ཞལ་གདམས།
ཨོཾ་སྭཱ་སྟི། འདུ་བྱེད་སྟོན་ཀའི་སྤྲིན་བཞིན་གཡོ་བ་དང༌། །ཚེ་སྲོག་ནམ་མཁའི་གློག་ལྟར་མི་བརྟན་ཞིང༌། །ལས་ནི་གྲིབ་མ་བཞིན་དུ་རྗེས་སུ་འགྲོ། །ལང་ཚོ་ལྡན་པའི་ལུས་ཀྱང་འཇིག་འགྱུར་བས། །འཇིག་རྟེན་འདི་དང་གཞན་དུ་ཕན་ངེས་པའི། །དགེ་བའི་ལས་ལ་རྩེ་གཅིག་འགྲུས་པར་འཚལ། །ལས་ནི་ཆུང་ཡང་འབྲས་བུ་རྒྱ་ཆེ་ན། །དགེ་སྡིག་ཆེན་པོ་བསགས་ལ་སྨོས་ཅི་དགོས། །ནམ་ཞིག་ཤ་ཁྲག་ཕུང་པོ་འགྱེས་པ་དང༌། །སེམས་ཉིད་སྐྱེ་བ་གཞན་དུ་འཕོ་བའི་ཚེ། །
དམ་པའི་ཆོས་ལས་སྐྱབས་གཞན་མ་མཆིས་ཤིང༌། །སྡིག་ལས་གཞན་དུ་དགྲ་ཡང་མ་མཆིས་སོ། །འདུས་པའི་ཐ་མ་འབྲལ་པ་ཆོས་ཉིད་ལགས། །བསླང་བའི་མཐའ་ནི་འགྱེལ་བར་འགྱུར་བ་དང༌། །བསགས་པའི་ཐ་མ་རིང་པོར་མི་ཐོགས་འཛད། །གསོན་མཐའ་འཆི་བ་ཡིན་ཞེས་རྒྱལ་བས་གསུངས། །འདྲེན་པ་རྡོ་རྗེའི་སྐུ་ཡང་མི་བརྟན་ན། །སོ་སོའི་སྐྱེ་བོ་རྣམས་ནི་སྨོས་ཅི་འཚལ། །རི་རབ་གླིང་བཞིར་བཅས་པའི་འཇིག་རྟེན་འདིའང༌། །ཐལ་བ་ཙམ་ཡང་མི་ལུས་འཇིག་པར་གསུངས། །དེ་བས་རང་ཉིད་སྐྱེ་བ་དཔག་མེད་དུ། །རབ་དྲག་དམྱལ་བའི་སྡུག་བསྔལ་མྱོང་བ་དང༌། །ལྷ་མིའི་དཔལ་གྱི་བདེ་སྐྱིད་ཉམས་པ་སོགས། །སྡུག་བསྔལ་མྱ་ངན་འཁྲུག་དང་ཡིད་མི་བདེ། །གྲངས་མེད་ཚད་མེད་མྱོང་ཞིང་དུས་འདས་ཀྱང༌། །ད་དུང་སྡུག་བསྔལ་འཁོར་ལོ་བསྐོར་བ་འདི། །ཆུ་གཉེར་གྲངས་བཞིན་ཟིན་པ་མི་གདའ་བས། །ཚུལ་འདི་དགོངས་ལ་མྱ་ངན་མི་འཚལ་ཏེ། །སངས་རྒྱས་ཐོབ་པར་འདོད་པའི་སེམས་བསྐྱེད་དང༌། །གཞན་ལ་ཕན་པར་བསམ་པའི་སྙིང་རྗེ་ཡིས། །དགེ་བའི་ལས་ལ་རྒྱ་ཆེར་འབད་པར་འཚལ། །འབྲས་བུའི་དོན་ཆེན་མཆོག་ལ་སོམ་ཉི་མེད། །ལོ་ཟླ་མང་པོར་སྡུག་བསྔལ་རྒྱུར་འགྱུར་ན། །ཉིན་གཅིག་སྐྱིད་པས་སྐྱིད་གོ་མི་ཆོད་ལྟར། །
ཚེ་རབས་ཀུན་ཏུ་སྡུག་བསྔལ་རྒྱུར་འགྱུར་བའི། །སྡིག་པས་ཚེ་འདིར་བདེ་ནའང་དེ་དང་འདྲ། །ཚེ་འདི་ཡུན་ཐུང་ལོ་ཟླ་འགའ་ཞིག་ཡིན། །འཇིག་རྟེན་ཕ་རོལ་ཚད་བཟུང་མེད་པའི་ཕྱིར། །སྐྱེ་བ་གཞན་དུ་སྡུག་བསྔལ་མི་འབྱུང་ཞིང༌། །དགེ་བའི་ཐབས་སུ་དགེ་སྡིག་བླང་དོར་བྱ། །ཚེ་འདིའི་གྲོགས་པོ་ཇི་ལྟར་བཟང་ཡང་འབྲལ། །དམ་ཆོས་སྒོམས་ན་ནམ་ཡང་འབྲལ་མི་སྲིད། །འཁོར་བའི་དཔོན་འདི་ཇི་ལྟར་བཟང་ཡང་བསླུ། །སྐྱབས་གནས་དཀོན་མཆོག་གསུམ་ལ་བསླུ་བ་མེད། །ཟས་ནོར་ལོངས་སྤྱོད་འཛོམ་ཡང་ཤུལ་དུ་ལུས། །བསགས་པའི་ལས་ནི་ནམ་ཡང་འབོར་མི་སྲིད། །ལང་ཚོ་ཕུན་སུམ་ཚོགས་པའང་རྒས་པས་འཇོམས། །དམ་པའི་ཆོས་ལ་ནམ་ཡང་རྒས་པ་མེད། །འཇིག་རྟེན་བྱ་བ་འགྲུབ་ཀྱང་ཟིན་པ་དཀོན། །ཆོས་ལ་འབད་ན་ལས་སྟབས་མྱུར་དུ་ཟིན། །འཁོར་བའི་བྱ་བ་ལེགས་པའང་ཐ་མར་བརླག །དམ་པའི་ཆོས་ཀྱི་འབྲས་བུ་ཉམས་མི་སྲིད། །དེ་ལྟར་ལགས་པས་ཚུལ་འདིས་ཀྱང༌། །ངེས་པར་ཐུགས་ནི་རབ་བསྐུལ་ཏེ། །བདག་ཉིད་དགེ་ལ་གནས་པ་དང༌། །སེམས་ཅན་བདེ་བའི་ཐབས་ཀྱང་འཚལ།། །།