སྨན་བླའི་རྗེས་འཛིན་བྱིན་རླབས་ཆོ་ག
བདེ་གཤེགས་སྨན་གྱི་བླ་མ་ལ། །དད་བརྒྱས་སྤྱི་བོས་རབ་བཏུད་དེ། །རྣམ་མང་ནད་ཀྱིས་གཟིར་བའི་འགྲོ། །རྗེས་འཛིན་བྱིན་རླབས་ཆོ་ག་བྲི། །གང་ཞིག་གིས་བཅོམ་ལྡན་འདས་སྨན་གྱི་བླ་མའི་བྱིན་རླབས་བྱེད་པར་འདོད་པས། དྲི་བཟང་གི་ཆུས་བྱུགས་པའི་སྟེགས་གཙང་མའི་ཁར་མགུལ་ཆིང་ནོར་བུའི་མདངས་ལྡན་གྱི་བུམ་པ་བཅུད་ཀྱིས་གཏམས་པ་དང༌། བདེ་གཤེགས་མཆེད་བརྒྱད་ཀྱི་སྐུ་གསུང་ཐུགས་རྟེན་བྲིས་པའི་ཙཀ་ལི་མཐའ་བརྟེན་གྱི་རྫས་དང་བཅས་པ་དང་ཉེ་ལོགས་སུ་ཁྲུས་བུམ་རྒྱན་ལྡན་ཀྱང་འདུ་བྱ་ལ། མདུན་དུ་ཉེར་སྤྱོད་ལྔ་སོགས་གཙང་ཞིང་དག་པའི་མཆོད་རྫས་གང་འབྱོར་བཀོད་ལེགས་པར་བཤམ་མོ། །དེ་ནས་ཆོ་གའི་གཞུང་བསྲང་བཟླས་པ་མཆོད་བསྟོད་བཅས་གྲུབ་རྗེས་སློབ་མ་རྣམས་མདུན་དུ་འཁོད་པ་ལ་ཁྲུས་བྱ་བའི་ཕྱིར། ཁྲུས་བུམ་ཐོགས་ལ། ཧཱུྃ། བདེ་གཤེགས་སྨན་བླ་མཆེད་བརྒྱད་ཐུགས་རྗེའི་ཆུས། །སྐལ་ལྡན་སློབ་མའི་སྒོ་གསུམ་སྡིག་སྒྲིབ་དང༌། །དེས་བསྐྱེད་ནད་གདོན་བར་ཆད་སྡུག་བསྔལ་ཚོགས། །ལྷག་མེད་ཤེལ་གོང་ཕྱིས་བཞིན་དག་གྱུར་ཅིག །ཡི་གེ་བརྒྱ་བ་བརྗོད་ཅིང་བཀྲུ། བགེགས་གཏོར་བསང་སྦྱང་ནི། སྭ་བྷ་ཝས་སྦྱངས། སྟོང་པའི་ངང་ལས་རིན་ཆེན་སྣོད་ཡངས་པར། །བགེགས་གཏོར་གཙང་ཞིང་དག་པའི་ལོངས་སྤྱོད་སྤྲིན། །དྲི་རོ་ནུས་པ་ཕུན་སུམ་ཚོགས་
པའི་རྫས། །འཛད་མེད་ནམ་མཁའ་མཛོད་ཀྱི་ཕུང་པོར་གྱུར། །འབྲུ་གསུམ། མགྲོན་འགུག །བསྔོ་སྔགས་རྣམས་བརྗོད་རྗེས། ན་མོ་སངས་རྒྱས་དཀོན་མཆོག་གི་བདེན་པ་དང༌། ཆོས་དཀོན་མཆོག་གི་བདེན་པ་དང༌། དགེ་འདུན་དཀོན་མཆོག་གི་བདེན་པས་སློབ་མ་འདི་དག་ལ་བཅོམ་ལྡན་འདས་སྨན་གྱི་བླ་མའི་དབང་བསྐུར་བྱིན་རླབས་ཀྱི་ཆོ་ག་སྒྲུབ་པ་ལ་གེགས་བྱེད་པའི་གདོན་བགེགས་ལོག་འདྲེན་གྱི་ཚོགས་ཐམས་ཅད་འདིར་མ་གནས་པར་གཞན་དུ་དེངས་ཤིག །གལ་ཏེ་མི་འགྲོ་ན་སངས་རྒྱས་རྣམས་ཀྱི་མངོན་སྤྱོད་ཀྱི་ཕྲིན་ལས་ཁྲོ་བོ་འཆོལ་བའི་ཚོགས་ཀྱིས་ཁྱེད་རྣམས་རྡུལ་དུ་བརླག་པར་གདོན་མི་ཟའོ། །ཧཱུྃ་བཞིའི་སྔགས་བརྗོད། ཧཱུྃ་སློབ་དཔོན་ཐུགས་ལས་ཡེ་ཤེས་མེ་དཔུང་དང༌། །རྡོ་རྗེ་འབར་བའི་སྤྲིན་ཆེན་སྤྲོས་པའི་མོད། །ཕྱོགས་མཚམ་མཐའ་དག་མི་ཤིགས་མཚོན་ཆའི་གུར། །གཞོམ་གཞིག་ཡོངས་བྲལ་སྲུང་བའི་འཁོར་ལོར་གྱུར། བཛྲ་རྐྵ་ཧཱུྃ། དེ་ནས་ལོ་རྒྱུས་བསྙད་པ་ནི་སྒྲ་དག་ལ་བརྡ་འཕྲོད་པར་བརྗོད་དེ། འདི་སྐད་དུ། ནམ་མཁའ་དང་མཉམ་པའི་སེམས་ཅན་ཐམས་ཅད་ཟག་པ་མེད་པའི་ཡེ་ཤེས་སྡེ་ཚན་ཉི་ཤུ་རྩ་གཅིག་གི་བདག་ཉིད་ཐམས་ཅད་མཁྱེན་པའི་ས་ལ་དགོད་པར་བྱ། དེའི་ཆེད་དུ་གང་གསན་པར་བྱ་བའི་ཆོས་ནི། །ད་ལམ་གྱི་སྐབས་སུ་
བཅོམ་ལྡན་འདས་སྨན་གྱི་བླ་མའི་བྱིན་རླབས་དབང་བསྐུར་གྱི་ཆོ་ག་བསྒྲུབ་པ་ལ་ཐོག་མར་ཡིད་ཆེས་ཤིང་དང་བ་འདྲེན་པའི་ཆེད་དུ་ལོ་རྒྱུས་ཅིག་འཆད་ན། སྤྱིར་ནམ་མཁའི་གར་ཁྱབ་རྒྱལ་བའི་ཞིང་ཁམས་ཀྱིས་ཁྱབ་ཅིང་དེ་དག་ཐམས་ཅད་དེ་བཞིན་གཤེགས་པའི་སྐུས་ཁྱབ་སྟེ། དཀོན་བརྩེགས་ལས། ནམ་མཁས་ཇི་སྙེད་ཁྱབ་གྱུར་པ། །སྐུ་ཡིས་ཀྱང་ནི་དེ་སྙེད་ཁྱབ། །ཅེས་སོ། །དེ་ཐམས་ཅད་ལས་ཀྱང་བྱེ་བྲག་ཏུ་བདེ་བར་གཤེགས་པ་མཆེད་བརྒྱད་ནི་སྙིགས་མའི་དུས་ན་ལྷག་པར་ཡང་ཐུགས་རྗེ་དང་ཕྲིན་ལས་ཀྱི་འཇུག་པ་རླབས་ཆེ་བར་གསུངས་ཏེ། ཇི་སྐད་དུ། བསྐལ་པ་གྲངས་མེད་འདས་པའི་དུས་ཀྱི་ཚེ། །ཕོངས་གྱུར་འགྲོ་བ་མཐའ་དག་སྐྱོབ་པའི་ཕྱིར། །སྨོན་ལམ་ཁྱད་པར་ཅན་རྣམས་བཏབ་གྱུར་པའི། །བདེ་བར་གཤེགས་པ་བརྒྱད་ལ་ཕྱག་འཚལ་ལོ། །ཞེས་སོ། །དེ་ལྟ་བུའི་བཅོམ་ལྡན་འདས་སྨན་བླ་མཆེད་བརྒྱད་ཀྱི་སྒྲུབ་སྐོར་ཤིན་ཏུ་མང་ཡང་ཁྱད་པར་དུ་གྱུར་པ་འདི་ནི། རང་གཞུང་ལས། ལྷ་དང་བླ་མའི་བྱིན་རླབས་ཀྱིས་ཐོབ་ནོར། །དད་ལྡན་རྣམས་ལ་ཕན་ངེས་བྱིན་ནུས་ལྡན། །དེ་ཕྱིར་ལོག་ལྟའི་སྐྱོན་གྱིས་མི་སྦགས་པར། །འཕྲལ་ཕུགས་ཀུན་ཏུ་ཕན་དང་བདེ་སྟེར་ལམ། །ཡིན་ལ་ཡིན་བཞིན་དད་གུས་མོས་གསུམ་གྱིས། །ཉམས་སུ་ལོངས་
དང་འབྲས་བཟང་ཐོབ་པར་ངེས། །ཞེས་གསུངས་པ་ལྟར་རྒྱལ་བ་ཐམས་ཅད་ཀྱི་གསང་བའི་ཆོས་ཀྱི་མཛོད་འཛིན་པ་དཔལ་ལག་ན་རྡོ་རྗེ་ཉིད་མིའི་ཟོལ་ལ་བརྟེན་ནས་བོད་ཁམས་ཀྱི་ལྗོངས་སུ་ཕན་བདེ་སྤེལ་བའི་བཤེས་གཉེན་དུ་ཞལ་བསྒྱུར་བ་གྲུབ་དབང་བྱང་ཆུབ་རྡོ་རྗེ་ཞེས་ཡོངས་སུ་གྲགས་པ་དེ་ཉིད་ལ་བཅོམ་ལྡན་འདས་སྨན་མཁྱེན་རྒྱལ་པོའི་ཡེ་ཤེས་ཀྱི་སྐུས་ལན་གསུམ་དུ་བྱིན་གྱིས་བརླབས་པ་ལས་གདམ་ངག་བདུད་རྩིའི་ཡང་ཞུན་འདི་ཉིད་ཐུགས་ཀྱི་ག་འུར་རྒྱས་བཏབ་པ་གང་དམ་པའི་ངང་ཚུལ་རྫོགས་པའི་བཤེས་གཉེན་ཆེན་པོ་བློ་བཟང་ནོར་བུས་བསྐུལ་འདེབས་ཀྱི་རྐྱེན་ལས་དག་པར་ཕབ་པ་སྟེ། འདི་ཉིད་ཀྱི་སྒོ་ནས་དབང་བསྐུར་བ་ལ་སློབ་དཔོན་གྱི་བྱ་བ་དང་སློབ་མའི་བྱ་བ་གཉིས་སུ་ཡོད་པ་ལས་དང་པོ་ནི་སྔོན་དུ་གྲུབ་པ་ལགས་ན། ད་ཁྱེད་རང་གི་ངོ་སྐལ་དུ་གྱུར་པའི་མནྡལ་ཕུལ། མཎྜལ་ཕུལ། སླར་ཡང་གསོལ་བ་གདབ་པ་འདིའི་རྗེས་ཟློས་གྱིས། བླ་མ་སྨན་རྒྱལ་བདག་ལ་དགོངས། །སྲིད་པའི་འཁོར་ལོར་འཕྱན་པའི་འགྲོ། །སྡུག་བསྔལ་སྒྲོག་གིས་བཅིངས་པ་ལས། །སྒྲོལ་ཕྱིར་བྱིན་རླབས་ཆོ་ག་སྩོལ། ལན་གསུམ། དེ་ནས་སྐྱབས་སུ་འགྲོ་བ་དང་སེམས་བསྐྱེད་པའི་ཕྱིར་འདིའི་རྗེས་ཟློས་གྱིས། ན་མོ། བསླུ་མེད་སྐྱབས་ཀྱི་མཆོག་གསུམ་ལ། མི་ལྡོག་དད་པས་
