འཁོར་ལོ་སྡོམ་པ་ནག་པོ་ཞབས་ལུགས་ཀྱི་སྒྲུབ་ཐབས་བདེ་བ་ཆེན་པོའི་ཆར་ཡངས།
འཁོར་ལོ་སྡོམ་པ་ནག་པོ་ཞབས་ལུགས་ཀྱི་སྒྲུབ་ཐབས་བདེ་བ་ཆེན་པོའི་ཆར་ཡངས་ཞེས་བྱ་བ་བཞུགས།
ཨོཾ་སྭཱ་སྟི། དཔལ་འཁོར་ལོ་སྡོམ་པའི་སྒྲུབ་ཐབས་སློབ་དཔོན་ཆེན་པོ་སྤྱོད་པ་པའི་རྗེས་སུ་འབྲང་བ། བདེ་བ་ཆེན་པོའི་ཆར་ཡངས་ཞེས་བྱ་བ། བླ་མ་དང་དཔལ་ཧེ་རུ་ཀ་ལ་ཕྱག་འཚལ་ལོ། །སྲིད་གསུམ་གཙོ་བོ་བདུད་བཞིའི་དགྲ་འཇོམས་དྲག་པོ་ཆེ། །ཕྱུགས་བདག་གཽ་རཱིས་མཉམ་པར་བདུད་པ་ཧེ་རུ་ཀ །ཁྱོད་ནི་རྟག་དང་ཆད་མཐའ་ལས་གྲོལ་དབུ་མ་སྟེ། །མཁའ་འགྲོ་དྲྭ་བའི་སྡོམ་པ་མཆོག་ལ་གུས་པས་འདུད། །རིག་འཛིན་འཁོར་ལོས་སྒྱུར་བ་བརྟུལ་ཞུགས་ཀྱི། །སྤྱོད་པའི་རོལ་སྒེག་འཆང་བ་ནག་པོའི་གསུང༌། །ཤིན་ཏུ་རྟོགས་དཀའ་རྟོགས་ན་དོན་ཆེ་བ། །འདི་དོན་འཁྲུལ་མེད་རབ་ཏུ་གསལ་བར་བྱ། །བྱིན་རླབས་དལ་འབབ་ཆུ་བོའི་རྒྱུན། །དངོས་གྲུབ་རླབས་འཕྲེང་གཡོ་བ་ཅན། །སྔགས་རིག་བྱེ་བའི་འབབ་སྟེགས་འདིར། །སྐལ་ལྡན་གེགས་མེད་འདུ་བར་ཤོག །དེ་ལ་འདིར་སྐྱབས་འགྲོ་སེམས་བསྐྱེད་ཡིག་བརྒྱ་རྣམས་སྔོན་དུ་འགྲོ་བར་བྱ་སྟེ། དེ་ཡང་འདི་ལྟར། བདག་དང་འགྲོ་བ་ནམ་མཁའ་དང་མཉམ་པའི་སེམས་ཅན་ཐམས་ཅད་དུས་འདི་ནས་བཟུང་སྟེ། ཇི་སྲིད་བྱང་ཆུབ་སྙིང་པོ་ལ་མཆིས་ཀྱི་བར་དུ། ཕྱོགས་བཅུ་དུས་གསུམ་གྱི་དེ་བཞིན་གཤེགས་
པ་ཐམས་ཅད་ཀྱི་སྐུ་གསུང་ཐུགས་ཡོན་ཏན་འཕྲིན་ལས་ཐམས་ཅད་ཀྱི་ངོ་བོ། ཆོས་ཀྱི་ཕུང་པོ་སྟོང་ཕྲག་བརྒྱད་ཅུ་རྩ་བཞིའི་འབྱུང་གནས། འཕགས་པའི་དགེ་འདུན་ཐམས་ཅད་ཀྱི་མངའ་བདགརྗེ་བཙུན་རྩ་བ་དང་བརྒྱུད་པར་བཅས་པའི་དཔལ་ལྡན་བླ་མ་དམ་པ་རྣམས་ལ་སྐྱབས་སུ་མཆིའོ། །ཡི་དམ་དཀྱིལ་འཁོར་གྱི་ལྷ་ཚོགས་རྣམས་ལ་སྐྱབས་སུ་མཆིའོ། །རྫོགས་པའི་སངས་རྒྱས་བཅོམ་ལྡན་འདས་རྣམས་ལ་སྐྱབས་སུ་མཆིའོ། །དམ་པའི་ཆོས་རྣམས་ལ་སྐྱབས་སུ་མཆིའཽ། །འཕགས་པའི་དགེ་འདུན་རྣམས་ལ་སྐྱབས་སུ་མཆིའོ།། ལན་གསུམ་མམ་བདུན་སོགས་བརྗོད་ནས། བླ་མ་དང་དཀོན་མཆོག་རིན་པོ་ཆེ་རྣམ་པ་གསུམ་ལ་བདག་ཕྱག་འཚལ་ཞིང་སྐྱབས་སུ་མཆིའོ། །ཁྱེད་རྣམས་ཀྱིས་བདག་གི་རྒྱུད་བྱིན་གྱིས་རླབས་ཏུ་གསོལ། ལན་གསུམ། ཀྱེ་མ་སེམས་ཅན་སྡུག་བསྔལ་ཞིང༌། །ཀུན་རྟོག་ལ་ནི་མངོན་པར་ཞེན། །དེ་ཡི་རྟོག་པ་གཞོམ་ཕྱིར་བདག །དཔལ་ལྡན་ཧེ་རུ་ཀར་བསྒོམ་བྱ། ལན་གསུམ། སེམས་ཅན་ཐམས་ཅད་ཀྱི་དོན་དུ་རྣམ་པ་ཐམས་
ཅད་མཁྱེན་པ་སངས་རྒྱས་འཁོར་ལོ་བདེ་མཆོག་གི་གོ་འཕང་ཐོབ་པར་བྱ། དེའི་ཕྱིར་དུ་ལམ་ཟབ་མོ་བསྒོམ་པར་བགྱིའོ།། ལན་གསུམ། རང་གི་སྤྱི་བོར་པདྨ་དང་ཟླ་བའི་གདན་གྱི་སྟེང་དུ། བཅོམ་ལྡན་འདས་དཔལ་རྡོ་རྗེ་སེམས་དཔའ་ཧེ་རུ་ཀ་སྐུ་མདོག་དཀར་པོ་ཞལ་གཅིག་ཕྱག་གཉིས་རྡོ་རྗེ་དང་དྲིལ་བུ་འཛིན་པས་ཡུམ་ལ་འཁྱུད་པ། རུས་པའི་རྒྱན་དྲུག་གིས་བརྒྱན་པ། ཞབས་རྡོ་རྗེའི་སྐྱིལ་མོ་ཀྲུང་དུ་བཞུགས་པ། དེའི་པང་ན་ཡུམ་རྡོ་རྗེ་སྙེམས་མ་དཀར་མོ་གྲི་གུག་དང་ཐོད་པ་འཛིན་པས་ཡབ་ལ་འཁྱུད་པ། ཕྱག་རྒྱ་ལྔས་བརྒྱན་པ། ཡབ་ཀྱི་ཐུགས་ཀར་ཟླ་བའི་དཀྱིལ་འཁོར་གྱི་སྟེང་དུ་ཧཱུཾ་དཀར་པོ་དེ་ལས་འོད་ཟེར་འཕྲོས། དེ་བཞིན་གཤེགས་པ་ཐམས་ཅད་ཀྱི་ཐུགས་ཀྱི་སྙིང་པོ་ཡེ་ཤེས་ཀྱི་བདུད་རྩི་སྤྱན་དྲངས་ནས་ཧཱུཾ་ལ་ཐིམ། བཅོམ་ལྡན་འདས་བདག་དང་སེམས་ཅན་ཐམས་ཅད་ཀྱི་འཁོར་བ་ཐོག་མ་མེད་པ་ནས་བསགས་པའི་སྡིག་སྒྲིབ་ཉེས་ལྟུང་དྲི་མའི་ཚོགས་ཐམས་ཅད་བྱང་ཞིང་དག་པར་མཛད་དུ་གསོལ། །ཨོཾ་ཤྲི་བཛྲ་ཧེ་རུ་ཀ །ས་མཱ་ཡ། མ་ནུ་པཱ་ལ་ཡ། བཛྲ་ཧེ་རུ་ཀ་ཏེ་ནོ་པ་ཏིཥྛ། ཌཱི་ཌྡྷོ་མེ་བྷ་ཝ། སུ་ཏོ་ཥྱོ་མེ་བྷ་ཝ། ཨ་ནུ་རཀྟོ་མེ་བྷ་ཝ། སུ་པོ་ཥྱོ་མེ་བྷ་ཝ། སརྦ་སིདྡྷི་མྨེ་པྲ་ཡཙྪ། སརྦ་ཀརྨ་སུ་ཙ་མེ། ཙིཏྟཾ་ཤྲིཿཡཾ་ཀུ་རུ་ཧཱུཾ། ཧ་ཧ་ཧ་ཧ་ཧོཿབྷ་ག་ཝཱན། བཛྲ་ཧེ་རུ་ཀ་མཱ་མེ་མུཉྩ། ཧེ་རུ་ཀོ྅་བྷ་ཝ་མ་ཧཱ་ས་མ་ཡ་ས་ཏྭ་ཨཱཿཧཱུཾ་ཕཊ། ཅེས་ཅི་ལྟར་རིགས་པ་བཟླས་པའི་མཐར། མགོན་པོ་བདག་ནི་མི་ཤེས་རྨོངས་པ་སྟེ། །དམ་ཚིག་ལས་ནི་
