གཏམ་ཚོགས།
བཅའ་ཐོ།
གསུང་མཆོག་རྡོ་རྗེ་སིནྡྷུའི་ཆུ་གཏེར་ཀློང༌། །རྒ་ཤི་མེད་པའི་ལང་ཚོར་ཡོངས་སྨིན་པ། །ཨོ་ཌི་ཡཱ་ནའི་རིག་འཛིན་སློབ་དཔོན་ཆེའི། །ཞབས་པད་བདག་གི་མགོ་བོར་མཛེས་གྱུར་ཅིག །དྲི་མེད་མཁྱེན་པའི་འོད་ཟེར་ཆ་རྫོགས་པ། །རང་བྱུང་རྡོ་རྗེ་གསུམ་གྱི་ཉིན་མོར་བྱེད། །ཀུན་ཏུ་བཟང་པོའི་གཞན་ཕན་སྣང་བ་ཅན། །མཉམ་མེད་བླ་མ་སྙིང་དབུས་ཐིག་ལེར་བཞུགས། །རྩོད་ལྡན་མཁའ་ལ་འོད་གསལ་སྙིང་ཐིག་གི །རང་ལུགས་ཉིན་བྱེད་འདྲེན་པའི་ཤིང་རྟར་བདག །རིག་འཛིན་ཌཱཀྐིས་བྱིན་རླབས་དབང་བསྐུར་ཞིང༌། །དམ་ཅན་རྒྱ་མཚོས་གཡེལ་མེད་ཕྲིན་ལས་སྒྲུབས། །ཞེས་དགེ་ལེགས་ཀྱི་ཚིགས་སུ་བཅད་པས་བྱང་དྲངས་ཏེ། གླེང་བར་བྱ་བ་ནི། སྤྱིར་བོད་ཀྱི་ཡུལ་འདིར། ས་དགེ་རྙིང་གསུམ་ཀར་འབྲུག་བོན་གསུམ། ཇོ་ཞལ་བོ་དོང་སོགས་ཀྱི་ལུགས་སྲོལ་མང་པོ་ཡོད་ཀྱང༌། གངས་ཅན་གྱི་ལྗོངས་སུ་བསྟན་པ་རིན་པོ་ཆེའི་སྲོལ་སྤྱི་དང༌། ཁྱད་པར་གསང་སྔགས་ཀྱི་ལུགས་སྲོལ་དང་པོར་ཕྱེ་བ་ནི་སྔ་འགྱུར་རྙིང་མ་ཡིན་ཅིང༌། དེའི་བརྒྱུད་འཛིན་ལ་གྲུབ་ཆེན་རྗེ་འབངས་ཉེར་ལྔ་དང༌། ཟུར་པ་མེས་དབོན་རྣམ་གསུམ་ནས་བཟུང༌། ཆོས་རྒྱལ་གཏེར་བདག་གླིང་པའི་བར་དུ་རིག་འཛིན་རྩལ་འཆང་གི་ཕྲེང་བ་གསེར་གྱི་ཉག་ཐག་ལྟ་བུ་བྱུང་ཡང་ཕྱི་མའི་དུས་སུ་སྟོན་ཆེན་དང་སྡེ་དགོན་ཕལ་ཆེར་མངའ་ཐང་དང་འཁོར་སློབ་ཀྱི་གཟི་བྱིན་འགྲན་ཅིང༌། དབྱངས་རོལ་དང་མདོས་གཏོ་ཙམ་ལ་སྙིང་པོ་རེ་ནས། རྙིང་བསྟན་རི་མོའི་མར་མེ་ལྟར་གྱུར་པ་ན། ཀུན་ཏུ་བཟང་པོའི་སྨོན་ལམ་གྱི་མཐུ་གྲུབ་ཅིང་མཁྱེན་པའི་ཡེ་
ཤེས་ཀྱི་རྩལ་འཆང་བ་ཁམས་གསུམ་ཆོས་ཀྱི་རྒྱལ་པོ་ཆེན་པོ་རིག་འཛིན་འཇིགས་མེད་གླིང་པས་བཤད་སྒྲུབ་ལས་གསུམ་གྱི་ཕྲིན་ལས་རླབས་པོ་ཆེས་གྲུབ་མཐའ་གཞི་བཞེངས་སུ་བསླངས་ཏེ། སྟོད་མོན་བལ་ནས་སྨད་རྒྱ་སོག་གི་ཡུལ་གྲུ་ཚུན་ཆད་སློབ་བརྒྱུད་ཀྱིས་བཀང༌། མོན་འཇིགས་མེད་ཀུན་གྲོལ། ཀོང་སྨྱོན་སྦས་པའི་རྣལ་འབྱོར། འཇིགས་མེད་རྒྱལ་བའི་མྱུ་གུ་སོགས་དངོས་སློབ་དང༌། ཁམས་རྫོགས་ཆེན་རིན་པོ་ཆེ་དང་རྒྱལ་སྲས་གཞན་ཕན་མཐའ་ཡས། མཁྱེན་སྤྲུལ་རིན་པོ་ཆེ་འཇིགས་མེད་ཡེ་ཤེས་རྡོ་རྗེ། ཤར་རྫོགས་ཆེན་པ་ཆོས་དབྱིངས་སྟོབས་ལྡན་རྡོ་རྗེ། དཔལ་དགེ་རྡོ་རྗེ་འཆང་འཇིགས་མེད་ཆོས་ཀྱི་དབང་པོ། རྗེ་ཐམས་ཅད་མཁྱེན་པ་འཇིགས་མེད་མཁྱེན་བརྩེའི་ཟློས་གར་སོགས་ཡང་སློབ་གྲགས་པ་དོན་ལྡན་གྱི་མཁས་གྲུབ་ཆེན་པོ་རྣམས་ཀྱི་དྲིན་ལས་ད་ལྟའི་བར་དུ་སྔ་འགྱུར་རྡོ་རྗེ་ཐེག་པའི་བཤད་སྒྲུབ་ཀྱི་སྲོལ་མ་ནུབ་པར་གནས་པ་ཡིན་ནོ། །དེ་ལྟ་བུའི་བརྒྱུད་པ་ཐམས་ཅད་ཀྱི་ནང་ཀུན་མཁྱེན་བླ་མ་གཉིས་པ་ལྟ་བུའི་བསྟན་པའི་ཆུ་མགོ་ནི་ཨོ་རྒྱན་རིན་པོ་ཆེས་གཏེར་ལུང་དུ་མར་རྗེས་སུ་བསྔགས་ཤིང༌། ཤར་ཕྱོགས་ཀྱི་རྒྱུད་དུ་པདྨའི་རིང་ལུགས་སྤེལ་བར་ཐུགས་བསྐྱེད་སྨོན་པའི་འབྲས་བུའི་རྩལ་རྫོགས་པ་གྲུབ་པ་མཆོག་གི་དབང་པོ་འཇིགས་མེད་ཕྲིན་ལས་འོད་ཟེར་ཡིན་ལ། རྗེ་བཙུན་འདིའི་གདན་ས་ནི། རོང་སྟོན་པདྨ་བདེ་ཆེན་གླིང་པའི་གཏེར་ལུང་བཞིན། ཤུགས་ཆེན་འགྲོ་དོན་ལྷུན་གྲུབ། བྲག་ཆེན་ཡར་ལུང་པདྨ་བཀོད། གཙང་ཆེན་དངོས་གྲུབ་དཔལ་འབར་གླིང་དང་
གསུམ་དུ་བྱུང་བ་ལས། ད་ལྟ་ནི་ཕྱི་མ་གཉིས་ཙམ་གནས་པ་སྟེ། དེའང་རྗེ་རང་གི་གསུང་ན། ངའི་སྒྲུབ་སྡེ་འདི་མཁོས་ཀ་ལ་བལྟས་ན། ཕྱུག་པོའི་ལྷས་མལ་ཙམ་ལས་མེད་དེ། རྙིང་བསྟན་གྱི་རྩ་བ་གནས་པས་རྡོ་རྗེ་མཁའ་འགྲོ་མ་རྣམས་སྤྲིན་བཞིན་འདུ་བར་འདུག །ཅེས་གསུངས་པ་ལྟར། སྟོང་ལྡིར་གྱི་འུར་མི་ཆེ་ཡང༌། ད་ལྟའི་བར་དུ་སྙིང་པོའི་བསྟན་འཛིན་བར་མ་ཆད་པར་བྱོན་པ་ཞིག་ཡིན་པས། དེ་དག་གི་རྗེས་སུ་སྐྱེས་པའི་རང་རེ་རྣམས་ཀྱིས་ཀྱང་བརྒྱུད་པའི་བླ་མི་འཚོང་ཙམ་རེ་ཅིས་ཀྱང་དགོས་པར་འདུག་རུང༌། མི་བསམ་རང་བསམ་མཐུན་མི་མཐུན་སྣ་ཚོགས་ཤིག་ཡོང་བར་སྣང་བ། དེ་བཞིན་བྱེད་ཚེ་དམ་པ་གོང་མའི་ཕྱག་རྗེས་ཆུད་ཟོས་སུ་འགྲོ་བས། གལ་ཆེ་ངེས་ཀྱི་བཅའ་ཐོ་རགས་པ་ཙམ་དགོད་པར་བྱ་སྟེ། དེ་ལ་སངས་རྒྱས་ཀྱི་བསྟན་པ་སྤོང་ཀློག་གཉིས་ཀྱིས་འཛིན་དགོས་པ་ལ། མིང་བསྟན་པ་ལ་ཞུགས་པར་བཏགས་ནས་ཡིག་ངོ་ཤེས་པ་ཙམ་ནས་དབྱར་སྟོན་གྱི་ནམ་ཟླ་ཐམས་ཅད་གྲོང་ཆོག་ལ་ཟད། དགུན་དཔྱིད་ཀྱི་ཟླ་བ་བྱུང་ཚེ་སྒྱེ་ཁ་དང་རྐྱལ་ཁའི་གཉེར་བ་ལ་བཏང་ན། ཁང་གོག་སྟོང་པ་ཤ་སྟག་གིས་ཤཱ་ཀྱ་སེང་གེའི་བསྟན་པ་མི་ཟིན་ཅིང༌། བནྡེའི་ཕ་ཁང་གཙུག་ལག་གི་ཁང་པ་ཡིན་པས་རང་གི་ཕ་ཐོབ་ཀྱི་རལ་གྲི་ཐང་ལ་མ་འཆོར་བར་མ་མཐའ་བྱས་ཀྱང་དགུན་ཟླ་གསུམ་ལ་དགོན་ཁང་ནང་དུ་སྟན་ཆགས་པ་དང༌། དེར་ཡང་ཤེས་རབ་དང་བརྩོན་འགྲུས་མི་དམན་པ་རྣམས་ཀྱིས་སྤྱོད་འཇུག་དང༌། སྡོམ་གསུམ་རྣམ་ངེས། ཡོན་ཏན་རིན་པོ་ཆེའི་མཛོད་སོགས་ལ་
བསླབ་སྦྱངས་ལ་འབུངས། དེ་ལྟར་མི་ནུས་པ་རྣམས་ནས་ཀྱང་ཐེག་པ་ཆེན་པོའི་ལམ་གྱི་འགགས་སྡོམ་ཐམས་ཅད་སྔོན་འགྲོའི་ཁྲིད་ཡིག་དྲན་པ་ཉེར་བཞག་ཏུ་ཚང་བས་དེ་ཙམ་ངེས་པར་བསླབ། གཞུང་ལུགས་ཀྱི་སྦྱངས་པ་མཐར་ཕྱིན་ནས་རང་ཉིད་བསྟན་པ་རིས་མེད་དུ་སོང་ན་མ་གཏོགས། གསར་བུའི་དུས་སུ་གཞུང་ལུགས་སྲ་སྲེ་མང་པོ་ལ་མི་འཇུག་ཅིང༌། འཆད་སྤེལ་ནུས་མཁན་ཚོས་ཀྱང་ཉན་པ་པོའི་བློ་ནུས་དང་བསྟུན་ནས་སྡེ་སྣོད་སྤྱིའི་བཤད་པས་ཁོག་ཕུབ་སྟེ། གནད་རང་ལུགས་ཀྱི་འགགས་ལ་སྒྲིལ་ཞིང་འཆད་པ་ལྟ་བུ་རང་གཞུང་ཤེས་པའི་ཡན་ལག་ཏུ་བྱེད་ན་མ་བཀག །དེ་ལས་གཞན་དུ་ཀུན་མཁྱེན་ཡབ་སྲས་ཀྱི་བཤད་སྲོལ་བག་ལ་ཞ་བའི་རྒྱུར་གཏོགས་རྒྱུའི་བཤད་པ་གསར་པ་ཁྱབ་བདལ་དུ་མང་ན་རང་ཉིད་ཅོལ་ཆུང་བའི་ནང་ཆ་བསྟན་པར་མ་ཟད་རྡོ་རྗེ་སྙིང་པོའི་བསྟན་པའི་ཞབས་འདྲེན་དུ་འགྱུར་བས་དེ་ལྟར་མ་སོང་བར་བྱ། དེ་བཞིན་དུ་ཚོགས་འདོན་ལའང་གྲུབ་དབང་བླ་མའི་སྐུ་དུས་ནས་རྒྱུན་ཚུགས་པའི་ཆོས་སྤྱོད་རིགས་ལ་རུང་མཐུན་བརྩིས་པ་ཞིག་མ་གཏོགས་སོ་སོའི་སྣང་བར་གང་དྲན་གྱི་གསར་ལུགས་མང་པོ་མི་བྱེད། དལ་འབྱོར་རྙེད་དཀའ་ནས་བཟུང་སེམས་བསྐྱེད་བར་གྱི་ཁྲིད་རིམ་ལ་གོ་བ་ཅུང་ཟད་ཆགས་པ་དང༌། སྔོན་འགྲོའི་ཉམས་ལེན་འབུམ་ལྔའི་བསགས་སྦྱང་དང་བཅས་པ་གནད་སྨིན་གཏོང༌། དེ་ནས་རབ་རྩ་བ་གསུམ་གྱི་བསྙེན་སྒྲུབ་དང་དེ་ལྟར་མ་གྲུབ་ནའང་རིགས་འདུས་དང་འགྲོ་འདུལ་སྡུག་བསྔལ་རང་གྲོལ་གང་རུང་ལ་བསྙེན་པ་བྱེད་རྒྱུ་
སོགས་སྒྲུབ་སྡེ་མིང་དོན་མི་འཛོལ་བའི་ཐབས་ཚུལ་ལ་འབད། དེ་རྣམས་གཙོ་བོར་དགུན་བཅའ་བྱེད་ཚུལ་ཡིན། དུས་རྒྱུན་དུ་ཡང་བླ་རྣམ་དང༌། རྩ་གསུམ་གསོལ་ཀ་ཆགས་མེད་དང༌། བྱང་སེམས་ཀྱི་རྩ་ལྟུང་དང་སྔགས་ཀྱི་རྩ་ལྟུང་སྡོམ་ཚིག་བློ་ལ་བཟུང་ནས་ཉིན་རེ་བཞིན་བསྔོ་བགྲང་དང་བཅས་ཁ་ཏོན་དུ་བཟུང་བ་གལ་ཆེ་སྟེ། མངའ་རིས་པན་ཆེན་དང་ཀུན་མཁྱེན་བླ་མ་སོགས་ཀྱི་ཕྱག་བཞེས་ཀྱང་ཡིན། བནྡྷེས་སྐྱ་ཆས་གྱོན་པ་ལར་ཡང་བསྟན་པའི་མིག་ལྟོས་ལ་ཤིན་ཏུ་གནོད་ཅིང༌། ཁྱད་པར་དུ་ཚོགས་གྲལ་དང་དགོན་པའི་ནང་དུ་ཁྱིམ་པའི་ཆས་འཇུག་པ་མང་པོ་མཐོང་ན་གདོལ་སྤྱོད་ཀྱི་སྐྱེ་བོས་ཀྱང་ཁྲེལ་བ་དང༌། བསྟན་པ་ལ་མི་གུས་པའི་ཆག་སྒོ་ཆེན་པོའི་གཞིར་འགྱུར་བས། རྒྱུན་པར་སླག་སྐྱ་དང་སྐེ་རགས་སྔོན་དམར་འཆང་བ། གོས་བརྫི་བཅིང་བྱེད་པ། དགྲ་དོགས་མེད་པའི་སར་ཡང་གྲི་ཐུང་དང་ཤང་ལང་འདོགས་པ་སོགས་གཏན་ནས་མི་བྱེད། ཚོགས་གྲལ་དུ་སྐྱེས་པ་བུད་མེད་ཉལ་པོ་བྱེད་པའི་གཏམ་སོགས་ཁྱིམ་པ་སུན་འབྱིན་གྱི་ཀུན་སྤྱོད་ངན་པའི་རིགས་ལ་མི་འཇུག་ཅིང༌། གལ་སྲིད་འཇུག་མཁན་བྱུང་ན་རྒན་པ་རྣམས་ནས་བསྟན་པའི་ལ་རྒྱལ་བསམས་ཏེ་གླེང་དྲན་ཐོངས། དགེ་འདུན་པས་དམར་ཆོག་དང༌། བཙུན་པས་ཁེ་སྤོགས་ཆེན་པོ་དང་ཁྱད་པར་བཤས་ཚོང་བྱེད་པ། དགོན་ཁང་དུ་སེར་ཁྱིམ་འཛིན་པ་སོགས་སངས་རྒྱས་ཀྱི་བླ་འཚོང་ཞིང་རྒྱལ་བའི་བསྟན་པ་ལ་ཐན་སྐྱེལ་བ། འཕགས་པའི་དགེ་འདུན་གྱི་རྐང་འདྲེན་ཅིང༌། ལྷ་དཀར་ཕྱོགས་སྐྱོང་བས་མཐོང་ན་དམོད་
འདེབས་པའི་སྤྱོད་ངན་རྣམས་རེག་ཕུང་གི་དུག་བཞིན་རིང་པོ་བས་ཀྱང་ཆེས་རིང་པོར་སྤོངས། མེ་དང་ཐབ་ཁ་བུད་ཤིང་གི་ཚོགས་པ་རྣམས་ཡ་མ་བྲལ་ན་གཡོས་བསྐོལ་ཡོང་སྟེ། སོ་སོར་བྱས་ན་མི་ཡོང་བ་ལྟར་དགོན་པའི་སྤྱི་ཆུས་བརྟན་མི་བརྟན་ཐམས་ཅད་དགེ་འདུན་གྱི་ཐུགས་བློ་མཐུན་མི་མཐུན་འདི་ལ་རྩ་བ་ཐུག་འདུག་པས་ཆོས་མཐུན་གྱི་བྱ་བ་ཆེ་ཆུང་གང་ལ་ཡང་བཟང་པོ་ཟུར་ཐོན་དང༌། ངན་པ་མགོ་རྒྱལ་དུ་མི་འགྲོ་བར་བློ་སེམས་གཅིག་དྲིལ་དགོས་པ་བཅས། དགེ་བཅུའི་གྲངས་ལྡན་གྱི་རྩ་ཚིག་ཉེ་འཁོན་མེད་པར་སྨན་པ་དྲང་སྲོང་རི་ཥིའི་དཀྱིལ་འཁོར་ལྟ་བུ་འདི་ཉིད་གསུང་རྡོ་རྗེ་པདྨ་སཾ་བྷ་བ་དངོས་དང་དབྱེར་མི་ཕྱེད་པའི་རིག་འཛིན་གྱི་སློབ་དཔོན་ཆེན་པོ་འཇམ་དཔལ་ཆོས་ཀྱི་བཤེས་གཉེན་ཞབས་ཀྱིས་བཀའ་དྲིན་གྱིས་འཚོ་བའི་མང་ཐོས་ད་རི་དྲ་འཇིགས་མེད་བསྟན་པའི་ཉི་མ་ཕྲིན་ལས་ཀུན་ཏུ་ཁྱབ་པའི་དཔལ་གྱིས་ལྷག་བསམ་བཟང་པོས་བྲིས་པ་མཚོ་སྐྱེས་རྒྱལ་བ་གཉིས་པའི་ཕྲིན་ལས་ཀྱི་གྲོགས་སུ་འགྱུར་བར་རྩ་གསུམ་རྒྱ་མཚོའི་དགེ་བས་བྱིན་གྱིས་རློབས་ཤིག་གུ།། །།
སྐྱབས་འགྲོའི་རྣམ་བཞག
༈ སངས་རྒྱས་འཇིག་རྟེན་ལ་ཐུགས་བརྩེ་བ་ཅན་སྲས་བྱང་ཆུབ་སེམས་དཔའི་ཚོགས་དང་བཅས་པ་ལ་ཕྱག་འཚལ་ལོ། །ཡོན་ཏན་རིན་པོ་ཆེའི་འབྱུང་གནས། ཐར་པའི་ལམ་གྱི་སྒོ་མོ་ཆེ། བདེ་ལེགས་མཐའ་དག་གི་རྩ་བ་དཀོན་མཆོག་གསུམ་ལ་སྐྱབས་སུ་འགྲོ་བའི་རྣམ་བཞག་བསྡུས་ཏེ་བསྟན་པ་ལ། སྐྱབས་སུ་འགྲོ་བའི་ཡུལ། སྐྱབས་སུ་འགྲོ་ཚུལ། སྐྱབས་འགྲོའི་བསླབ་བྱ། དེའི་ཕན་ཡོན་བཤད་པ་སྟེ་བཞི་ལས། དང་པོ་ལ་སྐྱབས་ཡུལ་ངོས་བཟུང་བ་དང༌། སྐྱབས་དེ་ཉིད་རིགས་པས་སྒྲུབ་པ་སྟེ་གཉིས་ལས། དང་པོ་ནི། སྤྱིར་འཇིག་རྟེན་པའི་
སྐྱབས་གནས་ཚངས་པ་དང་དབང་ཕྱུག་ལ་སོགས་པ་འཇིག་རྟེན་ན་སྐྱབས་སུ་གྲགས་པ་མང་མོད་ཀྱི། སྲིད་པ་སྡུག་བསྔལ་གྱི་རང་བཞིན་རྨིང་ནས་སྒྱེལ་བ་ལ་མཚུངས་ཟླ་མ་མཆིས་པ་ནི། སངས་རྒྱས་བཅོམ་ལྡན་འདས་ཉག་གཅིག་ཡིན་ལ། དེའི་ཕྱིར་དེ་ཉིད་དང༌། དེས་བསྟན་པ་དམ་པའི་ཆོས་དང༌། དེའི་སྲས་སློབ་མ་དང་བཅས་པ་རྣམས་ལ་སྐྱབས་ཡང་དག་ཏུ་བཟུང་བ་ནི་དངོས་པོའི་དོན་དང་མཐུན་པ་ཡིན་པས། འདིར་དཀོན་མཆོག་རིན་པོ་ཆེ་གསུམ་གྱི་ཡོན་ཏན་མདོ་ཙམ་དང་བཅས་པའི་ངོ་བོ་དང་དབྱེ་བ་འཆད་ན། ཤེས་བྱ་ཐམས་ཅད་ལ་མཁྱེན་པ་དུས་གཅིག་ཏུ་འཇུག་པའི་ཡེ་ཤེས་དང༌། དེ་དང་ལྡན་པའི་འགོག་བདེན་མཐར་ཐུག་དང༌། དེ་དག་རྒྱུད་ལྡན་གྱི་གང་ཟག་སངས་རྒྱས་དཀོན་མཆོག་སྟེ། འདུས་མ་བྱས་སོགས་ཡོན་ཏན་བརྒྱད་ལྡན་གྱི་སྐྱབས་གནས་མཐར་ཐུག་དེ་ཉིད་དོ། །དེ་ལ་ཡོན་ཏན་བརྒྱད་ནི། དེ་བཞིན་གཤེགས་པའི་ཆོས་ཉིད་རང་བཞིན་མེད་པའི་མཚན་ཉིད་ཅན་དེ་ཉིད་རྒྱུ་རྐྱེན་གྱི་རྩོལ་སྒྲུབ་ལས་མ་བྱུང་བས་འདུས་མ་བྱས། གཉེན་པོའི་འབད་རྩོལ་གྱིས་སྤང་བྱ་ཆེད་དུ་བཀག་མི་དགོས་པར། སྔ་ནས་ཆགས་ཐོགས་ཀྱི་དྲི་མ་མཐའ་དག་སྦྱངས་ཟིན་པའི་ལག་རྗེས་སུ་གློ་བུར་གྱི་སྒྲིབ་པ་གཞར་ཡང་མ་མཆིས་པའི་ངོ་བོར་ལྷུན་རྫོགས་པས་ལྷུན་གྱིས་གྲུབ་པ། དེ་ཉིད་ཀྱི་དོན་འཕགས་པའི་ཡེ་ཤེས་ཀྱིས་ཡུལ་དང་ཡུལ་ཅན་གཉིས་སུ་མེད་པའི་ཚུལ་དུ་མཐོང་བ་མ་གཏོགས་པར་རང་རང་གི་ངོ་བོ་སྒྲ་རྟོག་ཐ་སྙད་ཀྱིས་དངོས་སུ་མཐོང་བར་བྱར་མེད་པས་གཞན་
རྐྱེན་གྱིས་རྟོགས་མེད། ཕྱོགས་དུས་སྲིད་དང་ཞི་བའི་ཐ་སྙད་ཀྱི་ཤེས་བྱ་སྔ་ཕྱིའི་ངེས་པ་ལ་མ་ལྟོས་པར་སེམས་ཀྱི་སྐད་ཅིག་གཅིག་ལ་གཟིགས་ཀྱང་ཆོས་ཉིད་བསམ་གྱིས་མི་ཁྱབ་པའི་གཤིས་སུ་མཉམ་པར་བཞག་པའི་ཡེ་ཤེས་དེ་ཡང་མི་འདོར་བས་ན་ཐམས་ཅད་མཁྱེན་པ། འགོག་པ་ཡང་དག་པའི་མཐའ་མངོན་དུ་མཛད་ཀྱང༌། མཐའ་ཡས་པའི་སེམས་ཅན་གྱི་ཁམས་ལ་སྙིང་རྗེ་ཆེན་པོའི་འཇུག་པ་རྒྱུན་མི་འཆད་པར་སུ་ནི་རྒུད། སུ་ནི་ཉམ་ཐག་སུ་ཞིག་ནི་དགྲོལ་བར་བྱ་ཞེས་དགོངས་ཤིང་སྲས་སྒྲ་གཅན་ཟིན་བཞིན་དུ་སྙོམས་པར་བརྩེ་བས་ན་བརྩེ་བ། སྨོན་ལམ་གྱི་མཐུ་དང༌། ཏིང་ངེ་འཛིན་གྱི་སྟོབས་དང༌། ཐབས་ལ་མཁས་པའི་སྒོ་ཟད་མི་ཤེས་པས་སེམས་ཅན་ཚད་མེད་པ་རྣམས་རང་རང་གི་སྐལ་པ་ཇི་ལྟ་བ་བཞིན་དུ་སྨིན་ཅིང་གྲོལ་བར་མཛད་པས་ན་མཐུ་ལྡན། གང་ཟག་གང་ཞིག་གི་རྒྱུད་ཀྱི་ཆོས་ཉིད་གློ་བུར་གྱི་ཉེས་པ་ཀུན་ལས་གྲོལ་བའི་ཆོས་མཆོག་མྱ་ངན་མེད་པའི་གོ་འཕང་འདུས་མ་བྱས་སོགས་ཡོན་ཏན་གསུམ་ལྡན་ངོ་བོ་ཉིད་སྐུ། འབྲས་བུ་ཆོས་སྐུའི་ནང་ཚན་ཡེ་ཤེས་ཆོས་སྐུ་གཟུགས་ཀྱི་སྐུ་རྣམ་པ་གཉིས་དང་བཅས་པ་མཁྱེན་པ་སོགས་ཡོན་ཏན་གསུམ་ལྡན་གཞན་ཕན་ཕྲིན་ལས་ཀྱི་བདག་ཉིད་དེ། དབྱེ་བ་དྲུག་དབྱེ་གཞི་གཉིས་དང་བརྒྱད་དོ། །འཕགས་པ་རྣམས་ཀྱི་ཡེ་ཤེས་གཟིགས་པ་དང༌། དེ་དག་གི་ཐུགས་རྒྱུད་ན་བཞུགས་པའི་འགོག་བདེན་སོ་སོར་བརྟགས་པ་ལས་ཐོབ་པ་ནི་ཆོས་དཀོན་མཆོག་སྟེ། བསམ་མེད་སོགས་ཡོན་ཏན་བརྒྱད་ལྡན་གྱི་རྣམ་བྱང་བདེན་པའོ། །ཡོན་ཏན་བརྒྱད་ནི། ཡོད་དང་མེད་པ། གཉིས་ཀ་དང་གཉིས་མིན་ཏེ་མཐའ་
བཞིའི་མཚན་མ་ཐམས་ཅད་ཆོས་ཉིད་མཉམ་པ་ཉིད་དུ་རྣམ་པར་དག་ཅིང་དོན་དམ་གཟིགས་པའི་མདུན་ན་གཟོད་ནས་མ་སྐྱེས་པའི་རང་བཞིན་ཡིན་ལ། འགོག་བདེན་དོན་དམ་པའི་བདེན་པར་བསྡུ་བའི་ཕྱིར་བསམ་མེད། ལས་དང་ཉོན་མོངས་པའི་ཀུན་འབྱུང་ཅི་རིགས་གཏན་དུ་ཟད་པའི་བདག་ཉིད་ཡིན་པ་དང༌། རང་གི་ངོ་བོ་ཤེས་དང་ཤེས་བྱའི་གཉིས་སྣང་དང་བྲལ་བས་ན་གཉིས་མེད། ཚུལ་བཞིན་མ་ཡིན་པ་ཡིད་ལ་བྱེད་པའི་ཉེས་པ་ཀུན་གྱི་རྒྱུ་བ་ཤིན་ཏུ་ཟད་པས་ན་རྣམ་པར་རྟོག་མེད། དེའང་མཐོང་ལམ་ལ་སོགས་པར་མ་དག་ས་བདུན་གྱི་བར་ཆད་མེད་ལམ་དུ་ཚུལ་མིན་ཡིད་བྱེད་ཀྱི་རྒྱུ་བ་ཀུན་འཛད་པ་ཞིག་དགྲ་བཅོམ་རྟོགས་པ་སྔོན་སོང་མ་གཏོགས་པ་མེད་མོད་ཀྱི། དེ་དག་གི་འགོག་བདེན་ནི། ཚུལ་མིན་ཡིད་བྱེད་ཐམས་ཅད་ལས་འདས་པ་ཡིན་ཏེ། འདུས་མ་བྱས་ཡིན་པའི་ཕྱིར་རོ། །འོན་ཀྱང་འདི་ལ་སོ་སོ་སྐྱེ་བོའི་ཆོས་ཉིད་འགོག་བདེན་དུ་ཐལ་བ་འགོག་པའི་ཕྱིར་སྔར་གྱི་ཀུན་ཞེས་པ་ཅི་རིགས་པ་ལ་སྙེགས་པར་བྱའོ། །འཕགས་པའི་ཡེ་ཤེས་གཟིགས་པ་ནི་རང་རང་གི་ངོ་སྐལ་གྱི་སྤང་བྱ་རྩ་བ་དང་ཉེ་བའི་ཉོན་མོངས་པ་རྣམས་སླར་མི་སྐྱེ་བའི་ཚུལ་དུ་སྤངས་པས་དག་ལ། ཤེས་བྱ་དེ་ཁོ་ན་ཉིད་མངོན་སུམ་དུ་མཐོང་བའི་ཆོས་ཀྱི་མིག་རྡུལ་མེད་པ་ཡིན་པས་གསལ་བ། དེའི་བར་ཆད་མེད་པའི་ལམ་གྱིས་རང་གི་སྤང་བྱ་དངོས་སུ་འགོགས་ཤིང༌། རྣམ་པར་གྲོལ་བ་དང་རྗེ་ལ་ཐོབ་པའི་ལམ་རྣམས་ཀྱང་དེའི་ཕྱོགས་སུ་གྱུར་པས་གཉེན་པོའི་ཕྱོགས། ཤེས་པ་དང་གཟུགས་དང་ལྡན་
པ་མིན་པའི་འདུ་བྱེད་གང་དུའང་མི་གཏོགས་པའི་རྣམ་བྱང་བདེན་པ་གང་ཞིག །བསམ་མེད་སོགས་ཡོན་ཏན་གསུམ་གྱི་དབྱེ་གཞིར་གྱུར་པ་འགོག་བདེན། ཤེས་པས་བསྡུས་པའི་རྣམ་བྱང་བདེན་པ་གང་ཞིག །དག་གསལ་སོགས་ཡོན་ཏན་གསུམ་གྱི་དབྱེ་གཞིར་གྱུར་པ་ལམ་བདེན་ཏེ་བརྒྱད་དོ། །འཕགས་པ་ཉན་ཐོས་དང༌། རང་སངས་རྒྱས་དང༌། བྱང་ཆུབ་སེམས་དཔའ་དང༌། དེ་བཞིན་གཤེགས་པ་དང༌། འཕགས་པ་ཉན་ཐོས་ཐེག་ཆེན་གྱི་ཚོགས་སྦྱོར་ལ་གནས་པ་རྣམས་ནི་དགེ་འདུན་དཀོན་མཆོག་སྟེ། རིག་གྲོལ་གྱི་ཡོན་ཏན་བརྒྱད་དང་ལྡན་པའི་རིགས་གནས་ཀྱི་འཕགས་པའོ། །ཡོན་ཏན་བརྒྱད་ནི། མཉམ་བཞག་ཏུ་ཆོས་རྣམས་ཀྱི་རང་བཞིན་སྟོང་ཞིང་བདག་མེད་པ་མ་ནོར་བར་མངོན་སུམ་དུ་གཟིགས་པས་ཇི་ལྟ་བ་རིག་པ། རྗེ་ལ་ཐོབ་པའི་ཡེ་ཤེས་ཀྱིས་ཐ་སྙད་ཕུང་པོ་ཁམས་དང་སྐྱེ་མཆེད་ཀྱིས་བསྡུས་པའི་ཆོས་རྣམས་རྟོགས་པར་ཁོང་དུ་ཆུད་པས་ན་ཇི་སྙེད་པ་རིག་པ། ཟབ་མོ་སྟོང་པ་དང་རྒྱ་ཆེ་བ་རྟེན་འབྱུང་གི་ཚུལ་གདོད་ནས་རོ་གཅིག་པར་ཤེས་ཤིང་རྟོགས་པས་ནང་ཡེ་ཤེས་རིག་པ། ཉོན་མོངས་པའི་སྒྲིབ་པ་ཀུན་གཏགས་དང་ལྷན་སྐྱེས་ཀྱི་ཕྱོགས་ཅི་རིགས་པ་རྣམ་པར་ཟད་དེ་ཀུན་སྦྱོར་གྱི་རྒྱུ་བ་གཏིང་ནས་ཆད་པས་ཆགས་སྒྲིབ་ལས་གྲོལ་བ། ཤེས་བྱའི་སྒྲིབ་པ་ཕྲ་བ་དང་རགས་པའི་ཚོགས་ཇི་ལྟར་རིགས་པ་གཉེན་པོ་ཡེ་ཤེས་ཀྱི་རྡོ་རྗེས་ངེས་པར་བཅོམ་པས་ཐོགས་སྒྲིབ་ལས་གྲོལ་བ། དེའང་ཉན་རང་དགྲ་བཅོམ་མན་ཆད་ཀྱིས་ཐོགས་སྒྲིབ་སྤང་བ་དགྲ་བཅོམ་པ་གཉིས་ཀའི་ཆ་ལས་རྣམ་གྲོལ་མིན་པ་མེད་ལ། གཉིས་རྣམ་
གྲོལ་བས་ཀྱང་འཇིག་རྟེན་པའི་ལམ་གྱིས་སྙོམས་འཇུག་གི་སྒྲིབ་པ་སྤང་བ་ཙམ་ཞིག་ལས། འཇིག་རྟེན་ལས་འདས་པའི་ལམ་གྱིས་ཤེས་སྒྲིབ་སྐོར་དགུའི་བྱེ་བྲག་སྤང་བ་ནི་མེད་དེ། ནམ་ཞིག་ན་དེ་དག་ཀྱང་ཐེག་ཆེན་གྱི་ས་བཅུར་ཞུགས་པའི་ཚེ་གདོད་ས་དང་པོ་ནས་བཟུང་ཤེས་བྱའི་སྒྲིབ་པ་ཕྲ་རགས་བཅུ་སྤོང་བ་ཡིན་ནོ། །རང་དོན་ལྷུར་ལེན་པ་སྤངས་ཏེ་སེམས་ཅན་ཐམས་ཅད་ཀྱི་དོན་དུ་བླ་ན་མེད་པའི་བྱང་ཆུབ་ཀྱི་ངེས་པ་ལ་ཞུགས་པས་ན་དམན་སྒྲིབ་ལས་གྲོལ་བ། འཕགས་པ་ཡེ་ཤེས་ནམ་མཁའ་ལྟར་ཆགས་པ་མེད་པའི་སྤྱོད་ཡུལ་ཅན་ཆོས་རྣམས་ཀྱི་གནས་ལུགས་དང་མཐུན་པར་ཞུགས་པ་ཇི་ལྟ་བ་རིག་པ་སོགས་ཡོན་ཏན་གསུམ་ལྡན། ཡེ་ཤེས་དེ་དག་ཉིད་ཀྱིས་ཆོས་དབྱིངས་སྨྲ་བསམ་བརྗོད་མེད་ཡང་དག་པར་རྟོགས་པའི་གནད་ཀྱིས་ཟག་པ་གནས་ངན་ལེན་དང་བཅས་པ་ཇི་ལྟར་རིགས་པ་བཞིན་དུ་བཀག་པས་ཆགས་གྲོལ་སོགས་ཡོན་ཏན་གསུམ་ལྡན་གྲོལ་བ་སྟེ་བརྒྱད་དོ། །དེའང་སངས་རྒྱས་ཀྱི་ཡོན་ཏན་ཕྱི་མ་གསུམ། ཆོས་ཀྱི་ཡོན་ཏན་དྲུག་དང༌། དགེ་འདུན་གྱི་ཡོན་ཏན་གྲོལ་བ་གསུམ་ནི་མེ་དང་ཚ་བ་བཞིན་དུ་ལྡན་ཆོས་དང་ལྡན་གཞི་དོན་དུ་གཅིག་པར་རུང་ལ། གཞན་དྲུག་ནི་གང་ཟག་ལྡན་མིན་འདུ་བྱེད་དུ་བཞེད་པ་རྣམས་ཀྱི་ལུགས་ལྟར་ན། དགེ་འདུན་གྱི་གསུམ་པོ་ས་བོན་དང་དེས་བསྐྱེད་པའི་ནུས་པ་བཞིན་དུ་སོ་སོར་གཅད་ཅིང་འབྲལ་དུ་མེད་མོད། བློ་དང་ལྡན་མིན་དུ་ཕྱེ་བས་གཞི་གཅིག་པའང་མ་ཡིན་ལ། སངས་རྒྱས་
ཀྱི་ཡོན་ཏན་གསུམ་ནི་ངོ་བོ་ཉིད་སྐུ་དང་སྦྱར་བ་ན་ཆོས་དཀོན་མཆོག་གི་སྐབས་བཞིན་དང༌། སངས་རྒྱས་འཕགས་པ་དང་སྦྱར་ན་དགེ་འདུན་དང་རིག་པ་གསུམ་སྦྱར་བ་བཞིན་ནོ་ཞེས་པ་ཁོ་བོའི་འཁྲུལ་རྟོག་ཙམ་མོ། །དེ་དག་གི་སྒྲ་བཤད་ནི། རྒྱ་དཔེར། དཀོན་མཆོག་གི་སྐད་དོད་རཏྣ་ཏྲ་ཡཱ་ཡ་ཞེས་པ་རིན་ཆེན་རྣམ་གསུམ་དུ་བསྒྱུར་རྒྱུ་ཡིན་ཡང༌། དཀོན་མཆོག་ཅེས་པ་རིན་ཆེན་རྣམ་གསུམ་དཔེ་མིང་དོན་ལ་འདོགས་པའི་རྒྱུ་མཚན་དྲུག་པོའི་ཐོག་མཐའ་བསྡུས་པ་སྟེ། རྒྱུ་མཚན་དྲུག་པོའི་མིང་ཙམ་སྨོས་ན། རྙེད་དཀའ་བ་དང༌། དྲི་མ་ཅི་རིགས་ཟད་པ་དང༌། ཡོན་ཏན་ཆེན་པོའི་མཐུ་མངའ་བ་དང༌། འཇིག་རྟེན་ན་ཕན་པ་ཀུན་གྱི་རྩ་བར་གྱུར་པ་དང༌། རྣམ་པར་གྲོལ་བའི་གནས་སྟེར་བ་དང༌། འགྱུར་བ་མེད་པར་རྟག་ཏུ་ཕན་པ་མཛད་པའི་མཆོག་ཡིན་པའོ། །བྱེ་བྲག་གི་སྒྲ་ཉུང་ངུར་བཤད་ན། ཆགས་ཐོགས་ཀྱི་སྒྲིབ་པའི་མུན་ནག་ཆེན་པོ་སངས་པ་དང༌། ཡོན་ཏན་གྱི་སྣང་བ་གསལ་བ་རབ་ཀྱི་མཐར་ཐུག་པར་རྒྱས་པས་ན་སངས་རྒྱས། བདག་མེད་ཡང་དག་པར་རྟོགས་པའི་ཐབས་ཀྱིས་སྲིད་ལས་རྣམ་གྲོལ་ཞི་བའི་སར་འཛིན་པས་ན་ཆོས་ཞེས་སྤྱི་མིང་བྱེ་བྲག་ལ་བཏགས་ཤིང༌། བདུད་བྱེ་བ་ཁྲག་ཁྲིག་གིས་ཀྱང་མི་ཕྱེད་པའི་དད་པ་བརྟན་པོས་དཀོན་མཆོག་གསུམ་འཁུར་བས་དགེ་འདུན་ཏེ་བློ་དགེ་བ་དང་འདུན་པ་ལ་བྱའོ། །འདིའི་དད་པ་ནི་སློབ་དཔོན་སའི་རྩ་ལག་གིས་ཤེས་ནས་དད་པ་ཞེས་བཤད་ཅིང༌། ཤེས་ནས་དད་པ་ནི། མཛོད་ལས། བདེན་གསུམ་མཐོང་ན་ཚུལ་ཁྲིམས་དང༌། །ཆོས་ལ་ཤེས་ནས་དད་པ་ཐོབ། །ལམ་མངོན་རྟོགས་ན་
སངས་རྒྱས་དང༌། །དེ་ཡི་དགེ་འདུན་ངག་ལ་ཡང༌། །ཞེས་འཕགས་ལམ་བརྙེས་པའི་ཚེ་འཐོབ་པར་བཤད་དོ། །འདི་སྐབས་སུ་བཤད་དགོས་པ་ཤིན་ཏུ་མང་ཡང་ཡི་གེ་ཉུང་ངུར་འདོད་པ་དང༌། ཚོང་པས་འོ་མ་བཙོང་བའི་དཔེ་ལྟར་འགྱུར་དུ་དོགས་ནས་བཞག་གོ །གཉིས་པ་ལ། སྤྱིར་དཀོན་མཆོག་གསུམ་ཡོད་པར་སྒྲུབ་པ་དང༌། དེ་ཉིད་སྐྱབས་ཡང་དག་ཏུ་སྒྲུབ་པ་གཉིས། དང་པོ་ནི། སྤྱིར་འཇིག་རྟེན་ན་སུ་ཞིག་འཁྲུལ་པའི་ཉེས་པ་དུ་མའི་གཞན་དབང་དུ་སོང་བ་དེ་དག་ཐམས་ཅད་ཀྱང་རྐྱེན་སྣང་གློ་བུར་བའི་མཐུ་ལས་གྱུར་པ་མ་གཏོགས་པ་སེམས་ཀྱི་རང་བཞིན་དེ་ལྟ་བུ་མ་ཡིན་ཞིང༌། ངང་གིས་ཕྱིན་ཅི་མ་ལོག་པ་ཁོ་ན་སྟེ། གེགས་ཕྱིའི་མུན་པ་དང༌། ནང་གི་མིག་མི་གསལ་བ་ལ་སོགས་པའི་དབང་གིས་ཐག་ཁྲ་སྦྲུལ་སྣང་གི་ཤེས་པ་ལྟར་དོན་དང་མི་མཐུན་པ་གང་ཟག་འགའ་ཞིག་ལ་འབྱུང་མོད་ཀྱི། དེ་འགལ་རྐྱེན་དེ་མེད་དུ་ཟིན་ན་ཐག་པ་དང་སྦྲུལ་ལ་དོན་བཞིན་དུ་འཛིན་པ་བཞིན་ནོ། །དེ་ལྟར་ན་སྲིད་པའི་སྣང་བ་རྣམས་ཀྱང་དྲི་མ་གློ་བུར་བའི་དབང་གིས་བྱུང་བ་མ་གཏོགས་སེམས་ཀྱི་གཤིས་སུ་ཞུགས་པ་མ་ཡིན་ལ། དྲི་མ་དེ་ཉིད་སྦྱོང་བར་བྱེད་པའི་ཐབས་མེད་ན་དེ་གློ་བུར་བ་ཡིན་ཀྱང་རྣམ་པར་དག་པའི་གནས་མི་རྙེད་མོད་ཀྱི། ཉེས་པ་ཀུན་གྱི་རྩ་བ་མ་རིག་པ་དང་རྣམ་པ་འགལ་བའི་ཡེ་ཤེས་བདག་མེད་རྟོགས་པའི་ཤེས་རབ་ཡོད་དེ། འདིས་སྒྲིབ་པ་སྤོང་བར་འགྲུབ་ལུགས་ནི། དཔེ་ཞིག་གིས་སྟོན་ཏེ། ནོར་བདག་དང་རྐུན་པོ་གཉིས་རྩོད་ཅིང་ཤག་འགྱེད་པ་ན། རྐུན་པོས་ངས་རྫས་དེ་
མ་བརྐུས་ཞེས་བྱས་ཚེ། ནོར་བདག་གིས་བྱ་ཝང་ལ་མཇུག་སྒྲོ་ཡོད་དོ་ཞེས་བྱ་བ་སོགས་བརྗོད་པས་ཁོ་མི་ཕམ་གྱི། ཁྱོད་ཀྱིས་བརྐུས་སོ་ཞེས་དམ་བཅའ་བ་འཛིན་དགོས་སོ། །དེ་ནི་རྐུན་པོའི་ཚིག་དང་རྣམ་པ་འགལ་མི་འགལ་གྱི་དབང་གིས་ཡིན་ལ། དེའང་རྣམ་པ་འགལ་ཙམ་གྱིས་རྐུན་པོ་མི་ཕམ་གྱི། ནོར་བདག་ལ་དོན་ཡོད་པ་ཞིག་ཅི་ནས་ཀྱང་དགོས་ཏེ། ཚིག་ཕུགས་མེད་ཀྱིས་གཏམ་ཁུངས་ཅན་མི་ཐུབ་པའི་ཕྱིར་ཏེ། དངོས་པོ་སྟོབས་ཞུགས་ཀྱི་རིགས་པ་ཡོད་མེད་འདུག་པའི་ཕྱིར་རོ། །དེ་བཞིན་དུ་བྱམས་པ་ལ་སོགས་པའང་སྲིད་རྩ་དང་རྣམ་པ་འགལ་བ་མ་ཡིན་ཞིང༌། བདག་མེད་རྟོགས་པའི་བློ་ནི་མ་རིག་པའི་ལྡོག་ཕྱོགས་ཀྱི་འཛིན་སྟངས་ཅན་ཡིན་པ་དང༌། ཆོས་ཐམས་ཅད་རང་བཞིན་མཉམ་པའི་གནད་ཀྱིས་བདག་མེད་རྟོགས་པ་ཚད་མར་གྲུབ་ཅིང༌། བདེན་ཞེན་ནི་རྩ་བ་མི་བརྟན་པའི་ལོག་ཤེས་སུ་གྲུབ་བོ། །བདག་མེད་མཁྱེན་པ་དེའང་ནན་ཏན་དུ་ཐབས་དང་བཅས་ཏེ་བསླབ་ན་འདོད་འཇིགས་གོམས་པའི་སྣང་བ་བཞིན་དུ་བློ་སྔ་མ་སྔ་མས་ཕྱི་མ་ཕྱི་མ་ནུས་པ་མཐུ་ཅན་དུ་བྱེད་ཅིང་བློའི་རང་བཞིན་ཚད་མེད་པ་ནམ་མཁའ་ལྟར་མཐའ་ཡས་པའི་ཚུལ་དུ་མངོན་པར་སྣང་བ་འགྲུབ་པར་འགྱུར་ཞིང༌། སྒྲིབ་པ་མ་ལུས་པ་ཡོངས་སུ་སྲབ་པ་དང༌། རབ་ཏུ་བྱང་བ་དང༌། ཤིན་ཏུ་ཟད་པའི་མཐར་ཐུག་པར་གྲུབ་བོ། །དེ་ཙ་ན་མཁྱེན་པ་དེ་ཉིད་ཐོག་མར་སྒོམ་པའི་ཚོགས་སྦྱོར་གྱི་ལམ་དང༌། བར་དུ་གསལ་སྣང་ཐོན་པ་འཕགས་པ་སློབ་པའི་ལམ་དང༌། དེ་ཉིད་མཐར་ཕྱིན་པ་ཐམས་ཅད་མཁྱེན་པ་སྟེ། བར་པ་ཆོས་དཀོན་
མཆོག་འབའ་ཞིག་པ་དང༌། ཕྱི་མ་སངས་རྒྱས་དང་ཆོས་སུ་གྲུབ་བོ། །མཁྱེན་པ་དེ་སྲིད་རྩ་སྤངས་པའི་འགོག་བདེན་འཕགས་པ་སློབ་ལམ་པའི་ཐུགས་རྒྱུད་ན་བཞུགས་པ་ཆོས་དཀོན་མཆོག་ཁོ་ན་པ་དང༌། དེ་མཐར་ཕྱིན་པ་ཆོས་དང་སངས་རྒྱས་དཀོན་མཆོག་གཉིས་ཀ་ཡིན་པ་ངོ་བོ་ཉིད་སྐུའོ། །མཁྱེན་པ་དེ་དང་འགོག་བདེན་དེ་དག་རྒྱུད་ལྡན་གྱི་གང་ཟག་ཡོད་པས། དགེ་འདུན་དཀོན་མཆོག་ཁོ་ན་པ་སློབ་པ་འཕགས་པ་དང༌། ཉན་རང་མི་སློབ་ལམ་པ་གཉིས། སངས་རྒྱས་དང་དགེ་འདུན་གཉིས་ཀ་བ་སངས་རྒྱས་འཕགས་པ་དང་བཅས་ཡོད་པར་གྲུབ་བོ། །དོན་འདི་རྒྱ་ཆེར་རྣམ་འགྲེལ་ལས་རྟོགས་པར་བྱའོ། །གཉིས་པ་ནི། སངས་རྒྱས་བཅོམ་ལྡན་འདས་རྣམས་ནི་སེམས་ཅན་ཐམས་ཅད་ཀྱི་སྐྱབས་ཡིན་ཏེ། མཐའ་མེད་པའི་སེམས་ཅན་ཐམས་ཅད་ཀྱི་ཁམས་དབང་བསམ་པའི་ཁྱད་པར་ཕྲ་ཞིང་ཕྲ་བ་དང༌། དེ་དག་གང་གིས་འདུལ་བའི་ཐབས་ཆ་དང་བཅས་པ་ཐམས་ཅད་མཁྱེན་ཅིང་གཟིགས་པའི་ཕྱིར་དང༌། མ་གཅིག་པོའི་བུ་སྡུག་བཞིན་དུ་སེམས་ཅན་ཐམས་ཅད་ལ་རྟག་ཏུ་གཟིགས་པས་སེམས་ཅན་གཅིག་གི་ཕྱིར་ཡང་བསྐལ་པ་ཁྲག་ཁྲིག་མང་པོར་བརྩོན་འགྲུས་ཀྱི་གོ་ཆ་སྲ་བ་མནབས་པའི་ཐུགས་རྗེ་ཆེན་པོ་མཐར་ཕྱིན་པའི་ཕྱིར་དང༌། སངས་རྒྱས་ཀྱི་སྟོབས་ཚད་མེད་པ་ལ་འགལ་རྐྱེན་བྱེད་པའི་སྒྲིབ་པ་ཐམས་ཅད་བསལ་ཏེ་རྡོ་རྗེའི་སྟོབས་བླ་ན་མ་མཆིས་པ་ཡོངས་སུ་རྫོགས་པའི་ཕྱིར་ཏེ། མཁྱེན་པའི་ཡེ་ཤེས། བརྩེ་བའི་ཐུགས་རྗེ། མཛད་
པའི་ཕྲིན་ལས་གསུམ་དང་ལྡན་ན་གཞན་དོན་མི་ནུས་མི་སྲིད་དོ། །དམ་པའི་ཆོས་དཀོན་མཆོག་ནི་སེམས་ཅན་ཐམས་ཅད་ཀྱི་སྐྱབས་ཡིན་ཏེ། སུས་སྲིད་པ་རྨིང་སྒྱེལ་གྱི་ལམ་ཉམས་སུ་བླང་ཞིང༌། མྱ་ངན་ལས་འདས་པ་རྡུལ་མེད་བསིལ་བའི་གོ་འཕང་རྒྱུད་ལ་བསྟེན་པ་དེ་དག་ནི་རྒུད་པ་གཞི་དང་བཅས་པ་གཏན་དུ་ལྡོག་ནུས་པའི་ཕྱིར་རོ། །འཕགས་པའི་དགེ་འདུན་ནི་འགྲོ་བ་རྣམས་ཀྱི་སྐྱབས་ཡིན་ཏེ། སུས་སྐྱབས་སུ་སོང་བ་ཐམས་ཅད་ནམ་དུ་ཡང་སླུ་བར་མི་མཛད་པའི་ཕྱིར་དང༌། ཚུལ་ཁྲིམས་དང༌། ཏིང་ངེ་འཛིན་དང༌། ཤེས་རབ་ཟག་པ་དང་བྲལ་བའི་བྱིན་རླབས་ཚད་མེད་པ་མངའ་བའི་ཕྱིར་རོ། །དེ་ལྟ་ན་སྲིད་པའི་འགྲོ་བ་ཞིང་རྡུལ་ལས་ཀྱང་ཆེས་མང་བ་འདི་རྣམས་དཀོན་མཆོག་གི་བྱིན་གྱིས་བརླབས་པས་ཅིའི་ཕྱིར་གྲོལ་བར་མི་མཛད་དེ། དངོས་རྒྱུ་ནུས་པ་ཐོགས་མེད་ཚང་བའི་ཕྱིར་ཞེ་ན། རྟགས་མ་གྲུབ་སྟེ། རྣམ་པར་གྲོལ་བ་མ་རྙེད་པའི་སེམས་ཅན་རྣམས་ལ་ཕྱིའི་རྐྱེན་སྐྱབས་གསུམ་མ་ཚང་བ་མེད་ཀྱང༌། ནང་གི་རྐྱེན་སངས་རྒྱས་རྗེས་སུ་དྲན་པ་ལ་སོགས་པ་དགེ་བའི་ཚོགས་གོང་ནས་གོང་དུ་སྤེལ་བ་མེད་པའི་ཕྱིར་ཏེ། ཆུ་ཟླའི་རྣམ་པ་གཏོད་བྱེད་ཀྱི་ཟླ་བ་ཡོད་ཀྱང༌། གཏད་ཡུལ་ཆུ་སྣོད་མེད་ན་ཟླ་བའི་གཟུགས་བརྙན་མི་འཆར་བ་བཞིན་ནོ། །མདོར་ན་ཕྱི་རོལ་པའི་སྐྱབས་གནས་དྲག་པོ་ལ་སོགས་པ་ནི་ཀུན་འབྱུང་གི་ཆུ་བོས་ཁྱེར་བས་བདག་ཉིད་མ་སྨིན་པའི་སྟོབས་ཀྱིས་འཇིགས་པ་དང་བཅས་པ་ཡིན་ལ། དཀོན་མཆོག་གསུམ་ནི་དེ་ཁོ་ན་ཉིད་དང་མཚུངས་པར་ཞུགས་
པའི་མཐུ་མངའ་བ་སྟེ་ནམ་མཁའ་དང་ལག་མཐིལ་མཉམ་ཞིང་སྐད་ཅིག་དང་བསྐལ་པ་མཉམ་པའི་ཆོ་འཕྲུལ་གྱི་རོལ་མོ་ཟད་མི་ཤེས་པ་མངའ་བས་བྱིན་རླབས་ཀྱི་ཁྱད་པར་ཤིན་ཏུ་ཞུགས་པ་ཡིན་ནོ། །གཉིས་པ་ལ། སྐྱབས་འགྲོ་འབྱུང་བའི་རྒྱུ་དང༌། སྐྱབས་འགྲོ་དངོས་བཤད་པ་གཉིས། དང་པོ་ནི། བདག་ཉིད་འཇིགས་པ་དང་བཅས་པར་ཤེས་ནས་ཅི་ནས་ཀྱང་དེ་ལས་ཐར་བར་འདོད་པ་དང༌། དེ་ལས་སྐྱོབ་པའི་སྐྱབས་གནས་ཚོལ་བ་དང༌། སྐྱབས་དེ་དཀོན་མཆོག་གསུམ་འབའ་ཞིག་ཏུ་ཡིད་ཆེས་པ་དང༌། དེ་དག་ལ་སྐྱབས་སུ་མ་སོང་ན་སྐྱབས་གནས་བཟང་ཡང་བདག་ཉིད་སྐྱོབ་པའི་ཡུལ་དུ་མི་འགྱུར་བར་ཤེས་པ་རྣམས་ཚོགས་ན་སྐྱབས་སུ་འགྲོ་བ་སྐྱེའོ། །དེའང་སྐྱེས་བུ་ཆུང་ངུ་ནི་ངན་སོང་གི་འཇིགས་པས་སྐྲག །འབྲིང་ནི་དེ་ཙམ་དུ་མ་ཟད་འཁོར་བའི་སྡུག་བསྔལ་ཐམས་ཅད་ཀྱིས་སྐྲག །ཆེན་པོ་ནི་དེ་ཡང་མ་བས་སེམས་ཅན་ཐམས་ཅད་ཀྱི་སྡུག་བསྔལ་མཐའ་དག་གིས་སྐྲག་ནས་གསུམ་ལ་སྐྱབས་སུ་འགྲོ་བའོ། །སྐྱེས་བུ་གསུམ་ནི། འཁོར་བའི་ཕུན་ཚོགས་ཙམ་དོན་དུ་གཉེར་བ་དང༌། རང་དོན་དུ་ཞི་བ་དོན་དུ་གཉེར་བ་དང༌། ལྷག་བསམ་རྣམ་དག་ཐོབ་པ་སྟེ་གསུམ་པོ་གོ་རིམ་བཞིན་ཏེ། ཞར་ལ་འོངས་པའོ། །གཉིས་པ་ནི། སྤྱིར་སྐྱབས་འགྲོའི་ངོ་བོ་ལ། སློབ་དཔོན་དབྱིག་གཉེན་ཞབས་ཀྱིས་མངོན་མཛོད་རང་འགྲེལ་དུ། ངག་གི་རྣམ་པར་རིག་བྱེད་དགེ་བ་ཞིག་ཡིན་པར་བཤད་ཅིང༌། སློབ་དཔོན་འགའ་ཞིག་དང༌། ཕལ་ཆེར་དཀོན་མཆོག་གསུམ་ལ་དཔུང་གཉེན་དུ་རེ་བའི་སེམས་པར་ངོས་འཛིན་་
པ་སོགས་ཡོད་ཀྱང༌། ཤིང་རྟ་ཆེན་པོར་སྐྱེས་བུ་འབྲིང་གི་སྐྱབས་འགྲོ་འཆད་པ་ན། ཉན་རང་ནི་རང་དོན་དུ་སྲིད་པས་འཇིགས་ནས་དད་པ་གསུམ་བསྐྱེད་པའོ། །ཞེས་རྒྱུ་སྲིད་པ་ལ་སྐྱོ་ཞིང་འཇིགས་ཏེ་འབྲས་བུ་སྐྱབས་འགྲོ་སྐྱེ་བར་བཤད་པར་བཞེད་ནས། དེ་སྐད་གསུངས་པའི་ཕྱིར་དད་པ་ཉིད་དུ་དགོངས་སོ། །དོན་དུ་མི་གང་དག་འཇིགས་པས་སྐྲག་ནས་རྒྱལ་པོ་ལ་སོགས་པ་ལ་སྐྱབས་འཚོལ་བ་དེའི་ཚེ། རྒྱུ་དང་དུས་ཀྱི་ཀུན་སློང་གི་ཤེས་པ་ངག་གི་རྣམ་པར་རིག་བྱེད་དང་བཅས་པས་འབངས་སུ་དམ་བཅས་པ་དེ་ཙམ་གྱིས་སྐྱབས་སུ་སོང་བ་ཡིན་པ་ལྟར། དཀོན་མཆོག་གསུམ་ལ་དཔུང་གཉེན་གྱི་འདུ་ཤེས་བཞག་སྟེ་རེ་བ་དང་དད་པས་ངག་ཏུ་སྐྱབས་གསོལ་གྱི་ཚིག་བརྗོད་པ་ཀུན་ཀྱང་སྐྱབས་འགྲོ་ཡིན་པས། སྐྱབས་འགྲོ་གཟུགས་དང་ཤེས་པས་བསྡུས་པ་གཉིས་ཀ་ཡོད་ཀྱང་མི་འགལ་ལོ། །འོན་ཀྱང་རྒྱལ་པོ་ལ་སོགས་པ་ནི་ཡིད་ཀྱིས་སྐྱབས་སུ་སོང་བ་ཙམ་གྱིས་སྐྱབས་འགྲོའི་གོ་མི་ཆོད་མོད། དཀོན་མཆོག་གསུམ་ལ་ཡིད་ཆེས་ཀྱི་སྐྱབས་འགྲོ་གཅིག་པུས་ཀྱང་སྐྱབས་སུ་སོང་བར་འཇོག་པ་ནི་མཁྱེན་པ་ནུས་མཐུ་ཐོགས་མེད་དང་ལྡན་མི་ལྡན་གྱི་ཁྱད་པར་སོགས་ལས་ཡིན་ནོ། །གཞུང་དག་ལས་སྐྱབས་འགྲོའི་ངོ་བོ་རེ་བ་དང་བཅས་པའི་སེམས་པ་དང༌། དད་པར་ངོས་བཟུང་མཛད་པ་ནི། ཡིད་ཀྱི་རྣམ་ཤེས་འཁོར་དང་བཅས་པ་ཁབ་ལེན་ལ་ལྕགས་བཞིན་དུ་སྐྱབས་ཀྱི་རྗེས་སུ་གཡོ་བར་བྱེད་པ་ནི་སེམས་པ་ཡིན་ལ། དེ་ཉིད་དགེ་བར་སྒྱུར་བའི་གཙོ་བོ་ནི་རྒྱུའི་སྐྱབས་འགྲོ་དང་བའི་དད་པ་དང༌། འབྲས་བུའི་སྐྱབས་འགྲོ་འདོད་
པའི་དད་པ་ཡིན་པས་སྐྱབས་འགྲོའི་གཙོ་བོ་གཉིས་ཀྱི་དབང་དུ་མཛད་པའོ། །སྐྱབས་འགྲོ་དེ་ལ་དབྱེ་ན་རྒྱུ་དང་འབྲས་བུའི་སྐྱབས་འགྲོ་གཉིས། དེ་ལ་རྒྱུའི་སྐྱབས་འགྲོ་ནི། གཞན་རྒྱུད་ལ་བྱོན་ཟིན་པའི་དཀོན་མཆོག་གསུམ་ལ་འཇིགས་པ་ལས་སྒྲོལ་བའི་དཔུང་གཉེན་དུ་སྐྱབས་འཚོལ་བ་སྟེ། འོ་སྐོལ་་ཁྱུ་མཆོག་ལ་སྐྱབས་སུ་འགྲོ་བ་ལྟ་བུའོ། །འབྲས་བུའི་སྐྱབས་འགྲོ་ནི། རང་རྒྱུད་ལ་འབྱོན་འགྱུར་གྱི་དཀོན་མཆོག་གསུམ་ལ་ཐོབ་བྱར་རེ་བ་སྟེ། འོ་སྐོལ་འཚངས་རྒྱ་བར་འདོད་པ་ལྟ་བུའོ། །གསུམ་པ་ལ། རྩ་བའི་བསླབ་བྱ་དང༌། ཡན་ལག་གི་བསླབ་བྱ་གཉིས། དང་པོ་ནི། སྤྱིར་དཀོན་མཆོག་རིན་ཆེན་རྣམ་པ་གསུམ་ནི་ཚེ་རབས་ཐམས་ཅད་དུ་དཔུང་གཉེན་དུ་སྐྱབས་སུ་གྱུར་པ་ཡིན་ལ། ཚེ་འདིའི་སྲོག་དང་ནོར་དང་གཉེན་བཤེས་ཐམས་ཅད་ནི་ཆུའི་ཆུ་བུར་བཞིན་དུ་གཡོ་ཞིང་མི་བརྟན་པ་ཡིན་ཏེ། སྐྱེ་བོ་མཛངས་པ་རྣམས་ནི་རྣམ་པར་བཞག་པ་འདི་ལ་གནས་དང་སྲོག་དང་བྱ་དགའ་ལ་སོགས་པ་སྲིད་པའི་ཕུན་ཚོགས་གང་གི་ཕྱིར་ཡང་དཀོན་མཆོག་གསུམ་སྤོང་བར་མི་བྱེད་དེ། དེ་སྤང་བས་ནི་ཞི་བསིལ་མྱ་ངན་ལས་འདས་པའི་གོ་འཕང་འཐོབ་པའི་ཐབས་མི་སྲིད་པའི་ཕྱིར་རོ། །དེའི་ཕྱིར་དཀོན་མཆོག་གསུམ་ལ་སྙིང་ནས་ཡིད་ཁྱེད་ཤེས་ཀྱི་དད་པ་བརྟན་པོས་དེ་ལས་གཞན་ན་མཐར་ཐུག་གི་སྐྱབས་གནས་མེད་པར་ཡིད་ཆེས་པ་ཞིག་རྩ་བའི་བསླབ་བྱ་ཡིན་པས། དེའི་ལྡོག་ཕྱོགས་དཀོན་མཆོག་གསུམ་བློས་དོར་བ་དང༌། དོར་བ་ཙམ་མིན་
ཀྱང་བློ་མི་ཁེལ་བ་སྟེ་གཉིས་པོ་གང་བྱུང་ཡང་སྐྱབས་འགྲོ་རྩ་བ་ནས་གཏོང་བར་ཀུན་མཁྱེན་ཆོས་ཀྱི་རྒྱལ་པོ་དང༌། ཙོང་ཁ་པ་ཆེན་པོ་གཉིས་ཀས་བཤད་དོ། །དེའི་ཕྱིར་དེང་སང་ཤཱ་ཀྱའི་སྲས་ངུར་སྨྲིག་གི་འོད་ཀྱིས་ནམ་མཁའ་དམར་པོར་འགྲོ་བ་ཙམ་དུ་གཟི་བྱིན་བསྐྱེད་ནས། དེ་བཞིན་གཤེགས་པ་ཞེས་ཅི་ཙམ་བརྗོད་ཀྱང་བ་སྤུའི་འཁྲི་ཤིང་གཅིག་ཀྱང་མི་སློང་བར། ཚོང་སྤོག་ཁེ་སྐྱེད་ཀྱི་བུན་ལོང་ཁོ་ནས་དུས་འདའ་ཞིང་བཙན་ཕྱུག་གི་སྐྱེས་བུའི་གཏམ་གཅིག་ཙམ་ཐོས་པས་ཀྱང་རློམ་སེམས་ཀྱི་འགྲམ་ཆུ་ལྡང་བ་རྣམས་དང༌། མདངས་སུམ་གྱི་རྨི་ལམ་རྩ་འཁྲུལ་ཤིང་འཁྲུལ། འཁྲུལ་པའི་ཡང་འཁྲུལ་གྱི་མཚན་མ་ངན་པ་གཅིག་གིས་ཀྱང་ཡིད་འཆུམ་ཞིང༌། དྲང་སྲོང་བདེན་པར་སྨྲ་བས་རང་གི་སློབ་མའི་ཚོགས་ལ་ཐུགས་བརྩེ་བས་ལྷག་པའི་བསླབ་པ་རིན་པོ་ཆེ་རྣམ་པ་གསུམ་ལ་བརྩོན་པའི་ཕན་ཡོན། མ་བསླབ་པའི་ཉེས་དམིགས་སྒོ་དུམ་ནས་ལེགས་པར་བསྟན་པའི་གསུང་རབ་འཇིག་རྟེན་གྱི་དམིགས་བུར་གྱུར་པ་ལའང་བཀའ་འགྱུར་ཞེས་ཕྱུག་པོའི་ཁྱིམ་རྟེན་དུ་རེ་བ་ཙམ་ཞིག་སྙིང་པོར་བྱེད་པ་ལས་དགེ་སྡིག་གི་སྤང་བླང་ཞིབ་མོར་བྱས་ནས་རྣམ་སྨིན་སྡུག་བསྔལ་བ་འཐོབ་བོ་ཞེས་དོགས་པ་དང་བག་ཚ་བ་ཅུང་ཟད་ཙམ་ཡང་མེད་ཅིང༌། ཁ་ན་མ་ཐོ་བ་ཕྲ་རབ་ལའང་མི་འཛེམ་པར་ཇར་རྒྱག་ཉར་རྒྱག་ཏུ་གཏོང་བ་ཚོ་ལ་ནི་དཔའ་རྩལ་སྤྱང་གྲུང་གི་སྐྱེ་བོ་ཞེས་བཏགས་པ་མ་གཏོགས། བདེ་བར་གཤེགས་པའི་ཆོས་ཀྱི་སྲས་པོ་ཞེས་འཕགས་པའི་སྐྱེ་
བོ་སུས་ཀྱང་བསྔགས་པར་མི་མཛད་དོ། །སྐྱབས་འགྲོ་བཏང་བ་སླར་གསོ་བ་ནི་སྤོང་སེམས་དགེ་བ་ནམ་སྐྱེས་པ་དང༌། ཡིད་ཆེས་ཀྱི་དད་པ་ནམ་སོར་ཆུད་པ་ན་ཡིན་ཞེས་ཤིང་རྟ་ཆེན་པོར་བཤད་དོ། །འཆད་པར་འགྱུར་བའི་འཇིག་རྟེན་པའི་ལྷ་ལ་སྐྱབས་འཚོལ་བའང་རྩ་བའི་བསླབ་བྱ་དང་དངོས་འགལ་དུ་འགྲོ་བར་སྣང་ངོ༌། །གཉིས་པ་ཡན་ལག་གཙོ་བོར་གྱུར་པའི་བསླབ་བྱ་དགུ་ཕྲུགས་ནི། སངས་རྒྱས་ལ་སྐྱབས་སུ་སོང་ནས་འཇིག་རྟེན་པའི་ལྷ་ལ་སྐྱབས་མི་འཚོལ། ཆོས་ལ་སྐྱབས་སུ་སོང་ནས་སེམས་ཅན་ལ་གནོད་པའི་ལས་སྲོག་གཅོད་བརྡུང་བརྡེག་ལ་སོགས་པ་མི་བྱ། དགེ་འདུན་ལ་སྐྱབས་སུ་སོང་ནས་མུ་སྟེགས་ཅན་ནམ། དེ་དང་ཕྱོགས་མཐུན་དཀོན་མཆོག་ལ་ཡིད་མི་ཆེས་ཤིང་སྡིག་སྤྱོད་ཀྱིས་དུས་འདའ་བའི་གྲོགས་ངན་པ་དང་མི་འགྲོགས་པ་སྟེ། སྤང་བྱ་སྤོང་ཚུལ་ལས་གཞག་པ་གསུམ་དང༌། སངས་རྒྱས་ལ་སྐྱབས་སུ་སོང་ནས་དེ་བཞིན་གཤེགས་པ་ཉིད་ལ་གུས་པ་བྱ་བར་མ་ཟད། སྟོན་པའི་སྐུ་གཟུགས་ཆག་དུམ་ཙམ་ལའང་མི་སྨད་ཅིང་སྤྱི་བོས་མཆོད། ཆོས་ལ་སྐྱབས་སུ་སོང་ནས་དམ་པའི་ཆོས་ལ་བཀུར་སྟི་བྱ་བར་མ་ཟད། གསུང་རབ་ཡི་གེའི་རས་མ་ལའང་མི་འགོང་ཞིང་འཇིག་རྟེན་ན་རྙེད་པར་དཀའ་བའི་མཆོག་ཏུ་དད་པ་བཞག་དགེ་འདུན་ལ་སྐྱབས་སུ་སོང་ནས་འཕགས་པའི་གང་ཟག་རྣམས་རྗེས་སུ་དྲན་ཞིང་གུས་པར་བྱ་བར་མ་ཟད། གོས་ངུར་སྨྲིག་བགོས་ཤིང་དཀོན་མཆོག་གསུམ་གྱི་མཚན་ཤེས་པ་ཙམ་ལའང་ལྷ་དང་མིར་བཅས་པའི་
མཆོད་རྟེན་གྱི་འདུ་ཤེས་འཇོག །དེའང་གཞན་དེ་ལྟ་བུ་རྣམས་ལ་དེ་ལྟར་བྱ་བ་ཡིན་གྱི། བསྐལ་པ་བཟང་པོའི་ཇ་འདྲེན། དུས་ཚོད་ངན་པའི་དཔེ་འཐེན་དུ་ཁྱེར་ནས་རང་ཉིད་ཀྱང་དེ་དག་གི་གྲལ་ན་བྱུང་རྒྱལ་བྱེད་ན་ནི། ལས་ཀྱིས་ནོངས་པའི་གང་ཟག་ལ། །སྨན་བྱིན་པ་ཡང་དུག་ཏུ་འགྱུར། །ཞེས་པ་ལྟར་ཡིན་ཏེ། རྒྱས་པར་སངས་རྒྱས་ཀྱི་སྡེ་སྣོད་ཚུལ་ཁྲིམས་འཆལ་བ་ཚར་གཅོད་པའི་མདོ་སྡེར་ལྟོས་ཤིག །དེ་གསུམ་ནི་བསྒྲུབ་བྱ་གསུམ་ཞེས་གྲགས་ལ། སངས་རྒྱས་དང་ཆ་འདྲ་བར་ཡང་དག་པའི་ལམ་སྟོན་པ་དགེ་བའི་བཤེས་གཉེན་ལ་སངས་རྒྱས་ལྟར་གུས་པ་བྱ་བ་དང༌། རྣམ་བྱང་བདེན་པའི་མཐུན་པའི་རྒྱུ་དམ་པའི་ཆོས་ཉན་པ་རྗེས་སུ་མི་གཏོང་བ་དང༌། འཕགས་པ་རྣམས་དང་རྗེས་སུ་མཐུན་པའི་ཚུལ་ཁྲིམས་དང་ལྟ་བ་རྣམ་པར་དག་པ་ལ་སློབ་པ་སྟེ་གསུམ་ནི་ཆ་མཐུན་གྱི་བསླབ་བྱ་གསུམ་མོ། །བཞི་པ་ཕན་ཡོན་ནི། དེ་བཞིན་གཤེགས་པ་ཉིད་ཀྱིས་སྐབས་ཕྱེ་བ་མ་གཏོགས་པར་དེ་བཞིན་གཤེགས་པ་ལ་དམིགས་ནུས་པ་སུ་ཡང་མེད་པར་མདོ་སྡེ་ལས་བཤད་ན། དཀོན་མཆོག་གསུམ་གྱི་ཡོན་ཏན་ཤེས་པ་དང༌། དེ་ལ་ཡིད་ཆེས་པ་དང༌། རྟག་ཏུ་སྐྱབས་སུ་འགྲོ་བར་བྱེད་པ་ནི་ཤིན་ཏུ་རྙེད་དཀའ་བ་དང༌། རྙེད་ན་དོན་ཆེན་པོ་ཡིན་ཏེ། སངས་རྒྱས་རྣམས་ཀྱི་ཡུལ་བསམ་གྱིས་མི་ཁྱབ་པ་དང༌། འཕགས་པ་རྣམས་ཀྱི་སྤྱོད་ཡུལ་བསམ་གྱིས་མི་ཁྱབ་པ་ནི་འཇིག་རྟེན་ཐམས་ཅད་དང་མི་མཐུན་པ། ཀུན་གྱིས་མོས་པར་དཀའ་བ་ཡིན་པའི་ཕྱིར་དང༌། དེ་ལ་མོས་པ་ནི་དངོས་པོ་སྟོབས་ཞུགས་ཀྱི་རིགས་པ་ཚད་མའི་ལམ་ནས་ངེས་
པར་གྲུབ་པའི་འཛིན་སྟངས་མཐུ་ཆེ་བའི་ཕྱིར་དང༌། དེ་བཞིན་གཤེགས་པས་ཀྱང་ཆོས་ཀྱི་སྐུས་རབ་ཏུ་ཕྱེ་བའི་སྐུ་རྣམ་པ་ཐམས་ཅད་པ་དྲན་པ་དང་ཡིད་ལ་བྱས་པ་ཐམས་ཅད་དོན་དང་ལྡན་པར་བྱེད་པའི་བདག་ཉིད་སྔོན་གྱི་སྨོན་ལམ་གྱིས་ཡང་དག་པར་བསྒྲུབས་ཟིན་མཐར་ཕྱིན་པའི་ཕྱིར་དང༌། སྐྱུར་བའི་རོ་དྲན་པ་ལས་ཀྱང་འགྲམ་ཆུ་ལྡང་བ་བཞིན་དུ་རྟེན་ཅིང་འབྲེལ་བར་འབྱུང་བའི་ནུས་མཐུ་ནི་ཤིན་ཏུ་ཚད་མེད་པའི་ཕྱིར་རོ། །དེས་ན་ཕན་ཡོན་མདོར་བསྡུས་ན། འཇིག་རྟེན་འདིར་ཚེ་རིང་བ་དང༌། ནད་མེད་པ་དང༌། བགེགས་རྣམས་ཀྱིས་མི་ཚུགས་པ་དང༌། བདུད་རྣམས་ཀྱིས་མི་ཐུབ་པ་དང༌། ཕྱིན་ཅི་ལོག་གི་བློ་སྣ་ངན་པ་མི་སྐྱེ་བ་དང༌། བདེ་བའི་འབྱོར་ཚོགས་ཆེན་པོ་འཐོབ་ཅིང་འཆི་ཁ་ཡང་གནད་གཅོད་མི་འབྱུང་བ་ལ་སོགས་པ་དང༌། འཇིག་རྟེན་ཕ་རོལ་ཏུ་ཡང་བདེ་བ་ནས་བདེ་བ་བདེ་འགྲོ་མཐོ་རིས་ཀྱི་འཇིག་རྟེན་རྣམས་སུ་བདེ་བའི་ཚལ་ནས་བདེ་བའི་ཚལ་དུ་འགྲོ་བ་ལྟར་བདེ་ཞིང་བདེ་བའི་དགེ་མཚན་ནམ་ཡང་མི་ཉམས་པའི་ལེགས་ཚོགས་རྣམ་པར་འཕེལ་ཞིང་མཐར་ཐུག་མྱ་ངན་ལས་འདས་པ་རྡུལ་བྲལ་ཞི་བ་དམ་པའི་གོ་འཕང་ལ་རེག་པར་འགྱུར་རོ། །བློ་ཆེན་མཁས་པ་རྣམས་ཀྱིས་བསྔགས་བསྔགས་ཤིང༌། །བློ་ཆུང་ཡིད་ཀྱི་ཞིང་སར་སྨན་སྨན་པ། །བློ་ལྡན་སྐྱེས་བུའི་ཉམས་ལེན་ཡིག་ཆུང་འདི། །བློ་དམན་རང་འདྲའི་བློ་དང་འཚམས་པར་བརྗོད། །དེ་དགེ་ཀུན་ཕན་ཟླ་བ་ལྟར་བསིལ་བས། །མ་ལུས་འགྲོ་རྒྱུད་ཆོས་ཀྱི་ལམ་འགྱུར་
ཞིང༌། །འཕགས་པའི་ཡོན་ཏན་འཕགས་པ་ཉིད་བཞིན་དུ། །ཐོབ་ནས་འཇིག་རྟེན་ཀུན་ལ་ཕན་བྱེད་ཤོག །ཅེས་པའང་དགེ་རྒན་ཉེ་བར་གནས་པ་བཙུན་ཚུལ་ཡོན་ཏན་གྱིས་བརྒྱན་པའི་ཤཱ་ཀྱའི་སྲས་མ་ཏི་བྷ་དྲའི་བཞེང་བསྐུལ་མི་ལྡོག་པའི་ཕྱིར་དང༌། གཞན་ཡང་བློ་གསར་ལས་དང་པོ་པ་འགའ་ཞིག་ལ་ཕན་པར་བསམ་སྟེ། སྤྲང་སྨྱོན་ཀུན་བཟང་འཇིགས་མེད་པས་གང་དྲན་སྨྱོ་གཏམ་དུ་ལབ་པ་འདིས་ཀྱང་ཡོངས་འཛིན་དམ་པའི་བཞེད་པ་སྐོང་ཞིང་གཞན་ལ་ཕན་ཐོགས་པར་གྱུར་ཅིག །མངྒ་ལམ།། །།
སྐྱབས་འགྲོའི་རྣམ་བཞག་ཉུང་ངུ།
༈ གང་གི་དམིགས་པ་མེད་པའི་ཐུགས་རྗེ་ཡིས། །མཐའ་ཀླས་སྲིད་པའི་འགྲོ་རྣམས་སྐྱོབ་མཛད་པ། །ཐུབ་དབང་སྲས་དང་བཅས་ལ་ཕྱག་བྱས་ཏེ། །སྐྱབས་འགྲོའི་རྣམ་བཞག་ཉུང་ངུའི་ཚིག་གིས་སྤྲོ། །དེ་ལ་སྐྱབས་འགྲོའི་ཡུལ། ངོ་བོ། །ངེས་ཚིག་དབྱེ་བ། སྐྱབས་སུ་སོང་བའི་ཕན་ཡོན་བཤད་པ་དང་ལྔ་ལས། དང་པོ་ཡུལ་ནི། སྤྱོད་འཇུག་ལས། བྱང་ཆུབ་སྙིང་པོར་མཆིས་ཀྱི་བར། །སངས་རྒྱས་རྣམས་ལ་སྐྱབས་སུ་མཆི། །ཆོས་དང་བྱང་ཆུབ་སེམས་དཔའ་ཡི། །ཚོགས་ལའང་དེ་བཞིན་སྐྱབས་སུ་མཆི། །ཞེས་གསུངས་པ་ལྟར་གསུམ་ལས། དང་པོ་སངས་རྒྱས་དཀོན་མཆོག་ནི། །འགོག་བདེན་མཐར་ཐུག་པ་ངོ་བོ་ཉིད་སྐུ་དང༌། ལམ་བདེན་མཐར་ཐུག་པ་ཡེ་ཤེས་ཆོས་སྐུ་སྟེ། འདི་དག་མངའ་བའི་སྐྱབས་གནས་མཐར་ཐུག་པ་དེ་ཡིན། དེ་ལ་ངོ་བོ་ཉིད་སྐུ་ཞེས་པ་དེ་བཞིན་གཤེགས་པའི་ཡེ་ཤེས་ཀྱི་ཆོས་ཉིད་སྟོང་པ་ཉིད་བློ་བུར་གྱི་དྲི་མ་དང་བྲལ་བའི་ཆ་དེ་ཡིན། ཡེ་ཤེས་ཆོས་སྐུ་ཞེས་པ་སངས་རྒྱས་
འཕགས་པའི་ཐུགས་རྒྱུད་ཀྱི་རྣམ་མཁྱེན་ལ་ཟེར། དེ་དག་ཉིད་དང་གཞན་ཡང་ཆོས་དེ་དག་མངའ་བའི་སངས་རྒྱས་འཕགས་པ་སོགས་ཀྱང་སངས་རྒྱས་དཀོན་མཆོག་ཡིན། ཆོས་དཀོན་མཆོག་ནི་འགོག་ལམ་གྱི་བདེན་པ་གཉིས་ཏེ། འཕགས་པ་རྣམས་ཀྱི་ཐུགས་རྒྱུད་ཀྱི་ཡེ་ཤེས་ལམ་བདེན། འཕགས་པས་སྒྲིབ་པ་ཅི་རིགས་པ་བསལ་བའི་ཆ་འགོག་བདེན་ཡིན། བསལ་བའི་ཆ་ཞེས་པའང་འཕགས་པ་རྣམས་ཀྱི་སྟེང་གི་སྟོང་ཉིད་དེ་དྲི་མ་ལས་གྲོལ་བའི་ཆ་ལ་གོ་དགོས། །དགེ་འདུན་དཀོན་མཆོག་ནི་འཕགས་པ་བཞི་སོགས་འཕགས་པ་རྣམས་ལ་བྱ་སྟེ། ལར་འཕགས་པ་ཞེས་པ་ཟག་པ་མེད་པའི་ཡེ་ཤེས་ཐོབ་པའི་གང་ཟག་རྣམས་ཡིན། འཕགས་པ་བཞི་ནི། ཉན་རང་བྱང་སེམས་འཕགས་པ་གསུམ་དང་སངས་རྒྱས་འཕགས་པ་རྣམས་སོ། །དེ་དག་ལས་གཞན་འཕགས་པ་ཕུང་གསུམ་པ་ཡང་ཡོད་དོ། །གཉིས་པ་སྐྱབས་འགྲོའི་ངོ་བོ་ནི། དཀོན་མཆོག་གསུམ་ནི་བདག་གི་དཔུང་གཉེན་ཡིན་ནོ་སྙམ་པའི་རེ་བ་ཆེན་པོ་ཞིག་འཇོག་རྒྱུ་འདི་ཡིན། དེའང་དོན་དུ་སེམས་བྱུང་སེམས་པ་ཞིག་ཡིན། དེ་ལྟ་ནའང་གྲོགས་སེམས་པ་དེ་དང་ལྷན་ཅིག་པའི་དབང་གིས་དེ་དང་མཚུངས་པར་ལྡན་པའི་སེམས་སེམས་བྱུང་གཞན་མ་རྣམས་ཀྱང་དེའི་རྣམ་པར་འཆར་བ་ཡིན་ནོ། །གསུམ་པ་ངེས་ཚིག་གམ་སྒྲ་བཤད་ནི། སྐྱབས་དཀོན་མཆོག་གསུམ་ལ་བློ་འགྲོ་ཞིང་གཡོ་བའི་ཕྱིར་ན་སྐྱབས་འགྲོ་ཞེས་བྱ་སྟེ། ཆུ་འཐུང་བའི་དོན་དུ་འདུན་པ་འགྲོ་ཟེར་བ་
བཞིན་ཏེ། མདོར་བསྡུ་ན་རེ་བ་དང་བཅས་པའི་སེམས་པ་སྐྱབས་ཡུལ་ལ་སོང་བའོ། །བཞི་པ་དབྱེ་བ་ནི། གཞན་རྒྱུད་ལ་བྱོན་ཟིན་པའི་དཀོན་མཆོག་ལ་ཚེ་འདི་དང་ཕྱི་མའི་འཇིགས་པ་ལས་སྒྲོལ་བའི་དཔུང་གཉེན་དུ་རེ་བ་འཆའ་བ་རྒྱུའི་སྐྱབས་འགྲོ་དང༌། མ་འོངས་པ་ན་རང་གི་རྒྱུད་ལ་དཀོན་མཆོག་གསུམ་འབྱོན་པའམ་འཐོབ་པར་འདོད་པའི་བློས་འབྲས་བུ་སྐྱབས་གནས་དེ་ལ་ཐོབ་བྱའི་དཔུང་གཉེན་དུ་རེ་བ་འཆའ་བ་འབྲས་བུའི་སྐྱབས་འགྲོ་སྟེ་གཉིས་ཡོད། ལྔ་པ་ནི། དཀོན་མཆོག་གསུམ་ལ་སྐྱབས་སུ་སོང་བའི་འཕྲལ་དུ་ཚེ་རིང་སོགས་མཐོ་རིས་ཀྱི་ཡོན་ཏན་དང་ལྡན་ཞིང༌། ངན་འགྲོའི་སྒོ་འཕར་གཅོད་པ་སོགས་དང༌། ཕུགས་སུ་ངེས་པར་ལེགས་པའི་ཡོན་ཏན་གྱི་གཞི་འདིངས་པ་ལ་སོགས་པའོ། །དེ་སྐད་སྐྱབས་སུ་འགྲོ་བའི་གཏམ་གྱི་བཅུད། །ཉུང་ལ་གོ་བདེའི་ངག་གི་བཤད་པ་འདི། །བློ་གསལ་དབང་དྲག་ཞེས་བྱའི་བཞེད་སྐོང་དུ། །བླུན་ཕྲུག་འཇིགས་མེད་ཅེས་བྱས་གང་དྲན་བྲིས། །དགེའོ།། །།
སེམས་བསྐྱེད།
༈ འཇམ་དཔལ་དཔའ་བོ་བློ་ལྡན་མཆོག་སྲེད་ལ་ན་མོ། །དེ་ཡང་ཇི་སྐད་དུ། རྨད་དུ་བྱུང་བའི་སློབ་དཔོན་ཆེན་པོ་ཙནྡྲ་གོ་མིའི་ཞལ་སྔ་ནས། ཟླ་བ་ཡར་གྱི་ངོ་ལྟར་ཡོན་ཏན་གསལ་བར་རྫོགས། །ཉེས་པའི་མུན་པ་སེལ་མཛད་གཅིག་པུ་ཡིད་དུ་འོང༌། །འཇིག་རྟེན་ཕན་ལ་བརྩོན་པ་རབ་ཏུ་གསལ་བ་འབྱུང༌། །དེ་ཤར་ཟླ་བ་བཞིན་དུ་འགྲོ་བ་བསིལ་བར་མཛད། །ཞེས་གསུངས་པ་ལྟར་སྨྲ་བའི་ཟླ་བ་སངས་རྒྱས་བཅོམ་ལྡན་འདས་ཐབས་མཁས་ཤིང་ཐུགས་རྗེ་ཆེན་པོ་མངའ་བ་དེས། སྐྱེ་དགུ་མ་
རིག་པའི་མུན་པ་དང༌། སྡུག་བསྔལ་གྱི་ཚ་གདུངས་མི་བཟད་པས་ཤིན་ཏུ་ཉམ་ཐག་པ་རྣམས་ལ་རྗེས་སུ་བརྩེ་བས། དམ་ཆོས་བདུད་རྩིའི་སྣང་བ་མཐའ་ཡས་པ་ཞིག་སྤྲོ་བར་མཛད་པ་རྣམས་ཀྱི་བསྟན་དོན་ལམ་གྱི་རིམ་པ་ཐམས་ཅད་མདོར་བསྡུ་ན། མཐོ་རིས་དང་ཐར་པ་སྒྲུབ་པའི་ཐབས་ཚུལ་གཉིས་སུ་འདུ་ཞིང་དེའི་ནང་ནས་ཕྱི་མ་ལའང་ཐར་པ་དང་ཐམས་ཅད་མཁྱེན་པ་གཉིས་ཀྱི་ནང་ནས་ཐར་པ་ཙམ་སྒྲུབ་པར་བྱེད་པ་ཐེག་པ་ཆུང་ངུ་དང༌། ཐམས་ཅད་མཁྱེན་པ་སྒྲུབ་པར་བྱེད་པ་ཐེག་པ་ཆེན་པོ་སྟེ་གཉིས་ཡོད་ལ། དེ་ཐམས་ཅད་ལས་སྤང་བྱ་ཕྱོགས་རེ་ཙམ་མ་ཡིན་པར་སྤོང་བ་དང༌། ཡོན་ཏན་ཕྱོགས་རེ་བ་ཙམ་མ་ཡིན་པར་སྒྲུབ་པའི་ཐབས་མཁས་ཀྱི་གནད་མ་ཚང་བ་མེད་པའི་སྒོ་ནས་རབ་དང་ཕུལ་དང་མཆོག་ཏུ་གྱུར་པ་ནི་ཐེག་པ་ཆེན་པོ་ཡིན་པར་ལུང་དང་རིགས་པ་དུ་མས་བསྒྲུབས་ཤིང༌། ཐེག་པ་ཆེན་པོ་ལ་ཡང༌། གཏེར་ཆེན་ཐམས་ཅད་མཁྱེན་པ་འགྲོ་འདུལ་གླིང་བས། སྐུ་དང་ཞིང་ཁམས་འཁོར་དང་མཛད་པ་ནི། །ཡོངས་སུ་དག་པའི་ཡེ་ཤེས་ལམ་ཉིད་དུ། །བྱེད་དང་མི་བྱེད་སྔགས་དང་ཕ་རོལ་ཕྱིན། །ཞེས་གསུངས་པ་ལྟར་འབྲས་བུ་ལམ་དུ་བྱེད་པའི་ཐབས་མཁས་ཡོད་མེད་ཀྱི་དབང་གིས་ཕར་ཕྱིན་ཐེག་པ་དང༌། སྔགས་ཀྱི་ཐེག་པ་གཉིས་སུ་གསུངས་སོ། །འོན་ཀྱང་ཁྱད་པར་དེ་ནི་བསམ་སྦྱོར་གཉིས་ཀྱི་ནང་ནས། སྦྱོར་བ་བྱང་ཆུབ་སེམས་དཔའི་སྤྱོད་པ་སྒྲུབ་ཚུལ་གྱི་སྟེང་ནས་ཕྱེ་བ་རེད་མ་གཏོགས། འཇུག་སྒོ་བསམ་པའི་ངོས་ནས་ཁྱད་པར་ཅུང་ཟད་ཀྱང་མེད་པའི་རྒྱུ་མཚན་གྱིས་
གསང་སྔགས་ཀྱི་སྡོམ་པ་བཟུང་བའི་ཆོ་གའི་སྐབས་མང་པོར། བྱང་ཆུབ་སེམས་ནི་བླ་ན་མེད། །དམ་པ་བདག་གིས་སྐྱེད་པར་བགྱི། །ཞེས་གསུངས་པས། ཉན་ཐོས་དང་རང་རྒྱལ་རྣམས་ལ་ཡང་ངེས་འབྱུང་གི་བསམ་པ་དང༌། དེ་ཁོ་ན་ཉིད་ཀྱི་ལྟ་བ་སོགས་མངོན་པར་རྟོགས་པའི་ཡོན་ཏན་ཡིད་འཕྲོག་པ་མང་པོ་ཡོད་ཀྱང༌། དེ་དག་ལ་ཐེག་པ་ཆེན་པོའི་ལམ་གྱི་མིང་ཙམ་ཡང་མི་འཐོབ་པའི་རྒྱུ་མཚན་ནི། ཟིན་བྱེད་བྱང་ཆུབ་ཀྱི་སེམས་རིན་པོ་ཆེ་མེད་པའི་གནད་ཀྱིས་ཡིན་ལ། ཚུལ་དེ་ནི་ལྷ་སྒོམ་པ་དང༌། སྔགས་བཟླ་བ་སོགས་ལའང་ཤིན་ཏུ་མཚུངས་པས། ཐེག་པ་ཆེན་པོ་ལམ་གྱི་འཇུག་ངོགས་གཅིག་པུར་གྱུར་པ་ནི་བྱང་ཆུབ་ཀྱི་སེམས་ཡིན་ཅིང༌། དེའི་རྩ་བ་ཡང་སྙིང་རྗེ་ཆེན་པོ་ཡིན་པས། ཐེག་པ་མཆོག་ནི་སྙིང་རྗེ་ཆེན་པོས་ཁྱད་པར་དུ་ཕྱེ་བར་འཕགས་པ་ཀླུ་སྒྲུབ་ཀྱིས་གསུངས་ཏེ། རིན་ཆེན་ཕྲེང་བ་ལས། རང་གི་དོན་ལ་མི་ལྟ་བར། །གཞན་དོན་རོ་གཅིག་དགའ་བ་གང༌། །ཡོན་ཏན་འབྱུང་གནས་ཐེག་ཆེན་ཏེ། །ཞེས་གསུངས། དེ་ལྟར་ན་སྙིང་རྗེའི་རྩ་བ་ཅན་གྱི་སེམས་བསྐྱེད་སྒོམ་ཚུལ་མདོར་བསྡུས་ཤིག་རང་བློ་གོམས་པའི་ཕྱིར་དུ་བཤད་ན། དཔལ་དྭི་པཾ་ཀ་རས། རང་རྒྱུད་གཏོགས་པའི་སྡུག་བསྔལ་གྱིས། །གང་ཞིག་གཞན་གྱི་སྡུག་བསྔལ་ཀུན། །ཡང་དག་ཟད་པར་ཀུན་ནས་འདོད། །ཅེས་དང་པོར་སྡུག་བསྔལ་རང་ཉམས་དང་སྦྱར་ནས་སེམས་དགོས་པར་གསུངས་པ་བཞིན། རགས་པའི་སྡུག་བསྔལ་ངན་སོང་གི་སྡུག་བསྔལ་ལ་སོགས་པ་དང༌། ཕྲ་བའི་སྡུག་བསྔལ་ཁམས་གསུམ་འཁོར་
བ་ཐམས་ཅད་ལས་དང་ཉོན་མོངས་པའི་གཞན་དབང་དུ་སོང་བའི་འདུ་བྱེད་ཀྱི་སྡུག་བསྔལ་ལེགས་པར་བསམ་སྟེ། ཡིད་འཁུལ་བའི་མྱོང་བ་ཁྱད་པར་ཅན་སྐྱེ་བར་བྱེད། དེ་ནས་སེམས་ཅན་ཐམས་ཅད་ཡིད་དུ་འོང་བའི་བློ་བསྐྱེད་པར་བྱ་སྟེ། དེའང་འདི་ལྟར་དང་པོར་རང་གི་ཉེ་དུ་དང༌། མཛའ་བཤེས་དང༌། དེ་ནས་བར་མ། དགྲ་སོགས་ནས་རིམ་གྱིས་སྒོམ་པར་གསུངས་ཤིང་སྒོམ་པའི་ཚུལ་ནི། ད་ལྟ་རང་རེ་རྣམས་མངལ་ཞུགས་ཚུན་ཆད་ཀྱི་ཟག་བཅས་ཉེར་ལེན་གྱི་ཕུང་པོ་འདི་ཉིད་རྒྱུ་ལས་དང་ཉོན་མོངས་པ་ལས་མ་བྱུང་ན་ནི། རྒྱུ་མེད་པའི་དངོས་པོར་ཡོད་པར་སྨྲ་བ། དུ་བ་མེ་ལ་མི་ལྟོས་པར་སྐྱེ་བར་ཁས་བླང་བ་ལྟ་བུར་འགྲོ་ལ་དེ་རང་གི་མཐུན་པའི་རྒྱུ་ལས་བྱུང་ན་ནི། རྒྱུ་དེ་ཚེ་སྔ་མའི་སྐབས་ཀྱི་ལས་དང་ཉོན་མོངས་ལས་གཞན་དུ་མི་འཐད་ཅིང༌། དེ་ལྟ་དེ་ལྟར་ཚེ་སྔ་མ་དང༌། དེའི་ཡང་སྔ་མ་སོགས་ལ་སྦྱར་ནས་ཡར་དེད་དུ་དཔྱད་པ་ན་སྐྱེ་ཤིའི་འཁོར་བ་འདི་ལ་ཐོག་མའི་ཡ་མཐའ་འཇོག་རྒྱུ་ཞིག་གཏན་ནས་མི་སྲིད་པར་འགྲུབ་ལ། དེ་འགྲུབ་ན་སྐྱེ་ཤིའི་ཕྲེང་བ་དེ་དག་གི་སྐབས་ཀྱི་ཕ་མ་དང་སྤུན་ཟླ་མཛའ་བཤེས་སོགས་ཀྱི་ཡ་མཐའ་ཡང་མི་སྲིད་པ་ཁོ་ན་སྟེ། དེ་ལྟར་ཐོག་མ་མེད་པའི་དུས་ནས་མ་བུའི་བརྩེ་བ་ལ་གོམས་པའི་དབང་གིས། འཇིག་རྟེན་ན་བླུན་པའི་མཐར་ཐུག་ཕྱུགས་རྣམས་ཀྱང་རང་གི་བུ་ལ་བྱམས་པ་དང༌། གསོ་སྐྱོང་བྱ་བའི་ཐབས་ཤེས་པ་ལ་སོགས་པ་སུས་ཀྱང་མ་བསླབས་པར་ངང་གིས་འོང་བ་ཡིན་ཏེ། སྐྱེ་རབས་ལས། བློ་ཡི་མཐུ་སྟོབས་
ནུས་པ་མེད་པ་དང༌། །དབང་པོ་རྣམས་ཀྱང་བླུན་པའི་རང་བཞིན་ཅན། །བྱུང་མ་ཐག་ཏུ་སུས་ཀྱང་མ་བསླབས་པར། །ཁ་ཟས་གཞན་ལ་སྩོལ་བར་བྱེད་པ་འདིས། །སྐྱེ་བ་གཞན་ལ་གོམས་པར་བྱས་པར་གྲུབ། །ཅེས་གསུངས། དེ་ཡང་ཚེ་འདིའི་ཕ་མ་དང་སྤུན་ཟླ་ལ་སོགས་པ་ཁོ་ནས་ཉེ་དུ་དང་མཛའ་བཤེས་བསྐྱར་མར་བྱས་པ་ཙམ་མིན་པར། ནམ་མཁའི་མཐས་གཏུག་པའི་སེམས་ཅན་ཐམས་ཅད་རེ་རེ་ནས་དེ་ལྟར་འཁོར་ལོ་བསྐོར་བ་བཞིན་དུ་གྱུར་པའི་ཚུལ། སའི་དངོས་གཞིར་མདོར་དྲང་བ་ལས། ཡུན་རིང་པོར་འདས་པ་ན་སེམས་ཅན་གང་ཁྱེད་ཀྱི་ཕའམ་མའམ། ཕུ་ནུའམ། སྲིང་མོའམ། མཁན་པོའམ། སློབ་དཔོན་ནམ། བླ་མའམ། བླ་མའི་གནས་ལྟ་བུ་མ་གྱུར་པ་དེ་ནི་ངས་མཐོང་བར་དཀའོ། །ཞེས་གསུངས་ཤིང༌། དཀོན་བརྩེགས་ཀྱི་ལེའུ་བཅུ་གཉིས་པ་དང༌། དྲག་ཤུལ་ཅན་གྱིས་ཞུས་པ་དང༌། དཀོན་མཆོག་སྤྲིན་སོགས་མདོ་སྡེ་གཞན་མཐའ་ཡས་པར་ཡང་དེ་དང་འདྲ་བར་གསུངས། རིགས་པས་དཔྱད་ན་ཡང་དགྲ་གཉེན་བར་མ་སོགས་ནི་སྔོན་གྱི་ལས་བསགས་ཚུལ་གྱི་ཁྱད་པར་ལས་སོ་སོར་བྱུང་བ་ཁོ་ན་ཡིན་ལ། ལས་དེ་སོག་ཚུལ་ཡང༌། ད་ལྟ་རང་རེ་རྣམས་ཀྱིས་སེམས་ཅན་རེ་རེ་ལ་དམིགས་ནས་ཀྱང་སྐབས་འགར་ནི་ཆགས་པ་ལ་སོགས་པས་བསྐྱེད་པའི་གཉེན་དུ་འགྱུར་བའི་ལས་དང༌། སྐབས་ལ་ལར་ནི་ཞེ་སྡང་སོགས་ཀྱིས་བསྐྱེད་པའི་དགྲར་འགྱུར་བའི་ལས་སྣ་ཚོགས་ཞིག་ལོ་དང་ཟླ་བ་རེ་རེའི་ཁོངས་སུ་ཡང་གོ་རིམ་མ་ངེས་པར་གསོག་པ་མྱོང་བས་གྲུབ་
པས། དེ་དང་མཐུན་པར་འབྲས་བུ་གྲུབ་པའི་ཚེ་ཡང་ད་ལྟ་དགྲ་བོར་གྱུར་པའི་སེམས་ཅན་གཅིག་ཀྱང་རེས་འགའ་ཉེ་དུ་དང་དུས་གཞན་དང་གཞན་དུ་མཛའ་བཤེས་བརྩེ་དུང་ཅན་དུ་འགྱུར་བའི་ཚུལ་གྱིས་དབྱར་དགུན་བཞིན་དུ་བརྗེ་བར་ནུས་པ་ཡོད་དེ། ཚུལ་འདིས་མཐའ་ཡས་པའི་སེམས་ཅན་རེ་རེ་ནས་རང་གི་སྤུན་ཟླ་དང༌། ཚ་བོ་སོགས་གཉེན་བཤེས་ཀྱི་ཁྱད་པར་གང་དུ་བསྒྲུབ་ཀྱང་འགྲུབ་ལ། ཤེར་ཕྱིན་འབུམ་པ་ལས་ཀྱང་སེམས་ཅན་ཐམས་ཅད་ཕར་འདུ་ཤེས་པ་དང༌། སྤུན་ཟླ་དང་སྲིང་མོར་འདུ་ཤེས་པ་ལ་སོགས་པ་རྒྱ་ཆེར་གསུངས་མོད། འོན་ཀྱང་གཉེན་ཐམས་ཅད་ཀྱི་ནང་ནས་སྙིང་བརྩེ་བའི་མཐར་ཐུག་མ་ཡིན་པའི་གནད་ཀྱིས། གཙོ་བོར་མར་ཤེས་པའི་སྒོ་ནས་སེམས་ཅན་ལ་ཡིད་འོང་སྒྲུབ་པར་ཤིང་རྟ་ཆེན་པོ་རྣམས་ཀྱིས་གསུངས་ཏེ། མན་ངག་རྒྱུ་འབྲས་བདུན་ལྡན་གྱི་དང་པོར་མར་ཤེས་ཞེས་མིང་འདོགས་པའི་རྒྱུ་མཚན་ཡང་དེ་ཡིན་ནོ། །དེ་ལྟར་སེམས་ཅན་ཐམས་ཅད་མར་གྱུར་རེས་ཀྱིས་རང་རེ་རྣམས་ལ་དྲིན་ཆེན་པོས་བསྐྱངས་པ་ཤ་སྟག་ཡིན་པར་ཡང༌། སློབ་སྤྲིང་ལས། བྱིས་པ་པང་ན་བཙའ་བ་ཅི་ཡང་མི་ནུས་པ། །གང་གི་ནུ་ཞོ་བྱམས་པའི་ཤུགས་ཀྱིས་གཟགས་འཐུང་བ། །ངལ་བ་མང་བརྟེན་བྱམས་ལ་བརྟེན་པ་དེ་དག་འདིར། །ཤིན་ཏུ་མ་རབས་ཤིག་ནའང་སྤོང་བར་སུ་ཞིག་སྤྲོ། །ཞེས་གསུངས་པ་ལྟར། མིར་གྱུར་པའི་འགྲོ་བ་ལ་མཚོན་ན། དང་པོར་འགྲོ་བ་གཞན་ལས་ཁྱད་པར་དུ་འཕགས་པའི་ལུས་རྟེན་བཟང་པོ་བྱིན་ཅིང༌། དེ་ཉིད་ཟླ་
དུས་མང་པོར་མངལ་དུ་བསྐྱངས། བཙས་པའི་འོག་ཏུ་ཡང༌། མིག་འབྱེད་འཛུམ་དང༌། ཟས་ཁར་འཇུག་པ་ཙམ་ཡང་མི་ནུས་པའི་བྱིས་པ་མི་གཙང་བའི་ཁྲོད་ཀྱི་སྲིན་བུ་ལྟར་ཉམ་ཆུང་བ་དེ། སོར་མོ་བཅུའི་ཁ་ལ་གཡེང༌། འཇམ་པའི་ཤ་དྲོད་ལ་བཅར། ཟས་ལྕེས་བསྙོད། པང་གིས་ཁྲུས་ཁང་བྱས་ནས། དཀའ་བ་སྟོང་དང་བསྡོས་ཏེ་བསྐྱེད་བསྲིངས། མ་རང་ཉིད་སྡིག་སྡུག་གཏམ་ངན་ཐམས་ཅད་དང་བསྲེས་ཀྱིན་བསགས་བསགས་པའི་ཟས་ནོར་ལོངས་སྤྱོད་གང་ཡོད་ཐམས་ཅད་མི་ཕང་བར་བྱིན། རང་གིས་ཤེས་ཚོད་དང་མཐུན་པར་ཕུན་ཚོགས་སྒྲུབ་ཚུལ་དང་རྒུད་པ་ལས་སྲུང་ཚུལ། ཐ་ན་ཟས་ཟ་ལུགས་དང༌། ཟོས་ནས་ཁ་ཕྱི་ལུགས་ཡན་ཆད་གཡོ་མེད་པར་རྩལ་སྤྲུགས་སུ་བསླབས། མིག་གིས་བལྟ་ལུགས་དང༌། ངག་གིས་འབོད་ལུགས་ཚུན་ཆད་ཀྱི་སྒོ་ནས་བུའི་ཡིད་དང་ཅི་མཐུན་བྱེད། ཡུལ་དང་དུས་གང་དུ་ཕྱིན་ཡང་བུ་ལ་སེམས་པའི་བརྩེ་གདུང་གི་ཡིད་འབའ་ཞིག་གིས་དུས་འདའ། བུ་ན་བ་ལས་རང་ཉིད་འཆི་བ་འདམས་ཤིང༌། བུས་ལོག་སྒྲུབ་དང༌། བུའི་དོན་དུ་ངལ་དུབ་ཀྱི་སྡུག་བསྔལ་ཇི་ལྟ་བུ་བྱུང་ཡང་ཇི་མི་སྙམ་པ་སོགས་བཤད་ཀྱིས་མི་རྫོགས། མ་བུའི་བརྩེ་བ་དེ་ནི་མི་ཁོ་ན་ལ་ལྷག་པ་ཡང་མ་ཡིན་ཏེ། རང་ཉིད་ཆེས་ཤིན་ཏུ་བླུན་ཅིང་ཉམ་ཆུང་བའི་བྱ་དང་བྱིའུ་དང༌། ཤིན་ཏུ་གཏུམ་ཞིང་མ་རུངས་པའི་ཡིད་ཅན་གྱི་གཅན་ཟན་ཁྲོ་བོ་རྣམས་ཀྱང་ཚེ་འདི་དང་ཕྱི་མའི་དུས་ཀྱི་ལན་དང་རྣམ་སྨིན་གང་ལའང་རེ་བས་མ་ཡིན་པར། བུ་ལ་བྱམས་པ་རྐྱང་པའི་དབང་གིས་རང་ཉིད་ཀྱི་
ནུས་པ་ཅི་ཡོད་ནས་གསོ་སྐྱོང་དང་གཅེས་སྤྲས་བྱེད་ཅིང༌། ཐ་ན་རང་གི་སྲོག་ཀྱང་བུའི་ཆེད་དུ་ལྟོས་པ་མེད་པར་བཏང་བ་ལ་མཐའ་མེད། ཚུལ་དེ་ལྟ་བུས་སེམས་ཅན་རེ་རེས་ཀྱང་ས་ཆེན་པོའི་རྡུལ་སྙེད་ལས་ཀྱང་མང་བའི་ཚེ་རབས་ཀྱི་ཕྲེང་བར་ཕན་བཏགས་པ་ཤ་སྟག་ཡིན་པར་བཤེས་སྤྲིང་ལས། རེ་རེས་རྒྱ་མཚོ་བཞི་བས་ཆེས་ལྷག་པའི། །འོ་མ་འཐུང་སྟེ་ད་དུང་སོ་སོ་ཡི། །སྐྱེ་བོའི་རྗེས་སུ་སྤྱོད་པའི་འཁོར་བ་པས། །དེ་བས་ཆེས་མང་བ་ཞིག་བཏུང་འཚལ་ལོ། །ཞེས་རྐང་པ་སྔ་མ་ཕྱེད་གཉིས་ཀྱིས་སྔོན་ཆད་དྲིན་གྱིས་བསྐྱངས་པའི་ཚུལ་དང༌། དེ་མན་ཆད་ཀྱིས་ད་དུང་ཡང་སྐྱོང་བར་འགྱུར་བའི་ཚུལ་རྒྱུ་མཚན་དང་བཅས་པ་བསྟན། དེའི་ཕྱིར་འོ་སྐོལ་རྣམས་ཀྱིས་སེམས་ཅན་དེ་དག་ཕྲག་པའམ་སྤྱི་བོའི་གཙུག་ཏུ་བཏེགས་ཏེ། སྟོང་གསུམ་འཇིག་རྟེན་གྱི་ཁམས་འདི་བསྐོར་བའི་བསྙེན་བཀུར་བསྟབ་ཀྱང༌། དེ་དག་གིས་བྱས་པའི་འབུམ་གྱི་ཆ་ཙམ་ལའང་ལན་མི་ལོན་པར་སྡེ་སྣོད་དུ་མ་ལས་གསུངས། དེ་ལྟར་ཡུན་རིང་པོ་ནས་གཉེན་དུ་གྱུར་པའི་སེམས་ཅན་དེ་དག་འཁོར་བ་སྡུག་བསྔལ་གྱི་ཕུང་པོའི་གནས་འདིར་ལྟོས་མེད་དུ་བོར་ནས་རང་ཉིད་གཅིག་པོ་ཐར་པའི་བདེ་བ་ཙམ་ཞིག་དོན་དུ་གཉེར་བར་བྱེད་ན་ཡང་སྔོན་ཕན་བཏགས་པ་མི་དྲན་པའི་བྱས་པ་མི་ཤེས་པ་དང༌། དེ་ལ་ཕན་ལན་མི་སྐོར་བའི་བྱས་པ་མི་གཟོ་བ་ཁོ་ནར་འགྱུར་བས། སློབ་སྤྲིང་ལས། ཉེ་དུ་འཁོར་བའི་རྒྱ་མཚོའི་ཁོང་དུ་ཆུད་གྱུར་ཅིང༌། །ཀླུང་གི་ནང་དུ་ལྷུང་བ་ལྟ་བུར་སྣང་
བཞིན་དུ། །སྐྱེ་ཤི་འཕོས་པའི་ངོ་མ་ཤེས་པ་དེ་བོར་ནས། །གལ་ཏེ་གཅིག་ཐར་བྱེད་ན་དེ་ལས་ཁྲེལ་བོར་མེད། །ཅེས་གསུངས་སོ། །དེའི་རྒྱུ་མཚན་གྱིས་ཉོན་མོངས་ཐམས་ཅད་སྤངས་པའི་ཐེག་དམན་དགྲ་བཅོམ་པ་ཡང་རྒྱལ་དང་དེ་སྲས་ཀྱི་སྨོད་གནས་སུ་གྱུར་པས་སྐལ་པ་དམན་པར་གསུངས་ཏེ། དཔལ་མཆོག་དང་པོ་ལས། རང་གི་བུ་ལའང་མི་ཆགས་པའི། །ཉན་ཐོས་རྣམས་ནི་སྐལ་པ་དམན། །སེམས་ཅན་ཐམས་ཅད་བདེ་མཛད་པའི། །སྐལ་བཟང་ཕྱག་ན་རྡོ་རྗེ་དཔལ། །ཞེས་གསུངས། དེའི་རྒྱུ་མཚན་ཡང༌། སེམས་ཅན་ཁོ་རང་ཚོའི་རེས་ལ་བབས་ཚེ། ཁོང་ཚོའི་ནུས་ཚོད་ཀྱིས་ཕན་འདི་མ་བཏགས་བྱ་བ་དང༌། གནོད་པ་འདི་ལས་མ་བསྐྱབས་བྱ་བ་མེད་པས། ད་ལྟ་རང་རེ་རྣམས་ཀྱང་བྱང་ཆུབ་གསུམ་གང་འདོད་ཀྱང་བསྒྲུབ་ཏུ་ཡོད་པའི་གནས་སྐབས་སུ་ཆེད་དུ་བྱ་བ་གཞན་དོན་སྒྲུབ་པའི་ཐབས་ལ་མི་བརྩོན་ན། དེ་དག་གི་རེ་ལྟོས་སུ་ལ་འཆའ། དེ་དག་སྒྲོལ་བའི་རེས་ཀྱང་གཞན་སུ་ལ་འབབ་སྙམ་དུ་སྒོ་དུ་མ་དང༌། འབད་པ་དུ་མས་ལེགས་པར་བསམ། ཇི་སྐད་བཤད་པའི་ཚུལ་གྱིས་མར་ཤེས་པ་དང༌། དྲིན་དྲན་པ་དང༌། དྲིན་དུ་གཟོ་བ་སྟེ་གསུམ་པོ་གོ་རིམ་བཞིན་དུ་སྦྱང་བས་སེམས་ཅན་ཡིད་དུ་འོང་བའི་རྣམ་པ་ཅན་གྱི་བློ་ངང་ངམ་ཤུགས་ཀྱིས་སྐྱེ་བ་ན། སླར་ཡང་སེམས་ཅན་གྱི་སྡུག་བསྔལ་སྤྱི་དང་བྱེ་བྲག་དམྱལ་བ་པ་རྣམས་མཚོན་ཆ་དང་ནད་ལ་སོགས་པ་ཕྱི་དང་ནང་གི་འཚེ་བ་ལས་བྱུང་བའི་སྡུག་བསྔལ་ཤུགས་དྲག་ལ་རྒྱུན་རིང་ཞིང་བར་མཚམས་མེད་པར་འབྱུང་བ་རྣམས་ཀྱིས་མནར་བ་དང༌། དེ་བཞིན་དུ་ཡི་དྭགས་རྣམས་ཀྱང་བཀྲེས་
སྐོམ་དང་ཚ་གྲང་དང་ངལ་དུབ་ལ་སོགས་པའི་སྡུག་བསྔལ་སྣ་ཚོགས་པས་གཟིར་ཞིང་དུད་འགྲོ་རྣམས་གཅིག་གིས་གཅིག་ཟ་བ་དང་བཀོལ་སྤྱོད་ཀྱིས་འཚེ་བ་སོགས་དང་མི་རྣམས་ཚེ་ཐུང་ཞིང་ལོངས་སྤྱོད་ཉམས་པ་དང༌། འདོད་ལྷ་རྣམས་གཞན་གྱིས་ཚར་བཅད་པ་དང༌། སྤ་ཀོང་བ་དང་འཆི་འཕོ་ལྟུང་བ་སོགས་ཀྱིས་ཉམ་ང་ཞིང་སྲིད་རྩེ་མན་ཆད་ཀྱི་འཁོར་བ་མཐའ་དག་འདུ་བྱེད་ཀྱི་སྡུག་བསྔལ་ལས་མ་འདས་པའི་ཚུལ་རྣམས་རྒྱ་ཆེར་བསམ་ནས་དེ་དག་སྡུག་བསྔལ་དེ་ལས་བྲལ་བར་འདོད་པའི་བརྩེ་བ་སྙིང་རྗེ་ཆེན་པོ་བསྐྱེད་དགོས། དེའང་ཉན་ཐོས་དང་རང་སངས་རྒྱས་རྣམས་དང་ཐུན་མོང་བའི་བརྩེ་བ་སེམས་ཅན་སྡུག་བསྔལ་དང་བྲལ་འདོད་ཀྱི་རྣམ་པ་ཅན་ལ་བློ་འཁུལ་ཐུབ་པ་ཙམ་གྱིས་མི་ཚིམ་པར་འཇུག་པ་རང་འགྲེལ་ལས། བཅོམ་ལྡན་འདས་མ་སྙིང་རྗེ་ཆེན་པོ་སངས་རྒྱས་ཉིད་ཀྱི་རྒྱུ་ཕུན་སུམ་ཚོགས་པ་དང་སེམས་ཅན་འཁོར་བའི་བཙོན་རར་བསྡམས་པ་སྐྱབས་མེད་པ་མ་ལུས་པ་ཡོངས་སུ་སྐྱོབ་པའི་མཚན་ཉིད་ཅན་ཞེས་གསུངས་པ་ལྟར་འགྲོ་བ་སྡུག་བསྔལ་མཐའ་དག་ལས་སྒྲོལ་བ་དང་ཕན་བདེ་མཐའ་དག་སྒྲུབ་པའི་ངལ་བ་རང་གི་ཁུར་དུ་ལེན་པའི་སྐྱོབ་འདོད་ཀྱི་རྣམ་པ་ཅན་གྱི་བརྩེ་བ་ལྷག་བསམ་རྣམ་དག་བསྒྲུབ་པར་བྱ་དགོས། དེ་གྲུབ་ནས་གཞན་དོན་ཕུན་ཚོགས་སྒྲུབ་པ་ལ་ཚོང་པ་ཁེ་སྤོགས་འདོད་པ་དང༌། དབུལ་པོས་རིན་པོ་ཆེ་གཏེར་འདོད་པ་ལྟ་བུའི་དོན་གཉེར་རྐང་གི་ཁོང་ནས་སྐྱེ་བ་ནས། དེའི་ཐབས་ལ་རྟོག་པར་འགྱུར་ལ། དེ་ལྟར་བརྟགས་པ་ན། དཔལ་ཆོས་
ཀྱི་གྲགས་པས། བརྩེ་ལྡན་སྡུག་བསྔལ་གཞོམ་པའི་ཕྱིར། །ཐབས་རྣམས་ལ་ནི་མངོན་སྦྱོར་མཛད། །ཐབས་བྱུང་དེ་རྒྱུ་ལྐོག་གྱུར་པ། །དེ་འཆད་པ་ནི་དཀའ་བ་ཡིན། །ཞེས་ཐོབ་བྱ་ཐར་པ་དང་ཐམས་ཅད་མཁྱེན་པའི་གོ་འཕང་དང༌། ཐོབ་བྱེད་ཐེག་པ་གསུམ་གྱི་རྣམ་བཞག་རྣམས་རང་གིས་མ་རྟོགས་པར་གཞན་ལ་སྟོན་ཚུལ་མེད་པར་གསུངས་པའི་རིགས་པས། གདུལ་བྱ་རིགས་ཅན་གསུམ་པོའི་སྐལ་བ་དང་འཚམས་པར་ཆོས་ཀྱི་འཁོར་ལོ་བསྐོར་བའི་སྒོ་ནས་གཞན་དོན་སྒྲུབ་པ་ལ། དེའི་མེད་ན་མི་འབྱུང་གི་ཐབས་རྣམ་མཁྱེན་འཐོབ་དགོས་ཤིང་གོ་འཕང་དེ་ཐོབ་ན་གདུལ་བྱ་འདུལ་བའི་ཕྲིན་ལས་སྐད་ཅིག་ཀྱང་དུས་ལས་མི་ཡོལ་བའི་ཚུལ། རྒྱུད་བླ་མ་ལས། གདུལ་བྱའི་ཁམས་དང་འདུལ་བའི་ཐབས་དང་ནི། །གདུལ་བྱའི་ཁམས་ཀྱིས་འདུལ་བའི་བྱ་བ་དང༌། །དེ་ཡི་ཡུལ་དང་དུས་སུ་གཤེགས་པ་ལ། །ཁྱབ་བདག་རྟག་ཏུ་ལྷུན་གྱིས་གྲུབ་པར་འཇུག །ཅེས་གདུལ་བྱའི་ཁམས་དང༌། དེ་དག་འདུལ་བའི་ཐབས་དང༌། བཏུལ་བའི་འབྲས་བུ། ཐབས་དེ་ལ་འཇུག་པའི་ཚུལ་ལ་སོགས་པ་ཐམས་ཅད་རྟོག་མེད་ཡིད་བཞིན་གྱི་ནོར་བུའི་བྱ་བ་བཞིན་དུ་འཇུག་པར་གསུངས་པ་རྣམས་ལེགས་པར་མཐོང་ནས། ངེས་པར་དེ་ལྟ་བུའི་གོ་འཕང་ཞིག་ཐོབ་པར་བྱ་དགོས་སྙམ་པའི་བྱང་ཆུབ་དོན་གཉེར་གྱི་བསམ་པ་རྒྱུན་ཆགས་སུ་གོམས་པར་བྱས་པས་བཅོས་མིན་གྱི་མྱོང་བ་སྤྱོད་ལམ་རྣམ་བཞིའི་སྐབས་ཀུན་ཏུ་བསྲེ་ནུས་པ་སེམས་རང་དབང་མེད་པར་གཞན་དོན་དང་བྱང་
ཆུབ་དོན་གཉེར་གྱི་དབང་དུ་སོང་བ་ནམ་བྱུང་བ་ན་བླ་མེད་བྱང་ཆུབ་ཐུན་མོང་མ་ཡིན་པའི་རྒྱུ་ས་བོན་ལྟ་བུའི་བྱང་ཆུབ་ཀྱི་སེམས་རིན་པོ་ཆེ་ཞེས་བྱ་བ་དེ་རྒྱུད་ལ་སྐྱེས་པ་ཡིན་ལ། སེམས་དེ་སྐྱེས་ནས་སྐད་ཅིག་རེ་རེ་ཡང་སྒྲིབ་པ་སྦྱོང་བ་དང་ཚོགས་བསགས་པའི་ཐབས་མཁས་མཁའ་ལྟར་ཡངས་པ་སྒྲུབ་ནུས་ཤིང༌། སེམས་དེས་ཟིན་པའི་དོང་ཙེ་གཅིག་གི་སྦྱིན་པ་ཙམ་ཡང་རྒྱལ་སྲས་ཀྱི་སྤྱོད་པ་ཞེས་བྱ་བའི་གྲངས་སུ་འགྲོ་བས་ན། དགེ་ཚོགས་ཐབས་ཀྱིས་ཟིན་པར་བྱེད་པ་སྦྱོར་བ་སེམས་བསྐྱེད་དམ་པ་ཞེས་དམ་པ་གོང་མ་རྣམས་ཀྱིས་གསུངས་སོ།། །།
བློ་སྦྱོང་།
༈ བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ལོ། །དམ་པའི་ཆོས་གང་ཞིག་འཆད་ཉན་སྒོམ་སྒྲུབ་གང་བྱེད་ཀྱང་དེ་ཉོན་མོངས་ཅན་གྱི་ཀུན་སློང་དང་འདྲེས་ན་རྣམ་པར་གྲོལ་བའི་དངོས་རྒྱུར་མི་འགྱུར་ཏེ། ཡོན་ཏན་མཛོད་ལས། རྩ་བ་དུག་ཡིན་མྱུ་གུ་སྨོས་ཅི་འཚལ། །ཞེས་སོ། །དེའི་ཕྱིར་བློ་བཅོས་པ་འདི་གལ་ཆེ་སྟེ། སྤྱོད་འཇུག་ལས། དང་པོ་རང་གི་སེམས་བརྟགས་ནས། །བརྟན་པས་རིགས་པ་ལྡན་པར་བྱ། །ཞེས་གསུངས་པའི་ཕྱིར། དེ་ཡང་མི་དགེ་བའི་རྟོག་པ་ཐམས་ཅད་བསལ་ནས་དགེ་བའི་ཀུན་སློང་བཅོས་དགོས། དེ་ལས་ཀྱང་ཐེག་དམན་གྱི་བློ་ཆུང་རང་དོན་ཡིད་བྱེད་ཙམ་མ་ཡིན་པར་སྐྱེས་བུ་ཆེན་པོའི་ཀུན་སློང་བཅོས་ཚུལ་གཉིས་ཡོད་པ་ལས། འདིར་རྒྱུ་འབྲས་མན་ངག་བདུན་ལྡན་གྱི་སྒོ་ནས་བཤད་པ་ལ་
དང་པོ་མར་ཤེས་པ་ནི། ཚད་མ་རྣམ་འགྲེལ་ལས། རྣམ་ཤེས་མིན་པ་རྣམ་ཤེས་ཀྱི། །ཉེར་ལེན་མིན་པའི་ཕྱིར་ཡང་གྲུབ། །ཅེས་བཤད་པ་ལྟར་ཐུག་མེད་ཀྱི་རིགས་པས་གཞལ་ན་བློ་ཐུག་མེད་བློ་ཐུག་མེད་བཞིན་ལུས་ཐུག་མེད་ལུས་ཐུག་མེད་བཞིན་མ་ཐུག་མེད་ཀྱི་ཚུལ་བཤེས་སྤྲིང་ལས། མ་ཡི་ཐུག་མཐའ་རྒྱ་ཤུག་ཚིག་གུ་ཙམ། །རིལ་བུ་བགྲངས་ཀྱང་ས་ཡིས་ལང་མི་འགྱུར། །ཞེས་སོ། །གཉིས་པ་དྲིན་དྲན་ནི། སློབ་སྤྲིང་ལས། བྱིས་པ་པང་ན་བཙའ་བ་ཅི་ཡང་མི་ནུས་པས། །གང་གི་ནུ་ཞོ་བྱམས་པའི་ཤུགས་ཀྱི་གཟགས་འཐུང་བ། །ངལ་བ་མང་བརྟེན་བྱམས་ལ་བརྟེན་པ་དེ་དག་འདིར། །ཤིན་ཏུ་མ་རབས་ཐ་ཤལ་ཞིག་ནའང་སྤང་བར་སུ་ཞིག་སྤྲོ། །ཞེས་པ་ལྟར། ཐོག་མར་མངལ་དུ་བཟུང༌། བར་དུ་ནུ་ཞོ་བསྣུན། ཐ་མར་གྲགས་པ་སྒྲུབ། འཇམ་པའི་གོས་བསྐོན། ཞིམ་པོའི་ཟས་སྦྱིན། བྱམས་པའི་མིག་གིས་བལྟ། བརྩེ་བའི་ངག་གིས་འབོད། ཕན་པའི་བྱ་བས་སྐྱོང་བར་བྱས་པ་སྟེ། བཤེས་སྤྲིང་ལས། རེ་རེའི་རྒྱ་མཚོ་བཞི་བས་ཆེས་ལྷག་པའི། །འོ་མ་བཏུང་སྟེ་ད་དུང་སོ་སོ་ཡི། །སྐྱེ་བོའི་རྗེས་སུ་སྤྱོད་པའི་འཁོར་བ་པས། །དེ་བས་ཆེས་མང་བ་ཞིག་བཏུང་འཚལ་ལོ། །ཞེས་སོ། །གསུམ་པ་དྲིན་གཟོ་ནི། སློབ་སྤྲིང་ལས། ཉེ་དུ་འཁོར་བའི་རྒྱ་མཚོའི་ཁོང་དུ་ཆུད་གྱུར་ཅིང༌། །ཀླུང་གི་ནང་དུ་ལྷུང་བ་ལྟ་བུར་སྣང་བཞིན་དུ། །སྐྱེ་ཤི་འཕོས་པའི་ངོ་མ་ཤེས་པ་དེ་བོར་ནས། །གལ་ཏེ་གཅིག་ཐར་བྱེད་ན་དེ་ལས་ཁྲེལ་བོར་མེད། །ཅེས་པ་ལྟར་དྲིན་ཆེན་གྱི་
འགྲོ་བ་དེ་དག་ཐམས་ཅད་སྡུག་བསྔལ་གསུམ་གྱི་རྒྱ་མཚོར་ཆུད་པའི་གནས་ཚུལ་ཤེས་བཞིན་དུ། རང་ཉིད་གཅིག་པུའི་དོན་ལ་གཞོལ་ན་དེ་ནི་མ་རབས་ཀྱི་ཁུར་ཆེན་འཛིན་པ་སྟེ། ཀླུའི་རྒྱལ་པོ་རྔ་སྒྲའི་ཚིགས་བཅད་ལས། རྒྱ་མཚོ་དང་ནི་རི་རབ་དང༌། །ས་རྣམས་བདག་གིས་ཁུར་མིན་གྱི། །བྱས་པ་མི་གཟོ་གང་ཡིན་པ། །དེ་ནི་བདག་གིས་ཁུར་ཆེན་ཡིན། །ཞེས་སོ། །བཞི་པ་བྱམས་པ་ནི། དེ་ལྟར་ཡང་ཡང་བསྒོམས་པའི་མཐར། སེམས་ཅན་གང་ཡང་ཡིད་དུ་འོང་བ་གྲུབ་པས་ཕ་བསད་ཀྱི་ཤན་པ་མཐོང་ཡང་སྙིང་ལ་མི་སྡུག་པ་སྤངས་པ་སྔར་འདྲིས་ཀྱི་མཛའ་བོ་དང་འཕྲད་པ་ལྟ་བུ་སྟེ། མདོ་ལས། བྱེ་བ་ཁྲག་ཁྲིག་གཏམས་པའི་ཞིང་དག་ན། །མཆོད་པ་རྣམ་མང་དཔག་མེད་ཇི་སྙེད་པ། །སྐྱེས་མཆོག་རྣམས་ལ་ཉིན་རེར་རྟག་མཆོད་པས། །བྱམས་པའི་སེམས་ལ་གྲངས་དང་ཆར་མི་ཕོད། །ཅེས་སོགས་ཡོན་ཏན་བརྒྱད་ལྡན་གང་ཡིན་པའོ། །ལྔ་པ་བརྩེ་བའི་སྙིང་རྗེ་ནི། བཤད་མ་ཐག་པའི་ཡིད་འོང་གི་བྱམས་པ་དེ་ཉིད་ཤིན་ཏུ་འདྲིས་པས་ཇེ་ཞིག་ན་འགྲོ་བ་གང་ཡང་སྡུག་བསྔལ་གྱིས་ཉམ་ཐག་པ་མཐོང་ན་རང་ཡང་སྡུག་བསྔལ་བ་བུ་ཆུང་ན་བ་ལས་ཀྱང་བདག་ཉིད་འཆི་བ་འདོམ་པའི་མ་ལྟ་བུ་སྟེ། སྤྱོད་པའི་གཞུང་ལས། སྙིང་རྗེ་སྡུག་བསྔལ་མང་གྱུར་པས། །ཅི་ཕྱིར་ནན་གྱིས་བསྐྱེད་ཅེ་ན། །འགྲོ་བའི་སྡུག་བསྔལ་བསམ་བྱས་ན། །ཇི་ལྟར་སྙིང་རྗེའི་སྡུག་བསྔལ་མང༌། །ཞེས་སོ། །དྲུག་པ་ལྷག་བསམ་རྣམ་དག་ནི། །དེ་ལྟར་གོམས་པའི་གཞན་
ཕན་དོན་གཉེར་ལ་མྱོང་བ་ཐོན་ཀྱང༌། བྱང་ཆུབ་དོན་གཉེར་ལ་མྱོང་བ་མ་ཐོན་པ་བྱང་སེམས་མ་ཡིན་པའི་སྐྱེས་བུ་ཆེན་པོའི་ཀུན་སློང་གི་སྐབས་ཡིན་ནོ། །བདུན་པ་རང་འབྲས་བླ་མེད་ནི། སློབ་སྤྲིང་ལས། ཉི་མ་རླབས་ཆེན་རྟ་ཞོན་རྒྱུ་བ་སྣང་བྱེད་གང་ཡིན་དང༌། །ཁུར་ལ་མི་རྩེག་ས་ཡིས་འཇིག་རྟེན་འདེགས་པ་གང་ཡིན་པ། །རང་དོན་འགའ་མེད་ཆེན་པོ་རྣམས་ཀྱི་རང་བཞིན་དེ་འདྲ་སྟེ། །དེ་དག་འཇིག་རྟེན་ཕན་དང་བདེ་བའི་རོ་ལ་གཅིག་ཏུ་གཞོལ། །ཞེས་གསུངས་པ་ལྟར་གཞན་དོན་དུ་བྱང་ཆུབ་དོན་གཉེར་ལ་མྱོང་བ་ཐོན་པ་སྟེ། སྤྱོད་འཇུག་ལས། དེ་ལྟར་རྒྱུད་ནི་གོམས་པ་ཡིས། །གཞན་གྱི་སྡུག་བསྔལ་ཞི་དགའ་བའི། །པདྨའི་མཚོ་རུ་ངང་པ་ལྟར། །མནར་མེད་པར་ཡང་འཇུག་པར་འགྱུར། །ཞེས་ཆེས་ཆེར་གོམས་པ་རྣམས་ཀྱི་ངང་ཚུལ་བཤད་པ་བཞིན་ནོ། །དེ་ལྟར་སྙིང་རྗེ་ཆེན་པོ་དང་ལྡན་ཀྱང་སྟོང་ཉིད་རྟོགས་པའི་ཤེས་རབ་དང་བྲལ་ན་མཐའ་གཉིས་ལ་མི་གནས་པའི་མྱང་འདས་མི་འགྲུབ་སྟེ། དོ་ཧ་ལས། སྙིང་རྗེ་དང་བྲལ་སྟོང་པ་ཉིད་ལྟ་བ། །དེས་ནི་ལམ་མཆོག་རྙེད་པ་མ་ཡིན་ཏེ། །འོན་ཏེ་སྙིང་རྗེ་འབའ་ཞིག་བསྒོམ་པས་ཀྱང༌། །འཁོར་བ་འདིར་གནས་ཐར་པ་ཐོབ་མི་འགྱུར། །ཞེས་སོ། །དེས་ན་འདིར་ནི་བདག་མེད་སྒོམ་ཚུལ་གྱི་རྣམ་བཞག་མདོ་ཙམ་བཤད་པར་བྱ་སྟེ། དེའང་འཕགས་པ་ཏིང་འཛིན་རྒྱལ་པོའི་མདོ་ལས། ཇི་ལྟར་ཆུ་ཤིང་རློན་པའི་སྡོང་པོ་དག །སྙིང་པོ་འདོད་ཕྱིར་སྐྱེས་བུས་དེ་གཤགས་ཀྱང༌། །ནང་དང་ཕྱི་རོལ་ཀུན་ན་སྙིང་པོ་མེད། །ཆོས་རྣམས་ཐམས་
ཅད་དེ་བཞིན་ཤེས་པར་གྱིས། །ཞེས་གསུངས་པ་ལྟར་བྱས་པ་དང་མ་བྱས་པའི་ཆོས་ཐམས་ཅད་རང་བཞིན་བདེན་པར་མེད་དེ། རྩ་བ་ཤེས་རབ་ལས། རྟེན་ཅིང་འབྲེལ་འབྱུང་མ་གཏོགས་པའི། །ཆོས་འགའ་ཡོད་པ་མ་ཡིན་ནོ། །དེ་ཕྱིར་སྟོང་ཉིད་མ་གཏོགས་པའི། །ཆོས་འགའ་ཡོད་པ་མ་ཡིན་ནོ། །ཞེས་གསུངས་པའི་ཕྱིར། དེའི་ཚུལ་ཡང་གང་ཟག་གཅིག་ལ་མཚོན་ན། གང་ཟག་དེའི་གདགས་གཞི་ཁམས་དྲུག་པོ་དེ་དག་བདེན་པར་གྲུབ་བམ་མ་གྲུབ། གྲུབ་ན་གཞི་གྲུབ་ལ་ཆ་བཅས་ཀྱི་ཁྱབ་པས་དེའང་བདེན་གྲུབ་ཀྱི་ཆ་ཅན་ཡོད་དགོས། །དེ་ལྟར་ན་དེའི་ཆ་ཤས་དང་ཆ་ཅན་གྱི་བདེན་གྲུབ་གཅིག་གམ་ཐ་དད། དང་པོ་ལྟར་ན་གནོད་བྱེད་གཉིས་ཏེ། དང་པོ་ནི། གང་ཟག་ལྷ་སྦྱིན་ཆོས་ཅན། ཁྱོད་ལ་དྲུག་ཡོད་པར་ཐལ། ཁྱོད་ཀྱི་ཆ་ཤས་དྲུག་ཡོད་པའི་ཕྱིར། གཉིས་པ་ནི། གང་ཟག་ལྷ་སྦྱིན་གྱི་ཁམས་དྲུག་ཆོས་ཅན། ཁྱོད་གཅིག་ཡིན་པར་ཐལ། ཁྱོད་ཀྱི་ཆ་ཅན་གཅིག་ཡིན་པའི་ཕྱིར། འོན་ཏེ་ཕྱི་མ་ལྟར་ན་ལྷ་སྦྱིན་གྱི་ཁམས་དྲུག་བསལ་ཤུལ་ན་ལྷ་སྦྱིན་ཡོད་པར་ཐལ། དེའི་ཆ་ཅན་དང་ཆ་ཤས་གཉིས་བདེན་གྲུབ་ཀྱི་ཐ་དད་ཡིན་པའི་ཕྱིར། འདི་ལ་དགོངས་ནས་མགོན་པོ་ཀླུས། སྐྱེས་བུ་ས་མིན་ཆུ་མ་ཡིན། །མེ་མིན་རླུང་མིན་ནམ་མཁའ་མིན། །རྣམ་ཤེས་མ་ཡིན་ཀུན་མིན་ན། །དེ་ལས་གཞན་པའི་སྐྱེས་བུ་གང༌། །ཞེས་གསུངས་སོ། །འདི་ལས་གཞལ་ན་ཆོས་ཐམས་ཅད་བདེན་མེད་
དུ་འཇལ་ནུས་སོ། །དེ་སྐད་དུའང་རྗེ་བཙུན་ལྕང་སྐྱ་པས། གཟུང་འཛིན་སྣ་ཚོགས་འདི་ཨ་མའི་འཛུམ་བག །སྐྱེ་འཆི་འཕོ་འགྱུར་འདི་ཨ་མའི་རྫུན་ཚིག །བསླུ་མེད་ཨ་མ་ཡིས་ཁོ་བོ་བསླུས་སོ། །ཇོ་ཇོ་རྟེན་འབྱུང་དེས་སྐྱོབ་པར་རེའོ། །ཞེས་བཤད་དོ། །མདོར་ན་འཁྲུལ་སྣང་གི་འཆར་སྒོ་ཐམས་ཅད་སྣང་ཡང་བདེན་པར་མ་གྲུབ་པ་སྨིག་རྒྱུ་ལྟ་བུ། བརྟགས་ན་ངོ་བོ་མ་གྲུབ་པའི་བྲག་ཆ་ལྟ་བུ། བདེན་རྫུན་ལོག་ཤེས་ཀྱིས་བསྐྱེད་པའི་རྨི་ལམ་ལྟ་བུ། མངོན་ཞེན་བག་ཆགས་ཀྱིས་བསྐྲུན་པའི་སྒྱུ་མ་ལྟ་བུ། གཉིས་སྣང་འཁྲུལ་ཤེས་སུ་ཤར་བའི་སྤྲུལ་པ་ལྟ་བུ། ནང་གི་འཁྲུལ་རྟོག་གི་རང་གཟུགས་སུ་སྣང་བའི་གཟུགས་བརྙན་ལྟ་བུ་སྟེ། ཟག་པ་དང་བཅས་པའི་རྟེན་འབྲེལ་འདི་རྣམས་ཆོས་ཅན། བདེན་པར་མེད་དེ། བག་ཆགས་འཇོག་བྱེད་ཀྱི་རྣམ་པ་ལས་མ་འཕོས་པའི་སྣང་བ་ཡིན་པའི་ཕྱིར་དཔེར་ན་གཟུགས་བརྙན་བཞིན་ལྟ་བུ། འགྲོ་འོང་གཉིས་སུ་མི་དམིགས་པའི་དྲི་ཟའི་གྲོང་ཁྱེར་ལྟ་བུར་རྟོགས་པར་བྱ་སྟེ། ཡོན་ཏན་མཛོད་ལས། ཡུལ་ལྔའི་ཤེས་པ་ཚོན་རིས་མ་འདྲེས་ལྟའི། །གཟུགས་སོགས་འདོད་པའི་ཡོན་ཏན་ཆ་བཟུང་བ། །དེ་ལ་དེར་འཛིན་དགག་སྒྲུབ་བློ་རྟོག་གིས། །འཁྲུལ་སྣང་སྒྱུ་མའི་དཔེ་བརྒྱད་ཉིད་དུ་བརྟག །ཅེས་སོ། །དོན་གྱི་དབང་འདི་གཟིགས་ནས་སློབ་དཔོན་འཕགས་པས། མེ་ཡི་རང་བཞིན་ཚ་བ་དང༌། །ཆུ་ཡི་རང་བཞིན་གཤེར་བ་དང༌། །བུ་རམ་རང་བཞིན་མངར་བ་སྟེ། །དེ་བཞིན་ཆོས་རྣམས་ཐམས་ཅད་ཀྱི། །རང་བཞིན་སྟོང་པ་ཉིད་དུ་འདོད། །ཅེས་བཤད་དོ། །དེ་ལྟར་དགེ་རྩ་མཐའ་
དག་སེམས་བསྐྱེད་དང་སྟོང་ཉིད་རྟོགས་པའི་ཤེས་རབ་ཀྱིས་ཟིན་པས་རང་དོན་དོན་གཉེར་དང་བདེན་ཞེན་གྱིས་བཅིང་བའི་ཉེས་ཚོགས་ལས་སྒྲོལ་བ་ཡིན་ལ། ད་ནི་དགེ་རྩ་གོང་འཕེལ་དུ་འགྲོ་བ་བསྔོ་བའི་རྣམ་བཞག་འཆད་དེ། ཡོན་ཏན་རིན་པོ་ཆེའི་མཛོད་ལས། བདག་ཏུ་ལྟ་བས་འདར་བའི་རྣམ་དཀར་ཡང༌། །སྲིད་པར་ལན་གཅིག་མཐོ་བའི་ཆོ་ངེ་སྟེ། །བྱང་ཆུབ་བསྔོ་བའི་གསེར་འགྱུར་རྩིས་ཐེབས་པ། །འདི་ནི་སྟོན་པ་གཞན་གྱི་ལུགས་ལ་མེད། །ཅེས་གསུངས་པ་ལྟར་དགེ་བ་གང་ཞིག་བསགས་པ་ཐམས་ཅད་བླ་ན་མེད་པའི་བྱང་ཆུབ་ཏུ་མ་བསྔོས་ན་ལྷ་དང་མིའི་དཔལ་འབྱོར་ལ་སྨོན་པ་ཙམ་གྱིས་རྣམ་སྨིན་ཉུང་ངུར་ཟད་དེ། མདོ་ལས། མང་པོ་ཡང་ཉུང་ངུར་རིག་པར་བྱ་སྟེ། ཀུན་མཁྱེན་དུ་མ་བསྔོས་པའི་ཕྱིར་རོ། །ཞེས་སོ། །དེའང་གང་བསྔོ་ན་དུས་གསུམ་དུ་བསགས་པའི་དགེ་རྩ་མཐའ་དག །གང་དུ་བསྔོ་ན་མཁའ་ཁྱབ་ཀྱི་སེམས་ཅན་ཐམས་ཅད་བླ་ན་མེད་པའི་བྱང་ཆུབ་ཐོབ་ཅིང་ཕན་པ་དང་བདེ་བའི་རྩ་ལག་རྒྱལ་བསྟན་སྡེ་སྣོད་རིན་པོ་ཆེ་རྣམས་དར་ཞིང་རྒྱས་ལ་ཡུན་རིང་དུ་གནས་པར་བྱ་བའི་ཕྱིར་བསྔོ་བ་ཉིད། སྙིང་རྗེ་པདྨ་དཀར་པོའི་མདོ་ལས། སྦྱིན་པ་འདིས་བདག་དབང་པོའི་གནས་མིན་ཚངས་པའི་འཇིག་རྟེན་འབྲས་བུ་མི་འདོད་ན། །རླུང་གི་ཤུགས་ལྟར་མགྱོགས་ཤིང་གཡོ་བ་རྒྱལ་པོའི་སྲིད་ཀྱི་དཔལ་ལྟ་སྨོས་ཅི་དགོས། །བདག་གིས་གུས་པ་ཆེན་པོས་སྦྱིན་པ་འདི་ཡི་འབྲས་བུ་གང་ཡིན་དེ་ཡིས་ནི། །སེམས་ལ་དབང་བྱེད་མཚུངས་མེད་བྱང་ཆུབ་ཐོབ་ཅིང་སེམས་ཅན་རྣམས་ཀྱང་སྒྲོལ་གྱུར་ཅིག །ཅེས་
དང༌། སྤྱོད་འཇུག་ལས། འགྲོ་བའི་སྡུག་བསྔལ་སྨན་གཅིག་པུ། །བདེ་བ་ཐམས་ཅད་འབྱུང་བའི་གནས། །བསྟན་པ་རྙེད་དང་བཀུར་སྟི་དང༌། །བཅས་ཏེ་ཡུན་རིང་གནས་གྱུར་ཅིག །ཅེས་སོ། །གནས་སྐབས་སུ་ཡང་གང་ན་འཚོ་ཞིང་གཞེས་པའི་བསྟན་འཛིན་གྱི་སྐྱེས་བུ་དམ་པ་རྣམས་ཀྱང་མཛད་ཕྲིན་ཡར་ཟླ་ལྟར་འཕེལ་ཞིང་དགེ་འདུན་གྱི་འདུས་པ་རྒྱ་མཚོ་མཐའ་དག་ཚུལ་ཁྲིམས་རྣམ་པར་དག་པ་དང༌། ཤེས་རབ་དྲི་མ་མེད་པ་ལ་དབང་འབྱོར་ཞིང༌། ཡང་དག་པའི་ལམ་ལ་གནས་པ་དང་ཐུགས་མཐུན་པར་བྱ་བའི་ཕྱིར་བསྔོ་བ་ཡང༌། དེ་ཉིད་ལས། མཁས་པ་རྣམས་ནི་བཀུར་བ་དང༌། །བསོད་སྙོམས་དག་ཀྱང་རྙེད་པར་ཤོག །རྒྱུད་ནི་ཡོངས་སུ་དག་པ་དང༌། །ཕྱོགས་རྣམས་ཀུན་དུ་གྲགས་པར་ཤོག །ཅེས་དང༌། རྟག་ཏུ་དགེ་འདུན་མཐུན་པ་དང༌། །དགེ་འདུན་དོན་ཡང་འགྲུབ་པར་ཤོག །ཅེས་སོ། །གཞན་ཡང་འགྲོ་བ་ཐམས་ཅད་བྱང་ཆུབ་སྙིང་པོ་མ་ཐོབ་ཀྱི་བར་དུ་བདེ་ལྡན་ཞིང་སོགས་དག་པའི་ཞིང་དུ་སྐྱེས་ནས་རྒྱལ་སྲས་ཀྱི་སྤྱོད་པ་ལ་སློབ་པའི་ཆེད་དུ་བསྔོ་བ་ལ་སོགས་པ་སྟེ། དེ་དག་ཀྱང་འཁོར་གསུམ་བདེན་མེད་དུ་རྟོགས་པའི་ཤེས་རབ་ཀྱིས་ཟིན་པ་ནི་གལ་ཆེ་སྟེ། མངོན་རྟོགས་རྒྱན་ལས། ཡོངས་སུ་བསྔོ་བ་ཁྱད་པར་ཅན། །དེ་ཡི་བྱེད་པ་མཆོག་ཡིན་ནོ། །དེ་ནི་མི་དམིགས་རྣམ་པ་ཅན། །ཕྱིན་ཅི་མ་ལོག་མཚན་ཉིད་དོ། །ཞེས་སོ། །དེ་ལྟར་བསྔོ་བ་ལ་དགོས་པ་ཅི་ཡོད་ཅེ་ན། བློ་གྲོས་རྒྱ་མཚོས་ཞུས་པ་ལས། ཇི་ལྟར་ཆུ་ཐིགས་རྒྱ་མཚོ་ཆེ་ནང་ལྷུང༌། །
རྒྱ་མཚོ་མ་སྐམ་བར་དུ་དེ་མི་འཛད། །དེ་བཞིན་བྱང་ཆུབ་ཡོངས་བསྔོས་དགེ་བ་ཡང༌། །བྱང་ཆུབ་མ་ཐོབ་བར་དུ་དེ་མི་ཟད། །ཅེས་སོ། །དེ་དག་གི་ཐེག་ཆེན་ལམ་གྱི་སྙིང་པོ་ཁྱད་པར་གསུམ་གྱི་རྣམ་བཞག་བསྡུས་ཏེ་གླེང་ཟིན་ཏོ། །ཅེས་པའང་སྡོམ་བརྩོན་གྱི་དགེ་སློང་དམ་ཆོས་འོད་ཟེར་གྱིས་བསྐུལ་བ་ལྟར་འཇིགས་མེད་བསྟན་པའི་རྒྱལ་མཚན་དུ་འབོད་པས་སྦྱར་བའི་ཡེ་གེ་པ་ནི་ཉེ་གནས་ཤཱ་ཀྱའི་བཙུན་པ་བློ་གྲོས་བཟང་པོས་བགྱིས་པའོ།། །དགེའོ།། །།
བྱང་ཆུབ་ལམ་གྱི་རིམ་པ་ལ་འཇུག་པ།
༈ རྗེ་བཙུན་བླ་མ་དམིགས་པ་མེད་པའི་ཐུགས་རྗེ་ཆེན་པོ་དང་ལྡན་པ་ལ་ཕྱག་འཚལ་ལོ། །འདིར་བྱང་ཆུབ་ལམ་གྱི་རིམ་པ་ལ་འཇུག་པ་ལ། ཐོག་མར་ལམ་ཐམས་ཅད་ཀྱི་རྩ་བ་དགེ་བའི་བཤེས་གཉེན་བསྟེན་པ་དང༌། དགེ་བའི་བཤེས་གཉེན་གྱིས་ཇི་ལྟར་ཁྲིད་པའི་རིམ་པ་བཞིན་དུ་བསྟན་པ་ལ་བློ་སྦྱང་ཚུལ་གཉིས་ཡོད། དང་པོ་ལམ་ཐམས་ཅད་ཀྱི་རྩ་བ་དགེ་བའི་བཤེས་གཉེན་བསྟེན་ཚུལ་ནི། བསྟེན་བྱ་དགེ་བའི་བཤེས་གཉེན་གྱི་མཚན་ཉིད། དེ་བསམ་སྦྱོར་གཉིས་ཀྱི་སྒོ་ནས་ཇི་ལྟར་བསྟེན་ཚུལ། དེ་བསྟེན་པའི་ཕན་ཡོན་མ་བསྟེན་པའི་ཉེས་དམིགས་དང་བཅས་པའི་སྒོ་ནས་བཤད་པ་ཡིན། དགེ་བའི་བཤེས་གཉེན་གྱིས་ཇི་ལྟར་ཁྲིད་པའི་རིམ་པ་བཞིན་དུ་བསྟན་པ་ལྟར་བློ་སྦྱང་ཚུལ་དེ་ལ་དལ་བའི་རྟེན་ལ་སྙིང་པོ་ལེན་པར་བསྐུལ་བ་དང༌། སྙིང་པོ་ཇི་ལྟར་ལེན་པའི་ཚུལ་དངོས་བཤད་པ་གཉིས་ཡོད། དང་པོ་དལ་བའི་རྟེན་ལ་སྙིང་པོ་ལེན་པར་བསྐུལ་བ་ནི། དལ་འབྱོར་རྙེད་དཀའ་སྒོམ་ཚུལ་གྱིས་བསྟན། སྙིང་པོ་ཇི་ལྟར་ལེན་པའི་ཚུལ་དངོས་བཤད་པ་དེ་ལ། སྐྱེས་བུ་གསུམ་གྱི་
ལམ་སྤྱིའི་རྣམ་བཞག་དང༌། བྱེ་བྲག་སོ་སོའི་ལམ་གྱི་རྣམ་བཞག་བཤད་པ་གཉིས་ཡོད། དང་པོ་དེ་ལ་སྐྱེས་བུ་གསུམ་གྱི་ལམ་གྱི་གྲངས་ངེས། གོ་རིམ། སྐྱེས་བུ་གསུམ་གྱི་ལམ་དུ་བཤད་པའི་དགོས་པ། སྐྱེས་བུ་གསུམ་གྱི་ལམ་གྱི་གོ་དོན་དང་བཞི་ཡོད། དང་པོ་ནི་ལར་སངས་རྒྱས་འཇིག་རྟེན་དུ་བྱུང་བའི་དགོས་པ་ནི་སེམས་ཅན་གྱི་དོན་དུ་ཡིན་ལ། སེམས་ཅན་གྱི་དོན་ལ་མངོན་མཐོ་དང་ངེས་ལེགས་གཉིས་སུ་གྲངས་ངེས། དེའི་ཕྱིར་ན་དེ་བཞིན་གཤེགས་པའི་བསྟན་པ་རིན་པོ་ཆེ་ཡང་གནས་སྐབས་མངོན་མཐོ་དང་མཐར་ཐུག་ངེས་ལེགས་སྒྲུབ་པའི་ཐབས་ཚུལ་གཉིས་སུ་གྲངས་ངེས། དེ་ཡང་གནས་སྐབས་མངོན་མཐོ་སྒྲུབ་པའི་ཐབས་ཚུལ་དུ་གསུངས་པའི་ཆོས་སྐོར་རྣམས་ནི་སྐྱེས་བུ་ཆུང་ངུའི་ལམ་གྱི་ཆོས་སྐོར་དང༌། ཆུང་ངུ་དང་ཐུན་མོང་བའི་ལམ་གྱི་ཆོས་སྐོར་ཅི་རིགས་སུ་མ་འདུས་པ་མེད་ནི་རེད། ངེས་ལེགས་ལ་ཐར་པ་དང་ཐམས་ཅད་མཁྱེན་པ་གཉིས་ལས། ཐར་པ་ཙམ་སྒྲུབ་པའི་ཐབས་ཚུལ་དུ་གསུངས་པའི་ཆོས་སྐོར་རྣམས་ནི། སྐྱེས་བུ་འབྲིང་གི་ལམ་གྱི་ཆོས་སྐོར་དང་འབྲིང་དང་ཐུན་མོང་བའི་ལམ་གྱི་ཆོས་འཁོར་ཅི་རིགས་སུ་མ་འདུས་པ་མེད་པ་ཡིན། ཐམས་ཅད་མཁྱེན་པ་སྒྲུབ་པའི་ཐབས་ཚུལ་དུ་གསུངས་པའི་ཆོས་སྐོར་རྣམས་ནི་སྐྱེས་བུ་ཆེན་པོའི་ཐུན་མོང་མ་ཡིན་པའི་ལམ་གྱི་ཆོས་སྐོར་དུ་མ་འདུས་པ་མེད་ནི་རེད། དེའི་ཕྱིར་ན་དེ་བཞིན་གཤེགས་པའི་བསྟན་པ་ཡོངས་རྫོགས་མདོ་ཧྲིལ་གྱིས་དྲིལ་ན་སྐྱེས་བུ་གསུམ་གྱི་ལམ་དུ་གྲངས་ངེས་པ་ཡིན། གཉིས་པ་སྐྱེས་བུ་གསུམ་གྱི་ལམ་གྱི་གོ་རིམ་ནི།
དང་པོ་སྐྱེས་བུ་ཆུང་ངུ་དང་ཐུན་མོང་བའི་ལམ་ལ་བློ་སྦྱང༌། དེ་ནས་སྐྱེས་བུ་འབྲིང་དང་ཐུན་མོང་བའི་ལམ་དུ་བློ་སྦྱང༌། དེ་ནས་སྐྱེས་བུ་ཆེན་པོའི་ཐུན་མོང་མ་ཡིན་པའི་ལམ་ལ་བློ་སྦྱང་བ་སྟེ། གོ་རིམ་དེ་ལྟར་བྱས་ནས་སྒོམ་དགོས་པ་མ་གཏོགས། དང་པོ་སྐྱེས་བུ་ཆུང་འབྲིང་དང་ཐུན་མོང་གི་ལམ་ལ་བློ་མ་སྦྱང་བར་སྐྱེས་བུ་ཆེན་པོའི་ལམ་སྒོམ་དུ་མེད་པ་ཡིན་ནི་རེད། དེའི་རྒྱུ་མཚན་སྐྱེས་བུ་ཆེན་པོའི་ལམ་གྱི་སྲོག་ཤིང་ངམ་རྩ་བ་ལྟ་བུ་ནི་སྙིང་རྗེ་ཆེན་པོ་ཡིན་པས། སྙིང་རྗེ་དེ་ནི་སེམས་ཅན་ཐམས་ཅད་སྡུག་བསྔལ་ལས་བདག་གཅིག་པུས་བསྒྲལ་བར་བྱའོ་སྙམ་པའི་བློ་གཅིག་ཡིན་ལ། བློ་དེ་ནི་ལར་དང་པོ་རང་ཉིད་འཁོར་བའི་སྡུག་བསྔལ་གྱིས་མནར་ཚུལ་ལ་བསམ་ཀྱང་འཇིགས་ཤིང་སྐྲག་པའི་བློ་ཅུང་ཟད་ཀྱང་མི་སྐྱེ་བ་ཞིག་ལ་བློ་དེ་གཏན་ནས་སྐྱེ་མི་སྲིད་པ་ཡིན་པའི་ཕྱིར་ན། འབྲིང་དང་ཐུན་མོང་བའི་ལམ་ལ་བློ་སྦྱང་དགོས། དེ་ཡང་འཁོར་བ་མཐའ་དག་སྡུག་བསྔལ་གྱི་རང་བཞིན་དུ་མཐོང་ནས་དེ་ལས་ཐར་འདོད་ཀྱི་བློ་ཤུགས་དྲག་སྐྱེ་བ་ལ་རང་ཉིད་ངན་སོང་གསུམ་གྱི་སྡུག་བསྔལ་གྱིས་མནར་ཚུལ་བསམ་ཀྱང་བ་སྤུ་གཡོ་བ་ཙམ་གྱི་འཇིགས་ཤིང་སྐྲག་པའི་བློ་ཡང་མེད་ན་འཁོར་བ་མཐའ་དག་སྡུག་བསྔལ་གྱི་རང་བཞིན་དུ་མཐོང་ནས་དེ་ལས་ཐར་འདོད་ཀྱི་བློ་དེ་སྐྱེ་ས་མེད་པས་ན་སྐྱེས་བུ་ཆུང་ངུ་དང་ཐུན་མོང་བའི་ལམ་ལ་སྔོན་དུ་བློ་སྦྱང་དགོས་ནི་རེད། དེ་ལྟར་སྐྱེས་བུ་གསུམ་གྱི་ལམ་ཡང་གོ་རིམ་འདི་ལྟར་སྒོམ་དགོས་ཀྱི། དེ་ལས་གཞན་དུ་འཆོལ་བར་སྒོམ་ན་ལམ་རྒྱུད་ལ་སྐྱེ་མི་སྲིད་པས། །
གོ་རིམ་འདི་ཁོ་ན་ལྟར་སྒོམ་དགོས་ནི་ཡིན་གསུངས། གསུམ་པ་སྐྱེས་བུ་གསུམ་གྱི་ལམ་དུ་ཕྱེ་བའི་དགོས་པ་ནི། སྤྱིར་རྒྱ་གར་འཕགས་པའི་ཡུལ་དུ་མགོན་པོ་ཀླུ་སྒྲུབ་ལ་སོགས་པའི་ཤིང་རྟ་ཆེན་པོ་དག་གིས་ནི་མངོན་མཐོ་དང་ངེས་ལེགས་སྒྲུབ་པའི་ཐབས་ཚུལ་དཔག་ཏུ་མེད་པ་གསུངས་ཀྱང༌། བསྟན་པ་ཡོངས་རྫོགས་སྐྱེས་བུ་གསུམ་གྱི་ལམ་དུ་དྲིལ་ཏེ། དེ་ཁོ་ན་ལ་རྩལ་དུ་བཏོན་ཏེ་འཆད་པ་ཆེར་མ་མཛད། ཇོ་བོ་རྗེ་ཨ་ཏི་ཤས་ནི་བྱང་ཆུབ་ལམ་གྱི་སྒྲོན་མ་མཛད་དེ། བསྟན་པ་ཡོངས་རྫོགས་སྐྱེས་བུ་གསུམ་གྱི་ལམ་དུ་བསྡུས་ཏེ། དེ་ཁོ་ན་ལ་རྩལ་དུ་བཏོན་ཏེ་བཤད་པ་ཡིན། དེ་ལྟར་བཤད་པ་ལ་དགོས་པ་གཉིས་ཡོད་དེ། བློ་རབ་འབྲིང་ཐ་མ་ལ་ཕན་ཆེ་བ་དང་མངོན་པའི་ང་རྒྱལ་ཞི་བའི་དགོས་པ་གཉིས་ཡོད། དང་པོ་ནི་གང་ཟག་བློ་རབ་སྐྱེ་བ་སྔོན་དུ་སྐྱེས་བུ་ཆུང་འབྲིང་དང་ཐུན་མོང་བའི་ལམ་ནས་བཟུང་སྐྱེས་བུ་ཆེན་པོའི་བསམ་པའི་བར་རྒྱུད་ལ་སྐྱེས་པ་ཞིག་ཡིན་ན་སྐྱེ་བ་འདིར་སྐྱེས་བུ་ཆུང་ངུ་དང་ཐུན་མོང་བའི་ལམ་ནས་བཟུང་སྟེ་བློ་སྦྱང་ན། སྔར་ལམ་རྒྱུད་ལ་སྐྱེས་ཟིན་པ་རྣམས་ནི་མངོན་དུ་གྱུར་སླ་ཞིང་དེ་ལྟར་མངོན་དུ་གྱུར་པ་ཙམ་ནས་ལམ་ཕྱི་མ་བསྣན་ནས་སྒོམ་ཆོག་པས་དེའི་ལམ་ཇེ་བུལ་དང་ལམ་ལོག་པ་ཉིད་དུ་མི་འགྲོ་བར་མ་ཟད། རང་གི་མངོན་པར་འདོད་པའི་ཡོན་ཏན་སྐྱེ་སླ་བའི་དགོས་པ་ཡོད་པས་བློ་རབ་ལ་ཕན་ཆེ་བ་དང༌། སྔོན་སྐྱེས་བུ་ཆུང་ངུ་དང་ཐུན་མོང་བའི་ལམ་ཙམ་ལའང་བློ་སྦྱང་མ་མྱོང་བའི་གང་ཟག་ཐ་མ་ལ་ནི། དང་པོ་ནས་སྐྱེས་བུ་ཆེ་འབྲིང་གི་ལམ་བསྟན་ན་རྨིང་མེད་པའི་
རྩིག་པ་བཞིན་དུ་དེའི་རྒྱུད་ལ་ལམ་གྱི་ཡོན་ཏན་སྐྱེ་བ་མི་སྲིད་པ་ཡིན་ལ། སྐྱེས་བུ་ཆུང་ངུ་དང་ཐུན་མོང་བའི་ལམ་ནས་བཟུང་སྟེ་གདམ་ངག་བསྟན་ན། དེའི་རྒྱུད་ལ་ལམ་སྐྱེ་སླ་བས་ན་བློ་ཐ་མ་ལ་ཤིན་ཏུའང་ཕན་ཆེ། བློ་འབྲིང་སྐྱེས་བུ་ཆུང་ངུ་དང་འབྲིང་གི་ལམ་གྱི་སྐལ་བ་ཅན་ཞིག་ཡིན་ན། དེ་ལ་དང་པོ་ནས་སྐྱེས་བུ་ཆེན་པོའི་ཐུན་མོང་མ་ཡིན་པའི་ལམ་རྣམས་བསྟན་ན། དེའི་བྱང་ཆུབ་སེམས་དཔའི་སྤྱོད་པ་རྒྱ་མཚོ་ལྟ་བུ་བློར་མི་ཤོང་ཞིང༌། དེ་ལ་སྐུར་པ་འདེབས་པ་སོགས་དོན་མ་ཡིན་པ་ཆེན་པོ་འབྱུང་བས་ན་དེ་ལ་སྐྱེས་བུ་ཆུང་འབྲིང་དང་ཐུན་མོང་གི་ལམ་ནས་ཁྲིད་ན། དེ་ཆུང་ངུ་དང་འབྲིང་གི་ལམ་གང་གི་སྐལ་བ་ཅན་ཡིན་ན་ཡང་རང་གི་སྐལ་བ་དང་འཚམས་པའི་ལམ་དེར་སློབ་པ་མ་གཏོགས། ཉམས་འོག་ཏུ་མི་ཚུད་པའི་ལམ་རྣམས་ལ་མ་བསླབས་ཀྱང་ཆོག་པས་དེ་དོན་མ་ཡིན་པ་ལས་ཟློག་པར་འགྱུར་བས་ན། བློ་འབྲིང་ལའང་ཕན་ཆེ་བས་ན་བློ་རབ་འབྲིང་ཐ་མ་ལ་ཕན་ཆེ་བའི་དགོས་པ་ཞེས་བརྗོད་ནི་ཡིན། མངོན་པའི་ང་རྒྱལ་ཞི་བའི་དགོས་པ་ནི། སྐྱེས་བུ་ཆུང་ངུ་དང་ཐུན་མོང་བའི་ལམ་ནི་འདིའོ། །སྐྱེས་བུ་འབྲིང་དང་ཐུན་མོང་བའི་ལམ་ནི་འདིའོ། །སྐྱེས་བུ་ཆེན་པོའི་ཐུན་མོང་མ་ཡིན་པའི་ལམ་ནི་འདིའོ། །ཞེས་བཤད་པ་ན། རང་གི་རྒྱུད་ན་སྐྱེས་བུ་ཆུང་ངུ་དང་ཐུན་མོང་བའི་ལམ་ཙམ་ཡང་མེད་བཞིན་དུ་སྐྱེ་བུ་ཆེན་པོའི་ལམ་གྱི་ཡོན་ཏན་ཡང་ཡོད་དོ་སྙམ་པའི་མངོན་པའི་ང་རྒྱལ་ཞི་བའི་དགོས་པ་ཡོད་ནི་རེད། བཞི་པ་སྐྱེས་བུ་གསུམ་གྱི་ལམ་གྱི་གོ་དོན་ནི་དཔེར་ན་སྐྱེས་བུ་ཆུང་ངུས་ཚེ་ཕྱི་མའི་འཁོར་བའི་ཕུན་ཚོགས་
ཁོ་ན་དོན་གཉེར་གྱི་བློ་དང༌། འབྲིང་གིས་རང་གཅིག་པུ་ཞི་བདེ་དོན་གཉེར་གྱི་བློ་སྐྱེད་པ་ལྟ་བུ་ནི། སྐྱེས་བུ་ཆེན་པོའི་ལམ་གྱི་སྤང་བྱ་ཡིན་པས་དེ་དང་ཐུན་མོང་མིན་ལ། འདིར་གང་ཡིན་ན། ངན་སོང་གསུམ་གྱི་སྡུག་བསྔལ་ལ་འཇིགས་ཤིང་སྐྲག་སྟེ། དེ་ལས་ཐར་འདོད་ཀྱི་བློ་སྐྱེད་པ་དང༌། འཁོར་བ་མཐའ་དག་སྡུག་བསྔལ་གྱི་རང་བཞིན་དུ་མཐོང་ནས་དེ་ལས་ཐར་བའི་ཐར་པ་དོན་གཉེར་གྱི་བློ་སྐྱེད་པ་ལྟ་བུ་ནི། སྐྱེས་བུ་ཆུང་འབྲིང་གཉིས་ཀས་ཀྱང་རང་རང་གི་གོ་འཕང་དེ་མངོན་དུ་བྱེད་པ་ལ་ལམ་དེ་ལ་བློ་མ་སྦྱང་བའི་ལྟ་བ་མེད་ལ། སྐྱེས་བུ་ཆེན་པོས་ཀྱང་རང་གི་ཐུན་མོང་མ་ཡིན་པའི་ལམ་དེ་སྐྱེ་བའི་སྟེགས་སུ་དེ་ལ་ངེས་པར་བློ་སྦྱང་དགོས་པའི་ལམ་དེ་ལ་སྐྱེས་བུ་ཆུང་འབྲིང་ཆེ་གསུམ་གྱི་ཐུན་མོང་གི་ལམ་ཞེས་བརྗོད་པ་ཡིན་པས་ཐུན་མོང་བའི་ལམ་གྱི་གོ་དོན་ནི་དེ་ལྟར་ཡིན། གཉིས་པ་བྱེ་བྲག་སོ་སོའི་ལམ་གྱི་རྣམ་བཞག་བཤད་པ་ལ་གསུམ་ཡོད། དང་པོ་སྐྱེས་བུ་ཆུང་ངུ་དང་ཐུན་མོང་བའི་ལམ་གྱི་རྣམ་བཞག་བཤད་པ་དེ་ལ། བསམ་པ་འཇིག་རྟེན་ཕྱི་མའི་ཕུན་ཚོགས་དོན་གཉེར་གྱི་བློ་སྐྱེད་པ་དང༌། སྦྱོར་བ་འཇིག་རྟེན་ཕྱི་མར་བདེ་བར་འགྱུར་བའི་ཐབས་བསྟེན་པ་གཉིས་ཡོད། དང་པོ་བསམ་པ་འཇིག་རྟེན་ཕྱི་མའི་ཕུན་ཚོགས་དོན་གཉེར་གྱི་བློ་ནི། འཇིག་རྟེན་འདིར་རིང་དུ་མི་གནས་པར་འཆི་བ་བསམ་པ་དང་ཤི་ནས་འགྲོ་བ་གཉིས་ཀྱི་བདེ་སྡུག་བསམ་པ་གཉིས་ཀྱི་སྒོ་ནས་བློ་དེ་བསྐྱེད་དགོས་ནི་རེད། སྦྱོར་བ་འཇིག་རྟེན་ཕྱི་མར་བདེ་བར་འགྱུར་བའི་ཐབས་བསྟེན་པ་དེ་ལ། བསྟན་པ་ལ་འཇུག་པའི་སྒོ་དཀོན་མཆོག་གསུམ་ལ་སྐྱབས་
སུ་འགྲོ་བ་དང༌། བདེ་ལེགས་རྣམས་ཀྱི་རྩ་བ་ལས་འབྲས་ཡིད་ཆེས་ཀྱི་དད་པ་སྦྱང་བ་སྟེ་ལས་གཉིས་ལ་བླང་དོར་བྱ་བ་སྟེ་གཉིས་ཡོད། གཉིས་པ་སྐྱེས་བུ་འབྲིང་དང་ཐུན་མོང་བའི་ལམ་གྱི་རྣམ་བཞག་བཤད་པ་དེ་ལ་ཐར་པ་དོན་གཉེར་གྱི་བློ་སྐྱེད་པ་དང༌། དེ་བསྐྱེད་ནས་ཐར་པའི་ལམ་དངོས་ལ་ཇི་ལྟར་སློབ་པའི་ཚུལ་གཉིས་ཡོད། དང་པོ་ཐར་པ་དོན་གཉེར་གྱི་བློ་སྐྱེད་པ་ལ། སྡུག་བསྔལ་དང་ཀུན་འབྱུང་བདེན་པ་ལ་བསམས་ཏེ་འཁོར་བ་ལས་ངེས་པར་འབྱུང་འདོད་ཀྱི་བློ་སྐྱེད་པ་དང༌། རྟེན་འབྲེལ་ཡན་ལག་བཅུ་གཉིས་ཀྱི་ཚུལ་བསམས་ཏེ་འཁོར་བ་ལས་ངེས་པར་འབྱུང་འདོད་ཀྱི་བློ་སྐྱེད་པ་གཉིས་ཡོད། དེའི་དང་པོ་ལ། སྡུག་བདེན་འཁོར་བའི་ཉེས་དམིགས་ལ་བསམས་ཏེ་འཁོར་བ་དང་འབྲལ་དགོས་ཚུལ་དང༌། ཀུན་འབྱུང་འཁོར་བའི་འཇུག་རིམ་ལ་བསམས་ཏེ་འཁོར་བ་དང་འབྲལ་ནུས་ཚུལ་གཉིས་བསམ་པའི་སྒོ་ནས་ཐར་པ་དོན་གཉེར་གྱི་བློ་མཚན་ཉིད་ཚང་བ་རང་གི་རྒྱུད་ལ་སྐྱེད་དགོས་ནི་རེད། གཉིས་པ་དེ་བསྐྱེད་ནས་ཐར་པའི་ལམ་དངོས་ལ་ཇི་ལྟར་སློབ་པའི་ཚུལ་ལ། སེམས་རྣམ་པར་གཡེང་བ་མེད་པར་བྱེད་པ་ལྷག་པ་ཚུལ་ཁྲིམས་ཀྱི་བསླབ་པ། སེམས་མཉམ་པར་མ་བཞག་པ་མཉམ་པར་བཞག་པར་བྱེད་པ་ལྷག་པ་ཏིང་ངེ་འཛིན་གྱི་བསླབ་པ། སེམས་རྣམ་པར་མ་གྲོལ་བ་གྲོལ་བར་བྱེད་པ་ལྷག་པ་ཤེས་རབ་ཀྱི་བསླབ་པ་དང་གསུམ་ཡོད། དེའི་ནང་ནས་ཏིང་ངེ་འཛིན་དང་ཤེས་རབ་ཀྱི་བསླབ་པ་གཉིས་ནི་སྐྱེས་བུ་འབྲིང་གི་ལམ་རང་དགའ་བར་འཁྲིད་པའི་
