དཔལ་རྡོ་རྗེ་འཇིགས་མཛད་ལྷ་བཅུ་གསུམ་མའི་ཆོ་ག་འདོན་པ་བསྒྱུར་ལུགས་ཡང་དག་པ།
དཔལ་རྡོ་རྗེ་འཇིགས་མཛད་ལྷ་བཅུ་གསུམ་མའི་ཆོ་ག་འདོན་པ་བསྒྱུར་ལུགས་ཡང་དག་པའོ། །
ཨོཾ་སྭཱ་སྟི། ན་མོ་གུ་ར་ཝེ། བཅོམ་ལྡན་འདས་དཔལ་རྡོ་རྗེ་འཇིགས་མཛད་ཆེན་པོ་ལྷ་དགུའི་དཀྱིལ་འཁོར་གྱི་དབང་དུ་བྱས་ཏེ། དཀྱིལ་འཁོར་གྱི་ཆོ་ག་སྔར་བཤད་ཟིན་པ་ལས། ལྷ་བཅུ་གསུམ་གྱི་བདག་ཉིད་ཅན་གྱི་དཀྱིལ་འཁོར་ལ་འདོན་པ་སྤོ་བའི་ཚུལ་ནི། ས་ཆོག་གི་སྐབས། སྐྱབས་འགྲོ་ནས་བཟླས་པའི་བར་སྒྲུབ་ཐབས་བཞིན་བསྒོམ་ཞེས་པ་ལ། བཅུ་གསུམ་མ་ཉིད་ཀྱི་སྒྲུབ་ཐབས་ཀྱི་གཞུང་སྲོང་བ་ཡིན། སློབ་མས་གསོལ་བཏབ་ཀྱི་སྐབས། དུར་ཁྲོད་རྒྱན་གྱིས་སོགས་བསྟོད་པའི་རྗེས་ལ། དབང་ཆོག་རྒན་པོ་དྲི་མེད་ཆུ་རྒྱུན་ན། གསང་འདུས་ནས་བཤད་པའི་ཕྱོགས་བཞི་གསོལ་འདེབས་གོ་རིམ་དཀྲུགས་པའི་ཚུལ་གྱིས་ཡོད་ཀྱང༌། ལག་ལེན་དུ་ཤར་ལ་སོགས་པ་ཕྱོགས་བཞི་ནས་རིམ་པས། གཏི་མུག་རྡོ་རྗེའི་རང་བཞིན་ཁྱོད། །གཤིན་རྗེ་གཤེད་པོ་ཤིན་ཏུ་འཇིགས། །སྟོན་པ་སངས་རྒྱས་ཀུན་རང་བཞིན། །སྐུ་ཡི་རྡོ་རྗེ་ཕྱག་འཚལ་བསྟོད། །ཅེས་དང༌། སེར་སྣ་རྡོ་རྗེའི་རང་བཞིན་ཁྱོད། །གཤིན་རྗེ་གཤེད་པོ་ཤིན་ཏུ་འཇིགས། །ཐུགས་ཀྱི་རྡོ་རྗེ་རབ་གསལ་བ། །རིན་ཆེན་རྡོ་རྗེ་ཁྱོད་ཕྱག་འཚལ། །ཞེས་དང༌། འདོད་ཆགས་རྡོ་རྗེའི་རང་བཞིན་
ཁྱོད། ཁྱབ་བདག་ཆགས་པ་ཆོས་འབྱུང་གནས། །དབྱངས་མཆོག་ཀུན་གྱི་མཆོག་གི་མཆོག །གསུང་གི་རྡོ་རྗེ་ཁྱོད་ཕྱག་འཚལ། །ཞེས་དང༌། ཕྲག་དོག་རྡོ་རྗེའི་རང་བཞིན་ཁྱོད། །གཤིན་རྗེ་གཤེད་པོ་ལས་ཀུན་བྱེད། །སྐུ་ཡི་རྡོ་རྗེ་རབ་མཚུངས་པ། །ཕྱག་ན་རལ་གྲི་ཁྱོད་ཕྱག་འཚལ། །ཞེས་བརྗོད། ཐམས་ཅད་ཀྱི་ཐུན་མོང་དུ། སངས་རྒྱས་ཀུན་གྱི་རང་བཞིན་ཁྱོད། །སངས་རྒྱས་ཐམས་ཅད་གཅིག་བསྡུས་པ། །སངས་རྒྱས་ཀུན་རབ་མཆོག་གི་མཆོག །དཀྱིལ་འཁོར་གཙོ་ལ་ཕྱག་འཚལ་བསྟོད། །གཤིན་རྗེ་འཇོམས་པའི་དཀྱིལ་འཁོར་འཇིགས། །ཞེས་སོགས་སྦྲེལ་ལོ། །ལུས་ངག་སེམས་ལ་སོགས་ཀྱི་སྐབས། དཀྱུས་བཞིན་སོང་བའི་རྗེས་ལ། ང་ནི་དཔལ་ལྡན་འཁོར་ལོ་འཛིན། །རིན་ཆེན་འཛིན། པདྨ་འཛིན། རལ་གྲི་འཛིན། སོགས་འདོན་པ་སྤོ། ཕུར་གདབ་སྐབས་ནི། དཀྱིལ་ཆོག་རྒན་པོ་ན་རལ་གྲི་གཤིན་རྗེ་གཤེད་བསྐྱེད་ཀྱང༌། དཀྱུས་ཉིད་ལེགས་པས་ཐེ་ཚོམ་མི་བྱའོ། །སྟ་གོན་གྱི་སྐབས་ས་ལྷ་ཡན་ཆད་འདྲ། ལྷ་སྟ་གོན་གྱི་སྐབས། ཐིག་ཆེན་
བརྒྱད་སྐམ་ཐིག་ཏུ་བཏབ་ནའང་རུང༌། གཙོ་བོའི་གནས་སུ་དྲི་བཟང་གི་ཐིག་ལེ་གྲུ་བཞི་ཆེ་བ་ཅིག་བྱ། ལྷ་བཅུ་གཉིས་གཞན་རྣམས་ཀྱི་གནས་སུ་དེ་ལས་ཉིས་འགྱུར་གྱི་ཆུང་བའི་ཟླུམ་པོ་རེ་བྱེད། ལྷ་སྣམ་གྱི་ཕྱག་མཚན་ཉི་ཤུ་རྩ་བཞི་དང༌། རོ་ལངས་བཞི་དང༌། ཐོད་པ་བཞིའི་གནས་སུ་དྲི་བཟང་གི་ཐིག་ལེ་ཆུང་ངུ་རེ་བཀོད་ནས། དེ་རྣམས་ཀྱི་སྟེང་དུ་ཚོམ་བུ་ཡང་ཆེ་ཆུང་དེ་ཀའི་རིམ་པ་བྱ། གཞན་ཤོམས་འདྲ། བསངས་སྦྱངས། སྟོང་པའི་ངང་ལས་ཧཱུཾ་ལས་སྣ་ཚོགས་རྡོ་རྗེ་རྭ་ཉི་ཤུ་པ་ཞེས་པ་ནས། སྣ་ཚོགས་པས་གང་བའོ། །དབུས་ཀྱི་རེ་མིག་ཏུ་རླུང་གི་དཀྱིལ་འཁོར་ཞེས་པ་ནས། རྐང་པ་གསུམ་གར་བྱེད་པའོ། །དབུས་ཀྱི་གདན་གྱི་སྟེང་དུ་རཾ་ལས་ཉི་མའི་དཀྱིལ་འཁོར་གྱི་སྟེང་དུ། ཧཱུཾ་ལས་རྡོ་རྗེ་རྩེ་དགུ་པ་ཧཱུཾ་གིས་མཚན་པ། དེ་ལས་འོད་ཟེར་འཕྲོས། འཕགས་པ་མཆོད། སེམས་ཅན་ཐམས་ཅད་ཀྱི་དོན་བྱས། སླར་འདུས་ཤིང་ཐིམ་པ་ཡོངས་སུ་གྱུར་པ་ལས། བཅོམ་ལྡན་འདས་དཔལ་རྡོ་རྗེ་འཇིགས་བྱེད་སྐུ་མདོག་དུས་མཐའི་སྤྲིན་ཞེས་པ་ནས། རྡོ་རྗེ་རྩེ་ལྔ་པའི་ལྟེ་བ་ལ་ཧཱུཾ་ནག་པོ་འོད་ཟེར་འབར་བའོ། །བཅོམ་ལྡན་འདས་དེའི་སྐུ་ལ་འཁྱུད་པའི་ནས། མཉམ་པར་སྦྱོར་བའོ། །རེ་མིག་བརྒྱད་ལ། ཤར་དུ་ཀྵེ་ལས་འཁོར་ལོ་ཀྵེས་མཚན་པ་ནས། བྱང་ཤར་དུ་གཽ་རི་བསྐྱེད་པའི་སྐབས་ཀྱི་པདྨ་འཛིན་པ་ཞེས་པའི་རྗེས་ལ། སྒོ་བཞིར་སྒོ་སྐྱོང་བཞི་རྣམས་འཁོད་པ་ནི། ཤར་ཕྱོགས་སུ་ཡ་ལས་ཐོ་པ་ནས། བཞི་པོ་རྣམས་ཀྱང་འཁོད་པར་གྱུར། རང་གི་སྙིང་ག་ནས་འོད་ཟེར་འཕྲོས། ཡེ་ཤེས་སེམས་དཔའ་དཔལ་རྡོ་རྗེ་འཇིགས་བྱེད་ཅེས་སོགས་ནས། བདེ་བའི་ལམ་གྱི་འགོད་པར་ཤོག །ཅེས་པའི་བར་དུ་འདྲ་བ་ལས། ནང་མཆོད་ཀྱི་སྐབས།
གཙོ་བོའི་རྗེས་སུ། ཨོཾ་བཛྲ་བཻ་ཏ་ལི་ཧཱུཾ་ཕཊ། ཨོཾ་ཨཱཿཧཱུཾ། ཨོཾ་ཛི་ནི་ཛིཀ་ཧཱུཾ་ཕཊ། ཨོཾ་ཨཱཿཧཱུཾ། དེ་བཞིན་དུ། རཏྣ་དྷྲྀཀ ཨ་རོ་ལིཀ པྲཛྙཱ་དྷྲྀཀ མོ་ཧ་ར་ཏཱི། དྭེ་ཥ་ར་ཏཱི། རཱ་ག་ར་ཏཱི། བཛྲ་ར་ཏཱི། མུད་ག་ར་དྷྲྀཀ དཎྜ་དྷྲྀཀ པདྨ་དྷྲྀཀ ཁདྒ་དྷྲྀཀ ཅེས་པ་རྣམས་ལའང་སྦྱར། རེ་མིག་གི་མཚན་མ་ལྷག་མ་ལ་འབུལ་བ་མན་ཆད་འདྲ། གཏོར་མ་དང་པོ་དཀྱིལ་འཁོར་པ། གཉིས་པ་ཆོས་སྐྱོང་ཡེ་ཤེས་པ་ཇི་ལྟར་འོས་པ། གསུམ་པ་ཕྱོགས་སྐྱོང༌། བཞི་པ་ཕྱོགས་སྐྱོང་ཆོས་ཀྱི་རྒྱལ་པོ་རྣམས་ལ་འབུལ་བ་ཡིན། དེ་དག་ལས་སྨོན་ལམ་གདབ་པའི་བར་སྒྲུབ་ཐབས་སྙིང་པོ་དང༌། དཀྱིལ་ཆོག་ཏུ་བཤད་པ་བཞིན་ནོ། །དེ་ནས་ཧྲིཿཥྚཱིཿལན་གསུམ་གྱིས་སྲུང་བའི་བར། སྙན་གསན་ཕབ་ཅིང༌། དཀྱིལ་འཁོར་ནམ་མཁར་འདེགས་པའི་བར་ཡང་འདྲའོ། །བུམ་པ་སྟ་གོན་གྱི་སྐབས། སྤྱིར་བཅུ་གསུམ་མ་ནི། རྡོ་རྗེ་འཇིགས་བྱེད་ཀྱི་དཀྱིལ་འཁོར་ཆོ་གའི་རིམ་པ་རྒྱས་ཤོས་ཡིན་པས། བུམ་པ་ཡང་ཅུང་ཟད་རྒྱས་པ་ཙམ་འགྲུབ་ན་ལེགས་མོད་ཀྱི། ལག་ཏུ་ལོངས་པ་དཀའ་བས། བུམ་པ་གཉིས་ལ་བསྡུ་ན། ལྟ་བར་ཡང་མི་བཟོད་པའི་བདག་ཉིད་དུ་གྱུར། ཤར་དུ་ཀྵེཿལས་འཁོར་ལོ་ནས། ཁྲག་གིས་གང་བ་བཞི་པོ་རྣམས་ཀྱང་འཁོད་པར་གྱུར། གྱི་བར་མངལ་དཀྱིལ་གྱི་སྐབས་བཞིན། ལས་བུམ་ལ་བགེགས་མཐར་བྱེད་ཀྱིས་ཀྱང་ལེགས་ལ། ལྷ་དང་གྲངས་མཉམ་གྱི་བུམ་པ་ཡོད་ན། བྱང་སྒོའི་བུམ་པས་ལས་བུམ་གྱི་གོ་ཆོད་པར་འདོད་ཀྱང་ལག་ལེན་དཀྱིལ་ཆོག་བཞིན་བྱེད་པ་ལས། གཙོ་བོ་ཕྱག་གཉིས་པའི་རྣམ་པ་ཅན་བགེགས་མཐར་བྱེད་ཀྱི་ངོ་བོ་ཡིན་པས། ཨོཾ་ཨཱཿབིགྷྣཱནྟ་ཀྲྀཏ་ཧཱུཾ་ཕཊ་སྭཱཧཱ། གཙོ་བོར་བཟླ་བཞིན་ཉེ་སྙིང་ཡང་བཟླ་ནི་བཟླའོ། །འཁོར་གྱི་བསྟོད་ཐུང་ལ། ཡན་ལག་བཅུ་གཉིས་རབ་འགགས་ཤིང༌། །ས་ནི་བཅུ་གཉིས་དག་པའི་དངོས། །བདེ་གཤེགས་
