དཔལ་རྡོ་རྗེ་འཇིགས་བྱེད་ཀྱི་རྣལ་འབྱོར་དང་འགྲེལ་པ་དྲུག་ཅུ་རྩ་བཞིའི་གཏོར་ཆོག་གི་ངག་འདོན་ཁམས་གསུམ་ཟིལ་གནོན།
དཔལ་རྡོ་རྗེ་འཇིགས་བྱེད་ཀྱི་རྣལ་འབྱོར་དང་འགྲེལ་པ་དྲུག་ཅུ་རྩ་བཞིའི་གཏོར་ཆོག་གི་ངག་འདོན་ཁམས་གསུམ་ཟིལ་གནོན་ཞེས་བྱ་བ་བཞུགས་སོ། །
ཨོཾ་སྭཱ་སྟི། དུས་གསུམ་གྱི་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་རྡོ་རྗེའི་ཁྲོ་རྒྱལ་གཤིན་རྗེ་མཐར་བྱེད་ཆེན་པོའི་རིགས་སྔགས་ཀྱི་ལས་ཚོགས་དང་འབྲེལ་བས་བསྒྲུབ་པར་བྱ་བ། དྲུག་ཅུ་རྩ་བཞིའི་གཏོར་མའི་ཆོ་ག་ཁམས་གསུམ་ཟིལ་གནོན་ཞེས་བྱ་བ། བླ་མ་དང་ལྷག་པའི་ལྷ་ལ་ཕྱག་འཚལ་ལོ། །རྣམ་དག་བདེ་ཆེན་དཔའ་བོ་དུས་ཀྱི་དགྲ། །སྲིད་ཞིའི་མཐའ་ལ་ཁྲོས་ཤིང་ཆེར་འཁྲུགས་པས། །དྲུག་ཅུ་རྩ་བཞིའི་སྒྱུ་ཐབས་ཀུན་འཇོམས་ལ། །གུས་པས་བཏུད་ཀྱིས་བདུད་བཞིའི་དཀྱིལ་འཁོར་ཆོམ། །རབ་འཇིགས་ཡེ་ཤེས་འཁོར་ལོ་ནི། །བརྟན་གཡོའི་སྙེམས་པ་ཕྲོགས་ལས་སླར། །རབ་འབྱམས་འཕྲིན་ལས་སྤྲོ་བ་ཡང༌། །མཆོད་སྦྱིན་ཆེན་པོས་བདེ་བླག་འགྲུབ། །དེ་ལ་དང་པོར་བསྲུང་བཟློག་གི་ལས་ལ་བསྔགས་པའི་དབང་དུ་བྱས་ནས། ཅུང་ཟད་དྲག་པོའི་འཕྲིན་ལས་དང་འབྲེལ་བའི་གཏོར་མའི་ཆོ་ག་བཤད་པར་བྱའོ། །དེ་ལ་ཡོ་བྱད་བཅའ་གཞི་བྱ་ཚུལ་དང༌། ཆོ་ག་དངོས་སོ། །དང་པོ་ནི། དྲག་པོའི་ལས་དང་མཐུན་པའི་གནས་སམ། སྒྲུབ་ཁང་སོགས་ཡིད་དང་
མཐུན་པའི་གནས་སུ། ས་གཞི་ལ་དུག་ཁྲག་བསྲེས་པའི་ཐིག་ཆས་ཀྱིས་ཐིག་ཆེན་བརྒྱད་བཏབ། གནས་ཁང་ཡངས་དོག་དང་བསྟུན་པས་དཀྱིལ་འཁོར་གྱི་ཚད་ངེས་པ་མེད་ཀྱང༌། འགྲུབ་ཏུ་རུང་ན། ཐིག་སྐུད་ཁྲུ་གང་གིས་བསྐོར་བ་ལས་ཆུང་བ་མི་བྱ། གང་ལྟར་ཡང་ཟླུམ་པོར་བསྐོར་ལ། བསྐོར་ཐིག་དང་ལྷོའི་ཚངས་ཐིག་འཕྲད་མཚམས་ནས་བཟུང་སྟེ། ཤར་དང༌། བྱང་ཤར་གྱི་ཐིག་གི་བར་བསྐོར་ཐིག་སྟེང་ནས་ཆ་གསུམ་དུ་བགོས་པའི་ཆ་གཉིས་ཤར་ཐིག་དང༌། ཆ་གཅིག་བྱང་ཤར་གྱི་ཕྱོགས་སུ་ཡོད་པའི་མཚམས་ནས་ཐིག་སྣ་དྲངས་ཏེ་ཆོས་འབྱུང་གི་གཡོན་གྱི་ལོགས་ཐིག་བཏབ། དེ་བཞིན་དུ་ནུབ་དང༌། ནུབ་བྱང་གི་བར་ལ་ཐིག་སྣ་དྲངས་ཏེ་གཡས་ཀྱི་ཐིག་བཏབ། དེ་གཉིས་ཀྱི་རྩེ་སྦྲེལ་བས་རྒྱབ་ཀྱི་ལོགས་ཐིག་འབྱུང་ངོ༌། །དེ་ནས་ཟུར་གསུམ་དུ་སོར་གཉིས་རེ་མནན་པའི་རྩེ་རྣམས་སྦྲེལ་ཏེ་མུ་རན་བྱ། དེའི་ཕྱི་ལ་མེ་རི་གྲུ་གསུམ་དུ་འབྲི་བའི་ས་གཞི་བྱ་སྟེ། ཚད་ངེས་པ་མི་དགོས། རྒྱས་པ་ལ་དགའ་ན་དེའི་ཕྱིར་དུ་རྡོ་ར་མེ་རི་དུར་ཁྲོད་ཀྱི་ཐིག་རྣམས་ཀྱང་བསྐོར། བསྡུས་པ་ལ་ནི་ཆོས་འབྱུང་གཅིག་པུས་ཆོག་གོ །ཡང་ཆོས་འབྱུང་ཉིས་རྩེགས་སུ་བྱེད་པའི་ལུགས་ཀྱང་ཡོད་པ་རུང་བར་
མངོན་ཅིང༌། ཆོས་འབྱུང་གི་ནང་དུ་ཟླུམ་ཐིག་ཉིས་བསྐོར་ནང་ལེའུ་ཚེ་དགུ་པ་ཞིག་བྱ། རྡུལ་ཚོན་དགྱེ་བ་ནི། ཆོས་འབྱུང་གི་ནང་ནག་པོ། མུ་རན་དང་རེའུ་མིག་གི་གཞི་རྣམས་ནག་པོ། མེ་རི་དམར་སེར། རྡོ་ར་སོགས་བསྐོར་ན། གྲུ་བཅད་ལ་ཁྲག་མཚོ། རྡོ་ར་མེ་རི་སྤྱི་དང་མཐུན། དུར་ཁྲོད་ཕྱི་ནང་གང་དུ་བྲིས་ཀྱང་འདྲ། རེའི་མིག་དབུས་མ་ལ་ཉི་གདན་གྱི་སྟེང་དུ་ཚོམ་བུ་ནག་པོ། ཤར་གྱི་རེའུ་མིག་ལ་སེར་པོ་དང༌། དེའི་ཕྱི་རུ་ཡང་སེར་པོ། ཤར་ལྷོའི་རེའུ་མིག་ཏུ་དམར་པོ། ལྷོ་རུ་མཐིང་ཁ། ལྷོ་ནུབ་ཏུ་མཐིང་ནག་གམ་དམར་ནག །ནུབ་ཏུ་དཀར་པོ། དེའི་རྒྱབ་ཏུ་སེར་པོ། ནུབ་བྱང་དུ་ལྗང་ཁུ། བྱང་དུ་སེར་པོ། བྱང་ཤར་དུ་དཀར་པོའོ། །ཆོས་འབྱུང་གི་རྩེ་མོ་སྤྱིར་བཏང་ལ་ལྷོ་ཕྱོགས་སུ་སྟོན་པར་འདོད་ཅིང༌། དེ་ཡང་སྒྲུབ་པ་པོ་ཁ་ལྷོར་ལྟ་བའི་དབང་དུ་བྱས་པ་ཡིན། གནོད་བྱེད་ངེས་པ་ཅན་ཡོད་ན་དེའི་ཕྱོགས་ལ་བསྟན། གང་ལྟར་ཡང་འདི་དངོས་གྲུབ་བསྒྲུབ་པའི་ཆོས་འབྱུང་དང་མི་འདྲ་སྟེ། དྲག་པོའི་འབྲུབ་ཁུང་ཡིན་པས་རྩེ་མོ་རང་ལ་མི་སྟོན་པར་བཞེད་ཅིང༌། ཆོ་ག་བྱེད་མི་མང་པོས་མཐའ་བསྐོར་བའི་སྐབས་སུ་ཡང་རྩེའི་དྲང་ཐད་དུ་སྒྲུབ་པོ་སུ་ཡང་གདན་མི་འཆའ། སློབ་དཔོན་ཕྱོགས་ལ་ངེས་པར་འབྲུབ་ཁུང་གི་རྒྱབ་ལོགས་སྟོན་དགོས་པ་ཡིན་ནོ། །རྡུལ་ཚོན་མ་འབྱོར་བ་དང་བྲི་ལོང་མེད་ན། མེ་ཐལ་ལམ་སོལ་བས་བྲི་བའམ། རས་བྲིས་ལ་སོགས་པས་ཀྱང་རུང་ངོ༌། །དེའི་རྩེ་མོའི་ཕྱོགས་སམ། དབུས་སུ་མཉྫི་ལ་དྲུག་ཅུ་རྩ་བཞིའི་སྒྲུབ་གཏོར་བཤམས། རྩེ་ངོས་ཀྱི་སྟེགས་མཐོ་བ་ཞིག་ལ་འདས་གཏོར་ཆེན་པོ་བཤམས་དགོས་པ་ཡིན་ལ། དེ་ཡང་བྲིས་སྐུ་ཡོད་ན་བྲིས་སྐུའི་མདུན་དང༌། མེད་ན་དེ་ལ་ཙཀ་ལིའམ་གཟུགས་སྔགས་བཙུགས། མདུན་དུ་ཁྲག་གི་ཨརྒྷཾ་དང༌། མཆོད་པ་གཞན་རྣམས་གཡོན་བསྐོར་རམ། གཡས་གཡོན་དུ་ཕྱེད་མར་བགོས་ཏེ་ཕུལ་ཀྱང་རུང་ངོ༌། །དེའི་མདུན་ནམ་གཡས་གཡོན་གང་རུང་དུ་ཆོས་འབྱུང་གྲུ་གསུམ་གཅིག་ལ། མཉྫིའི་སྟེང་དུ་གཤིན་རྗེ་
ཆོས་ཀྱི་རྒྱལ་པོ་གཏོར་མ་བ་དན་ནག་པོ་དང་བཅས་པ་བཞག །སྒོས་མཆོད་ཞིག་ཀྱང་བཤམས། དམ་རྫས་རྫོགས་པར་ཚང་ན་རབ་ཡིན། ངེས་པར་ཤ་ཁྲག་དང༌། མྱོས་བྱེད་ཀྱི་མཆོད་པ་གལ་ཆེའོ། །སྒྲུབ་པ་པོའི་མདུན་དུ་ཧ་ཅང་མི་རིང་བར་འབྲུབ་ཁུང་དངོས་སམ་བྲིས་པའི་ནང་དུ། ལིང་ག་དབང་པོ་དོད་པ་ཞིག་བཞག་སྟེ་ཁེབས་ཀྱིས་བཀབ། གཞན་ཡང་རོལ་མོ་ལ་སོགས་པའི་ཡོ་བྱད་དང༌། ཕྱག་མཚན་རྣམས་དང༌། མཆོད་པའི་ཁྱད་པར་དམིགས་པ་མཐུན་པར་བཤམས་པ་དང༌། ཐུན་བྱེད་ན་སྣོད་གཉིས་སུ་སྐམ་ཐུན། རློན་ཐུན་སོགས་ཀྱང་འཛོམ་པར་བྱའོ། །སྒྲུབ་གཏོར་ནི་གྲུ་གསུམ་རྩེ་མོ་མི་མགོས་མཚན་པ། ལིང་གའི་སྙིང་པོ་ཅན་དུ་བྱས་ཀྱང་ཆོག །ཡང་སྔ་མ་རྣམས་ཀྱི་ཕྱག་བཞེས་ལྟར་ན། ཟན་ལེབ་གྲུ་གསུམ་ལ་ཟུར་ནས་དྲས་པས་གྲུ་གསུམ་བཞིར་འགྱུར། བཞི་པོ་དེ་དེ་བཞིན་དུ་དྲས་པས་བཅུ་དྲུག་ཏུ་འགྱུར། དེ་རྣམས་ཀྱང་དེ་བཞིན་དུ་དྲས་པས་དྲུག་ཅུ་རྩ་བཞིའོ། །དེ་རྣམས་རྩིག་ལུགས་ལ་ལག་ལེན་མི་འདྲ་བ་དུ་མ་ཡོད་ཅིང༌། མཁར་ཐབས་ཀྱང་ཟུར་དྲུག་པ་དང༌། བརྒྱད་པ་དང༌། བཅུ་གཉིས་པ་དང༌། བཅུ་དྲུག་པ་སོགས་འདོད་པ་ཡོད་ཀྱང༌། ཟུར་དགུ་པའམ། དྲུག་པ་གང་རུང་བྱ་སྟེ། དབུས་སུ་ཧོམ་ཁུང་གི་རྣམ་པ་འབྱུང་བ། དགུ་པོ་རེ་རེ་ཡང་ཡང་བདུན་བདུན་བརྩེགས་པས་ལྷག་མ་ཅིག་འབྱུང་བས་འབྲུབ་ཁུང་གི་ཁ་བཅད་ལ། དེའི་སྟེང་དུ་གྲུ་གསུམ་ཆུང་ངུ་ཞིག་བཞག་པར་བྱའོ། །དེ་ལ་མི་མགོའི་རྒྱལ་མཚན་དང༌། རྒྱུ་རློན་གྱི་ལྡ་ལྡི་སོགས་ཀྱིས་བརྒྱན། གཞན་ཡང་འཇིགས་སུ་རུང་བའི་རྒྱན་མང་པོས་རྣམ་པར་བརྒྱན་ནོ། །སྟེགས་མཐོ་བར་གཏོར་མ་ལྔ་ཚར་ཡང་བཤམས་དགོས་ལ། འདས་གཏོར་ཆེན་པོ་ནི་ཟླུམ་གཏོར་རམ། གྲུ་གསུམ་སྙིང་གཟུགས་མ་གང་རུང་ལ་མདའ་དར་སོགས་འཛུགས་ཤིང༌། གཤིན་རྗེའི་གཏོར་མ་ནི་མཐའ་གཅིག་ཏུ་ཟུར་གསུམ་ཁོ་ན་བྱའོ། །དེ་བཞིན་དུ་དྲུག་ཅུ་རྩ་བཞི་བཏབ་གཏོར་དང༌། སྒོས་ཀྱི་མཆོད་པ་ཅུང་
ཟད་དགོས་པ་རྣམས་དང༌། སྔོན་འགྲོ་གཏོར་མ་སོགས་མ་ཚང་བ་མེད་པར་བཤམ་མོ། །འདི་དག་གི་རྒྱུ་མཚན་ནི་གཞན་དུ་བཤད་པར་བྱའོ། །གཉིས་པ་ལ་སྔོན་འགྲོ། དངོས་གཞི། རྗེས་ཆོག་སྟེ་གསུམ་ལས། དང་པོ་ནི། སྔོན་འགྲོ་གཏོར་མ། ཡ་མཱནྟ་ཀའམ། ཨོཾ་བཛྲ་ཨ་མྲྀ་ཏ་ཀུཎྜ་ལི་ཧ་ན་ཧ་ན་ཧཱུཾ་ཕཊ། ཅེས་པས་བསངས། སྭ་བྷཱ་ཝས་སྦྱངས། ཨོཾ་ཨཱཿཧཱུཾ་ཧ་ཧོ་ཧྲཱིཿས་བྱིན་གྱིས་བརླབ། མཁའ་འགྲོ་སྤྱི་གཏོར་གྱི་སྔགས་སམ། ཨོཾ་ཨིནྡྲ་ཡ་སོགས་ལན་གསུམ་གྱིས་ཕུལ། ཨརྒྷཾ་ནས་ཤཔྟའི་བར་གྱིས་མཆོད། མཆོད་སྦྱིན་གཏོར་མ་འདི་བཞེས་ལ། །ཞེས་སོགས་ནས། ཡིད་ལ་འདོད་པ་ཀུན་འགྲུབ་ཤོག །རྩ་བ་དང་བརྒྱུད་པར་བཅས་པའི་དཔལ་ལྡན་བླ་མ་དམ་པ་རྣམས་ཀྱི་དགོངས་པ་བསྐང་བ་དང༌། དེ་བཞིན་གཤེགས་པ་སྲས་དང་བཅས་པ་མཐའ་དག་མཉེས་པར་བྱ་བ་དང༌། མ་ལུས་པའི་སེམས་ཅན་གྱི་ཁམས་རྣམས་ཐེག་པ་མཆོག་གི་བདེ་བ་ལ་འཇོག་པའི་དོན་དུ། དཀྱིལ་འཁོར་ཐམས་ཅད་ཀྱི་རྒྱལ་པོ་སྲིད་པ་གསུམ་ལས་རྣམ་པར་རྒྱལ་བ་བཅོམ་ལྡན་འདས་གཤིན་རྗེ་གཤེད་དཔལ་རྡོ་རྗེ་འཇིགས་མཛད་ཆེན་པོའི་དཀྱིལ་འཁོར་ལས་བརྩམས་ཏེ། འཕྲིན་ལས་རྣམ་པ་བཞིའི་སྒོ་ནས་མཆོད་གཏོར་རྒྱ་ཆེན་པོ་སྒྲུབ་པར་བགྱིད་ན། ཕྱོགས་སྐྱོང་བ་བཅུ་ལ་སོགས་པ་དཀར་པོའི་ཕྱོགས་ལ་མངོན་པར་དགའ་བའི་ཚོགས་རྣམས་ཀྱིས་བར་ཆད་བསྲུང་བ་དང༌། འཕྲིན་ལས་རྣམ་པ་བཞི་སྒྲུབ་ཅིང་དངོས་གྲུབ་གྱི་སྟོངས་གྲོགས་དམ་པ་མཛད་དུ་གསོལ། ནག་པོའི་ཕྱོགས་ལ་མངོན་པར་དགའ་བའི་འབྱུང་པོའི་ཚོགས་རྣམས་སའི་ཕྱོགས་འདིར་མ་གནས་པར་གཞན་དུ་སོང་ཤིག །ཅེས་རོལ་མོའི་
སྒྲ་དང་བཅས་ཕྱིར་དོར། ཧྲཱྀཿཥྚཱིཿདང་བགེགས་མཐར་བྱེད་ཀྱི་གཟུངས་བཟླས་ལ་བགེགས་བསྐྲད། ཡང་གནས་དང་ཡོ་བྱད་བསངས་སྦྱངས། གནས་ཁང་སྟོང་པའི་ངང་ལས། བྷྲུཾ་ལས་བྱུང་བའི་དུར་ཁྲོད་འབར་བའི་གཞལ་མེད་ཁང་མཚན་ཉིད་ཐམས་ཅད་ཡོངས་སུ་རྫོགས་པ། རྒྱན་ཐམས་ཅད་ཀྱིས་རྣམ་པར་བརྒྱན་པ། ཕྱི་རོལ་བསྲུང་བའི་འཁོར་ལོས་ཡོངས་སུ་བསྐོར་བའི་དབུས་སུ། ཨ་ལས་བྱུང་བའི་ཡེ་ཤེས་ཀྱི་ཀ་པཱ་ལ་ཡངས་ཤིང་རྒྱ་ཆེ་བ་རྣམས་ཀྱི་ནང་དུ། ཨོཾ་ཨཱཿཧཱུཾ་ཞུ་བ་ལས་བྱུང་བའི་ལྷ་རྫས་ལས་གྲུབ་པའི་མཆོད་ཡོན། ཞབས་བསིལ། མེ་ཏོག །བདུག་སྤོས། མར་མེ། དྲི་ཆབ། ཞལ་ཟས། རོལ་མོ། གཟུགས་སྒྲ། དྲི་རོ་རེག་བྱ་ལ་སོགས་པ་མཆོད་པའི་སྤྲིན་གྱི་ཕུང་པོ་རྣམས་ཤིན་ཏུ་རྣམ་པར་དག་པ་དབང་སྒྱུར་བའི་རྣམ་རིག་གི་རང་བཞིན་ཟག་པ་མེད་པའི་ཡེ་ཤེས་དང༌། སྨོན་ལམ་རྒྱ་མཚོའི་མཐུ་ལས་གྲུབ་པ། ཕྱོགས་བཅུ་རབ་འབྱམས་ནམ་མཁའི་གཏོས་ཐམས་ཅད་ཡོངས་སུ་གང་བ། སྲིད་པ་ཇི་སྲིད་ཀྱི་བར་དུ་རྒྱུན་མི་ཆད་པར་འཇུག་པར་གྱུར། ཨོཾ་བཛྲ་ཨརྒྷཾ་སྭཱཧཱ། པཱདྱཾ། ཨོཾ་བཛྲ་པུཥྤེ་ཨཱཿཧཱུཾ། དྷུ་པེ། ཨཱ་ལོ་ཀེ ། གནྡྷེ། ནཻ་ཝི་ཏེ། ཤཔྟ་ཨཱཿཧཱུཾ། ཨོཾ་བཛྲ་གྷནྚེ་ར་ཎི་ཏ་སོགས་ལན་གསུམ་གྱིས་རོལ་མོས་བྱིན་དབབ་བོ། །ཚོགས་པ་མང་ཞིང་འཁོར་ལོའི་མཆོད་པ་དང་བཅས་པ་དང༌། ཚོགས་པ་རྣམས་གུས་པའི་ཚོགས་ཀྱི་གཙོ་བོ་ཡོད་ཅིང་སྤྲོ་ན་ཞུ་འབུལ་བྱ། ཕྱག་ཚན་བཅོ་ལྔ་པའམ། ཕྱག་བཅོ་བརྒྱད་པའམ། ཉེར་གཅིག་པ་གསུམ་རྒྱས་བསྡུས་ཀྱི་ཁྱད་ཙམ་མ་གཏོགས་དོན་འདྲ་བས། ཇི་ལྟར་བྱས་ཀྱང་རུང་ངོ༌། །ཚོགས་ཀྱི་གཙོ་བོ་མཐུན་པ་མེད་པ་དང༌། ཚོགས་པ་མེད་དང༌། འཁོར་ལོས་མཆོད་པ་མེད་ཅིང་མི་སྤྲོ་ན།
