བྱང་ཆུབ་ལམ་གྱི་རིམ་པ་ལ་འཇུག་པ།
༈ རྗེ་བཙུན་བླ་མ་དམིགས་པ་མེད་པའི་ཐུགས་རྗེ་ཆེན་པོ་དང་ལྡན་པ་ལ་ཕྱག་འཚལ་ལོ། །འདིར་བྱང་ཆུབ་ལམ་གྱི་རིམ་པ་ལ་འཇུག་པ་ལ། ཐོག་མར་ལམ་ཐམས་ཅད་ཀྱི་རྩ་བ་དགེ་བའི་བཤེས་གཉེན་བསྟེན་པ་དང༌། དགེ་བའི་བཤེས་གཉེན་གྱིས་ཇི་ལྟར་ཁྲིད་པའི་རིམ་པ་བཞིན་དུ་བསྟན་པ་ལ་བློ་སྦྱང་ཚུལ་གཉིས་ཡོད། དང་པོ་ལམ་ཐམས་ཅད་ཀྱི་རྩ་བ་དགེ་བའི་བཤེས་གཉེན་བསྟེན་ཚུལ་ནི། བསྟེན་བྱ་དགེ་བའི་བཤེས་གཉེན་གྱི་མཚན་ཉིད། དེ་བསམ་སྦྱོར་གཉིས་ཀྱི་སྒོ་ནས་ཇི་ལྟར་བསྟེན་ཚུལ། དེ་བསྟེན་པའི་ཕན་ཡོན་མ་བསྟེན་པའི་ཉེས་དམིགས་དང་བཅས་པའི་སྒོ་ནས་བཤད་པ་ཡིན། དགེ་བའི་བཤེས་གཉེན་གྱིས་ཇི་ལྟར་ཁྲིད་པའི་རིམ་པ་བཞིན་དུ་བསྟན་པ་ལྟར་བློ་སྦྱང་ཚུལ་དེ་ལ་དལ་བའི་རྟེན་ལ་སྙིང་པོ་ལེན་པར་བསྐུལ་བ་དང༌། སྙིང་པོ་ཇི་ལྟར་ལེན་པའི་ཚུལ་དངོས་བཤད་པ་གཉིས་ཡོད། དང་པོ་དལ་བའི་རྟེན་ལ་སྙིང་པོ་ལེན་པར་བསྐུལ་བ་ནི། དལ་འབྱོར་རྙེད་དཀའ་སྒོམ་ཚུལ་གྱིས་བསྟན། སྙིང་པོ་ཇི་ལྟར་ལེན་པའི་ཚུལ་དངོས་བཤད་པ་དེ་ལ། སྐྱེས་བུ་གསུམ་གྱི་
ལམ་སྤྱིའི་རྣམ་བཞག་དང༌། བྱེ་བྲག་སོ་སོའི་ལམ་གྱི་རྣམ་བཞག་བཤད་པ་གཉིས་ཡོད། དང་པོ་དེ་ལ་སྐྱེས་བུ་གསུམ་གྱི་ལམ་གྱི་གྲངས་ངེས། གོ་རིམ། སྐྱེས་བུ་གསུམ་གྱི་ལམ་དུ་བཤད་པའི་དགོས་པ། སྐྱེས་བུ་གསུམ་གྱི་ལམ་གྱི་གོ་དོན་དང་བཞི་ཡོད། དང་པོ་ནི་ལར་སངས་རྒྱས་འཇིག་རྟེན་དུ་བྱུང་བའི་དགོས་པ་ནི་སེམས་ཅན་གྱི་དོན་དུ་ཡིན་ལ། སེམས་ཅན་གྱི་དོན་ལ་མངོན་མཐོ་དང་ངེས་ལེགས་གཉིས་སུ་གྲངས་ངེས། དེའི་ཕྱིར་ན་དེ་བཞིན་གཤེགས་པའི་བསྟན་པ་རིན་པོ་ཆེ་ཡང་གནས་སྐབས་མངོན་མཐོ་དང་མཐར་ཐུག་ངེས་ལེགས་སྒྲུབ་པའི་ཐབས་ཚུལ་གཉིས་སུ་གྲངས་ངེས། དེ་ཡང་གནས་སྐབས་མངོན་མཐོ་སྒྲུབ་པའི་ཐབས་ཚུལ་དུ་གསུངས་པའི་ཆོས་སྐོར་རྣམས་ནི་སྐྱེས་བུ་ཆུང་ངུའི་ལམ་གྱི་ཆོས་སྐོར་དང༌། ཆུང་ངུ་དང་ཐུན་མོང་བའི་ལམ་གྱི་ཆོས་སྐོར་ཅི་རིགས་སུ་མ་འདུས་པ་མེད་ནི་རེད། ངེས་ལེགས་ལ་ཐར་པ་དང་ཐམས་ཅད་མཁྱེན་པ་གཉིས་ལས། ཐར་པ་ཙམ་སྒྲུབ་པའི་ཐབས་ཚུལ་དུ་གསུངས་པའི་ཆོས་སྐོར་རྣམས་ནི། སྐྱེས་བུ་འབྲིང་གི་ལམ་གྱི་ཆོས་སྐོར་དང་འབྲིང་དང་ཐུན་མོང་བའི་ལམ་གྱི་ཆོས་འཁོར་ཅི་རིགས་སུ་མ་འདུས་པ་མེད་པ་ཡིན། ཐམས་ཅད་མཁྱེན་པ་སྒྲུབ་པའི་ཐབས་ཚུལ་དུ་གསུངས་པའི་ཆོས་སྐོར་རྣམས་ནི་སྐྱེས་བུ་ཆེན་པོའི་ཐུན་མོང་མ་ཡིན་པའི་ལམ་གྱི་ཆོས་སྐོར་དུ་མ་འདུས་པ་མེད་ནི་རེད། དེའི་ཕྱིར་ན་དེ་བཞིན་གཤེགས་པའི་བསྟན་པ་ཡོངས་རྫོགས་མདོ་ཧྲིལ་གྱིས་དྲིལ་ན་སྐྱེས་བུ་གསུམ་གྱི་ལམ་དུ་གྲངས་ངེས་པ་ཡིན། གཉིས་པ་སྐྱེས་བུ་གསུམ་གྱི་ལམ་གྱི་གོ་རིམ་ནི།