སྐབས་ཡིན་ན་སྐབས་འདིར་འཆད་དགོས་ན་ཡང་འདིར་སྐྱེས་བུ་ཆེན་པོའི་ལམ་གྱི་སྔོན་འགྲོར་བཤད་པའི་སྐབས་ཡིན་པས་སྐྱེས་བུ་ཆེན་པོའི་རང་གི་ཐུན་མོང་མ་ཡིན་པ་ལམ་ཕ་རོལ་ཏུ་ཕྱིན་པ་དྲུག་ལ་སློབ་པའི་སྐབས་སུ་ཕར་ཕྱིན་རྗེས་མ་གཉིས་ལ་སློབ་པར་འགྱུར་བས་ན་སྐབས་འདིར་དེ་གཉིས་འཆད་པར་མི་མཛད་ལ། ལྷག་པ་ཚུལ་ཁྲིམས་ཀྱི་བསླབ་པ་ཙམ་ཞིག་དམ་པ་གོང་མ་དག་གིས་འདིར་འཆད་པར་མཛད་ནི་རེད། གསུམ་པ་སྐྱེས་བུ་ཆེན་པོའི་ལམ་གྱི་རྣམ་བཞག་བཤད་པ་དེ་ལ་སེམས་བསྐྱེད་ཀྱི་ཕན་ཡོན་བསམ་པ། བྱང་ཆུབ་ཀྱི་སེམས་བསྐྱེད་ཚུལ། དེ་བསྐྱེད་ནས་སྤྱོད་པ་ལ་ཇི་ལྟར་སློབ་ཚུལ་དང་གསུམ་ཡོད། དང་པོ་སེམས་བསྐྱེད་ཀྱི་ཕན་ཡོན་བསམ་པ་དེ་ལ། ཐེག་པ་ཆེན་པོའི་ཡོན་ཏན་དྲན་ཞིང་དེའི་འཇུག་སྒོ་བྱང་ཆུབ་ཀྱི་སེམས་ཉག་གཅིག་ཡིན་པའི་ཚུལ་བསམ་པ་དང༌། དེ་ལས་གཞན་པའི་སེམས་བསྐྱེད་ཀྱི་ཕན་ཡོན་བསམ་པ་དང་གཉིས་ཡོད། གཉིས་པ་བྱང་ཆུབ་ཀྱི་སེམས་བསྐྱེད་པའི་ཚུལ་ལ། སེམས་བསྐྱེད་ཉིད་ཇི་ལྟར་བསྒོམ་ཚུལ་དང༌། དེ་བརྟན་པར་བྱ་བའི་ཆེད་དུ་སྨོན་སེམས་ཆོ་གའི་སྒོ་ནས་ཇི་ལྟར་བཟུང་བའི་ཚུལ་གཉིས་ཡོད། དང་པོ་ལ་རྒྱལ་བའི་ཡུམ་གྱི་དགོངས་པ་སློབ་དཔོན་ཆེན་པོ་ཙནྡྲ་གོ་མི་དང༌། ཀ་མ་ཤི་ལ་སོགས་ཀྱིས་བཀྲལ་བ་ལྟར་རྒྱུ་འབྲས་མན་ངག་བདུན་ལྡན་གྱི་སྒོ་ནས་བྱང་ཆུབ་ཀྱི་སེམས་སྒོམ་ཚུལ་དང༌། སངས་རྒྱས་ཕལ་ཆེན་གྱི་དགོངས་པ་སློབ་དཔོན་ཆེན་པོ་ཞི་བ་ལྷ་སོགས་ཀྱིས་བཀྲལ་བ་ལྟར་བདག་གཞན་མཉམ་བརྗེའི་སྒོ་ནས་བྱང་ཆུབ་ཀྱི་
སེམས་སྒོམ་ཚུལ་ཞིག་དང་གཉིས་ཡོད། གཉིས་པ་དེ་བརྟན་པར་བྱ་བའི་ཆེད་དུ་སྨོན་སེམས་ཆོ་གའི་སྒོ་ནས་ཇི་ལྟར་བཟུང་བའི་ཚུལ་བཤད་པ་དེ་ལ། དང་པོ་མ་ཐོབ་པ་ཐོབ་པར་བྱེད་པའི་ཐབས་དང༌། ཐོབ་ཟིན་མི་ཉམས་པར་བསྲུང་བའི་ཐབས། ཉམས་ན་ཕྱིར་བཅོས་པའི་ཐབས་དང་གསུམ་ཡོད། དང་པོ་ལ་གང་ལས་བླང་བའི་ཡུལ། །གང་གིས་ལེན་པའི་རྟེན། ཚུལ་ཇི་ལྟར་ལེན་པའི་ཆོ་ག་སྦྱོར་དངོས་རྗེས་གསུམ་དང་བཅས་པ་ཡོད་ལ། ཆོ་གའི་དངོས་གཞི་ནི། བྱང་ཆུབ་སྙིང་པོའི་བར་དུ་རྫོགས་པའི་བྱང་ཆུབ་ཀྱི་སེམས་མི་གཏོང་ངོ་སྙམ་པའི་སེམས་བསྐྱེད་དམ་བཅའ་བའི་ལྕགས་ཀྱུ་གཉིས་པས་རང་དབང་དུ་བྱེད་ཚུལ་དེ་ཡིན་ནི་རེད། གཉིས་པ་ཐོབ་ཟིན་མི་ཉམས་པར་བསྲུང་བའི་ཐབས་ལ། སྐྱེ་བ་འདིར་སེམས་བསྐྱེད་མི་ཉམས་པར་གོང་འཕེལ་དུ་འགྱུར་བའི་རྒྱུ་ལ་བསླབ་པ་དང༌། སྐྱེ་བ་གཞན་དུ་སེམས་བསྐྱེད་མི་བརྗེད་པའི་རྒྱུ་ལ་བསླབ་པ་གཉིས་ཡོད། དང་པོ་ལ་སེམས་བསྐྱེད་ལ་སྤྲོ་ཤུགས་འཕེལ་བའི་ཕྱིར། དུས་དྲུག་ཏུ་སེམས་བསྐྱེད་ཀྱི་ཕན་ཡོན་དྲན་པ། སེམས་དེ་ཉིད་འཕེལ་བའི་ཕྱིར་དུས་དྲུག་ཏུ་བྱང་ཆུབ་ཀྱི་སེམས་སྦྱང་བ། གང་གི་དོན་དུ་སེམས་བསྐྱེད་པའི་སེམས་ཅན་བློས་མི་གཏོང་བ་དང༌། སེམས་བསྐྱེད་གོང་འཕེལ་དུ་འགྲོ་བའི་ཕྱིར་ཚོགས་སྒོ་དུ་མ་ནས་གསོག་པ་དང་བཞི་ཡོད། སྐྱེ་བ་གཞན་དུ་སེམས་བསྐྱེད་མི་བརྗེད་པའི་རྒྱུ་ལ་བསླབ་པ་ནི། མཆོད་འོས་བསླུ་བ་དང༌། འགྱོད་མེད་ལ་འགྱོད་པ་སྐྱེད་པ་དང༌། བྱང་ཆུབ་སེམས་དཔའ་
ལ་སྐུར་བ་འདེབས་པ། སེམས་ཅན་ལ་གཡོ་སྒྱུ་བྱེད་པ་སྟེ་ནག་པོའི་ཆོས་བཞིའི་གཉེན་པོ་སྲོག་གི་ཕྱིར་དུ་ཡང་ཤེས་བཞིན་དུ་རྫུན་མི་སྨྲ་བ་ལ་སོགས་པའི་དཀར་པོའི་ཆོས་བཞི་ལ་ནན་ཏན་བྱེད་པ་དེ་ཡིན། ཉམས་ན་ཕྱིར་བཅོས་པའི་ཐབས་ནི། སེམས་བསྐྱེད་གཏོང་བ་དང༌། སེམས་ཅན་བློས་འདོར་བ་གཉིས་གང་བྱུང་ཡང༌། སེམས་བསྐྱེད་གཞི་ནས་བཟུང་དགོས་ནི་རེད། དེ་ལས་གཞན་པའི་ཉེས་པ་རྣམས་བྱུང་ཡང་སེམས་བསྐྱེད་ཀྱི་གཏོང་རྒྱུ་མིན་པ་དང༌། བྱང་སྡོམ་མ་བླང་བའི་གོང་ཡིན་པས་ལྟུང་བར་མི་འགྱུར་ནའང༌། བར་མ་ཁས་བླང་བ་དང་འགལ་བའི་ཉེས་སྤྱོད་དུ་འགྱུར་བས་ན་གཉེན་པོ་སྟོབས་བཞིའི་སྒོ་ནས་བཤགས་སྡོམ་བྱེད་དགོས་ནི་རེད། གསུམ་པ་སེམས་བསྐྱེད་ནས་སྤྱོད་པ་ལ་ཇི་ལྟར་སློབ་པའི་ཚུལ་བཤད་པ་དེ་ལ། བྱང་ཆུབ་སེམས་དཔའི་སྤྱོད་པ་ལ་སློབ་འདོད་སྦྱང་བ། དེ་འབྱོངས་ནས་བྱང་སྡོམ་ཆོ་གའི་སྒོ་ནས་ཇི་ལྟར་བཟུང་ཚུལ། དེ་བཟུང་ནས་སྤྱོད་པ་ལ་བསླབ་པའི་རིམ་པ་དངོས་དང་གསུམ་ཡོད། དང་པོ་ལ། སེམས་ཙམ་བསྐྱེད་ཀྱང་རྒྱལ་བའི་སྲས་ཀྱི་སྤྱོད་པ་ལ་མ་བསླབས་ན་རྫོགས་བྱང་ཐོབ་མི་སྲིད་པའི་ཚུལ་དང་དེ་ཡང་སྤྱོད་པ་ནོར་བ་ལས་མི་འབྱུང་བ་རྭ་ཐེན་པ་ལས་འོ་མ་མི་འབྱུང་བ་ལྟ་བུ་དང༌། ཐབས་ཤེས་ཡ་བྲལ་ལྟ་བུའི་སྤྱོད་པ་མ་ཚང་བ་ལས་མི་འབྱུང་བ་ས་བོན་ཆུ་ལུད་ལ་སོགས་པའི་རྐྱེན་གཅིག་མ་ཚང་ཡང་མྱུ་གུ་བསྐྱེད་མི་ནུས་པ་ལྟ་བུའི་ཚུལ་ལ་བསམ་སྟེ་ཚང་ལ་མ་ནོར་བའི་རྒྱལ་སྲས་ཀྱི་སྤྱོད་པ་ལ་སློབ་འདོད་སྤྱིར་སྦྱང༌། བྱེ་བྲག་
བྱང་སྡོམ་གྱི་སྐབས་ཀྱི་བསླབ་བྱའི་གནས་ཕྲ་རག་ཐམས་ཅད་ལ་རེ་རེའི་ཁ་ནས་དམིགས་ཕུགས་ཏེ་སློབ་འདོད་ཁྱད་པར་ཅན་སྐྱེད་པ་དེ་ཉིད་ཡིན་ནི་རེད། དེ་འབྱོངས་ནས་བྱང་སྡོམ་ཇི་ལྟར་བཟུང་བའི་ཚུལ་ནི། ཤིང་རྟ་ཆེན་པོ་གཉིས་ཀྱི་ལུགས་སྲོལ་གཉིས་ལ་གང་ལས་བླང་བའི་ཡུལ་སློབ་དཔོན་གྱི་ཁྱད་པར། གང་གི་ལེན་པའི་རྟེན་གྱི་ཁྱད་པར། ཚུལ་ཇི་ལྟར་ལེན་པའི་ཆོ་གའི་ཁྱད་པར། བླངས་ནས་བསླབ་བྱའི་རྐང་གྲངས་ཀྱི་ཁྱད་པར་སོགས་མང་དུ་ཡོད་པར་དཔལ་ལྡན་ས་སྐྱ་པཎྜི་ཏ་ལ་སོགས་པའི་མཁས་པ་ཆེན་པོ་དག་གིས་བཞེད་ནི་རེད། དགེ་བའི་བཤེས་གཉེན་ཤ་ར་བ་ལ་སོགས་པའི་མཁས་པ་མང་པོས་ནི་ཤིང་རྟ་ཆེན་པོ་གཉིས་ཀྱི་ལུགས་ལ་དེ་འདྲའི་རྣམ་དབྱེ་མི་བཞེད་པར་སྲོལ་ཆེན་པོ་གཉིས་གཅིག་ཏུ་བསྲེས་པའི་རྣམ་བཞག་མཛད་ནི་རེད། གསུམ་པ་དེ་བཟུང་ནས་སྤྱོད་པ་ལ་བསླབ་པའི་རིམ་པ་དངོས་དེ་ལ། རང་རྒྱུད་སྨིན་བྱེད་ཕར་ཕྱིན་དྲུག་ལ་སློབ་ཚུལ་དང་གཞན་རྒྱུད་སྨིན་བྱེད་བསྡུ་བའི་དངོས་པོ་བཞི་ལ་སློབ་ཚུལ་གཉིས་ཡོད། དང་པོ་ལ་ཕར་ཕྱིན་དྲུག་གི་གྲངས་ངེས། གོ་རིམ། ཕྱིན་དྲུག་དངོས་ལ་སློབ་ཚུལ་དང་གསུམ་ཡོད། དང་པོ་ནི། མདོ་སྡེ་རྒྱན་ལས། མངོན་མཐོ་ལ་ལྟོས་པའི་གྲངས་ངེས། རང་གཞན་གྱི་དོན་ཐམས་ཅད་སྒྲུབ་པ་ལ་ལྟོས་པའི་གྲངས་ངེས། གཞན་དོན་རྣམ་པ་ཐམས་ཅད་ལ་ལྟོས་པའི་གྲངས་ངེས། ཐེག་ཆེན་ཐམས་ཅད་སྡུད་པ་ལ་ལྟོས་པའི་གྲངས་ངེས། ཐབས་ཀྱི་རྣམ་པ་ཐམས་ཅད་པ་ལ་ལྟོས་
པའི་གྲངས་ངེས། བསླབ་པ་གསུམ་ལ་ལྟོས་པའི་གྲངས་ངེས་ཏེ་གྲངས་ངེས་ཀྱི་སྒོ་དྲུག་ཡོད་པར་གསུང་ནི་རེད། གོ་རིམ་ལ། སྐྱེ་བའི་གོ་རིམ། དམན་མཆོག་གི་གོ་རིམ། རག་ཕྲའི་གོ་རིམ་དང་གསུམ་ཡོད། དེ་ལྟར་ཕྱིན་དྲུག་གི་གྲངས་དང་གོ་རིམ་ལ་མཁས་པར་བྱས་ནས། ཕྱིན་དྲུག་དངོས་ལ་སློབ་ཚུལ་ལ་སྦྱིན་པ་ལ་སློབ་ཚུལ། ཚུལ་ཁྲིམས་ལ་སློབ་ཚུལ། བཟོད་པ། བརྩོན་འགྲུས། བསམ་གཏན། ཤེས་རབ་ལ་སློབ་ཚུལ་དང་དྲུག་ཡོད། དང་པོ་སྦྱིན་པ་ལ་སློབ་ཚུལ་ནི། རང་གི་ལུས་ལོངས་སྤྱོད་དགེ་རྩ་དང་བཅས་པ་ལ་ཀུན་འཛིན་གྱི་འཆིང་བས་བཅིངས་པའི་ཉེས་དམིགས་དང༌། སྦྱིན་པའི་ཕན་ཡོན་ལ་བསམ་སྟེ། སྤྲོ་སེམས་ཁྱད་པར་ཅན་སྒོམ་པ་དེ་ཡིན་ལ། ཚུལ་ཁྲིམས་ལ་སློབ་ཚུལ་ནི། ཚུལ་ཁྲིམས་བསྲུང་བའི་ཕན་ཡོན་མ་བསྲུང་བའི་ཉེས་དམིགས་ལ་བསམ་སྟེ། རང་རྒྱུད་དྲན་ཤེས་བཞིན་བག་ཡོད་ཀྱིས་ལེགས་པར་བསྡམ་སྟེ་སེམས་རྒྱུད་ཚུལ་ཁྲིམས་ཀྱི་ཕྱོགས་ལ་བསྒྱུར་བར་བྱེད་པ་ལ་བརྩོན་པར་བྱེད་པ་དེ་ཡིན། བཟོད་པ་ལ་སློབ་ཚུལ་ནི། བཟོད་པ་ལ་མང་དུ་ཡོད་ཀྱང་གནོད་བྱེད་ལ་ཅི་མི་སྙམ་པའི་བཟོད་པ་ལྟ་བུ་ལ་མཚོན་ན། དགྲ་བོ་བཀའ་དྲིན་ཆེ་ཚུལ་བསམ་པ་ལ་སོགས་པའི་སྒོ་ནས་རང་རྒྱུད་ཁོང་མི་འཁྲུགས་པའི་བཟོད་པ་ལ་གོམས་པར་བྱེད་པ་དེ་ཡིན། བརྩོན་འགྲུས་ལ་གོམས་པར་བྱེད་ཚུལ་ནི། བྱང་ཆུབ་སེམས་དཔའི་སྤྱོད་པ་བྱ་དཀའ་བ་དུས་ཡིན་རིང་པོར་སྤྱོད་དགོས་པ་རྣམས་ལ་མི་ཞུམ་ཞིང་སྙིང་སྟོབས་བསྐྱེད་དེ་སྤྲོ་ཤུགས་
འཕེལ་བ་ལ་བརྩོན་པར་བྱེད་རྒྱུ་དེ་རེད། བསམ་གཏན་ལ་སློབ་ཚུལ་ནི། མཐུན་པའི་ཡུལ་དུ་གནས་པ་དང་འདོད་པ་ཆུང་ཞིང་ཆོག་ཤེས་པ་དང༌། བྱ་བ་མང་པོ་སྤོང་བ་ལ་སོགས་པའི་བསམ་གཏན་གྱི་ཚོགས་ལ་གནས་པའི་གཞི་བཟུང་སྟེ། ཏིང་ངེ་འཛིན་དངོས་ལ་སློབ་ཚུལ་ནི། ཉེས་པ་ལྔ་སྤོང་འདུ་བྱེད་བརྒྱད་བསྟེན་པའི་སྒོ་ནས་ཏིང་ངེ་འཛིན་དེ་བསྒྲུབ་དགོས་ནི་རེད། དེ་ལ་ཉེས་པ་ལྔ་ནི། ལེ་ལོ། བརྗེད་ངས། བྱིང་རྒོད། འདུ་མི་བྱེད་པ། འདུ་བྱེད་དེ་ལྔ་ཡིན་ལ། དེའི་གཉེན་པོ་འདུ་བྱེད་བརྒྱད་བསྟེན་ཚུལ་ནི། འདུན་པ། བརྩོན་འགྲུས། ཤིན་སྦྱང་རྣམས་བསྟེན་དགོས་ནི་རེད། དེ་བཞིན་དུ་བརྗེད་ངས་ཀྱི་གཉེན་པོ་དྲན་པ། བྱིང་རྒོད་ཀྱི་གཉེན་པོ་ཤེས་བཞིན་ཡིན། འདུ་མི་བྱེད་པའི་གཉེན་པོ་སེམས་པ། འདུ་བྱེད་ཀྱི་གཉེན་པོ་བཏང་སྙོམས་བསྟེན་པ་སྟེ། དེ་ལྟར་ཉེས་པ་ལྔ་སྤོང༌། འདུ་བྱེད་བརྒྱད་བསྟེན་པའི་སྒོ་ནས། བསམ་གཏན་དང་པོའི་ཉེར་བསྡོགས་མི་ལྕོགས་མེད་སྒྲུབ་དགོས། དེ་ཚུལ་བཞིན་དུ་གྲུབ་པ་ན། དེ་ལ་བརྟེན་ནས་རིམ་གྱིས་བསམ་གཏན་བཞི་ཡན་ལག་གིས་འདའ་བ་དང༌། གཟུགས་མེད་བཞི་དམིགས་པའི་འདའ་བའི་ཚུལ་གྱིས་བསམ་གཟུགས་ཀྱི་ཏིང་ངེ་འཛིན་བརྒྱད་སྒྲུབ་པར་བྱེད་པ་དེ་ཡིན། ཤེས་རབ་ལ་སློབ་ཚུལ་ནི། ཤེས་རབ་དེ་ལ་ཇི་ལྟ་བ་རྟོགས་པའི་ཤེས་རབ། ཇི་སྙེད་པ་རིག་པའི་གནས་ལྔ་མཁྱེན་པའི་ཤེས་རབ། སེམས་ཅན་གྱི་དོན་བྱེད་པའི་ཤེས་རབ་དང་གསུམ་ཡོད་པའི་ནང་ནས་གཙོ་བོ་ནི་ཞི་གནས་
ལ་བརྟེན་ཏེ། བདག་མེད་པ་གཉིས་ཀྱི་དེ་ཁོ་ན་ཉིད་ལ་ལྷག་མཐོང་གི་རྩལ་སྦྱོང་བར་བྱེད་པ་དེ་ཤེས་རབ་ལ་བསླབ་ཚུལ་གྱི་གཙོ་བོ་ཡིན་ནི་རེད། གཉིས་པ་གཞན་རྒྱུད་སྨིན་བྱེད་བསྡུ་བའི་དངོས་པོ་བཞི་ལ་སློབ་ཚུལ་ལ། ཟང་ཟིང་གི་བསྡུ་བ་གཅིག་དང༌། ཆོས་ཀྱི་བསྡུ་བ་གསུམ་ཡོད། དང་པོ་ཟང་ཟིང་གི་བསྡུ་བ་ནི། སྦྱིན་པ་ཡིན་ལ། དེ་ནི་སྦྱིན་པའི་ཕར་ཕྱིན་ལ་སློབ་ཚུལ་གྱི་སྐབས་བཤད་པ་ལྟར་ཡིན། གཉིས་པ་ཆོས་ཀྱི་བསྡུ་བ་ནི། མོས་པའི་ཆོས་དང༌། སྒྲུབ་པའི་ཆོས་དང༌། དེ་ཉིད་རྣམ་པར་སྦྱོར་བའི་ཆོས་ཀྱི་བསྡུ་བ་དང་གསུམ་ཡིན། མོས་པའི་ཆོས་ཀྱི་བསྡུ་བ་ནི། སྙན་པར་སྨྲ་བ་དང༌། སྒྲུབ་པའི་ཆོས་ཀྱི་བསྡུ་བ་ནི་དོན་སྤྱོད་པ་དང༌། དེ་ཉིད་རྣམ་པར་སྦྱོང་བའི་ཆོས་ཀྱི་བསྡུ་བ་ནི། དོན་མཐུན་པ་ཡིན། དེ་ལ་སྙན་པར་སྨྲ་བ་ནི། གདུལ་བྱ་སེམས་ཅན་ལ་ཕར་ཕྱིན་དྲུག་ལ་སློབ་ཚུལ་ལ་སོགས་པའི་ཡང་དག་པའི་ཆོས་འཆད་དེ། དེ་རྣམས་ཤེས་པར་བྱེད་རྒྱུ་དེ་རེད། དོན་སྤྱོད་པ་ནི་ཕ་རོལ་པོས་ཆོས་ཤེས་པ་དེ་ཉིད་བསྒྲུབ་ཏུ་འཇུག་པ་དེ་ཡིན། དོན་མཐུན་པ་ནི་གཞན་ལ་བསྒྲུབ་ཏུ་འཇུག་པའི་ཆོས་དེ་རང་གིས་ཀྱང་འབད་པ་ཅི་ཡོད་ཀྱི་སྒོ་ནས་སྒྲུབ་པར་བྱེད་པ་དེ་ཡིན། དེ་ལྟར་ན་དེ་དག་གི་སྒོ་ནས་ཐེག་ཆེན་ཐུན་མོང་བའི་ལམ་ལ་སློབ་ཚུལ་བཤད་པ་དེ་ཉིད་སོང༌། ཐུན་མོང་མ་ཡིན་པ་གསང་སྔགས་རྡོ་རྗེ་ཐེག་པའི་ལམ་ལ་ཇི་ལྟར་སློབ་ཚུལ་ནི་བྱ་སྤྱོད་གཉིས་ཀ་གང་གི་ལམ་ལ་བསླབ་ཀྱང་བྱང་སྡོམ་ལ་བརྟེན་ནས་ཆུ་དང་ཅོད་པན་ལ་སོགས་ཀྱི་དབང་བསྐུར་བ་ཙམ་ཞིག་ནོད་དེ་
རང་གི་ལམ་ལ་བསླབ་ན་ཆོག་པས་དེ་ལ་སྔགས་སྡོམ་བཟུང་བ་སྔོན་དུ་འགྲོ་མི་དགོས། རྣལ་འབྱོར་རྒྱུད་ཡན་ཆད་ཀྱི་རྒྱུད་དེ་གང་གི་ལམ་བསྒོམ་ཡང༌། བྱང་སྡོམ་ལ་རྟེན་བྱས་ཏེ་སྔགས་སྡོམ་རང་གི་རྒྱུད་ལ་བཟུང༌། དེ་ནས་རྒྱུད་སྡེ་རང་རང་གི་དབང་བསྐུར་བ་མཚན་ཉིད་ཚང་བ་ཞུས་ཏེ། རྒྱུད་དེ་དང་དེའི་ལམ་ལ་སློབ་དགོས་ནི་རེད། དེ་ཡང་སྡོམ་པ་དང་དམ་ཚིག་ཚུལ་བཞིན་དུ་བསྲུང་བ་མེད་ན། རྒྱུད་སྡེ་གང་གི་ལམ་ལ་ཞུགས་ཀྱང་འབྲས་བུ་ཐོབ་པ་མི་སྲིད་ནི་རེད། སྡོམ་པ་དང་དམ་ཚིག་ཚུལ་བཞིན་དུ་བསྲུང་བ་ཡོད་ན་དེ་ལས་གཞན་པའི་ལམ་ལ་བརྩོན་པ་ཆེར་བསྐྱེད་མ་ནུས་ནའང་ཕར་ཕྱིན་ཐེག་པའི་ལམ་གྱིས་བསྐལ་ཆེན་གྲངས་མེད་པ་སོགས་སུ་སྒྲུབ་དགོས་རྒྱུའི་སངས་རྒྱས་ཀྱི་གོ་འཕང་དེ། སྐྱེ་བ་བཅུ་དྲུག་ཚུན་ལ་ངེས་པར་འགྲུབ་པར་གསུང་ནི་རེད། ལམ་དངོས་ལ་སློབ་ཚུལ་ནི། བྱ་སྤྱོད་རྣལ་འབྱོར་གྱི་རྒྱུད་གསུམ་ལ་དང་པོ་མཚན་བཅས་དང༌། དེ་ནས་མཚན་མེད་ཀྱི་རྣལ་འབྱོར་ལ་བརྟེན་ནས་ཐུན་མོང་གི་དངོས་གྲུབ་སྔོན་དུ་བསྒྲུབ། དེ་ལ་བརྟེན་ནས་མཆོག་གི་དངོས་གྲུབ་སྒྲུབ་དགོས། དེ་ལྟར་ཐུན་མོང་གི་དངོས་གྲུབ་སྒྲུབ་པ་ལ་མ་ལྟོས་པར་མཆོག་གི་དངོས་གྲུབ་སྒྲུབ་མི་ནུས་ནི་རེད། རྣལ་འབྱོར་བླ་མེད་ཀྱི་སྐབས་སུ་གདུལ་བྱ་རིན་པོ་ཆེ་ལྟ་བུའི་གང་ཟག་ཡིན་ན། དེའི་ཐུན་མོང་གི་དངོས་གྲུབ་སྒྲུབ་པ་ལ་མ་ལྟོས་པར་ཡང༌། རིམ་གཉིས་ཀྱི་རྣལ་འབྱོར་ལ་བརྟེན་ནས་སྙིགས་དུས་ཀྱི་ཚེ་ཐུང་ངུ་གཅིག་ལ་ཟུང་འཇུག་རྡོ་རྗེ་འཆང་གི་གོ་འཕང་སྒྲུབ་པར་
བྱེད་ནི་རེད། དེ་ལས་གཞན་པའི་ཙན་དན་ལྟ་བུ་ལ་སོགས་པའི་གདུལ་བྱ་ཕལ་པ་རྣམས་ཀྱི་ནང་ན་དང་པོ་ཐུན་མོང་གི་དངོས་གྲུབ་བསྒྲུབས་ཏེ་དེ་ལ་བརྟེན་ནས་མཆོག་གི་དངོས་གྲུབ་སྒྲུབ་པའང་ཡོད་ནི་ཡིན་གསུང་ནི་རེད་ལགས། དེ་ལྟར་ས་གསུམ་གྱི་རིན་པོ་ཆེ་གཅིག་པུ་བྱང་ཆུབ་ལམ་གྱི་རིམ་པའི་སྡོམ་རགས་པ་ཞིག །རྗེ་བླ་མ་བཀའ་དྲིན་མཚུངས་མེད་ཨ་བྷཱ་ཡའི་ཞལ་སྔ་ནས་མདུན་འཁོད་འགའ་ཞིག་ལ་བརྩེ་བས་གདམས་པ་བཞིན་དེ་དག་གིས་ཟིན་ཐོར་བཏབ་པ་ལྟར་ཧ་ལམ་པའི་ཞུ་དག་བྱས་ནས་གསུང་འབུམ་གྲར་བཞག་པའོ།། །།
བྱང་ཆུབ་སེམས་དཔའི་རྒྱན་གཟུངས་ཀྱི་རིན་པོ་ཆེ་མི་ཟད་པའི་མཛོད།
༈ བྱང་ཆུབ་སེམས་དཔའི་རྒྱན་གཟུངས་ཀྱི་རིན་པོ་ཆེ་མི་ཟད་པའི་མཛོད་ཅེས་བྱ་བ། འཇལ་དཔལ་གཞོན་ནུར་གྱུར་པ་ལ་ཕྱག་འཚལ་ལོ། །གང་དུ་བདུད་རྩིའི་གཏོང་བ་དོན་གཉེར་རྣམས། །རིན་ཆེན་ཆོས་ཀྱི་འབྱོར་བ་ཀུན་འགྲུབ་པའི། །གཟུངས་རྒྱལ་ཡོན་ཏན་ཕུང་པོ་ལེགས་བརྙེས་པ། །འཇམ་དབྱངས་སྒྲོལ་མཛད་འཕགས་མ་ལ་བཏུད་ནས། །རང་ཉིད་དགེ་བ་རྒྱ་ཆེན་གོམས་ཕྱིར་དང༌། །སྐལ་མཉམ་གཞན་ལའང་དོན་མང་སྤེལ་སླད་དུ། །ཐེག་མཆོག་གཟུངས་ཀྱི་རྒྱ་མཚོར་འཇུག་པའི་ཚུལ། །མདོ་སྡེའི་རྗེས་འབྲངས་ཇི་ལྟར་ནུས་བཞིན་བསྡུ། །གང་ཞིག་གང་ལ་ཅི་ཡི་ཕྱིར་འཇུག་དང༌། །ཐབས་གང་ཞིག་གིས་ཇི་ལྟར་འཇུག་པ་དང༌། །ཞུགས་ནས་དོན་ཐོབ་རང་གི་ངོ་བོ་ཡིས། །བརྟན་པ་རྣམས་ཀྱི་གཟུངས་འདི་ཤེས་པར་བྱ། །འཇིགས་རུང་སྡུག་བསྔལ་སྟོང་གིས་གཙེས་པ་ཡི། །སྲིད་པའི་ཆུ་མཚོར་བྱིང་བའི་རང་ཉམས་ལ། །བསམ་ཞིང་སྐྱོ་བས་རབ་དྲངས་མཛངས་པ་རྣམས། །དང་པོར་ཡིད་ནི་ཞི་ལ་ལྡང་བར་འགྱུར། །ཞི་བ་དེ་ཡི་ལམ་ཚུལ་མགོན་མེད་འགྲོར། །རྟག་ཏུ་མངོན་
ཕྱོགས་ཇི་བཞིན་ཉིད་གསུང་བའི། །བདེ་གཤེགས་ཉི་མ་འཇིག་རྟེན་ཀུན་གྱི་བླར། །གཅིག་པུ་སྣང་ལ་དང་བའི་མིག་འབུར་གཡོ། །འཁོར་ཚེ་ཕ་མཐའ་ཡས་པའི་སེམས་ཅན་ཀུན། །བདག་ལ་དཀའ་བ་རྒྱ་ཆེན་མང་བགྱིས་པར། །མཐོང་སྟེ་དེ་དག་རྣམས་ཀྱི་རྒུད་པའི་ཕྱོགས། །ཀུན་ཀྱང་རང་གི་རྒུད་པ་ལྟ་བུར་རྟོགས། །བདེ་འདོད་སྡུག་བསྔལ་མི་མཐུན་བློ་ཕྱིར་ལས། །བདག་གཅེས་འཛིན་པའི་རིགས་པ་གཞན་ཡོད་མིན། །རང་བཞིན་མཉམ་པ་ཆེས་མང་བོར་ནས་སུ། །གཅིག་ཅིག་སྲུང་བར་སེམས་པ་ཅི་ཡི་ཚུལ། །བདག་ཉིད་སྡུག་པ་འདོད་མང་སྡུག་བསྔལ་རྒྱུ། །བདེ་སྒྲུབ་མཐུ་མེད་དེ་གཞན་སྤོ་ན་ནི། །དེ་ཉིད་དགེ་བ་མཉམ་མེད་གཏེར་རིག་ནས། །ཚུལ་དེ་ལས་ཀྱང་ཡིད་འོང་གོ་འཕོ་ཐོབ། །ཇི་ལྟར་སྙིང་རྗེའི་རྩ་བ་ཆེར་བརླིང་དང༌། །རྒྱལ་ལ་དད་པ་མང་དུ་འཕེལ་དེ་ལྟར། །བྱང་ཆུབ་ཆེ་ལ་འདུན་པ་མང་འགྱུར་ཏེ། །འགྲོ་བ་སྐྱོབ་འདོད་སྐྱོབ་ནུས་དེར་ངེས་ཕྱིར། །དེ་མང་དེ་ཡི་ཐབས་ལའང་འདུན་པའི་ཤུགས། །ལྷག་འགྱུར་འགའ་ཡང་རྒྱུ་མེད་མི་མཐུན་རྒྱུས། །འགྲུབ་ཡོད་མིན་ལ་མོས་ཕྱིར་དེ་ཐབས་ནི། །ཐོས་པ་ཀུན་འཛིན་སྒྲུབ་པའི་སྙིང་པོ་ཅན། །གང་ཕྱིར་ཕྲ་རབ་ཤེས་བྱའི་མུན་པ་ནི། །ཐོས་པའི་མཛོད་བསགས་ཚུལ་སྒོ་བསམ་ཡས་ཀྱིས། །སྦྱང་བའི་བློ་ཅན་འབའ་ཞིག་སྤོང་ནུས་ན། །གཟུངས་དང་བྲལ་ལ་ཐོས་པའི་མཛོད་དེ་མེད། །དྲན་པ་བུལ་བས་དུས་མང་འཐོབ་དཀའ་བའི། །རླབས་ཆེན་་ཆོས་རབ་རྣམ་འབྱེད་རྩལ་དེ་དག །ངལ་བ་ཆུང་ངུས་
གཟུངས་ལ་གནས་པ་རྣམས། །འཐོབ་ཕྱིར་མྱུར་དུ་རྟོགས་པ་རབ་མཐར་བགྲོད། །གཟུངས་ཀྱི་རྒྱན་ལྡན་རྣམས་ལ་དེ་བཞིན་གཤེགས། །འདོམས་པའི་དུས་མཁྱེན་ཏིང་འཛིན་སྒོ་མོ་དང༌། །དེར་འཇུག་ཆོས་ཀྱི་དབྱིངས་ཚུལ་རྒྱས་པའི་གཏམ། །གསུང་ཕྱིར་སངས་རྒྱས་ཡུལ་འཇུག་མིག་དང་ལྡན། །དཔལ་སྟུག་གཟུགས་སྐུའི་ལེགས་མཛོད་ཡངས་པ་དང༌། །དེ་རྒྱུ་སྦྱིན་ཚུལ་བཟོད་པའི་བྱེ་བྲག་དང༌། །དེ་དག་རེ་རེར་འཇུག་སྒོ་ཟད་མི་ཤེས། །ཐོས་པས་འབྱོར་བ་ནན་ཏན་མང་བ་ཡིན། །ཐེག་མཆོག་རིན་ཐང་ཆེ་བའི་རྒྱུས་མཁས་ཤིང༌། །དེ་འཁུར་རང་བློ་སྟོབས་དང་ལྡན་རིག་ནས། །ཤུགས་དྲག་སྤྲོ་བ་མང་དུ་སྐྱེ་འགྱུར་ཏེ། །བརྩོན་ལྡན་དེ་འདྲ་ཡོན་ཏན་ཀུན་སྣོད་འགྱུར། །ཡེ་ཤེས་བསོད་ནམས་ཚོགས་ཀྱིས་འཕེལ་བྱེད་ཅིང༌། །ཡེ་ཤེས་སྟོབས་ཀྱིས་བསོད་ནམས་དག་འགྱུར་ཕྱིར། །གཟུངས་ནི་དེ་དག་ཡངས་པ་རབ་མཆོག་དང༌། །རྣམ་དག་ཕུལ་བྱུང་སྒྲུབ་པའི་ཐབས་སུའང་བསྔགས། །ཇི་ལྟར་ཉི་མའི་ཁང་པར་རྒྱུ་རྣམས་ལ། །སྲོད་ཀྱི་མུན་པ་འབྱུང་བ་གནས་མིན་ལྟར། །ཀུན་འཛིན་ཡེ་ཤེས་མཐོ་ལ་གནས་བཅས་པ། །དམ་ཆོས་ནུབ་པའི་སྨག་ལ་འཇིགས་པ་མེད། །དེ་ཕྱིར་ཚོགས་དེ་གཉིས་ཀྱི་རྣམ་སྨིན་དང༌། །རྒྱུ་མཐུན་འབྲས་བུ་རྒྱ་ཆེ་མུ་མེད་དུ། །འབྱིན་འགྱུར་རྒྱུ་དང་འབྲས་བུའི་ཕྱོགས་དག་ཀྱང༌། །སྟག་དང་ནགས་བཞིན་ཕན་ཚུན་སྲུང་བ་བྱེད། །འདི་ལྟར་ཐོས་སྒྲོགས་མཆོག་གི་ཡུལ་མིན་པའི། །རྣལ་འབྱོར་བྱིས་པའི་སར་ཡང་སྤྱོད་བཟོད་
པ། །རྒྱལ་སྲས་རྣམས་ཀྱི་ངོ་མཚར་རྨད་བྱུང་སྟེ། །བྱིས་པར་བརྗོད་ཀྱང་དེ་ཡི་ཉེས་ལས་འདས། །གཟུངས་ཀྱིས་བརྒྱན་པ་སྒྲ་དང་གཏན་ཚིགས་དང༌། །བཟོ་གསོ་རིག་པའི་ཐབས་ཚུལ་བསམ་ཡས་ཀྱིས། །གདུལ་བའི་སྐྱེ་མང་ཇི་ལྟར་འོས་པ་བཞིན། །ཚར་གཅོད་རྗེས་སུ་གཟུང་ལ་བག་རབ་བརྐྱང༌། །སངས་རྒྱས་གསུང་རབ་འོད་ཀྱིས་ལྗོན་པས་ཆབ། །དྲང་ལྟར་འགྲོ་བ་དམན་རྣམས་མཐོ་རིས་འཇུག །བསམ་གཏན་གནས་དང་ཐོས་སྒྲོགས་བསེ་རུ་དང༌། །བྱང་ཆུབ་མཉམ་པ་མེད་ཤུལ་ཀུན་ནས་སྟོན། །གཟུངས་ལྡན་དཔའ་བོ་རིགས་པའི་མར་མེ་ནི། །མང་པོར་སྤྲོ་བས་འཇིག་རྟེན་རྒྱན་བྱེད་དེ། །དེ་ཚེ་དེ་ལ་ལྷ་མི་མཁས་པ་ཀུན། །འདི་ནི་འཇིག་རྟེན་སྒྲོན་མར་འགྱུར་ཞེས་དགའ། །དགའ་བ་དེ་ལས་ཕུན་ཚོགས་མི་ཟད་པ། །ངེས་པར་འཐོབ་བྱེད་བསོད་ནམས་ཕུང་སོག་སྟེ། །ཆེ་བའི་བདག་ཉིད་རྣམས་ལ་ཉོན་མོངས་དང༌། །བཅས་པའི་ཡིད་ཞུགས་པ་ཡང་བདེ་བྱེད་གསུངས། །ཕྱོགས་བཅུར་རྒྱལ་བ་རྣམས་ཀྱིས་གཟུངས་ཐོབ་ལ། །བསྔགས་པའི་ཕྲེང་བ་བཟང་ཞིང་མང་བ་དང༌། །ཕུལ་བྱུང་དཔེ་ཡི་རྒྱན་དང་ལྡན་སོགས་ཀྱིས། །སེམས་ཅན་དཔག་མེད་ཐེག་མཆོག་སྤྲོ་བར་མཛད། །མདོར་ན་དམ་ཆོས་མ་ལུས་འཛིན་པའི་སྒོ། །གཟུངས་ཡིན་བདེ་བར་གཤེགས་པའི་ཆོས་འཛིན་པ། །རྒྱལ་སྲས་བསླབ་ཀུན་འདུ་བའི་སྡོམ་ཡིན་ཕྱིར། །དེ་ཡི་ཡོན་ཏན་ཕ་མཐའ་ཐུག་པ་མེད། །ཕ་རོལ་ཕྱིན་མིན་སེམས་བསྐྱེད་དགོས་མི་རྫོགས། །ཆུང་རིམ་
མ་བསྐྱེད་གོང་མ་མི་འཐོབ་ཕྱིར། །བརྟན་པ་གཟུངས་ལ་ངོམས་པ་མི་སྐྱེ་ཞིང༌། །དམན་ཞིང་ཕྲ་བ་ལ་ཡང་བརྙས་མི་སེམས། །དེ་ལྟར་ཡིད་ཆེས་མང་དུ་རྙེད་པ་ན། །གཟུངས་དེ་སྐྱེད་ལ་འདུན་པ་ཡངས་ཤིང་བརྟན། །འདུན་པའི་དབང་གིས་བསྐལ་བ་བརྒྱ་སྟོང་དུ། །མི་སྐྱོ་བརྩོན་འགྲུས་གོ་ཆ་སྲ་བ་འབྱུང༌། །བྱང་ཆུབ་སེམས་དཔའི་རྒྱན་གཟུངས་ཀྱི་རིན་པོ་ཆེ་མི་ཟད་པའི་མཛོད་ལས། གཟུངས་སྒྲུབ་པ་ལ་འཇུག་པའི་རྒྱུ་བསྟན་པའི་གནས་ཏེ་རིམ་པར་ཕྱེ་བ་དང་པོའོ།། །།རྒྱུས་དབྱེ་རྣམ་སྨིན་ཐོས་ལ་གོམས་པ་དང༌། །ཏིང་ངེ་འཛིན་གཟུངས་གཉིས་དང་གཅིག་རིམ་བཞིན། །ཆུང་དང་ཆེན་པོའི་ཕྱོགས་འདོད་སྐྱེ་བ་ལས། །ཐོབ་དང་སྦྱོར་བྱུང་དབྱེ་བས་ཆུང་ངུའང་གཉིས། །དེ་དག་ཚེ་གཅིག་འཐོབ་ལ་རིམ་པའི་ཚུལ། །འདིར་ངེས་གཉིས་གཅིག་དམན་མཆོག་རིམ་པའང་ཡིན། །ཀུན་གཞི་མེད་ཀྱང་རྣམ་པར་སྨིན་ཕུང་པོ། །གྲུབ་ཙམ་ཉིད་ལས་འཐོབ་ཕྱིར་དང་པོར་བརྗོད། །རྒྱུད་ཀྱི་བྱེ་བྲག་རྣམས་ལ་ལྷན་ཅིག་སྐྱེས། །ཐོས་པ་གཟུངས་མཐུ་མི་འདྲའི་ཁྱད་མཐོང་བས། །སྔོན་གྱི་སྦྱང་བའི་ཁྱད་པར་ཐ་དད་དུ། །གྲུབ་སྟེ་འདིར་གོམས་དབྱེ་བའི་འབྲས་བུར་མཚུངས། །དམ་ཆོས་བཀླག་དང་དྲིས་དང་ཁ་ཏོན་དུ། །གོམས་པར་བགྱིས་སོགས་དུས་དང་བསམ་དབང་གིས། །སྲིད་པ་གཞན་དུ་ཐོས་པ་འཛིན་པའི་རྩལ། །སོ་སོར་མངོན་འབྱུང་རྒྱུ་རུ་འགྱུར་ཤེས་བྱ། །ཚིག་དང་དོན་ཚུལ་འཛིན་ལ་ལེགས་བསྒྲིམས་ཤིང༌། །མཉན་བསམ་ངལ་བ་བསྟེན་
པས་ཕྱི་རིམ་བཞིན། །ནུས་པ་གླགས་ཏེ་སྒྱུ་རྩལ་བྱང་བ་ལྟར། །འཛིན་སྟོབས་མྱུར་བ་རྣམ་པ་གཞན་ཡིན་ནོ། །བསམ་གཏན་ཚོགས་ལ་གནས་ནས་བརྩོན་འགྲུས་ཅན། །མི་མཐོ་མི་ཞུམ་དམིགས་པ་བརྗེད་མེད་པར། །བཅིང་བའི་ཡིད་ཀྱིས་ཤེས་རབ་ཉེར་འཇོག་ཅིང༌། །གོམས་པས་ལུས་སེམས་ལས་སུ་རུང་བ་སྐྱེ། །སེམས་བསྡུས་ཤིན་ཏུ་སྦྱང་བ་རྙེད་འོག་ཏུ། །སྤྲོ་བས་ཤིན་སྦྱངས་དབང་དུ་བྱ་ཕྱིར་ནི། །སྤྲོ་བསྡུ་མཉམ་པས་ཤེས་རབ་བསྒོམ་བགྱི་སྟེ། །དེ་ལས་ཞི་ལྷག་ཟུང་འབྲེལ་ཏིང་འཛིན་འགྲུབ། །འཛིན་ལ་གཙོར་བགྱིད་ཞི་གནས་དབང་གིས་ནི། །ཐོས་པའི་ཡུལ་ལ་རི་བོ་བཞིན་བརྟན་ཅིང༌། །ལྷག་མཐོང་ཤུགས་ཀྱིས་གསལ་སྣང་བཟང་པོ་ཡིས། །འཁྱུད་པས་མོད་ལ་ཡང་དག་འཛིན་པ་འཐོབ། །ཐོས་པ་འཛིན་གང་རྣམ་ཐར་སྒོ་གསུམ་ལ། །དམིགས་པའི་ལྷག་མཐོང་ལས་སྐྱེས་ཆེན་པོར་གསུངས། །འདི་ཡི་དབྱེ་བ་བྱང་སེམས་དབང་མཛད་ནས། །ས་མཚམས་ལ་རྟེན་རྣམ་པ་གསུམ་དུ་བཤད། །དེ་ནི་ཆོས་དབྱིངས་ལྷག་པར་མོས་སྤྱོད་དང༌། །རྩོལ་ཞིང་འབད་བཅས་མངོན་སུམ་མཐོང་འཇུག་དང༌། །བརྩལ་འབད་ཕལ་ཆེར་ཞི་བའི་ཡེ་ཤེས་ཀྱི། །རྒྱུ་ཅན་ཕྱིར་ན་ཆུང་དང་ཆེ་རིམ་བཞིན། །གཟུངས་གསུམ་ཆུང་དང་ཆེར་བཤད་ཆུང་ངུའི་རྒྱུ། །གང་ཡིན་ཆེན་པོ་ཡི་ཡང་རྒྱུར་གསུངས་ཕྱིར། །རྣམ་པར་སྨིན་དང་ཏིང་འཛིན་ལས་བྱུང་སོགས། །བརྗོད་པ་དེ་དག་གཙོ་བོའི་རྒྱུ་ལས་ཡིན། །བྱང་ཆུབ་སེམས་དཔའི་ཚུལ་ཁྲིམས་རྣམ་སྦྱོང་ཞིང༌། །
འདོད་པའི་བདེ་བ་རིང་བཏང་ཆོས་ཀྱི་མཛོད། །ཅི་ཞིག་གང་ལས་གང་གི་ཆེད་སྒྲུབ་རྣམས། །སྲུང་ལ་ཁྱད་པར་བརྩོན་པས་གཟུངས་མཆོག་རྙེད། །འཇིག་རྟེན་མནོག་ཆུང་ཉེས་དམིགས་མང་རིག་ནས། །ལྷག་པར་ཞེན་མེད་གཞན་གྱི་སྦྱོར་མཐོང་ན། །མི་བཟོད་མི་བགྱི་ཡོངས་སུ་བཟུང་བ་རྣམས། །སྦྱིན་ལ་སློབ་ཅིང་འདོད་ཡོན་དོན་གཉེར་སྤོང༌། །གཟུངས་སོགས་མདོ་སྡེ་རྒྱ་ཆེན་བྱེ་བའི་མཛོད། །བྱང་ཆུབ་སེམས་དཔའི་སྡེ་སྣོད་གཙོར་བཟུང་སྟེ། །ཤས་ཆེར་གང་བསྟེན་དབང་པོ་རྟུལ་འགྱུར་བའི། །གཞུང་ལ་ངལ་བ་ལྷུར་ལེན་ཡོང་མི་བགྱི། །ཉིན་དང་མཚན་དུ་སྔོན་འདུས་བགྱིས་པ་ཡི། །ཆོས་ཀྱིས་ཕོངས་པའི་ནོངས་པ་མཐོལ་བགྱི་ཞིང༌། །ཆོས་ལ་སྡང་ཞིང་ཆོས་སྤོང་མི་བགྱི་སྟེ། །སྡིག་དེ་མཚམས་མེད་པས་ཀྱང་མི་བཟད་གསུངས། །ཆོས་ཀྱི་ཡོན་ཏན་སེམས་ཤིང་གལ་ཏེ་དེ། །འདོད་བཞིན་མ་ཐོབ་ན་ཡང་དེ་ཚོལ་ཉིད། །ཕན་ཡོན་ཆེན་པོའི་སྒོར་མཐོང་འདུན་པའི་སྟོབས། །རབ་དྲག་བརྩོན་པ་ཆུ་བོའི་རྒྱུན་ལྟར་བརྩམས། །ཐོབ་པའི་ཆོས་ལ་དགའ་བ་ཆེར་བསྐྱེད་ནས། །འབྲི་མཆོད་ཀློག་དང་ཁ་ཏོན་བྱ་བ་ལ། །མི་སྐྱོ་གཞན་ལའང་ཆོས་སྤྱོད་དེ་འདྲ་བ། །མཐོང་ན་རྗེས་སུ་ཡི་རང་བསོད་ནམས་སྒྲུབ། །ལྟ་དང་ཚུལ་ཁྲིམས་ངན་ལ་གནས་པ་དང༌། །འདྲིས་པ་སྤོང་ཞིང་དགེ་བའི་བཤེས་གཉེན་ལ། །རྙེད་དཀའ་རིན་ཆེན་སྦྱིན་པའི་འདུ་ཤེས་ཀྱིས། །རིང་ན་གནས་ཀྱང་དཀའ་བ་སྟོང་གིས་ཚོལ། །སྨྲ་མཁས་དེ་དག་འཇིག་རྟེན་ཆོས་གནས་ཀྱང༌། །སངས་རྒྱས་ཕྲིན་ལས་གོས་པ་མེད་
པར་སྤྱོད། །དེ་བས་དེ་ལ་བསམ་བཞིན་འཁྲུལ་མི་ཚོལ། །མངོན་སུམ་མཐོང་ཡང་ཉེས་པ་གླེང་མི་བྱ། །དེས་བྱིན་དྲིན་གྱིས་ཁེངས་དང་རྒྱགས་མེད་པར། །བསྒོ་བའི་རྗེས་འཇུག་ཤིན་ཏུ་དཀའ་བའང་བཟོད། །གྲོང་དང་ཡུལ་འཁོར་ཆོས་སྨྲ་སྲུང་བྱེད་ཅིང༌། །ཆོས་སྟོན་ཕྱིར་ནི་གསོལ་བ་དུ་མར་གདབ། །ཆོས་ལས་སངས་རྒྱས་རྗེས་དྲན་ཕྱོགས་དང་ཕྱོགས། །བདེ་བར་གཤེགས་ཀྱི་སྙན་པ་བརྗོད་བྱ་ཞིང༌། །དུས་གསུམ་ཕྱག་བགྱི་ཐུབ་པའི་མཆོད་རྟེན་ལ། །མར་མེའི་ཕྲེང་བ་ལ་སོགས་རྒྱ་ཆེར་མཆོད། །སྨོན་པའི་སྟོབས་སམ་བརྒྱ་ལ་ལས་ཀྱིས་ཀྱང༌། །སངས་རྒྱས་སྲས་རྣམས་གང་དུ་ཅི་འདྲར་ནི། །འབྱུང་བ་ཤེས་པར་སླ་མིན་ཚུལ་འདི་ཡིས། །སེམས་ཅན་ཀུན་ལ་སྟོན་པ་བཞིན་གུས་བྱ། །དེ་བཞིན་འགྲོ་ལ་བྱམས་པ་བསམ་ཡས་བསྐྱེད། །བདག་གི་ཕུན་ཚོགས་གཞན་ལ་སྔར་བསྟབས་པ། །དྲན་ནས་སློབ་དཔོན་དཔེ་མཁྱུད་མི་བྱ་ཞིང༌། །ཟང་ཟིང་འདོད་པའི་ཡིད་ནི་མི་རྒྱུ་བྱ། །སྙོམས་ལས་མེད་པར་དུས་བཞིན་ཆོས་འཆད་དང༌། །དེ་ལྟའི་དགེ་ལ་སྲོག་ཆགས་གཞན་ཡང་འཛུད། །བསོད་ནམས་ཕུང་པོ་དཔལ་ཕྲེང་སེང་གེའི་སྒྲའི། །སྨོན་པས་ཡོངས་བསྔོ་བསམ་པ་ཇི་བཞིན་འབྱུང༌། །སྒྲ་ཀུན་ཚུལ་གཅིག་འཇུག་པའི་རྣལ་འབྱོར་གྲུས། །གཟུངས་ཀྱི་ཆུ་གཏེར་སུལ་མང་འདའ་བ་ཡང༌། །དགེ་ཚོགས་བ་དན་དེ་འདྲ་མཐོན་པོ་རྣམས། །སངས་རྒྱས་བྱིན་རླབས་རླུང་གིས་དྲང་བའི་མཐུ། །བྱང་ཆུབ་སེམས་དཔའི་རྒྱན་གཟུངས་ཀྱི་རིན་པོ་ཆེ་མི་ཟད་པའི་མཛོད་
ལས། གཟུངས་སྒྲུབ་པའི་ཐབས་ཀྱི་རབ་དབྱེ་བསྟན་པའི་གནས་ཏེ་རིམ་པར་ཕྱེ་བ་གཉིས་པའོ།། །།ཤིན་སྦྱངས་ཕྲ་བས་བརྒྱན་པའི་ཡིད་ཅན་གྱིས། །རྣལ་འབྱོར་དང་མཐུན་ཀུན་ཏུ་སྤྱོད་གནས་ཤིང༌། །དཔའ་བོའི་ཏིང་འཛིན་ཀུན་ཏུ་སྣང་བ་ཡི། །སྤྱོད་ཡུལ་རྟོག་བྱེད་གཟུངས་སྒྲུབ་ཐབས་སུ་བཤད། །དེ་ལ་ཨ་ཞེས་བྱ་བ་མ་སྐྱེས་ཕྱིར། །ཆོས་ཀུན་སྒོ་ཡིན་དེ་ལྟར་ར་ལ་སོགས། །ཡི་གེའི་སྒོ་མོ་ཇི་སྙེད་དེ་སྙེད་དང༌། །བཅུ་དྲུག་སོགས་སྦྱོར་མདོ་སྡེ་རྣམས་ལས་འབྱུང༌། །བརྗོད་པར་བྱ་དང་བྱེད་དུ་སྣང་བའི་གཞི། །མཚན་ཉིད་ངོ་བོ་ཉིད་མེད་ཚུལ་ཤེས་ནས། །ཡི་གེའི་བརྡ་ལ་ཀུན་ཏུ་བརྟགས་ཙམ་ཞེས། །འཇུག་པ་དྲང་དོན་མདོ་རྗེས་འབྲངས་རྣམས་བཞེད། །ལུགས་དེར་ཆོས་བདག་མེད་པ་མི་བཞེད་དང༌། །བཞེད་པ་གཟུངས་སྒྲུབ་གཙོ་བོར་གནོད་མེད་ཀྱི། །བློ་དབང་ལས་མིན་བརྗོད་བྱ་རྗོད་བྱེད་དག །འགོག་ལ་བརྟེན་བཞེད་ཤིང་རྟ་ཆེ་སྲོལ་གཞན། །ཇི་ལྟར་ཤིང་ཏོག་ཁར་བཅང་མ་བཅས་དང༌། །བཅས་དག་རོ་བྲོ་ཚོར་ལ་ཁྱད་ཡོད་བཞིན། །བརྗོད་པ་སྤྱི་ཙམ་སོ་སོར་དེ་ཉིད་དོན། །དམིགས་པས་མཐུ་རྟུལ་བ་དང་རྣོན་པོར་འགྱུར། །རྣམ་གྲངས་དུ་མས་དོན་དང་ཚིག་དག་ལ། །སྦྱང་བ་ལྷུར་ལེན་ཉི་ཚེའི་མཐུ་ཅན་གྱི། །ཡིད་གཞུང་རྒལ་ནས་རིང་པོར་འགྲོ་འགྱུར་ཕྱིར། །གཟུངས་ཀྱི་སྒོ་ལ་ཡི་གེ་མང་པོར་བརྗོད། །ཨ་སོགས་མ་མོའི་གྲངས་རིམ་བརྡ་སྤྲོད་ཀྱི། །གཞུང་ལས་རྣམ་བཞག་གཞན་མཛད་དོན་དབང་ཕྱིར། །བསྟན་བྱ་སྟོན་དང་ཉན་ལ་རྣམ་རྟོག་པའི། །གཉེན་པོར་འབྲུ་བརྒྱད་སྒོ་མཐའ་ཡས་གསུངས་བཞིན། །སྐྱེས་བུ་
ཕུང་མིན་ཕུང་ལས་ཐ་དད་མིན། །དེ་ལ་ཕུང་པོའམ་ཕུང་ལ་དེ་བརྟེན་མིན། །ཕུང་དང་སྐྱེས་བུ་ངོ་བོ་ཉིད་ལྡན་མིན། །དེ་ཕྱིར་སྐྱེས་བུ་རང་བཞིན་ལས་མི་འཐད། །ཁམས་དང་དེ་ཡི་ཡན་ལག་དག་ཀྱང་ནི། །གཅིག་དང་དུ་མའི་རང་བཞིན་བྲལ་བ་ཡིན། །དེ་བཞིན་དངོས་རྣམས་བདག་དང་གཞན་ལས་སམ། །གཉིས་ལས་མ་ཡིན་རྒྱུ་མེད་འབྱུང་བའང་མིན། །ཡོད་པའམ་མེད་པ་གང་ཞིག་སྐྱེས་འགྱུར་ཞེས། །བརྟགས་ཀྱང་དངོས་པོ་སྐྱེ་བ་འགའ་མི་རྙེད། །གང་ཚེ་རང་གི་ངོ་བོ་མི་མཐོང་བ། །དེ་ཚེ་དེ་དག་གཞན་གྱིས་བཅོས་མར་ཤེས། །རྟོག་པས་བཅོས་མ་རང་བཞིན་སྟོང་པའི་ཚུལ། །གཅིག་འདི་རང་གི་གཞི་ལས་མང་པོ་སྟེ། །རེ་རེའང་ཆ་ལ་བརྟེན་ནས་མང་འདོགས་ཕྱིར། །ཡི་གེའི་ཕྲེང་བར་ཚུལ་མང་སྤྲོས་ནས་བཤད། །སྒྲ་དོན་སྲེ་ལ་གོམས་པའི་ངོར་བྱས་ནས། །དོན་ལས་རྗོད་བྱེད་ནུས་པ་ཐ་དད་དུ། །དམིགས་པར་འགྱུར་ཏེ་སྙན་དངགས་ཕྲེང་བ་ལ། །སྒེག་དང་དཔའ་བ་ལ་སོགས་ཉམས་མཐོང་བཞིན། །ཚུལ་འདིས་དེ་ཉིད་དོན་སྟོན་ཡི་གེ་རྣམས། །ཕུང་བའི་ཚིག་གསུངས་བཟོད་ལ་སྤྲོས་པ་ཡི། །གཡེང་བ་བསྡུས་པའི་ཤན་ཕྱིར་དེ་ཡི་ཕྱིར། །དྲན་པ་འབྱར་བ་ཡོངས་སུ་མི་འཕྲོགས་ཡིན། །སླུ་བའི་ཆོས་འབིགས་གཉིས་སུ་བགྱིར་མེད་པའི། །བརྗོད་བྱས་རབ་བརླིང་རྨོངས་པ་རྩ་སྐྱོད་ཕྱིར། །རྡོ་རྗེའི་ཚིག་ཡིན་དེ་སླད་རྒྱལ་པོ་ཡི། །ཕྱག་རྒྱ་བཞིན་དུ་ཡི་གེའི་ཚོགས་ནང་བརྗིད། །ཤིན་ཏུ་རྒྱས་པའི་སྟོང་ཉིད་སྔར་བསླབས་
རྣམས། །ཡིག་འབྲུ་རེ་རེར་ངེས་པའི་ཚིག་རེས་ཀྱང༌། །ཆོས་དབྱིངས་རྒྱ་མཚོའི་དཀྱིལ་འཁོར་ཀུན་མཐོང་སྟེ། །ཆོས་གཅིག་གཏིང་མཐོང་ཀུན་ཀྱང་ཐལ་ལེར་སྣང༌། །དང་པོའི་ཡི་གེ་ཚིག་དོན་དེ་དེ་ཡི། །མཚན་མར་འགྱུར་ཕྱིར་གཟུངས་ཀྱི་ཕྱག་རྒྱར་བརྗོད། །དེ་ཡང་མཚན་མར་བྱས་ནས་ངེས་པའི་ཚིག །ཡིད་བྱེད་བློ་ཡིས་དོན་མངོན་བརྗོད་ལས་འགྱུར། །ཅི་འདྲའི་རིམ་གོམས་དེ་ཁོ་ན་བཞིན་དུ། །འདོན་པ་མཐོང་བས་དབུས་མཐའ་མཚན་མ་མིན། །མཚན་མར་བཟུང་བ་གསལ་བརྟན་བུལ་གྱི་ཕྱིར། །སོ་སོར་རྟོག་པའི་ཤེས་རབ་ཕྲ་བས་འཇུག །ཡི་གེ་གཅིག་ལ་རྗོད་བྱེད་ཆ་འགའ་ཡང༌། །མི་འདོད་ཚིག་རྣམས་དོན་ལུང་མི་སྟོན་འགྱུར། །དེ་ལྟའནག་མིང་དང་མིང་མིན་ཡི་གེ་རྣམས། །མཚུངས་པར་དོན་དང་ངོ་བོས་འབྲལ་བ་མེད། །དབུས་མཐའ་དང་པོ་སྨྲ་རྩོམས་དུས་སུ་ནི། །མི་འདྲར་བསྐྱེད་མིན་མང་དུ་སོག་མེད་ཕྱིར། །བརྗོད་པའི་འོག་ཏུ་ཕྱི་རོལ་འགྲོ་མེད་པས། །སྔར་བྱུང་བ་ལ་བསྣན་ནས་ཕན་འདོགས་མིན། །དེ་རིང་ཉིད་ནི་འདིའམ་འདི་ལྟ་ཞེས། །མི་བརྗོད་བེམ་པོའི་ངོ་བོ་ཉིད་ཡིན་ཕྱིར། །འདིས་ནི་ཐོག་མ་དབུས་མཐའི་ཡི་གེ་རྣམས། །འབྲེལ་གྲུབ་ན་ཡང་དོན་བརྗོད་མི་ནུས་བཤད། །གལ་ཏེ་བརྡ་བྱེད་རྣམས་ཀྱི་བརྗོད་འདོད་ལས། །རྗོད་བྱེད་ཡན་ལག་རང་བཞིན་འདོད་ན་ཀོ། །སེམས་དང་བྲལ་བ་རྗོད་འདོད་དབང་བརྟེན་ནས། །དོན་རྟོགས་ཤེས་འགྱུར་དེ་ལས་མཚར་ཅི་ཡོད། །རང་བཞིན་ཞི་ཡང་རྗོད་བྱེད་རྗོད་བྱེད་ཆ། །འཕེལ་
འགྲིབ་མི་མངོན་གང་ཕྱིར་འཇིག་རྟེན་གྱིས། །བརྡ་དང་ཐ་སྙད་རང་དགར་བཟོ་མཐོང་གི། །འདིས་འདི་རྗོད་མི་ནུས་སྙམ་དོགས་མེད་ཕྱིར། །དོན་རྗོད་འདོད་པས་ཀུན་བསླང་དང་པོའི་སྒྲ། །སྦྱོར་ན་གཉིས་པའང་དང་པོ་བརྡ་བྱེད་མཁན། །གང་རྗེས་འབྲངས་ནས་བརྗོད་པའི་ལུགས་ཇི་བཞིན། །བརྗོད་བྱ་གཞན་དུ་དོན་དེ་ཤོང་མི་འགྱུར། །གང་ཕྱིར་མི་བསླུ་དོན་སྟོན་བྱ་བ་ལ། །ལྟོས་ནས་ཡི་གེ་རྣམས་ཀྱི་ངོ་བོ་དང༌། །གྲངས་དང་གོ་རིམས་སོ་སོ་རྣམ་ངེས་པ། །གྲགས་ལས་གཞན་པའི་རིགས་པ་འགའ་ཡོད་མིན། །ཡི་གེ་འབྱུང་བའི་ཚུལ་དང་ཡུན་ཚད་ཀྱི། །ཆ་སོགས་རྣམ་དཔྱད་སྟོང་པ་རྗེས་དྲན་ཞིང༌། །ཕྱག་རྒྱའི་ཚོགས་སུ་རང་བཞིན་འགོག་པའི་གཞི། །ཀུན་ཀྱང་དེ་འདྲ་ཁོ་ནར་ཡིད་ལ་བྱེད། །ཡིག་གཅིག་མཐའ་ཡས་སྐད་ཀྱིས་བསྒྱུར་བས་ན། །ཆོས་ཀུན་སྡུད་ཀྱང་རྗོད་བྱེད་མཉམ་པ་ཉིད། །སྒོ་ཡི་དོན་གནས་རེ་རེར་ཤེས་བྱ་ཀུན། །མཉམ་བསྡུས་དེ་ལ་བརྗོད་བྱའི་མཚན་ཉིད་མེད། །དེ་ལ་སོགས་ཀྱང་དཔེ་དོན་སྔར་སྦྱར་བས། །དཔེ་མཐོང་ཁོ་ནས་དོན་དྲན་དམིགས་པ་དང༌། །ཚིག་དང་དེ་ཡི་དོན་དག་དེ་བས་ཀྱང༌། །ཉེ་ཕྱིར་མཚན་མར་གཟུང་བའི་ཡན་ལག་འགྱུར། །འཐད་པ་བཟང་དང་ལྡན་པའི་ངེས་ཚིག་གིས། །ཡི་གེ་མངོན་སྒྲུབ་པ་ལ་མཁས་བྱས་པས། །ནས་ཀྱི་ཤུན་པ་བརྗེ་བའི་ཚུལ་གྱིས་ནི། །མ་ཐོས་བརྡ་ལ་འདྲིས་པའི་སྒོ་གཞན་འཇུག །མིང་དང་མིང་གཞན་ཡི་གེའི་བརྡ་དང་ནི། །ཐ་སྙད་སྟུག་པོས་བར་ཆོད་རིང་བ་དང༌། །གལ་ཏེ་ཡི་གེ་རིགས་བསྡུས་ཕྱོགས་
བསྟེན་ན། །བརྡ་གཉིས་བཏང་སྙོམས་འདུག་པ་ལྟ་བུར་སྣང༌། །ཕྱོགས་དེ་སྟོབས་ལྡན་མིང་གཅིག་ལ་འཇུག་པས། །རབ་འབྱམས་མིང་གི་ཡི་གེར་སླེབ་ནུས་མིན། །གལ་ཏེ་ཐོག་འདྲ་སོ་སོར་གཅིག་སྦྱར་ནས། །མཚན་མར་བྱེད་ནའང་ཐུག་དང་དགོས་ནུས་མེད། །དེ་ཕྱིར་མིང་ཚིག་ཀུན་ལས་བརྡས་འགྱུར་གྱི། །ལྷག་མ་ཡི་གེའམ་དོན་འགར་ཉེ་རིང་མེད། །འདོད་པའི་དབང་བརྟེན་འགའ་ཞིག་ཁོ་ན་ལ། །ངེས་འདིས་ཡི་གེ་བཏུས་ལ་བརྡ་ཡིས་ཕྱེ། །བཏུ་དང་ཕྱེ་བའི་སྒོ་གཉིས་ཕན་ཚུན་གྱི། །གྲོགས་གྱུར་པ་དག་ཡི་གེ་གཅིག་ལས་ནི། །ཡི་གེ་འབུམ་འཇུག་པ་དང་འབུམ་ལས་སླར། །གཅིག་ལ་འཇུག་པའི་ལམ་སྲང་དྲང་པོ་ཡིན། །ཡི་གེའི་སྒྲོན་མ་གཅིག་བཏེགས་འབྱམ་ཀླས་པའི། །དེ་ཉིད་དབྱེ་བ་དྲན་ཡུལ་གསལ་བྱེད་ཕྱིར། །ཐམས་ཅད་སྣང་བའོ་སྤོབས་པ་ཟབ་མོའི་གཏེར། །སྐྱེ་བའི་སྒོའི་ཕྱིར་ས་བོན་ཚིག་ཅེས་བྱ། །མིང་གང་སྔོན་དུ་ངེས་དོན་ལ་འཇུག་པའི། །ཡི་གེ་མི་འགྲོ་ཡོད་མིན་ཀུན་ནས་སྒོ། །ཐམས་ཅད་རྗེས་སོང་གཟུངས་དང་བརྗོད་པ་ཀུན། །སངས་རྒྱས་གསུང་བསྟན་པ་ཡང་དེ་ལྟར་བཤད། །གཟུངས་ཀྱི་རྣམ་གྲངས་དམིགས་པས་རྒྱས་འགྱུར་ཕྱིར། །སྒོ་ཚུལ་མཐའ་ཡས་ཞེས་ཀྱང་བཞེད་པ་ཡིན། །ཕྱོགས་འདིས་རྣམ་པའི་རྗེས་སུ་འཇུག་ལ་སོགས། །མདོ་ཡི་ཐ་སྙད་གཞན་ཡང་བཤད་པར་བྱ། །བྱང་ཆུབ་སེམས་དཔའི་རྒྱན་གཟུངས་ཀྱི་རིན་པོ་ཆེ་མི་ཟད་པའི་མཛོད་ལས། བཟོད་པའི་གཟུངས་སྒྲུབ་ཚུལ་བྱེ་བྲག་ཏུ་བཤད་པའི་གནས་ཏེ་རིམ་
པར་ཕྱེ་བ་གསུམ་པའོ།། །།རང་མཐུས་བཟུང་བ་ཡུན་རིང་ཆུད་མི་ཟ། །མཐུ་དེ་ཤས་ཆེ་བས་ན་གཟུངས་སུ་བརྗོད། །དེ་ཡི་རང་བཞིན་དྲན་པ་གསལ་བ་དང༌། །བརྟན་པའི་བློ་ཡིན་བསམ་གཏན་ལ་སོགས་ཀྱང༌། །རྒྱ་ཆེར་དབྱེ་བ་འཇིག་རྟེན་འདས་ལེ་དང༌། །གཟུངས་ཀྱི་རྒྱལ་པོའི་མདོ་སོགས་སྡེ་སྣོད་ལས། །བཀའ་སྩལ་མདོར་བསྡུས་ཆོས་དང་དོན་དང་ནི། །གསང་སྔགས་བཟོད་འཐོབ་བྱེད་པའི་གཟུངས་བཞིར་བཤད། །ཤིན་ཏུ་རྒྱས་གཞུང་རྣམས་ཀྱང་ཇི་ལྟ་བུར། །ཐོས་པའི་ཚུལ་ལས་ལྷག་ཆད་མི་འགྱུར་ཞིང༌། །རིམ་པ་མི་ཉམས་དེ་འདྲར་དེ་དག་གི། །དོན་འཛིན་སྤྱོད་པའི་སྒོ་ནས་གཉིས་སུ་འགྱུར། །རེ་རེའང་སྔར་བརྗོད་གསུམ་དབྱེ་གོང་ནས་གོང༌། །སྒོ་གསུམ་དག་གི་ཁྱད་པར་ཞུགས་འགྱུར་ཏེ། །གཞུང་དོན་རྣམ་ངེས་པ་དང་བརྟན་པ་དང༌། །ཐོས་མང་གནས་པའི་གོ་སྐབས་ཡངས་པ་ཡིན། །ཡི་གེའི་སྦྱོར་བ་ཏིང་ངེ་འཛིན་དབང་ངམ། །སྨོན་པའི་ཤུགས་ཀྱིས་གང་དང་ཅི་འདྲ་བའི། །སྔགས་སུ་བཟུང་བ་གཞན་དུ་མི་འགྱུར་བར། །ཟློས་ལ་དོན་ཡོད་འགྱུར་ཕྱིར་གཟུངས་སུ་འདོད། །སྔར་སྦྱོར་ཆུད་མི་ཟ་བའི་ནུས་པ་ལ། །རག་ལས་མིན་ཕྱིར་སྙན་དངགས་བྱེད་མི་མཚུངས། །སྔགས་འགྲུབ་བྱེད་པའི་རྗེས་སུ་བསླབ་དབང་གིས། །ཡིན་ཤེས་ཕྱིར་ནི་འབྲས་བུའང་རྒྱུ་ཡིས་བཏགས། །ཚུལ་ཁྲིམས་ལ་སོགས་གྲོགས་དང་ངོ་བོ་ཉིད། །ཇི་ཙམ་ཕུལ་གྱུར་དེ་ཡིས་ཉེར་བགོས་པའི། །སྔགས་ཀྱི་བྱིན་རླབས་
བརྫི་བས་མི་འཇིགས་དང༌། །བརྟན་དང་རྒྱ་ཆེ་བར་ནི་འགྱུར་བ་ཡིན། །བཟོད་པས་ཆོས་ཉིད་རྗོད་ཅིང་དབྱེ་བའི་སྒོ། །མ་ལུས་ཡི་གེའི་སྡོམས་སུ་བསྡུས་བསྒོམས་པས། །དོན་དམ་བཟོད་པ་ཡི་གེ་ཙམ་ཉིད་ཀྱིས། །འདྲོངས་པའི་མཐུ་གྲུབ་བློ་ལྡན་བཟོད་པའི་གཟུངས། །འདིར་ཡང་དབྱེ་བ་གོང་མ་བཞིན་བརྗོད་བྱ། །ཆོས་དོན་མཐའ་ཡས་གཞུང་དང་ཡིག་གཅིག་ཏུ། །བསྡུས་ནས་འཛིན་ལ་ཆོས་དོན་གཟུངས་གཉིས་སུ། །དབྱེ་དང་མི་དབྱེའི་རྣམ་དབྱེ་གསལ་བར་འདོད། །འདི་ལྟར་ལྡོག་པ་ཙམ་གྱིས་དེ་ཕྱེ་མིན། །གང་མ་བཟུང་བར་གང་འཛིན་ཡོད་མིན་པ། །མ་ཡིན་ཕྱིས་ཀྱང་འབྲས་བུའི་དྲན་པ་ལ། །ཐ་དད་མཐོང་ཕྱིར་གཉིས་སུ་འགྱུར་བ་སྙམ། །ཇི་ལྟར་དེ་དག་རྒྱུན་གཅིག་གོ་རིམ་རྣམས། །ངེས་སྦྱར་མཚན་མར་བྱས་པས་མི་འཁྲུལ་ལྟར། །འདི་ནི་དོན་གང་ཡི་གེ་གང་ཞིག་གིས། །མཚན་ལ་དམིགས་པས་དེ་དེར་འདུ་བ་ཉིད། །ངེས་འབྱུང་ལམ་མེད་པ་ལའང་གསུམ་ཐོབ་ཡོད། །དེ་ལས་གཟུངས་གཉིས་རྒྱུ་ཡིས་ལྷག་པར་མང༌། །གཅིག་ནི་རྒྱལ་སྲས་རྣམས་ཀྱི་ཐུན་མོང་མིན། །དེ་ནི་ཐམས་ཅད་ནང་ན་རྒྱུས་ཀྱང་ཉུང༌། །ཆོས་ནི་དོན་ཤེས་ཐབས་ཡིན་ཐོས་པ་རྣམས། །མཐར་ཕྱིན་དབང་མཛད་ཕྱིར་ན་དབུས་ཕལ་བ། །དེ་དག་བཟོད་པའི་གཟུངས་ཀྱིས་རྣམ་དག་ཕྱིར། །རིམ་འདི་མཁས་པ་རྣམས་ཀྱིས་བཞེད་པ་ལྟ། །བློ་ལྡན་རྣམས་ཀྱི་གཟུངས་འཐོབ་འགྱུར་བའི་ལྟས། །གཏེར་ཆེན་མེ་ཏོག་རྫིང་དང་གོས་དཀར་ཕྲུགས། །རྙེད་དང་སྤྱི་བོར་ལྷ་ཡིས་
གདུགས་མཛེས་པ། །འཛིན་པ་ལ་སོགས་རྨི་ལམ་དག་ན་མཐོང༌། །ཇི་ལྟར་གཟུངས་ཐོབ་ལ་བརྟེན་རྒྱལ་སྲས་ཀྱི། །བྱ་བ་དཔག་མེད་རྫོགས་བྱེད་དེ་སྔར་བཤད། །མདོར་བྱས་ཡང་ཡང་གཞན་དང་བདག་ཕན་ཕྱིར། །དམ་ཆོས་རབ་ཏུ་སྟོན་དང་འཛིན་ལས་ཅན། །བསྐལ་དང་མ་བསྐལ་དུས་གཞན་སོ་སོ་རུ། །ཐོས་པའི་ཆོས་དྲན་རྩ་ལག་འབྱོར་བ་བཞིན། །གནས་ཤིང་གདམ་ངག་དགོས་པ་མ་རྙིང་བའི། །ཤིང་ལས་ཕྲེང་བ་བཞིན་དུ་བརྒྱུད་མར་རྒྱུ། །གདུལ་བའི་དབང་བཞིན་བཤད་བྱ་དེ་དང་དེ། །འབྲེལ་ཞིང་རྒྱུན་ཆགས་མ་ཚང་མེད་པར་སྟོན། །དེ་འདྲའི་ཚུལ་གྱིས་འདྲི་བས་སངས་རྒྱས་དང༌། །སངས་རྒྱས་སྲས་ལས་ཆོས་ཀྱི་སྤྲིན་འབྱུང་བྱེད། །དམིགས་པ་ཆུད་མི་ཟ་བའི་སྟོབས་ཐོབ་པས། །བཤད་བྱ་ཕུལ་བྱུང་འཆད་ལ་དབང་བྱེད་ཕྱིར། །གསང་སྔགས་བྱེད་པའང་གཟུངས་སུ་བསྡུ་འོས་ཏེ། །དེ་ཕྱིར་བདེན་ཚིག་འགའ་ལའང་ཐལ་མི་འགྱུར། །སྣྲེལ་གཞིའི་རྒྱུད་དུ་རིང་པོར་བསྟན་སོགས་ཀྱིས། །དྲན་པ་མི་འཁྲུགས་འདོད་དང་མཐུན་བྱེད་པ། །ཟིལ་གྱིས་མི་ནོན་རང་དབང་ཐོབ་ལས་ཏེ། །དེ་ལྟར་སྐྱེ་བ་གཞན་དུའང་ཡོངས་མི་གཡོ། །བསྐལ་པ་དུ་མར་ཟབ་དང་རྒྱ་ཆེའི་གནས། །གཏན་འབེབས་སྨྲ་བའི་སྤོབས་པ་ཐུག་མི་འགྱུར། །རྣམ་དག་ངག་གི་ཡོན་ཏན་མི་ཟད་ཕྱིར། །གཞན་གྱི་ཡིད་འཕྲོག་སྤོབས་པའི་ས་བོན་སྐྲུན། །འགྲོ་བའི་རིས་དང་ཡུལ་གྱི་སྐད་སྣ་ཚོགས། །ཇི་ལྟར་རིགས་བཞིན་དུ་ནི་བརྡ་སྤྲོད་བྱེད། །པདྨོ་རྣམ་འཕྲུལ་ཆོས་
ཀྱི་ཆར་འབེབས་པས། །འཇིག་རྟེན་དགའ་བ་རྒྱ་ཆེར་ཀུན་ཏུ་སྐྱེད། །བྱང་ཆུབ་སེམས་དཔའི་རྒྱན་གཟུངས་ཀྱི་རིན་པོ་ཆེ་མི་ཟད་པའི་མཛོད་ལས། གཟུངས་ཀྱི་ངོ་བོ་དང་རྣམ་པར་དབྱེ་བ་བསྟན་པའི་གནས་ཏེ་རིམ་པར་ཕྱེ་བ་བཞི་པའོ།། །།གང་གིས་བདག་འདྲའནག་ཟབ་མོ་ཆོས་དཔྱོད་ལ། །སྦྱར་བ་དགེ་བའི་བཤེས་དེར་ཕྱག་བགྱིད་དོ། །རྨོངས་པས་ནོངས་ཏེ་དྲང་སྲོང་ཆེན་པོའི་གཞུང༌། །ལོག་པར་གང་བཤད་བརྩེ་ལྡན་རྣམས་ལ་འཆགས། །ནུས་པ་ཇི་བཞིན་དམ་ཆོས་ལ་གུས་པའི། །བློ་ཡིས་སྦྱར་འདི་མཁས་པས་འཕྱ་འོས་མིན། །བསམ་པ་དགེ་བས་སངས་རྒྱས་སྐུ་གཟུགས་ཀྱི། །དབུ་ལ་མཆིལ་ལྷམ་བཞག་པའང་མ་དཔྱས་ལྟོས། །ཆེན་པོ་རྣམས་ཀྱི་གཟུངས་ཚུལ་ལེགས་བསྙད་ལས། །བསོད་ནམས་དཔག་བསམ་ཤིང་འདྲ་གང་སྐྱེས་པས། །འགྲོ་ཀུན་རྒྱལ་བའི་ཆོས་མཛོད་ཡོངས་རྫོགས་པར། །བཟུང་སྟེ་མྱུར་དུ་ཀུན་མཁྱེན་སར་བགྲོད་ཤོག །བྱང་ཆུབ་སེམས་དཔའི་རྒྱན་གཟུངས་ཀྱི་རིན་པོ་ཆེ་མི་ཟད་པའི་མཛོད་ཅེས་བྱ་བ། ཐོས་པའི་ཟ་མ་ཏོག་ཁ་འབྱེད་པ། སྨྲ་བ་ཆེན་པོའི་སྟག་གི་རྒྱུད་དུ་བྱུང་ཞིང༌། བདེ་བར་གཤེགས་པའི་གཞུང་ལུགས་ཀྱི་ནག་འདབས་ཕྱོགས་གཅིག་ན་གནས་པ། གངས་ཅན་ཤར་ཕྱོགས་པ། འཇིགས་མེད་བསྟན་པའི་ཉི་མས་སྦྱར་བ་རྫོགས་སོ།། །།དགེ་ཞིང་བཀྲ་ཤིས།། །།
སྒོ་དྲུག་རྣམ་པར་བཞག་པའི་གཏམ།
༈ གང་གི་རིག་སྔགས་ཡེ་ཤེས་སྐུས། །འགྲོ་བ་སྐྱོབ་མཛད་ལ་བཏུད་ནས། །སྒོ་དྲུག་རྣམ་པར་བཞག་པའི་གཏམ། །བསྡུས་ཏེ་བདག་
གིས་གསལ་བར་བྱ། །ཨ་ནི་སྐྱེ་བ་མེད་པའི་སྒོ། །ཆོས་འདི་སྐྱེ་བ་མ་མཆིས་ཏེ། །བདག་ལས་སྐྱེ་ན་སྐྱེད་བྱེད་ཆོས། །སྐྱེ་བྱའི་སྔ་རོལ་མེད་པར་འགྱུར། །གཞན་ལས་སྐྱེ་ན་རྒྱུ་འབྲས་ཀྱི། །ངེས་པ་སྣང་བ་མི་རིགས་ཉིད། །གཉིས་ལས་སྐྱེ་ན་གནོད་པའི་ཕྱོགས། །གཉིས་ཀ་གཅིག་ཏུ་འདུ་བར་འགྱུར། །རྒྱུ་མེད་ཉིད་དུ་སྐྱེ་ཡིན་ན། །སྐྱེ་བ་ལྡོག་པ་རིགས་མ་ཡིན། །དེ་དག་ལས་གཞན་སྐྱེ་བའི་ཚུལ། །སུས་ཀྱང་སྨྲ་བར་མི་ནུས་སོ། །ར་ནི་ཆགས་པ་མེད་པའི་སྒོ། །ཆགས་པ་རང་བཞིན་མ་གྲུབ་སྟེ། །ཆགས་ཟིན་ཆགས་ན་དོན་མ་མཆིས། །ཆགས་པ་ལས་ལྷག་ཆགས་པ་ཅི། །ཆགས་མིན་ཆགས་པར་མི་རུང་སྟེ། །ཆགས་ན་ཆགས་མིན་ཡིན་པ་འགལ། །ཡང་དག་ལམ་ནི་ཆགས་པའི་བློ། །འབྲལ་བའང་ཆགས་པ་གྲུབ་ལ་མེད། །གཉེན་པོས་ཆགས་པའི་རྒྱུན་བཀག་ན། །ཆགས་པ་ཆགས་པར་མ་གྲུབ་ཉིད། །ཆགས་པ་སྣང་བཞིན་སྟོང་བ་སྟེ། །རང་བཞིན་མེད་པར་གསལ་བ་ཡིན། །པ་ནི་དོན་དམ་ཟབ་མོའི་སྒོ། །ཆོས་ཀྱི་དབྱིངས་ལ་དོན་དམ་བརྗོད། །སྣང་འདི་བདེན་པར་གྲུབ་གྱུར་ན། །དོན་དམ་བདེན་པ་གཏན་མེད་འགྱུར། །འོན་ཀྱང་རྟེན་འབྱུང་སྟོང་དེའི་ཕྱིར། །དོན་དམ་རིགས་པས་གྲུབ་པ་ཡིན། །སྟོང་པའང་རང་མཚན་མ་གྲུབ་མོད། །ཐ་སྙད་ཙམ་དུ་བཞག་པ་ཉིད། །བདེན་དངོས་ཀུན་རྫོབ་ཏུའང་མེད། །དེ་ཕྱིར་དོན་དམ་ཡོད་ཅེས་བྱ། །ཡང་དག་ཏུ་ནི་བདེན་གྲུབ་ལ། །ལྟོས་ནས་མ་
