རྟེན་འབྲེལ་སྙིང་པོ་ལ་བརྟེན་ནས་གླུད་གཏོར་བསྔོ་བའི་ཆོ་ག
རྟེན་འབྲེལ་སྙིང་པོ་ལ་བརྟེན་ནས་གླུད་གཏོར་བསྔོ་བའི་ཆོ་ག་བྱམས་ཆེན་སྤྲིན་གྱི་རྔ་སྒྲ་ཞེས་བྱ་བ་བཞུགས་སོ། །
ན་མོ་མཉྫུ་ཤྲཱི་ཡེ། ཟབ་མོ་ཆོས་ཀྱི་དབྱིངས་གསུངས་པའི། །རྒྱལ་བ་དེ་ལ་ཕྱག་འཚལ་ནས། །རྣམ་དག་མདོ་སྡེའི་རྗེས་འཇུག་པའི། །ཡིད་འོང་གཏོར་མའི་ཆོ་ག་བྲི། །འདིར་རྟེན་འབྲེལ་སྙིང་པོ་ལ་བརྟེན་ནས་གླུད་གཏོར་གཏོང་བའི་ཆོ་ག་ཇི་ལྟར་བགྱི་བའི་ཚུལ་ལ་གཉིས། སྦྱོར་བ་ཡོ་བྱད་ཀྱི་ཤོམ་དང༌། ཆོ་ག་དངོས་ཀྱི་རིམ་པའོ། །དང་པོ་ནི། བྱམས་པའི་སེམས་དང་གཙང་སྦྲའི་ཀུན་སྤྱོད་ལ་གནས་ནས། དབེན་པའི་ཕྱོགས་སུ་བ་བྱུང་གིས་བྱུགས་པའི་མཎྜལ་མདའ་གང་བ་ལ་སོགས་པ་ཇི་ལྟར་འཚམས་པ་བྱས་ལ་ཚོན་ཕྱེ་ལས་ཁང་བཟང་གི་རྣམ་པ་བྲི། དེའི་དབུས་སུ་གཞུང་ནས་འབྱུང་བའི་གཏོར་མ་རྣམས་གོས་དང་གདུགས་ལ་སོགས་པས་བརྒྱན་ཏེ་བཀོད། མཐའ་བསྐོར་མེ་ཏོག་ལ་སོགས་པའི་ཉེར་སྤྱོད་བཤམས། རྒྱས་པར་བྱེད་ན་བསྒྲུབ་བྱའི་གླུད་གཟུགས་གཙོ་འཁོར་ཁང་ཁྱིམ་རྟ་ཕྱུགས་ཞིང་མཐའ་
འཁོར་དང་བཅས་པའི་གཟུགས་བརྙན་དང༌། མ་གྲུབ་ན་ཇི་ལྟར་རིགས་པ་ཤར་ནས་བརྩམས་ཏེ་བསྒྲིགས། ཕྱི་རོལ་དུ་མུ་ཁྱུད་ཀྱི་ར་བ་བྱ། གོང་དུ་མཆོད་པའི་མཎྜལ་ལ་རྟེན་སྙིང་ནང་གཟུངས་སུ་བཞུགས་པའི་མཆོད་རྟེན། མཆོད་པའི་ཡོ་བྱད། ཁྲུས་བུམ་རྣམས་བཤམ་མོ། །གཉིས་པ་ལ། གཏོར་ཆོག་གི་སྔོན་དུ་བྱ་བ། དངོས་གཞི་གཏོར་ཆོག །དེའི་རྗེས་ལ་བྱ་བའི་རིམ་པ་དང་གསུམ། དང་པོ་ནི། གཟུངས་བཟླ་བའི་ཆོ་ག་ལ་བརྟེན་ནས་མཐུ་བསམ་གྱིས་མི་ཁྱབ་པའི་ཚིགས་སུ་བཅད་པ་ལན་མང་དུ་བཀླག །མཆོད་པའི་ཞིང་རྣམས་གཤེགས་གྲུབ་ནས་འདི་ལ་འཇུག་གོ །གཉིས་པ་ལའང༌། གླུད་གཏོར་བྱིན་གྱིས་རློབ་པ། མགྲོན་འགུག་པ། བརྔན་སྦྱིན་གྱིས་འཁོན་པ་སྦྱང་བ། བདེན་སྟོབས་ཀྱིས་གདོན་དང་ནད་པ་གསོ་བ། ལམ་བསྟན་ནས་ཕྱི་མཚམས་བཅད་པ་དང་ལྔ་ལས། དང་པོ་ནི།
ཡེ་་ཧེ་ཏུ་པྲ་བྷ་ཝཱ་ཧེ་ཏུནྟེ་་ཐཱ་ག་ཏོ་ཧྱ་བ་དཏ། ཏེ་་ཡོ་ནི་རོ་དྷ་ཨེ་ཝཾ་བཱ་དཱི་མ་ཧཱ་ཤྲ་མ་ཎཿ ཆོས་དབྱིངས་ཤིན་ཏུ་རྣམ་དག་པ། །ཐུགས་སུ་ཆུད་ནས་འདི་གསུངས་དང༌། །གང་གིས་ཡེ་ཤེས་མིག་སྦྱངས་པའི། །ཚད་མེད་བསོད་ནམས་ཕུང་པོ་དེའི། །བདེན་པས་དཀྱིལ་འཁོར་ཁང་པ་དང༌། །མཆོད་སྦྱིན་གཏོར་མ་འདི་དག་དང༌། །མེ་ཏོག་ལ་སོགས་ཡོ་བྱད་རྣམས། །མི་མཐུན་རྫས་དང་སྤྱོད་ལམ་གྱིས། །སྦགས་པའི་ཉེས་སྐྱོན་ཡོངས་དག་ནས། །མགྲོན་རྣམས་དབང་པའི་སྤྱོད་ཡུལ་དུ། །ཇི་ལྟར་འདོད་པ་བཞིན་འབྱུང་ཞིང༌། །སྡུག་བསྔལ་ཐམས་ཅད་སེལ་བྱེད་པའི། །ལོངས་སྤྱོད་ནམ་མཁའ་གང་བར་ཤོག །ལན་གསུམ་བརྗོད། གཉིས་པ་ལ། མགྲོན་འབོད་དངོས་དང༌། བག་ཕབ་ནས་འཁོད་དུ་གཞུག་པ་སྟེ་གཉིས་ཀྱི། དང་པོ་ནི་སྔར་བཞིན། ཡེ་་སོགས། ཐུགས་རྗེ་ཆེན་པོས་ཆོས་འདི་ཡི། །བསྡུ་བས་ཚོགས་རྣམས་དྲངས་མཛད་པ། །ལྷ་དང་བཅས་པའི་འཇིག་རྟེན་ན། །བསྡུ་བ་རྣམས་ཀྱི་མཆོག་ཡིན་པའི། །བདེན་པའི་ཚིག་ནི་དེ་ཡི་མཐུས། །གང་དག་གཞན་གནོད་བགྱིད་པ་ཡི། །འབྱུང་པོ་ས་འོག་རྒྱུ་བ་དང༌། །ས་སྟེང་རི་དང་ནགས་ཚལ་དང༌། །ཀུན་དགའ་ར་དང་སྐྱེད་མོས་ཚལ། །རྒྱལ་པོའི་ཕོ་བྲང་གྲོང་ཁྱེར་དང༌། །ཚོང་ཁང་རྣམས་དང་རྟ་ཡི་བྲེས། །གནག་ལྷས་ཤོ་གམ་གནས་རྣམས་དང༌། །འབྲོག་དང་ཁང་སྟོང་སོགས་གནས་དང༌། །དེ་བཞིན་ས་བླར་རྒྱུ་བ་ཡི། །ལྷ་ཀླུ་ལྷ་མ་
