བློ་ལྡན་ཀརྨ་ཆོས་བཟང་ལ་གདམས་པ།
ཨོཾ་སྭཱ་སྟི། གང་ཞིག་སྲིད་ཞིའི་ཕུན་ཚོགས་བདུད་རྩིའི་འབྲས། །དལ་འབྱོར་དཔག་བསམ་ལྗོན་པའི་རྩེར་ཆགས་པ། །འདི་ལས་འདོད་དགུ་ཅི་ཡང་བླང་བར་རིགས། །གཞན་དུ་འདི་འདྲ་རྙེད་པ་བརྒྱ་ལ་ཞིག །ཧ་རི་ཙནྡན་དྲིས་རྒྱས་སུམ་རྩེན་ནགས། །ཅི་འདོད་དགའ་བས་རོལ་པའི་རྩེ་ས་ཡང༌། །དབང་མེད་བོར་ཏེ་ལོ་མ་རལ་གྲིའི་ཚལ། །བསྐལ་པར་བསྟེན་པ་འདི་ནི་ལས་ཀྱི་མཐུ། །རབ་འབར་གསེར་གྱི་སྤོ་ལ་གནས་བཅས་པའི། །རྣམ་ཐོས་བུ་དང་དབང་པོའི་འབྱོར་པ་ཡང༌། །དུས་ཀྱི་དབང་གིས་སྟོན་ཀའི་ཆུ་འཛིན་བཞིན། །དེངས་པར་འགྱུར་བ་འདི་ལ་སུ་ཡིས་བཟློག །རིག་འཛིན་དགའ་མའི་ལག་པད་ཀྱིས་བཏུད་པའི། །འཆི་མེད་སྦྲང་རྩིའི་
དོག་པས་མི་སྤོགས་པ། །བསམ་བཏན་བདུད་རྩིའི་དགའ་སྟོན་ལོངས་སྤྱོད་ཅན། །དེ་དག་གཡུང་དྲུང་དཔལ་ལ་བདེ་བར་རོལ། །འཇིག་རྟེན་ཆོས་བརྒྱད་སྒྱུ་མའི་སྐྱེད་ཚལ་ན། །ངུར་སྨྲིག་སྤུ་སྡུག་རྒྱས་པའི་ཀོ་ཀི་ལ། །དམ་ཆོས་སྙན་སྒྲོགས་སྲིད་པའི་སྙེ་མ་ལ། །ཅི་དགར་ཆགས་མོད་དུས་གཞན་བསམ་པར་རིགས། །ཚིག་འཕྲེང་འདབ་ཤོག་རྒྱས་པའི་རྐང་དྲུག་པ། །རང་བཟོ་དཔལ་འབྲས་སྨིན་པའི་ཚོགས་ལ་འཁྲུལ། །འདབ་བརྒྱའི་ཚལ་ཞེས་རིངས་པར་རྒྱུག་བྱེད་ཀྱི། །ཟབ་དོན་རོ་མཆོག་ནམ་ཡང་ཐོབ་པ་མེད། །རྒྱུ་འབྲས་རྟེན་འབྲེལ་རི་མོ་བཀྲ་བ་འདི། །རང་བཞིན་གདོད་ནས་རྣམ་པར་དག་པའི་རྩལ། །ས་གཞི་རི་བཅས་ནགས་ཚལ་ཇི་སྙེད་གཟུགས། །ཅི་ཡང་འཆར་མོད་རབ་དྭངས་མཚོ་ཡི་ངང༌། །མཚན་ལྡན་བླ་མར་མོས་གུས་ཡིད་བཞིན་གྱི། །ནོར་བུ་འདི་ལས་ལེགས་བྱས་ཅི་ཡང་འབྱུང༌། །ཤིན་ཏུ་སྟོབས་ལྡན་བྱ་བའི་མཐུ་ལས་ནི། །མཐའ་དག་ཕྲ་མོ་འགྲུབ་པ་དངོས་པོའི་གཤིས། །རང་བཞིན་གདོད་མའི་སེམས་འདི་སངས་རྒྱས་ཏེ། །དབུལ་པོའི་ཁྱིམ་འོག་རིན་ཆེན་འབྱུང་ཁུངས་ལྟར། །ཐབས་གཞན་ཅིས་ཀྱང་མཚོན་པར་མི་ནུས་པ། །མཚོན་འདི་བྱིན་རླབས་སྟོབས་ཀྱི་མཐུ་དཔལ་ཡིན། །དེ་སྐད་སྨྲ་པ་ཏཱ་ར་ནཱ་ཐ་ཡིས། །བློ་ལྡན་
ཀརྨ་ཆོས་བཟང་ཞེས་བྱ་བ། །དེ་ལ་དམ་པའི་ཆོས་ལས་བརྩམས་པ་ཡི། །བཀའ་མཆིད་ཉུང་ངུ་ཙམ་ཞིག་སྨྲས་པ་ལགས།། །། མངྒལཾ་བིསྟཱ་ར་ཀུ་རུ། དགེའོ། །