གནས་བརྟན་མཆོད་ཆོག
ཐུབ་དབང་གནས་བརྟན་འཁོར་བཅས་མཆོད་པའི་ཆོ་ག་འཕགས་པ་དགྱེས་པའི་རོལ་མོ་ཞེས་བྱ་བ་བཞུགས་སོ།། །།
ཐུབ་དབང་གནས་བརྟན་འཁོར་བཅས་མཆོད་པའི་ཆོ་ག་འཕགས་པ་དགྱེས་པའི་རོལ་མོ་ཞེས་བྱ་བ། དཔལ་་སེངྒེ་ལ་ཕྱག་འཚལ་ལོ། །ཐུབ་དབང་གནས་བརྟན་འཁོར་བཅས་ལ་ཕྱག་མཆོད་འབུལ་བར་འདོད་པས། ཐོག་མར་གོང་དུ་རྟེན་གསུམ་ཅི་འབྱོར་བ་བཤམས་པའི་མདུན་དུ་སྟེགས་བུའི་ཁར་མཆོད་པ་སྣ་ཚོགས་གཙང་ཞིང་གྱ་ནོམ་པར་བཀོད། སྤོས་ཀྱི་དྲི་ཞིམ་པོས་བདུག །གསོ་སྦྱོང་ལ་གནས་པར་བྱས་ཏེ། བདེ་བའི་སྟན་ལ་འདུག་ནས། སྐྱབས་སེམས་སྔོན་དུ་གཏོང༌། དེ་ནས། དཀོན་མཆོག་གསུམ་གྱི་བདེན་པ་དང་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་བྱིན་གྱི་རླབས་དང་ཚོགས་གཉིས་ཡོངས་སུ་རྫོགས་པའི་མངའ་ཐང་ཆེན་པོ་དང༌། ཆོས་ཀྱི་དབྱིངས་རྣམ་པར་དག་ཅིང་བསམ་གྱིས་མི་ཁྱབ་པའི་སྟོབས་ཀྱིས། དེང་འདིར་ཁོར་ཡུག་
གི་ས་གཞི་འདི་དག་བཅོམ་ལྡན་འདས་འོད་དཔག་མེད་ཀྱི་ཞིང་གི་བཀོད་པའི་ཡོན་ཏན་ལྟར་ཕུན་སུམ་ཚོགས་པའི་རྒྱན་ཐམས་ཅད་ཀྱིས་བརྒྱན་པ་མཛེས་ཤིང་ཡིད་དུ་འོང་བར་གྱུར་པའི་གཞིར། །གཞལ་མེད་ཁང་རིན་པོ་ཆེ་སྣ་བདུན་མཆོག་ཏུ་འབར་བ་བཀོད་པ་ལེགས་པས་མཛེས་ཤིང་ལྷུན་སྟུག་པ། ཡངས་ཤིང་རྒྱ་ཆེ་བ། སྟེང་གི་ཤར་ལྷོར་ཁྲུས་ཀྱི་ཆོས་ཟང་དང་བཅས་པ། དེའི་ལྟེ་བར་རིན་པོ་ཆེ་སྣ་ཚོགས་ལས་གྲུབ་པའི་ཁྲི་སེང་གེ་ཆེན་པོ་བརྒྱད་ཀྱིས་བཏེགས་པའི་སྟེང་དུ་པད་ཟླའི་གདན། མཐའ་བསྐོར་ཀུན་ཏུ་སེང་ཁྲི་པད་ཟླའི་གདན་གྲངས་མེད་པ་དང༌། ཕྱི་ནང་ཀུན་ཏུ་ཡང་ཆོ་རིགས་དང་འཚམས་པར་
ལྷ་དང་མིའི་ཡོ་བྱད་དམ་པ་ཞལ་ཟས་དང༌། ན་བཟའ་དང༌། རོལ་མོ་ལ་སོགས་པ་ཕུལ་དུ་ཕྱིན་པ་སྣ་ཚོགས་པ། ཕུང་པོ་གསུམ་པའི་མདོ་དང༌། བཟང་པོ་སྤྱོད་པའི་སྨོན་ལམ་ལས་བྱུང་བའི་མཆོད་པའི་སྤྲིན་རྒྱ་མཚོ་ཐམས་ཅད་ཀྱིས་རྒྱས་པར་གང་ཞིང་རྒྱན་ཀླུབས་པ་དང་ལྡན་པ་འབྱུང་བར་གྱུར་ཅིག །མཆོད་པའི་སྤྲིན་གཟུངས་ལན་བདུན་སོགས་བཟླ་ཞིང་བྱིན་གྱིས་བརླབ། དེ་ནས་སྤོས་བཏུལ་ཏེ། ཐལ་མོ་སྦྱར་ལ། སྟོན་པ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་རྐང་པར་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེ་བུ་འདུལ་བས་ཁ་ལོ་སྒྱུར་བ། བླ་ན་མེད་པ། ལྷ་དང་མི་རྣམས་ཀྱི་སྟོན་པ་མཉམ་མེད་་རྒྱལ་པོ་འཕགས་པ་ཉན་ཐོས་ཀྱི་དགེ་འདུན་ཆེན་པོ་བཅུ་དྲུག་སོགས་སློབ་མ་དུལ་བ་མཐའ་ཡས་པའི་ཚོགས་དང་བཅས་པ་དེང་འདིར་བདག་ཅག་ལ་སོགས་པ་འགྲོ་བ་མང་པོའི་བསོད་ནམས་ཀྱི་ཞིང་དུ་སྤྱན་འདྲེན་ཅིང་མཆིས་ན། སྟོན་པས་བདག་ཅག་ལ་ཐུགས་བརྩེ་བ་ཉེ་བར་བཞག་སྟེ་ཡོན་ཏན་ཚད་མེད་པ་བཀོད་པའི་ཕོ་བྲང་གི་གནས་འདིར་གདན་འཛོམ་པ་ཆེན་པོ་མཛད་དེ་བྱིན་གྱིས་བརླབ་པར་ཅི་གནང༌། ཇི་ལྟར་སྔོན་དེ་བཞིན་གཤེགས་པ་ཉན་ཐོས་ཀྱི་དགེ་འདུན་དང་བཅས་ཏེ་འཇིག་
