བྱས་ཀྱི་རང་བཞིན་ཁོ་ན་ཡིན་པར་ཐག་ཆོད་བཞིན་པའི་ངང་ནས་རིག་པའི་བཞུགས་ཚུལ་གྱི་རང་བཞིན་བསྒོམ་པར་བྱ་བ་ནི་སྐབས་འདིའི་གནད་དོན་ཐུན་མོང་མ་ཡིན་པ་ཡིན་ནོ། །དེ་ལྟར་མིན་པ་ལ་ཡིན་པར་སྒྲོ་བཏགས་
ནས་སྒོམ་པ་ནི་མ་ཡིན་ཏེ། དེ་ལྟར་ཡེ་ནས་ཡིན་པ་ལ་ཡིན་པ་ལྟར་བླ་མའི་མན་ངག་གིས་ངོ་སྤྲད་ནས་ལམ་འདིས་སྒོམ་པར་བྱེད་པ་ཡིན་པར་གོ་བ་འདི་ཡང་གནད་ཀྱི་ཆ་གཅིག་གོ༌༈ །ཐོད་རྒལ་གྱི་སྐབས་སུ། རིག་པ་མིག་ལ་གཏད་ཅེས་པའི་དོན་བླ་མེད་ཀྱི་རྒྱུད་སྡེ་གཞན་ལ་མ་གྲགས་པའི་འོད་རྩ་ཀ་ཏི་ཤེལ་སྦུག་ཅན། རྒྱ་མཚོ་གསེར་གྱི་ཉི་མ་ཞེས་པ་དེ་ཉིད་རྩ་དབུ་མའི་ནང་དུ་ཡོད་པའི་སྣེ་མིག་གི་ཨ་འབྲས་ཀྱི་དཀྱིལ་དུ་ཟུག་ཚུལ་གྱི་རྡོ་རྗེའི་ལུས་ཀྱི་རྩའི་ཆགས་ཚུལ་དེ་ཐོག་མར་བླ་མའི་མན་ངག་གིས་ངོ་ལེགས་པར་སྤྲད་པར་བྱས་ནས་ཕྱིས་སུ་རྩ་དེ་ངོ་སྤྲད་པ་དེ་ལྟར་རང་གི་བློ་ལ་ལེགས་པར་ངེས་པར་བྱས་ནས་དབྱིངས་ཐིག་རིག་གསུམ་གྱི་སྣང་བ་ཐམས་ཅད་རྩ་དེའི་ནང་དུ་ཤར་བ་ཡིན་པ་ལེགས་པར་ཤེས་པར་བྱས་ཏེ། གཞི་ཀ་དག་གི་རིག་པ་མིག་ལ་གཏད། མིག་བར་སྣང་གི་དབྱིངས་རྣམ་དག་གི་སྒྲོན་མ་དང་རིག་པ་ལུ་གུ་རྒྱུད་ལ་གཏད་ནས། དབྱིངས་རིག་ཐིག་གསུམ་གྱི་རྣམ་པ་དེ་ཉིད་རིག་པས་སྐད་ཅིག་ཀྱང་མ་བོར་བར་བསྐྱངས་པ་ནི་ཐོད་རྒལ་གྱི་ལམ་ཐུན་མོང་མ་ཡིན་པ་ཡིན་ཏེ། དེ་ལྟར་འཆར་བར་བྱེད་པ་ལ་ཐོག་མར་ཉི་ཟླ་མར་མེ་གང་རུང་གི་ཡུལ་རྐྱེན་ལ་ལྟོས་ནས་དབྱིངས་ཐིག་གི་སྣང་བ་ལ་ལེགས་པར་གོམས་ནས། ཕྱིས་སུ་འོད་རྩ་དེ་ཉིད་སད་ན་ཕྱིས་ཡུལ་རྐྱེན་ལ་མི་ལྟོས་པར་འོད་རྩ་རང་ཉིད་ཀྱི་དབྱིངས་སུ་སྟོང་གཟུགས་ཀྱི་སྣང་བ་བསམ་གྱིས་མི་ཁྱབ་པ་འཆར་བར་
བྱེད་པ་ཡིན་ལ། དང་པོར་དེ་ཉིད་ཕྱི་ཡུལ་རྐྱེན་ལ་ལྟོས་དགོས་པ་དང༌། དེ་ཉིད་ཡུན་རིང་གོམས་པར་བྱས་ན་ཕྱིའི་ཡུལ་རྐྱེན་ལ་ལྟོས་མི་དགོས་པ་ནི་རྫ་བུམ་མེས་ཚོས་པ་ལྟ་བུའོ། །ཐོད་རྒལ་གྱི་སྐབས་རིག་པ་ཞེས་པ་ནི། རིག་པ་ལུ་གུ་རྒྱུད་ཀྱི་སྒྲོན་མ་དེ་ལ་ངོ་བོ་དང་རྩལ་དང་གདངས་གསུམ་ཡོད་པ་ལ་སྐབས་འདིར་རིག་པ་བརྗོད་པ་ཡིན་ཏེ། ངོ་བོ་སྟོང་ཕྱོགས་ཀྱི་རིག་པ་ཀ་དག་ཁྲེགས་ཆོད་ཀྱི་རིག་པ་ལ་ཟེར། གདངས་སྣང་ཕྱོགས་ཀྱི་རིག་པ་ལྷུན་གྲུབ་ཐོད་རྒལ་གྱི་རིག་པ་རྡོ་རྗེ་ལུ་གུ་རྒྱུད་ལ་ཟེར། རྩལ་རིག་པ་རང་བྱུང་གི་སྒྲོན་མའམ། ཚིག་དོན་ཀློང་ནས་རྡོལ་བའི་ཆ་ནས་ཤེས་རབ་རང་བྱུང་གི་སྒྲོན་མ་ཟེར་བ་སོགས་གསུམ་ཀ་ལ་སྐབས་འདིར་རིག་པའི་སྒྲ་འཇུག་པ་ཡིན་གསུང༌། ༈ །སྣང་ཉམས་ཐོད་རྒལ་གྱི་སྣང་ཆ་དང༌། ཤེས་ཉམས་ཁྲེགས་ཆོད་ཀྱི་རིག་པ་སྟེ། དེ་གཉིས་ངོ་བོ་གཅིག་ལ་ལྡོག་པ་ཐ་དད་དུ་ཕྱེ་བ་ཙམ་མ་གཏོགས་ཉི་མ་དང་ཟེར་བཞིན་དུ་ཕན་ཚུན་གཅིག་གྲོགས་སུ་གཅིག་སོང་ནས་སྣང་ཉམས་མཐར་ཐུག་སངས་རྒྱས་ཀྱི་གཟུགས་སྐུ་དང༌། ཤེས་ཉམས་མཐར་ཐུག་སངས་རྒྱས་ཀྱི་ཡེ་ཤེས་ཆོས་སྐུ་སྟེ་དེ་གཉིས་ངོ་བོ་གཅིག་ལ་ལྡོག་ཆའི་བྱེ་བྲག་ཅན་ཡིན་པ་དཔེར་ན་མེ་དང་ཚ་བ་དང་ཆུ་དང་རླན་བཞིན་ནོ། ༈ །ཆོས་ཟད་ཀྱི་སྐབས་སུ་ཕྱིའི་ས་རྡོ་རི་བྲག་ཟད་པ་དང༌། ནང་ཕུང་ཁམས་ཟད་པ་དང༌། གསང་བ་སེམས་
ཀྱི་རྟོགས་ཚོགས་ཟད་པ་དང༌། ཡང་གསང་ཐོད་རྒལ་གྱི་སྣང་ཆ་སོགས་ཟད་པའི་ཆོས་ཉིད་ཟད་པ་ཞེས་བརྗོད་དེ། དང་པོ་ནི་ཆོས་ཉིད་ཟད་པར་འཁྱོལ་བའི་རྣལ་འབྱོར་པ་དེས་ལམ་གྱིས་བགྲོད་པ་མཐར་སོན་ནས་མ་དག་པའི་ས་རྡོ་རི་བྲག་སོགས་སྣང་བྱེད་ཀྱི་བག་ཆགས་གཏན་ནས་ཟད་དེ་ཕྱིའི་ཡུལ་གྱིས་རྡོ་རི་བྲག་སོགས་ཟད་པ་དང༌། གཉིས་པ་ནི་ནང་མ་དག་པའི་ལུས་འདི་སྣང་བྱེད་ཀྱི་བག་ཆགས་གཏན་ནས་ཟད་པས་ནང་ཕུང་ཁམས་ཟད་པ་དང༌། གསུམ་པ་ཀུན་རྟོག་ལས་རླུང་གིས་གཡོ་བའི་རྟོག་ཚོགས་སམ་གཟུང་འཛིན་གྱི་སྤྲོས་པ་སྐྱེད་བྱེད་ཀྱི་ནུས་པ་གཏན་ནས་ཟད་པས་གསང་བ་སེམས་ཀྱི་རྟོག་ཚོགས་ཟད་པ་དང༌། བཞི་པ་ནི། ལྷུན་གྲུབ་ཐོད་རྒལ་གྱི་སྣང་ཆ་ཐམས་ཅད་གཡོ་བྱེད་ཀྱི་རླུང་ངམ་བག་ཆགས་གཏན་ནས་ཟད་པའི་ཡང་གསང་ཐོད་རྒལ་གྱི་སྣང་ཆ་ཐམས་ཅད་ཟད་པའོ། །སྐབས་འདིར་ཟད་པ་ཞེས་བྱ་བ་ནི་འཁྱིལ་བའི་དོན་ཡིན་པས། ཐོད་རྒལ་གྱི་སྣང་ཆ་ཐམས་ཅད་ཀྱི་རྩལ་ཡོངས་སུ་རྫོགས་པ་འདི་ཉིད་ལས་ལྷག་པ་གཏན་ནས་མེད་ཀྱང༌། གཡོ་བྱེད་ཀྱི་རླུང་ལྷག་ལུས་མེད་པར་ཟད་ནས་ལྷུན་གྲུབ་ཐོད་རྒལ་གྱི་སྣང་ཆ་ཐམས་ཅད་ཆོས་ཀྱི་དབྱིངས་སུ་འཁྱིལ་བའམ་རྒྱས་ཐེབས་ཏེ། ཆོས་ཉིད་དེ་བཞིན་ཉིད་ཀྱི་དབྱིངས་ལས་མི་ལྡང་བའི་ཚུལ་དུ་མཉམ་པར་བཞག་བཞིན་གཟུགས་སྐུ་གཉིས་ཀྱིས་གདུལ་བྱའི་སེམས་ཅན་
རྣམས་ཀྱི་འདོད་དོན་གྱི་རེ་བ་ཐམས་ཅད་འབད་མེད་ལྷུན་གྲུབ་ཏུ་སྐོང་ནུས་པའི་གདོད་མའི་མགོན་པོ་དེ་ཉིད་ལ་ཆོས་ཉིད་ཀྱི་སྒྲས་བསྙད་པའོ། ༈ །དེ་ལྟ་བུའི་སྐུ་ཐུགས་ཟུང་དུ་འཇུག་པའི་བསྒྲུབ་བྱ་མཐར་ཐུག་དེ་ཉིད་ནི་རྣམ་པ་གཟུགས་སྐུའི་རོལ་པ་ལ་ངོ་བོ་རྣམ་པ་ཐམས་ཅད་མཁྱེན་པའི་ཡེ་ཤེས་དང་ཟུང་དུ་འཇུག་པའི་གཟུགས་སྐུ་མཐར་ཐུག་གམ་མི་སློབ་ཟུང་འཇུག་གི་སྐུ་གྲུབ་པ་ཡིན་ནོ། ༈ །ངོ་བོ་རང་བཞིན་ཐུགས་རྗེ་གསུམ་ནི། ཡེ་གྲོལ་འདུས་མ་བྱས་ཀྱི་རིག་པ་དེ་ཉིད་རང་གི་ངོ་བོ་རང་བཞིན་གྱིས་གྲུབ་པ་རྡུལ་ཙམ་ཡང་མེད་པའི་ཆ་ནས་ངོ་བོ་སྟོང་པར་གསུངས་པ་དང༌། འདིར་ནི་ཀུན་རྟོག་ལས་རླུང་གི་གཡོ་བའི་ཆ་གཟུང་འཛིན་གྱི་སྤྲོས་པ་ཐམས་ཅད་དག་ནས་མེད་པའམ་སྟོང་པའི་ཆ་ནས་ངོ་བོ་དང༌། རང་བཞིན་གསལ་བ་ནི། གསལ་རིག་གི་ཆ་ཐམས་ཅད་གཏན་ནས་མེད་སོང་བ་ལྟར་མ་ཡིན་པར། རིག་པའི་རང་བཞིན་གསལ་ལ་འགག་པ་མེད་པ་དྭངས་གསལ་བདེ་བའི་རྣམ་པ་རྒྱ་གང་དུ་ཡང་མ་ཆད། ཕྱོགས་གང་དུ་ཡང་མ་ལྷུང་བའི་རང་བཞིན་ཅན་ཡིན་ཏེ། དེ་ཡང་རྒྱ་གང་དུ་ཡང་མ་ཆད་ཅེས་པའང་རིག་པའི་གདངས་དང་ཕྱོགས་ཀྱི་ཆ་ལ་ཚད་བཟུང་དང་བྲལ་བའི་སྟོང་ཁམས་གདལ་བ་ཡིན་པས་རྒྱ་མ་ཆད། རིག་པ་དེ་ཉིད་བདེ་བ་ཁོལ་བུ་དང་སྡུག་བསྔལ་ཁོལ་བུའི་རྣམ་པའི་ཕྱོགས་སུ་
ལྷུང་བ་མ་ཡིན་པར་ཀུན་ཁྱབ་གདལ་བ་ཆེན་པོའི་རང་བཞིན་ཡིན་པས་ན་རང་བཞིན་གསལ་བ། ཐུགས་རྗེ་ཀུན་ཁྱབ་ཞེས་པ་ནི། སྤྱིར་ཐུགས་རྗེ་ཞེས་པ་སྙིང་རྗེ་ལ་བཤད་ཀྱང༌། སྐབས་འདིར་ནི་རིག་པ་བརྟན་གཡོ་སྣོད་བཅུད་དང་བཅས་པའི་འཆར་གཞིར་གྱུར་པ་ཡིན་ཏེ། དེ་ཐམས་ཅད་རིག་པའི་རྩལ་དང༌། རིག་པའི་རྣམ་འཕྲུལ་ལམ། ཆོ་འཕྲུལ་ཡིན་པར་ཤེས་དགོས། འཁོར་འདས་གཉིས་ལ་མ་ཁྱབ་པ་མེད་ཅིང་འཁོར་འདས་གཉིས་ཀྱི་སྲོག་འཛིན་ཅིང༌། འདི་ཡོད་མེད་ཀྱི་རྗེས་སུ་འགྲོ་ལྡོག་བྱེད་པས་ཐུགས་རྗེ་ཀུན་ལ་ཁྱབ་པའོ། །
ཀ་དག་དྲི་མེད་གཉུག་མ་འཇམ་པའི་དབྱངས། །ལྷུན་གྲུབ་སྣང་བ་དམ་པའི་དཔལ་མངའ་བ། །དེ་ལ་རང་རིག་ལྟ་བས་ཕྱག་བྱས་ནས། །འཇམ་དཔལ་ཡེ་ཤེས་སེམས་དཔའི་མཚན་དོན་འགྲེལ། །མ་ལུས་ཤིང་ལུས་པ་མེད་པའི་རྒྱལ་བ་རྣམས་ཀྱི་ཐུགས་གཉིས་སུ་མེད་པའི་ཡེ་ཤེས་ནི་འཇམ་དཔལ་ཡེ་ཤེས་སེམས་དཔའ་ཞེས་བྱ་ལ། དེ་ད་ལྟ་ནས་ལམ་དུ་བྱེད་པ་ནི་རང་བཞིན་རྫོགས་པ་ཆེན་པོའི་ཚུལ་ཏེ། ཡེ་གྲོལ་ལྷུན་རྫོགས་ཀྱི་རིག་པ་ལས་གཞན་པའི་སངས་རྒྱས་ཀྱི་ཡེ་ཤེས་མ་མཆིས་པའི་ཕྱིར་རོ། །ཚུལ་འདིའི་རྟོགས་པར་བྱ་བའི་གནས་ནི་གསུམ་དུ་རིག་པར་བྱ་སྟེ། གཞི་དང༌། ལམ་དང༌། འབྲས་བུའོ། །གཞིའི་དོན་བཤད་པ་ལ། འཇམ་པ་དང༌། དཔལ་དང༌། གཞོན་ནུ་བཤད་པའོ། །དེ་ལ་འཇམ་པ་ནི་ངོ་བོ་ཀ་དག་སྟེ། ཆོས་རྣམས་ཀྱི་ཆོས་ཉིད་སྐྱེ་འགག་རྟག་ཆད་འགྲོ་འོང་གཅིག་དང་ཐ་དད་དེ། སྤྲོས་པའི་མཐའ་བརྒྱད་ལས་གདོད་མ་ནས་གྲོལ་བ། རྒྱ་ཆད་དང་ཕྱོགས་ལྷུང་མེད་པར་གཟུགས་ནས་རྣམ་མཁྱེན་གྱི་བར་གྱི་ཆོས་ཐམས་ཅད་ལ་ཁྱབ་པར་གྱུར་པས་གྲུབ་པའི་ཆོས་རྡུལ་ཙམ་ཡང་མེད་པ། སྐྱེ་བ་དང་བདེན་པར་གྲུབ་པ་མེད་ན་དེ་ལ་ལྟོས་ཏེ་བཏགས་པའི་སྐྱེ་མེད་ཀྱང་ཅི་ཞིག་གི་སླད་དུ་ཡོད་དེ་དེ་ལྟ་བས་ན་ཤེས་པ་དང་བརྗོད་པ་དང་འཇུག་པའི་ཐ་སྙད་ལས་འདས་པ། བག་ཆགས་སྣ་ཚོགས་པའི་ཀུན་གཞི་དང༌། བག་ཆགས་ལུས་ཀྱི་
ཀུན་གཞི་དང༌། ཁམས་གསུམ་པའི་སེམས་དང་སེམས་ལས་བྱུང་བ་མ་རིག་པ་དང་བཅས་པ་རྣམས་ལས་གྲོལ་བ། འཁྲུལ་བ་རང་རྩལ་དུ་ཤར་ཡང་འཁྲུལ་པའི་དྲི་མས་མ་གོས་པ་སྤྲིན་ནམ་མཁའ་ལ་བྱུང་ཡང་ནམ་མཁའ་ལ་གོས་པ་མེད་པ་ལྟ་བུ་སྟེ། གཞི་མེད་རྩ་བྲལ་གྱི་དབྱིངས་འདི་ནི་མཚན་མའི་རྩུབ་རེག་དང་བྲལ་བས་འཇམ་ཞེས་བྱའོ། །དཔལ་གང་ཞེ་ན། རང་བཞིན་ལྷུན་གྲུབ་སྟེ། གཞན་ནས་བཙལ་བ་དང་གསར་དུ་བསྒྲུབས་པ་མ་ཡིན་པར་སྐུ་དང་ཡེ་ཤེས་རྒྱ་མཚོ་གཞི་རང་མལ་ནས་རྫོགས་ནས། སྣང་ཚུལ་ལ་མ་དག་པར་ཤར་ཡང་གནས་ཚུལ་ལ་བྱང་ཆུབ་ཀྱི་ཡེ་ཤེས་ཆེན་པོར་གྲུབ་པ། འཁྲུལ་པས་བསྒྲིབས་པའི་སྐབས་དང༌། འཁྲུལ་པ་དག་པའི་སྐབས་གང་དུའང་ངོ་བོ་ལ་བཟང་ངན་དུ་འགྱུར་བ་མེད་པ། འཆར་ཚུལ་གྱི་དབང་དུ་ན། ཐུགས་རྗེ་ལྟར་ཤར་བས་སེམས་ཅན་རྣམས་ལ་སྙིང་རྗེ་འབྱུང་བ། འོད་ལྟར་ཤར་བས་ཡེ་ཤེས་ལྔའི་རང་བཞིན་ཅན་གྱི་འོད་ཟེར་གསལ་བ། ཡེ་ཤེས་ལྟར་ཤར་བས་སེམས་ཀྱི་དྲི་མ་དག་པའི་རང་རིག་ལ་གནས་པ། སྐུ་ལྟར་ཤར་བས་འོད་གསལ་དྭངས་མའི་ལྷ་སྐུས་ནམ་མཁའ་གང་བ། གཉིས་མེད་ལྟར་ཤར་བས་གཅིག་དང་ཐ་དད་དུ་འཛིན་པ་མེད་པ། མཐའ་གྲོལ་ལྟར་ཤར་བས་གཞི་རྫོགས་ཡེ་ཤེས་རང་གསལ་དུ་སྣང་བ། དག་པ་ཡེ་ཤེས་ལྟར་ཤར་བས་་མྱ་ངན་ལས་འདས་པའི་སྣང་བ་མ་འགགས་པ། མ་དག་
འཁོར་བ་ལྟར་ཤར་བས་རིགས་དྲུག་གི་སྣང་བ་སྒྱུ་མ་ལྟར་སྣང་བ་སྟེ། སྒོ་བརྒྱད་ཀྱི་འཆར་གཞིར་གྱུར་པའི་གཞི་ལྷུན་གྲུབ་རིན་པོ་ཆེའི་སྦུབས་ནི་རྣམ་པར་གྲོལ་བའི་ཡོན་ཏན་གྱི་གཞིར་གྱུར་པས་དཔལ་ཞེས་བྱའོ། །གཞོན་ནུའི་དོན་ནི། ཟག་པ་དང་བཅས་པའི་སེམས་ཀྱི་རྩ་བར་གྱུར་པའི་ལས་རླུང་གི་རྒྱུ་བ་བུམ་པ་ལྟ་བུའི་རྒྱར་འཐུམས་ཡང༌། ཆོས་ཉིད་ལ་བསླད་པ་མ་ཞུགས་ཤིང༌། ཆོས་ཉིད་དེ་ནི་འཆི་བ་མེད་པའི་རྟག་པ། ན་བ་མེད་པའི་བརྟན་པ། རྒ་བ་དང་རྒུད་པ་དང་བྲལ་བར་གྱུར་པ། སྐད་ཅིག་མའི་འགྱུར་བ་ལས་ཤིན་ཏུ་འདས་པའི་གཞོན་ནུ། སྟོབས་དང་མ་འདྲེས་པ་ལ་སོགས་པ་བླ་ན་མེད་པའི་ཡོན་ཏན་མཐའ་དག་གི་ཕུང་པོར་གྲུབ་བས་ཀཱ་ཡ་སྤུངས་པའི་དོན་ཏེ་སྐུ་ཞེས་བྱ་སྟེ། གཞོན་ནུ་བུམ་སྐུ་འདི་ནི་གཞོན་ནུ་ཞེས་བྱ་བ་ཀ་དག་ལྷུན་གྲུབ་ཟུང་འཇུག་གི་དོན་ཏོ། །གཉིས་པ་ལམ་ལ། འཇམ་པ་དང༌། དཔལ་དང༌། གཞོན་ནུ་བསྟན་པའོ། །དེ་ལ་དང་པོ་ནི་ཁྲེགས་ཆོད་ཀྱི་དོན་ཏེ། ཀུན་ནས་ཉོན་མོངས་པའི་ཕྱོགས་དང་རྣམ་པར་བྱང་བའི་ཕྱོགས་གང་ཅིར་ཡང་མ་གྲུབ་པའི་རང་རིག་པ་བྱང་ཆུབ་སེམས་ཉིད་མཐའ་གྲོལ་ཡངས་པ་ཆེན་པོར་ལྟ་བས་ཐག་ཆོད་པ་དེས། བསྒོམ་པ་དང་སྤྱོད་པའི་མན་ངག་ལ་བརྟེན་ནས་གང་ཤར་ཅིར་སྣང་ཐམས་ཅད་གྲོགས་སུ་ལྷོང་བ་ནི། ཟང་ཐལ་བྱར་མེད་གཉུག་མ་རང་བབས་ཀྱི་ཡེ་ཀློང་ཆེན་པོར་གང་དགར་ཀློང་པའི་ཚེ་
རྩལ་གྱི་རྣམ་པར་རྟོག་པ་བཟང་པོ་མི་བསྒྲུབ། ངན་པ་མི་དགག་པར་ཁང་སྟོང་དུ་རྐུན་མ་ཞུགས་པ་ལྟར་བཞག་པས་ནམ་མཁའ་ལ་མདུང་བསྐོར་བ་ལྟར་ཕན་གནོད་མེད་ཅིང༌། ཡུལ་སྣང་གི་འཆར་སྒོ་གང་སྣང་ཐམས་ཅད་ལ་སྤང་བླང་ཆེད་འཛིན་མེད་པར་སེང་གེ་ལ་རྡོ་ཕོག་པ་བཞིན་མཁན་པོ་ཁོ་རང་གི་རྩ་གདར་བཅད་པས་རྟོག་ཚོགས་ཐམས་ཅད་ཡེ་གྲོལ་མཉམ་པའི་དབྱིངས་སུ་ཕྱམ་ཕྱམ་དེང་འགྲོ་ཞིང༌། ཚོགས་དྲུག་གི་སྣང་བ་ཡེ་ཤེས་ཀྱི་གྲོགས་སུ་འགྱུར་རོ། །དེའི་ཚེ་དག་མཉམ་ཀུན་བཟང་གི་དགོངས་པ་འཇུར་བུའི་དྲན་པས་མ་བཅིངས་ཤིང༌། ཐ་མལ་གྱི་འཁྲུལ་པ་་ལ་བདག་རྐྱེན་མི་སྤྲད། ཨ་འཐས་ཀྱི་འཆིང་བའི་སྒྲོག་ཏུ་མི་འཛུད། དམིགས་གཏད་ཀྱི་བསྒོམ་པའི་འཕྲང་ལ་མི་འཇུག་པར་ཕྱལ་བ། ལྷུག་པ། རང་བཞག །ལྷོད་གྲོལ་ཆེན་པོའི་རྒྱུན་སྐྱོང་བ་ནི་ཞེན་འཛིན་གྱི་རྩུབ་རེག་དང་བྲལ་བས་ན་འཇམ་ཞེས་བྱའོ། །དཔལ་གྱི་དོན་ནི་ཐོད་རྒལ་གྱི་ཚུལ་ཏེ། འདི་ལྟར་སེངྒེ་དང༌། གླང་ཆེན་དང༌། དྲང་སྲོང་གི་འདུག་སྟངས་གང་རུང་དང་ལྡན་པས། འོད་རྩ་ཤིན་ཏུ་དྭངས་པ་རྒྱང་ཞགས་ཆུའི་སྒྲོན་མ་གྱེན་དང་ཐུར་དང་ཐད་ཟུར་གང་རུང་དུ་གཏད་པས། དབྱིངས་རྣམ་དག་གི་སྒྲོན་མ་དང་པོར་འོད་མཐིང་ཁྱབ་ཏུ་སྣང་བ་ལས་ཕྱིས་འོད་ལྔ་ཟླུམ་འཁྲིག་གི་ར་བར། ཐིག་ལེ་སྟོང་པའི་སྒྲོན་མ་ལྔ་ཚོམས་སུ་བསྟར་བ་དེའི་བར་འཚམས་ཀུན་ན་ཤེས་རབ་རང་
བྱུང་གི་སྒྲོན་མ་རིག་པ་རང་གནས་ཀྱི་ཡེ་ཤེས་ལྷུན་གྲུབ་རང་གསལ་གྱི་རང་གདངས་རྡོ་རྗེ་ལུ་གུ་རྒྱུད་མུ་ཏིག་བསྟར་ལ་བརྒྱུས་པའམ་གསེར་གྱི་སྐུད་པ་ལྡིང་བ་ལྟ་བུ་གོམས་ཤུགས་ལྟར་ཇེ་བརྟན་དུ་འགྲོ་བ་སྣང་སྟེ། ཕྱི་མ་གསུམ་ནི་རིམ་པ་བཞིན་དུ་སངས་རྒྱས་ཀྱི་ཞིང་དང་གཞལ་ཡས་ཁང་དང་སྐུའི་རྒྱུར་འགྱུར་བ་ཡིན་ནོ། །དེ་དག་ནི་སྒྲོན་མ་བཞི་ཡིན་ལ། འདི་དག་གི་སྟེང་དུ་ཙིཏྟ་ཤའི་སྒྲོན་མ་དང༌། དཀར་འཇམ་རྩའི་སྒྲོན་མ་ཀ་ཏི་ཤེལ་གྱི་སྦུ་གུ་ཅན་གཉིས་བསྣན་པས་སྒྲོན་མ་དྲུག་ཏུ་འགྱུར་ཞིང༌། དྲུག་པ་དེའི་ཁར་སྟོང་གསལ་ཟུང་འཇུག་ཡེ་ཤེས་རིན་པོ་ཆེ་ལ་གནས་ལུགས་གཞིའི་སྒྲོན་མར་གྲགས་པ་དང༌། བར་དོ་དུས་ཀྱི་སྒྲོན་མ་བར་དོའི་གཞི་སྣང་རང་གདངས་ཕྱིར་གསལ་བ་དང༌། འབྲས་བུ་སྒྲོན་མ་མཐར་ཕྱིན་ལྷུན་གྲུབ་ཀྱི་སྦུབས་གསུམ་བསྣན་པའི་སྒྲོན་མ་དགུ་ཡིན་ནོ། །འོན་ཀྱང་ལམ་དུས་ཀྱི་སྒྲོན་མ་ནི་སྔ་མ་རྣམས་ཡིན་ནོ། །དེ་ལྟ་བུའི་ཚུལ་གྱིས་བདེ་བར་གཤེགས་པའི་གསང་མཛོད་མངོན་དུ་གྱུར་པའི་སྒོ་དང་ལྐོག་ཏུ་གྱུར་པའི་སྒོ་དག་ལས་རྒྱལ་བའི་སྐུ་དང་ཞིང་གི་སྣང་བ་ཆོས་ཉིད་ཀྱི་རང་སྒྲ་དང་བཅས་པ་མངོན་སུམ་དུ་བལྟ་ཞིང་མཉན་དུ་ཡོད་པས་ན་དཔལ་ཞེས་བྱའོ། །གཞོན་ནུ་ཞེས་བྱ་བ་ནི་ཟུང་འཇུག་གི་ཉམས་མྱོང་ཏེ། ད་ལྟའི་རིག་པ་ཐ་མལ་པ་དཔེ་ཡིས་མི་མཚོན་ཞིང་ཚིག་གིས་བརྗོད་པ་ལས་འདས་པ། རེ་དོགས་ཀྱི་འཆིང་བ་དང་བྲལ་བ།
རིག་སྟོང་བློ་བྲལ་ཆེན་པོའི་ངང་ལ་གནས་ཤིང༌། རིག་གདངས་རྡོ་རྗེ་ལུ་གུ་རྒྱུད་དང་པོར་མཐོང་བ་ཆོས་ཉིད་མངོན་སུམ། དེ་ནས་འོད་སྣང་ཇེ་གསལ་དང༌། ཐིག་ལེའི་སྣང་བ་ཇེ་འཕེལ་དང༌། ལུ་གུ་རྒྱུད་ཇེ་བརྟན་ལ་འགྲོ་ཞིང༌། མཐར་སྐུ་རྐྱང་པ་མཐོང་བའི་བར་ནི་ཉམས་གོང་འཕེལ། སྐུ་ཡབ་ཡུམ་ཟུང་འབྲེལ་ནས་ཅིར་སྣང་འོད་གསལ་གྱི་སྣང་བར་འཆར་བའི་བར་རིག་པ་ཚད་ཕེབས། ཕྱི་ལུས་ཀྱི་རྡོས་པ། ནང་སེམས་ཀྱི་རྟོག་ཚོགས་གསང་བ་སྐུ་དང་ཐིག་ལེའི་སྣང་ཚུལ་དང་བཅས་པ་ཆོས་ཟད་བློ་འདས་སུ་ཟད་དེ། སྐྱེ་བ་ལ་དབང་ཐོབ་པས་འཕོ་ཆེན་གྱི་སྐུར་བཞེངས་ནས་འགྲོ་བའི་དོན་བྱེད་པར་འདོད་ན་སྣང་བ་རིམ་གྱིས་ཟད་དུས་ལག་སོར་ལྔ་འོད་དུ་སྣང་བ་ལ་རིག་པ་བཅུག་པས་འཇའ་སྐུར་ལྡང་ལ། འཇུག་པ་ལ་དབང་ཐོབ་པས་ལུས་དེས་གཞན་དོན་རླབས་ཆེན་མི་མཛད་ན་དེ་ཉིད་དུ་ནང་དབྱིངས་གདོད་མའི་ཀློང་དུ་ན་བུན་ཡལ་བ་ལྟར་དེངས་ནུས་པ་ནི་ཆོས་ཉིད་ཟད་པ་སྟེ་མཐར་ཐུག་གི་འབྲས་བུ་ལ་སྦྱོར་མ་རག་པའོ། །དེ་དག་གི་ཚེ་ཉམས་རྟོགས་ཐུན་མོང་མ་ཡིན་པ་དྲི་མ་མེད་པ་མེ་ཏོག་གཞོན་ནུའི་ལང་ཚོ་ལྟར་རྒྱས་པས་ན་གཞོན་ནུ་ཞེས་བྱ་སྟེ་རྩལ་པོ་ཆེའི་མི་གཞོན་ནུ་དང་ཡང་མཚུངས་སོ། །གསུམ་པ་འབྲས་བུ་ལའང༌། འཇམ་པ་དང༌། དཔལ་དང༌། གཞོན་ནུའོ། །འཇམ་པ་གང་ཞེ་ན། ཆགས་པ་ལ་སོགས་ཉོན་མོངས་པའི་སྒྲིབ་པ་དང༌།
ཟག་མེད་ཀྱི་ཆོས་ལ་སྲེད་པ་ལ་སོགས་པ་ཤེས་བྱའི་སྒྲིབ་པ་ལས་རླུང་ཤིན་ཏུ་ཕྲ་བ་དང་བཅས་པ་སྤངས་པ། བློའི་མཚན་མ་ཐམས་ཅད་ངང་གིས་ཞི་བ། གཉིས་སུ་འཛིན་པའི་འཆིང་ཞེན་ཐམས་ཅད་རང་སར་དྭངས་ཏེ། རང་བཞིན་གྱི་མྱ་ངན་ལས་འདས་པའི་དོན་ལ་སྒྲིབ་བྱེད་བྲལ་བས་གློ་བུར་རྣམ་པར་དག་པའི་མྱང་འདས་མངོན་དུ་གྱུར་པ། ཟག་པ་དང་བཅས་པའི་ཕུང་པོའི་བདུད། སྲོག་ལ་བར་དུ་གཅོད་པ་འཆི་བདག་གི་བདུད། ཐར་པ་ལ་གེགས་བྱེད་པ་ཉོན་མོངས་པའི་བདུད། བྱང་ཆུབ་འཐོབ་པ་ལ་གེགས་བྱེད་པ་ལྷའི་བུའི་བདུད་བཞི་རྣམ་པར་བཅོམ་པ། ཡོད་མེད་ཡིན་མིན་སོགས་སྤྲོས་པ་ཐམས་ཅད་ལས་གྲོལ་བ། ནང་དབྱིངས་སྐྱེ་འགག་མེད་པའི་ཀློང་ཆེན་པོར་འུབ་ཆུབ་པ་ནི་སྒྲིབ་པའི་རྩུབ་རེག་དང་བྲལ་བས་འཇམ་ཞེས་བྱའོ། །དཔལ་གང་ཞེ་ན། ཇི་ལྟ་བ་དང་ཇི་སྙེད་པའི་ཆོས་ཐམས་ཅད་ཅིག་ཆར་དུ་མཁྱེན་པ། ཟག་མེད་ཡེ་ཤེས་སྡེ་ཚན་ཉེར་གཅིག་ལ་མངའ་དབང་འབྱོར་བ། འོག་མིན་ཆེན་པོ་ལྷུན་སྟུག་པོ་བཀོད་པ་ན་ལོངས་སྤྱོད་ཆེན་པོ་དང༌། ཁ་སྦྱོར་དང༌། བདེ་ཆེན་དང༌། རང་བཞིན་མེད་པ་དང༌། སྙིང་རྗེའི་ཡོངས་སུ་གང་བ་དང༌། རྒྱུན་མི་འཆད་པ་དང༌། འགོག་པ་མེད་པ་སྟེ་ཡན་ལག་བདུན་ལྡན་ལོངས་སྤྱོད་རྫོགས་སྐུར་སྣང་ལ། རང་བཞིན་སྤྲུལ་པའི་ཞིང་ན་སྟོན་པ་གཟུགས་ཀྱི་
རྒྱལ་པོ་དང༌། ཚོར་བའི་རྒྱལ་པོ་དང༌། འདུ་ཤེས་ཀྱི་རྒྱལ་པོ་དང༌། འདུ་བྱེད་ཀྱི་རྒྱལ་པོ་དང༌། རྣམ་ཤེས་ཀྱི་རྒྱལ་པོ་རྣམས་རང་སྣང་དུ་སྣང་བས། འཁོར་གཞན་སྣང་གདུལ་བྱ་དག་པ་རྣམས་ཀྱི་དོན་སྤྱོད་པས་ཕྱེད་སྤྲུལ་ལོངས་སྐུ་དང༌། མ་དག་པའི་གདུལ་བྱ་རྣམས་ལ་བཟོ་དང་སྐྱེ་བ་ལ་སོགས་པར་འཕྲུལ་ཏེ། འགྲོ་བའི་དོན་མཛད་པ་ནི་དུས་རེ་འགའ་བ་དང༌། ཕྱོགས་རིས་ཆད་པ་དང༌། རྩོལ་རྟོག་གི་འཆིང་བ་ཅན་མིན་པར་རྟག་ཁྱབ་ལྷུན་གྲུབ་ཆེན་པོ་ཡིན་ནོ། །དེ་ལྟར་ཟབ་ཅིང་རྒྱ་ཆེ་བའི་སྐུ་བརྙེས་པ་ནི་རྟོགས་པའི་ཡོན་ཏན་བླ་ན་མེད་པའི་གཏེར་ཡིན་པས་ན་དཔལ་ཞེས་བྱའོ། །གཞོན་ནུའི་དོན་ནི། ཤིན་ཏུ་གསང་བ་ལྷུན་གྲུབ་རིན་པོ་ཆེའི་སྦུབས། མི་ཤིགས་ཕྲ་བའི་ཡེ་ཤེས་གཡུང་དྲུང་ཆེན་པོ། རྩལ་སྣང་ཐམས་ཅད་ཆོས་ཉིད་མཐའ་དབུས་དང་བྲལ་བའི་ཀློང་དུ་ཐིམ་ཞིང༌། དེའང་གཉིད་དང་བརྒྱལ་བ་དང་རྟག་ཏུ་འདུ་ཤེས་མེད་པ་དང་སྙོམས་འཇུག་གཉིས་ལྟ་བུའི་རྨུག་འཐིབས་པོ་མ་ཡིན་པར་མཁྱེན་ཆ་ནང་གསལ་དུ་རྫོགས་པ། ཡིད་ཀྱི་རང་བཞིན་གྱི་སྐྱེ་བ་དང༌། བསམ་གྱིས་མི་ཁྱབ་པའི་འཕོ་བ་ཕྲ་བ་ཡང་སྤངས་པས་རྟག་པ་དམ་པ་ནམ་མཁའ་ཇི་སྲིད་དུ་འཕོ་འགྱུར་མེད་པ་སྟེ། དཔེར་ན་མི་རྒ་བའི་མི་ཞིག་བརྟགས་པ་མཐའ་བཟུང་གི་དཔེར་བྱས་ན། དེ་འདྲ་དེ་ནི་རྟག་ཏུ་གཞོན་ནུར་འདུག་གོ་ཞེས་བརྗོད་རུང་བ་ལྟར་ཡིན་ཏེ།
མཐར་ཕྱིན་གྱི་གཞོན་ནུ་བུམ་སྐུ་འདི་ནི་གཞོན་ནུ་ཞེས་བྱའོ། །འདི་དག་གིས་ནི་འཇམ་དཔལ་རྫོགས་པ་ཆེན་པོ་བསྟན་ཟིན་ཏོ། །རིག་སྟོང་བློ་བྲལ་འཇམ་དཔལ་རྫོགས་པ་ཆེ། །སྨྲ་བསམ་བརྗོད་མེད་གནས་ལུགས་ཟབ་མོའི་དོན། ཁྱབ་བདག་བླ་མའི་བཀའ་གནང་ཇི་ལྟ་བར། །ཤིན་ཏུ་ཉུང་ངུའི་ངག་གིས་གསལ་བར་བྱས། །དགེ་དེས་མཁའ་ཁྱབ་ཡིད་ཅན་མ་ལུས་པ། །ཡིད་དཔྱོད་འཆིང་བ་ཀུན་ལས་རྒྱལ་གྱུར་ཏེ། །འཁོར་འདས་གཉིས་མེད་རང་རིག་འཇམ་དཔལ་དབྱངས། །མ་མཐོང་མཐོང་བའི་ཚུལ་དུ་མཐོང་གྱུར་ཅིག །ཅེས་པའང་ཁྱབ་བདག་བླ་མ་རིན་པོ་ཆེའི་ཞལ་སྔ་ནས་ཀྱིས་ཚུལ་འདི་ལྟ་བུ་ཞིག་གྱིས་ཞེས་བཀའ་སྩལ་སྤྱི་བོར་ཕེབས་པ་ལ་བརྟེན་ནས་གཞོན་ནུ་འཇིགས་མེད་པས་ལུང་སྦྱོར་ལ་སོགས་པའི་སྤྲོས་པ་བསྐྱུངས་ཏེ་གང་དྲན་ལྷུག་པར་སྦྱར་བ་མངྒ་ལཾ། ༈ །བླ་མ་ལ་ཕྱག་འཚལ་ལོ། །སྙིང་ཐིག་ཁྲིད་ཡིག་ཆེན་མོར། །དངོས་གཞི་གཉིས་ལ་མུ་བཞི་བརྩི་ཚུལ་ཞིག་གསུངས་པ་དེ་ཉུང་གསལ་བཤད་དགོས་ཞེས་ཕེབས་པར། གཞི་ནི་གཞི་ལམ་འབྲས་གསུམ་གྱི་ཟླས་ཕྱེ་བའི་གཞིའི་བཞུགས་ཚུལ་དེ་ལ་བྱེད། དངོས་ནི་དེ་མངོན་དུ་གྱུར་པ་ལ་བྱེད་པས་རྟོགས་བྱ་དང་རྟོགས་ཚུལ་གྱི་སྒོ་ནས་བཞག་ཅིང༌། གཞི་ལ་ངོ་བོ་རང་བཞིན་ཐུགས་
རྗེ་གསུམ་གསུངས་པའི་ཐུགས་རྗེ་ནི་གཞི་བྱེད་ཚུལ་དང༌། གྲོལ་ལུགས་ཀྱི་འགང་ཤེས་པའི་ཕྱིར་དུ་གསུངས་པ་ལས་གཞི་དངོས་མ་ཡིན་ལ། ངོ་བོ་དང་རང་བཞིན་སྟོང་གསལ་གཉིས་སུ་བཤད་པའི་དབྱིངས་རིག་གཉིས་པོ་དེ་གཞི་ལ་ཆ་ཕྱེ་བ་ཡིན་པས། །འདིའི་གཞི་ནི་རིག་པ་ཁོ་ན་ལ་མི་གཟུང་ངོ། །ལྷ་ཁང་དང་རྟེན་གསུམ་དཔེར་མཛད་པའང་རྟེན་དང་བརྟེན་པའི་དཔེ་ཙམ་དུ་མཛད་པ་ལས། དེ་གཉིས་རྟེན་བརྟེན་པའི་འཇོག་ཚུལ་འདྲ་བར་བཞེད་པ་མིན་ལ། དཔེའི་སྐབས་སུ་མུ་དང་པོའི་གཞི་ལྷ་ཁང་དང༌། གཉིས་པའི་གཞི་རྟེན་གསུམ་གྱི་མཚན་ཉིད་ལ་སྦྱར་ཡང༌། །དོན་གྱི་ཚེ་ནི་གཞི་གོང་འོག་རྣམས་གཅིག་ཏུ་བྱ་དགོས་ཏེ། དེ་འདྲ་མ་ཡིན་ན་ལྷ་ཁང་དང་རྟེན་གསུམ་གཉིས་ཀ་མཐོང་བ་དང༌། རྟེན་གསུམ་གྱི་མཚན་ཉིད་གཏན་ལ་མ་ཕེབས་པ་མི་འགལ་བ་བཞིན་དུ། དངོས་གཞི་གཉིས་ཀ་ཡིན་པའང་དངོས་ཡིན་ལ་གཞི་མ་ཡིན་པ་དང་མི་འགལ་བར་འགྱུར་ལ། དེའི་ཚེ་སྙིང་ཐིག་གི་རྣལ་འབྱོར་ཁྱད་པར་དུ་འཕགས་ཚུལ་སྟོན་པ་ལ་སྦྱར་བ་མ་འབྲེལ་བར་འགྱུར་བའི་ཕྱིར་རོ། །དེའང་རྟོགས་བྱ་གཞི་རྒྱུད་རྟོགས་པ་ཡིན་ཀྱང༌། རྟོགས་ཚུལ་དངོས་སུ་སྟེ་མངོན་སུམ་དུ་རྟོགས་པ་མ་ཡིན་སོགས་ལ་བར་གྱི་ཚིག་མི་མངོན་པར་མཛད་ནས་གཞི་ཡིན་ལ། དངོས་མ་ཡིན་སོགས་སུ་གསུང་བར་མངོན་ནོ། །མངོན་སུམ་
དུ་རྟོགས་པ་ལ་དངོས་སུ་རྟོགས་པར་གསུངས་པའང་དོན་སྤྱི་བརྒྱུད་མི་དགོས་པར་རྟོགས་པའི་རྒྱུ་མཚན་གྱིས་བཏགས་པ་འདྲ་བས། དངོས་ཤུགས་གཉིས་ཀྱི་ཟླས་དྲངས་པའི་དངོས་མིན་ཞིང༌། ཆོས་གཅིག་བདེན་མེད་དུ་རྟོགས་ན་བརྒྱུད་ནས་ཆོས་གཞན་ཡང་དེ་ལྟར་རྟོགས་ཞེས་པ་ལྟ་བུའང་མིན་ནོ། །སོ་སོའི་ངོས་འཛིན་ལ་བླ་མའི་མན་ངག་གི་དྲིན་གྱིས་སེམས་དང་རིག་པ་ཤན་འབྱེད་ཀྱི་ཁོག་ཤོག་པའི་གོ་བ་ཁྱད་པར་ཅན་རྙེད་དེ། ཕར་ཕྱིན་ཐེག་པ་དང༌། རྒྱུད་སྡེ་འོག་མའི་ལམ་མཐོན་པོ་རྣམས་དང༌། ལམ་འདི་ནས་རྟོགས་པའི་རྩལ་ཆེན་རྫོགས་པ་གཉིས་ལ་བསྒྲུབ་གཞིའི་དབང་གིས་ཁྱད་ཆེན་པོ་ཡོད་ཚུལ་ཤེས་ནས་མཐའ་བྲལ་གྱི་དེ་ཁོ་ན་ཉིད་ཀྱང་དེའི་སྟེང་དུ་གོ་བས་གཏན་ལ་ཕེབས་པ་བྱུང་རུང༌། དེའི་སྟེང་ནས་མྱོང་སྟོབས་ཀྱིས་སྒྲོ་འདོགས་ཆོད་ནུས་པའི་ཉམས་ལེན་མ་འབྱོངས་པ་ནི་མུ་དང་པོ་ལྷ་ཁང་མཐོང་ཡང་རྟེན་གསུམ་མ་མཐོང་བ་ལྟ་བུ་སྟེ། དཔེ་འདི་ལྷག་བསམ་བསྐུལ་བ་ལས། དེ་ལ་ཤུན་པ་ཇི་བཞིན་སྨྲ་བ་སྟེ། །སོགས་དང་ཚུལ་མཚུངས། དེ་ལྟར་ཡིན་པའང་ཐེག་མཆོག་མཛོད་ལས། རྫོགས་ཆེན་པ་ཁ་ཅིག་གིས་ཆོས་གཞི་ལ་ལུས་ནས་ལག་ཏུ་བླང་དུ་མེད་པར་ཆོས་ཉིད་ཁ་འབྱམས་སུ་སོང་བས་འཆི་ཁ་ཐ་མལ་དུ་འཆི་བ་རྣམས་སོ། །ཞེས་སོ། །མན་ངག་ཐོས་པའི་དུས་སུ།
དང་པོར་དཀྱུས་སྟོན་པ་ན་དབྱིངས་ངོ་འཕྲོད་ཅིང༌། རྒྱུག་བྱེད་ཐད་ཀར་སྟོན་པ་ན་ཀུན་རྟོག་གི་རྡུལ་དང་བྲལ་བའི་དྭངས་གསལ། བཅོས་མའི་འཇུར་མདུད་མ་སོང་བའི་ཐ་མལ། ཡུལ་སྣང་ཁོལ་བུ་བས་མ་བཅིང་བའི་ཁྱབ་གདལ་སོགས་ཀྱི་རྣམ་ཅན་ཁྱད་པར་བ་ཞིག་བརྡ་འལ་འོལ་འཕྲོད་དེ། དབྱིངས་རིག་དེ་གཉིས་སྦྱར་ན་རྫོགས་ཆེན་ཡིན་མདོག་ཁ་བོ་དང༌། རིག་པའི་རྣམ་ཆ་དེ་སྤུ་རིས་ཅུང་ཟད་རེ་ཟིན་ནས་སྐྱོང་སྐབས་གཞིའི་རང་མདངས་བག་ཙམ་གསལ་དུ་སོང་བ་འདྲ་མོ་ཡོད་ཅིང༌། དེ་ནས་སྒོམ་སྐྱོན་བྱིང་བ་བསགས་པ་དང༌། ཐེག་པ་ཐུན་མོང་གི་ཞི་གནས་སྐྱོང་བའི་དུས་ཀྱི་དྭངས་གསལ་སོགས་མང་པོ་ཞིག་ལ་བསྐོར་ནས་སླར་ཡང་རིག་པ་ངོས་འཛིན་མ་ནོར་བ་ཞིག་མཐའ་བཅད་པ་ན། སྔར་ཤན་འབྱེད་ཀྱི་གོ་བ་བརྟན་པོས་རྒྱུད་མ་སྨིན་པའི་དབང་གིས་ཉམས་མྱོང་འཆལ་ཏེ། གང་ལའང་རིག་པ་ཞེས་གནད་ཐོག་མེ་བཙའ་བྱས་མེད་པར་འགྲོ་ཞིང༌། དེ་ནས་དབྱིངས་ཀྱི་ཆའང་ཐུན་མོང་མ་ཡིན་པའི་ཀ་དག་གི་ཆ་ཤས་སུ་འཇོག་མི་ཐུབ་པར་སོང་བ་ནི་དངོས་ཡིན་ལ་གཞི་མ་ཡིན་པ་རྟེན་གསུམ་མཐོང་ཡང་དེའི་ཁྱད་པར་མ་ངེས་པ་ལྟ་བུ་སྟེ། ཐེག་མཆོག་མཛོད་དུ་འདི་འཆད་སྐབས། མན་ངག་ཁ་ཅིག་ཐོག་མ་གནད་ཐོག་ཏུ་ཕེབས་ཀྱང་ཐ་མ་ཚིག་གི་མཐའ་མ་ཆོད་པས་རྗེས་ལ་དེའི་ཐོག་ཏུ་མི་གནས་པར་པྲ་ཡས་པ་རྣམས་སོ། །ཞེས་
གསུངས་པའི་ཕྱིར་རོ། །དེའང་ཉམས་མྱོང་འཆལ་རྗེས་སུ་དེར་འཇོག་པ་མིན་གྱི། དེའི་སྔོན་ལ་ཉམས་རྟོགས་རྩ་བ་མི་བརླིང་བས་དེ་ལྟར་བཤད་དོ། །ཆོས་ཐམས་ཅད་སྟོང་པ་ཞེས་ཆད་མཐའ་ལ་དབྱིངས་སུ་འཁྲུལ་པ་དང་དེ་མ་འཁྲུལ་ཡང་ཐེག་པ་འདིར་གནས་ལུགས་དེ་ཉིད་གཞི་ཇི་འདྲ་ཞིག་དང་སྦྱར་ཏེ་སྒོམ་པའི་གནད་མ་གོ་བ་དང༌། ཁ་ཅིག་དེ་ཙམ་གྱིས་དབུ་མའི་ལྟ་བ་རྙེད་པ་དང་རྫོགས་ཆེན་གྱི་ངོ་སྤྲོད་ཐེབས་པ་གཉིས་མི་ཕྱེད་ཅིང༌། དེ་གཉིས་དོན་གཅིག་ཏུ་བྱ་བར་ཡང་མི་རུང་བ་ལུང་ཙམ་ལས་ཤེས་ཏེ། དཔྱད་འཇོག་གི་ཚུལ་མི་འདྲ་བས་དེ་གཉིས་ཁྱད་ཆེ་ཟེར་བ་དང༌། སེམས་ཀྱི་ངོ་བོ་སལ་ལེ་ཧྲིག་གེ་བ་ཙམ་ལ་ཐིམ་ལ་མ་རྨུགས་པའི་ཡེ་ཤེས་ནང་གསལ་སོགས་མིང་གང་བཟང་འདོགས་པ་དང༌། དེ་དང་ཕྱི་རོལ་པའི་བདེ་གསལ་རྟོག་མེད་ཀྱི་ཏིང་ངེ་འཛིན་ལ་ཁྱད་ཅི་ཡོད་བྱས་ཚེ། ཉམས་ལ་ཞེན་མི་ཞེན་ཡོད་ཟེར་བ་སོགས་ཕོངས་ཆོས་མང་པོ་སྨྲ་བ་ནི་གཞི་དང་དངོས་གཉིས་ཀ་མ་ཡིན་པ་ལྷ་ཁང་དང་རྟེན་གསུམ་གང་ཡང་མ་མཐོང་བ་ལྟ་བུ་སྟེ། སྔ་མ་ལས། ཐེག་པ་ཐུན་མོང་བ་སྤྱིའི་ཚིག་གི་ལྟ་སྒོམ་ཡིད་དཔྱོད་ཀྱི་ལམ་དུ་བྱས་ནས། དོན་ངོ་མ་འཕྲོད་པས་ཐ་མ་གར་འགྲོ་ངོ་མ་ཤེས་པ་རྣམས་སོ། །ཞེས་སོ། །འདི་ལ་འཆི་ཁ་ཐ་མལ་དུ་ལུས་པ་ཞེས་ཁྲིད་ཡིག་ཆེན་མོར་གསུངས་ཤིང༌། ཐེག་མཆོག་མཛོད་དུ་
