གནོན་སྦྱིན་ཆེན་པོ་ཙིཏྟ་དམར་པོ་ལ་བསྟོད་པ།
གནོད་སྦྱིན་ཆེན་པོ་ཙིཏྟ་དམར་པོ་ལ་བསྟོད་པ་བདུད་ལས་རྣམ་པར་རྒྱལ་བའི་རུ་མཚོན་ཞེས་བྱ་བ། ཧཱཾཨུ་ཧྲཱིཿ པདྨ་དབང་གི་ཞིང་ཁམས་སྐྱོང་མཛད་ཅིང༌། ཕྲིན་ལས་རྣོ་མྱུར་རྡོ་རྗེའི་ཤུགས་མངའ་བ། །སྡེ་བརྒྱད་དྲེགས་པའི་དམག་དཔོན་ཡང་ལེ་བེར། །སངས་རྒྱས་བསྟན་སྲུང་གཙོ་ལ་ཕྱག་འཚལ་བསྟོད། །མདོག་དམར་དུས་མཐའི་མེ་ལྟར་བཟོད་དཀའ་བའི། །གཏུམ་དྲག་གཟི་བརྗིད་ཕུང་པོས་བསྟན་དགྲ་རྣམས། །རབ་འབར་ཉི་མའི་འོད་ཀྱིས་བ་མོ་བཞིན། །སྐད་ཅིག་ཙམ་གྱིས་ལྷག་མར་མཛད་ལ་བསྟོད། །བོང་ཆེ་ཡན་ལག་རགས་ཤིང་བརྗིད་པའི་གཟུགས། །དྲག་པོའི་གཡུལ་དུ་རབ་བརྟན་ལྷུན་པོ་འདྲ། །མཐུ་རྩལ་ཐོགས་མེད་རྡོ་རྗེའི་རླུང་ཤུགས་ཀྱིས། །སྲིད་གསུམ་བགེགས་དཔུང་རྣམ་པར་འཐོར་ལ་བསྟོད། །ཟག་བྲལ་བདེ་ཆེན་སྒྱུ་མའི་ཆང་རྒོད་ཀྱིས། །གཟི་བྱིན་རབ་རྒྱས་འཇིགས་མེད་དཔའ་བོའི་ཞལ། །ཁྲོས་འཁྲུགས་བཞད་པའི་ཉམས་བརྒྱར་འབར་བ་ཡིས། །བརྟན་གཡོའི་དངོས་ཀུན་ཟིལ་གྱིས་གནོན་ལ་བསྟོད། །དམར་སེར་རལ་པའི་འོད་ཀྱིས་ནམ་མཁའ་གསལ། །སྡང་མིག་ཚ་ཟེར་རྣོན་པོས་གདུག་པ་སྲེག །རྔམ་ཞལ་གདང་བའི་ལྗགས་དང་མཆེ་བ་ལས། །ཉམས་པའི་ཁྲག་རྒྱུན་ཆིལ་ཆིལ་འཛགས་ལ་བསྟོད། །དར་དམར་ཐོད་ཆིང་བརྗིད་
པའི་བེར་དམར་དང༌། །གསེར་གྱི་སྐ་རགས་ནོར་བུའི་མཆིལ་ལྷྭམ་སོགས། །མི་ཤིགས་རྡོ་རྗེའི་ཆས་གོས་བཀྲག་ཅན་གསོལ། །ཆེ་བཙན་རྒྱལ་པོའི་རྟགས་ཀྱིས་སྤྲས་ལ་བསྟོད། །གཡས་གཡོན་སྟག་རལ་གཟིག་ཤུབས་འཕྱང་བ་ལས། །འཕུར་ཤེས་མདའ་དང་འབྲུག་སྒྲ་འུར་བའི་གཞུ། །དགྲ་ཁམས་ཕྱེ་མར་རློག་པའི་འཁྲུལ་འཁོར་གྱི། །མཚོན་ཆའི་སེར་བ་མི་བཟད་འབེབས་ལ་བསྟོད། །ཕྱག་གཡས་དབང་དྲག་ལས་ཀྱི་ཞགས་པ་ཡིས། །གང་ལ་དམིགས་པའི་ལུས་སེམས་དྲུ་གུར་འཆིང༌། །གཡོན་པས་བདུད་ལས་རྣམ་རྒྱལ་རུ་མཚོན་ཆེས། །བསྟན་དགྲའི་བླ་སྲོག་གནད་དུ་གཟིར་བསྟོད། །རྟ་མཆོག་བྲ་བོ་བསམ་སླེབ་རྫུ་འཕྲུལ་འགྲོས། །རྨིག་པས་དགྲ་མཁར་སྒྱེལ་བའི་དྲག་ཤུལ་ཅན། །སྒ་བཀྲ་རིན་ཆེན་སྦྲུལ་གྱིས་སྤྲས་པའི་སྟེང༌། །བསྟན་པའི་བྱ་ར་མཛད་ཅིང་འཁྱུག་ལ་བསྟོད། །ཟང་བྲག་རི་བོ་མེ་ཆེན་མཆེད་འདྲའི་ཀློང༌། །དམར་མཛོད་གནོད་སྦྱིན་འབྱོར་བའི་སྤྲིན་ཕུང་བཅས། །བསེ་སྨུག་ལྡེམ་པའི་མཁར་ལ་མཛད་ཅིང༌། །གནས་ཆེན་ཀུན་ཏུ་སྤྲུལ་པས་རོལ་ལ་བསྟོད། །ཁྱོད་ནི་པདྨའི་ཟབ་གཏེར་མཛོད་སྲུང་བ། ཁྲག་འཐུང་རྒྱལ་བའི་ལུང་གིས་བླ་ན་མཐོ། །ལས་དང་ཡེ་ཤེས་རིག་སྔགས་མཐའ་ཡས་པའི། །སྟོབས་ཀྱི་འཁོར་ལོ་བཞེད་དགུར་
བསྒྱུར་ལ་བསྟོད། །ཁྲི་སྲོང་ལྡེའུ་བཙན་རིགས་ལ་འགོ་བའི་ལྷ། །པདྨའི་རྗེས་འཇུག་སྐྱོང་བར་ཞལ་བཞེས་ཤིང༌། །དབང་ཆེན་བརྒྱུད་པའི་ཆད་མདོ་ལེགས་གསོས་ཏེ། །ཐ་ཚིག་རྡོ་རྗེའི་རི་མོ་བརླིང་ལ་བསྟོད། །ལྔ་ཕྲག་སྙིགས་མ་བདོ་བའི་རྩོད་དུས་མཐར། །སྙིང་སྟོབས་རྫོགས་ལྡན་ལང་ཚོ་མ་རྙིང་བས། །སྡེ་བཞིའི་མངའ་ཐང་གསར་པ་རྩོམ་བྱེད་ཅིང༌། །བསིལ་ལྡན་ཡངས་པའི་འཇིག་རྟེན་སྐྱོང་ལ་བསྟོད། །མཆོག་གསུམ་རྣམ་པར་རྒྱལ་བའི་བ་དན་དཀར། །རྟ་མཆོག་ཕྲིན་ལས་ཉི་མའི་ཁ་ལོ་བ། །ཆོས་སྲིད་ལེགས་ཚོགས་འགུགས་པའི་ལྕགས་ཀྱུ་ཆེ། །བསམ་ཀུན་སྒྲུབ་པའི་ཉེ་དུ་ཁྱོད་ལ་བསྟོད། །ཉིད་ལས་སྤྲུལ་པའི་བཙན་རྗེ་མཆེད་དྲུག་དང༌། །དགྱེས་པའི་དཔལ་སྐྱེད་ཡིད་བཟང་བཙུན་མོའི་འཁོར། །བཀའ་ཡི་ལས་བྱེད་དྲེགས་པའི་དམག་དཔོན་བརྒྱད། །འཇིགས་རུང་དམག་སྡེ་རླུང་ལྟར་འཚུབ་ལ་བསྟོད། །རུ་མཚོན་འོད་ཀྱིས་ནམ་མཁའ་མེ་ལྟར་འབར། །གནམ་ས་འཁྲུགས་པའི་རྫུ་འཕྲུལ་རླུང་དམར་གཡོ། །དྲག་པོའི་ངར་སྒྲ་འབྲུག་སྟོང་བཞིན་དུ་ལྡིར། །སྙིང་རྗེ་ཁྲོས་པས་ཕ་རོལ་གནོན་ལ་བསྟོད། །སྤྲུལ་པ་སྡེ་བཞིས་ཁྲོམ་གྱི་རུ་སྣ་འདྲེན། །རྔམ་པའི་ཁྱི་སྤྱང་མང་པོ་རོལ་ཏུ་འབྲང༌། །འདབས་ཆགས་ཤ་ཟན་སྤྲིན་ལྟར་ཀླད་ན་འཁྲིགས། །ཡང་སྤྲུལ་ཕོ་ཉས་
