ལས་སྟོད་ཀྱི་གནས་སྐོར་བ་འདྲ་ལ་གདམས་པའོ། །
༈ ཨོཾ་སྭཱ་སྟི། ངོ་མཚར་ཅན་གྱི་བླ་མ་ལ། །གདུང་བ་དྲག་པོས་གསོལ་བ་འདེབས། ཁྱེད་རྒྱལ་ཁམས་བསྐོར་བའི་རྣལ་འབྱོར་ཀུན། །དོན་འདི་བཞིན་ཐུགས་ལ་བཞག་པ་ཞུ། །ད་རེས་ཆོས་དང་མཇལ་བ་དང༌། །
དགོས་སུ་བླ་མ་མཆོག་ལ་བསྟེན། །ལར་སྐལ་པ་བཟང་སྟེ་ཨ་ལ་ལ། །དུས་ཡུན་རིང་དགེ་བ་བསགས་གྱུར་ན། །གནད་མཆོག་གྱུར་བླ་མའི་བྱིན་རླབས་རྙེད། །བསྐྱེད་རྫོགས་དང་བཟླས་བརྗོད་ལ་སོགས་པ། །རླབས་ཆེན་གྱི་དགེ་བ་ཕྱོགས་བཅུར་སྤེལ། །དགེ་བ་ལ་འཛིན་ཞེན་མི་འཚལ་བར། །ལྷུག་པའི་ངང་ནས་དགེ་རྩ་བསོགས། །དམིགས་མེད་ཀྱི་ཚུལ་དུ་སྨོན་ལམ་ཐོབ། །ཞིང་གནས་ཆེན་རྣམས་སུ་འགྲོ་བ་ན། །ཐོ་ཅོ་དང་འཁྲུག་ལོང་མི་འཚལ་ཞིང༌། །ཉམས་ལེན་གྱི་རྟེན་འབྲེལ་སྒྲིག་པ་ཞུ། །གང་སྣང་ལྷ་སྐུའི་ཉམས་ལེན་མཛོད། །དག་སྣང་ཕྱོགས་མེད་དུ་འཆར་བའི་རྟེན་འབྲེལ་ཡོད། །སྔགས་ཀྱི་བཟླས་བརྗོད་ཀྱང་ཅི་ནུས་འཚལ། །ངག་བདེན་ཚིག་འགྲུབ་པའི་རྟེན་འབྲེལ་ཡོད། །གང་དགོས་ཀྱི་འདུན་པ་དུང་ངེ་བ། །ཕཊ་ཅེས་རང་སར་བཤིག་ལས་ཞོག །སྣང་བ་དབང་དུ་འདུ་བའི་རྟེན་འབྲེལ་ཡོད། །རང་འདོད་མེད་པའི་སྨོན་ལམ་ཐོབ། །འགྲོ་དོན་ཕྱོགས་མེད་དུ་འཆར་བའི་རྟེན་འབྲེལ་ཡོད། །གང་སྣང་རང་སེམས་ཀྱི་ངོ་བོ་ལ་དྲན་པ་སྐྱོངས། །རྟོགས་པ་མངོན་འགྱུར་གྱི་རྟེན་འབྲེལ་ཡོད། །ཉོན་མོངས་གང་སྐྱེས་ལ་ངོ་ཤེས་འཚལ། །ཉོན་མོངས་ཅན་ཆོས་ལ་འཛུད་པའི་རྟེན་འབྲེལ་ཡོད། །རྩ་རླུང་ཐིག་ལེའི་རྣལ་འབྱོར་སྒོམ། །
མ་མཁའ་འགྲོས་བྱིན་རློབ་ཀྱི་རྟེན་འབྲེལ་ཡོད། །གང་སྡོད་དུ་མཆོད་གཏོར་ལ་བརྩོན་པ་ཞུ། །བར་ཆད་བཟློག་པའི་རྟེན་འབྲེལ་ཡོད། །མོས་གུས་ཀྱི་གསོལ་འདེབས་ཡང་ཡང་བྱ། །ཆོས་བརྒྱུད་འཕེལ་བའི་རྟེན་འབྲེལ་ཡོད། །དོན་དེ་དག་མཚོན་བྱེད་ཙམ་ཡིན་པས། །རྟེན་འབྲེལ་སྒྲིག་ལུགས་ཤེས་ཏེ་འཚལ། །ཕྱི་ནང་གི་རྟེན་འབྲེལ་སྒྲིག་ཤེས་ན། །དགོས་འདོད་དངོས་གྲུབ་ཆར་ལྟར་འབབ།། །།ཅེས་པའང་ཏཱ་ར་ནཱ་ཐས་ཉེ་བར་གདམས་པའོ། །དགེ་ལེགས་འཕེལ། །