རྟེན་འབྲེལ་སྙིང་པོ་ལ་བརྟེན་ནས་བསོད་ནམས་བྱ་བའི་ཆོ་ག
རྟེན་འབྲེལ་སྙིང་པོ་ལ་བརྟེན་ཏེ་བསོད་ནམས་བྱ་བའི་ཆོ་ག་མཆོད་སྦྱིན་གཏེར་གྱི་རྒྱ་མཚོ་ཞེས་བྱ་བ་བཞུགས་སོ། །
བླ་མ་་སེང་གེ་ལ་ཕྱག་འཚལ་ལོ། །དེའང་གཟུངས་སྔགས་ཀྱི་ཚུལ་རྒྱ་མཚོའི་ནང་ནས་ཆོས་ཕུང་བརྒྱད་ཁྲི་བཞི་སྟོང་གི་བསྟན་དོན་སྟོང་དང་རྟེན་འབྱུང་ཟུང་འཇུག་གི་དོན་དུ་བཟླུམ་པ་རྟེན་འབྲེལ་སྙིང་པོའི་གཟུངས་ལ་བརྟེན་ཏེ་མཆོད་སྦྱིན་གྱི་ཆོ་ག་ཉེ་བར་སྒྲུབ་པ་ལ། སྦྱོར་དངོས་གཉིས་ལས་དང་པོ་ནི། །གོང་དུ་མཆོད་པའི་མནྜལ་ཟླུམ་པོ་བ་བྱུང་དང་དྲི་བཟང་གིས་བྱུགས་པའི་དཀྱིལ་དུ་སྟོན་པའི་སྐུ་བྱིན་ཅན་བཞུགས། དེའི་གཡས་སུ་གཟུངས་བུམ་བཟང་པོ་དྲུག་དང་གྷི་ཧཾ་དང་ཙནྡན་དཀར་དམར་ལ་སོགས་པའི་ཆུས་བལྟམས་ཤིང་འབྲས་བུ་ཅན་གྱི་ཤིང་གི་ཁ་རྒྱན་དང་བཅས་ཏེ་བཞག་ལ། མཐའ་བསྐོར་དུ་མཆོད་ཡོན་དང་མེ་ཏོག་དང་སྤོས་དང་མར་མེ་དང་ལྷ་བཤོས་ལ་སོགས་པ་བཟང་ལ་མང་བ་བརྒྱ་མཆོད་དམ་སྟོང་མཆོད་ལྟ་བུ་ཅི་འབྱོར་བསྟར་ལེགས་སུ་བཤམ། མཆོད་དཀྱིལ་གྱི་མདུན་ངོས་དམའ་བར་སྟེགས་བུ་གྲུ་བཞི་ཁྱོན་ཡངས་པ་ལ་དབུས་སུ་རི་རབ་དང༌། ཕྱོགས་མཚམས་སུ་གླིང་གཙོ་དང༌། གླིང་ཕྲན། མཐའ་བསྐོར་དུ་ཁོར་ཡུག་ལྕགས་རི་དང་བཅས་པའི་བཀོད་པ་
རགས་པ་རེ་བྱས་ལ་ཚོན་གྱིས་བསྒྱུར། རི་རབ་ཀྱི་སྟེང་དུ་ཚོན་སྣའི་སྐུད་པ་ལས་ཁང་བཟང་གྲུ་བཞི་པའི་རྣམ་པར་ཕུབ་སྟེ་དེའི་ནང་གི་ཕྱོགས་བཞི་དབུས་དང་ལྔར་རིན་པོ་ཆེའི་སྣོད་བཟང་པོར་དཀར་གསུམ་མངར་གསུམ་གྱི་གཏོར་མ་ཟླུམ་པོ་གཙང་ཞིང་གྱ་ནོམ་པ་དང༌། མཆོད་ཡོན་རྙོག་མེད། འོ་ཕུད་མངར་དང་སྦགས་པ་རྣམས་ཚང་བ་རེ་བཤམས། །དབུས་ཀྱི་གཏོར་མའི་མདུན་ཕྱོགས་སུ་དམར་གཏོར་བརྗིད་བག་ཅན་ཟན་དང་ཤ་དུམ་སོགས་ཀྱིས་བསྐོར་བ་དང༌། བར་མཚམས་སུ་དཀར་གཏོར་གང་རིགས་བཞག་གླིང་བཞི་གླིང་ཕྲན་བརྒྱད་ལ་སོ་སོར་ངར་གླུད་དང་ནམ་རྒྱང་མདའ་འཕང་ཤིང་རིས་རྣམས་ཚང་བ་རེ་དང༌། །དེ་དག་གི་མཐར་ཤ་ཆང་ལ་ཕུག་སྒོག་ཙོང་སྲན་ཆན་སོགས་འབྱུང་པོའི་ཟས་སྣ་དང༌། གོས་དར་འབྲུ་སྣ་རིན་པོ་ཆེ་སོགས་དཀོར་ཆ། །མཐའ་འཁོར་དུ་རི་དྭགས་དང་གཡུང་དྭགས་སོགས་སྲོག་ཆགས་ཀྱི་མདངས་གང་མང་བཀོད། ངར་གླུད་རྣམས་ཀྱི་མདུན་དུ་ཆང་བུ་དང་ཏིང་ལོ་བཞག །ཅི་བདེ་བར་ཁ་སྐོང་གི་མཆོད་གཏོར་དཀར་མངར་ཟས་སྣས་
སྦགས་པ་བརྒྱ་རྩ་དང༌། དེ་ལས་ལོགས་སུ་མཐིང་ཤེལ་ཟངས་ལྕགས་སོགས་གླུད་རྫས་དང་འབྱུང་བཞིའི་འཁོར་ལོ་སྲོག་ཞུགས་ཀྱི་སྦྲེལ་གླུད་ཆེ་བ་གླུད་ཕྲན་བརྒྱ་རྩ། ཆང་བུ་བརྒྱ་རྩ། རིལ་བུ་བརྒྱ་རྩ་རྣམས་ཇ་ཤ་སྔོ་ངད་སོགས་ཀྱིས་བརྒྱན་ཏེ་ཉེ་བར་བསྡོགས། དེ་ནས་དངོས་གཞི་ལ་བབ་པ་ན། གཙང་སྦྲའི་ཀུན་སྤྱོད་དང་ལྡན་པས་མཆོད་སྦྱིན་མཁན་པོ་རྣམས་རང་རང་གི་སྟན་ལ་འདུག་སྟེ། དཀོན་མཆོག་གསུམ་ལ་གུས་པ་མངོན་དུ་ཕྱོགས་པའི་ཡིད་ཀྱིས་སྐྱབས་སེམས་བྱ། རྟེན་སྙིང་གི་ཆོ་ག་རྒྱ་གཞུང་མའི་རང་ཚིག ༈ །འདི་ལྟར་ལས་དང་ཉོན་མོངས་ཡོད་གྱུར་ན། །སེམས་ཅན་རྣམས་ནི་འཁོར་བར་འགྲོ་འགྱུར་ལ། །ལས་དང་ཉོན་མོངས་མེད་ན་འཁོར་བ་ལས་ཀྱང་ལྡོག །བདེན་པ་འདི་ཡིས་བདག་གི་བསམ་པ་འགྲུབ་གྱུར་ཅིག །སངས་རྒྱས་ལ་ཕྱག་འཚལ་ལོ། །ཆོས་ལ་ཕྱག་འཚལ་ལོ། །དགེ་འདུན་ལ་ཕྱག་འཚལ་ལོ། །ཡང་དག་པར་རྫོགས་པའི་སངས་རྒྱས་གངྒའི་ཀླུང་གི་བྱེ་མ་སྙེད་བཞུགས་པ་རྣམས་ལ་ཕྱག་འཚལ་ལོ། །རང་སངས་རྒྱས་རྣམས་ལ་ཕྱག་འཚལ་ལོ། །དགྲ་བཅོམ་པ་རྣམས་ལ་ཕྱག་འཚལ་ལོ། །ཕྱིར་མི་འོང་བ༴ ལན་ཅིག་ཕྱིར་འོང་བ༴ རྒྱུན་དུ་ཞུགས་པ༴ འཕགས་པ་བྱམས་པ་ལ་སོགས་པའི་བྱང་ཆུབ་སེམས་དཔའ༴ བརྟུལ་ཞུགས་གྲུབ་པ༴ སེམས་ཅན་གྱི་སྨན་པ༴ ནོར་བུ་གྲུབ་པ་རྣམས་ལ་ཕྱག་འཚལ་ལོ། །ཞེས་པའི་མཐར་རྟེན་སྙིང་དང་མཆོད་པའི་སྤྲིན་གཟུངས་སྦྲེལ་བ་ལན་བདུན་གྱིས་མཆོད་པ་རྣམས་བྱིན་གྱིས་བརླབས་ལ་སྟོང་གསུམ་ཡུངས་འབྲུར་ཚུད་པའི་ཏིང་ངེ་འཛིན་གྱི་སྒོ་ལ་དྲན་པ་ཉེ་བར་བཞག་སྟེ་མཆོད་ཚུལ་དྲུག་ལྡན་དུ་འབུལ། རྗེས་སུ་རོལ་མོ་བྱ། དེ་ནས། ན་མོ་རཏྣ་ཏྲ་ཡཱ་
ཡ། སོགས་རྟེན་སྙིང་གི་བཟླས་པ་བྱ་ཞིང་སྟོང་ཉིད་དང་རྟེན་འབྱུང་ཐ་མི་དད་པའི་དོན་ལ་དཔྱད་པས་དྲང་བའི་ངེས་ཤེས་ཁྱད་པར་ཅན་བསྐྱེད་དེ་སྟོན་པ་ཆོས་ཀྱི་སྐུ་རྗེས་སུ་དྲན་པའི་ངང་ལ་བློ་བཞག །ཐུན་མཐར་ཉེ་བ་ན། མདུན་མཁར་བཞུགས་པའི་ཐུབ་དབང་འཁོར་བཅས་ཀྱི་སྐུ་ལས་འོད་ཟེར་བདུད་རྩིའི་རང་བཞིན་ཅན་གསེར་ཞུན་མའི་ཁ་དོག་ལྟ་བུ་བབས་པས་བུམ་པ་ཡོངས་སུ་གང་བར་གྱུར་པའི་དམིགས་འདུན་གྱིས་གཟུངས་ཅི་ནུས་བཟླ། །དེ་དག་གྲུབ་ནས། ཐལ་མོ་སྦྱར་བ་བཏུད་དེ། །གང་གིས་རྟེན་ཅིང་འབྲེལ་བར་འབྱུང༌། །སྐྱེ་མེད་ཟད་པ་མེད་བསྟན་པས། །སྲིད་པའི་འཆིང་བ་གཅོད་མཛད་པ། །ཀུན་མཁྱེན་ཁྱོད་ལ་བདག་ཕྱག་འཚལ། །སྣང་བས་སྟོང་པ་ལ་འཇུག་ཅིང༌། །སྟོང་ཉིད་སྣང་བའི་སྒོར་སྟོན་པའི། །མགོན་པོ་གཉིས་མེད་ཚུལ་གསུངས་པ། །ཀུན་མཁྱེན་ཁྱོད་ལ་བདག་ཕྱག་འཚལ། །བརྗོད་མེད་དེ་ཉིད་ལ་གནས་ནས། །བརྗོད་པའི་ཐ་སྙད་སྣ་ཚོགས་ཀྱིས། །འགྲོ་ལ་ཞི་གྱུར་དོན་སྟོན་པ། །ཀུན་མཁྱེན་ཁྱོད་ལ་བདག་ཕྱག་འཚལ། །ཆོས་ཉིད་གཅིག་ལས་མ་གསུངས་ཀྱང༌། །རིགས་ཅན་བསམ་པའི་རྗེས་འགྲོ་བས། །རྒྱས་དང་བསྡུས་ཚུལ་མང་སྣང་བ། །ཀུན་མཁྱེན་ཁྱོད་ལ་བདག་ཕྱག་འཚལ། །ཕྱི་ཚུལ་ངལ་བརྒྱ་མ་བརྟེན་པར། །ནང་གི་བདག་ཉིད་རྣམ་དག་པས། །ཁྱད་པར་ཕུལ་བྱུང་རྙེད་མཛད་པ། །ཀུན་མཁྱེན་ཁྱོད་ལ་བདག་ཕྱག་འཚལ། །སྟོན་པ་མཆོག་ལ་འདིས་བསྟོད་པའི། །བསོད་ནམས་གང་ཞིག་བདག་རྙེད་པ། །
དེ་ཡིས་སྐྱེ་བོ་ཐམས་ཅད་ནི། །མགོན་པོ་དོན་ཀུན་གྲུབ་འདྲར་ཤོག །ཅེས་བསྟོད་སྨོན་བྱ། དེ་ནས་མདོས་ཆོག་བྱ་བ་ལས། ཐོག་མར་གདོན་གྱི་སྡེ་དཔོན་ཆེན་པོ་རྣམས་ལ་མཆོད་པ་ནི། ཁང་བཟང་དུ་བཀོད་པའི་གཏོར་མ་སོགས་མཆོད་རྫས་རྣམས། སྔགས་དྲུག་ཕྱག་དྲུག་གིས་བརླབ་ལ། ཀྱཻ། སྲིད་པའི་དྲི་ཟའི་གྲོང་ཁྱེར་བཞིན། །སྐྱེ་འགགས་འགྲོ་འོང་མི་དམིགས་ཀྱང༌། །འཛིན་པ་ལས་ཀྱི་རྗེས་འབྲངས་པས། །བརྟན་གཡོ་སྒྱུ་མའི་རོལ་པར་ཤར། །དབྱིངས་ལ་སྣོད་བཅུད་མ་མཆིས་ཏེ། །སྣང་བ་རྟེན་འབྲེལ་འཁོར་ལོ་ནི། །རྟོག་པ་སྨིག་རྒྱུ་ལྟ་བུ་རུ། །བརྟེན་ནས་འབྱུང་བ་ཁོ་ནར་ཟད། །དོན་ལ་གཙོ་འཁོར་མ་གྲུབ་ཀྱང༌། །འཇིག་རྟེན་ལས་ཀྱི་ཟློས་གར་ཆེ། །ཚོགས་ཤིང་དུས་ལ་བབས་པ་ན། །བདེ་སྡུག་རྨི་ལམ་བཞིན་དུ་སྣང༌། །མཐོན་པོ་ཉི་ཟླའི་སྐ་རགས་ཅན། །འཆི་མེད་ལྷ་བརྒྱའི་འདུན་ས་སྟེ། །རི་རྒྱལ་ལྷུན་པོའི་བ་གམ་ནི། །གདོན་གྱི་སྡེ་དཔོན་དུ་མའི་གནས། །ཤར་ཕྱོགས་ལྷུན་པོའི་རྩེ་བླ་ན། །བསོད་ནམས་སྤྲིན་གྱི་རོལ་མོའི་སྒྲ། །སྲིད་ན་ཆེ་བཙན་ཆེན་པོའི་གཟུགས། །ཕྱོགས་སྐྱོང་རྒྱལ་པོ་ཡུལ་འཁོར་སྲུང༌། །དྲི་ཟ་འབུམ་སྡེའི་བདག་པོ་སྟེ། །བརྒྱ་བྱིན་རྡོ་རྗེ་ཅན་གྱི་ནི། །དམག་དཔོན་གྲགས་དང་ལྡན་པ་ཡིན། །དེ་རིང་རྣལ་འབྱོར་བདག་ཅག་གིས། །མཆོད་དང་བསྙེན་བཀུར་བགྱི་བའི་ཕྱིར། །དྲི་ཟ་ལྷ་རྣམས་མང་པོར་བཅས། །རོལ་མོ་སིལ་སྙན་སྒྲ་དང་བཅས། །གཤེགས་ནས་གནས་འདིར་བཞུགས་སུ་གསོལ། །གཙང་མ་ཆབ་ཀྱི་མཆོད་ཡོན་འདིས། །དག་པ་ཁྲུས་
གྱི་ལས་མཛད་དེ། །བདུད་རྩི་ཕུད་ཀྱི་བཏུང་བ་དང༌། །དགྱེས་པའི་མཆོད་གཏོར་འདི་བཞེས་ལ། །དེང་གི་རྒྱུ་སྦྱོར་ཡོན་བདག་གི། །བླ་སྲོག་བྱད་དུ་འབེབ་པ་དང༌། །གཡེང་བྱེད་སྙིང་ལ་འཛིན་པ་ཡི། །གདུག་པ་དྲི་ཟའི་གདོན་རྣམས་ཀུན། །ཕྱོགས་སྐྱོང་ཁྱོད་ཀྱི་མངའ་རིས་དང༌། །འབངས་སུ་མ་ཆུད་འགའ་མེད་པས། །དེ་དག་ཕྱི་ནས་མི་འཚེ་བར། །བརྗིད་པའི་བཀའ་ནན་དབབ་ཏུ་གསོལ། །ལྷོ་ཕྱོགས་ལྷུན་པོའི་རྩེ་བླ་ན། །དགེ་མཚན་དབྱངས་སུ་འབར་བའི་དཔྱིད། །སྲིད་ན་ཆེ་བཙན་ཆེན་པོའི་གཟུགས། །ཕྱོགས་སྐྱོང་རྒྱལ་པོ་འཕགས་སྐྱེས་པོ། །གྲུལ་བུམ་འབུམ་སྡེའི་བདག་པོ་སྟེ། །བརྒྱ་བྱིན༴ དམག་དཔོན༴ དེ་རིང་༴ མཆོད་དང་༴ གྲུལ་བུམ་ལྷ་རྣམས་མང་པོར་བཅས། །སྙན་པ་གླུ་ཡི་སྒྲ་དང་བཅས། །གཤེགས་ནས༴ གཙང་མ༴ དག་པ༴ བདུད་རྩི༴ དགྱེས་པའི༴ དེང་གི༴ བླ་སྲོག༴ སྐེམ་བྱེད་ཤ་ལ་དཔའ་བ་ཡི། །གདུག་པ་གྲུལ་བུམ་གདོན་རྣམས་ཀུན། །ཕྱོགས་སྐྱོང་༴ འབངས་སུ༴ དེ་དག༴ བརྗིད་པའི༴ ནུབ་ཕྱོགས་ལྷུན་པོའི་རྩེ་བླ་ན། །བཀྲ་ཤིས་སྙན་པ་འབུམ་སྡེའི་དབྱིག །སྲིད་ན་ཆེ་བཙན་ཆེན་པོའི་གཟུགས། །ཕྱོགས་སྐྱོང་རྒྱལ་པོ་མིག་མི་བཟང༌། །ཀླུ་དབང་འབུམ་སྡེའི་བདག་པོ་སྟེ། །བརྒྱ་བྱིན༴ དམག་དཔོན༴ དེ་རིང་༴ མཆོད་དང་༴ གདེང་ཅན་ཀླུ་རྣམས་མང་པོར་བཅས། །སིལ་ཁྲོལ་ནོར་བུའི་སྒྲ་དང་བཅས། །
གཤེགས༴ གཙང་མ༴ དག་པ༴ བདུད་རྩི༴ དགྱེས་པའི༴ དེང་གི༴ བླ་སྲོག༴ མྱོས་བྱེད་དབུགས་ལ་སྟུངས་པ་ཡི། །གདུག་པ་ཀླུ་ཡི་གདོན་རྣམས་ཀུན། །ཕྱོགས་སྐྱོང་༴ འབངས་སུ༴ དེ་དག༴ བརྗིད་པའི༴ བྱང་ཕྱོགས་ལྷུན་པོའི་རྩེ་བླ་ན། །ཕུན་ཚོགས་ཉི་མ་སྟོང་གི་དངོས། །སྲིད་ན་ཆེ་བཙན་ཆེན་པོའི་གཟུགས། །ཕྱོགས་སྐྱོང་རྒྱལ་པོ་རྣམ་ཐོས་སྲས། །གནོད་སྦྱིན་འབུམ་སྡེའི་བདག་པོ་སྟེ། །བརྒྱ་བྱིན༴ དམག་དཔོན༴ དེ་རིང་༴ མཆོད་དང་༴ གནོད་སྦྱིན་ལྷ་རྣམས་མང་པོར་བཅས། །འབུམ་ཕྲག་དབྱིག་གི་གདངས་དང་བཅས། །གཤེགས་ནས༴ གཙང་མ༴ དག་པ༴ བདུད་རྩི༴ དགྱེས་པའི༴ དེང་གི༴ བླ་སྲོག༴ སྨྲ་བྱེད་གཉིད་ལས་གནོན་པ་ཡི། །གདུག་པ་གནོད་སྦྱིན་གདོན་རྣམས་ཀུན། །ཕྱོགས་སྐྱོང་༴ འབངས་སུ༴ དེ་དག༴ བརྗིད་པའི༴ སྟེང་ཕྱོགས་ལྷུན་པོའི་ཡང་རྩེ་ན། །མཆོད་སྦྱིན་གྲགས་པ་བརྒྱས་མཐོ་ཞིང༌། །ས་སྟེང་འཇིག་རྟེན་སྐྱོང་བའི་གཙོ། །བརྒྱ་བྱིན་དབང་དང་ལྡན་པ་པོ། །ཉེ་དབང་ལྷ་རྣམས་བདག་པོ་སྟེ། །སྲིད་ན་ཆེ་བཙན་དབང་ཕྱུག་ཆེ། །དཀར་ཕྱོགས་དབུགས་འབྱིན་བྱེད་པ་ཡིན། །དེ་རིང་རྣལ་འབྱོར་བདག་ཅག་གིས། །མཆོད་དང་བསྙེན་བཀུར་བགྱི་བའི་ཕྱིར། །སུམ་རྩེན་ལྷ་རྣམས་མང་པོར་བཅས། །རྒྱུད་མངས་བྱེ་བའི་སྒྲ་དང་བཅས། །གཤེགས་ནས་གནས་འདིར་བཞུགས་སུ་གསོལ། །གཙང་མ་ཆབ་ཀྱི་མཆོད་ཡོན་འདིས། །དག་པ་