རྟེན་རྣམས་ལ་ཐུགས་བརྩེ་བ་དང༌། ལྷ་དང་མི་རྣམས་ཀྱི་དོན་དང༌། གྲུབ་པ་དང་བདེ་བ་བླ་ན་མེད་པར་བྱ་བའི་ཕྱིར་གྲོང་ཁྱེར་རྒྱུ་བར་མཛད་དེ། སྟོན་པ་དུལ་བ་འཁོར་དུལ་བ་དང་ལྡན་པ། ཟླ་བ་སྐར་མའི་ཚོགས་ཀྱིས་བསྐོར་བ་ལྟ་བུ། །བརྒྱ་བྱིན་ལྷའི་འཁོར་གྱིས་བསྐོར་བ་ལྟ་བུ། ཚངས་པ་ཚངས་རིས་ཀྱི་འཁོར་གྱིས་བསྐོར་བ་ལྟ་བུ། ཁྱུ་མཆོག་ཅང་ཤེས་ལྟར་དབང་པོ་རྣམས་ཤིན་ཏུ་དུལ་བ། སྤྱོད་ལམ་དང་སྤྱོད་པ་མ་འཁྲུགས་པ། ཆུ་གཏེར་ལྟར་ཏིང་ངེ་བ། །སྤྲིན་ཆུ་དང་བཅས་པ་ལྟ་བུ། གླང་པོའི་རྒྱལ་པོ་ལྟར་དྲེགས་པ་དང་བྲལ་བ། ཛམ་བུ་ཆུ་བོའི་གསེར་གྱི་མཆོད་སྡོང་ལྟར་དཔལ་གྱིས་ལྷང་ངེ་ལྷན་ནེ་ལྷམ་མེར་འཕགས་པ། ཉི་མ་སྟོང་བས་ལྷག་པའི་འོད་དང་ལྡན་པ། རིན་པོ་ཆེའི་རི་བོ་འགྲོ་བ་ལྟར་ཀུན་ཏུ་བཟང་བ། ཀུན་ཤེས་ཀོའུ་དིནྱ་ལ་སོགས་པ་ཉན་ཐོས་ཆེན་པོ་དང༌། གཞན་ཡང་དགེ་སློང་གི་དགེ་འདུན་མང་པོས་བསྐོར་ཏེ་སངས་རྒྱས་ཀྱི་སྤྱོད་ལམ་མཐོང་ན་མི་མཐུན་པ་མེད་པས་སྐྱེ་རྒུ་རྣམས་ལ་བསོད་ནམས་ཀྱི་ཞིང་ཉེ་བར་བསྒྲུབས་པ་དེ་བཞིན་དུ་དེང་འདིར་བདག་ཅག་ལ་སོགས་པ་སྐྱེ་བོ་མང་པོ་ལ་ཕན་པ་དང་བདེ་བའི་ཕྱིར་སྐྱབས་མཛད་པ་དང༌། བསོད་ནམས་ཉེ་བར་བསྒྲུབ་པའི་སླད་དུ་དེ་
བཞིན་གཤེགས་པ་དང་འཕགས་པའི་གནས་བརྟན་རྣམས་བསྟན་པ་ལ་མངོན་པར་དགའ་བའི་ལྷའི་འཁོར་བསོད་ནམས་ཆེན་པོ་རྣམས་དང་ཐབས་གཅིག་ཕོ་བྲང་གི་གནས་འདིར་གཤེགས་ཤིང་གདན་འཛོམ་པ་ཆེན་པོ་མཛད་དེ་བྱིན་གྱིས་རློབ་པར་ཅིག་ནང༌། སྤོས་རོལ་ཆེར་བྱ། བཅོམ་ལྡན་འདིར་ནི་བྱོན་པ་ལེགས། །བདག་ཅག་བསོད་ནམས་སྐལ་བར་ལྡན། །བདག་གི་མཆོད་ཡོན་བཞེས་ནས་ཀྱང༌། །འདི་ཉིད་དུ་ནི་བཞུགས་སུ་གསོལ། །པདྨ་ཀ་མ་ལ་ཡེ་སྟྭམ། དེ་ནས་ཁྲུས་བུམ་སོགས་ཁྲུས་ཀྱི་ཡོ་བྱད་སྟ་གོན་དུ་བྱས་ཏེ་འདུལ་བ་ནས་གསུངས་པའི་ཁྲུས་སྟེགས་གསལ་བཏབ་ལ། ཁྲུས་ཀྱི་འབབ་སྟེགས་ཤིན་ཏུ་དྲི་ཞིམ་པ། །གླང་པོའི་རྨིག་མཐིལ་ལྟ་བུར་ཟླུམ་པའི་ཞབས། །ཀ་དམ་མེ་ཏོག་འདྲ་བའི་སྙིང་པོ་ཅན། །ལྷ་མི་དགའ་བ་སྐྱེད་བྱེད་འདུན་ས་དེར། །སངས་རྒྱས་མི་མཆོག་སློབ་མའི་ཚོགས་སུ་བཅས། །དགེ་མཚན་ཤིས་པའི་ཞབས་པད་ཉེར་བཀོད་དེ། །འདག་ཆལ་རྡུལ་ཁམས་འདྲེན་པའི་ཞབས་བསིལ་ཆུས། །ཉེ་རེག་ཁྲུས་ཀྱི་ཆོ་ག་རྣམ་པར་བསྟར། །ཇི་ལྟར་བདེ་གཤེགས་བལྟམས་པ་ཙམ་ཉིད་ནས། །ལྷ་དབང་ཀླུ་རྒྱལ་རྣམས་ཀྱིས་ཁྲུས་གསོལ་ལྟར། །དེང་འདིར་ལྷ་ཡི་ཆུ་ནི་དག་པ་ཡིས། །སྟོན་མཆོག་སློབ་མར་
བཅས་ལ་སྐུ་ཁྲུས་གསོལ། །དྲི་ཞིམ་སྤོས་ཆུས་གང་བའི་བུམ་པ་དང༌། །གླུ་གར་རོལ་མོའི་བྱེ་བྲག་རྣམ་མང་སོགས། །ཕུལ་བྱུང་མཆོད་པའི་ཡོ་བྱད་སྣ་ཚོགས་པས། །ཐུབ་དབང་གནས་བརྟན་རྣམས་ལ་སྐུ་ཁྲུས་གསོལ། །རྒྱལ་བའི་སྐུ་ལ་སྒྲིབ་པ་མི་མངའ་ཡང༌། །བདག་གཞན་སྒོ་གསུམ་ཉེས་ཚོགས་སྦྱང་བའི་ཕྱིར། །གཙང་མ་ཆབ་ཀྱི་ཁྲུས་གསོལ་འདི་བགྱིས་པས། །སྐྱོན་མེད་རྣམ་དག་སྐུ་མཆོག་ཐོབ་པར་ཤོག །མེ་ལོང་ལ་རས་ཀྱིས་དབྱི་ཞིང༌། རེག་འཇམ་ལྷ་རྫས་དར་གྱི་ཕྲེང་བ་དང༌། །གཙང་ཞིང་ངད་ལྡན་ཀ་ཤིའི་རས་བཟང་གིས། །དྲིལ་ཕྱིས་མཆོད་པའི་རི་མོ་འདི་བྱས་པས། །འཕགས་པ་དགྱེས་པའི་ཚུལ་ཁྲིམས་རྣམ་དག་ཤོག །ན་བཟའ་ཕུལ་ལ། དྲི་མེད་མཚན་ལ་སྒྲིབ་གསལ་མི་མངའ་ཡང༌། །དད་པས་ངུར་སྨྲིག་རྒྱལ་མཚན་ཕུལ་བ་ཡིས། །ནམ་མཁའི་མཐའ་ཀླས་གྱུར་པའི་སེམས་ཅན་རྣམས། །སངས་རྒྱས་བརྟུལ་ཞུགས་མཆོག་ལ་སྤྱོད་པར་ཤོག །དེ་ནས། བདག་དང་འགྲོ་ལ་ཐུགས་བརྩེའི་ཕྱིར། །ཉིད་ཀྱི་རྫུ་འཕྲུལ་མཐུ་ཡིས་ནི། །ཇི་སྲིད་མཆོད་པ་བདག་བགྱིད་ན། །དེ་སྲིད་བཅོམ་ལྡན་བཞུགས་སུ་གསོལ། །ཕྱག་མཆོད་དང་པོ་ལ་སྤྱི་བྱེ་བྲག་
གཉིས་ལས། དང་པོ་ནི། ཐབས་མཁས་ཐུགས་རྗེས་་རིགས་སུ་འཁྲུངས། །གཞན་གྱིས་མི་ཐུབ་བདུད་ཀྱི་དཔུང་འཇོམས་པ། །གསེར་གྱི་ལྷུན་པོ་ལྟ་བུར་བརྗིད་པའི་སྐུ། །རྒྱལ་པོ་ཁྱོད་ལ་ཕྱག་འཚལ་ལོ། །ཐུབ་པས་བཀའ་བསྒོས་བསྟན་པའི་རྒྱལ་མཚན་འཛིན། །ཡན་ལག་འབྱུང་དང་མ་ཕམ་ནགས་ན་གནས། །དུས་ལྡན་རྡོ་རྗེ་མོའི་བུ་བཟང་པོ་དང༌། །གསེར་བེའུ་བ་ར་དྷྭ་ཛ་གསེར་ཅན་མཆོག །འཕགས་པ་བ་ཀུ་ལ་དང་སྒྲ་གཅན་འཛིན། །ལམ་ཕྲན་བྷ་ར་དྷྭ་ཛ་བསོད་སྙོམས་ལེན། །ལམ་བསྟན་ཀླུའི་སྡེ་སྦེད་བྱེད་མི་ཕྱེད་པ། །དགེ་བསྙེན་དྷར་མཱ་ཏ་དང་རྒྱལ་ཆེན་བཞི། །འཁོར་དང་བཅས་པའི་ཞབས་ཀྱི་པདྨོ་ལ། །ཕྱག་འཚལ་སྐྱབས་མཆི་སྙིང་ནས་གསོལ་བ་འདེབས། །གཉིས་པ་ལ་གཙོ་བོ་དང་འཁོར་གྱི་ཕྱག་མཆོད་གཉིས་ལས། དང་པོ་ནི། ལངས་ཏེ་ཕྱག་འཚལ་བའམ་ཐལ་མོ་སྦྱར་བ་བཏུད་དེ། སྟོན་པ་བླ་ན་མེད་པ་ཡང་དག་པར་རྫོགས་པའི་སངས་རྒྱས་ཐུགས་རྗེ་ཆེན་པོ་དང་ལྡན་པ། །རིག་པ་གསུམ་ཤིན་ཏུ་བརྙེས་པ། །བསླབ་པ་གསུམ་ལ་ལེགས་པར་བསླབས་པ། དུལ་བའི་གནས་གསུམ་གྱི་གཞི་ལ་མཁས་པ། རྫུ་འཕྲུལ་གྱི་རྐང་པ་བཞིས་སྤྱོད་པའི་གཞི་ལ་གནས་པ། བསྡུ་བའི་དངོས་
པོ་ལ་ཡུན་རིང་པོ་ནས་སྦྱངས་པ་མཛད་པ། མི་འཇིགས་པ་བཞིས་བསྙེངས་པ་མི་མངའ་བ། །ཡན་ལག་ལྔ་སྤངས་པ། འགྲོ་བ་ལྔ་ལས་ཡང་དག་པར་འདས་པ། ཡན་ལག་དྲུག་དང་ལྡན་པ། ཕ་རོལ་ཏུ་ཕྱིན་པ་དྲུག་ཡོངས་སུ་རྫོགས་པ། རྟག་ཏུ་གནས་པ་དྲུག་གིས་གནས་པ། བྱང་ཆུབ་ཀྱི་ཡན་ལག་བདུན་གྱི་མེ་ཏོག་གིས་ཕྱུག་པ། །ལམ་གྱི་ཡན་ལག་བརྒྱད་སྟོན་པ། མཐར་གྱིས་གནས་པའི་སྙོམས་པར་འཇུག་པ་དགུ་ལ་མཁས་པ། ཕྱོགས་བཅུར་སྙན་པ་ཡང་དག་པར་རྒྱས་པ། མཉམ་མེད་་རྒྱལ་པོ། ཁྱུ་མཆོག ། སེང་གེ ། ཐུབ་པ། འཇིག་རྟེན་གྱི་བླ་མ། སྟོབས་བཅུ་མངའ་བའི་ཞབས་ཀྱི་པདྨོ་ལ་རྣམ་པར་བཏུད་དེ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། །ཅི་ནུས་ཀྱི་མཐར། སྟོན་པ་བཅོམ་ལྡན་འདས་་ཐུབ་པའི་སྤྱན་སྔར་མཆོད་པའི་རྫས་སྣ་ཚོགས་ཀྱི་སྤྲིན་རབ་འབྱམས། མནྡྷ་ར་བ་དང་པུཎྜ་རི་ཀ་ལ་སོགས་པའི་མེ་ཏོག་ལྷན་ཅིག་སྐྱེས་པ་དང་སྦྱར་བ་ལས་བྱུང་བའི་བདུག་སྤོས། མུན་པའི་ཁམས་མཐའ་དག་རྣམ་པར་སེལ་བའི་མར་མེ། སྨན་དང་དྲིའི་བྱུགས་པ་སྣ་ཚོགས། ལྷའི་ཞལ་ཟས་བཟའ་
