གཅོད་ཀྱི་ལས་ཚོགས་གཤིན་པོའི་སྡུག་བསྔལ་སྦྱོང་བྱེད་ཀྱི་ཆོ་ག
ཟབ་མོ་གཅོད་ཀྱི་ལས་ཚོགས་གཤིན་པོའི་སྡུག་བསྔལ་སྦྱོང་བྱེད་ཀྱི་ཆོ་ག་གཞན་ཕན་ཐུགས་རྗེའི་ཟློས་གར་ཞེས་བྱ་བ་བཞུགས་སོ། །བདེ་བར་གཤེགས་པ་ཀུན་གྱི་ཡུམ། །འཕགས་མ་སྒྲོལ་མ་རྣལ་འབྱོར་མ། །ཤེས་རབ་ཕ་རོལ་ཕྱིན་མ་ལ། །བརྟེན་ནས་གནས་ལུང་ཆོ་ག་བཤད། །དེ་ལ་སྦྱོར་དངོས་རྗེས་གསུམ་ལས། །དང་པོ་ནི། འོག་ཏུ་དགོས་པའི་ཡོ་བྱད་རྣམས་འདུ་བགྱིས་ཏེ། དངོས་གཞི་ལས། རྟེན་ལ་འགུགས་པ་ནི་ཕཊཿཀྱིས་མཚན་རྟོག་བཅད་ནས། ཆོས་
ཐམས་ཅད་སྟོང་པར་སྦྱངས། སྟོང་པའི་ངང་ལས་པདྨ་ཟླ་བའི་སྟེང༌། །ནྲྀཿཡིག་ཡོངས་གྱུར་ཚེ་འདས་ཕུང་ཁམས་དང༌། །སྐྱེ་མཆེད་ཡོངས་རྫོགས་གསོན་གྱི་གནས་སྐབས་བཞིན། །མངོན་སུམ་ཇི་བཞིན་རྟེན་དང་གཉིས་མེད་གྱུར། །ན་མོ། །དོན་གཉིས་མཐར་ཕྱིན་སངས་རྒྱས་བདེན་པ་དང༌། །ཞི་བ་ཆགས་བྲལ་དམ་ཆོས་བདེན་པ་དང༌། །ལྡན་གྲོལ་གཉིས་ལྡན་དགེ་འདུན་བདེན་པ་དང༌། །དོན་དམ་ཆོས་དབྱིངས་འགྱུར་མེད་བདེན་པ་དང༌། །ཀུན་རྫོབ་རྟེན་འབྱུང་བསླུ་མེད་བདེན་པ་དང༌། །བདེན་པ་ཆེན་པོའི་བྱིན་རླབས་ནུས་སྟོབས་ཀྱིས། །ཚེ་ལས་འདས་པའི་རྣམ་ཤེས་རིགས་དྲུག་གནས། །གང་ན་གནས་ཀྱང་མྱུར་དུ་འདིར་ཁུག་ཅིག །ལན་གསུམ། ཛ་ཧཱཾཨུ་བཾ་ཧོ་ཞེས་ཕྱག་རྒྱ་བཞིས་བཅིངས། དེ་ནས་བགེགས་གཏོར་བསང་སྦྱང་ལ། ཕཊཿཏྲཾ་ཡིག་ཡོངས་སུ་གྱུར་པ་ལས་རིན་པོ་ཆེའི་སྣོད་ཀྱི་ནང་དུ་གཏོར་མ་འདོད་ཡོན་ལྔ་དང་ལྡན་པར་གྱུར། འབྲུ་གསུམ་གྱིས་སྦྱངས་སྤེལ་བསྒྱུར་ལ། གཏོར་མ་གསུམ་རེ་རེ་བཞིན་གཡས་སུ་བསྐོར་ནས། ཨོཾ་སརྦ་བིགྷན་སོགས། ཏིང་ལོ་གསུམ་རེ་རེ་བཞིན་གཡོན་དུ་བསྐོར་ནས། ཨོཾ་སུམྦྷ་ནི་སོགས་ཀྱི་མཐར། ཕཊཿ ཚེ་འདས་ཐར་ལམ་གེགས་བྱེད་བགེགས་ཀྱི་རིགས། །གནོད་བྱེད་ཟ་འདྲེ་གཤེད་བདུད་ལན་ཆགས་ཚོགས། །ཐམས་ཅད་གླུད་ཀྱི་གཏོར་མ་འདི་
