རྟེན་སྙིང་གླུད་ཁྲིགས།
ན་མ་་མུ་ན་ཡེ། རྟེན་སྙིང་ལ་བརྟེན་ནས་གླུད་གཏོར་བསྔོ་ཆོ་ག་འདི་ཉིད་གསུང་རབ་ཀྱི་ཁུངས་ལ་བརྟེན་ནས་འཆད་དུ་ཡོད་མེད་སོགས་སྤྲོ་རྒྱུ་མང་ཡང་གཞན་བཏང་སྙོམས་བྱས་ནས། ཤོམ་དང་འདོན་འགྲིགས་ཙམ་གསལ་བར་བརྗོད་ན། བླ་གབ་མེད་པའི་གནས་སོགས་གཙང་ཞིང་བྱི་དོར་བྱས་པའི་ཕྱོགས་སུ། གཟུངས་ཆོག་གི་ཤོམ་དཀྱུས་སུ་གསལ་བ་ལྟར་དང༌། དེའི་འོག་ཅི་བདེར་བ་བྱུང་གིས་བྱུགས་པའི་གཞི་འཁྱེར་བདེ་བར་རྒྱས་པ་བྱེད་ན་འཇིམ་པའམ་ཟན་སོགས་ལས་ཁང་བཟང་ལྕགས་རིས་བསྐོར་བ་བཅོས། བསྡུ་ན་ཚོད་ཕྱེ་དང་ཆུ་ཚོན་གང་རུང་གིས་རེ་ཁཱ་གྲུ་བཞི་ཉིས་རིམ་ཕྱི་མ་ལ་རྒྱ་ཕིབ་ཀྱི་རི་མོ། ཕྱོགས་བཞི་གའམ་ཤར་དུ་སྒོ་ཁང་གི་རྣམ་པ་དང་བཅས་པ། དབུས་སུ་པདྨ་འདབ་བརྒྱད། རྩིག་པ་སྔོ། རྒྱ་ཕིབ་སེར། པདྨ་དཀར། ལྟེ་བ་ལྗང༌། ནང་གི་ཁྱམས་དང་སྒོ་ཁང་གི་ནང༌། ཕྱི་རོལ་གྱི་གཞི་རྣམས་ལྗང་གུ། མཐར་རེ་ཁཱ་དཀར་པོ་དང་བཅས་པ་བྱ། པདྨའི་ལྟེ་བར་མཉྫི་ལྟ་བུའི་ཁར་རིན་པོ་ཆེའི་ཟ་མ་ཏོག་དར་དང་མེ་ཏོག་གིས་བརྒྱན་པར་རྟེན་སྙིང་གི་སཙྪ་བཞུགས། གཙང་སྦྲ་ལ་དགའ་བ་དང་དམེ་བ་སྤྱོད་པའི་གདོན་ཆེ་ཕྲ་རྣམས་ཀྱི་དོན་དུ་ནང་གི་ཕྱོགས་བཞིར་ཁམ་ཕོར་བཞིར། སྣུམ་ཁུར་དང༌། དཀར་གསུམ། མངར་གསུམ། འོ་ཐུག་འབྲས་ཆན། སྲན་ཆན། ཞོ། འབྲས་ཡོས་སོགས་གཙང་མའི་ཟས་རྣམས་ལོ་མ་ལྟ་བུའི་སྣོད་སོ་སོར་རྩོལ་ཏེ་བཤམས་པའི་སྟེང་རྣམས་གདུགས་དཀར་པོས་བརྒྱན། མཚམས་བཞིར་ཁམ་ཕོར་དུ་གོང་བཞིན་ལོ་མ་སོགས་ཀྱི་སྣོད་སོ་སོར། ལ་ཕུག་