ཁྲུས་ཀྱི་ལས་མཛད་དེ། །བདུད་རྩི་ཕུད་ཀྱི་བཏུང་བ་དང༌། །དགྱེས་པའི་མཆོད་གཏོར་འདི་བཞེས་ལ། །དེང་གི་རྒྱུ་སྦྱོར་ཡོན་བདག་གི། །ཚེ་སྲོག་བྱད་དུ་འབེབས་པ་དང༌། །འགུགས་བྱེད་བླ་ལ་རྙབ་པ་ཡི། །ལྷ་སྲིན་དྲག་ཤུལ་ཆེན་པོ་རྣམས། །ཕྱོགས་སྐྱོང་ཁྱོད་ཀྱི་མངའ་རིས་དང༌། །འབངས་དང་བཀའ་འཁོར་ལ་གནས་པས། །དེ་དག་ཕྱི་ནས་མི་འཚེ་བར། །བརྗིད་པའི་བཀའ་ནན་དབབ་ཏུ་གསོལ། །འདོད་པའི་ཁམས་ན་ཆེ་བའི་ལྷ། །གཞན་འཕྲུལ་བདུད་ཀྱང་འཇིགས་མཛད་མ། །དྲག་མོ་བདུད་ཀྱི་བདུད་ཆེན་མོ། །དུད་སོལ་མ་ཧཱ་རེ་མ་ཏི། །འཇིགས་པ་མ་མོའི་ཚོགས་དང་བཅས། །དེ་རིང་མདོས་ལ་སྤྱན་འདྲེན་ན། །གཤེགས་ནས་རྒྱན་གྱི་མཆོད་གཏོར་བཞེས། །བྱད་དང་ཁྲམ་ཁ་དབྱིངས་སུ་བསྒྱུར། །ནམ་མཁའ་གོ་ལའི་མེ་ལོང་དང༌། །འབྱུང་ལྔ་སྲིད་པའི་རུས་སྦལ་ལ། །བརྟེན་པ་སྤར་སྨེ་ལོ་ཟླ་ཞག །གཟའ་སྐར་དུས་སྦྱོར་ཚེས་གྲངས་ལྷ། །རང་རང་རིགས་ཀྱི་འཁོར་ཚོགས་བཅས། །ཀུན་ཀྱང་མདོས་ལ་སྤྱན་འདྲེན་ན། །གཤེགས་ནས་མཐུན་པའི་དམ་རྫས་བཞེས། །ཕྱི་ནང་རྟེན་འབྲེལ་ལོག་པ་གསོས། །གཞན་ཡང་གྲོང་དང་གྲོང་ཁྱེར་དང༌། །རི་དང་ནགས་ཚལ་སྐྱེད་མོའི་ཚལ། །ལྷ་ཁང་དུར་ཁྲོད་ཤིང་གཅིག་དྲུང༌། །གཞལ་མེད་ཁང་དང་ཡུལ་འཁོར་སོགས། །གནས་དང་གནས་མིན་ལ་དབང་བའི། །དཀར་ཕྱོགས་ལྷ་རྣམས་ཐམས་
ཅད་ཀྱང༌། །འདིར་གཤེགས་མཆོད་སྦྱིན་གཏོར་མ་བཞེས། །ཚེ་དང་གྲགས་པའི་དངོས་གྲུབ་སྩོལ། །མདོར་ན་ཕྱོགས་སྐྱོང་ཆེན་པོ་བཅུའི། །བཀའ་དང་འཁོར་དུ་གཏོགས་པ་ཡི། །ལྷ་དང་ལྷ་མིན་གསང་བ་པ། །མཁའ་འགྲོ་བརྟན་མ་སྡེར་བཅས་རྣམས། །ཀུན་ཀྱང་མདོས་ལ་སྤྱན་འདྲེན་ན། །གཤེགས་ནས་མཐུན་པའི་མཆོད་གཏོར་བཞེས། །རྣལ་འབྱོར་བདག་ཅག་འཁོར་བཅས་ཀྱི། །མི་མཐུན་བར་ཆད་ཞི་བ་དང༌། །བཀྲ་ཤིས་བདེ་ལེགས་ཆེན་པོར་མཛོད། །ཅེས་གྱེར། དེ་ནས་ཁ་སྐོང་གཏོར་མ་རྣམས། ཨ་ཀཱ་རོས་བརླབས་ཏེ། མདོས་དཀྱིལ་གྱི་ཉེ་ལོགས་སུ་རྐང་སུམ་ལྟ་བུའི་ཁར་ཡོལ་གོ་གཙང་མ་ཞིག་བཞག་ལ། སཾ་བྷ་ར་ལན་རེ་དང་སྦྲག་དཀར་གཏོར་ཡོལ་གོར་ཕུལ། བཅུ་ཚོ་རེ་སོང་བ་དང༌། མཆོད་སྦྱིན་གཏོར་མ་འདི་བཞེས་ལ། །རྣལ་འབྱོར་བདག་ཅག་འཁོར་བཅས་རྣམས། །ནད་མེད་ཚེ་དང་དབང་ཕྱུག་དང༌། །ཕུན་ཚོགས་རྒྱ་ཆེན་སྩལ་དུ་གསོལ། །ཞེས་འདོད་དོན་གསོལ། དེ་ལྟ་བུའི་ཚུལ་གྱིས་བརྒྱ་ཕྲག་ཐལ་བ་དང༌། མཆོད་སྦྱིན་གཏོར་མ་འདི་བཞེས་ལ། །སོགས་ནས། ཡིད་ལ་འདོད་པ་ཀུན་འགྲུབ་མཛོད། །ཀྱི་བར་བརྗོད། དེ་ལྟར་གྲུབ་ནས་གདོན་ཕལ་པ་གཙང་སྦྲ་ལས་ཉམས་ཤིང་མདངས་ལ་རྒྱུ་བ་རྣམས་ལ་བརྔན་འགྱེད་བྱ་བ་ནི། སྭ་བྷ་ཝས་སྦྱངས། སྟོང་པའི་ངང་ལས་རྫས་རྣམས་སྲིད་པའི་འདོད་ཡོན་རྒྱ་མཚོ་ཟད་མི་ཤེས་པའི་རང་བཞིན་ནམ་མཁའ་མཛོད་ཀྱི་སྤྲིན་ཕུང་དྭངས་ཤིང་ཐོགས་པ་མེད་པ་སྒྱུ་མ་མཁན་པོའི་མིག་འཕྲུལ་ལྟར་ཅིར་ཡང་འཆར་བའི་ཚོགས་སུ་གྱུར། ནམ་མཁའ་མཛོད་ཀྱི་སྔགས་རྒྱ་ལན་བདུན་གྱི་བྱིན་གྱིས་
བརླབས། མགྲོན་འབོད་པ་ནི། ཀྱཻ། སྟོན་པ་ཕན་བཞེད་བླ་ན་མེད། །ཀུན་མཁྱེན་མི་ཡི་སེང་གེ་སྟེ། །སྤྲོས་ཀུན་ཉེར་ཞིའི་རྟེན་འབྲེལ་ནི། །ཐུགས་རྗེ་ཁོ་ནས་གདམས་པར་མཛད། །བདེན་ཚིག་འདི་ནི་བདེན་པའི་མཆོག །བདེན་པ་དུས་ཀུན་མི་བསླུའི་ཚིག །བདེན་པའི་ཚིག་ལ་མི་ཉན་མེད། །དེ་རིང་བདེན་པའི་གཡར་དམ་སྒྲོག །གླིང་བཞི་སྲིད་པའི་འཇིག་རྟེན་འདིར། །ལས་ཀྱི་རྫུ་འཕྲུལ་ཆེན་པོའི་གདོན། །གནོད་སྦྱིན་སྲིན་པོ་མིའམ་ཅི། །འབྱུང་པོ་རོ་ལང་ཤ་ཟ་དང༌། །བྱ་གདོན་སྲུལ་པོ་ཚེར་མ་གདོན། །སྨྱོ་བྱེད་རྨོངས་རེངས་བྱེད་པ་དང༌། །སྐེམ་བྱེད་རྡུལ་ཁྲོད་མ་མོའི་ཚོགས། །གྲིབ་གནོན་རྣོན་པོ་རེ་ལྡེག་གདོན། །བྱད་སྟེམ་ཕ་རོལ་རྦད་འདྲེ་སོགས། །ཤ་ལན་འཁོན་དུ་ཆགས་པ་ཡི། །ལྷ་འདྲེ་སྡིག་པའི་སེམས་ལྡན་དག །ཀུན་ཀྱང་ཡས་ལ་མགྲོན་དུ་གཉེར། །བྱིང་འཐིབས་རྨུགས་པ་ལྐུགས་རེངས་དང༌། །སྨྱོ་འབོགས་མིག་སེར་གཟེར་ཐམ་མཛེ། །སྐྲན་དང་དམུ་ཆུ་ལྷན་སྐྱེས་རྨ། །ཁ་མེད་སུརྻ་ལ་སོགས་བརྒྱ། །འབབ་པ་ཐོག་ལྟར་རྣོ་བ་དང༌། །གདུག་པ་ཧུར་ཐུམ་ཆེ་བའི་རིགས། །མདོར་ན་བཞི་བརྒྱ་རྩ་བཞིའི་ནད། །རྐྱེན་ངན་ཉི་ཁྲི་ཆིག་སྟོང་དང༌། །དུས་མིན་འཆི་བ་རྣམ་དགུ་སོགས། །འཆི་རྐྱེན་རྣམ་པ་སྣ་ཚོགས་ཀྱིས། །ཚེ་དང་སྲོག་ལ་བསྔོ་བའི་གདོན། །ཀུན་ཀྱང་མདོས་ལ་སྤྱན་འདྲེན་ན། །མདོས་ཁང་འདི་རུ་བརྟན་པར་བཞུགས། །མ་བསྟབས་གསོན་ཤ་དྲོན་མོ་དང༌། །མ་བསྔོས་མི་ཁྲག་ཚན་མོ་ཡང༌། །ལྡད་ཀྱི་
མཆེ་བ་གང་རྣོ་དང༌། །རྡུབ་པ་ཧུབ་ལ་གང་ཆེ་རུ། །གླལ་བས་གནམ་ས་ཁ་གདངས་ན། །དེ་རིང་རྣལ་འབྱོར་བདག་ཅག་གིས། །མདོས་བསྐངས་བརྟན་གཡོ་ཀུན་ཁྱབ་འདིར། །བོས་པའི་མགྲོན་ལ་ཅིས་མི་འབྱོན། །མ་ཐོགས་སྐད་ཅིག་ཉིད་ལ་གཤེགས། །སརྦ་བྷུ་ཏ་ཨཾ་ཀུ་ཤ་ཡ་ཛཿ ཞེས་བརྗོད། དེ་ནས་སྦྲེལ་གླུད་ཆེ་བ་དང་མདོས་དཀྱིལ་དུ་བཤམས་པའི་ཡས་རྣམས་བསྔོ་བ་ནི། །སེར་སྣའི་ཀུན་སྦྱོར་སྨིན་པའི་གཟུགས། །ཕུང་པོ་ཐལ་བ་ལྟ་བུའི་མདོག །ཡི་དྭགས་མེ་རུ་འབར་བའི་ཁ། །ངལ་གསོའི་དབུགས་འབྱིན་ལ་སྦྱར་བ། །རིག་པ་མཆོག་གི་བདུད་རྩི་ནི། །འོད་ཟེར་རྣམ་རྒྱལ་ཆེན་པོའི་ཤུགས། །ཐུབ་ཆེན་གང་གིས་འདི་གསུངས་པའི། །རྒྱལ་བ་ཕན་མཛད་དེས་སྲུངས་ཤིག །ན་མཿསརྦ༴ སོགས་རྒྱ་ཆེན་ཤུགས་ལྡན་ལན་བདུན་གྱི་མཐར། མཚན་བཞི་བརྗོད། །དེ་འདྲ་ལན་གསུམ་སྦྱར་བས་སྔགས་ཉེར་གཅིག་མཚན་བཞི་ལན་གསུམ་རྫོགས་པ་ན་གྱེར་བྱ་སྟེ། འདྲེ་ལྔ་བདུད་གཅོད་ཀྱི་ཕྱོགས་སུ་དམར་གསུར་གཏོང་ཞིང༌། ཀྱེ། སྣང་བ་རྟེན་འབྲེལ་ཆེན་མོ་སྟེ། །སྒྱུ་མ་ལས་ཀྱི་ཆོ་འཕྲུལ་ཉིད། །སྣ་ཚོགས་སྲིད་པའི་འཇིག་རྟེན་ནི། །སྒྲ་བརྙན་བཞིན་དུ་སྣང་བར་ཟད། །ཁམས་དང་འགྲོ་བ་ཐ་དད་དང༌། །ཟས་བཞི་གནས་རིས་ལོངས་སྤྱོད་ཀུན། །ལམ་གསུམ་རྟེན་འབྲེལ་འཁོར་ལོ་སྟེ། །མ་རིག་རྒྱུ་ལས་ཤིན་ཏུ་བྱུང༌། །བདག་ཉིད་ཆེན་པོ་སངས་རྒྱས་ཀྱིས། །བྱང་ཆུབ་སྙིང་པོར་འདི་གཟིགས་ཏེ། །འདོད་པའི་ཁམས་ནི་ཁ་ཟས་ལ། །བརྟེན་པ་མེད་པར་
ཡོངས་མི་གནས། །དེ་ཕྱིར་འཚོ་བ་ཟས་ལ་བརྟེན། །སྲོག་དང་བཅས་པའི་འཇིག་རྟེན་ནི། །རྒྱགས་དང་བརྔན་ལ་མི་ཆགས་མེད། །དཀོར་དང་ནོར་ལ་མི་སེམས་མེད། །བརྒྱ་བྱིན་བདུད་རྩི་འཐུང་བ་ནས། །སྲིན་པོ་རྐང་མར་ཟ་བ་ཡན། །ཀུན་ཀྱང་འཚོ་བའི་འདུ་བྱེད་ནི། །ཟས་ཀྱི་རྒྱུད་ལ་བརྟེན་པ་ཅན། །གདུག་པ་གཤིན་རྗེའི་འཇིག་རྟེན་ནི། །རྟེན་འབྲེལ་ལམ་ལ་མི་མཁས་ཤིང༌། །གོམས་པའི་གཞན་དབང་ཁོ་ན་ཡིས། །ཟས་ཕྱིར་སྡིག་ལ་ནན་གྱིས་འཇུག །གཞན་གྱི་འཚོ་བ་མི་སེམས་པར། །དམོད་པ་དུག་གི་ཁ་ཕྲུ་ཡིས། །འདྲེ་སྲིན་དམྱལ་ཐག་གཅོད་པ་རྣམས། །ཕན་བཞེད་ཐུབ་པ་མཆོག་གིས་སྨད། །དེ་སླད་སྟོང་ཕྲག་བརྒྱད་ཅུའི་གདོན། །མི་བཟད་སྡིག་ལས་བསྐྱབ་པ་དང༌། །སྦྱིན་བདག་འཇིགས་པ་བསལ་སླད་དུ། །བྱམས་ཆེན་སྦྱིན་པའི་སྒོ་འཕར་དབྱེ། །གཤིན་རྗེ་ལག་པ་དམར་བ་དང༌། །སྲོག་བདུད་ལས་ཀྱི་བཤན་པ་དང༌། །མ་མོ་དལ་ནད་རིམས་བདག་དང༌། །དམུ་ཐེལ་སྲིད་པ་དབུགས་སྡུད་དང༌། །ཡི་དྭགས་མི་ཤ་ཟ་བ་དང༌། །རྐང་དང་ཀླད་པ་ཚིལ་བུ་འདོད། །མཆིན་པ་ནང་ཁྲོལ་ཟ་བའི་ཚོགས། །ཁྲག་དང་མདངས་ལ་དགའ་བ་རྣམས། །དེང་གི་རྒྱུ་སྦྱོར་ཡོན་བདག་གི། །ཤ་ཡི་ལྷུན་དང་ཁྲག་གི་བཅུད། །མེ་དྲོད་ནུས་པ་དབུགས་ཀྱི་ཤུགས། །བླ་དང་ཚེ་ཡི་སྐུ་མཁར་ལ། །གཤེད་ཀྱི་ཐག་པ་བསྐྱང་སྲིད་ན། །རིག་པ་སྔགས་ཀྱི་རལ་
གྲིས་བཀྲོལ། །ཁྲོས་པའི་ཁ་རླངས་བཏབ་སྲིད་ན། །དག་པ་ཡེ་ཤེས་སྨན་གྱིས་འཚོ། །འཁོན་ལན་ཤ་ལ་གཞལ་སྲིད་ན། །གཅེས་པ་ནོར་ལ་གྲས་ཏེ་བརྫངས། །གཤིན་རྗེའི་རྡུབ་ལ་དྲང་སྲིད་ན། །གདོན་ཁ་ཡས་ཀྱི་སྟོན་མོས་གཅོད། །རྒྱུ་སྦྱོར་ཡོན་གྱི་བདག་པོ་ཡི། །བླ་དབུགས་སྲོག་གི་རིན་ཐང་དུ། །མི་ལས་དགའ་བའི་གླུད་འདི་འབུལ། །མི་ལས་གླུད་འདི་མི་དགའ་རྒྱུ། །ཏིང་འཛིན་སྔགས་རྒྱས་བྱིན་བརླབས་པ། །རིན་ཆེན་ངར་གྱི་མི་བོ་ཆེ། །རྣམ་འགྱུར་ཚངས་པ་བཞིན་དུ་བརྗིད། །བག་དྲོ་གཟི་བྱིན་ཆི་ལི་ལི། །ཞལ་ངོ་ཟླ་བ་བཞིན་དུ་མཛེས། །བཞད་གད་འཛུམ་མདངས་ཡ་ལ་ལ། །རལ་པ་ལྕང་ལོ་བཞིན་དུ་འཁྱིལ། །གསེར་གཡུའི་ལན་ཚར་ཁྲ་ལ་ལ། །གྲེ་འགྱུར་གླིང་བུ་བཞིན་དུ་བདེ། །གདངས་སྙན་རྒྱང་གླུ་ཀྱུ་རུ་རུ། །སྨྲ་སྒོ་པི་ཝཾ་བཞིན་དུ་གསལ། །བརྡའ་དག་ངག་སྒྲོས་ས་ལ་ལ། །རྡོག་བྲོ་རྨ་བྱ་བཞིན་དུ་འཁྲབ། །གར་སྟབས་མཉེན་འགྱུར་ཁྱུགས་སེ་ཁྱུག །ཞྭ་མོ་ལྕུགས་ཕྲན་བཞིན་དུ་ལྡེམ། །དར་ཐོད་ཅོད་པན་པུ་རུ་རུ། །སྟང་སྟབས་འཁོར་ལོ་བཞིན་དུ་བསྐྱོད། །ཕྱག་རྒྱ་པད་སྐོར་ཀྱི་ལི་ལི། །ན་བཟའ་འཇའ་ཚོན་བཞིན་དུ་བཀྲ། །ཟ་འོག་དར་ཆེན་ཤིགས་སེ་ཤིག །གླུད་གཏོར་བརྔན་སྦྱིན་རྒྱ་མཚོ་འདིས། །གདུག་པ་དྲག་ཤུལ་ཆེན་པོའི་གདོན། །སྟོང་ཕྲག་བརྒྱད་ཅུའི་ཡིད་ཚིམས་ཤིང༌། །ཤ་འཁོན་འགྲས་པ་བསྡུམས་གྱུར་ཅིག །མི་གསོན་ཟས་སུ་ཟ་བ་ཡི། །འདྲེ་སྲིན་མ་རུང་བྱེད་པ་རྣམས། །
བླ་དང་ཚེ་ལ་བཞབ་སྲིད་ན། །མཐུན་རྫས་མདོས་དང་ཡས་སུ་བཅལ། །སྐུ་མཁར་མཐོན་པོ་ནམ་མཁའི་རྫོང༌། །བརྗིད་དང་ལྷུན་ཆགས་དཔུངས་སེ་དཔུང༌། །རྟེན་ཤིང་ལྡེམ་པ་རྒྱང་བུའི་ཤིང༌། །བལ་ཚོན་འདབ་མ་ཉུགས་སེ་ཉུག །དཔའ་བ་ཕོ་ཆས་མདའ་ཁྲ་སྟེ། །གཅོད་དང་རྣོ་ངར་བྲེངས་སེ་བྲེང༌། །མཛངས་མ་མོ་ཆས་འཕང་ཁྲ་སྟེ། །སྒྲིལ་དང་ཟླུམ་འཁོར་ཧྲི་ལི་ལི། །སྲིད་པ་ཀུན་ཚང་ཤིང་རིས་ཏེ། །སྣོད་བཅུད་གཟུགས་བརྒྱ་ལམས་སེ་ལམ། །ཟས་མཆོག་འདོད་ཡོན་ཆང་བུ་སྟེ། །ཞིམ་མངར་རོ་འདའ་ཆི་ལི་ལི། །གོས་མཆོག་ལྷ་རྫས་ན་བཟའ་སྟེ། །ཕྲུག་དར་རེག་འཇམ་འབོལ་ལོ་ལོ། །བདུད་རྩི་བཅུད་ཀྱི་བཏུང་བ་སྟེ། །སྐྱེམས་ཕུད་ཞག་གཡོ་མེ་རེ་རེ། །ལོངས་སྤྱོད་དཀོར་ནོར་སྣ་ཚོགས་ཏེ། །རྔམ་དང་འཚུབ་མ་ཉི་ལི་ལི། །ཁྱོན་ལ་ཡངས་པ་ས་གཞི་སྟེ། །འབྲི་བརྒྱ་རྡངས་སུ་བསྒྲིགས་བསྒྲིགས་ནས། །ས་ཆེན་དོག་པོར་སོང་ལ་ཁད། །ཡུལ་ལ་ཆེ་བ་སྟོང་གསུམ་སྟེ། །ཕྱུགས་བརྒྱ་འཇལ་དུ་སྤྲད་སྤྲད་ནས། །སྟོང་ཁམས་ལྷས་སུ་སོང་ལ་ཁད། །ལྷུན་ལ་མཐོ་བ་རི་རབ་སྟེ། །ལུག་བརྒྱ་རིན་དུ་བཅལ་བཅལ་ནས། །ལྷུན་པོ་རྫི་རིར་སོང་ལ་ཁད། །ནེའུ་ཐང་འདལ་བ་གླིང་བཞི་སྟེ། །རྟ་བརྒྱ་སྤང་ལ་བརྟད་བརྟད་ནས། །གླིང་བཞི་དཀྱུས་རར་ཆུད་ལ་ཁད། །ཤ་བརྒྱ་ར་བརྡར་ཁྲིགས་སེ་ཁྲིག །རྐྱང་བརྒྱ་རྩེ་གར་ཁྲབས་སེ་ཁྲབ། །འབྲོང་བརྒྱ་རྔ་གུར་ཟིངས་སེ་ཟིང༌། །
