ལོ་གསར་སྟོན་བཤད་སོགས།
ལོ་གསར་སྟོན་བཤད་སོགས་གཏམ་ལབ་ཕྲན་ཚོགས་བསྡུས་པ་འདུ་ཤེས་པིར་གྱིས་བྲིས་པའི་སྣ་ཚོགས་རི་མོ་ཞེས་བྱ་བ་བཞུགས་སོ། །
བླ་མ་ལ་ཕྱག་འཚལ་ལོ། །བཀྲ་ཤིས་དགའ་སྟོན་གྱི་འདུན་ས། ལྷ་མིའི་གྲལ་རིང་གཤམས་པའི་གནས་འདིར། ལུགས་གཉིས་ཀྱི་ལེགས་ཚོགས་དང་འབྲེལ་བའི་གཏམ་ཉུང་ངུ་ཞིག་མཆོད་པའི་ཚུལ་དུ་སྤྲོ་ན། ཡས་གཏམ་དམ་པ་ཆོས་ཀྱི་བྱུང་ཚུལ། མས་གཏམ་འཇིག་རྟེན་སྲིད་པའི་ཆགས་ཚུལ། བྱས་ཤེས་བཀའ་དྲིན་ཆེ་བའི་ལོ་རྒྱུས་དང་གསུམ་ལས། ཡས་གཏམ་ལའང་སྟོན་པ་སངས་རྒྱས་བྱོན་ཚུལ། བསྟན་པ་དམ་ཆོས་དར་ཚུལ། བསྟན་འཛིན་དགེ་འདུན་གྱི་སྡེ་མཆེད་ཚུལ་རྒྱ་ཆེ་ལ་རྣམ་གྲངས་མང་བ་ཡོད་ཀྱང་ཕྱོགས་བསྡུས་རགས་རིམ་ཙམ་བཤད་པར་བྱ་སྟེ། དེ་ལ་གནས་ཕུན་སུམ་ཚོགས་པ་འཛམ་གླིང་ཡུལ་གྱི་གཙོ་བོ། །སེམས་ཅན་གྱི་སྙིང་པོ་མང་དུ་གནས་པ་རྒྱ་གར་
འཕགས་པའི་ཡུལ་དུ། དུས་ཕུན་སུམ་ཚོགས་པ་ཡར་སྔ་མ་ཆེས་སྐྱེ་དགུ་སྐྱོ་ཤས་ཆེ་བ། མར་ཕྱི་མ་དྲག་དབང་རྣོན་རྒྱུད་སྨིན་པའི་གདུལ་བྱ་འབྱུང་བ་རྩོད་ལྡན་ཚེ་ལོ་བརྒྱ་པའི་དུས་སུ། སྟོན་པ་ཕུན་སུམ་ཚོགས་པ་ས་གསུམ་གྱི་རྣམ་འདྲེན་གཅིག་པུ་མཉམ་མེད་་རྒྱལ་པོ་འཇིག་རྟེན་དུ་བྱོན་ཏེ། དེའང་ཐོག་མར་དགའ་ལྡན་ཆོས་ཀྱི་ཕོ་བྲང་དུ་ལྷའི་བུ་དམ་པ་ཏོག་དཀར་ཞེས་བྱ་བར་གྱུར་ནས་བཞུགས་པའི་ཚེ་ཕྱོགས་བཅུའི་སངས་རྒྱས་ཀྱིས་བསྐུལ་ནས་འཕགས་པ་མ་ཕམ་པ་རྒྱལ་ཚབ་ཏུ་བཞག་སྟེ་་རྒྱལ་པོ་ཟས་གཙང་གི་བཙུན་མོ་སྒྱུ་འཕྲུལ་ཆེན་མོའི་ལྷུམས་སུ་ཞུགས། ཟླ་བ་བཅུ་ཕལ་ཆེར་རྫོགས་པ་ན་ལྷ་མོ་ལུམྦི་ནའི་ཚུལ་དུ་ངོ་མཚར་བའི་དགེ་མཚན་བསམ་གྱིས་མི་ཁྱབ་པ་དང་བཅས་ཏེ་སྐུ་
བལྟམས། གཞོན་ནུ་ཉིད་ནས་རིག་པ་དང་སྒྱུ་རྩལ་ཐམས་ཅད་ཀྱི་ཕ་རོལ་ཏུ་ཕྱིན་པའི་ཚུལ་བསྟན། གཞོན་ནུ་རྣམས་སྟོབས་དང་སྒྱུ་རྩལ་གྱིས་ཕམ་པར་མཛད་པའི་ཚུལ་དུ་་བུ་མོ་ས་འཚོ་མ་ཕུལ་བ་གཙོ་མོར་གྱུར་པའི་བཙུན་མོ་དྲུག་ཁྲིའི་དབུས་སུ་ལྷ་དང་མི་ལས་ཁྱད་པར་དུ་འཕགས་པའི་འདོད་ཡོན་གྱི་དགའ་བ་ལ་རོལ་བཞིན་དགུང་ལོ་ཉེར་དགུའི་བར་ཁབ་ཏུ་བཞུགས། དེ་ནས་ངེས་པར་འབྱུང་བའི་རྐྱེན་བཞིས་བསྐུལ་ཏེ་མཆོད་རྟེན་རྣམ་དག་གི་དྲུང་དུ་མཁན་པོ་མེད་པར་རབ་ཏུ་བྱུང༌། མུ་སྟེགས་ཅན་གྱི་ང་རྒྱལ་གཞོམ་པ་ལ་སོགས་པའི་དགོས་པ་མང་པོའི་དབང་གིས་ལོ་དྲུག་ཏུ་དཀའ་བ་དྲག་པོ་སྤྱད། དེ་ནས་གྲོང་པའི་བུ་མོ་དགའ་མ་དང་དགའ་སྟོབས་མས་ཕུལ་བའི་འོ་ཐུག་སྦྲང་རྩིའི་སྙིང་པོ་ཅན་བཞེས་ཏེ་སྐུའི་ཉམས་སྟོབས་བསྐྱེད་ནས་བྱང་ཆུབ་ཀྱི་ཤིང་དྲུང་དུ་གཤེགས། རྩཱ་མཆོག་གི་གདན་ལ་སྐྱིལ་མོ་ཀྲུང་བཅས་ཏེ། ཇི་སྲིད་ཟག་མེད་མ་ཐོབ་པ། །དེ་སྲིད་སྐྱིལ་ཀྲུང་གཞིག་མི་བྱ། །ཞེས་གསུང་བྱོན་པ་ལྟར་སྲོད་ལ་བདུད་བཏུལ། དགུང་ལ་མཉམ་པར་བཞག །ཐོ་རང་བླ་ན་མེད་པའི་བྱང་ཆུབ་བརྙེས་པས་དགྱེས་ནས། འཇིག་རྟེན་འདོད་བདེ་གང་ཡིན་དང༌། །ལྷ་ཡུལ་འདོད་བདེ་གང་ཡིན་པས། །སྲེད་པ་ཟད་པའི་བདེ་བ་ལ། །བཅུ་དྲུག་ཆར་ཡང་མི་ཕོད་དོ། །ཞེས་སོགས་ཆེད་དུ་བརྗོད་ཅིང་ཞག་བདུན་ཕྲག་བདུན་དུ་ཆོས་མ་བསྟན་པར་བཞུགས་པ་ལ། ཚངས་པ་དང་བརྒྱ་བྱིན་གྱིས་
གསོལ་བ་བཏབས་ནས་ཝ་ར་ཎ་སིའི་དྲང་སྲོང་ལྷུང་བ་རི་དྭགས་ཀྱི་ནགས་སུ་འཁོར་ཕུན་སུམ་ཚོགས་པ་ལྔ་སྡེ་བཟང་པོ་ལྷ་བརྒྱད་ཁྲི་དང་བཅས་པ་ལ། ཆོས་ཕུན་སུམ་ཚོགས་པ་བདེན་བཞིའི་ཆོས་འཁོར་ཐོག་མར་བསྐོར་བ་ནས་བཟུང་ཆོས་འཁོར་རིམ་པ་གསུམ་དུ་བསྐོར་བས་གདུལ་བྱ་མཐའ་ཡས་པ་བྱང་ཆུབ་གསུམ་ལ་བཀོད། བསྟན་པའི་རྒྱུན་བཞག །བསྟན་འཛིན་ལུང་བསྟན་རྒྱལ་ཚབ་ཀྱི་ཉན་ཐོས་བྱིན་གྱིས་བརླབས་ཏེ། སྐུ་དངོས་ཀྱི་གདུལ་བྱ་རྫོགས་པ་དང༌། རྟག་འཛིན་ཅན་སྐྱོ་བ་སྐྱེད་པའི་ཆེད་དུ་དགུང་ལོ་བརྒྱད་ཅུ་པ་ལ་མྱ་ངན་ལས་འདས། འོད་སྲུང་ལ་སོགས་པ་སངས་རྒྱས་དང་འདྲ་བར་གྲགས་པའི་ཉན་ཐོས་ཆེན་པོ་རྣམས་ཀྱིས་བཀའ་བསྡུ་རིམ་པ་གསུམ་གྱིས་བསྟན་པ་བསྐྱངས། དེ་ནས་རིང་ཞིག་ལོན་པ་ན་རྒྱལ་བ་ཉིད་ཀྱིས་ལུང་བསྟན་པ་ལྟར་བེ་དར་བྷའི་ཡུལ་དུ་སངས་རྒྱས་གཉིས་པའི་ཕྲིན་ལས་ཅན་འཕགས་པ་ཀླུ་སྒྲུབ་བྱུང་བ་ནས་བཟུང་སྟེ། ཛམ་བུའི་གླིང་མཛེས་པར་བྱེད་པའི་རྒྱན་དྲུག །མཆོག་གཉིས། ཆེན་པོ་བཞི། རྨད་བྱུང་གཉིས་ལ་སོགས་པ་པཎ་གྲུབ་གསེར་རིའི་ཕྲེང་བ་ལྟར་བཟང་ལ་མང་བ་རིམ་པར་བྱོན་ཏེ་བཤད་སྒྲུབ་ལས་གསུམ་གྱི་འཁོར་ལོས་ཐུབ་བསྟན་མི་ནུབ་པའི་རྒྱལ་མཚན་བཟུང་ཞིང་བསྟན་འཛིན་དགེ་འདུན་གྱི་སྡེ་གནམ་གྱི་སྐར་མ་དང༌། སའི་རྩི་ཤིང་ལྟ་བུར་སྤེལ། བོད་གངས་ཅན་གྱི་ལྗོངས་འདིར་རྗེ་གཉའ་ཁྲི་བཙན་པོ་ནས་རྒྱལ་རབས་ཉི་ཤུ་
རྩ་ལྔའི་བར་དུ་གཡུང་དྲུང་གི་བོན་མཆོད་པ་ཙམ་ལས་དམ་པའི་ཆོས་མ་དར་བ་ལ། འཕགས་པ་ཀུན་ཏུ་བཟང་པོའི་སྤྲུལ་པ་ལྷ་ཐོ་ཐོ་རིའི་རིང་ལ་བརྐོས་ཕོར་ཙིཏྡྷ་མ་ཎི་དང༌། དཔང་སྐོང་ཕྱག་རྒྱ་པ། མདོ་སྡེ་ཟ་མ་ཏོག་རྣམས་ཕོ་བྲང་གི་དབུ་རྩེར་དངོས་གྲུབ་ཏུ་བབས་ཏེ་ཆོས་ཀྱི་དབུ་བརྙེས་ཤིང༌། རྒྱལ་རབས་ལྔ་ན་འཕགས་པ་སྤྱན་རས་གཟིགས་མངོན་སུམ་མིའི་རྗེ་བོར་བསྟན་པ་ལྷ་སྲོང་བཙན་སྒམ་པོ་བྱོན་ཏེ་དགེ་བཅུའི་བཀའ་ཁྲིམས་བཅས། ཡི་གེ་དང་བསྟན་བཅོས་ཀྱི་དབུ་བཙུགས། སྨིན་མཚམས་མཛོད་སྤུ་ལས་དགེ་སྦྱོང་ཨ་ཀར་མ་ཏི་ཤི་ལ་སྤྲུལ་ཏེ་རང་བྱོན་བཅུ་གཅིག་ཞལ་དང༌། འཕགས་པ་མཆེད་བཞི་སྤྱན་དྲངས། མཐའི་རྒྱལ་པོ་སྡེ་བཞི་ཟིལ་གྱིས་མནན་ནས་རྒྱ་བལ་གྱི་བཙུན་མོ་རྣམ་གཉིས་བསུས་པའི་རྫོང་བའི་ཚུལ་དུ་ཇོ་ཤཀ་རིན་པོ་ཆེ་རྣམ་གཉིས་བྱོན་ཏེ་ས་གཞི་བྱིན་གྱིས་བརླབས། དཔལ་ར་ས་འཕྲུལ་སྣང་གི་གཙུག་ལག་ཁང་སོགས་དཀོན་མཆོག་གསུམ་གྱི་རྟེན་རྒྱ་ཆེར་བཞེངས། སྐལ་པ་མཆོག་དང་ལྡན་པ་འགའ་ལ་ཐུགས་རྗེ་ཆེན་པོའི་དབང་གདམས་ངག་དམར་ཁྲིད་དང་བཅས་པ་ཅི་རིགས་སུ་གནང༌། དེ་དུས་བོད་ན་རབ་བྱུང་གི་སྡེ་མེད་ཀྱང་ཁྲ་འབྲུག་ཏུ་བཙུན་པའི་གཟུགས་ཅན་གཅིག་ལ་ལྷ་ཕྱག་མཛད་དེ་མ་འོངས་དབོན་སྲས་ཀྱི་མཆོད་གནས་སུ་འདུལ་འཛིན་འབྱུང་བའི་རྟེན་འབྲེལ་བསྒྲིགས་པ་སོགས་ཀྱི་བཀའ་འདྲིན་མཛད། དེ་ནས་བརྩིས་པའི་གདུང་རབས་ལྔ་པ་ལ་རྗེ་བཙུན་འཇམ་པའི་དབྱངས་ལྷ་ཁྲི་
སྡེ་གཙུག་བརྟན་གྱི་སྲས་སུ་མིའི་གཞོན་ནུ་ལྷའི་མཚན་རྟགས་དང་ལྡན་པར་འཁྲུངས་ནས། གནམ་ལྷ་བབས་ཀྱི་རྒྱལ་པོ། ས་ལྷུན་གྲུབ་ཀྱི་མངའ་བདག་ཁྲི་སྲོང་ལྡེའུ་བཙན་ཡིན་ཞེས་སུས་ཀྱང་མཚན་མ་གསོལ་བར་ཉིད་ཀྱིས་ཞལ་གྱིས་བཞེས་པས་དེ་ལྟར་ཡོངས་སུ་གྲགས། སྐུ་གཞོན་ནུའི་དུས་ཡབ་མེས་ཀྱི་ཡིག་ཚང་གཟིགས་པས་ཆོས་ཀྱི་ཐུགས་འདུན་བྱུང་སྟེ། བདུད་བློན་གྱི་བར་ཆད་དང་སྡེ་དམངས་ཀྱི་འཐེན་འཁྱེར་སོགས་ཐབས་མཁས་མཛད་པའི་འཕྲུལ་གྱིས་རང་ཞིར་བཏང༌། སྦ་སང་ཤི་ཏ་སོགས་ཕོ་ཉར་མངགས་ཏེ་རྒྱ་གར་འཕགས་པའི་ཡུལ་ན་ཉི་མ་ལྟར་རྩོད་མེད་དུ་གྲགས་པའི་པཎ་ཆེན་བྱང་ཆུབ་སེམས་དཔའ་ཞི་བ་འཚོ་སྤྱན་དྲངས། ཆོས་མངོན་པ་དང་མདོ་སྡེའི་གནས་ལ་ཐུགས་སྦྱངས་ཤིང་བཀའ་ཡང་དག་པའི་ཚད་མ་ལ་སོགས་པའི་བསྟན་བཅོས་ཀྱང་མཛད། ཐུགས་དམ་གཙུག་ལག་ཁང་བཞེངས་པའི་ས་འདུལ་བར་ཞུས་པས་བོད་ཀྱི་ལྷ་འདྲེ་གདུག་རྩུབ་ཆེ་བས་ངས་འདུལ་མི་ནུས། དེང་སང་རྒྱ་གར་ཡུལ་ན་པདྨ་སཾ་བྷ་བ་ཞེས་བྱ་བ་ཛམ་བུའི་གླིང་ན་ཆེ་བའི་རིག་སྔགས་འཆང་ཞིག་ཡོད། དེ་སྤྱན་དྲངས་ན་རྒྱལ་པོ་ཉིད་དང་སྔོན་གྱི་སྨོན་ལམ་གཅིག་པས་གདན་འདྲོང་ཞིང་ཐུགས་བཞེད་འགྲུབ་པར་འགྱུར་ཞེས་ལུང་བསྟན་པ་ལྟར་སྣ་ནམ་རྡོ་རྗེ་བདུད་འཇོམས་སོགས་སྤྱན་འདྲེན་གྱི་བང་མིར་བརྫངས་ཏེ་གསོལ་བ་བཏབ་པ་ལྟར་ཨོ་རྒྱན་སངས་རྒྱས་གཉིས་པ་བོད་ཡུལ་གྱི་
དབུས་སུ་ཆགས་ཕེབས། བསྟན་མ་བཅུ་གཉིས་དང་གཉན་ཆེན་སྡེ་བཞི་སོགས་ལྷ་སྲིན་མཐུ་བོ་ཆེ་རྣམས་དམ་འོག་ཏུ་བཅུག་ཅིང་བསྟན་པ་སྲུང་བའི་གཉེར་དུ་བསྐོས། །དེའི་སྟོབས་ཀྱིས་འབྱུང་པོ་ཕྲ་མོའི་སྡེ་རྣམས་ཀྱང་དཔོན་བཙོན་དུ་བཟུང་བས་འབངས་འཁུ་མི་ནུས་པ་ལྟ་བུར་སོང་སྟེ་ས་གཞི་བཏུལ། སྡེ་བརྒྱད་བྲན་དུ་བཀོལ་ནས་བསམ་ཡས་ཀྱི་གཙུག་ལག་ཁང་ལྷ་འདྲེ་མི་གསུམ་གྱིས་བརྩིགས་པས་བརྩིགས་པ་མི་འདྲ་སྐྱེས་པ་འདྲ་བར་ཡ་མཚན་ཆེ་ལ་ཚར་སྐྱེན་པར་ལྷུན་གྱིས་གྲུབ། བོད་ལ་ཕན་པའི་ལོ་པཎ་མང་པོ་ལུང་བསྟན་ནས་དམ་པའི་ཆོས་བསྒྱུར་ཞུས་འཆད་ཉན་གྱི་གྲྭ་བཙུགས། ཇོ་བོ་རྗེ་ལྷ་ཅིག་གིས་ཀྱང་བསམ་ཡས་ཀྱི་རྒྱ་དཔེ་རྣམས་གཟིགས་ནས་འདི་ན་ད་ལྟ་རྒྱ་གར་ན་མི་བཞུགས་པའི་བཀའ་བསྟན་མང་པོ་སྣང༌། དེ་དུས་ཀྱི་བསྟན་པ་དར་བ་འདྲ་བ་རྒྱ་གར་ནའང་དཀའ། བོད་ཀྱི་རཱ་ཛ་བོ་དྷི་སྟྭ་ཞེས་ཕྱག་ཐལ་མོ་སྦྱར་ནས་བསྔགས་བརྗོད་མཛད། མཁན་ཆེན་ཞི་བ་འཚོས་སད་མི་མི་བདུན་སོགས་རབ་ཏུ་བྱུང་སྟེ་འདུལ་འཛིན་གྱི་སྡེ་བཙུགས། རྒྱལ་པོས་བོད་ཀྱི་ཁྱིམ་པ་ཐམས་ཅད་དཀོན་མཆོག་ལ་མཆོད་པ་བྱེད་པའི་ཁྲིམས་བཅས་ཤིང་བོན་ལུགས་བྱར་མི་གནང་བའི་ལུང་བསྒྲགས། ཁྱད་པར་དུ་གནས་ཕུན་སུམ་ཚོགས་པ་ཆོས་འཁོར་གསུམ་དང་སྒྲུབ་གནས་རྣམ་གསུམ་སོགས་བཀྲ་ཤིས་བྱིན་རླབས་འབྱུང་བའི་གནས་ཆེན་མང་པོར། དུས་ཕུན་སུམ་ཚོགས་པ་ཆོས་རྒྱལ་མཆོད་
ཡོན་གསུམ་གྱི་སྨོན་ལམ་དུས་སུ་སྨིན་ཅིང་བོད་མིའི་བསོད་ནམས་དགུང་དུ་བརྡལ་བའི་གནས་སྐབས་ན། སྟོན་པ་ཕུན་སུམ་ཚོགས་པ་དུས་གསུམ་སངས་རྒྱས་ཐམས་ཅད་ཀྱི་མཁྱེན་བརྩེ་ནུས་གསུམ་གཅིག་ཏུ་བསྡུས་ནས་རིག་འཛིན་སློབ་དཔོན་གྱི་རྣམ་པར་བཞེངས་པ་རྒྱལ་དབང་པདྨ་འབྱུང་གནས་ཀྱིས། འཁོར་ཕུན་སུམ་ཚོགས་པ་ལས་ཅན་རྗེ་འབངས་ཉེར་ལྔ་སོགས་བླ་མེད་གསང་སྔགས་ཀྱི་གདུལ་བྱ་དབང་པོ་ཡང་རབ་ཏུ་གྱུར་པ་རྣམས་ལ། ཆོས་ཕུན་སུམ་ཚོགས་པ་བཀའ་སྡེ་སྣོད་གསུམ་གྱི་བཅུད་ཕྱུང་བ། ལམ་བསླབ་པ་གསུམ་གྱི་གནད་དྲིལ་བ། རྒྱལ་བ་རིག་འཛིན་རྣམས་ཀྱི་དགོངས་པའི་གསང་མཛོད་བརྟོལ་བའི་ཟབ་ཆོས་མཚན་ཙམ་ཡང་ཐོས་པར་དཀའ་བ་མང་པོ་ཁོར་ཡུག་ཏུ་གནང་བས། གདམས་ངག་བཏབ་པ་དང་རྒྱུད་གྲོལ་བ་དུས་མཉམ་པའི་རིག་འཛིན་གྲུབ་ཐོབ་ཀྱི་སྐྱེས་བུ་ཡོངས་ལ་གྲགས་པ་དང་མ་གྲགས་པ་མཐའ་ཡས་པ་བྱུང་སྟེ་བོད་མ་སང་འདྲེའི་ཡུལ་གྲུ་འོག་མིན་སྤྲུལ་པའི་ཞིང་ཁམས་སུ་བྱིན་གྱིས་བརླབས། དབོན་སྲས་རལ་པ་ཅན་གྱི་སྐུ་རིང་ལ་ཆོས་མང་པོ་གསར་དུ་བསྒྱུར་ཞིང༌། ཁྲི་སྲོང་གི་དུས་སུ་བསྒྱུར་བའི་ཆོས་རྣམས་སྐད་གསར་བཅད་ཀྱིས་གཏན་ལ་ཕབ་སྟེ་བརྗོད་བདེ་ཞིང་གོ་སླ་བར་བཅོས། མི་སྡེ་ཕལ་ཆེར་དཀོན་མཆོག་གི་ལྷ་འབངས་སུ་ཕུལ་ཞིང༌། དབང་དགེ་འདུན་ལ་བསྐུར་བ་སོགས་བསྟན་པའི་ཞབས་ཏོག་འགྲན་ཟླ་མེད་པ་མཛད་ཀྱང་སྐུ་ཚེ་
མཐར་མ་འཁྱོལ། དེ་ནས་སྨོན་ལམ་ལོག་པའི་རྒྱལ་པོ་གླང་དར་མ་ཨུ་དུམ་བཙན་པོས་སྡིག་བློན་རྣམས་དང་འཇིང་དྲིལ་ནས་རབ་བྱུང་གི་སྡེ་བསྣུབས། དམ་པའི་ཆོས་བྱར་མེད་པའི་ཁྲིམས་བསྒྲགས་ཀྱང༌། ཁྱིམ་པ་སྐྱ་བོའི་རྟེན་ཅན་ལ་མཁྱེན་རྟོགས་ལོ་པཎ་ཆེན་པོ་རྣམས་དང་ཁྱད་མེད་ཅིང་ཨོ་རྒྱན་སངས་རྒྱས་གཉིས་པ་སོགས་ཀྱི་རིང་ལུགས་དྲི་མ་མེད་པ་འཛིན་པའི་སྔགས་པ་མང་དུ་བཞུགས་པ་རྣམས་རྒྱལ་པོས་ཚོད་མ་ཐིག་ནས་གནོད་པ་མ་བྱས་པར་མི་ནག་གི་གྲལ་དུ་ཅི་བདེར་ལུས་པ་ལས་ཕྱིས་སུ་སླར་ཡང་བརྒྱུད་འཛིན་གྱི་རྒྱུན་མཆེད་དེ་ཆོས་ལུང་གི་ཉང་ཁུ་དབོན་དང༌། ཟུར་གྱི་གདུང་རྒྱུད། སྒྲོལ་གཡུང་རྣམ་གཉིས། ཀུན་མཁྱེན་དྲི་མེད་འོད་ཟེར་མངའ་རིས་པཎ་ཆེན་པདྨ་དབང་གི་རྒྱལ་པོ་སོགས་གསང་སྔགས་སྔ་འགྱུར་གྱི་བསྟན་འཛིན་མཁས་པའི་དབང་ཕྱུག་གྲུབ་པའི་ཁྱུ་མཆོག་ཏུ་གྱུར་པ་མང་དུ་བྱོན་ནས་ད་ལྟའི་བར་དུ་ཆོས་རྒྱུན་ཕལ་ཆེར་མ་ནུབ་པར་ཡོད། གླང་དར་མས་དབུས་གཙང་དུ་བསྟན་པ་བསྣུབས་པའི་དུས་སུ་ཡེར་བ་ནས་འདུལ་འཛིན་སྨ་གཡོར་གཙང་གསུམ་མདོ་ཁམས་སྨད་དུ་བྱོན་པ་ལས་མུ་ངུར་དགེ་བ་གསལ་རབ་ཏུ་བྱུང་བ་བླ་ཆེན་དགོངས་པ་རབ་གསལ་དུ་གྲགས། ཕྱིས་སུ་ཀླུ་མེས་ཚུལ་ཁྲིམས་ཤེས་རབ་དང་སུམ་བ་ཡེ་ཤེས་བློ་གྲོས་སོགས་དབུས་གཙང་མི་བཅུ་མདོ་སྨད་དུ་བྱོན་ནས་བླ་ཆེན་ལས་སོ་ཐར་གྱི་སྡོམ་རྒྱུན་བླངས་ཏེ་དབུས་གཙང་དུ་རྒྱ་ཆེར་སྤེལ་ཞིང་ཆོས་གཞི་གཙུག་ལག་ཁང་མང་དུ་
