འཇམ་དཔལ་གསང་ལྡན་གྱི་དཀྱིལ་ཆོག
འཇམ་དཔལ་གསང་ལྡན་གྱི་དཀྱིལ་ཆོག་བཞུགས།
ཨོཾ་སྭཱ་སྟི། རྒྱུད་ཐམས་ཅད་ཀྱི་བདག་པོ་མཚན་ཡང་དག་པར་བརྗོད་པ་ལས་འབྱུང་བའི་མན་ངག །སློབ་དཔོན་སྒེག་པའི་རྡོ་རྗེས་མཛད་པའི་གཞུང་སྒྲུབ་ཐབས་གསང་ལྡན་དང་དཀྱིལ་ཆོག་ཡོན་ཏན་འབྱུང་གནས་ལས་འབྱུང་བ་ལྟར་སྒྲུབ་ཐབས་དང་དཀྱིལ་འཁོར་གྱི་ཆོ་ག་མདོ་ཙམ་བརྗོད་པར་བྱའོ། །དཔལ་ལྡན་སངས་རྒྱས་ཀུན་བདག་ཉིད། །རིགས་ཀུན་བདག་པོ་ཡེ་ཤེས་སྐུ། །འཇམ་པའི་རྡོ་རྗེ་མགོན་པོ་དང༌། །བླ་མའི་ཞབས་ལ་གུས་པས་འདུད། །དེ་ལ་དང་པོར་བསྙེན་པའི་ཆོ་ག་ནི། སྐྱབས་འགྲོ་སེམས་བསྐྱེད་ཚད་མེད་བཞི་རྣམས་སྔོན་དུ་བཏང་སྟེ། ཨོཾ་པྲ་ཀྲྀ་ཏི་པ་རི་ཤུདྡྷཿསརྦ་དྷརྨཱཿཔྲ་ཀྲྀ་ཏི་པ་རི་ཤུདྡྷོ྅ཧཾ། ལན་གསུམ། ཨོཾ་བཛྲ་མཧཱ་ཀྲོ་དྷ་ཧཱུཾ། རང་སྐད་ཅིག་གིས་འཇམ་དཔལ་གཤིན་རྗེ་གཤེད། སྐུ་མདོག་མཐིང་ནག་ཞལ་གཅིགཕྱག་གཉིས་པ། རལ་གྲི་དང༌། སྡིགས་མཛུབ་ཅན། ཁྲོ་བོའི་རྒྱན་དང་ཆ་ལུགས་རྫོགས་ཤིང༌། ཞབས་གཡོན་བརྐྱང་གི་སྟབས་ཅན། ཆེར་ཁྲོས་པས་བགེགས་ཐམས་ཅད་འཇོམས་པ། ཧཱུཾ་གི་སྒྲ་དྲག་པོ་སྒྲོག་པའི། མིག་གཉིས་
སུ་མ་དང་ཊ་ལས་ཉི་མ་དང་ཟླ་བ་ལ་ཧཱུཾ་གིས་མཚན་པ། སྤྱན་དབུས་མ་ཉི་ཟླ་འདྲེས་པ་སྟེ། སྤྱན་གྱི་འོད་ཟེར་གྱིས་བགེགས་ཐམས་ཅད་བསྐྲད་པར་གྱུར། ཨོཾ་ཡ་མཱན་ཏ་ཀ་ཧཱུཾ་ཕཊ། སྤྲོས་པ་ལ་མོས་ན་སྐབས་འདིར་ཁྲོ་བོ་སྤྱན་འདྲེན་དང་བཀའ་བསྒོ་བྱ། སྙིང་གར་ཉི་མ་ལ་སྤྲིན་སྒྲའི་ང་རོ་ཧཱུཾ་ཡིག་ཡེ་ཤེས་ལྔའི་ངོ་བོ། དེ་ལས་འོད་ཟེར་འཕྲོས། ལྟ་སྟངས་ཀྱིས་བགོད་པ་དང་ལྷན་ཅིག་ཏུ། འོག་ཐམས་ཅད་རྡོ་རྗེའི་ས་གཞི། ཕྱོགས་མཚམས་ཐམས་ཅད་རྭ་བ་དང་དྲ་བ། སྟེང་ཐམས་ཅད་གུར་དང་བླ་རེ། དེའི་ཕྱི་རོལ་ཕྱོགས་བཅུར་རཾ་ཡིག་བསྐལ་པའི་མེ་འོད་ལྟ་བུ་ལས་མེ་འབར་བས། མཚམས་མེད་ཅིང་དུམ་བུ་གཅིག་ཏུ་གྱུར་ལ། འབར་བའི་འཕྲེང་བས་བསྐོར་བ་གྱུར། ཨོཾ་བཛྲ་རཀྵ་རཀྵ་ཧཱུཾ། ལན་གསུམ། ཨོཾ་མཉྫུ་ཤྲཱི་ཛྙཱ་ན་སཏྭ་ཧཱུཾ། རང་ཉིད་ཁྲོ་བོ་ལས་ཞི་བར་གྱུར་པ་ནི། འཕྲིན་ལས་ཀྱི་འཇམ་དཔལ་སྐུ་མདོག་སེར་པོ་ཞལ་གཅིག་ཕྱག་གཉིས་པ།
གཡས་རལ་གྲི་དང་གཡོན་ནོར་བུ་འཛིན་པ། གཞོན་ནུའི་རྒྱན་ཐམས་ཅད་ཀྱིས་བརྒྱན་པའོ། །ལྐོག་མར་ཧྲཱིཿལས་པདྨ་དང་ཨ་ལས་ཟླ་བ། དེའི་སྟེང་དུ་ཧཱུཾ་ལས་བྱུང་བའི་རྡོ་རྗེའི་ལྕེར་གྱུར། ཨོཾ་མཉྫུ་ཤྲཱི་བི་མ་ལེ་ཛི་ཧྭཱ་གྲ་སཾ་ཤོ་དྷ་ནི་བཛྲ་ཛི་ཧྭ་ཧཱུཾ། ལག་པ་གཉིས་སུ་ཨ་ལས་ཟླ་བ་ལ་གནས་པའི་ཧཱུཾ་ཡོངས་སུ་གྱུར་པ་ལས་རྡོ་རྗེའི་ལག་པར་གྱུར། ཨོཾ་མཉྫུ་ཤྲཱི་པདྨ་ཧསྟ་པཱུརྣ་ཀ་རོ་དྷི་རེ་བི་མ་ལེ་བཛྲ་ཧསྟ་ཧཱུཾ་ཕཊ། སྙིང་ཁར་པཾ་ལས་པདྨ་དང༌། ཨཱཿལས་ཟླ་བ་ལ་གནས་པའི་དྷཱིཿ ཨོཾ་མཉྫུ་ཤྲཱི་བི་མ་ལེ་བཛྲ་ཙིཏྟ་ཧཱུཾ། སྒྲུབ་ཐབས་ལས་བར་སྐབས་འདིར་སྦྱིན་སྲེག་བྱ་བར་གསུངས་པ་ནི། སློབ་མའི་དོན་གྱི་བསྙེན་པ་དང༌། རང་དོན་དངོས་གྲུབ་སྒྲུབ་པའི་དུས་སུ་དགོས་པ་ཡིན་ཡང༌། རང་དོན་གྱི་བསྙེན་པ་དང༌། ཆོ་ག་དཀྱུས་ལ་ངེས་པར་དགོས་པ་ནི་མ་ཡིན་ནོ། །རང་གི་ལག་མཐིལ་གཉིས་སུ་ཟླ་བའི་དཀྱིལ་འཁོར། གཡས་གཡོན་གྱི་མཐེ་བོང་ལ་ཨཱཿ མཛུབ་མོ་ལ་ཧཱུཾ། གུང་མོ་ལ་ཏྲཱཾ། སྲིན་ལག་ལ་ཧྲཱིཿ མཐེ་ཆུང་ལ་ཨཾ་སྟེ། གཡས་རྣམས་སངས་རྒྱས་ལྔ་དང༌། གཡོན་རྣམས་ཡུམ་ལྔའི་ངོ་བོར་གྱུར། ཡབ་ཡུམ་ཐབས་དང་ཤེས་རབ་གཉིས་སུ་མེད་པའི་ངོ་བོར་བྱིན་གྱིས་བརླབས། རྡོ་རྗེ་ཁུ་ཚུར་གྱི་མཛུབ་མོ་དང་མཐེའུ་ཆུང་འདུད་དེ། ཁ་གྱེན་དུ་ཕྱོགས་པ་འཁོར་ལོའི་ཕྱག་རྒྱ་བཅས་ཏེ། ཨོཾ་མཉྫུ་ཤྲཱི་མཎྜལ་བཛྲ་ཙཀྲ་ཧཱུཾ། བརྒྱ་རྩ་བརྒྱད་བཟླས། མདུན་གྱི་ནམ་མཁར་རིགས་བསྡུས་པའི་དཀྱིལ་འཁོར་ཆེན་པོ་སྤྲུལ་པར་གྱུར། ཨེ་མ་ཧོ་ཡན་ལག་འདུས་པ་ཡི། །སྦྱོར་བ་འདི་ནི་གསུམ་ལས་བྱུང༌། ཞེས་སོ། །དེ་ནས་ཡན་ལག་བཅུ་པ་བྱ་བ་ནི། ཕྱོགས་བཅུའི་ཞིང་ཁམས་མ་ལུས་ན། །རྒྱལ་བ་སྲས་བཅས་
བཞུགས་པ་རྣམས། །བདག་ལ་དགོངས་པར་བྱ་བའི་ཕྱིར། །ལུས་ངག་ཡིད་ཀྱིས་ཕྱག་འཚལ་ལོ། །གང་དེ་སྐུ་གསུང་ཐུགས་ལྡན་པའི། །འཇམ་དཔལ་དེ་ལ་སྤྱི་བོ་ཡིས། །ཀུན་ནས་ལུས་ངག་དང་བའི་ཡིད། །དེ་ལ་རྟག་ཏུ་ཕྱག་འཚལ་ལོ། །བརྩོན་འགྲུས་སྟོབས་ཀྱིས་དགེ་བསགས་པ། །ནམ་མཁའི་ཁམས་ཀྱི་མཐས་གཏུགས་པར། །མཆོད་སྤྲིན་ཚོགས་ཀྱིས་གང་གྱུར་ཏེ། །སྲས་དང་བཅས་ལ་མཆོད་པར་བགྱི། །ཨོཾ་སརྦ་ཏ་ཐཱ་ག་ཏ་ཨརྒྷཾ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡ་ཧཱུཾ། ཞེས་པ་ནས། ཤཔྟའི་བར་དུ་སྦྱར། ཚེ་རབས་ཐོག་མ་མེད་པ་ནས། །ཉོན་མོངས་དབང་གིས་སྡིག་བསགས་ཤིང༌། །ལུས་ངག་ཡིད་ཀྱིས་སྤྱད་པ་རྣམས། །མགོན་ལ་ལན་གསུམ་བཤགས་པར་བགྱི། །སེམས་བསྐྱེད་མངོན་པར་སངས་རྒྱས་དང༌། །རྒྱལ་སྲས་འགྲོ་བའི་དོན་བཞུགས་དང༌། །ཉན་ཐོས་རང་རྒྱལ་སྐྱེ་བོ་ཡི། །བསོད་ནམས་བྱེད་ལ་ཡི་རང་ངོ༌། །འགྲོ་ཀུན་ལྡོངས་པར་མི་འགྱུར་ཞིང༌། །བདུད་བཞི་ཟིལ་གྱིས་མནན་པ་དང༌། །བྱང་ཆུབ་རྣམ་གསུམ་ཐོབ་བྱའི་ཕྱིར། །འཁོར་ལོ་བླ་མེད་སྐོར་བར་བསྐུལ། །འཇིག་རྟེན་བདེ་ལ་འགོད་པ་དང༌། །སྲོག་ཆགས་བྱང་ཆུབ་རྒྱུ་ཡིན་ཕྱིར། །རྒྱལ་བ་མྱ་ངན་འདའ་བཞེད་ལ། །མྱ་ངན་མི་འདའ་བཞུགས་སུ་གསོལ། །དུས་གསུམ་སངས་རྒྱས་ཐམས་ཅད་དང༌། །རྒྱལ་སྲས་རྣམས་ལ་བདག་འབུལ་གྱི། །བདག་ནི་དུས་གསུམ་ཐམས་ཅད་དུ། །སོ་སོར་ཁྱེད་ཀྱིས་བཞེས་སུ་གསོལ། །སངས་རྒྱས་བྱང་ཆུབ་སེམས་དཔའ་རྣམས། །ཇི་ཙམ་དུས་ནས་གཟུང་ནས་སུ། །མ་ལུས་བདག་ལ་དགོངས་སུ་གསོལ། །བདག་མིང་འདི་ཞེས་བགྱི་བ་ནི། །ནམ་
ཞིག་བྱང་ཆུབ་སྙིང་པོ་ལ། །ཡོངས་སུ་མཆིས་ཀྱི་བར་དག་ཏུ། །བདག་གིས་བྱང་ཆུབ་མཆོག་གི་སེམས། །མ་ལུས་པར་ནི་བསྐྱེད་པར་བགྱི། །ཐུགས་རྗེ་ཆེ་དང་ལྡན་པ་ཡི། །བླ་ན་མེད་པའི་དཀོན་མཆོག་གསུམ། །འགྲོ་བའི་དོན་ཀུན་མཛད་པ་ལ། །བདག་ནི་གུས་པས་སྐྱབས་སུ་མཆི། །ཇི་ལྟར་དུས་གསུམ་མགོན་པོ་རྣམས། །ཞེས་པ་ནས། སེམས་ཅན་མྱ་ངན་འདས་ལ་འགོད། །ཅེས་པའི་བར་དུ་བརྗོད་དེ། བཤགས་པ་མན་ཆད་ཚར་གསུམ་བྱའོ། །དེ་ལྟར་ན་ཕྱག་འཚལ། མཆོད་པ། བཤགས་པ། ཡི་རང༌། བསྐུལ་བ། གསོལ་འདེབས། བདག་འབུལ། སེམས་བསྐྱེད། སྐྱབས་འགྲོ། སྡོམ་བཟུང་སྟེ་བཅུའོ། །རྒྱུན་གྱི་ཉམས་ལེན་སྐབས། བསྡུས་པ་ལ་མོས་ན་གུར་ནས་འབྱུང་བའི་རྒྱུན་བཤགས་ཙམ་བྱའོ། །དེ་ནས་འདི་ལྟར། བདེ་བ་ལས་འཁྲུངས་རྡོ་རྗེ་འཆང་བ་ཡི། །དངོས་དང་དངོས་མེད་འབྱུང་གནས་ཆེན་པོར་མཁྱེན། །དང་པོ་གང་དུ་རྣམ་པར་སྣང་མཛད་ཆེ། །དག་ཅིང་དྲི་མེད་བློས་ནི་ཨོཾ་དུ་སྤྲུལ། །གཟུགས་མང་འཕྲེང་བའི་ཚུལ་དུ་སྐོར་བ་ཡི། །སྒྱུ་འཕྲུལ་དྲྭ་བའི་ཚོགས་ལ་ཕྱག་འཚལ་བསྟོད། །དེ་ལྟར་བསྟོད་པས་ལྷ་རྣམས་དགྱེས་ཏེ། ལེགས་སོ་ལེགས་སོ་རིགས་ཀྱི་བུ་ཁྱོད་ཀྱིས། སངས་རྒྱས་ཀྱི་བྱ་བ་བྱས་སོ་ཞེས་གསུངས་པར་གྱུར། དེ་ནས་སླར་ཡང་དྲིན་ལན་གྱི་ཚུལ་དུ་བསྟོད་པ་ནི། ལུགས་འདི་ལ་མཚན་བརྒྱར་གྲགས་པའི། བྱང་ཆུབ་སེམས་ནི་རང་བྱུང་བ། །ཞེས་པ་ནས། ཕ་རོལ་ཕྱིན་བཅུའི་གཙོ་ལ་འདུད། །ཅེས་པའི་བར་གྱིས་བསྟོད་པར་གསུངས་པ་ལྟར། ཆོག་ཁྲིགས་སོགས་ཀྱི་སྐབས་དང༌། སྤྲོས་པ་ལ་དགའ་ན་དེ་ལྟར་བྱ་ལ། བསྟོད་པ་དེ་ཡང་འོག་ཏུ་འཆད་དོ། །བདག་ཉིད་ཉམས་ལེན་གྱི་སྐབས་མདོར་བསྡུས་པ་ལ་མོས་ན། མཆོག་སྦྱིན་རྡོ་རྗེ་
མཆོག་ཁྱོད་འདུད། །སོགས་འདུད་ཉི་ཤུས་བསྟོད་པར་བྱའོ། །དེ་ཡན་ཆད་ནི་རྒྱལ་མཆོག་སྦྱོར་བའི་འཁོར་ལོ་ཞེས་བྱ་བ། དང་པོའི་ཏིང་ངེ་འཛིན་ཏེ་སྔོན་འགྲོའོ། །ཨོཾ་སརྦ་ཏ་ཐཱ་ག་ཏ་ཀཱ་ཡ་ཝཱཀ་ཙིཏྟ་པྲ་ཎ་མེ་ཎ་བཛྲ་བནྡ་ནཱཾ་ཀ་རོ་མི། དབུས་སུའོ། །ཨོཾ་སརྦ་ཏ་ཐཱ་ག་ཏ་པཱུ་ཛ་ཨུ་པ་སྠཱ་ན་ཡ། ཨཱཏྨཱ་ནཱཾ་ནཱིརྱ་ཏ་ཡཱ་མི་སརྦ་ཏ་ཐཱ་ག་ཏ་བཛྲ་སཏྭ་ཨ་དྷི་ཏིཥྛ་སྭཱ་མཾ། ཤར་ནས་སོ། །ཨོཾ་སརྦ་ཏ་ཐཱ་ག་ཏ་པཱུ་ཛ་ཨ་བྷི་ཥེ་ཀཱ་ཡ། ཨཱཏྨ་ནཱཾ་ནཱིརྱ་ཏ་ཡཱ་མི། སརྦ་ཏ་ཐཱ་ག་ཏ་བཛྲ་རཏྣ་ཨ་བྷི་ཥིཉྩ་མཾ། ལྷོ་ནས་སོ། །ཨོཾ་སརྦ་ཏ་ཐཱ་ག་ཏ་པཱུ་ཛ་པྲ་བརྟ་ན་ཡ། ཨཱཏྨ་ནཱཾ་ནཱིརྱ་ཏ་ཡཱ་མི། སརྦ་ཏ་ཐཱ་ག་ཏ་བཛྲ་དྷརྨ་པྲ་བརྟ་ཡཱ་མི། ནུབ་ནས་སོ། །ཨོཾ་སརྦ་ཏ་ཐཱ་ག་ཏ་པཱུ་ཛ་ཀརྨ་ཎེ། ཨཱཏྨཱ་ནཱཾ་ནཱིརྱ་ཏ་ཡཱ་མི། སརྦ་ཏ་ཐཱ་ག་ཏ་བཛྲ་ཀརྨ་ཀུ་རུ་མཾ། བྱང་ནས་སོ། །ཨོཾ་ཨ་ཨཱ་ཨཾ་ཨ་པྲ་ཀྲི་ཏི་པ་རི་ཤུདྡྷ་སརྦ་དྷརྨ་ཡ་དུ་ཏ་སརྦ་ཏ་ཐཱ་ག་ཏ་ཧྲི་ད་ཡ། ཧ་ར་ཧ་ར། ཨོཾ་ཧཱུཾ་ཧྲི་བྷ་ག་ཝཱན་ཛྙ་ན་མུརྟི་བ་གི་ཤྭ་ར་མཧཱ་པ་ཙ་སརྦ་དྷརྨ་ག་ག་ན་མ་ལ་སུ་པ་རི་ཤུདྡྷ་དྷརྨ་དྷཱ་ཏུ་ཛྙཱ་ན་གརྦྷ་ཨཱཿ ཞེས་བརྗོད་པས་དཀྱིལ་འཁོར་གྱི་འཁོར་ལོ་རང་གི་སྙིང་གར་ཐིམ། དེ་དག་ནི་བསོད་ནམས་ཀྱི་ཚོགས་བསོག་པའི་ཏིང་ངེ་འཛིན་ཞེས་བྱའོ། །ཤེས་རབ་སྟོང་པ་ཉིད་དེ་དང༌། དཀྱིལ་འཁོར་གྱི་འཁོར་ལོ་རྒྱུ་དང་རྐྱེན་དུ་གྱུར་ཏེ། ཟུང་འཇུག་གི་མེས་རྣམ་སྨིན་གྱི་ཕུང་པོ་སྲེགས། ཡེ་ཤེས་ཀྱི་སྐུར་གྱུར་པ་ནི། འཇམ་དཔལ་སྐུ་མདོག་དཀར་པོ་ཞལ་དྲུག་ཕྱག་གཉིས་པའི་རྣམ་པ་ཅན་དུ་གསལ་བར་གྱུར། རང་སེམས་གསལ་ལ་རྟོག་པ་མེད་པ་མེ་ལོང་ཡེ་ཤེས་སོ། །དེ་ལྟར་མ་རྟོགས་པའི་སེམས་ཅན་མགོན་མེད་སྐྱབས་མེད་པ་རྣམས། སྡུག་བསྔལ་ལས་བསྒྲལ་ཏེ་གནས་འདི་ལ་དགོད་པར་བྱའོ། །
བདག་གཞན་ཆོས་ཐམས་ཅད་སྟོང་པ་ཉིད་དུ་རོ་གཅིག་པ། མཉམ་ཉིད་ཡེ་ཤེས་སོ། །དེ་ལྟར་མ་རྟོགས་པའི་ཞེས་པ་ནས། དགོས་པར་བྱའོའི་བར་གོང་བཞིན། ཨོཾ་ཨ་ཀཱ་རོ་མུ་ཁཾ་སརྦ་དྷརྨཱ་ཎཱཾ། ཨདྱཱ་ནུཏྤནྣ་ཏྭ་ཏ། ཆོས་ཐམས་ཅད་སོ་སོ་གདོད་མ་ནས་མ་སྐྱེས་པ། སོ་སོར་རྟོག་པའི་ཡེ་ཤེས་སོ། །དེ་ལྟར་མ་རྟོགས་པའི་སོགས། གཟུང་འཛིན་དང་བྲལ་བའི་རང་སེམས་ངོ་བོ་ཉིད་ཀྱིས་འོད་གསལ་བ། ཆོས་དབྱིངས་ཡེ་ཤེས་སོ། །དེ་ལྟར་མ་རྟོགས་པའི་སོགས། དབྱིངས་ལས་མ་གཡོས་བཞིན་དུ་སེམས་ཅན་གྱི་དོན་ལྷུན་གྱིས་གྲུབ་པར་འགྱུར་བ་ནི་བྱ་བ་གྲུབ་པའི་ཡེ་ཤེས་སོ། །དེ་ལྟར་མ་རྟོགས་པའི་སོགས། དེ་དག་ནི་ཡེ་ཤེས་ཀྱི་ཚོགས་ཏེ་ཡོངས་སུ་དག་པའི་ཏིང་ངེ་འཛིན་ནོ། །དེ་ལྟར་སེམས་རང་བཞིན་གྱིས་འོད་གསལ་བ་དེ་ཉིད། ཨ་ཡིག་སྐར་མའི་ཕུང་པོ་ལྟ་བུ་ནམ་མཁར་བཞུགས་པར་གྱུར། དེ་ལས་སྤྲོས་པའི་ཧཱུཾ་ཡིག་སྔོན་པོ་ཁྲོ་བོའི་ཚོགས་འཕྲོ་ཞིང་འོད་ཟེར་འཁྲུག་པའོ། །ཡང་དེ་ལས་རིགས་བདུན་ལ་སོགས་པའི་སངས་རྒྱས་དཔག་ཏུ་མེད་པ་སྤྲུལ། ཞིང་ཁམས་ཐམས་ཅད་དུ་སངས་རྒྱས་ཀྱི་མཛད་པ་མཛད། སེམས་ཅན་ཐམས་ཅད་ཡོངས་སུ་སྦྱངས། སླར་འདུས་ཏེ་ཧཱུཾ་ཡིག་ཁྲོ་བོ་དང་བཅས་པ་ཡོངས་སུ་གྱུར་པ་ལས། རྡོ་རྗེ་རྩེ་ལྔ་པ་སངས་རྒྱས་ཀྱི་ཞིང་དྲུག་ཁྱབ་པའི་ཚད་ཅན། རྭ་རྣམས་ཕྱོགས་ཀྱི་མདོག་དང་མཚུངས་པ་གྱེན་དུ་ལངས་པའོ། །ལྟེ་བའི་ཕྱི་ངོས་ལ་གནས་པའི་ཁྲོ་ཞལ་དྲུག་ལས་བཞི་ཕྱོགས་ཀྱི་མདོག་ཅན་དང༌། ཤར་སྟོད་ཤར་སྨད་གཉིས་དཀར་པོའོ། །རྡོ་རྗེ་ཆེན་པོའི་ཏིང་ངེ་འཛིན་ནོ། །རྡོ་རྗེ་ལྟེ་བའི་ནང་དུ། བྷྲུཾ་ལས་མཆོད་རྟེན་ཆེན་པོ་ཕྱོགས་ཀྱི་མདོག་ཅན་སྟོང་གསུམ་གྱི་ཚད་དང་མཉམ་པའོ། །མཆོད་རྟེན་ཆེན་
པོའི་ཏིང་ངེ་འཛིན་ནོ། །དེ་ཡི་བུམ་པའི་ནང་དུ་ཧྲཱིཿལས་ཆོས་འབྱུང་དཀར་པོ་གྲུ་གསུམ་པ། སྟོང་པར་མའི་ཚད་དང་མཉམ་པའོ། །ཆོས་འབྱུང་ཆེན་པོའི་ཏིང་ངེ་འཛིན་ནོ། །དེའི་ནང་དུ་ཨཱཿལས་སྣ་ཚོགས་རྡོ་རྗེ་སྟོང་སྤྱི་ཕུད་ཀྱི་ཚད་དང་མཉམ་པའོ། །རྡོ་རྗེ་རྒྱ་གྲམ་གྱི་ཏིང་ངེ་འཛིན་ནོ། །དེའི་ལྟེ་བར་བྷྲུཾ་ལས་ཐར་པ་ཆེན་པོའི་གཞལ་ཡས་ཁང་གྲུ་བཞི་སྒོ་བཞི། རྟ་བབས་བཞིས་བརྒྱན་པ། འདོད་ཡོན་གྱི་སྣམ་བུ་དང༌། ཕ་གུ་དང༌། དྲ་ཕྱེད་དང༌། ཤར་བུ་དང༌། མདའ་ཡབ་ཀྱིས་མཛེས་པ། གསེར་གྱི་ཀ་བས་བརྒྱན་པ། རྟ་བབས་ཀྱི་རྩེ་མོར། པདྨ་དང༌། འཁོར་ལོ་དང༌། གདུགས་དང༌། རི་དྭགས་ལ་སོགས་པས་མཛེས་པ། དེའི་ནང་གི་ཕྱེད་དུ་གཞལ་ཡས་ཁང་ནང་མ་གྲུ་བཞི། སྒོ་བཞི་རྟ་བབས་སོགས་མཚན་ཉིད་ཐམས་ཅད་ཕྱི་མ་དང་འདྲ་བ་ལས། ལྷ་སྣམ་གྱི་དབུས་སུ་རྡོ་རྗེའི་འཕྲེང་བས་སྐོར་བ་ལ་འཁོར་ལོ་རྩིབས་བཅུ་དྲུག་པའི་ལྟེ་བར་འཁོར་ལོ་རྩིབས་བརྒྱད་པ་དང༌། ཡ་ཕུབས་ཕྱུར་བུའི་རྣམ་པ། རྩེ་མོར་ཏོག་དང་བཅས་པའོ། །གཞལ་ཡས་ཁང་ཕྱི་ནང་གཉིས་ཀར་ཡང༌། སྔོོ་སེར་དམར་ལྗང་དཀར་བའི་རྩིག་པ་རིམ་པ་ལྔ་དང་ལྡན་པ། སྟེང་འོག་གི་གཞི་དང་འཁོར་ལོའི་རྩིབས་རྣམས་ཤར་དཀར་ལྷོ་སེར་ནུབ་དམར་བྱང་ལྗང༌། གཞལ་ཡས་ཁང་ནང་མའི་དབུས་ཀྱི་གཞི་དང་འཁོར་ལོའི་ལྟེ་བ་ཁ་དོག་དཀར་བ། འཁོར་ལོ་རྩིབས་བརྒྱད་པའི་དབུས་ཀྱི་ལྟེ་བར་སཾ་ལས་སེང་གེའི་གདན་ཕྱོགས་ཀྱི་རྩིབས་བཞི་ལ། ཤར་དུ་གཾ་ལས་གླང་པོ་ཆེ། ལྷོར་ཨཾ་ལས་རྟ། ནུབ་ཏུ་མཾ་ལས་རྨ་བྱ། བྱང་དུ་ཁཾ་ལས་མཁའ་ལྡིང་སྟེ། སྲོག་ཆགས་དེ་རྣམས་ཀྱིས་བཏེག་པའི་རིན་པོ་ཆེའི་ཁྲི་རེ་རེ། དེའི་
སྟེང་དུ་པཾ་ལས་པདྨ། ཨ་ལས་ཟླ་བ། དར་གྱི་གློ་གདན་རྣམས་བརྩེགས་པའི་གདན་དང༌། ལྷ་གཞན་རྣམས་ཀྱི་གནས་སུ་པདྨ་དང་ཟླ་བའི་གདན་རེ་རེ་གྲུབ་པར་གྱུར། དེ་དག་ནི་གཞིའི་ཏིང་ངེ་འཛིན་ནོ། །དབུས་ཀྱི་གདན་གྱི་སྟེང་དུ། ནམ་མཁར་གནས་པའི་ཨ་ཡིག་བབས་ཏེ་ཡོངས་སུ་གྱུར་པ་ལས། རང་ཉིད་གཞིའི་སངས་རྒྱས་རྣམ་པར་སྣང་མཛད་ཆེན་པོ། སྐུ་མདོག་དཀར་པོ་ཞལ་བཞི་པ། རལ་པའི་ཅོན་པན་ཅན། བྱང་ཆུབ་མཆོག་གི་ཕྱག་རྒྱ་མཛད་པ། ཞབས་རྡོ་རྗེའི་སྐྱིལ་མོ་ཀྲུང་གི་བཞུགས་པ། དར་གྱི་ན་བཟའ་ཅན། རྒྱན་སྤངས་པའོ། །དེའི་ཐུགས་ཀར་ཟླ་བ་ལ་གནས་པའི་དྷཱིཿཡིག་དཀར་པོ་ཡོངས་སུ་གྱུར་པ་ལས། དང་པོའི་སངས་རྒྱས་ཞལ་ལྔ་པ། ཕྱག་བརྒྱད་པ། སྐུ་ལུས་དང་སྟེང་ཞལ་དཀར་བ། རྩ་ཞལ་སྔོན་པོ། གཡས་སེར། རྒྱབ་དམར། གཡོན་ལྗང་བ། ཕྱག་གཡས་བཞིས་རལ་གྲི། གཡོན་བཞིས་ཤེས་རབ་ཀྱི་ཕ་རོལ་ཏུ་ཕྱིན་པའི་པོ་ཏི་འཛིན་པ། ཞབས་རྡོ་རྗེའི་སྐྱིལ་ཀྲུང་གིས་བཞུགས་པ། དར་གྱི་ན་བཟའ་དང་བཅས་པའི་རྒྱན་གྱིས་བརྒྱན་པའོ། །དེའི་ཐུགས་ཀར་ཤེས་རབ་ཀྱི་འཁོར་ལོ་རྩིབས་དྲུག་པའི་རྩིབས་བཞི་ཕྱོགས་མདོག་དང༌། ཤར་སྟོད་ཤར་སྨད་ཀྱི་རྩིབས་དང༌། ལྟེ་བ་དང༌། ཕྱི་རོལ་དང༌། ནང་གི་མུ་ཁྱུད་བཞི་རྣམས་དཀར་པོ། དེའི་ལྟེ་བར་ཡང་ཨ་ཡིག་དཀར་པོའོ། །དེའི་འོད་ཟེར་ལས་སྤྲུལ་པའི་ཡི་གེ་ནི། ནང་གི་མུ་ཁྱུད་དང་པོ་ལ། ཨོཾ་སརྦ་དྷརྨཱ་ཨཱ་བྷ་ཝ་སྭ་བྷཱ་ཝ་བི་ཤུདྡྷེ་བཛྲ་ཙཀྵུ་ཨ་ཨཱ་ཨཾ་ཨ། མུ་ཁྱུད་གཉིས་པ་ལ། ཨ་ཨཱ་ཨི་ཨཱི་ཨུ་ཨཱུ་ཨེ་ཨཻ་ཨོ་ཨཽ་ཨཾ་ཨ། རྩིབས་དྲུག་གི་ཤར་རྩིབས་ལ། ཨོཾ་དུཿཁ་ཚེ་ད་ཡ་ཏེ་ན་མཿ སྔོན་པོ། ལྷོ་རྩིབས་