རི་དྭགས་མ་བརྒྱ་བུ་བརྒྱ་སྟེ། །སྲོག་ཆགས་མདངས་སུ་བསྟར་བ་ཡི། །སྤྱན་གཟིགས་རྣམ་པ་སྣ་ཚོགས་འདིས། །གདོན་རིགས་འདོད་པ་སྐོང་གྱུར་ཅིག །ཚེ་རབས་ལན་ཆགས་འཁོར་གྱུར་ཅིག །ཤ་རྗེན་དམར་གྱི་དྭངས་མ་དང༌། །འབྲུ་བཅུད་ཆང་གི་ཞལ་སྐྱེམས་འདིས། །འབྱུང་པོ་ཤ་ལ་དགའ་བ་དང༌། །ཆང་སྐྱེམས་འདོད་རྣམས་དགྱེས་པ་བསྐང༌། །ལ་ཕུག་ལན་ཚྭ་སྦྱར་བ་དང༌། །ཀུན་དོང་ཙོང་གི་ཚོད་མ་ཡིས། །འབྱུང་པོ་སྔོ་ངད་ཟ་བ་དང༌། །མི་ཁ་བདུད་དུ་འབབ་པ་བསྐང༌། །སྲན་ཆན་འབྲུ་སྣས་སྦགས་པ་དང༌། །ཕྱེ་ཟན་འབྲས་བུས་བརྒྱན་པ་འདིས། །འབྱུང་པོ་གཏོར་མ་ཟ་བ་དང༌། །རོ་བདའ་འདོད་རྣམས་དགྱེས་པ་བསྐང༌། །ལྷ་རྐང་ཞུན་གྱི་མར་མེ་དང༌། །ཚིལ་ཆེན་དམར་གྱི་གསུར་ཆེན་འདིས། །གཤིན་རྗེ་ཞུན་ལ་རྔམ་པ་དང༌། །འབྱུང་པོ་དྲི་ལ་ཟ་རྣམས་བསྐང༌། །རྡོལ་མོ་ནས་ལ་ཚད་འཛུགས་ན། །འབྲུ་དར་བང་བ་གང་ཟེར་ཏེ། །དེ་རིང་མགྲོན་ལ་བྱིན་དྲག་པས། །སྟོང་པའི་ནམ་མཁའ་བརྣང་གིས་དོགས། །མང་བ་མི་ལ་ཚད་འཛུགས་ན། །མི་དར་གོ་ཁ་གང་ཟེར་ཏེ། །དེ་རིང་གདོན་ལ་འཇལ་ཆེས་པས། །གླུད་ཀྱིས་བར་སྣང་རལ་དུ་ཉེ། །བསགས་པ་ནོར་ལ་ཚད་འཛུག་ན། །དབྱིག་དར་མཛོད་མིག་གང་ཟེར་ཏེ། །དེ་རིང་བགེགས་ལ་བརྔན་དྲག་པས། །བརྟན་པ་སྣོད་ཀྱང་དོག་པོར་ཐལ། །མ་བསད་སྟོངས་སུ་ཕབ་པ་དང༌། །མ་བརྐུས་འཇལ་དུ་བརྫངས་
པ་ཡི། །གྱ་ནོམ་དཀོར་ཆ་སྣ་ཚོགས་འདིས། །གཙོ་བོའི་གདོན་ཆེན་བཅོ་བརྒྱད་དང༌། །བྱིས་པའི་གཤེད་ཆེན་བཅོ་ལྔ་སོགས། །བགེགས་རིགས་བརྒྱ་ཕྲག་བརྒྱད་བརྒྱ་བསྐང༌། །སོ་སོའི་རེ་འདོད་བསྐངས་ནས་ཀྱང༌། །རྒྱུ་སྦྱོར་ཡོན་གྱི་བདག་པོ་རྣམས། །བཟུང་བ་ཐོངས་ལ་བཅིངས་པ་ཁྲོལ། །བསྡམས་པ་བཤིག་ལ་མནན་པ་ཕྱུངས། །ཟོས་པ་སྐྱུགས་ལ་འཆི་བ་གསོས། །རྣལ་འབྱོར་བདག་ཅག་འཁོར་བཅས་ཀྱི། །བླ་ཡི་སྐུ་མཁར་བརྗིད་པ་དང༌། །སྲོག་གི་ཀ་བ་བརྟན་པ་དང༌། །རླུང་རྟའི་བ་གམ་མཐོན་པོར་མཛོད། །གནས་སྐབས་རང་གཞན་བདེར་སྤྱོད་ཅིང༌། །མཐར་ཐུག་འཆི་མེད་བདེ་བ་མཆོག །བདེ་ཞིང་བདེ་བའི་དགའ་སྟོན་གྱིས། །དུས་རྣམས་ཀུན་ཏུ་ཤིས་གྱུར་ཅིག །དེ་ནས་སྦྲེལ་གླུད་ཆེ་བའི་དྲུང་དུ་གླུད་ཕྲན་རེ་དང་ཆང་བུ་རེ་རིལ་བུ་རེ་རྣམས་ཟས་སྣས་སྦགས་ཏེ་འདོར་བ་དང་སྔགས་རྒྱ་ཆེན་ཤུགས་ལྡན་ལན་རེ་བརྗོད། །བཅུ་ཚོ་རེའི་མཚམས་སུ་མཚན་བཞི་རེ་དང༌། ཁྱེར་ཅིག་ཁྱེར་ཅིག་སྟོབས་ལྡན་རྣམས། །སྲེད་དང་ཆགས་དང་ཚྭ་སྒོག་གཡེར་མ་རམ་བུ་ལ་སོགས་མི་ཁའི་རྫས་རྣམས་དང་གླུད་ཆང་བུ་རིལ་བུ་རྣམས་དང་བསྲེས་ཏེ། མཆན་ཞེན་པ་དང༌། །དྲན་དང་གཟུངས་དང་བསམ་དང་རེག །གློད་དང་ཞི་དང་གྲོལ་བར་མཛོད། །ཅེས་པ་ལན་རེ་བཏང་ཚུལ་འདིས་བརྒྱ་ཚར་གྲུབ་ནས་གདོན་གྱི་རྒྱལ་པོ་དང་སྡེ་དཔོན་དམངས་ཕལ་པ་རྣམས་དང་བཅས་པའི་བྱད་འགྲོལ་ཞིང་ཉེར་འཚེ་ཞི་བའི་ཕྱིར། །རྟེན་སྙིང་གི་ཤམས་སུ། དེ་བཞིན་གཤེགས་པ་ཐམས་ཅད་
ཀྱི་ཡུམ་སོགས་བདེན་པའི་བྱིན་རླབས་རལ་གྲི་ངར་འབྱིན་གང་མང་དུ་བསྐྱར། དོ་གལ་ཆེ་ཞིང་སྤྲོ་ན། ཨོཾ་ཧྲཱིཿབཛྲ་ཛྭ་ལ་སརྦ་ཀརྨ། བདག་གི་ལུས་ངག་ཡིད་གསུམ་བྱད་དུ་བཅུག་པ་དང༌། བཅིངས་པ་དང༌། མནན་པ་དང༌། ནུས་པ་བཤིགས་པ་ཐམས་ཅད་ཁྲོལ་བར་གྱུར་ཅིག །ཨོཾ་བཛྲ་་ཡ་ཧ་ཧེ་ཧཱཾཨུ་ཕཊཿ གཞན་གྱི་སྦྱོར་བ་ངན་པ་ཐམས་ཅད་ལས་བདག་རྒྱལ་བར་གྱུར་ཅིག །ཨོཾ་མ་མ་སརྦ་བྷི་དྷ་བྷི་དྷ། ཛ་ཡེ་ཛ་ཡེ། བི་ཛ་ཡེ་བི་ཛ་ཡེ། ཨ་ཛི་ཏ་ཨ་པ་ར་ཛི་ཏ་ཡེ། མ་མ་བྷཻ་སྱ་པྲ་མརྡྷ། ཧ་ཡེ་མ་མ་ཧཱུྃ་ཕཊཿ གཞན་གྱིས་མི་ཐུབ་པའི་རིག་སྔགས་ཆེན་མོ་འདིས་གང་དག་བདག་ལ་སྡང་བ་དང༌། ལོག་པར་སེམས་པ་ཐམས་ཅད་ཞི་བར་གྱུར་ཅིག །ཨོཾ་་རི་ནི་ཡེ་མ་མ་བཛྲ། ཛྙཱ་ན་པྲ་ཡཙྪ་ཡཾ་མ་མ་བིདྷ་ར་ཡ། ཧ་ཧ་ཧེ་ཧེ་ཧི་ཧི་ཧཱཾཨུ་ཧཱཾཨུ། པྲ་ཀ་ར་ན་སརྦ་ཙ་ལ་སརྦ་བཛྲ་རྐྵ་རྐྵ་ཕཊ་ཕཊ་སྭཱ་ཧཱ། ཞེས་པའང་མང་དུ་བརྗོད། མཇུག་ཏུ། ནམ་མཁའ་མེད་པར་གྱུར་ན་ཡང༌། སོགས། མ་བྱུང་འབྱུང་བར་མི་འགྱུར་རོའི་བར་དུ་བརྗོད་དོ། །འདི་ནི་ཕྱོགས་གཞན་གྱི་བྱས་པའི་རིག་སྔགས་འགྲོལ་བ་དང་འགྲོལ་རྒྱུ་ཡང་སྦྱིན་བདག་ཆོས་བཞིན་སྤྱོད་པ་ཡིན་ན་བྱའི། ཅུང་ཟད་རེའི་ཐད་དང་རང་ཉིད་མཐུ་ཆེན་གྲུབ་པའི་རློམས་པ་ལ་རྒྱབ་དཔུང་བཅོལ་ནས་བཀའ་ཆད་རིན་གྱིས་ཉོ་བར་མི་བྱའོ། །དེ་ནས་ཆོས་སྦྱིན་བྱ་བ་ནི། འཁོར་བ་སྡུག་བསྔལ་བདེན་པ་ནི། །སྐྱེ་ཤི་ཟོ་ཆུན་ཁྱུད་མོ་ལྟར། །ཉོན་མོངས་ལས་ཀྱི་འཕེན་པ་ཡིས། །སྣ་ཚོགས་ལུས་སུ་རྣམ་པར་སྣང༌། །ཇི་ལྟར་འཁོར་བའི་འཁོར་ལོ་འདིར། །བདེ་དང་སྡུག་བསྔལ་རྣམ་ཕྱེ་བ། །དེ་ལྟར་སྲིད་པའི་འདུ་བྱེད་ཀྱང༌། །
དཀར་དང་ནག་དང་འདྲེས་མར་སྣང༌། །སྟོན་པས་ཉོན་མོངས་ལམ་གསུམ་དང༌། །ལས་ཀྱི་ལམ་ནི་གཉིས་བརྟེན་ཏེ། །སྡུག་བསྔལ་བདུན་དུ་འབྱུང་བཤད་པ། །དེ་ཀུན་མ་རིག་རྩ་བ་ཅན། །གང་དུ་རང་བཞིན་མ་དམིགས་པའི། །ཆོས་དེ་བཏགས་ཙམ་ཉིད་ཤེས་ནས། །མཁས་པ་ཚུལ་མིན་མི་སེམས་ཏེ། །བློ་ངན་རྟག་ཏུ་གདུངས་བ་བརྟེན། །དེ་དག་ལྟ་རི་མཐོར་གནས་པས། །ཚུལ་བཞིན་མིན་སེམས་དང་འབྲེལ་བ། །འདོད་དང་སྡང་སོགས་ཉེས་རྣམས་ནི། །གཏི་མུག་ཁོ་ནར་བརྟེན་ནས་སྐྱེ། །སྐྱེ་བའི་ཉ་རྒྱ་འདྲལ་བ་དང༌། །རྒ་ཤིའི་ཁྱིམ་ནས་འཐོན་པ་དག །དངོས་པོ་ཡུལ་ལ་མ་མཐོང་བས། །གཏི་མུག་ཤིན་ཏུ་ཞི་བ་འཐོབ། །སུ་ཞིག་སྔོན་དང་ཕྱི་མ་ཡི། །མཐར་ལྟ་མི་བཟད་ལ་གནས་པ། །དེ་ཉིད་དེ་ཡི་འཆིང་བ་སྟེ། །ཟབ་མོའི་རྟེན་འབྲེལ་ཡོངས་མི་ཤེས། །གང་རྣམས་བདག་གཞན་ལས་མིན་ཞིང༌། །གཉིས་ཀའམ་རྒྱུ་མེད་མ་ཡིན་པའི། །སྲིད་འདི་བརྟེན་ནས་སྐྱེར་ཤེས་པ། །དེ་དག་ཤིན་ཏུ་མི་རྨོངས་འགྱུར། །སེམས་ཅན་ཀུན་ལ་སྨན་སླད་དུ། །འདི་དོན་བརྙེས་ནས་གསུང་བ་ཡི། །སངས་རྒྱས་རྣམ་འདྲེན་ཟླ་མེད་པ། །གོའུ་ཏམ་ཆོས་ནི་དེ་ལྟར་ཟབ། །སྡིག་པ་ཅི་ཡང་མི་བྱ་སྟེ། །སོགས། གཞན་ཡང་བྱ་ཁྱི་སྤྲང་གསུམ་ལ་སྦྱིན་འགྱེད་སོགས་སྟོན་མོའི་འདུ་བ་རྒྱ་ཆེན་པོ་གཅེས་ཤིང་ཕངས་པའི་ནོར་རྫས་ལས་བླངས་ཏེ་སེར་སྣ་དང་ཕངས་སེམས་ཀྱིས་མ་སྦགས་པར་བྱ། དེ་ནས་ལམ་
བསྟན་བྱ་སྟེ་ཁང་བཟང་དང་ལྷ་གཏོར་རྣམས་བླང་ལ་མཆོད་དཀྱིལ་གྱི་ཉེ་ལོགས་སུ་བཞག །མདོས་ཡས་གཞན་རྣམས་ཕྱོགས་གཅིག་ཏུ་འཁྱེར་སླ་བར་བསྡུ་ཞིང་ཏིང་ལོ་རྣམས་བལྟམས་ལ་བཏེགས་ཏེ། ཀྱེ། སྣང་བ་ཀུན་བྱེད་སེམས་ཀྱི་འཕྲུལ། །ཤེས་བྱ་གཤིས་ལ་མ་གྲུབ་ཀྱང༌། །རྟོག་པ་འཆར་སྒོ་འགགས་མེད་ལས། །རྟེན་འབྲེལ་སྒྱུ་མ་ཆེན་པོར་ཤར། །བསམ་གཏན་རྣལ་འབྱོར་ལྡན་པ་དང༌། །གྲུབ་པ་རིག་སྔགས་འཆད་རྣམས་ཀྱིས། །སྣང་བ་སྤྲུལ་བསྒྱུར་ནུས་པ་ཡང༌། །རིག་པ་རང་བྱན་ཚུད་པའི་མཐུ། །དེ་ཕྱིར་དེ་རིང་རྣལ་འབྱོར་ངས། །སྟོང་གསུམ་སྲིད་པའི་ལྷ་འདྲེ་དང༌། །སྦྱིན་བདག་འགྲས་པ་བསྡུམ་སླད་དུ། །གསང་སྔགས་བདེན་པའི་བྱིན་རླབས་ཀྱིས། །ལོངས་སྤྱོད་དཀོར་ནོར་རྒྱ་མཚོའི་སྤྲིན། །ནམ་མཁའ་གང་བའི་འདོད་ཡོན་ཆེས། །གཏན་པ་མེད་པར་བརྔན་ཟིན་ན། །ད་ནི་དཀོར་ལ་ངོ་ཞིག་འཚལ། །བྱམས་པའི་དྲིན་ལ་རླུང་ཡང་གཟོ། །བདེན་པའི་ཚིག་ལ་མི་ཡང་ཉན། །རིག་པ་མཆོག་ལ་ལྷ་ཡང་དད། །གཤིན་རྗེའི་འཇིག་རྟེན་སྨོས་ཅི་འཚལ། །ཕྱོགས་ཀྱི་ཆུ་གཏེར་ཆེན་པོ་བཞི། །རིན་ཆེན་དབྱིག་གི་བང་མཛོད་དེ། །དེ་རུ་ཁྱེད་ལ་ལམ་བསྟན་གྱིས། །ད་ནི་གཤེགས་ཤིག་ཤ་ར་ར། །ད་ནི་བཞུད་ཅིག་སི་ལི་ལི། །སྟོང་པ་ནམ་མཁའི་རུམ་དུ་བཞུད། །ཏིང་ལོའི་ལམ་སྒྲོན་འདི་ཐོགས་ལ། །དགུ་ཚིགས་ཞགས་པ་བཞིན་དུ་བསྡོགས། །འབབ་པ་ཆུ་བོའི་གཞུང་དུ་བཞུད། །སྣང་གསལ་མེ་སྒྲོན་འདི་ཐོགས་ལ། །ཆུ་ཆེན་གྲུ་གུ་བཞིན་དུ་
སྡུས། །འཚུབས་མ་རླུང་གི་བང་ལ་བཞུད། །སྒྲོན་ཆེན་འོད་འབར་འདི་ཐོགས་ལ། །རླུང་ནག་གྲུ་བོ་བཞིན་དུ་སྐྱོད། །བསྒོ་བའི་བཀའ་ལ་མི་ཉན་ན། །གདོན་གྱི་སྡེ་དཔོན་ཆེན་པོ་བཅུར། །ཆད་པ་ལས་ཀྱི་བཀའ་ནན་གསོལ། །དབང་ཕྱུག་ཆེ་རྣམས་རིག་སྔགས་དང༌། །འབར་བའི་ཕྱག་རྒྱ་རྣོན་པོ་ཡིས། །བསྡིག་དང་བརླག་པར་གདོན་མི་ཟ། །དེ་བས་ད་ལྟ་ཉིད་དུ་དེངས། །སརྦ་བྷུ་ཏ་གཙྪ། ཞེས་ལ་ལས་བྱུང་བའི་རླུང་གིས་གཏོར་སྣོད་བཏེགས་པར་བསམ་ལ། ཨོཾ་བཛྲ་ཀྲོ་ཏ་མ་ཧཱ་བ་ལ་ཧ་ན་ད་ཧ་པ་ཙ་་ཡ་ཛ་ཊི་ལམ་བྷོ་དྷ་ར་ཨུ་ཙུཥྨ་ཀྲོ་ཏ་ཧཱཾཨུ་ཕཊཿསྭཱ་ཧཱ། ཞེས་བཟླ་ཞིང་ཡུངས་ཀར་འཐོར། གུ་གུལ་གྱི་དུད་པས་བདུག །མདོས་རྣམས་ཆུ་བོ་ཆེན་པོའི་དབའ་རྒལ་ལ་བསྐྱོན། རླུང་པྲ་བརྟག་ལ། བསྲུང་འཁོར་བསྒོམ་ཞིང༌། བསྒྲུབ་བྱ་དེ་བཞིན་གཤེགས་པ་ལ་ཡིད་ཕྱོགས་པའི་སྐུ་གཟུགས་ཀྱི་སྤྱན་སྔར་ཐལ་མོ་སྦྱར་ཏེ་འདུག་པ་ལ་ཚེ་བཀུག །ཚེ་གཟུངས་དང་རྟེན་སྙིང་བཟླ་ཞིང་བུམ་ཆུ་བླུད་ལུས་བཀྲུ། ཤིས་པ་བརྗོད་པའི་ཚིག་གིས་དབུགས་དབྱུང༌། །རྗེས་ལ་ལྷ་གཏོར་རྣམས་གཤེགས། ཁང་བཟང་མཛོད་ཁང་གི་ཕུག་ལྟ་བུར་བཞག་སྟེ་མཐའ་བསྡུའོ། །རྒྱབ་ཆོས་སུ་སཙྪ་ལོ་གྲངས་དང་ལམ་ཕྲང་བཅོས་པ་སོགས་བྱ་ཞིང༌། ཁྱད་པར་དུ་སྲོག་བསླུ་གང་མང་གཏོང༌། དེ་ལྟར་བྱས་པས་མཐོ་རིས་ཀྱི་ཡོན་ཏན་རྣམ་པ་བདུན་ཆར་པས་བརླན་པའི་ལྗོན་ཤིང་ལྟར་འཕེལ་ཞིང་རྒྱས་པ་ལ་བརྟེན་ནས་ཕུན་སུམ་ཚོགས་པའི་རྟེན་འབྲེལ་གྱི་སྒོ་མང་པོ་ཞིག་རྣམ་པར་ཕྱེ་བར་འགྱུར་བ་ནི་ཐེ་ཚོམ་མེད་པའི་གནས་སོ། །ཞེས་པའང་མདོས་ཆོག་གཏོའི་རིག་པ་ལ་རིང་ནས་དགའ་བའི་འདུ་འཛི་ཅན་སྤྲང་པོ་འཇིགས་མེད་བསྟན་པའི་རྒྱལ་མཚན་དུ་འབོད་པས་ཆུ་སྟོད་ཟླ་བའི་ཉི་རིང་འཕུལ་བ་
