བཅོམ་ལྡན་འདས་གཤིན་རྗེ་གཤེད་ནག་པོ་ལྷ་བཅུ་གསུམ་གྱི་སྒྲུབཐབས་རྡོ་རྗེ་འོད་ཟེར།
བཅོམ་ལྡན་འདས་གཤིན་རྗེ་གཤེད་ནག་པོ་ལྷ་བཅུ་གསུམ་གྱི་སྒྲུབཐབས་རྡོ་རྗེ་འོད་ཟེར་ཞེས་བྱ་བ་བཞུགས།
ཨོཾ་སྭཱ་སྟི། ན་མོ་བཛྲ་ཨཱ་ཙརྱཱ་ཡ། གང་ཞིག་མཐའ་གཉིས་ལ་གནས་གཤིན་རྗེའི་ཚོགས། །གཉིས་མེད་ཡེ་ཤེས་སྟོབས་ཀྱིས་རབ་བརྫེས་པས། །ལྷན་སྐྱེས་ཡེ་ཤེས་མཆོག་གི་རྒྱལ་ཐབས་མཁན། །བླ་མ་གཤིན་རྗེ་གཤེད་པོའི་ཞབས་ལ་འདུད། །གདོད་མའི་རང་བཞིན་བཅུ་གསུམ་འཁོར་ལོའི་བདག །རིམ་གཉིས་ལམ་གྱིས་དྲི་མ་སྦྱངས་པ་ལས། །ཟུང་འཇུག་རྡོ་རྗེའི་གནས་མཆོག་ཐོབ་པའི་ཐབས། །མདོར་བསྡུས་ཙམ་ཞིག་བདག་གིས་བཤད་པར་འདོད། །གྲུབ་པ་རིག་པ་འཛིན་རྣམས་ཀྱིས། །བཤད་གང་ཚིག་དོན་རྟོགས་དཀའ་བས། །འདིར་འབད་གོ་བླའི་ཕྱིར་འབབ་ཞིག །གཞན་དུ་རྙེད་སོགས་འདོད་པས་མིན། །འདིར་བྲིས་སྐུ་བཀྲམ་ཞིང༌། མཆོད་གཏོར་ལག་ལེན་བཞིན་བཤམས་ལ། སྐྱབས་འགྲོ་སེམས་བསྐྱེད་སྔོན་དུ་འགྲོ་བས། རོལ་མོའི་སྒྲ་དང་བཅས་ཏེ། རྡོ་རྗེ་གསོར་ཞིང་དྲིལ་བུ་དཀྲོལ་ལ། རང་སྐད་ཅིག་གིས་སེམས་དཔའ་གསུམ་བརྩེགས་སུ་གྱུར། ཨོཾ་སུམྦྷ་ནི་སུམྦྷ་ཧཱུཾ། གྲྀཧྞ་གྲྀཧྞ་ཧཱུཾ། གྲྀཧྞ་པཱ་ཡ། གྲྀྀཧྞ་པཱ་ཡ་ཧཱུཾ། ཨ་ན་ཡ་
ཧོ། བྷ་ག་ཝན། བིདྱཱ་རཱ་ཛ་ཧཱུཾ་ཕཊ། ཧྲཱིཿཥྚཱིཿ ཡི་གེ་བཅུ་བཞི་པ་ལན་གསུམ་གྱི་མཐར། གནོད་བྱེད་མཱ་ར་ཡ་ཕཊ། ཅེས་བཏགས། རང་གི་སྙིང་ག་ནས་སྤྲོས་པའི་ཁྲོས་བོས་བགེགས་ཐམས་ཅད་བསྐྲད་པར་གྱུར། ཕོ་ཉ་རྣམས་རང་ལ་ཐིམ། རྡོ་རྗེ་བསྡུ་བའི་ཕྱག་རྒྱ་བཅས་ལ། ཨོཾ་བཛྲ་ས་མཱ་ཛཿ ཞེས་བརྗོད་དོ། །རང་གི་སྙིང་གའི་ཡ་ཡིག་ལས། ལྷ་མོ་བཞི་སྤྲོས། བླ་མ་ཡེ་ཤེས་སེམས་དཔའི་ཚུལ་དུ་བཞུགས་པའི་གཤིན་རྗེ་གཤེད་ལྷ་བཅུ་གསུམ་གྱི་དཀྱིལ་འཁོར་སྤྱན་དྲངས། མདུན་གྱི་ནམ་མཁར་བཞུགས། ལྷ་མོ་བཞི་རང་ལ་ཐིམ། མཆོད་པ་མཆོད་བྱེད་མཆོད་ཡུལ་རྣམས་རང་བཞིན་གྱི་རྣམ་པར་དབེན་པའོ། །སྙིང་གའི་ས་བོན་ལས་རང་འདྲ་དཔག་ཏུ་མེད་པ་སྤྲུལ། ཕྱག་དང་བསྐོར་བ་བྱས་པར་བསམ། ཨོཾ་སརྦ་ཏ་ཐཱ་ག་ཏ་པཱ་ད་བནྡྷ་ནཾ་ཀ་རོ་མི། ཧྲཱིཿཥྚཱིཿ ལན་གཅིག་བརྗོད། སྙིང་ག་ནས་མཆོད་པའི་ལྷ་མོ་དཔག་ཏུ་མེད་པ་སྤྲུལ། མཆོད་རྫས་རྣམས། ཧྲཱིཿཥྚཱིཿས་བསངས། ཨོཾ་བཛྲ་པུཥྤེ་ཧཱུཾ་
ནས། ཤཔྟའི་བར་གྱི་སྔགས་དང༌། ཕྱག་རྒྱས་བྱིན་གྱིས་བརླབས། ཨོཾ་ཨ་ཀ་རོ་མུ་ཁཾ། སརྦ་དྷརྨཱ་ནན། ཨཱ་དྱ་ནུཏྤནྣ་ཏྭཏ། སྟོང་ཉིད་ཀྱི་དོན་བསྒོམ། གཙང་ཞིང་གཙང་མར་སྦྱར་བ་ཡི། །ལྷ་རྫས་དམ་པའི་ཞབས་བསིལ་འདི། །བླ་མ་རྫོགས་སངས་རྒྱས་ལ་འབུལ། །ཞབས་རྣམས་ཉེ་བར་བསིལ་བར་མཛོད། །ཧྲཱིཿཥྚཱིཿའི་མཐར། ཨོཾ་བཛྲ་པྲ་ཝ་ར་སཏྐ་ར་པྲ་ཏཱིཙྪ་སྭཱཧཱ། དེ་བཞིན་དུ། ཞབས་བསིལ་གནས་སུ། འཐོར་ཐུང་འདི། སྐུ་དང་ཕྱག་ནི་བསིལ་བར་མཛོད། །ཧྲཱིཿཥྚཱིཿའི་མཐར། ཨོཾ་བཛྲ་ནི་རི་ཏེ་ཧཱུཾ་ཁཾ། དེ་བཞིན་དུ། ཞལ་བསིལ་འདི། ཞལ་རྣམས་ཉེ་བར་བསིལ་བར་མཛོད། །ཧྲཱིཿཥྚཱིཿའི་མཐར། ཨོཾ་བཛྲ་ཨརྒྷཾ་པྲ་ཏཱིཙྪ་སྭཱཧཱ། ཆུ་དང་ཐང་ལས་སྐྱེས་པ་ཡི། །ལྷ་རྫས་དམ་པའི་པདྨ་འདི། །བླ་མ་རྫོགས་སངས་རྒྱས་ལ་འབུལ། །པདྨའི་གདན་ལ་བཞུགས་སུ་གསོལ། །ཨོཾ་བཛྲ་པདྨ་ཀཱ་མ་ཡེ་སྟྭཾ། ལྷན་ཅིག་སྐྱེས་དང་སྦྱར་བ་ཡི། །ལྷ་རྫས་དམར་པའི་བདུག་སྤོས་འདི། །བླ་མ་རྫོགས༴ འགྲོ་བའི་དོན་དུ་བཞེས་སུ་གསོལ། །ཨོཾ་བཛྲ་དྷཱུ་པེ་ཧཱུཾ། ཆུ་དང་ཐང་ལས་སྐྱེས་པ་ཡི། །ལྷ་རྫས་དམ་པའི་མེ་ཏོག་འདི། །བླ་མ་རྫོགས༴ འགྲོ་བའི་དོན་དུ༴ བཛྲ་པུཥྤེ་ཏྲཾ། འབྱུང་བ་ཆེ་རྣམས་རྒྱུར་བྱས་པའི། །སྣང་གསལ་འདི། བླ་མ་རྫོགས༴ འགྲོ་བའི་དོན༴ བཛྲ་ཨཱ་ལོ་ཀེ་ཧྲཱིཿ ལྷན་ཅིག་སྐྱེས་དང་སྦྱར་བྱུང་བའི། །དྲི་མཆོག་འདི། བཛྲ་གནྡྷེ་ཨ། འབྱུང་བ་ཆེ་ལས་རྒྱུར་བྱས་པའི། །ཞལ་ཟས་འདི། བཛྲ་ནེ་ཝེ་ཏེ། དེ་ལས་གཞན་ཡང་མཆོད་པའི་ཚོགས། །རོལ་མོ་དབྱངས་སྙན་ཡིད་འོང་སྒྲ། །བླ་མ་སོགས། བཛྲ་ཤཔྟ་ཨཱཿཧཱུཾ། གཟུགས་དང་སྒྲ་དང་དྲི་དང་རོ། །རེག་བྱ་དག་ནི་འདོད་ཡོན་ལྔ། །གཞན་ཡང་མཆོད་པའི་རྣམ་པ་ནི། །
རིན་ཆེན་རི་དང་དཔག་བསམ་ཤིང༌། །བླ་བྲེ་རྒྱལ་མཚན་འཕན་གདུགས་ཀྱིས། །ཕྱོགས་བཅུའི་འཇིག་རྟེན་ཁམས་བཀང་ནས། །བླམ་སོགས། ཨོཾ་སརྦ་ཏ་ཐཱ་ག་ཏ་པཱུ་ཛ་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། ལྷ་མོ་རྣམས་སྙིང་གའི་ཡ་ཡིག་ལ་ཐིམ། བསྡུས་པ་ལ་མོས་པས་མཆོད་པའི་ཚིགས་བཅད་རྣམས་མ་བརྗོད་ཀྱང་རུང་ངོ༌། །དེ་ནས་སྡིག་སྒྲིབ་སྦྱངས་ཤིང་ཉམས་ཆགས་བསྐང་བའི་དོན་དུ་རྡོ་རྗེ་སེམས་དཔའ་ཡི་གེ་བརྒྱ་པ་ཅི་འགྲུབ་ཏུ་བཟླས། ཐལ་མོ་སྦྱར་ཞིང་དོན་དྲན་བཞིན་པས། ལུས་ངག་ཡིད་ཀྱིས་སྡིག་བགྱིས་དང༌། །བགྱིད་དུ་བརྩལ་དང་ཡི་རང་དང༌། །སྒྱུ་མ་སྒྱུ་མ་ལ་སོགས་བཞིན། །ཐུགས་རྗེ་ཅན་རྣམས་མདུན་དུ་བཤགས། །སྔོན་བྱས་མ་ལུས་བཤགས་ནས་ནི། །ཕྱིན་ཆད་དེ་ལ་མི་འཇུག་ཅིང༌། །བྱང་ཆུབ་སྙིང་པོར་མཆིས་ཀྱི་བར། །མི་དགེ་ཀུན་ལས་ལྡོག་པར་བགྱི། །སངས་རྒྱས་དེ་སྲས་འཕགས་རྣམས་དང༌། །སྲིད་པ་མཐར་ཕྱིན་དམ་པའི་ཆོས། །སྐྱབས་ཀྱི་དམ་པ་དེ་གསུམ་ལ། །དེ་ཉིད་གུས་པས་སྐྱབས་སུ་མཆི། །རྣམ་རྟོག་རྒྱ་ཡིས་རབ་བཅིངས་ཤིང༌། །འཁོར་བའི་རྒྱ་མཚོར་ནུབ་པ་ཀུན། །བསྒྲལ་ཕྱིར་བདེ་གཤེགས་ཉིད་ཐོབ་པ། །བྱང་ཆུབ་མཆོག་ཏུ་སེམས་བསྐྱེད་དོ། །བདེ་གཤེགས་སྲས་བཅས་འཕགས་སྐྱེ་བོ། །ཀུན་གྱི་དགེ་བ་ཀུན་བསྡུས་ལ། །སེལ་མེད་རབ་ཏུ་ཡི་རང་ཞིང༌། །ལེགས་སོ་ཞེས་ཀྱང་བསྔགས་པར་བགྱི། །དུས་སུམ་བདེ་གཤེགས་སྲས་བཅས་ཀུན། །གཤེགས་ཤིང་གཤེགས་དང་གཤེགས་འགྱུར་བའི། །སྦྱིན་སོགས་ལམ་གྱི་རང་བཞིན་གང༌། །ཅི་ཡོད་སྟོབས་ཀྱིས་ཡང་དག་རྟེན། །ཡོན་ཏན་རྒྱ་མཚོ་ལྡན་རྣམས་ལ། །བདག་ཉིད་བདག་གིས་འབུལ་ལགས་ཀྱི། །
ཐུགས་རྗེ་མངའ་བ་ཁྱེད་རྣམས་ཀྱིས། །སོ་སོར་ནང་འཁོར་སྤྱོད་དུ་བཞེས། །གང་ཞིག་མྱ་ངན་འདའ་བཞེད་ལ། །ཇི་སྲིད་འཁོར་བ་གནས་བར་དུ། །དེ་སྲིད་མྱ་ངན་མི་འདའ་བར། །ཐུགས་རྗེ་ཅན་ལ་གསོལ་བ་འདེབས། །བྱང་ཆུབ་ཤིང་ལ་གཟིགས་རྣམས་ལ། །ཐེག་ཆེན་བདུད་རྩི་རབ་བཤད་པར། །འགྲོ་བའི་ཡབ་ཏུ་གྱུར་རྣམས་ལ། །འཁོར་ལོ་བསྐོར་བར་གསོལ་བར་འཚལ། །ལུས་ངག་ཡིད་ཀྱི་དགེ་བ་གང༌། །བགྱིས་པ་མ་ལུས་ཀུན་བསྡུས་ནས། །འགྲོ་བ་ཀུན་གྱི་བདེ་ཆེན་ཉིད། །ཐོབ་པའི་རྗེས་སུ་མཐུན་གྱུར་ཅིག །བཛྲ་མུཾ། ཡིད་ཀྱིས་དྲན་པས་གཤེགས་སུ་གསོལ། བདག་ཏུ་འཛིན་པས་འཁོར་བར་ལྷུང་བའི་སེམས་ཅན་རྣམས་སྙིང་རེ་རྗེ། འདི་རྣམས་སྡུག་བསྔལ་དང་བྲལ་བར་གྱུར་ཅིག་སྙམ་པ་དང༌། ཆོས་རྣམས་སྟོང་པ་ཉིད་ཡིན་པ་ལ། དེ་ལྟར་མ་རྟོགས་པ་སྙིང་རེ་རྗེ། རྣམ་ཐར་སྒོ་གསུམ་གྱི་དོན་རྟོགས་པར་གྱུར་ཅིག སྙམ་དུ་བསམ། སྟོང་ཉིད་སྙིང་རྗེ་དབྱེར་མེད་པའི་དོན་བསྒོམ་སྟེ། ཨོཾ་ཤཱུ་ནྱ་ཏ་ཛྙཱ་ན་བཛྲ་སྭ་བྷཱ་ཝ་ཨཏྨ་ཀོ྅ཧཾ། སྟོང་པའི་ངང་ལས་རང་གི་བར་དོའི་རྣམ་ཤེས་ཀྱི་རང་བཞིན། གཞི་དང་འབྲས་བུའི་སྒོ་གསུམ་གྱི་ངོ་བོ། ཨོཾ་དཀར་པོ། ཨཱཿདམར་པོ། ཧཱུཾ་སྔོན་པོ་རྣམས། ཧོཿདམར་སྐྱ་གཉིས་ཀྱི་ནང་དུ་ཆུད་པ་ནམ་མཁར་གནས། དེ་ལས་ཨ་ཆད་པ་ལས་ཉི་མའི་དཀྱིལ་འཁོར། ཧཱུཾ་ཆད་པ་ལས་སྣ་ཚོགས་རྡོ་རྗེ་ཤར་དཀར་ལྷོ་སེར་ནུབ་དམར་བྱང་ལྗང༌། ལྟེ་བ་མཐིང་ག་ལ་ཧཱུཾ་གིས་མཚན་པ། ཧཱུཾ་ལས་རྡོ་རྗེ་དང་འོད་ཟེར་ཕྱོགས་བཅུར་སྤྲོས་པས། །རྭ་བ་གུར་མེ་རི་འབར་བ་དང་བཅས་པར་གྱུར། ཅེས་སོ། །སྐབས་འདིར་དུར་ཁྲོད་བསྐྱེད་ནའང་རུང་ངོ༌། །དེ་ནས་གུར་གྱི་དབུས་སུ་པད་
ཟླའི་གདན། སཾ་ལས་རྡོ་རྗེ་སཾ་དང་བཅས་པར་གྱུར། དེ་ལས་ཀུན་ཏུ་བཟང་པོ་རྒྱུའི་རྡོ་རྗེ་འཆང་དང་མཚུངས་པར་གྱུར། འབྲུ་ལྔ་གཉིས་པ་ཞིག་ཆད་དེ། ཀུན་བཟང་གི་ཞལ་དུ་ཞུགས། སྙོམས་འཇུག་རྗེས་ཆགས་ཀྱིས་འོད་ཏུ་ཞུ་བ་ལས། ཆོས་འབྱུང་དཀར་པོ་ཟུར་གསུམ་རྩེ་མོ་འཐུར་དུ་ཕྱོགས་པ། འཕེལ་ཁ་གྱེན་དུ་ཕྱོགས་པའོ། །དེའི་དབུས་སུ་དུར་ཁྲོད་ཆེན་པོ་བརྒྱད་ཀྱི་བསྐོར་བའི་ནང་དུ། པཾ་ཆད་པ་ལས་སྣ་ཚོགས་པདྨ། གེ་སར་གྱི་ཁཾ་ལྗང་ཁུ་ལས་སྣ་ཚོགས་རྡོ་རྗེ། དེའི་ལྟེ་བར་བྷྲུཾ་ལས་འཁོར་ལོ་སེར་པོ་བྷྲུཾ་གྱིས་མཚན་པ་ལས། གཏི་མུག་གཤིན་རྗེ་གཤེད་ཡབ་ཡུམ་དུ་གྱུར། འབྲུ་ལྔ་ལས་རང་འདྲ་བའི་ཡི་གེ་ཆད། ཞལ་དུ་ཞུགས། རྗེས་ཆགས་ཀྱིས་འོད་དུ་ཞུ་བ་ལས། རིན་པོ་ཆེ་སྣ་ཚོགས་ལས་གྲུབ་པའི་གཞལ་མེད་ཁང་གྲུ་བཞི་སྒོ་བཞི་རྟ་བབས་བཞི་དང་ལྡན་པ། ནང་ནས་རིམ་པ་བཞིན་དུ། ནག་ལྗང་དམར་སེར་དཀར་བའི་རྩིག་པ་རིམ་པ་ལྔ་དང་ལྡན་པ། འདོད་ཡོན་གྱི་སྣམ་བུའི་སྟེང་དུ་མཆོད་པའི་ལྷ་མོ་དང་བཅས་པ། རྩིག་པའི་སྟེང་དུ་གསེར་གྱི་སྐེ་རགས་ལ་དྲ་བ་དང་དྲ་བ་ཕྱེད་པ་འཕྱང་བ། དེའི་སྟེང་དུ་བཱ་ཀུ་ལིའི་འཕྲེང་བ་དང༌། སྟེང་དུ་ཀྲ་མ་ཤིརྵའི་པུ་ཤུས་བསྐོར་པ། སྒོ་ཁང་བཞིའི་མདུན་དུ་ཀ་རྒྱན་དང་བཅས་པའི་ཀ་བ་གཉིས་གཉིས་ཀྱིས་བཏེག་པའི་རྟ་བབས་བཞི་དང༌། པདྨ་ལ་གནས་པའི་ཆོས་འཁོར་དང༌། རི་དྭགས་དང་གདུགས་ལ་སོགས་པས་མཛེས་པ། འདོད་སྣམ་གྱི་ཕྱི་རོལ་ཕ་གུ་སེར་པོ་རྩིག་པའི་ལྕགས་ཆུང་གིས་བསྐོར་བ། ནང་གི་ལྷ་སྣམ་ཤར་དཀར། ལྷོ་སེར། ནུབ་དམར། བྱང་ལྗང༌། དབུས་སྔོ་བས་གཞི་ལ་ལྷའི་གདན་སྣ་ཚོགས་རྡོ་རྗེ་
རྒྱ་གྲམ། ཤར་དུ་འཁོར་ལོ། ལྷོར་རིན་པོ་ཆེ། ནུབ་ཏུ་པདྨ། བྱང་དུ་རལ་གྲིས་མཚན་པའི་ཀ་བ་གཉིས་གཉིས་ཀྱིས་བཏེག་པའི་རྡོ་རྗེའི་གདུང་ཟླུམ་པོ། ཕྱི་ནང་གཉིས་རྡོ་རྗེའི་ཐོག་ཕུབ་དང་བཅས་པ་སྟེ་པདྨའི་དབྱིབས་ཅན་གྱི་རེ་མིག་དགུ་པའོ། །ཕྱི་ནང་ཐམས་ཅད་དྭངས་ཤིང་འོད་གསལ་བ། རྒྱན་ཐམས་ཅད་ཀྱིས་བརྒྱན་པར་གྱུར། དབུས་ཀྱི་སྣ་ཚོགས་རྡོ་རྗེའི་ལྟེ་བ་དང༌། ནང་གི་ཤར་ལས་གཞན་པའི་ཕྱོགས་གསུམ་དང༌། སྒོ་བཞིར་ཉི་མའི་གདན། ཤར་གྱི་རྭ་དབུས་མའི་སྟེང་དུ། ཕྱི་ནང་གྲྭ་བཞིར་ཟླ་བའི་གདན་དང་བཅས་པའོ། །འདིར་ཁ་ཅིག་ཐོད་པ་བཞི་ལ་པདྨའི་གདན་དང༌། དབུས་སུ་མ་ཧེ་དང་གཤིན་རྗེའི་གདན་ཡང་བཞེད་དོ། །འོན་ཀྱང་དབུས་སུ་སྐབས་འདིར་ཉི་གདན་བསྐྱེད་པ་དེ་མངོན་བྱང་ལྔ་པའི་ཚེ་ཟླ་གདན་དུ་བསྒྱུར། འབྲས་བུའི་སྐབས་ཉི་མ་གཤིན་རྗེ་མ་ཧེ་དང་བཅས་པར་བསྒྱུར་པ་ཞང་ལུགས་ཀྱི་བླ་མ་གོང་མ་རྣམས་ཀྱི་བཞེད་པ་ཐུན་མོང་མ་ཡིན་པའོ། །དེ་དག་ནི་རྟེན་བསྐྱེད་པའི་རིམ་པའོ། །ནམ་མཁར་གནས་པའི་ཡིག་འབྲུ་ལྔ་ལས་འོད་འཕྲོས། རྒྱལ་བ་འོད་དཔག་མེད་ཀྱི་ཐུགས་ཀར་ཞུགས། མཚན་བཟང་པོ་རྣམས་ཀྱི་ནུས་པ་སྤྱན་དྲངས་ཏེ། གཙོ་བོའི་གདན་ལ་འཁོད། ཨ་ཨཱ། ཨི་ཨཱི། ཨུ་ཨཱུ། རྀ་རཱྀ། ལྀ་ལཱྀ། ཨེ་ཨཻ། ཨོ་ཨཽ། ཨཾ་ཨཿ ཕྲག་གཉིས་ལས་ཟླ་བའི་དཀྱིལ་འཁོར་ཨཱ་ལི་ཕྲག་གཉིས་ཀྱིས་མཚན་པ། སླར་ཡང་འབྲུ་ལྔ་ལས་འོད་འཕྲོས། རྒྱལ་བ་རྔ་སྒྲའི་རྒྱལ་པོའི་ཐུགས་ཀ་ནས། དཔེ་བྱད་བཟང་པོའི་ནུས་པ་རྣམས་སྤྱན་དྲངས། སྔར་གྱི་ཟླ་བའི་སྟེང་དུ་འཁོད། ཀ་ཁ་ག་གྷ་ང༌། ཙ་ཚ་ཛ་ཛྷ་ཉ། ཊ་ཋ་ཌ་ཌྷ་ཎ། ཏ་ཐ་ད་དྷ་ན། པ་ཕ་བ་བྷ་མ། ཡ་ར་ལ་ཝ། ཤ་ཥ་ས་ཧ་ཀྵ། ཡ་ར་ལ་ཝ་ཌ་ཌྷ་ཕྲག་གཉིས་ཞུ་བ་ལས་བྱུང་བའི་ཟླ་བ་ཀཱ་ལི་ཕྲག་གཉིས་ཀྱིས་མཚན་པར་གྱུར། དེ་གཉིས་
ཀྱི་དབུས་སུ། རཾ་དམར་པོ་དང་བཅས་པ་ནི་མེ་ལོང་ལྟ་བུའི་ཡེ་ཤེས་སོ། །ཨོཾ་ཙིཏྟ་པྲ་ཏི་བེ་དྷཾ་ཀ་རོ་ནི། རཾ་ལས་འོད་འཕྲོས། ཟླ་བ་ཡིག་འབྲུ་དང་བཅས་པ་ཞུ་ཞིང་འདྲེས་པ་ནི་མཉམ་པ་ཉིད་ཀྱི་ཡེ་ཤེས་སོ། །ཨོཾ་བོ་དྷི་ཙིཏྟ་ཨུ་པ་དཱ་ཡ་མི། དེ་ལྟ་བུའི་ཉི་ཟླ་འདྲེས་པ་ལ་ཧཱུཾ་དཀར་ལ་དམར་བའི་མདངས་ཆགས་པ། སོ་སོར་རྟོག་པའི་ཡེ་ཤེས། ཨོཾ་ཏིཥྛ་བཛྲ། ཧཱུཾ་ལས་སྣ་ཚོགས་རྡོ་རྗེའི་ལྟེ་བ་ལ་ཧཱུཾ་གིས་མཚན་པ། བྱ་བ་གྲུབ་པའི་ཡེ་ཤེས། ཨོཾ་བཛྲ་ཨཏྨ་ཀོ྅ཧཾ། དེ་ལས་འོད་འཕྲོས། འཕགས་པ་མཆོད། སེམས་ཅན་གྱི་དོན་བྱས། སླར་འདུས་ཏེ་ཐིམ་པ་ཡོངས་སུ་གྱུར་པ་ལས། བདག་ཉིད་རྒྱུ་རྡོ་རྗེ་འཆང་སྐུ་མདོག་དཀར་པོ། དཀར་ནག་དམར་བའི་ཞལ་གསུམ། ཕྱག་དྲུག་གི་གཡས་གཉིས་ན་རྡོ་རྗེ་དང་རལ་གྲི། གཡོན་གཉིས་ན་འཁོར་ལོ་དང་པདྨ། ཕྱག་ཐ་མ་གཉིས་ཀྱིས་གྲི་གུག་དང་ཐོད་ཁྲག་འཛིན་པས་རང་སྣང་གི་རིག་མ་ལ་འཁྱུད་པ། རོལ་བའི་ཁྲོ་བོ་ཆེན་པོ་རྒྱན་དང་ཆ་ལུགས་ཐམས་ཅད་ཡོངས་སུ་རྫོགས་པ། ལྷན་སྐྱེས་བདེ་བས་རྒྱུད་གང་བ། ཟླ་བའི་གདན་ལ་བཞུགས་པ་ནི་ཆོས་ཀྱི་དབྱིངས་ཀྱི་ཡེ་ཤེས་སོ། །ཨོཾ་ཡ་ཐཱ་སརྦ་ཏ་ཐཱ་ག་ཏ་ཏ་ཐ་ཨ་ཧཾ། དེ་དག་ནི་དང་པོའི་རྣལ་འབྱོར་རོ། །ཐུགས་ཀའི་ཧཱུཾ་གི་འོད་ཀྱིས། སངས་རྒྱས་ཐམས་ཅད་གཤིན་རྗེ་གཤེད་ཀྱི་རྣམ་པར་སྤྱན་དྲངས་ཏེ། ཞལ་དུ་ཞུགས། བྱང་ཆུབ་ཀྱི་སེམས་སུ་གྱུར་པ་རྡོ་རྗེའི་ལམ་ནས་ཡུམ་གྱི་པདྨར་བབས་པ། ལྷ་བཅུ་གསུམ་གྱི་དཀྱིལ་འཁོར་ཡོངས་སུ་རྫོགས་པར་གྱུར། ཐུགས་ཀའི་འོད་ཀྱིས་རིགས་དྲུག་གི་སེམས་ཅན་ཐམས་ཅད་བཀུག་སྟེ་མཁའ་ནང་གི་དཀྱིལ་འཁོར་དུ་བཅུག དབང་ཐམས་ཅད་བསྐུར་བར་གྱུར།
