དགྲ་ཐབས་འདུན་གྲོས་སུ་གླེང་བ་སྒྱུ་མའི་སྒྲུང་རབས།
༈ རྗེ་བཙུན་འཇམ་པའི་དབྱངས་མཁྱེན། འཁོར་བ་སྡུག་བསྔལ་གྱི་
ཡུལ་གྲུ་སྔོན་དང་ཕྱི་མའི་མཐའ་མི་མངོན་པས་ས་ཁ་རྒྱ་ཆེ་ཞིང་གནམ་ལྟོ་བ་ཡངས་པའི་ས་ཆ། ཞི་བའི་རི་ངོགས་མེད་ཅིང༌། བདུད་རྩིའི་ནགས་འདབ་མེད་པ། འཕགས་པའི་ལམ་གྱི་ཆུ་མེད་པ། ཕྱིན་ཅི་ལོག་གི་ཉོན་མོངས་པའི་ཚ་དུབ་ལ་བཟོད་ཐབས་མེད་པ། །གང་དུ་བལྟས་ཀྱང་འདུ་བྱེད་ཀྱི་སྡུག་བསྔལ་སྨུག་ལྟེམ་མེ་བའི་ནང་ན་འཁྲུལ་པའི་སྨིག་མང་པོ་ལང་ལོང་དུ་རྒྱུ་བ། མི་འགྲོའི་རང་དབང་ཟད་པ། སོང་ན་གཏད་སོ་བྲལ་བ། དོན་མེད་རང་སྡུག་མྱོང་བའི་ལམ་རིང་པོ་འཛད་དུས་མེད་པ། འཕགས་པའི་དགའ་བ་ཟང་ཟིང་མེད་ཅིང་གྱ་ནོམ་པའི་བཀྲག་མེད་པ། ཆོས་ཀྱིས་ཕོངས་པའི་མུ་གེའི་ཐལ་བ་སྐྱ་ཐལ་ལེབ། ཁ་བརྒྱར་གྱེས་པ་ཅན། སྟོང་སྡེ་ཁྲི་ཤོག་མང་པོའི་གྲོང་ཚོ་ཆགས་པ། སྟོད་གཟུགས་ཁམས་དང་གཟུགས་མེད་ཀྱི་འབྲོག་ན་བསོད་ནམས་ཀྱི་བེ་ལུག་འཚོ་སྐྱོང་མཁས་པས་ཏིང་ངེ་འཛིན་གྱི་དཀར་སྣ་མོད་པ། སྨད་འདོད་ཁམས་ཀྱི་རོང་ཡུལ་ན་དགེ་སྡིག་གི་ལས་རྣམ་པ་སྣ་ཚོགས་ཞིང་དུ་རྨོ་བས་སྐྱིད་སྡུག་གི་འབྲུ་སྣ་ལ་འདི་མི་དར་བྱ་བ་མེད་པ། རྒྱུ་འབྲས་ཀྱི་ཉོ་ཚོང་ལ་སྐྱེད་འཕེལ་བརྩི་བ། སྐྱེ་ཤིའི་ས་ཚུགས་རྩིས་ཀྱིས་མི་ཆོད་པ་མུ་ནས་རྒྱུད་དུ་མཐུད་པ། ས་ཚུགས་རེ་དང་བར་ན་རྟག་འཛིན་གྱི་བྱ་བྱེད་འཆར་གྲངས་མང་ལ་གཟུང་དུ་མེད་པའི་དྲི་ཟའི་གྲོང་འབུམ་ཚོ་མང་པོས་བརྒྱན་པ། སྐད་ཅིག་རེ་ནས་ཅི་ཡང་མེད་པ། ཕར་འགྲོ་དང་ཚུར་འོང་གི་འདུ་འགོད་རྒྱུན་མི་འཆད་པས་མགྲོན་པོའི་བུན་ལོང་མིག་སྦྲིད་པ་ལྟ་བུ། ཆ་ལུགས་སྤྱོད་ཚུལ་མི་མཐུན། ཟ་ཐང་དང་ལོངས་སྤྱོད་
མི་འདྲ། གྲོང་ཤོགས་དང་སྐད་རིགས་མི་གཅིག་པའི་སེམས་ཅན་གཞལ་དུ་མེད་པ། འཇིག་ཚོགས་ལ་ལྟ་བའི་མི་དཔོན་གཅིག་གི་ཁེབ་ཞབས་སུ་ཆུད་པའི་མངའ་རིས་འདི་ན། བུ་རང་ཉིད་མིན་པའི་དཔའ་བོ་དང་ཐུག་མ་ཐུབ། །དགྲ་ཕར་འདུལ་མིན་པའི་ཚུར་རྒོལ་དང་ཕྲད་མ་མྱོང༌། གནས་རང་ཁྱིམ་མིན་པའི་ས་མཐའ་གཅོད་དགོས་མ་བྱུང་བའི་དཔོན་ཨ་མའི་གོ་ཁའི་གཅེས་ཕྲུག་པོ་ཁོ། ཁྲིམས་ལ་ཡོ་དྲང་མེད་དེ་ངན་གཡོའི་ལྟ་རྒྱུད་དུ་བྱུང༌། འབངས་ལ་སྐྱོང་ལུགས་མེད་དེ་ཉོན་བདུད་ཀྱི་ཐ་སྙད་ཆགས། དྲིན་ལ་ངོ་སོ་མེད་དེ་སེམས་གཤིས་ཕྱིན་ཅི་ལོག་གི་གཙོ་བོར་གྱུར་ནས། གྱོད་གཞི་ན་ཡོད་པ་བུན་དུ་འཇོག་པ། གྱོད་རྩ་ནང་དུ་བསྡུས་ནས་གཏང་རག་གཏོང་བ། སྡུག་སེམས་ན་མེད་པ་ཐོག་འཇོག་བྱེད་པ། བློའི་སྐོར་ལུགས་རེ་ལ་ལོ་བརྒྱའི་མནར་ཐབས་ཚང་བ། འཕྲལ་དགའ་ལ་མཐའ་ངན་པའི་ཁྲིམས་ཀོ་དམར་གྱི་འབྲེང་རློན་ལྟ་བུས་སེམས་ཅན་སྡུག་ཐག་གཅོད་པའི་སྐབས་སུ། དཔོན་ལ་ཟ་ཚོད་ཡོད་རུང་གཡོག་ལ་འཇལ་ཚོད་མེད་པའི་དཔྱ་ཁྲལ་ཡ་མེད། རྗེ་ལ་མགུ་དུས་མེད་རུང་བྲན་ལ་སུན་དུས་འབྱུང་བའི་ཞབས་ཏོག་ཡ་མེད། ཁྲིམས་ལ་མནར་ཕོད་ཡོད་རུང་འབངས་ལ་བརྣག་ནུས་མེད་པའི་ཆད་པ་ཡ་མེད། གཤེད་མ་གསོད་སྙིང་ཆེ་རུང་བཙོན་བུ་འཆི་སྙིང་མེད་པའི་རང་ཉམས་ལྷུག་པ་འདི་ཚོ་བསམས་ནས། ཤ་ཚ་རང་ལ་འཆོར་བའི་མི་འདྲ་སྲིད་ན་ནི། །ད་བབ་སྡུག་གི་ཁུར་པོ་རི་ལྟར་ལྕི་བས་ཐོ་བཞག །ཕྱིས་འབྱུང་ཕུང་པོའི་སེམས་ཁྲལ་ནད་ལྟར་ན་བས་གླེང་བསླང༌། སྔར་བརྐོས་ལས་ཀྱི་སྡུག་ཡུས་མི་
རོ་ལྟར་ངམ་གནག་པ་བསྐྱེད་དེ། གནམ་གྱིས་རྭ་ཅོ་བརྡར། ས་ཡིས་རྔ་མ་གཡུགས། གནམ་ས་ཆ་ལང་བརྡབ། སྲིད་པ་ཐོག་འོག་ལོག་པའི་དུས་ནམ་ཤར་རུང༌། རྗེའི་སྐུ་ཚོད་འཛིན་པའི་ཐོབ་ཐང་མི་དབང་ཡང༌། བདེན་རྫུན་རང་ལམ་ལེན་པའི་སྤྱི་ལུགས་དེ་མི་དབང་དོན་མི་འདུག་པས། ཡོ་དྲང་གི་ས་དམིགས་དང༌། སྐྱིད་སྡུག་གི་དབང་སྐལ་ཐིག་གིས་བགོ་བའི་གླེང་གཞི་ཞིག་སློང་དགོས། དེ་ལ་མི་དཔོན་