རྩིས་ཀྱི་མོ་གཙུག་ལག་རྒྱ་མཚོའི་མེ་ལོང་།
རྩིས་ཀྱི་མོ་གཙུག་ལག་རྒྱ་མཚོའི་མེ་ལོང་ཞེས་བྱ་བ་བཞུགས་སོ། །བླ་མ་འཇམ་པའི་དབྱངས་ལ་ཕྱག་འཚལ་ལོ། །མཐའ་ཡས་སྲིད་དང་ཞི་བའི་ཤེས་བྱ་ཀུན། །མཁྱེན་རབ་ཡེ་ཤེས་མེ་ལོང་འོད་པོ་ཆེས། །སྟོང་ཉིད་ནམ་མཁའི་ཐིག་ལེར་སྡོམ་མཛད་པ། །བླ་མ་བརྟན་པའི་འཁོར་ལོས་དགེ་ལེགས་སྩོལ། །ཤར་ཕྱོགས་གནམ་སྐྱོང་རྒྱལ་པོའི་ཡུལ་གྲུ་རུ། །གཙུག་ལག་མ་དྲོས་ཆུ་གཏེར་འཁྱིལ་བའི་གཞི། །སྲིད་པ་རུས་སྦལ་ཁོག་པའི་མེ་ལོང་ལ། །སྤང་བླང་རི་མོ་འབུམ་བྲག་པྲ་རུ་འབེབས། །དེ་ལ་གཉིས་ཏེ། བསྡུས་བཤད་སྡོམ་ཚིག་ཏུ་བརྗོད་པ་དང༌། སྤྲོས་བཤད་ངག་འགྲོས་སུ་བཀོད་པའོ། །དང་པོ་ནི། བརྩི་གཞི་རུས་སྦལ་གན་རྐྱལ་ཏེ། །མགོ་བོ་ལྷོ་ལ་གཞོག་གཡས་ཤར། །མཇུག་མ་བྱང་དང་གཞོག་གཡོན་ནུབ། །མཚམས་བཞིའང་དེ་ཡིས་ཞར་ལ་ཤེས། །དེ་རྣམས་མེ་ཤིང་ཆུ་ལྕགས་དང༌། །ས་ལྔ་གོ་རིམ་བཞིན་སྦྱར་ནས། །མ་བུ་དགྲ་གྲོགས་ངེས་པ་ཡིས། །ལོ་ཟླ་ཞག་དང་དུས་ཚོད་བརྩི། །གཞི་ཕྱྭ་ལོ་དང་མགྲོན་ཕྱྭ་ཟླ། །དགྲ་ཕྱྭ་ཞག་དང་སྲོག་སོགས་དུས། །རྣམ་པར་སྦྱར་བའི་རིགས་པ་དང༌། །རྡེལ་ཞག་གཞན་ཡང་མང་དུ་དབྱེ། །གནམ་ལོའི་འབྱུང་དགྲས་ཟླ་ངོས་བཟུང༌། ཟླ་འབྱུང༌།
སྟེང་ནས་ཞག་མགོ་འཛིན། མཆན། བ་གང་ཡང་རུང༌། །ཟླ་ཞག་དེ་ཡི་དགྲ་ནས་འཛིན། །ཞག་གི་བུ་ནི་དུས་ཚོད་དེ། །དུས་ཚོད་མ་གཏོགས་སྦྲག་མར་བརྩི། །ཟླ་བའི་ཐོག་མ་སྤྲེལ་གྱི་ཟླ། །ཞག་ལ་ཕོ་དྲུག་སྟག་གིས་ཚེས། །དེ་བཞིན་མོ་དྲུག་སྤྲེལ་གྱིས་ཏེ། །རིམ་བཞིན་འབྲུག་དང་ཁྱི་ཡིས་ཉ། །དེ་ལྟར་བརྟགས་ནས་བརྩི་ཚུལ་དངོས། །བརྩི་བྱ་དེ་ཉིད་ལོ་སོགས་འཐབ། །སྲོག་ལུས་དབང་ཐང་རླུང་རྟ་ཡི། །ས་མལ་ལོ་མལ་ཀུན་ལ་དཔྱད། །གྲོགས་ཕྲད་རབ་ལ་མ་བུ་འབྲིང༌། །མེ་ལྕགས་ཤིང་ནང་ངན་པ་ལ། །ས་ཆུ་ནང་བཟང་དགྲ་ཕྲད་ངན། །བྱེ་བྲག་གཞན་ཡང་རབ་ཤེས་བྱ། །གཙོ་བོར་དུས་ཚོད་ལ་སོགས་པ། །རང་རང་གང་ལ་གང་བསྔགས་པ། །དེ་ཉིད་གཞིར་བཟུང་སྤར་སྨེ་ཡི། །རྣོ་ཁྱད་འདོན་པ་འདི་ཡི་ལུགས། །ན་ཤི་དགྲ་དུར་གེགས་རྣམས་དང༌། །བདུན་ཟུར་བཞི་གཤེད་དགུ་མིག་སོགས། །རྒྱ་ཆེར་པགས་རུས་ཤ་གསུམ་གྱིས། །བརྩི་བ་དོན་གྱི་སྙིང་རྡོ་ཡིན༌། །གཞན་ཡང་དཔྱོད་ཚུལ་ཁྱད་པར་ནི། །རུས་སྦལ་ལུས་ལ་འབྱུང་ལྔ་སྦྱར། །དེ་རྣམས་དབྱིབས་མདོག་གྲངས་ཕྱོགས་སོགས། །སོ་སོའི་རྣམ་པར་བླན་ལས་ཤེས། །གཉེན་ཕྱོགས་མ་ཕྱི་འོག་རྟ་ཁྱི། །རང་དང་གྲོགས་ཡིན་དགྲ་ཕྱོགས་དགྲ། །
དེ་བཞིན་སྒོ་ནི་རང་དང་མ། །གདོན་དང་རང་དགྲ་ཕྱོགས་ལའོ། །འདི་དག་བློར་བཟུང་ན་འོག་ནས་འཆད་པའི་རྩིས་འབྲས་རྣམས་ཀྱང་ཡིད་ལ་འཛིན་སླ་བ་ཡིན་ནོ། །གཉིས་པ་ནི། ནམ་རྟེན་འབྲེལ་གྱི་རྩིས་བྱ་བར་འདོད་པའི་དུས་དེར། ཐོག་མར་སྐྱབས་སེམས་སྔོན་འགྲོས་འབྱུང་བའི་ལྷ་དང་གཙུག་ལག་གི་སྟོན་པ་རྣམས་ལ་གཏོར་མ་ཕུལ། །བདེན་པ་བདར། མེ་ཏོག་ལ། ཨ་ཀར་ཁ་ཡེར་ཡ་ཝ་ཡང་ཨུར་ཏེ་ཏཾ་ཏ། ཞེས་ཉེར་གཅིག་བཟླས་ཏེ་འཐོར། དེའི་འོག་ཏུ་སྐོར་མགོ་ལ་འཇུག་གོ །དེའང་རྩིས་ཀྱི་སྐོར་མགོ་དངོས་ནི། གནམ་ལོའི་འབྱུང་བ་གང་ཡིན་གྱི་དགྲ་ཐོག་ནས་ཟླ་བའི་སྐོར་མགོ་བྱ་སྟེ། དེའང་འདིའི་ལུགས་ཀྱི་ལོ་མགོ་ཧོར་ཟླ་བཅུ་གཉིས་པ་སྤྲེལ་ཟླས་འཛིན་རྒྱུ་ཡིན་ལ། ཟླ་བ་བཅུ་གཉིས་པོའི་ནང་ཚན་ཕོ་མོའི་ཟླ་བ་ཕྲུག་གཉིས་རེ་འབྱུང་བ་གཅིག་ཅིང་བརྩི་དུས་ཀྱང་དེ་ལྟར་བརྩིའོ། །དེ་ལྟར་ཟླ་བ་གར་སླེབས་ཀྱི་སྟེང་ནས་ཞག་གི་སྐོར་མགོ་ནི། སྤྲེལ་སོགས་ཟླ་བ་ཕོ་དྲུག་སྟག་གིས་ཚེས་ཤིང་བྱ་སོགས་ཟླ་བ་མོ་དྲུག་སྤྲེལ་གྱིས་ཚེས་རྒྱུ་ཡིན་པས། དེ་དག་གཞིར་བཟུང་ལ། ཞག་གི་ངོས་འཛིན་དངོས་ནི། གཅིག་བཅུ་གསུམ་ཉེར་ལྔ་ཞེས་པའི་སྡེ་ཚན་གསུམ་པོ་གང་རིགས་སྐབས་བསྟུན་གྱི་སྟེང་ན་
གཡས་སུ་བསྐོར་བས་རྟོགས་ནུས། དེ་ལ་ཟླ་བ་གཉིས་ནི་འབྱུང་བའི་སྐོར་མགོ་དང་སྦྲག་མར་བརྩི་ལུགས་གཅིག་ཏུ་བྱ་དགོས་པས། གཅིག་གཉིས་རང༌། གསུམ་བཞི་བུ། ལྔ་དྲུག་གྲོགས། བདུན་བརྒྱད་དགྲ། དགུ་བཅུ་མ་ཞེས་བགྲང་ངོ༌། །དུས་ཚོད་ཀྱི་སྐོར་མགོ་ནི། ཞག་གི་བུ་ཐོག་ནས་བྱ་སྟེ་ནམ་ལང་ཡོས། ཉི་ཤར་འབྲུག་ཉི་དྲོས་སྦྲུལ། ཉིན་གུང་རྟ། ཕྱེད་ཡོལ་ལུག་དགུང་ཆེན་སྤྲེལ། དགུང་ཆུང་བྱ། མུན་རུབ་ཁྱི། སྲོད་འཁོར་ཕག་ནམ་གུང་བྱི་བ། ནམ་ཕྱེད་གླང༌། ཐོ་རངས་སྟག་སྟེ་དུས་ཚོད་བཅུ་གཉིས་པོའི་ནང་གར་བབ་ངོས་འཛིན། འདི་ལ་ནི་འབྱུང་བ་རྐྱང་དེད་བྱའོ། །དེ་དག་རྩིས་ཐང་གི་སྤྲོས་པ་ལ་མི་ལྟོས་པར་ལག་པའི་སོར་མོ་འབའ་ཞིག་གི་སྟེང་ནས་བརྩི་ལུགས་བློ་ཆུང་ལས་དང་པོ་པ་རྣམས་ཀྱི་དོན་དུ་གནམ་ལོ་ཤིང་བྱ་ཁྱིའི་ཟླ་བའི་ཡར་ཚེས་བརྒྱད་ཀྱི་ཉི་ཤར་ལྟ་བུ་ལ་དཔེ་བརྗོད་བྱས་ན། ལག་པའི་གུང་འཛུབ་སྲིན་གསུམ་རེའུ་མིག་དགུར་ཕྱེ་བའི་ཤར་ཤིང༌། ལྷོ་མེ། ནུབ་ལྕགས། བྱང་ཆུ། ལྷོ་ནུབ་ས་སྒོ་ཆེ་བར་དཔྱད་ལ། ཐོག་མར་གནམ་ལོ་ཤིང་ཞེས་ཤིང་ཁམས་སུ་བླན་ནས་སླར་ཡང་ལྕགས་སྤྲེལ་གྱི་ཟླ་བ་ལོ་མགོར་བཞག་སྟེ་ནུབ་ཏུ་འཕོས། དེའི་སྟེང་ནས་ཟླ་བའི་