མུ་དང་པོ་ལ་དེ་ལྟར་གསུངས་ཏེ། དེ་གཉིས་ཐ་མལ་དུ་ལུས་ལུགས་མི་འདྲ་ཡང༌། སྒོམ་བྱུང་གི་སྣེམ་ཟིན་པ་ལ་འདྲ་ཞིང༌། དེ་ལས་མུ་གསུམ་པས་ནི་གདམས་པའི་གནད་མ་རྙེད་པ་ཤིན་ཏུ་གསལ་ལ་དེ་ཚང་བར་རྙེད་ཀྱང་རྙེད་པ་ལྟར་གྱི་ཉམས་ལེན་མ་འབྱོངས་པའི་སྐབས་ནི་གདུལ་བྱ་མཆོག་ལའང་ཡོད་ཚུལ་ཐོས་བསམ་སྒོམ་པའི་གོ་རིམ་གྱིས་ཤེས་ཤིང༌། དེ་གོང་སྨོས་ལྟར་མུ་དང་པོས་བསྡུས་པར་བཤད་ནའང་མི་འཐད་པ་མེད་མོད་ཀྱི། མུ་དང་པོ་ཐེག་མཆོག་མཛོད་ཀྱི་སྒྲས་ཟིན་གཙོ་བོ་ནི། མན་ངག་གི་གནད་ཚང་བར་མ་རྙེད་པ་ལ་བྱེད་དེ། ལག་ཏུ་བླང་དུ་མེད་པར་ཞེས་སོགས་ཀྱིས་གསལ་ལོ། །དེའི་དོན་ཡང་དཔེར་ན་བླ་མེད་ཀྱི་རྫོགས་རིམ་གཞན་ལ་སློབ་ཚེ་འོད་གསལ་དང་ཡེ་ཤེས་ཀྱི་སྐུའི་འཇོག་ཚུལ་ལ་གོ་བ་རྙེད་ཀྱང་དེ་དག་སྒྲུབ་བྱེད་རྩ་རླུང་ཐིག་ལེའི་རྣལ་འབྱོར་རྣམས་ལེགས་པར་མ་ཤེས་ན་མཉན་པ་ལག་སྐྱ་མེད་པ་ལྟ་བུར་འགྲོ་བ་དེ་བཞིན་དུ། རིག་པ་དང་དེའི་གདངས་ཀྱི་འཇོག་ཚུལ་ལམ་གཞི་དང་གཞི་སྣང་གི་གོ་དོན་སོགས་ཤེས་ཀྱང་དེ་དག་ལམ་དང་འབྲས་བུའི་ངོ་བོར་གོ་འཕོ་བའི་ཐབས་སུ་སྐྱོང་ཐབས་ཀྱི་གནད་ངེས་པ་གསུངས་པའི་དོན་རྣམས་ལ་མ་མཁས་ན། དེ་ནི་བསྟན་བཅོས་དོན་མང་མྱ་ངམ་གྱི། །ཐང་ལ་སྐོམ་པས་གདུང་སྟེ་འཆི་བར་ཟད། །ཅེས་པ་ལྟ་བུར་འགྱུར་བའོ། །དེ་ལྟར་བྱས་ན་རྫོགས་ཆེན་
གྱི་ལམ་གྱི་ཆ་རྣམས་མ་ཚང་བ་མེད་པར་ལུས་སུ་བསྒྲིགས་པའི་གཞུང་ལ་ཉན་བསམ་རྫོགས་པར་བྱས་པ་ཙམ་ནས་མུ་དང་པོ་གསུམ་ཕལ་ཆེར་ལས་འདའ་ཞིང༌། ཉན་བསམ་སྒོམ་གསུམ་ལེགས་པར་བྱས་ན་མཐའ་དག་ལས་འདའ་བར་ནུས་སོ་ཞེས་པར་གསལ་ཏེ། ལམ་གྱི་དངོས་གཞི་དང༌། དངོས་གཞིའི་གདམས་པ་གཉིས་ཀྱི་ཁྱད་ཆོས་སོ་སོ་ནས་བསྟན་ཏོ། །གལ་ཏེ་ཁྲིད་ཡིག་ཏུ་མུ་གཉིས་པ་སྟོན་སྐབས། རྟོག་དཔྱོད་ཀྱིས་གོ་ཡང་མྱོང་ཐོག་ཏུ་མ་ཆགས། ཞེས་གསུངས་ཤིང༌། དང་པོའི་ཚེ་ཚིག་ཙམ་ལ་ལྟ་སྒོམ་ཡིན་པར་ཡིད་བརྟན་འཆའ་བ་ཞེས་གསུངས་པས་འདིར་བཤད་པ་རྣམས་ཅི་ལྟར་རུང་ཞེ་ན། སྐྱོན་མེད་དེ། སྔ་མ་ནི་མྱོང་བ་བརྟན་པོ་མ་ཆགས་པས་དམན་པ་ལ་དགག་སྒྲ་སྦྱར་བ་ཡིན་པར་གོང་དུ་དྲངས་པའི་ལུང་གིས་ཤེས་པའི་ཕྱིར་དང༌། ཕྱི་མའང་བསམ་བྱུང་ཐོས་བྱུང་དང་ཕྱོགས་གཅིག་ཏུ་བསྡུས་ནས་བསྟན་པ་ཡིན་པའི་ཕྱིར་རོ། །བརྗོད་པར་བྱ་བ་གཞན་ཡང་ཡོད་དེ་ཐོ་ཙམ་མོ། །དེ་ནས་མུ་བཞི་པ་ནི། ཐེག་མཆོག་མཛོད་ལས། རིག་པ་དངོས་སུ་མཐོང་བས་ལྟ་སྒོམ་ཡིན་སྙམ་ལ་རག་མ་ལུས། གཞི་མཐོང་བས་ལྡོག་པའི་ས་མེད་པ་ཞེས་གསུངས་ཏེ། གོང་མ་རྣམས་དང་སྦྱར་ན་ཤིན་ཏུ་སླའོ། །འདི་དག་གཞུང་སྤྱི་སྐད་ལ་གྲགས་པའི་དངོས་གཞིའི་
སྒྲ་བཤད་མིན་གྱི། རྫོགས་ཆེན་ལ་འཇུག་ཚུལ་དེ་ལ་དངོས་དང་གཞི་གཉིས་ཕྱེ་སྟེ་དེ་ལ་མུ་བརྩིས་པའོ། །བདག་འདྲ་བས་ཀུན་མཁྱེན་བླ་མའི་དགོངས་པ་ཤོད་མི་ཐུབ་ཀྱང༌། འཕྲལ་དུ་ཡིད་ལ་ཤར་ཚུལ་ཅུང་ཟད་ཅིག་བཀོད་པར་ཟད་དེ་ཉིད་ལྟ་བུའི་མཁྱེན་རབ་ཅན་གྱིས་རྒྱ་ཆེར་དཔྱད་པར་མཛོད་ཅིག །དགེ་ཞིང་བཀྲ་ཤིས།། ༈ །།གང་གི་རང་བཞིན་སྤྲོས་པས་མི་མཚོན་པ། །བརྟན་གཡོ་ཀུན་གྱི་གཉུག་མའི་དེ་ཁོ་ན། །རྒྱུད་སྡེ་རྒྱ་མཚོའི་སྙིང་པོའི་དོན་གཅིག་པུ། །དཔལ་ལྡན་བླ་མའི་ངོ་བོར་ཤེས་པས་འདུད། །ཐེག་མཆོག་རྡོ་རྗེ་སྙིང་པོའི་ཆོས་ཚུལ་ལ། །མོས་པའི་བློ་ལྡན་ཁྱེད་ཀྱིས་གང་དྲིས་པ། །དེ་འདྲ་བདག་བློའི་རྩལ་གྱིས་ཤོད་དཀའ་ཡང༌། །བླ་མའི་ལུང་ལ་བརྟེན་ནས་ཆ་ཙམ་དབྱེ། །དེ་ལ་སྤྱིར་རྫོགས་ཆེན་གྱི་གདམས་པའི་ཟབ་ཁྱད་མཐའ་ཡས་ཀྱང༌། རྩ་བའི་གནད་ནི། ཡོན་ཏན་རིན་པོ་ཆེའི་མཛོད་ལས། གང་དག་སེམས་ལས་འདས་པའི་རིག་པ་ནི། །རང་བཞིན་རྫོགས་པ་ཆེན་པོའི་ཁྱད་ཆོས་ཡིན། །ཞེས་གསུངས་པ་ལྟར་སེམས་རིག་ཤན་འབྱེད་ལ་ཐུག་པས། །དེ་ཉིད་གནད་དུ་བཟུང་ཚུལ་བྲིས་འདུག་པ་ནི་དམ་པའི་གསུང་སྒྲོས་མ་ནོར་བར་ཟིན་པ་སྟེ་རྗེས་སུ་ཡི་རང་ལགས། གཉུག་མའི་རིག་པ་དང༌། འོད་གསལ་རྡོ་རྗེའི་སེམས་གཉིས་དོན་གཅིག་ལ། དེ་
ཉིད་སྔགས་བླ་མེད་ཀྱི་རྒྱུད་སྡེ་ཐམས་ཅད་དུ་རྩལ་འདོན་མཛད་ནས་མ་བཤད་པ་མེད་ཀྱང༌། རླུང་སེམས་དབུ་མར་འཛུད་པའི་མན་ངག་གིས་ཀུན་རྟོག་བཅད་པའི་སྐབས་སུ་འོད་གསལ་ངོས་བཟུང་སྟེ་སྒོམ་པའི་ཕྱོགས་ཁོ་ན་མང་ལ། ལུགས་འདིར་ནི་ཀུན་རྟོག་གི་སྟེང་ན་འོད་གསལ་ཏིལ་འབྲུ་སྣུམ་ཁྱབ་ལྟར་གནས་པའི་དུས་ཉིད་ན་བཅར་ཕོག་ཏུ་ངོས་བཟུང་སྟེ་སྐྱོང་ཚུལ་སྟོན་པའི་ཁྱད་ཆེ་ཞིང༌། དེའི་དབང་གིས་ཡེ་ཤེས་མཆོག་སྒྲུབ་པ་ལ་རྩོལ་བ་ཆེ་ཆུང་དང་མང་ཉུང་ཡང་ཆེས་མི་འདྲའོ། །དེའི་དབང་དུ་བྱས་ནས་ད་ལྟའི་ཤེས་པ་ཐ་མལ་པའམ། ད་ལྟའི་རིག་པ་མ་བཅོས་པ་ངོ་སྤྲོད་ལུགས་ལ་ཆོས་དབྱིངས་མཛོད་འགྲེལ་དུ་ཚུལ་བདུན་གསུངས་པ་སོགས་རྣམ་གྲངས་མང་ཡང༌། རེ་ཞིག་སྟོང་ཉིད་ཀྱི་ལྟ་བའི་སྟེང་ནས་ངོ་སྤྲོད་ཚུལ་ཙམ་བརྗོད་ན། ཕྱོགས་གཞན་དུ་རང་སེམས་སྐྱེ་འགག་གནས་གསུམ་དང་བྲལ་བར་གཏན་ལ་ཕབ་ནས། དེ་ལྟར་ཕབ་པའི་སྟོང་ཆ་དེ་ལས་ཡིད་གཞན་དུ་མ་ཡེངས་པར་བྱས་ཏེ་སྒོམ་པ་ཡིན་ཡང༌། འདིར་དེ་ལྟར་མི་བྱེད་ཀྱི་བྱུང་གནས་འགྲོ་གསུམ་བཙལ་ནས་ཡུལ་དང་ཡུལ་ཅན་གྱི་དམིགས་གཏད་གཤེགས་པའིདུས་སུ་འདིའོ་ཞེས་ཟུང་དུ་ཅི་ཡང་མ་རྙེད་པའི་ངང་དེར་བཟོ་མེད་རང་བབ་ཀྱི་ཤེས་པ་སྟོང་གསལ་སྤྲོ་བསྡུ་དང་བྲལ་བ་ཞིག་འཆར་སྟེ། བཞི་ཆ་
གསུམ་བྲལ་གྱི་རིག་པ་ཞེས་བྱ་བ་ཡིན། དེ་ཉིད་ལ་བཅོས་སླད་ཀྱི་དྲི་མས་མ་ཕོག་པར་ལྷོད་ཀྱིས་གློད་དེ་འཇོག་པ་ནི། རིག་པ་རྟེན་མེད་དུ་ཞོག་དང་རྣལ་འབྱོར་པ། །ཞེས་གསུངས་པའི་དོན་མ་ནོར་བ་ཡིན་ནོ། །དེའང་སྔོན་འགྲོའི་དུས་སུ་སེམས་ཀྱི་མཚང་བཙལ་བ་དང༌། དངོས་གཞིའི་ཚེ་དེ་ལྟར་བཙལ་བའི་སྟེང་ནས་རིག་པ་ངོ་སྤྲོད་པ་གཉིས་མ་འཛིང་བ་དགོས་ཏེ། ཀུན་མཁྱེན་ཆོས་རྗེ་དང་གཏེར་བདག་གླིང་པ་སོགས་ཀྱི་གཞུང་ན་གསལ་ལོ། །སེམས་ཀྱི་ཆ་ཐམས་ཅད་རིག་པར་ཐག་བཅད་ཅེས་བྲིས་འདུག་པ་འདི་ལ་ཞུ་དག་བྱས་ན། སེམས་ཀྱི་ཆ་ཐམས་ཅད་རིག་པའི་རང་རྩལ་དུ་ཤར་བ་ཡིན་གྱི། རིག་པ་དངོས་མིན་ཟེར་དགོས་ཏེ། གཞན་དུ་ན་སེམས་རིག་ཤན་འབྱེད་ཅེས་པའང་རིག་པ་དང་རིག་པ་ཤན་འབྱེད་ཅེས་པར་འགྱུར་བའི་ཕྱིར་རོ། །ཡུལ་སེམས་ཐམས་ཅད་རིག་པའི་རྩལ་དུ་ཐག་ཆོད་ཀྱང༌། ཉོན་མོངས་པ་དང་རྣམ་རྟོག་ཁ་མ་བྲིན་འཆིང་ཨེ་ནུས། ཞེས་སོགས་འདྲི་བ་ལ་སྤྱིར་འོད་གསལ་ལ་སྲབ་འཐུག་གི་རིམ་པ་མང་པོ་ཡོད་པས། དང་བའི་དུས་སུ་རིག་ཐོག་ནས་མ་ཡེངས་ཀྱང༌། དགེ་སྡིག་གི་རྟོག་པ་སྣ་ཚོགས་ཆུ་རླབས་ལྟར་འབྱུང་བ་མང་དུ་ཡོད་ལ། དེ་ལྟར་འབྱུང་ཡང་རྩ་བ་རིག་པའི་ཡེ་ཤེས་རང་མལ་ནས་མ་གཡོས་པའི་དབང་གིས། ཀུན་རྟོག་དེ་རྣམས་སྐད་ཅིག་དང་
པོར་ཐོལ་གྱིས་ཤར་ཡང༌། གཉིས་པར་དེའི་རྒྱུན་འཐུད་མི་ནུས་པར་འོད་གསལ་གཉུག་མའི་དབྱིངས་སུ་སིབ་ཀྱིས་ཐིམ་འགྲོ་བས་རྒྱུད་མི་འཆིང་ཞེས་གསུངས་ཏེ། མི་འཆིང་བའི་རྒྱུ་མཚན་ནི། སྐད་ཅིག་གཉིས་པར་རྒྱུན་མ་མཐུད་པ་གཅིག་པུ་དེ་མིན་གྱི། རྣམ་རྟོག་སྐད་ཅིག་དང་པོ་སྐྱེ་དུས་ནས་འོད་གསལ་གྱི་དགོངས་པའི་རྒྱས་ཐེབས་པའི་གནད་ཀྱིས་ཡིན་ཏེ། བསྐྱེད་རིམ་ཙམ་ལ་གནས་པའི་སྔགས་པས་ཀྱང་སྣང་སྤྱོད་ཐམས་ཅད་ལྷའི་རྣལ་འབྱོར་གྱི་རྒྱས་ཐེབས་པའི་དབང་གིས་བསྒུལ་བསྐྱོད་འགྲོ་འདུག་སོགས་གཞན་ལ་ལུང་མ་བསྟན་དུ་འགྲོ་བ་རྣམས་ཀྱང་སྔགས་དང་ཕྱག་རྒྱ་ལ་སོགས་པ་ཚོགས་གཉིས་ཀྱི་སྒོ་རླབས་པོ་ཆེར་འགྱུར་བར་གསུང་ན། དེ་ལྟ་ཅི་སྨོས་པའི་ཕྱིར་རོ། །འོན་ཀྱང་རིག་ཐོག་ཏུ་མཉམ་པར་མི་འཇོག་པར། གང་ཤར་ཐམས་ཅད་རིག་པའི་རང་རྩལ་དུ་ཤེས་པའི་གོ་ཡུལ་ཡོད་པ་ཙམ་གྱིས་ནི་རང་གྲོལ་གྱི་གདེངས་ཚད་རྗེས་མཐུན་ཙམ་ཡང་མི་རྙེད་པས། འཇིག་རྟེན་ཕལ་པ་ལྟར་ལས་ཉོན་གྱི་འཁྲུལ་པའི་གཞན་དབང་དུ་འགྲོ་བར་ཟད་དོ། །འདིའི་མཉམ་བཞག་ཏུ་གཉིས་སྣང་ནུབ་ཨེ་དགོས། གཉིས་སྣང་མ་ནུབ་པར་རྫོགས་ཆེན་གྱི་རིག་པ་ངོ་མ་ཕྲོད་པ་ཨེ་ཡོད། ཅེས་པར། སྣང་བཞིའི་རྟོགས་པ་མཐོན་པོར་སླེབས་དུས་མཉམ་བཞག་ཏུ་
གཉིས་སྣང་གི་སྤྲོས་པ་མཐའ་དག་ཞི་བ་འབྱུང་ཡང༌། རྫོགས་ཆེན་གྱི་རིག་པ་ལ་མཉམ་པར་བཞག་ཚད་དེ་ལྟར་འོང་བ་མིན་ཏེ། གོང་དུ་འོད་གསལ་སྲབ་འཐུག་གི་རིམ་པ་མང་པོ་ཡོད་པར་བཤད་པ་དེས་ཤེས་སོ། །དྲན་པའི་རྒྱུན་བསྐྱངས་ནས་བསྒོམ་པས་ནམ་ཞིག་རིག་པ་ཉིད་ཀྱི་སྟེང་ནས་དྲན་པ་ཞིག་སད་འོངས་ཞེས་ཞལ་རྒྱུན་ལས་ཐོས་ཀྱང་ཞིབ་ཏུ་རྩད་གཅོད་པ་མ་བྱུང་བས་དེ་ཇི་ལྟར་ཡིན། ཞེས་པར། ཐུན་མོང་སེམས་གནས་ཀྱི་བསམ་གཏན་ལ་གནས་ཆ་ཡོད་ཀྱང་གློ་བུར་བའི་རྟེན་ཅན་ཡིན་ཕྱིར་རླབས་ཆུང་ལ། རིག་པ་རང་གནས་ཀྱི་བསམ་གཏན་ནི་གཉུག་མའི་རང་གཤིས་ཡིན་པས་ཆོས་ཉིད་ཀྱི་རླན་དང་མི་འབྲལ་བར་ཐེག་མཆོག་མཛོད་དང་རྣམ་མཁྱེན་ཤིང་རྟ་ལས་གསུངས་པ་ལྟར། རིག་ཐོག་ན་འདུ་བྱེད་ཀྱི་དྲན་པ་ཞེས་གྲགས་པ་དམིགས་གཏད་ཅན་གྱི་དྲན་འཛིན་མེད་ཀྱང༌། རྩོལ་མེད་རང་བཞག་གི་དྲན་པའམ། ཆོས་ཉིད་མ་བཅོས་པའི་དྲན་པ་ཞེས་འོད་གསལ་རང་ས་ཟིན་ཅིང༌། རྩལ་ཐོག་ཏུ་མི་འཆོར་བར་བྱེད་པའི་གཉུག་མའི་དྲན་པ་ཡོད་ཅེས་པ་ཡིན་ནོ། །དེ་ནི་སྒོམ་སྟོབས་ཀྱིས་རིག་པ་མངོན་དུ་གྱུར་པ་དང་མཉམ་དུ་གསེར་དང་དེའི་རང་འོད་ལྟར་ཤུགས་འབྱུང་ལ་འོང་བ་ཡིན་གྱི། ཆེད་དུ་གཉེར་ནས་དྲན་པ་བརྟེན་དགོས་ཕན་ཆད་སེམས་ཀྱི་ཕྱོགས་ལས་མི་འདའོ། །འོན་ཀྱང་གཉུག་མའི་དྲན་པ་དེ་མངོན་དུ་བྱ་བའི་ཐབས་སུ་
དང་པོར་འདུ་བྱེད་ཀྱི་དྲན་པ་བརྟེན་ནས་རིག་ངོ་སྐྱོང་བ་ནི་མི་འགོག་སྟེ། མན་ངག་མཛོད་ལས། དང་པོའི་ལས་ཅན་འདུ་བྱེད་མ་ཡེངས་བྱ། །ཞེས་སོགས་གསུངས་པ་བཞིན་ནོ། །འདིའི་རྣལ་འབྱོར་པ་འཆི་དུས་ཐིམ་རིམ་ཇི་ལྟར་འོང༌། དེ་དུས་འཕེན་པ་གཏོང་ཨེ་དགོས། ཞེས་པར། ས་ས་ལ་ཐིམ་པ་སོགས་ནས། རྣམ་ཤེས་ནམ་མཁའ། །ནམ་མཁའ་འོད་གསལ། འོད་གསལ་ཟུང་འཇུག །ཟུང་འཇུག་ཡེ་ཤེས། ཡེ་ཤེས་ལྷུན་གྲུབ་ལ་ཐིམ་པའི་བར་དང༌། །མཐར་ལྷུན་གྲུབ་ནང་དབྱིངས་སུ་སྡུད་པའི་ཚུལ་བཅས་རྒྱ་ཆེར་ཐེག་མཆོག་མཛོད་དང༌། གནད་འདུས་ཁྲིད་ཡིག་ཡེ་ཤེས་བླ་མར་གསལ་བར་དེར་གཟིགས་ཤིག །འདི་དུས་སྣང་མཆེད་ཐོབ་གསུམ་རྒྱུད་གཞན་ནས་བཤད་ཚོད་ལྟར་འཆར་དགོས་མི་དགོས་ལ་སྣ་ཚོགས་སྨྲ་ཡང༌། དོན་གནས་ནི་འདིའི་ལུགས་ཀྱི་རིག་པ་དང༌། འོད་གསལ་གྱི་ཡེ་ཤེས་གཅིག་ཡིན། དེས་ན་སྣང་མཆེད་ཐོབ་གསུམ་གྱི་མཐའི་འོད་གསལ་རྫོགས་ཆེན་གྱི་རིག་པ་དངོས་ཡིན་ཀྱང༌། རྫོགས་ཆེན་གྱི་རིག་པ་འཆི་དུས་མངོན་དུ་བྱེད་ཚུལ་ལ་སྣང་མཆེད་ཐོབ་གསུམ་བཤད་ཚོད་བཞིན་འོང་བའི་ངེས་པ་མེད་དེ། འོད་གསལ་འཆར་ཚུལ་ལ་གང་ཟག་གི་ཁྱད་པར་གྱིས་མི་འདྲ་བ་སྣ་ཚོགས་ཤིག་སྣང་བའི་ཕྱིར་ཏེ། སྦས་རྒྱུད་གཞན་དང་དུས་འཁོར་
དང༌། འདི་ནས་གསུངས་པའི་འོད་གསལ་དུ་ཐིམ་པའི་རིམ་པ་མི་འདྲ་བ་བཞིན་ནོ། །ཆོས་འདིའི་ཁྱད་པར་གྱི་གདུལ་བྱ་རྣམས་འཆི་བའི་དུས་ཀྱི་ཐིམ་རིམ་ནི་གོང་དུ་སྨོས་པ་ལྟར་ཡིན་ལ། དེའི་ཚེ་འཕེན་པ་སྔོན་དུ་གཏོང་བ་ནི་གལ་ཆེ་སྟེ། མགྲོན་པོ་ལ་བརྒལ་བ་ཚང་སྤྲུགས་སུ་གདབ་པ་ཞེས་བླ་མའམ་རྡོ་རྗེའི་སྤུན་གྱིས་བར་དོའི་གདམས་པ་ཕོག་ནས་གསལ་ལེགས་པར་བཏབ་སྟེ། འདི་བཞིན་དུ་བར་དོར་མི་བརྗེད་པར་སྐྱོང་དགོས་སྙམ་དུ་ངེས་པར་བྱས་ནས་འཆི་བ་ཡང་དེ་ཡིན་ནོ། །སླར་ཡང་མཉམ་བཞག་གི་སྔོན་དང༌། དངོས་གཞིའི་སྐབས་དང༌། རྗེས་ལ་ཇི་ལྟར་བྱ་བ་གོ་སླ་བ་ཞིག་ཤོད་ཅེས་པར། ལར་དགེ་སྦྱོར་ཅི་བྱེད་ཀྱང་འཇིག་རྟེན་གྱི་གཡེང་བ་བཅད་ནས་སྐྱོང་བ་གལ་ཆེ་ལ། ལྷག་པར་རྫོགས་ཆེན་སྒོམ་ན་ཆོས་དང་ཆོས་མིན་གྱི་བྱ་བཞག་ལང་ལོང་མང་པོ་ཙམ་གྱིས་བཞག་སྟེ་ལས་རླུང་དལ་ཞིང་ཞི་བའི་ཐབས་ལ་འབད་དགོས། མཉམ་བཞག་དངོས་ཀྱི་ཚེ། དང་པོ་རིག་པ་རྗེན་ལ་བཏོན་ནས། དེ་ཉིད་བཅོས་བསྒྱུར་སྤང་བླང་གི་ལྷད་མ་ཞུགས་པར་རང་བབས་སུ་བཞག་ཅིང༌། རྣམ་རྟོག་འཕྲོ་ན་ཕར་རྣམ་རྟོག་གི་རྗེས་སུ་མི་འབྲང་བར། རིག་ཐོག་ཏུ་ཚུར་རང་སོ་བཟུང་བ་གནད་ཡིན། བདེ་གསལ་མི་རྟོག་པའི་ཉམས་སོགས་བཟང་ངན་གྱི་རྣམ་པ་གང་བྱུང་ཡང༌། དེ་ལ་རྩིས་གདབ་ཀྱི་རྗེས་གཅོད་
བྱས་ཕན་ཆད་རིག་པ་རང་མལ་ནས་གཡོས་ཏེ་རྩལ་ཐོག་ཏུ་ཤོར་བ་ཡིན་པས་སྔར་བརྗོད་པ་ལྟར། རིག་པ་རྟེན་མེད་དུ་འཇོག་པ་ཁོ་ན་འགག་དོན་དུ་ཤེས་དགོས། མཉམ་རྗེས་གཉིས་ལ་རིག་པ་མེ་ལོང་གཡའ་བཤུས་མ་བཤུས་ལྟ་བུའི་ཁྱད་ཡོད་ཀྱང༌། སྐྱོང་ཚུལ་གྱི་རིགས་མི་འདྲ་བ་མེད་པས། དཔལ་སྤྲུལ་རིན་པོ་ཆེས། མཉམ་བཞག་རྗེས་ཐོབ་ཐ་དད་མེད། །ཅེས་གསུངས་པ་ཡིན། ཡུལ་སྣང་ལ་དེར་འཛིན་གྱི་འཁྲུལ་པ་ལུ་གུ་རྒྱུད་དུ་ཤར་ཚེ་སྣང་བའི་དབང་དུ་ཤེས་པ་སོང་ནས་ཆགས་སྡང་སོགས་ལས་དང་ཉོན་མོངས་པའི་དགྲ་རྣམས་མགོ་རྒྱལ་དུ་འགྲོ་བ་ཡིན་ལ། རིག་པའི་ངང་མ་ཤོར་ན་སྤྱོད་ཡུལ་ཐམས་ཅད་དེའི་རང་མདངས་སུ་ཤར་ནས་རིམ་གྱིས་བརྟུལ་ཞུགས་ཀྱི་དྲོད་ཐོབ་པར་འགྱུར་བ་ལགས། ཞེས་པའང་དད་དམ་བརྩོན་པའི་ཡོན་ཏན་དང་ལྡན་པ་ཧོར་འོད་ཟེར་གྱི་ངོར་བསྟན་པའི་ཉི་མས་འཕྲལ་དུ་བྲིས་པ་དགེ། །།
ན་མོ་གུ་རུ། །ད་ལམ་རྗེ་ཉིད་ཀྱིས་རྫོགས་ཆེན་ཕྱོགས་ལས་བརྩམས་པའི་བཀའ་འདྲི་འགའ་ཞིག་གནང་བ་འདི་རིགས་ལ་རང་འདྲ་བའི་བློ་དམན་གྱིས་ཇི་བཞིན་ཞུ་བའི་རྔོ་ཐོགས་དཀའ་ཡང་འཕྲལ་དུ་གོ་ཚོད་ཕྱོགས་ཙམ་སྙན་དུ་གསོལ་ན། དྲི་བ་དང་པོར། རྫོགས་ཆེན་གྱི་གཞུང་དུ་གཞི་ལ་འཁྲུལ་གྲོལ་གྱི་གཞི་གཉིས་སུ་དབྱེ་བའི་གྲོལ་གཞི་ཕྱོགས་ཙམ་གོ་རུང༌། འཁྲུལ་གཞི་གྲོལ་གཞིར་ལྷུན་གྲུབ་ཏུ་འདོད་པ་ནི་གཞི་སྐྱོན་ཅན་གྱི་ཁས་བླངས་ལགས་ན། འཁྲུལ་གཞི་འདི་གློ་བུར་བ་ཞིག་ཡིན་ནམ་མིན་ཞེས་པ་འདི་ལ། བྲམ་ཟེ་ཆེན་པོས། སེམས་ཉིད་གཅིག་པུ་ཀུན་གྱི་ས་བོན་ཏེ། །གང་ལ་སྲིད་དང་མྱ་ངན་འདས་འཕྲོ་བ། །ཞེས་གསུངས་པ་ལྟར། འོད་གསལ་གཉུག་མའི་སེམས་གཅིག་པུ་དེ་ཀ་ངོ་མ་ཤེས་ན་འཁྲུལ་པའི་གཞི་དང༌། ངོ་ཤེས་ནས་བརྟན་པ་ཐོབ་ན་གྲོལ་སར་འགྱུར་ཏེ་སྔ་མ་གཞི་དང་ཕྱི་མ་འབྲས་བུའི་གནས་སྐབས་ཡིན་པས་དེ་གཉིས་གཅིག་ཏུ་སྨྲ་བ་ཀུན་མཁྱེན་ཆེན་པོས་བཀག་ཡོད། གཞིའི་སྐབས་སུ་འཆི་ཐེང་རེ་བཞིན་འོད་གསལ་དེ་ཡོངས་རྫོགས་འཆར་ཡང་ངོ་མ་ཤེས་པའི་དབང་གིས་སླར་ཡང་འཁྲུལ་པའི་གཟུང་འཛིན་གྱི་ཡོ་ལང་དུ་ལྡོག་ལ། གྲོལ་སར་སླེབས་དུས་རང་ཐོག་ཏུ་བཙན་ས་ཟིན་པས་ཕྱིར་མི་ལྡོག་པའི་ཁྱད་པར་ཡོད། གཞིའི་དུས་སུ་རང་ངོ་མ་ཤེས་པས་རང་རྩལ་འཁྲུལ་པར་ཤར་བ་འདི་ལ་དཔྱད་པ་ཉིད་ཀྱིས་
འཁྲུལ་པའི་གཞི་བྱེད་པ་དེ་འོད་གསལ་ཁོ་རང་གི་གཉུག་མའི་རང་གཤིས་མིན་པར་རྟོགས་ནུས་ཏེ། དེ་ལྟར་མ་ཡིན་ན་དེའི་རང་ངོ་ཇི་ལྟར་ཤེས་ཤིང་ཇི་ལྟར་རྩལ་རྫོགས་པ་དེ་ལྟ་དེ་ལྟར་སྲིད་པའི་འཁྲུལ་སྣང་མཆེད་རིགས་པར་ཐལ་བའི་ཕྱིར་རོ། །དེའི་ཕྱིར་འཁྲུལ་གཞི་དང་གྲོལ་ས་གཅིག་ཏུ་མི་འདོད་ཅིང་འཁྲུལ་གཞིར་འདོད་པའི་གཞིའི་འོད་གསལ་གློ་བུར་བའི་ཆོས་སུའང་ཁས་མི་ལེན་པས་ཀ་དག་ལྷུན་གྲུབ་གཉིས་ཕྱོགས་རེར་བཅད་པའི་འདོད་ཚུལ་རྣམས་དང་མི་འདྲ་སྙམ་པ་ལགས། །བཀའ་འདྲི་གཉིས་པ། གཞི་ལ་འཁྲུལ་པ་མ་གྲུབ་ཀྱང་གཞི་སྣང་གི་རྩལ་ལ་བཟང་ངན་དུ་འཛིན་པས་འཁྲུལ་པ་དེ། དེ་ལྟར་འཁྲུལ་མཁན་གྱི་རླུང་སེམས་ཐ་དད་ཅིག་ཡོད་པ་ཡིན་ནམ་ཞེས་གསུངས་པ་ལ། གཞིའི་འོད་གསལ་འཁྲུལ་པའི་ངོ་བོར་སྐྱེས་མ་མྱོང་ཞིང་མི་སྲིད་པས་ཡེ་གྲོལ་དང་གདོད་ནས་རྣམ་དག་དང་ཀ་དག་སོགས་སུ་བརྗོད་ལ། གཞི་སྣང་ལ་འཛིན་པ་ཞུགས་པའི་རླུང་སེམས་དེ་མ་འཁྲུལ་ཟེར་མི་ནུས་པས་དེ་གཉིས་མི་གཅིག་ཅིང་ཐ་དད་དུ་འཇོག་དགོས་ཀྱང༌། འཁྲུལ་པ་འོད་གསལ་མིན་ཡང་འོད་གསལ་སྤངས་པའི་འཁྲུལ་པ་ཅིག་མེད་པར་རིག་འཛིན་གོང་མས་གསུངས་པ་ལྟར་དེ་འདྲའི་འཁྲུལ་པ་དེ་འོད་གསལ་དེའི་བདག་ཉིད་དང་ངོ་བོ་ཉིད་དུ་ཁས་བླང་དགོས་ཀྱི་རྫས་ཐ་དད་དུ་མི་འཇོག་པར་སེམས་ལགས། གསུམ་པ། ཆོས་སྐུ་ཡེ་ཤེས་རིག་པ་རྣམས་ལ་འཁྲུལ་ནས་ཀུན་གཞི་རྣམ་
ཤེས་སེམས་སུ་ལོག་པ་འདི་གསུམ་སྔ་མ་གསུམ་བཅིངས་གྲོལ་ལས་འདས་ཤིང་རྒྱ་ཆད་ཕྱོགས་ལྷུང་བྲལ་བའི་གཤིས་ཅི་ཡང་མ་ཡིན་པ་ལ་ཅི་ཡང་འབྱུང་རུང་མེ་ལོང་དུ་གཟུགས་བརྙན་སྣ་ཚོགས་འཆར་བ་སོགས་ཀྱི་དཔེས་བསྟན་རུང་འཁོར་བར་སྣང་ཙམ་མིན་པ་ཞེན་འཁྲུལ་གྱིས་བཅིངས་པའི་སེམས་ཅན་རྣམས་བྱུང་བའི་གནད་འདི་ཇི་ལྟར་ཡིན་ཞེས་པར། གཞི་ལས་གཞི་སྣང་དུ་གཡོས་ཞེས་པའི་གཞི་སྣང་ནི་སྐུ་དང་འོད་དང་ཐིག་ལེ་སོགས་ཡུལ་སྣང་གི་རྣམ་པ་ཅན་ཁོ་ནར་མི་བྱའི་ཐུགས་རྗེའི་རིག་ཆ་ཕྱིར་གསལ་དུ་མཆེད་པའང་དེར་འཇོག་དགོས་ལ། དེའི་རྩལ་ལམ་ཤུགས་ལས་གསེར་གྱི་གཡའ་དང་ཆུའི་ཉ་ལྕིབས་ལྟར་ཡུལ་ཤེས་སོ་སོར་སྣང་བའི་ཤེས་པ་གློ་བུར་བའི་ཆར་གྱུར་པ་ཕྲ་མོ་དང་པོར་མཆེད་པ་ལ་ཀུན་གཞི་ཞེས་བྱ། དེའི་རླུང་སེམས་ཇེ་རགས་སུ་སོང་བ་ལས་ཚོགས་དྲུག་ཉོན་ཡིད་དང་བཅས་པར་སོང་ལུགས་རྫོགས་ཆེན་གྱི་གཞུང་ཆེན་པོ་རྣམས་སུ། མ་རྟོགས་སེམས་ཅན་གྱི་འཁྲུལ་ཚུལ་བསྟན་པའི་སྐབས་ནས་རྒྱ་ཆེར་བཤད་པ་དེ་ལགས། དེ་ལྟར་ན་རིག་པ་དངོས་ཀ་དག་ཡིན་པས་ཞེན་འཛིན་གྱི་རྣམ་པར་མི་འབྱུང་ཡང་དེ་ལས་ཤར་བའི་སེམས་རགས་པ་རྣམས་ཐ་མལ་པའི་ཞེན་འཛིན་དུ་འཆར་ལ། དེའི་དབང་གིས་འདུ་བྱེད་ཀྱི་ལས་དང་སེམས་ཅན་དང་སེམས་ཅན་གྱི་གནས་རྣམས་འབྱུང་ཚུལ་མཁྱེན་སླ་བ་ལགས། བཞི་པར། འཆི་ཁའི་
བར་དོ་དང་པོ་ནམ་མཁའ་སུམ་ཕྲུག་གི་ཉམས་ལེན་དང་གྲོང་འཕོ་སྟོབས་སུ་གྱུར་པ་ལ་སྣང་མཆེད་ཐོབ་པའི་ཐིམ་རིམ་འབྱུང་ངམ་མི་འབྱུང་ཞེས་པར། དེ་དག་གང་ལའང་ཐིམ་རིམ་དེ་འབྱུང་དགོས་པར་སེམས་ཏེ། འོད་གསལ་སྦུབས་འཇུག་གིས་གྲོལ་བ་ནི་འཆི་བའི་འོད་གསལ་གྱི་དུས་སུ་བརྟན་པ་ཐོབ་པ་ཡིན་ལ། འོད་གསལ་དེའི་སྔོན་དུ་ཐིམ་རིམ་དེ་འབྱུང་དགོས་པའི་ཕྱིར་དང༌། གྲོང་འཕོ་གྲོང་འཇུག་གིས་གྲོལ་ན་རྣམ་ཤེས་ལུས་ལས་འཐོན་པའི་ཚེ་དག་པའི་གནས་སུ་འཕོ་བ་ཡིན་པ་གང་ཞིག །རྣམ་ཤེས་ལུས་ལས་འཐོན་པ་ནི་ཐིམ་རིམ་གྱིས་དྲངས་པའི་འཆི་བ་འོད་གསལ་གྱི་མཐར་ཡིན་པའི་ཕྱིར་རོ། །ལྔ་པ། རྣམ་ཤེས་སྣང་བ་ལ་ཐིམ་སོགས་ཀྱི་འགྲོས་དང༌། རྣམ་ཤེས་ནམ་མཁའ་ལ་ཐིམ་པའི་འགྲོས་གཉིས་ཀྱི་ཁྱད་པར་གང་ཡིན་ཞེས་པར། རྣམ་ཤེས་ནམ་མཁའ་ལ་ཐིམ་ཚུལ་ཉིད་རྒྱས་པར་ཕྱེ་ན་རྣམ་ཤེས་སྣང་བ་དང༌། སྣང་བ་མཆེད་པ་ལ་ཐིམ་པ་སོགས་སུ་འགྱུར་བས་གནད་གཅིག་པ་ལགས། དྲུག་པ། ཁུ་རྡུལ་རླུང་གསུམ་གྱི་ཐིམ་རིམ་འདི་བཙན་ཐབས་སུ་བཅད་པའི་སྦས་དོན་མན་ངག་ཨེ་ཡོད་གསུངས་པར། སྣང་མཆེད་ཐོབ་པའི་ཐིམ་རིམ་འདི་དག་རླུང་ཐིམ་པའི་ཐིམ་རིམ་ཁོ་ནར་བཤད་པ་དང༌། ཁུ་རྡུལ་རླུང་གསུམ་གྱི་ཐིམ་རིམ་དུ་བཞག་པའི་བཤད་སྒྲོས་མི་འདྲ་ཙམ་ཡོད་པར་སྣང༌། གང་ལྟར་ཡང་ཚེ་
འདིར་འཚང་རྒྱ་བ་རྣམས་ནི་མཐོང་བའི་ཆོས་ཉིད་ལ་ཁུ་ཁྲག་རླུང་གསུམ་གཙོ་བོར་གྱུར་པའི་ཕུང་ཁམས་ཀྱི་སྤྲོས་པ་མཐའ་དག་འོད་གསལ་གཞོན་ནུ་བུམ་པ་སྐུའི་དབྱིངས་སུ་རང་དེངས་ལ་སོང་བའི་ཐིམ་རིམ་གྱིས་མཚོན་པའི་སྐྱེ་འཆི་བར་དོའི་རྣམ་བཞག་ཐམས་ཅད་ལས་རིང་དུ་བརྒལ་བ་ཡིན་ལ། དེ་ལས་གཞན་པ་རྣམས་ནི་ཚེ་འདིའི་ཕུང་ཁམས་ཕྲ་རགས་འོད་གསལ་གྱི་དབྱིངས་སུ་ལྷག་མ་མེད་པར་མ་བསྡུས་པར་བར་དོ་འགྲུབ་ཚུལ་མེད་ལ། དཀར་དམར་ནག་གསུམ་གྱི་སྣང་བ་སོགས་ཀྱང་ཁམས་ཕྲ་མོ་བསྡུས་པའི་རྟགས་སྣང་ཡིན་པས་མན་ངག་ཟུར་པ་ཅང་མེད་དམ་སྙམ་མོད། གང་ཟག་གི་ཁྱད་པར་གྱིས་ཐིམ་རྟགས་དེ་དག་ལ་མངོན་ཚན་ཆེ་ཆུང་ནི་སྣ་ཚོགས་ཤིག་འོང་བ་འདྲ། བདུན་པ། འཆི་ཁའི་བར་དོར་གྲོལ་བ་ལ་འཆར་ལུགས་བརྒྱད་འབྱུང་ངམ་མི་འབྱུང་གསུངས་པར། འཆར་ཚུལ་དེ་དག་ནི་འཆི་ཁའི་བར་དོའི་ཕ་རོལ་ལམ་བར་དོ་དོ་རྫོགས་རྗེས་ཀྱི་ཆོས་ཉིད་བར་དོའི་འཆར་ཚུལ་ཡིན་པས་མི་འབྱུང་བར་སེམས་ལགས། བརྒྱད་པ། ཆོས་ཉིད་ཀྱི་བར་དོར་ཞི་སྐུས་གཞན་དོན་དངོས་སུ་མི་བྱེད། ཁྲོ་སྐུས་བྱེད་ཅེས་པ་འདི་ཅི་ལགས་གསུངས་པར། མཆེད་གཞི་སྙིང་གའི་རིག་གདངས་ཞི་སྐུར་ཤར་དུས་ནས་རང་ངོ་ཤེས་ན་གཞན་དོན་དངོས་སུ་བྱེད་ལོང་མེད་པར་དབྱིངས་ཐོག་ཏུ་ཐིམ་པ་
ཡིན་ལ་དེ་ལས་མཆེད་པ་དུང་ཁང་གི་ཁྲོ་བོའི་རྟགས་སྣང་ཁྲོ་སྐུར་ཤར་ཚེ་གཞན་དོན་བྱེད་པའི་སྐད་ཅིག་མ་མང་པོའི་རིང་ལ་གནས་པའི་དོན་ཡིན། སྐབས་འདིའི་གཞན་དོན་བྱེད་མི་བྱེད་ཅེས་པའི་གཞན་ནི་རང་ལས་རྒྱུད་ཐ་དད་པའི་གདུལ་བྱ་ལ་མི་བྱེད་ཀྱི་སྟོང་གཟུགས་ལྷུན་གྲུབ་ཀྱི་སྣང་ཆར་འགྲོ་དྲུག་རྨི་ལམ་ལྟར་འཆར་བ་ལ་བཞག་པར་གསུངས་ཏེ། རྒྱས་པར་ཐེག་མཆོག་མཛོད་ཀྱི་བར་དོའི་རིམ་ཁང་ན་གསལ་ལགས། དགུ་པར། སེམས་ཅན་སུམ་སྟོང་ལ་རིག་པ་བཅུག་པས་གྲོལ་ཞེས་པ་འདི་བར་སྲིད་དང་རང་བཞིན་བར་དོའི་སེམས་ཅན་གང་ལགས། རྫོགས་ཆེན་ལ་སྦྱང་བ་ཡོད་མེད་ཐམས་ཅད་ལགས་སམ། གྲངས་སུམ་སྟོང་འདི་ལ་གབ་སྦས་ཡོད་དམ་མེད་ཅེས་པར། དབང་གཉིས་ཀྱི་འཇུག་པ་ལ་དབང་ཐོབ་པའི་སྐབས་སུ་སེམས་ཅན་སུམ་སྟོང་རིག་པ་གཏད་པས་གྲོལ་བར་མཛད་ཅེས་གསུངས་པ་འདིའི་ཐད་ནས་དྲིས་པར་སྣང་སྟེ། དེ་ནི་ཁ་ཅིག་ཏུ་བར་དོའི་སེམས་ཅན་ཞེས་བཤད་པ་རང་བཞིན་བར་དོ་ལ་དགོངས་ཞེས་ག་ཤེད་གསུངས་ཡོད་སྣང་ཤར། དེ་དག་རྫོགས་ཆེན་ལ་སྦྱངས་པའི་སེམས་ཅན་ཡིན་མིན་མི་གསལ་ཡང་སྔོན་གྱི་འབྲེལ་བ་ཡོད་པ་རེ་དགོས་སམ་སྙམ། སུམ་སྟོང་གི་གྲངས་ལ་གབ་དོན་མེད་པ་འདྲ། འདི་རིགས་གཞུང་ནས་གསུངས་པ་དེ་ཀའི་རྗེས་སུ་འབྲངས་པ་མ་གཏོགས་གྲངས་དེ་ལྟར་ངེས་པའི་རྒྱུ་
མཚན་སོགས་བཤད་མི་ནུས་པ་འདྲ་སྟེ། རྒྱལ་སྲས་ས་དང་པོ་པའི་ཡོན་ཏན་བརྒྱ་ཕྲག་བཅུ་གཉིས་འཐོབ་པར་གསུངས་པ་སོགས་ཀྱང་ཚུལ་དེ་འདྲ་རེད་ལགས། བཅུ་པར། བར་དོར་གནད་གསུམ་གྱིས་གྲོལ་བ་རྣམས་ལ་ཐིམ་ལུགས་བརྒྱད་ཀྱིས་ཅིག་ཆར་དུ་ཐིམ་པ་དང༌། ངོ་མ་ཤེས་ནས་འཁྲུལ་པ་ལ་ཐིམ་ལུགས་བརྒྱད་ཀས་ནང་དབྱིངས་སུ་གཞི་སྣང་ཐིམ་རུང་འཁོར་བ་ལྟར་ཐིམ་པ་ལ་བག་ཆགས་གོམས་ཤུགས་ཆེ་བས་འཁྲུལ་པ་ལགས་སམ་ཞེས་པར། གཞི་སྣང་གྲོལ་སྟོབས་ཀྱིས་ཐིམ་པ་དང་འཁྲུལ་སྟོབས་ཀྱིས་ཐིམ་པ་གཉིས་ལས་ཕྱི་མའི་སྐབས་འདིར་སེམས་ཅན་ཐ་མལ་པ་རྣམས་ལ་ཆོས་ཉིད་བར་དོའི་གཞི་སྣང་སྐར་མདའ་རྒྱུག་པའི་ཡུན་ཙམ་ལས་མི་འཆར་ཞིང་ཤར་བ་དང་ཐིམ་པ་གཉིས་ཀ་ངོས་མི་ཟིན་མོད། འོན་ཀྱང་ཐོག་མེད་ནས་བག་ཆགས་གོམས་ཤུགས་ཀྱིས་མ་དག་འཁོར་བའི་སྒོ་ལྟར་ཤར་བའི་ལག་རྗེས་སྟོབས་སུ་གྱུར་ནས་བར་དོ་དང་སྐྱེ་བའི་འཁོར་བ་མཆེད་པ་ནི་ལོས་ཡིན་སྙམ། བཅུ་གཅིག་པར། ཡེ་ཤེས་བཞི་སྦྱོར་སྐབས་ཡེ་ཤེས་གསུམ་པོའི་ལམ་སྣང་ལ་གྲོལ་བ་དེ་ཕྲིན་ལས་རྩལ་མ་རྫོགས་པས་ཡོན་ཏན་ལ་མཆོག་དམན་འབྱུང་ངམ། ཡེ་ཤེས་ལྷུན་གྲུབ་རིན་པོ་ཆེའི་སྦུབས་ལ་ཐིམ་པའི་ལམ་སྣང་ལ་ཕྲིན་ལས་ཀྱི་རྩལ་རྫོགས་པ་ཨེ་ཡིན་གསུངས་པར། ཆོས་དབྱིངས་མེ་ལོང་མཉམ་ཉིད་སོར་རྟོག་སྟེ་ཡེ་
ཤེས་བཞི་སྦྱོར་གྱི་སྣང་བ་ཞེས་ཟེར་དགོས་པས་ཡེ་ཤེས་གསུམ་ཞེས་པ་ནི་ཡི་གེ་ཅུང་མ་དག །བྱ་གྲུབ་ཡེ་ཤེས་ཀྱི་རྩལ་རྫོགས་པ་ནི་ཀ་དག་ཏུ་གྲོལ་དུས་ཁོ་ན་ཡིན་པར་གསུངས་ཏེ། དེའི་དུས་སུ་རྩལ་རྫོགས་ཟིན་པས་ཡོན་ཏན་ལ་མཆོག་དམན་འབྱུང་དོན་མ་མཆིས་པ་ལགས། བཅུ་གཉིས་པ། བསམ་གཟུགས་ཀྱི་ཏིང་འཛིན་འགྲུབ་ཕྱིར་ཨ་བཞི་བརྩེགས་སོགས་སྒོམ་པར་གསུངས་པ་འདིའི་སྒོམ་ཚུལ་ཇི་ལྟ་བུ་ཡིན་ཞེས་པར། ཐོད་རྒལ་གྱི་གཟིགས་སྟངས་དང་བསྟུན། འཇམ་རླུང་ཅུང་ཟད་བཟུང་སྟེ་ཨའི་དོན་སྐྱེ་མེད་དང༌། སྐྱེ་མེད་ཅེས་པ་རང་སེམས་ཀྱི་དབྱིངས་གདལ་ཁྱབ་ཆེན་པོར་ཤེས་པའི་ངང་ནས་ནམ་མཁའ་ལ་མིག་གཏད་པའི་སར་ཨ་དམར་པོ་ལྔ་བརྩེགས་བསྒོམས་ནས་རིག་པ་མ་ཡེང་བར་གཏད་པས་དམིགས་མེད་དུ་ཆམ་གྱིས་འགྲོ་བས་དེའི་ངང་ལ་མཉམ་པར་བཞག །ཨ་དཀར་པོ་བཞི་བརྩེགས་སོགས་ལྷག་མ་རྣམས་ལའང་འགྲེ་སྦྱར་བས་འགྲུབ། བཅུ་གསུམ་པ། ཡེ་ཤེས་ཀྱི་འོད་རྩ་ཤེལ་སྦུབས་ཅན་འདི་རྫོགས་ཆེན་ལུགས་ཀྱི་དབུ་མ་མཐར་ཐུག་ལགས་སམ། མིག་གཉིས་ལ་ཟུག་པ་འདི་རྩ་དེ་གཉིས་སུ་གྱེས་པ་ལགས་སམ་སོགས་གསུངས་པར། དེ་ཀ་ལྟར་ཡིན་མཆི་སྙམ་པའི་འལ་འོལ་ཙམ་ལས་དཔེ་ཆ་བལྟ་མ་ཐུབ་པས་ཐེག་མཆོག་མཛོད་གཟིགས་པར་ཞུ། བཅུ་བཞི་པ། འཆི་དུས་སྲོག་རྩ་ནས་ཁྲག་ཐིགས་གསུམ་སྙིང་ཁར་