རིགས་དྲུག་གི་སྒྲིབ་པ་དག་སྟེ། སྐྱེ་མཆེད་དྲུག་བྱང་ཆུབ་སེམས་དཔའ་དྲུག་ཏུ་གྱུར་པ་རྣམས། ཀྵིཾ་ཛིཾ་ཁཾ་གཾ་ཀཾ་སཾ། མཁའ་ནང་ནས་ཕྱིར་སྤྲོས་ཏེ་རང་རང་གི་ཞིང་དུ་གཤེགས་པར་གྱུར། ནམ་མཁར་གནས་པའི་ཡིག་འབྲུ་ལྔ་རྣམས་སྐར་མདའ་འཕོ་བའི་ཚུལ་གྱིས་རྡོ་རྗེ་འཆང་གི་ཞལ་དུ་ཞུགས། བྱང་ཆུབ་ཀྱི་སེམས་སུ་གྱུར་སྙོམས་འཇུག་གི་བདེ་བ་ཆེན་པོས། ཡབ་ཡུམ་ལྷན་ཅིག་སྐྱེས་པའི་རང་བཞིན་བྱང་ཆུབ་ཀྱི་སེམས་ཀྱི་ངོ་བོར་ཞུ། འོད་ཟེར་གྱི་ཐིག་ལེ་མཚམས་བཞིར་སྤྲོས་ཏེ། ཛ་ས་དོ་རུ་རྣམས་སུ་གྱུར། དེ་རྣམས་ལས་གྲི་གུག་བཞི། ཛ་ས་དོ་རུས་མཚན་པ། དེ་རྣམས་ཙརྩི་ཀ་ལ་སོགས་པའི་ལྷ་མོ་བཞིར་གྱུར་ཏེ། ཀྱཻ། རྗེ་བཙུན་ཐུགས་རྗེས་ཁྲོས་བཞེངས་ལ། །གནས་གསུམ་ཀུན་གྱི་གཏི་མུག་སྤོངས། །གཙོ་བོ་བདུད་རྣམས་ཀུན་ལས་རྒྱལ། །རྗེ་བཙུན་ཁྲོས་པའི་ཐུགས་ཀྱིས་བཞེངས། །འཇིག་རྟེན་མགྲོན་གཉེར་སྟོང་གནས་ཅི། །རྗེ་བཙུན་འཇིག་རྟེན་བསོད་ནམས་བཞེངས། །ཀྱཻ། ཁྱོད་ནི་སྟོང་དམིགས་ཅི་སྟེ་བཞུགས། །འཇིག་རྟེན་བྱང་ཆུབ་རང་བཞིན་མགྲོན། །ཅེས་བསྐུལ་ཏེ་ལྷ་མོ་བཞི་ཡང་ཐིག་ལེ་ལ་ཐིམ། ཐིག་ལེ་དེ་ཉིད་ཡ་ལས་རྡོ་རྗེ་ནག་པོ་རྩེ་ལྔ་པ་ཡས་མཚན་པར་གྱུར། དེ་ལས་འབྲས་བུ་རྡོ་རྗེ་འཛིན་པ་བཅོམ་ལྡན་འདས་ཞེ་སྡང་རྡོ་རྗེ་གཤིན་རྗེ་གཤེད་སྐུ་མདོག་དུས་མཐའི་སྤྲིན་ལྟར་གནག་པ། རྩ་བའི་ཞལ་ནག་པོ། གཡས་དཀར་བ། གཡོན་དམར་བ། དམར་ལ་ཟླུམ་པའི་སྤྱན་གསུམ་གསུམ་དང་ལྡན་པ། རྣམ་པར་འགྱུར་བའི་ཞལ་མཆེ་བ་རབ་ཏུ་གཙིགས་པ། སྨ་ར་དང༌། སྨིན་མ་དང༌། དབུ་སྐྲ་ཁམ་སེར་གྱེན་དུ་འཁྱིལ་བ། ཕྱག་དྲུག་གི་གཡས་ཀྱི་དང་པོ་
ན་རྡོ་རྗེ་ནག་པོ་རྩེ་ལྔ་པ། གཉིས་པ་ན་རལ་གྲི། གཡོན་གྱི་དང་པོ་ན་འཁོར་ལོ། གཉིས་པ་ན་པདྨ་དམར་པོ། ཕྱག་མདུན་མ་གཉིས་ཀྱི་གྲི་གུག་དང༌། ཐོད་པ་ཁྲག་གིས་གང་བ་འཛིན་པས། ཡུམ་རྡོ་རྗེ་ཕག་མོ་རང་དང་འདྲ་བ་ལ་འཁྱུད་པ། ཞབས་གཡས་བསྐུམ་གཡོན་བརྐྱང་པས་ཉི་མའི་གདན་ལ། མ་ཧེ་ནག་པོ་དྲེགས་ཤིང་འཁྲོས་པ་མགོ་བོ་གཡས་སུ་བསྟན་པའི་སྟེང་དུ། གཤིན་རྗེ་ཕོ་མོ་ཕན་ཚུན་མགོ་བོ་དང་རྐང་པ་བསྣོལ་ཐབས་སུ་མནན་ཞིང་བརྫིས་པ། སྟག་ལྤགས་ཀྱི་ཤམ་ཐབས། གླང་ལྤགས་ཀྱི་སྟོད་གཡོགས། ཐོད་སྐམ་ལྔའི་དབུ་རྒྱན། རློན་པ་ཁྲག་འཛག་ལྔ་བཅུ་རྩ་གཅིག་གི་དོ་ཤལ་རྣམས་དང་བཅས་པ། རུས་རྒྱན་དྲུག་གིས་བརྒྱན་པ། ཀླུ་མཐའ་ཡས་སྔོན་པོས་དབུ་སྐྲ་བཅིངས་པ། འཇོག་པོ་དམར་པོས་རྣ་རྒྱན། རིགས་ལྡན་ཁྲ་བོས་དཔུང་རྒྱན། དུང་སྐྱོང་སེར་པོ་ཕྱག་གདུབ། པདྨ་དཀར་པོས་མགུལ་རྒྱན། སྟོབས་ཀྱི་རྒྱུ་ལྗང་ཁུས་དོ་ཤལ། ནོར་རྒྱས་བུ་དཀར་དམར་གྱི་སྐེ་རགས། པདྨ་ཆེན་པོ་དཀར་པོས་ཞབས་གདུབ་བྱས་པ། བསྐལ་པའི་མེ་ལྟ་བུའི་མེ་དཔུང་འབར་བའི་དབུས་ན་བཞུགས་པའོ། །ནག་པོ་ཆོས་དབྱིངས་མི་འགྱུར་བ། །ཞལ་གསུམ་ཉི་ཟླ་སྒྲ་གཅན་དག །དུས་གསུམ་ཁམས་གསུམ་གཟིགས་པའི་སྤྱན། །སྐྱེ་ཤི་གཅོད་མཛད་མཆེ་བ་གཙིགས། །ཐུགས་རྗེ་འདྲེན་མཛད་སྐྲ་སེར་འཁྱིལ། །ཐོད་སྐམ་རིགས་ལྔ་རྣམ་དག་པ། །ཕྱིན་དྲུག་ཕྱག་དྲུག་རིམ་པ་བཞིན། །མི་ཕྱེད་པ་དང་ཉོན་མོངས་གཅོད། །ཆོས་འཁོར་སྐྱོན་གྱི་མ་གོས་དང༌། །སྡིག་པ་གཅོད་དང་བདེ་བ་སྐྱོང༌། །གཏི་མུག་གླང་ལྤགས་སེམས་བྱུང་གི །
མགོ་འཕྲེང་ཁམས་དྲུག་དག་པའི་རྒྱན། །མ་རིག་མ་ཧེ་གཟུང་འཛིན་གྱི། །གཤིན་རྗེ་ཁྱོ་ཤུག་ཞབས་ཀྱིས་མནན། །ཐབས་ཤེས་ཟུང་འཇུག་ཡུམ་དང་སྦྱོར། །ཚོགས་བརྒྱད་དག་པའི་སྦྲུལ་རྒྱན་དང༌། །བསམ་པ་རྫོགས་བྱེད་རིན་ཆེན་རྒྱན། །མེ་དཔུང་ཡེ་ཤེས་ལྔ་ཡི་དངོས། །སྐབས་འདིར་ཞང་ལུགས་ཀྱི་བླ་མ་འགའ་ཞིག་སེང་གེའི་པགས་པས་སྟོད་གཡོག་དང༌། དགའ་བོ་སྔོན་པོས་སྐྲ་བཅིངས། པུ་ཙུ་ཤ་དང༌། ནོར་རྒྱས་ཀྱི་སྐེ་རགས་ཞེས་བཞེད་ཅིང༌། སྦྲུལ་གྱི་མགུལ་རྒྱན་མི་མཛད་དོ། །དེ་བཞིན་དུ་ཡུམ་རང་སྣང་ཙམ་དང༌། རྡོ་རྗེ་རོ་ལངས་མ་རྣམ་པ་ཡབ་དང་འདྲ་བར་མཛད་པ་ཡང་ཡོད་དོ། །འདི་དག་ཀྱང་ལུགས་ཐ་དད་ཅིང་མན་ངག་དང་ལྡན་པའི་ཕྱིར་མི་རུང་བ་མ་ཡིན་ནོ། །དེ་ནས། ཨོཾ་དྷརྨ་དྷ་ཏུ་སྭ་བྷཱ་ཝ་ཨཱཏྨ་ཀོ྅ཧཾ། ཞེས་བྱའོ། །དེ་དག་ནི་རྗེས་སུ་རྣལ་འབྱོར་རོ། །ཡབ་ཀྱི་གསང་བ་མི་དམིགས་པའི་ངང་ལས་ཧཱུཾ་ལས་བྱུང་བའི་རྡོ་རྗེ་ཨོཾ་ལས་བྱུང་བའི་ནོར་བུས་མཚན་པ། བུ་གར་ཕཊ་ཀྱིས་བཀག་པ། ཡུམ་གྱི་མཁའ་མི་དམིགས་པ་ལས། པཾ་ལས་བྱུང་བའི་པདྨ་ཨཱ་ལས་བྱུང་བའི་ཟེའུ་འབྲུས་མཚན་པ། རྩ་སྦུབས་བྷྲཱུཾ་གྱིས་བཀག་པ། ཐུགས་ཀའི་འོད་ཀྱིས་སངས་རྒྱས་ཐམས་ཅད་སྤྱན་དྲངས། ཞལ་དུ་ཞུགས། བྱང་ཆུབ་ཀྱི་སེམས་སུ་གྱུར། ཡབ་ཡུམ་སྙོམས་པར་ཞུགས། བྱང་ཆུབ་ཀྱི་སེམས་ཡུམ་གྱི་མཁར་བབས། ཨོཾ་སརྦ་ཏ་ཐཱ་ག་ཏ་ཨ་ནུ་རཱ་ག་ན་བཛྲ་སྭ་བྷཱ་ཝ་ཨཏྨ་ཀོ྅ཧཾ། ཐིག་ལེ་དེ་ཉིད་ཆ་བཅུ་བདུན་དུ་གྱུར། དེ་རྣམས་ཡ་ཀྵེ་མ་མེ་ད་ཡ་ཙ་ནཱི་ར་ཛ་ས་དོ་རུ་ཎ་ཡོ་ནི་ར་རྣམས་སུ་གྱུར། དེ་དག་ཀྱང་ཕྱག་མཚན་བཅུ་གསུམ་ཐོད་པ་བཞི་དང་
བཅས་པར་གྱུར། ཕྱག་མཚན་རྣམས་ཡོངས་སུ་གྱུར་པ་ལས། ལྷ་བཅུ་གསུམ་གྱི་དཀྱིལ་འཁོར་དུ་གྱུར་ཏེ། ཧྲཱིཿཥྚཱིཿ སོགས། མཁའ་ནང་གི་ཞེ་སྡང་གཤིན་རྗེ་གཤེད་དཔག་ཏུ་མེད་པ་སྤྲོས། སེམས་ཅན་ཐམས་ཅད་ཀྱི་ཞེ་སྡང་སྦྱངས། ཆོས་ཀྱི་དབྱིངས་ཀྱི་ཡེ་ཤེས་ལ་བཀོད། ཚུར་འདུས། བདག་ཉིད་ལ་ཐིམ་པས་མཐུ་སྟོབས་དཔག་ཏུ་མེད་པར་གྱུར། ཨོཾ་ཛི་ན་ཛིཀ་སྭཱཧཱ། གཏི་མུག་རྡོ་རྗེ་དཔག་ཏུ་མེད་པ་སྤྲོས། སེམས་ཅན་ཐམས་ཅད་ཀྱི་གཏི་མུག་སྦྱངས། མེ་ལོང་ལྟ་བུའི་ཡེ་ཤེས་ལ་བཀོད། ཚུར་འདུས། ཤར་གྱི་རྭ་ལ་འཁོད་པ་ནི། སྐུ་མདོག་དཀར་པོ། དཀར་ནག་དམར་བའི་ཞལ་གསུམ། ཕྱག་དྲུག་གི་གཡས་གཉིས་ན་འཁོར་ལོ་དང་རལ་གྲི། གཡོན་གཉིས་ན་རིན་པོ་ཆེ་དང་པདྨ་འཛིན་པ། ཨོཾ་རཏྣ་དྷྲྀཀ་སྭཱཧཱ། སེར་སྣ་རྡོ་རྗེ། ང་རྒྱལ་དང་སེར་སྣ་སྦྱངས། མཉམ་ཉིད་ཡེ་ཤེས་ལ་བཀོད། ལྷོའི་རྭ་ལ་འཁོད་པ་ནི། སྐུ་མདོག་སེར་པོ། སེར་ནག་དཀར་བའི་ཞལ་གསུམ་ཕྱག་དྲུག་གིས་གཡས་གཉིས་ན་རིན་པོ་ཆེ་དང་རལ་གྲི། གཡོན་གཉིས་ན་འཁོར་ལོ་དང་པདྨ་འཛིན་པ། ཨོཾ་ཨ་རོ་ལིཀ་སྭཱཧཱ། འདོད་ཆགས་རྡོ་རྗེ། ཞེ་སྡང༌། སོར་རྟོག་ཡེ་ཤེས་ལ་བཀོད། ནུབ་ཀྱི་རྭ་ལ་འཁོད་པ་ནི། དམར་པོ་དམར་ནག་དཀར་བའི་ཞལ་གསུམ་ཕྱག་དྲུག་གིས་གཡས་གཉིས་ན་པདྨ་དང་རལ་གྲི། གཡོན་གཉིས་ན་འཁོར་ལོ་དང་རིན་པོ་ཆེ་འཛིན་པ། ཨོཾ་པྲཛྙཱ་དྷྲྀཀ་སྭཱཧཱ། ཕྲག་དོག་རྡོ་རྗེ་དཔག་ཏུ་མེད་པ་སྤྲོས། སེམས་ཅན་ཐམས་ཅད་ཀྱི་ཕྲག་དོག་སྦྱངས། བྱ་སྒྲུབ་ཡེ་ཤེས་ལ་བཀོད། བྱང་གི་རྭ་ལ་འཁོད་པ་ནི། སྐུ་མདོག་ལྗང་ཁུ། ལྗང་ནག་
དཀར་བའི་ཞལ་གསུམ་ཕྱག་དྲུག་གིས་གཡས་གཉིས་ན་རལ་གྲི་དང་རྡོ་རྗེ། གཡོན་གཉིས་ན་འཁོར་ལོ་དང་པདྨ་འཛིན་པ། ཨོཾ་མུཏྒ་ར་དྷྲྀྀྀཀ་སྭཱཧཱ། རྡོ་རྗེ་ཐོ་བ། མ་དད་པ། དད་པའི་སྟོབས། ཤར་སྒོར། སྔོན་པོ་སྔོ་དཀར་དམར་བའི། ཐོ་བ་དང་རལ་གྲི། རིན་པོ་ཆེ་དང་པདྨ། ཨོཾ་དཎྜ་དྷྲྀཀ་སྭཱཧཱ། རྡོ་རྗེ་བེ་ཅོན། ལེ་ལོ། བརྩོན་འགྲུས་ཀྱི་སྟོབས། ལྷོ་སྒོར། དཀར་པོ་དཀར་ནག་དམར་བའི། བེ་ཅོན་དང་རལ་གྲི། འཁོར་ལོ་པདྨ། ཨོཾ་པདྨ་དྷྲྀཀ་སྭཱཧཱ། པདྨ་གཤིན་རྗེའི་དགྲ། བརྗེད་ངས། དྲན་པའི། ནུབ་སྒོར། དམར་པོ་སོགས་གོང་འདོད་ཆགས་རྡོ་རྗེ་དང་འདྲ། ཨོཾ་ཁཏྒ་དྷྲྀཀ་སྭཱཧཱ། རལ་གྲི་གཤིན་རྗེའི་དགྲ། རྡོ་རྗེ་རལ་གྲི། རྣམ་གཡེངས་དང་ཤེས་འཆལ། ཏིང་ངེ་འཛིན་དང་ཤེས་རབ་གྱི། བྱང་སྒོར། ལྗང་ཁུ་ཕྲག་དོག་རྡོ་རྗེ་དང་འདྲ། ཨོཾ་མོ་ཧཱ་རཱ་ཏཱི་སྭཱཧཱ། ཙརྩི་ཀ བརྣབས་སེམས། བྱམས་པ་ཚད་མེད། མེ་མཚམས་ཀྱི་གྲྭར། དཀར་མོ་སོགས། གཏི་མུག་རྡོ་རྗེ་དང་འདྲ། ཨོཾ་དྭེ་ཥ་རཱ་ཏཱི་སྭཱཧཱ། ཕག་མོ། རྣམ་པར་འཚེ་བ་སྦྱངས་སྙིང་རྗེ་ལ། བདེན་བྲལ་དུ། སྔོན་མོ་སྔོ་དཀར་དམར་བའི་རྡོ་རྗེ་དང་རལ་གྲི། འཁོར་ལོ་དང་པདྨ། ཨོཾ་ར་ག་རཱ་ཏཱི་སྭཱཧཱ། དབྱངས་ཅན་མ། མི་དགའ་བ། དགའ་བ་ཚད་མེད། རླུང་མཚམས་སུ། དམར་མོ་སོགས། འདོད་ཆགས་རྡོ་རྗེ་དང་འདྲ། ཨོཾ་བཛྲ་རཱ་ཏཱི་སྭཱཧཱ། མཛོད་ལྡན་མ། གནོད་སེམས་ལ་སོགས་པ། བཏང་སྙོམས། དབང་ལྡན་གྱི་གྲྭར། ལྗང་ཁུ་སོགས། ཕྲག་དོག་རྡོ་རྗེ་དང་འདྲ། ཐམས་ཅད་ཀྱང་རྩ་བའི་ཕྱག་འོག་མ་གཉིས་ཀྱིས་གྲི་གུག་དང་ཐོད་པ་ཁྲག་གིས་གང་བ་འཛིན་པ་སྟེ། ཁྲོ་བོ་བརྒྱད་རང་སྣང་གི་ཤེས་རབ་མ་ལ་འཁྱུད་ཅིང༌། ལྷ་མོ་བཞི་རང་སྣང་གི་ཐབས་
དང་སྦྱོར་བའོ། །ཐམས་ཅད་ཀྱང་ཞལ་རེ་རེ་ལ་སྤྱན་གསུམ་གསུམ་དང་ལྡན་ཞིང༌། སྟག་ལྤགས་ཀྱི་ཤམ་ཐབས་དང༌། སྐྲ་སེར་གྱེན་དུ་འཁྱིལ་ཞིང་གཡོན་བརྐྱང་བ། ལྷ་མོ་རྣམས་བུད་མེད་སྒྱུ་མའི་ང་རྒྱལ་གྱི་འགྱིང་ཞིང༌། ནུ་འབུར་རྒྱས་པ། ཟླ་བའི་འོད་ཟེར་འཕྲོ་བ། ཁྲོ་བོ་རྣམས་སྨ་ར་དང་སྨིན་མ་འབར་ཞིང༌། ཉི་མའི་འོད་ཟེར་ཅན། ཀུན་ཀྱང་མེ་དཔུང་འབར་བའི་དབུས་ན་བཞུགས་ཤིང༌། གནོད་བྱེད་ཐམས་ཅད་ཚར་གཅོད་པའོ། །གྲུབ་ཆེན་དཔལ་འཛིན་གྱི་སྒྲུབ་ཐབས་སུ། ཙརྩི་ཀ་སྐེམས་ཤིང་ཁྲོས་པ། ཟླ་གདན་ཟླ་འོད། ཕག་མོ་དང་གཽ་རི་སྦོམ་ཐུང༌། ཕག་མོ་ཕག་ཞལ་ཅན། དབྱངས་ཅན་མ་ཆགས་པའི་ཉམས་ཅན་དུ་བཤད་ཅིང༌། བླ་མ་གོང་མ་འགའ་ཞིག་ནི། གཙོ་འཁོར་ཐམས་ཅད་རོལ་པའི་ཁྲོ་བོ་ཁྲོ་མོར་བཞེད། སྤྱིར་གཙོ་འཁོར་ཐམས་ཅད་ཆེར་ཁྲོས་པ་ཡིན་ལ། ནང་ཚན་དུ་ལྟོས་པའི་རིགས་དང་མཐུན་པའི་ཉམས་འགྱུར་བྱར་རུང་ཞིང༌། བསྙེན་པའི་སྐབས་སུ། རོལ་བའི་ཁྲོ་བོར་བྱས་ན། བར་ཆད་མི་ལྡང་ཞིང༌། བཀྲ་ཤིས་པའི་དོན་ཡིན་ཞེས་གསུང་ངོ༌། །ཡང་གོང་བཞིན་སྦྱར་ཏེ། ཨོཾ་ཨཱཿཧཱུཾ། ལན་བཞི། ཐོད་པ་བཞི། གཟུགས་སྒྲ་དྲི་རོ་རེག་བྱ་ཆོས་ཁམས་རྣམས་ཀྱི་དྲི་མ་སྦྱངས། ཕ་རོལ་ཏུ་ཕྱིན་པ་དྲུག་ལ་བཀོད། རིམ་པ་གཉིས་པའི་གྲྭ་བཞིའི་གདན་གྱི་སྟེང་དུ་འཁོད་པར་གྱུར། དེ་དག་ནི་རྫོགས་པའི་རྣལ་འབྱོར་རམ་ཤིན་ཏུ་རྣལ་འབྱོར་རོ། །དཀྱིལ་འཁོར་གྱི་ལྷ་ཐམས་ཅད་ཀྱི་མིག་ཏུ་ཀྵིཾ་དང་འཁོར་ལོ་ལས། སའི་སྙིང་པོ་གཏི་མུག་རྡོ་རྗེ་དང་འདྲ་བ་ལ། རྣ་བར་ཛིཾ་དང་རྡོ་རྗེ་ལས། ཕྱག་ན་རྡོ་རྗེ་ཞེ་སྡང་རྡོ་རྗེ་དང་འདྲ་བ། སྣར་ཁཾ་དང་རིན་པོ་ཆེ་ལས། ནམ་མཁའི་སྙིང་པོ་སེར་སྣ་རྡོ་རྗེ་དང་འདྲ་བ། ལྕེར་གཾ་དང་པདྨ་ལས། འཇིག་རྟེན་དབང་ཕྱུག་འདོད་
ཆགས་རྡོ་རྗེ་དང་འདྲ་བ། སྐྲ་མཚམས་སུ་སྐཾ་དང་རལ་གྲི་ལས། སྒྲིབ་པ་རྣམ་སེལ་ཕྲག་དོག་རྡོ་རྗེ་དང་འདྲ་བ། བྲང་ཟེར་སཾ་དང་རྡོ་རྗེ་ལས། ཀུན་ཏུ་བཟང་པོ་རྒྱུ་རྡོ་རྗེ་འཆང་དང་འདྲ་བ། འོན་ཀྱང་ཐམས་ཅད་ཟླ་བའི་གདན་ལ་སེམས་དཔའི་སྐྱིལ་ཀྲུང་གིས་བཞུགས་པ་ཞི་དྲག་ཕྱེད་མའི་ཉམས་དང༌། རིན་པོ་ཆེས་བརྒྱན་པའོ། །འདིའི་ཀུན་ཏུ་བཟང་པོ་དཔལ་འཛིན་གྱིས་ལྟེ་བ་བཀོད་པར་བཤད་པ་སྤྱི་དང་མཐུན་ནོ། །ཐུགས་ཀར་ཧཱུཾ་ལས་ཐུགས་རྡོ་རྗེ། ཞེ་སྡང་རྡོ་རྗེ་དང་འདྲ་བའི་ཐུགས་ཀར་རྡོ་རྗེ་ལ་ཧཱུཾ་ནག་པོ། མགྲིན་པར་ཨཱཿལས་གསུང་རྡོ་རྗེ་འདོད་ཆགས་རྡོ་རྗེ་དང་འདྲ་བའི་ཐུགས་ཀར་པདྨ་ལ་ཨཱཿདམར་པོ། དཔྲལ་པར་ཨོཾ་ལས་སྐུ་རྡོ་རྗེ་གཏི་མུག་རྡོ་རྗེ་དང་འདྲ་བའི་ཐུགས་ཀར་འཁོར་ལོ་ལ་ཨོཾ་དཀར་པོ། དེ་རྣམས་ལས། དེ་བཞིན་གཤེགས་པ་རྣམས་སུ་མཉེས་ཤིང་འགུགས་པར་བྱེད་པའི་ལྷ་མོ་དཔག་ཏུ་མེད་པ་སྤྲོས། སངས་རྒྱས་ཐམས་ཅད་ཐུགས་གསུང་སྐུ་རྡོ་རྗེའི་ལྷ་ཚོགས་ཀྱི་རྣམ་པར་སྤྱན་དྲངས། ལྷ་རྣམས་ཀྱི་གནས་གསུམ་གྱི་རྡོ་རྗེ་གསུམ་ལ་ཐིམ། ཨོཾ་སརྦ་ཏ་ཐཱ་ག་ཏ་ཙིཏྟ་བཛྲ་སྭ་བྷཱ་ཝ་ཨཏྨ་ཀོ྅ཧཾ། ཨོཾ་སརྦ་ཏ་ཐཱ་ག་ཏ་ཝཱཀ་བཛྲ་སྭ་བྷཱ་ཝ་ཨཏྨ་ཀོ྅ཧཾ། ཨོཾ་སརྦ་ཏ་ཐཱ་ག་ཏ་ཀཱ་ཡ་བཛྲ་སྭ་བྷཱ་ཝ་ཨཏྨ་ཀོ྅ཧཾ། གཙོ་བོའི་ཐུགས་ཀར་རྡོ་རྗེ་ནག་པོ་རྩེ་ལྔ་པའི་ལྟེ་བར་ཡ། དེ་ལས་ལྷ་མོ་བཞི་དང་མཆོད་པའི་ལྷ་མོ་དཔག་ཏུ་མེད་པ་སྤྲུལ། དེ་བཞིན་གཤེགས་པ་རྣམས་མཆོད་ཅིང༌། བདག་ལ་དབང་བསྐུར་བར་གསོལ་བ་བཏབ་པས། ཕྱོགས་བཅུའི་སངས་རྒྱས་རྣམས་ཀྱི་ཐུགས་ཀ་ནས་སྤྲུལ་པའི་ལྷ་མོ་རྣམས་ཀྱི་གཙོ་མོ་ཙརྩི་ཀ་ལ་
སོགས་པ་བཞིས། བཀྲ་ཤིས་གླུ་དབྱངས་དང་རོལ་མོར་བཅས་བཞིན་པས། ཨོཾ་བཛྲིར་བྷ་ཝ་ཨཱ་བྷི་ཥིཉྩ་ཧཱུཾ། ཞེས་གསུང་བཞིན་བུམ་པའི་ཆུས་དབང་བསྐུར། སྐུ་གང་དྲི་མ་དག ཆུའི་ལྷག་མ་ཡར་ལུད་པ་ལས། གཙོ་བོ་ལ་རྒྱུ་རྡོ་རྗེ་འཆང་དང་འདྲ་བའི་རྡོ་རྗེ་སེམས་དཔའ་དང༌། འཁོར་རྣམས་ལ་གཙོ་བོ་ཉིད་ཀྱིས་དབུ་བརྒྱན་པའི་རིག་བདག་རྣམས་ཅུང་ཟད་ཞི་བ། ཟླ་བ་ལ་སྐྱིལ་ཀྲུང་གིས་བཞུགས་པའོ། །སླར་ཡང་སྙིང་ག་ནས་འོད་འཕྲོས། མཚམས་ཀྱི་ལྷ་མོ་བཞིའི་ཐུགས་ཀར་ཐིམ། དེ་རྣམས་ཀྱི་ཐུགས་ཀ་ནས་རང་འདྲ་དཔག་ཏུ་མེད་པ་སྤྲུལ་ཏེ། རང་བཞིན་གྱི་གནས་ནས། སངས་རྒྱས་ཐམས་ཅད་ཡེ་ཤེས་སེམས་དཔའ་ལྷ་བཅུ་གསུམ་གྱི་འཁོར་ལོའི་རྣམ་པར་བཛྲ་ས་མཱ་ཛཿ ཡེ་ཤེས་པ་རྣམས་རྡོ་རྗེའི་གུར་གྱི་སྟེང་དུ་བཞུགས་ཤིང༌། ལྷ་མོ་རྣམས་རང་གི་སྙིང་གར་ཐིམ་པར་བསམ། ཡང་ཐུགས་ཀའི་འོད་ཀྱིས་སྒོ་བ་བཞི་བསྐུལ། རང་འདྲ་དཔག་ཏུ་མེད་པ་སྤྲོས། རྡོ་རྗེ་གུར་གྱི་སྒོ་ཕྱེ། ཡེ་ཤེས་པ་རྣམས་ཁྱམས་ཀྱི་སྟེང་དུ་སྤྱན་དྲངས། ཕྱི་འབྲང་གི་བགེགས་རྣམས་བསྐྲད་དེ། གུར་གྱི་སྒོ་བཅིངས་པར་གྱུར། སྤྲུལ་པ་རྣམས་སྙིང་གར་ཐིམ། ཧྲཱིཿཥྚཱིཿ ལན་གཅིག་བརྗོད། ཐུགས་ཀ་ནས་མཆོད་རྫས་ཐོག་པའི་ལྷ་མོ་རྣམས་སྤྲུལ། ཧྲཱིཿཥྚཱིཿ ལན་གསུམ་བརྗོད་པས། མཆོད་པ་རྣམས་བསངས་ཤིང་བྱིན་གྱིས་བརླབས་པར་བསམ། ཡན་ལག་བརྒྱད་དང་ལྡན་པ་ཡི། །ལྷ་རྫས་དམ་པའི་ཞབས་བསིལ་འདི། །ཡེ་ཤེས་འཁོར་ལོའི་ཚོགས་ལ་འབུལ། །ཞབས་རྣམས་ཉེ་བར་བསིལ་བར་མཛོད། །ཧྲཱིཿཥྚཱིཿའི་མཐར། ཨོཾ་བཛྲ་པྲ་ཝ་ར་སཏྐ་ར་པྲ་