སྐོར་མགོ། ལྕགས་ཀྱི་སྤྲེལ་བྱ། ཆུའི་ཁྱི་ཞེས་སྔ་མ་ལས་གནས་གཅིག་བགྲོད་པས་བྱང་དུ་སླེབ། དེའི་རང་ཐོག་ནས་ཞག་གི་བརྩི་ལུགས། ཆུའི་སྟག་ཡོས། ཤིང་གི་འབྲུག་སྦྲུལ། མེའི་རྟ་ལུག་སའི་སྤྲེལ་བྱ་བགྲང་བས་ལྷོ་ནུབ་ཏུ་ཕྱིན། དེའི་བུ་ཐོག་ནས། ནམ་ལང་སྟག་ཡོས། ཉི་ཤར་ཆུ་འབྲུག་ཅེས་དེ་ཉིད་དུ་རང་ས་འཛིན་པ་བཞིན་ནོ། །དེ་ལྟར་མགྱོགས་རྩིས་ཀྱི་རྣམ་བཞག་ཆགས་པར་བྱས་ནས་ད་ནི་བྱེ་བྲག་ཏུ། གཞི་ཕྱྭ་ལོ། མགྲོན་ཕྱྭ་ཟླ་བ། དགྲ་ཕྱྭ་ཞག་སྲོག་ཆོས་སྲིད་དོན་སོགས་དུས་ཚོད་དང་སྦྱར་ཏེ་བརྩི་ལུགས་རགས་པ་ཙམ་བརྗོད་ན། གཞི་ཕྱྭར་བརྩི་བྱའི་སྲོག་ལུས་དབང་ཐང་རླུང་རྟ་རྣམས་གནམ་ལོའི་སྲོག་སོགས་བཞི་དང་འཐབ་ལ། སླར་ཡང་རང་དུས་ཀྱི་ཟླ་བའི་སྲོག་སོགས་བཞི་པོ་བརྩི་བྱ་དང་འཐབ། དེ་བཞིན་དུ་ཞག་དང་བརྩི་བྱ། དུས་ཚོད་དང་བརྩི་བྱ་བཅས་ལེགས་པར་ལྟོ་སྦྱར་ལ། མ་ཕྲད་དང་གྲོགས་ཕྲད་རབ། བུ་ཕྲད་དང་ཤིང་ལྕགས་མེ་གསུམ་ནང་ཕྲད་ངན་པ། ས་ཆུ་ནང་ཕྲད་བཟང་བ། དགྲ་ཕྲད་ཤིན་ཏུ་ངན་པ་སྟེ་འདི་དག་གི་གོ་བ་གཞིར་བཞག་ནས། བཟང་ཕྱོགས་མང་ན་དགེ་ཞིང༌། བཟང་ངན་མཉམ་ན་འགྱུར་ལྡོག་ཐེ་ཚོམ་ཅན་དང༌། ངན་ཕྱོགས་མང་ན་མི་དགེ་བའི་ལྟས་
ཡིན། འདི་ལ་ཞིབ་ཏུ་ན་སྲོག་ལུས་དབང་ཐང་རླུང་རྟ་སོ་སོའི་ས་མལ་ལོ་མལ་རྣམས་ལ་བྱང་བ་ཞིག་གནད་དུ་ཆེ་བས། དེ་བཤད་པར་བྱའོ། །སྤྱིར་བཏང་དུ་སྲོག་ནི་གང་ལའང་གལ་ཆེན་དགོས་མོད་ཀྱི། ཁྱད་པར་གྱི་ས་དང་ལོའི་མལ་ནི་འཆི་འཚོ་གཉིས་ཀྱི་ལ་ཤན་ཕྱེས། འོག་རྟ་དང་སྐྱེས་པའི་ས་མལ། བྱི་འབྲུག་སྤྲེལ་གསུམ་གྱི་ལོ་མལ། གཞིས་ལ་ལྷག་པར་གཙོ་བ་ཡིན་ནོ། །ལུས་ནི་ན་ཚ་འབྱུང་མི་འབྱུང་བརྟགས་ས་ལུག་དང་རྒན་བྱིས་ཀྱི་ས་མལ། ཁྱི་རྟ་སྟག་གསུམ་གྱི་ལོ་མལ། སྒོ་ཐེམ་གྱི་ས་དང་ཕྱི་ས་ཡིན་ནོ། །དབང་ཐང་ནི་ཕྱུག་དབུལ་གཉིས་ཀྱི་སོ་འཚམས་ཕྱེ་ས། ནོར་ཞིང་བུད་མེད་ཁྱིམ་གྱི་ས་མལ། བྱ་གླང་སྦྲུལ་གསུམ་གྱི་ལོ་མལ། བློ་ཕྱྭ་དང་དོན་ཕྱྭ་ལ་ལྷག་པར་གཉན་པ་ཡིན་ནོ། །རླུང་རྟ་ནི་དགྲ་རྐུན་གྱི་འཇིགས་པ་བརྟགས། བན་བཙུན་དང་གཙོ་བོ་རྒན་རབས་རྣམས་ཀྱི་ས་མལ། ཕག་ལུག་ཡོས་གསུམ་གྱི་ལོ་མལ། ཆོས་ཕྱྭ་དང་ལྷ་ས་དྲག་ཞན་དཔྱོད་པའི་གནས་ཆེ་ས་ཡིན་ནོ། །དེ་རྣམས་རེ་རེ་ནས་འབྲས་བཤད་བཟང་ངན་འབྲིང་གསུམ་བཤད་མ་ཐག་པ་ལྟར་བརྟགས་ལ། ངན་འབྲིང་གཉིས་ལ་བཅོས་ཀ་བྱ་སྟེ། མཐུན་ཕྱོགས་ལོ་པ་ཡོད་ན་དེ་དང་བསྟུན། ཁྱད་པར་ལོ་མལ་གང་ཞན་གྱི་མི་དེ་འདྲ་ཁྱིམ་དེར་མེད་ན། བརྩི་བྱའམ་དེ་ལས་
གཞན་པའི་ས་མལ་དབང་བཙན་དུ་བྱ་ཞིང༌། ཡོད་ན་དེ་ཉིད་གཙོ་བོར་བྱས་ཏེ། ལོ་ཀེགས་ཆེ་ཆུང་དང་སྤར་སྨེའི་འབྲས་རྩིས་རེ་རེ་ནས་བསྐོར་ལ། དེའི་སྒོ་ནས་འཁྱུག་དཔྱད་ཀྱི་སྦྱོར་བ་གང་འོས་སུ་དཀྲི་བ་ནི་རྣོ་སྟངས་སྤར་སྨེས་གཅོད་དོ་ཞེས་རྩིས་རིག་སྨྲ་བའི་ངག་སྒྲོས་ལས་བྱུང་བའི་དོན་ནོ། །གལ་ཏེ་རླུང་རྟའི་མལ་ལྟ་བུ་ཟླ་ཞག་དུས་ཚོད་གསུམ་ངན་ཞིང་གནམ་ལོའི་རླུང་སྐལ་དང་གྲོགས་འཕྲད་ལྟ་བུའི་དགེ་ལྟས་སྣང་ན། གཞི་ཕྱྭ་གནམ་ལོ་གཙོ་བ་དང༌། བཟང་ངན་གྱི་ཕྱོགས་གང་ན་མང་བ་དེ་ཉིད་དབང་བཙན་དགོས་པ་གཉིས་ཀ་བཤད་ཟིན་པས་དེ་ལ་ཇི་ལྟར་ལུང་དུ་སྟོན་ཞེ་ན། དེ་ནི་གནས་སྐབས་སུ་དགྲ་ཡོད་ཀྱང་ནམ་ཕུགས་སུ་དགྲའི་གཞན་དབང་ཅན་དུ་མི་འགྲོ་བའི་ལྟས་དང༌། རིམ་གྲོ་རྒྱ་ཆེར་བྱས་ན་བཟློག་ནུས་པའི་ལྟས་ཡིན་གྱི། དགྲ་ཕྱྭ་ཧ་ཅང་འཁྲུགས་པའི་རྟགས་སུ་མི་གཟུང་ངོ༌། །འོན་ཀྱང་གཙོ་བོར་ནི་རྩིས་མཁན་ཉིད་ཀྱི་ཞེ་འདོད་ལ་རག་ལས་པས། རྟེན་འབྲེལ་དེ་བརྟག་པ་ནི། དང་པོར་ལོ་དབང་བཙན་གྱི་སྟེང་ནས་བརྟག་གོ་སྙམ་ན་ལོ་ཉིད་གཙོ་ཆེ་ཞིང༌། དུས་ཚོད་འབའ་ཞིག་དབང་བཙན་དུ་བྱེད་པར་སྤྲོ་ན་དེ་ཉིད་གཙོ་བོར་འགྱུར་བ་སོགས་འདི་འདྲའི་རིགས་མང་པོ་ཞིག་རྩིས་པའི་བློའི་གཡོ་བ་ལ་ཐུག་པར་བླ་མ་རྣམས་
གསུངས་སོ། །ཡང་གཞི་ཕྱྭའི་ལེགས་ཉེས་ཀྱི་རྟེན་འབྲེལ་དེ་བས་ཀྱང་བསྡུས་ཏེ་བརྟག་པར་འདོད་ན། གནམ་ལོའི་སྲོག་སོགས་བཞི་དང་བརྩི་བྱའི་སྲོག་སོགས་བཞི་འཐབ་པའི་འོག་ཏུ་དུས་ཚོད་ཀྱི་འབྱུང་བ་རྐྱང་དེད་བྱས་ནས་དབང་ཐང་གི་སྐལ་པ་དང་ཕན་ཚུན་འཐབ་པས་ཀྱང༌། སྤྱིར་བཏང་དུ་ས་མལ་དྲག་ཞན་དང༌། དམིགས་བསལ་དུ་སྐྱིད་སྡུག་གང་སྟོང་རྣམས་ལེགས་པར་ཤེས་ནུས་ཏེ། དེའང་གནམ་ལོའི་སྟེང་ནས་སྤྱིར་བཏང་གི་ལེགས་ཉེས་འཇལ་ཚུལ་ནི་གོང་དུ་བཤད་པ་རྣམས་ཀྱིས་རྟོགས་པར་སྣང་བས། འདིར་དུས་ཚོད་ཀྱི་དབང་སྐལ་ནས་དམིགས་བསལ་བའི་ལེགས་ཉེས་བརྟག་ལུགས་ཙམ་ཞིག་འཆད་དོ། །དེ་ནི་མ་བུ་དགྲ་གྲོགས་ནང་འཕྲད་དང་ལྔའི་སྒོ་ནས་ཕྱེ་སྟེ། སྤྱིར་ནི་མ་ཕྲད་ནི་ཕྱི་འཇིགས་ཙམ་དང༌། བུ་འཕྲད་འགྱོད་དོ། །གྲོགས་འཕྲད་དགེ་ལྟས་སོགས་ཡིན་པ་གཞིར་བཞག་ལ། བྱེ་བྲག་ཏུ་ཤིང་མ་ཆུ་འཕྲད་ལ། གཞི་ཕྱྭ་ཅུང་ཟད་འཁྲུགས་ལྟས་དང༌། བྱང་ཕྱོགས་ནས་ལྷགས་པའི་གདོན་ངོ་ཆེ་ཞིང༌། རང་དང་ཉེ་འབྲེལ་ལ་རྐྱེན་ངན་འོང་བའི་ལྟས་ཡིན། མེ་མ་ཤིང་འཕྲད་ལ་ལྷ་སྲུང་འཁྲུགས་པའི་བཀའ་ཆད་དང༌། ཉི་མ་ཤར་ཕྱོགས་ཀྱི་གདོན་ངོ་ཡོད་གཞན་ཡང་ཉེ་དུ་སོགས་ལ་དམར་བཤལ་ལྟ་
