བླ་མ་ཡི་དམ་ཆོས་སྐྱོང་གི་བསྐང་གསོ་བདེ་སྟོང་རོལ་པ།
བླ་མ་ཡི་དམ་ཆོས་སྐྱོང་གི་བསྐང་གསོ་བདེ་སྟོང་རོལ་པ་ཞེས་བྱ་བ་བཞུགས།
ན་མཿཤྲཱི་ཀཱ་ལ་ཙཀྲ་ཡ། བླ་མ་ཡི་དམ་ཆོས་སྐྱོང་གི་བསྐང་གསོ་བདེ་སྟོང་རོལ་པ་ནི། བསལ་གཏན་ནང་མཚམས་བྱེད་པ་དང༌། །རྒྱུད་སྡེ་འཆད་ཉན་དབང་བསྐུར་རིགས། །ཆོས་ལྡན་རྨི་ལམ་འཁྲུགས་པའམ། །རྣལ་འབྱོར་ཉམས་འཆགས་གསོ་བ་དང༌། སེམས་ཅན་ཚོགས་གཉིས་སྤེལ་བའི་ཕྱིར། །རྣལ་འབྱོར་ལྷ་ཡི་ང་རྒྱལ་གྱིས། །དབྱངས་དང་རྔ་བརྡུང་འདི་སྐད་དོ། །ཧཱུཾ། སྤྲོས་བྲལ་ཆོས་ཀྱི་དབྱིངས་ལས་མ་གཡོས་ཀྱང༌། །གཟུགས་སྐུ་མཁའ་ཁྱབ་སེམས་ཅན་འདྲེན་པའི་ཕྱིར། །དུས་གསུམ་བཀའ་བརྒྱུད་བླ་མ་ཡི་དམ་ལྷ། །མཁའ་འགྲོ་ཆོས་སྐྱོང་ཚོགས་རྣམས་
གཤེགས་སུ་གསོལ། །མདུན་ཕྱོགས་འཇའ་ཚོན་པ་དྲྭ་འཁྱིལ་བའི་དབུས། །སྣ་ཚོགས་པདྨ་འདབ་སྟོང་རྒྱས་པའི་སྟེང༌། །སེངྒེ་བརྒྱད་བཏེགས་རིན་ཆེན་སྣ་ཚོགས་ཁྲི། །ཉི་ཟླ་པདྨའི་གདན་ལ་བཞུགས་སུ་གསོལ། །ཁྱེད་ལ་ཕུན་ཚོགས་མཆོད་པ་འབུལ་བ་ནི། །ལྟ་སྤྱོད་རྣམ་དག་མཆོད་ཡོན་ཀུན་ནས་འཁྱིལ། །ཐོས་བསམ་སྒོམ་གསུམ་དག་པའི་ཞབས་བསིལ་མངར། །སྒོ་གསུམ་དགེ་བཅུའི་མེ་ཏོག་སིལ་མར་བཀྲམ། །སྡོམ་
གསུམ་དག་པའི་སྤོས་མཆོག་སྤྲིན་དུ་འཁྲིགས། །བསླབ་གསུམ་ཡོན་ཏན་ཉྀ་འོད་མར་མེ་འབར། །ཚོགས་གསུམ་རྒྱ་མཚོ་སྤོས་ཆུའི་དྲི་མཆོག་བལྟམས། །འཁོར་གསུམ་དག་པའི་རོ་བརྒྱ་ཞལ་ཟས་སྦྱོར། །ཐེག་གསུམ་རོལ་མོའི་སིལ་སྙན་སྣ་ཚོགས་དཀྲོལ། །བཀའ་འཁོར་གསུམ་གྱི་རྔ་ཆེན་འཁར་རྔ་བརྡུང༌། །སྡེ་སྣོད་གསུམ་གྱི་དུང་སྒྲ་ཁམས་གསུམ་སྒྲོགས། །རྒྱུད་སྡེ་བཞི་ཡི་བ་དན་མཁའ་ལ་ཕྱར། །རྫོགས་ལྡན་ཆོས་ཀྱི་རྒྱལ་མཚན་གྱེན་དུ་བསྒྲེང༌། །ཕྱི་ནང་གསང་བའི་མཆོད་སྤྲིན་རྒྱ་མཚོ་འདིས། །མཐའ་བཞི་ལས་གྲོལ་ངོ་བོ་ཉིད་ཀྱི་སྐུ། །མཁའ་ཁྱབ་དང་པོའི་སངས་རྒྱས་ཐུགས་དམ་བསྐང༌། །འགྱུར་མེད་རང་བཞིན་འོད་གསལ་ཆོས་ཀྱི་སྐུ། །རྒྱལ་བ་རྡོ་རྗེ་འཆང་ཆེན་ཐུགས་དམ་བསྐང༌། །གཞོམ་མེད་སྒྲ་ལྡན་ལོངས་སྤྱོད་རྫོགས་པའི་སྐུ། །བཅོམ་ལྡན་དུས་ཀྱི་འཁོར་ལོའི་ཐུགས་དམ་བསྐང༌། །དཔག་མེད་ཞིང་ནས་མཐའ་ཡས་སྤྲུལ་པའི་སྐུ། །སངས་རྒྱས་ཤཱཀྱ་ཐུབ་པའི་ཐུགས་དམ་བསྐང༌། །རྒྱལ་སྲས་ཁྲོ་རྒྱལ་རྣམས་ཀྱི་ངོ་བོ་ཉིད། །ཆོས་རྒྱལ་རིགས་ལྡན་རྣམས་ཀྱི་ཐུགས་དམ་བསྐང༌། །སྤྱན་རས་གཟིགས་ལ་རྒྱུད་འགྲེལ་གསན་པའི་མཆོག །
