ཀུན་དགའ་རྒྱལ་མཚན་ལ་གདམས་པ།
ན་མོ་གུ་རུ། རྒྱལ་བ་སངས་རྒྱས་ཀུན་གྱི་དངོས། །མཚན་ལྡན་རྗེ་ལ་གུས་པས་འདུད། །བདག་ཅག་སློབ་མར་བཅས་པ་ལ། །ད་ལྟ་བྱིན་གྱིས་
བརླབ་ཏུ་གསོལ། །ཕྱོགས་བཅུ་ནམ་མཁའི་མཐའ་གཏུགས་པའི། །འགྲོ་དྲུག་དྲིན་ཅན་ཕ་མ་ལ། །བྱས་པ་ཤེས་བཞིན་དྲིན་བཟོ་བའི། །བྱམས་དང་སྙིང་རྗེ་འབད་དེ་སྒོམས། །དམ་ཆོས་སྤྱོད་པའི་མཐུ་ལྡན་པ། །རྙེད་དཀའ་མི་ལུས་རིན་ཆེན་འདི། །སྟོན་ཀའི་སྤྲིན་བཞིན་ཡིད་བརྟན་མེད། །ནམ་འཆི་ཆ་མེད་བསམ་པར་འཚལ། །ཤིན་ཏུ་འབད་པའི་ལོངས་སྤྱོད་དང༌། །འབྲལ་ཐབས་མེད་པའི་བདོག་པ་ཀུན། །དབང་མེད་དུ་འཇོག་པ་མཐོང་ཙ་ན། །རྟག་འཛིན་ཅན་རྣམས་ཡི་རེ་མུག །དམ་ཆོས་ཉམས་ལེན་མ་གཏོགས་པ། །ལས་ཐབས་ཐམས་ཅད་མདོ་མེད་ཡིན། །མཚན་ལྡན་བླ་མ་ལས་གཞན་པའི། །བློ་གཏད་ཐམས་ཅད་སླུ་རྡོ་ཡིན། །ད་རེས་ཚེ་ཐུང་འདི་འདྲ་ལ། །ཚེ་འདིའི་ཆེད་ཀར་གཏོང་གཏོང་ནས། །ངན་སོང་གི་སྡུག་བསྔལ་མི་ཟད་རྒྱུ། །ཆོས་མིན་གྱི་བྱ་བ་བྱེད་ཁོམ་མམ། །དམ་ཆོས་སུ་མིང་བཏགས་མི་ཆོས་དང༌། །གཞན་དོན་དུ་མིང་བཏགས་ཀྱི་རང་འདོད་དང༌། །ཆོས་གཟུགས་སུ་བྱས་པའི་ཆོས་མེད་གསུམ། །སེམས་ཅན་སླུ་བའི་བརྫུན་ཁྲིགས་ཡིན། །བློ་སྙིང་ནས་ཆོས་སུ་སོང་བ་འཚལ། །བྱམས་སྙིང་རྗེ་གཏིང་ནས་འབྱོངས་པ་འཚལ། །དབྱིངས་སྤྲོས་མེད་ལ་མཉམ་
པར་འཇོག་པ་འཚལ། །དོན་དེ་ཙམ་ཐུགས་ལ་འཇོག་པ་ཞུ།། །།ཞེས་པའང་རྒྱལ་ཁམས་པ་ཏཱ་ར་ནཱ་ཐས་ཚོགས་བྱེ་རྫིངས་ཀྱི་གཏན་གཅིག་པ་ཀུན་དགའ་རྒྱལ་མཚན་ལ་གདམས་པའོ། །མངྒལཾ། །