འཕགས་ཚོགས་མཆོད་པའི་ཆོ་ག་སྙིང་པོར་དྲིལ་བ་རྣམ་པར་ཐར་བ་རྒྱ་མཚོའི་མེ་ཏོག་གི་སྤྲིན་རབ་ཏུ་འབྱུང་བ།
(༢༤༡)འཕགས་ཚོགས་མཆོད་པའི་ཆོ་ག་སྙིང་པོར་དྲིལ་བ་རྣམ་པར་ཐར་པ་རྒྱ་མཚོའི་མེ་ཏོག་གི་སྤྲིན་རབ་ཏུ་འབྱུང་བ་ཞེས་བྱ་བ་བཞུགས་སོ། །
(༢༤༢)བླ་མ་འཇམ་པའི་དབྱངས་ལ་ཕྱག་འཚལ་ལོ། །འདིར་འཕགས་ཚོགས་མཆོད་པའི་ཆོ་ག་སྙིང་པོར་དྲིལ་ཏེ་ཉམས་སུ་ལེན་པར་འདོད་པ་དག་གིས། ཐོག་མར་གནས་ཁང་བྱི་དོར་བྱ་ཞིང་སྐུ་གསུང་ཐུགས་ཀྱི་རྟེན་དགྲམ་པ་དང་། མཆོད་པ་གཡོ་མེད་ཅིང་བཀོད་པས་མཛེས་པར་བཤམས་པ་དང་། སྐྱབས་འགྲོ་སེམས་བསྐྱེད་རྒྱུད་དང་འདྲེས་ངེས་སུ་བྱ་བ་རྣམས་སྔོན་དུ་བཏང་ནས། ཚོགས་ཞིང་མངོན་དུ་བྱ་བ་ནི། མཚན་དཔེའི་སྐུ་མཆོག་ཤིན་ཏུ་ཞི་བ་ནི། །ཉོན་མོངས་རྙོག་པ་ངང་གིས་དྭངས་བྱེད་དེ། །གང་གི་ཡིད་ནི་དམིགས་པ་དེར་འཇུག་པ། །དེ་ཡི་མདུན་ན་རྒྱལ་བརྟག་ཏུ་བཞུགས། །རྒྱན་རབ་བཀོད་པ་འོག་མིན་ཆེན་པོའི་གནས། །རྣམ་པར་སྣང་མཛད་རྒྱལ་བས་ཡོངས་གང་
(༢༤༣)ཞིང་། །གྲགས་ཆེན་རྒྱལ་སྲས་རྒྱ་མཚོའི་འབྱོར་པ་ཅན། །རྣམ་ཀུན་རྒྱུན་གྱིས་རྟག་པའི་འཁོར་ལོ་རོལ། །དེ་དག་འོད་ཟེར་ཀུན་སྣང་གཟི་བརྗིད་སྤྲིན། །བྱང་ཆུབ་པདྨའི་རྒྱལ་པོའི་སྤྲིན་ཚོགས་ཅན། །བདེ་དང་དགེ་བའི་བདུད་རྩི་མཆོག་སྦྱིན་པའི། ངོ་མཚར་སྐུ་ཡི་ཆོ་འཕྲུལ་འཛད་པ་མེད། །གཞན་ཡང་རྡུལ་གཅིག་སྟེང་ན་རྡུལ་སྙེད་ཀྱི། །སྐུ་དང་ཞིང་གི་རྣམ་རོལ་མཐའ་ཡས་ཏེ། །དེ་ལྟར་ཆོས་དབྱིངས་རྒྱ་མཚོའི་ཞིང་རྣམས་སུ། །སངས་རྒྱས་ཞིང་གི་དཀྱིལ་འཁོར་མུ་མཐའ་མེད། །ཡེ་ཤེས་སྒྱུ་མ་མཁའ་ལྟར་རབ་ཞི་ཡང་། །རྒྱ་ཆེན་སྨོན་ལམ་ཐུགས་རྗེ་དམ་པའི་མཐུ། །རིམ་དང་རིམ་
(༢༤༤)མིན་སྣ་ཚོགས་ཐབས་ཚུལ་གྱིས། །སེམས་ཅན་ཁམས་ལ་ཆུ་ཟླ་བཞིན་དུ་སྣང་། །དེ་འདྲའི་ཡོན་ཏན་མཆོག་ཚོགས་མགོན་པོ་རྣམས། །མཉམ་པའི་ཆོས་ཉིད་གཅིག་ཏུ་དགྱེས་རོལ་བས། །མཁས་པ་གང་གིས་རྣམ་འདྲེན་གཅིག་མཆོད་པ། །དེས་ནི་ཐུབ་ཆེན་ཀུན་ལ་བྱ་བ་བྱས། །དེ་ལྟར་རྒྱལ་བ་དེ་དག་རྗེས་དྲན་ཞིང་། །དེ་སྙེད་ལུས་རྣམས་རྒྱ་མཚོར་བྱིན་བརླབས་ཏེ། །བསྔགས་འོས་རྒྱལ་ཀུན་དགྱེས་པའི་མཆོད་སྤྲིན་གྱིས། །བཟང་པོ་སྤྱོད་པའི་རྣམ་ཐར་རྒྱས་པར་བགྱི། །ཞེས་བརྗོད་ཅིང་དོན་ཡིད་ལ་དྲན་པར་བྱའོ། །དེ་ནས་ཡན་ལག་བདུན་པའི་དང་པོ་ཕྱག་འཚལ་བ་ནི། ༈ །རྡུལ་བྲལ་བསོད་ནམས་བརྒྱ་བའི་ཡེ་ཤེས་སྐུ། །ཕྲ་རག་ཕུང་པོའི་བདུད་ལས་རྣམ་གྲོལ་ཞིང་། །ཐུབ་དཀའ་སྲེད་མེད་བུ་ཡི་ཤུགས་འཆང་བ། །རྡོ་རྗེའི་སྐུ་མཆོག་བརྙེས་ལ་ཕྱག་འཚལ་ལོ། །ཡན་ལག་རྒྱ་མཚོ་ཚངས་པ་རྔ་སྒྲའི་དབྱངས། །ཟིལ་གྱིས་མི་ནོན་སྒྲ་ཀུན་རྗེས་འཇུག་ཅིང་། །གསུང་གི་གདངས་རེར་ཆོས་ཕུང་ཀུན་རྫོགས་པའི། །ཡོན་ཏན་དཔག་མེད་དབྱངས་ལ་ཕྱག་འཚལ་ལོ། །ཞི་བའི་ཆོས་ཉིད་རྣམ་ཐར་སྒོ་གསུམ་དབྱིངས། །ཤེས་དང་ཤེས་བྱ་རོ་མཉམ་ཚུལ་གཟིགས་ཀྱང་། །ཇི་སྙེད་ཆོས་ཀུན་མཁྱེན་པའི་སྐབས་མངའ་བ། །སྟོབས་བཅུའི་རྒྱལ་ཐབས་གནོན་ལ་ཕྱག་འཚལ་ལོ། །དག་དང་མ་དག་
(༢༤༥)གདུལ་བྱའི་ཞིང་རྣམས་སུ། །མཚན་དང་སྐུ་ཡི་རྣམ་འགྱུར་ཐ་དད་ཀྱང་། །སེམས་ཅན་གདུལ་བའི་དབང་དུ་ཚུལ་གཅིག་པ། །ཟླ་མེད་གཞན་ཕན་བརྙེས་ལ་ཕྱག་འཚལ་ལོ། །གཞན་ཡང་རྒྱལ་བ་ཀུན་གྱི་སྲས་རྣམས་དང་། །རང་རྒྱལ་སློབ་མ་དུལ་བའི་དགེ་འདུན་ཚོགས། །ཕྱག་འོས་ཡོན་ཏན་དུ་མས་མངོན་འཕགས་པ། །དེ་དག་ཀུན་ལ་གུས་པས་ཕྱག་འཚལ་ལོ། །གཉིས་པ་མཆོད་པ་ནི་སྐབས་འདིར་ས་བཅད་བཅོ་ལྔར་ཕྱེ་སྟེ་རིམ་བཞིན། འཆི་བ་མེད་པའི་ལམ་ནས་ལྡིང་བ་ཡི། །སྣ་ཚོགས་མཛེས་སྤྲིན་པདྨོའི་སྦུབས་འགྱིང་བ། །དག་བྱེད་བུམ་བཟང་འཛིན་པའི་མེ་ན་ཀས། །སངས་རྒྱས་བསོད་ནམས་ཕུང་པོར་སྐུ་ཁྲུས་གསོལ། །ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏེ་ས་མ་ཡ་ཤྲཱི་ཡེ་ཧཱུཾ། ཨོཾ་ཀཱ་ཡ་བི་ཤྭ་དྷ་ན་ཡེ་སྭཱཧཱ། བཛྲ་ཝསྟ་ཧཱུཾ། ལྷ་རྫས་ཡིད་བཞིན་དྲྭ་བའི་པདྨོ་མཆོག །འོད་ཟེར་མེ་ཏོག་སྤྲིན་གྱི་ཆར་འབེབས་པས། །མ་ལུས་ཞིང་རྣམས་རྒྱ་མཚོའི་ཁྱོན་འགེང་བ། །བསོད་ནམས་སྤྲིན་གྱི་རོལ་མོར་ཅིར་ཡང་འཇོ། །ཨོཾ་སརྦ་ཏ་ཐཱ་ག་ཏ་ས་པཱ་རི་ཝ་ར་པུཥྤེ་པུ་ཙ་མེ་གྷ་ས་མུ་དྲ་སྥ་ར་་ས་མ་ཡེ་ཧཱུཾ། རྒྱ་ཆེ་དཔག་བསམ་སྤོས་ཀྱི་ལྗོན་པ་མཆོག །ཀུན་ནས་དགའ་བ་རྒྱ་མཚོའི་དྲི་བསུང་ཅན། །སྤོས་རྡུལ་
(༢༤༦)ཕྱེ་མ་སྣ་ཚོགས་སྤྲིན་འཕྲོ་བ། །དཔལ་ལྡན་ངོ་མཚར་བཀོད་པའི་མཆོད་སྤྲིན་འཁྲིག །ཨོཾ་སརྦ་སོགས་དྷུ་བྤེ་པུ་ཙ༴ །རིན་ཆེན་ཉི་ཟླ་ནོར་བུའི་སྒྲོན་མ་མཆོག །ཚད་མེད་འོད་ཟེར་རྒྱ་མཚོའི་སྣང་བ་ཆེས། །སངས་རྒྱས་ཞིང་ཀུན་མུན་པའི་གོ་འགོག་པས། །རྒྱལ་དང་དེ་སྲས་དགྱེས་པའི་བསྙེན་བཀུར་སྟོབ། །ཨ་ལོ་ཀེ༴ སྤོས་དང་སྨན་སྦྱར་བདུད་རྩིའི་ཕྱུགས་པ་མཆོག །ཡིད་འཕྲོག་དྲི་རྣམས་རྒྱ་མཚོའི་ཆར་འབེབས་ཤིང་། །ཟག་མེད་བདེ་བའི་ཁྱད་པར་འབུམ་སྦྱིན་པ། །ནམ་མཁའ་མཛོད་ཀྱི་ཕུང་པོར་ཟད་མི་ཤེས། །གྷནྡྷེ༴ །ཕུན་ཚོགས་རོ་བརྒྱ་ལྡན་པའི་ཞལ་ཟས་མཆོག །བཟའ་བཅའ་བཏུང་བའི་ཁྱད་པར་རྣམ་མང་པོ། །བྲི་དང་གང་བ་མེད་པར་འབྱམས་ཀླས་པ། །ཏིང་འཛིན་ཞི་བ་མཆོག་གི་རྣམ་པར་རོལ། །ནེ་ཝི་ཏྱ༴ །བསྟོད་སྤྲིན་ཡན་ལག་རྒྱ་མཚོའི་རོལ་མོ་མཆོག །སིལ་སྙན་རྔ་སྒྲའི་སྤྲིན་གྱི་ཆར་འབེབས་ཤིང་། །ས་དང་ཕ་རོལ་ཕྱིན་པའི་སྒྲ་དབྱངས་བརྒྱས། །རབ་འབྱམས་རྒྱ་མཚོའི་འཇིག་རྟེན་རྒྱས་པར་འགེངས། །ཤཔྟ༴ །ནོར་བུའི་ཆུན་འཕྱངས་རྒྱ་མཚོ་མཛེས་བཀོད་པ། །འོད་ཀྱིས་འཇིག་རྟེན་རྣམ་པར་སྣང་བའི་གདུགས། །རབ་འབྱམས་ནམ་མཁའི་ཁྱོན་ལྟར་རྒྱ་ཆེ་ཞིང་། །རྒྱལ་རྣམས་འཁོར་གྱི་དཀྱིལ་འཁོར་མཛེས
(༢༤༧)པའི་རྒྱན། །ཙྪ་ཏྲཾ་ཀ༴ །ཡིད་བཞིན་ནམ་མཁའི་རྒྱན་གྱུར་བླ་བྲེ་ཆེ། །དྲིལ་གཡེར་དྲྭ་བ་བརྒྱ་སྟོང་བྲིས་པའི་གཟུགས། །ཀུན་བཟང་རྣམ་མཐར་རྒྱ་མཚོའི་ཚུལ་སྒྲོག་པ། །སངས་རྒྱས་གཙུག་ཏོར་མཛེས་པའི་ངོ་མཚར་རྫོགས། །བི་ཏཱ་ནཾ༴ །སྣ་ཚོགས་དབང་པོའི་གཞུ་ལྟར་རབ་བཀྲ་བ། །རྣམ་མང་ལྷ་རྫས་དར་གྱི་ལྔ་ལྡི་ཅན། །ཕྱོགས་བཅུ་ཞིང་ཀུན་བསྒྲེང་བའི་རྒྱལ་མཚན་སྤྲིན། །ཆོས་དབྱིངས་མུ་མཐའ་མེད་པར་འབྱམས་སུ་ཀླས། །བྷྭ་ཛ༴ །ལྷ་རྫས་རེག་ན་བདེ་བའི་གོས་མཆོག་སྤྲིན། །གཟི་ལྡན་སྒྲོན་མེའི་ཚོགས་ལྟར་རབ་འབར་བ། །འདྲེས་དང་མ་འདྲེས་རྒྱ་མཚོའི་ཁ་དོག་ཅན། །མཚན་དཔེ་སྒྱུ་མ་མཆོག་གི་འཁོར་ལོས་སིམ། །ཝ་སྟྲ༴ །གདུ་བུ་ཅོད་པན་རྣ་ཀོར་ཕྲེང་བ་སོགས། །སྣ་ཚོགས་ནོར་བུ་བཀོད་པའི་རྒྱན་མང་པོ། །རིན་ཆེན་མེ་ཏོག་རྒྱ་མཚོའི་ཆར་འབེབས་ཤིང་། །ཀུན་བཟང་མཆོད་པའི་དཀྱིལ་འཁོར་རབ་སྣང་བྱེད། །ཨ་ལཾ་ཀཱ་ར༴ །རྣམ་མང་དཔག་བསམ་ལྗོན་པའི་དགའ་ཚལ་དང་། །ཡིད་འོང་ཟླ་བ་ནོར་བུའི་བྲག་སྐྱིབ་ཅན། །དཀའ་ཐུབ་གནས་རྣམས་རྒྱ་མཚོ་རྣམ་ཕྱེ་བ། །བསམ་གཏན་བདེ་བའི་དགའ་སྟོན་སྤྱིན་པའི་དཔྱིད། །བ་ན་ཥ་ནཱཾ༴ །བཞལ་མེད་ཁང་བརྩེགས་རིན་ཆེན་དྲྭ་བ་ཅན། །གླུ་
(༢༤༨)གར་སིལ་སྙན་བསྟོད་དབྱངས་ཆར་འབེབས་ཤིང་། །མཆོད་པའི་ལྷ་མོ་སྣ་ཚོགས་སྤྲིན་འཕྲོ་བ། །ཀུན་བཟང་སྨོན་ལམ་རྒྱ་མཚོའི་རོལ་མོར་འབར། །པྲ་སཱ་ད༴ །རླབས་ཆེན་བསོད་ནམས་སྤྲིན་གྱི་འཇུག་པ་ཅན། །སྲིད་ཞིའི་དགེ་མཚན་འཁྱིལ་བའི་བུམ་པ་བཟང་། །བསམ་ཡས་འདོད་དགུའི་གྲུ་ཆར་རྣམ་འབེབས་པ། །འོག་མིན་སྤྲུལ་པའི་ཞིང་ཀུན་བཀྲག་པའི་རྒྱན། །ནི་དྷི་ཀཱ་ལ་ཤ༴ །དེ་ནས་མཆོད་པའི་མཇུག་བསྡུ་བ་ནི། མདོར་ན་བསྐལ་མང་རྒྱ་མཚོའི་འཁོར་ལོ་ཅན། །དུས་གསུམ་རྒྱ་མཚོ་བློ་ཡིས་མི་ཐུག་པར། །བྱུང་དང་འབྱུང་འགྱུར་མཆོད་སྤྲིན་རྒྱ་མཚོ་ཀུན། །མ་ལུས་ཡོངས་རྫོགས་རྣམ་མཐར་རྒྱ་མཚོའི་རྒྱན། །ཞིང་རྣམས་ཐམས་ཅད་འགྲོ་འོང་མེད་པའི་དབྱིངས། །རྟེན་ཅིང་འབྲེལ་འབྱུང་ཟབ་མོའི་ཚུལ་འཇུག་པས། །བདེ་གཤེགས་མཆོད་པའི་འདུན་ཁང་རེ་རེར་ཡང་། །ཞིང་རྣམས་རྒྱ་མཚོ་མིག་འཕྲུལ་བཞིན་དུ་སྣང་། །ལུས་རྣམས་ཐམས་ཅད་སྒྱུ་མ་སྤྲུལ་པའི་རྒྱན། །བྲི་དང་གང་བ་མེད་པའི་ཚུལ་འཇུག་པས། །གཙུག་གི་བླ་མ་རིམ་གྲོའི་གངས་ཆེན་མཚོ། །ཡེ་ཤེས་མེ་ཏོག་རྒྱལ་ལ་ལྷག་པར་མོས། །རྡུལ་རྣམས་ཐམས་ཅད་རྡོ་རྗེ་ནམ་མཁའི་དབྱིངས། །སྣང་དང་སྟོང་པ་མཉམ་པའི་ཚུལ་འཇུག་པས། །སྒྱུ་མའི་རྡུལ་རེར་ནམ་མཁའ་རྒྱས་འགེངས་
(༢༤༩)པའི། །མཆོད་སྤྲིན་བཀོད་པའི་རྒྱ་མཚོ་བསམ་མི་ཁྱབ། །སྒྲིབ་བྲལ་མཁྱེན་པ་གཉིས་ལྡན་ཡེ་ཤེས་ཆེ། །དམིགས་མེད་བྱམས་པའི་སྟོབས་མཆོག་མཐའ་ཡས་པས། །ཀུན་བཟང་མཆོད་སྤྲིན་རྒྱ་མཚོ་འདི་བཞེས་ལ། །ཕུན་ཚོགས་རིག་དང་བརྩེ་བའི་དགའ་སྟོན་སྩོལ། །བི་ཤྭ༴ །ད་ནི་ཡན་ལག་ལྷག་མ་ལྔའི་ནང་ཚན་ཕུང་པོ་གསུམ་གྱི་ཚིགས་སུ་བཅད་པ་བཅོ་ལྔར་ཕྱེ་བ་ལས་དང་པོ་བཤགས་པ་ནི། ཐལ་མོ་སྦྱར་ཏེ། གང་སྔོན་ཚེ་ཡི་རྒྱུད་རྣམས་རྒྱ་མཚོ་རུ། །ཀུན་རྨོངས་ཉེས་པའི་འཆིང་བ་བརྟན་གྱུར་པས། །སྡིག་ཏོའི་ནོངས་པ་མི་བཟད་གང་བགྱིས་པ། །དེ་ཀུན་སྙིང་ནས་འགྱོད་པས་མཐོལ་ཞིང་འཆགས། །གང་ཞིག་སྤངས་ན་འདྲེན་པ་ཀུན་སྤོང་ཞིང་། །བསྟེན་ན་བྱང་ཆེན་ལག་རྩེར་སྦྱིན་པ་ཡི། །མཁས་པའི་བཤེས་གཉེན་ཡོན་ཏན་མིག་གཅིག་པུ། །ཚུལ་བཞིན་མཉེས་པར་མ་བགྱིས་མཐོལ་ཞིང་འཆགས། །བསྟན་པ་ཀུན་གྱི་ནང་ནས་སྙིང་པོ་མཆོག །བྱང་ཆུབ་སྤྱོད་པ་རྒྱ་མཚོའི་ལམ་སྣང་བ། །དོན་ཟབ་ཤིན་ཏུ་རྒྱས་པའི་སྡེ་སྣོད་ཆོས། །སྤངས་པའི་ཉེས་སྤྱོད་ཆེ་རྣམས་མཐོལ་ཞིང་འཆགས། །ཐུབ་རྣམས་བདག་གཞན་མཉམ་པ་ཉིད་གསུངས་ཏེ། །སེམས་ཅན་ཞིང་རྣམས་རྒྱལ་བ་ལྟར་བསྔགས་ན། །བདག་གིས་དེ་དག་ཡོངས་འཛིན་མ་བགྱིས་
(༢༥༠)ཤིང་། །འཁྲུགས་དང་གདུང་བ་བསྐྱེད་རྣམས་མཐོལ་ཞིང་འཆགས། །བརྟན་པ་རྣམས་ཀྱི་ཕ་རོལ་ཕྱིན་དྲུག་དང་། །བྱང་ཆུབ་སེམས་དཔའི་རྒྱན་སྣང་རྣམ་བཞི་སོགས། །རྒྱལ་བའི་སྤས་ཀྱི་སྤྱོད་པ་རྒྱ་མཚོ་ལ། །སྒྲིབ་པར་གྱུར་པའི་ལས་ཀུན་སྙིང་ནས་འཆགས། །གཉིས་པ་ཡི་རང་ནི། ངན་འགྲོ་ལོག་པར་ངེས་པའི་ཕུང་པོ་རྣམས། །སྤངས་པའི་མཐོ་རིས་ངལ་འཚོ་ལ་སྦྱོར་བ། །ཆོས་དཀར་དགེ་བའི་བརྟུལ་ཞུགས་མངོན་སྤྱོད་པའི། །ལེགས་སྨོན་