སྐྱབས་སུ་མཆི། །ཕོངས་གྱུར་འགྲོ་བ་སྐྱོབ་པའི་ཕྱིར། །བྱང་ཆུབ་མཆོག་ཏུ་སེམས་བསྐྱེད་དོ། །ལན་གསུམ། སླར་ཡང་སྡོམ་པ་བཟུང་བ་འདིའི་རྗེས་ཟློས་གྱིས། དགོངས་ཤིག་སྟོན་པ་བཅོམ་ལྡན་འདས། །སྒྲུབ་པོ་སྐལ་བཟང་རྣལ་འབྱོར་བདག །བྱང་ཆུབ་སྙིང་པོར་མཆིས་ཀྱི་བར། །སྐྱབས་ཀྱི་དམ་པར་དཀོན་མཆོག་འཛིན། །འཇིག་རྟེན་ལྷ་རྣམས་མཆོད་མི་བྱ། །གཞན་གནོད་གཞི་དང་བཅས་པ་སྤོངས། །རྟག་ཏུ་འགྲོ་ཕན་ཐབས་ལ་བརྩོན། ཁྲུས་དང་གཙང་སྦྲར་གནས་བགྱི་ཞིང༌། །བདེ་གཤེགས་སྨན་རྒྱལ་བསྒོམ་ཞིང་མཆོད། །མདོར་ན་བསྲུང་བྱའི་བསླབ་སྡོམ་རིགས། །མ་ལུས་བདག་གིས་ཡོངས་སུ་བཟུང༌། །ལན་གསུམ། ཨོཾ་སྭ་བྷ་ཝས་སྟོང་པར་བསྒོམ་རྗེས། བྱིན་རླབས་ཀྱི་གཞི་རྟེན་བསྒྲུབ་པའི་སླད་དུ་དམིགས་པ་འདི་བཞིན་དུ་མཛོད། སྟོང་པའི་ངང་ལས་ཤར་ཕྱོགས་བལྟ་ན་སྡུག་པའི་ཕོ་བྲང་ཆེན་པོར་སློབ་མ་རྣམས་བཅོམ་ལྡན་འདས་བདེ་གཤེགས་སྨན་པའི་རྒྱལ་པོ་འཁོར་སངས་རྒྱས་དང་བྱང་ཆུབ་སེམས་དཔའི་ཚོགས་དང་བཅས་པ་ཐམས་ཅད་མ་འདྲེས་པར་གསལ་བཏབ་པའི་གནས་གསུམ་ཨོཾ་ཨཱཿཧཱཾཨུ་གིས་མཚན་པ་ལས་འོད་ཟེར་འཕྲོས་པས་བསྒོམ་པ་དང་འདྲ་བའི་ཡེ་ཤེས་པ་སྤྱན་དྲངས་པར་གྱུར།
གཞུང་གི་སྤྱན་འདྲེན་གྱི་ཚིག་བརྗོད་མཐར། མཱ་གུ་རུ་བྷེ་ཥ་ཛྱེ་ས་པཱ་རི་ཝཱ་ར་བཛྲ་ས་མ་ཡ་ཛ། ཞེས་བཟླ། བརྟན་བཞུགས་བྱ། དེ་ནས་དབང་བསྐུར་བ་ནི། བུམ་པ་འདི་ཉིད་ཡེ་ཤེས་ཀྱི་གཞལ་མེད་ཁང་དུ་གསལ་བའི་ནང་ན་བཅོམ་ལྡན་འདས་སྨན་གྱི་བླ་མ་འཁོར་དང་བཅས་པ་མཚན་དཔེ་གསལ་རྫོགས་ཀྱི་སྐུར་མོས་པ་དུང་དུང་མཛོད་ཅིག །ཧཱུྃ། དོན་དམ་མཐའ་བཞི་བྲལ་བའི་ངང་ཉིད་ལས། །དག་པ་ཡེ་ཤེས་ལྷ་རུ་སྣང་བའི་དཔལ། །མི་ཟད་བྱིན་རླབས་འབྱུང་བའི་གཏེར་ཆེན་པོའི། །དབང་མཆོག་བསྐུར་བས་ས་ལམ་ཡོངས་རྫོགས་ཤོག །རྩ་སྔགས་མཐར། ཀཱ་ཡ་ཨ་བྷི་་ཨོཾ། ལྷ་དབང་བསྐུར་བ་ནི། ཧཱུྃ་ཐུགས་རྗེ་ཀུན་ལ་སོགས། མཚན་གྱི་མེ་ཏོག་སོགས། རང་གཞུང་ལས་འབྱུང་བའི་ཤོ་ལོ་ཀ་རྣམས་ཀྱི་མཇུག་ཏུ། དབང་བསྐུར་རོ། །གསུང་རྟེན་གླེགས་བམ་གཏད་ལ། བསོད་ནམས་བྱེ་བས་བསྐྲུན་པའི་བདེ་གཤེགས་གསུང༌། དབྱངས་ཀྱི་ཡན་ལག་རྒྱ་མཚོར་ལྡན་པ་ལས། །ཉེར་འོངས་ཟབ་མོའི་མདོ་སྡེ་བརྒྱད་བརྒྱ་པ། །གསུང་མཆོག་དམ་པའི་ཆོས་ཀྱི་དབང་བསྐུར་རོ། །རྩ་སྔགས། ཨ་བྷི་ཥཱིཉྩ་ཨཱ། ཐུགས་རྟེན་ཧཱུྃ་ཡིག་གཏད་ལ། མཚན་བཅས་རྟོག་པས་མ་ཡིན་རྒྱལ་བའི་ཐུགས། །ནམ་མཁའ་ལྟ་བུར་རྒྱས་པའི་མཁྱེན་རབ་དང༌། །ཐུགས་
རྗེ་རྒྱུན་འཆད་མེད་པའི་ཡེ་ཤེས་ཅན། །རྣམ་པར་མི་རྟོག་ཐུགས་ཀྱི་དབང་བསྐུར་རོ། །རྩ་སྔགས་མཐར། །ཙིཏྟ་ཨ་བྷི་ཥཱིཉྩ་ཧཱུཾ། མཐའ་རྟེན་གྱི་དབང་བསྐུར་བ་ནི། རྒྱལ་སྲིད་རིན་ཆེན་སོགས། གདུགས་དང་གསེར་ཉ་སོགས། སྔོན་དུ་་སོགས། འདོན་བསྒོམ་སྦྲག །བཀྲ་ཤིས་བརྗོད། དམ་ཚིག་ཁས་བླང༌། གཏང་རག་གི་མཎྜལ་ཕུལ། །དགེ་བ་བསྔོ། རྗེས་ཀྱི་ཆོ་ག་གཟབ་རྒྱས་སུ་བྱའོ། །སླར་སྨྲས་པ། རྒྱུད་སྡེའི་དགོངས་དོན་མ་རྟོགས་ཤིང༌། །རྩོམ་པའི་རྒྱུ་གསུམ་མི་ལྡན་པས། །འདི་ལ་འགལ་འཁྲུལ་ནོངས་པའི་དྲིས། སྦགས་པར་གྱུར་གང་མཁས་ལ་འཆགས། །དེ་དགེ་དྲི་མེད་ཟླ་བ་ལྟར། །རྣམ་པར་དཀར་བའི་བྱེད་འབྲས་ལ། །བརྟེན་ནས་འགྲོ་རྣམས་ཀུན་མཁྱེན་སར། །མྱུར་དུ་གྲོལ་བའི་བཀྲ་ཤིས་ཤོག །ཅེས་པའང་དགེ་སློང་དམ་ཆོས་འོད་ཟེར་ནས་བསྐུལ་བ་ལྟར་གཞོན་ནུ་འཇིགས་མེད་པས་རང་ལོ་བཅུ་དྲུག་པ་རྣམ་གནོན་གྱི་ལོར་སྦྱར་བའོ།། །།