སྟོང་ཁམས་ཁྱབ་ལ་བསྟོད། །ཀུན་ཀྱང་དབང་ཆེན་པདྨའི་བཀའ་ཉན་ཏེ། །དམ་ཚིག་གཅིག་པའི་སྒྲུབ་ལ་སྙིང་ཉེ་ཞིང༌། །བསྟན་བཤིགས་ཆེ་བཙན་ཡོངས་ཀྱི་གཤེད་དུ་རྣོ། །སྣ་ཚོགས་ལས་ཀྱི་སྒྱུ་རྩལ་འཆང་ལ་བསྟོད། །ཏིང་འཛིན་ལྟ་བའི་མཁར་རྫོང་བཙན་པོ་ཡིས། །བསྟན་འཛིན་ཡོན་སྦྱོར་བཅས་པ་བསྲུངས་ནས་སླར། །ཕྱོགས་ལས་རྣམ་རྒྱལ་འཇིགས་མེད་གྲགས་པའི་དབྱངས། །སྲིད་རྩེའི་བར་དུ་ཁྱབ་པར་སྒྲོགས་ལ་བསྟོད། །བསྟོད་དེ་གཙང་རིགས་མི་ཡི་དགྲ་ལྷ་ཆེ། །གསོལ་ལོ་ཆོས་འཁོར་གཉན་གྱི་སྲུང་མའི་གཙོ། །བསྟེན་ནོ་སངས་རྒྱས་སྤྲུལ་པའི་ལས་མཁན་མཆོག །ཐུགས་དམ་དགྱེས་སྐོང་བཅོལ་བའི་ཕྲིན་ལས་མཛོད། །གནོད་སྦྱིན་ཆེན་པོ་ཙིཏྟ་དམར་པོ་ལ་བསྟོད་པ་བདུད་ལས་རྣམ་པར་རྒྱལ་བའི་རུ་མཚོན་ཞེས་བྱ་བ་འཇིགས་མེད་ཀྱིས་ཆོས་སྐྱོང་དགྱེས་པའི་སྙན་ཤལ་དུ་ཕུལ་བའོ། །ལྕགས་ཕག་ཆུ་སྟོད་ཟླ་བའི་ཡར་ཚེས་ཕོ་རོག་ཏོང་སྐད་སྒྲོགས་པའི་དུས་སུའོ། །མངྒ་ལཾ།། །།
བཙན་གྱི་ཞགས་པ་དམར་པོ་མེ་ལྟར་འབར་བའི་འོད་ཟེར་ཅན། རྡོ་རྗེའི་ལུ་གུ་རྒྱུད་ལྟར་བརླིང་ཞིང་སྲ་བ། སྦྲུལ་ལྟར་འཁྱུག་ཅིང་མཉེན་ལ་འཁྲིལ་བ། དགྲ་ལྷའི་ཕྱག་ན་གློག་ཞགས་ལྟར་འཁྱིལ་ཞིང༌། །དམིགས་པའི་གནས་སུ་སྐར་མདའ་ལྟར་འགྲོ་བ། གར་སོང་གི་ཕྱོགས་རྣམས་མེ་རླུང་འཚུབ་པ། །འཕང་བ་དང་ཐེབས་
པ་དུས་མཉམ་པ། སྤྱི་དགྲ་ལ་རིམས་ནད་ལྟར་འདེབས་པ། སྒོས་དགྲ་ངོ་ཤེས་ལྟར་འདམ་པ། བརྣག་པའི་དགྲ་བོ་བཤས་ལུག་ལྟར་འཛིན་པ། ཉེས་བྱེད་རྐེ་ནས་ཤ་བཙོན་ལྟར་འཁྲིད་པ། །འདྲ་བའི་ནང་ནས་མི་ནོར་བ། མང་པོའི་གསེབ་ནས་མི་འཆོར་བ། བཟུངས་ནས་མི་ཁྲོལ་བ། བཅིངས་ནས་མི་ཐར་བ། ཕས་རྒོལ་ལྟག་ན་གཉའ་ཤིང་ལྟར་ལྕི་བ། བསྟན་དགྲའི་རི་དྭགས་ཁྱི་སྤྱང་ལྟར་འདེད་པ། གར་ཡང་ཐོགས་མེད་རླུང་གི་ཤུགས་ཅན། བཙན་དམག་འབུམ་སྡེའི་ཤ་སྟོན་སྡུད་པ། ལས་མཛད་ཕྱག་གི་མངག་གཞུག་ཆེན་པོ། དགྲ་འདུལ་དཔའ་བོའི་ཟླ་གྲོགས། །དབང་སྒྱུར་དྲག་པོའི་མཚོན་ཆ། དོན་ཡོད་འཕྲུལ་གྱི་ཞགས་པ་ཡིད་བཞིན་གྱི་ཨ་ལོང་ཅན། སྒྲུབ་མཆོག་རྣལ་འབྱོར་པས་གར་བསྐུལ་དུ་ཕོ་ཉ་ལྟར་