ཡིན་པ་དང༌། །དྲི་ཟ་གྲུལ་བུམ་གསང་བ་པ། །འདབ་བཟང་མིའམ་ཅི་དང་ནི། །ལྟོ་འཕྱེ་ཆེ་དང་སྨྱོ་བྱེད་དང༌། །མཚུན་དང་ཚངས་པའི་སྲིན་པོ་དང༌། །གྲིབ་གནོན་གནོན་པོའི་གདོན་རྣམས་དང༌། །ཤ་ཟ་ཞེས་བྱའི་གདོན་ལ་སོགས། །འཇིག་རྟེན་སྐྱོང་བ་རྣམ་བཞི་དང༌། །ཆོས་ཀྱི་རྒྱལ་པོ་གཤིན་རྗེ་ཡི། །སྡེ་དང་རིས་སུ་གཏོགས་དགུ་ཅོག །དགོས་སུ་བདག་དང་སྦྱིན་བདག་གི། །ལུས་སྲོག་འབྱོར་པ་ལ་སྡང་བའི། །འབྱུང་པོ་ཆེ་ཕྲ་ཅི་མཆིས་པ། །ཕྱོགས་འདིར་སྦྱིན་པའི་མགྲོན་ལ་འདུས། །གང་དག་མཆོད་སྦྱིན་འདི་ཡི་སྒྲ། །གཡེང་བས་མ་ཚོར་སྲིད་ན་ཡང༌། །ཕན་ཚུན་གཅིག་ལ་གཅིག་སྦྲན་ནས། །མ་ཚང་མེད་པར་འདུ་གྱུར་ཅིག །ལན་གསུམ། གཉིས་པ་ནི། བདག་གི་བདེ་བ་ལ་ལྟོས་པས། །འབྱུང་པོ་ཐམས་ཅད་སྲོག་ལ་སྡུག །འགྲོ་བ་ཟས་ཀྱིས་གནས་པའི་ཕྱིར། །གདོན་ཡང་དེ་ལ་སེམས་པ་སྟེ། །ཉེ་འཁོན་མེད་པའི་བྱམས་པ་ཡིས། །བདག་འདིར་སྦྱིན་ལ་ཡང་དག་འཇུག །དེ་ཕྱིར་རབ་ཏུ་དགའ་བ་ཡི། །སེམས་སུ་གྱིས་ལ་ལེགས་པར་འཁོད། །གསུམ་པ་ལ་ཟང་ཟིང་གི་སྦྱིན་པ་དང༌། ཆོས་ཀྱི་སྦྱིན་པ་བྱ་བ་གཉིས། དང་པོ་ལའང༌། བསྔོ་ཚིག་གིས་རྒྱ་ཆེར་བཀྲོལ་བ་དང༌། སོ་སོར་ཚིམས་པའི་བདེན་སྟོབས་བརྗོད་པ་གཉིས། དང་པོ་ནི། སྤོས་གསུར་གྱི་དུད་པ་གཏོང་བཞིན་པས། གང་ཡང་འབྱུང་པོའི་དཀྱིལ་འཁོར་ན། །རང་རང་ལས་ཀྱི་རྫུ་འཕྲུལ་ཅན། །ལུས་ཆེ་བཞིན་ཡངས་རྣམ་
པར་འགྱུར། །ཡན་ལག་མང་ལ་ཁྲག་གིས་བགོས། །སྣ་ཚོགས་མདོག་འཆང་གནོད་སྦྱིན་དང༌། །བྱ་དང་གཅན་ཟན་རྣམ་པ་སོགས། །འཇིགས་པའི་གཟུགས་ནི་སྣ་ཚོགས་ཅན། །མི་རྣམས་འབྲོག་དང་བས་མཐའ་དང༌། །དུར་ཁྲོད་རྣམས་དང་ཁང་སྟོང་སོགས། །གཅིག་པུར་གནས་སམ་རྒྱུ་བ་ན། །མདུན་དུ་ལུས་མངོན་སྣང་བར་བྱེད། །དེ་ནས་མི་སྣང་ལམ་འདུག་དང༌། །ཤས་ཆེར་མཚན་མོ་སྒྲ་སྒྲོགས་ཤིང༌། །བུ་ག་དག་ནས་སེ་གོལ་གཏོགས། །ཉལ་བ་རྣམས་ལ་ཕྱིས་གནོན་བྱེད། །སྡུག་པའི་བུད་མེད་གཟུགས་ཀྱིས་ནི། །ལྷན་ཅིག་འདོད་ལ་བསྟེན་པར་བགྱིད། །རྨི་ལམ་སྡིག་པ་མང་པོ་དང༌། །གཞན་ཡང་བཀྲ་མི་ཤིས་པ་སྟོན། །འཇིགས་དང་སྡིག་ལས་སྤྱོད་པ་དང༌། །སྔོན་གྱི་ལས་ཡོངས་སྨིན་པ་དང༌། །མཆོད་པར་འོས་རྣམས་སྤངས་པ་དང༌། །གཙང་སྦྲ་ཚུལ་བཞིན་མི་བྱེད་སོགས། །སྲོག་ཆགས་རྣམས་ཀྱི་ཀུན་སྤྱོད་ལ། །གླགས་སྐབས་རྣམ་པ་སྣ་ཚོགས་ཚོལ། །རིགས་སྔགས་དྲག་ཤུལ་ཅན་དག་གིས། །དཔག་ཚད་སྟོང་ནས་རབ་ཏུ་འདྲེན། །དེ་དག་བ་སྤུའི་སྒོ་སོགས་ནས། །འཇུག་བཟོད་ཕྲ་བའི་ལུས་ཅན་ཏེ། །གསོད་འདོད་གཏོར་མ་འདོད་པ་དང༌། ཁ་ཅིག་རྩེད་མོའི་ཕྱིར་དུ་ཡང༌། །གླགས་དང་བཅས་པའི་མི་རྣམས་ཀྱི། །ལུས་ལ་འཇུག་ཅིང་ཀུན་ཏུ་སྤྱོད། །དེ་དག་ལུས་ལ་བབ་པ་ན། །ཁྲོ་དང་དགོད་དང་གླུ་ལ་དགའ། །རྟག་པར་མང་དུ་སྨྲ་བྱེད་ཅིང༌། །དུ་ཞིང་ཕྱོགས་
སུ་འཕྱན་པར་བགྱིད། །ལྷ་དང་ལྷ་མིན་གནོད་སྦྱིན་སོགས། །དེ་དང་དེ་ཡི་སྤྱོད་པ་སྟོན། །ཉིན་བཞི་རྟག་པའི་རིམས་ལ་སོགས། །རིམས་དང་ནད་རིགས་མང་པོ་གཏོང༌། །སྐྱེས་པ་བུད་མེད་བྱིས་རྣམས་དང༌། །ཕྱུགས་དང་རྟ་རྣམས་ལ་ཡང་འཚེ། །ནད་དང་ནད་ཀྱི་མཚན་མ་ཡང༌། །ཕྱིན་ཅི་ལོག་ཏུ་སྣང་བར་བགྱིད། །དམག་དང་འཐབ་མོ་རྩོད་པ་འབྱིན། །མེ་དང་ཆུ་ཡི་འཇིགས་པ་དང༌། །ས་གཡོ་སྐར་མདའ་ལྟུང་བ་དང༌། །གཟའ་སྐར་འཇིགས་པ་སྣ་ཚོགས་སྟོན། །གྲོང་དང་ཡུལ་འཁོར་ཁང་ཁྱིམ་འཇིག །དུག་དང་བཅས་པའི་རླུང་གཏོང་ཞིང༌། །ཆུ་དང་རྩི་ཏོག་མ་རུངས་བྱེད། །ཆུ་ཆར་དུས་བཞིན་འབབ་པ་ལ། །བགེགས་བྱེད་སད་དང་སེར་བ་གཏོང༌། །ཁྱིམ་དུ་ཞུགས་ནས་རྫས་འཕྲོག་ཅིང༌། །ཟས་དང་ནོར་གྱི་གཡང་ལ་རྐུ། །ཡང་དག་འཇོག་གི་གནས་རྣམས་སུ། །སྒྲ་ཆེར་འདོན་ཞིང་དེ་དག་ན། །གནས་པའི་སེམས་ནི་རྙོག་པར་བྱེད། །སུ་དག་སྐལ་བ་དམན་པ་ཡི། །མི་དེ་རྣམས་ཀྱི་ཡིད་བསྒྱུར་ནས། །ནག་པོའི་ཕྱོགས་རབ་འཕེལ་བར་བྱེད། །མདོར་ན་མི་ཡི་འཇིག་རྟེན་ན། །སྡིག་དང་གནོད་འཚེར་བགྲང་བའི་ཕྱོགས། །རྣམ་པ་མང་པོ་སྟོན་བགྱིད་པའི། །འབྱུང་པོ་གང་དང་ཇི་སྙེད་པ། །དེ་ཀུན་འཇིག་རྟེན་སྤྱི་དང་ནི། །བྱེ་བྲག་བདག་ཅག་འཁོར་བཅས་ལ། །ལོག་པར་སེམས་པའི་བསམ་ངན་
དང༌། །དེས་བསྐྱེད་སྦྱོར་བ་ངན་པའི་རིགས། །མཐའ་དག་རྣམ་ཀུན་སྤོང་བའི་ཕྱིར། །ཆོས་བཞིན་ཡང་དག་བརྔན་པ་དང༌། །གཞན་ཡང་བདག་གམ་སྦྱིན་བདག་གིས། །སུ་སྔོན་སྲོག་ལས་ཕྲལ་བ་དང༌། །སྡུག་པའི་གཉེན་དང་ཕྱེ་བ་དང༌། །གནས་རྟེན་བཅོམ་དང་ལོངས་སྤྱོད་ཕྲོགས། །དེ་དང་དེ་ལ་སོགས་ཚུལ་གྱིས། །ཁྱེད་ལ་གནོད་པ་ཅི་བགྱིས་པའི། །ཁོན་འཛིན་ཆ་བཅས་སྦྱང་བའི་ཕྱིར། །སེར་སྣའི་གཏན་པ་མ་མཆིས་པའི། །མཆོད་སྦྱིན་འདོད་ཡོན་ལྔ་ལྡན་འབུལ། །གང་ཞིག་ཡི་དྭགས་འཇིག་རྟེན་དུ། །མི་བཟད་ལས་ཡོངས་སྨིན་པའི་ལུས། །ལྗོན་པ་ཀེང་ཤུ་ཀ་འདྲ་བ། །ཆུ་རྒྱུས་མང་པོས་ཤིན་ཏུ་སྦྲེལ། །སོལ་བ་མིག་སྨན་ལྟ་བུའི་མདོག །སྒྲ་ཡིས་ཁ་བཞིན་མུན་ལྟར་ཁེབས། །མིག་ཁུང་ཟབ་ལ་མཆི་མས་ཡོག །སེན་མོ་རིང་ཞིང་མདོག་མི་སྡུག །བ་སྤུ་རིང་ལ་གཟིང་བའི་ནང༌། །སྦྲང་བུ་ཤ་སྦྲང་མཆུ་རྣོན་སོགས། །ཞུགས་ནས་ཁབ་ལྟར་འབིགས་ཤིང་ཟ། །ལུས་ཀུན་འབར་བའི་ཕྲེང་བས་དཀྲིགས། །ལྷག་པར་བཀྲེས་ཤིང་སྨྲེ་སྔགས་འདོན། །སྐོམ་པས་ཉེན་ནས་ཕྱོགས་བཅུར་རྒྱུག །ཆུ་མེད་རི་བྲག་འབྲོག་རྣམས་སུ། །དུ་སྐད་འདོན་ཅིང་རྐང་ལག་རྡོལ། །དེ་དག་སྐྱབས་ཡོད་མ་ཡིན་ཞིང༌། །དཔུང་གཉེན་གྱུར་པ་འགའ་ཡང་མེད། །བརྒྱ་ལམ་ཞིག་ན་ཚེགས་ཆེན་པོས། །རྙེད་ཀྱང་ཚིམས་པར་མི་
འཐོབ་ཅིང༌། །ཅུང་ཟད་དེ་ཡང་མོད་ལ་སྐྱུགས། །དྲོད་དུས་ཚ་བ་བརྒྱ་འགྱུར་དང༌། །གྲང་ཚེ་ལྷགས་པ་བརྒྱ་འགྱུར་དུ། །བརྣག་དཀའི་ཚོར་བ་སྐྱེད་པར་བྱེད། །དེ་དག་ཆུ་ལ་འཐུང་ན་ཡང༌། །གཤིན་རྗེའི་སྐྱེས་བུ་མིག་དམར་ཞིང༌། །མཆུ་དང་ལྟོ་བ་རབ་འཕྱང་ལ། །ཧ་ཧའི་སྒྲ་སྒྲོགས་མཚོན་ཆ་ཐོགས། །ཆ་བྱད་བསྒྱུར་བ་འཆང་རྣམས་ཀྱིས། །སྤྱོ་ཞིང་ཤིན་ཏུ་རྡེག་པར་བྱེད། །དེ་བཞིན་ཀླུ་རྣམས་ཁ་ཅིག་ནི། །མཁའ་ལྡིང་ཁྲོ་བོའི་འཇིགས་པ་དང༌། །མེ་དང་རིག་སྔགས་བྱེ་ཚན་སོགས། །འཇིགས་པ་མང་པོས་ཀུན་ཏུ་ཁེབས། །དེ་སོགས་འབྱུང་པོ་ཐམས་ཅད་ལ། །ལྷན་ཅིག་སྐྱེས་དང་གློ་བུར་གྱི། །འཇིགས་དང་སྡུག་བསྔལ་ཅི་བདོག་པ། །ཐམས་ཅད་ཐམས་ཅད་ཉེར་ཞི་ནས། །རྟག་ཏུ་བདེ་བ་འཐོབ་བྱའི་ཕྱིར། །ཚོགས་ཆས་སྨན་དགུ་བསྡུས་ནས་འབུལ། །ལུས་དང་སྐྱེ་བ་སྣ་ཚོགས་ལྟར། །བསམ་པའི་ཁྱད་པར་སྣ་ཚོགས་པས། །སོ་སོའི་བསམ་པ་ཇི་བཞིན་དུ། །མཐུན་པའི་རྫས་རྣམས་ཅི་བདེར་བཞེས། །དེ་ཡང་བདག་དང་ཡོན་སྦྱོར་གྱི། །ནོར་ལས་དངོས་སུ་བཤམས་པ་དང༌། །བདེན་པའི་སྟོབས་དང་མོས་པའི་མཐུས། །སྦྱངས་ཤིང་བསྒྱུར་ནས་སྤེལ་བ་ཡི། །ཁྲུས་དང་དྲིལ་ཕྱིས་སྤྱད་པ་དང༌། །མེ་ཏོག་ཕྲེང་བ་སྣ་ཚོགས་དང༌། །བྱུགས་པ་དྲི་ཞིམ་མང་པོ་དང༌། ། །ཨ་ཀ་རུ་སོགས་བདུག་