འདི་རིགས་རྣམས་རང་ཅི་འདོད་ཀྱི་ངང་ལ་སྣང་བ་བྱུང་རྒྱལ་དུ་འཇོག་རྒྱུ་ཡོད་མེད། ཁོང་གི་ཡབ་མེས་ལ་ཐོབ་ཐང་དབང་ཚུལ། །ལྷ་སྲས་ཀྱིས་རང་སྲིད་བསྐྱང་རབས། སྐྱེས་བུའི་སྐྱོན་ཡོན་ཡོ་ལུགས་དང་བཅས་པ་ཟུར་ཙམ་ཞིག་དྲང་པོར་བརྗོད་ན། གནའ་རབས་དང་པོའི་ཐོག་མ། འདི་པའི་ཡབ་མེས་ཆོས་སྐྱོང་རྒྱལ་དང༌། ཆོས་ཕྱུག་འབུམ་ལ་སོགས་པ་རིགས་ངན་མ་ནིང་གི་སྡེབ་ལས་སྐྱེས་ཤིང༌། ལུས་སེ་དྲིའི་སྡོང་པོ་ལྟས་ངན་གྱི་ཤ་གཟུགས་སུ་གྲུབ་པས། ཡ་རབས་ཀྱི་མི་ཁྱུར་མ་ཆུད། གཉན་སྣ་རྫི་ཅན་དང་སྡེབས་མ་རྙེད་ནས། འབྱུང་བ་རྫས་སྣ་དགུ་འདུས་ཞེས་བྱ་བའི་ཡུལ་ས་མིན་རྡོ་མིན་ལས་གྲུབ་པའི་གཅོང་རོང༌། སྔོ་ལྡུམ་དང་མེ་ཏོག་མེད་པ། སྟེང་ནས་ཉི་མ་དང་རླུང་གིས་རྨྱ་བ། ཞབས་ནས་འདམ་རུལ་དང་བ་ཚྭས་གཤེར་བ། ཕྱི་འཁྲང་ལ་ནང་མྱགས་པ། རླན་དྲི་དང་དྲོད་རླངས་འདྲེས་མ་དང༌། ལུད་འབུ་རིགས་མི་གཅིག་པ་མང་པོས་ཁྱབ་པ། རྩ་འཇག་མ་ཤུགས་རིང་འབྱིན་པའི་སའི་སྐུངས།
ལུང་པའི་གཏིང་དོང༌། རྡོ་གོར་མོ་ཡིན་ཡང་ས་མི་ཟིན་པ་ལྟ་བུ་ཞིག་ན། ཆུ་གད་པ་གཉིས་དང་པུས་མོ་མཉམ་བཙུགས། རྫ་ཕ་བོང་གཉིས་དང་ངོ་འཇིགས་སྟོན་རེས་བྱེད་པའི་སྐྱེ་མཆེད་ཀྱི་གྱང་རོལ་བྱ་བ། ནང་ནས་བལྟས་ན་ཕྱི་མི་བསྒྲིབ་པའི་གོག་པོ་ཁ་རལ། ནང་ན་མི་མ་བསྡད། ཕྱི་ན་དུ་བ་མི་འོང་བ་ཞིག་ཡོད། དེ་ལ་རྟེན་མཁར་གྱི་གཙོ་བོ་བྱས་ཏེ། སྣོད་བཅུད་གོ་མ་འཛོལ་བའི་དུས་དེ་ཙམ་ན་ཡང༌། སས་ཡར་ལ་གཅིག་བལྟས་ན། གནམ་གྱིས་མར་ལ་གཅིག་ལྟ། ཀྭི་ཕར་ལ་གཅིག་བོས་ན་རི་བྲག་གིས་ལད་མོ་ཞིག་ཟློ་བ་ལྟ་བུ་མ་གཏོགས། ཁྱིམ་མཚེས་ཀྱི་ཨ་ཡ་དང་གཅིག །ཕྱུགས་ལུག་གི་སྐྱོང་སྤེལ་དང་གཉིས། རྨོ་རྐོ་སོ་ནམ་དང་གསུམ། དེ་རིགས་ཚོར་ཡང་མྱོང་ཚོད་དུ་མི་འདུག་པ་དེ་ལྟར་ཡིན་རུང༌། གདུང་ཨ་ཚ་རྐེ་རིང་གི་རྒྱུད་དུ་བྱུང་བས་མུ་གེས་མ་ཐུབ། མ་སྡུག་མོ་ཁེར་སྡུག་གི་བུ་རྒྱུད་ཡིན་པས་ཡིད་གཅོང་མ་ལོང༌། མེས་གླེན་རིགས་ལུགས་སྨྱོན་མགོའི་ཚ་རྒྱུད་ཡིན་པས་སེམས་ཤེད་མ་ཆད་དེ། གྱོང་པོ་ཁྱིས་མ་ཆོད། རོ་ཁུར་འདྲེས་མ་འདོད་པའི་ཁ་དཔེ་ལྟར་སྡུག་ཚེ་དམྱལ་བ་བས་ཀྱང་རིང་བར་བྱུང༌། དེ་ཚོའི་རིང་ལ་སེམས་ཅན་གྱི་རང་བཞིན་དར་བས་འཇམ། གཡོན་ཅན་གྱི་ཉམས་རྒྱུ་མི་ཤེས། ཅི་ཟེར་ལ་བདེན་ཁ་སྟེར། ཁྱི་བས་བྲིད་སླ། ཁྭ་བས་ཅོལ་ཆུང༌། བྱིས་པ་བས་མགུ་སྐྱེན་ཞིང༌། བདེན་ཡིད་ཁ་འཕྲོགས་པ་མེད་ཀྱང་ཟོག་པོ་རྫུན་ལ་བྱང་བའི་སྟབས་དང་མཛངས་རྣམ་དཔྱོད་བཟང་བ་མིན་ཀྱང་མི་ཁྲམ་བློ་ཤོ་
རྒོད་པ་དང༌། དཔའ་བོ་སྙིང་ཤེད་ཆེ་བ་མིན་ཀྱང་སྔར་མ་གབ་ལ་མཁས་པའི་རྐྱེན་ལས། ངན་པ་གོང་དུ་ཤོར། མ་རབས་མགོ་མཐོན་དུ་སོང་བའི་ཐོག །དཔོན་འཇིག་ཚོགས་ལ་ལྟ་བའི་སྤུན་སྡེ་ཉི་ཤུ། སྐུ་ངོ་གང་ཟག་སྐྱབས་དང༌། ཤེད་བུ་སྲུང་སོགས་ཕུ་ནུ་སྟག་ཤར་མང་པོ་དང་བཅས་པ་སྲིད་པ་ལས་ཀྱི་གཉའ་ཤིང་དུ་བྱུང་སྟེ། མི་དབང་བ་ལ་ཞིང་རྨོས་མི་འོས་མི་ལ་བཙན་བཙུགས། མི་དགོས་ལས་ལ་ནན་བརྡུང༌། མི་དར་དཔེ་ལ་ཁེབ་བླང་ཁྲིམས་ཚེ་སྡུག་གི་རྒྱ་མ་ཆེ་ལ་གཉན་པ་ཐོག་མར་བཙུགས། སྐྱེ་དགུའི་ཆོ་རིགས་གསེར་ལྟར་བཙུན་པའི་ནང་དུ་གདོལ་སྤྱོད་ཀྱི་ཁྲིམས་ལུང་དང་པོར་བསྟན། འགྲོ་བའི་སེམས་གཤིས་འོ་མ་ལྟར་དང་བ་ལ་ངན་དགུ་དུག་བཅུའི་སྡིག་ལས་ཀྱི་རུ་མ་བརྒྱབ། འདུ་བྱེད་ལ་གཞི་བཏིང་སྲེད་ལེན་ལ་སྒྲུབ་བྱེད། སྲིད་པ་ལ་འཕེལ་རྩི། རྒ་ཤི་ལ་གཟུང་གསོག་བྱེད་པའི་སྲོལ་ས་སྟེང་ན་སྲིད་མ་མྱོང་བ་ཕྱི་རབས་ཀྱི་བཙས་སུ་བཞག་སྟེ། སྟོང་ཁམས་གསུམ་གྱི་འཇིག་རྟེན་སྡུག་བསྔལ་གྱི་ར་བ་གཅིག་དང༌། སྲིད་པའི་སྡེ་རིས་ཕལ་ཆེར་སྡིག་སྤྱོད་ཀྱི་ཁྱུ་གཅིག་ཏུ་ཁ་ལོ་སྒྱུར། སྔོན་གྱི་མི་རྒྱུད་མ་འཆུགས་པའི་རྟགས་སུ། ས་པདྨ་འདབ་བརྒྱད་རྒྱ་ཁྱོན་ཡངས་པ། གནམ་འཁོར་ལོ་རྩིབས་བརྒྱད་ཐ་གྲུ་ཆེ་བའི་ཕྱི་སྣོད་འཇིག་རྟེན་གྱི་རྣམ་གྲངས་འདི་ཙམ་ཞིག་ཡོད་རུང༌། སྡེ་འདིས་ཆུས་སྲིད་བཟུང་ནས་ལོ་གྲངས་དང་མི་རབས་འདི་ལོན་གཞལ་བར་མི་ནུས་པའི་དུས་ཀྱི་མཐར་ཡང་ཕ་གཞིས་ཀྱི་ལུད་ཁང་ཚ་རོ་མ་འདི་མིན་པའི་རེམ་རྒྱུ་མེད་པ་འདི། གྲོང་ཁྱེར་གྱི་སེང་གེ་རྔ་ལེབ་
དང༌། ཁོང་རྣམ་པ་ཚོ་རིགས་གཙང་ཡ་རབས་ཀྱི་སྡེབ་ནས་མཆེད་པའི་རྟེན་འབྲེལ་མི་བསླུ་བའི་བདེན་པ། བཏུམ་ན་མི་ཐུམ། བཟུང་ན་མི་ཐུབ། བསུབ་ན་མི་ཟུབ་པའི་ངོ་བོ་མི་འགྱུར་བ་དེ་ཀ་ཡིན། ཧ་ཧ། ད་དེ་ལྟར་བཤད་ན། མི་ཐམས་ཅད་རང་ཡུལ་ན་ཆེ། སྡེ་ཐམས་ཅད་རང་ས་ན་བརྗིད། རིགས་ཐམས་ཅད་རང་ཐོབ་ལ་གཉན་པ་མ་གཏོགས། དོན་ཡིན་ལུགས་ཀྱི་ངོས་ན་དཔོན་འབངས་ཀྱི་འབྲེལ་བ་མ་གྲུབ། མཆོག་དམན་གྱི་ཐ་སྙད་ཇི་སྲིད་པའི་ཇ་སིག་ཞིག་ཡིན་ལ། དགོས་འཇིག་ཚོགས་ལ་ལྟ་བའི་བློ་ངན་འདི་ལ་ཕ་ཐོབ་ཀྱི་འཕྲུ་ཏོག་སྟོན་རྒྱུ། རང་དཔུང་གི་རལ་གྲི་བསྡིགས་རྒྱུ། ངས་བྱས་ཀྱི་བཟང་ཡུས་འདྲེན་རྒྱུ། དབང་སྐལ་གྱི་ཟ་ཐང་རྒྱུག་རྒྱུ་སོགས་སྣ་གཅིག་ཙམ་ཡང་མེད་ཀྱི་སྟེང༌། འཇིག་རྟེན་ཕལ་པ་ཚོས། དགྲ་འདྲེ་གཉིས་ཀྱི་གཡབ་མོ། །ལྟས་ངན་སྟོང་གི་ཐོག་མ། བྱུར་ཆག་གི་སྙིང་རྡོ་བརྒྱ་དོད་མ་འདི་ཁྱིམ་དུ་བཅུག །ཟོན་ཕྱི་རོལ་དུ་བྱེད་ཟེར་ནས་དོན་མེད་ཀྱི་སྟོང་འདང་མང་པོ་གྲོས་སུ་ཤོམ་པར་འདུག་སྟེ། དེ་ལྟ་བུ་མིན། ཚེ་ཐོག་མ་མེད་པའི་དུས་ཀྱི་ཕུང་རྒན་པོ་འདི་ནི་ཉེས་བྱས་ཀྱི་ཚད་ལ་གཞལ་ན། ནམ་མཁའ་ལ་བླ་བྲེ་རྒྱོང་རྒྱོང༌། བར་སྣང་ལ་འཁོར་ལོ་སྐོར་སྐོར། ས་གཞི་ལ་ཀོ་བ་རྡུང་རྡུང་དུ་བརྡུང་རུང་སྡུག་སྙིང་མི་ཚིམ་ཞིང༌། ཞེ་འཁོན་ཕུང་ཤུལ་གྱི་མིང་སྐམ་ལ་ཡང་བརྗེད་མི་ཐུབ་པའི་ཚོད་ཡིན། བདག་ཆད་ཀྱིས་འཇིགས་པའི་སེར་སྣ་ཅན་དག །དཔོན་གཞུང་བཟང་ཕྱི་ཐག་རིང་བའི་སྐུ་དྲིན་འདི་མིན་ན་དམངས་རང་ཡུལ་གྱི་མངའ་རིས་ན་སྡོད་ཐབས་མི་འོང་ཟེར་ཏེ། མི་གླེན་པ་རྒྱུས་མེད་