ཏཱིཙྪ་སྭཱཧཱ། དྲི་ཞིམ་རྣམས་དང་ལྡན་པ་ཡི། །ལྷ་རྫས་དམ་པའི་འཐོར་འཐུང་འདི། །ཡེ་ཤེས༴ ཕྱག་རྣམས༴ ཧྲཱིཿཥྚཱིཿའི་མཐར། ཨོཾ་བཛྲ་ནི་རི་ཏེ་ཧཱུཾ་ཁཾ། བདུད་རྩི་ལྔ་དང་སྦྱར་བ་ཡི། །ལྷ་རྫས་དམ་པའི་ཞལ་བསིལ་བདེ། །ཡེ་ཤེས༴ ཞལ་རྣམས༴ ཨརྒྷཾ། ཆུ་དང་ཐང་ལས་སྐྱེས་པ་ཡི། ཁ་དོག་དབྱིབས་ལེགས་པདྨ་འདི། །ཡེ་ཤེས༴ པདྨའི་གདན་ལ་བཞུགས་སུ་གསོལ། །པདྨ་ཀཱ་མ་ཡེ་སྟྭཾ། ཚིགས་བཅད་འདི་རྣམས་མ་བརྗོད་ཀྱང་རུང་ངོ༌། །ལྷ་མོ་རྣམས་ཐུགས་ཀར་ཐིམ། ཡང་རང་གི་སྙིང་ག་ནས་འོད་འཕྲོས། སྒོ་བ་བཞིའི་ཐུགས་ཀར་ཕོག ཐུགས་རྒྱུད་བསྐུལ་ཏེ། དགུག་གཞུག་བཅིང་མཉེས་ཀྱི་ལས་མཛད་པར་བསམ། ཨོཾ་མུཏྒ་ར་ཛཿ ཨོཾ་དཎྜ་ཧཱུཾ། ཨོཾ་པདྨ་ཧཱུཾ། ཨོཾ་ཁཏྒ་ཧོ། ཡབ་ཡུམ་སྙོམས་པར་ཞུགས་པའི་བྱང་ཆུབ་ཀྱི་སེམས་མཆོད་པའི་ལྷ་མོར་གྱུར་པ་རྣམས་ཡུམ་གྱི་བ་སྤུའི་བུ་ག་ནས་སྤྲོས། མཆོད་པ་རྣམས་གོང་ཚོགས་ཞིང་གི་སྐབས་དང་འདྲ་བ་ལས། ཚིགས་བཅད་རྣམས་བོར་བས་འགྲུབ་བོ། །ཀྱེ་ཀྱེ་གཤིན་རྗེ་གཤེད་ནག་པོ། །བླ་མ་སྲིན་པོའི་གཟུགས་རང་བཞིན། །བདག་གིས་ཁྱོད་མཐོང་རྣམ་པར་འཇིགས། །བླ་མ་ཁྲོ་བོའི་རང་བཞིན་སྤོངས། །བདག་པོ་ཡིས་ནི་གར་མཛད་པས། །མཐོ་རིས་མི་ཡུལ་ས་འོག་གཡོ། །ནག་པོ་ཁྲོ་བོ་ཉིད་ཀྱིས་འཇིགས། །གར་མཛད་ཁྱོད་ནི་འཇིགས་པ་ཆེ། །ནག་པོ་མི་ཐུང་གཤིན་རྗེའི་དགྲ། །རྣམ་པ་སྣ་ཚོགས་སྐུ་སྤྲུལ་པ། །རྡོ་རྗེ་དབྱངས་ཅན་མས་ཞུས་པ། །གར་མཛད་ཁྱོད་ནི་བདེ་བ་ཆེ། །ཧྲཱིཿཥྚཱིཿའི་གསང་སྔགས་གར་བྱེད་ཁྱོད། །ས་གསུམ་པོ་ཡི་འཁྲུལ་བ་སྤོངས། །རྗེ་བཙུན་སྙིང་རྗེའི་ཁྲོ་བོ་ཁྱོད། །གར་མཛད་འགྲོ་བ་ཡོངས་
ལ་གཟིགས། །ཨོཾ་སརྦ་ཏ་ཐཱ་ག་ཏ་པཱུ་ཛ་བཛྲ་སྭ་བྷཱ་ཝ་ཨཏྨ་ཀོ྅ཧཾ། གཏི་མུག་རྡོ་རྗེའི་རང་བཞིན་ཁྱོད། །གཤིན་རྗེ་གཤེད་པོ་ཤིན་ཏུ་འཇིགས། །སྟོན་པ་སངས་རྒྱས་ཀུན་གྱི་བདག །མི་འཇིགས་སངས་རྒྱས་ཁྱོད་ལ་འདུད། །སེར་སྣ་རྡོ་རྗེའི་རང་བཞིན་ཁྱོད། །གཤིན་རྗེ༴ ཐུགས་ཀྱི་རྡོ་རྗེ་རབ་གསལ་བ། །རིན་ཆེན་རྡོ་རྗེ་ཕྱག་འཚལ་བསྟོད། །འདོད་ཆགས་རྡོ་རྗེའི་རང་བཞིན་ཁྱོད། །གཙོ་བོའི་འདོད་ཆགས་ཆོས་འབྱུང་གནས། །དབྱངས་མཆོག་ཀུན་གྱི་མཆོག་གི་མཆོག །གསུང་གི་རྡོ་རྗེ༴ ཕྲག་དོག་རྡོ་རྗེའི་རང་བཞིན་ཁྱོད། །གཤིན་རྗེ་གཤེད་པོ་ལས་ཀུན་བྱེད། །ལས་ཀྱི་རྡོ་རྗེ་རབ་གསལ་བ། །ཕྱག་ན་རལ་གྲི་ཁྱོད་ཕྱག་འཚལ། །སངས་རྒྱས་ཀུན་གྱི་རང་བཞིན་སྐུ། །སངས་རྒྱས་ཐམས་ཅད་གཅིག་བསྡུས་པ། །སངས་རྒྱས་ཀུན་རབ་མཆོག་གི་མཆོག །དཀྱིལ་འཁོར་བདག་ལ་ཕྱག་འཚལ་བསྟོད། །ཨོཾ་སརྦ་ཏ་ཐཱ་ག་ཏ་སྟུ་ཏི་ར་བཛྲ་སྭ་བྷཱ་ཝ་ཨཏྨ་ཀོ྅ཧཾ། ལྷ་མོ་རྣམས་སྙིང་གར་ཐིམ། ནང་མཆོད་ཧྲཱིཿཥྚཱིཿའི་བསངས། ཨཱ་ཀ་རོས་སྦྱངས། སྟོང་པའི་ངང་ལས། ཡཾ་ལས་རླུང་གི་དཀྱིལ་འཁོར་སྔོན་པོ་གཞུ་བདུངས་བ་ལྟ་བུ། མཆོག་མ་ལ་བ་དན་དང༌། ཆང་ཟུང་ལ་ཡཾ་གྱིས་མཚན་པ། དེའི་སྟེང་དུ། མེའི་དཀྱིལ་འཁོར་དམར་པོ་གྲུ་གསུམ་རཾ་གྱིས་མཚན་པ། དེའི་སྟེང་དུ། མི་མགོའི་སྐྱེད་བུ་གསུམ་གྱི་སྟེང་དུ། ཨ་ལས་ཐོད་པ་ཕྱི་དཀར་ལ་ནང་དམར་བ། དུམ་བུ་གཅིག་པ། དེའི་ནང་དུ། དབུས་སུ་ཡ་ལས་བྱང་སེམས། ཤར་དུ་ཀྵེ་ལས་དྲི་ཆེན། ལྷོ་རུ་མ་ལས་དྲི་ཆུ། ནུབ་ཏུ་མེ་ལས་རཀྟ། བྱང་དུ་ད་ལས་ཀླད་པ། དེའི་སྟེང་དུ། དབུས་སུ་ན་ལས་མིའི་ཤ ཤར་དུ་གོ་ལས་བ་ལང་གི་ཤ ལྷོ་རུ་ཀུ་ལས་ཁྱིའི་ཤ ནུབ་ཏུ་ད་ལས་
གླང་པོ་ཆེའི་ཤ བྱང་དུ་ཧ་ལས་རྟའི་ཤ དེ་རྣམས་ཀྱི་སྟེང་དུ་ཧཱུཾ་ལས་རྡོ་རྗེ་དཀར་པོ་ཧཱུཾ་གིས་མཚན་པ། དེ་ལས་མཐོ་གང་ཙམ་གྱིས་དཔག་པར་ཟླ་བ་ལ་ཨོཾ། རྡོ་རྗེའི་ལྟེ་བའི་ཧཱུཾ་ལས་འོད་ཟེར་འོག་ཏུ་འཕྲོས། རླུང་གཡོས། མེ་སྦར། རྫས་རྣམས་ཞུ་ཞིང་ཁོལ། ཧཱུཾ། སྐྱོན་དང་དྲི་མ་སྦྱངས། ཨཱཿ ཁ་དོག་དམར་པོ་ཞུ་ཞིང་རོ་ཕུན་སུམ་ཚོགས་པར་གྱུར། ཨོཾ། ཁ་དོག་དང༌། དྲི་དང༌། ནུས་པ་ཕུན་སུམ་ཚོགས་པར་གྱུར། དེའི་རླངས་པ་གྱེན་དུ་འཕྱུར་བ་ཨོཾ་དང་ཟླ་བ་ལ་ཕོག་པས། དེ་ལས་འོད་ཟེར་འཕྲོས། སངས་རྒྱས་ཐམས་ཅད་ཀྱི་ཐུགས་ཀ་ནས། ཡེ་ཤེས་ཀྱི་བདུད་རྩི་སྤྱན་དྲངས་པ། ཟླ་བ་ཨོཾ་ཡིག་དང་བཅས་པ་ལ་ཐིམ། ཟླ་བ་ཨོཾ་ཡིག་རྡོ་རྗེ་བཅས་པ་ཡང་ཡེ་ཤེས་ཀྱི་བདུད་རྩིར་ཞུ་སྟེ། དམ་ཚིག་གི་བདུད་རྩི་དང་རོ་གཅིག་ཏུ་གྱུར་པས་ཐམས་ཅད་གང་བར་གྱུར། ཧཱུཾ་ཨཱཿཨོཾ། ཞེས་བརྒྱ་རྩའམ། ཉེར་གཅིག་ལ་སོགས་པས་བྱིན་གྱིས་བརླབས། རྩ་བརྒྱུད་ཀྱི་བླ་མ་རྣམས་རིགས་ཀྱི་བདག་པོའི་ངོ་བོར་བཞུགས་པར་གྱུར། ལྷ་ཐམས་ཅད་ཀྱི་ལྗགས་ཧཱུཾ་ལས་བྱུང་བའི་རྡོ་རྗེའི་སྦུ་གུས་བདུད་རྩི་གསོལ་བར་གྱུར། འཇམ་པའི་དབྱངས་དང་སངས་རྒྱས་ཡེ་ཤེས་ཞབས། །དཱི་པཾ་ཀ་ར་རོལ་པའི་རྡོ་རྗེ་དང༌། །སཱུ་ར་བཛྲ་ཤ་ན་བཛྲ་དང༌། །ཨ་ཝ་ལི་ན་གུ་ཎ་བྷ་དྲ་དང༌། །ངག་དབང་གྲགས་པ་ལྷ་འབྱུང་སྦས་པ་དང༌། །དོན་ཡོན་རྡོ་རྗེ་ཤེས་རབ་བླ་མ་དང༌། །དགེ་འདུན་བཟང་པོ་གཙང་འོད་རྡོ་རྗེ་རྩེ། །གཏི་མུག་རྡོ་རྗེ་རྡོ་རྗེ་གསང་བ་དང༌། །རྡོ་རྗེ་འོད་ཟེར་འཛིམ་ཆེན་རྒྱལ་མཚན་དཔལ། །གངས་ཁྲོད་པ་དང་མ་ཏི་པཎ་ཆེན་དང༌། །ལོ་ཙཱ་ཤཱཀ་བཟང་ཆེན་པོ་ཀ་དྲུག་པ། །ངག་དབང་གྲགས་
པ་ཚུལ་མཆོག་རྣམ་རྒྱལ་མཚན། །རྩ་བའི་བླ་མ་རྡོ་རྗེ་འཆང་གི་དངོས། །རྩ་བརྒྱུད་བླ་མ་རྣམས་ལ་མཆོད་པ་འབུལ། །ཨོཾ་ཨཱཿཧཱུཾ། ཞེས་བརྗོད། དབང་མཆོག་དབང་གོང་མ་བརྒྱུད་པ་འགའ་ཞིག་ལྟར་ན། ཞང་ལོ་ཤེས་རབ་བླ་མའི་རྗེས་སུ། ཛྙཱ་ན་གརྦྷ་བསོད་ནམས་ཤེས་རབ་དང༌། །བསོད་ནམས་བཀྲ་ཤིས་མ་ཟོ་ཇོ་ཐུབ་དང༌། །གཅེན་པོ་གཙང་འོད་གཅུང་པོ་རྡོ་རྗེ་རྩེ། །དེ་མན་ཆད་གོང་བཞིན། ཡང་ན། ཨོཾ་ཨཱཿཧཱུཾ། སངས་རྒྱས་རྡོ་རྗེ་འཆང་གི་ཞལ་དུ། ཨི་དཾ་ཨ་མྲྀ་ཏ་མཧཱ་སྭཱ་ད་ཧཱུཾ། དེ་བཞིན་དུ་སྦྱར་ཏེ། འཇམ་པའི་དབྱངས། སངས་རྒྱས་ཡེ་ཤེས་ཞབས། མར་མེ་མཛད། ལ་ལི་ཏ་བཛྲ། བདེ་སྦྱིན་གང་བ། སེ་ན་པ་བདེ་ལྡན། མཁའ་ལྡིང་ཞབས་ཅན། ཡོན་ཏན་འབྱུང་གནས། ངག་དབང་གྲགས་པ། དེ་བ་ཨ་ཀ་ར་ཙནྡྲ། ཨ་མོ་གྷ་བཛྲ། ཅོ་གྲུ་ཤེས་རབ་བླ་མ། སྲས་དགེ་འདུན་བཟང་པོ། གཙང་དང་འོད་པོ། རྡོ་རྗེ་རྩེ་མོ། འཁྲུལ་ཞིག་རྡོ་རྗེ་ཡང་རྩེ། སྔགས་འཆང་རྒྱལ་པོ། བྱང་ཆུབ་རིན་ཆེན། གླལ་སྟོན་མཆེད་གཉིས། འབྲུག་སྒྲ་རྒྱལ་མཚན། ཞང་སྒོམ་ཞིག་པོ། མཁས་གྲུབ་རིན་རྒྱལ། རིན་ཆེན་འོད་ཟེར། བློ་གྲོས་མཚུངས་མེད། བྱང་ཆུབ་སེང་གེ ཚུལ་ཁྲིམས་རྒྱལ་མཆོག གྲགས་པ་མཐའ་ཡས། ངག་དབང་གྲགས་པ། ཚུལ་ཁྲིམས་མཆོག་གྲུབ། རྣམ་རྒྱལ་བཀྲ་ཤིས། རྩ་བའི་བླ་མ་རྗེ་བཙུན་ཀུན་དགའ་བཀྲ་ཤིས་ཀྱི་ཞལ་དུ་ཨི་དཾ་ཨ་མྲྀ་ཏ་མཧཱ་སྭཱ་ད་ཧཱུཾ། འོག་ནས་འབྱུང་བ་ལྟར་འཕྲེང་སྔགས་སོ་སོའི་འགོར་ཨོཾ་དང༌། མཇུག་ཏུ་ཨི་དཾ་སོགས་སྦྱར་བས་འབུལ། སྤྲོ་ན་ཆོས་སྐྱོང་དང༌། ཕྱོགས་སྐྱོང་སོགས་ལའང་འབུལ། རང་གིས་མྱངས་ནས། ཨོཾ་སརྦ་ཏ་ཐཱ་ག་ཏ་ཨ་མྲྀ་ཏ་སྭཱ་ད་ན་བཛྲ་སྭ་བྷཱ་ཝ་ཨཏྨ་ཀོ྅ཧཾ། དེ་དག་ནི་རྣལ་འབྱོར་ཆེན་