ལོངས་ལ། རྒྱ་མཚོ་ཆེན་པོའི་ཕ་མཐར་ཕྱིར་དེངས་ཤིག །རྩ་སྔགས་ཧཱཾཨུ་བཞིའི་སྔགས་དང༌། དྲག་སྔགས་སོ་ལྔས་བསྐྲད། བཛྲ་རྐྵ་རྐྵ་ཧཱུྃ་གིས་སྲུང་འཁོར་བསྒོམ། དེ་ནས་ཚེ་འདས་ཀྱིས་འདི་བཞིན་གསོལ་བ་གདབ་པར་བསམ། ཀྱེ་ཧོ་བླ་མ་འགྲོ་བའི་མགོན། །སྐྱབས་མེད་བདག་ལ་དགོངས་སུ་གསོལ། །རིགས་དྲུག་འཁོར་བའི་གནས་རིས་ལས། །ད་ལྟ་ཉིད་དུ་དྲང་དུ་གསོལ། །ཞེས་བརྗོད་དེ་ནས་མེ་ལོང་ངོས་སུ་བྱང་བུའི་གཟུགས་བརྙན་འཆར་བ་ལ་ཁྲུས་བྱ་ཞིང༌། ཕྱག་འཚལ་བདེ་མ་དགེ་མ་ཞི་མ། །མྱ་ངན་འདས་ཞི་སྤྱོད་ཡུལ་ཉིད་མ། །སྭཱ་ཧཱ་ཨོཾ་དང་ཡང་དག་ལྡན་པས། །སྡིག་པ་ཆེན་པོ་འཇོམས་པ་ཉིད་མ། །རྩ་སྔགས་གཤམ་བུར། སརྦ་པཱ་པཾ་ཤཱནྟིཾ་ཀུ་རུ་ཡེ་སྭཱ་ཧཱཿ ཞེས་མང་དུ་བཟླས་མཐར། ས་ནི་དུག་གི་ཕ་ཡིན་ཏེ། །ས་ནི་དུག་གི་མ་ཡང་ཡིན། །བདེན་པའི་བདེན་ཚིག་འདི་བརྗོད་པས། །དུག་གསུམ་ས་ཡི་ནང་དུ་སོང༌། །ཆུ་ནི་དུག་གི་ཕ་ཡིན་ཏེ། །ཆུ་ནི་དུག་གི་མ་ཡང་ཡིན། །བདེན་པའི་བདེན་ཚིག་འདི་བརྗོད་པས། །དུག་གསུམ་ཆུ་ཡི་ནང་དུ་སོང༌། །མེ་ནི་དུག་གི་ཕ་ཡིན་ཏེ། །མེ་ནི་དུག་གི་མ་ཡང་ཡིན། །བདེན་པའི་བདེན་ཚིག་འདི་བརྗོད་པས། །དུག་གསུམ་མེ་ཡི་ནང་དུ་སོང༌། །རླུང་ནི་དུག་གི་ཕ་ཡིན་ཏེ། །རླུང་ནི་དུག་གི་མ་ཡང་