བུའི་ཡམས་ནད་འབྱུང་ངོ་དང༌། དམར་ངོ་ཡོད། ས་མ་མེ་འཕྲད་ལ། ཕུག་ལྷ་བཙན་འགོང་མེད་ན་བཙན་དང་ས་བདག་གི་གནོད་པ་དང༌། ལྷོ་ཕྱོགས་ཀྱི་གདོན་ངོ་ཡིན། ལྕགས་མ་ས་འཕྲད་ལ། ཕ་མྱེས་ཀྱི་དུར་ས་ལང་ནས་ཤུལ་ཕྱི་དབུལ་ཞིང་ཕོངས་པ་དང༌། མཚམས་བཞིའི་གཤེད་ཁ་ལྟ་བའི་ངོ༌། ལོ་ཏོག་ལ་འཚེ་བའི་ལྟས་ཡིན། ཆུ་མ་ལྕགས་འཕྲད་ལ། དམེ་འཁྲུགས་ནང་འཐབ་དང་གནམ་ལྕག་འབབ་པའི་ལྟས། ཉི་མ་ནུབ་ཕྱོགས་ཀྱི་གདོན་ངོ་སྟེ་མ་འཕྲད་སྐོར་གྱི་འབྲས་བཤད་ཟིན་ཏོ། །ཤིང་བུ་མེ་འཕྲད་ལ། ལྷོ་གདོན་དང་དང་བཙན་གཤེད་ཀྱི་ཁ་ལྟ། རྟ་ནོར་དང་ཞིང་ལ་བཀྲ་མི་ཤིས་ཤིང༌། ནད་ཡམས་མཆེད་པའི་ངོ། །མེ་བུ་ས་འཕྲད་ལ། མའམ་སྲིང་མོ་ལ་ངན། འཚམས་བཞི་དང༌། ཁྱད་པར་ལྷོ་ནུབ་ཀྱི་བགེགས་ངོ་ཡིན། ས་བུ་ལྕགས་འཕྲད་ལ། གཡང་གི་ཁང་སྒོ་རལ། མི་ནོར་གང་རུང་རྦབ་འོག་ཏུ་བསྡུ། དགྲ་རྐུན་དང་ནུབ་ཕྱོགས་ཀྱི་གཤེད་ངོ་ཡོད། ཁྱིམ་གྱི་བུད་མེད་འཆི་བའི་ལྟས་ཡིན། ལྕགས་བུ་ཆུ་འཕྲད་ལ། ཤི་ཆད་དང༌། ཁྱད་པར་དུ་བྱང་ཕྱོགས་ཀྱི་ཆུ་རྒྱུད་ནས་གཤིན་པོའི་ལག་པ་ཟེད་པའི་རྟགས་ཏེ། དེའི་དབང་གིས་འཁྲུགས་རྩོད་དང་
གོད་ཁ་འབྱུང་ངོ་ཡོད། ཆུ་བུ་ཤིང་འཕྲད་ལ། ཤར་ཕྱོགས་ནས་ཤི་གཤེད་ཀྱི་ཁ་ལྟ་བས་མི་དང་ནོར་ལ་འཚེ་ངོ་ཡིན། དེ་དག་ནི་བུ་ཕྲད་ཀྱི་སྡེ་ཚན་ནོ། །ཤིང་དགྲ་ལྕགས་འཕྲད་ལ། ཤར་རམ་ནུབ་ནས་འོང་བའི་ཕུ་ནུའི་རུས་འདྲེ་དང་གྲི་གཤེད་གདོན། ཡང་ན་ཡུལ་དེའི་གཞི་བདག་གམ་ཁྱིམ་བདག་གམ་ཁྱིམ་ལྷ་བཙན་པོ་ལ་ཕོག་ཐུག་སོང་བའི་ངོ་དང༌། རྫས་ཤིང་ལྕགས་སྤྲད་མའི་ཕྱིར་འབྲང་བའི་གདོན་རྒོད་ངན་པས་སྨྱོ་འབོགས་གཏོང་ངོ་ཡིན་ཞིང་ནོར་ཕྱུགས་ལ་གོད་ངོ་ཆེ། མེ་དགྲ་ཆུར་འཕྲད་ལ། ལྷོ་ཕྱོགས་སམ་བྱང་ཕྱོགས་ནས་འོང་བའི་རྫས་དམར་པོའི་རིགས་ཀྱི་ཕྱིར་འབྲང་གི་ཉེ་དུའི་རུས་འདྲེ་དང་བཙན་འགོང་དང་མོ་སྲིས་གནོད་ངོ༌། ཁྱིམ་དེར་ཤ་དམར་པགས་དམར་འདྲ་ད་ལྟ་མེད་ན་ངེས་པར་ཕྱུགས་ལ་གོད་འོང༌། ས་དགྲ་ཤིང་འཕྲད་ལ། མཚམས་བཞིའམ་ཤར་ཕྱོགས་ཀྱི་ཤག་པོ་ལས་བླང་བའི་རིན་པོ་ཆེའི་རིགས་སམ་གྲོགས་ཀྱི་རྗེས་འབྲང་གི་རྒྱལ་པོ་དང༌། མི་ཁ་གླེང་བརྗོད། གཟའ་མི་བྱེ་བྲལ་སོགས་འབྱུང་བའི་ལྟས་ཡིན། ལྕགས་དགྲ་མེ་འཕྲད་ལ། ནུབ་བམ་ལྷོ་ནུབ་ནས་འོང་བའི་མགར་སྐྱེས་དར་མའམ་མིའི་གཙོ་བོའི་རིགས་དང་ལྕགས་ཆའི་ཕྱིར་འབྲང་གི་གྲི་བཙན་ནམ་ཤི་གཤེད་གནོད། ལྷ་འཁྲུགས་དང་བྱད་ཕུར་རྦོད་གཏོང་གི་
ལྟས། ལྷོ་རྒྱུད་ནས་དགྲ་རྐུན་ངོ༌། །ཡང་ན་གློ་བུར་གྱི་འུར་ངོ་ཆེན་པོ་ཡོད། ཆུ་དགྲ་ས་འཕྲད་ལ། བྱང་ངམ་ལྷོ་ནུབ་གཙོ་བོར་གྱུར་པའི་མཚམས་བཞི་གང་རུང་ནས་མ་དང་བུ་མོ་སོགས་བུད་མེད་ཀྱི་རིགས་འགའ་ཞིག་གི་ཕྱིར་འབྲང་མོ་སྲི་གདོན། གོད་ངོ་དང་ནད་ངོ༌། ཁྱད་པར་དུ་གཟའ་མི་ནང་རྩོད་དང་རྐྱེན་ངན་གློ་བུར་བ། མྱ་ངན་དང་སྙིང་སྟོང་ཆེན་པོའི་ལྟས། དེ་རྣམས་དགྲ་འཕྲད་ཀྱི་དུམ་བུའོ། །ཤིང་གཉིས་ནང་འཕྲད་ལ། ཕ་ཁུ་སོགས་ཉེ་དུའམ། ཤར་དང་ལྷོའི་ཕྱོགས་ཀྱི་གཤིན་ལྕགས་རྒྱལ་པོའམ་གཉན་རིགས་དང་བསྡོངས་ནས་འཚེ་བའི་ངོ༌། །མེ་གཉིས་ནང་འཕྲད་ལ། བཙན་གཤེད་ཀྱི་གདོན་ངོ་དང༌། རྟ་ཕོ་གྲིར་འཆི་བའི་སྔ་ལྟས། འགོ་བའི་ནད་ཡམས་མཆེད་ལྟས་སོགས་ཡིན། ས་གཉིས་ནང་འཕྲད་ལ། རྒྱལ་གདོན་དང་ས་བདག་འཁྲུགས་པའམ། ཡང་ན་བན་བོན་སྔགས་པས་གཏད་མནན་བྱས་པའི་ངོ་ཡིན། གཏད་བྱེད་སའི་ངོས་འཛིན་ནི། མཚམས་བཞིའི་དུས་ཚོད་ལས་དཔྱད་དེ། ས་གླང་རི་སྣ་དང༌། ས་འབྲུག་བྲག་སྣ། ས་ལུག་ཐང་ཆེན་པོའི་རྔམ་ཞོལ། ས་ཁྱི་ཆུ་མིག་དང་མཚོའི་འགྲམ་ལྟ་བུར་གཏད་ཡོད་ངོ་ཡིན། དེ་འདྲའི་བྱད་གཏད་མེད་
ན་མཁར་གྱི་ལས་འགའ་ཞིག་ཉེས་ཟེར། ལྕགས་གཉིས་ནང་འཕྲད་ལ། ཕལ་ཆེར་བྱད་ཕུར་ཆེ་བའི་ངོ་ཡིན་ཞིང༌། ཡང་ན་གྲི་བཙན་འཁྲི། དེ་དག་གང་ཡང་མེད་ན་དགྲ་དང་རྐུན་མའི་ལྟས། ཆུ་གཉིས་ནང་འཕྲད་ལ། བྱང་ཕྱོགས་ཀྱི་ཆུ་རྒྱུད་ནས་ལྷགས་པའི་མོ་འདྲེའམ། ཀླུ་གཉན་ས་བདག་གམ། ཆུའི་ཡུལ་འདྲེ་ལྟ་བུའི་ངོ། ཆུ་མིག་ལ་ཕོག་ཐུག་སྔར་སོང་ཡོད་ན་དེ་འདྲའི་རྟགས་མཚན་ཡིན་ནོ། །འདི་དག་ནི་ནང་འཕྲད་ཀྱི་གྲས་སོ། །དེའང་གདོན་ངོ་གང་བབས་ཀྱི་འདྲེ་བགེགས་དེ་འདྲ་ཁྱིམ་དུ་མེད་པའམ་མ་བྱུང་ན་དགྲ་ངོ་ཡིན་པས་དེ་འདྲའི་རིགས་གཞན་ཡང་ཞིབ་མོའི་བློས་དཔོག་ཤེས་པར་བྱའོ། །ཤིང་གྲོགས་ས་འཕྲད་ནི། ས་བདག་རྒྱལ་པོས་ཕྱི་ལམ་འདེད་པ་དང༌། ལྷ་སྲུང་གི་འཁུ་ལྡོག་རང་ཞིར་སོང་ལྟས། ཕུང་སེལ་གྱི་ངན་སྔགས་ལས་གྲོལ་བའི་དགེ་མཚན་ཁྱད་པར་ཅན་ཡིན། མེ་གྲོགས་ལྕགས་འཕྲད་ནི། གྲི་གཤེད་རང་ཡུལ་བླང་ངོ་དང༌། ནད་པ་འཆི་བདུད་ཀྱི་ཁྲིམས་འོག་ནས་ཐར་བའི་ལྟས། ཕྱུགས་ཀྱི་གོད་ཟག་དང༌། ཡུལ་ཁམས་ཀྱི་བཀྲ་མི་ཤིས་པ་ཐམས་ཅད་རང་ཞིར་ཐལ་བའི་ངོ། ས་གྲོགས་ཆུ་འཕྲད་ནི། མོ་སྲི་ཁ་དམར་རྣམས་རང་ཡུལ་སྙེགས་ལྟས་དང༌། ཁྱིམ་བདག་གི་ནོར་
སྐལ་འཕེལ་ཞིང་ལོ་ལེགས་སྐྱ་རྒྱལ་ཆེན་པོའི་ངོ་ཡིན། ལྕགས་གྲོགས་ཤིང་འཕྲད་ནི། གདོན་དང་རྒྱལ་པོས་ཕྱི་ལམ་སྙེགས་ངོ། །ལྷ་རྣམས་དགའ་ཞིང་སྡོང་གྲོགས་ལ་ཡོང་ལྟས། བན་བོན་སྔགས་པའི་བྱད་ཐག་ལ་རྩང་ཟོར་བབས་པའི་ངོ་ཡིན། ཆུ་གྲོགས་མེ་འཕྲད་ལ། བཙན་གདོན་རང་གནས་སུ་ལྡོག་པའི་མཚན་མ། མི་ནོར་བདེ་ཞིང་དཔལ་འབྱོར་རྒྱས་པའི་དུས་ཏེ་གྲོགས་འཕྲད་ཀྱི་ལེའུ་མཚན་ནོ། །དེ་ལྟར་ཕྲད་ཉི་ཤུ་རྩ་ལྔར་ཕྱེ་བ་ལས། བཟང་པོའི་ཕྱོགས་ལ་གྲོགས་འཕྲད་ཀྱི་བཤད་པ་ནི་ཤིན་ཏུ་གསལ་ཞིང༌། མ་འཕྲད་ངན་པ་ཤ་སྟག་ལྟར་བཤད་པ་ཡང་ཕྱི་འཇིགས་ཙམ་ཡིན་གྱི། བརྩི་ཡུལ་དངོས་ལ་ནི་སྐྱོན་མེད་པར་བཤད་དེ་གཞན་གོ་སླའོ། །དོན་གཉིས་པ་མགྲོན་ཕྱྭ་ཟླ་བ་དང་འཐབ་སྟེ་བརྩི་བ་ནི། སྤྱིར་མགྲོན་པོ་ཕར་ཚུར་འོང་གཉིས་ཀྱི་ཕྱི་མ་དུས་ཚོད་ཀྱི་སྒོ་ནས་རྣོ་སྟངས་གཅོད་པའི་ཕྱོགས་ཉིད་ཕྱག་བཞེས་སུ་མཛད་པས། དེ་ནི་འོག་ཏུ་བཤད་པར་བྱ་ཞིང༌། འདིར་སྔ་མ་ཟླ་བའི་སྟངས་གཅོད་དུ་སྦྱར་ཏེ་འཆད་པ་ནི། འདིའི་ཟླ་བ་ཞེས་པ་བརྩི་དུས་ཀྱི་དེའང་ཡིན་མོད། འོན་ཀྱང་གཙོ་བོར་ནི་འགྲོ་དུས་ཀྱི་ཟླ་བ་ཉིད་དབང་བཙན་པས་དེ་ཉིད་དང་བརྩི་བྱའི་སྲོག་སོགས་བཞི་འཐབ་ལ། སྲོག་མའམ་
གྲོགས་དང་འཕྲད་ན་ཚེ་རིང༌། ལུས་མའམ་གྲོགས་དང་འཕྲད་ན་ནད་མེད། དབང་ཐང་མ་དང་ཕྲད་ན་དོན་འབྲིང༌། གྲོགས་དང་ཕྲད་ན་རབ། རླུང་རྟ་མའམ་གྲོགས་ཕྲད་ལ་དགྲ་མེད། བུ་འཕྲད་བཞི་ལ། ཚེ་ཉམས་དང༌། ན་ཚ་ཕྲན་བུ། ཕྱུགས་གོད་དོན་ཤོར་མེད་པའི་དགྲ་ངོ། །དགྲ་འཕྲད་གོ་ནུས། ནང་འཕྲད་འབྱུང་བ་རྐྱང་དཔྱད་ཐུན་མོང་བ་ནི། འབྱུང་བ་ཤིང་གི་དུས་ཡིན་ན་ཤར་ཕྱོགས་སུ་འགྲོ་བ་དགེ །ཤིང་བན་བུན་ཡོད་སར་མཛའ་བོས་གྲོགས་བྱེད། ནོར་ལྗང་རིགས་སམ་ཤིང་སྤྱད་བཟང་པོ་རྙེད་ངོ་དང༌། ཟས་ཤིང་ཐོག་སོགས་ལ་སྤྱོད་ངོ་ཡོད། ལྷོ་རུ་འགྲོ་ན་སྤྱིར་ཁ་འགྱོད་དང༌། ཁྱད་པར་བྲག་དམར་ས་དམར་ཡོད་པའི་ལོགས་སུ་རྐུན་པོ་འབྱུང༌། ནོར་དམར་མཚན་ཅན་མི་ལག་ཏུ་འགྲོ་ངོ་ཡོད། མཚམས་བཞི་གང་རུང་དུ་འགྲོ་ན་རི་མཐོན་པོའི་རྩེ་མོའམ། ཐང་ཆེན་པོའི་དཀྱིལ་ནས་གྲོགས་རྙེད། ནོར་གསེར་མདོག་ཅན་དང་ཟས་འབོལ་ཞིང་སྣུམ་བག་ཅན་ལ་སྤྱོད་ངོ་ཡིན། ནུབ་ཏུ་འགྲོ་ན། མགྲོན་པོ་སྤྱི་དང་ཁྱད་པར་ཇག་མགྲོན་ལ་ངན། རྫ་བྲག་དཀར་པོའམ་དཀར་ཤལ་ཡོད་པའི་སར་ཆོམ་པོ་རྟ་དཀར་ཅན་ཡོང༌། ནོར་དཀར་མཚན་ཅན་དགྲ་ལག་ཏུ་འཆོར་ཉེན་ཆེ། ཟས་དཀར་གསུམ་དང་
བཅའ་བའི་རིགས་ལས་ནད་འབྱུང༌། བྱང་དུ་འགྲོ་ན་ཕྱི་འཇིགས་ཡོད་ཀྱང་དོན་ཕམ་མེད། མི་ཕལ་པའམ་བུད་མེད་རིགས་ཀྱིས་གྲོགས་བྱེད། དེས་མཚོན་ཏེ་མེ་སོགས་ལྷག་མ་རྣམས་ཀྱང་རང་ཕྱོགས་དང་མ་གྲོགས་བཟང་བ། བུ་དང་དགྲ་ཕྱོགས་ངན་པར་ཤེས་པར་བྱའོ། ༈ །གསུམ་པ་དགྲ་ཕྱྭའི་སྟངས་ཞག་གིས་བཅད་དེ་བརྩི་བ་ནི། བརྩི་བྱའི་སྲོག་སོགས་བཞི་དང་ཞག་གི་སྲོག་སོགས་བཞི་ནང་ཕན་ཚུན་འཐབ་ལ། སྔར་བཤད་པའི་སྲོག་ལུས་དབང་ཐང་གི་ས་མལ་དང་ལོ་མ་ལ་གྱི་སྟེང་ནས་རྣོ་ཁྱད་འདོན་པ་ནི་སྲོག་དགྲ་དང་ཕྲད་ན་བྱི་འབྲུག་སྤྲེལ་གསུམ་ལོ་པ་ལ་ཉི་མ་ནུབ་ཕྱོགས་ཀྱི་དགྲ་ངོ་དང༌། ལྷོ་ནས་རྐུན་མ་འཇབ་དོགས་ཡོད། སྲོག་ལ་ཆད་འབིག་འགྲོ། ལུས་དགྲ་དང་ཕྲད་ན་བྱ་གླང་སྦྲུལ་གསུམ་གྱི་ལོ་པ་ལ་མཚམས་བཞིའི་ཕྱོགས་ནས་དགྲ་ངོ་དང༌། ཤར་ནས་རྐུན་ངོ་ཡོད། ལུས་ལ་རྨས་འགྲམ་འབྱུང༌། དབང་ཐང་དགྲ་དང་ཕྲད་ན་ཁྱི་རྟ་སྟག་གསུམ་ལོ་པ་ལ་ལྷོ་ནས་དགྲ་དང་བྱང་ནས་རྐུན་ངོ༌། །སྙིང་ནོར་མི་ལག་ཏུ་འགྲོ་དོགས་ཡོད། ཀླུང་རྟ་དགྲ་དང་འཕྲད་ན། ཕག་ལུག་ཡོས་གསུམ་ལོ་པ་ལ་བྱང་ནས་དགྲ་ངོ་དང༌། མཚམས་ནས་རྐུན་ངོ་དང༌། ཁྱད་པར་དུ་རང་མགོ་དགྲ་ཞབས་
སུ་ཚུད་ཉེན་ཆེ། དེས་ན་རླུང་རྟ་ནི་ཤིན་ཏུ་གཙོ་ཆེ་བ་ཡིན་ནོ། །སྲོག་སོགས་བཞི་མའམ་གྲོགས་དང་ཕྲད་ན་སྤྱིར་བཏང་བཟང༌། དམིགས་བསལ་མ་ཕྲད་མང་ན་ཕྱི་འཇིགས་དང༌། གྲོགས་ཕྲད་མང་ན་འུར་ངོ་ཡིན་ལ་བུ་འཕྲད་སྙིང་འགྱོད་ཀྱི་ངོ་ཞེས་གྲགས་ཤིང༌། ནང་ཕྲད་ལ། ཤིང་གཉིས་ནི་མཚམས་བཞིའི་ལོ་པ་ཡོད་ན། ཤར་རམ་ནུབ་ནས་དགྲ་དར་མའི་ངོ་དང༌། ལྷོ་ཕྱོགས་ཀྱི་རྒྱུད་ནས་རྐུན་པོ་འཇབ་པའི་ལྟས་ཡིན། མེད་ན་ནུབ་ནས་དམིགས་བསལ་ཅན་གྱི་དགྲ་ངོ་ཅུང་ཟད་ཡོད། དེ་མིན་གཞན་དུ་དགྲ་མེད་པའི་ངོ༌། དེས་མཚོན་ཏེ། མེ་ནང་ལ་བྱའམ་སྤྲེལ་ལོ་ཡོད་ན་ལྷོའམ་བྱང་ནས་དགྲ་དང༌། ལྷོ་ནུབ་སོགས་ནས་རྐུན་ངོ༌། །མེད་ན་བྱང་ཕྱོགས་ནས་དམིགས་བསལ་བ་དགྲ་ངོ༌། །དེ་མིན་སྐྱོན་མེད། ས་ནང་ལ། བྱི་ཕག་ལོ་པ་ཡོད་ན་མཚམས་བཞི་དང་ཤར་གྱི་ཕྱོགས་ནས་དགྲ་ངོ་དང༌། ནུབ་ནས་རྐུན་ངོ༌། །མེད་ན་ཤར་ནས་དམིགས་བསལ་བའི་དགྲ་ངོ་ཅུང་ཟད་ཙམ་ཡིན་མོད། མཐའ་གཅིག་ཏུ་མ་ངེས། དེ་འདྲ་མེད་ཕན་ཆད་སྐྱོན་མེད། ལྕགས་ནང་ལ། སྟག་ཡོས་ལོ་པ་ཡོད་ན་ནུབ་བམ་ལྷོ་ནས་དགྲ་ངོ་དང༌། བྱང་ནས་རྐུན་ངོ་ཡིན། དེ་དག་མེད་ན་ལྷོ་ནས་དམིགས་བསལ་བའི་དགྲ་ངོ། །ལྷག་མ་གོང་
བཞིན། ཆུ་ནང་ལ། རྟ་སྦྲུལ་ལོ་པ་ཡོད་ན་བྱང་དང་མཚམས་ནས་དགྲ་དང༌། ཤར་ནས་རྐུན་ངོ༌། །མེད་ན་མཚམས་ནས་དམིགས་བསལ་ཅན་གྱི་དགྲ་ངོ། །ལྷག་མ་གོང་བཞིན། མདོར་ན་དགྲ་ཕྱྭ་ལ་ལྷག་པར་གལ་ཆེ་བ་ནི་རླུང་རྟ་ཡིན་པས་གཙོ་བོར་དེ་ཉིད་ཀྱིས་སྟངས་གཅོད་བྱའོ། ༈ །བཞི་པ་སྲོག་ཆོས་སྲིད་དོན་སོགས་དུས་ཚོད་ལས་རྣོ་སྟངས་གཅོད་པ་ལ། སྲོག་ཕྱྭ། སྲིད་ཕྱྭ། བུ་ཆུང་གི་མཐུ་ཕྱྭ། དོན་ནམ་བློ་ཕྱྭ། ནད་ཕྱྭ། གདོན་ཕྱྭ། བོར་སྟོར་རྙེད་མིན། མགྲོན་ཕྱྭ། ཆོས་ཕྱྭ་རྣམས་སུ་ཡོད་པའི། དང་པོ་ནི། དུས་ཚོད་ཀྱི་སྲོག་སོགས་བཞི་དང་བརྩི་བྱའི་སྲོག་སོགས་བཞི་པོ་ནང་འཐབ་ལ། ཕྲད་ཀྱི་འབྲས་བཤད་འབའ་ཞིག་གིས་ལེགས་ཉེས་ལུང་སྟོན་པ་ནི། འབྱུང་བ་མ་ཕྲད་གྲོགས་ཕྲད་རབ། བུ་ཕྲད་འབྲིང༌། ནང་ཕྲད་འགྱུར་ལྡོག་ཅན། དགྲ་ཕྲད་ཤིན་ཏུ་ངན་པ་སྟེ་སྤྱི་ཁོག་དེ་ལྟར་དཔྱད་ལ། ཁྱད་པར་དུས་ཚོད་དེ་ཉིད་བརྩི་བྱའི་ལོའི་བདུན་ཟུར་དང་བཞི་གཤེད་ལ་བབ་པའམ་ན་ཤི་དུར་ཀེགས་དང་སྲོག་དགྲ་གཤེད་དུ་སོང་བ་རྣམས་ཤིན་ཏུ་ངན་པས་དེ་དག་ལ་ཞིབ་ཏུ་དཔྱད། འདི་དང་གོང་སྨོས་ཀྱི་གཞི་ཕྱྭ་གཉིས་ཀར་པགས་པ་ལོའི་འབྲས་བཤད་དང༌། རུས་རྩིས་སྤར་ཁའི་རྣམ་བཞག་དང༌། ཤ་རྩིས་སྨེ་བའི་རབ་དབྱེ་སྟེ་འདི་གསུམ་ཤིན་ཏུ་གལ་ཆེ་བར་ཡོད་པས་གཙུག་ལག་པད་ཚལ་ལས་ཤེས་པར་
