ཚེ་སྒྲུབ་ཀྱི་ཆོ་ག་འཆི་མེད་གྲུབ་པའི་ཤིང་རྟ།
འཆི་མེད་ཡེ་ཤེས་དམ་པའི་སྐུ་མཆོག་ནི། །འཆི་བདུད་ཉེས་པ་འཇོམས་པའི་རལ་གྲི་སྟེ། །འཆི་བྱེད་མ་རིག་རྒུད་པའི་གཡུལ་ངོ་ཆེ། །འཆི་མེད་ཞི་བར་སྒྲོལ་ལ་ཕྱག་འཚལ་ལོ། །འདིར་གུ་རུ་ཉི་མ་འོད་ཟེར་གྱི་རྣལ་འབྱོར་ལ་བརྟེན་པའི་ཟབ་མོ་ཚེའི་སྒྲུབ་པ་བྱ་བར་འདོད་
པས། ཐོག་མར་སྐྱབས་སེམས་ནི། བདག་གཞན་འགྲོ་ཀུན་སྲིད་ལས་རྣམ་གྲོལ་ཞིང༌། །འཆི་མེད་རྟག་པ་དམ་པའི་ས་བསྒྲུབ་ཕྱིར། །ཚེ་དབང་རིག་འཛིན་ལྷ་ལ་སྐྱབས་མཆི་ཞིང༌། །སངས་རྒྱས་ང་རྒྱལ་ཆེན་པོའི་ཏིང་འཛིན་བསྒོམ། །ལན་གསུམ། དངོས་གཞི་བསྒོམ་བཟླས་ནི། དག་པའི་ཆོས་ཉིད་རང་བཞིན་མ་བཅོས་པ། །ཀུན་སྣང་འཆི་བ་མེད་པའི་ཡེ་ཤེས་ཆེར། །ཟུང་འཇུག་སེམས་ཀྱི་རྡོ་རྗེ་གཉུག་མའི་སྲོག །ཧྲཱིཿཡིག་མི་ཤིགས་ཐིག་ལེར་སྦྱར་བ་ལས། །སྒྱུ་འཕྲུལ་དྲྭ་བ་ཆེན་པོའི་འོད་ཟེར་སྤྲིན། །ནམ་མཁའ་གང་བའི་སྤྲོ་བསྡུ་མི་ཟད་པས། །རྒྱལ་བ་ཀུན་མཉེས་འགྲོ་བའི་དོན་བྱས་ཏེ། །ཞུ་བའི་བདེ་ཆེན་ལྷན་སྐྱེས་ནམ་མཁའི་གཟུགས། །བདེ་མཆོག་སྒྱུ་མ་སྐུ་ཡི་ཟློས་གར་ནི། །རང་བཞིན་རྣམ་དག་འདབ་སྟོང་གེ་ས་རར། ཁུ་རྡུལ་དག་པ་ཉི་ཟླའི་གདན་སྟེང་དུ། །ཡེ་ཤེས་ཉི་མ་འོད་ཟེར་བརྒྱ་པའི་སྐུ། །ཞལ་གཅིག་རྗེས་ཆགས་ཅིར་ཡང་བཞད་པའི་ཉམས། །ཕྱག་གཉིས་ཚེ་འཛིན་པདྨོའི་མྱུ་གུ་དང༌། །འཆི་མེད་བདུད་རྩིའི་བུམ་བཟང་རབ་ཏུ་འཆང༌། །མཛེས་པའི་ཞབས་ཟུང་རྒྱལ་པོ་རོལ་སྟབས་ཅན། །སྐུ་ལ་རུས་རྒྱན་སྟག་གི་ཤམ་ཐབས་གསོལ། །ཐུན་མཚམས་
གསར་པའི་མདངས་ལྟར་ལམ་མེ་བ། །དཔའ་བོ་ཆེན་པོ་བརྟུལ་ཞུགས་སྤྱོད་པའི་གཟུགས། །རང་བྱུང་ལྷུན་གྲུབ་དྭངས་མའི་མཚན་དཔེར་རྫོགས། །གནས་གསུམ་རྡོ་རྗེ་ཡི་གེ་འབྲུ་གསུམ་ལས། །འོད་འཕྲོས་རང་བཞིན་གནས་ནས་ཡེ་ཤེས་པ། །དཔའ་བོ་རྣལ་འབྱོར་ཚོགས་བཅས་སྤྱན་དྲང་གྱུར། །ཞེས་སྤྱན་དྲངས་ཤིང་སྤོས་རོལ་བཅས། ཧྲཱིཿ གདོད་ནས་སྐྱེ་མེད་ཀ་དག་ཆོས་ཀྱི་སྐུ། །སྐྱེ་བའི་ཆོ་འཕྲུལ་ཕྱག་རྒྱ་ཆེན་པོའི་ལྷ། །ཟུང་འཇུག་འཆི་མེད་གྲུབ་པའི་དཀྱིལ་འཁོར་གཙོ། །ཚེ་སྦྱིན་བླ་མ་རིག་འཛིན་གཤེགས་སུ་གསོལ། །ཨོཾ་ཨཱཿམ་ཧཱ་གུ་རུ་ས་པཱ་རི་ཝ་ར་བཛྲ་ས་མ་ཡ་ཛ་ཛཿཔདྨ་ཀ་མ་ལ་ཡ་སྟྭཾ། ཞེས་མདུན་མཁར་ཞུགས་སུ་གསོལ་ལ། མཆོད་པ་ནི། ཧྲཱིཿ ཀུན་ཏུ་བཟང་པོ་རང་སྣང་དག་པའི་རྒྱན། །སྣང་སྟོང་འདོད་ཡོན་མཆོད་པའི་སྤྲིན་ཕུང་གིས། །ཡེ་ཤེས་ཉིད་ལ་ཡེ་ཤེས་ཉིད་མཆོད་པས། །ཚེ་དབང་གྲུབ་པའི་རིག་འཛིན་མཉེས་གྱུར་ཅིག །བཛྲ་ཨཱརྒྷཾ་སོགས། བསྟོད་པ་བྱ་བ་ནི། ཧྲཱིཿ གཞི་དབྱིངས་ཁྱད་ཆོས་དྲུག་ལྡན་བུམ་པའི་སྐུ། །གཞི་སྣང་འདབ་སྟོང་ཐིག་ལེའི་ལྟེ་བ་རུ། །ལྷུན་གྲུབ་མཚན་དཔེའི་རྣམ་རོལ་པདྨ་འབྱུང༌། །དཀྱིལ་འཁོར་འཁོར་ལོའི་དབང་ཕྱུག་ཁྱོད་ལ་བསྟོད། །ཛཿཧཱུྃ་བཾ་ཧོཿ
ས་མ་ཡ་ཏིཥྛ་ལྷན། ཞེས་དམ་ཡེ་གཉིས་མེད་དུ་བསྲེ། དེ་ནས་འཛབ་དགོངས་ནི། ཐུགས་ཀར་ཁ་སྦྱོར་ཉི་ཟླའི་ག་འུ་རུ། །འཕོ་འགྱུར་མེད་པ་ཐིག་ལེ་ཆེན་པོའི་སྲོག །གསུང་གི་རྡོ་རྗེ་ཧྲཱིཿཡིག་འབར་བ་ནི། །ཤིན་ཏུ་ཕྲ་བ་འོད་ལྔའི་ཐིག་ལེ་ཅན། །གནད་བསྐུལ་འཛབ་བཟླས་རིག་པ་ལ་སྦྱར་བས། །མཁའ་སྤྱོད་དཔའ་བོ་་ཐུགས་རྒྱུད་བསྐུལ། །རྟག་བརྟན་འཆི་བ་མེད་པའི་དངོས་གྲུབ་དབྱིག །ངོ་མཚར་ཕྱག་རྒྱའི་རྣམ་རོལ་ཚད་མེད་པས། །སྙིང་དབུས་ཏིང་འཛིན་སེམས་དཔར་རོ་གཅིག་གྱུར། །ཞེས་དམིགས་པ་ལ་སེམས་རྩེ་གཅིག་ཏུ་གཞོལ་བ། གསུང་ཕྱག་རྒྱའི་སྙིང་པོ་ཡི་གེ་འབྲུ་གཅིག་གི་བཟླས་པ་ཆུ་བོའི་རྒྱུན་བཞིན་དུ་བྱ་ཞིང༌། སྐབས་སུ་འཇམ་རླུང་བུམ་པ་ཅན་བཟུང༌། ཐུན་མཐར་མཆོད་བསྟོད་བྱ་ཞིང༌། ཚེ་འགུགས་ནི། ཧྲཱིཿ སྣང་གསུམ་རྟོག་པའི་བག་ཆགས་མ་ལུས་པ། །སྒྲ་གཅན་དབུ་མའི་གྲོང་དུ་བསྒྲལ་བ་ལས། །བསམ་གྱིས་མི་ཁྱབ་སྐྱེ་འཆིའི་ཁམས་སྤངས་པ། །ཚེ་དབང་གྲུབ་པའི་མགོན་པོ་དབྱིངས་ནས་བཞེངས། །མཉམ་པའི་ཆོས་ཉིད་ཀློང་ཆེན་ཡངས་པ་ལས། །འཕོ་ཆེན་འཆི་མེད་རྡོ་རྗེའི་ཡེ་ཤེས་སྐུ། །ལྷན་སྐྱེས་་འདུ་བ་འབུམ་དང་བཅས། །