དང་པོ་སྐྱེས་བུ་ཆུང་ངུ་དང་ཐུན་མོང་བའི་ལམ་ལ་བློ་སྦྱང༌། དེ་ནས་སྐྱེས་བུ་འབྲིང་དང་ཐུན་མོང་བའི་ལམ་དུ་བློ་སྦྱང༌། དེ་ནས་སྐྱེས་བུ་ཆེན་པོའི་ཐུན་མོང་མ་ཡིན་པའི་ལམ་ལ་བློ་སྦྱང་བ་སྟེ། གོ་རིམ་དེ་ལྟར་བྱས་ནས་སྒོམ་དགོས་པ་མ་གཏོགས། དང་པོ་སྐྱེས་བུ་ཆུང་འབྲིང་དང་ཐུན་མོང་གི་ལམ་ལ་བློ་མ་སྦྱང་བར་སྐྱེས་བུ་ཆེན་པོའི་ལམ་སྒོམ་དུ་མེད་པ་ཡིན་ནི་རེད། དེའི་རྒྱུ་མཚན་སྐྱེས་བུ་ཆེན་པོའི་ལམ་གྱི་སྲོག་ཤིང་ངམ་རྩ་བ་ལྟ་བུ་ནི་སྙིང་རྗེ་ཆེན་པོ་ཡིན་པས། སྙིང་རྗེ་དེ་ནི་སེམས་ཅན་ཐམས་ཅད་སྡུག་བསྔལ་ལས་བདག་གཅིག་པུས་བསྒྲལ་བར་བྱའོ་སྙམ་པའི་བློ་གཅིག་ཡིན་ལ། བློ་དེ་ནི་ལར་དང་པོ་རང་ཉིད་འཁོར་བའི་སྡུག་བསྔལ་གྱིས་མནར་ཚུལ་ལ་བསམ་ཀྱང་འཇིགས་ཤིང་སྐྲག་པའི་བློ་ཅུང་ཟད་ཀྱང་མི་སྐྱེ་བ་ཞིག་ལ་བློ་དེ་གཏན་ནས་སྐྱེ་མི་སྲིད་པ་ཡིན་པའི་ཕྱིར་ན། འབྲིང་དང་ཐུན་མོང་བའི་ལམ་ལ་བློ་སྦྱང་དགོས། དེ་ཡང་འཁོར་བ་མཐའ་དག་སྡུག་བསྔལ་གྱི་རང་བཞིན་དུ་མཐོང་ནས་དེ་ལས་ཐར་འདོད་ཀྱི་བློ་ཤུགས་དྲག་སྐྱེ་བ་ལ་རང་ཉིད་ངན་སོང་གསུམ་གྱི་སྡུག་བསྔལ་གྱིས་མནར་ཚུལ་བསམ་ཀྱང་བ་སྤུ་གཡོ་བ་ཙམ་གྱི་འཇིགས་ཤིང་སྐྲག་པའི་བློ་ཡང་མེད་ན་འཁོར་བ་མཐའ་དག་སྡུག་བསྔལ་གྱི་རང་བཞིན་དུ་མཐོང་ནས་དེ་ལས་ཐར་འདོད་ཀྱི་བློ་དེ་སྐྱེ་ས་མེད་པས་ན་སྐྱེས་བུ་ཆུང་ངུ་དང་ཐུན་མོང་བའི་ལམ་ལ་སྔོན་དུ་བློ་སྦྱང་དགོས་ནི་རེད། དེ་ལྟར་སྐྱེས་བུ་གསུམ་གྱི་ལམ་ཡང་གོ་རིམ་འདི་ལྟར་སྒོམ་དགོས་ཀྱི། དེ་ལས་གཞན་དུ་འཆོལ་བར་སྒོམ་ན་ལམ་རྒྱུད་ལ་སྐྱེ་མི་སྲིད་པས། །
གོ་རིམ་འདི་ཁོ་ན་ལྟར་སྒོམ་དགོས་ནི་ཡིན་གསུངས། གསུམ་པ་སྐྱེས་བུ་གསུམ་གྱི་ལམ་དུ་ཕྱེ་བའི་དགོས་པ་ནི། སྤྱིར་རྒྱ་གར་འཕགས་པའི་ཡུལ་དུ་མགོན་པོ་ཀླུ་སྒྲུབ་ལ་སོགས་པའི་ཤིང་རྟ་ཆེན་པོ་དག་གིས་ནི་མངོན་མཐོ་དང་ངེས་ལེགས་སྒྲུབ་པའི་ཐབས་ཚུལ་དཔག་ཏུ་མེད་པ་གསུངས་ཀྱང༌། བསྟན་པ་ཡོངས་རྫོགས་སྐྱེས་བུ་གསུམ་གྱི་ལམ་དུ་དྲིལ་ཏེ། དེ་ཁོ་ན་ལ་རྩལ་དུ་བཏོན་ཏེ་འཆད་པ་ཆེར་མ་མཛད། ཇོ་བོ་རྗེ་ཨ་ཏི་ཤས་ནི་བྱང་ཆུབ་ལམ་གྱི་སྒྲོན་མ་མཛད་དེ། བསྟན་པ་ཡོངས་རྫོགས་སྐྱེས་བུ་གསུམ་གྱི་ལམ་དུ་བསྡུས་ཏེ། དེ་ཁོ་ན་ལ་རྩལ་དུ་བཏོན་ཏེ་བཤད་པ་ཡིན། དེ་ལྟར་བཤད་པ་ལ་དགོས་པ་གཉིས་ཡོད་དེ། བློ་རབ་འབྲིང་ཐ་མ་ལ་ཕན་ཆེ་བ་དང་མངོན་པའི་ང་རྒྱལ་ཞི་བའི་དགོས་པ་གཉིས་ཡོད། དང་པོ་ནི་གང་ཟག་བློ་རབ་སྐྱེ་བ་སྔོན་དུ་སྐྱེས་བུ་ཆུང་འབྲིང་དང་ཐུན་མོང་བའི་ལམ་ནས་བཟུང་སྐྱེས་བུ་ཆེན་པོའི་བསམ་པའི་བར་རྒྱུད་ལ་སྐྱེས་པ་ཞིག་ཡིན་ན་སྐྱེ་བ་འདིར་སྐྱེས་བུ་ཆུང་ངུ་དང་ཐུན་མོང་བའི་ལམ་ནས་བཟུང་སྟེ་བློ་སྦྱང་ན། སྔར་ལམ་རྒྱུད་ལ་སྐྱེས་ཟིན་པ་རྣམས་ནི་མངོན་དུ་གྱུར་སླ་ཞིང་དེ་ལྟར་མངོན་དུ་གྱུར་པ་ཙམ་ནས་ལམ་ཕྱི་མ་བསྣན་ནས་སྒོམ་ཆོག་པས་དེའི་ལམ་ཇེ་བུལ་དང་ལམ་ལོག་པ་ཉིད་དུ་མི་འགྲོ་བར་མ་ཟད། རང་གི་མངོན་པར་འདོད་པའི་ཡོན་ཏན་སྐྱེ་སླ་བའི་དགོས་པ་ཡོད་པས་བློ་རབ་ལ་ཕན་ཆེ་བ་དང༌། སྔོན་སྐྱེས་བུ་ཆུང་ངུ་དང་ཐུན་མོང་བའི་ལམ་ཙམ་ལའང་བློ་སྦྱང་མ་མྱོང་བའི་གང་ཟག་ཐ་མ་ལ་ནི། དང་པོ་ནས་སྐྱེས་བུ་ཆེ་འབྲིང་གི་ལམ་བསྟན་ན་རྨིང་མེད་པའི་