པའི་སྤོས། །བཟའ་བ་སྣུམ་ཁུར་གསར་པ་དང༌། །མར་དང་བུ་རམ་ལ་སོགས་སུ། །བཅས་དང་མ་བཅས་འབྲས་ཆན་དང༌། །དེ་བཞིན་སྲན་མ་མུད་ག་དང༌། །མོན་སྲན་ལས་བགྱིས་ཚོད་མ་དང༌། །ནས་ཆེན་མར་དང་མེ་ཏོག་བཅུད། །བུ་རམ་ཤིང་གི་བཅའ་བ་དང༌། །ཤིང་ཏོག་རྣམ་པ་སྣ་ཚོགས་དང༌། །ལ་ཕུག་ལན་ཚ་ཏིལ་གྱི་ཕྱེ། །ཏིལ་གྱི་ཚིག་མའི་ཟས་དག་དང༌། །རྗེན་དང་བཙོས་པའི་ཤ་རྣམས་དང༌། །འོ་ཐུག་ཞོ་དང་མངར་བའི་ཁུ། །ཁྲག་དང་ཆང་དང་ཆུའི་བཏུང་བ། །ལ་སོགས་ཐུན་མོང་མཐུན་རྫས་དང༌། །སོ་སོར་དགོས་སུ་འཚམས་པ་ཡི། །གཏོར་མ་བཟང་ལ་མང་བ་རྣམས། །གསེར་སོགས་བཞུ་དང་མི་བཞུ་བའི། །རིན་པོ་ཆེ་ཡི་བྱེ་བྲག་དང༌། །དེ་དག་རྒྱན་དུ་བགྱིས་པ་དང༌། །གོས་ཀྱི་ཁྱད་པར་དུ་མ་དང༌། །གདུགས་སོགས་གང་ལ་གང་མཐུན་དུ། །སྦྱར་ནས་ཇི་ལྟར་འབྱོར་པ་དང༌། །ཅི་ལྟར་ནུས་བཞིན་ཡང་དག་འབུལ། །བདག་གམ་སྦྱིན་པའི་བདག་པོ་ཡི། །གནས་སམ་ལུས་དང་ལོངས་སྤྱོད་ལ། །ལྷག་པར་ཞེན་ཞིང་མི་གཏོང་ན། །དངོས་ལས་བཟོ་བཀོད་བཟང་བ་ཡི། །ཁང་ཁྱིམ་ཡུལ་འཁོར་བཅས་པ་དང༌། །གཟུགས་བྱད་མི་ལས་ལྷག་པ་ཡི། །གླུད་གཟུགས་རྒྱན་དང་ལྡན་པ་དང༌། །རྟ་ཕྱུགས་དབྱིག་ལ་སོགས་པ་རྣམས།
ཇི་ལྟ་བ་བཞིན་དེ་ལས་ཀྱང༌། །ལྷག་པའི་བར་དུ་བྱིན་བརླབས་ནས། །ཕུལ་བས་བདག་ཅག་འཁོར་བཅས་ཀྱི། །ཚབས་སམ་དོད་དུ་དགོངས་ལ་སྣོམས། །ཞི་ཞིང་བྱམས་པའི་སེམས་སུ་མཛོད། །གཉིས་པ་ནི། ཡེ་་སོགས། བཀའ་འདི་གཞན་དུ་མི་འགྱུར་དང༌། །མདོ་སྡེ་ལེགས་བརྗོད་བདེན་པའི་མཐུས། །ལྷ་གདོན་ཕོ་དང་མོ་རྣམས་དང༌། །ལྷ་ཡི་བུ་ཕོ་བུ་མོ་དང༌། །ལྷ་ཡི་རྒས་པོ་རྒས་མོ་དང༌། །ལྷ་འཁོར་ཕོ་དང་མོ་རྣམས་ཀུན། །སྤྱི་དགོས་མཐུན་པའི་རྫས་འདི་དག །བཞེས་ནས་ཚིམས་ཤིང་རངས་པར་ཤོག །བདག་དང་སྦྱིན་བདག་འཁོར་བཅས་ལ། །བསམ་དང་སྦྱོར་བ་ལོག་པའི་དུག །བྱུང་དགུ་གླུད་ལ་འཕོ་བ་དང༌། །སླད་ཀྱང་འབྱུང་བ་མེད་པར་མཛོད། །ཡེ་་སོགས། བཀའ་འདི་གཞན་དུ་མི་འགྱུར་དང༌། །མདོ་སྡེ་ལེགས་བརྗོད་བདེན་པའི་མཐུས། །ཀླུ་གདོན་ཕོ་དང་མོ་རྣམས་དང༌། །ཀླུ་ཡི་བུ་ཕོ་བུ་མོ་དང༌། །ཀླུ་ཡི་རྒས་པོ་རྒས་མོ་དང༌། །ཀླུ་འཁོར་ཕོ་དང་མོ་རྣམས་ཀུན། །སྤྱི་དགོས་མཐུན་སོགས། ཡེ་་སོགས། བཀའ་འདི་གཞན་དུ་མི་འགྱུར་དང༌། །མདོ་སྡེ་ལེགས་བརྗོད་བདེན་པའི་མཐུས། །ལྷ་མིན་ཕོ་དང་མོ་རྣམས་དང༌། །ལྷ་མིན་བུ་ཕོ་བུ་མོ་དང༌། །ལྷ་མིན་རྒས་པོ་རྒས་མོ་དང༌། །ལྷ་མ་ཡིན་འཁོར་ཕོ་མོ་རྣམས། །སྤྱི་དགོས་མཐུན་སོགས། ཡེ་་སོགས། བཀའ་
འདི་གཞན་དུ་མི་འགྱུར་དང༌། །མདོ་སྡེ་ལེགས་བརྗོད་བདེན་པའི་མཐུས། །རླུང་ལྷ་ཕོ་དང་མོ་རྣམས་དང༌། །རླུང་ལྷའི་བུ་ཕོ་བུ་མོ་དང༌། །རླུང་ལྷ་རྒས་པོ་རྒས་མོ་དང༌། །རླུང་ལྷའི་མངག་གཞུག་ཕོ་མོ་རྣམས། །སྤྱི་དགོས་སོགས། ཡེ་་སོགས། བཀའ་འདི་གཞན་དུ་མི་འགྱུར་དང༌། །མདོ་སྡེ་ལེགས་བརྗོད་བདེན་པའི་མཐུས། །ནམ་མཁའ་ལྡིང་ཕོ་མོ་རྣམས་དང༌། །མཁའ་ལྡིང་བུ་ཕོ་བུ་མོ་དང༌། །མཁའ་ལྡིང་རྒས་པོ་རྒས་མོ་དང༌། །མཁའ་ལྡིང་གཡོག་འཁོར་ཕོ་མོ་རྣམས། །སྤྱི་དགོས་སོགས། །ཡེ་་སོགས། བཀའ་འདི་གཞན་དུ་མི་འགྱུར་དང༌། །མདོ་སྡེ་ལེགས་བརྗོད་བདེན་པའི་མཐུས། །དྲི་ཟ་ཕོ་དང་མོ་དག་དང༌། །དྲི་ཟའི་བུ་ཕོ་བུ་མོ་དང༌། །དྲི་ཟ་རྒས་པོ་རྒས་མོ་དང༌། །དྲི་ཟའི་གཡོག་འཁོར་ཕོ་མོ་རྣམས། །སྤྱི་དགོས་སོགས། ཡེ་་སོགས། །བཀའ་འདི་གཞན་དུ་མི་འགྱུར་དང༌། །མདོ་སྡེ་ལེགས་བརྗོད་བདེན་པའི་མཐུས། །མི་ཅི་ཕོ་དང་མོ་དག་དང༌། །མི་ཅིའི་བུ་ཕོ་བུ་མོ་དང༌། །མི་ཅི་རྒས་པོ་རྒས་མོ་དང༌། །མི་ཅིའི་མངག་གཞུག་ཕོ་མོ་རྣམས། །སྤྱི་དགོས་སོགས། ཡེ་་སོགས། བཀའ་འདི་གཞན་དུ་མི་འགྱུར་དང༌། །མདོ་སྡེ་ལེགས་བརྗོད་བདེན་པའི་མཐུས། །ལྟོ་འཕྱེ་ཆེན་པོ་ཕོ་མོ་དང༌། །ལྟོ་འཕྱེའི་བུ་ཕོ་བུ་མོ་དང༌། །ལྟོ་འཕྱེ་རྒས་པོ་རྒས་མོ་དང༌། །ལྟོ་འཕྱེའི་གཡོག་