ལ། ཨོཾ་ཝཱ་གི་ཤྭ་ར་ཡ་ཏེ་ན་མཿསེར་པོ། ནུབ་རྩིབས་ལ། ཨོཾ་བཛྲ་ཏིཀྵྞ་ཡ་ཏེ་ན་མཿ དམར་པོ། བྱང་རྩིབས་ལ། ཨོཾ་ཛྙཱ་ན་ཀཱ་ཡ་ཡ་ཏེ་ན་མཿལྗང་ཁུ། ཤར་སྟོད་ལ། ཨོཾ་པྲཛྙཱ་ཛྙཱ་ན་མུརྟ་ཡེ་ཡ་ཏེ་ན་མཿདཀར་པོ། ཤར་སྨད་ལ། ཨོཾ་ཨ་ར་པ་ཙ་ན་ཡ་ཏེ་ན་མཿ དཀར་པོ། ཕྱི་རོལ་མུ་ཁྱུད་གསུམ་པ་ལ། ཨ་ཨཱཿསརྦ་ཏ་ཐཱ་ག་ཏ་ཧྲི་ད་ཡ། ཧ་ར་ཧ་ར། ཨོཾ་ཧཱུཾ་ཧྲཱིཿབྷ་ག་ཝཱན་ཛྙཱ་ན་མུརྟི་ཝ་གི་ཤྭ་ར་མཧཱ་པ་ཙ་སརྦ་དྷརྨྨ་ག་ག་ཎ་ཨ་མ་ལ་སུ་པ་རི་ཤུདྡྷ་དྷརྨ་དྷ་ཏུ་ཛྙཱ་ན་གརྦྷ་ཨཱཿ མུ་ཁྱུད་བཞི་པ་ལ། ཀ་ཁ་ག་གྷ་ང༌། ཙ་ཚ་ཛ་ཛྷ་ཉ། ཊ་ཋ་ཌ་ཌྷ་ཎ། ཏ་ཐ་ད་དྷ་ན། པ་ཕ་བ་བྷ་མ། ཡ་ར་ལ་ཝ་ཤ་ཥ་ས་ཧ། འཁོར་ལོའི་ལྟེ་བའི་ཨ་ཡིག་ཡོངས་སུ་གྱུར་པ་ལས། བདག་ཉིད་བཅོམ་ལྡན་འདས་ཡེ་ཤེས་སེམས་དཔའ་འཇམ་དཔལ་ཞལ་དྲུག་པ། ཕྱག་གཉིས་པ། སྐུ་ལུས་དང་སྟེང་གི་ཞལ་ཉིས་རྩེགས་དཀར་བ། རྩ་ཞལ་སྔོན་པོ། གཡས་སེར་རྒྱབ་དམར་གཡོན་ལྗང་བ། ཕྱག་གཉིས་མཉམ་གཞག་གི་ཕྱག་རྒྱ་མཛད་པའི་གཡས་པས་ཨུཏྤ་ལ་དམར་པོ་དང༌། གཡོན་པས་སྔོན་པོའི་རྩ་བ་འཛིན་ཅིང༌། སྡོང་པོ་གཡས་གཡོན་དུ་རྒྱས་པ། མེ་ཏོག་སྙན་གྱི་ཐད་ཀར་ཁ་བྱེ་བའི་སྟེང་ན་པོ་ཏིས་མཚན་པ། ཞབས་རྡོ་རྗེའི་སྐྱིལ་མོ་ཀྲུང་གིས་བཞུགས་པ། དར་སྣ་ཚོགས་པའི་ན་བཟའ་དང༌། ཨིནྡྲ་ནཱི་ལའི་གཙུག་ཕུད་ལ་སོགས་པ་རིན་པོ་ཆེའི་རྒྱན་ཐམས་ཅད་ཀྱིས་བརྒྱན་པ། ཉི་མ་འཆར་ཀ་ལྟ་བུའི་འོད་ཟེར་འཕྲོ་བ། སྐུའི་མགྲིན་པ་མན་ཆད་ལོང་བུ་ཡན་ཆད་དུ། སྤྲུལ་པའི་སྐུ་དཔག་ཏུ་མེད་པས་བལྟམས་པའོ། །དེའི་ཐུགས་ཀར་ཡང་ཟླ་བའི་དཀྱིལ་འཁོར་གྱི་སྟེང་དུ་སྐྱེ་མེད་ཀྱི་
ངོ་བོ་ཨ་ཡིག་དཀར་པོ། མི་ཤེས་པའི་རི་བོ་འཇོམས་པར་བྱེད་པ། ཨ་ཡིག་དེ་ལས་འོད་ཟེར་གྱི་ཚོགས་དཔག་ཏུ་མེད་པ་འཕྲོས། ཡེ་ཤེས་སེམས་དཔའི་སྐུ་གང༌། ཕྱིར་འཕྲོས་ཏེ་རིམ་པས་ཤེས་རབ་ཀྱི་འཁོར་ལོ་དང༌། དང་པོའི་སངས་རྒྱས་དང༌། གཞིའི་སངས་རྒྱས་ཀྱི་སྐུ་གང༌། ཞལ་བཞི་ནས་སྤྲོས་ཏེ་འཇིག་རྟེན་གསུམ་སྣང་བར་བྱས། གཞལ་ཡས་ཁང་དང་རྒྱ་གྲམ་དང༌། ཆོས་འབྱུང་དང༌། མཆོད་རྟེན་དང༌། རྡོ་རྗེ་ཆེན་པོའི་ནང་གང༌། ཁྲོ་ཞལ་དྲུག་ནས་འོད་ཟེར་ཁ་དོག་དྲུག་ལྡན་དུ་འཕྲོས། ནམ་མཁའི་ཁམས་ཐམས་ཅད་ཁྱབ་པར་བྱས། སངས་རྒྱས་མཆོད། སེམས་ཅན་ཐམས་ཅད་ཀྱི་སྡིག་སྒྲིབ་སྦྱངས། འཇམ་དཔལ་རིགས་བདུན་གྱི་གོ་འཕང་ལ་བཀོད། ཐུགས་གཉིས་སུ་མེད་པའི་ཡེ་ཤེས་འོད་ཟེར་གྱི་རྣམ་པར་སྤྱན་དྲངས། རྡོ་རྗེ་ཆེན་པོ་ལ་སྐོར་བ་ལན་གསུམ་བྱས་ཏེ། ཁྲོ་ཞལ་དྲུག་ནས་ཞུགས། ཇི་ལྟར་སྤྲོས་པའི་རིམ་པ་རྣམས་ལུགས་ལས་ཟློག་པའི་ཚུལ་གྱིས་ཞུགས་ནས། ཡེ་ཤེས་སེམས་དཔའི་ཐུགས་ཀའི་ཨ་ལ་ཐིམ་པར་གྱུར། དེ་དག་ནི་བྱང་ཆུབ་རྫུ་འཕྲུལ་དང་པོ་སྦྱོར་བའི་རིམ་པའོ། །ད་ནི་དཀྱིལ་འཁོར་རྒྱལ་མཆོག་ལ། བླ་མ་སྔ་མ་རྣམས་འོད་ཟེར་སྤྲོ་བའི་སྒོ། མཛད་པ་མཛད་པའི་སྒོ། སླར་བསྡུ་བའི་སྒོ། བརྟན་པར་འཁོད་པའི་སྒོ། ཕྱག་མཚན་ཐུགས་ཀྱི་སྒོ། ཕྱག་ཆེན་སྐུའི་སྒོ། སྤྲོས་ཤིང་ཕྱུང་བའི་སྒོ། ཞེས་པ་དོན་ཚན་བདུན་གྱི་སྐྱེད་པར་བྱེད་ཀྱང་བདུན་པོ་མི་དགོས་ལ། བཞི་པ་ལ་ཡི་གེ་སྤྲོ་བའི་སྒོ། ཞེས་བྱས་ན་ལེགས་པར་འགྱུར་རོ། །སླར་ཡང་ཡེ་ཤེས་སེམས་དཔའི་ཐུགས་ཀའི་ཨ་ལས་འོད་ཟེར་གྱི་ཚོགས་དཔག་ཏུ་མེད་པ་སྤྲོས། ཤེས་རབ་ཀྱི་འཁོར་ལོ་ནས། རྡོ་རྗེ་ཆེན་པོའི་བར་དུ་རིམ་གྱིས་གསལ་བར་བྱས་ཤིང༌། དཀྱིལ་འཁོར་གྱི་ལྷ་
ཚོགས་དཔག་ཏུ་མེད་པས་ནམ་མཁའི་ཁམས་ཐམས་ཅད་ཁྱབ་པར་གྱུར་ཏོ། །མཛད་པ་བཅུ་གཉིས་ལ་སོགས་པའི་སེམས་ཅན་གྱི་དོན་མཛད། སྒྲིབ་གཉིས་ཐམས་ཅད་ཡོངས་སུ་སྦྱངས་ཏེ། འཇམ་དཔལ་ལྷ་ལྔ་བཅུ་ང་བདུན་གྱི་གོ་འཕང་ལ་བཀོད། འཕགས་པའི་ཚོགས་ཐམས་ཅད་མཆོད་པས་མཉེས་པར་བྱས་སོ། །སངས་རྒྱས་ཐམས་ཅད་ཀྱི་ཐུགས་རྗེའི་བྱིན་རླབས་རྣམས། འོད་ཟེར་གྱི་རྣམ་པར་ཚུར་བསྡུས། རོ་གཅིག་ཏུ་འདྲེས། སྔར་གྱི་ལམ་ལས་འོངས་ཏེ། ཡེ་ཤེས་སེམས་དཔའི་ཐུགས་ཀའི་ཨ་ཡིག་དང་གཅིག་ཏུ་གྱུར། སླར་ཡང་ཨ་ཡིག་ལས་བྱུང་བའི་འོད་ཀྱི་ཕུང་པོ་དེ་ལས་ས་བོན་ཡིག་འབྲུ་རྣམས་སུ་གྱུར། ཐུགས་ཀ་ནས་ཕྱིར་སྤྲོས་དང་པོའི་སངས་རྒྱས་དང་གཞིའི་སངས་རྒྱས་ཀྱི་ཐུགས་ཀ་ནས་ཀྱང་ཕྱུང༌། སོ་སོའི་གདན་གྱི་སྟེང་དུ་འཁོད་པ་ནི། ཤར་དུ་ཧཱུཾ། ལྷོར་ཨཾ། ནུབ་ཏུ་ཧྲཱིཿ བྱང་དུ་ཨཱཿ ཤར་ལྷོར་ཨ། ལྷོ་ནུབ་ཏུ་ཨཱ། ནུབ་བྱང་དུ་ཨི། བྱང་ཤར་དུ་ཨཱི། འཁོར་ལོ་ཕྱི་མའི་རྩིབས་རྣམས་ལ། ཨ་ཨཱ་ཨི་ཨཱི་ཨུ་ཨཱུ་ཨེ་ཨཻ་ཨོ་ཨཽ་ཨཾ་ཨཿ ཨ་ཨཱ་ཨེ་ཨཻ། ནང་གི་གྲྭ་བཞི་ལ། ལཱ་མཱ་གཱི་ནྲྀ། གཞལ་ཡང་ཁང་ཕྱི་མའི་གྲ་བཞིར། དྷུ་བུ་ཨ་ག །ཕྱིའི་ལྷ་སྣམ་ལ། ཨ་ཡིག་བཅུ་དྲུག །སྒོ་བཞི་ལ། ཛཿཧཱུཾ་བཾ་ཧོཿ རྣམས་སུ་གྱུར་ཏོ། །ས་བོན་དེ་རྣམས་ཡོངས་སུ་གྱུར་པ་ལས། རིམ་པ་བཞིན་དུ། རྡོ་རྗེ་རིན་ཆེན་པདྨ་སྣ་ཚོགས་རྡོ་རྗེ་དང༌། །ལག་ཉལ་ནོར་བུ་འདམ་སྐྱེས་རྒྱ་གྲམ་ཁྲ་བོ་དང༌། །རྡོ་རྗེ་ལྕགས་ཀྱུ་མདའ་གཞུ་སེ་གོལ་ཕྱག་རྒྱ་དང༌། །རིན་ཆེན་ཉི་མ་རྒྱལ་མཚན་སོའི་འཕྲེང་བ་དང༌། །པདྨ་རལ་གྲི་འཁོར་ལོ་རྡོ་རྗེས་མཚན་པའི་ལྗགས། །སྣ་ཚོགས་རྡོ་རྗེ་གོ་ཁྲབ་མཆེ་བ་ཁུ་ཚུར་དང༌། །རྡོ་རྗེ་
འཕྲེང་རྒྱུད་པི་ཝང་རྡོ་རྗེ་རྩེ་གསུམ་དང༌། སྤོས་སྣོད་མེ་ཏོག་ཕོར་པ་གོང་བུ་དུང་ཆོས་དང༌། །རྡོ་རྗེ་བཞི་དང་ནོར་བུ་བཞི་དང་པདྨ་བཞི། །སྣ་ཚོགས་རྡོ་རྗེ་བཞི་སྟེ་ལྷ་སྣམ་དག་ལ་གནས། །སྒོ་བཞིར་ལྕགས་ཀྱུ་ཞགས་པ་ལྕགས་སྒྲོག་དྲིལ་བུའོ། །ཕྱག་མཚན་རྣམས་ལས་འོད་ཟེར་དཔག་ཏུ་མེད་པ་འཕྲོས། སེམས་ཅན་གྱི་དོན་རྫོགས་པར་བྱས། སངས་རྒྱས་ཐམས་ཅད་མཆོད་དེ། སླར་འདུས་ཤིང་ཐིམ་པ་ཡོངས་སུ་གྱུར་པ་ལས། དཀྱིལ་འཁོར་གྱི་ལྷ་ལྔ་བཅུ་རྩ་གཉིས་ཡོངས་སུ་རྫོགས་པར་གྱུར་པ་ནི། ཨོཾ་ཨ་ཨཱཿསརྦ་ཏ་ཐཱ་ག་ཏ་ཧྲི་ད་ཡ་ནས། ཛྙཱ་ན་གརྦྷ་ཨཱཿ འཁོར་ལོའི་རྩིབས་བརྒྱད་ལས་ཤར་དུ་མི་བསྐྱོད་པ་སྔོན་པོ་གཡས་ས་གནོན། གཡོན་མཉམ་བཞག་མཛད་པ། ཨོཾ་ཨ་ཨཱཿནས། ཛྙཱ་ན་གརྦྷ་ཨཱཿ ལྷོར་རིན་ཆེན་འབྱུང་ལྡན་སེར་པོ། གཡས་མཆོག་སྦྱིན་དང༌། གཡོན་མཉམ་གཞག་མཛད་པ། དེ་བཞིན་དུ་གཞན་རྣམས་ལ་ཡང་སྦྱར་ཏེ། ཨོཾ་ཨ་ཨཱཿསོགས་སྔགས་རེ་བརྗོད་ཅིང་ལྷ་རེ་གསལ་བཏབ་བོ། །ནུབ་ཏུ་འོད་དཔག་མེད་དམར་པོ་ཕྱག་གཉིས་མཉམ་གཞག་གི་ཕྱག་རྒྱ་མཛད་པ། བྱང་དུ་དོན་ཡོད་གྲུབ་པ་ལྗང་ཁུ་གཡས་སྐྱབས་སྦྱིན་དང༌། གཡོན་མཉམ་གཞག་མཛད་པ། བཞི་ཀའང་རྡོ་རྗེའི་སྐྱིལ་མོ་ཀྲུང་གིས་བཞུགས་ཤིང༌། དབུ་བརྒྱན་རྡོ་རྗེ་རིན་པོ་ཆེས་སྤྲས་པ། དར་དང་རིན་པོ་ཆེའི་རྒྱན་ཐམས་ཅད་ཀྱིས་བརྒྱན་པ། རིགས་སྔགས་ཀྱི་འཁོར་ལོས་སྒྱུར་བའི་ཆ་ལུགས་སོ། །ཤར་ལྷོར་སེམས་མ་རྡོ་རྗེ་མ་དཀར་མོ་རྡོ་རྗེ་ཐུགས་ཀར་འཛིན་པ། ལྷོ་ནུབ་ཏུ་རིན་ཆེན་རྡོ་རྗེ་མ་སྔོན་མོ་རིན་པོ་ཆེ་འཛིན་པ། ནུབ་བྱང་དུ་ཆོས་ཀྱི་རྡོ་རྗེ་མ་དམར་མོ་པདྨ་འཛིན་པ། བྱང་ཤར་དུ་ལས་ཀྱི་རྡོ་རྗེ་མ་ལྗང་ཁུ་སྣ་ཚོགས་རྡོ་རྗེ་
འཛིན་པ། འཁོར་ལོ་ཕྱི་མའི་ཤར་གྱི་རྩིབས་བཞི་ལ། རྡོ་རྗེ་སེམས་དཔའ་གཡས་རྡོ་རྗེ་ཐུགས་ཀར་འཛིན་པ། རྡོ་རྗེ་རྒྱལ་པོ་གཡས་ལྕགས་ཀྱུ་འཛིན་པ། རྡོ་རྗེ་ཆགས་པ་ཕྱག་གཉིས་མདའ་གཞུང་འགེངས་པ། རྡོ་རྗེ་ལེགས་པ་ཕྱག་གཉིས་སེ་གོལ་རྟོག་པ་སྟེ། ཤར་ཕྱོགས་ཀྱི་སེམས་དཔའ་བཞི་སྔོན་པོའོ། །ལྷོའི་རྩིབས་བཞི་ལ་རིམ་པས་རྡོ་རྗེ་རིན་ཆེན་གཡས་རིན་པོ་ཆེ་འཛིན་པ། རྡོ་རྗེ་གཟི་བརྗིད་གཡས་ཉི་མའི་དཀྱིལ་འཁོར་འཛིན་པ། རྡོ་རྗེ་ཏོག་གཡས་རིན་པོ་ཆེའི་རྒྱལ་མཚན་འཛིན་པ། རྡོ་རྗེ་བཞད་པ་ཕྱག་གཉིས་སོའི་འཕྲེང་བ་འཛིན་པ་སྟེ་ལྷོ་ཕྱོགས་ཀྱི་སེམས་དཔའ་བཞི་སེར་པོའོ། །ནུབ་ཀྱི་རྩིབས་བཞི་ལ་རྡོ་རྗེ་ཆོས་ཕྱག་གཉིས་པདྨ་འཛིན་པ། རྡོ་རྗེ་རྣོན་པོ་གཡས་རལ་གྲི་འཕྱར་བ། རྡོ་རྗེ་རྒྱུ་གཡས་འཁོར་ལོ་སེར་པོ་སྐོར་བ། རྡོ་རྗེ་སྨྲ་བ་རྡོ་རྗེའི་ལྗགས་འཛིན་པ་སྟེ། ནུབ་ཕྱོགས་ཀྱི་སེམས་དཔའ་བཞི་དམར་པོའོ། །བྱང་གི་རྩིབས་བཞི་ལ་རིམ་པས་རྡོ་རྗེ་ལས་གཡས་སྣ་ཚོགས་རྡོ་རྗེ་ཐུགས་ཀར་འཛིན་པ། རྡོ་རྗེ་བསྲུང་བ་ཕྱག་གཉིས་རྡོ་རྗེའི་གོ་ཁྲབ་འཛིན་པ། རྡོ་རྗེ་གནོད་སྦྱིན་ཕྱག་གཉིས་རྡོ་རྗེས་མཚན་པའི་མཆེ་བ་འཛིན་པ། རྡོ་རྗེ་ཁུ་ཚུར་ཕྱག་གཉིས་དམ་ཚིག་གི་ཁུ་ཚུར་འཆིང་བ་སྟེ་བྱང་ཕྱོགས་ཀྱི་སེམས་དཔའ་བཞི་ལྗངཁུའོ། །ནང་གི་གྲྭ་བཞིར་ཤར་ལྷོར་སྒེག་མོ་སྔོན་མོ་རྡོ་རྗེ་རྩེ་ལྔ་པ་སྙེམས་པའི་ཚུལ་གྱིས་དཀུར་བརྟེན་པ། ལྷོ་ནུབ་ཏུ་འཕྲེང་བ་མ་སེར་མོ་རིན་པོ་ཆེའི་འཕྲེང་རྒྱུད་འཕྱང་བ། ནུབ་བྱང་དུ་གླུ་མ་དམར་མོ་པི་ཝང་རྡུང་བ། བྱང་ཤར་དུ་གར་མ་ལྗང་ཁུ་རྡོ་རྗེ་རྩེ་གསུམ་པ་གཉིས་སྣམས་ནས་གར་སྒྱུར་བ། ཕྱིའི་གྲྭ་བཞི་ལ་ཤར་ལྷོར་བདུག་སྤོས་མ་སྔོན་མོ་སྤོས་སྣོད་འཛིན་པ།
ལྷོ་ནུབ་ཏུ་མེ་ཏོག་མ་སེར་མོ་མེ་ཏོག་གིས་གང་བའི་སྣོད་འཛིན་པ། ནུབ་བྱང་དུ་མར་མེ་མ་དམར་མོ་མར་མེའི་ཀོང་བུ་འཛིན་པ། བྱང་ཤར་དུ་དྲི་ཆབ་མ་ལྗང་ཁུ་དྲིའི་དུང་ཆོས་འཛིན་པ། ཨོཾ་ཨ་ཨཱ་སོགས་ཚར་བཞི་བརྗོད་ལ། བྱམས་པ་སྤོས་ཀྱི་གླང་པོ་དང༌། །འཇམ་དཔལ་ཡེ་ཤེས་ཏོག་སྟེ་བཞི། །སྔོན་པོ་རྡོ་རྗེ་སེམས་དཔའ་འདྲ། །ཤར་གྱི་ཕྱོགས་ཀྱི་ལྷ་སྣམ་ལའོ། །ཡང་སྔགས་བཞི་དང༌། བཟང་སྐྱོང་བློ་གྲོས་རྒྱ་མཚོ་དང༌། །བློ་གྲོས་མི་བཟད་སྤོབས་པ་བརྩེགས། །སེར་པོ་རྡོ་རྗེ་རིན་ཆེན་འདྲ། །ལྷོ་ཡི་ཕྱོགས་ཀྱི་ལྷ་སྣམ་ལའོ། །སྔགས་བཞི་བཟླས། མཐུ་ཆེན་ངན་སོང་ཀུན་འདྲེན་དང༌། །མྱ་ངན་འཇོམས་པ་དྲ་ཅན་འོད། །དམར་པོ་རྡོ་རྗེ་ཆོས་དང་འདྲ། །ནུབ་ཀྱི་ཕྱོགས་ཀྱི་ལྷ་སྣམ་ལའོ། །ཡང་སྔགས་བཞི། ཟླ་འོད་གཞོན་ནུ་བདུད་རྩིའི་འོད། །ནམ་མཁའ་མཛོད་དང་སྒྲིབ་སེལ་རྣམས། །ལྗང་ཁུ་རྡོ་རྗེ་ལས་དང་འདྲ། །བྱང་གི་ཕྱོགས་ཀྱི་ལྷ་སྣམ་ལའོ། །ཕྱིའི་ཤར་སྒོར་རྡོ་རྗེ་ལྕགས་ཀྱུ་སྔོན་པོ་ལྕགས་ཀྱུ་འཛིན་པ། ལྷོ་སྒོར་རྡོ་རྗེ་ཞགས་པ་སེར་པོ་ཞགས་པ་འཛིན་པ། ནུབ་སྒོར་རྡོ་རྗེ་ལྕགས་སྒྲོག་དམར་པོ་ལྕགས་སྒྲོག་འཛིན་པ། བྱང་སྒོར་རྡོ་རྗེ་འབེབས་པ་ལྗང་ཁུ་དྲིལ་བུ་འཛིན་པ། ཨོཾ་ཨ་ཨཱཿནས། ཛྙཱ་ན་གརྦྷ་ཨཱཿ སེམས་མ་རྡོ་རྗེ་མ་ནས་རྩམས་ཏེ་དེ་ཐམས་ཅད་རང་རིགས་གྱི་རྒྱལ་བའི་ཅོད་པན་གྱིས་མཛེས་པར་བྱས་པའི་རྒྱན་དང་ཆ་ལུགས་ཅན། རིན་པོ་ཆེའི་རྒྱན་སྣ་ཚོགས་དང༌། དར་གྱི་ན་བཟའ་གསོལ་བ། སེམས་དཔའི་སྐྱིལ་མོ་ཀྲུང་གིས་པད་ཟླའི་གདན་ལ་བཞུགས་ཤིང་ཕྱག་གཡོན་ན་པོ་ཏིས་མཚན་པའི་ཨུཏྤལ་བསྣམས་པ། དམིགས་བསལ་ཅན་རྣམས་
མ་གཏོགས། ཕྱག་གཡོན་པ་རྣམས་ཀྱི་ཁུ་ཚུར་དཀུར་བརྟེན་པའོ། །ཡང་ལུགས་འདིའི་རྒྱ་གར་གྱི་བྲིས་སྐུ་ཁུངས་མ་འགའ་ལས་ནི། རིགས་ལྔ་ནས་རྩམས་ཏེ་ལྷ་ཐམས་ཅད་ལ། གཡོན་ན་ཨུཏྤལ་ལ་གནས་པའི་པོ་ཏི་དང༌། གཡས་ཕྱོགས་སུ་ཨུཏྤལ་ལ་བརྟེན་པའི་རལ་གྲི་བྲིས་པའང་སྣང་ངོ༌། །འདིའི་ལྷ་རྣམས་ཀྱི་བཞུགས་ཚུལ་ལ་ཡང་རྡོར་དབྱིངས་ཀུན་སྙིང་ལུགས་ཀྱི་རིགས་འདྲེ་མི་འགྲོ་ལ། ལྷ་ཚོགས་རྣམས་བྱུང་རྫོགས་སུ་སྤྲོ་བ་སྐྱེད་ཆོག་ཅུང་ཟད་བསྡུས་པ་འདི། འདི་ཉིད་ཀྱི་རང་ལུགས་ཡིན་གྱི་རེ་རེ་བཞིན་རྐངས་འཐོན་དུ་སྤྲོ་ཞིང༌། ལྷ་སོ་སོའི་དག་པ་ཅུང་ཟད་གསུངས་པ་དང་སྦྱར་ནས། སོ་སོའི་དགོས་ཀྱི་མཛད་པ་སོགས་སྦྱོར་བ་ནི། སྤྲོས་པ་ལ་དགའ་བ་ཙམ་མཚོན་པར་བྱེད་དོ། །རྒྱུན་གྱི་ཉམས་ལེན་དང་མདོར་བསྡུས་པའི་སྐབས། ལྷ་ཐམས་ཅད་ལ་དམིགས་ནས། རྩ་སྔགས་ཚར་གཅིག་ཁོ་ན་བརྗོད་དེ། དེ་རྗེས་གསལ་བཏབ་པས་ཀྱང་ཆོག་གོ །དེ་དག་ནི་དམ་ཚིག་བསྐྱེད་པ་སྟེ། དཀྱིལ་འཁོར་རྒྱལ་པོ་མཆོག་གི་ཏིང་ངེ་འཛིན་ནོ། །དཀྱིལ་འཁོར་གྱི་གཙོ་བོའི་ཐུགས་ཀ་ནས། འཇམ་དཔལ་སྐུ་མདོག་སེར་པོ་བྱུང་ཏེ་ལས་རྣམས་མཛད་པར་གྱུར། མཆོད་རྫས་རྣམས་ལ་དམིགས་ཏེ། ཨོཾ་བཛྲ་ཡཀྵ་ཧཱུཾ་ཕཊ། དྲི་བཟང་གི་ཆུས་གཏོར། བགེགས་རྣམས་བསངས་པར་བསམ། ཨོཾ་བཛྲ་ཤི་ཥ་རེ་རུ་ཊ་མ་ཊ་ཧཱུཾ་ཕཊ། ཅེས་ཐམས་ཅད་དག་པར་བྱས་པར་བསམ། ཨོཾ་སྭ་བྷཱ་ཝ་ཤུདྡྷ་སརྦ་དྷརྨ་སྭ་བྷཱ་ཝ་ཤུདྡྷོ྅ཧཾ། སྟོང་པའི་ངང་ལས་ཨོཾ་ལས་བྱུང་བའི་རིན་པོ་ཆེའི་སྣོད་ཡངས་ཤིང་རྒྱ་ཆེ་བ་རྣམས་ཀྱི་ནང་དུ། ཨོཾ་ལས་བྱུང་བའི་མཆོད་ཡོན། ཞབས་བསིལ། མེ་ཏོག །བདུག་སྤོས། མར་མེ། དྲི་ཆབ། ཞལ་ཟས། རོལ་མོ་རྣམས་དྭངས་ཤིང་ཐོགས་པ་མེད་པ་ནམ་མཁའི་མཐའ་ཀླས་པར་གྱུར། ཨོཾ་ཨཱཿཧཱུཾ། ཨོཾ་ཨཱཿཧཱུཾ། ཨོཾ་
བཛྲ་པུཥྤེ་ཧཱུཾ། དེ་བཞིན་དུ་དྷུ་པེ། ཨཱ་ལོ་ཀེ གནྡྷེ། ནེ་ཝེ་ཏེ། ཤཔྟ་རྣམས་ལ་ཡང་སྦྱར། ཨོཾ་བཛྲ་ཨ་བེ་ཤ་ཡ་ཧཱུཾ་ཕཊ་ཀྱི་སྒོ་དབྱེ། ཨོཾ་བཛྲ་ས་མཱ་ཛཿ ཛཿཧཱུཾ་བཾ་ཧོཿ སྙིང་གའི་འོད་ཟེར་གྱིས་སངས་རྒྱས་བྱང་ཆུབ་སེམས་དཔའི་ཚོགས་དང་བཅས་པ་ཐམས་ཅད་ནམ་མཁའི་དབུས་སུ་སྤྱན་དྲངས་པར་གྱུར། མ་ལུས་ཕྱོགས་ན་བཞུགས་པ་ཡི། །འཕགས་པ་འཇམ་དབྱངས་བཅོམ་ལྡན་འདས། །སངས་རྒྱས་ཐམས་ཅད་དགོངས་སུ་གསོལ། །བདག་མིང་འདི་ཞེས་བགྱི་བ་ཡིས། །སངས་རྒྱས་ཐམས་ཅད་སྤྱན་འདྲེན་པས། །དེང་འདིར་སངས་རྒྱས་ཀུན་གཤེགས་ཏེ། །དངོས་གྲུབ་འདིར་ནི་སྩལ་དུ་གསོལ། །ཨོཾ་ཨེ་ཧྱེ་ཧི་བྷ་ག་ཝཱན། བཛྲ་ཨང་གུ་ཤ་ཛཿཧཱུཾ་བཾ་ཧོཿ ས་མ་ཡ་སྟྭཾ། བཅོམ་ལྡན་ཐུགས་རྗེ་བྱོན་པ་ལེགས། །བདག་ནི་བསོད་ནམ་སྐལ་བར་ལྡན། །བདག་གི་མཆོད་ཡོན་བཞེས་ནས་ཀྱང༌། །འདི་ཉིད་དུ་ནི་བཞུགས་སུ་གསོལ། །ཨོཾ་ཨརྒྷཾ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུཾ། ཇི་ལྟར་བཅོམ་ལྡན་འཇམ་པའི་དབྱངས། །རང་བཞིན་དག་པའི་ཡེ་ཤེས་ལྷ། །གཟུང་འཛིན་དྲི་མ་མི་མངའ་ཡང༌། །འགྲོ་བའི་དོན་དུ་སྐུ་ཁྲུས་གསོལ། །ཨོཾ་སརྦ་ཏ་ཐཱ་ག་ཏ་པྲ་ཝ་ར་སཏ་ཀཱ་ར་པྲ་ཏཱིཙྪ་སྭཱཧཱ། བདག་དང་འགྲོ་ལ་ཐུགས་བརྩེའི་ཕྱིར། །ཉིད་ཀྱི་རྫུ་འཕྲུལ་མཐུ་ཡིས་ནི། །ཇི་སྲིད་མཆོད་པ་བདག་བགྱིད་ན། །དེ་སྲིད་བཅོམ་ལྡན་བཞུགས་སུ་གསོལ། །ཨོཾ་བཛྲ་ཏིཥྛ་ཧཱུཾ། དེ་ལྟར་མཆོད་ཡོན་ཞབས་བསིལ། གདན་རྣམས་ཕུལ་ནས། ཨོཾ་མཉམ་ཉིད་མི་གཡོ་མཉམ་ཉིད་མཆོག་གི་ཆོས་ཉིད་ཅན། །ཞེས་སོགས་ཀྱིས་བསྟོད། ཨོཾ་བཛྲ་ཨཾ་གུ་ཤ་ཛཿ ཨོཾ་བཛྲ་པཱ་ཤ་ཧཱུཾ། ཨོཾ་བཛྲ་སྥོ་ཊ་བཾ།
ཨོཾ་བཛྲ་ཨཱ་བེ་ཤ་ཨཱཿ ཞེས་པས་ཡེ་ཤེས་སེམས་དཔའ་སྒོ་བཞི་ནས་བཅུག །ཅེས་མན་ངག་དང་ལག་ལེན་ལས་འབྱུང་ཞིང༌། དཀྱིལ་ཆོག་གི་དངོས་བསྟན་ལ། ཤར་སྒོ་ནས་འཇུག་པ་ཁོ་ན་ལས་མེད་དོ། །ཨོཾ་ཡ་མཱནྟ་ཀ་ཧཱུཾ་ཕཊ། ཕྱི་འབྲང་གི་བགེགས་བསྐྲད། བཛྲ་བནྡྷ་ཧཱུཾ། གིས་སྒོ་བཅད། ཨོཾ་ཨ་ཨཱཿནས། ཛྙཱ་ན་གརྦྷ་ཨ། དྲཱྀ་ཤྱ་ས་མ་ཡ་སྟྭཾ་ཨཱ་ཧཾ། ཞེས་པས་བདག་དང་ཡེ་ཤེས་སེམས་དཔའ་དང་དམ་ཚིག་སེམས་དཔའ་རྣམས་ཕན་ཚུན་དུ་བལྟས། ཡང༌། ཨོཾ་ཨ་ཨཱཿནས། གརྦྷ་ཨཱཿ དྲྀ་ཤྱ་ཛཿཧཱུཾ་བཾ་ཧོཿ ས་མ་ཡ་སྟྭཾ། ཨཱ་ཧཾ། དམ་ཚིག་སེམས་དཔའ་དང་ཡེ་ཤེས་སེམས་དཔའ་དབྱེར་མེད་དུ་གྱུར། ཨོཾ་ཛྲ་སཏྭ་ཧཱུཾ། ལྷ་ཐམས་ཅད་ཀྱི་ཐུགས་ཀར་པད་ཟླ་ལ་ཨཱཿ ཨོཾ་ཨ་ཨཱཿནས། གརྦྷ་ཨཱཿ ཨོཾ་བཛྲ་ཀརྨ་ཨོཾ། ཨ་ལས་འོད་འཕྲོས། སངས་རྒྱས་དང་བྱང་ཆུབ་སེམས་དཔའ་དང་གཞན་ཡང་འཕགས་པ་ཐམས་ཅད་ཀྱི་ཡོན་ཏན་དང་འཕྲིན་ལས་རྣམས་འོད་ཟེར་གྱི་རྣམ་པར་ཚུར་བསྡུས། ཨ་ལ་ཐིམ། དེ་སྣ་ཚོགས་རྡོ་རྗེ་ཨས་མཚན་པར་གྱུར། ལས་ཀྱི་ཕྱག་རྒྱའོ། །གོང་བཞིན་རྩ་སྔགས་དེ་ཉིད་ཀྱི་མཐར། ཨོཾ་བཛྲ་དྷརྨ་ཧྲཱིཿ ལྷ་ཐམས་ཅད་ཀྱི་མགྲིན་པའི་གནས་སུ་པད་ཟླ་ལ་ཧྲཱིཿདམར་པོ། དེ་ལས་འོད་འཕྲོས་སངས་རྒྱས་བྱང་སེམས་འཕགས་པ་རྣམས་ཀྱི་གསུང་གི་ཡེ་ཤེས་ཐམས་ཅད་ཚུར་བསྡུས། ཧྲཱི་ལ་ཐིམ་པ་ལས། པདྨ་དམར་པོ་ཨས་མཚན་པར་གྱུར། ཆོས་ཀྱི་ཕྱག་རྒྱའོ། །ཡང་རྩ་སྔགས་ཀྱི་མཐར། ཨོཾ་བཛྲ་ཙཀྲ་ཨོཾ། ལྷ་ཐམས་ཅད་ཀྱི་སྤྱི་གཙུག་ཏུ་པད་ཟླ་ལ་ཨོཾ་ལས་འོད་འཕྲོས། སངས་རྒྱས་བྱང་སེམས་འཕགས་པ་ཐམས་
ཅད་ཀྱི་སྐུའི་ཡེ་ཤེས་རྣམས་འོད་ཟེར་གྱི་རྣམ་པར་ཚུར་བསྡུས། ཨོཾ་ལ་ཐིམ་པས་འཁོར་ལོ་ཨོཾ་གྱིས་མཚན་པར་གྱུར། ཕྱག་རྒྱ་ཆེན་པོའོ། །ཡང་རྩ་སྔགས་ཀྱི་མཐར། ཨོཾ་བཛྲ་སཏྭ་ཧཱུཾ། ལྷ་ཐམས་ཅད་ཀྱི་ཐུགས་ཀར་པད་ཟླ་ལ་ཧཱུཾ་ལས་འོད་འཕྲོས། སངས་རྒྱས་བྱང་སེམས་འཕགས་པ་ཐམས་ཅད་ཀྱི་ཐུགས་ཀྱི་ཡེ་ཤེས་རྣམས་ཚུར་འདུས། ཧཱུཾ་ལ་ཐིམ་པ་ལས་རྡོ་རྗེ་ཧཱུཾ་གིས་མཚན་པར་གྱུར། དམ་ཚིག་གི་ཕྱག་རྒྱའོ། །སངས་རྒྱས་ཀུན་གྱི་ཐུགས་ཆེ་བ། །སངས་རྒྱས་ཀུན་གྱི་གསུང་ཡང་ཡིན། །སངས་རྒྱས་ཀུན་གྱི་སྐུ་ཆེ་བ། །སངས་རྒྱས་ཀུན་གྱི་ཐུགས་ལ་གནས། །གཙོ་བོ་ཆོས་ཀྱི་སྦྱིན་བདག་སྟེ། །ཕྱག་རྒྱ་བཞི་བའི་དོན་སྟོན་པའོ། །དེ་དག་ནི་ཕྱག་རྒྱ་བཞིའི་རྒྱས་བཏབ་བོ། །དབང་གི་ལྷ་རིགས་ལྔ་འཁོར་དང་བཅས་པ། ཨོཾ་བཛྲ་ས་མཱ་ཛཿ ཨོཾ་པུཥྤེ་ཧཱུཾ། སོགས་ཉེར་སྤྱོད་ཀྱིས་མཆོད། ཨོཾ་ཨ་བྷི་ཥིཉྩ་ཏུ་མཾ་སརྦ་ཏ་ཐཱ་ག་ཏ། ཞེས་གསོལ་བ་བཏབ་པས། ཨོཾ་པྲ་ཀྲི་ཏི་པ་རི་ཤུདྡྷ་སརྦ་དྷརྨ་ཡ་ཏུ་ཏ་སརྦ་ཏ་ཐཱ་ག་ཡ་ཛྙཱ་ན་ཀཱ་ཡ། མཉྫུ་ཤྲཱི་པ་རི་ཤུདྡྷི་ཏ་མུ་པ་ད་ཡ་ཏཱི་ཨ་ཨ། སརྦ་ཏ་ཐཱ་ག་ཏ་མུ་ཀུ་ཊ་ཨ་བྷི་ཥིཉྩ་མཾ། ཞེས་དབང་བསྐུར་བས། དེ་བཞིན་གཤེགས་པ་ལྔ་དང༌། སྐལ་བཟང་བཅུ་དྲུག་ལ་རིན་པོ་ཆེའི་ཅོད་པན་ནོ། །གཞན་རྣམས་ལ་རང་རིགས་ཀྱི་བདག་པོས་དབུ་བརྒྱན་པར་གྱུར། འདིར་ཡོ་ག་སྤྱིའི་ཆོག་སྒྲོས་སྦྱར་ནས་ལས་བཅོལ་བྱེད་པའི་སྲོལ་ཡོད་ཀྱང་མི་དགོས་ཏེ། རང་གཞུང་ལས་མ་བཤད་ཅིང༌། དེས་དོད་ཐུབ་གཞན་འཆད་འགྱུར་ལྟར་ཡོད་པས་སོ། །གཙོ་བོའི་ཐུགས་ཀའི་ཨ་ཡིག་ལས་འོད་ཟེར་འཕྲོས། ཤེས་རབ་འཁོར་ལོ་ནས། རྡོ་རྗེ་
ཆེན་པོའི་བར་གསལ་བར་བྱས། སེམས་ཅན་གྱི་དོན་བྱེད་པ་དང་དེ་བཞིན་གཤེགས་པ་རྣམས་མཆོད་པའི་བྱ་བ་བྱས་ཏེ། ཡང་སྙིང་གའི་ཨ་ཡིག་ལ་བསྡུ། དེ་ལྟར་སྤྲོ་བསྡུས་ཡང་ཡང་བྱེད་པ་ནི་ལས་ལ་སྦྱོར་བའི་དོད་དོ། །དེ་ནི་སྒྲུབ་ཐབས་ཀྱི་གཞུང་ལས། སྒྲ་ལས་འཕེལ་ཏེ་རྒྱད་བཤད་པ། །ཞེས་པའི་དོན་ཡིན་ཞིང༌། ཡེ་ཤེས་སྤྱན་འདྲེན་དང༌། ཕྱག་རྒྱ་བཞི་དང་དབང་བསྐུར་རྒྱས་གདབ་སོགས་དཀྱིལ་ཆོག་ལས་རྒྱས་ཤིང་གསལ་བར་འབྱུང་བ་ནི། སྒྲུབ་ཐབས་སུ། དེ་ནས་ལས་ཀྱི་ཁྱད་པར་ཡང༌། །བསྐྱེད་པའི་ཞར་ལས་འབྱུང་བ་སྟེ། །ཞེས་པས་ན་དོན་བསྟན་ཏོ། །དེ་ནས་དཀྱིལ་འཁོར་གྱི་ལྷ་ཚོགས་ལ་མཆོད་པ་ནི། ཆུ་དང་ཐང་ལས་སྐྱེས་པ་ཡི། །ལྷ་རྫས་དམ་པའི་མེ་ཏོག་འདི། །ཐུབ་དབང་སྲས་དང་བཅས་ལ་འབུལ། །བདག་དང་འགྲོ་ལ་ཐུགས་བརྩེའི་ཕྱིར། །ཅི་བདེ་བར་ནི་བཞེས་སུ་གསོལ། །ཨོཾ་ན་མཿསརྦ་ཏ་ཐཱ་ག་ཏ་བཛྲ་པུཥྤེ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུཾ། འོག་མ་རྣམས་ལའང་དེས་རིགས་འདྲེས་ཏེ། ནགས་ཚལ་བཅུད་ནི་ཡིད་འོང་བ། །ལྷ་རྫས་དམ་བའི་བདུག་སྤོས་ནི། །ཐུབ་དབང་སྲས་དང་བཅས་ལ་འབུལ། །བདག་དང་འགྲོ་ལ་ཐུགས་བརྩེའི་ཕྱིར། །ཅི་བདེ༴ བཛྲ་དྷུ་པེ་པཱུ་ཛ། སྣང་བའི་ཁྱད་པར་གང་ཡོད་པའི། །ལྷ་རྫས་དམ་པའི་མར་མེ་འདི། །ཐུབ་དབང་༴ བདག་དང་འགྲོ་ལ་ཐུགས་བརྩེའི་ཕྱིར། །ཅི་བདེ༴ ཨཱ་ལོ་ཀེ ། ཨ་ཀར་ཙནྡན་ལ་སོགས་ཆུ། །ལྷ་རྫས་དམ་པའི་དྲི་མཆོག་འདི། །ཐུབ་དབང་༴ བདག་དང་འགྲོ་ལ་ཐུགས་བརྩེའི་ཕྱིར། །ཅི་བདེ༴ གནྡྷེ། རོ་མཆོག་བརྒྱ་དང་ལྡན་པ་ཡི། །ལྷ་རྫས་དམ་པའི་ཟས་མཆོག་འདི། །ཐུབ་དབང་༴ བདག་དང་འགྲོ་ལ་ཐུགས་བརྩེའི་ཕྱིར། །ཅི་བདེ༴ ནེ་ཝེ་ཏེ། ཚངས་པའི་གསུང་ལྟར་སྙན་པ་ཡི། །ལྷ་རྫས་དམ་པའི་སིལ་སྙན་འདི། །ཐུབ་དབང་༴ བདག་དང་འགྲོ་ལ་ཐུགས་བརྩེའི་ཕྱིར། །ཅི་བདེ༴ བཛྲ་གཱི་ཏི་རཱ་ག་
ཤཔྟ་པཱུ་ཛ། དེང་ནས་རྩམས་ཏེ་རྫོགས་སངས་རྒྱས། །སྲས་དང་བཅས་པ་རྣམ་རོལ་ཞིང༌། །རྡོ་རྗེ་སྙེམས་མའི་རབ་སྦྱོར་གྱི། །དགའ་སྟོན་བདེ་བས་མཆོད་པར་བགྱི། །ཨོཾ་བཛྲ་ལཱ་སྱ་ཧཱུཾ། སྒེག་དང་བཅས་པའི་འཕྲེང་བ་འཕངས། །སངས་རྒྱས་ཐམས་ཅད་མཆོད་པར་བྱ། །དེ་ནི་བཅོམ་ལྡན་འབྲལ་མི་འགྱུར། །འཕྲེང་བ་དེ་ཡི་རྒྱན་ཡིན་ནོ། །ཨོཾ་བཛྲ་མཱ་ལེ་ཏྲཱཾ། ལུས་ཅན་ཀུན་ལ་དམ་ཆོས་ཀྱི། །གླུ་ནི་ཁྱོད་ཀྱིས་བླང་བར་བྱ། །དེས་ནི་བདེ་གཤེགས་དངོས་གྲུབ་ནི། །མྱུར་དུ་བདེ་བ་མྱོང་བར་འགྱུར། །ཨོཾ་བཛྲ་གཱི་ཏི་ཧྲཱིཿ དེ་ཉིད་ཐལ་མོའི་གར་གྱིས་ནི། །སངས་རྒྱས་ཐམས་ཅད་མཆོད་པར་བྱ། །སངས་རྒྱས་འདུལ་བའི་འཕྲིན་ལས་ཀྱིས། །གར་མཁན་ཚུལ་དུ་བསྒྱུར་བར་བགྱིས། །ཨོཾ་བཛྲ་ནྲྀ་ཏི་ཨ། རྫོགས་སངས་རྒྱས་ལ་སྤོས་ཕུལ་བས། །བརྟུལ་ཞུགས་བཟང་པོས་ལེགས་ཚིམ་གྱིས། །ལུས་ཅན་བདེ་གཤེགས་ཆ་ལུགས་སུ། །ཡེ་ཤེས་ཀྱིས་ནི་ཚིམ་པར་གྱིས། །ཨོཾ་བཛྲ་དྷུ་པེ་ཧཱུཾ། སངས་རྒྱས་རྣམས་ལ་མེ་ཏོག་གཏོར། །བྱང་ཆུབ་ཡན་ལག་ཚོགས་གྱུར་པ། །མཚན་དང་དཔེ་བྱད་ལྡན་པ་ཡི། །བདེ་གཤེགས་སྐུ་ནི་ཐོབ་པར་འགྱུར། །ཨོཾ་བཛྲ་པུཥྤེ་ཧཱུཾ། ཆོས་ཀྱི་མེ་ནི་ལེགས་སྦར་བར། །རྡོ་རྗེ་ཆོས་དང་འདྲ་བ་རུ། །སེམས་ཅན་མ་རིག་ལྡོངས་པ་ལ། །ཡེ་ཤེས་སྒྲོན་མེ་སྦར་བར་བགྱི། །ཨོཾ་བཛྲ་ཨཱ་ལོ་ཀེ་ཧཱུཾ། རྒྱལ་བ་རྣམས་ལ་དྲི་ཕུལ་བས། །ཚུལ་ཁྲིམས་ཏིང་འཛིན་ཤེས་རབ་དང༌། །རྣམ་གྲོལ་ཡེ་ཤེས་མཐོང་བ་ཡིས། །བྱང་ཆུབ་ལུས་ཅན་རྣམས་ལ་
བགོས། །ཨོཾ་བཛྲ་གནྡྷེ་ཨཱཿ དེ་ནས། ཁ་དོག་དབྱིབས་ལེགས་ཡིད་འོང་རྒྱན་འཕྲེང་ལྡན། །སོགས་འདོད་ཡོན་ལྔའི་མཆོད་པ་འབུལ་ཏེ། སྔགས་རྣམས་ཀྱང་རཱུ་པ་པཱུ་ཛ་མེ་གྷ་སོགས་གོང་མས་རིགས་འདྲེའོ། །སྤྲོས་པ་ཆུང་བ་ལ་མོས་པའམ། །བདག་ཉིད་ཐུན་བཞིའི་ཉམས་ལེན་སོགས་ཀྱི་སྐབས་སུ། སྤྱན་འདྲེན་བཞུགས་གསོལ་མཆོད་པའི་ཚིགས་བཅད་རྣམས་བོར་ཏེ། སྔགས་དང་ཕྱག་རྒྱ་ཙམ་གྱིས་ཀྱང་ཆོག་གོ །དེ་ནས་དྲིལ་ཐབས་དང་བཅས་ཏེ། མཆོག་སྦྱིན་རྡོ་རྗེ་སོགས་འདུད་ཉི་ཤུས་བསྟོད། ཨོཾ་སྠི་ཏོ་ཧྲི་དི་ཛྙཱ་ན་མུརྟི་ར་ཧཾ། བུདྡྷོ་བོ་དྷི་ནཾ་ཏྲྱ་དྷོ་བརྟི་ནཾ། ཞེས་པའི་སྔགས་ཀྱིས། རང་ཉིད་ལས་ཀྱི་འཇམ་དཔལ་སེར་པོ་གསལ་བ། གཞིའི་སངས་རྒྱས་བཅོམ་ལྡན་འདས་རྣམ་པར་སྣང་མཛད་གངས་ཅན་མཚོ་ལ་ཕྱག་བྱས་ཏེ་ཐུགས་ཀར་ཞུགས་པར་གྱུར། ཨོཾ་སྠི་ཏོ་སོགས་ཀྱིས། དང་པོའི་སངས་རྒྱས་ལ་ཕྱག་བྱས་ཏེ་དེའི་ཡང་ཐུགས་ཀར་ཞུགས་པར་གྱུར། ཨོཾ་སྠི་ཏོ་སོགས། ཤེས་རབ་ཀྱི་འཁོར་ལོ་ལ་ཕྱག་བྱས་ཏེ། འཁོར་ལོའི་ལྟེ་བར་ཕྱིན་པར་གྱུར། ཨོཾ་སྠི་ཏོ་སོགས། ཡེ་ཤེས་སེམས་དཔའ་ལ་ཕྱག་བྱས་ཏེ། དེའི་ཐུགས་ཀར་ཐིམ་ནས་ཐུགས་ཀའི་ཨ་ཡིག་དང་གཉིས་སུ་མེད་པར་གྱུར། དཀྱིལ་འཁོར་གྱི་འཁོར་ལོ་ཐམས་ཅད་སྒྱུ་མ་ལྟར་ཤེས་པར་བྱས་ལ་མཉམ་པར་བཞག་ཅིང༌། ཐིག་ལེའི་རྣལ་འབྱོར་ལ་སོགས་པའི་མན་ངག་རྣམས་ཀྱང་སྤྲོ་ན་སྐབས་འདིར་བསྒོམ་མོ། །དེ་ནས་བཟླས་པ་ནི། ལྷ་ཐམས་ཅད་དམ་གཙོ་བོ་ཁོ་ནའི་ཐུགས་ཀར་ཟླ་བ་ལ་ཨ་ཡིག་གི་མཐར། གང་བཟླ་བའི་སྔགས་ཀྱི་འཕྲེང་བས་སྐོར་བ་སྒོམ། སྤྲོ་བསྡུའི་རིམ་པ་གོང་དུ་བཤད་པ་རྣམས་ཀྱིས་རིགས་འདྲེས་ཏེ། བཟླས་པའི་དམིགས་པ་དང་ལྡན་པས་བཟླས་བརྗོད་བྱའོ། །ཨོཾ་སརྦ་
དྷརྨ་ཨ་བྷཱ་ཝ་སྭ་བྷཱ་ཝ་བི་ཤུདྡྷེ་བཛྲ་ཙཀྵུ་ཨ་ཨ་ཨཾ་ཨ། ཞེས་པ་ནི་ཡང་སྙིང་ངོ༌། །ཨ་ཨཱ་སརྦ་ཏ་ཐཱ་ག་ཏ་ཧྲི་ད་ཡ། ཧ་ར་ཧ་ར་ཨོཾ་ཧྲཱིཿབྷ་ག་ཝཱན་ཛྙཱ་ན་མུརྟི་ཝ་གཱི་ཤྭ་ར། མཧཱ་པ་ཙ་སརྦ་དྷརྨ་ག་ག་ཎ་ཨ་མ་ལ་སུ་པ་རི་ཤུདྡྷ་དྷརྨ་དྷཱ་ཏུ་ཛྙཱ་ན་གརྦྷ་ཨཱཿ ཞེས་པ་ནི་རྩ་བའི་སྔགས་སོ། །ཨོཾ་བཛྲ་ཏིཀྵྞ་དུ་ཁ་ཙྪེ་ད་པྲཛྙཱ་ཛྙཱ་ན་མུརྟ་ཡེ། ཛྙཱ་ན་ཀཱ་ཡ་ཝཱ་གི་ཤྭ་ར་ཨ་ར་པ་ཙ་ན་ཡ་ཏེ་ན་མཿ ཞེས་པ་ནི་རིགས་བསྡུས་པའི་སྙིང་པོའོ། །འཇམ་དཔལ་གྱི་སྙིང་པོ་ཡི་གེ་དྲུག་པ་གཞན་ཡང་བཟླར་རུང་ཞིང༌། མཚན་ཡང་དག་པར་བརྗོད་པ་ཉིད་འདོན་པའང་བཟླས་པའི་རྣམ་གྲངས་སུ་འགྱུར་རོ། །ཐུན་འཇོག་པ་ན། རྗེས་ཀྱི་བྱ་བ་ནི། དང་པོར། མཆོག་སྦྱིན་རྡོ་རྗེ་སོགས་ཀྱིས་བསྟོད། མཆོད་ཡོན་ཞབས་བསིལ་ཉེར་སྤྱོད་ལྔ་པོ་རྣམས་གོང་དུ་བཤད་པའི་སྔགས་དང་ཕྱག་རྒྱས་ཕུལ། རྡོ་རྗེ་སེམས་དཔའི་ཡིག་བརྒྱ་ལ་འདོན་པ་སྤོས་ཏེ། ཨོཾ་མཉྫུ་ཤྲཱི་ས་མ་ཡ། ཞེས་དང༌། མཉྫུ་ཤྲཱི་ཏྭེ་ནོ་ཞེས་དང༌། སརྦ་ཏ་ཐཱ་ག་ཏ་མཉྫུ་ཤྲཱི་མཱ་མེ་མུཉྩ་ཞེས་པ་རྣམས་སོ། །དེ་ལྟར་ལན་གསུམ་བཟླས་པས་བརྟན་པར་བྱས་ཏེ། ཡེ་ཤེས་སེམས་དཔའ་དང་ལྷན་ཅིག་བྱོན་པའི་མགྲོན་རྣམས་ལ་དམིགས་ནས། མ་འབྱོར་པ་དང་ཉམས་པ་དང༌། །སོགས་དང༌། ཨོཾ་ཁྱོད་ཀྱིས་སེམས་ཅན་དོན་ཀུན་མཛད། །སོགས་ཀྱི་མཐར། བཛྲ་མུཿ ཞེས་པས་གཤེགས་སུ་གསོལ། ཐུགས་ཀའི་ཨ་ལས་འོད་ཟེར་འཕྲོས། དཀྱིལ་འཁོར་ཐམས་ཅད་ཁྱབ་སྟེ། ཕྱི་མ་ཕྱི་མ་འོད་དུ་ཞུ་ནས་ནང་མ་ནང་མ་ལ་ཐིམ། སྐྱེ་མེད་ཨ་ཡིག་སྤྲོས་པ་ཐམས་ཅད་དང་བྲལ་བར་གྱུར། སླར་ཡང་དགེ་བའི་རྩ་བ་བྱང་ཆུབ་ཏུ་བསྔོ་བར་བྱའོ། །འདིར་ཕྱག་རྒྱ་དགྲོལ་བ་མི་དགོས་ཏེ། ལག་པའི་ཕྱག་རྒྱ་མ་བཅིངས་པའི་ཕྱིར་རོ། །བདག་བསྐྱེད་ཀྱི་ཡེ་ཤེས་པ་གཤེགས་སུ་གསོལ་པ་ཡང་མི་དགོས་ཏེ། རང་གཞུང་ལས་ཡེ་མ་བཤད་ཅིང༌།
དོན་གྱིས་ཐོབ་པ་ཡང་མིན་པའི་ཕྱིར་རོ། །འདི་ཡོ་གའི་ལུགས་ཡིན་པའི་ཕྱིར་དེ་དག་དགོས་སོ་སྙམ་ན། ཁྱབ་པར་ཡང་མ་ངེས་ལ། ལུགས་འདི་རྒྱུད་སྡེ་བཞིའི་ཟླས་ཕྱེ་བའི་རྣལ་འབྱོར་རྒྱུད་ཀྱི་ཆོ་གར་བྱས་པའང་མ་ཡིན་ནོ། །དེས་ན་འདི་རྣལ་འབྱོར་ཆེན་པོ་ཐབས་རྒྱུད་དུ་བཀྲལ་བའི་ལུགས་ཡིན་ཏེ། རྒྱུ་མཚན་རྒྱས་པར་བླ་མའི་ཞལ་ལས་རྟོགས་དགོས་ཤིང་ཅུང་ཟད་འོག་ཏུ་འཆད་པ་ལ་ལྟ་བར་བྱའོ། །འདི་ནི་བསྙེན་པ་རྒྱས་པ་ཡིན་ཞིང༌། བསྡུས་པ་ནི་དང་པོ་སྦྱོར་བ་ཙམ་ཡིན་ལ་འདི་རིགས་བསྡུས་ཡིན་ཞིང༌། རིགས་སོ་སོ་བ་ལ་ནི། མི་བསྐྱོད་པའི་ཐུགས་ཀར་དང་པོའི་སངས་རྒྱས། དེའི་ཐུགསས་ཀར་ཤེས་རབ་ཀྱི་འཁོར་ལོའི་རྩིབས་བརྒྱད་ལ། ཨོཾ་དུ་ཁ་ཚེ་ད་ཡ་ཏེ་ན་མཿ ལྟེ་བར་ཧཱུཾ་ལས་རྡོ་རྗེའི་རིགས་ཀྱི་འཇམ་དཔལ་སྔོན་པོ། གཡས་རལ་གྲི་དང་གཡོན་རྡོ་རྗེ་འཛིན་པའི་ཐུགས་ཀར་ཡང་ཧཱུཾ་སྔོན་པོའོ། །དེ་བཞིན་དུ། རིན་ཆེན་འབྱུང་ལྡན་གྱི་ཐུགས་ཀར་དང་པོའི་སངས་རྒྱས། དེའི་ཐུགས་ཀར་ཤེས་རབ་ཀྱི་འཁོར་ལོ་རྩིབས་བརྒྱད་པ་ལ། ཨོཾ་བཱ་གཱི་ཤྭ་ར་ཡ་ཏེ་ན་མཿ ལྟེ་བར་ཏྲཱཾ་ངམ་ཨཾ་ལས་རིན་ཆེན་རིགས་ཀྱི་འཇམ་དཔལ་གཡས་རལ་གྲི་དང་གཡོན་རིན་པོ་ཆེ་འཛིན་པའི་ཐུགས་ཀར་ཟླ་བ་ལ་ཏྲཱཾ་ངམ་ཨཾ་སེར་པོའོ། །འོད་དཔག་མེད་ཀྱི་ཐུགས་ཀར་ཡང་དང་པོའི་སངས་རྒྱས། དེའི་ཐུགས་ཀར་ཤེས་རབ་ཀྱི་འཁོར་ལོ་རྩིབས་བརྒྱད་པ། ཨོཾ་བཛྲ་ཏིཀྵྞ་ཡ་ཏེ་ན་མཿ ལྟེ་བར་ཧྲཱིཿལས་པདྨའི་རིགས་ཀྱི་འཇམ་དཔལ་དམར་པོ། གཡས་རལ་གྲི་དང་གཡོན་པདྨ་འཛིན་པའི་ཐུགས་ཀར་ཡང་ཟླ་བ་ལ་ཧྲཱིཿདམར་པོའོ། །དོན་ཡོད་གྲུབ་པའི་ཐུགས་ཀར་ཡང་ཤེས་རབ་ཀྱི་འཁོར་ལོ་རྩིབས་བརྒྱད་པ། ཨོཾ་ཛྙཱ་ན་ཀཱ་ཡ་ཡ་ཏེ་ན་མཿ ལྟེ་བར་ལས་ཀྱི་རིགས་ཀྱི་འཇམ་
དཔལ་ལྗང་ཁུ་གཡས་རལ་གྲི་དང་གཡོན་རྒྱ་གྲམ་འཛིན་པ། ཐུགས་ཀར་ཟླ་བ་ལ་གནས་པའི་ཨཱཿའོ། །རྣམ་སྣང་གི་ཐུགས་ཀར་ཡང་ཤེས་རབ་ཀྱི་འཁོར་ལོའི་རྩིབས་བརྒྱད་པ། ཨོཾ་པྲཛྙཱ་ཛྙཱ་ན་མུརྟ་ཡེ་ཡ་ཏེ་ན་མཿ ལྟེ་བར་ཨོཾ་ལས་འཇམ་དཔལ་དཀར་པོ་གཡས་རལ་གྲི་དང༌། གཡོན་འཁོར་ལོ་འཛིན་པ། ཐུགས་ཀར་ཡང་ཟླ་བའི་སྟེང་དུ་ཨོཾ་མོ། །སྲོག་ཆགས་ལྔ་ཅར་གྱིས་བཏེག་པའི་ཁྲི་གཅིག་གི་སྟེང་དུ། དར་གྱི་གློ་གདན་དང༌། པདྨ་ཉི་ཟླའི་གདན་ལ། ཨཿལས་བྱང་སེམས་རྡོ་རྗེ་དཀར་པོ། རྡོ་རྗེ་སེམས་དཔའ་སྤྱི་དང་འདྲ་བའི་ཐུགས་ཀར་དང་པོའི་སངས་རྒྱས། དེའི་ཐུགས་ཀར་ཤེས་རབ་ཀྱི་འཁོར་ལོ་རྩིབས་བརྒྱད་པ་ལ། ཨོཾ་ཨ་ར་པ་ཙ་ན་ཡ་ཏེ་ན་མཿ འཁོར་ལོའི་ལྟེ་བར་ཨ་ལས་བྱང་ཆུབ་སེམས་ཀྱི་འཇམ་དཔལ་དཀར་པོ། རལ་གྲི་དང་པོ་ཏི་འཛིན་པའི་ཐུགས་ཀར་ཡང་ཨཱཿདཀར་པོ་བསམ། དེ་ལྟར་དེ་རྣམས་ཐམས་ཅད་ལ་འཁོར་ལོའི་ཁ་དོག་ལྷའི་མདོག་དང་མཚུངས་ལ། མུ་ཁྱུད་ལ་སོགས་པ་གོང་དུ་བཤད་པ་དང་འདྲའོ། །འདི་རྣམས་གཙོ་བོ་གོ་འཕོ་བའི་ཚུལ་གྱི་སྒོམ་པ་སྟེ། རིགས་སོ་སོའི་སྒྲུབ་པ་པོས་ཉམས་སུ་བླང་བར་བྱ་བ་ཡིན་མོད་ཀྱི། དེ་དག་གི་ཆོ་གའི་ཁྱད་པར་མི་འདྲ་བ་རྣམས་དང༌། ལྷ་ཚོགས་ཀྱི་དབྱེ་བའི་ཁྱད་པར་རྣམས་ནི། ཡི་གེ་མང་བའི་ཕྱིར་འདིར་མ་བྲིས། གཞན་ཡང་ཁྲུས་ཀྱི་རྣལ་འབྱོར་དང༌། ཆུ་སྦྱིན་དང༌། མཎྜལ་དང༌། ཕྱག་དང༌། ཚ་ཚ་གདབ་པ་དང༌། སྐོོར་བ་དང༌། གཏོར་མ་དང༌། སྦྱིན་སྲེག་སྟེ། རྣལ་འབྱོར་གྱི་ཡན་ལག་བརྒྱད་པོ་རྣམས་ལའང་ནན་ཏན་དུ་བསྒྲུབ་པར་བྱའོ། །ཡང་སྒྲུབ་ཐབས་ཀྱི་གཞུང་ལས་སྒོ་ཕྲག་གཉིས་མ་དང༌། དཀྱིལ་ཆོག་ལས་མཚན་གྱི་ལྷ་རྣམས་བཀོད་པའི་སྒོ་ཕྲག་གསུམ་མ་ཡང་གསུངས་ཤིང༌། དམིགས་པ་མདོར་བསྡུས་ལ་དགའ་བས་ནི། དཀྱིལ་འཁོར་སྒོ་རྐྱང་ཡང་རུང་ངོ་ཞེས་ཤེས་པར་བྱའོ། །
གཉིས་པ་དཀྱིལ་འཁོར་གྱི་ཆོ་ག་ལ། སའི་ཆོ་ག །སྟ་གོན་གྱི་ཆོ་ག །དངོས་གཞིའི་ཆོ་ག་སྟེ་གསུམ་མོ། །དང་པོ་ནི། འོག་ཏུ་དགོས་པའི་ཡོ་བྱད་རྣམས་ཚང་བར་བྱས། སྔོན་འགྲོ་གཏོར་མ་དང༌། གནས་ཡོ་བྱིན་རླབས། རྒྱུད་སྡེ་འོག་མ་རྣམས་དང་ཐུན་མོང་གི་ཆོ་ག་སྤྱིའི་ལུགས་དང་མཐུན་པར་བཏང༌། ཨོཾ་པྲ་ཀྲི་ཏེ་པ་རི་ཤུདྡྷ་ནས། ཧཱུཾ་གི་སྒྲ་དྲག་པོ་སྒྲོག་པའོ། །ཡ་མཱནྟ་ཀའི་སྔགས་བཟླ་ཞིང༌། བསང་ཆུས་ཕྱོགས་ཐམས་ཅད་དུ་གཏོར་བར་བྱའོ། །དེ་ནི་མི་ཤིས་པ་དང་མི་མཐུན་པའི་ཕྱོགས་ཐམས་ཅད་སྤྱིར་བསང་བ་ཡིན་ཏེ། ས་ཆོག་གི་སྔོན་འགྲོའོ། །ཨོཾ་སྭ་བྷཱ་ཝས་སྟོང་པར་སྦྱངས། ཚོམ་བུའི་སྟེང་དུ་བཾ་ལས་སའི་ལྷ་མོ་སེར་མོ་ཞི་བ་ཕྱག་གཉིས་ཀྱིས་གསེར་གྱི་བུམ་པ་འཛིན་པ་རྒྱན་ཐམས་ཅད་ཀྱིས་བརྒྱན་པར་གྱུར། རང་གི་སྙིང་གའི་ས་བོན་ལས་འོད་ཟེར་འཕྲཽས། ས་འོག་ནས་སའི་ལྷ་མོ་འཁོར་དང་བཅས་པ་བཛྲ་ས་མཱ་ཛཿ ཛཿཧཱུཾ་བཾ་ཧོཿ གཉིས་སུ་མེད་པར་ཐིམ། ཨོཾ་བཛྲ་རཏྣ་མུ་ཀུ་ཊ་ཨ་བྷི་ཥིཉྩ་མཾ། རིན་པོ་ཆེའི་ཅོད་པན་གྱིས་དབང་བསྐུར་བར་གྱུར། ཨོཾ་པྲི་ཐི་བཱི་དེ་བཱི་བཛྲ་ཨརྒྷཾ་སྭཱཧཱ། དེ་བཞིན་དུ་སྦྱར་ནས། བཛྲ་པུཥྤེ་ཧཱུཾ་ནས། ཤཔྟ་ཧཱུཾ་གི་བར་གྱིས་མཆོད། གཏོར་མ་འབུལ་ན། ན་མཿསརྦ་ཏ་ཐཱ་ག་ཏ་བྷྱོཿ སོགས་ནམ་མཁའ་མཛོད་ཀྱི་སྔགས་རྒྱས་ཕུལ། སྐྱོབ་པ་སངས་རྒྱས་ཐམས་ཅད་ཀྱི། །སྤྱོད་པའི་ཚུལ་དང་ཁྱད་པར་དང༌། །ས་དང་ཕ་རོལ་ཕྱིན་པ་ལ། །ལྷ་མོ་ཁྱོད་ནི་དཔང་དུ་གྱུར། །ཤཱཀྱ་སེང་གེ་སྐྱོབ་པ་ཡིས། །ཇི་ལྟར་བདུད་ཀྱི་སྡེ་བཅོམ་པ། །དེ་བཞིན་བདག་གིས་བདུད་སྡེ་ལས། །རྒྱལ་བར་བྱས་ནས་དཀྱིལ་འཁོར་འབྲི། །ལན་གསུམ། ཕྱོགས་འདིར་དཀྱིལ་འཁོར་གྱི་ལས་ཅི་བདེ་བར་གྱིས་ཤིག །