ཞུ་འབུལ་མི་དགོས་ཤིང༌། སྤྱིར་དེ་དག་འཛོམ་ན་ཡང༌། ཞུ་འབུལ་མ་བྱས་པའི་ཆོ་ག་ཆད་པར་མི་འགྱུར་རོ། །གཉིས་པ་དངོས་གཞི་ལ། རྣལ་འབྱོར་བསྒྲུབ་པ་དང༌། ལས་ལ་སྦྱར་བའོ། །དང་པོ་ལ་བདག་བསྐྱེད་བསྒོམ་བཟླས་དང༌། མདུན་བསྐྱེད་སྒྲུབ་མཆོད་དོ། །དང་པོ་བདག་བསྐྱེད་ནི། བདག་དང་འགྲོ་བ་ནམ་མཁའི་མཐའ་དང་མཉམ་པའི་ཞེས་པ་ནས། དེ་འོད་དུ་ཞུ་རང་ཉིད་ལ་ཐིམ། ཞེས་པའི་བར་རྫོགས་པར་བསྒོམས། བཟླས་པའི་སྐབས་བཟླས་པའང་ཅི་འགྲུབ་བྱའོ། །གཉིས་པ་མདུན་བསྐྱེད་ནི། མདུན་བསྐྱེད་དཀྱིལ་འཁོར་བསངས་སྦྱངས། སྟོང་པའི་ངང་ལས། ཆོས་འབྱུང་གྲུ་གསུམ་ཞེས་པ་ནས། རཾ་ལས་ཉི་མའི་དཀྱིལ་འཁོར་གྱི་སྟེང་དུ། ཧཱུཾ་ལས་རྡོ་རྗེ་ཆེན་པོ་མཐིང་ནག་རྩེ་ལྔ་པ་རྭ་གདེངས་པ་འོད་འབར་བར་གྱུར། དེ་ལས་དེ་བཞིན་གཤེགས་པ་ཞེས་པ་ནས། བལྟ་བར་ཡང་མི་བཟོད་པའི་བདག་ཉིད་དུ་གྱུར། ཞེས་པའི་བར་བདག་བསྐྱེད་དང་འདྲ་བ་ལས། བདག་ཉིད་ཅེས་པའི་ཚིག་དོར། མིག་ཏུ་ཀྵིཾ་ནས། དཀྱིལ་འཁོར་བཛྲ་ས་མཱ་ཛཿ ཧཱུཾ། འཇམ་དཔལ་ཁྲོས་པའི་དཀྱིལ་འཁོར་ནས། །སྲིན་པོའི་གཟུགས་སུ་སྐུ་སྤྲུལ་པ། །གདུག་པ་ཅན་ཀུན་འདུལ་བའི་ཕྱིར། །འཇིགས་པའི་ཁྲོ་རྒྱལ་གཤེགས་སུ་གསོལ། །ཨོཾ་ཚུར་བྱོན་ཚུར་བྱོན་འཇམ་པའི་དབྱངས། ཁྲོ་བོ་གཤིན་རྗེ་གཤེད་པོའི་ཚོགས། །འཇམ་དཔལ་ཁྲོ་བོ་མི་བཟད་པ། །མཐུ་རྩལ་དྲག་པོ་གཤེགས་སུ་གསོལ། །ཡེ་ཤེས་ཁྲོ་བོ་གཤེགས་ནས་ཀྱང༌། །རྫུ་འཕྲུལ་དངོས་གྲུབ་སྩོལ་བའི་ཕྱིར། །རྟགས་དང་མཚན་མ་བསྟན་པ་དང༌། །འགྲོ་བའི་དོན་ཀུན་མཛད་དུ་གསོལ། །ཨོཾ་ཧྲཱིཿཧཿབྷྱོཿམཧཱ་ཀྲོ་དྷ་ཨཱ་གཙྪ་ཨཱ་གཙྪ། ཨཱཏྨ་ཏ་པཱུ་ཛ་པྲ་ཏི་
གྲྀཧྣཎྟུ་པྲ་ས་ད། མེ་དྷི་མན་ཀུ་རུ་ཀུ་རུ་སྭཱཧཱ། ཨོཾ་བཛྲ་ཨརྒྷཾ་པྲ་ཏཱིཙྪ་སྭཱཧཱ། པུཥྤེ་ནས་ཤཔྟའི་བར་གྱིས་མཆོད། ཧཱུཾ འདིར་བཞུགས་འདིར་བཞུགས་འཇམ་པའི་དབྱངས། ཁྲོ་བོ་གཤིན་རྗེ་གཤེད་པོའི་ཚོགས། །འཇམ་དཔལ་ཁྲོ་བོ་མི་བཟད་པ། །མཐུ་རྩལ་དྲག་པོ་བཞུགས་སུ་གསོལ། །པདྨ་ཀ་མ་ལ་ཡེ་སྟྭཾ། བཅོམ་ལྡན་དེ་བཞིན་གཤེགས་པ་ཀུན། །ཞེས་པ་ནས། ཨོཾ་བཛྲ་གྷཎྜེ་ཧོའི་བར་སྒྲུབ་ཐབས་བཞིན་དང༌། དེ་ལྟར་ན་འདི་ནི་མདུན་བསྐྱེད་ཀྱི་རྩ་བ་ཡེ་ཤེས་ཁྲོ་བོ་གཙོ་རྐྱང་གི་དབང་དུ་བྱས་པ་ཡིན་ལ། ཤིན་ཏུ་བསྡུ་ན་ཐོད་མཁར་མ་བསྐྱེད་པར་དུར་ཁྲོད་ཁོ་ནའི་དབུས་སུ་བཞུགས་པར་བྱས་ཀྱང་ཆོག །ཅུང་ཟད་རྒྱས་པ་ལ་མོས་ན། གཞལ་མེད་ཁང་གྲུ་བཞི་སྒོ་བཞི་རོ་ལངས་བརྒྱད་དང་བཅས་པ། དབང་ཆོག་གི་མདུན་བསྐྱེད་བསྒྲུབ་པའི་སྐབས་སུ་བཤད་པ་ལྟར་བྱས་ཀྱང་ལེགས་པ་ཡིན་ནོ། །རང་གི་སྙིང་ག་ནས་འཕྲོས་པའི་འོད་ཟེར་གྱི་རྩེ་མོ་ལས་ཁྲོ་བོ་ལྕགས་ཀྱུ་དང༌། ཞགས་པ་ཐོགས་པ་དཔག་ཏུ་མེད་པ་སྤྲོས་ཏེ། ཕྱོགས་སྐྱོང་ཐམས་ཅད་བཀུག་པར་གྱུར། ཨོཾ་ཧྲཱྀཿཥྚཱིཿབི་ཀྲྀ་ཏཱ་ན་ན་ཧཱུཾ་ཕཊ། ཨོཾ་ཨིནྡྲ་སརྦ་དུཥྟཾ་ས་པཱ་རི་ཝཱ་ར་ཨཱ་ཀརྵ་ཡ་ཛཿ ཨིནྡྲ་ཞེས་པའི་གནས་སུ། ཡ་མ་ཡ། ཝཱ་རུ་ཎ། ཀུ་བེ་ར། ཨཱི་ཤ་ན། ཨགྣེ་ཡེ། ནཻ་རི་ཏྱ། ཝཱ་ཡ་ཝེ། བྲཧྨ་ཡ། བཱ་སུ་དྷ་རི་ཎེ། ཞེས་པ་རྣམས་བཅུག་པས་སྤྱན་འདྲེན། དེ་ལྟར་ན་ཕྱོགས་སྐྱོང་བ་འཁོར་དང་བཅས་པ་རྣམས་ཕྱོགས་བཅུར་འཁོད་པ་ནི། ཤར་དུ་བརྒྱ་བྱིན་སེར་སྐྱ་མིག་སྟོང་དང་ལྡན་པ། རྡོ་རྗེ་དང་སྡིགས་མཛུབ་ཅན་གླང་པོ་ཆེ་ལ་ཞོན་པ། ལྷོ་རུ་གཤིན་རྗེ་ནག་པོ་ཆེར་ཁྲོས་པ་དབྱུག་པ་དང་སྡིགས་མཛུབ་ཅན་མ་ཧེ་ལ་ཞོན་པ། ནུབ་ཏུ་ཆུ་ལྷ་དཀར་པོ་སྦྲུལ་ཞགས་འཛིན་པ་བྲང་འགྲོ་ལ་ཞོན་པ། བྱང་དུ་གནོད་སྦྱིན་སེར་པོ།
ལུས་སྦོམ་པ། བི་ཛ་པུ་ར་ཀ་དང་ནེའུ་ལེ་འཛིན་པ་རྟ་ལ་ཞོན་པ། བྱང་ཤར་དུ་དབང་ལྡན་དཀར་པོ་རྩེ་གསུམ་དང་ཐོད་པ་འཛིན་པས་གཽ་རཱི་ལ་འཁྱུད་པ། མིག་གསུམ་པ་རལ་པའི་ཐོར་ཅོག་ཅན་ཁྱུག་མཆོག་ལ་ཞོན་པ། ཤར་ལྷོར་མེ་ལྷ་དམར་པོ་བགྲང་འཕྲེང་དང་སྤྱི་བླུགས་འཛིན་པ་ར་སྐྱེས་ལ་ཞོན་པ། ལྷོ་ནུབ་ཏུ་བདེན་བྲལ་ནག་པོ་མི་བཟད་ཅིང་ཆེར་འཁྲུགས་པ་གྲི་གུག་དང་ཐོད་པ་ཅན་རོ་ལངས་ལ་ཞོན་པ། ནུབ་བྱང་དུ་རླུང་ལྷ་ལྗང་ཁུ་རླུང་གིས་བསྐྱོད་པའི་བ་དན་འཕྱར་བ་རི་དྭགས་སེར་པོ་ལ་ཞོན་པ། སྟེང་དུ་ཚངས་པ་སེར་པོ་གདོང་བཞི་པ་ཕྱག་གཡས་གཉིས་སྤྱི་བླུགས་དང་སྐྱབས་སྦྱིན་གཡོན་གཉིས་དབྱུག་དགུ་དང་བགྲང་འཕྲེང་འཛིན་པ་ངང་པ་ལ་ཞོན་པ། འོག་ཏུ་ནོར་འཛིན་མ་སེར་མོ་བུམ་པ་འཛིན་པ་པདྨ་ལ་གནས་པ། ཐམས་ཅད་ཀྱང་རང་རང་གི་འཁོར་ཚོགས་དཔག་ཏུ་མེད་པ་དང་བཅས་ཏེ་འཁོད་པར་གྱུར། ཨོཾ་ད་ཤ་དིཀ་ལོ་ཀ་པཱ་ལ་ས་པཱ་རི་ཝཱ་ར་བྷྱཿ བཛྲ་ཨརྒྷཾ་པྲ་ཏཱིཙྪ་སྭཱཧཱ། ཞེས་པ་ནས། ཤཔྟའི་བར་གྱིས་མཆོད། ཧཱུཾ། གང་འདུལ་ཚུལ་གྱིས་འགྲོ་བའི་དོན། །རྣམ་པ་སྣ་ཚོགས་སྐུ་སྤྲུལ་པ། །མཐུ་སྟོབས་རྫུ་འཕྲུལ་བསམ་མི་ཁྱབ། །ཕྱོགས་སྐྱོང་འཁོར་དང་བཅས་ལ་བསྟོད། །ཨོཾ་བཛྲ་ས་མཱ་ཡ་སྟྭཾ། ཞེས་རྡོ་རྗེ་རྩེ་ལྔ་པའི་ཕྱག་རྒྱ་བསྟན་ལ། སྒྲུབ་པོ་བདག་གི་ཡིད་ལ་བརྣག་པའི་དོན་འདི་སྟོབས་དང་ལྡན་པར་གྲུབ་པར་མཛོད་ཅིག །ཐོགས་པ་མེད་པར་གྲུབ་པར་མཛོད་ཅིག །གེགས་མེད་པར་གྲུབ་པར་མཛོད་ཅིག །ཅེས་བརྗོད། ཡང་རང་གི་སྙིང་ག་ནས་ཁྲོ་བོ་ཕུར་བུ་ཐོགས་པ་དཔག་ཏུ་མེད་པ་སྤྲོས། དེ་རྣམས་ཀྱི་སྤྱི་བོར་ཕུར་བུས་བཏབ། ཨོཾ་ཧྲཱྀཿཥྚཱིཿབཱི་ཀྲྀ་ཏཱ་ན་ན་ཧཱུཾ་ཕཊ། ཨིནྡྲ་ཡ་སརྦ་དུཥྟཾ་ས་པཱ་རི་ཝཱ་རཱ་ན་བཛྲ་ཀཱི་ལ་ཡ་ཧཱུཾ་ཕཊ། དེ་བཞིན་
དུ། ཡ་མ་ནས། བཱ་སུ་དྷ་རི་ནིའི་བར་ལ་ཡང་སྦྱར། གྲུབ་པའི་དངུལ་ཆུའི་བཅུད་ཀྱིས་རེག་པ་ན། ཞེས་པ་ནས། གཡོན་བརྐྱང་གིས་བཞུགས་པའོ། །བསྡུ་ན་དེ་ཙམ་གྱིས་ཀྱང་ཆོག་ལ། སྤྲོ་ན། མིག་ཏུ་ཀྵཾ་ནས། མི་བསྐྱོད་པས་དབུ་བརྒྱན། ཛཿཧཱུཾ་བཾ་ཧོཿ དེ་ནས་མཆོད་པ་གོང་བཞིན་བྱིན་གྱིས་བརླབས་པ་ལས། གནས་ཁང་བསྐྱེད་ཆོག་བོར་བ་ཡིན་ཏེ། སྟོང་པའི་ངང་ལས། ཨ་ལས་བྱུང་བའི་ཡེ་ཤེས་ཀྱི་སོགས། ཤཔྟ་ཨཱཿཧཱུཾ། དེ་ནས་དབྱངས་དང་བཅས་པས་སམ། མེད་ཀྱང་རུང་སྟེ། སྟོང་གསུམ་བནྡྷ་རབ་ཡངས་བར། །སྣ་ཚོགས་རཀྟ་རྒྱ་མཚོར་བསྐྱིལ། ཁྲག་ཆེན་སྦུ་འཕྲེང་ཆེར་འཁྲུགས་པའི། །ཨརྒྷཾ་མཆོག་གི་མཆོད་པར་བགྱི། །ཨོཾ་ཧྲཱྀཿཥྟཱི་ཧཿ དྲག་པོའི་སྤོས་དང་སྦྱར་བའི་ཆུ། །ཐོད་པའི་སྣོད་དུ་རབ་བཏགས་པ། །སྟོང་གསུམ་ཁྱབ་པར་གར་སྒྱུར་བའི། །ཞབས་བཀྲུའི་ཆེད་དུ་འབུལ་བར་བྱ། །ཨོཾ་ཧཱུཾ་ཧཱུཾ་ཕཊ། ཚེར་མ་རྩུབ་ཅིང་ཆེར་འཇིགས་པ། །མི་ཟད་དྲི་ལྡང་སྦྲང་རྩིར་བཅས། །རྡོ་རྗེ་རིགས་ཀྱི་མེ་ཏོག་ཚོགས། །ཀུན་ཏུ་ཆར་བཞིན་འབབ་གྱུར་ཅིག །ཨོཾ་ཀུ་མཱ་ར་རཱིུ་པི་ཎི་ཛཿཛཿ ཞིང་བཅུ་བསྒྲལ་བའི་ཤ་དང་ཚིལ། །གསུར་ཆེན་དམ་ཚིག་འདུས་བྱས་ལ། །བདུག་པའི་སྤྲིན་ཚོགས་གཏིབས་པར་གྱུར། །གཉིས་སྣང་བསྲེག་པའི་མཐུ་ཐོབ་ཤོག །ཨོཾ་ཧྲཱིཿཧ་ཧེ་ཕཊ། མར་ཁུ་ཆེན་པོའི་སྒྲོན་མེ་ནི། །དུར་ཁྲོད་མེ་ཡིས་རབ་ཏུ་སྦར། །སྲིད་གསུམ་ཁྱབ་པར་འོད་གསལ་བ། །སྣང་གསལ་ཆེན་པོས་མཉེས་གྱུར་ཅིག །ཨོཾ་དཱཔྟ་ལོ་ཙ་ནི་བི་ཀྲྀ་ཏཱ་ན་ན་མཧཱ་ཨཊྚ་ཊྚ་ཧཱ་ས་ན་དི་ན་དཱིཔྟ་སྭཱཧཱ། ཁྲག་དང་མཁྲིས་ཆེན་ཡང་དག་སྦྱར། །བདུག་པའི་དྲི་མཆོག་ཀུན་དང་ལྡན། །བརྩེ་བས་གདུངས་ཤིང་ཁྲོས་པའི་ཐུགས། །
དྲི་ཞིམ་བྱུགས་པས་རིམ་གྲོ་བགྱི། །ཨོཾ་བི་ཀྲྀ་ཏཱ་ན་ན་དུཥྟཾ་སཏྭ་ད་མ་ཀ་གཿགཿགཿ ནད་གདོན་དགྲ་བགེགས་ཚར་བཅད་ལས། །མཁའ་དང་ས་སྟེང་རྒྱུ་བའི་ཤ ། སྣ་ཚོགས་རོ་དང་སྦྱར་བ་ཡང༌། །ཞལ་ཟས་བདུད་རྩི་ཆེན་པོར་འབུལ། །ཨོཾ་ཀཱ་ལ་རཱུ་པ་སརྦ་སཏྭ་ད་མ་ཀ ། མཧཱ་བྷཱུ་ཏ་ཨ་དྷི་པ་ཏི་ཨི་མཾ་བ་ལིཾ་གྲཧྞ་པ་ཏ་ཡེ་སྭཱཧཱ། སྣ་ཚོགས་རོལ་མོའི་ཁྱད་པར་ནི། །ཐོད་རྔ་ལ་སོགས་འཇིགས་པའི་སྒྲ། །རོ་ལངས་འཁྲུགས་པའི་དཀྱིལ་འཁོར་དུ། །ཡན་ལག་རྒྱ་མཚོ་འབྱུང་འགྱུར་ཅིག །ཨོཾ་བཛྲ་ཤཔྟ་ཨཱཿཧཱུཾ། ཨོཾ་བཛྲ་གཎྜེ་ར་ནི་སོགས་རོལ་ཆེན་བྱ། དེ་ནས་ནང་མཆོད་འབུལ་ཏེ། སྤྲོ་ན་བླ་མ་བརྒྱུད་པའི་མཚན་ནས་སྨྲོས་ཤིང་འབུལ། བསྡུ་ན། དུས་གསུམ་སངས་རྒྱས་ཐམས་ཅད་ཀྱི་ངོ་བོ། རྒྱལ་བ་རྡོ་རྗེ་འཆང་གི་བདག་ཉིད་རྩ་བའི་བླ་མའི་ཞལ་དུ་ཨོཾ་ཨཱཿཧཱུཾ། ཡི་གེ་བཅུ་པའི་མཐར་འབྲུ་གསུམ་བཏགས་ཏེ་གཙོ་བོ་ལ་འབུལ། ཨོཾ་ཀཱ་ལ་རཱུ་པ་ཧཱུཾ་ཕཊ། དམ་ཅན་ཆོས་ཀྱི་རྒྱལ་པོ་གཤིན་རྗེའི་ཞལ་དུ་ཨོཾ་ཨཱཿཧཱུཾ། ཨོཾ་ཧྲི་ཙ་མུནྚེ་ཧཱུཾ་ཕཊ། ཨོཾ་ཨཱཿཧཱུཾ། དེ་བཞིན་དུ། ཨོཾ་ཨིནྡྲ་ཡེ་སྭཱཧཱ། ཨོཾ་ཨཱཿཧཱུཾ། ཡ་མ་ཡ། ཝཱ་རུ་ཎ་ཡ། ཀུ་བེ་ར་ཡ། ཨཱི་ཤ་ན་ཡ། ཨགྣ་ཡ། ནེ་རི་ཏྱ། བཱ་ཡ་བེ། བྲཧྨ་ཎ་ཡ། བཱ་སུ་དྷ་རི་ནེ། ཞེས་པ་རྣམས་ལའང་འབྲུ་གསུམ་སྦྱར་བས་འབུལ། གཞན་ཡང་ལྷ་ཆེན་པོ་བརྒྱད། ཀླུ་ཆེན་པོ་བརྒྱད། གཟའ་ཆེན་པོ་བརྒྱད། རྒྱུ་སྐར་ཉི་ཤུ་རྩ་བརྒྱད། རྒྱལ་པོ་ཆེན་པོ་བཞི་རྣམས་ཀྱི་ཞལ་དུ་ཨོཾ་ཨཱཿཧཱུཾ། གཞན་ཡང་གནོད་སྦྱིན་སྲིན་པོ། འབྱུང་པོ། ཡི་དྭགས། ཤ་ཟ། སྨྱོ་བྱེད། བརྗོད་བྱེད། མ་མོ། ཞིང་སྐྱོང༌། ཕོ་ཉ། འཕྲོག་མ། གྲུབ་པ་རྣམས་ཀྱི་ཞལ་དུ་ཨོཾ་ཨཱཿཧཱུཾ། འགྲོ་བ་རིགས་དྲུག །ལམ་རྒྱུད་ལྔ། སྐྱེ་གནས་རྣམ་པ་བཞིས་
བསྡུས་པའི་སེམས་ཅན་ཐམས་ཅད་ཟག་པ་མེད་པའི་བདེ་བས་རྒྱུད་ཚིམ་ནས་མྱུར་དུ་སངས་རྒྱས་ཀྱི་གོ་འཕང་ཐོབ་པའི་སྐལ་བ་དང་ལྡན་པར་གྱུར་ཅིག །ཨོཾ་སརྦ་ཏ་ཐཱ་ག་ཏ་ཨ་ནུ་རཱ་ག་ན་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། དེ་ནས་བསྟོད་པ་ནི། རོལ་མོའི་སྒྲ་དང་སྦྱར་ཞིང་དབྱངས་དང་བཅས་པས་དཀྱིལ་ཆོག་ནས་བཤད་པ་ལྟར། མིའུ་ཐུང་སྒེག་པ་སོགས་སམ། ཡང་ན། ཧཱུཾ། འཇམ་དཔལ་མཁའ་ལས་བྱུང་བའི་གསེར་མདོག་ཅན། །འཇམ་དཔལ་ཐུགས་ལས་ཆོས་ཀུན་རང་བཞིན་གསལ། །འཇམ་དཔལ་གསུང་གི་དབང་ཕྱུག་འཇམ་པའི་དབྱངས། །འཇམ་དཔལ་བདག་ནི་རེ་བའི་སེམས་ཀྱིས་འདུད། །ཐུགས་མཆོག་འཇམ་པའི་ངང་ལས་མ་གཡོས་ཀྱང༌། །ཐུགས་རྗེས་གདུག་པ་འདུལ་ཕྱིར་གཤིན་རྗེ་གཤེད། །མི་བཟད་དུས་མཐའི་བསྐལ་པའི་མེ་ལྟར་འབར། །ཞལ་གདངས་ཁྲོ་གཉེར་སྨིན་མ་གློག་ལྟར་འཁྱུག །སྤྱན་བགྲད་མཆེ་བ་གཙིགས་པ་རབ་དུ་འབར། །རྡོ་རྗེའི་རྟ་སྐད་དྲག་པོ་ཧ་ཧར་བཞད། །མཁའ་འགྲོ་བསྡུ་བའི་ཕེཾ་སྐད་དྲག་པོ་སྒྲོག །ཁྲོས་པའི་སྟབས་ཀྱིས་ཞབས་བརྡབས་ཁམས་གསུམ་གནོན། །སྡིགས་མཛུབས་གནམ་དུ་སྒྲེང་ཞིང་ལྷ་ཆེན་འདུལ། །ལྗགས་འདྲིལ་འབར་བའི་ཞལ་གདངས་ཁྲག་གིས་མྱོས། །ལྷ་དང་བཅས་པའི་འཇིག་རྟེན་ཞལ་དུ་གསོལ། །བགེགས་ཆེན་ཀོ་རློན་ཐོད་པའི་འཕྲེང་བས་བརྒྱན། །གཅེར་བུ་འཇིགས་བྱེད་དབང་ཕྱུག་ཆེན་པོའི་ཚུལ། །འཇིགས་བྱེད་མ་ཧེ་ཁྲོས་ཤིང་འགྱུར་བའི་གདོང༌། །ཞལ་དགུ་འབར་བས་སྲིད་གསུམ་ཟ་བར་མཛད། །སྣ་ཚོགས་འགྲོ་བ་འདུལ་བའི་ཕྱག་རྒྱ་འབར། །བདུད་རིགས་ཀུན་འཇོམས་ཞབས་གཉིས་བརྐྱང་བསྐུམ་གནས། །འཇིགས་བྱེད་ཆེན་
པོའི་སྐུ་ལ་རྟག་ཏུ་འདུད། །ཧཱུཾ། དབུ་དགུ་འབར་བའི་དཀྱིལ་འཁོར་ནས། །གཡས་ཀྱི་ཞལ་གསུམ་བགྲད་པ་ནི། །མཐིང་ནག་དམར་དང་སེར་བའི་ཞལ། །གཡོན་གྱི་ཞལ་གསུམ་གཙིགས་པ་ནི། །དཀར་དང་དུད་ཁ་ནག་པོའི་ཞལ། །དབུས་ཀྱི་ཞལ་གསུམ་འབར་བ་ནི། ཁྲོ་དང་ཆགས་དང་ཞི་བའི་ཚུལ། །ཕྱག་རྒྱ་འོད་ཟེར་འབར་བ་ལས། །གཡས་ཀྱི་ཕྱག་རྒྱ་བཅུ་དྲུག་ནི། །བརྡེག་ཅིང་འཇོམས་པའི་མཚོན་ཆ་གདེངས། །གཡོན་གྱི་ཕྱག་རྒྱ་བཅུ་དྲུག་ནི། །རོལ་ཞིང་སྟོབ་པའི་མཚན་མས་མཛེས། །བརྗིད་གནོན་ཞབས་ཀྱི་ཚམས་རྔམས་ལས། །གཡས་ཀྱི་ཞབས་བརྒྱད་བསྐུམ་པ་ནི། །དྲེགས་པའི་ལྷ་བརྒྱད་ཐབས་ཀྱིས་འདུལ། །གཡོན་གྱི་ཞབས་བརྒྱད་བརྐྱང་བ་ནི། །དྲེགས་པའི་ལྷ་མོ་བརྒྱད་ལ་རོལ། །འདོད་ཆགས་ཆེན་པོས་འདུལ་བའི་ཕྱིར། །རྟག་ཏུ་ལིངྒ་རྒྱས་པའི་ཚུལ། །དྲག་པོའི་ཚུལ་གྱིས་ཞེ་སྡང་འདུལ། །འདུལ་བྱེད་སྐུ་ལ་ཕྱག་འཚལ་ལོ། །དུར་ཁྲོད་ཆེན་པོའི་དཀྱིལ་འཁོར་ནས། །བདུད་དང་གཤིན་རྗེ་ཐབས་ཀྱིས་འདུལ། །མ་མོ་མཁའ་འགྲོ་དབང་དུ་བསྡུད། །དབང་ཆེན་སྐུ་ལ་ཕྱག་འཚལ་ལོ། །དབང་ཕྱུག་ཆེན་པོའི་དཀྱིལ་འཁོར་དུ། །དབང་མེད་དད་པས་འདུས་པ་དང༌། ཡེ་ཤེས་སྤྲུལ་པའི་འཁོར་གྱིས་བསྐོར། །འཁོར་བཅས་ཁྱོད་ལ་བདག་ཕྱག་འཚལ། །ཡེ་ཤེས་ཐུགས་ཀྱི་དཀྱིལ་འཁོར་ནས། །ཇི་ལྟ་བུར་ནི་སྤྲུལ་གྱུར་ཀྱང༌། །རྣམ་དག་དབྱིངས་ལས་མ་གཡོས་ཏེ། །མཉམ་ཉིད་སྐུ་ལ་ཕྱག་འཚལ་ལོ། །ཞེས་པས་བསྟོད། བསྟོད་པ་འདི་རྒྱ་གར་མར་གྲགས་ཤིང༌། སྔོན་གྱི་རོང་ཟོམ། རྭ་སྐྱོ་གཉོས་པ་ཀུན་ལ་གྲགས་པ། བྱིན་རླབས་ཀྱི་མཚན་མ་ཅན་ཡིན་ངེས་ཤིང༌། འདི་ཙམ་རྒྱས་བསྡུས་འཚམ་པར་སྣང་ངོ༌། །དེ་ནས་འཁོར་
གྱིས་བསྟོད་པ་ནི་མདོ་ཙམ་གྱིས་ཆོག་པས། གང་འདུལ་ཚུལ་གྱིས་སོགས་དང༌། ཕྱོགས་བཅུའི་དཀྱིལ་འཁོར་མ་ལུས་པ། །རྫུ་འཕྲུལ་ཆེན་པོས་མངའ་མཛད་ནས། །འགྲོ་བའི་སྡུག་བསྔལ་ཞི་མཛད་པ། །གནས་སྲུང་རྣམས་ལ་ཕྱག་འཚལ་བསྟོད། །ལྷ་དང་ལྷ་མིན་ལ་སོགས་པ། །འགྲོ་བ་དྲུག་ན་གནས་པ་ཡི། །གདུག་པ་ཅན་ཀུན་ཚར་གཅོད་པའི། །འཇོམས་བྱེད་སྐུ་ལ་ཕྱག་འཚལ་ལོ། །ཚེ་དང་བསོད་ནམས་འབྱོར་པ་དང༌། །བདེ་བ་དམ་པས་སེམས་ཅན་སྐྱོངས། །སྐྱེ་འཇིགས་འབྱོར་རྒུད་མི་མངའ་བ། །ཡེ་ཤེས་སྤྲུལ་པ་རྣམས་ལ་བསྟོད། །དམ་ཚིག་ལྡན་པའི་སྒྲུབ་པོ་ལ། །དངོས་གྲུབ་ཐོགས་པ་མེད་སྩོལ་ཞིང༌། །བར་ཆད་མ་ལུས་སེལ་བ་དང༌། །འཕྲིན་ལས་ཀུན་གྲུབ་རྣམས་ལ་བསྟོད། །དེ་ལྟར་བསྟོད་པའི་དགེ་བས་ཀྱང༌། །གསང་སྔགས་ལྷ་རྣམས་མཉེས་གྱུར་ཏེ། །རྡོ་རྗེ་འཛིན་པའི་ས་ཐོབ་ནས། །འགྲོ་ཀུན་སྨིན་ཅིང་གྲོལ་བར་ཤོག །ཅེས་སོ། །དེ་ནས་གཤིན་རྗེ་ཆོས་ཀྱི་རྒྱལ་པོ་བསྐྱེད་ཅིང་སྤྱན་འདྲེན་པ་ནི། སྭ་བྷཱ་ཝས་སྟོང་པར་སྦྱངས། སྟོང་པའི་ངང་ལས། བཅོམ་ལྡན་འདས་ཀྱི་སྐུའི་དྲུང་དུ་རཀྟའི་རྒྱ་མཚོའི་དབུས་སུ། ཐོད་མཁར་འབར་བའི་གཞལ་ཡས་ཁང་ཀེང་རུས་ཀྱི་ཐོག་ཕུབ་པ། དེའི་དབུས་མེ་རླུང་འཚུབ་མའི་ནང་ན། པད་ཉི་ལ་གནས་པའི་མ་ཧེ་ནག་པོ་དྲེགས་ཤིང་ཁྲོས་པ་དགྲ་བགེགས་ཀྱི་བམ་ཆེན་བརྫིས་པའི་སྟེང་དུ། ཡ་ལས་དབྱུག་པ་ཡས་མཚན་པ་ཡོངས་སུ་གྱུར་པ་ལས། གཤིན་རྗེ་ཆོས་ཀྱི་རྒྱལ་པོ་སྐུ་མདོག་མཐིང་ནག་ཞལ་གཅིག་ཕྱག་གཉིས་མ་ཧེའི་གདོང་པ་ཅན། ཕྱག་གཡས་རྡོ་རྗེས་མཚན་པའི་ཐོད་དབྱུག་ནག་པོ་འཕྱར་
ཞིང༌། གཡོན་ཞགས་པ་ནག་པོ་དང་བཅས་པའི་སྡིགས་འཛུབ་མཛད་པ། སྐྲ་ཁམས་པ་གྱེན་དུ་བརྫེས་ཤིང་མཆེ་བ་གཙིགས་པ། གཅེར་བུ་ལིང་ག་གྱེན་དུ་བསྒྲེང་བ། རབ་ཏུ་འཇིགས་པའི་ཉམས་ཅན་རྒྱན་སྤངས་པ། ཞབས་གཡས་བསྐུམ་གཡོན་བརྐྱང་གི་སྟབས་ཀྱིས་མེ་རླུང་འཚུབ་མའི་ཀློང་ན་མ་ཧེའི་གདན་ལ་ཞུགས་པའོ། །གཡོན་དུ་ཙཾ་ལས་ཡུམ་ཙ་མུཎྜི་ནག་མོ་སྐྲ་དམར་སེར་སིལ་བུར་གྲོལ་ཞིང་ནུ་མ་འཕྱང་བ། བ་ལང་གི་པགས་པ་དང༌། གོས་ནག་གྱོན་ཅིང༌། ཏྲི་ཤུ་ལ་དང་ཐོད་པ་ཐོགས་པ་ཆེར་ཁྲོས་པའོ། །མཐའ་བསྐོར་དུ། ཡ་བ་ཏི་བེ་ཅོན་འཛིན་པ། ཕྱ་སངས་འཁོར་ལོ་འཛིན་པ། རྨིག་པ་གསལ་ཤིང་འཛིན་པ། རལ་པ་ཚར་དགུ་མདུང་ཐུང་འཛིན་པ། གཤིན་རྗེ་ཕོ་ཉ་ལྕགས་ཀྱུ་འཛིན་པ། དུས་ཀྱི་ཞགས་པ་བདུད་ཞགས་འཛིན་པ། ཡ་མ་དཾཥྟི་མཆེ་བ་འབར་བ་འཛིན་པ། གཞན་ཡང་དུས་མཚན་མོ་དང༌། གསོད་པ་མོ་དང༌། ནག་མོ་དང༌། ནམ་གྲུ་ཤ་ཀ་ལཱི་ལ་སོགས་པ་གཤིན་རྗེ་དང༌། མ་མོའི་ཚོགས་ཐམས་ཅད་ཀྱིས་ཡོངས་སུ་བསྐོར་བར་གྱུར། རང་གི་སྙིང་ག་ནས་འོད་ཟེར་འཕྲོས་པས། ལྷོ་ཕྱོགས་རིམ་པ་བདུན་གྱི་ས་འོག་གཤིན་རྗེའི་གྲོང་ཁྱེར་སྒོ་མེད་ལྕགས་ཀྱི་མུན་ཁང་བཅུ་དྲུག་ནས། གཤིན་རྗེ་ཆོས་ཀྱི་རྒྱལ་པོ་འཁོར་དང་བཅས་པ་བཛྲ་ས་མཱ་ཛཿ རུས་སྦལ་གྱི་འདུག་སྟངས་བཅས་ལ། རྡོ་རྗེ་བསྡམས་པ་ལས་སྲིན་ལག་བརྐྱང་བའི་གཤིན་རྗེའི་དམ་རྒྱ་གཡབ་ཅིང༌། ཧཱུཾ། འདི་ནས་ལྷོ་ཡི་ཕྱོགས་རོལ་ན། །དཔག་ཚད་བརྒྱད་ཁྲིའི་ཕ་རོལ་ན། །རིམ་པ་བདུན་གྱི་ས་འོག་ན། །ཐོད་པ་ལྕགས་ཀྱི་གྲོང་ཁྱེར་ན། །ཡི་དྭགས་ཀུན་གྱི་སྡེ་དཔོན་པོ། །མ་མོ་ཀུན་གྱི་ཚོགས་རྗེའོ། །གསོན་གཤིན་ཀུན་གྱི་ཟམ་ཁ་པ། །གསོན་པོ་
བཀོས་ལ་འདེབས་པ་པོ། །ཤི་བ་ཀུན་གྱི་གཤིན་བུ་རྗེ། །དགེ་བ་ཅན་གྱི་སྟངས་འཛིན་པ། །སྡིག་པ་ཅན་གྱི་ཆད་པ་མཁན། །ལྷ་དང་བཅས་པའི་འཇིག་རྟེན་ན། །ལེགས་ཉེས་ཆོས་བཞིན་གཅོད་པ་པོ། །ཆོས་རྒྱལ་གཤིན་རྗེ་ཞེས་བྱ་བ། །མངོན་ཤེས་རྫུ་འཕྲུལ་མཐུ་རླབས་ཅན། །འཁོར་བཅས་གནས་འདིར་གཤེགས་སུ་གསོལ། །ཧྲཱྀཿཥྚཱིཿམཐར། ཡ་མ་རཱ་ཛ་ས་པཱ་རི་ཝཱ་ར་ཨཱ་ཀརྵ་ཡ་ཛཿ ཞེས་སྤྱན་དྲངས། གོང་གི་དམ་རྒྱ་དེ་ཉིད་དམ། རྡོ་རྗེ་ཁུ་ཚུར་གྱི་གུང་མོ་བརྐྱང་པ་དབྱུག་པའི་ཕྱག་རྒྱ་འཕྱར་བས་ཀྱང་རུང་སྟེ། ཧྲཱྀཿཥྚཱིཿའི་མཐར། ཡ་མ་རཱ་ཛ་ས་པཱ་རི་ཝཱ་ར་ས་མ་ཡ་སྟྭཾ། ཞེས་དམ་ལ་བཞག །ཨརྒྷཾ་ནས་ཤཔྟའི་བར་གྱིས་མཆོད་པ་བསྡུས་པ་ཞིག་ཕུལ། གཤིན་རྗེའི་རྒྱལ་པོ་འཁོར་བཅས་ལ། །དམ་ཚིག་དབང་གིས་འདིར་བརྟན་བཞུགས། །མཆོད་པ་ཚུལ་བཞིན་བཞེས་ནས་ཀྱང༌། །ལས་གྲུབ་བར་དུ་བཞུགས་སུ་གསོལ། །ཨོཾ་ཡ་མ་རཱ་ཛ་ས་མ་ཡ་པདྨ་ཀ་མ་ལ་ཡེ་སྟྭཾ། ཛཿཧཱུཾ་བཾ་ཧོཿ གཉིས་སུ་མེད་པར་བསྟིམ། ལག་པ་གཡས་བེ་ཅོན་གྱི་ཕྱག་རྒྱ་བཅས། གཡོན་པས་སོ་སོའི་ཕྱག་རྒྱ་བཅས་པའམ་གཏོར་སྣོད་དམ་བཟེད་ཞལ་དུ་མཆོད་པ་བསྟབས་ལ། ཧྲཱྀཿམཐར། ཡ་མ་རཱ་ཛ་ས་པཱ་རི་ཝཱ་ར་ཨརྒྷཾ་པྲ་ཏཱིཙྪ་ཨཱཿཧཱུཾ། དེ་བཞིན་དུ། པཱདྱཾ། བཛྲ་པུཥྤེ་པཱུ་ཛ་ས་མ་ཡེ་ཧཱུཾ། དེ་ནས། ནཻ་ཝི་ཏྱའི་བར་རིགས་འགྲེ། རོལ་མོའི་སྒྲ་བསྒྲགས་ཤིང༌། ཨོཾ་བཛྲ་ཤཔྟ་ཨཱཿཧཱུཾ། ཞེས་བརྗོད། བཅོམ་ལྡན་ཆོས་རྗེ་འཇམ་དབྱངས་སྤྱན་སྔ་རུ། །བདུད་འདུལ་བསྟན་པ་བསྲུང་བར་ཞལ་བཞེས་པ། །ལས་ཀྱི་གཤིན་རྗེ་མ་མོ་མཁའ་འགྲོ་དང༌། །འབྱུང་པོ་རོ་ལངས་ཅི་བགྱི་བཀའ་གཉན་སོགས། །ཕྱི་ནང་གསང་བའི་དམ་ཅན་མ་ལུས་པ། །བདག་གི་རེ་བའི་སེམས་