ཡིན། །བདེན་པའི་བདེན་ཚིག་འདི་བརྗོད་པས། །དུག་གསུམ་རླུང་གི་ནང་དུ་སོང༌། །མུཾ་ལཱཾ་མཱཾ་པཱཾ་ཏཱཾ་ཆེ་གེ་མོའི་འབྱུང་བའི་དུག་ཐམས་ཅད་ཤཱནྟིཾ་ཀུ་རུ་སྭཱ་ཧཱ། ཞེས་འབྱུང་བའི་དུག་བྱུང་བྱས་པའི་མཇུག་ཏུ། དཀོན་མཆོག་རིན་ཆེན་རྣམ་གསུམ་གྱི། །བདེན་པ་ཆེན་པོའི་བྱིན་རླབས་ཀྱིས། ཁྱོད་ཀྱི་ཉོན་མོངས་དུག་ལྔའི་སྒྲིབ། །ད་ལྟ་ཉིད་དུ་དག་གྱུར་ཅིག །ཅེས་བདེན་སྟོབས་ཀྱིས་དུག་དབྱུང་ཡང་བྱ། དེ་ནས་ཤིས་བརྗོད་ནི། སྟོབས་བཅུ་མངའ་བདག་རྫོགས་སངས་རྒྱས། །འཁོར་བའི་འཇིགས་སྐྱོབ་དམ་པའི་ཆོས། །འགྲོ་བའི་འདྲེན་པ་དགེ་འདུན་ཏེ། །བདེ་ལེགས་འབྱུང་གནས་མཆོག་གསུམ་གྱིས། ཁྱོད་ལ་བདེ་ལེགས་མཛད་པར་གྱུར། །ཆེ་གེ་མོའི་གཙོར་བྱས་པའི་སེམས་ཅན་ཐམས་ཅད་སྡིག་པའི་ཕྱོགས་ལས་རྒྱལ་ཞིང་ཤིན་ཏུ་བཀྲ་ཤིས་པར་གྱུར་ཅིག །དེ་ནས་དབང་ཞུ་བའི་ཡོན་དུ་མཎྜལ་ཕུལ་བར་མོས་ལ། ས་གཞི་སྤོས་ཆུས་སོགས་བརྗོད་རྗེས། དཀོན་མཆོག་གསུམ་ལ་བདག་སྐྱབས་མཆི། །སྡིག་པ་མི་དགེ་སོ་སོར་བཤགས། །འགྲོ་བའི་དགེ་ལ་རྗེས་ཡི་རང༌། །སངས་རྒྱས་བྱང་ཆུབ་ཡིད་ཀྱིས་བཟུང༌། །སངས་རྒྱས་ཆོས་དང་ཚོགས་མཆོག་ལ། །བྱང་ཆུབ་བར་དུ་སྐྱབས་སུ་མཆི། །རང་གཞན་དོན་གཉིས་རབ་
བསྒྲུབ་ཕྱིར། །བྱང་ཆུབ་སེམས་ནི་བསྐྱེད་པར་བགྱི། །བྱང་ཆུབ་མཆོག་གི་སེམས་ནི་བསྐྱེད་བགྱིས་ནས། །སེམས་ཅན་ཐམས་ཅད་བདག་གིས་མགྲོན་དུ་གཉེར། །བྱང་ཆུབ་སྤྱོད་མཆོག་ཡིད་འོང་སྤྱད་པར་བགྱི། །འགྲོ་ལ་ཕན་ཕྱིར་སངས་རྒྱས་འགྲུབ་པར་ཤོག །ཅེས་རྗེས་ཟློས་བྱེད་པར་མོས་ལ། ཡེ་ཤེས་དབབ་པ་ནི། ཕཊཿ ཆོས་ཐམས་ཅད་སྟོང་པར་གྱུར་སྟོང་པའི་ངང་ལས་ཚེ་འདས་ལུས་རྟེན་དེ་ཉིད་བཅོམ་ལྡན་འདས་རྡོ་རྗེ་རྣལ་འབྱོར་མའི་སྐུར་གྱུར། ཕཊཿ མ་ཡུམ་ཆེན་ཆོས་སྐུའི་ཐུགས་ཀློང་ནས། །རང་ཤར་མཁའ་འགྲོ་ལབ་སྒྲོན་མ། །འཁོར་གནས་གསུམ་་ཚོགས་དང་བཅས། །ད་ལྟ་ཉིད་དུ་འདིར་གཤེགས་ལ། །མཆོག་ཐུན་གྱི་དངོས་གྲུབ་སྩལ་དུ་གསོལ། །ཨོཾ་ཨཱཿཧཱཾཨུ་གུ་རུ་དྷེ་ཝ་་ནི་དྭི་པ་བཛྲ་ས་མ་ཡ་ཨ་ཝེ་ཤ་ཡ་ཕེམ་ཕེམ་ཕེམ། །ཞེས་གསོལ་བ་བཏབ་པའི་མོད་ལ་དབྱིངས་ནས་ཡེ་ཤེས་ཀྱི་མཁའ་འགྲོ་མ་ལབ་ཀྱི་སྒྲོན་མ་འཁོར་དཔའ་བོ་་ཚོགས་དང་བཅས་པ་ཐམས་ཅད་ནམ་མཁའ་ནས་ཁ་ཆར་བབ་པ་བཞིན་དུ་བྱོན་ནས་ཚེ་འདས་རྡོ་རྗེ་རྣལ་འབྱོར་མ་གསལ་བ་ལ་ཐིམ་པས་དབྱིངས་ཕྱུག་ཡེ་ཤེས་རྗེ་མོ་ལབ་ཀྱི་སྒྲོན་མའི་གསང་བ་གསུམ་དང་དབྱེར་མེད་དུ་གྱུར། ཅེས་བརྗོད། ཏིཥྛ་བཛྲས་བརྟན་པར་བྱས། དེ་ནས་བུམ་པ་སྤྱི་བོར་
བཞག་ནས། ཨོཾ་རྒྱལ་ཀུན་སྐུ་ཡི་རྡོ་རྗེ་བུམ་པའི་དབང༌། །དེང་འདིར་ཚེ་འདས་ལུས་ལ་བསྐུར་བ་ཡིས། །སྣང་སྟོང་གཞོམ་བྲལ་སྐུ་ཡི་དབང་ཐོབ་ནས། །མ་ཅིག་སྐུ་ཡི་གསང་བ་མངོན་གྱུར་ཤོག །རྩ་སྔགས་མཐར། ཀཱ་ཡ་ཨ་བྷི་་ཨོཾ། བདུད་རྩི་མགྲིན་པར་བཞག་ནས། ཨཱཿ རྒྱལ་ཀུན་གསུང་གི་རྡོ་རྗེ་བདུད་རྩིའི་དབང༌། །དེང་འདིར་ཚེ་འདས་ངག་ལ་བསྐུར་བ་ཡིས། །གྲགས་སྟོང་བརྗོད་བྲལ་གསུང་གི་དབང་ཐོབ་ནས། །མ་ཅིག་གསུང་གི་གསང་བ་མངོན་གྱུར་ཤོག །རྩ་སྔགས་མཐར། ཨ་བྷི་ཥིཉྩ་ཨཱ། རྡོ་རྗེ་སྙིང་གར་བཞག་ལ། ཧཱུྃ་རྒྱལ་ཀུན་ཐུགས་ཀྱི་ངོ་བོ་རྡོ་རྗེའི་དབང༌། །དེང་འདིར་ཚེ་འདས་སེམས་ལ་བསྐུར་བ་ཡིས། །རིག་སྟོང་བློ་བྲལ་ཐུགས་ཀྱི་དབང་ཐོབ་ནས། །མ་ཅིག་ཐུགས་ཀྱི་གསང་བ་མངོན་གྱུར་ཤོག །རྩ་སྔགས་མཐར། ཙིཏྟ་ཨ་བྷི་ཥིཉྩ་ཧཱུཾ། གཏང་རག་གི་མཎྜལ་ཕུལ། གཙོ་བོས་ཇི་ལྟར་སོགས། བརྗོད་པར་བསམ། སྐབས་འདིར་འདོད་ཡོན་བསྔོ་བ་ནི། གསུར་རྫས་གྱ་ནོམ་པར་བཤམས་ནས། བྱིན་རླབས་སྤྱི་མཐུན་ལྟར་བྱས་ལ། ཀྱེ་ཧོ་ཚེ་འདས་ཐར་པའི་ལམ་བགྲོད་ལ་སོགས་ནས། སྲིད་པ་བར་མ་དོར་ཉམ་ང་བའི་སོགས་དང༌། ཐམས་ཅད་ནམ་མཁའ་མཛོད་བཞིན་དུ་སོགས། ཕཊཿ ཚེ་འདས་ཀྱི་སྟེང་གི་ནམ་