ཅེས་གནང་བ་སྦྱིན། ཨོཾ་བཛྲ་ཨུཏྣིཥྛ་སའི་ལྷ་མོ་ནམ་མཁར་བཞུགས་པར་གྱུར། དེ་ནི་ས་བླང་པའོ། །དེ་ནས་དྲག་པོ་དང༌། ཞི་བའི་སྦྱིན་སྲེག་དང༌། རྐོང་སྦྱངས་བྱ་བ་སོགས་ཀྱང་བར་འདིར་བཤད་དོ། །དེ་ནི་ས་སྦྱང་བའོ། །འོན་ཀྱང་ད་ལྟར་ལག་ལེན་དེ་དག་མི་བྱེད་དེ། མེད་ཀྱང་ཆོག་གོ །སྤོས་ཀྱི་ཆུ་དང་ཡུངས་ཀར་སོགས་ཀྱིས་ས་ལ་གཏོར། ཨ་ཨ་སོགས་རྩ་བའི་སྔགས་བཟླས། ལག་མཐིལ་ས་ལ་མཉམ་པར་རེག་སྟེ། ཨོཾ་མཉྫུ་ཤྲཱི་ས་མ་ཡ་སོགས་ལན་གསུམ་བཟླས་ཏེ་ས་བཟུང་བའོ། །དེ་ནས་སློབ་དཔོན་དཀྱིལ་འཁོར་གྱི་ས་གཞིའི་དབུས་སུ་འདུག་སྟེ། སྐྱབས་འགྲོ་ནས་རྩམས་བཟླས་པའི་བར་དང༌། བསྟོད་མཆོད་ཡིག་བརྒྱ་རྣམས་གོང་བསྙེན་པའི་སྐབས་སུ་བཤད་པ་བཞིན་བྱ་ལ། དཀྱིལ་འཁོར་གྱི་འཁོར་ལོ་རང་གི་སྙིང་གར་སྐད་ཅིག་གིས་བསྡུ། ཁཾ་དཀྱིལ་འཁོར་གྱི་ས་གཞི་སྟོང་པའི་རང་བཞིན་དུ་གྱུར། ཧཱུཾ་ཧཱུཾ་ལས་ས་གཞི་རྡོ་རྗེའི་རང་བཞིན་དུ་གྱུར། དེང་དུ་བདག་ཚེ་འབྲས་བུ་ཡོད། །བདག་གི་གསོན་པའང་འབྲས་བུར་བཅས། །དམ་ཚིག་ལྷ་རྣམས་དང་མཉམ་པར། །འགྱུར་བར་བདག་ཉིད་ཐེ་ཚོམ་མེད། །བྱང་ཆུབ་སེམས་དང་སེམས་གཅིག་པར། །མི་ཟློག་པར་ནི་བདག་གྱུར་ཏེ། །དེ་བཞིན་གཤེགས་པའི་རིགས་སུ་ནི། །དེང་བདག་སྐྱེ་བར་ཐེ་ཚོམ་མེད། །དེང་བདག་ཉི་མ་དམ་པ་སྟེ། །སངས་རྒྱས་ཐམས་ཅད་སྤྱན་འདྲེན་པས། །བདག་གི་མཆོད་སྦྱིན་བླ་ན་མེད། །དེང་བདག་འདུས་པའི་མཆོག་ཡིན་ནོ། །ཞེས་བརྗོད་དེ། ས་གཞི་བྱིན་གྱིས་རླབ་པའོ། །དེ་ནས་བདུག་སྤོས་ཐོགས་ཏེ་དྲིལ་གསིལ་དང་བཅས་པས། མ་ལུས་ཕྱོགས་ན་བཞུགས་པ་ཡི། །སངས་རྒྱས་ཐམས་ཅད་དགོངས་སུ་གསོལ། །
བདག་མིང་འདི་ཞེས་བགྱི་བ་ཡིས། །འཇམ་དཔའི་དབྱངས་ཀྱི་དཀྱིལ་འཁོར་འབྲི། །སངས་རྒྱས་ལ་སོགས་ཀུན་འབྱོན་འཚལ། །དངོས་གྲུབ་འདིར་ནི་སྩལ་དུ་གསོལ། །ཅེས་པ་ནི་དབང་པོ་སྤྱན་འདྲེན་པའོ། །ཨ་ཨཱ་སོགས་རྩ་སྔགས་ཅི་རིགས་པར་བཟླས་ཏེ། རང་ཉིད་ལྷའི་ང་རྒྱལ་བརྟན་པོར་སྐྱེད་པ་ནི། གོ་ཆ་བྱིན་གྱིས་རླབ་པའོ། །སློབ་མ་ཕྱག་ན་རྡོ་རྗེ་ཞི་བ་སྔོན་པོ་རྡོ་རྗེ་དང་དྲིལ་བུ་འཛིན་པའི་སྐུར་གྱུར། སངས་རྒྱས་ཀུན་གྱི་དཀྱིལ་འཁོར་ཆེ། །སྤྲུལ་པའི་འཁོར་ལོ་སྣ་ཚོགས་འཆང༌། །སེམས་ཅན་ཀུན་ལ་ཕན་པའི་ཕྱིར། །དཀྱིལ་འཁོར་ཆེན་པོར་བཤད་དུ་གསོལ། །དེ་བཞིན་གཤེགས་པ་ཀུན་ཞི་བ། །དེ་བཞིན་གཤེགས་པ་ཀུན་གྱི་གནས། །སྒྱུ་འཕྲུལ་དྲྭ་བ་ལས་བྱུང་བའི། །དཀྱིལ་འཁོར་དམ་པ་བཤད་དུ་གསོལ། །རྒྱུད་ཆེན་སྒྱུ་འཕྲུལ་དྲྭ་བ་ལས། །རྡོ་རྗེ་འཆང་ཆེན་གསང་སྔགས་འཆང༌། །དཔག་མེད་རྣམས་ཀྱིས་དགའ་བཞིན་དུ། །དཀྱིལ་འཁོར་གཙོ་བོ་བཤད་དུ་གསོལ། །ཅེས་པ་ནི་སློབ་མས་གསོལ་བ་བཏབ་པའོ། །འདིར་དཔེ་འགའ་ཞིག་ལས། ཞི་བའི་ཆོས་ནི་མཆོག་ལས་བྱུང༌། །ཞེས་སོགས་བྲིས་པ་ནི། རང་བཟོ་མཁན་གྱིས་བཅུག་པའོ། །དེ་ནས། ཨོཾ་སརྦ་ཏ་ཐཱ་ག་ཏ་པཱ་ད་བནྡྷ་ནཾ་ཀ་རོ་མི། རང་ཉིད་ཁྲོ་བོ་གཤིན་རྗེ་གཤེད་ཀྱི་སྐུར་གྱུར། མིག་གཉིས་སུ་མ་དང་ཊ་ལས་ཉི་མ་དང་ཟླ་བ་ཧཱུཾ་གིས་མཚན་པ། རྐང་མཐིལ་གཉིས་སུ་ཧཱུཾ་ལས་རྡོ་རྗེ་རྒྱ་གྲམ་འོད་འབར་བ། དབུས་ནས་དབང་ལྡན་དུ་སོང་ཞིང༌། དེ་ནས་གཡས་སྐོར་དུ་གཡས་བརྐྱང་གཡོན་བརྐྱང་གི་འགྲོས་ཀྱིས་བཅགས་ཤིང༌། ང་ནི་རང་ཉིད་རྡོ་རྗེ་ཅན། །འཇམ་པའི་རྡོ་རྗེ་རང་ཉིད། །ང་ནི་སངས་རྒྱས་རྒྱལ་པོ་ཆེ། །སྟོབས་
ཆེན་སངས་རྒྱས་ཀུན་བདག་ཉིད། །བདག་པོ་ཆེན་པོ་རྡོ་རྗེའི་བདག །བྱིན་གྱིས་རླབས་པ་མི་འདོར་རོ། །དཀྱིལ་འཁོར་ཆེན་པོའི་ས་གཞི་ལ་གནས་པའི། །ལྷ་ལ་སོགས་པ་བགེགས་ཚོགས་ཀུན་ཉོན་ཅིག །གནས་འདིར་འཇམ་དཔལ་ཕོ་བྲང་དཀྱིལ་འཁོར་འབྲི། །བགེགས་ཀྱི་རིགས་ཚོགས་གང་ཡིན་བྱེར་བར་གྱིས། །ཞེས་བརྗོད་ཅིང༌། གཤིན་རྗེ་གཤེད་དང་བདུད་རྩི་འཁྱིལ་པའི་སྔགས་དྲག་ཏུ་བཟླས། རོལ་མོའི་སྒྲ་བྱའོ། །རྒྱས་པར་སྤྲོ་ན་དེང་སང་ཕྱོགས་ནམ་མཁར་ལྟར་ཞེས་སོགས་ཚིག་ལྷུག་པའི་བཀའ་སྒོ་ཡང་བྱ། ཤར་དུ་གཡས་བརྐྱང༌། ལྷོར་གཡོན་བརྐྱང༌། ནུབ་ཏུ་ཟླུམ་པོ། བྱང་དུ་ས་གའི་སྟང་སྟབས་རྣམས་ཀྱིས་ཀྱང་བགེགས་བསྐྲད་དོ། །བསྡུ་ན་བཀའ་བསྒོ་ཙམ་གྱིས་ཀྱང་ཆོག་སྟེ། དེ་དག་ནི་བགེགས་གཞོམ་པའི་བྱ་བའོ། །དེ་ནས་ཕུར་བུ། སྭ་བྷཱ་ཝས་སྟོང་བར་སྦྱངས། སྟོང་པའི་ངང་ལས་ཧཱུཾ་ལས་བྱུང་བའི་ཕུར་བུ་ཁྲོ་བོ་བདུད་རྩི་འཁྱིལ་བ། རྡོ་རྗེ་དང་སྡིགས་མཛུབ་མཛད་པ། ཨུཏྤལ་སྔོན་པོའི་མདོག་ཅན། ལྟེ་བ་མན་ཆད་ཕུར་བའི་དབྱིབས་སུ་གནས་པར་གྱུར། ཨོཾ་བཛྲ་ཀཱི་ལི་ཀཱི་ལ་ཡ་སརྦ་བིགྷྣཱན་བནྡྷ་ཧཱུཾ་ཕཊ། མང་དུ་བཟླས། ཧཱུཾ་ལས་བྱུང་པའི་རྡོ་རྗེ་ཐོ་བར་གྱུར། སྙིང་ཁ་ནས་འོད་ཟེར་འཕྲོས་བགེགས་ཐམས་ཅད་བཀུག་སྟེ། མཚམས་བཞི་དང་དབུས་སུ་དྲག་པོ་འབྲུབ་ཁུང་གི་ནང་དུ་བཅུག །ཕུར་བུས་བཏབ་ཅིང་ཐོ་པས་བརྡུངས་པར་གྱུར། ཨོཾ་གྷ་གྷ་གྷ་ཏ་ཡ་གྷ་ཏ་ཡ། སརྦ་དུཥྟཾ་ཕཊ། ཀཱི་ལ་ཡ་ཀཱི་ལ་ཡ་སརྦ་པཱ་པཾ་ཕཊ། ཧཱུཾ་ཧཱུཾ་ཧཱུཾ་བཛྲ་ཀཱི་ལ་བཛྲ་དྷ་རོ་ཨཱཛྙཱ་པ་ཡ་ཏི་སརྦ་བིགྷྣཱན་ཀཱ་ཡ་བཀ་ཙིཏྟ་བཛྲ་ཀཱི་ལ་ཡ་ཧཱུཾ་ཕཊ། དབུས་དང་གྲྭ་བཞིར་གདབ་བོ། །དཀྱིལ་འཁོར་གྱི་ས་གཞིའི་དབུས་སུ་ཧཱུཾ་ཡིག་དང༌། དེ་ལས་
འོད་ཟེར་འཕྲོས། འོག་ཐམས་ཅན་རྡོ་རྗེའི་ས་གཞི། ཕྱོགས་མཚམས་ཐམས་ཅད་རྭ་བ་དང་དྲ་བ་སྟེང་ཐམས་ཅད་གུར་དང་བླ་རེ། ཕྱི་རོལ་འབར་བའི་ཕྲེང་བས་སྐོར་བར་གྱུར། ཨོཾ་བཛྲ་རཀྵ་རཀྵ་ཧཱུཾ། ཡང་རང་གི་ཐུགས་ཀ་ནས་འོད་ཟེར་འཕྲོས། ནམ་མཁར་གནས་པའི་སའི་ལྷ་མོ་བཀུག་སྟེ། ས་གཞིའི་སྟེང་དུ་གནས་པར་གྱུར། གོང་བཞིན་མཆོད་ཡོན་ལ་སོགས་པས་མཆོད། ཆོས་ཀྱི་དབྱིངས་དང་དབྱེར་མེད་ལྷ་མོ་ནི། །རྣམ་དག་ས་གཞི་སངས་རྒྱས་སྤྱན་མའི་ངང༌། །བདུད་འཇོམས་སྒྲུབ་ལ་དངོས་གྲུབ་མཆོག་སྩོལ་བའི། །ས་ཡི་ལྷ་མོ་འཁོར་བཅས་བསྟོད་པར་བགྱི། །སའི་ལྷ་མོ་འཁོར་བཅས་དཀྱིལ་འཁོར་གྱིས་ས་གཞི་ལ་ཐིམ། དེ་དག་ནི་ས་སྲུང་བའོ། །དེ་ལྟར་ན་ས་ཆོག་གི་སྐོར་འདི་རྣམས། གང་དག་ལུགས་འདི་ཉིད་ཀྱི་གཞུང་སྲོང་བ་དག་ཡོད་ན་དེ་དག་ལ་དགོངས་པར་མཐོང་ནས། རང་གཞུང་ཇི་ལྟ་བ་བཞིན་དུ་བཀོད་པ་ཡིན་ལ། ཆོས་ཚུལ་འདི་ཞར་བྱུང་དུ་བྱེད་པ་རྣམས་ཀྱིས་ནི། གསང་བ་སྤྱིའི་ཆོ་ག་ལྟར་བྱས་ཀྱང་འགལ་བ་མེད་དོ། །གཉིས་པ་ལྷག་གནས་ལ། ལྷ་ལྷག་པར་གནས་པ་ནི། སྐྱ་ཐིག་ཙམ་བཏབ་ལ། ལྷ་རྣམས་ཀྱི་གནས་སུ་དྲི་བཟང་གི་ཐིག་ལེ་བཀོད། མཐའ་མཆོད་པས་སྐོར། ཡ་མཱན་ཏ་ཀས་བསངས། ཨོཾ་པྲ་ཀྲི་ཏེ་པ་རི་ཤུདྡྷ་སརྦ་དྷརྨ་པྲ་ཀྲི་ཏེ་པ་རི་ཤུདྡྷོ྅ཧཾ། ཨོཾ་སྭ་བྷཱ་ཝ་ཤུདྡྷ་སརྦ་དྷརྨ་སྭ་བྷཱ་ཝ་ཤུདྡྷོ྅ཧཾ། སྟོང་པའི་ངང་ལས་ཧཱུཾ་ཡིག་ལས་སྲུང་འཁོར་ཡངས་ཤིང་རྒྱ་ཆེ་བ། དེའི་ནང་དུ་ཨ་ལས་སྣ་ཚོགས་རྡོ་རྗེའི་ལྟེ་བར་བྷྲུཾ་ལས་ཐར་པ་ཆེན་པོའི་གཞལ་མེད་ཁང༌། ཞེས་པ་ནས། གདན་རེ་རེ་གྲུབ་པར་གྱུར། དབུས་ཀྱི་གདན་གྱི་སྟེང་དུ་རྣམ་
སྣང་ཆེན་པོ་དང༌། དང་པོའི་སངས་རྒྱས་དང༌། ཡེ་ཤེས་སེམས་དཔའ་དབྱེར་མེད་པ། བཅོམ་ལྡན་འདས་འཇམ་དཔལ་ཞལ་དྲུག་པ་ཞེས་པ་ནས། དཔག་ཏུ་མེད་པས་བལྟམས་པའོ། །འཁོར་ལོའི་རྩིབས་བརྒྱད་ལ་ཤར་དུ་མི་བསྐྱོད་པ་སྔོན་པོ་ཞེས་པ་ནས། ཁུ་ཚུར་དཀུར་བརྟེན་པའོ། །ཞེས་བའི་བར་མངོན་རྟོགས་བཞིན་ལས། ཨ་ཨཱ་སོགས་རྩ་སྔགས་ཀྱིས་ལྷ་འགོད་པ་མི་དགོས། མཆོད་རྫས་རྣམས། ཨོཾ་བཛྲ་ཡཀྵ་ཧཱུཾ་ཕཊ་ཀྱིས་བསང་བ་ནས། ཨོཾ་བཛྲ་ཏིཥྛ་ཧཱུཾ་ཕཊ་ཀྱི་བར་དང༌། ཨོཾ་བཛྲ་ཨང་ཀུ་ཤ་ཛཿནས། ས་མ་ཡ་སྟྭཾ་ཨཱ་ཧཾ། ཆུ་དང་ཐང་ལས་སྐྱེས་པ་ཡི། །ཞེས་པ་ནས། འདུད་ཉི་ཤུས་བསྟོད་པའི་བར་ཡང་བདག་བསྐྱེད་བཞིན་ནོ། །དེ་ནས་སྤོས་དང་བཅས་པའི་རྡོར་དྲིལ་འཛིན་པས། འཇམ་དཔལ་དཔའ་བོ་རྡོ་རྗེ་ཆེ། །རིགས་སྔགས་རྒྱལ་ལ་ཕྱག་འཚལ་ལོ། །དཀྱིལ་འཁོར་ཐུགས་རྗེའི་བདག་ཉིད་ཅན། །སོགས་སྤྱི་དང་འདྲ་བ་ལས། འཇམ་དཔལ་རྡོ་རྗེའི་དཀྱིལ་འཁོར་ནི། །འགྲོ་བ་སྦྱང་ཕྱིར་བྲི་བར་བྱ། །ཞེས་འདོན་པ་སྤོས་ཏེ། སྙན་གསན་དབབ་པ་ལན་གསུམ་བྱ། བར་འདིར་དཀྱིལ་འཁོར་ཁང་བའི་ཕྱི་རོལ་ཏུ་སོང་ནས་འཇིག་རྟེན་པའི་གཏོར་མ་ཆེན་མོ་གཏོང་ངོ༌། །དེ་ནས་བུམ་བ་ལྷག་གནས་ནི། བསྡུས་པའི་དབང་དུ་བྱས་ནས་བུམ་པ་གཉིས་བཤམ། རྣམ་རྒྱལ་བུམ་པ་ལ་རིགས་དྲུག་གི་མཚན་མ་དང༌། ལས་བུམ་ལ་སྣ་ཚོགས་རྡོ་རྗེ་འབྲི། བུམ་པ་འཆའ་ཚུལ་སྤྱི་དང་འདྲ། ཡང༌། ཡཀྵས་བསངས། སྭ་བྷཱ་ཝས་སྦྱངས། སྟོང་པའི་ངང་ལས་པཾ་ལས་པདྨ་དང༌། ཨ་ལས་ཟླ་བའི་སྟེང་དུ། བཾ་ལས་རིན་པོ་ཆེའི་བུམ་པ་མཚན་ཉིད་ཐམས་ཅད་ཡོངས་སུ་རྫོགས་པ། ནང་ལྷ་རྫས་ཀྱི་ཆུ་བོས་ཡོངས་སུ་གང་བ་
ལྷ་སོ་སོའི་གདན་དང་བཅས་པ་ཡོངས་སུ་རྫོགས་པ་གྲུབ་པར་གྱུར། དབུས་ཀྱི་གདན་གྱི་སྟེང་དུ། རྣམ་སྣང་ཆེན་པོ་དང༌། དང་པོའི་སངས་རྒྱས་དང༌། ཡེ་ཤེས་སེམས་དཔའ་དབྱེར་མེད་པ། བཅོམ་ལྡན་འདས་འཇམ་དཔལ་ཞལ་དྲུག་པ། ཞེས་པ་ནས་གཏམས་པའོ། །ཤར་དུ་མི་བསྐྱོད་པ་སྔོན་པོ་ནས། ལྗང་ཁུ་སྣ་ཚོགས་རྡོ་རྗེ་འཛིན་པ། དེའི་ཕྱི་རོལ་ཤར་དུ་རྡོ་རྗེ་སེམས་དཔའ་ནས། སྔོན་པོའོ། །ལྷོ་ཕྱོགས་སུ་རྡོ་རྗེ་རིན་ཆེན་ནས། སེར་པོའོ། །ནུབ་ཕྱོགས་སུ་རྡོ་རྗེ་ཆོས་ནས། དམར་པོའོ། །བྱང་ཕྱོགས་སུ་རྡོ་རྗེ་ལས་ནས། ལྗང་ཁུའོ། །ཤར་ལྷོར་སྒེག་མོ་ནས། གར་སྒྱུར་བ། དེའི་ཕྱི་རིམ་ལ་ཤར་ལྷོར་བདུག་སྤོས་མ་ནས། དུང་ཆོས་འཛིན་པ། ཤར་དུ་བྱམས་པ་སྤོས་ཀྱི་གླང་པོ་ནས། བྱང་གི་ཕྱོགས་ཀྱི་ལྷ་སྣམ་ལའོའི་བར་ལ། ལྷ་སྣམ་ཞེས་པ། གནས་ལའོ། །ཞེས་འདོན་པ་སྒྱུར་བ་དང༌། དེའི་ཕྱིར་རོལ་ཤར་དུ་རྡོ་རྗེ་ལྕགས་ཀྱུ་ནས། ཁུ་ཚུར་བཀུར་བརྟེན་པའོ། །ལས་བུམ་གྱི་ནང་དུ་པད་ཉིའི་སྟེང་དུ་ཧཱུཾ་ལས་འཇམ་དཔལ་གཤིན་རྗེ་གཤེད་ནས། སྒྲ་དྲག་པོ་སྒྲོག་པའོ། །ཨོཾ་བཛྲ་ཡཀྵས་བསངས་པ་ནས། ཤཔྟ་ཧཱུཾ་གི་བར། ཨོཾ་བཛྲ་ས་མཱ་ཛཿ ནས། སྤྱན་དྲངས་པར་གྱུར། ཛཿཧཱུཾ་བཾ་ཧོཿ གཉིས་སུ་མེད་པར་ཐིམ། ཨོཾ་ན་མཿསརྦ་ཏ་ཐཱ་ག་ཏ་བཛྲ་ཨརྒྷཾ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུཾ། དེ་བཞིན་དུ། ཤཔྟའི་བར་དུ་སྦྱར་ཏེ་མཆོད། འདུད་ཉི་ཤུས་བསྟོད། གཤིན་རྗེ་གཤེད་པོ་བགེགས་ཀྱི་རྒྱལ། །སྐུ་མདོག་མཐིང་ནག་འཇིགས་ལ་དཔའ། །དཔའ་བོ་བདུད་དགྲ་བདུད་འདུལ་བ། །བགེགས་
ཚོགས་འདུལ་ལ་ཕྱག་འཚལ་བསྟོད། །གཟུངས་ཐག་ནས་བཟུང་སྟེ། རྩ་སྔགས་ཅི་འགྲུབ་ཏུ་བཟླ། ལས་བུམ་ལ། ཨོཾ་ཡ་མཱནྟ་ཀ་ཧཱུཾ་ཕཊ། བརྒྱ་རྩ་སོགས་བཟླས། ཐུན་མོང་དུ། ཨཱ་བྷི་ཥེ་ཀ་བཟླས་པའི་མཐར། འཇམ་དཔལ་གྱི་ཡི་གེ་བརྒྱ་པ་བདུན་ལ་སོགས་པ་ཇི་ལྟར་འོས་པ་བརྗོད་ནས། རྣམ་རྒྱལ་བུམ་པ་ལ་མཆོད་ཡོན་ཕུལ་ཏེ། ཨོཾ་ཨརྒྷཾ་པཱུ་ཛ་མེ་གྷ་ས་མུ་དྲ་ས་མ་ཡེ་ཧཱུཾ། ལྷ་རྣམས་ཡེ་ཤེས་ཀྱི་བདུད་རྩིའི་ངོ་བོར་ཞུ་བར་གྱུར། ལས་བུམ་ལ་ཡང་སྔགས་དེས་ཕུལ་ནས། ཇི་སྲིད་དཀྱིལ་འཁོར་གྱི་བྱ་བ་མཐར་མ་ཕྱིན་གྱི་བར་དུ་བགེགས་ཐམས་ཅད་བཟློག་ཅིང༌། ལས་ཐམས་ཅད་སྒྲུབ་པའི་འཕྲིན་ལས་མཛད་དུ་གསོལ། ཅེས་བརྗོད། དེ་ནས་གཞུང་ལས་སྐབས་འདིར་སློབ་མ་ལྷག་གནས་བཤད་པ་ཡིན་ཏེ། འོག་ཏུ་འབྱུང་བར་འགྱུར་རོ། །དཀྱིལ་འཁོར་ཞག་གི་བྱ་བ་ནི། མཆོད་པ་ཚར་གཅིག་བཤམས། གོང་བཞིན་བྱིན་གྱིས་བརླབས་ཏེ། ཨརྒྷཾ་ནས་ཤཔྟའི་བར་སྔགས་དང་ཕྱག་རྒྱ་ཙམ་གྱིས་མཆོད་པ་ཕུལ། འདུད་བསྟོད་བྱ། འཇམ་དཔལ་གྱི་ཡིག་བརྒྱ་ལན་གསུམ། འཇམ་དཔལ་རྡོ་རྗེ་དབྱིངས་ཀྱི་དཀྱིལ་འཁོར་གྱི་ལྷ་ཚོགས་རྣམས་ནི་སྤྱན་དྲངས་པའི་ཚེ་འདིར་བྱོན་ཏེ། དཀྱིལ་འཁོར་བྱིན་གྱིས་བརླབས་པ་དང༌། བདག་དང་སློབ་མར་བཅས་པ་ལ་དངོས་གྲུབ་མ་ལུས་པ་སྩལ་དུ་གསོལ། ཨོཾ་བཛྲ་རཀྵ་རཀྵ་ཧཱུཾ། ཐིག་སྐུད། ཡ་མཱན་ཏ་ཀའི་སྔགས་ཀྱིས་བསངས། སྭ་བྷཱ་ཝས་སྦྱངས། སྟོང་པའི་ངང་ལས། ཐིག་སྐུད་སྔོན་པོ་ལ་ཧཱུཾ། སེར་པོ་ལ་ཏྲཱཾ། དམར་པོ་ལ་ཧྲཱིཿ ལྗང་ཁུ་ལ་ཨཱཿ དཀར་པོ་ལ་ཨཾ་རྣམས་ཀྱིས་མཚན་པ། ཡིག་འབྲུ་རྣམས་དེ་བཞིན་གཤེགས་པ་རིགས་ལྔའི་རང་བཞིན་ནོ། །རང་གི་སྙིང་ག་ནས་འོད་ཟེར་འཕྲོས། ནམ་
མཁར་བཞུགས་པའི་སྟ་གོན་གྱི་ལྷ་རིགས་ལྔའི་ཐུགས་ཀ་ནས། ཡིག་འབྲུ་ལྔའི་ཚོགས་དང་ཕྱོགས་བཅུའི་སངས་རྒྱས་ཐམས་ཅད་ཀྱང་ཡིག་འབྲུ་ལྔའི་རྣམ་པར་སྤྱན་དྲངས། ཐིག་སྐུད་ཀྱི་ཡིག་འབྲུ་ལྔ་ལ་གཉིས་སུ་མེད་པར་ཐིམ། ཧཱུཾ་ཏྲཱཾ་ཧྲཱིཿཨཱ་ཨཾ། ཞེས་མང་དུ་བཟླས་ལ། ཡིག་འབྲུ་རྣམས་ཞུ་ཞིང་ཐིག་སྐུད་ལ་ཐིམ་པས། ཡེ་ཤེས་ཀྱི་སྲད་བུར་གྱུར། ཨ་ཨཱཿ སོགས་རྩ་སྔགས་བརྗོད་ལ་སྒྲིལ། མེ་ཏོག་ལ་སོགས་པ་ཉེར་སྤྱོད་ལྔ་སྔགས་ཙམ་གྱིས་མཆོད། ཡང་རྩ་སྔགས་བཟླ་བཞིན་དུ་ཕྱོགས་ཐམས་ཅད་མཉམ་པ་ཉིད་དུ་མོས་ཛྫཿཞེས་ཐིག་སྐུད་ཀྱི་སྣེ་གྲོགས་ལ་གཏད། ཨོཾ་བཛྲ་ས་མ་ཡ་སཱུ་ཏྲ་མཱ་ཏི་ཀྲ་མ་ཧཱུཾ། ཞེས་བརྗོད་ཅིང་ཡེ་ཤེས་ཀྱི་ཐིག་ཆེན་བརྒྱད་པོ་སྤྱི་དང་འདྲ་བར་བཏབ། དེའི་འོག་ཏུ་ལས་ཐིག་བཏབ་ནས་ཆ་དབྱེ་བར་བྱའོ། །མཐར་ཐིག་སྐུད་ལ་ཉེར་སྤྱོད་ལྔས་མཆོད་ནས། བཛྲ་མུཿས་ཡེ་ཤེས་པ་གཤེགས་སུ་གསོལ། རྡུལ་ཚོན་བྱིན་གྱིས་རླབས་པ་ཡང་དེས་རིགས་འགྲེས་ཏེ། ཐིག་སྐུད་དང་སྲད་བུ་ཞེས་པའི་གནས་སུ། རྡུལ་ཚོན་ཞེས་པ་འཇུག །སྒྲིལ་བའི་ཚབ་ཏུ་མཐེབ་སྲིན་གྱི་མཉེས་ནས། ཨོཾ་བཛྲ་ཙིཏྟྲ་ས་མ་ཡེ་ཧཱུཾ། མང་དུ་བཟླས་ཏེ། འདི་ནི་ཆོས་དབྱིངས་དག་པ་སྟེ། །སེམས་ཅན་ཁམས་ནི་རབ་སྒྲོལ་བྱེད། །རྒྱལ་བ་འཇམ་པའི་རྡོ་རྗེ་ཉིད། །དེ་བཞིན་གཤེགས་པ་ཀུན་གྱི་བདག །ཞེས་བརྗོད་དེ་སློབ་དཔོན་གྱིས་དབང་ལྡན་གྱི་རྩིག་པ་བྲིས་པ་སྣོད་ཀྱིས་བཀབ་པར་བྱ་ལ། དེ་ནས་ཚོན་ཅི་བདེར་འགྱེད་དོ། །ལྷ་མཚན་གྱི་སྐབས་གཙོ་བོའི་མཚན་མ་ལ་འཁོར་ལོ་དང༌། རལ་གྲི་དང༌། ཨུཏྤལ་དམར་པོ་པོ་ཏིར་བཅས་པ་རྣམས་སུམ་རྩེག་ཏུ་འབྲི་བར་བཤད་ལ། གསུམ་ཀར་བྲི་བར་མ་ནུས་ན། ཨུཏྤལ་དང་བཅས་པའི་པོ་ཏི་ཁོ་ན་འབྲི། མཐར་རྡུལ་ཚོན་