རྩིག་པ་བཞིན་དུ་དེའི་རྒྱུད་ལ་ལམ་གྱི་ཡོན་ཏན་སྐྱེ་བ་མི་སྲིད་པ་ཡིན་ལ། སྐྱེས་བུ་ཆུང་ངུ་དང་ཐུན་མོང་བའི་ལམ་ནས་བཟུང་སྟེ་གདམ་ངག་བསྟན་ན། དེའི་རྒྱུད་ལ་ལམ་སྐྱེ་སླ་བས་ན་བློ་ཐ་མ་ལ་ཤིན་ཏུའང་ཕན་ཆེ། བློ་འབྲིང་སྐྱེས་བུ་ཆུང་ངུ་དང་འབྲིང་གི་ལམ་གྱི་སྐལ་བ་ཅན་ཞིག་ཡིན་ན། དེ་ལ་དང་པོ་ནས་སྐྱེས་བུ་ཆེན་པོའི་ཐུན་མོང་མ་ཡིན་པའི་ལམ་རྣམས་བསྟན་ན། དེའི་བྱང་ཆུབ་སེམས་དཔའི་སྤྱོད་པ་རྒྱ་མཚོ་ལྟ་བུ་བློར་མི་ཤོང་ཞིང༌། དེ་ལ་སྐུར་པ་འདེབས་པ་སོགས་དོན་མ་ཡིན་པ་ཆེན་པོ་འབྱུང་བས་ན་དེ་ལ་སྐྱེས་བུ་ཆུང་འབྲིང་དང་ཐུན་མོང་གི་ལམ་ནས་ཁྲིད་ན། དེ་ཆུང་ངུ་དང་འབྲིང་གི་ལམ་གང་གི་སྐལ་བ་ཅན་ཡིན་ན་ཡང་རང་གི་སྐལ་བ་དང་འཚམས་པའི་ལམ་དེར་སློབ་པ་མ་གཏོགས། ཉམས་འོག་ཏུ་མི་ཚུད་པའི་ལམ་རྣམས་ལ་མ་བསླབས་ཀྱང་ཆོག་པས་དེ་དོན་མ་ཡིན་པ་ལས་ཟློག་པར་འགྱུར་བས་ན། བློ་འབྲིང་ལའང་ཕན་ཆེ་བས་ན་བློ་རབ་འབྲིང་ཐ་མ་ལ་ཕན་ཆེ་བའི་དགོས་པ་ཞེས་བརྗོད་ནི་ཡིན། མངོན་པའི་ང་རྒྱལ་ཞི་བའི་དགོས་པ་ནི། སྐྱེས་བུ་ཆུང་ངུ་དང་ཐུན་མོང་བའི་ལམ་ནི་འདིའོ། །སྐྱེས་བུ་འབྲིང་དང་ཐུན་མོང་བའི་ལམ་ནི་འདིའོ། །སྐྱེས་བུ་ཆེན་པོའི་ཐུན་མོང་མ་ཡིན་པའི་ལམ་ནི་འདིའོ། །ཞེས་བཤད་པ་ན། རང་གི་རྒྱུད་ན་སྐྱེས་བུ་ཆུང་ངུ་དང་ཐུན་མོང་བའི་ལམ་ཙམ་ཡང་མེད་བཞིན་དུ་སྐྱེ་བུ་ཆེན་པོའི་ལམ་གྱི་ཡོན་ཏན་ཡང་ཡོད་དོ་སྙམ་པའི་མངོན་པའི་ང་རྒྱལ་ཞི་བའི་དགོས་པ་ཡོད་ནི་རེད། བཞི་པ་སྐྱེས་བུ་གསུམ་གྱི་ལམ་གྱི་གོ་དོན་ནི་དཔེར་ན་སྐྱེས་བུ་ཆུང་ངུས་ཚེ་ཕྱི་མའི་འཁོར་བའི་ཕུན་ཚོགས་
ཁོ་ན་དོན་གཉེར་གྱི་བློ་དང༌། འབྲིང་གིས་རང་གཅིག་པུ་ཞི་བདེ་དོན་གཉེར་གྱི་བློ་སྐྱེད་པ་ལྟ་བུ་ནི། སྐྱེས་བུ་ཆེན་པོའི་ལམ་གྱི་སྤང་བྱ་ཡིན་པས་དེ་དང་ཐུན་མོང་མིན་ལ། འདིར་གང་ཡིན་ན། ངན་སོང་གསུམ་གྱི་སྡུག་བསྔལ་ལ་འཇིགས་ཤིང་སྐྲག་སྟེ། དེ་ལས་ཐར་འདོད་ཀྱི་བློ་སྐྱེད་པ་དང༌། འཁོར་བ་མཐའ་དག་སྡུག་བསྔལ་གྱི་རང་བཞིན་དུ་མཐོང་ནས་དེ་ལས་ཐར་བའི་ཐར་པ་དོན་གཉེར་གྱི་བློ་སྐྱེད་པ་ལྟ་བུ་ནི། སྐྱེས་བུ་ཆུང་འབྲིང་གཉིས་ཀས་ཀྱང་རང་རང་གི་གོ་འཕང་དེ་མངོན་དུ་བྱེད་པ་ལ་ལམ་དེ་ལ་བློ་མ་སྦྱང་བའི་ལྟ་བ་མེད་ལ། སྐྱེས་བུ་ཆེན་པོས་ཀྱང་རང་གི་ཐུན་མོང་མ་ཡིན་པའི་ལམ་དེ་སྐྱེ་བའི་སྟེགས་སུ་དེ་ལ་ངེས་པར་བློ་སྦྱང་དགོས་པའི་ལམ་དེ་ལ་སྐྱེས་བུ་ཆུང་འབྲིང་ཆེ་གསུམ་གྱི་ཐུན་མོང་གི་ལམ་ཞེས་བརྗོད་པ་ཡིན་པས་ཐུན་མོང་བའི་ལམ་གྱི་གོ་དོན་ནི་དེ་ལྟར་ཡིན། གཉིས་པ་བྱེ་བྲག་སོ་སོའི་ལམ་གྱི་རྣམ་བཞག་བཤད་པ་ལ་གསུམ་ཡོད། དང་པོ་སྐྱེས་བུ་ཆུང་ངུ་དང་ཐུན་མོང་བའི་ལམ་གྱི་རྣམ་བཞག་བཤད་པ་དེ་ལ། བསམ་པ་འཇིག་རྟེན་ཕྱི་མའི་ཕུན་ཚོགས་དོན་གཉེར་གྱི་བློ་སྐྱེད་པ་དང༌། སྦྱོར་བ་འཇིག་རྟེན་ཕྱི་མར་བདེ་བར་འགྱུར་བའི་ཐབས་བསྟེན་པ་གཉིས་ཡོད། དང་པོ་བསམ་པ་འཇིག་རྟེན་ཕྱི་མའི་ཕུན་ཚོགས་དོན་གཉེར་གྱི་བློ་ནི། འཇིག་རྟེན་འདིར་རིང་དུ་མི་གནས་པར་འཆི་བ་བསམ་པ་དང་ཤི་ནས་འགྲོ་བ་གཉིས་ཀྱི་བདེ་སྡུག་བསམ་པ་གཉིས་ཀྱི་སྒོ་ནས་བློ་དེ་བསྐྱེད་དགོས་ནི་རེད། སྦྱོར་བ་འཇིག་རྟེན་ཕྱི་མར་བདེ་བར་འགྱུར་བའི་ཐབས་བསྟེན་པ་དེ་ལ། བསྟན་པ་ལ་འཇུག་པའི་སྒོ་དཀོན་མཆོག་གསུམ་ལ་སྐྱབས་