བཏབ། སྟོད་མངའ་རིས་སུ་ལོ་ཆེན་རིན་ཆེན་བཟང་པོས་ཆོས་མང་དུ་བསྒྱུར་བ་སོགས་བསྟན་པའི་བྱ་བ་ཆེན་པོ་མཛད། ཁྱད་པར་དུ་བོད་ཆོས་རྒྱལ་གྱི་གདུང་བརྒྱུད་མངའ་རིས་པུ་རང་གི་རྒྱལ་པོ་ལྷ་བླ་མ་ཡེ་ཤེས་ཁུ་དབོན་གྱི་དྲིན་ལས་བདེ་གཤེགས་སྣང་བ་མཐའ་ཡས་མིའི་རོལ་གར་དུ་བསྟན་པ་ཇོ་བོ་རྗེ་ལྷ་ཅིག་དི་པཾ་ཀ་ར་འཕགས་ཡུལ་ནས་བྱོན་ཏེ་བོད་དུ་ལོ་བཅུ་གསུམ་བཞུགས། བསྟན་པའི་སྲོལ་ནུབ་པ་གཞི་བཞེངས་སུ་གསོས་ཤིང༌། ཁུ་རྔོག་འབྲོམ་གསུམ་དང༌། རྣལ་འབྱོར་པ་གོང་འོག་སོགས་བསྟན་པ་འཛིན་ནུས་ཀྱི་སློབ་མའི་མཆོག་མང་པོ་དང༌། ཡང་སློབ་སྐུ་མཆེད་གསུམ་དང༌། ཁམས་པ་ལུང་པ་སོགས་བཀའ་གདམས་གཞུང་པ། གདམས་ངག་པ། མན་ངག་པ་གསུམ་ལས་རྒྱ་ཆེར་གྱེས་ཏེ་བོད་གངས་ཅན་གྱི་འགྲོ་བ་རྒྱལ་བའི་སྲས་པོའི་ཁྱུ་གཅིག་ཏུ་མཛད། ཕྱི་མའི་དུས་སུ་འཇམ་མགོན་བློ་བཟང་གྲགས་པས་མཁན་ཆེན་ཆོས་སྐྱབས་བཟང་པོ་དང༌། ལྷོ་བྲག་པ་ནམ་མཁའ་རྒྱལ་མཚན་ལས་བཀའ་གདམས་ཀྱི་ཆོས་སྐོར་མཐའ་དག་གསན་ཅིང་ཐུགས་ཉམས་སུ་བཞེས་ཏེ་བྱང་ཆུབ་ལམ་རིམ་ཆེ་ཆུང་གི་གཞུང་བརྩམས་པ་ལ་སོགས་པའི་སྒོ་ནས་འཆད་སྤེལ་གྱི་མཛད་པ་བསྐྱངས་པས་ཁ་ཆེ་ཛ་ལནྡྷ་ར་ནས་ཤར་ཕྱོགས་རྒྱ་མཚོའི་བར་དུ་བཀའ་གདམས་ཀྱི་བསྟན་པས་ཁྱབ་པར་བྱུང༌། འདུལ་འཛིན་སད་མི་བདུན་ནས་འཁོན་ཀླུ་དབང་སྲུང་གི་དབོན་བརྒྱུད་འཁོན་དཀོན་མཆོག་རྒྱལ་པོའི་
སྲས་སུ་ས་ཆེན་ཀུན་དགའ་སྙིང་པོ་འཁྲུངས་ཏེ་འབྲོག་མི་་ཡེ་ཤེས་ཀྱི་དངོས་སློབ་ཞང་དགོན་པ་བ་སོགས་ལས་རྗེ་བཙུན་བིར་ཝ་པའི་གདམས་ངག་ལམ་འབྲས་སྐོར་སོགས་མདོ་སྔགས་གསར་རྙིང་གི་ཆོས་ཐམས་ཅད་ལ་གསན་བསམ་རིས་མེད་དུ་མཛད་ཅིང༌། རྗེ་བཙུན་འཇམ་པའི་དབྱངས་ཀྱིས་མངོན་སུམ་དུ་གདམས་པའི་བདུད་རྩི་སྩལ། མགོན་པོ་བིར་ཝ་པ་དངོས་དང་མཇལ་ནས་གསང་སྔགས་ཀྱི་བསྟན་པའི་བདག་པོར་མངའ་གསོལ་ཏེ་གྲུབ་པའི་ས་མཐོར་གཤེགས། སློབ་མ་མཆོག་ཐོབ་པ་གསུམ། བཟོད་པ་ཐོབ་པ་བདུན་སོགས་རྒྱ་ཆེར་བྱུང་བ་ལས་སྐུའི་སྲས་རྗེ་བཙུན་རྩེ་མོ་སྐུ་མཆེད་བརྒྱུད་འཛིན་གྱི་ཐུ་བོར་གྱུར། རྗེ་བཙུན་སྐུ་མཆེད་ཀྱི་གཅུང་དཔལ་ཆེན་འོད་པོའི་སྲས་སུ་འཇམ་དབྱངས་ངུར་སྨྲིག་འཆང་བའི་རྣམ་པར་རོལ་བ་ཀུན་དགའ་རྒྱལ་མཚན་དཔལ་བཟང་པོ་བལྟམས། བྱིས་པའི་དུས་ནས་རིག་གནས་ཐམས་ཅད་ལ་ཐོགས་པ་མེད་པའི་ཤེས་རབ་ཀྱི་གཏེར་གྲོལ་ཞིང༌། འཇམ་དཔལ་སྨྲ་བའི་སེང་གེའི་ཡེ་ཤེས་ཀྱི་སྐུས་མངོན་སུམ་དུ་བྱིན་གྱིས་བརླབས་པས་ཤེས་བྱའི་རྒྱ་མཚོའི་ཕ་རོལ་ཏུ་ཕྱིན། ཁ་ཆེ་པཎ་ཆེན་་ཤྲི་བྷ་དྲ་ལས་བསྙེན་པར་རྫོགས་ཏེ་འདུལ་འཛིན་མཁས་པ་ཡོངས་ཀྱི་མཆོག་ཏུ་གྱུར། མུ་སྟེགས་ཀྱི་མཁས་པ་འཕྲོག་བྱེད་དགའ་བོ་འཁོར་བཅས་དྲི་མ་མེད་པའི་རིགས་པས་ཚར་བཅད་དེ་རྒྱལ་བསྟན་རྣམ་པར་རྒྱལ་བའི་བ་དན་བསྒྲེང་བས་དཔལ་ལྡན་ས་སྐྱ་པཎྜི་ཏ་
ཞེས་སྙན་པར་གྲགས་པའི་རྔ་བོ་ཆེ་ཛམ་གླིང་གི་ས་གཡོ་བ་ཙམ་དུ་ལྡིར། སྐུ་ཚེའི་སྨད་ལ་གོང་མ་ཧོར་གྱི་རྒྱལ་པོའི་དཔུང་གིས་བོད་ལ་གནོད་དུ་ཉེ་བ་གཟིགས་ནས་དེ་འདུལ་བའི་ཕྱིར་རྒྱ་ནག་ཏུ་ཕེབས། རྒྱ་ནག་གི་རྒྱལ་པོས་ཚོད་བགམ་པའི་ཕྱིར་སྒྱུ་མ་མཁན་ལ་གྲོང་ཁྱེར་བའི་གཤང་གཅིའི་ཕུང་པོར་གཞལ་མེད་ཁང་བཀོད་པས་མཛེས་པ་སྤྲུལ་དུ་བཅུག་ནས་དེར་སྤྱན་དྲངས་པ་ན་རྟེན་འབྲེལ་སྙིང་པོས་བྱིན་གྱིས་བརླབས་པའི་མེ་ཏོག་གཏོར་ནས་ནང་དུ་བྱོན་པས་ཕྱིར་བསྡུ་མ་ནུས་པར་བྱང་ཕྱོགས་སྤྲུལ་པ་སྡེའི་ལྷ་ཁང་ཞེས་དུས་ཕྱིས་ཀྱང་ཡོད་པ་སོགས་ངོ་མཚར་རྫུ་འཕྲུལ་གྱི་སྤྱོད་པས་རྒྱལ་པོ་འཁོར་བཅས་དད་པར་བྱས་ཏེ་བདེ་བ་ཅན་དུ་གཤེགས། དབོན་ཆོས་རྒྱལ་འཕགས་པ་གོང་མའི་བླ་མར་གྱུར་ཏེ་རྫུ་འཕྲུལ་དང་ཆོས་བསྟན་པའི་སྒོ་ནས་རྒྱལ་པོའི་མཛད་པ་ལེགས་ལམ་དུ་བསྒྱུར་བས་མངའ་འབངས་སྐྱིད་ཅིང་བསྟན་པ་དར་བའི་གཞི་རྩ་བཙུགས། བོད་ཀྱི་དགེ་འདུན་རྣམས་ཆོས་དང་ཟང་ཟིང་གི་ཆར་གྱིས་ཚིམ་པར་མཛད། དེ་གོང་བོད་དུ་རིག་གནས་ཀྱི་སྲོལ་ཀ་ཆེར་མ་དར་བ་ལས་ཆོས་རྗེ་ཁུ་དབོན་འདི་གཉིས་ཀྱིས་སྒྲ་དང་སྙན་དངགས་སྡེབ་སྦྱོར་མངོན་བརྗོད་ཟློས་གར་གྱི་གཞུང་མང་པོ་བསྒྱུར་ཞིང༌། རྒྱ་ཆེར་དར་བའི་བདག་རྐྱེན་མཛད་པས་ལྷག་པར་ཡང་རིན་པོ་ཆེ་སྣ་ཚོགས་ཀྱི་ཡུལ་གླིང་ཆེན་པོ་ལྟ་བུར་གྱུར། དེའི་རྗེས་སུ་དཔལ་ལྡན་བླ་མ་དམ་པ་བསོད་ནམས་རྒྱལ་མཚན་དང་བདག་ཆེན་
བློ་གྲོས་རྒྱལ་མཚན་སོགས་གདུང་བརྒྱུད་དང༌། གཞན་ཡང་གཡག་རོང་རྣམ་གཉིས། ངོར་རྫོང་རྣམ་གཉིས། གོ་ཤཱཀ་རྣམ་གཉིས། ཚར་ཆེན་ཡབ་སྲས་སོགས་སྐྱེས་ཆེན་མང་དུ་བྱོན་ནས་རིང་ལུགས་བཤད་སྒྲུབ་ཀྱི་རྒྱུན་བཟུང་ཞིང༌། ངོར། ན་ལེན་དྲ། རྟ་ནག་ཐུབ་བསྟན་རྣམ་རྒྱལ། མཉན་ཡོད་བྱ་རྒོད་གཤོངས་སོགས་ཆོས་སྡེ་གྲགས་པ་ཅན་མང་དུ་བཏབ། གཞན་ཡང་ལྷོ་བྲག་མར་པ་ལོ་ཙཱ་རྒྱ་གར་དུ་བྱོན་ཏེ། དཔལ་ན་རོ་པ་སོགས་པཎ་གྲུབ་ཀྱི་བླ་མ་མང་དུ་བསྟེན། སླར་བོད་ཡུལ་དུ་བསྟན་པ་བསྐྱངས་པའི་སློབ་མ་ཀ་བ་བཞི་ལས་སྒྲུབ་བརྒྱུད་ཀྱི་བཀའ་བབས་མི་ལ་བཞད་པའི་རྡོ་རྗེས་སྤྱིར་གྲུབ་ཐོབ་ཀྱི་བུ་སློབ་མང་དུ་བཏོན་པའི་ནང་ནས་མཆོག་ཏུ་གྱུར་པ་མཉམ་མེད་སྒམ་པ་པོ་ཟླ་འོད་གཞོན་ནུའི་བཀའ་བརྒྱུད་ལ། ཕག་གྲུ། དུས་མཁྱེན། ཞང་ཚལ་བ། འབའ་རོམ་བཀའ་བརྒྱུད་དེ་ཆེ་བཞི། གདན་ས་བཀའ་བརྒྱུད་དང་ལྔ། འབྲི་གུང༌། འབྲུག་པ། སྟག་ལུང༌། ཁྲོ་ཕུ་བ་སོགས་བཀའ་བརྒྱུད་ཆུང་བརྒྱད། དེ་དག་རེ་རེ་ལ་ཡང་གྲུབ་བརྙེས་རྣལ་འབྱོར་པའི་སྡེ་དཔག་ཏུ་མེད་པ་དབྱར་དུས་ཀྱི་ཆུ་བོ་ལྟར་འཕེལ་ཏེ་དཔལ་ལྡན་འབྲུག་པ་ཁོ་ནའི་བཀའ་བརྒྱུད་ཀྱིས་ཀྱང་བྱ་རྒོད་པོའི་ཉིན་ལམ་བཅོ་བརྒྱད་ཁྱབ་པར་གྲགས། དེས་མཚོན་ནས་བོད་དབུས་གཙང་གི་ལྗོངས་སུ་བསྟན་པ་དར་བའི་ཚུལ་རྒྱས་པར་བརྗོད་ཀྱིས་མི་ལོང་ཡང་ཟུར་ཙམ་བཤད་པ་ཡིན་ལ། མདོ་ཁམས་ཀྱི་ཡུལ་ན་ཆེ་བ་ཤར་ཕྱོགས་འབྲི་ཀླུང་གི་རྒྱུད་འདིར་ནི་སྔོན་ཆེན་པོ་
གླིང་གི་དུས་ནས་ས་སྐྱ་པའི་བསྟན་པ་གཙོ་བོར་མཆོད་པའི་སྲོལ་དར་ཞིང༌། རྗེས་ལ་སྡེ་དགེ་ཆོས་རྒྱལ་ཆེན་པོ་རིམ་བྱོན་རྣམས་ཀྱང་གདུང་བརྒྱུད་གོང་མ་འགར་ཆེན་ཡེ་ཤེས་བཟང་པོའི་དུས་ནས་རྗེ་བཙུན་ས་སྐྱ་པའི་ནང་འཁོར་ཡིན་པ་དང༌། ཕྱིས་སུའང་དཔལ་ཨེ་ཝཾ་པའི་མཁན་བརྒྱུད་ཀྱི་ཕྲེང་བ་རྣམས་དང་མཆོད་ཡོན་ཉི་ཟླ་ཟུང་འབྲེལ་དུ་གྱུར་པ་སོགས་ཀྱི་རྟེན་འབྲེལ་ལས་དཔལ་ལྡན་ས་ངོར་རྣམ་གཉིས་རིགས་བདག་ཏུ་འཛིན་པ་ཤ་སྟག་བྱུང་ལ། སྡེ་དགེ་བོ་ཐར་གྱི་དུས་སུ་ཕོ་བྲང་གི་ས་གཞི་དང་པོར་འདུལ་བ་དང༌། རྒྱལ་སྲིད་ལ་མངའ་གསོལ་བའི་བྱེད་པོ་གྲུབ་ཆེན་ཐང་སྟོང་རྒྱལ་པོ་ཡིན་ཅིང༌། ཕྱིས་སུ་གཏེར་སྟོན་འཇའ་ཚོན་སྙིང་པོས་སྡེ་དགེ་གྲུབ་ཐོབ་ཀུན་དགའ་རྒྱ་མཚོ་ལ་ཟན་གྱི་སྡིག་པ་ར་ཙའི་གཟུགས་ཤིག་བཅོས་ནས་གནང་སྟེ། འདི་ཡི་དམ་གུ་རུ་དྲག་པོའི་ཕྱག་མཚན་ཡིན། ཁྱེད་རང་གི་ཐེལ་རྟགས་ལ་འདི་ཐོབ། ས་སྟོད་རྣམས་ས་སྐྱ་དང༌། ས་སྨད་རྣམས་རྙིང་མ་བས་ཟུངས་དང་རྒྱལ་སྲིད་ཕྱི་ན་གས་མེད་པ་ནང་ན་སྲུབ་མེད་པ་འོང་ཞེས་ལུང་བསྟན་པ་ལྟར་བྱུང་བ་སོགས་ཀྱིས་གསང་སྔགས་རྙིང་མ་པ་རྣམས་ཀྱང་མཆོད་གནས་ཀྱི་ཕུད་དུ་བཀུར། སྡེ་དགེ་སངས་རྒྱས་བསྟན་པའི་སྐུ་རིང་ལ་བཀའ་བརྒྱུད་བསྟན་འཛིན་ཡོངས་ཀྱི་གཙུག་རྒྱན་ཀུན་མཁྱེན་སི་ཏུ་ཆོས་ཀྱི་འབྱུང་གནས་ཨ་ལོར་འཁྲུངས་པ་དབུས་ཕྱོགས་ཀྱི་གདན་སར་མ་ཕུལ་བར་དཔལ་སྤུང་གི་ཆོས་གྲྭ་བཏབ་ནས་དེར་བཞུགས་སུ་གསོལ་བ་
ནས་བཟུང་སྟེ་སི་ཏུའི་སྐུ་ཕྲེང་རྣམས་གཙུག་གི་ནོར་བུར་བསྟེན་པས་སྒྲུབ་བརྒྱུད་ཀཾ་ཚང་གི་ཡང་བསྟན་པའི་སྦྱིན་བདག་མཚུངས་བྲལ་དུ་གྱུར། བྱང་རྒྱུད་རྫ་ཆུ་ཁ་ན་རི་བོ་དགེ་ལྡན་པའི་མཚན་ཉིད་ཀྱི་ཆོས་གྲྭའནག་འགའ་ཞིག་ཡོད་དེ་མདོར་ན་གངས་རིའི་ཁྲོད་ཀྱི་རིས་མེད་པའི་རྒྱལ་བསྟན་མཐའ་དག་གྲུ་བཞིར་སྐྱོང་ཞིང༌། སྔོན་དུས་རྒྱལ་རབས་རེ་བཞིན་རིན་པོ་ཆེ་དང་ཙནྡན་ལས་གྲུབ་པའི་སྐུ་གཟུགས་མཆོད་རྟེན་མང་པོ་དང༌། གསེར་བཏུལ་མའི་བཀའ་འགྱུར་སོགས་དཀོན་མཆོག་གསུམ་གྱི་རྟེན་བཞེངས་མང་དུ་མཛད་ལ། ཁྱད་པར་དུ་དགེ་འདུན་གྱི་སྡེ་རྙིང་པ་མཆོད་ཅིང་གསར་པ་འཛུགས་པ་དང༌། བཀའ་བསྟན་འགྱུར་རོ་ཅོག་དང་བོད་ཀྱི་མཁས་གྲུབ་རྣམས་ཀྱི་གསུང་འབུམ། སྣ་ཚོགས་རིག་གནས་ཀྱི་སྐོར་སོགས་གླེགས་བམ་གྱི་ཕྱི་མོའི་སྤར་ཤིང་གྲངས་མང་ལ་དངོས་གཙང་བ་རིན་པོ་ཆེའི་བྲག་རི་བརྩིགས་པ་ལྟ་བུ་བཞེངས་ཏེ། ཕྱོགས་བཞིའི་སྐལ་བཟང་ཆོས་དོན་གཉེར་བའི་སྐྱེ་བོ་རྣམས་རྒྱ་མཚོ་ཆེན་པོ་ལས་ནོར་བུ་ལེན་པའི་ཚུལ་དུ་ཚུར་འདུ་བ་དང༌། ཆོས་ཀྱི་རྙེད་པ་གྲུབ་ནས་དགའ་བཞིན་རང་གནས་སུ་ལྡོག་པའི་འགྲོ་འོང་མང་པོའི་རྒྱུ་འགྲུལ་གྱི་བུན་ལོང་ཉིན་རེ་བཞིན་དུ་རྒྱུན་མི་འཆད་པར་འབྱུང་བས་མདོ་ཁམས་སྟོད་སྨད་བར་གསུམ་ཆོས་ཀྱི་ལོངས་སྤྱོད་རྣམ་ཐོས་བུའི་བང་མཛོད་ཁ་ཕྱེ་བ་ལྟ་བུས་བཀང་བ་འདི་དག་སྡེ་དགེ་བྱང་ཆུབ་སེམས་དཔས་བཞེངས་པའི་རྟེན། བསྒྲུབས་པའི་ཆོས། བསགས་པའི་རྣམ་དཀར། སྔོན་སྨོན་གྱི་ཆེ་བ་ཡིན་པས་
ཁམས་ཆུ་བཞི་སྒང་དྲུག་གི་ཁོངས་འདིར་རྒྱལ་བསྟན་སྟོབས་ཀྱིས་འདེགས་པ་དང༌། སྐྱེ་དགུའི་ཕན་བདེ་གསོ་བ་ལ་འགྲན་ཟླ་ཐམས་ཅད་དང་བྲལ་བ་ཁས་བསྟོད་བསྟོད་ལ་མི་ལྟོས་པར་མིག་གི་མཐོང་གསལ་ལ་གནས་པ་དེ་ཀ་ལགས། ཁམས་ཕྱོགས་འདིར་གསང་སྔགས་སྔ་འགྱུར་པའི་ཆོས་སྡེ་བྱུང་བ་ལ་སྔ་བ་ནི་ཟུར་གསང་བདག་སྒྲོ་ཕུག་པའི་དངོས་སློབ་ཛམ་སྟོན་འགྲོ་བའི་མགོན་པོའི་ཐུགས་སྲས་བླ་མ་ཤར་བ་སྤོབས་པ་མཐའ་ཡས་སམ་ཡོངས་གྲགས་སུ་དམ་པ་བདེ་གཤེགས་ཞེས་གྲུབ་ཆེན་མེ་ཏྲ་ཛོ་ཀིས་རྒྱལ་སྲས་ཞི་བ་ལྷར་ངོས་བཟུང་བ་དེས་ཁམས་སྤོ་འབོར་གྱི་སའི་ཆར་ཀཿཐོག་རྡོ་རྗེ་གདན་གྱི་ཆོས་སྡེ་བཏབ་སྟེ། རྒྱལ་ཚབ་གཙང་སྟོན་རྡོ་རྗེ་རྒྱལ་མཚན་དང་བྱམས་པ་འབུམ་ནས་བླ་རབས་བཅུ་གསུམ། དུང་རབས་བཅུ་གསུམ་སོགས་སྤྱིར་མདོ་སྔགས་མཐའ་དག་ལ་མཁས་ཤིང་ཁྱད་པར་མདོ་སྒྱུ་སེམས་གསུམ་གྱི་རིང་ལུགས་འཛིན་པའི་གདན་རབས་ཀྱི་ཕྲེང་བ་ཡིད་བཞིན་ནོར་བུའི་དོ་ཤལ་ལྟ་བུ་ཚར་དུ་བསྒྲིགས། སྔོན་ཆོས་སྡེ་འདིར་དུས་གཅིག་ལ་དགེ་འདུན་ཁྲི་ཕྲག་བཅོ་བརྒྱད་འདུས་པར་གྲགས་ཤིང༌། འཇའ་ལུས་ཀྱི་གྲུབ་མཐའ་སྙོགས་པའི་རྣལ་འབྱོར་པའང་འགའ་ཞིག་བྱོན། དུས་ཕྱིས་ཀཿཐོག་གྲུབ་བརྙེས་བྱང་ཆུབ་རྒྱ་མཚོའམ་གཏེར་སྟོན་བདུད་འདུལ་རྡོ་རྗེའི་རིང་ལ་པདྨའི་རྒྱལ་ཚབ་རིག་འཛིན་མི་འགྱུར་རྡོ་རྗེ་ངོམ་དུ་འཁྲུངས། སྐུ་གཞོན་ནུ་ནས་སྔོན་སྦྱངས་སྟོབས་སུ་གྱུར་པས་ཉམས་
རྟོགས་ཀྱི་ཀློང་རྡོལ། རྩ་གསུམ་ལྷག་པའི་ལྷའི་ཞལ་གཟིགས། གནམ་ཆོས་ཐུགས་ཀྱི་གཏེར་ཁར་གྲགས་པའི་ཆོས་མཛོད་ལ་དབང་བསྒྱུར། རིག་འཛིན་བདུད་འདུལ་རྡོ་རྗེ་དང་ཡང་མཇལ་ཏེ་ཕན་ཚུན་ཐུགས་ཡིད་གཅིག་ཏུ་འདྲེས། རྒྱལ་བ་ཀརྨ་པ་ཞྭ་ནག་དབང་ཕྱུག་རྡོ་རྗེ་དང༌། ཞྭ་དམར་ཆོས་ཀྱི་དབང་ཕྱུག་གཉིས་ཀྱི་དངོས་སློབ་སེམས་དཔའ་ཆེན་པོ་ཀརྨ་ཆགས་མེད་དང་མཇལ་བས་ཚད་ལྡན་གྱི་གཏེར་སྟོན་དུ་ཐུགས་ངེས་འཁྲུངས་ཏེ་ཞབས་སྤྱི་བོར་བླངས། གསུང་གི་བདུད་རྩི་བཞེས། མཉེས་པ་གསུམ་གྱིས་ཐུགས་བཟུང༌། དགོངས་གཏེར་རྣམས་ལ་གསལ་བྱེད་ཆོག་ཁྲིགས་དང༌། ཁ་སྐོང༌། ཟུར་རྒྱན། ཟིན་བྲིས་སོགས་མང་དུ་མཛད་ཅིང་ཉམས་བཞེས་དང་འཆད་སྤེལ་གྱི་ཕྲིན་ལས་རྒྱ་ཆེར་བསྐྱངས། དཔལ་ཡུལ་རྣམ་རྒྱལ་བྱང་ཆུབ་གླིང་དང་རྨུགས་སང་གདན་ས་སོགས་ལས་རིང་ལུགས་འཛིན་པའི་ཆོས་སྡེ་མང་དུ་མཆེད། ཐུགས་རྗེའི་བྱིན་རླབས། ཆོས་ཀྱི་འགྲོ་དོན། བཀའ་བབས་ཀྱི་ཆོས་བདག་སོགས་སྒོ་ཀུན་ནས་ཕུན་སུམ་ཚོགས་པས་སྡེ་དགེ་ལྷོ་རྒྱུད། ཧོར་ཞབས། འགུ་ལོག །གསེར་ཐལ། རེབ་བཀོང༌། རྒྱལ་མོ་རོང་སོགས་ཆོས་བརྒྱུད་ཀྱིས་ཁྱབ་ཅིང༌། དབང་ལུང་གི་བརྒྱུད་སྲོལ་ཟིན་པ། ཐུགས་དམ་ཕྱག་རྫོགས་ལ་མཛད་པ། སྙིང་རུས་སྒྲུབ་ཚུགས་ལ་སྐྱེལ་བ། གདམས་ངག་སྣ་གཅིག་གི་སྟེང་དུ་ས་སྡེ་ཚུགས་པའི་དམ་པའི་སྐྱེས་བུ་མང་དུ་བྱོན། ཡང་ཆགས་མེད་