བརྒྱབ་པས་སེམས་རིག་འབྲེལ་ཐག་ཆད་ནས་རིག་པ་མིག་ནས་ཐོན་ཅེས་པའི་མིག་འདི་དབང་རྟེན་རགས་པ་ལ་བྱེད་དམ་ཞེས་པར། དེ་དབང་རྟེན་རགས་པ་ཙམ་ལ་མི་བྱེད་ཀྱི་དེར་ཟུག་པའི་འོད་རྩ་རྒྱང་ཞགས་ཆུའི་སྒྲོན་མ་ལ་བྱེད་པ་ཡིན་ཏེ། འདིའི་རྟེན་འབྲེལ་གྱིས་ཆོས་ཉིད་བར་དོའི་སྣང་བ་འཆར་བ་ལགས། བཅོ་ལྔ་པ། སྔ་འགྱུར་གྱི་མན་ངག་ལས་རྩ་རོ་མ་དཀར་རྐྱང་མ་དམར་ཞེས་པར། གཡས་གཟུང་བའི་རླབ། གཡོན་འཛིན་པའི་རླབ་ཅེས་སྦྱོར་ཆོག་གམ་གསུངས་པར་ཆོག་པ་འདྲ་སྙམ། བཅུ་དྲུག་པ། ཀློང་སྙིང་བར་དོའི་སྨོན་ལམ་ལས་དམར་ལམ་སྔོན་དུ་འཆར་བར་བཤད་པའི་གནད་ཅི་ལགས་གསུངས་པར། སྐུ་གསུམ་ཞིང་ཁམས་སྦྱོང་བའི་སྨོན་ལམ་ལས་སྣང་བ་གསུམ་གྱི་རྟགས་སྣང་དམར་དཀར་ནག་གསུམ་གྱི་རིམ་པས་སྦྱར་བ་དེ་ལ་དགོངས་པར་མངོན་མོད། བར་དོའི་སྨོན་ལམ་དགོངས་གཅིག་རྒྱ་མཚོ་དང༌། རྩ་རླུང་རིག་འཛིན་འཁྲུལ་འཁོར། རྣམ་མཁྱེན་ཤིང་རྟའི་གོང་འོག་སོགས་ཀུན་ཏུ་དཀར་དམར་ནག་གསུམ་གྱི་རིམ་པ་སྤྱི་འགྲོས་ལྟར་ཀུན་མཁྱེན་ཉིད་ཀྱིས་བཤད་འདུག་པས་སྔ་མའི་དེ་ཡི་གེ་འཁྲུགས་པའི་དཔེ་སྐྱོན་མིན་པའི་ངེས་པའང་མི་འདུག་སྙམ། བཅུ་བདུན་པ། ཐིག་ལེ་སྟོང་སྒྲོན་གྱི་ར་བར་རིག་པ་ལུག་རྒྱུད་ཚུད་ཐབས་ཁྲེགས་ཆོད་ལ་བརྟན་པ་ཐོབ་ནས་རིག་པ་རླུང་སེམས་ཀྱིས་མི་
སྤུར་བ་དང༌། གནད་གསུམ་གཟིགས་སྟངས་སོགས་ཀྱིས་གཅུན་ནས་བརྩོན་འགྲུས་ཀྱིས་སྦྱངས་པ་ལས་གཞན་པའི་མན་ངག་ཅང་ཨེ་བཞུགས་གསུངས་པར། སྟོང་སྒྲོན་གྱི་ཕྱི་རོལ་དུ་ལུ་གུ་རྒྱུད་ཤར་བ་དེ་བལྟ་སྟངས་ཀྱིས་སྟོང་སྒྲོན་དེ་ཀའི་དབུས་སུ་རིམ་གྱིས་ཁྲིད་ནས་དེ་ཉིད་ལས་རིག་པ་གཞན་དུ་མི་གཡོ་བར་མདུང་ཚུགས་སུ་གཏད་དེ་སྒོམ་པ་ཁོ་ན་གནད་ཀྱི་གཙོ་བོ་ཡིན་ལ། ལུས་ངག་གི་གནད་གཅུན་པ་སོགས་དེའི་ཡན་ལག་ཏུ་དགོས་པ་ལགས། བཅོ་བརྒྱད་པ། གཉུག་མའམ་ཐ་མལ་གྱི་ཤེས་པ་ཟེར་བ་འདི་སེམས་ཀྱི་རང་བཞིན་དུས་གསུམ་གྱི་རྟོག་པས་མ་བསླད་པའི་རང་བྱུང་གི་ཡེ་ཤེས་དེ་ལགས་སམ། འོན་ཀྱང་ཐ་མལ་དང་ཤེས་པ་ཟེར་དོན་ཅི་ལགས་གསུངས་པར། གཉུག་སེམས་མཛུ་གུ་བཙུགས་ཕྱག་བྲིས་འདིར་འཁོད་དེ་ཀ་ལྟར་ཡིན་པ་གཞིར་བཅས་ཀྱང་དོན་འདི་ནི་རྣལ་འབྱོར་བླ་མེད་ཀྱི་རྒྱུད་སྡེ་རྒྱ་མཚོའི་བརྗོད་བྱ་འགང་ཆེ་ཤོས་ཡིན་པས་རྒྱ་མཚོ་ལྟར་ཟབ་ཅིང་རྒྱ་ཆེ་བའི་གཏམ་གྱི་གཞིར་ངེས། དེ་ལ་སེམས་ཀྱི་རྡོ་རྗེ་དང་འོད་གསལ་དང་རང་བཞིན་ལྷན་སྐྱེས་སོགས་ཀྱི་ཐ་སྙད་ནི་བླ་མེད་སྤྱི་ལ་གྲགས་ཤིང༌། ཐ་མལ་གྱི་ཤེས་པ་ཞེས་པ་ནི་སྒོས་སུ་རྫོགས་ཆེན་པ་ལ་གྲགས་པར་སྣང༌། དེའང་གསོ་རིག་འགྲེལ་པ་ཟླ་ཟེར་དུ་གླལ་བ་དང་སྦྲིད་པ་སོགས་ཀྱི་ཤུགས་མི་དགག་པ་ལ་སོགས་པའི་ཀུན་སྤྱོད་བཤད་སྐབས། ཐ་མལ་པར་གནས་པ་ལ་
ནད་མི་འབྱུང་བའི་ཕྱིར་ཞེས་རང་བབས་སུ་གནས་པ་ལ་ཐ་མལ་པར་གནས་པའི་ཐ་སྙད་བརྗོད་པ་ལྟར་གཉུག་མའི་རང་འགྲོས་ལ་སྤངས་བླང་དགག་སྒྲུབ་སོགས་ཀྱི་བཟོ་བཅོས་མ་སོང་བའི་རང་བབས་དེ་ལ་ཐ་མལ་པ་ཞེས་བརྗོད་པ་ལགས། རྫོགས་ཆེན་སྐོར་ནས་འདི་མང་དུ་སྨོས་པའི་རྒྱུ་མཚན་ཡང་རྫོགས་རིམ་གཞན་ལྟར་རྩ་རླུང་ཐིག་ལེའི་སེམས་ཀྱིས་གཉུག་སེམས་ལ་བདེ་ཉམས་དང་མི་རྟོག་པའི་ཉམས་སོགས་དབྱུང་ཐབས་མི་འདྲ་བ་མང་པོ་བྱས་ནས་ཡེ་ཤེས་འཆར་ཚུལ་དང་མི་འདྲ་བར་ད་ལྟ་ཀུན་རྟོག་རང་དགའ་མའི་སྟེང་ན་ཡེ་གྲོལ་བསལ་བཞག་ལས་འདས་པའི་རིག་པ་ཟང་ཐལ་རྗེན་པར་བཞུགས་པ་དེ་ཀ་སོར་བཞག་བྱས་ནས་ངོ་སྤྲོད་པ་དང་སྒོམ་པ་ལ་དགོངས་ཏེ། རྩོལ་བྲལ་གྱི་ཐེག་པ་ཞེས་རྒྱ་ཆེར་བསྔགས་པའི་གནད་ཀྱང་འདི་ལ་ཡོད་པ་ལགས། ཤེས་པ་ཟེར་དོན་ནི་དེ་འདྲའི་རིག་པ་དེའི་ངོ་བོ་བེམ་ཆོས་དང་བེམ་སྟོང་སོགས་ཡིན་པ་བཅད་ནས་ཤེས་རིག་གི་ཆར་གྱུར་པ་ཡིན་པར་གོ་ཆེད་ཐ་སྙད་སྦྱར་བ་སྟེ་གོ་སླ། བཅུ་དགུ་པ། མཚན་མེད་རིག་སྟོང་ཟུང་འཇུག་གི་ཉམས་ལེན་སྐྱོང་དུས་རྟོག་པ་ཅི་ཤར་ཡང་ཤར་གྲོལ་རིས་མེད་དང༌། དེ་ཡང་གྲོལ་ལུགས་གསུམ་གང་རུང་ལགས་ཀྱང་འོག་འགྱུ་ཤིན་ཏུ་ཕྲ་མོ་གྲངས་མེད་པ་ཡེང་བ་མི་ཚོར་བ་ཞིག་འབྱུང་འདུག་པ། དེ་ལ་ངང་གནས་ཆོས་ཉིད་རང་བྱུང་གི་དྲན་པའི་རྒྱུན་ཡང་ཡང་བརྟེན་པ་དེ་ཀས་འཁྲུལ་རྟོག་རྒྱ་འབྱམས་
ཆོད་དམ་མི་ཆོད་ཅེས་པར། རིག་ཐོག་ཏུ་མཉམ་པར་བཞག་རྩིས་བྱས་རུང་ཅི་ཞིག་ནས་ཀུན་གཞི་ལུང་མ་བསྟན་གྱིས་མགོ་བསྐོར་ནས་སེམས་གནས་ལྟེང་པོ་ཧད་དེ་བ་དང་ཐོམ་མེ་བའི་ངང་ལ་ལུས་ཏེ་འོག་འགྱུ་ཤར་བ་མི་ཚོར་བ་ཞིག་འབྱུང་བ་ནི་མཉམ་བཞག་རང་ས་མ་ཟིན་པ་ཡིན་པས་ཅི་ཙམ་གོམས་ཡང་འཁྲུལ་རྟོག་གི་བག་ཆགས་བཟློག་མི་ནུས་ལ། དེ་ལྟ་མིན་པར་རྣམ་རྟོག་གི་འཆར་སྒོ་བཟང་ངན་ཐམས་ཅད་ལ་བདག་གཉེར་མི་སྤྲོད་པར་འཆར་གཞིའི་རིག་པ་ཟང་ཐལ་གྱི་ངོ་བོ་ཁོ་ནའི་སྟེང་དུ་རང་ས་བཟུང༌། ཡང་དང་ཡང་དུ་རིག་ཆ་དེ་ཉིད་ཧུར་བཏོན། རྗེན་ལ་ཕྱུངས་ཏེ། ཆིག་ཆོད་དུ་བསྐྱངས་པས་རྟོག་པ་ཕྲ་རགས་ཅི་ཙམ་ཟུར་དུ་ཤར་ཡང་བྱུང་ཚོར་གྱི་རྩིས་གདབ་མི་འབྱུང་བ་ནི་ཡེངས་ནས་མི་ཚོར་བ་མིན་གྱི་རྩལ་གྱི་རྟོག་པས་མི་འཕྲོག་པའམ་མི་གཡེང་ཚུལ་ཡིན་པས་གྲོལ་ལུགས་གསུམ་པ་ཁང་སྟོང་དུ་རྐུན་མ་ཞུགས་པའི་དཔེས་བསྟན་པའང་དེ་ཀ་ཡིན། དེའི་ངང་ལ་ཇི་ལྟར་གོམས་པ་དེ་ལྟར་རྣམ་རྟོག་ཐ་མལ་པའི་རྩལ་ལམ་ཤུགས་ཆད་ཅིང་རྣམ་པར་མི་རྟོག་པའི་རིག་པ་རྩལ་ཇེ་རྫོགས་ལ་སོང་ནས་སྟོང་པའི་དབྱིངས་སུ་རིག་པའི་མདུང་སྐོར་བྱེད་པ་དེ་འབྱུང༌། ཆོས་ཉིད་རང་བྱུང་གི་དྲན་པ་དངོས་ནི་གཉུག་སེམས་རང་གི་ཆར་གྱུར་པའི་ཡེ་བབས་ཀྱི་དྲན་པ་ཁོ་ན་ཡིན་ལ། སྨོས་མ་ཐག་པ་ལྟར་རིག་པ་རྩལ་ཐོག་ན་གནས་དུས་ཡེང་མ་ཡེང་གི་སོ་མཚམས་འཛིན་པའི་ཤེས་རབ་འདྲེན་བྱེད་
ཀྱི་དྲན་པ་དེ་ཡང་ཆོས་ཉིད་ཀྱི་དྲན་པ་རྗེས་མཐུན་ཙམ་དུ་འགྱུར་བར་མངོན་ལགས། ཉི་ཤུ་པ། ཤེས་ཉམས་དང་མཐར་འགྱུར་གྱི་ཉམས་གཉིས་གཅིག་ཡིན་ནམ་མིན། བརྟན་མི་བརྟན་གྱིས་སྣང་ཤེས་ཉམས་སོ་སོར་འབྱེད་པ་ལགས་སམ། དེ་ལྟར་ན་བླ་མེད་རྒྱུད་སྡེ་གཞན་གྱི་སྟོང་གཟུགས་ཀྱང་བརྟན་པ་སྲིད་ན་རྫོགས་ཆེན་གྱི་སྣང་ཉམས་དང་ཁྱད་པར་ཅི་ལགས་ཞེས་གསུངས་པར། ཤེས་ཉམས་དང་སྣང་ཉམས་དང་མཐར་འགྱུར་གྱི་ཉམས་གསུམ་ལས་དང་པོ་ནི་བདེ་གསལ་མི་རྟོག་སོགས། གཉིས་པ་ནི་དབྱིངས་སྒྲོན་རྨ་བྱའི་མདོངས་ལྟ་བུ་དང་སྟོང་སྒྲོན་ཀོ་མོའི་ཆུ་ལ་རྡོ་བོར་བ་ལྟ་བུ་སོགས། གསུམ་པ་ནི་རིག་མདངས་ལས་གཞན་པའི་ཟླ་ཉི་འཇའ་ཚོན་འདྲ་བ་སོགས་རླུང་རྟགས་ཀྱི་སྣང་བ་རྣམས་ཏེ་དེ་རྣམས་གཅིག་ཏུ་འདོད་མི་བཏུབ། རྒྱུད་སྡེ་གཞན་ནས་བཤད་པའི་སྟོང་གཟུགས་དང་རྫོགས་ཆེན་ཐོད་རྒལ་བའི་སྣང་ཉམས་གཉིས་སྟོང་གཟུགས་ཡིན་པ་ཙམ་དུ་འདྲ་ཞིང་གོམས་འདྲིས་སོང་རིམ་བཞིན་གསལ་བརྟན་ཇེ་ཆེར་འགྲོ་བ་ཙམ་དུའང་འདྲ་མོད་ཀྱི་རླུང་གདངས་དང་རིག་གདངས་ཀྱི་ཁྱད་པར་ལས་དྭངས་ཆ། གསལ་ཆ་བརྟན་ཆ་སོགས་ལ་ཕན་ཚུན་མི་འདྲ་བའི་ཁྱད་ཆེ་བར་ཐེག་མཆོག་མཛོད་ལས་གསུངས་ཏེ། བུ་རམ་འོ་མ་ཤ་ཁ་ར་རྣམས་ཀྱི་རོ་མངར་བ་ཙམ་དུ་འདྲ་ཡང་ཕན་ཚུན་ཁྱད་པར་ཆེ་མོད་དེ་དག་གི་ཁྱད་པར་འདི་ལྟ་བུ་ཞེས་
ལྕེས་མྱང་ན་ཤེས་པ་མ་གཏོགས་དབྱངས་ཅན་མས་ཀྱང་བརྗོད་མི་ནུས་ཞེས་སློབ་དཔོན་དཎྜིས་གསུངས་པ་ལྟར་རོ། །ཉེར་གཅིག་པ། སེམས་ཀྱི་གསལ་སྟོང་ཟུང་འཇུག་དང༌། དེ་ལས་བྱུང་བའི་ཉམས་བདེ་གསལ་མི་རྟོག་དང༌། སེམས་ལས་འདས་པའི་རིག་པ་གསལ་སྟོང་ཟུང་འཇུག་དང་དེའི་བདེ་གསལ་མི་རྟོག་གི་ཁྱད་པར་འདིས་རྫོགས་ཆེན་མན་ངག་སྡེ་དང་འོག་མའི་ཁྱད་པར་ཕྱེ་ཟེར་ན་རུང་ངམ་གསུངས་པར། སེམས་གསལ་སྟོང་ཟུང་འཇུག་དང༌། དེའི་ཆར་གྱུར་པའི་བདེ་གསལ་མི་རྟོག་ཙམ་གྱིས་ཕྱི་ནང་ཐུན་མོང་གི་ཞི་གནས་ལས་ཀྱང་འཕགས་མི་ནུས་ལ། རྫོགས་ཆེན་སེམས་ཀློང་མན་ངག་གི་སྡེ་གསུམ་གང་ཡང་སྤྱིར་ཐེག་ཆེན་དེ་ལས་གསང་སྔགས། དེའི་ནང་ནས་རྣལ་འབྱོར་བླ་མེད། དེ་ལས་ཀྱང་རྫོགས་རིམ་གྱི་རྣལ་འབྱོར་ཆེས་ཟབ་པ་ཡིན་པས་དེ་ལྟར་བཞག་མི་རུང་བར་གོ་ལགས། ཉེར་གཉིས་པ། རྫོགས་ཆེན་ལ་གསུམ་དུ་དབྱེ་སྐབས་མ་ཧཱ་ཡོ་ག་སེམས་སྡེ། ཨ་ནུ་ཀློང་སྡེ། ཨ་ཏི་མན་ངག་སྡེ་ཞེས་བཞག་ཨེ་རུང་ཞེས་པར། དེ་ལྟར་བཞག་ཀྱང་འགལ་ཚབ་ཧ་ཅང་ཆེ་བ་མ་མཐོང་རུང་རྒྱུད་འགྲེལ་ཕྱོགས་བཅུ་མུན་སེལ་ལས་གསུངས་པའི་བབས་ལ་བརྟགས་ན་སྒྱུ་འཕྲུལ་གསང་སྙིང་གི་ལམ་རིམ་དང་རྫོགས་ཆེན་ཁྲེགས་ཆོད་དང་ཐོད་རྒལ་དང་གསུམ་པོ་ཨ་ཏིའི་མ་ཧཱ་སོགས་གསུམ་དུ་མཛད་པ་འདྲ་བ་ཅིག་སྣང་སྟེ་འདི་ལ་ད་དུང་ཤིན་ཏུ་བརྟགས་དགོས་པར་
འདུག་ལགས། ཉེར་གསུམ་པ། རྫོགས་ཆེན་སྒོམ་པའི་རྣལ་འབྱོར་པ་བར་དོ་སྔ་མ་གསུམ་གང་རུང་ལ་གྲོལ་ན་དེའི་དུས་ཉིད་དུ་གདོད་མའི་དབྱིངས་སུ་མངོན་པར་བྱང་ཆུབ་པ་དང༌། སྲིད་པ་བར་དོར་གྲོལ་ན་རང་བཞིན་སྤྲུལ་པའི་ཞིང་དུ་སྐྱེས་ནས་གཟོད་འཚང་རྒྱ་བ་ལགས་སམ་ཞེས་པ་ནི་ཇི་ལྟར་ཕྱག་བྲིས་སུ་གནང་བ་དེ་ཁོ་ན་ལྟར་ལགས། ཉེར་བཞི་པ། གསང་བ་སྒྱུ་འཕྲུལ་པའི་ལྷག་པའི་བདེན་གཉིས་དབྱེར་མེད་སྐབས། ཀུན་རྫོབ་ཏུ་ཡང་བདེན་གཉིས་དབྱེར་མེད་པའི་བསམ་སྤྱོད་ཁྱད་པར་ཅན་གྱི་ས་ཟིན་པས་དག་པ་རྡོ་རྗེ་དབྱིངས་ཀྱི་དཀྱིལ་འཁོར་དུ་བལྟ་བ་དང༌། དོན་དམ་དཀོར་བདུན་ཡེ་ནས་ལྷུན་གྱིས་གྲུབ་པའི་བཞུགས་ཚུལ་དེ་ལ་ཐུན་མོང་གི་མཉམ་གཉིས་ལས་ལྷག་པའི་བདེན་གཉིས་དབྱེར་མེད་ཆོས་སྐུ་ཆེན་པོ་ཞེས་གོ་བ་དེ་འདྲ་ཞིག་ཨེ་རེད་ཅེས་བཀའ་སྩལ་བར། དེ་ལོས་ཡིན་ཡང་ལྷག་པ་ཀུན་རྫོབ་བདེན་པ་འདིའི་འཇོག་ལུགས་ཞིབ་ཏུ་སྣང་བ་ལྷར་སྒྲུབ་ཚུལ་གྱི་སྐོར་རྣམས་ལས་རྒྱས་པར་མཁྱེན་དགོས་ཤིང༌། དོན་དམ་དཀོར་བདུན་གྱི་གོ་དོན་རྩ་བ་གཉུག་སེམས་རྒྱས་པར་གཏན་ལ་ཕབ་པ་ལ་རག་ལས་ཀྱང་རྒྱུད་འགྲེལ་རྣམས་ལ་གཟིགས་པས་ཁྱབ་ཀྱི་ཡི་གེ་ཧ་ཅང་མང་བས་འཇིགས་པས་སྤྲོས་པ་བསྐྱུངས་པ་ལགས། དེ་དག་གིས་ནི་ཇི་ལྟར་བཀའ་འདྲི་གནང་བ་རྣམས་ཀྱི་ལེན་ཧ་ལམ་ཙམ་རེ་ཞུས་ཟིན་ཏོ། །སྤྱིར་
དེང་སང་བསྐལ་པ་སྙིགས་མའི་མཐར་སླེབས་ཤིང༌། ཐུབ་པའི་བསྟན་པ་མར་འགྲིབ་པས་སྐྱེ་བོ་རྣམས་དམ་པའི་ཆོས་ལ་མོས་པ་ཆུང་ཞིང༌། ལྷག་པར་ཐེག་མཆོག་རྡོ་རྗེ་རྩེ་མོའི་བཤད་སྒྲུབ་བསོད་ནམས་དང་སྐལ་པས་འཆུན་པ་སྲིད་མཐའ་མ་ཁེགས་ཙམ་དུ་སོང་བའི་དུས་འདིར། འདི་ཙམ་ཞིག་གླེང་བའི་གོ་སྐབས་རྙེད་པའང་སྐལ་པ་བཟང་བར་ཤེས་ནས་བྱིས་པས་མི་རྒན་གྱི་ལད་མོ་ལྟར་བཟླས་པ་མ་གཏོགས་རྡོ་རྗེའི་གནས་ཟབ་མོ་རྣམས་བདག་འདྲ་བས་བཤད་པར་ག་ལ་ནུས། བཀའ་འདྲི་འདི་དག་ལ་བལྟས་ན་དེ་ཀར་རྫོགས་ཆེན་སྙིང་ཐིག་གི་ཕྱོགས་ལ་གཟིགས་རྟོག་མང་དུ་མཛད་ཀྱི་ཡོད་འདྲ་སྙམ་ནས་ཁ་ཙམ་མིན་པར་ཡི་རང་ཆེན་པོ་སྐྱེས་ཤིང་ད་དུང་ཡང༌། སེམས་རིག་རྣམ་འབྱེད་སྤྱིའི་གོ་དོན་དང༌། རིག་པ་བཅར་ཕོག་ཏུ་ངོས་འཛིན་ཚུལ། དེ་ཁོ་ནས་ཤོར་གོལ་ནོར་གསུམ་གྱི་འཕྲང་ཐམས་ཅད་ཆིག་ཆོད་བྱེད་ཚུལ། རིག་པ་རྐྱང་འདེད་བྱས་ནས་གདམས་ངག་གཞན་གྱི་ཤན་མ་ཞུགས་པར་སྐྱོང་ཚུལ། དེ་ལ་མདོ་རྒྱུད་འོག་མ་རྣམས་ནས་བཤད་པའི་ལམ་གྱི་གནད་མཐའ་དག་ཡར་ལྡན་དུ་རྫོགས་ཚུལ། དེར་མ་ཟད་ཐེག་པ་འོག་མ་གང་དང་ཡང་མི་འདྲ་བའི་ཁྱད་པར་འཕགས་ཆོས་ངེས་འདྲོང་རྒྱ་ཆེར་ཡོད་ཚུལ་སོགས་གསལ་ཞིང་རྣོ་ལ་མཐའ་ཆོད་པ་ཀུན་མཁྱེན་ཆོས་ཀྱི་རྒྱལ་པོ་དྲི་མེད་འོད་ཟེར་ཞལ་དངོས་སུ་བཞུགས་པ་དང་འདྲ་བར་
སྟོན་པ་ཆོས་དབྱིངས་མཛོད་འགྲེལ་ལུང་གི་གཏེར་མཛོད་ཡིན་པས་དེ་ཉིད་ལ་ཡང་ཡང་གཟིགས་དགོས། ཡང་ཡང་གཟིགས་ན་ཇེ་ཞིབ་ཇེ་ངེས། ཚིམ་པ་མེད་པར་བལྟ་སྙིང་འདོད་པ་འབྱུང༌། ལན་རེ་ཟུང་གཟིགས་པ་ཙམ་གྱིས་རྩིང་ཧྲོབ་བེ་བ་ལས་མི་འོང༌། དེ་ནས་ཁྲེགས་ཆོད་ཐོད་རྒལ་གཉིས་ཀའི་མཐའ་གཅོད་རྒྱ་ཆེ་ཞིང་འབྱམས་ཀླས་པར་གཏན་ལ་འབེབས་པ་ཐེག་མཆོག་མཛོད་ཡིན་པས་དེ་ཡང་ཡང་གཟིགས་པ་གནད་ཆེ། སེམས་ཉིད་ངལ་གསོའི་འགྲེལ་པ་ཤིང་རྟ་ཆེན་པོ་དང༌། ཡོན་ཏན་མཛོད་རྩ་འགྲེལ་གྱི་སྟེང་ནས་བསྟན་པ་སྤྱིའི་སྒྲོམ་འཚོལ་བའང་མེད་མི་རུང་དུ་གལ་ཆེ་སྙམ་པ་བཅས་མཛེས་ལམ་དུ་མ་སོང་བའི་ནང་བཅར་གྱི་ཞུ་བ་ལགས། ཞེས་འཇམ་དབྱངས་བླ་མ་རྡོ་རྗེ་འཆང་ཆེན་པོའི་བྲན་གྱི་ཐ་ཤལ་དུ་གཏོགས་པ་སྤྲང་རྒན་བསྟན་པའི་ཉི་མས་གསོལ་བ་དགེ་བར་གྱུར་ཅིག། །།
རྣམ་རྟོག་ངོ་ཤེས་པ་དང་རིག་པ་ངོ་ཤེས་པ་གཉིས་ཁ་ཁ་ཁུ་ཁུ་རེད། རྣམ་རྟོག་གི་ངོ་འཚོ་བ་ལ་དགོས་པ་ཅི་ཡང་མེད། འདི་སྒོམ་ཟེར་རྒྱུའི་ངོ་བོ་ངོས་བཟུང་མེད་རུང་གསལ་སྟོང་བརྗོད་མེད་ཀྱི་ངོ་བོ་ཧ་གོ་བཞིན་དེའི་ངང་མ་ཤོར་བར་བསྡད་ན་རེད་ཡོད། དེ་ཡང་རང་ངོ་རང་གི་ཧ་གོ་བ་ཙམ་མ་གཏོགས་གོ་རྒྱུ་དང་གོ་མཁན་གཉིས་ཡོང་ལེ་མ་རེད། རིག་པ་ཧུར་ཕྱུང་ཟེར་བ། བྱིང་རྨུགས་འཕྲོ་རྒོད་ཡོང་ཤོམ་བྱེད་དུས་དེ་ལ་ཕར་སྤང་བླང་མི་བྱེད་པར། རྩ་བ་བརྗོད་མེད་ཀྱི་རིག་པ་རང་ཉིད་གཟེང་བསྟོད་གསལ་ངར་བཏོན་ནས་ཚུར་རང་ས་འཛིན་པ་དེ་ལ་ཟེར། ༈ །འོ་དེ་ཡིན། རྣམ་རྟོག་ངོ་ལ་བལྟ་བ་སོགས་དེ་འདྲའི་རིགས་ཐམས་ཅད་བཟོ་བཅོས་ཤ་སྟག་རེད། །བཟོ་བཅོས་ཐམས་ཅད་དང་བྲལ་བའི་རིག་པ་ཁོ་རང་གཅེར་བུར་ཕུད་དེ་བསྐྱང་བའི་སྐྱོང་བྱེད་ཀྱི་དྲན་པ་ཡང་སྐྱོང་རྒྱུའི་རིག་པ་ཁོ་རང་གི་ཀློང་དུ་ལན་ཚ་ཆུར་ཞུ་བ་ལྟར་ཐིམ་འགྲོ། །དེ་ལྟར་བསྐྱང་ན་ནོར་ས་གཞན་མེད། གེགས་སེལ་བོགས་འདོན་ཐམས་ཅད་བླ་མའི་རྣལ་འབྱོར་ལས་ཟབ་པ་མེད་པས་རང་གི་ལག་གི་ཡིད་བཞིན་ནོར་བུ་ཐང་ལ་མ་འཕེན་ཨང་དགེ༌༈ །རགས་པ་མངོན་ཞེན་དང་ཕྲ་བ་གཤིས་ཤོར་སོགས་ཀྱི་སྐོར་རྣམས་རིག་པ་ལས་གཞན་དུ་གོལ་བའི་སེམས་འཛིན་མཁན་གྱི་སྐད་ཆ་རེད། རིག་ཐོག་ན་དེ་འདྲའི་གོལ་ས་མང་པོ་ཡོད་ན་རིག་པ་ཀུན་ཏུ་བཟང་པོ་ཅི་ལ་ཟེར། དེའི་ཕྱིར་རིག་ངོ་སྐྱོང་དུས་འདི་ལ་མངོན་
ཞེན་ཨེ་ཡིན་གཤིས་ཤོར་གྱི་དོགས་པ་ཨེ་ཡོད་སྙམ་ནས་རེ་དོགས་ཙབ་ཙུབ་མང་པོ་སྤེལ་བ་ནི་ཆུ་དྭངས་པའི་ནང་དུ་ཟླ་གཟུགས་དཀར་ལྷག་གེ་འོང་དུས་ཆུ་དབྱུག་མདོང་གིས་བསྙོག་ནས་ད་ཟླ་བ་ག་རེད་ཟེར་བ་དང་འདྲ་བར་གོ་ལགས། ལུས་རླུང་འཁྲུགས་པ་དང༌། སེམས་ཁ་དྭངས་དུབ་རྣམ་རྟོག་མང་ཉུང་སོགས་སྣ་ཚོགས་འོང་བ་ནི་རིག་ངོ་ཧ་ལམ་ཙམ་མཐོང་ཡང་ཉམས་ལེན་རྩལ་མ་རྫོགས་ཤིང་རིག་ཐོག་ཏུ་བརྟན་པ་མ་ཐོབ་པའི་ལན་པས་རེ་དོགས་བྱེད་གི་མི་འདུག་པར་ག་ལེར་སོས་བརྡལ་ནས་བསྒོམ་ན་རིམ་གྱིས་སྐྱེ་རྒྱུ་རེད། དཔེར་ན་ལྷ་སར་འགྲོ་དུས་ལམ་མ་ནོར་བ་ཞིག་ཤེས་དགོས། དེ་ཤེས་རུང་མགྲོན་པོ་འགྲུལ་པ་གར་མཐོང་གི་རྗེས་སུ་འཁྱམ་གིན་བསྡད་ན་ལྷ་སར་རིག་དུས་ཡོད་རྒྱུ་མ་རེད་པས་རང་ལམ་ནག་དེད་བྱེད་པ་གལ་ཆེ་བ་འདྲ། གདངས་མངོན་གྱུར་གྱི་ཆ། རྣམ་རྟོག་དང་བྲལ་བ་འོད་གསལ་བའི་རྣམ་པ་ཅན་དེ་རིག་པ་ཨེ་རེད་ཟེར་བ་ནི་གཤིས་རང་བབས་བརྗོད་མེད་ཀྱི་ངང་དེ་ལ་བཅོས་བསྒྱུར་གཏན་ནས་མ་ཕོག་ན་ཡིན་འདུག །མཚན་མོ་ཡང་རིག་པ་རང་བབས་སུ་བཞག་བཞིན་དུ་གཉིད་ལོག་ན་རིམ་གྱིས་ཉམས་ལེན་གཉིད་དང་འདྲེས་འགྲོ་རྒྱུ་རེད་ཀྱང་ཉིན་མོའི་རྣལ་འབྱོར་ལ་མ་བརྟན་བར་དུ་དཀའ་བར་སྣང་ངོ༌། །ཐུང་མྱུར་དུ་དགེ་སྦྱོར་གཉིད་རྨི་དང་བསྲེ་ཨེ་ཐུབ་བསམ་ན་ཉིན་པར་གྱི་དུས་སུ་ད་ལྟ་གཉིད་སྐབས་ཡིན་ཅིར་སྣང་ཅི་བྱེད་འདི་ཐམས་ཅད་རྨི་ལམ་དངོས་ཡིན་སྙམ་པའི་དྲན་འཛིན་
ཤུགས་དྲག་རྒྱུན་ཆགས་སུ་བརྟེན་ནས་ཉམས་ལེན་དང་བསྲེ་བ་དང༌། ཉལ་ཁའང་གཉིད་ཀྱི་རིང་ལ་ཉམས་ལེན་སྐྱོང་དགོས་སྙམ་པའི་འཕེན་པ་དྲག་པོ་བཏང་ན་ཟབ་པར་གསུང༌། ཧ་ཤང་གི་ལྟ་བ་དང༌། ཞི་གནས་རྟོག་མེད་དང༌། སེམས་ཧད་པོ་གསུམ་གྱི་ཁྱད་པར་གང་ཡིན་ཟེར་བར། དང་པོ་ནི་ཅི་ཡང་མི་བསམ། ཡིད་ལ་མི་བྱེད་པ་ཁོ་ན་ཟབ་མོའི་ལམ་དུ་འདོད་པ་ཞིག་རེད། གཉིས་པ་ལ་བཤད་རྒྱུ་མང་ཡང་མདོ་རྩ་བྱིང་རྒོད་ཀྱི་སྐྱོན་གཉིས་བཅད་ནས་སེམས་གསལ་དྭངས་ཀྱི་སྟེང་དུ་བརྟན་ཆ་ཐོབ་པ། གསུམ་པ་འདི་ལ་མཆོག་དམན་བར་མ་སྣ་ཚོགས་ཡོད་པས་ཟེར་ཚོད་མེད་དེ་ཐ་ན་སྤྲང་པོ་ཁྱི་མང་གི་རུབ་དུས་ཀྱང་སེམས་ཧད་དེ་བ་དེ་ཨི་མི་འོང་ཧ་ཧ། དེ་ཐམས་ཅད་གློ་བུར་འཁོར་བའི་སེམས་ཁོ་ནའི་སྟེང་ནས་འགྲོ་བ་རེད་མ་གཏོགས་སེམས་རིག་པ་ལ་ཤན་ཕྱེས་ཏེ་རིག་པ་རྐྱང་འདེད་བྱེད་པ་ནི་གཅིག་ཀྱང་ག་ལ་ཡོད། ༈ །རྣམ་རྟོག་ལ་དགག་སྒྲུབ་རྗེས་འབྲང་གང་ཡང་མ་བྱས་པར་སེམས་རང་བབས་སུ་བཞག་པ་འདི་ཡིན་གྱི་ངོས་ཟུང་མེད་ཀྱང་ཡེ་ནས་བཅོས་བསླད་ཀྱི་དྲི་མ་མ་ཞུགས་པའི་སེམས་ཀྱི་རང་གཤིས་རིག་ཆ་སང་ངེ་བ་དེའི་སྟེང་ནས་མ་གཡོས་ན་དེ་གས་ཆོག །དེའི་ཚེ་རྣམ་རྟོག་བདག་མེད་དུ་བསྐྱུར་བ་ལ་སྐྱོན་ཅི་ཡང་མེད། དེ་འདྲའི་རྣམ་རྟོག་ཤར་ཡང་མི་གནོད་པ་ཡིན། བླ་མ་ལ་མོས་གུས་བཅོས་
མིན་ཡོད་རུང་ད་དུང་བླ་མ་ཡང་ཡང་གསལ་བཏབ། ཡང་ཡང་བཀའ་དྲིན་དྲན་ནས་མོས་གུས་ཀྱི་རྒྱུན་གོང་འཕེལ་དུ་སྤེལ་ན་བཟང༌། ཀུན་གཞི་ནི་གློ་བུར་བའི་ཡིད་ཤེས་ཕྲ་མོ་རྣམ་རྟོག་རགས་པ་མ་མཆེད་པའི་གནས་ཆ་ལྟེང་པོ་ཡིན་ལ། རིག་པ་ནི་གློ་བུར་བའི་བསླད་ཆ་ལས་འདས་པའི་རང་བབས་གཤིས་ཀྱི་བཞུགས་ཚུལ་རྗེན་པའི་ངོ་བོ་ཡིན་པས་ཀུན་གཞི་ལས་སད། རྣམ་རྟོག་རགས་པའི་སྟེང་དུ་མ་ཤོར་བའི་བར་དེར་ངོས་འཛིན་དགོས། ༈ །རྣམ་རྟོག་གི་འཕྲོ་བ་ཕྲ་རགས་ངོས་ཟིན་མི་ཟིན་གྱིས་རིག་པ་དང་ཀུན་གཞིའི་ཁྱད་ཕྱེ་མི་ཐུབ། སེམས་རྟོག་མེད་ཀྱི་ངང་ལ་འཕྲོ་ཆ་ཕྲ་རགས་ངོས་ཟིན་པ་ཙམ་སྒོམ་གྱི་མཐིལ་དུ་འཛིན་མཁན་མང་ཡང་དེས་ཀུན་གཞིའི་གཡའ་མི་ཆོད། གནས་ཆ་ལྟེམ་མེ་བ་ལྟ་བུ་དང་གློ་བུར་བའི་གསལ་ཆ་དྭངས་ཆ་སོགས་ཡོད་རུང་རྒྱ་ཆད་ཕྱོགས་ལྷུང་ཅན་གྱི་འཛིན་ཆ་ཐུམ་ཐུམ་འདྲ་བ་དེ་ཀུན་གཞི་དང་ཀུན་གཞིའི་རྣམ་ཤེས་ལས་མི་འདའ། གནས་ཆ་ལྟེང་པོ་ལས་སད། འགྱུ་ཆ་ཕྲ་རགས་སུ་མ་མཆེད་པའི་བར་རང་བབས་ཀྱི་ཤེས་པ་སང་ངེ་བ་འཛིན་ཆ་གང་གིས་ཀྱང་མ་བཅིང་ཞིང་སྟོང་མི་སྟོང་དང་གསལ་མི་གསལ་སོགས་ཀྱི་རྩིས་གདབ་དང་བྲལ་བ། རྟེན་མེད་ཟང་ཐལ་རྗེན་པའི་ངོ་བོ་ཞིག་འཆར་རྒྱུ་དེ་རིག་པ་ཡིན། དེ་ངོས་ཟིན་ཕན་ཆད་རྣམ་རྟོག་ཤར་རམ་གནས་སམ་ཇི་ལྟར་ཡང་གནས་འགྱུའི་རྗེས་མི་དེད་
པར་རྩ་བའི་རིག་པ་ཁོ་རང་རྐྱང་པ་རྗེན་ལ་ཕུད་དེ་སྐྱོང་བ་འདི་སྒོམ་ཆེན་མཆོག་རྣམས་ཀྱི་ལམ་སྲོལ་མ་ནོར་བ་ཡིན། མིག་སོགས་དབང་པོའི་ཡུལ་གང་སྣང་ཡང་དེར་འཛིན་མ་ཞུགས་པ་ཙམ་ཞིག་ཀུན་གཞི་དང་རིག་པ་གཉིས་ཀ་ལ་ཡོད་ཀྱང་ཀུན་གཞི་ལུང་མ་བསྟན་ཁོལ་བུར་ལུས་པ་དང༌། རིག་པ་ཕྱོགས་མེད་རྒྱ་གྲོལ་ཆེན་པོ་གཉིས་གོང་སྨོས་ལྟར་ཆེས་མི་མཚུངས་པ་ལགས། ༈ །རང་གི་སེམས་ས་ལེ་ཧྲིག་གེ་བ་དེའི་སྟེང་དུ་དྲན་པ་བརྟེན་ནས་གྲིམ་ལྷོད་རན་པར་བསྒྲིམས་ཏེ་བསྐྱང་བས་རིམ་གྱིས་སེམས་ཇེ་བརྟན་དུ་འགྲོ་བ་ཞིག་འོང་ཡང་དེ་རྫོགས་ཆེན་མ་རེད། དེ་འདྲའི་སེམས་ས་ལེ་བ་དེ་ལའང༌། ཕྱིའི་ཡུལ་རྐྱེན་དང་ནང་བཞག་ཐབས་སོགས་ཀྱི་རྐྱེན་ལས་དྭངས་ཆ་དང་གསལ་ཆ་ཐོབ་པའི་གློ་བུར་བའི་ཆ་ཞིག་དང༌། དེ་འདྲའི་རྐྱེན་དབང་གིས་བྱུང་བ་མིན་པའི་སེམས་རང་གི་གཉུག་མའི་འདུག་ཚུལ་བཟོ་བཅོས་གང་ཡང་ཕོག་མ་མྱོང་བ་ཞིག་སྟེ། དེ་གཉིས་ཆུ་དང་འོ་མ་འདྲེས་པ་བཞིན་གནས་པས་དེ་ལྟར་རང་བབས་གཉུག་མའི་བཞུགས་ཚུལ་གློ་བུར་བའི་སེམས་ཀྱི་དུག་དང་མ་བྲལ་བར་ཅི་ཙམ་བསྐྱང་ཡང་རྟོགས་པ་མཆོག་ལ་རེག་མི་ནུས། གློ་བུར་བའི་སེམས་ནི་ཁོལ་བུ་པ་དང་བཟོ་བཅོས་དང་དམིགས་གཏད་ཅན། གཉུག་མའི་རིག་ཆ་ནི་གང་གིས་ཀྱང་ཁོལ་བུར་མ་བཅིང་བས་ཕྱོགས་དང་རིས་
སུ་མ་ཆད་ཅིང༌། དམིགས་གཏད་དང་འཛིན་ཞེན་བཅོས་བསྒྱུར་གང་ཡང་མེད་པ། དེ་ལྟར་མེད་ཀྱང་ཅི་ཡང་མི་གོ་མི་ཤེས་པའི་རྨོངས་ཆ་གཏན་ནས་མ་ཞུགས་པ། མཐོ་ཟང་དེ་ཡངས་ཁྲོལ་ལེ་བ་ཞིག་ཡིན། དེ་གཉིས་མི་ནོར་བར་རིག་ཆ་རྐྱང་བ་དེ་སྐྱོང་རྒྱུ་ཡིན། དེའང་རིག་པ་ངོ་ཤེས་ནས་དེ་ལས་གཞན་པའི་གནས་ཆ་འགྱུ་ཆ་གང་གི་ཕྱོགས་སུའང་མ་ཤོར་རིག་ཆ་ཁོ་རང་བཟོ་མེད་དུ་འཇོག་པ་གོམས་པས་གནས་འགྱུ་གཞན་ཆེད་དུ་མ་བཀག་ཀྱང་གར་སོང་ཆ་མེད་ཀྱི་དང་ནས་རིག་པ་གཅེར་བུར་བུད་སོང་བ་ཞིག་འབྱུང་བས་དེ་ལ་རིག་ཆ་རྗེན་པར་བུད་ཟེར་བ་ཡིན། ཤེས་རིག་རང་ཚུགས་མ་ཤོར་ན། །དེ་ལས་ལྷག་པ་གཞན་མི་དགོས། །གསུངས་པའང་དེ་རེད། དེས་ན་ཁྱེད་ཀྱི་ཡི་གེའི་ནང་གི་དོན་གཉིས་པོ་འདིའི་སྔ་མ་དེ་བཟང་བ་འདྲའནག ། ཉམས་རྟོགས་ཨི་སྐྱེ་སྒྲུབ་ཚུགས་ལ་རག་ལས། སྒྲུབ་ཚུགས་ཨི་ཟིན་སྙིང་རུས་ལ་ཐུག་ཏེ་བློ་སྣ་མི་མང་བར་ཞེ་བཅད་གཅིག་གི་སྟེང་དུ་འདུག་ཐུབ་པ་ཞིག་གལ་ཆེ་བས་དེ་ལྟར་རེམ་རེམ་ཐོ་ཐོ་སྤྲུལ་སྐུ་ཚང༌། དང་པོར་འཁྲུལ་ཚུལ། གང་ཚེ་ཐུགས་རྗེའི་རིག་གདངས་རྣམ་པའི་ཡུལ་སོགས། ཞིབ་པར་དཔྱོད་དང་ཀུན་གཞིའི་གཏད་ཞེན་གཟའ་གཏད་དམིགས་གཏད་ཅི་བྱས་ཀྱང་དེ་བདེན་ཞེན་གྱི་རྩ་བའི་གླེང་གཞི་རེད། འདི་ལྟར་གཏད་ཞེན་དེས་ཡུལ་གྱིས་ཤེས་པ་བསླུས་ཤིང་ཁྲིད། ཤེས་
པ་ཡུལ་ཐོག་ཏུ་ཤོར་ནས་ཡུལ་སྣང་གིས་ཤེས་པ་མགོ་རྨོངས། རྨོངས་ནས་བདེན་ཞེན་སྐྱེ། དེས་ཡུལ་སྣང་མཐུ་ཇེ་ཆེར་མཆེད་དེ་ཇེ་རགས་ཇེ་རྒྱས་རེད་ནས་ཁམས་གསུམ་དུ་འཁོར། དེ་ལྟར་ན་གཏད་ཞེན་གྱི་ཆ་རྣམས་ཀུན་གཞིའི་མུན་ཆ་ལས་བྱུང་བས་ཀུན་གཞིའི་སྨག་སང་རིམ་ལྟར་གཏད་ཞེན་ཆགས་ཐོགས་ཀྱི་སྐྱོན་དག་ནས་རིག་པ་ཐོགས་མེད་ཟང་ཐལ་དུ་བུད་ཅིང༌། ཡུལ་སྣང་གི་ཆ་ཐམས་ཅད་སྟོང་གཟུགས་ལྟ་བུའི་བན་མ་བུན་དུ་འཆར། ཀུན་གཞིའི་བསླད་ཆ་མཐའ་དག་སང་ཚེ། ཡུལ་གྱི་སྣང་ཆ་གཏན་ལོག་ཏུ་འགྲོ་སྟེ། བཏགས་གྲོལ་གྱི་ཀུན་བཟང་ཡབ་ཡུམ་གྱི་དགོངས་པ་སོ་སོའི་བཤད་པ་ལྟར་རང་སྣང་དུ་ཤེས་པས་ནད་དབྱིངས་སུ་ཐིམ་པ་རེད། བདེན་སྣང་གི་ཆ་ཐམས་ཅད་གཟའ་གཏད་ཀྱི་སྤྲོས་པའི་རང་མདངས་ཡིན་པས་ཀུན་གཞི་དང་དེ་ལས་བྱུང་བའི་འཛིན་ཞེན་དང་གཟའ་གཏད་ཀྱི་སྤྲོས་པ་ཐམས་ཅད་ནུབ་པའི་ཚུལ་གྱིས་ངོ་བོའི་རིག་དབྱིངས་མངོན་དུ་གྱུར་ཚེ། ཤུན་པ་བཤུས་པས་སྙིང་པོའི་གནས་ཚུལ་རྗེན་ཅེར་གྱིས་མཐོང་བ་ལྟར་ངོ་བོ་ཉིད་མེད་པའི་དབྱིངས་སམ། གཤིས་ཀྱི་བཞུགས་ཚུལ་སྒྲིབ་མེད་དུ་མཐོང་འོང་སྟེ། ལུང་རིགས་ལ་ཅི་ཙམ་སྦྱང་བ་ལས་དེ་ཁྱད་པར་འཕགས། རིག་ཐོག་ཏུ་ཀུན་གཞིའི་སྨག་མུན་སང་ཐབས་ནི་རིག་ཆ་ཧུར་ཕྱུང་སྟེ་སྒོམ་པ་རང་རེད་པས་ཅོག་བཞག་ས་
ལ་ངེས་པ་འདྲོང༌། ཆོས་དབྱིངས་མཛོད་འགྲེལ་ན། རྣལ་འབྱོར་པ་ལ་ཡུལ་སྣང་ཕྱི་རོལ་དུ་མི་འཆར་བར་མེ་ལོང་ལ་གཟུགས་བརྙན་ལྟར་རིག་ཀློང་དུ་ཚུར་འཆར་གསུངས་པའང་སྣང་སེམས་རྒྱང་ཆད་ཀྱི་འཆར་ཚུལ་ཀུན་གཞིའི་གཏད་ཞེན་ལས་བྱུང་བས་གཏད་མེད་རྒྱ་ཡན་གྱི་རིག་པ་རང་འགྲོས་སུ་བཞག་པའི་ལག་རྗེས་རེད། མཁའ་འགྲོ་ཡང་ཏིག་ཏུ་ཁྲེགས་ཆོད་དུས་ཀྱང་བཞག་སྟོབས་ཁོ་ནས་ཡུལ་སྣང་ཐམས་ཅད་རང་སྣང་སྒྱུ་མ་ལྟ་བུར་འཆར་ཏེ་ཤེར་སྒྲོན་གྱི་མཐུ་ཡིན་གསུངས་པའང་ཤེར་སྒྲོན་ནམ་རིག་ཆ་ཧུར་ཐོན་ཚེ་ཡུལ་གྱི་སྣང་ཆ་ཀུན་གཞིའི་མུན་པ་དང་འདྲེས་པ་དེ་སོ་སོར་སོང་ནས་སྣང་བཏགས་ཙམ་གྱི་རང་སྣང་རྐྱང་པར་མཐོང་བའི་དོན་རེད་པས། རིག་པ་ངོ་སྤྲོད་ཀྱི་བླ་མ་ཚད་ལྡན་ཞིག་རྙེད་ན། སྟོང་ཉིད་སྟོན་པའི་བླ་མ་ལོགས་ནས་ཚོལ་མི་དགོས་པར་བཞེད་དེ། མིག་འབྱེད་པའི་སྨན་པ་རྙེད་ན། གཟུགས་སྟོན་མཁན་གཞན་མི་དགོས་པ་ལྟ་བུ། ཞི་གནས་ཐུན་མོང་བ་གྲུབ་དུས་ཀྱང་རྗེས་ཀྱི་ཡུལ་སྣང་བུན་ལོང་དུ་འཆར་བ་ཙམ་ཡོད་ཀྱང༌། དེ་ནི་ཡུལ་སྣང་རང་དབང་བའམ་རང་རྒྱུད་པར་འཁྲུལ་བའི་རྨོངས་ཆའི་བསླད་པ་ལོག་སྟོབས་ཀྱིས། རང་བབས་གཉུག་མའི་རིག་ཆའམ་མཁྱེན་ཆའི་གསལ་སྣང་ཆེར་མཆེད་དེ་ཡུལ་སྣང་གཞི་མེད་རྩ་བྲལ་དུ་མཐོང་བའི་ཕྱོགས་ན་གཏན་མེད་དོ། །དེ་ལྟར་ན་དང་པོའི་གཞི་ཐོག་ནས་གཞི་
སྣང་ཡེ་ཤེས་ཀྱི་རླུང་གིས་རིག་ཆ་སད་རྗེས་སུ། དེ་ཉིད་ལ་ཀུན་གཞིའི་གཡའ་བཅད་དེ་རང་རྩལ་རྫོགས་སུ་བཅུག་ནས་དབྱིངས་ཐོག་ཏུ་བཙན་ས་འཛིན་པ་འདི་ནི་རྫོགས་ཆེན་ཁོ་ནའི་གསང་གཏམ་ཆེན་པོ་སྟེ། ཀུན་བཟང་ཆོས་དྲུག་ཐད། གཞི་ཉིད་འབྲས་བུར་སྨིན་བྱེད་ཤེས་རབ་སྟེ། སོགས་འཁོར་འདས་སམ་འཁྲུལ་གྲོལ་གྱི་གྱེས་མཚམས་བཤད་པས་ཤེས་སོ། །འདི་ལ་གནད་མང་འདུ། ༈ །དེ་ལྟར་བཤད་པ་འདི་དཔྱད་བཟོད་པ་འདྲ་བས་ད་དུང་དེ་ཀ་བཤད་ན། ཆོས་ཉིད་བར་དོའི་སྣང་ཆ་ཤར་དུས་རང་སྣང་དུ་ངོ་ཤེས་ཞེས་པའི་དོན་ནི། སྣང་བ་དེ་མེད་སྣང་སྟོང་གཟུགས་སུ་ངོ་ཤེས་པའི་དོན་རེད། དེ་དུས་ཀྱང་སྣང་བ་དེ་ལ་ཕར་སྤུ་རིས་ཕྱེ་ན་ཡུལ་སྣང་རང་རྒྱུད་པར་སོང་ནས་ཀུན་གཞིའི་འཛིན་ཆ་སླེབ་ཡོད། དེ་ལྟར་མ་ཕྱེ་བར་བཞག་པས་གྲོལ་བའི་དོན་ནི། མེད་སྣང་སྟོང་གཟུགས་དང་ངོ་བོའི་གཤིས་ལ་གྲུབ་མ་མྱོང་བའི་སྣང་བ་གཉིས་གོ་རྒྱུ་གཅིག་རེད་པས་སྔ་མར་མཐོང་བ་དེ་ཕྱི་མར་མཐོང་བའང་རེད་ལ། དེའི་སྟེང་ནས་གཤིས་ལ་གྲུབ་མ་མྱོང་ཞེས་པའི་གཤིས་ངོ་བོ་སྟོང་པའི་དབྱིངས་དེར་རིག་པ་གཏད་དེ་བཞགས་པས་སྣང་བ་དེ་གཤིས་ལ་མ་གྲུབ་པར་རྟོགས་པའི་ཤུགས་ཇེ་ཆེར་འགྲོ། དེ་སོང་བ་ལྟར་སྣང་ཙམ་དེའང་དག་ཐིམ་བསྡུས་ཅི་ཟེར་ཡང་འདྲ་སྟེ་གཤིས་ཐོག་ཏུ་ཚུར་འཁྱིལ་ཡོང་བ་རེད། དེས་ན་རང་སྣང་དུ་མཐོང་ཚུལ་འདི་ཐལ་འགྱུར་བའི་ཐ་སྙད་ཀྱི་འཇོག་མཚམས་ཕྲ་