པོའོ། །དེ་ནས་ཕྲ་ཐིག་གི་རྣལ་འབྱོར་བསྒོམ་པར་བྱ་སྟེ། འདི་དག་ཡིད་ཀྱིས་བསམ་པ་ལས་ངག་ཏུ་བརྗོད་མི་དགོས་སོ། །དེ་ཡང༌། སྙིང་གའི་འོད་ཀྱིས་ཕྱོགས་བཅུར་ཁྱབ། སྣོད་ལ་རེག་གཞལ་ཡས། བཅུད་ལ་རེག་ལྟར་བྱས་ཏེ། དེ་རྣམས་བསྡུས་ཏེ་གུར་ལ་ཐིམ། དེ་ཆོས་འབྱུང༌། གཞལ་ཡས། འཁོར། གཙོ་བོའི་སྐུ་གསུང་ཐུགས། ཡེ་ཤེས་སེམས་དཔའ། རྡོ་རྗེ། ཡ་རྣམས་ལ་རིམ་བཞིན་བསྡུ། དེ་ཞུ་ཐིག་ལེ་སྔོན་པོ་རྒྱ་སྲན་གྱི་ཚད་ཙམ་གྱི་ནང་དུ། གུར། ཆོས་འབྱུང༌། རྟེན་དང་བརྟེན་པ། སྐྱེ་མཆེད། སྐུ་གསུང་ཐུགས། དབུ་རྒྱན་ལ་སོགས་པ་སྐད་ཅིག་ལ་རྫོགས་པར་བསྐྱེད། དེའི་གཙོ་བོའི་ཐུགས་ཀའི་ཡའི་འོད་ཀྱིས། ཐིག་ལེ་ནང་གི་ལྷ་རྣམས་གསལ་བཏབ། ཐིག་ལེའི་ཕྱིར་འཕྲོས། རྡོ་རྗེ་དང༌། ཡེ་ཤེས་སེམས་དཔའ་དང༌། གཙོ་བོ། འཁོར། རྟེན། གུར་ལ་སོགས་པ་གསལ་བཏབ་ལ་བལྟའོ། །དེ་ནི་ཆུང་ངུས་ཆེན་པོ་ལ་བརྟགས་པའོ། །ཕྱི་ནས་ཐིག་ལེའི་ནང་གི་གཙོ་བོའི་ཐུགས་ཀའི་སེམས་དཔའ་གསུམ་བརྩེགས་ཀྱི་ཡ་ཤིན་ཏུ་ཕྲ་བ་ལ་བལྟ་སྟེ། ཆེན་པོ་ལ་གནས་ནས་ཆུང་ངུར་བརྟགས་པའོ། །དེ་གཉིས་རེས་འཇོག་ལ་བརྟན་པ་ཐོབ་ནས། དུ་བ་ལ་སོགས་པའི་རྟགས་འབྱུང་བས། ཐིག་ལེ་ནང་གི་ལྷ་རྣམས་ཀྱི་སྤྲོ་བསྡུས་སེམས་ཅན་གྱི་དོན་ལ་བློ་སྦྱང་ངོ༌། །དེའི་ཚེ་རྒོད་ན་ཕྱི་ནས་རིམ་གྱིས་བསྡུ་ཞིང༌། བྱིངས་ན་ནང་ནས་རིམ་གྱིས་སྤྲོའོ། །ཡང་རྒོད་ན་རང་ཆེན་པོ་ལ་གནས་པས། ཆུང་ངུའི་དཀྱིལ་འཁོར་ལ་སེམས་འཛིན། བྱིངས་ན་རང་ཆུང་ངུ་ལ་གནས་པས། ཆེན་པོའི་དཀྱིལ་འཁོར་ལ་སེམས་འཛིན་ཏོ། །དེ་ནས་བཟླས་པ་ནི། དུང་འཕྲེང་ལ་སོགས་པའི་བགྲང་འཕྲེང་བསངས་སྦྱངས། ལག་པ་གཡོན་པ་ཟླ་བར་གྱུར་པའི་སྟེང་དུ། བགྲང་འཕྲེང་རིལ་བུ་རེ་རེ་
བཞིན་མེ་ལས་འདོད་ཆགས་གཤིན་རྗེ་གཤེད་དུ་གྱུར། ཧྲཱིཿཥྚཱིཿ བརྗོད་ཅིང་བདུད་རྩི་ལྔ་བྱུགས་ལ། སླར་ཡང་ཧྲཱིཿཥྚཱིཿབརྒྱ་རྩ་ཙམ་བཟླས་ལ། དེ་དག་ཞུ་བ་ལས། ཁྲག་འཛག་མགོ་བོའི་འཕྲེང་བར་གྱུར། བགྲང་འཕྲེང་དེ་ཉིད་རང་གི་གནས་བཞིར་གཏུགས་ཏེ། སྔར་གྱི་རྡོ་རྗེ་གསུམ་དང༌། སྟེང་སྣའི་ཐད་ཀྱི་ལུས་ཀྱི་དབུས་སུ། རང་འདྲའི་ཡེ་ཤེས་སེམས་དཔའི་ཐུགས་ཀར་ཏིང་ངེ་འཛིན་སེམས་དཔའ་རྡོ་རྗེ་རྩེ་ལྔ་པའི་ལྟེ་བར་ཉི་མ་ལ་ཡ་ཡིགམཐའ་སྐོར་དུ་ཡི་གེ་བཅུ་བཞིས་བསྐོར་བ། དེ་ཡང༌། ཡ་དམ་རྒྱ། ཧཱུཾ་ལས་རྒྱ། ཨཱཿཆོས་རྒྱ། ཨོཾ་ཕྱག་ཆེན་གྱི་ངོ་བོར་མོས་ལ། ཧྲཱིཿཥྚཱིཿསོགས་བཟླས་པས། སྔགས་འབྲུ་ལས་ཁྲོ་བོའི་ཚོགས་དཔག་ཏུ་མེད་པ་བྱུང༌། དབུགས་ཕྱིར་འགྲོ་བའི་ཚེ་སྣོད་བཅུད་ཐམས་ཅད་ཁྱབ། འཕགས་པ་མཆོད། སེམས་ཅན་གྱི་དོན་བྱས། དགྲ་བགེགས་རྣམས་ཚར་བཅད། སངས་རྒྱས་བྱང་སེམས་ཀྱི་ཐུགས་རྗེ་བྱིན་རླབས་ཐམས་ཅད་བསྡུས་ཏེ་དབུགས་ནང་དུ་ཡོང་བ་དང་ལྷན་ཅིག་སྙིང་གའི་ས་བོན་སྔགས་བཅས་ལ་ཐིམ། བགྲང་འཕྲེང་འབྲུ་རེ་རེ་བཞིན་ནས་བགྲང་བའི་ཚེ། འདོད་ཆགས་རྡོ་རྗེའི་སྐུ་གཉིས་པ་རེ་རེ་བཞིན་ཆད་ནས། སྙིང་གར་ཐིམ་པར་བསམ་ལ། སྔགས་བཟླའོ། །ཨོཾ་ཧྲཱིཿཥྚཱིཿཝི་ཀྲི་ཏཱ་ན་ན་ཧཱུཾ་ཧཱུཾ་ཕཊ་ཕཊ་སྭཱ་ཧཱ། སྙིང་པོའོ། །ཨོཾ་ཨཱཿཡ་བཛྲ་དྷྲྀཀ་ཧཱུཾ་ཕཊ། ཨོཾ་ཨཱཿཀྵེ་ཛི་ན་ཛིཀ་ཧཱུཾ་ཕཊ། ཨོཾ་ཨཱཿམ་རཏྣ་དྷྲྀཀ་ཧཱུཾ་ཕཊ། ཨོཾ་ཨཱཿམེ་ཨ་རོ་ལྀཀ་ཧཱུཾ་ཕཊ། ཨོཾ་ཨཱཿད་པྲཛྙཱ་དྷྲྀཀ་ཧཱུཾ་ཕཊ། ཡ་མུཏྒ་ར་དྷྲྀཀ ཙྪ་དཎྜི་དྷྲྀཀ ནི་པདྨ་དྷྲྀཀ རཱ་ཁཏྒ་དྷྲྀཀ ཛ་མོ་ཧ་རཱ་ཏཱི། ས་དྭེ་ཥ་རཱ་ཏཱི། དོ་ར་ག་རཱ་ཏཱི། དུ་བཛྲ་རཱ་ཏཱི། ཨོཾ་ཨཱཿཎ་ཧཱུཾ་ཕཊ། ཨོཾ་ཨཱཿ
ཡོ་ཧཱུཾ་ཕཊ། ཨོཾ་ཨཱཿནི་ཧཱུཾ་ཕཊ། ཨོཾ་ཨཱཿར་ཧཱུཾ་ཕཊ། འཕྲེང་བའི་སྔགས་སོ། །ཡང་ཡི་གེ་བཅུ་བདུན་པ་བཟླ་བར་འདོད་ན། སྙིང་གའི་ཏིང་ངེ་འཛིན་སེམས་དཔའ་རིན་པོ་ཆེ་ཟུར་བརྒྱད་པ། རྩེ་མོ་དབུས་མ་ལ་ཡ། རྩེ་མོ་བརྒྱད་ཀྱི་ནང་གི་ཕྱོགས་ལ། ཤར་ནས་གཡས་སྐོར་གྱི་རིམ་པ་བཞིན་དུ། ཀྵེ་ཛ་མ་ས་མེ་དོ་ད་རུ་རྣམས་དང༌། ཕྱི་ངོས་བརྒྱད་ལ། ཡ་ཎ་ཙྩ་ཡོ་ནི་ནི་ར་ར་རྣམས་ལྷ་སོ་སོའི་ཁ་དོག་དང་མཐུན་པར་བཀོད་ལ། ཨོཾ་ཡ་ཀྵེ་མ་མེ་ད་ཡཙྪ་ནི་ར་ཛ་ས་དོ་རུ་ཎ་ཡོ་ནཱི་ར་ཧཱུཾ་ཧཱུཾ་ཕཊ་ཕཊ་སྭཱཧཱ། ཞེས་བཟླ་བའམ་ཡང་ན། སྙིང་གར་རིན་པོ་ཆེ་རྩེ་དགུ་པ། ཟུར་བཞི་ཕྱི་དང་ཟུར་བཞི་ནང་དུ་བསྟན་པར་བསམ། རྩེ་མོ་དབུས་མ་ལ་ཡ། ནང་མ་རྣམས་ལ་གཡས་སྐོར་ཀྱི་ཀྵེ་མ་མེ་ད། ཕྱིའི་ཟུར་རྣམས་ཀྱི་གཡས་གཡོན་དང་རྩེ་མོ་སྟེ་བཅུ་གཉིས་རྣམས་ཀྱི་ལྷོའི་དབུས་ནས་བརྩམས་ཏེ། རཱ་ཛ་ས་དོ་རུ་ཎ་རོ་ནཱི་ར་ཡཙྩ་ནི། ཞེས་པ་རྣམས་བཀོད་དེ། ཨོཾ་ཡ་མ་རཱ་ཛ་ས་དོ་མེ་ཡ། ཡ་མེ་དོ་རུ། ཎ་ཡོ་ད་ཡ། ཡ་ད་ཡོ་ནི། ར་ཡ་ཀྵེ་ཡ། ཡ་ཀྵེ་ཡཙྩ། ནི་རཱ་མ་ཡ་ཧཱུཾ་ཧཱུཾ་ཕཊ་ཕཊ་སྭཱཧཱ། ཞེས་ཀློག་པའི་ཚུལ་གྱིས་བཟླ་བ་དང༌། ཡི་གེ་བཅུ་བདུན་གྱི་དོད་དུ། ལྷ་བཅུ་བདུན་འགོད་པ་དང༌། འགོག་པའི་བཟླས་པའི་ཚེ། རླུང་ཕྱིར་འགྲོ་བ་ན། ཡི་གེ་དེ་རྣམས་དབུ་མའི་ལམ་བརྒྱུད། ཐོད་པའི་ནང་དུ་གནས་པས། འོད་འཕྲོས། གཏི་མུག་དག་པར་བསམ། རླུང་ནང་དུ་འོང་བའི་ཚེ། སྙིང་གའི་རིན་པོ་ཆེ་ལ་འཁོད། གནས་པའི་ཚེ། དེ་ལས་དེ་འདྲ་བ་གཉིས་པ་ཞིག་ཆད་ནས། གསང་གནས་སུ་སླེབ་པར་བསམ། དེ་གཉིས་ལས་ཀྱང་འོད་ཟེར་སྤྲོས་ཏེ། སྡིག་སྒྲིབ་སྦྱང་བ་སོགས་བྱའོ། །དེ་དག་ནི། ནང་གི་བཟླས་པ་སྟེ། ལུགས་འདིའི་ཐུན་མོང་མ་ཡིན་པ་ཡིན་ཞིང༌། བཟླས་པའི་མན་ངག་ཅེས་མངོན་རྟོགས་ཀྱི་དཀྱུས་སུ་མ་
བཅུག་པར། ལོགས་སུ་མཛད་པ་དེའོ། །བསྡུ་བར་འདོད་ན། རང་གི་སྙིང་ག་ནས་འོད་ཟེར་འཕྲོས། སྣོད་བཅུད་རྟེན་དང་བརྟེན་པའི་དཀྱིལ་འཁོར་དུ་གྱུར་པ་བདག་ཉིད་ལ་ཐིམ། ཐུན་ཐ་མ་ལ། དཀྱིལ་འཁོར་གྱི་འཁོར་ལོ་ཡང་བདག་ཉིད་ལ་སྐད་ཅིག་གིས་ཐིམ། ཞེས་བརྗོད། ཐུན་སྔ་མ་རྣམས་ལ་ནི། དཀྱིལ་འཁོར་གཙོ་བོ་ལས་ཕྱེ་བའི། རང་ཉིད་ཕྱག་གཉིས་པའི་ང་རྒྱལ་གྱིས་ཐུན་མཚམས་ཀྱི་བྱ་བ་བྱེད་པར་མོས། བཟླས་པའི་ཚེ། ལུས་དུབ་ན་གསང་འདུས་ལས་འབྱུང་བའི་ཏིང་ངེ་འཛིན་གྱི་བཅུད་ལེན་བྱ། སྒོམ་པས་ཡིད་སྐྱོ་ན། སྙིང་ག་ནས་སྤྲུལ་པའི་ལྷ་མོ་རྣམས་ཀྱིས་མཆོད་བསྟོད་བྱས་པར་བསམ་ཞིང༌། དབྱངས་བླངས་ལ་རེ་ཞིག་ཅི་བདེར་གནས་སོ། །གལ་ཏེ་གཏོར་མ་འབུལ་བར་འདོད་ན། དཀྱིལ་འཁོར་གྱི་འཁོར་ལོ་མ་བསྡུས་པར། ཡེ་ཤེས་པ་དཀྱིལ་འཁོར་གྱི་གཙོ་བོར་བཞགརང་ཉིད་དམ་ཚིག་པའི་ང་རྒྱལ་གྱིས་ཤར་སྒོར་ཕྱིན་པར་མོས་ཏེ། གཏོར་མ་བསངས་སྦྱངས། ནང་མཆོད་ལྟར་བྱིན་གྱིས་བརླབས། མཁའ་གསང་བྱིན་རླབས་ནས། རྗེས་ཆགས་ཀྱི་སྔགས་གྱི་བར་མངོན་རྟོགས་བཞིན་བྱས་ལ། མཁའ་ནང་དུ་བྱང་ཆུབ་ཀྱི་སེམས་ཆ་བཅུ་བཞིར་གྱུར་པ། ཡེ་ཤེས་པའི་ཕྱོགས་སྐྱོང་བཅུ་བཞིར་གྱུར། རང་གི་སྙིང་ག་ནས་བྷྲུཾ་སྤྲོས་པས། གཞལ་ཡས་ཁང་ཁོང་དུ་ཆུད་པའི་འཁོར་ལོ་རྩིབས་བཅུ་པར་གྱུར། ཧྲཱིཿཥྚཱིཿ ལན་གཅིག་བརྗོད་པས། ཕྱོགས་སྐྱོང་རྣམས་མཁའ་ནང་ནས་ཕྱིར་སྤྲོས་ནས། རྩིབས་རྣམས་ལ་འཁོད། སྙིང་ག་ནས་ཁྲོ་བོ་ལྕགས་ཀྱུ་དང་ཞགས་པ་ཐོགས་པ་དཔག་ཏུ་མེད་པ་སྤྲོས། འཇིག་རྟེན་པའི་ཕྱོགས་སྐྱོང་རྣམས་བཀུག ཧྲཱིཿཥྚཱིཿའི་མཐར། འབྱུང་པོ་འཁོར་དང་བཅས་པ་
