བདེ་ཆེན་རྒྱལ་མོའི་བསྐང་གསོ།
ན་མོ་གུ་རུ་མཉྫུ་གྷོ་ཥ་ཛྙཱ་ན་ཀྲི་བེནྡྲ་ཡེ། ཡེ་ཤེས་ཀྱི་ཌཱ་ཀི་ནི་བདེ་ཆེན་རྒྱལ་མོའི་དཀྱིལ་འཁོར་པ་རྣམས་ཐུགས་དམ་བསྐང་བའི་རིམ་པ་ལ། བཤམས་ཤིང་བྱིན་གྱིས་རླབས་པ་སྤྱི་ལྟར་གྲུབ་ནས། རོལ་མོ་དབྱངས་དང་བཅས། ཧོ༑ །གཟུང་འཛིན་ཆོས་ཀུན་གཉུག་མའི་གཤིས་སུ་ཐིམ། །ཀ་དག་རིག་པ་དབྱིངས་ཀྱི་ལྷུམས་སུ་ཞུགས། །དབྱིངས་རིག་དབྱེར་མེད་སྒྱུ་འཕྲུལ་དྲྭ་བའི་སྤྲིན། །སྣང་སྲིད་ཐམས་ཅད་མཆོད་པའི་ཕྱག་རྒྱ་ཆེ། །ལྔ་ལྡན་པདྨོ་དྲྭ་བའི་ཡེ་ཤེས་ཞིང༌། །མཐའ་དབུས་མེད་པར་བརྡལ་བའི་ཀློང་དཀྱིལ་ན། །རྣམ་དག་བདུད་རྩི་མཆོད་ཡོན་ཞབས་བསིལ་དང༌། །རྡོ་རྗེ་མེ་ཏོག་བདུག་པ་མར་མེ་དྲི། །ཞལ་ཟས་རོལ་མོའི་ཉེར་སྤྱོད་ཕུལ་བྱུང་དང༌། །གཞལ་མེད་ཁང་བརྩེགས་རིན་ཆེན་སྤུངས་པའི་རི། །དཔག་བསམ་ནགས་ཚལ་མ་རྨོས་ལོ་ཏོག་སྟུག །རིན་ཆེན་ཉེ་བའི་རིན་ཆེན་བདུན་བདུན་དང༌། །དགེ་ལེགས་ཆར་འབེབས་བཀྲ་ཤིས་རྫས་རྟགས་བརྒྱད། །པདྨའི་ལག་མཆོག་གཟུགས་སྡུག་དབྱངས་སྙན་དང༌། །དྲི་ཞིམ་རོ་བདའ་ལྷ་རྫས་རེག་བྱ་ཡིས། །ལེགས་མཚན་ལྷ་མོ་ཨུཏྤལ་མིག་ཡངས་ཚོགས། །ཟླ་བ་ཉི་མ་ཐབས་ཤེས་ཟུང་འཇུག་པའི། །རང་བཞིན་སྨན་མཆོག་དམར་ཆེན་བྷ་ལིང་ཏ། །མཆོག་གི་འདོད་ཡོན་སྒྱུ་
རྩལ་དྲུག་ཅུ་བཞིའི། །མཐར་སོན་པད་ཅན་ཕྱག་རྒྱའི་འདུ་བ་སོགས། །རྣམ་པ་ཀུན་ལྡན་འབྱོར་པའི་ཆ་ཤས་རེར། །བདེ་ཆེན་རི་མོའི་ཉམས་འགྱུར་འབུམ་རྫོགས་པའི། །ཀུན་བཟང་མཆོད་སྤྲིན་རབ་འབྱམས་དབྱིངས་ཀྱི་རྒྱན། །དག་པའི་མོས་ངོར་ཅིག་ཆར་གསལ་བ་འདིས། །ཟུང་འཇུག་དཀྱིལ་འཁོར་རྒྱ་མཚོའི་ཁྱབ་བདག་ཆེ། །དབྱིངས་ཡུམ་རྡོ་རྗེ་ཕག་མོའི་ཐུགས་དམ་བསྐངས། །གནས་གསུམ་མཁའ་འགྲོ་ཡོངས་ཀྱི་འཁོར་ལོས་སྒྱུར། །བདེ་རྒྱལ་པདྨོ་ཡོ་གིའི་ཐུགས་དམ་བསྐངས། །བྱིན་རླབས་འབྱུང་གནས་བཀའ་བརྒྱུད་བླ་མའི་གཙོ། །རིགས་བདག་པདྨ་ཐོད་ཕྲེང་ཐུགས་དམ་བསྐངས། །རྡོ་རྗེ་བཙུན་མོའི་ཕྱི་ནང་གཞན་གསུམ་ཆོས། །རྡུལ་བྲལ་ཡེ་ཤེས་དབྱིངས་སུ་རོ་མཉམ་ཆ། །དྲན་པས་ཕུང་ཁམས་སྐྱེ་མཆེད་ཡང་དག་མཐར། །སྦྱོང་མཛད་ཞི་ཁྲོ་རིགས་བརྒྱའི་ཐུགས་དམ་བསྐངས། ཁྱད་པར་རྩ་རླུང་ཐིག་ལེ་འོད་གསལ་ཀློང༌། །རྒྱས་འདེབས་འཁོར་ལོ་གསུམ་དཀྱིལ་ཐུགས་དམ་བསྐངས། །མཁའ་སྤྱོད་གཏུམ་མོ་ལ་སོགས་ཐུགས་འཁོར་བདག །ཡེ་ཤེས་དཔའ་བོར་བཅས་རྣམས་ཐུགས་དམ་བསྐངས། །ས་སྤྱོད་ས་སྲུང་མ་སོགས་གསུང་འཁོར་བདག །ཡེ་ཤེས་དཔའ་