པས་རང་མགོ་འཁོར་བ་མ་གཏོགས་ཤེས་བྱ་མི་སྲིད་དགུ་སྲིད། རྒྱལ་ཁམས་མི་དར་དགུ་དར་ཡིན་པས། སྐྱིད་པའི་རྒྱལ་ཁམས་མེད་ནས་འགྲོ་ས་ཟད་པ་ག་ལ་ཡིན། དེ་ཡང་ཟུར་ཙམ་བཤད་ན། སྡིག་སྤྱོད་མྱང་ངམ་ཐང་འདིའི་ཕ་མཐའ་རྫོགས་མཚམས། འཛད་མེད་སྡུག་སྣ་མང་པོའི་རྒྱ་གྲོང་ཟད་མཚམས། བསོད་ནམས་ཕྱུག་སྡེ་འབོལ་མོའི་སྡེ་སྣེ་ཐུག་མཚམས་ཞིག་ན། ལམ་བདུད་རྩིའི་ཆུ་ཀླུང་གཡས་སུ་འཁྱིལ་བའི་འགྲམ་ངོགས། གཙང་ཚངས་སྤྱོད་སིལ་མའི་སྤོས་ངད་ལྡང་བའི་ས་ཕྱོགས། མཐོ་དབེན་པ་ལས་སྐྱེས་པའི་ཉམས་དགའ་གཡང་དུ་ཆགས་པའི་ཡུལ་གླིང༌། ཏིང་ངེ་འཛིན་གྱི་ནགས་ཚལ་ཕྱུག་ལ་སྤུན་པ་དང༌། ཤིན་སྦྱང་གི་བདེ་བའི་འཁྲི་ཤིང་ལྡེམ་ལ་མཉེན་པ། སྙིང་རྗེའི་འབབ་ཆུ་བསིལ་ལ་དང་བ་དང༌། བྱམས་པའི་མེ་ཏོག་དགོད་ལ་བཀྲ་བ། མངོན་པར་ཤེས་པའི་རྩེ་སྣ་འཁྱུགས་ལ་མཚར་བ་སོགས་ངོ་མཚར་སྒྱུ་མའི་བཟོ་བཀོད་ཟད་མི་ཤེས་པའི་སྨན་ལྗོངས། སྲིད་པ་སྒྱུ་མའི་ཁང་བཟང་དང༌། སྐྱེ་བ་སྐྱེད་མོས་ཚལ་འགྲོ་ལྟར་རྟོགས་པའི་རྒྱལ་སྲས་སྙིང་སྟོབས་ཅན་རྣམས་འདོད་དགུར་བསྒྱུར་བའི་ཡེ་ཤེས་ཀྱི་རོལ་རྩེད་དབྱར་གྱི་ལྗོང་རྒྱུ་ལྟར་སྟོན་པའི་ལྟད་མོ་མཐོང་ཞིང༌། ཐུབ་དབང་སེང་གེ་འདུས་མང་འཕགས་བཞིའི་དགེ་འདུན་དང་བཅས་པ་བདེ་སྐྱིད་འཆི་བ་མེད་པའི་སྟོན་མོ་མཛད་དེ། ཟབ་ཞི་རྡུལ་དང་བྲལ་བའི་བསམ་གཏན་གྱི་གྲིབ་མ་ལ་བརྗོད་དུ་མེད་པའི་འགྲོ་བས་དུས་ཡོལ་བར་མཛད་པའི་མངའ་རིས་ཡོད་དེ། ས་དེ་ན་ནི་ང་ཁྱོད་ཀྱི་བདག་བཟུང་མེད།