བཅའ་བཏུང་བའི་ཁྱད་པར་རོ་མཆོག་བརྒྱ་ལྡན། རོལ་མོ་སིལ་སྙན་གྱི་སྒྲ་དབྱངས་སྙན་པར་འབྱུང་བ་ལ་སོགས་པ། བདེན་པ་དང་མོས་པའི་སྟོབས་ཀྱིས་ཆོས་ཀྱི་དབྱིངས་ཀྱི་མཐའ་ཀླས་པ་ཀུན་ནས་ཁྱབ་པའི་མཆོད་སྤྲིན་ཚད་མེད་པར་སྤྲུལ་ཏེ་མཆོད་དོ། །གསོལ་ལོ། །རིམ་གྲོར་བགྱིའོ། །གང་ཡང་བདག་ཅག་རྣམས་ཐོག་མ་མེད་པའི་སྲིད་པ་ནས་འདོད་ཆགས་དང༌། ཞེ་སྡང་དང༌། གཏི་མུག་ལ་སོགས་པས་སེམས་ཟིལ་གྱིས་ནོན་ཏེ། ལུས་ངག་ཡིད་གསུམ་གྱི་སྒོ་ནས་སྡིག་པ་མི་དགེ་བའི་ལས་ཇི་སྙེད་ཅིག་བྱས་ཤིང་བསགས་པ་དེ་དག་ཐམས་ཅད་མགོན་པོ་ཐུགས་རྗེ་ཆེན་པོ་དང་ལྡན་པ་རྣམས་ཀྱི་སྤྱན་སྔར་གནོང་ཞིང་འགྱོད་པས་མཐོལ་ལོ་བཤགས་སོ། །ཕྱོགས་བཅུ་དུས་གསུམ་གྱི་འཕགས་པ་དང་སོ་སོའི་སྐྱེ་བོའི་རྒྱུད་དུ་གཏོགས་པ། མཐོ་རིས་ཀྱི་ལམ་དང་ལྡན་པ་རྣམས་དང༌། །ཉན་ཐོས་དང་རང་སངས་རྒྱས་ཀྱི་ལམ་དང་ལྡན་པ་རྣམས་དང༌། །བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་འགྲོ་བའི་ལམ་དང་ལྡན་པ་ཡང་རུང་སྟེ། དགེ་བའི་རྩ་བ་གང་དག་ཇི་སྙེད་པ་དེ་དག་ཐམས་ཅད་ཀྱི་རྗེས་སུ་ཕྲག་དོག་མེད་པའི་སེམས་ཀྱིས་ཡི་རང་བར་བགྱིའོ། །སངས་རྒྱས་འཇིག་རྟེན་
གྱི་སྒྲོན་མ་གང་དག་འཚོ་ཞིང་གཞེས་པ་དེ་དག་གི་སྤྱན་སྔར་གདུལ་བར་བྱ་བའི་སེམས་ཅན་གྱི་ཁམས་ཐམས་ཅད་སྨིན་པ་དང་གྲོལ་བར་བྱེད་པའི་ཆོས་ཀྱི་འཁོར་ལོ་བླ་ན་མེད་པ་བསྐོར་བ་དང༌། །མྱ་ངན་ལས་མི་འདའ་བར་ཡུན་རིང་དུ་བཞུགས་པར་གསོལ་བ་འདེབས་སོ། །དགེ་བའི་རྩ་བ་འདིས་མཚོན་ཏེ་རང་གཞན་རྣམས་ཀྱིས་དུས་གསུམ་དུ་བསགས་ཤིང་གསོག་པར་འགྱུར་བའི་བསོད་ནམས་བྱ་བའི་དངོས་པོ་མཐའ་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་བསྔོ་བར་བགྱིའོ། །ཞེས་ཡན་ལག་བདུན་པ་ཕུལ་མཐར་གསོལ་བ་གདབ་པ་ནི། དེང་འདིར་ཐུབ་དབང་གནས་བརྟན་འཁོར་བཅས་གདན་འཛོམས་པའི་སྤྱན་སྔར། སྟོན་པ་བཅོམ་ལྡན་འདས་་ཐུབ་པའི་མཚན་ནས་བརྗོད་ཅིང་ཡིད་ལ་བྱས་པ་དང་ཕྱག་མཆོད་ཕུལ་བ་ལ་བརྟེན་ནས། བདག་ཅག་ལ་སོགས་པའི་སེམས་ཅན་སྒྲིབ་པ་དང་སྡུག་བསྔལ་གྱི་རང་བཞིན་སྣ་ཚོགས་པས་གཟིར་ཞིང་གདུངས་པ་ཐམས་ཅད་བླ་ན་མེད་པའི་བྱང་ཆུབ་ཀྱི་བར་དུ་བདེ་བ་དམ་པའི་མཆོག་ལ་རེག་པར་གནས་པར་གྱུར་ཅིག །ཕྱི་དང་ནང་གི་མི་མཐུན་པའི་ཚོགས་གང་ཞིག །གདོན་དང་རིམས་དང་དུག་གི་འཇིགས་
པ་དང༌། མྱ་ངན་དང་ཡིད་མི་བདེ་བ་ལ་སོགས་པ་ལུས་ཀྱི་གནོད་པ་དང༌། སེམས་ཀྱི་གདུངས་པ་སྣ་ཚོགས་པ་ཐམས་ཅད་ཞི་བར་གྱུར་ཅིག །ཚེ་རབས་ཐམས་དུ་ངན་འགྲོ་ལོག་པར་ལྟུང་བའི་སྐྱེ་གནས་ཀྱི་ཁམས་ཐམས་ཅད་དུ་མི་འཕོ་ཞིང་བདེ་བ་ནས་བདེ་འགྲོ་མཐོ་རིས་ཀྱི་འཇིག་རྟེན་དུ་སྐྱེ་བར་གྱུར་ཅིག །སྐྱེ་ཞིང་སྐྱེ་བའི་ཕྲེང་བ་ཀུན་ཏུ་ཡོན་ཏན་རིན་པོ་ཆེའི་འབྱུང་གནས་བཤེས་གཉེན་དམ་པ་ཚུལ་བཞིན་དུ་བསྟེན་ཏེ་སངས་རྒྱས་འབྱུང་བ་མཉེས་པར་བྱེད་ནུས་པར་གྱུར་ཅིག །འཁོར་བའི་ཕུན་ཚོགས་ཀྱི་འབྱོར་པ་མཐའ་དག་སྙིང་པོ་མེད་པ་ཆུ་ཤིང་གི་སོ་ནམས་ལྟར་ཤེས་ཏེ་སྲིད་པ་ཐམས་ཅད་ལ་མི་ལྟ་བའི་ཐར་འདོད་རྒྱུན་ཆད་མེད་པར་གྱུར་ཅིག །ཆོས་འདུལ་བ་ཚངས་པར་སྤྱོད་པའི་ཡོན་ཏན་རིན་པོ་ཆེ་བཞི་ཡི་བདག་ཉིད་ཅན་ཡོངས་སུ་ཐོས་ནས་དུས་གསུམ་གྱི་འཕགས་པ་དགྲ་བཅོམ་པ་རྣམས་ཀྱི་རྗེས་སུ་སློབ་པར་ཤོག་ཅིག །མཐའ་ཡས་པའི་སེམས་ཅན་གྱི་ཁམས་རྒྱ་མཚོ་སྲིད་པའི་གཅོང་རོང་ཟབ་མོ་ལས་བསྒྲལ་བ་དང༌། བྱང་ཆུབ་ཀྱི་ཕྱོགས་ཀྱི་ཆོས་རྣམས་ཡོངས་སུ་རྫོགས་པར་བགྱི་བའི་སླད་དུ་བླ་ན་མེད་པའི་བྱང་ཆུབ་ཀྱི་སེམས་ཡིད་ལ་བྱ་བ་དང་མི་འབྲལ་བར་གྱུར་ཅིག །རྒྱལ་བའི་སྲས་ཀྱི་སྤྱོད་པའི་སྒོ་རྒྱ་མཚོ་ཡོངས་སུ་