མོ་དང་ཡང་གཅིག་ངོ་མ་ཡིན་པ་གོ་སླ། དེ་ཐམས་ཅད་ད་ལྟའི་འཁྲུལ་སྣང་རགས་པ་ལའང་ཇི་བཞིན་སྦྱར་དགོས་ཏེ། འདིར་སྣང་དང་སྣང་ཡུལ་ཕྱེད་དགོས། ཡིད་བཞིན་མཛོད་ཀྱི་བཅོ་བརྒྱད་པ་སོགས་ན་ཀུན་རྫོབ་མ་བརྟགས་ཉམས་དགའ་དང༌། རིག་པས་རྟགས་ན་མི་རྙེད་དང༌། གང་སྣང་འདི་དང་པོ་དང་ཐ་མའི་དབྱིངས་ན་མེད་ཀྱང་ད་ལྟ་རྨི་ལམ་ལྟར་སྣང་ཞེས་དང༌། བརྟགས་ན་ངོས་བཟུང་མེད་ཅེས་ཀུན་མཁྱེན་བླ་མས་མང་དུ་གསུངས་པ་ཐམས་ཅད་འདི་ཁོ་ན་ལྟར་རེད་པས་ཐུན་མོང་ལྟར་མ་བྱེད། དེ་ལྟར་གཟུང་འཛིན་འཁྲུལ་བའི་ཡོ་ལང་མཐའ་དག་བཏགས་ཙམ་དང་མེད་སྣང་སྟོང་གཟུགས་རྐྱང་བ་དང༌། ཡེ་སྟོང་རང་སྟོང་དུ་ཀ་ནས་སམ་གདོད་ནས་དག་པར་མཐོང་བ་སྟོབས་སུ་གྱུར་ཏེ། རིག་པ་གཟུང་འཛིན་གྱི་རྒྱས་མ་བཅིང་བའི་རྒྱ་གྲོལ་རང་ཡན་དུ་སོང་བ་ན། གཟུང་འཛིན་བདེན་པར་མེད་པར་འཛིན་པའི་འཛིན་སྟངས་དམ་སྦྲིང་ངེ་བ་ཞིག་མ་བཞག་རུང་རིག་པས་དང་པོའི་རང་མལ་ལམ་གཏན་ཡུལ་རྙེད་པས་དེ་ཁོ་ན་ཉིད་རྟོགས་པའི་རྩལ་མེ་ལྕེ་མཆེད་པ་བཞིན་ཤུགས་ཇཻ་ཆེ་ཇེ་འབར་དུ་འགྲོ་ཡི་ཤུགས་ཞན་དུ་མི་འགྲོ་སྟེ། སེམས་ལམ་བྱེད་ཀྱིས་གནས་ལུགས་སྒོམ་དུས་ཀྱི་སྐད་ཆ། རིག་སྟོང་སྒོམ་པའི་སྟེང་དུ་མ་འཁྱེར་ཅིག །ཚུལ་དེས་གཟུང་འཛིན་གྱི་སྤྲོས་པ་ཞི་བ་ན་ཤུལ་དུ་འོད་གསལ་ཟེར་རྒྱུའི་དམིགས་གཏད་ཀྱི་རྟེན་ནི་ཅུང་ཟད་ཀྱང་མི་འཆར་གྱི། རིག་པ་ནམ་མཁའ་
ལ་མདུང་བསྐོར་བ་བཞིན་དུ་གཏད་མེད་རྒྱ་ཡན་གྱི་ངང་གཅིག་ལ་གནས་སོ། །སེམས་ཅན་འཁོར་བར་འཕྱན་པ་ནི་གློ་བུར་བའི་སྤྲོས་པ་འདི་ལ་བདེན་པར་བཟུང་བས་ཡིན་གྱི། འོད་གསལ་བདེན་པར་བཟུང་ནས་མིན་པས་སྟོང་ཉིད་སྒོམ་དུས་ཀྱང་གློ་བུར་བའི་སྣང་སེམས་ཀྱི་གཞི་རྩ་གཅོད་པ་གཙོ་བོའི་དོན་དུ་བཟུང་ངོ། །འོད་གསལ་བདེན་པར་མེད་ཚུལ་གྱི་སྟེང་ནས་མཉམ་བཞག་གི་འགྲོ་ལུགས་འཚོལ་བ་རྩལ་འདོན་མི་བྱེད་ཀྱི། ད་ལྟ་རང་རེ་རྣམས་ཀྱིས་གང་དུ་བདེན་པར་ཞེན་ནས་ཐག་འཁྲུགས་པ་དང༌། དྲུ་གུ་འཛིང་བ་དང༌། བལ་བ་ཛ་འཛིང་བ་ལྟར་འཁྲུལ་པའི་དྲ་བ་གཅད་དཀའ་དབྱེ་དཀའ་བར་སོང་སྟེ་མགོ་རྨོངས་ཕྱོགས་བསླད་པར་གྱུར་པའི་གཟུང་འཛིན་གྱི་ཆོས་འདི་དག་གཞི་རྩ་གཅོད་པ་རྣམ་གྲོལ་སྒྲུབ་པའི་ལམ་གྱི་ཁོག་དོན་རེད་ཅེས་པའོ། །དེ་ལྟར་བྱས་ཚེ་དོན་གྱི་འོད་གསལ་གཉུག་མའི་བཞུགས་ཚུལ་གློ་བུར་གྱི་སྤྲོས་པས་སྟོང་ཚུལ་སྒོམ་པར་སོང་ཡོད་པས། ཀུན་མཁྱེན་གྱིས་གཞན་སྟོང་སྒོམ་ཚུལ་ལ་བསྔགས་པ་འདྲ་མོ་དང༌། བརྒྱུད་པའི་གསུང་སྒྲོས་ལ། ལྟ་བ་རྟོགས་ཚུལ་ལ་ལྟོས་ཏེ་སྟོང་ཉིད་མེད་དགག་དང༌། སྒོམ་པ་སྐྱོང་ཚུལ་ལ་ལྟོས་ཏེ་མ་ཡིན་དགག་གི་ཕྱོགས་བཙན་པར་བྱ་ཞེས་གསུངས་པ་ཐམས་ཅད་དེ་ལ་དགོངས་པར་སེམས། སྣང་བའི་སྤྲོས་པ་ཐམས་ཅད་ནི་གཤིས་ལ་མ་གྲུབ་པ་དང༌། ངོ་བོ་ཉིད་མེད་པ་གཉིས་ཆར་ཡིན་ལ། གཤེགས་སྙིང་ནི་ངོ་བོ་ཉིད་མེད་པ་ཡིན་ཀྱང༌། གཤིས་ལ་
མ་གྲུབ་པ་མིན་ཏེ། འདི་ནི་དབུ་སེམས་སྐབས་དོན་དམ་འཇོག་ཚུལ་གཉིས་འབྱུང་བ་ལྟ་བུར་གོ །ཆོས་དབྱིངས་མཛོད་འགྲེལ་སོགས་ཐམས་ཅད་ན་ལྟ་བ་དབུ་མ་ཐལ་འགྱུར་པའི་ལུགས་ཁོ་ན་ལ་བསྔགས་ཡོད་པས། དགག་བྱའི་མཚམས་འཛིན་སོགས་ཐལ་འགྱུར་ལུགས་ལྟར་ངེས་པར་དགོས་ཀྱང༌། སྣང་སྟོང་གི་སྤུ་རིས་འབྱེད་པའམ། སྟོང་པ་གུད་དུ་གཅད་པ་ཞེས་སྣང་སྟོང་གི་ལྡོག་ཆ་སོ་སོར་ཕྱེ་སྟེ་མེད་དགག་གི་སྟོང་པ་ཁོ་ན་འཛིན་པ་ནི་རྟོག་པས་སྐྱོང་ཚུལ་གཞིར་བཞག་གི་འགྲོ་ལུགས་ཡིན་ལ། དང་པོ་རྟོག་ངོར་དེ་ལྟར་ཕྱེ་བའི་སྟེང་ནས་བསྒོམས་པ་གོམས་ན། དེ་གསལ་མི་རྟོག་བློ་འབྲས་ཅན། །ཞེས་པ་ལྟར་འོང་བའང་འདོད་མོད་ཀྱི། དང་པོ་ནས་རིག་པ་ལམ་བྱེད་དམ་རིག་པ་རྐྱང་འདེད་བྱེད་པའི་རྫོགས་ཆེན་རང་ལུགས་ལ་རྟོག་པ་ལ་ལས་ཀ་མི་འཆོལ་ཏེ། རྟོག་པ་དེ་སེམས་ཡིན་ལ། འདིར་སེམས་རིག་ཕྱེ་ནས་སྒོམ་པའི་ཕྱིར་རོ། །དངོས་པོ་ལ་རང་ངོས་ནས་གྲུབ་པ་གཅད་རྒྱུ་དགག་རྒྱུ་གཏན་མེད་ཀྱང༌། དགག་བྱ་དེ་བཅད་པའི་མེད་དགག་སྒོམ་པ་ནི་བློ་ངོའི་དགག་སྒྲུབ་ཀྱི་རྣམ་བཞག་ལ་བརྟེན་པ་ཀུན་རྟོག་གཞིར་བཞག་གི་འགྲོ་ལུགས་ཡིན་ལ་ཞེས་སོགས་ཀྱང་དེ་བཞིན་ནོ། ༈ །དབུ་མའི་ལྟ་ཁྲིད་དུས། སྟོང་ཉིད་མེད་དགག་ངེས་པའི་ངེས་ངོར་སྟོང་གཞི་དང་དགག་བྱ་མི་འཆར་ཡང༌། དགག་བྱ་བཅད་ལྡོག་ཙམ་ངེས་པའི་
ངེས་ཤེས་ཀྱི་ཤུགས་རྗེ་ཞན་དུ་འགྲོར་མི་སྟེར་བར་ཡང་ཡང་དཔྱད་པ་ཕྲ་མོའི་ཟུར་གསོས་གཏོང་དགོས། ངེས་ངོ་དེར་རང་བཞིན་བཙལ་བས་མ་རྙེད་པ་ཙམ་ལ་སྟོང་ཉིད་རྙེད་ཟེར་བ་མ་གཏོགས། རྙེད་རྒྱུའི་སྟོང་ཉིད་ཟུར་པ་མེད། དང་པོ་ཟུར་གསོས་འཕྲལ་འཕྲལ་མ་བྱས་ན་མ་ཡིན་དགག་ཏུ་འཆོར་ཉེན་སོགས་ཡོད། གོམས་ནས་མེད་དགག་གི་ངེས་ཤེས་རྐྱང་བའང་ཡུན་འཚམས་པ་རེ་སྐྱོང་ནུས་གསུངས། འདིར་སྣང་སེམས་བྱ་བྱེད་རྒྱུ་འབྲས་སོགས་ཐམས་ཅད་བདེན་རྫུན་ལ་སོང་ན་མེད་པ་གསལ་སྣང་རྐྱང་པ་ཙམ་དུ་རིག་པ་རང་གནས་ཀྱི་ཤེས་རབ་ཟབ་མོའི་འཕྲུལ་གྱིས་ངོ་ཤེས་ཐག་ཆོད་གདེང་འཆོས་ཏེ། སྣང་བ་ལ་བཀྱེད་ནས་མི་ལྟ་བར་གཤིས་ཐོག་ཏུ་བཏུད་ནས་བཞག་པས་རང་སར་དག་དུས་སྣང་ཆ་དངོས་རང་མེད་ཀྱང་དེ་ཐམས་ཅད་གདོད་ནས་སྟོང་པར་རྟོགས་པའི་ཤུགས་ཡར་ལྡན་དུ་ཡོད་ལ། དེ་ལ་ཟུར་གསོས་གང་ཡང་བྱར་མི་རུང༌། མི་དགོས་ཀྱི་རང་བབས་སུ་བསྐྱང་བས་ངང་འབྱམས་ལྷུན་འབྱམས་ཀློང་རྡོལ་དུ་འགྲོ། མདོར་ན་རིག་པས་སྣང་སེམས་མེད་སྣང་སྟོང་གཟུགས་སུ་མཐོང་བའི་ཤུགས་སམ་རྩལ་རྫོགས་ཐོག་ནས་འོད་གསལ་ཅིར་ཡང་མི་རྟོག་པའི་རང་འགྲོས་སྐྱོང་བ་རེད། དེ་ལྟར་བསྐྱང་བས་རྩལ་ཤུགས་དེ་ཇེ་ཞན་ལ་འགྲོ་རྒྱུ་མེད་པར་ཇེ་ཆེར་མཆེད་འོང་ཞིང༌། དེ་མཆེད་པ་ལྟར་མི་རྟོག་པ་ཤུགས་ཆེར་ཡོང་རྒྱུ། དེ་གཉིས་རྟ་ཤིག་
ཕྲུག་འདྲ། ཆར་པ་ཆུ་འདྲ་རེད། ༈ །དེ་ལྟར་མང་པོ་བཤད་ཀྱང༌། དོན་པོ་ནི། སྣང་བ་དང་སྣང་ཡུལ་མ་འཛིང་བ་གཞིར་ཞོག །ཡེ་ཤེས་རང་ངོ་ལ་ཀུན་གཞིའི་བསླད་ཆ་མ་ཞུགས་པས་སྣང་ཆ་གང་ཡང་ཡེ་ཤེས་སམ་རིག་ངོར་སོང་བ་ན་རིག་པ་ཉིད་སྣང་ཆ་དེ་དང་དེར་ཤར་བར་འཆར་གྱི། ཐ་དད་དུ་མི་འཆར། དེའི་སྣང་ཆ་ཐམས་ཅད་རིག་པ་ཉིད་ཀྱིས་ཡིན་བསྡུས་ཀྱང་ཡིན་ཏེ། གཞི་སྣང་དང་པོ་བཞིན་ནོ། །ཀུན་གཞིའི་ལྷད་ཕོག་རིམ་བཞིན་སེམས་ཀྱི་གཡའ་བྱུང་སྟེ་ཡེ་ཤེས་ཀྱི་སྣང་ཆ་དེ་སེམས་ཀྱི་སྣང་བ་རྒྱང་ཆད་གཉིས་སྣང་ཅན་དང་འདྲེས་ནས་གསེར་ལ་དངུལ་ཆུའི་ཟོལ་ཡོད་པ་ལྟ་བུར་འགྱུར་ཡང་ཡེ་ཤེས་དང་དེའི་སྣང་བའི་ཆ་ལ་གོས་མ་མྱོང༌། དེ་ལྟར་སྣང་བ་གང་དང་གང་རིག་ཐོག་ཏུ་སོང་ཡང་སྣང་བ་དེས་རིག་པ་བཏུམ་རྒྱུའམ། གཡོགས་རྒྱུའམ། འགེབ་རྒྱུ་མེད་པར་སྣང་བ་དེ་ཉིད་རིག་པ་རང་དུ་ཧྲིལ་གྱིས་འགྲོ་བ་ནི་རིག་པ་ཡུལ་ལ་མི་ཐོགས་པའི་དོན་ཏེ། རིག་པ་བཟང་ཐལ་ཟེར་དོན་དེ་རེད། དེ་ལྟར་རིག་པ་རང་སྣང་གི་སྣང་བ་ཐམས་ཅད་སྣང་དུས་ཉིད་ནས་ངོ་བོའི་དབྱིངས་ཐོག་ཏུ་གྲུབ་མ་མྱོང་བས་མེད་སྣང་སྟོང་གཟུགས་རྐྱང་པ་ཙམ་ལས་ངོ་བོ་ཉིད་མེད་པར་རིག་པའི་རང་སྟོབས་ཀྱིས་ཐག་ཆོད་པར་འགྱུར་ལ། དེའི་ཚེ་རང་སྣང་ལ་མ་ཞེན་པར་དེ་རྣམས་རང་གི་ངོ་བོས་མ་གྲུབ་པའི་སྟོང་ཉིད་ངོ་ཤེས་པའི་ངང་ནས་
ངོ་བོའི་དབྱིངས་སུ་མཉམ་པར་བཞག་པས་རང་སྣང་རང་བཞིན་མེད་པའི་མེད་དགག་གི་སྟོང་པ་དང༌། སྤྲོས་མཚན་ཀ་ནས་དག་པའི་ངོ་བོའི་དབྱིངས་གཉིས་རོ་གཅིག་པའི་ཚུལ་དུ་འདྲེས་ནས་མཐོང་བ་ནི་ཆོས་དབྱིངས་མཛོད་ཀྱི་ལེའུར་ཆོས་ཉིད་དང་སེམས་ཉིད་ཐ་མི་དད་པར་བཤད་པ་ལྟར་རེད་སྙམ། བཏགས་གྲོལ་གྱི་ཀུན་བཟང་ཡབ་ཡུམ་གྱི་དགོངས་པའང་དེ་ལྟར་རེད། མདོར་ན་རིག་པའི་རང་སྣང་དེ་རིག་པ་རང་གི་ངོ་བོར་ཡང་ཤེས། དེ་རིག་པའི་ངོ་བོར་རིག་པའི་གཤིས་ཐོག་ནས་གྲུབ་མ་མྱོང་བར་ཡང་ཤེས་ཚེ་ཐལ་འགྱུར་ལྟ་བའི་གནད་ཀྱང་འདུ་ཡོང༌། ༈ །རྫོགས་ཆེན་འདིར། གཏད་མེད། འཛིན་མེད། ཞེན་མེད་རྣམས་གཅེས་པར་མཛད། ཐོད་རྒལ་ལུག་རྒྱུད་སོགས་ལ་གཏད་དགོས་པར་ཡང་བཤད་པ་ནི། དཔྱད་སྒོམ་གྱིས་གཏད་མི་རུང་བ་དང༌། འཇོག་སྒོམ་གྱིས་གཏད་ནས་བཞག་པ་ལ་སྐྱོན་མེད་པའི་དོན་ཏེ། དཔྱད་སྒོམ་འཛིན་ཞེན་དུ་སོང་ནས་ཀུན་གཞིའི་སྒྲིབ་ཆ་འདྲེན་པས་ཡིན་ཏེ། ཡེ་ཤེས་བླ་མས། དཔེར་ན་རི་མཐོང་བའི་སྐད་ཅིག་སོགས་གཟུང་འཛིན་གྱི་ཐད་སོགས་ལས་ཤེས། ༈ །ཀུན་རྟོག་ལ་གང་སྣང་རིག་པ་ལའང་སྣང་ཟེར་ཚེ། བེམ་པོའི་ས་རྡོ་སོགས་ཀྱང་རིག་ངོར་སྣང་དགོས། དེ་ལྟར་སྣང་བ་དེ་མ་ཡིན་ལ་དེར་སྣང་བའི་འཁྲུལ་ཆ་མིན་ཟེར་དགོས་ན་རིག་པ་ཉིད་ཡིན་
པར་འཆར་ཟེར་མི་ལོ། ལོ་ན་ས་རྡོ་ཡེ་ཤེས་སུ་ཐལ་ལོ། །ཡེ་ཤེས་ཀྱི་ངོར་ས་རྡོ་བེམ་པོ་མིན། ཀུན་རྟོག་ངོར་བེམ་པོ་རེད་ཟེར་ན། ཁྱད་པར་སྦྱོར་རྒྱུ་སྐྱུར་དང་སྤྱིར་ས་རྡོ་བེམ་པོ་ཡིན་ནམ་ཡེ་ཤེས་ཡིན་ཟེར་ན་ཅི་སྨྲ། ཀུན་རྟོག་ལ་ཐ་མལ་པའི་ས་རྡོ་སྣང༌། ཡེ་ཤེས་ལ་དེའི་རང་སྣང་གི་ས་རྡོ་སྣང་བས་ས་རྡོ་ཐ་དད་རེད་ཟེར་ན། རིག་ངོར་ཚོགས་དྲུག་གི་ཡུལ་དངོས་གཏན་ནས་མེད་དགོས་པས་རང་གཞུང་དང་འགལ་ལོ་སྙམ་ན། འདི་མདུད་ལོག་ཅིག་རེད་ཀྱང༌། གསར་མའི་གཞུང་ན་གང་སྣང་བདེ་བར་འཆར་ཚུལ་ཐད། གང་སྣང་ལམ་གྱི་ངོ་བོར་གྱུར་པའི་བདེ་སྟོང་གི་རྣམ་འཕྲུལ་ཡིན་ནམ་མིན། ཡིན་ན་དམྱལ་བའང་རྣམ་མཁྱེན་དུ་གྱུར་པའི་འོད་གསལ་གྱི་སྤྲུལ་པར་ཡང་འདོད་དགོས་ཐུག་ཡོང༌། མིན་ན་དེ་ལྟར་ཤར་བ་དེ་ཕྱིན་ཅི་ལོག་ཏུ་ཐལ་ལོ་ཟེར་ན་ཅི་སྨྲ། འདི་ལ་གསར་མ་འགས་ཕུང་པོ་ལ་བརྟེན་ནས་གང་ཟག་ཏུ་བཏགས་པ་ལྟ་བུར་བཤད་དེ། གང་སྣང་གི་སྟེང་དུ་བདེ་བའི་རོལ་པར་སྣང་བའི་སྣང་ཆ་རེ་ཕར་བཞག་ཟེར་རམ་དཔྱད། རང་རེས་སེམས་རིག་དེ་གཉིས་སྣང་བ་ཐ་དད། སྣང་ཡུལ་གཅིག་རེད་འདྲ་ཟེར་རམ། དེ་ཟེར་ན་སྣང་ཡུལ་དེ། སྣང་བ་ཐམས་ཅད་རང་སྣང་ཡིན། ཞེས་པའི་སྒོ་ནས་དག་པ་རབ་འབྱམས་སུ་ཇི་ལྟར་སྒྲུབ་སོགས་ཤིན་ཏུ་དཔྱོད། ༈ །ལར་ཀ་དག་ལྷུན་
གྲུབ་འབྲལ་མི་ཤེས། གཙོ་ཆེ་བའི་དབང་དུ་གཞི་དང་གཞི་སྣང་གི་ཟླས་ཕྱེ་བའི་གཞི་དེ་ཀ་དག །གཞི་སྣང་གི་རིག་པ་ལྷུན་གྲུབ། ལྷུན་གྲུབ་ཀྱི་སྦུབས་ལ་གསུམ་སྟེ། དང་པོ་གཞིའི་དུས་ཕྱི་རྒྱ་མ་རལ་བས་ནང་གསལ་སྐབས་ཏེ་གཞི་ལྷུན་གྲུབ་རིན་པོ་ཆེའི་སྦུབས་ཟེར་ཏེ་གཞོན་ནུ་བུམ་སྐུ། ཕྱིར་གསལ་དུས་ལམ་ལྷུན་གྲུབ་སྦུབས། འདི་དུས་ཀྱི་སྣང་བ་རྣམས་ཕྱིར་གསལ་བས་ནང་མ་ཡིན། འོད་གསལ་ལས་ངོ་བོ་གཞན་མིན་པས་ཕྱི་མིན་གསུངས། མཐར་གཞི་སྣང་གྲོལ་སའི་ཀ་དག་ཏུ་ཐིམ་ནས་ནང་གསལ་སྐབས་འབྲས་བུ་ལྷུན་གྲུབ་སྦུབས་སོ། །གཞི་སྣང་གཞི་ལ་ཐིམ་ཚུལ་ལ། །རང་ངོ་ཤེས་ན་གྲོལ་སྟོབས་ཀྱིས་ཐིམ་ལ། །མ་ཤེས་ན་འཁྲུལ་སྟོབས་ཀྱིས་ཐིམ་སྟེ། གང་ཡང་ཡེ་གདངས་ནང་དུ་ལོག་པ་ཞེས་བྱ། ༈ །ཐུགས་རྗེའི་རིག་པ་དཔྱོད་བྱེད་ལྟར་ཤར་བ་རིག་པ་ལ་ལྟོས་པའི་མ་རིག་ཅན་གྱི་ཆ་བཟུང་ཞེས་པ་མ་ངེས་པའི་སྣང་བ་ཆེན་པོར་གནས་ཞེས་དང༌། རིག་གདངས་མ་རིག་པར་ལྡོག་པའི་དུས་ཞེས་སོགས། འདི་རིག་པ་ཉིད་དང་གཞི་མཐུན་རེད་པས་མ་རིག་པ་དངོས་མིན་འདྲ། ༈ །གཤིས་ཀྱི་བཞུགས་ཚུལ་ཡེ་གྲོལ། རྩལ་སྣང་ཐམས་ཅད་རང་ལས་ཤར་ཞིང་རང་སྟེང་དུ་བཞག་སྟོབས་ཀྱི་གཉེན་པོ་མེད་པར་རང་གྲོལ། མཐོང་སར་ཡལ་བའམ་སྐད་ཅིག་དང་པོ་རང་ལ་ངོ་བོ་ཉིད་
མེད་པའི་རིག་དབྱིངས་སུ་སྣང་སེམས་འདྲེས་པས་སྣང་དུས་དེ་ཉིད་དུ་སྟོང་པའི་རང་མདངས་སུ་འཆར་བས་ཅེར་གྲོལ་ཏེ། ཅེར་གྲོལ་ངོ་བོ་མེད་དེ་བདེན་པས་སྟོང༌། །ཞེས་སོ། །རྟག་ཆད་དང་གཅིག་དང་དུ་མའི་མཐའ་ལས་གྲོལ་བས་མཐའ་གྲོལ། ཟང་ཐལ་གྱི་རིག་པ་གཅིག་པུ་རྗེན་ལ་བུད་པས་འཁོར་འདས་ཐམས་ཅད་རྒྱ་གྲོལ་དུ་འགྲོ་བས་གཅིག་གྲོལ་ཏེ་ལྔའོ། ༈ །སྙིང་ཀའི་ཏི་ལ་ཀ་ལས་འོད་ཟེར་སེར་པོ་ཀུན་ནས་བཀྲག་ཆེ་བ་ཟེར་རྣོན་པོའི་རྣམ་པར་འཕྲོས། རང་གི་ཤ་ཁམས་ལ་ཕོག །ཤ་ཁམས་ཀྱི་སྙིགས་མ་སྦྱང༌། འོད་ཟེར་སེར་ལ་འཚེར་བའི་རྣམ་པའི་དྭངས་མ་ཆེན་པོར་གྱུར། དེ་བཞིན་དུ་དཀར་པོས་ཆུ། དམར་པོས་མེ་སོགས་ལ་ཁ་སྒྱུར་བ་གྲོལ་ཏིག་ལས་ཏེ། འདི་ཚེ་ཡུམ་ཛབ་དགོངས་སོགས་ལ་མཁོ། དབྱིངས་སྒྲོན་གྱི་བརྡས་མཚོན་པའི་ནང་དབྱིངས་མཐར་ཐུག་ནི་རྗེས་སྟོང་བཞིའི་མཐའི་སྟོང་པ་ལ་བདེ་སྟོང་གི་སྟོང་པར་བཞེད་པ་དང༌། མི་རྟོག་པའི་ཆ་ལ་ངོ་བོའི་རིག་པར་བྱས་ནས། ངོ་བོ་སྟོང་པའི་དབྱིངས་ནི་ཞེས་པའི་དབྱིངས་ཀུན་འགྲོས་གཅིག་རེད། དབྱིངས་ཀྱི་ར་བར་ལུག་རྒྱུད་འཛུད་དགོས་དོན་ནི་ལུག་རྒྱུད་ཤེས་རབ་བམ་ཐུགས་རྗེའི་རིག་པར་བཤད་པས་རྩལ་གྱི་རིག་པ་ངོ་བོའི་རིག་དབྱིངས་སུ་བཙན་ས་བཟུང་དགོས་པས་རེད། རྩལ་ངོ་བོའི་དབྱིངས་སུ་ཇི་ལྟར་བཙན་ས་འཛིན་པ་དེ་ལྟར་་གཟེར་ཐེབས་པ།
ལུག་རྒྱུད་དབྱིངས་ཀྱི་ར་བར་བརྟན་ཡོང༌། མཐར་ཤེས་རབ་ངོ་བོའི་སྟོང་ཆར་རོ་གཅིག་ཏུ་རྩལ་རྫོགས་ཤིང༌། ངོ་བོའི་དབྱིངས་ཀྱི་སྙིང་པོ་ཤེས་རབ་ཀྱི་བཅུད་དུ་སྨིན་པ་ན་ལུག་རྒྱུད་ལྷ་སྐུར་འཆར་བ་རེད། དོན་དུ་ཤེས་རབ་ངོ་བོའི་དེ་ཉིད་དང་རོ་གཅིག་ཏུ་ཞུགས་ཤིང་འདྲེས་པའམ། ཤེས་རབ་ཀྱི་ངོ་བོའི་དེ་ཉིད་མངོན་དུ་བྱས་པའམ། ངོ་བོའི་དབྱིངས་སྤྲིན་མེད་ཀྱི་ནམ་མཁའ་ལྟར་མངོན་དུ་གྱུར་པའི་རྟགས་སུ་ལྷ་སྐུ་འཆར་བ་སྟེ། འོ་མ་ལས་མར་དཀྲོག་པ་ལྟར་མི་རྟོག་པའི་དྭངས་བཅུད་རིག་ཆར་འདྲིལ་ཞིང་སྨིན་པའོ། །ཉམ་གོང་འཕེལ་དུས་ཤེས་རབ་ཀྱི་སྒྲོན་མེས་གདངས་ཀྱི་རིག་པའམ་རང་བཞིན་གསལ་བའི་ཆ་ལ་རང་ཡིན་གྱི་ཚུལ་གྱིས་གསལ་སྣང་ཆེན་པོས་རང་ས་བཟུང་སྟེ་སྤྱོད་ནུས་ཀྱང༌། དེའི་གཏིང་མཐར་ཐུག་མི་རྟོག་པའི་ངོ་བོའི་དབྱིངས་ཀྱི་ཆ་ལ་དེ་ལྟར་གསལ་སྣང་མ་ཐོབ་པས་རྒྱ་ཆེ་བའི་རིག་པ་ལ་དབང་ཐོབ་ཀྱང༌། ཟབ་མོའི་དབྱིངས་ལ་དབང་མ་ཐོབ་པ་རེད་ལ། ཚད་ཕེབས་དུས་ཤེས་རབ་ཀྱི་སྣང་བས་ངོ་བོའི་དབྱིངས་ལ་རྗེན་ལ་བུད་དེ་རྟོགས་བྱ་རྟོགས་བྱེད་སོ་སོའི་ཚུལ་དུ་མེད་པར་ཤེས་རབ་དེ་ཉིད་ངོ་བོའི་རང་བཞིན་དུ་གྱུར་པའི་རྟགས་སུ་སྐུར་ཤར་བའོ། །འདི་ནི་ཁྲིད་ཡིག་ཆེན་མོར་ཚད་ཕེབས་དུས། སེམས་ཡིད་རྣམ་ཤེས་ནུབ་ནས་ཆོས་དབྱིངས་དྲི་མེད་དུ་རང་གསལ་ཞེས་སོགས་དང་ཡང་ཤིན་ཏུ་འབྱོར། ༈ །རིག་པའི་རང་
ངོ་མཐར་གཏུག་པ་ལ་འགྲོ་བ་རིགས་དྲུག །ལས་ཉོན་སྡུག་བསྔལ། སྐྱེ་ཤི་བར་དོ་སོགས་ཡེ་ནས་མ་གྲུབ་པའི་གནད་ཀྱིས་རིག་ངོ་རྒྱུན་དུ་བལྟས་ན་འགྲོ་བ་དྲུག་དང་སྡུག་བསྔལ་གྱི་བྱེ་བྲག་དང་སྐྱེ་འཆི་སོགས་ཀྱི་སྣང་ཞེན་ཐམས་ཅད་བྱ་ལམ་རྗེས་མེད་དུ་དག་འགྲོ་ཞིང༌། གཉུག་མ་ཀ་དག་གི་རྒྱལ་ས་འཛིན་པར་གསུངས། ༈། ཕྱེད་སྐུར་འཆར་བའི་ཐད་སྐུ་ལྟེ་བ་ཡན་ཆད་འཆར་བ་སྟེ། རྒྱུ་དོན་དམ་དྭངས་མའི་འབྱུང་བ་བཞི། རྐྱེན་ཡེ་ཤེས་ལམ་བྱེད་ཀྱིས་ཉམས་སུ་བླང་བས་འབྲས་བུ་དོན་དམ་གྱི་སྐུར་སྨིན་ལ། རྒྱུ་ཀུན་རྫོབ་སྙིགས་མའི་འབྱུང་བཞི། རྐྱེན་སྐྱེ་བ་བཞིས་བསྐྱེད་དེ་རགས་ལུས་སུ་སྨིན་ཏེ། སྐུ་སྔ་མ་ནི་རིག་པས་བཟུང་བའི་འོད་ལུས་ཆུ་ཟླ་ལྟ་བུ། ལུས་ཕྱི་མ་ནི་འཁྲུལ་བས་བཟུང་བ་སྙིགས་མའི་ལུས་སོ། །དེ་ལ་ཐོད་རྒལ་ཉམས་ལེན་གྱི་སྟོབས་ཀྱིས་སྙིགས་མའི་ནུས་པ་ཕྱེད་བསྐུམ། དྭངས་མའི་རང་རྩལ་ཕྱེད་རྫོགས་དུས་དེའི་རྟགས་སྣང་ཕྱེད་སྐུར་འཆར་བ་སྟེ། གྲོལ་ཐིག་གི་དགོངས་པའོ། །དོན་དམ་དྭངས་མའི་འབྱུང་བ་ནི་མི་ཤིགས་པའི་རླུང་ཐིག་སོགས་ཏེ། དྭངས་མ་ལྔ་འདུས་ཞེས་བྱ་ལ། རྫོགས་ཆེན་རང་སྐད་ལ། ད་དུང་ཐེག་མཛོད་འབྱུང་ལེ་དང༌། དགོངས་འདུས་ན་དུ་མ་ལྟོས་དང་ཡོད། །དེ་འདྲའི་དྭངས་མའི་གནད་དེ་ཐོད་རྒལ་ཉམས་ལེན་གྱིས་བསྐུལ་ནས་སད་པར་བྱས་ཏེ། འབྱུང་བ་དྭངས་སྙིགས་ཕྱེད།
དྭངས་མའི་སྟོབས་འཕེལ། དྭངས་མས་སྙིགས་མ་ཟིལ་གྱིས་མནན། སྙིགས་མའི་ནུས་པ་བསྐུམ། དྭངས་མའི་ཡོན་ཏན་མཐའ་ནས་རྒྱས་ཤིང་ཀློང་དུ་གྱུར་ནས་དབྱིངས་སུ་བརྟན་པ་ནི་འཆི་མེད་འཕོ་ཆེན་སྒྲུབ་པའི་ཟབ་གནད་རེད། དྭངས་མའི་སྣང་ཆ་ལྷུན་གྲུབ་དག་པའི་འོད་ཐིག་རིག་སྐུ་རེད། སྙིགས་མའི་སྣང་ཆ་འཁྲུལ་སྣང་རགས་པ་རེད། དྭངས་མ་ཚད་ལ་ཕེབས་དུས་འཁྲུལ་བའི་སྣང་བ་རང་འགག་ལ་འགྲོ། དྭངས་མའི་ནུས་པ་ཚད་ལ་ཕེབས་པ་དང༌། དྭངས་མའི་རྟགས་སྣང་ཚད་ལ་ཕེབས་པ་ལ་རིག་པ་ཚད་ཕེབས་ཟེར། ལར་རིག་པ་ལུ་གུ་རྒྱུད་བཅུད་དུ་སྨིན་པའི་ཚད་ནི་ལྷ་སྐུར་ཤར་བ་ཡིན་ལ། དེའང་རིག་པ་སྐུ་གསུམ་དུ་རྩལ་རྫོགས་པའམ། སྐུ་གསུམ་ལམ་སྣང་དུ་རྫོགས་པའི་ཚད་དོ། །དེ་མཚན་ཉིད་ཡོངས་སུ་རྫོགས་པ་དབང་དུ་བྱས་ནས་ཡབ་ཡུམ་ཟུང་འབྲེལ་ནས་འཇོག །རིག་པ་ལྷར་ཚད་ལ་ཕེབས་པའི་ཚད་ཕེབས་ཙམ་པོ་བའི་དབང་དུ་སྐུ་ཕྱེད་པ་དང༌། དབུ་ཉུག་ཙམ་སོགས་ཀྱང་དེར་འཇོག །སྔ་མ་ལྟར་ན་སྐུ་རྐྱང་ཤར་བའི་སྐོར་ཉམས་གོང་འཕེལ་ཁྱད་པར་བར་འཇོག་དགོས། འདི་ལྟར་བྱས་ནས་ཚད་ཕེབས་ཙམ་པོ་བ་དང༌། གོང་འཕེལ་ཁྱད་པར་བ་མི་འགལ་བྱས་ན་སློབ་དཔོན་རྣམ་གཉིས་དགོངས་པ་གཅིག་ཏུ་བཤད་ཐུབ། འདི་དུས་ཕྱི་ས་རྡོ་རི་བྲག་གི་འཁྲུལ་བའི་སྣང་བ་འོད་ལྔར་དེངས་པར་
གསུངས་པ། སྣང་ཡུལ་ས་རྡོ་སོགས་འོད་ལྔར་དེངས་ཟེར་བ་མིན་པས་ཕྱེད་དགོས། ལར་ཀུན་མཁྱེན་གྱིས་སྣང་བ་དང་སྣང་ཡུལ་མི་གཅིག །སྒོས་ཀྱི་སྣང་བ་སྦུབས་འཕོ་དུས་ལོག་ཀྱང༌། སྤྱི་མཐུན་གྱི་སྣང་ཡུལ་མི་ལྡོག་གསུངས་པ་འདི་ལྟར་ཁས་མ་བླང་ན། བློ་ངོར་མྱུ་གུ་བདེན་གྲུབ་ཏུ་སྣང་བའི་སྣང་ལུགས་དང༌། སྣང་ཡུལ་བདེན་པར་གྲུབ་པའང་གཅིག་ཏུ་ཐལ་ཉེན་ཆེ་བས་གནད་ཆེན་ཡོད། བླ་མེད་སྤྱིའི་འོད་གསལ་འཆར་དུས་ཀྱང་རི་ར་བ་ཁང་ཁྱིམ་སོགས་ཀྱི་སྣང་བ་ནང་དུ་བསྡུས་འགྲོ་ཡང༌། རི་ར་བ་སོགས་ནང་དུ་བསྡུས་འགྲོ་བ་མིན་པས་སྣང་བ་ཐིམ་ཡང་སྣང་ཡུལ་མི་ཐིམ་ཟེར་བ་ལས་མི་འདའ། ༈ །རྫོགས་ཆེན་དང་བསྟུན་ནས་བསྐྱེད་རིམ་ཏིང་འཛིན་རྣམ་གསུམ་སྒོམ་དུས། དེ་ཏིང་ཀ་དག་གཞིའི་སྐབས། ཀུན་སྣང་རང་བཞིན་ལྷུན་གྲུབ་གཞི་སྣང་གི་ཡེ་ཤེས། རྒྱུ་ཏིང་ཀ་དག་ལྷུན་གྲུབ་ཟུང་འཇུག་ཐུགས་རྗེའི་རིག་པ་ཤེས་རབ་ཀྱི་ཆ་ཐོད་རྒལ་བའི་རྡོ་རྗེ་ལུ་གུ་རྒྱུད་དུ་འོང་རྒྱུ་དེ་རེད། དཀྱིལ་འཁོར་ལྷ་བསྐྱེད་ཤེས་རབ་སྐུར་སྨིན་པའི་ཞིང་སྐུ་ཕོ་བྲང་སོགས་ལ་སྦྱོར་སྙམ། ཤེས་རབ་སྐུར་སྨིན་པ་འདི་ལ་སྤྲུལ་སྐུ་ལོངས་སྐུ་གཉིས་ཀ་ཡོད་པས། སྒྱུ་འཕྲུལ་ལྟར་ལྷ་བསྐྱེད་ཀྱི་ལྷ་སོ་དྲུག་ཆོས་སྐུ། དྲུག་སྤྲུལ་སྐུར་བྱས་སྒོམ་པ་ལྟ་བུར་ཡང་སྦྱར་བཏུབ། ༈ །གཞི་དང་གཞི་སྣང་གི་ཟླས་ཕྱེ་བའི་གཞི་ཡིན་ན་ངོ་བོའི་རིག་པས་ཁྱབ། ངོ་བོའི་རིག་པ་ཡིན་ན་
གཞི་དེས་མ་ཁྱབ། གཞི་དེ་ཡིན་ན་གཞི་སྣང་གི་རིག་པ་མིན་པས་ཁྱབ། རྩལ་གྱི་རིག་པ་ཡིན་ན་གཞི་སྣང་གི་རིག་པ་མཚན་ཉིད་ཚང་བ་ཡིན་པས་མ་ཁྱབ་ཀྱང་གཞི་སྣང་གི་རིག་པ་ཙམ་ཡིན་པས་ཁྱབ། གཞི་སྣང་གི་རིག་པ་ལ་རྩལ་གྱི་རིག་པས་ཀྱང་ཁྱབ་བམ་དཔྱད། ད་ལྟ་ཡུལ་ཐོག་ཏུ་འཆར་དུས་ཀྱི་རིག་པ་ལ་ཡང་ངོ་བོའི་ཆ་འབྲལ་མི་ཤེས་པར་ཡོད་ཀྱང་གཙོ་ཆེ་བའི་དབང་གིས་རྩལ་གྱི་རིག་པ་ཡིན་གྱི་ངོ་བོའི་རིག་པར་མི་འཇོག །གཞི་དང་གཞི་སྣང་གི་ཟླས་ཕྱེ་བའི་གཞི་ལ་རྩལ་གྱི་རིག་པ་མིན་པས་ཁྱབ་པ་བཤད་མ་ཐག་པས་ཤེས། རྩལ་གྱི་རིག་པ་ཡིན་ན་ངོ་བོའི་རིག་པ་མིན་པས་མ་ཁྱབ་སྟེ་ཚད་ཕེབས་དུས་གཞི་སྣང་ཡིན་པས་རྩལ་རིག་ཡིན་དགོས་ཤིང་ངོ་བོའི་སྟེང་དུ་བཙན་ས་ཟིན་པ་ཡིན་པས་སོ། །རིག་པ་ཡིན་ན་གཞི་དང་གཞི་སྣང་གི་རིག་པ་གང་རུང་གིས་མ་ཁྱབ་སྟེ་གྲོལ་ས་ལྷུན་གྲུབ་སྦུབས་ཀྱི་རིག་པ་དེ་གཞི་མིན་ལ་གཞི་སྣང་དབྱིངས་སུ་ཐིམ་པའི་རིག་པ་ཡིན་པའི་ཕྱིར། འབྲས་བུའི་ལྷུན་གྲུབ་སྦུབས་འདི་ངོ་བོ་རང་བཞིན་ཐུགས་རྗེ་གསུམ་ཀར་འདོད་དགོས་སམ་སྙམ་པས་རང་བཞིན་གསལ་བ་ལ་གཞི་སྣང་གི་རིག་པས་མ་ཁྱབ། སྐུ་དང་ཞིང་ཁམས་ཀྱི་སྣང་བ་ཅན་གྱི་རིག་པ་ལ་གཞི་སྣང་གི་རིག་པས་མ་ཁྱབ་པའང་དེས་ཤེས། ལམ་དུས་སྙིང་ཀའི་དྷུ་ཏིར་རླུང་བསྡུས་སྟོབས་ཀྱིས་འཆར་བའི་
རིག་པ་ལ་ངོ་བོའི་རིག་པས་ཁྱབ་ཀྱང་ངོ་བོའི་རིག་པ་འཆར་ན་དྷུ་ཏི་ཁོ་ནར་འཆར་དགོས་པས་མ་ཁྱབ་སྟེ། ཚད་ཕེབས་དང་ཆོས་ཟད་དུས་བཞིན་ནོ། །ལར་ནི་འོད་གསལ་ལུས་ཐམས་ཅད་ལ་ཁྱབ་པར་འཆར་བ་དང༌། ཁྱབ་པར་གནས་པ་ཆེས་མི་གཅིག་སྟེ། ད་ལྟའི་གསོན་པོ་ཐ་མལ་པ་ཚོའི་ལུས་ལ་འོད་གསལ་ཁྱབ་པར་གནས་ཀྱང༌། དེར་འོད་གསལ་ཤར་བ་མིན་པའི་ཕྱིར། ༈ །ཐེག་བརྒྱད་བློའི་གྲུབ་མཐའ་ཟེར་བ་མི་རིགས་ཏེ། ཕ་མའི་རྒྱུད་ལ་འོད་གསལ་ལམ་བྱེད་གཙོ་བོར་བྱེད་པའི་ཕྱིར་ན་མ་ཁྱབ། སེམས་ལམ་བྱེད་མེད་པར་ཡེ་ཤེས་ཁོ་ན་ལམ་དུ་བྱེད་མི་ནུས་པའི་དོན་ཡིན་པར་རྣམ་མཁྱེན་ཤིང་རྟར་གསུངས་པའི་ཕྱིར་ཏེ། རྩ་རླུང་ཐིག་ལེའི་སེམས་འཛིན། རིག་མ་བྱིན་རླབས། ཡུལ་སྣང་གི་ཐོག་ཏུ་བདེ་ཆེན་དྲན་པའི་རྒྱས་འདེབས། ལྷའི་ང་རྒྱལ་དང་འོད་ཟེར་སྤྲོ་བསྡུ་བཟླ་དམིགས་སོགས་ཐམས་ཅད་རླུང་སེམས་ལ་ལས་བཅོལ་བ་ཡིན་པས་སོ། །དེ་དག་གི་རྫོགས་རིམ་དུ་རླུང་སེམས་རྩ་ཐིག་ལས་རུང་སྒྲུབ་ཚུལ་ཕུལ་ཕྱིན་ཡོད་ཀྱང༌། རྩ་ཐིག་རླུང་སེམས་དེ་རྣམས་དྷུ་ཏིའི་དབྱིངས་སུ་འདུ་སླ་བ་དུ་མ་རག་པའི་མཉེན་འཇམ་ཡང་གསུམ་ཁྱད་པར་ཅན་དུ་བྱེད་པས་དྷུ་ཏི་ཁོ་ནར་འོད་གསལ་འཆར་ཐབས་སུ་འགྱུར། འདིར་དེ་རྣམས་ལས་རུང་གི་དོན་རྩ་ཐིག་རླུང་གསུམ་སྙིགས་མའི་ཆ་གར་ཡོད་སོ་སོའི་སྟེང་ན་ཡེ་ཤེས་དྭངས་མའི་རླུང་རིག་གི་ཆ་རེ་ཡོད་པ་རྣམས་རྗེན་ལ་བཏོན་ནས་དེའི་
མཐུས་རྩ་རླུང་ཐིག་ལེའི་སྙིགས་རྣམས་དྭངས་མར་གྱུར། དྭངས་མ་རྣམས་ཤིན་ཏུ་དྭངས་མའི་ཁམས་སུ་བསྒྱུར་ནས་རྟེན་རྩ་ཁམས་དྭངས་པ་བཞིན་བརྟེན་པ་རིག་པ་དྭངས་པ་སྟེ། སྔ་མའི་རླུང་ལས་སུ་རུང་ཡང་ལས་རླུང་རང་རེད། ཕྱི་མའི་ལས་རུང་དུས་ཡེ་ཤེས་ཀྱི་རླུང་དུ་སོང་བ་རེད། སྔ་མར་དྷུ་ཏིར་མ་འདུས་བར་དུ་འོད་གསལ་མི་འཆར། དེར་འདུས་ཚེ་འཆར་བ་རེད། ཕྱི་མར་རང་རང་གི་གནས་ན་ཡོད་དུས་འཆར་བས་སྔ་མའི་འོད་གསལ་འཆར་བའི་གནས་ལ་དྷུ་ཏི་དང༌། རྟེན་ལ་དྷུ་ཏིའི་ནང་གི་ཐིག་ལེར་ངེས། ཕྱི་མའི་གནས་སུ་རྩ་གནས་སོགས་ཤེས་པས་གར་ཟིན་འགྱུར། རྟེན་དུའང་ཐིག་ལེ་སོགས་ཤ་ཁྲག་རྐང་ཚིལ་ཐམས་ཅད་འོང༌། དེས་ན་སྔ་མའི་འོད་གསལ་གྱི་མཉམ་བཞག་རེ་འགའ་བ་དང་ཁོལ་བུ་པ་ཡིན་པས་རྩོད་ལྡན་དུས་སུ་ཆོས་ཀྱི་རྒྱལ་པོ་མཐུ་ཆེན་ལྟ་བུའི་མཐུས་བདེ་སྐྱིད་ཀྱི་ཉི་མ་ཁོལ་བུར་ཤར་བ་དང་འདྲ། ཕྱི་མ་དུས་ཐམས་ཅད་པ་ཡིན་ཅིང་ལུས་ཐམས་ཅད་ལ་ཁྱབ་་ཁ་སྦྱོར་ཡན་ལག་བདུན། པས་རྒྱ་ཆེ་བ་ཞེས་པ་ལྟར་ཡིན་པས་རྫོགས་ལྡན་གྱི་ཕུན་ཚོགས་ལྟར་རྒྱ་ཆེ་ལ་མཐའ་བརྟན་པའོ། དེས་ན་རྟག་འགྲུས་གཉིས་ཀྱི་རྟག་ལ་རྒྱུན་ཆགས་པའི་ཁྱད་པར་གྱིས་རྟོགས་པ་འཕགས་ཤིང༌། །འབྲས་བུའི་ཁྱད་པར་གྱིས་འཕགས་ལུགས་ནི་གཞན་གྱི་འོད་གསལ་འཆར་དུས་རྩལ་གྱི་རིག་པའམ་ཤེས་རབ་ཀྱི་ཆ་ཕལ་ཆེར་བསྡུས་
འགྲོ་ཞིང༌། རིག་ཆ་དེ་འོད་གསལ་གྱི་བཞུགས་ཚུལ་གསལ་བར་ངེས་བྱེད་ཐམས་ཅད་ཀྱི་ནང་ནས་དམ་པ་ཡིན་པས་དེ་བསྡུས་སོང་དུས་བདེ་བའི་གཟི་བྱིན་ཆེར་ཆུག་ཀྱང་འདི་ལྟ་བུའི་སྟོབས་མེད་པར་བཞེད། རིག་ཆ་དེས་འོད་གསལ་རང་ཉིད་ངེས་པ་ནི་ཆེས་ཁྱད་པར་དུ་འཕགས་ཏེ། འཕགས་ཚུལ་ཡང་འོད་གསལ་ལ་མངོན་དུ་ཕྱོགས་ཚབས་ཆེ་བའམ་འོད་གསལ་གྱི་བཞུགས་ཚུལ་རིག་པའམ་བཞུགས་ཚུལ་གསལ་བར་རྟོགས་པའི་སྟོབས་ཀྱིས་འོད་གསལ་རང་སྟེང་དུ་ས་ཟིན་ཕུལ་ཆེ་བ་ཡིན་པས་མཉམ་བཞག་གསལ་བརྟན་གཉིས་ཆར་ཁྱད་ཞུགས་སོ། ༈ །ཕ་རྒྱུད་དུ་རླུང་དབང་དུ་བསྡུས་སྟོབས་ཀྱིས་འོད་གསལ་དམར་འབྱིན་བྱེད་པའམ་འོད་གསལ་དབང་དུ་གྱུར་བར་བྱེད་དེ་རླུང་འདུ་ཕུལ་ཅི་ཙམ་ཆེ་བ་ཙམ་དུ་འོད་གསལ་འཐུག་ཅིང་བརྟན་ནོ། །མ་རྒྱུད་དུ་ཐིག་ལེ་ལས་སུ་རུང་སྟོབས་ཀྱིས་འོད་གསལ་གྱི་རྣལ་འབྱོར་དབང་དུ་གྱུར་པར་བྱེད་དེ། འབར་འཛགས་ཅི་ཙམ་སྟོབས་ཆེ་བ་ཙམ་དུ་འོད་གསལ་གཟི་བྱིན་རྒྱས་ནས་འཆར་ཤུགས་ཆེའོ། །རླུང་ཅི་ཙམ་འདུས་པ་དང༌། བདེ་བ་ཅི་ཙམ་འབར་བ་ཙམ་དུ་རྣམ་རྟོག་གཅོད་ཕུལ་ཆེ། འོད་གསལ་དམིགས་རྣམ་གསལ་བར་འབྱིན་ཚབས་ཆེའོ། །གཙོ་བོར་བྱེད་ལུགས་སམ་རྩལ་དུ་འདོན་ཕྱོགས་ཙམ་ལས་གཉིས་ཀར་གཉིས་ཀ་ཡོད་དོ། །འདིར་ནི་འོད་གསལ་ཁོ་རང་གི་སྟེང་ན་ཁོ་རང་གི་བཞུགས་ཚུལ་སལ་ལེར་ངེས་བྱེད་ཀྱི་རིག་
ཆའམ་མཁྱེན་ཆ་ཀུན་རྟོག་གིས་འོད་གསལ་ལ་མགོ་རྨོངས་པའི་ཤན་ནམ་བསླད་ཆ་དང་བྲལ་བ་གསར་རྐྱེན་གྱིས་བསྒྲུབ་པ་མིན་པར་དང་པོ་ནས་ཡོད་པ་དེ་འོད་གསལ་རང་གི་རླུང་གིས་ཕྱིར་བསྐུལ་ནས་སད་པར་བྱས་ཡོད་པ་དེ་མི་བསྡུ་བར་དམར་འབྱིན་བྱས་ནས་རྐྱང་དེད་བཏང་བས། དབྱིངས་དང་ཡེ་ཤེས་ཀྱི་འདུག་ཚུལ་གསལ་བར་མཐོང་བྱེད་ཀྱི་ཤེས་པའི་གནད་མཐར་ཐུག་དེ་ཀ་ཡིན་པའི་གནད་ཀྱིས་འོད་གསལ་གྱི་རྟོགས་པ་ལ་དེས་གཟི་མདངས་བྱུང་སྟེ་ཉི་མ་བྱེ་བ་བརྒྱ་ལྟར་གསལ་དུ་འགྲོའོ། །རླུང་རགས་པ་དབུ་མར་འདུ་བ་དང༌། ཐིག་ལེ་དཀར་དམར་གྱི་འབར་འཛགས་ནི་རེས་འཇོག་ལས་མེད་ཅིང༌། འདི་ནི་འོད་གསལ་ཁོ་རང་གི་རང་འགྲོས་ལ་ཉི་མ་དང་ཟེར་བཞིན་མི་འབྲལ་བར་ཡོད་པས་འདིའི་སྒོ་ནས་གཉུག་སེམས་ལ་གཟི་མདངས་འདོན་ཐུབ་ན་མཉམ་བཞག་གི་འོད་གསལ་བྲི་གང་འཆར་ནུབ་མེད་པར་སྐྱོང་ནུས་སོ། །འདི་ནི་ད་ལྟ་རང་རེའི་སེམས་སྟེང་འདི་ཀར་འོད་གསལ་ངོ་སྤྲད་དེ་སྐྱོང་ཟེར་བ་ཙམ་མིན་པར་འོད་གསལ་གྱི་རིག་ཆའམ་རྩལ་གྱི་རིག་ཆ་དམར་དེད་བྱས་པས་འོད་གསལ་གྱི་གཏིང་ལ་ཇེ་ཟུག་ཏུ་སོང་སྟེ་དྲོད་འཐོབ་ཟེར་བ་རེད་པས་མ་རྒྱུད་སོགས་སུ་རྩ་རླུང་ཐིག་ལེར་གནད་དུ་བསྣུན་ནས་འོད་གསལ་གྱི་རྣལ་འབྱོར་ལ་རྩལ་སྦྱོང་བའི་དོད་དུ། འདིར་འོད་གསལ་གྱི་རིག་ཆ་ཡུལ་ལ་འཆར་འཆར་འདྲ་ཡང་ཡུལ་ཐོག་ཏུ་མི་འདྲེ་བ་དེ་ཧུར་