བཞག་དོན་དམ་ཅི། །ཙ་ནི་འཆི་འཕོ་མེད་པའི་སྒོ། །སྲོག་འགག་པ་ལ་ཤི་བར་བརྗོད། །ཅི་སྟེ་སྲོག་དབང་གཅིག་ཡིན་ན། །རྒན་དང་གཞོན་པ་ག་ལ་རུང༌། །སྲོག་དབང་སྐད་ཅིག་རང་བཞིན་ན། །རྫུན་པར་གྲུབ་པ་མ་ཡིན་ནམ། །གང་ལ་སྲོག་ནི་ཡོད་མིན་པ། །དེ་ལ་དེ་འགག་ཅི་ཕྱིར་ཡོད། །རིས་མཐུན་གནས་པ་ལྡོག་ལས་གཞན། །ཤི་བ་དངོས་མེད་ཡིན་པའི་ཕྱིར། །རང་གི་ངོ་བོ་ཐ་སྙད་དུའང༌། །མེད་པར་སྨྲ་ལ་བདག་མི་འཇིགས། །ན་ནི་མིང་དང་བྲལ་བའི་སྒོ། །མིང་ནི་མཉམ་པ་ཉིད་ལ་མེད། །མིང་དང་དོན་ལ་ཆ་མེད་ན། །བརྗོད་བྱ་རྗོད་བྱེད་མི་སྲིད་འགྱུར། །གལ་ཏེ་དེ་དག་ཆ་ཡོད་ན། །ཕན་ཚུན་ལྟོས་ཏེ་བཞག་པར་ཟད། །བརྗོད་འདོད་རྟོག་ལས་མི་སྐྱེ་ན། །འཛིན་པས་བཞག་ལས་ཅི་ཞིག་ཡོད། །མིང་དོན་བློ་ཡིས་མ་བཞག་ན། །འབྲེལ་བའི་ཚུལ་གཞན་གང་ཞིག་འཐད། །རྟོག་བཏགས་མིན་པའི་མིང་དང་དོན། །རང་གི་ངོས་ནས་གྲུབ་པ་མེད། །དྷཱི་ནི་བློ་གྲོས་དམ་པའི་སྒོ། །ཆོས་རབ་རྣམ་འབྱེད་མཆོག་གི་བློས། །ཇི་ལྟ་ཇི་སྙེད་ཤེས་བྱའི་གནས། །མ་ལུས་ཡང་དག་མངོན་པར་རྟོགས། །རྡུལ་མེད་ཞི་བའི་ཡེ་ཤེས་ཆེས། །བདེན་དང་མི་བདེན་སྣ་ཚོགས་པའི། །འཛིན་སྟངས་དབྱིངས་སུ་བརྟུལ་ནས་ནི། །མཐོང་བ་མེད་པའི་ངང་དུ་གནས། །འོན་ཀྱང་རྟེན་ཅིང་འབྲེལ་འབྱུང་བ། །རྐྱེན་ཉིད་འདི་པ་ཙམ་མོ་ཞེས། །མ་བརྟགས་ཉམས་དགའི་སྣང་བ་ལ། །ཟབ་མོའི་ངེས་ཤེས་ལྷག་པར་སྐྱེ། །གནས་འདི་ཤེས་ནས་ཇི་བཞིན་དུ། །
གང་གི་ཡིད་ལ་ཉམས་ལེན་པ། །དེ་ལ་མྱང་འདས་མི་རིང་སྟེ། །སྲིད་རྩའི་དངོས་གཉེན་ལྷག་ཕྱིར་རོ། །ཅུང་ཟད་སྤྲོས་ཀྱང་བདག་སྤོབས་མོད། །གཞུང་མང་དོགས་ནས་ཧ་ཅང་བསྡུས། །སྒོ་དྲུག་ཚུལ་ལ་འཇུག་པའི་གཏམ། །འདི་ནི་འཇིགས་མེད་གཞོན་ནུས་བྲིས། །བྱིས་པ་རང་ལོ་བཅོ་བརྒྱད་པས། །ཟབ་དོན་ཤེས་པ་དཀའ་མོད་ཀྱི། །འཇམ་དཔལ་གཞོན་ནུའི་བཀའ་དྲིན་ལས། །གཞུང་ལུགས་འདི་ནི་འདིར་བྱས་སོ། །དགེ་དེས་གཞན་ལ་ཕན་འབྱུང་ཞིང༌། །བླ་མེད་བྱང་ཆུབ་མྱུར་ཐོབ་ཤོག། །།
སྒོ་དྲུག་གི་དོན་རྣམ་པར་ཕྱེ་བ།
༈ སྒོ་དྲུག་གི་དོན་རྣམ་པར་ཕྱེ་བ་ལ། ཀླད་དང༌། གཞུང་དང༌། མཇུག་གི་དོན་དང་གསུམ་ལས། དང་པོ་ལ་མཆོད་བརྗོད་དང༌། དམ་བཅའ་གཉིས། དང་པོ་གང་གི་སོགས། །གཉིས་པ་སྒོ་དྲུག་སོགས། གཞུང་ལ་སྒོ་དྲུག་དངོས་དང༌། དེ་བསྒོམ་པའི་ཡོན་ཏན་གཉིས། དང་པོ་ལ་དྲུག་ལས། ཨའི་སྒོ་བཤད་པ་ལ། མདོར་བསྟན་དང་རྒྱས་བཤད་གཉིས། །དང་པོ་ཨ་ནི་སོགས། གཉིས་པ་ལ་བདག་སྐྱེ་གཞན་སྐྱེ་གཉིས་སྐྱེ་རྒྱུ་མེད་ལས་སྐྱེ་བ་དགག་པ། མཐའ་གཞན་པའི་སྐྱེ་བ་དགག་པ་སྟེ་ལྔ་ལས། དང་པོ་བདག་ལས་སོགས། གཉིས་པ་གཞན་ལས་སོགས། གསུམ་པ་གཉིས་ལས་སོགས། བཞི་པ་རྒྱུ་མེད་སོགས། ལྔ་པ་དེ་དག་སོགས། རའི་སྒོ་བཤད་པ་ལ་མདོར་བསྟན། རྒྱས་བཤད། དང་པོ་ར་ནི་སོགས། གཉིས་པ་ལ། ཆགས་པ་རང་ཉིད་དགག་
པ་དང༌། སྤང་གཉེན་དགག་པ་དང༌། ཆགས་པ་བདེན་མེད་དུ་བསྟན་པ་དངོས་དང་གསུམ། དང་པོ་ཆགས་ཟིན་སོགས། གཉིས་པ་ཡང་དག་སོགས། གསུམ་པ་ཆགས་པ་སོགས། པའི་སྒོ་བཤད་པ་ལ། བསྟན་བཤད་གཉིས། དང་པོ་པ་ནི་སོགས། གཉིས་པ་ལ། དོན་དམ་ཉིད་སྒྲུབ་པ་དང༌། དེའང་བློས་བཞག་པར་བསྟན་པ་དང༌། རང་གི་ངོ་བོས་སྟོང་པར་བསྟན་པ་དང་གསུམ། དང་པོ་སྣང་འདི་སོགས། གཉིས་པ་སྟོང་པའང་སོགས། གསུམ་པ་ཡང་དག་སོགས། ཙའི་སྒོ་བཤད་པ་ལ། བསྟན་བཤད་གཉིས། དང་པོ་ཙ་ནི་སོགས། གཉིས་པ་ལ་ཤི་བ་ངོས་བཟུང་བ་དང༌། སྲོག་དབང་དོན་དམ་པར་དགག་པ་དང༌། དེ་མ་གྲུབ་པས་སྲོག་འགག་པ་མ་གྲུབ་པ་དང༌། ཤི་བ་དངོས་མེད་ཐ་སྙད་དུའང་མེད་པར་བསྟན་པ་དང་གསུམ། །དང་པོ་སྲོག་འགག་སོགས། གཉིས་པ་ཅི་སྟེ་སོགས། གསུམ་པ་གང་ལ་སོགས། བཞི་པ་རིས་མཐུན་སོགས། ནའི་སྒོ་བཤད་པ་ལ། བསྟན་བཤད་གཉིས། དང་པོ་ན་ནི་སོགས། གཉིས་པ་ལ། མིང་དོན་གཅིག་ཐ་དད་དུ་མ་གྲུབ་པར་བསྟན་པ་དང༌། མིང་དོན་རྟོག་བཏགས་སུ་བསྟན་པ། མིང་དོན་གྱི་ཆོས་ཉིད་བསྟན་པ་དང་གསུམ། དང་པོ་མིང་དང་སོགས། གཉིས་པ་བརྗོད་འདོད་སོགས། གསུམ་པ་རྟོག་བཏགས་སོགས། དྷཱིའི་སྒོ་བཤད་པ་ལ། མདོར་བསྟན་དང་རྒྱས་བཤད་གཉིས། དང་པོ་དྷཱི་ནི་སོགས། གཉིས་པ་ལ་སྤྱིར་བཤད་པ་དང༌། བྱེ་བྲག་ཏུ་བཤད་པ་གཉིས། དང་
པོ་ནི་ཆོས་རབ་སོགས། གཉིས་པ་ལ་ཇི་ལྟ་བ་མཁྱེན་པ་དང༌། ཇི་སྙེད་པ་གཟིགས་པ་བསྟན་པ་གཉིས། དང་པོ་རྡུལ་མེད་སོགས། གཉིས་པ་འོན་ཀྱང་སོགས། གཉིས་པ་དེའི་ཡོན་ཏན་བཤད་པ། གནས་འདི་སོགས། མཇུག་གི་དོན་ལ་རྩོམ་པ་པོའི་མིང་བསྟན་པ། རྩོམ་པའི་རྒྱུ་མཚན་བསྟན་པ་དང༌། དགེ་བ་བསྔོ་བ། བརྩམ་པའི་གནས་བསྟན་པ་སྟེ་གསུམ། དང་པོ་ཅུང་ཟད་སོགས། གཉིས་པ། བྱིས་པ་སོགས། བཞི་པ་ཞེས་པའང་སོགས་སོ། །ཞེས་པའང་ཡར་ལུང་པདྨ་བཀོད་རྩ་གསུམ་མཁའ་འགྲོའི་གླིང་ནས་སྐད་ཅིག་ཡུད་ཙམ་ལ་བྲིས་པའོ།། །།
སྤྱོད་འཇུག་དཀའ་གནས་གསལ་བ་བྱེད་བེཌུ་དབང་པོའི་མེ་ལོང་།
༈ འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ལོ། །རབ་འབྱམས་ཞིང་གི་རྒྱལ་བ་རྒྱ་མཚོའི་མཁྱེན་རབ་ནི། །ཟུར་ཕུད་ལྔ་པའི་གཞོན་ཚུལ་གར་གྱིས་རྣམ་རོལ་པ། །སྨྲ་བའི་ཉིན་བྱེད་འཇམ་མགོན་བླ་མའི་ཆུ་སྐྱེས་ཞབས། །མི་ལྡོག་མི་ཕྱེད་རྩེ་གཅིག་དང་བས་གཙུག་གིས་མཆོད། །བློ་མཆོག་མངའ་བས་ལེགས་གསུང་དོན། །ཀུན་གྱི་རྩེ་མོར་སོན་པ་ནི། །རྒྱལ་སྲས་ཡོངས་ཀྱི་སྡོམ་པ་སྟེ། །དེ་སྟོན་གཞུང་གི་བཀའ་འགྲེལ་བྱ། །དེ་ཡང་འདིར་བཤད་བྱའི་དོན་ནི། །རྒྱལ་བ་ཐམས་ཅད་ཀྱི་གཤེགས་ཤུལ། །རྒྱལ་སྲས་ཐམས་ཅད་ཀྱི་བསྟེན་བྱ། །དགེ་ལེགས་ཐམས་ཅད་ཀྱི་འབྱུང་གནས། །རིན་ཆེན་བྱང་ཆུབ་ཀྱི་སེམས་བརྗོད་བྱར་གྱུར་པའི་བསྟན་བཅོས་བྱང་ཆུབ་སེམས་དཔའི་སྤྱོད་འཇུག་འདི་ལ་ལེའུ་བཅུ་ཡོད་པ་ལས། རྟོགས་དཀའ་བའི་གནས་ཤེས་
རབ་ལེའུའི་སྐབས། ཀུན་རྫོབ་དང་ནི་དོན་དམ་སྟེ། །འདི་ནི་བདེན་པ་གཉིས་སུ་འདོད། །ཅེས་པ་ལ། བདེན་གཉིས་ཀྱི་དབྱེ་གཞི་ནི། རང་བཞིན་མེད་པ་ཡིན་ཏེ། འཇུག་པ་ལས། བདེན་པ་གཉིས་ཆར་དུ་ཡང་རང་བཞིན་མེད། །ཅེས་གསུངས་པའི་ཕྱིར། དེ་ལ་དབྱེ་ན་གཉིས་ལས། ཀུན་བརྫོབ་བདེན་པའི་མཚན་ཉིད་ནི། །བློའི་ཡུལ་དུ་གྱུར་པའི་ཆོས་གང་ཞིག །དཔྱད་ན་བརྫུན་པའི་རང་བཞིན་ཡིན་པའོ། །དབྱེ་ན། ཡང་ལོག་གི་ཀུན་རྫོབ་གཉིས་ཏེ། དབང་པོ་གནོད་མེད་ལ་སྣང་བ་ཡང་དག་ཀུན་རྫོབ་དང༌། གནོད་པས་དཀྲུགས་པའི་སྣང་བ་རབ་རིབ་དང་ནམ་མཁའ་ལ་སྐྲ་ཤད་འཛག་པ་དང༌། དུང་སེར་པོར་སྣང་བ་ལ་སོགས་པ་ལོག་པའོ། །དེ་དག་ཀྱང་འཇིག་རྟེན་ཤེས་ངོ་ལ་ལྟོས་ནས་བཞག་པ་ཡིན་ནོ། །དེ་དག་ལ་ཀུན་རྫོབ་བདེན་པ་ཞེས་བརྗོད་པའི་རྒྱུ་མཚན་ཡོད་དེ། ཏིང་འཛིན་རྒྱལ་པོ་ལས། ཇི་ལྟར་སོས་ཀའི་ཉི་མ་ཕྱེད་དུས་ན། །སྐྱེས་བུ་སྐོམ་པས་གདུངས་ཤིང་འགྲོ་བ་དག །སྨིག་རྒྱུ་དག་ལ་ཆུ་ཡི་ཕུང་པོར་མཐོང༌། །ཆོས་རྣམས་ཐམས་ཅད་དེ་བཞིན་ཤེས་པར་གྱིས། །ཞེས་པ་ལྟར། སྣང་ལ་རང་བཞིན་མ་གྲུབ་པས་ཀུན་རྫོབ། བློ་འཁྲུལ་ཤེས་ཀྱི་ངོར་བདེན་པ་ཡིན་པའི་ཕྱིར། དོན་དམ་བདེན་པའི་མཚན་ཉིད་ནི། བློ་ལས་འདས་པའི་ཆོས་ཉིད་དམིགས་པ་ཉེ་བར་ཞི་བའི་རང་བཞིན་ནོ། །དབྱེ་ན། ཕྱི་སྟོང་པ་ཉིད་དང༌། ནང་༴ ཕྱི་ནང་༴ སྟོང་པ་ཉིད༴ ཆེན་པོ༴ དོན་དམ་པ༴ འདུས་བྱས༴ འདུས་མ་བྱས༴ མཐའ་ལས་འདས་པ༴
ཐོག་མཐའ་མེད་པ༴ དོར་བ་མེད་པ༴ རང་བཞིན་སྟོང་༴ ཆོས་ཐམས་ཅད༴ རང་མཚན༴ མི་དམིགས་པ༴ དངོས་མེད༴ ངོ་བོ་ཉིད༴ དངོས་མེད་ངོ་བོ་ཉིད་སྟོང་པ་ཉིད་དེ་བཅོ་བརྒྱད་དོ། །དེ་རྣམས་ལ་དོན་དམ་བདེན་པ་ཞེས་བརྗོད་པའི་རྒྱུ་མཚན་ཡོད་དེ། སྒྲ་གཅན་འཛིན་གྱི་ཡུམ་ལ་བསྟོད་པར། སྨྲ་བསམ་བརྗོད་མེད་ཤེས་རབ་ཕ་རོལ་ཕྱིན། །མ་སྐྱེས་མི་འགག་ནམ་མཁའི་ངོ་བོ་ཉིད། །སོ་སོ་རང་རིག་ཡེ་ཤེས་སྤྱོད་ཡུལ་བ། །དུས་གསུམ་རྒྱལ་བའི་ཡུམ་ལ་ཕྱག་འཚལ་ལོ། །ཞེས་པ་ལྟར། འཁྲུལ་པའི་ཡུལ་ལས་འདས་པས་སོ་སོ་རང་རིག་པའི་ཡེ་ཤེས་དང་ཡུལ་ཡུལ་ཅན་དབྱེར་མེད་པར་གྱུར་པ་ལ་རྟོགས་པའི་མིང་བཏགས་པ་ཙམ་སྟེ། དམ་པ་རྣམས་ཀྱི་གཉེར་བྱའི་དོན་ཡིན་པ་དང༌། ལམ་འབྲས་ཀྱི་ཆོས་སུ་མི་བསླུ་བས་བདེན་པ་ཡིན་པའི་ཕྱིར། བདེན་གཉིས་ཤེས་པ་ལ་དགོས་པ་ཡོད་དེ། ཀ་མ་ལས། བདེན་གཉིས་རྣམ་དབྱེ་ཤེས་པ་དག །ཐུབ་པའི་བཀའ་ལ་མི་རྨོངས་ཏེ། །དེ་དག་མ་ལུས་ཚོགས་བསགས་ནས། །ཕུན་ཚོགས་ཕ་རོལ་འགྲོ་བ་ཉིད། །ཅེས་གསུངས་པའི་ཕྱིར་རོ། །ཡང་ཉན་རང་རྣམས་ཀྱིས་བདག་མེད་གཉིས་རྫོགས་པར་རྟོགས་མ་རྟོགས་ཀྱི་གནས་ལ། སྤྱིར་ས་པཎ་ཆེན་གྱི་གཞུང་ལུགས་ལེགས་བཤད་སོགས་དང༌། རྗེ་ཙོང་ཁ་པ་ཡབ་སྲས་ཀྱི་གཞུང་ལུགས་རྣམས་ལས་ནི། དེ་དག་གིས་བདག་མེད་གཉིས་རྫོགས་པར་རྟོགས་
དགོས་ཏེ། དེ་ལྟར་མིན་ན་དེ་དག་ཁམས་གསུམ་དུ་སྐྱེ་བ་ལེན་པར་ཐལ་བའི་ཕྱིར་ཏེ། ཀླུ་སྒྲུབ་ཀྱི་གཞུང་གི་ལུང་དོན་དེ་ལྟར་ཡིན་ཞེས་གསུངས། ཀུན་མཁྱེན་ཆོས་རྗེའི་གྲུབ་མཐའ་མཛོད་དུ་ནི། དེ་ལྟར་མ་གསུངས་ཏེ། མངོན་རྟོགས་རྒྱན་གྱི་ལུང་དོན་འགོད་པར་མཛད་ལ། ཆེན་པོ་བདུན་གྱི་ཆེ་བའང་དེ་ལྟར་ན་ཚང་གིས། གཞན་དུ་ན་ཡེ་ཤེས་ཆེན་པོ་འདི་ལ་ཅི་ཙུག་སྨྲ། ཞེས་བསྟན་ལ། ཡིད་བཞིན་རིན་པོ་ཆེའི་མཛོད་དུ་ནི། ལམ་སྒོམ་དུས་སུའང་དབང་པོའི་ཁྱད་པར་གྱིས་བདག་མེད་གཉིས་སྒོམ་པ་དང་མི་བསྒོམ་པ་གཉིས་ཀ་ཡོད་ལ། འབྲས་བུ་ཐོབ་དུས་ཀྱང་དེ་ལྟར་ཡོད་དོ་ཞེས་གསུངས་ཏེ། འདིར་གང་བཞག་ན་ཐམས་ཅད་མཁྱེན་པ་དྲི་མེད་འོད་ཟེར་གྱི་བཞེད་གཞུང་བཞིན་དུ་རིག་པར་བྱའོ། །ཡང༌། གཟུགས་སོགས་མངོན་སུམ་ཉིད་ཀྱང་ནི། །གྲགས་པས་ཡིན་གྱི་ཚད་མས་མིན། །ཞེས་པ་ལ། དར་ཊིཀ་ཏུ་གསུངས་པའི་དོན་ནི། ཉོན་ཐོས་སྡེ་པ་ན་རེ། གཟུགས་སོགས་བདེན་གྲུབ་ཡིན་ཏེ། དབང་པོ་ལྔ་ལ་དེ་ལྟར་སྣང་བའི་ཕྱིར། །ཞེས་ཟེར། དེ་ལ་འདི་སྐད་ཅེས། ཚུར་མཐོང་གི་དབང་པོ་ལྔ་ཆོས་ཅན། ཁྱོད་གྲགས་པའི་གྲུབ་པའི་ཀུན་རྫོབ་ལ་ཚད་མར་སོང་བ་ཡིན་གྱི་དེ་ཐམས་ཅད་ཀྱི་དེ་ཁོ་ན་ཉིད་ལ་ཚད་མར་སོང་བ་མ་ཡིན་པར་ཐལ། ཏིང་འཛིན་རྒྱལ་པོ་ལས། མིག་དང་རྣ་བ་སྣ་ཡང་ཚད་མ་མིན། །ལྕེ་དང་ལུས་དང་ཡིད་ཀྱང་ཚད་མིན་ཏེ། །གལ་ཏེ་དབང་པོ་འདི་དག་ཚད་ཡིན་ན། །འཕགས་པའི་ལམ་གྱི་སུ་ལ་
ཅི་ཞིག་བྱ། །ཞེས་གསུངས་པ་བཞིན་དུ་ཚུར་མཐོང་གིས་རྟོགས་ན་འཕགས་ལམ་གྱིས་དགོས་པ་མེད་པར་ཐལ་བའི་ཕྱིར་རོ། །ཞེས་གསུངས་ལ། མཁས་པ་ཆེན་པོ་ཐོགས་མེད་ནི། འཇིག་རྟེན་ན་དེ་དག་གྲགས་པ་ཙམ་ཡིན་གྱི་ཚད་མས་ནི་མ་གྲུབ་བོ། །ཞེས་ལེགས་པར་བསྟན་ཏོ། །ཡང༌། གལ་ཏེ་དོན་དམ་མྱ་ངན་འདས། །འཁོར་བ་ཀུན་རྫོབ་དེ་ལྟ་ན། །སངས་རྒྱས་ཀྱང་ནི་འཁོར་འགྱུར་བས། །བྱང་ཆུབ་སྤྱོད་པས་ཅི་ཞིག་བྱ། །ཞེས་པ་ལ། མྱང་འདས་ལ་རང་བཞིན་རྣམ་དག་དང་གློ་བུར་རྣམ་དག་གི་མྱང་འདས་གཉིས་ཕྱེ་མ་ནུས་ན། ལན་མི་ཐེབས་པས། འདི་ལྟར་འགྲེལ་དགོས་ཏེ། ད་ལྟ་སེམས་ཅན་རྣམས་ཀྱང་རང་བཞིན་མྱང་འདས་ཡིན་ཏེ། དེ་རྣམས་དོན་དམ་པར་བདེན་མེད་ཡིན་པའི་ཕྱིར་ཏེ། འདི་ནི་ཆོས་ཐམས་ཅད་ཀྱི་རང་བཞིན་ཡིན་པར། ཤིང་རྟ་ཆེན་པོ་ཀླུ་སྒྲུབ་ཀྱིས། རྟེན་ཅིང་འབྲེལ་འབྱུང་མ་གཏོགས་པའི། །ཆོས་རྣམས་ཡོད་པ་མ་ཡིན་ནོ། །དེ་ཕྱིར་སྟོང་ཉིད་མ་གཏོགས་པ། །ཆོས་འགའ་ཡོད་པ་མ་ཡིན་ནོ། །ཞེས་གསུངས་པ་ལྟར་ཡིན་པའི་ཕྱིར། དེ་ལྟར་ཡིན་ཀྱང་སྒྱུ་མ་ལྟར་འགྲོ་བ་རྣམས་སྲིད་པར་འཁོར་བ་ཡང༌། མདོ་ལས། སྲིད་པའི་འགྲོ་བ་རྨི་ལམ་བཞིན་དུ་འཁོར། །ཞེས་སོ། །དེའི་གནས་ཚུལ་མངོན་དུ་འགྱུར་བའི་ཕྱིར། ཕྱིན་དྲུག་གི་ལམ་སྒྱུ་མ་ལྟར་ཉམས་སུ་བླང་བས། སྒྱུ་མ་ལྟ་བུའི་རྟེན་འབྲེལ་བཅུ་གཉིས་ལུགས་ལྡོག་ཏུ་བཟློག་སྟེ། སྒྱུ་མ་ལྟ་
བུའི་འབྲས་བུ་མངོན་དུ་འགྱུར་ཏེ། དཔེར་ན་སྒྱུ་མའི་རྟ་གླང་གི་རང་བཞིན་མ་གྲུབ་ཀྱང་དེ་ལྟར་སྣང་བ་དེ་དེའི་རྒྱུ་རྐྱེན་རྫས་སྔགས་རྒྱུན་ཆད་ན་དེ་དག་མི་འབྱུང་བ་བཞིན་ནོ། །གལ་ཏེ་རང་རིག་ཡོད་མིན་ན། །རྣམ་ཤེས་དྲན་པར་ཇི་ལྟར། །གཞན་མྱོང་བ་དང་འབྲེལ་བ་ལས། །དྲན་འགྱུར་བྱི་བའི་དུག་བཞིན་ནོ། །ཞེས་པའི་དོན་ནི། རྗེ་ཙོང་ཁ་པ་ཡབ་སྲས་ནི། སྤྱིར་དཔལ་ལྡན་གྲགས་པ་ལ་སོགས་སེམས་ཙམ་པ་རྣམས་ཀྱི་ལུགས་ལ། གང་ཟག་གི་རྒྱུད་ཀྱི་སྔོ་འཛིན་མིག་ཤེས་དེའི་ཡུལ་སྔོན་པོ་ནམ་བཟུང་བ་དང་དུས་མཉམ་དུ། སྔོ་འཛིན་མིག་ཤེས་ཉམས་སུ་མྱོང་བའི་རང་རིག་དེས་ཀྱང་སྔོ་འཛིན་མིག་ཤེས་ཉམས་སུ་མྱོང་བར་འདོད་ལ། དེའི་སྒྲུབ་བྱེད་ཀྱང༌། མྱོང་བའི་རྟགས་སུ་ཡུལ་ཅན་དྲན་ལ། མྱོང་བ་ལ་རང་མྱོང་གཞན་མྱོང་གཉིས་ལས། གཞན་མྱོང་བ་ལ་གཉིས་ཏེ། མིག་ཤེས་གཉིས་ཡོད་དམ། མིག་ཤེས་ཀྱི་སྐད་ཅིག་དང་པོས་ཡུལ་སྔོན་པོ་བཟུང༌། དེའི་སྐད་ཅིག་ཕྱི་མས་དེ་འཛིན་ནམ། དང་པོ་ལྟར་ན་མདོ་ལས། སེམས་ཅན་རྣམས་ཀྱི་རྒྱུད་ནི་རེ་རེ་བའོ། །ཞེས་གསུངས་པ་དང་འགལ་ལོ། །གཉིས་པ་ལྟར་ན། གང་ཟག་དེའི་མིག་ཤེས་སྐད་ཅིག་སྔ་མས་སྔོན་པོ་མཐོང་ལ། སྐད་ཅིག་ཕྱི་མ་དེ་ལོང་བར་ཐལ་ལོ། །དེའི་ཕྱིར་དེ་ནི་རང་མྱོང་ཡིན་ནོ་ཞེས་བཞེད། དེའི་ལན། དཔེའི་སྒོ་ནས་འདེབས་ཏེ། གདུག་ཅན་བྱི་བས་རྨུགས་པ་ལྟ་བུ་ནི། མིག་ཤེས་ཀྱི་སྔོན་པོ་བཟུང་བ་དང་མཚུངས་པར་སྦྱོར་ཞིང༌། དེའི་ཚེ་དུག་ལུས་ལ་ཞུགས་པ་མ་ཚོར་བ་ནི། དེའི་ཚེ་རང་རིག་གིས་མིག་ཤེས་སོགས་ཉམས་སུ་མྱོང་བ་ཚོར་བའི་དཔེ་ཡིན་ལ། དེ་འབྲུག་སྒྲས་བསླང་བ་ནི་རྐྱེན་གྱིས་བསྐུལ་བའི་དཔེ་དང༌།
གང་གི་ཚེ་སྔར་བྱི་བའི་དུག་ཞུགས་པར་ཤེས་པ་ནི། དྲན་པའི་དཔེར་གསུངས། དེ་ལྟར་རང་རིག་གིས་རྣ་ཤེས་སོགས་འཛིན་ཞེས་བློ་རྫས་ཐ་དད་ཡིན་ན། སྔར་བཤད་པའི་ལུགས་དང་འགལ་ལོ། །འོན་ཏེ་ཤེས་པ་མ་ཡིན་ཏེ། མི་ལྡན་པའི་འདུ་བྱེད་ཡིན་ནོ་ཞེ་ན། འོ་ན་དེའི་རང་ཡུལ་འཛིན་མི་ནུས་པར་ཐལ། དེ་ལྡན་མིན་འདུ་བྱེད་ཡིན་པའི་ཕྱིར་རོ། །དེས་ན་རྣ་ཤེས་རང་གིས་རང་མྱོང་བར་འདོད་དགོས་པས། འདི་ལྟ་སྟེ། རང་རིག་མེད་ན་བདག་ཉིད་ནི་རྣ་ཤེས་དྲན་པར་མི་འགྱུར་རོ་ཞེ་ན། མ་ཡིན་ཏེ། རང་མ་མྱོང་ཡང༌། དྲི་སོགས་ཡུལ་མྱོང་ཚེ་ཡུལ་ཤེས་འབྲེལ་བ་ལས་སོ། །དེའི་དཔེ་ནི། བྱི་བའི་དུག་བཞིན་ནོ། །ཡང་གྲུབ་མཐའ་ངན་པ་ཕྱི་རོལ་པའི་ལུགས་ལ། སྤྱིར་ཀུན་བརྟགས་ཀྱི་ལྟ་བ་འཛིན་པ་སུམ་བརྒྱ་དྲུག་ཅུ་ཡོད་ཀྱང༌། བསྡུ་ན་རྟག་ཆད་དུ་ལྟ་བ་གཉིས་སུ་འདུ་ཞིང༌། །དང་པོ་ལའང་བཞི་ལས། དང་པོ་གྲངས་ཅན་པ་ནི། ཤེས་བྱ་ཐམས་ཅད་གྲངས་ཉེར་ལྔར་སྨྲ་བས་ན་དེ་སྐད་དུ་བརྗོད་དེ། དེའང་བདག་ནི། འཇུག་པ་ལས། ཟ་བོ་རྟག་དངོས་བྱེད་པོ་མིན་པའི་བདག །ཡོན་ཏན་བྱར་མེད་མུ་སྟེགས་རྣམས་ཀྱིས་བརྟགས། །ཞེས་པ་ལྟར་ཆོས་ལྔ་ལྡན་ཡིན་ནོ། །གཙོ་བོ་ནི། །རྣམ་འགྱུར་གྱི་རྒྱུ་བྱེད་པ། བསམ་གཏན་གྲུབ་པའི་མངོན་ཤེས་མ་གཏོགས། དྲང་སྲོང་སེར་སྐྱའི་མིག་གིས་ཀྱང་མི་མཐོང་བ། །རྡུལ་མུན་སྙིང་སྟོབས་གསུམ་ཆ་མཉམ་པའོ། །ཆེན་པོའམ་བློ་ཞེས་པ་མེ་ལོང་ངོས་གཉིས་པ་ལྟ་བུ་ཕྱིའི་སྒྲ་སོགས་ཀྱི་རྣམ་འགྱུར་དང་ནང་སྐྱེས་བུའི་གཟུགས་བརྙན་འཆར་བའོ། །ང་རྒྱལ་ནི། རྣམ་འགྱུར། སྙིང་སྟོབས། མུན་པ་ཅན་གྱི་ང་རྒྱལ་ཏེ་གསུམ་
མོ། །དང་པོ་ལས། དེ་ཙམ་ལྔ་འབྱུང་ངོ༌། །དེ་ལས་ནི་འབྱུང་ལྔ་འབྱུང་ངོ༌། །གཉིས་པ་ལས། ངག་དང༌། ལག་པ་དང༌། རྐང་པ་དང༌། འཕོང་དང༌། འདོམ་སྟེ་ལུས་དབང་ལྔ་དང༌། མིག་རྣ། སྣ། ལྕེ། པགས་པའི་དབང་པོ་སྟེ་བློ་དབང་ལྔ་དང༌། ཡིད་དབང་རྣམས་འབྱུང༌། གསུམ་པས་ནི་དེ་དག་གི་གྲོགས་བྱེད་དོ། །དེ་རྣམས་ཀྱང་མུ་བཞིར་འདུ་སྟེ། ཇི་སྐད་དུ། གཙོ་བོ་བྱེད་ཡིན་བྱ་བ་མིན། །ཆེན་པོ་སོགས་བདུན་བྱ་བ་བྱེད། །བཅུ་དྲུག་པོ་ནི་བྱ་བ་ཡིན། །སྐྱེས་བུ་བྱ་མིན་བྱེད་པ་མིན། །ཞེས་པ་ལྟར་ཡིན་ཏེ་གོ་སླ། ཡང་ཉེར་གསུམ་ཀུན་རྫོབ་དང༌། གཙོ་བདག་གཉིས་དོན་དམ་དུ་འདོད་དོ། །དེ་དག་ཤེས་པས་གྲོལ་བར་སྨྲ་སྟེ། རལ་པའམ་སྤྱི་བོའི་ཅོད་པན་སོགས། །ཆ་ལུགས་གང་གིས་གནས་ཀྱང་རུང༌། །དེ་ཙམ་ཉི་ཤུ་ལྔ་ཤེས་ན། །གྲོལ་འགྱུར་འདི་ལ་ཐེ་ཚོམ་མེད། །ཅེས་སོ། །དེ་ལྟར་རྟོགས་ནས་ལམ་བསྒོམ་པས་མངོན་ཤེས་འགྲུབ་སྟེ། དེས་གཙོ་བོ་ལ་བལྟས་པས། དེ་སྐྱེངས་ནས་རྣམ་འགྱུར་རྣམས་བསྡུས་པ་དང༌། སྐྱེས་བུ་ཡན་གར་བར་གནས་པ་ལ་ཐར་པར་འདོད་དོ། །གཉིས་པ་དབང་ཕྱུག་པ་ནི། སྐྱེ་བོ་ཤེས་པ་ཡོད་པ་མ་ཡིན་ཏེ། །བདག་གི་བདེ་སྡུག་བདག་ལ་རང་དབང་མེད། །དབང་ཕྱུག་གིས་བཏང་ཡང་ན་གཡང་སའམ། །མཐོ་རིས་དག་ཏུ་འགྲོ་བ་ཁོ་ནར་འགྱུར། །ཞེས་པ་ལྟར། འགྲོ་བའི་བདེ་སྡུག་དང་ལེགས་ཉེས་བཟང་ངན་ཐམས་ཅད་དབང་ཕྱུག་གིས་བྱས་པར་གྲགས་ཤིང་
དེའང༌། བྲམ་ཟེ་འདོད་ལ་བྲམ་ཟེ་དང༌། །རྒྱལ་རིགས་འདོད་ལ་རྒྱལ་རིགས་དང༌། །ནོར་རྣམས་འདོད་ལ་ནོར་རྣམས་ཀྱི། །མཆོད་སྦྱིན་དམ་པ་ཡང་དག་བརྩམ། །ཞེས་པ་ལྟར། མཆོད་སྦྱིན་ལེགས་ན་མཐོ་རིས་དང༌། །ཉེས་ན་ངན་འགྲོར་འགྲོ་བར་ཁས་འཆེས། དོན་དྲུག་འདོད་པ་ནི་འདིའི་ལུགས་ཀྱི་གྲུབ་མཐའ་སྟེ། དབུ་མ་རྒྱན་ལས། རྫས་དང་ཡོན་ཏན་ལས་དང་སྤྱི། །བྱེ་བྲག་འདུ་བ་རྣམ་པ་དྲུག །ཅེས་སོ། །དེ་ལ་རྫས་ནི། བདག་དུས། ཕྱོགས། ཡིད། ནམ་མཁའ། ས་ཆུ་མེ་རླུང་སྟེ་དགུ་ལས། རྟག་རྫས་ནི་དང་པོ་ལྔ་དང༌། མི་རྟག་པའི་རྫས་ནི་ཕྱི་མ་བཞི་ཡིན་ནོ། །ཡོན་ཏན་ནི། སྒྲ་ནམ་མཁའི་ཡོན་ཏན། དྲི་སའི། རོ་ཆུའི། རེག་བྱ་རླུང་གི། ཁ་དོག་མེའི་ཡོན་ཏན་ནོ། །ལས་ནི་ལྔ་སྟེ། འདེགས་འཇོག་བརྐྱང་བསྐུམས་འགྲོ་བའོ། །སྤྱི་ནི་ཆེན་པོ་དང་ཉི་ཚེ་བ་གཉིས་སོ། །བྱེ་བྲག་ནི། འདྲེ་བར་མི་བྱེད་པའི་ཆོས་སོ། །འདུ་བ་ནི་འགོག་པའི་སྒོ་ནས་ཐ་མི་དད་པར་གནས་པའོ། །ཁྱབ་འཇུག་པ་ནི། རིག་བྱེད་བཞི་སྨྲ་སྟེ། སྐྱེ་བོ་དགའ་བར་བྱེད་པ་སྙན་ངག་རང་སྡེ་རྒྱལ་བར་བྱེད་པ་སྲིད་བསྲུང༌། འདི་ཕྱིའི་དོན་འགྲུབ་པར་བྱེད་པ་མཆོད་སྦྱིན། མཆོག་སྒྲུབ་བྱེད་ངེས་བརྗོད་རྣམས་སོ། །རྒྱལ་བ་པ་ནི། ཚིག་གི་དོན་དགུ་འདོད་དེ། གང་ཞེ་ན། སྲོག་དང༌། ཟག་པ་དང༌། སྡོམ་པ་དང༌། ངེས་པར་རྒ་བ་དང༌། འཆི་བ་དང༌། ལས་དང༌། སྡིག་པ་དང༌། བསོད་ནམས་དང༌། ཐར་པའོ། །འདི་དག་ནི། ཤིང་སེམས་
ཅན་ཡིན་པའི་རྟགས་སུ་འདབ་མ་བཅད་ན་འཁུམ་པ་དང༌། ལྤགས་བཤུས་ན་སྐམ་པ་སོགས་དང༌། ཐར་པ་མདོགས་དབྱིབས་ཅན་ཡིན་པར། ཇི་སྐད་དུ། ཁ་བ་རྒྱ་སྤོས་མེ་ཏོག་དང༌། །བ་ཞོ་བ་མོ་མུ་ཏིག་མདོག །གདུགས་དཀར་བཟུང་བའི་དབྱིབས་འདྲ་བ། །ཐར་པ་ཡིན་པར་རྒྱལ་བས་བཤད། །ཅེས་སོ། །གཉིས་པ་ནི། ཕུར་བུ་པ་སྟེ། འདིས་ནི་ཚེ་སྔ་ཕྱི་མེད་ལ་ཆོས་ཐམས་ཅད་རྒྱུ་མེད་ཡིན་ནོ། །ཞེས་ཟེར་ཏེ། འདི་སྐད་དུ། པདྨ་གེ་སར་སུ་ཡིས་བྱས། །རྨ་བྱའི་རི་མོ་སུ་ཡིས་བྲིས། །ཚེར་མ་རྣོན་པོ་སུ་ཡིས་བརྡར། །ཐམས་ཅད་རྒྱུ་མེད་ངོ་བོས་བྱུང༌། །ཞེས་སོ། །དེ་རྣམས་ལ་ཏ་རྐ་སྡེ་ལྔ་ཞེས་བྱའོ། །འགོག་ཚུལ་ནི་གཞུང་ན་གསལ་ལོ། །ཡང་དབུ་མའི་གཏན་ཚིགས་ལྔ་སྟོན་ཏེ། དང་པོ་གཅིག་དུ་བྲལ་གྱི་གཏན་ཚིགས་ནི། དོན་དུ་སྣང་བ་འདི་ཆོས་ཅན། དངོས་པོ་དང་དངོས་མེད་ཀྱི་མཐའ་དང་བྲལ་ཏེ། གཅིག་དང་དུ་མ་གང་དུའང་མ་གྲུབ་པའི་ཕྱིར། གཉིས་པ་རྡོ་རྗེ་གཟེགས་མའི་གཏན་ཚིགས་ནི། སྣང་བཞིན་པ་འདི་དག་ཆོས་ཅན། དོན་དམ་པར་དོན་མེད་ཡིན་པར་ཐལ། བདག་གཞན་གང་ལས་ཀྱང་མི་སྐྱེ་ལ་རྒྱུ་མེད་ཀྱང་མ་ཡིན་པའི་ཕྱིར། གསུམ་པ་ཡོད་མེད་སྐྱེ་འགོག་ནི། སྣང་བའི་དངོས་པོ་འདི་དག་ཆོས་ཅན། རང་བཞིན་དངོས་མེད་ཡིན་པར་ཐལ། ངོ་བོ་ཡོད་མེད་གང་དུའང་མ་གྲུབ་ཅིང་སྐྱེ་བ་དང་བྲལ་བའི་ཕྱིར་རོ། །བཞི་པ་དོན་བྱེད་འགོག་པ་ནི། ཤེས་བྱར་སྣང་ཙམ་ཆོས་ཅན། དངོས་པོར་མ་གྲུབ་པར་
ཐལ། དོན་བྱེད་པ་མ་གྲུབ་པའི་ཕྱིར། ལྔ་པ་རྟེན་འབྲེལ་ཆེན་པོ་ནི། སྣང་ཙམ་ཆོས་ཅན། རང་བཞིན་མེད་དེ། རྟེན་འབྲེལ་ཡིན་པའི་ཕྱིར། ཞེས་པའོ། །དེ་དག་གི་ཚུལ་ཞིབ་པར་ནི་གཞན་ལས་རྟོགས་པར་བྱའོ། །རྒྱལ་སྲས་སྤྱོད་པ་ཕྱིན་དྲུག་ལ། །འཇུག་པའི་ཐབས་མཆོག་སྟོན་བྱེད་པའི། །གཞུང་བཟང་ནོར་བུའི་དོ་ཤལ་འདི། །འཇམ་དཔལ་དཔའ་བོའི་དགོངས་རྒྱན་ཡིན། །དེ་ཡི་རྟོགས་དཀའི་གནས་འགའ་ཞིག །བསྡུས་ཏེ་སྟོན་པའི་འབེལ་གཏམ་འདིར། །ཚོང་པར་འོ་མ་འཚོང་བའི་དཔེར། །གྱུར་པའི་ནོངས་ཚོགས་མཁས་ལ་འཆགས། །དེ་ལས་ཐོབ་པའི་རྣམ་དཀར་ཡོན་ཏན་བདུད་རྩིའི་ཀླུང༌། །ཕན་དང་བདེ་བའི་རླབས་ཕྲེང་འབུམ་དུ་གཡོ་བཞིན་པར། །ཀུན་མཁྱེན་ཡེ་ཤེས་ཆུ་ཡི་ཕུང་པོར་འདྲེས་གྱུར་ཏེ། །དོན་གཉིས་ལྷུན་གྲུབ་ཡིད་བཞིན་དབང་པོའི་མཛོད་གྱུར་ཅིག། །།བྱང་ཆུབ་སེམས་དཔའི་སྤྱོད་པ་ལ་འཇུག་པའི་དཀའ་གནས་གསལ་བར་བྱེད་པ་བེཌཱུར་དབང་པོའི་མེ་ལོང་ཞེས་བྱ་བ་སྟོན་པ་ཐམས་ཅད་མཁྱེན་པ་ཤཱཀྱའི་རྒྱལ་པོའི་བསྟན་པ་ལ་མངོན་པར་དད་པའི་གཞོན་ནུ་འཇིགས་མེད་པས་ཆོ་འཕྲུལ་ཟླ་བའི་ཡར་ངོ་ཨིནྡྲ་ཝར་མིའི་མཆོད་པའི་དུས་ཆེན་ལ་སྦྱར་བའོ།། །།
བདེ་སྨོན་གཞུང་གི་ཟིན་ཐོ།
༈ །།བདེ་སྨོན་གཞུང་གི་ཟིན་ཐོ་དུམ་དུམ་ཁྲིགས་བཞུགས། བླ་མ་ལ་ཕྱག་འཚལ་ལོ། །བདེ་སྨོན་བཤད་པའི་ཟིན་བྲིས་འཐོར་བུ་འགོད་དེ། ཐོག་མར་ཨེ་མ་ཧོ་ཞེས་པའི་སྐབས། སེམས་ཅན་ཚད་མེད་པ་མཐའ་དག་གི་དོན་དུ་དམིགས་པ་དང༌། དུས་ཚད་མེད་པ་ནམ་མཁའ་ཇི་སྲིད་དུ་གོ་ཆ་བགོས་པ་དང༌། དམ་
བཅའ་ཚད་མེད་པ་སེམས་ཅན་ཐམས་ཅད་ཀྱི་སྡུག་བསྔལ་བསལ་ནས་མ་སྨིན་པ་སྨིན་པ་དང༌། སྨིན་པ་གྲོལ་བར་བྱའི་ཞེས་ཐུགས་བསྐྱེད་པ་ངོ་མཚར་བ་དང༌། དེའི་ཆེད་དུ་བྱང་ཆུབ་སེམས་དཔའི་སྤྱོད་པ་རྒྱ་མཚོའི་སྒོ་ཚད་མེད་པ་ནས་ཡོངས་སུ་རྫོགས་པར་མཛད་པའི་བརྩོན་འགྲུས་ཀྱི་འཇུག་པ་ངོ་མཚར་བ་དང༌། ཤིན་ཏུ་རྣམ་པར་དག་པའི་ཞིང་དང༌། ཡང་དག་པར་ངེས་པའི་ཕུང་པོ་ཤ་སྟག་ཏུ་གྱུར་པའི་འཁོར་དང༌། ཞིང་ཚད་མེད་པར་རྒྱས་པར་འགེང་བའི་གྲགས་པ་དང་ལྡན་པའི་སངས་རྒྱས་ཀྱི་ཆེ་བ་མི་ཟད་པའི་འབྲས་བུ་ཡོན་ཏན་ངོ་མཚར་བ་སྟེ། དེ་བཞིན་གཤེགས་པ་ཚེ་དཔག་མེད་ཀྱི་རྣམ་པར་ཐར་པ་མདོར་བསྟན་པའོ། །དེ་ནས་གཞུང་དོན་བདེ་བ་ཅན་དུ་སྐྱེ་བའི་རྒྱུ་བཞིའི་སྐབས། སངས་རྒྱས་རྗེས་སུ་དྲན་པ་དང༌། དགེ་འདུན་རྗེས་སུ་དྲན་པ་སྒོམ་པ་གཙོ་བོར་བྱས་པའི་གདམས་ངག །དེ་བཞིན་གཤེགས་པ་འོད་དཔག་མེད་སྲས་དང་བཅས་པའི་སྐུའི་རྣམ་པ་ལ་བརྟེན་ནས་ཡང་དང་ཡང་དུ་ཡིད་ལ་བྱས་ཏེ་གུས་པ་བསྐྱེད་པ་ནི། དེ་ན་བཅོམ་ལྡན་སོགས་སོ། །མོས་གུས་ཕྱག་ལ་སོགས་ཀྱི་སྐབས། གུས་པ་ཞེས་བྱ་བ་ནི། ཡོན་ཏན་དང་ཡོན་ཏན་ཅན་ལ་བཀུར་བའི་ངོ་ཚ་ཤེས་པ་ཡིན་ལ། དེས་ཀུན་ནས་བསླང་བའི་ལུས་ངག་གི་བྱ་བ་དང་བཅས་པས་ཕྱག་འཚལ་བ་ཡིན་ནོ། །ཆོས་སྐུ་སྣང་བ་མཐའ་ཡས་ཞེས་པ་ལ། སྤྱིར་ཆོས་སྐུ་ལ་འབྲས་བུ་ཆོས་སྐུ་དང་ཡེ་ཤེས་ཆོས་སྐུ་གཉིས་ཡོད་པ་ཡིན་ཞིང༌། སྔ་མ་སྤྱི་དང༌། ཕྱི་མ་དེའི་བྱེ་བྲག་
ཡིན་ལ། འདིར་བཤད་པ་འབྲས་བུ་ཆོས་སྐུར་འཐད་དོ། །འབྲས་བུ་ཆོས་སྐུ་དེ་ལ་དབྱེ་ན་སྐུ་བཞི་ཡོད་པའི་ནང་ཚན་འདི་སྤྲུལ་སྐུ་སྟེ། ངེས་པ་ལྔ་ལྡན་གྱི་གཟུགས་སྐུ་ནི་མ་ཡིན་ལ། གཟུགས་སྐུ་ནི་ཡིན་པའི་ཕྱིར་རོ། །ངེས་པ་ལྔ་ལྡན་མིན་ལུགས་ནི། དུས་ངེས་པ་འཁོར་བ་ཇི་སྲིད་དུ་བཞུགས་པར་སྟོན་པའི་གཟུགས་སྐུ་མིན་པའི་ཕྱིར་ཏེ། སྐུ་ཚེའི་ཚད་འོག་ཏུ་བཤད་པའི་ཕྱིར་རོ། །ཕྱག་གཡས་འོད་ཟེར་ལས་སྤྲུལ་སོགས་ཀྱི་སྐབས། སྤྱིར་འཕགས་པ་སྤྱན་རས་གཟིགས་ཉིད་དེ་བཞིན་གཤེགས་པ་འོད་དཔག་མེད་ཀྱི་འཁོར་དུ་བཤད་པ་དང་སྤྲུལ་པར་བཤད་པ་སོགས་བཤད་ཚུལ་དུ་མ་ཡོད་ཀྱང༌། དོན་ལ་འགལ་བ་མེད་དོ། །སོར་ཕྲེང་གིས་ཞུས་པའི་མདོ་ལས། །དེ་བཞིན་གཤེགས་ཀྱིས་སྒྱུ་མ་སྤྲུལ་བ་ནི། །སེམས་ཅན་མང་པོ་དག་གིས་མི་ཤེས་ཏེ། །སངས་རྒྱས་སྒྱུ་མའི་རྒྱལ་པོའི་སྐུ་ཆེ་ཞིང༌། །དེ་བཞིན་གཤེགས་པ་ཐབས་ཀྱི་སྐུ་མངའ་འོ། །ཞེས་གསུངས་པ་ལྟར་སངས་རྒྱས་རྣམས་ཀྱི་ཡུལ་བསམ་གྱིས་མི་ཁྱབ་པའི་ཕྱིར་ཏེ་ཐམས་ཅད་མཁྱེན་པའི་ཡེ་ཤེས་གཅིག་ཉིད་སྐུ་ཐ་དད་པ་དང༌། གདུང་ཐ་དད་པ་དང༌། མཚན་ཐ་དད་དུ་སྣང་བའི་ཕྱིར་རོ། །འདི་གཞན་འགའ་ལའང་མཚུངས་སོ།། ༈ །སྟོང་གསུམ་འཇིག་རྟེན་རབ་འབྱམས་སོགས་སྐབས། མགོན་པོ་འོད་དཔག་མེད་ཀྱི་མཚན་ཐོས་པ་ཙམ་ལའང་བསོད་ནམས་དེ་ཙམ་དུ་འབྱུང་བའི་རྒྱུ་མཚན་ནི། མཚན་དེ་ཉིད་དེ་བཞིན་གཤེགས་པའི་སྨོན་ལམ་དང༌།
ཚུལ་ཁྲིམས་དང༌། ཏིང་འཛིན་དང༌། མངོན་པར་ཤེས་པའི་སྟོབས་ཀྱིས་བྱིན་གྱིས་རླབས་པའི་མཐུ་ཁྱད་པར་ཅན་དུ་གྱུར་པའི་ཕྱིར་དང༌། དེ་ཉན་པ་པོས་དད་པའི་བློས་མཉན་ན་ངོ་བོ་ཉིད་ཀྱི་དགེ་བ་དང༌། ཀུན་སློང་གི་དགེ་བ་དང༌། མཚུངས་ལྡན་གྱི་དགེ་བར་ཡང་འགྱུར་བའི་ཕྱིར་རོ། །དེ་གལ་ཏེ་བྱང་ཆུབ་སེམས་ཀྱིས་ཟིན་ན་ནི་ཉན་རང་གི་དགེ་བ་ཐམས་ཅད་ཟིལ་གྱིས་གནོན་ཏོ། ༈ །མཆོད་པའི་སྐབས། ལར་མཆོད་པ་ཞེས་བྱ་བ་ངོ་བོ་མ་ཆགས་པ་ཀུན་སློང་སེམས་པ་དང་མཚུངས་པར་ལྡན་པ་ལུས་ངག་གི་རྣམ་རིག་དང་བཅས་པ་ཡིན་ལ། མ་ཆགས་པའི་བསམ་པ་དགེ་བ་མེད་བཞིན་དུ་ནོར་ཆེན་པོ་ཕུག་ཏུ་སྦས། ཕྲན་ཚེགས་ཀྱིས་མཆོད་ཁྲལ་འཇལ། བཟང་པོ་རང་གིས་སྤྱད། ངན་དགུས་དཀོན་མཆོག་གསུམ་བསླུ་རྩིས་བྱས་པས་མི་ཡོང་སྟེ། པུ་ཏོ་བའི་ཞལ་ནས། སྤང་སྤོས་སྣ་ཚ་ཏིང་ངེ་བར་ཐབ་ཏུ་འདེབས་ནས། ཙན་དན་ཨ་ཀ་རུ་སོགས་སྦྱར་བའི་སྤོས། །ཞེས་ལོང་བས་མིག་ལྡན་ལ་རྫུན་གཏོང་བ་མཚར་ཞེས་གསུངས་པ་ལྟར་ཡིན་ནོ། ༈ །བཤགས་པའི་སྐབས། ཕ་མས་ཐོག་དྲངས་ཞེས་པ་ཚེ་འདིའི་ཕ་མའི་དབང་དུ་མཛད་ཀྱི། ཕ་མར་གྱུར་མྱོང་གི་དབང་དུ་མཛད་པ་མིན་ཏེ། ཡིན་ན་བདག་སོགས་འགྲོ་ཀུན་གྱི་ཞེས་པ་དོན་མེད་དུ་འགྱུར་བའི་ཕྱིར་རོ། །མི་དགེ་བའི་ངོ་བོ་ནི། ངོ་ཚ་མེད་པ་དང༌། ཁྲེལ་མེད་གཉིས་དང༌། དེ་དང་མཚུངས་པར་ལྡན་པ་དང༌། དེས་ཀུན་ནས་བསླང་བ་རྣམས་ཡིན་ལ། དབྱེ་ན་སྤྱིར་རྣམ་གྲངས་ཚད་མེད་
ཀྱང་ཆེ་ལོང་ཙམ་བསྡུས་ནས་མི་དགེ་བ་བཅུར་བཤད་དོ། །དེ་དག་ཆེ་ལོང་ཙམ་ཡིན་པའི་རྒྱུ་མཚན་ནི། ལུས་ངག་གི་མི་དགེ་བདུན་གྱི་སྦྱོར་མཇུག་སོགས་འདི་དག་ཏུ་མ་བསྡུས་པའི་ཕྱིར་རོ། །འོན་ཀྱང༌། མཛོད་ལས། དེ་ལས་ཆེ་ལོང་བསྡུས་ནས་ནི། །ལས་ཀྱི་ལམ་ནི་བཅུར་གསུངས་སོ། །ཞེས་པ་ལྟར་བཅུར་བཤད་དོ། །མཚམས་མེད་ལྔ་བརྩི་བའི་སྐབས། ཕ་བསད་པ། མ་བསད་པ། སློབ་དཔོན་དགྲ་བཅོམ་བསད་པ་སྟེ་གསུམ་དང༌། རྒྱལ་བའི་ཡེ་ཤེས་ཆོས་སྐུ་ལ་ཁྲག་བྱུང་བ་དགེ་འདུན་འཁོར་ལོའི་དབྱེན་དང༌། གཟུགས་སྐུ་ལ་ཁྲག་བྱུང་བ་ནི། སངས་རྒྱས་སྤྲུལ་པའི་སྐུ་ལ་མཚོན་གྱིས་རྨས་པ་སོགས་ཏེ་འདི་ལྟར་བཞག་ན་རུང་གི་གཞན་དུ་ན་གཞུང་ལུགས་མང་པོ་དང་མི་འགྲིགས་སོ། །སློབ་དཔོན་དགྲ་བཅོམ་པ་ཞེས་པ་དགྲ་བཅོམ་ཀྱང་ཡིན་ལ་རང་གི་སློ་དཔོན་ཡང་ཡིན་པའི་གཞི་མཐུན་པ་ཞིག་དགོས་ཟེར་བ་མིན་གྱི། སྤྱིར་དགྲ་བཅོམ་རྣམས་ཆོས་ཀྱི་སློབ་དཔོན་ཡིན་པ་ལ་གོ་རྒྱུ་ཡིན། །དེ་ནས་ཉེ་བའི་མཚམས་མེད་བརྩི་བ་ནི། དགེ་སློང་དགེ་ཚུལ་བསད་དང་ཞེས་པ་བྱང་སེམས་ངེས་གནས་དང༌། ཐེག་དམན་སློབ་པ་འཕགས་པ་གཉིས་གང་རུང་ཡིན་པའི་དགེ་སློང་དགེ་ཚུལ་ལ་བྱ་དགོས་ཀྱི། དེ་ལྟ་མིན་ན་ལུང་དང་འགལ་ལོ། །དགེ་སློང་དགེ་ཚུལ་སྨོས་པ་ནི་མཚོན་པའི་སྒོ་ཙམ་སྟེ། གོང་གི་གཉིས་པོ་གང་རུང་ཞིག་ཡིན་ན་རབ་བྱུང་མིན་ཀྱང་འདིའི་གྲངས་སུ་བསྡུ་དགོས་སོ། །མཚོན་སྒོ་ཙམ་སྨོས་པས་གཞན་འགའ་ཞིག་ཀྱང་ཞར་ལ་གོ་དགོས་པ་ཡོད་དེ། དཔེར་ན་
འཕགས་པ་ཞི་བ་ལྷས། བསྡུས་འཇོམས་རིས་འཇོམས་སྐྲག་པ་དག །སེམས་ཀྱི་རྨ་ལྟ་ཅིས་མི་བསྲུང༌། །ཞེས་པ་བཞིན་ནོ། །བཙུན་མ་ཕབ་ཅེས་པའང༌། བཙུན་མ་ཙམ་མིན་གྱི་མ་ཡང་ཡིན་ལ་དགྲ་བཅོམ་མ་ཡང་ཡིན་པའི་གཞི་མཐུན་པ་ཞིག་སུན་བྱུང་བ་དེ་ཡིན་ནོ། །དེ་ནས་སྐུ་གཟུགས་མཆོད་རྟེན་ལྷ་ཁང་བཤིག་པ་སོགས་ཞེས་པ་ནི། མཆོད་རྟེན་བཤིག་པ་ཕྱོགས་མཐུན་དང་བཅས་པའོ། །སོགས་ཀྱི་སྒྲས་དགེ་འདུན་གྱི་འདུ་སྒོ་ཕྲོགས་པ་བསྟན་ཏོ། །ཁམས་གསུམ་སེམས་ཅན་བསད་ལས་སོགས་ཀྱི་སྐབས། བྱང་ཆུབ་སེམས་དཔས་ཁམས་གསུམ་གྱི་སེམས་ཅན་ལམ་ལ་མ་ཞུགས་པ་རྣམས་བསད་ཀྱང་དེའི་དགེ་རྩ་འཆད་པ་དང༌། གོ་ཆ་གཞི་ནས་བགོ་བ་མི་དགོས་ཀྱི། བྱང་ཆུབ་སེམས་དཔའ་ལ་ཁྲོས་ཤིང་ཚིག་བརླང་པོ་བརྗོད་ན་བྱང་ཆུབ་སེམས་དང་ཡོངས་སུ་བསྔོ་བས་ཟིན་ཀྱང་རུང་མ་ཟིན་ཀྱང་རུང་སྟེ་དགེ་བའི་རྩ་བ་སྔར་བསགས་པ་རྣམས་འཇོམས་ཤིང༌། ཁྲོ་བའི་ཡུལ་ལུང་བསྟན་ཐོབ་པ་ཞིག་ཡིན་ན་ཁྲོ་བ་པོས་གོ་ཆ་གཞི་ནས་བགོ་དགོས་ཏེ། སྒོ་གཉིས་པོ་དེ་ལ་དགོངས་སོ། །དགེ་བའི་ཕན་ཡོན་སོགས་ཀྱི་སྐབས། ཚེ་སྔ་ཕྱི་ལས་རྒྱུ་འབྲས་སོགས་མི་བདེན་ཏེ་མེད་དོ་སྙམ་པའི་ལོག་ལྟ་དེ་མཚམས་མེད་པའི་ལས་ལྔ་བས་ཀྱང་ཐུ་བར་བཤད་པ་ནི། དགེ་རྩ་འཆད་པའི་སྒོ་ནས་ཡིན་གྱི་རྣམ་སྨིན་གྱི་སྒོ་ནས་མཚམས་མེད་པ་ལས་ཐུ་བ་ཙམ་མིན་ནོ། །ཐར་མེད་ཅེས་པ་ནི་དམན་ལ་དགག་སྒྲ་སྦྱར་ནས་བསྐལ་པ་ཤིན་ཏུ་མང་པོར་ངན་སོང་ལས་མི་ཐར་བ་ལ་བྱ་ཡི་
རིགས་གཏན་ཆད་འདོད་པ་ནི་མིན་ནོ། །ངོ་ཚ་འཇིགས་སྐྲག་འགྱོད་པ་ཆེན་པོས་བཤགས་ཞེས་པ་ལ། ངོ་ཚ་ནི་བདག་གམ་ཆོས་ཀྱི་དབང་དུ་བྱས་ནས་སྡིག་པ་ལ་འཛེམ་པ་སྟེ། བདག་འཕགས་པ་རྣམས་ཀྱི་རྟགས་ངུར་སྨྲིག་གི་རྒྱལ་མཚན་ཅན་ཡིན་ན། བདག་གིས་ཁ་ན་མ་ཐོ་བ་བགྱིད་དུ་ག་ལ་རུང་སྙམ་པ་སོགས། ལས་འདི་ནི་དམ་པའི་ཆོས་དང་འགལ་ཏེ། འདི་འདྲ་དག་བྱེད་ན་འབྲས་བུ་ངན་སོང་དུ་མཆིའོ། །ཞེས་དེ་བཞིན་གཤེགས་པས་གསུངས་སོ་སྙམ་དུ་སྡིག་ལ་འཛེམ་པའོ། །འདི་འཇིགས་སྐྲག་ཅེས་པ་ནི། ཁྲེལ་ཡོད་པ་སྟེ། དེ་འཇིག་རྟེན་གྱི་དབང་དུ་བྱས་ནས་ཉེས་པ་ལ་འཇིགས་པའོ་ཞེས། ཕུང་ལྔའི་རབ་བྱེད་ཀྱི་ཊིག་དག་ཏུ་བཤད་དེ། དོན་ནི་གང་དག་གིས་ལས་འདི་ལྟ་བུ་བྱས་པ་འཇིག་རྟེན་གྱི་སྐྱེ་བོ་ཡ་རབས་རྣམས་ཀྱིས་ཐོས་ནས་དེ་ལ་སྨད་པ་དང༌། འཕྱ་བར་བྱས་པ་ག་གེ་མོ་ཞིག་བདག་གིས་ཤེས་ཏེ། ད་བདག་གིས་ཀྱང་འདི་བྱས་ན་གཞན་དག་གིས་སྨོད་པར་འགྱུར་རོ་སྙམ་དུ་སྐྲག་པའོ། །གཞན་ཡང་སྐྱེས་རབས་ལས། མ་མཐོང་བཞིན་དུ་སྡིག་པ་བྱས་ན་ཡང༌། །དུག་ཟོས་བཞིན་དུ་བདེ་བར་ག་ལ་འགྱུར། །ལྷ་དང་རྣལ་འབྱོར་ཅན་གྱི་མི་དག་གིས། །རྣམ་དག་མིག་གིས་མི་མཐོང་མི་སྲིད་དོ། །ཞེས་པ་ལྟར་ལས་འདི་བྱས་ན་འཕགས་པ་རྣམས་དང་ལྷ་རྣམས་ཀྱིས་ཁྲེལ་དུ་འོང་ངོ་སྙམ་ནས་འཇིགས་ཤིང་སྐྲག་པའམ་ཁྲེལ་ཡོད་ཡིན་ནོ། །འགྱོད་པ་ལ་སྤྱིར་དགེ་མི་དགེ་ལུང་མ་བསྟན་དུ་མ་ཡོད་ཀྱང༌། འདི་ནི་མི་དགེ་བ་ལ་ངན་
པར་བྱས་པའི་དངོས་པོར་ཤེས་ཏེ་ཡིད་ལ་བཅག་པའི་རྣམ་པ་དེ་ཡིན་ནོ། ༈ །ཡི་རང་སྐབས། དེའི་བསོད་ནམས་མཉམ་དུ་ཐོབ་པར་གསུངས། །ཞེས་པ་ནི། ཡི་རང་གི་ཡུལ་དང་ཡི་རང་བྱེད་པ་པོ་གཉིས་རྒྱུད་ཚོད་མཚུངས་པའི་དབང་དུ་མཛད་ལ། གཞན་དུ་ན། ཡི་རང་དང་ཡི་རང་གི་ཡུལ་གཉིས་ལས་ཡི་རང་བསོད་ནམས་ལྷག་པ་བྱང་ཆུབ་སེམས་དཔས་ཉན་རང་གི་དགེ་བ་ལ་ཡི་རང་བ་ལྟ་བུ་དང༌། ཡི་རང་གི་ཡུལ་གྱི་བསོད་ནམས་ལྷག་པ་སོ་སོའི་སྐྱེ་བོས་སངས་རྒྱས་འཕགས་པའི་དགེ་ཚོགས་ལ་ཡི་རང་བ་ལྟ་བུ་མང་དུ་ཡོད་དོ། ༈། གསོལ་གདབ་སྐབས། ཆོས་ཀྱི་འཁོར་ལོ་ལ་བཞེད་ཚུལ་མང་ཡང་འདིར་མཐོང་སྒོམ་མི་སློབ་ལམ་རྣམས་ཡིན་ལ། དེ་ཉིད་དེ་བཞིན་གཤེགས་པས་ཆོས་བསྟན་པ་ལ་བསྟེན་ནས་གདུལ་བྱའི་རྒྱུད་ལ་མངོན་དུ་སྣང་བར་བྱས་པ་ནི་ཆོས་འཁོར་བསྐོར་བ་ཡིན་ལ། དེ་དོན་དུ་གཉེར་བའི་འདུན་པ་ཤུགས་དྲག་ཏུ་སྐྱེད་པ་ནི་ཆོས་འཁོར་བསྐོར་བར་བསྐུལ་བའམ་གསོལ་བ་གདབ་པ་ཡིན་ནོ། ༈ །བཞུགས་གསོལ་སྐབས། ལྷག་བཅས་ཀྱི་ས་ནས་ལྷག་མེད་ཀྱི་དབྱིངས་སུ་ཞུགས་པ་ནི་མྱ་ངན་ལས་འདས་པ་ཞེས་བྱ། ལྷག་མ་ཞེས་བྱ་བ་ནི། ཉེར་ལེན་གྱི་ཕུང་པོ་ལ་གདམས་པ་སྤྱིར་བཏང་ཡིན་ཞིང༌། སངས་རྒྱས་འཕགས་པ་ནི་ཉེར་ལེན་གྱི་ཕུང་པོ་མི་མངའ་མོད་ཀྱི་ཚུར་མཐོང་གི་སྣང་ངོར་སྐྱེ་བ་དང༌། འཆི་བ་ལྟར་སྟོན་པའི་ཚུལ་དབང་བཙན་དུ་བྱས་ནས། ཞིང་འགའ་ཞིག་ཏུ་གཟུགས་སྐུའི་རྣམ་རོལ་བསྡུས་པ་ཙམ་ལ་དེ་སྐད་ཅེས་བཏགས་
ལ། བློ་ལྡན་རྣམས་ཀྱིས་སེམས་ཅན་ལོང་བ་འདྲེན་པ་མེད་པ་རྣམས་ཀྱི་དོན་དུ་དེ་བཞིན་གཤེགས་པ་སྲས་དང་སློབ་མར་བཅས་པ་ཡུན་རིང་དུ་བཞུགས་པར་གསོལ་བ་གདབ་པ་སྟེ། ངོ་བོ་ནི་འདུན་པ་ཡིན་ནོ། །བསྔོ་བ་ཁྱད་ཆོས་དྲུག་ལྡན་ནི། སེམས་ཅན་ཐམས་ཅད་ཀྱི་དོན་དུ་བསྔོ་བ། དགེ་བའི་རྩ་བ་ཐམས་ཅད་བསྔོ་བ། སངས་རྒྱས་ཀྱི་སར་བསྔོ་བ། བདེན་མེད་རྟོགས་པས་ཟིན་པ། ངོ་བོ་འདུན་པས་བསྡུས་པ། དགེ་བ་གོང་འཕེལ་བྱེད་པ་རྣམས་སོ། ༈ །དེ་ནས་བདེ་བ་ཅན་དུ་སྐྱེ་བའི་རྒྱུ་གསུམ་པ་བཤད་པའི་སྐབས། བྱང་ཆུབ་མཆོག་ཏུ་སེམས་བསྐྱེད་པའི་ཚུལ་བཤད་པ་ནི། འཁོར་བའི་ཉེས་དམིགས་སྨོས་པའི་རྒྱུ་མཚན། ཇོ་བོ་བཀའ་གདམས་པའི་མན་ངག་ཏུ། འོ་སྐོལ་སེམས་ཅན་མ་བསྒྲལ་བ་བསྒྲལ་ལོ་ཞེས་དམ་བཅའ་ཧ་ཅང་ཆེས་ཏེ། རང་ཉིད་འཁོར་བ་ལ་གཞལ་ཡས་ཁང་དུ་མཐོང་བ་འདི་འདྲས་མི་ལྟོ་གསུངས་པ་དང༌། ཡང་སྐབས་འདི་ཉིད་དུ་མི་རྟག་པ་བསྒོམ་ཚུལ་བསྟན་པའང༌། དཔེ་ཆོས་སུ། བྱང་ཆུབ་སེམས་དཔའ་གཞན་དོན་བྱེད་པ་པོ་དེ། བློ་སྣ་ཐུང་སྤུད་དེ། ཤེས་པ་ཙབ་ལིང་བ་ཞིག་དགོས་གསུངས་པ་ལྟར་ཡིན་ནོ། །དེའི་གནད་ཀ་ཅི་ཡིན་ན་བྱང་ཆུབ་མཆོག་གི་སེམས་སྐྱེ་བ་ལ་རྩ་བ་སྙིང་རྗེ་ཆེན་པོ་ཡོད་དགོས། དེ་རྒྱུ་ལ་སྐྱེ་བ་ལ་སེམས་ཅན་ཡིད་འོང་གི་རྣམ་པར་འཆར་བ་ཞིག་དང༌། དེ་དག་སྡུག་བསྔལ་བའི་རྣམ་པ་ཅན་དུ་ཤེས་པ་གཉིས་གལ་ཆེ། དེ་ལས་སྔ་མ་ནི། བདག་དང་བདག་ལ་འབྲེལ་ཐོགས་
ཀུན། །ཞེས་པའི་སྐབས་སུ་བསྟན་ཏེ། བདག་དང་སེམས་ཅན་གཞན་རྣམས་ཀུན། །ཞེས་མ་གསུངས་པའི་རྒྱུ་མཚན་སེམས་ཅན་གཞན་ཐམས་ཅད་ཐོག་མ་མེད་པའི་དུས་ནས་འོ་སྐོལ་ལ་བྱམས་པའི་དྲིན་གྱིས་འབྲེལ་བ་མ་ཐོགས་པ་མེད་དོ་ཞེས་ཚིག་གི་རོ་ནུས་བཏོན་པའི་ཕྱིར་རོ། །ཕྱི་མ་ནི། ཐོག་མ་མེད་ནས་ད་ལྟའི་བར། །སོགས་ཀྱིས་བསྟན་ཏེ། འཁོར་བའི་སྡུག་བསྔལ་གྱིས་མནར་ཡུན་རིང་བ་དང༌། འཁོར་བའི་བདེ་བ་ལ་ཡིད་རྟོན་མེད་པ་དང༌། འཁོར་བ་ངན་སོང་གི་སྡུག་བསྔལ་དོས་དྲག་པ་ལ་སོགས་པས་བསྟན་པའོ། །དེས་ན་འཆི་བ་མི་རྟག་པའང་འགྱུར་བའི་སྡུག་བསྔལ་སྟོན་པའི་ཕྱིར་ཡིན་ནོ། །དེ་སྐབས། ས་ཆ་ཡུལ་རིས་ཁང་ཁྱིམ་རྣམས། །སོགས་ཀྱི་སྐབས། བདེན་པར་མ་གྲུབ་ཤེས་པར་ཤོག །ཞེས་པ་དེ་ནི་རྟོག་པས་བཞག་པ་མ་གཏོགས་པ་རང་བཞིན་གྱིས་གྲུབ་པ་མེད་དོ་སོགས་ཀྱི་དོན་དུ་མི་བྱ་སྟེ། དེ་འདྲ་ནི་འདིའི་སྐབས་སུ་མ་བབས་པའི་ཕྱིར་རོ། །དེས་ན་འདི་ནི་དཔེར་ན། མི་དེའི་གཏམ་མི་བདེན་ཟེར་བ་དེ་གཏམ་དེས་ཕུགས་མི་ཐུབ་པ་ཞིག་ལ་གོ་རྒྱུ་ཡིན་པ་ལྟར། ཚེ་འདིའི་གནས་ཁང་ཡོ་བྱད་འཁོར་འབང་སོགས་ཅི་ཙམ་ཡོད་ཀྱང་འཆི་དུས་རྗེས་སུ་མི་འབྲང་བའི་ཕྱིར། དེ་དག་གིས་ནི་མཐའ་མི་ཐོན་ནོ། །ཞེས་པའི་དོན་དུ་བཤད་དགོས་སོ། །དེ་མན་ཆད་ཀྱི་འབྲུ་ནོན་ཞིང་བཀོད་སོགས་ནི་གོ་སླ་ཞིང༌། རྒྱ་ཆེར་དཀོན་མཆོག་བརྩེགས་པའི་མདོར་བལྟ་དགོས་པས་མ་བྲིས་སོ། །སྤོས་ཆུའི་ཆུ་ཀླུང་ཡན་ལག་
བརྒྱད་ལྡན་མང༌། །ཞེས་པའི་ཡན་ལག་བརྒྱད་ནི། བསིལ་བ། འཇམ་པ། རོ་ཞིམ་པ། སྲང་ལ་གཞལ་ན་ཡང་བ། རྙོགས་པ་དྭངས་པ། སྲོག་ཆགས་སོགས་ཀྱི་དྲི་མ་མེད་པ། འཐུང་ན་མགྲིན་པ་ལ་བྱམས་པ། ལྟོ་བ་ལ་ནད་ཀྱི་རྒྱུར་མི་འགྱུར་བའི་གནོད་པ་མེད་པ་རྣམས་སོ། །རིན་ཆེན་སྣ་བདུན་ཐེམ་སྐས་ཞེས་པའི་རིན་ཆེན་སྣ་བདུན་ནི། གསེར། དངུལ། ཤེལ། མུ་ཏིག་དམར་པོ། ། རྡོའི་སྙིང་པོ། སྤུག་རྣམས་སོ། །དེའི་འོག་ཏུ་མེ་ཏོག་པདྨ་ཞེས་པ་འདི་ཟློས་པར་མི་འགྱུར་རམ། མེ་ཏོག་སྨོས་པས་ཆོག་པའི་ཕྱིར་ཞེ་ན། མེ་ཏོག་ཡིན་ན་པདྨ་ཡིན་པས་ཁྱབ་པ་མེད་དེ། ཀུ་མུ་ད་བཞིན་ནོ། །དེ་སྐད་དུ་སྤྱོད་འཇུག་ལས། མེ་ཏོག་མནྡ་ར་དང་པདྨ་དང༌། །ཞེས་སོགས་བཤད་པ་བཞིན་ཏེ། པདྨ་ནི་ཟླ་འོད་ཀྱིས་ཁ་ཟུམ་ཞིང་ཉི་མས་འབྱེད་པ། མེ་ཏོག་གི་ནང་ན་ཉི་འོད་ཀྱིས་ཟུམ་ནས་ཟླ་བས་འབྱེད་པའང་ཡོད་པའི་ཕྱིར་རོ། །འདི་ལ་དོན་ཆུང་ཡང་བླུན་པོ་ཁ་ཅིག་གིས་གཡར་ཚ་བའི་རྩོད་པ་དེ་ལྟ་བུའང་བཀོད་དེ། དེའི་ཕྱིར་ཡིན་ནོ། ༈། མངོན་ཤེས་ལྔ་དང་སྤྱན་ལྔ་ཀུན་ལ་མངའ། །ཞེས་པ་ལ། མངོན་ཤེས་ནི། བསམ་གཏན་གྱི་དངོས་གཞི་ལ་བརྟེན་པའི་མངོན་སུམ་གྱི་བློ་མ་འཁྲུལ་བ་ཡིན་ལ། དབྱེ་ན་དྲུག་སྟེ། ནམ་མཁར་འགྲོ་བ་སོགས་བྱེད་པ་རྫུ་འཕྲུལ་གྱི་མངོན་ཤེས་དང༌། ཐག་རིང་ཐུང་གི་སྒྲ་ཐོས་པ་ལྷའི་རྣ་བའི་དང༌། འཇིག་རྟེན་གྱི་ཁམས་ཀྱི་གཟུགས་ཉེ་རིང་མཐོང་ཞིང་སེམས་ཅན་གྱི་འཆི་འཕོ་ཤེས་ཤིང་སྐྱེ་བ་ཤེས་པ་ལྷའི་མིག་དང༌། ཚེ་རབས་སྔ་མ་
མངོན་པར་དྲན་པ་སྔོན་གནས་རྗེས་དྲན་གྱི་དང༌། ཕ་རོལ་གྱི་སེམས་ཤེས་པའི་དང༌། རང་གཞན་གྱི་རྒྱུད་ཟག་པ་ཉོན་མོངས་དང་བྲལ་མ་བྲལ་ཤེས་པ་ཟག་ཟད་ཀྱི་སྟེ་དྲུག་གོ །དེའང་ནམ་མཁར་འགྲོ་བ་ཁོ་རང་རྫུ་འཕྲུལ་གྱི་མངོན་ཤེས་མིན་གྱི། དེ་ལྟར་ནུས་པའི་བློ་གོང་སྨོས་དེ་ཡིན་ནོ། །འདི་གཞན་ལྔ་ལའང་སྦྱར་རོ། །སྤྱན་ལྔ་ནི། ཏིང་ངེ་འཛིན་ལས་སྐྱེས་པའི་ཡེ་ཤེས་ཀྱི་བྱེ་བྲག་ཡིན་ལ། དབྱེ་ན་ལྔ། གཟུགས་ཕྲ་རགས་མང་པོ་ཤེས་པ་ཤའི་དང༌། འཆི་འཕོ་དང་སྐྱེ་བ་ཤེས་པ་ལྷའི་དང༌། བདག་མེད་མངོན་སུམ་དུ་རྟོགས་པ་ཤེས་རབ་ཀྱི་དང༌། རང་གཞན་དབང་པོ་རྣོ་རྟུལ་ཤེས་པ་ཆོས་ཀྱི་དང༌། རྣམ་མཁྱེན་གྱི་ཡེ་ཤེས་ཀྱི་སྤྱན་ནོ། །དེ་ལྟར་རྣམ་བཞག་རགས་པ་བརྗོད་ནས། ད་ནས་ཀུན་ལ་མངའ་ཞེས་པ་དཔྱད་དེ། མངོན་ཤེས་དྲུག་ཀ་བདེ་བ་ཅན་པ་རྣམས་ལ་ཡོད་དེ། དེ་ནི་ཀུན་ཤེས་པའི་དབང་པོ་མཐོང་ངམ་མ་ཐོབ་པ་མེད་པའི་ཕྱིར་རོ། །དེ་ལྟ་ནའང་འདིར་བཤད་པའི་དོན་ནི་དཔྱད་པར་བྱ་བ་ཞིག་སྟེ། ཁོ་བོས་ནི་རྔོ་མ་ཐོགས་སོ། །སྤྱན་ལྔ་ཡོངས་སུ་རྫོགས་པ་ནི། དེ་བཞིན་གཤེགས་པ་ལ་མ་གཏོགས་མེད་དེ། སངས་རྒྱས་འཕགས་པ་ཁྱད་པར་བྱེད་པའི་ཆོས་ཐུན་མོང་མ་ཡིན་པ་ནི་སངས་རྒྱས་ཀྱི་སྤྱན་ཡིན་པའི་ཕྱིར་ཏེ། དེ་ཡོད་ཕན་ཆད་སངས་རྒྱས་འཕགས་པ་ཁོ་ན་ཡིན་ནོ། །དེ་ཉིད་སངས་རྒྱས་འོད་དཔག་མེད་པའི་སྨོན་ལམ་གྱི་མཐུ་ཡིན་ནོ་ཞེས་ཀྱང་མི་རུང་སྟེ། དེ་ལྟ་ན་ཞིང་དེར་བྱང་སེམས་འཕགས་པ་གཅིག་ཀྱང་མེད་དོ་ཞེས་སྨྲ་བར་འགྱུར་རོ། །ལུང་དང་ཡང་མི་འགལ་ཏེ། འོད་མདོ་ལས་ནི་སངས་རྒྱས་སྤྱན་བསྒྲུབ་པའི་ཕ་རོལ་ཏུ་
ཕྱིན་པ་ཤ་སྟག་ཏུ་བཤད་དོ། །འོ་ན་འདི་ལ་མཁས་གྲུབ་ཨ་རཱ་ག་འཁྲུལ་ལམ་ཞེ་ན་ག་ལ་ཡིན་ཏེ། འདི་ནི། དཔེར་ན་རྒྱལ་པོས་སྦྱིན་པར་དམ་བཅས་ཤིང༌། རྒྱལ་པོའི་ནོར་རང་ལ་ཐོབ་ངེས་པ་དེའི་ཚེ་ད་ང་ལ་ནོར་དེ་ཐོབ་བོ་ཞེས་འཛེར་ཏེ། དེ་ནོར་ཐོབ་པ་དངོས་མིན་ཀྱང་ཐོབ་པའམ་རྙེད་པ་ལས་མི་ལྡོག་པས་ཐོབ་པ་དང་འདྲ་བ་ལ་བསམ་ནས་སྨྲ་རུང་བ་བཞིན་དུ། ཞིང་དེའི་བྱང་ཆུབ་སེམས་དཔའ་རྣམས་ནི་རྫོགས་པའི་བྱང་ཆུབ་ལས་སླར་མི་ལྡོག་པ་ཤ་སྟག་ཡིན་པའི་རྒྱུ་མཚན་གྱིས་བྱང་ཆུབ་ཆེན་པོ་ཐོབ་མ་རག་པ་ལ་དགོངས་པ་སྟེ། ཐོབ་པ་དང་འདྲ་བའོ། །དེ་མན་ཆད་ནི་གོ་སླའོ། །དེ་ལྟར་ན། འདི་ནས་ཉི་མ་ནས་སེར་ལྟེམ་མེ་ཞེས་པའི་བར་གྱིས་ཞིང་ཁམས་བརྟེན་པ་དང་བཅས་པ་ཡིད་ལ་བྱ་བ་བསྟན་ཞིང༌། མོས་གུས་ཕྱག་ལ་སོགས་ནས་འགྲུབ་པར་ཤོག་བར་གྱིས་དགེ་བའི་རྩ་བ་དཔག་ཏུ་མེད་པ་སྒོ་དུ་མ་ནས་གསོག་ཚུལ་བསྟན་ལ། བདག་དང་བདག་ལ་ནས་སྨོན་ལམ་བཏབ་བཞིན་འགྲུབ་པར་ཤོག་གི་བར་གྱིས་བྱང་ཆུབ་ཏུ་སེམས་བསྐྱེད་པ་དང༌། དགེ་བ་ཅི་བསགས་ཞིང་ཁམས་སྦྱོང་བའི་རྒྱུར་བསྔོ་བ་གཉིས་མཉམ་དུ་བཤད་པས། གཞུང་འདིའི་བསྟན་དོན་བདེ་བ་ཅན་དུ་སྐྱེ་བའི་རྒྱུ་བཞི་ཡིན་ནོ། །དེའང་བསྔོ་བ་ནི། དགེ་རྩ་བློ་ཡུལ་དུ་བྱས་ནས་དེ་ཉིད་རང་གིས་འདོད་པའི་འབྲས་བུའི་རྒྱུར་འདུན་པས་བསྒྱུར་བ་ལ་བྱ་ཞིང༌། འདིར་དགེ་རྩ་ལ་སྔོན་དུ་དམིགས་པ་དངོས་སུ་མ་བཤད་མོད། འོན་ཀྱང་འདུན་པ་དེ་ལྟ་བུས་ཟིན་ན་བསྔོ་བར་འགྲོའོ། །བདེ་སྨོན་གཞུང་གི་ཟིན་ཐོ་འདིའང་རྗེ་བཙུན་བླ་མ་ཛྙཱ་ནའི་མཚན་ཅན་