མཁར་མ་ཅིག་ལབ་ཀྱི་སྒྲོན་མ་སྐུ་གར་སྟབས་ཁྱུག་ཁྱུག །གསུང་སྙན་པའི་དབྱངས་ཀྱིས་བུ་ཡར་ཤོག་དག་པ་མཁའ་སྤྱོད་ཀྱི་ཞིང་དུ་འགྲོའོ། །ཞེས་གསུང་བར་མོས་ལ། ཕཊཿ ཀྱེ་མ་ཚེ་འདས་རིགས་ཀྱི་བུ། །རིགས་དྲུག་འཁོར་བའི་བཙོན་ར་ན། །སྡུག་བསྔལ་གསུམ་གྱི་ཁྲི་མུན་འཐིབས། །ཉོན་མོངས་དུག་ལྔའི་སྒོ་སྲུང་མང༌། །ཐར་དཀའི་གནས་འདི་ཡ་རེ་ང༌། །སྲིད་པའི་སྡུག་བསྔལ་སྐྱི་རེ་བུང༌། །འཁོར་བའི་སེམས་ཅན་ཉམ་རེ་ཐག །འདི་རུ་སྡོད་པ་ཁྱོད་རེ་བླུན། །དེ་བས་གནས་འདིར་མ་ཆགས་པར། །ཐར་པ་བྱང་ཆུབ་གོ་འཕང་ལ། །མོས་འདུན་བསྐྱེད་ཅིག་རིགས་ཀྱི་བུ། །བསླུ་མེད་སྐྱབས་གནས་མཆོག་གསུམ་ལ། །དད་གུས་བསྐྱེད་ཅིག་རིགས་ཀྱི་བུ། །ཡུམ་ཆེན་ཆོས་སྐུའི་ཐུགས་ཀློང་དུ། །དབྱེར་མེད་རོ་གཅིག་ཨེ་མ་ཧོ། །ཞེས་བརྗོད་པའི་མོད་ལ་ཚེ་འདས་ཀྱི་རྣམ་ཤེས་དེ་ཉིད་འོད་ཀྱི་གོང་བུ་སྲན་མ་ཙམ་དུ་གྱུར་ནས་མ་ཅིག་ལབ་ཀྱི་སྒྲོན་མའི་ཐུགས་ཀར་ཐིམ་པའི་མོད་ལ་མ་ཅིག་ཀྱང་ཆོས་སྐུ་ཡུམ་ཆེན་མོའི་དགོངས་ཀློང་དང་རོ་གཅིག་ཏུ་གྱུར། ཕཊཿ ལྔ་ཕྲུགས་སུ་བརྗོད་པས་སྐུ་ལྔའི་དབྱིངས་སུ་རྒྱས་བཏབ་ནས་མི་དམིགས་པའི་ངང་ལ་དར་ཅིག་མཉམ་པར་བཞག །དེ་ནས་བྱང་བུའི་གཟུགས་བརྙན་མེར་སྦྱང་བ་ནི། ཕཊཿ
ཚེ་འདས་ཕུང་པོ་ལྔ་ཡི་བུད་ཤིང་ལ། །བཅོམ་ལྡན་རྒྱལ་བ་རིགས་ལྔའི་མེ་སྦར་རོ། །ཚེ་འདས་འབྱུང་བ་ལྔ་ཡི་བུད་ཤིང་ལ། །རྒྱལ་ཡུམ་གཤེགས་མ་ལྔ་ཡི་མེ་སྦར་རོ། །ཚེ་འདས་རྣམ་ཤེས་ཚོགས་བརྒྱད་བུད་ཤིང་ལ། །སེམས་དཔའ་ཆེན་པོ་བརྒྱད་ཀྱི༴ ཚེ་འདས་སྐྱེ་མཆེད་དྲུག་གི་བུད༴ འགྲོ་འདུལ་ཐུབ་པ་དྲུག་གི༴ ཚེ་འདས་ལུས་ངག་ཡིད་གསུམ་བུད༴ རྒྱལ་ཀུན་གསང་བ་གསུམ་གྱི་མེ་སྦར་བས། །ཚེ་འདས་སྒྲིབ་གཉིས་ཡོངས་དག་ཚོགས་གཉིས་རྫོགས། །སྐུ་གཉིས་མངོན་གྱུར་དོན་གཉིས་འགྲུབ་པར་ཤོག །ཅེས་བརྗོད་མཐར་རྩ་སྔགས་དང་མི་འཁྲུགས་པའི་གཟུངས་སོགས་བཟླས་རྗེས། བཟང་པོ་སྤྱོད་པའི་སྨོན་ལམ་དང༌། བྱང་ཆུབ་སྤྱོད་པའི་སྨོན་ལམ་དང༌། ཚེ་འདས་ཀྱི་ཤུལ་མི་སོགས་ཀྱང་མཐོ་རིས་ཡོན་ཏན་བདུན་གྱིས་འབྱོར་པའི་ཆེད་དུ་བཀྲ་ཤིས་ཀྱིས་མཐའ་བརྒྱན་པར་བྱའོ། །འདིར་སྨྲས་པ། རྣམ་མང་དུཿཁས་གཟིར་བའི་འགྲོ་བ་རྣམས། རྣམ་དག་ཞི་བའི་ཡོན་ཏན་དཔག་མེད་རྣམས། །རྣམ་ཐོབ་དགྲར་ངེས་མ་རིག་འཁོར་བཅས་རྣམས། །རྣམ་པར་འཇོམས་བྱེད་ལམ་བཟང་འདི་ཀོ་རྨད། །རྨད་བྱུང་ཆོས་འདི་ཟབ་ཅིང་རྒྱ་ཆེ་བས། །བྱིས་བློས་དཔག་དཀའ་ཁྱད་པར་རང་ཉིད་འདིར། །ལེགས་པར་སྦྱངས་པའི་ཤེས་རབ་ཆེས་དམན་པས། །ནོངས་པར་གྱུར་གང་དམ་པ་རྣམས་ལ་འཆགས། །གལ་ཏེ་ལེགས་པའི་
ཚིག་དོན་ཕྲ་མོ་འགའ། །མཆིས་སྲིད་དེ་ཡང་འགྲོ་བ་མ་ལུས་པ། །རིང་པོར་མི་ཐོགས་རྣམ་གྲོལ་རྒྱལ་བའི་སར། །བཀྲི་སླད་བསྔོས་བཞིན་གེགས་མེད་འགྲུབ་གྱུར་ཅིག །ཅེས་ཟབ་མོ་གཅོད་ཀྱི་ལས་ཚོགས་གཤིན་པོའི་སྡུག་བསྔལ་སྦྱོང་བྱེད་ཀྱི་ཆོ་ག་གཞན་ཕན་ཐུགས་རྗེའི་ཟློས་གར་ཞེས་བྱ་བ་འདི་ནི་རང་སློབ་ཀུན་བཟང་འཇིགས་མེད་ཀྱི་ངོར། གྲུབ་དབང་ལཀྵིཾ་ཀཱ་རའི་ཡང་སྲིད་དུ་མིང་གི་ཅོད་པན་ཐོབ་པ། འཇིགས་མེད་བསྟན་པའི་རྒྱལ་མཚན་དུ་འབོད་པས་ཤར་མར་སྤེལ་བའི་ཡི་གེ་པ་ནི་ཉེ་གནས་་བཙུན་པ་མ་ཏི་བྷ་དྲས་བྲིས་པ་དགེ །མངྒ་ལཾ།། །།