ཀྱིས་འདུད་ཅིང་མཆིས། །ཞེས་བསྟོད། དེ་ནས་གཏོར་མ་བྱིན་གྱིས་བརླབ་པ་ནི། ཨོཾ་ཨཱཿབིགྷྣཱནྟ་ཀྲྀཏ་ཧཱུཾ་ཕཊ། ཅེས་པས་བསངས་པ་ནས། རྒྱ་མཚོ་ཆེན་པོར་གྱུར། ཨོཾ་ཨཱཿཧཱུཾ་ཧ་ཧོ་ཧྲཱིཿ ཞེས་པའི་བར་སྒྲུབ་ཐབས་བཞིན། བྱིན་རླབས་འདི་སྔ་ཕྱིའི་གཏོར་མ་ཐམས་ཅད་ལ་ཆབས་གཅིག་ཏུ་དམིགས་པས་ཆོག །ལྷ་ཐམས་ཅད་ཀྱི་ལྗགས་ཧཱུཾ་ལས་བྱུང་བའི་རྡོ་རྗེའི་འོད་ཟེར་གྱི་སྦུ་གུས་གཏོར་མ་དྲངས་ཏེ་གསོལ་བར་གྱུར། སྔགས་གསུམ་ཀའམ་སྙིང་པོའི་མཐར། སརྦ་བིགྷྣཱན་ཤ་ཏྲུན་མཱ་ར་ཡ་ཨི་དམ་བ་ལིང་ཏ་ཁ་ཁ་ཁཱ་ཧི་ཁཱ་ཧི་ཧཱུཾ་ཧཱུཾ་ཕཊ། ཅེས་ལན་བདུན་ལ་སོགས་པས་གཙོ་བོ་ལ་ཕུལ། ཨོཾ་བཛྲ་ལཱ་སྱ་ཧཱུཾ། སོགས་ཀྱིས་མཆོད། སྙིང་པོའི་མཐར་འབྲུ་གསུམ་བཏགས་པས་ནང་མཆོད་འབུལ། གཟུགས་སྒྲ་ལ་སོགས་དྲུག་པོ་ནི། །ཞེས་པ་ནས། དུད་ཁ་མུན་ཅན་ཁྱོད་ལ་འདུད། །གཤིན་རྗེ་གཤེད་པོ་འཁོར་བཅས་རྣམས། །མཆོད་སྦྱིན་གཏོར་མ་འདི་བཞེས་ལ། །ཞེས་པ་ནས། ཡིད་ལ་འདོད་པ་ཀུན་གྲུབ་ཤོག །ཞེས་པའི་བར་གྱིས་འདོད་དོན་གསོལ་བ་བཏབ། ཡི་དམ་གཞན་ལ་གཏོར་མ་འབུལ་ནའང་སྐབས་འདིར་བྱ་བ་ཉིད་དོ། །དེ་ནས། ཨོཾ་ཨིནྡྲ་ཡ་ཧྲཱིཿ ཡ་མ་ཡ་བཱ་རུ་ཎ་ཡ་བི། ཀུ་བེ་ར་ཡ་ཀྲྀ། ཨཱི་ཤྭ་ན་ཡ་ཏ། ཨགྣ་ཡེ་ཨ། ནཻ་རི་ཏྱ་ན། བཱ་ཡ་བེ་ན། ཧྨ་ཡ་ཧཱུཾ། བཱ་སུ་དྷ་རི་ནེ་ཡ་ཕཊ། སརྦ་བྷཱུ་ཏེ་བྷྱོ་ཧ་ཧ། ཧི་ཧི། ཧཱུཾ་ཧཱུཾ་ཕཻ༵ཾ་ཕཻཾ་ཕཊ་ཕཊ་སྭཱཧཱ། ཞེས་པ་ལན་གསུམ་མམ་བདུན་གྱི་བར་གང་འོས་ཀྱིས་ཕྱོགས་སྐྱོང་རྣམས་ལ་ཕུལ། ཨོཾ་ད་ཤ་དིཀ་ལོ་ཀ་པཱ་ལ་ས་པཱ་རི་ཝཱ་ར་བྷྱཿ ཞེས་པ་ལ་ཨརྒྷཾ་ནས། ཤཔྟའི་བར་གྱིས་མཆོད། ཧྲཱྀཿཥྚཱིཿའི་མཐར་འབྲུ་གསུམ་བཏགས་པས་ནང་མཆོད་ཕུལ། བདུད་བཞི་པོ་ནི་རྣམ་པར་འཇོམས། །དཔའ་བོ་གདུལ་དཀའ་འདུལ་མཛད་པ། །གཤིན་རྗེ་མཐར་བྱེད་ཕྱག་འཚལ་
ཞིང༌། །ཕྱོགས་སྐྱོང་འཁོར་དང་བཅས་ལ་འདུད། །མཆོད་སྦྱིན་གཏོར་མ་འདི་བཞེས་ལ། །སོགས་འཕྲིན་ལས་བཅོལ། ཨོཾ་ཀཱ་ལ་རཱུ་པ་སརྦ་བིགྷྣཱན་ཤ་ཏྲུན་མཱ་ར་ཡ་ཨི་དམ་བ་ལིང་ཏ་ཁ་ཁ་ཁཱ་ཧི་ཁཱ་ཧི་སྭཱཧཱ། ཨོཾ་ཧྲཱིཿཙ་མུཎྜཱི་སརྦ་བིགྷྣཱན་ཤ་ཏྲུན་སོགས་སྦྱར་བ་སྟེ། དེ་ལྟར་ལན་བདུན་གྱིས་གཤིན་རྗེ་ལྕམ་དྲལ་ལ་གཏོར་མ་ཕུལ། ཨོཾ་བཛྲ་ཨརྒྷཾ་སྭཱཧཱ། ནས་ཤཔྟའི་བར་གྱིས་མཆོད། འཆི་བདག་དམ་ཅན་གཤིན་རྗེ་ནི། །འཇམ་པའི་དབྱངས་ཀྱི་ཕྱག་བརྙན་ཏེ། །མ་གཤིན་འབྱུང་པོ་ཚོགས་བཅས་ལ། །མཆོད་ཅིང་བསྟོད་དེ་ཕྱག་ཀྱང་འཚལ། །རྒྱལ་པོ་འཁོར་དང་བཅས་པ་རྣམས། །མཆོད་སྦྱིན་གཏོར་མ་འདི་བཞེས་ལ། །ནས། ཡིད་ལ་འདོད་པ་ཀུན་གྲུབ་ཤོག །ཅེས་པའི་བར་གྱིས་འཕྲིན་ལས་བཅོལ་ཏེ། བཟླས་པ་ཅུང་ཟད་བྱའོ། །ཆོས་སྐྱོང་གཞན་གྱི་གཏོར་མ་དང་བསྐང་བ་སོགས་བྱེད་པར་སྤྲོ་ན་འདིར་བྱ་བ་ཡིན་མོད། རྣམ་གྲངས་ཧ་ཅང་མང་གྲགས་པ་རང་ནི་མི་ལེགས་སོ། །དེ་དག་ནི་ལས་ཅི་ལྟ་བུ་ཞིག་སྒྲུབ་ཀྱང་ངེས་པ་དགོས་པས་རྩ་བའི་གཏོར་འབུལ་ཞེས་བྱའོ། །ཕྱིས་ཀྱི་ལག་ལེན་རྣམས་ལ་རྩ་བའི་གཏོར་འབུལ་དང༌། ལས་བཅོལ་གྱི་གཏོར་འབུལ་སོ་སོར་མི་བྱེད་པ་ཤས་ཆེ་མོད། གློོ་བུར་ལས་བཅོལ་གྱི་གཏོར་མའི་སྐབས་འགའ་ཞིག་ཏུ་དེ་ལྟར་བྱར་རུང་བའང་ཡིན་མོད་ཀྱི། ཐོག་མར་རྩ་བའི་གཏོར་མ་འགྲུབ་ན། ལས་གང་ལ་ཡང་སྟོབས་ཆེ་ཞིང་བཀྲ་ཤིས་པ་ཡིན་པས། ལོང་སྐབས་ཡོད་ན་སོ་སོར་བྱ་བ་ཁོ་ན་ལེགས་སོ། །གཉིས་པ་ལས་ལ་སྦྱར་བ་ལ། ལས་སྦྱོར་གྱི་སྔོན་དུ་བྱ་བ་གཉིས། ལས་སྦྱོར་དངོས་ཀྱི་བྱ་བ་བཞིའོ། །དང་པོ་ལ་གཉིས་ཀྱི་དང་པོ་གནང་བ་ཞུ་ཞིང་སྙན་གསན་དབབ་པ་ནི། ཧཱུཾ། བཅོམ་ལྡན་འཇམ་དཔལ་ཁྲོས་པ་གཤིན་རྗེ་གཤེད། །ཕྱོགས་སྐྱོང་བཅུ་དང་འཆི་བདག་ཉི་མའི་བུ། །མ་མོ་གཤིན་
རྗེ་སྲིན་པོ་མཁའ་འགྲོའི་ཚོགས། །ཐམས་ཅད་མ་ལུས་བདག་ལ་སྙན་གསན་ཞིག །རྒྱལ་བ་རྒྱ་མཚོའི་ཐུགས་ཀྱི་མཛོད་འཛིན་པ། །རྩ་བརྒྱུད་བླ་མ་ཐམས་ཅད་དགོངས་སུ་གསོལ། །ཕྱོགས་བཅུའི་སངས་རྒྱས་བྱང་སེམས་མ་ལུས་ལ། །བདག་ནི་དྲག་པོའི་ལས་ཀྱི་གནང་བ་ཞུ། །འཇིག་རྟེན་འཇིག་རྟེན་འདས་པའི་དམ་ཅན་དང༌། །དཀར་ཕྱོགས་སྐྱོང་བ་མཐུ་དང་རྫུ་འཕྲུལ་ཅན། །སྲིད་གསུམ་གནས་པ་ཐམས་ཅད་འདིར་དགོངས་ཤིག །གཟུང་དང་དཔང་མཛོད་ཞལ་ལྕེ་བཅད་དུ་གསོལ། ཧཱུཾ། གཏུམ་པོ་མ་རུངས་སྡིག་པ་ཅན། །དཀོན་མཆོག་གསུམ་ལ་གནོད་བྱེད་དང༌། །སེམས་ཅན་ཡོངས་ལ་འཚེ་བར་བྱེད། །རྡོ་རྗེ་སློབ་དཔོན་སྨོད་པ་དང༌། །ཐེག་པ་ཆེན་པོ་སུན་འབྱིན་དང༌། །སྔགས་དང་རྒྱུད་ལ་འཕྱ་བྱེད་པ། །འདི་དག་སྒྲོལ་བའི་དུས་ལ་བབ། །ངན་འགྲོའི་སྒོ་མང་བཅད་དུ་གསོལ། ཁྱད་པར་དགྲ་བོ་སྡིག་ཅན་འདིས། །དཀོན་མཆོག་གསུམ་གྱི་དབུ་འཕང་སྨད། །གསང་སྔགས་རྣལ་འབྱོར་ཡོངས་ལ་བརྙས། །སངས་རྒྱས་བསྟན་པ་འདི་ཡིས་བཤིག །རྒྱལ་ཁམས་འདི་ཡིས་ཕུང་བར་བྱས། །ཡི་དམ་ལྷ་ཚོགས་ཁྱེད་རྣམས་ལ། །ལོག་ལྟ་ཅན་འདིས་བསྐུར་བ་བཏབ། །བཀའ་བསྲུང་རྣམས་ལ་ཕོད་བཙུགས་སོ། །རིག་འཛིན་རྣམས་ལ་དོ་བསྡོས་སོ། །ལྷ་ལ་མཐུ་མེད་ཟེར་ནས་བརྙས། །རྣལ་འབྱོར་ལྷ་མེད་ཟེར་ནས་བརྙས། །བསྒྲལ་བའི་ཞིང་བཅུ་འདི་ལ་འཚང༌། །འདི་ལྟ་སྟོབས་དང་སྤྲོ་བ་ཆེ། །རང་འདོད་ཆེ་ལ་ཆོག་མི་ཤེས། །བཟང་པོ་ཐམས་ཅད་ཁྱད་དུ་གསོད། །བསམ་པ་ངན་ལ་སྦྱོར་བ་རྩུབ། །བརྩེ་བར་འོས་པའི་ཉམས་ཆུང་མིན། །ང་རྒྱལ་ཅན་འདིའི་སྟངས་ཆོག་ཅིག །བདག་ཅག་ཆོས་
ལ་རྟེན་རྣམས་ཀྱི། །མགོན་སྐྱབས་དཀོན་མཆོག་ཁྱེད་ལས་མེད། །སྔགས་འཆང་རིག་འཛིན་ཚོགས་རྣམས་ཀྱིས། །ཞི་བའི་ཐབས་ནི་སྣ་ཚོགས་པས། །བཟློག་ཀྱང་ལོག་སྲེད་ཅན་འདི་ནི། །ཐབས་ཀྱིས་སྡིག་ལས་བཟློག་མ་ནུས། །དགྲ་འདི་ཡུན་རིང་འཚོ་གྱུར་ན། །སྐྱེ་བོ་ཡོངས་ལ་གནོད་བྱས་ནས། །རང་ཉིད་མི་བཟང་ངན་འགྲོར་ལྟུང༌། །དེས་ན་བསྒྲལ་བའི་གནང་བ་ཞུ། ཁྲོ་རྒྱལ་གཤིན་རྗེ་གཤེད་པོ་ཡི། །མཐུ་སྟོབས་ཟད་པ་མི་མངའ་བས། །དགྲ་བགེགས་སྒྲོལ་བའི་དུས་ལ་བབ། །རྣམ་དག་ཞིང་དུ་སྒྲོལ་བར་ཞུ། །ཕོ་ཉ་ཕྱག་བརྙན་མངགས་པ་དང༌། །སྣང་སྲིད་ལྷ་སྲིན་སྡེ་བརྒྱད་རྣམས། །དྲག་པོའི་ལས་ལ་སྐུ་བསྐྱོད་ཅིག །མཐུ་རྩལ་དབྱུང་བའི་དུས་ལ་བབ། །ཆོས་ཀྱི་རྒྱལ་པོ་གཤིན་རྗེ་ནི། །ས་འོག་མུན་པའི་སྨག་རུམ་ནས། །གཤིན་རྗེ་བྱེ་བ་ཐེར་འབུམ་བཅས། །མངོན་སྤྱོད་འཕྲིན་ལས་དུས་ལ་བབ། །ཞེས་བསྐུར་པས། རང་ལ་གནང་བ་སྩལ་ཞིང༌། དགྲ་བགེགས་ལ་ཐུགས་ཆེར་འཁྲུགས་པས་དྲག་པོའི་ལས་ལ་མངོན་དུ་ཕྱོགས་པའི་ཚུལ་དུ་བཞུགས་པར་མོས། དགྲ་བོ་དམིགས་བསལ་ཡོད་ཅིང༌། བསྒྲུབ་པ་དང་འབྲེལ་བའི་དྲག་ལས་གལ་ཆེ་བའི་སྐབས་ཡིན་ན། གནང་བ་ཞུ་བའི་གཟུ་དཔང་རྒྱས་པ་ལོགས་སུ་ཡོད་པ་ལྟར་བྱས་ལ། དམིགས་བསལ་གྱི་ཡུལ་མེད་ན། ཁྱད་པར་དགྲ་བོ་ཞེས་སོགས་བར་གྱི་ཚིག་ཉེར་བརྒྱད་བོར་བས་ཆོག་གོ །དེ་ནས་གཉིས་པ་ཕོ་ཉ་སྤྲོ་བ་ནི། ཨོཾ་བཛྲ་བྷཻ་ར་བ་ཨཱ་ཧཾ། ཞེས་བརྗོད། ལྷའི་ང་རྒྱལ་དྲག་པོ་བསྐྱེད་ལ། བདག་བསྐྱེད། མདུན་བསྐྱེད་ཀྱི་སྐུ་དང༌། ཞབས་འོག་གི་སྲོག་ཆགས་རྣམས་ལས་དགྲ་བགེགས་འགུག་འདྲེན་མཛད་པའི་ཕོ་ཉ་དཔག་ཏུ་མེད་པ་སྤྲོས་པར་བསམ། རོལ་མོའི་སྒྲ་དང་
བཅས་ཏེ། འདི་སྐད་ཅེས་གྱེར་རོ། །ཧཱུཾ། འཇིགས་མཛད་ཆེན་པོའི་གཡས་པ་ཡི། །ཞབས་བརྒྱད་ལས་སྤྲོས་ཕོ་ཉ་ནི། །ཡ་བ་ཏི་དང་ཆོས་ཀྱི་རྒྱལ། །གཏེལ་བ་དང་ནི་གླང་མགོ་ཅན། །མིག་དམར་དང་ནི་ཕྱ་སངས་དང༌། །རྨིག་པ་རལ་པ་ཚར་དགུ་རྣམས། །མི་དང་མ་ཧེ་ཁྱུ་མཆོག་དང༌། །བོང་བུ་ག་དམར་རྔ་མོ་དང༌། ཁྱི་ནག་ལུག་དང་ཅེ་སྤྱང་ཞོན། །གདོང་བརྒྱད་གཤིན་རྗེ་བརྒྱད་པོ་ཡང༌། །ཞལ་ནས་བསྐལ་བའི་མེ་ཡང་སྤྲོ། །མཆེ་བ་གཙིགས་ཤིང་རལ་པ་སྤྲུག །དབུ་ལ་འཇམ་པའི་དབྱངས་ཀྱིས་བརྒྱན། །ཤིན་ཏུ་དྲག་པོར་བསྐུལ་བའི་ཚེ། །མགོ་བོ་འཁོར་དང་ཁྲག་ཏུ་སྐྱུག །རྣམ་ཤེས་མྱོས་དང་གསོད་པར་མཛོད། །འཇམ་པའི་རྡོ་རྗེ་བཀའ་བྱུང་གིས། །གུམ་གུམ་ཆུམ་ཆུམ་ལས་ཀྱིས་ཤིག །འཇིགས་མཛད་ཆེན་པོའི་གཡོན་པ་ཡིས། །ཞབས་བརྒྱད་ལས་སྤྲོས་ཕོ་ཉ་ནི། །ལྕགས་ཀྱུ་ཞགས་པ་ལྕགས་སྒྲོག་མ། །འབེབས་པ་མོ་དང་ཕོ་ཉ་མོ། །མཆེ་བ་མོ་དང་བེ་ཅོན་མ། །དུས་མཚན་མ་དང་བརྒྱད་པོ་ཡང༌། །བྱ་རྒོད་འུག་པ་ཁྲ་དང་ནི། །བྱ་རོག་ནེ་ཙོ་ཁྱུང་ཆེན་དང༌། །རི་{ེག་བཞད་ལ་ཞོན་ནས་རྒྱུག །ནད་བདག་མ་མོ་བརྒྱད་པོ་ཡང༌། །ཞལ་དུ་ཤ་ཁྲག་རྒྱ་མཚོར་འཁྱིལ། །མཆེ་བ་གཙིགས་ཤིང་རལ་པ་སྤྲུག །དབུ་ལ་འཇམ་པའི་དབྱངས་ཀྱིས་བརྒྱན། །ཤིན་ཏུ་དྲག་པོར་བསྐུལ་བའི་ཚེ། །བསྟན་པ་འཇིག་པ་ནད་ཀྱིས་ཐོབ། །མྱོས་དང་བསོད་པའི་ལས་མཛོད་ཅིག །འཇམ་པའི་རྡོ་རྗེའི་བཀའ་བྱུང་གི ། གུམ་གུམ་ཆུམ་ཆུམ་ལས་ཀྱིས་ཤིག །ཡ། མི་རྒོད་རོ་ལངས་བཞོན་པ་ལ། །གཤིན་རྗེ་མི་རྒོད་མགོ་ཅན་ཞོན། །གསོད་ཅིག་རྒྱོབ་ཅིག་མི་རྒོད་གདོང༌། །ན་ར་མུ་ཁའི་དུས་ལ་
བབ། །ཡ། འཇིགས་རུང་མ་ཧེའི་བཞོན་པ་ལ། །གཤིན་རྗེ་མ་ཧེའི་མགོ་ཅན་ཞོན། །རྭ་རྩེར་སྐྱོན་ཅིག་མ་ཧེའི་གདོང༌། །མ་ཧེའི་མུ་ཁའི་དུས་ལ་བབ། །ཡ། གདུག་རྩུབ་གླང་གི་བཞོན་པ་ལ། །གཤིན་རྗེ་གླང་གི་མགོ་ཅན་ཞོན། །བརྡུང་ཅིག་བརྫིས་ཅིག་བ་ལང་གདོང༌། །བྲི་ཁ་མུ་ཁའི་དུས་ལ་བབ། །ཡ། བགྲོད་བྱེད་བོང་བུའི་བཞོན་པ་ལ། །གཤིན་རྗེ་བོང་བུའི་མགོ་ཅན་ཞོན། །ཟོ་ཞིག་བྲོད་ཅིག་བོང་བུའི་གདོང༌། ཁ་ར་མུ་ཁའི་དུས་ལ་བབ། །ཡ། རྫུ་འཕྲུལ་རྔ་མོའི་བཞོན་པ་ལ། །གཤིན་རྗེ་རྔ་མོའི་མགོ་ཅན་ཞོན། །རྡུལ་དུ་ལྷོགས་ཅིག་རྔ་མོའི་གདོང༌། །ཨུཥྟ་མུ་ཁའི་དུས་ལ་བབ། །ཡ། ཟ་བྱེད་ཁྱི་ཡི་བཞོན་པ་ལ། །གཤིན་རྗེ་ཁྱི་ཡི་མགོ་ཅན་ཞོན། །རྨུགས་ཞིག་བཏུབ་ཅིག་ཁྱི་ཡི་གདོང༌། །ཤྭ་ན་མུ་ཁའི་དུས་ལ་བབ། །ཡ། གཏི་མུག་ལུག་གི་བཞོན་པ་ལ། །གཤིན་རྗེ་ལུག་ཀྱི་མགོ་ཅན་ཞོན། །བརྡུངས་ཞིག་ཚིར་ཅིག་ལུག་གི་གདོང༌། །མེ་ཥ་མུ་ཁའི་དུས་ལ་བབ། །ཡ། ཀུན་འགྲོ་ཅེ་སྤྱང་བཞོན་པ་ལ། །གཤིན་རྗེ་ཅེ་སྤྱང་མགོ་ཅན་ཞོན། །ཧུབ་ཀྱི་ཐོབ་ཅིག་ཅེ་སྤྱང་གདོང༌། །སྱ་ལ་མུ་ཁའི་དུས་ལ་བབ། །མ། ཐོགས་མེད་བྱ་རྒོད་བཞོན་པ་ལ། །གཤིན་རྗེ་བྱ་རྒོད་མགོ་ཅན་ཞོན། །སྤྱི་བོར་ཕུག་ཅིག་བྱ་རྒོད་གདོང༌། །གྲྀ་དྷ་མུ་ཁའི་དུས་ལ་བབ། །མ། མུན་མཐོང་འུག་པའི་བཞོན་པ་ལ། །མ་མོ་འུག་པའི་མགོ་ཅན་ཞོན། །ཀླད་ཁྲག་རྔུབས་ཅིག་འུག་པའི་གདོང༌། །ཨུ་ལུ་མུ་ཁའི་དུས་ལ་བབ། །མ། འབྱིན་བྱེད་བྱ་རོག་བཞོན་པ་ལ། །མ་མོ་བྱ་རོག་མགོ་ཅན་ཞོན། །མིག་ནས་ཕྱུངས་ཅིག་བྱ་རོག་གདོང༌། །ཀཱ་ཀ་མུ་ཁའི་དུས་ལ་བབ། །མ།
