རྟེན་འབྲེལ་སྙིང་པོ་ལ་བརྟེན་ནས་ཁྲམ་དབྱིའི་ཆོ་ག་འཆི་བའི་འཇིགས་སྒྲོལ།
རྟེན་འབྲེལ་སྙིང་པོ་ལ་བརྟེན་ནས་ཁྲམ་དབྱིའི་ཆོ་ག་འཆི་བའི་འཇིགས་སྒྲོལ་བཞུགས་སོ། །དཔལ་་སེང་གེ་ལ་ཕྱག་འཚལ་ལོ། །འཕགས་པ་རྟེན་འབྲེལ་སྙིང་པོ་ལ་བརྟེན་ནས་ཁྲམ་དབྱིའི་ཆོ་གས་སེམས་ཅན་འཆི་བས་སྐྲག་པ་རྣམས་ལ་ཕན་གདགས་པར་འདོད་པས། དང་པོ་སངས་རྒྱས་རྗེས་སུ་དྲན་ཞིང་དད་པ་ཆེན་པོ་བསྐྱེད། དེ་ནས། འདི་ཡོད་པས་འདི་འབྱུང༌། འདི་སྐྱེས་པའི་ཕྱིར་འདི་སྐྱེ་སྟེ་འདི་ལྟར། མ་རིག་པའི་རྐྱེན་གྱིས་འདུ་བྱེད། འདུ་བྱེད་ཀྱི་རྐྱེན་གྱིས་རྣམ་ཤེས། རྣམ་ཤེས་ཀྱི་རྐྱེན་གྱིས་མིང་དང་གཟུགས། མིང་དང་གཟུགས་ཀྱི་རྐྱེན་གྱིས་སྐྱེ་མཆེད་དྲུག །སྐྱེ་མཆེད་དྲུག་གི་རྐྱེན་གྱིས་རེག་པ། རེག་པའི་རྐྱེན་གྱིས་ཚོར་བ། ཚོར་བའི་རྐྱེན་གྱིས་སྲེད་པ། སྲེད་པའི་རྐྱེན་གྱིས་ལེན་པ། ལེན་པའི་རྐྱེན་གྱིས་སྲིད་པ། སྲིད་པའི་རྐྱེན་གྱིས་སྐྱེ་བ། སྐྱེ་བའི་རྐྱེན་གྱིས་རྒ་ཤི་དང༌། མྱ་ངན་དང༌། སྨྲེ་སྔགས་འདོན་པ་དང༌། སྡུག་བསྔལ་བ་དང༌། ཡིད་མི་བདེ་བ་དང་འཁྲུགས་པ་རྣམས་རབ་ཏུ་འབྱུང་བར་འགྱུར་ཏེ། དེ་ལྟར་ན་སྡུག་བསྔལ་གྱི་ཕུང་པོ་འབའ་ཞིག་པོ་འདི་འབྱུང་བར་འགྱུར་རོ། །ཞེས་པའི་བར་གྱི་མདོའི་དོན་ཡིད་ལ་དྲན་བཞིན་པར། འདི་ལྟར་ལས་དང་ཉོན་མོངས་ཡོད་གྱུར་ན། །སེམས་ཅན་རྣམས་ནི་འཁོར་བར་འགྲོ་འགྱུར་ལ། །ལས་དང་ཉོན་མོངས་མེད་ན་འཁོར་བ་ལས་ཀྱང་ལྡོག །བདེན་པ་དེ་ཡིས་བདག་གི་བསམ་པ་འགྲུབ་གྱུར་ཅིག །སངས་རྒྱས་
ལ་ཕྱག་འཚལ་ལོ། །ཆོས་ལ་ཕྱག་འཚལ་ལོ། །དགེ་འདུན་ལ་ཕྱག་འཚལ་ལོ། །ཡང་དག་པར་རྫོགས་པའི་སངས་རྒྱས་གངྒཱའི་ཀླུང་གི་བྱེ་མ་སྙེད་བཞུགས་པ་རྣམས་ལ་ཕྱག་འཚལ་ལོ། །རང་སངས་རྒྱས་རྣམས་ལ་ཕྱག་འཚལ་ལོ། །དགྲ་བཅོམ་པ་རྣམས་ལ་ཕྱག་འཚལ་ལོ། །ཕྱིར་མི་འོང་བ་རྣམས་ལ་ཕྱག་འཚལ་ལོ། །ལན་ཅིག་ཕྱིར་འོང་བ་རྣམས་ལ་ཕྱག་འཚལ་ལོ། །རྒྱུན་དུ་ཞུགས་པ་རྣམས་ལ་ཕྱག་འཚལ། །འཕགས་པ་བྱམས་པ་ལ་སོགས་པའི་བྱང་ཆུབ་སེམས་དཔའ་རྣམས་ལ་ཕྱག་འཚལ་ལོ། །བརྟུལ་ཞུགས་གྲུབ་པ་རྣམས་ལ་ཕྱག་འཚལ་ལོ། །སེམས་ཅན་གྱི་སྨན་པ་རྣམས་ལ་ཕྱག་འཚལ་ལོ། །ནོར་བུ་གྲུབ་པ་རྣམས་ལ་ཕྱག་འཚལ་ལོ། །བརྗོད་པ་སྔོན་དུ་འགྲོ་བས། མཐུ་བསམ་གྱིས་མི་ཁྱབ་པའི་ཚིགས་སུ་བཅད་པ་ལན་བདུན་བཀླགས། དེ་ནས། བདག་གམ་བདག་གི་འཁོར་རམ་མིང་འདི་ཞེས་བྱ་བ་ལ་འཆི་བདག་གི་མཚན་མ་བཏབ་པ་དང༌། དེ་ལས་བྱུང་བའི་ལྟས་དང༌། རྨི་ལམ་སྡིག་པ་དང༌། ནད་དང༌། ཡམས་ནད་དང༌། ཉེ་བར་འཚེ་བའི་རྣམ་པ་ཅི་མཆིས་པ་ཐམས་ཅད། སངས་རྒྱས་བཅོམ་ལྡན་འདས་རྣམས་ཀྱི་བདེན་པའི་ཞགས་པས་རང་དབང་མེད་པར་དྲངས་ཏེ། ཆེད་དུ་མངོན་པར་བསམ་པའི་རྟེན་འབྲེལ་གྱི་གླེགས་བུ་འདི་ལ་རི་མོའི་གཟུགས་སུ་དབབ་བོ། །མཚན་
མ་བཏབ་བོ། །ཞེས་བརྗོད་ཅིང་ཕོའི་དོན་དུ་བྱེད་ན་ཕོའི་མིང་ཅན་དང༌། མོའི་དོན་དུ་བྱེད་ན་མོའི་མིང་ཅན་གྱི་ཤིང་ལ་དབྱུག་གུ་བསྣོལ་བ་ལྟ་བུའི་རི་མོའི་མཚན་མ་བྱ། དེ་འདྲ་བ་སྐྱེས་བུའི་ལོ་གྲངས་སོགས་སོང་བ་དང༌། འདི་མེད་པས་འདི་མི་འབྱུང་ལ། འདི་འགག་པའི་ཕྱིར་འདི་འགག་སྟེ། འདི་ལྟར་མ་རིག་པ་འགག་པས་འདུ་བྱེད་འགག །འདུ་བྱེད་འགག་པས་རྣམ་ཤེས་འགག །རྣམ་ཤེས་འགག་པས་མིང་དང་གཟུགས་འགག །མིང་དང་གཟུགས་འགག་པས་སྐྱེ་མཆེད་དྲུག་འགག །སྐྱེ་མཆེད་དྲུག་འགག་པས་རེག་པ་འགག །རེག་པ་འགག་པས་ཚོར་བ་འགག །ཚོར་བ་འགག་པས་སྲེད་པ་འགག་སྲེད་པ་འགག་པས་ལེན་པ་འགག་ལེན་པ་འགག་པས་སྲིད་པ་འགག །སྲིད་པ་འགག་པས་སྐྱེ་བ་འགག །སྐྱེ་བ་འགག་པས་རྒ་ཤི་དང༌། མྱ་ངན་དང༌། སྨྲེ་སྔགས་འདོན་པ་དང༌། སྡུག་བསྔལ་བ་དང༌། ཡིད་མི་བདེ་བ་དང་འཁྲུགས་པ་རྣམས་རབ་ཏུ་འགག་པར་འགྱུར་ཏེ། དེ་ལྟར་ན་སྡུག་བསྔལ་གྱི་ཕུང་པོ་འབའ་ཞིག་པོ་འདི་འགག་པར་འགྱུར་རོ། །ཞེས་པའི་བར་ཡིད་ལ་བྱེད་ཅིང༌། ཡང༌། འདི་ལྟར་ལས་དང་ཉོན་མོངས་ཡོད་གྱུར་ན། །སེམས་ཅན་རྣམས་ནི་འཁོར་བར་འགྲོ་འགྱུར་ལ། །ལས་དང་ཉོན་མོངས་མེད་ན་འཁོར་བ་ལས་ཀྱང་ལྡོག །བདེན་པ་དེ་ཡིས་བདག་གི་བསམ་པ་འགྲུབ་གྱུར་ཅིག །སངས་རྒྱས་ལ་ཕྱག་
འཚལ་ལོ། །ཆོས་ལ་ཕྱག་འཚལ་ལོ། །དགེ་འདུན་ལ་ཕྱག་འཚལ་ལོ། །ཡང་དག་པར་རྫོགས་པའི་སངས་རྒྱས་གངྒཱའི་ཀླུང་གི་བྱེ་མ་སྙེད་བཞུགས་པ་རྣམས་ལ་ཕྱག་འཚལ་ལོ། །རང་སངས་རྒྱས་རྣམས་ལ་ཕྱག་འཚལ་ལོ། །དགྲ་བཅོམ་པ་རྣམས་ལ་ཕྱག་འཚལ་ལོ། །ཕྱིར་མི་འོང་བ་རྣམས་ལ་ཕྱག་འཚལ་ལོ། །ལན་ཅིག་ཕྱིར་འོང་བ་རྣམས་ལ་ཕྱག་འཚལ་ལོ། །རྒྱུན་དུ་ཞུགས་པ་རྣམས་ལ་ཕྱག་འཚལ་ལོ། །འཕགས་པ་བྱམས་པ་ལ་སོགས་པའི་བྱང་ཆུབ་སེམས་དཔའ་རྣམས་ལ་ཕྱག་འཚལ་ལོ། །བརྟུལ་ཞུགས་གྲུབ་པ་རྣམས་ལ་ཕྱག་འཚལ་ལོ། །སེམས་ཅན་གྱི་སྨན་པ་རྣམས་ལ་ཕྱག་འཚལ་ལོ། །ནོར་བུ་གྲུབ་པ་རྣམས་ལ་ཕྱག་འཚལ་ལོ། །སྔོན་འགྲོས་རྟེན་སྙིང་ལན་བདུན་བརྗོད་དེ། བདག་གམ་བདག་གི་འཁོར་རམ་མིང་འདི་ཞེས་བྱ་བ་ལ་འཆི་བདག་གི་མཚན་མ་བཏབས་པ་དང༌། དེ་ལས་བྱུང་བའི་ལྟས་དང༌། རྨི་ལམ་སྡིག་པ་དང༌། ནད་དང༌། ཡམས་ནད་དང༌། ཉེ་བར་འཚེ་བའི་རྣམ་པ་ཅི་མཆིས་པ་ཐམས་ཅད་འཆི་བ་མེད་པའི་ལམ་གསུངས་པ་སངས་རྒྱས་བཅོམ་ལྡན་འདས་རྣམས་ཀྱི་བདེན་པའི་གཟི་བརྗིད་ཀྱིས་དབྱེའོ། །བཅོམ་མོ། །མེད་པར་བགྱིའོ། །ཞི་ཞིང་རབ་ཏུ་ཞི་བར་བགྱིའོ། །ཞེས་བརྗོད་ཅིང་རི་མོའི་མཚན་མ་དང་པོ་དབྱི། དེ་ཁོ་ནའི་ཚུལ་གྱིས་རི་མོ་མཐའ་དག་ཕྱིས་ཟིན་
པ་ན་ཤིང་དེ་ཐུབ་པའི་སྐུ་གཟུགས་ལ་གསོལ་བའི་ཁྲུས་ཆུས་བཀྲུ། བྱུར་སླར་ཡང་མི་ལྡང་བའི་ཕྱིར་དེ་བཞིན་གཤེགས་པའི་ཕྱག་རྒྱས་བཏབ་པར་བསམ་ལ་ཤིང་དེའི་ལོགས་ལ་རྟེན་འབྲེལ་སྙིང་པོ་བྲིས་ཏེ་སྒོའི་སྟེང་དུ་བཞག་གོ༌།དེར་ཡང་དེ་ཁོ་ན་ཉིད་ཡུན་རིང་དུ་བསྒོམ་མོ། །མཇུག་ཏུ་ཡངས་པའི་གྲོང་ཁྱེར་དུ་འཇུག་པ་སོགས་ལ་གསུངས་པའི་ཤིས་བརྗོད་ཀྱང་བྱའོ། །དེ་ལས་བསྡུས་པ་བྱེད་ན། ཐོག་མར། འདི་ལྟར་ལས་དང་སོགས་ལན་གསུམ་དང༌། སངས་རྒྱས་ལ་ཕྱག་འཚལ་ལོ་སོགས་ལན་གསུམ་བཏོན་ལ། རྟེན་སྙིང་ཉེར་གཅིག་བཟླ། དེ་ནས་སྔར་བཞིན་བདེན་སྟོབས་བརྗོད་བཞིན་པར་ཁྲམ་རིས་ལོ་གྲངས་དཀྱུས་གཅིག་ཁོ་ནར་བཏབ། དབྱི་ཚུལ་ཡང་དེས་འགྲེས་ཏེ་ཤེས་པར་བྱའོ། །འདི་ལ་སྔོན་དུ་རྟེན་འབྲེལ་སྙིང་པོ་སྲོག་ལྡན་གྱི་སཙྪ་ལོ་གྲངས་ལས་མི་ཉུང་བ་བཏབ་སྟེ། དེའི་སྤྱན་སྔར་མཆོད་པ་ཇི་ལྟར་འབྱོར་པ་དབུལ་བར་བྱ་བ་ནི་གལ་ཤིན་ཏུ་ཆེའོ། །ཞེས་པའང་སྤྲང་རྒན་བསྟན་ཉིས་སྔར་རང་ཉིད་ན་ཚོད་ཆུང་ངུའི་དུས་རྟེན་སྙིང་ཁྲམ་མདོས་ཟེར་བའི་བན་མིན་བོན་མིན་ཅིག་རྩེད་མོའི་ཚུལ་དུ་བྲིས་པ་འཁོས་ཆུང་འགའ་ཞིག་དེ་ཕྱག་ལེན་དུ་འདེབས་པའང་ཐོས་ནས་ཤིན་ཏུ་ཡིད་ཕྱུང་སྟེ། དེ་ལས་འདི་འདྲ་བྱས་ན་ཅུང་ཟད་དགའ་འམ་སྙམ་ནས། རྒྱལ་བ་ཆོས་འཁོར་བསྐོར་བའི་དུས་ཆེན་ལ་སྦྱར་བ་མཆོག་ཏུ་དགེ་བར་གྱུར་ཅིག། །།མངྒ་ལཾ།། །།