རིན་པོ་ཆེའི་བུ་ཆེན་དམ་པ་པདྨ་རིག་འཛིན་གྱིས་ཕྱོགས་མེད་ཀྱི་བླ་མ་མང་དུ་བསྟེན། ཆོས་བཀའ་སྤྱི་དང་ཁྱད་པར་རྫོགས་ཆེན་མཁའ་འགྲོ་སྙིང་ཐིག་གི་གདམས་པ་ཞུན་ཐར་ཆོད་པར་གསན་ནས་ཁམས་དབུས་ཀྱི་སྒྲུབ་གནས་རྣམས་སུ་སྒྲུབ་པ་རྩེ་གཅིག་མཛད་པས་ཉམས་རྟོགས་ཀྱི་རྩལ་ཆེན་རྫོགས་ཏེ། རྒྱལ་དབང་ཐམས་ཅད་མཁྱེན་པ་ལྔ་པ་ཆེན་པོས་ཀྱང་བསྟོད་བསྔགས་ཀྱིས་དབུགས་དབྱུང༌། དགུང་ལོ་དྲུག་ཅུ་བཞེས་དུས་ཁམས་རུ་དམ་དུ་ཕེབས་ནས་ཨོ་རྒྱན་བསམ་གཏན་ཆོས་གླིང་གི་གདན་ས་བཏབ་སྟེ་སློབ་མ་བསྐྱངས་པས་ཚོགས་པ་སྟོང་ཕྱེད་ལྔ་བརྒྱ་ཙམ་འདུས་ཤིང༌། ནག་ཤོད་སྲིན་རྫོང༌། ཞེ་ཆེན་བསྟན་གཉིས་དར་རྒྱས་གླིང༌། རྒྱ་རོང་རྟག་བརྟན་སྒྲུབ་སྡེ་སོགས་ཡན་ལག་གི་ཆོས་སྡེ་ཆེ་ཕྲ་མང་པོར་འཕེལ། མཁས་གྲུབ་ཀྱི་བུ་སློབ་བྱ་ཁྱུ་འཕུར་བ་ཙམ་ཐོན་པས་མདོ་ཁམས་རྫོགས་ཆེན་པ་ཞེས་དབུས་གཙང་ཁམས་གསུམ་དུ་གྲགས་ཤིང༌། མཚན་དོན་གྱིས་གུང་ཁེབ་པ་བྱུང༌། དེ་རྣམས་ལ་ཀཿརྫོགས་དཔལ་གསུམ་ཞེས་མདོ་ཁམས་ཀྱི་ཡུལ་འདིའི་གསང་སྔགས་རྙིང་མ་པའི་ཆོས་སྡེ་ཐམས་ཅད་ཀྱི་རྩ་བར་ད་ལྟའི་བར་གོང་འཕེལ་དུ་བཞུགས་ཏེ་ཡས་གཏམ་དམ་པ་ཆོས་ཀྱི་ལོ་རྒྱུས་རགས་རིམ་ཙམ་ལགས།། ༈ །།མས་གཏམ་ལའང་སྟེང་ན་རྗེའི་གདུང་རབས། འོག་ན་འབངས་ཀྱི་མི་རབས། སྟོང་སྡེ་སྲིད་པའི་ཆགས་ཚུལ་དང་གསུམ་ལས་
དང་པོའི་དབང་དུ་བཏང་ན། འཇིག་རྟེན་ཐོག་མར་ཆགས་ནས་ཡུན་རིང་མ་སོང་བའི་དུས་སུ་མི་ལ་ཕོངས་ཕྱུག་དང་ལོངས་སྤྱོད་ལ་གསོག་འཇོག་མེད་ཅིང༌། དཔོན་གཡོག་གི་ཐ་སྙད་མེད་དེ་བསམ་གཏན་ལྷ་གནས་དང་ཆ་འདྲ་བའི་བདེ་སྐྱིད་ཆེན་པོས་འཚོ་ཡང༌། བསྐལ་པ་མར་འགྲིབ་པས་བསོད་ནམས་རིམ་གྱིས་ཕྲི་སྟེ་འབྱུང་བ་དྭངས་མའི་ཟས་རྣམས་ནུབ། སྐྱེ་བོ་རྣམས་འབྲས་སཱ་ལུའི་ཞིང་ལ་སྤྱོད་པའི་སྐབས་སུ་ལོ་ཏོག་ལ་གསོག་འཇོག་དྲན་ཞིང་ང་ཁྱོད་ཀྱི་རིས་སུ་བཅད་དེ་ཕན་ཚུན་མི་མཐུན་པར་རྩོད་པ་ན་རྒྱལ་པོ་ལ་སྔ་བ་མང་པོས་བཀུར་བ་བྱུང་སྟེ། དྲང་པོའི་གཞུང་ལམ་བཟུང༌། ལོངས་སྤྱོད་ཆོས་བཞིན་བགོས། རྩོད་པའི་ཟུག་རྔུ་ཕྱུངས་པས་དྲིན་ལན་དུ་དྲུག་ཆའི་དཔྱ་ཐང་གིས་མཆོད། མི་ལ་མཐོ་དམན་ཕྱེ་སྟེ་རྗེ་དང་འབངས་སུ་བཞག །དབང་རྗེ་ལ་གཏད་དེ་སྐྱིད་སྡུག་ཤེས་སུ་འཇུག་པའི་སྲོལ་དོད། དེའི་བུ་བརྒྱུད་ལ་འཁོར་ལོས་སྒྱུར་བའི་རྒྱལ་པོ་ལྔ་སོགས་ནས་་རྒྱལ་པོ་ཟས་གཙང་མ་མཆེད་བཞིའི་བར་དུ་རྒྱལ་པོ་དང་རྒྱལ་རིགས་འབུམ་ཕྲག་ལྷག་པའི་གདུང་རབས་མུ་ཏིག་གི་ཕྲེང་བ་སྟར་ལ་བརྒྱུས་པ་ལྟར་བྱུང༌། རྒྱལ་པོ་ཟས་གཙང་གི་སྲས་བཅོམ་ལྡན་འདས་དང་མཛེས་དགའ་བོ་གཉིས། བཅོམ་ལྡན་འདས་ཁབ་ན་བཞུགས་དུས་ཀྱི་སྲས་སྒྲ་གཅན་ཟིན་ཏེ། འདི་ཡན་ཆད་ཀྱིས་མང་པོས་བཀུར་བའི་རྒྱལ་བརྒྱུད་དངོས་རྫོགས་པར་གསུངས། གཞན་ཡང་མ་ག་དྷ་དང༌། ཀོ་ས་ལ་དང༌།
ཀོ་ཤམྦིའི་རྒྱལ་པོའི་རིགས་དང༌། ལི་ཙ་བིའི་རིགས་སོགས་གྲགས་པ་ཅན་གྱི་རྒྱལ་པོའི་རིགས་མང༌། དེའི་རྗེས་ཉི་མའི་རིགས་ལས་ཛམ་བུ་གླིང་གི་རྒྱལ་པོ་མྱ་ངན་མེད་དང་སྙིང་པོའི་ཐིག་ལེ་དང་སེང་གེ་ལྔ་པ་སོགས་དང༌། ཙནྟྲའི་རིགས་ཀྱི་རྒྱལ་རབས་མང་པོ་སྔོན་དུས་སུ་བྱུང་ཞིང༌། ཕྱི་རྒྱལ་པོའི་གྲུབ་ཐོབ་གོ་པཱ་ལ་དང་དེ་བ་པཱ་ལ་དང་ཆོས་རྒྱལ་མྱ་ངན་མེད་ལ་གཟི་བྱིན་འགྲན་པ་རྒྱལ་པོ་ཆེན་པོ་་པཱ་ལ་སོགས་པཱ་ལའི་རིགས་ཀྱི་རྒྱལ་པོ་མང་དུ་མཆེད་པས་མཚོན། བསོད་ནམས་ལས་ཤུགས་ཀྱིས་ཡངས་པའི་ས་ཆེན་པོ་ལ་དབང་བསྒྱུར་ཞིང༌། མངའ་ཐང་ལོངས་སྤྱོད་ཀྱིས་དཀོན་མཆོག་གི་གདན་ཁྲི་འདེགས་པ། དཔུང་སྟོབས་གཟི་བརྗིད་ཀྱིས་གཞན་སྡེའི་རྒོལ་བ་ཟིལ་གྱིས་གནོན་པའི་རྒྱལ་པོ་དང་རྒྱལ་ཕྲན་མང་པོ་འཕགས་ཡུལ་ཤར་ནུབ་ལྷོ་བྱང་དབུས་ལྔ་ཀུན་ཏུ་བྱུང༌། བོད་གངས་ཅན་གྱི་ལྗོངས་འདིར་ནི་སྟོན་པས་འཇམ་དཔལ་རྩ་བའི་རྒྱུད་དུ་གསལ་བར་ལུང་བསྟན་པ་ལྟར་འཕགས་ཡུལ་ལི་ཙ་བིའི་རིགས་ལས་མཚན་དང་ལྡན་པའི་གཞོན་ནུ་ཞིག་རྐང་འཁྱམ་སྟེ་རིམ་གྱིས་བོད་གཡོ་རུའི་ཡར་ལུང་ལྷ་རི་རོལ་པོའི་རྩེ་མོར་བྱོན་པ་ཕྱོགས་དེའི་རྫི་བོ་མང་པོས་མཐོང་ནས་གཉའ་བར་ཁྲི་བརྩིགས་ཏེ་རྗེར་བཀུར་བའི་ཚེ་མིང་བཙན་པོ་ཞེས་གསོལ་བ་མི་རྗེ་གཉའ་ཁྲི་བཙན་པོ་སྟེ། དེ་ནས་རིམ་པར་གནམ་ལ་ཁྲི་བདུན། ས་ལ་ལེགས་དྲུག་ཚིགས་ལ་བཙན་ལྔ། ལོགས་ལ་སྡེ་བརྒྱད་
སྐྱིད་པའི་གདུང་རབས་བཅུ་གསུམ་སོགས་བྱུང་བའི་ནང་ཚན་མི་རྗེ་སྲོང་བཙན་སྒམ་པོས་དགེ་བ་བཅུའི་ཁྲིམས་བཅས་ཀྱང་ཁྲིམས་ཡིག་རྒྱས་པར་མ་མཛད་པ་ལ། ཆོས་རྒྱལ་ཁྲི་སྲོང་ལྡེའུ་བཙན་དང་འགོས་ཁྲི་བཟང་ལྷ་ལོད་རྗེ་བློན་གྱིས་རྒྱལ་ཁྲིམས་གསེར་གྱི་གཉའ་ཤིང་སྦྲམ་ལ་ལྕི་བ་དང༌། ཆོས་ཁྲིམས་དར་གྱི་མདུད་པ་འཇམ་ལ་དམ་པ་གཉིས་སུ་ཕྱེ་སྟེ་བཀའ་གཙིགས་ཀྱི་ཡི་གེ་ཞིབ་མོ་བྲིས། འགྱུར་མེད་ཀྱི་ཕྱག་རྒྱས་བཏབ་སྟེ་ཁྲིམས་བསྡམས་པས་རྒྱལ་པོ་བཀའ་བཙན། ཁྲིམས་ལུགས་དྲང་ལ་སྙོམས། ཡུལ་མི་རྗེ་ལ་གུས་པས་རྒྱལ་ཁམས་བདེ་སྐྱིད་དང་ལྡན་པར་གྱུར། ཆོས་རྒྱལ་་པཱ་ལ་དང་ཡང་ཕྲིན་ཡིག་གི་ལམ་ནས་མ་མཐོང་བའི་མཛའ་བོར་སྦྲེལ། ཕྱོགས་བཞིའི་འགྲན་ཟླ་ཆེ་དགུ་དབང་དུ་བསྡུས་ཏེ་ཆུ་བོ་གངྒཱའི་འགྲམ་དུ་རྡོ་རིང་བསླངས། སྲས་མུ་ཏིག་བཙད་པོས་རྒྱལ་ས་བཟུང་སྟེ་བོད་མིའི་ཕྱུག་དབུལ་ལན་གསུམ་བསྙམས། མངའ་བདག་རལ་པ་ཅན་གྱིས་དབོན་ཞང་གི་འཁྲུགས་པ་བསྡུམས་ཏེ་རྒྱ་རྒྱ་ཡུལ་དང་བོད་བོད་ཡུལ་ན་སྐྱིད་པར་བྱས་པ་སོགས་མེས་དབོན་རྣམས་ཀྱིས་རྒྱལ་སྲིད་སྙིང་རྗེས་བསྐྱངས་པའི་མཛད་པ་རླབས་ཆེ། དེ་མཐར་རལ་པ་ཅན་གྱི་གཅུང་གླང་དར་མས་ཆོས་ཁྲིམས་བཤིག་པས་རྒྱལ་ཁྲིམས་རང་ཤུགས་ཀྱིས་ཞིག །གདུང་བརྒྱུད་སིལ་བུར་འཐོར། དེ་ཕྱིན་མངའ་རིས་ཀྱི་ལྷ་བླ་མ་ཁུ་དབོན་སོགས་སྐྱེས་བུ་དམ་པ་མང་དུ་འཁྲུངས་ཀྱང་བོད་སྤྱི་ལ་དབང་
བའི་རྒྱལ་པོ་མ་བྱུང༌། ཕྱིས་སུ་གནམ་སེ་ཆེན་རྒྱལ་པོས་མདོ་སྨད་མིའི་ཆོལ་ཁ། མདོ་སྟོད་རྟའི་ཆོལ་ཁ། དབུས་གཙང་ཆོས་ཀྱི་ཆོལ་ཁ་སྟེ་བོད་ཆོལ་ཁ་གསུམ་འགྲོ་མགོན་ཆོས་རྒྱལ་འཕགས་པ་ལ་དབང་ཡོན་དུ་ཕུལ་བས་བོད་ཁམས་མཐའ་དབུས་ཐམས་ཅད་དཔལ་ལྡན་ས་སྐྱ་པའི་ཆབ་འབངས་སུ་གྱུར་ཏེ་དཔོན་ཆེན་་བཟང་པོ་སོགས་བོད་སྤྱི་ལ་དབང་བའི་མི་དཔོན་རིམ་པར་བསྐོས་པ་རྣམས་ཀྱིས་ཧོར་ལུགས་དང་བསྟུན་པའི་ཁྲིམས་ཀྱིས་བཟང་ལ་གཏང་རག་དང་ངན་ལ་ཆད་པ་བྱས། དེའི་རྗེས་སུ་ལྷ་གཟིགས་རླངས་ཀྱི་གདུང་ལས་ཏཱའི་སི་ཏུ་བྱང་ཆུབ་རྒྱལ་མཚན་གྱིས་བོད་ཁྲི་སྐོར་བཅུ་གསུམ་དབང་དུ་བསྡུས་ནས་ཕོ་བྲང་སྣེའུ་གདོང་རྩེ་བཟུང༌། སྔོན་གྱི་བོད་ཆོས་རྒྱལ་མེས་དབོན་གསུམ་གྱི་ཁྲིམས་ཡིག་ལ་གཞི་བླང་བའི་བཀའ་ཁྲིམས་བཟང་པོ་གསར་དུ་བཅས་ཏེ་བོད་ཁམས་བདེ་བར་བསྐྱངས། རབ་བྱུང་བཅུ་པའི་ནང་དུ་ཆེན་པོ་ཧོར་གྱི་ཡུལ་ནས་ཇིང་གིར་བསྟན་འཛིན་ཆོས་རྒྱལ་བྱུང་སྟེ་བོད་ཤིང་སྒོ་ཅན་མཐའ་དག་དཔུང་གིས་མནན། དབུས་གཙང་གི་སའི་ཆ་ཐམས་ཅད་རྒྱལ་དབང་ཐམས་ཅད་མཁྱེན་པ་ཡབ་སྲས་ལ་ཕུལ། མི་རིང་བར་གནམ་གོང་མ་ཡུང་ལོ་རྒྱལ་པོས་ཀུན་མཁྱེན་ལྔ་པ་པེ་ཅིང་དུ་སྤྱན་དྲངས་ནས་ཏི་ཤྲིར་མངའ་གསོལ། གནམ་འོག་གི་སྐྱེ་བོ་མཐའ་དག་བསྟན་པ་གཅིག་ཏུ་གྱུར་པའི་འགྱུར་མེད་རྡོ་རྗེ་འཆང་རྒྱ་མཚོའི་བླ་མ་ཞེས་པའི་མཚན་དང༌། ཁྱབ་བདག་རྡོ་རྗེ་འཆང་གི་ལས་ཀ་
ཕུལ་བ་ནས་བཟུང་སྟེ་དགའ་ལྡན་ཕོ་བྲང་གི་དབུ་འཕང་དགུང་ལ་རེག་ཅིང་ལུགས་གཉིས་ཀྱི་བཀའ་ཁྲིམས་དྲང་པོར་བསྲང་བས་ཆོས་རྒྱལ་མེས་དབོན་རྣམ་གསུམ་གྱི་ཕྲིན་ལས་འོ་མཚོ་ལྟར་ཁ་གཏིང་མེད་པར་དཀར་བའི་རྒྱུན་སླར་ཡང་འཕྱུར་ཏེ་བོད་ཁམས་ཐམས་ཅད་དཀར་ལ་མདངས་ཆེ་བར་བྱས། སྣེའུ་གདོང་གོང་མ་གྲགས་པ་རྒྱལ་མཚན་ཁུ་དབོན་གྱི་རིང་ཙམ་ན་ཆོས་རྒྱལ་སྲོང་བཙན་སྒམ་པོའི་གུང་བློན་ཆེན་པོ་བཞིའི་མཆོག་ཏུ་གྱུར་པ་འགར་སྲོང་བཙན་ཡུལ་བསྲུང་གི་མི་རྒྱུད་ལས་བདེ་ཆེན་བསོད་ནམས་བཟང་པོ་ཞེས་བྱ་བ་ཁམས་སུ་བྱོན་ནས་ཆེན་པོའི་ལས་ཀ་བཟུང་བ་ན་མི་ཀུན་གྱིས་སྡེ་དགེ་ཞེས་འབོད་པར་བྱུང་སྟེ། སྡེ་རིས་དགེ་བར་སྐྱོང་བའི་རྟེན་འབྲེལ་དུ་གནམ་གྱིས་མིང་བྱིན་པར་གྲགས། དེའི་འོག་ཏུ་སྡེ་དགེ་བོ་ཐར་གྱིས་རྣལ་འབྱོར་དབང་ཕྱུག་ཐང་སྟོང་རྒྱལ་པོའི་བཀའ་བཞིན་རྒྱལ་ཁབ་ལྷུན་གྲུབ་སྟེང་བཟུང་བ་ནས་བརྩམས་ཏེ་མེས་ལས་ཚ་དང༌། ཚ་ལས་ཡང་ཚ་ལྷག་པའི་ཚུལ་གྱིས་མངའ་ཐང་ཇེ་ཆེར་རྒྱས་ཤིང༌། གནམ་སའི་དབང་ཕྱུག་འཇམ་དབྱངས་གོང་མ་བདག་པོ་ཆེན་པོས་ཀྱང་ལུང་ལས་ཀ་ལག་རྟགས་དང་བཅས་པས་གཟེངས་བསྟོད་དེ་སྟོད་སྨད་ལྷོ་བྱང་སྟོང་སྡེ་ཁྲི་ཤོག་མང་པོ་ལ་དབང་བསྒྱུར། ལྷ་ཆོས་ལ་གཞི་བཅོལ་བའི་རྒྱལ་ཁྲིམས་འཇམ་ལ་ནོན་ཆེ་བ་བཅས་ཏེ། ལུགས་གཉིས་ཀྱི་སྲོལ་བཟང་སྔར་ཡོད་རྒྱུན་གསོས་ཤིང་སྔར་མེད་གསར་དུ་བཙུགས། ཁྲིམས་མཐུན་གྱི་ལེགས་བྱེད་གཏང་རག་གིས་སྤེལ། ཁྲིམས་འགལ་གྱི་དཔེ་ངན་ཆད་པས་
བསྣུབས། མཐོན་པོའི་གོང་མནན། དམའ་བ་ཐབས་ཀྱིས་བསྐྱངས། ཉམ་ཆུང་གི་ཕ་མ་མཛད། རང་མཉམ་མཐུན་འཇུག་གིས་བསྡུས། འགྲན་ཟླ་དཔུང་ཤེད་ཀྱིས་བཏུལ། རྒྱལ་པོ་བཞུགས་གདན་དང་མ་བྲལ་ཡང་ས་མཐའ་སྙན་གྲགས་ཀྱིས་ཁེབས་ཏེ། ཕ་ཡུལ་ཐག་རིང་གི་མི་སྡེ་སྐྱིད་པའི་ལུང་འོག་ཏུ་བབས་ཀྱིས་འདུ་བ་བྱུང༌། ཆོས་རྒྱལ་བསྟན་པ་ཚེ་རིང་གི་དུས་སུ་རྒྱལ་དབང་ཐམས་ཅད་མཁྱེན་པ་སྐལ་བཟང་རྒྱ་མཚོ་མདོ་ཁམས་མི་ཉག་གི་ཡུལ་ནས་དབུ་རུ་གྲུ་འཛིན་གྱི་ཕོ་བྲང་ཆེན་པོར་གདན་འདྲེན་པའི་མཐུན་འགྱུར་ཞབས་ཏོག་བསྒྲུབས་པ་ནས་བཟུང་སྟེ་དབུས་གཞུང་ས་ཆེན་པོ་དང་ཡང་ད་ལྟའི་བར་དུ་པདྨ་དང་ཉི་མའི་དཔེ་བཞིན་མཆོད་ཡོན་གྱི་འབྲེལ་ཟབ་ཐུན་མོང་མ་ཡིན་པ་གོང་འཕེལ་དུ་གནས་པ་འདི་བཞིན་ལགས། འབངས་མིའི་གནས་ཚུལ་གྱི་དབང་དུ་བྱས་ན། སྟོད་རྒྱ་གར་གྱི་ཡུལ་རྣམས་བསྐལ་བ་བཟང་པོའི་གྲོང་ཁྱེར་ཡིན་པས་མིའི་མཆོག་དང་ལོངས་སྤྱོད་ཀྱི་རྩེ་མོ་འབྱུང༌། སྡེ་མང་ལ་འབྱོར་པ་ཆེ། གཙུག་ལག་གི་གཞུང་དང་སྒྱུ་རྩལ་གྱི་རྣམ་གྲངས་མང༌། ཚོང་འདུས་ཀྱི་ལྟད་མོ་དང་བཟོ་གནས་ཀྱི་འཕྲུལ་མོད། མི་རིགས་བཞིའི་རྣམ་དབྱེ་གསལ། མཐོ་དམན་ཁྱད་སྤྱོད་པས་དབྱེ། ཕྱུག་པོ་ལས་མཁས་པ་བཀུར། ཟོང་ལས་རིག་པ་བྲིན། ཞིབ་ལ་བརྟགས་དཔྱད་རྣོ། སྔོན་གྱི་དྲང་སྲོང་ཕྱི་རྗེས་རིང་པོར་གཟིགས་པ་མང་དུ་བྱོན་པས་བྱ་བཞག་ཐམས་ཅད་ལ་བསྟན་བཅོས་
ཡོད། ལས་དང་བྱ་བ་ཅི་བྱེད་བསྟན་བཅོས་དཔང་པོར་འཇོག་པས་དུས་བཟང་གི་ལུགས་སྲོལ་མི་འགྱུར། ཕ་མེས་ཀྱི་རིགས་ཆོས་གཞུང་སྲོང་བས་གནའ་བོའི་ལག་རྗེས་མི་ནུབ་ཅིང་མིའི་གོ་རིམ་མི་འཆོལ། མགོ་ནག་མི་ལ་ཆགས་སྔ་ཞིང་ཛམ་གླིང་ཡུལ་དབུས་ན་གནས་པས་སྡེ་མང་ནང་ནས་ཕུད་དུ་བརྩི་བ་དེ་ལགས། བོད་ཁ་བ་ཅན་འདི་དང་པོ་མི་མིན་འདྲེའི་རྒྱལ་ཁམས་སུ་ཡོད་པ་ལས། ཐུགས་རྗེ་ཆེན་པོའི་དགེ་བསྙེན་འཕགས་པ་སྤྲེལ་སྒོམ་དང༌། སྒྲོལ་མའི་སྤྲུལ་པ་བྲག་སྲིན་མོ་འདུས་ཏེ། རིགས་དྲུག་ནས་འཕོས་པའི་ལས་ཅན་གྱི་འགྲོ་བ་དྲུག་སྲས་སུ་བསྐྱེད་པ་ལས་མང་པོར་འཕེལ་ནས་བློ་ལྡན་རང་བཞིན་བཟང་བ་རྣམས་ཕའི་རིགས་དང༌། གཤིས་ངན་སྤྱོད་པ་གྱོང་བ་རྣམས་མའི་རིགས་སུ་བྱིན་གྱིས་བརླབས། དེ་དག་ལས་རུས་ཆེན་སྡེ་ལྔ། རེ་རེ་བཞིན་གྱེས་པའི་རྣམ་གྲངས་མང་པོ་དང་བཅས་བོད་ཁམས་མཐའ་དབུས་ཀྱི་མི་རྣམས་རིམ་གྱིས་མཆེད། དེའང་བོད་ལ་བོད་དང༌། བོད་ཆེན་པོ་གཉིས་ལས། བོད་ཡུལ་དབུས་ཀྱི་རྒྱལ་ཁམས། དབུས་ཁྲི་སྐོར་དྲུག །གཙང་ཁྲི་སྐོར་དྲུག །ཡར་འབྲོག་ཁྲི་སྐོར་གཅིག་སྟེ་སྡེ་ཁྲི་སྐོར་བཅུ་གསུམ། སྐད་ཆོས་སྐད་དུ་སྨྲ། ཡོན་ཏན་གང་ཆེའི་སྐྱེ་བོ་འཚོགས། རིགས་གང་མཐོའི་ཆེ་དགུ་གནས། མཐའ་བཞིའི་ནོར་སྣ་འདུ། ཕྱོགས་བཞིའི་མི་སྣ་འཛོམ། འཇིག་རྟེན་ལུགས་ཀྱི་བསྟན་བཅོས། བོད་རྗེ་གོང་མའི་ཡིག་ཚང༌། ཁྲིམས་སྲོལ་ཡུལ་དུས་ཀྱིས་བསྒྱུར་བའི་ཁྱད་པར་
སོགས་ལ་མཁས་ཤིང་མཐོང་རྒྱ་ཆེ། སྐྱེས་བུའི་ལུས་ཀྱི་རྩལ་གསུམ་ཞེས་མཐེབ་ཀྱིས་ཤ་ནོན་པ། རྐྱལ་གྱིས་ཆུ་ཆེན་བརྒལ་བ། ཡར་རྩལ་བྱ་ལ་འགྲན་པ་རྣམས་དང༌། ལོ་རྒྱུས་ཀྱིས་དགེ་ཐོན་པ། གཏམ་གྱི་བཞད་གད་ཐོན་པ། ཤགས་ཀྱིས་ཕ་རོལ་གནོན་པ་སྟེ་ངག་གི་རྩལ་གསུམ། མཛངས་ལ་བློ་འགྱུ་བ། དཔའ་ལ་སྲན་ཚུགས་པ། ཁ་གསལ་ཞིང་གཏིང་མི་རྟོགས་པ་རྣམས་ཡིད་ཀྱི་རྩལ་གསུམ་སྟེ་ཕོ་རྩལ་སྣ་དགུ་དང༌། གཏམ་ཡིག་རྩིས་གསུམ། མདའ་རྡོ་མཆོང་གསུམ། བང་རྐྱལ་ཤེད་གསུམ་སྟེ་རྩེད་མོ་སྣ་དགུ་སོགས་སྒྱུ་རྩལ་གྱི་ཤེས་པ་མང་པོས་རང་སྲིད་འཛིན་མཁས་ཤིང༌། གཞན་སྡེ་འདུས་མཁས། བོད་ཁམས་ཕན་བདེའི་རྩ་ལག་ཆོས་འཁོར་རྣམ་གསུམ་སོགས་ལ་ཞབས་ཏོག །སངས་རྒྱས་བསྟན་པའི་རྒྱ་མཚོ་ཆོས་སྡེ་རྣམ་བཞི་སོགས་ལ་བསྙེན་བཀུར། འཕགས་ཆེན་སྤྲུལ་པའི་རྒྱལ་པོ་རྣམས་ཀྱི་དགེ་བཅུའི་བཀའ་ཁྲིམས་ལ་བརྩི་འཇོག་སོགས་ལས་ཐབས་ཆོས་ཕྱོགས་སུ་སྨིན་ཅིང༌། ལག་རྗེས་ཆོས་ལ་ཆེ་བས་དབུས་གཙང་ཆོས་ལྡན་གྱི་ཡུལ་གྲུར་གྲགས་པ་དོན་ལ་གནས། བོད་ཆེན་པོ་སྟེ་མདོ་ཁམས་ལ། ཁམས་སྟོད། བར་ཁམས། མདོ་སྨད་དེ་གསུམ་པོ། ས་ཁ་རྒྱ་ཆེ། ལུང་པ་ཕུ་ཐག་རིང༌། མི་སྡེའི་རྣམ་གྲངས་མང༌། མི་རིགས་དང་སྐད་རིགས་མི་གཅིག །ཆ་ལུགས་དང་སྤྱོད་ཡུལ་མི་འདྲ་བའི་སྡེ་ཤོག་ཐ་དད། ལ་ལ་ཐང་མ་ལྟར་བརྡལ་ཆེ། ལ་ལ་ཚོམ་བུ་ལྟར་སྤུངས་