མཆོད་དེ་ཡེ་ཤེས་པ་གཤེགས་སོ། །ཇོ་བོ་སྨྲྀ་ཏིས་མཛད་པའི་གསང་ལྡན་གྱི་འགྲེལ་པར་ཐིག་གི་རྣམ་གཞག་ལ། ཐིག་སྤྱི་དང་མི་འདྲ་བ་ཞིག་མཛད་པ་ནི། ཁོང་ཉིད་ཀྱི་བཞེད་པ་ཡིན་གྱི། སྒེག་པའི་རྡོ་རྗེའི་བཞེད་པ་ཡིན་པར་མ་ངེས་པས། ཐིག་རྣམས་སྤྱི་དང་འདྲ་བར་བཏབ་པས་རུང་ལ། འཁོར་གྱི་ལྷ་མཚན་ནི་སྒྲུབ་ཐབས་བཞིན་ནོ། །ད་ནི་དངོས་གཞིའི་རིམ་པ་ལ། དཀྱིལ་འཁོར་གྱི་མཐར་མཆོད་པས་མཛེས་པར་བྱེད་པ་ནི་ངེས་པར་དགོས་ལ། ཕུར་བུ་དང༌། མདའ་དང༌། རལ་གྲི་དང༌། ཚོན་སྐུད་དང༌། མེ་ལོང་ལ་སོགས་པས་བརྒྱན་པར་བཤད་པ་ལྟར་འགྲུབ་ན་བྱ་མོད། མ་གྲུབ་ཀྱང་འགལ་བ་མེད་དོ། །སློབ་དཔོན་གྱིས་རྡོ་རྗེ་གསོར་དྲིལ་བུ་དཀྲོལ་ཞིང༌། འཇམ་དཔལ་གྱི་ཡི་གེ་བརྒྱ་པ་བཟློས་པ་དང་བཅས་པས། དབང་ལྡན་ནས་རྩམས་ཏེ་གཡས་སུ་སྐོར་བ་ལན་བདུན་བྱའོ། །རྣམ་རྒྱལ་བུམ་པ་དབུས་སུ་བཞག་པར་མོས་ཏེ་དཀྱིལ་འཁོར་གྱི་ཤར་དུ་བཞག །ལམ་བུམ་དཀྱིལ་འཁོར་གྱི་ལྷོ་ཕྱོགས་སུ་བཞག་གོ །རྡུལ་ཚོན་གྱི་དཀྱིལ་འཁོར་ལ་བགེགས་སྦྱང་བ་དང༌། སྡིག་པ་སྦྱང་བ་དང་ལས་བུམ་མམ། ཁྲུས་བུམ་གཞན་གྱིས་ཁྲུས་གསོལ་བའི་དྲི་མ་སྦྱང་བ་དང་ཤིས་བརྗོད་ཇི་ལྟར་འོས་པར་བྱའོ། །སབས་འདིར་དཀྱིལ་འཁོར་སྒྲུབ་པའི་ཆོ་ག་ལ་དཀྱིལ་ཆོག་ཡོན་ཏན་འབྱུང་གནས་ལས། དཀྱིལ་འཁོར་བསྒྲུབ་པར་བྱ་སྟེ། འཁོར་ལོ་དང་པོའི་ཏིང་ངེ་འཛིན་ནས། ཡོངས་སུ་རྫོགས་པའི་ཏིང་ངེ་འཛིན་གྱི་བར་དུ་བསྒོམས་ལ། བཟླས་པའི་རྣལ་འབྱོར་རྫོགས་པ་དང་རས་ཟུང་དུ་སྦྱར་བ་ལྷ་རྣམས་ལ། ཨོཾ་ཨཱཿཧཱུཾ་བཛྲ་བསྟྲ་ཧཱུཾ། ཞེས་བྱ་བས་དབུལ་ལོ། །ཞེས་གསུངས་ཏེ། དེ་ལ་འཁོར་ལོ་དང་པོའི་ཏིང་ངེ་འཛིན་ཞེས་པ་ནི། རྒྱལ་མཆོག་དང་པོའི་འཁོར་ལོ་སྦྱོར་བའི་ཏིང་ངེ་འཛིན་ཞེས་བྱ། སྒྲུབ་ཐབས་ཀྱི་སྔོན་འགྲོའི་མིང་ཡིན་གྱི་དང་པོ་སྦྱོར་བ་མ་ཡིན་ལ། ཡོངས་སུ་རྫོགས་
པའི་ཏིང་ངེ་འཛིན་ནི། དངོས་གཞི་ཏིང་འཛིན་གསུམ་གྱི་མིང་ངོ༌། །དེ་ལྟར་ན་གཞུང་གི་དགོངས་པ་ནི་བདག་མདུན་དབྱེར་མེད་དུ་གྲགས་པ། བདག་བསྐྱེད་ལ་བརྟེན་ནས་གཟུགས་བརྙན་གྱི་དཀྱིལ་འཁོར་སྒྲུབ་པའི་ལུགས་ཡིན་ཏེ་སྔ་རབས་པ་མང་པོ་ཞིག་ཀྱང་དེ་བཞིན་དུ་བཞེད་དོ། །ཕྱིས་ཀྱི་ཁ་ཅིག་འདི་སྐད་ཅེས། དཀྱིལ་འཁོར་སྒྲུབ་པར་བྱ་སྟེ། འཁོར་ལོ་དང་པོའི་ཏིང་ངེ་འཛིན་གྱི་བར་བསྒོམས་ལ། བཟླས་པའི་རྣལ་འབྱོར་རྫོགས་པ་ཞེས་ལུང་འདྲེན་མ་དག་པར་མངོན་ཞིང༌། འཁོར་ལོ་དང་པོའི་ངོས་འཛིན་དང་པོ་སྦྱོར་བ་ལ་བྱེད་དེ། སྒྲུབ་ཐབས་གསང་ལྡན་དང་དངོས་སུ་འགལ་བའི་སྤྱི་ཏོལ་སྐྱེད་ནས། རྡོ་རྗེ་འབྱུང་བའི་རྒྱས་བཀབ་བྱེད་པ་འདི་ནི་མི་ལེགས་སོ། །ཡང་སྔ་ཕྱི་མང་པོ་ཞིག་སྟ་གོན་གྱི་དཀྱིལ་འཁོར་གཟུགས་བརྙན་གྱི་དཀྱིལ་འཁོར་ལ་ཕབ་པའི་རྗེས་སུ་དཀྱིལ་འཁོར་སྒྲུབ་སྟེ་རྣམ་པ་ཅིག་ཏུ་ན་དེ་ལ་འགལ་བ་མེད་ཀྱང༌། འདི་ཉིད་ཀྱི་རྩ་བའི་གཞུང་རྣམས་ནས་མ་བཤད་ཅིང༌། རྡོར་འབྱུང་སོགས་གཞུང་གཞན་ལ་སྐྲུན་པ་ཁོ་ནར་སྣང་བས། སྐབས་འདིར་དེ་འདྲ་དགོས་པ་མ་ཡིན་ནོ། །དེས་ན་སྔོན་འགྲོ་གཏོར་མ་བཏང༌། གནས་ཡོ་བྱིན་རླབས་བྱ། སྐྱབས་འགྲོ་སེམས་སྐྱེད་ཚད་མེད་བཞི་རྣམས་སོང་བ་ན། ཨོཾ་པྲ་ཀྲི་ཏི་ཞེས་པ་ནས། དཀྱིལ་འཁོར་གྱི་འཁོར་ལོ་རང་གི་སྙིང་གར་ཐིམ། དེ་ནས་རྡུལ་ཚོན་གྱི་དཀྱིལ་འཁོར་ཡ་མཱནྟ་ཀའི་སྔགས་ཀྱིས་བསངས། རྩ་སྔགས་ལན་གསུམ་བཟླས་ཏེ། བདག་ཉིད་རྡུལ་ཚོན་གྱི་དཀྱིལ་འཁོར་གྱི་དབུས་སུ་གནས་པར་གྱུར། ཨོཾ་སྭ་བྷཱ་ཝ་སོགས་ཀྱིས་སྟོང་པར་སྦྱངས། ཤེས་རབ་སྟོང་པ་ཉིད་དེ་དང་དཀྱིལ་འཁོར་གྱི་འཁོར་ལོ་ཞེས་པ་ནས་བཟུང་སྟེ། ཕྱག་གཡོན་པ་རྣམས་ཀྱི་ཁུ་ཚུར་དཀུར་བརྟེན་པའོ། །ཞེས་པའི་བར་དང་སྦྱོར་བ་དང༌། དཀྱིལ་འཁོར་རྒྱལ་མཆོག་རྫོགས་
པར་བྱས་ཏེ། གཙོ་བོའི་ཐུགས་ཀའི་ཨ་ཡིག་ལས་འོད་ཟེར་འཕྲོས། སྟ་གོན་གྱི་དཀྱིལ་འཁོར་རྟེན་དང་བརྟེན་པར་བཅས་པ་ཐམས་ཅད་ཨོཾ་བཛྲ་ས་མཱ་ཛཿ ཛཿཧཱུཾ་བཾ་ཧོཿ ཨོཾ་ཡ་མཱནྟ་ཀ་ཧཱུཾ་ཕཊ། ཀྱིས་བགེགས་བསལ། ཨོཾ་ན་མཿསརྦ་ཏ་ཐཱ་ག་ཨརྒྷཾ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུཾ། དེ་བཞིན་དུ་ཤཔྟའི་བར་གྱིས་མཆོད། འདུད་ཉི་ཤུས་བསྟོད། ཨ་ཨཱཿ སོགས་རྩ་སྔགས་ཀྱི་མཐར། དྲྀ་ཤྱ་ཛཿཧཱུཾ་བཾ་ཧོཿས་མ་ཡ་སྟྭཾ་ཨཱ་ཧཱཾ། ལན་གསུམ་གྱིས། གཟུགས་བརྙན་གྱི་དཀྱིལ་འཁོར་དང༌། ཏིང་ངེ་འཛིན་གྱི་དཀྱིལ་འཁོར་དང༌། སྟ་གོན་གྱི་དཀྱིལ་འཁོར་རྣམས་རོ་གཅིག་ཏུ་འདྲེས་པར་གྱུར། དེ་རྗེས། དཀྱིལ་འཁོར་གྱི་གཙོ་བོའི་ཐུགས་ཀ་ནས་འཇམ་དཔལ་སྐུ་མདོག་སེར་པོ་ཞེས་པ་ནས། ཨོཾ་བཛྲ་ཏིཥྛ་ཧཱུཾ། དེ་ནས། ལྷ་ལ་སོགས་པ་དྲིའི་རྫས། །ཞེས་སོགས་ཚིགས་བཅད་སྦྱར་བའམ། སྔགས་རྐྱང་པས་ཉེར་སྤྱོད་རོལ་མོ་དང་བཅས་པ་ཕུལ། མཉམ་ཉིད་མི་གཡོ་ནས། ཡང༌། སྙིང་གའི་ཨ་ཡིག་ལ་བསྡུའོ། །ཞེས་པའི་བར་བྱ། དེ་ནས་མཆོད་པ་ཁ་གསོས་ཏེ་སླར་ཡང་གོང་བཞིན་བྱིན་རླབས་བྱ། ཨོཾ་ཡན་ལག་བརྒྱད་ལྡན་ལྷ་རྫས་ཨརྒྷཾའི་རྒྱུན། །སེམས་ཉིད་རབ་ཏུ་དང་བ་འོད་གསལ་དང༌། །ཞིང་ཀུན་ཁྱབ་པར་རབ་ཏུ་སྤྲུལ་ནས་ཀྱང༌། །འཇམ་དཔལ་དཀྱིལ་འཁོར་ལྷ་ཚོགས་མཆོད་པར་བགྱི། །ཨོཾ་ན་མཿསརྦ་ཏ་ཐཱ་ག་ཏ་ཨརྒྷཾ་སོགས། དྲི་ཞིམ་ཞབས་བཀྲུ་སྤོས་ཀྱི་ཆུ་བོ་འདི། །སེམས་ཉིད་སོགས། གོང་བཞིན། པཱདྱཾ། ཆུ་དང་ཐང་ལས་སྐྱེས་པ་ཡི། །ཞེས་པ་ནས་འདོད་ཡོན་ལྔ་རྫོགས་པའི་བར། ལས་རྒྱལ་མཆོག་བཞིན་བྱས་ནས། ཅུང་ཟད་སྤྲོས་པ་ལ་མོས་ན། སྤྱི་དང་མཐུན་པར་རྒྱལ་སྲིད་སྣ་བདུན་དང༌། མགོན་པོ་ཐུགས་རྗེ་ཆེན་པོས་
བྱིན་རླབས་པའི། །བསོད་ནམས་རྒྱུ་ལས་བྱུང་བའི་འཁོར་ལོ་འདི། །འཇམ་དཔལ་རྡོ་རྗེ་དབྱིངས་ཀྱི་ལྷ་ཚོགས་ལ། །ཕུལ་བས་འགྲོ་ཀུན་བླ་མེད་ཐོབ་པར་ཤོག །གཞན་འདྲ་བ་ལས། དྲི་མེད་ཤིན་ཏུ་མཛེས་པའི་དཔལ་བེའུ་འདི། །རིན་ཆེན་བཅུད་ཀྱིས་བལྟམས་པའི་བུམ་པ་འདི། །ཡིད་འོང་འདམ་གྱིས་མ་གོས་པདྨ་འདི། །སྒྲ་དབྱངས་ཕྱོགས་བཅུར་སྒྲོག་པའི་དུང་དཀར་འདི། །ཐོགས་མེད་ཀུན་ཏུ་རྒྱུ་བའི་གསེར་ཉ་འདི། །གདུང་བ་མ་ལུས་སྐྱོབ་བྱེད་གདུགས་མཛེས་འདི། །མི་མཐུན་ཕྱོགས་ལས་རྒྱལ་བའི་རྒྱལ་མཚན་འདི། །ཞེས་འདོན་པ་སྤོ། དེ་བཞིན་སྔགས་ཀྱང་རིམ་པ་བཞིན་དུ། མངྒ་ལ་ཙཀྲ། མངྒ་ལ་ཤྲཱི་བཏ་ས། མངྒ་ལ་གྷ་ཊ། མངྒ་ལ་ཀ་མ་ལ། མངྒ་ལ་ཤཾ་ཁ། མངྒ་ལ་མཏ་སྱ། མངྒ་ལ་ཚ་ཏྲཱཾ་ག །མངྒ་ལ་དྷཱ་ཛ། ཞེས་འདོན་པ་སྤོ། དེ་ནས་མཚན་བརྒྱ་རྩ་བརྒྱད་པས་བསྟོད་པར་བྱས་ཏེ། བྱང་ཆུབ་སེམས་ནི་རང་བྱུང་བའི། །འདི་ལྟར་སངས་རྒྱས་བཅོམ་ལྡན་འདས། །དོན་ཆེན་ཡི་གེ་དམ་པ་འདི། །མཆོག་སྦྱིན་རྡོ་རྗེ་མཆོག་ཁྱོད་འདུད། །སངས་རྒྱས་རྣམ་པར་སྣང་མཛད་ཆེ། །གཏི་མུག་བློ་སྟེ་གཏི་མུག་སེལ། །མགོན་པོ་ས་བཅུའི་དབང་ཕྱུག་སྟེ། །རྡོ་རྗེ་འཆང་བ་ཁྱོད་ལ་འདུད། །རྡོ་རྗེ་འཇིགས་བྱེད་འཇིགས་པར་བྱེད། གདོང་དྲུག་མིག་དྲུག་ལག་དྲུག་པོ། །མཆེ་གཙིགས་གདོང་བརྒྱ་ཀུན་འདུལ་བ། །སངས་རྒྱས་རོལ་སྟོན་ཁྱོད་ལ་འདུད། །ཡང་དག་བདག་མེད་དེ་བཞིན་ཉིད། །སྟོང་ཉིད་སྨྲ་བའི་ཁྱུང་མཆོག་སྟེ། །སུམ་ཅུ་རྩ་གཉིས་མཚན་འཆང་བ། །མེད་པ་ལས་བྱུང་ཁྱོད་ལ་འདུད། །འདོད་པའི་དོན་གྲུབ་ངན་སོང་སྦྱོང༌། །མགོན་པོ་ཉོན་མོངས་དྲ་བ་འཇོམས། །
ས་གཞི་ཚངས་གནས་རྐང་པས་གནོན། །སྒྱུ་འཕྲུལ་དྲྭ་བ་ཁྱོད་ལ་འདུད། །སངས་རྒྱས་ཀུན་གྱིས་རྟོགས་བྱ་བ། །ཐིག་ལེ་ཆེན་པོ་ཡི་གེ་མེད། །ལོངས་སྤྱོད་རྫོགས་སྐུ་ཀུན་གྱི་རྒྱལ། །སངས་རྒྱས་རོལ་སྟོན་ཁྱོད་ལ་འདུད། །མེ་ལོང་ཡེ་ཤེས་ངོ་བོ་ཉིད། །ཨ་ནི་ཡིག་འབྲུ་ཀུན་གྱི་མཆོག །ཁོང་ནས་འབྱུང་བ་སྐྱེ་བ་མེད། །སེམས་མ་རྡོ་རྗེ་ཁྱོད་ལ་འདུད། །མཉམ་ཉིད་ཡེ་ཤེས་ངོ་བོ་ཉིད། །ཨ་ནི་འབྱུང་བ་འགོག་པ་སྟེ། །ཚིག་ཏུ་བརྗོད་པ་རྣམ་སྤངས་པ། །རིན་ཆེན་འབྱུང་མ་ཁྱོད་ལ་འདུད། །སོ་སོར་ཀུན་རྟོག་ངོ་བོ་ཉིད། །ཨ་ནི་བརྗོད་པའི་རྒྱུ་ཡིན་ཏེ། །བརྗོད་པ་ཀུན་གྱི་རྒྱུ་ཡི་མཆོག །ཆོས་ཀྱི་རྡོ་རྗེ་ཁྱོད་ལ་འདུད། །བྱ་བ་ནན་ཏན་ངོ་བོ་ཉིད། །ཨ་ནི་ཡིག་འབྲུ་གསལ་བར་བྱེད། །ཚིག་ཀུན་གསལ་བར་བྱེད་པ་ཡི། །རྡོ་རྗེ་དྲ་བ་ཁྱོད་ལ་འདུད། །སྟོང་པའི་རང་བཞིན་འདོད་ཆགས་ཆེ། །སངས་རྒྱས་འདོད་ལ་ཕྱག་འཚལ་འདུད། །ཕྱི་ཉིད་མ་གྲུབ་བདེ་བ་ཆེ། །སངས་རྒྱས་རོལ་ལ་ཕྱག་འཚལ་འདུད། །གཉིས་ཀ་མེད་པ་བདེ་བ་ཆེ། །སངས་རྒྱས་ཆགས་པ་ཁྱོད་ལ་འདུད། །གཏོང་བའི་དོན་ལྡན་མགུ་བ་ཆེ། །སངས་རྒྱས་དགྱེས་པ་ཁྱོད་ལ་འདུད། །གཟུགས་ཆེ་ལུས་ཀྱང་ཆེ་བ་སྟེ། །སངས་རྒྱས་འཛུམ་པ་ཁྱོད་ལ་འདུད། ཁ་དོག་ཆེ་ལ་གཟི་བརྗིད་ལྡན། །མེད་པ་ལས་བྱུང་ཁྱོད་ལ་འདུད། །མིང་ཆེ་མཚན་བཟང་རྒྱ་ཆེ་བ། །སངས་རྒྱས་ཐུགས་ལ་ཕྱག་འཚལ་འདུད། །བཞད་ཅིང་དཀྱིལ་འཁོར་ལས་ཁྱབ་པ། །སངས་རྒྱས་བཞད་པ་ཁྱོད་ལ་འདུད། །ཆོས་ཀྱི་ཤེས་རབ་མཚན་འཆང་བ། །སངས་རྒྱས་གསུང་ལ་ཕྱག་འཚལ་འདུད། །ཉོན་མོངས་དྲ་བ་འཇོམས་
པའི་མཆོག །སངས་རྒྱས་འབྱུང་བ་ཁྱོད་ལ་འདུད། །དྲག་པོ་རྡོ་རྗེ་རྒྱུ་ཡི་བདག །ནམ་མཁའ་ལས་བྱུང་ཁྱོད་ལ་འདུད། །སྣང་བ་ཆེན་པོ་གསལ་བ་ཆེ། །ཡེ་ཤེས་ལས་བྱུང་ཁྱོད་ལ་འདུད། །མཁས་ཤིང་སྤྲུལ་འཆང་རྡོ་རྗེ་ལས། །སྒྱུ་འཕྲུལ་དྲྭ་བ་ཁྱོད་ལ་འདུད། །སྒྱུ་འཕྲུལ་ཆེན་པོ་གོ་ཆ་སྲ། །སངས་རྒྱས་རོལ་སྟོན་ཁྱོད་ལ་འདུད། །སྒྱུ་འཕྲུལ་བདག་ཉིད་གནོད་སྦྱིན་གཙོ། །ཐམས་ཅད་ཐམས་ཅད་ཁྱོད་ལ་འདུད། །སྒྱུ་འཕྲུལ་ཁུ་ཚུར་བསྟན་ཅིང་བསྡུ། །ཡེ་ཤེས་སྐུ་ཉིད་ཁྱོད་ལ་འདུད། །སྦྱིན་བདག་གཙོ་ཆེན་གཙོ་བོ་སྟེ། །རྡོ་རྗེ་སྒེག་མོ་ཁྱོད་ལ་འདུད། །ཚུལ་ཁྲིམས་ཆེན་པོ་འཆང་བའི་མཆོག །རྡོ་རྗེ་དཔའ་འཕྲེང་ཁྱོད་ལ་འདུད། །བཟོད་ཆེན་འཆང་བ་བརྟན་པ་པོ། །རྡོ་རྗེ་དབྱངས་མཁན་ཁྱོད་ལ་འདུད། །བརྩོན་འགྲུས་ཆེན་པོ་རྟུལ་བ་ཡིན། །རྡོ་རྗེ་གར་མཁན་ཁྱོད་ལ་འདུད། །བསམ་གཏན་ཆེན་པོ་ཏིང་འཛིན་གནས། །རྡོ་རྗེ་མེ་ཏོག་ཁྱོད་ལ་འདུད། །ཤེས་རབ་ཆེན་པོ་ལུས་འཆང་བ། །རྡོ་རྗེ་བདུག་སྤོས་ཁྱོད་ལ་འདུད། །སྨོན་ལམ་ཡེ་ཤེས་རྒྱ་མཚོ་སྟེ། །རྡོ་རྗེ་མར་མེ་ཁྱོད་ལ་འདུད། །སྟོབས་པོ་ཆེ་ལ་ཐབས་ཆེ་བ། །རྡོ་རྗེ་དག་བྱེད་ཁྱོད་ལ་འདུད། །རྡོ་རྗེ་ལྕགས་ཀྱུ་འདྲེན་པ་སྟེ། །རྡོ་རྗེ་འགུགས་བྱེད་ཁྱོད་ལ་འདུད། །རྡོ་རྗེ་ཞགས་པ་རྣམ་པར་རྒྱལ། །རྡོ་རྗེ་འདྲེན་བྱེད་ཁྱོད་ལ་འདུད། །རྡོ་རྗེ་ལྕགས་སྒྲོག་འཛིན་པ་ཆེ། །རྡོ་རྗེ་སྡོམ་བྱེད་ཁྱོད་ལ་འདུད། །རྡོ་རྗེ་འབེབས་བྱེད་རྣམ་པར་རྒྱལ། །རྡོ་རྗེ་འབེབས་པ་ཁྱོད་པ་ལ་འདུད། །བྱམས་ཆེན་རང་བཞིན་དཔག་ཏུ་མེད། །སྙིང་རྗེ་ཆེན་པོ་བློ་ཡི་མཆོག །ཤེས་རབ་ཆེན་པོ་བློ་ཆེན་ལྡན། །མཁས་པ་ཆེན་པོ་ཐབས་ཆེ་བ། །ཡེ་ཤེས་ཆ་དྲུག་སེམས་
དཔའི་ཚོགས། །སྟོང་པ་ཉིད་ཀྱི་སྒོར་གནས་པ། །བག་ལ་ཉལ་བ་བྱང་སེམས་ལྡན། །ཤེས་རབ་སྙིང་རྗེ་ལྡན་ལ་འདུད། །རྫུ་འཕྲུལ་ཆེན་པོ་སྟོབས་ཆེན་ལྡན། །ཤུགས་ཆེན་མགྱོགས་པ་ཆེན་པོ་སྟེ། །རྫུ་འཕྲུལ་ཆེན་པོ་ཆེར་གྲགས་པ། །སྟོབས་ཆེན་ཕ་རོལ་གནོན་པ་པོ། །སྟོབས་བཅུ་རྫུ་འཕྲུལ་བཞི་ལྡན་པའི། །གོམས་ཤུགས་ཡེ་ཤེས་བཞི་གྲགས་པ། །རྫུ་འཕྲུལ་ལྡན་ཞིང་སྟོབས་ཀྱིས་གནོན། །ཚོགས་གཉིས་རྫོགས་པ་ཁྱོད་ལ་འདུད། །སྲིད་པའི་རི་བོ་ཆེན་པོ་འཇོམས། །འཁྲིགས་ཤིང་རྡོ་རྗེ་ཆེན་པོ་འཆང༌། །དྲག་པོ་ཆེན་པོ་མུན་པ་འཇོམས། །འཇིགས་ཆེན་འཇིགས་པར་བྱེད་པ་པོ། །ཕུང་པོ་ལྔ་བདག་ལྷ་ཆེན་འདུལ། །མི་ཤེས་རི་འཇོམས་སྲ་པ་པོ། །མྱ་ངན་ཀུན་སེལ་དྲག་པོ་སྟེ། །ཆེ་བས་ཆེ་བ་ཁྱོད་ལ་འདུད། །མགོན་པོ་རིགས་མཆོག་ཆེན་པོ་སྟེ། །བླ་མ་གསང་སྔགས་ཆེ་བའི་མཆོག །ཐེག་པ་ཆེན་པོའི་ཚུལ་ལ་གནས། །ཐེག་པ་ཆེན་པོའི་ཚུལ་གྱི་མཆོག །འཁོར་བ་མྱ་ངན་སྐྱོབ་པའི་མགོན། །ཐེག་པའི་ཚུལ་མཆོག་ལམ་གནས་པའི། །ཕྱག་རྒྱ་མཆོག་ཏུ་སྒྲུབ་བྱེད་པ། །ཕ་རོལ་ས་བཅུ་གཙོ་ལ་འདུད། །དེ་ལྟར་བསྟོད་པ་བྱེད་པ་དེ། །འཁོར་ལོ་འདུས་པའི་གཙོ་མཆོག་གྲུབ། །ཅེས་པའོ། །གཞན་ཡང་མཆོད་པ་དང༌། བསྟོད་པ་ཇི་ལྟར་མོས་ཤིང་སྤྲོ་བ་དག་བྱའོ།། །།༈ ཨོཾ་སྠཱི་ཏོ་ཧྲི་དི། ཅེས་པ་ནས། ཨ་ཡིག་དང་གཉིས་སུ་མེད་པར་ཞེས་བརྗོད་ཅིང༌། སྔགས་གསུམ་པོ་བརྒྱ་རྩ་སོགས་བཟླས་པ་ཅི་འགྲུབ་བྱ། མཚན་བརྗོད་ཡོངས་སུ་རྫོགས་པ་ཚར་གཅིག་ངེས་པར་འདོན་དགོས་ལ། ཚར་མང་དུ་བྱས་ན་བཟང་ངོ༌། །དེ་ནས་ལྷ་རྣམས་གོས་ཟུང་འབུལ་བ་
ཡང་སྤྱི་དང་འདྲ་བ་ལས། གཞུག་ཏུ་རྩ་སྔགས་ལན་ལྔ་ཙམ་གྱི་མཐར། ཨོཾ་ཨཱཿཧཱུཾ་བཛྲ་བསྟྲ་ཧཱུཾ། ཞེས་པ་ལྷ་གྲངས་དང་མཉམ་པའི་དབང་དུ་བྱས་ཏེ། ལན་ལྔ་བཅུ་ང་གསུམ་མམ་ང་ལྔ་བརྗོད་དོ། །དེ་ནས་གསོལ་བ་བཏབ་སྟེ། བཅོམ་ལྡན་འདས་འཇམ་དཔལ་རྡོ་རྗེ་དབྱིངས་ཀྱི་ལྷ་ཚོགས་རྣམས་ཀྱིས་བདག་དང་སེམས་ཅན་ཐམས་ཅད་ལ་ཐུགས་བརྩེ་བར་མཛོད་ལ། མཆོག་དང་ཐུན་མོང་གི་དངོས་གྲུབ་མ་ལུས་པ་བདེ་བླག་ཏུ་སྩལ་ཏུ་གསོལ། གནས་སྐབས་སུ་ཡང་འཕགས་པ་འཇམ་དཔལ་ཉིད་ཀྱི་ཞལ་མངོན་སུམ་དུ་མཐོང་བ་དང་ཏིང་ངེ་འཛིན་དང་གཟུངས་དང༌། རྣམ་པར་ཐར་པ་ཐམས་ཅད་གོང་ནས་གོང་དུ་ཐོབ་པ་དང༌། བར་ཆད་མ་ལུས་པ་ཐམས་ཅད་ཞི་བ་དང༌། བདེ་བ་དང་ཡིད་བདེ་བ་ཐམས་ཅད་གེགས་མེད་དུ་འགྲུབ་པར་མཛད་དུ་གསོལ། མཐར་ཐུག་དུས་གསུམ་རྒྱལ་བ་མ་ལུས་པའི་སྐུ་གསུང་ཐུགས་ཀྱི་བདག་ཉིད། བཅོམ་ལྡན་འདས་འཇམ་དཔལ་ཉིད་ཀྱི་གོ་འཕང་ཐོབ་ནས། འགྲོ་བ་དྲུག་གི་སེམས་ཅན་ཐམས་ཅད་ཀྱང་བླ་ན་མེད་པའི་གནས་དེ་ཉིད་ལ་འགོད་ནུས་པར་བྱིན་གྱིས་བརླབ་ཏུ་གསོལ། ཅེས་པའི་མཐར་རྗེ་བཙུན་གྱི་ཡིག་བརྒྱ་ཅི་རིགས་པར་བཟླའོ། །དེ་ནས་དཀྱིལ་འཁོར་ཀྱི་ཕྱི་རོལ་ཏུ་སོང་ནས། འཇིག་རྟེན་པའི་ཚོགས་ལ་གཏོར་མ་སྦྱིན་དགོས་ན། འདིའི་ཕྱི་རོལ་གཏོར་མ་ནི་ཆ་གསུམ་དུ་གྲགས་པ་ཉིད་མཛད་པའི་རྒྱུན་སྣང་ངོ༌། །དེ་ཡང་བོད་སྔ་མ་རྣམས་ཀྱི་ནི་གསང་སྔགས་ཕྱི་པ་ཡིན་པས་བསམས་པ་ལ་སྣང་མོད། འོན་ཀྱང་མི་འགལ་ཏེ། འོག་མའི་ཆོ་ག་ཐུན་མོང་མང་པོ་ཞིག་གོང་མ་ལ་སྦྱོར་བ་འགལ་བ་མེད་པའི་ཕྱིར་རོ། །དེའི་ཡང་འབྱུང་གཏོར་དང་ཕྱོགས་སྐྱོང་གཏོར་མ་ལྟ་བུ་རེ་རེས་ཀྱང་ཆོག་པར་སྣང་ཞིང༌།