འདྲེན་བྱེད་ནེ་ཙོའི་བཞོན་པ་ལ། །མ་མོ་ནེ་ཙོའི་མགོ་ཅན་ཞོན། །རྒྱུ་མ་དྲོངས་ཅིག་ནེ་ཙོའི་གདོང༌། །སུ་ཀ་མུ་ཁའི་དུས་ལ་བབ། །མ། བརླག་བྱེད་ཁྲ་ཡི་བཞོན་པ་ལ། །མ་མོ་ཁྲ་ཡི་མགོ་ཅན་ཞོན། །དོན་སྙིང་ཐོད་ཅིག་ཁྲ་ཡིག་གདོང༌། །སྱེ་ན་མུ་ཁའི་དུས་ལ་བབ། །མ། རླབས་ཆེན་ཁྱུང་གི་བཞོན་པ་ལ། །མ་མོ་ཁྱུང་གི་མགོ་ཅན་ཞོན། །ཕྱེ་མར་བརློགས་ཤིག་ཁྱུང་གི་གདོང༌། །ག་རུ་མུ་ཁའི་དུས་ལ་བབ། །མ། རྣོ་ངར་རེ་སྐེག་བཞོན་པ་ལ། །མ་མོ་རི་སྐེེག་མགོ་ཅན་ཞོན། །བཤིག་ཅིག་ཕྱེ་ཅིག་རི་སྐེག་གདོང༌། །ཤཱ་རོ་མུ་ཁའི་དུས་ལ་བབ། །མ། མཛེས་དཀར་བཞད་ཀྱི་བཞོན་པ་ལ། །མ་མོ་བཞད་ཀྱི་མགོ་ཅན་ཞོན། །ཕུག་ཅིག་གཏུབས་ཞིག་བཞད་ཀྱི་གདོང༌། །ས་ར་མུ་ཁའི་དུས་ལ་བབ། །གཤིན་རྗེའི་རྒྱལ་པོ་ཁྱེད་རྣམས་དང༌། །མ་མོའི་དབང་ཕྱུག་ཁྱེད་རྣམས་ཀྱང༌། །ཕྱག་མཚན་མཚོན་ཆའི་འཕྲེང་བ་འཁྲིགས། །སྤྲུལ་པའི་ཚོགས་ཀྱིས་སྟོང་གསུམ་འགེངས། །ཕོ་ཉ་དྲག་གཏུམ་སྤྲིན་ལྟར་གཏིབས། །ཉམས་པའི་དགྲ་བགེགས་འདིར་ཁུག་ལ། །ལིང་ག་འདི་ལ་མྱུར་དུ་ཆུག །བཅིང་ཞིང་བརླབ་པ་ཉིད་དུ་མཛོད། །གཞན་ཡང་ཞིང་ཁམས་ཀུན་ཁྱབ་པར། །སྣ་ཚོགས་དོན་སྤྱོད་རྫུ་འཕྲུལ་ཅན། །མཁའ་འགྲོའི་ཚོགས་དང་མ་མོ་བརྒྱད། །མིང་པོ་གསུམ་དང་སྲིང་མོ་བཞི། །ལྷ་དང་ཀླུ་དང་དྲི་ཟའི་ཚོགས། །གཟའ་དང་རྒྱུ་སྐར་འཇིགས་བྱེད་དང༌། །ཕྱོགས་སྐྱོང་བཅུ་དང་རྒྱལ་ཆེན་བཞི། །འབར་མ་དང་ནི་དབང་ཕྱུག་མ། །ཕོ་ཉ་སུམ་བརྒྱ་དྲུག་ཅུ་དང༌། །དྲང་སྲོང་གྲུབ་པ་འཕྲོག་མ་དང༌། །གནོད་སྦྱིན་སྲིན་པོ་མ་རུངས་ཚོགས། །གདོན་ཆེན་བཅོ་བརྒྱད་ལ་སོགས་
དང༌། །ལྷ་དང་ལྷ་མིན་རྫུ་འཕྲུལ་ཅན། །ལྷ་སྲིན་སྡེ་བརྒྱད་དུས་ལ་བབ། །གཤེད་བྱེད་བྱད་བྱེད་བསམ་སྦྱོར་ངན། །སྡང་བའི་དགྲ་དང་གནོད་བྱེད་བགེགས། །བཟུང་ཤིག་ཆིངས་ཤིང་རྣམ་པར་སྡོམ། ཁུག་ཤིག་དྲོངས་ཤིག་དབང་དུ་བསྡུས། །གསོད་ཅིག་སྐྲོད་ཅིག་རེངས་པར་གྱིས། །ཕྱེ་ཅིག་གནོད་ཅིག་རྨུགས་པར་གྱིས། །ཐུལ་ཤིག་ཆོམས་ཤིག་རྣམ་པར་བཤིག །ཕོབ་ཅིག་བཏུབས་ཤིག་རྣམ་པར་རྒྱོབ། །དཀྲུགས་ཤིག་གཡེངས་ཤིག་རྣམ་པར་ཆོམ། །བདག་གིས་བསྒོ་བ་ཀུན་ཁུག་ལ། །སྲུང་སྐྱོབ་མགོན་དང་བྲལ་བར་མཛོད། །གསང་སྡེ་བརྒྱད་དང་ཕྲོལ་ལ་ཤོག །ལོ་དང་ཟླ་བར་མ་བཞག་ཅིག །ཞག་དང་ཟ་མར་མ་འཇོག་ཅིག །མ་ཐོགས་མྱུར་དུ་ཁྲིད་ལ་ཤོག །བདུན་བརྒྱུད་ཚུན་ཆད་ཁུག་ལ་ཤོག །སྟངས་འཛིན་རྒྱབ་རྟེན་ཕྱེ་མར་བཤིག །ད་ལྟ་ཉིད་དུ་འདིར་ཁུག་ལ། །གཟུགས་བརྙན་འདི་ལ་མྱུར་དུ་ཕོབ། །འཁོར་དང་སྨྱོ་ཞིང་ཁྲག་ཏུ་སྐྱུགས། །རྡུལ་ཕྲན་བཞིན་དུ་བརླག་པར་མཛོད། །དུས་ལ་བབ་པོ་ས་མ་ཡ། །ཞེས་དྲག་ཏུ་བསྐུལ་ལོ། །གཉིས་པ་ལས་སྦྱོར་དངོས་ཀྱི་བྱ་བ་ལ། ལིང་ག་འགུགས་སྒྲོལ། དྲག་པོའི་མཆོད་གཏོར། ལས་གཏད་བསྐུལ་བ། གཏོར་ཟོར་འཕང་བ་སྟེ་བཞིའོ། །དང་པོ་ལ། ལིང་ག་བསྐྱེད་པ། དགུག་གཞུག །ལྷ་དབྱེ། བསྒྲལ་ཆོག་སྟེ་བཞི་ལས། དང་པོ་ནི། སྭ་བྷཱ་ཝས་སྦྱངས། སྟོང་པའི་ངང་ལས། འབྲུབ་ཁུང་གནམ་ལྕགས་ཀྱི་རང་བཞིན་རྒྱ་ཆེ་ལ་གཏིང་ཟབ་པ། མི་བཟད་པའི་མུན་པ་ཆེན་པོར་མཚོན་ཆའི་བུ་ཡུག་དང༌། ནད་རིགས་བཞི་བརྒྱ་རྩ་བཞིའི་ན་
བུན་འཐུལ་བ། རྒྱོབ་གསོད་ཀྱི་སྒྲ་དང༌། དྲག་པོའི་འབྲུག་སྒྲས་ནག་ཕྱོགས་ཀྱི་སྙིང་འགས་པར་བྱེད་པ། ཐར་པའི་གོ་སྐབས་མེད་པའི་གནས་སུ་གྱུར། དེ་ལྟ་བུའི་ནང་དཔག་ཚད་བརྒྱད་ཁྲིའི་གཏིང་དུ། རླུང་དང་མེའི་དཀྱིལ་འཁོར་ལ་ཎྲྀ་འམ་ཏྲི་ལས་དགྲ་བོའམ་བགེགས་ལུས་རིད་ཅིང་ཉམ་ཆུང་བ། དབང་པོ་དོད་པ། ལྕགས་སྒྲོག་དང༌། ཞགས་པས་བཅིང་ཞིང༌། བུ་ག་དགུ་ནས་ཁྲག་འཛག་པ། ལུས་རྨ་ཤུའི་འཕྲེང་བས་ཁྱབ་ཅིང་ཀྱི་ཧུད་ཀྱི་སྒྲ་སྒྲོགས་པ་སྡུག་བསྔལ་གྱིས་གདུངས་པའི་སེམས་དང་ལྡན་པའི་རྣམ་པ་ཅན་དུ་གྱུར། གཉིས་པ་ནི། ཧཱུཾ་མཛད་ཀྱི་ཕྱག་རྒྱ་བཅས་ཤིང༌། ཅུང་ཟད་གཡབས་ལ། ན་མོ་རྗེ་བཙུན་རྩ་བ་དང་བརྒྱུད་པར་བཅས་པའི་དཔལ་ལྡན་བླ་མ་དམ་པ་རྣམས་ཀྱི་བཀའ་བདེན་པ་དང༌། ཕྱོགས་བཅུ་དུས་གསུམ་གྱི་སངས་རྒྱས་རྣམས་ཀྱི༴ ལུང་དང་རྟོགས་པས་བསྡུས་པ་དམ་པའི་ཆོས་རྣམས་ཀྱི༴ ཐེག་པ་གསུམ་ལ་གནས་པ་འཕགས་པའི་དགེ་འདུན་རྣམས་ཀྱི༴ ཡི་དམ་རྒྱལ་བའི་དཀྱིལ་འཁོར་གྱི་ལྷ་ཚོགས་རྣམས་ཀྱི༴ དེ་བཞིན་གཤེགས་པ་དང༌། རྡོ་རྗེ་དང༌། རིན་པོ་ཆེ་དང༌། པདྨ་དང༌། ལས་ཀྱི་རིགས་སུ་ཞུགས་པའི་ལྷ་ཚོགས་རྣམས་ཀྱི༴ སྙིང་པོ་དང༌། ཕྱག་རྒྱ་དང༌། གསང་སྔགས་དང༌། རིགས་སྔགས་ཀྱི་ལྷ་ཚོགས་རྣམས་ཀྱི༴ དུས་གསུམ་གྱི་སངས་རྒྱས་ཐམས་ཅད་ཀྱི་སྐུ་དང༌། གསུང་དང༌། ཐུགས་རྡོ་རྗེ་ཁྲོ་རྒྱལ་ཆེན་པོ་གཤིན་རྗེ་གཤེད་པོའི་ལྷ་ཚོགས་རྣམས་ཀྱི༴ བཀའ་སྡོད་ཕྱག་བརྙན་དམ་ཅན་བསྲུང་མའི་ཚོགས་ཀྱི༴ ཆོས་ཀྱི་དབྱིངས་རྣམ་པར་དག་ཅིང་བསམ་གྱིས་མི་ཁྱབ་པའི༴ ཀུན་རྫོབ་རྒྱུ་འབྲས་
བསླུ་བ་མེད་པའི༴ རྣལ་འབྱོར་པ་བདག་ཅག་གི་སྔགས་དང༌། ཕྱག་རྒྱ་དང༌། ཏིང་ངེ་འཛིན་གྱི་བདེན་པ་དང༌། བདེན་པ་ཆེན་པོས་བྱིན་གྱིས་བརླབས་ཀྱིས། སྤྱིར་སངས་རྒྱས་ཀྱི་བསྟན་པ་འཇིགས་པར་བྱེད་པ། སེམས་ཅན་ཡོངས་ལ་གནོད་ཅིང་འཚེ་བ། མི་དགེ་བ་བཅུ་དང༌། མཚམས་མེད་པ་ལྔ་ལ་སོགས་པ་སྡིག་པའི་ལས་ལ་རྟག་ཏུ་སྤྱོད་པ། དཀོན་མཆོག་གསུམ་ལ་བརྙས་ཤིང་མཐོ་འཚམས་པ་མ་རུངས་པ་ཐམས་ཅད་དང༌། ཁྱད་པར་དུ་རྣལ་འབྱོར་བསྒྲུབ་པ་པོ་བདག་ཅག་ལ་ཞེས་པའམ། བཤད་སྒྲུབ་ཀྱི་བསྟན་པ་ཁྱད་པར་ཅན་འདི་ལྟ་བུ་ལ་ཞེས་སོགས་སྐབས་སུ་བབ་ཀྱི་མཚམས་སྦྱར་ནས། དངོས་དང་བརྒྱུད་པའི་སྒོ་ནས་གནོད་པར་བྱེད་པའི་སྔ་དགྲ་ལག་ལ་བདར་བ། ཕྱི་དགྲ་ཡིད་ལ་བསམས་པ། ད་ལྟར་སྔོན་དུ་གྱུར་པའི་ལས་ངན་གྱི་དགྲ་བགེགས། དངོས་གྲུབ་དང༌། ཏིང་ངེ་འཛིན་དང༌། བསམ་པ་ལ་བར་དུ་གཅོད་པར་བྱེད་པ་དང༌། ཐོས་པ་དང༌། བསམ་པ་དང༌། བསྒོམ་པ་ལ་ལོག་པར་སྒྲུབ་པར་བྱེད་པ་དང༌། ཚེ་དང༌། འབྱོར་པ་དང༌། དབང་ཕྱུག་དང༌། བདེ་བ་དམ་པ་ལ་མི་མཐུན་པར་རྩོམ་པ། མདོར་ན་ཆོས་དང་འབྱོར་བའམ་ཕན་པ་བདེ་བ་ཕུན་སུམ་ཚོགས་པ་ལ་བར་དུ་གཅོད་པར་བྱེད་པ་གང་ཡིན་པ་དེ་དག་མཐོ་དམའ་དབུས་གསུམ། ཉེ་རིང་བར་གསུམ། ས་འོག །ས་སྟེང༌། ས་བླ་གང་གནས་ཀྱང་རུང༌། ལས་མཁན་ཕོ་ཉའི་ཚོགས་ཁྱེད་རྣམས་ཀྱིས་ད་ལྟ་ཉིད་དུ་མ་ཐོགས་པར་མྱུར་བ་ཉིད་དུ་འདིར་ཁུག་ཅིག །རྒྱབ་རྟེན་མགོན་སྐྱབས་ཀྱི་དབང་དུ་མ་གཏོང༌། ལས་ཀྱི་རྣམ་པར་སྨིན་པ་ལ་ཁག་
མི་བཞག །ཕྱི་མ་ལ་དུས་མ་འདེབས་པར་འཚོར་བ་མེད་པར་འདིར་ཁུག་ཅིག །ལས་ཀྱི་རླུང་གིས་རྒྱབ་ནས་དེད་ཅིག །མུན་པ་ནག་པོས་མདུན་ནས་བསུས་ཤིག །གཤིན་རྗེའི་ལྕགས་ཀྱུས་སྙིང་ནས་དྲོངས་ཤིག །འཆི་བདག་གི་ཞགས་པས་{ེ་ནས་ཆིངས་ཤིག །ལས་ངན་གྱི་དུག་གིས་སྨྱོ་བར་གྱིས་ཤིག །སྲོག་བདུད་ཀྱི་མཚོན་ཆས་ལུས་ལ་བཏབ་ནས། རབ་ཏུ་བསྡིགས་ཏེ་སྐད་ཅིག་ཐང་ཅིག་ཡུད་ཙམ་འདི་ཉིད་ལ་ལིང་ག་འདིར་ཕོབ་ཅིག །ཧྲཱྀཿདང༌། ཀཱ་ལ་རཱུ་པའི་མཐར། སརྦ་བིགྷྣཱན་ཤ་ཏྲུན་ཨཱ་ཀརྵ་ཡ་ཛཿཛཿ ནྲྀ་ཡཾ་ཛཿ ཏྲྀ་ཡཾ་ཛཿ ཨོཾ་བཛྲ་ཨཾ་ཀུ་ཤ་ཛཿ ཨོཾ་བཛྲ་པཱ་ཤ་ཧཱུཾ། ཨོཾ་བཛྲ་སྥོ་ཊ་བཾ། ཨོཾ་ཨཱ་བེ་ཤ་ཨ། ཞེས་རོལ་མོའི་སྒྲ་དྲག་པོ་དང་བཅས་ཏེ་ལན་གསུམ་དགུག་གཞུག་བྱའོ། །གསུམ་པ་ནི། དེ་ནས་མཆོད་པ་གཅིག་ཡི་གེ་འབྲུ་གསུམ་གྱི་བྱིན་གྱིས་བརླབས་ལ། ཨརྒྷཾ་ནས་ཤཔྟའི་བར་གྱིས་སྔགས་དང་ཕྱག་རྒྱས་དགྲ་བགེགས་ཀྱི་ཁ་སྦྱོར་བཞིའམ་གསང་སྡེའི་ལྷ་ལ་ཕུལ། རྣམ་པར་མི་རྟོག་ཐུགས་རྗེའི་བདག །ལུས་ངན་འདི་ལ་མ་བཞུགས་ཤིག །མཁའ་དབྱིངས་ཆོས་སྐུའི་ཀློང་དཀྱིལ་དུ། །ལྷ་དང་བཅས་ཏེ་གཤེགས་སུ་གསོལ། །ཅེས་མཆོད་པ་སྟེང་དུ་གཏོར་ཞིང་དམིགས་པ་དྲག་ཏུ་གཏད་དོ། །བཞི་པ་ནི། དེ་ནས་ཕྱག་མཚན་རྣམས་རིམ་གྱིས་འདེབས་ཚུལ་དུ་བྱས་ནས། ཧཱུཾ། ཞེ་སྡང་གིས་མནན་འགྲོ་གཟིགས་ནས། །ཞེ་སྡང་གཤིན་རྗེ་གཤེད་གཟུགས་སུ། །བཅོམ་ལྡན་སྙིང་རྗེའི་དབང་མཛད་པའི། ཁྲོ་རྒྱལ་ཁྱོད་ཀྱི་དུས་ལ་བབ། །བསྟན་པ་འཇིག་པའི་དགྲ་བོ་འདི། །མྱུར་དུ་ཁུག་ལ་ལས་མཛོད་ཅིག །ཧཱུཾ་ཛ་བཀའ་བཞིན་སྤྲོས་ནས་ནི། །ཊཀྐི་ཧཱུཾ་ཛ་མྱུར་དུ་ཁུག །རྡོ་རྗེ་ལྕགས་ཀྱུའི་ཚོགས་སྤྲོས་པས།
ཁུག་ཅིག་བཛྲ་ཨཾ་ཀུ་ཤ ། རྡོ་རྗེ་ཞགས་པའི་ཚོགས༴ ཆིངས་ཤིག་བཛྲ་པཱ་ཤ་ཧོཿ ། རྡོ་རྗེ་ལྕགས་སྒྲོག་ཚོགས༴ སྡོམས་ཤིག་བཛྲ་སྥོ་ཊ་བཾ། །རྡོ་རྗེ་དྲིལ་བུའི༴ ཕོབ་ཅིག་བཛྲ་གྷཎྜེ་ཧོཿ ། རྡོ་རྗེ་ཕུར་བུའི་ཚོགས་སྤྲོས་པས། །ཐོབ་ཅིག་བཛྲ་ཀཱི་ལ་ཡ། །རྡོ་རྗེ་ཐོ་བའི༴ བརྡུངས་ཤིག་བཛྲ་མུཏྒ་ར། །རྡོ་རྗེ་དགྲ་སྟྭའི༴ ཆོད་ཅིག་བཛྲ་པ་ར་ཤུ། །རྡོ་རྗེ་རྩེ་གསུམ༴ གཟིར་ཤིག་བཛྲ་ཏྲི་ཤུ་ལ། །རྡོ་རྗེ་རལ་གྲིའི༴ གཏུབས་ཤིག་བཛྲ་ཁཊྒ་ཧོཿ ། རྡོ་རྗེ་གྲི་གུག༴ རྡུལ་དུ་རློག་ཅིག་ཀརྟ་རི། །ཞེས་སོ། །སྐབས་འདིར་ཐུན་བརྡེག་པར་འདོད་ན་མན་ངག་བཞིན་དུ་བརྡེག་པ་ཡིན། ཕྱག་མཚན་ཐམས་ཅད་འདེབས་པའི་ལུགས་ཀྱང༌། འདུག་པ་སྤྱིར་མི་འགལ་མོད། གོང་མ་རྣམས་ཀྱིས་འདི་ཙམ་ཁོ་ན་མཛད་དོ། །དེ་ནས། ཧྲཱྀཿཥྟྲིའི་སྔགས་དང༌། སརྦ་བིགྷྣཱན་ཤ་ཏྲུན་མཱ་ར་ཡ་སྤེལ་ནས་བཟླ་བཞིན་དུ། ལིང་ག་དུམ་བུར་གཏུབས། གཉིས་པ་དྲག་པོའི་མཆོད་གཏོར་འབུལ་བ་ལ། དྲུག་ཅུ་རྩ་བཞི་འབུལ་བ་དང༌། མཆོད་བསྟོད་རྒྱས་པའོ། །དང་པོ་ནི། དེའི་ཕུད་ནས་འདས་གཏོར་སོགས་སྒྲུབ་པའི་གཏོར་མ་རྣམས་ལ་སྒྲོན། ཆ་ཤས་ནས་མཆོད་པ་གཞན་ལའང་བསྲེ། དགྲ་བགེགས་རྣམས་གཏོར་མ་ལ་བསྟིམ་པའི་དམིགས་པ་ཡང་ཡང་བྱས་ལ། བཏབ་གཏོར་དྲུག་ཅུ་རྩ་བཞི་ཤ་དུམ་དྲུག་ཅུ་རྩ་བཞི་ལིང་རོ་ལྷག་མ་རྣམས་དང་བཅས་པ། ཚན་པ་རེ་རེ་ཞིང་ལ། ཆུ་དང་ཁྲག་དང་ཆང་རྣམས་བླུག་ལ། བསངས་སྦྱངས། ཨོཾ་ཨཱཿཧཱུཾ། གཏོར་མ་དགྲ་བགེགས་བསྒྲལ་བའི་ཤ་ཁྲག་གི་ཕུང་པོ་ཆེན་པོར་གྱུར། གོང་གི་ཡི་དམ་གྱི་གཏོར་སྔགས་སམ། ཧྲཱྀཿཥྚཱིཿཁོ་ནའི་མཐར་ཨི་དམ་སོགས་སྦྱར་བ་ཚར་གཅིག་གི་རྗེས་ལ། ཨོཾ་ཨིནྡྲ་ཡ་ཧྲིཿ སོགས་ཇི་ལྟར་འོས་པ་སྦྱར་བས་ཕུལ། ཚན་པ་རེ་རེའི་མཐར་མཁར་ཐབས་ཀྱི་གཏོར་མ་ལ་འདེབས་
