སྨན་བཙུན་མའི་ཤྭ་མོ་དུས་གསུམ་ཀུན་གསལ།
༈ རྫོགས་པ་ཆེན་པོ་ཀློང་ཆེན་སྙིང་ཐིག་གི་བཀའ་སྲུང་སྨན་བཙུན་མའི་ཤྭ་མོ་དུས་གསུམ་ཀུན་གསལ་ཞེས་བྱ་བ། ན་མོ་གུ་རུ་པདྨ་སཾ་བྷ་བེ། །འབུམ་བྲག་དཔའ་བོ་་ཡེ་ཤེས་སྲོག །བདེ་སྟོང་ཐིག་ལེ་གཅིག་ཏུ་ཟླུམ་པའི་དབྱིག །ཀློང་ཆེན་སྒྱུ་མའི་གཟུགས་ཅན་འཇིགས་བྲལ་གླིང༌། །བྱང་ཆུབ་བར་དུ་
རིགས་ཀྱི་བདག་པོར་བསྙེན། །དེའང་ཇི་སྐད་དུ་ཨོ་རྒྱན་དུས་གསུམ་མཁྱེན་པའི་ཞལ་སྔ་ནས། མ་འོངས་ལྟ་སྒོམ་ཏིང་འཛིན་གྱིཿ དྲོད་ཚད་མེད་པར་འོལ་ཚོད་ཀྱིསཿ མངོན་ཤེས་ཅལ་ཅོལ་སྒྲོགས་པའི་ཚེཿ སྨན་བཙུན་སེམས་ཀྱི་ཆོ་འཕྲུལ་ལྔསཿ ཐེ་ཚོམ་མདུད་པ་རང་སར་གྲོལཿ ཞེས་ཐོས་གྲོལ་རྡོ་རྗེའི་གསུང་གིས་རྗེས་སུ་བསྔགས་པ་ལྟར་སྨན་བཙུན་མཁའ་འགྲོའི་གཙོ་མོ་བཀྲ་ཤིས་ཚེ་རིང་མའི་ཕྲིན་ལས་ཀྱི་གབ་ཡིག་དོན་ཡོད་ཞགས་པའི་ལུགས་ཀྱི་རྣོ་མཐོང་ཟབ་མོ་ལག་ལེན་དུ་བསྟར་བ་ལ། སྦྱོར་དངོས་རྗེས་གསུམ་ལས། དང་པོ་ནི། གནས་དབེན་ཞིང་ཉམས་དགའ་བར་སྟེགས་བུ་ཁེབས་ལྡན་མཉྫི་དང་བཅས་པ་ལ་སྨན་བཙུན་མའི་བླ་རྡོ་སྲོག་འཁོར་གཞུང་ནས་བཤད་པ་བཞིན་བསྟར་བའི་མདུན་དུ་འབྲུ་དཀར་གྱི་ཚོམ་བུའི་ཁར། དུང་ཤྭ་གཙང་མ་ཚུལ་བཞིན་བཟོས་པའི་ཤྭ་མིག་ཅན་བཤམ། མཐའ་བསྐོར་ཕྱི་ནང་གི་མཆོད་པ་སྤྱི་དང༌། བྱེ་བྲག་གསེར་སྐྱེམས། ཕྱེ་མར། འོ་ཆོལ་སོགས་ཚར་དུ་དངར། གཞན་ཡང་དགོས་པའི་ཡོ་བྱད་ཐམས་ཅད་ཚང་བར་བྱའོ། །གཉིས་པ་ནི། ཐོག་མར་རིག་འཛིན་ཡབ་ཀ་དང་ཡུམ་ཀ་གང་རུང་ལ་བརྟེན་པའི་བདག་གི་རྣལ་འབྱོར་སྔོན་དུ་འགྲོ་བས་ཕྲིན་ལས་དཔག་
བསམ་ཡོངས་འདུ་རྒྱས་པར་བཏང་རྗེས། །བདག་ཉིད་ལྷ་ཡི་ཐུགས་ཀ་ནས། །འོད་ཟེར་དྲྭ་བ་རབ་འཕྲོས་པས། །སྨན་བཙུན་འཁོར་བཅས་ཐུགས་རྒྱུད་བསྐུལ། །འདོད་དོན་མངོན་དུ་སྒྲུབ་པར་གྱུར། །ཞེས་དམིགས་ཏེ་རྩ་བའི་རིག་པ་ལྔ་ཁྲི་ཁ་སྐོང་བཅས་བཟླས་