སུ་འགྲོ་བ་དང༌། བདེ་ལེགས་རྣམས་ཀྱི་རྩ་བ་ལས་འབྲས་ཡིད་ཆེས་ཀྱི་དད་པ་སྦྱང་བ་སྟེ་ལས་གཉིས་ལ་བླང་དོར་བྱ་བ་སྟེ་གཉིས་ཡོད། གཉིས་པ་སྐྱེས་བུ་འབྲིང་དང་ཐུན་མོང་བའི་ལམ་གྱི་རྣམ་བཞག་བཤད་པ་དེ་ལ་ཐར་པ་དོན་གཉེར་གྱི་བློ་སྐྱེད་པ་དང༌། དེ་བསྐྱེད་ནས་ཐར་པའི་ལམ་དངོས་ལ་ཇི་ལྟར་སློབ་པའི་ཚུལ་གཉིས་ཡོད། དང་པོ་ཐར་པ་དོན་གཉེར་གྱི་བློ་སྐྱེད་པ་ལ། སྡུག་བསྔལ་དང་ཀུན་འབྱུང་བདེན་པ་ལ་བསམས་ཏེ་འཁོར་བ་ལས་ངེས་པར་འབྱུང་འདོད་ཀྱི་བློ་སྐྱེད་པ་དང༌། རྟེན་འབྲེལ་ཡན་ལག་བཅུ་གཉིས་ཀྱི་ཚུལ་བསམས་ཏེ་འཁོར་བ་ལས་ངེས་པར་འབྱུང་འདོད་ཀྱི་བློ་སྐྱེད་པ་གཉིས་ཡོད། དེའི་དང་པོ་ལ། སྡུག་བདེན་འཁོར་བའི་ཉེས་དམིགས་ལ་བསམས་ཏེ་འཁོར་བ་དང་འབྲལ་དགོས་ཚུལ་དང༌། ཀུན་འབྱུང་འཁོར་བའི་འཇུག་རིམ་ལ་བསམས་ཏེ་འཁོར་བ་དང་འབྲལ་ནུས་ཚུལ་གཉིས་བསམ་པའི་སྒོ་ནས་ཐར་པ་དོན་གཉེར་གྱི་བློ་མཚན་ཉིད་ཚང་བ་རང་གི་རྒྱུད་ལ་སྐྱེད་དགོས་ནི་རེད། གཉིས་པ་དེ་བསྐྱེད་ནས་ཐར་པའི་ལམ་དངོས་ལ་ཇི་ལྟར་སློབ་པའི་ཚུལ་ལ། སེམས་རྣམ་པར་གཡེང་བ་མེད་པར་བྱེད་པ་ལྷག་པ་ཚུལ་ཁྲིམས་ཀྱི་བསླབ་པ། སེམས་མཉམ་པར་མ་བཞག་པ་མཉམ་པར་བཞག་པར་བྱེད་པ་ལྷག་པ་ཏིང་ངེ་འཛིན་གྱི་བསླབ་པ། སེམས་རྣམ་པར་མ་གྲོལ་བ་གྲོལ་བར་བྱེད་པ་ལྷག་པ་ཤེས་རབ་ཀྱི་བསླབ་པ་དང་གསུམ་ཡོད། དེའི་ནང་ནས་ཏིང་ངེ་འཛིན་དང་ཤེས་རབ་ཀྱི་བསླབ་པ་གཉིས་ནི་སྐྱེས་བུ་འབྲིང་གི་ལམ་རང་དགའ་བར་འཁྲིད་པའི་
སྐབས་ཡིན་ན་སྐབས་འདིར་འཆད་དགོས་ན་ཡང་འདིར་སྐྱེས་བུ་ཆེན་པོའི་ལམ་གྱི་སྔོན་འགྲོར་བཤད་པའི་སྐབས་ཡིན་པས་སྐྱེས་བུ་ཆེན་པོའི་རང་གི་ཐུན་མོང་མ་ཡིན་པ་ལམ་ཕ་རོལ་ཏུ་ཕྱིན་པ་དྲུག་ལ་སློབ་པའི་སྐབས་སུ་ཕར་ཕྱིན་རྗེས་མ་གཉིས་ལ་སློབ་པར་འགྱུར་བས་ན་སྐབས་འདིར་དེ་གཉིས་འཆད་པར་མི་མཛད་ལ། ལྷག་པ་ཚུལ་ཁྲིམས་ཀྱི་བསླབ་པ་ཙམ་ཞིག་དམ་པ་གོང་མ་དག་གིས་འདིར་འཆད་པར་མཛད་ནི་རེད། གསུམ་པ་སྐྱེས་བུ་ཆེན་པོའི་ལམ་གྱི་རྣམ་བཞག་བཤད་པ་དེ་ལ་སེམས་བསྐྱེད་ཀྱི་ཕན་ཡོན་བསམ་པ། བྱང་ཆུབ་ཀྱི་སེམས་བསྐྱེད་ཚུལ། དེ་བསྐྱེད་ནས་སྤྱོད་པ་ལ་ཇི་ལྟར་སློབ་ཚུལ་དང་གསུམ་ཡོད། དང་པོ་སེམས་བསྐྱེད་ཀྱི་ཕན་ཡོན་བསམ་པ་དེ་ལ། ཐེག་པ་ཆེན་པོའི་ཡོན་ཏན་དྲན་ཞིང་དེའི་འཇུག་སྒོ་བྱང་ཆུབ་ཀྱི་སེམས་ཉག་གཅིག་ཡིན་པའི་ཚུལ་བསམ་པ་དང༌། དེ་ལས་གཞན་པའི་སེམས་བསྐྱེད་ཀྱི་ཕན་ཡོན་བསམ་པ་དང་གཉིས་ཡོད། གཉིས་པ་བྱང་ཆུབ་ཀྱི་སེམས་བསྐྱེད་པའི་ཚུལ་ལ། སེམས་བསྐྱེད་ཉིད་ཇི་ལྟར་བསྒོམ་ཚུལ་