བོར་བཅས་རྣམས་ཐུགས་དམ་བསྐངས། །ས་འོག་འཁོར་ལོའི་ཤུགས་སོགས་སྐུ་འཁོར་བདག །ཡེ་ཤེས་དཔའ་བོར་བཅས་རྣམས་ཐུགས་དམ་བསྐངས། །དེ་དག་རྣམ་འཕྲུལ་རི་རབ་རྡུལ་ཕྲན་སྙེད། །མཁའ་འགྲོ་མ་དཔལ་ལྷ་ཚོགས་ཐུགས་དམ་བསྐངས། །རྡོ་རྗེ་ལུས་དང་ཕྱི་རོལ་དཀྱིལ་འཁོར་གྱི། །རྣལ་འབྱོར་མ་ཚོགས་དགྱེས་པ་སྐོང་གྱུར་ནས། །ཐུགས་དང་འགལ་བའི་ཉམས་ཆག་མུན་པ་སངས། །ཡེ་ཤེས་སྣང་བས་བདག་རྒྱུད་གསལ་བར་ཤོག །ཅིར་སྣང་ཡུལ་ཀུན་ཚོགས་ཀྱི་ལོངས་སྤྱོད་དུ། །རོལ་པས་བདེ་སྟོང་རྟོགས་པའི་རྩལ་འབར་ཏེ། །འདུ་བ་གསུམ་དང་འབར་བ་རྣམ་གསུམ་སོགས། །དངོས་གྲུབ་དབྱར་གྱི་མཚོ་ལྟར་འཕེལ་བར་ཤོག །མཐར་ཐུག་ཕུང་ཁམས་སྙིགས་མ་དབྱིངས་སུ་དག །མི་ཤིགས་དྭངས་མ་ཡེ་ཤེས་བཅུད་ཀྱིས་སྨིན། །སྟོང་པའི་མཁའ་ལ་རྗེས་ཆགས་མདངས་ཤར་ཏེ། །ཟུང་འཇུག་ཕག་མོའི་གོ་འཕང་མྱུར་འགྲུབ་ཤོག །གཞན་ཡང་རིས་མེད་རྒྱལ་བསྟན་བཤད་སྒྲུབ་འཕེལ། །དེ་འཛིན་ཞབས་བརྟན་ཕྲིན་ལས་ཕྱོགས་མཐར་ཁྱབ། །འགྲོ་ཀུན་ཕན་བདེའི་དགེ་མཚན་དར་བབས་ཤིང༌། །ཕྱམ་གཅིག་མཆོག་དངོས་འགྲུབ་པའི་བཀྲ་ཤིས་ཤོག །འཕྲོས་དོན་ཕྲན་བུ་སྨོས་པ། བསྐང་བ་ཞེས་པའི་
འབྲུ་དོན། །ཚོགས་བསྐང་གཉིས་ཀྱི་ཟླས་ཕྱེ་བའི་ཚོགས་མཆོད་ནི་ཞལ་ཟས་བཟའ་བཏུང་གི་བདུད་རྩིས་བླ་མ་དང་དཀྱིལ་འཁོར་གྱི་ལྷ་རྣམས་མཉེས་པ་སྒྲུབ་པ་གཙོ་ཆེ་ལ། དེའི་སྟེང་དུ་འདོད་ཡོན་གྱི་འབྱོར་པ་རྒྱས་པ་ཡིད་ལས་སྤྲུལ་པ་དང༌། དངོས་བཤམས་བྱིན་གྱིས་བརླབས་པའི་སྒོ་ནས་ལྷའི་ཐུགས་རྒྱུད་ཀྱི་མཉེས་པ་ཆ་ཤས་རྫོགས་པའམ། ཁ་འགེང་བར་བྱེད་པས་ན་དེ་སྐད་ཅེས་བྱ་སྟེ། ཚོགས་བསྐང་གཉིས་ཀྱི་ཁྱད་པར་ཡང་དེས་ཤེས་སོ། །དེར་མ་ཟད་དམ་ཚིག་ཉམས་པའི་ཉེས་པས་དཀྱིལ་འཁོར་གྱི་ལྷ་རྣམས་མི་མཉེས་པར་བགྱིས་པ་འགྱོད་ཚངས་ཆེན་པོའི་མན་ངག་རྒྱས་པར་བསྒྲུབས་པ་ལ་བརྟེན་ནས་སྦྱར་བ་ཡང་སྒྲ་དེ་ལྟར་འཇུག་སྟེ་རང་གི་དམ་ཚིག་གསོ་བ་དང༌། ལྷའི་དགོངས་པ་གསོ་བ་གཉིས་གང་ལྟར་ཡང་སྒྲ་བཤད་དུ་རུང་ངོ༌། །སྤྱིར་ཚོགས་བསྐང་གཉིས་ལ་འགལ་བ་མེད་དོ། །གྲོལ་ཐིག་ལམ་རྒྱས་པའི་བསྐང་བ་འཆི་མེད་སྐུ་གསུམ་འདུས་པའི་དཀྱིལ་ཆོག་ཏུ་ཚོགས་ཕུད་དང་པོའི་མཆོད་པར་གསུངས་པ་བཞིན་ནོ། །ཞེས་པའང་བཙུན་པ་བློ་གྲོས་གསལ་བ་འཇིགས་མེད་འོད་གསལ་གྱི་ངོར། སྤྲང་སྨྱོན་བསྟན་པའི་ཉི་མས་བྲིས་པ་མངྒ་ལཾ།། །།