ཕྱུག་དབུལ་གྱི་དབྱེ་བ་མེད། ལྟོ་གོས་ཀྱི་རྩོལ་སྒྲུབ་ཐམས་ཅད་མེད་པར། དུས་རྟག་ཏུ། གཏན་བདེའི་ངང་ལ་གུ་ཡངས། ཞི་བའི་མལ་དུ་ལྷོད་ཆགས་ནས། རྣམ་པར་གྲོལ་བའི་དགའ་བ་ཤུགས་འབྱུང་དུ་སྐྱོང་ཆོག་པའི་དགེ་མཚན་གྱི་གཟི་འོད་འབར། དེ་དག་ཀྱང་གནམ་ཐོག་སོ་བཅོ་བརྒྱད་ཀྱི་སྟེང་ན་མི་རྙེད་ཀྱི་ནོར་སྣ་ཡོད་རབས། ས་རིམ་པ་བཅུ་གསུམ་གྱི་མར་ཞབས་ན་མི་སླེབ་ཀྱི་ཚོང་རྡལ་ཡོད་རབས། འབྲེལ་མེད་ཕོངས་པའི་རྣ་བ་ཁ་གཡང་གིས་བྲིད་པ་ལྟ་བུ་ཞིག་གཏན་ནས་མིན་ཏེ། བླ་ན་མེད་པའི་སྟོན་པ་དང༌། སྟོན་པའི་རྒྱལ་ཚབ། མཉམ་པ་ཉིད་ཀྱི་དབྱིངས་ལ་སྐུ་བཞུགས་ཀྱང༌། །ཐུགས་རྗེ་ཆེན་པོའི་སྤྱན་རས་རྗེས་འཇུག་ལ་ཆགས་པ་རྣམས་ཀྱིས། ཕྱིས་འབྱུང་གི་འདང་ལ་མཁས་ཤིང༌། སྐྱིད་སྡུག་གཉིས་ཀྱི་ཆུས་སྲིད་ལ་གཏན་བརྗེ་ཕོད་པའི་མི་བཟང་བློ་སྟོབས་ཅན་མང་པོ་ད་ལྟ་དང་མ་འོངས་པའི་དུས་སུ་འབྱུང་བར་གཟིགས་ནས། སྲིད་པའི་སྲང་སྒོ་གཅོད་ལུགས། ཞི་བའི་འཇུག་ཕྱོགས་མཚོན་ལུགས། །སྲིད་ཞིའི་ས་མཚམས་བགོ་ལུགས། འཁོར་བ་དང་མྱང་འདས་ཀྱི་བར་ན་དམུ་ཐག་གསེར་ཟམ་གྱི་ཕྲེང་བ་ཚར་དུ་དངར་བའི་ས་ལམ་གྱི་རྒྱུ་འབྲས་དང་བཅས་པ་རྗོད་བྱེད་ངག་ལམ་དུ་དྲངས་ཏེ། མཁས་བྱའི་མ་མོ་བཞག །སྤང་བླང་གི་སྦྱོར་ཚུལ་བསླབ། ཉམས་ལེན་གྱི་ཁོག་གཞུང་བསྒྲིགས་པའི་དམར་ཁྲིད་གདམས་ངག་ཏུ་བཏབས། བསྐྱར་ལྡབ་རྗེས་བསྟན་ལ་མཛད། གདམས་ལྷག་ཞལ་ཆེམ་དུ་བཞག །བསྟན་རྒྱུན་གླེགས་བམ་དུ་བཀོད། དུས་བབས་
ཞལ་མཐོང་གི་གདུལ་བྱ་སྐུ་དངོས་ཀྱི་མཛད་པས་རྗེས་སུ་བཟུང་ཞིང༌། མ་འོངས་ཕྱི་རབས་ཀྱི་འདུལ་སྐལ་བརྒྱུད་འཛིན་ཐུགས་སྲས་ལ་གཏད་དེ། ལེགས་གསུང་སྐྱེ་དགུའི་ཉི་མ་ཕྱི་མཐའི་བར་དུ་བྲི་གང་དང་བྲལ་བར་བྱིན་གྱིས་བརླབས་ནས། གདུལ་བྱ་མཆོག་དམན་མེད་པའི་ཉམས་རངས་སུ་སྤྱོད་ཆོག་པའི་སྐུ་དྲིན་མཐོང་ཆོས་ན་ཡོད། རྒྱུད་ཕྲེང་ཐག །ལུང་ཕྲེང་རྡོག །དྲོད་ཚད་བཅུ་ཚར། གནད་མདོ་འཛིན་དུ་སྦྱར་བའི་ལམ་ཡིག་མུ་ཏིག་གི་ཕྲེང་བ་ལྟ་བུ་འདི་ཚོ་ཡོད་བཞིན་དུ། ལམ་མཁན་ལ་འཕྲིགས་མ་ཚུད་པར། སློབ་གསར་ལ་ཞིབ་ཅིག་ཡོད་མདོག་བྱེད་ཅིང༌། གླེན་སྒོམ་སེམས་གནས་ཀྱི་གཡག་རྒན་འཇིག་ལྟའི་སྒོ་སྔུན་དུ་བཏགས་ནས། ཨུ་ཚུགས་རང་ལྟ་མཆོག་འཛིན་གྱི་སྙིང་རུས་ཆེན་པོས་ནན་ལྟར་ཞོན་ཏེ། གཡག་རྒན་ལ་འགྲོ་ལུགས་མེད་ཀྱང་ཁ་རྣམ་པར་གྲོལ་བའི་ཕྱོགས་སུ་བལྟས་ནས་འགྲོ་ཀྱིན་ཡོད་སྙམ་པའི་སྟོང་འདང་ཞིག་ལ་སྔས་བྱས་ནས་བསྡད་པས་མི་ཆོག །ལྷ་ཁམས་གསུམ་གྱི་ཆོས་རྗེ་སངས་རྒྱས་བཅོམ་ལྡན་འདས་ཀྱི་གསེར་ཡིག་བཀའ་ཐམ་གྱི་རྭེ་ཁ་མ་ཉམས་པ་འདི་ལ་གདེང་བཅས། གཏན་འདུན་གྱི་སྙིང་པོ་འཆུག་མེད་ཅིག་ལ་རྡོག་པ་གཏད་དེ། དཔའ་འདི་བྱས་ཟེར་རྒྱུ་མེད་པར། དཔའ་སྐད་ཀྱི་ཁ་བོ་ཆེ་བ་ཙམ་ཡིན་པར། བདུད་ངོ་འཇིགས་ཅན་དང་ལྟ་རེས། དགྲ་ཁ་ཚན་ཅན་དང་གཤེ་རེས། དཔའ་ལག་དམར་ཅན་དང་འཇུ་རེས་བྱས་ནས་ཁེ་ཕམ་གྱི་རང་སྐལ་མངོན་སུམ་དུ་ལོང་བ་ཞིག་ལ་བསམ་སྦྱོར་ཆིག་སྒྲིལ་
དགོས་པར་མཐོང༌། རང་དང་གཞན་ལ་དགོས་ངེས་ཀྱི་དགྲ་ཐབས་འདུན་གྲོས་སུ་གླེང་བ་སྒྱུ་མའི་སྒྲུང་རབས་ཞེས་བྱ་བའི་གཏམ་ནག །མདོ་ཁམས་རོལ་ཆེན་བཅོ་བརྒྱད་དུ་གྲགས་པའི་ཡ་གྱལ། རྡོ་རོལ་གྱི་ཆ་ལས་ཡུལ་གྱི་དགེ་བཅུ་མ་ཚང་བ་མེད་པའི་སའི་ལྟེ་བ། ལྷ་ཆེན་རྡོ་རྗེ་མགར་དམར་སྲིད་པའི་བདེ་སྡུག་གི་བཟོ་ཁྱད་མང་པོ་མགར་དུ་རྡུང་ཞིང་མཐའི་སོ་ཁ་ལ་ལྟ་བའི་རྫོང་ཟུར། ཟང་ཡག་དམར་པོ་བྲག་གདན་གཡུ་ཀླུང་གི་སྐ་རགས་ཅན་ལ་བརྗིད་པའི་ཀེའུ་ཚང་ནས་བྲག་སྲིན་འཇིགས་བྱེད་འབར་མ་མེལ་ཚེ་བྱེད་པའི་གནས་རྩེ། གསུང་གི་རིག་འཛིན་རྟ་མཆོག་ཁྲག་འཐུང་གཉིས་པ། །དབང་ཆེན་དགྱེས་རབ་རྡོ་རྗེའི་ཞལ་སྔ་ནས། གསང་ཆེན་དངོས་གྲུབ་གླིང་གི་ཆོས་གྲྭ་ཞེས་བདེན་ཚིག་གྲུབ་པའི་གསུང་བྱིན་རླབས་ཀྱི་མེ་ཏོག་སིལ་མར་བསྙིལ་བའི་གྲུབ་པའི་རི་ངོགས་ཉམས་དགའ་བ་ནས་མི་སྨྱོན་ལྕགས་ཀོང་ད་རི་དྲས་བྲིས། མངྒ་ལཾ།། །།