གྲུབ་ཆེན་དུས་ཞབས་ཆེན་པོའི་ཐུགས་དམ་བསྐང༌། །དངོས་གྲུབ་རྣམ་གཉིས་མངོན་དུ་གྱུར་པ་ཡི། །གྲུབ་ཆེན་དུས་ཞབས་ཆུང་བའི་ཐུགས་དམ་བསྐང༌། །རྣམ་སྣང་གངས་ཆེན་མཚོ་ལ་ཆོས་གསན་པའི། །མཁས་མཆོག་ནཱ་ལེནྡྲ་པའི་ཐུགས་དམ་བསྐང༌། །སྒྲོལ་མས་ལུང་བསྟན་བོད་ཁམས་མུན་སེལ་བ། །པཎ་ཆེན་ཟླ་བ་མགོན་པོའི་ཐུགས་དམ་བསྐང༌། །གསང་འདུས་ཞལ་གཟིགས་མངོན་ཤེས་རྫུ་འཕྲུལ་ཅན། །བློ་ལྡན་འབྲོ་སྟོན་ལོཙྪའི་ཐུགས་དམ་བསྐང༌། །ཉིན་ཞག་བཅོ་ལྔར་འོད་གསལ་ངང་ལ་བཞུགས། །མཉམ་མེད་ལྷ་རྗེ་སྒོམ་པའི་ཐུགས་དམ་བསྐང༌། །ཟླ་གཅིག་ཏིང་འཛིན་སྒོམ་པའི་གཙུག་ཏོར་འཕགས། །སྒྲོ་སྟོན་གནམ་ལ་བརྩེགས་ཀྱི་ཐུགས་དམ་བསྐང༌། །ཤཱཀ་ཐུབ་ལ་སོགས་སངས་རྒྱས་དཔག་མེད་གཟིགས། །ཡུ་མོ་ཆོས་ཀྱི་ར་ཆེན་ཐུགས་དམ་བསྐང༌། །བྱིན་རླབས་མཛད་ཙམ་སྐལ་ལྡན་སྨིན་གྲོལ་མཛད། །སྲས་མཆོག་དྷརྨཱ་ཤྭ་རའི་ཐུགས་དམ་བསྐང། །དགྱེས་པ་རྡོ་རྗེའི་ཞལ་གཟིགས་ལུང་བསྟན་ཐོབ། །མཁས་པ་ནམ་མཁའ་འོད་ཟེར་ཐུགས་དམ་བསྐང༌། །རྫུ་འཕྲུལ་སྟོབས་ལྡན་མཁའ་སྤྱོད་གནས་
སུ་གཤེགས། །མ་ཅིག་སྤྲུལ་སྐུ་ཇོ་འབུམ་ཐུགས་དམ་བསྐང༌། །དུས་གསུམ་མཁྱེན་པའི་མངོན་ཤེས་ཐོགས་མེད་ལྡན། །གྲུབ་ཐོབ་སེ་མོ་ཆེ་བའི་ཐུགས་དམ་བསྐང༌། །འཇམ་པའི་དབྱངས་ཀྱིས་དངོས་སུ་ལུང་བསྟན་ཐོབ། །ཆོས་རྗེ་འཇམ་དབྱངས་གསར་མའི་ཐུགས་དམ་བསྐང༌། །ལྷ་སའི་ཇོ་བོས་བྱང་ཆུབ་ལུང་བསྟན་པ། །ཀུན་མཁྱེན་ཆོས་སྐུ་འོད་ཟེར་ཐུགས་དམ་བསྐང༌། །དུས་འཁོར་ཡེ་ཤེས་དཀྱིལ་འཁོར་མངོན་སུམ་གཟིགས། །ཀུན་སྤང་ཐུགས་རྗེ་བརྩོན་འགྲུས་ཐུགས་དམ་བསྐང༌། །ཆོས་ཉིད་བདེ་གཤེགས་སྙིང་པོ་དངོས་སུ་བརྙེས། །བྱང་སེམས་རྒྱལ་བ་ཡེ་ཤེས་ཐུགས་དམ་བསྐང༌། །རླུང་སེམས་དབང་འདུས་ཡི་དམ་དཔག་མེད་གཟིགས། །མཁས་བཙུན་ཡོན་ཏན་རྒྱ་མཚོའི་ཐུགས་དམ་བསྐང༌། །དུས་གསུམ་རྫོགས་པའི་སངས་རྒྱས་ཀུན་འདུས་དངོས། །ཀུན་མཁྱེན་ཤེས་རབ་རྒྱལ་མཚན་ཐུགས་དམ་བསྐང༌། །འཆད་རྩོད་རྩོམ་པའི་རྒྱལ་བསྟན་འཛིན་སྐྱོང་སྤེལ། །ཆོས་རྗེ་ཕྱོགས་ལས་རྣམ་རྒྱལ་ཐུགས་དམ་བསྐང༌། །མང་ཐོས་རིག་པས་ཕས་རྒོལ་ཚར་གཅོད་མཛད། །མཁས་མཆོག་ཉ་དབོན་ཀུན་དགའི་ཐུགས་དམ་བསྐང༌། །བཤད་
