ས་སྐྱོང་མི་དབང་ཆེན་པོའི་བཀས་བསྐུལ་ནས་ཏཱ་ར་ནཱ་ཐས་སྨྲས་པ།
ན་མོ་གུ་ར་ཝེ། དྲི་བྲལ་མཁའ་ལ་ཉིན་བྱེད་ཤར་བ་ལྟར། །སྒྲིབ་བྲལ་ཡེ་ཤེས་ཤེས་བྱ་ཀུན་ཁྱབ་དེ། །སྤྲོས་བྲལ་ཐུགས་རྗེའི་རོལ་པར་རྟག་ཤར་བ། །མཚུངས་བྲལ་རྗེ་བཙུན་བླ་མས་བྱིན་གྱིས་རློབས། །ཤེས་བྱའི་མཚན་ཉིད་བསམ་གྱིས་མི་ཁྱབ་ཅིང༌། །ཐ་སྙད་བརྗོད་པ་ཟད་མེད་དཔག་ཏུ་མེད། །ལམ་གྱི་སྟོན་ཚུལ་རྣམ་པ་མང་ན་ཡང༌། །སྙིང་པོ་གནད་ནས་བཟུང་ན་འདི་ལྟར་ལགས། །དད་པ་ཅན་ལ་སྡིག་པའི་གོ་སྐབས་མེད། །ངེས་འབྱུང་ཅན་ལ་ཞེན་ཆགས་ལེ་ལོ་མེད། །མོས་གུས་ཅན་ལ་དཀོན་མཆོག་འདུ་འབྲལ་མེད། །སྙིང་རྗེ་ཅན་ལ་རང་འདོད་ཁོང་སྲན་མེད། །དཀར་ནག་ལས་འབྲས་མི་སླུ་ངེས་ཤེས་བསྐྱེད། །ཚིག་བཤད་མཁས་ཤིང་ཁ་ལྟ་མཐོ་བ་དང༌། །འདུག་ཚུགས་བཟང་ཡང་སྡིག་ལ་མ་འཛེམས་ན། །ངན་སོང་གསུམ་གྱི་གཏིང་རྡོ་ཐང་མ་ཡིན། ཁ་དྲག་དཔུང་འཛོམ་ལོངས་སྤྱོད་ལྡན་པ་ཡང༌། །ལོ་ཟླ་ཞག་འགའ་ཙམ་གྱི་ཕོ་སོ་ཡིན། །ཕ་རོལ་འགྲོ་ཚེ་དབང་མེད་ལས་ཀྱིས་འཁྲིད། །རློམ་སེམས་ཅན་ལ་ཁ་ཉེན་སྐབས་དེར་འབབ། །དགྲ་གཉེན་ནོར་ཁང་གཡོག་
འཁོར་ལ་སོགས་པ། །རང་དབང་འབྱོར་སྐབས་དག་ལ་སྦྱར་ན་ལེགས། །ངཻས་པར་འབྲལ་ལ་མྱུར་དུ་འོང་ངེས་པས། །དབང་མེད་ཇེ་བྲལ་དེ་ལ་ཕན་ཡོན་ཅི། །ལྷ་མིའི་དཔལ་འབྱོར་ཐོབ་ཀྱང་ཚིམ་པ་མེད། །ཉོན་མོངས་དུག་གསུམ་རྒྱས་པས་ལས་ངན་བསོག །མཐོ་རིས་ཐོབ་དུས་དམྱལ་བའི་བྲེ་ཁ་འགེངས། །བདེ་བ་ཆུང་ངུས་སྡུག་བསྔལ་ཆེན་པོ་བསྒྲུབ། །ཨེ་མ་འཁོར་བའི་རང་བཞིན་དེ་འདྲ་ལ། །ལེགས་པར་བསམས་ན་སུ་ཞིག་ཆགས་པར་འགྱུར། །གྲོགས་དང་ཉེ་དུས་ཕན་པའི་རེ་མེད་ཀྱིས། །སྐྱབས་སུ་བཟང་བ་བླ་མ་དཀོན་མཆོག་ཡིན། །མོས་གུས་ཞན་རྣམས་རང་བློའི་མུན་པས་བསྒྲིབས། །ཡིད་ཆེས་མོས་གུས་སྙེམས་འཁྲིགས་བྲལ་བ་བསྒོམ། །དེ་ལས་ཕུན་ཚོགས་འབྲས་བུ་ཀུན་འབྱུང་སྟེ། །ཆོས་ཀུན་རང་གི་བསམ་པའི་རང་གཟུགས་ཡིན། །ཆོས་ཀྱི་རྩ་བ་བསམ་པའི་འགྲོ་ལྡོག་ལགས། །སྒོ་གསུམ་ཆོས་ལ་འབད་པར་རློམ་ན་ཡང༌། །འཇིག་རྟེན་འཕྲལ་བདེའི་རང་འདོད་མུན་ནག་ན། །ཕྱོགས་ཞེན་ཆོས་ཀྱི་ཆགས་སྡང་འབྱུང་པོ་རོལ། །རང་སེམས་གནས་ལུགས་མ་རྟོགས་ཉོན་མོངས་འཁྲུགས། །ལས་ངན་དབང་གིས་འགྲོ་དྲུག་སྲིད་པར་འཁྱམས། །སྒྱུ་མའི་འཁྲུལ་བས་སེམས་ཅན་འདི་རྣམས་བསླུས། །ང་རྒྱལ་ཁེངས་པ་མི་བྱ་སྙིང་རྗེ་སྒོམས། །
ད་ནི་སྙིང་པོའི་གནད་ལ་གདམས་པར་བྱ། །རང་སེམས་སྤྲོས་བྲལ་བྱ་བ་ལོགས་ན་མེད། །ཐ་མལ་ཤེས་པ་བཟོ་བཅོས་མེད་པར་སྐྱོངས། །གང་ཤར་རྗེན་པ་དེ་ལ་རང་སོ་ཚུགས། །ཆེད་དུ་བཅོས་པའི་ལྟ་སྒོམ་བཟང་བཟང་པོ། །བློ་ཡིས་བྲིས་པའི་རི་མོ་ཟར་ཟིར་ཡིན། །རང་གི་སྡོད་ལུགས་སྒོམ་དུ་མ་ཤར་ན། །ལོགས་ནས་ཉམས་ལེན་ཚོལ་བ་དབུལ་ཤིང་འཕོངས། །རང་དུས་ཉིད་དུ་རང་གྲོལ་མ་ཤེས་ན། །རྗེས་འདེད་སྐྱེལ་མ་ཙམ་ཏེ་བྱེད་སྐད་ཡིན། །འཆར་སྒོ་སྟོང་པའི་རྩལ་དུ་མ་རིག་ན། །རྒྱས་འདེབས་ཙམ་གྱི་ཐལ་གཡོགས་དེ་ཡིས་ཅི། །མ་རྟོགས་ཁ་ཡན་སྨྱོན་པའི་རྣམ་ཐར་ལ། །མ་བཅོས་སོ་མར་འཁྲུལ་ན་རྩ་བ་འཆུག །ངོས་གཟུང་མེད་པའི་རང་ངོ་མ་མཐོང་ན། །གནས་པ་བཟང་ཡང་གཏི་མུག་མུན་འཐོམས་ཡིན། །བརྗོད་བྲལ་སེམས་ཀྱི་རང་རྩལ་འགག་མེད་དེ། །ཕྱིར་ལྟས་མ་ཤོར་རང་གསལ་ངང་ལ་ཞོག །གང་ཤར་དེ་ཀས་ཆོག་ན་སྒོམ་གྱི་མཆོག །འོན་ཀྱང་དོན་མེད་ལུས་ན་ལུང་མ་བསྟན། །རང་རིག་ནམ་ཡང་འཁྲུལ་ཏུ་མ་འཇུག་ཅིག །འཁྲུལ་ཀྱང་ཆོག་ན་བདེ་བའི་ཡང་རྩེ་ཡིན། །རྟག་ཏུ་བྱ་བྱེད་བདག་པོ་མེད་པར་ཞོག །བྱས་ཀྱང་བྱ་རྒྱུ་ཟད་ན་སྤྲོས་བྲལ་ཡིན། །སྒྲ་ཕྱིར་འབྲངས་པའི་རྟོག་དཔྱོད་
མི་འཚལ་ཏེ། །བྱེད་བློ་རང་སར་གྲོལ་ན་མཚན་མེད་ཡིན། །གཞག་ཐབས་རྒྱལ་པོ་ལྷུག་པ་རང་དགའ་ལགས། །དབྱིངས་ཉིད་རྩོལ་པར་རག་ན་བཟོ་མེད་མཆོག །གནས་སམ་འགྱུ་ཡང་ཡེངས་མེད་ཐབས་ཀྱི་མཆོག །ཡེངས་པའི་རང་མཚང་རིག་ན་གནས་པའི་མཆོག །དབྱིངས་ལས་རང་ཤར་ཙམ་གྱི་རྣམ་རྟོག་དང༌། །བྱ་བྱེད་རྩོལ་པར་ཤར་ནས་རང་སར་ཐིམ། །དེ་ལྟར་རྟོགས་ན་མ་བཅོས་སོ་མ་ཡང༌། །རང་སར་སངས་ཏེ་བཅོས་དང་མ་བཅོས་མེད། །བསྒོམ་བྱ་སྒོམ་བྱེད་རང་སར་སྟོང་པ་ན། །སྣང་བ་ཐམས་ཅད་སྒོམ་དུ་ཤར་ཞེས་གྲགས། །ད་ནི་དེ་དག་གནང་དུ་འགྲོ་བ་ལའང༌། །ཉམས་ལེན་ཆོས་ཀྱི་བཟོ་ཐབས་ལེགས་པར་འཚལ། །ཨུ་ཚུགས་འཚོང་བའི་ཐག་ཆོད་ཡུས་ཡུས་པོ། །མདོ་མེད་པོ་གཅིག་གོལ་སའི་གཡང་ལ་ལྷུང༌། །ཐ་མལ་ལུས་ལ་གཅེས་འཛིན་སྤོང་བ་དང༌། །སྣང་བ་ཀུན་ལ་བདེན་འཛིན་བཤིག་པ་གཅེས། །བདེན་ཞེན་ཨ་མཐས་ཇེ་དམ་གོང་འཕེལ་ཞིག །གནས་ལུགས་རྟོགས་པར་འདོད་པ་ཤིན་ཏུ་འཁྲུལ། །ཕྱོགས་ཆ་ཟད་པའི་བྱམས་དང་སྙིང་རྗེ་ཡིས། །ཅི་བྱེད་གཞན་གྱི་དོན་དུ་སྦྱར་བར་བྱ། །འགལ་ཕྱོགས་དགྲ་ལ་ཉེས་འདོད་ངན་སེམས་ཅན། །ཞེ་སྡང་ལམ་འཁྱེར་ཟེར་ཡང་འུད་གོག་ཡིན། །
འདོད་ཞེན་ཉེ་བའི་སྲེད་པས་མི་འཆིང་བར། །ཡིད་འོང་སེམས་ཀྱང་རྨི་ལམ་ལྟ་བུར་ལྟོས། །འདི་ནི་ལྷ་སྟེ་བདག་ལ་ཕན་འདོགས་པས། ཁྱེད་ཀྱིས་སྐྱོབས་ཞེས་རེ་བ་དུང་དུང་དང༌། །འདྲེ་འདིས་བདག་ལ་ངེས་པར་གནོད་དོ་སྙམ། །གནོད་སེམས་འཇིགས་སྐྲག་དོགས་པའི་འདམ་དུ་བྱིང༌། །དེ་དག་སེམས་ཀྱི་སྣང་ཆ་མཉམ་པོ་ལ། །བླང་དོར་དགའ་སྡུག་རང་གིས་རང་ཉིད་བསླུས། །ནད་དང་ཉམས་ང་ཆགས་ཆེ་བྱུང་གིན་དོགས། །མི་འདོད་སྡུག་བསྔལ་སངས་ཏེ་འགྲོ་ལ་རེ། །ཆོས་ཀྱི་འབྲས་བུ་ཚེ་འདིའི་བདེ་སྐྱིད་འདོད། །འདོད་པ་མ་གྲུབ་དཀོན་མཆོག་གསུམ་ལ་འཁང༌། །ཚེ་འདིའི་སྐྱིད་སྡུག་སྔོན་གྱི་ལས་ལས་བྱུང༌། །གང་བྱུང་ཆོག་ཤེས་བྱས་ན་ཞེ་བློ་བདེ། །ཕྱྀན་ཆད་ཆོས་ཀྱི་ཕན་ཡོན་བསླུ་བ་མེད། །བློ་སྣ་གཅིག་ཏུ་དྲིལ་ལ་ཡིད་ཆེས་སྐྱེད། །རང་ལ་ཉམས་མྱོང་ཡོན་ཏན་ཅུང་ཟད་ཙམ། །སྐྱེས་ན་ང་རྒྱལ་འགོང་པོ་རྗེས་སུ་འབྲང༌། །དེ་ལ་རང་ངོ་ཤེས་པའི་ཐོག་རྫིས་དང༌། །ང་རྒྱལ་ཡོད་དོན་མེད་པའི་རྒྱུ་མཚན་བསམ། །སྔོན་གྱི་སྡིག་ལས་ཟད་པར་འགྱུར་བའི་ཕྱིར། །སྡུག་བསྔལ་བྱུང་ན་འདོད་ཐོག་གོ་བཅད་སྙམ། །བློས་འདིས་བཅོས་པ་མ་གཏོགས་སྡུག་བསྔལ་ནི། །དངོས་པོར་
མ་གྲུབ་རང་ལ་ཆེར་ཏེ་ལྟོས། །དོན་ལ་སྡུག་བསྔལ་གཞི་མེད་རྩ་བྲལ་ཡིན། །ཀུན་རྫོབ་ཏུ་ནི་ལས་སྣང་གང་ཤར་འདི། །བཅས་བཅོས་མི་བྱ་རེ་དོགས་མེད་ན་བདེ། །འོན་ཀྱང་དྲིན་ཅན་བླ་མར་གསོལ་བ་ཐོབ། །མདོར་ན་ལས་འབྲས་ཆོས་ལ་ཡིད་ཆེས་ཤིང༌། །དཀོན་མཆོག་གསུམ་ལ་དད་པ་རྒྱུན་མི་འཆད། །གང་ལའང་མ་ཆགས་རང་ངོ་རང་ཤེས་རྩལ། །སྒོ་གསུམ་ལོངས་སྤྱོད་དགེ་བ་བསོག་རྩི་ཞིང༌། །རྟག་ཏུ་གཞན་ཕན་བསམ་པ་བཟང་པོ་འཆང། །ལྔ་པོ་དེ་ལ་ཆོས་ཀྱི་མདོ་ཀུན་འདུས། །སྨོན་ལམ་དག་པས་རྟག་ཏུ་མཚམས་སྦྱོར་ཞིང༌། །རེ་དོགས་སྤོང་དང་སྐྱབས་གནས་དམ་པ་མཆོད། །ཆོས་འདི་གསུམ་ཡང་གནད་ཀྱི་དོན་ཆེན་ཡིན། །དེ་ལྟར་ཆ་ཙམ་གདམས་པ་འདི་དག་ཀྱང༌། །ཐུགས་སུ་བྱོན་ན་གཏན་གྱི་འདུན་གྲོས་ཡིན། །བས་ན་བླུན་པོའི་རང་མཚང་ལགས་པར་དགོངས། །འདི་ལས་ཅི་སྟེ་དགེ་བར་གྱུར་སྲིད་ན། །སྐྱེ་བོ་ཀུན་ལ་ཐར་པའི་རྒྱུ་རུ་བསྔོ། །བློ་ལྡན་དམ་པ་ཁྱེད་ཀྱི་ཐུགས་མཚོ་ཡང༌། །དམ་ཆོས་བདུད་རྩིའི་ཆུ་བརྒྱས་གང་བར་ཤཽག། །།ཅེས་པའང་རིག་སྔགས་ཀྱི་འཁོར་ལོས་བསྒྱུར་བ། ས་སྐྱོང་མི་དབང་ཆེན་པོའི་བཀས་བསྐུལ་ནས། ཏཱ་ར་ནཱ་ཐས་སྨྲས་པའོ། །དགེ་ལེགས་འཕེལ།། །།