འགལ་ཞིང་ཉམས། །བླ་མ་མགོན་པོས་སྐྱོབ་མཛོད་ཅིག །གཙོ་བོར་རྡོ་རྗེ་འཛིན་པ་སྟེ། །ཐུགས་རྗེ་ཆེན་པོའི་བདག་ཉིད་ཅན། །འགྲོ་བའི་གཙོ་ལ་བདག་སྐྱབས་མཆི། །སྐུ་གསུང་ཐུགས་རྩ་བ་དང་ཡན་ལག་གི་དམ་ཚིག་ཉམས་པ་ཐམས་ཅད་མཐོལ་ལོ་བཤགས་སོ། །སྡིག་སྒྲིབ་ཉེས་ལྟུང་དྲི་མའི་ཚོགས་ཐམས་ཅད་བྱང་ཞིང་དག་པར་བྱིན་གྱིས་བརླབ་ཏུ་གསོལ། རྡོ་རྗེ་སེམས་དཔའ་ཡབ་ཡུམ་འོད་དུ་ཞུ་ནས་རང་ལ་ཐིམ་པར་བསམ་མོ།། སྒྲུབ་ཐབས་དངོས་ལ་གཉིས། མཉམ་བཞག་གི་རྣལ་འབྱོར་དང་མཉམ་ལང་གི་རྣལ་འབྱོར་རོ། །དང་པོ་ལ་གཉིས་ཏེ། སྔོན་དུ་བྱ་བ་འཇུག་ལྡོག་གི་སྦྱོར་བ་དང༌། དཀྱིལ་འཁོར་གྱི་འཁོར་ལོ་དངོས་གཞི་སྒོམ་པའོ། །དང་པོ་ལ་མཐུན་རྐྱེན་སྒྲུབ་པ་དང༌། འགལ་རྐྱེན་སྤོང་བ་གཉིས་སོ། །དང་པོ་ལ་རྐྱེན་བསོད་ནམས་ཚོགས་སོགས་དང༌། རྒྱུ་ལམ་ཁྱེར་གཉིས་སོ། །དེའི་དང་པོ་རྐྱེན་བསོད་ནམས་ཚོགས་བསག་ནི། རང་ཉིད་གང་དུ་གནས་པའི་ཕྱོགས་དེ་ཁོར་ར་ཁོར་ཡུག་ཏུ་མི་བཟད་ཅིང་འཇིགས་སུ་རུང་བའི་དུར་ཁྲོད་ཆེན་པོ་བདག་མེད་པའི་ངོ་བོས་ཁྱབ་ཅིང༌། དབུས་སུ་ཆོས་ཀྱི་དབྱིངས་ཀྱི་བདག་ཉིད་རོའི་གདན་ལ་ཡང་དག་པར་གནས་པའི་སྒྲུབ་པ་པོ་རང་ཉིད་ཕྱག་གཉིས་པའི་རྣམ་པ་ཕྱག་རྒྱ་ལྔས་བརྒྱན་པ་དང་མཚན་ཉིད་ཐམས་ཅད་ཡོངས་སུ་རྫོགས་པའི་རིག་མ་གཡོན་གྱི་ཆ་ནས་ཉེ་བར་བསྟེན་པར་མོས་ཏེ། བདུད་རྩི་རིལ་བུ་ཁར་སྟེན་པའམ། ནང་མཆོད་བྱིན་གྱི་རླབས་ཏེ་མྱངས་ལ། ཤྲཱི་ཧེ་རུ་ཀོ྅་ཧཾ། སྙིང་གར་ཨ་ལས་ཟླ་བའི་དཀྱིལ་འཁོར་སྟེང་དུ། ཧཱུཾ་སྔོན་པོ་ཡེ་ཤེས་
ལྔའི་བདག་ཉིད་ཅན། ཧཱུཾ་ལས་འོད་འཕྲོས་ལུས་ཐམས་ཅད་གང༌། སྡིག་སྒྲིབ་ཐམས་ཅད་སྦྱངས་ཏེ། དཔལ་འཁོར་ལོ་བདེ་མཆོག་ཡབ་ཡུམ་དུ་གྱུར། སླར་ཧཱུཾ་ལས་འོད་ཟེར་འཕྲོས་པས་མདུན་གྱི་ནམ་མཁའ་སྟེང་གི་ཆ་ལ་རྩ་བའི་བླ་མ་རྡོ་རྗེ་ཆོས་ཀྱི་རྣམ་པ་ཅན་ལ་བརྒྱུད་པའི་བླ་མ་རྣམས་ཀྱིས་བསྐོར་བ། འོག་གི་ཆ་ལ་འཁོར་ལོ་བདེ་མཆོག་ལྷ་དྲུག་ཅུ་རྩ་གཉིས་ཀྱི་དཀྱིལ་འཁོར་སྤྱན་དྲངས། ན་མོ་གུ་རུ་བྷྱཿ ཞེས་དང༌། ན་མཿཤྲི་ཙཀྲ་སམྦྷ་ར་མཎྜལ་བྷྱཿ ཞེས་པའི་ཕྱག་བྱ། ཨོཾ་སརྦ་ཏ་ཐ་ག་ཏ་ཤྲི་ཙཀྲ་སམྦར་མཎྜལ་ལ་ཙཀྲ་སརྦ་བཱི་ར་ཡོ་གི་ནཱི། ཞེས་པ་རེ་རེའི་མགོར་སྦྱར་བའི། བཛྲ་ཨརྒྷཾ་པྲ་ཏིཙྪ་སྭཱཧཱ། བཛྲ་པཱ་དྱཾ་པྲ་ཏཱི་ཙྪ་སྭཱཧཱ། ཨོཾ་བཛྲ་པུཥྤེ་ཨཱཿཧཱུཾ། དེ་བཞིན་དུ། དྷུ་པེ། ཨ་ལོ་ཀེ གནྡྷེ་ནི་ཝི་དྱ། ཨོཾ་བཛྲ་ཤཔྟ་ཨཱཿཧཱུཾ། གི་བར་དུ་སྦྱར་བའི་མཆོད་པ་སྔོན་དུ་འགྲོ་བས་རྒྱུན་བཤགས་ནི། དཀོན་མཆོག་གསུམ་ལ་བདག་སྐྱབས་མཆི། །སྡིག་པ་ཐམས་ཅད་སོ་སོར་བཤགས། །འགྲོ་བའི་དགེ་ལ་རྗེས་ཡི་རང༌། །སངས་རྒྱས་བྱང་ཆུབ་ཡིད་ཀྱིས་བཟུང༌། །སངས་རྒྱས་ཆོས་དང་ཚོགས་མཆོག་ལ། །བྱང་ཆུབ་བར་དུ་སྐྱབས་སུ་མཆི། །རང་གཞན་དོན་ནི་རབ་བསྒྲུབ་ཕྱིར། །བྱང་ཆུབ་སེམས་ནི་བསྐྱེད་པར་བགྱི། །བྱང་ཆུབ་མཆོག་གི་སེམས་ནི་བསྐྱེད་བགྱིས་ནས། །སེམས་ཅན་ཐམས་ཅད་བདག་གི་མགྲོན་དུ་གཉེར། །བྱང་ཆུབ་སྤྱོད་མཆོག་ཡིད་འོང་སྤྱད་པར་བགྱི། །འགྲོ་ལ་ཕན་ཕྱིར་སངས་རྒྱས་འགྲུབ་པར་ཤོག །ཅེས་ལན་གསུམ་བརྗོད་པའོ།། དེ་ནས། སེམས་
ཅན་ཐམས་ཅད་བདེ་བ་དང་བདེ་བའི་རྒྱུ་དང་ལྡན་པར་གྱུར་ཅིག སྡུག་བསྔལ་དང་སྡུག་བསྔལ་གྱི་རྒྱུ་དང་བྲལ་བར་གྱུར་ཅིག སྡུག་བསྔལ་མེད་པའི་བདེ་བ་དང་མི་འབྲལ་བར་གྱུར་ཅིག ཉེ་རིང་ཆགས་སྡང་དང་བྲལ་བའི་བཏང་སྙོམས་ཚད་མེད་པ་ལ་གནས་པར་གྱུར་ཅིག ཅེས་ཚད་མེད་བཞི་ཡང་སྒོམ་མོ། །གཉིས་པ་རྒྱུ་ལམ་ཁྱེར་གཉིས་ནི། ཨོཾ་སྭ་བྷ་ཝ་ཤུདྡྷ་སརྦ་དྷརྨཿསྭ་བྷཱ་ཝ་ཤུདྡྷོ྅་ཧཾ། ཨོཾ་ཤུ་ནྱཱ་ཏ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། ཞེས་བརྗོད་ཅིང་དོན་སྒོམ་པ་ནི་ཆོས་སྐུ་ལམ་ཁྱེར་རོ། །སྟོང་པའི་ངང་ལས་རང་གི་བར་དོའི་རྣམ་ཤེས་ཀྱི་ངོ་བོ་ནཱ་ད་དཀར་ལ་དམར་བའི་མདངས་ཆགས་པ་རྩ་སྔགས་ཀྱི་སྒྲ་སྒྲོག་པའོ། །ཞེས་པ་ནི་ལོངས་སྐུ་ལམ་ཁྱེར་ཏེ། ཡང་ན་ཧཱུཾ་ཆ་ལྔ་པ་བསྒོམས་ཀྱང་ལེགས་པ་ཡིན་ནོ། །གཉིས་པ་འགལ་རྐྱེན་འགོག་པ་བསྲུང་བའི་འཁོར་ལོ་ནི། དེ་ལས་འོག་ཏུ་བཾ་འཕྲོས་པ་ལས་སྣ་ཚོགས་པད་མ་རཾ་འཕྲོས་པ་ལས་ཉི་མའི་དཀྱིལ་འཁོར། ཧཱུཾ་འཕྲོས་པ་ལས་སྣ་ཚོགས་རྡོ་རྗེའི་རྭ་རྣམས་ཤར་སྔོ། བྱང་ལྗང་ནུབ་དམར་ལྷོ་སེར། ལྟེ་བ་ཧཱུཾ་གིས་མཚན་པར་བསམ། རྡོ་རྗེའི་ལྟེ་བའི་ཧཱུཾ་ལས་སྒོ་མཚམས་མ་བརྒྱད། ཁ་གདོང་མ་ལས་སྟེང་དུ་ཁྭ་གདོང་མ་དང་ཁྱི་གདོང་མ་ལས་འོག་ཏུ་ཁྱི་གདོང་མ་རྣམས་དམར་མོ་ཞགས་པ་དང་ལྕགས་ཀྱུ་ཐོགས་པ་ཕྱོགས་བཅུར་སྤྲོས། ཨོཾ་སུམྦྷ་ནི་སུམྦྷ་ཧཱུཾ་ཧཱུཾ་ཕཊ། ཨོཾ་གྲྀཧྞ་གྲྀཧྞ་ཧཱུཾ་ཧཱུཾ་ཕཊ། ཨོཾ་གྲྀཧྞ་པཱ་ཡ་གྲྀཧྞ་པཱ་ཡ་ཧཱུཾ་ཧཱུཾ་ཕཊ། ཨོཾ་ཨཱ་ན་ཡ་ཧོ་བྷ་ག་ཝཱན་བིདྱ་རཱ་ཛ་ཧཱུཾ་ཧཱུཾ་ཕཊ། ཕྱོགས་གཡོན་