དང་འགའ་ཞིག་ལ་ཕན་པར་འགྱུར་བའི་བསམ་པས་ཡར་ལུང་པདྨ་བཀོད་སྔགས་རིག་གྲུབ་པའི་སློབ་དཔོན་བགྲང་བར་དཀའ་བའི་ཞབས་ཀྱིས་བཅགས་ཤིང་ལྷ་དང་རིག་འཛིན་གྱི་འདུ་བ་སྤྲིན་ལྟར་འཁྲིགས་པའི་གནས་སུ་སྦྱར་བ་དགེ་ཞིང་ཤིས་པར་གྱུར་ཅིག། །།མངྒ་ལཾ།། ༈ །།རྟེན་སྙིང་སྔགས་ཀྱི་མདེའུ་ཐུང་ནི། ན་མོ་མཉྫུ་ཤྲཱི་ཡེ། རྟེན་འབྲེལ་སྙིང་པོའི་སྔགས་ཀྱི་ཤམ་བུ་བདེན་ཚིག་གི་མདེའུ་ཐུང་ནི། དེ་བཞིན་གཤེགས་པ་ཐམས་ཅད་ཀྱི་ཡུམ། ཆོས་ཀྱི་སྐུ་སྒྲིབ་པ་མེད་པའི་ཕྱག་རྒྱ། དུས་གསུམ་གྱི་འཕགས་པ་རྣམས་ཀྱིས་དགོངས་པ། བརྟུལ་ཞུགས་གྲུབ་པ་རྣམས་ཀྱིས་བསམ་པ། བཅོམ་ལྡན་འདས་ཀྱི་བདེན་པའི་ཚིག་འདི་དག་གིས་བདག་དང་སེམས་ཅན་ཐམས་ཅད་ལ་སྲུང་བ་གྱིས་ཤིག །ཚེ་དང་གཟི་བརྗིད་དང་ལོངས་སྤྱོད་འཁོར་དང་ཆོས་དང་གྲགས་པ་ལ་སོགས་པ་འཇིག་རྟེན་དང་འཇིག་རྟེན་ལས་འདས་པའི་ཕུན་སུམ་ཚོགས་པ་ཐམས་ཅད་སྦྱིན་པ་དང༌། ཡོངས་སུ་བཟུང་བ་དང༌། ཕྱིར་ཞིང་རྒྱས་པར་སྤེལ་བ་སྒྲུབས་ཤིག །གང་ཡང་བདག་ཅག་ལ་འཚེ་ཞིང་རྣམ་པར་སྡང་བའི་དགྲ་དང༌། དབུལ་ཕོངས་དང༌། གདོན་དང༌། ནད་དང༌། རིམས་ནད་དང༌། གཅན་གཟན་ཁྲོ་བོ་དང༌། དུག་དང༌། མེ་དང༌། ཆུ་དང༌། མཚོན་ཆ་དང༌། རྨི་ལྟས་ངན་པ་དང༌། གཟའ་དང༌། རྒྱུ་སྐར་དང༌། ཕྱོགས་ངན་དང༌། སྲི་ཀེགས་དང༌། བྱད་སྟེམ་དང༌། གྲིབ་མནོལ་དང༌། དུས་མ་ཡིན་པར་འཆི་བའི་འཇིགས་པ་ཐམས་ཅད་རིག་སྔགས་ཀྱི་རལ་གྲིས་གཅད་པ་དང༌། ཕུར་བུས་གདབ་པ་དང༌། འཁྲུལ་འཁོར་གྱིས་གཞོམ་པ་དང༌། གོ་ཆས་
མཚམས་བཅིང་བར་གྱིས་ཤིག་སྭཱ་ཧཱ། ནམ་མཁའ་མེད་པར་སོགས་ཞེས་གདབ་བོ། །ནགས་ཀྱི་མཐོངས་འཆི་མེད་དགའ་བའི་ཚལ་དུ། ཨ་བྷྱཱས་བྲིས།། ༈ །།རྟེན་འབྲེལ་སྙིང་པོ་ལ་བརྟེན་པའི་མདོས་ཀྱི་ཆོ་ག་ཉུང་ངུ་འཇིག་རྟེན་གསུམ་གྱི་རྣ་རྒྱན་ཞེས་བྱ་བ་བཞུགས་སོ། །ན་མོ་བུདྡྷ་ཡ། རྣལ་འབྱོར་པ་གང་ཞིག་གིས་རྟེན་འབྲེལ་སྙིང་པོའི་ཆོ་ག་ལ་བརྟེན་ནས་རང་གཞན་གྱི་འཆི་བ་བསླུ་ཞིང་ནད་གདོན་ཞི་བར་བྱེད་པ་མདོས་གླུད་ཡས་ཀྱི་རིམ་པ་གཏོང་བར་འདོད་པས། ཐོག་མར་མདུན་དུ་སྟེགས་བུའི་ཁར་སའམ་ཟན་གཙང་རིན་ཆེན་ཕྱེ་མ་དང་བསྲེས་པ་རི་རབ་གླིང་བཞི་གླིང་ཕྲན་དང་བཅས་པའི་གཟུགས་བྱ། རི་རབ་ཀྱི་སྟེང་ནམ་མཁའ་ཁ་དོག་ལྔ་པ་དང༌། གླིང་བཞི་ཤར་དཀར། ལྷོ་སྔོ། ནུབ་དམར། བྱང་སེར་བའི་ཁ་དོག་ཅན་གྱི་ནམ་མཁའ་སོ་སོར་བྲན། གླིང་ཆེ་ཆུང་བཅུ་གཉིས་རི་རབ་དང་བཅས་པའི་དབུས་སུ། །བླ་གླུད་བཟང་པོ། །མདའ་འཕང༌། ཤིང་རིས། རྒྱང་བུ། ཐེབས་ཀྱུ་དང་ལན་ཆགས་གང་མང་བཅས་བསག །རི་རབ་ཀྱི་བང་རིམ་སོགས་མཐའ་བསྐོར་ཀུན་ཏུ་རིན་ཆེན་སྣ་ཚོགས་དང༌། དར་སྣ། རས་སྣ། ཇ་ཕུད། ཞོ་ཕུད། ཆང་ཕུད། ཆུ་ཕུད། ཅི་འབྱོར་དང༌། དེ་དག་ལས་ཅུང་ཟད་རིང་བའི་ཉེ་འཁོར་ཅི་རིགས་པར་དམར་གསུར་གྱི་སྣོད་དང༌། ཤ་ཚིལ་ཀྱང་བསག །དེ་ལྟར་མདོས་ཆས་རྣམས་སྟ་གོན་བྱས་ནས། གོང་དུ་བུམ་པ་བཅུད་ལྡན་ཤིང་གི་ཁ་རྒྱན་དང་བཅས་པའང་བཤམས་ལ། དངོས་གཞིའི་དང་པོར་སྐྱབས་སེམས་ནི། བདག་དང་མཐའ་ཡས་སེམས་ཅན་རྣམས། །དཀོན་མཆོག་གསུམ་ལ་སྐྱབས་མཆི་ཞིང༌། །འགྲོ་ཀུན་བྱང་ཆུབ་མཆོག་ཐོབ་ཕྱིར། །གཞན་ཕན་རླབས་ཆེན་བསྒྲུབ་པར་བགྱི། །ལན་གསུམ་བྱ། དེ་ནས་འཇུག་ཚིག་རྟེན་འབྲེལ་སྙིང་པོའི་གཞུང་ལས་བྱུང་བ་ཚིག་སྣ་བསྡུས་ཏེ། ལས་
དང་ཉོན་མོངས་ཡོད་གྱུར་ན། །སེམས་ཅན་འཁོར་བར་འགྲོ་འགྱུར་ལ། །ལས་ཉོན་མེད་ན་སྲིད་ལས་ལྡོག །བདེན་དེས་བདག་གི་བསམ་འགྲུབ་ཤོག །དེ་ནས་ལྷ་རྗེས་སུ་དྲན་པ་ནི། ཆོས་གང་རྒྱུས་བྱུང་དེ་དག་དང༌། །དེ་ལ་འགོག་པ་གང་ཡིན་པ། །དེ་བཞིན་གཤེགས་པས་བཀའ་སྩལ་ཏེ། །ཚུལ་བཞིན་གསུངས་པ་དགེ་སྦྱོང་ཆེ། །དྲང་སྲོང་ཡང་དག་རྫོགས་སངས་རྒྱས། །སྐྱེས་བུ་ཆེན་པོའི་མཚན་གྱིས་བརྒྱན། །དཔེ་བྱད་བཟང་པོ་བརྒྱད་ཅུས་སྤྲས། །འོད་ཀྱི་གཟི་བྱིན་མཚུངས་མེད་སྐུ། །མེ་ཡི་ཁམས་ལ་རབ་གནས་པ། །བདག་ཉིད་ཀྱི་ནི་ལག་མཐིལ་དུ། །གསེར་གྱི་རི་བོ་འབར་བ་བཞིན། །སྐྱིལ་ཀྲུང་ཞབས་ཀྱིས་བཞུགས་པར་གྱུར། །སངས་རྒྱས་ལ་ཕྱག་འཚལ་ལོ། །ཆོས་ལ་ཕྱག་འཚལ་ལོ། །དགེ་འདུན་ལ་ཕྱག་འཚལ་ལོ། །ཡང་དག་པར་རྫོགས་པའི་སངས་རྒྱས་གངྒའི་ཀླུང་གི་བྱེ་མ་སྙེད་བཞུགས་པ་རྣམས་ལ༴ རང་སངས་རྒྱས་རྣམས༴ ་དགྲ་བཅོམ་པ༴ ཕྱིར་མི་འོང་བ༴ ལན་གཅིག་ཕྱིར་འོང་བ༴ རྒྱུན་དུ་ཞུགས་པ༴ འཕགས་པ་བྱམས་པ་ལ་སོགས་པའི་བྱང་ཆུབ་སེམས་དཔའ་རྣམས་ལ༴ བརྟུལ་ཞུགས་གྲུབ་པ་རྣམས་ལ༴ སེམས་ཅན་གྱི་སྨན་པ་རྣམས་ལ༴ ནོར་བུ་གྲུབ་པ་རྣམས་ལ་ཕྱག་འཚལ་ལོ། །དེ་ནས། ན་མོ་རཏྣ་ཏྲ་ཡཱ་ཡ། ཨོཾ་ཡེ་༴ སོགས་ཅི་འགྲུབ་བཟླ། །དེ་ནས་མདོས་བྱིན་རླབས་ནི། གཟུངས་དེ་ཉིད་སླར་ཡང་ལན་བདུན་བརྗོད་ནས།
ཆོས་གང་རྒྱུས་བྱུང་དེ་དག་ནི། །དེ་ལ་འགོག་པ་གང་ཡིན་པ། །དེ་བཞིན་གཤེགས་པས་བཀའ་སྩལ་ཏེ། །དེ་སྐད་གསུངས་པ་དགེ་སྦྱོང་ཆེ། །ཆོས་ཀུན་རྟེན་འབྱུང་ཟབ་མོ་རུ། །མཁྱེན་པ་བླ་ན་མེད་བརྙེས་པའི། །མཐུ་དང་སྟོབས་དང་དབང་ཕྱུག་གིས། །སྟོང་གསུམ་སྟོང་གི་འཇིག་རྟེན་འདི། །ངོ་མཚར་རིན་ཆེན་བཀོད་པའི་ཞིང༌། །ཡིད་འོང་ལྟ་ན་རབ་མཛེས་པར། །ལོངས་སྤྱོད་མི་ཟད་ནམ་མཁའ་མཛོད། །འདོད་དགུའི་སྤྲིན་ཕུང་ཆེན་པོར་གྱུར། །ཞེས་བརྗོད་ཅིང་བསམ། དེ་ནས་མགྲོན་འབོད་པ་ནི། ཀྱཻ། དེ་རིང་སྒྱུ་མའི་རྣལ་འབྱོར་ངས། །སེམས་ཅན་ཡོངས་ལ་ཕན་གདགས་ཕྱིར། །འཛད་མེད་སྦྱིན་པའི་སྒོ་འབྱེད་ཀྱིས། །ལན་ཆགས་མགྲོན་རྣམས་ད་གཤེགས་ཤིག །མ་རིག་སྲེད་ལེན་གཞན་དབང་གིས། །སྣ་ཚོགས་སྲིད་པའི་ལུས་བླང་ཞིང༌། །ལས་ཀྱི་རྫུ་འཕྲུལ་ཤུགས་ལྡན་པའི། །གདོན་རིགས་སྟོང་ཕྲག་བརྒྱད་ཅུའི་སྡེ། །མདོས་གླུད་ཡས་ཀྱི་སྟོན་མོར་གཤེགས། །ས་འོག་ས་སྟེང་ས་བླ་སྟེ། །འཇིག་རྟེན་གསུམ་ལ་རབ་རྒྱུ་བའི། །བགེགས་ཆེན་མ་རུང་གཤིན་རྗེའི་རྒྱལ། །བདུད་བཙན་གནོད་སྦྱིན་གཟའ་ཀླུའི་ཚོགས། །བརྗེད་བྱེད་གྲིབ་གནོན་སྲུལ་པོའི་གདོན། །སྐེམ་བྱེད་སྨྱོ་བྱེད་ཤ་ཟའི་སྡེ། །ཐེའུ་རང་སྲིན་པོ་མ་མོ་སོགས། །ལོག་འདྲེན་མགྲོན་རྣམས་ད་གཤེགས་ཤིག །ཁྱད་པར་དེང་གི་བསྲུང་བྱ་འདིའི། །སྲོག་དབུགས་དྲོད་དང་མདངས་འཕྲོག་པའི། །སྟེང་
གདོན་གཟའ་དང་རྒྱུ་སྐར་དང༌། །འོག་གདོན་ཀླུ་དང་ས་བདག་དང༌། །བར་གདོན་བཙན་དང་མ་སྲིན་སོགས། །མཐོ་བ་རྗེ་དཔོན་རྒྱལ་རིགས་ནས། །དམའ་བ་རྡུལ་ཁྲོད་ཤ་ཟའི་བར། །དེ་རིང་སྟོན་ཆེན་མགྲོན་ལ་གཤེགས། །འཚོ་བའི་ཟས་ལ་ལྷ་ཡང་འདུ། །བདེན་པའི་ཚིག་ལ་མི་ཡང་ཉན། །དེ་ཕྱིར་རྣལ་འབྱོར་སྔགས་འཆང་གིས། །དཀོར་ནོར་སྦྱིན་པའི་མགྲོན་ལ་འདུས། །ཕན་བྱེད་བདེན་པའི་ངག་ལ་ཉོན། །ཐོགས་མེད་སྐད་ཅིག་ཡུད་ཙམ་ལ། །རྫུ་འཕྲུལ་སྟོབས་ཀྱིས་ད་གཤེགས་ཤིག །སརྦ་བྷུ་ཏ་ཨཾ་ཀུ་ཤ་ཡ་ཛཿ ཞེས་བརྗོད་པས་མགྲོན་རིགས་དེ་དག་ཐམས་ཅད་ཁ་བ་དང་བུ་ཡུག་འཚུབ་པ་ལྟར་འདུས་པར་བསམ་མོ། །དེ་ནས་མདོས་གྱེར་བ་ནི། ཀྱཻ། ཆོས་དབྱིངས་ཕྱོགས་དུས་མཉམ་པ་ཉིད། །གཟོད་ནས་ཞི་ཞིང་རྣམ་དག་དང༌། །ཆོས་ཀྱི་རང་བཞིན་མ་རྟོགས་ཏེ། །མ་རིག་བདག་ཏུ་ལྟ་བ་ལས། །སྲིད་པ་རྨི་ལམ་བཞིན་དུ་སྣང༌། །བགེགས་རྒྱལ་ཆེན་པོ་ཁྱེད་རྣམས་ཀྱང༌། །འདུ་བྱེད་མི་དགེའི་ལམ་བསགས་ཤིང༌། །སྔོན་གྱི་སྲིད་པས་མཚམས་སྦྱར་ནས། །མི་བཟད་གཤིན་རྗེའི་འཇིག་རྟེན་དུ། །འཁྲུལ་སྣང་སྡུག་བསྔལ་སྣ་ཚོགས་མྱོང༌། །རྒྱུ་འབྲས་ཚུལ་ལ་རྣམ་རྨོངས་ཏེ། །གཞན་ལ་གནོད་པ་ལྷུར་ལེན་ཞིང༌། །ཤ་ཁྲག་དྲོད་དང་དབུག་ལ་རྔམ། །མི་བརྫུ་དགུ་བརྫུའི་ཆོ་འཕྲུལ་གྱིས། །སྐྱེ་འགྲོའི་སྲོག་ལ་ཧུར་ཐུམ་བྱེད། །མཐོ་རིས་བདེ་བའི་ཡོན་ཏན་བདུན། །ཀུན་གྱི་དང་པོར་ཚེ་ཞེས་བརྗོད། །
ཚེ་དང་སྲོག་ལས་ཕངས་པའི་ནོར། །སྲིད་ན་ནམ་ཡང་རྙེད་མི་འགྱུར། །གང་ཞིག་གཞན་གྱི་སྲོག་ལེན་པ། །འཕྲལ་དུ་གཞན་ལ་འཚེ་བྱེད་ཅིང༌། །ཡུན་དུ་རང་ཉིད་ཕུང་ཁྲོལ་སྐྱེད། །དེ་དག་བསྐལ་མང་བྱེ་བ་བརྒྱར། །ལོག་པར་ལྟུང་ཞིང་གྲོལ་མི་འགྱུར། །དེ་ཕྱིར་དེ་རིང་རྣལ་འབྱོར་ངས། །སྦྱིན་བདག་སྡུག་བསྔལ་ཞི་བ་དང༌། །བགེགས་རྣམས་ཡུན་དུ་བདེ་བའི་ཕྱིར། །བྱམས་དང་སྙིང་རྗེའི་མཐུ་བསྐྱེད་དེ། །མདོས་གླུད་དཀོར་ནོར་ལོངས་སྤྱོད་ཀྱིས། །ལན་ཆགས་མགྲོན་རིགས་རྒྱ་མཚོ་བརྔན། །ཞེས་བརྗོད་ནས་རྟེན་སྙིང་ལན་བདུན་གྱིས་ཤར་གདོན་རྣམས་ལ་མདོས་བསྔོ་ཞིང་གྱེར་བྱ་བ་ནི། ཀྱཻ། ཤར་ཕྱོགས་དྲི་ཟའི་གདོན་རྣམས་ལ། །མདོས་གླུད་རྣམ་པ་སྣ་ཚོགས་པ། །རི་རབ་གླིང་བཞིའི་འཇིག་རྟེན་ཀུན། །རིན་ཆེན་གོས་དང་དར་སྣས་བཀང༌། །གསེར་སྐྱེམས་བདུད་རྩིའི་རྒྱ་མཚོ་བསྐྱིལ། །གཡུ་སྐྱེམས་ཕུད་ཀྱི་ཆུ་རྒྱུན་བསྒྲེངས། །རོ་མངར་འོ་ཕུད་ཆི་ལི་ལི། །བཅུད་ལྡན་ཇ་ཞག་མེ་རེ་རེ། །འབྲུ་རིགས་སྣ་ཚོགས་འཛད་མེད་པ། །འབྲས་སྲན་བོང་དང་གཏོས་སུ་ཆེ། །གྲོ་ནས་ལྷུན་དང་དཔངས་སུ་མཐོ། །ཁྲེ་ཡུངས་གྲངས་དང་རྔམས་སུ་བརྗིད། །ལོངས་སྤྱོད་རྒྱ་ཆེན་དང་ལྡན་པའི། །བླ་གླུད་བརྔན་སྦྱིན་རྒྱ་མཚོའི་གཏེར། །བཀྲག་དང་གཟི་བྱིན་ལམས་སེ་ལམ། །བཞད་དང་བྲོ་གར་ཁྲབས་སེ་ཁྲབ། །རྩེ་དང་བང་འགྲོས་བྲེངས་སེ་བྲེང༌། །གོས་དང་དར་ཐོད་ལྷབས་སེ་ལྷབ། །རྒྱན་དང་དྲིལ་གཡེར་ཁྲོ་ལོ་
ལོ། །དེ་འདྲའི་བླ་གླུད་བཟང་པོ་ལ། །མདོས་རྫོང་སྐྱེས་བུ་འདེབས་པ་ནི། །ཚོན་སྐུད་དེ་ནི་ནམ་མཁར་བྲན། །ནམ་མཁའི་མཁར་རྫོང་ཝངས་སེ་ཝང༌། །བལ་ཚོན་དེ་ནི་རྒྱང་བུར་བརྒྱུས། །རྒྱང་བུའི་འཁྲི་ཤིང་ལྡེམས་སེ་ལྡེམ། །ཕོ་ཤིང་དེ་ནི་མདའ་ཁྲར་བསྒྲིགས། །མདའ་ཁྲའི་ཡོ་ལང་སྒ་ར་ར། །མོ་ཤིང་དེ་ནི་འཕང་ཁྲར་བསྐོར། །འཕང་ཁྲའི་སྒྲིལ་འགྲོས་པུ་རུ་རུ། །ལྔ་ཚོན་དེ་ནི་ཤིང་རིས་བཀོད། །ཤིང་རིས་བཀྲག་མདངས་ཡ་ལ་ལ། །ཏིང་འཛིན་སྔགས་ཀྱིས་བྱིན་རླབས་ཏེ། །སྟོང་གསུམ་འཇིག་རྟེན་མ་ལུས་པར། །འདོད་ཡོན་རྒྱན་གྱི་སྤྲིན་བཀོད་ནས། །སྦྱིན་བདག་ཚེ་ཡི་གླུད་དུ་འབུལ། །སོ་སོའི་རེ་འདོད་བསྐངས་ནས་ཀྱང༌། །རྣལ་འབྱོར་སྔགས་འཆང་བདག་ཅག་གི། །བསྲུང་བྱ་ཡོན་གྱི་བདག་པོ་རྣམས། །དྲན་དང་བསམ་དང་གཟུང་དང་རེག །གློད་དང་ཞི་དང་བཀྲོལ་ནས་ཀྱང༌། །སླན་ཆད་འཚེ་བར་མ་བྱེད་ཅིག །ཅེས་གྱེར། སླར་ཡང་མདོས་ལ་དམིགས་ནས་རྟེན་སྙིང་ལན་བདུན་བརྗོད་ནས། ཀྱཻ། ལྷོ་ཕྱོགས་གྲུལ་བུམ་གདོན་རྣམས་ལ། །མདོས་གླུད་རྣམ་པ་སོགས་ནས། སླན་ཆད་འཚེ་བར་མ་བྱེད་ཅིག །གི་བར་བཏང༌། ཡང་རྟེན་སྙིང་ལན་བདུན་བརྗོད་ནས། ཀྱཻ། ནུབ་ཕྱོགས་ཀླུ་ཡི་གདོན་རྣམས་ལ། །མདོས་གླུད་སོགས་རིགས་འགྲེ། ཀྱཻ། བྱང་ཕྱོགས་གནོད་སྦྱིན་གདོན་རྣམས་ལ། །མདོས་གླུད་སོགས་འགྲེ། ཀྱཻ། ཕྱོགས་ཀྱི་མཚམས་ན་གནས་པའི་གདོན། །མེ་ལྷའི་གདོན་དང་སྲིན་པོའི་གདོན། །རླུང་ལྷའི་