ཕྱོགས་སྐྱོང་བཅོ་ལྔའི་གཏོར་ཆོག་བླ་མེད་སྤྱི་འགྲོ་ལུགས་སྦྱར་ན་ལེགས་པར་འགྱུར་རོ། །འོན་ཀྱང་རེ་ཞིག་འགལ་བ་མེད་ཕྱིན་གོང་མ་རྣམས་ཀྱི་ལག་ལེན་དང་མཐུན་པར་བྱེད་པ་བཟང་སྟེ། ཆ་གསུམ་དུ་གྲགས་པ་ཉིད་བྱ་ལ། དེའི་ཆོ་ག་ནི་གཞན་དུ་ཤེས་སོ། །དེ་ནས་སློབ་དཔོན་གྱིས་ཉེ་རེག་བྱས་ཀྱང་ལེགས་ལ་མ་བྱས་ཀྱང་རུང་སྟེ། འགྲུབ་ན་དཀྱིལ་འཁོར་གྱི་ཤར་ཕྱོགས་སུ་སྦྱིན་སྲེག་བྱའོ། །དེའི་རྗེས་སུ། མཆོག་ཏུ་བདེ་བའི་སེམས་ནི་རོལ་པར་ལྡན། །སོགས་ཀྱིས་མེ་ཏོག་ཕུལ། ཨོཾ་བཛྲ་ཨུཏ་གྷ་ཊ་པྲ་བེ་ཤ་ཡ་ཧཱུཾ་གིས་སྒོ་ཕྱེའོ། །དེ་ནས་བདག་འཇུག་ནི། འཇུག་པའི་མཎྜལ་ཕུལ། ཡམཱནྟ་ཀས་བསངས། ཨཱ་ཁཾ་བཱི་ར་ཧཱུཾ། ལན་གཉིས་ཀྱིས་མིག་དར་བཅིངས། མེ་ཏོག་འཕྲེང་བ་གཏད། བུ་ཁྱོད་དངོས་གྲུབ་ཅི་ལ་དགའ། །སལ་བཟང་བདེ་བ་མཆོག་ལ་བདག་དགའོ། །ཞེས་དྲི་ལན་བྱ། དགའ་ཆེན་ཁྱོད་བདག་སྟོན་པ་སྟེ། །སོགས་ཀྱིས་གསོལ་བ་བཏབ། བུ་ཚུར་ཤོག་ཅིག་ཐེག་ཆེན་པོའི། །ཞེས་པ་ནས། བློ་གྲོས་འདི་གྱིས་ཤིག །ཅེས་པའི་བར་གྱིས་སྤྲོ་བ་བསྐྱེད། ཚེ་རབས་ཐོག་མ་མེད་པ་ནས། །ཞེས་པ་ནས། ཁྱེད་ཀྱིས་བཞེས་སུ་གསོལ། །ཞེས་པའི་བར་གྱི་རྒྱུན་བཤགས་ཀྱང་སྤྲོ་ན་བྱ་ལ། བསྡུ་ན། དཀོན་མཆོག་གསུམ་ལ་བདག་སྐྱབས་མཆི། །སོགས་ཀྱིས་རྒྱུན་བཤགས་བྱེད། གཙོ་བོ་བདག་ལ་སྡོམ་པ་སྩོལ། །ཐུབ་པ་ཉི་མ་མ་ལུས་པ། །ཕྱིར་མི་ལྡོག་པའི་དབང་བསྐུར་བ། །སློབ་དཔོན་ཆེན་པོ་བདག་ལ་སྩོལ། །ལན་གསུམ། ཆྒཻ་མོ་ཞེས་བྱ་བ་ནི། བྱང་ཆུབ་སེམས་ནི་ཡོངས་འཛིན་ཅིང༌། །དམ་ཚིག་སྡོམ་དང་གསང་བ་ཡི། །དཀྱིལ་འཁོར་འདིར་ནི་འཇུག་པར་འཚལ། །གསང་བ་ཆེན་པོ་རིགས་དག་པའི། །གསང་བ་
ཡོངས་སུ་འཛིན་པར་ནི། །བདག་ཉིད་ཆེན་པོ་ཁྱོད་འདོད་དམ། གསང་བ་ཆེན་པོ་རིགས་དག་པའི། །གསང་བ་ཡོངས་སུ་འཛིན་པར་ནི། །བདག་ཉིད་ཆེན་པོ་བདག་འཚལ་ལོ། །ཞེས་དྲི་ལན་བྱས་ནས། སྡོམ་པ་སྒྲག་པ་ནི། སངས་རྒྱས་ཆོས་དང་དགེ་འདུན་ཏེ། །དཀོན་མཆོག་གསུམ་ལ་སྐྱབས་སུ་སོང༌། །འདི་ནི་སངས་རྒྱས་རིགས་དག་པའི། །དམ་ཚིག་བརྟན་པོར་གྱུར་པའོ། །རྡོ་རྗེ་དྲིལ་བུ་ཕྱག་རྒྱ་ནི། །བློ་ཆེན་ཁྱོད་ཀྱིས་བཟུང་བར་བྱ། །བྱང་ཆུབ་སེམས་གང་དེ་རྡོ་རྗེ། །ཤེས་རབ་དྲིལ་བུ་ཞེས་སྒྲགས་སོ། །སློབ་དཔོན་ཁྱོད་ཀྱིས་བཟུང་བར་བྱ། །བླ་མ་སངས་རྒྱས་ཀུན་དང་མཉམ། །འདི་ནི་རྡོ་རྗེ་རིགས་དག་པའི། །དམ་ཚིག་ཡིད་དུ་འོང་བའོ། །རིན་ཆེན་རིགས་མཆོག་ཆེན་པོ་ལ། །ཉིན་དང་མཚན་མོ་ལན་གསུམ་དུ། །ཟང་ཟིང་མི་འཇིགས་ཆོས་དང་བྱམས། །སྦྱིན་པ་རྣམ་བཞི་རྟག་ཏུ་སྦྱིན། །ཕྱི་དང་གསང་བ་ཐེག་པ་གསུམ། །དམ་པའི་ཆོས་ནི་མ་ལུས་བཟུང༌། །འདི་ནི་པདྨའི་རིགས་དག་པའི། །དམ་ཚིག་ཡིད་དུ་འོང་བའོ། །ལས་ཀྱི་རིགས་མཆོག་ཆེན་པོ་ལ། །སྡོམ་པ་ཐམས་ཅད་ལྡན་པ་ནི། །ཡང་དག་ཉིད་དུ་བཟུང་བར་བགྱི། །མཆོད་པའི་ལས་ཀྱང་ཅི་ནུས་བགྱི། །ཞེས་སོ། །མདོར་བསྡུ་ན་དེ་ཙམ་གྱིས་ཆོག་ལ། རྒྱས་པ་ལ་དགའ་ན། དེ་ལས་གཞན་ཡང་བཅུ་བཞི་ནི། །ཞེས་པ་ནས། ཁྱོད་ཀྱི་རྟག་ཏུ་བསྲུང་བར་བྱ། །ཞེས་པའི་བར་ཡང་སྒྲག་གོ །དེ་ནས་སྡོམ་པ་བཟུང་བ་ནི། སློབ་དཔོན་འདིར་ནི་བདག་ལ་གསོན། །གཙོ་བོས་ཇི་ལྟར་བཀའ་སྩལ་པ། །དེ་ལྟར་བདག་ཀྱང་
བགྱིད་པར་འཚལ། །ཇི་ལྟར་དུས་གསུམ་མགོན་པོ་རྣམས། །ནས། མྱ་ངན་འདས་ལ་དགོད། །ལན་གསུམ། དེ་ཡན་ཆད་ཡོལ་བའི་ཕྱིར་འཇུག་ཡིན། དེ་ནས། ཨཱ་ཁཾ་བཱི་ར་ཧཱུཾ། ཞེས་ནང་དུ་ཞུགས་པར་མོས། དེ་རྗེས་དམ་ཚིག་གསང་མནན་ཞེས་བྱ་བ། སེམས་བསྐྱེད་པ་ནི། རང་གི་སྙིང་གར་ཟླ་བའི་སྟེང་དུ་རྡོ་རྗེ་དཀར་པོ་རྩེ་ལྔ་པ། ཨོཾ་བོ་དྷི་ཙིཏྟ་ཨུ་པ་ཏ་ཡ་མི། མེ་ཏོག་དང་བཅས་པའི་རྡོ་རྗེ་སྙིང་གར་བཞག་སྟེ། སུ་ར་ཏེ་ས་མ་སྟྭཾ། ཧོ་སིདྡྷི་བཛྲ་ཡ་ཐ་སུ་ཁཾ། དེ་ནས་གསང་བར་གདམས་པ་ནི། དུས་འདི་ཉིད་དུ་ཁྱོད་ཉིད་ནི། །སངས་རྒྱས་རིགས་སུ་ཆུད་པས་ན། །ཚུལ་འདི་གཞན་ལ་མ་བརྗོད་ཅིག །གལ་ཏེ་སྨྲས་པར་གྱུར་པ་ན། །འཇམ་པའི་རྡོ་རྗེ་རབ་ཁྲོས་ནས། །འགའ་ལ་སྨྲ་བའི་ཀླད་པ་འགེམས། །དམ་ལ་བཞག་པ་ནི། འདི་ནི་ཁྱོད་ཀྱི་དམྱལ་བའི་ཆུ། །དམ་ཚིག་འདས་ན་སྲེག་པར་བྱེད། །དམ་ཚིག་སྲུངས་ན་དངོས་གྲུབ་ནི། །རྡོ་རྗེ་བདུད་རྩིའི་ཆུ་འདིས་འགྲུབ། །ཨོཾ་བཛྲ་ཨུ་ཏ་ཀ་ཋ། དེང་ནས་རྩམས་ཏེ་བུ་ཁྱོད་ཀྱི། །འཇམ་པའི་རྡོ་རྗེ་ང་ཡིན་གྱིས། །ང་ཡིས་ཇི་ལྟར་བཀའ་སྩལ་པ། །ཁྱོད་ཀྱིས་སྐྱོ་བ་མེད་པར་གྱིས། །གང་ཡང་ང་ལ་རྙས་པར་མིན། །དེ་བཞིན་མོས་པར་མ་བྱས་ན། །བདུད་ཀྱིས་བཅོམ་ནས་དམྱལ་བར་འགྲོ། །དེ་བས་དམ་ཚིག་ལ་གནས་བྱོས། །ཡེ་ཤེས་དབབ་པ་ནི། དེ་བཞིན་གཤེགས་པ་ཐམས་ཅད་ཀྱིས་བྱིན་གྱིས་རློབས་ལ། འཇམ་པའི་རྡོ་རྗེ་བདག་ལ་དབབ་དུ་གསོལ། ལན་གསུམ། རང་ཉིད་ཡེ་ཤེས་སེམས་དཔའི་སྐུར་གྱུར་པའི་སྙིང་གར་ཨཿཡིག་སྐྱེ་བ་མེད་པའི་རང་བཞིན་ནོ། །དེ་བཞིན་གཤེགས་པ་
ཐམས་ཅད་ཀྱིས་བྱིན་གྱིས་རློབས་ལ། ཡེ་ཤེས་སེམས་དཔའ་འདི་ལ་འབབ་པར་གྱུར་ཅིག །རང་གི་རྐང་མཐིལ་དུ་ཡཾ་ལས་རླུང་གི་དཀྱིལ་འཁོར་སྔོན་པོ་བ་དན་གྱིས་མཚན་པ། དེའི་ཤུགས་ཀྱིས་རང་ལུས་གྱེན་དུ་ལྡེགས་ཤིང་སྐྱོད་པ། སྤྱི་བོར་ཨོཾ་དཀར་པོ་དེ་ལས་འོད་ཟེར་འཕྲོས་ཏེ། ལུས་ཀྱི་ནང་གང་ལུས་སེམས་ཐམས་ཅད་བདེ་བས་ཁྱབ། དཀྱིལ་འཁོར་གྱི་གཙོ་བོ་དང་བླ་མ་དབྱེར་མེད་པའི་ཐུགས་ཀ་ནས་པདྨ་རཱ་ག་ལྟར་དམར་བའི་རྡོ་རྗེ་ཕྲ་མོ་དཔག་ཏུ་མེད་པ་བྱུང༌། རང་གི་ལུས་ལ་ཐིམ་པས་སངས་རྒྱས་ཐམས་ཅད་ཀྱིས་རྒྱུད་བྱིན་གྱིས་བརླབས། བཛྲ་ཨཱ་བེ་ཤ་ཡཱ་ཨ་ཨ་ཨ་ཨཿ ལན་བརྒྱ་རྩ་བརྒྱད་བརྗོད། ཡང་རྡོ་རྗེ་བསྡམས་པ་ལས་སེམས་མ་རྡོ་རྗེ་མའི་ཕྱག་དྲལ་ཞིང༌། བཛྲ་སཏྭ་ཨཱ་ཨཱ་ཨཱ་ཨཱ། དཀྱིལ་འཁོར་གྱི་གཙོ་བོ་སུམ་སྦྲགས་ཀྱི་ཐུགས་ཀའི་ཡིག་འབྲུ་རྣམས་ལས། འོད་ཟེར་དམར་པོ་དཔག་ཏུ་མེད་པ་བྱུང༌། རང་གི་ལུས་ལ་ཞུགས་པས། སྡིག་སྒྲིབ་མ་ལུས་བསྲེགས་ཤིང་དག་པར་གྱུར། །སུ་པྲ་ཏཱིཙྪ་བཛྲ། ཞེས་སྤྱི་བོར་རྡོ་རྗེ་བཞག་སྟེ་བརྟན་པར་བྱས། འདི་ལྟར་བདག་གིས་སློབ་མ་འདི། །དཀྱིལ་འཁོར་དུ་ནི་ལེགས་བཅུག་ན། །ལྷ་ཡི་རིགས་ཀྱི་རིམ་པ་དང༌། །བསོད་ནམས་དེ་ཡང་ཅི་འདྲ་བ། །དེ་འདྲ་དཀྱིལ་འཁོར་དུ་གྱུར་ཅིག །འདིར་སློབ་མ་དབང་བསྐུར་སྐབས་ནམ་མཁའི་ཁ་དོག་དྲི་དགོས། དཀྱུས་ལ་རང་གི་ལས་འགྲུབ་པའི་རིམ་པ་དང་མཐུན་པར། ནམ་མཁའི་ཁ་དོག་མཐོང་བར་གྱུར། འདི་ཡི་དངོས་གྲུབ་ཅི་འདྲར་འགྱུར། །རིགས་ནི་གང་གི་སྣོད་དུ་འགྱུར། །འདི་ལ་བསོད་ནམས་ཅི་ཡོད་པ། །དེ་བཞིན་དུ་ནི་འབབ་པར་ཤོག །པྲ་ཏཱིཙྪབཛྲ་ཧོཿ ཞེས་མེ་ཏོག་དོར། ཨོཾ་པྲ་ཏི་གྲྀཧྞ་སྟྭཾ་ཨི་མཾ་སཏྭ་མཧཱ་བ་ལ།
ཨོཾ་སརྦ་དྷརྨ་ཨ་བྷཱ་ཝ། སོགས་ཡང་སྙིང་གིས་མེ་ཏོག་དེ་མགོ་ལ་བཅིངས། རྡོ་རྗེ་ཆགས་བ་དེང་ཁྱོད་ཀྱི། །མིག་འབྱེད་པར་ནི་བརྩོན་པར་མཛད། །ཕྱེ་བས་ཐམས་ཅད་མཐོང་གྱུར་ཏེ། །རྡོ་རྗེ་མིག་ནི་བླ་ན་མེད། །ཧེ་བཛྲ་པཱ་ཤྱ། གདོང་གཡོགས་དགྲོལ། ཐར་པ་ཆེན་པོ་གྲོང་ཁྱེར་མཆོག །ལྟོས་ཤིག་ལྟོས་ཤིག་སེམས་དཔའ་ཆེ། །མེ་ཏོག་གང་དུ་ལྷུང་གྱུར་པ། །དེ་ནི་ཁྱོད་ཀྱི་འཇམ་པའི་དབྱངས། །བདག་གིས་འཇམ་དཔལ་རྡོ་རྗེ་དབྱིངས་ཀྱི་རྟེན་དང་བརྟེན་པའི་དཀྱིལ་འཁོར་ཐམས་ཅད་མངོན་སུམ་བཞིན་དུ་མཐོང་བར་གྱུར། ཞེས་བརྗོད། སློབ་མ་ལ་དབང་བསྐུར་ན་སྐབས་འདིར་ལྷ་ངོ་བསྟན་ཏོ། །དེ་ནས་དག་པར་བརྗོད་པ་ནི། དཀྱིལ་འཁོར་རིམ་པ་གཉིས་ཐབས་དང་ཤེས་རབ་བོ། མུ་ཁྱུད་རྣམས་ནི་ཐུག་པ་མེད་པའི་ཆོས་དབྱིངས་མཐར་ཐུག་པའོ། །ཆོས་ཐམས་ཅད་རང་བཞིན་མཉམ་པ་ཉིད་ཀྱི་ཕྱིར་གྲུ་བཞི་མཉམ་པའོ། །གཞལ་ཡས་ཁང་ནི་བྱང་ཆུབ་ཀྱི་ཕྱོགས་ཀྱི་ཆོས་སུམ་ཅུ་རྩ་བདུན་རྣམ་པར་དག་པའོ། །གཙོ་བོ་རིགས་ལྔ་ནི་བྱང་ཆུབ་ཀྱི་སེམས་དང་རོ་གཅིག་པའོ། །རྣམ་ཐར་བཞི་ནི་ཡུམ་བཞིའོ། །སྟོང་པ་ཉིད་བཅུ་དྲུག་ནི་རྡོ་རྗེ་སེམས་དཔའ་ལ་སོགས་པ་བཅུ་དྲུག་གོ །སེམས་དཔའ་ཆེན་པོ་བཅུ་དྲུག་ནི་བྱམས་པ་ལ་སོགས་པ་བཅུ་དྲུག་གོ །ལྷ་མོ་བརྒྱད་ནི་སྦྱིན་པ་ལ་སོགས་པ་བརྒྱད་དོ། །སྒོ་བ་བཞི་ནི་སྟོབས་དང་ཡེ་ཤེས་ཐབས་དང་ཤེས་རབ་ཀྱི་རྣམ་པར་ཕྱེ་བའོ། །དེ་དག་ནི་དཀྱིལ་འཁོར་དུ་འཇུག་པའི་ཆོ་ག་རྣམས་སོ། །དེ་ནས་བུམ་པའི་དབང་གི་དོན་དུ་མཎྜལ་ཕུལ་ལ། བྱང་ཆུབ་རྡོ་རྗེ་སངས་རྒྱས་ལ། །མཆོད་ཆེན་ཇི་ལྟར་སྩལ་བ་ལྟར། །བདག་
ཀྱང་སྐྱབས་པའི་དོན་གྱི་ཕྱིར། །ནམ་མཁའི་རྡོ་རྗེ་དེང་བདག་སྩོལ། །ལན་གསུམ། སབས་འདིར་མེ་ཏོག་གང་ཕོག་གི་ལྷར་བསྐྱེད་པར་བཤད་ཀྱང༌། དེང་སང་ལག་ལེན་མི་བྱེད་དོ། །དེས་ན་འདི་ལྟར་བྱ་སྟེ། དཀྱིལ་འཁོར་གྱི་ཤར་ཕྱོགས་སུ་ཟླ་བའི་དཀྱིལ་འཁོར་གྱི་སྟེང་དུ། བདག་ཉིད་ཨ་ལས་བྱུང་བའི་བྱང་ཆུབ་ཀྱི་སེམས་རྡོ་རྗེ་སྐུ་མདོག་དཀར་པོ་གཡས་རྡོ་རྗེ་ཐུགས་ཀར་གཏོད་ཅིང་གཡོན་དྲིལ་བུ་དཀུར་བརྟེན་པ་སེམས་དཔའི་སྐྱིལ་མོ་ཀྲུང་གིས་བཞུགས་པ། དར་དང་རིན་པོ་ཆེའི་རྒྱན་ཐམས་ཅད་ཀྱི་བརྒྱན་པ། རང་གི་ཐུགས་ཀར་དང་པོའི་སངས་རྒྱས་དཀར་པོ་ཐུགས་ཀར་ཤེས་རབ་ཀྱི་འཁོར་ལོ་ཨོཾ་ཨ་ར་པ་ཙ་ན་ཡ་ཏེ་ན་མཿ འཁོར་ལོའི་ལྟེ་བར་འཇམ་དཔལ་དཀར་པོ་རལ་གྲི་དང་པོ་ཏི་འཛིན་པ། ཐུགས་ཀར་ཨ་དཀར་པོ། སྤྱི་བོར་ཨོཾ། མགྲིན་པར་ཨཱཿ ཐུགས་ཀར་ཧཱུཾ། ཐུགས་ཀའི་ཧཱུཾ་ལས་འོད་ཟེར་འཕྲོས། ཡེ་ཤེས་སེམས་དཔའ་བཛྲ་ས་མ་ཛཿ ཛཿཧཱུཾ་བཾ་ཧོཿ གཉིས་སུ་མེད་པར་ཐིམ། སྟེང་དུ་བླ་རེ་དང་མཐའ་སྐོར་དུ་མཆོད་པའི་སྤྲིན་གྱི་ཕུང་པོ་བསམ་གྱིས་མི་ཁྱབ་པས་བསྐོར་བར་གྱུར། ལས་ཐམས་ཅད་པའི་བུམ་པ་བླངས་ཏེ། ཇི་ལྟར་བལྟམས་པ་ཙམ་གྱིས་ནི། །སོགས་ཀྱི་མཐར། ཨོཾ་ཡ་མཱནྟ་ཀ་ཧཱུཾ་ཕཊ། ཨོཾ་སརྦ་ཏ་ཐཱ་ག་ཨ་བྷི་ཥེ་ཀ་ཏ་ས་མ་ཡ་ཤྲི་ཡེ་ཧཱུཾ། ཨོཾ་བཛྲ་པུཥྤེ་ཧཱུཾ། སོགས་ཉེར་སྤྱོད་ལྔ་རོལ་མོའི་སྒྲ་དང་བཅས་པའི་མཆོད། ཡང་སྙིང་ག་ནས་འོད་ཟེར་འཕྲོས། སངས་རྒྱས་བྱང་ཆུབ་སེམས་དཔའ་རིགས་པའི་ལྷ་མོའི་ཚོགས་དང་བཅས་པ་ཐམས་ཅད་དབང་གི་དོན་དུ་བཛྲ་ས་མཱ་ཛཿ ཨོཾ་བཛྲ་ཨརྒྷཾ་སྭཱཧཱ། ཨོཾ་བཛྲ་པུཥྤེ་ཧཱུཾ། སོགས་ཉེར་སྤྱོད་ལྔས་མཆོད། དེ་
བཞིན་གཤེགས་པ་ཐམས་ཅད་ཀྱིས་འདི་ལ་མངོན་པར་དབང་བསྐུར་དུ་གསོལ། ཞེས་གསོལ་བ་བཏབ། བཀྲ་ཤིས་ཀུན་གྱི་བཀྲ་ཤིས་པ། །གྲགས་པའི་བཀྲ་ཤིས་སྙན་གྲགས་དགེ། །དབུགས་འབྱིན་ཆེན་པོ་དགའ་སྟོན་ཆེ། །དགའ་ཆེན་རོལ་མོ་ཆེན་པོ་སྟེ། །བཀུར་སྟི་རིམ་གྲོ་ཕུན་སུམ་ཚོགས། །མཆོག་ཏུ་དགའ་བའི་གྲགས་བདག་དཔལ། །མཆོག་ལྡན་མཆོག་སྦྱིན་གཙོ་བོ་སྟེ། །སྐྱབས་ཀྱི་དམ་པ་སྐྱབས་སུ་འོས། །འཇིག་རྟེན་དགྲ་སྟེ་རབ་ཀྱི་མཆོག །འཇིགས་པ་མ་ལུས་སེལ་བ་པོ། །ཞེས་བརྗོད་དེ། ཨོཾ་ཕུན་སུམ་ཚོགས་པ་མངའ་བ་སོགས་ཀྱི་ཤིས་བརྗོད་བྱ། སྭ་བྷཱ་སོགས། སྟོང་པའི་ངང་ལས་རང་ཉིད་ཧཱུཾ་ལས་རྡོ་རྗེ་ཧཱུཾ་གིས་མཚན་པ་ལས་མི་བསྐྱོད་པ་གཡས་ས་གནོན་དང་གཡོན་མཉམ་བཞག་གི་ཕྱག་རྒྱ་མཛད་པ། རྡོ་རྗེའི་སྐྱིལ་མོ་ཀྲུང་གིས་བཞུགས་པ། དར་དང་རིན་པོ་ཆེའི་རྒྱན་གྱིས་བརྒྱན་པ། རང་གི་ཐུགས་ཀར་དང་པོའི་སངས་རྒྱས་སྔོན་པོ་ཐུགས་ཀར་ཤེས་རབ་ཀྱི་འཁོར་ལོ། ཨོཾ་དུ་ཁ་ཚེ་ད་ཡ་ཏེ་ན་མཿ འཁོར་ལོའི་ལྟེ་བར་འཇམ་དཔལ་སྔོན་པོ་རལ་གྲི་དང་རྡོ་རྗེ་འཛིན་པ། ཐུགས་ཀར་ཧཱུཾ་སྔོན་པོ། སྤྱི་བོར་ཨོཾ། མགྲིན་པར་ཨཱཿ ཐུགས་ཀར་ཧཱུཾ། ཐུགས་ཀའི་ཧཱུཾ་ལས་འོད་འཕྲོས། ཡེ་ཤེས་སེམས་དཔའ་བཛྲ་ས་མཱ་ཛཿ ཛཿཧཱུཾ་བཾ་ཧོཿ གཉིས་སུ་མེད་པར་ཐིམ། འཁོར་གྱི་བུམ་པ་བཅས་ཡོད་ན། སབས་འདིར་བུམ་ཆུ་རྣམ་རྒྱལ་དུ་བསྡུའོ། །སྐུ་གསུམ་དམ་ཚིག་ལས་བྱུང་བ། །ཡེ་ཤེས་བདུད་རྩི་དྲི་མ་མེད། །བཅོམ་ལྡན་མི་བསྐྱོད་རྡོ་རྗེ་ཡིས། །དག་པ་ལྷ་ཡི་ཆུ་དབང་བསྐུར། །ཨ་ཨཱཿ ནས། གརྦྷ་ཨཱཿ ཨོཾ་མཉྫུ་ཤྲཱི་བཛྲ་ཨ་བྷི་ཥིཉྩ་ཧཱུཾ། ཞེས་དབང་བསྐུར་སྐུ་གང་དྲི་མ་དག །ཆུའི་ལྷག་མ་ཡར་ལུད་པ་
ལས། དེ་བཞིན་གཤེགས་པ་རིགས་ལྔས་དབུ་རྒྱན། དེ་ལྟར་ན་ཆུའི་དབང་བསྐུར་བས། ཀུན་གཞི་རྣམ་ཤེས་གནས་གྱུར་ཏེ་མེ་ལོང་ལྟ་བུའི་ཡེ་ཤེས་མངོན་དུ་བྱས་སོ། །ཨོཾ་སྭ་བྷཱ་ཝ་སོགས། སྟོང་པའི་ངང་ལས་རང་ཉིད་ཏྲཱཾ་ལས་རིན་པོ་ཆེ་ཏྲཱཾ་གིས་མཚན་པ་ལས། རིན་ཆེན་འབྱུང་ལྡན་སེར་པོ་གཡས་མཆོག་སྦྱིན་དང༌། གཡོན་མཉམ་གཞག་མཛད་པ། རྡོ་རྗེ་སྐྱིལ་མོ་ཀྲུང་གིས་བཞུགས་པ། དར་དང་རིན་པོ་ཆེའི་རྒྱན་གྱིས་བརྒྱན་པ། རང་གི་ཐུགས་ཀར་དང་པོ་སངས་རྒྱས་སེར་པོ། ཐུགས་ཀའི་ཤེས་རབ་ཀྱི་འཁོར་ལོ། ཨོཾ་བཱ་གི་ཤྭ་ར་ཡ་ཏེ་ན་མཿ འཁོར་ལོའི་ལྟེ་བར་འཇམ་དཔལ་སེར་པོ་རལ་གྲི་དང་རིན་པོ་ཆེ་འཛིན་པ། ཐུགས་ཀར་ཏྲཱཾ་སེར་པོ། སྤྱི་བོར་ཨོཾ། མགྲིན་པར་ཨཱཿ ཐུགས་ཀར་ཧཱུཾ། ཐུགས་ཀའི་ཧཱུཾ་ལས་འོད་འཕྲོས་ཡེ་ཤེས་སེམས་དཔའ་བཛྲ་ས་མཱ་ཛཿ ཛཿཧཱུཾ་བཾ་ཧོཿ གཉིས་སུ་མེད་པར་ཐིམ། ཨོཾ་སྭ་བྷཱ་ཝ་སོགས། དབུ་རྒྱན་མི་དམིགས་ཏེ། སྟོང་པའི་ངང་ལས་ཨོཾ་ཧཱུཾ་ཏྲཱཾ་ཧྲཱིཿཨཱཿལས་རྒྱལ་བ་རིགས་ལྔའི་སྐུར་གྱུར། ཡེ་ཤེས་སེམས་དཔའ་རྒྱལ་བ་རིགས་ལྔ་བཛྲ་ས་མཱ་ཛཿ ཛཿཧཱུཾ་བཾ་ཧོཿ ཨོཾ་ཧཱུཾ་ཏྲཱཾ་ཧྲཱིཿཨཱཿ ལན་མང་དུ་བཟླས། ཐོར་ཚུགས་ཅོད་པན་གྱིས་བརྒྱན་པ། །སངས་རྒྱས་ཀུན་གྱིས་རབ་བསྔགས་པའི། །རིན་ཆེན་དབུ་རྒྱན་དམ་པ་དང༌། །དར་དབྱངས་དབང་བསྐུར་སྦྱིན་པར་བྱ། །ཨ་ཨཱ་ནས། གརྦྷ་ཨཱཿ ཨོཾ་རཏྣ་ཀུ་ལ་མུ་ཀུ་ཊ་ཨ་བྷི་ཥིཉྩ་ཏྲཱཾཾ། དེ་ལྟར་ན་ཅོད་པན་གྱི་དབང་བསྐུར་བས། ཉོན་ཡིད་གནས་གྱུར་ཏེ། མཉམ་པ་ཉིད་ཀྱི་ཡེ་ཤེས་མངོན་དུ་བྱས་སོ། །དེ་བཞིན་དུ། ཨོཾ་སྭ་བྷཱ་ཝ་སོགས། བདག་དང་དབང་རྫས་རྡོ་རྗེའི་མི་དམིགས་ཏེ། སྟོང་པའི་ངང་ལས་ཧྲཱིཿལས་པདྨ་ཧྲཱིཿས་མཚན་པ་
ལས་འོད་དཔག་མེད་དམར་པོ། མཉམ་བཞག་གི་ཕྱག་རྒྱ་མཛད་པ། རྡོ་རྗེ་སྐྱིལ་མོ་ཀྲུང་གི་བཞུགས་པ། དར་དང་རིན་པོ་ཆེའི་རྒྱན་གྱིས་བརྒྱན་པ། རང་གི་ཐུགས་ཀར་དང་པོའི་སངས་རྒྱས་དམར་པོ། ཐུགས་ཀར་ཤེས་རབ་ཀྱི་འཁོར་ལོ། ཨོཾ་བཛྲ་ཏིཀྵྞ་ཡ་ཏེ་ན་མཿ འཁོར་ལོའི་ལྟེ་བར་འཇམ་དཔལ་དམར་པོ་རལ་གྲི་དང་པདྨ་འཛིན་པ། ཐུགས་ཀར་ཧྲཱིཿདམར་པོ། སྤྱི་བོ་ཨོཾ། མགྲིན་པར་ཨཱཿ ཐུགས་ཀར་ཧཱུཾ། ཐུགས་ཀའི་ཧཱུཾ་ལས་འོད་འཕྲོས་ཡེ་ཤེས་སེམས་དཔའ་བཛྲ་ས་མཱ་ཛཿ ཛཿཧཱུཾ་བཾ་ཧོཿ གཉིས་སུ་མེད་པར་ཐིམ། དབང་རྫས་ཀྱི་འོད་དཔག་མེད་ཞུ་བ་ལས་རྡོ་རྗེར་གྱུར། ཨ་ཨཱ་སོགས། གརྦྷ་ཨཱཿ སངས་རྒྱས་ཀུན་གྱི་རྡོ་རྗེའི་དབང༌། །དེ་རིང་ཁྱོད་ལ་སྦྱིན་པར་བྱ། །སངས་རྒྱས་ཀུན་ཏུ་རབ་སྒྲུབ་ཕྱིར། །རྡོ་རྗེ་འདི་ནི་ཁྱོད་ཀྱིས་ལོངས། །ཨོཾ་བཛྲ་ཨ་དྷི་པ་ཏི་སྟྭཾ། ཨ་བྷི་ཥིཉྩ་ཧཱུཾ་ཏིཥྛ་བཛྲ་ས་མཱ་ཡ། དེ་ལྟར་ན་རྡོ་རྗེ་དབང་སྐུར་བས་ཡིད་ཀྱིས་རྣམ་ཤེས་གནས་གྱུར་ཏེ་སོ་སོར་རྟོག་པའི་ཡེ་ཤེས་མངོན་དུ་བྱས་སོ། །སྭ་བྷཱ་ཝ་ནས། བདག་དང་དབང་རྫས་དྲིལ་བུ་མི་དམིགས་ཏེ། སྟོང་པའི་ངང་ལས་ཨ་ལས་རྒྱ་གྲམ་ཨས་མཚན་པ་ལས། དོན་ཡོད་གྲུབ་པ་ལྗང་ཁུ་གཡས་སྐྱབས་སྦྱིན་དང༌། གཡོན་མཉམ་གཞག་གི་ཕྱག་རྒྱ་མཛད་པ། རྡོ་རྗེ་སྐྱིལ་མོ་ཀྲུང་གིས་བཞུགས་པ། དར་དང་རིན་པོ་ཆེའི་རྒྱན་གྱིས་བརྒྱན་པ། རང་གི་ཐུགས་ཀར་དང་པོའི་སངས་རྒྱས་ལྗང་ཁུ། ཐུགས་ཀར་ཤེས་རབ་ཀྱི་འཁོར་ལོ། ཨོཾ་ཛྙཱ་ན་ཀཱ་ཡ་ཡེ་ཏེ་ན་མཿ འཁོར་ལོའི་ལྟེ་བར་འཇམ་དཔལ་ལྗང་ཁུ་རལ་གྲི་དང་རྡོ་རྗེ་རྒྱ་གྲམ་འཛིན་པ། ཐུགས་ཀར་ཨ་ལྗང་ཁུ། སྤྱི་བོར་ཨོཾ། མགྲིན་པར་ཨཱཿ ཐུགས་