ཚུལ་ཁྲིམས་རྒྱ་མཚོར་རྗེས་ཡི་རང་། །འཕགས་པའི་བདེན་པ་བཞི་ཡི་འཇུག་ལྡོག་ལ། །ཚུལ་གནས་ཐོས་བསམ་སྒོམ་པའི་ཤེས་རབ་ཀྱིས། །སྲིད་ལས་རྣམ་གྲོལ་ཞི་བ་མཆོག་སྒྲུབ་པའི། །ངེས་འབྱིན་ཐར་ལམ་རྒྱ་མཚོར་རྗེས་ཡི་རང་། །བླ་ན་མེད་པའི་སངས་རྒྱས་ཆོས་རྟོགས་ནས། །སེམས་ཅན་རྒྱ་མཚོ་རྣམ་པར་དགྲོལ་སླད་དུ། །བསོད་ནམས་ཡེ་ཤེས་ཚོགས་ཆེན་རབ་གསོག་པའི། །ཐེག་མཆོག་བརྟུལ་ཞུགས་རྒྱ་མཚོར་རྗེས་ཡི་རང་། །གྲངས་མེད་རྒྱལ་ལ་བལྟ་དང་ཆོས་ཉན་སོགས། །འཕགས་པའི་ལམ་གྱི་ཁྱད་པར་དུ་མ་ཡིས། །སྒྲིབ་པ་མེད་པའི་གནས་རབ་སྣང་བྱེད་པ། །ས་བཅུའི་ཡོངས་སྦྱོང་རྒྱ་མཚོར་རྗེས་ཡི་རང་། །བདག་དོན་དག་པ་གཉིས་ལྡན་ས་བརྙེས་ནས། །འབད་རྩོལ་སྤྲོས་པའི་འཇུག་
(༢༥༡)ལྡང་ཉེར་ཞི་བའི། །གཞན་ཕན་སྲིད་པ་ཇི་སྲིད་མི་འགོང་བ། །སངས་རྒྱས་སྤྱོད་པའི་རྒྱ་མཚོར་རྗེས་ཡི་རང་། །གསུམ་པ་བསྐུལ་ཞིང་གསོལ་བ་གདབ་པ་ནི། གང་ཡང་ཕྱོགས་བཅུའི་ཞིང་མང་རྒྱ་མཚོ་རུ། །འཇིག་རྟེན་སྒྲོན་མ་བསྐུལ་བའི་སར་གཞེས་པ། །དེ་དག་རྣམས་ལ་བདུད་རྩིའི་སྒོ་དབྱེ་ཞིང་། །ཆོས་རྔའི་སྒྲ་ཆེན་འབྱིན་པའི་བསྐུལ་མ་འདེབས། །ཤིང་རྒྱལ་དྲུང་ན་རིག་གསུམ་མངོན་མཛད་དེ། །མི་སྨྲའི་བརྟུལ་ཞུགས་ལ་དགྱེས་མགོན་པོ་རྣམས། །ལྷར་བཅས་འཇིག་རྟེན་ཀུན་ལ་སྨན་སླད་དུ། །ཆོས་ཀྱི་འཁོར་ལོ་བླ་མེད་བསྐོར་བར་བསྐུལ། །བདག་རྟོག་མཚན་མའི་སྤྲོས་པ་རབ་གཅོད་ཅིང་། །ཡང་དག་བདེན་དོན་རྟོགས་པའི་སྣང་བ་ཅན། །རྨད་བྱུང་འཕགས་ལམ་རྒྱ་མཚོའི་ཆོས་འཁོར་ཆེ། །རིགས་གསུམ་མོས་པའི་ནམ་མཁར་རབ་སྣང་མཛོད། །གང་གིས་འཇིག་རྟེན་མྱ་ངན་ཁང་བུ་རུ། །མཆི་མའི་རྒྱུན་མང་རབ་ཏུ་བླག་བྱེད་པའི། །མྱ་ངན་འདའ་བ་སྟོན་མཛད་མགོན་པོ་རྣམས། །འགྲོ་སྒྲོལ་འཁོར་བ་ཇི་སྲིད་བཞུགས་གསོལ་འདེབས། །ཡིད་ཅན་རྒྱ་མཚོའི་བསོད་ནམས་ཞིང་སླད་དུ། །འདྲེན་པ་མཆོག་རྣམས་སྐུ་ཚེ་དཔག་མེད་ཅིང་། །མཚན་དཔེའི་མཆོད་སྡོང་མིག་གི་བདུད་རྩི་རུ། །སྤྱོད་པའི་དགེ་མཚན་ཉམས་པ་མེད་
(༢༥༢)གྱུར་ཅིག །རྗེས་སུ་བསྔོ་སྨོན་གྱི་རིམ་པ་ནི། དགེ་བའི་རྩ་བ་བློ་ཡུལ་དུ་བཞག་སྟེ། བདག་ནི་སྐྱེ་ཞིང་སྐྱེ་བའི་ཕྲེང་བ་ཀུན། །རྨད་བྱུང་འཁོར་ལོ་བཞི་ཡི་ཁྱད་ནོར་ཅན། །དལ་འབྱོར་ཡོན་ཏན་རྫོགས་པའི་རྟེན་རྙེད་ནས། །སྔོན་གནས་ཚེ་རབས་རྗེས་སུ་དྲན་གྱུར་ཅིག །འཇིགས་རུང་འཁོར་བ་མེ་ཡི་འོབས་བཞིན་དུ། །མཐོང་ནས་ཐར་པ་འདོད་པས་ཡིད་དྲངས་ཏེ། །སྟོན་པ་ཟླ་མེད་རྗེས་སུ་རབ་འབྱུང་ཞིང་། །བསླབ་པ་རྒྱ་མཚོའི་འདུན་ཁང་མཛེས་གྱུར་ཅིག