གདོན་དང་དབང་ལྡན་གདོན། །འབྱུང་པོ་མི་བཟད་གདོན་རྣམས་ལ། །མདོས་གླུད༴ སོགས། ཀུན་ལ་བར་མཚམས་སུ་རྟེན་སྙིང་བརྗོད། སྤྱིར་གོང་གི་མདོས་བྱིན་རླབས་ལ་སྔགས་དྲུག་ཕྱག་དྲུག་གམ་ནམ་མཁའ་མཛོད་ཀྱི་སྔགས་རྒྱ་ལྟ་བུ་སྦྱར་ཀྱང་ལེགས་མོད། རྟེན་འབྲེལ་སྙིང་པོ་ཁོ་ནས་ཀྱང་འཐུས་ཏེ་རྟེན་སྙིང་བསྟན་པ་ལ། མཆོད་པ་གང་ལ་དམིགས་ནས་བརྗོད་ན་འཇིག་རྟེན་གྱི་ཁམས་གང་བ་ཙམ་ཕུལ་བར་འགྱུར་རོ། །ཞེས་བཤད་ཅིང༌། དེ་ཉིད་མདོས་ལའང་མཚུངས་སོ། །དེ་ནས་དམར་གསུར་གཏོང་ཞིང༌། ནམ་མཁའ་མཛོད་ཀྱི་སྔགས་རྒྱའམ་རྟེན་སྙིང་གིས་བརླབས་ལ། ཀུན་མཁྱེན་རང་བྱུང་རྡོ་རྗེའི་ཞལ་སྔ་ནས་མཛད་པའི་དམར་གསུར་གྱི་ཆོ་ག་ཅུང་ཟད་རྒྱས་པ་ཉིད་གཏོང་བའམ་བསྡུ་ན། །སེམས་ཅན་ཀུན་གྱི་དྲོད་དབུགས་དང༌། །སྲོག་དང་ཤ་ཁྲག་ལ་རྔམ་པའི། །བགེགས་རིགས་འབྱུང་པོའི་ཚོགས་རྣམས་ལ། །དམར་ཆེན་འདོད་དགུའི་བརྔན་སྦྱིན་ནི། །ཤ་གསུར་དུད་པའི་སྤྲིན་ཆེན་འཁྲིགས། །ཚིལ་ཆེན་གསུར་གྱི་དྲི་ངད་འཐུལ། །སྟོབས་དང་མདངས་དང་དྲོད་དབུགས་བཅས། །ཏིང་འཛིན་དགོངས་པས་རྣམ་སྤྲུལ་ཏེ། །སྦྱིན་བདག་ཚེ་ཡི་གླུད་དུ་སྟེར། །རྣལ་འབྱོར་བདག་གི་བསྲུང་བྱ་རྣམས། །དྲན་དང་ཆགས་དང་གཟུང་དང་རེག །གློད་དང་གཏོང་དང་གྲོལ་བར་མཛོད། །ཅེས་བརྗོད་ཅིང་དམིགས་གནད་གཟབ་རྒྱས་བྱ། སླར་ཡང་ཡི་དྭགས་སྤྱི་ལ་དམིགས་ཏེ་ཆུ་སྦྱིན་བྱ་བ་ནི། ཟངས་དངུལ་སོགས་རིན་པོ་ཆེའི་སྣོད་གཙང་མའམ་རྫ་སྣོད་གཙང་མར་ཆུ་གཙང་བླུགས་ཏེ། ལག་གཡས་སྣོད་ཀྱི་ཁར་བཞག་ལ། ན་མཿསརྦ་ཏ་ཐཱ་ག་ཏ་ཨ་བ་ལོ་ཀི་ཏེ། ཨོཾ་སམྦྷ་ར་སམྦྷ་ར་ཧཱཾཨུ།
ལན་བདུན་བཟླས་ནས། དེ་བཞིན་གཤེགས་པ་རིན་ཆེན་མང་ལ་ཕྱག་འཚལ་ལོ། །དེ་བཞིན་གཤེགས་པ་གཟུགས་དམ་པ་ལ་ཕྱག་འཚལ་ལོ། །དེ་བཞིན་གཤེགས་པ་སྐུ་འབྱམས་ཀླས་ལ་ཕྱག་འཚལ་ལོ། །དེ་བཞིན་གཤེགས་པ་འཇིགས་པ་ཐམས་ཅད་དང་བྲལ་བ་ལ་ཕྱག་འཚལ་ལོ། །ཞེས་བརྗོད་ཅིང་སེ་གོལ་གསུམ་བྱས་ཏེ་ས་གཙང་མར་བླུགས་སོ། །དེ་ཅི་ནུས་སུ་བསྐྱར། འདི་ཁོ་ནས་ཀྱང་ཡི་དྭགས་མང་པོ་ཚིམས་ཤིང༌། སྦྱིན་པ་པོའི་བསོད་ནམས་འཕེལ་བ་དང༌། མདངས་དང་སྟོབས་འཕེལ་བ་དང༌། བགེགས་རྣམས་ཀྱིས་འཚེ་མི་ནུས་པ་སོགས་ཕན་ཡོན་བསམ་གྱིས་མི་ཁྱབ་པར་མདོ་ལས་བཤད་དོ། །མཐར། ཀྱཻ། སྟོང་གསུམ་སྲིད་པའི་འཇིག་རྟེན་ན། །ལྷ་འདྲེ་ཡིད་ཀྱི་རྫུ་འཕྲུལ་ཅན། །སའམ་འོན་ཏེ་བར་སྣང་གནས། །ཆེན་པོའམ་ཆུང་ངུ་གང་ཡང་རུང༌། །སྟོན་ཆེན་མགྲོན་ལ་སྤྱན་དྲངས་ནས། །ལོངས་སྤྱོད་འདོད་དགུའི་ཆར་ཕབ་སྟེ། །བཟའ་དང་བཅའ་དང་བཏུང་དང་བགོ །ཡིད་བཞིན་ནམ་མཁའ་གང་བར་འབུལ། །བརྟན་གཡོ་ཕྱི་ནང་སྣང་བ་འདི། །གདོད་ནས་རང་བཞིན་མ་སྐྱེས་ཏེ། །རྟེན་འབྱུང་སྒྱུ་མའི་སྣང་ཆ་རུ། །འཕགས་དང་འཕགས་པ་མ་ཡིན་པའི། །བློ་ཡིས་ཇི་ལྟར་བཞག་པ་བཞིན། །དག་དང་མ་དག་སོ་སོར་སྣང༌། །སྒྲོ་དང་སྐུར་བ་ཞི་བ་ཡི། །དོན་འདི་སུ་ཞིག་རྟོགས་གྱུར་པ། །དེ་དག་ཟབ་མོ་ཡེ་ཤེས་ཀྱིས། །མཁའ་དང་ལག་མཐིལ་རབ་མཉམ་པའི། །ཆོ་འཕྲུལ་སྒྱུ་མ་བཞིན་དུ་སྟོན། །དེ་ཕྱིར་རྣལ་འབྱོར་དབང་ཕྱུག་ངས། །ཆོས་ཉིད་རྟོགས་པའི་ལྟ་བ་དང༌། །ཏིང་འཛིན་སྒྱུ་མའི་
འཕྲུལ་ཆེན་གྱིས། །འཛད་མེད་དཀོར་ནོར་ནམ་མཁའི་གཏེར། །དེ་རིང་ཁྱེད་ལ་དངོས་སུ་འབུལ། །དགྱེས་ཤིང་ཚིམ་པར་བཞེས་ནས་ཀྱང༌། །གདུག་རྩུབ་གནོད་སེམས་ཞི་བ་དང༌། །རྟག་ཏུ་བདེ་ལ་གནས་གྱུར་ཅིག །ཅེས་བརྗོད་ཅིང་བསམ། དེ་ནས་ཆོས་སྦྱིན་དང་བདེན་ཚིག་བསྒྲགས་པ་ནི། ཆོས་གང་རྒྱུས་བྱུང་དེ་དག་ནི། །དེ་ལ་འགོག་པ་གང་ཡིན་པ། །དེ་བཞིན་གཤེགས་པས་བཀའ་སྩལ་ཏེ། །དེ་སྐད་གསུངས་པ་དགེ་སྦྱོང་ཆེ། །ཆོས་ཉིད་མཐའ་དབུས་མེད་པའི་ཀློང༌། །ཆོས་ཀུན་གཟོད་ནས་ཞི་བ་སྟེ། །ངོ་བོ་ཉིད་ཀྱིས་མ་སྐྱེས་ཤིང༌། །མཚན་མ་ཀུན་ལས་རབ་ཏུ་འདས། །རྒྱུས་བྱུང་ཆོས་གང་རྒྱུར་བཅས་པ། །ཐ་སྙད་སྣང་བ་ཁོ་ན་སྟེ། །བློ་ཡིས་རྣམ་པར་བཞག་པ་ལ། །རྟེན་ཅིང་འབྲེལ་འབྱུང་ཚུལ་ཞེས་བྱ། །སྟོང་དང་རྟེན་འབྱུང་ཟབ་མོའི་དོན། །མ་རིག་འཛིན་པས་རབ་བསྒྲིབས་ཏེ། །རྟེན་འབྲེལ་ལུགས་འབྱུང་བཅུ་གཉིས་ཀྱིས། །སྐྱེ་བོ་བྱིས་པ་བསླུ་ཞིང་འཁྲིད། །ཉོན་མོངས་སྒྱུ་མའི་སྒྱུ་ཐབས་དང༌། །འདུ་བྱེད་སྒྱུ་མའི་འཁྲུལ་འཁོར་ལ། །སྡུག་བསྔལ་སྒྱུ་མའི་གནས་བཅས་ནས། །སེམས་ཅན་སྒྱུ་མ་ཡ་རེ་ང༌། །གང་ཚེ་ཀུན་འབྱུང་སྲིད་པའི་ཁམས། །འཕགས་པའི་ལམ་གྱིས་སྤངས་པ་ན། །ཆོས་མཆོག་མྱ་ངན་མེད་པའི་གནས། །ཇི་ལྟ་བ་བཞིན་ཐོབ་པར་འགྱུར། །གང་ཞིག་བདག་ཏུ་སྒྲོ་འདོགས་པ། །དེ་དག་ཉོན་མོངས་རྣམ་མང་པོ། །སྲེད་དང་སྡང་དང་ཁེངས་
ལ་སོགས། །བརྒྱུད་མར་འཕེལ་ཞིང་རྒྱས་པར་འགྱུར། །དེ་ཕྱིར་ཁྱེད་ཀྱང་འདི་འདྲའི་ཚུལ། །མཐོང་ནས་དོན་བཞིན་སྤྱོད་པ་དང༌། །མཐོང་དོན་གཞན་ལ་འདོམས་བྱེད་པའི། །སངས་རྒྱས་ཕན་མཛད་ཉིད་གྱུར་ཅིག །སངས་རྒྱས་བྱང་ཆུབ་མཆོག་འདོད་ན། །བྱང་ཆུབ་མཆོག་གི་སེམས་བསྐྱེད་ཅིག །སངས་རྒྱས་ཡོན་ཏན་རྨད་བྱུང་བ། །ཀུན་ཀྱང་བྱང་ཆུབ་སེམས་ལས་སྐྱེ། །གཞན་ཕན་སྙིང་རྗེའི་རྩ་བ་དང༌། །ལྷག་བསམ་རྣམ་པར་དག་པ་ལས། །བླ་མེད་བྱང་ཆུབ་སེམས་འབྱུང་སྟེ། །འགྲོ་དོན་སངས་རྒྱས་དོན་གཉེར་ཡིན། །སྡིག་པ་ཅི་ཡང་མི་བྱ་ཞིང༌། །དགེ་བ་ཕུན་སུམ་ཚོགས་པར་སྤྱད། །རང་གི་སེམས་ནི་ཡོངས་སུ་གདུལ། །འདི་ནི་སངས་རྒྱས་བསྟན་པ་ཡིན། །སླར་ཡང་རྟེན་སྙིང་བརྗོད་ནས་དེ་ཉིད་བོད་སྐད་དུ་བསྒྱུར་བ། ཆོས་གང་རྒྱུས་བྱུང་དེ་དག་ནི། །དེ་ལ་འགོག་པ་གང་ཡིན་པ། །དེ་བཞིན་གཤེགས་པས་བཀའ་སྩལ་ཏེ། །དེ་སྐད་གསུངས་པ་དགེ་སྦྱོང་ཆེ། །སངས་རྒྱས་ཆགས་མེད་སྤྱོད་ཡུལ་ཅན། །གནས་མེད་ལེན་པ་མེད་བརྙེས་ཤིང༌། །བདུད་རྩི་རྡུལ་མེད་དོན་སྟོན་པའི། །བདེན་ཚིག་ནམ་ཡང་བསླུ་བ་མེད། །བདེ་གཤེགས་རིག་པ་གསུམ་མངའ་བས། །ཆོས་ཀུན་རང་བཞིན་རྣམ་སྟོང་ཞིང༌། །ཀུན་རྫོབ་རྟེན་ནས་འབྱུང་གཟིགས་པའི། །བདེན་ཚིག་ནམ་ཡང་བསླུ་བ་མེད། །རྒྱལ་བའི་ཤེས་རབ་ཕ་རོལ་ཕྱིན། །ཆོས་ཀྱི་དབྱིངས་དང་མཉམ་སྦྱོར་ཞིང༌། །རྟོག་པ་ཀུན་ལས་རྣམ་གྲོལ་བའི། །
བདེན་ཚིག་ནམ་ཡང་བསླུ་བ་མེད། །འདྲེན་པ་མཚུངས་མེད་བློ་མངའ་ཞིང༌། །སེམས་ཅན་ཁམས་རྣམས་མ་ལུས་པར། །མི་དམིགས་བྱམས་པས་ཁྱབ་མཛད་པའི། །བདེན་ཚིག་ནམ་ཡང་བསླུ་བ་མེད། །སྐྱོབ་པ་འཇིག་རྟེན་མཁྱེན་མངའ་བའི། །ཕྲིན་ལས་བསམ་གྱིས་མི་ཁྱབ་ཀྱང༌། །ཡེ་ཤེས་འཕེལ་དང་འགྲིབ་མེད་པའི། །བདེན་ཚིག་ནམ་ཡང་བསླུ་བ་མེད། །བདེན་པའི་བྱིན་རླབས་འདི་དག་གིས། །མ་རིག་རྒུད་པ་ཞི་བ་དང༌། །བགེགས་རྣམས་འཕགས་པའི་ལམ་རྙེད་ནས། །རང་གཞན་བདེ་ལ་སྤྱོད་གྱུར་ཅིག །སངས་རྒྱས་སྟོབས་བཅུའི་སྟོབས་མངའ་བའི། །སྟོབས་མཆོག་མཚུངས་པ་མེད་པ་དང༌། །གྲགས་ཆེན་བྱང་ཆུབ་སེམས་དཔའ་རྣམས། །ཡེ་ཤེས་ཆགས་པ་མེད་བརྙེས་པའི། །མཐུ་དང་སྟོབས་དང་དབང་ཕྱུག་གིས། །བགེགས་རྣམས་གནོད་སེམས་ཞི་བ་དང༌། །སྦྱིན་བདག་འཇིགས་པ་ཀུན་བྲལ་ནས། །རང་གཞན་བདེ་ལ་གནས་གྱུར་ཅིག །སྒྱུ་མ་ལྟ་བུའི་ཏིང་འཛིན་དང༌། །དཔའ་བར་འགྲོ་བའི་ཏིང་འཛིན་དང༌། །རྡོ་རྗེ་ལྟ་བུའི་ཏིང་འཛིན་སོགས། །ཏིང་འཛིན་གཟི་བརྗིད་ཆེན་པོ་ཡི། །མཐུ་དང་སྟོབས་དང་དབང་ཕྱུག་གིས། །སོགས་འགྲེ། རྒྱུན་ཞུགས་ལན་ཅིག་ཕྱིར་འོང་སོགས། །གང་དག་ཉན་ཐོས་རང་སངས་རྒྱས། །སློབ་དང་མི་སློབ་ལམ་གནས་ཤིང༌། །ཀུན་སྦྱོར་རྒྱུ་བ་རྣམས་ཟད་པའི། །མཐུ་དང་སྟོབས་དང་དབང་ཕྱུག་གིས། །བགེགས་
རྣམས་གནོད་སེམས་ཞི་བ་དང༌། །སྦྱིན་བདག་འཇིགས་པ་ཀུན་བྲལ་ནས། །རང་གཞན་བདེ་ལ་གནས་གྱུར་ཅིག །ཡང་ཡེ་་གཅིག་གམ་གསུམ་བརྗོད། དེ་ལྟར་སྦྱིན་འགྱེད་རྫོགས་ནས། མགྲོན་ལམ་བསྟན་པ་ནི། མདོས་བཏེགས་ལ། ཀྱཻ། ཆོས་གང་རྒྱུས་བྱུང་དེ་དག་ནི། །དེ་ལ་འགོག་པ་གང་ཡིན་པ། །དེ་བཞིན་གཤེགས་པས་བཀའ་སྩལ་ཏེ། །དེ་སྐད་གསུངས་པ་དགེ་སྦྱོང་ཆེ། །རྟེན་འབྲེལ་ནུས་པ་བསམ་མི་ཁྱབ། །སངས་རྒྱས་སྤྱོད་ཡུལ་བསམ་མི་ཁྱབ། །རིག་སྔགས་བདེན་པ་བསམ་མི་ཁྱབ། །བསམ་གྱིས་མི་ཁྱབ་འདི་དག་གི། །སྟོབས་ནུས་བསམ་གྱིས་མི་ཁྱབ་པས། །འཇིག་རྟེན་ཁམས་རྣམས་རྒྱ་མཚོའི་ཁྱོན། །འདོད་ཡོན་སྤྲིན་གྱིས་བར་བཀང་སྟེ། །དེ་རིང་ཁྱོད་ལ་ཕུལ་ཟིན་གྱིས། །ད་ནི་གཤེགས་ཤིག་ཤ་ར་ར། །བགེགས་རྒྱལ་ད་ནི་གཤེགས་རེ་རན། །ལྷ་འདྲེ་ཡིད་ཀྱི་རྫུ་འཕྲུལ་ཅན། །ཕྱོགས་བཅུ་དག་ནས་གང་ལྷགས་དང༌། །སྦྱིན་བདག་འགྲས་པ་བསྡུམ་པའི་ཕྱིར། །མཆོད་དང་བསྙེན་བཀུར་བགྱིས་ཟིན་གྱིས། །བྱམས་པའི་དྲིན་ལ་ངོ་ཞིག་འཚལ། །བདེན་པའི་ཆད་ཐོ་དོན་ཡོད་མཛོད། །མཐོ་བ་རི་རབ་རྩེ་མོ་ནས། །དམའ་བ་གཤིན་རྗེའི་འཇིག་རྟེན་ཡན། །ལྷ་དང་ལྷ་མིན་ཡི་དྭགས་གདོན། །སྲིད་པ་ལས་ཀྱིས་བསྐོས་པ་བཞིན། །རང་རང་སོ་སོའི་གནས་སུ་དེངས། །བསྒོ་བའི་དམ་ལ་མི་ཉན་ན། །རིག་སྔགས་ཞགས་པ་མི་བཟད་པས། །འཆིང་དང་གཟིར་དང་ཕམ་བྱས་ནས། །