གྱི་བཞེད་སྐོང་དུ་གཞོན་ནུ་འཇིགས་མེད་པས་གང་དྲན་བྲིས་པ་དགེ་བར་གྱུར་ཅིག །མངྒ་ལམ། །།
བདེ་ཆེན་ཞིང་ཐང་འབྲི་ཚུལ།
༈ བདེ་ལེགས་སྣང་བ་སྟོང་བརྡལ་བདེ་ཆེན་ཞིང༌། །འཕགས་ཚོགས་རྒྱ་མཚོར་བཅས་པའི་སྣང་བརྙན་གཟུགས། །ངོ་མཚར་རི་མོའི་ལམ་དུ་བཀོད་པའི་ཚུལ། །རྗོད་བྱེད་ཚིག་ཕྲེང་གསར་པ་བསྟར་ལ་རིངས། །དེ་ལ་ཞིང་ཁམས་ཀྱི་དབུས་སུ་བྱང་ཆུབ་ཀྱི་ཤིང་ཡལ་འདབ་དང་ལོ་མ་དང༌། འབྲས་བུ་དང་མེ་ཏོག་ཕུན་སུམ་ཚོགས་པ་རིན་པོ་ཆེའི་དྲིལ་གཡེར་དང་གསེར་གྱི་སྐུད་པའི་འཕྱང་འཕྲུལ་ཅན། དེའི་དྲུང་ན་མགོན་པོ་འོད་དཔག་མེད་སེང་གེའི་ཁྲི་ལ་བཞུགས་པ། དེའི་གཡས་གཡོན་ན་སེམས་དཔའ་མཆོག་གཉིས། མདུན་ངོས་སུ་བྱང་ཆུབ་སེམས་དཔའི་དགེ་སློང་འཕགས་པ་གསེར་ལྟར་དྲི་མ་མེད་ཅིང་དུལ་བའི་ངང་ཚུལ་ཅན་ཤིན་ཏུ་མང་པོ། གཙོ་བོའི་མདུན་དུ་རྫིང་བུ་དྭངས་ལ་གསལ་བའི་ནང་ན་པདྨ་སྡོང་པོ་ཀུན་ནས་མཛེས་པའི་སྟེང་མཆོད་པའི་རྫས་སྣ་ཚོགས་བཀོད་པ་བྲིས་ན་མཛེས་པར་སྣང༌། ཞིང་གི་མཐའ་སྐོར་དུ་རིན་པོ་ཆེའི་ཤིང་ལྗོན་པ་རིམ་གསུམ་གྱིས་བསྐོར་བ། ནགས་ཚལ་གྱི་ནང་ནས་གཞལ་མེད་ཁང་ཕྱེད་ཙམ་སྣང་བ་དང༌། རྫོགས་པར་སྣང་བ་དུ་མའི་ནང་ན་མལ་སྟན་གྱ་ནོམ་པ་སྔས་ཁྲ་བོ་ཅན་བཀྲམ་པ་ལ་བྱང་ཆུབ་སེམས་དཔའ་མང་པོ་འདུག་པ། དེ་དག་གི་བར་མཚམས་ཅི་རིགས་པར་ཁྲུས་ཀྱི་རྫིང་བུ་མེ་ཏོག་གིས་ཁེབས་པ་གང་མང༌། མེ་ཏོག་གི་སྦུབས་ན་བྱང་ཆུབ་སེམས་དཔའ་རྫུས་ཏེ་སྐྱེ་བ་མང་པོ་ལག་མཐིལ་ནས་མཆོད་སྤྲིན་འབྱུང་བཞིན་སྣང་བ། སྟེང་གི་བར་སྣང་ལ་བདེ་བར་གཤེགས་པའི་
ཞིང་སྣང་དུ་མར་བྱང་ཆུབ་སེམས་དཔའ་མང་པོ་རྫུ་འཕྲུལ་གྱིས་རྒྱུ་ཞིང་ལག་མཐིལ་ནས་འབྱུང་བའི་མཆོད་སྤྲིན་སྤྲོ་བ། དེའི་སྟེང་གི་ནམ་མཁར་སྤྲིན་ཁ་དོག་སྣ་ཚོགས་པའི་སྦུབས་ན་མཆོད་པའི་ལྷ་མོ་རྣམས་ཀྱིས་མེ་ཏོག་གི་ཆར་འབེབས་པ་དང༌། རིན་པོ་ཆེའི་ཕྲེང་བ་འཛིན་པ་དང༌། སྤོས་ཕོར་འཛིན་པ་དང༌། བདུད་རྩིའི་ཆུ་རྒྱུན་སྦྲེང་བ་སོགས་ཀྱིས་མཛེས་པར་བྱས་ན་ལེགས་པར་མངོན་ལགས། བཛྲ་ནཱ་ཐའི་དགྱེས་སྐོང་དུ། །གང་དྲན་ཅ་ལེ་ཅོ་ལེར་བྲིས། །རྣམ་དཔྱོད་ཞིབ་མོས་ལེགས་དཔྱད་ན། །མདོ་སྡེའི་དགོངས་པར་འདི་ཉེའོ།། ༈ །།སྐལ་བཟང་སྐྱེ་དགུའི་ལེགས་བྱས་རས་གཞིའི་ངོས། །ཕུལ་བྱུང་བདེ་ཆེན་ཞིང་གི་རི་མོའི་དཔལ། །སྨོན་ལམ་པིར་གྱིས་བྲིས་པའི་འོད་མཛད་ལྷ། །མཚན་ཐོས་ངན་འགྲོའི་འཇིགས་འཕྲོགས་དེ་ལ་འདུད། །བདེ་ཆེན་ཞིང་ཐང་འདྲི་ཚུལ་དབུས་སུ་བྱང་ཆུབ་ཀྱི་ཤིང་དབྱིབས་ལེགས་ཤིང་ལོ་འབྲས་མེ་ཏོག་གི་མདོག་སྣ་ཚོགས་སུ་བཀྲ་བ་རིན་པོ་ཆེ་དང་དྲིལ་བུ་གཡེར་ཁའི་དྲ་བ་སོགས་རྒྱན་སྣ་ཚོགས་འཕྱང་བའི་དྲུང་དུ་གཞལ་མེད་ཁང་ཡངས་ཤིང་བཀོད་ལེགས་པའི་དབུས་ན་འོད་དཔག་མེད་མཛེས་ཤིང་བརྗིད་ཆགས་ལ་ཞི་བའི་སྐུ་ཅན་སེང་གེའི་ཁྲི་ལ་བཞུགས་པ་སྤྱི་འགྲོ་ལྟར་དང༌། དེའི་གཡས་གཡོན་དུ་སྲས་ཀྱི་ཐུ་བོ་གཉིས་སྐུ་མདོག་དཀར་པོ་ཕྱག་གཡས་གཉིས་ཀྱི་གཙོ་བོ་ལ་རྔ་ཡབ་དཀར་པོ་གཡོབ་ཅིང་གཡོན་གཉིས་པདྨ་དཀར་པོ་བསྣམས་པའི་འཇིག་རྟེན་དབང་ཕྱུག་གི་པདྨ་ཁ་གྱེས་པ་དང༌། མཐུ་ཆེན་ཐོབ་ཀྱི་ཁ་འབུས་ཀྱི་རྣམ་པ་ཅན། ཕྱི་ཁྱམས་རིན་པོ་ཆེའི་
རབ་ཉམས་དགའ་བའི་ནང་འཕགས་པ་འཇམ་དཔལ་དང་ཀུན་ཏུ་བཟང་པོ་སོགས་བྱང་སེམས་འཁོར་སྒྱུར་ཆས་ཅན་དང༌། གཞོན་ནུ་རབ་བྱུང་གི་ཆ་བྱད་ཅི་རིགས་པ། དེའི་ཕྱི་རོལ་དུ་གཞི་མཉམ་ཞིང་ཐ་གྲུ་ཡངས་པའི་ནེའུ་སེང་མདངས་དགའ་བར་གསེར་འོད་དང་ལྡན་པའི་པདྨ་ཆེན་པོ་དག་དང༌། འཁོར་ལོ་དང་ནོར་བུ་དང་རིན་པོ་ཆེའི་མགུལ་རྒྱན་དང༌། རྣ་ཆ་གདུ་བུ་དཀར་པོ་སོགས་ལྷ་དང་མིའི་གཡོ་བྱད་མང་པོས་གང་བའི་མཐའ་ཁྲུས་ཀྱི་རྫིང་བུ་རིན་པོ་ཆེའི་སོ་ཕག་ཀ་བ་ཀ་སྒྲོག་སྒྲོམ་ལེབ་རྣམས་ཇི་ལྟར་རིགས་པའི་ར་བ་ཅན་གྱི་ཉེ་འདབ་ན་བྱང་སེམས་ཁྲུས་ཀྱི་རྩེ་བ་དང་ལྷའི་ཆུ་བྱ་རྩེ་འཇོས་རྒྱགས་པ་དང༌། རྫིང་རའི་ཕྱི་ནས་སྤོས་ཀྱི་ཤིང་ཕྲན་སྐྱེས་པའི་བར་བར་ན་མེ་ཏོག་གི་སྡོང་པོ་མང་པོས་བསྐོར་བ། དེ་འདྲ་བའི་ཁྲུས་ཀྱི་རྫིང་བུ་གཉིས་སམ་གསུམ་བྲིས་པ་དག་ན་ཙནྡན་དང་ཨ་ཀ་རུ་ལ་སོགས་པའི་ལྗོན་ཤིང་རིགས་མི་གཅིག་པ་དུ་མས་ཁེབས་པ། ཤིང་དེ་དག་ལས་ལྷ་རྫས་ཀྱི་གོས་དང་རིན་པོ་ཆེའི་དོ་ཤལ་གཉིས་སྦྲགས་དང་ཆིག་རྐྱང་ལ་སོགས་པའི་རྒྱན་གྱི་ཁྱད་པར་དུ་མ་འཕྱང་བས་མཛེས་པ། དེ་དག་རྣམས་སུ་རྒྱལ་བའི་སྲས་པོ་པདྨ་ལས་རྫུས་ཏེ་འབྱུང་བ་དང༌། ཆོས་བགྲོ་བ་དང་བསམ་གཏན་བྱེད་པ་སོགས་ཀྱི་རྣམ་པ་མང་ཉུང་འཚམ་པར་བཀོད། ས་གཞི་ཕྱི་མཐའ་རི་བོའི་བཀོད་པ་བྲག་དང་ནགས་ཚལ་དང་ཆུའི་རྒྱན་ཐོགས་པ་བཀོད་པ་ནང་གསེབ་ལ་ལ་ནས་རིན་པོ་ཆེའི་ཁང་བཟང་བ་གམ་ཙམ་མཐོང་བ། ལ་ལ་སྒོ་ཁྱིམ་ཙམ་མཐོང་བ། ཁ་ཅིག་གཞལ་མེད་ཁང་རིལ་གྱིས་ཐོན་པའི་ནང་ན་བྱང་
སེམས་ཁ་ཏོན་དང་བསམ་གཏན་བྱེད་པའི་གཟུགས་ཅི་མཛེས་སུ་བཀོད་པ། རི་བོའི་བར་ནས་ལྷའི་ཆུ་བོ་མེ་ཏོག་སིལ་མ་དང་ལྷན་ཅིག་འབབ་པ། ཆུ་བྱའི་ཕྲེང་བ་ཅན་བྱ། སྟེང་ཕྱོགས་ཀྱི་ནམ་མཁའ་ལ་བྱང་ཆུབ་སེམས་དཔའ་ལྷ་དང་དགེ་སློང་གི་ཆ་བྱད་ཅན་མང་པོ་རྫུ་འཕྲུལ་གྱིས་ཕར་འགྲོ་བ་དང་ཚུར་འདུ་ཞིང་ལག་ན་མེ་ཏོག་གི་ཡོལ་གོ་ཐོགས་པའི་ནང་ནས་སྟོན་པ་འོད་དཔག་མེད་ལ་ལྷའི་མེ་ཏོག་གི་ཆར་པ་འབབ་པ་དང༌། མེ་ཏོག་དེ་དག་བྱང་ཆུབ་ཤིང་གི་སྟེང་ཕྱོགས་དང་ཉེ་བར་མེ་ཏོག་གི་གདུགས་སུ་གྱུར་པའི་རྣམ་པ་དང༌། གཞན་ཡང་གསེར་དང་དངུལ་དང་ཨིནྡྲ་ནི་ལའི་སྙིང་པོ་ཅན་གྱི་སྤྲིན་ལས་མེ་ཏོག་དང་གདུགས་དང་བ་དན་དང་རྔ་ཡབ་པི་ཝང་ནོར་བུ་རྫ་རྔ་ལ་སོགས་པ་ལོངས་སྤྱོད་ཀྱི་ཆར་སྣ་ཚོགས་འབབ་པ་དང༌། གཞལ་མེད་ཁང་ནམ་མཁའ་ལ་རྒྱུ་བ་རྒྱན་དང་བཀོད་པ་རྒྱ་ཆེན་པོ་རྣམས་སུ་བྱང་ཆུབ་སེམས་དཔའ་ལྷའི་བུ་མོའི་འཁོར་དང་བཅས་ཏེ་ཕྱོགས་བཅུར་རྣམ་པར་བལྟ་ཞིང་འགྲོ་བ་བྲིས། མཐོང་བས་ཡིད་ལ་ཀུན་འགའ་རྒྱས་བྱེད་ཅིང༌། །བརྟགས་ན་མདོ་སྡེར་མཐུན་པས་མགུ་བ་སྐྱེ། །བསམ་ན་སངས་རྒྱས་རྗེས་དྲན་འཕེལ་བྱེད་པའི། །དོན་ལྡན་རི་མོའི་ལས་འདི་དགེ་གྱུར་ཅིག། ༈ །།འཕགས་པ་འཇམ་དཔལ་དམར་སེར་གླེགས་རལ། ཕྱག་རྡོར་སྔོན་པོ་རྡོ་རྗེ། བྱམས་པ་དམར་སེར་གླུ་ཤིང་གི་སྡོང་བུ་བསྣམས་པ་ཐོར་ཚུགས་ལ་གསེར་གྱི་མཆོད་རྟེན་ཅན། ས་སྙིང་སེར་པོ་མེ་ཏོག་སྔོན་པོའི་ཐོད་ཆིངས་ཅན། ཤིང་ཏོག་དང༌། པདྨ་ནོར་བུས་
མཚན་པ་འཛིན་པ། སྒྲིབ་སེལ་དཀར་པོ་བུམ་པ་བཟང་པོ་དང༌། པད་དཀར་ཟླ་བས་མཚན་པ་འཛིན་པ། ནམ་སྙིང་སྔོན་པོ་ཆོས་འཆད་རྒྱས་ཨུཏྤལ་རལ་གྲིས་མཚན་པ་འཛིན་པ། ཀུན་བཟང་དམར་པོ་བུམ་པ་དང༌། པད་དཀར་ཉི་མས་མཚན་པ་བསྣམས་པའོ།། །།
གུ་རུ་སིདྡྷིའི་རྣམ་བཤད་ཀུ་མུ་ཏའི་ཕྲེང་བ།
༈ གུ་རུ་སིདྡྷིའི་རྣམ་བཤད་ཀུ་མུ་ཏའི་ཕྲེང་བ་ཞེས་བྱ་བ། དཔལ་ལྡན་བདེ་བ་ཆེན་པོ་པདྨ་སཾ་བྷ་བའི་ཞབས་ལ་ཕྱག་འཚལ་ལོ། །ཟུང་འཇུག་སློབ་པ་མིན་པའི་ཡེ་ཤེས་སྐུ། །འཆི་མེད་བདེ་སྟོང་རོལ་པའི་འཛུམ་དཀར་ཅན། །མཚོ་སྐྱེས་གྲུབ་པའི་ཟླ་སྣང་གསར་པ་ཞིག །ལོངས་སྤྱོད་འཁོར་ལོའི་གྲོང་དུ་ཅི་དགར་རྩེ། །དེ་ལ་གསང་སྔགས་རྒྱལ་པོ་འདི་འཆད་པའི་ཚུལ་མང་ནའང༌། ད་ལྟ་ཁྱིམ་བདག་ཕྱུག་པོའི་སྒོ་ནོར་ཡན་ཆད་ཀྱི་རིམ་གྲོར་གྲྭ་ཕྲུག་ལྕུག་སེར་གཅུ་ནུས་པ་ཙམ་ནས་ཀུན་གྱིས་སྔགས་ཀྱི་ཚིག་འདི་དག་བཟླས་བརྗོད་ལ་སྙད་བཏགས་པའི་འུར་ཞོག་གི་ཧམ་པ་ཆེ་དྲག་ནའང་དོན་གྱི་འགྲོ་ཕྱོགས་ཙམ་ཡང་རྔོ་མ་ཐོགས་པའི་གནས་སྐབས་སུ་སྣང་བས། དེ་དག་ལ་གཏམ་དུ་བྱ་བའི་ཚིག་གི་སྦྱོར་བ་ཉུང་ལ་གོ་བདེ་ཞིང༌། གྲོང་མིའི་ཐ་སྙད་འབའ་ཞིག་གིས་བཤད་པར་བྱ་བ་ཡིན་པས། སྔ་འགྱུར་རྒྱུད་སྡེའི་ཕ་རོལ་ཏུ་སོན་པའི་མཁས་གྲུབ་ཆེན་པོ་རྣམས་དང༌། རྟགས་གསལ་རྟོག་གེའི་ཚིག་སྐམ་ལ་སྙིང་པོར་འཛིན་པའི་གཞུང་ལུགས་པ་དག་ནི་གཏམ་འདིའི་ཆེད་དུ་བྱ་བའི་གདུལ་བྱ་མ་ཡིན་ཏེ། གོ་རིམ་བཞིན་དུ་འདི་ཙམ་ཞིག་ལ་ལྟོས་འཆའ་བའི་རྣམ་དཔྱོད་ཕུར་ཁུང་ཐུག་པ་མིན་པའི་ཕྱིར་དང༌། གསང་
སྔགས་ཀྱི་གཞི་འདི་དག་བོད་ཀྱི་གྲོང་སྔགས་བན་མིན་བོན་མིན་པ་རྣམས་ཀྱིས་རང་བཟོའི་སྔགས་ལོག་ཏུ་འཁྲུལ་པ་མང་བའི་ཕྱིར་རོ། །དེ་ལྟར་ན་བློ་གྲོས་ཀྱི་མཐུ་ཞན་པས་དོན་གྱི་སྒྲོམ་རླབས་ཆེན་རྟོགས་པར་མི་ནུས་ཤིང༌། སྔགས་འདི་ཁ་ཏོན་དུ་མོས་པས་བྱེད་པའི་གང་ཟག་ཤེས་རབ་ཆུང་ངུ་དག་གིས་གཏམ་འདི་ལ་སྙན་དབང་གཡར་ཁྲལ་དུ་མཛད་ན་བཀྱལ་ཀའི་ཚིག་འདི་ཞུའོ། །དེ་ལ་སྔགས་འདི་རྒྱལ་དབང་པདྨ་ཉིད་ཀྱི་རྣམ་པར་ཐར་པའི་ཚུལ་དང་ལྟོ་སྦྱར་ཏེ་བཤད་ན་ཡིད་ལ་འཆར་སླ་བས། འདི་ལ་གཉིས། སློབ་དཔོན་ཆེན་པོའི་ཡོན་ཏན་རྗེས་སུ་དྲན་པ་དང༌། འདོད་དོན་ཡིད་བཞིན་སྩོལ་བར་གསོལ་བ་འདེབས་པའོ། །དང་པོ་ལ། ཆེ་བའི་ཡོན་ཏན་དངོས་བཤད་པ་དང༌། ཡོན་ཏན་དེ་ལྡན་གུ་རུ་ཉིད་ཀྱི་མཚན་སྨོས་པ་སྟེ་གཉིས་ལས། དང་པོ་ལའང༌། སྤྱིར་བསྔགས་པ་དང༌། བྱེ་བྲག་ཏུ་གུ་རུ་རིན་པོ་ཆེའི་རྣམ་ཐར་གཙོ་བོའི་ཚུལ་བཤད་པ་གཉིས། དང་པོ་ནི། ཨོཾ་ཨཱཿཧཱུྃ་ཞེས་པ་སྟེ། སྤྱིར་སྔགས་རྣམས་ཀྱི་ཐོག་མའི་མགོ་འདྲེན་གྱི་ཨོཾ་ཞེས་པ་རབ་བསྔགས་དང་དཔལ་སྟེར་བ་དང༌། གཡང་འཕེལ་བ་ལ་སོགས་པ་མདོར་ན་བཀྲ་ཤིས་པའི་དོན་ཅན་ཡིན་པར་རྡོ་རྗེ་རྩེ་མོ་ལ་སོགས་པ་ནས་བཤད་ནའང༌། འདིའི་སྐབས་སུ་ནི་ཨོཾ་ཨཱཿཧཱཾཨུ་གསུམ་པོ་རྡོ་རྗེ་གསུམ་གྱི་སྙིང་པོ་ལ་བཤད་དགོས་པས། ཨོཾ་གྱི་མཚན་དོན་ནི། སངས་རྒྱས་རྣམས་ཀྱི་སྐུ་རྡོ་རྗེ་སྟེ། ལར་སངས་རྒྱས་གཟུགས་ཀྱི་སྐུ་ཐམས་ཅད་ཀྱང་སྐུ་རྡོ་རྗེ་ཡིན་མོད། གཙོ་བོར་ནི་ཡེས་ཤེས་ཀྱི་རླུང་དབྱིངས་སུ་འཁྱིལ་
བ་ཞེས་བྱ་བ། བདེ་ཆེན་ལྷན་ཅིག་སྐྱེས་པའི་ཡེ་ཤེས་ཀྱི་རྟེན་དག་པ་རླུང་གི་ཆ་བདེ་བ་ཆེན་པོ་གཉུག་མའི་སེམས་དང་ངོ་བོ་གཅིག་པ་དེ་ཉིད་སྟོབས་སུ་གྱུར་བའམ་ནར་སོན་ཏེ། སྔགས་བླ་མེད་ཐུན་མོང་མ་ཡིན་པའི་ལུགས་ཀྱི་ལུས་ཕྲ་རགས་གསུམ་དུ་ཕྱེ་བའི་རགས་པ་ཕྱི་ནང་གི་ལུས་གཉིས་དང༌། ཕྲ་བའི་ལུས་ཀྱི་ནང་ཚན་སྟོང་པ་གསུམ་གྱི་བཞོན་པའི་རླུང་གི་ཁམས་མཐའ་དག་ཤིན་ཏུ་རྣམ་པར་དག་པའི་དབྱིངས་སུ་རང་ཞི་བ་ན་གཉུག་མའི་རླུང་སྣང་སྟོང་སྒྱུ་འཕྲུལ་དྲྭབཱི་ཕྱག་རྒྱར་བཞེངས་པ་ལ་འཕོ་ཆེན་འཇའ་ལུས་རྡོ་རྗེའི་སྐུ་ཞེས་འདོགས་པ་ཡིན་ལ། དེ་ཉིད་ནི་རང་བཞིན་ཐེག་མཆོག་རྒྱལ་པོའི་ལུགས་ཀྱི་སྐུ་རྡོ་རྗེ་མཐར་ཐུག་པའི་འཇོག་ཚུལ་ཡིན་ཏེ། བླ་མེད་ཀྱི་རྒྱུད་གཞན་ནའང་ཚེ་འདིར་སྒྱུ་མའི་སྐུ་གྲུབ་པ་རྣམས་ཚེ་འདིར་འཚང་རྒྱ་བ་ངེས་པར་གསུངས་ཤིང༌། དེའི་ཚེ་རགས་ལུས་ཤུལ་དུ་བཞག་ཏེ་སྙིང་ཀའི་ཡེ་ཤེས་སེམས་དཔའ་ཚོན་གང་བ་ཞིག་འཚང་རྒྱ་བ་མིན་པར་མ་ཟད་བསྐྱེད་རྫོགས་གང་བསྒོམ་ཡང་རགས་པའི་ལུས་དམ་ཚིག་སེམས་དཔའ་སྤྲུལ་སྐུ་ལམ་བྱེད་དུ་བསྒོམ་པའི་གྲུབ་དོན་ལུས་རགས་པའི་རྫས་རྒྱུན་ཀྱང་སངས་རྒྱས་སྤྲུལ་པའི་སྐུར་འགྱུར་བས། དེ་དང་འདི་གཉིས་ཕྱོགས་མཚུངས་པར་ཤེས་པར་ནུས་སོ། །ཨཱཿཡིག་གི་མཚན་དོན་ནི། གསུང་རྡོ་རྗེ་སྟེ། དེའང་སྒྱུ་འཕྲུལ་ལས། ཨ་ནི་སྟོང་དང་མི་སྟོང་གི། །དབུ་མའང་དམིགས་སུ་ཡོད་མ་ཡིན། །ཞེས་གསུངས་པའི་སྐབས་ལྟར་སྤྱིར་སངས་རྒྱས་ཀྱི་གསུང་རྣམ་པ་ཐམས་ཅད་པ་གདུལ་བྱའི་མོས་པ་དང་བསམ་པ་ཐ་དད་
པའི་རྗེས་སུ་འཇུག་པ། དབྱངས་ཀྱི་ཡན་ལག་ཚད་མེད་པའི་རང་བཞིན་ཅན་མཐའ་དག་གསུང་རྡོ་རྗེ་ཡིན་མོད་དེ། ཐེག་པའི་རྒྱལ་པོ་ཤིན་ཏུ་རྣལ་འབྱོར་གྱི་ལུགས་ཐུན་མོང་མ་ཡིན་པར། ངེས་དོན་མི་འགྱུར་བའི་ཨ་ཡིག་རྒྱུད་གཞན་དུ། སྙིང་ཀའི་དབུས་ན་མི་ཤིག་པ། །གསལ་ཞིང་མར་མེ་དག་དང་མཚུངས། །མི་འགྱུར་མཆོག་ཏུ་ཕྲ་བ་སྟེ། །ཨ་ནི་གཙོ་བོ་དམ་པའོ། །ཞེས་རླུང་སེམས་མི་ཤིག་པའི་ཏིལ་ཀའི་བརྡར་ཨ་ཡིག་བཤད་པ་དང་དོན་གཅིག་པར་འོད་གསལ་རྡོ་རྗེ་རྩེ་མོ་ནང་གསལ་གཞོན་ནུ་བུམ་སྐུ་བརྗོད་མེད་རིག་སྟོང་གི་ཐིག་ལེ་སྟེ། དེ་ཉིད་ནི་རྗོད་བྱེད་རླུང་གི་འཁོར་ལོའི་རང་བཞིན་གྱི་སྒྲར་སྣང་བ། དབྱིངས་སུ་བརྗོད་པ་མཐའ་དག་གི་རྟེན་གཞིར་གྱུར་པའང་ཡིན་ཏེ། ཞིབ་ཏུ་སྐྱེ་བ་དང་འཆི་བའི་རིམ་པའི་རླུང་གི་སྐྱེད་སྡུད་ལ་མཁས་པར་བྱས་ན་ཤེས་སླ་བ་ཉིད་དོ། །ཧཱཾཨུ་གི་མཚན་དོན་ནི། རྒྱལ་བ་རྣམས་ཀྱི་ཐུགས་རྡོ་རྗེ་སྟེ། བཤད་མ་ཐག་པའི་འཕོ་ཆེན་འཇའ་ལུས་རྡོ་རྗེའི་ངོ་བོ་ཉིད་ལྷུན་གྲུབ་ཕྲ་བའི་རླུང་དང་རོ་གཅིག་ཏུ་གྱུར་པའི་འོད་གསལ་རང་བྱུང་གི་ཡེ་ཤེས་མཐར་ཐུག་གཤིས་ཇི་བཞིན་པའི་ཡིན་ལུགས་མངོན་དུ་གྱུར་པ་དག་པ་རབ་ཀྱི་མཐར་ཕྱིན་པས་རྟག་ཏུ་སྐྱེ་མེད་སྤྲོས་པ་དང་བྲལ་བའི་དེ་ཁོ་ན་ཉིད་དུ་མཉམ་པར་མ་བཞག་པ་མེད་པའི་རིག་སྟོང་ཀ་ནས་དག་པ་ལ་གློ་བུར་རྣམ་དག་གི་ཡོན་ཏན་ཡོངས་རྫོགས་སུ་གྲུབ་པའམ་མངོན་དུ་བྱས་པ་ནི་སྟོབས་བཅུ་མི་འཇིགས་བཞི་ལ་སོགས་པ་སངས་རྒྱས་ཀྱི་ཆེ་བའི་ཡོན་ཏན་རབ་འབྱམས་དང་མི་ཕྱེད་པས་ན་
རྡོ་རྗེའི་སྒྲ་ཞུགས་པའོ། །དེ་ལྟར་ན་དེ་བཞིན་གཤེགས་པ་རྣམས་ཀྱི་རྡོ་རྗེ་གསུམ་གྱི་ཡོན་ཏན་ཇི་སྙེད་ཅིག་མཆིས་པ་དེ་དག་ཐམས་ཅད་རྒྱལ་དབང་པདྨ་ཀ་རའི་གསང་གསུམ་མི་ཟད་རྒྱན་གྱི་འཁོར་ལོའི་རང་བཞིན་དུ་རྩལ་རྫོགས་པ་ཡིན་ནོ་ཞེས་བསྟན་པ་སྟེ། ད་དུང་སྤྱིར་མདོ་སྔགས་ཐུན་མོང་གི་ལུགས། བྱེ་བྲག་གསང་སྔགས་བླ་མེད་ཀྱི་ལུགས། ཁྱད་པར་རང་བཞིན་རྫོགས་པ་ཆེན་པོའི་རང་ལུགས་ཐུན་མོང་མ་ཡིན་པའི་ཟབ་གནད་གཞན་ལྟ་ཅི་སྨོས་ཏེ། བླུན་ཕྲུག་བདག་གཅིག་པོས་བཤད་ཀྱང་གླེགས་བམ་གྱི་ཕུང་པོ་ཆེན་པོར་འགྱུར་བ་ཙམ་ཡོད་ཀྱང་སྔར་བཤད་ལྟར་བཙུན་ཕྲུག་ངེད་རང་གི་ན་ཚོད་དུ་ལོངས་པ་རྣམས་དང་རྒན་པོ་བྱིས་པའི་ངང་ཚུལ་ཅན་རྣམས་ལ་ལྡེ་མིག་ཙམ་ཞིག་བཞག་པའོ། །གཉིས་པ་ནི། བཛྲ་གུ་རུ་ཞེས་པ་སྟེ། བོད་སྐད་དུ། རྡོ་རྗེ་བླ་མ་ཞེས་བསྒྱུར་རྒྱུ་ཡིན་ནོ། །དེའང་ཡབ་སྲས་མཇལ་བ་ལས། །དཔའ་བོ་ཆེན་པོ་ཐབས་མཁས་ཆེ། །སེམས་ཅན་ཡོངས་སུ་སྨིན་མཛད་ཕྱིར། །བྱེ་བ་ཕྲག་བརྒྱར་རྒྱལ་བ་ཉིད། །སངས་རྒྱས་ཉིད་དུ་བསྟན་གྱུར་ཀྱང༌། །ད་དུང་ཡང་ནི་འདྲེན་པ་ཁྱོད། །སངས་རྒྱས་མང་པོ་སྟོན་པར་མཛད། །ཅེས་གསུངས་པ་ལྟར། རྒྱལ་བའི་དབང་པོ་འདི་ཉིད་དོན་དུ་ན་བསྐལ་པ་གྲངས་ཀྱིས་མི་ཆོད་པའི་སྔ་རོལ་ནས་བྱང་ཆུབ་ཆེན་པོར་ཡོངས་སུ་གྲུབ་ཟིན་པ་ཡིན་ནའང༌། ཚུར་མཐོང་གི་གདུལ་བྱའི་སྣང་ངོར་སློབ་པའི་རིག་འཛིན་འཆི་མེད་གྲུབ་པའི་རྣམ་རོལ་གྱིས་སིནྡྷའི་ཆུ་མཚོར་འདབ་སྟོང་གེ་སར་གྱི་སྦུབས་སུ་བལྟམས་པ་
ལ་མཚོ་སྐྱེས་རྡོ་རྗེ་འཆང་ཆེན་ཞེས་མཚན་ཡོངས་སུ་གྲགས་པ་སྟེ། དེའི་རྣམ་པར་ཐར་པ་བརྗོད་ལས་འདས་པ་ཙམ་ཡོད་མོད་ཀྱི། གཙོ་བོར་གྱུར་པ་ནི་རྡོ་རྗེ་ཐེག་པ་རྣལ་འབྱོར་བླ་མེད་ཀྱི་ལམ་ནས་མངོན་པར་བྱང་ཆུབ་པ་འདི་ཉིད་ཡིན་ཏེ། དང་པོ་ཡུལ་ཨོ་ཊི་ཡ་ནའི་རྒྱལ་པོ་སྤྱན་མེད་འབྱོར་ལྡན་གྱི་དམ་པའི་རྒྱལ་ཐབས་ལ་དབང་བསྒྱུར་བའི་གནས་སྐབས་ཉིད་ནས་ཇི་ལྟར་དཔལ་ས་ར་ཧས་སངས་རྒྱས་ཐོད་པའི་རྒྱུད་སྡེ་ལ་བདག་ཉིད་དབང་བསྒྱུར་བ་ལྟར། སྔོན་ཡོངས་སུ་སྦྱངས་པའི་ཁྱད་པར་གྱིས་ཚེ་འདིར་རང་དབང་དུ་ཟབ་མོ་སྔགས་ཀྱི་ལམ་ཚོགས་ལམ་བསྐྱེད་པའི་རིམ་པ་དང༌། སྦྱོར་ལམ་རྡོ་རྗེའི་ལུས་ལ་གནད་དུ་བསྣུན་པའི་རྫོགས་རིམ་ལ་སྦྱང་བ་ཕུལ་དུ་སོན་ཏེ། ཕྱིས་སུ་དུར་ཁྲོད་ཆེན་པོ་བསིལ་བའི་ཚལ་དུ་བོགས་འབྱིན་བརྟུལ་ཞུགས་ཀྱི་སྤྱོད་པས། མདའ་བསྣུན་ཞབས་ཀྱིས། བྲོ་གར་གླུ་དང་རོལ་མོ་ཡིས། །ཕྱོགས་རྣམས་ཀུན་ཏུ་སྒྲ་སྒྲོགས་ཤིང༌། །རྣལ་འབྱོར་མ་ནི་གཡོན་ནས་བསྐོར། །དམིགས་གཏད་བྲལ་བའི་རང་བཞིན་གྱིས། །འབད་པ་མེད་པ་ཀུན་དུ་སྤྱད། །ཅེས་གསུངས་པ་ལྟར། ཞིང་སྔགས་ལྷན་ཅིག་སྐྱེས་པའི་རྣལ་འབྱོར་མའི་ཚོགས་ཆེན་པོ་དང་ལྷན་ཅིག་བདེ་སྟོང་དགའ་ཆེན་རྡོ་རྗེའི་ཏིང་འཛིན་གྱི་རོལ་མོ་ཅིར་ཡང་སྤེལ་བའི་མཐུ་ལ་བརྟེན་ནས། སྔགས་བླ་མེད་ཀྱི་སྦྱོར་ལམ་ཆོས་མཆོག་དཀའ་བ་མེད་པར་མངོན་དུ་མཛད་དེ། ཟ་ཧོར་རྒྱལ་པོ་གཙུག་ལག་འཛིན་དང་ཨོ་རྒྱན་རྒྱལ་པོ་ཨིནྡྲ་བྷུ་ཏི་གཉིས་ཀྱི་ཁབ་ཏུ་གཤེགས་པའི་ཚེ་སྐུ་ཞུགས་ལ་བཞེན་པར་བརྩམ་
པའི་ཚེ། ཙནྡན་ཏིལ་མར་གྱིས་སྦགས་པའི་མེ་ལྕེའིང་བསིལ་བའི་ཆུ་ཀླུང་དུ་བསྒྱུར་ཏེ། ཡིད་ལས་བྱུང་བའི་མེ་ཏོག་གི་སྡོང་པོ་ལ་བསིལ་བསིལ་ཕྲུམ་ཕྲུམ་ལྟར་བསྟན་པ་ལ་སོགས་པ་བླ་མེད་གྱི་སྦྱོར་ལམ་ཆོས་མཆོག་གྲུབ་པའི་ལག་རྗེས་སུ་བྱུང་བ་སྟེ། ཕར་ཕྱིན་ཐེག་པ་ཐུན་མོང་གི་ལུགས་ལའང་སྲིད་པ་ཐ་མ་པ་ནི་བདག་ཉིད་ཀྱིས་ཀྱང་མི་འཆི་ལ་གཞན་གྱིས་ཀྱང་མི་འཆི་བ་ཁོ་ནར་མངོན་པ་འོག་མ་ནས་བཤད་ན་བླ་མེད་ཀྱི་ཆོས་མཆོག་པ་རྟེན་དེར་རྡོ་རྗེ་འཛིན་པའི་འཕོ་མེད་ཟུང་འཇུག་གི་སྐུ་འགྲུབ་པར་ངེས་པ་རྣམས་ལ་ཕྱི་ནང་གི་འབྱུང་བ་ལས་གྱུར་པའི་གནོད་པ་མཐའ་དག་གིས་མི་ཚུགས་པ་ལྟ་ཅི་སྨྲོས། དེ་ལ་སོགས་པ་བརྟུལ་ཞུགས་རྫུ་འཕྲུལ་གྱི་སྤྱོད་པ་བྱིས་པའི་བློས་གཏིང་དཔག་དཀའ་བ་རྒྱ་མཚོའི་འཇིང་ལྟ་བུས་རང་དང་གཞན་གྱི་དོན་རླབས་པོ་ཆེ་བསྒྲུབས་ནས། སླར་ཡང་མི་འགྱུར་ལྷན་ཅིག་སྐྱེས་པའི་ཡེ་ཤེས་དང་ཆོས་རྣམས་ཀྱི་དེ་ཁོ་ན་ཉིད་ལ་གཉིས་སྣང་གི་མཚན་མ་ཤིན་ཏུ་ཕྲ་བའང་ཉེ་བར་ཞི་བའི་རྣམ་ཀུན་མཆོག་ལྡན་གྱི་ཤེས་རབ་ཟབ་མོ་གཉིས་རོ་གཅིག་ངོ་བོ་དབྱེར་མེད་དུ་གྱུར་པའི་དོན་དམ་འོད་གསལ་བའི་གྲུབ་པ་མངོན་དུ་མཛད་པའི་ཕྱིར། བལ་ཡུལ་ཡང་ལེ་ཤོད་དུ་ཚོགས་ཀྱི་སྤྱོད་པའི་ཉེ་རྒྱུ་ཡང་བསྟན་ནས་ཕྱག་རྒྱ་ཆེན་པོ་མཆོག་གི་དངོས་གྲུབ་མངོན་དུ་བསྒྲུབས་ཏེ། ལམ་མཆོག་ཡོངས་སུ་རྫོགས་པའི་ཚེ་དབང་རིག་འཛིན་དུ་གྲགས་པ་སྔགས་བླ་མེད་ཀྱི་མཐོང་ལམ་ཐོབ་པ་ཡིན་ཏེ། གསོལ་འདེབས་རྡོ་རྗེའི་ཚིག་རྐང་ལས། ཕྱག་རྒྱ་ཆེན་པོའི་དངོས་གྲུབ་
གནས་དེར་ཐོབ། །ཅེས་གསུངས་ཤིང༌། ཕྱག་རྒྱ་ཆེན་པོ་མཆོག་གི་དངོས་གྲུབ་ནི་སྔགས་བླ་མེད་དུ་ལམ་དེ་ཉིད་ཀྱི་དབང་དུ་བྱས་པའི་མཐོང་ལམ་ཡིན་པར་ཀུན་མཁྱེན་རིག་འཛིན་འཇིགས་མེད་གླིང་པས་བཤད་དོ། །དེ་ལྟར་མཆོག་གྲུབ་ནས་ཀྱང་ཡེ་ཤེས་ཆེན་པོ་དེ་ཉིད་དུ་རྟག་ཏུ་མཉམ་བར་བཞག་པའི་མཐུ་ལས་སྒོམ་སྤང་གི་དྲི་མ་སྣང་གསུམ་ཕྲ་བའི་བག་ཆགས་དང་བཅས་པ་རྣམ་པར་བཅོམ་སྟེ། མི་སློབ་པའི་ལམ་མཐར་ཕྱིན་ལྷུན་གྲུབ་རིག་འཛིན་གྱི་ས་ལ་བཞུགས་ཤིང༌། རྔ་ཡབ་སྤྲུལ་པའི་གྲོང་ཁྱེར་དུ་ད་ལྟའནག་འཆི་མེད་གཡུང་དྲུང་ལྟ་བུའི་གཟུགས་སྐུར་ལྷུན་གྱིས་གྲུབ་ཅིང༌། བོད་ཁམས་བསྟན་འགྲོའི་དཔལ་མགོན་དུ་འཁོན་འཇམ་དབྱངས་བདུན་རྒྱུད་དང༌། ཇོ་འབྲོམ་རྣམ་གཉིས། བསིལ་ལྗོངས་ཤིང་རྟ་རྣམ་གསུམ་ལ་སོགས་པ་རྡོ་རྗེའི་བླ་མ་སྔགས་རིགས་གྲུབ་པའི་དེད་དཔོན་ཚད་མེད་པའི་རྣམ་རོལ་རྒྱུན་མི་ཆད་པ་ཡིན་ནོ། །མདོར་ན་བླ་མའི་སྐད་དོད་གུ་རུ་སྟེ། གུ་ཎ་ཞེས་པ་ཡོན་ཏན་གྱི་སྐད་དོད་དང༌། རུ་ལྕི་བའི་དོན་ཅན་ཡིན་པས། སློབ་དཔོན་ཆེན་པོ་ཐུགས་ཡོན་ཏན་གྱིས་གང་ཞིང་ལྕི་བའི་དོན་ཏོ། །དེ་ལ་རྒྱུ་གང་གིས་ལྕི། ཐབས་གང་ལ་བརྟེན་ནས་ལྕི། ལྕི་བར་བྱེད་པའི་ཡོན་ཏན་ཇི་ལྟ་བུ་ཞིག་ཅེ་ན། བཛྲ་སྟེ་རྡོ་རྗེའི་སྒོ་ནས་ལྕི་ཞེས་པའོ། །ཇི་ལྟར་ན་ཉེར་ལེན་གྱི་རྒྱུ་ཀུན་རྟོག་བློ་བུར་གྱི་དྲི་མ་ཆ་དང་བཅས་པས་ནམ་ཡང་མི་ཕྱེད་པའི་ཕྱིར་སེམས་ཀྱི་རྡོ་རྗེའམ་གཉུག་མའི་སེམས་སུ་གྲགས་པ་འོད་གསལ་གཞི་གྲོལ་ཆེན་པོ་གཞི་གཞོན་ནུ་བུམ་སྐུ་དང༌། ལྷན་ཅིག་
བྱེད་པའི་ཐབས། གཞིའི་ཡིན་ལུགས་ནང་གསལ་ཕྲ་བའི་ཡེ་ཤེས་དང་རྣམ་པ་འདྲ་བའི་ལམ་ལྷུན་གྲུབ་སྣང་སྟོང་དུ་ཤར་བ་ཟབ་མོའི་བསྐྱེད་རིམ་དང༌། ཁམས་གསུམ་ཡེ་གྲོལ་དུ་རྟོགས་པ་མཐར་ཐུག་གི་རྫོགས་རིམ་ཁྱད་པར་ཅན་སོགས་ལས་འབྲས་བུ་སངས་རྒྱས་རྣམས་ཀྱི་རྡོ་རྗེ་གསུམ་ལམ་དུ་བྱེད་པའི་ཕྱིར་བླ་མེད་རྡོ་རྗེའི་ལམ་ཞེས་བྱའོ། །ཡོན་ཏན་རང་གི་ངོ་བོ་ནི། གཞི་རྡོ་རྗེའི་ཡེ་ཤེས་ཉིད་རྡོ་རྗེའི་ལམ་གྱི་ཐབས་མཁས་ལ་བརྟེན་ནས་ཡུལ་འོད་གསལ་རང་རིག་པའི་ཆོས་ཉིད་མཐའ་གྲོལ་ཡངས་པ་ཆེན་པོའི་ཀློང་དུ། ཡུལ་ཅན་ནི་ཁྱད་ཆོས་དྲུག་ཏུ་སོན་པའི་རྫོགས་པ་ཆེན་པོ་འབྲས་བུའི་ཡེ་ཤེས་རྣམ་པར་མི་ཕྱེད་པ་ལྷུན་གྲུབ་རྡོ་རྗེའི་ཡོན་ཏན་ཡོངས་སུ་རྫོགས་པའི་ངོ་བོར་སྨིན་པ་དེ་ཉིད་དོ། །ཞེས་བཛྲ་གྱི་སྒྲའི་བསྟན་དོན་ནོ། །གཉིས་པ་ནི། པདྨ་ཞེས་པ་སྟེ། གསང་བ་བླ་ན་མེད་པའི་ངོ་མཚར་ཡོན་ཏན་གྱི་བཀོད་པ་རྒྱ་མཚོ་དེ་ལྟ་བུ་དེ་དག་གང་ལ་མངའ་ཞེ་ན། སྐབས་འདིར་བསྟན་གྱི་དབང་དུ་བྱས་ནས། རྫོགས་པའི་སངས་རྒྱས་པདྨ་ཞེས་སྐུ་གསུམ་གྱི་སྟོན་པའི་ཞིང་ཁམས་རབ་འབྱམས་ན་མཚན་ཡོངས་སུ་གྲགས་པ་དེ་ཉིད་དོ། །དེ་ལ་ཅིའི་ཕྱིར་པདྨ་ཞེས་མཚན་བཏགས་པ་ཡིན་ཞེ་ན། པདྨའི་སྦུབས་སུ་བརྫུས་ཏེ་བྱུང་བའི་ཕྱིར་འབྱུང་ཁུངས་ཀྱི་སྒྲ་བཏགས་པ་དང༌། པདྨའི་རིགས་དེ་བཞིན་གཤེགས་པ་འོད་དཔག་མེད་ཀྱི་ཐུགས་རྣམ་པ་ཐམས་ཅད་མཁྱེན་པའི་ཡེ་ཤེས་ཀྱི་ཆོ་འཕྲུལ་ཡིན་པས་ངོ་བོ་ལས་བཏགས་པའམ། ཡང་ན་རིགས་ལ་བཏགས་པ་དང༌། །ཤ་ཟ་འབོད་སྒྲོགས་རྒྱལ་པོ་པདྨ་བཞིན། །ས་བཅུ་ཕོ་ཉའི་ལམ་གྱིས་
བགྲོད་ལགས་སམ། །ཞེས་གསུངས་པ་ལྟར། རྡོ་རྗེ་བཙུན་མོ་པདྨ་ལ་བསྟེན་ནས་ཟུང་འཇུག་རྡོ་རྗེ་འཆང་ཆེན་པོའི་གོ་འཕང་གྲུབ་པའི་ལོངས་སྤྱོད་ཀྱི་གཙོ་བོ་ལས་བཏགས་པ་དང༌། སྲིད་པའི་འགྲོ་བ་རྣམས་སུ་སྒྱུ་འཕྲུལ་གཟུགས་སྐུའི་རྣམ་རོལ་ཆུ་ནང་གི་ཟླ་བ་བཞིན་དུ་སྟོན་ཀྱང་པདྨ་འདམ་གྱིས་མི་གོས་པར་འདམ་ན་སྣང་བ་ལྟར་ཆགས་པའི་འཆིང་བ་ལས་གྲོལ་བས་བྱེད་ལས་ཀྱི་སྒོ་ནས་བཏགས་པ་སྟེ། དཔེར་ན་འབྱུང་ཁུངས་ལས་བཏགས་པ་གསེར་མངལ་ཅན་ལྟ་བུ་དང༌། རིགས་ལས་བཏགས་པ་ལྷ་ཆེན་པོ་ལྟ་བུ་དང༌། ལོངས་སྤྱོད་ལས་བཏགས་པ་མེ་ཏོག་ཟས་ཅན་ལྟ་བུ་དང༌། བྱེད་ལས་ཀྱི་སྒོ་ནས་བཏགས་པ་པདྨོའི་དགྲ་ལྟ་བུའོ། །དེའི་ཕྱིར་སློབ་དཔོན་ཆེན་པོ་ལ་པདྨ་འབྱུང་གནས། པདྨ་སཾ་བྷ་བ། པདྨ་སྐྱེས་ཞེས་པ་ལ་སོགས་པ་མཚན་དུ་མ་གསོལ་བ་སྟེ། འདི་དག་ཕལ་ཆེར་མཚན་བཏགས་ཚུལ་དང་པོ་ཤས་ཆེ་ཡང༌། པདྨ་ཞེས་པ་ཙམ་ལ་ཚུལ་བཞི་ཀ་ཡོད་དོ། །ལོངས་སྤྱོད་དང་བྱེད་ལས་ཀྱི་སྒོ་ནས་གྲུབ་པ་མཆོག་བརྙེས་པ་ཐམས་ཅད་ཀྱང་བཤད་མ་ཐག་པ་འདྲ་བ་ཤ་སྟག་ཡིན་པས་དེའི་སྒོ་ནས་པདྨ་ཞེས་འདོགས་རྒྱུ་ཡིན་ན་འཕགས་བོད་ཀྱི་གྲུབ་ཆེན་མཐའ་དག་ལ་པདྨ་ཞེས་འདོགས་པར་འགྱུར་རོ། །ཞེས་བླུན་དཔྱད་མི་བྱ་སྟེ། བྱང་ཆུབ་སེམས་དཔའ་ནམ་མཁའ་མཛོད། །ལག་ན་རྡོ་རྗེ་ལ་སོགས་པ་རྣམས་ལའང་སྙིང་རྗེ་ཆེན་པོ་ཚད་མེད་པ་ཡོད་མོད་ཀྱི། དེ་དག་ལ་རྣམ་ཐར་གྱི་སྒོ་གཞན་ནས་མཚན་བཏགས་ཤིང༌། འཕགས་
པ་སྤྱན་རས་གཟིགས་ལ་ཡོན་ཏན་གྱི་སྒོ་དེ་ཉིད་ནས་མཚན་བཏགས་པ་བཞིན་ནོ། །ཡང་གོང་གི་ལོངས་སྤྱོད་དང་བྱེད་ལས་དེ་དག་མིན་པའི་སློབ་དཔོན་རིན་པོ་ཆེའི་རྣམ་པར་ཐར་པ་ཚད་མེད་ན་པདྨ་ཞེས་ཡོན་ཏན་གྱི་ཕྱོགས་འགའ་ཞིག་ནས་བརྩམ་པ་འདི་ཅི་སྟེ་གསུངས་ཞེ་ན། ལར་གོང་གི་ལོངས་སྤྱོད་དང་བྱེད་ལས་དེ་དག་ཏུ་སངས་རྒྱས་ཀྱི་ཡོན་ཏན་ཐམས་ཅད་འདུ་ཚུལ་ཡང་རྒྱ་ཆེར་བསྒྲུབ་ཏུ་ཡོད་མོད། དེར་མ་ཟད་ལར་ཡོན་ཏན་ཐམས་ཅད་ནས་མིང་འདོགས་དགོས་པའི་ངེས་པའང་མེད་དེ། འཇིག་རྟེན་གྱི་གཏམ་རྒྱུད་དུའང་ཁྱབ་འཇུག་ལ་ལྷ་མ་ཡིན་འཁར་བ་བསད་པའི་ཆེ་བ་མ་ཡིན་པ་དེའི་ཡོན་ཏན་བགྲང་པ་གཞན་ཡང་ཡོད་དེ། དེ་ལྟ་ནའང་ཁྱབ་འཇུག་འཁར་བའི་དགྲ་ཟེར་བ་བཞིན་ནོ། །ཁྱབ་འཇུག་ལ་འཁར་བའི་དགྲ་ཁོ་ནར་མ་ཟད་དེ། མིང་གི་སྒོ་གཞན་ཡང་ཡོད་དོ་ཞེ་ན། སློབ་དཔོན་ཆེན་པོ་ལའང་མཚན་བརྒྱད། འཕྲུལ་མཚན་ཉི་ཤུ་ལ་སོགས་པ་མཚན་གྱི་སྒོ་ཚད་མེད་པ་ཡོད་དེ་ཁ་ཤག་ལ་དོན་ཆུང་བར་ཤེས་ནས་དེ་ཙམ་མོ། །གཉིས་པ་ལ། འདོད་པའི་དོན་ཞུ་བ་དང༌། དེ་བསྐུལ་བའི་སྙིང་པོ་བཤད་པ་གཉིས་ལས། དང་པོ་ནི་སིདྡྷི་ཞེས་པ་སྟེ། བོད་སྐད་དུ་དངོས་གྲུབ་ཀྱི་དོན་ཏོ། །དེའང་དངོས་གྲུབ་ནི་གཉིས་ཏེ། མཆོག་དང་ཐུན་མོང་གི་དངོས་གྲུབ་བོ། །སྔ་མ་ནི། མཆོག་དངོས་མཐར་ཐུག་མི་སློབ་པའི་ཡེ་ཤེས་དང༌། ཟུང་འཇུག་གི་སྐུ་དང༌། བསམ་གྱིས་མི་ཁྱབ་པའི་ཕྲིན་ལས་རྣམས་ཡིན་ལ། དེ་དང་ཚུལ་མཐུན་པའི་རིག་
འཛིན་རྣམ་པ་བཞིའི་སྤང་རྟོགས་ཀྱི་ཡོན་ཏན་མཐའ་དག་ལའང་མཆོག་གི་དངོས་གྲུབ་ཅེས་བྱ་སྟེ། རྣམ་སྨིན་རིག་འཛིན་སྔགས་ཀྱི་སོ་སྐྱེ་ཡིན་པར་རྒྱལ་དབང་པདྨ་ལས་གྲོལ་བཞེད་པའི་མཆོག་གི་དངོས་གྲུབ་ཅེས་པ་གོང་སྨོས་ཀྱི་ཕྱག་རྒྱ་ཆེན་པོ་དངོས་གྲུབ་ཐོབ་པ་ནས་འཇོག་རྒྱུ་ཁོ་ནའང་མིན་ནོ། །ཐུན་མོང་གི་དངོས་གྲུབ་ཅེས་པ་གྲུབ་པ་བརྒྱད། ལས་ཚན་བཅུ་གཉིས་ལ་སོགས་པ་བསྐྱེད་རིམ་པ་དང་ཐུན་མོང་གི་དངོས་གྲུབ་རྣམས་ལ་བྱའོ། །དེ་ལྟར་ན་གནས་སྐབས་སུ་ཕྲིན་ལས་རྣམ་པ་བཞིའི་བརྟུལ་ཞུགས་རབ་འབྱམས་ལ་མངའ་དབང་འབྱོར་ཏེ་སེམས་ཅན་ཚར་གཅོད་པ་དང་རྗེས་སུ་འཛིན་པའི་ཐབས་མཁས་ཀྱི་སྒོ་ནས་འགྲོ་བའི་དོན་རླབས་པོ་ཆེ་སྒྲུབ་པར་ནུས་པ་དང༌། མཐར་ཐུག་རིག་འཛིན་རྣམ་བཞིའི་ཐེམ་སྐས་ལ་བརྟེན་ནས། མྱུར་དུ་མི་སློབ་པའི་ཟུང་འཇུག་ཁྱབ་བདག་རྡོ་རྗེ་འཆང་ཆེན་པོའི་གོ་འཕང་དཀའ་བ་མེད་པར་འགྲུབ་པ་དེ་དག་ནི་བདག་གི་འདོད་པའི་དོན་ཡིན་ནོ་ཞེས་པའོ། །གཉིས་པ་ནི། ཧཱཾཨུ་ཞེས་པ་སྟེ། ཡི་གེ་ཧ་ཨུ་མ་གསུམ་གྱིས་མཚོན་པའི་རྡོ་རྗེ་གསུམ་གྱི་དངོས་གྲུབ་བསྐུལ་བའི་སྔགས་ཡིན་པའམ། ཡང་ན་ཧཱཾཨུ་ཐུགས་རྡོ་རྗེའི་སྙིང་པོ་ཡིན་པས་དངོས་གྲུབ་སྩོལ་བ་ལ་ཐུགས་མངོན་དུ་ཕྱོགས་པར་བསྐུལ་བ་དང༌། དངོས་གྲུབ་དེའི་བསྒྲུབ་གཞི་ཡང་ཧཱཾཨུ་ཡིག་གི་མཚོན་དོན་གདོད་ནས་རྣམ་པར་གྲོལ་བའི་གཉུག་མ་མི་ཤིགས་པའི་སྒོ་གསུམ་རང་ཉིད་ཀྱི་སྙིང་ལ་གནས་པའི་དེ་ཁོ་ན་ཉིད་བསྟན་པ་ཡིན་པས། དངོས་གྲུབ་ཀྱི་གཙོ་བོ་མཆོག་གི་ཡེ་ཤེས་ཀྱི་ཉེར་ལེན་རང་ལ་
གནས་པ་དང༌། ལྷན་ཅིག་བྱེད་རྐྱེན་གུ་རུ་རིན་པོ་ཆེའི་ཐུགས་རྗེ་བསྐུལ་བ་དང༌། ཐུན་མོང་གི་གྲུབ་པའི་འཆར་གཞི་དང་མཐུན་པའི་རྐྱེན་གཉིས་བསྟན་པ་སྟེ། མདོར་ན་དངོས་གྲུབ་འགུགས་པ་དང༌། བརྟན་པར་བྱ་བའི་སྙིང་པོ་ཡིན་ནོ། །དེ་དག་གིས་སྔགས་བླ་མེད་ཀྱི་དབང་ཐོབ་ལ་སྔགས་ཀྱི་ཚིག་འདི་དག་ལ་དད་པ་བརྟན་ཞིང་བློ་གྲོས་དམན་པ་རྣམས་ལ་དོན་འགྲེལ་རགས་པ་ཙམ་ཞིག་བསྟན་པ་ཡིན་ལ། དེ་ཙམ་ཡང་རྟོགས་མི་ནུས་པ་དག་གིས་ནི། སྔགས་ཀྱི་དོན། རྡོ་རྗེ་གསུམ་གྱི་བདག་ཉིད་དམ། རྡོ་རྗེ་གསུམ་གྱི་ཡོན་ཏན་ཆེན་པོ་ཚད་མེད་པས་ལྕི་ཞིང་གང་བའི་རྒྱལ་དབང་པདྨ་ཞེས་བོས་ནས་བདག་ལ་དངོས་གྲུབ་སྩོལ། ཞེས་པ་སྟེ། རྡོ་རྗེ་གསུམ་ནི་སྐུ་གསུང་ཐུགས་གསུམ་ཡིན་ལ་དེ་གང་གིས་བསྟན་ན་ཨོཾ་ཨཱཿཧཱུྃ་བཛྲ་ཞེས་པས་བསྟན། ཡོན་ཏན་གྱིས་ལྕི་ཞེས་པ། སྐུ་མཚན་དཔེ། གསུང་ཚང་དབྱངས། ཐུགས་རྣམ་མཁྱེན་གྱིས་ལྕི་བའི་དོན་ཏེ། སྲང་དངུལ་གྱིས་ལྕི་བས་ལྕི་ལུགས་མིན་གྱི། ས་ལྕིད་དང་ལྡན་པའི་ལྕི་ལུགས་ཡིན་ལ་དེ་གང་གིས་སྟོན་ན་གུ་ཎ་རུ་ཞེས་པ་བསྡུས་ཏེ་གུ་རུ་ཞེས་གསུངས་པ་འདིས་བསྟན། པདྨ་ནི་སློབ་དཔོན་ཆེན་པོའི་མཚན་ཡིན་པ་གོ་སླ། དངོས་གྲུབ་ཟེར་རྒྱུ་དེ་ལ་མཆོག་ཐུན་མོང་གི་དངོས་གྲུབ་མང་པོ་ཡོད་ཀྱང༌། དེང་སང་གི་མི་བསམ་ཆུང་མོ་ཁབ་མིག་གང་ཚོད་དང་བསྟུན་ན། རྟ་ཁྱོག་དང་གཡག་ཁྱོག་མང་བ། བེའུ་ལུག་གི་འཕེལ་ཀ་ཆེ་བ། ཉ་ཤི་གོད་ལོག་མི་འོང་བ་སོགས་ཡིན་པར་འདུག་ཧཱཾཨུ་ཞེས་པ་དང་སིདྡྷི་དངོས་གྲུབ་དེ་སྩོལ་
ཅིག་པར་བསྐུལ་བ་ཡིན། རྒྱ་ཆེར་ན་སྔགས་ཀྱི་རྒྱལ་པོ་འདི་ལམ་གྱི་ལུས་ཡོངས་སུ་རྫོགས་པ་དང་སྦྱར་ཏེ་བཤད་ན་ཤིན་ཏུ་ལེགས་མོད་ཀྱི་རེ་ཞིག་དེ་ཙམ་སྟེ། གང་དྲན་ཙམ་ཁུག་སྤྲུག་པ་ལྟར་འགོད་པ་གཏི་ཐུག་གི་ལས་ཀ་ཡིན་པར་ཐོས་སོ། །དཀོར་ཆོག་གྲྭར་ཤེས་ཉུལ་བའི་བན་གཞོན་དང༌། །གཏོ་སྒྲུབ་ཡུང་རྡོག་བཙོ་འདྲའི་བླ་སར་ཚོ། །སྔགས་དོན་འདི་འདྲ་ཙམ་ཡང་མི་མཁྱེན་ན། །དད་ཟས་རྣམ་སྨིན་བསམ་ཚེ་མཆི་མ་བཀུ། །ཞེས་པའང་གཞོན་ནུ་ཀུན་བཟང་འཇིགས་མེད་ལྷུན་གྲུབ་རང་བྱུང་གི་དཔལ་མོ་བྱང་གྲོལ་རྔ་ཡབ་གསར་པའི་ཆུན་འཕྱང་ཅན་གྱིས་བརྗོད་པ་འདིས་ཀྱང་དེར་སྣང་བྱ་བ་གྲུབ་པའི་བླ་དྭགས་ཅན་རྣམ་པར་སྡུད་པ་ལ་རང་དབང་འབྱོར་བའི་རྒྱུར་གྱུར་ཅིག་གུ།། །།
བཤེས་གཉེན་བསྟེན་ཚུལ།
༈ བཤེས་གཉེན་བསྟེན་ཚུལ་གྱི་མདོ་ཆིངས་ཚིགས་བཅད་དུ་ཕབ་པ་དད་པའི་པདྨ་རྒྱས་པའི་ཉིན་བྱེད་ཅེས་བྱ་བ། གང་ཞིག་ཤར་བས་ཐོག་མེད་དུས་རིང་ནས། །བསགས་པའི་གཏི་མུག་མུན་པའི་རྡུལ་དེངས་ཤིང༌། །ལེགས་རྒུའི་ཡོན་ཏན་ཆུ་གཏེར་རྒྱས་མཛད་པའི། །བཤེས་གཉེན་ཟླ་བ་དེ་ལ་ཕྱག་འཚལ་ལོ། །རང་བྱུང་མྱ་ངན་འདས་པའི་དུས་འོག་ཏུ། །སངས་རྒྱས་མངོན་སུམ་བལྟ་བར་མི་སྤྱོད་པའི། །སེམས་ཅན་ཁམས་ལ་རྒྱལ་བ་ཉིད་འདྲ་བའི། །རླབས་ཆེན་ཕྲིན་ལས་མཛད་འདིར་སུ་མི་དད། །གང་དག་སངས་རྒྱས་ཆོས་ཉིད་མི་ཤེས་པའི། །སྐྱེ་བོ་དེ་དག་གཟུགས་སྐུ་མཐོང་བ་ལས། །གང་ཞིག་བླ་མའི་གདམས་ངག་ཟབ་མོའི་མཐུས། །ཆོས་སྐུ་མཐོང་བ་དེ་དག་ཤིན་ཏུ་བསྔགས། །ཇི་ལྟར་མེ་ཏོག་ཤིང་གི་ས་བོན་དག །གཅིག་
ནས་གཅིག་བརྒྱུད་རྒྱུ་ཡི་རྗེས་འཇུག་པ། །དེ་ལྟར་བླ་མའི་མན་ངག་གཅིག་ནས་གཅིག །བརྒྱུད་འདི་ཐུབ་དབང་ཞལ་གྱི་བདུད་རྩི་ལགས། །དེ་སླད་མང་ཐོས་ཕྱོགས་ལྷུང་བྲལ་བ་དང༌། །རང་བཟོ་མེད་པར་ཆོས་བཞིན་སྨྲ་བ་རྣམས། །སྟོན་པས་བསྐལ་པ་བགྲང་དུ་མ་མཆིས་པར། །དཀའ་བས་བཙལ་བའི་ཆོས་མཛོད་འདི་འཛིན་ཡིན། །སླད་མའི་དུས་ཀྱི་གདུལ་བྱ་ལ་བརྩེ་ནས། །རྒྱལ་བ་རྣམས་ཀྱིས་ཆོས་སྐུའི་གཏེར་བཞག་ཀྱང༌། །མུན་པའི་ལག་ཁྲིད་ལོང་བ་མིག་འབྱེད་པ། །འདི་དག་མེད་ན་སུ་ཞིག་ལོངས་སྤྱོད་འགྱུར། །ཉེས་སྤྱོད་ཆེན་པོའི་རྣམ་སྨིན་མི་བཟད་པའི། །ངན་འགྲོའི་གཡང་སར་སྐྱེ་བ་བརྒྱར་ངུས་ཀྱང༌། །སུན་མེད་བྱིས་པ་སྦྲུལ་དང་རྩེ་བ་བཞིན། །ད་དུང་སྡིག་པའི་རྫབ་ལ་དགའ་བ་དག །འདི་ནི་ཁྱེད་ལ་གཅིག་ཏུ་ཕན་པ་དང༌། །འདི་ནི་རྣམ་ཀུན་ཞི་བའི་སྒོ་ཡིན་ཞེས། །གདམས་པའི་དུས་སྟོན་ཉིན་བཞིན་འབྱུང་བ་ཡིས། །གཏན་བདེའི་ས་ལ་རྐང་པ་དྲང་མཛད་པ། །དེ་དག་དཀའ་བ་རྒྱ་ཆེན་མཛད་པ་སྟེ། །གང་དག་བདག་ལ་བྱ་དཀའ་བགྱིད་བགྱིད་པའི། །སྔོན་གྱི་མཚུན་དང་ཕ་མ་ཉེ་དུ་སོགས། །སུས་ཀྱང་འདི་འདྲའི་དཀའ་བ་བགྱིས་པ་མེད། །ཕན་འདོགས་ཞིང་གི་ངང་ཚུལ་འདི་འདྲ་འདི། །བསམ་ན་དེ་སྐྱོན་མཐོང་ཡང་སྨད་འོས་ཅི། །སེམས་ཅན་སངས་རྒྱས་བསྒྱུར་བའི་བཀའ་དྲིན་ཏེ། །བྱང་ཆུབ་སྙིང་པོའི་མཐར་ཡང་གཞལ་སླ་མིན། །ཁྱད་པར་ཟབ་མོ་རྡོ་རྗེ་ཐེག་པ་ཡི། །རྒྱུད་དོན་གསལ་བར་བལྟ་བའི་མིག་གཅིག་
པུ། །གྲངས་མེད་རྡོ་རྗེ་འཆང་དབང་ངོ་བོ་ཉིད། །དཀོན་མཆོག་བཞི་པ་ཞེས་སུ་རྒྱུད་ནས་བསྔགས། །པི་ཝཾ་སྦྱོར་ཀུན་ཚོགས་ཀྱང་རྒྱུད་མེད་ན། །རོལ་མོའི་དགོས་པ་མི་ནུས་དེ་བཞིན་དུ། །སློབ་དཔོན་ཞལ་ནས་དབང་བསྐུར་མ་ཐོབ་པའི། །སྒྲུབ་པོ་དེ་དག་ཅི་ཡང་མི་འགྲུབ་གསུངས། །སློབ་དཔོན་མཉེས་པ་རབ་འབྲིང་ཐ་མ་ཡི། །རིམ་པ་ཇི་བཞིན་དངོས་གྲུབ་འགུགས་པའི་སྟོབས། །མཆོག་འབྲིང་དམན་པའི་ཁྱད་པར་དུ་མ་ཞིག །རྒྱུད་དོན་རིག་པའི་མིག་སྔར་ཡང་དག་གྲུབ། །རྡོ་རྗེ་གསུམ་གྱི་རྣལ་འབྱོར་སྤངས་པ་ཡི། །ཐ་མལ་རྣམ་རྟོག་རྒྱུན་ལ་གནས་ནས་སུ། །དབང་བཞིའི་ཡེ་ཤེས་སྨིན་པར་མི་ནུས་ཞེས། །རྡོ་རྗེ་ཅན་གྱིས་ལན་མང་གསུངས་པའི་ཚུལ། །རྣམ་དག་རིགས་པའི་ལམ་ནས་ཡིད་ཆེས་ན། །གང་གི་སྒོ་ནས་བླ་མར་འཇོག་པ་ཡི། སྒོ་དེ་བླ་མ་སངས་རྒྱས་བལྟ་བ་ཡི། །དྲི་མ་མེད་པའི་རྒྱུ་མཚན་ཁོ་ནར་གྲུབ། །ཏིལ་གྱི་གོང་བུ་གཏམས་འདྲས་རྒྱལ་བ་ཡང༌། །རྡོ་རྗེ་སློབ་དཔོན་རྣམས་ཀྱི་ལུས་ཞུགས་ནས། །སྔགས་པའི་ཚོགས་གཉིས་རླབས་ཆེན་རྫོགས་བྱེད་ཅིང༌། །སྔོན་བསགས་ལས་སྒྲིབ་མང་པོ་སྦྱོང་གསུང་དང༌། །དེ་ཕྱིར་རྡོ་རྗེ་སེམས་དཔའ་ཧེ་རུ་ཀ༌།ཐ་མལ་གཟུགས་ཀྱིས་དངོས་གྲུབ་སྦྱིན་ནོ་ཞེས། །བདེན་པའི་ཞལ་བཞེས་རྒྱུད་སྡེ་མང་པོ་རུ། །བཀའ་སྩལ་དེ་དག་སྒོ་འདིའི་ངེས་པ་རྙེད། །ཇི་ལྟར་གདུལ་བྱ་འདུལ་བའི་དབང་སྣ་ཚོགས། །བཟུང་ནས་དཀྱིལ་འཁོར་དབང་ཕྱུག་རང་ཉིད་ཀྱང༌། །ཞི་དང་ཁྲོ་བོ་བདུད་སྲིན་ཕྲ་མེན་སོགས། །རྣམ་པ་
མང་པོའི་ཐབས་མཁས་སྟོན་པ་ལྟར། །ཆགས་དང་ཁྲོ་དང་ཤིན་ཏུ་འགྱེད་ལ་སོགས། །བླ་མའི་མཛད་སྤྱོད་ལེགས་ཉེས་ཅིར་སྣང་ཡང༌། །དེ་ཉིད་རིག་པ་རྣམས་ཀྱི་སྒྱུ་མ་འདི། །བསམ་མི་ཁྱབ་ཕྱིར་ལོག་པར་བརྟགས་ནུས་མིན། །དེ་ཕྱིར་ཅི་མཛད་ལེགས་པར་མཐོང་བ་ཡི། །མོས་གུས་ལམ་གྱི་སྲོག་ཏུ་ངེས་རྙེད་ནས། །བསམ་དང་སྦྱོར་བ་དག་པས་དུས་ཀུན་ཏུ། །དམ་པའི་བཤེས་གཉེན་མཉེས་པ་སྒྲུབ་གྱུར་ཅིག །སྐད་ཅིག་ཙམ་ཡང་དགེ་བའི་བཤེས་གཉེན་ལ། །མི་མཉེས་མི་བགྱིད་དཀའ་བ་བརྒྱ་སྟོང་གིས། །བཤེས་གཉེན་ཚོལ་ལ་ངོམ་པ་མི་མངའ་བ། །རྒྱལ་སྲས་མཁས་པ་ནོར་བཟང་འདྲ་བར་ཤོག །དེ་མཐུས་ཐེག་མཆོག་སྤྱི་དང་བྱེ་བྲག་ཏུ། །ཟབ་ལམ་རྡོ་རྗེ་ཐེག་པའི་གནས་རྣམས་ཀུན། །དྲི་མེད་ཆོས་རབ་འབྱེད་པའི་བློ་གྲོས་ཀྱིས། །ཚང་ལ་མ་ནོར་ཇི་བཞིན་ལེགས་རྙེད་ནས། །དམ་ཚིག་སྡོམ་པ་མིག་འབྲས་བཞིན་སྲུང་ཞིང༌། །ཟབ་ཅིང་རྒྱ་ཆེའི་ལམ་རྣམས་མ་འཆོལ་བར། །ནན་ཏན་སྙིང་པོ་བྱེད་པའི་སྒྲུབ་པ་ཡིས། །མངོན་པར་རྟོགས་པའི་ཡོན་ཏན་མཐར་ཕྱིན་ཤོག །ཅེས་པའང་ཆོས་གྲོགས་སྡོམ་བརྩོན་དམ་པ་ཚུལ་ཁྲིམས་ནོར་བུ་ནས་བཤེས་གཉེན་བསྟེན་ཚུལ་གྱི་མདོ་ཆིངས་ཚིགས་བཅད་དུ་ཕབ་པ་ཞིག་དགོས་ཞེས་བསྐུལ་བ་ལྟར་སྤྲང་སྨྱོན་འཇིགས་མེད་བསྟན་པའི་ཉི་མས་ཤར་མར་སྦྱར་བ་མངྒ་ལམ།། །།
ཐོས་བསམ་ལ་བསྐུལ་བའི་གཏམ།
༈ བླ་མ་འཇམ་པའི་དབྱངས་ལ་ཕྱག་འཚལ་ལོ། །ཞི་གྱུར་ཐར་ལམ་བདུད་རྩི་སྐྱོན་མེད་པ། །རྣམ་དག་ཐོས་བསམ་སྒོམ་པའི་འཇུག་ངོགས་མཆོག །མཚན་ལྡན་དམ་པའི་ཞལ་ནས་ཐོས་ན་ཡང༌། །དོན་བཞིན་རང་གི་རྒྱུད་ལ་སྦྱར་
བ་ཉུང༌། །ཐོས་པས་གཞུང་མང་མཐའ་རྒྱ་གཅོད་ནུས་ཤིང༌། །བཤད་པའི་ཚིག་གི་ལོ་འདབ་མང་གྱུར་ཀྱང༌། །གནད་དོན་ཉམས་ལེན་གཅིག་ལ་མ་དྲིལ་ན། །གདམས་ངག་སྟོང་གི་མདོ་དོན་སྟོར་བ་ལགས། །འོན་ཀྱང་མཁས་པའི་རྣམ་དཔྱོད་བཙུན་པའི་ཚུལ། །གྲུབ་པའི་གྲགས་སྙན་ཁྲི་དང་བྱེ་བ་བརྒྱ། །དང་པོ་ཐོས་པ་དམ་པའི་ལག་རྗེས་སུ། །འབྱུང་ཕྱིར་ཐོས་པ་ནོར་བུའི་གཏེར་མཛོད་ཡིན། །གང་ཞིག་ཤེས་ན་ཐོག་མེད་དུས་རིང་ནས། །གོམས་པའི་ཉེས་སྤྱོད་སྒོ་མོ་བཅད་དཀའ་བ། །བག་ཡོད་ཡོན་ཏན་སྟྭ་རེ་རྣོན་པོ་ཡིས། །གཅོད་པའི་ཡུ་བ་མཆོག་གཅིག་ཐོས་པ་ཉིད། །གང་མ་ཤེས་ན་སྡུག་ཀུན་སྲིད་པའི་ཁམས། །འབྱུང་དང་ལྡོག་པའི་རྣམ་དབྱེ་མི་ཕྱེད་པ། །ཟབ་མོ་རྟེན་འབྲེལ་སྟོན་པ་མཆོག་གི་གཏམ། །མང་ཐོས་སྐྱེ་བོ་མཁས་པའི་སྤྱོད་ཡུལ་ཡིན། །གང་ལ་བསླབ་ན་ཚོགས་ཀྱི་ཚོགས་ནང་དུ། །རིགས་པ་སྨྲ་བའི་སྐལ་བཟང་སྦྱིན་བྱེད་པ། །ཆོས་རབ་རྣམ་འབྱེད་བློ་གྲོས་དམ་པའི་སྐྱེས། །ཐོས་མང་དབྱིག་བརྒྱའི་བང་མཛོད་འདི་ལས་བྱུང༌། །གང་དུ་སླེབས་ན་ཕྱིན་ཆད་མི་ལྡོག་པའི། །མྱ་ངན་འདས་པ་རིམས་ནད་མེད་པའི་གནས། །ཇི་བཞིན་བརྙེས་ནས་དེ་བཞིན་སྟོན་པ་ཡང༌། །ཐོས་པའི་ཐེམ་སྐས་བཙུགས་ན་དཀའ་བ་མེད། །གང་ལྟར་སྦྱངས་ན་འཕགས་ལམ་མ་སྐྱེས་པར། །གློ་བུར་འཆི་བདག་ཞགས་པ་བརྐྱང་འགྱུར་ཀྱང༌། །མྱུར་དུ་གཞན་དྲིང་མི་འཇོག་རྣམ་དཔྱོད་བློས། །རང་འབྲས་ལག་རྩེར་སྦྱིན་པ་ཐོས་པའི་དྲིན། །གང་གི་དགོས་པ་ཚེ་དེར་མ་གྲུབ་ཀྱང༌། །ཚེ་
རབས་གཞན་དུ་རྒྱལ་མང་བསྙེན་བཀུར་ཏེ། །རྒྱལ་གསུང་ཐེག་གསུམ་བདུད་རྩིའི་སྣོད་གྱུར་པ། །ཐུབ་ཚུལ་ཐོས་པ་མང་ན་ཤིན་ཏུ་ཉེ། །གང་དུ་གཅེས་པར་བསྐྱང་བའི་ལུས་དང་སྲོག །སྟོབས་འབྱོར་ཁབ་རྩེ་ཙམ་ཡང་མི་འབྲང་བའི། །གདུག་པ་གཤིན་རྗེའི་ཁྲིམས་རར་སོང་ན་ཡང༌། །ཐོས་པའི་དགའ་སྟོན་གྲིབ་མ་བཞིན་དུ་འོང༌། །ཀུན་གཟིགས་སྟོབས་བཅུའི་ཉི་མ་སངས་རྒྱས་ཀྱང༌། །སྡེ་སྣོད་ཚིག་རེའི་ཕྱིར་དུ་སྐུ་ཚེ་བརྒྱ། །བཏང་བའི་ནན་ཏན་གོམས་པ་ལྷུར་བཞེས་ན། །དེ་སྲས་མཁས་པའི་ཚོགས་ལྟ་སྨོས་ཅི་འཚལ། །འོད་བྱེད་ས་མཆོག་གྲུབ་པའི་སེམས་དཔའ་ཡང༌། །གསུང་རབ་ཚིགས་བཅད་གཅིག་ཕྱིར་བརྩོན་མཛད་ན། །གོང་མའི་སྐུ་སྐྱེས་ཡིན་ཀྱང་མི་འོང་གི། །དང་པོ་ཐོས་པ་དམ་པའི་ཞལ་སྐྱེམས་བཞེས། །སྟོང་ཆེན་འཇིག་རྟེན་མེས་པོ་ཚངས་པས་ཀྱང༌། །གདོལ་སྤྱོད་སྨྱིག་མ་མཁན་ལས་ཆོས་མཉན་ན། །མཐོན་པོའི་དཔོན་བླ་ཡིན་ཡང་ཅི་ལྟོ་སྟེ། །ཐོས་པ་སྐྱེ་དགུའི་གཉེན་འདིར་སྤྱི་བོས་འདུད། །ཆེན་པོར་གྲགས་པའི་དྲང་སྲོང་རྒྱས་པས་ཀྱང༌། །ཐུབ་ལ་ཉི་ཚེར་གྱུར་པའི་ཆོས་དྲིས་ན། །སྟོན་ཆེན་སྟོབས་འབྱོར་དྲེགས་པས་མི་ཆོག་གིས། །ཐོས་པ་ཡོན་ཏན་ཚོགས་མང་འདིར་ཞུགས་ཤིག །བཙན་ཡང་སྡིག་པ་དཔུང་དང་བསྡུར་རྒྱུ་མེད། །ཕྱུག་ཀྱང་ཐར་པ་ཉོ་རུ་མི་བཏུབ་ན། །དྲེགས་ལྡན་རྒྱལ་པོ་ཡིན་ཡང་མི་འོང་གི། །མང་ཐོས་མཁས་པའི་ཞབས་རྡུལ་སྤྱི་བོས་ལོངས། །མཐོ་ཡང་ཐོས་པ་གསུག་འབུལ་ལེན་མེད་ཅིང༌། །དམའ་ཡང་ཐོས་པ་བརྙས་ཐབས་བྱེད་མེད་དེ། །
དཔའ་བོ་གང་ཞིག་ཀློག་པའི་ནན་ཏན་ཅན། །དེ་དག་སྙིང་ལ་ཐོས་མང་སོག་པར་འགྱུར། །སྐྱོབ་པའི་སྐྱབས་སུ་ཐོས་པ་འཇིག་རྟེན་མིག །མཐུན་པའི་ཡོན་ཏན་ནོར་བརྒྱའི་མཆོག་སྟེར་ཞིང༌། །མི་མཐུན་ཉེས་པ་སྟོང་གི་དགྲ་གསོད་པ། །འདི་ལ་བརྟེན་ན་དུས་ཀུན་བསླུ་བ་མེད། །སྤྱོད་པའི་ཁྱད་ནོར་ཐོས་པ་རིན་ཆེན་གཏེར། །རྣམ་གྲོལ་འདོད་དགུའི་དགའ་སྟོན་འདིས་སྦྱིན་ཏེ། །བསྐལ་མང་གོམས་པའི་མི་ཤེས་དབུལ་བ་ཡང༌། །འདི་ལ་བརྟེན་ན་རྩ་སྦུར་མེ་ཆེན་བཞིན། །མཐུན་པའི་གཉེན་བཤེས་ཐོས་པ་ལེགས་དགུའི་གཉེན། །མ་འདྲིའི་མཛའ་བཤེས་གཅིག་གྱུར་འདི་ཡིན་ཏེ། །འབྱོར་བའི་དུས་དང་རྒུད་པའི་དུས་ཀུན་ཏུ། །ཕན་དང་བདེ་བའི་གཞི་གྱུར་འདི་ཁོ་ན། །སྔར་ཞིག་ཐོས་པ་ལུང་གི་བ་དན་འདིས། །ཡང་དག་ལྟར་སྣང་ཐང་ཤ་གཅོད་མོད་དེ། །ད་ནི་སྟོན་ཆེན་རྟ་ཐོགས་རྙེད་བཀུར་འདིས། །ཟོག་པོ་གྲུབ་བརྫུའི་དབུ་འཕང་མཐོ་བ་ལགས། །སྔར་ཞིག་ཐོས་པ་རིགས་པའི་རལ་གྲི་འདི། །ཆོས་མིན་ཞགས་པ་གཅོད་པའི་མཚོན་ཆ་སྟེ། །ད་ནི་གཟུ་ལུམ་བསྟན་སེལ་སྡེ་འཁྲུགས་འདིས། །ཆོས་མིན་སྨྲ་བ་ཤེད་ཀྱིས་བཀུར་བ་མང༌། །སྔར་ཞིག་ལེགས་བཤད་ཐོས་པའི་མེ་ཏོག་འདིས། །བློ་གསལ་སྟོང་གི་དུས་སྟོན་བྱས་སྐད་དེ། །ད་ནི་ཐོས་གོག་ཚིག་གི་སྤུན་པ་ཞེས། །སྒོམ་ཆེན་སྟོང་གི་རྣ་བ་རྟག་ཏུ་འགེབས། །སྔར་ཞིག་ཐོས་པ་ཉམས་ལེན་གཏེར་མཛོད་དེ། །དགྲ་བཅོམ་ཁྲི་ཕྲག་ཁྲི་བརྒྱའི་གཤེགས་ཤུལ་ཉིད། །ད་ནི་ཐོས་པ་སྒོམ་གྱི་གཤེད་མ་
རུ། །མཐོང་བའི་རྟོགས་ལྡན་ས་ཡི་དྲེགས་པ་ཙམ། །འདོད་པའི་ཁོལ་པོ་སྐྱེད་མ་བསད་པ་ཡང༌། །རྒྱལ་བའི་སྡེ་སྣོད་མང་དུ་ཐོས་པ་ལས། །མནར་མེད་དམྱལ་བར་དར་གྱི་ཕོ་ལུང་ཙམ། །སོང་ནས་འཆི་མེད་ལྷ་བརྒྱས་བསུས་ཞེས་ཐོས། །ཆགས་སྡང་ཚེར་མའི་དཔལ་ཀྱང་མི་ཆོག་པའི། །ཟབ་གྲག་ཉམས་ལེན་མཐོན་པོའི་ལྟ་སྟངས་འདི། །བཞག་ནས་ཐོས་པ་ཡོན་ཏན་རིན་པོ་ཆེའི། །གཏེར་མཛོད་དགའ་བའི་ཚལ་འདིར་ཞུགས་ན་ལེགས། །ཐོས་པ་བདུད་རྩིའི་རྡུལ་མང་རྣ་བ་རུ། །སོན་པའི་བགོ་སྐལ་ལག་ཏུ་ཐོབ་ན་ཡང༌། །ཐོས་དོན་རང་གི་རྒྱུད་དང་མ་སྦྱར་ན། །ཚིག་ཙམ་སྙིང་པོར་རེ་བ་བྱིས་པ་ཡིན། །སྔོན་དུ་རང་སེམས་ཆོས་སུ་མ་སྦྱར་ན། །ལེགས་བཤད་གཞན་ལ་འཆད་པ་ནེ་ཙོའི་ཁ། །རིགས་ལམ་སྟོང་གི་རྣོ་སོ་ཚུར་བསྐོར་ཏེ། །རྟོག་ངན་འཁྲིལ་བའི་དུག་རོ་ཁུང་ནས་ཐོན། །བཤད་པས་ཀུན་རྨོངས་ཉེས་པ་བརྒྱ་སེལ་ཞིང༌། །རྩོད་པས་ལྟ་བ་ངན་པའི་ལམ་འགོག་ལ། །བརྩམ་པས་ལེགས་ལམ་སྟོང་གི་དམིགས་ཕྱེ་བས། །ཀུན་ཀྱང་རང་སེམས་འདུལ་བའི་གྲོགས་སུ་འགྲོ། །བཤད་ན་མི་བརྗེད་དྲན་པའི་གསལ་འདེབས་ཤིང༌། །རྩོད་ན་རྒྱལ་བའི་ལམ་ལ་ངེས་པ་བརྟན། །བརྩམ་ན་ཤེས་རབ་ཟབ་མོའི་བོགས་འདོན་པ། །དུས་རྣམས་ཀུན་ཏུ་ཆོས་ཀྱི་དགའ་བ་འཕེལ། །རྟོགས་དོན་ལེགས་པར་འདོམས་པའི་བཤད་པ་དང༌། །ལམ་མིན་ཐབས་ཀྱིས་འགོག་པའི་བརྒལ་དང་རྟགས། །ཚུལ་གསུམ་ཡོན་ཏན་ཚང་བའི་རྩོད་པ་གསུམ། །རང་དོན་ཞར་