བསྡུས་པ་ཕ་རོལ་རུ་ཕྱིན་པ་དྲུག་གི་བརྟུལ་ཞུགས་ལས་ནམ་ཡང་མི་ཉམས་པར་གྱུར་ཅིག །ཕན་བདེའི་འབྱུང་གནས་རྒྱལ་བའི་བསྟན་པ་རིན་པོ་ཆེ་ཕྱོགས་དུས་གནས་སྐབས་ཐམས་ཅད་དུ་དར་ཞིང་རྒྱས་ལ་ཡུན་རིང་དུ་གནས་པར་གྱུར་ཅིག །སྟོན་པའི་བསྟན་པ་ལ་བྱ་བ་རྒྱ་ཆེན་པོ་མཛད་པའི་སྨོན་ལམ་གྱི་མཐུ་གྲུབ་པ་སྡེ་སྣོད་འཛིན་པའི་དགེ་བའི་བཤེས་གཉེན་དམ་པ་རྣམས་ཀྱང་ཞབས་པད་བསྐལ་པ་རྒྱ་མཚོར་བརྟན་ཅིང་བསྟན་པ་འཛིན་པའི་ཕྲིན་ལས་ཀྱི་གོ་སྐབས་ཡངས་པར་གྱུར་ཅིག །བསྟན་འཛིན་དགེ་འདུན་གྱི་སྡེ་རྣམས་ཀྱང་ཚུལ་ཁྲིམས་དང་ལྟ་བ་མཆོག་ལ་གནས་ཤིང༌། ཀློག་པ་ཐོས་བསམ་དང་འཕགས་པའི་མི་སྨྲ་བ་ལ་གནས་པ་རྣམ་པར་དག་པས་ཐུབ་བསྟན་ལུང་རྟོགས་ཀྱི་བདག་ཉིད་འཇིག་རྟེན་ན་ཡུན་རིང་དུ་སྐྱོང་བར་གྱུར་ཅིག །ལྷ་དང་མིར་བཅས་པའི་སྐྱེ་རྒུའི་འཇིག་རྟེན་ཐམས་ཅད་ལེགས་ལམ་དགེ་བ་བཅུའི་བརྟུལ་ཞུགས་མཆོག་ལ་གནས་ཤིང༌། །གནས་སྐབས་ཕན་པ་དང་མཐར་ཐུག་བླ་ན་མ་མཆིས་པའི་ཡེ་ཤེས་ཀྱི་གོ་འཕང་རིན་པོ་ཆེ་མྱུར་དུ་ཐོབ་པར་གྱུར་ཅིག །གཉིས་པ་འཁོར་རྣམས་ལ་ཕྱག་མཆོད་འབུལ་བ་ནི། འཕགས་པ་རྣམ་པར་གྲོལ་བའི་ཡེ་ཤེས་ཀྱི་ས་མཐོར་
གཤེགས་ཏེ། ཁམས་གསུམ་པའི་ཡུལ་ལས་ཤིན་ཏུ་འདས་པ། ལེན་པ་མེད་པར་སེམས་ཟག་པ་རྣམས་དང་བྲལ་བ་ཙནྡན་སྦང་བ་ལྟ་བུར་བསིལ་བ་ཐོབ་པ། ཟད་པ་དང་མི་སྐྱེ་བ་ཤེས་པའི་ཡེ་ཤེས་སྣང་བ་མངོན་དུ་གྱུར་ཅིང༌། སྟོན་པ་བཅོམ་ལྡན་འདས་་རྒྱལ་པོའི་སྤྱན་སྔར་སླད་མའི་དུས་སུ་བདེ་བར་གཤེགས་པའི་ཆོས་ཀྱི་མཛོད་དམ་པ་འཇིག་རྟེན་ན་ཡོངས་སུ་སྐྱོང་བར་འཕགས་པའི་ཚིག་ངེས་པའི་ཞལ་གྱིས་བཞེས་པ། གནས་བརྟན་ཡན་ལག་འབྱུང་སློབ་མ་དུལ་བའི་ཚོགས་འཕགས་པ་ཉན་ཐོས་ཀྱི་དགེ་འདུན་ཆེན་པོ་ཆིག་སྟོང་སུམ་བརྒྱ་དང་བཅས་པ་རྣམས་ལ་ཕྱག་འཚལ་ལོ། །ཅི་རིགས་ཀྱི་མཐར། འཕགས་པའི་གནས་བརྟན་ཆེན་པོ་ཡན་ལག་འབྱུང་གི་སྤྱན་སྔར་སོགས། ཡན་ལག་བདུན་པ་དང༌། དེང་འདིར་ཐུབ་དབང་གནས་བརྟན་འཁོར་བཅས་གདན་འཛོམ་པའི་སྤྱན་སྔར། འཕགས་པ་ཡན་ལག་འབྱུང་བའི་མཚན་ནས་བརྗོད་ཅིང་སོགས་གསོལ་བ་འདེབས་པ་སྔར་བཞིན་བྱ། གཞན་རྣམས་ལའང་དེའི་འགྲེས་ཀྱི་ཁ་བསྒྱུར་དམིགས་བསལ་དུ་ཡན་ལག་འབྱུང་ཞེས་པའི་མལ་དེར། མ་ཕམ་པ༴ ནགས་ན་གནས༴ དུས་ལྡན༴ རྡོ་རྗེ་མོའི་བུ༴ བཟང་པོ༴ གསེར་བེའུ༴ གསེར་ཅན་མཆོག༴ བ་ཀུ་ལ༴ སྒྲ་གཅན་འཛིན༴ ལམ་ཕྲན་བསྟན༴ བསོད་སྙོམས་