བྱའོ། །དེའང་སྐྱེས་དར་སྲོག །རྒན་བྱིས་ལུས། བུད་མེད་དབང་ཐང༌། ཡོན་ཏན་ཅན་ལ་རླུང་རྟ་གལ་ཆེན་བྱ་ཞིང་བརྩི་བ་ནི། སྔར་ནས་ཀྱང་ཤུགས་བསྟན་དུ་གླེང་ཟིན་ཏོ། །གཉིས་པ་ནི། དང་པོར་བརྩི་ཡུལ་ཁྱོ་ཤུགས་གཉིས་ཀའི་སྲོག་སོགས་བཞི་རེ་རེ་ནས་དུས་ཚོད་དང་འཐབ་སྟེ་བརྩིས་ལ། དཔྱད་ལུགས་ལ་སྤྱིར་ཕོ་མོ་གཉིས་ཀ་དང་ཁྱད་པར་ཕོའི་སྲོག་རླུང་གཉིས་དར་ན། སྲིད་དུ་བུ་བཙའ་ངོ། གཙོ་བོར་བརྩི་བྱའི་ལུས་དབང་དར་ཞིང་སྲོག་རླུང་གི་ཁམས་རྣམས་ཞན་ན། སྲིད་དུ་བུ་མོ་འབྱུང་བའི་ལྟས་ཡིན། སྲོག་རྒུད་ན་ལུས་དབང་ཐང་རླུང་རྟ་གསུམ་དར་ཡང་སྲིད་ལ་རྐུན་བུ་མེད་པའི་སྔ་ལྟས་ཙམ་ལས། སྲིད་བུ་འབྱུང་བའི་ལྟས་མ་ཡིན་ལ། བརྩི་བྱའི་སྲོག་དབང་ཀླུང་རྟ་གསུམ་རྒུད་ཅིང་ལུས་འབའ་ཞིག་དར་ན་སྲིད་ཅུང་ཟད་འབྱུང་ལྟས་ཡིན་ཡང་མི་མཐུན་པའི་འགལ་རྐྱེན་མང་བར་ལུང་སྟོན། དབང་ཐང་ཁོ་ན་ཙམ་ཞིག་དར་ཡང་ལྷག་མ་རྣམས་རྒུད་ན་སྲིད་མྱུར་དུ་མི་འབྱུང་ཡང་རིམ་གྲོ་རྒྱ་ཆེར་བྱས་ན་འབྱུང་བའི་ལྟས་ཡིན། དེ་སོགས་གཞན་ཡང་རིག་པའི་རྣམ་འཕྲུལ་གྱིས་དཔག་པར་བྱའོ། །གཞན་དུ་ན་སྲོག་སོགས་ཐམས་ཅད་རྒུད་ན་རབ་ཆད་དང༌། ཐམས་
ཅད་དར་ན་སྲིད་ཤིན་ཏུ་རྒྱས་པའི་ངོ་ཡིན་ནོ། །ཡང་ཤིང་སོགས་འབྱུང་བ་དེ་རྣམས་བརྩི་བྱ་དང་གྲོགས་ཕྲད་དུ་གྱུར་ན་སྲིད་ཀྱི་གྲངས་འཛིན་བྱ་བ་ནི། ཤིང་གཅིག་ཆུ་གཉིས། མེ་གསུམ། ས་བཞི། ལྕགས་ལ་ལྔ་སོགས་མ་ངེས་པའི་སྒོ་ནས་ལུང་དུ་སྟོན་མོད་ཀྱི། ཧ་ཅང་ཡང་ངེས་པ་མེད་དོ། །གལ་ཏེ་རྩིས་མཁན་གྱི་འདོད་པས་འབྱུང་བ་རྐྱང་དཔྱད་བྱེད་པར་སྤྲོ་ན་ནི་དེ་ལྟར་བྱ་སྟེ། འབྱུང་བ་ཤིང་དང་མེ་གཉིས་ནི་དུས་ཉེ་བར་བུ་འབྱུང་བའི་ངོ་ཡིན་ཞིང༌། ས་དུས་ཕྱི་དལ་ཆེ་བའི་ལྟས་དང༌། ལྕགས་དུས་སྲིད་དཀོན་པའི་ངོ༌། །ཆུ་དུས་བུ་མོ་བཙའ་བའི་མཚན་མ་རྣམས་སུ་གཟུང་ངོ། །གསུམ་པ་ནི། བརྩི་བྱ་བུ་ཆུང་གི་སྲོག་སོགས་བཞི་དང་དུས་ཚོད་ཀྱི་སྲོག་སོགས་བཞི་འཐབ་ལ། རྩིས་འབྲས་ནི། །སྲོག་མ་དང་ཕྲད་ན་ཚེ་རིང༌། ལུས་མ་དང་ཕྲད་ན་ནད་མེད། དབང་ཐང་མ་དང་ཕྲད་ན་ལོངས་སྤྱོད་འཕེལ། རླུང་རྟ་མ་དང་ཕྲད་ན་གདོན་ལས་གྲོལ་བའི་དགེ་ལྟས་དང༌། དེ་བཞིན་དུ་སྲོག་སོགས་བཞི་བུ་ཕྲད་ལ། གོ་རིམ་ལྟར། སྲོག་ལ་སྲི་རྐུན་འཇུག་ལུས་ལ་ནད་གཟེར་ཕྲན་བུ། དབང་ཐང་ལ་སྡུག་བསྔལ་སྣ་ཚོགས། རླུང་རྟ་ལ་བྱད་གདོན་སྣ་ཚོགས་ཏེ་སྤྱིར་
བཏང་དང༌། དེ་དག་ལས་ཀྱང་ཁྱད་པར་བའི་རྣོ་སྟངས་དབང་ཐང་གིས་གཅོད་རྒྱུ་ཡིན་པས། དེ་བྱེ་བྲག་ཏུ་བཤད་ན། ཤིང་བུ་མེ་ཕྲད། རིམས་ངོ་ཡམས་ངོ་དང་ཆུང་སྲི་ཁ་དམར་གྱིས་འཚེ་བའི་ལྟས། མེ་བུ་ས་ཕྲད། སྤྱིར་མ་ལ་ངན་ཞིང་ཁྱད་པར་དུ་ས་བདག་ཀླུ་གཉན་གྱི་གདོན་ངོ། །ས་བུ་ལྕགས་འཕྲད། གཡང་སར་ལྷུང་བ་དང་བཙན་ཐེལ་གྱི་བྱུར་ངན་ལྡང་བའི་ལྟས། ལྕགས་བུ་ཆུ་འཕྲད། ཤི་འདྲེ་གནོད་ཅིང་གཤིན་པོའི་ཤི་རྒབ་མཆོད་པའི་ངོ། །ཆུ་བུ་ཤིང་ཕྲད། ཕ་མེས་ཀྱི་ཤི་གཤེད་གནོད་དེ་སྲིད་ཕྱྭ་ཤིན་ཏུ་གཟན་པའི་རྟགས་སོ། །འོན་ཀྱང་ཕའི་སྲོག་སོགས་བཞི་དང་དུས་ཚོད་འཐབ་ན་དབང་ཐང་ཡང་གཙོ་ཆེར་བྱེད་མོད་བུ་ཆུང་ཁོ་རང་གི་སྲོག་སོགས་དང་འཐབ་ན་ལུས་ཀྱི་ས་མལ་ཉིད་དབང་བཙན་པར་མཐོང་ངོ༌། །ཡང་སྲོག་སོགས་བཞི་པོ་དགྲ་དང་འཐབ་ན་གོ་རིམ་བཞིན་དུ། ཚེ་ལ་བར་ཆད་དང༌། ལུས་ཀྱི་ན་ཚ། བཀྲེན་ལྟོགས་ཀྱི་དབུལ་ཕོངས། གདོན་བགེགས་ཆེ་བའི་རྟགས་ཡིན། འབྱུང་བ་ནང་ཕྲད་ལ། རིག་པས་དཔག་སྟེ་གདོན་ངོས་འཛིན་དང༌། དེ་དང་བསྟུན་པའི་རིམ་གྲོ་ལུང་དུ་སྟོན་ཞིང༌། ནམ་ཕུགས་སུ་སྐྱོན་མེད་པར་སྟངས་གཅོད་བྱེད་དོ། ༈ །བཞི་པ་ནི། དོན་འདི་ལ་དབང་ཐང་གི་
ཁམས་འབའ་ཞིག་གཙོ་ཆེ་བས། བརྩི་བྱ་དང་དུས་ཚོད་ཀྱི་དབང་ཐང་འཐབ་སྟེ་བརྩིས་པས། མ་དང་ཕྲད་ན་ལར་བཟང་ཡང་ཅུང་ཟད་ཕྱི་དལ་ཆེ་བའི་ངོ་ཡིན་ཞིང༌། བུ་དང་ཕྲད་ན་དོན་དང་བྱུར་གཉིས་ཀ་མེད་པའི་ངོ་ཡིན། དགྲ་དང་ཕྲད་ན་བསམ་པའི་དོན་ཚུར་མི་འོང་སྟེང་དུ་མི་འདོད་པའི་སྡུག་བསྔལ་གཉའ་བར་འབབ་པའི་ལྟས་ཡིན། གྲོགས་དང་ཕྲད་ན་ཇི་ལྟར་འདོད་པའི་དངོས་པོ་དེ་ཉིད་མྱུར་དུ་འགྲུབ་པའི་ལུང་སྟོན། ནང་ཕྲད་ལ། ཤིང་མྱུར། ས་དལ། ཆུ་མཆོག་མེ་བཟང་ཡང་འགྱུར་ལྡོག་ཅན། ལྕགས་ཤོལ་སྡོད་དམ་དཀའ་ལས་ཆེན་པོས་འགྲུབ་པའི་ལྟས་ཏེ། འདི་དག་ནི་རགས་པ་ཙམ་མོ། །གཞན་དུ་ན་ཤིང་གྲོགས་ས་དང་འཕྲད་ན་ཤར་ཕྱོགས་ཀྱི་ཕ་ཁུས་དོན་སྒྲུབ། གྲུབ་དོན་འབྲིང༌། མེ་གྲོགས་ལྕགས་དང་ཕྲད་ན་ལྷོ་ནས་ཞང་ཉེའི་རིགས་ཀྱི་གྲོགས་བྱེད། གྲུབ་དོན་མྱུར་ཞིང་བཟང༌། ས་གྲོགས་ཆུ་དང་ཕྲད་ན་ཤག་པོའམ་བནྡྷེའི་རིགས་ཀྱིས་གྲོགས་བྱེད། ཕྱི་དལ་ཆེ། ལྕགས་གྲོགས་ཤིང་དང་ཕྲད་ན་དམེ་ཕོའམ་མགར་བའི་རིགས་ཀྱིས་གྲོགས་བྱེད། གྲུབ་དོན་མི་འབྱུང༌། བྱུར་ངོ་ཡོད། ཆུ་གྲོགས་མེ་དང་འཕྲད་ན་བྱང་གི་མགྲོན་པོ་དང་བུད་མེད་རིགས་ཀྱིས་དོན་སྒྲུབ། ཁ་གྲོགས་ཆེ།
དོན་གྲོགས་ཆུང༌། དོན་མྱུར། ཁ་འགྱོད་ཕྲན་ཕྲིན་གྱི་ངོ། དེ་སོགས་མང་པོ་ཞིག་རིག་པས་དཔྱད་དེ་རྟོགས་སུ་ཡོད་མོད་ཀྱི་ཀུན་ཀྱང་རྩིས་མཁན་གྱི་བསམ་པ་ཉིད་ལ་ཐུག་པར་སྔར་བརྗོད་ཟིན་ཏོ། ༈ །ལྔ་པ་ནི། ཤིང་གི་དུས་ཚོད་ལ་བབ་ན་ནད་པའི་ལུས་ཀྱི་གཡས་ཕྱོགས། གློ་བ་དང༌། རྩ་རྒྱུས་མི་བདེ་བ་ལས་གྱུར་པ། གཡོ་ཞིང་བསྐྱོད་པ་རླུང་གི་རིགས་ཏེ། རྒྱལ་ནད་དང་གཉན་རིགས་ཀྱི་ནད། བཅོས་སླ་ཞིང་འཚོ་སླ་བའོ། །མེའི་དུས་ཚོད་ལ་བབ་ན། མགོ་བོ་དང་བྱང་ཁོག་སྟོད་ཀྱི་ནད། སྙིང་ནད་དང་ཁྲག་མཁྲིས་ཚད་རིགས། གཉན་དང་བཙན་གྲིབ། དྲག་ཤིང་རྩུབ་པའི་གཟེར་རྒོད་བཅོས་ཐབས་སླ་བའི་ངོ། །སའི་དུས་ཚོད་ལ་བབ་ན། ཤ་ལྤགས་ཆུ་སེར་དང༌། ཡན་ལག་བཞི། མཆིན་སྲོག་ཕོ་མཚེར་སོགས་དོན་སྣོད་ཕལ་མོ་ཆེའི་ནད། ཡང་ན་ཆམ་རིགས་སམ་སྣ་འགགས། རྒྱལ་པོ་དང་ས་བདག་གི་ནད་ངོ། །ལྕི་ཞིང་འཐིབ་པ། བཅོས་ཐབས་དཀའ་བའི་ཁམས་སོ། །ལྕགས་ཀྱི་དུས་ཚོད་ལ་བབ་ན་རྩིབ་མ་གཡོན་ཕྱོགས་སམ། མཆིན་པ་དང་རུས་པའི་ནད། སྲིན་ནམ་སྐྱུག་སྦྱོང་གི་ངོ༌། །བད་ཀན་ལས་གྱུར་པ། གྲི་བཙན་གདུག་པའི་རིགས་ཀྱི་གདོན། ནད་ཡུན་རིང་བའི་ལྟས།
ཆུའི་དུས་ཚོད་ལ་བབ་ན། བྱིང་ཁོག་སྨད་ཀྱི་ཕྱོགས། མཁལ་མ་དང་ལྒང་བའི་ཁམས་མི་མཉམ་པ་ལས་གྱུར་པའི་ངོ༌། ཁྱད་པར་དུ་ཀླུ་ནད། གྲང་བ་དང༌། དམུ་ཆུ། ཆུ་འགག་རྩ་འགྲམ་ཆུ་སེར་གྱི་ནད་རིགས། མོ་གདོན་དང་དམུ་ཐེལ་གྱི་གྲིབ། བཅོས་ཐབས་སླ་ཞིང་སོས་ལམ་རྙོགས་པའི་ངོ༌། །ནད་སློང་བའི་ཟས་རྐྱེན་ནི། ཤིང་གི་དུས་ཚོད་དུ་བྱུང་ན་ཤིང་ཐོག་དང་ཤིང་མངར་སྔོ་སྡུམ་ནས་སྲན་གྲོ་འབྲས་ཚོད་མའི་རིགས་གང་རུང་ངམ། ཤིང་མཁན་བཟོ་བོའི་རིགས་ལས་བླང་བའི་རྐྱེན་བྱས་ན་དེ་གྲིབ། མེའི་དུས་སུ་བྱུང་ན། ཇ་ཤ་རྔོན་ཟས་སྟོད་ཤ་ཁྱི་སྤྱང་གི་ཐེད་རོ་སོགས་དམར་ངན་གྱི་རིགས་བཟོ་བོའི་ལག་ནས་བྱུང་བ་ཡོད་ན་དེ་གྲིབ། སའི་དུས་སུ་བྱུང་ན། མར་ཐུད་ཁུར་བ་ཁོག་ཤའམ་ལྷུ་ཤ་ཚིལ་བུ་སོགས་སྣུམ་འབོལ་བཅུད་ཆེན་གྱི་རིགས། རྫ་མཁན་ལས་བླང་བའི་གྲིབ་ངོ་ཡིན། ལྕགས་ཀྱི་དུས་སུ་བྱུང་ན། དཀར་གསུམ་རིགས་སམ། བཅའ་བ་དང་སྒོག་པའི་རིགས། དམེ་མགར་ལས་བླང་བའི་ངོ། །ཆུའི་དུས་སུ་བྱུང་ན་བུར་ཀར་དང་ཆང་སོགས་མངར་སྐྱུར་བཏུང་བའི་རིགས་སམ་སྨད་ཤ་ལྟ་བུ་མོ་བཙུན་བུད་མེད་སོགས་ལས་བླང་བའི་ལྟས་ཏེ། འདི་དག་གདོན་ཕྱྭ་དང་
ཡང་འབྲེལ་མོད་ཀྱི། སྐབས་འདིར་ནི་ནད་ཕྱྭའི་རྟེན་འབྲེལ་གྱི་ཞར་ལ་འོང་བར་བྱས་སོ། ༈ །དྲུག་པ་ནི། ཤིང་གི་དུས་ཚོད་ལ་བབ་ན། རྒྱལ་གདོན་དང༌། རྫས་ཤིང་གི་ཉེར་སྤྱད་དམ་རས་སོགས་ལྗང་ཀུའི་རིགས། དབྱིབས་ནར་མོ་དང་གྲངས་གཅིག་ཕ་ཚན་དང་ཕུ་ནུའི་ཕྱོགས་ནས་བླང་བའམ། ཡང་ན་དེ་འདྲའི་མི་རིགས་ཞིག་གནོད་ཟེར། མེའི་དུས་ཚོད་ལ་བབས་ན་བཙན་གཤེད་གདོན། རྫས་སུ་ཟངས་ཀྱི་སྤྱད་པ་དང་ཤ་དམར་ལྤགས་དམར་སོགས་དམར་པོའི་རིགས་དབྱིབས་གྲུ་གསུམ་མདོག་དམར་པོ། གྲངས་གསུམ་ཅན་ལྟ་བུ་ཡོད་ན་ཐང༌། བནྡྷེ་ཞང་བློན་རིག་གནས་མཁན་གྱི་མི་རིགས་སམ། དེ་ལས་བླང་བའི་དཀོར་ཆ་གནོད། སའི་དུས་སུ་བབ་ན། རྒྱལ་འགོང་དམ་སྲི་དང་ཁྱད་པར་ས་བདག་གནོད། རྫས་སུ་ལྷ་ཆ་མཆོད་ཆའམ། རས་དར་སོགས་མདོག་སེར་པོ། དབྱིབས་གྲུ་བཞི་གྲངས་བཞི་ཅན། ཕྱུག་པོ་གཙོ་བོའི་རིགས་ལས་རྩིབས་མ་གཡས་ཕྱོགས་ཀྱི་ཤ་ལྟ་བུ་ཞིག་བླང་བའམ། ཡང་ན་དེ་འདྲའི་མི་རིགས་གནོད། ལྕགས་ཀྱི་དུས་སུ་བབས་ན་གྲི་ཤི་གྲི་གཤེད་དང་ཕོ་འདྲེ་གྲི་བོ་གནོད། རྫས་སུ་མཚོན་ལྕགས། རིན་ཆེན་རིགས། དཀར་འོད་ཅན། དབྱིབས་ཟླ་གམ། གྲངས་ལྔ།
ཡང་ན་ཕོ་སྐྱེས་གཞོན་དར་ལས་རྙེད་པའམ། དེ་འདྲའི་མི་རིགས་གནོད། ཆུའི་དུས་སུ་བབ་ན་མོ་འདྲེའམ་ཆུ་གྲིའི་རིགས་གནོད། རྫས་སུ་ཐབ་ཁ་རེ་ཧྲུལ་ཞོན་པ་མཆིལ་ལྷམ་སོགས་དབྱིབས་ཟླུམ་པོ། མདོག་སྔོ་ནག་གང་རུང༌། གྲངས་གཉིས་ཅན་ཡོད་ན་ཐང༌། སྨན་དར་མའམ་གཞན་ཡང་བུད་མེད་ཀྱི་རིགས་ལས་བླང་བའི་རྫས་སྤྱད་དང་མི་རིགས་དེ་འདྲ་གནོད། གདོན་ནོར་གར་ཡོད་ཀྱི་ཕྱོགས་དང་སྣོད་སྤྱད་ངོས་འཛིན་ནི། ཤིང་ལ་བབ་ན་ཁྱིམ་གྱི་ཤར། སྦྲའམ་ཁང་པའི་གཡས་ཕྱོགས། ལུས་ཀྱི་ལོག་འགྲམ་གཡས། མལ་སའི་གཡས་ངོས་ལྟ་བུར། ཤིང་སྣོད་ཀྱི་རིགས་ཤུབ། སྒམ། པར་བུ་སོགས། ཡང་ན་ཤིང་གི་ཁམས་གང་རིགས་དང་ལྷན་ཅིག་པར་ཡོད་ཟེར། དེ་འདྲ་མེད་ན་རས་དྲིལ་དང་གལ་ལྟ་སྔོན་པོའམ་ལྗང་ཀུའི་ནང་ན་ཡོད་ངོ་ཡིན། མེ་ལ་བབ་ན། ཁྱིམ་གྱི་ལྷོ། སྦྲའམ་ཁང་པའི་ཕུག །ལུས་ཀྱི་མགོ་དང་རྐེ། མལ་སའི་སྔས་ཕྱོགས་དང༌། སྣོད་དུ་ཝ་སྤྱང་གི་པགས་པའི་རྐྱལ་བུའམ་ལྗོན་དམར་དང་ཟངས་ཀྱི་གབ་ཚེ་ཞྭ་གོས་སོགས་དམར་པོའི་རིགས་མེ་ཆ་དང་མེ་མདའི་ཆ་ལག་ལྟ་བུ་མེའི་རྫས་དང༌། ཡང་ན་ཐབ་ཀའི་ཟུར་སོགས་ན་ཡོད། ས་ལ་བབ་ན་སྤྱིར་ཁྱིམ་གྱི་