སྒྲུབ་ཉི་ཟླའི་ངོ་མཚར་སྣང་བའི་གཉེན། །འཇམ་མགོན་ཀུན་དགའ་བློ་གྲོས་ཐུགས་དམ་བསྐང༌། །རྒྱ་ཆེན་ཤེས་བྱའི་གཏེར་གྱུར་འཇིག་རྟེན་མིག །འཇམ་དབྱངས་དཀོན་མཆོག་བཟང་པོའི་ཐུགས་དམ་བསྐང༌། །རྒྱལ་བའི་དགོངས་སྤྱོད་ཟབ་མོའི་ངེས་གསང་རྟོགས། །མཁས་པ་ནམ་མཁའ་ཆོས་སྐྱོང་ཐུགས་དམ་བསྐང༌། །རྣམ་མང་གཞུང་ལུགས་མཁྱེན་པའི་གངས་རི་སྐྱོངས། །པཎ་ཆེན་ནམ་མཁའ་དཔལ་བཟང་ཐུགས་དམ་བསྐང༌། །མདོ་སྔགས་རྒྱུད་སྡེ་རྒྱ་མཚོའི་འཁོར་ལོས་བསྒྱུར། །ལཱོ་ཆེན་རཏྣ་བྷ་དྲའི་ཐུགས་དམ་བསྐང༌། །གདམས་པའི་ཆུ་ཀླུང་མ་ལུས་སྡུད་པོ་མཆོག །དཔལ་ལྡན་ཀུན་དགའ་གྲོལ་མཆོག་ཐུགས་དམ་བསྐང༌། །བསྙེན་སྒྲུབ་རྣམ་བཞིའི་ཉམས་རྟོགས་མཐར་སོན་པའི། །མཁན་ཆེན་ལུང་རིགས་རྒྱ་མཚོའི་ཐུགས་དམ་བསྐང༌། །༈ ཐུབ་བསྟན་ཡོངས་སུ་རྫོགས་པའི་བཤེས་གཉེན་མཆོག །གསང་བདག་སྒྲོལ་བའི་མགོན་པོའི་ཐུགས་དམ་བསྐང༌། །མདོ་རྒྱུད་མན་ངག་མཆོག་ལ་མངའ་དབང་བསྒྱུར། །མཚུངས་མེད་རིན་ཆེན་རྒྱ་མཚོའི་ཐུགས་དམ་བསྐང༌། །མཁྱེན་སྟོབས་དཔུང་གིས་རྒྱལ་
བསྟན་གདུགས་དཀར་འདེགས། །མཁས་གྲུབ་བློ་གྲོས་རྣམ་རྒྱལ་ཐུགས་དམ་བསྐང༌། །རྫོགས་ལྡན་གྲུབ་པའི་བརྟུལ་ཞུགས་ཉམས་བཞེས་པའི། །གྲུབ་ཆེན་ངག་དབང་འཕྲིན་ལས་ཐུགས་དམ་བསྐང༌། །བརྒྱུད་གསུམ་བྱིན་རླབས་ཆུ་བོ་འདུས་པའི་གཏེར། །ངག་དབང་བསྟན་འཛིན་རྣམ་རྒྱལ་ཐུགས་དམ་བསྐང༌། །ཟབ་ལམ་བསྟན་པའི་གསང་མཛོད་འདོད་འཇོའི་མཁན། །རྣལ་འབྱོར་མཁས་བཙུན་དར་རྒྱས་ཐུགས་དམ་བསྐང༌། །ཟབ་ལམ་གདམས་པའི་འཁོར་ལོ་ཕྱོགས་བཅུར་བསྐོར། །ཀུན་བཟང་འཕྲིན་ལས་རྣམ་རྒྱལ་ཐུགས་དམ་བསྐང༌། །གང་ལ་གང་འདུལ་ཐབས་མཁས་རོལ་རྩེད་འཆང༌། །ནུས་ལྡན་ལྷུན་གྲུབ་རྒྱ་མཚོའི་ཐུགས་དམ་བསྐང༌། །སྨིན་གྲོལ་བདུད་རྩིའི་འགྲོ་ཕན་བླ་མེད་སྤྱོད། །དཀོན་མཆོག་འཇིག་མེད་རྣམ་རྒྱལ་ཐུགས་དམ་བསྐང༌། །རྩ་བརྒྱུད་བླ་མའི་ཐུགས་རྗེས་རང་གཟུགས་གར། །ངག་དབང་ཆོས་འཕེལ་རྒྱ་མཚོའི་ཐུགས་དམ་བསྐང༌། །ཡན་ལག་དྲུག་གི་རྣལ་འབྱོར་མཐར་སོན་པ། །ངག་དབང་ཆོས་ཀྱི་འཕགས་པའི་ཐུགས་དམ་བསྐང༌། །རྣམ་ཀུན་མཆོག་ལྡན་འོད་གསལ་དབྱིངས་སུ་རོལ། །