ལན་ཚྭ། སྒོག་བཙོང༌། ནས་ཆན། ཏིལ་གྱི་ཚིགས་མ་དང་ཕྱེ་མ། ཤ་བཙོས་རྗེན། ཁྲག་ཆང༌། ཁམས་ཕོར་ཐམས་ཅད་དུ་ཆུ་དང་བཅས་བཤམས་ཤིང་རིན་པོ་ཆེ་དང་དར་ཟབ་སོགས་ཀྱང་བཞག །དེའང་དཀར་གསུམ་མངར་གསུམ་སོགས་ཕྱོགས་བཞིའི་ཁམ་ཕོར་གྱི་གཏོར་མའི་རྫས་ཕལ་ཆེར་མཚམས་བཞིའི་ཁམ་ཕོར་དུའང་འཇུག་ལ། ཤ་ཁྲག་སོགས་མཚམས་བཞིའི་ཁམ་ཕོར་གྱི་ཟས་རྣམས་ཕྱོགས་བཞིའི་ཁམ་ཕོར་དུ་མི་འཇུག་པ་ཁྱད་པར་རོ། །གཏོར་མ་རྣམས་ཞག་མ་ལོན་ན་བཟང་ངོ༌། ཁྱམས་ཀྱི་ཕྱོགས་བཞིར་ཁམ་ཕོར་དུ་མཆོད་ཡོན་དང་མེ་ཏོག་སོགས་ཉེར་སྤྱོད་རྣམས་ཚར་བཞིའམ། བསྡུ་ན་ཚར་གཅིག་བཤམས། ཕྱིའི་ར་བའི་ནང་གི་ཤར་དབུས་སུ་ཁང་པ་བཀོད་ལེགས་འཇིམ་སོགས་ལས་བྱས་པའམ་བསྡུ་ན་ཤིང་བྱང་ལྟ་བུར་བྲིས་ནས་བཙུགས་པས་ཀྱང་ཆོག །གྲོང་ཁྱེར་ལྟ་བུའི་ཆེད་ཡིན་ན་ཁང་པའི་གཟུགས་བརྙན་ཡང་ཁྱིམ་གྱི་གྲངས་དང་མཉམ་པར་བྱེད། ཁང་པའི་ཁ་དབུས་སུ་བསྟན། དེ་མདུན་གོས་རྒྱན་བཟང་པོས་སྤྲས་པའི་གླུད་གཟུགས་འཁོར་ཇི་ལྟར་རིགས་པ་བཅས་དང༌། ལོ་མའི་སྣོད་སོགས་སུ་དུག་རིགས་མིན་པའི་མེ་ཏོག་དང༌། ཤིང་ཐོག་བཟང་པོ་དང༌། གཙང་མའི་འབྲུ་སྣ་སོགས་ཇི་ལྟར་རྙེད་པའི་རྫས་རུང་བ་སྦྱར་བའི་ཆང་བུ་དང༌། རིལ་བུ་ཅི་མང་བཀོད། ཕྱོགས་གཞན་གསུམ་ལ་ཅི་བདེར་བཤམས་པས་ཆོག་ཀྱང༌། དཔེར་བརྗོད་ལྟ་བུར། ལྷོར་རྟ་བྲེས་དང༌། ཕྱུགས་བྲེས་ཀྱི་རྣམ་པའི་ར་བ་སོ་སོར། རྟ་ཕྱུགས་ཀྱི་གཟུགས་གང་མང༌། ནུབ་ཏུ་རས་སྣམ་དར་ཟབ་སོགས་ལས་བྱས་པའི་རྐྱལ་ཆུང་འབྲུ་སྣས་གཏམས་པ་དང༌། ཤོག་བུའམ་ཟན་གྱི་སྒྲོམ་གཟུགས་གོས་དང་རིན་པོ་ཆེས་བཀང་
བ་མང་པོ་བརྩིགས་ཐབས་སུ་བཀོད་པ། བྱང་དུ་ས་ནག་རློན་པ་བག་ཙམ་བཀྲམ་པར། གཤོལ་གྱི་རྗེས་ལྟ་བུ་ཅི་རིགས་བྲིས་པ་ལ། ནས། གྲོ། འབྲས། སྲན་མ་སོགས་གཏོར་བ་དང༌། སྨྱུག་ཐུར་ཕྲ་མོ་སོགས་ཀྱི་རྩེར་ཟན་གྱི་སྙེ་མའི་གཟུགས་འབྲུ་སྣས་སྦགས་པ་མང་དུ་བཙུགས། རྟ་ཕྱུགས་ཁོ་ནའི་བསྲུང་བ་ལྟ་བུ་ཡིན་ན། ཕྱོགས་བཞི་ཀ་དེ་དག་གི་གཟུགས་བརྙན་འབའ་ཞིག་གིས་བཀང་ཡང་རུང༌། གཟུགས་བརྙན་ཐམས་ཅད་གསལ་ཞིང་སྐྱེ་མཆེད་དོད་པ་གཅེས་ལ། ནམ་རྒྱང་མདའ་འཕང་ཤིང་རིས་སོགས་ཀྱང་ལྷ་འདྲེའི་མཐུན་རྫས་ཁྱད་པར་ཅན་ཡིན་པས་བར་མཚམས་ཅི་རིགས་པར་བཤམས་ན་ཕུན་སུམ་ཚོགས་པའི་ཡན་ལག་ཏུ་འགྱུར། ཧ་ཅང་སྤྲོས་པ་ལ་དགའ་ན་ཕྱིའི་ར་བའི་ཁར། བྱ་རིགས་སྣ་ཚོགས་དང༌། འདོད་ཡོན་ལྔའི་གཟུགས་བརྙན་མང་པོ། དེའི་ཕྱི་རོལ་དུ་ལྗོན་ཤིང་གི་ཕྲེང་བ་དར་ཐག་གིས་སྦྲེལ་བ། བར་བར་དུ་རི་དྭགས་ཀྱི་གཟུགས་མང་པོ་བཀོད་པ་ཡང་རུང་ཞིང༌། དབུས་ཀྱི་རྟེན་སྙིང་གི་སཙྪའི་སྟེང་དུ་དར་གྱི་བླ་བྲེ་ཡང་བྲེ་བར་བྱའོ། །འདོན་འགྲིགས་དངོས་ལ་གཟུངས་ཆོག་འདོན་ཚུལ་དཀྱུས་གསལ་ལས་གཞན་མེད། གཏོར་ཆོག་གི་སྐབས་སུ་དུལ་ཞིང་ཞི་བའི་སེམས་ལ་གནས་པ་ཤིན་ཏུ་གལ་ཆེ་བས་བྱམས་པ་ཅི་ནུས་སུ་སྒོམ། གང་ཡང་འབྱུང་པོའི་དཀྱིལ་འཁོར་ན། སོགས་ཀྱི་ཚེ་སྤོས་གསུར་གྱི་དུད་པ་གཏོང་ཞེས་པར་སྤོས་ལ་གུ་གུལ་དང་གླ་རྩི་སོགས་མེད་པ་དགོས་ཏེ། འདི་ནི་གོང་དུ་ཉེར་སྤྱོད་ནང་གི་སྤོས་ལའང་འདྲའོ། །ནང་དུ་དཀར་གསུར་ཙམ་གཏོང་ཞིང༌། དམར་གསུར་རིགས་ཕྱི་རོལ་ཐག་རིང་པོར་གཏོང་བ་ལེགས།
གླུད་གཏོར་ཁ་གསོ་བྱེད་པ་དཀྱུས་སུ་མ་སྨོས་ཀྱང༌། བྱེད་ན་ཤོམ་གྱི་སྐབས་གླུད་དང་ཆང་བུ་ཟས་སྣ་དར་སྣ་སོགས་སླད་ནས་བསྣན་རྒྱུ་ཟུར་དུ་བཞག་ལ། ཞི་ཞིང་བྱམས་པའི་སེམས་སུ་མཛོད། །ཅེས་པའི་འཕྲོར་རྟེན་སྙིང་ལན་གསུམ་དང༌། དེ་བཞིན་གཤེགས་པ་བླ་ན་མེད་པའི་དགེ་སྦྱོང་ཆེན་པོའི་བདེན་པས་མཆོད་སྦྱིན་གྱི་ཡོ་བྱད་འདི་དག་ནམ་མཁའ་གང་བའི་ལོངས་སྤྱོད་མགྲོན་རིགས་སོ་སོའི་དབང་པོའི་སྤྱོད་ཡུལ་དུ་ཇི་ལྟར་འདོད་པ་བཞིན་འབྱུང་ཞིང་རྒྱས་པར་གྱུར་ཅིག་ཅེས་བྱིན་རླབས་བྱས་ནས་སྡེ་ཚན་རེ་རེ་བཞིན་གསོ། འོན་ཀྱང་སྲིན་པོ་དང་ཤ་ཟ་སོགས་ཀྱི་སྐབས་མ་གཏོགས་སྤྱི་ཁྱབ་ཏུ་ཤ་ཆང་སོགས་མི་བླུགས། བྱུང་དགུ་གླུད་ལ་འཕོ་བ་དང༌། ཞེས་པ་འདི་ནད་སྤོ་གདོན་སྤོ་ཞེས་འདུལ་བ་ལུང་གི་དྲང་སྲོང་དུང་དང༌། བྲེས་པའི་སྔོན་རབས་ཐད་ཀྱི་ལུང་ཁུངས་དང་འབྲེལ་བའི་གནད་ཆེན་ཡིན་པས་དམིགས་གནད་ནན་ཏན་བྱ། བདེན་སྟོབས་ཀྱིས་གསོ་བའི་མཇུག་ཏུ་སྲུང་སྐུད་འདོགས་ན་གཟུངས་སྒྲུབ་ཀྱི་དུས་ནས་སྔགས་སྐུད་ལེགས་པར་བསྔགས་ལ་སྐབས་དེར་སྦྱིན་པར་བྱ་སྟེ་འདུལ་བ་ལུང་ལས་སྔགས་སྐུད་དཔུང་པ་གཡོན་དུ་གདགས་པར་གསུངས། མདོས་ལམ་བསྟན་པའི་མགོར་མདོས་དཀྱིལ་དབུས་ཀྱི་རྟེན་སྙིང་གི་སཙྪ་བླང་ལ་མཆོད་གྲལ་དུ་འཇོག གཞན་དཀྱུས་ཀྱི་ཡིག་ཆུང་ངུ་གསལ་བས་ཟུར་དུ་མ་བྲིས།། ༈ །ཁྲམ་དབྱིའི་ཆོ་ག་འཆི་བའི་འཇིགས་སྒྲོལ་ནི་ཚིག་རྒྱ་ཕེར་བའི་ཆོ་ག་ཡིན་གྱི་མདོས་ཆོག་དང་སྦྲེལ་རྒྱུར་བྱས་པ་མིན་མོད། འོན་ཀྱང་གཉིས་ཀ་སྦྲེལ་ནས་བྱ་བར་འདོད་ན།
མདོས་ཆོག་གི་མགྲོན་འབོད་པའི་མཐར། འདི་ལྟར་ལས་དང་སོགས་ནས། རི་མོའི་གཟུགས་སུ་དབབ་བོ། །མཚན་མ་བཏབ་བོ། །ཞེས་པའི་བར་ལོ་གྲངས་སོགས་ཀྱི་ཁྲམ་གཏབ། དེ་ནས་བདག་གི་བདེ་བ་ལ་ལྟོས་པས་སོགས་ནས། བདེན་སྟོབས་ཀྱིས་གསོ་བའི་བར་འདོན། དེ་མཚམས། འདི་ལྟར་ལས་དང་སོགས་ནས། ཞི་ཞིང་རབ་ཏུ་ཞི་བར་བགྱིའོ། །ཞེས་པའི་བར་ལོ་གྲངས་སོགས་ཀྱིས་ཁྲམ་དབྱི་ཞིང༌། ཤིང་བྱང་བཀྲུས་ལ་རྟེན་སྙིང་བྲི་བ་རྣམས་བྱས་ཏེ་མདོས་ལམ་བསྟན་པ་མན་ཆད་བྱའོ། །ཞེས་པའང་རིགས་སྔགས་འཆང་བའི་དབང་ཕྱུག་ནམ་མཁའ་རིན་པོ་ཆེའི་མཆོག་སྤྲུལ་དཔོན་སློབ་ཀྱི་ཐུགས་བཞེད་སྐོང་ཕྱིར་སྨྲས་རིམ་བཞིན། མ་ཏི་་ཡི་གེར་བྲིས་པ་དགེ །གལ་ཏེ་འབྱོར་པ་དམན་པས་གཏོར་མའི་ཡོ་བྱད་ཇི་བཞིན་མ་འབྱོར་ན་ཅི་ཙམ་རྙེད་པ་ལ་བརྟེན་ནས་བྱས་ཀྱང་ཉན་ནོ། །མངྒ་ལཾ་བྷ་བ་ཏུ།། །།