ལེགས། གང་ཡང་དབྱར་ཁའི་མེ་ཏོག་ལྟར་སྣ་ཚོགས་སུ་བཀྲ་བའི་ཚུལ་དུ་ཡོད་པ་ལས། མདོ་ཁམས་ཡུལ་གྱི་ལྟེ་བ། དགུ་གླིང་སའི་མདུད་འཛོམ། སྡེ་དགེ་བྱང་ཆུབ་སེམས་དཔའི་མངའ་རིས་ལ། ལྷོ་རོང་སྡེ་ཁང་ཞིང་ཅན་གྱི་བདག་པོ། དཔའ་མཛངས་ཡ་རབས་རྒྱུད་ལས། རྒྱལ་ཁྲིམས་ཀྱི་ལུགས་ཤེས་ཤིང༌། སྤྱོད་པ་སོ་ཟིན་པ། གོང་རྗེའི་མདུན་བློན་དུ་འོས་ཤིང༌། སྡེ་རང་ཐོབ་ཀྱི་ཆུས་ཚུགས་ཐུབ་པའི་རྫོང་དཔོན་ཉི་ཤུ་རྩ་ལྔ། བྱང་འབྲོག་སྡེ་ཤོག་ཆེན་བཅུ་གཉིས་ཀྱི་བདག་པོ། གདུང་ཞལ་དཀར་ཅན་གྱི་མི་རྒྱུད། མཛངས་ལ་བློ་བརྟན་པ། རྗེ་ལ་སྙིང་ཉེ་ཞིང༌། འབངས་ལ་ཁྲེལ་གཞུང་ཆེ་བའི་དཔོན་ཁག་སུམ་ཅུ་སོ་ལྔ། དེ་དག་གང་ཡང་ཆོས་ཀྱི་རྒྱལ་པོ་རིམ་བྱོན་རྣམས་ཀྱིས་ལེགས་པར་བསྐྱངས་པས་མི་ཐམས་ཅད་རང་བཞིན་གྱིས་དུལ་ནས། རྗེ་བྱམས། འབངས་སྐྱིད། ཡུལ་འཇམ། རྒྱལ་ཁམས་རྒན་མོ་གསེར་ཁུར་ལྟ་བུར་སྤྱོད་པས་ཕྱུག་པོས་སྐྱོང་སླ། མེད་པོས་བཙལ་སླ། སློང་མོ་བས་རྙེད་སླ། མི་ལ་མཁས་པ་མང༌། ཡ་རབས་ཀྱི་ལུགས་སྲོལ་ཤེས། མི་ཆོས་ལ་ཤེས་སྒོ་ཡངས། ལྷ་ཆོས་ལ་གོ་བ་བཟང༌། རིགས་གནས་ལ་རྣམ་དཔྱོད་ཞིབ། སྤྱོད་པ་ཁྲིམས་ལུགས་དང་མཐུན། ཡོན་ཏན་ཅན་གྱི་རྒྱལ་ཁམས་སུ་བྱུང་བ་ལས། ལྷོ་རོང་གི་བྱེ་བྲག་གདུང་རྒྱ་མཁར་སྲས་པོའི་རྫོང་འོག་སྡེ་ཀུ་སེ་རྒྱལ་མོ་ཚོ་དྲུག །དེའི་ནང་གསེས་ཀུ་སེ་སྨད་པའི་མི་རིགས། ཁ་ཆོས་འདོན་ལ་མཁས་པ།
ལག་ཡིག་རིགས་ལ་བྱང་བ། བློ་རིག་པ་ལ་གོམས་པ། སྡེ་དགེ་ཚོགས་རྒྱལ་རིམ་བྱོན་རྣམས་ཀྱི་བཞེད་སྲོལ་སྐྱོང་བ། ཁྱུང་པོ་གཡུ་ཁྲི་སོགས་སྔོན་གྱི་བཟོ་བོ་འཕྲུལ་གྱི་རྣམ་དཔྱོད་ཅན་རྣམས་ཀྱི་ལག་རྒྱུན་འཛིན་པ། བཀའ་བསྟན་འགྱུར་རོ་ཅོག་གི་བསྟན་སྲོག་མི་ནུབ་པའི་སྲོག་ཤིང་འཛུགས་པ། རྟེན་བཞེངས་ལ་བྱས་པ་ཆེ་བས་རྗེའི་ཐུགས་སུ་འཐད་པ། ལོངས་སྤྱོད་བཟོ་གནས་ཀྱིས་འགྲུབ་པས་རྐུན་ཇག་གི་སྲོལ་ངན་ཉུང་བ། རྩལ་འགྲན་ཡོན་ཏན་ལ་བྱེད་པས་ལོ་བཅུའི་བྱིས་པ་ཡན་ཆད་བསླབ་ཤེས་མཁན་པོར་འགྲོ་བ། ཨེ་ཡུལ་རིག་པའི་འབྱུང་གནས་ལྟ་བུའི་མི་སྡེ་སྟེ་འོག་ན་འབངས་ཀྱི་མི་རབས་ཞེས་བྱ། ཡུལ་སྡེའི་ཆགས་ཚུལ་ལྟར་བཤད་ན། འཇིག་རྟེན་དང་པོར་ཆགས་དུས་འབྱུང་བཞིའི་ཁམས་རབ་ལས་རི་རབ་རིན་ཆེན་བཞིའི་རང་བཞིན་དང༌། འབྲིང་ལས་གསེར་གྱི་རི་བདུན་གསེར་འབའ་ཞིག་ལས་བརྩམས་པ་གཉིས་མཐོ་རིས་ལྷའི་ཡུལ་དུ་བྱུང༌། ཁམས་ཐ་མ་ས་རྡུལ་ལས་གླིང་བཞི་མིའི་ཡུལ་དུ་གྲུབ་སྟེ། ཁམས་རབ་དང་འདྲེས་པའི་རྟེན་འབྲེལ་ལས་རིན་པོ་ཆེའི་འབྱུང་ཁུངས་མང་བར་བྱུང༌། གླིང་བཞིའི་ནང་ནས་ལྷོ་གླིང་ནམ་མཁའ་སྔོན་པོའི་ཁེབ་འོག །ལོངས་སྤྱོད་ཛམ་བུ་་ཤིང་ཏོག་མཚོར་ལྷུང་བ་གསེར་དུ་འགྱུར་བའི་ཆ་ལས་ཛམ་བུའི་གླིང་དུ་མིང་བཏགས། གླིང་འདིར་བསྐལ་བཟང་གི་སངས་རྒྱས་སྟོང་འབྱོན་པས་གླིང་གཞན་ལས་ཁྱད་པར་འཕགས། དེ་ལ་ཡུལ་ཆེན་ཡུལ་ཕྲན་གྲངས་ཀྱིས་མི་ཆོད་པ་ཡོད་པའི་ནང་
ནས་མཆོག་ཏུ་གྱུར་པ་རྒྱ་གར་འཕགས་པའི་ཡུལ་ན་བྷང་ག་ལ་དང་ཨོ་ཌི་བི་ཤ་དང་ཁ་ཆེ་སོགས་རེ་རེ་བཞིན་མི་ཁྱིམ་འབུམ་ཕྲག་མང་པོ་དང་བཅས་པ་དང༌། འཕགས་ཡུལ་དངོས་ལ་མི་གཏོགས་ཀྱང་དེའི་ཕྱོགས་སུ་བསྡུ་བ་གསེར་གླིང་དང་སིང་ག་ལའི་གླིང་སོགས་བགྲང་དཀའ་བ་ཡོད་ཀྱང་གཙོ་བོར་གྱུར་པ་ནི་ཝ་ར་ཎ་སི། ཡངས་པ་ཅན། མཉན་ཡོད། གནས་བཅས། ཙམ་པ་ཀ༌།རྒྱལ་པོའི་ཁབ་སྟེ་ཡུལ་དབུས་ཀྱི་གྲོང་ཁྱེར་ཆེན་པོ་དྲུག་ཏུ་གྲགས། དེ་དག་གི་དབུས་ན་སྟོན་པ་མངོན་པར་བྱང་ཆུབ་པའི་གནས་རྡོ་རྗེ་གདན་བྱང་ཆུབ་ཤིང་གིས་བརྒྱན་པ་དང༌། ནུབ་ཨོ་རྒྱན་མཁའ་འགྲོའི་གླིང་ན་རང་བྱུང་ཧེ་རུ་ཀའི་ལྷ་ཁང་སོགས་ངོ་མཚར་ཅན་མང་པོ་དང༌། དཔལ་འབྱོར་ལོངས་སྤྱོད་ཀྱི་ཁྱད་པར་ལྷ་ཡུལ་ལ་འགྲན་པ་ཡོད། དེ་ལས་བྱང་གི་ཕྱོགས་ན་གནས་པ་བོད་ཁ་བ་ཅན་གྱི་ཡུལ་གྲུ། རི་ཐམས་ཅད་གངས་ཀྱིས་གཡོགས་པ། ཆུ་ཐམས་ཅད་བསིལ་ལ་དྭངས་པ། སྔོ་ཐམས་ཅད་སྨན་དུ་སྐྱེ་བ། རི་བྲག་ལ་སྤྲུལ་པའི་རང་བྱོན་འབྱོན་པ། ཚད་པའི་དཔལ་ཆུང་བ། གདུག་པའི་སྲོག་ཆགས་ཉུང་བ། དུས་བཞིའི་རྣམ་འགྱུར་གསལ་བ། ཡུལ་བཀོད་སྣ་ཚོགས་སུ་བཀྲ་བ་སྟེ། སྟོད་མངའ་རིས་ཞང་ཞུང༌། བྲུ་ཤ༌།པུ་རང་སོགས་སྐོར་གསུམ་ལ་དབྱེ་བ་དགུ་རྫིང་གི་ཚུལ་དང༌། བར་དབུས་གཙང་གཉིས་ཀྱི་དབུས་ན་དབུ་རུ་དང་གཡོ་རུ་གཉིས། གཙང་ན་གཡས་རུ་དང་རུ་ལག་གཉིས་ཏེ་རུ་བཞི་ཡུར་བའི་ཚུལ། སྨད་མདོ་
ཁམས་ཚ་བ་སྒང༌། སྤོ་འབོར་སྒོང༌། འབྲི་རྫ་ཟལ་མོ་སྒང་སོགས་སྒང་དྲུག་གི་ཁོངས་སུ་ཆུད་པ་ཞིང་གི་ཚུལ་ཏེ། དེ་དག་ལ་ལྷ་གཅིག་ཆུའི་པདྨས་སའི་དཔྱད་གཟིགས་པས་སྲིན་མོ་གན་རྐྱལ་དུ་ཉལ་བའི་དབྱིབས་སུ་འདུག་ནས་དེའི་ཁ་གནོན་དུ་བཞེངས་པའི། མཐའ་འདུལ། ཡང་འདུལ། རུ་གནོན་གྱི་ལྷ་ཁང་བཞི་གསུམ་བཅུ་གཉིས་དང༌། དབུས་ན་ལྷ་ལྡན་དགའ་བཞི་འཕྲུལ་གྱི་ལྷ་ཁང་ངམ། དཔལ་ར་ས་འཕྲུལ་སྣང་གི་གཙུག་ལག་ཁང༌། འཕགས་པ་ཐུགས་རྗེ་ཆེན་པོའི་བདེན་སྟོབས་ཀྱིས་རྒྱ་མཚོ་བསུབ་པའི་སྟེང་ན་ཆགས་ཤིང༌། རྫུ་འཕྲུལ་སྤྲུལ་པའི་བཟོ་བོས་དངོས་སུ་བཞེངས་པ། རྟེན་གཙོ་ཇོ་ཤཱཀ་རྣམ་གསུམ་དང་འོད་ཟེར་འཕྲོས་པའི་ལྷ་བརྒྱད་སོགས་སངས་རྒྱས་སྤྲུལ་པའི་སྐུ་དངོས་དང་ཁྱད་པར་མེད་པ་མང་པོ་བཞུགས་པས། དགའ་ལྡན་ལྷ་ཡུལ་ན་ཡང་ངོ་མཚར་གྱི་གླེང་གཞིར་བྱེད་པ། རྒྱ་ཕིབས་ཀྱི་དབུ་རྩེ་མཐོང་བས་ཀྱང་རྒྱུད་ལ་བྱིན་རླབས་འཇུག་པ་དང༌། དེའི་ལྷོ་རྒྱུད་གཡོ་རུའི་ས་ཆ་ན་དཔལ་བསམ་ཡས། སྟེང་ཁང་རྒྱ་གར། བར་ཁང་ལི་ཡུལ། འོག་ཁང་རྒྱ་ནག་གི་ལུགས་སུ་བཞེངས་པའི་ལུགས་གསུམ་མི་འགྱུར་ལྷུན་གྱིས་གྲུབ་པའི་གཙུག་ལག་ཁང༌། གླིང་བཞི། གླིང་ཕྲན། ཡཀྵ་ལྟག་འོག། ཇོ་མོ་གླིང་གསུམ་དང་བཅས་པ། རྟེན་གཙོ་བྱང་ཆུབ་ཆེན་པོ་སོགས་སྐུ་གསུང་ཐུགས་རྟེན་བསམ་གྱིས་མི་ཁྱབ་པ་བཞུགས་ཤིང༌། མཁན་སློབ་ཆོས་གསུམ་ཞལ་འཛོམ་ནས་ས་རབ་ཏུ་གནས་པའི་མེ་
ཏོག་འཐོར་བས་ཉི་འོག་གི་རྒྱལ་ཁམས་ན་བྱིན་རླབས་ཆེ་བ། མཐོང་ཐོས་ཀྱི་འབྲེལ་བ་ཐོབ་ཚད་ཕྱིར་མི་ལྡོག་པའི་སྐལ་ལྡན་དུ་བྱས་པ། དེ་སོགས་རྟེན་གསུམ་དང་གཙུག་ལག་ཁང་གི་རྣམ་གྲངས་མཐའ་ཡས་པ་ཡོད། གཞན་ཡང་སྟོད་མངའ་རིས་ན་གངས་བྲག་ཉི་ཤུ། བར་དབུས་གཙང་ན་སྒྲུབ་གནས་ཉེར་གཅིག །སྨད་མདོ་ཁམས་ན་གནས་ཆེན་ཉེར་གཅིག །གངས་ཆེན་བཞི། གྲགས་པའི་མཚོ་ཆེན་བཞི། སྦས་ཡུལ་རྒྱལ་པོ་གསུམ། ལུང་ལྔ། གླིང་དྲུག །ཡུལ་ཕྲན་བརྒྱ་རྩ་སོགས་ཡོད། སྟོད་སྨད་ཀྱི་ལྷོ་རྒྱུད་ཐམས་ཅད་དྲོ་ལ་འབྲུ་སྨིན། ཡུལ་གྱི་དགེ་བཅུ་ཚང་ཞིང་སའི་བཙན་བརླིང་འཛོམ། མཁར་ཁང་དང་རྨོས་ཞིང་འབྲེལ་བར་ཁྱབ། བྱང་རྒྱུད་ཐམས་ཅད་བསིལ་ལ་དཀར་བཅུད་འཕེལ། སྤྱོད་ཡུལ་ཁྱོན་ཡངས་ཤིང༌། ཕྱོགས་བཞིའི་འགྲོན་ལམ་བདེ། སྤྲ་ཁྱིམ་དང་ཕྱུག་འབྲོག་སྤེལ་མས་འཛིན། གང་ཡང་སའི་དཔྱད་བཟང་དགུ་འཛོམ། གྲུབ་ཐོབ་ཀྱི་གདན་ས་དང་དགོན་གནས་མང་པོས་བརྒྱན་པ་སྟེ། རོང་འབྲོག་སྦྲ་དང་ཆོན་ཐག་གི་ཚུལ། དགོན་གྲོང་གོས་དང་གོང་བའི་ཚུལ་དུ་ཆགས། རང་ཡུལ་ཀུ་སེ་ལུང་པ་ལ་དཔེར་བརྗོད་ན། སྔོན་སློབ་དཔོན་བཻ་རོ་ཙ་ན་ཁམས་རྒྱལ་མོ་རོང་ནས་བྱོན་དུས་ཀུ་སེ་འཕགས་ལུང་ཐང་ཞེས་པར་ཡི་གེ་བྲི་བའི་ཕྱག་སྨྱུག་ལྷུང་བ་ལས་གསེར་གྱི་ལྗང་བ་སྐྱེས་པའི་ཤུལ་དུ་ཕྱིས་དགོན་གནས་བཏབ་པ་ལ་དེང་སང་ཡང་གསེར་ལྗང་དགོན་དུ་གྲགས་ཏེ། ཡུལ་འདིར་ཡི་གེའི་རིག་པ་ལ་མཁས་པ་མང་དུ་འབྱུང་
བ་དེའི་བྱིན་རླབས་ཀྱིས་ཡིན་པར་གླེང༌། གཞན་ཡང་རྨུགས་སང་གི་གནས་ན་བྱ་ཁྱུང་རང་བྱོན་གྱི་ལྟད་མོ་དང༌། རྨུ་བ་ཆོས་ཉིད་རྡོ་རྗེ་ཟེར་བའི་གྲུབ་ཐོབ་ཆེན་པོ་ཅིག་གི་སྒྲུབ་གནས་རྨུ་ཕུག་སོགས་དང༌། རོང་བཙན་ཁ་བ་དཀར་པོའི་གནས་ལག་ཏུ་གྲགས་པ་སྒམ་བུ་གནས། རྗེ་གྲུབ་ཐོབ་ཆེན་པོས་བྱིན་གྱིས་བརླབས་པར་གྲགས་པའི་རྡོ་ཟམ་ཡ་མཚན་ཆེ་བ་སོགས་ངོ་མཚར་བའི་མཚན་རྟགས་མང་པོས་ཁྱད་པར་དུ་མཚོན་ཏེ། མདོར་ན་བསིལ་ལྡན་གངས་རིས་བསྐོར་བའི་ཡུལ་འདི་སྔོན་རྒྱལ་བ་ཉིད་ཀྱིས་འཕགས་པ་འཇིག་རྟེན་དབང་ཕྱུག་ལ་བཀས་གཏད་པ་ཐུགས་རྗེ་ཆེན་པོའི་རྣམ་འཕྲུལ་རྒྱུན་མི་འཆད་པར་འབྱུང་ཞིང༌། མདོ་རྒྱུད་ཐམས་ཅད་ཀྱི་སྙིང་པོའི་ཟབ་དོན་ཡི་གེ་དྲུག་ཏུ་བསྡུས་ནས་གདུལ་བྱའི་སྙིང་ལ་རྒྱས་བཏབ་པས་བྱིས་པ་ལོ་གསུམ་གྱི་དུས་ནས་མ་ཎི་པདྨེ་རང་ཤེས་སུ་འོང་བའི་ངོ་མཚར་ཅན། རིའི་རྒྱལ་པོ་པོ་ཏ་ལ་དང་རྣམ་དབྱེར་མ་མཆིས་པའི་ཞིང་མཆོག་ཁྱད་པར་ཅན་ཡིན་པས་དེའི་ཡོན་ཏན་དང་ལོ་རྒྱུས་མཐའ་དག་བརྗོད་པར་དཀའ་ཡང་ད་དུང་མ་འོངས་པའི་གནས་སྐབས་ཀུན་ཏུ་བཀྲ་ཤིས་དགའ་སྟོན་དང་འབྲེལ་བར་ཡང་ཡང་གླེང་བའི་རྟེན་འབྲེལ་བྱེད། ༈ བྱས་ཤེས་བཀའ་དྲིན་ཆེ་བའི་ལོ་རྒྱུས་ཀྱི་དབང་དུ་བཏང་ན། མ་དག་པའི་ཞིང་དུ་སྙིགས་མ་ལྔས་གདུངས་པས་ཉམ་ཐག་པའི་སེམས་ཅན་རྣམས་ལ་ཐུགས་རྗེས་གཟིགས་ཏེ། མཐོང་གྲོལ་གཟུགས་སྐུའི་ཉི་མ་བསོད་ནམས་བརྒྱ་བའི་
མཚན་དཔེ་ཅན་དངོས་སུ་བྱོན། གདུལ་བྱ་མཆོག་དམན་མེད་པར་རྗེས་སུ་བཟུང༌། ཉེ་རིང་མེད་པར་ཆོས་བསྟན་ནས་འཁོར་བ་དང་ངན་སོང་གི་སྒོ་བཅད། མཐོ་རིས་དང་ཐར་པའི་འཇུག་ངོགས་ལམ་པོ་ཆེ་བཞིན་དུ་གསལ་པོར་བཏོད། ཞལ་དངོས་སུ་མཇལ་བའི་སྐལ་པ་མེད་ཀྱང་ཐོས་པ་དོན་ལྡན་གྱི་མཚན་དང་གསུང་གི་བདུད་རྩིའི་རྒྱུན་བཟང་དེང་སང་གི་འགྲོ་བས་ཀྱང་ལོངས་སྤྱོད་དུ་ཡོད་པར་མཛད་པས་སྟོན་མཆོག་རྫོགས་པའི་སངས་རྒྱས་དེའི་བཀའ་དྲིན་སྟོང་གསུམ་གསེར་གྱིས་བཀང༌། གསེར་ཤིང་ནོར་བུས་སྤྲས་ཏེ་ཕུལ་ཡང་ཆ་ཤས་ཙམ་ཡང་གཞལ་བར་མི་ནུས་ལ། དེའི་རྗེས་སུ་དམ་པའི་ཆོས་འཆད་རྩོད་རྩོམ་གསུམ་གྱི་སྒོ་ནས་ལེགས་པའི་ལམ་བཟང་གསལ་བར་མཛད་དེ་གདུལ་བྱའི་ལྷག་མ་བསྐྱངས་པས་ཛམ་གླིང་རྒྱན་དྲུག་མཆོག་གཉིས་སོགས་འཕགས་ཡུལ་པཎ་གྲུབ་ཀྱི་ཕྲེང་བ་རྣམས་ཀྱང་སྐུ་དྲིན་ཆེ། དེ་ནས་བོད་ཡུལ་མུན་པའི་གླིང་དུ་དཀོན་མཆོག་གསུམ་གྱི་སྒྲོན་མེ་སྤར། མངའ་རིས་བདེ་སྐྱིད་ལ་བཀོད། འགྲོ་བའི་ཁ་ལོ་གྱེན་ལ་བསྒྱུར་བས་ཆོས་རྒྱལ་མེས་དབོན་རྣམ་གསུམ་སོགས་སྔོན་གྱི་མི་རྗེ་སེམས་དཔའ་ཆེན་པོ་དེ་རྣམས་ཀྱང་སྐུ་དྲིན་ཆེ། ཕྱོགས་འདིའི་བསྟན་པ་ལ་སྡང་བའི་ཡུལ་བདག་ལྷ་སྲིན་སྟོབས་པོ་ཆེ་རྣམས་དམ་འོག་ཏུ་བཙུད། ལྷ་མིའི་བསོད་ནམས་ཀྱི་ཞིང་དུ་ཆོས་གཞི་གཙུག་ལག་ཁང་བཞེངས། བསྟན་རྩ་རབ་བྱུང་དང་གསང་སྔགས་འཛིན་པའི་སྡེ་བཙུགས། སྐལ་ལྡན་གྱི་འགྲོ་བ་སྨིན་གྲོལ་ལ་བཀོད། སྐལ་མེད་
ལ་ཐར་པའི་ས་བོན་བཞག་སྟེ་རྒྱལ་བའི་མཛད་པ་བསྒྲུབས་པས་ཨོ་རྒྱན་སངས་རྒྱས་གཉིས་པ་སོགས་སྤྲུལ་པའི་ལོ་པཎ་ཆེན་པོ་རྣམས་ཀྱང་སྐུ་དྲིན་ཆེ། དེ་རྣམས་ཀྱི་མཛད་པའི་འཕྲོ་བསྐྱངས་ཏེ། ཉན་བཤད་སྒོམ་སྒྲུབ་ཀྱིས་རྒྱལ་བའི་བསྟན་པ་བཟུང་ཞིང༌། རྙེད་བཀུར་དཔུང་སྟོབས་ཀྱིས་ཆོས་དབུ་འཕང་མཐོ་བར་བྱས་ཏེ། གངས་ཅན་ཕན་བདེའི་སྲོག་མཁར་གཞི་བརླིང་བར་མཛད་པས་ས་དགེ་བཀའ་རྙིང་གི་བསྟན་འཛིན་དམ་པ་རྣམས་དང༌། གཞུང་ས་དགའ་ལྡན་ཕོ་བྲང་བ་དང༌། སྡེ་དགེ་ཆོས་རྒྱལ་རིམ་བྱོན་རྣམས་ཀྱང་སྐུ་དྲིན་ཆེ། མངོན་མཐོའི་རྟེན་བཟང་བྱིན་ནས་དཀོན་པ་བརྒྱ་དང་དཀའ་བ་སྟོང་གིས་གཅེས་པར་བསྐྱངས་པའི་དྲིན་ཆེན་ཕ་མ་དང༌། ས་གདན་ཐོག་གཅིག་ཏུ་འགྲོགས་ཏེ། སྐྱིད་ན་མཐུན་འསྦྱོར་ལེགས་སྤེལ། སྡུག་ན་སེམས་གསོ་སྐྱོ་གྲོགས། སྐྲག་ན་སྐྱེལ་མ་ར་མདའ། སྟེང་གི་སྐྱིབས་དང༌། རྒབ་ཀྱི་སྐྱོར་བྱས་པས་ཕུ་ནུ་ཉེ་མཛའ་རྣམས་ཀྱང་དྲིན་ཆེ། དེ་ཐམས་ཅད་ཀྱི་དྲིན་ལས་སྔོན་ནས་ཁར་སང་གི་བར་དུ་དཔལ་གྱི་ཉི་མ་སྣུམ་ལ་བག་དྲོ་བ་ཡང་དང་ཡང་དུ་ཤར་བ་ཡིན་ལ། ཚུལ་དེ་བཞིན་དུ། གསར་ཚེས་གནམ་ལོ་རྒྱལ་པོའི་འཛུམ་ཞལ་ཐོག་མར་མཐོང་བའི། དུས་བཟང་འདིར་ཡང་ཡུལ་མི་ཐམས་ཅད་བསོད་ནམས་དགའ་སྟོན་གྱི་ལས་ལ་འདུས་ཏེ། བདེ་ལ་ཡངས་པའི་གདན་བཏིང༌། འགྲིགས་ལ་རིང་བའི་གྲལ་བསྒྲིགས། དཀར་དམར་གྱི་ཟས་