བསྐོར་དང༌། མཚམས་གཡས་བསྐོར་དུ་ཏེ་ལན་གཉིས་བརྗོད། གཡོན་པའི་སྡིགས་འཛུབ་ཕྱོགས་བཅུར་བསྟན་ཞིང༌། སེ་གོལ་གདབ་པའོ།། ཡང་སུམྦྷ། ཚར་གཅིག་བརྗོད་ནས། ཕྱོགས་བཅུའི་བགེགས་ཐམས་ཅད་ཚར་གཅོད་པའི་འཕྲིན་ལས་མཛོད་ཅིགཅེས་བཀའ་བསྒོས་པས། ཕོ་ཉ་རྣམས་ཀྱིས་བགེགས་ཁ་ཅིག་ནི་སྐྱབས་སུ་འགྲོ་བ་དང༌། བྱང་ཆུབ་ཀྱི་སེམས་ལ་བཀོད། ནག་པོའི་རིག་ཅན་ཁ་ཅིག་ནི་བསྒྲལ་ཏེ་བདེ་བ་ཅན་ལ་སོགས་པའི་ཞིང་དུ་གནས་སྤར། བགེགས་ཀྱི་གཙོ་བོ་ཕྱོགས་སྐྱོང་བཅུ་ནི་བཀུག་སྟེ་འོངས་པ་ཕྱོགས་བཅུར་འཁོད་པ། ཧཱུཾ་བཅུ་ལས་བྱུང་བའི་ཁྲོན་པ་གྲུ་གསུམ་ཟབ་ཅིང་རྒྱ་ཆེ་བ་བཅུའི་ནང་དུ་བཅུག ཡང་ཧཱུཾ་ལས་ཕུར་བུ་བཅུ་སྤྲོས་ཕོ་ཉ་རྣམས་ཀྱི་ལག་པར་གཏད། བགེགས་རྣམས་ཀྱི་སྤྱི་བོར་བཙུགས། ཨོཾ་གྷ་གྷ་གྷཱ་ཏ་ཡ་གྷ་ཏ་ཡ་སརྦ་དུཥྟཾ་ཕཊ། ཀཱི་ལ་ཡ་ཀཱི་ལ་ཡ་སརྦ་པཱ་པཾ་ཕཊ། ཧཱུཾ་ཧཱུཾ་ཧཱུཾ། བཛྲ་ཀཱི་ལ། བཛྲ་དྷ་རོ་ཨཛྙཱ་པཱ་ཡ་ཏི་སརྦ་བིགྷྣཾ་ཀཱ་ཡ་ཝཱཀ་ཙིཏྟ་བཛྲ་ཀཱི་ལ་ཡ་ཧཱུཾ་ཕཊ། ཅེས་བརྗོད། ཡང་ཧཱུཾ་ལས་ཐོད་པ་བཅུ་སྤྲོས། ཕོ་ཉ་རྣམས་ཀྱི་ལག་པ་གཡས་པར་གཏད། ཕུར་བུའི་སྤྱི་བོར་བརྡུངས། ཨོཾ་བཛྲ་མུངྒ་ར་བཛྲ་ཀཱི་ལ་ཡ་ཨཱ་ཀོ་ཊ་ཡ་ཧཱུཾ་ཕཊ། བགེགས་རྣམས་ཀྱི་སྤྱི་གཙུག་ནས་རྐང་མཐིལ་གྱི་བར་ཐལ་ཕྱུང་ནས་དེ་དག་གི་ལུས་གཡོ་བ་མེད། ངག་རླུང་རྒྱུ་བ་མེད། སེམས་རྣམ་པར་རྟོགས་པ་ཐམས་ཅད་བཅོམ་ནས་འོད་གསལ་གྱི་ངོ་བོར་གྱུར་ཞིང༌། སྨོན་ལམ་གྱི་མཐུ་ལས་རྣམ་པར་ཤེས་
པ་མི་བསྐྱོད་པའི་ཞིང་དུ་སྐྱེས་པར་གྱུར། སྣ་ཚོགས་རྡོ་རྗེ་ལས་འོག་ཏུ་སྣ་ཚོགས་རྡོ་རྗེ་དཔག་ཏུ་མེད་པ་སྤྲོས། དེ་ལས་རྡོ་རྗེའི་ས་གཞིར་བསམ་ལ། ཨོཾ་མེ་དྷི་ནི་བཛྲི་བྷ་བ་བནྡྷ་ཧཱུཾ། དེ་ལས་ཕྱོགས་མཚམས་སུ་འཕྲོས་པ་ལས་རྡོ་རྗེ་ནག་པོ་གདེངས་པ་འགྲེང་བུར་གྱུར་པའི་རྭ་བ་དང༌། རྡོ་རྗེ་འཕྲེང་ལ་སོང་བའི་རྭ་བར་བསམ་ལ། ཨོཾ་བཛྲ་པྲ་ཀ་ར་ཧཱུཾ་བཾ་ཧཱུཾ། སྟེང་དུ་འཕྲོས་པ་ལས་རྡོ་རྗེ་རྭ་བ་དང་དྲྭ་བའི་གུར་དུ་བསམ་ལ། ཨོཾ་བཛྲ་པཉྫ་ར་ཧཱུཾ་པཾ་ཧཱུཾ། དེའི་འོག་ཏུ་རྡོ་རྗེའི་བླ་རེར་བསམ་ལ། ཨོཾ་བཛྲ་བི་ཏ་ན་ཧཱུཾ་ཁཾ་ཧཱུཾ། དེའི་ཕྱིར་རོལ་དུ་འོབས་དང་བཅས་པའི་མདའི་དྲྭ་བ་མདེའུ་བསྣོལ་བ་ཕྱིར་བསྟན་པ་སྲིད་པའི་རྩེ་མོ་ལ་ཐུག་པར་བསམ་ལ། ཨོཾ་བཛྲ་ས་ར་ཛཱ་ལ་ཏྲཾ་སཾ་ཏྲཾ། དེ་ཐམས་ཅད་ཀྱི་ཕྱི་རོལ་ཏུ་བསྐལ་པའི་མེ་ལྟ་བུའི་མེ་རི་འབར་བ། ཨོཾ་བཛྲ་ཛྭ་ལ་ཨ་ན་ལརྐ་ཧཱུཾ་ཧཱུཾ་ཧཱུཾ། ཞེས་པ་སྟེ། སྔགས་རྣམས་ལན་གསུམ་གསུམ་བརྗོད་དོ། །ཕོ་ཉ་རྣམས་ལས་རང་འདྲ་བ་དཔག་ཏུ་མེད་པ་སྤྲུལ་ཏེ་མཚོན་ཆ་སྣ་ཚོགས་ཐོགས། རྡོ་རྗེ་དྲ་མིག་ནས་ཕར་རོ་སྟོད་ཐོན་ནས། བསྒྲུབ་པ་པོས་ཇི་སྲིད་བྱང་ཆུབ་མ་ཐོབ་ཀྱི་བར་དུ། བར་དུ་གཅོད་པ་ཐམས་ཅད་བསྲུང་བར་མཛད། གཉིས་པ་དཀྱིལ་འཁོར་གྱི་འཁོར་ལོ་དངོས་གཞི་སྒོམ་པ་ལ་རྟེན་གྱི་དཀྱིལ་འཁོར་སྒོམས་པ་དང༌། བརྟེན་པའི་དཀྱིལ་འཁོར་བསྒོམ་པའོ།། དང་པོ་ནི། བསྲུང་བའི་འཁོར་ལོའི་དབུས་སུ་ཆོས་ཀྱི་འབྱུང་གནས་གྲུ་གསུམ་པ། ཕྱི་དཀར་ལ་ནང་དམར་བ་ཡངས་ཤིང་རྒྱ་ཆེ་བའི་དབུས་སུ། ལཾ་ལས་སའི་དཀྱིལ་འཁོར་སེར་པོ་གྲུ་བཞི་གྲྭ་བཞིར་རྡོ་རྗེ་རྩེ་མོ་གསུམ་པས་
མཚན་པ། དེའི་སྟེང་དུ་བཾ་ལས་ཆུའི་དཀྱིལ་འཁོར་དཀར་པོ་ཟླུམ་པོ་བུམ་པས་མཚན་པ། དེའི་སྟེང་དུ་རཾ་ལས་མེའི་དཀྱིལ་འཁོར་དམར་པོ་གྲུ་གསུམ་འབར་བས་མཚན་པ། དེའི་སྟེང་དུ་ཡཾ་ལས་རླུང་གི་དཀྱིལ་འཁོར་སྔོན་པོ་གཞུའི་དབྱིབས་ཅན་བ་དན་གྱིས་མཚན་པ། དེའི་སྟེང་དུ་སུཾ་ལས་རིའི་རྒྱལ་པོ་རི་རབ་ཟུར་བཞི་པ། ཤར་ཤེལ། བྱང་གསེར། ནུབ་པདྨ་རཱ་གལྷོ་བཻཌཱུརྱ་ལས་གྲུབ་པ་རིན་པོ་ཆེ་སྣ་བཞིའི་རང་བཞིན་ཅན། ལྕོགས་བརྒྱད་དང་ལྡན་པ། ཐིག་ལེ་སེར་པོ་དང་བཅས་པ། དེ་རྣམས་ཡོངས་སུ་གྱུར་པ་ལས་འོག་ཏུ་རླུང་གི་དཀྱིལ་འཁོར་སྔོན་པོ་གཞུའི་དབྱིབས་ཅན་བ་དན་གྱིས་མཚན་པ། དེའི་སྟེང་དུ་མེའི་དཀྱིལ་འཁོར་དམར་པོ་གྲུ་གསུམ་འབར་བས་མཚན་པ། དེའི་སྟེང་དུ་ཆུའི་དཀྱིལ་འཁོར་དཀར་པོ་ཟླུམ་པོ་བུམ་པས་མཚན་པ། དེའི་སྟེང་དུ་སའི་དཀྱིལ་འཁོར་སེར་པོ་གྲུ་བཞི་གྲྭ་བཞིར་རྡོ་རྗེ་རྩེ་མོ་གསུམ་པས་མཚན་པ། དེའི་སྟེང་དུ་རིའི་རྒྱལ་པོ་རི་རབ་ཟུར་བཞི་པ། ཤར་ཤེལ། བྱང་གསེར། ནུབ་པདྨ་རཱ་ག །ལྷོ་བཻཌཱུརྱ་ལས་གྲུབ་པ་རིན་པོ་ཆེ་སྣ་བཞིའི་རང་བཞིན་ཅན། ལྕོག་བརྒྱད་དང་ལྡན་པ། ཐིག་ལེ་སེར་པོ་དང་བཅས་པ། དེའི་སྟེང་དུ་བསྲུང་བའི་འཁོར་ལོའི་དབུས་སུ་སྣ་ཚོགས་རྡོ་རྗེའི་ལྟེ་བར་རིན་པོ་ཆེ་སྣ་ཚོགས་ལས་གྲུབ་པའི་གཞལ་ཡས་ཁང་པ་གྲུ་བཞི་པ། སྒོ་བཞི་པ། ནང་ནས་རིམ་པ་བཞིན་ནག་པོ། ལྗང་ཁུ། དམར་པོ། སེར་པོ། དཀར་བའི་བརྩིག་པ་རིམ་པ་ལྔ་དང་ལྡན་པའི་སྟེང་དུ། རིན་པོ་ཆེའི་ཕ་གུ་སེར་པོ་ལ་རིན་པོ་ཆེའི་ཕྲ་ཡིས་མཛེས་པ། དེའི་སྟེང་དུ་