དང༌། དེ་བརྟན་པར་བྱ་བའི་ཆེད་དུ་སྨོན་སེམས་ཆོ་གའི་སྒོ་ནས་ཇི་ལྟར་བཟུང་བའི་ཚུལ་གཉིས་ཡོད། དང་པོ་ལ་རྒྱལ་བའི་ཡུམ་གྱི་དགོངས་པ་སློབ་དཔོན་ཆེན་པོ་ཙནྡྲ་གོ་མི་དང༌། ཀ་མ་ཤི་ལ་སོགས་ཀྱིས་བཀྲལ་བ་ལྟར་རྒྱུ་འབྲས་མན་ངག་བདུན་ལྡན་གྱི་སྒོ་ནས་བྱང་ཆུབ་ཀྱི་སེམས་སྒོམ་ཚུལ་དང༌། སངས་རྒྱས་ཕལ་ཆེན་གྱི་དགོངས་པ་སློབ་དཔོན་ཆེན་པོ་ཞི་བ་ལྷ་སོགས་ཀྱིས་བཀྲལ་བ་ལྟར་བདག་གཞན་མཉམ་བརྗེའི་སྒོ་ནས་བྱང་ཆུབ་ཀྱི་
སེམས་སྒོམ་ཚུལ་ཞིག་དང་གཉིས་ཡོད། གཉིས་པ་དེ་བརྟན་པར་བྱ་བའི་ཆེད་དུ་སྨོན་སེམས་ཆོ་གའི་སྒོ་ནས་ཇི་ལྟར་བཟུང་བའི་ཚུལ་བཤད་པ་དེ་ལ། དང་པོ་མ་ཐོབ་པ་ཐོབ་པར་བྱེད་པའི་ཐབས་དང༌། ཐོབ་ཟིན་མི་ཉམས་པར་བསྲུང་བའི་ཐབས། ཉམས་ན་ཕྱིར་བཅོས་པའི་ཐབས་དང་གསུམ་ཡོད། དང་པོ་ལ་གང་ལས་བླང་བའི་ཡུལ། །གང་གིས་ལེན་པའི་རྟེན། ཚུལ་ཇི་ལྟར་ལེན་པའི་ཆོ་ག་སྦྱོར་དངོས་རྗེས་གསུམ་དང་བཅས་པ་ཡོད་ལ། ཆོ་གའི་དངོས་གཞི་ནི། བྱང་ཆུབ་སྙིང་པོའི་བར་དུ་རྫོགས་པའི་བྱང་ཆུབ་ཀྱི་སེམས་མི་གཏོང་ངོ་སྙམ་པའི་སེམས་བསྐྱེད་དམ་བཅའ་བའི་ལྕགས་ཀྱུ་གཉིས་པས་རང་དབང་དུ་བྱེད་ཚུལ་དེ་ཡིན་ནི་རེད། གཉིས་པ་ཐོབ་ཟིན་མི་ཉམས་པར་བསྲུང་བའི་ཐབས་ལ། སྐྱེ་བ་འདིར་སེམས་བསྐྱེད་མི་ཉམས་པར་གོང་འཕེལ་དུ་འགྱུར་བའི་རྒྱུ་ལ་བསླབ་པ་དང༌། སྐྱེ་བ་གཞན་དུ་སེམས་བསྐྱེད་མི་བརྗེད་པའི་རྒྱུ་ལ་བསླབ་པ་གཉིས་ཡོད། དང་པོ་ལ་སེམས་བསྐྱེད་ལ་སྤྲོ་ཤུགས་འཕེལ་བའི་ཕྱིར། དུས་དྲུག་ཏུ་སེམས་བསྐྱེད་ཀྱི་ཕན་ཡོན་དྲན་པ། སེམས་དེ་ཉིད་འཕེལ་བའི་ཕྱིར་དུས་དྲུག་ཏུ་བྱང་ཆུབ་ཀྱི་སེམས་སྦྱང་བ། གང་གི་དོན་དུ་སེམས་བསྐྱེད་པའི་སེམས་ཅན་བློས་མི་གཏོང་བ་དང༌། སེམས་བསྐྱེད་གོང་འཕེལ་དུ་འགྲོ་བའི་ཕྱིར་ཚོགས་སྒོ་དུ་མ་ནས་གསོག་པ་དང་བཞི་ཡོད། སྐྱེ་བ་གཞན་དུ་སེམས་བསྐྱེད་མི་བརྗེད་པའི་རྒྱུ་ལ་བསླབ་པ་ནི། མཆོད་འོས་བསླུ་བ་དང༌། འགྱོད་མེད་ལ་འགྱོད་པ་སྐྱེད་པ་དང༌། བྱང་ཆུབ་སེམས་དཔའ་
ལ་སྐུར་བ་འདེབས་པ། སེམས་ཅན་ལ་གཡོ་སྒྱུ་བྱེད་པ་སྟེ་ནག་པོའི་ཆོས་བཞིའི་གཉེན་པོ་སྲོག་གི་ཕྱིར་དུ་ཡང་ཤེས་བཞིན་དུ་རྫུན་མི་སྨྲ་བ་ལ་སོགས་པའི་དཀར་པོའི་ཆོས་བཞི་ལ་ནན་ཏན་བྱེད་པ་དེ་ཡིན། ཉམས་ན་ཕྱིར་བཅོས་པའི་ཐབས་ནི། སེམས་བསྐྱེད་གཏོང་བ་དང༌། སེམས་ཅན་བློས་འདོར་བ་གཉིས་གང་བྱུང་ཡང༌། སེམས་བསྐྱེད་གཞི་ནས་བཟུང་དགོས་ནི་རེད། དེ་ལས་གཞན་པའི་ཉེས་པ་རྣམས་བྱུང་ཡང་སེམས་བསྐྱེད་ཀྱི་གཏོང་རྒྱུ་མིན་པ་དང༌། བྱང་སྡོམ་མ་བླང་བའི་གོང་ཡིན་པས་ལྟུང་བར་མི་འགྱུར་ནའང༌། བར་མ་ཁས་བླང་བ་དང་འགལ་བའི་ཉེས་སྤྱོད་དུ་འགྱུར་བས་ན་གཉེན་པོ་སྟོབས་བཞིའི་སྒོ་ནས་བཤགས་སྡོམ་བྱེད་དགོས་ནི་རེད། གསུམ་པ་སེམས་བསྐྱེད་ནས་སྤྱོད་པ་ལ་ཇི་ལྟར་སློབ་པའི་ཚུལ་བཤད་པ་དེ་ལ། བྱང་ཆུབ་སེམས་དཔའི་སྤྱོད་པ་ལ་སློབ་འདོད་སྦྱང་བ། དེ་འབྱོངས་ནས་བྱང་སྡོམ་ཆོ་གའི་སྒོ་ནས་ཇི་ལྟར་བཟུང་ཚུལ། དེ་བཟུང་ནས་སྤྱོད་པ་ལ་བསླབ་པའི་རིམ་པ་དངོས་དང་གསུམ་ཡོད། དང་པོ་ལ། སེམས་ཙམ་བསྐྱེད་ཀྱང་རྒྱལ་བའི་སྲས་ཀྱི་སྤྱོད་པ་ལ་མ་བསླབས་ན་རྫོགས་བྱང་ཐོབ་མི་སྲིད་པའི་ཚུལ་དང་དེ་ཡང་སྤྱོད་པ་ནོར་བ་ལས་མི་འབྱུང་བ་རྭ་ཐེན་པ་ལས་འོ་མ་མི་འབྱུང་བ་ལྟ་བུ་དང༌། ཐབས་ཤེས་ཡ་བྲལ་ལྟ་བུའི་སྤྱོད་པ་མ་ཚང་བ་ལས་མི་འབྱུང་བ་ས་བོན་ཆུ་ལུད་ལ་སོགས་པའི་རྐྱེན་གཅིག་མ་ཚང་ཡང་མྱུ་གུ་བསྐྱེད་མི་ནུས་པ་ལྟ་བུའི་ཚུལ་ལ་བསམ་སྟེ་ཚང་ལ་མ་ནོར་བའི་རྒྱལ་སྲས་ཀྱི་སྤྱོད་པ་ལ་སློབ་འདོད་སྤྱིར་སྦྱང༌། བྱེ་བྲག་
བྱང་སྡོམ་གྱི་སྐབས་ཀྱི་བསླབ་བྱའི་གནས་ཕྲ་རག་ཐམས་ཅད་ལ་རེ་རེའི་ཁ་ནས་དམིགས་ཕུགས་ཏེ་སློབ་འདོད་ཁྱད་པར་ཅན་སྐྱེད་པ་དེ་ཉིད་ཡིན་ནི་རེད། དེ་འབྱོངས་ནས་བྱང་སྡོམ་ཇི་ལྟར་བཟུང་བའི་ཚུལ་ནི། ཤིང་རྟ་ཆེན་པོ་གཉིས་ཀྱི་ལུགས་སྲོལ་གཉིས་ལ་གང་ལས་བླང་བའི་ཡུལ་སློབ་དཔོན་གྱི་ཁྱད་པར། གང་གི་ལེན་པའི་རྟེན་གྱི་ཁྱད་པར། ཚུལ་ཇི་ལྟར་ལེན་པའི་ཆོ་གའི་ཁྱད་པར། བླངས་ནས་བསླབ་བྱའི་རྐང་གྲངས་ཀྱི་ཁྱད་པར་སོགས་མང་དུ་ཡོད་པར་དཔལ་ལྡན་ས་སྐྱ་པཎྜི་ཏ་ལ་སོགས་པའི་མཁས་པ་ཆེན་པོ་དག་གིས་བཞེད་ནི་རེད། དགེ་བའི་བཤེས་གཉེན་ཤ་ར་བ་ལ་སོགས་པའི་མཁས་པ་མང་པོས་ནི་ཤིང་རྟ་ཆེན་པོ་གཉིས་ཀྱི་ལུགས་ལ་དེ་འདྲའི་རྣམ་དབྱེ་མི་བཞེད་པར་སྲོལ་ཆེན་པོ་གཉིས་གཅིག་ཏུ་བསྲེས་པའི་རྣམ་བཞག་མཛད་ནི་རེད། གསུམ་པ་དེ་བཟུང་ནས་སྤྱོད་པ་ལ་བསླབ་པའི་རིམ་པ་དངོས་དེ་ལ། རང་རྒྱུད་སྨིན་བྱེད་ཕར་ཕྱིན་དྲུག་ལ་སློབ་ཚུལ་དང་གཞན་རྒྱུད་སྨིན་བྱེད་བསྡུ་བའི་དངོས་པོ་བཞི་ལ་སློབ་ཚུལ་གཉིས་ཡོད། དང་པོ་ལ་ཕར་ཕྱིན་དྲུག་གི་གྲངས་ངེས། གོ་རིམ། ཕྱིན་དྲུག་དངོས་ལ་སློབ་ཚུལ་དང་གསུམ་ཡོད། དང་པོ་ནི། མདོ་སྡེ་རྒྱན་ལས། མངོན་མཐོ་ལ་ལྟོས་པའི་གྲངས་ངེས། རང་གཞན་གྱི་དོན་ཐམས་ཅད་སྒྲུབ་པ་ལ་ལྟོས་པའི་གྲངས་ངེས། གཞན་དོན་རྣམ་པ་ཐམས་ཅད་ལ་ལྟོས་པའི་གྲངས་ངེས། ཐེག་ཆེན་ཐམས་ཅད་སྡུད་པ་ལ་ལྟོས་པའི་གྲངས་ངེས། ཐབས་ཀྱི་རྣམ་པ་ཐམས་ཅད་པ་ལ་ལྟོས་
པའི་གྲངས་ངེས། བསླབ་པ་གསུམ་ལ་ལྟོས་པའི་གྲངས་ངེས་ཏེ་གྲངས་ངེས་ཀྱི་སྒོ་དྲུག་ཡོད་པར་གསུང་ནི་རེད། གོ་རིམ་ལ། སྐྱེ་བའི་གོ་རིམ། དམན་མཆོག་གི་གོ་རིམ། རག་ཕྲའི་གོ་རིམ་དང་གསུམ་ཡོད། དེ་ལྟར་ཕྱིན་དྲུག་གི་གྲངས་དང་གོ་རིམ་ལ་མཁས་པར་བྱས་ནས། ཕྱིན་དྲུག་དངོས་ལ་སློབ་ཚུལ་ལ་སྦྱིན་པ་ལ་སློབ་ཚུལ། ཚུལ་ཁྲིམས་ལ་སློབ་ཚུལ། བཟོད་པ། བརྩོན་འགྲུས། བསམ་གཏན། ཤེས་རབ་ལ་སློབ་ཚུལ་དང་དྲུག་ཡོད། དང་པོ་སྦྱིན་པ་ལ་སློབ་ཚུལ་ནི། རང་གི་ལུས་ལོངས་སྤྱོད་དགེ་རྩ་དང་བཅས་པ་ལ་ཀུན་འཛིན་གྱི་འཆིང་བས་བཅིངས་པའི་ཉེས་དམིགས་དང༌། སྦྱིན་པའི་ཕན་ཡོན་ལ་བསམ་སྟེ། སྤྲོ་སེམས་ཁྱད་པར་ཅན་སྒོམ་པ་དེ་ཡིན་ལ། ཚུལ་ཁྲིམས་ལ་སློབ་ཚུལ་ནི། ཚུལ་ཁྲིམས་བསྲུང་བའི་ཕན་ཡོན་མ་བསྲུང་བའི་ཉེས་དམིགས་ལ་བསམ་སྟེ། རང་རྒྱུད་དྲན་ཤེས་བཞིན་བག་ཡོད་ཀྱིས་ལེགས་པར་བསྡམ་སྟེ་སེམས་རྒྱུད་ཚུལ་ཁྲིམས་ཀྱི་ཕྱོགས་ལ་བསྒྱུར་བར་བྱེད་པ་ལ་བརྩོན་པར་བྱེད་པ་དེ་ཡིན། བཟོད་པ་ལ་སློབ་ཚུལ་ནི། བཟོད་པ་ལ་མང་དུ་ཡོད་ཀྱང་གནོད་བྱེད་ལ་ཅི་མི་སྙམ་པའི་བཟོད་པ་ལྟ་བུ་ལ་མཚོན་ན། དགྲ་བོ་བཀའ་དྲིན་ཆེ་ཚུལ་བསམ་པ་ལ་སོགས་པའི་སྒོ་ནས་རང་རྒྱུད་ཁོང་མི་འཁྲུགས་པའི་བཟོད་པ་ལ་གོམས་པར་བྱེད་པ་དེ་ཡིན། བརྩོན་འགྲུས་ལ་གོམས་པར་བྱེད་ཚུལ་ནི། བྱང་ཆུབ་སེམས་དཔའི་སྤྱོད་པ་བྱ་དཀའ་བ་དུས་ཡིན་རིང་པོར་སྤྱོད་དགོས་པ་རྣམས་ལ་མི་ཞུམ་ཞིང་སྙིང་སྟོབས་བསྐྱེད་དེ་སྤྲོ་ཤུགས་
འཕེལ་བ་ལ་བརྩོན་པར་བྱེད་རྒྱུ་དེ་རེད། བསམ་གཏན་ལ་སློབ་ཚུལ་ནི། མཐུན་པའི་ཡུལ་དུ་གནས་པ་དང་འདོད་པ་ཆུང་ཞིང་ཆོག་ཤེས་པ་དང༌། བྱ་བ་མང་པོ་སྤོང་བ་ལ་སོགས་པའི་བསམ་གཏན་གྱི་ཚོགས་ལ་གནས་པའི་གཞི་བཟུང་སྟེ། ཏིང་ངེ་འཛིན་དངོས་ལ་སློབ་ཚུལ་ནི། ཉེས་པ་ལྔ་སྤོང་འདུ་བྱེད་བརྒྱད་བསྟེན་པའི་སྒོ་ནས་ཏིང་ངེ་འཛིན་དེ་བསྒྲུབ་དགོས་ནི་རེད། དེ་ལ་ཉེས་པ་ལྔ་ནི། ལེ་ལོ། བརྗེད་ངས། བྱིང་རྒོད། འདུ་མི་བྱེད་པ། འདུ་བྱེད་དེ་ལྔ་ཡིན་ལ། དེའི་གཉེན་པོ་འདུ་བྱེད་བརྒྱད་བསྟེན་ཚུལ་ནི། འདུན་པ། བརྩོན་འགྲུས། ཤིན་སྦྱང་རྣམས་བསྟེན་དགོས་ནི་རེད། དེ་བཞིན་དུ་བརྗེད་ངས་ཀྱི་གཉེན་པོ་དྲན་པ། བྱིང་རྒོད་ཀྱི་གཉེན་པོ་ཤེས་བཞིན་ཡིན། འདུ་མི་བྱེད་པའི་གཉེན་པོ་སེམས་པ། འདུ་བྱེད་ཀྱི་གཉེན་པོ་བཏང་སྙོམས་བསྟེན་པ་སྟེ། དེ་ལྟར་ཉེས་པ་ལྔ་སྤོང༌། འདུ་བྱེད་བརྒྱད་བསྟེན་པའི་སྒོ་ནས། བསམ་གཏན་དང་པོའི་ཉེར་བསྡོགས་མི་ལྕོགས་མེད་སྒྲུབ་དགོས། དེ་ཚུལ་བཞིན་དུ་གྲུབ་པ་ན། དེ་ལ་བརྟེན་ནས་རིམ་གྱིས་བསམ་གཏན་བཞི་ཡན་ལག་གིས་འདའ་བ་དང༌། གཟུགས་མེད་བཞི་དམིགས་པའི་འདའ་བའི་ཚུལ་གྱིས་བསམ་གཟུགས་ཀྱི་ཏིང་ངེ་འཛིན་བརྒྱད་སྒྲུབ་པར་བྱེད་པ་དེ་ཡིན། ཤེས་རབ་ལ་སློབ་ཚུལ་ནི། ཤེས་རབ་དེ་ལ་ཇི་ལྟ་བ་རྟོགས་པའི་ཤེས་རབ། ཇི་སྙེད་པ་རིག་པའི་གནས་ལྔ་མཁྱེན་པའི་ཤེས་རབ། སེམས་ཅན་གྱི་དོན་བྱེད་པའི་ཤེས་རབ་དང་གསུམ་ཡོད་པའི་ནང་ནས་གཙོ་བོ་ནི་ཞི་གནས་
ལ་བརྟེན་ཏེ། བདག་མེད་པ་གཉིས་ཀྱི་དེ་ཁོ་ན་ཉིད་ལ་ལྷག་མཐོང་གི་རྩལ་སྦྱོང་བར་བྱེད་པ་དེ་ཤེས་རབ་ལ་བསླབ་ཚུལ་གྱི་གཙོ་བོ་ཡིན་ནི་རེད། གཉིས་པ་གཞན་རྒྱུད་སྨིན་བྱེད་བསྡུ་བའི་དངོས་པོ་བཞི་ལ་སློབ་ཚུལ་ལ། ཟང་ཟིང་གི་བསྡུ་བ་གཅིག་དང༌། ཆོས་ཀྱི་བསྡུ་བ་གསུམ་ཡོད། དང་པོ་ཟང་ཟིང་གི་བསྡུ་བ་ནི། སྦྱིན་པ་ཡིན་ལ། དེ་ནི་སྦྱིན་པའི་ཕར་ཕྱིན་ལ་སློབ་ཚུལ་གྱི་སྐབས་བཤད་པ་ལྟར་ཡིན། གཉིས་པ་ཆོས་ཀྱི་བསྡུ་བ་ནི། མོས་པའི་ཆོས་དང༌། སྒྲུབ་པའི་ཆོས་དང༌། དེ་ཉིད་རྣམ་པར་སྦྱོར་བའི་ཆོས་ཀྱི་བསྡུ་བ་དང་གསུམ་ཡིན། མོས་པའི་ཆོས་ཀྱི་བསྡུ་བ་ནི། སྙན་པར་སྨྲ་བ་དང༌། སྒྲུབ་པའི་ཆོས་ཀྱི་བསྡུ་བ་ནི་དོན་སྤྱོད་པ་དང༌། དེ་ཉིད་རྣམ་པར་སྦྱོང་བའི་ཆོས་ཀྱི་བསྡུ་བ་ནི། དོན་མཐུན་པ་ཡིན། དེ་ལ་སྙན་པར་སྨྲ་བ་ནི། གདུལ་བྱ་སེམས་ཅན་ལ་ཕར་ཕྱིན་དྲུག་ལ་སློབ་ཚུལ་ལ་སོགས་པའི་ཡང་དག་པའི་ཆོས་འཆད་དེ། དེ་རྣམས་ཤེས་པར་བྱེད་རྒྱུ་དེ་རེད། དོན་སྤྱོད་པ་ནི་ཕ་རོལ་པོས་ཆོས་ཤེས་པ་དེ་ཉིད་བསྒྲུབ་ཏུ་འཇུག་པ་དེ་ཡིན། དོན་མཐུན་པ་ནི་གཞན་ལ་བསྒྲུབ་ཏུ་འཇུག་པའི་ཆོས་དེ་རང་གིས་ཀྱང་འབད་པ་ཅི་ཡོད་ཀྱི་སྒོ་ནས་སྒྲུབ་པར་བྱེད་པ་དེ་ཡིན། དེ་ལྟར་ན་དེ་དག་གི་སྒོ་ནས་ཐེག་ཆེན་ཐུན་མོང་བའི་ལམ་ལ་སློབ་ཚུལ་བཤད་པ་དེ་ཉིད་སོང༌། ཐུན་མོང་མ་ཡིན་པ་གསང་སྔགས་རྡོ་རྗེ་ཐེག་པའི་ལམ་ལ་ཇི་ལྟར་སློབ་ཚུལ་ནི་བྱ་སྤྱོད་གཉིས་ཀ་གང་གི་ལམ་ལ་བསླབ་ཀྱང་བྱང་སྡོམ་ལ་བརྟེན་ནས་ཆུ་དང་ཅོད་པན་ལ་སོགས་ཀྱི་དབང་བསྐུར་བ་ཙམ་ཞིག་ནོད་དེ་
རང་གི་ལམ་ལ་བསླབ་ན་ཆོག་པས་དེ་ལ་སྔགས་སྡོམ་བཟུང་བ་སྔོན་དུ་འགྲོ་མི་དགོས། རྣལ་འབྱོར་རྒྱུད་ཡན་ཆད་ཀྱི་རྒྱུད་དེ་གང་གི་ལམ་བསྒོམ་ཡང༌། བྱང་སྡོམ་ལ་རྟེན་བྱས་ཏེ་སྔགས་སྡོམ་རང་གི་རྒྱུད་ལ་བཟུང༌། དེ་ནས་རྒྱུད་སྡེ་རང་རང་གི་དབང་བསྐུར་བ་མཚན་ཉིད་ཚང་བ་ཞུས་ཏེ། རྒྱུད་དེ་དང་དེའི་ལམ་ལ་སློབ་དགོས་ནི་རེད། དེ་ཡང་སྡོམ་པ་དང་དམ་ཚིག་ཚུལ་བཞིན་དུ་བསྲུང་བ་མེད་ན། རྒྱུད་སྡེ་གང་གི་ལམ་ལ་ཞུགས་ཀྱང་འབྲས་བུ་ཐོབ་པ་མི་སྲིད་ནི་རེད། སྡོམ་པ་དང་དམ་ཚིག་ཚུལ་བཞིན་དུ་བསྲུང་བ་ཡོད་ན་དེ་ལས་གཞན་པའི་ལམ་ལ་བརྩོན་པ་ཆེར་བསྐྱེད་མ་ནུས་ནའང་ཕར་ཕྱིན་ཐེག་པའི་ལམ་གྱིས་བསྐལ་ཆེན་གྲངས་མེད་པ་སོགས་སུ་སྒྲུབ་དགོས་རྒྱུའི་སངས་རྒྱས་ཀྱི་གོ་འཕང་དེ། སྐྱེ་བ་བཅུ་དྲུག་ཚུན་ལ་ངེས་པར་འགྲུབ་པར་གསུང་ནི་རེད། ལམ་དངོས་ལ་སློབ་ཚུལ་ནི། བྱ་སྤྱོད་རྣལ་འབྱོར་གྱི་རྒྱུད་གསུམ་ལ་དང་པོ་མཚན་བཅས་དང༌། དེ་ནས་མཚན་མེད་ཀྱི་རྣལ་འབྱོར་ལ་བརྟེན་ནས་ཐུན་མོང་གི་དངོས་གྲུབ་སྔོན་དུ་བསྒྲུབ། དེ་ལ་བརྟེན་ནས་མཆོག་གི་དངོས་གྲུབ་སྒྲུབ་དགོས། དེ་ལྟར་ཐུན་མོང་གི་དངོས་གྲུབ་སྒྲུབ་པ་ལ་མ་ལྟོས་པར་མཆོག་གི་དངོས་གྲུབ་སྒྲུབ་མི་ནུས་ནི་རེད། རྣལ་འབྱོར་བླ་མེད་ཀྱི་སྐབས་སུ་གདུལ་བྱ་རིན་པོ་ཆེ་ལྟ་བུའི་གང་ཟག་ཡིན་ན། དེའི་ཐུན་མོང་གི་དངོས་གྲུབ་སྒྲུབ་པ་ལ་མ་ལྟོས་པར་ཡང༌། རིམ་གཉིས་ཀྱི་རྣལ་འབྱོར་ལ་བརྟེན་ནས་སྙིགས་དུས་ཀྱི་ཚེ་ཐུང་ངུ་གཅིག་ལ་ཟུང་འཇུག་རྡོ་རྗེ་འཆང་གི་གོ་འཕང་སྒྲུབ་པར་
བྱེད་ནི་རེད། དེ་ལས་གཞན་པའི་ཙན་དན་ལྟ་བུ་ལ་སོགས་པའི་གདུལ་བྱ་ཕལ་པ་རྣམས་ཀྱི་ནང་ན་དང་པོ་ཐུན་མོང་གི་དངོས་གྲུབ་བསྒྲུབས་ཏེ་དེ་ལ་བརྟེན་ནས་མཆོག་གི་དངོས་གྲུབ་སྒྲུབ་པའང་ཡོད་ནི་ཡིན་གསུང་ནི་རེད་ལགས། དེ་ལྟར་ས་གསུམ་གྱི་རིན་པོ་ཆེ་གཅིག་པུ་བྱང་ཆུབ་ལམ་གྱི་རིམ་པའི་སྡོམ་རགས་པ་ཞིག །རྗེ་བླ་མ་བཀའ་དྲིན་མཚུངས་མེད་ཨ་བྷཱ་ཡའི་ཞལ་སྔ་ནས་མདུན་འཁོད་འགའ་ཞིག་ལ་བརྩེ་བས་གདམས་པ་བཞིན་དེ་དག་གིས་ཟིན་ཐོར་བཏབ་པ་ལྟར་ཧ་ལམ་པའི་ཞུ་དག་བྱས་ནས་གསུང་འབུམ་གྲར་བཞག་པའོ།། །།