གངས་ལྗོངས་བསྟན་སྲིད་ཞབས་རིམ།
༈ བདེ་སྐྱིད་བཀྲ་ཤིས་འབྱུང་བའི་གཞི་གཅིག་པུ་ནི་སངས་རྒྱས་ཀྱི་བསྟན་པ་ཡིན་ཏེ། དེ་འཛིན་པའི་དམ་པ་ཕལ་ཆེར་ཟད་པ་དང༌། སྐྱེ་དགུ་ཆོས་མིན་སྤྱོད་པའི་དུས་སུ་ལྷ་དང་མི་རྣམས་རྒུད་ཅིང༌། ལྷ་མ་ཡིན་སོགས་ངན་འགྲོའི་ཕྱོགས་རྣམས་སྟོབས་འཕེལ་བ་ནི་ཆོས་ཉིད་ཡིན་ལ། ལྷག་པར་བོད་འབངས་རྣམས་ཀྱི་གངས་ལྗོངས་སྐྱོབ་པའི་མགོན་གཅིག་བླ་མ་ཨོ་རྒྱན་རིན་པོ་ཆེ་དང༌། ལྷ་ཐུགས་རྗེ་ཆེན་པོ་བརྗེད་དེ། སྐྱབས་
འཇིག་རྟེན་པའི་འབྱུང་པོ་ལ་འཚོལ། ལས་སུ་མི་དགེ་བ་ཁོ་ན་བྱེད་པ་ན། བསོད་ནམས་ཀྱི་ལྡེ་ཁ་སྨོན་ལམ་ལོག་པས་བསྒྱུར་བའི་མི་ནག་ཕོ་མོ་དང༌། བནྡྷེ་ཁྲིམས་འཆལ། སྔགས་པ་དམ་ཉམས་རྣམས་ནག་ཕྱོགས་ཀྱི་འབྱུང་པོ་མཐུ་ཆེན་དུ་སྐྱེས་ནས་ལྷ་སྲིན་སྡེ་བརྒྱད་ནང་འཁྲུགས་སློང་ཞིང༌། མཐའ་བཞིའི་རྒྱ་འདྲེ་མ་རུངས་པ་རྣམས་ཀྱིས་སྣ་ཁྲིད་བྱས་ཏེ་འགོང་པོ་སྤུན་དགུའི་དམགས་དཔུང་དགུན་གྱི་འཚུབ་མ་ལྟར་ལངས། དཀར་ཕྱོགས་ཀྱི་གཞི་བདག་མང་པོ་ཡུལ་བཏོན་ནས། ཕལ་ཆེར་གཉའ་མནན་ནས་ལྡང་མི་ནུས་པ་བྱས། སངས་རྒྱས་མཐོང་བའི་བསྟན་སྲུང་མཐུ་བོ་ཆེ་རྣམས་ཀྱང་བོད་འབངས་ཆོས་ཀྱི་གཟི་བྱིན་དང་བྲལ་བའི་དབང་གིས་སྐྱོབ་པའི་ཐབས་མེད་པར་ཤེས་ནས་ཟངས་མདོག་དཔལ་རི་སོགས་རིག་པ་འཛིན་པའི་གྲོང་ཁྱེར་ཁྱད་པར་ཅན་རྣམས་སུ་བཞུད་དེ། གངས་ཅན་གྱི་ལྗོང་འདི་མི་མེད་ཀྱི་འབྲོག་སྟོང་ལྟ་བུར་སོང་བའི་གནས་སྐབས་ན། མཐའ་དབུས་ཀྱི་འབྱུང་པོ་འདྲེས་པའི་རྟགས་སུ་མི་རྣམས་ཀྱང་མཐའ་དབུས་འདྲེས་ཤིང༌། ཡུལ་ཁམས་ཕན་ཚུན་ནང་འཆོལ་བ་དང༌། ཆས་སྤྱོད་འཆོལ་བ་སོགས་འབྱུང༌། དེའི་དུས་སུ་སྤྱིར་ནད་མུག་འཁྲུགས་རྩོད་སོགས་ཕྱི་ནང་གི་འཇིགས་པ་རགས་ལ་མང་བ་དང༌། ཁྱད་པར་མཐའ་བཞིའི་དམག་དཔུང་མང་པོས་ལན་གཅིག་མ་ཡིན་པར་འཇོམས་ཚུལ་དུས་གསུམ་མཁྱེན་པ་ཨོ་རྒྱན་ཆེན་པོའི་གཏེར་ལུང་རྣམས་སུ་གསུངས་ཤིང༌། དེའང་དུས་འགྱུར་ཆེན་པོ་བཅུ་ཡོང་བའི་ནང་ནས་དེང་