དྲ་བ་དང་དྲ་བ་ཕྱེད་པ་དང༌། དྲིལ་བུ་གཡེར་ཁའི་ཕྲེང་བ་དང༌། དར་གྱི་ཆུན་འཕྱང་དང༌། ཟླ་བ་རླུང་གིས་བསྐྱོད་པ་དང༌། རྔ་ཡབ་ནོར་བུའི་ཡུ་བ་ཅན་ལ་སོགས་པས་བརྒྱན་པ། དེའི་སྟེང་དུ་བྱ་འདབ་ལས་ཐུར་དུ་འཕྱང་བའི་བ་ཀུ་ལི་དང༌། དེའི་སྟེང་དུ་རིན་པོ་ཆེའི་དྲ་བ་གསེར་མའི་མདའ་ཡབ་ཀྱིས་བརྒྱན་པ། གཞལ་ཡས་ཁང་གི་དབུས་ན་ཨིནྡྲ་ནི་ལའི་ས་གཞི་ལ་གནས་པའི་འཁོར་ལོ་རིམ་པ་བཞི། མཆོད་རྟེན་ཟླུམ་པའི་བང་རིམ་གྱི་དབྱིབས་ལྟར་ཅུང་ཟད་ཇེ་མཐོ་ཇེ་མཐོར་གྱུར་པའི་ལྟེ་བར་བདེ་བ་ཆེན་པོའི་འཁོར་ལོ། གཙོ་བོའི་གདན་སྣ་ཚོགས་པདྨས་དབུས་སུ་བརྒྱན་པའི་ཆུ་སྐྱེས་སེར་པོ་འདབ་མ་བརྒྱད་པའི་ཕྱི་རོལ་དུ་རྡོ་རྗེའམ་གྲི་གུག་གིས་མཚན་པའི་རྭ་བ་དང༌། ཀ་བ་དང༌། གདུང་དང༌། ཐོག་ཕུབ་ཀྱིས་མཛེས་པར་བྱས་པ། དེ་ལས་ཅུང་ཟད་ཀྱིས་དམའ་བར་ཐུགས་ཀྱི་འཁོར་ལོ་སྔོ་ནག་རྩིབས་བརྒྱད་པ། རྡོ་རྗེས་མཚན་པའི་ར་བ་དང༌། ཀ་བ་དང༌། གདུང་དང༌། ཐོག་ཕུབ་ཀྱིས་མཛེས་པར་བྱས་པ། དེ་ལས་ཅུང་ཟད་ཀྱིས་དམའ་བར་གསུང་གི་འཁོར་ལོ་དམར་པོ་རྩིབས་བརྒྱད་པ། པདྨས་མཚན་པའི་ར་བ་དང༌། ཀ་བ་དང༌། གདུང་དང༌། ཐོག་ཕུབ་ཀྱིས་མཛེས་པར་བྱས་པ། དེ་ལས་ཅུང་ཟད་ཀྱིས་དམའ་བར་སྐུའི་འཁོར་ལོ་དཀར་པོ་རྩིབས་བརྒྱད་པ། འཁོར་ལོས་མཚན་པའི་ར་བ་དང༌། ཀ་བ་དང༌། གདུང་དང༌། ཐོག་ཕུབ་ཀྱིས་མཛེས་པར་བྱས་པ། དམ་ཚིག་གི་འཁོར་ལོའི་ལྷ་སྣམ་ཤར་སྔོ། བྱང་ལྗང་
ནུབ་དམར། ལྷོ་སེར་བ། མཚམས་རྣམས་སུ་བུམ་པ་གཉིས་གཉིས་ཏེ་བརྒྱད་དང་ལྡན་པ། དབུས་ཕྱུར་བུར་གྱུར་པའི་རྩེ་མོར་རྡོ་རྗེ་དང་ནོར་བུའི་ཏོག་གིས་སྤྲས་པ། རྩིག་པའི་ཕྱི་རོལ་འདོད་ཡོན་གྱི་སྣམ་བུ་དམར་པོའི་སྟེང་ན་མཆོད་པའི་ལྷ་མོ་བཅུ་དྲུག་གི་མཆོད་རྫས་དུ་མ་ཐོགས་ནས་འཁོད་པ། སྒོ་ཁང་བཞིའི་སྟེང་གི་ཐད་སོར་ཀ་བ་བཞི་བཞིས་བཏེག་པའི་རྟ་བབས་སྣམ་བུ་བཅུ་གཅིག་དང་ལྡན་པའི་རྩེ་མོར་པདྨ་ལ་གནས་པའི་ཆོས་ཀྱི་འཁོར་ལོ་དང༌། གཡས་གཡོན་དུ་རི་དྭགས་ཕོ་མོ་དང༌། སྣམ་བུ་སོ་སོ་ལ་རྒྱལ་མཚན་དང༌། བ་དན་ལ་སོགས་པས་བརྒྱན་པའོ། །དེའི་ཕྱི་རོལ་ཏུ་དུར་ཁྲོད་བརྒྱད་ནི། ཤར་དུ་དྲག་ཏུ་གཏུམ་པ། བྱང་དུ་ཚང་ཚིང་འཁྲིགས་པ། ནུབ་ཏུ་འུར་འུར་འབར་བ། ལྷོར་འཇིགས་སུ་རུང་བ། མེར་ནགས་ཚལ་ཕུན་སུམ་ཚོགས་པ། བདེན་བྲལ་དུ་མུན་པ་མི་ཟད་པ། རླུང་དུ་ཀི་ལི་ཀི་ལིའི་སྒྲ་རབ་ཏུ་སྒྲོག་པ། དབང་ལྡན་དུ་ཧ་ཧ་དགོད་པའོ། །ཤིང་བརྒྱད་ནི། ཤར་དུ་ཤི་རི་ཤ །བྱང་དུ་ཨ་ཤྭོ་ཐ། ནུབ་ཏུ་ཀ་ཀོ་ལ། ལྷོ་རུ་ཙུ་ཏ། མེར་ཀ་རཉྫ། བདེན་བྲལ་དུ་ལ་ཏ་པརྐ་ཏི། རླུང་དུ་པར་ཏི་པ་ཏ། དབང་ལྡན་དུ་བྷ་ཊའོ། །ཕྱོགས་སྐྱོང་བརྒྱད་ནི། ཤར་དུ་དབང་པོ། བྱང་དུ་གནོད་སྦྱིན། ནུབ་ཏུ་ཆུ་ལྷ། ལྷོར་གཤིན་རྗེ། མེར་བྱིན་ཟ། བདེན་བྲལ་དུ་སྲིན་པོ། རླུང་དུ་རླུང་བདགདབང་ལྡན་དུ་འབྱུང་པོའོ། །ཀླུ་བརྒྱད་ནི། ཤར་དུ་ནོར་རྒྱས། བྱང་དུ་འཇོག་པོ། ནུབ་ཏུ་སྟོབས་ཀྱི་རྒྱུ། ལྷོར་པདྨ། མེར་ཧཱུ་ལུན་ཏ།
བདེན་བྲལ་དུ་རིག་ལྡན། རླུང་དུ་དུང་སྐྱོང༌། དབང་ལྡན་དུ་པདྨ་ཆེན་པོའོ། །སྤྲིན་གྱི་བདག་པོ་བརྒྱད་ནི། ཤར་དུ་སྒྲ་སྒྲོགས་པ། བྱང་དུ་རྨུགས་པ། ནུབ་ཏུ་མུན་པ་ཅན། ལྷོར་ཀུན་ཏུ་འཁྱིལ། མེར་གང་བ། བདེན་བྲལ་དུ་འབབ་པ། རླུང་དུ་དྲག་པོ། དབང་ལྡན་དུ་འཁྲིགས་པའོ། །ཤིང་རྣམས་ལ་བརྟེན་པའི་ཞིང་སྐྱོང་རྣམས་ནི་སྒོ་མཚམས་མ་བརྒྱད་ཀྱི་གཟུགས་འཛིན་པའོ། །དུར་ཁྲོད་དེ་དག་ཏུ་ཆུ་ཆེན་པོ་བརྒྱད་དང༌། མེ་ཆེན་པོ་བརྒྱད་དང༌། མཆོད་རྟེན་བརྒྱད་ལ་སོགས་པས་ཡོངས་སུ་གང་བ་སྟེ། གཞན་ཡང་རོ་དང་ཀེང་རུས་དང༌། གསལ་ཤིང་གིས་ཕུག་པ་དང༌། དཔྱངས་པ་དང༌། དུམ་བུ་དང༌། འཐོར་བ་ལ་སོགས་པས་གང་བ། བྱ་དང་གཅན་གཟན་སྣ་ཚོགས་པ་ལང་ལོང་རྒྱུ་ཞིང༌། ལྕེ་སྤྱང་གི་སྒྲས་ཁྱབ་པ། གྲུབ་ཆེན་རྫུ་འཕྲུལ་དང་ལྡན་པའི་སློབ་དཔོན་དང་དཔའ་བོ་དང༌། རྣལ་འབྱོར་མ་དང༌། མཁའ་འགྲོ་དང༌། མཁའ་འགྲོ་མ་དང༌། འཇིགས་པའི་གཟུགས་ཅན་དང་རོ་ལངས་དང་འབྱུང་པོ་དང་སྲིན་མོ་དག་ཤ་ཟ་དུ་མས་ཁྱབ་པ། དངོས་གྲུབ་ཀྱི་རྫས་དང་མཆོད་པ་སྣ་ཚོགས་པས་གང་བའོ། །ནང་གི་ལྷའི་གནས་རྣམས་སུ་ཉི་མའི་དཀྱིལ་འཁོར་གྱི་སྟེང་དུ། དབུས་སུ་འཇིགས་བྱེད་དང་དུས་མཚན་མ། བདེ་ཆེན་འཁོར་ལོའི་མཚམས་བཞིར་ཟླ་བའི་གདན། འཁོར་རྣམས་ལ་མི་རོའི་གདན་རེ་རེའོ། །གཉིས་པ་བརྟེན་པའི་དཀྱིལ་འཁོར་སྒོམ་པ་ལ། དང་པོ་སྦྱོར་བ་དང༌། དཀྱིལ་འཁོར་རྒྱལ་མཆོག་དང་ལས་རྒྱལ་མཆོག་སྟེ་གསུམ་ལས། དང་པོ་ལ་