ཀར་ཧཱུཾ། ཐུགས་ཀའི་ཧཱུཾ་ལས་འོད་འཕྲོས། ཡེ་ཤེས་སེམས་དཔའ་བཛྲ་ས་མཱ་ཛཿ ཛཿཧཱུཾ་བཾ་ཧོཿ གཉིས་སུ་མེད་པར་ཐིམ། དབང་རྫས་ཀྱི་དོན་ཡོད་གྲུབ་པ་ཞུ་བ་ལས་དབང་རྫས་དྲིལ་བུར་གྱུར། ཨ་ཨཱ་ནས། གརྦྷ་ཨཱཿ ཤེས་རབ་ཐབས་དང་ལྡན་པ་ཡིས། །འགྲོ་དོན་མཉམ་མེད་བྱེད་པ་དང༌། །མཆོད་པའི་ལས་རྣམས་རྫོགས་པའི་ཕྱིར། །རྡོ་རྗེ་ལས་ཀྱི་དབང་བསྐུར་རོ། །ཨོཾ་ཨ་ཀཱ་རོ་མུ་ཁཾ་སརྦ་དྷརྨ་ཎཾ་ཨདྱ་ནུཏྤནྣ་ཏྭཏ། ཞེས་དྲིལ་བུ་འཁྲོལ་ལོ། །དེ་ལྟར་ན་དྲིལ་བུའི་དབང་བསྐུར་བ་ཐོབ་པས། དབང་ཤེས་ལྔ་གནས་གྱུར་ཏེ། བྱ་བ་གྲུབ་པའི་ཡེ་ཤེས་མངོན་དུ་བྱས་སོ། །ཨོཾ་སྭ་བྷཱ་ཝ་སོགས། སྟོང་པའི་ངང་ལས་རང་ཉིད་ཨོཾ་ལས་འཁོར་ལོ་ཨོཾ་གྱིས་མཚན་པ་ལས། རྣམ་པར་སྣང་མཛད་སྐུ་མདོག་དཀར་པོ། ཕྱག་གཉིས་བྱང་ཆུབ་མཆོག་གི་ཕྱག་རྒྱ་མཛད་པ། རྡོ་རྗེ་སྐྱིལ་མོ་ཀྲུང་གིས་བཞུགས་པ་དར་དང་རིན་པོ་ཆེའི་རྒྱན་གྱིས་བརྒྱན་པ། རང་གི་ཐུགས་ཀར་དང་པོའི་སངས་རྒྱས་དཀར་པོ། ཐུགས་ཀར་ཤེས་རབ་ཀྱི་འཁོར་ལོ། ཨོཾ་པྲཛྙཱ་ཛྙཱ་མརྟ་ཡེ་ཡ་ཏེ་ན་མཿ འཁོར་ལོའི་ལྟེ་བར་འཇམ་དཔལ་དཀར་པོ་རལ་གྲི་དང་འཁོར་ལོ་འཛིན་པ། ཐུགས་ཀར་ཨཱཿདཀར་པོ། སྤྱི་བོར་ཨོཾ། མགྲིན་པར་ཨཱཿ ཐུགས་ཀར་ཧཱུཾ། ཐུགས་ཀའི་ཧཱུཾ་ལས་འོད་འཕྲོས་ཡེ་ཤེས་སེམས་དཔའ་བཛྲ་ས་མཱ་ཛཿ ཛཿཧཱུཾ་བཾ་ཧོཿ གཉིས་སུ་མེད་པར་ཐིམ། རྣམ་སྣང་ཀྱི་རང་བཞིན་མིང་ཚིག་གིས་ཀྱང་དབང་བསྐུར་བར་གྱུར། རྡོ་རྗེའི་མིང་གི་དབང་བསྐུར་བས། །བྱང་ཆུབ་སྙིང་པོའི་བར་དུ་ནི། །ཅིས་ཀྱང་མི་ཆོད་མི་ཤིག་པ། །རྡོ་རྗེའི་མིང་དུ་རབ་ཏུ་སྒྲགས། །ཨ་ཨཱ་ནས། ཛྙཱ་ན་
གརྦྷ་ཨཱཿ ཨོཾ་བཛྲ་སཏྭ་ཏྭཾ། ཨ་བྷི་ཥིཉྩ་མཾ། བཛྲ་ནཱ་མ་ཨ་བྷི་ཥེ་ཀ་ཏ། ཀྱཻ་དཔལ་འཇམ་པའི་རྡོ་རྗེ་ཞེས་བྱ་བའི་དེ་བཞིན་གཤེགས་པའོ། །དེ་ལྟར་མིང་གི་དབང་བསྐུར་བས། གཟུགས་ཚོར་འདུ་ཤེས་འདུ་བྱེད་རྣམས་གནས་གྱུར་ཏེ། ཆོས་ཀྱི་དབྱིངས་ཀྱི་ཡེ་ཤེས་མངོན་དུ་བྱས་སོ། །དེ་དག་ནི་རིག་པའི་དབང་ལྔ་སྟེ་སློབ་མའི་དབང་བསྐུར་བའོ། །གཙོ་བོ་ཁྱོད་ཀྱི་བཀའ་དྲིན་གྱིས། །བདག་དང་གཞན་དོན་བྱེད་པས་ན། །ཕྱིར་མི་ལྡོག་པའི་དབང་བསྐུར་བ། །ཐུགས་རྗེའི་བདག་པོས་བདག་ལ་སྩོལ། །ཅེས་ལན་གསུམ་གསོལ་བ་བཏབ། འགྲུབ་ན་དངོས་སུ་དབང་སྟེགས་སྒོ་གཅིག་པ་བཤམ། མ་གྲུབ་ན་དམིགས་བསམ་གྱིས་རུང་སྟེ། དཀྱིལ་འཁོར་གྱི་ཤར་ཕྱོགས་སུ་ཁྲུས་ཀྱི་ཁང་པ་གཞལ་མེད་ཁང་སྒོ་གཅིག་ནུབ་ཏུ་བསྟན་པ། དབུས་སུ་དབང་སྟེགས་ཁྲུས་གདན་གྱི་སྟེང་དུ། པདྨ་ཟླ་བ་དར་གྱི་གློ་གདན་རྣམས་ཀྱི་གདན་ལ་རང་སེམས་ཨ་ཡིག་དཀར་པོ་ཡོངས་སུ་གྱུར་པ་ལས། རང་ཉིད་གཞིའི་སངས་རྒྱས་རྣམ་པར་སྣང་མཛད་ཆེན་པོ་ཞེས་པ་ནས། སྐུ་མདོག་དཀར་པོ་ཞལ་བཞི་པ་རལ་བའི་ཅོན་པན་ཅན། བྱང་ཆུབ་མཆོག་གི་ཕྱག་རྒྱ་མཛད་པ། ཞབས་རྡོ་རྗེའི་སྐྱིལ་མོ་ཀྲུང་གིས་བཞུགས་པ། དར་གྱི་ན་བཟའ་ཅན། རྒྱན་སྤངས་པའོ། །དེའི་ཐུགས་ཀར་ཟླ་བ་ལ་གནས་པའི་དྷཱིཿཡིག་དཀར་པོ་ཡོངས་སུ་གྱུར་པ་ལས། དང་པོའི་སངས་རྒྱས་ཞལ་ལྔ་པ། ཕྱག་བརྒྱད་པ། སྐུ་ལུས་དང་སྟེང་ཞལ་དཀར་བ། རྩ་ཞལ་སྔོན་པོ། གཡས་སེར། རྒྱབ་དམར། གཡོན་ལྗང་བ། ཕྱག་གཡས་བཞིས་རལ་གྲི། གཡོན་བཞིས་ཤེས་རབ་ཀྱི་ཕ་རོལ་ཏུ་ཕྱིན་པའི་པོ་ཏི་འཛིན་པ། ཞབས་རྡོ་རྗེའི་སྐྱིལ་ཀྲུང་གིས་བཞུགས་
པ། དར་གྱི་ན་བཟའ་དང་བཅས་པའི་རྒྱན་གྱིས་བརྒྱན་པའོ། །དེའི་ཐུགས་ཀར་ཤེས་རབ་ཀྱི་འཁོར་ལོ་རྩིབས་དྲུག་པའི་རྩིབས་བཞི་ཕྱོགས་མདོག་དང༌། ཤར་སྟོད་ཤར་སྨད་ཀྱི་རྩིབས་དང༌། ལྟེ་བ་དང༌། ཕྱི་རོལ་དང༌། ནང་གི་མུ་ཁྱུད་བཞི་པ་རྣམས་དཀར་པོ། དེའི་ལྟེ་བར་ཡང་ཨ་ཡིག་དཀར་པོའོ། །དེའི་འོད་ཟེར་ལས་སྤྲུལ་པའི་ཡི་གེ་ནི། ནང་གི་མུ་ཁྱུད་དང་པོ་ལ། ཨོཾ་སརྦ་དྷརྨཱ་ཨ་བྷ་ཝ། སྭ་བྷཱ་ཝ་བི་ཤུདྡྷེ་བཛྲ་ཙཀྵུ་ཨ་ཨཱ། ཨཾ་ཨཱཿ མུ་ཁྱུད་གཉིས་པ་ལ། ཨ་ཨཱ་ཨི་ཨཱི་ཨུ་ཨཱུ་ཨེ་ཨཻ་ཨོ་ཨཽ་ཨཾ་ཨཿ རྩིབས་དྲུག་གི་ཤར་རྩིབས་ལ། ཨོཾ་དུཿཁ་ཚེ་ད་ཡ་ཏེ་ན་མཿ སྔོན་པོ། ལྷོ་རྩིབས་ལ། ཨོཾ་ཝ་གི་ཤོ་རི་ཏེ་ན་མཿ སེར་པོ། ནུབ་རྩིབས་ལ། ཨོཾ་བཛྲ་ཏིཀྵྞ་ཡ་ཏེ་ན་མཿ དམར་པོ། བྱང་རྩིབས་ལ། ཨོཾ་ཛྙཱ་ན་ཀ་ཡ་ཡ་ཏེ་ན་མཿ ལྗང་ཁུ། ཤར་སྟོད་ལ། ཨོཾ་པྲཛྙཱ་ཛྙཱ་ན་མུརྟི་ཡེ་ཡ་ཏེ་ན་མཿ དཀར་པོ། ཤར་སྨད་ལ། ཨོཾ་ཨ་ར་པ་ཙ་ན་མཿ དཀར་པོ། ཕྱི་རོལ་མུ་ཁྱུད་གསུམ་པ་ལ། ཨ་ཨཱཿ སརྦ་ཏ་ཐཱ་ག་སོགས་ནས། ཛྙཱ་ན་གརྦྷ་ཨཱཿ མུ་ཁྱུད་བཞི་པ་ལ། ཀ་ཁ་ག་གྷ་ང༌། ཙ་ཚ་ཛ་ཛྷ་ཉ། ཊ་ཋ་ཌ་ཌྷ་ཎ། ཏ་ཐ་ད་དྷ་ན། པ་ཕ་བ་བྷ་མ། ཡ་ར་ལ་ཝ། ཤ་ཥ་ས་ཧ། འཁོར་ལོའི་ལྟེ་བའི་ཨ་ཡིག་ཡོངས་སུ་གྱུར་པ་ལས་རང་ཉིད་བཅོམ་ལྡན་འདས་ཡེ་ཤེས་སེམས་དཔའ་འཇམ་དཔལ་ཞལ་དྲུག་པ། ཕྱག་གཉིས་ལ་སྐུ་ལུས་དང་སྟེང་ཞལ་ཉིས་རྩེགས་དཀར་བ། རྩ་ཞལ་སྔོན་པོ། གཡས་སེར། རྒྱབ་དམར། གཡོན་ལྗང་བ། ཕྱག་གཉིས་མཉམ་བཞག་གི་ཕྱག་རྒྱ་མཛད་པའི་གཡས་པས་ཨུཏྤལ་དམར་པོ་དང༌། གཡོན་པས་སྔོན་པོའི་རྩ་བ་འཛིན་ཅིང༌། སྡོང་པོ་གཡས་གཡོན་
ཏུ་རྒྱས་པ། མེ་ཏོག་སྙན་གྱིས་ཐད་ཀར་ཁ་ཕྱེ་བའི་སྟེང་ན་པོ་ཏི་འཛིན་པ། ཞབས་རྡོ་རྗེའི་སྐྱིལ་མོ་ཀྲུང་གིས་བཞུགས་པ་དར་སྣ་ཚོགས་པའི་ན་བཟའ་དང༌། ཨིནྡྲ་ནཱི་ལའི་གཙུག་ཕུད་ལ་སོགས་པ་རིན་པོ་ཆེའི་རྒྱན་ཐམས་ཅད་ཀྱིས་བརྒྱན་པ་ཉི་མའི་འཆར་ཀ་ལྟ་བུའི་འོད་ཟེར་འཕྲོས་པ། སྐུའི་མགྲིན་པ་མན་ཆད་ལུང་བུ་ཡན་ཆད་དུ་སྤྲུལ་པའི་སྐུ་དཔག་ཏུ་མེད་པས་བལྟམས་པའོ། །དེའི་ཐུགས་ཀར་ཡང་ཟླ་བའི་དཀྱིལ་འཁོར་གྱི་སྟེང་དུ་སྐྱེ་མེད་ཀྱི་ངོ་བོ་ཨ་ཡིག་དཀར་པོ་མི་ཤེས་པའི་རི་བོ་འཇོམས་པར་བྱེད་པའོ། །ཞེས་པའི་བར་དང་པོ་སྦྱོར་བ་བཞིན་ནོ། །ཆུ་དབང་ནས། འདིས་བར་དུ་སྙིང་གའི་སེམས་དཔའ་སུམ་བརྩེགས་བསྒོམ་པ་འདི་རྣམས་གཞུང་ལས་མི་གསལ་མོད་མན་ངག་ལས་འབྱུང་བ་བྱིན་རླབས་ཀྱི་སྒོ་གལ་པོ་ཆེ་ཡིན་པས་མ་ཆད་པར་བྱའོ། །རང་གི་སྟེང་དུ་བླ་བྲེ། གཡས་སུ་གདུགས་དཀར་གཡོན་དུ་རྒྱལ་མཚན་མཐའ་སྐོར་དུ་དུང་དང་རྔ་བོ་ཆེ་ལ་སོགས་པ་མཆོད་པའི་སྤྲིན་གྱི་ཕུང་པོས་སྟིབས་པར་གྱུར། དབང་གི་ལྷ་རྣམས་ཀྱིས་ཤིས་པ་བརྗོད་དེ། འདི་ལྟར་སངས་རྒྱས་བཅོམ་ལྡན་འདས། །རྫོགས་པའི་སངས་རྒྱས་ཨ་ལས་བྱུང༌། །ཨ་ནི་ཡིག་འབྲུ་ཀུན་གྱི་མཆོག །དོན་ཆེན་ཡི་གེ་དམ་པ་ཡིན། ཁོང་ནས་འབྱུང་བ་སྐྱེ་བ་མེད། །ཚིག་ཏུ་བརྗོད་པ་སྤངས་པ་སྟེ། །བརྗོད་པ་ཀུན་གྱི་རྒྱུ་ཡི་མཆོག །ཚིག་ཀུན་རབ་ཏུ་གསལ་བར་བྱེད། །མཆོད་པ་ཆེན་པོ་འདོད་ཆགས་ཆེ། །སེམས་ཅན་ཐམས་ཅད་དགའ་བར་བྱེད། །མཆོད་པ་ཆེན་པོ་ཞེ་སྡང་ཆེ། །ཉོན་མོངས་ཀུན་གྱི་དགྲ་ཆེ་བ། །མཆོད་པ་ཆེན་པོ་གཏི་མུག་ཆེ། །གཏི་མུག་བློ་སྟེ་གཏི་མུག་སེལ། །མཆོད་པ་ཆེན་པོ་ཁྲོ་བ་ཆེ། ཁྲོ་བ་ཆེན་པོ་དགྲ་ཆེ་བ། །མཆོད་པ་ཆེན་པོ་ཆགས་པ་ཆེ། །ཆགས་པ་ཐམས་
ཅད་སེལ་བར་བྱེད། །འདོད་པ་ཆེན་པོ་བདེ་བ་ཆེ། །དགའ་བ་ཆེན་པོ་མགུ་བ་ཆེ། །གཟུགས་ཆེ་ལུས་ཀྱང་ཆེ་བ་སྟེ། ཁ་དོག་ཆེ་ཞིང་ལུས་ཆེ་བ། །མིང་ཡང་ཆེ་ཞིང་རྒྱ་ཆེ་བ། །དཀྱིལ་འཁོར་ཆེན་པོ་ཡངས་པ་ཡིན། །ཤེས་རབ་མཚོན་ཆེན་འཆང་བ་སྟེ། །ཉོན་མོངས་ལྕགས་ཀྱུ་ཆེ་བའི་མཆོག །གྲགས་ཆེན་སྙན་གྲགས་ཆེན་པོ་སྟེ། །སྣང་བ་ཆེན་པོ་གསལ་བ་ཆེ། །མཁས་པ་སྒྱུ་འཕྲུལ་ཆེན་པོ་འཆང༌། །སྒྱུ་འཕྲུལ་ཆེན་པའི་དོན་གྲུབ་པ། །སྒྱུ་འཕྲུལ་ཆེན་པོའི་དགའ་བས་དགའ། །སྒྱུ་འཕྲུལ་ཆེན་པོ་མིག་འཕྲུལ་ཅན། །སྦྱིན་བདག་ཆེན་པོ་གཙོ་བོ་སྟེ། །ཚུལ་ཁྲིམས་ཆེན་པོ་འཆང་བའི་མཆོག །བཟོད་ཆེན་འཆང་བ་བརྟེན་པ་པོ། །བརྩོན་འགྲུས་ཆེན་པོ་བརྟུལ་བ་ཡིན། །བསམ་གཏན་ཆེན་པོ་ཏིང་འཛིན་གནས། །ཤེས་རབ་ཆེན་པོའི་ལུས་འཆང་བ། །སྟོབས་པོ་ཆེ་ལ་ཐབས་ཆེ་བ། །སྨོན་ལམ་ཡེ་ཤེས་རྒྱ་མཚོ་སྟེ། །བྱམས་ཆེན་རང་བཞིན་དཔག་ཏུ་མེད། །སྙིང་རྗེ་ཆེན་པོ་བློ་ཡི་མཆོག །ཤེས་རབ་ཆེན་པོ་བློ་ཆེན་ལྡན། །མཁས་པ་ཆེན་པོ་ཐབས་ཆེ་བ། །རྫུ་འཕྲུལ་ཆེན་པོ་སྟོབས་དང་ལྡན། །ཤུགས་ཆེན་མགྱོགས་པ་ཆེན་པོ་སྟེ། །རྫུ་འཕྲུལ་ཆེན་པོ་ཆེར་གྲགས་པ། །སྟོབས་ཆེན་ཕ་རོལ་གནོན་པ་པོ། །སྲིད་པའི་རི་བོ་ཆེན་པོ་འཇོམས། །མཁྲེགས་ཤིང་རྡོ་རྗེ་ཆེན་པོ་འཆང༌། །དྲག་པོ་ཆེན་པོ་དྲག་ཤུལ་ཆེ། །འཇིགས་ཆེན་འཇིགས་པར་བྱེད་པ་པོ། །མགོན་པོ་རིགས་མཆོག་ཆེན་པོ་སྟེ། །བླ་མ་གསང་སྔགས་ཆེ་བའི་མཆོག །ཐེག་པ་ཆེན་པོའི་ཚུལ་ལ་གནས། །ཐེག་པ་ཆེན་པོའི་ཚུལ་གྱི་མཆོག །
ཅེས་པའི་བར་བརྗོད་པ། ཨོཾ་ཕུན་སུམ་ཚོགས་པ་མངའ་བ་སོགས་དང༌། དྲིལ་བུ་དཀྲོལ། མེ་ཏོག་གཏོར། ཇི་ལྟར་བལྟམས་པ་སོགས་དང༌། རྩ་སྔགས་ཀྱི་མཐར། ཨོཾ་མཉྫུ་ཤྲཱི་བཛྲ་ཨ་བྷི་ཥིཉྩ་ཧཱུཾ། འཁོར་གྱི་ལྷ་སོ་སོའི་བུམ་པ་ཡོད་ན། སྒོམ་པའི་བར་དུ་རིམ་པས་དབང་བསྐུར་བ་བྱ་ལ། རྣམ་རྒྱལ་བུམ་པ་ལས་མེད་ན། ཚིགས་དང་སྔགས་སོགས་གོང་དུ་བཤད་པ་ལྟ་བུའི་མཇུག་ཏུ། ཧཱུཾ་ཨཱཾ་ཧྲཱི་ཨ་བཛྲ་ཨ་བྷི་ཥིཉྩ། ཨ་ཨཱ་ཨི་ཨཱི་བཛྲ་ཨ་བྷི་ཥིཉྩ་ཨ་ཨཱཿ ཨི་ཨཱི་ཨུ་ཨཱུ་ཨེ་ཨཻ་ཨོ་ཨཽ་ཨཾ་ཨཿ ཨ་ཨཱ་ཨེ་ཨཻ་བཛྲ་ཨ་བྷི་ཥིཉྩ། ལཱ་མཱ་གི་ནྲྀ་བཛྲ་ཨ་བྷི་ཥིཉྩ། དྷུ་པཱུ་དཱི་ག་བཛྲ་ཨ་བྷི་ཥིཉྩ་ཨ། བཅུ་དྲུག་གི་མཐར། བཛྲ་ཨ་བྷི་ཥིཉྩ་ཛཿཧཱུཾ་བཾ་ཧོཿ བཛྲ་ཨ་བྷི་ཥིཉྩ། དེ་ནས་བདག་འཇུག་ལ་འཇམ་དཔལ་གྱི་སྐུ་གཟུགས་སྤྱི་བོར་བཞག་པར་མོས་པས་ཆོག་ལ། སློབ་མ་དབང་བསྐུར་ལ་དངོས་སུ་འཇུག་དགོས། དཀྱིལ་འཁོར་གྱི་ལྷ་ཚོགས་རྣམས་ལས་ལྷ་ཚོགས་གཉིས་པ་ཆད་ནས་དེ་རང་ལ་ཐིམ། ཨོཾ་མཉྫུ་ཤྲཱི་མཧཱ་སུ་ཁ། བཛྲ་སཏྭ་ཛཿཧཱུཾ་བཾ་ཧོཿ སུ་ར་ཏེ་ས་མ་ཡེ་སྟྭཾ། དེ་རིང་རྡོ་རྗེ་སློབ་དཔོན་གྱུར། །སློབ་མའི་ཚོགས་རྣམས་བསྡུ་བར་གྱིས། །དེ་ནས་དམ་ཚིག་གསུམ་སྦྱིན་པ་ནི། ཧཱུཾ་ལས་བྱུང་བའི་རྡོ་རྗེ། འདི་དེ་སངས་རྒྱས་ཐམས་ཅད་ཉིད། །འཇམ་པའི་རྡོ་རྗེ་ཕྱག་ན་གནས། ཁྱོད་ཀྱིས་ཀྱང་ནི་རྟག་ཏུ་བཅངས། །འཇམ་པའི་རྡོ་རྗེའི་བརྟུལ་ཞུགས་བརྟན། །ཨོཾ་སརྦ་ཏ་ཐཱ་ག་ཏ་སིདྡྷི་བཛྲ་ས་མ་ཡ། ཏིཥྛ་ཨེ་ཥ་སྟྭཾ་དྷ་ར་ཡ་མི། ཧཿཧཿཧཿཧཿ ཧཱི་ཧཱི་ཧཱི་ཧཱི་ཧཱུཾ། ཐོག་མཐའ་མེད་པའི་སེམས་དཔའ་ནི། །འཇམ་པའི་རྡོ་རྗེ་དགའ་བ་ཆེ། །ཀུན་ཏུ་བཟང་པོ་ཀུན་བདག་ཉིད། །རྡོ་རྗེ་སྙེམས་ཚུལ་བདག་པོའི་བདག །བཅོམ་
ལྡན་འདས་དཔལ་མཆོག་དང་པོའི་སྐྱེས་བུའོ། །ཨོཾ་མཧཱ་བཛྲ་ཧཱུཾ། ཨ་ལས་བྱུང་བའི་དྲིལ་བུ། འདི་དེ་སངས་རྒྱས་ཐམས་ཅད་ཀྱི། །ཤེས་རབ་དབྱིངས་ཀྱི་རྗེས་འགྲོར་བཤད། ཁྱོད་ཀྱིས་ཀྱང་ནི་རྟག་ཏུ་བཅངས། །བྱང་ཆུབ་མཆོག་ཏུ་རྒྱལ་བ་བཞེད། །སྲིད་པ་ངོ་བོ་ཉིད་ཀྱིས་དག །ངོ་བོ་ཉིད་ཀྱིས་སྲིད་བྲལ་བྱས། །རང་བཞིན་དག་པའི་སེམས་ལྡན་པ། །སྲིད་པ་དག་པ་མཆོག་ཏུ་བྱེད། །ཨོཾ་བཛྲ་གྷཎྜེ་ཨ། རྡོ་རྗེ་དྲིལ་བུ་སྙིང་གར་བསྣོལ། རང་ཉིད་ལྷ་སྐུ་ཕྱག་རྒྱ་ཆེན་པོ་ཐབས་དང་ཤེས་རབ་ཟུང་འཇུག་ཏུ་གྱུར། སྲིད་པའི་བདེ་བ་ཤིན་ཏུ་ཆུང༌། །སྡུག་བསྔལ་ཆེན་པོ་དག་བྱའི་ཕྱིར། །ཤིན་ཏུ་བདེ་བ་དམ་པའི་ཐབས། །དམ་ཚིག་འདི་ནི་ཁྱོད་ཀྱིས་ལོངས། །འདོད་པའི་ལོངས་སྤྱོད་ཐམས་ཅད་ནི། །ཅི་འདོད་པར་ནི་བསྟེན་བཞིན་དུ། །རང་གི་ལྷ་ཡི་སྦྱོར་བ་ཡིས། །བདག་དང་གཞན་ལ་མཆོད་པར་གྱིས། །ཨོཾ་བཛྲ་པུཥྤེ་ཧཱུཾ། སོགས་མཆོད་པ་ལྔས་མཆོད། ཨོཾ་སུ་པྲ་ཏིཥྛ་བཛྲ་སྭཱཧཱ། ཞེས་མེ་ཏོག་དོར་ལ་རོལ་མོའི་སྒྲ་བྱའོ། །དེ་ནི་རྡོ་རྗེ་སློབ་དཔོན་གྱིས་དབང་དངོས་ཡིན་ལ། མཐའ་རྟེན་དང་རྗེས་གནང་ནི། ཇི་ལྟར་མིག་མཁན་རྒྱལ་པོ་ཡིས། །འཇིག་རྟེན་རབ་རིབ་བསལ་བ་ལྟར། །བུ་ཁྱོད་ཀྱི་ནི་མི་ཤེས་པའི། །རབ་རིབ་རྒྱལ་བ་རྣམས་ཀྱིས་བསལ། །ཨོཾ་བཛྲ་ནཻ་ཏྲ་ཨ་པ་ཧ་ར་བ་ཊ་ལཾ་ཧྲཱིཿ ཞེས་མིག་ཐུར་དང༌། ཆོས་རྣམས་གཟུགས་བརྙན་ལྟ་བུ་སྟེ། །གསལ་ཞིང་དག་ལ་རྙོག་པ་མེད། །བཟུང་དུ་མེད་ཅིང་བརྗོད་དུ་མེད། །རྒྱུ་དང་ལས་ལས་ཀུན་ཏུ་འབྱུང༌། །ངོ་བོ་ཉིད་མེད་གནས་མེད་པ། །དེ་ལྟར་ཆོས་རྣམས་ཤེས་ཀྱིས་
ལ། །སེམས་ཅན་དོན་ནི་མཉམ་མེད་བྱོས། །འོན་ཀྱང་སངས་རྒྱས་སྲས་སུ་སྐྱེས། །མེ་ལོང་དང༌། ཨཿལས་སྐྱེས་པའི་དྲིལ་བུ། ཐམས་ཅད་ནམ་མཁའི་མཚན་ཉིད་དེ། །ནམ་མཁའ་ལ་ཡང་མཚན་ཉིད་མེད། །ནམ་མཁའ་དང་ཡང་མཉམ་སྦྱོར་བས། །ཐམས་ཅད་མཆོག་གི་མཉམ་ཉིད་གསལ། །ཞེས་དྲིལ་བུ་དང༌། ཧོཿལས་བྱུང་བའི་མདའ་གཞུ། དེ་བཞིན་གཤེགས་པ་ཐམས་ཅད་རྗེས་སུ་ཆགས་པར་བྱོས་ཤིག །འཇམ་པའི་རྡོ་རྗེ་མེ་ལོང་ལྟར། །དག་ཅིང་གསལ་ལ་རྙོག་པ་མེད། །སངས་རྒྱས་ཀུན་བདག་རང་བཞིན་གྱིས། །བུ་ཁྱོད་ཀྱི་ནི་སྙིང་ལ་ཞུགས། །ཨོཾ་མཉྫུ་ཤྲཱི་ཨ། ཞེས་མེ་ལོང་གཉིས་པ་རྡོ་རྗེའི་གཟུགས་བརྙན་ཅན་དང༌། ཨོཾ་བཛྲ་ཧེ་ཏུ་མཾ། ཨོཾ་བཛྲ་བྷཱ་ག་ཏཾ། ཨ་ལས་བྱུང་པའི་པོ་ཏི་ཨཱཿ དེ་རིང་ཕྱིན་ཆད་འཇིག་རྟེན་ལ། །སྐྱོབ་པ་རྣམས་ཀྱིས་འཁོར་ལོ་བསྐོར། ཁྱོད་ཀྱི་ཐེ་ཚོམ་དོགས་མེད་པར། །ཡིད་གཉིས་མེད་པའི་སེམས་ཀྱིས་སུ། །ཆོས་ཀྱི་དུང་ནི་བླ་མེད་པ། །ཀུན་ནས་ཡོངས་སུ་གང་བར་གྱིས། །བསྔགས་བརྗོད་ཚུལ་གྱི་ཆོ་ག་ཡིས། །སྐྱེས་བོ་རྣམས་ལ་རྟག་ཏུ་ཤོད། །དེ་ལྟར་བྱས་ན་སངས་རྒྱས་ལ། །ཕན་འདོགས་དྲིན་དུ་གཟོ་ཞེས་བྱ། །རྡོ་རྗེ་འཛིན་པ་དེ་ཀུན་ཡང༌། ཁྱེད་ལ་རྟག་ཏུ་སྲུང་བར་མཛད། །ཅེས་ཆོས་བཤད། འཇིག་རྟེན་ཀུན་ལ་ཐམས་ཅད་དུ། །སེམས་ཅན་ཀུན་ལ་ཕན་པའི་ཕྱིར། །ཇི་ལྟར་སྣ་ཚོགས་འདུལ་འགྱུར་བ། །ཆོས་ཀྱི་འཁོར་ལོ་རབ་ཏུ་བསྐོར། །རྡོ་རྗེ༴ རིན་ཆེན༴ པདྨ༴ ལས་ཀྱི་འཁོར་ལོ་རབ་ཏུ་བསྐོར། །ཞེས་པས་ཁྱད་པར་རྗེས་སུ་གནང་བ་