ལ་འགྲུབ་པའི་གཞན་ཕན་ཡིན། །གཞན་དུ་སྨྲ་ལ་དགའ་བའི་རྟོག་གེ་བ། །དམ་ཆོས་མར་ཁུའི་ཡང་ཞུན་བཏུང་ནས་སླར། །ཆོས་སྤང་སྐྱུགས་པ་འབྱིན་པའི་ངན་སྤྱོད་འདིས། །ཐུབ་བསྟན་ཤ་ནེའི་གོས་བཟང་ཡོང་མི་མཛེས། །དཔྱད་པས་བསམ་བྱུང་ངེས་པ་འདྲེན་མོད་ཀྱི། །ཟབ་མོ་གོ་བ་གནད་དུ་མ་སོང་ན། །ཤེར་འཆལ་རིན་གྱིས་ཉོས་པ་ཡིན་མཆི་སྟེ། །བསམས་ཤིང་བསམས་ན་ལོག་པའི་ལམ་དུ་འགྲོ། །བཤད་པས་ལུང་གི་རྒྱལ་བསྟན་འཛིན་མོད་ཀྱི། །དོན་དུ་རང་གི་རྒྱུད་དང་མ་འདྲེས་ན། །བཤད་ཚད་ཁ་གཡང་བོས་པ་ཡིན་མཆི་སྟེ། །དོན་མེད་རྣམ་གཡེང་ཁོལ་པོར་མི་ཚེ་ཟད། །རྩོད་པས་རིགས་ལམ་གདར་ཤ་གཅོད་མོད་ཀྱི། །རྣམ་དག་རྟོན་པ་བཞི་དང་མ་འབྲེལ་ན། །རྒྱལ་བསྟན་དབྱེན་ལ་སྦྱར་བ་ཡིན་མཆི་སྟེ། །སྙིང་པོའི་ཟབ་དོན་མི་ཤེས་ལྕོ་ཀའི་ཁ། །རྩོམས་པས་ལེགས་བཤད་གོམས་པ་སྐྱེ་མོད་ཀྱི། །ཐར་ལམ་བདུད་རྩིའི་ཐིགས་ཕྲེང་མི་འཆད་ན། །རྒྱ་སྣག་ཤོག་གུའི་དྲོན་འཛར་ཡིན་མཆི་སྟེ། །སྙན་ཚིག་ཕལ་ཆེར་བྱིས་པ་འདྲིད་པའི་ངག །དེ་སླད་ཐུབ་པ་ཆེན་པོའི་མདོ་སྡེ་ལས། །སྨྲ་ལ་དགའ་བའི་ཉེས་པ་མང་མཐོང་བས། །རྒྱལ་བསྟན་སྙིང་པོ་སྒྲུབ་པའི་ནན་ཏན་དུ། །མཐོང་ནས་ཐོས་བསམ་སྒོམ་པའི་དགའ་བས་ཞུགས། །དེ་སྐད་འཇིགས་མེད་བྱིས་པའི་སྤྲང་སྨྱོན་དེས། །དགེ་མཚན་པདྨོའི་འདབ་རྒྱ་འཛུམ་པའི་ཞལ། །མདོ་སྨད་ཟལ་མོ་སྒང་གི་ཉེ་རྒྱུད་དུ། །བྱུང་རྒྱལ་སྨྱོན་པའི་གཏམ་དུ་སྦྱར་བ་ཡིན། །
ཞེས་པའང་སྔ་སོར་འདི་དང་ཕྱོགས་མཚུངས་གྱི་ཚིགས་བཅད་བཅུ་ལྷག་ཙམ་བྲིས་པ་ལས་སླར་ཅུང་ཟད་ཁ་བསྐངས་ཏེ་བཀོད་པ་དགེ་བར་གྱུར་ཅིག། །།
ནགས་ཀྱི་གཏམ་པདྨ་དཀར་པོ།
༈ མཚན་དཔེའི་སྙེ་མ་དར་བབས་སྐུའི་འཁྲི་ཤིང༌། །སློབ་པ་མིན་པའི་ཡེ་ཤེས་འབྲས་བཟང་ཁུར། །འདེགས་བཟོད་རྣམ་དཀར་རྒྱ་མཚོའི་དཔུང་བ་ཅན། །མི་འདུལ་ཤཱཀྱའི་ཏོག་དེས་རྟག་སྐྱོངས་ཤིག །སྐྱོབ་པ་མཆོག་དང་དེ་སྲས་བདག་ཉིད་ཆེས། །དབེན་པའི་བསྔགས་བརྗོད་མེ་ཏོག་རྒྱན་ཕྲེང་གིས། །མཛེས་སྡུག་སྣང་བ་འབུམ་སྦྱིན་ཞི་བའི་ནགས། །གང་ན་གཏམ་གྱི་ཆར་ཟིམ་འདི་ཡང་འབབ། །གྲོང་ཁྱེར་ཆེན་པོ་འཇིགས་བྱེད་ཧ་ལའི་ཤིང༌། །གཡོ་བའི་ལོངས་སྤྱོད་འབྲས་བུ་གཡུར་ཟ་བ། །འཚོ་བྱེད་ནགས་མའི་ལྗོང་བཞིན་བསྙེན་བགྱིད་པའི། །སྐྱེ་བོ་དེ་དག་བདག་ལ་རྔམས་པ་ལགས། །མཛའ་བའི་གཡར་དམ་བཅས་པ་མི་འགོང་པའི། །རྐང་གཉིས་གྲོགས་ཀྱི་འདུ་བ་འབུམ་ཕྲག་བརྒྱ། །སྣ་ཚོགས་ལས་དབང་བཙན་པོས་བདས་བཞིན་དུ། །ལྔ་པའི་ལམ་ནས་སོ་སོར་གྱེས་པ་ལགས། །རྩུབ་མོའི་ངག་ཚིག་ཆུ་སྲིན་ཀུམྦྷི་རས། །བཟུང་བ་མིན་པའི་གསང་གཏམ་གང་གཱའི་རྒྱུན། །རྣ་བའི་བཅུད་དུ་སྒྲེང་བའི་ལྷ་གྲོགས་ཀྱང༌། །འཆི་བྱེད་གཤེད་མར་འགྲོ་བའི་དུས་ཤིག་ཡོད། །འབྱོར་བའི་ཉིན་བྱེད་བཀྲག་ཏུ་བལྟས་པའི་ཚེ། །མཛའ་གཅུགས་མེ་ཏོག་བཞད་པ་ཆེས་མང་ཡང༌། །བཀྲེན་ཕོངས་ཐུན་གསུམ་རང་ཞལ་རྔམས་པ་ན། །ཉེ་དུའི་ཐ་ཚིག་ཟུམ་པ་བཞིན་དུ་འགྱུར། །བརླང་པོའི་གཏུམ་ཚིག་གཡབ་མོ་གཅིག་གིས་ཀྱང༌། །ཁྲོ་གཉེར་མི་བཟད་ཕྱོགས་
ཀྱི་མགྲོན་པོ་བརྒྱ། །མཁུར་ཚོས་ལྭ་བ་དམར་པོའི་ལྡིང་ཁང་དུ། །སྡུད་པའི་གྲོགས་དེ་བསྙེན་པར་དཀའ་བ་ཡིན། །སེར་སྣའི་མདུད་པ་ཤིན་ཏུ་གཞིག་དཀའ་བས། །འཁྱུད་བཅིང་བདོག་པའི་འབྱོར་པ་ལྷུན་སྡུག་ཀྱང༌། །རྔམ་སྟབས་བེ་ཅོན་གདེང་བའི་བདུད་རྒྱལ་དེས། །སྒྲེན་མོ་ཁོ་ནར་ཤུལ་རིང་ལམ་དུ་འཁྲིད། །ཁང་མིག་ཡིད་འོང་བརྩེགས་པའི་ཐ་གྲུའི་ཁྱོན། །སྣ་ཚོགས་རིན་ཆེན་དབྱིག་བརྒྱས་ལྕི་བྱས་ཤིང༌། །ལྷབ་ལྷུབ་དར་གྱི་གོས་བཟང་རྣམ་བཀོད་ཀྱང༌། །དུས་ཀྱི་ཞགས་པས་འཕྲོགས་པ་འབའ་ཞིག་འགྱུར། །ཕྲག་དོག་སྨིན་མ་ཡོ་བའི་ཤ་བ་རིས། །འབྱོར་དགུའི་རྭ་དཀར་འདྲེག་ལ་ཆེས་རྔམ་སྟེ། །གཡོ་ཐབས་མེ་མདའི་འཁྲུལ་འཁོར་ལྷུར་བླང་བ། །ནོར་ལྡན་ཤ་བ་རོག་པོའི་གཙུག་ཏུ་འབབས། །དལ་བ་མིན་པའི་བརྟུལ་ཞུགས་བརྒྱ་ཕྲག་གིས། །རྙེད་དང་བཀུར་སྟིའི་ཁྱད་ནོར་རབ་བསགས་ཤིང༌། །གྲགས་པའི་དུང་ཆེན་སྲིད་པའི་ཁོང་བུས་ཀྱང༌། །ནམ་ཞིག་སྣང་བ་མེད་པའི་ཕྱོགས་སུ་འགྲོ། །འདུ་འཛི་ལྟད་མོའི་དགའ་བ་མི་འཕེལ་ཞིང༌། །རྣམ་གཡེང་བཞིན་རས་འགོད་ལ་མི་ཕྱོགས་པར། །སྦྱངས་པའི་ཡོན་ཏན་མེ་ཏོག་འདུན་ཁང་དུ། །འཇུག་ལ་རིངས་པར་རིངས་པར་ཆས་དེ་མཚར། །སྨན་གྱི་ནགས་ཚལ་རིང་ནས་བཤམ་པ་བཞིན། །རྡོ་ལེབ་ཁྲི་སྟན་ལག་པས་བཀྲམ་པ་བཞིན། །ཁུ་བྱུག་བུ་མོས་རྒྱང་གླུས་བསུ་བ་བཞིན། །བསམ་གཏན་འདོད་རྣམས་ད་ནི་གཤེགས་རེ་རེན། །དཔྱ་ཁྲལ་ཅོད་པན་འཆང་བའི་ས་བདག་དང༌། །གླ་རྔན་སློང་མོར་སློང་བའི་བྲན་གཡོག་དང༌། །དགའ་
གཅུགས་ཞགས་པ་སྐྱོང་བའི་མཛའ་བཤེས་ཀྱིས། །ཞི་བའི་ནགས་འདབ་བཏང་བ་འབའ་ཞིག་ཡིན། །བསོག་བསྲུང་སྤེལ་བའི་ཆོ་གས་མ་བྲེལ་ཞིང༌། །འཁོན་ཞེན་རྟོག་པའི་ཁུར་ཆེན་མ་བཟུང་བར། །དབེན་པའི་ནགས་རིར་ཏིང་འཛིན་འབྱོར་ཚོགས་ཅན། །སྤོང་བ་པ་དེ་བདེ་ཞིང་བདེ་བ་ལགས། །ལྷུན་སྟུག་རི་བོ་ལྷ་ཡུལ་རི་འདྲ་བར། །དུས་བཞིའི་རི་མོར་བྲིས་པ་ལྟར་སྣང་བས། །ཆོས་ཀྱི་སྡོམ་བཞིའི་ཐོག་མར་མཚོན་བགྱིད་དེ། །ཐར་འདོད་རྣམས་ལ་དགེ་བའི་བཤེས་གཉེན་ཡིན། །མཐའ་དང་དབུས་མེད་ཀུན་ཁྱབ་གདལ་བ་ཆེ། །འགྲོ་འོང་མཚན་མ་གཞར་ཡང་དམིགས་མིན་པའི། །དྲི་མེད་མཁའ་དབྱིངས་ཤིན་ཏུ་ཞི་བ་འདིས། །མྱ་ངན་འདས་པ་སྤྲོས་ཀུན་ཞི་བར་སྟོན། །སྤུ་སྡུག་ལྷ་བྱ་བྱ་ཝང་མགྲིན་པའི་ཤིང༌། །ཁྲ་གླག་དྲག་ཤུལ་དགྲ་སྟའི་དྲུང་ཕྱུངས་ཏེ། །ཁྲག་གི་སྐྱང་ནུལ་ཡང་དང་ཡང་བཏབ་པས། །སྲིད་ཁམས་སྡུག་བསྔལ་ཕུང་པོ་མཚོན་མིན་ནམ། །ནགས་ཀྱི་སྨན་ལྗོངས་དྭངས་ཤིང་གཙང་བའི་ངོགས། །སྨིག་རྒྱུའི་སྟོད་གཡོག་བཀབ་པ་བཞིན་གྱུར་པའི། །རྟེན་འབྱུང་སྣང་བ་སྣང་བཞིན་སྟོང་ངོ་ཞེས། །རྟོགས་པར་དཀའ་བའི་ཆོས་ཚུལ་ཟབ་མོ་འདོམ། །ཆོས་ཀྱི་སྡོམ་བཞིའི་བརྡའ་ཐབས་འདི་འདྲི་བ། །ཞི་བའི་ནགས་སུ་ལྟད་མོར་བཀྲམ་ནས་སླར། །བདེ་བའི་ཚོགས་ཆས་བདེ་བ་མཆོག་སྟེར་བའི། །རྣལ་འབྱོར་ཅན་ལ་ཕུ་དུད་རི་མོར་བྱེད། །ལྕུགས་མའི་ཕང་ཕུང་རྣམ་རྒྱལ་ལྷའི་ཁང་བཟང༌། །ཤིང་བལ་གཞོན་ནུའི་ལྷབ་ལྷུབ་འབུམ་གཡོ་ཞིང༌། །རི་སྐྱེས་ལྷ་མོའི་ཟློས་གར་རྩེན་པ་ན། །རྣལ་
འབྱོར་དབང་ཕྱུག་ལྷ་དབང་བཞིན་དུ་བརྗིད། །མར་གད་ཞུན་མར་བཞུས་འདྲའི་ནགས་འདབས་ལ། །སྲེ་བཞོན་རེག་པ་འཇམ་པོས་འཛུམ་བྱིན་པས། །བསིལ་བཅུད་བདུད་རྩིའི་བགོ་སྐལ་མཆོག་སྦྱིན་ཏེ། །རྔ་ཡབ་དེ་འདྲས་བསམ་གཏན་འདོད་རྣམས་མཛེས། །ལྷོད་ལྷོད་འདབ་མ་སྐྱོད་པའི་རྐང་འཐུང་དབང༌། །འབོལ་འཇམ་ཤིང་ལོའི་རེག་པ་ཁྲག་ཁྲིག་གིས། །གཙུག་ཕུད་ཡང་དང་ཡང་དུ་ཉེར་ཕྱུག་པས། །བསམ་གཏན་སྒོམ་ལ་དབུགས་འབྱིན་བྱེད་པ་བཞིན། །སྤྲིན་དཀར་ཁ་ཡི་ཟེག་མ་སྐྱུག་པའི་ཆུས། །ལྗོན་པའི་ནགས་ཚལ་གདོང་བ་བཀྲུས་ནས་སླར། །མེ་ཏོག་ག་ཤལ་ལན་བརྒྱར་འཛུམ་བྱས་པས། །ནགས་ཀྱི་དབང་ཕྱུག་གཟིགས་མོས་མཉེས་པར་བྱེད། །དབང་སྔོན་ནོར་བུའི་མདངས་འདྲ་བདུད་རྩིའི་ཀླུང༌། །སྐོམ་རེག་བདུད་རྩིའི་གདུངས་བ་གཞིལ་མཁས་པས། །ནགས་ཀྱི་རྣལ་འབྱོར་འཚོ་བའི་ལས་བྱེད་དེ། །དུས་རླབས་ཕྲེང་བའི་རྣལ་འབྱོར་ཅན་ལ་འདུད། །འདབ་བཟང་ངང་པ་གཞོན་ནུའི་མགྲིན་པའི་རྔ། །འགྲོ་འོང་དབུགས་ཀྱི་དཎྜིས་བསྐུལ་བ་ལས། །དབྱངས་ལྡན་ངག་གི་སྒྲ་སྐད་མི་ཟད་པའི། །སྤོང་བའི་ལས་ཅན་སྙིང་ལ་དགའ་བ་འཕེལ། །བདེ་བའི་རྒྱུ་ཚོགས་དེ་དང་དེ་འདྲ་བ། །དབེན་པའི་ནགས་སུ་རང་བཞིན་ལྷུན་གྲུབ་སྟེ། །ཐར་པ་འདོད་པའི་སྐལ་བཟང་སྐྱེས་བུ་ནི། །ནགས་ཀྱི་ལྗོངས་སུ་བདེ་བ་མཆོག་དང་ལྡན། །ནགས་རིའི་ཡོན་ཏན་དཔག་བསམ་དཔལ་འདྲ་བ། །བསྐལ་བར་བརྗོད་ཀྱང་ཕ་མཐའ་ཡས་མོད་ཀྱི། །ཉུང་ངུའི་ངག་འདི་དབེན་པའི་ནགས་འདབ་ལ། །
སྤྲོ་བའི་ཡིད་ཀྱིས་གང་དྲན་བྲིས་པ་ལགས། །བསྔགས་འོས་བསྔགས་བརྗོད་དྲི་ཟའི་རྒྱུད་མངས་ལས། །བླང་བའི་ལེགས་བྱས་བསོད་ནམས་སྤྲིན་ཕུང་འདིས། །ཕན་དང་བདེ་བའི་ཆར་ཆེན་འབུམ་སྙོལ་བས། །འཇིག་རྟེན་གསུམ་གྱི་ཐ་གྲུ་ཤིས་གྱུར་ཅིག །ནགས་ཀྱི་གཏམ་པདྨ་དཀར་པོ་ཞེས་བྱ་བ་སྤྲང་པོ་འཇིགས་མེད་བསྟན་པའི་རྒྱལ་མཚན་དུ་འབོད་པས་སྦྱར་བ་དགེ་ཞིང་བཀྲ་ཤིས།། །།
བདེན་གཉིས་རྣམ་བཞག
༈ ལྷ་ཡི་ལྷ་མཆོག་འཇིག་རྟེན་འདྲེན་པ་ཤཱཀྱའི་དབང༌། །བྱང་ཆུབ་སེམས་དཔའ་སེམས་དཔའ་ཆེན་པོ་མ་ཕམ་པ། །ཐུབ་བསྟན་འདྲེན་པའི་ཤིང་རྟ་ཆེན་པོ་རྣམ་གཉིས་སོགས། །བདེ་གཤེགས་སློབ་མར་བཅས་པ་རྣམས་ལ་ཕྱག་འཚལ་ལོ། །གང་ཞིག་ལེགས་པར་ཤེས་གྱུར་ན། །ཡོན་ཏན་ཚད་མེད་དང་ལྡན་པའི། །བདེན་གཉིས་རྣམ་པར་བཞག་པ་ནི། །ཤིན་ཏུ་བསྡུས་ཏེ་གསལ་བར་བྱ། །དེ་ལ་བདེན་གཉིས་གཏན་ལ་ཕབ་པའི་ཕན་ཡོན། བདེན་གཉིས་མ་ཤེས་པའི་ཉེས་དམིགས། བདེན་གཉིས་ཀྱི་གོ་རིམ། བདེན་གཉིས་གཏན་ལ་འབེབས་ཚུལ་ལོ། །དང་པོ་ནི། བདེན་གཉིས་ཆོས་ཅན། གཏན་ལ་ཕབ་པ་ལ་དགོས་པ་ཡོད་དེ། །ཀ་མ་ཤི་ལས། བདེན་གཉིས་རྣམ་དབྱེ་ཤེས་པ་དག །ཐུབ་པའི་དཀའ་ལ་མི་རྨོངས་ཏེ། །དེ་དག་མ་ལུས་ཚོགས་བསགས་ནས། །ཕུན་ཚོགས་ཕ་རོལ་འགྲོ་བ་ཉིད། །ཅེས་བདེན་གཉིས་ཤེས་པས་སྟོན་པའི་གསུང་རབ་ལ་རྨོངས་པ་མེད་པའི་ཤེས་རབ་འཐོབ་ཅིང་དེ་ལ་བརྟེན་ནས་བསོད་ནམས་དང་ཡེ་ཤེས་ཀྱི་ཚོགས་
བསགས་ནས་རྣམ་པ་ཐམས་ཅད་མཁྱེན་པའི་ས་ལ་འགྲོ་བར་གསུངས་པའི་ཕྱིར། གཉིས་པ་ནི། བདེན་གཉིས་ཆོས་ཅན། ཁྱོད་མ་ཤེས་པ་ལ་ཉེས་སྐྱོན་ཡོད་དེ། དཔལ་ལྡན་ཟླ་བས། ཀུན་རྫོབ་བདེན་པ་ཐབས་སུ་གྱུར་པ་དང༌། །དོན་དམ་བདེན་པ་ཐབས་བྱུང་གྱུར་པ་སྟེ། །བདེན་གཉིས་རྣམ་དབྱེ་གང་གིས་མི་ཤེས་པ། །དེ་ནི་རྣམ་རྟོག་ལོག་པའི་ལམ་ངན་ཞུགས། །ཞེས་བདེན་གཉིས་མ་ཤེས་པས་བདེ་བར་གཤེགས་པའི་གསུང་རབ་ལ་རྨོངས་པ་ལ་སོགས་པ་དང་ཆབས་གཅིག་ཏུ་གནས་པར་གསུངས་པའི་ཕྱིར། གསུམ་པ་ནི། བདེན་གཉིས་ཆོས་ཅན། ཁྱོད་ལ་གོ་རིམ་ཡོད་དེ། ཞི་བ་ལྷས། བརྟག་པའི་དངོས་ལ་མ་རེག་པར། །དེ་ཡི་དངོས་མེད་འཛིན་མ་ཡིན། །ཞེས་བྱ་བ་སོགས་གསུངས་པ་ལྟར་ཀུན་རྫོབ་བདེན་པའི་མཚན་གཞི་ངེས་པར་བྱས་རྗེས། དེ་ཉིད་བློ་གནོད་མེད་ལ་སྣང་བའི་དབང་གིས་བཞག་ཙམ་མ་ཡིན་པར་ཡུལ་རང་གི་ཐུན་མོང་མ་ཡིན་པའི་སྡོད་ལུགས་ཀྱིས་གྲུབ་པས་སྟོང་པའི་དོན་དམ་བདེན་པ་ངེས་པར་བྱས་ཏེ། དེའི་རྗེས་སུ་ཀུན་རྫོབ་བདེན་པ་ངེས་དགོས་པའི་ཕྱིར། བཞི་པ་ལ། བདེན་གཉིས་ཀྱི་དབྱེ་གཞི། མཚན་ཉིད། དབྱེ་བ། སྒྲ་དོན། གཅིག་ཐ་དད་བརྟག་པ། གཏན་ལ་འབེབས་བྱེད་ཀྱི་རིགས་པ། དེ་ལྟར་ཉམས་སུ་བླང་བའི་ལག་རྗེས་ཀྱི་རིམ་པའོ། །དང་པོ་ནི། བདེན་གཉིས་ཆོས་ཅན། ཁྱོད་ལ་དབྱེ་གཞི་ཡོད་དེ། ཤེས་བྱ་ཙམ་ཡིན་པའི་ཕྱིར། གཉིས་པ་ནི། ཀུན་རྫོབ་བདེན་པ་ཆོས་ཅན། ཁྱོད་ལ་མཚན་ཉིད་ཡོད་དེ།
ཐ་སྙད་དཔྱོད་བྱེད་ཀྱི་ཚད་མས་རྙེད་དོན་གང་ཞིག །ཐ་སྙད་དཔྱོད་བྱེད་ཀྱི་ཚད་མ་རང་ཉིད་ལ་ཐ་སྙད་དཔྱོད་བྱེད་ཀྱི་ཚད་མར་སོང་བ་དེ་ཡིན་པའི་ཕྱིར། དོན་དམ་བདེན་པ་ཆོས་ཅན། ཁྱོད་ལ་མཚན་ཉིད་ཡོད་དེ། མཐར་ཐུག་དཔྱོད་བྱེད་ཀྱི་ཚད་མས་རྙེད་དོན་གང་ཞིག །མཐར་ཐུག་དཔྱོད་བྱེད་ཀྱི་ཚད་མ་རང་ཉིད་ལ་མཐར་ཐུག་དཔྱོད་བྱེད་ཀྱི་ཚད་མར་སོང་བ་དེ་ཡིན་པའི་ཕྱིར། དེ་ཡང་སངས་རྒྱས་འཕགས་པའི་རྒྱུད་ཀྱི་མཐར་ཐུག་དཔྱོད་བྱེད་ཀྱི་བློ་ཆོས་ཅན། ཐ་སྙད་དཔྱོད་བྱེད་ཀྱི་ཚད་མ་ཡིན་པར་ཐལ། ཁྱོད་རྣམ་མཁྱེན་ཡིན་པའི་ཕྱིར། འདོད་ན། དེ་ཆོས་ཅན། ཁྱོད་ཀྱི་ཀུན་རྫོབ་བདེན་པ་གཉིས་སྣང་དང་བཅས་པའི་ཚུལ་གྱིས་རྟོགས་པར་ཐལ། དེ་ཐ་སྙད་དཔྱོད་བྱེད་ཀྱི་བློ་ཡིན་པའི་ཕྱིར། འདོད་ན་རིགས་སོ། །དེ་ཆོས་ཅན། ཁྱོད་ཀུན་རྫོབ་རང་ཉིད་ལ་ཐ་སྙད་དཔྱོད་བྱེད་ཀྱི་ཚད་མར་སོང་བར་ཐལ། དེའི་ཕྱིར། འདོད་ན། དེ་མ་ཡིན་པར་ཐལ། ཁྱོད་ཀྱི་གཞལ་བྱ་ཀུན་རྫོབ་བདེན་པ་ཡིན་པའི་ཕྱིར། རྟགས་མ་གྲུབ་ཟེར་ན། དེ་ཆོས་ཅན། དེར་ཐལ། ཁྱོད་ཐ་སྙད་དཔྱོད་བྱེད་ཀྱི་བློ་ཡིན་པའི་ཕྱིར། འདོད་ན་དམ་བཅའ་སྔ་མ་དང་འགལ་ལོ། །གསུམ་པ་ནི། བདེན་གཉིས་ཆོས་ཅན། ཁྱོད་ལ་དབྱེ་བ་ཡོད་དེ། ཀུན་རྫོབ་བདེན་པ་དང་དོན་དམ་བདེན་པ་གཉིས་པོ་དེ་ཡིན་པའི་ཕྱིར། རྟགས་གྲུབ་སྟེ། སྤྱོད་འཇུག་ལས། ཀུན་རྫོབ་དང་ནི་དོན་དམ་སྟེ། །འདི་ནི་བདེན་པ་གཉིས་སུ་འདོད། །ཅེས་གསུངས་པའི་ཕྱིར། དང་པོ་ཆོས་ཅན། ཁྱོད་ལ་དབྱེ་བ་ཡོད་དེ། ཡང་ལོག་གི་ཀུན་རྫོབ་
གཉིས་ཡིན་པའི་ཕྱིར། དེ་ཆོས་ཅན། དེར་ཐལ། བདེན་གཉིས་ལས། སྣང་དུ་འདྲ་ཡང་དོན་བྱེད་དག །ནུས་པའི་ཕྱིར་དང་མི་ནུས་ཕྱིར། །ཡང་དག་ཡང་དག་མ་ཡིན་པའི། །ཀུན་རྫོབ་ཀྱི་ནི་དབྱེ་བ་བྱས། །ཞེས་རང་སྣང་བའི་བློ་ལ་སྣང་བ་ལྟར་དོན་བྱེད་ནུས་མི་ནུས་གཉིས་སུ་གསུངས་པའི་ཕྱིར། གཉིས་པ་ཆོས་ཅན། ཁྱོད་ལ་དབྱེ་བ་ཡོད་དེ། སྟོང་ཉིད་བཅུ་དྲུག་དང་དེ་བསྡུ་ན་བཞིར་གསུངས་པའི་ཕྱིར། བཞི་པ་ནི། ཀུན་རྫོབ་བདེན་པ་ཆོས་ཅན། ཁྱོད་ལ་དེ་སྐད་བརྗོད་པའི་རྒྱུ་མཚན་ཡོད་དེ། གནས་ཚུལ་དང་སྣང་ཚུལ་མི་མཐུན་པའི་བསླུ་བའི་ཆོས་ཡིན་པ་གང་ཞིག །མ་རིག་པའི་བློ་ངོར་བདེན་པས་བདེན་པ་ཡིན་པའི་ཕྱིར། དོན་དམ་བདེན་པ་ཆོས་ཅན། ཁྱོད་ལ་དེ་སྐད་བརྗོད་པའི་གཏན་ཚིགས་ཡོད་དེ། དམ་པ་ཟག་མེད་ཡེ་ཤེས་ཀྱི་རྙེད་དོན་ཡིན་པ་གང་ཞིག །མཐར་ཐུག་དཔྱོད་བྱེད་ཀྱི་བློ་ངོར་བདེན་པ་ཡིན་པའི་ཕྱིར། ལྔ་པ་ནི། བདེན་གཉིས་ཆོས་ཅན། ཁྱོད་ངོ་བོ་གཅིག་ཡིན་ཏེ། དབྱེར་མེད་ཡིན་པའི་ཕྱིར། དེ་ཆོས་ཅན། ལྡོག་པ་ཐ་དད་ཡིན་ཏེ། གནས་ཚུལ་དང་སྣང་ཚུལ་མཐུན་མི་མཐུན་སོགས་ཀྱི་ཁྱད་པར་ཡོད་པའི་ཕྱིར། དྲུག་པ་ནི། མཁས་པ་སྟོང་གི་གཙུག་རྒྱན་ཞི་བ་འཚོའི་བཞེད་པ་ལྟར་གྱི་གནད་ཆེན་པོ་བཞི་ལས། དང་པོ། དགག་བྱའི་སྣང་ཚུལ་ངེས་པའི་གནད་ཅེས་བྱ་སྟེ། བློ་གནོད་མེད་ལ་སྣང་བའི་དབང་གིས་བཞག་ཙམ་མ་ཡིན་པར། ཡུལ་རང་གི་ཐུན་མོང་མ་ཡིན་པའི་སྡོད་ལུགས་ཀྱི་ངོས་ནས་གྲུབ་པ་དེ་ཡིན་ལ། དེ་ནི་དེ་ལྟར་འཛིན་པའི་བདེན་འཛིན་རང་
ཅག་ལ་སྣང་བ་ཉིད་སྤང་བྱར་ཤེས་པའམ་རིག་པའི་ཆེད་དོ། །གཉིས་པ་ཁྱབ་པ་ངེས་པའི་གནད་ཅེས་བྱ་སྟེ། འདི་ལྟར་གཞི་གྲུབ་ན་ཆ་བཅས་ཡིན་པས་ཁྱབ་པ་གང་ཞིག །ཆོས་གང་ཡང་རུང་བ་བདེན་གྲུབ་ཞིག་ཡོད་ན། །དེ་ལྟར་ན་བདེན་གྲུབ་ཆོས་ཅན། གཞི་གྲུབ་ཡིན་པར་ཐལ། ཡོད་པ་གང་ཞིག་ཡོད་ན་གཞི་གྲུབ་དགོས་པའི་ཕྱིར། འདོད་ན་ཆ་ཅན་ཀ་བ་དང་དེའི་ཆ་ཤས་གཉིས་ཆོས་ཅན། བདེན་གྲུབ་ཡིན་པར་ཐལ། ཆོས་ཐམས་ཅད་བདེན་པར་གྲུབ་པ་གང་ཞིག་ཀ་བ་ཆོས་ཡིན་པའི་ཕྱིར། འདོད་ན། ཆ་ཅན་ཀ་བ་དང་དེའི་ཆ་ཤས་ཆོས་ཅན། ཁྱོད་བདེན་པར་གྲུབ་པའི་གཅིག་གམ་ཐ་དད་གང་རུང་ཡིན་པར་ཐལ། དེའི་ཕྱིར། དེ་ལྟར་ཤེས་པ་གང་ཡིན་པའོ། །གསུམ་པ་གཅིག་བྲལ་ངེས་པའི་གནད་ཅེས་བྱ་སྟེ། དེ་ཡང་འདི་སྙམ་དུ་ཆ་ཅན་དང་ཆ་ཤས་གཉིས་བདེན་གྲུབ་ཀྱི་གཅིག་གོ་ཞེས་དམ་འཆའ་བ། བུམ་པ་དང་དེའི་ཆ་ཤས་དྲུག་ཀྱང་དེར་འགྱུར་བས། དེ་ཆོས་ཅན་དེར་ཐལ། དེའི་ཕྱིར། འདོད་ན་བུམ་པ་ཆོས་ཅན། ཁྱོད་ལ་དྲུག་ཡོད་པར་ཐལ། ཁྱོད་ཀྱི་ཆ་ཤས་དྲུག་ཡོད་པ་གང་ཞིག །ཁྱོད་དང་དེ་གཉིས་བདེན་གྲུབ་ཀྱི་གཅིག་ཡིན་པའི་ཕྱིར་ཏེ། དེ་ཡིན་ན་དབྱེར་མེད་ཀྱི་གཅིག་ཡིན་པས་ཁྱབ་པའི་ཕྱིར། ཡང༌། བུམ་པའི་ཆ་ཤས་དྲུག་ཆོས་ཅན། གཅིག་ཡིན་པར་ཐལ། བུམ་པ་གཅིག་ལས་མེད་པ་གང་ཞིག་ཁྱོད་དང་དེ་གཉིས་བདེན་གྲུབ་ཀྱི་གཅིག་ཡིན་པའི་ཕྱིར། བཞི་པ་དུ་བྲལ་ངེས་པའི་གནད་ཅེས་བྱ་སྟེ། ཆ་ཅན་དང་ཆ་ཤས་བདེན་པར་གྲུབ་པའི་ཐ་དད་
དོ་ཞེས་ཁས་འཆེ་ན། སྣམ་བུའི་ཆ་ཤས་བསལ་ཤུལ་ན་སྣམ་བུ་ཡོད་པར་ཐལ། དེ་གཉིས་བདེན་གྲུབ་ཀྱི་ཐ་དད་ཡིན་པའི་ཕྱིར་ཏེ། དེ་ཡིན་ན་འབྲེལ་མེད་ཐ་དད་ཡིན་པས་ཁྱབ་པའི་ཕྱིར། ལུག་བསལ་ཤུལ་ན་ར་སྟོན་རུང་བ་བཞིན་ནོ། །དང་པོ་འདོད་ན། གཞི་མ་གྲུབ་པ་ཞིག་ཁས་ལེན་དགོས་ལ། གཉིས་པ་འདོད་ན། བུམ་པ་སོགས་ཆ་མེད་དུ་ཁས་ལེན་དགོས་ཤིང༌། གསུམ་པ་འདོད་ན་ཆ་བཅས་མ་ཡིན་པའི་གཞི་གྲུབ་ཞིག་ཁས་ལེན་དགོས་པས་དམ་བཅའ་ཐབས་རྡུགས་ཡིན་ནོ། །བདུན་པ་ནི། བདེན་གཉིས་ཆོས་ཅན། ཁྱོད་ཉམས་སུ་བླང་བ་ལ་དགོས་པ་ཡོད་དེ། དབུ་མ་ཆེན་པོའི་དོན་གླུའི་ལམ་ནས་དྲང་བར། གཟུང་འཛིན་སྣ་ཚོགས་འདི་ཨ་མའི་འཛུམ་བག །སྐྱེ་འཆི་འཕོ་འགྱུར་འདི་ཨ་མའི་རྫུན་ཚིག །ཅེས་པ་ལྟར་ཆོས་ཐམས་ཅད་བདེན་མེད་དུ་རྟོགས་པ་ལ་སོགས་པ་དང་ལྡན་པའི་ཕྱིར། འདི་ལྟར་རྩོམ་པོའང་བློ་གྲོས་མཐུ། །ཆེས་ཆེར་དམན་པས་འགལ་འཁྲུལ་དྲིས། །གོས་གྱུར་ནོངས་པ་ཅི་མཆིས་པ། །དམ་པ་རྣམས་ཀྱིས་བཟོད་པར་མཛོད། །འདིར་འབད་དགེ་བ་ཆུ་འཛིན་གཞོན་ནུའི་དཔལ་ཡོན་ལས། །ཕན་དང་བདེ་བའི་གྲུ་ཆར་ཆེན་པོའི་རྒྱུན་འབྱུང་སྟེ། །རིས་མེད་འགྲོ་བའི་བསོད་ནམས་ཞིང་དུ་རྣམ་མཁྱེན་གྱི། །འབྲས་བཟང་རྫོགས་ནས་བདེན་གཉིས་ལྷུན་གྲུབ་འབྱུང་བར་ཤོག །བདེན་གཉིས་ཀྱི་རྣམ་པར་བཞག་པ་དོན་བཟང་མེ་ཏོག་རྒྱས་པའི་ལྗོན་ཤིང་ཞེས་བྱ་བ་རྨོངས་པའི་བློ་མངའ་བྱིས་པ་འཇིགས་
མེད་པས་ཨོ་རྒྱན་གྱི་པཎྜི་ཏ་པདྨ་སཾ་བྷ་བས་བྱིན་གྱིས་རླབས་པའི་ཚེས་བཅུའི་དུས་ཆེན་པོར་སྦྱར་བ་རྫོགས་སོ།། དགེའོ།། །།
མཆོད་པའི་གཏམ་ཤུན་ཏུ་ཉུང་ང་མེ་ཏོག་གི་སྒྲོམ།
༈ མཆོད་པའི་གཏམ་ཤིན་ཏུ་ཉུང་ངུ་མེ་ཏོག་གི་སྒྲོམ་ཞེས་བྱ་བ་བཞུགས་སོ། །སྒྱུ་མ་ལྟ་བུའི་རྣམ་འཕྲུལ་མི་ཟད་པ། །རྒྱལ་དང་དེ་སྲས་དགྱེས་པ་སྐོང་མཛད་པ། །འཇམ་དཔལ་དཔའ་བོའི་རྣམ་ཐར་རྗེས་དྲན་ཞིང༌། །གང་ཞབས་ཕྱག་གིས་མཆོད་ནས་གཏམ་འདི་སྤྲོ། །དེ་ལ་འདི་སྐད་དུ། །བློ་ལྡན་གང་ཞིག་འཕྲལ་དང་ཡུན་དུ་དགེ་ལེགས་ཕུན་སུམ་ཚོགས་པ་དོན་དུ་གཉེར་བ་དེ་དག་གིས་ནི་ཡོན་གྱི་གནས་ཆེན་པོ་བླ་མ་རྒྱལ་བ་སྲས་བཅས་ལ་མཆོད་པ་རྣམ་པ་དུ་མས་བསྟི་བསྟང་དུ་བྱས་ལ་བསོད་ནམས་ཆེས་མང་པོ་བསགས་དགོས་པས་འདིར་དེའི་ཚུལ་ཉུང་ངུར་བཤད་པ་ལ། མཆོད་པའི་ཞིང་བསྟན་པ། མཆོད་པའི་རྫས་བཤད་པ། མཆོད་པའི་ཚུལ་བརྗོད་པ། མཆོད་པའི་ཕན་ཡོན་སྨོས་པ་དང་བཞི་ལས། དང་པོ་ནི། མཆོད་པ་ཞེས་བྱ་བ་ཡོན་གྱི་གནས་ལ་ཡོན་སྟོབ་པ་ཡིན་ཞིང༌། ཡོན་གྱི་གནས་སུ་འོས་པ་དང་མི་འོས་པ་ཡོན་ཏན་དང་ལྡན་པ་དང་མི་ལྡན་པས་ཕྱེ་སྟེ། དེའི་ཕྱིར་རྒྱལ་བ་སྲས་བཅས་ནི་ཡོན་ཡོངས་སུ་སྦྱོང་བ་སྟེ། སྦྱིན་བདག་གིས་བསོད་ནམས་ཀྱི་ཞིང་དུ་དམིགས་ཏེ་ཕུལ་བ་དོན་མཐུན་དུ་འགྱུར་བའི་ཕྱིར་ཏེ། དེ་དག་ལ་ཡོན་ཏན་ཕུན་སུམ་ཚོགས་པ་མངའ་བའི་ཕྱིར་རོ། །དེའི་ཕྱིར་བསྔགས་འོས་བསྔགས་བསྟོད་ལས། ཁྱོད་དང་འདྲ་བའི་ཞིང་དག་ནི། །འཇིག་རྟེན་གསུམ་ན་མ་མཆིས་ཏེ། །ཁྱོད་ནི་ཡོན་གནས་རྣམས་ཀྱི་མཆོག །གྲལ་གཙང་མཛད་པས་གཙང་
མ་ལགས། །ཞེས་གསུངས། དེ་དག་ཚོགས་ཀྱི་ཞིང་དུ་སྤྱན་དྲངས་པ་བཞིན་དུ་འབྱོན་པར་ཡང་ངེས་ཏེ། འབྱོན་པའི་གེགས་མེད་པའི་ཕྱིར་རོ། །སྤྱན་དྲངས་པར་མི་མཁྱེན་པའམ། མཁྱེན་ཀྱང་ཡོན་གནས་ལ་མི་བརྩེ་བའམ། མཁྱེན་ཅིང་བརྩེ་བར་གྱུར་ཀྱང་འབྱོན་པའི་མཐུ་མེད་པ་རྣམས་དང་བྲལ་ལ། མཁྱེན་པའི་ཡེ་ཤེས། མི་དམིགས་པའི་ཐུགས་རྗེ། ཐོགས་པ་མེད་པའི་མཐུ་རླབས་པོ་མངའ་བའི་ཕྱིར་རོ། །གཉིས་པ་ནི། དངོས་སུ་བཤམས་པའི་མཆོད་རྫས་རང་གི་ལུས་དང་ལོངས་སྤྱོད་གྱ་ནོམས་པ་རྣམས་དང༌། ཡིད་ལས་བྱུང་བའི་ལྷའི་མེ་ཏོག་མནྡྷ་ར་བ་དང༌། པ་ར་ཤི་ཀ་དང༌། དོང་ཀ་ཆེན་པོ་དང༌། མེ་ཏོག་སྣ་མ་ལ་སོགས་པ་དང༌། བདུག་སྤོས་དམ་པ་གླང་པོའི་སྙིང་པོ། ཨ་ཀ་རུ་ནག་པོ་དང༌། ཙནྡན་ས་མཆོག་དང༌། ཙནྡན་ས་སྟེང་དམ་པ་ལ་སོགས་པ་དང༌། སྒྲོན་མ་འབར་བ་ཉི་མ་དང་ཟླ་བ་ལྟ་བུའི་འོད་ཟེར་ཅན་རྣམ་པ་དུ་མ་དག་དང༌། རྔ་པ་ཊ་ཧ་དང་དུང་དཀར་དང༌། མཁར་རྔ་དང་ཀིམ་པ་ལ་དང༌། རྒྱུད་མངས་ལ་སོགས་པ་རོལ་མོའི་བྱེ་བྲག་སྣ་ཚོགས་པ་ནམ་མཁའ་རབ་འབྱམས་ཀྱི་ཁྱོན་རྒྱས་པར་འགེང་བར་བསམ། དེ་ཡང་མེ་ཏོག་གཅིག་པུ་ཉིད་ཀྱང་བླ་བྲེ་དང༌། རྒྱལ་མཚན་དང༌། རྐོན་བུ་དང༌། སིལ་མར་བཀྲམ་པ་ལ་སོགས་པ་མཆོད་པའི་ཡོ་བྱད་མངོན་པར་འཕྲུལ་ཏེ་རྒྱལ་བ་རྣམས་ལ་མཆོད་དེ། དཀོན་མཆོག་ཏ་ལ་ལས། མེ་ཏོག་ཕལ་ཆེར་མེ་ཏོག་བླ་བྲེ་དང༌། །མེ་ཏོག་བཀོད་པའི་འོད་ཟེར་རབ་བཀྱེ་སྟེ། །མེ་ཏོག་སྣ་ཚོགས་
ཀུན་ཏུ་བཀྲམ་བྱས་ནས། །བདག་ཉིད་ཆེན་པོ་དེ་དག་རྒྱལ་བ་མཆོད། །ཅེས་སོ། །གསུམ་པ་ནི། དངོས་བཤམས་ཀྱི་མཆོད་རྫས་རྣམས་ཀྱང༌། ལོག་འཚོས་སྦགས་པ་མ་ཡིན་པ་དང༌། སེར་སྣ་དང་བརྙས་ཐབས་ལ་སོགས་པ་མེད་པ། གནས་ཁང་བྱི་དོར་བྱ་ཞིང་ཆགས་ཆགས་གདབ་པ་དང༌། ཡོ་བྱད་ལ་གཙང་སྦྲ་འདོན་པ་སྔོན་དུ་སོང་ནས། སྤོས་དང་མར་མེ་དང་མཆོད་ཆུ་སོགས་བཀོད་པ་བསྟར་ལེགས་ཤིང་སེམས་དྭངས་བར་བཤམས་དགོས་ལ། དེའང་རང་གི་ལོངས་སྤྱོད་ཀྱི་མཆོག་རྣམས་ཕུལ་དགོས་ཀྱི། རང་ལ་ཉེར་མཁོ་མེད་ཅིང་རྫས་རིན་ཐང་ཆུང་ངུ་དངོས་པོ་དམན་པ་རྣམས་མཆོད་ལོ་བྱེད་ཅིང༌། ཆེན་པོ་ཕུག་ཏུ་སྦས་པས་མི་ཡོང༌། ཀུན་སློང་ཡང་ཐར་ལམ་ཡང་དག་ལ་གེགས་བྱེད་པའི་རང་རྒྱུད་ཀྱི་སྒྲིབ་པ་སྦྱོང་བའི་ཕྱིར། བསོད་ནམས་གསོག་པར་འདོད་པས་ཟིན་པ་ཞིག་གལ་ཆེ། ཁྱད་པར་ཐེག་ཆེན་པ་རྣམས་ནི་སེམས་ཅན་ཐམས་ཅད་ཀྱི་དོན་དུ་རྫོགས་པའི་བྱང་ཆུབ་ཐོབ་འདོད་ཀྱི་རྣམ་པ་ཅན་གྱི་སེམས་རིན་པོ་ཆེས་ཟིན་པ་དང་བྱང་ཆུབ་མཆོག་ཏུ་བསྔོ་བའི་རྒྱས་ཐེབས་པར་བྱ་སྟེ། འཇམ་དཔལ་ཞིང་བཀོད་ཀྱི་མདོ་ལས། མཚན་རབ་སུམ་ཅུ་རྩ་གཉིས་བརྒྱན་པའི་སྐུ། །བདེ་གཤེགས་རྒྱལ་བར་སུ་དག་འདོད་པ་ནི། །སྙིང་ལ་རྫོགས་པའི་བྱང་ཆུབ་སེམས་ཞོག་སྟེ། །མཆོད་པའི་ཕྱིར་ནི་དེ་ཡི་ཐད་དུ་སོང༌། །ཞེས་པའི་རྐང་པ་གསུམ་པས་བསྟན་པ་ལྟར་དང༌། བཞི་པ་ནི། བདག་ཉིད་ཆེན་པོ་སྙིང་རྗེ་དྲི་མ་མེད་པ་མངའ་ཞིང་ཚོགས་གཉིས་ཕུལ་དུ་བྱུང་བ་གྲུབ་པ་རྣམས་ནི། སྔོན་
དགེ་བའི་རྩ་བ་མང་པོ་བསགས་པ། སྨོན་ལམ་བླ་ན་མེད་པ་བཏབ་པ། སེམས་ཅན་ཐམས་ཅད་ཀྱི་དོན་འབའ་ཞིག་ལ་གཞོལ་བར་གྱུར་པ་སྟེ། དེའི་ཕྱིར་དེ་དག་ལ་ནི་གུས་པའི་ཡིད་ཀྱིས་མེ་ཏོག་གཅིག་ཙམ་ཞིག་ཕུལ་ཀྱང་རྒྱ་མཚོ་ཆེན་པོར་ཆུ་ཐིགས་བཞག་པ་བཞིན་དུ་སྦྱིན་གནས་རྣམས་ཀྱི་ཐུགས་བསྐྱེད་དང་སྦྱིན་བདག་གི་དད་པའི་དབང་གིས་བསྐལ་པ་ཁྲག་ཁྲིག་མང་པོར་བསོད་ནམས་ཀྱི་མཐུ་འཕེལ་བར་འགྱུར་ཏེ། མདོ་སངས་རྒྱས་ཀྱི་ཡོན་ཏན་བསྔགས་པ་ལས། གང་དག་སྟོན་པ་བདེ་གཤེགས་ལ། །མཆོད་པ་ཆུང་ངུ་བྱེད་པ་ཡང༌། །ལྷ་མིའི་བདེ་བ་ཀུན་བགྲོད་ནས། །འཆི་མེད་དམ་པ་མཆོག་ཐོབ་འགྱུར། །ཞེས་གསུངས། དེའི་ཕྱིར་ལེགས་པར་འདོད་རྣམས་ཚུལ་འདི་ལ་བརྩོན་པར་བྱའོ། །གཏམ་འདི་བྱིས་པ་རང་ལོ་བཅོ་བརྒྱད་པ། །འཇིགས་མེད་བསྟན་པའི་རྒྱལ་མཚན་ཞེས་བྱ་བས། །བཅོ་ལྔའི་དུས་ཚེས་བཟང་པོར་བྲིས་པ་སྟེ། །འདིས་ཀྱང་ཡིད་ཅན་ཀུན་ལ་སྨན་གྱུར་ཅིག །དགེའོ། །དགེའོ། །དགེའོ།། །།
དབེན་པ་བསྐུལ་བའི་གཏམ།
༈ རྨོངས་པའི་བྱིས་པ་རླུང་བུའི་དབང་པོ་བཞིན། །ཟིན་པའི་དུས་མེད་བྲེལ་དོའི་རྣམ་གཡེང་བ། །དལ་མེད་སོ་ནམས་ངལ་བས་བསླུས་མཐོང་ནས། །སོས་དལ་ནགས་ཀྱི་ནང་ན་གནས་པར་སྨོན། །ཅི་ཙམ་འགྲོགས་ཀྱང་དེ་ཙམ་སྐྱོན་འགོ་ཞིང༌། །ཆགས་སྡང་མེ་ཡིས་རང་གཞན་སྲེག་བྱེད་པའི། །བྱིས་པའི་གྲོགས་པོའི་རྣམ་ཐར་དེ་ཤེས་ནས། །ཉམས་དགའི་ནགས་ཀྱི་ནང་ན་གནས་པར་སྨོན། །བསྟོད་པས་མོད་ལ་ཁེངས་པའི་རུ་མཚོན་སྒྲེང༌། །ཅུང་ཟད་སྨད་ཀྱང་ཁྲོ་བའི་མེ་འབར་བ། །གདུལ་དཀའ་
སྦྱང་དཀའ་སྙིགས་མའི་གྲོགས་མཐོང་ནས། །དབེན་པའི་གནས་ན་གཅིག་པུར་གནས་པར་སྨོན། །བསླང་ན་མི་སྟེར་ཡིབ་ན་ཚོལ་དུ་འོང༌། །ལན་བརྒྱར་འདྲིས་པའི་མཛའ་བཤེས་ཉིད་གྱུར་ཀྱང༌། །ཅུང་ཟད་རྐྱེན་གྱིས་དགྲ་ཟླར་གྱུར་མཐོང་བའི། །བྱིས་པའི་གྲོགས་པོ་མཐོང་ནས་དབེན་པར་སྤྲོ། །ཕན་བཏགས་བྱེ་བའང་གནོད་པ་གཅིག་གིས་འཇོམས། །ཕན་པ་མི་འདྲེན་སྡུག་བསྔལ་ཡུས་ཆེན་འདྲེན། །ཆོས་ལ་མི་དགའ་སྡིག་པའི་ཕྱོགས་ལ་མོས། །བྱིས་པའི་གྲོགས་པོ་མཐོང་ནས་སེམས་འདི་སྐྱོ། །ལུས་ལ་བརྗིད་མེད་མགོ་ན་ཀླད་པ་མེད། །སངས་རྒྱས་ལས་ཀྱང་གཡོ་ཟོལ་མཁན་པོར་དད། །མོས་གུས་མི་ལྡན་བླ་མ་མཁྱེན་ཞེས་ཟེར། །བྱིས་པའི་གྲོགས་པོ་མཐོང་ནས་སེམས་འདི་སྐྱོ། །ཆོས་ལས་ཟོག་བྲིན་ཟས་གཅིག་མི་ཟ་བར། །རོ་མང་མྱང་ནས་སླར་ལ་སྐྱུག་པར་བྱེད། །གསེར་སྣོད་ཐོགས་ནས་ངན་སྐྱུག་འཕྱག་བགྱིད་པའི། །བྱིས་པའི་གྲོགས་པོ་མཐོང་ནས་ཁམས་འདི་འདུས། །ཁ་རོག་འདུག་ན་ཆོས་གཏམ་ཐོངས་ཞེས་ཟེར། །ཆོས་གཏམ་བཏང་ན་མི་འདོད་རྣ་བ་འགེབ། །ཁ་ལ་ཉི་ཤར་སྙིང་ལ་ཆར་སྤྲིན་གཏིབས། །བྱིས་པའི་གྲོགས་པོ་མཐོང་ནས་ཁམས་འདི་འདུས། །ནོར་སྲེད་བཏང་ན་རང་མདོ་ཤོར་ཞེས་ཟེར། །བཟོད་པ་བསྒོམ་ན་ནུས་པ་མེད་ཅེས་སྨྲ། །ལུང་གིས་ཕྱུག་ལ་ཁ་བཤད་མཁས་ཞེས་སྒྲོགས། །བྱིས་པའི་གྲོགས་པོ་མཐོང་ནས་སྙིང་རླུང་ལྡང༌། །བཤད་པ་ཡིན་ཟེར་ཁ་ལྟ་འུད་
གོག་འཐག །སྒྲུབ་པ་ཡིན་ཟེར་བུག་པ་འདག་ཞལ་བྱེད། །གཞན་ཕན་ཡིན་ཟེར་གསང་སྔགས་བོན་དུ་གྱེར། །བྱིས་པའི་གྲོགས་པོ་མཐོང་ནས་སེམས་འདི་སྐྱོ། །སོ་ཐར་ཡིན་རློམ་ཁྲིམས་མེད་རྟགས་ཙམ་འཛིན། །བྱང་སེམས་ཡིན་ལོ་བྱི་ལའི་བརྟུལ་ཞུགས་འཛིན། །གསང་སྔགས་ཡིན་སྐད་ཚངས་སྤྱོད་རིང་དུ་སྤོངས། །སྙིགས་མའི་སྐྱེ་བོ་མཐོང་ནས་སེམས་འདི་སྐྱོ། །ཀྱེ་མ་ཀྱེ་མ་ལྔ་བརྒྱ་ཐ་མའི་འགྲོ། །བརྒྱ་ཕྲག་ལས་ཉོན་སྲད་བུས་བཅིངས་མཐོང་ནས། །བཟོད་མེད་སྙིང་རྗེའི་གཤོག་རླབས་རབ་བསྐྱོད་དེ། །ཐེག་གསུམ་ཆོས་ཀྱི་གླུ་སྒྲ་སྒྲོགས་གྱུར་ཅིག །དེ་སྐད་དབེན་པར་བསྐུལ་བའི་གཏམ། །ཏིང་འཛིན་ཞི་བའི་ཤིང་རྟ་འདི། །དབེན་པའི་གནས་ལ་རབ་དགའ་བའི། །བྱིས་པ་རྩེད་མོ་ཅན་གྱིས་སྤེལ། །ཛ་ཡནྟུ།། །།
རྟེན་འབྲེལ་སྙིང་པོའི་བརྗོད་བྱ།
༈ རྟེན་འབྲེལ་ཆུའི་ཟླ་བ་བཞིན། །རྟོགས་ནས་གཞན་ལ་འདོམས་མཛད་པ། །འཇམ་དཔལ་དེ་ལ་ཕྱག་བྱས་ནས། །རྟེན་འབྲེལ་སྙིང་པོའི་བརྗོད་བྱ་འཆད། །དེ་ཡང་ཕར་ཕྱིན་ཐེག་པའི་སྐབས་ཀྱི་དབུ་མ་དང་སྦྱར་ན། རྣམ་ཤེས། མིང་གཟུགས། སྐྱེ་མཆེད། རེག་པ། ཚོར་བ། སྐྱེ་བ། རྒ་ཤི་རྣམས་འདུ་བྱེད་དང་སྲིད་པ་ལས་བྱུང་ལ། དེ་དག་ནི་མ་རིག་པ་དང་སྲེད་ལེན་ལས་བྱུང༌། དེ་གསུམ་ཡང༌། ཡང་རྒ་ཤི་ལ་སོགས་པ་ལས་གྲུབ་སྟེ། རྒྱུ་རྒྱས་བསྡུས་དང༌། འབྲས་བུ་རྒྱས་བསྡུས་ཀྱི་མཐའ་རྟོགས་པའི་ཕྱིར་དང་རྨོངས་པ་དག་བསལ་བའི་ཕྱིར་བསྟན་པ་དེ་དག་
གི་ཚུལ་ནི་རྒྱུ་འབྲས་བུར་མི་འཕོ་བ་དང༌། རྒྱུ་མེད་པར་མ་ཡིན་ཞིང༌། རྒྱུ་འབྲས་ལྟོས་མེད་ཀྱི་ཐ་དད་མ་ཡིན་ལ། རྒྱུ་ཆུང་ངུ་ལས་ཀྱང་འབྲས་བུ་ཆེན་པོ་འབྱུང་བ་སྟེ། ས་བོན་དང་མྱུ་གུ་ལ་སོགས་པ་བཞིན་ནོ། །དེ་ལྟར་ན་གཞན་ནི་མ་རིག་པ་ལ་བརྟེན་པས་དེ་ཉིད་བཅོམ་ན་གཞན་རྣམས་ཀྱང་ལྡོག་ལ། དེ་ཉིད་ནི་རྟོག་པའི་དབང་ལས་མ་ཡིན་ཞིང༌། དོན་དམ་པའི་རྣམ་པའི་བདག་ཉིད་ཀྱི་བློས་དཔྱད་པས་རྙེད་པར་ཡོད་པར་འཛིན་པའི་ཕྱོགས་ཏེ། དེའི་ཕྱིར་གཞན་རྣམས་ལ་བྲལ་བ་ཐོབ་པར་འདོད་པས་ནི་དེ་འགོག་པ་རྟོག་དང་བརྟགས་པའི་དངོས་པོ་མ་ལུས་པ་བདག་ཉིད་ཀྱི་ཆ་ལས་བཏགས་པ་དང༌། གཞན་ལ་ལྟོས་ཏེ་འཇོག་པ་ཉིད་ཀྱིས་གནས་ལུགས་སུ་མེད་པར་འཇལ་བ་ཡང་དག་པའི་བློའི་རྣལ་འབྱོར་ལ་བསླབས་པས། ངང་ཚུལ་འགལ་བའི་ཕྱིར་འདི་འཕེལ་བ་དང༌། ཅིག་ཤོས་འགྲིབ་པ་འཐོབ་སྟེ། དེས་ནི་ཁྱད་པར་འདིའི་བདག་པོ་རང་བཞིན་མ་སྐྱེས་པའི་ངང་དུ་གྱུར་པ་ནི་ཐར་པ་སྟེ། དེ་ལྟར་བསྟན་པ་འདི་ནི་དཔྱད་པ་གསུམ་གྱིས་ནོངས་པའི་རྣམ་དཔྱོད་ཅན་འུག་པ་བ་སོགས་ལ་མེད་ཀྱི། སྔོན་ཟབ་མོ་བཟོད་པ་ལ་གནས་ཤིང་རང་དང་གཞན་མཉམ་པར་ཤེས་པའི་བརྩེ་བ་ཡོངས་སུ་རྫོགས་པའི་དབང་གིས་ཐབས་བྱུང་གི་མཛད་པ་འདི་བརྙེས་པའི་སངས་རྒྱས་དེ་བཞིན་ཉིད་དུ་གཤེགས་པས་རྣམ་པར་བསྟན་པ་སྟེ། དགེ་སྦྱོང་ཆེན་པོ་དེའི་ལུགས་སུ་བཞག་པའི་གཙོ་བོ་ནི་འཕགས་པའི་བདེན་པ་བཞི་ཞེས་བྱ་བའི་ཐ་ཚིག་གོ །སྔགས་བླ་མེད་ཀྱི་ལམ་གྱི་གཙོ་བོ་སོགས་དང་སྦྱར་ན། །
བརྟན་པ་དང་གཡོ་བ་ཇི་སྙེད་པ་ནི་ནང་གི་དངོས་པོ་མེད་པ་ལས་སོ། །འདི་ནི་གཉུག་མར་གྱུར་པའི་ལུས་ཀྱིས་གཟུང་ཞིང་འཛིན་ཏོ། །བྱིས་པ་རྣམས་རིས་མཐུན་དུ་གནས་པ་ནམ་ལྡོག་པ་དེའི་ཚེ་རླུང་གི་ཁམས་མ་ལུས་པ་དེར་སྡུད་ཅིང༌། སྐྱེ་བ་ན་ཕྲ་བའི་ཁམས་དེ་ལས་གསུམ་དང་བཞིའི་རིམ་པས་སླར་ཡང་འབྱུང་ཞིང་རིམ་པས་རྟོག་པའི་ཚོགས་ཀྱང་རྒྱས་པར་འགྱུར་རོ། །དེ་ལ་བག་ཆགས་ཀྱི་གནས་མ་བརྟན་དུ་ཟིན་ན་ནི་དེ་ལྟར་སྐྱེ་ཞིང་འབྱུང་བ་མེད་དོ། །འདི་མངོན་པར་འདོད་པས་ནི་དེའི་རྣམ་པར་གནས་པའམ། དེ་ཉིད་ཀྱི་གྲོང་ཁྱེར་དུ་ཡིད་གཞུག་པ་བྱ་སྟེ། དེ་ལྟར་བྱས་ན་རང་བཞིན་གྱི་སེམས་དེའི་ངང་དུ་གྱུར་ཏེ། དེ་ནི་འགྱུར་བ་གསུམ་གྱི་མཚན་ཉིད་ལས་གྲོལ་བའི་མཚན་ཉིད་ཀྱི་ཕྱིར་བརྟན་ན་ཅིག་ཤོས་འགྲིབ་པ་མཐོང་བར་འགྱུར་རོ། །དེ་ལྟར་བཤད་པའི་ལུང་ནི་བདག་ཉིད་དེ་བཞིན་དུ་གཤེགས་ནས་རྡོ་རྗེ་བདེ་བ་ཆེན་པོ་མཆོག་གི་གནས་རྙེད་པ་པོ་དོན་དམ་པའི་དགེ་སྦྱོང་རྡོ་རྗེ་འཛིན་གྱིས་ངེས་པར་བསྟན་པའོ། །དེ་དག་བསྟན་པའི་གཞུང་ནི་འདི་ཡིན་ཏེ། ཡེ་་ཧེ་ཏུ་པྲ་བྷ་བཱ་ཧེ་ཏུནྟེ་་ཐཱ་ག་ཏོ་ཧྱ་བ་ཏད་ཏེ་་་ཡོ་ནི་རོ་དྷ་ཨེ་བཾ་བཱ་དི་མ་ཧཱ་ཤྲ་མ་ཎཿ ཞེས་པའོ། །རྟེན་སྙིང་ཟབ་མོའི་ཚིགས་བཅད་པ། །ཤིན་ཏུ་རྒྱས་པར་གང་བཤད་པའི། །བསོད་ནམས་འདི་ཡིས་འཇིག་རྟེན་འདི། །འཇམ་དཔལ་ཁྱོད་དང་འདྲ་བར་ཤོག །ཅེས་པའང་གཞོན་ནུ་ཀུན་བཟང་འཇིགས་མེད་པས་སྤོས་ཐུར་སོར་མོ་བཅུ་གཉིས་པ་ཞིག་ཞུགས་ཀྱིས་ཟིན་པའི་ཡུན་ལ་གང་དྲན་བྲིས་པ་དགེ་བར་གྱུར་ཅིག། །།
འབེལ་གཏམ།
༈ ཡོངས་ཀྱི་དགེ་བའི་བཤེས་གཉེན་ཆེན་པོ་དོན་བཞིན་དུ་གཏམ་སྟོན་ཅིང༌། ཆོས་བཞིན་དུ་
གདུལ་བྱ་སྐྱོང་བས་དགེ་སློང་ཆོས་སྨྲ་བའོ། །ཞེས་གྲགས་པ་དོན་དང་ལྡན་པ་འཇམ་དབྱངས་མཁྱེན་བརྩེའི་དབང་པོའི་ཞབས་ཀྱི་པདྨོ་རྙོག་པ་མེད་པ་སྤྱི་བོས་ལན་བརྒྱར་བླངས་ཏེ། སྐལ་བཟང་གི་སྐྱེ་བོ་རྣམས་ལ་སྨན་པར་བྱ་བའི་ཕྱིར་དང༌། འཇིག་རྟེན་ན་ཆོས་ཀྱི་རྔ་བོ་ཆེ་རྡུང་ཞིང་གྲགས་པར་བྱ་བའི་ཕྱིར་དང༌། རིགས་པར་སྨྲ་བ་རྣམས་ལ་འབེལ་བའི་གཏམ་གྱིས་ཕུ་དུད་བྱ་བའི་སླད་དུ་དེང་ཚུལ་གཉིས་ཤིང་རྟའི་རྣམ་པར་བཞག་པ་ལས་འཕྲོས་པའི་ངག་གི་ཕྲེང་བ་ཟིལ་པའི་ཐིགས་པ་ཙམ་ཞིག་སྤེལ་བ་ལ་བདག་སྤོབས་པར་བགྱིའོ། །དེ་ལ་དེ་བཞིན་གཤེགས་པ་ནི་ལྷ་དང་བཅས་པའི་འཇིག་རྟེན་ན་སྨྲ་བ་པོ་གཞན་གྱིས་སྨྲ་མི་ནུས་ཤིང་རྟོགས་པར་མི་ནུས་པའི་ཆོས་ཟབ་མོ་ཕྲ་བ་གཏིང་དཔག་དཀའ་བ་སྒྲོ་སྐུར་དང་བྲལ་བའི་དོན་ལེགས་པར་འདོམས་པའི་སེང་གེའི་སྒྲ་ཆེན་པོ་སྒྲོག་པར་མཛད་དེ། ཇི་སྐད་དུ། ཆོས་རྣམས་ཀྱི་ཆོས་ཉིད་ཕྲ་བ་ཕྲ་བ་ཉིད་དང༌། ཆོས་རྟེན་ཅིང་འབྲེལ་འབྱུང་ཕྲ་བ་ཕྲ་བ་དག་སྟོན་ཞིང་ཁྱུ་མཆོག་གླང་པོ་ཆེའི་གནས་སུ་ཞལ་གྱིས་འཆེས་སོ། །དེ་ལ་ཇི་ལྟར་དེ་བཞིན་གཤེགས་པས་ཆོས་རྣམས་ཀྱི་དེ་ཁོ་ན་ཉིད་སྟོན་ཞེ་ན། འདི་ལྟར་ཆོས་ཆོས་ཞེས་བྱ་བ་ནི་ཁམས་བཅོད་བརྒྱད་པོ་ཉིད་དེ། དེ་རྣམས་ལས་ཁམས་བཅུ་བདུན་ལྷག་མ་དང་བཅས་པ་ནི་འདུས་བྱས་ཞེས་བྱ་བ་སྟེ། །དེ་དག་ཀྱང་ཡོད་པ་ཉིད་དུ་མི་འགྲུབ་སྟེ། གཟུགས་ནི་རྡུལ་འདུས་པ་ཙམ། བློ་ནི་གསལ་ཞིང་རིག་པའི་རྒྱུན་ཙམ་ཡིན་ལ་གང་འདུས་པ་མེད་ན་གཟུགས་མེད། གང་གསལ་བའི་རྒྱུན་མེད་ན་བློ་མེད་པར་ནི་འགྲུབ། གང་ཕྱོགས་ཀྱི་ཆ་མ་དམིགས་པས་
རྡུལ་མེད། གང་སྐད་ཅིག་མའི་འགྱུར་བ་མེད་པས་བློ་མ་མཆིས་པར་ཡང་གྲུབ་བཞིན་དུ་ཅིའི་ཕྱིར་རང་བཞིན་གྱིས་གྲུབ་པའི་ཆོས་ཡོད་དོ། །ཞེས་སྨྲ། འོན་ཏེ་ལྡན་པ་མ་ཡིན་པའི་འདུ་བྱེད་ཡོད་དོ་ཞེ་ན། གཟུགས་དང་ཤེས་པ་མེད་ན་དེའི་གནས་སྐབས་ཡོད་དུ་ག་ལ་རུང༌། གནས་སྐབས་ལས་གཞན་པའི་ལྡན་པ་མ་ཡིན་པའི་འདུ་བྱེད་ཀྱང་མཁས་པ་སུ་ཞིག་སྨྲ་བར་ནུས། འོན་ཏེ་ཆོས་ཀྱི་ཁམས་ཀྱི་ཕྱོགས་གཅིག་ན་འདུས་མ་བྱས་ཀྱི་ཆོས་རྣམ་པར་བཞག་པ་དེ་ཉིད་ཡོད་དོ་ཞེས་བྱར་ཡང་མི་རུང་སྟེ། ཅི་འདུས་མ་བྱས་དེ་རྒྱུ་རྐྱེན་ལ་ལྟོས་ཏེ་བཞག་པ་ཞིག་ཡིན་ན་ནི། དེ་ཅི་ནས་ཀྱང་མིང་གིས་བཏགས་པ་དང༌། གཞན་བཀག་པ་ལ་བརྟེན་ནས་བཞག་པ་དང༌། རང་གི་ངོ་བོ་སྒྲུབ་པའི་བློས་སྤྲོས་པ་ཁོ་ན་ལས། རང་གི་ངོ་བོས་གྲུབ་པ་མ་ཡིན་ཏེ། ལྕགས་ཀྱུ་མེད་ལ། ཅི་སྟེ་རྒྱུ་ལས་མ་བཞག །རྐྱེན་ལས་མ་བཏགས་པ་ཞིག་ན་ནི། ཤེས་བྱའི་ཁོང་ན་མི་གནས་ཏེ། སྐྱེས་པ་ཡང་མ་ཡིན། མ་སྐྱེས་པའང་མ་ཡིན་ཞེས་སྨྲ་བར་འགྱུར་རོ། །དེའི་ཕྱིར་ཆོས་གང་ཡང་ཡོང་ཡེ་མ་མཆིས་པ་དེ་ལ་དོན་དམ་པའི་བདེན་པ་ཞེས་བླ་དྭགས་སུ་གདགས་མོད་ཀྱི། གང་དེ་ཉིད་དུའང་གནས་པ་འབའ་ཞིག་མ་ཡིན་ཏེ། སྟོང་པ་ཉིད་གྲུབ་པ་མེད་པའི་གནས་ལུགས་ལ་ལྟོས་ནས་ནི་དེ་ལ་ཀུན་རྫོབ་ཀྱི་བདེན་པ་ཞེས་བརྡར་བྱ་བ་ལས་ཅི་ཞིག་རུང༌། དེ་ལྟ་བས་ན་ཚིག་དང་ཡི་གེས་བརྗོད་པས་མི་མཚོན་ཞིང༌། ངང་གིས་མཚན་མའི་རྡུལ་ཤིན་ཏུ་ཞི་བར་གྱུར་པ་འདི་ནི་དེ་ཁོ་ན་ཉིད་ཡིན་ནོ་ཞེས་དེ་བཞིན་
གཤེགས་པ་དེ་སྐད་དུ་ཆོས་སྟོན་ཏོ། །དེ་ལ་དེ་བཞིན་གཤེགས་པ་ཇི་ལྟར་ཆོས་རྟེན་ཅིང་འབྲེལ་འབྱུང་སྟོན་ཞེ་ན་འདི་ལྟར་ཆོས་གང་ཡང་རང་གི་ངོ་བོས་མ་གྲུབ་པ་དེ་ཉིད་ཀྱི་ཕྱིར་ན་རྨི་ལམ་ལྟ་བུའི་ཆོས་འདི་སྣང་དུ་རུང་སྟེ། འདུས་བྱས་ཀྱི་ཆོས་འདི་དག་ཀྱང་སྐད་ཅིག་མ་ཉིད་ཀྱི་ཕྱིར་རྒྱུ་རྟག་པ་ལས་འབྱུང་བ་མ་ཡིན། རྒྱུ་འབྲས་ངེས་པ་ཉིད་ཀྱི་ཕྱིར་རྒྱུ་ལོག་པ་ལས་འབྱུང་བ་མ་ཡིན། རྣམ་པར་འགྱུར་བ་ཉིད་ཀྱི་ཕྱིར་རྒྱུ་མེད་པར་འབྱུང་བ་མ་ཡིན་གྱི་རང་གི་དངོས་རྒྱུ་ནུས་པ་ཐོགས་མེད་ལས་འབྱུང་བ་ཡིན་ལ། འདུས་མ་བྱས་ཀྱི་ཆོས་རྣམས་ཀྱང་འདུས་མ་བྱས་ཡིན་པའི་ཤེས་བྱར་འཇིག་རྟེན་ན་གྲགས་པ་བཞིན་དུ་འཇོག་སྟེ། སུ་ཞིག་གིས་དེ་ལྟར་འཇོག་ན། འདས་པའི་ཆོས་དང་མ་འོངས་པའི་ཆོས་དང་ད་ལྟ་བའི་ཆོས་དང་མ་བྱས་པའི་ཆོས་ཆོས་ཞེས་ཀུན་ཏུ་ཚད་མར་གྱུར་པའི་བློས་འཇོག་གོ །དེ་འཇོག་བྱེད་ཀྱི་ཚད་མ་དེའང་ཡུལ་འཇལ་བ་ལ་མི་བསླུ་བ་དེའི་ཕྱིར་འཇོག་པས་དེ་འཇོག་པའང་ཡུལ་ལ་ལྟོས། ཡུལ་དེ་ཉིད་ཀྱང་འདོགས་བྱེད་ཀྱི་ཚད་མས་གྲུབ་པའི་ཕྱིར་དེ་འཇོག་པའང་ཚད་མ་ལ་ལྟོས་ཏེ། དེའི་ཕྱིར་མ་བརྟགས་ཉམས་དགའ་མ་བརྟགས་ཉམས་དགའ་ཞེས་བརྗོད་དོ། །དང་པོའི་གནས་ཚུལ་དེ་ལྟ་བུ་ཡིན་ཀྱི་ཐ་སྙད་པའི་བློ་གནོད་མེད་ཀྱིས་ཀྱང་དམིགས་སུ་མི་རུང་བའི་ཆོས་རང་མཚན་དུ་གྲུབ་པ་དུས་རྟག་ཏུ་ཡོད་དོ་ཞེས་ལོག་པའི་བློས་བཞག་པ་ལ་གོམས་པའི་དབང་གིས་རྟེན་འབྲེལ་ཡན་ལག་བཅུ་གཉིས་རྣམས་ཉེ་བ་དང་རིང་བ་བཞིན་དུ་འདི་ཡོད་པས་འདི་འབྱུང་ཞེས་རྣམ་པར་འཇོག་པས་
རྒྱུ་འབྲས་སུ་གྱུར་ཅིང༌། ཟླ་བ་དང་བསིལ་ཟེར་བཞིན་དུ་འདི་སྐྱེས་པས་འདི་སྐྱེས་ཏེ། མ་རིག་པ་ལས་འདུ་བྱེད་འདུ་བྱེད་ལས་རྣམ་ཤེས་རྣམ་ཤེས་ལས་མིང་གཟུགས། མིང་གཟུགས་ལས་སྐྱེ་མཆེད་སྐྱེ་མཆེད་ལས་རེག་པ། རེག་པ་ལས་ཚོར་བ། ཚོར་བ་ལས་སྲེད་པ། སྲེད་པ་ལས་ལེན་པ། ལེན་པ་ལས་སྲིད་པ། སྲིད་པ་ལས་སྐྱེ་བ། སྐྱེ་བ་ལས་རྒ་ཤི་རྒ་ཤི་ལས་ཀྱང་མ་རིག་པ་སོགས་སྔ་མ་ཇི་ལྟ་བ་བཞིན་དུ་སྟེ། དེ་ལྟ་བུའི་རིམ་པས་འཁོར་བའི་འཁོར་ལོ་ཐོག་མ་དང་ཐ་མ་མེད་པར་བརྒྱུད་ཅིང་འཁྱམས་པའི་སེམས་ཅན་བདེ་བ་ལ་འདོད་ཅིང་དོན་དུ་གཉེར་བ་བཞིན་དུ་ཁ་ན་མ་ཐོ་བའི་ཕྱོགས་ཤིན་ཏུ་ལྷུར་ལེན་པ་སྡུག་བསྔལ་དང་བྲལ་བར་མོས་བཞིན་དུ་སྲིད་པ་བཟློག་བྱེད་ཀྱི་ཐབས་ལ་རྨོངས་པར་གྱུར་པ་རྣམས་ཀྱི་ཕྱིར་ཕན་པ་མཐའ་དག་གི་འབྱུང་གནས་རྣམ་པར་གྲོལ་བ་བླ་ན་མེད་པའི་ཡེ་ཤེས་མངོན་དུ་བྱ་བའི་ཕྱིར་ཕ་རོལ་ཏུ་ཕྱིན་པ་དྲུག་གི་བརྟུལ་ཞུགས་ལས་སླར་མི་ལྡོག་པ་འདི་ནི་བྱང་ཆུབ་སེམས་དཔའ་རྣམས་ཀྱི་ཚུལ་སྐྱོན་མ་ཞུགས་པ་ཡིན་ནོ་ཞེས་དེ་བཞིན་གཤེགས་པ་དེ་སྐད་དུ་ཆོས་སྟོན་ཏོ། །གང་ཡང་ཁོ་བོས་འབེལ་བའི་གཏམ་དེ་སྐད་ཅེས་བརྗོད་པ་འདི་ནི་ཚུལ་གཉིས་ཟབ་མོའི་གཞུང་ཡིན་ནོ་ཞེས་ངོ་བོ་ཙམ་དུ་ནི་བརྟགས་པར་རིགས་སོ། །ཕྲ་མོ་ནི་འཁྲུལ་པར་འཁུམ་མོད་ཀྱི་གང་ཟག་ཆོས་ཀྱི་སྤྱན་མ་ཟུམ་པ་དེ་དག་གིས་བཟོད་པར་མཛོད་ཅིག །ཅེས་པའང་ཆུ་རྟ་ཧོར་ཟླ་ལྔ་པའི་ཚེས་གསུམ་གྱི་ཉིན་གཞོན་ནུ་འཇིགས་མེད་པས་ཇ་གསུམ་པ་དང་བཞི་པ་གཉིས་ཀྱི་བར་ལ་མྱུར་པོར་བྲིས་པའོ།། །།
སྐལ་པ་བཟང་ངན་གྱི་མགུར།
༈ ཚངས་དབང་ཁྲག་ཁྲིག་བྱེ་བའི་དོ་ཀེར་གྱིས། །གང་ཞབས་ནོར་བུའི་མེ་ལོང་དྭངས་པའི་ངོགས། ཕུ་དུད་རི་མོའི་སྣང་བརྙན་འཆར་བྱེད་པའི། །མགོན་པོ་ཤཱ་ཀྱའི་ཏོག་དེས་དགེ་བར་མཛོད། །བདེ་གཤེགས་ཉི་མ་འབར་བའི་སྣང་བ་ཡིས། །ཛམ་བུའི་པྲིཀྵིས་མཚན་པའི་གྲོང་ཁྱེར་འདི། །སུམ་རྩེན་སྐྱེད་མོའི་ཚལ་ལས་དགེ་བྱས་པས། །མི་འདུལ་མཆོག་དེའི་བཀའ་དྲིན་སླར་ཡང་དྲན། །སྣང་ནས་སྣང་བར་འགྲོ་བའི་ཐེམ་སྐས་ཆེ། །ཕུལ་བྱུང་ལེགས་ལམ་སྟོང་གི་གདང་བུ་ཅན། །དམ་ཆོས་བདུད་རྩིའི་ལམ་བཟང་འདིར་འཇོགས་ནས། །མཐོ་རིས་གྲོང་ཁྱེར་སྙེགས་རྣམས་སྐལ་པ་བཟང༌། །གང་ལ་བརྟེན་ན་ཉེས་པའི་དབུལ་ཐོངས་ཆེ། །བསལ་མཛད་དམ་ཆོས་བ་མོ་འདོད་འཇོ་བ། །བླངས་ནས་ངེས་ལེགས་འོ་མའི་དགའ་སྟོན་ལ། །སྤྱོད་པའི་སྐྱེ་བོ་དེ་དག་སྐལ་བ་བཟང༌། །ཞི་བསིལ་དམ་ཆོས་བདུད་རྩིའི་འོད་དཀར་ཅན། །གང་གི་ཡིད་མཁར་ལན་ཅིག་ཤར་བས་ཀྱང༌། །སྲིད་པའི་མུན་རུམ་སྟུག་པོ་མཐར་བྱེད་པ། །དེ་འཛིན་བློ་གསལ་དེ་དག་སྐལ་བ་བཟང༌། །སྙིང་ལ་དམ་ཆོས་བདུད་རྩིའི་རྒྱུན་འཁྱིལ་ཞིང༌། །ལྕེ་ལས་ལེགས་བཤད་སྣང་བ་འབུམ་འཇོ་ལ། །རྟག་ཏུ་དམ་ཆོས་སྤྱོད་པས་མི་ངལ་བའི། །བློ་བཟང་སྐྱེ་བོ་དེ་དག་སྐལ་བ་བཟང༌། །རྨད་བྱུང་དགེ་བ་གསུམ་ལྡན་དམ་ཆོས་མཆོག །འཕགས་པའི་བདེན་པ་བཞི་ཡི་ཚུལ་ལུགས་ཅན། །སྙིང་ལ་མདུད་རྒྱ་བཞིན་དུ་དམ་འཆང་བ། །དེ་དག་རྣམས་ཀྱི་སྐལ་པ་སྨད་མ་འགྱུར། །དམ་ཆོས་
ལྷ་ཡི་དགའ་ཚལ་འདི་སྤངས་ནས། །སྙིགས་སྤྱོད་ཐལ་ཕུང་ངོགས་སུ་འགྲེ་ལྡོག་གར། །གཡོ་བས་མི་ངོམས་སྐལ་ངན་སྐྱེ་བོ་དག །ཁྱེད་ཀྱི་ཁོང་ན་གློ་སྙིང་མེད་དམ་ཅི། །ཚངས་སྤྱོད་ནོར་བུའི་རྒྱན་ཆས་འདི་སྤངས་ནས། །བག་མེད་རལ་གྲིའི་འཁྲུལ་འཁོར་གདེང་བའི་རྩེར། །དགེ་བའི་སྲོག་རྩ་འདྲལ་བའི་མི་གཞོན་ལ། །དམ་ཆོས་བདུད་རྩིའི་སྣང་བ་འཆར་དུས་དཀོན། །སྐལ་བ་བཟང་ངོ་དམ་པའི་ལྷ་གྲོགས་རྣམས། །སྐལ་བ་ངན་ནོ་ཆོས་མེད་སྡིག་ཆེན་སྡེ། །འདུན་མ་ལེགས་སོ་ཆོས་བཞིན་སྤྱོད་པའི་གྲོགས། །འདུན་ལུགས་ཉེས་སོ་ཆོས་མིན་སྡིག་སྤྱོད་ཚོགས། །ཞེས་པའང་སྤྲང་སྨྱོན་འཇིགས་མེད་པས་སོ། །དགེའོ།། །།
གཉིད་ལ་བག་ཟོན།
༈ །།གཉིད་ཐུན་གཅིག་ལ་ཉེས་བརྒྱའི་རྨི་སྣང་ཅན། །དུས་རིང་གོམས་པའི་མ་རིག་གཉིད་འཐུག་ནི། །ལྷག་མ་མེད་པར་སད་པའི་མཁྱེན་རབ་སྤྱན། །མི་ཟུམ་འཇམ་མགོན་ལྷ་དེས་ཤིས་པ་སྩོལ། །སྤྱིར་གསང་སྔགས་བླ་མེད་ཀྱི་སྐབས་སུ་གཉིད་དགེ་སྦྱོར་དུ་འགྲོ་ལུགས་ཐུན་མོང་མ་ཡིན་པ་ཡོད་ཅིང༌། ཕར་ཕྱིན་ཐེག་པར་ཡང་གཉིད་དང་ལམ་གྱི་གཞི་མཐུན་འབྱུང་བ་ཡོད་མོད་ཀྱི། །ཐབས་མཁས་དང་བྲལ་བའི་གང་ཟག་གིས་གཉིད་ལ་མང་དུ་བསྟེན་པ་ནི་ཉེས་དམིགས་ཆེ་ཞིང་སངས་རྒྱས་ཀྱིས་མ་གནང་བ་ཡིན་པས་དེ་དགག་ཚུལ་མདོར་བསྡུས་ཤིག་བརྗོད་པར་བྱ་སྟེ། དེ་ལ་གཉིས། གཉིད་ཀྱི་སྐྱོན་སེམས་བ་དང༌། བསམ་ནས་ཇི་ལྟར་སྒྲུབ་པའི་ཚུལ་ལོ། །དང་པོ་ནི། དཔལ་་དེ་བས། མི་ཡི་གྲུ་ལ་བརྟེན་ནས་ནི། །སྡུག་བསྔལ་ཆུ་བོ་ཆེ་ལས་སྒྲོལ། །གྲུ་འདི་
ཕྱི་ནས་རྙེད་དཀའ་བས། །རྨོངས་པ་དུས་སུ་གཉིད་མ་ལོག །ཅེས་གསུངས་པ་ལྟར། ད་ལྟ་རང་རེ་རྣམས་ཀྱིས་རྙེད་པའི་དལ་འབྱོར་གྱི་རྟེན་འདི་འདྲ་བ་ནི་རྒྱུ་དཔེ་གྲངས་གསུམ་གང་གི་སྒོ་ནས་བསམ་ཡང་རྙེད་པར་དཀའ་ཞིང༌། ལན་ཅིག་རྙེད་པའང་རིང་དུ་མི་གནས་པར་འཇིག་པས་སེམས་ཤིག་ཡོད་ན་མགོ་ལ་མེ་ཤོར་བ་ཕྱིར་བཟློག་པ་ལྟ་བུའི་བརྩོན་འགྲུས་དྲག་པོ་ཆོས་ཕྱོགས་སུ་མྱུར་བར་རྩོམ་དགོས་པ་ལ། ཚེའི་ཕྱེད་ཉིན་མོ་དང༌། ཕྱེད་མཚན་མོ་ཡིན་ཅིང༌། མཚན་མོ་རིལ་གཉིད་ལ་འཛད་པར་མ་ཟད། ཉིན་མོའི་ཆ་ཕལ་ཆེར་ཡང་གཉིད་ཀྱིས་དྲོན་སོང་ན། དེ་ནས་བརྩོན་འགྲུས་རྩོམ་པ་མི་ཡོང་ལ། དེའི་རིང་ལ་དགེ་སྦྱོར་རེ་ནུས་ན་བ་འཇོས་ཙམ་གྱིས་ཡུན་ལ་བྱང་ཆུབ་ཀྱི་སེམས་བསྒོམ་པས་ཀྱང་ས་ཆེན་པོའི་རྡུལ་གྱི་གྲངས་དང་མཉམ་པའི་བསོད་ནམས་ཀྱི་ཁེ་འཐོབ་ཚུལ་མདོ་སྡེ་རྣམས་ལས་རྒྱས་པར་གསུངས་པས། གཏན་གྱི་འདུན་མ་དང༌། གཉིད་ཐུན་གཅིག་གི་བདེ་བ་གཉིས་བརྗེ་མི་རིགས་ཏེ། ལྷག་བསམ་བསྐུལ་བ་ལས། ཤིན་ཏུ་གཏི་མུག་ལྟ་བ་མང་པོའི་རྒྱུ། །དོན་བཟང་དམ་ཆོས་ཡོན་ཏན་ཆུད་གཟོན་པ། །གཉིད་འདི་བརྩོན་འགྲུས་འཕྲོགས་པར་རྟོགས་གྱུར་ནས། །མཁས་པ་ཡོན་ཏན་ལྡན་པ་སུ་དེར་དགའ། །ཞེས་སོ། །ཁྱད་པར་དུ་བྱང་སེམས་ཀྱི་སྡོམ་པ་ལེན་སྐབས་མཐའ་ཡས་པའི་སེམས་ཅན་བླ་ན་མེད་པའི་བདེ་བ་ལ་འགོད་པར་ཁས་བླངས་ནས་རྟག་ཏུ་གཉིད་དང་སྙོམ་ལས་ཀྱི་ངང་ལ་དུས་འདའ་བར་བྱེད་པ་ནི་རྒྱལ་བ་སྲས་དང་བཅས་པས་ཁྲེལ་བའི་གནས་སུ་