བསྙེན་པ་དང་ཉེར་སྒྲུབ་དང༌། བསྒྲུབ་པ་དང༌། བསྒྲུབ་ཆེན་ཏེ་བཞི་ལས། དང་པོ་ལ། སྔོན་འགྲོ་རྒྱུ་རྡོ་རྗེ་འཛིན་པ་མཛད་པ་དང་བཅས་པ། དངོས་བཞི་འབྲས་བུ་རྡོ་རྗེ་འཛིན་པ་བྱིན་རླབས་དང་བཅས་པའོ། དང་པོ་ནི། དབུས་ཀྱི་གདན་གྱི་སྟེང་དུ་གཡོན་བསྐོར་གྱི། ཨ་ཨཱ། ཨི་ཨཱི། ཨུ་ཨཱུ། རྀ་རཱྀ། ལྀ་ལཱྀ། ཨེ་ཨཻ། ཨོ་ཨཽ། ཨཾ་ཨཿ ཕྲག་གཉིས་འཁོད། མཚན་བཟང་པོ་སུམ་ཅུ་རྩ་གཉིས་ཀྱི་ངོ་བོ། དེ་ཡོངས་སུ་གྱུར་པ་ལས་ཟླ་བའི་དཀྱིལ་འཁོར་མེ་ལོང་ལྟ་བུའི་ཡེ་ཤེས། དེའི་སྟེང་དུ་གཡས་བསྐོར་གྱི། ཀ་ཁ་ག་གྷ་ང༌། ཙ་ཚ་ཛ་ཛྷ་ཉ། ཊ་ཋ་ཌ་ཌྷ་ཎ། ཏ་ཐ་ད་དྷ་ན། པཱ་ཕ་བ་བྷ་མ། ཡ་ར་ལ་ཝ། ཤ་ཥ་ས་ཧ་ཀྵ། ཡ་ར་ལ་ཝ་ཌ་ཌྷ་ཕྲག་གཉིས་བཀོད། དཔེ་བྱད་བཟང་པོ་བརྒྱད་ཅུའི་ངོ་བོ། དེ་ཡོངས་སུ་གྱུར་པ་ལས་ཉི་མའི་དཀྱིལ་འཁོར་མཉམ་པ་ཉིད་ཀྱི་ཡེ་ཤེས། དེའི་བར་དུ་ཧཱུཾ་དང་ཨཾ་ལས་རྡོ་རྗེ་དང་ཐོད་པ་ཧཱུཾ་དང་ཨཾ་གིས་མཚན་པ། སོ་སོར་རྟོག་པའི་ཡེ་ཤེས། དེ་རྣམས་གཅིག་ཏུ་འདྲེས་པར་བྱ་བ་གྲུབ་པའི་ཡེ་ཤེས། དེ་ལས་སྐུ་ཡོངས་སུ་རྫོགས་པ་ཆོས་ཀྱི་དབྱིངས་ཀྱི་ཡེ་ཤེས་ཀྱི་ངོ་བོ་རྒྱུ་རྡོ་རྗེ་འཛིན་པ་བཅོམ་ལྡན་འདས་དཔལ་རྡོ་རྗེ་སེམས་དཔའ་འཁོར་ལོ་བདེ་མཆོག་སྐུ་མདོག་དཀར་པོ་ཁྲོ་བོ་ཆེན་པོ་ཞལ་བཞི་ཕྱག་བཞི། རྩ་བའི་ཞལ་དཀར། གཡས་ནག གཡོན་དམར། རྒྱབ་སེར་བ། ཞལ་ཐམས་ཅད་རྣམ་པར་འགྱུར་བ། སྤྱན་གསུམ་པ་མཆེ་བ་གཙིགས་པ། ཕྱག་དང་པོ་གཉིས་ཀྱིས་རྡོ་རྗེ་དང་དྲིལ་བུ་འཛིན་པས་ཡུམ་ལ་འཁྱུད་པ། འོག་མ་གཉིས་ཀྱིས་ཐོད་པ་བདུད་རྩིས་གང་བ་དང༌། བདུད་རྩིའི་རང་བཞིན་གྱི་
ཁ་ཊཱཾ་ག་བསྣམས་པ། པདྨ་དང་ཉི་མའི་གདན་གྱི་སྟེང་ན་ཞབས་གཡས་བརྐྱང་པས་དུས་མཚན་མ་དམར་མོའི་ལྟེ་བ་དང་སྐྱེ་གནས་མནན་པ། ཞབས་གཡོན་བསྐུམ་པས་འཇིགས་བྱེད་ནག་པོ་ཁ་བུབ་ཏུ་བསྒྱེལ་བའི་མགོ་བོ་དང་སྙིང་ག་བརྫིས་པ། རལ་བའི་ཐོར་ཚུགས་དང༌། སྣ་ཚོགས་རྡོ་རྗེ་དང༌། ཟླ་བ་ཕྱེད་པ་དང༌། ཐོད་པ་སྐམ་པོ་ལྔས་དབུ་བརྒྱན་པ། གཙུག་གི་ནོར་བུ་རིན་པོ་ཆེ་དང༌། རྣ་ཆ་དང༌། མགུལ་རྒྱན་དང༌། ཕྱག་གི་གདུ་བུ་དང༌། ཚངས་པའི་སྐུད་པ་དང༌། ཐལ་ཆེན་ཏེ་ཕྱག་རྒྱ་དྲུག་དང༌། སྤྱི་བོའི་འཁོར་ལོ་དང༌། སྐ་རགས་དང༌། ཞབས་གདུབ་གཡེར་ཁའི་འཕྲེང་བ་དང་བཅས་པ། དཔུང་རྒྱན་དང་སོར་གདུབ་སྟེ་ཉེ་བའི་ཕྱག་རྒྱ་ལྔས་སྐུ་ལ་བརྒྱན་པ། མི་མགོ་རློན་པ་ལྔ་བཅུའི་དོ་ཤལ་དང༌། སྟག་གི་པགས་པའི་ཤམ་ཐབས་གྲོལ་བ། སྒེག་པ་ལ་སོགས་པའི་གར་གུ་དང་ལྡན་པ། དེའི་པང་ན་ཡུམ་རྡོ་རྗེ་ཕག་མོ་སྐུ་མདོག་དམར་མོ་ཞལ་གཅིག་ཕྱག་གཉིས། སྤྱན་གསུམ་མ། དྲག་མོ་ཆེན་མོ་བསྐལ་པའི་མེ་ལྟར་གཟི་བརྗིད་འབར་བ། ཕྱག་གཡོན་པའི་བདུད་དང་གདུག་པའི་ཁྲག་དང་མིའི་རྒྱུ་མའི་གང་བའི་ཐོད་པ་འཛིན་པས་ཡབ་ལ་འཁྱུད་པའི་ཚུལ་གྱིས་སྟོབས་པ། གཡས་པས་རྡོ་རྗེ་དང་སྡིགས་འཛུབ་ཀྱིས་ཕྱོགས་ཐམས་ཅད་དུ་བསྡིགས་པ། དབུ་སྐྲ་གྲོལ་བ། ཞབས་གཡོན་བརྐྱངས་ཤིང་གཡས་བསྐུམ་པས་བཅོམ་ལྡན་འདས་ལ་ལེགས་པར་འཁྱུད་པ་གཅེར་བུའི་མཆོག་མི་མགོ་
སྐམ་པོ་ལྔའི་དབུ་རྒྱན་དང༌། སྐམ་པོ་ལྔ་བཅུའི་དོ་ཤལ་ཅན། འཁོར་ལོ་སྙན་རྒྱན་མགུར་ཆུ་གདུབ་བུའི་ཚོགས་དང་འོག་པག་སྟེ། རུས་པའི་རྒྱན་ལྔས་བརྒྱན་པ། ཁྲག་གསོལ་བ་ལ་དགེས་ཤིང༌། བྷ་ག་ནས་ཁྲག་འཛག་པའོ། །སྣང་བ་དང་ལྷག་མཐོང་དང་ཐུགས་རྗེ་ཆེན་པོའི་ངོ་བོ་ནི་ཡབ་ཡིན་ལ། སྟོང་པ་དང་ཞི་གནས་དང་བདེ་བ་ཆེན་པོའི་ངོ་བོ་ནི་ཡུམ་ཡིན་ཞིང༌། གཉིས་ཀའང་བསྐལ་པའི་མེ་ལྟ་བུའི་དབུས་ན་བཞུགས་པའོ། །དེ་ནས་ཡུམ་གྱི་མངལ་གནས་སུ་སྐད་ཅིག་གིས་ལྷ་དྲུག་ཅུ་རྩ་གཉིས་ཀྱི་དཀྱིལ་འཁོར་གཞལ་ཡས་ཁང་དང་བཅས་པ་གྲུབ་པར་གྱུར། གཙོ་བོ་ཡབ་ཡུམ་རྗེས་སུ་ཆགས་པས་ཁ་སྦྱོར་ནང་གི་འདོད་པའི་ཡོན་ཏན་ལྔའི་བདེ་བ་སྐུ་ཉམས་སུ་སྟར་ཞིང་རྡོ་རྗེ་དང་པདྨའི་འཁོར་ལོའི་ལྟེ་བ་ལུ་གུར་རྒྱུད་དུ་བཅིངས་པའི་སྦྱོར་བས་འདོད་ཆགས་ཆེན་པོའི་འོད་ཟེར་ཐུགས་ཀ་ནས་སྤྲོས་སེམས་ཅན་གྱི་ཁམས་མ་ལུས་པ་བཀུག་ནས་ནང་གི་དཀྱིལ་འཁོར་གྱི་སྒོ་བཞི་ཕྱེ་བ་ནས་ཞུགས། བྱང་ཆུབ་ཀྱི་སེམས་ཀྱིས་དབང་བསྐུར་བས་སྒྲིབ་པ་གསུམ་དགཡེ་ཤེས་ཡོངས་སུ་རྫོགས། དཔལ་འཁོར་ལོ་སྡོམ་པ་ཡབ་ཡུམ་གྱིས་སྐུར་གྱུར་ནས་ཕྱིར་སྤྲོས་ཏེ་སྐད་ཅིག་དེ་ཉིད་ལ་རང་རང་གི་ཞིང་དུ་གཤེགས་པར་གྱུར། རྒྱུ་རྡོ་རྗེ་འཛིན་པ་ཡབ་ཡུམ་སྙོམས་པར་ཞུགས། དགའ་བའི་སྒྲས་ནམ་མཁའི་ནཱ་དའམ་ཧཱུཾ་ཡིག་དང་དེ་བཞིན་གཤེགས་པ་ཐམས་ཅད་སྤྱན་དྲངས། བདག་གི་ཞལ་ནས་ཞུགས། སྙིང་གར་འོད་དུ་ཞུ། རྡོ་རྗེའི་ལམ་ནས་ཡུམ་གྱི་པདྨར་བབས་པ་ལས་ཡབ་ཡུམ་