ཐམས་ཅད་ཨཾ་ཀུ་ཤ་ཛཿ ཕྱོགས་མཚམས་རྣམས་སུ་འཁོད། ཡང་ཧྲཱིཿཥྚཱིཿའི་མཐར་འབྱུང་པོ་འཁོར་དང་བཅས་པ་ཐམས་ཅད་ལ། ཀཱི་ལ་ཡ། ཀཱི་ལ་ཡ་ཧཱུཾ་ཕཊ། དེ་རྣམས་ཀྱི་སྤྱི་བོར་ཕུར་བུས་བཏབ་པས། སྡིག་སྒྲིབ་ཐམས་ཅད་བྱང༌། ཡེ་ཤེས་ཀྱི་ཕྱོགས་སྐྱོང་རྣམས་ཀྱང་ཐིམ་པས་རོ་གཅིག་ཏུ་གྱུར་པས། འོད་དུ་ཞུ། སླར་ཡང་གཤིན་རྗེ་གཤེད་ཀྱི་ལྷ་ཚོགས་སུ་བཞེངས་པ་ནི། ཤར་དུ་ཧྲཱིཿདང་རྡོ་རྗེ་ལས། བརྒྱ་བྱིན་དཀར་པོ་མིག་སྟོང་དང་ལྡན་པ་ལ། ཤ་ཙི་མས་འཁྱུད་པ། གླང་པོ་ཆེ་ལ་གནས་པ། ལྷོ་རུ་ཥྚཱིཿདང་བེ་ཅོན་ལས། གཤིན་རྗེ་ནག་པོ་ལ། འཆི་བདག་མས་འཁྱུད་པ། མ་ཧེ་ལ་གནས་པ། ནུབ་ཏུ་བི་དང་སྦྲུལ་ཞགས་ལས། ཆུ་ལྷ་དཀར་པོ་ལ། ཆུ་བདག་མས་འཁྱུད་པ། ཆུ་སྲིན་ལ་གནས་པ། བྱང་དུ་ཀྲི་དང་རིན་ཆེན་དབྱུག་པ་ལས། གནོད་སྦྱིན་སེར་པོ་ལ། ནོར་འཛིན་མས་འཁྱུད་པ། རྟ་དཀར་པོ་ལ་གནས་པ། བྱང་ཤར་དུ་ཏ་དང་རྩེ་གསུམ་ལས། དབང་ལྡན་ཐལ་དཀར་ལ། ཨུ་མས་འཁྱུད་པ། ཁྱུ་མཆོག་ལ་གནས་པ། ཤར་ལྷོར་ཨ་དང་བགྲང་འཕྲེང་ལས། མེ་ལྷ་དམར་པོ་ལ། བསྲེག་བྱེད་མས་འཁྱུད་པ། ར་ལ་གནས་པ། ལྷོ་ནུབ་ཏུ་ན་དང་རལ་གྲི་ལས། སྲིན་པོ་ཁམ་པ་ལ། སྲིན་མོས་འཁྱུད་པ། རོ་ལངས་ལ་གནས་པ། ནུབ་བྱང་དུ་ན་དང་བ་དན་ལས། རླུང་ལྷ་དུང་ལྗང་ལ། གཡོ་བྱེད་མས་འཁྱུད་པ། ཤ་བ་ལ་གནས་པ། སྟེང་གི་རྩིབས་ཀྱི་རྩ་བར། ཧཱུཾ་དང་ཨུཏྤལ་ལས། ཟླ་བ་དཀར་པོ་ལ། བསིལ་བྱེད་མས་འཁྱུད་པ། ངང་སྐྱ་བདུན་གྱིས་དྲངས་པའི་ཤིང་རྟ་ལ་གནས་པ། རྩིབས་ཀྱི་དབུས་སུ། ཧཱུཾ་དང་པདྨ་ལས།
ཉི་མ་དམར་པོ་ལ། འོད་ལྡན་མས་འཁྱུད་པ། རྟ་བདུན་གྱིས་དྲངས་པའི་ཤིང་རྟ་ལ་གནས་པ། རྩེ་མོར་ཕཊ་དང་སྣ་ཚོགས་པདྨ་ལས། ཚངས་པ་སེར་པོ་ལ། ཚངས་མས་འཁྱུད་པ། ངུར་པ་བདུན་གྱིས་དྲངས་པའི་ཤིང་རྟ་ལ་གནས་པ། འོག་རྩིབས་ཀྱི་རྩ་བར། ཕཊ་དང་བུམ་པ་ལས། ས་བདག་ནག་པོ་ལ། སའི་ལྷ་མོ་སེར་མོས་འཁྱུད་པ། ཕག་པ་ལ་གནས་པ། རྩིབས་ཀྱི་དབུས་སུ། སྭཱ་དང་རལ་གྲི་ལས། ཐགས་བཟང་རིས་དམར་པོ་ལ། ལྷ་མིན་མོས་འཁྱུད་པ། དར་གྱི་འབོལ་སྟན་ལ་གནས་པ། རྩེ་མོར་ཧཱ་དང་མཚོན་ཆ་ལས། ཁྱབ་འཇུག་ལ་སོགས་པའི་འབྱུང་པོ་སྣ་ཚོགས་པ་དཔལ་མོ་ལ་སོགས་པ། རང་རང་གི་ལྷ་མོས་འཁྱུད་པ་དཔག་ཏུ་མེད་པ་དང་བཅས་པར་གྱུར། དཀར་པོ་རྣམས་གཏི་མུག་རྡོ་རྗེ་ལྟ་བུ། སེར་པོ་རྣམས་སེར་སྣ་རྡོ་རྗེ་ལྟ་བུ། དམར་པོ་རྣམས་འདོད་ཆགས་རྡོ་རྗེ་ལྟ་བུ། རླུང་ལྷ་ཕྲག་དོག་རྡོ་རྗེ་ལྟ་བུ། སྔོན་པོ་རྣམས་ཞེ་སྡང་རྡོ་རྗེ་ལྟ་བུ། ཐམས་ཅད་ཀྱང་གཡས་བསྐུམ་གཡོན་བརྐྱང༌། དར་དང་རིན་པོ་ཆེའི་རྒྱན་གྱིས་བརྒྱན་པ། འཁོར་དཔག་ཏུ་མེད་པ་དང་བཅས་པའོ། །འདི་ནི་བསྐྱེད་ཆོག་འབྲིང་བོའི་དབང་དུ་བྱས་པ་སྟེ། རྒྱས་པར་ན། ཐོར་མར་མཁའ་ནང་དུ། ཡེ་ཤེས་པའི་ཕྱོགས་སྐྱོང་བསྐྱེད། འཇིག་རྟེན་པའི་ཕྱོགས་སྐྱོང་རྣམས་བཀུག་སྟེ། ཞལ་ཕྱག་རྣམས་སྤྱི་དང་མཐུན་པར་བསྐྱེད། ཕུར་གདབ་ཀྱི་རྗེས་སུ་ཆོ་ག་གསུམ་བསྐྱེད་ཀྱི་སྔར་བཞིན་བསྐྱེད་དེ། འོན་ཀྱང་ཕྱག་མཚན་གྱི་ཁྱད་པར་ནི། གཡས་དང་པོ་རང་རང་གི་བསྐྱེད་གཞིའི་ཕྱག་མཚན་འཛིན་པར་བྱའོ། །དེ་ལ་ཡེ་ཤེས་ཀྱི་ཕྱོགས་སྐྱོང་གཤིན་རྗེ་གཤེད་རིགས་ལྔ་དང་འདྲ། འཇིག་རྟེན་རང་བརྒྱུད་པའི་ཕྱོགས་སྐྱོང་ཡང་སྤྱི་དང་མཐུན། ཕྱི་མ་འདི་དེ་གཉིས་འདྲེས་པ་སྟེ་ངོ་བོ་ཡེ་ཤེས་
པ་ལ་ཕྱག་གཡས་དང་པོའི་མཚན་མ་འཇིག་རྟེན་པ་དང་མཐུན་པའོ། །གང་ལྟར་ཡང་སྐྱེ་མཆེད་དང༌། གནས་གསུམ་བྱིན་རླབས་གོང་བཞིན་བྱ། སྙིང་གའི་ས་བོན་གྱིས་སྤྱན་དྲངས་པའི་ལྷ་རྣམས་ཀྱིས། ཨོཾ་བཛྲིར་བྷ་ཝ་ཨ་བྷི་ཥིཉྩ་ཧཱུཾ། ཞེས་དབང་བསྐུར། སྐུ་གང༌། དྲི་མ་དག ཆུའི་ལྷག་མ་ཡར་ལུད་པ་ལས། ཞེ་སྡང་རྡོ་རྗེས་དབུ་རྒྱན། གོང་ཚོགས་ཞིང་སྐབས་ལྟར་མཆོད་པ་བྱིན་གྱིས་རླབས་པ་ནས་བཟུང་སྟེ། རོལ་མོ་འབུལ་བའི་བར་དུ་བྱ། དཀྱིལ་འཁོར་གྱི་ལྷ་རྣམས་ཀྱི་ལྗགས་རྡོ་རྗེའི་སྦུ་གུས་དྲངས་ཏེ། གཏོར་མ་གསོལ་བར་གྱུར། བླ་མ་གོང་མ་རྣམས་ཀྱི་ཕྱག་ལེན་ལ། བླ་མ་ལ་ཡང་གཏོར་མ་འབུལ་བར་མཛད་པས་དེ་ལྟར་ན། ཨོཾ་ཨཱཿཧཱུཾ། རྡོ་རྗེ་འཆང་གི་སོགས་གོང་ནང་མཆོད་ཀྱི་སྐབས་བཞིན། བླ་མ་ཡི་དམ་དབྱེར་མེད་དུ་འཆད་པའི་ཕྱིར། འདི་སྒོས་སུ་མ་བྱས་ཀྱང་ཆོག་གོ །ཨོཾ་ཨཱཿཧཱུཾ། ཨོཾ་ཧྲཱིཿཥྚཱིཿཝི་ཀྲི་ཏཱ་ན་ན་ཧཱུཾ་ཧཱུཾ་ཕཊ་ཕཊ་སྭཱཧཱ། ཨི་དཾ་ཡ་མི་ཏ་མཧཱ་སྭཱ་ད་ཧཱུཾ། བ་ལིཾ་ཏ་ཁཱ་ཁཱ། ཁཱ་ཧི་ཁཱ་ཧི། དེ་བཞིན་དུ་ལྷ་ཚོགས་ཀྱི་སྔགས་ཐམས་ཅད་ལ་སྦྱར་ལ། གཙོ་བོ་ལ་ལན་བདུན་དང༌། འཁོར་རྣམས་ལ་ལན་རེའམ་ལན་གསུམ་གྱིས་འབུལ། འཇིག་རྟེན་འདས་པའི་གཏོར་མ་འདི་ཕྱོགས་སྐྱོང་མ་བསྐྱེད་གོང་དུ་ཕུལ་ན་ལེགས་པར་མཐོང་ངོ༌། །ཕྱོགས་སྐྱོང་འཁོར་བཅས་ཀྱི་ལྗགས་རྡོ་རྗེ་སྦུ་གུས་དྲངས་ཏེ་གསོལ་བར་གྱུར། ཨོཾ་ཨིནྡྲ་ཡ་ཧྲཱིཿ ཡ་མ་ཡ་ཥྚཱིཿ བ་རུ་ན་ཡ་བི། ཀུ་བེ་ར་ཡ་ཀྲི། ཨཱི་ཤ་ན་ཡ་ཏ། ཨགྣ་ཡེ་ཨ། ནིརྟེ་ཡེ་ན། ཝ་ཡ་བེ་ན། ཙནྡྲ་ཡ་ཧཱུཾ། ཨརྐ་ཡ་ཧཱུཾ། བྲཧྨ་ཎེ་ཕཊ། བཱ་སུནྡྷ་ར་ཡ་ཕཊ། བེ་མ་ཙི་ཏྲ་ཡེ་སྭཱ། སརྦ་བྷུ་ཏེ་བྷྱོ་ཧཱ། ཧ་ཧ་ཧ། ཧི་ཧི་ཧི། ཧཱུཾ་ཧཱུཾ་ཧཱུཾ། ཕེཾ་ཕེཾ་ཕེཾ་ཕཊ་སྭཱཧཱ། ལན་གསུམ་སོགས་ཅི་རིགས་པས་འབུལ། བར་འདིར་འགྲུབ་ན། འདི་ཉིད་ཀྱི་སྒོས་ཀྱི་ཆོས་སྐྱོང་ཡང་ཡིན་ཞིང༌། མ་གཤིན་ཤིན་ཏུ་
འབྲེལ་ཆེ་བའི་ཕྱིར། དཔལ་ལྡན་ལྷ་མོ་དམག་ཟོར་རྒྱལ་མོ་ལ་ཡང་གཏོར་ཆོག་ནས་འབྱུང་བ་ལྟར་གཏོར་མ་འབུལ་ལོ། །དེ་དག་གི་རྗེས་སུ། གཟུགས་སྒྲ་ལ་སོགས་དྲུག་པ་ནི། །དངོས་མེད་ནམ་མཁའ་ལྟ་བུ་ལ། །ལོངས་སྤྱོད་ཡུལ་དུ་དུ་མར་སྣང༌། །ཤེལ་ལ་ཚོན་ནི་ཇི་བཞིན་དུ། །འདོད་ཡོན་ལྔ་དང་ཆོས་རྣམས་ལ། །རྣལ་འབྱོར་རྟག་ཏུ་སྤྱོད་པར་ཤོག །ཨ་ལ་ལ་ཧོ། རོལ་ཏུ་གསོལ། བསྣམས་པར་མཛོད། མི་འཛིན་སྒྱུ་མ་ལྟ་བུ་ལ། །དགྱེས་པའི་གར་གྱིས་རོལ་པར་མཛོད། །རེག་བྱ་འགག་པ་མེད་པ་ལ། །མིག་ཡོར་བཞིན་དུ་རོལ་ཏུ་གསོལ། །ཧོ་ཆགས་པ་མེད་ཅིང་ཆགས་པར་མཛོད། །ཨོཾ་སརྦ་ཏ་ཐཱ་ག་ཏ་པཱུ་ཛ་བཛྲ་སྭ་བྷཱ་ཝ་ཨཏྨ་ཀོ྅ཧཾ། ཧཱུཾ། དུར་ཁྲོད་ཀྱི་ནི་ལེགས་བརྒྱན་པའི། །ཞེ་སྡང་གཤིན་རྗེ་གཤེད་པོ་ནི། །དངོས་མེད་ནམ་མཁའ་ལྟ་བུར་ལ། །ཐུགས་རྗེས་སྤྲུལ་པའི་སྐུར་སྟོན་པའི། །ཡེ་ཤེས་ཁྲོ་རྒྱལ་རབ་འཇིགས་པ། །དུད་ཁ་མུན་ཅན་ཁྱོད་ལ་འདུད། །བདུད་བཞི་པོ་ནི་རྣམ་པར་འཇོམས། །དཔའ་བོ་གདུལ་དཀའ་འདུལ་བ་པོ། །གཤིན་རྗེ་མཐར་བྱེད་ཕྱག་འཚལ་ཞིང༌། །ཕྱོགས་སྐྱོང་བཅོ་ལྔའི་ཚོགས་ལ་འདུད། །མཆོད་སྦྱིན་གཏོར་མ་འདི་བཞེས་ལ། །རྣལ་འབྱོར་བདག་ཅག་འཁོར་བཅས་ལ། །ནད་མེད་ཚེ་དང་དབང་ཕྱུག་དང༌། །དཔལ་དང་གྲགས་དང་སྐལ་བ་བཟང༌། །ལོངས་སྤྱོད་རྒྱ་ཆེན་ཀུན་ཐོབ་ཅིང༌། །ཞི་དང་རྒྱས་ལ་སོགས་པ་ཡི། །ལས་ཀྱི་དངོས་གྲུབ་བདག་ལ་སྩོལ། །དམ་ཚིག་ཅན་གྱི་བདག་ལ་བསྲུངས། །དངོས་གྲུབ་ཀུན་གྱི་སྟོངས་གྲོགས་མཛོད། །དུས་མིན་འཆི་དང་ནད་རྣམས་དང༌། །གདོན་དང་བགེགས་རྣམས་མེད་པར་མཛོད། །རྨི་ལམ་