ཡབ་ཡུམ་འཁོར་བཅས་ལ། །ལུས་ངག་ཡིད་ཀྱིས་ཕྱག་འཚལ་བསྟོད། །ཅེས་སྤོས་པ་ཙམ་ཡིན། གཞན་ཁྱད་པར་མེད་དོ། །ཐིག་ཚོད་བྱིན་རླབས་ཀྱི་སྐབས་སུ། ཡ་ལས་ཞེ་སྡང་གཤིན་རྗེ་གཤེད་ནག་པོ། ནག་དཀར་དམར་བའི་ཞལ་གསུམ། ཕྱག་དྲུག་གི་དང་པོ་གཉིས་གྲི་གུག་དང་ཐོད་པ་འཛིན་པས། རང་སྣང་གི་ཡུམ་ལ་འཁྱུད་པ། ལྷག་མ་གཡས་གཉིས་ཀྱིས་རྡོ་རྗེ་དང་རལ་གྲི། གཡོན་གཉིས་ཀྱིས་འཁོར་ལོ་དང་པདྨ་འཛིན་པ། དཀར་པོའི་གནས་སུ། ཀྵེ་ལས་གཏི་མུག་གཤིན་རྗེ་གཤེད། དཀར་པོ་དཀར་ནག་དམར་བ་སོགས། མ་ལས་སེར་སྣ་གཤིན་རྗེ་གཤེད། སེར་པོ་སེར་ནག་དཀར་བའི་ཞལ་སོགས། མེ་ལས་འདོད་ཆགས་གཤིན་རྗེ་གཤེད་དམར་པོ། དམར་ནག་དཀར་བའི་སོགས། ད་ལས་ཕྲག་དོག་གཤིན་རྗེ་གཤེད་ལྗང་ཁུ། ལྗང་ནག་དཀར་བའི་སོགས། ཐམས་ཅད་ཀྱང་ཁྲོ་བོའི་ཆ་བྱད་ཡོངས་སུ་རྫོགས་པ། སྤྱན་གསུམ་མཆེ་གཙིགས། དབུ་སྐྲ་གྱེན་དུ་བརྗེས་པ། སྟག་སྤགས་དང༌། མགོ་ཕྲེང་དང༌། རུས་པ་དང༌། སྦྲུལ་གྱིས་བརྒྱན་པ། ཞབས་གཡོན་བརྐྱང་པའི་སྟབས་ཀྱིས་མེ་དཔུང་འབར་བའི་དབུས་ན་བཞུགས་པའོ། །ཐམས་ཅད་ཀྱི་དཔྲལ་བར་ཨོཾ་སོགས་སྤེལ། མི་འདྲ་བའི་ཁྱད་པར་དེ་ཙམ་ཡིན། དཀྱིལ་འཁོར་འབྲི་བའི་སྐབས། གཙོ་བོའི་གནས་སུ། མི་རོའི་སྟེང་དུ་པད་ཉི་ལ་རལ་གྲི་འབྲི། འདི་ངེས་ཅན་ཡིན། ཅལ་ཅོལ་གྱི་ཁ་ལ་མ་རྒྱུག་ཅིག རེ་མིག་བརྒྱད་ལ་མི་མགོ་སོགས་ཀྱི་སྟེང་དུ། ཤར་དུ་ཟླ་བ་ལ་འཁོར་ལོ། ལྷོར་ཉི་མ་ལ་ནོར་བུ། ནུབ་ཏུ་ཉི་མ་འོད་བྲལ་ཏེ་དམར་པོ་ལ་པད་དམར། བྱང་དུ་རླུང་དཀྱིལ་ཏེ་ནག་པོ་ཟླ་གམ་ལ་རྒྱ་གྲམ་འབྲི། མཚམས་བཞིར་ཟླ་གདན་རིམ་པས་འཁོར་ལོ། རྡོ་རྗེ་པདྨ་ཨུཏྤལ་བྲིས་ཀྱང་ལེགས། ཡང་གྲི་གུག་ཁོ་ན་བྲིས་ཀྱང་
རུང་ངོ༌། །སྒོ་བཞིར་ཉི་གདན་ལ་ཐོ་བ་དང༌། བེ་ཅོན་དང༌། པད་དམར་དང༌། རལ་གྲིའོ། །ཕྱིའི་གྲྭ་བཞིར་རོ་ལངས་ཀྱི་གཟུགས་བཞིའམ། ཚོན་སྤུངས་ནག་པོ་རེ་བྱས་ཀྱང་རུང་ཙམ་ཡིན། དེ་རྣམས་ཀྱི་མདུན་ནམ་རིམ་པ་གཉིས་པའི་གྲྭ་བཞིར་ཟླ་གདན་ལ་ཐོད་པ་འབྲི། གཞན་ལྷ་སྣམ་གྱི་ཕྱག་མཚན་སོགས་ལ་ཁྱད་པར་མེད་དོ། །དབུས་ཀྱི་གཞི་གྲུ་ཆོད་ཁྲག་མཚོ་འདི་ལ་ཟླུམ་སྐོར་རིམ་པ་གཉིས་ཡོད་པས། ཟླུམ་སྐོར་ཕྱི་མ་ལ་ཐོད་སྐམ་གྱི་འཕྲེང་བ། ནང་མ་ལ་གདུང་ཟླུམ་བྱ། རེ་མིག་གི་ནང་ལ་ཁྲག་མཚོའི་རི་མོ་བྱེད་མཁན་ཡོད་ཀྱང་མི་ལེགས། དེས་ན་གཞི་ནག་པོར་བྱེད་ན་གདུང་སྔོན་པོ་དང༌། གཞི་སྔོན་པོར་བྱེད་ན་གདུང་ནག་པོར་བྱའོ། །དཀྱིལ་ཆོག་རྒན་པོ་ནས་དངོས་གཞིའི་ཐོག་མར་སླར་ཡང་བུམ་པ་སྒྲུབ་པར་འདོད། དཀྱིལ་འཁོར་སྒྲུབ་ཚུལ་ལ་བདག་མདུན་ཐ་དད་དང༌། མདུན་བསྐྱེད་སྒྲུབ་ཚུལ་དཀྱུས་མ་ཞིག་བྱེད་པར་འདུག ཕྱིས་འགའ་ཞིག་དགྲ་ནག་གི་དཀྱིལ་མཆོག་དཔལ་འཛིན་གྱིས་མཛད་པའི་དགོངས་པར་བྱས་ཏེ། བདག་མདུན་ཐ་མི་དད་ཁོ་ནར་མཛད་དོ། །འོན་ཀྱང་འདི་ལྟར་བྱ་སྟེ། སྔོོན་འགྲོ་གཏོར་མ་ནས་བརྩམས། འཁོར་བཅུ་གཉིས་པོ་དང་ཡུམ་ཡང་རང་ཉིད་ལ་ཐིམ། ཞེས་པའི་བར་དུ་བཅུ་གསུམ་མའི་སྒྲུབ་ཐབས་ཀྱི་གཞུང་བསྲངས་ཏེ་བསྒོམ། སྐབས་འདིར་བདག་བསྐྱེད་ཁོ་ན་ཡིན། དེ་ནས་སྤྲོ་ན་བགེགས་སྦྱང་བ་དང༌། སྡིག་པ་སྦྱོང་བ་དང༌། ཁྲུས་གསོལ་རྣམས་བྱ། བསངས་སྦྱངས། སྟོང་པའི་ངང་ལས་ཧཱུཾ་ལས་སྣ་ཚོགས་རྡོ་རྗེ་རྭ་ཉི་ཤུ་པ། ཞེས་པ་ནས། རྐང་པ་གསུམ་གར་བྱེད་པའོ། །དབུས་ཀྱི་གདན་པདྨ་དང་ཉི་མའི་དཀྱིལ་འཁོར་ལ་ཧཱུཾ་ལས་བྱུང་བའི་རལ་གྲི་ཧཱུཾ་གིས་མཚན་པ་འོད་ཟེར་མཐའ་ཡས་པ་འབར་བའོ། །ཉེ་སྙིང་དང༌། སྙིང་པོ་དང༌། རྩ་སྔགས་ལན་བདུན་བདུན་བརྗོད། ཤར་དུ་ཀྵེ་ལས་འཁོར་ལོ་ཀྵེས་མཚན་པ། ཨོཾ་ཛི་ན་