ལེན༴ ལམ་ཆེན་པ༴ ཀླུའི་སྡེ༴ སྦེད་བྱེད༴ མི་ཕྱེད་པ༴ ཞེས་བསྒྱུར། ཆིག་སྟོང་སུམ་བརྒྱ་ཞེས་པའི་ཚབ་ཏུ། ཆིག་བརྒྱ༴ སྟོང་བཞི་བརྒྱ༴ ཆིག་སྟོང་ཆིག་བརྒྱ༴ ཆིག་སྟོང་༴ སྟོང་ཉིས་བརྒྱ༴ ལྔ་བརྒྱ༴ བདུན་བརྒྱ༴ དགུ་བརྒྱ༴ སྟོང་ཆིག་བརྒྱ༴ སྟོང་དྲུག་བརྒྱ༴ ཆིག་སྟོང་༴ དགུ་བརྒྱ༴ སྟོང་ཉིས་བརྒྱ༴ སྟོང་བཞི་བརྒྱ༴ ཆིག་སྟོང་༴ ཞེས་བསྒྱུར་བ་མ་གཏོགས་ཐམས་ཅད་འདྲ། དེ་ནས། གནས་བརྟན་ཆེན་པོ་རྣམས་ཁ་ན་མ་ཐོ་བ་མེད་པའི་སྲི་ཞུས་མཆོད་དེ་དགེ་བའི་རྩ་བ་བསྐྱེད་པ་དགེ་བསྙེན་་ཏ་མངོན་པར་ཤེས་པ་དང་རྫུ་འཕྲུལ་གྱི་རྣམ་པར་རོལ་པས་ཀུན་ཏུ་རྩེན་པ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། །ཅི་འགྲུབ་མཐར། དངོས་བཤམས་གཟུངས་རིག༴ སོགས་ཀྱི་ཡན་ལག་བདུན་པ་འབུལ། དགེ་བསྙེན་་ཏའི་མཚན་ནས་བརྗོད་ཅིང་ཕྱག་མཆོད་ཕུལ་བ་ལ་བརྟེན་ནས་བདག་ཅག་ལ་སོགས་པའི་སེམས་ཅན་ཐམས་ཅད་ཚེ་རབས་ཀུན་ཏུ་དགེ་བའི་ཆོས་རྣམས་ཀྱིས་རྣམ་པར་འཕེལ་བ་དང༌། བདུད་དང་མུ་སྟེགས་ལྟ་བ་ངན་པའི་ཕྱོགས་ཐམས་ཅད་ཀྱིས་མི་ཕྱེད་པ་ཐོབ་པར་གྱུར་ཅིག །ཕན་བདེའི་རྩ་ལག་ཐུབ་པའི་བསྟན་པ་རིན་པོ་ཆེ་དར་ཞིང་རྒྱས་པ་དང་བསྟན་འཛིན་ཆེན་པོ་རྣམས་ཞབས་པད་བསྐལ་པ་རྒྱ་མཚོར་བརྟན་པར་གྱུར་ཅིག །ཕྱོགས་དུས་
ཀུན་ཏུ་བདེ་སྐྱིད་རྫོགས་ལྡན་གྱི་བསྐལ་པ་ཆེན་པོས་མཐའ་ཡས་པའི་སྐྱེ་རྒུ་རྣམས་ལ་ཕན་པ་དང་བདེ་བའི་དགའ་སྟོན་རྒྱུན་མི་ཆད་པར་གྱུར་ཅིག །དེ་ནས། དེ་བཞིན་གཤེགས་པ་དང་གནས་བརྟན་ཆེན་པོ་རྣམས་ཁ་ན་མ་ཐོ་བ་མེད་པའི་སྲི་ཞུས་མཆོད་དེ་དགེ་བའི་རྩ་བ་བསྐྱེད་པ། དཀར་ཕྱོགས་སྐྱོང་བའི་རྒྱལ་པོ་ཆེན་པོ་ཡུལ་འཁོར་སྲུང་དང༌། འཕགས་སྐྱེས་པོ་དང༌། །མིག་མི་བཟང་དང༌། རྣམ་ཐོས་སྲས་ལ་སོགས་པ་ལྷའི་དགེ་བསྙེན་ཆེན་པོ་རྣམས་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། །སོགས་ཅི་རིགས་མཐར། དངོས་བཤམས་གཟུངས་རིག༴ སོགས་ཡན་ལག་བདུན་པ་དང༌། དཀར་ཕྱོགས་སྐྱོང་བའི་ལྷ་ཆེན་པོ་རྣམས་ཀྱི་མཚན་ནས་བརྗོད་ཅིང་སོགས། གསོལ་འདེབས་བྱ་ཚུལ་་ཏའི་སྐབས་བཞིན་ནོ། །དེ་ནས་མཇུག་ཏུ་མཎྜལ་ཚོམ་བུ་སོ་བདུན་མ་ཕུལ་ཏེ། ཁ་བསྒྱུར། མ་ཚང་བ་མེད་པ་འདི་ཉིད་ཐུབ་དབང་གནས་བརྟན་འཁོར་བཅས་གདན་འཛོམ་པ་ཆེན་པོར་གྱུར་པའི་སྤྱན་སྔར་རྩེ་གཅིག་གུས་པའི་ཡིད་ཀྱིས་འབུལ་བར་བགྱིའོ། །ཞེས་པ་ཙམ་མིན་པ་སྤྱི་ནས་འབྱུང་བ་ལྟར་བྱ་ཞིང༌། སྔར་བཤད་པའི། ཐབས་མཁས་ཐུགས་རྗེ་སོགས་ཀྱི་ཕྱག་མཆོད་དང༌། །དངོས་བཤམས་གཟུངས་རིག་མོས་སྟོབས་ཀྱིས་སྤྲུལ་པའི། །མཆོད་ཚོགས་ཀུན་འབུལ་སྡིག་ལྟུང་ཐམས་ཅད་བཤགས། དགེ་ལ་ཡི་རང་
བསྐུལ་ཞིང་གསོལ་བ་འདེབས། །འདིས་མཚོན་དགེ་བ་བྱང་ཆུབ་ཆེན་པོར་བསྔོ། །ཞེས་ཡན་ལག་བདུན་པ་ཕུལ། མཐར། བཅོམ་ལྡན་གདན་འཛོམ་ཆེན་པོ་དགོངས་སུ་གསོལ། །ཐུབ་དབང་གནས་བརྟན་འཕགས་པའི་ཚོགས་རྣམས་ཀྱི། །མཚན་མཆོག་ཐོས་དང་དྲན་བརྗོད་ཕྱག་མཆོད་མཐུས། །བདག་ཅག་ལ་སོགས་སེམས་ཅན་གང་དང་གང༌། །གནས་སྐབས་མཐར་ཐུག་མི་མཐུན་ཕྱོགས་ཀུན་ཞི། །བདེ་སྐྱིད་ཆོས་ལྡན་དཔལ་འབྱོར་རབ་ཏུ་འཕེལ། །ཐེག་མཆོག་དགེ་བའི་བཤེས་ཀྱིས་རྗེས་བཟུང་ནས། །གསུང་གི་བདུད་རྩིས་འཚོ་བར་བྱིན་གྱིས་རློབས། །ཚུལ་ཁྲིམས་དག་ཅིང་ཐོས་བསམ་སྒོམ་པར་ལྡན། །ངེས་