བརྗོད་བྱ། དེ་ནས་ལས་སྦྱོར་གྱི་ཚེ། མདུན་བསྐྱེད་ཐུགས་ཀའི་བཾ་ཡིག་ལས། །འོད་འཕྲོས་སྣང་སྲིད་གསལ་བར་བྱས། །ཚུར་འདུས་བདག་ལ་ཐིམ་པ་ཡིས། །རྣོ་མཐོང་དངོས་གྲུབ་ཐོབ་པར་དམིགས། །ཧྲཱིཾ་བཛྲ་པྲ་མོ་ཧ་ལོ་ཀ་སརྦ་མུ་མུ་ཕྱེ་ཕྱེ༌། སྟོང་ཕྲག་གཅིག་བཟླ། སྟོང་ཚིག་གིས་མཆོད་བསྟོད་བྱ་ཞིང་སྤྲོ་ན་ཚོགས་ཀྱི་འཁོར་ལོས་ཀྱང་མཆོད། ༈ །བརྟགས་པ་བྱ་ཚུལ་དངོས་ནི། གཞུང་ལས། དེ་ནས་མེ་ལོང་གཡའ་བྲལ་སྟེང་ཿ གང་འདོད་དོན་སྨོས་ཤྭ་སྒྲིལ་བསཿ ཞེས་གསུངས་པ་ལྟར། འདོད་དོན་ལ་དམོད་བོར་བཞིན་ཐེ་ཚོམ་མེད་པའི་ཡིད་ཀྱིས་ཤྭ་སྒྲིལ་བས། དང་པོ་ཐིག་ལེ་ཤར་ན། བསྟན་པའི་ཆུས་ཕྱྭར། མི་ཁྱོད་ཀྱི་ཆུས་སྲིད་མ་སྨིན་སྨིན་འདྲའི་ཨ་མྲ། བལྟས་ན་མཛེས། དོན་རྩ་ན་གསོག་པ་ཞིག་སྣང་སྟེ། ཐབས་ལ་མཁས་ན་བཟང་པོར་འོང༌། ཁྱིམ་ཕྱྭར། མི་ནོར་ལ་གང་སྟོང་བག་ཙམ་འོང་སྟེ་སྲིད་པའི་ཉི་ཟླ་འཕོ་འཆུགས་འགྲོ་བ་མི་སྣང༌། སྲོག་ཕྱྭར། གནམ་གྱི་
འཇུ་ཐག་ཆད། སའི་རྟོད་ཕུར་ཐོན་ཏེ་ཤིན་ཏུ་ངན། ཆོས་ཕྱྭར། དང་པོ་ཆོས་བྱེད་འདོད་ཀྱི་ངེས་འབྱུང་སྤུ་སུ་དེ་ནམ་ཞིག་རང་མཚང་རྡོལ་བའི་དུས་མཆི། དོན་ཕྱྭར། བང་གང་གི་རྟ་བརྒྱུག་ནས། ཁ་གང་གི་རྒྱལ་ཟ་བ་ལྟ་བུའི་དོན་གཅིག་ཡིན་ན་མཆི་སྟེ། རྔམ་ཆེན་མི་འོང༌། གྲོགས་ཕྱྭར། གྲོགས་ཤ་དུམ་ཙམ་ལ་དགྲ་བྱ་གླག་ཙམ་གཅིག་འོང་བའམ་ཡང་ན་ལག་སྟོང་དུ་འཁོར། མགྲོན་ཕྱར། ཡོང་ཁ་ལ་བཏགས་ནས་མི་ཡོང་ལག་ཏུ་ལེན་པར་འདུག་དགྲ་ཕྱྭར། བདུད་ཀྱི་བླ་ཤིང་ལ་ལྕགས་ནག་གི་སྟ་རེ་ཐེབས་པས་བཟང༌། གཉིས་པ་ཚོམ་བུ་ཤར་ན། བསྟན་པའི་ཆུས་ཕྱྭར། ཆོས་སྲིད་སྨན་གྱི་སྡོང་པོ་གཞི་བསྟན་ཡང་འཁོར་ནང་འཐབ་འོང་བའི་སྲི་ཞིག་འདུག་པས་དེ་འདུལ་བ་ལ་དྲག་པོ་སྔགས་ཀྱི་འཁྲུལ་འཁོར་དགོས་སོ། །ཁྱིམ་ཕྱྭར། གཙོ་བོའི་འདུན་ཁང་མ་མཛེས་པའི་མཁོན་འགའ་ཞིག་ལྡང་བ་མ་གཏོགས་ལར་ཕྱྭ་གཡང་ལོངས་སྤྱོད་ཀྱི་ཆར་པ་འབབ་པས་བཟང༌། སྲོག་ཕྱྭར་ཚེའི་དམུ་ཐག་དཀར་པོ་ལ་འཆི་མེད་ཀྱི་མདུད་པ་དགུ་ཡོད་དེ་ཤིན་ཏུ་མཆོག །ཆོས་ཕྱྭར། ལྷའི་རྔ་སྒྲ་དབྱངས་ཐག་རིང༌། ཆོས་ཀྱི་མར་མེ་འབར་ཡུན་རིང་བས་བཟང༌། དོན་ཕྱྭར། བློ་དོན་ཡོད་ཞགས་པའི་སྐོར་མགོ་འདི་གང་དུ་བབས་
ཀྱང་དངོས་གྲུབ་ཁོ་ན་ཡོང༌། གྲོགས་ཕྱྭར། གྲོགས་འབྲས་དཀར་གྱི་སྙེ་མ་དེ་བྲེར་བླུག་ན་མི་གང༌། ཕུལ་དུ་བླུག་ན་མི་ཤར་འབྲིང་ཙམ། མགྲོན་ཕྱྭར། མགྲོན་པོ་དལ་མྱུར་གཉིས་ཀྱིས་མཚམས་ན་ཡོད་དེ་དུས་རེ་ཞིག་ནས་སླེབ། དགྲ་ཕྱྭར། དགྲའི་མགོ་ལ་དམུ་གབ་ཀྱི་ཞྭ་ནག་གྱོན་པས་ངེས་པར་ཐུབ། གསུམ་པ་ཚངས་པ་ཤར་ན། བསྟན་པའི་ཆུས་ཕྱྭར། བསོད་ནམས་ལས་ཀྱི་ཤེ་མོང་དར་དྲག་ལ་ཡུན་ཐུང་བས་རིམ་གྲོ་ལ་འབུངས། ཁྱིམ་ཕྱྭར། མར་མེ་འདའ་ཁ་ན་གསལ། ལ་འཛད་ཁ་ན་མཐོ་སྟེ་ནམ་ཕུགས་མི་བདེན། སྲོག་ཕྱྭར། ཤིའོ་ཟེར་བའི་སྲོག་ཕམ་མེད་ཀྱང་འཆིའམ་སྙམ་པའི་འཇིགས་ངོ་ཅིག་འདུག་པས་བསྲུང་བཟློག་གི་རི་ཆེན་སྙིལ། ཆོས་ཕྱྭར། སྐ་རགས་ཀྱི་ཚོས་མདོག་ཁོ་ནས་མིང་རབ་བྱུང་དུ་བཏགས་པའི་གཡོན་ཅན་སྒྱུ་མ་མཁན་ཅིག་འོང་མཆི། དོན་ཕྱྭར། ས་གོམ་གསུམ་སྤོས་ན་དོན་གསུམ། མདའ་ཐེང་གསུམ་འཕང་ན་འབེན་གསུམ་ཆོད་དེ་བཟང༌། གྲོགས་ཕྱྭར། གྲོགས་ཀྱི་གཡུ་རི་ཕྱུག་མོ་ནས། དངོས་གྲུབ་རིན་པོ་ཆེའི་གཏེར་ཁ་རྡོལ་བས་ངེས་པར་བརྩོན་འཚལ། མགྲོན་ཕྱྭར། ཆང་སིང༌། གདན་ཐིང་ལ་ལྟོས་དང༌། ཞྭ་ཐོད་ཀྱི་རྩེ་མོ་མཐོང༌། དགྲ་ཕྱྭར། དགྲ་མགོ་
ལྕགས་ལས་སྲ། དགྲ་དཔུང་སྟག་ལས་ངར། མི་ཁྱོད་ཀྱིས་མི་ཚད་ཁྱོད་འདྲ་བརྒྱས་རྒོལ་ཀྱང་ཐུབ་པའི་ས་ན་མི་འདུག་བཞི་པ་སྒྲོམ་བུ་ཤར་ན། བསྟན་པའི་ཆུས་ཕྱྭར། ཆོས་འཁོར་གན་དྷོ་ལའི་དབུ་རྩེར་གྲགས་པ་དཀར་པོའི་དུང་འབུད་ཅིང་བསྟན་པའི་གདུགས་དཀར་བླ་ནས་བླར་མཐོ། ཁྱིམ་ཕྱྭར། ཕྱུགས་ཀྱི་གཡང་ར་མ་ཞིག་རྩེ་འཛིན་གྱི་བ་གམ་མ་རལ་བར་སྐྱིད་ཆི་ལེ་འོང༌། སྲོག་ཕྱྭར། སྟོན་བརྒྱའི་ལྟད་མོ་མ་མཐོང༌། མི་བརྒྱའི་ཚེ་ཚད་མ་རྫོགས་པར་ཁྱོད་མི་འཆི། ཆོས་ཕྱྭར། འཇིག་རྟེན་མཐུན་འཇུག་གི་ཆོས་གཟུགས་ལྟོ་འབོལ་བ་ཞིག་ཡོད། དོན་ཕྱྭར། ལག་སྟོང་ཁར་བཅུག་གལ་སྟོང་ཕྲག་ལ་གཟད་དེ་སྐྱོ་གླུ་རིང་མོ་ཞིག་ལེན་ཞིང་མཆི། གྲོགས་ཕྱྭར། ཕྱུག་དར་མའི་གཞོན་ནུ་གསེར་རྣ་ཅན་དེས། དངུལ་དཀར་གྱི་བུམ་པ་ཞིག་རུམ་ནས་བཏོན་ཏེ་སྟོན་པ་ཙུག་སྦེད་པ་ཙུག་བྱེད་དེ་མི་བརྟན་འགྱུར་ལྡོག་ཆེ་བའི་ངོ། །མགྲོན་ཕྱྭར། ཁྱོད་ཀྱི་མགྲོན་པོ་དེ་བྱིས་པ་ལྟད་མོ་ལ་ཡེངས་པ་ལྟར་ཡོང་སྙམ་ཡིད་ན་མེད་དེ་ཐང༌། དེ་མིན་ན་གཏམ་ངན་ཁུར་པོ་གང་ཁྱེར་ནས་སླེབ་འོང༌། དགྲ་ཕྱྭར། ད་རེས་རྩ་ལྟར་ཞུམ་པའི་དུས་མིན་སྙིང་སྟོབས་མེ་ལྟར་སྦར་བའི་དུས་ཡིན་ཏེ། དགྲ་ལྷའི་
དབུ་རྨོག་བཙན། ལྔ་པ་རྨིག་པ་ཤར་ན། བསྟན་པའི་ཆུས་ཕྱྭར། མཐོན་པོའི་གནམ་རལ། ཡངས་པའི་ས་གྲུམ། དཔལ་གྱི་ཉི་མ་ཐང་ལ་ལྷུང་བས་ཤིན་ཏུ་ངན། བདུད་བཟློག་དང་བསྲུང་བ་ལ་རེམ། ཁྱིམ་ཕྱྭར། ཕྱུག་པོའི་གཡང་སྒོ་རལ། བཙན་པོའི་རུ་དར་ཆག་འདུག་པས་གསུང་རབ་ཀློག་སྒྲོགས་དང་མཆོད་སྦྱིན་རྒྱ་ཆེར་གྱིས། སྲོག་ཕྱྭར། ཚེ་བདུད་ཀྱི་ཞགས་པས་བཏབ་ཀྱང་བཤའ་གྲིས་མ་ཐེབས་པས་ད་དུང་འཆི་བསླུ་དང་སྲོག་འདོན་སོགས་རིམ་འགྲོ་རྒྱ་ཆེར་བྱས་ན་འཚོ་ཙམ། ཆོས་ཕྱྭར། སྒྲུབ་བརྒྱུད་ཀྱི་བསྟན་པ་ཉི་མ་འདྲ་བ་དེ་མི་ཁྱོད་ཀྱི་ཐོད་ལ་འཆར། དོན་ཕྱྭར། ཐོག་སོ་བརྒྱ་པའི་མཁར་ལས་ལྟར་བརྩོན་འགྲུས་ཀྱི་ཡུན་མ་སོང་བར་ཉིན་ཅིག་ལ་ཧུར་ཐག་བྱས་པས་མི་ཡོང༌། ལར་འགྱང་ས་ཞིག་ནས་འགྲུབ་སྲིད། གྲོགས་ཕྱྭར། ནོར་བདུན་རྒྱུད་འཚེང་ནུས་མེད་དེ། ཟས་ཉིན་གཅིག་འགྲང་བ་ཡོད་ཟེར། མགྲོན་ཕྱྭར། དགའ་ཡ་ལེ། འཛུམ་མུ་ལེ། ཕྱི་ལམ་ཐག་པ་བཞིན་དུ་བསྡོགས་ནས་སྒོ་རྩ་ན་སླེབས་འདུག་དགྲ་ཕྱྭར། དཔའ་བོའི་གོ་རལ། སྔར་མའི་བང་ཟད། སྲིད་པའི་མདའ་མོ་སྐེད་ནས་ཆག་འདུག་པས་དགྲ་བྲུབ་དང་རླུང་རྟ་བསྐྱེད་པ་སོགས་བྱ། འདི་རྣམས་ཕལ་ཆེར་གཞུང་གིས་
དངོས་བསྟན་དུ་བྱུང་ཞིང༌། དེ་ལས་གཞན་དུ་ན་ནད་ཕྱྭ་དང་གྲོགས་ཕྱྭ་ཁོག་གཅིག་ནོར་ཕྱྭ་དང་མཚེར་ཕྱྭ་སོགས་ཁྱིམ་ཕྱྭར་ཁོག་གཅིག་ཚོང་ཕྱྭ་དང་རྟ་ཕྱུགས་འཕྲོད་མིན་ལོ་ལེགས་ཉེས་མཛའ་བོ་ཨེ་རྙེད་རྣམས་གྲོགས་ཕྱྭ་དང་ཁོག་གཅིག་བློ་ཕྱྭ་དང་སྟོར་བ་རྙེད་མིན་ཞུ་བ་ཨེ་གནང་སྨན་དཔྱད་འཕྲོད་དམ་སོགས་དོན་ཕྱྭ་དང་ཁོག་གཅིག་པ་ལྟ་བུས་མཚོན་ཏེ་ཤེས་པར་བྱའོ། །གསུམ་པ་ནི། སླར་ཡང་གཏོར་ཕུད་ཁ་གསོ་ཞིང་གཏང་རག་གི་མཆོད་བསྟོད་ཕུལ་ཏེ་ཕྲིན་ལས་བཅོལ། གཏོར་མའི་རས་མ་ཅུང་ཟད་དངོས་གྲུབ་ཏུ་ཤེས་པས་ལོངས་སྤྱོད། ཚོགས་མཆོད་དང་འབྲེལ་བ་ཡིན་ན་མངའ་གསོལ་གཏོར་མ་བསྟབ་པ་སོགས་རྗེས་ཀྱི་ལས་རིམ་ཡོངས་སུ་རྫོགས་པས་མཐའ་རྒྱས་སུ་བྱའོ། །འདི་ཉིད་ཚུལ་བཞིན་བསྒྲུབ་ནས་རྟག་ཏུ་གསོལ་ཀ་ལ་བརྩོན་པ་དང༌། དུང་ཤྭ་མི་ལག་མི་འགྲིམ་པ་སོགས་གཞུང་ནས་གསུངས་པའི་སྤྱི་དང་བྱེ་བྲག་གི་དམ་ཚིག་མ་ཉམས་པར་བསྲུང་ན་བླང་དོར་བསླུ་མེད་དུ་སྟོན་པ་ནི་སངས་རྒྱས་པད་མའི་ལུང་གིས་ཡིད་ཆེས་ཤིང་རིགས་པས་ཀྱང་གྲུབ་པ་ཁོ་ནའོ། །རྟོག་གེ་འཆལ་བའི་ཚིག་གིས་མ་བསླད་ཅིང༌། ། ཞལ་གྱི་དྲོད་རླངས་མ་ཡལ་བ། །ཟབ་དོན་མན་
ངག་ཟིལ་པ་འདི་རྙེད་པས། །སླན་ཆད་ཟོག་པོའི་ངག་ལ་དགའ་བ་སྤངས། །དེ་ལྟར་བོད་ཡུལ་གྱི་ལྷན་ཅིག་སྐྱེས་མ་རྡོ་རྗེ་སྨན་བཙུན་མའི་ཤྭ་མོ་འདི་ནི་གཞུང་འདི་ལ་གྲུབ་དབང་བྱང་ཆུབ་རྡོ་རྗེའི་མན་ངག་གི་ཡིག་ཆ་ཡོད་ཀྱང་ཚིག་ཚོགས་མང་ཆེས་པར་མཐོང་ནས་ཡི་གེ་ཉུང་ལ་ངག་དོན་གོ་སླ་བར་ཀུན་མཁྱེན་བླ་མའི་ཆོས་སྲས་ཀྱི་གཟུགས་བརྙན་འཛིན་པ་པདྨ་ཁྱབ་བདག་རྡོ་རྗེས་སྦྱར་བ་དགེ་ཞིང་བཀྲ་ཤིས་པར་གྱུར་ཅིག། །།