པ་ཡིན་ལ། འོན་ཀྱང་ཞག་མང་པོར་བསྒྲུབ་པ་ལ་ནི་སྣོད་གཞན་དུ་སྤུངས་པ་ཉིད་ལག་ལེན་བདེའོ། །ཨརྒྷཾ་ནས་ཤཔྟའི་བར་གྱིས་མཆོད། དེ་ནས་རོལ་མོ་དང་བཅས་ཏེ། བདུད་བཞི་པོ་ནི་རྣམ་པར་འཇོམས། །ཞེས་སོགས་བསྟོད་པ་དང་འཕྲིན་ལས་བཅོལ། དྲག་པོ་རྐྱང་པའི་སྐབས་སུ་ལས་བཅོལ་ཡང་དྲག་པོ་ཁོ་ན་བྱེད། རྐྱེན་བཟློག་རིམ་གྲོ་དྲག་པོའི་སྐབས་ཡིན་ན། འདོད་གསོལ་དཀྱུས་མ་དེ་ཡང་བྱེད་ཅིང༌། མཐར། དགྲ་དང་བགེགས་དང་ལོག་འདྲེན་དང་བྱད་མ་ཐམས་ཅད་ནི་བཱ་ར་ཡ་ཕཊ། རྐྱེན་ངན་བར་ཆད་མི་མཐུན་པའི་ཕྱོགས་ཐམས་ཅད་ཕྱི་ལ་བཟློག་པར་གྱུར་ཅིག །ཅེས་ཐལ་མོ་བརྡབ་བོ། །འདི་ལ་ཕྱོགས་སྐྱོང་གི་གཏོར་སྔགས་ཚར་བཞི་བཞིར་བཅད་ནས། ཚན་པ་བཅུ་དྲུག་བྱེད་པ་དང༌། བརྒྱད་ཚན་བརྒྱད་དུ་གཅོད་པ་དང༌། བཅུ་དྲུག་པའི་ཚན་པ་བཞིར་བྱེད་པ་རྣམས། ལག་ལེན་རྒྱས་འབྲིང་བསྡུས་གསུམ་གྱི་ཁྱད་པར་ཡིན་ལ། གང་ལྟར་ཡང་ཚན་པ་མང་ཉུང་གི་ཁྱད་མ་གཏོགས། ཚན་པ་རེ་རེའི་མགོར་བྱིན་རླབས་གསོ་བ་དང༌། འདས་གཏོར་གྱི་སྔགས་ཚར་གཅིག་རྣམས་སྦྱོར་ཞིང༌། མཇུག་ཏུ་མཆོད་བསྟོད་འདོད་གསོལ་རྣམས་བྱེད་པ་ལ་ཁྱད་པར་མེད་དོ། །མགྲོན་གྱི་གཙོ་བོ་ནི་ཕྱོགས་སྐྱོང་ཡིན་ཡང༌། ཕུད་ཡི་དམ་དང༌། ཞོར་ལ་འདིར་གཏོགས་ཀྱི་ཆོས་སྐྱོང་མཐའ་དག་ལ་བསྔོ་བ་ཡིན་ནོ། །གཉིས་པ་མཆོད་བསྟོད་ནི། དྲག་པོའི་མཆོད་པ་གསར་དུའང་བཤམས། རྙིང་པ་རྣམས་ཀྱང་ཁ་གསོས། བསངས་སྦྱངས། སྟོང་པའི་ངང་ལས། ཨ་ལས་བྱུང་བའི་ཀ་པཱ་ལ་ཡངས་ཤིང་རྒྱ་ཆེ་བ་རྣམས་ཀྱི་ནང་དུ། ཨོཾ་ཨཱཿཧཱུཾ་དང༌། རཾ་ཡིག་ལས་བྱུང་བའི་དགྲ་བགེགས་བསྒྲལ་བའི་ཁྲག་གི་མཆོད་ཡོན་དང། ཞབས་བསིལ། དབང་པོ་ལྔའི་མེ་ཏོག །ཚིལ་ཆེན་གྱི་བདུག་སྤོས། ཞུན་ཆེན་གྱི་མར་མེ། མཁྲིས་ཆེན་དྲི་དྲི་ཆབ། ཤ་རུས་ཀྱི་ཞལ་
ཟས། ཐོད་རྔའི་རོལ་མོ། གཡང་གཞིའི་འཕན་གདུགས། སྐྲའི་རྔ་ཡབ། ནང་ཁྲོལ་གྱི་ལྡ་ལྡི། ཞིང་ཆེན་གྱི་རྒྱལ་མཚན། ཐོད་པ་སྐམ་རློན་གྱི་དོ་ཤལ། ནི་རཾ་སུའི་ཕྱག་རྒྱ་ལ་སོགས་པ་དྲག་པོའི་ལས་ཀྱི་མཐུན་རྫས་ས་དང་བར་སྣང་ནམ་མཁའ་ཐམས་ཅད་ཁྱབ་པར་གྱུར། ཨརྒྷཾ་སོགས་སྐགས་དང་ཕྱག་རྒྱས་བྱིན་གྱིས་བརླབས། ཧཱུཾ། སྟོང་གསུམ་འདིའམ་གཞན་དག་ན། །དགྲ་བགེགས་མ་ལུས་བསྒྲལ་པ་ཡི། །ཁྲག་ཞག་ཨརྒྷཾ་ལ་སོགས་པ། །མཆོད་ཡོན་ཇི་སྙེད་མཆིས་པ་རྣམས། །བཅོམ་ལྡན་རྡོ་རྗེ་འཇིགས་བྱེད་དང༌། །འཇིག་རྟེན་འཇིག་རྟེན་འདས་པ་ཡི། །གཤིན་རྗེ་གཤེད་པོའི་ལྷ་ཚོགས་ལ། །གུས་པའི་སེམས་ཀྱི་བདག་འབུལ་གྱིས། །ཐུགས་རྗེའི་དབང་གིས་བཞེས་ནས་ཀྱང༌། །ཞི་རྒྱས་དབང་དང་མངོན་སྤྱོད་ཀྱི། །འཕྲིན་ལས་རྣམ་བཞིས་འགྲོ་བའི་དོན། །མ་ལུས་པར་ནི་གྲུབ་པར་མཛོད། །ཨོཾ་ཤྲཱི་བཛྲ་བྷཻ་ར་ཝ་ཡ་ས་པཱ་རི་ཝཱ་ར་ཨརྒྷཾ་པྲ་ཏཱིཙྪ་སྭཱཧཱ། དེ་བཞིན་དུ་སྦྱར་ཏེ། དབང་ལྔའི་པུཥྤེ་ལ་སོགས་པ། །མེ་ཏོག་ཇི་སྙེད་མཆིས་པ་རྣམས། །ཞེས་པ་དང༌། བཛྲ་པུཥྤེ། ཞེས་འདོན་པ་སྤོ། ཚིལ་ཆེན་དྷུ་པེ། བདུག་སྤོས་ཇི་སྙེད། དྷུ་པེ། ཞུན་ཆེན་དཱི་པེ། སྣང་གསལ། ཨཱ་ལོ་ཀེ ། མཁྲིས་པའི་གྷནྡྷེ། དྲི་མཆོག །གནྡྷེ། ཤ་རུས་བཟའ་བ། ཞལ་ཟས། ནཻ་ཝི་ཏྱ། ཐོད་རྔ་རྐང་གླིང༌། རོལ་མོ། ཤཔྟ་ཞེས་སྦྱར། ཧཱུཾ། གཡང་གཞིའི་བླ་རེ་ནམ་མཁའི་རྒྱན། །རྒྱུ་རློན་ལྡ་ལྡི་བར་སྣང་རྒྱན། །ཀེང་རུས་ཞིང་ཆེན་ས་གཞིའི་རྒྱན། །ཕྱག་རྒྱ་རྣམ་དྲུག་སྐུ་ཡི་རྒྱན། །འཇིགས་བྱེད་ཆེན་པོ་མཉེས་བྱེད་
པའི། །བླ་ན་མེད་པའི་མཆོད་པ་འདི། །བཅོམ་ལྡན་རྡོ་རྗེ་སོགས། ཨ་ལིངྐྲི་ཏ། མྱོས་བྱེད་སྟོང་གི་བཅུད་བསྡུས་པ། །ལྕགས་ཀྱུ་ལྔ་དང་ཡང་དག་ལྡན། །བདུད་རྩི་ལྔ་དང་རབ་སྦྱར་བ། །ཡེ་ཤེས་ལྔ་རུ་བྱིན་གྱིས་བརླབས། ཁ་དོག་དྲི་རོ་ནུས་པར་ལྡན། །དངོས་གྲུབ་པདྨོ་འབྱུང་བའི་གནས། །མཁའ་འགྲོ་ངང་པ་འདུ་བའི་གཞི། །གསང་བ་བདུད་རྩིའི་མཆོད་པ་འདི། །བཅོམ་ལྡན་རྡོ་རྗེ༴ བཛྲ་ཨ་མྲྀ་ཏ། དེ་ནས་སྐབས་འདིར་སྤྲོ་ཞིང་ཤེས་ན། འཇམ་དཔལ་ཁྲོས་པའི་དཀྱིལ་འཁོར་ནས། །ཞེས་སོགས། མ་རུངས་དགྲ་བགེགས་ཐམས་ཅད་ཟོ། །ཞེས་པའི་བར་དུ་བསྟོད་པ་རྒྱས་པ་བྱ་ཞིང༌། བསྡུ་ན། དུར་ཁྲོད་རྒྱན་གྱི་སོགས་དང༌། ཕྱོགས་སྐྱོང་དང༌། ཆོས་རྒྱལ་ལའང་གོང་གི་བསྟོད་ཐུང་རྣམས་ཀྱིས་བསྟོད། གསུམ་པ་ལས་གཏད་ཅིང་བསྐུལ་བ་ནི། ཧཱུཾ། སངས་རྒྱས་བྱེ་བ་ཕྲག་འབུམ་གྱི། །མཚན་ནས་བརྗོད་པའི་བསོད་ནམས་ལས། །འཇམ་དཔལ་ལན་ཅིག་ཆེས་མཆོག་ཏུ། །གསུངས་ཀྱི་བདག་ལ་བྱིན་གྱི་བརློབས། །རྡོ་རྗེ་ཁྲོས་པའང་འཇམ་པའི་དབྱངས། །མཐོང་ན་ལག་ཆ་ལྟུང་གྱུར་ན། །གཞན་ལྟ་སྨོས་ཀྱང་ཅི་ཞིག་དགོས། །དགྲ་བགེགས་མ་ལུས་མྱུར་དུ་བསྡིགས། །དྲེགས་པས་ཁྲོས་པ་ཁྲོ་བོའི་བཀའ། །བསྒོས་པ་གལ་ཏེ་མི་བྱེད་ན། །རྒྱལ་བའང་ཟ་བས་བསྡིགས་བྱེད་ན། །དགྲ་བགེགས་མ་ལུས་མྱུར་དུ་ཟོ། །འཇིག་རྟེན་གཤིན་རྗེ་ཁྲོས་པས་ཀྱང༌། །ཐལ་བར་བྱེད་ན་འཇམ་པའི་དབྱངས། ཁྲོས་པ་སྨོས་ཀྱང་ཅི་ཞིག་དགོས། །དགྲ་བགེགས་རྡུལ་ཕྲན་བཞིན་དུ་མཛོད། །བདུད་སྡེ་ཀུན་གྱིས་དུས་གསུམ་གྱི། །སངས་རྒྱས་མཚན་ནི་ཐོས་པ་བས། །འཇམ་དཔལ་
ལན་གཅིག་ཐོས་པ་ཉིད། །ལྷག་པར་འཇིགས་ཀྱི་བདུད་སྡེ་ཆོམས། །ཤ་ཆེན་ཁྲག་ཞག་ཆེན་པོ་ཡི། །གཏོར་མ་རྒྱ་མཚོ་མཆོད་པར་བཞེས། །རྒྱལ་བས་གསུངས་པའི་དམ་ཚིག་དང༌། །ཐུགས་རྗེས་དགྲ་བགེགས་མྱུར་དུ་སྒྲོལ། །ཅེས་གཙོ་བོའི་ཐུགས་དམ་བསྐུལ། ཧཱུཾ། ཤར་ཕྱོགས་རབ་འཇིགས་དུར་ཁྲོད་ནས། །ཕྱོགས་སྐྱོང་རྒྱལ་པོ་འཇིགས་བྱེད་པ། །དྲི་ཟ་འདུལ་མཛད་གཤིན་རྗེའི་སྐུ། །མ་མོ་སྲིན་པོའི་ཚོགས་དང་བཅས། །མཆོད་སྦྱིན་གཏོར་མ་འདི་སྣོམ་ལ། །རྣལ་འབྱོར་བདག་ཅག་འཁོར་བཅས་ལ། །སྡང་བའི་དགྲ་དང་གནོད་པའི་བགེགས། །རྡུལ་ཕྲན་བཞིན་དུ་བརླག་པར་མཛོད། དེ་བཞིན་དུ་འོག་མ་རྣམས་ལའང་སྦྱར་ཏེ། ཤར་ཕྱོགས་ཀྱི་དོད་དུ། ལྷོ་ཕྱོགས། དྲི་ཟའི་དོད་དུ། གྲུལ་བུམ། ཞེསའདོན་པ་སྤོས་ལ་གཞན་རྣམས་འདྲ། དེ་བཞིན་དུ། ནུབ་ཕྱོགས། ཀླུ་རྣམས། བྱང༌། གནོད་སྦྱིན། ཤར་ལྷོ། མེ་ལྷ། ལྷོ་ནུབ། སྲིན་པོ། ནུབ་བྱང༌། རླུང་ལྷ། བྱང་ཤར། འབྱུང་པོ། སྟེང་ཕྱོགས། ཚངས་པ། འོག་ཕྱོགས། ས་བདག །ཅེས་པའོ། །ཧཱུཾ། གཤིན་རྗེ་གཤེད་ཀྱི་རྣམ་འཕྲུལ་ལས། །འཇིག་རྟེན་སྐྱོང་བའི་ཚུལ་འཛིན་པ། །ཕྱོགས་སྐྱོང་བཅུ་པོའི་འཁོར་བཅས་རྣམས། །འདིར་གཤེགས་བདག་ལ་དགོངས་སུ་གསོལ། །བདག་ནི་རྣལ་འབྱོར་སྒྲུབ་པ་པོ། །འཇམ་དཔལ་གཞོན་ནུའི་ཐུགས་ཀྱི་སྲས། །གཤིན་རྗེ་གཤེད་ཀྱི་རྣལ་འབྱོར་པ། །རྫོགས་པའི་བྱང་ཆུབ་བསྒྲུབ་པའི་ཕྱིར། །བསམ་པ་བྱང་ཆུབ་སེམས་ཀྱིས་བརླན། །རྒྱར་ནི་ཡེ་ཤེས་རྡོ་རྗེ་འཆང༌། །གཟི་བྱིན་སྐུ་གསུང་ཐུགས་ཀྱི་སྐྱེད། །དོན་
ནི་འགྲོ་བ་ཡོངས་ཀྱི་དོན། །ལས་ནི་སངས་རྒྱས་ཀུན་གྱི་ལས། །བཀའ་ནི་དཀོན་མཆོག་གསུམ་གྱི་བཀའ། །ཕྱོགས་སྐྱོང་འཁོར་དང་བཅས་པ་རྣམས། །ཤ་ཆེན་ཁྲག་ཞག་ཆེན་པོ་ཡི། །གཏོར་མ་རྒྱ་མཚོ་མཆོད་པར་བཞེས། །སྡང་བའི་དགྲ་དང་གནོད་པའི་བགེགས། །ཞེས་སོགས་གོང་བཞིན། བར་འདིར་ནུས་ཤིང་སྤྲོ་ན། གཤིན་རྗེ་ཕོ་བརྒྱད་མོ་བརྒྱད་དང༌། ལྷ་སྲིད་སྡེ་བརྒྱད་ཀྱི་བསྐུལ་བ་རྣམས་ལྷའི་ང་རྒྱལ་གྱི་གདེངས་དང་ལྡན་པས་བསྒྲུབ་བོ། །དེ་ཡན་ཆད་ཐུགས་དམ་བསྐུལ་བ་ཙམ་ཡིན་ལ། དེ་ནས་ལས་གཏད་དངོས་ནི། གཤིན་རྗེ་ཆོས་ཀྱི་རྒྱལ་པོ་འཁོར་བཅས་ལ་ལས་གཏད་ཅིང་བསྐུལ་བ་སྟེ། ཤ་ཁྲག་གི་མཆོད་པ་ཚན་གཅིག་བཤམས། གཏོར་མ་ཁ་གསོས་དགྲ་བགེགས་འགུགས་འདྲེན་དང༌། ཞལ་དུ་བཏབ་པའི་དམིགས་པ་དྲག་པོ་དང་བཅས། གཏོར་སྔགས་ལན་མང་པོས་ཕུལ། གོང་དྲག་པོའི་མཆོད་རྫས་ཀྱི་སྐབས་བཞིན་བྱིན་གྱིས་བརླབས། སྟོང་གསུམ་འདི་འམ་སོགས་ལ་འདོན་པ་སྤོ་སྟེ། བཅོམ་ལྡན་རྡོ་རྗེ་སོགས་ཀྱི་དོད་དུ། ཆོས་ཀྱི་རྒྱལ་པོ་གཤིན་རྗེའི་ཚོགས། །མ་མོ་གཤིན་རྗེ་སྲིན་པོ་དང༌། །དྲེག་པ་ཕོ་མོ་དཔག་མེད་རྣམས། །འཇམ་པའི་རྡོ་རྗེའི་བཀའ་ནོད་ནས། །རྔམས་པའི་སྟོབས་ཀྱིས་བཞེས་ནས་ཀྱང༌། །བསད་བསྐྲད་དབྱེ་དང་རྨོངས་རེངས་ཀྱིས། །འཕྲིན་ལས་དྲག་པོས་བསྒྲུབ་པོའི་དོན། །མ་ལུས་པར་ནི་གྲུབ་པར་མཛོད། །ཨོཾ་ཀཱ་ལ་རཱུ་པ་ས་པཱ་རི་ཝཱ་ར་བཛྲ་ཨརྒྷཾ་པྲ་ཏཱིཙྪ་སརྦ་བིགྷྣཱན་ཤ་ཏྲུན་མཱ་ར་ཡ་ཧཱུཾ་ཕཊ། ཅེས་བརྗོད་ཅིང་རོལ་མོའི་བར་དེའི་རིགས་འགྲེ། མཆོད་རྫས་དེ་རྣམས་ལས་གཤིན་གྱི་གཏོར་མ་ལ་བཏབ། བཅོམ་ལྡན་ཆོས་རྗེ་སོགས་ཀྱིས་བསྟོད། འདི་ནས་ལྷོ་ཡི་ཞེས་པ་ནས། འཁོར་བཅས་འདིར་ནི་བདག་ལ་དགོངས། །བདག་ལ་