སྡུག་བསྔལ་མི་བཟད་མྱོང་བར་འགྱུར། །དེ་བས་རྣལ་འབྱོར་སྔགས་འཆང་གིས། །ཇི་ལྟར་རྗེས་སུ་བསྟན་པ་བཞིན། །རང་རང་གནས་སུ་སླར་གཤེགས་ནས། །བྱང་ཆུབ་སེམས་དང་ལྡན་པར་བྱོས། །སརྦ་བྷུ་ཏ་གཙྪ། ཞེས་བརྗོད་ནས་མདོས་ཡས་རྣམས་ཕྱོགས་གཙང་སར་བསྐྱལ། རྟེན་སྙིང་གི་སྔགས་ཀྱིས་བཏབ་པའི་གུ་གུལ་བདུག་ཅིང༌། བསྲུང་གུར་བསྒོམ་པ་ནི། ཆོས་གང་རྒྱུས་བྱུང་དེ་དག་ནི། །དེ་ལ་འགོག་པ་གང་ཡིན་པ། །དེ་བཞིན་གཤེགས་པས་བཀའ་སྩལ་ཏེ། །དེ་སྐད་གསུངས་པ་དགེ་སྦྱོང་ཆེ། །འདྲེན་པ་་སེངྒེ་ཡི། །ཡེ་ཤེས་ཆེན་པོའི་བྱིན་རླབས་ལས། །མི་ཤིགས་གཞོམ་མེད་རྡོ་རྗེའི་གུར། །འབར་བའི་མེ་འོད་རབ་འཕྲོ་བས། །ཕྱི་རོལ་ཕྱོགས་རྣམས་ཀུན་ཁྱབ་སྟེ། །ལོག་འདྲེན་རྒྱུ་བའི་སྐབས་མེད་གྱུར། །ཡེ་༴ སོགས་ལན་གསུམ། དེ་ནས་བསྲུང་བྱའི་ལུས་ཐམས་ཅད་བུམ་ཆུས་བཀྲུ་ཞིང་བྱུག །གལ་ཏེ་དེ་བཞིན་གཤེགས་པའི་སྐུ་གཟུགས་ཡོད་ན། དེ་ཉིད་ཀྱི་ངོགས་སུ་ཆུ་རྒྱུན་སྦྲེང་བས་ཁྲུས་གསོལ་ཞིང༌། ཁྲུས་ཆུས་བསྲུང་བྱ་བཀྲུ་བའང་བྱ་ལ། འདིར་ཚེ་འགུགས་སྤྲོ་ན། ཚེ་འགུགས་ཀྱི་ཆོ་ག་རྒྱས་བསྡུས་ཅི་རིགས་བྱ་ཞིང༌། ཤིན་ཏུ་བསྡུ་ན་མདའ་དར་བླང་ལ། ཡེ་་སོགས། ཆོས་གང་རྒྱུས་བྱུང་དེ་དག་ནི། །དེ་ལ་འགོག་པ་གང་ཡིན་པ། །དེ་བཞིན་གཤེགས་པས་བཀའ་སྩལ་ཏེ། །དེ་སྐད་གསུངས་པ་དགེ་སྦྱོང་ཆེ། །ཆོས་ཉིད་གཅིག་ལས་མ་གཡོས་བཞིན། །གང་འདུལ་ཐབས་ལ་མཁས་པའི་སྒོ། །ཚད་མེད་བསམ་གྱིས་མི་ཁྱབ་ཅིང༌། །ཐུགས་རྗེའི་ཐུགས་དམ་ཆེན་པོ་
ཡིས། །སེམས་ཅན་དོན་དུ་ད་བཞེངས་ཤིག །བརྟན་པ་སྣོད་ཀྱི་འཇིག་རྟེན་ཁམས། །འབྱུང་པོ་ཆེན་པོ་རྣམ་བཞི་ཡིས། །སྙིང་པོའི་དྭངས་མ་མདངས་དང་བཅུད། །རྡོ་རྗེ་ཚེ་ཡི་གསོས་སུ་ཆེ། །ལྷ་དང་དྲང་སྲོང་རིག་འཛིན་གྱི། །སྟོབས་དང་མདངས་དང་གཟི་བརྗིད་དང༌། །རིག་སྔགས་བྱིན་རླབས་ཚད་མེད་པ། །ཀུན་ཀྱང་མི་ཤིགས་ཚེ་ཡི་གྲོགས། །མདོར་ན་རབ་འབྱམས་འཇིག་རྟེན་གྱི། །བརྟན་གཡོའི་དྭངས་བཅུད་མ་ལུས་པ། །བྱིན་རླབས་སྟོབས་ཀྱིས་འདིར་བཀུག་སྟེ། །བསྲུང་བྱ་རྒྱུ་སྦྱོར་ཡོན་བདག་གི། །ཁམས་དྲུག་སྲོག་གི་གསོས་སུ་སྩོལ། །བླ་ཚེ་སྲོག་དབུག་དྲོད་དང་བཅས། །ཆད་པ་མཐུད་ལ་ཟད་པ་བསྲིངས། །འཐོར་བ་ཁུག་ལ་ཉམས་པ་གསོས། །རྡོ་རྗེ་ཚེ་ཡི་བྱིན་ཕོབ་ཅིག །དམིགས་ཡུལ་བསྲུང་བྱའི་སེམས་ཅན་གྱི། ཁ་བསྒྱུར་མཆན། སྤྲོ་ན་ཚེ་གཟུངས་བཟླས། རྟེན་སྙིང་གིས་ཚེ་སྲོག་བརྟན་པར་བྱ། དེ་ནས་བུམ་ཆུ་བླུད་གོང་སྨོས་ཀྱི་སྐུ་ཁྲུས་ཀྱི་ཆུ་ཡོད་ནའང་བླུད། །མཇུག་ཏུ་བཀྲ་ཤིས་བརྗོད་པ་ནི། ཡེ་་སོགས། །ཆོས་གང་རྒྱུས་བྱུང་དེ་དག་ནི། །དེ་ལ་འགོག་པ་གང་ཡིན་པ། །དེ་བཞིན་གཤེགས་པས་བཀའ་སྩལ་ཏེ། །དེ་སྐད་གསུངས་པ་དགེ་སྦྱོང་ཆེ། །འཕགས་ཚོགས་སྲས་དང་བཅས་རྣམས་ཀྱི། །ཡེ་ཤེས་བྱིན་རླབས་རྨད་པོ་ཆེས། །དེ་རིང་རྒྱུ་སྦྱོར་ཡོན་བདག་གི། བསྲུང་བྱ་འདི་དག་གི། མཆན། དགོས་འདོད་འགྲུབ་པའི་བཀྲ་ཤིས་སྩོལ། །ནད་གདོན་འཇིགས་བརྒྱད་ཞི་བ་དང༌། །ཚེ་བསོད་ཡར་ཟླ་ལྟར་འཕེལ་ཏེ། །མཐོ་
རིས་ལེགས་པའི་ཡོན་ཏན་བདུན། །འཕེལ་ཞིང་རྒྱས་པའི་བཀྲ་ཤིས་ཤོག །ཅེས་བརྗོད་ཅིང་ནས་འཐོར་རོ། །སྔོན་བྱུང་སྐྱེ་བོ་མཁས་རྣམས་ཀྱིས། །སྐྱེ་རྒུ་བདེ་བར་གནས་བྱའི་ཕྱིར། །ཆོ་ག་འདི་འདྲ་བཀོད་མཐོང་ནས། །ངས་ཀྱང་དེ་འདྲའི་ལད་མོ་བྱས། །གཏོ་བླ་མགོ་འཛོང་བཞུགས་སོ་ཅོག །གཏོ་ནག་འདི་ཡིས་ཐུགས་དམ་བསྐང༌། །གཏོ་བོད་བ་ཚྭའི་མཚོ་ནང་ནས། །དོན་ཟབ་ནོར་བུ་རྙེད་ཀྱང་སྲིད། །འཁྲུལ་དང་ནོངས་པ་ཅི་ཡོད་པ། །དེ་ཀུན་གཏོ་མཁན་རྒྱལ་ལ་བཤགས། །ལེགས་ཚོགས་ཇི་སྙེད་མཆིས་པ་ཡིས། །འགྲོ་བ་ཡོངས་ལ་ཕན་བྱེད་ཤོག །ཅེས་པའང་སྤྲང་སྨྱོན་འཇིགས་མེད་པས་བྲིས་པ་དགེ།། ༈ །།རྟེན་འབྲེལ་མདོས་ཀྱི་བཅའ་ཐབས། རང་གི་མདུན་སྟེགས་བུའི་ཁར་རམ། ཅུང་ཟད་འཕགས་པའི་སྟེང་སྣོད་གཙང་གི་ནང་ས་བླུགས་ནས་ཆག་ཆག་གདབ་ལ། དེའི་སྟེང་ཁམས་སའམ་བག་ཟན་གྱི་ནང་རིན་ཆེན་ཕྱེ་མ་བསྲེས་ལ་རི་རབ་བང་རིམ་བཞིའི་སྟེང་རི་རབ་ཁ་ཁྱེར་ལ་བླ་ཀླུད་བཟང་པོ་ཞྭ་མོ་དང་གཟན་ཤམ་ཅན་དང༌། ནམ་མཁའ་ཁ་དོག་ལྔ་པ་རྒྱང་བུ་ཤིང་རིས་མདའ་འཕང་བཅས། རི་རབ་ཀྱི་ཤར་དུ་གདན་ཟླུམ་པོ་དབུས་ཆེ་བ་གཡས་གཡོན་ཆུང་བ། ལྷོ་ཕྱོགས་གདན་སོག་ཁ་དབུས་ཆེ་བ་གཡས་གཡོན་ཆུང་བ། ནུབ་ཕྱོགས་གདན་ཟླ་གམ་ཡང་གོང་ལྟར། །བྱང་གྲུ་བཞི་གོང་ལྟར་བྱས་པའི་གླིང་བཞི་གླིང་ཕྲན་བཅུ་གཉིས་སྟེང་བླ་གླུད་བཟང་པོ་རེ་དང༌། ཤར་ནམ་མཁའ་དཀར་པོ། །ལྷོ་སེར། ནུབ་དམར། བྱང་ལྗང༌། དེ་བཞིན་དུ་རེ་རེ་བཞིན་མདའ་འཕང་བ་ལ་རྒྱངས་ཤིང་རིས་བཅས་བཀོད། མཐའ་བསྐོར། རིན་པོ་ཆེ་སྣ་ཚོགས། དར་སྣ། རས་སྣ། ཇ་ཆང་འོ་ཞོ་ཆུ་གཙང་དང༌། གཟུགས་འགྲོས་སྣ་ཚོགས་པ་ཅི་འབྱོར་བཤམས། དམར་གསུར་གྱི་ཤ་ཚིལ་དང༌། ཆུ་གཏོར་གྱི་ཆུ་དང༌། ཟངས་སྣོད་བཅས་འདུ་བྱའོ།། ༈ །།རྟེན་འབྲེལ་གཏམ་གྱི་རྔ་སྒྲ་ཡིས། །མི་ཤེས་གཉིད་འཐུག་
གསལ་མཛད་པ། །ཀུན་མཁྱེན་འཇམ་པའི་དབྱངས་མངའ་བའི། །བླ་མ་དེ་ལ་ཕྱག་འཚལ་ལོ། །རྟེན་འབྲེལ་སྙིང་པོ་ལ་བསྟེན་པའི་ལས་སྦྱོར་གྱི་ཤམ་བུ་ནི། དེ་བཞིན་གཤེགས་པ་ཐམས་ཅད་ཀྱི་ཡུམ། ཆོས་ཀྱི་སྐུ་སྒྲིབ་པ་མེད་པའི་ཕྱག་རྒྱ། དུས་གསུམ་གྱི་འཕགས་པ་རྣམས་ཀྱིས་དགོངས་པ། བརྟུལ་ཞུགས་གྲུབ་པ་རྣམས་ཀྱིས་བསམ་པ། བཅོམ་ལྡན་འདས་ཀྱི་བདེན་པའི་ཚིག་འདི་དག་གིས། བདག་དང་སེམས་ཅན་ཐམས་ཅད་ལ་བསྲུང་བ་གྱིས་ཤིག་ཡོངས་སུ་བཟུང་བ་དང༌། ཡོངས་སུ་སྐྱབས་པ་དང༌། ཞི་བ་དང༌། བདེ་ལེགས་སུ་འགྱུར་བ་དང༌། ཆད་པ་སྤང་བ་དང༌། དུག་གཞིལ་བ་དང༌། ས་བཅིངས་པ་གྱིས་ཤིག་གང་ཡང་བདག་ལ་རྣམ་པར་སྡང་བ་དང༌། གནོད་པར་བསམ་པ་དང༌། དགྲ་དང་ཆོམ་རྐུན་དང་བཤེས་བྲལ་དང་གདོན་དང་ནད་དང་རིམས་ནད་དང༌། །གཅན་གཟན་ཁྲོ་བོ་དང༌། དུག་དང་མེ་དང་ཆུ་དང་མཚོན་ཆ་དང་རྨི་ལྟས་ངན་པ་དང་གཟའ་དང་རྒྱུ་སྐར་དང་ཕྱོགས་ངན་དང་སྲི་ཀེགས་དང༌། བྱད་སྟེམས་དང་གྲིབ་མནོལ་དང་དུས་མ་ཡིན་པར་འཆི་བའི་རིགས་སུ་གྱུར་པ་ཐམས་ཅད་ཕྱིར་བཟློག་གོ །རྣམ་པར་བསྐྲད་དོ། །ཡོངས་སུ་གཞིག་གོ །རིག་སྔགས་ཀྱི་རལ་གྲིས་གཅོད་དོ། །ཕུར་བུས་གདབ་བོ། །མཚམས་ཆེན་པོ་བཅད་དོ། །རིག་སྔགས་བདེན་པའི་བྱིན་རླབས་འདི། །སྟོབས་ལྡན་བདུད་ཀྱི་སྟོབས་འཇོམས་པས། །རལ་གྲི་ངར་མ་ཕྱུང་བརྡེག་སྟེ། །ངོ་མཚར་ཕན་བདེའི་ཉི་མའང་ཡིན། །བྱད་བཟློག་དམིགས་
བསལ་ཅན་ལྟ་བུ་ཡིན་ན། །བདེན་ཚིག་གི་མཇུག་ཏུ། ཨོཾ་ཧྲཱི་བཛྲ་ཛྭ་ལ་སརྦ་ཀརྨ་སོགས་ནས། རྐྵ་རྐྵ་ཕཊ་ཕཊ་སྭཱ་ཧཱའི་བར་ལུས་ངག་ཡིད་གསུམ་བཅིངས་པ་ལས་རྒྱལ་བར་བྱེད་པའི་གཟུངས་གང་མང་བསྐྱར། ༈ །མིག་སྦྱོང་བ་ལ། རྟེན་སྙིང་གི་མཐར་མིག་རྣམ་པར་སྦྱོང་བའི་རིག་སྔགས་སྦྲེལ་ཞིང༌། ཚུལ་ཁྲིམས་ཀྱི་བདེན་པ་དང་སོགས་བདེན་སྟོབས་བརྗོད་པས་འཐུས། དེའི་རིགས་པས་ལས་གང་ལའང་རིགས་འགྲེ་སྦྱར་རོ། །དེ་ཡང་མིག་འབྱེད་ལ་དཔེར་བརྗོད་ན། དུས་གཉན་རྣམས་སུ་མིག་ལ་བསྒྲིལ་བའི་ཟན་གྱི་འཐེབ་ཀྱུ་བརྒྱ་རྩ་བརྒྱད་ཕྱོགས་སུ་བསྔོ་བ་ལྟ་བུས་མཚོན་ཏེ། ནད་གདོན་བྱད་གྲིབ་སོགས་གང་ལའང་སྐབས་སུ་ངོ་ལོན་གྱི་གླུད་མང་དུ་འཇལ། རྒྱབ་ཆོས་སུ་འཕགས་པ་ས་ལུའི་ལྗང་པ་དང༌། མདོ་སྡུད་པ་ཀློག་སྒྲོག་བྱ་ཞིང་རྒྱ་ཆེན་ཤུགས་ལྡན་ལ་བརྟེན་པའི་དྲང་སྲོང་མཆོད་པ་སོགས་བྱའོ། །རྟེན་འབྲེལ་ཟབ་མོའི་གནད་ཇི་ལྟ་བར་ཤེས་ནས་གཟུངས་སྔགས་ཀྱི་སྦྱོར་བ་འདི་ཐེ་ཚོམ་མེད་པའི་ཡིད་ཀྱིས་བརྩམས་ན་རིགས་སྔགས་གྲུབ་པའི་དྲང་སྲོང་གི་དམོད་པ་རྣམས་ཀྱང་ཞ་ཉེ་ཕ་ལམ་གྱི་བྲག་ལ་བབས་པ་ལྟར་བྱ་བར་ནུས་ན་གཞན་ལྟ་ཅི་སྨོས་ཏེ། མདོར་ན་བྲམ་ཟེ་ཞི་འཛིན་མཆོག་གི་རྣམ་པར་ཐར་པའི་ཡུལ་གྱི་རྗེས་སུ་སོང་བ་ཡིན་ནོ། །ནགས་ཚལ་དྲིལ་བུའི་སྒྲ་ཅན་དུ། །བརྗོད་པ་ཀུ་ཧུའི་མགྲིན་ལྡན་གླུ། །དཔལ་ལྡན་པདྨའི་འདབ་སྟེགས་སུ། །སླར་ཡང་ཉུང་ངུར་རྗེས་བཟླས་བྱས། །ཞེས་པའང་སྤྲང་པོ་འཇིགས་མེད་བསྟན་རྒྱལ་གྱིས་སྦྱར་བ་མངྒ་ལཾ།། ༈ །།གླུད་བསྔོ་ཐབས་ཉུང་ལ་འདོན་བདེ་བ་བཞུགས་སོ། །བླ་མ་ལ་ཕྱག་འཚལ་ལོ། །གླུད་དང་ཆང་བུ་བརྒྱ་རྩ་བསྔོ་ན། །སྤྱིར་གླུད་ཀྱི་ཁུངས་ནི། སྐྱེས་རབས་ལས། ངང་པའི་རྒྱལ་པོའི་སྲོག་གླུད་དུ། །བདག་ཉིད་མཆིད་ཀྱིས་འཚལ་བར་བགྱི། །ཞེས་གླུད་ཀྱི་བརྡ་ཆད་མཛད་པ་དང༌། །ཤ་ལྔ་མ་རྙེད་ན་ཟན་ལས་བྱས་པའི་གཟུགས་བརྙན་གྱིས་ཀྱང་རུང་བར་རྒྱ་གར་པཎ་ཆེན་གྱི་
གཞུང་ནས་འབྱུང་བ་ལྟར་རིགས་པ་མཚུངས་པ་ཡིན་ཞེས་མཁས་པ་དག་གིས་གསུངས་པས། དེའི་རིགས་པས་རྫས་གཞན་ལ་ཡང་དཔག་ནུས་སོ། །དེ་ལྟར་ན་འདིར་ཆོ་ག་ཤིན་ཏུ་བསྡུས་ཏེ་འགོད་པ་ལ། ཐོག་མར་མདུན་དུ་རིན་པོ་ཆེའི་སྣོད་དམ་ཆུ་བོར་བསྐུར་ན་ཤིང་གི་བཞི་སྐོར་ལྟ་བུ་ལ་གླང་ཐག་གི་དྲྭ་ཕད་ལྟར་བཅིངས་པའི་སྟེངས་དང་ལྕི་བས་བྱུག །དེའི་ཁར་བསྒྲུབ་བྱའི་དྲི་མ་དང་བསྲེས་པའི་བག་ཟན་ལ་གླུད་དང་ཆང་བུ་བརྒྱ་རྩ་དང༌། གྲུབ་ན་ནམ་རྒྱང་མདའ་འཕང་ཤིང་རིས་རྣམས་ཚང་བ་གཅིག །གཞན་ཡང་ཏིང་ལོ། །ཤ་ཆང༌། ལ་ཕུག །སྒོག་ཙོང༌། རམ་རུག །དར་སྣ་རས་སྣ། རིན་པོ་ཆེ། སྲོག་ཆགས། མདངས་རྣམས་བསྟར་ལ་བཞག །དེ་ནས་བདག་གི་རྣལ་འབྱོར། སངས་རྒྱས་ཆོས་དང་སོགས་སྐྱབས་སེམས་མཐར། རང་ཉིད་སྐད་ཅིག་གིས་འཕགས་པ་སྤྱན་རས་གཟིགས་དབང་ཕྱུག་ཞལ་གཅིག་ཕྱག་གཉིས་ནོར་བུ་དང་པདྨ་འཛིན་པ་དར་དང་རིན་པོ་ཆེས་བརྒྱན་ཅིང་རི་དྭགས་ཀྱི་ལྤགས་པ་འཆང་བ་པད་ཟླའི་གདན་ལ་བཞེངས་སྟབས་མཛད་པ་སྐུ་མདོག་དཀར་གསལ་ཡེ་ཤེས་ཀྱི་འོད་ཟེར་ཟླ་བ་ལྟར་ཀུན་ནས་སྣང་བའི་སྐུར་གྱུར། བར་བལྟས་ལ་ཡིག་དྲུག་བཟླས་མཐར། ལྷ་སྣང་དེ་ཉིད་ཀྱིས། སྭ་བྷ་ཝ་སོགས། སྟོང་པའི་ངང་ལས་རྫས་རྣམས་ཟག་པ་མེད་པའི་ཡེ་ཤེས་ཀྱི་ཆོ་འཕྲུལ་ནམ་མཁའ་གང་བའི་འདོད་ཡོན་བསམ་གྱིས་མི་ཁྱབ་པ་རྣམས་སུ་གྱུར། ནམ་མཁའ་མཛོད་ཀྱི་སྔགས་རྒྱས་བརླབས། ན་མོ། །རིག་འཛིན་རྩ་བརྒྱུད་ཀྱི་དཔལ་ལྡན་བླ་མ་དམ་པ་རྣམས་ཀྱི་བདེན་པ་དང༌། སངས་རྒྱས་ཐམས་ཅད་ཀྱི་གསུང་རྡོ་རྗེ་ཡི་དམ་པདྨ་གར་དབང་སྤྱན་རས་གཟིགས་ཀྱི་བདེན་པ་དང༌། གསང་སྔགས་རིག་སྔགས་གཟུངས་
སྔགས་ཀྱི་ལྷ་རྣམས་ཀྱི་བདེན་པ་དང༌། ཆོས་ཉིད་རང་བཞིན་གྱིས་རྣམ་པར་དག་ཅིང་ཆོས་ཅན་རྟེན་འབྲེལ་བསླུ་བ་མེད་པའི་བདེན་པ་དང༌། བདེན་པ་ཆེན་པོའི་མཐུ་དང་ནུས་པ་ལ་བརྟེན་ནས། རྣལ་འབྱོར་པ་བདག་ཅག་དཔོན་སློབ་འཁོར་དང་བཅས་པ་རྣམས་ལ་གནོད་ཅིང་འཚེ་བར་བྱེད་པའི་འབྱུང་པོ་ས་དང་བར་སྣང་ལ་བརྟེན་པ་ཐམས་ཅད་ཁྲ་ཧོར་གཟན་ལ་རུབ་པ་ལྟར་སྐད་ཅིག་གིས་ཆང་བུའི་མགྲོན་ལ་འདིར་མཆིས་པར་གྱུར་ཅིག །སརྦ་བྷུ་ཏ་ཨཾ་ཀུ་ཤ་ཛ། ལན་གསུམ། དེ་ནས། ཧོ་འདོད་ཡོན་ལོངས་སྤྱོད་ཀྱི་སྤྲིན་ཕུང་རྒྱ་མཚོ་བཟང་ཞིང་གྱ་ནོམ་པ། མཐུན་རྫས་དཀོར་ནོར་སྤྱན་གཟིགས་ཉེར་སྤྱོད་བཟའ་བཅའ་ལྡག་གཞིབ། བཅུད་ལྡན་བདུད་རྩིའི་བཏུང་བ། ལྷ་རྐང་དམར་གྱི་གསུར་དུད། འདོད་ཡོན་རོ་བརྒྱའི་ཆང་བུ། །ལྷུན་པོ་ལྟར་སྤུང་བ། རྒྱ་མཚོ་ལྟར་བསྐྱིལ་བ། གྲམ་ཁྲོད་ལྟར་གཅལ་དུ་བཀྲམ་པ་ལ་སོགས་ཏེ་ཟད་མི་ཤེས་པ་རིན་པོ་ཆེའི་སྤྲིན་ཕུང༌། ཁྱད་པར་དུའང་རིན་ཆེན་ངར་གྱི་མི་གཟུགས། ཁམས་དྲུག་དབང་པོ་ལྔ་ལྡན་དུ་བྱིན་གྱིས་བརླབས་པ་ལས་བྱུང་བའི་གླུད་གཏོར་བརྔན་སྦྱིན་རྒྱ་མཚོ། གསལ་བྱེད་ཏིང་ལོའི་སྣང་བ་དང་བཅས་པ། མགྲོན་རྣམས་སོ་སོའི་དབང་པོ་དྲུག་ལ་དགྱེས་དགུར་འཆར་བའི་ལོངས་སྤྱོད་ཀྱི་གཏེར་ཆེན་པོ་བགེགས་རིགས་ལན་ཆགས་ཀྱི་མགྲོན་ཆེན་པོ་དང་ཕལ་པའི་ཚོགས་ཐམས་ཅད་བརྔན་ཞིང་བསྙེན་བཀུར་བྱ་བའི་ཕྱིར། གཟུངས་སྔགས་
ཀྱི་རྒྱལ་མོ་འོད་ཟེར་ཚད་མེད་པའི་དབང་དུ་གྱུར་པའི་གཟི་བརྗིད་རྣམ་པར་རྒྱལ་བའི་ཤུགས་ལ་བརྟེན་ཏེ། མཆོད་སྦྱིན་གྱི་ཆོ་ག་མངོན་དུ་བགྱིའོ། །ཞེས་པའི་མཐར། །སཾ་བྷ་ར་སོགས་ལན་བདུན། མཚན་བཞི་ལན་གཅིག །ཁྱེར་ཅིག་ཁྱེར་ཅིག་སྟོབས་ལྡན་རྣམས། །སྲེད་དང་ཆགས་དང་ཞེན་པ་དང༌། །དྲན་དང་བཟུང་དང་བསམ་དང་རེག །གློད་དང་ཞི་དང་གྲོལ་བར་མཛོད། །དེ་འདྲ་བ་ལྔའམ་བདུན་སོགས་སྐབས་དང་བསྟུན་ནོ། །དེ་ལའང་སྔགས་ཀྱི་རྫས་རྣམས་སྤེལ་བ་དང༌། ཡི་དྭགས་ཀྱི་སྡེ་ཚན་སུམ་ཅུ་རྩ་གཉིས་སོགས་མགྲོན་རིགས་ཐམས་ཅད་དགའ་བར་བྱེད། མཚན་བཞིས་གོ་རིམ་བཞིན་དུ་གདོན་རྣམས་ཀྱི་སྒྲིབ་པ་སྦྱང་བ་དང༌། གཟུགས་བཟང་འཐོབ་པ་དང༌། ཟས་ཀྱིས་ཆོག་ཤེས་ཤིང་ངོམས་པ་དང༌། འཇིགས་པའི་འཚེ་བ་ཐམས་ཅད་ཉེ་བར་ཞི་བར་བྱེད་དོ། །མཇུག་ཏུ། མཆོད་སྦྱིན་འདོད་ཡོན་གྱི་དགའ་སྟོན་རྒྱ་ཆེན་པོ་འདི་ཉིད་བསྔོ་ཞིང་འབུལ་བའི་ཡུལ་དུ་གྱུར་པ་ནི། རྣལ་འབྱོར་པ་བདག་ཅག་དཔོན་སློབ་ཡོན་མཆོད་འཁོར་དང་བཅས་པའི་ཚེ་དཔལ་ཆོས་འབྱོར་ལ་བར་དུ་གཅོད་ཅིང༌། བྱུར་དང་མི་ཤེས་པའི་སྣ་འདྲེན་པ་རྨི་ལམ་རྟགས་མཚན་ངན་པ། གློ་བུར་བདུད་དང་ཡེ་འདྲོག །རྐྱེན་ངན་དང་འཆི་རྐྱེན་རྦབ་རྒོད་ལྟར་གཏོང་བའི་སྲོག་བདུད་ལས་ཀྱི་གཤིན་རྗེ་རྒྱལ་བསེན་དམ་སྲི་ཐེའུ་རང༌། གདོན་རིགས་སྟོང་ཕྲག་བརྒྱད་བཅུ། གཙོ་བོའི་གདོན་ཆེན་བཅོ་བརྒྱད། གདོན་ཕལ་པ་བཅུ་བཞི་ལ་སོགས་པ་སྐྱེ་འགྲོ་ཡོངས་སུ་གནོད་ཅིང་འཚེ་བའི་བསམ་སྦྱོར་ཅན། བླ་ལ་ཧབ་ལེན་བྱེད་པ། སྲོག་ལ་རྒྱུག་འགྱེལ་གཏོང་བ། དབུགས་
ལ་རྐན་སྒྲ་རྡེབ་པ། གཟའ་སྐར་དང་དུས་སྦྱོར་ངན་པ། དར་རྒུད་སྤར་སྨི་ལ་དབང་བ། ལོའི་འཚམས་ན་གནས་པ། ཟླ་བའི་མལ་ན་སྡོད་པ། ཞག་གི་ལམ་འཕྲང་སྒུག་པ། དུས་ཚོད་རྩིས་གྲངས་ལ་འདེབས་པ། ཤ་ལན་དང་རུས་ལན་ཆགས་པ། འཁོན་བུ་ལོན་བཞིན་དུ་འདེད་པ། ཚེ་རབས་ཀྱི་ལན་ཆགས་ཞོ་ལྟར་སྙོལ་བ། རླུང་ལྟར་འཚུབས་པ། དཔང་རྒྱ་ལྟར་གནས་པ་རྣམས་ཀྱི་སྤྱན་སྔར་བླ་ཚེ་སྲོག་དབུགས་ཕྱྭ་མདངས་མེ་དྲོད་ཀྱི་གླུད་དུ་བསྔོའོ། །གཏོང་ངོ༌། །སྟེར་རོ། ཤའི་རིན་དུ་འཇལ་ལོ། །ཁྲག་གི་གཏའ་མར་བཞག་གོ །བདག་ཅག་དཔོན་སློབ་མི་ཕྱུགས་འཁོར་དང་བཅས་པ་རྣམས་ལ་གཤིན་རྗེའི་གཏད་ཁྲམ་ཐུག་པ། བདུད་ཀྱི་ཟ་སྐལ་བབ་པ། མ་མོའི་དལ་ཁ་ཐེབས་པ། ཐེའུ་རང་གི་ཤོ་སྣ་རྡོལ་བ། སྡེ་བརྒྱད་ཀྱི་ཟོར་ཕམ་ཐོད་པ། མི་ཁ་དང་དགྲ་སྣ་ལྡང་བ་ལ་སོགས་པ་ཆགས་ཆེ་བ་དང་ཉམ་ང་བ་ཐམས་ཅད་ཡོངས་སུ་ཞི་ཞིང༌། སྔོན་རབས་ཀྱི་སྲིད་པ་ཀུན་ཏུ་བྱས་ཤིང་བསགས་པའི་ཤ་འཁོན་རྣམས་བྱང༌། ལན་ཆགས་ཐམས་ཅད་འཁོར་ཏེ། ནད་གདོན་བྱད་གྲིབ་མཐའ་དག་ལས་རྣམ་པར་གྲོལ་བ་ལ་བརྟེན་ནས། གནས་སྐབས་སུ་སྲོག་གི་ཀ་བ་བརྟན་ཞིང༌། བླའི་སྐུ་མཁར་སྲ་བ། རླུང་རྟའི་བ་དན་མཐོ་སྟེ། ཕྱོགས་ཐམས་ཅད་ལས་རྣམ་པར་རྒྱལ་བའི་དཔའ་བོར་ས་གསུམ་ན་གྲགས་ཤིང༌། མཐར་ཐུག་བླ་ན་མེད་པའི་བྱང་ཆུབ་གོ་འཕང་རིན་པོ་ཆེ་དཀའ་བ་མེད་པར་མྱུར་
དུ་འགྲུབ་པར་གྱུར་ཅིག །སྨྲང་དང་བཅས་བསྔོས་ནས། སྡིག་པ་ཅི་ཡང་མི་བྱ་སོགས་དང༌། འབྱུང་པོ་གང་དག་སོགས་ཀྱི་ཆོས་སྦྱིན་དང་སྨོན་ལམ་བྱ། ཡས་རྣམས་འདྲེ་ལྔ་བདུད་གཅོད་ལྟར་སྐྱོལ། དེའི་ཚུལ་ནི་གཡང་སྨན་སྲོག་ལུས་དཔལ་བདུད་འདྲེ་གདོན་སྟེ་བརྒྱད་ལས། ཕྱི་མའི་ཕྱོགས་སུ་མདོས་རྫོང་བར་དགེ་ཞེས་བཤད་པས། སྤར་ཁ་ལི་ཐོག་ན་ཡོད་པ་རྣམས་ཀྱི་བྱང་ཤར། དེས་མཚོན་ཁོན་ལ་ཤར། དྭ་ལ་བྱང༌། ཁེན་ལ་ཤར་ལྷོ། ཁམས་ལ་ནུབ། གིན་ལ་ལྷོ། ཟིན་ལ་ལྷོ་ནུབ། ཟོན་ལ་ནུབ་བྱང་རྣམས་སུ་ཡོད་དོ། །བསྒྲུབ་བྱའི་གདོན་ཕྱོགས་སློབ་དཔོན་གྱི་ཕྱོགས་སོང་བ་ལྟ་བུ་ཡིན་ན་ཆུ་བོ་ཆེན་པོའི་གཞུང་ལ་བསྐྱལ། གསུར་དུད་ཀྱིས་སྡུན་བསུ། གང་ལྟར་ཡང༌། སརྦ་བྷུ་ཏ་གཙྪ། ཡཾ་ཡིག་འོད་དུ་ཞུ་བ་ལས་བྱུང་བའི་འདེག་བྱེད་རླུང་གི་དཀྱིལ་འཁོར། བསྐལ་པ་འཇིག་པའི་རླུང་ནག་ལྟར་དྲག་ལ་རྔམས་པའི་ཤུགས་ཀྱིས་གཏོར་སྣོད་རྫས་དང་བཅས་པ་རྣམས་རས་བལ་གྱི་འདབ་མ་རླུང་ལ་ཕྱར་བ་བཞིན་དུ་བསྐྱོད་དེ་ཕྱོགས་ཀྱི་རྒྱ་མཚོའི་ཕ་མཐར་དོང་བས་བགེགས་རིགས་འབྱུང་པོ་ཐམས་ཅད་སྐད་ཅིག་ཉིད་ལ་ཧབ་སྒྲ་དི་རི་རི་སོང་བར་བསམ། ག་ཏེ་ཉེར་གཅིག་གི་མཐར། ཡུམ་ཤེས་རབ་ཀྱི་ཕ་རོལ་ཏུ་ཕྱིན་མའི་བདེན་པས། ནད་གདོན་བགེགས་རིགས་ཆགས་ཆེ་ཉམ་ང༌། སྲི་གེགས་བྱད་ཕུར་ལ་སོགས་པ་འགལ་རྐྱེན་མི་མཐུན་པའི་ཕྱོགས་ཐམས་ཅད་ཕྱིར་བཟློག་པར་གྱུར་ཅིག་ལན་གསུམ། ཐལ་མོ་བརྡབ། གང་མཚན་ལན་གཅིག་ཡིད་ལ་དྲན་པས་ཀྱང༌། །འཆི་མེད་ཚེ་དང་ཡེ་ཤེས་མཆོག་སྩོལ་བ། །ཡོན་ཏན་དཔག་མེད་ཞིང་གི་མགོན་པོ་མཆོག །སངས་རྒྱས་ཚེ་དཔག་མེད་ལ་
ཕྱག་འཚལ་ལོ། །ཞེས་བརྗོད་ནས་ཚེ་བསྙེན་དང་ཚེ་གཟུངས་བཟླ། དགེ་བ་འདི་ཡིས་བདག་དང་འགྲོ་བ་ཀུན། །འཆི་བདག་ལ་སོགས་བདུད་བཞི་རྣམ་བཅོམ་སྟེ། །སྐྱེ་རྒ་ན་འཆིའི་མཚོ་ཆེན་ལས་བརྒལ་བ། །མགོན་པོ་ཚེ་མཐའ་ཡས་པ་ཐོབ་པར་ཤོག །ཅེས་བསྔོ་སྨོན་ཤིས་བརྗོད་བྱའོ། །ཞེས་པའང་འཇིགས་མེད་པས་སྔ་སོར་བྲིས་པའི་ཡི་གེ་ཉུང་ངུ་ལ་ཕྲི་སྣོན་ཅུང་ཟད་བྱས་ཏེ་འདོན་བདེ་བར་བཀོད་པ་དགེ་ཞིང་བཀྲ་ཤིས། སརྦ་མངྒ་ལཾ།། ༈ །།བླ་མ་ལ་ཕྱག་འཚལ་ལོ། །རྟེན་སྙིང་གི་མདོས་ཆོག་འདིའི་ཁྲིགས་ནི། བཅའ་ཤོམ་ལ། དབུས་ཀྱི་རི་རབ་བང་རིམ་བཞིའི་ཁར་ཟོམ་གྱི་རྣམ་པ་ཅན། གླིང་བཞིའི་ཤར་ཟླ་གམ། ལྷོ་སོག་ཁ། ནུབ་ཟླུམ་པོ། བྱང་གྲུ་བཞིར་བྱ་བ་མཛོད་ལུགས། གླིང་ཕྲན་རྣམས་རང་རང་གི་གཙོ་བོའི་གཟུགས་དང་དབྱིབས་མཐུན་དུ། དེའང་བྲིས་འབུར་གང་རིགས་ཀྱིས་ཆོག་གོ །གལ་ཏེ་དེ་ལས་སླ་བར་བྱེད་པས། རྩིས་གཏོ་གཙོ་བོར་བྱེད་ན། ཟླུམ་སྐོར་བཞིའི་དབུས་སུ། འཕུར་སྨེ་ལྟེ་བར་བཅུག་པའི་རྨེ་བ་གླིང་དགུ། མུ་ཁྱུད་གཉིས་པར་པད་འདབ་བརྒྱད་ལ་སྤར་ཁའི་ཕྱག་རྒྱ་བརྒྱད། གསུམ་པར་རེའུ་མིག་བཅུ་གཉིས་ལ་ལོ་སྐོར་བཅུ་གཉིས་ཀྱི་གཟུགས་སམ། མིང་ཡིག །བཞི་པར་པདྨ་འདབ་མ་ལྔ་ལ། འབྱུང་ལྔའི་སྙིང་པོ། མ་མ་ཀ་རཱ། སོགས་བཀོད། མུ་ཁྱུད་དང་པོ་ལ་འབྱུང་བཞིའི་འཁོར་ལོ་ནང་རྟེན་དུ་བཅུག་པའི་བླ་གླུད། ནམ་མཁའ། རྒྱང་བུ། མདའ་འཕང༌། ཤིང་རིས་སོགས་ཀྱིས་བརྒྱན་པ། མུ་ཁྱུད་གཉིས་པ་དང་གསུམ་པར་ལོ་སྦར་སོ་སོར་གྲངས་ལྡན་གྱི་ངར་མི་ཆས་ལྡན་དྲིལ་ཟན་ལས་བྱས་པ། གླུད་རེ་རེ་ཞིང་ངམ་བསྡུ་ན་བླ་གླུད་དབུས་མའི་མདུན་དུ་ཏིང་ལོ་བཞག་བར་མཚམས་ཐམས་ཅད་དུ་ཆང་བུ་དང་དཀོར་ནོར་སྤྱན་གཟིགས་གང་མང༌། ཁྱད་པར་སྲོག་ཆགས་མདངས་མང་དུ་བསྟར།
བཤད་མ་ཐག་པའི་རི་རབ་གླིང་བཞི་མདོས་དཀྱིལ་དུ་བཀོད་ན། དབུས་ཀྱི་ལྷུན་པོའི་སྟེང་དུ་བླ་གླུད་ཆེ་བ་བཀོད་ཚུལ་སོགས་དཀྱུས་ཀྱི་ཡིག་ཆུང་བཞིན། ཆོ་ག་དངོས་གཞི་ལ་མདོས་འདི་ཉིན་བཞི་པའི་ཆོ་ག་ལྟ་བུར་བྱེད་ན་ཆུ་སྦྱིན་དང་དམར་གསུར་གཏོང་བའི་ཆོ་ག་རོགས་ཅི་རིགས་པ་ལོགས་སུ་འདུག་སྟེ། མདོས་གཞུང་དངོས་ཀྱི་ཚེ། བདག་ཉིད་ནུས་ལྡན་དུ་བྱ་བའི་ཕྱིར་བཟླས་བརྗོད་དང༌། སྦྱིན་བདག་གི་ཤ་མཁོན་བཅག་པའི་ཕྱིར་ཡས་འགྱེད་བྱ་བ་སྟེ་འདི་གཉིས་གལ་ཆེན་དུ་བྱ། དེ་ལས་ཀྱང་ཕྱི་མའི་ཕྱོགས་ལ། འདིས་ནད་པ་འཆི་བདག་གི་ཁ་ནས་རིན་གྱིས་ཉོ་བའི་ཕྱིར། ཤིན་ཏུ་རྒྱས་པར་ན། ཕྱོགས་སྐྱོང་གི་མཚམས་ཀྱི་གདོན་ཆེན་རྣམས་ལ་སྟེར་རྒྱུའི་གཏོར་གླུད་སྟོང༌། ཆང་བུ་ཁྲི། རིལ་བུ་གང་མང་བཅས་པ་བསྡོགས་ལ། གྱེར་གྱི་སྐབས། ཐོག་མར། ལན་ཆགས་མགྲོན་རིགས་རྒྱ་མཚོ་བརྔན། །ཞེས་པའི་འཕྲོར། རྟེན་སྙིང་བདུན་བཟླས་ཏེ་གཏོར་གླུད་གཅིག་བསྔོ་བཞིན་སཾ་བྷ་ར་ལན་གཅིག་དེ་དང་རྗེས་འབྲེལ་དུ་ཆང་བུ་བཅུ་དང་རིལ་བུ་བཅུ་སྟེ། ཆང་བུ་རེ་དང་རིལ་བུ་རེ་སྟབས་གཅིག་པར་སཾ་བྷ་ར་ལན་རེ་རྣམས་སྦྲག་མར་བཏང༌། ཁྱེར་ཅིག་ཁྱེར་ཅིག༴ སོགས། ཡང་གླུད་གཏོར་སོགས་བསྔོ་བཞིན། དེ་འདྲའི་རིམ་པས་ཡས་གླུད་བརྒྱ། ཆང་བུ་དང་རིལ་བུ་སྟོང་ཕྲག །སཾ་བྷ་ར་སྟོང༌། ཁྱེར་ཅིག་གི་ཚིགས་བཅད་ཚར་བརྒྱ་བཅས་རྫོགས་པ་དང༌། ཀྱེ། ཤར་ཕྱོགས་དྲི་ཟའི༴ སོགས་གྱེར། ཡང་གཏོར་གླུད་ཆང་བུ་སོགས་སྔར་བཞིན་གྱི་རྗེས། ལྷོ་ཕྱོགས་གྲུལ་བུམ་སོགས། གཞན་གོ་སླ། མཚམས་བཞིའི་སོ་སོར་བྱ་དགོས་པས། ཤར་ལྷོ་མེ་ལྷའི༴ ལྷོ་ནུབ་སྲིན་པོའི༴ ནུབ་བྱང་རླུང་ལྷའི༴ བྱང་ཤར་འབྱུང་པོའི༴ ཞེས་བསྒྱུར། སྟེང་འོག་གི་གྱེར་ལ། སྟེང་ཕྱོགས་ལྷ་དབང་གདོན་རྣམས་ལ། །འོག་ཕྱོགས་བདག༴ ཞེས་བཅུག་དེ་ལྟར། ཕྱོགས་ཀྱི་གདོན་བཅུ་ཕྲག་པོ་རེ་རེ་ཞིང་གླུད་བརྒྱ་རེ་དང༌།