པར་འབྱུང་དང་བྱང་ཆུབ་སེམས་གཉིས་འབྱོངས། །རྟག་ཏུ་གཞན་ཕན་སྤྱོད་ལས་མི་གཡེལ་བས། །རྣམ་མཁྱེན་གོ་འཕང་ཐོབ་པར་བྱིན་གྱིས་རློབས། །རྒྱལ་བསྟན་དྲི་མེད་ཕྱོགས་བཅུར་དར་ཞིང་རྒྱས། །བསྟན་འཛིན་མཆོག་རྣམས་ཞབས་པད་བསྐལ་བརྒྱར་བརྟན། །འཇིག་རྟེན་བདེ་ལེགས་ཆེན་པོས་ཁྱབ་པ་དང༌། །དོན་གཉིས་ལྷུན་གྱིས་གྲུབ་པའི་བཀྲ་ཤིས་སྩོལ། །ཞེས་གསོལ་འདེབས་བྱ། དེ་ནས། སྟོན་པ་ཡང་དག་པར་རྫོགས་པའི་སངས་རྒྱས་དགེ་སློང་གི་
དགེ་འདུན་དང་བཅས་པ་རྣམས་གདན་འཛོམ་པ་ཆེན་པོར་གྱུར་པའི་སྤྱན་སྔར། བདག་ཅག་ལ་སོགས་པ་འགྲོ་བ་མང་པོའི་དོན་དུ་སྐྱབས་མཛད་པར་བསྐུལ་ཞིང་གསོལ་བ་བཏབ་པའི་སྐབས་འདིར། བདག་ཅག་དུས་ངན་པའི་སེམས་ཅན་བག་མེད་པ་དང་ཉོན་མོངས་པ་མང་བའི་དབང་གིས་ཆོ་གའི་སྦྱོར་བ་མ་ཚང་བ་དང༌། གཙང་སྦྲ་མ་ཐོན་པ་དང་ཉེས་སྤྱོད་ཀྱི་དྲི་མས་སྦགས་པར་གྱུར་པ་གང་ལགས་པ་དེ་དག་ཐམས་ཅད་མགོན་པོ་ཐུགས་རྗེ་དང་ལྡན་པ་རྣམས་ཀྱི་སྤྱན་སྔར་མཐོལ་ཞིང་བཤགས་པར་མཆི་ན། སྙིགས་མའི་དུས་ཀྱི་སེམས་ཅན་རང་ཞིན་ངན་པ། །ཆོ་ག་ཉམས་པ་དང༌། རྣམ་པར་མ་དུལ་བའི་ངང་ཚུལ་ཅན་ལགས་པས། ཅི་ནས་ཐུགས་བརྩེ་བར་དགོངས་ཏེ་ཚངས་པ་མཆོག་སྩོལ་ཞིང་བཟོད་པར་མཛད་དུ་གསོལ། ཞེས་བརྗོད་ནས། གཤེགས་སུ་གསོལ་བ་ནི། སྟོན་པ་ཐུགས་རྗེ་ཆེན་པོ་དང་ལྡན་པས་བདག་ཅག་ལ་སོགས་པ་འགྲོ་བ་མང་པོའི་དོན་མཛད་པ་ལགས་ཀྱིས་སླར་ཡང་སངས་རྒྱས་ཀྱི་ཞིང་གཞན་དང་གཞན་པ་རྣམས་སུ་གདུལ་བྱའི་འགྲོ་བ་གཞན་དང་གཞན་གདུལ་བའི་དབང་གི་ཕྱིར་གཟུགས་སྐུའི་རྣམ་པར་རོལ་པ་ཚད་མེད་པས་གཤེགས་ཤིང༌། ད་དུང་ཡང་བདག་ཅག་ཐུགས་རྗེ་ཆེན་པོའི་སྤྱན་རས་ཀྱིས་རྟག་ཏུ་བཙའ་བར་ཅི་
གནང༌། འཕགས་པ་ཉན་ཐོས་ཀྱི་གནས་བརྟན་ཆེན་པོ་རྣམས་ཀྱང་འཇིག་རྟེན་ལ་ཐུགས་བརྩེ་བས་སྙིགས་དུས་ཀྱི་མཐར་ཡང་ཛམ་བུའི་གླིང་འདིར་དམ་པའི་ཆོས་སྐྱོང་བའི་ཕྱིར་ལྗོངས་ནས་ལྗོངས་རྒྱུ་ཞིང༌། ཤས་ཆེར་གང་དུ་བཞུགས་པའི་རིའི་རྒྱལ་པོ་གངས་ཅན་དང༌། བྱ་རྒོད་ཕུང་པོ་དང་ཁ་ཆེའི་རྒྱུད་ལ་སོགས་པ་རྣམས་སུ་སླན་ཆད་ཀྱང་ཕྱོགས་འདིར་ཡང་དང་ཡང་དུ་གདན་འཛོམ་མཛད་པར་དགོངས་ཤིང་འབྱོན་པར་ཅི་གནང༌། ཨོཾ་ཁྱེད་ཀྱིས་སེམས་ཅན་སོགས་རོལ་མོ་བྱ་ཞིང༌། །མཇུག་ཏུ་བསྔོ་སྨོན་དང༌། བཀྲ་ཤིས་རྒྱ་ཆེར་བྱའོ། །དེའང་ཆོ་ག་རྒྱས་པར་སྤྲོ་ན་དངོས་བསྟན་ལྟར་དང༌། དེ་ལས་བསྡུ་ན་སྟོན་པ་ལ་ཕྱག་མཆོད་ཡན་ལག་ལྷག་མ་རྣམས་གསོལ་འདེབས་དང་བཅས་པའི་མཐར་གནས་བརྟན་རྣམས་ཀྱི་ཕྱག་མཆོད་བརྗོད་དེ། མཐར། འཕགས་པའི་ཚོགས་དེ་དག་གི༴ ཞེས་ཁ་བསྒྱུར་ཏེ་ཡན་ལག་ལྷག་མ་རྣམས་དང་གསོལ་འདེབས་བཅུ་དྲུག་པོ་ཚར་གཅིག་གིས་འགྲུབ་པར་བྱ་ཞིང༌། གསོལ་འདེབས་ཀྱི་ཚེ། འཕགས་པའི་གནས་བརྟན་ཆེན་པོ་རྣམས་ཀྱི་མཚན་བརྗོད་ཅིང་༴ ཞེས་བསྒྱུར། ཤིན་ཏུ་བསྡུ་ན་སྟོན་པ་དང་གནས་བརྟན་རྣམས་ཀྱི་ཕྱག་མཆོད་སོ་སོར་ཕུལ་ནས་ཡན་ལག་ལྷག་མ་རྣམས་དང་གསོལ་འདེབས་ལན་གཅིག་གིས་འཐུས་ཤིང་ཏ་དང་རྒྱལ་ཆེན་རྣམས་ལ་ཕྱག་མཆོད་ཀྱི་མཐར། དངོས་བཤམས་གཟུངས་རིག༴ དང༌། དགེ་བསྙེན་་ཏ་དང་