གནོད་པའི་དགྲ་དང་བགེགས། །བྱད་མ་བསམ་སྦྱོར་ངན་པ་འདི། །གསོན་ན་འགྲོ་བ་ཡོངས་ལ་གནོད། །དཀོན་མཆོག་གསུམ་ལ་རྣམ་པར་འཚེ། །དམིགས་ཀྱི་རྣལ་འབྱོར་ཡོངས་ལ་སྡང༌། །འདི་དག་མྱུར་དུ་བསྒྲལ་བའི་ཕྱིར། །ཆོས་རྒྱལ་འཁོར་བཅས་སྤྱན་དྲངས་ཀྱི། །དམ་ཚིག་དབང་གིས་འཕྲིན་ལས་བསྒྲུབས། །བཅོམ་ལྡན་གཤིན་རྗེ་གཤེད་པོའི་བཀའ། །ཆོས་ཀྱི་རྒྱལ་པོ་དགོངས་སུ་གསོལ། །དེ་རིང་དྲག་པོའི་འཕྲིན་ལས་ནི། ཁྱོད་ཀྱི་ལས་སུ་འོས་པ་ཡིན། །ལྷ་དང་བཅས་པའི་འཇིག་རྟེན་ན། །ལེགས་ཉེས་ཆོས་བཞིན་གཅོད་པ་ཁྱོད། །གཤིན་རྗེ་གཤེད་ཀྱི་བཀའ་འཁོར་ན། །བཀའ་ཉན་དམ་ཚིག་བསྲུང་བ་ཁྱོད། །ལས་དང་རྐྱེན་གྱི་འཆི་བ་ཡི། །སྲོག་ལ་དབང་བྱེད་བདག་པོ་ཁྱོད། །དེ་ཕྱིར་ལས་འདི་ཁྱོད་ལ་གཏད། ཁྱོད་ཀྱི་འཁོར་ནི་མི་བསྲུན་ཏེ། །ཐ་མལ་སེམས་ཅན་ཉེས་མེད་ཅིང༌། །གཞན་གྱི་བསྐུལ་བ་མ་བྱས་པར། །གློ་བུར་འཕྲད་པའང་འཛིན་བྱེད་ན། །ང་ཡིས་གཏད་པའི་ལས་འདི་རྣམས། །འཇམ་དཔལ་གཞོན་ནུའི་བཀའ་བཞིན་དུ། །དམ་ཚིག་ཕྱག་རྒྱ་མིག་ལ་བསྟན། །དམ་ཚིག་སྙིང་པོ་རྣ་བར་བསྒྲགས། །རྡོ་རྗེའི་ཐ་ཚིག་སྙིང་ལ་བཞག །དམ་རྫས་མཆོད་པ་ཕུལ་ནས་ཀྱང༌། །དམ་ཚིག་འཕྲིན་ལས་གཉེར་དུ་གཏད། །ལས་འདི་སྔོན་དུ་བསྒྲུབ་པར་རིགས། །ཁྱོད་ཀྱིས་ལས་འདི་མ་བསྒྲུབས་ན། །དཀོན་མཆོག་གསུམ་གྱི་བཀའ་ཡང་བཅག །གཤིན་རྗེ་གཤེད་ཀྱི་དམ་ཡང་བྲལ། །རང་གི་ཐ་ཚིག་རང་གིས་བསླུས། །དམ་ཚིག་གྲོགས་པོ་བདག་ཅག་གི ། རེ་བའི་བསམ་པ་གཏིང་ནས་བཅད། །དེ་བས་ལས་
འདི་བསྒྲུབ་པར་གྱིས། །ཧཱུཾ། འཆི་བདག་ནག་པོ་ལྷོ་ཕྱོགས་ཀྱི། །རིམ་པ་བདུན་གྱི་ས་འོག་ནས། །སྲོག་ལ་རྔམས་པའི་གཤིན་རྗེ་ནི། །ནག་པོའི་མ་ཧེའི་གདན་སྟེང་དུ། །ཡ་ལས་བྱུང་བའི་དབྱུག་པ་ནི། །ཐོད་པས་མཚན་པ་ལས་བྱུང་བ། །གཏིང་ནས་ཁྲོས་པ་མ་ཧེའི་གདོང༌། །ཟ་བྱེད་ཞལ་གདངས་མཆེ་བ་གཙིགས། ཁྲོས་པའི་སྤྱན་གསུམ་དམར་པོ་འཁྱུག །དབུ་སྐྲ་དམར་སེར་གྱེན་དུ་བརྫཻས། །ལག་གཡོན་ཞགས་པས་དགྲ་བགེགས་ཆིངས། །ལག་གཡས་དབྱུག་པས་རྡུལ་དུ་རློག །ཆོས་ཀྱི་རྒྱལ་པོ་གཤིན་རྗེའི་ཚོགས། །བྲན་དང་བཅས་པས་དུས་ལ་བབ། །ཤ་ཆེན་ཁྲག་ཞག་ཆེན་པོ་ཡི། །གཏོར་མ་རྒྱ་མཚོ་མཆོད་པར་བཞེས། །རྒྱལ་བས་བསྒོས་པའི་དམ་ཚིག་དང༌། །སྙིང་རྗེས་དགྲ་བགེགས་མ་ལུས་སྒྲོལ། །སྡང་བའི་དགྲ་དང་གནོད་པའི་བགེགས། །བདུད་དང་སོགས་གོང་བཞིན་ལས། ཐུལ་ཞིག་ཆོམས་ཤིག་རྣམ་པར་བཤིག །རྡུལ་ཕྲན་ཙམ་ཡང་མེད་པར་མཛོད། །ཅེས་བསྐུལ་ཏེ། བསྡུ་ན་ལས་གཏད་དེ་ཙམ་གྱིས་ཀྱང་ཆོག་ལ། ཡང་ཅུང་ཟད་རྒྱས་པ་ལ་དགའ་ན། ཁྱོད་ཀྱི་འཁོར་གྱི་དཀྱིལ་འཁོར་ན། །ཡ་མ་དུ་ཏི་ཞེས་བྱ་བ། །ལག་ན་ལྕགས་ཀྱུ་འབར་བ་ཐོགས། །གང་ཞིག་འགུགས་པར་འདོད་པ་དེ། །དབྱུགས་པ་ཙམ་གྱིས་འགུགས་པར་བྱེད། །ཁྱོད་ལ་གཉེར་དུ་གཏད་པ་ནི། །བདག་ཅག་འཁོར་དང་བཅས་རྣམས་ལ། །གནོད་པའི་དགྲ་བགེགས་འབྱུང་པོའི་ཚོགས། །དོ་ནུབ་ཁྱོད་ཀྱིས་བཟུང་བར་གྱིས། །འདི་ལ་དམིགས་ཀྱི་བསལ་བའི་བསྒྲུབ་བྱ་ཡོད་ན། ཁྱོད་ལ་གཉེར་དུ་གཏད་པ་ནི། །ཆྒཻ་ཞེས་བྱའི་ཡུལ་ཁམས་ན། རུས་ནི་ཆྒཻེ་
མོ་ཞེས་བྱ། །དེ་ཡི་མིང་ནི་ཆྒཻེ་མོ། །འདི་དག་གྲོགས་དང་བཅས་པ་ཀུན། །དེ་རིང་ཁྱོད་ཀྱིས་བཟུང་བར་གྱིས། །ཞེས་སོགས་བརྗོད་པར་བཤད་ཅིང༌། བཟུང་བར་གྱིས་ཞེས་བསད་པར་གྱིས། །ཞེས་པའམ། བརླག་པར་གྱིས། ཞེས་པའམ། བསྐྲད་པར་གྱིས། སོགས་ལས་དང་མཐུན་པར་སྦྱར་རོ། །དཀྱུས་ལ་ཡང༌། བདག་ཅག་འཁོར་དང་བཅས་པ་ཞེས་པ་སྐབས་སུ་གང་བབ་ཏུ་འདོན་པ་བསྒྱུར་བས་ཆོག་གོ །གཞན་ཡང་འཁོར་གྱི་དཀྱིལ་འཁོར་ན། །ཀ་ལ་པཱ་ཤ་ཞེས་བྱ་བ། །ལག་ན་དུས་ཀྱི་ཞགས་པ་ཐོགས། །གང་ཞིག་འཛིན་པར་འདོད་པ་དེ། །བཏབ་པ་ཙམ་གྱིས་འཛིན་པར་བྱེད། ཁྱོད་ལ་གཉེར་དུ་གཏད་པ་ན། །སོགས། གཞན་ཡང་འཁོར་གྱི་དཀྱིལ་འཁོར་ནི། །ཡ་མ་དཎྜི་ཞེས་བྱ་བ། །ལག་ན་བེ་ཅོན་ནག་པོ་ཐོགས། །གང་ཞིག་བསད་པར་འདོད་པ་དེ། །ཕྱར་བ་ཙམ་གྱིས་འཆི་བར་བྱེད། ཁྱོད་ལ་གཉེར་དུ་སོགས། གཞན་ཡང་འཁོར་གྱི་དཀྱིལ་འཁོར་ན། །ཡ་མ་དཾཥྟི་ཞེས་བྱ་བ། །ཟ་བྱེད་མཆེ་བ་འབར་བ་ཅན། །གང་ཞིག་ཟ་བར་འདོད་པ་དེ། གཙིགས་པ་ཙམ་གྱི་ཟ་བར་བྱེད། ཁྱོད་ལ་སོགས། གཞན་ཡང་འཁོར་གྱི་དཀྱིལ་འཁོར་ན། །ཀཱ་ལ་ར་ཏྲི་ལ་སོགས་པའི། །གསོད་པ་མོ་དང་ནག་མོ་དང༌། །ནམ་གྲུ་ཤ་ཀཱ་ལི་ལ་སོགས། །བུད་མེད་ཚོགས་ཀྱིས་བསྐོར་བ་ནི། །ལ་ལ་ལས་ཀྱི་མེ་ལོང་ཅན། །ལ་ལ་ནད་ཀྱི་རྐྱལ་པ་ཐོགས། །ལ་ལ་མཚོན་གྱི་གྲུ་གུ་ཅན། །ལ་ལ་བདུད་ཀྱི་ཁྲམ་བཾ་ཐོགས། །ལ་ལ་ཤྭ་རྡེ་དཀར་ནག་ཅན། །ལ་ལ་ལྕགས་ཀྱི་དྲེའུ་རྟ་ཞོན། །ལ་ལ་བོང་བུ་
གྭ་པ་ཞོན། །ལ་ལ་རླུང་ནག་འཚུབ་མ་ཞོན། །ལ་ལ་ཆུ་བྱ་ནག་པོ་ཞོན། །ལ་ལ་གནམ་གྱི་གུང་ལ་རྒྱུ། །ལ་ལ་ཆུ་བོའི་གཞུང་ལ་རྒྱུ། །ལ་ལ་ཉི་མའི་ཟེར་ལ་རྒྱུ། །ཀུན་ཀྱང་གཞན་སྲོག་འཕྲོག་པ་སྟེ། ཁྱོད་ལ་གཉེར་དུ་སོགས། གཞན་ཡང་ནང་གི་དཀྱིལ་འཁོར་ན། །ཡ་བ་ཏི་དང་ཕྱ་སངས་དང༌། །རྨིག་པ་རལ་པ་ཚར་དགུ་སོགས། །ལ་ལ་རྒྱལ་པོའི་ཚུལ་དུ་གནས། །ལ་ལ་བློན་པོའི་ཚུལ་དུ་གནས། ཁ་ཅིག་དག་ནི་དེད་དཔོན་ཚུལ། །ལ་ལ་ཕོ་ཉའི་ཚུལ་དུ་གནས། །ལ་ལ་བེ་ཅོན་འཁོར་ལོ་དང༌། །གསལ་ཤིང་མདུང་ཐུང་མཚོན་ཆ་ཐོགས། །སོ་སོའི་སྡེ་དཔོན་མངག་པ་དང༌། །ཕོ་ཉ་ཕྱག་བརྙན་བཅས་པ་ལ། །འཕྲིན་ལས་གཉེར་དུ་གཏད་པ་ནི། །སོགས་གོང་བཞིན། དེ་ནས་དམ་ལ་བཞག་པ་ནི། ཨོཾ་ཡ་མ་རཱ་ཛ་ས་པཱ་རི་ཝཱ་ར་ཨརྒྷཾ་པྲ་ཏཱིཙྪ་ཧཱུཾ། ཞེས་པས་དམར་གྱི་ཨརྒྷཾ་ལན་གསུམ་སྒྲེང༌། འདི་ནི་ཁྱོད་ཀྱི་དམྱལ་བའི་ཆུ། །དམ་ཚིག་འདས་ན་བསྲེག་པར་བྱེད། །དམ་ཚིག་བསྲུངས་ན་དངོས་གྲུབ་ནི། །རྡོ་རྗེ་བདུད་རྩིའི་ཆུ་འདིས་འགྲུབ། །གལ་ཏེ་དམ་ཚིག་འདས་གྱུར་ན། །འཇམ་པའི་རྡོ་རྗེ་ཁྲོས་ནས་ཀྱང༌། །སྙིང་ག་ནས་ནི་གཤེགས་པར་འགྱུར། །དེ་བས་དམ་ལ་མ་འདའ་ཤིག །ཨོཾ་བཛྲ་ཨུུ་ད་ཀ་ཧཱུཾ་ཋ་ཋ་ཋ། ཞེས་ནང་མཆོད་ནས་མནའ་ཆུ་བླུད། ཧཱུཾ། སྔོན་གྱི་ཐ་ཚིག་དྲན་བྱའི་ཕྱིར། །རྡོ་རྗེ་ཐ་ཚིག་འདི་བསྣན་པས། །མི་ཕྱེད་རྡོ་རྗེའི་ཐ་ཚིག་འདི། ཁྱོད་ཀྱི་སྙིང་ལ་གནས་པར་འགྱུར། །ཨོཾ་བཛྲ་ས་མ་ཡ་ཏིཥྛ། ཞེས་སྙིང་ཁང་རྡོ་རྗེ་བཞག་གོ །བཞི་པ་གཏོར་ཟོར་འཕང་བ་ནི། དེ་ནས་ལུགས་གཅིག་ལ་མཎྜལ་གྱི་གཙོ་བོ་ཚོམ་བུ་བསྒྲུབ་པ་པོ་རང་ཉིད་ཀྱི་སྤྱི་བོར་བཞག་པའམ། ཡི་དམ་གྱི་གཏོར་མ་ལ་ཕུལ། གཞན་གྱི་ལྷ་ཚོགས་
རྣམས་གཏོར་མའི་ནམ་མཁར་སྦར་བས་མོས་ལ། སོ་སོར་ལྕགས་མཁར་དང་གཤིན་རྗེའི་གཏོར་མ་ལ་འདེབས། མཎྜལ་གྱི་མཆོད་པ་རྣམས་ཀྱང་སོ་སོའི་གཏོར་མ་ལ་བསྡུ་བའི་ལག་ལེན་སྣང་བ་གློོ་བུར་ལས་བཅོལ་གྱི་གཏོར་མའི་སྐབས་དེ་བཞིན་ཡིན་ཞིང༌། རྩ་བའི་གཏོར་ཆོག་རྣམས་བྱེད་ན། མཎྜལ་རྗེས་ཆོག་གི་དུས་བསྡུས་པས་ཆོག་པས། དམ་ཅན་བསྲུང་མའི་སྤྲུལ་གཞི་རྣམས་དེར་བཞུགས་ཤིང༌། སྤྲུལ་པ་ལས་མཁན་དང་བཅས་པ་ཕྱིར་བསྐྱོད་པ་ཡིན་ནོ། །དེ་ཡན་ཆད་སྒྲུབ་ཁང་དུ་བྱེད་པའི་ལུགས་སོ། །ལས་གཤིན་གྱི་ལས་གཏད་སྒྲུབ་ཁང་གི་སྒོ་དྲུང་དུ་བྱེད་པ་དང༌། གཏོར་མ་གཏོང་སར་བྱེད་པ་ཡོད་པར་ཡང་མི་འགལ་ལོ། །གང་ལྟར་ཡང་ཕུད་གཏོར་བས་སྣ་དྲངས། དར་འཕྱར་ཞིང༌། རོལ་མོ་དང་བཅས་པའི་ཕྱི་བཞིན་དུ། སྔོོན་ལ་ལས་གཤིན་གྱི་གཏོར་མ། དེ་རྗེས་ལྕགས་མཁར་དང༌། བཏབ་གཏོར་སོགས་ཁྱེར། བསྒྲུབ་པ་པོས་དེ་དག་གི་ཕྱི་བཞིན་དུ་འགྲོ་ལ། གཏོར་སྐྱེལ་བ་ཞུ་བ་ཅན་གྱིས་བྱེད་པ་ལག་ལེན་ལ་ཡོད་པས་གྲུབ་ན་བྱ། མཐའ་གཅིག་ཏུ་མ་ངེས། ཟོར་གྱི་གནས་སུ་ཕྱིན་ལ། དང་པོར། ན་མཿསརྦ་ཏ་ཐཱ་ག་ཏ་བྷྱོ་བི་ཤྭ་སོགས་སྔགས་ཀྱིས་བླ་མ་ཡི་དམ་ཆོས་སྐྱོང་རྣམས་ལ་ཕུད་གཏོར། དེ་ནས་སྔགས་དེས་སྡེ་བརྒྱད་སྤྱི་ལ་གཏོར། ཡང་སྔགས་དེར་ཟོར་ལམ་ན་གནས་པའི་འབྱུང་པོ་རྣམས་ལ་ཕུལ། དེ་དག་ཏུ་རྒྱུན་རོལ་བྱ། དེ་ནས་བདེན་པ་མང་དུ་བདར་ཞིང་འདི་སྐད་ཅེས། ཆོས་ལུགས་རྒྱལ་བར་གྱུར་ཅིག་ཆོས་མིན་རྒྱལ་མ་གྱུར། །སངས་རྒྱས་རྒྱལ་བར་གྱུར་ཅིག་མུ་སྟེགས་རྒྱལ་མ་གྱུར། །ལྷ་རྣམས་རྒྱལ་བར་གྱུར་ཅིག་ལྷ་མིན་རྒྱལ་མ་གྱུར། །སྒྲུབ་པོ་རྒྱལ་བར་གྱུར་ཅིག་དགྲ་བགེགས་རྒྱལ་མ་གྱུར། །སངས་ཀྱིས་ནི་བདུད་ཕམ་མཛད། །ཆོས་མ་ཡིན་ནི་
ཆོས་ཀྱིས་སོ། །དགེ་འདུན་གྱིས་ནི་མུ་སྟེགས་ཕམ། །དབང་པོས་ལྷ་མིན་ཕམ་པར་གྱུར། །གཤིན་རྗེ་གཤེད་པོའི་ལྷ་ཚོགས་ཀྱིས། །དགྲ་བགེགས་ཐམས་ཅད་ཕམ་པར་མཛད། །རིགས་སྔགས་བདེན་པའི་མཐུ་འདི་ནི། །ཐོགས་པ་མེད་པར་འགྲུབ་པར་ཤོག །ཅེས་རིག་པ་ངར་དང་ལྡན་པས་བརྗོད། དེ་ནས་ཟོར་ལམ་དབྱེ་བ་ལ་གཏོར་མ་ཞིག་གཏང་ན་ལེགས་ཤིང༌། བསྡུ་ན་སླར་ཡང་གསེར་སྐྱེམ་ཙམ་ཞིག་གཏོར་ལ། ང་ནི་སངས་རྒྱས་ཀུན་གྱི་དངོས། །འཇམ་དཔལ་ཁྲོས་པ་གཤིན་རྗེ་གཤེད། །དགྲ་བགེགས་མ་ལུས་བསྒྲལ་བའི་ཕྱིར། །དེ་རིང་དྲག་པོའི་ཟོར་འཕེན་གྱི། །བསྟན་པ་ཡོངས་ཀྱི་བསྲུང་མ་དང༌། །སེམས་ཅན་ཕན་བྱེད་དགེ་ལ་སྤྲོ། །དཀར་པོའི་ཕྱོགས་ལ་དགའ་བ་ཡི། །འབྱུང་པོ་ཐམས་ཅད་སྐུ་བསྐྱོད་ཅིག །དེ་རིང་དྲག་པོའི་སྔགས་ཀྱི་ཟོར། །སྡེ་བརྒྱད་རྣམས་ལ་མི་འཕེན་ནོ། །རུ་ང་ཕྲག་དོག་མ་མཛད་ཅིག །ལམ་ན་གནས་པ་གཞན་དུ་གཤེགས། །གནས་གཞན་བསྐྱོད་པར་མི་ནུས་ན། །མཐོ་བ་རྣམས་ནི་ཞབས་བསྐུམ་ཞིག །དམའ་བ་རྣམས་ནི་དབུ་ཆུམ་ཞིག །བར་མ་རྣམས་ནི་སྐུ་ཟུར་ཞིག །བག་མེད་རྣམས་ནི་བག་མཛོད་ཅིག །ཟོར་འདི་སྡང་བའི་དགྲ་ལ་ཡ། །ཟོར་འདི་གནོད་པའི་བགེགས་ལ་ཡ། །གནོད་བྱེད་བྱད་མའི་སྙིང་ལ་ཡ། །ཞེས་བརྗོད། བར་འདིར་སྤྲོ་ན་ཐུན་ཟོར་གྱི་རིགས་ཅི་འདོད་འཕངས་པས་ཆོག །དེ་ནས་གཏོར་མ་བསྐུལ་བ་ནི། ཟློག་པ་ཙམ་གྱི་ཆེད་དུ་ཡིན་ན། ཧཱུཾ་ཡ་བྷྱོཿ བླ་མ་ཡི་དམ་ལྷ་ཚོགས་ཀྱི། །དོ་ནུབ་ཟོར་གྱི་ལས་མཛོད་ཅིག །གཤིན་རྗེ་གཤེད་ཀྱི་ལྷ་ཚོགས་ཀྱིས། །དོ་ནུབ༴ དམ་ཅན་ཆོས་