འཇུག་པ་ལ་གསོལ་ལོ། །བསང་ངོ༌། །མཆོད་དོ། །འཇིགས་པའི་བསེ་མདུང་དམར་པོ་མཚམས་སྤྲིན་ལྟར་གཡོ་བའི་རུ་དར་ཅན། དབང་ཆེན་ཁྲོས་པའི་རྫུ་འཕྲུལ་གཟུགས་སུ་ཤར་བ་ལྟ་བུ། ལག་ཆ་གཅིག་ལ་བྱེད་ལས་བརྒྱ་པ། མཚོན་རྩེ་གཅིག་ལ་རྣོ་ནུས་སྟོང་དང་ལྡན་པ། དྲང་ཞིང་ལྡེམ་ལ་ཕྲ་ཞིང་བརླིང་བ། རགས་པ་འབྱེད་ཅིང་ཕྲ་མོ་འབྱིན་པ། གཉན་དགུ་འཚོལ་ཞིང་གནད་ལ་འབིགས་པ། མདུང་རྩེ་གནམ་ལ་བསྒྲེང་ཚེ། སྟོབས་ཆེན་
རླུང་གི་དམག་སྡེས་མཆོད་བསྟོད་འབུལ་ཞིང་མངའ་གསོལ་བ། འོད་ཉི་ཟླ་གཉིས་དང་གྲལ་རྩོད་པ། མདུང་རྟིང་ས་ལ་བསྣུན་ཚེ། དགྲ་ཡུལ་གཟེར་རྒོད་ཕོག་པ་ལྟར་འཕར་ཞིང་ལྡེག་པ། དགྲ་དཔུང་ཐོ་ཡོར་བསྒྱེལ་བ་ལྟར་སྤྲུགས་ཤིང་སྦུབ་པ། མདུང་སོ་དགྲ་ལ་གཏད་ཚེ། རྒྱོབ་སོད་ཀྱི་དམོད་སྔགས་དང་འགྲོགས་པ། རང་དཔུང་གི་ཐོག་མ་ནས་འགྲོ་བ། དགྲ་སྔུན་དུ་འབྲོང་ལྟར་རྒུགས་པ། དགྲ་སྲོག་ལ་སེང་གེ་བཞིན་མཆོང་བ། འོད་དམར་གྱི་གླལ་བ་འཁྱུགས་པ། ཁྲག་གི་དཔའ་སྐྱེམས་ལ་སྤྱོད་པ། ཚིལ་བུའི་ཅོད་པན་གྱིས་བརྒྱན་པ། རུ་དར་བརྡབ་པའི་རྐན་སྒྲ་ཅན། ཕྱར་ན་སྐྱེན་པོའི་རྩལ་གནོན་པ། གཟས་ན་དཔའ་བོའི་སྙིང་འཆུམ་པ། བསྐོར་ན་མགྱོགས་པའི་བང་འཆིང་བ། །བཏབ་ན་རྡོ་རྗེའི་བྲག་འགས་པ། གོ་ཆ་འདྲལ་ཞིང་ཕུབ་ཀྱིས་མི་སྲུང་བ། དགྲ་མང་གསོད་ལ་མི་ངལ་བ། སྡེ་མང་བརླག་ལ་མི་ཞུམ་པ། རོ་མང་བརྡལ་ལ་མི་སྐྱོ་བ། བསྣུན་གྱིན་རྣོ་བའི་ངར་ཐོགས་པ། བརྡེག་གྱིན་འབིགས་པའི་སོ་ཐོན་པ། བཀོལ་གྱིན་རྩུབ་པའི་དབལ་ཚ་བ། དཀར་ཕྱོགས་གཟེངས་སྟོད་ཅིང༌། ནག་པོའི་གོང་གནོན་པ། སྒྲོལ་བ་སྔགས་ཀྱི་མཚོན་ཆ། མངོན་སྤྱོད་གྲུབ་པའི་ནོར་བུ། དགྲ་ལས་རྣམ་པར་རྒྱལ་བའི་མདུང་དམར་གློག་མདའི་ཤུགས་ཅན། ལྷ་སྲུང་གི་དཔའ་ཟླ། སྔགས་
འཆང་སྒྲུབ་པ་པོའི་དཔུང་གྲོགས། ལྷ་མིའི་བསམ་པ་སྒྲུབ་ཅིང་འདོད་པའི་ཕྲིན་ལས་ཐོགས་མེད་དུ་བྱེད་པ་ལ་གསོལ་ལོ། །བསང་ངོ༌། །མཆོད་དོ། །མངའ་དབུལ་ལོ། །གཟི་བྱིན་བསྐྱེད་དོ། །