སྣ་གཡོས་སུ་བྱས། ཇ་ཆང་གི་སྟོན་མོ་སྐྱེམ་དུ་སྦྱར། དྲང་སྲོང་མགྲོན་འགྱེད་པ་ལྟ་བུའི་ལྷ་མཆོད་མི་མཆོད་ཡུལ་དུས་དང་འཚམས་པར་སྤེལ་ཞིང༌། སྲིད་ཞིའི་དགེ་ལེགས་ཐམས་ཅད་ཀྱི་འབྱུང་གནས་དཀོན་མཆོག་གསུམ་དང༌། དཀོན་མཆོག་མཆོད་པའི་སྦྱིན་བདག །བསྟན་པ་དར་བའི་ཡུལ་གླིང་དང་བཅས་པའི་ལོ་རྒྱུས་ལ་ཁོག་བཅོལ་ཏེ། ཆོས་དང་བཀྲ་ཤིས་ཀྱི་གཏམ་སྙན་ལ་འབྲེལ་ཆགས་ཤིང་སྐབས་སུ་བབས་པ་བགྱིས་ནས། ཕུན་ཚོགས་ཆོས་ལྡན་གྱི་བདེ་བའི་དགའ་སྟོན་རྒྱ་ཆེ་ལ་རྒྱུན་རིང་བར་འབྱུང་བའི་རྟེན་འབྲེལ་བསྒྲིགས་པ་ལེགས་ལམ་དུ་འགྲིགས་ནས། ལྷ་བདེ། ཀླུ་ཞི། ལོ་ལེགས། འབྲུ་འཕེལ། མི་ཕྱུགས་སྐྱིད་དར་འཛོམ། དམག་འཁྲུགས་དང་ནད་ཡམས་མེད། རྗེའི་མངའ་ཐང་འཕེལ། མི་སྡེ་ནང་མཐུན། ཡུལ་ཁམས་ཆོས་ལ་སྤྱོད། ཐུབ་པའི་བསྟན་པ་དར། བསྟན་འཛིན་སྐུ་ཚེ་རིང༌། དགེ་འདུན་གྱི་སྡེ་འཕེལ། ཕྱོགས་དུས་གནས་སྐབས་ཐམས་ཅད་དུ་བཀྲ་ཤིས་རྫོགས་ལྡན་གྱི་འབྱོར་པ་ཆར་བཞིན་འབབས་པའི་རྟེན་འབྲེལ་སྨོན་ལམ་ཞུ། བློ་ཆུང་སྦྱང་བ་དམན་ལ་གཏམ་སྒོ་དོག །གཞོན་དུས་མི་ཁྱུར་མ་སོང་གབ་ནས་བསྡད། །རྒས་དུས་ཡོག་ཚད་ཟོས་ནས་ཉལ་ཞིང་གཉིད། །བདག་འདྲས་ལུགས་གཉིས་གཏམ་གཞུང་ཇི་ལྟར་འཆད། །འོན་ཀྱང་བན་བུན་རྣམ་རྟོག་སྤྲ་བའི་མེ། །བསྐུལ་ཚིག་སྦུད་པས་བུས་ནས་ཆེར་མཆེད་དེ། །སྣ་ཚོགས་དབྱིབས་སུ་གྱུར་པའི་མེ་ལྕེ་འདིས། །ཕྱོགས་ཀུན་བཀྲ་ཤིས་སྣང་བས་
འགེངས་གྱུར་ཅིག །ཅེས་པའང་རྐོས་མཁན་རྒྱ་མཚོ་ནས་ལོ་གསར་དགའ་སྟོན་སོགས་དང་འབྲེལ་བའི་གཏམ་ལ་སྙན་ངག་གི་བརྡས་མ་བསྒྲིབས་པའི་ཤིན་ཏུ་ཁ་གསལ་བ་ཞིག་བྲིས་ཞེས་བསྐུལ་བའི་ངོ་མ་བཟློག་བར་རྡོ་བ་བསྟན་ཉིས་སྨྲས་རིམ་བཞིན་བློ་གསལ་ཆོས་ཀྱི་གྲགས་པས་ཡི་གེར་བྲིས་པ་དགེ་བར་གྱུར་ཅིག །ལོ་གསར་དང་མ་འབྲེལ་ན་རྟགས་པར་བུད་པས་ཆོག །བླ་མའི་ལུང་འདོན་པའི་ཚུལ་དུ་མི་བྱ་བར། སྐད་ཆ་དཀྱུས་མ་ལབ་ལབ་བྱས་ནས་དལ་ལ་ཚིག་འབྲུ་གསལ་བར་བཤད། སྔོན་ནས་བྱང་ཆ་ཐོན་པར་བྱས་ཏེ་སྒྲ་ལོག་མི་ཟེར་ཞིང༌། སྔ་ཕྱིའི་གཅོད་མཚམས་མི་ནོར་བར་བྱའོ།། ༈ །།བྱ་བ་ལེགས་ཉེས་རང་ལ་ཡང་སྲིད་ཅིང་ཉེས་ཟིན་བཅོས་སུ་མེད་པས་གྱོད་བརྡལ་མ་མང༌། མཐའ་མ་ཅིར་འགྱུར་མི་ཤེས་པས་གཞན་ལ་བསྟོད་སྨད་དང་ང་བཟང་གི་ཁ་ཕོ་མ་སྔ། མིའི་རྒྱུད་ཚོད་ཚད་ཀྱིས་མི་ཐིག་ཅིང་འཁོན་གཞི་རང་རྩ་ནས་ལྡང་བས་གཉེན་ཉེ་བ་ཡིན་རུང་ཁ་མ་སོང་ན་ལག་རྒྱགས་པ་ལྟ་བུའི་ཐག་ཆོད་དབང་ཆེ་དང༌། འཕྲལ་དུ་གོ་མ་ཆོད་རུང༌། ཕུགས་སུ་བཟང་བྱེད་སུས་བྱེད་མི་ཤེས་པས། མཆན། བྲན་ཐ་མ་ལ་ཡང་འབར་འཐབ་དྲག་པོ། སྙིང་འདྲིས་ཀྱི་གྲོགས་པོ་ལའང་ཟེར་ཆོག་གི་ཚར་བཅད་མ་མང༌། མི་ལམ་དུ་མི་ཚུད་པའི་རྒྱུ་གཅིག་གཅེས་པ་ལང་ཤོར་ཡིན་པས་གཉེན་ལ་བྱམས་མ་ཐལ། དགྲས་བསྐོས་ཐང་དང་མི་མཐུན་པའི་སྡུག་ཡུས་དང༌། མི་འཚམས་པའི་གནོད་འཚེ་མ་བྱེད། ཡུས་ཅན་གྱི་མཇུག་མ་ཉེས་ཅན་དུ་འགྲོ་ཞིང༌། དགྲ་ལ་སྡུག་སྙིང་ཇེ་ཆེར་འགྲོ་བས་ཕར་བསྐོས་ཀྱི་མཇུག་མ་ཚུར་ལོག །སྐྱིད་སྡུག་དང་དལ་ཁོམ་གྱི་ཉམས་ལ་མི་ལྟ་བར་ཐོག་རྫིས་ཀྱི་མངག་གཞུགས་དང་སློང་མོ་མ་བྱེད།
འབངས་ཡིན་རུང་ཞེ་ལ་འཇོག་པ་ཡིན། དཔེ་ཁྲིམས་ངན་པ་གཞན་ལ་མ་སློབ། ལ་ཡོག་རང་ལ་འོང༌། གཙོ་བོར་གཏམ་མགོ་དང་གཏམ་རྔ་འཛུམ་ལ་ཞོག་ལ་སྐབས་ཀྱི་དགོས་དོན་གནད་ལ་ཕོག་པ་དང་རན་ལ་མཛེས་པར་གཏམ་ཤོད། ཁ་ངན་གྱིས་དགྲ་མི་ཐུལ་ཞིང་ཡུས་ཕར་ལ་འདྲེན་རྒྱུར་མཁོ་བས་དགྲ་ལའང་ཁ་འཇམ་དང་སྲན་བཟོད་ཆེ་བ་གྱིས། ནམ་ཕུགས་ཤགས་སུ་ཆེ། སྙིང་ཚུར་ལ་གཏོད་ན་ཤ་ཚ་ཕར་ལ་མ་བྱས་ན་སྙིང་རིང་དུ་ཤེས་ནས་ཁ་ཚུར་ལ་གྱུ་མཁན་མེད་པས་དྲང་གཏམ་ཟབ་མར་ཤོད། འོན་ཀྱང་མི་ལ་ཅིར་འོང་མི་ཤེས་ཤིང་རྒྱུས་ཡོད་དགྲ་རུ་སོང་ན་རང་མཚང་ཕྱིར་ལ་འདོན་པ་དང༌། མི་ཕལ་ཆེར་ཁ་མང་བས་རང་གི་རྒྱུས་མ་འཆད། མིའི་བྱམས་པ་ནམ་ཕུགས་རིང་བས་རང་འདོད་མ་ཆེ། སྔ་འདྲིས་གློ་གཏད་མི་འོང་བས་གྲོགས་ལ་གསར་ངས་མ་ཆེ། གསར་པའང་སྔ་མ་དང་རིགས་འདྲར་འགྱུར། སྤྱི་མི་དགྲ་རུ་མ་ལེན། འདོད་པ་ཅན་ལ་ནོར་རྫས་མ་བསྟན། སློང་ཡང་སྟེར་ནུས་ན་མ་གཏོགས་རང་གི་ནུས་པ་མ་བརྟགས་པར་ལར་རང་མཐོང་དང༌། གསར་འགྲོགས་ཆེ་བའི་གཉེན་པས་ཕྱི་ཐག་རིང་བའི་དགྲ་དགའ་གསུང༌། མཆན། མི་ཐུབ་དོ་བསྔོ་དང་མི་འགྲུབ་ལས་དགའ་མ་མང༌། སྤྲོ་ཐུང་ལ་ཀུ་རེ་མ་བྱེད། མི་བདེན་པ་ལ་ཤགས་མ་བྱེད། མི་ལ་དྲིན་ལན་མ་གསོད་བར་ཡུས་སུ་མ་འཇོག་བུ་ལོན་དང་འདྲ། གཞན་སྡུག་དུས་སྙིང་ཚིམ་གཏོང་བ་དང་རི་མགོ་གང་མཐོའི་ཉི་མ་མ་བྱེད། སྡུག་པོ་རང་ལའང་ཡོང༌། རང་སྡུག་དུས་སྲིད་ཅིང་སྐྱིད་རེས་གཞན་ལ་ཡང་འོང་བས་རང་སྐྱིད་པ་ངོམ་ཁྱེར་མི་བྱེད།
ཕར་བྱས་ལ་དྲིན་ཆེ་མ་འདྲེན། སྡུག་ཡུས་ཀྱིས་རང་དགེ་མི་ཐོན་ཞིང་བྱས་པ་ངོ་མེད་དུ་འགྲོ། དཔའ་སྐད་སྔ་བས་ཁེབ་ལྷག་པོ་མེད་ཅིང༌། ཁ་འཕང་དམའ་ན་རྗེས་ལ་མ་བྱུང་ཡང་སྐྱོན་ཆུང་བས་ཡོན་ཏན་ཁོང་དུ་སྦོས། མཆན་བུ། བཟང་ཁ་ཕོ་མ་འདོན། ཀུན་ལ་རྒྱུས་ཡོད། ངན་པ་ཆེ་སྐད་མ་འདོན། གཞན་གྱིས་ཁྲེལ་ཡོང༌། ཁ་ནས་མེད་སྐད་ཤོད། བསམ་བློ་གཏང་ས་རྗེས་ན་ཡོད་པས་དཔོན་བཅོལ་དུས་རང་འདོད་བསྐྱུང༌། གྲོས་ལེགས་དུས་ཚོད་ཟུངས། དབང་ཡོད་དུས་ཕམ་ཁ་ལོངས། རྒྱལ་ཁ་མིག་གིས་དེ་རིག་མ་བྱེད་པར་བདེན་གཞུང་གཙང་པོའི་མཇུག་མ་ལྟ་བུ་ཟུང༌། འཁོར་མང་དུས་མི་རྩིས་ཆེ་དགོས། སྐྱིད་དུས་མི་དང་བསྟུན་དགོས། དྲན་ཚད་མ་སྨྲ། སྨྲས་ཚད་ཐོག་ཏུ་ཁོལ། ཚད་མི་བཙན་ན་མིས་ཚད་མ་མི་བྱེད། ཁ་མང་ན་རང་གི་མདོ་འཆོར། མིའི་གྲོས་ཁྱུར་མི་ཚུད། མི་ཐམས་ཅད་དོགས་ཟོན་བྱེད་པས་སྙིང་ཉེ་མེད་པས་ཁ་སྡོམ། ཟས་ལ་ངོ་ཡོད། དངོས་པོ་དམན་པས་རྩིས་ཆེར་བསྲུང་རིན་མི་ཆོག་གིས་བྱིན། ཕྱིན་ཆད་ཀྱི་བསམ་བློ་སྔ་ནས་བཤད་ན་བར་ཆད་བྱེད་པའི་མི་མང་བས་བྱེད་མ་ཚར་བར་མི་གོ་བ་གྱིས། མ་བཤད་ན་ཕས་ཀྱང་མི་གོ་བས་བཤད་དགོས་པའི་གནད་དེ་ལྷུག་པར་ཤོད། ཕར་ལ་སྦྱིན་པ་བཏང་ན་ཚུར་ལ་མིའི་འཁོར་འདུ། སྟེར་བའི་ས་ལ་རྒྱུན་དུ་མི་འགྲོ། མིའི་སྣ་སུན་ནས་འགྲོ། གྲོས་ལ་ཐག་ཆོད་མ་སྔ། བཅོས་སུ་ཡོད། བསྐྱུར་དུ་བཏུབ། གཟབ་ཏུ་བཏུབ། འདི་ཕྱིན་ཆད་ཀྱི་བསམ་བློ་གསང་བ་ལའང་སྦྱོར། ཁ་ཉུང་དྲག་ན་མིས་གླེན་པ་དང་གཤིས་ངན་དུ་བརྩི་
ཞིང་ཀུན་དང་འབྲེལ་འཆད། མང་ན་རྒྱུས་ལོན་ནས་བརྩི་བཞག་ཆུང་བས་ཁ་གསལ་གཏིང་ཟབ་བྱེད།། ༈ །།ཚེ་དཔག་མེད་ལ་ན་མོ། དཔལ་གྱི་བཟང་མོ་ནི་སྐྱེས་བུ་འགའ་ཞིག་ལ་འོང་སྟེ། བཟང་ལ་བརྟན་ཅིང་ཟབ་པ་དང་མཛངས་པ་རྣམས་ཀྱིས་རང་དབང་མེད་པར་འདྲེན་ནོ། །རྒྱུད་འཇམ་ཞིང་མཉེན་པའི་བཟང་བས་ནི་གཅེས་པའི་ཐུ་བོར་བྱེད་ཅིང༌། མི་ཆོས་ཀྱི་ཡོན་ཏན་མང་པོའི་གཞི་འཛིན་ནོ། །དེའང་རང་གཞན་གྱི་ཕྱོགས་སོ་སོ་བ་དང༌། མཐོ་དམན་སོགས་ལ་བལྟས་པའི་ཕྱོགས་ལྷུང་དང་བྲལ་བར་བསྐྱང་ན་རྒྱལ་པོ་ས་ཀུན་སྙོམས་པའི་ཆོས་ཉིད་ལྟར་བདག་ཉིད་ཆེན་པོའི་ཆེ་རྟགས་སུ་འགྲོ། གཞན་གྱི་ལེགས་པ་མི་བཟོད་པས་ནི་ལེགས་བདེ་ཅིའང་མི་འཐོབ་ཀྱི། ཡིད་ཀྱི་གདུངས་པ་དང༌། ཡ་རབས་ཀྱིས་དཔྱ་བ་འཐོབ། རྒྱུ་མཚན་མ་བརྟགས་པར་མི་ཁྲོ་སྟེ། ཁྲོས་པའི་འོག་ཏུ་རིགས་མི་རིགས་བལྟ་བའི་གོ་སྐབས་ཁྲོ་བས་འགོག་གོ༌།དགྲ་ལའང་འཁྲུགས་པ་ལྷུར་མི་བླང་སྟེ། རང་བློའི་བདེ་བ་བསྲེག་པས་དགྲ་ལ་ཅིར་ཡང་མི་འགྱུར་རོ། །རྟག་ཏུ་རྩུབ་མོར་འབྱིན་པའི་ངག་ནི་ཁྭ་ཏའི་སྨྲ་བ་ལྟར་བརྙས་ལ། བརྒྱ་ལམ་ན་དགོས་པ་ཅན་གྱི་དྲག་པོའི་ངག་ནི་གཟི་རྣོ་ཞིང་བརྗིད་པ་ཡིན་པས། འཇམ་པོས་ནི་རྩུབ་མོའང་བརྒྱན་པར་བྱེད་དོ། །གཞན་གྱི་ཕུན་ཚོགས་ཏིལ་མར་ལྟར་བཙིར་ནས་བདག་ལ་སྦྱོར་བ་དང༌། བདག་གི་བདེ་བ་བགོ་བཤའ་མི་བྱེད་པའི་མི་ལ་འཁོར་མི་བསྟེན་ཅིང་བསྟེན་ཡང་དཀའ་བ་བྱེད་པར་མི་འགྱུར་ཏེ། འཇིག་རྟེན་ནི་བདེ་བ་འདོད་པའི་
ཕྱིར་རོ། །གཞན་གྱི་བྱས་པ་བརྗེད་ཅིང་བརྙས་པ་ནི་ཡ་རབས་ཀྱི་ནང་ན་སྣ་རྡུམ་ལྟར་སྣང་ཞིང་བྱས་པ་འགྲས་མེད་ཀྱི་ཞིང་དེ་སུ་ཡང་མི་རྨོའོ། །ཕར་བྱས་པ་མི་བགྲང་སྟེ། བྱས་ཤེས་ལ་དེ་བགྲང་མི་དགོས་ཤིང་མི་ཤེས་པ་ལ་བགྲང་ཡང་ཁྱད་དུ་གསོད། དེ་འདྲའི་ངག་དེས་རང་གི་དྲིན་དེ་ཉིད་ཆུས་ཡང་ཡང་བསིང་བའི་ཆང་བཞིན་ཉམས་པར་བྱེད་པས་སོ། །གྲོགས་ཀྱི་བྱ་བ་ཅུང་ཟད་རེས་སྲང་མདའི་མཐོ་དམན་ལྟར་དགའ་ཁྲོའི་རྣམ་འགྱུར་བསྟན་པར་མི་བྱ་སྟེ། དེ་དེ་ལ་མི་དགའ་བ་བརྒྱུད་མར་སྤེལ་བས་གློ་བ་རིང་དུ་འགྲོ་བའི་ཕྱིར་དང༌། ཨ་མྲའི་ཚིག་གུ་ལྟར་ཆུང་བའི་རང་གི་དེ་ཉིད་སྒྲོག་པ་ལ་མནའ་འདོར་བའི་ཕྱིར་རོ། །བྱ་བ་ལེགས་ཉེས་རང་ལའང་མཆི་ཞིང་ཉེས་ཟིན་བཅོས་སུ་མེད་པས་ཀྱང་གྲོགས་པོའི་བྱ་བ་ཉེས་པ་ལ་ཚོད་མི་ཤེས་པའི་ཚར་བཅད་མི་རིགས་སོ། །རང་ཉིད་ལ་ཡིད་རྟོན་ཅིང་སྐྱབས་སུ་རེ་བ་རྣམས་ལྷག་པར་བསྐྱང་དགོས་ཏེ། དེ་གཉིས་ལ་མི་བལྟ་བའི་མི་ལ་བསམ་པ་ཉེ་སའི་གཞི་མེད་པའི་ཕྱིར་རོ། །དགོས་པ་བསྒྲུབ་རྒྱུ་མིན་པའི་ཡོ་བྱད་ལ་རང་གི་ངོ་བོའི་སྒོ་ནས་མནོག་ཅིག་ཡོད་སྙམ་པ་བློའི་འཛིན་ཚུལ་རྐྱང་པ་ཡིན་ཅིང༌། ཧ་ཅང་བསོགས་ལ་ཞེན་པ་ནི་རང་ལ་དེའི་དགོས་པ་ཅི་ཡང་མི་ཡོང་བར་སྦྲང་རྩི་ལྟར་གཞན་གྱིས་སྤྱོད་པས། འཕྲལ་དང་འཕྲལ་དུ་སྐྱེ་བོ་དགའ་བ་དང༌། གྲགས་པ་དང༌། བསོད་ནམས་ཀྱི་དགོས་པ་ལ་དེངས་སུ་འཇུག་པར་བྱའོ། །འགྲོ་བའི་བདེ་སྡུག་འཁོར་ལོ་བསྐོར་བ་དང་འདྲ་བས་འབྱོར་པས་
དྲེགས་པ་དང་རྒུད་པས་ཞུམ་པའི་མི་བརྟན་པ་སྤང་ངོ༌། །མཛའ་བོ་ཕོངས་དུས་སུ་འདོར་བ་དང་གཞན་ཕོངས་པར་གྱུར་དུས་དེ་ལ་དགའ་ཉམས་སྟོན་པ་སོགས་ཀྱང་མི་བྱ་སྟེ། སྡུག་རེས་རང་ལའང་འོང་བའི་རིགས་པ་དེ་ཉིད་ཀྱིས་སོ། །གཏམ་ལ་རྫུན་ཚིག་མང་བ་དང༌། བྱ་བ་ལ་འགྱུར་ལྡོག་ཆེ་ན་བདེན་པ་དང་མི་འགྱུར་བའི་ཚིག་དང་བྱ་བ་སྨྲ་ཞིང་བྱེད་པ་ནའང༌། ཟླ་གཟུགས་ཀྱིས་བསླུས་པའི་ངང་པ་པད་རྩ་མཐོང་བ་ལྟར་གཞན་ཡིད་ཆེས་པར་མི་འགྱུར་རོ། །ཕྱུག་ཅིང་མཐོ་བ་རྣམས་ལ་བསྙེན་བཀུར་ཆེས་ན་འདི་ནི་ཁོ་བོ་ལ་དགོས་པ་རེའོ་སྙམ་དུ་བརྙས་པར་ཡང་སྲིད་ལ། དེ་དག་གཞན་ལས་མགུ་དཀའ། མཐུན་འཇུག་གི་ཚུལ་ཕྱོགས་ལྷུང་ཅན་དེ་སྐྱེ་བོ་ལ་མི་མཛེམ་པའང་ཡིན། ཕན་པ་སུས་བྱེད་ཀྱང་མི་ཤེས་པས་འཕྲལ་གྱི་མཐོང་ལུགས་དང་སྦྱར་ནས་མཐོ་ལ་འདུད་ཅིང་དམན་ལ་བརྙས་པའི་ཤིང་ལོ་རླུང་བསྐྱོད་མི་མང་བར་བྱ། རང་གི་དོན་འགངས་ཅན་མིའི་ཟས་ངོར་འཆོར་བ་དང༌། སྐྱོན་ཡོན་གྱི་ཁོག་ལ་མི་དཔྱོད་པས་ངོ་བསྟོད་མཁན་ལ་ཤག་པོར་རྩི་བ་སོགས་ཅོལ་ཆུང་གི་དེ་ཉིད་བསྟན་པ་ཡིན་པས་དང་དུ་མི་བླང༌། དམ་བཅའ་མང་བ་ཁུར་མང་པོ་འཁུར་བ་དང་འཆིང་བ་མང་པོའི་ནང་དུ་རྐང་པ་བཅུག་པ་ཡིན་པས་ཟོན་བྱ། དམ་བཅས་ནས་གཞན་དུ་མི་འགྱུར་བ་རང་ཉིད་ཚད་མར་སྒྲུབ་པའི་ཐབས་ཆེན་པོར་འགྲོ། གཞན་ལ་བསྟོད་སྨད་སོགས་བྱ་བ་ཐམས་ཅད་ངོ་ལྐོག་སྙོམས་པར་བྱེད་པའང་དགོས་པ་དེ་དང་འདྲ། སུ་དང་གང་གི་སྨྲས་ཚད་ལ་ཉན་ན་ཉེས་དམིགས་མང་
པོ་སྲིད་པས་རང་གིས་ལེགས་པར་དཔྱད་དེ་རིགས་པའི་ཕྱོགས་སུ་ཟུང་ཐུབ་པར་བསྟེན་ཏེ་སེངྒེ་མཆེ་བཟང་དང༌། སྟག་དཔུང་བཟང་ལྟ་བུ། འཇིགས་པ་མ་བྱུང་གོང་དུ་གཟུར་མཁས་པ་དང༌། བྱུང་བའི་འོག་ཏུ་བསྲན་ཚུགས་པ་དང༌། བསྟོད་སྨད་དང་དགྲ་གཉེན་སོགས་ཀྱིས་ཡིད་མི་བསྐྱོད་པར་སྔོན་གྱི་ལས་ཀྱིས་ཇི་ལྟར་འགོད་པ་ཤེས་དཀའ་བ་ལ་བསམས་ཏེ་རི་བཞིན་བརྟན་པར་གནས་པ་ནི་ཆེས་བརྗིད་པ་ཡིན་ནོ། །རྐང་པ་རྙིས་ཟིན་པའི་བྱ་དང༌། རང་རྒྱུས་གཞན་ལ་ཤོར་བའི་མི་གཉིས་སྐྱིད་པའི་སྣ་ཐག་མགོ་ལ་དཀྲི་ལུགས་མེད་པས་སྤྱོད་པ་ཟབ་དགོས། དེའང་གསང་གཏམ་མཛའ་བོ་ལའང་སྦྱིན་པར་མི་བྱ་སྟེ། གཞན་གྱི་བསམ་པ་ཤིན་ཏུ་ལྐོག་གྱུར་ཡིན་པས་རང་གི་སྙིང་གཏམ་སྦེད་ཡུལ་དང༌། རང་ཉིད་གཉིས་དེའི་གསང་བ་མཐར་ཐུག་སྟོན་པའི་ཡུལ་སུ་ཡིན་ཤེས་པར་དཀའ་བ་དང༌། གསང་ཚིག་བྱིན་པའི་མཛའ་བོ་ངན་པ་ཁྲོ་ན་སྦྲུལ་ལས་ཀྱང་འཇིགས་པ་ཆེ་བའི་ཕྱིར་རོ། །ལྐོག་ན་འདུག་ཀྱང་གཞན་གྱི་སྐྱོན་ཟློ་བར་མི་བྱ་སྟེ། སྐྱུགས་པའི་འདམ་རྫབ་དཀྲུགས་པ་ལ་དགོས་པ་མེད་པའི་ཕྱིར་དང༌། སྐྱོན་རང་ལའང་ཡོད་པའི་ཕྱིར་རོ། །ཕྱིན་ཆད་ཀྱི་བློ་རྩེ་སྔ་ནས་མི་སྟོན་ཏེ། བར་ཆད་བྱེད་པའི་མི་མང་བས་སོ། །མ་འདྲིས་པ་ལ་རང་གི་ལོ་རྒྱུས་འཆད་པ་དང༌། བདག་ཉིད་བསྟོད་པ་དང༌། མང་པོའི་ཚོགས་དང་འཁོན་གསེབ་དང་རྩེད་མོའི་གྲལ་ལ་སོགས་པར་ཧ་ཅང་རྒྱུ་བ་དང༌། འབངས་ལ་ཁ་ཤག་དང་རོལ་རྩེད་འགྱེད་པ་སོགས་གཞན་མི་གུས་པས་རང་གི་བརྗིད་