སང་བརྒྱད་པ་ཕལ་ཆེར་རྫོགས་ནས་དགུ་པ་ལ་ཉེ་བ་ཡིན། དེ་བཟློག་ཐབས་ཡོད་ཀྱང་བོད་འབངས་སྤྱིའི་ལས་དབང་གིས་བྱུང་བའི་སྡུག་བསྔལ་གང་ཟག་རེ་རེ་གཉིས་རེས་བཟློག་དཀའ། མང་པོས་ནི་སྒྲུབ་རོགས་མི་བྱེད་ཅིང་བློ་མཐུན་རྒྱུ་མ་རེད་ཀྱང༌། སྒྲུབ་མཁན་བྱུང་ན། སྤྱིར་བསྙེན་སྒྲུབ་ཚད་དུ་འཁྱོལ་བའི་རིག་སྔགས་འཆང་ནུས་ལྡན་རྣམས་ཀྱིས་གཡུལ་མདོས། ས་གནད་མེ་བཙའ། གཏོར་བཟློག །འགོང་པོ་ཨར་གཏད། དམ་སྲི་མནན་པ། ཆོས་སྐྱོང་སྤྱི་དང་བྱེ་བྲག་བརྟན་མ་བཅུ་གཉིས་སོགས་ཀྱི་གསོལ་མཆོད། ཞི་དྲག་གི་སྦྱིན་སྲེག་ཚད་ལྡན། ལྷ་སྲིན་དམ་བསྒྲགས་སོགས་བསྟན་འགྲོ་སྤྱི་ལ་སྨན་པའི་ལྷག་བསམ་ཟོལ་མེད་ཀྱིས་བསྒྲུབ་ན་སྟོབས་ཆེ་ཡང་དེ་འདྲ་ཚད་ལྡན་བྱེད་པ་མང་པོ་འོང་དཀའ་སྒྲུབ་སླ་ལ་ཆོད་ཆེ་ངེས་ནི། བན་སྔགས། མི་ནག་ཕོ་མོ། ཁྱེའུ་བུ་མོ་ཐམས་ཅད་ཀྱི་མ་ཎི་དུང་ཕྱུར་མང་པོ་འདོན་ཅིང་དུས་ཆེན་རྣམས་སུ་མ་ཎིའི་འུར་སྒྲ་ཆེན་པོ་བྱེད། མ་ཎི་རྡོ་ལ་བརྐོ། དར་དུ་འཛུགས་པ་སོགས་དང༌། གུ་རུ་སིདྡྷི་དེ་མཚུངས་རྩལ་དུ་བཏོན། བསམ་ལྷུན་འབུམ་ཐེར་མང་པོ་དང༌། ཁྱད་པར་ཡིད་བཞིན་ནོར་བུ་ལྟ་བུའི་མན་ངག་བཅུ་གསུམ་གྱི་དང་པོ། ཧོར་སོགས་འཇིགས་པའི་དམག་གིས་མཐའ་བསྐོར་ནསཿ ཞེས་པའི་གསོལ་འདེབས་ཁྲི་འབུམ་མང་པོ་གསོག །ལྷ་མོ་འོད་ཟེར་ཅན་གྱི་ཕྱག་འཚལ་དང་གཟུངས་སྔགས་ཚར་གྲངས་མང་པོ་འབྲི་འདོན། ཤེར་སྙིང་བདུད་བཟློག་ཅི་མང༌། སྒྲོལ་མའི་མཎྜལ་ཆོ་ག་རྣམ་དག་མང་པོ་དང༌། ཕྱག་འཚལ་ཉེར་གཅིག་བྱེ་བ་སོགས་ཅི་ཐོན། ཏཱ་རེ་ཡིག་བཅུ་དུང་ཕྱུར་ཅི་འགྲུབ། སྒྲོལ་
མའི་དར་ཆེན་མང་དུ་འཕྱར་བ་རྣམས་ཤིན་ཏུ་གལ་ཆེ། འདི་རྣམས་ནི་རང་ཉིད་ཀྱིས་མོ་ཕྱྭ་བགྱིས་པའམ། རིམ་གྲོ་འདི་དག་བཟང་ཡོང་སྙམ་དུ་ཞེ་རྩིས་གང་ཆེ་རྣམས་བྲིས་པ་ལྟ་བུ་གཏན་ནས་མིན་གྱི། ཨོ་རྒྱན་སངས་རྒྱས་གཉིས་པའི་གཏེར་ལུང་ལྷད་མེད་ལྟར་བྲིས་པ་ཡིན་པས་ཡིད་ཆེས་ཀྱི་གནས་སུ་བཟུང་ཆོག་པར་ཡོད། སྤྱིར་འདི་འདྲའི་རིགས་རྣམས་ཆུ་མ་ཤོར་གོང་དུ་རག་པ་རྒྱང་ནས་བྱེད་པ་ལྟར་ཐོག་ཏུ་མ་བབས་གོང་ནས་སྒྲུབ་དགོས་པ་ཡིན་ཀྱང་ཐལ་ཟིན་དེར་ཟད། ད་དུང་ཡང་ཚད་ལྡན་སྒྲུབ་མཁན་མང་པོ་སྲིད་ན་ཁོལ་བུ་རེ་བདེ་བ་ལ་ཕན་ནམ་སྙམ་ནས་བྲིས་པ་དགེ་བར་གྱུར་ཅིག། །།