འཁོར་ཕོ་མོ་རྣམས། །སྤྱི་དགོས་སོགས། ཡེ་་སོགས། བཀའ་འདི་གཞན་དུ་མི་འགྱུར་དང༌། །མདོ་སྡེ་ལེགས་བརྗོད་བདེན་པའི་མཐུས། །གནོད་སྦྱིན་ཕོ་དང་མོ་དག་དང༌། །གནོད་སྦྱིན་བུ་ཕོ་བུ་མོ་དང༌། །གནོད་སྦྱིན་རྒས་པོ་རྒས་མོ་དང༌། །གནོད་སྦྱིན་མངག་གཞུག་ཕོ་མོ་རྣམས། །སྤྱི་དགོས་སོགས། །ཡེ་་སོགས། བཀའ་འདི་གཞན་དུ་མི་འགྱུར་དང༌། །མདོ་སྡེ་ལེགས་བརྗོད་བདེན་པའི་མཐུས། །སྲིན་པོ་ཕོ་དང་མོ་དག་དང༌། །སྲིན་པོའི་བུ་ཕོ་བུ་མོ་དང༌། །སྲིན་པོ་རྒས་པོ་རྒས་མོ་དང༌། །སྲིན་པོའི་མངག་གཞུག་ཕོ་མོ་རྣམས། །སྤྱི་དགོས་སོགས། ཡེ་་སོགས། བཀའ་འདི་གཞན་དུ་མི་འགྱུར་དང༌། །མདོ་སྡེ་ལེགས་བརྗོད་བདེན་པའི་མཐུས། །ཡི་དྭགས་ཕོ་དང་མོ་དག་དང༌། །ཡི་དྭགས་བུ་ཕོ་བུ་མོ་དང༌། །ཡི་དྭགས་རྒས་པོ་རྒས་མོ་དང༌། །ཡི་དྭགས་མངག་གཞུག་ཕོ་མོ་རྣམས། །སྤྱི་དགོས་སོགས། ཡེ་་སོགས། བཀའ་འདི་གཞན་དུ་མི་འགྱུར་དང༌། །མདོ་སྡེ་ལེགས་བརྗོད་བདེན་པའི་མཐུས། །ཤ་ཟ་ཕོ་དང་ཤ་ཟ་མོ། །ཤ་ཟའི་བུ་ཕོ་བུ་མོ་དང༌། །ཤ་ཟ་རྒས་པོ་རྒས་མོ་དང༌། །ཤ་ཟའི་གཡོག་འཁོར་ཕོ་མོ་རྣམས། །སྤྱི་དགོས་སོགས། ཡེ་་སོགས། བཀའ་འདི་གཞན་དུ་མི་འགྱུར་དང༌། །མདོ་སྡེ་ལེགས་བརྗོད་བདེན་པའི་མཐུས། །འབྱུང་པོ་ཕོ་དང་མོ་དག་དང༌། །འབྱུང་པོའི་བུ་ཕོ་བུ་མོ་དང༌། །འབྱུང་པོ་རྒས་པོ་རྒས་མོ་དང༌། །
འབྱུང་པོ་གཡོག་འཁོར་ཕོ་མོ་རྣམས། །སྤྱི་དགོས་སོགས། ཡེ་་སོགས། བཀའ་འདི་གཞན་དུ་མི་འགྱུར་དང༌། །མདོ་སྡེ་ལེགས་བརྗོད་བདེན་པའི་མཐུས། །གྲུལ་བུམ་ཕོ་དང་མོ་དག་དང༌། །གྲུལ་བུམ་བུ་ཕོ་བུ་མོ་དང༌། །གྲུལ་བུམ་རྒས་པོ་རྒས་མོ་དང༌། །གྲུལ་བུམ་མངག་གཞུག་ཕོ་མོ་རྣམས། །སྤྱི་དགོས་སོགས། ཡེ་་སོགས། བཀའ་འདི་གཞན་དུ་མི་འགྱུར་དང༌། །མདོ་སྡེ་ལེགས་བརྗོད་བདེན་པའི་མཐུས། །སྲུལ་པོ་ཕོ་དང་མོ་དག་དང༌། །སྲུལ་པོའི་བུ་ཕོ་བུ་མོ་དང༌། །སྲུལ་པོ་རྒས་པོ་རྒས་མོ་དང༌། །སྲུལ་པོའི་གཡོག་འཁོར་ཕོ་མོ་དང༌། །སྤྱི་དགོས་སོགས། ཡེ་་སོགས། བཀའ་འདི་གཞན་དུ་མི་འགྱུར་དང༌། །མདོ་སྡེ་ལེགས་བརྗོད་བདེན་པའི་མཐུས། །ལུས་སྲུལ་ཕོ་དང་མོ་དག་དང༌། །ལུས་སྲུལ་བུ་ཕོ་བུ་མོ་དང༌། །ལུས་སྲུལ་རྒས་པོ་རྒས་མོ་དང༌། །ལུས་སྲུལ་མངག་གཞུག་ཕོ་མོ་རྣམས། །སྤྱི་དགོས་སོགས། ཡེ་་སོགས། བཀའ་འདི་གཞན་དུ་མི་འགྱུར་དང༌། །མདོ་སྡེ་ལེགས་བརྗོད་བདེན་པའི་མཐུས། །སྐེམ་བྱེད་སྐེམ་བྱེད་མོ་དག་དང༌། །སྐེམ་བྱེད་བུ་ཕོ་བུ་མོ་དང༌། །སྐེམ་བྱེད་རྒས་པོ་རྒས་མོ་དང༌། །སྐེམ་བྱེད་གཡོག་འཁོར་ཕོ་མོ་རྣམས། །སྤྱི་དགོས་སོགས། ཡེ་་སོགས། བཀའ་འདི་གཞན་དུ་མི་འགྱུར་དང༌། །མདོ་སྡེ་ལེགས་བརྗོད་བདེན་པའི་མཐུས། །སྨྱོ་བྱེད་ཕོ་དང༌།