འཕྲོགས་ཤིང་བཀའ་མི་བཙན་པར་བྱེད་པས་བག་ཡོད་པར་བྱ།། ༈ །།བོད་ཡུལ་མདོ་སྨད་ཀྱི་ཆ་ཤས་རྡོ་རོལ་ཞེས་པའི་སའི་ཐིག་ལེ་བརྫི་མེད་རྣམ་པར་རྒྱལ་བའི་རི་བོའི་ཕང་བ་ན་ཆོས་ལེགས་གཡང་འཁྱིལ་ཞེས་བྱ་བའི་ས་ཕྱོགས་ཤིག་ཡོད་དེ། དེ་ནི་རབ་མཐོ་ཕྱོགས་ཀྱི་སྤྱི་བོར་འཛེགས། །ནགས་ཀྱི་སྐྱེས་བུ་མང་པོས་ཉེ་འཁོར་གང༌། །བྱེའུའི་ན་ཆུང་ཤིན་ཏུ་དུལ་བ་རྣམས། །དེ་དག་པང་ན་གླུ་དབྱངས་ལེན་པས་མཛེས། །ཕྱོགས་དེར་དགེ་བ་སྤྱོད་པའི་གཙུག་ལག་ཁང༌། །རྩིག་ངོས་མཁུར་བཀང་བྱས་འདྲ་ཟླ་བའི་མདོག །ནགས་ཚལ་ཚོགས་ཀྱིས་ཤིང་བལ་གཞོན་ནུའི་རྒྱན། །འབུལ་བས་བསྟི་བསྟངས་བགྱིས་པ་ལྟ་བུ་ཡོད། །གཙུག་ལག་ཁང་དེ་ན་དགེ་སློང་གཞོན་ནུ་ཤེས་པའི་མཐུ་ཅན། བཞད་གད་ལ་དགའ་བ། བདག་ཉིད་སྨྲ་བ་གསལ་ཞིང༌། གཞན་གྱི་སྨྲ་བ་མི་མངོན་པར་རྒྱས་འདེབས་པ། ཤགས་ཀྱི་མཚོན་ཆ་ཅན། འཕགས་པ་ཉེ་དགའ་གཉིས་པ་ལྟ་བུ་ཞིག་ཡོད་དེ། དེའི་མིང་ནི་བཟང་པོའི་བློ་ཞེས་བྱའོ། །ནགས་དེ་ན་བྱ་རོག་བུམ་པའི་སྤྱི་གཙུག་ཅེས་བྱ་བ་སྒྲིན་ཞིང་མང་དུ་སྨྲ་བ། སྒྱུ་ཐབས་ཀྱི་ཕ་རོལ་དུ་ཕྱིན་པ་ཞིག་ཀྱང་གནས་སོ། །དགེ་ཚུལ་དེས་དུས་དང་དུས་སུ་དེ་ལ་གཏོར་མ་བྱིན་པས་དེ་གཉིས་རིང་ཞིག་མཛའ་བར་གྱུར་པ་ལ། རེ་ཞིག་ན་དགེ་ཚུལ་ནི་ཟས་ཀྱི་ཡོ་བྱད་མང་བ་ཡིན་ཅིང༌། བྱ་རོག་ནི་རྐུ་བ་ལ་དགའ་བ་ཡིན་པས། ཤ་དུམ་བརྐུས་པའི་གཞི་ལས་རྩོད་པར་གྱུར་ཏེ། དེས་ཐག་པའི་འཁྲུལ་
འཁོར་ལས་རྡོ་ཐོག་ལྟར་འབེབ་པའི་སྒྱོགས་ཀྱི་སྦྱོར་བ་བྱས་ནས་འཕང་བར་བརྩམས་པ་ན། ཁྭ་ཏ་འཛུར་ལ་མཁས་ཤིང༌། གབ་བྱང་བས་མ་ཕོག་གོ༌།དེར་དགེ་ཚུལ་ཁྲོས་ནས་རུ་ཤིང་མཉེན་པོ་ལས་གཞུ་བྱས་ཏེ། ཕྱོགས་བཞིར་བདས་པ་དང༌། བྱ་རོག་ཀྱང་ནགས་ནས་ནགས་དང༌། རིའི་གསེབ་ནས་རིའི་གསེབ་ཏུ་བྲོས་སོ། །འོན་ཀྱང་དེ་དགེ་ཚུལ་ཁྲོ་བོ་དེས་མ་བཏང་ནས། དེ་ན་རེ། ལྟོས་ཤིག་གྲོང་ཁྱེར་མི་དང་ནགས་ཀྱི་བྱ། ། རབ་བྱུང་ཆོས་གོས་ཕྲག་བཟར་ནས། །ཉེས་མེད་བྱ་རོག་ནགས་སུ་རྒྱུ་བ་ལ། །མདའ་གཞུ་རྣ་དྲུང་བཀང་སྟེ་ཐོ་འཚམས་པ། །སྐྱབས་ལས་འཇིགས་པ་བྱུང་བའི་ངང་ཚུལ་འདིར། །ལྟོས་དང་རྨི་ལམ་སྡིག་པ་བརྒྱ་ཡིས་ཀྱང༌། །མཚོན་མིན་ལྟས་འདི་རྡོ་ཡུལ་ཤར་གྱུར་པས། །ཕྱིར་བཟློག་རིག་སྔགས་སེམས་པའི་དུས་ལ་བབ། །ཅེས་ཟེར་བ་དང༌། དགེ་ཚུལ་ན་རེ། རྐུན་པོ་སྲང་ནས་འོང་བ་ས་སྟེང་སྲོལ། །དབེན་མཐོ་བར་སྣང་ལམ་ནས་ཆོམ་རྐུན་ལྷུང༌། །ཉམ་ཆུང་སྦྲང་མ་སྤུ་ཅན་ཁྱོད་འདྲས་ཀྱང༌། །མཐུ་ལྡན་རྐང་གཉིས་མི་ལ་འཕྲོག་དུས་བྱུང༌། །སྣ་ཚོགས་ཟས་སྦྱོར་བཤམས་པའི་ཚོང་འདུས་དང༌། །གཡོས་ཁང་དཔུང་པ་བསྒྲིགས་པའི་གྲོང་ཁྱེར་རྣམས། །བོར་ནས་དྲང་སྲོང་ཞི་བའི་གཙུག་ལག་ཁང༌། །ཉམ་ཉེས་བྱེད་པའི་བགེགས་ཁྱོད་བསད་ན་རུང༌། །བྱས་པ་མི་གཟོ་བརྐུ་ཞིང་མང་སྨྲ་མཁན། །ད་དུང་ཉེས་མེད་ཟེར་བའི་བཟློག་ཐབས་ཅན། ཁྱོད་འདྲའི་བྱ་ཐན་མཐོང་ནས་
མདའ་དང་གཞུས། །ཕྱིར་བཟློག་མི་རྩོམ་སྐྱེས་བུ་སུ་ཞིག་ཡོད། །ཅེས་ཟེར་རོ། །དེ་ལ་བྱ་རོག་ན་རེ། འཕྲོགས་ལ་དཔའ་ཞིང་ཤག་ལ་མཛངས་པ་ཡི། །འཕྲུལ་གྱི་བློ་ཅན་ང་འདྲ་ལྟས་ངན་མིན། །ཞི་བའི་ཆས་གྱོན་གཡུལ་གྱི་བརླང་སྤྱོད་ཅན། ཁྱོད་འདྲ་ཐན་དུ་འགྱུར་ལ་དོགས་པ་སྐྱེ། །ནམ་མཁའི་རྫོང་འཛིན་ས་གཞིའི་རྫས་འཕྲོགས་པའི། །ཆོམ་རྐུན་དེ་འདྲ་ཉམ་ཆུང་བརྗོད་མི་བྱ། །གནས་འདིར་དྲང་སྲོང་ཞི་བ་གནས་ན་ཀོ༌།ཤ་དུམ་བརྐུས་པའི་ཉེས་པ་སུས་མི་བཟོད། །བརྐུས་ཀྱང་རང་གི་རིགས་ཀྱི་ལས་ཡིན་ཕྱིར། །དེ་ཡིས་ཁོ་བོ་ཉེས་དང་བཅས་མི་འགྱུར། །དཀའ་ཐུབ་ནགས་སུ་མདའ་གཞུ་ཐོགས་པ་ཁྱོད། །རང་གི་སྟོན་པའི་ལུགས་ལས་བརྒལ་བས་ནོངས། །སྔོན་གྱི་དགེ་སློང་འཆར་ཀས་ང་འདྲ་བ། །བསད་པས་་གཙོ་ལས་སྤྱོ་བ་ཐོབ། །དེ་གོང་གཞི་འདིས་བཅས་པ་མ་མཛད་ཕྱིར། །འཆར་ཀའང་ཁྱོད་ལྟར་ཉེས་པ་བྱས་མི་འགྱུར། །ཞེས་ཟེར་ཞིང་འདི་ལྟར་བྱ་དང་བྱ་མིན་མེད་པར་སྤྱོད་ན་འདི་ལ་ཡང་ལྡག་ཏུ་རུང་ངོ་ཞེས་འཕོང་བཏེག་སྟེ་བསྟན་ཏོ། །དེ་ནས་དགེ་ཚུལ་ལྷག་པར་ཡང་འཁྲུགས་ཏེ། ཁྲོས་པའི་བཞིན་བསྡུས་ནས། དམངས་རིགས་རང་དགར་སྤྱོད་པས་རྒྱགས་གྱུར་པ། །དེ་ཡིས་རྒྱལ་པོ་རང་བཞིན་བཟང་བར་ཤེས། །དམན་ལས་དམན་པ་ཁྱོད་འདིར་དྲེགས་སྨྲ་བ། །དེ་ཡིས་ཁོ་བོ་བརྩེ་དང་ལྡན་པར་རྟོགས། །བདག་ཅག་དྲང་སྲོང་དུལ་བ་ཡིན་ན་ཡང༌། ཁྱོད་ལྟས་གནས་མིན་བརྙས་པ་ག་ལ་བཟོད། །ཧ་ཅང་
གཙུབ་ན་བསིལ་བའི་ཤིང་ལས་ཀྱང༌། རབ་འབར་མེ་ལྕེ་ཤིན་ཏུ་ཚ་བ་འབྱུང༌། ཁྱོད་ཀྱིས་བརྐུས་དང་ཕྱིས་ཟ་བ་དག །རིགས་ཀྱི་ཀུན་སྤྱོད་ཡིན་ཞེས་བདག་ཉིད་སྒྲོག །མཚངས་འབྲུ་འདོད་པའི་བཞད་གད་མཁན་རྣམས་ཀྱང༌། །དེ་ལས་ཐུབ་བ་ཅི་ཞིག་སྨྲ་བར་འགྱུར། །བླུན་པོ་རིགས་སུན་འབྱིན་པས་ཆེར་རློམ་ཁྱོད། །མཁས་པའི་ཉེ་འཁོར་འདུག་ཏུ་ག་ལ་དབང༌། །གནོད་བྱེད་བསམ་གཏན་ཚེར་མ་ཁྱོད་མེད་ན། །སྡོམ་བརྩོན་ནགས་ན་མདའ་གཞུ་ཅི་སྟེ་འཛིན། །སྟོན་པས་བྱ་རོག་སྐྲོད་པ་དགེ་ཚུལ་ལ། །གནང་བཀག་ང་རང་ཤེས་ཀྱི་ཁ་རོག་སྡོད། ཁྱོད་ཀྱི་ཉེས་པ་བཟློག་དཀའ་འདི་གཟིགས་ནས། །བློ་བཟང་འཆར་ཀས་ཕ་རོལ་གནོན་པ་མཛད། །ཕྱི་ས་ཟ་བ་ཁྱོད་ཀྱི་གཤང་སྒོ་ལ། །ང་འདྲ་ལྡག་པ་རྨི་ལམ་རྨི་ཟེར་ནའང༌། །དེ་ལ་ཕོ་ཉ་མདེའུའི་ལྕེ་རྣོན་ཅན། །ལན་སྨྲ་མ་བཏབ་བཏང་སྙོམས་འཇོག་རེ་ཀན། །ཟེར་ནས་མདའ་གཅིག་འཕང་བ་དང༌། བྱ་རོག་གིས་མགོ་བོ་སྨད་ཙམ་བྱས་པས་སྟེང་ནས་ཤུར་གྱིས་སོང་ངོ༌། །ཡང་གཅིག་འཕང་བ་བྱ་རོག་མགྲིན་པ་བསྲང་སྟེ་དགྱེད་ཙམ་བྱས་པས། རྐང་པའི་བར་ནས་མཇུག་སྒྲོ་ལ་རེག་ཙམ་བབས་ཏེ་རྒྱབ་ཕྱོགས་ཀྱི་ས་ལ་ཟུག་གོ༌།དེ་ནས་བྱ་རོག་ནམ་མཁའ་ལ་འཕུར་ཏེ། བྱའི་ཁྱུ་ཆེན་པོ་ཞིག་ལྷོ་ཕྱོགས་ཀྱི་ནམ་མཁའ་ནས་བྱང་ཕྱོགས་ཀྱི་མཁའ་ལ་ལྡིང་ཞིང་འགྲོ་བའི་ནང་དུ་ཞུགས་ནས། ཁ་ཕྱིར་བལྟས་ཏེ་དགེ་ཚུལ་མི་དགའ་བར་བྱ་བའི་ཕྱིར་འདི་སྐད་ཅེས། སྤྲིན་གྱི་རླབས་ལྡང་གནམ་སྔོན་ཆུ་གཏེར་
ནང༌། །རྒོད་པའི་སྒྲ་སྒྲོག་འདབ་བཟང་ཚོང་པའི་ཁྱུ། །རླུང་གི་གཟིང་ལ་ཞོན་ནས་འགྲོ་བ་ནི། །བཟའ་ཤིང་ནགས་སུ་རབ་དགའ་རྙེད་པར་འགྱུར། །ཅེས་སྨྲས་ཏེ་སོང་ངོ༌། །དགེ་ཚུལ་ནི་ཁ་ཏ་འཕུར་བའི་ཕྱི་བཞིན་སྟེང་དུ་བལྟ་ཞིང་མདའ་གཞུ་ཐོགས་ཏེ། ཀྱེ་མ་ཀྱི་ཧུད། ངས་སྔོན་ནས་སྒྱུ་རྩལ་ཞིག་མ་བསླབས་ཟེར་ཞིང་ཁྲོས་པའི་ཤུགས་ཀྱིས་སྡོད་མི་བཟོད་པར་རིའི་ངོས་ཕན་ཚུན་ཀུན་ཏུ་བརྒྱུགས་སོ། །དེ་ཕྱིན་ཆད་བྱ་རོག་ནམ་མཐོང་བ་ན་ནི་མདའི་འཁྲུལ་འཁོར་འཕེན་ཅིང༌། མི་མཐོང་བའི་དུས་སུ་ནི་རྡོ་སྒྱོགས་འཕངས་པའི་སྒྲ་འབྲུག་ཆེན་གནམ་ལྕགས་འབེབས་བའི་ང་རོ་ལྟར་དྲག་པས་ནགས་ནས་ནགས་སུ་འཇིགས་པ་སྐྱེད་ཅིང་འགྲོ་སྟེ། དེ་འཕངས་པ་ན་རིའི་གཅོང་རོང་ཤིན་ཏུ་ཟབ་ཅིང་གཏིང་རིང་བའི་རྐྱེན་ལས་བྲག་ཆའི་སྒྲ་སྔ་མ་ལས་ཉིས་འགྱུར་སུམ་འགྱུར་དུ་ཆེ་བས་རི་བོ་རལ་བ་བཞིན་དུ་སྣང་ངོ༌། །ཚུལ་དེས་ཉི་མ་རེ་རེ་ཞིང་གཙེས་པས་ཁྭ་ཏ་ཆེས་ཕམ་པར་གྱུར་ནས། ནམ་ཞིག་ན་དེ་རང་གི་ཚང་མལ་ཡོད་པའི་ལྗོན་ཤིང་དང་ཉེ་བ་ཞིག་ཏུ་འདུག་སྟེ། མཆུ་ས་ལ་སྦྱར་ནས་སྙིང་རྗེ་རྗེ་ལྟར་སྣང་བའི་ངག་ཏུ། ཨ་ཝ་ཝ་ཝ། ཞེས་རྡོ་ཡུལ་པའི་སྐད་ཀྱིས་འོ་དོད་བོས་ནས་སླར་ཡང་འདི་སྐད་དུ། བརྩེ་བའི་ཕ་མ་མ་གཏོགས་པ། །སུས་ཀྱང་མ་བསྐྱངས་ཁྭ་ཏའི་བུ། །བདག་མེད་ནགས་སུ་སྤྱོད་པ་ལ། །རྒྱུ་མཚན་མེད་པའི་གྱོད་ཅིག་བྱུང༌། །གཙུག་ལག་འཇིགས་པའི་ཆོམ་རྐུན་ལའང༌། །དགེ་སྦྱོང་འཚེ་བ་མ་ཐོས་ཏེ། །དེང་ནི་ཤ་དུམ་ཆུང་ངུའི་ཕྱིར། །བྱ་རོག་གནས་དང་བྲལ་བར་བྱས། །རིང་ནས་མཛའ་
བོ་ལྟར་འདྲིས་པའི། །ལྗོན་པ་ཡན་ལག་རབ་བཟང་དང༌། །མལ་སྟན་མིག་མང་རིས་ཁྱོད་ཀྱང༌། །དེང་ནི་སྤངས་ཏེ་འགྲོ་བ་སྙམ། །ཕངས་ཤིང་སྡུག་པའི་གནས་གྲོགས་དང༌། །བྲལ་བའི་སྡུག་བསྔལ་དབལ་ཚ་ཡང༌། ། དགེ་ཚུལ་བརྩེ་མེད་པའི། །མེ་འདིས་ཁོ་བོ་འདི་ལྟར་བསྲེགས། །ཀྱེ་མའོ་ཀྱི་ཧུད། ད་ནི་ཆུང་མ་སྟོབས་བྲལ་མ། །འབའ་ཞིག་ཁྲིད་དེ་མཆི་བ་ན། །ཕྱོགས་མཐའ་ཕྱོགས་མཐའི་བྱ་ཚོགས་ནང༌། །ཉིན་བཞིན་བརྙས་པ་ཐོབ་པར་འགྱུར། །ཞེས་སྨྲས་ནས་རིང་ཞིག་བསམས་ཏེ། འཇིག་རྟེན་ནི་ཕལ་ཆེར་འདྲིས་པའི་རྗེས་སུ་འཇུག་པ་ཡིན་པས། དེ་རང་གི་གནས་གྲོགས་དང་བྲལ་བའི་སྡུག་བསྔལ་གྱིས་ཞེ་ཕམ་བཞིན་དུ་མཛའ་མོ་གཅིག་པུ་ཁྲིད་དེ་ཤར་ཕྱོགས་ཀྱི་ནགས་ཀླུང་བགྲོད་དཀའ་བ་ཞིག་ཏུ་སོང་ངོ༌། །དེར་བསྟི་གནས་སུ་འོས་པའི་ལྗོན་ཤིང་རྩེ་མོ་མཐོ་བ། ཡལ་ག་སྟུག་ཅིང་འཛིང་ལ་རིང་པོར་རྒྱས་པ། ཤིང་ཆེན་དང་ཤིང་ཕྲན་གྱི་ཚང་ཚིང་མང་པོའི་ནང་དུ་རྒྱས་བཏབ་པ་བཞིན་མི་མངོན་པར་སྣང་བ་ཞིག་བཙལ་ཏེ། ཚང་ཤིང་བསགས། བྱ་སྤུ་བསྡུས་ཏེ་རང་གི་ལས་ཀྱིས་ཐོབ་པའི་ཤེས་རབ་དང་ཤིན་ཏུ་གཟུ་བའི་མཆུའི་འདུ་བྱེད་ཀྱིས་བཟོ་ལེགས་པར་སྦྱར་བའི་མལ་སྟན་ཡང་བརྩིགས་ནས་འདུག་གོ༌།རེ་ཞིག་ཅིག་ན་དེས་བསམ་པ། ནགས་ཚལ་འདི་ན་རྒྱུ་བའི་བྱ་རོག་གཞན་རྣམས་ནི། འདི་ཉིད་དུ་སྐྱེས་ཤིང་འདི་ཉིད་ན་ལོངས་སྤྱོད་པ་སྟེ། རང་གི་ཕ་མེས་ཀྱི་ཁབ་ལས་མ་ཉམས་པ་ཤ་སྟག་གོ༌།ནགས་ཚལ་གཞན་ན་གནས་
པ་རྣམས་ཀྱང་དེ་ཁོ་ན་བཞིན་ཏེ། རང་གི་ཡུལ་ན་མི་འཇིགས་པར་སྤྱོད་པ་ཤ་སྟག་ཡིན་ན། བདག་གཅིག་པུ་ནི། རང་གི་ཡུལ་འཁོར་ནས་ཐོན་ཏེ། གཞན་གྱི་ཡུལ་དུ་དམན་ཞིང་དམན་པའི་ཡིད་ཀྱིས་རླུང་གིས་བུས་པའི་ཤིང་ལོ་བཞིན་འཁྱམས་ཤིང་འདུག་སྟེ། བདག་གིས་དགེ་ཚུལ་ངན་པ་དེ་ལ་འཇིག་རྟེན་ཕ་རོལ་ཏུ་ཡང་ཁོན་འཛིན་སྤང་བར་མི་ནུས་སོ་སྙམ་མོ། །ཡང་བསམ་པ་ལ། གཅིག་པུ་སྙིང་ལས་ཆུང་བས་བདེ། །དབུལ་པོ་འདུ་འགོད་ཉུང་བས་བདེ། །ཡུལ་མེད་རང་དབང་ཐོབ་པས་བདེ། །མདའ་ཕྲན་འགྲོ་འོང་སླ་བས་བདེ། །དེའི་ཕྱིར་ད་ནི་དགེ་ཚུལ་གཏུམ་པོ་དེས་བདག་ལ་ཅི་ཡང་བྱར་མེད་ཀྱིས། བདག་གིས་ཁོ་ན་ལན་གླན་པའི་དུས་ནི་འདི་ཡིན་ནོ་སྙམ་ནས། དེ་ནང་རེ་བཞིན་དགེ་ཚུལ་གཙུག་ལག་ཁང་དུ་ཁ་ཏོན་དང་བསམ་གཏན་བྱེད་ཅིང་འདུག་པའི་དུས་སུ་གླགས་རྙེད་པར་ཤེས་ཏེ། དུས་དེར་ཆུང་མ་དང་བཅས་པར་ལྷགས་པ་དང༌། གཙུག་ལག་ཁང་པའི་ཕྱི་རོལ་དུ་ཕྱུགས་ཀྱི་ཤ་ཚོ་ཞིང་ཞིམ་པ་ཟས་ཀྱི་ཆེད་དུ་གཞན་ལས་ཉོས་པ་དག་ཐག་པའི་གདངས་ལ་བརྒྱུས་ཏེ། ཉི་མ་ལ་བཞག་པ་མཐོང་སྟེ། ཇི་ཙམ་འདོད་པར་ཟོས་ཤིང་ཤའི་ལྷག་མ་ལ་བྱ་ཐལ་བཏང་ནས་སོང་ངོ༌། །ཚུལ་དེས་ཡང་དང་ཡང་དུ་ཐོ་བརྩམས་པ་ལ། དུས་རིང་ཞིག་ལོན་པ་དང་དགེ་ཚུལ་གྱིས་ཚོར་ནས་ཤུག་པའི་མདའ་གཞུ་མལ་དྲུང་དུ་བླངས་ཏེ་བྱ་ར་བྱེད་དོ། །དེ་ནས་ཡང་ནང་སྔ་ཞིག་ན་བྱ་རོག་སྔར་བཞིན་འོང་ནས་ཤ་མང་དུ་ཟོས་པ་དང༌། དགེ་ཚུལ་གྱིས་སྒྲའི་མཚན་མ་ལས་ཤེས་ཏེ།
སྐྱིལ་མོ་ཀྲུང་མྱུར་བ་མྱུར་བ་བཤིག་ནས་མདའ་གཞུ་ཐོགས་ཤིང་སོང་བ་ལས། བྱ་རོག་ནི་ཆེས་སྒྲོན་པ་ཡིན་པས་ཚོར་ནས་ཉེ་འཁོར་གྱི་ཤིང་ཞིག་གི་རྩེར་འཕུར་ཏེ་འདུག་གོ༌།དགེ་ཚུལ་ཕྱི་རོལ་དུ་ཐོན་པ་དང༌། བྱ་རོག་ན་རེ། བྱོན་པ་ལེགས་སོ་ནགས་ཀྱི་སྤོང་བ་པ། །ཡང་དག་འཇོག་ལས་བཞེངས་མ་ཐག་པ་ཁྱོད། ཁྱོད་ཀྱི་རྗེས་ཐོབ་སྤྱོད་པའི་ཚུལ་འདི་ཡིས། །མཉམ་བཞག་སྤྱོད་ཡུལ་ཤིན་ཏུ་ཞི་བར་རྟོགས། །ཉིན་བཞིན་བྱ་ཚོགས་གཙེས་ནས་ནང་པར་དུས། །བྱམས་དང་མི་འཚེ་སྟོན་པའི་གཙུག་ལག་རྣམས། ཁ་ཏོན་བྱེད་ཁྱོད་རང་གི་ལྕེ་ལ་ཡང༌། །ངོ་ཚར་མི་སེམས་གདོང་ལྤགས་ཤིན་ཏུ་འཐུག །བསམ་གཏན་མལ་དུ་ཚངས་པའི་རྒྱལ་ལྟར་ཞི། །ཐང་དང་ཁྱམས་ན་སྲིན་པོའི་འཁོར་ལྟར་ཁྲོ། །བདེན་བྲལ་འདོད་དགུར་བསྒྱུར་བའི་གཟུགས་ཅན་ལྟའི། །རྣལ་འབྱོར་སྤྱོད་ཁྱོད་རིང་མོ་ཞིག་ནས་མཐོང༌། །ཞེས་སྨྲས་པས། དེས་རྐྱག་ཟན་ཁྱོད་ཀྱི་གདམས་ངག་གིས་ཁོ་བོ་ཞི་བར་འགྱུར་སྙམ་མམ། ཁྱོད་ཀྱིས་གཙུག་ལག་ཁང་གི་ཉེར་སྤྱད་རྒྱ་ཆེན་པོ་ཉམས་པར་བྱས་པ་མི་དྲན་ནམ། ཚོད་མི་ཤེས་པའི་བླུན་པོ་ཁྱོད་སྡོད་ཅིག་ཅེས་མདའ་གཞུ་བཀང་སྟེ་བདས་སོ། །དེར་བྱ་རོག་མོ་གཙུག་ལག་ཁང་གི་རྒྱབ་ཕྱོགས་ནས་བྱུང་སྟེ། བྱ་ཐལ་འཐོར་ཞིང༌། འདི་སྙེད་ཕྱུགས་རྣམས་ཁྱོད་ཀྱིས་སུ་ལས་བརྐུས། །སྤོང་བའི་ནགས་སུ་ཤ་འདི་གང་ནས་བྱུང༌། །བས་མཐར་འདི་འདྲའི་ལས་ཀྱིས་དྲེགས་པ་ཁྱོད། །གདམས་པས་ཞི་བར་མི་འགྱུར་དེ་