འགྱུར་ཏེ། མདོ་སྡེ་རྒྱན་ལས། མགོ་ལ་སེམས་ཅན་ཁུར་ཆེན་ཁྱེར་བ་ཡི། །སེམས་དཔའ་མཆོག་རྣམས་དལ་གྱིས་འགྲོ་མི་མཛེས། །ཞེས་གསུངས་པ་བཞིན་ནོ། །དེར་མ་ཟད་ཆོས་མངོན་པར་སེམས་བྱུང་གི་དབྱེ་བ་དང་བྱེད་ལས་འཆད་པ་ན་གཉིད་བྱ་བ་འཆོར་བའི་ལས་ཅན་དུ་གསུངས་པ་ལྟར། འཕྲལ་གྱི་དོན་དང་བྱ་བ་ཕྲ་མོ་རྣམས་ཀྱང་གཉིད་ལ་དགའ་བའི་དབང་གིས་ཆག་འགྲོ་བ་མངོན་སུམ་གྱིས་གྲུབ་སྟེ། མདོར་ན་འཇིག་རྟེན་དང་འཇིག་རྟེན་ལས་འདས་པའི་ཕུན་ཚོགས་ཐམས་ཅད་བརྩོན་འགྲུས་ཀྱི་རྣམ་འཕྲུལ་ཡིན་པར་སྟོན་པ་དང་སྟོན་པའི་རྒྱལ་ཚབ་ཀྱིས་བཤད་ཅིང༌། བརྩོན་འགྲུས་ཀྱི་དགྲ་གཅིག་ལ་གཉིད་འདི་ལས་ཐུ་བ་མེད་པས་དུས་རྒྱུན་དུ་འདིའི་གཞན་དབང་ལ་སོང་ན། དེ་ལས་བློ་ཉེས་པ་དང༌། དེ་ལས་གྱོང་སྒོ་ཆེ་བ་གཞན་མེད་པ་ཡིན་ནོ། །གཞན་ཡང་གཉིད་ལ་གོམས་ཤིང་གཉིད་ཀྱིས་རང་དབང་མེད་པར་བྱས་པའི་མི་ནི་དམ་པའི་ཆོས་གྲལ་དུ་བསྡད་ཀྱང་ཆོས་ཐུན་རིལ་པོ་རྨུགས་ཐོམ་མེ་བ་གཅིག་ལ་བསྐྱལ་ནས་བློ་ལ་ཟིན་རྒྱུའི་དོན་ལྟ་ཅི། ཚིགས་བཅད་གཅིག་ཙམ་ཡང་མེད་པར་སྟོན་མོ་ཆེན་མོའི་ནང་དུ་བགོ་སྐལ་ཆད་པ་བཞིན་སྟོང་ཧང་ངེ་ལངས་ཏེ་འགྲོ་དགོས་པ་དང༌། གསུང་རབ་ཀྱི་གླེགས་བམ་རྒྱབ་ཁལ་ནོན་པ་ཞལ་ཕྱེ་ནས་མིག་བཀྲ་ཧྲིག་ཧྲིག་བལྟས་ཀྱང་ཡིད་ཤེས་ལ་གཉིད་འཐིབས་ཀྱི་རྩི་ཞུགས་ནས་དོན་བློ་ལ་ངེས་རྒྱུ་ཅི་ཡང་མེད་པས་ཟ་མ་ལང་ཚོ་མ་ལ་བྱ་བ་བྱེད་མི་ནུས་པ་ལྟ་བུར་འགྱུར་བ་དང༌། དོན་རྣམ་པར་ངེས་པའི་ཕྱིར་བསམ་བྱུང་གི་ཤེས་རབ་སྐྱེད་པར་
བརྩམས་ཀྱང་ཡིད་གཏད་ཙམ་ཉིད་ནས་གཉིད་ཀྱི་མགོ་རྩོམ་ཡོང་བས་དཔྱད་པ་གཏིང་སླེབས་པ་ཐེང་གཅིག་ཀྱང་འགྲོར་མི་སྟེར་བ་དང༌། ཏིང་ངེ་འཛིན་གྱི་སྒྲིབ་པ་ལྔའི་ཡ་གྱལ་ཡིན་པས་སྒོམ་བྱུང་གི་ཤེས་རབ་དེ་བས་ཀྱང་སྐྱེ་ས་མེད་པ་དང༌། དུས་རྒྱུན་དུ་གཉིད་ཀྱི་དབང་གིས་ཤེས་པའི་འཕང་སྨད་ཅིང༌། དྲན་རིག་གི་དཔལ་བཅག་པས་ཆོས་རབ་རྣམ་འབྱེད་ཀྱི་ཤེས་རབ་དད་དམ་ཤུགས་ཀྱིས་ཞན་དུ་འགྲོ་ཞིང༌། དྲན་པ་ཤིན་ཏུ་བུལ་བ་དང༌། བརྗེད་ངེས་པ་མང་དུ་འགྲོ་བའི་ཉེས་དམིགས་དང་ལྡན་པར་ལྷག་བསམ་བསྐུལ་བ་ལས། གང་ཞིག་རྨུགས་དང་གཉིད་ལ་དགའ་འགྱུར་བ། །དེ་ཡི་ཤེས་རབ་ཤིན་ཏུ་ཉམ་ཆུང་འགྱུར། །དེ་ཡི་བློ་ཡང་ཡོངས་སུ་ཉམས་པར་འགྱུར། །ཡེ་ཤེས་ལས་ནི་རྟག་ཏུ་དེ་ཉམས་འགྱུར། །ཞེས་དང༌། གང་ཞིག་རྨུགས་དང་གཉིད་ལ་དགའ་འགྱུར་བ། །སེམས་ཀྱང་རྟུལ་ཞིང་དེ་ཡི་དྲན་པ་རྨོངས། །ལུང་ནོད་ཁ་ཏོན་བྱེད་ལ་དེ་མི་གནས། །ཆོས་སྨྲ་ན་ཡང་དེ་ནི་རྟག་ཏུ་ཐོགས། །ཅེས་བཀའ་སྩལ་ཏོ། །གཉིད་ཀྱིས་ཤས་ཆེར་ནོན་པ་ལ་མི་མ་ཡིན་གཏུམ་པོ་དག་གིས་ཀྱང་གླགས་རྙེད་དེ་མདངས་འཕྲོགས་པར་ལྷག་བསམ་བསྐུལ་བ་དང་སྤྱོད་འཇུག་བསྔོ་ལེར་གསུངས་ཤིང༌། ཤིན་ཏུ་ཐུབ་པར་དཀའ་བའི་དཔའ་བོའང་གཉིད་ཀྱི་གླགས་ལ་བལྟས་ནས་དགྲ་ཉམ་ཆུང་གི་ལག་ཏུ་སོང་བ་མཐོང་ཆོས་སུ་ཡང་མང་པོ་འདུག་པ་དང༌། གཉིད་ཀྱི་ཚོད་མི་རིག་པ་ཚེའི་བར་ཆད་དུ་འགྲོ་བར་ལུགས་ཀྱི་བསྟན་བཅོས་ཤེས་རབ་སྡོང་བུ་ལ་སོགས་པར་ཡང་བཤད་དེ། དེ་འདྲ་ལ་དགོངས་ནས་ཀུན་མཁྱེན་དྲི་མེད་འོད་ཟེར་
གྱིས་ཀྱང༌། ཉལ་ཞིང་གཉིད་པས་དོན་རྣམས་འཆོར་བ་དང༌། །བག་ཟོན་མེད་པས་དགྲ་རྣམས་འཇུག་པ་དང༌། །འདྲེ་རྣམས་གླགས་ཚོལ་ཉེས་པ་ཚད་མེད་པས། །དོན་རྣམས་འབྱོར་སླད་བརྩོན་འགྲུས་དཔེ་མེད་མཛོད། །ཅེས་རི་བོང་གི་རྟོགས་བརྗོད་དུ་གསུངས་སོ། །སེམས་ཀྱི་ཡོན་ཏན་ལ་གནོད་པར་མ་ཟད་ལུས་ཀྱི་ཟུང་ཡང་གཉིད་འདིས་འཕྲོག་པར་བྱེད་དེ། གཉིད་ཀྱིས་ནང་གི་མེའི་ཁམས་ཉམས་པར་འགྱུར་བས་ཁ་ཟས་ལེགས་པར་མི་འཇུ་བ་དང༌། ཟས་ལ་ཡི་ག་འཆུ་བ་དང༌། བད་ཀན་དང་གཅོང་ཆེན་དམུ་ཆུ་སོགས་ནད་མང་པོ་འཇུག་པ་དང༌། ཆོས་ཉིད་ཀྱིས་ཤ་ཆེ་ཞིང་ལྷོད་པ་དང༌། མདོག་མི་སྡུག་པར་འགྱུར་བའི་ཉེས་པ་སོགས་ཀྱང་གསུངས་ཏེ། རྒྱས་པར་བསླབ་བཏུས་དང་མདོ་བལྟ་བར་བྱའོ། །ད་ལྟ་གཉིད་ཆེ་ཞིང་སྤང་བར་དཀའ་བ་ནི་ཚེ་སྔ་མ་ལ་སྦྲུལ་སོགས་སུ་སྐྱེས་ནས་གཉིད་དང་དེའི་རྒྱུ་མུན་པ་ཡིད་བྱེད་ལ་མང་དུ་གོམས་པའི་རྒྱུ་མཐུན་ཡིན་པར་གདགས་པའི་བསྟན་བཅོས་ལས་བཤད་པ་ལྟར། ད་ལྟ་གཉིད་ལ་གོམས་ན་ཚེ་འདི་ལ་དེ་འདྲའི་ཉེས་དམིགས་འབྱུང་བར་མ་ཟད། ཕྱི་མ་ལའང་དེའི་རྒྱུ་མཐུན་བཟློག་དཀའ་བས་རྩལ་ཅི་ཡོད་ཕྱུངས་ནས་དགག་དགོས་སོ། །གཉིས་པ་ནི། བརྩོན་འགྲུས་ཀྱི་ཕན་ཡོན་སེམས་དང་བར་འགྱུར་བའི་དམིགས་པ་ཡིད་ལ་བྱེད་པ་དང༌། སྣང་བའི་མཚན་མ་ཡིད་བྱེད་ལ་མང་དུ་གནས་པའི་སྒོ་ནས་གཉིད་མང་བའི་འགལ་ཟླ་སྒྲུབ་པ་དང༌། གཉིད་བྱུང་རེས་ཀྱིས་ཉེས་དམིགས་མང་དུ་བསམ་ལ། སྤྱོད་འཇུག་ལས། དེ་བས་པང་དུ་སྦྲུལ་འོང་ན། །ཇི་ལྟར་རིངས་པས་ལྡང་བ་ལྟར། །དེ་
བཞིན་གཉིད་དང་སྙོམ་འོང་ན། །མྱུར་དུ་དེ་དག་བཟློག་པར་བྱ། །ཞེས་པ་ལྟར་བསྒྲིམས་ནས་འགོགས་ཤིང་ཕྱིས་མི་འབྱུང་བའི་འཕེན་པ་དྲག་པོ་བྱ་སྟེ། དེ་དག་ནི་གཉིད་ལོག་མ་བྱུང་གོང་དང༌། བྱུང་བར་རྩོམ་པ་ན་ཇི་ལྟར་བྱ་བ་དང༌། བྱུང་བ་འགོག་པ་ལ་ཡང་སྦྱར་རོ། །དེ་ལྟ་མོད་ཀྱི་གཉིད་བྱུང་ཚབས་ཆེ་བ་འགོག་པ་ལ་ནི། ལངས་ནས་ཕྱོགས་བཞིར་འཆགས་པ་དང༌། རྒྱུ་སྐར་ལ་ལྟ་བ་དང༌། གདོང་ལ་ཆུ་གྲངས་མོ་འདེབས་པ་སོགས་སྤྱོད་ལམ་གྱི་སྒོ་ནས་འགོག་ཚུལ་ཉན་ས་ལས་གསུངས་པ་རྣམས་ཀྱང་བསྟེན་དགོས་ཤིང༌། སྤྱོད་འཇུག་ལེའུ་བདུན་པར་གསུངས་པའི་འཆི་བ་སེམས་ཚུལ་རྣམས་ཀྱང་སྟོབས་ཆེའོ། །ཞེས་པའང་དགེ་སྦྱོང་དང་ལོ་ནས་བསྐུལ་བ་བཞིན་འཇིགས་མེད་བསྟན་ཉིས་སྐད་ཅིག་ལ་ཤར་མར་བྲིས། དགེའོ།། །།
གསང་སྔགས་ཀྱི་གཞུང་དུ་འདོད་པའི་ཡོན་ཏན་རྒྱན་དུ་རོལ་བར་གསུངས་པའི་དོན་ཅུང་ཟད་བཤད་པ།
༈ གསང་སྔགས་ཀྱི་གཞུང་དུ་འདོད་པའི་ཡོན་ཏན་རྒྱན་དུ་རོལ་བར་གསུངས་པའི་དོན་ཅུང་ཟད་བཤད་ན། དེང་སང་གི་སྔགས་གཟུགས་ཕལ་ཆེར་ནི་འདོད་པའི་ཡུལ་འདོད་པའི་བློ་འདོད་པའི་འབྲས་བུ་དང་བཅས་པ་གདོད་ནས་མ་སྐྱེས་པ་ནམ་མཁའ་ལྟ་བུ་ཡིན་པས་འདོད་ཡོན་ལ་སྤྱད་ཀྱང་མི་གོས་ཞེས་ཟེར་མོད། །དེ་ལྟ་ན་སྔགས་པ་ཡིན་རུང་མིན་རུང་ཆོས་ཐམས་ཅད་རང་བཞིན་བདེན་མེད་དུ་མགོ་མཚུངས་པས་སེམས་ཅན་ཐམས་ཅད་འཁྲུལ་ཀྱང་མི་རིགས་ལ། སྤྱད་ཡུལ་དང་སྤྱོད་མཁན་དོན་དམ་དུ་མེད་པས་ཐ་སྙད་དུ་མེད་གོ་ཆོད་ན་སྤྱད་ཅེས་པའང་མི་འཐད་དེ་རི་བོང་གི་རྭས་རུས་སྦལ་གྱི་སྤུ་བྲེག་པ་བཞིན་ནོ། །མི་གོས་ཞེས་པའང་ཁྱོད་ལ་མི་འཐད་དེ། མི་གོས་ཉིད་ཀྱང་བདེན་མེད་ཡིན་པའི་ཕྱིར་རོ། །དེས་ན་ཁྱེད་རང་གི་ཚིག་གིས་རང་ཉིད་བརླག་
པར་ཟད་དོ། །ལར་གོས་དང་མི་གོས་འཁྲུལ་དང་མ་འཁྲུལ་ཐམས་ཅད་ཀུན་རྫོབ་མ་བརྟགས་ཉམས་དགའི་ངོར་བཞག་པ་ཡིན་གྱི་དོན་དམ་པར་བཞག་པ་ལྟ་ག་ལ་ཡིན། དེའི་ཕྱིར་ཚིག་ལྟར་སྣང་བ་དེ་འདྲས་རྡོ་རྗེ་འཆང་གི་བླ་མ་ཚོངས་ཤིག་འོ་ན་ཁྱོད་ཅག་ཅི་ཚུག་སྨྲ་ཞེ་ན། སྔགས་པས་ནི་སངས་རྒྱས་ཀྱི་སའི་གནས་ལུས་ལོངས་སྤྱོད་ལམ་དུ་བྱེད་དགོས་པ་ཡིན་པས། འདི་ན་མ་དག་པའི་ཆོས་ཞིག་མི་འཇོག་པར་སྣང་སྲིད་དག་པ་རབ་འབྱམས་སུ་བལྟས་ཏེ། དོན་དམ་རང་བཞིན་རྣམ་དག་ལེགས་པར་རྟོགས་ཤིང༌། ཐ་སྙད་དུ་དག་ཆེན་སྐུ་དང་ཡེ་ཤེས་སུ་རྟོགས་པའི་ཕྱག་རྒྱས་འདོད་ཡོན་གྱི་སྣང་བ་ཀུན་ལ་བཏབ་པས་འབྲས་བུ་ཁྱད་པར་ཅན་འབྱིན་ཞིང་གནས་ངན་ལེན་མི་སྐྱེད་པ་ཉིད་དེ། སྐྱུ་རུ་རའི་འབྲས་བུ་འོ་མ་དང་སྦགས་པ་ལས་རོ་མངར་པོར་འགྱུར་བ་བཞིན་ནོ། །འོ་ན་གཟུགས་སོགས་ཡུལ་གྱི་སྣང་བ་ལ་སྤྱད་པས་མི་འཆིང་ངམ་ཞེ་ན། རྣམ་པ་ཀུན་ཏུ་འཆིང་བའང་མ་ཡིན་ལ། ཐམས་ཅད་དུ་མི་འཆིང་བའང་མ་ཡིན་ཏེ། དེའི་རྒྱུ་མཚན་རྣམ་པ་ཀུན་ཏུ་གཟུགས་སྣང་བས་འཁྲུལ་ན་སངས་རྒྱས་བཅོམ་ལྡན་རྣམས་ཀྱང་སྲིད་པར་ལྟུང་བར་ཐལ་ལ། རྣམ་པ་ཀུན་ཏུ་གཟུགས་ལ་བརྟེན་ནས་མི་འཆིང་ན་གཟུགས་རང་བཞིན་གྱིས་གྲུབ་པར་ཞེན་པའི་སེམས་ཅན་ཁོ་བོ་ལྟ་བུའང་གྲོལ་བ་ཡིན་པར་ཐལ་ལོ། །དེའི་ཕྱིར་ཡུལ་སྣང་བདེན་གྲུབ་ཏུ་ལྟ་བ་ལས་ཆགས་སྡང་ལ་སོགས་པའི་ཉོན་མོངས་ཀྱི་ཚོགས་འབྱུང་ཞིང་དེ་ལས་ཁམས་གསུམ་དུ་ལྟུང་བ་ཡིན་གྱི། སྲིད་རྩ་བདེན་འཛིན་གྱི་ཁམས་བདག་མེད་
རྟོགས་པས་བྱུང་བ་རྣམས་ལ་ཡུལ་གྱིས་འཆིང་བར་ག་ལ་འགྱུར། སྤྱིར་འབྲས་བུར་གྱུར་པའི་ཆོས་གང་སྐྱེ་བའི་གེགས་མེད་ཅིང་རྒྱུ་ཚོགས་ཀུན་ཚང་ན་མི་སྐྱེ་བའི་དབང་མེད་པ་ཡིན་ལ། རྣལ་འབྱོར་པས་མཆོག་གི་ཡེ་ཤེས་སྐྱེ་བའི་གེགས་བདག་ཏུ་སྲེད་པ་འགོག་པའི་ཐབས་ལ་བློའི་རྩལ་སྦྱོང་ཞིང༌། མཐུན་པའི་རྐྱེན་དག་མཉམ་ཆེན་པོའི་དགོངས་པ་དང་ལྡན་ན་འདི་དག་འགྲུབ་པར་མི་འགྱུར་བ་མེད་དོ། །སངས་རྒྱས་བཅོམ་ལྡན་འདས་ཀྱིས་ཀྱང་གནས་འདི་གང་ཟག་ཆགས་ཅན་དབང་པོ་རྣོན་པོ་རྣམས་ཀྱི་ཕྱིར་ཚུལ་ཟབ་མོར་བསྟན་པ་ཡིན་ནོ། །གནད་འདི་རྒྱས་པར་དེ་ཉིད་གྲུབ་པ་ལས་རིག་པར་བྱའོ། །ད་ནི་དྲག་པོ་མངོན་སྤྱོད་ཀྱི་སྒྲོལ་བ་ལ་ཉུང་ངུའི་ཚུལ་དུ་དཔྱད་པར་བྱ་སྟེ། འདི་ལའང་དེང་སང་གི་གཏོ་བ་དང་མཐུ་མཁན་ཕལ་ཆེར་ནི་འདི་སྐད་ཅེས། དགྲ་བོ་རྣམས་ནི་གསད་པར་བྱ་བ་ཡིན་ཏེ། བདག་དང་སྦྱིན་པའི་བདག་པོ་ལ་འཚེ་བའི་ཕྱིར་རོ་ཞེས་ཟེར་ཞིང་བདག་དང་བདག་གི་བཤེས་ལ་ཆགས་པ་ཁོ་ན་སྙིང་ལ་བཅག་ཏེ། དགྲ་བོ་ག་གེ་མོས་སངས་རྒྱས་ཀྱི་བསྟན་པ་བཤིག་བྱང་ཆུབ་ཀྱི་སེམས་བདག་ལ་བསྒོམ་དུ་མ་སྟེར་ཞེས་ཡེ་ཤེས་ཀྱི་ལྷ་ལ་རྫུན་ལབ་པར་འདུག་སྟེ། ཁོ་བོའི་ཁྱི་ཁོག་ཏུ་དྲན་ཚོད་ལྟར་ན་འདི་འདྲ་བ་རྡོ་རྗེའི་ཐེག་པར་མ་ཚུད་པ་འདྲ་སྟེ། རྡོ་རྗེའི་ཐེག་པ་ཞེས་བྱ་བ་དེ་ཐེག་པ་ཆེན་པོ་ཞིག་ཡིན། ཐེག་ཆེན་བྱ་བ་བྱང་ཆུབ་ཀྱི་སེམས་ཀྱིས་ཁྱད་པར་དུ་བྱས་པའི་ལམ་ཡིན། བྱང་ཆུབ་ཀྱི་སེམས་ཞེས་བྱ་བ་གཞན་དོན་དུ་རྫོགས་པའི་བྱང་ཆུབ་དོན་གཉེར་ལ་མྱོང་བ་ཐོན་པའི་སེམས་ཞིག་ཡིན།
དེ་ཙ་ན་དགྲ་བོ་ལ་སྙིང་རྗེ་ཆེན་པོའི་བློ་རྡུལ་ཕྲན་ཙམ་ཡང་མེད་བཞིན་དུ་ཁྲོ་བ་དང་འཚིག་པའི་སེམས་ཀྱིས་སྲོག་གཅོད་ཀྱི་སྒྱུ་ཐབས་བརྩམ་པ་ཙམ་ཞིག་ཡིན་ནོ། །བདག་ཉིད་ཀྱིས་ཐུབ་པའི་བསྟན་པ་ལ་བྱ་བ་བྱས་པ་ཡང་མེད་ལ། མི་དགེ་བའི་ལས་ལམ་གསང་སྔགས་སུ་སྒྲོ་འདོགས་པའི་ཆོས་སྤོང་གི་ལས་ཚབས་པོ་ཆེ་ལ་ཅང་མི་སེམས་པར། དགྲ་མཐུ་ཆུང་འགའ་ཞིག་ལ་སྡང་སེམས་ཀྱིས་འདིས་སངས་རྒྱས་ཀྱི་བསྟན་པ་བཤིགས་སོ་ཞེས་སྨྲ་བ་དགོད་བྲོ་ལ། བྱང་ཆུབ་ཀྱི་སེམས་དེའང་དགྲ་གཉེན་ཐམས་ཅད་ལ་སྙོམས་པར་འབྱུང་བ་ཞིག་དགོས་ཀྱི། སོས་དལ་དུ་ལྷུག་ལྷུག་པོར་ཉལ་བ་ཙམ་བྱང་ཆུབ་ཀྱི་སེམས་ག་ལ་ཡིན། བཟོད་པའི་ཕ་རོལ་ཏུ་ཕྱིན་པ་སྐུལ་བའི་གྲོགས་ལ་སླར་ཁྲོ་ན་ཁྱོད་རང་ཉིད་དགྲ་གྱུར་གྱི་ཁོ་ག་ལ་ཡིན། འོ་ན་གཏེར་གཞུང་མང་པོར་བྱང་ཆུབ་སེམས་གཉིས་བསྒོམ་པའི་དགྲ་རུ་ལང༌། །ཞེས་བཤད་པ་དང་འགལ་ལོ་ཞེ་ན། དེ་ནི་དགྲ་བོ་ཁོ་རང་གི་རྒྱུད་ཀྱི་ཞེ་སྡང་ལ་སོགས་པའི་ཉོན་མོངས་ཀྱི་ཚོགས་ཁོ་རང་གི་རྒྱུད་ཀྱི་བྱང་ཆུབ་ཀྱི་སེམས་སྐྱེ་བའི་གེགས་སུ་གྱུར་པའི་ཕྱིར་རྩ་གསུམ་རྒྱལ་བ་རབ་འབྱམས་ཀྱི་ཐབས་མཁས་ཕྲིན་ལས་ཆེན་པོའི་ཤུགས་ཀྱིས་དགྲ་བོའི་ཉོན་མོངས་པ་ཐུལ་ཅིག་ཅེས་བསྐུལ་བ་ཡིན་པས་འགལ་བ་ལྟ་ག་ལ་ཡོད། འོ་ན་ཉམས་པ་ཅན་སྒྲོལ་བའི་ཐབས་གཏན་ནས་མི་རིགས་པ་ཡིན་ནམ་ཞེ་ན། དེ་ནི་མ་ཡིན་ཏེ། སྡིག་ཅན་ཚེ་རིང་ན་ཡུན་རིང་པོར་ལོག་པའི་ལམ་སློབ་པ་རྣམས་ལ་སྙིང་བརྩེ་བ་མངོན་དུ་བཞག་སྟེ།
དོན་གྱི་སེམས་ལྷག་པའི་བདེན་པ་དབྱེར་མེད་རྟོགས་པ་དང༌། སྟོང་ཉིད་ཀྱི་སེམས་རྔམ་པ་ཆེན་པོའི་ཏིང་ངེ་འཛིན་ལ་གནས་ནས་རྣལ་འབྱོར་པའི་ཚེ་ལུང་ཁྲུས་ཀྱི་དགོངས་པ་དང༌། སངས་རྒྱས་རྣམས་ཀྱི་ཡེ་ཤེས་ཆེན་པོའི་བྱིན་རླབས་བསམ་གྱིས་མི་ཁྱབ་པའི་བདེན་པས་ཉམས་པ་ཅན་བསྒྲལ་ཏེ་སྐུ་བཞིའི་ནུས་པ་རྒྱུད་ལ་འཇོག་ཅིང༌། མངོན་མཐོ་དང་ངེས་པར་ལེགས་པའི་ས་ལ་དབུགས་འབྱིན་པ་ཞིག་མེད་པར་སྨྲ་བ་ནི་མ་ཡིན་ནོ། །དེའང་གདུལ་བྱའི་རྒྱུད་ཀྱི་དགེ་ཚོགས་དུས་སུ་སྨིན་པའམ་སད་པར་བྱེད་ལ་དགྲ་བོའི་ཤ་ཁྲག་གིས་དགྱེས་ཉམས་ལྷ་ཡི་དཀྱིལ་འཁོར་ལ་ཚོགས་མཆོད་སྤྲིན་གྱི་རོལ་མོར་སྤེལ་བ་དང༌། ཆོས་ཉིད་རྟོགས་པའི་ཡེ་ཤེས་དང་རྟེན་འབྱུང་མཐོང་བའི་བདེན་པ་རྨད་དུ་བྱུང་བ་དང༌། ཁྲུས་ལུང་གི་དགོངས་པ་ཟབ་མོ་ལ་སོགས་པ་ཐབས་ཀྱི་སྒོ་སྣ་ཚོགས་ལ་བརྟེན་པས། ཉི་མ་དང་ཆུ་ནང་གི་ཉི་གཟུགས་བཞིན་དུ་ཉམས་པ་ཅན་ལ་བྱིན་རླབས་ཀྱི་སྣང་བ་ཅིར་ཡང་འཆར་བ་ནི་རྟེན་ཅིང་འབྲེལ་འབྱུང་གི་མཐུ་ནུས་ཡིན་ནོ། །ཞེས་པའང་སྤྲང་སྨྱོན་འཇིགས་མེད་པས་སྨྱོ་གཏམ་ཅལ་ཅོལ་དུ་བྲིས་པའོ།། །།
བསང་གི་དམིགས་པ།
༈ ན་མོ་གུ་རུ་པདྨཱ་ཀ་ར་ཡེ། དུས་གསུམ་རྒྱལ་བའི་སྤྱི་གཟུགས་འགྲོ་བའི་མགོན། །སྙིགས་མའི་འགྲོ་ལ་ཐུགས་རྗེས་རབ་དགོངས་མཛད། །གངས་ཅན་བསྟན་འགྲོའི་གཙུག་རྒྱན་ཨོ་རྒྱན་རྗེ། །མི་ཕྱེད་སྒོ་གསུམ་གུས་འདུད་སྤྱི་བོས་མཆོད། །དེ་ལ་འདིར་སྒྱུ་མ་ལྟ་བུའི་རྣལ་འབྱོར་གྱིས། །སྒྱུ་མ་ལྟ་བུའི་སྦྱིན་བྱས་ན། སྒྱུ་མ་ལྟ་བུའི་ཚོགས་རྫོགས་པར་འགྱུར་བ་ཡིན་ཏེ། རྒྱུ་བསོད་ནམས་ཀྱི་ཚོགས་ལ་བརྟེན་ནས་འབྲས་བུ་ཡེ་ཤེས་ཀྱི་
ཚོགས་རྫོགས་པར་བྱེད་པའི་ཐབས་ཚེགས་ཆུང་ལ་དོན་ཆེ་བ་ཕན་ཡོན་དང་ལྡན་པ་དུས་དང་རྣམ་པ་ཀུན་ཏུ། བསང༌། ཆུ་གཏོར། གསུར། ལུས་སྦྱིན་སོགས་སྦྱིན་པ་རྣམ་བཞི་ལ་རྟག་ཏུ་བརྩོན་པར་བྱེད་པའི་གང་ཟག་དེ་ཉིད་ནི། ཚོགས་རྫོགས་ཤིང་སྒྲིབ་པ་དག་པ་དང་ཁྱད་པར་དུ་ཡང་ཚེ་འདིར་དམ་ཆོས་བྱང་ཆུབ་སྒྲུབ་པའི་འགལ་ཟླ་མི་མཐུན་པའི་ཕྱོགས་ཐམས་ཅད་ཉི་མ་སྤྲིན་ལས་གྲོལ་བ་བཞིན་དུ་ཉེ་བར་ཞི་ཞིང་མཐར་ཐུག་ཐུན་མོང་མ་ཡིན་པ་རྫོགས་པ་ཆེན་པོ་མཆོག་གི་དངོས་གྲུབ་ཐོབ་པར་བྱེད་པའི་ལམ་གྱི་ཆ་ལག་ཏུ་ཉེ་བར་འགྱུར་བ་ཡིན་པས་འདི་ལ་འབད་པར་རིགས་སོ། །ཐོག་མར་བསང་ལྟ་བུ་ལ་མཚོན་ན། བསང་རྫས་དེ་ཡང༌། རྒྱུ་བཟང་བ། དངོས་གཙང་བ། བཀོད་ལེགས་པ་ཞེས་གསུངས་པ་ལྟར། རྒྱུ་ལོག་འཚོ་དང་སེར་སྣས་མ་བསླད་པ་ཞིག་དགོས་པ་ཡིན་ཏེ། ལོག་པའི་འཚོ་བ་ལྔ་དང༌། ཁྱད་པར་སེར་སྣ་ནི་ཡི་དྭགས་སུ་སྐྱེ་བའི་རྒྱུ་ཡིན་ཏེ། མཆོད་པའི་དངོས་པོ་གང་ལ་ཡང་རང་གི་ཤ་ལ་གཅིག་གཅོད་དགོས་པ་ལྟ་བུའི་སེར་སྣ་དང་བཅས་པས་ནི་ཚོགས་རྫོགས་པར་འགྱུར་བ་མ་ཡིན་པས་ལེགས་པར་སྤང་དགོས། དངོས་བཟང་བ་ནི་རང་གིས་གང་ཟ་རྒྱུའི་དངོས་པོ་དེ་ལས་ཕུད་དམ་གང་བཟང་བ་དེ་ལས་མཆོད་པའི་དངོས་པོ་བྱེད་པ་མ་གཏོགས། གང་ངན་པ་དང༌། རུལ་བ་དང༌། ཁ་བ། ནག་དྲགས་ཕོག་པ་སོགས་རང་གིས་བཟའ་མི་ལོམ་པ་ལ་མཆོད་པ་བྱེད་པ་ནི་ཤིན་ཏུ་མི་རུང་སྟེ། རྒྱལ་བ་རྣམས་ལ་བཟང་ངན་དང་གཙང་སྨེ་
སོགས་གཉིས་སྣང་གི་རྟོག་པ་མངའ་བ་མ་ཡིན་ཏེ། རང་གིས་ཚོགས་རྫོགས་པར་བྱེད་པས། གཙང་ཞིང་གཙང་མར་སྦྱར་བ་ཡི། །ཞེས་པ་ལྟར་ཁ་གཙང་ལག་གཙང་བྱས་ཏེ། མཆོད་པའི་དངོས་པོ་དེ་ཡང་ཤིན་ཏུ་གཙང་ཞིང་དག་པར་བྱེད་པ་ནི་གནད་དོ། །བཀོད་ལེགས་པ་ནི། བསང་མཁར་སོགས་མཆོད་སྟེགས་དེ་ཡང་རང་གི་ལུས་ངལ་བ་ཙམ་ལ་བསམ་ནས་ཅི་ཉན་གང་ཉན་ཞིག་མི་བྱེད་པར་ཡ་ཡོ་འཁྱག་འཁྱོག་དང་བྲལ་བ། དབྱིབས་མཛེས་ཤིང་ཁོད་སྙོམས་པ་ཞིག་བྱེད་པ་ནི་གལ་ཆེའོ། །ལར་བྱ་བ་གང་ལ་ཡང་ལུས་ངག་ཡིད་གསུམ་ཆིག་དྲིལ་དུ་མ་བྱས་ན་དགོས་དོན་མི་འགྲུབ་པའི་ཕྱིར། འདིར་ཡང་ཡིད་ལ་བསམ་རྒྱུ་ཅི་ཡང་མེད་པར་ཤིང་ཁ་ཤོག་ལྕེ་ཙམ་ཁོ་ནས་འདོན་ཟློས་བྱས་ཀྱང་རང་ངལ་བ་ཙམ་ལས་དོན་འབྲས་ཆུང་བར་འདུག་པས་བསྐྱེད་རིམ་ཞིག་མི་དགོས་པའི་ཆོ་ག་ཞིག་འདོན་རྒྱུ་གཏན་ནས་ཡོད་པ་མ་ཡིན་ཏེ། འདིར་ཡང་བསྐྱེད་རིམ་དང་དམིགས་པ་ཁོ་ན་ལ་རགས་ལས་པ་ཡིན་པས་དེ་ཡང་མདོ་ཧྲིལ་གྱིས་དྲིལ་ན། ཐོག་མར་སྐྱབས་དཀོན་མཆོག་གསུམ་ལ་ཡིད་ཁྱེད་ཤེས་ཀྱི་དད་པ་བརྟན་པོས་སྒོ་ནས་སྐྱབས་སུ་འགྲོ་བ་དང༌། རང་གཞན་སེམས་ཅན་ཐམས་ཅད་རྫོགས་བྱང་ཐོབ་འདོད་ཀྱི་ཀུན་སློང་བསམ་པ་བྱང་ཆུབ་མཆོག་ཏུ་སེམས་བསྐྱེད་པ་དང་བཅས་ཏེ་སྐྱབས་འགྲོ་དང་སེམས་བསྐྱེད་ཀྱི་ཚིག་བརྗོད། འདི་གཉིས་སྔོན་དུ་མ་སོང་ན་འབེན་མ་མཐོང་བར་མདའ་རྒྱག་པ་དང་འདྲ་བར་མཚུངས་པས་སྐྱབས་སེམས་གཉིས་སྔོན་དུ་འགྲོ་བར་བྱས་ལ། ཐོག་མར་རང་ཡི་དམ་གྱི་ལྷ་
གང་རུང་ཞིག་ཏུ་མ་གསལ་བར་མཆོད་རྫས་ཀྱི་དངོས་པོ་དེ་ཡང་བྱིན་གྱིས་རློབ་མི་ནུས་པ་ཡིན་པས་རང་ཉིད་ཡི་དམ་དུ་གསལ་བའི་ཐུགས་ཀའི་ཧཱུྃཿལས་ཡི་གེ་རཾཿདམར་ནག་གཅིག་སྤྲོས་པ་ལས་བསང་རྫས་ཀྱི་དངོས་པོ་དེ་དག་བསྲེག །ཡཾ་ལས་རླུང་བྱུང་བས་གཏོར། ཁཾ་ལས་ཆུ་བྱུང་བས་བཀྲུ་བར་བྱས་ཏེ། མི་དམིགས་པ་ཆོས་དབྱིངས་ཀ་དག་ཆེན་པོའི་དབྱིངས་སུ་སྟོང་པར་སྦྱངས་ནས། སླར་ཡང་རང་ཉིད་ཡི་དམ་གྱི་ཐུགས་ཀ་ནས་ཡི་གེ་ཨོཾ་དཀར་པོ་ཐིག་ལེའི་བརྒྱན་པ་ཞིག་འཕྲོས་ཏེ་རིན་པོ་ཆེའི་སྣོད་ཟབ་ཅིང་རྒྱ་ཆེ་ལ་ཁྱོན་ཡངས་པ་ཁྱབ་བརྡལ་ནམ་མཁའི་མཐའ་དང་མཉམ་པ་ལྟ་བུའི་ནང་དུ་དབྱིངས་ནས་རྒྱལ་བ་ཐམས་ཅད་ཀྱི་སྐུའི་ངོ་བོ་ཨོཾ་དཀར་པོ། གསུང་གི་ངོ་བོ་ཨཿདམར་པོ། ཐུགས་ཀྱི་ངོ་བོ་ཧཱུྃ་མཐིང་ནག་གི་ཆར་བབས་ཏེ་བསང་རྫས་ཀྱི་དངོས་པོ་དེ་ཡང་ངོ་བོ་སྟོང་ལ་ཟག་པ་མེད་པ་མྱོང་གྲོལ་ཡེ་ཤེས་ཀྱི་བདུད་རྩི་ལས། རྣམ་པ་བསང་མགྲོན་རྣམས་རང་རང་གི་སྤྱན་ལམ་དུ། མིག་གི་འདོད་ཡོན་གཟུགས། རྣ་བའི་འདོད་ཡོན་སྒྲ། སྣའི་འདོད་ཡོན་དྲི། ལྕེའི་འདོད་ཡོན་རོ། །ལུས་ཀྱི་འདོད་ཡོན་རེག་བྱ་སོགས་མཁོ་དགུའི་ལོངས་སྤྱོད་མ་ཚང་བ་མེད་པ་འཕགས་པ་ཀུན་ཏུ་བཟང་པོའི་མཆོད་སྤྲིན་ལྟ་བུར་ཟད་པ་མེད་པའི་གཏེར་ཆེན་པོར་བྱིན་གྱིས་བརླབས་ཏེ། ནམ་མཁའ་མཛོད་ཀྱི་སྔགས་རྒྱས་མང་དུ་སྤེལ། ཡང་རང་ཉིད་ཡི་དམ་གྱི་ཐུགས་ཀའི་ཧཱུྃཿལས་འོད་ཟེར་གྱི་ཚོགས་དཔག་ཏུ་མེད་པ་འཕྲོས་ཏེ། དཀོན་མཆོག་
སྲི་ཞུའི་མགྲོན། མགོན་པོ་ཡོན་ཏན་གྱི་མགྲོན། རིགས་དྲུག་སྙིང་རྗེའི་མགྲོན། བགེགས་རིགས་ལན་ཆགས་ཀྱི་མགྲོན་ལ་སོགས་པ་དེ་དག་ཐམས་ཅད་ཆོས་ཀྱི་དབྱིངས་ནས་གཟུགས་ཀྱི་སྐུར་བཞེངས་ཏེ། དཔེར་ན་ཆུ་ལས་ཆུ་བུར་རྡོལ་བའམ། མཁའ་ལས་གློག་འཁྱུགས་པ་བཞིན་དུ་སྤྱན་འདྲེན་གྱི་ཚིག་བརྗོད་པ་དང༌། མཉམ་དུ་རང་གི་རིག་པ་མངོན་སུམ་དབང་པོའི་སྤྱོད་ཡུལ་དུ་སྐད་ཅིག་གིས་བྱོན་པར་བསམ་ལ། གདན་ཕུལ། དཀོན་མཆོག་སྲི་ཞུའི་མགྲོན་ནི། ཆོས་སྐུ་ལོངས་སྐུ་སྤྲུལ་སྐུ་སངས་རྒྱས་ཆོས་དང་དགེ་འདུན་བླ་མ་ཡི་དམ་མཁའ་འགྲོ་སོགས་ནམ་མཁའ་ལ་སྐར་ཚོགས་བཀྲ་བ་ལྟ་བུ། མགོན་པོ་ཡོན་ཏན་གྱི་མགྲོན་ནི། ལྷ་ཆེན་པོ་བརྒྱད། ཀླུ་ཆེན་པོ་བརྒྱད། གཟའ་ཆེན་པོ་བརྒྱད། རྒྱལ་པོ་ཆེན་པོ་བཞི། འཇིགས་བྱེད་ཆེན་པོ་དགུ། ཕྱོགས་སྐྱོང་བ་བཅུ། རྒྱུ་སྐར་ཉི་ཤུ་རྩ་བརྒྱད་དེ། གཙང་རིས་ཀྱི་མགོན་པོ་བདུན་ཅུ་རྩ་ལྔ་འཁོར་དང་བཅས་པ། གཡོག་དང་བཅས་པ། ཡང་གཡོག་དང་བཅས་པ། བུ་སྨད་དང་བཅས་པ། དཀར་ཕྱོགས་སྐྱོང་བའི་ཡུལ་ལྷ་གཞི་བདག་དང་བཅས་པ་ཐམས་ཅད་ནམ་མཁའ་ལ་སྤྲིན་འཁྲིགས་པ་ལྟ་བུ། རིགས་དྲུག་སྙིང་རྗེའི་མགྲོན་ནི། ལྷ་དང་མི་དང་ལྷ་མ་ཡིན་དང༌། བྱོལ་སོང་ཡི་དྭགས་དམྱལ་བ་སོགས་བར་སྣང་ལ་ན་བུན་འཐིབ་པ་ལྟ་བུ། བགེགས་རིགས་ལན་ཆགས་ཀྱི་མགྲོན་ནི། བགེགས་ཀྱི་རྒྱལ་པོ་བི་ནཱ་ཡ་ཀས་གཙོར་བྱས་པའི་བགེགས་རིགས་སྟོང་ཕྲག་བརྒྱད་ཅུ། བྱིས་པའི་གདོན་ཆེན་བཅོ་ལྔ། འཕྲོག་མ་མ་
བུ་ལྔ་བརྒྱ་སོགས་ལན་ཆགས་ཀྱི་འགྲོ་བ་ཐམས་ཅད་ས་གཞི་ལ་ལྷ་དང་མིའི་ཁྲོམ་ཆེན་པོ་འཚོགས་པ་བཞིན་དུ་ཐིབས་ཀྱིས་འདུས་པར་བསམ་ལ། དེ་ནས་མཆོད་སྦྱིན་གྱི་དམིགས་པ་ནི། མཆོད་ཡུལ་གྱི་ལྷ་རྣམས་རང་རང་གི་ལྗགས་རྡོ་རྗེའི་སྤུ་གུ་ཅན་གྱི་འོད་ཟེར་གྱི་རྣམ་པས་ཆུ་ལ་ཉི་ཟེར་ཕོག་པ་བཞིན་དུ་བསང་རྫས་ཀྱི་བཅུད་རྣམས་དྲངས་ཏེ་གསོལ་བར་བསམ་པའོ། །ཡང་ན་དུ་བའི་ཟེར་ལས་མཆོད་པའི་ལྷ་མོ་ཉི་རྡུལ་གྱི་གྲངས་དང་མཉམ་པར་སྤྲོས་ཏེ། དེ་དག་གིས་གཡས་དག་བྱེད་ཀྱི་བདུད་རྩི་ཁྲུས་ཀྱི་བུམ་པ་འཛིན་པ། གཡོན་སྨན་གྱིས་བཀང་བའི་གཞོང་པ་ལས་དུ་བ་དྲི་ཞིམ་པོས་འཇིག་རྟེན་གྱི་ཁམས་ཀུན་ཁྱབ་པར་བྱེད་པ། དུ་བའི་རྩེ་ལས་བཀྲ་ཤིས་རྟགས་བརྒྱད་རྒྱལ་སྲིད་སྣ་བདུན་སོགས་མཆོད་པའི་སྤྲིན་རྒྱ་མཚོ་ལྟ་བུ་བསམ་གྱིས་མི་ཁྱབ་པར་སྤྲོས་ཏེ་མཆོད་སྦྱིན་གྱི་དམིགས་པ་བྱ། དཀོན་མཆོག་སྲི་ཞུའི་མགྲོན་རྣམས་ལ་ཕུལ་བས་རང་གཞན་སེམས་ཅན་ཐམས་ཅད་ཀྱི་ཚོགས་གཉིས་རྫོགས། སྒྲིབ་གཉིས་དག་ནས་མཆོག་ཐུན་མོང་གི་དངོས་གྲུབ་མ་ལུས་པ་ཚེ་འདི་ཉིད་ལ་ཐོབ་པར་བསམ། མགོན་པོ་ཡོན་ཏན་མགྲོན་རྣམས་ལ་ཕུལ་བས་དེ་དག་གིས་ཐུགས་བདེ་སྟོང་གི་རོས་མྱོས་ཏེ་དམ་ཆོས་བྱང་ཆུབ་སྒྲུབ་པའི་མི་མཐུན་པའི་ཕྱོགས། ནད་དང་གདོན་དང་རྐྱེན་དང་བར་ཆད་ཐམས་ཅད་ཉེ་བར་ཞི་ཞིང༌། མཐུན་རྐྱེན་ལེགས་ཚོགས་དགེ་བའི་དངོས་པོ་ཐམས་ཅད་འབད་མེད་ཡིད་བཞིན་དུ་འགྲུབ་པའི་སྡོང་གྲོགས་དང་ཕྲིན་ལས་གང་འདོད་
སྒྲུབ་པར་བསམ། རིགས་དྲུག་སྙིང་རྗེའི་མགྲོན་རྣམས་ལ་ཕུལ་བས་དེ་དག་ནི་རིགས་དྲུག་སོ་སོའི་ལས་སྣང་སྡུག་བསྔལ་བག་ཆགས་མཐའ་དག་དང་བྲལ་ཏེ། གནས་སྐབས་སུ་གཞན་འཕྲུལ་ལྷའི་ལོངས་སྤྱོད་ལྟ་བུ་ལ་མངའ་དབང་བསྒྱུར་ཏེ། མཐར་ཐུག་རང་སྣང་དོན་གྱི་འོག་མིན་ཆེན་པོའི་དབྱིངས་སུ་རང་སད་དེ་སངས་རྒྱས་པར་བསམ། བགེགས་རིགས་ལན་ཆགས་ཀྱི་མགྲོན་རྣམས་ལ་ཕུལ་བས་རང་གཞན་སེམས་ཅན་ཐམས་ཅད་ཀྱིས་ཚེ་རབས་ཐོག་མ་མེད་པའི་དུས་ནས་ཚེ་ལུས་འདི་ལ་མ་ཐུག་གི་བར་དུ། བསད་བསད་ཚེ་ཐུང་བའི་ལན་ཆགས། བརྡུང་བརྡུང་ནད་མང་བའི་ལན་ཆགས། བརྐུས་བརྐུས་འཕྲོག་འཕྲོག་གི་རྒྱུའི་ལན་ཆགས། མཐོ་བ་མཁར་ཕབ་པ། དམའ་བ་ཡུལ་འཕྲོགས་པ། མི་རྟ་གྲི་རུ་བསད་པ་ལ་སོགས་པའི་ལན་ཆགས་འཁོར། བུ་ལོན་སོད། ཤ་མཁོན་དག་དེ་དག་གི་ལས་སྣང་སྡུག་བསྔལ་ཐམས་ཅད་དང་བྲལ་ཞིང་ཁྱད་པར་དུ་གཞན་ལ་འཚེ་བའི་བསམ་སྦྱོར་ངན་པ་ཐམས་ཅད་དང་བྲལ་ཏེ། བྱམས་སྙིང་རྗེ་བྱང་ཆུབ་ཀྱི་སེམས་རིན་པོ་ཆེ་དང་ལྡན་པར་བསམ། དེ་ལྟར་འདོན་སྒོམ་སྦྲགས་ལ་དམིགས་པས་རྒྱས་ཐེབ་པར་བྱེད་པ་ནི་གལ་ཆེའོ། །མཐར་མགྲོན་བསྡུ་བའི་དམིགས་པ་ནི། བསྡུ་གཤེགས་ཀྱི་ཚིག་བརྗོད་པ་དང་མཉམ་དུ། མཆོད་པ་པོ་དང་མཆོད་པའི་དངོས་པོ། མཆོད་པའི་ཡུལ་མི་དམིགས་པ་ཆོས་དབྱིངས་སྤྲོས་མཐའ་དང་བྲལ་བ། ཀ་དག་ཡེ་གྲོལ་ཆེན་པོའི་དབྱིངས་སུ་འབྱམས་ཀླས་པར་བྱས་ལ། དགེ་རྩ་
རྫོགས་བྱང་དུ་བསྔོ་བ་དང་ཤིས་བརྗོད་ཀྱི་ཚིག་ཅི་རིགས་པས་མཐའ་བརྒྱན་པར་བྱའོ། །ཆུ་གཏོར་དང་གསུར་ལུས་སྦྱིན་སོགས་ཀྱི་དམིགས་པ་ཡང་ཧ་ལམ་དེ་དང་མཚུངས་པ་ཡིན་པ་རིགས་པས་འཕྲུལ་ཤེས་པར་བྱའོ། །སྨྲས་པ། ཇི་བཞིན་རང་གི་རྒྱུད་ལ་མི་ངེས་ཀྱང༌། །མཚུངས་མེད་དམ་པའི་ཞལ་རྒྱུན་མ་ནོར་བར། །མཁས་རློམས་རང་བཟོས་བསྲེ་བསླད་ཡོངས་སྤངས་ནས། །ཆོས་མཐུན་གྲོགས་ཀྱིས་ཡང་ཡང་བསྐུལ་བའི་ངོར། །བསང་གི་དམིགས་པ་ཚིག་ཉུང་དོན་འདུས་བཀོད། །ཉེས་འགལ་མཆིས་ན་སྤྱན་ལྡན་ཚོགས་ལ་བཤགས། །དགེ་བས་འདི་མཐོང་རང་གཞན་སེམས་ཅན་གྱི། །བྱང་ཆུབ་སྒྲུབ་པའི་ཉེར་འཚེ་ཀུན་ཞི་ནས། །ཆོས་མཐུན་བསམ་པ་གེགས་མེད་འགྲུབ་པ་དང༌། །དོན་གཉིས་ཡིད་བཞིན་འགྲུབ་པའི་བཀྲ་ཤིས་སྩོལ། །ཅེས་པ་འདི་ཡང་དལ་འབྱོར་དོན་ལྡན་དུ་བྱེད་པ་འཛམ་གླིང་གནས་ཆེན་ཀུན་ལ་ལན་གྲངས་དུ་མར་བྱོན་པའི་བཙུན་པ་ཨ་ཅོ་ནས་བསང་གི་དམིགས་པ་ཚིག་ཉུང་དོན་འདུས་ཞིག་དགོས་ཞེས་ཡང་ཡང་བསྐུལ་བ་ལ་བརྟེན་ནས་མདོ་མེད་ཀྱི་སྤྲང་པོ་བསྟན་མིང་པས་དབེན་གནས་རྡོ་རྗེ་བྲག་གི་མགུལ་ནས་བྲིས་པ་དགེའོ། །དགེའོ།། དགེའོ།། །།
འཆི་ཁ་མའི་མན་ངག
༈ འཆི་ཁ་མའི་མན་ངག་ནི། འཆི་རན་དུས་ཀྱི་སྔོན་ནས་ཚགས་སུ་ཚུད་དགོས་ཏེ། དེ་ལ་རིམ་པ་མང་ཡང་འདིར་སྤྲོས་པ་བསྐྱུངས་ལ། འཆི་བ་ལ་ཉེ་བའི་དུས་སུ་ཅི་ལྟར་བྱ་བ་ཉུང་བསྡུས་ནི། སྔ་ཕྱི་ནམ་ཤི་ཡང་རུང་སྟེ། ལུས་དང་ལོངས་སྤྱོད་ཐམས་ཅད་མཐར་འདོར་བའི་ཆོས་ཁོ་ན་ལས་མ་འདས་ཏེ། འདི་ནི་འཇིག་རྟེན་སྤྱི་ཡི་ཆོས་ཉིད་ཡིན་ནོ་ཞེས་མང་དུ་བསམ་ལ།
ཆགས་ཞེན་གྱི་འཁྲི་བ་རྦད་ཀྱིས་བཅད། ཚེ་རབས་གཞན་དང་འདི་ཉིད་ཀྱི་རིང་ལ་འདུས་བྱས་པའི་སྡིག་པ་དང༌། བཅས་འགལ་གྱི་ལྟུང་བ་དྲན་མི་དྲན་ཐམས་ཅད་བཤགས་ཤིང༌། སྡོམ་སེམས་མང་དུ་བསྟེན། དེ་ནས་འཆི་བ་ལ་ཞེ་འཚེར་མེད་པར་རིག་པ་གཟེང་བསྟོད་དེ་སྤྲོ་སེང་བ་བྱས་ལ། སྔར་ཕན་ཆོད་དགེ་སྦྱོར་ཅི་ལྟར་བྱས་པ་རྣམས་ཡིད་ལ་བྱས་ཏེ། རློམ་སེམས་དང་བྲལ་བའི་ཡི་རང་མང་དུ་བསྒོམ་ཞིང༌། ཚེ་རབས་ཐམས་ཅད་དུ་ཐེག་པ་མཆོག་གི་ལམ་ཡོངས་རྫོགས་ལ་སྒྲུབ་པ་སྙིང་པོར་བྱེད་པ་དང༌། སྒྲུབ་པ་དེ་ཡང་ཡོངས་འཛིན་བཤེས་གཉེན་དང༌། དད་བརྩོན་ཤེས་རབ་བག་ཡོད་སོགས་ཕྱི་དང་ནང་གི་རྟེན་འབྲེལ་གྱི་སྒོ་ཐམས་ཅད་ནས་ཕུན་སུམ་ཚོགས་པ་དང༌། སྡིག་གྲོགས་དང་ཉོན་མོངས་པ་སོགས་ཀྱི་གཞན་དབང་དུ་མི་འགྲོ་བའི་བསྔོ་བ་དང་སྨོན་འདུན་ཡང་ཡང་བྱེད། འདུལ་བ་ལུང་ན་སངས་རྒྱས་ཀྱི་སྤྱན་སྔར་ཚུལ་ཁྲིམས་དང་ལྡན་པ་སོགས་ཀྱི་མཆོག་ཏུ་སྐྱེས་པ་རྣམས་ཀྱི་དང་པོའི་རྒྱུ་བཤད་དུས། སྔོན་སངས་རྒྱས་ཀྱི་བསྟན་པ་ལ་འཆི་ཁར་སྨོན་ལམ་བཏབ་ཚུལ་ཤ་སྟག་སྣང་བས། ཉེ་བ་གང་དང་གོམས་པ་གང༌། །ཞེས་པ་ལྟར་སྟོབས་ཤིན་ཏུ་ཆེ། དེའི་གྲོགས་སུ་ཚེ་རབས་ཀུན་ཏུ་སྟོང་ཉིད་སྙིང་རྗེའི་སྙིང་པོ་ཅན་གྱི་ལམ་ལ་ཅིས་ཀྱང་སློབ་དགོས་སྙམ་པའི་འཕེན་པ་དྲག་པོ་གཏོང་དགོས་ཏེ། གཉིད་ལས་ལྡང་བའི་འདུ་ཤེས་ཀྱི་སྐབས་སུའང༌། ནང་དུས་སྔ་མོ་ནས་སད་པར་གྱུར་ཅིག་སྙམ་པའི་སྨོན་ལམ་ལས། སད་པར་བྱའོ་སྙམ་པའི་འཕེན་པ་གཏོང་བ་སྟོབས་
ཆེ་བ་ལ་ལྟོས་དང་ཤེས་སོ། །སྨོན་ལམ་དང་འཕེན་པ་གང་བྱས་ལྟར་བདེ་བླག་ཏུ་འགྲུབ་པའི་རྒྱུའི་ཡན་ལག་ཞིང་གི་མཐུ་ལ་བསྟན་པ་ཟབ་པས། དཔལ་ཨོ་རྒྱན་ཆེན་པོ་དང་འཕགས་པ་འཇིག་རྟེན་དབང་ཕྱུག་ལྟ་བུ་གཙོ་བོར་རང་ཉིད་གང་ལ་མོས་པ་ཆེ་ཞིང༌། བཟླས་སྒོམ་གྱི་འབྲེལ་བ་ཆེ་བ་དེ་དཀོན་མཆོག་ཀུན་འདུས་ཀྱི་ངོ་བོར་ཐག་བཅད་དེ། འདོད་དོན་སྒྲུབ་པའི་གསོལ་བ་རྩེ་གཅིག་ཏུ་བཏབ། དེ་ནས་འཆི་ཁ་དངོས་ལ། དེ་འདྲའི་འཁྲིགས་ཆགས་སུ་བསམ་དབང་ཡོང་དཀའ་བས། སངས་རྒྱས་རྗེས་དྲན་ནམ། སྙིང་རྗེའི་དམིགས་རྣམ་མམ། སྟོང་ཉིད་ཀྱི་ལྟ་བའམ། གཞན་ཡང་ཆོས་དང༌། དགེ་འདུན་རྗེས་དྲན་སོགས་སྔར་གོམས་འདྲིས་གང་ཆེ་དང༌། ཐད་དེར་བསམ་དུ་བཏུབ་ཤོས་ཞིག་ལ་སེམས་ཅི་ནུས་སུ་བསྲེས་པའི་ཐོག་ནས་འཆི་ཁར་གཞུག་ཅིང༌། དེ་ཡོང་ཐབས་སུ། དེའི་སྔོན་ནས་ད་གཟོད་འཆི་ཁར་མཚམས་སྦྱོར་གྱི་རྣམ་རྟོག་ངན་པ་མི་རྒྱུ་བར་བྱའོ་སྙམ་པའི་འཕེན་པ་ཡང་ཡང་སྦྱང་བ་གལ་ཆེ། སྔོན་གྱི་དམ་པས། རིག་པ་སྡུག་པའི་དགེ་སྦྱོར་ཡུན་རིང་ལས། །རིག་པ་དྭངས་པའི་དགེ་སྦྱོར་ཞག་གཅིག་དགའ། །ཞེས་གསུངས་པ་ལྟར། འདི་ཐམས་ཅད་ཤེས་པ་དགའ་སྤྲོ་དང་ལྡན་པར་བཅོས་གང་ནུས་བྱས་པའི་ངང་ནས་བྱེད་པ་སྟོབས་ཆེ་བར་གོ༌།ངེད་རང་ལྟ་བུས་གཞན་ལ་ཕན་ཐོགས་པ་དཀའ་ཡང་ཁྱོད་ཀྱི་སྐུ་ཚེའི་ཕྲེང་བར། ཐེག་པ་ཆེན་པོའི་བསྟན་པ་ལ་བྱ་བ་བྱེད་པའི་སྨོན་ལམ་
དང་སྐྱབས་འགྲོ་འདོན་རྒྱུ་ལགས། འཇིགས་མེད་པས་བྲིས།། །།
སྨྱོ་འབོགས་སེལ་ཐབས།
༈ བླ་མ་གང་ཞིག་འཁྲུལ་སྤོང་སྨན་པ་མཆོག །ལྟ་བས་འཁྲུལ་པ་ཀུན་སེལ་ཟབ་མོའི་བློ། །སྤྱོད་པས་འགྲོ་ཀུན་འཁྲུལ་པའི་རྒྱུད་སྤོང་བ། །ཟུང་འབྲེལ་ཐུགས་རྗེའི་ཐུགས་མངའ་དེ་ལ་འདུད། །ཅེས་མཆོད་བརྗོད་ཀྱིས་སྔུན་བསུས་ཏེ། མཛོད་ལས། གཡེང་བའི་སེམས་ནི་ཡིད་སེམས་ལ། །སྐྲག་གནོད་མ་མཉམ་མྱ་ངན་གྱིས། །ཞེས་པ་ལྟར། དོན་འདི་གོ་བདེར་འདྲིལ་ན། སྨྱོ་འབོགས་དངོས་བཤད་པ་དང༌། དེ་སེལ་ཐབས་བསྡུས་ཏེ་བཤད་པ་གཉིས་ལས། དང་པོ་ལ། སྨྱོ་འབོགས་ཁམས་དང་འགྲོ་བ་དུ་ཞིག་གིས་བསྡུས་བཤད་པ་དང༌། ཤེས་པ་གང་གི་འཁོར་ན་འབྱུང་ཚུལ་བཤད་པ་དང༌། དེ་རང་གི་ངོ་བོ་རྒྱུ་ཚོགས་དང་བཅས་པ་བཤད་པ་སྟེ་གསུམ་ལས། དང་པོ་ནི། ཁམས་གོང་མ་གཉིས་ན་སྨྱོ་འབོགས་མེད་དེ། དེ་དག་ནི་མཉམ་བཞག་གི་ས་པ་ཡིན་པའི་ཕྱིར་ངེས་རྟོག་ཕྱོགས་གཅིག་ཏུ་གཡེང་བ་མེད་པའི་ཕྱིར་རོ། །དེས་ན་འདོད་ཁམས་ཁོ་ནས་བསྡུས་ཏེ། འདོད་ཁམས་ན་ནི་སྨྱོ་བའི་རྒྱུ་རྣམས་ཀྱང་ཡོད་ལ། ཁ་ནང་དུ་ལྟ་བའི་མཉམ་བཞག་གི་ས་པའང་མིན་པའི་ཕྱིར་རོ། །ཁམས་གོང་མ་ན་སྨྱོ་བའི་རྒྱུ་རྣམས་ཀྱང་མེད་པ་ཡིན་ནམ་ཞེ་ན། ཡིན་ཏེ། རྣམ་སྨིན་ལས་སྨྱོ་བ་ནི་རྣམ་སྨིན་ཅན་མི་དགེ་བ་ལས་བསྐྱེད་པ་ཡིན་ཞིང༌། གོང་མའི་སས་བསྡུས་ཀྱི་མི་དགེ་བ་མེད་པའི་ཕྱིར་དང༌། དེ་དག་དམིགས་པ་ལ་རྩེ་གཅིག་ཏུ་བརྟན་པ་ཐོབ་པའི་ཏིང་ངེ་འཛིན་དང་ལྡན་པའི་ཕྱིར་སྐྲག་སྡང་གིས་
གཡོ་བར་མི་ནུས་པའི་ཕྱིར་དང༌། མི་མ་ཡིན་འདོད་ཁམས་པ་འཁྲུགས་པ་དང་ལྡན་པ་རྣམས་ཀྱིས་བལྟ་བར་ཡང་མི་ནུས་པའི་ཕྱིར་དང༌། ལུས་ཤིན་ཏུ་དྭངས་པའི་ཁམས་ཡིན་པས་འདུ་འཁྲུགས་མེད་པའི་ཕྱིར་དང༌། གོང་མའི་རྒྱུད་དེ་སྡུག་བསྔལ་དང་མི་འབྲེལ་བའི་ཕྱིར་རོ། །འདོད་ཁམས་ཀྱི་ནང་ནས་ཀྱང་སྒྲ་མི་སྙན་པ་མ་གཏོགས་པ་དམྱལ་བ། ཡི་དྭགས། དུད་འགྲོ། མི། ལྷ་སྟེ་འགྲོ་བ་ལྔ་ཀ་ན་ཡོད་དེ། དམྱལ་བ་པའི་ནང་ཚན་ཉི་ཚེ་བའི་དམྱལ་བ་མཽང་གལ་གྱི་བུའི་རྣམ་ཐར་ནས་བཤད་པ་འདྲ་བ་འགའ་ཞིག་མ་གཏོགས་པ་ཐམས་ཅད་རྟག་ཏུ་སེམས་སྡུག་བསྔལ་ཁོ་ནས་ནོན་ཏེ་རེ་ཞིག་བདག་ཉིད་ཀྱང་མི་དྲན་པའི་ཕྱིར་རྟག་ཏུ་སྨྱོན་པ་ཡིན་ལ། ཉི་ཚེ་བ་དེ་དག་ཀྱང་སྨྱོ་རུང་གི་རྟེན་ཡིན་པ་དང༌། འགྲོ་བ་གཞན་བཞི་ནི་རྟག་ཏུ་སྨྱོ་བའང་མ་ཡིན་ལ། རྟེན་གྱི་སྒོ་ནས་དང༌། སའི་སྒོ་ནས་སྨྱོ་མི་རུང་བའང་མིན་ནོ། །ལུས་འཕགས་གླིང་སོགས་གླིང་གཞན་གསུམ་ན་སྨྱོ་འབོགས་ཡོད་ཅིང༌། དེ་སྒྲ་མི་སྙན་པ་ལ་མི་མཚུངས་པ་ཅི་ཡིན་ཞེ་ན། དེ་ནི་དགེ་བའི་ལས་ཀྱི་རྣམ་སྨིན་འབའ་ཞིག་ལ་སྤྱོད་པ་ཡིན་པའི་ཕྱིར་རོ་ཞེས་བླ་མ་རྣམས་གསུང་ངོ༌། །ལུས་རྟེན་འདོད་པར་གཏོགས་ཀྱང་སེམས་རྟེན་གོང་མ་པ་ཡིན་ན་སྨྱོ་འབོགས་མེད་དེ། རྒྱུ་མཚན་ཕལ་ཆེར་སྔ་མ་བཞིན་ནོ། །གཉིས་པ་ནི། སྨྱོ་བ་ནི་ངེས་རྟོག་འབའ་ཞིག་གིས་བསྡུས་ཤིང༌། མཛོད་ལས་ངོ་བོ་ཉིད་ཀྱི་རྟོག་པ་དང༌། ངེས་རྟོག་གི་རྟོག་པ་དང༌། རྗེས་དྲན་གྱི་རྟོག་པ་སྟེ་གསུམ་བཤད་པའི། དང་པོ་དབང་ཤེས་སུ་བཤད་ལ། གཉིས་པ་དང་གསུམ་པ་ཡིད་
ཤེས་ཀྱིས་བསྡུས་པ་ཁོ་ནར་བཤད་དོ། །དེས་ན་འདི་ནི་ཡིད་ཤེས་འཁོར་འབའ་ཞིག་པ་ཡིན་ཞིང༌། དབང་ཤེས་དང་གཞི་མཐུན་མེད་པ་ཉིད་དེ། གཙོ་བོར་ངེས་རྟོག་གི་ཤེས་པ་ཕྱོགས་གཅིག་ཏུ་འཕྱོ་ཞིང་གཡེང་བ་ལ་བྱའོ། །འདིའི་གཡེང་བ་ནི་ཤེས་པ་ཡ་ཡོ་ཕྱད་ཕྱོད་དུ་སོང་བའི་དོན་དེ་ཡིན་གྱི། ཉོན་མོངས་པའི་སེམས་ཀྱི་ས་མང་པོ་པ་རྣམས་ཀྱི་བྱེ་བྲག་ཏུ་གྱུར་པའི་རྣམ་གཡེང་དང་དོན་མི་གཅིག་སྟེ། དོན་གཅིག་ན་དེ་གཉིས་ཡིན་ཁྱབ་མཉམ་དགོས་ཤིང༌། དེ་ལྟ་ན་དགྲ་བཅོམ་པའི་རྒྱུད་ཀྱི་སྨྱོ་འབོགས་ཀྱང་ཉོན་མོངས་ཅན་དུ་འགྱུར་བས། ཉོན་མོངས་པ་མ་སྤངས་པའི་དགྲ་བཅོམ་ཡོད་པར་ཐལ་བའི་ཕྱིར་རོ། །འོན་ཀྱང་སྨྱོ་འབོགས་ཀྱི་གཡེང་བ་དང༌། རྣམ་གཡེང་ངོ་བོ་གཅིག་པ་མེད་པ་ནི་གཏན་མིན་ཏེ། མཛོད་འགྲེལ་དུ། དེ་གཉིས་ལ་མུ་བཞི་བརྩིས་པ་བཞིན་ནོ། །གསུམ་པ་ལ། རྒྱུ་ཚོགས་དང༌། དངོས་བཤད་པ་གཉིས་ལས། དང་པོ་ནི། སྤྱིར་ལྔ་སྟེ། རྣམ་སྨིན་དང༌། འཇིགས་པ་དང༌། གནོད་པ་དང༌། འཕྲལ་རྐྱེན་ཙམ་ལས་འདུ་བ་འཁྲུགས་པ་དང༌། མྱ་ངན་ལས་གྱུར་པ་རྣམས་སོ། །དེ་ལ་དང་པོ་ནི། སྨྱོ་བྱེད་ཀྱི་རིག་སྔགས་ལ་བརྟེན་ནས་གཞན་གནོད་རྩོམ་པ་དང༌། ཕ་རོལ་པོ་ལ་མི་འདོད་བཞིན་དུ་ཆང་ལྡུད་པ་དང༌། རྩེད་མོ་སོགས་ཀྱི་ཕྱིར་གཞན་ལ་དངངས་སྐྲག་སློང་བ་དང༌། ཤིག་ལ་སོགས་པ་སྲོག་ཆགས་གཡང་སར་འཕེན་པ་དང༌། ནགས་ལ་མེ་སྤར་བ་ལ་སོགས་པའི་ལས་ཀྱི་དབང་གིས་ལུས་ཀྱི་འབྱུང་བ་རྣམས་སྨྱོ་འབོགས་སུ་འགྱུར་བའི་གྲོགས་སུ་འཁྲུགས་པ་སྟེ།
བདག་འབྲས་སྨྱོ་འབོགས་དང༌། བདག་རྐྱེན་ལས་ཀྱི་རྣམ་སྨིན་དུ་གྱུར་པའི་འདུ་འཁྲུགས་སོ། །གཉིས་པ་ནི། མིའམ། མི་མ་ཡིན་པའི་སེམས་ཅན་དང༌། སེམས་མེད་ཕྱི་རོལ་གྱི་འབྱུང་བ་ལ་སོགས་པའི་དབང་གིས་བྱུང་བ་ཡང་རུང་སྟེ། སྐྲག་དངངས་སློང་བའི་རྒྱུ་ཚོགས་ལ་བརྟེན་ནས་སྙིང་ཁམ་དཀྲུགས་ཏེ་སེམས་སྨྱོའོ། །གསུམ་པ་ནི། ཡུལ་ལྷ་ལ་སོགས་པ་མི་མ་ཡིན་གྱི་སྙིང་ལ་མི་འབབ་པའི་ཀུན་སྤྱོད་ཀྱི་དབང་གིས། ལྷ་སོགས་གནོད་བྱེད་དེ་དང་དེས་གནད་དུ་བསྣུན་པའི་ཡིད་ཀྱི་འགྱུར་བ་དང༌། དམོད་ཚིག་བོར་བ་ལ་སོགས་པ་སྨྱོ་བྱེད་ཀྱི་སྦྱོར་བ་བརྩམ་པ་དང༌། རང་གི་ཀུན་སྤྱོད་ལ་འཁྲུགས་པ་མིན་ཀྱང་སྨྱོ་བྱེད་ཀྱི་གདོན་ཡི་དྭགས་ཀྱི་འགྲོ་བས་བསྡུས་པ་འགའ་ཞིག་གིས་གཙེས་པ་ལྟ་བུའོ། །བཞི་པ་ནི། ཐང་ཁྲོམ་ཟོས་པ་ལྟ་བུ་ཟས་དང་སྤྱོད་ལམ་ཉེས་པས། འདུ་བ་འཁྲུགས་པ་ལས་སྨྱོ་བ་སྟེ། གཙོ་བོར་ནི་སྙིང་ལ་རླུང་ཞུགས་པ་ལས་སོ། །ལྔ་པ་ནི། བྱ་བ་རླབས་ཆེན་མ་གྲུབ་པའི་སེམས་ལས་དང༌། གྲོགས་པོ་ཤི་བ་ལས་སྡུག་བསྔལ་སྐྱེས་པ་ལ་སོགས་པའི་མྱ་ངན་གྱི་གཞིས་སྙིང་རླུང་ལྡང་བ་ལྟ་བུའོ། །དེ་ལ་དང་པོ་མ་གཏོགས་པ་འཕྲལ་གྱི་རྐྱེན་དབང་དང༌། དང་པོ་ནི་གནམ་གྱིས་བསྐོས་པའོ། །གཉིས་པ་ནི། སྨྱོ་བའི་རྒྱུ་ཚོགས་ལྔ་པོ་གང་རུང་གིས་ཐུན་མོང་མིན་པའི་བདག་རྐྱེན་ལ་བརྟེན་ནས་ངེས་རྟོག་ཕྱོགས་གཅིག་ཏུ་འཕྱོ་ཞིང་གཡེང་བ་དེའི་མཚན་ཉིད། དབྱེ་ན། རྒྱུའི་དབང་གིས་དབྱེ་བ་ལྔ་དང༌།
སྐྱེ་འཕགས་ཀྱི་རྒྱུད་ཀྱི་དབང་གིས་གཉིས་སུ་ཕྱེའོ། །ཕྱི་མ་འདི་ལས་འཕྲོས་པ། འཇིགས་པ་དང༌། གནོད་པ་དང༌། མ་མཉམ་པ། རྣམ་སྨིན་ལས་གྱུར་པ་དང༌། མྱ་ངན་ལས་གྱུར་པའི་སྨྱོ་འབོགས་ནི་འཕགས་པ་རྣམས་ལ་མེད་དེ། རིམ་བཞིན། འཚོ་བ་མེད་པ་ལ་སོགས་པའི་འཇིགས་པ་ལྔ་དང་བྲལ་བའི་ཕྱིར་དང༌། མི་མ་ཡིན་འཁྲུགས་པར་འགྱུར་བའི་ཀུན་སྤྱོད་མི་མཛེས་པ་མི་བྱེད་པའི་ཕྱིར་དང༌། རྣམ་སྨིན་འདི་འདྲ་བ་རྣམས་སྨིན་ངེས་ཀྱི་ལས་རྣམས་བྱང་བའི་ཕྱིར་དང༌། འདུ་བྱེད་རྣམས་ཀྱི་ཆོས་ཉིད་རྟོགས་པས་མྱ་ངན་མེད་པའི་གནས་བརྙེས་པའི་ཕྱིར་རོ། །འོན་ཀྱང་སངས་རྒྱས་འཕགས་པ་མ་གཏོགས་པ་རྣམས་ལ་འཕྲལ་གྱི་མྱ་ངན་ལས་གྱུར་པ་ནི་ཡོད་དོ་ཞེས་མཛོད་འགྲེལ་དུ་གསུངས་ཏེ། ཐེག་དམན་གྱི་སྡེ་སྣོད་ཀྱི་དབང་དུ་མཛད་པའོ། །གནད་འདི་དག་ཤེས་ན་དེང་སང་རོང་པ་རྣམས་ནས་དུག་ལྡུད་པ་སྨན་དུ་རེ་ནས་མཛའ་བཤེས་ལ་ཆང་གི་ཕམ་ཕབ་སྦྱིན་པ་དང༌། སྲིན་བུ་དང༌། ཤིག་སྲོ་ལ་སོགས་པ་གང་བྱུང་དུ་འཕེན་པ་དང༌། མཐུ་ངན་སྔགས་ཀྱི་སྦྱོར་བ་ལ་ཡོན་ཏན་དུ་ལྟ་བ་ལ་སོགས་པ་ཉེས་པའི་སྒོ་མང་པོ་ཞིག་གི་མཚང་རྟོགས་པར་འགྱུར་ཞིང༌། སྒོམ་ཆེན་སྨྱོ་བ་ཐོས་ན་མི་སྲིད་པའི་མཚར་གནས་སུ་བསམ་ནས་གང་ཟག་དམ་པ་སྨོད་པའི་ཉེས་ལྟུང་ཡང་འགོག་པར་ནུས་སོ། །གཉིས་པ་ལ། ཐུན་མོང་དུ་གྲགས་པ་དང༌། ཐུན་མོང་མ་ཡིན་པའོ། །དང་པོ་ནི། སྨྱོ་འབོགས་ཞི་བར་བྱེད་པའི་ཐབས་སུ་གྱུར་པ་དེའི་མཚན་ཉིད། དབྱེ་ན། རྣམ་སྨིན་ལས་སྨྱོ་བ་ལ་
ནི་སྨན་དཔྱད་སོགས་ཀྱིས་རང་དགར་བཅོས་སུ་མི་བཏུབ་པའི་ཕྱིར། བཤགས་པའི་སྒོ་རྨད་དུ་བྱུང་བ་སྟོབས་བཞིའི་རྣལ་འབྱོར་གལ་ཆེ་མོད། སྤྱིར་ནི་འདི་འདྲ་བའི་རྣམ་སྨིན་ལས་གྱུར་པ་ཐོབ་ཟིན་པ་རྣམས་ནི་འཆོས་པར་ཤིན་ཏུ་བཏུབ་དཀའ་བར་རྟོག་གེ་འབར་བ་ནས་མདོ་ལུང་དང་བཅས་ཏེ་བཤད་པས། ལས་ཀྱི་རྣམ་སྨིན་གཉའ་ཐོག་ཏུ་མ་བབས་པ་ནས་འཆགས་པ་གཅེས་སོ། །སྐྲག་པའི་གཞི་ལས་གྱུར་པ་ལ་ནི། མི་མ་ཡིན་གྱི་ཉེར་འཚེ་སྐབས་དེ་དང་བསྡོངས་ནས་བླའམ་མདངས་ཕྲོགས་པ་ལས་གྱུར་པའང་ཡོད་དེ། དེ་ནི་འཇིགས་པ་དང་གནོད་པ་གཉིས་ཀ་ལ་གྱུར་པར་སྣང་ཡང་དེའི་བདག་རྐྱེན་གྱི་གཙོ་བོ་གནོད་པ་ཡིན་པས་འོག་ཏུ་འཆད་ལ། འདིར་དེ་ལས་གཞན་པ་ནི། དབུགས་འབྱིན་པ་ལ་སོགས་པ་ཐབས་ལ་མཁས་པའི་སྐྱེས་བུ་དམ་པའི་མན་ངག་གིས་འཆོས་སོ། །གནོད་པ་ལས་གྱུར་པའི་ནང་ཚན་ལྷ་ཀུན་སྤྱོད་མི་མཛེས་པས་འཁྲུགས་པ་ལ་ནི། མཆོད་གསོལ་དང་བཟོད་པ་འབུལ་བས་ཞི་ལ། སྨྱོ་བྱེད་ཀྱི་གདོན་སོགས་ལ་ནི་གདོན་དེ་དག་སྐྲོད་པའི་རིག་སྔགས་ལ་སོགས་པས་གཞིལ་བར་བྱ་ཞིང༌། དེ་དག་གང་ལའང་རིག་སྔགས་འཆང་བའི་ནུས་མཐུས་མི་ཐུབ་པ་མེད་ཅིང༌། མདོས་ཀྱི་ཆོ་ག་ལ་སོགས་པ་ཐབས་གཞན་ཡང་ཆེས་མང་ངོ༌། །འོན་ཀྱང་དེང་སང་སྨྱོ་འབོགས་ཀྱི་ནང་ནས་ཀྱང་འདི་ཉིད་མང་བར་སྣང་ཞིང༌། དེ་ཞི་བ་ལའང་མདོས་གླུད་ཀྱི་ཡས་འགྱེད་འདི་དར་ཆ་ཆེ་མོད། འོན་ཀྱང༌། མཛོ་རྩ་ཟན་མང་ཡང་ཁལ་ཐེག་དཀོན་པའི་དཔེ་ལྟར་སོང་བས་གཏོ་མཁན་གཏོ་རྒྱུས་
ལ་མཁས་པ་དཀའ་བར་སྣང་བས། མདོས་གླུད་ཀྱི་རྣམ་གཞག་ཆེ་ལོང་རགས་པ་ཙམ་བརྗོད་ན། སྤྱིར་མདོས་གཞུང་རྣམས་སུ། མདོས་ལ་རྣམ་གྲངས་ཆེས་མང་བ་བཤད་ཀྱང༌། འདིར་མཁོ་བ་ནི་བསྐང་མདོས་ཡིན་ལ། བསྐངས་ཞེས་པ་བུམ་པ་ཆུས་བཀང་བར་བྱེད་པ་ལའང་ཆུས་བུམ་པ་བསྐངས་ཞེས་ཟེར་རུང་བས་ལྷ་འདྲེའི་འདོད་པ་འགེང་བར་བྱེད་པ་སྟེ། མདོས་ཀྱིས་བསྐང་བ་ལ། སྐོང་མདོས་ཞེས་གྲགས། མདོས་ཁོ་རང་ནི། ལྷ་འདྲེའི་མཐུན་རྫས་ལ་བྱ་བ་རགས་པ་ཙམ་དང༌། ཅུང་ཟད་ཞིབ་པར་བཏང་ན། ལྷ་འདྲེ་ལ་མཐུན་རྫས་སྤྱིར་ཡོད་དོ་ཅོག་ལའང་མདོས་མི་ཟེར་ཏེ། ཟེར་ན་སྒོག་པ་རི་ལ་སྐྱེས་པ་རྣམས་ཀྱང་རང་བཞིན་གྱིས་མདོས་ཡིན་པར་ཐལ་བའི་ཕྱིར་ཏེ། དེ་མཐུན་རྫས་སུ་འགྲོ་བའི་འདྲེ་ཡོད་པའི་ཕྱིར་རོ། །དེས་ན་རིག་སྔགས་འཆང་བ་རྣམས་ཀྱིས་སྔགས་དང༌། བསམ་པའི་ཁྱད་པར་གྱིས་བགེགས་ལ་སོགས་པ་ཚིམ་པའི་ཕྱིར་བྱིན་གྱིས་བརླབ་པའམ་ནུས་མཐུས་བསྒྱུར་བ་དང༌། གང་བསྒྱུར་རྒྱུའི་རྫས་དེའང་ལྷ་འདྲེ་དེ་དང་དེའི་མཐུན་རྫས་ཡིན་པའི་གཞི་མཐུན་ཅིག་ལ་བྱ་བ་ཀུན་མཁྱེན་རང་བྱུང་རྡོ་རྗེའི་དགོངས་པར་ཡང་སྣང་ངོ༌། །མདོ་སྡེ་སོགས་ནས་མདོས་ཡས་ཀྱི་བརྡ་ཆད་དངོས་སུ་མ་བྱུང་ཡང༌། འཇིག་རྟེན་གྱི་ཁམས་འབྱོར་པས་གཏམས་ནས་རྒྱལ་བ་སྲས་བཅས་ལ་མཆོད་པ་ཡིད་སྤྲུལ་བྱ་བ་ཡང་གསུངས་ཤིང༌། དེ་མཆོད་པ་དང༌། འདི་སྦྱིན་པ་ཙམ་ཡིན་པའི་ཁྱད་པར་མ་གཏོགས་འདྲ་བའི་ཕྱིར་དང༌། དེར་ཡང་མ་ཟད་སྟོང་
གསུམ་རིན་པོ་ཆེ་ལ་སོགས་པས་བཀང་སྟེ་སེམས་ཅན་རང་རང་གིས་གང་འདོད་བཞིན་སྟེར་བ་ཡང་མདོ་ལས་གསུངས། རིག་སྔགས་ཀྱི་སྟོབས་ཀྱིས་སེམས་ཅན་གྱི་ཉེ་བར་སྤྱད་པ་གང་ཡང་སྣང་བར་བྱེད་ནུས་པ་ཡང་མདོ་ལས་མང་དུ་གསུངས་པས། ལྷ་འདྲེའི་མཐུན་རྫས་ནམ་རྒྱང་མདའ་འཕང་ལ་སོགས་པ་རང་རང་གི་འདོད་པའི་དངོས་པོ་ཅི་ལྟར་འབྱོར་བ་ལ། རིག་སྔགས་ཀྱི་མཐུས་མང་དུ་སྤེལ་ནས་སྦྱིན་པ་ལ་མདོས་གཏོང་ཟེར་བས་དོན་ནི་འདྲ་ལ། མཁས་པས་ཚིག་ཙམ་གྱི་རྗེས་གཅོད་པར་མི་བྱེད་དོ། །གླུད་ནི། སྐྱེས་རབས་སུ། ངང་པའི་རྒྱལ་པོའི་སྲོག་གླུད་དུ། །བདག་ཉིད་མཆིད་ཀྱིས་འཚལ་བར་བགྱི། །ཞེས་བརྡ་ཆད་ཀྱང་དངོས་སུ་བྱུང་ལ། འདིའི་གླུད་ཀྱི་དངོས་པོ་ཁོ་རང་བེམ་པོ་ཡིན་པའི་ཕྱིར་སྨྱོ་འབོགས་ཅན་སོགས་ནད་པའི་ཚབ་ཏུ་རུང་བའི་ཤ་ཁྲག་དྲོད་དབུགས་དང༌། ཁྱད་པར་དུ་ལྷ་འདྲེ་ལ་མཁོ་བའི་མདངས་སམ་བླ་མེད་མོད་ཀྱི་རིག་སྔགས་ཀྱི་མཐུས་ལྷ་འདྲེའི་ངོར་དེ་དག་དངོས་སུ་ཡོད་པར་སྣང་བ་མི་འགལ་ཀྱང༌། རིག་སྔགས་ཀྱི་མཐུས་རྩམ་གོང་གང་ཟག་ཏུ་བསྒྱུར་ཆོག་ཟེར་བ་མིན་ནོ། །ཞར་ལ་འོངས་པའོ། །མ་མཉམ་པ་ལས་སྨྱོ་བ་ལ་ནི་སྨན་པ་རྣམས་ཀྱིས་གསོ་དཔྱད་ཀྱི་ཆོ་གས་ཞི་བར་བྱེད་དོ། །མྱ་ངན་ལས་གྱུར་པ་ནི་མྱ་ངན་བསང་བ་ལ་བརྟེན་ཏེ། མྱ་ངན་སྲབ་པར་བྱེད་པ་དང༌། དགའ་བའི་དངོས་པོ་ཐོབ་པ་ལས་མྱ་ངན་བརྗེད་པར་འགྱུར་བ་ལ་སོགས་པ་རྣམ་པ་དེ་ལྟ་བུ་དག་གིས་ཕན་པ་ཉིད་དོ། །