དཀར་ཕྱོགས་སྐྱོང་བའི་ལྷ་ཆེན་པོ་རྣམས་ཀྱི༴ ཞེས་བསྒྱུར་ནས་གསོལ་འདེབས་སྟབས་གཅིག་ཏུ་བྱས་པས་འགྲུབ་བོ། ༈ །ཞར་བྱུང་གཟུངས་བུམ་བསྒྲུབ་ན་མཇུག་གི་གཏང་རག་མཆོད་བསྟོད་མགོར། ཐུབ་དབང་གནས་བརྟན་རྣམས་ཀྱི་སྐུ་ལས་འོད་ཟེར་བདུད་བརྩིའི་རང་བཞིན་དུ་བབས་པས་བུམ་པ་ཡོངས་སུ་གང་བར་གྱུར། ཅེས་བརྗོད་ནས། མུ་ནེའི་གཟུངས་ཅི་རིགས་བཟླའོ། །ཆོ་ག་འདིའི་སྤྱན་འདྲེན་སྐབས་་ཏ་དང་རྒྱལ་ཆེན་རྣམས་ཀྱི་སྤྱན་འདྲེན་དངོས་སུ་མི་འབྱུང་བ་ནི། གཙོ་བོ་ཐུབ་དབང་དང༌། གནས་བརྟན་བཅས་སྤྱན་དྲངས་ན་གཞན་ནི་དེ་དང་ལྷན་ཅིག་ཏུ་འབྱོན་ཞིང་བྱིན་གྱིས་རློབ་པར་སྔོན་དམ་བཅས་པའི་ཕྱིར་མི་དགོས་པ་ཡིན་ནོ། །འོ་ན་སྟོན་པ་སྤྱན་དྲངས་པས་ཆོག་གིས། །གཞན་མི་དགོས་པར་རིགས་པ་མཚུངས་སོ་ཞེ་ན། མི་མཚུངས་ཏེ། དེ་བཞིན་གཤེགས་པ་འཁོར་བྱང་སེམས་ཁོ་ནས་བསྐོར་བ་ལ་ཕྱག་མཆོད་ཕུལ་བའི་སྐབས་གཞན་ཡང་ཡོད་པས། འདིར་འཁོར་གྱི་གཙོ་བོ་གང་དང་ལྷན་ཅིག་ཏུ་འདྲེན་པའི་དམིགས་བྱེད་དགོས་པའི་ཕྱིར་རོ། །བླུན་པོ་དག་ན་རེ། གནས་བརྟན་བཅུ་དྲུག་ཐེག་ཆེན་པ་ཡིན་ནམ་མིན། ཡིན་ན་ཁྱོད་ཀྱིས་ད་ལྟ་བྱང་སེམས་ཁོ་ནས་བསྐོར་བ་ཞེས་པའི་ཚིག་ལས་གནས་བརྟན་འདི་རྣམས་བྱང་སེམས་མིན་པར་ཤུགས་ཀྱིས་བསྟན་པ་དང་འགལ་ཞིང༌། མིན་ན་དེ་དག་ལ་གསོལ་བ་འདེབས་པའི་ཚེ་རྒྱལ་སྲས་ཀྱི་སྤྱོད་པ་མི་ཉམས་པར་གསོལ་བ་འདེབས་ཚུལ་དེ་མི་འཐད་དེ། འདེབས་ཡུལ་ཉིད་རྒྱལ་སྲས་མིན་པའི་ཕྱིར་རོ་ཞེ་ན། འདི་རྣམས་བྱང་འཕགས་ཡིན་པར་སྔོན་གྱི་དམ་པ་དག་གསུངས་མོད། གལ་ཏེ་མིན་དུ་ཟིན་ཀྱང་སྐྱོན་ཕྱི་མ་དག་གཏན་མེད་དེ།
ཡོད་ན་བྱང་ཆུབ་སེམས་དཔའ་རྣམས་ཀྱིས་སངས་རྒྱས་ཉན་ཐོས་དང་བཅས་པ་ལ་མཆོད་པ་འབུལ་བའི་ཚེ་ཡང་ཉན་ཐོས་ཀྱི་དགེ་འདུན་མཆོད་པའི་བསོད་ནམས་རྫོགས་བྱང་གི་རྒྱུར་བསྔོ་མི་རུང་བར་འགྱུར་ཏེ། འདིར་ཡང་ཕྱག་མཆོད་ཕུལ་བ་ལ་བརྟེན་ནས་ཞེས་སོགས་རིགས་པ་ཤིན་ཏུ་མཚུངས་པའི་ཕྱིར་དང༌། གཞན་བརྗོད་བྱ་མང་དུ་ཡོད་ལ། གནས་བརྟན་འདི་རྣམས་བྱང་འཕགས་ཡིན་དུ་ཆུག་ཀྱང༌། སྐྱོན་སྔ་མ་མེད་དེ། དེ་ནི་ཡོངས་སུ་གྲགས་པ་དང༌། སྣང་ཚུལ་ཇི་ལྟར་བསྟན་ཚུལ་ནས་ཡིན་པའི་ཕྱིར་རོ། །དེ་ལྟར་ན་དེ་དག་གི་ཆོ་ག་ཡོངས་སུ་རྫོགས་ཏེ། ཚུལ་འདི་ལྟར་འབད་པས་ནི་སངས་རྒྱས་ཀྱི་བསྟན་པ་རྒྱས་ཤིང༌། དགེ་འདུན་གྱི་སྡེ་འཕེལ་བ་དང༌། རྒྱལ་ཁམས་ཐམས་ཅད་བདེ་ཞིང་སྐྱིད་པ་དང༌། ཚེ་རིང་བ་དང༌། ཚུལ་ཁྲིམས་རྣམ་པར་དག་པ་སོགས་ཕན་ཡོན་ཟད་མི་ཤེས་པ་ཡོད་དོ། །ཞེས་པའང་མདོ་སྨད་རྡོ་རོང་གི་སྤྲང་འཁྱམས། འཇིགས་མེད་བསྟན་པའི་རྒྱལ་མཚན་དུ་འབོད་པས་རང་ལོ་ཉི་ཤུ་པ་ཤིང་སྤྲེལ་ཧོར་ཟླ་དགུ་པའི་ཡར་ངོས་ཀྱི་གྲལ་ཚེས་བརྒྱད་ལ་བབས་པ་ཟླ་བ་གྲོ་བཞིན་གྱི་དགའ་མ་དང་ལྷན་ཅིག་རྩེ་བའི་འགྲུབ་སྦྱོར་བཟང་པོའི་ཉིན་བྲིས་པ་འདིས་ཀྱང་རྒྱལ་བསྟན་ཡོན་ཏན་རིན་པོ་ཆེའི་རྩ་ལག་འཇིག་རྟེན་ན་ཡུན་དུ་གནས་པའི་རྒྱུར་གྱུར་ཅིག །སརྦ་དཱ་མངྒ་ལམ།། །།