སྐྱོང་བསྲུང་མ་ཡིས། །དོ་ནུབ༴ ལས་ཀྱི་གཤིན་རྗེ་འཁོར་བཅས་ཀྱིས། །དོ་ནུབ༴ སྣང་སྲིད་ལྷ་སྲིན་སྡེ་བརྒྱད་ཀྱིས། །དོ་ནུབ༴ ཡུལ་ལྷ་གཞི་བདག་གཉན་པོ་ཡིས། །དོ་ནུབ་ཟོར་གྱི་ལས་མཛོད་ཅིག །ཁྲོ་བོའི་རྒྱལ་པོ་ཁྱེད་རྣམས་ནི། །མ་གཡེལ་འཕྲིན་ལས་དུས་ལ་བབ། །རྐྱེན་ངན་ཐམས་ཅད་དགྲ་ལ་བྷྱོཿ ། གནོད་པའི་བགེགས་ཀྱི་སྟེང་དུ་བྷྱོཿ ། ངན་པ་བཟློག་ལ་རྩུབ་མོ་བསྒྱུར། །ཆོས་ཀྱི་རྒྱལ་པོ་སྐུ་བསྐྱོད་ལ། །སྟེང་གི་ངན་སྔགས་དགྲ་ལ་བསྒྱུར། །ཟློག་གོ་དྲག་པོའི་དཔུང་གིས་བཟློག །བསྒྱུར་རོ་ལྟས་ངན་ཆོ་འཕྲུལ་བསྒྱུར། །རྫས་སྔགས་འཁྲུལ་འཁོར་ཕྱི་ལ་བཟློག །ཡ་བ་ཏི་ནི་སྐུ་བསྐྱོད་ལ། །ཤར་གྱི་ངན་སྔགས༴ མྱོས་བྱེད་འབར་བ༴ ལྷོ་ཡི༴ ཨཱརྱ་མ་རུ༴ ནུབ་ཀྱི་ངན༴ རལ་བ་ཚར་དགུ༴ བྱང་གི་ངན༴ མིག་དམར་ལ་སོགས༴ ཕྱོགས་མཚམས་ངན༴ ཙ་མུཎྜ་ནི་སྐུ༴ འོག་གི་ངན་སྔགས༴ སོགས་གོང་བཞིན། བདུད་གཡོས་མུན་ལྟར་འཐིབས་པ་བཟློག །སྲི་ལངས་མེ་ལྟར་འབར་བ་བཟློག །དམ་སྲི་བར་ཆད་བྱེད་པ་བཟློག །ཀླུ་ཡི་མནན་གཏད་བྱེད་པ་བཟློག །རྒྱལ་པོའི་སྨྱོ་འབོག་ལ་སོགས་བཟློག །བཙན་གྱི་ཞགས་པ་སྐྱོང་བ་བཟློག །ཡམ་ཤུད་འགོང་བོའི་གནོད་པ་བཟློག །གཞན་གྱི་བསམ་སྦྱོར་ངན་པ་ཡི། །སྦོད་གཏོང་དམོད་མོའི་རིགས་རྣམས་བཟློག །ལྟས་ངན་བརྒྱད་ཅུ་རྩ་གཅིག་དང༌། །མཚན་ལྟས་ངན་པ་ཐམས་ཅད་བཟློག །ཡེ་འབྲོག་གསུམ་བརྒྱ་དྲུག་ཅུ་དང༌། །ནད་རིགས་བཞི་བརྒྱ་རྩ་བཞི་བཟློག །རྨི་ལམ་ངན་པ་ཐམས་ཅད་དང༌། །བགེགས་རིགས་སྟོང་ཕྲག་བརྒྱད་ཅུ་
སོགས། །སྡེ་བརྒྱད་རྣམས་ཀྱི་རྦོད་གཏོང་དང༌། །མཁའ་འགྲོ་མ་དང་རོ་ལངས་དང༌། །རྒྱལ་བསེན་བར་ཆད་བྱེད་པ་བཟློག །བདག་ཅག་བསྟན་པ་སྐྱོང་བ་ལ། །འགལ་རྐྱེན་བྱེད་པ་ཐམས་ཅད་བཟློག །བདུད་ཀྱི་ཁྲམ་ཁ་དགྲ་ལ་བསྒྱུར། །ཐམས་ཅད་སྡང་བའི་དགྲ་ལ་བྷྱོཿ ། ཐམས་ཅད་གནོད་པའི་བགེགས་ལ་བྷྱོཿ ། སྔ་དགྲ་དར་བ་ཐམས་ཅད་ཟློག །ཕྱི་དགྲ་རྩོམ་པ་ཐམས་ཅད་བཟློག །ད་དགྲ་བཤོམ་པ་ཐམས་ཅད་བཟློག །སྡང་བའི་ས་གསུམ་སྟོངས་པར་གྱིས། །ཆོས་དབྱིངས་ངང་དུ་དག་པར་མཛོད། །ཅེས་པའི་མཐར་གཏོར་ཟོར་འཕང་བ་དངོས་ནི། རོལ་མོའི་སྒྲ་དྲག་པོ་དང་བཅས་དང་པོར་ལས་གཤིན་གྱི་གཏོར་མ་ཟོར་དུ་འཕང༌། ལྕགས་མཁར་དང༌། བཏབ་གཏོར་སོ་སོར་ཡོད་ན། ལྕགས་མཁར་ཁ་སྦུབ་དུ་བརྡབ། བཏབ་གཏོར་རྣམས་ཕྱི་ནས་རིམ་པས་འཕང༌། ཡང་བསང་ལས་གཙོ་ཆེ་བ་ཡིན་ན། ཧཱུཾ་ཡ་བྷྱོ་ནས། བགེགས་ཀྱི་སྟེང་དུ་བྷྱོཿ ། ཞེས་པའི་བར་གོང་བཞིན་ལ། མ་རུངས་གཏུམ་པོ་སྡིག་པ་ཅན། །དཀོན་མཆོག་གསུམ་ལ་གནོད་བྱེད་དང༌། །རྡོ་རྗེ་སློབ་དཔོན་སྨོད་པ་དང༌། །སེམས་ཅན་ཡོངས་ལ་འཚེ་བྱེད་ཅིང༌། །ཐེག་པ་ཆེན་པོ་སུན་འབྱིན་དང༌། །གསང་སྔགས་རྒྱུད་ལ་འཕྱ་བྱེད་པ། ཁྱད་པར་རྣལ་འབྱོར་བདག་ཅག་ལ། །གནོད་ཅིང་བར་ཆད་བྱེད་པ་འདི། །ཡུལ་ཕྱོགས་གང་ན་གནས་ཀྱང་རུང༌། །སྤྱོད་ཚུལ་ཇི་ལྟར་སྟོན་ཡང་རུང༌། །མངོན་ཤེས་རྫུ་འཕྲུལ་ལྡན་པ་ཡི། །ཆོས་རྒྱལ་གཤིན་རྗེ་འཁོར་བཅས་དང༌། །ཕྱོགས་སྐྱོང་བཅུ་ཡི་སྣ་དྲངས་ཏེ། །སྲིད་གསུམ་དམག་གིས་དགྲ་བགེགས་ཆོམ། །འདུ་བ་རྣམ་བཞིའི་ནད་ཕོབ་ཅིག །
དྲག་པོས་མཚོན་ཆའི་ཆར་ཕོབ་ཅིག །ཆོ་འཕྲུལ་ལྟས་ངན་ཐམས་ཅད་ཕོབ། །མཛའ་བཤེས་ཉེ་བ་ཀུན་དང་ཕྲོལ། །ལྕགས་ཀྱུས་དྲོངས་ལ་ཞགས་པས་ཆིངས། །ཡན་ལག་མཚོན་ཆས་གཏུབས་ལ་སོད། །རྒྱུ་མ་ནང་ཁྲོལ་ཐང་ལ་ཕོ། །དོན་སྙིང་དབང་པོ་ལྔ་ཡི་ཚོགས། །གཤིན་རྗེའི་རྒྱལ་པོའི་ཞལ་དུ་ཐོབ། །སྡེ་བརྒྱད་རྔམས་པའི་ཕོ་ཉ་འགྱེད། །ཕོ་རྒྱུད་རྣམས་ནི་ཤ་ལ་ཟོ། །མ་མོའི་ཚོགས་རྣམས་ཁྲག་ལ་འཐུང༌། །གཟུགས་ཕུང་བཤིག་ལ་རྣམ་ཤེས་སྤོར། །བདེ་ཆེན་དབྱིངས་སུ་སྒྲོལ་བར་མཛོད། །བསྡུ་ན་དེ་ཙམ་གྱི་ཆོག །ཅུང་ཟད་སྤྲོས་པ་ལ་དགའ་ན། དམོད་པའི་ཚིགས་བཅད་གཞན་ཡང་ཡོད་དེ་ལོགས་སུ་སྦྱར་བ་ལས་ཤེས་པར་བྱའོ། །དེ་ལྟར་ཟོར་བསྐུལ་ཏེ། དེ་ནས་ཟོར་རྣམས་གོང་བཞིན་འཕངས། དགྲ་བོའི་རྣམ་ཤེས་མར་མེ་བསད་པ་ལྟར་སོང༌། གནས་ལུས་ལོངས་སྤྱོད་ཐལ་བར་བརླག་པར་བསམ་མོ། །དེ་ནས་ཟོར་རྗེས་ནི། ཟོར་ལམ་གཅོད་པའི་དམིགས་པ་བྱས་ནས། རྡོ་རྗེ་སློབ་དཔོན་གྱིས་རྟིང་མནན་ཏེ་ནང་དུ་འོང༌། གསུམ་པ་རྗེས་ཆོག་ནི། མཆོད་པ་རྣམས་ཁ་གསོ། གོང་གནས་ཡོ་བྱིན་རླབས་ཀྱི་སྐབས་སམ་དྲག་པོའི་མཆོད་རྫས་ཀྱི་སྐབས་ལྟར་མཆོད་པ་བྱིན་གྱིས་བརླབས། གོང་དུ་བཤད་པའི་ཚིགས་བཅད་སྔགས་དང་བཅས་པ་གོང་འོག་གང་རུང་གཅིག་སྦྱར་ནས། མཆོད་ཡོན་ནས། རོལ་མོའི་བར་འབུལ། ཡི་དམ་ཆོས་སྐྱོང་རྣམས་ཀྱི་སྙིང་པོའི་མཐར་འབྲུ་གསུམ་སྦྱར་ལ་ནང་མཆོད་འབུལ། དེ་ནས་རོལ་ཆེན་དང་བཅས། གཟུགས་སྒྲ་ལ་སོགས་དྲུག་པོ་ནི། །ནས། དུད་ཁ་མུན་ཅན་ཁྱོད་ལ་འདུད། །ཅེས་པའི་བར་བརྗོད། མཆོག་སྦྱིན་རྡོ་རྗེ་མཆོག་ཁྱོད་འདུད། །ཅེས་པ་ནས། ཡེ་
ཤེས་སྐུ་ཉིད་ཁྱོད་ལ་འདུད། །ཀྱི་བར་འདུད་བསྟོད་ཉི་ཤུ་བྱ་ཞིང༌། ཤེས་ཤིང་སྤྲོ་ན་དབྱངས་དང་བཅས་ཏེ་བྱ། བསྡུ་ན་དེ་ཙམ་གྱིས་ཆོག་ལ། སྤྲོ་ན་གཞན་ཡང་བསྟོད་པ་ཇི་ལྟར་རིགས་པས་བསྟོད་དོ། །བཅོམ་ལྡན་འདས་དཔལ་རྡོ་རྗེ་འཇིགས་མཛད་ཀྱི་དཀྱིལ་འཁོར་ཆེན་པོའི་ལྷ་ཚོགས་རྣམས་དང༌། སངས་རྒྱས་དང་བྱང་ཆུབ་སེམས་དཔའི་འཁོར་དང་བཅས་པ་ཐམས་ཅད་བདག་ལ་དགོངས་སུ་གསོལ། བདག་ཅག་རྣམས་ཀྱི་སྔོན་གྱི་ལས་ལས་གྱུར་པ་དང༌། འཕྲལ་གྱི་རྐྱེན་ལས་གྱུར་པའི་ནད་དང༌། གདོན་དང༌། བར་ཆད་ཐམས་ཅད་ཞི་བར་མཛད་དུ་གསོལ། ཚེ་དང་བསོད་ནམས་དང་དཔལ་དང་འབྱོར་པ་ཐམས་ཅད་གོང་ནས་གོང་དུ་འཕེལ་ཞིང་རྒྱས་པར་མཛད་དུ་གསོལ། དབང་ཕྱུག་དམ་པ་ཕུན་སུམ་ཚོགས་པས་འགྲོ་བ་ཐམས་ཅད་བྱང་ཆུབ་ལ་ཡང་དག་པར་གཞུག་པ་དང༌། སྡང་བ་དང་གདུག་པས་སེམས་ཅན་ཞི་བས་མི་འདུལ་བ་རྣམས་དྲག་པོའི་ལས་ཀྱིས་འདུལ་བར་མཛད་དུ་གསོལ། བདག་དང་སེམས་ཅན་ཐམས་ཅད་ལ་དངོས་གྲུབ་དམ་པ་མ་ལུས་པ་སྩལ་དུ་གསོལ། བྱང་ཆུབ་ཀྱི་ཕྱོགས་ཀྱི་ཆོས་སུམ་ཅུ་རྩ་བདུན་ཡོངས་སུ་རྫོགས་པ་དང༌། ཕ་རོལ་ཏུ་ཕྱིན་པ་དྲུག་གི་རང་བཞིན་རྣམ་པར་དཀར་བའི་ལམ་རྒྱུད་ལ་སྐྱེ་བར་མཛད་དུ་གསོལ། སེམས་ཅན་ཐམས་ཅད་ཀྱི་བདུད་དང་ཉོན་མོངས་པ་རྩ་བ་དང་དྲི་མར་བཅས་པ་ཐམས་ཅད་ཆོས་ཀྱི་དབྱིངས་ཀྱི་རང་བཞིན་དུ་གཞོམ་པར་མཛད་དུ་གསོལ། མྱུར་དུ་ཕྱག་རྒྱ་ཆེན་པོ་མཆོག་གི་དངོས་གྲུབ་རྡོ་རྗེ་འཆང་ཆེན་པོའི་གོ་འཕང་ཐེག་པ་བདེ་བ་དང༌། ལམ་བདེ་བ་དང༌། འཇུག་པ་བདེ་བས་ཐོབ་པར་མཛད་དུ་གསོལ། ཇི་སྲིད་གོ་
འཕང་མཆོག་དེ་ཉིད་མ་ཐོབ་བའི་བར་དུ་ཡང༌། འཇིག་རྟེན་དང་འཇིག་རྟེན་ལས་འདས་པའི་ཕུན་སུམ་ཚོགས་པ་ཐམས་ཅད་ཐོབ་པར་མཛད་དུ་གསོལ། ཅེས་པ་ལ་སོགས་པས་གསོལ་བ་ཡང་ནས་ཡང་དུ་གདབ་བར་བྱའོ། །ཡེ་གེ་བརྒྱ་པ་ཅི་ནུས་བཟླས་པས་ལྷག་ཆད་ཁ་བསྐང༌། མ་འབྱོར་བ་དང་ཉམས་པ་དང༌། །གང་ཡང་བདག་རྨོངས་བློ་ཡིས་ནི། །བགྱིས་པ་དང་ནི་བགྱིད་སྩལ་བ། །དེ་ཡང་མགོན་པོས་བཟོད་པར་མཛོད། །གང་ཡང་བདག་བློ་རྨོངས་པ་ཡིས། །ཉེས་བྱས་ཅུང་ཟད་གང་བགྱིས་པ། །གང་ཕྱིར་ལུས་ཅན་སྐྱབས་ཡིན་ཕྱིར། །མགོན་ཁྱོད་དེ་ཀུན་བཟོད་པར་མཛོད། །མ་རྙེད་ཡོངས་སུ་མ་ཤེས་དང༌། །གང་ཡང་ནུས་པ་མ་མཆིས་པས། །འདིར་ནི་བྱ་བ་གང་བགྱིས་བ། །དེ་ཀུན་གཙོ་བོས་བཟོད་མཛད་རིགས། །ཨོཾ་ཁྱེད་ཀྱིས་སེམས་ཅན་དོན་ཀུན་མཛད། །རྗེས་སུ་མཐུན་པའི་དངོས་གྲུབ་སྩོལ། །སངས་རྒྱས་ཡུལ་དུ་གཤེགས་ནས་ཀྱང༌། །སླར་ཡང་འབྱོན་པ་མཛད་དུ་གསོལ། །ཅེས་པའམ། བདག་ལ་དངོས་གྲུབ་མཆོག་སྩལ་ལགས། །ཏིང་འཛིན་ཀུན་གྱི་འབྲས་བུ་སྩལ། །སེམས་ཅན་ཀུན་ལ་ཅི་འདོད་པར། །དངོས་གྲུབ་བླ་ན་མེད་པའང་སྩལ། །སླར་ཡང་གཤེགས་པར་མཛད་པའི་ཕྱིར། །རང་གི་གནས་གཤེགས་བཛྲ་མུཿ ། ཨོཾ་ཛ་ཡ་ཛ་ཡ། སུ་ཛ་ཡ། བི་ཤྭ་རཱུ་པ་དྷཱ་རི་གཙྪ་གཙྪ་སྭ་བྷཱ་ཝ་ནཾ། ཀྲྀ་ཏནྟེ་ན། ཏ་ཐཱ་གཙྪ། སརྦ་བུདྡྷ་ཤྩ་བི་སརྫ་ཡ། མ་མ་ཀར་མཾ་ཀུ་རུ་སྭཱཧཱ། ཞེས་གཏོར་མགྲོན་དང༌། སྔར་རྡུལ་ཚོན་གྱི་མཎྜལ་གཤེགས་གསོལ་མ་ཟིན་ན་སྐབས་འདིར་ཡེ་ཤེས་པ་རྣམས་གཤེགས། ཛཿཧཱུཾ་བཾ་ཧོཿ དམ་ཚིག་པ་རྣམས་རང་ལ་ཐིམ། བྲིས་སྐུ་ལ་བརྟན་བཞུགས་སྤྱི་དང་མཐུན་པར་བྱ། རང་གི་དཔྲལ་བར་ཨོཾ། ནས། ལྟེ་
བར་སཾ་རྣམས་ཀྱིས་རྒྱས་བཏབ་པར་གྱུར། ཅེས་བརྗོད་ལ། སྨོན་ལམ་བཀྲ་ཤིས་གང་འགྲུབ་ཅིག་བྱའོ། །གཏོར་ཆོག་རྒྱས་པ་འདི་དང་འབྲེལ་བར་ཚོགས་ཀྱི་འཁོར་ལོའམ། དཔའ་བོའི་སྟོན་མོ་གལ་ཆེ་བ་ཡིན་པ་ལས། དྲུག་ཅུ་རྩ་བཞིའི་གཏོར་མ་བསྔོས་གྲུབ་མ་ཐག་ཏུ་བྱེད་པ་ཐོབ་ཐང་ཡིན་ནའང༌། ལག་ལེན་མི་བདེ་བས་དེང་སང་མི་བྱེད་ལ། གཏོར་ཟོར་འཕངས་ཟིན་ནས། རྗེས་ཆོག་མ་བྱས་པའི་བར་དེར་འཁོར་ལོའི་མཆོད་པ་བྱ་བའམ། ཡང་ན་གཏོར་ཆོག་དང་འབྲེལ་བའི་བྱ་བ་དང་མཐའ་དག་གྲུབ། ལས་རྗེས་ཀྱང་བསྡུས་ཟིན་ནས་སླར་བརྩམས་ཀྱང་རུང་ངོ༌། །འདི་དག་གི་མན་ངག་ནི་གཞན་དུ་འཆད་པར་འགྱུར་ཞིང༌། གཤིན་རྗེ་གཤེད་དམར་ནག་ལ་འདོན་པ་སྤོ་ཚུལ་དང༌། ཞི་རྒྱས་དབང་གསུམ་གྱི་ལས་དང་འབྲེལ་བའི་བྱ་བ་རྣམས་ཀྱང་འདི་རྣམས་ལ་རྗེས་སུ་དཔགས་ཏེ་ཤེས་པར་བྱའོ།། །།འདིར་སྨྲས་པ། ཐབས་ལས་དུག་ཀྱང་བདུད་རྩིར་གྱུར། །མཀྵིའི་སྦྱོར་བས་ལྕགས་ཀྱང་གསེར། །འཆི་སྟེར་དབྱུག་གུའི་ཡེ་ཤེས་ཆས། །འདོད་པ་ཀུན་འགྲུབ་ངོ་མཚར་རྨད། །དཔལ་ལྡན་རྒྱུད་ཆེན་གསང་བའི་རྒྱ་མཚོ་ལས། །དངོས་གྲུབ་ཀུན་འབྱུང་ཡིད་བཞིན་ནོར་རྙེད་པ། །བདུད་ལས་རྣམ་རྒྱལ་རྒྱལ་མཚན་རྩེར་མཆོད་པས། །ཕུན་ཚོགས་འགྲོ་ལ་ཕན་བདེའི་རྒྱུར་གྱུར་ཅིག །ཅེས་དཔལ་རྡོ་རྗེ་འཇིགས་བྱེད་ཀྱི་རྣལ་འབྱོར་དང་འབྲེལ་བར་དྲུག་ཅུ་རྩ་བཞིའི་གཏོར་ཆོག་གི་ངག་འདོན་ཁམས་གསུམ་ཟིལ་གནོན་ཞེས་བྱ་བ་འདི་ཡང་མང་པོས་བསྐུལ་བའི་ངོར། ༧ རྒྱལ་ཁམས་པ་ཏཱ་ར་ནཱ་ཐས་ངེས་པར་བརྗོད་པའོ།། །།དར་རྒྱས་འཕེལ། མངྒ་ལཾ། །