མཚམས་བཞི་གང་རུང༌། ཁྱད་པར་ལྷོ་ནུབ་ཀྱི་ཕྱོགས། ལུས་ཀྱི་ཡན་ལག་བཞི། སྦྲའམ་ཁང་པའི་ཟུར་མཆོག་མལ་སའི་ཟུར་བཞི་ལྟ་བུ་ཕྱོགས། དངོས་རྫས་གདུ་བུ་དང་ཆུན་འཕྱང་སོགས་རྫས་སྣོད་དམ་ས་རྗེན་ལ་བསྟེན་པ། ལྕགས་ལ་ཁྱིམ་གྱི་ནུབ་ཕྱོགས། སྦྲ་ཁང་དང་ལུས་སམ་མལ་ཆའི་གཡོན། རས་སོགས་དཀར་པོའི་སྣོད་དམ། ཁྲོ་ལྕགས་སོགས་རིན་པོ་ཆེའི་སྣོད་དུ་ཡོད་ན་ཐང༌། ཡང་ན་ལྕགས་ཆ་དང་ལྷན་ཅིག་ཡོད་ཟེར། དངོས་རྫས་འོད་ཅན་དང་ཕྲ་རྒྱན་ཅན་གྱི་རིགས་ཡིན། ཆུ་ལ་བབ་ན། ཁྱིམ་གྱི་བྱང༌། སྦྲའམ་ཁང་པའི་སྒོ་འགྲམ། ལུས་ཀྱི་སྨད་ཆ། མལ་སའི་རྟེན་མ་སོགས་ཕྱོགས་དང༌། སྣོད་དྲིལ་སྔོན་པོའམ་ཆུ་རླུང་མི་ཆགས་པ་སྒྱེ་ཧྲུལ་ལྟ་བུ། ཡང་ན་རྫ་བུམ་སོགས་ཆུ་སྣོད་དུ་ཡོད། ཡང་ན་འབྱུང་བ་ལྔ་གོ་རིམ་བཞིན་དུ། ཤིང་གཉན་བཅད་པ་སོགས་ཤིང་གི་ལས། རི་གཉན་ལ་མེ་བཏང་བ་སོགས་མེའི་ལས། ས་ལྡད་དུར་ལྡད་དང་ས་རྐོ་རྡོ་རློག་སོགས་སའི་ལས་དང་བྱད་ཁ་དང་བྲག་གཉན་གཤིག་པ། ཆུ་མིག་གཉན་པོ་དཀྲུག་པ་སོགས་ཆུའི་ཉེས་པ་ལས་གྱུར་པ་སྟེ། དེ་སོགས་མང་པོ་ཞིག་འབྱུང་བ་དང་སྤར་ཁའི་སྐོར་མགོ་ལས་རྟོགས་པར་བྱ་བ་ནི། རྩིས་གཞུང་བཻཌཱུར་དཀར་
པོ་ནས་ཞིབ་ཏུ་ཤེས་པར་བྱ་ལ། ཤིན་ཏུ་རགས་པ་རེ་གཙུག་ལག་པད་ཚལ་དུའང་སྟོན་ནོ། ༈ །བདུན་པ་ནི། སྟོར་བ་ཁྱིམ་དུ་ཡོད་ན་སྒོ་ཕུག་ལོག་ཟུར་ལ་དཔྱད་ལུགས་གདོན་རྫས་ངོས་འཛིན་གྱི་སྐབས་སུ་བཤད་པ་འདི་ཉིད་ལས་ཤེས་ཤིང༌། ཕྱི་རོལ་གྱི་ས་ཕྱོགས་ལ་དཔྱོད་པ་ནི། ཤིང་གི་དུས་ཚོད་ལ་བབ་ན། གཡས་ཕྱོགས་ཀྱི་རིའམ། རིའི་གཡས་ངོས། ཤིང་ཚབ་ཚུབ་ཅི་རིགས་པའི་ནང་ན་ཡོད་དེ་མྱུར་དུ་རྙེད། མེའི་དུས་ཚོད་ལ་བབ་ན། ལྷོ་ཕྱོགས་ཀྱི་རི་མཐོན་པོའི་རྩེའམ། ས་ཤལ་དམར་པོའམ་བྲག་གི་རྒྱུད་དམར་པོ་ཡོད་པའི་ཞོལ་སོགས་ན་ཡོད་དེ་རྙེད་སླ། སའི་དུས་ཚོད་ལ་བབ་ན། ལྷོ་ནུབ་གཙོ་བོར་གྱུར་པའི་མཚམས་བཞི་གང་རུང་ངམ། མ་ཕྱོགས་ཀྱི་རི་རྒྱུད་ན་ཡོད་དེ་དཀའ། ལྕགས་ཀྱི་དུས་ལ་བབ་ན། ཉི་མ་ནུབ་ཕྱོགས་ཀྱི་རིའམ། རིའི་སྲིབ་ངོས། ཡང་ན་རི་བོའི་གཡོན་ལོག་གི་རྫ་རྒྱུད་ན་ཡོད། རྐུན་པོས་ཁྱེར་ཡང་ཐང་སྟེ་རྙེད་ཤིན་ཏུ་དཀའ། ཆུའི་དུས་ཚོད་ལ་བབ་ན། མདུན་རིའི་ཞོལ་སོགས་རིའི་ཆའམ། བྱང་ཕྱོགས་ཀྱི་ཆུ་རྒྱུད་མིག་མཐོང་གང་གི་ས་ན་ཡོད་དེ་མྱུར་དུ་རྙེད། གལ་ཏེ་མ་རྙེད་ན་རྐུན་པོའི་མི་ངོས་འཛིན་བྱ་སྟེ། ཤིང་གི་དུས་ཚོད་ལ་བབ་ན། མི་གྲངས་གཅིག་ཤར་ནས་
འོང་ཞིང༌། ལུས་བོང་རིང་བ། བློ་སྣ་མང་པོ་ཅན་གྱིས་ཁྱེར་ཏེ་ཤིང་ནང་དུ་བསྐུང༌། བོང་ཁ་གྲུ་བཞིའི་རྣམ་པ་ཅན་གཟུགས་པོ་ཐུང་ལ་སྙིང་ཁམས་ཆེ་བའི་རིགས་ཀྱིས་མྱུར་བར་བཙལ་ན་རྙེད་ཟེར། མེའི་དུས་ཚོད་ལ་བབ་ན། ལྷོ་ནས་རྐུན་པོ་ཤ་རྩ་དམར་ཞིང་གོས་དམར་ཅན་གསུམ་མམ་གཅིག་སོགས་ཀྱིས་ཁྱེར་ཏེ། ལྷོ་ཕྱོགས་ཀྱི་རྫ་དམར་པོའི་ནང་དུ་སྦས་པའམ། ཡང་ན་བཤས་ཏེ་བཞག་པའི་ངོ། རྩད་གཅོད་མ་འགྱང་ན་རྙེད་ཀྱང་སྲིད། སའི་དུས་ཚོད་ལ་བབ་ན། ལྷོ་ནུབ་སོགས་འཚམས་བཞིའི་རྐུན་མ་མི་གྲངས་བཞི་སོགས་ཀྱིས་ཁྱེར་ཏེ། རི་ཆེན་པོའི་རྒྱུད་ན་སྦས་ཡོད། བཙལ་ཀྱང་རྙེད་དཀའ་བའི་ངོ། །ལྕགས་ཀྱི་དུས་ཚོད་ལ་བབ་ན། རང་གི་དགྲ་ཟླའམ་རིགས་མི་མཐུན་པའི་རྐུན་པོ་ལྔ་སོགས་ཕྱེ་བྲལ་གྱི་རིགས་གྲངས་མ་ངེས་པ་ཤ་མདོག་སྐྱ་ཞིང་གྱོང་བས་ནུབ་ཏུ་ཁྱེར། རྫའམ་བྲག་ནག་པོའི་ཁྲོད་དུ་བསྐུངས་ཏེ་རྙེད་ཤིན་ཏུ་དཀའ། ཆུའི་དུས་ཚོད་ལ་བབ་ན། ཤ་མདོག་སྔོ་ཞིང་རིད་པ་ཁ་ཆུ་སྣ་ཆུ་དང་མིག་རྔུ་མང་བའི་རྐུན་མ་མི་གཉིས་པ་ཞིག་བྱང་ཕྱོགས་ཀྱི་ཆུ་རྒྱུད་ནས་ཁྲིད་དེ་སོང༌། རྙེད་ངོ་ཆེན་པོ་ཡོད། བརྒྱད་པ་ནི། འདྲི་བ་པོ་དང་མགྲོན་པོ་གང་ཡང་རུང་བའི་སྲོག་སོགས་བཞི་དང༌། དུས་ཚོད་ཀྱི་སྲོག་སོགས་བཞི་དང༌། དུས་ཚོད་ཀྱི་སྲོག་
སོགས་བཞི་ནང་འཐབ། ཁྱད་པར་དུ་མགྲོན་པོ་ཁོ་རང་བརྩི་བྱར་བཞག་པ་འདི་རྣོ་ཚབས་ཆེ། དེ་ལ་སྲོག་མ་འཕྲད་དང་གྲོགས་འཕྲད་མགྲོན་པོ་འཚོ། ལུས་མ་ཕྲད་ལུས་ཟུང་བདེ། དབང་ཐང་མ་འཕྲད། དོན་བཟང་འགྲུབ། རླུང་རྟ་མ་འཕྲད། དགྲའི་ཉེ་ཞོ་མེད། སྤྱིར་མ་ཕྲད་ལ་རང་ས་མ་མནན་ན་ཕྱི་དལ་ཆེ་བའི་ངོ་ཡིན། སྲོག་བུ་ཕྲད་སྡངས་སྐྲག་གི་ངོ་ཡིན། ལུས་མ་འཕྲད། ནད་ངོ་ཆེ། དབང་ཐང་བུ་ཕྲད་གྱོད་གོད་ཀྱི་ངོ་ཆེ། རླུང་རྟ་མ་འཕྲད། རྐུན་ངོ་ཡིན། བུ་ཕྲད་མྱུར་དུ་སླེབ་མིན་མ་ངེས་པ་དང༌། སླེབས་ཀྱང་ཁ་འགྱོད་ཡོད་ངོ་ཡིན། སྲོག་དགྲ་ཕྲད་མགྲོན་པོ་རང་ཡུལ་དུ་ཐོན་དཀའ་བའི་ངོ། །ལུས་དགྲ་འཕྲད། ནད་ངོ་ཤིན་ཏུ་ཆེ། དབང་ཐང་དགྲ་འཕྲད། ནོར་གྱི་སྟོར་བརླག་དང་ཕམ་སྟོང་འབྱུང་བའི་ངོ། རླུང་རྟ་དགྲ་འཕྲད། དགྲ་ཁ་བཙན་ཅན་གྱི་ངོ། །དགྲ་ཕྲད་ཀྱི་སྤྱི་བཤད་ཕལ་ཆེར་བུ་ཕྲད་ཀྱི་ཕྱོགས་དང་འདྲ་བ་ལ། འདིར་ན་ཁ་འགྱོད་ཕྲན་བུ་ཙམ་ཞིག་མིན་གྱི། དེ་ལས་ཆེ་བའི་བྱུར་ངན་འགའ་ཞིག་གི་ལྟས་སོ། །གྲོགས་ཕྲད་རྣམས་མ་འཕྲད་དང་འདྲའོ། །ནང་ཕྲད་ནི་གོང་དུ་སྨོས་པའི་འབྱུང་བ་རྐྱང་དཔྱད་ཀྱི་སྐོར་མགོ་དང་སྦྱར་བས་ཆོག་དེ་རྣམས་ཐག་རིང་གི་མགྲོན་པོ་དོ་གལ་ཆེན་པོའི་དབང་དུ་བྱས་
ནས་བཤད་ལ། ཐག་ཉེའི་མགྲོན་ཉི་ཚེ་ཡིན་ན་ནི། དབང་ཐང་ལ་བརྩིས་པས་འགྲུབ་སྟེ་མ་ཕྲད་ཕྱི་དལ། བུ་ཕྲད་ཁ་འགྱོད། དགྲ་ཕྲད་དོན་མེད་སྟོང་པའམ་གཏམ་ངན། གྲོགས་ཕྲད་ཁ་གསལ་དང་དོན་འགྲུབ་པའི་ངོ། །ནང་ཕྲད་ཀྱི་ཤིང་ཆུ་མེ་གསུམ་མྱུར། ས་ལྕགས་དལ་བའམ། ཡང་ན་རང་ས་ནོན་ངོ༌། །འབྱུང་བ་རྐྱང་དཔྱད་དང་ཕྲད་ཀྱིས་འབྲས་རྩིས་གང་ལའང་སྦྱར་དུ་རུང་བ་ནི། ཤིང་གི་དུས་ལ་བབ་ན་མི་ལྗང་རྟ་ལྗང་གི་མགྲོན་པོ་ཡིན་ན་ཐང་སྟེ་ཞག་གཅིག་ཚུན་ལ་སླེབ་པར་འདུག་ཟེར། མེའི་དུས་ལ་བབས་ན། མི་དམར་རྟ་དམར་ཅན་ཡོད་ན་ཐང་སྟེ་ཞག་གསུམ་ནས་སླེབ་ངོ་ཡིན་འོན་ཀྱང་དང་པོ་ཀྲོགས་སེ་ལང༌། བར་དུ་ཙེན་ནེར་བསྡད། ཐ་མ་ཡུལ་གཞན་དུ་སོང་ངམ་མ་སོང་ཆ་མེད་དེ་འཕོ་འགྱུར་ཆེ་ཟེར། སའི་དུས་ཚོད་ལ་བབས་ན། མི་སེར་རྟ་སེར་ཅན་ཡོད་ན་ཐང་སྟེ། དེ་སྔོན་རང་ས་མ་ནོན་ན་ཕྱི་དལ་ཆེ། ཡང་ན་ཞག་བཞི་ནས་སླེབ་ཟེར། ལྕགས་ཀྱི་དུས་ཚོད་ལ་བབས་ན། མགྲོན་པོ་མི་དཀར་རྟ་དཀར་ཅན་ཡོད་ན་ཐང་སྟེ་ཕྱི་དལ་ཤིན་ཏུ་ཆེ། ཡང་ན་ཞག་གྲངས་ལྔའི་འཕྲོར་སླེབ་ཟེར། ཆུའི་དུས་ཚོད་ལ་བབས་ན། མགྲོན་པོ་མི་སྔོན་རྟ་སྔོན་ཅན་ཡོད་ན་ཐང་སྟེ། མགྱོགས་ངོ་ཡོད། ཞག་གཉིས་ནས་སླེབ་བོ། །