ཛིཀ་ཧཱུཾ་ཕཊ། ལྷོར་མ་ལས་རིན་པོ་ཆེ་མས་མཚན་པ། ཨོཾ་རཏྣ་དྷྲྀཀ་ཧཱུཾ་ཕཊ། ནུབ་ཏུ་མེ་ལས་པདྨ་མེས་མཚན་པ། ཨོཾ་ཨ་རོ་ལིཀ་ཧཱུཾ་ཕཊ། བྱང་དུུ་ད་ལས་རྒྱ་གྲམ་ད་ཡིག་གིས་མཚན་པ། ཨོཾ་པྲཛྙཱ་དྷྲྀཀ་ཧཱུཾ་ཕཊ། ཤར་ལྷོར་ཛ་ལས་འཁོར་ལོ་ཛས་མཚན་པ། ཨོཾ་མོ་ཧ་ར་ཏི་ཧཱུཾ། ལྷོ་ནུབ་ཏུ་ས་ལས་རྡོ་རྗེ་ས་ཡིས་མཚན་པ། དྭེ་ཥ་ར་ཏི། ནུབ་བྱང་དུ་དོ་ལས་པདྨ་དོས་མཚན་པ། རཱ་ག་ར་ཏི། བྱང་ཤར་དུ་རུ་ལས་ཨུཏྤལ་རུས་མཚན་པ། བཛྲ་ར་ཏི། ཡང་ན་བྱང་དུ་རལ་གྲི། མཚམས་བཞིར་གྲི་གུག་གོ །ཤར་སྒོར་ཡ་ལས་ཐོ་བ་ཡས་མཚན་པ། མུདྒ་ར་དྷྀཀ ལྷོ་སྒོར་ཙ་ལས་དབྱུག་པ་ཙས་མཚན་པ། དཎྜ་དྷྲྀཀ ནུབ་སྒོར་མེ་ལས་པདྨ་མེས་མཚན་པ། པདྨ་དྷྲྀཀ བྱང་སྒོར་ར་ལས་རལ་གྲི་རས་མཚན་པ། ཨོཾ་ཁདྷ་དྷྲྀཀ་ཧཱུཾ་ཕཊ། ལན་གསུམ། གྲྭ་བཞིར་ཎ་ཡོ་ནི་ར་ལས་བྱུང་བའི་ཐོད་ཁྲག་བཞི། ཎ་ཡོ་ནི་རས་མཚན་པ། ཨོཾ་ཨཱཿཧཱུཾ། ལན་བཅུ་གཉིས། དེ་ནས་ཉེ་སྙིང་ལན་གསུམ་དང༌། ཧྲཱིཿཥྚཱིཿལན་གསུམ་དང༌། རྩ་སྔགས་ལན་གསུམ་གྱིས་མཚན་མ་གཞན་རྣམས་བྱིན་གྱིས་བརླབས། དེ་ཉིད་ལ་ཨརྒྷཾ་ནས་ཤཔྟའི་བར་གྱིས་མཆོད། སངས་རྒྱས་ཀུན་གྱི་རང་བཞིན་ཁྱོད། །སོགས་ཀྱིས་བསྟོད་དོ། །མཚན་མ་སྤྱི་ལ་དམིགས་ནས། སྙིང་པོ་དང༌། རྡོར་སེམས་ཀྱི་ཡིག་བརྒྱ་ཡང་ཅི་རིགས་པར་བཟླའོ། །དེ་དག་ནི་དཀྱིལ་འཁོར་མདུན་བསྐྱེད་འབའ་ཞིག་གི་ཚུལ་དུ་སྒྲུབ་པའོ། །དེ་ནས་སྔགས་གསུམ་ཚར་གཅིག་བརྗོད། བདག་ཉིད་བཅོམ་ལྡན་འདས་དཔལ་རྡོ་རྗེ་འཇིགས་བྱེད་ཆེན་པོ་ཞལ་དགུ། ཕྱག་སུམ་ཅུ་རྩ་བཞི། ཞབས་བཅུ་དྲུག རྒྱན་དང་མཚོན་ཆ་ཐམས་ཅད་ཡོངས་སུ་རྫོགས་པ། ཁམས་གསུམ་
ལས་རྣམ་པར་རྒྱལ་བའི་གཟི་འོད་འབར་བ་ཅན། སྐུ་དང་གསུང་དང་ཐུགས་དང༌། ཡོན་ཏན་འཕྲིན་ལས་བསམ་གྱིས་མི་ཁྱབ་པ་མངའ་བ་ཉིད་མདུན་གྱི་དཀྱིལ་འཁོར་ཆེན་པོའི་དབུས་ཀྱི་གདན་ལ་བཞུགས། དབུས་ཀྱི་ལྷའི་མཚན་མ་དང་གཉིས་སུ་མེད་པར་འདྲེས། ཨོཾ་ཨ་ས་མེ། ཏྲི་ས་མེ། མཧཱ་ས་མ་ཡེ་སྭཱཧཱ། ལན་གསུམ། རང་གི་པང་དུ་རང་རིགས་ཀྱི་ཕྱག་རྒྱ་མཚན་ཉིད་ཐམས་ཅད་ཡོངས་སུ་རྫོགས་པ་གནས་པ་ལས། དེ་ཉིད་མི་དམིགས་ཏེ་སྟོང་པར་སྦྱངས། ཨོཾ་ཤཱུ་ནྱ་ཏཱ་སོགས། སྟོང་པའི་ངང་ལས་བཾ་ལས་གྲི་གུག་བཾ་གྱིས་མཚན་པ་ཡོངས་སུ་གྱུར་པ་ལས། ཁྲོ་མོའི་དབང་ཕྱུག་རྡོ་རྗེ་རོ་ལངས་མའི་སྐུར་གྱུར། ཡབ་ཀྱི་གསང་གནས་མི་དམིགས་ཏེ། སྟོང་པའི་ངང་ལས་ཧཱུཾ་ལས་རྡོ་རྗེ་ནས། སྲོག་དག་པའི་ལམ་ནས་ཡུམ་གྱི་མཁར་བབས་པ། གཞལ་མེད་ཁང་བསྲུང་བའི་འཁོར་ལོ་དུར་ཁྲོད་དང་བཅས་པའི་ནང་དུ། ལྷ་སོ་སོའི་གདན་གྱི་གནས་ལ་ཐིག་ལེ་བཅུ་བདུན་དུ་གྱུར། དེ་རྣམས་ལྷ་སོ་སོའི་ས་བོན་དུ་གྱུར། ཅེས་པ་ནས། བཞི་པོ་རྣམས་ཀྱང་འཁོད་པར་གྱུར། གྱི་བར་སྒྲུབ་ཐབས་བཞིན། ཨོཾ་ཧྲཱིཿཥྚཱིཿནས། དཀྱིལ་འཁོར་གྱི་གཙོ་བོ་རང་ཉིད་ཀྱི་སྐུའི་ཆ་ཐམས་ཅད་ནས་ཞུགས་ཏེ་གཉིས་སུ་མེད་པར་ཐིམ། བདེ་སྟོང་གཉིས་སུ་མེད་པ་སྐུ་གསུམ་ནས། ཤར་གྱི་རེ་མིག་ཏུ་པད་ཟླའི་གདན་ལ་མཚན་མའི་ཕྱག་རྒྱ་དང་གཉིས་སུ་མེད་པར་འདྲེས་སྟེ་འཁོད་པར་གྱུར། དེ་བཞིན་དུ་ཐམས་ཅད་ལ་སྦྱར་ཏེ། ལྷོའི་རེ་མིག་ཏུ་པད་ཉིའི་གདན་ལ། མཚན་མའི་ཕྱག་རྒྱ་དང་གཉིས་སུ་མེད་པར་འདྲེས་ཏེ་འཁོད་པར་
གྱུར་ནས། བྱང་སྒོར་པད་ཉི་ལ། མཚན་མའི་ཕྱག་རྒྱ་དང་གཉིས་སུ་མེད་པར་འདྲེས་ཏེ་འཁོད་པར་གྱུར་གྱིས་བར་བརྗོད། ཨོཾ་ཨཱཿཧཱུཾ། ལན་བཞི་ནས། གདན་རེ་རེ་ལ་ཐོད་པ་བཞིའི་ཕྱག་རྒྱ་དང་དབྱེར་མེད་དུ་འདྲེས་ཏེ་འཁོད་པར་གྱུར། མཁའ་ནང་གི་གཞལ་མེད་ཁང་དུར་ཁྲོད་སྲུང་བའི་འཁོར་ལོ་དང་བཅས་པ་དཔག་ཏུ་མེད་པ་སྤྲོས། བཅོམ་ལྡན་འདས་ནས། སེམས་ཅན་ཐམས་ཅད་ཀྱི་དོན་མཛད། སྣོད་ཀྱི་འཇིག་རྟེན་གྱི་དྲི་མ་མ་ལུས་པ་སྦྱངས། རྣམ་ཤེས་ཚོགས་བརྒྱད་དང༌། བདུད་བཞི་དབྱིངས་སུ་དག་པར་བྱས། སངས་རྒྱས་ཀྱི་ཞིང་རྣམ་པར་དག་པ་ཡེ་ཤེས་ཀྱི་རང་སྣང་ལ་བཀོད། ཚུར་འདུས་གཅིག་ཏུ་འདྲེས། གཞལ་ཡས་ཁང་གདན་དང་བཅས་པ་དང༌། དུར་ཁྲོད་སྲུང་བའི་འཁོར་ལོ་དང་བཅས་པ་ལ་གཉིས་སུ་མེད་པར་ཐིམ་པའི་ཚུལ་གྱིས་བཞུགས་པར་གྱུར། འདིར་གཞལ་ཡས་ཁང་དང༌། དུར་ཁྲོད་དང༌། སྲུང་འཁོར་ལ་དག་སྦྱོར་གྱི་སྤྲས་སྤྲོས་མང་པོ་མི་དགོས་སོ། །ལྷ་ཐམས་ཅད་ཀྱི་མིག་ཏུ་ཀྵིཾ་ལས་ནས། དོན་ཡོད་གྲུབ་པས་དབུ་བརྒྱན་གྱི་བར་ཡང་སྒྲུབ་ཐབས་བཞིན་ནོ། །ཡང་རང་གི་སྙིང་ག་ནས་འོད་ཟེར་འཕྲོས་སོགས། སྟ་གོན་གྱི་ལྷ་སྤྱན་འདྲེན་པ་མན་ཆད། མཆོད་བསྟོད་གཏོར་འབུལ་ཕྱི་རོལ་གཏོར་མ་རྣམས་ལའང་མི་འདྲ་བ་མེད་མོད། སྒྲུབ་ཐབས་ཡིད་བཞིན་གཏེར་མཛོད་ན། བདག་བསྐྱེད་ཀྱི་ཡེ་ཤེས་སྤྱན་འདྲེན་སྐབས། ཚིགས་བཅད་ལ། དྲག་པོའི་ལས་ལ་སྤྱན་འདྲེན་ན། །དགྲ་བགེགས་རྣམས་ནི་བསྒྲལ་བའི་ཕྱིར། །ཞེས་འདོན་ཏེ། ཤིན་ཏུ་སྐབས་སུ་མ་བབ་བོ། ཞི་བ་ཡེ་ཤེས་ཀྱི་སྒྲུབ་ཐབས་ན། ཡེ་ཤེས་པ་ལ་སྤྱན་འདྲེན་ཚིགས་བཅད་དང༌། མཆོད་འཕྲེང་སོགས་ཡོད་ཀྱང༌། དེ་ནི་རང་དང་མདུན་ཏེ་སྐུའི་རྣམ་པ་གཉིས་བསྒོམས་པས། མི་ལེགས་པ་མིན་ལ། རྒྱུན་གྱི་ཉམས་ལེན་དང་མཆོག་སྒྲུབ་སོགས་གང་བྱུང་
ཐམས་ཅད་དུ་དྲག་པོའི་ལས་ཞེས་པ་ཁོ་ན་འདོན་པ་ཡང་འབྲེལ་མེད་དོ། །དེས་ན་འདི་པའི་ལུགས་ཀྱི་བདག་བསྐྱེད་ལ། ཚིགས་བཅད་དེ་འདྲ་ཡེ་མི་དགོས། མདུན་བསྐྱེད་ཀྱི་སྐབས་དང༌། ཁྱད་པར་སྟ་གོན་སྤྱན་འདྲེན་ལ། དེ་ལྟར་བྱེད་ནའང་མི་འགལ་ལོ། །འདི་ལྟར་འདོན་པར་བྱ་སྟེ། ཧཱུཾ། འཇམ་དཔལ་ཁྲོས་པའི་དཀྱིལ་འཁོར་ནས། །སྲིན་པོའི་གཟུགས་སུ་སྐུ་སྤྲུལ་པ། །གདུག་པ་ཅན་རྣམས་འདུལ་བའི་ཕྱིར། །འཇིགས་པའི་ཁྲོ་རྒྱལ་གཤེགས་སུ་གསོལ། །ཚུར་བྱོན་ཚུར་བྱོན་འཇམ་པའི་དབྱངས། ཁྲོ་བོ་གཤིན་རྗེ་གཤེད་པོའི་ཚོགས། །འཇམ་དཔལ་ཁྲོ་བོ་མི་བཟད་པ། །མཐུ་རྩལ་དྲག་པོ་གཤེགས་སུ་གསོལ། །རྣམ་པ་ཀུན་ལྡན་ཁྲོ་བོའི་སྐུ། །བསྐལ་པ་སྲེག་པའི་འཁོར་ལོ་ཆེ། །བདུད་སྡེའི་དཀྱིལ་འཁོར་ཀུན་འཇོམས་པ། །འགྲོ་བ་སྐྱོབ་མཛད་གཤེགས་སུ་གསོལ། །རི་བོ་རལ་ཞིང་ཆུ་གཏེར་འཁྲུག །རྡོ་རྗེ་མཚོན་ཆའི་བུ་ཡུག་འཁྲུག །ཕོ་ཉ་དྲག་གཏུམ་གློག་ལྟར་འཁྱུག །དྲག་ཤུལ་མི་བཟད་གཤེགས་སུ་གསོལ། །སངས་རྒྱས་ཀུན་གྱིས་དབང་བསྐུར་ཞིང༌། །མཁའ་དབྱིངས་གང་བའི་ལྷ་མོས་མཆོད། །རྒྱལ་སྲས་ཀུན་གྱི་ཞབས་འབྲིང་བཅས། །དཀྱིལ་འཁོར་དབང་ཕྱུག་འདིར་གཤེགས་གསོལ། །ཅེས་རོལ་མོའི་སྒྲ་དང་བཅས་ཏེ་གྱེར་ན་རུང༌། བཞུགས་གསོལ་གྱི་སྐབས་ཀྱང༌། ཤོ་ལོ་ཀ་དང་པོ་གཉིས་དང་ཐ་མ་ལ་བཞུགས་སུ་གསོལ། །ཞེས་འདོན་པ་བསྒྱུར་ན་ལེགས་པར་འོང༌། དཀྱིལ་ཆོག་རྙིང་པ་འགའ་རེ་ན་འདི་འདྲའི་རིགས་བྲིས་ཤིང༌། ལ་ལར་ད་ལྟ་ལག་ལེན་ཡང་བྱེད་ཀྱིན་འདུག་པས། སྐབས་རེ་བྱས་ཀྱང་མི་འགལ་བར་སེམས། ངེས་པ་དགོས་པ་ནི་མ་ཡིན་ནོ། །བསྟོད་པའི་སྐབས།
འཁོར་གྱི་བསྟོད་པ་བསྡུ་ན་སྒྲུབ་ཐབས་བཞིན་བྱས་ཀྱང་ཆོག་ལ། ཅུང་ཟད་རྒྱས་པར་ན། འཁོར་ལོའི་དབང་ཕྱུག་རྣལ་འབྱོར་མ། །རྒྱལ་བ་ཐམས་ཅད་སྐྱེད་མཛད་ཡུམ། །གདུལ་དཀའ་མ་ལུས་འདུལ་མཛད་མ། །རྡོ་རྗེ་རོ་ལངས་ཕྱག་འཚལ་བསྟོད། །ཟླ་བ་ཉ་འདྲའི་གཟི་བརྗིད་ཅན། །སྟོང་པའི་ཆོས་ལས་འཁྲུངས་པའི་སྐུ། །གཏི་མུག་རྒྱ་མཚོ་{ེམས་མཛད་པ། །རྡོ་རྗེ་སྐུ་ལ་ཕྱག་འཚལ་བསྟོད། །འབར་བ་གསེར་གྱི་ལྷུན་པོ་འདྲ། །ཡིད་བཞིན་ནོར་བུ་སྦྱིན་པའི་དངོས། །རྡོ་རྗེ་དབང་བསྐུར་འཕོངས་པ་སེལ། །ཕྲ་མ་རྡོ་རྗེ་ལ་ཕྱག་འཚལ། །གཙོ་བོ་རྡོ་རྗེ་ཆོས་ཀྱི་སྐུ། །ཉི་མ་སྟོང་དང་མཉམ་པའི་འོད། །སེམས་ཅན་འདོད་ཆགས་གནས་ལ་འཇོག །རྡོ་རྗེ་གསུང་ལ་ཕྱག་འཚལ་བསྟོད། །བརྩོན་འགྲུས་ཆེན་པོ་ཕ་རོལ་གནོན། །ལྗང་སྔོན་འོད་ཟེར་བྱེ་བ་འགྱེད། །སྣ་ཚོགས་ལས་ཀྱི་རྣམ་པར་འཕྲུལ། །ཕྲག་དོག་རྡོ་རྗེ་ཕྱག་འཚལ་བསྟོད། །མཁའ་ལྟར་ཁྱབ་པའི་བྱམས་པ་ཡང༌། །གདུག་པ་འདུལ་ཕྱིར་ཙ་མུཎྜི། ཁྲག་ཆེན་བཏུང་བས་ཀུན་ཏུ་དགྱེས། །གཏི་མུག་དགའ་མ་ལ་ཕྱག་འཚལ། །འཁོར་ལོའི་དབང་ཕྱུག་དགྱེས་བྱེད་ཡུམ། །གཤིན་རྗེ་འཇོམས་མ་དྲག་མོའི་སྐུ། །སྙིང་རྗེའི་རང་བཞིན་རྡོ་རྗེའི་རིགས། །ཞེ་སྡང་དགའ་མ་ལ་ཕྱག་འཚལ། །སྲིད་གསུམ་གནས་ཀྱི་ངག་ཚིག་རྣམས། །ལྷ་མོ་ཁྱོད་ཀྱི་མཐུ་ལས་བྱུང༌། །དགའ་ཞིང་རྗེས་སུ་ཡི་རང་ཚུལ། །འདོད་ཆགས་དགའ་མ་ལ་ཕྱག་འཚལ། །བཏང་སྙོམས་ཉོན་མོངས་མེད་རང་བཞིན། །ཞུ་བ་དགུག་པ་ཡེ་ཤེས་ཆེ། །གཽ་རཱི་བསམ་མི་ཁྱབ་པའི་མཐུ། །རྡོ་རྗེ་དགའ་མ་ལ་ཕྱག་འཚལ། །གཤེད་བྱེད་བྱད་མ་ཀུན་འཇོམས་
པ། །མཐའ་དག་འགུགས་པའི་ལས་ལ་བརྩོན། །ཡོན་ཏན་རྣམ་པར་རྒྱས་པ་ཡི། །རྡོ་རྗེ་ཐོ་བ་ཕྱག་འཚལ་བསྟོད། །གཞན་གྱིས་མི་ཐུབ་སྟོབས་པོ་ཆེ། །ལྷ་དང་ལྷ་མིན་སྐྲག་པར་མཛད། །ལྟ་བ་ངན་པའི་མུ་སྟེགས་འཇོམས། །རྡོ་རྗེ་དབྱུག་པ་ཕྱག་འཚལ་བསྟོད། །ཇི་སྲིད་འཁོར་བར་རྟག་གནས་ཀྱང༌། །ཉོན་མོངས་དྲི་མས་མ་གོས་པར། །ཐབས་ཀྱིས་འགྲོ་ཀུན་འདུལ་པ་པོ། །རྡོ་རྗེ་ཆུ་སྐྱེས་ཕྱག་འཚལ་བསྟོད། །བྱེ་བ་སྟོང་གི་བགེགས་རྣམས་ཀྱང༌། །གང་གི་མཚན་ཙམ་ཐོས་པས་བྱེར། །བདེ་ཆེན་བདུད་རྩི་སྩོལ་བ་པོ། །རྡོ་རྗེ་རལ་གྲི་ཁྱོད་ཕྱག་འཚལ། །སྣ་ཚོགས་མཆོད་པའི་ཁྱད་པར་ལས། །རྒྱལ་བ་ཐམས་ཅད་རབ་མཉེས་བྱེད། །བདུད་ཀྱི་དཀྱིལ་འཁོར་མ་ལུས་འཇོམས། །ཐོད་པ་བཞི་ལ་ཕྱག་འཚལ་བསྟོད། །མཚན་མ་རྣམ་པ་སྣ་ཚོགས་ནི། །གང་ལ་གང་འདུལ་ཐབས་ཀྱི་གཙོ། །སྣ་ཚོགས་འཕྲིན་ལས་སྒྲུབ་མཛད་པ། །ཕྱག་རྒྱའི་ཚོགས་ལ་ཕྱག་འཚལ་བསྟོད། །ཡེ་ཤེས་གཞལ་མེད་ཁང་པ་ནི། །རྒྱན་རྣམས་ཀུན་གྱིས་རྣམ་པར་བརྒྱན། །ཤིན་ཏུ་རྣམ་དག་དབང་བསྒྱུར་བའི། །དེ་ཉིད་རང་བཞིན་ཕྱག་འཚལ་བསྟོད། །མི་ཤེས་མུན་འཇོམས་ཉི་མའི་གདན། །ཉེས་པས་མ་གོས་པདྨ་རྒྱས། །བདུད་བཞི་འཇོམས་བྱེད་སྲུང་བ་ཡི། །འཁོར་ལོར་བཅས་ལ་ཕྱག་འཚལ་བསྟོད། །སྲིད་པ་ཇི་སྲིད་གནས་ཀྱི་བར། །འཁོར་བར་འགྲོ་བའི་དོན་མཛད་པ། །དུར་ཁྲོད་གནས་པ་ཐམས་ཅད་ལའང༌། །གུས་པའི་ཡིད་ཀྱི་ཕྱག་འཚལ་བསྟོད། །དེ་ལྟར་བསྟོད་པའི་དགེ་བ་ཡིས། །མཁའ་དང་མཉམ་པའི་འགྲོ་བ་རྣམས། །སངས་རྒྱས་ཀུན་གྱི་ཡེ་ཤེས་སྐུ། །ད་ལྟ་ཉིད་
དུ་ཐོབ་པར་ཤོག །ཅེས་པས་བསྟོད་པར་བྱའོ། །བདག་འཇུག་གི་ཐོག་མའི་གསོལ་འདེབས་ལ། ཨེ་མ་ཧོ་སངས་རྒྱས་སློབ་དཔོན་ཆེ། །ཨེ་མ་ཧོ་ཆོས་དང་ཚོགས་ཀྱི་མཆོག །ཨེ་མ་ཧོ་ཁྲོ་བོ་འཇིགས་མཛད་པ། །རོ་ལངས་མ་ཡིས་མགྲིན་འཁྱུད་པའི། །ཞེས་ལྷག་པོར་སྣོན། དཀྱིལ་ཆོག་རྒན་པོ་ན། ཕྱི་འཇུག་གི་སྐབས་འདིར་གོ་རིམ་མི་གཅིག་པ་འགའ་རེ་ཡོད་ནའང༌། ལེགས་པ་ཁོ་ནར་ཡང་མི་སྣང་བས། ལྷ་དགུའི་དཀྱིལ་མཆོག་སྐར་སྦྱར་བ་བཞིན་དུ་བྱའོ། །མི་ལེགས་པ་ཇི་ལྟ་བུ་སྙམ་ན། དྲི་བ་དྲི་ལན་གྱིས་སྣོད་བརྟགས་ནས་སེམས་བསྐྱེད་དེ། དེའི་རྗེས་སུ་དེ་ཉིད་གསང་བ་གདམས་དགོས་པ་ལས། གསང་གདམས་སེམས་བསྐྱེད་དྲི་ལན་ཞེས་རིམ་པ་གོ་ཟློག་པ་ནི། ཤིན་ཏུ་མི་ལེགས་པའི་ཕྱིར་རོ། །ཡེ་ཤེས་དབབ་པའི་སྐབས། རང་སྐད་ཅིག་གིས་འདོད་ཆགས་གཤིན་རྗེ་གཤེད་སྐུ་མདོག་དམར་པོ། ཞལ་གསུམ་ཕྱག་དྲུག་པར་གསལ་བའི་རྐང་འོག་ཏུ་ཞེས་འདོན་པ་སྤོ། རིག་པའི་དབང་ལྔ་ལས་ཆུ་དབང་གི་ནང་དབང་སྐབས། ཡ་ལས་རྡོ་རྗེ་ཡས་མཚན་པ་ལས། ཞེ་སྡང་གཤིན་རྗེ་གཤེད། སྐུ་མདོག་མཐིང་ནག ནག་དཀར་དམར་བའི་ཞལ་གསུམ་ཕྱག་དྲུག་གི་དང་པོ་གཉིས་གྲི་གུག་དང་ཐོད་པ་འཛིན་པས་རང་སྣང་གི་ཡུམ་ལ་འཁྱུད་པ། ལྷག་མ་གཡས་གཉིས་ཀྱིས་རྡོ་རྗེ་དང་རལ་གྲི། གཡོན་གཉིས་ཀྱིས་འཁོར་ལོ་དང་པདྨ་འཛིན་པ། ཁྲོ་བོའི་ཆ་བྱད་ཡོངས་སུ་རྫོགས་པ། སྤྱན་གསུམ་མཆེ་གཙིགས་སྐྲ་སེར་གྱེན་དུ་བརྗེས་པ། སྟག་ལྤགས་དང༌། རུས་པ་དང༌། མགོ་འཕྲེང་དང༌། སྦྲུལ་གྱིས་བརྒྱན་པ། ཞབས་གཡོན་བརྐྱང་གི་སྟབས་ཀྱིས་མེ་དཔུང་འབར་བའི་དབུས་ན་བཞུགས་པའོ། །དཔྲལ་བར་ཨོཾ་སོགས་དང་སྦྲེལ། དེ་