ཕྱུངས་ཏེ་དེའི་སྟེང་ནས་རྩལ་འབྱོང་བར་བྱེད་པས་འདི་ནི་རྩ་རླུང་སྒོམ་པའི་དོད་ཐུབ་ལྷག་དང་བཅས་པའང་རེད་དོ། །གཞི་ཉིད་འབྲས་བུར་སྨིན་བྱེད་ཤེས་རབ་སྟེ། །ཞེས་སོགས་དང༌། རིག་པའི་ལམ་ནི་ཤེས་རབ་ཁྱད་པར་ཅན། །ཞེས་སོགས་ཡང་ཡང་འབྱུང་བས་ཤེས་ཏེ་ད་དུང་ཡང་དཔྱོད། འདི་པས་རྩ་རླུང་བསྒོམ་ནས་སྲོག་དྷུ་ཏིར་ཞུགས་གནས་ཐིམ་གསུམ་གྱིས་དྲང་བའི་བདེ་ཆེན་སྐྱེས་དུས་ཀྱང༌། དེ་ལ་རིག་ཆ་ཡང་ཡང་བཏོན་ནས་དེ་གཙོ་བོར་སྐྱོང་བར་ཡིད་བཞིན་མཛོད་འགྲེལ་སོགས་ན་ཡོད་སྙམ་ཡང་དེ་བདེ་བས་ཐབས་བྱས་པའི་དཔེའི་ཡེ་ཤེས་ཞེས་བདེ་བས་དྲང་བའི་སྟོང་པ་ཞེས་བདེ་བས་རྟོག་པ་དང་སྣང་གསུམ་གྱི་རླུང་སེམས་བཅད་པའི་ཐམས་ཅད་སྟོང་པ་སྐྱོང་ལུགས་སུ་ཀློང་སྙིང་འཁྲུལ་འཁོར་སྦས་གསལ་དུ་སྣང་བས་ཞིབ་དཔྱོད་དགོས་ཏེ། རིག་ཆ་ཅི་ཙམ་ཐོན་པ་ཙམ་གྱིས་ཐམས་ཅད་སྟོང་པ་ལ་སྲེ་ཐུབ་པ་ཡིན་ནམ་རྡོ་རྗེའི་གནས་ལ་ཧང་འགྲོས་མི་རུང༌། ཐུགས་རྗེའི་རིག་ཆ་དེ་ནི་དང་པོ་གཞི་ལས་གཞི་སྣང་དུ་གཡོ་དུས་ཤེས་རབ་སྲོག་ཏུ་གྱུར་པའི་རླུང་ལྔ་ཞེས་ཤིན་ཏུ་ཕྲ་བའི་རླུང་གིས་འོད་གསལ་གྱི་མཁྱེན་ཆ་ཕྱིར་གསལ་དུ་བསྐུལ་ནས་སད་པ་ཡིན་པས། རླུང་སེམས་རགས་པའི་བྱེད་ལས་ཀྱིས་བསྒྲུབ་པའི་ཡོན་ཏན་ཁོལ་བུ་པ་ཙམ་དང་མི་འདྲ་བར་ཚད་འདི་ཙམ་ཞེས་བྱར་མེད་ཅིང༌། རྒྱ་ཆད་ཕྱོགས་ལྷུང་བྲལ་བ་ཡིན་ཕྱིར་རྒྱ་ཤིན་ཏུ་ཆེ་ལ། རྩ་ཁམས་རགས་པའི་ལག་རྗེས་འོད་གསལ་ལ་ཚུར་བཞག་པའི་
བདེ་ཉམས་སོགས་དང་མི་འདྲ་བར། གཉུག་མ་རང་གཤིས་ཀྱི་མཁྱེན་ཆ་རླུང་འོད་ཟེར་ལྔ་པས་གཏིང་ནས་ཕར་གཡོས་ཏེ་སྤྲོས་པ་ཡིན་ཕྱིར། རྣམ་པར་མི་རྟོག་པའི་དབྱིངས་ལ་གཏུགས་པ་མེད་པར་འཇུག་པའི་ཟབ་ཕྲ་རྣོ་གསུམ་སོགས་ཀྱི་མཐུ་དཔག་པར་དཀའ་བའི་མཐར་ཐུག་གོ །དེའང་ཁ་ཕྱིར་མ་བལྟས་པས་གཟུང་འཛིན་གྱི་རྗེས་སུ་མི་འབྲང་ལ། ཡུལ་སྣང་ཅི་སྣང་ཡང་མིག་ཤེས་ཀྱིས་རི་ཕར་མཐོང་བ་ལྟ་བུའི་རྒྱང་ཆད་ཀྱི་ཚུལ་དུ་མི་འཆར་བར་མེ་ལོང་ལ་གཟུགས་བརྙན་ཚུར་ཤར་བ་ལྟར་རིག་པའི་ཀློང་དུ་ཚུར་མཉམ་བརྡལ་དུ་ཤར་ནས་རང་སྣང་གཞན་དུ་མགོ་རྨོངས་པའི་ནག་ནོག་མ་ཞུགས་པར་རྩ་བའི་དབྱིངས་ཐོག་ཏུ་གསལ་སྣང་བརྟན་པའི་ལྷག་མཐོང་གི་ཏིང་ངེ་འཛིན་སྒྲོན་མེ་རླུང་གིས་མི་གཡོ་བ་ལྟ་བུ་གཞན་ལས་ཕུལ་ཕྱིན་འོང་ལ། དེས་ནང་ཀ་དག་གི་བཞུགས་ཚུལ་ལ་བསམ་གཏན་བྱས་རིམ་བཞིན་བཞུགས་ཚུལ་དེ་གསལ་པོར་འཐོན་པའམ་མངོན་དུ་གྱུར་འོང་བ་སྟེ། དབྱིངས་ལ་གསལ་སྣང་ཐོན་པའི་དོན་ཡང་གསལ་བར་དམིགས་གཏད་ཅན་མིན་གྱི། རིག་པ་རང་གནས་ཀྱི་བསམ་གཏན་འོད་གསལ་གྱི་ངོ་བོ་སྟོང་པ་དམིགས་གཏད་དང་བྲལ་བའི་བརྗོད་མེད་ཟང་ཐལ་དུ་འདྲེས་ཕུལ་ཆེ་བའོ། ཁ་ཕྱིར་ལྟ་ནང་ལྟའི་ཁྱད་ཀྱིས་མ་རིག་པ་དང་རིག་པར་འཇོག་པ་འདི་གཞི་སྣང་དུས་ཐུགས་རྗེའི་རིག་པ་མ་རིག་པར་ལྡོག་པ་དང༌། མ་རིག་པ་རིག་པར་ལྡོག་ནས་
འཁྲུལ་གྲོལ་བྱེད་ལུགས་དང་ཀུན་གཞི་དང་ཆོས་སྐུའི་ཁྱད་སོགས་ཀྱིས་ཤེས་ཤིང༌། ཡུལ་སྣང་རང་རྒྱུད་དུ་བཟུང་ནས་ཕར་ཞེན་ན་ཀུན་རྟོག་ལུ་གུ་རྒྱུད་དུ་འགྲོ་ཞིང༌། གང་སྣང་འོད་གསལ་གྱི་རོལ་པར་བལྟས་ནས་ཁ་ཚུར་བསྐོར་ན་འོད་གསལ་གྱི་ཐོག་ཏུ་ཐོན་ཡོང་བ་ནི་སྔགས་བླ་མེད་སྤྱིའི་ལུགས་སོ། །མདོར་ན་རྩ་བའི་འོད་གསལ་ཐུགས་རྗེའི་རིག་པར་དྲུང་མཆེད་པ་ནི་ཤེས་རབ་རྐྱང་པའང་མིན་པར་ཏིང་ངེ་འཛིན་དང་ཤེས་རབ་མཐར་ཐུག་གཉིས་འབྲལ་མི་ཤེས་པའི་ལྷག་མཐོང་གི་མིག་ཐུན་མོང་མ་ཡིན་པ་ཡིན་ལ། དེའི་གནད་ཀྱིས་དེ་འོད་གསལ་རང་ཉིད་ལ་རྩེ་གཅིག་ཏུ་དམིགས་ནས་སམ་གཏད་ནས་བཞག་པས་འོད་གསལ་གྱི་ངོ་བོ་གསལ་འབར་བཀྲག་གསུམ་དུ་ཇེ་མངོན་ཇེ་ཆེ། འོད་གསལ་གྱི་རྩལ་ཁ་རང་སྣང་རིས་མེད་དུ་རྒྱས་པས་རྒྱ་ཇེ་ཆེ། མཐའ་ཇེ་རྒྱས་ལ་འགྲོ་བས་གདོད་མའི་རྒྱལ་བ་ཡང་དང་ཡང་དུ་སྐུལ་བྱེད་ཀྱི་ལྕགས་ཀྱུ་མཐར་ཐུག་ནི་ཐུགས་རྗེའི་རིག་པ་སྟེ། དད་པས་ཤེས་རྒྱུད་འཁུལ་ཟེར་བ་ལྟར་སྐུལ་བྱ་སྐུལ་བྱེད་ངོ་བོ་ཐ་མི་དད་པའོ། །བླ་མེད་རྒྱུད་གཞན་ལྟར་ན། གང་སྣང་བདེ་སྟོང་དུ་ལྟ་དུས་རྣལ་འབྱོར་པའི་བློ་ཁྱད་ཀྱིས་སྣང་བ་དེ་བདེ་བར་འཆར་ཕུལ་ཆེ་ཆུང་མང་ལ། དེ་འཆར་སྟོབས་ཇི་ལྟར་ཆེ་བ་ལྟར་ཡུལ་སྣང་ཟིལ་གྱིས་ནོན་ཚབས་དང༌། འོད་གསལ་འདྲེན་ཕུལ་ཆེ། རྣལ་འབྱོར་པའི་བློ་ཁྱད་ཅེས་པའང་གང་སྣང་བདེ་སྟོང་གི་རོལ་པར་མཐོང་
བའི་ཤེས་རབ་ཀྱི་རྩལ་འབྱོང་མ་འབྱོང་ལ་བྱེད། དེ་ནི་གློ་བུར་བའི་སེམས་གཞན་ཅིག་གིས་གང་སྣང་ལྷན་སྐྱེས་ཀྱི་རོལ་པར་བཅོས་ཤིང་རྒྱས་བཏབ་ནས་སེམས་རང་ཉིད་ལྷན་སྐྱེས་ཀྱི་ངང་དུ་འགྲོ་བའི་ལམ་སྦྱོང་བ་ཡིན་ལ། འདིར་ནི་གཉུག་སེམས་རང་གི་ཆར་གྱུར་པའི་ཤེས་རབ་ཀྱིས་གཉུག་སེམས་རང་ཉིད་ངོ་ཤེས་མ་ཐག །ངོ་བོ་དང་ཐུགས་རྗེ་གཅིག་གིས་གཅིག་གསལ་བར་རྗེན་ལ་ཕྱུངས་ཏེ། གང་སྣང་ཐམས་ཅད་རང་གི་ཚོས་མདོག་ཏུ་བཅོས་མིན་ཤུགས་འབྱུང་དུ་འཆར་ཞིང༌། དེ་ཇི་ལྟར་ཤར་བ་ལྟར་ཐུགས་རྗེ་ངོ་བོའི་དབྱིངས་སུ་བརྟན་ཚབས་ཆེ་སྟེ། ཡང་ཡང་འོད་གསལ་གྱི་དབྱིངས་སུ་འགྲོ་བའི་ལམ་སྦྱོང་མི་དགོས་པར་རིག་པ་རང་མལ་དུ་རྒྱལ་པོ་གདན་དང་མ་བྲལ་བར་བསྡད་པ་རང་གིས་ཆོག་པས་རྩོལ་མེད་ཀྱི་ཐེག་པ་ཞེས་བྱའོ། ༈ །ཐིག་ལེ་སྟོང་སྒྲོན་ནི་འཆར་བའི་རྣམ་པ་རྩོལ་བྱེད་ཀྱི་རྟེན་ཡིན་ཞེས་པ། འགབ་ན་རྩོལ་བཅས་ཀྱི་དམིགས་རྟེན་ཡིན་ཏེ་རྒྱུད་ལས། རྩོལ་བཅས་རྣམས་ཀྱི་རེ་གནས་འཐོབ། །ཅེས་དྲངས་ནས་བཤད་དེ། ལུག་རྒྱུད་དབྱིངས་ཀྱིར་བར་འཛུད་པ་ལ་ལྟ་སྟངས་དང་རིག་པ་དབྱིངས་སྒྲོན་ལ་གཡོ་མེད་དུ་གཏད་ནས་སྒོམ་དགོས། །དེའང་དབྱིངས་སྒྲོན་གྱི་མཐའ་དབུས་གར་ཡིན་དུ་ངེས་ཤེས་ཏིག་ཏིག་མ་བྱས་པར་གཏད་པ་ཙམ་གྱིས་ལུ་གུ་རྒྱུད་འགུལ་འཕྲིག་དང་འགྲོ་འོང་མེད་པར་བརྟན་པ་ཡོང་མི་ནུས་པས། ས་དཔྱད་
མཁན་ཚོས་ས་བཟང་བས་མི་ཆོག་ས་མིག་ནོན་དགོས་ཟེར་བ་ལྟར། གང་དུ་ལུ་གུ་རྒྱུད་བརྟན་པོར་གཟེར་ལ་ཐེབས་པའི་གནད་དམིགས་དངོས་ནི་ཐིག་ལེ་སྟོང་སྒྲོན་ཡིན་པས་དེའི་ནང་དུ་རྒྱང་ཞགས་གཟིར་དགོས་པ་གནད་ཆེན་པོའོ། །དེའང་ནང་དབྱིངས་བདེ་གཤེགས་སྙིང་པོའི་རང་གདངས་དབྱིངས་སྒྲོན་དང༌། དབྱིངས་ཀྱི་གསལ་ཆ་ཡེ་ཤེས་ཀྱི་གདངས་ཐིག་སྒྲོན་ཡིན་པས་སྟོང་པའི་ཆོས་ཉིད་མ་དང༌། སྣང་བའི་ཆོས་ཉིད་ཕ་ཞེས་རྣམ་མཁྱེན་ཤིང་རྟ་རང་ན་རྩལ་རྫོགས་ཀྱི་ལུང་དོན་བརྡ་འགྲོལ་མཛད་སྐབས་ཡོད་པས་ངོ་བོའི་དབྱིངས་དང་ཐུགས་རྗེའི་རིག་པ་གཉིས་རང་བཞིན་གསལ་བའི་ཡེ་ཤེས་ཀྱི་གཟེར་བུ་བརྒྱབ་ནས་སྦྱར་དགོས་པའི་བརྡ་རེད་དམ་སྙམ། ༈ །ལུག་རྒྱུད་དབྱིངས་སུ་འཛུད་སྐོར་ལ། ནང་དབྱིངས་བདེ་གཤེགས་སྙིང་པོའི་ཀློང་དུ་ལྷག་མཐོང་གི་རིག་པ་བཅུག་སྟེའམ་བཞག་སྟེ་བསྒོམ་ན་ནང་དབྱིངས་དེ་ལ་སྒྲིབ་བྱེད་ཀྱི་ལས་རླུང་དང་རྣམ་རྟོག་རང་སང་ལ་དག་ནས་དབྱིངས་དེ་རྒྱ་ཇེ་ཆེར་མངོན་དུ་འགྱུར་བའི་གནད་ཀྱིས། དེའི་རང་མདངས་སུ་ཡང་དབྱིངས་སྒྲོན་གྱི་ནང་དུ་ལུག་རྒྱུད་བཞག་ནས་བལྟས་པས་དབྱིངས་སྣང་ཇེ་གསལ་དང་རྒྱ་ཇེ་ཆེར་འགྲོ་བ་ཡིན་པས་ལུག་རྒྱུད་ནི་དབྱིངས་སྒྲོན་ཇི་དོར་བྱེད་པའི་ཆུ་དྭངས་ནོར་བུ་ལྟ་བུ་ཡིན་སྣང༌། གཤེགས་སྙིང་ཇི་ལྟར་མངོན་དུ་གྱུར་པ་དེ་ལྟར་ལྷག་མཐོང་གི་རིག་པའང་ནང་དབྱིངས་གཤེགས་སྙིང་དེ་ཉིད་ཀྱི་ཡོན་
ཏན་ཡིན་པས་ཇེ་འཕེལ་ཇེ་བརྟན། ནང་དབྱིངས་སུ་ཇེ་ཞུགས་རེད་ནས་མཐར་ནང་དབྱིངས་རྗེན་ཅེར་དུའམ་མངོན་སུམ་དུ་མངོན་དུ་བྱེད་ལ། དེའི་རྟགས་སུ་ལུག་རྒྱུད་ཀྱིས་དབྱིངས་སྣང་རྒྱ་བསྐྱེད་དུས་དབྱིངས་སྣང་ཅི་ཙམ་འཕེལ་བ་ཙམ་དུ་སླར་ལུ་གུ་རྒྱུད་ཇེ་འཕེལ་ཇེ་རྫོགས་རེད་ནས། མཐར་ངོ་བོའི་རྟགས་སུ་སྐུ་འཆར་ཞེས་པ་དེ་འོང་བ་ཡིན་ནོ། །དབྱིངས་སྒྲོན་གྱི་དབྱེ་བའི་ཐད། གཞིའི་དབྱིངས་ཀྱིས་ཙིཏྟར་སྐུ་དང་ཡེ་ཤེས་འཛིན་ཞེས་པ་ནི་གཤེགས་སྙིང་རྣམ་པར་མི་རྟོག་པའི་དབྱིང་ཀྱིས་ཁམས་སམ་དབྱིངས་སམ་རིགས་ཀྱི་ཚུལ་དུ་བཞུགས་པའི་ཡོན་ཏན་གྱི་ཆ་རྣམས་འཛིན་པ། ལམ་ལ་སྣང་བའི་དབྱིངས་ཀྱིས་འོད་ལྔའི་འཆར་གཞི་བྱེད་ཅེས་པ་ནི་ནང་དབྱིངས་གཞི་ལ་བཞུགས་པའི་བཞུགས་ཚུལ་མཐའ་དག་ལམ་དུས་དང་པོ་ནས་མཐོང་མི་ནུས་ཀྱི། དེའི་ཆ་ཤས་ཅི་རིགས་ཙམ་ནས་རིམ་གྱིས་མཐོང་འོང་བས་རྣལ་འབྱོར་པ་གོང་འོག་ལ་ནང་དབྱིངས་མཐོང་རྒྱ་ཆེ་ཆུང་གི་ཁྱད་ཆེས་ཆེར་ཡོད་ལ། ནང་དབྱིངས་ཅི་ཙམ་ཤར་བའི་ཚད་དུ་འབྲས་བུ་ཡུལ་སྣང་བའི་དབྱིངས་སྒྲོན་གསལ་ཆ་དང་རྒྱ་ཇེ་ཆེར་འོང་བ་སྟེ། མདོར་ན་རྣལ་འབྱོར་པའི་ཉམས་མྱོང་གིས་ངོ་བོའི་བཞུགས་ཚུལ་ཅི་ཙམ་ངེས་པའི་ནང་དབྱིངས་ཀྱི་རྟོགས་པ་དེ་ལ་ལམ་སྣང་གི་དབྱིངས་ཞེས་བྱའོ། །ལུ་གུ་རྒྱུད་ལྷ་སྐུར་སྨིན་པ་དབྱིངས་སྒྲོན་གྱི་མཐུ་ཡིན་ཞེས་པ་དང༌།
དབྱིངས་སྒྲོན་སྟོང་ཁམས་ཁྱབ་པར་མཆེད་པ་ལུག་རྒྱུད་ཀྱི་མཐུ་ཡིན་ཞེས་པ་གཉིས་གོ་བ་ལེན་ཕྱོགས་ཐ་དད་རེད་པས་སྔར་བཤད་དང་འདི་གཉིས་ཀ་ཤེས་དགོས་ཏེ། བྱ་དང་སྒོ་ང་གང་སྔ་དཔྱོད་པ་བཞིན་ནོ། ༈ །ངོ་བོའི་དབྱིངས་ཀྱི་བཞུགས་ཚུལ་རྟོགས་པའི་ཤེས་རབ་ལ་ལྟ་བ་ཟེར་བ་དང༌། ཤེས་རབ་དེ་ཕུལ་ཕྱིན་རིག་པར་གསུངས་པས་ལུགས་འདིར་ཐུན་མིན་གྱི་ལྟ་བ་ནི་ལྷག་མཐོང༌། རིག་པ་ཉིད་ལ་འཇོག་པ་འདྲ་སྟེ་དཔྱོད། ༈ །རིག་པ་ཟང་ཐལ་ཞེས་པ་རིག་ངོ་དེར་ཡུལ་གང་སྣང་ཡང་སྣང་ཆ་དེས་ངོ་བོའི་དབྱིངས་སྒྲིབ་མི་ནུས་པར་སྣང་བ་དེ་ཐལ་བྱུང་དུ་ཕྱུངས་ཏེ་རིག་པ་ངོ་བོའི་དབྱིངས་ཐོག་ཏུ་འགྲོ་བ་དང༌། ཡུལ་ཅན་རྟོག་པ་ཅི་ཤར་ཡང་དེས་རིག་པའི་མིག་འགེབ་མི་ཐུབ་པར་དམིགས་གཏད་ཀྱི་སྤྲོས་པ་ཞིག་པའི་དབྱིངས་སུ་རིག་པ་རང་ཉིད་སྲེ་ཐུབ་པ་སྟེ། ཀུན་གཞི་ལུང་མ་བསྟན་ནི་སྣང་སེམས་ལ་ཐོགས་ནས་ཐུམ་གྱིས་གནས་ཤིང༌། རིག་པ་ནི་དམིགས་གཏད་བྲལ་བའི་དབྱིངས་ལ་རྟེན་མེད་གནས་མེད་དུ་སང་ངེར་རྒྱ་ཡན་ཆེན་པོར་སྤྱོད་དོ། །མདོར་ན་རིག་ཐོག་ཏུ་གནས་དུས་སྣང་སེམས་གང་ཤར་ཐམས་ཅད་དབྱིངས་ལས་མི་གཞན་པར་རྟོགས་ནས་གང་ལའང་མངོན་ཞེན་གྱི་ཐོགས་རྡུགས་མི་འབྱུང་བར་ངོ་བོའི་སྟེང་དུ་ཐལ་གྱིས་སམ་ཐལ་མར་འགྲོ་བ་སྟེ། བཏགས་གྲོལ་གྱི་ཡབ་ཡུམ། གཉིས་མེད་ཀྱི་དགོངས་པ་གསུམ་ཡང་དེ་ལྟར་རེད། དབྱིངས་ཀ་དག་གི་ཆ་ནི་གཞི་སྣང་
མ་ཤར་གོང་གི་གཞི་དང༌། ད་ལྟ་འཁྲུལ་སྐབས་ཀྱི་ངོ་བོའི་དབྱིངས་ཀྱང་ཡིན་མོད། མི་གསལ་བས་ངེས་ཤིན་ཏུ་དཀའ། དེ་ཉིད་རང་བཞིན་གསལ་བའི་ཡེ་ཤེས་ཀྱི་ངོ་བོར་མཆེད་པ་ན་རྟོགས་སླ་བ་ནི་བླ་མེད་གཞན་དུ་བདེ་བའི་སྟོབས་ཀྱིས་འོད་གསལ་དམིགས་རྣམ་ཤིན་ཏུ་གསལ་བར་འབྱིན་པ་དང་འདྲའོ། ཁྲེགས་ཆོད་དུ་གཞི་སྣང་འཁྲུལ་སྟོབས་ཀྱིས་ནང་དུ་ལོག་རྗེས་ཀྱི་དབྱིངས་དེ་རིག་པའི་སྟོབས་ཀྱིས་རྗེན་ཕུད་བྱེད་པ་ཙམ་ལས་གསལ་ཆ་འདོན་ལུགས་འདི་མེད་པས་འདི་རྩལ་འདོན་བྱེད་པ་ནི་ཐོད་རྒལ་གྱི་ཁྱད་ཆོས་ཆེ་ཤོས་རེད། །དེའི་གནད་ཀས་ནང་དབྱིངས་བདེ་གཤེགས་སྙིང་པོ་རྫོགས་པར་མངོན་དུ་བྱེད་པ་ལ་ཐོད་རྒལ་ལམ་མྱུར་རོ། །དབྱིངས་དང་རིག་པའི་གདངས་དབྱིངས་སྣང་དང་ལུག་རྒྱུད་དུ་འཆར་བའི་གནད་ཀྱང་རང་བཞིན་གསལ་བའི་ཡེ་ཤེས་ལ་ཐུག་ཅིང༌། ཡེ་ཤེས་དེའི་རང་གདངས་ཀྱི་སྣང་ཆ་ཐུན་མིན་ནི་ཐིག་སྒྲོན་ཡིན་པས་དབྱིངས་སྒྲོན་དང་ལུག་རྒྱུད་གཉིས་ཀའི་འཆར་བའི་གཞི་ཐིག་ལེའི་སྒྲོན་མ་ཡིན་པར་བཤད་པ་རེད་སྙམ། རྟོགས་བྱ་ནང་དབྱིངས་བདེ་སྙིང་ལྷུན་གྲུབ་ཀྱི་གསལ་མདངས་སུ་མཆེད་པ་དེ་དབྱིངས་དང་ཐིག་ལེའི་སྒྲོན་མ་རོ་གཅིག་པར་སྣང་ཞིང༌། རྟོགས་བྱེད་སྒོམ་པའི་ཤེས་རབ་ལྷག་མཐོང་གི་རིག་པ་དེ་ལུ་གུ་རྒྱུད་དུ་ཤར་བ་རེད་དོ། །ད་དུང་རྣམ་མཁྱེན་ཤིང་རྟར་ལམ་ལ་སྣང་བའི་དབྱིངས་ཀྱིས་
འོད་ལྔའི་འཆར་གཞི་བྱེད་ཅིང༌། རིག་པའི་དྭངས་མ་བསམ་གཏན་གྱི་ཐིག་ལེར་སྡུད། བྱ་བ་ཡོད་པས་དཔྱད་དགོས། ༈ །ཆོས་ཉིད་བར་དོའི་ལྷུན་གྲུབ་ཀྱི་གཞི་སྣང་འཆར་བ་ལ་ནི་ཕུང་ཁམས་རགས་པ་མཐའ་དག་ཐིམ་པའི་གཞིའི་འོད་གསལ་ངེས་པར་སྔོན་དུ་འགྲོ་བས་གཞི་དང་གཞི་སྣང་གི་རིམ་པ་ངེས་ལ། ད་ལྟ་ཐོད་རྒལ་བའི་ལམ་སྣང་འཆར་བ་ལ་ནི་དེ་ལྟར་མི་དགོས་པས་གཞི་སྣང་སྔ་མ་དང་ཕྱི་མ་གཉིས་ལ་སྟོབས་ཆེ་ཆུང་གི་ཁྱད་ཆེས་ཆེ་བས་དཀྱུས་གཅིག་པོ་དེར་ལྷ་སྐུར་རྫོགས་ནས་མཐར་ཕྱིན་པ་སོགས་འོང་མི་འོང་བྱུང་བ་སྟེ། གཞིའི་འོད་གསལ་འཐུག་པོ་སྔ་མ་བཞིན་སོང་ན། ཕུང་ཁམས་གློ་བུར་བའི་སྒྲིབ་བྱེད་མེད་པས་སྟོན་ཀའི་ཉི་མ་སྤྲིན་བྲལ་ལྟ་བུའི་གཞི་སྣང་ཤུགས་ཆེར་འཆར་ལ། ཕྲ་རགས་འབྲེལ་བ་མ་ཆད་སྐབས་དེ་ཙམ་གྱི་རྩལ་རྫོགས་མི་ཐུབ་པའམ། གཞི་སྣང་གི་ནུས་པ་དེ་ཙམ་མྱུར་པོར་རྒྱས་མི་ནུས་ཏེ། ཚད་ཕེབས་ཐད་ཕྱེད་སྐུར་འཆར་བའི་གོ་བ་གོང་སྨོས་ལ་དཔྱད་ཀྱང་ཤེས་སོ། །འདིའི་རྩ་ཐོ་ཐེག་མཆོག་མཛོད་ན་ཡོད། འདི་ལྟར་བྱས་ཚེ་ཐོད་རྒལ་གྱི་སྒྲ་བཤད་ཀྱང༌། འཁྲུལ་སྣང་དང་ཡེ་ཤེས་རང་སྣང་གི་བར་དུ་ཐོག་མའི་ཀ་དག་གི་གཞི་དབྱིངས་འཆར་་བརྒྱུད་་མི་དགོས་པར་འཁྲུལ་སྣང་ལས་གཞི་སྣང་ལ་ཐོད་རྒལ་དུ་འཇུག་པ་ཟེར་རམ་དཔྱད། ༈ །ཤེས་རབ་ཀྱི་མིག་གིས་མཐོང་ན་ཅིག་ཆར་དུ་ཟད་པ་སྟེ།
སྣང་བཞིའི་རྟགས་སྣང་མཐའ་དག་མ་རྫོགས་ཀྱང་ཆོས་ཟད་དུ་འགྲོ་བ་ཡོད་གསུངས་པ་ནི། ཤེར་སྒྲོན་སྟོབས་ཤིན་ཏུ་ཆེ་ན་སྣང་བ་མ་རྫོགས་གོང་ནས་གྲོལ་སར་ཐིམ་ནུས་པའམ་ལྷུན་གྲུབ་ཀྱི་སྦུབས་སུ་ཐིམ་ནུས་པ་སྟེ། ཆོས་ཉིད་བར་དོར་ཡེ་ཤེས་བཞི་སྦྱོར་ནས་ངོ་ཤེས་ཏེ་གྲོལ་བ་དང་ཚོམ་བུའི་སྣང་བ་ལ་རང་སྣང་དུ་ངོ་ཤེས་ནས་གྲོལ་བ་སོགས་གང་དང་གང་གི་ཐད་དུ་ཤེར་སྒྲོན་རྩལ་རྫོགས་ཀྱང་དེ་ཐད་ཉིད་དུ་གྲོལ་བར་བཤད་པ་དང་ཚུལ་འདྲའོ། ༈ །གཞི་སྣང་གི་འོད་གསལ་ལ་རང་བཞིན་དང་ཐུགས་རྗེ་གཉིས་ཀ་འཇོག་མི་འཇོག་དཔྱོད། ༈ །བྱིང་རྒོད་སོགས་སྒོམ་སྐྱོན་གཅད་ཚུལ་ནི། བྱིང་རྨུགས་འཕྲོ་རྒོད་གང་ཡང་རིག་པ་རང་མལ་ནས་གཡོས་ཏེ་རྩལ་ཐོག་ཏུ་ཤོར་བ་ཁོ་ན་ལས་བྱུང་གིས་རིག་ཐོག་དངོས་ན་དེ་ཐམས་ཅད་དྲི་ཙམ་ཡང་མེད་པས་རིག་ཐོག་ནས་མ་གཡོས་པ་ཁོ་ནས་ཆོད་པར་ཀུན་བྱེད་ཀྱི་ལུང་དྲངས་ནས་ཆོས་དབྱིངས་མཛོད་འགྲེལ་ལས་གསུངས་ཏེ། རྣམ་མཁྱེན་ཤིང་རྟར་ཆོས་སྐུའི་རང་མལ་ནས་མ་གཡོས་པའི་རིག་པའི་ཡེ་ཤེས་སམ་རོལ་པ་ཆོས་ཉིད་དུ་ཤེས་པའི་ཤེས་རབ་ལ་ཡུལ་ཐོག་ཏུ་མི་འཆོར་བར་རང་ངོ་བོའི་སྟེང་དུ་གསལ་སྣང་མཆེད་པའི་མཐུ་ཡོད་པས་སོ་སོ་རང་རིག་ཡེ་ཤེས་ཟེར་ཚུལ་དང༌། དེས་རྣམ་རྟོག་གཟུང་འཛིན་ཐམས་ཅད་ཟ་བས་མེ་དང་འདྲ་ཚུལ། རིག་པ་རླུང་གིས་སྤུར་བའི་རང་རྩལ་ལས་བྱུང་བའི་བྱིང་རྒོད་སོགས་
ཐམས་ཅད་དེ་ཉིད་ཀྱིས་སེལ་ཚུལ། ཁྲེགས་ཆོད་ལམ་ནི་ཤར་གྲོལ་དུས་མཉམ་སྟེ། །ཞེས་པའི་ཐད་དང་ཀུན་གཞི་ཆོས་སྐུའི་ཐད་སོགས་ན་ཅི་རིགས་སུ་ཡོད་དོ། །ཕར་ཕྱིན་ཐེག་པར་ཡང༌། ལྷག་མཐོང་སྒོམ་བྱུང་གི་ཤེས་རབ་ཀྱིས་སྟོང་ཉིད་ལ་དམིགས་ནས་ཇི་ལྟར་བསྒོམ་པ་དེ་ལྟར་ཤེས་རབ་དེ་གསལ་རྣོ་ཆེ་ཟབ་ཇེ་བཟང་དུ་འགྲོ་ལ། དེ་ལྟར་ལྷག་མཐོང་གི་ཤེས་རབ་ནར་སོན་ནས་མཐར་སྟོང་ཉིད་དང་ཆུ་ལ་ཆུ་ཐིམ་ལྟར་སོང་དུས་འཕགས་པའི་ཤེས་རབ་ཏུ་སོང་བ་རེད། དེ་བཞིན་དུ་དབྱིངས་ཀྱི་ནང་དུ་ལུ་གུ་རྒྱུད་བཞག་པས་ལུག་རྒྱུད་རིམ་གྱིས་འཕེལ་ནས་མཐར་ངོ་བོའི་རྟགས་སུ་ལྷ་སྐུར་འཆར་ཞེས་གུང་བསྒྲིགས་དུས་ཤིན་ཏུ་ཡག་པོ་ཡོད། ༈ །རིག་པའི་རྩལ་ངར་གྱི་ཤུགས་ནི་ཚད་བཟུང་དུ་མེད་དེ་དེ་མཆེད་པ་ལས། །འོད་ཟེར་གྱི་ཚུལ་དུ་གཟུང་འཛིན་གྱི་སྤྲོས་པ་མཐའ་མེད་དུ་ཤར་ཞིང་འཕྲོས་པ་རེད་ལ། དེས་ན་གཟུང་འཛིན་གྱི་རྣམ་རྟོག་ཅི་ཙམ་འབར་བ་ཙམ་དུ་རིག་རྩལ་གསལ་འབར་དུ་སོང་བ་ཡིན་ཏེ། ཆོས་དབྱིངས་མཛོད་ཀྱི་ལེའུ་བཅུ་གཅིག་པར་ཆགས་སྡང་འབར་དུས་རིག་རྩལ་ལྷོང་བར་བཤད་པ་བཞིན་ནོ། །འོན་ཀྱང་རྩལ་གྱི་རིག་པ་ཡུལ་ཐོག་ཏུ་མི་འཆོར་བས་ཁ་ཕྱིར་བལྟས་ཀྱི་རོལ་པ་རྣམས་ཀྱིས་བསྒྲིབ་ནས་རྟོགས་དཀའོ། །དེའི་དུས་སུ་རིག་པ་སྣང་སེམས་ཀྱིས་གོས་ན་སྣང་སེམས་ཁོལ་བུར་ཆད་པ་ལྟར་རིག་རྩལ་
ཡང་རྒྱ་ཆད་ཕྱོགས་ལྷུང་ཅན་དུ་འགྱུར་བ་ལས། རིག་པ་གཟུང་འཛིན་མེད་པའི་ཟང་ཐལ་ཡིན་པས་མ་གོས་ཏེ་རྒྱ་མ་ཆད་ཕྱོགས་སུ་མ་ལྷུང་བ་རེད། དེའི་དུས་སུ་ཁ་ཕྱིར་བལྟས་ཀྱི་གཟུང་འཛིན་འཁྲུལ་བའི་ཆ་དེ་གར་འགྲོར་བཏང་ནས། རྩལ་གྱི་རིག་པ་དེ་ནང་ངོ་བོའི་སྟེང་དུ་བཞག་པས་རྩལ་གྱི་འོད་ཟེར་ཉི་མ་བརྒྱའི་འོད་ལྟར་གསལ་བ་དེས་ངོ་བོའི་བཞུགས་ཚུལ་རྗེན་ལ་ཕུད་ཡོང༌། རྩལ་གྱི་རིག་པ་དེ་གཟུང་འཛིན་གྱིས་མ་གོས་པས་རྒྱ་ཆད་ཕྱོགས་ལྷུང་མེད་པ་རང་གི་གནད་ཀྱིས་དེ་ངོ་བོའི་ཐོག་ཏུ་ཕེབས་ཙ་ན་ངོ་བོ་རིས་མེད་ལ་རིག་པ་ཕྱོགས་མེད་དུ་རྒྱས་ནས་དེ་ཁོ་ན་ཉིད་ལ་བློ་རྒྱས་པ་ཟེར་བ་ལྟར་འགྲོ་སྟེ། རྒྱ་གྲོལ་རྣལ་འབྱོར་ནམ་ལང་ཉི་ཤར་འདྲ། །ཞེས་སོ། ༈ །རིག་པ་ཆོས་སྐུ་ཡིན་ཡང་དེའི་ཐོག་ནས་གཡོས་ཏེ། རྩལ་ཐོག་ཏུ་འཁྱམ། སླར་རིག་ཐོག་ཏུ་ས་མི་འཛིན་པར་རྩལ་གྱི་སྟེང་ནས་ཤེས་རབ་དང་ཏིང་ངེ་འཛིན་སོགས་སངས་རྒྱས་ཀྱི་ཡོན་ཏན་བསྒྲུབ་ཚེ་བྱིང་རྒོད་སོགས་གོལ་སྒྲིབ་མང་སྟེ་རྙོག་པ་ཅན་གྱི་སེམས་འགྲུབ་གཞིར་བྱས་པས་སོ། །རིག་པ་ནི་རང་བཞིན་གཤིས་ཀྱི་དྭངས་མའི་འོད་གསལ་ཡིན་པས་དེ་ཐོག་ཏུ་བསྡད་ན་གོལ་སྒྲིབ་མེད་དེ། རང་ཁྱིམ་ནས་ཐག་རིང་དུ་འཁྱལ་ཏེ། སླར་མཚན་འགྲོས་ཀྱིས་འོང་དགོས་ན་ལམ་ནོར་དོགས་ཆེ། རང་ཁྱིམ་ནས་སྒོར་མ་བུད་བཞིན་དུ་རང་ཁྱིམ་ཚོལ་དགོས་དང༌། ཚོལ་ཚེ་ལམ་ནོར་དོགས་
སྐྱེ་བའི་གཞི་མེད་པ་བཞིན་ཏེ། བགྲོད་དུ་མེད་ལ་བགྲོད་པས་གོལ་ས་བྱུང༌། །ཞེས་དྲངས་ནས་སྣང༌། གཉུག་མ་རང་མལ་དུ་སྐྱོང་ནུས་ཀྱང་གོལ་ས་ཡོད་ན་རྩོལ་མེད་ཀྱི་ཐེག་པར་འགལ་ཏེ། གཉུག་མའི་སྟེང་ནས་རྩོལ་འབད་དགོས་པའི་ཕྱིར་རོ། །ཡང་རང་གནས་ཀྱི་བསམ་གཏན་ལ་གོལ་སྒྲིབ་མི་སྲིད་ལ། རང་བབས་རང་གནས་ཀྱི་བསམ་གཏན་མ་བསྒོམ་ཆུ་བོ་རྒྱུན་དུ་ཤེས་པ་དེ་ལ་གང་ཡང་ཆོས་ཉིད་དུ་འཆར་བས་གོལ་སྒྲིབ་དང་རྐྱེན་སྣང་གི་བར་ཆད་མེད་དེ་ཡེངས་ཡུལ་ཆོས་ཉིད་ཀྱི་རོལ་པར་ཤར་བའི་ཕྱིར་རོ་ཞེས་བཤད་དེ་བྱིང་རྒོད་སྐྱེ་བར་རྩོམ་དུས་ནས་རིག་པ་དྲི་མེད་ཀྱི་ཀློང་དུ་དག་འགྲོ་བའོ། ༈ །གཟུང་འཛིན་འཁྲུལ་བའི་ཡོ་ལང་འདི་རྣམས་དང་པོའི་གཞི་དང༌། མཐར་གྲོལ་ས་གཉིས་ཀ་ན་མེད་ཀྱང་བར་འདིར་རྨི་ལམ་རྨིས་པ་ལྟར་ཤར་ཏེ། དེའི་ཚེའང་སེམས་ཐོག་ནས་བལྟས་ན་མཁྲང་ཐེང་ངེ་བ་ལྟ་བུར་སྣང་ཡང༌། རིག་ཐོག་ནས་བལྟས་ན་སྟོང་གཟུགས་ཤར་བ་ལྟ་བུ་ལས་མེད་དེ། ཟང་ཐལ་གྱི་སྣང་བ་ཤག་མ་ཤིག་མ་ཁྲལ་མ་ཁྲོལ་མ་ཙམ་མོ། །སྟོང་གཟུགས་ལའང་སྟོང་པའི་གཟུགས་སྒྲ་སོགས་ཡུལ་ལྔ་འདོད་པ་ལྟར། ལུགས་འདིར་སྣོད་བཅུད་ཐམས་ཅད་སྟོང་གཟུགས་སུ་ཟད་དེ། དཔེར་ན་རེ་ཁཱ་ནག་པོའི་ནང་དུ་གསེར་དང་མེ་ཏོག་ཆར་དང་བུམ་སྣམ་རེ་ལྡེ་སོགས་ཅི་ཤར་ཡང་འོད་གསལ་གྱི་རང་སྣང་ཁོ་ན་ཡིན་པས་བཟང་ངན་མེད་པ་ལྟར། སྐྱེ་ཤི་
བདེ་སྡུག་སོགས་ཅི་ཤར་ཡང་རིག་པའི་ཀློང་ལས་མ་གཡོས་པས་ཐམས་ཅད་མཉམ་པ་ཉིད་དེ། གནས་སྐབས་སུ་སེམས་ཀྱི་རང་སྣང་རེད་ཀྱང༌། མཐར་གཏུགས་ན་སེམས་དང་དེའི་རོལ་པ་ཐམས་ཅད་ཡེ་ཤེས་རང་སྣང་གི་སྟོང་གཟུགས་སུ་སངས་རྒྱས་ཟིན་པས་རིག་པ་དག་མཉམ་ལྷུན་གྲུབ་ཆེན་པོས་ཁྱབ་པའི་ཞིང་ཞེས་བྱའོ། །ཐུགས་རྗེའི་རིག་པ་མེ་ལོང་དང་འདྲ་སྟེ་འཆར་གཞི། གཟུང་འཛིན་གཟུགས་བརྙན་དང་འདྲ་སྟེ་ཤར་ཆོས། འཆར་གཞིའི་དབང་གིས་ཤར་བ་མེ་ལོང་མེད་ན་གཟུགས་བརྙན་གཏན་མི་འབྱུང་བ་འདྲ། རིག་པའི་ངོ་བོ་སྟོང་པ་བརྗོད་མེད་རེད་པས། དེའི་རོལ་པ་ཐམས་ཅད་ཀྱང་མེད་པ་གསལ་སྣང་ཁོ་ན་སྟེ། སྟོང་པའི་རང་མདངས་རང་མཚན་གྱིས་གྲུབ་པར་འགལ་བའི་ཕྱིར་ཏེ། གཞི་རྩ་མེད་པའི་ཕྱིར་རོ། །དེ་རྣམས་བསྒྲིགས་དུས་སྣང་སྲིད་ཐམས་ཅད་མེ་ལོང་ལ་པྲ་ཕབ་ལྟ་བུའི་སྟོང་གཟུགས་ངོ་ཏི་རང་ཡིན་ཀྱང༌། སེམས་ཀྱི་སྤྱོད་ཡུལ་དུ་སོང་བའི་ངོར་དེ་ཚེ་སྟོང་གཟུགས་ཡིན་བྱས་ན་མི་སྲིད་པའི་གཏམ་ལྟ་བུར་འཆར་བ་ནི་སེམས་སྟོང་གཟུགས་ཀྱི་དེ་ཉིད་ལ་ཚད་མ་མ་ཡིན་པས་སྟོང་གཟུགས་སྒྱུ་མའི་གྲོང་ཁྱེར་ལ་བདེན་པར་འཁྲུལ་བ་རྐྱང་པ་རེད་དོ། །དེའང་དང་པོའི་ལྷུན་གྲུབ་ཀྱི་སྣང་བ་ནི་རིག་པ་ཁོ་ནའི་སྣང་བ་ཡིན་པས་དྭངས་ཤིང་སྒྲིབ་མེད་དུ་གསལ་བ། རང་སྣང་དུ་ཤེས་མ་ཐག་
དབྱིངས་སུ་དག་འགྲོ་བའི་ལས་རུང་གི་ཡོན་ཏན་ཕུལ་བྱུང་ཅན་ཡིན་ཡང༌། ད་ལྟའི་གཟུང་འཛིན་རགས་པ་ནི་རིག་རྩལ་མ་རིག་པ་གསུམ་དུ་ལོག་སྟེ་སྣང་བ་རང་རྒྱུད་པར་ཞེན་པའི་རླུང་སེམས་ལས་ཤར་བས། འདག་དཀའ་བ། སྦྱང་དཀའ་བ། ཤིན་ཏུ་ངན་རེང་གི་རྣམ་པ་ཅན་ཡིན་ཏེ། ཨ་འཐས་ཀྱི་འཁྲུལ་སྣང་ཟེར། དེའང་རིག་པའི་རང་མལ་ནས་གཡོས་ཏེ་རྩལ་ཐོག་ཏུ་ཤོར་བའི་ཀུན་གཞི་ལུང་མ་བསྟན་གྱིས་རང་སྣང་གི་དེ་ཉིད་བསྒྲིབ། ཡུལ་སྣང་རང་རྒྱུད་པར་སྣང༌། སྣང་བ་ལྟར་གྲུབ་པར་ཞེན། ཞེན་པ་རྒྱུན་ཆགས་སུ་འཐས། དེ་ལ་བརྟེན་ནས་ལས་ཉོན་སྡུག་བསྔལ་གྱི་འཁོར་བ་ཟད་མེད་འཕེལ་བ་འདི་སེམས་ཅན་བཅིང་ལུགས་ཡིན་པའི་གནད་ཤེས་ན། གཤིས་ལྷག་མཐོང་གི་རིག་པའི་རང་སོ་བཟུང་སྟེ། རྩལ་ཐོག་མ་ཤོར་བར་བསྐྱངས་པས། ཀུན་གཞིའི་བསླད་པ་སང༌། མ་འཁྲུལ་གཉུག་མའི་དབྱིངས་ཐོག་ཏུ་བཙན་ས་ཟིན། རོལ་པ་ཆོས་ཉིད་དུ་ཤེས་པའི་མཁྱེན་ཆ་རྒྱས། གཟུང་འཛིན་རང་རྒྱུད་པའི་འཁྲུལ་འཁོར་ཞིག །སྣང་སྲིད་ཐམས་ཅད་དག་མཉམ་ཆེན་པོའི་སྟོང་གཟུགས་སུ་ཤར། མཐར་རང་གདངས་ནང་དུ་ལོག །རྩལ་གཞི་ལ་ཐིམ་ནས་གྲོལ་སར་ཕྱིན་འགྲོ་བ་ལ་ངེས་པ་འཐོབ་སྟེ། འདིའི་རྒྱུ་མཚན་གྱིས་རིག་པ་བསྐྱང་དེད་གཅིག་པོས་འཚང་རྒྱ་བ་རེད་པས། འབད་མེད་གྲོལ་བའི་གནད་ཀྱི་
ཉིང་ཁུ། འོད་གསལ་རྡོ་རྗེ་རྩེ་མོའི་གསང་གཏམ་མཐར་ཐུག་པ་ལགས་སོ། ༈ །རིག་པ་ལ་ཡུལ་ཚུར་སྣང་ཡང་ཡུལ་ཐོག་ཏུ་ཕར་མི་འཆོར་བས་རིག་པ་ཟང་མ་རྗེན་པར་བུད་དེ། གཟུང་འཛིན་འཁོར་བའི་རྩ་བ་སྟོང༌། སྣང་སྲིད་རྒྱ་གྲོལ་ལ་སང༌། གང་སྣང་ཐམས་ཅད་སྟོང་པར་གྲོལ་བས་ཁམས་གསུམ་ཡོངས་གྲོལ་གྱི་དགོངས་པ་ཟེར། རྟེན་འབྲེལ་བཅུ་གཉིས་ལུགས་སུ་འཇུག་པ་འདི་དག་གོ་བཟློག་སྟེ་དང་པོའི་རིག་ཐོག་ཏུ་དེད་ནས་ཟང་ཐལ་གྱི་རིག་པ་རྗེན་ལ་བུད་ཙ་ན། སྤྲིན་ཡེ་དག་གི་ནམ་མཁའི་ངོས་ལྟར་གཤིས་ལ་འཁོར་བ་ཡོད་མ་མྱོང་བའི་དྲི་མེད་རྣམ་དག་ཆེན་པོར་རྟོགས་པས་སྲིད་གསུམ་ཀ་དག་གི་དགོངས་པ་ཞེས་བྱའོ། །སྲིད་གསུམ་ཀ་ནས་དག་ཚུལ་འདི་རྒྱས་པར་ཡིད་བཞིན་མཛོད་ཀྱི་ལེའུ་བཅོ་བརྒྱད་པར་ཡོད། ༈ །བདེ་གསལ་རྣམ་པར་མི་རྟོག་པའི་འོད་གསལ་ནི་བླ་མེད་ཀྱི་རྒྱུད་ཐམས་ཅད་ན་གསལ་བར་བསྟན་ཀྱང༌། ཐུགས་རྗེའམ་རྩལ་གྱི་རིག་པའམ་ཤེས་རབ་ཀྱི་ཆ་སྟེ་མཁྱེན་ཆ་རྗེན་འདོན་བྱེད་ཅིང་དེའི་སྟེང་ནས་འོད་གསལ་གྱི་ལམ་བསྒྲུབ་པ་གཙོ་བོར་རྩལ་འདོན་བྱེད་པ་ནི་རྡོ་རྗེ་རྩེ་མོའི་ཁྱད་ཆོས་རེད་འདྲ།། ༈ །།ངོ་བོའི་འོད་གསལ་ནི་ཀུན་རྟོག་གི་དུས་བག་ལ་ཞ་འགྲོ་སྟེ། རྒྱུད་གཞན་དུ་འོད་གསལ་དང་ཀུན་རྟོག་ཅིག་ཤར་དུས་གཅིག་ནུབ་འགྲོ་བར་བཤད་པའང་འདིར་དགོངས། ཐུགས་རྗེའི་རིག་ཆ་ནི་ཉི་འོད་མཆེད་དུས་ཚ་དྲོད་རང་འགྲོགས་སུ་མཆེད་པ་བཞིན་ཀུན་རྟོག་མཆེད་
དུས་དེ་ལ་རང་འགྲོགས་སུ་མཆེད་ཡོང་སྟེ་སྙིང་ཐིག་གི་གྲུབ་མཐའ་ཐུན་མིན་རེད། ལྗོན་ཤིང་གི་སྒྲ་དང་འཁྲུལ་འཁོར་གྱི་ཁོང་གནད་ལྟར། འོད་གསལ་གྱི་གནད་མཐར་ཐུག་ནི་ངོ་བོའི་དབྱིངས་སམ་མི་རྟོག་པའི་དབྱིངས་ཏེ། དེ་ནི་འོད་གསལ་གྱི་གཏིང་ངོ། །འདི་ལ་དབྱིངས་ཞེས་ཟེར་དོན་དམིགས་གཏད་ཁོལ་བུ་པ་ལ་སྣང་བ་རིས་མེད་མི་ཡོང༌། རྒྱ་ཡན་གྱི་སྣང་ཆ་ལ་ཕྱོགས་མེད་རིས་མེད་ཡོང་བས་ཅི་ཡང་མ་ཡིན་པ་ལས་ཅི་ཡང་འབྱུང་ཟེར་རྒྱུ་དེ་རེད་པས་ཆོས་ཐམས་ཅད་ཀྱི་དབྱིངས་ཡིན་ལ། སྤྱི་ལྟར་འཕགས་པའི་ཆོས་ཀྱི་དབྱིངས་ཞེས་ཀྱང་བཤད་ནུས། རིག་པ་ལྷག་ཐོང་གི་རྒྱལ་པོ་ཡིན་པས་དེས་ངོ་བོའི་བཞུགས་ཚུལ་རྗེན་ལ་འབྱིན་ཐུབ་པ་འདྲ་བ་བདེ་བ་དང་གསལ་བ་གཞན་གྱིས་མི་ཐུབ་ལ། བཞུགས་ཚུལ་དེ་ཅི་ཙམ་རྗེན་འདོན་ཐུབ་པ་དེ་ཙམ་དུ་འོད་གསལ་གྱི་རྟོགས་པ་ལས་སུ་རུང་བ་དང༌། འོད་གསལ་ལ་དབང་བསྒྱུར་ཕུལ་བྱུང་འཐོབ་པ་ནི། ལམ་འདིའི་ཟབ་ཁྱད་དང་མྱུར་ཁྱད་མཆོག་གོ །རིག་པས་དབྱིངས་ཀྱི་གཏིང་ལ་རེག །ཇི་ལྟར་རེག་པ་དེ་ལྟར་དབྱིངས་ཀྱི་རིག་པ་རྣོ་ལ་ངར་བཏགས་ལྟར་བྱེད། དེའང་རིག་པས་འོད་གསལ་གནད་ནས་བསྐུལ་ཞིང་ཅི་ཙམ་འཁུལ་ནུས་པ་ལྟ་བུ་བདེ་བ་སོགས་ལ་མེད་པའི་དོན་ནོ། །རྡོ་རྗེ་སེམས་དཔའ་རྒྱལ་པོ་ཆེ། །ཡང་དང་ཡང་དུ་སྐུལ་བར་བྱ། །ཞེས་ཏེ། སྐུལ་བ་འདི་རྣལ་འབྱོར་བླ་མེད་ཀྱི་སྲོག་གོ །དེ་ལྟར་རིག་པ་ལ་འོད་གསལ་གྱི་