གཉིས་འོད་དུ་ཞུ་ནས། ཐིག་ལེའི་རང་བཞིན་འོད་ཀྱི་ཕུང་པོ་དཀར་ལ་དམར་བའི་མདངས་ཅན་དུ་གྱུར། གཉིས་པ་ནི། དེ་ནས་རང་བཞིན་གྱི་གནས་ནས་སངས་རྒྱས་ཐམས་ཅད་འདུས་པ་དང༌། ཐིག་ལེ་ལས་བྱུང་བའི་སངས་རྒྱས་རྣམས་ཀྱིས། ཨོཾ་མ་ཧཱ་སུ་ཁ་བཛྲ་སཏྭ་ཛ་ཧཱུཾ་བཾ་ཧོཿ སུ་ར་ཏ་སྟྭཾ་དྲཾ་ཤྱ་ཧོ། ཞེས་བསྐུལ། སངས་རྒྱས་རྣམས་ཐིག་ལེ་ལ་ཐིམ་ཏེ། ཐིག་ལེ་དེ་ཧཱུཾ་དང་ཨཾ་གཉིས་སུ་གྱུར། དེ་ལས་འབྲས་བུ་རྡོ་རྗེ་འཛིན་པ་བཅོམ་ལྡན་འདས་དཔལ་ཧེ་རུ་ཀ་འཁོར་ལོ་བདེ་མཆོག་སྐུ་མདོག་མཐིང་ནག ཆེས་ཆེར་ཁྲོས་པ་དྲག་ཤུལ་ཆེན་པོ་ཆགས་པའི་ཉམས་དང་འདྲེས་པ། ཞལ་བཞི་ཕྱག་བཅུ་གཉིས་པ། རྩ་བའི་ཞལ་ཤིན་ཏུ་གནག་པ། གཡས་ཞལ་ཀུནྡ་ལྟར་དཀར་བ་གཡོན་ཞལ་པདྨ་རཱ་ག་ལྟར་དམར་བ། རྒྱབ་ཞལ་སེར་པོ་གསེར་ལྟར་འབར་བ། ཞལ་ཐམས་ཅད་རྣམ་པར་འགྱུར་བ། སྤྱན་གསུམ་པ། མཆེ་བ་གཙིགས་པ། ཕྱག་དང་པོ་གཉིས་ཀྱིས་རྡོ་རྗེ་དང་དྲིལ་བུ་འཛིན་པས་ཡུམ་ལ་འཁྱུད་པ། དེའི་འོག་མ་གཉིས་ཀྱིས་གླང་པོ་ཆེའི་པགས་པ་བརྒྱངས་ཏེ་འཛིན་པ། གསུམ་པ་གཉིས་ན་ཌ་མ་རུ་དང་ཁ་ཊྭཱཾ་ག བཞི་པ་གཉིས་ན་དགྲ་སྟ་དང་ཞགས་པ། ལྔ་པ་གཉིས་ན་མདུང་རྩེ་གསུམ་པ་དང༌། ཁྲག་གིས་གང་བའི་ཐོད་པ། དྲུག་པ་གཉིས་ཀྱིས་གྲི་གུག་དང་ཚངས་པའི་མགོ་བོ་བསྣམས་པ། པདྨ་དང་ཉི་མའི་གདན་གྱི་སྟེང་ན་ཞབས་གཡས་བརྐྱང་པས་དུས་མཚན་མ་དམར་མོའི་ལྟེ་བ་དང་སྐྱེ་གནས་མནན་པ་
ཞབས་ཡོན་བསྐུམ་པས་འཇིགས་བྱེད་ནག་པོ་ཁ་བུབ་ཏུ་བསྐྱེལ་བའི་མགོ་བོ་དང་སྙིང་ག་བརྫིས་པ། རལ་པའི་ཐོར་ཚུགས་དང༌། སྣ་ཚོགས་རྡོ་རྗེ་དང༌། ཟླ་བ་ཕྱེད་པ་དང༌། ཐོད་པ་སྐམ་པོ་ལྔས་དབུ་རྒྱན་པ། གཙུག་གི་ནོར་བུ་རིན་པོ་ཆེ་དང༌། རྣ་ཆ་དང༌། མགུལ་རྒྱན་དང༌། ཕྱག་གི་གདུ་བུ་དང༌། ཚངས་པའི་སྐུད་པ་དང༌། ཐལ་ཆེན་ཏེ་ཕྱག་རྒྱ་དྲུག་དང༌། སྤྱི་བོའི་འཁོར་ལོ་དང༌། སྐ་རགས་དང༌། ཞབས་གདུབ་གཡེར་ཁའི་འཕྲེང་བ་དང་བཅས་པ་དང༌། དཔུང་རྒྱན་དང་སོར་གདུབ་སྟེ་ཉེ་བའི་ཕྱག་རྒྱ་ལྔས་སྐུ་ལ་བརྒྱན་པ། མི་མགོ་རློན་པ་ལྔ་བཅུའི་དོ་ཤལ་དང༌། སྟག་གི་པགས་པའི་ཤམ་ཐབས་གྲོལ་བ། སྒེགས་པ་ལ་སོགས་པའི་ཀར་དགུ་དང་ལྡན་པ། དེའི་པང་ན་ཡུམ་རྡོ་རྗེ་ཕག་མོ་སྐུ་མདོག་དམར་མོ་ཞལ་གཅིག་ཕྱག་གཉིས་སྤྱན་གསུམ་མ། དྲག་མོ་ཆེན་མོ་བསྐལ་པའི་མེ་ལྟར་གཟི་བརྗིད་འབར་བ། ཕྱག་གཡོན་པས་བདུད་དང་གདུག་པའི་ཁྲག་དང་མིའི་རྒྱུ་མས་གང་བའི་ཐོད་པ་འཛིན་པས་ཡབ་ལ་འཁྱུད་པའི་ཚུལ་གྱིས་སྟོབས་པ། གཡས་པས་རྡོ་རྗེ་དང་སྡིགས་འཛུབ་ཀྱིས་ཕྱོགས་ཐམས་ཅད་དུ་བསྡིགས་པ། དབུ་སྐྲ་གྲོལ་བ། ཞབས་གཡོན་བརྐྱངས་ཤིང་གཡས་བསྐུམས་པས་བཅོམ་ལྡན་འདས་ལ་ལེགས་པར་འཁྱུད་པ། །གཅེར་བུའི་མཆོག་མི་མགོ་སྐམ་པོ་ལྔའི་དབུ་རྒྱན་དང༌། སྐམ་པོ་ལྔ་བཅུའི་དོ་ཤེལ་ཅན། འཁོར་ལོ་སྙན་རྒྱན་མགུར་ཆུ་གདུ་བུའི་ཚོགས་དང་འོག་པག་སྟེ། རུས་པའི་རྒྱན་ལྔས་བརྒྱན་པ། ཁྲག་གསོལ་བ་ལ་དགེས་
ཤིང༌། བྷ་ག་ནས་ཁྲག་འཛག་པའོ། །སྣང་བ་དང་ལྷག་མཐོང་དང་ཐུགས་རྗེ་ཆེན་པོའི་ངོ་བོ་ནི་ཡབ་ཡིན་ལ། སྟོང་པ་དང་ཞི་གནས་དང་བདེ་བ་ཆེན་པོའི་ངོ་བོ་ནི་ཡུམ་ཡིན་ཞིང༌། གཉིས་ཀའང་བསྐལ་པའི་མེ་ལྟ་བུའི་དབུས་ན་བཞུགས་པའོ། །ཞེས་པའི་བར་སྔར་བཞིན་ནོ། །སུམྦྷ་བརྗོད་པའི་ཞལ་བཞི་བྱིན་གྱིས་རླབས་པ་དང༌། ཨོཾ་དྷརྨ་དྷ་ཏུ་སྭ་བྷཱ་ཝ་ཨཱཏྨ་ཀོ྅་ཧཾ། ཞེས་ང་རྒྱལ་བཟུང་ངོ་། །གཉིས་པ་ཉེར་བསྒྲུབ་ནི་གོ་ཆ་འགོད་པ་སྟེ། སྙིང་ཁར་ཨོཾ་ཨོཾ་ཧ་དཀར་པོ་རྡོ་རྗེ་སེམས་དཔའ་འམ། མགོ་བོར་ཨོཾ་ན་མ་ཧི་སེར་པོ་རྣམ་པར་སྣང་མཛད། སྤྱི་གཙུག་ཏུ་ཨོཾ་སྭཱཧཱ་ཧཱུཾ་དམར་པོ་པདྨ་གར་གྱི་དབང་ཕྱུགཕྲག་པ་གཉིས་སུ་ཨོཾ་བཽ་ཥཊ་ཧེ་ནག་པོ་དཔལ་ཧེ་རུ་ཀ མིག་གཉིས་སུ་ཨོཾ་ཧཱུཾ་ཧཱུཾ་ཧོ་དམར་སེར་རྡོ་རྗེ་ཉི་མ། ཚིགས་ཆེན་བརྒྱད་ལ་ཨོཾ་ཕཊ་ཧཾ་ལྗང་ཁུ་རྟ་མཆོག་གི་ངོ་བོ། ལྟེ་བར་ཨོཾ་ཨོཾ་བཾ་དམར་མོ་རྡོ་རྗེ་ཕག་མོ། སྙིང་ཁར་ཨོཾ་ཧཾ་ཡོཾ་སྔོན་མོ་གཤིན་རྗེ་མ། ཁར་ཨོཾ་ཧྲིཾ་མོཾ་དཀར་མོ་རྨོངས་བྱེད་མ། དཔྲལ་བར་ཨོཾ་ཧྲིཾ་ཧྲིཾ་སེར་མོ་བསྐྱོད་བྱེད་མ། སྤྱི་གཙུག་ཏུ་ཨོཾ་ཧཱུཾ་ཧཱུཾ་ལྗང་ཁུ་སྐྲག་བྱེད་མ། ཚིགས་ཆེན་བརྒྱད་ལ་ཨོཾ་ཕཊ་ཕཊ་དུད་ཁ་ཙཎྜི་ཀཱའི་ངོ་བོ། རྡོ་རྗེ་སེམས་དཔའ་དང་རྨོངས་བྱེད་མ་ཟླ་བའི་གདན། གཞན་རྣམས་ཉི་མའི་གདན་ལ་གནས་པ་སྟེ་ཡབ་ཀྱི་གནས་སུ་ཡང་ཡུམ་དང༌། ཡུམ་གྱི་གནས་ཡང་ཡབ་གཉིས་སུ་མེད་པར་གྱུར། གསུམ་པ་བསྒྲུབ་པ་ལ་རྡོ་རྗེ་གསུམ་བྱིན་གྱིས་རླབས་པ་ནི། ཡབ་ཀྱི་སྙིང་ཁར་ཟླ་བ་ལ་གནས་པའི་ཧཱུཾ་སྔོན་པོ་ཐུགས་རྡོ་རྗེ། ལྐོག་མར་ཨོཾ་ཧྲི་ཧ་ཧ་ཧཱུཾ་ཧཱུཾ་ཕཊ་དམར་པོ་གསུང་