བཞིན་དུ་ཅོད་པན་ལ། མ་ལས་རིན་པོ་ཆེ་མས་མཚན་པ་ཡོངས་སུ་གྱུར་པ་ལས། སེར་སྣ་གཤིན་རྗེ་གཤེད་སེར་པོ། སེར་ནག་དཀར་བའི་ཞལ་གསུམ་ཕྱག་དྲུག་གི་དང་པོ་གཉིས་གྲི་གུག་དང་ཐོད་པ་འཛིན་པས་རང་སྣང་གི་ཡུམ་ལ་འཁྱུད་པ། ལྷག་མ་གཡས་གཉིས་ཀྱིས་རིན་པོ་ཆེ་དང་རལ་གྲི། གཡོན་གཉིས་ཀྱིས་འཁོར་ལོ་དང་པདྨ་འཛིན་པ། ཁྲོ་བོའི་ནས། བཞུགས་པའོའི་བར་སྔ་མ་བཞིན། རྡོ་རྗེའི་དབང་གི་སྐབས། མེ་ལས་པདྨ་མེས་མཚན་པ་ཡོངས་སུ་གྱུར་པ་ལས། འདོད་ཆགས་གཤིན་རྗེ་གཤེད་དམར་པོ་དམར་ནག་དཀར་བའི་ཞལ་གསུམ། ཕྱག་དང་པོ་གཉིས་འདྲ། གཡས་གཉིས་ཀྱིས་པདྨ་དང་རལ་གྲི། གཡོན་གཉིས་ཀྱིས་འཁོར་ལོ་དང་ནོར་བུ་འཛིན་པ། ཁྲོ་བོའི་ནས། བཞུགས་པའོ། །དྲིལ་བུའི་དབང་གི་སྐབས། ད་ལས་རལ་གྲི་དས་མཚན་པ་ཡོངས་སུ་གྱུར་པ་ལས། ཕྲག་དོག་གཤིན་རྗེ་གཤེད་ལྗང་ཁུ། ལྗང་ནག་དཀར་བའི༴ ལྷག་མ་གཡས་གཉིས་ཀྱི་རལ་གྲི་དང་འཁོར་ལོ། གཡོན་གཉིས་ཀྱིས་རིན་པོ་ཆེ་དང་པདྨ་འཛིན་པ། གཞན་འདྲ། མིང་དབང་གི་སྐབས་སུ། ཀྵེ་ལས་འཁོར་ལོ་ཀྵེས་མཚན་པ་ཡོངས་སུ་གྱུར་པ་ལས། གཏི་མུག་གཤིན་རྗེ་གཤེད་དཀར་པོ། དཀར་ནག་དམར་བའི༴ གཡས་གཉིས་ཀྱིས་འཁོར་ལོ་དང་རལ་གྲི། གཡོན་གཉིས་ཀྱིས་ནོར་བུ་དང་པད་མ་འཛིན་པ། ཁྲོ་བོའི་ནས། བཞུགས་པའོ། །ལྷའི་དེ་ཉིད་བརྗོད་པའི་སྐབས། ལྷ་རྣམས་ནི། ཕུང་པོ་ལྔ་དང༌། འབྱུང་བ་བཞི་དང༌། ཉོན་མོངས་པ་བཞི་རྣམ་པར་དག་པ་ཡེ་ཤེས་ལྔ་དང༌། ཚད་མེད་པ་
བཞི་དང༌། དབང་པོ་ལྔ་དང༌། ཕ་རོལ་ཏུ་ཕྱིན་པ་རྣམས་ཀྱི་རང་བཞིན་ནོ། །བསྲུང་བའི་དམ་ཚིག་དང་སོགས་སྦྲེལ། དེ་ཙམ་མ་གཏོགས་ཆོ་ག་ལྷག་མ་རྣམས་ལ་ཁྱད་པར་མེད་དོ། །དེ་བཞིན་དུ་སློབ་མ་ལ་དབང་བསྐུར་བ་ལ་ཡང་ཁྱད་པར་མེད་དེ། དཀྱིལ་ཆོག་རྒན་པོ་ནས་བཤད་པའི་སྤྲོས་པ་ཟར་ཟུར་མང་པོ་དེ་རྣམས་ངེས་པར་དགོས་པ་མ་ཡིན་ལ། ཅི་སྟེ་སྤྲོས་པ་ལ་དགའ་བས་བྱེད་ན། སོ་སོའི་ཐད་དུ་ཇི་ལྟར་འོས་པ་སྦྱར་བས་འགྲུབ་མོད་ཀྱི། སྤྲོས་པ་ལ་ལས་ནི། ཆུ་གཙང་ལ་རྙོག་མ་བླང་བའི་དཔེ་དང་མཚུངས་པའང་འབྱུང་ཉེན་ཡོད་དོ། །དེ་བས་ན་དབང་ཆོག་རྒན་པོ་དྲི་མེད་སྣང་བར་གྲགས་པ་དང༌། སྒྲུབ་ཐབས་ཡིད་བཞིན་གཏེར་མཛོད་འདི་དག་རྩ་བ་རྭ་དཀོན་མཆོག་སེང་གེས་མཛད་རིགས་སུ་གདའ་ནའང༌། དེ་ལའང་ཕྱིས་སྤྲོས་པའི་ལྷད་མང་པོ་དང་བཅོས་བྱེད་མཁན་བྱུང་བར་མངོན་ཏེ། དཔེ་དུ་མ་བསགས་ན་ཚིག་སྣ་རིང་ཐུང་ཡང་སྣ་ཚོགས་སྣང་ངོ༌། །སྒྲུབ་དཀྱིལ་དེ་གཉིས་རྗེ་བཙུན་རྡོ་རྗེ་གྲགས་པའི་གསུང་མ་ཡིན་པ་ལ་ཡིན་པར་འཁྲུལ་བས། ཡི་གེ་དེ་གཉིས་རང་ཆེས་ཉོག་པའི་སྟེང་དུ།
ལྷན་ཐབས་འཛག་འཛོག་དུ་མ་བསྣན་པའི་རང་བཟོ་ལ་གཞན་ལ་མེད་པའི་ཁྱད་བཅོས་དང༌། ཟབ་ཁྱད་ཡིན་ནོ་སྙམ་མ་གོ་བོ་སྦོས་པ་ཡང་བག་རེ་སྣང་བ་སྙིང་རེ་རྗེ། འདིར་ནི་རྭ་འབུམ་སེང་གིས་མཛད་པའི་དཀྱིལ་ཆོག་གི་རྗེས་སུ་འབྲངས་པའོ། །རྡོ་རྗེ་འཇིགས་བྱེད་ཀྱི་ཆོས་སྐོར་རྭ་ལུགས་ལ་མངོན་པར་དགའ་བ་རྣམས་ཀྱིས་ལྷ་བཅུ་གསུམ་མའི་སྒྲུབ་ཐབས་དང་དབང་བསྐུར་ཆོ་ག་རྣམས་ལ་ཡང་མཁས་པར་བྱ་དགོས་སོ། །ཞེས་པ་དཔལ་རྡོ་རྗེ་འཇིགས་བྱེད་བཅུ་གསུམ་མའི་ཆོ་གའི་ཁྱད་པར་ཕྱེ་བ་འདི་ཡང༌། དོན་གཉེར་འགའ་ཞིག་གིས་བསྐུལ་བའི་ངོར། རྒྱལ་ཁམས་པ་ཏཱ་ར་ནཱ་ཐས་ངེས་པར་བརྗོད་པའོ།། །།བཀྲ་ཤིས། ཞུས་དག །
ཤོག་སྟོང་།