དབྱིངས་གསལ་བར་འབྱིན་པའི་ཁྱད་ཆོས་ཆེ་བར་མ་ཟད། དབྱིངས་ཐོག་ཏུ་བརྟན་པར་གནས་ཐུབ་པ་ལའང་ཁྱད་ཆེས་ཆེ་སྟེ་རླུང་རགས་པ་ཐིམ་པའི་གསལ་བ་དང༌། ཐིག་ལེ་རགས་པ་ཞུ་བའི་བདེ་བ་སོགས་ནི་དུས་དེར་འཕྲལ་རྐྱེན་གྱིས་འོད་གསལ་བོགས་བཏོན་པའི་ཤེས་ཉམས་ཡིན་པས་བརྟན་པར་དཀའ་ལ། རིག་པ་ནི་དབྱིངས་ཁོ་རང་གི་རང་འགྲོས། ཁོ་དང་གདོད་ནས་འབྲལ་མི་ཤེས་པའི་ཆོས་ཉིད་ཅན་ཡིན་ཅིང༌། ཉི་མའི་རང་གཤིས་སྣང་བ་ཡིན་པ་ལྟར་རིག་པ་དབྱིངས་ཀྱི་སྣང་བྱེད་དུ་གཤིས་ཀྱིས་གྲུབ་པས་དེའི་སྟེང་ནས་དབྱིངས་བསྒོམ་ན་དབྱིངས་ཐོག་དུ་བརྟན་སླ་སྟེ། རྣམ་མཁྱེན་ཤིང་རྟར། རང་བཞིན་རྫོགས་པ་ཆེན་པོ་ནི་ཆོས་ཉིད་ཀྱི་རླན་དང་མི་འབྲལ། ཞེས་པའང་དེ་ལྟར་རེད་སྙམ། ༈ །རྩ་རླུང་ཐིག་ལེའི་རྟོག་སྒྲིབ་ཀྱིས་གཉུག་མའི་རང་ཞལ་འགེབ་ལ། རྟོག་སྒྲིབ་དེ་སྦྱོང་བ་ནི་གཞན་དུ་སྒོ་གསུམ་ཕྲ་རགས་ཕྱེ་ནས་མཛད་ཀྱང༌། འདིར་རགས་པ་ཉིད་ཕྲ་བ་དང༌། ཕྲ་བ་ཤིན་ཏུ་ཕྲ་མོར་བསྒྱུར་ནས་མི་ཤིགས་དྭངས་མ་ཆེན་པོའི་དབྱིངས་སུ་འཇུག་པ་སྟེ། དེ་ལྟར་རགས་པ་ཕྲ་བར་བསྒྱུར་བའི་གནད་ནི། ཕྲ་རགས་མ་ཕྱེ་བར་རླུང་སེམས་རགས་པ་ཉིད་ཀྱི་སྟེང་ནས་གཉུག་སེམས་བསྐྱང་བའི་ལག་རྗེས་ལ་དེ་ལྟར་འོང་བ་སྟེ། བུད་ཤིང་མ་བསལ་བར་དུ་མེ་མི་འབར་བ་མིན་གྱི། བུད་ཤིང་ཅི་ཙམ་མང་བ་ཙམ་དུ་མེ་མཆེད་ཡོང་བ་བཞིན། ཀུན་རྟོག་དང་ལས་
རླུང་ཅི་ཙམ་འབར་བ་དེ་ཙམ་རིག་པའི་རྩལ་ངར་མཆེད་ཡོང་བས། དེ་ཐད་ཉིད་དུ་རིག་པ་ངོས་བཟུང་སྟེ་སྐྱོང་བ་རེད། རྟོག་སྒྲིབ་ཀྱི་གསེབ་ནས་ཐོན་པའི་རིག་པས་རྟོག་སྒྲིབ་སྲེག་པ་ནི། ཤིང་དྲུད་པ་ལས་བྱུང་བའི་མེས་ཤིང་ཉིད་སྲེག་པ་བཞིན་ནོ། །འདི་ལྟར་སྙིགས་མ་དྭངས་མར་སྒྱུར་ཐུབ་པ་ནི། བྱ་བ་དགུ་ཕྲུགས་བཏང་ནས་བར་མེད་དུ་སྒོམ་པ་ལ་ལྟོས་ངེས། ༈ །ཐོད་རྒལ་ཐད། གཏེར་ཆེན་རིན་པོ་ཆེའི་ཞལ་ནས། དབྱིངས་ཐིག་རིག་གསུམ་གྱི་སྣང་བ་མཐོང་ཚེ། དེ་ལ་བདག་གཉེར་གང་ཡང་མེད་པར་རིག་པ་གློད་དེ་འཇོག་པ་དེ་ཐོད་རྒལ་སྒོམ་ལུགས་ལེགས་ཤོས་མིན་པར་གོ །ལུ་གུ་རྒྱུད་དབྱིངས་ཐིག་གི་ར་བར་གཟེར་བཏབ་པ་ལྟར་ཨར་ལ་གཏད་ནས། དེ་འདྲའི་ལུག་རྒྱུད་དེ་ལ་ནང་གི་རིག་པ་ཙིར་བཟུང་ལྟ་བུར་མདུང་ཚུགས་སུ་གཏད་པའམ་རིག་པ་ཁ་ཡན་དུ་མི་གཏོང་བར་ལུ་གུ་རྒྱུད་ཁོ་ན་དང་བསྲེས་ནས་ཕུར་ཚུགས་སུ་ཧུར་ཐག་བྱས་ཏེ་སྒོམ་པ་འདི་ལེགས་ཤོས་ཡིན་ཏེ་འདིའི་གནད་ཀྱིས་དབང་རྣོན་སྒོམ་མེད་ཁྲེགས་ཆོད་ཀྱིས་གྲོལ་བ་དང༌། བརྩོན་འགྲུས་ཅན་སྒོམ་ཡོད་ཐོད་རྒལ་གྱི་ལམ་པ་ཞེས་བཤད་པ་ཡིན་གསུངས་ཏེ་ཟབ་གནད་ཕུལ་བྱུང་དུ་སྣང༌། ཡང་རིག་པའི་བོགས་འདོན་ལ་བདེ་བ་ལས་ཀྱང་གསལ་བ་དྲག །ཅེས་དང༌། མཉམ་བཞག་འཐུག་པོའི་དུས་སུ་ཕྱག་རྒྱའི་བདེ་བ་ལས་ལྷག་པའི་བདེ་བ་དྭངས་ཤིང་མི་གཡོ་བ་ཡོད་ཀྱང་དེ་རྩལ་འདོན་མ་བྱས་པར་
རིག་ཆ་བསྐྱངས་པས་མི་རྟོག་པའི་དབྱིངས་སུ་འདྲེས་ཚེ་མི་རྟོག་པས་བདེ་བ་ཟིལ་གྱིས་མནན་ནས་འགྲོ་གསུངས་ཏེ། དེའི་ཚེ་བདེ་ཉམས་ཕུལ་བྱུང་ཡོད་ཀྱང་མི་མངོན་པ་འཕགས་པའི་མཉམ་བཞག་ལ་ཡུལ་ཡུལ་ཅན་ཡོད་ཀྱང་ཡུལ་ཡུལ་ཅན་དུ་སྣང་བ་ནུབ་པ་ལྟ་བུར་གསལ། ཡང་གོང་སྨོས་ལྟར་ནང་གི་རིག་པ་ལུག་རྒྱུད་ཀྱི་ནང་དུ་བརྩོན་འཛིན་བྱས་པས་རིག་ཆ་འབར་ནས་ཤེས་རབ་རང་བྱུང་གི་སྒྲོན་མར་མཆེད་དེ་དེའི་རྩལ་ལས་ཤེས་རབ་ཀྱི་ཀློང་རྡོལ་འོང་གསུངས་ཏེ། འདི་ནི་ཤེས་རབ་སྲོག་ཏུ་གྱུར་པའི་རླུང་ལྔ་ལས་རུང་གི་ལག་རྗེས་སུ་གོ། ཡང་མ་དག་པའི་རླུང་སེམས་ཀྱི་ཆ་རྣམས་དག་པ་དང༌། དབྱིངས་ལ་རིག་པ་ཕྱོགས་མེད་དུ་རྒྱས་པ་ལས་སམ་འབར་ཞིང་མཆེད་པ་ལས་སྤྱན་དང་མངོན་ཤེས་རྫུ་འཕྲུལ་སོགས་འགྲུབ་ཅེས་དང༌། འཆི་ཀའི་བར་དོར་འོད་གསལ་མ་བུ་སྲེ་ནུས་པ་ཡིན་ཡང་ད་དུང་དབྱིངས་ལ་ཞུགས་ཚབས་ཆེ་ཆུང་ངམ་རྣམ་པར་མི་རྟོག་པའི་དབྱིངས་ཀྱི་གཏིང་དཔོག་ཚུལ་ཤུགས་ཆེ་ཆུང་མང་པོ་ཡོད་པས་དེར་གྲོལ་ཐུབ་མི་ཐུབ་མང་པོ་བྱུང་བ་ཡིན་གསུངས་ཏེ། འདིའི་དབང་གིས་ཆོས་ཉིད་བར་དོར་ཡང་གྲོལ་དཀའ་སླ་དང་མྱུར་བུལ་མང་པོ་བྱུང་བ་འདྲ། དེ་དག་གཏེར་ཆེན་གསུང་སྒྲོས་སོ། ༈ །རགས་པའི་རླུང་སེམས་མ་ལུས་པ་སྟེ་ལྷག་མེད་དུ་ཐིམ་པའི་འོད་གསལ་དང༌། ཅི་རིགས་རེ་དག་པའི་འོད་གསལ་གཉིས་དཔྱིད་ཀ་དང་སྟོན་ཀའི་
ནམ་མཁའ་ལྟ་བུའི་ཁྱད་ཆེ་ལ། དེའི་གནད་ཀྱིས་དེ་ལས་ཤར་བའི་དབྱིངས་རིག་གི་སྣང་བ་ལའང་སྤྲིན་སྦུབས་ཀྱི་དང༌། སྤྲིན་བྲལ་གྱི་ཉི་མའི་འོད་ལྟ་བུའི་ཁྱད་ཆེ་བས། ད་ལྟ་ལོ་ཟླ་འགའ་རེར་སྒྲུབ་དགོས་པའི་ཚད་ཕེབས་ཀྱི་སྣང་བ་མཐར་ཐུག་པའང་ཆོས་ཉིད་བར་དོར་ཐུན་གཅིག་ལ་རྫོགས་ནུས་པ་ཡིན། ཡང་ཤེས་རབ་ཀྱི་མིག་གིས་མཐོང་ན་སྣང་གཞི་རིམ་གྱིས་འཆར་བ་ལ་མི་ལྟོས་ཞེས་པས་ཆོས་ཉིད་བར་དོར་བརྟན་པ་ཐོབ་པའམ་གྲོལ་སར་ཕྱིན་པ་ལ་ཆོས་ཉིད་བར་དོའི་སྣང་བ་མཐའ་དག་རྫོགས་རྫོགས་སུ་སྡོད་མི་དགོས་ལུགས་དང་རིགས་པ་འདྲའོ། ༈ །དབྱིངས་གཏིང་མཐའ་མེད་པའི་ཟབ་མོ་ལ་རིག་པ་ཅི་ཙམ་ཞུགས་ཚབས་ཆེ་བ་དེའི་ཚོད་དུ་རིག་པ་ཉིད་ཇེ་ཕྲར་འགྲོ། ཕྲ་ཞེས་པ་ནི་སྐྲ་རྩེ་དང་ཁབ་རྩེ་ལྟ་བུ་མིན་ཏེ། གལ་ཏེ་ཡིན་ན་རིག་པ་དེ་ཁོལ་བུ་ལས་ཀྱང་ཁོལ་བུར་འགྱུར་བས་རྒྱ་གྲོལ་གྱི་རིག་པར་ག་ལ་འགྱུར། དེས་ན་བསམ་མི་ཁྱབ་ཀྱི་མཚན་ཉིད་ཇེ་རྫོགས་སུ་སོང་བའམ། དེའི་བཞུགས་ཚུལ་ལམ་ངོ་བོ་དེ་ཕལ་གྱིས་རྟོགས་ཇེ་དཀར་སོང་བའི་དོན་ནོ། །ནམ་མཁའི་ལུས་ཅན་གར་ཡང་ཐོག་མེད་ཅིང༌། །ཟེར་བའི་དཔེ་ལྟར་རིག་པ་མཉེན་ལྕུགས་ཇེ་ཆེར་སོང་བའང་ངོ༌། །དབྱིངས་ལ་རིག་པ་ཅི་ཙམ་སྲེ་ནུས་པའི་ཚད་དུ་རྒྱ་ཆད་ཕྱོགས་ལྷུང་བྲལ་བ་ཟེར་བ་ལྟར་རིག་པ་རྒྱ་ཇེ་ཆེ་ཇེ་ཡངས་སུ་འགྲོ་བའང་ཤེས་སླའོ། ༈ །གསང་སྔགས་
གཞན་ལས། བདེ་བ་ཅི་ཙམ་ཤུགས་ཆེ་བ་ལྟར་དེ་ཁོ་ན་ཉིད་རྟོགས་ཕུལ་ཆེ་ཞེས་འབྱུང་བ་ནི་བདེ་བས་དེ་ཁོ་ན་ཉིད་རྟོགས་པའི་ཤེས་རབ་ཀྱི་རྣོ་སོ་འདོན་པའི་དོན་རེད། ཤེས་རབ་ཀྱང་འོད་གསལ་གྱི་ཤེས་རབ་ལ་བྱ་དགོས་པས་འདིའི་རིག་ཆ་དང་གཅིག་རེད། དེ་ལ་རྫོགས་ཆེན་པས་བལྟས་དུས། བདེ་བ་དང་གསལ་བའི་སྟོབས་ཀྱིས་ཆོས་དབྱིངས་རྟོགས་པ་ཁྱད་ཞུགས་པ་ནི། དེ་དག་གི་མཐུས་རིག་པ་ལ་ངར་ཐོན་པའི་སྟེང་ནས་འཇོག་དགོས་པས་རིག་པ་བར་དུ་བརྒྱུད་དགོས་ལ། རིག་པ་དང་ཆོས་དབྱིངས་ཀྱི་བར་དུ་གང་ཡང་བརྒྱུད་མི་དགོས་པས། དབྱིངས་རྟོགས་བྱ། རིག་པ་རྟོགས་བྱེད་ཀྱི་རྒྱལ་པོ། དེ་གསལ་རྟོག་བྱེད་དེའི་འཁོར་ལྟ་བུར་འགྱུར་བ་འདྲ། དེའང་གཞན་དུ་རླུང་དང་གཏུམ་མོ་དང་ལས་རྒྱ་ལ་སོགས་པའི་ཐབས་ཀྱིས་བདེ་བ་དང་གསལ་བ་ཅི་རིགས་སྒྲུབ་ལ། བདེ་གསལ་གྱི་ཐབས་ལས་རིག་པ་མཚོན་པར་བྱེད་པས་དབྱིངས་ལ་འཇུག་པ་ལ་རིག་པ་དགོས་པར་མ་ཟད། རིག་པ་ཉིད་ལའང་བདེ་གསལ་གྱི་ཐབས་ཀྱིས་འཇུག་དགོས་ཤིང༌། སྙིང་ཐིག་གི་སྐབས་སུ་དེ་འདྲ་གང་ཡང་མི་དགོས་པར་རིག་པ་ལ་དམར་འཇུས་བྱས་པས་ཆོག་པས་འཁོར་བརྒྱུད་ནས་རྒྱལ་པོ་ལ་འདྲིས་གདགས་པ་དང༌། རྒྱལ་པོ་ཉིད་དབང་དུ་བསྡུས་ནས་འཁོར་རང་ཤུགས་ཀྱིས་ཐོབ་པའི་ཁྱད་ལྟ་བུ་ཡོད་སྙམ། ༈ །ཡང་སྒྱུ་འཕྲུལ་ཐད། རྒྱུད་འདིའི་ལམ་ལ་ཐབས་གྲོལ་གཉིས་ཡོད་ཀྱང༌།
གཙོ་བོ་གྲོལ་ལམ་རང་ཡིན་ཏེ། གཡོ་བ་རླུང་དང༌། བདེ་བ་ཐིག་ལེའི་རྫོགས་རིམ་གཙོ་བོར་མི་བྱེད་པར་འོད་གསལ་ཡེ་ཤེས་ཀྱི་རྫོགས་རིམ་གཙོ་བོར་བྱེད་པས་མ་ཧཱའི་ཨ་ཏིར་བཞག་པའི་ཕྱིར། ༈ །རྫོགས་ཆེན་ཐད། ཀུན་གཞི་ཆོས་སྐུ་ངོ་བོ། །སེམས་དང་ཡེ་ཤེས་རང་བཞིན། ཡིད་དང་ཤེས་རབ་ཐུགས་རྗེ། ཨེ་ཡིན་དཔྱོད། ༈ །ངོ་ཤེས་རྩལ་རྫོགས་ཐད་ཕྱག་རྒྱ་བ་སོགས་ཀྱི་ཆོས་སྐད་ཤན་མ་ཤོར་བ་ནི། ད་ལྟ་རྣམ་རྟོག་གི་སྟེང་ན་རིག་ཆ་གཙོ་ཆེར་ཡོད་དེ། དེ་དུས་རིག་ཆ་དེ་བསླད་ཡོད་ཅིང༌། རིག་པའི་རྩལ་ལམ་ཤུགས་སམ་ཤེད་སྟོབས་ཀྱི་ཆ་རྣམས་རྣམ་རྟོག་ཏུ་ཕར་སོང་བས་རྣམ་རྟོག་ཚོ་ལ། རིག་པ་ཤེད་ཞན་ཅིང་ལྗིད་པར་སོང་བ་སྟེ། རྣམ་རྟོག་བཀྲག་ཆེ་ལ། རིག་པ་བཀྲག་ཆུང༌། དེའི་དུས་སུ་རྣམ་རྟོག་ཐད་ཀར་བཅད་ནས་རིག་པ་རྐྱང་འདེད་དམ་རྗེན་འདོན་བྱས་པས་རྣམ་རྟོག་གི་རྩལ་ཤུགས་རིག་པ་ལ་ཚུར་ཞུགས་ཤིང་འདུས་ནས་རིག་ཆ་ཧུར་ཐོན་ཅིང་རྗེན་ལ་ཅེར་གྱིས་བུད་ཡོང༌། ༈ །རིག་ཆ་ཡེ་ཤེས་ཀྱི་རླུང་གིས་སྤུར་བའམ་གཞི་ཐོག་ནས་ཕྱིར་འཕགས་ཤིང་སད་པའི་རྟགས་སུ་སྟོང་གཟུགས་ཀྱི་དབྱིངས་ཐིག་སོགས་འཆར། དེའང་ལས་རླུང་སེམས་བཅས་ཀྱི་བསླད་ཆ་མཐའ་དག་དང་པོའི་གཞི་ཐོག་ཏུ་ཐིམ་པའི་རྗེས་ཐོག་ཡིན་ན་རང་ཤུགས་ཀྱིས་འཆར་ཞིང༌། རྒྱ་ཆེ་མཐའ་ཡས་སུ་འཆར། ཀུན་རྟོག་གི་སྟེང་ན་ཡོད་ཚེ་གནད་གསུམ་གྱིས་མ་གཅུན་ན་མི་འཆར། གཅུན་ན་བག་ཙམ་ཉུག་
ཙམ་འཆར་ཏེ། ཐོད་རྒལ་ཐོག་མར་སྒོམ་ཚེའོ། །དེ་ལྟར་ཤར་བའི་སྣང་བ་དེ་ལ་རྩེ་གཅིག་གཟིར་ཞིང་གཏད་ན་རྟགས་སྣང་གི་རྟོད་ལ་རྟགས་ཅན་གྱི་རིག་ཆ་གཅེར་བུར་ཟིན་ནས་གོང་འཕེལ་དུ་འགྲོ། དེས་ན་ཁྲེགས་ཆོད་ཀྱི་རིག་ཆའང་ཤེར་སྒྲོན་ཙམ་ངེས་པར་ཡིན་ཀྱང༌། ཐོད་རྒལ་བསྒོམ་སྟོབས་ཀྱིས་དེ་ནར་སོན་ནས་ཟབ་མོའི་ཚིག་དོན་འབྱེད་པའི་ཤེས་རབ་སོགས་རྩལ་རྒྱས་ཤིང་མཆེད་པའི་མགོ་ནི་ཉམས་གོང་འཕེལ་ཞེས་པའི་ཤེས་ཉམས་ནས་རྩོམ་པ་འདྲ། ཁྲེགས་ཆོད་ཀྱི་རིག་ཆ་དེ་ལྷུན་གྲུབ་ཀྱི་གཞི་སྣང་གི་རིག་ཆ་ཕལ་པ་ཙམ་དུ་ཚིག་དོན་མཛོད་ལས་གསུངས་པ་དང་ཤེར་སྒྲོན་དུ་བཤད་པ་འདི་གཉིས་མཐུན། ༈ །འཆི་ཀ་བར་དོའི་ཐད། འཆི་བ་འོད་གསལ་དངོས་ནི་བར་དོར་བཞག་མི་རུང་ངམ་སྙམ། སྙིང་གའི་ཡེ་ཤེས་བཞིའི་རང་སྣང་རང་བཞིན་སྤྲུལ་སྐུའི་ཞིང་དང༌། དེས་ན་ད་ལྟ་ཡེ་ཤེས་བཞི་སྦྱོར་གྱི་སྣང་བ་ལ་གོམས་ན་དེ་དག་སྐྱེ་བགྲོད་ནུས་པ་ནི། མ་རྒྱུད་དུ། ཧེ་རུ་ཀའི་རྩ་གནས་རྣམས་ཡུལ་ཆེན་ཉེར་བཞིར་ཤར་ཞིང༌། དེས་ན་དེ་བསྒོམ་པས་གནས་ཡུལ་ལ་དབང་སྒྱུར་བར་བཤད་པ་ལྟ་བུར་མཐོང་ངོ༌། ༈ །ཡང་གོ་ལུགས་གསར་པ་ཞིག་ལ། ངོ་བོ་རང་བཞིན་ཐུགས་རྗེ་གསུམ་ཀ་རིག་པ་སྟེ། ངོ་བོའི་རིག་པ། རང་བཞིན་གྱི་རིག་པ་སོགས་སོ། །སྤྱིར་རིག་པ་ཡིན་ཕན་ཆད་གསུམ་ཀ་ཡིན་ཡང༌། གཙོ་ཆེ་བའི་ངོས་ནས་བཞག་ན་
གཞི་སྣང་མ་ཤར་གོང་གི་རིག་པ་ནི་སྟོང་པ་རིག་པའི་སྙིང་པོ་ཅན་ཏེ། མི་རྟོག་པའི་དབྱིངས་ཐོག་ནས་མ་གཡོས་པའི་ཕྱིར་རོ། །དེ་ལ་ངོ་བོ་སྟོང་པ་ཟེར། དེ་གསལ་མདངས་ཆེར་འབར་ཞིང་རྩལ་གྱི་གཟུང་འཛིན་གྱི་ཐོག་ཏུ་མ་ཤར་བ་ནི་གསལ་བ་རིག་པའི་སྙིང་པོ་ཅན་ཏེ། རང་བཞིན་གསལ་བ་ཟེར། འདིའི་རིག་ཐོག་གི་གསལ་ཆ་འདི་ལ་མདངས་ནང་གསལ་གྱི་ཆ་ཟེར། དབྱིངས་ཡེ་རིག་གསུམ་སོ་སོར་བྱེད་ཚེ་ཡེ་ཤེས་ཞེས་པའང་དེ་ཡིན་པ་འདྲ་སྙམ་པ་དཔྱོད། རྩལ་ཐོག་ཏུ་ཤར་ནས་ཐུགས་རྗེ་ཀུན་ཁྱབ། རང་གནས་མི་རྟོག་པའི་དབྱིངས་དེ་ངོ་ཤེས་བྱེད་དངོས་རིག་ཆ་དེ་ཁོ་ན་རེད་ཀྱང༌། ཐོག་མའི་གཞི་ལ་གནས་དུས་མི་རྟོག་པ་ཤིན་ཏུ་འཐུག་རུང་རིག་ཆ་ཕྲ་མོར་སོང་བས་རིག་ཆ་ཉིད་ཀྱང་ངོས་མི་ཟིན་ན། དབྱིངས་ལྟ་ཅི། དེ་ནས་གསལ་མདངས་ཆེར་མཆེད་ཚེ་རིག་ཆའམ་ཤེས་རབ་སྲོག་ཏུ་གྱུར་པའི་རླུང་ལྡས་བསྐུལ་ནས་གསལ་ཆ་རྒྱས་པ་ཡིན་ཕྱིར་རིག་ཆ་མཆེད་ཡོད་ཀྱང་ཐ་མལ་བ་ལ་འདུ་བྱེད་ཀྱི་དྲན་པ་ལྟ་བུའི་དྲན་པ་རྙེད་པའི་རྐྱེན་མ་ཚང་ཞིང་སྐར་མདའ་རྒྱུག་ཡུན་ཙམ་ལས་མེད་པས་ངོས་མི་ཟིན། ད་ལྟ་རྣམ་རྟོག་གི་སྟེང་ན་ཡོད་དུས་ནང་གསལ་དུ་མ་གབ་པར་ཕྱིར་གསལ་དུ་ཐོན་ཏེ་མེ་སྟག་མེ་ཕུང་དུ་མཆེད་པ་ལྟ་བུའི་སྐབས་ཡིན་པས་བླ་མའི་གདམ་ངག་གི་རྐྱེན་ལས་ངོ་འཕྲོད་སླ་ཞིང༌། འདིའི་སྟེང་ནས་རིག་ཆ་རྗེན་འདོན་ནམ་རྐྱང་འདེད་བྱས་ནས་རྩེ་གཅིག་བསྐྱང་བས་ནང་དབྱིངས་ལ་གཏིང་
ཕྱིན་པར་འདྲེ་སྐབས་ཀྱང༌། སྐྱོང་ལུགས་ཀྱི་གནད་ཀྱིས་རྫོགས་རིམ་གཞན་གྱི་འོད་གསལ་གྱི་རིག་ཆ་ལས་ཆེས་ལྷག་པའམ་ཤས་ཆེ་བའི་རིག་ཆ་ཕུལ་བྱུང་སད་ཅིང་འཆར་ཏེ། ཐིག་ལེའི་རྣལ་འབྱོར་གཙོར་བྱས་བདེ་བ་ཤས་ཆེ་བ་བཞིན་ནོ། །དེ་ནི་རྩལ་ཐོག་གི་རིག་པ་བསྡུས་རྗེས་སུ་ཡང་ནང་གསལ་དུ་རིག་ཆ་རྩལ་རྫོགས་ཕུལ་གཞན་ལས་ཆེས་ཆེ་བ་འོང་བའི་ཚུལ་ཏེ། ཐུགས་རྗེའི་རིག་པ་བསྐྱང་བས་ངོ་བོའི་རིག་པ་ཁྱད་འཇུག་ལུགས་རེད་དོ། །དེས་ན་སྟོང་གཟུགས་ཀྱང་རིག་གདངས་ཀྱི་ཕྱོགས་ནས་འཆར་རོ། །དེས་ན་ནང་གསལ་གྱི་རིག་པ་རང་བཞིན་གསལ་བ་དང༌། ཕྱིར་གསལ་གྱི་རིག་པ་ཐུགས་རྗེ་ཀུན་ཁྱབ་རེད། ཕྱིར་གསལ་གྱི་དོན་ནི་འཛིན་ཆའི་རྣམ་རྟོག་དང་འགྲོགས་ནས་ཡུལ་ཐོག་ཏུ་ཤར་བ་སྟེ། ཡུལ་ཐོག་ཏུ་མ་ཤར་བ་ལ་ནང་གསལ་ཟེར། ཕྱིར་གསལ་ལའང༌། ཐུགས་རྗེའི་རིག་པ་དངོས་ནི་འཛིན་མེད་ཡིན་ལ། དེའི་འོད་ཟེར་གྱི་ཚུལ་དུ་ཤར་བའི་འཛིན་ཆ་རྣམ་ནི་ཐུགས་རྗེའི་རིག་རྩལ་ཞེས་བྱ། ༈ །འདིར་སམ་ཊ་དཔེ་བཤུས་པ་ནི། ལྷུན་གྲུབ་སྒོ་བརྒྱད་མ་ཤར་གོང་གི་གཞི་སྣང་དེ་རང་བཞིན་གསལ་བའི་རིག་མདངས། ལྷུན་གྲུབ་སྒོ་བརྒྱད་ཤར་དུས་ཐུགས་རྗེའི་རིག་གདངས་ཡིན་ཏེ། སྒོ་བརྒྱད་དུས་འཛིན་ཆ་ཕྲ་མོ་ཤར་ནས་རིག་པའང་ཕྱིར་གསལ་དུ་སོང་བ་རེད། འདིའི་དུས་ཀུན་གཞིའི་རླུང་སེམས་ཆ་ཕྲ་མོ་ཙམ་ཐོག་མར་ཤར་ལ་རིག་ཆ་
ཀུན་གཞིའི་བག་ལ་མ་ཞབས་རིག་མ་རིག་སྟོབས་མཚུངས་སུ་ཡོད་སྐབས་རེད། དེའི་ཕྱིར་ལྷུན་གྲུབ་སྒོ་བརྒྱད་འཁོར་འདས་གྱེས་མདོར་བཤད། དེའི་ཕྱིར་གཞི་སྣང་གི་སྟོད་རིག་མདངས། སྨད་རིག་གདངས། འདི་ཡི་གེ་མ་བལྟས་པར་བྲིས་པས་དཔྱད་དགོས། ཞེས་འདུག ༈ །རྫོགས་ཆེན་སྒོམ་པ་ཤིན་ངེས་པར་རིག་འཛིན་གྱི་རྟེན་མཆོག་འཐོབ་བམ་ཞེ་ན། ཐོད་རྒལ་དུས་སུ་འདི་ནས་མངལ་གྱི་གྲོང་ཁྱེར་རྒྱུན་ཆོད་ཅེས་འབྱུང་བ་རྣམས་ནི་རྣམ་གྲོལ་དབུགས་ཆེན་འབྱིན་པའི་ཞིང་བགྲོད་ཁོ་ནར་མངོན། ཁྲེགས་ཆོད་དུ་གསལ་ཁ་མི་ཆེ་ཡང༌། རིག་པ་སྐུ་གསུམ་དུ་རྩལ་རྫོགས་པའི་རྩལ་དབང་མ་ཐོབ་བར་དུ་ནི་ཐ་མལ་སྣང་ཞེན་གྱི་སྟོབས་འཕྲོག་མི་ནུས་པའམ་ཤུགས་ཟློག་མི་ཐུབ། དེ་མ་ཐུབ་ན་ད་ལྟའི་རྗེས་ཐོབ་དང༌། གཟོད་སྐྱེ་འཆིའི་དུས་ཀྱང་སྣང་ཞེན་དེའི་ལག་རྗེས་ངན་པ་རྣམས་ཁ་གནོན་མི་ནུས་པས་ཅིར་འོང་ཆ་མེད། རྩལ་དབང་ཐོབ་ནས་རིག་པ་གདོད་ནས་རྣམ་དག་གི་བདེན་དོན་མཐོང་ཚེ་ཐ་མལ་སྣང་ཞེན་གྱི་ལག་རྗེས་ངན་པ་ཅི་རིགས་དགག་ཐུབ་པས་སྐྱེ་འཆིའི་སྐྱོན་ཅི་རིགས་མགོ་གནོན་ནུས་སྙམ་ཏེ། ཐུན་མོང་བ་ལྟར་ན་བྱང་སེམས་ཀྱི་བཟོད་པ་ཐོབ་ཚེ་པདྨར་སྐྱེ་བ་དང༌། བསྐྱེད་རིམ་པས་རིག་འཛིན་གྱི་རྟེན་ཁྱད་པར་ཅན་འཐོབ་པ་སོགས་གུང་སྒྲིགས། མདོར་ན་རིག་པ་ངོས་ཟིན་ཙམ་གྱིས་ངོ་བོའི་གནས་ལུགས་མཐོང་བ་མིན། རིག་པ་དེ་ངོ་བོའི་དབྱིངས་
ཐོག་ཏུ་འཁྱོལ་ཐུབ་པ་དགོས། དེ་འཁྱོལ་ཐུབ་ན་སྐྱེ་འཆི་སོགས་ལ་དབང་སྒྱུར་གྱི་ཡོན་ཏན་གྱི་ཆ་ཕྲ་མོ་རེ་དང་པོ་ནས་འཐོབ་པར་སེམས་ཏེ་དཔྱོད། ༈ །ཀུན་གཞིའི་དྲི་མ་གཏན་ལོག་ཏུ་མ་སོང་བར་དུ་རྩལ་དང་ངོ་བོའི་སྤྲོ་སྡུད་རེས་འཇོག་གི་ཆ་ངེས་པར་ཡོད་ལ། དེ་བྱང་དུས་རྩལ་ངོ་བོའི་སྟེང་དུ་རྫོགས་པའམ་རྩལ་དང་ངོ་བོ་གཅིག་ཏུ་སོང་བས་རྩལ་མཆེད་དུས་ངོ་བོ་ལས་གཡོ་ཞིང༌། ངོ་བོའི་སྟེང་དུ་བརྟན་དུས་རྩལ་ཐིམ་ནས་མི་མངོན་པའི་རེས་འཇོག་གཏན་མེད་དེ། མདོར་ན་ཀུན་གཞི་དེ་སྣང་སྟོང་ངོ་བོ་ཐ་དད་དུ་ཞེན་པའི་ཞེན་ཆ་ཞིག་རེད་པས། དེ་ལྷག་མེད་དུ་དག་ཚེ་བདེན་གཉིས་ཅིག་ཆར་དུ་མངོན་པར་རྫོགས་པར་འཚང་རྒྱ་བ་སྟེ། མདོ་རྒྱུད་སྤྱི་དང་ཡང་གུང་འགྲིགས་པས་མཐུན་ལ་ཁྱད་ཆོས་ཆེ་བའོ། །རྩལ་སྣང་ཕྱོགས། ངོ་བོ་སྟོང་ཕྱོགས། སངས་རྒྱས་སའི་མཉམ་བཞག་ཁོ་ན་ལ་འོད་གསལ་གྱི་ཆར་གྱུར་པའི་བྱམས་བརྩེ་མངོན་ཤེས་སོགས་མངོན་གྱུར་དུ་ཡོད་ལུགས་སོ། ༈ །རྩེ་གཅིག་ཚོགས་སྦྱོར་ནས། སྒོམ་མེད་མི་སློབ་ལམ་ཞེས་སྦྱར་བ་ནི་མོས་སྤྱོད་སོ་སྐྱེའི་ལམ་ཁོ་ན་ལ་ལམ་བཞིར་ཕྱེ་བ་འདྲ། སྒོམ་མེད་ཆེན་པོ་ཡང་འཕགས་ལམ་དངོས་ཨེ་ཡིན་དཔྱད་དགོས། གཏམ་ཚོགས་སུ་སྒོམ་ལམ་ཐོབ་ཀྱང་ཚོགས་ལམ་ཆེན་པོའི་རྟགས་ཚད་མེད་པ་ཡོད་གསུངས་པའང་རོ་གཅིག་སྒོམ་ལམ་དུ་བཞག་པ་དེ་རེད་དམ་སྙམ། སྒོམ་མེད་ལ་སླེབས་པ་དང་རྣམ་
སྨིན་རིག་འཛིན་དུ་ཞལ་བཞེས་མཛད་པའང་དེ་འདྲ་ཨེ་ཡིན་སྙམ། སྒོམ་མེད་པ་སངས་རྒྱས་ཀྱི་གྲལ་དུ་སྒྲིགས་ཆོག་པར་གཏམ་ཚོགས་རྔ་མ་ན་སྣང་བའང་རིག་པ་སངས་རྒྱས་སུ་སྒོམ་སྟོབས་ཀྱིས་རྟོགས་པ་བརྟན་པ་རྣམས་འབྲས་བུ་ལམ་བྱེད་ལ་བྱན་ཚུད་དབང་གིས་དེ་ལྟར་ཡིན་ཏེ། ཕྱིར་མི་ལྡོག་པའི་བྱང་སེམས་སངས་རྒྱས་སུ་བསྡུ་བར་སྐྱབས་འགྲོ་བདུན་བཅུ་པར་བཤད་པ་བཞིན་ནོ། །ཐེག་ཆེན་འཕགས་པར་འདོད་ཅིང་འཕགས་པའི་ཡོན་ཏན་བརྒྱ་ཕྲག་བཅུ་གཉིས་སོགས་མེད་པར་སྨྲ་བ་ལ་ནི་ཀུན་མཁྱེན་ཆོས་རྗེས་བཀའ་བཀྱོན་ཆེ་སྟེ་ནམ་མཁའ་ཀློང་ཡངས་སུ་ལྟོས། སྒོམ་མེད་ཆེན་པོར་སླེབས་ནས་སྣང་སེམས་ཁྱབ་གདལ་དུ་འདྲེས། ཕྱོགས་མེད་དུ་གྲོལ་ནས་འཕགས་ལམ་གྱི་དྲོད་ཚད་ཀུན་རྫོབ་སྣང་ཕྱོགས་པ་ཐམས་ཅད་ལའང་དབང་སྒྱུར་རྒྱུ་ཡིན་པར་གསལ། ཨེ་མ་བཀའ་དྲིན་འཁོར་མེད་ཀྱི་ཀུན་མཁྱེན་ཡབ་སྲས། ༈ །རྒྱང་ཞགས་དུས་རྒྱུན་ཡོད་ཀྱང་མ་དག་པའི་ཡུལ་སྣང་རགས་པ་ལ་སྤྱོད་རིང་ལ་སྟོང་གཟུགས་མཐོང་བའི་བྱ་བ་ལ་མི་འཇུག་པ་ནི་བྱ་བ་དེ་གཉིས་ནི་གཅིག་མངོན་དུ་གྱུར་དུས་ཅིག་ཤོས་བག་ལ་ཞ་སྟེ་འགྲོ་བ་ཅིག་ཡིན་པའི་ཕྱིར་ཏེ། དཔེར་ན་སད་རྨི་གཉིས་ཀྱི་སྣང་བ་ལྟ་བུ་སྟེ། འདི་ནི་ལྷུན་གྲུབ་ཀྱི་ཕྱི་རྒྱ་མ་རལ་བར་ལ་ཆོས་ཉིད་བར་དོའི་སྣང་བ་མི་འཆར་བ་སོགས་ཀྱིས་ཤེས་སོ། ༈ །ལམ་མཐོན་པོར་ཆུ་སྒྲོན་ལ་མི་ལྟོས་པར་སྙིང་གའི་ལྷུན་གྲུབ་ཀྱི་རིག་གདངས་
བརྟན་པོར་སད་པའི་དབང་གིས་འཆར་ཏེ། དང་པོར་ཉི་ཟླ་མེ་གསུམ་གྱི་ཟེར་ལ་ལྟོས་ཀྱང༌། ཕྱིས་མི་ལྟོས་པ་ལྟ་བུའོ། །འདི་ནི་ཕྱིས་ལུས་ཀྱི་རྡུལ་ཕྲ་རབ་རེར་ཡང་དབྱིངས་ཐིག་རིག་གསུམ་འཆར་བར་བཤད་པས་སོ། །དེའང༌། མེ་དང་ཟངས་མའི་ཞུ་ཉིད་བཞིན། །ཞེས་སོ། ༈ །ཡང་ཏིག་དུ། དེ་ཕན་ཆད་ཀྱི་སྣང་བ་གང་ཡང་མེད་དོའི་དོན་བཤད་དགོས། དགོངས་པ་དབྱིངས་ལ་གཏད་ན་སྡུད་འགྲོ་བའི་དོན་ནོ། །བར་དོར་གྲོལ་ཞེས་པ་ནི་དེར་བརྟན་པ་ཐོབ་པ་དང་བཙན་ས་ཟིན་པ་ལ་ཡབ་སྲས་ཀྱིས་བཤད་པས་སངས་རྒྱས་པ་མིན་སྙམ། ༈ །རྒྱུད་འདིའི་ལུགས་ལ། འོད་གསལ་གྱི་བཞོན་པ་ཉིད་ལའང་ཁྱབ་བྱེད་སོགས་རླུང་ལྔའི་ཆ་འབྱེད་ཚུལ་ཞིག་ཡོད་དམ་སྙམ་སྟེ་དེའང་གཞི་ལས་གཞི་སྣང་དུ་མ་འཕགས་བར་དུ་སྲོག་འཛིན་ཁོ་ནར་ཟད་ལ། འཕགས་དུས་ནས་རླུང་ལྔར་སྐྱེ་སྟེ། སྲོག་རླུང་ཡན་ལག་བཞི་ལྡན་ཕྱིར་འཕགས་པར་གསུངས་པའི་ཕྱིར་རོ། །དེའང་མི་ཤིགས་པའི་རླུང་རང་ཉིད་རྩལ་ཇེ་རྒྱས་སུ་མཆེད་ནས་སོང་བས། ཡེས་ཤེས་རྒྱ་ཆེ་བ་དང༌། བདེ་གསལ་གྱི་ངར་ཆ་ཤིན་ཏུ་སྨིན་པར་བྱེད་པ་སོགས་བྱེད་ལས་ཀྱི་ནུས་པ་ཐ་དད་སད་པའི་ལྡོག་ཆ་ནས་ཁྱབ་བྱེད་མེ་མཉམ་སོགས་སུ་བཏགས་སམ་སྟེ། རྩལ་དབང་གི་ཁྱབ་བྱེད་སོགས་རླུང་ལྔ་རིག་པར་ཚང་ཚུལ་བཞིན་ནོ།། ༈ །ལུགས་འདིར། །གཙོ་ཆེ་
ཆུང་ལ་ལྟོས་ན། ཙནྡན་གྱི་སྡོང་པོ་དྲི་བཟང་གིས་ཁྱབ་ཀྱང༌། ལྷག་པར་རྐང་ལ་བཟང་བ་ལྟར། འོད་གསལ་དང་རླུང་མི་ཤིགས་པ་སྙིང་ཀའི་རྩ་འཁོར་དུ་གནས་པ་ཡིན་ཀྱང༌། ཀུན་རྟོག་རླུང་བཅས་མཆེད་དུས་སེམས་ཀྱིས་གར་ཁྱབ་ཏུ་རིག་པ་དང༌། ལས་རླུང་གིས་གར་ཁྱབ་ཏུ་ཡེས་ཤེས་ཀྱི་རླུང་གིས་ཏིལ་འབྲུ་སྣུམ་ཁྱབ་ལྟར་ཡོད་པས། དེའི་ཚེ་ཕལ་པའི་ཚུལ་གྱིས་ལུས་ཐམས་ཅད་ཀྱང་མི་ཤིགས་པའི་རླུང་སེམས་ཀྱིས་ཁྱབ་པར་འཕྲོ་མོད། འོན་ཀྱང་རླུང་སེམས་རགས་པས་ཕྲ་བ་ཟིལ་གྱིས་མནན་ནས་དེའི་ངོ་བོ་དང་བྱེད་ལས་གང་ཡང་མི་མངོན་པ་ཡིན་ལ། རྒྱུད་གཞན་གྱི་རྫོགས་རིམ་པའི་སྡུད་རིམ་ལྟར་བྱེད་དུས་ནི། ཚེ་ཡུམ་གྱི་བཅུད་སྔ་མ་བཞིའི་སྐབས་སུའང་ངོ༌། ལུས་ཀྱི་གནས་གཞན་གྱི་རླུང་སེམས་ཕྲ་རགས་དེ་དག་ལྷན་ཅིག་ཏུ་བསྡུས་འགྲོའོ། །མན་ངག་སྡེར་རླུང་དབུ་མར་མི་སྡུད་པར་རང་བཞག་གི་གནད་ཁྱད་པར་ཅན་ཤེས་ནས་བསྐྱང་ན་དེ་དག་ན་གནས་པའི་ལས་རླུང་རྣམས་རང་དེངས་ལ་སོང༌། །ཡེ་ཤེས་ཀྱི་རླུང་རིག་ཤུགས་ཇེ་ཆེར་རྒྱས་ནས་ཡོང་བས་དེ་ལ། ལས་རླུང་ཡེ་ཤེས་ཁམས་སུ་གནས་གྱུར་པ་ཞེས་གསུངས་ཏེ། དང་པོར་ནི་རེ་ཞིག་དང༌། ཕྱིས་ནི་གཏན་དུ་གནས་གྱུར་པའོ། ༈ །ཐོད་རྒལ་གྱི་སྣང་བ་ཁྲེགས་ཆོད་རིག་པའི་བོགས་འདོན་དུ་གསུང་བ་ནི། རིག་པ་རྟོད་ལ་གནོན་པའང་ཡིན་མོད། གཙོ་བོ་ནི་འདི་ཡིན་ནམ་སྟེ།
དང་པོ་རླུང་སེམས་རགས་པ་ཕར་གཞི་ལ་བསྡུས་ཏེ། གཞི་རང་གི་སྟེང་གི་ཤེས་རབ་དང་ཏིང་ངེ་འཛིན་སོགས་ཀྱི་ནུས་པ་གསལ་བར་མ་སད་པའི་དུས་ཤིག་དང༌། ཡེ་ཤེས་ཀྱི་རླུང་ལྔ་འཕགས་པས་དེ་སད་པའི་དུས་ཤིག་སྟེ། འདིའི་འཆི་དུས་ཀྱི་འོད་གསལ་འཆར་རིམ་གཉིས་ཡོད་པ་ལ། གཞི་དང་གཞི་སྣང་ཟེར། དེའི་གནད་ཀྱིས་ཡེས་ཤེས་དང་མཐའ་གྲོལ་ལྟར་ཤར་བ་སོགས་གཞི་སྣང་དུ་བཤད་པར་སྣང༌། དེ་ལྟར་ན་ཐོད་རྒལ་གྱི་སྣང་བ་རྣམས་ནི་དང་པོ་ནས་གཞི་ལ་ཡོད་པའི་ཤེས་རབ་སོགས་ཀྱི་ནུས་པ་དེ་གསལ་བར་སད་པའི་རྟགས་སྣང་ཐུན་མིན་ཡིན་པས་དེ་བཙོན་དུ་ཟིན་ན་རིག་པའི་སྟེང་གི་ཤེས་རབ་བམ་རིག་པ་རང་གི་ཆར་གྱུར་པའི་ཤེས་རབ་སོགས་གསལ་བརྟན་དུ་བྱེད་པ་སྟེ། དེས་ན་གཞི་སྣང་མ་ཤར་གོང་དང༌། ཤར་རྗེས་ཀྱི་རིག་པ་ལ་ནི་ཡོན་ཏན་རྩལ་རྫོགས་ཀྱི་དབང་གིས་དེ་ཁོ་ན་ཉིད་ལ་འཇུག་པའི་སྟོབས་མི་འདྲ་བའི་ཁྱད་ཆེའོ། །འདི་ནི་ཆོས་ཉིད་བར་དོར་གཟུངས་དང་མངོན་ཤེས་སོགས་འཆར་ཚུལ། སེམས་ཚད་ཕེབས་དུས་ཀྱི་ཡོན་ཏན། ཤེས་རབ་རང་བྱུང་སྒྲོན་མ་ལ་རིག་པ་འཇོག་དོན། ཐེག་མཆོག་མཛོད་རིམ་ཁང་ལུང་སྔར་དྲངས། རྩལ་དབང་གི་ཤེས་རབ་ལྔའི་ངོ་སྤྲོད་སོགས་ཀྱིས་ཤེས་སོ། ༈ །ལུགས་འདིའི་འཆི་དུས་ཀྱི་འོད་གསལ་ལ། དང་པོའི་
གཞིའི་སྐབས་ཤིག་དང༌། གཞི་སྣང་གི་སྐབས་ཤིག །གཟུང་འཛིན་རགས་པ་འཆར་བར་རྩོམ་པའི་དབང་གིས་གཞི་སྣང་ཕར་དང་པོའི་གཞི་ལ་ཐིམ་པའི་སྐབས་ཤིག་སྟེ་རིམ་པ་གསུམ་ཡོད་ཀྱང༌། ལམ་དུས་སུ་ཕྱི་མ་འདི་ཆོས་ཉིད་ཟད་པ་དང་སྦྱར་མི་རུང་བ་འདྲ་བས། མཉམ་བཞག་གི་རིག་ངོར་སྣང་ཆ་དེ་དག་ཟད་པའམ་མ་དམིགས་པ་ལ་བྱེད་དེ་དབུ་མའི་སྐབས། གདོད་ནས་ཟད་པས་ཟད་ཅེས་བྱ། །ཞེས་པར་སྤྲོས་པ་དེ་གཏན་མེད་དུ་སོང་བ་མི་དགོས་པ་དང་ཧ་ལམ་ཙམ་འདྲའོ། ༈ །སྒྱུ་ལུས་སྒྲུབ་མཁན་རྣམས་ཀྱིས་ཀྱང་འབྲས་དུས་སུ་འོད་གསལ་གྱི་གཡོ་བའི་ཆ་ཐམས་ཅད་ཟད་སོང་བ་ན། ཟུང་འཇུག་གི་སྐུ་ཟེར་རྒྱུ། འོད་གསལ་གྱི་སྣང་ཆ་ཙམ་ལས་བཞག་དཀའ་ཞིང༌། དུས་འཁོར་ལྟར་རླུང་བཅུ་དབུ་མར་ཞུགས་པའི་རྟགས་སྣང་རྣམས་ཀྱང༌། འོད་གསལ་གྱི་སྟེང་གི་སྣང་བ་སྣ་ཚོགས་སྐྱེད་པའི་ནུས་པ་མ་ལུས་པར་གཉུག་སེམས་ཉིད་ཀྱི་སྟེང་ནས་སྨིན་པའི་སྐུ་ལ་གཞོལ་བས། སྒྱུ་ལུས་ཀྱང་ལུགས་འདིའི་ཡེ་ཤེས་ཀྱི་སྐུ་ལ་གཞོལ་བར་སྣང་ཞིང༌། འདི་དུས་འཁོར་དང་ཆེས་མཚུངས་པས་ཀརྨ་རང་བྱུང་ཞབས། པྲ་ཛྙཱའི་ཞབས་སོགས་ཚད་ལྡན་གྱིས་དེ་གཉིས་ཕྱོགས་སྦྲེལ་ཡོད། བརྗེད་ཐོའི་ནང་ནས་ཤིན་ཏུ་ཁྱད་འཕགས་ཀུན་མཁྱེན་ཆོས་རྗེའི་བསྟན་པ་གཞིར་བཞེངས་བྱེད་ན་མེད་མི་རུང༌། ༈ །ཆོས་ཉིད་ཟད་དུས་རླུང་གི་གཡོ་རྩོལ་ལས་བྱུང་བའི་སྐུ་འོད་ཐིག་ལེ་སོགས་ཀྱི་སྣང་བ་ཐམས་
ཅད་འཛད་ཀྱང༌། རིག་པའི་དབྱིངས་སུ་སྣང་བ་དེ་ཐམས་ཅད་ནང་གསལ་དུ་འཁྱིལ་བའམ། རིག་པ་དེ་སྣང་བ་དེ་ཐམས་ཅད་ཀྱི་འཆར་གཞིར་རྩལ་ལམ་ནུས་པ་རྫོགས་པ་ཡིན་པས། སྔར་གཞི་དུས་ཀྱི་ནང་གསལ་དང་མི་འདྲའོ། །འདིར་ནི་སྣང་ཆ་དེ་དག་ལ་རིག་རྩལ་བྱང་བ་མཐར་སོན་པའི་ཕྱིར་ཏེ། རིག་པ་སྐུར་སྨིན་ཞེས་པའང་མཐར་གཏུགས་ན་འདི་ལ་གཞོལ་ཞིང༌། རིག་པའི་རྩལ་དབང་ཞེས་པའང་འདིར་གཞོལ་ལོ། །དེས་ནང་དབྱིངས་ཆོས་སྐུ་དེ་གདུལ་བྱ་ཇི་ལྟ་བ་བཞིན་དུ་གཟུགས་སྐུ་རབ་འབྱམས་སྟོན་པ་ལ་ཐོགས་པ་མེད་དོ། ༈ །ད་ལྟ་རིག་པ་ལུས་ལ་སྟེ་སྙིང་ནང་ན་གནས་པ་གསོན་པོའི་དུས་ན་གནས་སྐབས་ཀྱི་གཞི་ཞེས་བརྗོད་ཀྱང་དབྱིངས་ནས་འཁོར་བར་འཕགས་ཏེ་གྲོལ་སར་མ་ཕྱིན་སྐབས་ཡིན་པས་གཞི་སྣང་གི་རིག་པར་འདོད་ཅེས་འོད་གསལ་མཛོད་ནས་དང་པོར་ཏེ། དབྱིངས་ཀྱི་གཞི་དང་གནས་སྐབས་ཀྱི་གཞི་ལ་ཁྱད་ཆེ་བར་དེ་ལས་སོ། །འདི་གནས་སྐབས་ཀྱི་གཞི་ཡིན་ལུགས་ནི་ལྷུན་གྲུབ་སྒོ་བརྒྱད་ཀྱི་སྣང་བ་བསྡུས་ནས་གདོད་སྲིད་པ་བར་དོར་འོང་བ་ཡིན་པ་ལ། འདིའང་སྐྱེས་བུ་དེ་བར་དོའི་སེམས་ཚུན་ཆད་ཀྱི་སེམས་རགས་པ་ལ་གནས་སྐབས་ཡིན་པས་གཞི་སྣང་ཞེས་འོད་གསལ་གྱི་རང་སྣང་ཕྱིར་གསལ་དུ་མེད་པར་ནང་གསལ་དུ་བསྡུས་པའི་སྐབས་ཀྱི་འོད་གསལ་ཡིན་པས་སོ། །དོན་དུ་རིག་པ་དེས་དངོས་སུ་