མོ་དག་དང༌། །སྨྱོ་བྱེད་བུ་ཕོ་བུ་མོ་དང༌། །སྨྱོ་བྱེད་རྒས་པོ་རྒས་མོ་དང༌། །སྨྱོ་བྱེད་མངག་གཞུག་ཕོ་མོ་རྣམས། །སྤྱི་དགོས་སོགས། ཡེ་་སོགས། བཀའ་འདི་གཞན་དུ་མི་འགྱུར་དང༌། །མདོ་སྡེ་ལེགས་བརྗོད་བདེན་པའི་མཐུས། །གྲིབ་གནོན་ཕོ་དང་མོ་དག་དང༌། །གྲིབ་གནོན་བུ་ཕོ་བུ་མོ་དང༌། །གྲིབ་གནོན་རྒས་པོ་རྒས་མོ་དང༌། །གྲིབ་གནོན་གཡོག་འཁོར་ཕོ་མོ་རྣམས། །སྤྱི་དགོས་སོགས། ཡེ་་སོགས། བཀའ་འདི་གཞན་དུ་མི་འགྱུར་དང༌། །མདོ་སྡེ་ལེགས་བརྗོད་བདེན་པའི་མཐུས། །བརྗེད་བྱེད་ཕོ་དང་མོ་དག་དང༌། །བརྗེད་བྱེད་བུ་ཕོ་བུ་མོ་དང༌། །བརྗེད་བྱེད་རྒས་པོ་རྒས་མོ་དང༌། །བརྗེད་བྱེད་གཡོག་འཁོར་ཕོ་མོ་རྣམས། །སྤྱི་དགོས་སོགས། ཡེ་་སོགས། བཀའ་འདི་གཞན་དུ་མི་འགྱུར་དང༌། །མདོ་སྡེ་ལེགས་བརྗོད་བདེན་པའི་མཐུས། །གནོན་པོ་ཕོ་དང་མོ་དག་དང༌། །གནོན་པོའི་བུ་ཕོ་བུ་མོ་དང༌། །གནོན་པོའི་རྒས་པོ་རྒས་མོ་དང༌། །གནོན་པོའི་གཡོག་འཁོར་ཕོ་མོ་རྣམས། །སྤྱི་དགོས་སོགས། ཡེ་་སོགས། བཀའ་འདི་གཞན་དུ་མི་འགྱུར་དང༌། །མདོ་སྡེ་ལེགས་བརྗོད་བདེན་པའི་མཐུས། །མདངས་འཕྲོག་པ་དང་མངལ་ལ་ཟ། །སྲོག་འཕྲོག་གཏོར་མ་ཟ་བ་དང༌། །ཤ་ཟ་བ་དང་ཁྲག་འཐུང་དང༌། །ཞག་དང་ཚིལ་བུ་ཟ་རྣམས་དང༌། །དེ་བཞིན་རྐང་དང་བཙས་པ་ཟ། །
དྲི་དང་མེ་ཏོག་འབྲས་བུ་དང༌། །ལོ་ཏོག་སྦྱིན་བསྲེག་ཟ་བ་དང༌། །རྣག་དང་ཕྱི་སའི་ཟས་ཅན་དང༌། །གཅིན་དང་མཆིལ་མ་ངར་སྣབས་ཟ། །སྣབས་དང་ལྷག་མ་ཟ་བ་དང༌། །སྐྱུགས་པ་རྣམས་དང་མི་གཙང་ཟ། །སྟོར་ཁུང་ནས་འབབ་འཐུང་བ་རྣམས། །སྤྱི་དགོས་མཐུན་པའི་རྫས་འདི་དག །བཞེས་ནས་ཚིམས་ཤིང་རངས་པར་ཤོག །བདག་དང་སྦྱིན་བདག་འཁོར་བཅས་ལ། །བསམ་དང་སྦྱོར་བ་ལོག་པའི་དུག །བྱུང་དགུ་གླུད་ལ་འཕོ་བ་དང༌། །སླད་ཀྱང་འབྱུང་བ་མེད་པར་མཛོད། །གཉིས་པ་ནི། ཡེ་་སོགས། ཆོས་གང་རྒྱུས་བྱུང་དེ་དག་དང༌། །རྒྱུ་དང་དེ་འགོག་གང་ཡིན་པའང༌། །དེ་བཞིན་གཤེགས་པས་བཀའ་སྩལ་ཏེ། །དེ་སྐད་གསུངས་པ་དགེ་སྦྱོང་ཆེ། །འཇིག་རྟེན་བདེ་སྡུག་མི་མཉམ་པ། །འདི་ཀུན་རྒྱུ་མེད་ངོ་བོ་དང༌། །དུས་དང་རང་བཞིན་ལས་སྐྱེས་མིན། །སྣ་ཚོགས་ལས་ཀྱི་བཟོ་བོས་བྱས། །ས་བོན་རྩུབ་མོ་བཏབ་པ་ལས། །འབྲས་བུ་རྩུབ་མོ་རྣམ་པར་སྨིན། །དེ་བཞིན་ས་བོན་དགེ་བ་ལས། །རྒྱུ་དང་མཐུན་པའི་འབྲས་བུ་འབྱུང༌། །རྨོངས་པ་སྡིག་ལ་དགའ་བ་རྣམས། །སྡུག་བསྔལ་ཉིད་དུས་སྡུག་བསྔལ་རྒྱུ། །ཕན་ཚུན་འཁོར་ལོ་བསྐོར་བ་བཞིན། །རྒྱུན་མི་འཆད་དུ་རྗེས་སུ་འཇུག །ཁྱེད་ཀྱང་བསོད་ནམས་མ་ཡིན་པའི། །སྔོན་བྱས་ལས་ཀྱིས་འདིར་སྐྱེས་ཏེ། །ད་དུང་གཞན་ལ་གནོད་བགྱིད་ན། །ཤི་
འཕོས་འགྲོ་བ་ཇི་ལྟར་འགྱུར། གཞན་གྱི་འཚོ་བ་ཕྲོགས་ནས་སུ། །བདག་ཉིད་འཚོ་བ་ལྷུར་ལེན་རྣམས། །ཟས་ཀྱི་དགོས་པ་ཙམ་གྱི་ཆེད། །ངན་འགྲོའི་གནས་སུ་ཡུན་རིང་བརླག །ཇི་ལྟར་བདག་ལ་སྲོག་ཕངས་པ། །དེ་ལྟར་ཀུན་ལ་སྲོག་ཕངས་པས། །རྣམ་ཀུན་གཞན་ལ་མི་འཚེ་བའི། །ཚུལ་ཁྲིམས་མང་དུ་གོམས་པར་མཛོད། །སྤྲོ་ན། ཡན་ལག་བྱེ་བྲག་བཅུ་གཉིས་གང༌། །ཐུབ་པས་རྟེན་འབྱུང་གསུངས་དེ་དག་སོགས། དབུ་མ་རྟེན་འབྲེལ་སྙིང་པོའི་གཞུང་བཀླག །སྡིག་པ་ཅི་ཡང་མི་བྱ་སོགས། བསྟན་པ་ཡིན། བཞི་པ་ལ། དཀོན་མཆོག་གསུམ་གྱི་བདེན་སྟོབས་དང༌། གདོན་རྣམས་ཀྱི་བདག་པོའི་བདེན་སྟོབས་བརྗོད་པ་གཉིས། དང་པོ་ནི། ཡེ་་སོགས། དེ་ཕྱིར་རྐང་གཉིས་འཇིག་རྟེན་ན། །སངས་རྒྱས་མཆོག་ཡིན་བདེན་པའི་ཚིག །དེ་བསྟན་ཁོ་ནར་ཆོས་ཀྱི་མཆོག །འདོད་ཆགས་བྲལ་ཡོད་བདེན་པའི་ཚིག །ཆོས་དེ་མངོན་སུམ་བགྱིས་པ་རྣམས། །ཚོགས་ཀྱི་མཆོག་ཡིན་བདེན་པའི་ཚིག །དཀོན་མཆོག་བདེན་མཐུ་བསམ་མི་ཁྱབ། །མདོ་སྡེའི་ནུས་པ་བསམ་མི་ཁྱབ། །བདེན་ལས་མཐུ་སྟོབས་ཆེ་བ་གཞན། །འཇིག་རྟེན་ཀུན་ན་མ་མཆིས་ཏེ། །བདེན་པས་མེ་དང་ཆུ་གཏེར་དང༌། །སྤྲིན་ཡང་འདོད་པ་བཞིན་དུ་བྱེད། །འཇིག་རྟེན་དཀའ་ཐུབ་གྲུབ་རྣམས་ཀྱི། །དམོད་པའི་མཚོན་ཡང་མི་བཟད་ན། །བླ་མེད་ཡེ་ཤེས་བརྙེས་རྣམས་ཀྱི། །གསུང་གི་ནུས་པ་སྨོས་ཅི་འཚལ། །