ཆང་བུ་སྟོང་རེ། རིལ་བུ་སྟོང་ཕྲག་རེ་བཅས་བྱིན་ཟིན་པ་ན། ཀྱེ། སྟོང་གསུམ་སྲིད་པའི༴ སོགས་ནས། ཆང་བུ་ཁྲི་འགྱེད་ཉིན་གཅིག་གིས་འགྲོ་མིན་ནི་ཆོག་རོགས་གྲངས་མང་ཉུང་ལ་ལྟོས་མོད། གལ་ཏེ་ཉིན་བཞི་ལྔ་སོགས་སུ་འགྱང་དགོས་པ་ཡིན་ན། མགྲོན་འགྱེད་ཅི་རིགས་པ་རེའི་མཚམས་སུ་ཉིན་ཆོག་གིས་མཇུག་བསྡུ་ཞིང༌། ཕྱི་ཉིན་ཡང་དེ་ལྟར་བྱས་པས་མཚོན་ནོ། །ཚུལ་འདིས་གླུད་བརྒྱ་འཇལ་དང་ཆང་བུ་སྟོང་འགྱེད་ཀྱི་ཆོ་ག་འབྲིང་དང༌། གླུད་བཅུ་ཆང་བུ་བརྒྱ་བསྔོས་ཀྱི་ཆོ་ག་བསྡུས་པ་དང༌། དེ་འདྲའི་འཕྱོང་གང་ཡང་མེད་པའི་ཆོ་ག་ཤིན་ཏུ་བསྡུས་པ་གྱེར་རང་གཞུང་ནས་གསལ་བ་ཙམ་ཁོ་ནས་འཐུས་པར་བྱས་པ་རྣམས་ཀྱང་མཚོན་ནུས་སོ། །གང་ལྟར་ཡང༌། སྟོང་གསུམ་སྲིད་པའི་འཇིག་རྟེན་ན། །སོགས་འཇལ་གྱི་མཐའ་བསྡུས་པའི་འོག་ཏུ། ཆོས་སྦྱིན་དང་བདེན་ཚིག་སོགས་གཞུང་ནས་གསལ་བ་ཉིད་ཆུ་འབེབས་མར་བྱ་བ་སྤྱིར་བཏང་དང༌། དམིགས་གསལ་དུ་སྦྱིན་བདག་ནད་པ་ལྟ་བུ་དོ་གལ་ཆེ་བ་ཡིན་ན་ནི་བདེན་ཚིག་ཀླད་དུ། དེ་བཞིན་གཤེགས་པ༴ སོགས་སམ། གང་ཡང་བདག་ལ་རྣམ་པར་སྡང་བ་དང་༴ སོགས་བདེན་པའི་བྱིན་རླབས་ཕན་བདེའི་ཉི་མ་གང་མང་དུ་བསྐྱར། ལམ་བསྟན་གྱི་ཚེ་མདོས་ཞལ་ཕྱིར་བསྒྱུར་ལ། ཆོས་གང་༴ སོགས་དཀྱུས་བཞིན་གྱི་མཐར་འདྲེ་ལྔ་བདུད་གཅོད་དམ་ཆུ་བོ་ཆེན་པོའི་གཞུང་ལ་བསྐྱལ། ཡུལ་གྲུ་ཁ་ཅིག་ན། མདོས་རྫོང་གི་བཅའ་ལག །དར་ཕྲུག་གཅན་ལྤགས་སོགས་གང་བྱུང་བླ་མ་དང་མཆོད་དཔོན་གྱིས་སྤྱད་དེ་རེ་ཐག་གི་དཀྲིས་པ་དང༌། རྩམ་སྒོང་གྱོང་པོ་རྣམས་སྐུ་རྐྱང་གསུང་རྐྱང་ལ་གཏོང་བ་ནི། སྐྱུག་པ་སླར་ལ་ཟ་བ་དང༌། གྲོང་ཁྱེར་གྱི་གཏོར་མ་ལེན་པའི་སྤྲང་རྒན་གདོལ་པ་རྣམས་ཀྱི་ཀུན་སྤྱོད་ཁོ་ནར་སྣང་ངོ༌། །མདོས་སྐྱེལ་བ་ནི། གསུར་དུད་དང་གསེར་སྐྱེམས་ཀྱིས་
་སྣ་དྲངས། མདོས་ཆོག་པ་རྣམས་ནས་ཤེར་སྙིང་དང་ག་ཏེ་ཅི་མང་གི་མཐར་བདུད་བཟློག་གསུམ་བདུན་ཉེར་གཅིག་སོགས་གདབ། ཆོས་གང་༴ སོགས་སྲུང་འཁོར་བསྒོམ། ཚེ་གཟུངས་དང་རྟེན་སྙིང་སྦྲེལ་ལ་བརྒྱ་རྩ་སོགས་བཟླ་ཞིང༌། དཀྱུས་ནས་བཤད་པའི་སྐུ་ཁྲུས་ཀྱི་ཆུ་ཉིད་བུམ་པར་སྩལ་བ་ལ་བྱིན་རླབས་བརྟན་པར་བྱ། བསྒྲུབ་བྱ་ལ་ཚེ་འགུགས་གང་མང་གིས་ཚེ་བཀུག་སྟེ། མཇུག་ཏུ་ཚེ་ཆུ་བླུད། རྒྱ་ཆེར་ན་ཚེ་མདོ་ཀློག་སྒྲོགས་དང་ཚེ་སྒྲུབ་ཚེ་དབང་སོགས་སྐབས་འདིར་བྱ། འདིའི་རྒྱབ་ཆོས་སུ། དཀོན་མཆོག་མཆོད་པ་དང༌། ངན་སློང་ལ་སྦྱིན་འགྱེད། ལམ་འཕྲང་བཅོས་པ། ཚེ་མདོ་སོགས་གསུང་རབ་ཀློག་འདོན། སྡིག་པ་བཤགས་སྦྱང་རྣམས་ལ་ནན་ཏན་བརྩོན་འགྲུས་བསྐྱེད་པས་ཤིན་ཏུ་ལེགས་པར་འགྱུར་རོ། །མདོས་གཞུང་འདི་ནི། ངེད་རང་ནས་དེ་མོའི་བུ་ལྔ་ཞིག་གསོ་བསྐྱངས་བྱས་སྐབས། གཉིས་བཙས་ཉིན་ནས་ཤི། གཅིག་བཙས་ནས་ཞག་དྲུག་ཅུ་རྩ་ལྔ་ན་ཤི་བས་ཀླད་ཆུང་བྱིས་པའི་སྣང་ཤེས་ཀྱི་སྙིང་རྗེ་སད་དེ་སུད་དེ་བ་ཞིག་གིས་སྣ་དྲངས་ཏེ་བྲིས་པ་ལས་སྲི་ཅན་གྱི་བྱ་ཕྲུག་ལྷག་མ་གཉིས་ཀྱང་དུས་མིན་གྱི་འཆི་བ་ལས་རྣམ་པར་གྲོལ་བ་སོགས་རྟེན་འབྲེལ་གྱི་ལྟས་བཟང་པོ་འགའ་ཞིག་བྱུང་བ་ཡིན་པས་སྐྱེ་བོ་མཛངས་པ་རྣམས་ཀྱིས་དང་དུ་བླང་བྱར་མ་ཟད། སྤྱིར་ཡང་རིག་སྔགས་ཀྱི་རྒྱལ་པོ་འདིའི་ཆེ་བའི་ཡོན་ཏན་རྒྱས་པར་དབུ་མ་རྩ་བ་ཤེས་རབ། རིགས་པ་དྲུག་ཅུ་པ། དབུ་མ་ལ་འཇུག་པ། དབུ་མ་རྟེན་སྙིང༌། སྤྱོད་འཇུག་ཤེས་རབ་ཀྱི་ལེའུ། །དེ་དག་གི་འགྲེལ་པ་འགྲེལ་བཤད་རྣམས་དང༌། འཕགས་པ་ས་ལུའི་ལྗང་པའི་མདོ་འགྲེལ་གཉིས། དབྱིག་གཉེན་དང༌། འོད་ཀྱི་རྟེན་འབྲེལ་མདོ་འགྲེལ་སོགས་ཤིང་རྟ་ཆེན་པོའི་གཞུང་ལུགས་མཐའ་ཡས་པ་ཞིག་རྒྱབ་ཆོས་སུ་སྦྱར་ཏེ་ཐོས་པ་དང་བསམ་པའི་ཤེས་རབ་
ཁྱད་པར་ཅན་གྱིས་ལེགས་པར་གཏན་ལ་ཕབ་པས་རྟོགས་པ་ཉིད་དོ། །ཞེས་པའང་གཞོན་ནུ་ཀུན་བཟང་འཇིགས་མེད་བསྟན་པའི་ཉི་མས་སྐད་ཅིག་གིས་བྲིས་པ་དགེ་ཞིང་བཀྲ་ཤིས།། ༈ །།ས་གར་སོང་དུ། སྤྱོད་པ་གང་འཚམས་དགོས་ཟེར་ཏེ། དེ་བདེན། ལྷ་འདྲེ་དྲག་པོ་གནས་པའི་སར་ཟླ་རེའམ། ཟླ་ཕྱེད་རེར་སྡོད་ཀྱང་དེའི་རིང་ལ་གནས་བདག་དང་བསྟུན་གང་ནུས་དགོས་ཏེ། ཇོ་བོའི་སློབ་མ་ལྷ་རྗེ་བསམ་གཏན་གྱི་ལོ་རྒྱུས་པོ་ཏོ་བས་གསུངས་པ་ལྟ་བུ་ཡིན། དེས་ན་རེ་ཞིག་གར་སྡོད་ཀྱི་གཞི་བདག་ལ་གསུར་མཆོད་འབུལ་ཚུལ་གཙང་ཆེན་སྲིན་མོ་ལ་དཔེར་བརྗོད་བྱས་ནས་བསྟན་ན། ལྕི་བའི་མེ་དུ་བ་མེད་པ་དང༌། དཀར་མངར་དང་ཆོས་སྨན་བསྲེས་པའི་གསུར་ཕྱེ་གཙང་མ་བདུད་རྩི་ཅན་གྱི་ཤིང་སྣ་དང་སྦྱར་པ་འདུ་བྱ། སྐྱབས་སེམས་ཚད་མེད་བཞི་བསྒོམ། རང་གུ་རུ་ཞི་བའམ་ཐུགས་རྗེ་ཆེན་པོར་བསྐྱེད་དེ། ཐུགས་ཀ་ནས་བྱམས་བརྩེའི་འོད་ཟེར་དཀར་པོ་སྤྲོ་བསྡུས་གཞི་བདག་སོགས་ཀྱི་གདུག་རྩུབ་དང་གནོད་སེམས་ཞི་བའི་དམིགས་གནད་དང་བཅས་བཟླས་པ་ཅི་རིགས་པ་བྱ། དེ་ནས། རང་གི་ཐུགས་ཀ་ནས་ཡི་གེ་རཾ་ཡཾ་ཁཾ་གསུམ་ཆད། རཾ་ལས་ཡེ་ཤེས་ཀྱི་མེ་ལྕེ་འདོད་ཡོན་རྣམ་པ་ཐམས་ཅད་པའི་དུད་སྤྲིན་འཕྲོ་བ། ཡཾ་ལས་བྱུང་བའི་རླུང་གིས་སྦར། ཁཾ་ལས་ཆུས་བསངས་ཏེ། རྫས་རྣམས་མཆོད་སྦྱིན་གྱི་མགྲོན་ཐམས་ཅད་ལ་ཚིམ་པར་སྟོབ་པའི་ནུས་ལྡན་དུ་གྱུར། ཞེས་རླུང་ཡབ་ཡོད་ན་གཡབ་ཅིང༌། ཆུ་གཙང་གིས་བྲན་ལ། རཾ་ཡཾ་ཁཾ། ལན་གསུམ་བརྗོད། གསུར་ཕྱེ་ལའང་ཆབ་བྲན་ཏེ། བྷྲུཾ་ལས་རིན་པོ་ཆེའི་སྣོད་དུ་འབྲུ་གསུམ་ཞུ་བ་ལས་བྱུང་བའི་རྫས་ཐམས་ཅད་མགྲོན་རིགས་སོ་སོར་གང་ལ་ཅི་འདོད་དུ་འཆར་བའི་ཡིད་བཞིན་གྱི་
ལོངས་སྤྱོད་ཟད་མི་ཤེས་པར་གྱུར་པར་བསམ་ལ། ཨོཾ་ཨཱཿཧཱུྃ། བདུན་དང་ནམ་མཁའ་མཛོད་སྔགས་ལན་གསུམ་བཟླ། སྤྲོ་ན་རྣམ་སྣང་མངོན་བྱང་ལས་གསུངས་པའི། བདག་གི་བསམ་པའི་སོགས། སྟོབས་རྣམས་ཀྱིས། སེམས་ཅན་ཀུན་ལ་ཕན་གདགས་ཕྱིར་ནས། འབྱུང་བར་ཤོག །གི་བར་བདེན་སྟོབས་བརྗོད་པའང་བྱ། ཛམ་བུའི་གླིང་སྤྱི་དང༌། བྱེ་བྲག་ཡུལ་ཕྱོགས་འདི་ན་གནས་པའམ་གསར་དུ་རྒྱུ་བའི་གདོན་བགེགས། བདག་ཅག་དང་ཞེ་འགྲས་ཤིང་ཤ་འཁོན་ཞུགས་པ། བསམ་སྦྱོར་ངན་པ་འཆང་ཞིང༌། ཚེ་དང་ཆོས་དང་བདེ་བ་ལ་བར་དུ་གཅོད་པ་རྣམས་དང༌། གཞན་ཡང་སེམས་ཀྱི་རྒྱུད་སྡིག་པས་བསྲེག་ཅིང༌། སྡུག་བསྔལ་སྣ་ཚོགས་ཀྱིས་ཉམ་ཐག་པ་དང༌། རང་བཞིན་དུ་གནས་པའི་འབྱུང་པོ་གང་སུ་ཡང་རུང་སྟེ། ཐམས་ཅད་དཀོན་མཆོག་གསུམ་གྱི་བདེན་པ་དང༌། ཆོས་ཀྱི་དབྱིངས་རང་བཞིན་གྱིས་རྣམ་པར་དག་པའི་བྱིན་གྱིས་རླབས་ཀྱིས་ཤིན་ཏུ་ཞི་ཞིང་བྱམས་པ་དང་དུལ་བའི་ཡིད་དང་ལྡན་པར་གྱུར་ཏེ། སྐད་ཅིག་ཉིད་ལ་འདིར་མཆིས་པར་གྱུར་ཅིག །སརྦ་བྷུ་ཏ་ཨ་ཀརྵ་ཡ་ཛཿ ཞེས་འགུག་འདྲེན་ཡིད་ཆེས་པར་བྱས་ལ། སྨྲང་འདོན་པ་ནི། གསུར་མཆོད་འདོད་ཡོན་མི་ཟད་པའི་སྤྲིན་ཕུང༌། གདོན་རིགས་སོ་སོའི་མོས་པ་བཞིན་འཆར་བར་སྔགས་དང་ཕྱག་རྒྱ་ཏིང་ངེ་འཛིན་དང་བདེན་ཚིག་གིས་བྱིན་གྱིས་བརླབས་པ་འདི་ཉིད་ཛམ་བུའི་གླིང་སྤྱི་དང༌། བྱེ་བྲག་ཡུལ་ཕྱོགས་འདིའི་ལ་ཀླུང་ཉིན་སྲིབ། ལུང་པ་ཕུ་མདའ། ས་རྡོ་ཆུ་ཤིང༌། ཁང་ཁྱིམ་ཕྱི་ནང༌། རྟ་བྲེས་ཕྱུགས་ལྷས། ལམ་ཕྲན་
དང་སྲང་པོ་ཆེ་སོགས་ན་གཉུག་མར་གནས་པ་དང༌། གློ་བུར་དུ་ལྷགས་པའི་གདོན་བགེགས། ལྷ་དང་ཀླུ་དང་ཡི་དྭགས་ཀྱི་འགྲོ་བས་བསྡུས་པ། བདག་ཅག་དང་འགྲས་ཤིང་ཤ་འཁོན་ཆགས་པ། གནོད་པའི་བསམ་ངན་འཆང་ཞིང་གླགས་ཚོལ་བ། བཀྲ་མི་ཤིས་པའི་ལྟས་སྟོན་ཅིང༌། བྱུར་དང་སྡུག་བསྔལ་གྱི་སྣ་འདྲེན་པ། རང་བཞིན་གྱིས་འཚེ་བ། འཕྲལ་རྐྱེན་གྱིས་བསྐུལ་བ། ཕོ་རྒྱུད་མོ་རྒྱུད་མ་ནིང་གི་རིགས་སུ་གཏོགས་པ་ཐམས་ཅད་དང༌། ཁྱད་པར་དུ་ཡང་རྡོ་སྟོད་རྩང་ཆེན་གྱི་ས་ཆ་འདི་ཉིད་ན་གནས་པའི་བྲག་སྲིན་མོར་གྲགས་པ། སྣ་འཁྲིད་བསྡོང་ཟླ་རྒྱབ་དཔུང་དང་བཅས་པ་གཙོ་བོར་བྱས་ཏེ། ཇི་ལྟར་མགྲོན་དུ་བོས་པའི་འབྱུང་པོའི་ཚོགས་ལ་གཞིའི་ལོངས་སྤྱོད་དང༌། བྱེས་ཀྱི་ལམ་རྒྱགས། འཕྲལ་དུ་བདེ་བའི་འཚོག་ཆས་དང༌། ཡུན་དུ་ཕན་པའི་གསོས་སྨན་དམ་པར་བསྔོ་ཞིང་འབུལ་ལོ། །བདག་ཅག་ལ་ཤ་འཁོན་དང་བུ་ལོན་ཆགས་པ་ཐམས་ཅད་བྱང་ཞིང་འཁྱོལ་བ་དང༌། སོ་སོའི་ལུས་སེམས་ཀྱི་སྡུག་བསྔལ་མཐའ་དག་ཉེ་བར་ཞི་སྟེ། ཉམས་པ་མེད་པའི་བདེ་བའི་དཔལ་ལ་རོལ་པར་གྱུར་ཅིག །ཕྱོགས་འདིར་ས་གཡོ་དང་མེ་དགྲ། ཐོག་སེར་དང་ལོ་ཉེས་སོགས་འབྱུང་བཞིའི་འཇིགས་པ་མ་བཏང༌། མི་ལ་ན་ཚ་དང་གྲིར་ཤི༌།རྟ་ཕྱུགས་ལ་གོད་ཁ་དང་སྟོར་བརླག་བྱ་བ་ལ་བློ་ཉེས་དང་མགོ་སྐོར། ཡུལ་དུ་ཡམས་ནད་དང་དབུལ་ཕོངས། སྤྱི་སྒོས་སུ་ལྟས་ངན་དང་ཆག་སྒོའི་རིགས་མ་བཏང༌། ཕྱི་དགྲ་དང་ནང་འཁྲུགས་
མ་སློང༌། མི་ཁ་དང་ཁ་སྨྲས་མ་གཡོ་བ། ལྷ་མིའི་བར་དུ་དབྱེན་མ་སྦྱོར། དཔོན་སློབ་ནང་དུ་སེལ་མ་འཇུག །གཡོས་སྦྱོར་ནང་དུ་དུག་མ་འདེབས། ཚོགས་སུ་རྐུན་བུ་ལྟར་མ་འཇབ། དབེན་པར་ཇག་པ་ལྟར་མ་འཕྱོ། རྣལ་འབྱོར་པའི་ཚོགས་ཁང་མ་ཉུལ། བང་མཛོད་ཀྱི་སྲིས་ལ་མ་རྐུ། ཤོ་རྡེལ་མ་འགྲེམ། ཟ་ལམ་མ་གཏོད། འདྲེ་ཚང་མ་བཅའ། གྲོས་ངན་མ་ཤོམས། མི་མི་ཡུལ་ན་སྐྱིད་པ། ལྷ་འདྲེ་རང་ཡུལ་ན་བདེ་བ། གཞི་མགྲོན་བར་དུ་བྱམས་པའི་གསེར་ཟམ་གྱིས་སྦྲེལ་བ། ཡངས་པའི་འཇིག་རྟེན་རྒྱ་མོའི་དར་གོས་ལྟར་འཇམ་པ། ཆོས་སྲིད་ཤིང་རྟའི་འགྲོ་ལམ་ལྷ་ཡུལ་གྱི་ལམ་སྲང་ལྟར་བདེ་ཞིང་བར་ཆད་མེད་པར་མཛད་དུ་གསོལ། ཞེས་བརྗོད། ཚར་གྲངས་གསོག་ན། སླར་ཡང་གསུར་མཆོད་ཁ་གསོས་ཏེ། བྱིན་རླབས་ཀྱི་སྔགས་བརྗོད་ནས། ཁམས་གསུམ་དག་པའི་ཞིང༌། སོགས་གཞན་ནས་འབྱུང་བ་ལྟར་བསྔོ་བ་ལ་གྲངས་གཟུང༌། མཐར། ཆོས་རྣམས་ཐམས་ཅད་རྒྱུ་ལས་བྱུང༌། །སོགས་དང༌། སྡིག་པ་ཅི་ཡང་མི་བྱ་སོགས། ཆོས་སྦྱིན་བཏང༌། འབྱུང་པོ་གང་དག་སོགས་ཀྱིས་སྨོན་ལམ་གདབ། གཙྪ་གཙྪ། མགྲོན་རྣམས་སོ་སོའི་གནས་སུ་གཤེགས་ལ་ཆོས་སྤྱོད་པར་མཛོད་ཅིག །ཅེས་སེ་གོལ་བརྡབ། ཤིས་བརྗོད་ཀྱི་ཚིགས་བཅད་ཀྱང་བརྗོད་དོ། །གཡུ་འབྲུག་ནམ་མཁའ་སྟོང་པའི་དཀྱིལ་འཁོར་ནས། །ཧ་ཧའི་གད་རྒྱངས་རི་ཀླུང་འགེང་བར་སྒྲོགས། །བདག་ཀྱང་ཐང་སྟོང་རྒྱལ་པོའི་ཕོ་བྲང་ནས། །ཀུན་རྟོག་དགོད་པའི་རང་སྒྲ་འདི་ལྟར་ཕྱུང༌། ཧ་ཧ། ཧི་ཧི།