ལྷུན་གྲུབ་ཀྱི་སྣང་བ་ལ་སྤྱོད་མི་ནུས་པས་གཞི་སྣང་གི་རིག་པའི་མཚན་ཉིད་མ་རྫོགས་ཞེས་པའོ། །འོན་ཀྱང་དེ་ལྷུན་གྲུབ་ཀྱི་ཕྱི་རྒྱ་རལ་རྗེས་ཀྱི་རིག་པ་འོད་ཀྱི་ཁང་པ་ན་གནས་དུས་ཡིན་པས་སྤྱིར་ནི་གཞི་སྣང་གི་རིག་པ་ཙམ་ཞིག་ཡིན་ཞེས་པ་སྟེ། འདིས་གཞི་སྣང་གི་རིག་པ་དང་གནས་སྐབས་ཀྱི་གཞི་མི་འགལ་བ་དང༌། གཞི་སྣང་གི་རིག་པ་ཡིན་ན་དངོས་སུ་སྟོང་གཟུགས་ཀྱི་སྣང་བ་ཅན་ཡིན་མི་དགོས་པར་བསྟན་ནོ། ༈ །གཞི་ལ་འཆི་དུས་སུ་གཞི་སྣང་ལྷུན་གྲུབ་ཀྱི་སྣང་བ་འཆར་ལུགས་དང༌། ལམ་འདི་པ་འཆི་དུས་ལྷུན་གྲུབ་ཀྱི་བསྲེ་བའི་སྐབས་ཀྱི་གཞི་སྣང་འཆར་ཚུལ་གཉིས་ལས། སྔ་མ་ནི་གཞི་དང་གཞི་སྣང་གི་ཐད་དུ་བཤད་དེ། གཞི་ལམ་འབྲས་གསུམ་གྱི་དང་པོའི་ཐད་དུའོ། །ཕྱི་མ་ནི་དབང་འབྲིང་བར་དོར་གྲོལ་བའི་ཆོས་ཉིད་བར་དོའི་ཐད་དུ་བཤད་དེ། དེར་བདེན་པ་མཐོང་བ་འཆི་དུས་མ་གཏོགས་ཐ་མལ་པ་འཆི་དུས་ཀྱི་འཆར་ཚུལ་ལྟར་མ་བཤད་པའང་དེའི་རྒྱུ་མཚན་གྱིས་ཡིན་ལ། འོད་གསལ་མཛོད་གནས་དང་པོར། རིག་པ་གཞི་ལས་འཕགས་ཏེ་གཞི་སྣང་དུ་ཤར་བའི་དུས་དང༌། ད་ལྟ་ལུས་ལ་གནས་དུས་དང༌། ཆོས་ཉིད་བར་དོའི་དུས་ན་འོད་ཀྱི་ཁང་པ་ན་གནས་ཏེ། རང་རིག་གཞི་ནས་ནི་འཕགས། མཐར་ཐུག་གི་ས་ནི་མ་ཟིན་པའི་བར་དེར་གཞི་སྣང་ལ་གནས་པས། མར་མེ་རང་འོད་ཀྱི་དབུས་ན་འདུག་པའམ། ཤེལ་ཉི་ཟེར་དང་ཕྲད་པའི་སྣང་བ་བཞིན་ནོ། །ཞེས་གཞི་སྣང་དང༌། ཆོས་ཉིད་བར་དོ་ཐ་དད་དུ་ཕྱེ་ནས་
གསུངས་པའང་དེ་ལ་དགོངས་སོ། །ལུང་ཕྱི་མ་འདི་ལ་ད་དུང་དཔྱད་གཞི་ཆེ་བས་ལྷག་ཆད་བཅོས་བསྒྱུར་ཡེ་མ་སོང་བར་དཔེ་བཤུ་བགྱིས་པ་ཁོ་ནའོ། ༈ །གཞི་སྣང་གི་རིག་པ་དེ་སྤྱིར་གཞི་ལམ་འབྲས་གསུམ་གྱི་ནང་གི་གཞི་རྒྱུད་ཡིན་ཡང༌། གཞི་རྒྱུད་དེ་ལ་གཞི་དང་གཞི་སྣང་གཉིས་ཀྱི་ཟླས་ཕྱེ་བའི་གཞི་མིན་ཟེར་རམ་དཔྱད། ༈ །ཐེག་མཆོག་མཛོད་དུ་སྒྲོན་བཞིའི་སྐབས། དབྱིངས་སྒྲོན་རིག་པ་ལུག་རྒྱུད་གོ་རར་འཛུད་པའི་ར་བ་སྟེ། འདིར་ལུག་རྒྱུད་བཙུད་ནས་མི་གཡོ་བར་བསྒོམ་ན་ཟང་ཐལ་རང་དལ་ཆེན་པོའི་བསམ་གཏན་འབེབས་གསུངས། དབྱིངས་ཞེས་པ་སྣང་རིག་གསལ་བར་བྱེད་པའི་དོན་ཡིན་གསུང༌། འདིས་ཐིག་ལེའི་དྭངས་མ་སྡུད་གསུངས་ཏེ་སྟོང་སྒྲོན་ནོ། །ཐིག་ལེའི་མེ་ཏོག་མཐོང་བས་སྣང་བ་སྤེལ་ཞེའོ། །དབྱིངས་སྒྲོན་གྱིས་རིག་པ་མཁའ་ལ་རྗེན་ཅེར་དུ་བཏོན་ནས་གསལ་བར་བྱེད་གསུང༌། སྣང་བ་འོད། སྨིན་པ་ཐིག་ལེ། རྫོགས་པ་སྐུ་ཞེའོ། །དབྱིངས་རྟགས་འོད། ཡེ་ཤེས་རྟགས་ཐིག་ལེ། རིག་པའི་རྟགས་ལུ་གུ་རྒྱུད་ཅེས་སྨིན་གཏེར་རོ། །དབྱིངས་ཐིག་གི་སྒྲོན་མ་གཉིས་རྡོ་རྗེའི་རྫོང་ཆེན་སྐུ་དང་ཡེ་ཤེས་ཀྱི་འབྱུང་གནས་ཡིན་ཞེས་ཏེ། གཟུང་འཛིན་གྱི་དགྲས་མི་བརྫི་མི་ཞེའམ་དཔྱད། ཀོ་མོའི་ཆུ་ལ་རྡོ་བོར་ལྟ་བུ་ཞེས་པ་ཟླུམ་པོ་འལ་འོལ། ངོ་བོའི་རྟགས་སུ་སྐུ་ཞེས་གསུངས་པ་དང༌། ཤེས་རབ་སྐུར་སྨིན་ཞེས་པ་དང༌། ཤེས་
རབ་ཐུགས་རྗེའི་རིག་པར་བཤད་པ་བསྒྲིགས་ལ་དོགས་སྤོང་གལ་ཆེ། དབྱིངས་ཐིག་རིག་གསུམ་ཞིང་སྐུ་ཕོ་བྲང་དུ་མཁའ་འགྲོ་ཡང་ཏིག་ལས་སོ། །དབྱིངས་རིག་གི་སྒྲོན་མ་གཉིས་སྟོང་སྒྲོན་ལས་བྱུང་གསུངས། སྒྲོན་མ་བཞི་ཀ་ཡེ་ཤེས་ཀྱི་སྣང་བ་ཞེས་ལས་རླུང་དང་རྣམ་རྟོག་དག་པའི་མཐུས་རིག་པ་རང་སོ་ཟིན་པ་ལས་འོང་དགོས་ཏེ། རླུང་རིག་དལ་བ་གནད་དུ་བཤད་པ་དང༌། ཉམས་གོང་འཕེལ་གྱི་སྣང་བ་རྣམས་སྔོན་འགྲོའི་དུས་རྟོག་པ་བསླང་བ་དེ་རྣམས་ཟད་པ་ལས་བྱུང་གསུངས་པ་གོ་དགོས། ཤེར་སྒྲོན་ནི་སྒྲོན་མའི་སྣང་བ་ཐམས་ཅད་རང་སྣང་ཟང་ཐལ་དུ་འཆར་བྱེད་ཡིན་ཏེ། དབྱིངས་རིག་གི་སྣང་བ་གཟིར་བས་རིག་པ་བྱན་ཚུད་དུས་ཀུན་རྟོག་གི་ཡིད་མེད་ཀྱང་ཤེས་རབ་ཡོད་པས་སྣང་ཤེས་ཐམས་ཅད་རང་བཞིན་མེད་པ་དང་རིག་པའི་ཡོ་ལང་དུ་རྟོགས་པའི་མཐུ་འཐོབ། ལམ་དུས་དབྱིངས་རིག་ཞིང་སྐུར་སྨིན་པ་དང༌། མཐར་ལྷུན་གྲུབ་ཀྱི་སྣང་ཆ་ནང་དབྱིངས་སུ་ཐིམ་པ་ཐམས་ཅད་ཤེར་སྒྲོན་གྱི་ཆེ་བར་གསུངས། རུ་ཤན་ཕྱི་ལྟར་དབྱེ་བ་ནི་རྟོག་པ་སྣ་ཚོགས་མངོན་དུ་སློང་བ་དང༌། དེ་ཐམས་ཅད་གཟའ་གཏད་མེད་པར་ཁྲོལ་ཚགས་བཞིན་གཏོང་བའི་ཆེད་དེ། དེ་ལྟར་བྱས་ནས་དངོས་གཞི་སྒོམ་དུས་གཟུང་འཛིན་རང་གྲོལ་དུ་འགྲོ་བ་ཚེགས་མེད་དོ། །འདིར་རྨི་ལམ་སྦུབས་འཇུག་གི་ལུང་དྲན་དགོས། ༈ །བི་མ་སྙིང་ཏིག་ཏུ། དབྱིངས་ཀྱི་ནང་དུ་བཅུག་ནས་བསྒོམ་པས་ལུག་རྒྱུད་གཟི་མདངས་འཐོན་གསུང༌། དེར་དབྱིངས་
རིག་གི་སྒྲོན་མ་གཉིས་ཐིག་སྒྲོན་གྱི་གདངས་ཡིན་གསུངས། ༈ །མི་འགུལ་བ་གསུམ་སོགས་ཀྱི་གོ་དོན་ཁྱད་འཕགས་ཐེག་མཛོད་སྒྲོན་བཞིའི་རིམ་ཁང་གི་སྒྲོན་བཞིའི་སྤྱིར་བཤད་ཐད་ཡོད། དང་པོར་འཁྲུལ་དུས་གཞི་སྣང་འོད་ལྔའི་རྩལ་ལས་མཆེད་པས། ད་འཁྲུལ་བའི་སྣང་ཞེན་དུ་བཟློག་དུས་ཀྱང་དང་པོའི་མཆེད་གཞི་ལྷུན་གྲུབ་ཀྱི་སྣང་བའི་སྟེང་དུ་བསྐྱལ་ནས་ཤེར་སྒྲོན་རྩལ་སྦྱང་ན་རིག་པ་བཙན་ས་ཟིན་སླ་བས་ཐོད་རྒལ་ཟབ་པ་སྟེ། ཡལ་གའི་སྟེང་ནས་རྩ་བ་ཆོད་དཀའ། རྩ་བ་ཕྱུངས་ན་ཡལ་ག་རང་སྐམ་བཞིན། འདི་མཁའ་འགྲོ་ཡང་ཏིག་ཏུ་ཡོད། །འདི་ལྟར་བྱས་ཚེ་ཀུན་རྟོག་དང་དབང་ཤེས་ཀྱི་ཡུལ་སྣང་དང་སེམས་རགས་པ་བསྐྱུར་ནས་དང་པོའི་གཞི་སྣང་གི་སྟེང་དུ་མཆོངས་ཏེ་དེ་ཉིད་ལ་སྦྱོར་བས་ཐོད་རྒལ་ཟེར་ཏེ་གནད་ཟབ། འཆི་དུས་དང་ལམ་དུས་ཀྱི་ལྷུན་གྲུབ་ཀྱི་གཞི་སྣང་གང་ཤར་ཡང་རིག་པ་རང་མལ་ནས་མ་གཡོས་པར་འཆར་ལུགས་མེད་དེ། སྲོག་རླུང་ཡན་ལག་བཞི་པས་རིག་པ་བསྐྱོད་པའམ་སྤུར་བའི་རང་གདངས་སུ་གསུངས་པས་སོ། །དེ་འདྲའི་སྣང་བའི་སྟེང་ནས་ངེས་པར་རྩལ་སྦྱང་དགོས་ཏེ། གཞན་དུ་སྣང་སྟོང་གི་ཕྱོགས་གཉིས་རྩལ་རྫོགས་མི་ཐུབ། མཐར་ཟད་དགོས་ཏེ། རིག་པ་རང་མལ་ནས་གཡོ་བའི་ཆ་མ་ཟད་པའི་སངས་རྒྱས་མི་སྲིད་པའི་ཕྱིར། འོན་ཀྱང་རང་མལ་ནས་མ་གཡོས་བཞིན་དུ་སྐུ་གསུང་ཐུགས་མི་ཟད་རྒྱན་འཁོར་བཀོད་དུས་སངས་རྒྱས་པའོ། །གཡོ་བའི་
རྒྱུས་བྱུང་གི་སྣང་ཆ་ཟད། མ་གཡོས་པའི་སྣང་ཆ་མ་བཀོད་པར་དེར་སྣང་མེད་ཀྱི་སྐབས་ཤིག་ཡོད་འདྲ་བས་དབང་གཉིས་རྡོར་ཏིང་རྒྱུན་མཐར་བཞག་གམ་དཔྱད། དུས་འཁོར་དུ་ཤེས་པ་ཡུལ་ལ་འཕོ་བའི་ཆ་ཟད་དུས་སངས་རྒྱས་གསུངས་པ་འདིར་ཡུལ་སྣང་འཆར་དུས་རིག་པ་མལ་ནས་གཡོ་དགོས་པའི་ཆ་ཟད་དུས་སངས་རྒྱས་སུ་གསུངས་པ་ཆེས་མཐུན་པར་གོ། ༈ །།མཁས་པ་མི་བཞིའི་ཐུགས་བཅུད་རྫོང་འཕྲང་གི་བརྗེད་བྱང་རྟོགས་དཀའ་འཕྲང་སྒྲོལ། ཀུན་བཟང་ཆོས་རྗེ་བླ་མ་ལ་ཕྱག་འཚལ་ལོ། །རྫོང་གསུམ། འཕྲང་གསུམ་ཡོད་པ་ལས། རྫོང་དང་པོ་ནི། འཁོར་འདས་ཀྱི་སྣང་བ་ཐམས་ཅད་ཀྱི་རྩ་བ་རིག་པ་བྱང་ཆུབ་ཀྱི་སེམས་སུ་གཏན་ལ་འབེབས་པ་སྟེ། འདི་ལ་ཀུན་གཞི་གནད་ཀྱི་སྟོང་ཐུན་ཟེར། དེའང་སྒྱུ་འཕྲུལ་ལས། འཁོར་བའི་ཆོས་ཐམས་ཅད་ནི་སེམས་རང་སྣང་སྟེ། སེམས་ནི་རིག་པའི་རྩལ་ཙམ་དུ་ཟད་པ་དང༌། འདས་པའི་ཆོས་ཐམས་ཅད་ནི་ཡེ་ཤེས་རང་སྣང་སྟེ། ཡེ་ཤེས་ནི་རིག་པ་དེ་མ་རིག་པའི་བསླད་པ་དང་བྲལ་བ་ཉིད་ལ་བྱེད་པར་གསུངས་པ་བཞིན་ཤེས་པར་བྱའོ། །ཀུན་གཞི་རྒྱུ་རྒྱུད་མ་ཤེས་པར་བདེ་སྡུག་ལ་བླང་དོར་རེ་བ་ནི་གཟུགས་བརྙན་ལ་མགོ་རྨོངས་པ་ལྟ་བུ་དང༌། གཞི་ཐོག་ཏུ་བཙན་ས་འཛིན་པ་ནི་བྱད་བཞིན་ལ་དམར་འཇུས་བྱེད་པ་ལྟ་བུའི་ཁྱད་བཞེད་དོ། །རྫོང་གཉིས་པ། གཞི་རྒྱུད་གཏན་ལ་ཕེབས་པའི་དགོས་པ་གཞི་ཐོག་དེ་ཀ་ནས་འཚང་རྒྱ་
དགོས་ཤིང༌། དེ་ལ་རིག་པ་དེ་གློ་བུར་གྱི་འཁྲུལ་པས་བསླད་པའི་དབང་དུ་མ་བྱས་ན་ངོ་བོའི་དེ་ཉིད་གདོད་ནས་སྐུ་གསུམ་འབའ་ཞིག་ཏུ་བཞུགས་ཚུལ་ལེགས་པར་རྟོགས་པའི་སྒོ་ནས་འབྲས་བུ་སངས་རྒྱས་ཀྱི་ས་ཐམས་ཅད་རིག་པའི་ཐོག་ཏུ་གཏན་ལ་ཕེབས་པ་ཞིག་དགོས་ཏེ། འདི་ལ་འབྲས་བུ་སྐུ་གསུམ་གཏན་འབེབས་ཟེར། རྫོང་གསུམ་པ། དེ་ལྟར་རང་བཞིན་གཞིའི་སྐུ་གསུམ་ངོ་འཕྲོད་པ་དེ་ཉིད་འཁྲུལ་བའི་སྣང་ཞེན་གྱིས་མི་འཕྲོགས་པའི་ཆེད་དུ། སྣང་བ་སེམས་སུ་ཤེས་པས་གཟུང་ཡུལ་གྱི་འཁྲུལ་བ་རྩད་གཅད། སེམས་སྟོང་པར་ཤེས་པས་འཛིན་སེམས་ཀྱི་འཁྲུལ་བ་རྩད་གཅད། སྟོང་བ་རིག་པ་དང་རིག་པ་སྐུ་གསུམ་དུ་ཤེས་པས་གཟུང་འཛིན་གཉིས་ཀའི་འཁྲུལ་བ་རྩད་གཅད་དེ། འདིར་སེམས་སྟོང་པ་ཞེས་པའི་སེམས་ཀྱི་ནང་དུ་མ་རིག་པའང་རིལ་ཚང་བས། །མ་རིག་པ་ཉིད་ཡེ་ཤེས་གསལ། །ཞེས་ཀྱང་བསྟན་པར་འགྱུར་རོ། །མདོར་ན་ཡུལ་སེམས་ཐམས་ཅད་ཀྱི་སྟེང་དུ་རྫོང་གོང་མ་གཉིས་རྩལ་སྦྱངས་ནས་དེ་ཐམས་ཅད་ལ་ཉམ་ང་མེད་པར་བྱེད་པ་སྟེ། འདི་ལ་མ་རིག་སྦུབས་འབྱེད་ཅེས་ཟེར། དེ་དག་གི་ཆོས་ཐམས་ཅད་ཡེ་སངས་རྒྱས་པར་རྟོགས་པའི་ལྟ་བའི་སྟེང་ན་དགྲ་གསུམ་བདུད་བཞི་གཡང་ས་དྲུག་གཅོད་པར་བྱེད་པ་སྟེ། ལྟ་བའི་རྫོང་ཟེར་བའི་རྒྱུ་མཚན་ཡང༌། འདིས་རྣལ་འབྱོར་པ་རྣམས་དགྲ་གསུམ་བདུད་བཞི་སོགས་ལ་མི་འཇིགས་པར་བྱེད་པའོ། །ལྟ་བའི་རྫོང་དེའང་གོ་ཡུལ་ཙམ་གྱིས་མི་ཆོག་སྟེ། སྒོམ་པའི་འཕྲང་ཞེས་པ་ཡེང་འཁྲུལ་གྱི་དགྲ་མི་ཐར་བའི་ཏིང་ངེ་འཛིན་
བྲག་རོང་བགྲོད་དཀའ་ལྟ་བུའི་སྟེང་དུ་ཕུབ་ན། གདོད་མི་འཕྲོགས་པའམ་ས་ཟིན་པར་འགྱུར་བ་ཡིན་ནོ། །ལྟ་བའི་རྫོང་དུ་འགྲོ་བ་ལ་སྒོམ་པའི་འཕྲང་བགྲོད་དགོས་ཞེས་པའང་རྫོང་བཙན་པོ་ལྟ་བུའི་ལྟ་བར་སླེབས་པ་ལ། སྒོམ་པའི་འཕྲང་བརྒྱུད་ནས་ཕྱིན་དགོས་ཞེས་པ་ཡིན་གྱི། ལྟ་བ་ཙམ་རྟོགས་པ་ལ་མིན་ནོ། །འདི་ནི་སྤྱི་སྐད་ལ་ལྷག་མཐོང་གི་རྟེན་དུ་ཞི་གནས་དགོས་པ་དང་གནད་འདྲའོ། །འཕྲང་དང་པོ་བསམ་གཏན་གཅིག་པ་སྒོམ་གྱི་མན་ངག་ཅེས། ལྷར་སྣང་གསལ་བརྟན་གྱི་ཚད་ལ་ཕེབས་པར་བྱས་ནས་ལྷའི་དེ་ཉིད་སྒོམ་པའི་གཞི་འདིང་བ་སྟེ། འདི་ལ་འཕྲང་རྫོང་ཐོག་ཏུ་སྐྱེལ་བ་ཟེར། འཕྲང་གཉིས་པ་བསམ་གཏན་ཉམས་ཀྱི་ཡིག་ཆུང་ཞེས་བྱ་སྟེ། གསལ་བརྟན་ཐོབ་པའི་ལྷའི་དལ་དེ་ཐམས་ཅད་རིག་པ་བྱང་སེམས་ཁོ་ནའི་ཡོ་ལང་དུ་ཤེས་པའི་ངང་ནས་ལྷ་དང་རིག་པ་བསྲེ་བའི་ཚུལ་གྱིས་རིག་ཐོག་ཏུ་མཉམ་པར་འཇོག་པ་ལ་བསླབ་པས། རིག་པ་ཉིད་སྐུ་གསུམ་དུ་རྫོགས་པའི་ཉམས་སམ་མྱོང་བ་བརྟན་པོ་རྙེད་དེ། ལྷ་ལ་གསལ་བརྟན་ཅི་ཙམ་འོང་བའི་ཚོད་དུ་ལྷའི་དེ་ཉིད་ལའང་གསལ་བརྟན་ཐོབ་པར་བྱའོ། །དེས་ན་འཕྲང་དང་པོ་ཏིང་ངེ་འཛིན་དང༌། གཉིས་པ་འདི་ཤེས་རབ་ཀྱི་མཐུ་སྒྲུབ་ལུགས་ཀྱིས་བཞག་པ་འདྲ་ཞིག་བཤད། འདི་ལ་ནི་རྫོང་འཕྲང་ཐོག་ཏུ་ཕུབ་པ་ཞེས་བྱའོ། །དེ་ནས་འཕྲང་གསུམ་པ་བསླབ་མཐའ་སྦྱོང་བ་ཞེས་པ། འཕྲང་སྔ་མ་གཉིས་ཀྱི་སྐབས་ཀྱི་ཟབ་
གསལ་གཉིས་མེད་ཀྱི་དགོངས་པ་དེ་ཉིད་འགྲོ་དྲུག་གི་ཡུལ་སྣང་རབ་འབྱམས་ཀྱི་སྟེང་དུ་རྩལ་སྦྱངས་ནས་ཅིར་སྣང་གང་ཤར་ཐམས་ཅད་དག་མཉམ་གྱི་འཁོར་ལོར་དབང་སྒྱུར་བར་བྱེད་པའོ། །དེའང་སྔར་ཏིང་ངེ་འཛིན་གྱིས་སྒོམ་པའི་སྣང་བ་ལ་ད་ལྟ་མདུན་གྱི་སྣང་བ་འདི་དག་དང་ཁྱད་མེད་པ་ལྟ་བུའི་གསལ་བརྟན་ལས་སུ་རུང་ཡོད་པའི་གནད་ཀྱིས། སྐབས་འདིར་དམྱལ་བ་ནས་ལྷའི་བར་གྱི་གནས་ལུས་སོགས་གང་དམིགས་ཀྱང་མདུན་གྱི་སྣང་བ་ལྟ་བུའི་གསལ་བརྟན་ཚེགས་མེད་དུ་འབྱུང་ལ། དེ་ཀའི་སྟེང་ནས་སྣང་བ་དེ་སེམས། སེམས་དེ་སྟོང་པ། སྟོང་པ་རིག་པ། རིག་པ་སྐུ་གསུམ་དུ་འཆར་བ་ལ་སྦྱང་བས་ལྷ་དང་ལྷའི་དེ་ཉིད་ཀྱི་རྩལ་ཁ་ཕྱོགས་མེད་དུ་རྒྱས་ཏེ། དགྲ་གསུམ་བདུད་བཞི་གཡང་ས་དྲུག་ཐམས་ཅད་ཆོད་ནས། དེ་དག་ལ་འཇིགས་པ་མེད་པའི་གདེང་ཐོབ་པ་ཡིན་ནོ། །དེ་ལྟར་ན་རྫོང་ཕྱུག་པོའི་བང་མཛོད་དང་འདྲ། །འཕྲང་དེའི་ལྡེའུ་མིག་དང་འདྲ། རགས་འཕྲང་ལ་ལས་ཞེས་ཡང་ཡང་གསུངས་ཏེ། རྫོང་ནི་བསྒོམ་བྱའམ་འཇུག་ཡུལ་དང༌། འཕྲང་ནི་སྒོམ་བྱེད་དམ་འཇུག་བྱེད་དུ་བསྟན་པ་སྒྱུ་འཕྲུལ་བའི་ཤེས་འཇུག་གི་མཚན་ཉིད་གཉིས་དང་ཚུལ་འདྲ་བ་ཡིན་ནོ། །རྫོང་འཕྲང་འདིའི་རྫོགས་རིམ་གྱི་འགྲོས་ནི་རྫོགས་ཆེན་སེམས་ཕྱོགས་ཁོ་ནར་སྣང་ཞིང༌། རིག་པ་རང་ཤར་གྱི་མན་ངག་ལས། སྟོང་གཟུགས་འབྲི་གུ་ཏའི་ལམ་ནས་འཆར་
བའི་མན་ངག་ཀྱང་བཤད་པ་ལྟར། འཕྲང་གཉིས་པ་འདིའང་འཕྲང་དང་པོར་ལྷ་སྔགས་ཀྱི་རྣལ་འབྱོར་གཉིས་བརྟན་པ་དེ་ལ་གཞི་བྱས་ཏེ། ཐུགས་འོད་གསལ་དེ་ཁོ་ན་ཉིད་ཀྱི་རྣལ་འབྱོར་རྫོགས་ཆེན་ཁྲེགས་ཆོད་ཀྱི་བཞག་ཐབས་ལྟར་སྐྱོང་བ་རང་ལ་བཞེད་དམ་སྙམ་སྟེ། བཤད་པའི་རྣམ་གྲངས་གཞན་བྱས་ནའང་ཆོག་ཙམ་སྣང་བས་ཞིབ་ཏུ་དཔྱད་པར་བྱའོ། །གཞུང་འདིར་ཁམས་གསུམ་ལས་རྣམ་པར་རྒྱལ་བའི་དཔའ་བོའི་རྒྱལ་སྲིད་སྒྲུབ་པའི་མན་ངག །ས་བཙན་སར་རྫོང་བཙན་པོ་བཟུང་ནས་ཡུལ་ཁམས་ལ་དབང་སྒྱུར་བའི་ཚུལ་དུ་བསྟན་པ་ལས། ཡུལ་ཁམས་དབང་དུ་བསྡུ་བ་ལྟ་བུ་དངོས་ནི་སྲོག་གི་གདམས་པ་གསུམ་སྟེ། དང་པོ་སྲོག་གི་ཐ་རམ་ཞེས་པ་སྲོག་གཏན་ལ་འབེབས་པ་ནི། འཁོར་ལོའི་རིགས་ཀྱི་ཨོཾཿདང༌། རྡོ་རྗེའི་ཧཱུྃཿསོགས་ཡེ་ཤེས་པའི་དང༌། གཤིན་རྗེའི་ཡཿདང༌། མ་མོའི་མཿཡིག་སོགས་འཇིག་རྟེན་པའི་སྲོག་ཡིག་དང༌། དེ་དག་གི་མིང་སྔགས་རྣམས་ཀྱང་སྲོག་ཏུ་ཤེས་པར་བྱའོ། །འདིའི་གནད་རྣམས་གཞན་དུ་ཤེས། གཉིས་པ་ཐ་རམ་འབྱེད་པའི་ལྡེ་མིག་ཅེས་སྲོག་འཕྲོགས་ཐབས་ཀྱི་སྐོར་ལ། སྲོག་འདྲེན་གྱི་དམིགས་གནད་དང་ལྡན་པར་སྔགས་བཟླས་པས་ལྷ་སྲིན་གནས་ནས་དགུག་པ་སྔགས་ཀྱིས་འཕྲོགས་ཚུལ། ཡེ་ཤེས་ལྷ་དང་བཀའ་སྡོད་ཀྱི་སྐུ་གསལ་བར་དམིགས་ནས་མཐོང་ཁོལ་མངོན་དུ་བྱ་བ་ཏིང་འཛིན་གྱིས་འཕྲོགས་ཚུལ།
ལྷ་འདྲེའི་སྣང་ཆ་རང་སེམས་སྟོང་གསལ་གྱི་ཆོ་འཕྲུལ་དུ་ཤེས་པས་དབང་དུ་བྱ་བ་ལྟ་བས་འཕྲོགས་ཚུལ་ཏེ་གསུམ་ཡོད། སྔགས་ཀྱིས་འཕྲོགས་སྐབས། བསྙེན་དུས་ཉེར་མ་བཏུབ་ན་རེངས་པ་ཁུགས་སུ་གཞུག་པ། རྦད་དུ་འགྲོར་མ་བཏུབ་ན་འཁྱིལ་བ་ལམ་དུ་གཞུག་པ། བསད་དུས་ལས་མ་འགྲུབ་ན་ལོག་རྡུགས་མཐའ་ལ་གཏད་པ་ཞེས་གསུངས་པ་རྣམས་ནི་ཉང་གི་གཏེར་ཁྱིམ་སོགས་ལྟར་བྱ། ལར་བླ་མ་མཉེས་ན་དམ་ཅན་མ་བསྒྲུབ་ཀྱང་འདུ། ཡི་དམ་གྱི་བསྙེན་པ་ཐེམ་ན་ཕྲིན་ལས་མ་བཅོལ་ཡང་བྱེད་པར་གསུངས་པས་བླ་མ་དང་ཡེ་ཤེས་ལྷ་ལ་དབང་ཐོབ་པར་བྱ་བ་ནི་བཀའ་སྡོད་ཀྱི་སྲོག་ཐོབ་པའི་མན་ངག་ཆེན་པོའོ། །གསུམ་པ་མཚན་བསྒྱུར་བ་ནི། ལྷ་འདྲེ་ཆུང་ངུ་ཞིག་གི་སྲོག་ཐོབ་ཀྱང་དེ་ལས་བྱིན་རླབས་དང་དངོས་གྲུབ་ཆེ་ཞིང་མང་བ་འབྱུང་བའི་ཐབས་མཁས་ཀྱི་གནད་ནི། སེམས་ཅན་གྱི་སྲོག་སངས་རྒྱས་སུ་མཚན་བསྒྱུར་ནས་སྒྲུབ་པ་ཡིན་ཏེ། བདག་ཉིད་ལྷར་སྒོམ་པའང་སེམས་ཅན་གྱི་སྲོག་སངས་རྒྱས་སུ་མཚན་སྒྱུར་བ་རང་ཡིན་ནོ། །མཆན། སངས་རྒྱས་ཀྱི་ཡེ་ཤེས་ཀྱིས་མ་ཁྱབ་པའི་ཆོས་ཀྱི་དབྱིངས་དང༌། ཆོས་དབྱིངས་ཀྱིས་མ་ཁྱབ་པའི་ལྷ་འདྲེ་གང་ཡང་མེད་པས། གང་དང་གང་ལ་སངས་རྒྱས་སུ་དམིགས་པ་དེ་དང་དེ་ནས་རྒྱལ་བ་དང་ཆོས་ཀྱི་དབྱིངས་ཀྱི་བྱིན་རླབས་རྡོལ་ཏེ་འོང་བ་ཡིན་ནོ། །དེར་ཡང་མ་ཟད་ཕན་བྱེད་ཀྱི་ལྷ་གནོད་པའི་
འདྲེར་མཚན་བསྒྱུར་ནས་དགྲ་བགེགས་ཚར་གཅད་པ་དང༌། དེ་ལས་བཟློག་སྟེ་མཚན་བསྒྱུར་ནས་ཕན་འདོགས་པ་མང་དུ་བཤད་དོ། །མདོར་ན་འཇིག་རྟེན་དྲེགས་པའི་སྲོག་འཕྲོགས་པ་ལའང་སྲོག་སྡོམ་གཟེར་བཞི་རང་མེད་དུ་མི་རུང་སྟེ། སྔགས་ཀྱི་གཟེར་མ་ཐེབས་ན་རང་རྒྱུད་པ་གནས་ནས་མི་ཁུག །ཏིང་ངེ་འཛིན་གྱི་གཟེར་མ་ཐེབས་ན་གཟུགས་དངོས་སུ་མི་མཐོང༌། དགོངས་པའི་གཟེར་མ་ཐེབས་ན་གྲུབ་ཀྱང་ཀོ་ལོང་དང་བར་ཆད་མང་ཞིང་དངོས་གྲུབ་ཀྱི་ཚན་ཆུང༌། འཕྲོ་འདུའི་གཟེར་མ་ཐེབས་ན་གང་འདོད་ཀྱི་ཕྲིན་ལས་ལ་སྦྱར་དུ་མེད་པར་གསུངས་སོ། །དེ་ལྟར་རྫོང་འཕྲང་སྲོགས་གསུམ་གྱི་གནད་འདི་ལ་ལེགས་པར་སྦྱངས་ན་རྒྱལ་བའི་བསྟན་པ་སྲུང་བ་དང༌། བསྟན་པའི་དོན་བྱ་བ་ལ་རྡོ་རྗེའི་རྣམ་པར་ཐར་པའི་དབང་དང་ལྡན་པ་དཔལ་ཕྱག་ན་རྡོ་རྗེ་ལྟ་བུར་གྱུར་ནས་དོན་གཉིས་ཀྱི་དགའ་སྟོན་རྒྱས་པར་འགྱུར་བ་ཡིན་ནོ། །ཞེས་པའང་རྡོ་རྗེའི་མིང་ཅན་གྱིས་ཐོར་བཏབ་པ་དགེ། ༈ །།མན་ངག་ཟབ་མོ་རྡོ་རྗེའི་མཚོན་ཆ་ཞེས་བྱ་བ་བཞུགས་སོ། །བླ་མ་དང་དབྱེར་མེད་པའི་རྒྱལ་བ་ཚེ་དཔག་ཏུ་མེད་པ་ལ་ཕྱག་འཚལ་ལོ། །གྲུབ་ཆེན་བི་མ་ལ་དང༌། ཨོ་རྒྱན་རིན་པོ་ཆེའི་བཀའ་རྒྱུད་ཆེ་བ་རྣམས་སུ་གྲགས་ཆེ་བའི་རྫོགས་རིམ་ནི་རྫོགས་ཆེན་མན་ངག་སྡེའི་ལམ་སྲོལ་དུ་སྣང་ལ། དེ་ལའང་སྐོར་བཞི་ལས་ཟབ་རྒྱ་ཆེའི་མན་ངག་ཡོངས་སུ་རྫོགས་པ་ནི་ཡང་
གསང་སྙིང་ཐིག་ཁོ་ན་ཡིན་པར་གྲགས་ཏེ། གྲགས་པ་ལྟར་སྣང་ངོ༌། །དེའི་ལུགས་ཡིན་ཟེར་ནས་ཆོས་སྐད་འདྲ་མིན་དུ་མ་སྨྲ་མཁན་མང་དུ་འདུག་ཀྱང༌། གཟུར་གནས་བློ་གྲོས་དང་ལྡན་པ་དང༌། བློ་ལྡན་གཟུ་བོར་གནས་པ་ཆེས་ཉུང་བའི་དབང་གིས་སློབ་དཔོན་རྣམ་གཉིས་ཀྱི་ལུགས་སྲོལ་ཀུན་མཁྱེན་ཡབ་སྲས་གཉིས་ཀྱིས་ཇི་ལྟར་བཀྲལ་བ་བཞིན་ཤོད་པར་འདུག་སྙམ་པ་སྲིད་མཐའ་མ་བཀག་ཙམ་དུ་འདུག་པས། བདག་འདྲ་བས་དགོངས་དོན་གཏིང་དཔོག་པ་དང་དཔོག་ཀྱང་གཞན་དོན་དུ་འགྱུར་སྙམ་པ་ཅང་མ་མཐོང་ངོ༌། །འོན་ཀྱང་རང་གི་བརྗེད་ཐོ་བྲིས་པ་ལ་མཁས་པས་འཕྱ་རྒྱུ་དང༌། བླུན་པོས་སྡང་རྒྱུ་ཡང་མི་འདུག་སྟེ། བྱ་ཕྲུག་གཤོག་རྩལ་སློབ་པ་ལ་སྡང་ཞིང་འཕྱ་མི་རིག་པ་ལྟ་བུ་ཡིན་པའི་ཕྱིར་རོ། །དེ་ལ་ཐོབ་བྱ་མཐར་ཐུག་ནི། ཀ་དག་ནང་གསལ་གྱི་ཆོས་སྐུ་དང༌། ལྷུན་གྲུབ་ཕྱིར་གསལ་གྱི་གཟུགས་སྐུ་གཉིས་རོ་གཅིག་ཏུ་གྱུར་པ་དེ་ཡིན་ལ། དེའི་གནད་ཀྱིས་ཐོབ་བྱེད་ལའང་དེ་གཉིས་ཀྱི་ཉམས་ལེན་ཚང་བ་ཞིག་དགོས་སོ། །སྐུ་དེ་གཉིས་ཀྱི་སྒྲུབ་གཞི་ནི་ཐེག་པ་གཞན་དང་མི་འདྲ་བར། གདོད་མའི་གཞི་སྟོང་གསལ་གདལ་བ་ནམ་མཁའ་གཡའ་དག་ལྟ་བུ་དང༌། གཞི་དེའི་རང་སྣང་ལ་གཞི་སྣང་དུ་གྲགས་པ་ལྷུན་གྲུབ་སྒོ་བརྒྱད་གཉིས་ཡོད་པ་དེ་ཡིན་ཏེ། འདི་གཉིས་ཞིབ་ཏུ་འབྱེད་པ་ལ་ཆོས་ཉིད་བར་དོའི་འཆར་ཚུལ་ཤེས་དགོས་སོ། །
གཞི་འདུས་མ་བྱས་ཡིན་མིན་ལ་མི་འཆམ་པ་སྣང་ཡང༌། དོན་ལ་འདུས་མ་བྱས་ཡིན། དེའང་མ་བྱས་ཚུལ་ནི་བཅོས་མའི་གློ་བུར་བ་མིན་པ་ལ་བྱེད་པར་བཤད་དེ། མ་བཅོས་ལུགས་ཀྱང་གཉུག་མའི་གདོད་མ་ལ་བྱེད་པས། ལུགས་འདི་ལ་འདུས་མ་བྱས་འཇོག་ཚུལ་རྟོག་གེའི་གཞུང་དང་ཐུན་མིན་ནོ། །གཞི་སྣང་རྒྱུད་སྡེ་གཞན་ལ་མ་གྲགས་པར་གསུངས་པ་ནི་ལྷུན་གྲུབ་སྒོ་བརྒྱད་སོགས་ཀྱི་བཤད་ཚུལ་ལ་སྦྱར་དགོས་ཀྱི་འཆར་ཚུལ་གྱི་ངོ་བོ་ཙམ་ཞིག་དུས་འཁོར་ལས་ཀྱང་གསུངས་ཏེ། དེར་འཆི་བའི་འོད་གསལ་པྲ་ཕབ་པའི་མེ་ལོང་ལྟ་བུར་གསུངས་པའི་ཕྱིར་རོ། །དེ་ལྟ་བུའི་གཞི་དེ་ཡར་ལྡན་དུ་ཁྱེར་ནས་ཆོས་སྐུ་སྒྲུབ་པར་བྱེད་པའི་ལམ་དེ་ཁྲེགས་ཆོད་དང་གཞི་སྣང་ལས་གཟུགས་སྐུ་སྒྲུབ་པར་བྱེད་པའི་ལམ་དེ་ཐོད་རྒལ་ཡིན་པས་དེ་གཉིས་ཡ་བྲལ་མི་རུང་ངོ༌། ཁྲེགས་ཆོད་ཀྱི་བཞག་ཐབས་ལ་བརྟན་པ་ཅུང་ཟད་མ་ཐོབ་བར་དུ་ཐོད་རྒལ་སྒོམ་པ་སྐད་བྱས་ཀྱང༌། དེ་མཚན་ཉིད་ཚང་བ་མི་སྐྱེ་བས། དེ་གཉིས་ལས་ཁྲེགས་ཆོད་ཐོག་མར་བསྟན་ནོ། །མིང་དོན་ནི། སེམས་དམིགས་པ་ཁྱད་པར་ཅན་ལ་བསྡུས་ཏེ་རླུང་དྷུ་ཏིར་འགོག་པ་གཞན་འདྲ་བ་མིན་པར་གཟུང་འཛིན་གྱི་དྲ་བ་འདི་ཀའི་སྟེང་ཉིད་ནས་རང་གི་བློ་ངོར་རིག་པ་རྗེན་ལ་འདོན་ལུགས་རྩལ་ཐོན་པར་བྱས་ཏེ་སྐྱོང་བ་དེ་རིག་པ་ལ་ཐད་ཆོད་དུ་ཞུགས་པ་ཡིན་པས། མཁྲེད་ཆོད་དམ་ཁྲེགས་ཆོད་དང༌། ཐབས་
མཁས་ཀྱི་སྒོ་འདིས་རིག་པའི་ཡོན་ཏན་བདེ་བླག་ཏུ་རྫོགས་ནུས་པས། ས་ལམ་རང་དགའ་དགར་བརྒལ་ནས་སོང་བས་ཆོག་པ་འདྲ་བའི་མྱུར་ཁྱད་སྒོས་སུ་ཡོད་པའི་ཕྱིར་ཐོད་རྒལ་དུ་བཏགས་པར་བཤད། ཁྲེགས་ཆོད་ཀྱི་གདམས་པ་རྣམས་སུ་སེམས་ལས་འདས་པའི་རིག་པ་གསུངས་པ་ནི་སྔར་བརྗོད་པའི་བཅོས་མའི་རྟོག་བཅས་དང༌། རྟོག་མེད་ཀྱི་བློ་རྣམས་ལས་རིགས་ཀྱི་སྒོ་ནས་འདས་པའང་ཡིན་མོད་ཀྱི། གཙོ་བོར་དེ་དག་གི་ཕ་མཐའ་བརྒལ་བ་ན་འཆར་བ་དེ་སེམས་ལས་འདས་ཚུལ་དང༌། དེར་འཆར་རྒྱུ་འོད་གསལ་དེ་རིག་པ་ཞེས་པའི་དོན་ནོ། །རིག་པ་ཟེར་བའི་རྒྱུ་མཚན་ནི། མ་རིག་པའི་བག་ཆགས་ཕྲ་མོ་ཟད་པར་སྤོང་བྱེད་དང༌། འདི་ནི་རྣམ་ཤེས་ལ་མི་རྟོན་ཡེ་ཤེས་ལ་རྟོན་ཞེས་པའི་རྣམ་ཤེས་དང་ཡེ་ཤེས་ཀྱི་མིང་འདོགས་དང་ཕྱོགས་གཅིག་གོ །སྤང་བའི་ཡེ་ཤེས་གཉིས་ཀར་འདི་ཁོ་ནའི་བསྒྲུབ་གཞི་བྱས་པའི་རིག་པ་ཞིག་དགོས་པས། མ་རིག་པའི་བཟློག་ཕྱོགས་མཐར་ཐུག་པའི་མིང་གིས་བཏགས་པ་སྟེ། འབྲས་མིང་རྒྱུ་ལ་བཏགས་པའོ། །དེའང་མ་རིག་པའི་བག་ཆགས་ལྷག་མ་མ་ལུས་པར་ལོག་པ་ན། བློ་རང་ཉིད་ཀྱི་རིགས་ཀྱང་ལོག་ནས་འགྲོ་བ་དེ། རང་གི་སྒྲུབ་གཞི་གློ་བུར་བ་ཡིན་པའི་གནད་ལ་ཐུག་ཅིང༌། ཅིག་ཤོས་དེ་ལས་བཟློག་པ་ཡིན་ནོ། །དེ་ལ་འདི་སྐོར་རྣམས་སུ་གློ་བུར་གྱི་སྤྲོས་པ་མཐའ་དག་དང་བྲལ་བའི་ཆ་ནས་
མཐར་ཐུག་གི་མྱང་འདས་འཇོག་པ་སོགས་ཀྱི་སྒོ་ནས་གཉུག་མའི་ཆོས་རྣམས་མྱང་འདས་ཀྱི་ཕྱོགས་སུ་བསྡུ་ཞིང༌། དེ་ལྟར་བྱས་ན་ཐ་མལ་པའི་སེམས་རྣམས་འཁོར་བའི་ཕྱོགས་སུ་འགྲོ་ལ། དེ་འགྲོ་བ་ལྟར་མ་རིག་པའི་ཕྱོགས་སུའང་འགྲོ་ལུགས་ཡོད་པས། དེའི་ཟླ་ལ་དྲངས་པ་ཡིན་ཏེ། སེམས་དང་ཡེ་ཤེས་ཞེས་གསུངས་པའི་ཡེ་ཤེས་ཀྱི་སྒྲ་འཆད་ཚུལ་ཡང་དེ་དང་འདྲའོ། །དེ་ལྟར་དུ་བཏགས་པ་ནི་ལམ་འདི་ལ་ཐེག་པ་གཞན་དང་མི་འདྲ་བའི་ཟབ་ཁྱད་འཇུག་པའི་རྩ་བ་ཤེས་པར་བྱ་བའི་ཆེད་དུ་སྟོན་ལུགས་དེ་འདྲ་ཞིག་མཛད་པ་ཡིན་གྱི། སྤྱིར་ནི་འདིར་བཤད་པའི་སེམས་གང་བྱུང་ཐམས་ཅད་འཁོར་བའི་ཕྱོགས་ཡིན་པར་ཁས་མི་བླང་སྟེ། གལ་ཏེ་བླང་ན་ཉན་ཐོས་ཀྱི་ཟད་མི་སྐྱེ་ཤེས་པའི་ཡེ་ཤེས་ཀྱང་ཀུན་ཉོན་ཕྱོགས་ཀྱི་བདེན་པར་འདོད་དགོས་པའི་ཕྱིར་རོ། །རིག་པ་གསང་སྔགས་བླ་མེད་པའི་འོད་གསལ་ལ་འདོད་པ་ནི། འཆི་བའི་འོད་གསལ་ལ་རིག་པར་ངོས་བཟུང་བའི་རྫོགས་ཆེན་གྱི་གསུང་རབ་རྩོད་མེད་སོགས་ཤེས་བྱེད་མཐའ་ཡས་པ་ཡོད་དོ། །དེས་ན་འོད་གསལ་ཐམས་ཅད་སྟོང་པ་དང༌། རྫོགས་རིམ་པའི་ལྷན་སྐྱེས་སོགས་བྱས་ཚེ། དེའི་བརྗོད་བྱ་དམ་ཧྲིག་གེར་འཆར་ཞིང༌། རིག་པ་བྱས་ཚེ་འོད་གསལ་ལ་ངོ་སྤྲད་ཀྱང་བུན་ལོང་དེ་ཞིག་ལས་མི་གོ་བ་ནི་ཕ་རྒྱུད་མ་རྒྱུད་གཞན་གྱི་ཆོས་སྐད་ལ་བག་ཆགས་ཕྱོགས་
ལྷུང་དུ་སོང་བའི་རྟགས་ཡིན་པས་རིག་འཛིན་གྱི་མཛུབ་རྩེ་དང༌། རྗེས་འཇུག་གི་ལྟ་ཕྱོགས་འཛོལ་ནས་མ་སོང་བ་ཞིག་གལ་ཆེའོ། །རྫོགས་ཆེན་གྱི་གཞུང་རྣམས་སུ་ད་ལྟའི་ཤེས་པ་སྟོང་གསལ་འདི་རིག་པར་ངོ་སྤྲོད་པ་ཤ་སྟག་འབྱུང་བས། སྣང་གསུམ་མཐའི་འོད་གསལ་ལ་སྦྱར་བ་ག་ལ་རིགས་སྙམ་ན། གོ་བ་ཁ་ཕྱིར་བལྟས་ལ་དེ་འདྲ་འཆར་བ་བདེན་ཡང༌། འདི་ལྟར་ཡིན་ཏེ། ད་ལྟ་འདྲི་བ་པོ་ཁྱོད་དང་ད་ཅག་སྨྲ་བཞིན་པའི་དུས་ཀྱི་རང་རེ་གཉིས་ཀྱི་ཤེས་རིག་སལ་ལེ་བ་འདི་ཧྲིལ་གྱིས་རིག་པ་ཁོ་ན་མིན་རུང༌། འདི་ཉིད་ཀྱི་ཆ་གཅིག་རིག་པར་གདོན་མི་ཟ་བར་འདོད་དགོས་ཏེ། དེའི་དུས་སུའང་གདོད་མའི་འོད་གསལ་ཡོད་དགོས། དེ་ཡོད་ན་གང་ཟག་དེའི་ཤེས་རིག་ཏུ་ཡོད་དགོས། དེ་ལ་དེ་དུས་ཀྱིས་ལེ་བ་དེ་མིན་པའི་རིག་ཆ་ཞིག་ཡོད་ན་དེའི་ཤེས་རིག་ཏུ་འཇོག་མི་རུང་བའི་ཕྱིར་རོ། །འོན་ཀྱང་ཐ་མལ་པ་ལ་འཆི་དུས་མ་གཏོགས་པར་རིག་པ་དེ་བསླད་ཡོད་པས། ད་ལྟ་ངོས་འཛིན་དཀའ་བའི་ཕྱིར། བཞི་ཆ་གསུམ་བྲལ་ཞེས། དུས་གསུམ་གྱི་ཀུན་རྟོག་ལས་ཟུར་དུ་ཕྱེ་བའི་ཆ་བཞི་པའམ་ལྷག་མ་དེ་རིག་པ་ཡིན་ཞེས་བཤད་ནས། དེ་ཙམ་གྱིས་དེའི་བཞུགས་ཚུལ་རྗེན་པར་བློ་ངོར་མཚོན་མི་ནུས་པར་གཟིགས་ཏེ། དེའི་རྣམ་པ་ངོ་སྤྲོད་ཚུལ་རྒྱས་བཤད་
མང་པོ་མཛད་པ་ཡིན་ནོ། །བཞི་ཆ་གསུམ་བྲལ་བཤད་ལུགས་ལ་དཔག་ཀྱང་ད་ལྟ་ཀུན་རྟོག་དང་སྦྲགས་མར་ཡོད་པ་ཞིག་དང༌། དེའི་རང་ཞལ་གཙོ་བོར་ཀུན་རྟོག་གིས་གཡོགས་པའི་དབང་གིས་ངེས་མ་ཐུབ་པ་ཡིན་པར་བཞེད་པ་དཔྱད་ཤེས་ན་གསལ་ལོ། །ངོ་སྤྲོད་རྒྱས་པར་མཛད་ཚུལ་ཡང༌། སློབ་དཔོན་ཀླུ་སྒྲུབ་ཞབས་ཀྱིས། ཐམས་ཅད་སྟོང་པ་རྨད་པོ་ཆེ། །དྭངས་ཤིང་གསལ་བའི་མཚན་ཉིད་ཅན། །ནམ་མཁའི་ངོས་ལྟར་མཆོག་གྱུར་པ། །ཞེས་ཟུང་འཇུག་གི་འོད་གསལ་དེ་ལྟ་བུའི་རྣམ་པ་ཅན་ཞིག་ཡིན་པར་བཤད་པ་དང༌། འཇམ་དཔལ་ཞལ་ལུང་དུ། ཆོས་སྐུ་རབ་དགའ་མཁའ་མཉམ་པ། ཞེས་རབ་དགའ་དང་མཁའ་མཉམ་གྱི་བཞུགས་ཚུལ་ཅན་དུ་གསུངས་པ་དང་འདྲ་བར། འདི་སྐོར་དུ་ཡང༌། ངོ་བོ་སྟོང༌། རང་བཞིན་གསལ། ཐུགས་རྗེའམ་རྩལ་རིས་མེད་པར་ཁྱབ་པ་ཞེས་དང༌། གཏིང་གསལ་ཕྲ་བ་དང༌། གདོད་མ་ནས་མ་བཅོས་པ་དང༌། ཡེ་གྲོལ་དང༌། བློ་བྲལ་དང༌། ཁྱབ་གདལ་དང༌། ཟང་ཐལ་གྱི་རིག་པ་སོགས་བཤད་ཚུལ་མཐའ་ཡས་པས་བསྟན་ཏེ། དེ་འདྲ་བའི་བརྗོད་ཚུལ་རེ་རེ་ལ་ཡང་རིག་པའི་ངོ་བོ་དང་ཁྱད་པར་ཅི་རིགས་པ་གཏན་ལ་འབེབས་པའི་ནུས་པ་ཁྱད་པར་ཅན་རེ་འབྱིན་རྒྱུད་ཡོད་ལ། བླ་མེད་རྒྱུད་གཞན་ལས་ཀྱང་རིག་པའི་རྣམ་པ་ངོ་སྤྲོད་ལ་ཕྱོགས་འདི་རྒྱས་པ་ནི་གཞན་དུ་རྩ་རླུང་