ངན་དང་མཚན་མ་ངན། །བྱ་བྱེད་ངན་པ་མེད་པར་མཛོད། །འཇིག་རྟེན་བདེ་ཞིང་ལོ་ལེགས་དང༌། །འབྲུ་རྣམས་འཕེལ་ཞིང་ཕྱུགས་འཕེལ་བ། །བདེ་ལེགས་ཐམས་ཅད་འབྱུང་བའི་གནས། །ཡིད་ལ་འདོད་པ་ཀུན་འགྲུབ་མཛོད། །ཡི་གེ་བརྒྱ་པ་བརྗོད་ཅིང༌། གཏོར་མགྲོན་རྣམས་མི་དམིགས་པར་མོས། བསང་ཆུའི་ཉེ་རེག་བྱས་ལ། ཨོཾ་ནི་རི་ཏེ་ཧཱུཾ་ཁཾ། ཞེས་བརྗོད། འདི་ཡང་ཕྱི་རོལ་གཏོར་མའི་ཚུལ་དུ་ཕྱོགས་སྐྱོང་ལ་སྒོ་ཕྱིའམ། ཁང་སྟེང་སོགས་སུ་འབུལ་བའི་དབང་དུ་བྱས་པ་སྟེ། ནང་གཏོར་ཁོ་ནའི་དབང་དུ་བྱས་ན་ཉེ་རེག་འདི་མི་དགོས་སོ། །སླར་ཡང་རང་ཉིད་དཀྱིལ་འཁོར་ཀྱི་དབུས་སུ་སོང་སྟེ། ཡེ་ཤེས་ཀྱི་འཁོར་ལོ་ལ་དམིགས་ཏེ། ཨོཾ་བཛྲ་པུཥྤེ་ཨཱཿཧཱུཾ། དྷུ་པེ། ཨཱ་ལོ་ཀེ གནྡྷེ། ནེ་ཝེ་ཏྱ། ཤཔྟ་ཨཱཿཧཱུཾ། དུར་ཁྲོད་རྒྱན་གྱི་སོགས་ཀྱིས་བསྟོད། གཙོ་བོའི་སྔགས་ཀྱིས་ནང་མཆོད་འབུལ། རང་ཉིད་དམ་ཡེ་དབྱེར་མེད་ཀྱི་ང་རྒྱལ་གྱིས། དཀྱིལ་འཁོར་གྱི་འཁོར་ལོ་འོད་གསལ་དུ་བསྡུ་བའམ། ཡིག་རྙིང་ཕལ་ཆེ་བའི་ལུགས་ལྟར་ན། བདུད་རྩི་འབུལ་བའི་རྗེས་ལ། ཨོཾ་ཁྱེད་ཀྱིས་སེམས་ཅན་དོན་ཀུན་མཛད། །རྗེས་སུ་མཐུན་པའི་དངོས་གྲུབ་སྩོལ། །སངས་རྒྱས་ཡུལ་དུ་གཤེགས་ནས་ཀྱང༌། །སླར་ཡང་འབྱོན་པར་མཛད་དུ་གསོལ། །ཨོཾ་ཨཱཿཧཱུཾ་མུཾ། ཞེས་པས་ཡེ་ཤེས་པའི་དཀྱིལ་འཁོར་མདུན་གྱི་ནམ་མཁར་གཤེགས། ཡང་ཨོཾ་ཨཱཿཧཱུཾ་མུཾ། ཞེས་པས་དམ་ཚིག་གི་དཀྱིལ་འཁོར་སྔར་བཞིན་བསྡུས་ལ་འོད་གསལ་གྱི་ངང་ལ་མཉམ་པར་བཞགསྐད་ཅིག་གིས་ཕྱག་གཉིས་པའི་ང་རྒྱལ་གྱིས་ལངས་ཏེ། གང་ཡང་བདག་བློ་གཏི་མུག་པས། །ལེགས་སྤྱད་འདི་ལ་ཉེས་གྱུར་གང༌། །གང་ཕྱིར་ལུས་ཅན་སྐྱབས་གྱུར་པ། །དེ་དག་ཐམས་ཅད་བཟོད་པར་
གསོལ། །མགོན་དང་བྱང་ཆུབ་སེམས་དཔའ་དང༌། །ཐུགས་རྗེ་ཅན་དུ་བདག་བྱིན་གྱིས་རློབས། །ཐེག་པ་ཆེ་ལས་མི་ཉམས་ཤིང༌། །སླར་ཡང་བདག་ལ་ཕན་མཛད་པར། །ངེས་པར་ཡང་དག་གྱུར་ནས་ཀྱང༌། །མགོན་པོ་རིགས་དང་སྲས་བཅས་རྣམས། །ཅི་བདེ་བར་ནི་གཤེགས་སུ་གསོལ། །ཨོཾ་ཨཱཿཧཱུཾ། ཞེས་རང་བཞིན་གྱི་གནས་སུ་གཤེགས་སུ་གསོལ། དཔལ་ལྡན་གཤིན་རྗེ་གཤེད་པོ་ཡི། །སྒོམ་ཐབས་ཐོབ་པའི་དགེ་བ་ཡིས། །ཡེ་ཤེས་བདེ་ལྡན་རང་གྱུར་ནས། །འགྲོ་རྣམས་ཀུན་རིག་ས་ཐོབ་ཤོག །ཅེས་དགེ་བ་བསྔོས། ཐུན་མཚམས་ཀྱི་བྱ་བ་ལ་ཅི་བདེ་བར་འཇུག་པར་བྱའོ། །ཡང་གཏོར་མའི་ཆོ་ག་རྒྱས་འབྲིང་གཉིས་མི་ལྕོགས་ན། སྔར་བཞིན་གཏོར་མ་བྱིན་གྱིས་བརླབས། རང་གི་སྙིང་ག་ནས་འོད་ཟེར་འཕྲོས་པས། གཤིན་རྗེ་གཤེད་ལྷ་བཅུ་གསུམ་གྱི་དཀྱིལ་འཁོར་མདུན་གྱི་ནམ་མཁར་བཛྲ་ས་མཱ་ཛཿ ཨརྒྷཾ་ནས། ཤཔྟའི་བར་གྱིས་མཆོད། འཇིག་རྟེན་ལས་འདས་པའི་ལྷ་ཚོགས་རྣམས་ལ། གོང་བཞིན་སྔགས་ཀྱིས་ཕུལ། རང་གི་སྙིང་ག་ནས་འོད་ཟེར་འཕྲོས། ཕྱོགས་སྐྱོང་འཁོར་བཅས་བཛྲ་ས་མཱ་ཛཿ ཐམས་ཅད་ཀྱི་སྐད་ཅིག་གིས་འོད་གསལ་དུ་བཅུག་ནས། གཤིན་རྗེ་གཤེད་ཀྱི་ལྷ་ཚོགས་སུ་གྱུར། ཞེས་པའམ། ཡང་ན་སྐུ་མདོག་གཞོན་པ་སོགས་གོང་དང་འདྲ་བ་ལ། ཕྱག་མཚན་སྤྱི་དང་མཐུན་པར་བསྐྱེད། ཨོཾ་ཨིནྡྲ་ཡ། སོགས་ཀྱིས་འབུལ་བ་མན་ཆད་གོང་བཞིན་བྱ། ལུགས་འདི་ལྟར་ན། དམ་ཡེ་སོ་སོར་ཕྱེ་ནས་དཀྱིལ་འཁོར་གྱི་ཕྱི་རོལ་ཏུ་འགྲོ་བ་དང༌། ཉེ་རེག་བྱས་ནས། ནང་དུ་འོང་བ་སོགས་མི་དགོས་སོ། །ཚོགས་ཀྱི་འཁོར་ལོ་བྱ་བར་འདོད་ན། ལྷ་བཅུ་གསུམ་གྱི་མཎྜལ་བསྐྱེད་ལ། མཆོད་གཏོར་
ཚོགས་རྫས་རྣམས་བཤམས་ཏེ། སྙིང་ག་ནས་མཆོད་པའི་ལྷ་མོ་དཔག་ཏུ་མེད་པ་སྤྲུལ། ཞེས་པ་ནས། ཕྱོགས་བཅུའི་འཇིག་རྟེན་ཁམས་བཀང་ནས། །ཞེས་པའི་བར་གོང་བཞིན་ཕུལ། འཛམ་བུའི་གླིང་དང་གླིང་གཞན་དག །འཁོར་ལོ་རིན་ཆེན་གྱིས་བཀང་ནས། །སྟོང་གསུམ་ལ་སོགས་དེ་བཞིན་ཏེ། །ཞུམ་པ་མེད་པ་བྱས་ཏེ་འབུལ། །ཨོཾ་ཨཱཿཙཀྲ་རཏྣ་པཱུ་ཛི་ཏེ་ཧཱུཾ། འདི་ཉིད་འདོན་པ་སྤོས་ཏེ། རྒྱལ་སྲིད་སྣ་བདུན་དང༌། འདོད་ཡོན་སྣ་ལྔ་ཡང་འབུལ། ནག་པོ་ར་རི་མེད་པ་ཡི། །བུམ་པ་ལྟོ་ཆེ་བྲེ་ཚད་པ། །མཆུ་འཕྱང་མགྲིན་རིང་གདན་དང་ལྡན། །སྙིང་པོར་ལྡན་པའི་སྨན་སོགས་གཞུག །མགྲིན་པ་གོས་བཟང་དག་གིས་བརྒྱན། །འདབ་མར་ལྡན་པའི་ལྕུག་མ་དང༌། །དྲི་ངད་ལྡན་པའི་ཁ་རྒྱན་ཅན། །བདུད་རྩིར་ལྡན་པ་ཡིས་ཀྱང་མཆོད། །གཟུགས་སྒྲ་ལ་སོགས་དྲུག་པོ་ནི། །སོགས་དང༌། དཀྱིལ་འཁོར་རྒྱལ་མཆོག་ནས་འབྱུང་བ་ལྟར། བསྟོད་པས་བསྟོད། ཚོགས་ཕུད་གཏོར་མ་ལ་སྦྲན་ཏེ། གོང་བཞིན་གཏོར་ཆོག་གིས་ཕུལ། དེ་ནས་ཚོགས་ཀྱི་འཁོར་ལོ་འདྲེན་ཅིང་ལེན་པ་དང༌། ལོངས་སྤྱོད་པ་དང༌། ལྷག་མའི་གཏོར་མའི་བར་སྤྱི་དང་འདྲའོ། །གཞན་ཡང་ཐུན་མཚམས་སྤྱོད་ལམ་གྱི་རྣལ་འབྱོར་དང༌། ཁ་ཟས་ཀྱི་རྣལ་འབྱོར་དང༌། རྗེས་ཆགས་ཀྱི་རྣལ་འབྱོར་དང༌། ཉལ་བའི་རྣལ་འབྱོར་དང༌། ལྡང་བའི་རྣལ་འབྱོར་དང༌། ཁྲུས་ཀྱི་རྣལ་འབྱོར་རྣམས་གོ་བླ་ཞིང་སྤྱི་དང་མཐུན་པ་དང༌། བླ་མ་གོང་མ་རྣམས་ཀྱིས་གསལ་བར་བཤད་པའི་ཕྱིར་འདིར་མ་སྤྲོས་སོ། །གཤིན་རྗེ་གཤེད་ནག་པོ་རྩ་བའི་རྒྱུད་འདི་ཉིད་ལ་འཆད་ཚུལ་ལུགས་ཇི་སྙེད་ཅིག་སྣང་ན་ཡང༌། ཞང་ལུགས་ཉིད་མན་ངག་ཆེ་ཞིང༌། བྱིན་རླབས་ཆེ་བར་མངོན་ནོ། ཁ་བ་
ཅན་འདིར་གཤིན་རྗེ་གཤེད་ཀྱི་རྣལ་འབྱོར་པ་ཤས་ཆེ་བས་ཀྱང༌། རྡོ་རྗེ་འཇིགས་མཛད་དང༌། གཤིན་རྗེ་གཤེད་དམར་པོ་སོགས་ལ་ཐུགས་དམ་གྱི་མཐིལ་དུ་མཛད་པ་མང་ཞིང༌། ཞང་ཅོ་གྲུ་ལོཙྪ་བ་དེ་ཉིད་རྗེས་འབྲངས་དང་བཅས་པ་རྣམས་ནི། རྩ་བའི་རྒྱུད་འདི་ཉིད་ལ་རྩལ་ཏུ་བཏོན་ཏེ། མཁས་པར་སྦྱོངས་པ་དང༌། ཉམས་བཞེས་སུ་མཛད་པ་ཤ་སྟག་གོ །འདིར་སྨྲས་པ། སྲིད་གསུམ་ཉོན་མོངས་གཤིན་རྗེ་ཀུན་འཇོམས་པ། །བླ་མེད་བླ་མ་ཁམས་གསུམ་དབང་ཕྱུག་མཆོག །རིམ་གཉིས་ལམ་གྱི་སྒྲུབ་པར་བྱེད་པའི་ཐབས། །དགེ་ལེགས་ཀུན་གྱི་འབྱུང་གནས་འདིར་གསལ་བྱས། །འདི་ལས་དགེ་བ་གང་ཐོབ་པས། །མཐའ་དག་སྲིད་གསུམ་འགྲོ་བ་རྣམས། །རྡོ་རྗེ་སློབ་དཔོན་དུས་ཀྱི་དགྲའི། །གོ་འཕང་མྱུར་དུ་ཐོབ་པར་ཤོག །བཅོམ་ལྡན་འདས་གཤིན་རྗེ་གཤེད་ལྷ་བཅུ་གསུམ་གྱི་དཀྱིལ་འཁོར་གྱི་འཁོར་ལོའི་སྒྲུབ་ཐབས་རྡོ་རྗེ་འོད་ཟེར་ཞེས་བྱ་བ་འདི་ནི། དོན་གཉེར་འགས་བསྐུལ་བ་དང༌། བདག་ཉིད་ཀྱང་ལམ་འདི་ལ་ལྷག་པར་མོས་པས་ཉེ་བར་སྦྱར་བ་སྟེ། རྒྱལ་ཁམས་པ་ཏཱ་ར་ནཱ་ཐས་རང་ལོ་ཉེར་དགུ་པ་ལ། དཔལ་ཇོ་མོ་ནང་གི་རི་ཁྲོད་དུ་སྒྲུབ་པའོ།། །།དགེ་ལེགས་འཕེལ།
ཤོག་སྟོང་།