དེ་ལྟར་བདེན་པ་འདི་དག་དང༌། །བདེན་པའི་ཚིག་ནི་དེ་དག་གིས། །རླུང་དང་མཁྲིས་པ་ལས་གྱུར་དང༌། །བད་ཀན་འདུས་ལས་གྱུར་པ་ཡི། །ནད་རྣམས་ཐམས་ཅད་ཟད་པ་དང༌། །ཞི་ཞིང་རབ་ཏུ་ཞི་བར་ཤོག །མཐོང་དང་རེག་དང་ཁ་རླངས་དང༌། །དམོད་པ་རིག་སྔགས་ལས་གྱུར་སོགས། །དུག་རྣམས་ཐམས་ཅད་ངེས་པར་བཅོམ། །གདོན་ཀུན་བྱམས་དང་ལྡན་པར་ཤོག །ཆུ་དང་མེ་དང་གནམ་ལྕགས་དང༌། །བཤེས་བྲལ་རྣམས་དང་དབུལ་ཕོངས་དང༌། །གཡུལ་དང་རྒྱལ་པོའི་ཆད་པ་དང༌། །སྡིག་པའི་མཚན་མ་སྣ་ཚོགས་སོགས། །མི་དང་མི་མིན་ལས་བྱུང་བའི། །འཇིགས་པའི་རང་བཞིན་ཇི་སྙེད་པ། །ལེགས་གསུང་མདོ་སྡེའི་གཟི་བརྗིད་ཀྱིས། །བཅོམ་ནས་ལྡོག་ཏུ་མེད་པར་ཤོག །བདག་དང་གཞན་གྱི་གཟི་བྱིན་དང༌། །སྟོབས་དང་གཡང་ལ་བརྐུས་པ་རྣམས། །མདོ་སྡེའི་ནུས་པས་སླར་ཕྲོགས་ནས། །ཞི་དང་བདེ་ལེགས་འགྱུར་བར་ཤོག །གདོན་རྣམས་རང་རང་ལས་རྗེས་སུ། །འབྲེལ་བའི་སྡུག་བསྔལ་ཅི་མཆིས་ཀྱང༌། །མདོ་སྡེའི་བདུད་རྩི་འདི་ཉིད་ཀྱིས། །ཉེ་བར་ཞི་ནས་བདེ་གྱུར་ཅིག །ཡུལ་འཁོར་འདི་དང་གྲོང་འདི་དང༌། །ནད་པ་འདི་ཞེས་བྱ་ལ་སོགས། །ཇི་ལྟར་དམིགས་བཞིན་བསྲུང་བ་དང༌། །བསྐྱབ་དང་གཟུང་བ་འགྲུབ་གྱུར་ཅིག །ཅེས་བརྗོད་དེ་གཟུངས་ཆབ་དང༌། སྟོན་པའི་སྐུ་གཟུགས་ལ་ཁྲུས་གསོལ་བའི་ཁྲུས་ཆབ་ཀྱིས་བསྒྲུབ་བྱ་བཀྲུ་ཞིང༌། འབྱུང་
པོའི་དཀྱིལ་འཁོར་གྱི་ཕྱོགས་སུའང་འཐོར། དེ་འདྲ་བ་ལན་ཅི་ནུས་སུ་བསྐྱར། གཉིས་པ་ནི། ཡེ་་སོགས་མཐར། རྒྱལ་བ་ཉིད་ལས་མངོན་སུམ་དུ། །མདོ་འདི་སྔོན་ཆད་ཐོས་པ་ཡི། །ཚངས་དང་ལེགས་ལྡན་སྲེད་མེད་བུ། །དབང་ཕྱུག་ཆེ་དང་རྡོ་རྗེ་འཆང༌། །དྲི་ཟ་གཙུག་ཕུད་ལྔ་པ་སོགས། །མཐུ་ཆེ་རྫུ་འཕྲུལ་ཆེ་བའི་ལྷ། །དེ་རྣམས་ཀུན་གྱི་གཟི་བརྗིད་དང༌། །མིང་དང་དབང་ཕྱུག་སྟོབས་ཀྱིས་ཀྱང༌། །ཉིན་གཅིག་པ་དང་ཉིན་གཉིས་སོགས། །རིམས་རྣམས་ཐམས་ཅད་ཞི་གྱུར་ཅིག །ཤུ་བ་མེ་དབལ་ལ་སོགས་པ། །གཉན་རྣམས་ཐམས་ཅད་ཞི་གྱུར་ཅིག །ཀླད་ནད་གཞོགས་ཕྱེད་ན་བ་སོགས། །ནད་རྣམས་ཐམས་ཅད་ཞི་གྱུར་ཅིག །ལྷ་དང་གནོད་སྦྱིན་ལ་སོགས་པ། །གདོན་རྣམས་ཐམས་ཅད་ཞི་གྱུར་ཅིག །གྲུབ་དང་འབྱུང་པོས་བྱས་ལ་སོགས། །རིགས་སྔགས་ཐམས་ཅད་ཞི་གྱུར་ཅིག །རྩ་བ་མཆེ་བའི་དུག་ལ་སོགས། །དུག་རྣམས་ཐམས་ཅད་ཞི་གྱུར་ཅིག །དགྲ་དང་ཆོམ་པོས་འཚེ་བ་སོགས། །འཇིགས་པ་ཐམས་ཅད་ཞི་གྱུར་ཅིག །ཞི་ནས་བདག་ཅག་འཁོར་དང་བཅས། །ཚེ་རིང་ནད་རྣམས་མེད་པ་དང༌། །དབང་ཕྱུག་བདེ་བ་དཔེ་མེད་ཤོག །དེ་བཞིན་འབྱུང་པོ་ཐམས་ཅད་ཀྱང༌། །རྟག་ཏུ་བྱམས་པ་ལ་གནས་ཤིང༌། །སྡུག་བསྔལ་ཀུན་དང་བྲལ་བར་ཤོག །ཅེས་ཇི་ལྟར་འཚམས་པ་བཟླ། ལྔ་པ་ནི། མདོས་དཀྱིལ་བསྐུལ་ཏེ། དེ་ལྟར་མཆོད་སྦྱིན་དཀྱིལ་