ཐིག་ལེ་ལ་གནད་དུ་བསྣུན་སྟོབས་ཀྱིས་ལྷན་སྐྱེས་དྲངས་ཡོང་བས། ད་ལྟ་ནས་བཞུགས་ཚུལ་ངོ་སྤྲོད་ལ་ཧ་ཅང་རྩལ་དུ་འདོན་མི་དགོས། འདིར་རིག་པ་ངོ་སྤྲད་ནས་དེ་ལ་བཞག་སྟོབས་ཀྱིས་ཐུན་མོང་མ་ཡིན་པའི་ལྷག་མཐོང་འདྲེན་པ་ཉིད་མན་ངག་གི་སྙིང་པོར་བྱེད་ལ། དེ་ལྟར་འདྲེན་པ་ལ་ཐོག་མ་ནས་རིག་པའི་བཞུགས་ཚུལ་ལ་བློ་ཤིན་ཏུ་རྒྱས་པ་མེད་ན། འཇོག་བྱེད་ཀྱི་སྒོམ། འཇོག་ས་རིག་པའི་སྟེང་ནས་གཞན་དུ་མི་འཆུགས་པའི་གཟེར་བུ་ཐེབས་ལུགས་མེད་པས། ཡུན་རིང་པོར། རློམ་ཚོད་རིག་པ་ཅོག་བཞག་གི་རྒྱུན་བསྐྱང་བར་རློམ་ཡང༌། སོང་ཚོད་སེམས་ཐ་མལ་བ་རང་གི་གསལ་སྟོང་གི་ཆ་ཕྱི་རོལ་པས་ཀྱང་ངེས་ནུས་པ་རེ་བསྒོམ་པར་སོང་བ་ལྟ་བུ་ལས་མི་ཡོང་བའི་རྒྱུ་མཚན་གྱིས་ཡིན་པས། ཚིག་རིས་དེ་འདྲ་བ་ཐམས་ཅད་ཀྱིས་གནས་ཆ་དང་གསལ་ཆ་ཟུང་དུ་འབྲེལ་བའི་སེམས་ཙམ་ཞིག་ངོ་སྤྲད་པར་བཟུང་བ་ནི། དེའི་མི་མཐུན་པའི་ཕྱོགས་ཆེན་པོ་ལ་གནས་པ་ཡིན་ནོ། །རིག་པ་ངོ་འཕྲོད་མཚམས་ལ་ཡང༌། གོ་བས་འཕྲོད་པ་དང༌། ཉམས་མྱོང་གི་སྟོབས་ཀྱིས་འཕྲོད་པ་གཉིས་ཤེས་དགོས་ཤིང༌། དེའི་ཕྱི་མ་ནི་སྔ་མ་སྔོན་དུ་འགྲོ་བ་ཡིན་ལ། ཚེ་འདིར་སྔ་མ་སྔོན་དུ་མ་བཏང་བར་ཡང་བླ་མའི་བྱིན་རླབས་ཁོ་ནས་ཕྱི་མ་ཡོང་བ་འགའ་ཞིག་ལ་སྲིད་པ་ནི་ལས་འཕྲོ་ཅན་ཡིན་པའི་རྒྱུ་མཚན་གྱིས་ཡིན་ནོ། །དེའི་འགྲེས་ཀྱིས། རིག་པའི་
སྟེང་དུ་འཇོག་ལུགས་ལའང༌། གོ་བ་ཤས་ཆེ་བའི་སྒོ་ནས་འཇོག་ཚུལ་དང༌། མྱོང་སྟོབས་ཀྱིས་རིག་པའི་རང་ཞལ་མཇལ་ནས་དེ་སྐྱོང་ཚུལ་གཉིས་ཡོད་ལ། དེ་གཉིས་ཀྱང་འདིར་གོ་རིམ་ངེས་པ་ཡིན་ཏེ། སྔ་མ་ལྟར་བསྐྱང་བས་རིག་པ་ཇེ་གསལ་དང༌། སེམས་ཇེ་ཞན་དུ་སོང་ནས་རིམ་གྱིས་གོ་བའི་རྒྱུན་ཉམས་མྱོང་དུ་འགྲོ་དགོས་པའི་ཕྱིར་རོ། །མྱོང་སྟོབས་ཀྱིས་རིག་ངོ་མཐོང་ནས་སྒོམ་པ་ལའང་རྟོགས་པའི་ཡེ་ཤེས་སྲབ་འཐུག་གི་རིམ་པ་མང་པོ་ཡོད་པ་ལས། རྣམ་རྟོག་གི་གྲོལ་ལུགས་གསུམ་སོགས་བཤད་པའི་ཕལ་ཆེ་བ་ནི། སེམས་རིག་གཉིས་ལས་སེམས་ཀྱི་ཕྱོགས་མངོན་དུ་གྱུར་པ་སྟོབས་ཆེ་བའི་དུས་སུ་ཡིན་གྱི། རིག་པ་མངོན་དུ་གྱུར་པའི་ཕྱོགས་ལྷག་པ་ན་མིན་ལ། ཁང་སྟོང་རྐུན་མ་ཞུགས་པ་ལྟ་བུའི་གྲོལ་ལུགས་དེ། དེ་གཉིས་ཀྱི་མཚམས་འཛིན་ལྟ་བུར་མངོན་ནོ། །གོ་བའི་སྟེང་ནས་རིག་པ་ལ་འཇོག་སྒོམ་བྱེད་པའང་མདུན་དུ་ཀེང་རུས་བསྒོམ་པ་ལ་སེམས་འཛིན་ལུགས་ལྟ་བུ་ཡེ་མིན་པས། རྣལ་འབྱོར་པའི་བློ་ཧྲིལ་གྱིས་རིག་པ་འབའ་ཞིག་ཏུ་སོང་བ་འདྲ་བའི་ཉམས་ཡོད་པ་ཞིག་དགོས་སོ། །ཕྱོགས་འདིར་བྱ་བ་དགུ་ཕྲུགས་སུ་གཏོང་བར་བཤད་པ་བཞིན། ཆོས་དང་ཆོས་མིན་གྱི་གཡེང་བ་གཞན་བཏང་སྟེ། ཅོག་བཞག་ལ་ཆིག་དྲིལ་ཡུན་རིང་པོར་ནུས་ན། ཅི་ཞིག་ནས་ཀུན་རྟོག་གཡོ་བའི་རླུང་རགས་ལ་རྒོད་པ་རྣམས་རང་འགག །ཕྲ་བ་རྣམས་འོད་གསལ་ངང་སྒོམ་གྱི་སྦྱོར་བས་རྒྱུན་རིང་དུ་
བཏུལ་བའི་མཐུས། དུག་སད་པའི་དངུལ་ཆུ་ལྟར་འགྱུ་དྲན་གྱི་ཉེས་པ་སྐྱེད་པའི་ཐུ་ཕྲོགས། དེའི་དབང་གིས་རིམ་གྱིས་ཡེ་ཤེས་ཀྱི་གྲོགས་སུ་འགྲོ་བ་ལའང་ཚེགས་མེད་པ་ཞིག་ཏུ་གྱུར་ཏེ། ད་དུང་ཡང་སྔར་ལྟར་སྐྱོང་ནུས་ན་ལས་རླུང་གི་རྒྱུན་ལ་རིག་པའི་རྩི་ཐེབས་ནས་ཡེ་ཤེས་ཀྱི་རླུང་དུ་འགྲོ་བར་བཞེད་དེ། དང་པོ་ནས་ཡེ་ཤེས་གཉུག་མའི་རླུང་དུ་གནས་པ་དང༌། ཕྱིས་ཐབས་མཁས་ཀྱིས་ཡེ་ཤེས་ཀྱི་རླུང་དུ་བསྒྲུབ་པ་སྟེ་ཡེ་ཤེས་རླུང་གི་ཚུལ་གཉིས་ཡོད་པར་བཤད་དོ། །བླ་མེད་རྒྱུད་གཞན་དུ་གཏུམ་མོ་དང༌། དཔྱིད་ཀྱི་རྣལ་འབྱོར་སོགས་ཀྱིས་འོད་གསལ་མངོན་དུ་བྱེད་ཚུལ་བཤད་པ་རྣམས། དེ་དག་ཉིད་ཀྱི་ལུགས་ཀྱིས་བཙན་ཐབས་ཀྱི་སྦྱོར་བ་མ་ཡིན་ཀྱང༌། འདི་ལ་ལྟོས་ན་བཙན་ཐབས་སུ་རིག་པ་མངོན་དུ་བྱས་པར་སོང་ཡོད་པས། འདི་བཞིན་བསྐྱང་བ་ན་དང་པོ་བསྒོམ་སྟོབས་ཀྱིས་འོད་གསལ་འཆར་བ་ལ་གཞན་ལས་བུལ་བ་ལྟར་འདུག་ཀྱང༌། རིག་པ་མངོན་དུ་བྱེད་ནུས་པ་ན་གཞན་ལས་ཆེས་བརྟན་ཅིང་རྒྱུན་རིང་བ་དང༌། འོད་གསལ་གྱི་ཏིང་ངེ་འཛིན་དབང་དུ་གྱུར་པ་ཁྱད་ཞུགས་པ་ཅིག་ཡོང་ངམ་སྙམ་མོ། །དེར་མ་ཟད་རྫོགས་རིམ་གྱི་ལམ་སྲོལ་གཞན་འདྲ་བའི་རླུང་གི་སྡུད་རིམ་མ་བྱས་པར་རིག་པ་མངོན་དུ་བྱེད་ལུགས་འདི་ལ་དྷུ་ཏིའི་གནས་ཁོལ་བུ་རེད། དམིགས་རྟན་ཁོལ་བུ་རེའི་སྟེང་དུ་འོད་གསལ་ཤར་བ་དང་མི་འདྲ་བའི་
འཆར་ཚུལ་ཐུན་མོང་མ་ཡིན་པ་ཞིག་དང༌། དེ་ལ་བརྟེན་ནས་འཇའ་ལུས་སྒྲུབ་ཚུལ་གྱི་གནད་ཕྲ་མོ་ཞིག་ཀྱང་ཡོད་པར་སེམས་སོ། །རིག་པ་ངོ་སྤྲོད་ཀྱི་སྣོད་རུང་སྒྲུབ་པ་ལ་དོན་དམ་དཔྱོད་པའི་རིག་པས་སེམས་སྦྱངས་པ་དགོས་པར་གསུངས་ཤིང༌། ལམ་དུས་ཀྱི་རིག་པ་དང་པོའི་གཞི་ལས་འཕགས་ཚུལ་གསུངས་པ་དང༌། རིག་པ་གཞི་མེད་རྩ་བྲལ་དུ་གསུངས་པའི་དགོས་ཆེད་དང༌། ཁྲེགས་ཆོད་ཀྱི་སྐབས་སུ་བཤད་པའི་དབྱིངས་རིག་གཉིས་དབྱེར་མེད་དུ་མངོན་དུ་བྱ་བར་གསུངས་པ་སོགས་བསྒྲིགས་ཤེས་ན་རིག་སྟོང་ཟུང་འཇུག་ཉམས་སུ་ལེན་པའི་ཚུལ་ཡང་ཤེས་ཡོང་བས་དེ་ལ་མ་བསམ་པར་རང་བཟོ་སྨྲ་མི་རུང་ངོ༌། །ཆོས་ཐམས་ཅད་རིག་པའི་རྩལ་དུ་གསུངས་པའི་དོན་ནི། རྟོག་པའི་འགྱུ་འཕྲོ་ཐམས་ཅད་འོད་གསལ་གྱི་རིག་པའི་རྩལ་དུ་འཕྲོ་ཞིང༌། དེ་དང་མཚུངས་པར་རང་གི་ཕུང་ཁམས་ཐམས་ཅད་ཀྱང་འཕྲོ་བ་དཔྱོད་སླ། དེ་དག་གི་རྩལ་ལམ་ཤུགས་སམ་དབང་གིས་ཕྱིའི་གནས་དང་ལོང་སྤྱོད་ཐམས་ཅད་ཀྱང་འཕྲོས་ཏེ། འཕྲོས་ཚུལ་ཡང༌། གཞི་སྣང་གི་འོད་ལ་གཉིས་སྣང་འཁྲུལ་བའི་ཆ་ཕྲ་མོ་ཞིག་རྐྱེན་གྱིས་བསྒྱུར་ལུགས་ཀྱིས་གཟུང་འཛིན་རགས་པའི་སྐབས་ཀྱི་མ་དག་པའི་དངོས་སྣང་འཆར་བར་བཤད་པ་སོགས་ལས་ཤེས་པར་བྱ་སྟེ། ཕྱི་མ་འདི་ལ་གོ་རྒྱུ་ཕྲ་མོ་ཞིག་ཡོད་པ་འདྲ། དེ་འདྲ་ལ་དགོངས་ནས་འབྱུང་བཞི་ནམ་མཁའི་ཀློང་ལས་མི་འདའ་བ་ལྟར་སྣོད་བཅུད་རིག་
པའི་ཀློང་ལས་མི་འདའ་བའི་རང་སྣང་ཉག་གཅིག་ཏུ་གསུངས་པ་རྣམས་སོ། །དེ་ལྟར་བྱས་ན་ད་ལྟ་ཕྱི་ནང་གི་དངོས་པོ་རྣམས་གདོད་མའི་རིག་པ་ཟེར་རྒྱུ་ཞིག་ལ་ཡེ་མ་ལྟོས་པའི་ཡོར་རེ་བ་རེར་སྣང་བའི་འཆར་ལུགས་འདི་གཏན་ལོག་ནས། འོད་གསལ་གྱི་རིག་པའི་ཚོས་ཁ་ཅན་ཤ་སྟག་ཏུ་འཆར་བའི་སྒོ་དོད་ཡོང་སྟེ། བཤད་མ་ཐག་པའི་ཚུལ་དེ་ལ་རྟོགས་པའི་རྩལ་སྦྱངས་པ་ཉིད་ཀྱིས་དེ་ལྟར་འཆར་བའི་ཕྱིར་རོ། །དེ་ལྟར་འཆར་བ་ལ་གོམས་ན་རིག་གདངས་ཕྱོགས་མེད་དུ་རྒྱས་ཤིང༌། རྐྱེན་སྣང་གང་གིས་ཀྱང་ཟིལ་གྱིས་མི་ནོན་པའི་རྣལ་འབྱོར་ཅན་དུ་འགྱུར་བས། ཉམས་མྱོང་གི་བོགས་འདོན་པ་ཡིན་ཏེ། རྗེས་ཐོབ་ཀྱི་སྐྱོང་ཚུལ་ཡིན་ལ། མཉམ་རྗེས་ཕན་ཚུན་གྲོགས་སུ་འགྲོ་བའི་ཚུལ་ཡང་འདིས་ཤེས་པར་བྱའོ། །དེ་བས་ཕྲ་བ་ནི། འདི་ཉིད་ལ་བརྟེན་ནས་འཇུག་སྟེ། དེའང་སྣང་ཚད་རིག་པའི་མདངས་སུ་ཤར་བ་ན། དེ་ལས་བཟློག་ཕྱོགས་ཀྱི་སྣང་ཚུལ་འདི་སྣང་བ་ལྟར་མ་གྲུབ་པའི་རྫུན་པ་ཕྱིན་ཅི་ལོག་ཏུ་འཆར་ཞིང་རྫུན་རིས་ཀྱི་ཕྲེང་བ་དེ་མིང་ཙམ་ཞིག་གིས་བཀོད་པར་འཆར་བའང་འོང་ངོ༌། །དེ་ནས་དེ་འདྲ་བའི་ཡུལ་ཡུལ་ཅན་གཉིས་ཀ་རྫུན་མཉམ་དུའང་རྟོགས་ལ། དེའི་ཚེ་དེ་ཐམས་ཅད་གཞི་མེད་ཀྱི་རིག་པས་མིག་འཕྲུལ་བཀྱེ་བ་ཙམ་དུ་ཟད་པར་མཐོང་ནས། དེའི་སྒོ་ནས་གཟུང་འཛིན་གྱི་ཆོས་རྣམས་ལ་ཀ་དག་རིག་པའི་ཕྱག་རྒྱས་འདེབས་ཚུལ་
ཡང་གོང་གི་འགྲེས་ཀྱིས་ཤེས་སོ། །ཤར་སྣང་རིག་པའི་ཀློང་ལས་མི་གཡོ་བ་འདི་ནི་གཞི་དུས་ནས་ཡོད་པས་རིག་པའི་ཀློང་དུ་ཀུན་རྟོག་དུས་གཉིས་པར་ཞིག་ནས་སོང་བ་ཙམ་ནི་ལམ་འདིའི་གྲོལ་ལུགས་མིན་གྱི། རིག་པའི་ངང་བཞག་གི་ཏིང་ངེ་འཛིན་གྱི་ནུས་པས་ཀུན་རྟོག་གིས་ཚོ་མ་ཐུབ་པར་དག་ནས་སོང་ན་གྲོལ་ལུགས་སུ་འགྲོའོ། །ཐོད་རྒལ་གྱི་གནད་འཆད་བྱེད་ལ་ངོ་སྤྲོད་ཉེར་གཅིག་སོགས་མང་དུ་གསུངས་ཀྱང༌། མདོར་བསྡུ་ན། སྙིང་ཀའི་མི་ཤིགས་པ་ལ་གདོད་མའི་རྒྱལ་བ་འོད་ཟེར་གྱི་ཕུང་པོ་ཆེན་པོ་ཞེས་གསུངས་ཏེ། དེ་ལ་གདོད་མའི་རྒྱལ་བ་ཞེས་པ་ནི་རྣལ་འབྱོར་ཆེན་པོའི་རྒྱུད་ལས་བར་སྲིད་ལ་ལོངས་སྤྱོད་རྫོགས་སྐུར་འདོགས་ལུགས་དང་མཚུངས་ཤིང༌། དེ་ཉིད་འོད་ཟེར་ལྔ་འབར་བའི་གོང་བུར་གནས་པ་ནི་འོད་ཀྱི་ཕུང་པོའི་དོན་ནོ། །འདིར་དེ་འདྲའི་མིང་འདོགས་ས་དེ་ལ་འདུས་པ་ལས། ཕྱེད་ཚད་ཙམ་གྱི་ཕྲ་མོ་མཆོག །སོགས་གསུངས་པར་ཐེག་མཆོག་མཛོད་ལས་བཤད་པས་དོན་དུ་ནི་ཤིན་ཏུ་ཕྲ་བའི་རླུང་ངོ༌། །བྱེད་པ་གཙོ་བའི་དབང་གིས་ཆ་ཕྱེ་སྟེ་བཤད་ན་དེ་ལྟར་ཡིན་ཀྱང༌། སྤྱིར་ནི་གདོད་མའི་རླུང་རིག་ངོ་བོ་དབྱེར་མེད་ཡིན་ཅིང༌། རིག་པ་དང་བྲལ་ན་འོད་ལྔའི་གཟི་བརྗིད་འཛིན་མི་ཐུབ་པར་མ་ཟད། རླུང་རང་ཉིད་ཀྱང་འཚོ་མི་ནུས་པས་རིག་པ་ཡང་གདོད་མའི་མགོན་པོ་འོད་ཟེར་གྱི་ཕུང་པོ་ཡིན་ནོ། །རིག་པ་ལ་དབྱིབས་དང་ཁ་དོག་མེད་པར་གསུངས་
པ་དང༌། འོད་ཟེར་གྱི་ཁ་དོག་ལྔ་མ་འདྲེས་པར་ཡོད་ཚུལ་གསུངས་པ་གཉིས་ནི། ངོ་བོ་དང༌། རང་བཞིན་གྱི་བཤད་ལུགས་ཐ་དད་ཡིན་པར་གསུངས་ཏེ། རིག་པ་ཉིད་ལ་ཁ་དོག་སོགས་མེད་ཀྱང༌། རིག་མདངས་ལ་ཁ་དོག་ཡོད་པར་མི་འགལ་བའི་དོན་ནོ། །ངོ་བོ་དང་རང་བཞིན་གྱི་དོན་ལ་ཡང་ཁྲེགས་ཆོད་དང་ཐོད་རྒལ་སྐབས་ཀྱི་བཤད་ཚུལ་སོ་སོར་ཡོད་པས་མ་འཛིངས་པ་གཅེས་སོ། །སྙིང་གའི་གཞོན་ནུ་བུམ་སྐུ་དེ་ནི་ཐོད་རྒལ་གྱི་སྣང་བ་མཐའ་དག་འཆར་བའི་གཞི་ཡིན་པས་གནས་ལུགས་གཞིའི་སྒྲོན་མ་ཞེས་བྱའོ། །བུམ་སྐུའི་འོད་ལྔ་དེ་མངོན་སུམ་དུ་འཆར་བའི་ནུས་པ་རྒྱ་མཚོ་གསེར་གྱི་ཉི་མའི་རྩ་ལ་ཡོད་པས་སྒོའི་སྒྲོན་མར་གསུངས། འཆར་ལུགས་ནི་བྱད་གཟུགས་མེ་ལོང་དུ་ཤར་བ་ལྟ་བུར་བཤད་ལ། འོད་ལྔའི་སྣང་བ་སྐྱེད་པའི་ནུས་པ་ཡོད་ས་མཐར་ཐུག་པ་སྙིང་གའི་ཐིག་ལེ་ཡིན་ཀྱང༌། མིག་གི་འོད་རྩ་ལ་བརྟེན་ནས་ནུས་པ་དེ་འབྱིན་དགོས་པས། ཚང་ན་མི་འཆར་སྒོར་འཆར་བ་བྱ་ཁྲ་དང་འདྲ་བར་བཤད་དོ། །སྒོའི་གནད་དང་འདུག་སྟངས་ཀྱི་བྱེད་བཅིངས་སོགས་རྒྱུད་སྡེ་འདི་ནས་བཤད་པ་བཞིན་བྱས་ཏེ་བལྟས་པས་སྣང་བ་འཆར་ཚུལ་ལ་འོད་ཁྱིམ་གྱི་ནང་དུ་ཐིག་ལེའི་ཚོམ་བུ། དེ་དག་གི་བར་མཚམས་རྣམས་སུ་ལུ་གུ་རྒྱུད་གསེར་སྐུད་ལྡིང་བ་ལྟ་བུར་འཆར་བ་སོགས་ནི་རྟེན་འབྲེལ་གྱི་ཆོས་ཉིད་ཡིན་ཏེ། གཞན་དུ་སྨིག་རྒྱུ་ལ་སོགས་པའི་མཐར་སྣང་
གསུམ་འཆར་བའི་གོ་རིམ་དང༌། དུ་བ་ལ་སོགས་པའི་རྟགས་བཅུའི་གོ་རིམ་ངེས་པ་བཞིན་ནོ། །འདི་དག་ཤེས་ན་ཡེ་ཤེས་ཀྱི་རླུང་གི་གདངས་ལས་ཐོད་རྒལ་ཆེན་པོའི་སྣང་བ་འཆར་བར་རྒྱུད་མན་ངག་ལས་བཤད་པ་རྣམས་ལེགས་པར་ཤོད་ཡོད་དོ། །ཆོས་ཉིད་ཀྱི་རང་སྒྲ་ཡང་ཐོས་པར་བཤད་དེ། སྙིང་གའི་གཞོམ་དུ་མེད་པའི་ནཱ་ད་བརྗོད་པ་ཐམས་ཅད་ཀྱི་རྒྱུ་བྱེད་པའི་རང་སྣང་ཡིན་ནོ། །དེ་བཞིན་དུ་རང་སྣང་གི་དྲི་རོ་རེག་བྱ་སོགས་ཀྱང་འདོད་དགོས་པ་འདྲ་ཞིག་སྣང་ཡང༌། སྒྲ་འོད་ཟེར་གསུམ་ཙམ་ཞིག་མང་དུ་གསུངས་པ་ནི། དབྱིངས་ཀྱི་སྒྲོན་མ་ཡར་ལྡན་དུ་ཁྱེར་བའི་སྟེང་ནས་འབྲས་བུའི་དུས་ཀྱི་ཞིང་དང༌། ཐིག་ལེའི་སྒྲོན་མ་ཡར་ལྡན་དུ་ཁྱེར་ཏེ་འོག་མིན་གྱི་གཞལ་མེད་ཁང༌། ཤེས་རབ་རང་བྱུང་གི་སྒྲོན་མ་ཡར་ལྡན་དུ་ཁྱེར་ཏེ་རྡོ་རྗེའི་སྐུ་སྒྲུབ་པར་བྱེད་ཚུལ་གསུངས་པ་ན་སྐུ་རྡོ་རྗེ་སྒྲུབ་ལུགས་དེ་ལྟར་བྱེད་པ་བཞིན་གསུང་རྡོ་རྗེ་སྒྲུབ་ལུགས་ཤིག་ཀྱང་ཡོད་དགོས་པས་གང་ཡིན་སྙམ་པ་ལ། ཆོས་ཉིད་ཀྱི་རང་སྒྲ་ཇེ་དག་ལ་སོང་ནས་ཤིན་ཏུ་རྣམ་པར་དག་པའི་གསུང་དུ་འགྱུར་རོ་ཞེས་བརྗོད་བཞེད་པ་ཙམ་མོ། །ཤེས་རབ་རང་བྱུང་གི་སྒྲོན་མ་ལ་ངོ་བོ་དང་རྩལ་དང་གདངས་གསུམ་གསུངས་པའི་གསུམ་པ་ནི་སྨོས་མ་ཐག་པ་དེ་ཡིན་ཅིང༌། དང་པོ་དེ་གོང་འཕེལ་དུ་གྱུར་པ་ལས་འོད་གསལ་རྡོ་རྗེའི་ཐུགས་མཐར་ཐུག་དང༌། གཉིས་
པ་ལས་དེའི་ཡོན་ཏན་ཇི་ལྟ་ཇི་སྙེད་ཀྱི་ཆོས་ཀྱི་རྣམ་པ་ཐམས་ཅད་མཁྱེན་པ་འབྱུང་བའི་ཚུལ་ཡང་ཤེས་པར་བྱའོ། །རྒྱུད་ཀྱི་རྒྱལ་པོ་གཞན་དུའང་སྟོང་གཟུགས་ཀྱི་སྟེང་ནས་རྣམ་ཀུན་མཆོག་ལྡན་གྱི་གཟུགས་སྐུ་སྒྲུབ་ཚུལ་གསུངས་ཀྱང༌། དེ་དང་འདི་གཉིས་སྟོང་གཟུགས་འཆར་བའི་གནད་མི་གཅིག་གོ །འོན་ཀྱང་བླ་མ་ཡང་ཏིག་ཏུ་སྤྱི་བོ་ན་ཐིག་ལེ་སྟོང་སྒྲོན་གནས་པར་བཤད་ཅིང༌། མུ་ཏིག་ཕྲེང་བར། རིག་པ་རྟོག་མེད་ལུ་གུ་རྒྱུད། །བདེ་ཆེན་ཚངས་པའི་སྒོ་ནས་སྣང༌། །ཞེས་གསུངས་པ་སོགས་ལ་དཔྱད་ན། སྤྱི་བོ་ན་སད་པའི་གནས་སྐབས་སྐྱེད་པའི་ཐིག་ལེ་ཞེས་སྣང་བ་སྣ་ཚོགས་སྐྱེད་པར་བྱེད་པའི་ཐིག་ལེ་ཡོད་པ་དེ་ཡང་རྩ་ཤེལ་སྦུག་ཅན་གྱི་ནུས་པ་མངོན་དུ་སད་པ་དང་ནང་འཛོམ་ན་སྒྲོན་མའི་སྣང་བ་རྒྱ་ཆེར་འཆར་བྱེད་ཀྱི་ཡན་ལག་ཏུ་འགྱུར་ལ། དེའི་འགྲེས་ཀྱིས་རྨི་ལམ་དང་གཉིད་འཐུག་སོགས་ཀྱི་ཐིག་ལེའི་ལག་རྗེས་རྣམས་ཀྱང་ཐབས་མཁས་ཀྱི་མཐུས་དག་པའི་གཞི་སྣང་དང་གཞི་དབྱིངས་འཆར་བའི་གྲོགས་སུ་གོ་འཕོ་བར་སྣང་ལ། རྩ་འཁོར་གྱི་གནས་བྱེ་བྲག་པ་རེར་རླུང་སེམས་བསྡུ་ཚུལ་གྱི་གནད་ཀྱིས་གནས་སྐབས་རིགས་བཞིའི་ཐིག་ལེ་རྣམས་ཀྱི་ནུས་པ་རེས་འཇོག་ཏུ་སད་པར་བྱེད་པ་དང་ལག་རྗེས་མི་འདྲ་བ་ཡོད་དོ། །ཤེལ་སྦུག་ཅན་གྱི་ནུས་པ་སློང་བྱེད་ནི། རྩ་དེའི་རང་གི་
ངོ་བོ་དང༌། དེས་ཡེ་ཤེས་ཀྱི་སྣང་བ་འཆར་བའི་ལམ་ཇི་ལྟར་བྱེད་ཚུལ་སོགས་ཀྱི་ངོ་སྤྲོད་གནད་ལ་ཐེབས་ངེས་བགྱིས་ཏེ། ཁྲེགས་ཆོད་ཀྱི་རིག་པ་མངོན་དུ་བྱས་པའི་ངང་ནས། འོད་རྩ་ལ་རྩེ་གཅིག་ཏུ་གཏོད་པ་དེ་ཡིན་ཅིང༌། དེའི་གྲོགས་ནི་གཟིགས་སྟངས་གསུམ་སོགས་བྱེད་བཅིངས་ཀྱི་སྦྱོར་བ་དང་ཉི་མ་དང་མན་ཤེལ་ལ་སོགས་པའི་ཟེར་ཡང་ཡིན་ནོ། །འདིར་རིག་པ་མིག་ལ་གཏད་ཅེས་བཤད་པ་ལ་སེམས་གཏད་བྱེད། མིག་ཙམ་ཞིག་གཏད་ཡུལ་དུ་བསྟན་པར་འཁྲུལ་བ་མང་སྟེ། དེས་ཤེལ་སྦུག་ཅན་གྱི་ཟ་མ་ཏོག་ཁ་དབྱེ་མི་ནུས་པས་ལམ་གྱི་འགངས་འཆུགས་ནས་འགྲོའོ། །ཀ་དག་གི་དགོངས་པ་ན་སྨིན་པ་དང༌། བསྐྱེད་རིམ་སྔོན་སོང་ལ་མི་ལྟོས་པར་ལུག་རྒྱུད་ལྷ་སྐུར་སྨིན་པ་དང༌། དེ་ལ་བསོད་ནམས་ཀྱི་ཚོགས་མཐའ་ཡས་པའི་བྱེད་ལས་ཚང་བའི་རྒྱ་ཆེ་བའི་མཚན་ཉིད་རྫོགས་པ་དང༌། ལྷ་སྐུའི་སྣང་ཆ་རྣམས་དངོས་གནས་ལ་གྲུབ་པའི་ཡེ་ཤེས་ཀྱི་སྐུར་སྨིན་པ་སོགས་ནི་རིག་པའི་རྩལ་དབང་ཐོབ་པ་ལ་རག་ལས་ཏེ། དབང་དེའི་དོན་ནི། མ་འོངས་པ་ན་རང་ཉིད་སངས་རྒྱས་པའི་དུས་ཀྱི་ཤེས་བྱ་ཐམས་ཅད་ལ་ཆགས་ཐོགས་མེད་པའི་མཁྱེན་རབ་ཀྱི་རྩལ་དང༌། ཤིན་ཏུ་རྣམ་པར་དག་པའི་ལོངས་སྤྱོད་ཟད་མི་ཤེས་པ་དང༌། འཁོར་དང༌། གཟི་བརྗིད་ཟད་མི་ཤེས་པ་སོགས་གཟུགས་སྐུའི་ཕུན་ཚོགས་
བསམ་གྱིས་མི་ཁྱབ་པ་ཐམས་ཅད་གློ་བུར་བའི་སྒྲིབ་བྱེད་ཀྱི་དབང་གིས་མངོན་དུ་གྱུར་མ་ཐུབ་པ་ཙམ་མ་གཏོགས་རང་གི་རིག་པ་འདི་ཉིད་ཀྱི་རྩལ་ལམ་ཤུགས་སམ་མཐུ་ལས་འབྱུང་བས། ནང་གསལ་གྱི་དབང་དུ་བཏང་ན་འབྲས་ཆོས་ད་ལྟ་ཉིད་ནས་རང་ཆས་སུ་བཞུགས་པའི་ཚུལ་ལེགས་པར་གཏན་ལ་ཕེབས་པ་དེ་ཡིན་ཏེ། རང་བྱུང་རྡོ་རྗེ་སེམས་དཔའི་མེ་ལོང་གི་བརྡས་ཀྱང་འདི་འདོམས་པར་སྣང་ངོ༌། །སྤྱིར་ཀུན་རྟོག་དང་ལས་རླུང་གི་གཡོ་ལྡང་ཞི་བ་ན། འོད་གསལ་གྱི་རླུང་སེམས་ནུས་པ་ཆེར་འོང་བ་ཆོས་ཉིད་ཡིན་ཅིང༌། ཁྱད་པར་དུ་རིག་པའི་རྩལ་དབང་གི་ཟབ་གནད་ངོ་ཤེས་བཞིན་པས་མཉམ་བཞག་འཁོར་མོར་སྦྱང་བ་ན། སྙིང་ཀའི་གཞོན་ནུ་བུམ་སྐུའི་སྟེང་ན་དབྱིངས་ཐིག་རིག་གསུམ་གྱིས་བསྡུས་པའི་རྡོ་རྗེ་གསུམ་སྐྱེད་བྱེད་ཀྱི་ནུས་པ་གཞི་ལ་ཡོད་པ་དེ་རིམ་གྱིས་ཆེར་འཕེལ། དེ་ཅི་ཙམ་འཕེལ་བ་ཙམ་དུ་མི་ཤིགས་པའི་འོད་ལྔའི་ལང་ཚོ་ཡང་བཀྲག་མདངས་ལྷག་པར་འབར། དེ་དང་མཉམ་དུ་རྩ་གནས་གཞན་གྱི་ཡེ་ཤེས་ཀྱི་རླུང་རྣམས་ཀྱང་སྒྲོན་མ་སྤོར་བའི་ནུས་པ་ཆེར་རྒྱས་ཏེ། དེ་ཐམས་ཅད་ཀྱི་ནུས་པ་ལ་བརྟེན་ནས་དབྱིངས་སྣང་ཇེ་ཆེ་དང༌། ཐིག་ལེ་ཇེ་གསལ། རིག་གདངས་ལྷ་སྐུའི་རྣམ་པར་ཇེ་མངོན། རིག་རྩལ་ཇེ་རྣོ། འོད་གསལ་ཇེ་འཐུག་ཏུ་འགྲོ་བ་ཡིན་ནོ། །སྒྲོན་མའི་སྣང་བ་
དང་རིག་པ་གཉིས་ཕན་ཚུན་བརྟོད་དེ་བཞག་པས་རིག་པའི་རྩལ་དབང་གི་ཉམས་ལེན་དང་སྦྲགས་པའི་སྣང་བ་དེ་ཇི་ལྟར་འཐུག་པ་དེའི་ཚོད་ཙམ་དུ་སྒྲོན་མས་རིག་པ་བསྡུ་ཕུལ་ཆེ། དེ་ཇི་ལྟར་ཆེ་བ་དེ་ལྟར་རིག་རྩལ་འཁྲུལ་བའི་སྣང་ཞེན་གྱི་རྒྱུ་དང་འབྲས་བུར་ཤར་བའི་ཕྱོགས་འདི་ཁ་བྲི་ནས། དག་པའི་གཞི་སྣང་དུ་འཆར་བའི་ཕྱོགས་གཏིང་ཚུགས་སུ་འགྱུར་བ་ཡིན་ལ། དེ་གཉིས་གོ་བཟློག་ཏུ་ཡོང་བ་འདི་ཇི་ལྟར་ལྷག་པ་དེ་ལྟ་དེ་ལྟར་ཕུང་ཁམས་འོད་སྐུར་གནས་འགྱུར་བ་ལ་ཕྱོགས་པ་ཡིན་ནོ། །དབྱིངས་སྣང་ལ་མང་དུ་གོམས་པའི་སྐབས་སུ་ཟླ་ཉིའི་ཟེར་འཆར་སྡུད་དང༌། མིག་ཕྱེ་བཙུམ་གང་ལའང་རག་མི་ལས་པར་འོད་སྣང་འཆར་བ་སོགས་རྒྱུ་མཚན་དུ་བཀོད་ནས། དེའི་ཚེ་སྟོང་གཟུགས་རྣམས་རྒྱང་ཞགས་ཆུ་སྒྲོན་གྱི་སྦུབས་སུ་འཆར་བ་ཡིན་གྱི། ཕྱིའི་ནམ་མཁའ་ལ་མཐོང་བ་མིན་པར་ཀུན་མཁྱེན་ཆེན་པོས་ལན་དུ་མར་གསུངས་ཏེ། འདི་མ་གོ་ན་ཐོད་རྒལ་གྱི་སྣང་བ་ལ་བརྟེན་ནས་རིག་པ་རྟོད་ལ་གནོན་ཚུལ་རྒྱུད་ཀྱི་དགོངས་པ་དང་མཐུན་པར་ཤེས་ལུགས་མེད་དོ། །དེར་མ་ཟད་སྟོང་གཟུགས་དང་རིག་པ་གཉིས་ལ་རྒྱང་ཆད་དུ་སྣང་བའི་འཆར་ཚུལ་མ་ལོག་ན་དེ་གཉིས་སྐུ་ཐུགས་སུ་གྱུར་པའི་འབྲས་བུའི་དུས་ཀྱི་ཀ་དག་ལྷུན་གྲུབ་ཟུང་འཇུག་གི་གོ་འཕང་འགྲུབ་ལུགས་མེད་ཀྱང༌། རྒྱང་ཞགས་ཀྱི་སྒོར་
ཤར་བའི་འོད་སྣང་ལ་ལྟ་བ་མིན་པའི་བྱེད་ལུགས་ཆེར་མ་བཤད་པ་འདྲ་ཞིག་སྣང་བ་ནི་རྩལ་དབང་གི་ཁོངས་སུ་ཚང་བའི་རྒྱུ་མཚན་གྱིས་ཡིན་ཏེ། དེའང་འོད་གསལ་འཆར་བའི་གནས་མཐར་ཐུག་གཉིས་ཀ་ཡིན་པ་ལ་ནི་རྣལ་འབྱོར་བླ་མེད་ཀྱི་རྒྱུད་ཐམས་ཅད་མཐུན་ཡང༌། གཞན་དུ་འཁོར་ལོ་གང་ལ་དམིགས་པས་གནད་དུ་བསྣུན་པའི་གནས་དེར་འཆར་ལ། འདིར་སྒྲུབ་ཚུལ་གྱི་དབང་གིས་སྙིང་ཀའི་བུམ་སྐུ་ཤུགས་མཐའ་མེད་དུ་འཕེལ་དུ་འགྲོ་བ་ཙམ་ལས་མེད་དེ། དེའི་ཕྱིར་འོད་སྣང་ཡང་མཐར་སྙིང་དབུས་ནས་འཆར་དགོས་པས། རྩལ་དབང་གི་ངོ་སྤྲོད་སྐབས་སུ་ལྷུན་གྲུབ་རིན་པོ་ཆེའི་སྣང་བ་ཐམས་ཅད་རིག་པ་ཉིད་ལས་མི་གཞན་པའི་གདངས་སམ་སྣང་ཆ་ཙམ་དུ་ངོ་སྤྲོད་པའི་དོན་དེ་ཉིད་ལ་རྩེ་གཅིག་ཏུ་མཉམ་པར་བཞག་སྟེ་གོམས་པ་ཆེར་བརྟན་པ་ན། སྣང་བ་དེ་རྣམས་ཀ་དག་གི་རིག་པ་དང་རོ་གཅིག་ཏུ་འདྲེས་ནས་རྣལ་འབྱོར་པའི་ཡིད་ངོར་འོད་ཀྱི་ལུས་ལ་ཡེ་ཤེས་ཀྱི་སྲོག་དང་ལྡན་པ་ཞིག་ཏུ་འཕོ། །དེ་ཤིན་ཏུ་གོམས་པས་ཆབ་རོམ་ལོ་འབུམ་ལོན་ནས་ཤེལ་དུ་འགྱུར་བ་ལྟར་ནམ་ཞིག་དངོས་གནས་ལ་གྲུབ་པའི་འཕོ་ཆེན་ཆུ་ཟླའི་ལུས་སུ་འགྱུར་རོ། །རྩལ་དབང་སྐུར་བའི་དུས་གཅིག་ནི་འོད་གསལ་གྱི་སྣང་བ་ཅུང་ཟད་མཐོང་བའི་འོག་ཏུ་བྱ་བར་གསུངས་ཏེ། དེ་ལ་དཔྱད་ནའང་དབང་དེ་བསྐུར་བས་ཅི་བྱེད་ཤེས་པ་ཡོད་དོ། །དབྱིངས་རིག་གཙོ་བོར་འཆར་ས་དང་དང་
པོར་འཆར་ས་གོང་བཞིན་ཡིན་ཀྱང༌། ཀློང་དུ་གྱུར་པའི་དུས་སུ་ལུས་ཀྱི་རྡུལ་ཕྲ་རབ་ཐམས་ཅད་ལ་མན་ཤེལ་ཉི་ཟེར་ལ་བཞག་པའི་ནང་ལྟར་ཁྱབ་པར་འཆར་བ་ཡང་ཡིན་ཏེ། འདི་ཁྲེགས་ཆོད་སྐབས་སུ་བརྗོད་པའི་འཇའ་ལུས་སྒྲུབ་པའི་གནད་དང་བསྒྲིགས་ནས་དཔྱད་ན་གོ་བ་ཆེའོ། །ཐོད་རྒལ་གྱི་སྣང་བ་ལ་སྟོང་གཟུགས་ཞེས་པའི་ཐ་སྙད་ནི་ཀུན་མཁྱེན་གྱི་བསྟན་བཅོས་དང༌། འཕྲེང་མགོ་རིན་པོ་ཆེའི་གྲོལ་ཐིག་སོགས་ན་མང་དུ་འབྱུང་ཞིང་འདིའི་རྒྱུད་ལས། ནང་དུ་སྟོང་པའི་ཉམས་ཤར་བས། །ཕྱི་རུ་གསལ་བའི་ཡེ་ཤེས་ནི། །ཞེས་པའང་དེའི་སྒྲ་བཤད་ཡིན་ནོ། །རྩལ་དབང་ཐོབ་ཀྱང་དེའི་རྟོགས་པ་ལ་ཅི་འདོད་དུ་དབང་སྒྱུར་མ་ཐོབ་ན་སྟོང་གཟུགས་དངོས་གནས་ཀྱི་གཟུགས་སྐུར་སྨིན་མི་ནུས་ལ། དབང་སྒྱུར་དེ་འཐོབ་པ་ལ་མཉམ་བཞག་གཡོ་བྱེད་ཀྱི་རླབས་གཏིང་ནས་ཞི་བ་དགོས་ཏེ། དེ་འབྱུང་བའི་ཚུལ་ནི་ལུགས་འདིའི་ལས་རླུང་འདུལ་ཐབས་ཁྲེགས་ཆོད་ཀྱི་སྐབས་སུ་བཤད་པ་དང་བསྒྲིགས་ནས་ཤེས་པར་བྱའོ། །འཇའ་འོད་ཀྱི་ཞིང་སྐུ་དངོས་གནས་ལ་གྲུབ་པའི་མཚམས་ནི་རིག་པ་ཚད་ཕེབས་ཀྱི་སྐབས་ཤིག་ཡིན་པར་སྣང་ངོ༌། །དེའི་དུས་སུ་ཐོག་མ་མེད་པ་ནས་གྲུབ་པའི་སངས་རྒྱས་རྣམས་ཀྱི་ཡེ་ཤེས་རང་གི་སྟོང་གཟུགས་ཀྱི་སྣང་བ་ལ་ཞུགས་ནས་སྔོན་མ་ཐོས་པའི་ཆོས་ཚུལ་ཞིང་གི་རྡུལ་སྙེད་སྟོན་པ་སོགས་འབྱུང་བར་བཤད་པ་བཞིན་དུ།
སྟོང་གཟུགས་ཀྱི་འགྲོ་བ་ལ་རིག་པ་གཏད་པ་ཙམ་གྱིས་ཀ་དག་གི་དབྱིངས་སུ་གྲོལ་བར་བྱེད་པ་སོགས་ཀྱི་སྒོ་ནས་འབྲས་བུའི་དུས་ཀྱི་ཕྲིན་ལས་ད་ལྟ་ནས་རྩལ་སྦྱོང་བར་བྱེད་པའི་ཚུལ་ཡང་ཤེས་དགོས་ཏེ། ཚོགས་གཉིས་རྫོགས་ཕུལ་ཆེ་ཆུང་གི་མཚམས་འཛིན་ཐམས་ཅད་ནང་རང་རྒྱུད་ལ་ནུས་པ་ཐོན་ཚུལ་གྱི་སྟེང་ནས་འཇོག་དགོས་ཀྱི། དེས་དངོས་སུ་སེམས་ཅན་ལ་ཕན་ཐོགས་བྱུང་ཚུལ་སོགས་ཀྱི་སྟེང་ནས་མི་འཇོག་པ་ཤིང་རྟ་ཆེན་པོས་གསུངས་པ་ལ་བརྟེན་ནས་དགོངས་པ་རྩད་ཆོད་པར་བྱའོ། །ཚད་ཕེབས་ཀྱི་ལྷ་མོའི་ཆུ་སྐྱེས་ལ་བརྟེན་ནས་མི་འགྱུར་བའི་བདེ་བ་སྒྲུབ་པ་ནི་གྲོལ་ཐིག་ལམ་རྒྱས་འབྲིང་བསྡུས་པ་གསུམ་ཀའི་མན་ངག་ཏུ་གསུངས་ལ། གཞན་དུ་དེ་བཤད་པ་མ་མཐོང་སྟེ། མ་བཤད་པ་འདི་ལྟར་བྱས་ན་རྫོགས་ཆེན་གྱི་རྒྱུད་སྡེ་གཉིས་མེད་རྒྱུད་དུ་འཇོག་པའི་ཕྱོགས་དང་འགྲིགས་སླ་བར་སྣང་ངོ༌། །འདིར་སྒོམ་ལམ་སྐོར་དགུའི་རྣམ་བཞག་ཀྱང་བྱེད་པར་མཁའ་འགྲོ་ཡང་ཏིག་ཏུ་བཤད་དོ། །ཆོས་ཉིད་ཟད་པའི་དོན་ནི། རིག་པ་ཆོས་ཉིད་ཀྱི་ཀློང་དུ་གཉིས་སྣང་མཐའ་དག་ཞི་བའི་ཚུལ་གྱིས་རོ་མཉམ་ལ་སོང་བ་ན། དེའི་རླུང་གཞི་གནས་ཀྱི་ཐིག་ལེར་གྲགས་པ་ཡང་སྔར་བས་ཆེས་ཆེར་ཕྲ་བ་ཞིག་ཏུ་འགྲོ། དེ་ཇི་ལྟར་ཕྲ་བ་དེ་ལྟར་དཔེར་ན་ཡེ་ཤེས་སྙིང་པོའི་རླུང་དེ་ནུས་པ་རྒྱས་རིམ་གྱི་ཚོད་དང་མཐུན་པར་འོད་སྣང་རྒྱས་སུ་འགྲོ་བའི་
རིགས་པས་འཇའ་ཟེར་སྐུ་ཐིག་གི་སྣང་བ་རྣམས་ཆ་ཕྲ་བར་དེངས་ནས་ཆེས་ཆེར་བསམ་གྱིས་མི་ཁྱབ་པའི་རྡུལ་བྲལ་སྒྱུ་མའི་འཁོར་ལོ་ཞིག་ཏུ་གྱུར་བ་ནམ་མཁའ་ལྟ་བུའི་མཉམ་གཞག་དེ་དང་འདྲེས་པ་ལ། གཞི་སྣང་གཞི་དབྱིངས་སུ་འཁྱིལ་བ་དང༌། དང་པོའི་ཆོས་ཉིད་དུ་ཟད་པ་ཞེས་གསུངས་ཏེ། གནས་སྐབས་འདིར་ནི་སྔར་ལུས་ཀྱི་རླུང་ཐམས་ཅད་ཡེ་ཤེས་ཀྱི་རླུང་དུ་རྒྱས་བཏབ་པ་རྣམས་ཀྱང་གསེར་སྦྱངས་མེ་ཆེན་ནང་ནས་བཏོན་པ་བཞིན་དུ་སོང་སྟེ་འཇའ་ལུས་སུ་རིམ་གྱིས་འགྱུར་བ་ཡིན་ནོ། །གཏེར་གཞུང་ཁ་ཅིག་དང་གསུང་རྒྱུན་ལས་ཆོས་ཉིད་ཙམ་དུ་ཟད་པའམ་བས་པ་ཞེས་འབྱུང་བའང་གནད་འདྲའོ། །དེའི་མཐར་འཕོ་བ་ཆེན་པོའི་སྐུ་འགྲུབ་པར་གསུངས་པའི་འཕོ་ལུགས་ནི། གློ་བུར་བའི་སྒོ་གསུམ་ཕྲ་རགས་ཀྱི་ཆ་ཐམས་ཅད་ལྷག་མ་མེད་པར་ལོག་ནས་རྣལ་འབྱོར་བའི་སྒོ་གསུམ་གདོད་མའི་རང་བཞིན་གྱི་རྡོ་རྗེ་གསུམ་དུ་གོ་འཕོ་བ་སྟེ། གཞན་དུ་ཕྱི་ནང་གཞན་གསུམ་རོ་མཉམ་རྡོ་རྗེར་གྱུར་པ་དང་གནད་གཅིག་གོ །འཕོ་ཆེན་དུ་འཇུག་ལུགས་གཉིས་གསུངས་པ་ནི་སྔར་གྱི་སྐུའི་རྣམ་པ་དེ་ཉིད་སྡུད་མི་སྡུད་ཀྱི་ཁྱད་པར་ཙམ་ལ་སྦྱར་དགོས་ཀྱི། སྐུ་གསུང་ཐུགས་མི་ཟད་པ་རྒྱན་གྱི་འཁོར་ལོ་ཡ་བྲལ་དུ་འགྲོ་མི་སྲིད་པར་ཤེས་དགོས་སོ། །ལམ་ལྔའི་སྦྱོར་ཚུལ་དང༌། ཆོས་ཉིད་བར་དོའི་གྲོལ་ལུགས་སོགས་རྩད་མི་གཅོད་དུ་མི་རུང་
བའི་ཟབ་གནད་མང་པོ་བཤད་རྒྱུ་ཡོད་ཀྱང་རེ་ཞིག་དེ་ཙམ་ལས་ཐོར་མ་བཏབ་བོ། ཁོ་བོས་རྫོགས་ཆེན་གྱི་དགོངས་པ་ལེན་ལུགས་འདི་ལ་མཉེས་མི་མཉེས་མང་དུ་སྣང་ཡང༌། རྒྱ་བོད་གཉིས་ཆར་དུ་དྲང་སྲོང་ཆེན་པོའི་བཞེད་པར་སོང་བ་དང་མ་སོང་བའི་དགོངས་འགྲེལ་མཁན་དུ་སྨྲ་བ་དུ་མ་ཞིག་བྱུང་འདུག་པ་ལྟར། རང་རང་གི་གོ་ལུགས་ཙམ་ཞིག་བཤད་པ་ལ་དམ་པ་རྣམས་ཀྱིས་དགག་སྒྲུབ་ཀྱི་རིགས་པ་གང་འོས་དེ་སྟོན་པ་མ་གཏོགས་ཐུགས་ལོག་མཛད་པར་མི་འགྱུར་སྙམ་ནས་བྲིས་པ། ཀུན་ཏུ་བཟང་པོའི་རིང་ལུགས་ལ་བྱིས་པ་ངན་རྟོག་གི་དྲི་མས་སྦགས་པ་མཆིན་རྩ་གསུམ་རྒྱ་མཚོའི་སྤྱན་སྔར་སྙིང་ནས་འཆགས་སོ། །འདི་ནས་རྩོད་དུས་ཀྱི་ཐམས་ཅད་མཁྱེན་པ་རྡོ་རྗེ་གཟི་བརྗིད་ཞབས་ཀྱི་བཀའ་དྲིན་བདུད་རྩིའི་རྒྱུན་ལ་འཐུང་བ། མདོ་སྨད་རྡོ་རོལ་གྱི་སྤྲང་སྨྱོན་ཉི་མ་དཔལ་གྱིས་རང་ལོ་སུམ་ཅུ་རྩ་གཅིག་པ་མྱོས་བྱེད་ཤིང་ལུག་གི་ལོའི་ཁྲུམ་ཟླའི་དཀར་ཚེས་བཟང་པོར་གང་ཤར་ཅི་ཐོན་དུ་བྲིས་པ་འགྲོ་ཀུན་མཐོང་བའི་ཆོས་ལ་འོད་གསལ་ཐིག་ལེ་ཆེན་པོ་ཡི་གེ་མེད་པའི་དབྱིངས་སུ་བྱང་ཆུབ་པའི་རྒྱུར་གྱུར་ཅིག །འདི་དག་རྗེ་ཉིད་ནས་ཟིན་ཐོ་ལྟ་བུར་བཏབ་ཡོད་པ་རྣམས་གཞན་དུ་འཁྱར་གྱི་དོགས་ནས་རྗེས་འཇུག་འགའ་ཞིག་གིས་ཕྱོགས་གཅིག་ཏུ་བསྒྲིག་ཁུལ་བྱས་
ཏེ་ཕྱག་བྲིས་ཇི་ལྟ་བ་བཞིན་བཅོས་བསླད་མེད་པར་སྤར་དུ་བསྐྲུན་པ་དགེ་ལེགས་འཕེལ།། །།