ངག་དབང་ཆོས་འཛིན་རྒྱ་མཚོའི་ཐུགས་དམ་བསྐང༌། ༈ གཟུང་འཛིན་འཁྲུལ་ཟད་རྒྱུད་སྡེ་རབ་འབྱམས་བདག །ཀུན་དགའ་བསོད་ནམས་དཔལ་ལྡན་ཐུགས་དམ་བསྐང༌། །དབང་ལུང་གདམས་ངག་རྒྱ་མཚོའི་མཛོད་འཛིན་པ། །ངག་དབང་ཆོས་ཀྱི་རྣལ་འབྱོར་ཐུགས་དམ་བསྐང༌། །གནས་ལུགས་བདེ་གཤེགས་སྙིང་པོ་མངོན་གསལ་བ། །ངག་དབང་མཁས་གྲུབ་དབང་ཕྱུག་ཐུགས་དམ་བསྐང༌། །ཡི་དམ་རྒྱུད་སྡེ་རྒྱ་མཚོའི་ཞལ་གཟིགས་པ། །ངག་དབང་བསྟན་པ་གསལ་བྱེད་ཐུགས་དམ་བསྐང༌། །ཡི་དམ་རྒྱུད་སྡེ་རབ་འབྱམས་སྤྲོ་བསྡུ་མཛད། །ངག་དབང་རྡོ་རྗེ་བཟང་པོའི་ཐུགས་དམ་བསྐང༌། །དོན་དམ་གནས་ལུགས་བླ་མའི་ཞལ་མཇལ་བ། །ངག་དབང་དཀོན་མཆོག་དར་རྒྱས་ཐུགས་དམ་བསྐང༌། །གཞན་སྟོང་དབུ་མས་འཛམ་གླིང་ཁྱབ་མཛད་པ། །ངག་དབང་བློ་གྲོས་གྲགས་པའི་ཐུགས་དམ་བསྐང༌། །དུས་འཁོར་བསྐང་བའི་ཁ་སྐོང་འཛམ་ཐང་གཙང་བའི་གདན་རབས་རིམ་བྱོན་ལྟར་བློ་བཟང་ཆོས་འཕེལ་བས་བྲིས་པའོ། །༈ དེ་དག་ནི་དབང་བརྒྱུད་དེད་པ་ཡིན་ཏེ། མན་ངག་ཉམས་ཁྲིད་སོགས་ཀྱི་བརྒྱུད་པ་ལ་མོས་ན། མཁས་བཙུན་དར་རྒྱས་ཀྱི་མལ་དུ། ཐབས་ལམ་གཏུམ་མོའི་འབར་སྣང་ལ་སྤྱོད་པའི། །ཡོངས་འཛིན་ཀུན་དགའ་ཆོས་འཕེལ་
ཐུགས་དམ་བསྐང༌། །ཞེས་པ་དང༌། ལྷུན་གྲུབ་རྒྱ་མཚོ་དང༌། འཇིགས་མེད་རྣམ་རྒྱལ་ཟུང་གི་ཚབ་ཏུ། མངོན་ཤེས་སྤྱན་གྱིས་དུས་གསུམ་སྒྲིབ་མེད་གཟིགས། །རྟོགས་ལྡན་ཀུན་དགའ་ཆོས་འབྱོར་ཐུགས་དམ་བསྐང༌། །གནས་ལུགས་གཉུག་མ་དོན་གྱི་རང་བཞིན་མཇལ། །གུ་རུ་ངག་དབང་རྒྱལ་མཚན་ཐུགས་དམ་བསྐང༌། །དེ་སོགས་དབང་བརྒྱུད་མན་ངག་གཞུང་འགྲེལ་གྱི། །བཀའ་བརྒྱུད་བླ་མ་རྣམས་ཀྱི་ཐུགས་དམ་བསྐང༌། །ཐུགས་དམ་བསྐང་བའི་བྱིན་རླབས་རྣམ་དག་གིས། །བདག་ཅག་དཔོན་སློབ་སྐྱེ་བ་ཀུན་ཏུ་ཡང༌། །རིགས་ལྡན་བླ་མ་ཆོས་རྗེ་ཡབ་སྲས་ཀྱི། །རྟག་པར་ཞལ་མཐོང་ལུང་རིགས་དབང་འབྱོར་ནས། །འཆད་རྩོད་རྩོམ་པའི་དཔལ་ལ་སྤྱོད་པར་ཤོག །ཧཱུཾ། ཆོས་དབྱིངས་འབྱུང་ལྔ་འོད་འཕྲེང་བསྐོར་བའི་དབུས། །གྲུ་བཞི་ཉི་མའི་སྒོ་ཁང་རྟ་བབས་ལྡན། །མཆོག་གསུམ་ཁང་བརྩེགས་རྒྱ་ཕུབ་འདེགས་པའི་དབུས། །སྣ་ཚོགས་པདྨ་ཟླ་ཉི་སྒྲ་གཅན་སྟེང༌། །བཅོམ་ལྡན་དུས་ཀྱི་འཁོར་ལོ་ནམ་མཁའི་མདོག །སྐུ་བཞིའི་ཞལ་ལྡན་ཉི་མའི་སྤྱན་ཆེན་བགྲད། །རལ་བའི་ཅོད་པན་སྣ་ཚོགས་རྡོ་རྗེ་དང༌། །ཟླ་ཕྱེད་མི་བསྐྱོད་པ་ཡི་དབུ་རྒྱན་ཅན། །བཅོམ་ལྡན་དུས་ཀྱི་འཁོར་ལོའི་ཐུགས་དམ་བསྐང༌། །རྡུལ་མུན་སྙིང་སྟོབས་རྣམ་དག་མགྲིན་པ་གསུམ། །
ཕྱི་ནང་དུས་དྲུག་དག་པའི་ཕྲག་པ་ལ། །དུས་སྦྱོར་བཅུ་གཉིས་རྣམ་དག་དཔུང་པ་སྤྲས། །བཅོམ་ལྡན་དུས་ཀྱི་འཁོར་ལོའི་ཐུགས་དམ་བསྐང༌། །ཟླ་ཕྱེད་ཉེར་བཞི་དག་པའི་ཕྱག་ངར་ལྡན། །ཕྱག་སོར་ལྔ་ལྔ་ཟླ་བའི་ཡོན་ཏན་འགགས། །སོར་ཚིག་གསུམ་གསུམ་ཉི་མའི་ཡོན་ཏན་སྤངས། །བཅོམ་ལྡན་དུས་ཀྱི་འཁོར་ལོའི་ཐུགས་དམ་བསྐང༌། །སྒྲ་གཅན་རྣམ་དག་ཆོས་སྐུ་ཉག་གཅིག་འབར། །རོ་རྐྱང་དག་པའི་ཞབས་གཉིས་བརྐྱང་བསྐུམ་གྱིས། །བདུད་དང་ཉོན་མོངས་བསྒྱེལ་བའི་སྙིང་གར་མནན། །བཅོམ་ལྡན་དུས་ཀྱི་འཁོར་ལོའི་ཐུགས་དམ་བསྐང༌། །ཐབས་ཤེས་གཡས་གཡོན་ཕྱག་གི་དང་པོ་གཉིས། །བདེ་སྟོང་རྡོ་རྗེ་དྲིལ་བུ་ཐུགས་ཀར་བསྣོལ། །བཅོམ་ལྡན་དུས་ཀྱི་འཁོར་ལོའི་ཐུགས་དམ་བསྐང༌། །རྣམ་ཤེས་མ་རིག་གཅོད་པའི་རལ་གྲི་གཡས། །ཡེ་ཤེས་རྡོ་རྗེའི་གོ་ཆ་ཕུབ་དཀར་གཡོན། །བཅོམ་ལྡན་དུས་ཀྱི་འཁོར་ལོའི་ཐུགས་དམ་བསྐང༌། །ཟག་བཅས་བདེ་བ་གཅོད་པའི་གྲི་གུག་གཡས། །ཟག་མེད་བདེ་ཆེན་སྐྱོང་མཛད་ཐོད་ཁྲག་གཡོན། །བཅོམ་ལྡན་དུས་ཀྱི་འཁོར་ལོའི་ཐུགས་དམ་བསྐང༌། །སྒོ་གསུམ་མི་དགེ་འབུགས་པའི་རྩེ་གསུམ་གཡས། །སྐུ་གསུམ་ཡོན་ཏན་
རྫོགས་པའི་ཁ་ཊྭཱཾ་གཡོན། །བཅོམ་ལྡན་དུས་ཀྱི་འཁོར་ལོའི་ཐུགས་དམ་བསྐང༌། །ཉོན་མོངས་དུག་ལྔ་འཇོམས་པའི་མེ་མདའ་གཡས། །ཡེ་ཤེས་ལྔ་ལྡན་འབར་བའི་གཞུ་བརྡུང་གཡོན། །བཅོམ་ལྡན་དུས་ཀྱི་འཁོར་ལོའི་ཐུགས་དམ་བསྐང༌། །རླུང་སེམས་དབུ་མར་འགུགས་པའི་ལྕགས་ཀྱུ་གཡས། །ཐིག་ལེ་རྩ་རླུང་འཆིང་བའི་ཞགས་པ་གཡོན། །བཅོམ་ལྡན་དུས་ཀྱི་འཁོར་ལོའི་ཐུགས་དམ་བསྐང༌། །བདེ་སྟོང་ཟབ་མོའི་སྒྲ་སྒྲོགས་ཌཱ་རུ་གཡས། །ཐེག་གསུམ་དམ་ཆོས་འབྱུང་གནས་རིན་ཆེན་གཡོན། །བཅོམ་ལྡན་དུས་ཀྱི་འཁོར་ལོའི་ཐུགས་དམ་བསྐང༌། །གློ་བུར་བུམ་པ་བརྡུང་བའི་ཐོ་བ་གཡས། །ཉོན་མོངས་སྐྱོན་གྱིས་མ་གོས་པད་དཀར་གཡོན། །བཅོམ་ལྡན་དུས་ཀྱི་འཁོར་ལོའི་ཐུགས་དམ་བསྐང༌། །དུས་གསུམ་རྒྱལ་བའི་རྣམ་འཕྲུལ་འཁོར་ལོ་གཡས། །ཁམས་གསུམ་ཆོས་སྒྲ་སྒྲོགས་པའི་དུང་དཀར་གཡོན། །བཅོམ་ལྡན་དུས་ཀྱི་འཁོར་ལོའི་ཐུགས་དམ་བསྐང༌། །གཟུང་འཛིན་ལོག་འདྲེས་འབུགས་པའི་མདུང་ཐུང་གཡས། །ཆོས་ཉིད་སྟོང་གཟུགས་འཆར་བའི་མེ་ལོང་གཡོན། །བཅོམ་ལྡན་དུས་ཀྱི་འཁོར་ལོའི་ཐུགས་དམ་བསྐང༌། །བདུད་བཞི་དཔུང་བཅས་སྒྲོལ་བྱེད་དབྱུག་པ་གཡས། །
ལས་དང་ཉོན་མོངས་འཆིང་བའི་ལྕགས་སྒྲོག་གཡོན། །བཅོམ་ལྡན་དུས་ཀྱི་འཁོར་ལོའི་ཐུགས་དམ་བསྐང༌། །མ་རིག་སྡོང་པོ་གཅོད་པའི་དགྲ་སྟྭ་གཡས། །རིག་བྱེད་རྣམ་བཞི་བཅོམ་པའི་ཚངས་མགོ་གཡོན། །བཅོམ་ལྡན་དུས་ཀྱི་འཁོར་ལོའི་ཐུགས་དམ་བསྐང༌། །སྟག་ལྤགས་རྡོ་རྗེའི་རྒྱན་དྲུག་སྐུ་ལ་སྤྲས། །སྟོང་ཆེན་སྣ་ཚོགས་ཡུམ་ལ་རྣམ་པར་རོལ། །བདེ་སྟོང་གཉིས་སུ་མེད་པའི་ཐུགས་དམ་བསྐང༌། ཡུམ་ཆེན་ལྷ་མོ་གསེར་མདོག་ཞལ་བཞི་མ། །པྲ་ཕབ་བརྒྱད་ཀྱི་ཕྱག་རྣམས་མཚོན་ཆ་འཛིན། །ཕྱག་རྒྱ་ལྔ་ཡི་རབ་བརྒྱན་ཡབ་ལ་འཁྱུད། །སྟོང་ཆེན་སྣ་ཚོགས་ཡུམ་གྱི་ཐུགས་དམ་བསྐང༌། །ཕ་རོལ་ཕྱིན་བཅུ་རྣམ་དག་ནུས་མ་བཅུ། །བུམ་པ་བཅུ་དང་བཅས་པའི་ཐུགས་དམ་བསྐང༌། །གནས་སྐབས་རིགས་བཞིའི་སྒྲིབ་པ་མཐར་མཛད་པ། །རྡོ་རྗེ་མཚན་མ་རྣམ་བཞིའི་ཐུགས་དམ་བསྐང༌། །ཕུང་པོ་རྣམ་དག་དེ་བཞིན་གཤེགས་པའི་ཚོགས། །ཁམས་དྲུག་དག་པའི་ཡུམ་དང་མཉམ་པར་སྦྱོར། །སངས་རྒྱས་ཡབ་ཡུམ་ཚོགས་ཀྱི་ཐུགས་དམ་བསྐང༌། །དབང་པོ་རྣམ་དག་བྱང་ཆུབ་སེམས་དཔའ་དྲུག །ཡུལ་དྲུག་དག་པའི་ལྷ་མོས་རབ་ཏུ་འཁྱུད། །སེམས་དཔའ་ཡབ་ཡུམ་ཚོགས་ཀྱི་ཐུགས་དམ་བསྐང༌། །ལས་དབང་རྣམ་དག་ཁྲོ་ཆེན་
འབར་བའི་ཚོགས། །བྱ་བ་རྣམ་དག་ཁྲོ་མོར་མཉམ་པར་སྦྱོར། །ཁྲོ་རྒྱལ་ཡབ་ཡུམ་ཚོགས་ཀྱི་ཐུགས་དམ་བསྐང༌། །སྐྱེ་མཆེད་བཅུ་གཉིས་རྣམ་དག་མཆོད་སྤྲིན་ཐོགས། །གཟུངས་མ་ལྷ་མོ་བཅུ་གཉིས་ཐུགས་དམ་བསྐང༌། །ལྟེ་བའི་རྩ་འཁོར་དབྱུག་གུ་རྣམ་དག་པ། །ཙརྩི་ཀཱ་སོགས་གཞན་མཆོག་གཙོ་མོ་བརྒྱད། །ཟུང་འཇུག་རོལ་པའི་ལྷ་མོ་འཁོར་དང་བཅས། །གསུང་གི་ལྷ་ཚཽགས་རྣམས་ཀྱི་ཐུགས་དམ་བསྐང༌། །ཀུན་རྫོབ་ཟླ་བ་བཅུ་གཉིས་ཚིགས་དང་རྩ། །རྣམ་དག་ལྷ་ཆེན་བཅུ་གཉིས་བཞོན་པར་བཅས། །ཚེས་ཞག་སུམ་བརྒྱ་དྲུག་ཅུ་རྣམ་དག་པ། །ཆོས་ཉིད་ལྷ་མོ་འཁོར་བཅས་ཐུགས་དམ་བསྐང༌། །མཐིལ་བཞི་གསང་གཙུག་རྣམ་དག་ཤིང་རྟའི་སྟེང༌། །ཁྲོ་རྒྱལ་དབྱུག་སྔོན་ལ་སོགས་ཁྲོ་བོ་དྲུག །འོད་ཟེར་ཅན་སོགས་ཁྲོ་མོར་མཉམ་པར་སྦྱོར། །སྒོ་སྐྱོང་ཁྲོ་རྒྱལ་ཡབ་ཡུམ་ཐུགས་དམ་བསྐང༌། །སོར་མོ་རྣམ་དག་ཀླུ་དང་གཏུམ་མོའི་ཚོགས། །འདོད་ཡོན་དགའ་བདེའི་རང་བཞིན་གཟུངས་ཀྱི་ལྷ། །སྐྲ་དང་བ་སྤུ་རྣམ་དག་གྲུབ་པའི་ཚོགས། །དོན་དམ་འབྱུང་པོའི་ཚོགས་ཀྱི་ཐུགས་དམ་བསྐང༌། །གཟའ་དང་དྲང་སྲོང་རྒྱུ་སྐར་ཁྱིམ་དང་ཆ། །ཕྱོགས་སྐྱོང
་ཞིང་སྐྱོང་ཕོ་ཉ་འཕྲོག་མ་དང༌། །གྷནྚ་ཀརྞ་དགའ་བྱེད་ནག་པོ་ཆེ། །བྷྲྀཾ་གི་ཎི་སོགས་འཁོར་གྱི་ཐུགས་དམ་བསྐང༌། །དོན་དམ་སྐྱབས་གསུམ་ཐུགས་གསུང་སྐུའི་ལྷ། །ལྷུན་གྲུབ་ཡེ་ཤེས་འོད་གསལ་འདུས་མ་བྱས། །དྲུག་བརྒྱ་སོ་བཞི་ཡབ་ཡུམ་འཁོར་དང་བཅས། །ཆོས་ཉིད་ཡོངས་རྫོགས་ལྷ་ཚོགས་ཐུགས་དམ་བསྐང༌། །ཐུགས་དམ་བསྐང་བའི་བྱིན་རླབས་རྣམ་དག་གིས། །རྣལ་འབྱོར་བདག་ཅག་དཔོན་སློབ་འཁོར་བཅས་ཀྱི། །དམ་ཚིག་ཉམས་ཆགས་མ་ལུས་བསྐང་བ་དང༌། །ཕྱི་ནང་ཉོན་མོངས་གློ་བུར་ལས་གྲོལ་ནས། །སྟོབས་སོགས་ཡོན་ཏན་གདོད་ནས་ཀུན་ལྡན་པའི། །རྒྱལ་བའི་སྙིང་པོ་མྱུར་དུ་ཐོབ་པར་ཤོག །ཧཱུཾ། རྡོ་རྗེ་ཁང་བརྩེགས་འབར་བའི་དཀྱིལ་འཁོར་དུ། །ཁྲོ་རྒྱལ་རྡོ་རྗེ་ཤུགས་ཀྱི་ཐུགས་དམ་བསྐང༌། །ཕ་རོལ་ཕྱིན་བཅུ་རྣམ་དག་ཁྲོ་རྒྱལ་བཅུ། །དོན་དམ་ཟད་པར་བཅུ་ཡི་ཐུགས་དམ་བསྐང༌། །སྟོབས་བཅུ་བཞོན་པ་ལྡན་པའི་ཕྱོགས་སྐྱོང་བཅུ། །ཆོས་ཉིད་གཟའ་ཆེན་བཅུ་ཡི་ཐུགས་དམ་བསྐང༌། །ཡེ་ཤེས་དབང་བཅུའི་བདག་ཉིད་ཀླུ་རྒྱལ་བཅུ། །གཞན་མཆོག་འབྱུང་པོ་བཅུ་ཡི་ཐུགས་དམ་བསྐང༌། །སྡེ་དྲུག་སྲུང་