རེ་བདེན། །ཟེར་ནས་གཉིས་ཀ་ནམ་མཁའ་ལ་གྱ་གྱུར་རྩེ་ཞིང་སོང་ངོ༌། །དེའི་ཚེ་གཏུམ་སྤྱོད་ཉི་མ་དཔལ་ཞེས་པ་གདོལ་པའི་རིགས་ལས་ཡི་གེ་ཀློག་པའི་སློབ་དཔོན་དུ་གྱུར་པ་ཞིག་གཙུག་ལག་ཁང་དེའི་ཕྱོགས་གཅིག་ན་འདུག་གོ༌།དེས་དགེ་ཚུལ་དང་བྱ་རོག་དེ་ལྟར་འགྲས་པ་ཐོས་ནས་དགེ་ཚུལ་གྱི་དྲུང་དུ་ཕྱིན་ཏེ་སྨྲས་པ། ཚེ་དང་ལྡན་པ་ཁྱོད་གཙུག་ལག་ཁང་ན་ཀློག་པ་དང་སྤོང་བས་དུས་འདའ་བ་དང༌། བྱ་རོག་ནགས་ཀྱི་ནང་དུ་གྲོང་འདབ་ནས་གཞན་གྱིས་བོར་བ་རྙེད་པ་ཟ་ཞིང་འདུག་པ་གཉིས་ཅི་ཞིག་ལ་རྩོད། དེ་ལྟ་མོད་ཀྱི་ཁྱོད་ཅག་རྒྱུ་མཚན་ཆུང་ངུའི་ཕྱིར་དུ་རྩོད་ཅིང་འདུག་གོ་ཞེས་ཐོས་ཀྱི་དེ་ཁོ་བོས་ཞི་བར་བྱ་ན། སླན་ཆད་ཞི་བའི་ནགས་སུ་རྩོད་པའི་མེ་མ་སྤོར་ཅིག་ཁྱོད་ཀྱིས་ལེགས་པར་སོམས་ཤིག་དང༌། གྲགས་པ་མི་སྡུག་དུ་བའི་རྒྱལ་མཚན་ཅན། །རྩོད་པའི་བུད་ཤིང་ཤ་ནི་འཇུས་ཟིན་ན། ཁྱོད་ཀྱི་ཁྲོ་བའི་མེ་ལྕེ་མ་ཞི་འདི། །གང་ལ་གནས་དེ་ཞིབ་མོས་བསམ་པར་གྱིས། །སུ་འགྲོགས་ཡིད་ལ་མཐུན་པར་བྱེད་པའི་མི། །མང་པོས་བཀུར་བ་འཇིག་རྟེན་རིག་པ་དང༌། །མི་འཚེས་ལེགས་འགྱུར་ཆོས་ཀྱི་ལུགས་ཡིན་ན། །བློ་གྲོས་གསལ་བ་ཁྱོད་ལྟ་སུ་ཞིག་རྩོད། །དེ་ཕྱིར་ཡིད་ཀྱི་སྡུག་བསྔལ་དྲག་པོའི་དུག །འཕྲོག་བྱེད་གཟུ་བོའི་ངག་གིས་སྨན་བྱེད་པ། ཁྱེད་ལ་བསམ་པ་དགེ་བའི་ཚུལ་བསམ་ནས། །ནད་གསོའི་སྦྱོར་བ་འབྲས་མེད་མི་འགྱུར་བྱོས། །དགེ་ཚུལ་གྱིས་ལན་སྨྲས་པ། གྲོགས་པོ་ཁྱོད་ཁོ་བོ་ལ་སྨན་པར་འདོད་པ་ནི་བདེན་
མོད་ཀྱི། བདག་ཅག་གཙུག་ལག་ཁང་གཅིག་ན་བགོ་སྐལ་གཅིག་ལ་སྤྱོད་པ་ཡིན་པས། ཕན་ཚུན་བསམ་པ་བཟང་བ་ལ་ངོ་མཚར་དུ་བྱ་བ་ཡང་མེད་དོ། །འོན་ཀྱང་ཁོ་བོ་ནི། རྩོད་དང་འདུ་འཛིས་འཇིགས་ནས་ནགས་སུ་བྱོལ། །མི་མེད་ནགས་འདིར་ཁ་ཏས་རྩོད་པ་སྤེལ། །རྩོད་པའི་ཁུར་བུ་མ་བསྐུར་མཆོག་ཡིན་ཀྱང༌། །ལས་ཀྱིས་ཐོབ་འདི་ད་ནི་མཐར་ཕྱུང་བྱ། །གདོལ་པའི་སློབ་དཔོན་གྱིས་སྨྲས་པ། ཚེ་དང་ལྡན་པ་བྱ་རོག་གིས་ཐང་ནས་ཤ་དུམ་རྙེད་དེ་ཁྱེར་བ་གང་ཡིན་དེ་ནི་ཁྱོད་ལ་རྩོད་པར་འདོད་ནས་མ་ཡིན་ཏེ། འདི་ནི་ཐང་ནས་རྙེད་པ་ཙམ་ལ་སྤྱོད་པར་ཟད་ཀྱི། བདག་པོ་དང་བཅས་པ་དང་བདག་པོ་མེད་པའི་རྣམ་དབྱེ་མི་ཤེས་པའི་ཕྱིར་རོ། ཁྱོད་ཀྱིས་བག་ཙམ་གཞི་ལས་ངན་སྐྱུག་གི༌།འདམ་རྫབ་དཀྲུགས་པའི་ངལ་བ་ལྷུར་བླངས་ན། །དེ་ཡིས་འདམ་རྫབ་ཕམ་པར་མི་འགྱུར་གྱི། །རང་ཉིད་གྲགས་པ་ངན་པའི་དྲིས་གོས་འགྱུར། །གང་ཕྱིར་མུ་ཅོར་སྨྲ་བའི་རྗེས་བསྙགས་ནས། །མཁས་པ་ཀུ་ཤའི་རྩེ་ལ་རླུང་ཕོག་བཞིན། །བསྐྱོད་པའི་ཚུལ་མིན་ནགས་སུ་སྤེལ་མཐོང་ན། །བསྔགས་མིན་མི་སྒྲོགས་དཔྱོད་ལྡན་སུ་ཞིག་མཆི། །གང་མཐུས་ཁྱོད་ལ་བྱ་རྣམས་ཀྱང༌། །གླན་ཀ་ཚོལ་བ་ལྟར་སྣང་བ། །མི་བཟད་ཡིད་ཀྱི་སྒྱུ་མ་མཁན། །འདི་ལ་སུ་ཞིག་ཡིད་རྟོན་འགྱུར། །དུག་ལོ་མ་སྨིན་དུས་སུ་འབྲེག་པ་བཟང༌། །ནགས་མེ་མ་མཆེད་དུས་སུ་གཞིལ་
བ་བཟང༌། །རྩོད་པའི་ཆུ་བོ་ཆོས་དང་གྲོགས་པ་ཡི། །ཤིང་རྩ་མ་ཟོས་དུས་སུ་བཟློག་པ་བཟང༌། །དེ་ནས་དགེ་ཚུལ་གྱིས། འདི་ནི་བདག་ལ་སྙིང་བརྩེ་བར་སེམས་པ་ཡིན་པས་ཤགས་ཀྱིས་སྤྱོ་བར་བྱ་བའི་ཡུལ་མ་ཡིན་ནོ་སྙམ་ནས་སྨྲས་པ། ཀྭ་ཡེ་ཤེས་ལྡན་ཁྱོད་ཀྱིས་ཁོ་བོ་ཅག་གི་འཁོན་ཞི་བར་བྱ་བའི་སྒོ་ཞིག་མཐོང་ན། རེ་ཞིག་དེ་སྟོན་ཅིག་དང༌། བསམ་པར་བྱའོ། །གདོལ་པས་སྨྲས་པ། ཐུབ་པའི་སྐྱེ་བོ་དུལ་ཞིང་ཞི་བས་འཕགས། །རྟེན་དང་མུ་ཅོར་སྨྲ་བས་བྱ་རོག་ཉམས། །དེ་ཡིས་དེ་ལ་ཕ་རོལ་གནོན་བསྟན་ན། །ཆེན་པོའི་མཐུ་རྩལ་ཅི་ཞིག་བསྟན་པར་འགྱུར། །ཚེ་དང་ལྡན་པ་ཁྱེད་ཅག་གཉིས་ཀྱི་ཞི་བར་བྱ་བའི་སྒོ་ཡང་དེ་ཡིན་ནོ། །དེ་ལྟ་མོད་ཀྱི་རྩོད་པ་འདིའི་བྱུང་བ་ལེགས་པར་གཏན་ལ་ཕབ་ནས་ཕྱིས་ཀྱང་བསྟན་པར་བྱའོ། །ཞེས་སྨྲས་པ་དང༌། དེ་ཅང་མི་ཟེར་རོ། །དེ་ནས་གདོལ་པའི་སློབ་དཔོན་གྱིས་དགེ་ཚུལ་ཅུང་ཟད་དུལ་བར་ཤེས་ནས། ཚེ་དང་ལྡན་པ་ཅང་མི་སྨྲ་བ་ནི་རྗེས་སུ་གནང་བའི་མཚན་མར་འཇིག་རྟེན་ན་གྲགས་ཏེ་ཁྱོད་ཀྱང་འདི་ལྟར་ཅང་མི་སྨྲ་བས་བདག་གིས་ཇི་སྐད་སྨྲས་པ་འདི་གནང་བར་འཛིན་ཏོ་ཞེས་སྨྲས་ཏེ་སོང་ངོ། །དེ་ཉིན་ཞག་ཕྱི་མ་ལ་ཟན་དང་ཤ་དང་ཁུར་སྐྱའི་དུམ་བུ་འགའ་ཞིག་ཐོགས་ཏེ་བྱ་རོག་གནས་པ་ལ་ནགས་སུ་ཕྱིན་པ་དང༌། བྱ་རོག་ནི་འཁུ་འཁྲིགས་ཟ་བ་ཡིན་པས་ཚང་ནས་འབྱུང་དུ་མ་འདོད་པ་ན། དེས་ཟས་ཀྱི་ལྷག་མ་དེ་གཏོར་རོ། །རིང་ཞིག་ན་དེ་དག་བཟའ་བའི་ཕྱིར་
འོང་བར་གྱུར་ཏེ། དེ་ལྟ་ནའང༌། མི་ནི་ཕལ་ཆེར་མ་རུངས་ཤིང་བསླུ་བ་ཉིད་ཀྱི་ཕྱིར། །འདིས་ཀྱང་བདག་ལ་ཐོ་འཚམ་པར་འགྱུར་གྲང་ཞེས། རླུང་གིས་ཤིན་ཏུ་བསྐྱོད་པའི་མར་མེའི་རྩེ་མོ་ལྟར་ཕན་ཚུན་དུ་བལྟ་བས་བྲེལ་ཞིང༌། མགྲིན་པ་ཆེར་བསྲང་བ་དང་ཆེར་བསྐུམ་པ་དང༌། རོ་སྟོད་ནམ་མཁའ་ལ་བཏེགས་ཤིང་ལྟ་བ་དང༌། ས་གཞི་ལ་བསྐུས་པ་སྙམ་བྱེད་ཅིང་ལྟ་བ་ལ་སོགས་ཏེ་རྣམ་འགྱུར་མང་པོས་འབྲོས་པར་རྩོམ་པ་གདོལ་བའི་སློབ་དཔོན་གྱིས་མཐོང་ནས། མཁས་པ་བདེན་པར་སྨྲ་བས་མགུ། །བླུན་པོ་ངོ་བསྟོད་བྱས་ན་མགུ། །ཞེས་བྱ་བ་ཡིན་པས། འདི་ལ་ངོ་བསྟོད་དང་འབྲེལ་བའི་གཏམ་ཞིག་བྱའོ་སྙམ་ནས་སྨྲས་པ། དུས་ལ་ལྟ་ཞིང་ཚང་ནས་དུས་སུ་འབྱུང༌། །འཇིག་རྟེན་ཤེས་པས་ཀུན་ལ་ཡིད་མི་རྟོན། །བག་དང་ལྡན་ཕྱིར་རང་སྤྱོད་ལེགས་བསྲུང་བའི། །འདབ་ཆགས་མཁས་ཁྱོད་ནགས་ཀྱི་ཐིག་ལེ་ཡིན། །འོན་ཀྱང་བདག་ལ་ནི་ཁྱོད་འཇིགས་པར་བྱ་མི་དགོས་ཏེ། འདི་ལྟར་བདག་གིས་རྒྱུས་བསྙད་པར་བྱ་ན། བདག་ནི་གདོལ་པ་ཉི་མ་དཔལ། །བས་མཐའི་གཙུག་ལག་ཁང་ན་གནས། །དེང་ནི་ཁྱོད་དང་བཟང་པོའི་བློའི། །རྩོད་པ་སྡུམ་ཕྱིར་འདིར་འོངས་སོ། །ཚིག་དེ་ཐོས་ནས་བྱ་རོག་ཀྱང་ཅུང་ཟད་བག་ཕེབས་པར་གྱུར་ཏེ་སྨྲས་པ། གང་ན་ཡིད་ཀྱི་ཚེར་མ་དེ་གནས་པའི། །གཙུག་ལག་ཁང་པའི་གཏམ་ལ་བདག་མི་སྤྲོ། །འོན་ཀྱང་བདག་ཅག་རིགས་དང་རྗེས་མཐུན་པས། །གདོལ་པ་ཞེས་བྱའི་སྒྲ་
འདི་རྣ་བར་སྙན། །བདག་གི་འདབ་བཟང་བུམ་པའི་སྤྱི་གཙུག་སྟེ། །ཤིང་ཐོག་བྲེ་ཡིས་གཞལ་བ་དུ་མ་དང༌། །ཡལ་གའི་ལག་པ་འབྲེལ་བའི་ཤིང་ཆེན་དང༌། །འཁྲི་ཤིང་མང་པོའི་ཁྱིམ་ལ་དབང་བར་འགྱུར། །དེ་ནས་དགེ་ཚུལ་བཟང་པོའི་བློ་གྲོས་ལ། །འཐབ་མོ་སྤེལ་བའི་བློ་གྲོས་སྐྱེས་གྱུར་ནས། ཁོ་བོ་སྒྲེན་མོ་ལག་སྟོང་འཕྱན་པ་ཡི། །ཤེས་པའི་རྣམ་འཕྲུལ་འདི་འདྲ་འདི་དག་སྤྲུལ། །བཟང་པོའི་བློ་མངའ་དགེ་སྦྱོང་ཞི་བ་ཡི། །བཟང་དང་ཞི་བའི་མཛད་པ་འདི་ཡིན་ན། །ཟླ་བས་གདུངས་བསྐྱེད་སྔོན་མེད་རྒུད་པ་འདི། །འདི་ལྟ་བུར་ན་ཁྱོད་ཀྱིས་སེལ་བར་འགྱུར། །གདོལ་པས་སྨྲས་པ། ཡིད་ནི་ཕྱི་རོལ་ལ་བལྟས་ནས། །གཞན་སྐྱོན་ཚོལ་ན་མཁས་པ་སྟེ། །དེ་ལྟར་ནང་ལ་མངོན་ཕྱོགས་ནས། །བདག་ཉིད་དཔྱོད་ལ་ཞུགས་ཚེ་མིན། །འདི་ལྟར་ཁྱོད་ལ་སྨྲ་བའི་རྒྱུས། །གཞན་ནི་མུ་ཅོར་སྨྲར་ཤེས་ཏེ། །དེ་ཁྱོད་རང་ཉིད་ཀྱིས་ནི་བདག །སྙམ་དགུ་སྨྲ་ལ་མཁས་པར་སེམས། །དགེ་ཚུལ་ན་རེ་ཟས་ཀྱི་དྲིན་ལན་དུ། །རྐུ་བས་གནོད་བྱེད་བྱ་རོག་མི་སྲུན་པ། ཁོ་ནས་ནོར་ཟེར་ཁྱོད་ནི་འདི་ལྟ་བུར། །རང་གིས་ནོངས་པའི་གཏམ་ཙམ་ཡོང་མི་སྣང༌། །བཞིན་བཟང་དེའི་ཕྱིར་ཁྱོད་ཀྱང་བློ་གཟུ་བོར་གནས་ནས་བདག་ཉིད་བསམ་པར་བྱ་སྟེ། ཁོ་བོའི་ངལ་བའང་འབྲས་བུ་དང་བཅས་པར་བྱའོ། །ཞེས་བསྒོས་ནས་སོང་ངོ༌། །དུས་གཞན་ཞིག་ན་སོས་ཀའི་དུས་སྟོན་ལ་བབ་པའི་ཚེ། ཤགས་ཀྱི་རྒྱལ་ཕམ་ཉན་པའི་བྱ་རྣམས་
བསྡུས་ཤིང༌། བྱ་རོག་དང་དགེ་ཚུལ་གཉིས་ཀྱང་བོས་ཏེ། གདོལ་པས་སྨྲས་པ། ཤིང་རྣམས་ལག་པ་མེ་ཏོག་ཁུར་བུས་དུད། །བྱ་ཚོགས་རྩེ་བས་དྲེགས་པའི་ཅ་ཅོ་ཡི། །ཕྱོགས་ཀྱི་མཛེས་མ་སོས་ཀའི་ཆང་འཐུང་བས། །མྱོས་པའི་གླུ་ལེན་ལྟ་བུར་དུས་འདི་དགའ། །བརྟན་གཡོ་མཐའ་དག་དཔྱིད་ཀྱི་བུ་མོ་དང༌། །ལྷན་ཅིག་ཀུན་དགའི་བདུད་རྩི་འཐུང་བ་ན། །རྩོད་པས་རང་གི་བདེ་བ་འཇོམས་བྱེད་པའི། །ཁྱོད་ཀྱི་ལས་འདིས་དགོས་པ་ཅི་ཞིག་འཐོབ། །གང་གིས་ཁྱེད་ཅག་ཡུན་རིང་ན་གྱུར་པའི། །ཁོན་ཆེན་དུག་དེ་བདག་དང་ཅང་ཤེས་ཀྱི། །བྱ་བརྒྱ་འདུས་པའི་མདུན་འདིར་སྐྱུག་ཅིག་དང༌། །ཚུལ་བཞིན་ན་བ་ཡིན་མིན་གདོད་ཤེས་འགྱུར། །དེ་ཁུ་བྱུག་དང༌། འཇོལ་མོ་དང༌། བྱ་རོག་ཆེན་པོ་དང༌། འོལ་བ་ལ་སོགས་པ་བྱའི་རྒན་རབས་རྒན་རབས་རྣམས་ཀྱང་གདོལ་པ་ཇི་སྐད་ཟེར་བ་བཞིན་དབྱངས་གཅིག་ཏུ་སྨྲ་ཞིང༌། ཁ་གཅིག་འཁྲི་ཤིང་རྣམས་ཀྱི་རྩེ་མོ་ན་ཏོག་ལྟ་བུ་དང༌། གཞན་དག་ཡལ་གའི་ལག་རྩེན་བིལྦ་ལྟར་འཁོད་དེ་ཅང་མི་ཟེར་བར་ཉན་ཅིང་འདུག་གོ །དེ་ལ་བཟང་བློ་ན་རེ། དོན་འདི་ལ་མང་དུ་ཅི་ཞིག་སྨྲ་སྟེ། ཁོ་བོ་གཙུག་ལག་ཁང་པར་བསམ་གཏན་དང་ཁ་ཏོན་བྱེད་པ་ལ་མང་དུ་སྨྲ་བ་དང༌། མུ་ཅོར་སྨྲ་བ་དང༌། གསང་མཐོར་སྨྲ་བས་ལན་གཅིག་མ་ཡིན་པར་ཐོ་བཙམས་ཤིང༌། བརྐུ་བ་དང༌། འཕྲོག་པའི་གནོད་པ་བྱེད་པའི་ཕྱིར། བུམ་པའི་སྤྱི་གཙུག་ཁོ་ན་དུག་སྦྱོར་བར་ཟད་དེ། འདི་ཉིད་ཁོ་ན་དུག་འཐོར་བ་དང༌།
དུག་གི་ཤུགས་མི་བཟད་པ་གཏོང་བ་ཡིན་ནོ་ཟེར་རོ། །བུམ་པའི་མགོ་ན་རེ། ཁ་ཏོན་སུས་འདོན་ལ་སུས་མི་འདོན་ཏེ། བཀྲེས་པའི་དཀའ་ཐུབ་བསྟན། ཉི་མ་ལ་སྦྱིན་སྲེག་བྱེད། ཟས་ཀྱི་བསམ་གཏན་ལ་གནས། ཡུལ་ངན་ལ་ཐོག་བརྫིས་གཏོང་ཞིང༌། ཨ་ཝའི་གསང་སྔགས་ཟློ་བ་དེ་ངའི་ཁ་ཏོན་ཡིན། རང་གི་སེམས་ལས་སུ་མ་རུངས་པ་ལ་མི་སེམས་པས། གཞན་གྱི་ཁ་ཏོན་ཁོ་ནས་ཁོ་བོའི་ཡོན་ཏན་གྱི་ཁྱད་པར་མ་ཐོབ་ཟེར་བའི་དགེ་ཚུལ་གཡོན་ཅན་འདིའི་སྤྱི་བརྟོལ་ལ་ལྟོས་དང༌། ཨ་ཝ་ཝ། དེ་ལྟར་ཁོ་བོ་དཀའ་ཐུབ་ཀྱི་ནགས་སུ་རིག་སྔགས་འདོན་པ་ལ་ལོག་པར་སྒྲུབ་ཅིང༌། ད་དུང་རང་ཉིད་བསམ་གཏན་པར་སྨྲ་བའི་གཟུ་ལུམ་ཅན་འདི་ཉིད་ཁོ་ན་རྩོད་པའི་རྩ་བ་ཡིན་ཏེ། བདག་གིས་ནི་འཁོན་ལན་གླན་པའང་མེད་ན། རྩོད་པ་བསླང་བ་ལྟ་ཅི་ཟེར་རོ། །བཟང་བློ་ན་རེ། དུད་འགྲོའི་སྙིགས་མ། བྱ་བརྒྱའི་གདོལ་པ། ཁྱོད་འདྲ་བ་བསྐྲད་ཀྱང་ཅི་ཞིག་ནོངས་ཏེ་བསྐྲད་པར་འོས་པ་གནས་ནས་བཏོན་པ་ཡིན་པའི་ཕྱིར་རོ། །དེང་སྲས་པོ་སྐལ་བཟང་རྒྱལ་རིགས་མཁས་པའི་བླ་མ། ལྷ་རྣམས་ཀྱང་ལུང་ལེན་པར་བྱེད་པ་རྣམས་ལ་སྔོན་སུས་ཀྱང་དེ་ལྟར་ཐོ་འཚམས་མ་མྱོང༌། བྱ་ངན་ཁྱོད་འདྲས་སྔོན་ཆད་ནམ་ཡང་ཅང་ཤེས་ཀྱི་མི་ལ་གནོད་པ་དེ་འདྲ་ཐུབ་མྱོང་བ་ཤེས་སམ། བུམ་པའི་མགོ་ན་རེ། རབ་བྱུང་གིས་མདའ་ཐོགས་ནས་ནགས་སུ་བྱ་བཤོར་བའི་རབས་ཤིག་ཀྱང་སྔོན་ནམ་ཡང་འཇིག་རྟེན་དུ་བྱུང་བ་ཤེས་སམ། བྱས་
མི་ལ་དྲག་ཤུལ་ཆེས་ཆེ་བ་བསྟན་པ་དང༌། དེ་ལྟར་བསྟན་ཡང་གྱོད་མེད་པའི་ལུགས་སྲོལ་སྔོན་དུས་ནས་གནས་པ་ནི། བྱའི་རྒྱལ་པོ་གཤོག་བཟང་གིས་ཀ་ཤིའི་རྒྱལ་པོ་བསད་པའི་བྱུང་བ་ཁྱོད་ཉིད་ཀྱིས་སྡེ་སྣོད་འདོན་པའི་སྒྲ་ལས་ཐོས་ན། ད་ཁྱོད་རང་གི་ཚིག་ལའང་ལོག་པར་སྒྲུབ་བམ། བཟང་བློ་ན་རེ། རབ་བྱུང་གིས་བྱ་རོག་བསྐྲད་པ་ཙམ་དུ་མ་ཟད་བསད་པ་ཡང་སྔོན་ཆད་བྱུང་བའི་ཚུལ་དགེ་སློང་འཆར་ཀའི་བྱུང་བ་སྔར་བདག་ཅག་གཉིས་ཐོག་མར་རྩོད་པའི་དུས་སུ་ཁྱོད་ཉིད་ཀྱིས་ཚུར་ལ་བསྙད་པ་མི་དྲན་ནམ། བྱ་ཡི་རྒྱལ་པོ་གཤོག་བཟང་ལ་བྱ་ཡི་རྒྱལ་པོ་ཟེར་བ་དེ་བྱ་ངན་གདོལ་བ་ཐ་ཆད་ཁྱོད་དང་མི་མཉམ་པའི་རྟགས་ཡིན་པས། ཁྱོད་དང་ནམ་མཁའ་ལྡིང་གཉིས་རིགས་པ་ག་ལ་མཚུངས། མཚུངས་སུ་ཆུག་ཀྱང་ངས་ཁྱོད་ལ་མི་ཟས་ཀྱི་བགོ་བཤའ་བྱས་པའི་དྲིན་ལན་དུ་སྔར་ཆོམ་རྐུན་བྱས་པས་མ་ཚིམ་པར། ད་དུང་གཤོག་བཟང་གིས་ཀ་ཤིའི་རྒྱལ་པོ་ལ་ཇི་ལྟར་བྱས་པ་དེ་མ་གྲུབ་པས་སྙིང་ནའམ། བུམ་པའི་མགོ་ན་རེ། འཆར་ཀ་དང་བྱ་རོག་གཞན་གྱི་ཡུལ་དུ་འཕྲད་པ་དང༌། ཁོ་བོ་རང་ཡུལ་ན་སྡོད་པ་གློ་བུར་བའི་སྐྱེ་བོས་བསྐྲད་པ་གཉིས་ཀྱང་ག་ལ་མཚུངས། ཁྱོད་ཁོ་བོའི་ཡུལ་དུ་འདུག་ནས་ས་རིན་ཟས་ཀྱིས་བཅལ་བ་ལ་དྲིན་ཅི་ཞིག་དྲན་པར་བྱ། ཁྱོད་ཀྱི་མ་བསྟབ་པའི་ཤ་དུམ་བདག་གིས་ཁྱེར་བ་ཡང་ཡུལ་བདག་གིས་དཔྱ་ཁྲལ་བླངས་པ་ཡིན་པས་ཅི་ཞིག་ནོངས་པར་འགྱུར། འོན་ཀྱང་ཁོ་བོ་རང་གི་ཡུལ་ན་ཉེས་པ་མེད་བཞིན་བསྐྲད་པས་ཁྱེད་
ཁོ་ན་ཤིན་ཏུ་ནོངས་ཅན་ནོ། །བཟང་བློ་ན་རེ། གླིང་འདི་ལ་འཛམ་གླིང་མི་ཡི་ཡུལ་ཞེས་འཇིག་རྟེན་ན་ཤེས་ཀྱིས་མཐོ་རིས་གཉིས་པ་བྱ་ཡི་ཡུལ་ཞེས་སུ་ཡིས་ཟེར། དེའི་ཕྱིར་ཁྱོད་ནི་རྟག་ཏུ་གཞན་ཡུལ་ན་གནས་པ་ཡིན་ན་ས་རིན་དང་དཔྱ་ཁྲལ་ཡང་ཇི་ལྟར་དབང་བར་འགྱུར། དེར་ཡང་མ་ཟད་དེ། ཁྱོད་མི་ཡུལ་ན་གནས་པ་དེ་སྲིད་དུ་རྔོན་པ་རྣམས་ཀྱི་རི་དྭགས་དང་ཁྱིམ་བདག་རྣམས་ཀྱི་ཕྱུགས་ལྟར་མིའི་ལོངས་སྤྱོད་ཁོ་ན་ཡིན་པས་བརྡུང་བ་དང་བསྐྲད་པ་ཡང་མི་ཉིད་དབང་ངོ༌། །བུམ་པའི་མགོ་ན་རེ། ས་གཞི་འབྱུང་པོ་འཛིན་མ་འདི་ལ་གངས་རྩེའི་སེང་གེ་ནས་ཁུང་གི་ཕྱི་བའི་བར་གྱི་བྱོལ་སོང་མང་པོ་སྤྲང་པོའི་གོས་ལ་ཤིག་ལྟར་འཁྲིགས་ནས་འདུག་སྟེ། དེ་ཐམས་ཅད་གླིང་འདི་མི་ཡུལ་ཡིན་གྱི་བྱ་ཡུལ་མིན་ཞེས་པའི་རིགས་པ་འདིས་གནས་ནས་ཕྱུང་བར་ནུས་སམ། དེ་ལས་གཞན་དུ་ན་ཁོ་བོ་གཅིག་པུ་བསྐྲད་པ་ཤིན་ཏུ་ཡུས་སོ། །ཁྱོད་ན་རེ་བྱ་མིའི་ལོངས་སྤྱོད་ཡིན་ཟེར་ཏེ། དེ་ལྟ་ཡིན་ན་ཁོ་བོས་ཤ་དུམ་ཁྱེར་བའང་ཕྱུག་པོའི་སྐྱེམས་ལྷག་ཕྱུག་པོའི་ཁྱིས་འཐུང་བར་ཟད་པས་ཇི་ལྟར་ན་གྱོད་འབྱུང་བར་འགྱུར། བཟང་བློ་ན་རེ། ཁ་སྨྱོ་བ། ལག་རྐུ་བ། ཤ་ཟ་ལྟར་གླག་ཚོལ་བ། ཁྱོད་གཅིག་པུ་མ་གཏོགས། གཞན་གྱིས་ཁོ་བོ་ལ་ཐོ་མི་འཚམས་པས་དེ་དག་ག་ལ་སྐྲོད། གཞན་ཡང་ཁྱོད་ལྷག་མ་ཟ་བའི་ཁྱི་ཡིན་ཟེར་བ་བདེན་ནམ། ཡུལ་འདིས་ས་བདག་རྒྱལ་པོ་ཡིན་པ་བདེན་ན་ས་སྐྱོང་གིས་ལྷག་མ་ཟ་བའི་རབས་ཤིག་སྨྲོས་དང༌། སྤྱིར་ཡང་ས་གཞི་སྐྱོང་བ་ཞེས་བྱ་བ་བྱམས་པས་འཇིག་རྟེན་གྱི་རྫི་བོ་བྱེད་པ་གཅིག་
ཡིན་གྱི། ཕྱི་ས་ཁམ་གང་གི་དོན་དུ་ཆུང་མ་ལ་ཕྱི་ཐག་སྟུང་བ་ཁྱོད་འདྲ་ཞིག་ཡིན་རེ་ཀན། བུམ་པའི་མགོ་ན་རེ། ཁོ་བོས་ཁྱོད་དཀའ་ཐུབ་ཀྱི་ནགས་སུ་བྱམས་པ་ལ་གནས་པའི་དྲང་སྲོང་གི་སྤྱོད་ཚུལ་ཅན་དུ་ཤེས་ཀྱིས་འདབ་ཆགས་རང་སྐད་སྨྲ་བ་དང༌། བཀྲེས་པས་རྒུམ་བུ་འཐུ་བ་ལ་དེ་ཙམ་དུ་ཐོ་འཚམས་པར་བརྩི་བ་མ་ཤེས་ཏེ། བྱིའུ་ཁུག་རྟ་ཡང་རང་གི་ཚང་མལ་དུ་འདུག་ནས་སྐད་ཅི་དགར་འབྱིན་ཅིང༌། ཟས་ཀྱི་ཆེད་དུ་ཕྱོགས་བཞིར་འགྲོ་ཡང་དེ་སུས་ཀྱང་དགག་པ་མི་སྣང་ངོ༌། །ཁྱོད་ཀྱི་སྨྲ་བ་གཞན་ཡང་འབྲེལ་མེད་ཡིན་ཏེ། འདི་ལྟར་ཁྱོད་ཀྱིས་བྱ་རྣམས་མི་ཡི་ལོངས་སྤྱོད་དུ་སྨྲ་བ་དང༌། དེ་ལ་ལོངས་སྤྱོད་དུ་བརྩིས་པའི་གཅེས་སྤྲས་མི་བྱེད་པ་གཉིས་ནང་འགལ་བར་བརྗོད་པའི་ཕྱིར། ཁྱིའི་དཔེ་བསྟན་པ་ཡིན་གྱི་ཁོ་བོའི་ཕ་མ་དང༌། ཕུ་ནུ་འདི་སྙེད་ཅིག་ཕྱོགས་འདིར་གནའ་བོའི་དུས་ནས་ཅི་སྟེ་ཡོད། དེ་ཙམ་ཞིག་མ་གཏོགས་སྐྱེས་པའི་ཕ་ཡུལ་ཞེས་བྱ་བ་ཡང་རྭ་ཟིང་ངེ་བ་ཞིག་གང་ནས་བཙལ། བཟང་བློ་ན་རེ། བྱིའུ་ཁུག་རྟ་ནི་འདབ་ཆགས་ཅང་ཤེས་ཡིན་ཏེ། རྫ་རྔ་བཞིན་དུ་རེ་འགའ་ན་སྙན་པར་སྒྲོགས་པ་དང༌། ཁྱོད་བླུན་པོ་དུས་མི་ཤེས་པ་དུས་དང་དུས་མིན་མེད་པར་ཀུ་ཅོ་འདོན་པ་གཉིས་ཅིའི་ཕྱིར་དཔེ་དོན་རིགས་པར་འགྱུར། ཁུག་རྟ་བདག་པོ་མེད་པའི་ཟས་སྒྲུབ་པ་དང༌། ཁྱོད་གཞན་གྱིས་ཡོངས་སུ་བཟུང་བའི་རྫས་འཕྲོགས་པ་གཉིས་ཀྱང་གཞན་ལ་ཐོ་བཙམས་པར་ག་ལ་མཉམ། ཁྱོད་ཀྱིས་རང་ཉིད་ས་སྐྱོང་དུ་སྨྲས་པའི་ཁས་བླངས་མེད་ཅེས་ཟེར་བ་དེ་ནི་ཤིན་ཏུ་ལེགས་ཏེ་ཁྱོད་
འདི་ལྟར་ཁས་བླངས་པ་མ་བརྗེད་པར་གྱིས་ཤིག་གནོད་བྱེད་ལྷམ་ནང་གི་རྡོ་བ་ཁྱོད་ཀྱི་ཕུ་ནུ་འདི་ན་ཡོད་པས། འདི་ཁྱོད་ཀྱི་རང་ཡུལ་དུ་ཅིའི་ཕྱིར་འགྲུབ་སྟེ། ཁྭ་ཏ་གནོད་འཚེ་མང༌། ཕ་མེས་དང་ཡང་མེས་སོགས་ཀྱི་རིང་ལ་གཞན་དང་འགྲས་ནས་རང་ཡུལ་ནས་བཏོན་པའང་ཡིན་སྲིད་པའི་ཕྱིར་ཏེ། དཔེར་ན་ད་རེས་རང་གི་ཀུན་སྤྱོད་ཉེས་པས་ཡུལ་ལས་ཉམས་པ་བཞིན་ནོ། །བུམ་པའི་མགོ་ན་རེ། རྟག་ཏུ་འགྲོགས་པས་ནོངས་ན་ཅ་ཅོ་ཅན་གྱི་འབབ་ཆུ་ལའང་རྩོད་པར་གྱིས་ཤིག །རྫས་མ་བྱིན་པ་ཁྱེར་བས་ནོངས་ན་བར་སྣང་གི་རླུང་ལའང་ཕ་རོལ་གནོད་པ་སྟོན་ཅིག་དང༌། ཀྱེ་མའོ། །ཁྱོད་ལ་བྱ་དགོས་པ་མང་ངོ༌། །དེ་ལས་གཞན་དུ་ཁོ་བོ་ལ་ནི་མིང་ས་སྐྱོང་དུ་འདོགས་སམ་མི་འདོགས་ཀྱང་བླའི། ནགས་འདི་ཁོ་བོའི་ཡུལ་ཡིན་པ་ཁྱོད་ཀྱིས་ཁས་བླངས་ཟིན་པས་བདག་གིས་མང་དུ་སྨྲས་པའི་དགོས་པ་གྲུབ་ཀྱིས། ད་ནི་ཁོ་བོ་མང་དུ་སྨྲ་བ་ལ་མི་བརྩོན་ནོ། །བཟང་བློས་སྨྲས་པ། ཁོ་བོས་ཇི་ལྟར་ཁས་བླངས། བུམ་མགོས་སྨྲས་པ། ཁ་ཏྭ་རང་ཡུལ་ནས་བཏོན་པའི་མཐུན་དཔེ་མཁོ་བོ་ནགས་ཚལ་འདི་ནས་བསྐྲད་པ་ཁས་བླངས་པས། ཇི་ལྟར་མ་བླངས་ཞེས་སྨྲས་པ་དང༌། དགེ་ཚུལ་ཅང་མི་ཟེར་རོ། །དེ་ནས་གདོལ་པ་པཎྜི་ཏས། རྩོད་པའི་ཐོག་མ་བྱ་རོག་གིས་བསླངས་པས་བྱ་རོག་ནོངས་པ་ཆེ་ཚུལ། མི་འཚམས་པའི་འཁོན་ལན་དགེ་ཚུལ་གྱིས་རྩལ་བས་དགེ་ཚུལ་ནོངས་པ་ཆེ་ཚུལ། དེ་གཉིས་བྱ་བའི་ངོས་ནས་ནོངས་ཚོད་འདྲ་མཉམ་ཡིན་ཀྱང་རྟེན་གྱི་ངོས་ནས་དགེ་ཚུལ་ནོངས་ཆེན་ཡིན་ཚུལ་དང་ཉེས་
པ་ཆེ་ཚུལ། གཞན་ཡང་བྱ་རོག་བྱས་པ་མི་གཟོ་བས་ཉམས་པ་དང༌། དགེ་ཚུལ་དཀའ་ཐུབ་ཀྱི་ནགས་སུ་བརླང་སྤྱོད་བྱེད་པ་སོགས་དེ་གཉིས་ནོངས་པ་མཚུངས་ཚུལ་དང༌། མི་མཚུངས་པའི་ཚུལ་མང་པོ་ཞིག་བསྟན་ནས། ཕྱིན་ཆད་དགེ་ཚུལ་གྱིས་དུས་དང་དུས་སུ་བྱ་རོག་ལ་སྟོན་མོས་མཆོད་པ་བྱ་བ་དང༌། དེའི་ཚེ་བྱ་རོག་གིས་ཀྱང་ཚངས་པའི་མཁུར་ཚོས་ནས་བྱུང་བའི་ཡི་གེ་ཨོཾ་ཨ་ཐཱ་ཞེས་བྱ་བ་འདིས་དགེ་ཚུལ་ལ་ཤིས་པ་བརྗོད་པར་བྱ་བ་སོགས་ཁྲིམས་སུ་བཅས་ནས་རྩོད་པ་ཟླུམ་པའི་དགའ་སྟོན་ཡང་བྱས་སོ། །ཉི་མ་ཕྲིན་ལས་ཀྱིས་བྲིས་པ་ཡིན་ནོ།། ༈ །།ཕྱུག་པོ་བུ་བརྒྱ་མ་ཟེར་བ་དེའི་སྒོར་སྤྲང་པོ་ཤིག་སླག་ཅན་ཞིག་བྱུང་ནས། ཉི་མའི་ནང་དུ་ཤིག་འཐུ་ཞིང་བསྡད་པས། ཕྱུག་པོས་དེ་ལ་བལྟས་ནས་ཁོང་འཛུམ་ཅིག་ཤོར་ཏེ། འདི་སྐད་ཟེར། ཕྱི་རོལ་དགྲ་རྐུན་འོང་སྙམ་མི་དགོས་ཀྱང༌། །ནང་དུ་ཤིག་གི་སྲིན་པོས་གཟོན་ཟོས་བྱེད། །ཉིན་མཚན་བར་མེད་ཤིག་དང་གཡུལ་སྤྲད་པས། །སེན་མོའི་མཚོན་ཆ་ཟད་དེ་ལག་ཡུར་བུད། །ལྤགས་ཟད་ལག་སོར་རྩེ་ནས་ཁྲག་འཛགས་ཤིང༌། །ཤ་དྲི་ལུས་མདོག་ནག་ལ་སྣུམ་ཞག་བྲལ། །སྐྲ་རྣམས་ཤིག་སྲོ་གཉིས་ཀྱིས་གཡེང་ཞིང་འགུལ། །ཁྱི་མང་ནང་དུ་སྤྲང་པོ་ཐང་ཆད་བཞིན། །བྲོས་པས་མི་ཐར་རང་གི་ལུས་ལས་སྐྱེས། །བསད་པས་མི་འཛད་གོས་ཀྱི་ཕྱི་ནང་ཁྱབ། །སྤྲུགས་པས་མི་འབུད་སྐྲ་རྩ་ཤིག་གིས་བཟུང༌། །སྐྱུར་བའི་ཐབས་མེད་མི་གཅིག་གོས་
གཅིག་རང༌། །སུ་འགྲོགས་མི་རྣམས་ཤིག་མེད་ཤིག་ཚང་བྱེད། །སུས་མཐོང་མི་ཀུན་འགོ་བའི་ནད་ལྟར་ལྟ། །མི་ཁྱུར་མི་ཚུད་གར་སོང་མི་ཡིས་བརྙས། །ཧྲུལ་པོའི་ཤིག་སླག་ལུས་གདོན་བཞིན་དུ་འབྲང༌། །དགྲ་ཡིན་བྱས་ན་རང་སྐྱེས་བུ་དང་འདྲ། །གཉེན་ཡིན་བྱས་ན་ལུས་ཁྲག་དྲོན་མོ་འཐུང༌། །འཚོས་ན་བུ་རོ་བསྐྱང་ན་དགྲ་བས་སྡང༌། །དགྲ་ཐབས་ཟིན་ཆུས་གང་ཡང་བྱར་མི་བཏུབ། །ནག་པོའི་སྐྲ་ལ་སྲོ་མའི་འབྲུ་དཀར་ཆགས། །འཇམ་པོའི་ལྤགས་རྣམས་འབྲུམ་བུའི་ཕུང་པོར་སོང༌། །སོས་དལ་ལག་པ་བྲེལ་བས་གཟེར་ཞིང་ངལ། །དང་བའི་བཞིན་རས་ཤིག་གི་ཟུག་རྔུས་སྡུད། །ཀྱེ་མ་རྣམ་པ་སྣ་ཚོགས་ལས་ཐབས་ཀྱིས། །མི་ལ་འཚེ་བྱེད་འབྱུང་པོ་མངོན་སུམ་ལྟའི། །ཤིག་སྲོ་གཉིས་དང་རུམ་བསྡོང་ཤིག་གི་བྲིས། །ཡི་ག་འཆུ་བའི་སྤྲང་པོ་སྙིང་རེ་རྗེ། །ཞེས་སྨྲས་པ། སྤྲང་པོའི་མཚང་ལ་ཕོག་ནས་ལན་སྨྲས་པ། ཁྱོད་ཀྱི་ཁྱིམ་སྒོ་ལས་གསུམ་བུ་ཡིས་གང༌། །ཕ་མའི་ཚེ་གསོག་ཟ་བའི་ལུས་སྐྱེས་དགྲ། །ཚེ་མཇུག་སྡུག་ལ་འཁོར་བའི་གསར་བྱུང་འདྲེ། །དེ་ཡིས་དྲེགས་ན་ང་ཡང་ཤིག་གིས་དྲེགས། །གཡས་ནས་ངུ་ཞིང་གཡོན་ནས་རྒྱུག་འདྲེད་བྱེད། །འཚིག་དང་དགོད་དང་ཀུ་ཅོ་སྣ་ཚོགས་ཀྱིས། །སྐད་ཅིག་བསྡད་ཀྱང་འཕྲལ་ལ་གཟེང་ནུས་པ། །འདྲེ་དམག་མངོན་སུམ་ཁྱིམ་དུ་བབ་པ་བཞིན། །འདུག་ན་སྤྲེ་དམག་མང་པོས་གཙེ་ཞིང་སྤྱོ། །ཟ་ཚེ་ཡི་དྭགས་ཚོགས་ཀྱིས་ཕོར་བུ་འདེགས། །ཉལ་ཡང་ནུ་འཚིག་སྒྲ་ཡིས་གཉིད་འཕྲོག་པ། །དེ་འདྲའི་བྱུར་ངན་ཁྱོད་ཀྱི་
ཁྱིམ་ན་མཆིས། །ཆེ་མཐོའི་མལ་སྟན་གཅིན་དང་རྟུག་པས་སྦག །གཙང་སྦྱར་ཟས་ཀྱི་སྣོད་རྣམས་དྲི་མར་བྱེད། །གཅེས་ཤིང་ཕངས་པའི་རྫས་མང་བཅག་ཅིང་བཀྲུམ། །གོས་དང་གདོང་གི་ངོས་ལ་མཆིལ་མ་འདེབས། །ཞོ་དང་འོ་མ་མར་ཁུའི་ཚོགས་མང་པོ། །ཚང་མང་ཐལ་བ་དཀྲུགས་པས་ཁྱིམ་ཀུན་ཁྱབ། །སླན་ཆད་ཕྱགས་མ་ཐོགས་པ་བརྒྱ་ཡིས་ཀྱང༌། །ཁྱིམ་དེ་བྱི་དོར་བྱ་བར་ནུས་མ་ཡིན། །ཁང་ཁྱིམ་མཛོད་དང་ཐང་རྣམས་ལྷས་སུ་བསྒྱུར། །མཛོད་ཀུན་དབྱིག་དང་ལྷས་མལ་ཕྱུགས་ཀྱིས་གང༌། །འོན་ཀྱང་འཁྱག་ལྟོགས་གཉིས་ཀྱིས་ཚེ་ཡོལ་བ། །བུ་ཞེས་ཟ་འདྲེ་མང་པོ་ཡོད་པའི་མཐུ། །ཕ་མའི་བག་ཡངས་བདེ་བའི་དགའ་སྟོན་དང༌། །ཤ་ཁྲག་ཟད་ཟད་བསགས་པའི་ཟས་གོས་ནོར། །མཉམ་དུ་ཟོས་ནས་བྱས་ཡུས་ཆེ་ཆེ་ལྟར། ངུ་བའི་འདྲེ་ཤིག་ཅན་ཁྱོད་སྙིང་རྗེའི་ཡུལ། །ཞེས་ཟེར་རོ། །དེ་ཕྱུག་པོའི་བྱིས་པ་རྣམས་ཀྱིས་ཚོར་ནས། ཅི་ཟེར། སྤྲང་པོ་སྡུག་དྲེད། རང་སྡུག་པ་ལ་ངུ་རྒྱུ་བསྐྱུར་ནས། མི་སྐྱིད་པ་ལ་འཕྱ་བཞད་བྱེད་པ་ཕྱུག་པོའི་ཁྱིམ་གཞིས་མིས་བཟུང་བ་དང༌། ཁྱོད་ཀྱི་རྩག་ཧྲུལ་ཤིག་གིས་གང་བ་གཉིས་འདྲ་ཟེར་རམ། འདྲ་ན་ཁྱོད་ངེད་ཀྱི་སྒོར་སྤྲང་ཕོར་རྒྱ་རྫ་ཙམ་བཟེད་ནས་ཅི་ལ་འོང༌། ཞེས་རྡོ་དང་དབྱུགས་པ་དང་ཐལ་བའི་ཆར་འབེབས་ཤིང་བརྒྱུག་པས། སྤྲང་པོ་མྱུར་དུ་ལངས་ཏེ་གོམ་པ་བཅའ་བཅུ་ཙམ་ཕར་བྲོས་ནས་བྱིས་པའི་ཚོགས་ལ་ལྟ་ཞིང༌། ཕུང་ཤིག་ཁྱེད་རྣམས་མཐོང་ན། །ཕྱུག་པོས་སྤྲང་ཕོར་འཛེད་ཉེན་ཡོད། །
སྤྲང་པོས་ཤིག་ལ་སུན་སྲིད་ཀྱང༌། །ཧྲུལ་པོའི་གོས་ལ་ཕང་སེམས་མེད། །མུ་ཏོའི་ཤིག་རྣམས་འགྲང་ཙ་ན། །གོས་ངན་སྦུགས་སུ་ཁ་རོག་ཉལ། །ཁྱེད་རྣམས་འགྲང་ཚད་ཟོས་ནས་ཀྱང༌། །མ་ཡི་པང་ན་འཚིག་ཅིང་ངུ། །ཕ་ལ་ཟ་བས་ཤིག་དང་འདྲ། །ཁ་ལྟོ་ཆེ་ལ་ཁྱེད་ཅག་ལྷག །ཕྱུག་པོ་འདྲད་པས་མ་ཚིམ་པར། །སྤྲང་པོ་ཟ་ལ་རྔམ་མམ་ཅི། །སྤྲང་པོ་ཤིག་ལ་མི་འཇིགས་ཏེ། །ཤིག་བརྒྱགས་ཡོང་ན་ཟ་རྒྱུ་ཡིན། །ལྟོགས་པ་བྱུང་ན་གསོ་རྒྱུ་ཡིན། །ཤོག་དང་ཨམ་ཕྲག་བཅུག་པས་ཆོག །སྤྲང་པོ་བྲོས་ཀྱང་མི་འཐོགས་ཏེ། །ཀོག་སྟེ་ལང་བས་གཞིས་རྫོགས་ཡིན། །བུ་སྨད་མང་པོའི་གདོས་ཐག་ལས། །འཆོར་མེད་ཕྱུག་པོ་སྙིང་རེ་རྗེ། །ཞེས་སྨྲས་ནས་ཡང་བྲོས་ཏེ་སོང་ངོ༌།། ༈ །།བླ་མ་ངག་གི་དབང་ཕྱུག་ལ་ཕྱག་འཚལ་ལོ། །མི་ཟད་སྤོབས་པའི་འབྱུང་གནས་ལྷག་པའི་ལྷ། །འཇམ་མགོན་སྙིང་གི་ཉི་མ་ལ་བཏུད་ནས། །གནད་ཟབ་ཚིག་གི་རྣམ་པར་བཞག་པ་ནི། །རྣམ་བཞིའི་རྣམ་བཤད་ཤིན་ཏུ་བསྡུས་ཏེ་བྱ། །ཨ་ཞེས་བྱ་བ་དགག་པའི་སྒྲ་ཡིན་ཏེ། །གང་ལ་ཞེ་ན་མ་རབས་སྐྱེ་བོའི་ཚིག །གང་ཞིག་ཅེ་ན་དམ་པའི་ལེགས་བཤད་ངག །གང་ཕྱིར་ཞེ་ན་དོན་མེད་དོན་ལོག་ཕྱིར། །ཇི་ལྟར་ལུས་ཅན་དག་གི་མཁྲིས་པའི་རོ། །དེ་ལ་མངར་བའི་རོ་ནི་ཡོད་མ་ཡིན། །དེ་བཞིན་མ་རབས་བླུན་པོ་རྣམས་ཀྱི་ངག །དེ་ལ་རྣམ་བཞག་བཟང་པོ་ཡོད་མ་ཡིན། །དེ་ཕྱིར་ཤིན་ཏུ་མ་རབས་རྣམས་ཀྱི་ཚིག །མཁས་པ་རྣམས་ཀྱིས་དགག་པར་བྱ་བ་སྟེ། །ལེགས་ཆ་མེད་དང་སྤང་བྱ་ཡིན་པས་ན། །ཨ་
ཞེས་གཟུར་གནས་རྣམས་ཀྱིས་སྲིད་འདིར་བསྒྲགས། །ཁ་ཞེས་བྱ་བ་གཏན་གྱི་སྒོ་ཡིན་ཏེ། །སྐྱེས་བུ་ཐ་ཤལ་རྣམས་ཀྱི་ཁ་ཉིད་ནི། །འདོར་འོས་སྨད་པར་བྱ་བའི་ངག་མང་པོ། །འབྱུང་བའི་གཞི་ཞེས་མཁས་པས་རྟོགས་པར་བྱ། །ཇི་ལྟར་རྡུལ་ཉོག་ཁྲོད་ནས་འོང་བའི་ཆུ། །ཀུན་ཏུ་རྙོག་མས་དཀྲུག་པ་ཡིན་ཞེས་བྱ། །དེ་བཞིན་མ་རབས་ཁ་ནས་འོང་བའི་ཚིག །ཀུན་ཏུ་ཉེས་པས་དཀྲུག་པ་ཁོ་ནར་ཟད། །མ་རབས་ཁ་ལ་དགག་བྱར་བསྟན་ཤུགས་ལས། །ཁ་ཡི་བརྗོད་པར་སློང་བའི་ཡིད་དང་ནི། །ཁ་དང་མཚུངས་པའི་ལུས་ཀྱི་སྤྱོད་པའང༌། །དེ་ཡིས་མཚོན་ནས་སྤང་བྱར་བསྟན་པ་ཡིན། །ཐེ་ལེ་ཞེས་པ་སྡུག་བསྔལ་སྒྲ་ཡིན་ཏེ། །མ་རབས་ཡིད་ཀྱིས་མ་རབས་ཚིག་བརྗོད་ཅིང༌། །མ་རབས་སྤྱོད་པ་རྟག་ཏུ་སྤྱོད་བྱེད་ན། །དེ་ནི་རྟག་ཏུ་དུ་ཁས་འདེབས་པར་འགྱུར། །འདི་ན་གང་ལ་སྐྱེ་བོ་རྣམས་ཀྱིས་ནི། །སྨོད་ཅིང་ཕྱར་ཀ་གཏོང་བ་ལ་སོགས་པ། །འདི་ཀུན་མ་རབས་སྤྱོད་ལས་འབྱུང་བ་སྟེ། །འདི་བཞིན་ཚེ་རབས་གཞན་དུའང་ཐེ་ལེ་ལེ། །ཇི་ལྟར་ལུས་ནི་གང་ན་འགྲོ་གྱུར་པ། །དེ་ནས་དེ་ཡི་གྲིབ་མ་རྗེས་སུ་འགྲོ། །དེ་བཞིན་མ་རབས་གང་དུ་སོང་གྱུར་ཀྱང༌། །སྡུག་བསྔལ་ཐེ་ལེ་མི་བཟད་རྗེས་སུ་འགྲོ། །དེ་ཕྱིར་ཚིག་འདི་རྣམས་ཀྱི་བརྗོད་བྱ་ནི། །མ་རབས་སྤོངས་ཞེས་དངོས་སུ་བསྟན་པ་དང༌། །ཡ་རབས་བསྒྲུབ་ཅེས་ཤུགས་ལ་བསྟན་པས་ན། །མི་ཆོས་འདོད་པས་དོན་འདི་རྟོགས་པར་གྱིས། །ཨ་ཁ་ཐེ་ལེའི་རྣམ་པར་བཤད་པ་ནི། །རྡོ་རྗེའི་མཆེད་པོ་
ཀུན་བཟང་འཇིགས་མེད་ཀྱི། །བཞེད་པ་ཇི་བཞིན་གཞོན་ནུ་འཇིགས་མེད་པས། །གང་དྲན་ལྷུག་པར་བརྗོད་པ་མངྒ་ལཾ།། །།