ཁྱད་པར་གསུང་རབ་ལྟ་བའི་མིག་སྦྱིན་པ། །ཐེག་མཆོག་དགེ་བའི་བཤེས་ཀྱིས་རྗེས་འཛིན་ཞིང་། །གདམ་ངག་གསུང་གི་བདུད་རྩི་བཏུང་བ་ལས། །མི་ཟད་སྤོབས་པའི་གཏེར་ཆེན་རྙེད་པར་ཤོག །ཐུན་མོང་ལམ་གྱི་རིམ་པས་རྒྱུད་སྦྱངས་ཏེ། །ཐུན་མིན་སྐྱེས་བུ་ཆེན་པོའི་ཉམས་ལེན་གནད། །བཅོས་མ་མིན་པའི་བྱང་ཆུབ་སེམས་འབྱོང་ཞིང་། །རྒྱལ་སྲས་སྤྱོད་པའི་རྒྱ་མཚོར་འཇུག་པར་ཤོག །ཤིན་ཏུ་ཞི་བ་དབེན་པའི་ནགས་ཁྲོད་དུ། །རྩེ་གཅིག་རྣམ་གཡེང་མེད་པའི་ཏིང་འཛིན་གྱིས། །ལུས་སེམས་ལས་སུ་རུང་བའི་མཆོག་གྲུབ་སྟེ། །འདོད་ཉོན་འཆིང་བ་ངང་གིས་ཞི་བར་ཤོག །ཉེས་ཀུན་རྩ་བ་འགོག་པའི་ཐབས་ཀྱི་མཆོག །སྟོང་དང་རྟེན་འབྱུང་
(༢༥༣)ཟབ་མོའི་སྒོར་ཞུགས་ནས། །སྒྲིབ་པ་ལྔ་ལས་འདས་པའི་ལྷག་མཐོང་གི །རྟོགས་པའི་ཉི་མ་ནང་ནས་འཆར་གྱུར་ཅིག །ཆོས་ལ་ཆོས་མིག་རྡུལ་བྲལ་རབ་སྐྱེས་ནས། །བྱང་ཆུབ་དོན་དམ་ཟབ་མོའི་སེམས་ལྡན་ཞིང་། །གྲངས་མེད་འབུམ་ཕྲག་བཅུ་ཡི་སྨོན་ལམ་གྱིས། །འཕགས་པའི་ས་ནས་ས་མཐོ་གནོན་གྱུར་ཅིག །དེ་མཐུས་རྒྱལ་བའི་སྲས་ཀྱི་ཏིང་འཛིན་མཛོད། །གཟུངས་སྟོབས་མངོན་པར་ཤེས་དང་ཡང་དག་རིག །བསམ་ཡས་བརྗོད་དུ་མེད་པའི་རྣམ་པར་ཐར། །གྲུབ་ནས་ལམ་གྱི་བགྲོད་པ་རྫོགས་གྱུར་ཅིག །མཐར་ཐུག་བླ་ན་མེད་པའི་ཡེ་ཤེས་སྐུ། །སྟོབས་དང་མི་འཇིགས་རྒྱ་མཚོའི་མཛོད་བརྙེས་ཏེ། །རྫོགས་སྨིན་སྦྱང་གསུམ་མཐར་ཕྱིན་བདེན་པ་ཡིས། །དོན་གཉིས་འདོད་དགུ་ཡིད་བཞིན་འབྱོར་གྱུར་ཅིག །ཅེས་འདུན་པ་རྩེ་གཅིག་ཏུ་བྱའོ། །འདི་ནི་ཐེག་པ་ཆེན་པོའི་མདོ་སྡེ་ཕལ་པོ་ཆེའི་སྙིང་པོ་བསྡུས་པ་ཡིན་པས་དོན་ཇི་ལྟ་བ་བཞིན་དུ་བསམ་ན་རྒྱལ་བའི་སྲས་ཀྱི་ལམ་མཐའ་དག་ལ་ཉམས་ལེན་བྱས་པར་འགྲོ་ཞིང་གནས་སྐབས་དང་མཐར་ཐུག་གི་ལེགས་ཚོགས་ཚད་མེད་པའི་གངས་ཆེན་མཚོར་འགྱུར་པའི་ཚུལ་ལ་བསམས་ཏེ་སྐལ་བཟང་རྣམས་ཀྱིས་ཡི་དམ་དུ་བྱ་བར་རིགས་སོ། །ཞེས་པའང་གཞོན་ནུ་འཇིགས་མེད་བསྟན་རྒྱམ་དུ་འབོད་པའི་བན་དེ་སྙོམས་ལས་པས་རང་ལོ་ཉེར་གཅིག་པས་སྐྱོང་གི་ལོ་ཁྲུམ་སྟོད་ཟླ་བའི་
(༢༥༤)ཡར་ཚེས་ཟླ་བ་གྲོ་བཞིན་གྱི་དགའ་མ་དང་རྩེ་ཞིང་དྲང་སྲོང་རི་ཥི་འཆར་བའི་ཚེ་བྲིས་ཤིང་སྤེལ་བ་མངྒ་ལཾ། གང་ཟག་གཟུ་བོར་གནས་ཤིང་མདོ་སྡེ་མཐོང་བའི་རྣམ་དཔྱོད་ཅན་གྱིས་དཔྱད་ན་ཚིགས་སུ་བཅད་པརེ་རེ་ལའང་མཁས་པ་དགའ་བ་བསྐྱེད་པའི་ཚུལ་མང་པོ་ཞིག་ཡོད་པར་ཤེས་པར་གྱིས་ཤིག །སརྦ་དཱ་ཀཱ་ལ་ཾ་བྷ་བ་ཏུ།། ༈ །།འཇམ་པའི་རྡོ་རྗེ་ལ་ན་མོ། །མཆོད་སྤྲིན་མེ་ཏོག་རབ་འབྱུང་གི་འཕྱོང་ཟུར་དུ་བཀོལ་བ་ནི། དང་པོ་གནས་ཁང་བྱི་དོར་གྱི་ཚེ། སེམས་ཀྱི་རྙོགས་པ་བགྲུངས་ཤིང་ལྷ་རྣམས་དགའ། །མཛེས་པའི་ལང་ཚོ་རབ་འཐོབ་མཐོ་རིས་སྐྱེ། །རྡུལ་བྲལ་ཞི་བའི་མཆོག་ཀྱང་འདིས་སྦྱིན་ཏེ། །ལས་འདིར་ངལ་བ་བརྟེན་རྣམས་དོན་ཡོད་ཡིན། །ཞེས་བརྗོད་དེ་དཀོན་མཆོག་བླ་མར་བྱ་བའི་འདུ་ཤེས་བསྐྱེད་ནས་བསང་ཤིང་གི་དུད་པས་རྡུལ་མནན་ཏེ་ཕྱག་དར་དངོས་ལ་འཇུག །དེའི་འོག་ཏུ་སྤོས་ཆབ་དྲི་ཞིམ་པོས་བརླན་ལ་མེ་ཏོག་སིལ་མ་བཀྲམ་སྟེ་གུང་དུ་མཆོད་པའི་སྟེགས་བང་རིམ་ཅན་བླ་བྲེ་དང་འཕན་གདུགས་སོགས་ཀྱིས་མཛེས་པར་དཀོན་མཆོག་གི་རྟེན་བཞུགས་སུ་གསོལ་ཞིང་མཐའ་བསྐོར་དུ་སྤོས་དང་མར་མེ་སོགས་མཆོད་པའི་ཡོ་བྱད་རྒྱ་ཆེར་བསྟར། རང་ཉིད་སྟན་བདེ་བ་ལ་སྤྱོད་ལམ་ཞི་བས་འཁོད་དེ། །སངས་རྒྱས་ཆོས་ཚོགས་ལྟ་བུས་སྐྱབས་སེམས་བྱ། །ཚོགས་ཞིང་གསལ་གདབ། ཕྱག་འཚལ་གྱི་ཚིག་ཤྭ་ལོ་ཀ་ལྔ་པོ་གང་ནུས་བསྐྱར་ཞིང་ཕྱག་བྱ། མཆོད་པའི་སྤྲིན་གཟུངས་དང་རྟེན་འབྲེལ་སྙིང་པོས་གནས་ཡོ་བྱིན་གྱིས་བརླབས་ཏེ་རོལ་མོ་འཁྲོལ། ཁྲུས་གསོལ་ཀྱི་ཚེ་བཟེད་ཞལ་དུ་ཞབས་བསིལ་སྦྲེང་ཞིང་ཤབྟའི་སྐབས་ལ་སོགས་བར་རོལ་མོ་སྤེལ་བས་ཀྱང་མཆོད། མཆོད་པ་གྲངས་གསོག་ལྟ་བུར་མཎྜལ་ཁོ་ནས་དོན་འགྲུབ་པས་དོན་
(༢༥༥)བསྡུས་རྗེས་སུ་ཚོམ་བུ་སོ་བདུན་མ་འདི་ཉིད་འབུལ་བར་བྱ་སྟེ། ཐོག་མར་མཎྜལ་གྱི་བྱི་དོར་ལེགས་པར་བྱ་ཞིང་བ་བྱུང་གི་དྲི་ལྔས་བྱུགས་བཞིན་དུ། ཨོཾ་བཛྲ་བྷུ་མི་ཨཱ་ཧཱུཾ། ཞེས་བརྗོད། །དེ་ནས་མེ་ཏོག་གི་ཚོམ་བུ་ཞིག་དཀྱིལ་འཁོར་གྱི་དབུས་སུ་བཞག་སྟེ། ཨོཾ་བཛྲ་རེ་ཁཱེ་་ཨཱ་ཧཱུྃ། ཞེས་བྱིན་གྱིས་བརླབས་ལ། དབྱིག་མཆོག་བརྒྱ་ལས་ལེགས་བྲིས་ས་ཡི་གཞིར། །རི་རབ་རིན་ཆེན་ལྷུན་པོ་ལུས་འཕགས་གླིང་། །ཛམ་བུ་ན་དཱའི་གླིང་དང་བ་ལང་སྤྱོད། །སྒྲ་མི་སྙན་གླིང་བཞི་ཡིས་རབ་བརྒྱན་པ། །ལུས་དང་ལུས་འཕགས་རྔ་ཡབ་རྔ་ཡབ་གཞན། །གཡོ་ལྡན་ལམ་མཆོག་འགྲོ་དང་སྒྲ་མི་སྙན། །སྒྲ་མི་སྙན་ཟླ་ཞེས་བྱའི་ཉེ་གླིང་བཅས། །རིན་ཆེན་རི་བོ་དཔག་བསམ་ལྗོན་པའི་ཕྲེང་། །འདོད་འཇོའི་བ་དང་མ་རྨོས་ལོ་ཏོག་ཚལ། །གསེར་སྦྱངས་འཁོར་ལོ་དྲི་མེད་ནོར་བུའི་མཆོག །བདེ་སྦྱིན་བུད་མེད་ཁྱིམ་བདག་ལྷ་མིག་གྲུབ། །ཅང་ཤེས་གླང་པོ་ཤུགས་འཆང་དུལ་བའི་རྟ། །དམག་མི་རིན་ཆེན་འདོད་འབྱུང་གཏེར་གྱི་བུམ། །ཕས་རྒོལ་ཟིལ་གནོན་རལ་གྲི་པགས་པ་འཇམ། །རབ་དགའི་ནགས་ཚལ་ཡིད་རྗེས་འགྲོ་བའི་གོས། །མཐུ་ལྡན་མཆིལ་ལྷམ་གཞལ་མེད་ཁང་བ་བཟང་། །བདེ་བའི་མལ་སྟན་མཚན་མ་བཟང་པོའི་དུང་། །ཉི་མ་ཟླ་བ་ནོར་བུའི་གདུགས་མཆོག་དང་། །
