རིག་འཛིན་ཡུམ་ཀའི་རྒྱུན་ཁྱེར།
རིག་འཛིན་ཡུམ་ཀའི་རྒྱུན་ཁྱེར་སྙིང་པོར་དྲིལ་བ་རྡོ་རྗེ་བཙུན་མོའི་ཞལ་ལུང་ཞེས་བྱ་བ་བཞུགས་སོ། །ན་མོ་ཛྙཱ་ན་ས་ཀ་རཱ་ཡེ། འདིར་རྫོགས་པ་ཆེན་པོ་ཀློང་ཆེན་སྙིང་གི་ཐིག་ལེ་བརྡ་བསྒྱུར་ནམ་མཁའ་མཛོད་ཀྱི་ཆོས་སྡེའི་བྱེ་བྲག་གི་རིག་འཛིན་ཡུམ་ཀ་རྡོ་རྗེ་མཁའ་འགྲོ་མ་རྣམས་ཀྱི་འཁོར་ལོས་སྒྱུར་བ་དབྱིངས་ཕྱུག་བདེ་ཆེན་རྒྱལ་མོའི་རྩ་སྒྲུབ་བདེ་ཆེན་དཔལ་ཕྲེང་གི་རྒྱུན་ཁྱེར་སྙིང་པོར་དྲིལ་ཏེ་ཉམས་སུ་ལེན་པར་འདོད་པས། ཐོག་མར། གང་གི་དྲིན་གྱིས་བདེ་ཆེན་སོགས། ཅེས་རྩ་བརྒྱུད་ཀྱི་བླ་མ་ལ་གསོལ་གདབ་སྔོན་དུ་འགྲོ་བས། སྐྱབས་སེམས་བྱ་བ་ནི། ན་མོ་རྒྱལ་ཡུམ་རྡོ་རྗེ་ཕག་མོ་ལཿ འདུ་འབྲལ་མེད་པར་སྐྱབས་སུ་མཆིཿ ཕྱོགས་རིས་བྲལ་བའི་སེམས་ཅན་རྣམསཿ
བདེ་ཆེན་ས་ལ་འགོད་པར་བགྱིཿ ལན་གསུམ། དེ་ནས་དངོས་གཞི་མཁའ་འགྲོའི་མངོན་རྟོགས་སྒོམ་པ་ནི། ཨཱཿ སྣང་བ་ཐམས་ཅད་ཡུམ་ལྔའི་ཀློང་ཿ སྲིད་པ་ཐམས་ཅད་མཁའ་འགྲོའི་དལཿ རྒྱུ་རྐྱེན་ལས་འདས་གཞལ་ཡས་ཁང་ཿ ཐིག་ལེ་ཉག་གཅིག་ཆོས་དབྱིངས་སྒོཿ བདེ་ཆེན་འབར་བའི་ཕོ་བྲང་དབུསཿ ཆུ་སྐྱེས་གེ་སར་བཞད་པའི་སྟེང་ཿ ཉི་མའི་གདན་ལ་མཁའ་འགྲོའི་གཙོཿ ཆོས་སྐུའི་ཀློང་ན་ཀུན་བཟང་མོཿ ལོངས་སྐུའི་ཞིང་ན་ཝཱ་ར་ཧིཿ སྤྲུལ་སྐུ་ཡེ་ཤེས་མཚོ་རྒྱལ་མཿ ཞལ་གཅིག་ཕྱག་གཉིས་སྐུ་མདོག་དམརཿ གཅེར་མོ་མཉམ་པའི་དོར་སྟབས་ཅནཿ ཤིན་ཏུ་ཆགས་དང་བཞད་པའི་ཞལཿ ཕྱག་གཡས་ཐོད་པའི་ཅང་ཏེའུཿ སྙན་གྱི་ཐད་ཀར་གཏད་ཅིང་འཁྲོལཿ གཡོན་པ་གྲི་གུག་ཡུ་བ་ནིཿ དཀུ་ལ་བསྟེན་ནས་མཆོག་ཏུ་འགྱིངསཿ བྷ་ག་རྒྱས་ཤིང་ནུ་མ་འབུརཿ རིན་པོ་ཆེ་དང་གཞོན་ནུའི་རྒྱནཿ པུཎྜ་རི་ཀའི་དོ་ཤལ་འཕྱང་ཿ རུས་པའི་རྒྱན་དྲུག་སྐུ་ལ་གསོལཿ གནག་སྣུམ་དབུ་སྐྲའི་ལན་ཚར་ཅནཿ རིན་པོ་ཆེ་ཡི་རྩེ་ཕྲན་བརྗིདཿ དབུ་མའི་སྤྱན་ནི་དབྱིངས་ལ་གཟིགསཿ ལོངས་སྐུའི་སྤྱན་གྱིས་འགྲོ་བ་འདུལཿ སྤྲུལ་སྐུའི་སྤྱན་གྱིས་ཁམས་གསུམ་
འགུགསཿ སྐུ་ལ་རྒྱུད་སྡེའི་དཀྱིལ་འཁོར་རྫོགསཿ འབུམ་ཕྲག་ཡངས་པའི་མཁའ་འགྲོས་བསྐོརཿ རིགས་བདག་པདྨ་ཐོད་འཕྲེང་རྩལཿ ཨ་ཙརྱ་གཞོན་དཀར་གསལ་འཛུམཿ ཧེ་རུ་ཀ་པ་ཅང་དྲིལ་འཁྲོལཿ དམ་ཚིག་ཡེ་ཤེས་གཉིས་སུ་མེདཿ བསྒོམས་པ་ཙམ་གྱིས་དངོས་གྲུབ་ཐོབཿ ཅེས་དམ་ཡེ་དབྱེར་མེད་ཀྱི་ང་རྒྱལ་བརྟན་པོ་བྱ་ཞིང་དག་པ་རབ་འབྱམས་ལྷའི་གསལ་སྣང་ལ་སེམས་རྩེ་གཅིག་ཏུ་བཟུང༌། བཟླས་དམིགས་ནི། རང་ཉིད་མཁའ་འགྲོའི་ཐུགས་ཀ་རུ༔ ཕག་མོ་མཐིང་ནག་གྲི་ཐོད་ཅནཿ སྙིང་དབུས་དགའ་འཁྱིལ་བཾ་མཚན་མཐརཿ སྔགས་ཕྲེང་འཁོར་བའི་འོད་ཟེར་གྱིསཿ ལྷ་སྐུའི་སྣང་ཞེན་གསལ་བར་བྱསཿ རིགས་བདག་བླ་མའི་ཐུགས་རྒྱུད་བསྐུལཿ དེ་ལས་འོད་འཕྲོས་དོན་གཉིས་བྱསཿ བླ་མའི་སྐུ་ལས་བདུད་རྩིའི་རྒྱུནཿ ཟག་མེད་བདེ་བ་ཆེན་པོར་བབསཿ དགའ་བ་བཞི་ཡི་བྱེད་ལས་ཀྱིསཿ དབང་བཞིའི་ཡེ་ཤེས་ཉམས་སུ་མྱོང་ཿ ཞེས་སེམས་དཔའ་སུམ་བརྩེགས་སུ་བྱས་ཏེ་རྡོ་རྗེའི་རྩ་སྔགས་ཡི་གེ་བཅུ་གཉིས་པ། ཨོཾ་ཞེས་སྔགས་ཀྱི་མགོ་འདྲེན་དང༌། པདྨོ་ཡོ་གི་ནི་སྟེ་དམ་ཚིག་སེམས་མ་དང༌། ཛྙཱ་ན་ཝཱ་རཱ་ཧཱི་ཞེས་ཡེ་ཤེས་སེམས་མའི་མཚན་སྔགས་ཀྱི་མཐར། ཧཱུྃ་ཞེས་རྡོ་རྗེ་གསུམ་