སྦྱིན་ནོ། །དེ་ལྟར་ན། ཆོས་བཤད་དང༌། ཁྱད་པར་གྱི་རྗེས་གནང་གཉིས་ནི། རྗེས་གནང་གི་དངོས་གཞི་ཡིན་ནོ། །ལུང་བསྟན་པ་ནི། ཨོཾ་འདི་ལྟར་ངས་ཁྱོད་ལུང་བསྟན་ཏེ། །འཇམ་པའི་རྡོ་རྗེ་དེ་བཞིན་གཤེགས། །སྲིད་པ་ཤིན་ཏུ་དག་པས་ན། །སྲིད་པའི་ངན་འགྲོ་རྣམས་ལས་བཏོན། །ཀྱཻ་རྡོ་རྗེ་༵༵༵ཆྒཻ་མོ་ཞེས་བྱ་བ་འདི་ཉིད། དེ་བཞིན་གཤེགས་པ་ཆྒཻ་མོ་བྷུར་བྷུ་ཝ་སྭཱ། གསང་བ་སྒྲགས་པའི་དབུགས་དབྱུང་བ་ནི། འདོད་ཆགས་བྲལ་བ་ལྟ་བུ་ཡི། ཁམས་གསུམ་ན་ནི་སྡིག་མེད་དེ། །དེ་བས་འདོད་ལ་ཆགས་བྲལ་བར། ཁྱོད་ཀྱི་ནམ་ཡང་མ་བྱེད་ཅིག །ཨོཾ་མཧཱ་ས་མཱ་ཡ་ཧ་ན་ཧཱུཾ་ཕཊ། བར་འདིར་སློབ་མ་ལ་སྔགས་ཀྱི་རྗེས་སུ་གནང་བ། བཟླས་ལུང་སྤྱི་དང་མཐུན་པར་སྦྱིན་དགོས་ལ། བདག་འཇུག་ལ་ནི་རྩ་སྔགས་ལན་གསུམ་བཟླས་པའི་ཆོག་གོ །ཁྱོད་ཀྱིས་མི་མཁས་གང་ཟག་ལ། །སྔགས་དང་ཕྱག་རྒྱ་མ་བསྟན་ཅིག །དེ་ཡིས་སྤྱོད་ན་སོམ་ཉི་ཟ། །གཉིས་ཀ་ངན་སོང་ཉིད་དུ་ལྟུང༌། །དེ་ནས་གཟེངས་བསྟོད་པ་ནི། སྔགས་དང་རྒྱུད་རྣམས་འཛིན་འགྱུར་བའི། །སློབ་མ་འདི་ནི་འབུལ་བ་ལགས། །དེ་རིང་དཀྱིལ་འཁོར་སློབ་དཔོན་གྱུར། །སྔགས་དང་རྒྱུད་རྣམས་འཛིན་གྱུར་པ། །སངས་རྒྱས་བྱང་ཆུབ་སེམས་དཔའ་དང༌། །ལྷ་རྣམས་ཀུན་གྱིས་མཐུན་པར་གསུངས། །སེམས་ཅན་ཀུན་ལ་རྗེས་བརྩེ་བས། ཁྱོད་ཀྱིས་ནན་ཏན་སྐྱེད་ནས་ནི། །དཀྱིལ་འཁོར་ཆོ་ག་བཞིན་དུ་བྲིས། །ཆོས་རྣམས་ཀུན་ལས་སེར་སྣ་དང༌། །སེམས་ཅན་རྣམས་ལ་མི་ཕན་པ། །ཉམ་ང་ཤིན་ཏུ་ཆེ་ན་ཡང༌། །བུ་ཁྱོད་ཀྱིས་ནི་མི་བྱའོ། །མཆོག་ཏུ་གསང་བའི་
དཀྱིལ་འཁོར་འདིར། །བཅུག་པ་དང་ནི་མཐོང་བས་ཀྱང༌། །སྡིག་པ་ཀུན་ལས་རྣམ་གྲོལ་ནས། །དེ་རིང་ཁྱེད་རྣམས་བདེ་བར་གནས། །བདེ་ཆེན་ཐེག་པ་འདི་ལ་ནི། །ཕྱིན་ཆད་འཆི་བ་ཡོངས་མེད་དེ། །མི་ཐུབ་ཚུགས་པར་ཡོངས་མིན་པས། །ཅིས་ཀྱང་མ་འཇིགས་དགའ་བར་གྱིས། །སྲིད་པ་ཤིན་ཏུ་དག་པས་ན། །སྲིད་པའི་སྡུག་བསྔལ་ལས་འདས་པའོ། །ཞེས་བརྗོད་ལ། སྤྲོ་ན། བྱང་ཆུབ་སེམས་ནི་སྤང་མི་བྱ། །དམ་པའི་ཆོས་ནི་སུན་མི་དབྱུང༌། །ནམ་ཡང་དོར་བར་མི་བྱའོ། །མི་ཤེས་པའམ་རྨོངས་པ་ཡིས། །དེ་ཉིད་ངེས་པར་བསྟན་མི་བྱ། །རྡོ་རྗེ་དྲིལ་བུ་ཕྱག་རྒྱ་རྣམས། །ནམ་ཡང་དོར་བར་མི་བྱའོ། །སློབ་དཔོན་སྨད་པར་མི་བྱ་སྟེ། །འདི་ནི་སངས་རྒྱས་ཀུན་དང་མཉམ། །རང་གི་བདག་ཉིད་ཡོངས་སྤངས་ནས། །དཀའ་ཐུབ་ཀྱིས་ནི་མ་གདུང་ཞིང༌། །ཅི་བདེ་བར་ནི་བདེ་བར་བཟུང༌། །འདི་ནི་མ་བྱོན་རྫོགས་སངས་རྒྱས། །དེ་རིང་ཁྱོད་ཉིད་དཀྱིལ་འཁོར་གྱི། །སློབ་དཔོན་སྔགས་དང་རྒྱུད་འཛིན་པར། །སངས་རྒྱས་བྱང་ཆུབ་སེམས་དཔའ་དང༌། །ལྷ་རྣམས་ཀུན་གྱིས་མཐུན་པར་དགོངས། །སེམས་ཅན་རྣམས་ལ་རྗེས་བརྩེ་བས། ཁྱོད་ཀྱི་དཀྱིལ་འཁོར་ཆོ་ག་བཞིན། །རབ་ཏུ་འབད་དེ་བྲི་བར་བྱ། །སྒྲུབ་པ་པོ་རྣམས་རྒྱུད་ལ་སྦྱོར། །ཞེས་བརྗོད་དོ། །གཙོ་བོས་ཇི་ལྟར་བཀའ་སྩལ་པ། །དེ་དག་ཐམས་ཅད་བདག་གིས་བགྱི། །དེ་དག་ནི་སློབ་དཔོན་དུ་དབང་བསྐུར་བའི་ཆོ་གའོ། །ཡང་གསང་དབང་གི་མཎྜལ་ཕུལ། བྱང་ཆུབ་རྡོ་རྗེ་སངས་རྒྱས་ལ། །སོགས་ལན་གསུམ། རང་ཉིད་ཡེ་ཤེས་སེམས་དཔའ་འཇམ་
དཔལ་སྐུ་མདོག་དཀར་པོ། གཡས་རལ་གྲི་དང༌། གཡོན་པོ་ཏི་འཛིན་པར་གྱུར། དམ་ཚིག་གི་རྫས་ལ་དམིགས་ཏེ། ཨོཾ་ཧཱུཾ་ཏྲཱཾཿཧྲཱི་ཨཱ་དེ་རྣམས་ལས་འོད་ཟེར་འཕྲོས་འཁོར་འདས་སྣོད་བཅུད་བརྟན་གཡོ་ཐམས་ཅད་ཀྱི། དྭངས་མ་ཡེ་ཤེས་ཀྱི་བདུད་རྩི་ཚུར་བསྡུས་ནས་འབྲུ་ལྔ་ལ་ཐིམ། དེ་རྣམས་ཞུ་བ་ལས་བྱུང་བའི་བདུད་རྩིར་གྱུར། ཨོཾ་ཨཱཿཧཱུཾ། ལན་མང་དུ་བཟླས་ཏེ་བྱིན་གྱིས་རླབས། ཇི་ལྟར་འཇམ་དབྱངས་རྒྱལ་པོ་ཡི། །བྱང་ཆུབ་སྲས་ལ་དབང་བསྐུར་བཞིན། ཁྱོད་ལ་གསང་བའི་དབང་བསྐུར་བས། །བདུད་རྩི་ལྔ་ནི་མཉམ་པའི་རོས། །ཉོན་མོངས་ལྔ་ནི་དག་པར་བྱེད། །ཡེ་ཤེས་ལྔ་ཡི་དབང་བསྐུར་རོ། །ཨོཾ་སརྦ་དྷརྨ་ནས། ཨཾ་ཨ། ཞེས་ཡང་སྙིང་བརྗོད། དམ་རྫས་ལྕེ་ཐོག་ཏུ་བཞག་པར་མོས། སློབ་མ་ལ་དབང་བསྐུར་ན། རྫས་ལྔ་པོ་ཚོགས་པར་བྱས། ཨོཾ་ལས་ཨ་ཀ་རུ་ནག་པོ། ཧཱུཾ་ལས་གླ་རྩི། ཏྲཱཾ་ལས་མཚལ། ཧྲཱིཿལས་མུ་ཐིག །ཨ་ལས་ཙནྡན་དམར་པོ་རྣམས་ཡི་གེ་དེ་རྣམས་ཉིད་ཀྱིས་མཚན་པ། ས་བོན་ལྔ་པོ་བརྒྱ་སྟོང་དུ་བཟླས་ཏེ་ཡི་གེ་རྣམས་ཞུ་བར་གྱུར། དེ་དག་ཞིབ་མོར་བཏགས་ནས་འོ་མ་འམ། ཞོ་འམ། མར་རམ། མངར་གསུམ་ཇི་ལྟར་འོས་པའི་ཁུ་བ་དང་སྦྱར་ནས། རིན་པོ་ཆེའི་སྣོད་དམ། ཉ་ཕྱིས་སམ། དུང་བོར་སོགས་སུ་བླུག་གོ །དེ་ནས་གོང་ལྟར་བདུད་རྩི་འགུགས་པའི་དམིགས་པ་བཅས་ཏེ་འབྲུ་གསུམ་མང་དུ་བཟླས་ཏེ་དཀྱིལ་འཁོར་གྱི་ཕྱོགས་སུ་བཞག་པ་ནི་དམ་རྫས་ཞེས་བྱ་སྟེ། དངོས་སུ་སློབ་མ་ལ་སྦྱིན་རྒྱུའོ། །རྫས་ལྔ་པོ་དེ་གསང་སྔགས་ནང་བའི་ལུགས་ཀྱི་བདུད་རྩི་ལྔའི་བརྡ་ཡིན་པས་གོང་གི་བྱ་བ་མ་གྲུབ་ན། བླ་མེད་སྤྱི་འགྲོའི་བདུད་རྩི་རིལ་བུས་ཀྱང་ཆོག་པར་མངོན་ནོ། །དེ་དག་ནི་གསང་དབང་ངོ༌། །ཡང་ཤེས་དབང་གི་
མཎྜལ་ཕུལ། བྱང་ཆུབ་རྡོ་རྗེ་སངས་རྒྱས་ལ། །སོགས་ཀྱིས་གསོལ་བ་བཏབ། འདི་ཁྱོད་གཟུགས་བཟང་བརྟན་པ་ཡིས། །དམ་པའི་བདེ་བ་མྱོང་བར་འགྱུར། །རིག་མའི་རྣལ་འབྱོར་སྡོམ་པ་ཡིས། །སངས་རྒྱས་དངོས་གྲུབ་ཐོབ་པར་འགྱུར། །རྨོངས་པ་གང་ཞིག་འདི་སྤོང་བ། །དེ་ལ་མཆོག་གི་དངོས་གྲུབ་མེད། །ཅེས་བརྗོད་དེ། རིག་མ་གཏད་དོ། །སྐབས་འདིར་དཀྱིལ་ཆོག་ཡོན་ཏན་འབྱུང་གནས་ལས། ཞེས་བྱ་བ་འདིས་སྦྱིན་པར་བྱའོ། །དགེ་སློང་དང༌། བྱིས་པ་དང༌། མ་ནིང་དང༌། རྒན་པོ་ལ་ནི་ལུས་ཀྱི་གནས་བཞིར་འཁོར་ལོ་རྣམ་བཞི་བསམས་ལ། ཞེས་པའི་དོན་སྦྱིན་པར་བྱ་ཞེས་པ་ཡིད་ཀྱི་རིག་མ་སྦྱིན་པར་བྱ་བའི་དོན་དང༌། དགེ་སློང་སོགས་ཀྱི་དོན་སྤྱི་དབང་འདི་ཆགས་ལམ་གྱིས་ཀྱང་དབང་བསྐུར་བ་ཡིན་མོད་ཀྱི། དེ་ལ་མི་མོས་པ་དང་མི་ནུས་པས་གྲོལ་ལམ་ལ་བརྟེན་ནས་བསྐུར་ན་འཁོར་ལོ་བཞི་པ་འདི་སྒོམ་པ་ཞེས་པ་ཡིན་པས། དཀྱིལ་འཁོར་འདིར་དངོས་ཀྱིས་རིག་མ་བརྟེན་ནས་ངེས་པའི་དབང་བསྐུར་བའང་ཡོད་པ་དང༌། གྲོལ་ལམ་ལ་མ་བརྟེན་ཀྱང་ཡིད་རིག་བཏད་པས་ལྷ་ཁ་སྦྱོར་གྱི་རྣམ་པ་ཅན་སྒོམ་དགོས་པ་དང༌། དེ་ཙམ་གྱིས་ཉམས་མྱོང་སྐྱེ་ནུས་པ་དཀའ་བས། ཉམས་མྱོང་སྐྱེ་བའི་དོན་དུ་འཁོར་ལོ་བཞི་སྦྱོར་སྒོམ་དགོས་པ་དང༌། དེ་ནི་གསང་སྔགས་ནང་གི་གཏུམ་མོ་འཁོར་ལོ་བཞི་པ་ཡིན་པ། གོང་གི་གསང་དབང་ཡང་གྲོལ་ལམ་ཁོ་ན་ལ་བརྟེན་པ་ཡིན་མོད། གསང་སྔགས་ཕྱི་རྒྱུད་ལུགས་ཡེ་མ་ཡིན་པ་དང༌། དགེ་སློང་དང་ཞེས་སོགས་ཀྱི་སྐལ་བ་དང་ལྡན་ན། ངེས་པའི་དབང་ཆགས་ལམ་ལ་བརྟེན་ནས་བསྐུར་བ་ཡོད་པར་བསྟན་པས། ཆགས་ལམ་ལ་བརྟེན་པའི་གསང་དབང་ཡང་ཡོད་པར་ཤུགས་ལ་འགྲུབ་སྟེ། དེའི་ཕྱིར་ཆོས་སྐོར་འདི། སྐབས་འགའ་ཞིག་ཏུ་རྣལ་འབྱོར་ཕྱི་རྒྱུ་དང༌། ཆོག་བགྲོས་མཚུངས་པ་ཅི་རིགས་དང༌། ལྷ་སྐུའི་རྣམ་འགྱུར་མཚུངས་པ་ཙམ་ཡོད་མོད་ཀྱང་དེ་ཙམ་གྱིས་ཡོ་ག་ཕྱི་བའི་ལུགས་སུ་མི་འགྲུབ་པས་འདི་ནི་བླ་མེད་ཁོ་ན་ཡིན་གྱི་རྒྱུད་སྡེ་
འོག་མའི་ལུགས་མ་ཡིན་ནོ། །དེ་ཕྱིར་བླ་མེད་ཕ་རྒྱུད་ལ་རིགས་གསུམ་ལས། གཏི་མུག་རིགས་ཀྱི་ཆོ་ག་ནི་འདི་ལྟ་བུ་ཡིན་པར་ཤེས་པར་བྱའོ། །ད་ནི་དཀྱུས་ལ་འཇུག་སྟེ། རྐང་པའི་མཐིལ་དུ་ཡཾ་ལས་རླུང་གི་དཀྱིལ་འཁོར་སྔོ་ལྗང་གཞུའི་དབྱིབས་ཅན་བ་དན་གྱིས་མཚན་པ། སུམ་མདོའི་གནས་སུ་རཾ་ལས་མེའི་དཀྱིལ་འཁོར་དམར་པོ་གྲུ་གསུམ་མོ། །རང་ཉིད་རིགས་ཀྱི་བདག་པོས་ཡེ་ཤེས་སེམས་དཔའ་འཇམ་དཔལ་དབྱངས་ལ་རིགས་ཀྱི་ཡུམ་སངས་རྒྱས་སྤྱན་མས་ཡང་དག་པར་འཁྱུད་པ། རང་གི་སྐུ་ལ་རྩ་གསུམ་འཁོར་ལོ་བཞི་འོད་ཀྱི་རང་བཞིན་དུ་གྲུབ་པར་གྱུར། རྐང་མཐིལ་གྱི་རླུང་གཡོས། གསང་བའི་མེ་སྦར། རྩ་ཨ་ཝ་དྷཱུ་ཏཱིའི་ལམ་ནས་ཞུགས། སྤྱི་བོ་བདེ་ཆེན་འཁོར་ལོའི་ཐིག་ལེ་སུམ་ཅུ་རྩ་གཉིས་ཞུ། དེ་ལ་ཐེག་ལེ་བཅུ་དྲུག་མགྲིན་པའི་འཁོར་ལོར་བབས། དེ་ལས་བརྒྱད་སྙིང་གར་བབས། དེ་ལས་བཞི་ལྟེ་བར་བབས། ལུས་ཐམས་ཅད་བྱང་ཆུབ་ཀྱི་སེམས་ཀྱིས་ཡོངས་སུ་གང་བས། སེམས་བདེ་གསལ་སྤྲོས་པས་དབེན་པའི་ལྷན་སྐྱེས་མངོན་དུ་བྱས་པར་གྱུར། ས་མཆོག་བཅུ་གཉིས་ཐོབ་གྱུར་པ། །ཐབས་གཞན་གྱིས་ནི་སངས་མི་རྒྱ། །འཁོར་ལོ་བཞི་པོ་མཉམ་པའི་རོས། །སྲིད་པ་གསུམ་ནི་དག་པར་བྱེད། །དེ་བས་ཁྱོད་ཀྱི་འདི་དང་ནི། །ནམ་ཡང་འབྲལ་བར་མི་བྱའོ། །ཨོཾ་སྠི་ཏོ་ཧྲི་དི་ཛྙཱ་ན་མུརྟི་ར་ཧཾ། བུདྡྷོ་བུདྡྷ་ནཾ། ཏྲཻ་དྷཱ་བརྟི་ནཾ། ཨོཾ་ཨཱཿཧཱུཾ། དེ་དག་ནི་ངེས་པའི་དབང་བསྐུར་བའོ། །སྐབས་འདིར་བཞི་པའི་དབང་ནི་མི་གསུངས་ཏེ། མན་ངག་ལ་ལྟོས་པའམ། རྒྱུ་འབྲས་ཀྱི་ཁྱད་པར་མ་གཏོག་ངོ་བོ་གཅིག་པར་དགོངས་པ་ཡིན་པར་རྟགས་པར་བྱའོ། །དེ་རྗེས། གཙོ་བོས་ཇི་
ལྟར་སོགས་དང༌། གཏང་རག་གི་མཎྜལ་དང༌། དེང་ནས་བརྩམས་ཏེ་སོགས། དགེ་བ་བྱང་ཆུབ་ཏུ་བསྔོ་བ་རྣམས་བྱའོ། །དེ་ནས་སློབ་མ་གཞུག་པའི་དོན་དུ་གནང་བ་ནོད་པར་བྱ་སྟེ། བདག་མིང་འདི་ཞེས་བགྱི་བ་ནི། །རྡོ་རྗེ་སློབ་དཔོན་དཀའ་ཐུབ་ཆེ། །སེམས་ཅན་ཀུན་ལ་ཕན་པའི་ཕྱིར། །སློབ་མ་རྣམས་ནི་འཇུག་པར་འཚལ། །ཞེས་སོ། །གལ་ཏེ་སློབ་མ་དབང་བསྐུར་བར་འདོད་ན། བུམ་པ་སྟ་གོན་གྱི་རྗེས་སམ། ཇི་ལྟར་སྐབས་སུ་བབས་པའི་དུས་ལ། སློབ་མ་ལྷག་གནས་བྱ་སྟེ། མཎྜལ་ཕུལ་ལ། དགའ་ཆེན་ཁྱོད་བདག་སྟོན་པ་སྟེ། །སོགས་ཀྱིས་གསོལ་བ་བཏབ། བུ་ཚུར་ཤོག་ཅིག་ཐེག་ཆེན་པོ། །སོགས་ཀྱིས་སྤྲོ་བ་བསྐྱེད། དཀོན་མཆོག་གསུམ་ལ་ཕྱག་འཚལ་ལོ། །སྡིག་པ་ཐམས་ཅད་སོ་སོར་བཤགས། །སོགས་མན་ཆད་གུར་གྱི་ཚིག་དང་མཐུན་པས་རྒྱུན་བཤགས་བྱ། སློབ་མ་ཡེ་ཤེས་སེམས་དཔའ་དཀར་པོ། རལ་གྲི་དང་པོ་ཏི་འཛིན་པའི་ཐུགས་ཀར་ཟླ་བ་ལ་གནས་པའི་རྡོ་རྗེ། ས་མ་ཡ་ཨ། སུ་ར་ཏ་སྟྭཾ། ས་མ་ཡ་ཧོཿ བཛྲ་སཏྭ་ཡ་ཐ་སུ་ཁཾ། ཞེས་ནང་གི་སེམས་བསྐྱེད། གནས་གསུམ་བྱིན་རླབས་དང༌། མཆོད་པ་བཞི་འབུལ་བ་སྤྱི་དང༌། ཡ་མཱན་ཏ་ཀའི་སྔགས་ཀྱི་སོ་ཤིང་སྟེར། ཨོཾ་པྲ་ཀྲི་ཏེ་པ་རི་ཤུདྷ། སརྦ་དྷརྨ་པྲ་ཀྲི་ཏེ་པ་རི་ཤུདྡྷོ྅ཧཾ། ཅེས་པའི་སྔགས་ཀྱིས་ཁྱོར་ཆུ་སྦྱིན། ཀུ་ཤ་ཡང༌། ཡ་མཱནྟ་ཀའི་སྔགས་ཀྱིས་སྟེར། བསྲུང་སྐུད་ཡི་གེ་འབྲུ་གསུམ་ལས་བསྐྱེད་དེ། རྗེ་བཙུན་གྱི་ཡི་གེ་བརྒྱ་པས་བཅིངས་ཤིང་བརྟེན་པར་བྱ་སྟེ། ཁྱད་པར་དེ་རྣམས་མ་གཏོགས་སྤྱི་དང་འདྲ། འཇིག་རྟེན་དུ་ནི་ཀུན་མཁྱེན་དག །ཅེས་སོགས་ཟབ་མོའི་ཆོས་བཤད། ཡང་མཎྜལ་ཕུལ་ནས། མི་ལྡོག་འཁོར་ལོའི་དབང་བསྐུར་བ། །མགོན་པོའི་བདག་
ལ་སྩལ་ནས་ཀྱང༌། །འཁོར་ལོ་ལྷ་ཡི་དེ་ཉིད་དང༌། །སློབ་དཔོན་འཕྲིན་ལས་ཡོངས་སུ་གསུངས། །སངས་རྒྱས་ཀུན་གྱི་དམ་ཚིག་དང༌། །སྡོམ་པ་བླ་ན་མེད་པ་སྩོལ། །སེམས་ཅན་ཀུན་གྱི་དོན་བགྱིད་ཕྱིར། །བདག་ནི་རྟག་ཏུ་སློབ་དཔོན་འགྱུར། །ཞེས་ལན་གསུམ་གྱིས་གསོལ་བ་བཏབ། རྨི་ལམ་བརྟག་ཅིང་ངན་ན་སྲུང་བའང་སྤྱི་དང་མཐུན་ནོ། །གལ་ཏེ་རྨི་ལམ་བཟང་ངམ་འབྲིང་ན། དེའི་སང་ནུབ་དབང་དངོས་བསྐུར་བར་བྱ་སྟེ། གོང་དུ་བཤད་པའི་བདག་འཇུག་སློབ་མའི་དོན་དུ་གསོལ་བ་བཏབ་པ་ཡན་ཆད་ཚང་བར་བྱས་ནས། བདག་ཉིད་ཀྱིས་ཇི་ལྟར་བླངས་པ་ལྟར། སློབ་མ་ལ་དབང་བསྐུར་བ་ཉིད་ཡིན་ན་འདོན་པ་བསྒྱུར་དགོས། ཁྱད་པར་ཕྲ་མོ་རྣམས་ནི་རྟོགས་པར་བླའོ། །སློབ་མ་དབང་བསྐུར་བའི་རྗེས་སུ། ཙཱ་རུའི་བཟའ་སྟོན་རྒྱ་ཆེན་པོ་ཡང་བྱེད་པར་ཡང་བཤད་ལ། མཐར་རྗེས་ཆོག་ནི་མཆོད་པ་ཁ་གསོས། འགྲུབ་ན་གསར་པའང་བཤམས། གོང་བཞིན་བྱིན་གྱིས་རླབས། གཙང་ཞིང་གཙང་མར་སྦྱར་བ་ཡི། །ལྷ་རྫས་དམ་པའི་མཆོད་ཡོན་འདི། །མཆོག་ཏུ་དད་པའི་འབུལ་ལགས་ཀྱི། །ཅི་བདེ་བར་ནི་བཞེས་སུ་གསོལ། ཨོཾ་ན་མཿསརྦ་ཏ་ཐཱ་ག་ཏ་ཨརྒྷཾ་པུ་ཛ་སོགས། གཞན་འདྲ་བ་ལ། ཞབས་བསིལ། པཱདྱཾ། ཆུ་དང་ཐང་ལས་སྐྱེས་པ་ཡི། །མེ་ཏོག་དམ་པ་འདི་དག་ནི། །མཆོག་ཏུ་དད་པའི་སོགས། པུཥྤེ། ལྷན་ཅིག་སྐྱེས་དང་སྦྱར་བ་ཡི། །བདུག་སྤོས་དམ་པ་འདི་དག་ནི། །མཆོག་ཏུ་དད་པའི་སོགས། དྷུ་པེ། མུན་པའི་ཚོགས་རྣམས་འཇོམས་བྱེད་ཅིང༌། །ཕྱོགས་ཀུན་གསལ་བྱེད་མར་མེ་འདི། །ཀུན་མཁྱེན་ཡེ་ཤེས་ཐོབ་ཕྱིར་འབུལ། །ཅི་བདེ༴
ཨཱ་ལོ་ཀེ ། ལྷན་ཅིག་སྐྱེས་དང་སྦྱར་ལས་བྱུང༌། །དྲི་ཡི་མཆོད་པ་འདི་དག་ནི། །རང་བྱུང་ཉིད་ལ་འབུལ་ལགས་ཀྱི། །ཀུན་བཟང་བདེ་ཆེན་བཞེས་སུ་གསོལ། །གནྡྷེ། ཁ་དོག་དྲི་དང་རོ་ལྡན་ཞིང༌། །བཟའ་བ་མཆོག་དང་ཡང་དག་ལྡན། །ཐམས་ཅད་སྦྱར་བའི་བཤོས་འདི་དག །ཆོས་དབྱིངས་ཡེ་ཤེས་བརྙེས་ལ་འབུལ། །ནཻ་ཝི་ཏྱ། བླ་མེད་རྡོ་རྗེ་ཐེག་པའི་དོན་སྟོན་ཞིང༌། །ཤེས་རབ་མཆོག་གི་རྗེས་འགྲོ་རོལ་མོའི་སྒྲ། །བདུད་ཀྱི་འཁོར་ལོ་གཞོམ་ཕྱིར་དབུལ་བར་བགྱི། །དོན་དམ་དབྱིངས་ལ་མངའ་བརྙེས་བཞེས་སུ་གསོལ། །ཤཔྟ། དེ་རྗེས་འདུད་ཉི་ཤུས་བསྟོད། ཕྱག་བྱར་འོས་པ་ཐམས་ཅད་ལ། །ཞིང་རྡུལ་ཀུན་གྱི་གྲངས་སྙེད་ཀྱིས། །ལུས་བཏུད་པ་ཡིས་རྣམས་ཀུན་ཏུ། །མཆོག་ཏུ་དད་པས་ཕྱག་འཚལ་ལོ། །དེ་ནས་སྤྱི་དང་མཐུན་པར་གསོལ་བ་བཏབ་ཅིང་དངོས་གྲུབ་བླངས། ཡི་གེ་བརྒྱ་པ་མང་དུ་བཟླས། མ་འབྱོར་པ་དང༌། སོགས་ཀྱིས་བཟོད་པར་གསོལ། དགེ་བ་འདི་ཡིས་མྱུར་དུ་བདག །འཇམ་པའི་རྡོ་རྗེ་འགྲུབ་གྱུར་སོགས་དང༌། རྟེན་རྣམས་ལ་བརྟན་བཞུགས་བྱ། ཨོཾ་ཁྱེད་ཀྱིས་སེམས་ཅན་སོགས་ནས། ཨོཾ་བཛྲ་མུཿ རྡུལ་ཚོན་གྱི་ཡེ་ཤེས་པ་གཤེགས། དམ་ཚིག་པ་རང་གི་སྙིང་གར་བསྡུ་བའམ། ཡང་ན་དམ་ཡེ་དབྱེ་བ་མེད་པར་དཀྱིལ་འཁོར་ཐམས་ཅད་རང་ཉིད་ལ་བསྡུས་ཀྱང་རུང་ངོ༌། །སླར་ཡང་སྨོན་ལམ་བཏབ། ཡིག་བརྒྱ་དང་དགེ་བ་བསྔོ་བར་བྱ། ཧཱུཾ་བཞི་པའི་སྔགས་ཀྱིས་ཕུར་བུ་ཕྱུང་བ་དང༌། ཨ་ཀཱ་རོའི་སྔགས་ཀྱིས་དཀྱིལ་འཁོར་དབྱེ་ཞིང༌། རྡུལ་ཚོན་ཆུ་བོ་སྤྱན་འདྲེན་པ་དང༌། ཤིས་བརྗོད་སོགས་ཀྱང་སྤྱི་དང་འདྲའོ། །གཞན་ཡང་གཤིན་དོན་གྱི་ཆོ་ག་དང༌། སྦྱིན་བསྲེག་དང་རབ་གནས་ལ་སོགས་པ་ཡོད་དེ། གཞུང་ལས་
རྟོགས་པར་བྱའོ། །དང་པོའི་སངས་རྒྱས་རྒྱལ་བ་རིགས་ལྔ་དང༌། །རྗེ་བཙུན་འཇམ་དབྱངས་འཇམ་དཔལ་བཤེས་གཉེན་དང༌། །སྒེག་པའི་རྡོ་རྗེ་ཉི་མ་སེང་གེ་དང༌། །ཆོས་ཀྱི་རྡོ་རྗེ་མུ་དྲ་སིདྡྷི་དང༌། །ལྷ་ཡི་དངོས་གྲུབ་སྨྲྀ་ཏི་ཛྙཱ་ན་དང༌། །ཚོར་སྡེ་ངག་དབང་བྱེ་མ་ལུང་བ་དང༌། །སུརྱ་སིདྡྷི་ཤེས་རབ་རྡོ་རྗེ་དང༌། །རྔོག་སྟོན་ཆོས་རྡོར་དེ་སྲས་མདོ་སྡེ་དང༌། །གཙུག་སྟོན་དར་རྒྱས་དུམ་བུ་ཁ་པ་དང༌། །བཟང་མོ་བ་དང་རྔོག་སྟོན་རིན་ཆེན་བཟང༌། །ཆོས་རྒྱལ་བ་དང་བླ་མ་སངས་ཡོན་པ། །བྱང་ཆུབ་དཔལ་དང་བྱང་ཆུབ་དཔལ་གྲུབ་དང༌། །བཀྲ་ཤིས་དཔལ་གྲུབ་བློ་གྲོས་དཔལ་བཟང་དང༌། །ཡེ་ཤེས་རྡོ་རྗེ་རྩ་བའི་བླ་མ་སོགས། །གཞན་ཡང་ཆོས་ཚུལ་འདི་ལ་བརྒྱུད་པ་ཡི། །རིམ་པ་གསུམ་ལྡན་བླ་མའི་མན་ངག་ཅན། །རྒྱུད་འགྲེལ་གཞུང་བཅས་ལེགས་ཐོས་ལེགས་པར་སྦྱངས། །ལེགས་པར་གོ་ནས་མདོ་ཙམ་འདི་སྦྱར་བའི། །དགེ་བས་འགྲོ་བ་དྲུག་གི་སེམས་ཅན་རྣམས། །ཡེ་ཤེས་སེམས་དཔའི་གོ་འཕང་ཐོབ་པར་ཤོག །འཕགས་པ་འཇམ་དཔལ་གྱི་མཚན་ཡང་དག་པར་བརྗོད་པའི་དཀྱིལ་ཆོག །སློབ་དཔོན་སྒེག་པའི་རྡོ་རྗེའི་དགོངས་དོན་ཇི་ལྟ་བ་བཞིན་དུ་སྦྱར་བ་འདི་ཡང་རྒྱལ་ཁམས་པ་ཏཱ་ར་ནཱ་ཐས་སྨྲས་པའོ།། །།མངྒ་ལཾ།། །།
ཤོག་སྟོང་།