འཁོར་འདིར། །འབྱུང་པོ་ཐམས་ཅད་སྤྱན་དྲངས་ནས། །བརྔན་སྦྱིན་རྒྱ་ཆེར་བྱས་ཟིན་པས། །དུས་ཤེས་གྱིས་ལ་གཞན་དུ་དེངས། །ཤིང་གཅིག་ལྷ་ཁང་སྟོང་པ་དང༌། །དུར་ཁྲོད་ལ་སོགས་འབྱུང་པོའི་གནས། །ཇི་ལྟར་བདེ་བ་དེ་དང་དེར། །ཕྱི་མིག་མ་ལྟ་དགའ་མགུར་སོང༌། །སྙིང་བརྩེ་ཕྱོགས་སུ་མ་ལྷུང་བས། །ཅི་འདོད་ཕངས་པ་མ་མཆིས་པར། །བསྟབས་པའི་རྫས་འདིས་མགུས་བྱོས་ལ། །ཕན་ཚུན་རྩོད་པ་མེད་པར་དོང༌། །ཟང་ཟིང་སྦྱིན་པས་རབ་མགུ་ཞིང༌། །ཆོས་སྦྱིན་བཟང་པོས་དུལ་བའི་སེམས། །མཐུན་པའི་སྤྱོད་ཡུལ་འབའ་ཞིག་ནས། །གཞན་གནོད་མ་བྱེད་དྲང་པོར་སོང༌། །སུ་དག་ཞི་བའི་ཡིད་ཅན་དང༌། །ཕན་པར་འདོད་པས་གནས་རྣམས་ནི། །ཅི་བདེ་བར་ནི་སྤྱོད་ཅིང་འཁོད། །དེ་ཀུན་དོན་ཡང་འགྲུབ་པར་ཤོག །འབྱུང་པོ་གང་དག་གདམས་ན་ཡང༌། །བྱམས་པའི་དྲིན་ལ་མི་སེམས་ཤིང༌། །བདེན་པའི་ཚིག་ལ་མི་བརྩི་ན། །དེ་དག་མདོ་སྡེའི་ཞགས་པས་བརླག །དེ་དག་ལུས་ལ་ཤ་བཀྲ་དང༌། །ཕོལ་མིག་མི་བཟད་འབྱུང་བར་འགྱུར། །དེ་ཡི་བུ་ཕོ་ཐུ་བོ་ཡང༌། །མདོ་སྡེའི་ཆད་པས་འཆི་བར་འགྱུར། །མཐུ་ཆེན་རྒྱལ་པོ་སྡེ་བཞི་ཡི། །གཞལ་མེད་ཁང་པ་ཉམས་དགའ་དང༌། །ཉམས་དགའི་འབྱོར་པ་རྒྱ་ཆེན་ཀུན། །མཐོང་བར་ཡང་ནི་མི་འགྱུར་རོ། །འབྱུང་པོ་མང་པོའི་ཟས་གྲལ་དུ། །སྟན་དང་ཆུ་ཡང་མི་འཐོབ་སྟེ། །དེ་
དག་རྒྱལ་པོའི་ཆད་པ་ཡིས། །གནས་ནས་གནས་སུ་སྐྲོད་པར་འགྱུར། །རྒྱལ་པོའི་གཡོག་འཁོར་རྫུ་འཕྲུལ་ཅན། །བཞོན་པ་སྣ་ཚོགས་ལ་ཞོན་ནས། །ཕྱོགས་བཞི་ཡོངས་སུ་སྐྱོང་རྣམས་ཀྱང༌། །མཚོན་ཆ་མང་པོ་འཕེན་པར་བྱེད། །དེ་ཕྱིར་བདེན་པའི་ཚིག་ཉན་ནས། །གྲོང་ཁྱེར་བསྲུང་བ་འདི་ཐོང་ལ། །བྱིན་པའི་མདོས་གླུད་འདི་ཉིད་བཞེས། །ད་ལྟ་ཉིད་དུ་སོ་སོར་དེངས། །མདོས་བཏེགས་ལ། སྤོས་དུད་རོལ་མོའི་སྒྲ་ལ་སོགས་པས་མདུན་བསུས་ཏེ། འབྱུང་པོ་གང་དག་མཆོད་སྦྱིན་གྱི་ཆོ་གས་ལེགས་པར་བརྔན་ཞིང་རིགས་པའི་ཚིག་གིས་བསྒོ་ཡང་མི་འགྲོ་ཞིང་སླར་ལ་མི་ཕན་པར་སེམས་པ་དེ་དག་ལེགས་པར་གསུངས་པའི་གཟི་བརྗིད་ཀྱིས་ཉམས་ནས་རབ་ཏུ་ཕམ་པར་གྱུར་ཅིག །ཡེ་་ཧེ་ཏུ་པྲ་བྷ་ཝཱ་ཧེ་ཏུནྟེ་་ཐཱ་ག་ཏོ་ཧྱ་བ་དཏ། ཏེ་་ཡོ་ནི་རོ་དྷ་ཨེ་ཝཾ་བཱ་དྭི་མ་ཧཱ་ཤྲ་མཎཿ སོགས་ཅི་རིགས་བཟླ། གླུད་གཏོར་རྣམས་སྲང་མདོ་དང་ཆུ་ཀླུང་ལ་སོགས་པ་འབྱུང་པོ་འདུ་བའི་ཕྱོགས་སུ་སྐྱེལ་བར་བྱའོ། །གསུམ་པ་ནི། གསེར་ལ་སོགས་པས་བྲིས་པའི་རྟེན་འབྲེལ་སྙིང་པོའི་གླེགས་བམ་རྒྱལ་མཚན་གྱི་རྩེ་མོ་ལ་བཏགས་ཏེ་སྤོས་རོལ་དང་བ་དན་ལ་སོགས་པ་མཆོད་སྤྲིན་ཆེན་པོ་དང་བཅས་པས་གྲོང་ཁྱེར་རམ་ཁྱིམ་མམ་ཡུལ་འཁོར་གང་བསྲུང་བར་འདོད་པ་དེ་སྐོར་ཞིང༌། དེ་དང་དེའི་དབུས་སུ་མཆོད་སྟོན་རྒྱ་ཆེར་བཤམས་པའི་དཀྱིལ་དུ་བཙུགས་ལ་དགེ་འདུན་རྣམས་མདུན་དུ་འཁོད་དེ་ཡངས་པའི་གྲོང་ཁྱེར་དུ་འཇུག་པ་ནས་གསུངས་པ་སོགས་བདེ་ལེགས་ཀྱི་ཚིགས་སུ་བཅད་པ་བཀླག །རྒྱལ་མཚན་བཀུར་སྟི་ཆེན་པོ་དང་བཅས་པས་རང་གནས་སུ་སྤྱན་
དྲངས་པར་བྱའོ། །དེ་ལྟར་མ་གྲུབ་ནའང་ཤིས་བརྗོད་ཀྱི་མདོ་སྡེ་ཀློག་པ་སོགས་བྱའོ། །འགྲོ་མང་སྡུག་བསྔལ་ལས་སྐྱོབ་ཕྱིར། །གསོ་ཆོག་བཟང་པོ་འདི་སྦྱར་བས། །སེམས་ཅན་ཐམས་ཅད་བྱང་ཆུབ་ཀྱི། །བདེ་བ་མི་ཟད་ལ་རེག་ཤོག །རྟེན་འབྲེལ་སྙིང་པོ་ལ་བརྟེན་ནས་གླུད་གཏོར་བསྔོ་བའི་ཆོ་ག་བྱམས་ཆེན་སྤྲིན་གྱི་རྔ་སྒྲ་ཞེས་བྱ་བ་འདིའང་འཇིགས་མེད་བསྟན་པའི་ཉི་མས་རང་ཉིད་བགྲང་བྱ་ཉེར་དྲུག་ཏུ་སོན་པ་ལྕགས་སྟག་རྒྱལ་གྱི་ཉ་བའི་དཀར་ཕྱོགས་ཀྱི་རྫོགས་པ་ཕྱི་མ་ལ་ལེགས་པར་གྲུབ་པར་བགྱིས་པའི་དགེ་བས་སེམས་ཅན་ཐམས་ཅད་བདེ་ལེགས་ཀྱི་དཔལ་ལ་ལོངས་སྤྱོད་པར་གྱུར་ཅིག། །།