འབྱུང་བའི་ཁ་དོག་གི་དབང་དུ་དེ་ལྟར་བཤད་ཀྱང་གཞན་དུ་ན་ནག་པོ་དང་ངང་པ་ལ་སོགས་པ་འོག་རྟའི་པགས་མདོག་ཐ་དད་པ་རྣམས་ཀྱང་ཁ་དོག་གི་སྡེ་ཚན་འདི་དག་གི་ཁོངས་སུ་བསྡུ་ལ། ༈ ཡང་མགྲོན་པོ་མྱུར་དུ་སླེབ་མིན་ལ། ཤིང་གྲོགས་ས་ལྟ་བུ་ཞིག་བྱུང་ན་གྲོགས་ཕྲད་ཁ་གསལ་དང༌། ས་ཕྱི་དལ་ཡིན་པས་གཏམ་གསལ་ཐོས་ཤིང་མགྲོན་པོ་མྱུར་དུ་མི་འོང་བའམ། ལར་དལ་མྱུར་གཉིས་ཀྱི་ནང་ནས་མྱུར་ཚབས་ཆེ་ཡང༌། ད་ལྟ་ད་ལྟར་སླེབ་ཡོང་ཟེར་རྒྱུ་ཙམ་རྔོ་མི་ཐོགས་པ་ཞིག་ཡིན་ནོ། །དེ་སོགས་རིགས་པའི་རྣམ་འཕྲུལ་གྱིས་དཔྱད་ཤེས་པར་བྱའོ། །དགུ་པ་ནི། བརྩི་བྱའི་རླུང་རྟ་དང༌། དུས་ཚོད་ཀྱི་རླུང་རྟ་འཐབ། འབྲས་བཤད་ལ་ཕྲད་དང་རྐྱང་དཔྱད་གཉིས་སུ་ཕྱེ་བའི་དང་པོ་ནི། མ་ཕྲད་དང་གྲོགས་ཕྲད་བཟང༌། བུ་ཕྲད་འབྲིང༌། དགྲ་ཕྲད་ངན། ནང་ཕྲད་རྣམས་ཀྱི་རྣམ་བཞག་རྐྱང་དཔྱད་ལྟར་བྱའོ། །གཉིས་པ་ནི། ཤིང་བབ་སྐྱེས་བུ་དར་མའི་ཆོས་ཕྱྭ་ལ་བཟང་ཞིང༌། དེས་མཚོན་ཏེ་བཙུན་པའི་ཆོས་ཕྱྭར་མེ། འཕན་ཕྱུག་ཅན་ལས། དམེ་ཕོ་སྡིག་ཅན་ལ་ལྕགས། ཇོ་མོ་དང་བུད་མེད་ལ་ཆུ་ཉིད་མཆོག་གོ་གཞན་ཡང་འབྱུང་བའི་ཁ་དོག་མཐུན་སྡེབ་ལ་བརྟེན་ནས་ཚོང་ནོར་ཤེས་པ་དང་མི་ཤེས་པའི་ཤན་འབྱེད་བྱ་
བ་སོགས་མང་པོ་ཞིག་ཡོད་དེ། བྲི་བར་མ་ནུས་སོ། །དེ་ལྟར་རྩིས་འབྲས་གཙོ་བོའི་རིགས་རྣམས་བརྗོད་ཟིན་ནས། ༈ །ད་ནི་རྣོ་སྟངས་གཅོད་པའི་ཐོར་བུའི་རིགས་འགའ་ཞིག་མདོར་བསྡུས་སུ་བཤད་པར་བྱ་སྟེ། གང་གི་ཚེ་རྟེན་འབྲེལ་ཞུ་བ་པོ་དེའི་གཉེན་འདུན་དང་འོག་རྟ་སོགས་གར་ཡོད་ཀྱི་ཕྱོགས་བསྟན་པ་ལ། དུས་ཚོད་ཀྱི་འབྱུང་བ་གར་བབས་དེའི་མ་ཕྱོགས་སམ་བུ་ཕྱོགས་གང་རུང་གཉེན་འདུན་ཐ་མལ་བའི་ས་དང༌། གྲོགས་ཕྱོགས་མཛའ་བོ་སྙིང་དམར་ཅན་གྱི་ས་ཡིན། སྒོ་ཁྱི་རང་ཕྱོགས་དང་འོག་རྟ་གྲོགས་ཕྱོགས། རྟ་དང་ཁྱིའི་ཁ་དོག་དང་ལུས་དབྱིབས་རང་མཐུན། ཁྱིམ་གྱི་སྒོ་རང་ངམ་མ་ཕྱོགས། གདོན་བགེགས་རང་དང་དགྲ་ཕྱོགས། དགྲ་ཕྱོགས་སུ་མི་མཐུན་པའི་དགྲ་ཡོད་པ་སྟེ། དཔེར་བརྗོད་བྱས་ན། འབྱུང་བ་ཤིང་གི་དུས་སུ་རྟེན་འབྲེལ་ཞུ་མི་བྱུང་ན་དེའི་གཉེན་འདུན་བྱང་དང་ལྷོ་ན་ཡོད། ཤིན་ཏུ་སྡུག་པའི་གྲོགས་གཅིག་ལྷོ་ནུབ་གཙོ་བོར་གྱུར་པའི་མཚམས་བཞི་གང་རུང་ཞིག་ན་གནས། སྒོ་ཁྱི་ལུས་རིང་ར་སྔོན་མདོག་ཅན་གཅིག་ཤར་ན་ཡོད། འོག་རྟ་ར་སྔོན་མདོག་ཡོད་ན་ཐང་སྟེ། གྲངས་གཅིག་གམ། བཅུ་གཅིག་དང༌། ཉེར་གཅིག་སོགས་གཅིག་ཅན་གང་རུང་ཞིག་ཡོད། རྟ་འདོགས་ས་ལྷོ་ནུབ་ལྟ་བུའམ་མཚམས་ཀྱི་གྲ་ཞིག་
ཏུ་བྱེད། སྒོ་བྱང་ངམ་ཤར་དུ་ལྟ་བ་ཡོད། གནོད་པའི་གདོན། ཤར་ནུབ་གང་རུང་དང༌། ནུབ་ཕྱོགས་ན་དགྲ་ཟླ་སྐྱེས་བུ་དར་མའི་རིགས་ཤིག་ཡོད་ཟེར། དེ་བཞིན་དུ་མེ་ལ་སྒོ་ཁྱི་ལུས་དབྱིབས་མཐོ་ཞིང་མགོ་ཆེ་བ་དམར་པོའི་རིགས་ས་ལ་བབས་ན། སྒོ་ཁྱི་ལུས་བོང་ཐུང་ཞིང་ཤ་འཐུག་པ་རྒྱ་སེར། ལྕགས་ལ་སྒོ་ཁྱི་དཀར་པོའམ་དཀར་མཚན་ཅན་ལུས་བོང་ཆེ་ཞིང་གཏུམ་པ། ཆུ་ལ་སྒོ་ཁྱི་ལུས་བོང་ཆུང་ལ་མདོག་སྔོན་པོ་ཁྱི་མོའི་རིགས། དེ་སོགས་ལྷག་མ་རྣམས་གོ་སླའོ། །གཞན་ཡང་བྱ་ར་དང་ཕྱེད་ཡོལ། ཐིག་སྡོང་སྟེ་དེ་གསུམ་བརྩི་གཞིར་བྱས་ནས་གཅོད་འདྲལ་དང་དར་རྒུད་ཀྱི་རྩིས་འབྲས་བརྟགས་པ་སོགས་ངོ་མཚར་ཅན་གྱི་གཏམ་དང༌། ཁྱད་པར་མན་ངག་གི་རྩིས་འདིའི་རྣམ་བཞག་རྒྱས་པ་རྡེལ་ཞག་བཅུ་གསུམ་པ། འབྲིང་པོ་རྡེལ་ཞག་དྲུག་པ། བསྡུས་པ་རྡེལ་ཞག་བཞི་པ། ཤིན་ཏུ་བསྡུས་པ་རྡེལ་ཞག་གཉིས་པ་སྟེ། དོན་གྱི་རླབས་ཆེ་ཞིང་བློ་གསལ་དགའ་བ་བསྐྱེད་པའི་ཚུལ་མང་པོ་ཞིག་བཤད་པ་ཡོད་མོད་ཀྱི། རེ་ཞིག་དེ་ཙམ་མོ། །དྲིལ་ན་སོར་གསུམ་རྩེ་མོའི་འཕྲུལ་འདེགས་ཏེ། །བཀྲལ་ན་རྟེན་འབྲེལ་སྒོ་བརྒྱའི་དོན་སྟོན་པ། །འབྱུང་རྩིས་གཙུག་ལག་རྒྱ་མཚོའི་མེ་
ལོང་འདི། །བློ་གསལ་བླང་དོར་བལྟ་བའི་མིག་ཀྱང་ཡིན། །དེ་སླད་སྔོན་བྱུང་མཁས་པའི་མན་ངག་འདིར། །དགའ་དང་གུས་པའི་ཉམས་བརྒྱས་འདར་བཞིན་དུ། །ཆུ་སྐྱར་ཆུ་བོ་མཐོང་ལྟར་ཞུགས་ཤིག་དང༌། །ལུང་སྟོན་བདེན་པའི་ཚིག་འབྱུང་བསླུ་བ་མེད། །ཞེས་པའང་རང་ཉིད་གཙུག་ལག་གི་སྒོ་འདིར་བག་ཆགས་འཇོག་པ་དང༌། ཁྱད་པར་ད་ལྟའི་དུས་ན་གཡོན་ཅན་གྱི་ཟོག་པོ་ཕལ་ཆེར་ཞིག་མངོན་མཁྱེན་དུ་སྙད་བཏགས་པའི་སྟོང་ཟོབ་ཁོ་ནས་སྣང་བ་བྲིད་དེ་ལག་རྩིས་འདི་ཙམ་ལའང་དཔེ་མཁྱུད་ཀྱི་ཉེས་པ་མ་བཟད་པར་གསོག་པར་མཐོང་ནས་སྟོང་ཟོབ་ཁོ་ནས་དེ་དག་གི་རྫུན་ཁུང་འདོན་པའི་ཕྱིར་རྡོ་ཤོད་སྲིན་མོའི་རྫོང་གི་སྤྲང་རྒན་གསལ་བྱེད་ཀྱི་ང་རོ་གསུམ་པའི་ཡི་གེ་སྲོག་ཏུ་ཞུགས་ཤིང༌། དེ་འོག་ལྔ་པའི་དང་པོ་དབྱངས་བཅུ་གསུམ་པའི་སྙིང་པོ་ཅན་གྱི་གྲགས་པས་བཅིངས་པའི་བྷུ་སུ་ཀུ་ཞིག་གིས་སྦྱར་བ་དགེ་ཞིང་བཀྲ་ཤིས།། །།