(༢༥༦)ཕྱོགས་ལས་རྣམ་པར་རྒྱལ་བའི་རྒྱལ་མཚན་སོགས། །ལྷ་མིའི་འབྱོར་ཚོགས་ཡིད་བཞིན་སྤྲིན་ཕུང་ཅན། །འཛད་པའི་ཕ་མཐའ་ཡོང་ཡེ་མི་དམིགས་པ། །ལྷག་པར་མོས་སོ་ཏིང་འཛིན་ཡིད་ཀྱི་འཕྲུལ། །ཐུགས་རྗེས་བཞེས་ཤིག་མགོན་པོ་སྲས་དང་བཅས། །བཞེས་ནས་བདག་རྒྱུད་བྱིན་གྱིས་བརླབ་ཏུ་གསོལ། །ཨི་དཾ་གུ་རུ་རཏྣ་མཎྜ་ལ་ཀཾ་ནིརྻ་ཏ་ཡ་མི། ཞེས་ཚོམ་བུ་རྣམས་གསལ་ཞིང་མཛེས་པར་བཀོད་ལ་ཕུལ། སྤྲོ་བ་བསྐྱེད་པའི་ཡན་ལག་ཏུ་ཕན་ཡོན་གྱི་ཚིགས་སུ་བཅད་པ་ནི་ཟ་མ་ཏོག་ལྟ་བུའི་གཏམ་དང་སེམས་རིན་པོ་ཆེ་རྣམ་པར་སྦྱང་བའི་ཕྲིན་ཡིག་སོགས་ནས་འབྱུང་བ་རྣམས་དོན་ལ་ཁྱད་མི་སྣང་ཞིང་། དེ་ཉིད་མཐོང་བའི་ལམ་ལས་ལྷག་པོ་གཅིག་ཀྱང་གསུངས་པས་འདིར་དེ་རྣམས་བསྡོམ་ན། བ་ཡི་ལྕི་བ་ཆུར་བཅས་སྦྱིན་པ་ཡང་དག་བྱི་དོར་ཚུལ་ཁྲིམས་དང་། །སྲོག་ཆགས་ཕྲ་མོའང་བསལ་བ་བཟོད་པ་བྱ་བ་ཉེར་གནས་བརྩོན་འགྲུས་ཏེ། །སྐད་ཅིག་དེའི་སེམས་རྩེ་གཅིག་བསམ་གཏན་རི་མོ་མཛེས་འབར་ཤེས་རབ་ཉིད། །ཐུབ་པའི་མཎྜལ་བགྱིས་པས་ཕ་རོལ་ཕྱིན་དྲུག་འདི་དག་ཐོབ་འགྱུར་ལ། ཁ་དོག་གསེར་དུ་འགྱུར་ཞིང་ནད་ཀུན་ལས་ནི་རྣམ་པར་གྲོལ་བར་འགྱུར། །ལྷ་དང་མི་ལས་ཆེས་ལྷག་འགྱུར་དང་ཟླ་བ་ལྟ་བུར་མཛེས་པ་འབར། །འབྱོར་ལྡན་རྒྱལ་རིགས་གསེར་གྱི་ཚོགས་མང་བདེ་གཤེགས་མཆོད་པའི་ཁྱིམ་དུ་སྐྱེ། །རྡུལ་དང་ཐ་བ་ཤིན་ཏུ་རྣམ་སྤངས་སངས་རྒྱས་ཞིང་མང་འཛིན་པར་འགྱུར། །ཞེས་པའི་རྐང་པ་ཕྱི་མ་གཉིས་ལ་འཕྲི་བསྣོན་ཅུང་ཟད་བགྱིས་པ་ཙམ་མ་གཏོགས་གཞན་རྣམས་སློབ་དཔོན་མི་
(༢༥༧)ཕམ་བཤེས་གཉེན་གྱི་འཇམ་དཔལ་མཆོད་ཆོག་ནས་བྱུང་བའི་ཚིག་ཡིན་ལ། འདི་དག་མཎྜལ་ཕུལ་བའི་རྗེས་སུ་ཀློག་པར་ཛེ་ཏ་རིས་བཤད་ཅིང་། འཇུག་པ་བདེ་བའི་ཕྱིར་སྔོན་དུ་བཏང་ཡང་མི་འགལ་ལོ། །གཞན་ཡང་རྒྱས་པར་སྐྱེད་ན་ཡན་ལག་བདུན་པོ་རེ་རེ་ནས་གཞུང་ཚིག་དང་བཟང་པོ་སྤྱོད་པའི་ཚིགས་བཅད་སྤེལ་མར་བྱ་བས་མཚོན་ཏེ་ཤེས་ནུས་སོ། །ཞེས་སྔ་སོར་རང་ལོ་ཉེར་གཅིག་པར་མཆོད་གཞུང་དཀྱུས་མ་ཙམ་བྲིས་པ་ལས་སླར་ཡང་ཁ་སྐོང་མཎྜལ་གྱི་འཕྱོང་འདི་མེ་ཕག་ཟླ་གསུམ་པའི་ཉེར་གསུམ་ལ་སྤེལ་བའོ།། །།