རྡོ་རྗེ། དཔྲལ་པར་ཨོཾ་ཤྲཱི་བཛྲ་ཧེ་ཧེ་རུ་རུ་ཀཾ་ཧཱུཾ་ཧཱུཾ་ཕཊ། ཌཱ་ཀཱི་ནཱི་ཛྭ་ལ་སཾ་པ་རཾ་སྭཱཧཱ། དཀར་པོ་སྐུ་རྡོ་རྗེའོ། །ཡུམ་གྱི་སྙིང་ཁར་ཨོཾ་སརྦ་བུདྡྷ་ཌཱ་ཀཱི་ནཱི་ཡེ་བཛྲ་ཝརྞ་ནཱི་ཡེ་ཧཱུཾ་ཧཱུཾ་ཕཊ་སྭཱཧཱ་ནག་པོ་ཐུགས་རྡོ་རྗེ་མ་ལྐོག་མར་ཨོཾ་ཙཽ་རཱི་ཧཱུཾ་ཧཱུཾ་ཕཊ། དམར་པོ་གསུང་རྡོ་རྗེ་མ། དཔྲལ་བར་ཨོཾ་བཛྲ་བཻ་རོ་ཙ་ནཱི་ཡེ་ཧཱུཾ་ཧཱུཾ་ཕཊ་སྭཱཧཱ། དཀར་པོ་སྐུ་རྡོ་རྗེ་མའོ། །གནས་ལྔ་བྱིན་གྱིས་བརླབ་པ་ནི། གཉིས་ཀའི་སྤྱི་བོར་ཨོཾ་དཀར་པོ་རྣམ་པར་སྣང་མཛད། སྙིང་གར་ཧཱུཾ་སྔོན་པོ་མི་བསྐྱོད་པ། ཟེའུ་འབྲུ་ལ་ཨཱཿདམར་པོ་སྣང་བ་མཐའ་ཡས། ལྟེ་བར་སྭ་སེར་པོ་རིན་ཆེན་འབྱུང་ལྡན། བརླར་ཧཱ་ལྗང་ཁུ་དོན་ཡོད་གྲུབ་པའི་ངོ་བོར་གྱུར། བཞི་པ་སྒྲུབ་ཆེན་ལ་བཞི་ལས། དང་པོ་ཡེ་ཤེས་པ་དགུག་པ་ནི། སྙིང་གའི་ཧཱུཾ་ལས་འོད་ཟེར་ལྕགས་ཀྱུ་ལྟ་བུར་འཕྲོས་པས། འཁོར་ལོ་བདེ་མཆོག་ཡབ་ཡུམ་སྤྱན་དྲངས། ཕཻཾ། ཞེས་བརྗོད་ཅིང༌། འབར་བའི་ཕྱག་རྒྱ་དཔྲལ་བར་བཞག་ལ་གཡོན་དུ་བསྒྱུར་ཞིང་མིག་གྱེན་དུ་བལྟ། རྐང་པ་གཡོན་པས་གཡས་པ་གནོན་ནོ།། དེ་ནས། ཛཿཧཱུཾ་བཾ་ཧོཿ ཞེས་བརྗོད་དེ་དམ་ཚིག་པ་ལ་བསྟིམ། ཨོཾ་ཡོ་ག་ཤུདྡྷ་སརྦ་དྷརྨཱ་ཡོ་ག་ཤུདྡྷོ་྅་ཧཾ། ཞེས་བརྗོད། གཉིས་པ་དབང་བསྐུར་བ་ནི། སླར་ཡང་སྙིང་གའི་ཧཱུཾ་ལས་འོད་ཟེར་ལྕགས་ཀྱུ་ལྟ་བུའི་འཕྲོས་པས། དབང་གི་ལྷ་དཔའ་བོ་དང་རྣལ་འབྱོར་མ་ཐམས་ཅད་ཕཻཾ། ཁྱེད་རྣམས་ཀྱིས་བདག་ལ་དབང་བསྐུར་དུ་གསོལ། ཞེས་གསོལ་བ་བཏབ་པས། དེ་བཞིན་གཤེགས་པ་ལྷ་མོའི་ཚོགས་དང་བཅས་པ་རྣམས་ཀྱིས། ཇི་ལྟར་བལྟམས་པ་ཙམ་གྱིས་ནི། །དེ་བཞིན་གཤེགས་ཀུན་ཁྲུས་གསོལ་ལྟར། །ལྷ་ཡི་ཆུ་ནི་དག་པ་ཡིས། །དེ་བཞིན་
བདག་གིས་ཁྲུས་བྱའོ། ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ས་མ་ཡ་ཤྲཱི་ཧཱུཾ། ཞེས་བརྗོད་ཅིང༌། དབང་བསྐུར་བས་ལུས་ཐམས་ཅད་བྱང་ཆུབ་སེམས་ཀྱི་ཆུ་རྒྱུན་གྱིས་གང་སྟེ། ལུས་ངག་ཡིད་གསུམ་གྱི་དྲི་མ་སྦྱངས་ནས་ཆུའི་ལྷག་མ་ཡར་ལུད་པ་ལས་ཡབ་ཡུམ་གཉིས་ཀ་ལ་མི་བསྐྱོད་པས་དབུ་བརྒྱན། གསུམ་པ་མཆོད་པ་ནི། ཨོཾ་སརྦ་ཏ་ཐཱ་ག་ཏ་ཤྲཱི་ཙཀྲ་སཾ་བ་ར། ཞེས་པ་སྔོན་དུ་འགྲོ་བའི་ཆུ་གཉིས་དང་ཉེར་སྤྱོད་ལྔས་མཆོད། ཡབ་ཡུམ་གྱི་སྙིང་པོ་བརྗོད་ཅིང་ནང་མཆོད་འབུལ་ལོ།། བཞི་པ་རྗེས་ཆགས་ཀྱི་རྒྱས་གདབ་ནི། ཡུམ་གྱི་མཁའ་ཨཱཿལས་པདྨ་དམར་པོ་འདབ་མ་གསུམ་པ་ཟེའུ་འབྲུའི་ནང་དུ་ཡི་གེ་དྱཱ་དམར་པོ། ཡབ་ཀྱི་གསང་གནས་ཧཱུཾ་ལས་རྡོ་རྗེ་སྔོན་པོ་རྩེ་ལྔ་པ་ནོར་བུའི་ནང་དུ་ཡི་གེ་བྱཱ་དཀར་པོའོ། །ཡབ་ཡུམ་གཉིས་རྗེས་སུ་ཆགས་པ་སྙོམས་པར་ཞུགས་པས་ཟག་པ་མེད་པའི་བདེ་བ་ཆེན་པོས་རྒྱུད་གང་བར་གྱུར། གཉིས་པ་དཀྱིལ་འཁོར་རྒྱལ་མཆོག་ལ། རྒྱུ་ཐིག་ལེ་སྒྲུབ་པ། འབྲས་བུ་དཀྱིལ་འཁོར་བསྐྱེད་དེ་སྤྲོ་བ། ཡང་དག་བྱིན་གྱིས་རླབས་པ། མཆོད་ཅིང་བསྟོད་པར་བྱ་བ་སྟེ་ལྔ་ལས། དང་པོ་ནི་སླར་ཡང་ཡབ་ཡུམ་སྙོམས་པར་ཞུགས། ཨོཾ་སརྦ་ཏ་ཐཱ་ག་ཏ་ཨ་ནུ་རཱ་ག་ཎ་བཛྲ་སྭ་བྷ་ཝ་ཨཱཏྨ་ཀོ྅་ཧཾ། གཙོ་བོའི་ཐུགས་ཀའི་ཧཱུཾ་ལས་འོད་ཟེར་འཕྲོས་པས་བདེ་བར་གཤེགས་པ་རྣམས་སྤྱན་དྲངས། སྨིན་མཚམས་ནས་ཞུགས་ཨ་ཝ་དྷུ་ཏཱིའི་ལམ་ནས་སྙིང་ཁར་བབས། ལྟེ་བའི་ཨཾ་གི་འོད་ཀྱིས་ཞུ། རྡོ་རྗེའི་ལམ་ནས་ཡུམ་གྱི་མཁར་བབས་པར་གྱུར། གཉིས་པ་ནི། ཐིག་ལེ་དཀར་དམར་འདྲེས་པ་དེ་ལས་རྟེན་དང་བརྟེན་པའི་
དཀྱིལ་འཁོར་དུས་གཅིག་ཏུ་གྲུབ་པ་ནི། རིན་པོ་ཆེ་སྣ་ཚོགས་ལས་གྲུབ་པའི་གཞལ་ཡས་ཁང་འཁོར་ལོའི་རིམ་པ་བཞི་ལྷའི་གདན་དང་བཅས་པ། དབུས་ཀྱི་གདན་གྱི་སྟེང་དུ་བཅོམ་ལྡན་འདས་དཔལ་ཧེ་རུ་ཀ་འཁོར་ལོ་བདེ་མཆོག་སྐུ་མདོག་མཐིང་ནག་ཆེས་ཆེར་ཁྲོས་པ་དྲག་ཤུལ་ཆེན་པོ་ཆགས་པའི་ཉམས་དང་འདྲེས་པ། ཞལ་བཞི་ཕྱག་བཅུ་གཉིས་པ། རྩ་བའི་ཞལ་ཤིན་ཏུ་གནག་པ། གཡས་ཞལ་ཀུན་ལྟར་དཀར་བ་གཡོན་ཞལ་པདྨ་རཱ་ག་ལྟར་དམར་བ། རྒྱབ་ཞལ་སེར་པོ་གསེར་ལྟར་འབར་བ། ཞལ་ཐམས་ཅད་རྣམ་པར་འགྱུར་བ། སྤྱན་གསུམ་པ་མཆེ་བ་གཙིགས་པ། ཕྱག་དང་པོ་གཉིས་ཀྱིས་རྡོ་རྗེ་དང་དྲིལ་བུ་འཛིན་པས་ཡུམ་ལ་འཁྱུད་པ། དེའི་འོག་མ་གཉིས་ཀྱིས་གླང་པོ་ཆེའི་པགས་པ་བརྒྱངས་ཏེ་འཛིན་པ། གསུམ་པ་གཉིས་ན་ཌ་མ་རུ་དང་ཁ་ཊཱཾ་གབཞི་པ་གཉིས་ན་དགྲ་སྟ་དང་ཞགས་པ། ལྔ་པ་གཉིས་ན་མདུང་རྩེ་གསུམ་པ་དང་ཁྲག་གིས་གང་བའི་ཐོད་པ། དྲུག་པ་གཉིས་ཀྱིས་གྲི་གུག་དང་ཚངས་པའི་མགོ་བོ་བསྣམས་པ། པདྨ་དང་ཉི་མའི་གདན་གྱི་སྟེང་ན་ཞབས་གཡས་བརྐྱང་པས་དུས་མཚན་མ་དམར་པོའི་ལྟེ་བ་དང་སྐྱེ་གནས་མནན་པ། ཞབས་གཡོན་བསྐུམ་པས། འཇིགས་བྱེད་ནག་པོ་ཁ་བུབ་ཏུ་བརྒྱལ་བའི་མགོ་བོ་དང་སྙིང་ག་བརྫིས་པ། རལ་པའི་ཐོར་ཚུགས་དང༌། སྣ་ཚོགས་རྡོ་རྗེ་དང༌། ཟླ་བ་ཕྱེད་པ་དང༌། ཐོད་པ་སྐམ་པོ་ལྔས་དབུ་རྒྱན་པ། གཙུག་གི་ནོར་བུ་རིན་པོ་ཆེ་དང༌། རྣ་ཆ་དང༌། མགུལ་རྒྱན་དང༌། ཕྱག་གི་གདུ་བུ་དང༌། ཚངས་པའི་སྐུད་པ་དང༌།