ཚེ་དབང་བདེ་བ་སྦྱིན་པའི་ལྷར་བཞེངས་ཤིག །འོད་ལྔ་ཡེ་ཤེས་ཀློང་དགུའི་རྣམ་རོལ་གྱིས། །ལྷུན་གྲུབ་འཆི་བ་མེད་པའི་ཚེ་བཅུད་བསྡུས། ཁམས་དྲུག་རྡོ་རྗེའི་ལུས་ཀྱི་དཀྱིལ་འཁོར་དུ། །ཡེ་ཤེས་ལྷ་མོ་བཞི་ཡིས་དབང་མཆོག་བསྐུར། །མ་རིག་ལས་ཀྱི་རྒྱུ་འབྲས་འཆོལ་བ་དང༌། །རྩ་རླུང་ཐིག་ལེའི་དབང་ཐང་ཉམས་པ་ལས། །འཆི་འཕོའི་འདུ་བྱེད་ཉེར་བར་ཕྱོགས་པའི་ཁམས། །གཞི་རྩ་མེད་པའི་དབྱིངས་སུ་ཞི་བར་མཛོད། །འཁྱམས་དང་ཡར་དང་ཆད་དང་ཉམས་པ་དང༌། །བརྐུས་དང་ཟད་དང་བྱད་དུ་བཅུག་པའི་ཚེ། །རྗེས་འཛིན་རིག་པ་བརྟུལ་ཞུགས་མཐུ་ཕྱུངས་ལ། །མི་འགྱུར་སྲོག་གི་ཀ་བ་བརྟན་པོར་ཚུགས། །སྣོད་བཅུད་བརྟན་གཡོའི་དགེ་མཚན་གཡང་དུ་བསྐྱིལ། །འཁོར་འདས་སྲིད་ཞིའི་ལེགས་ཚོགས་དབང་དུ་བསྡུས། །མཆོག་དང་ཐུན་མོང་དངོས་གྲུབ་ཆར་དུ་བསྙིལ། །འཕོ་འགྱུར་གཉིས་མེད་ཚེ་ཡི་བྱིན་ཆེན་ཕོབ། །གཞོམ་མེད་འོད་ལྔའི་རང་མདངས་ཤིགས་སེ་ཤིག །མི་ཤིག་ཐིག་ལེའི་སྤྲིན་ཕུང་ཐིབས་སེ་ཐིབ། །རྡོ་རྗེ་སྔགས་ཀྱི་རང་སྒྲ་དི་རི་རི། །སྐྱེ་འཆི་མེད་པ་ཚེ་ཡི་བྱིན་ཕོབ་ཅིག །ཨོཾ་བཛྲ་ཨ་ཡུ་ཥེ་སྭཱ་ཧཱ།
ཡང་ན་མཆོད་བསྟོད་འདིར་བྱ། མཐར་བསྡུ་ལྡང་ནི། ཨ་དག་པ་རབ་འབྱམས་བརྟན་གཡོའི་སྣང་བ་ཀུན། །འོད་གསལ་རིག་པ་ཆོས་ཟད་ངང་དུ་བསྡུ། །སླར་ཡང་ནང་གསལ་ཕྲ་བའི་ཡེ་ཤེས་ཆེའི། །རང་གདངས་ཕྱག་རྒྱ་སྒྱུ་མའི་འཁོར་ལོར་ལྡང༌། །ཧྲཱིཿཧྲཱིཿཧྲཱིཿ མཇུག་ཏུ་བསྔོ་སྨོན་ནི། དགེ་བ་འདི་ཡིས་མྱུར་དུ་བདག་ཉིད་ནི། །ཚེ་དབང་འཆི་མེད་རིག་འཛིན་ས་ཐོབ་སྟེ། །འགྲོ་བ་སེམས་ཅན་སོགས་ཀྱིས་མཐའ་བརྒྱན་པར་བྱའོ། །སྙན་བརྒྱུད་མན་ངག་ཆུ་གཏེར་བསྲུབས་པའི་སྐྱེས། །ཟབ་ལམ་གདམས་པའི་ཟླ་སྣང་འདི་བཀོད་པས། །འཆི་བདུད་མུན་པའི་རྡུལ་ཁམས་མཐར་བསྐྲད་དེ། །བཀྲ་ཤིས་སྣང་བས་ས་གསུམ་ཁྱབ་གྱུར་ཅིག །ཚེ་སྒྲུབ་ཀྱི་ཆོ་ག་འཆི་མེད་གྲུབ་པའི་ཤིང་རྟ་ཞེས་བྱ་བ་དབྱངས་གསལ་གྱི་ཡེ་ཤེས་ཐོག་མའི་སྲོག་ཤིང་ལ་གསལ་བྱེད་ཐ་སྙད་ཀྱི་འཇུག་པ་དུ་མས་མཛའ་བོར་བྱས་པའི་མིང་གི་གྲགས་པ་ཅན་ཆོས་རྗེ་བློ་གསལ་དབང་པོའི་གཟུགས་སུ་སྣང་བར་བྱས་ཤིང༌། ཀུ་མཱ་རའི་བརྟུལ་ཞུགས་ཅན་གྱིས་བརྗོད་པ་དགེ་བར་གྱུར་ཅིག། ༈ །།