གྱི་དངོས་གྲུབ་བསྐུལ་བའི་རིག་པ་སྦྱར་བ་ཅི་ནུས་སུ་བཟླས། འོད་ཟེར་སྤྲོ་བསྡུའི་དམིགས་པ་བྱ་ཞིང་ཀློང་ཆེན་དགོངས་པའི་སྐྱོང་ཚུལ་སོགས་གཞུང་ལས་ཤེས། མཐར། ཨོཾ་གུ་ཧྱ་ཛྙཱ་ན་བོ་དྷི་ཙིཏྟ་མ་ཧཱ་སུ་ཁ་རུ་ལུ་རུ་ལུ་ཧཱུྃ་བྷྱོ་ཧཱུྃཿ ཞེས་ཞི་ཁྲོ་འདུས་པའི་སྤྱི་སྔགས་ཀྱང་བཟླ། ཐུན་ལས་ལྡང་བ་ན་དབྱངས་གསལ་རྟེན་སྙིང་ཡི་གེ་བརྒྱ་པས་ལྷག་ཆད་སྐོང་ཞིང་བྱིན་རླབས་བརྟན་པར་བྱས་ནས། ལྷ་སྣང་འོད་་ལུས་དཀྱིལ་གཙོ་བོའི་ཐུགས་ཀར་ཉི་ཟླའི་གའུར་ཨ་ཡིག་ལ་སྔགས་ཕྲེང་གི་བསྐོར་བར་དམིགས་ཏེ་སྤྲོ་བསྡུ་བྱའོ། །མཆན། གསལ་གྱི་ལྷར་ལྡང༌། ཧོ་ཆུ་ལས་ཆུ་བུར་རྡོལ་བ་བཞིནཿ རང་ལས་སྤྲུལ་པའི་དཀྱིལ་འཁོར་ལྷཿ ཡེ་ཤེས་དབྱིངས་སུ་བཛྲ་མུཿ ཞེས་དགོངས་པ་ལ་མཉམ་པར་བཞག །སླར་ཡང༌། རྗེས་ཐོབ་སྒྱུ་མའི་ལྷ་སྐུར་ལྡང་ཿ ཞེས་ཐུན་མཚམས་ཀྱི་ལྷར་ལྡང༌། དགེ་བ་འདི་ཡིས་མྱུར་དུ་བདག །རྡོ་རྗེ་བཙུན་མོ་འགྲུབ་གྱུར་ནས་སོགས་བསྔོ་སྨོན་གྱིས་མཐའ་བརྒྱན་པར་བྱ་སྟེ། རྣམ་འབྱོར་འདི་ཙམ་གྱིས་སྐྱེ་འཆི་བར་དོ་གསུམ་སྐུ་གསུམ་དུ་སྒྱུར་བའི་རྡོ་རྗེ་ཐེག་པ་བླ་མེད་ཀྱི་ཐབས་ལ་མཁས་པའི་གནད་ལེགས་པར་ཟིན་པ་ཡིན་པས་ཚེས་བཅུ་གཉིས་ཀྱི་མཆོད་པ་མ་གཏོགས་པ་དུས་གཞན་རྣམས་སུ་བསྡུས་པ་ལ་དགའ་ན་འདི་ལ་ཡི་དམ་དུ་བྱའོ། །ཞེས་པའང་ཀུན་མཁྱེན་བླ་མའི་གསུང་རབ་ཀྱི་བདུད་རྩིས་འཚོ་བའི་སྤྲང་པོ་སྨྱོན་པ་འཇིགས་མེད་བསྟན་རྒྱལ་གྱིས་རྫོང་སར་བཀྲ་ཤིས་ལྷ་རྩེར་སྦྱར་བ་དགེ་ཞིང་བཀྲ་ཤིས། །དགེའོ།། །།