གཉིས་པ་ནི། ལྷ་མཉེས་པར་བྱ་བ་དང་འབྲེལ་བ་དང༌། དེ་ལས་གཞན་པའི་ཚུལ་གཉིས་ཏེ། སྔ་མ་ནི་འཇམ་དཔལ་དཀར་པོའི་སྒྲུབ་ཐབས་སུ། ཙནྡྲ་ཀ་ར་གུབྟ། ཕན་ཚུན་བཟློག་པས་འཁྲུལ་པ་འཇོམས། །ཞེས་བཤད་པ་ལྟ་བུ་ལ་སོགས་པའོ། །ཕྱི་མའི་ཕྱོགས་ལའང༌། སྤྱིར་རྣམ་གྲངས་མང་ཞིང་སྔགས་བླ་མེད་ཀྱི་རྒྱུད་སྡེའི་ལུགས་ཐུན་མོང་མ་ཡིན་པའི་གེགས་སེལ་ནི་ཀུན་མཁྱེན་ཆོས་ཀྱི་རྒྱལ་པོའི་གསུང་རབ་ཡང་ཏིག་ཡིད་བཞིན་ནོར་བུ་ལ་སོགས་པར་བཤད་ཅིང༌། དེ་ལས་ཀྱང་ཆེས་ཟབ་པའི་གེགས་སེལ་གྱི་མཆོག་ནི་བསམ་གཏན་ངལ་གསོ་ལས་ཤེས་པར་བྱའི། སྨྱོ་བ་བཤད་པའི་ཡིག་ཕྲན་ཞིབ་ཏུ་སྨོས་ཀྱིས་མི་ལྡང་སྟེ། དེའང་འཇམ་དཔལ་དཀར་པོའི་མན་ངག་ལས་བཤད་པ་འདྲ་བ་ནི་ངེས་རྟོག་ཕྱོགས་གཅིག་ཏུ་གཡོ་བ་དང་རྣམ་པ་དངོས་འགལ་ཡིན་པ་དང༌། དེ་ལས་གཞན་པ་ཕལ་ཆེ་བ་ནི་སྨྱོ་བའི་རྒྱུ་ཚོགས་དང་འགལ་བ་ལ་སོགས་པའོ། །གནད་དེ་དག་བཤད་ན་ནི་ཆུ་གཏེར་གཞི་ནས་དཀྲུགས་ཏེ་འཆད་དགོས་ཤིང༌། ཞིབ་མོར་མ་བཤད་ན་འདྲ་འདྲ་མོའི་ཆོས་སྐད་ཙམ་གྱིས་གོ་བའི་གནད་དམིགས་ནས་ཟིན་པ་ཉུང་བར་སྣང་བས། བདག་ལྟ་བུའི་བྱིས་པ་བླུན་པོའི་ཁ་ལ་མི་བལྟ་བར་རིག་འཛིན་བརྒྱུད་པའི་མན་ངག་གི་གནད་རྗེན་པར་རྟོགས་ནས་ཕ་ཤུལ་བུས་ཟིན་པ་རེ་ཨེ་འོང་བལྟ་དགོས་སོ། །སྤྲོས་བཤད་མཁའ་ལྡིང་གཤོག་རླབས་ཤག་པོ་མིན། །བསྡུས་བཤད་རྐྱལ་པ་མཆུ་བཅིང་ཡིག་ཆུང་འདི། །ཁ་བཤད་གོ་བ་མེད་པའི་ཧོབ་རྐྱལ་དེས། །སྨྱོ་བཤད་སྨྱོ་འབོགས་གདུང་སེལ་བདུད་རྩིར་སྦྱར། །
སྨྱོ་འབོགས་སེལ་ཐབས་དང་བཅས་པ་བསྡུས་ཏེ་བཤད་པའི་ཡིག་ཆུང་ཉུང་ངུ་སྨྱོ་བརྗེད་ཤ་ཟའི་གཤེད་མ་ཞེས་བྱ་བ་གཞོན་ནུ་ཀུན་བཟང་འཇིགས་མེད་པས་རང་ལོ་ཉི་ཤུ་པའི་སྟོན་འབྲིང་དམར་ཕྱོགས་ཀྱི་དགའ་བའི་ཉིན་བར་ཞིག་ཏུ་བྲིས་པ་དགེ །།།
གུག་ནར་ཞབས་འབྲེང་མེད་པའི་ཡིག
༈ ནང་ནས་བསླབ་པ་རྣམ་དག་མ་སྦྱང་ན། །ལྟར་སྣང་ཆ་བྱད་བཟང་ཡང་ཕན་པ་དཀའ། །སྤང་བླང་གནས་ལ་འབད་པས་བག་མཛད་ན། །བཅའ་ལག་ར་ལྤགས་མནབ་ཀྱང་དམ་པ་ལགས། །ད་ལྟ་དད་ཟས་ཟ་བ་ལ་བསམ་ནས། །ཀ་སྨད་ཁ་བྱང་བྱས་ཚད་གཟན་ཤམ་སྤྲད། །བསྟན་པ་རྟགས་ལ་གནས་སྙམ་བླ་མ་ཕལ། །ལྷ་འབག་གདན་ལ་བཞག་ལྟར་རྒྱགས་པ་རྒྱས། །གྲྭ་པས་ཁ་ཙམ་དད་པ་ཁ་ལ་བཏགས། །བླ་མས་ང་མཁས་སྙམ་ནས་ང་རྒྱལ་མཛད། །འཆད་ཉན་བྱ་མང་ནང་ན་བྱ་སྐད་ལྟར། །མང་མང་གྲགས་ཀྱང་རྩ་བ་ཕྲ་བར་སྣང༌། །སྐ་རགས་བ་བླ་འདྲ་ཡང་སྣལ་མ་ཙམ། །གྲྭ་སར་བཅས་བཟང་སྤྲད་ཀྱང་ཁྲག་རྐྱལ་ཙམ། །བལྟ་དགའ་བཀྲག་མདངས་གསལ་ཡང་ཤ་ལྤགས་ཙམ། །ཐམས་ཅད་རྨ་བྱ་འདྲ་ཡང་སྣང་བརྙན་ཙམ། །བཤད་ཡམ་ཁ་རླང་འདྲ་བས་ཁ་ནང་ཟད། །བསམ་གཏན་ཉམས་ལ་བལྟས་ཀྱང་ཨ་ཐང་ཆད། །བག་ཡང་རང་སར་བསྡད་ན་ཐ་མལ་པ། །ཧ་ཧ་གང་ལ་བལྟས་ཀྱང་འབག་འཆམ་འདྲ། །ཡང་དག་ལམ་བཟང་བཤད་ན་རྣ་བ་དགབ། །རྟ་གཡག་ནང་རྫས་བསྟན་ན་སྣང་ཉམས་དགའ། །སངས་རྒྱས་རྒྱལ་སྲས་ཡ་མཚན་རྣམ་ཐར་ཅན། །སྤྲང་འཁྱམ་ང་འདྲས་བལྟས་ཀྱང་བཞད་གད་
གནས། །རྟགས་གསལ་ཐལ་སྐད་ཅག་ཅག་བརྩད་ན་ཡང༌། །ཆང་བརྒྱག་ལག་འཐབ་སྤྲད་ལྟར་ཞལ་རས་དམར། །ཨ་གཏད་བཞག་ནས་དྲན་པ་བསྡམ་ན་ཡང༌། །རྒྱ་ནག་ཧ་ཤང་ལྟ་བ་འདྲ་ལ་ཁད། །སངས་རྒྱས་བསྟན་པ་བསྐྱང་སྙམ་དབང་བཀའ་བཤད། །དབང་བཀས་ར་ཚང་ནང་ནའང་གསང་བ་བསྒྲགས། །གསང་བ་བསྒྲགས་ན་དམ་ཉམས་སྐར་ལྟར་མང༌། །དམ་ཉམས་མང་ན་དམྱལ་ཁམས་ཆབ་འབང་རྒྱས། །རྔ་སྐད་ཁྲང་ཁྲང་བསྒྲགས་ནས་ངན་སྔགས་བཅས། །དབྱངས་གདངས་ཐག་པ་བརྐྱངས་ལྟར་ན་ར་ར། །བསྟན་དགྲ་ར་རྒན་བཤས་ནས་ཞལ་བསྟབ་མཛད། །སྨད་ལས་དགའ་དང་འགའ་ལ་མཚར་ཉམས་ཤར། །ཁ་ནས་གདམས་ངག་བཤད་པ་ཆར་ལྟར་འབབས། །ནང་ནས་བསམ་ངན་འཆར་ཆ་སྔར་ལས་ལྷག །གཞན་ཕན་བྱ་བ་བྱས་བྱས་རང་རྩ་ཉམས། །ང་འདྲས་ཁ་བཤད་ལབ་ལབ་བྲག་ཆ་འདྲ། །ནག་ཆང་ནང་བསམ་མཚན་བསམ་ཐལ་དྲག་པས། །གཟན་དཀར་རལ་པ་བཞག་ནས་རས་པ་མཛད། །བཤད་ཚད་ཁྲམ་པ་འདྲ་བར་ཡ་མ་བརླ། །སྔགས་འཆང་ས་ར་ཧ་ལྟར་སྙད་ཀྱང་བཏགས། །ཟབ་ལམ་གདམས་པས་རང་སྣང་མ་དག་པར། །གཞན་སྣང་དད་པ་ཙམ་ལ་དགའ་དྲག་ནས། །ཞྭ་ཚད་ལྷམ་ལ་བླང་བ་མང་ན་ཡང༌། །རྒན་རབས་མཁས་པས་བརྟག་ན་རང་མཚང་གསལ། །ལ་ལས་དམར་ན་བཟང་སྙམ་འགགས་ཤམ་གཟབ། །ལ་ལས་སྐྱ་ན་དགའ་སྙམ་ལྤགས་སྐྱ་སྤྲད། །རྟགས་དང་མཛད་པ་ཐ་དད་གནས་བརྟན་དག །རང་རང་མཁས་སྙམ་བྱས་ཀྱང་བལྟས་ན་གསལ། །ཨ་
ཅང་མང་མང་བཤད་ན་ཁ་ཏྭ་འདྲ། །ཞྭ་ལྷྭམ་རང་སར་བཞག་ན་དགའ་བ་ལ། །སྤྲང་འཁྱམ་རང་ལ་ཤར་ཚད་བསྙད་པ་ལགས། །སྣང་བ་དགྲར་ལང་ལགས་ན་བཤགས་པས་འཆགས། །ཕན་མཛད་སངས་རྒྱས་འཕྲད་པ་བརྒྱ་ལམ་ཙམ། །ཟབ་རྒྱས་ལམ་བཟང་ཡང་ཡང་མཇལ་དཀའ་བས། །ད་ལྟ་དལ་བ་བརྒྱད་ལྡན་གནས་སྐབས་ན། །ཡང་དག་བསླབ་པ་སྦྱང་འཚལ་སྐལ་བཟང་དག །ཅེས་གུག་ནར་ཞབས་འགྲེང་མེད་པའི་ཨ་ཡིག་ངེས་པ་དང་སྦྱར་བའི་སྨྱོ་གཏམ་གཡོས་བླུག་མ་འདིའང་རྡོ་རོང་གི་སྤྲང་པོ་འཇིགས་མེད་པས་གང་དྲན་བྲིས་པ་དགེའོ།། །།
ཡི་གེའི་འཇུག་པ།
༈ ཡི་གེའི་འཇུག་པ་གཅིག་ཀྱང་དོན་གྱི་སྒོ། །བྱེ་བ་ཁྲག་ཁྲིག་དུ་མའི་རྣམ་འབྱེད་དུ། །སྟོན་ལ་མི་འཇིགས་སྤོབས་པའི་མཐུ་གྲུབ་པ། །ཆོས་ཀྱི་སློབ་དཔོན་མཆོག་ལ་ཕྱག་འཚལ་ལོ། །དོན་གྱི་རྣམ་དབྱེ་གཅིག་ཀྱང་ཡི་གེའི་སྒོ། །ཁྲག་ཁྲིག་བྱེ་བ་སྙེད་ཀྱིས་སྟོན་མཛད་མོད། །དེ་ཡི་བློ་གྲོས་འཇུག་པ་འཛད་མེད་ཅན། །ཡི་གེའི་སློབ་དཔོན་དེ་ལ་ཕྱག་འཚལ་ལོ། །ཡི་གེའི་དེ་བཞིན་ཉིད་དང་ཡི་གེའི་ཆོས། །རོ་གཅིག་སོ་སོ་མ་ཡིན་ཚུལ་མཁྱེན་ནས། །ཡི་གེའི་སྒོ་འཕར་གཅིག་གིས་ཤེས་བྱ་ཀུན། །སྟོང་དང་རྟེན་འབྱུང་ཟབ་མོའི་ངོ་བོར་འདོམ། །ཡི་གེ་མཉམ་པ་ཉིད་ཀྱིས་མཉམ་ཉིད་དོན། །ནམ་མཁས་ནམ་མཁའ་བྲིས་བཞིན་མི་མཚོན་མོད། །རྟེན་འབྱུང་རྨི་ལམ་ལྟ་བུའི་སྣང་ཆ་ན། །ཚིག་དོན་མ་བརྟགས་ཉམས་དགའི་རོལ་མོར་སྟོན། །ཡི་གེ་ཚིག་གིས་ཕ་མཐར་རྣམ་བཞག་མོད། །ཚིག་ཀྱང་ཡི་གེ་ཉིད་ལས་བརྩམས་ཏེ་འབྱུང༌། །ཚིག་དང་ཡི་གེ་འདི་དག་བཏགས་
པ་སྟེ། །རང་བཞིན་གྲུབ་པའི་མཚན་མ་རྡུལ་ཙམ་མེད། །གང་གིས་ཡི་གེ་གང་ཞིག་རྣམ་བརྗོད་པ། །དེ་ཚེ་ཡི་གེ་གཞན་ནས་འོང་མིན་ཞིང༌། །ཡི་གེ་གང་ནའང་གནས་པ་མ་མཆིས་མོད། །ཡི་གེ་སྒྲ་བརྙན་བཞིན་དུ་དེ་ཚེ་སྣང༌། །སུ་ཞིག་ཡི་གེའི་སྒོ་ལ་དམིགས་གྱུར་པ། །དེ་ཚེ་ཡི་གེ་འཕེལ་མེད་འགྲིབ་མེད་དེ། །ཇི་ལྟར་མེ་ལོང་དག་ལ་གཟུགས་བརྙན་བཞིན། །དེ་ནི་དེ་ཡི་ཡིད་ལ་སྣང་ཙམ་ཉིད། །དོན་གང་ཡི་གེའི་དུ་མས་རྣམ་བཤད་པ། །དེ་དག་བརྗོད་འདོད་དབང་ལས་མ་གཏོགས་པ། །དོན་དང་ཡི་གེ་གཅིག་མིན་ཐ་དད་མིན། །དེ་དག་རང་བཞིན་ཉིད་ཅེས་བརྗོད་མི་བྱ། །དོན་དང་ཡི་གེ་གཅིག་ན་ལྷུན་པོའི་ཚིག །བརྗོད་འདོད་མགྲིན་པའི་དབུས་སུ་རི་སྣང་འགྱུར། །དེ་དག་ཐ་དད་ཉིད་ནའང་ཚིག་གིས་དོན། །སྟོན་པའི་གོ་སྐབས་སྣང་བ་མི་རིགས་སོ། །སྒྲ་དང་རྟོག་པས་རབ་བཞག་ཡི་གེའི་སྒོ། །བྲག་ཆ་བཞིན་དུ་ཐེར་ཟུག་མ་མཆིས་མོད། །བྱིས་པ་སྨིག་རྒྱུའི་ཕུང་པོས་རི་དྭགས་བཞིན། །དོན་དང་ཡི་གེས་བདག་ཏུ་རྨོངས་པར་འགྱུར། །དེ་ལྟར་ཤེས་ནས་མཁས་པ་བློ་གྲོས་ཅན། །ཆགས་མེད་ཡེ་ཤེས་མཁའ་ལ་ཉི་མ་བཞིན། །མཚན་མར་འཛིན་པའི་ལྟ་བ་རབ་བཅད་དེ། །རྨི་ལམ་ལྟ་བུའི་ཡི་གེས་རྨོངས་མི་འགྱུར། །དེ་དག་བསྐལ་པ་དུ་མར་ཆོས་སྟོན་ཀྱང༌། །ཆོས་ཀྱི་དབྱིངས་ལ་བྲི་གང་མེད་ཤེས་ནས། །སྤོབས་པའི་ཆུ་རྒྱུན་འཛད་པ་མེད་འགྱུར་ནས། །ཐོགས་པ་མེད་པའི་བློ་གྲོས་སྣང་བ་འབྱུང༌། །ཞེས་པའང་འཇིགས་མེད་བསྟན་རྒྱམ་པས་བྲིས།། །།
དགྲ་ཐབས་འདུན་གྲོས་སུ་གླེང་བ་སྒྱུ་མའི་སྒྲུང་རབས།
༈ རྗེ་བཙུན་འཇམ་པའི་དབྱངས་མཁྱེན། འཁོར་བ་སྡུག་བསྔལ་གྱི་
ཡུལ་གྲུ་སྔོན་དང་ཕྱི་མའི་མཐའ་མི་མངོན་པས་ས་ཁ་རྒྱ་ཆེ་ཞིང་གནམ་ལྟོ་བ་ཡངས་པའི་ས་ཆ། ཞི་བའི་རི་ངོགས་མེད་ཅིང༌། བདུད་རྩིའི་ནགས་འདབ་མེད་པ། འཕགས་པའི་ལམ་གྱི་ཆུ་མེད་པ། ཕྱིན་ཅི་ལོག་གི་ཉོན་མོངས་པའི་ཚ་དུབ་ལ་བཟོད་ཐབས་མེད་པ། །གང་དུ་བལྟས་ཀྱང་འདུ་བྱེད་ཀྱི་སྡུག་བསྔལ་སྨུག་ལྟེམ་མེ་བའི་ནང་ན་འཁྲུལ་པའི་སྨིག་མང་པོ་ལང་ལོང་དུ་རྒྱུ་བ། མི་འགྲོའི་རང་དབང་ཟད་པ། སོང་ན་གཏད་སོ་བྲལ་བ། དོན་མེད་རང་སྡུག་མྱོང་བའི་ལམ་རིང་པོ་འཛད་དུས་མེད་པ། འཕགས་པའི་དགའ་བ་ཟང་ཟིང་མེད་ཅིང་གྱ་ནོམ་པའི་བཀྲག་མེད་པ། ཆོས་ཀྱིས་ཕོངས་པའི་མུ་གེའི་ཐལ་བ་སྐྱ་ཐལ་ལེབ། ཁ་བརྒྱར་གྱེས་པ་ཅན། སྟོང་སྡེ་ཁྲི་ཤོག་མང་པོའི་གྲོང་ཚོ་ཆགས་པ། སྟོད་གཟུགས་ཁམས་དང་གཟུགས་མེད་ཀྱི་འབྲོག་ན་བསོད་ནམས་ཀྱི་བེ་ལུག་འཚོ་སྐྱོང་མཁས་པས་ཏིང་ངེ་འཛིན་གྱི་དཀར་སྣ་མོད་པ། སྨད་འདོད་ཁམས་ཀྱི་རོང་ཡུལ་ན་དགེ་སྡིག་གི་ལས་རྣམ་པ་སྣ་ཚོགས་ཞིང་དུ་རྨོ་བས་སྐྱིད་སྡུག་གི་འབྲུ་སྣ་ལ་འདི་མི་དར་བྱ་བ་མེད་པ། རྒྱུ་འབྲས་ཀྱི་ཉོ་ཚོང་ལ་སྐྱེད་འཕེལ་བརྩི་བ། སྐྱེ་ཤིའི་ས་ཚུགས་རྩིས་ཀྱིས་མི་ཆོད་པ་མུ་ནས་རྒྱུད་དུ་མཐུད་པ། ས་ཚུགས་རེ་དང་བར་ན་རྟག་འཛིན་གྱི་བྱ་བྱེད་འཆར་གྲངས་མང་ལ་གཟུང་དུ་མེད་པའི་དྲི་ཟའི་གྲོང་འབུམ་ཚོ་མང་པོས་བརྒྱན་པ། སྐད་ཅིག་རེ་ནས་ཅི་ཡང་མེད་པ། ཕར་འགྲོ་དང་ཚུར་འོང་གི་འདུ་འགོད་རྒྱུན་མི་འཆད་པས་མགྲོན་པོའི་བུན་ལོང་མིག་སྦྲིད་པ་ལྟ་བུ། ཆ་ལུགས་སྤྱོད་ཚུལ་མི་མཐུན། ཟ་ཐང་དང་ལོངས་སྤྱོད་
མི་འདྲ། གྲོང་ཤོགས་དང་སྐད་རིགས་མི་གཅིག་པའི་སེམས་ཅན་གཞལ་དུ་མེད་པ། འཇིག་ཚོགས་ལ་ལྟ་བའི་མི་དཔོན་གཅིག་གི་ཁེབ་ཞབས་སུ་ཆུད་པའི་མངའ་རིས་འདི་ན། བུ་རང་ཉིད་མིན་པའི་དཔའ་བོ་དང་ཐུག་མ་ཐུབ། །དགྲ་ཕར་འདུལ་མིན་པའི་ཚུར་རྒོལ་དང་ཕྲད་མ་མྱོང༌། གནས་རང་ཁྱིམ་མིན་པའི་ས་མཐའ་གཅོད་དགོས་མ་བྱུང་བའི་དཔོན་ཨ་མའི་གོ་ཁའི་གཅེས་ཕྲུག་པོ་ཁོ། ཁྲིམས་ལ་ཡོ་དྲང་མེད་དེ་ངན་གཡོའི་ལྟ་རྒྱུད་དུ་བྱུང༌། འབངས་ལ་སྐྱོང་ལུགས་མེད་དེ་ཉོན་བདུད་ཀྱི་ཐ་སྙད་ཆགས། དྲིན་ལ་ངོ་སོ་མེད་དེ་སེམས་གཤིས་ཕྱིན་ཅི་ལོག་གི་གཙོ་བོར་གྱུར་ནས། གྱོད་གཞི་ན་ཡོད་པ་བུན་དུ་འཇོག་པ། གྱོད་རྩ་ནང་དུ་བསྡུས་ནས་གཏང་རག་གཏོང་བ། སྡུག་སེམས་ན་མེད་པ་ཐོག་འཇོག་བྱེད་པ། བློའི་སྐོར་ལུགས་རེ་ལ་ལོ་བརྒྱའི་མནར་ཐབས་ཚང་བ། འཕྲལ་དགའ་ལ་མཐའ་ངན་པའི་ཁྲིམས་ཀོ་དམར་གྱི་འབྲེང་རློན་ལྟ་བུས་སེམས་ཅན་སྡུག་ཐག་གཅོད་པའི་སྐབས་སུ། དཔོན་ལ་ཟ་ཚོད་ཡོད་རུང་གཡོག་ལ་འཇལ་ཚོད་མེད་པའི་དཔྱ་ཁྲལ་ཡ་མེད། རྗེ་ལ་མགུ་དུས་མེད་རུང་བྲན་ལ་སུན་དུས་འབྱུང་བའི་ཞབས་ཏོག་ཡ་མེད། ཁྲིམས་ལ་མནར་ཕོད་ཡོད་རུང་འབངས་ལ་བརྣག་ནུས་མེད་པའི་ཆད་པ་ཡ་མེད། གཤེད་མ་གསོད་སྙིང་ཆེ་རུང་བཙོན་བུ་འཆི་སྙིང་མེད་པའི་རང་ཉམས་ལྷུག་པ་འདི་ཚོ་བསམས་ནས། ཤ་ཚ་རང་ལ་འཆོར་བའི་མི་འདྲ་སྲིད་ན་ནི། །ད་བབ་སྡུག་གི་ཁུར་པོ་རི་ལྟར་ལྕི་བས་ཐོ་བཞག །ཕྱིས་འབྱུང་ཕུང་པོའི་སེམས་ཁྲལ་ནད་ལྟར་ན་བས་གླེང་བསླང༌། སྔར་བརྐོས་ལས་ཀྱི་སྡུག་ཡུས་མི་
རོ་ལྟར་ངམ་གནག་པ་བསྐྱེད་དེ། གནམ་གྱིས་རྭ་ཅོ་བརྡར། ས་ཡིས་རྔ་མ་གཡུགས། གནམ་ས་ཆ་ལང་བརྡབ། སྲིད་པ་ཐོག་འོག་ལོག་པའི་དུས་ནམ་ཤར་རུང༌། རྗེའི་སྐུ་ཚོད་འཛིན་པའི་ཐོབ་ཐང་མི་དབང་ཡང༌། བདེན་རྫུན་རང་ལམ་ལེན་པའི་སྤྱི་ལུགས་དེ་མི་དབང་དོན་མི་འདུག་པས། ཡོ་དྲང་གི་ས་དམིགས་དང༌། སྐྱིད་སྡུག་གི་དབང་སྐལ་ཐིག་གིས་བགོ་བའི་གླེང་གཞི་ཞིག་སློང་དགོས། དེ་ལ་མི་དཔོན་འདི་རིགས་རྣམས་རང་ཅི་འདོད་ཀྱི་ངང་ལ་སྣང་བ་བྱུང་རྒྱལ་དུ་འཇོག་རྒྱུ་ཡོད་མེད། ཁོང་གི་ཡབ་མེས་ལ་ཐོབ་ཐང་དབང་ཚུལ། །ལྷ་སྲས་ཀྱིས་རང་སྲིད་བསྐྱང་རབས། སྐྱེས་བུའི་སྐྱོན་ཡོན་ཡོ་ལུགས་དང་བཅས་པ་ཟུར་ཙམ་ཞིག་དྲང་པོར་བརྗོད་ན། གནའ་རབས་དང་པོའི་ཐོག་མ། འདི་པའི་ཡབ་མེས་ཆོས་སྐྱོང་རྒྱལ་དང༌། ཆོས་ཕྱུག་འབུམ་ལ་སོགས་པ་རིགས་ངན་མ་ནིང་གི་སྡེབ་ལས་སྐྱེས་ཤིང༌། ལུས་སེ་དྲིའི་སྡོང་པོ་ལྟས་ངན་གྱི་ཤ་གཟུགས་སུ་གྲུབ་པས། ཡ་རབས་ཀྱི་མི་ཁྱུར་མ་ཆུད། གཉན་སྣ་རྫི་ཅན་དང་སྡེབས་མ་རྙེད་ནས། འབྱུང་བ་རྫས་སྣ་དགུ་འདུས་ཞེས་བྱ་བའི་ཡུལ་ས་མིན་རྡོ་མིན་ལས་གྲུབ་པའི་གཅོང་རོང༌། སྔོ་ལྡུམ་དང་མེ་ཏོག་མེད་པ། སྟེང་ནས་ཉི་མ་དང་རླུང་གིས་རྨྱ་བ། ཞབས་ནས་འདམ་རུལ་དང་བ་ཚྭས་གཤེར་བ། ཕྱི་འཁྲང་ལ་ནང་མྱགས་པ། རླན་དྲི་དང་དྲོད་རླངས་འདྲེས་མ་དང༌། ལུད་འབུ་རིགས་མི་གཅིག་པ་མང་པོས་ཁྱབ་པ། རྩ་འཇག་མ་ཤུགས་རིང་འབྱིན་པའི་སའི་སྐུངས།
ལུང་པའི་གཏིང་དོང༌། རྡོ་གོར་མོ་ཡིན་ཡང་ས་མི་ཟིན་པ་ལྟ་བུ་ཞིག་ན། ཆུ་གད་པ་གཉིས་དང་པུས་མོ་མཉམ་བཙུགས། རྫ་ཕ་བོང་གཉིས་དང་ངོ་འཇིགས་སྟོན་རེས་བྱེད་པའི་སྐྱེ་མཆེད་ཀྱི་གྱང་རོལ་བྱ་བ། ནང་ནས་བལྟས་ན་ཕྱི་མི་བསྒྲིབ་པའི་གོག་པོ་ཁ་རལ། ནང་ན་མི་མ་བསྡད། ཕྱི་ན་དུ་བ་མི་འོང་བ་ཞིག་ཡོད། དེ་ལ་རྟེན་མཁར་གྱི་གཙོ་བོ་བྱས་ཏེ། སྣོད་བཅུད་གོ་མ་འཛོལ་བའི་དུས་དེ་ཙམ་ན་ཡང༌། སས་ཡར་ལ་གཅིག་བལྟས་ན། གནམ་གྱིས་མར་ལ་གཅིག་ལྟ། ཀྭི་ཕར་ལ་གཅིག་བོས་ན་རི་བྲག་གིས་ལད་མོ་ཞིག་ཟློ་བ་ལྟ་བུ་མ་གཏོགས། ཁྱིམ་མཚེས་ཀྱི་ཨ་ཡ་དང་གཅིག །ཕྱུགས་ལུག་གི་སྐྱོང་སྤེལ་དང་གཉིས། རྨོ་རྐོ་སོ་ནམ་དང་གསུམ། དེ་རིགས་ཚོར་ཡང་མྱོང་ཚོད་དུ་མི་འདུག་པ་དེ་ལྟར་ཡིན་རུང༌། གདུང་ཨ་ཚ་རྐེ་རིང་གི་རྒྱུད་དུ་བྱུང་བས་མུ་གེས་མ་ཐུབ། མ་སྡུག་མོ་ཁེར་སྡུག་གི་བུ་རྒྱུད་ཡིན་པས་ཡིད་གཅོང་མ་ལོང༌། མེས་གླེན་རིགས་ལུགས་སྨྱོན་མགོའི་ཚ་རྒྱུད་ཡིན་པས་སེམས་ཤེད་མ་ཆད་དེ། གྱོང་པོ་ཁྱིས་མ་ཆོད། རོ་ཁུར་འདྲེས་མ་འདོད་པའི་ཁ་དཔེ་ལྟར་སྡུག་ཚེ་དམྱལ་བ་བས་ཀྱང་རིང་བར་བྱུང༌། དེ་ཚོའི་རིང་ལ་སེམས་ཅན་གྱི་རང་བཞིན་དར་བས་འཇམ། གཡོན་ཅན་གྱི་ཉམས་རྒྱུ་མི་ཤེས། ཅི་ཟེར་ལ་བདེན་ཁ་སྟེར། ཁྱི་བས་བྲིད་སླ། ཁྭ་བས་ཅོལ་ཆུང༌། བྱིས་པ་བས་མགུ་སྐྱེན་ཞིང༌། བདེན་ཡིད་ཁ་འཕྲོགས་པ་མེད་ཀྱང་ཟོག་པོ་རྫུན་ལ་བྱང་བའི་སྟབས་དང་མཛངས་རྣམ་དཔྱོད་བཟང་བ་མིན་ཀྱང་མི་ཁྲམ་བློ་ཤོ་
རྒོད་པ་དང༌། དཔའ་བོ་སྙིང་ཤེད་ཆེ་བ་མིན་ཀྱང་སྔར་མ་གབ་ལ་མཁས་པའི་རྐྱེན་ལས། ངན་པ་གོང་དུ་ཤོར། མ་རབས་མགོ་མཐོན་དུ་སོང་བའི་ཐོག །དཔོན་འཇིག་ཚོགས་ལ་ལྟ་བའི་སྤུན་སྡེ་ཉི་ཤུ། སྐུ་ངོ་གང་ཟག་སྐྱབས་དང༌། ཤེད་བུ་སྲུང་སོགས་ཕུ་ནུ་སྟག་ཤར་མང་པོ་དང་བཅས་པ་སྲིད་པ་ལས་ཀྱི་གཉའ་ཤིང་དུ་བྱུང་སྟེ། མི་དབང་བ་ལ་ཞིང་རྨོས་མི་འོས་མི་ལ་བཙན་བཙུགས། མི་དགོས་ལས་ལ་ནན་བརྡུང༌། མི་དར་དཔེ་ལ་ཁེབ་བླང་ཁྲིམས་ཚེ་སྡུག་གི་རྒྱ་མ་ཆེ་ལ་གཉན་པ་ཐོག་མར་བཙུགས། སྐྱེ་དགུའི་ཆོ་རིགས་གསེར་ལྟར་བཙུན་པའི་ནང་དུ་གདོལ་སྤྱོད་ཀྱི་ཁྲིམས་ལུང་དང་པོར་བསྟན། འགྲོ་བའི་སེམས་གཤིས་འོ་མ་ལྟར་དང་བ་ལ་ངན་དགུ་དུག་བཅུའི་སྡིག་ལས་ཀྱི་རུ་མ་བརྒྱབ། འདུ་བྱེད་ལ་གཞི་བཏིང་སྲེད་ལེན་ལ་སྒྲུབ་བྱེད། སྲིད་པ་ལ་འཕེལ་རྩི། རྒ་ཤི་ལ་གཟུང་གསོག་བྱེད་པའི་སྲོལ་ས་སྟེང་ན་སྲིད་མ་མྱོང་བ་ཕྱི་རབས་ཀྱི་བཙས་སུ་བཞག་སྟེ། སྟོང་ཁམས་གསུམ་གྱི་འཇིག་རྟེན་སྡུག་བསྔལ་གྱི་ར་བ་གཅིག་དང༌། སྲིད་པའི་སྡེ་རིས་ཕལ་ཆེར་སྡིག་སྤྱོད་ཀྱི་ཁྱུ་གཅིག་ཏུ་ཁ་ལོ་སྒྱུར། སྔོན་གྱི་མི་རྒྱུད་མ་འཆུགས་པའི་རྟགས་སུ། ས་པདྨ་འདབ་བརྒྱད་རྒྱ་ཁྱོན་ཡངས་པ། གནམ་འཁོར་ལོ་རྩིབས་བརྒྱད་ཐ་གྲུ་ཆེ་བའི་ཕྱི་སྣོད་འཇིག་རྟེན་གྱི་རྣམ་གྲངས་འདི་ཙམ་ཞིག་ཡོད་རུང༌། སྡེ་འདིས་ཆུས་སྲིད་བཟུང་ནས་ལོ་གྲངས་དང་མི་རབས་འདི་ལོན་གཞལ་བར་མི་ནུས་པའི་དུས་ཀྱི་མཐར་ཡང་ཕ་གཞིས་ཀྱི་ལུད་ཁང་ཚ་རོ་མ་འདི་མིན་པའི་རེམ་རྒྱུ་མེད་པ་འདི། གྲོང་ཁྱེར་གྱི་སེང་གེ་རྔ་ལེབ་
དང༌། ཁོང་རྣམ་པ་ཚོ་རིགས་གཙང་ཡ་རབས་ཀྱི་སྡེབ་ནས་མཆེད་པའི་རྟེན་འབྲེལ་མི་བསླུ་བའི་བདེན་པ། བཏུམ་ན་མི་ཐུམ། བཟུང་ན་མི་ཐུབ། བསུབ་ན་མི་ཟུབ་པའི་ངོ་བོ་མི་འགྱུར་བ་དེ་ཀ་ཡིན། ཧ་ཧ། ད་དེ་ལྟར་བཤད་ན། མི་ཐམས་ཅད་རང་ཡུལ་ན་ཆེ། སྡེ་ཐམས་ཅད་རང་ས་ན་བརྗིད། རིགས་ཐམས་ཅད་རང་ཐོབ་ལ་གཉན་པ་མ་གཏོགས། དོན་ཡིན་ལུགས་ཀྱི་ངོས་ན་དཔོན་འབངས་ཀྱི་འབྲེལ་བ་མ་གྲུབ། མཆོག་དམན་གྱི་ཐ་སྙད་ཇི་སྲིད་པའི་ཇ་སིག་ཞིག་ཡིན་ལ། དགོས་འཇིག་ཚོགས་ལ་ལྟ་བའི་བློ་ངན་འདི་ལ་ཕ་ཐོབ་ཀྱི་འཕྲུ་ཏོག་སྟོན་རྒྱུ། རང་དཔུང་གི་རལ་གྲི་བསྡིགས་རྒྱུ། ངས་བྱས་ཀྱི་བཟང་ཡུས་འདྲེན་རྒྱུ། དབང་སྐལ་གྱི་ཟ་ཐང་རྒྱུག་རྒྱུ་སོགས་སྣ་གཅིག་ཙམ་ཡང་མེད་ཀྱི་སྟེང༌། འཇིག་རྟེན་ཕལ་པ་ཚོས། དགྲ་འདྲེ་གཉིས་ཀྱི་གཡབ་མོ། །ལྟས་ངན་སྟོང་གི་ཐོག་མ། བྱུར་ཆག་གི་སྙིང་རྡོ་བརྒྱ་དོད་མ་འདི་ཁྱིམ་དུ་བཅུག །ཟོན་ཕྱི་རོལ་དུ་བྱེད་ཟེར་ནས་དོན་མེད་ཀྱི་སྟོང་འདང་མང་པོ་གྲོས་སུ་ཤོམ་པར་འདུག་སྟེ། དེ་ལྟ་བུ་མིན། ཚེ་ཐོག་མ་མེད་པའི་དུས་ཀྱི་ཕུང་རྒན་པོ་འདི་ནི་ཉེས་བྱས་ཀྱི་ཚད་ལ་གཞལ་ན། ནམ་མཁའ་ལ་བླ་བྲེ་རྒྱོང་རྒྱོང༌། བར་སྣང་ལ་འཁོར་ལོ་སྐོར་སྐོར། ས་གཞི་ལ་ཀོ་བ་རྡུང་རྡུང་དུ་བརྡུང་རུང་སྡུག་སྙིང་མི་ཚིམ་ཞིང༌། ཞེ་འཁོན་ཕུང་ཤུལ་གྱི་མིང་སྐམ་ལ་ཡང་བརྗེད་མི་ཐུབ་པའི་ཚོད་ཡིན། བདག་ཆད་ཀྱིས་འཇིགས་པའི་སེར་སྣ་ཅན་དག །དཔོན་གཞུང་བཟང་ཕྱི་ཐག་རིང་བའི་སྐུ་དྲིན་འདི་མིན་ན་དམངས་རང་ཡུལ་གྱི་མངའ་རིས་ན་སྡོད་ཐབས་མི་འོང་ཟེར་ཏེ། མི་གླེན་པ་རྒྱུས་མེད་
པས་རང་མགོ་འཁོར་བ་མ་གཏོགས་ཤེས་བྱ་མི་སྲིད་དགུ་སྲིད། རྒྱལ་ཁམས་མི་དར་དགུ་དར་ཡིན་པས། སྐྱིད་པའི་རྒྱལ་ཁམས་མེད་ནས་འགྲོ་ས་ཟད་པ་ག་ལ་ཡིན། དེ་ཡང་ཟུར་ཙམ་བཤད་ན། སྡིག་སྤྱོད་མྱང་ངམ་ཐང་འདིའི་ཕ་མཐའ་རྫོགས་མཚམས། འཛད་མེད་སྡུག་སྣ་མང་པོའི་རྒྱ་གྲོང་ཟད་མཚམས། བསོད་ནམས་ཕྱུག་སྡེ་འབོལ་མོའི་སྡེ་སྣེ་ཐུག་མཚམས་ཞིག་ན། ལམ་བདུད་རྩིའི་ཆུ་ཀླུང་གཡས་སུ་འཁྱིལ་བའི་འགྲམ་ངོགས། གཙང་ཚངས་སྤྱོད་སིལ་མའི་སྤོས་ངད་ལྡང་བའི་ས་ཕྱོགས། མཐོ་དབེན་པ་ལས་སྐྱེས་པའི་ཉམས་དགའ་གཡང་དུ་ཆགས་པའི་ཡུལ་གླིང༌། ཏིང་ངེ་འཛིན་གྱི་ནགས་ཚལ་ཕྱུག་ལ་སྤུན་པ་དང༌། ཤིན་སྦྱང་གི་བདེ་བའི་འཁྲི་ཤིང་ལྡེམ་ལ་མཉེན་པ། སྙིང་རྗེའི་འབབ་ཆུ་བསིལ་ལ་དང་བ་དང༌། བྱམས་པའི་མེ་ཏོག་དགོད་ལ་བཀྲ་བ། མངོན་པར་ཤེས་པའི་རྩེ་སྣ་འཁྱུགས་ལ་མཚར་བ་སོགས་ངོ་མཚར་སྒྱུ་མའི་བཟོ་བཀོད་ཟད་མི་ཤེས་པའི་སྨན་ལྗོངས། སྲིད་པ་སྒྱུ་མའི་ཁང་བཟང་དང༌། སྐྱེ་བ་སྐྱེད་མོས་ཚལ་འགྲོ་ལྟར་རྟོགས་པའི་རྒྱལ་སྲས་སྙིང་སྟོབས་ཅན་རྣམས་འདོད་དགུར་བསྒྱུར་བའི་ཡེ་ཤེས་ཀྱི་རོལ་རྩེད་དབྱར་གྱི་ལྗོང་རྒྱུ་ལྟར་སྟོན་པའི་ལྟད་མོ་མཐོང་ཞིང༌། ཐུབ་དབང་སེང་གེ་འདུས་མང་འཕགས་བཞིའི་དགེ་འདུན་དང་བཅས་པ་བདེ་སྐྱིད་འཆི་བ་མེད་པའི་སྟོན་མོ་མཛད་དེ། ཟབ་ཞི་རྡུལ་དང་བྲལ་བའི་བསམ་གཏན་གྱི་གྲིབ་མ་ལ་བརྗོད་དུ་མེད་པའི་འགྲོ་བས་དུས་ཡོལ་བར་མཛད་པའི་མངའ་རིས་ཡོད་དེ། ས་དེ་ན་ནི་ང་ཁྱོད་ཀྱི་བདག་བཟུང་མེད།
ཕྱུག་དབུལ་གྱི་དབྱེ་བ་མེད། ལྟོ་གོས་ཀྱི་རྩོལ་སྒྲུབ་ཐམས་ཅད་མེད་པར། དུས་རྟག་ཏུ། གཏན་བདེའི་ངང་ལ་གུ་ཡངས། ཞི་བའི་མལ་དུ་ལྷོད་ཆགས་ནས། རྣམ་པར་གྲོལ་བའི་དགའ་བ་ཤུགས་འབྱུང་དུ་སྐྱོང་ཆོག་པའི་དགེ་མཚན་གྱི་གཟི་འོད་འབར། དེ་དག་ཀྱང་གནམ་ཐོག་སོ་བཅོ་བརྒྱད་ཀྱི་སྟེང་ན་མི་རྙེད་ཀྱི་ནོར་སྣ་ཡོད་རབས། ས་རིམ་པ་བཅུ་གསུམ་གྱི་མར་ཞབས་ན་མི་སླེབ་ཀྱི་ཚོང་རྡལ་ཡོད་རབས། འབྲེལ་མེད་ཕོངས་པའི་རྣ་བ་ཁ་གཡང་གིས་བྲིད་པ་ལྟ་བུ་ཞིག་གཏན་ནས་མིན་ཏེ། བླ་ན་མེད་པའི་སྟོན་པ་དང༌། སྟོན་པའི་རྒྱལ་ཚབ། མཉམ་པ་ཉིད་ཀྱི་དབྱིངས་ལ་སྐུ་བཞུགས་ཀྱང༌། །ཐུགས་རྗེ་ཆེན་པོའི་སྤྱན་རས་རྗེས་འཇུག་ལ་ཆགས་པ་རྣམས་ཀྱིས། ཕྱིས་འབྱུང་གི་འདང་ལ་མཁས་ཤིང༌། སྐྱིད་སྡུག་གཉིས་ཀྱི་ཆུས་སྲིད་ལ་གཏན་བརྗེ་ཕོད་པའི་མི་བཟང་བློ་སྟོབས་ཅན་མང་པོ་ད་ལྟ་དང་མ་འོངས་པའི་དུས་སུ་འབྱུང་བར་གཟིགས་ནས། སྲིད་པའི་སྲང་སྒོ་གཅོད་ལུགས། ཞི་བའི་འཇུག་ཕྱོགས་མཚོན་ལུགས། །སྲིད་ཞིའི་ས་མཚམས་བགོ་ལུགས། འཁོར་བ་དང་མྱང་འདས་ཀྱི་བར་ན་དམུ་ཐག་གསེར་ཟམ་གྱི་ཕྲེང་བ་ཚར་དུ་དངར་བའི་ས་ལམ་གྱི་རྒྱུ་འབྲས་དང་བཅས་པ་རྗོད་བྱེད་ངག་ལམ་དུ་དྲངས་ཏེ། མཁས་བྱའི་མ་མོ་བཞག །སྤང་བླང་གི་སྦྱོར་ཚུལ་བསླབ། ཉམས་ལེན་གྱི་ཁོག་གཞུང་བསྒྲིགས་པའི་དམར་ཁྲིད་གདམས་ངག་ཏུ་བཏབས། བསྐྱར་ལྡབ་རྗེས་བསྟན་ལ་མཛད། གདམས་ལྷག་ཞལ་ཆེམ་དུ་བཞག །བསྟན་རྒྱུན་གླེགས་བམ་དུ་བཀོད། དུས་བབས་
ཞལ་མཐོང་གི་གདུལ་བྱ་སྐུ་དངོས་ཀྱི་མཛད་པས་རྗེས་སུ་བཟུང་ཞིང༌། མ་འོངས་ཕྱི་རབས་ཀྱི་འདུལ་སྐལ་བརྒྱུད་འཛིན་ཐུགས་སྲས་ལ་གཏད་དེ། ལེགས་གསུང་སྐྱེ་དགུའི་ཉི་མ་ཕྱི་མཐའི་བར་དུ་བྲི་གང་དང་བྲལ་བར་བྱིན་གྱིས་བརླབས་ནས། གདུལ་བྱ་མཆོག་དམན་མེད་པའི་ཉམས་རངས་སུ་སྤྱོད་ཆོག་པའི་སྐུ་དྲིན་མཐོང་ཆོས་ན་ཡོད། རྒྱུད་ཕྲེང་ཐག །ལུང་ཕྲེང་རྡོག །དྲོད་ཚད་བཅུ་ཚར། གནད་མདོ་འཛིན་དུ་སྦྱར་བའི་ལམ་ཡིག་མུ་ཏིག་གི་ཕྲེང་བ་ལྟ་བུ་འདི་ཚོ་ཡོད་བཞིན་དུ། ལམ་མཁན་ལ་འཕྲིགས་མ་ཚུད་པར། སློབ་གསར་ལ་ཞིབ་ཅིག་ཡོད་མདོག་བྱེད་ཅིང༌། གླེན་སྒོམ་སེམས་གནས་ཀྱི་གཡག་རྒན་འཇིག་ལྟའི་སྒོ་སྔུན་དུ་བཏགས་ནས། ཨུ་ཚུགས་རང་ལྟ་མཆོག་འཛིན་གྱི་སྙིང་རུས་ཆེན་པོས་ནན་ལྟར་ཞོན་ཏེ། གཡག་རྒན་ལ་འགྲོ་ལུགས་མེད་ཀྱང་ཁ་རྣམ་པར་གྲོལ་བའི་ཕྱོགས་སུ་བལྟས་ནས་འགྲོ་ཀྱིན་ཡོད་སྙམ་པའི་སྟོང་འདང་ཞིག་ལ་སྔས་བྱས་ནས་བསྡད་པས་མི་ཆོག །ལྷ་ཁམས་གསུམ་གྱི་ཆོས་རྗེ་སངས་རྒྱས་བཅོམ་ལྡན་འདས་ཀྱི་གསེར་ཡིག་བཀའ་ཐམ་གྱི་རྭེ་ཁ་མ་ཉམས་པ་འདི་ལ་གདེང་བཅས། གཏན་འདུན་གྱི་སྙིང་པོ་འཆུག་མེད་ཅིག་ལ་རྡོག་པ་གཏད་དེ། དཔའ་འདི་བྱས་ཟེར་རྒྱུ་མེད་པར། དཔའ་སྐད་ཀྱི་ཁ་བོ་ཆེ་བ་ཙམ་ཡིན་པར། བདུད་ངོ་འཇིགས་ཅན་དང་ལྟ་རེས། དགྲ་ཁ་ཚན་ཅན་དང་གཤེ་རེས། དཔའ་ལག་དམར་ཅན་དང་འཇུ་རེས་བྱས་ནས་ཁེ་ཕམ་གྱི་རང་སྐལ་མངོན་སུམ་དུ་ལོང་བ་ཞིག་ལ་བསམ་སྦྱོར་ཆིག་སྒྲིལ་
དགོས་པར་མཐོང༌། རང་དང་གཞན་ལ་དགོས་ངེས་ཀྱི་དགྲ་ཐབས་འདུན་གྲོས་སུ་གླེང་བ་སྒྱུ་མའི་སྒྲུང་རབས་ཞེས་བྱ་བའི་གཏམ་ནག །མདོ་ཁམས་རོལ་ཆེན་བཅོ་བརྒྱད་དུ་གྲགས་པའི་ཡ་གྱལ། རྡོ་རོལ་གྱི་ཆ་ལས་ཡུལ་གྱི་དགེ་བཅུ་མ་ཚང་བ་མེད་པའི་སའི་ལྟེ་བ། ལྷ་ཆེན་རྡོ་རྗེ་མགར་དམར་སྲིད་པའི་བདེ་སྡུག་གི་བཟོ་ཁྱད་མང་པོ་མགར་དུ་རྡུང་ཞིང་མཐའི་སོ་ཁ་ལ་ལྟ་བའི་རྫོང་ཟུར། ཟང་ཡག་དམར་པོ་བྲག་གདན་གཡུ་ཀླུང་གི་སྐ་རགས་ཅན་ལ་བརྗིད་པའི་ཀེའུ་ཚང་ནས་བྲག་སྲིན་འཇིགས་བྱེད་འབར་མ་མེལ་ཚེ་བྱེད་པའི་གནས་རྩེ། གསུང་གི་རིག་འཛིན་རྟ་མཆོག་ཁྲག་འཐུང་གཉིས་པ། །དབང་ཆེན་དགྱེས་རབ་རྡོ་རྗེའི་ཞལ་སྔ་ནས། གསང་ཆེན་དངོས་གྲུབ་གླིང་གི་ཆོས་གྲྭ་ཞེས་བདེན་ཚིག་གྲུབ་པའི་གསུང་བྱིན་རླབས་ཀྱི་མེ་ཏོག་སིལ་མར་བསྙིལ་བའི་གྲུབ་པའི་རི་ངོགས་ཉམས་དགའ་བ་ནས་མི་སྨྱོན་ལྕགས་ཀོང་ད་རི་དྲས་བྲིས། མངྒ་ལཾ།། །།
བདེན་བཞིའི་རྣམ་བཞག
༈ སྨྲ་བའི་སེངྒེ་ཟུར་ཕུད་ལྔ་པ་དང༌། །རྒྱལ་བའི་རྒྱལ་ཚབ་མི་ཕམ་བླ་མའི་ཞབས། །དད་པའི་སེམས་ཀྱིས་སྤྱི་བོས་རབ་མཆོད་དེ། །བདེན་བཞིའི་རྣམ་བཞག་ཉུང་ངུའི་ཚིག་གིས་སྤྲོ། །ཐར་འདོད་རྣམས་ཀྱིས་བསླབ་བྱ་བདེན་པ་བཞིའི་ནང་ཚན། སྡུག་བསྔལ་བདེན་པའི་མཚན་གཞི་གང་ཞེ་ན། མ་དག་པའི་སྣོད་དང་མ་དག་པའི་བཅུད་གཉིས་པོའོ། །སྡུག་བསྔལ་བདེན་པའི་མཚན་ཉིད་གང་ཞེ་ན། །རང་རྒྱུ་ཀུན་འབྱུང་བདེན་པ་ལས་སྐྱེས་པའི་ཆ་ནས་བཞག་པའི་ཟག་བཅས་ཀྱི་སྤང་བྱའི་རིགས་སུ་གནས་པའོ། །སྡུག་བསྔལ་གྱི་ངོ་བོའི་དབྱེ་བ་གང་ཞེ་ན། འགྱུར་བའི་སྡུག་བསྔལ་དང༌།
སྡུག་བསྔལ་གྱི་སྡུག་བསྔལ་དང༌། ཁྱབ་པ་འདུ་བྱེད་ཀྱི་སྡུག་བསྔལ་རྣམས་སོ། །འགྱུར་བའི་སྡུག་བསྔལ་གང་ཞེ་ན། ཚོར་བ་བདེ་བའོ། །སྡུག་བསྔལ་གྱི་སྡུག་བསྔལ་གང་ཞེ་ན། ཚོར་བ་སྡུག་བསྔལ་བའོ། །ཁྱབ་པ་འདུ་བྱེད་ཀྱི་སྡུག་བསྔལ་གང་ཞེ་ན། ཟག་པ་དང་བཅས་པའི་ཉེར་ལེན་གྱི་ཕུང་པོའོ། །སྡུག་བསྔལ་གྱི་རྣམ་པའི་དབྱེ་བ་གང་ཞེ་ན། མི་རྟག་པ་དང༌། སྡུག་བསྔལ་བ་དང༌། བདག་མེད་པ་དང༌། སྟོང་པའོ། །མི་རྟག་པའི་རྣམ་པ་གང་ཞེ་ན། སྐད་ཅིག་མའོ། །སྡུག་བསྔལ་བའི་རྣམ་པ་གང་ཞེ་ན། ལས་ཉོན་གྱི་གཞན་དབང་དུ་གྱུར་པའི་ཕུང་པོ་ལྔའོ། །བདག་མེད་པའི་རྣམ་པ་གང་ཞེ་ན། ངོ་བོར་གྱུར་པའི་བདག་གིས་སྟོང་པའི་དེའོ། །སྟོང་པའི་རྣམ་པ་གང་ཞེ་ན། དབང་བསྒྱུར་བའི་བདག་དོན་གཞན་གྱིས་སྟོང་པའི་དེའོ། །སྡུག་བསྔལ་གྱི་བདེན་པ་ནི་ཤེས་པར་བྱ་བ་སྟེ། ཇི་ལྟར་རླུང་ངམ་མཁྲིས་པའམ་བད་ཀན་ནམ་འདུས་པའི་ནད་བྱུང་བའི་མིས་དེ་ཤེས་པར་བྱ་བ་བཞིན་ནོ། །ཀུན་འབྱུང་བདེན་པའི་མཚན་གཞི་གང་ཞེ་ན། ལས་དང་ཉོན་མོངས་པའོ། །ཀུན་འབྱུང་བདེན་པའི་མཚན་ཉིད་གང་ཞེ་ན། རང་འབྲས་སྡུག་ལྡན་སྐྱེད་བྱེད་ཀྱི་ཆ་ནས་བཞག་པའི་ཟག་བཅས་ཀྱི་སྤང་བྱའི་རིགས་སུ་གནས་པའོ། །ཀུན་འབྱུང་གི་ངོ་བོའི་དབྱེ་བ་གང་ཞེ་ན། དགེ་བ་དང༌། མི་དགེ་བ་དང་ལུང་མ་བསྟན་གྱི་ལས་དང༌། འདོད་ཆགས་དང༌། ཞེ་སྡང་དང༌། གཏི་མུག་སྟེ་ཉོན་མོངས་པའོ། །ཀུན་འབྱུང་གི་རྣམ་པའི་དབྱེ་བ་གང་ཞེ་ན། རྒྱུ་དང༌། ཀུན་
འབྱུང་དང༌། རབ་སྐྱེ་དང༌། རྐྱེན་གྱི་རྣམ་པའོ། །རྒྱུ་གང་ཞེ་ན། སྡུག་བསྔལ་གྱི་རྩ་བར་གྱུར་པའི་སྲེད་པ་ལྟ་བུའོ། །ཀུན་འབྱུང་གི་རྣམ་པ་གང་ཞེ་ན། སྡུག་བསྔལ་ཡང་ཡང་སྐྱེད་པའི་སྲེད་པ་ལྟ་བུའོ། །རབ་སྐྱེའི་རྣམ་པ་གང་ཞེ་ན། སྡུག་བསྔལ་ཤུགས་དྲག་ཏུ་སྐྱེད་པའི་སྲེད་པ་ལྟ་བུའོ། །རྐྱེན་གྱི་རྣམ་པ་གང་ཞེ་ན། སྡུག་བསྔལ་གྱི་ལྷན་ཅིག་བྱེད་པའི་སྲེད་པ་ལྟ་བུའོ། །ཀུན་འབྱུང་གི་བདེན་པ་ནི་སྤང་བྱ་སྟེ། ཇི་ལྟར་ནད་གང་ཡང་རུང་བའི་རྒྱུ་སྤང་བྱ་ཡིན་པ་བཞིན་ནོ། །འགོག་པའི་བདེན་པའི་མཚན་གཞི་གང་ཞེ་ན། སྡུག་ཀུན་གཉིས་ཀྱི་བྲལ་འབྲས་ལྟ་བུའོ། །འགོག་བདེན་གྱི་མཚན་ཉིད་གང་ཞེ་ན། རང་རྒྱུ་ལམ་བདེན་བསྒོམ་སྟོབས་ཀྱིས་ཐོབ་པའི་བྲལ་འབྲས་སོ། །འགོག་བདེན་གྱི་ངོ་བོའི་དབྱེ་བ་གང་ཞེ་ན། བརྡའི་འགོག་པ་དང༌། དོན་དམ་པའི་འགོག་པའོ། །བརྡའི་འགོག་པ་གང་ཞེ་ན། སོ་སོའི་སྐྱེ་བོའི་རྒྱུད་ཀྱི་ཉོན་མོངས་ཅི་རིགས་རེ་ཞིག་གི་བར་དུ་མི་སྐྱེ་བར་བྱས་པའི་ཆའོ། །དོན་དམ་པའི་འགོག་པ་གང་ཞེ་ན། འཕགས་རྒྱུད་ཀྱི་སྤང་བྱ་ཅི་རིགས་གཏན་མེད་དུ་བྱས་པའི་ཆའོ། །འགོག་བདེན་གྱི་རྣམ་པའི་དབྱེ་བ་གང་ཞེ་ན། འགོག་པ་དང༌། ཞི་བ་དང༌། གྱ་ནོམ་དང༌། ངེས་འབྱུང་གི་རྣམ་པའོ། །འགོག་པའི་རྣམ་པ་གང་ཞེ་ན། སྡུག་བསྔལ་གྱི་བྲལ་འབྲས་སོ། །ཞི་བའི་རྣམ་པ་གང་ཞེ་ན། ཀུན་འབྱུང་གི་བྲལ་འབྲས་སོ། །གྱ་ནོམ་པའི་རྣམ་པ་གང་ཞེ་ན། ཕན་བདེའི་ངོ་བོར་གྱུར་པའི་འཕགས་རྒྱུད་ཀྱི་དེའོ། །ངེས་འབྱུང་གི་རྣམ་པ་གང་ཞེ་ན། འཁོར་བ་
ལས་ཐར་པའི་དེའོ། །འགོག་བདེན་ནི་ཐོབ་བྱ་སྟེ་ནད་མེད་པའི་བདེ་བ་ཐོབ་བྱ་ཡིན་པ་དང་འདྲའོ། །ལམ་བདེན་གྱི་མཚན་གཞི་གང་ཞེ་ན། འཕགས་རྒྱུད་ཀྱི་མཁྱེན་པའོ། །ལམ་བདེན་གྱི་མཚན་ཉིད་གང་ཞེ་ན། རང་འབྲས་འགོག་བདེན་ཐོབ་བྱེད་ཀྱི་ཐབས་སུ་གྱུར་པའི་འཕགས་རྒྱུད་ཀྱི་མངོན་རྟོགས་སོ། །ལམ་བདེན་གྱི་ངོ་བོའི་དབྱེ་བ་གང་ཞེ་ན། མཐོང་ལམ་དང༌། སྒོམ་ལམ་དང༌། མི་སློབ་པའི་ལམ་མོ། །ལམ་བདེན་གྱི་རྣམ་པའི་དབྱེ་བ་གང་ཞེ་ན། ལམ་དང༌། རིགས་པ་དང༌། སྒྲུབ་པ་དང༌། ངེས་འབྱིན་གྱི་རྣམ་པའོ། །ལམ་གྱི་རྣམ་པ་གང་ཞེ་ན། ཐར་པར་འགྲོད་པའི་འཕགས་རྒྱུད་ཀྱི་དེའོ། །རིགས་པའི་རྣམ་པ་གང་ཞེ་ན། ཉོན་མོངས་པའི་གཉེན་པོར་གྱུར་པའི་དེའོ། །སྒྲུབ་པའི་རྣམ་པ་གང་ཞེ་ན། སེམས་ཀྱི་གནས་ལུགས་ཕྱིན་ཅི་མ་ལོག་པར་སྟོན་པའི་དེའོ། །ངེས་འབྱིན་གྱི་རྣམ་པ་གང་ཞེ་ན། གཏན་བདེ་འཁོར་བར་མི་ལྡོག་པའི་གནས་སུ་འཁྲིད་པར་བྱེད་པའི་འཕགས་རྒྱུད་ཀྱི་རྣལ་འབྱོར། ལམ་བདེན་ནི་ཉམས་སུ་བླང་བྱ་སྟེ། ཇི་ལྟར་སྨན་བསྟེན་པར་བྱ་བ་དང་འདྲའོ། ༈ །ཁ་ཅིག་ན་རེ། ཀུན་འབྱུང་རྒྱུར་གྱུར་པའི་འབྲས་བུ་ཡིན་ན། སྡུག་བདེན་ཡིན་པས་ཁྱབ་ཟེར་ན། ལྷས་སྦྱིན་གྱི་རྒྱུད་ཀྱི་འདོད་ཆགས་ཀྱི་རྟོག་པ་སྔ་མའི་ཕྱི་ལོགས་སུ་བྱུང་བའི་རྗེ་བཙུན་བྱམས་པའི་རྒྱུད་ཀྱི་བྱང་ཆུབ་ཀྱི་སེམས་ཆོས་ཅན། སྡུག་བདེན་ཡིན་པར་ཐལ། ཀུན་འབྱུང་རྒྱུར་གྱུར་པའི་འབྲས་བུ་ཡིན་པའི་ཕྱིར། འདོད་ན་དེ་ཆོས་ཅན། སྡུག་བདེན་མ་ཡིན་པར་ཐལ།
ལམ་བདེན་ཡིན་པའི་ཕྱིར། རྟགས་མ་གྲུབ་ཟེར་ན། དེ་ཆོས་ཅན། དེར་ཐལ། ཁྱོད་འཕགས་རྒྱུད་ཀྱི་མཁྱེན་པ་ཡིན་པའི་ཕྱིར། འགའ་ཞིག་ན་རེ། ཚོར་བ་ཡིན་ན་སྡུག་བསྔལ་ཡིན་པས་མ་ཁྱབ་སྟེ། ཚོར་བ་བདེ་བ་ཆོས་ཅན། ཚོར་བ་ཡིན་པ་གང་ཞིག་སྡུག་བསྔལ་མ་ཡིན་པའི་ཕྱིར་ཟེར་ན། ཚོར་བ་བདེ་བ་ཆོས་ཅན། སྡུག་བསྔལ་ཡིན་པར་ཐལ། མདོ་ལས། གང་ཅི་ཚོར་བ་ཡང་རུང་སྟེ་སྡུག་བསྔལ་བའོ། །ཞེས་གསུངས་པ་གང་ཞིག །ཁྱོད་ཚོར་བ་ཡིན་པའི་ཕྱིར། ལ་ལ་ན་རེ། སྣོད་བཅུད་གཉིས་པོ་གང་རུང་ཡིན་ན་སྡུག་བསྔལ་ཡིན་པས་ཁྱབ་ཟེར་ན། སངས་རྒྱས་རང་སྣང་ལས་གྲུབ་པའི་སྣོད་དང་ལོངས་སྐུ་ཆོས་ཅན། དེར་ཐལ། དེའི་ཕྱིར། ཕལ་ཆེར་ན་རེ། སྡུག་བསྔལ་ཡིན་ན་ཀུན་འབྱུང་ཡིན་པས་ཁྱབ་ཟེར་ན། རྡོ་ཆོས་ཅན། ཀུན་འབྱུང་ཡིན་པར་ཐལ། སྡུག་བདེན་ཡིན་པའི་ཕྱིར། གཞན་དག་ན་རེ། འགོག་ལམ་གཉིས་ལ་གཞི་མཐུན་ཡིན་ཟེར་ན། འདུས་བྱས་དང་འདུས་མ་བྱས་ཀྱི་ཆོས་ལ་གཞི་མཐུན་ཡོད་པར་ཐལ། འགོག་བདེན་དང་ལམ་བདེན་གཉིས་དེ་ཡིན་པའི་ཕྱིར། འདོད་ན། དེ་ལ་གཞི་མཐུན་མེད་པར་ཐལ། རྟག་མི་རྟག་གཉིས་འགལ་བ་ཡིན་པའི་ཕྱིར། དེ་གཉིས་འདུས་བྱས་དང་འདུས་མ་བྱས་ཡིན་པ་རྟགས་མ་གྲུབ་ཟེར་ན། ངོ་བོ་ཉིད་ཆོས་སྐུ་ཆོས་ཅན། བྱས་པར་ཐལ་ཏེ། འགོག་བདེན་འདུས་མ་བྱས་མ་ཡིན་ལ་ལམ་བདེན་འདུས་བྱས་མ་ཡིན་པ་གང་ཞིག །ངོ་བོ་ཉིད་སྐུ་འགོག་བདེན་ཡིན་པའི་ཕྱིར། འདོད་ན། སྟོང་ཉིད་ཆོས་ཅན། མ་རིག་པ་ཡིན་པར་ཐལ། རང་བཞིན་རྣམ་དག་གི་ངོ་བོ་ཉིད་སྐུ་སྟོང་ཉིད་ཡིན་པ་གང་ཞིག་དེ་བྱས་པ་ཡིན་པའི་ཕྱིར། ཡང་ཁ་ཅིག་གིས་འགོག་ལམ་ངོ་བོ་
གཅིག་པ་མེད་ཟེར་ན། །མཐོང་ལམ་རྣམ་གྲོལ་ལམ་པའི་རྒྱུད་ན་འགོག་བདེན་མེད་པར་ཐལ། ལམ་བདེན་དང་ངོ་བོ་གཅིག་པའི་འགོག་བདེན་མེད་པའི་ཕྱིར། ཁ་ཅིག་ན་རེ། གཞི་གྲུབ་ན་བདེན་བཞི་གང་རུང་ཡིན་པས་ཁྱབ་ཟེར་ན། ནམ་མཁའ་ཆོས་ཅན། བདེན་བཞི་གང་རུང་ཡིན་པར་ཐལ། གཞི་གྲུབ་པའི་ཕྱིར། འདོད་ན། དེ་མིན་པར་ཐལ། ཁྱོད་སྡུག་ཀུན་གཉིས་མ་ཡིན་པ་གང་ཞིག་འགོག་ལམ་གཉིས་མ་ཡིན་པའི་ཕྱིར། དེ་དག་ཀྱང་ནོར་འཁྲུལ་གྱི་དབང་དུ་གྱུར་པ་ལས་ལེགས་པར་བཤད་པས་དབེན་པའི་ནོངས་ཚོགས་སྲས་བཅས་རྒྱལ་བའི་སྤྱན་སྔར་འཆགས་སོ། །འདི་ལས་ཉེར་བསྐྲུན་དགེ་བའི་མཐུ་ཡིས་ནི། །མཐའ་ཡས་འགྲོ་ཀུན་རྒྱལ་བའི་ས་ཐོབ་སྟེ། །སྟོབས་སོགས་རྣམ་པར་བྱང་བའི་ཡོན་ཏན་ཀུན། །བདག་གིར་བྱེད་པའི་དཔལ་དང་ལྡན་གྱུར་ཅིག །བདེན་བཞིའི་རྣམ་བཞག་སྙིང་པོར་དྲིལ་བ་ཐར་འདོད་ཡོངས་ཀྱི་འཇུག་ངོགས་ཞེས་བྱ་བ། བཙུན་པ་མ་ཏི་བྷ་དྲའི་ངག་གིས་བསྐུལ་བ་ལྟར་རྨོངས་པ་དཀོན་མཆོག་མིང་པས་ཡར་ངོའི་ཚེས་བཅུ་གཅིག་གི་ཉིན་སྦྱར་བ་རྫོགས་སོ།། །།
རྡོར་དྲིལ་མཚོན་དོན།
༈ འདིར་སྔགས་པ་རྣམས་ཀྱིས་རྟག་ཏུ་མི་འབྲལ་བར་བཅང་བར་བྱ་བའི་རྡོར་དྲིལ་ནི་སྔགས་ཀྱི་ཉམས་ལེན་གྱི་རིམ་པ་རྫོགས་པར་མཚོན་པས་དོན་ཆེན་པོ་ཅན་ཡིན་ཏེ། དེ་ལ་རྡོ་རྗེ་ནི་སྣང་ཕྱོགས་ཀྱི་ཆ་མཚོན་བྱེད་ཡིན་པས་ཐབས་བདེ་བ་ཆེན་པོའི་ཡེ་ཤེས་ཞེས་བྱ་བ་སྔགས་བླ་མེད་ཀྱི་ལམ་གནད་མཐར་ཐུག་པ་དེ་མཚོན་བྱེད། དེ་ཉིད་ཀྱི་ལྟོ་བ་ཟླུམ་པས་ཡེ་ཤེས་དེ་ཉིད་ཆོས་ཉིད་སྟོང་པ་ཉིད་ལ་གཉིས་སྣང་དང་བྲལ་བར་མཉམ་པར་བཞག་པའི་ཡེ་ཤེས་དེ་
མཚོན་ཞིང༌། ཡེ་ཤེས་དེ་ཉིད་ལམ་དུས་དང་འབྲས་དུས་ཀྱི་ཁྱད་པར་གྱི་དྲི་མ་ཐམས་ཅད་དང་འབྲལ་བྱེད་དམ་བྲལ་བའི་བདག་ཉིད་ཅན་ཡིན་པ་དང་ནམ་དུའང་ཡེ་ཤེས་དེ་ཉིད་དྲི་མའི་ངོ་བོ་སྐྱེ་མི་སྲིད་པས། ཡེ་ཤེས་དེ་ཉིད་ཡེ་ཤེས་ལྔ་དང་ཡུལ་གྱི་ཆོས་ཉིད་ལྔ་མཚོན་པའི་ཡར་མར་གྱི་རྩེ་ལྔ། ཐུགས་རྗེ་ཆེན་པོས་འཁྱུད་པ་མཚོན་པས་ཆུ་སྲིན་གྱི་ཁ་དང༌། ཡེ་ཤེས་དེ་ཉིད་ཀྱིས་གདུལ་བྱའི་རེ་བ་སྐོང་བ་རྒྱུན་མི་ཆད་པའི་བརྡར་རིན་པོ་ཆེའི་ཕྲེང་བ་དང་ལྡན་པ་ཡིན་ལ། གཞན་ཡང་ཡེ་ཤེས་དེ་ཉིད་ཀྱི་རྩལ་དུ་རིགས་ལྔ་ཡབ་ཡུམ་སེམས་དཔའ་ཡབ་ཡུམ་དང་འགྲོ་འདུལ་གྱི་ཕྲིན་ལས་ཀྱི་མཛད་པ་རྣམས་མཚོན་པའི་བརྡར་ཡར་མར་གྱི་རྩེ་ལྔ་དང་པད་འདབ་བརྒྱད་རིན་པོ་ཆེའི་ཕྲེང་བས་མཛེས་པར་བྱས་པ་ཡིན་ནོ། ༈ །དྲིལ་བུ་ནི་ཆོས་ཉིད་སྟོང་པ་ཉིད་རྟོགས་པའི་ཤེས་རབ་མཚོན་བྱེད་ཡིན་པས་དབྱིངས་ཕྱུག་མའི་ཞལ་གྱིས་ཆོས་ཐམས་ཅད་ཀྱི་དེ་ཁོ་ན་ཉིད་བདེ་ཆེན་གྱི་ཡེ་ཤེས་དེ་ཉིད་ཀྱིས་མངོན་སུམ་གྱིས་གཟིགས་པ་མཚོན་པ་དང༌། རྒྱལ་བའི་ཐུགས་རྟག་ཏུ་ཆོས་ཉིད་ལས་མི་གཡོ་བར་མཉམ་པར་བཞག་པས་རྡོ་རྗེའི་ཕྲེང་བ་དང༌། ཡེ་ཤེས་དེ་ལ་ས་དང་ལམ་གྱི་ཡོན་ཏན་མཐའ་དག་རྫོགས་པས་བུམ་པ་དང༌། ཡེ་ཤེས་དེ་ཉིད་ཐུགས་རྗེ་ཆེན་པོའི་བདག་ཉིད་མཚོན་བྱེད་ཆུ་སྲིན་གྱི་ཁ་དང་དེའི་རྩལ་ཕྲིན་ལས་རྒྱུན་མི་ཆད་པའི་དྲྭ་བ་དྲྭ་ཕྱེད། ཡེ་ཤེས་དེ་ཉིད་ཡུམ་ལྔ་དང་སེམས་མ་བརྒྱད་ལ་སོགས་པ་ལྷའི་རྣམ་པར་འཕྲུལ་བ་པད་འདབ་དང་མགོ་རྩེ་ལྔ་སོགས་དང་ལྡན་པ་ཤེས་པར་བྱ་དགོས་སོ། །མཚོན་ལྡན་གཞན་ཡང་ཡོད་པ་ནི་གཞིར་བཅའ་འོ། །དགེའོ།། །།
དྲིས་ལན་འདོད་ར་མ།
༈ དྲིས་ལན་འདོད་ར་མ་ཞེས་པ། ཡོན་ཏན་འདོད་ན་གལ་གང་ཆེ། གང་ལ་གོམས་པ་དེ་མཁས་བྱ་བ་ཡིན་པས་གོམས་པ་གལ་ཆེའོ། །གོམས་པར་བྱེད་པ་ལ་ཅི་དྲག །སྒོམ་པ་གལ་ཆེའོ། །བསྒོམས་ཀྱང་མ་གོམས་པ་ཅིས་ལན། སྒོམ་རླུང་གིས་ཁྱེར་བར་ཟད་དོ། །དེ་ལ་ཅི་དྲག་གཡེང་བའི་ཡུལ་རྐྱེན་ཐག་བསྲིང་བ་དྲག་གོ༌།བསྲིང་ཡང་རླུང་གིས་ཁྱེར་བ་ཅིས་ལན། འདུ་འཛི་བཅད་ཀྱང་རྣམ་གཡེང་མ་བཅད་པས་ལན་ནོ། །འདུ་འཛིར་འཕྱན་པ་ལ་སྒོམ་ཆེན་ཡོད་དམ། བརྟན་པ་ཐོབ་ནས་ཡོད་དོ། །བརྟན་པ་མ་ཐོབ་པ་འདུ་འཛིར་བསྒོམ་ན་ཅིར་འགྱུར། རླུང་མར་ནང་ན་མར་མེ་ལྟར་འགྱུར་རོ། །འདུ་འཛི་བཅད་ཀྱང་ཕྱིར་ལ་ལོག་པ་ཅིས་ལན། རྟོད་ཐག་རྐེ་ལ་འཁྲིལ་བས་ལན་ནོ། །རྟོད་ཐག་གང་ཡིན། འཇིག་རྟེན་ཆོས་བརྒྱད་དོ། །དེ་གཅོད་ན་ཅི་དགོས། ཞེན་ལོག་གི་རལ་གྲི་དགོས་སོ། །རལ་གྲི་དེ་འདོད་ན་གང་ཟབ། བློ་ལྡོག་རྣམ་བཞི་སྒོམ་པ་ཟབ་མོད། དགོས་མེད་ཁ་ཏོན་དུ་བཏོན་ན་ཅི་འདྲ། ཁ་ངན་གྱིས་དགྲ་བོ་མི་ཐུབ་ཟེར་རྒྱུ་དེར་ཟད། འོ་ན་དེ་ལ་དགོས་པ་གཏན་ནས་མེད་དམ། སྤྱོད་ལམ་ཀུན་ཏུ་ཚིག་གིས་སྦྱང༌། །བྱ་བ་ཡིན་པས་དེའང་མིན། ཆོས་བརྒྱད་སྤངས་ནས་དབེན་པ་བསྟེན་ཟེར་རམ། དབེན་པ་བསྟེན་ནས་ཆོས་བརྒྱད་སྤོང་ཟེར། གཉིས་ཀ་ཟེར་ཏེ་བྱ་དང་སྒོ་ང་བཞིན་ནོ། །དབེན་པར་ཆོས་བརྒྱད་སྒྲུབ་པ་ཁྱོད་ལྟ་བུ་ལ་ཅི་ཟེར། ཁྱིམ་ཆེན་སྤངས་པའི་ཁྱིམ་ཆུང་ཟེར། དེ་ལ་བྱ་བྲལ་མི་ཟེར་རམ། ད་ལྟ་རང་ཁྱིམ་ཆུང་གི་བཟའ་དཔོན་བྱས་པ་དེ་
མ་གོ་འམ། ཁྱིམ་པ་ལ་བྱ་བྲལ་ཟེར་རམ་ཅི། གཞན་གྱིས་ཆོས་པར་སེམས་ཤིང༌། རང་ཆགས་སྡང་སྒོམ་པ་ཁྱོད་ལྟ་བུ་ལ་ཅི་ཟེར། ཟོག་པོ་ཟེར་བ་ཡིན་མོད། དེ་ལྟར་ཡིན་པར་ཤེས་ན་དེ་ཙུག་བྱེད་པ་ཅི་ཡིན། ལས་ངན་གྱི་འབྱུང་པོས་གཙེས་པ་ཡིན་མོད། འབྱུང་པོ་འདི་ལས་ཐར་ཐབས་ལ་ཅི་དགོས། ཞིང་གི་མཐུ་ལ་བརྟེན་ཅིང༌། ཚེ་རབས་ཀུན་ཏུ་དབེན་གནས་པ། །ཕུན་སུམ་ལྡན་པ་ཐོབ་པར་ཤོག །བསམ་གིན་བསྡད་ན་དགའ་འམ་སྙམ། །དབེན་པ་བསྟེན་ན་སྐྱོ་བ་སྐྱེ་བས་མི་ཟུག་གམ། དེ་ཉིད་དེའི་ཕན་ཡོན་ཏེ། སྐྱོ་ཤས་ཆོས་ཀྱི་མགོ་བོར་འཇོག་པ་ཡིན་མོད། དེ་གཉིས་སྐྱོ་བ་ཞེས་པའི་མིང་དུ་མཐུན་ཡང་དོན་གཏན་ནས་མི་གཅིག་པས་ཅི་ཟེར། འོ་ན་དབེན་པར་ཅི་ཞིག་དྲན་ནས་སྐྱོ་ཟེར། བདེ་སྐྱིད་ཀྱི་ཕུན་ཚོགས་དྲན་ནས་སྐྱོ་བ་ཡིན་མོད། སྐྱིད་སྡུག་འབྱེད་པའི་བློ་མིག་ཡོད་ན་བདེ་བའི་མཆོག་གིས་སྐྱོ་ནས་བདེ་སྐྱིད་ངན་པ་ལ་དགའ་བ་གར་སྲིད། འོ་ན་དབེན་པ་ན་བདེ་སྐྱིད་ཅི་ཡོད། སེམས་སྐྱིད་པ་ཡོད་དེ། བདེ་བའི་མཆོག་ནི་སེམས་སྐྱིད་པ། །ཞེས་སོ།། །།
གངས་ལྗོངས་བསྟན་སྲིད་ཞབས་རིམ།
༈ བདེ་སྐྱིད་བཀྲ་ཤིས་འབྱུང་བའི་གཞི་གཅིག་པུ་ནི་སངས་རྒྱས་ཀྱི་བསྟན་པ་ཡིན་ཏེ། དེ་འཛིན་པའི་དམ་པ་ཕལ་ཆེར་ཟད་པ་དང༌། སྐྱེ་དགུ་ཆོས་མིན་སྤྱོད་པའི་དུས་སུ་ལྷ་དང་མི་རྣམས་རྒུད་ཅིང༌། ལྷ་མ་ཡིན་སོགས་ངན་འགྲོའི་ཕྱོགས་རྣམས་སྟོབས་འཕེལ་བ་ནི་ཆོས་ཉིད་ཡིན་ལ། ལྷག་པར་བོད་འབངས་རྣམས་ཀྱི་གངས་ལྗོངས་སྐྱོབ་པའི་མགོན་གཅིག་བླ་མ་ཨོ་རྒྱན་རིན་པོ་ཆེ་དང༌། ལྷ་ཐུགས་རྗེ་ཆེན་པོ་བརྗེད་དེ། སྐྱབས་
འཇིག་རྟེན་པའི་འབྱུང་པོ་ལ་འཚོལ། ལས་སུ་མི་དགེ་བ་ཁོ་ན་བྱེད་པ་ན། བསོད་ནམས་ཀྱི་ལྡེ་ཁ་སྨོན་ལམ་ལོག་པས་བསྒྱུར་བའི་མི་ནག་ཕོ་མོ་དང༌། བནྡྷེ་ཁྲིམས་འཆལ། སྔགས་པ་དམ་ཉམས་རྣམས་ནག་ཕྱོགས་ཀྱི་འབྱུང་པོ་མཐུ་ཆེན་དུ་སྐྱེས་ནས་ལྷ་སྲིན་སྡེ་བརྒྱད་ནང་འཁྲུགས་སློང་ཞིང༌། མཐའ་བཞིའི་རྒྱ་འདྲེ་མ་རུངས་པ་རྣམས་ཀྱིས་སྣ་ཁྲིད་བྱས་ཏེ་འགོང་པོ་སྤུན་དགུའི་དམགས་དཔུང་དགུན་གྱི་འཚུབ་མ་ལྟར་ལངས། དཀར་ཕྱོགས་ཀྱི་གཞི་བདག་མང་པོ་ཡུལ་བཏོན་ནས། ཕལ་ཆེར་གཉའ་མནན་ནས་ལྡང་མི་ནུས་པ་བྱས། སངས་རྒྱས་མཐོང་བའི་བསྟན་སྲུང་མཐུ་བོ་ཆེ་རྣམས་ཀྱང་བོད་འབངས་ཆོས་ཀྱི་གཟི་བྱིན་དང་བྲལ་བའི་དབང་གིས་སྐྱོབ་པའི་ཐབས་མེད་པར་ཤེས་ནས་ཟངས་མདོག་དཔལ་རི་སོགས་རིག་པ་འཛིན་པའི་གྲོང་ཁྱེར་ཁྱད་པར་ཅན་རྣམས་སུ་བཞུད་དེ། གངས་ཅན་གྱི་ལྗོང་འདི་མི་མེད་ཀྱི་འབྲོག་སྟོང་ལྟ་བུར་སོང་བའི་གནས་སྐབས་ན། མཐའ་དབུས་ཀྱི་འབྱུང་པོ་འདྲེས་པའི་རྟགས་སུ་མི་རྣམས་ཀྱང་མཐའ་དབུས་འདྲེས་ཤིང༌། ཡུལ་ཁམས་ཕན་ཚུན་ནང་འཆོལ་བ་དང༌། ཆས་སྤྱོད་འཆོལ་བ་སོགས་འབྱུང༌། དེའི་དུས་སུ་སྤྱིར་ནད་མུག་འཁྲུགས་རྩོད་སོགས་ཕྱི་ནང་གི་འཇིགས་པ་རགས་ལ་མང་བ་དང༌། ཁྱད་པར་མཐའ་བཞིའི་དམག་དཔུང་མང་པོས་ལན་གཅིག་མ་ཡིན་པར་འཇོམས་ཚུལ་དུས་གསུམ་མཁྱེན་པ་ཨོ་རྒྱན་ཆེན་པོའི་གཏེར་ལུང་རྣམས་སུ་གསུངས་ཤིང༌། དེའང་དུས་འགྱུར་ཆེན་པོ་བཅུ་ཡོང་བའི་ནང་ནས་དེང་
སང་བརྒྱད་པ་ཕལ་ཆེར་རྫོགས་ནས་དགུ་པ་ལ་ཉེ་བ་ཡིན། དེ་བཟློག་ཐབས་ཡོད་ཀྱང་བོད་འབངས་སྤྱིའི་ལས་དབང་གིས་བྱུང་བའི་སྡུག་བསྔལ་གང་ཟག་རེ་རེ་གཉིས་རེས་བཟློག་དཀའ། མང་པོས་ནི་སྒྲུབ་རོགས་མི་བྱེད་ཅིང་བློ་མཐུན་རྒྱུ་མ་རེད་ཀྱང༌། སྒྲུབ་མཁན་བྱུང་ན། སྤྱིར་བསྙེན་སྒྲུབ་ཚད་དུ་འཁྱོལ་བའི་རིག་སྔགས་འཆང་ནུས་ལྡན་རྣམས་ཀྱིས་གཡུལ་མདོས། ས་གནད་མེ་བཙའ། གཏོར་བཟློག །འགོང་པོ་ཨར་གཏད། དམ་སྲི་མནན་པ། ཆོས་སྐྱོང་སྤྱི་དང་བྱེ་བྲག་བརྟན་མ་བཅུ་གཉིས་སོགས་ཀྱི་གསོལ་མཆོད། ཞི་དྲག་གི་སྦྱིན་སྲེག་ཚད་ལྡན། ལྷ་སྲིན་དམ་བསྒྲགས་སོགས་བསྟན་འགྲོ་སྤྱི་ལ་སྨན་པའི་ལྷག་བསམ་ཟོལ་མེད་ཀྱིས་བསྒྲུབ་ན་སྟོབས་ཆེ་ཡང་དེ་འདྲ་ཚད་ལྡན་བྱེད་པ་མང་པོ་འོང་དཀའ་སྒྲུབ་སླ་ལ་ཆོད་ཆེ་ངེས་ནི། བན་སྔགས། མི་ནག་ཕོ་མོ། ཁྱེའུ་བུ་མོ་ཐམས་ཅད་ཀྱི་མ་ཎི་དུང་ཕྱུར་མང་པོ་འདོན་ཅིང་དུས་ཆེན་རྣམས་སུ་མ་ཎིའི་འུར་སྒྲ་ཆེན་པོ་བྱེད། མ་ཎི་རྡོ་ལ་བརྐོ། དར་དུ་འཛུགས་པ་སོགས་དང༌། གུ་རུ་སིདྡྷི་དེ་མཚུངས་རྩལ་དུ་བཏོན། བསམ་ལྷུན་འབུམ་ཐེར་མང་པོ་དང༌། ཁྱད་པར་ཡིད་བཞིན་ནོར་བུ་ལྟ་བུའི་མན་ངག་བཅུ་གསུམ་གྱི་དང་པོ། ཧོར་སོགས་འཇིགས་པའི་དམག་གིས་མཐའ་བསྐོར་ནསཿ ཞེས་པའི་གསོལ་འདེབས་ཁྲི་འབུམ་མང་པོ་གསོག །ལྷ་མོ་འོད་ཟེར་ཅན་གྱི་ཕྱག་འཚལ་དང་གཟུངས་སྔགས་ཚར་གྲངས་མང་པོ་འབྲི་འདོན། ཤེར་སྙིང་བདུད་བཟློག་ཅི་མང༌། སྒྲོལ་མའི་མཎྜལ་ཆོ་ག་རྣམ་དག་མང་པོ་དང༌། ཕྱག་འཚལ་ཉེར་གཅིག་བྱེ་བ་སོགས་ཅི་ཐོན། ཏཱ་རེ་ཡིག་བཅུ་དུང་ཕྱུར་ཅི་འགྲུབ། སྒྲོལ་
མའི་དར་ཆེན་མང་དུ་འཕྱར་བ་རྣམས་ཤིན་ཏུ་གལ་ཆེ། འདི་རྣམས་ནི་རང་ཉིད་ཀྱིས་མོ་ཕྱྭ་བགྱིས་པའམ། རིམ་གྲོ་འདི་དག་བཟང་ཡོང་སྙམ་དུ་ཞེ་རྩིས་གང་ཆེ་རྣམས་བྲིས་པ་ལྟ་བུ་གཏན་ནས་མིན་གྱི། ཨོ་རྒྱན་སངས་རྒྱས་གཉིས་པའི་གཏེར་ལུང་ལྷད་མེད་ལྟར་བྲིས་པ་ཡིན་པས་ཡིད་ཆེས་ཀྱི་གནས་སུ་བཟུང་ཆོག་པར་ཡོད། སྤྱིར་འདི་འདྲའི་རིགས་རྣམས་ཆུ་མ་ཤོར་གོང་དུ་རག་པ་རྒྱང་ནས་བྱེད་པ་ལྟར་ཐོག་ཏུ་མ་བབས་གོང་ནས་སྒྲུབ་དགོས་པ་ཡིན་ཀྱང་ཐལ་ཟིན་དེར་ཟད། ད་དུང་ཡང་ཚད་ལྡན་སྒྲུབ་མཁན་མང་པོ་སྲིད་ན་ཁོལ་བུ་རེ་བདེ་བ་ལ་ཕན་ནམ་སྙམ་ནས་བྲིས་པ་དགེ་བར་གྱུར་ཅིག། །།