མ་དྲུག་ཅུ་འཁོར་བཅས་དང༌། །དུར་ཁྲོད་འབྱུང་པོ་བྱེ་བ་ཕྲག་ཕྱེད་ལ། །གླིང་བཞི་ལྷུན་པོ་ཉི་ཟླ་དཔག་བསམ་ཤིང༌། །ལྷ་མིའི་ལོངས་སྤྱོད་ཚོགས་ཀྱིས་ཐུགས་དམ་བསྐང༌། །བདག་ཅག་རྣལ་འབྱོར་བསྲུང་སྐྱོབས་ཞི་རྒྱས་སོགས། །རྡོ་རྗེ་འཛིན་པའི་བཀའ་བཞིན་སྒྲུབ་པར་མཛོད། །ཧཱུཾ། རབ་འཇིགས་དུར་ཁྲོད་འབར་བའི་དཀྱིལ་འཁོར་དུ། །བཅོམ་ལྡན་དཔལ་ཆེན་རྡོ་རྗེ་ནག་པོ་ཆེ། །སྲིན་པོའི་གཟུགས་ཅན་སྦོམ་ཐུང་མཆེ་བ་གཙིགས། །ཟླུམ་པོའི་སྟབས་ཅན་རུས་རྒྱན་དར་གྱིས་བརྒྱན། །གྲི་ཐོད་རྣམ་འཕྲུལ་གནྚེ་ཐུགས་ཀར་འཛིན། །སྐྲ་སེར་སྦྲུལ་རྒྱན་ཚངས་རྐུད་ཐོད་རློན་སྤྲས། །དཔལ་ལྡན་མཧཱ་ཀཱ་ལའི་ཐུགས་དམ་བསྐང༌། །ཨེ་ཀ་ཙ་ཊྀ་འདོད་ཁམས་དབང་ཕྱུག་མ། །གནོད་སྦྱིན་ཡབ་ཡུམ་པུ་ཊ་མིང་སྲིང་དང༌། །རུ་འདྲེན་སྡེ་བཞི་མི་ནག་བྱ་ཁྱི་སོགས། །འཁོར་དང་བཅས་པའི་ཐུགས་དམ་སྐོངས་གྱུར་ཅིག །སེང་གེ་གླང་ཆེན་སྟག་གཟིག་དོམ་དྲེད་སོགས། །ཁྲབ་རྨོག་དར་སྣ་རིན་ཆེན་སྣ་ཚོགས་འདིས། །མཧཱ་ཀཱ་ལ་འཁོར་བཅས་ཐུགས་དམ་བསྐང༌། །བཞེས་ནས་ཐུབ་དབང་བསྟན་པ་རྒྱས་པ་དང༌། །རྡོ་རྗེ་ཐེག་པ་མཆོག་ཏུ་དར་བར་མཛོད། །དེ་ལྟར་ཐུགས་དམ་
བསྐང་བའི་བྱིན་རླབས་ཀྱིས། །བདག་ཅག་བྱང་ཆུབ་སྙིང་པོ་བསྒྲུབ་པ་ལ། །འདུ་བ་རྣམ་བཞིའི་ནད་རིགས་ཐམས་ཅད་དང༌། །ཉོན་མོངས་རྣམ་རྟོག་དགྲ་བགེགས་ཞི་བར་མཛོད། །ཚེ་དང་བསོད་ནམས་དཔལ་འབྱོར་སྙན་གྲགས་དང༌། །ས་ལམ་ཡོན་ཏན་མ་ལུས་རྒྱས་པར་མཛོད། །མི་ཆེན་རྒྱལ་པོ་ལྷ་ཀླུ་མ་ལུས་དང༌། །ལས་རླུང་ཐམས་ཅད་དབང་དུ་བསྡུ་བར་མཛོད། །ལྷ་མིའི་ལོངས་སྤྱོད་འདོད་རྫས་ཐམས་ཅད་དང༌། །རླུང་སེམས་མ་ལུས་དབུ་མར་འགུག་པར་མཛོད། །བསྟན་པའི་དགྲ་བོ་བདུད་རིགས་ཐམས་ཅད་དང༌། །ཉོན་མོངས་རགས་པའི་སེམས་རྣམས་རྨོངས་པར་མཛོད། །ཐར་པའི་ཆོམ་རྐུན་འདུ་འཛི་ལ་སོགས་པའི། །མི་བཟད་གློ་བུར་དགྲ་རྣམས་རེངས་པར་མཛོད། །བསྒྲལ་བའི་ཞིང་གྱུར་དགྲ་བགེགས་ཐམས་ཅད་དང༌། །ལས་རླུང་ཉི་ཁྲི་ཆིག་སྟོང་བསད་པར་མཛོད། །གཟུང་
འཛིན་མ་རིག་ལས་ཀྱི་དགྲ་བགེགས་དང༌། །འཛག་བདེ་འཕོ་བའི་བག་ཆགས་བསྐྲད་པར་མཛོད། །ཚེ་འདིར་ཕྱག་རྒྱ་ཆེན་པོའི་དངོས་གྲུབ་མཆོག །ཐོབ་ནས་བསྟན་དང་འགྲོ་ལ་ཕན་བྱེད་ཤོག །ཡི་དམ་ཆོས་སྐྱོང་གི་བསྐང་བསྡུས་འདིའང༌། ཀུན་མཁྱེན་རིན་པོ་ཆེ་ཤེས་རབ་རྒྱལ་མཚན་གྱིས་གསུངས། རྒྱུད་སྡེ་བཞིའི་བསྐང་བ་བདེ་སྟོང་རོལ་པ་ནས་ཁོལ་བྱུང་དུ་འབྲི་བ་པོ་ནི། དགེ་སློང་ངག་དབང་ཆོས་འཕེལ་ཏེ་དགེ་བར་གྱུར་ཅིག བཀྲ་ཤིས།