ཐལ་ཆེན་ཏེ་ཕྱག་རྒྱ་དྲུག་དང༌། སྤྱི་བོའི་འཁོར་ལོ་དང༌། སྐ་རགས་དང༌། ཞབས་གདུབ་གཡེར་ཁའི་འཕྲེང་བ་དང་བཅས་པ། དཔུང་རྒྱན་དང་སོར་གདུབ་སྟེ་ཉེ་བའི་ཕྱག་རྒྱ་ལྔས་སྐུ་ལ་བརྒྱན་པ། མི་མགོ་རློན་པ་ལྔ་བཅུའི་དོ་ཤལ་དང༌། སྟག་གི་པགས་པའི་ཤ་ཐབས་གྲོལ་བ། སྒེག་པ་ལ་སོགས་པའི་གར་དགུ་དང་ལྡན་པ། དེའི་པང་ན་ཡུམ་རྡོ་རྗེ་ཕག་མོ་སྐུ་མདོག་དམར་པོ་ཞལ་གཅིག་ཕྱག་གཉིས། སྤྱན་གསུམ་མ། དྲག་མོ་ཆེན་མོ་བསྐལ་པའི་མེ་ལྟར་གཟི་བརྗིད་འབར་བ། ཕྱག་གཡོན་པས་བདུད་དང་གདུག་པའི་ཁྲག་དང་མིའི་རྒྱུ་མས་གང་བའི་ཐོད་པ་འཛིན་པས་ཡབ་ལ་འཁྱུད་པའི་ཚུལ་གྱིས་སྟོབ་པ། གཡས་པས་རྡོ་རྗེ་དང་སྡིགས་འཛུབ་ཀྱིས་ཕྱོགས་ཐམས་ཅད་བསྡིགས་པ། དབུ་སྐྲ་གྲོལ་བ། ཞབས་གཡོན་བརྐྱངས་ཤིང་གཡས་བསྐུམས་པས་བཅོམ་ལྡན་འདས་ལ་ལེགས་པར་འཁྱུད་པ། གཅེར་བུའི་མཆོག་མི་མགོ་སྐམ་པོ་ལྔའི་དབུ་རྒྱན་དང༌། སྐམ་པོ་ལྔ་བཅུའི་དོ་ཤལ་ཅན། འཁོར་ལོ་སྙན་རྒྱན་མགུར་ཆུ་གདུ་བུའི་ཚོགས་དང་འོག་པག་སྟེ། རུས་པའི་རྒྱན་ལྔས་བརྒྱན་ལ། ཁྲག་གསོལ་བ་ལ་དགེས་ཤིང༌། བྷ་ག་ནས་ཁྲག་འཛག་པའོ། །སྣང་བ་དང་ལྷག་མཐོང་དང་ཐུགས་རྗེ་ཆེན་པོའི་ངོ་བོ་ནི་ཡབ་ཡིན་ལ། སྟོང་པ་དང་ཞི་གནས་དང་བདེ་བ་ཆེན་པོའི་ངོ་བོ་ནི་ཡུམ་ཡིན་ཞིང༌། གཉིས་ཀའང་བསྐལ་པའི་མེ་ལྟ་བུའི་དབུས་ན་བཞུགས་པའོ། །ཤར་དུ་མཁའ་འགྲོ་མ་སྔོ་སྐྱ། བྱང་དུ་ལཱ་མ་ལྗང་
སྐྱ། ནུབ་ཏུ་ཁཎྜ་རོ་ཧཱ་དམར་སྐྱ། ལྷོར་གཟུགས་ཅན་མ་སེར་སྐྱ། ཐམས་ཅད་ཀྱང་ཞལ་གཅིག་ཕྱག་གཉིས་སྤྱན་གསུམ་མ། གཡས་གྲི་གུག །གཡོན་པ་རྣམས་བདུད་རྩིས་གང་བའི་ཐོད་པ་ལ་རིམ་པས། གླང་པོ་ཆེ། ཅེ་སྤྱང་སྐྱེས་པ། བ་ལང་རྣམས་ཀྱིས་མཚན་པ་བསྣམས་པ། སྐྲ་གྲོལ་བ། ཕྱག་རྒྱ་ལྔ་སོགས་རྒྱན་ཐམས་ཅད་ཀྱིས་བརྒྱན་པ། །མི་རོའི་སྟེང་དུ་གཡས་བརྐྱང་བའི་གར་གྱིས་བཞུགས་པའོ། །མཚམས་བཞིར་མ་དང་ཕ་དང་རྒྱལ་པོ་དང༌། རྒྱལ་རིགས་གཉིས་ཀྱི་གང་བའི་ཐོད་པ་བཞི་སངས་རྒྱས་ཀྱི་གཟུགས་ཀྱིས་མཚན་པའོ། །དེའི་ཕྱི་རོལ་ཏུ་ཐུགས་ཀྱི་འཁོར་ལོའི་ཤར་ཕྱོགས་པུ་ལི་ར་མ་ལ་ཡ་ར་ཁཎྜ་ཀ་པཱ་ལ་དང༌། རབ་གཏུམ་མོ། བྱང་ཕྱོགས་ཛཱ་ལན་ད་རར་མ་ཧཱ་ཀཾ་ཀ་ལ་དང་གཏུམ་པའི་མིག་ཅན་མ། ནུབ་ཕྱོགས་ཨོ་ཊི་ཡ་ནར་ཀཾ་ཀཱ་ལ་དང་འོད་ལྡན་མ། ལྷོ་ཕྱོགས་ཨརྦུ་ཏ་ར་མཆེ་བ་རྣམ་པར་གཙིགས་པ་དང་སྣ་ཆེན་མ། ཤར་ལྷོ་གཽ་དཱ་ཝ་རེར་སུ་ར་བཻ་རི་དང་བརྟན་པའི་བློ་ཅན་མ། ལྷོ་ནུབ་རསྨཱི་ཤྭ་རར་འོད་དཔག་མེད་དང་མིའུ་ཐུང་མ། ནུབ་བྱང་དེ་བཱི་ཀོ་ཊར་རྡོ་རྗེའི་འོད་དང་ལངྐའི་དབང་ཕྱུག་མ། བྱང་ཤར་མཱ་ལ་བར་རྡོ་རྗེའི་སྐུ་དང་ཤིང་གྲིབ་མ་སྟེ་ཐུགས་ཀྱི་གསང་བ་བསམ་གྱིས་མི་ཁྱབ་པའི་ངོ་བོ་ཁ་དོག་ནག་པོའོ། །དེའི་ཕྱི་རོལ་ཏུ། གསུང་གི་འཁོར་ལོའི་ཤར་ཕྱོགས་ཀཱ་མ་རཱུ་པར་ཨཾ་ཀུ་རི་དང་ཨེ་ར་བ་ཏཱི། བྱང་ཕྱོགས་ཨོ་ཏྲེར་རྡོ་རྗེ་རལ་པ་ཅན་དང་འཇིགས་བྱེད་ཆེན་མོ། ནུབ་ཕྱོགས་དྲི་ཤ་ཀུ་ནེར་དཔའ་བོ་ཆེན་པོ་དང་རླུང་གི་ཤུགས་
ཅན་མ་ལྷོ་ཕྱོགས་ཀོ་ས་ལར་རྡོ་རྗེ་ཧཱུཾ་མཛད་དང་ཆང་འཐུང་མ། ཤར་ལྷོར་ཀ་ལིངྐར་རབ་ཏུ་བཟང་པོ་དང་ཤྱཱ་མ་དེ་ཝཱི། ལྷོ་ནུབ་ལཾ་བ་ཀར་རྡོ་རྗེ་བཟང་པོ་དང་ཤིན་ཏུ་བཟང་མོ། །ནུབ་བྱང་ཀཉྩིར་འཇིགས་བྱེད་ཆེན་པོ་དང་རྟ་རྣམ། བྱང་ཤར་ཧི་མ་ལ་ཡར་མིག་མི་བཟང་དང་ཁ་གཱ་ན་ན་སྟེ་གསུང་གི་གསང་བ་བསམ་གྱིས་མི་ཁྱབ་པའི་ངོ་བོ་ཁ་དོག་དམར་པོའོ། །དེའི་ཕྱི་རོལ་ཏུ་སྐུའི་འཁོར་ལོའི་ཤར་ཕྱོགས་པྲེ་ཏ་པུ་རིར་སྟོབས་པོ་ཆེ་དང༌། འཁོར་ལོའི་ཤུགས་ཅན་མ། བྱང་ཕྱོགས་གྲི་ཧ་དེ་བར་རིན་ཆེན་རྡོ་རྗེ་དང་ཁཎྜ་རོ་ཧི། ནུབ་ཕྱོགས་སཽ་རཥྟར་རྟ་མགྲིན་དང་ཤཽནྚི་ནཱི། ལྷོ་ཕྱོགས་སུ་ཝརྞ་དཱི་པར་ནམ་མཁའི་སྙིང་པོ་དང་འཁོར་ལོའི་གོ་ཆ་མ། ཤར་ལྷོ་ན་ག་རར་དཔལ་ཧེ་རུ་ཀ་དང་ཤིན་ཏུ་དཔའ་མོ། ལྷོ་ནུབ་སིདྡྷུར་པདྨ་གར་གྱི་དབང་ཕྱུག་དང་སྟོབས་ཆེན་མ། ནུབ་བྱང་མ་རུ་ར་རྣམ་པར་སྣང་མཛད་དང་འཁོར་ལོས་སྒྱུར་མ། བྱང་ཤར་ཀུ་ལུ་སྟ་ར་རྡོ་རྗེ་སེམས་དཔའ་དང་བརྩོན་འགྲུས་ཆེན་མོ་སྟེ་སྐུའི་གསང་བ་བསམ་གྱིས་མི་ཁྱབ་པའི་ངོ་བོ་ཁ་དོག་དཀར་པོའོ། ཁཎྜ་ཀ་པཱ་ལ་ལ་སོགས་པའི་དཔའ་བོ་ཉེར་བཞི་ཐམས་ཅད་དཔལ་ཧེ་རུ་ཀའི་རིགས་ལས་བྱུང་བ། ཧེ་རུ་ཀ་ཉིད་དང་མཚུངས་པ་ལས་ཞལ་གཅིག་ཕྱག་གཉིས་རྡོ་རྗེ་དང་དྲིལ་བུ་འཛིན་པས་ཡུམ་ལ་འཁྱུད་པ། དབུགས་བྲལ་གྱི་གདན་ལ་གནས་པའོ། །རབ་གཏུམ་མ་ལ་སོགས་པའི་ལྷ་མོ་ཉེར་བཞི་རྣམས་རྡོ་རྗེ་ཕག་མོའི་རིགས་ལས་བྱུང་བ་ཕག་མོ་ཉིད་དང་མཚུངས་པ་ལས། ཕྱག་གཡས་རྡོ་རྗེས་མཚན་པའི་
གྲི་གུག་དང༌། གཡོན་ཐོད་པ་ཁྲག་གིས་གང་བ་བསྣམས་པའོ། །དེའི་ཕྱི་རོལ་དམ་ཚིག་གི་འཁོར་ལོའི་ཤར་དུ་ཁྭ་གདོང་མ་སྔོ་སྐྱ། བྱང་དུ་འུག་གདོང་མ་ལྗང་སྐྱ། ནུབ་ཏུ་ཁྱི་གདོང་མ་དམར་སྐྱ། ལྷོར་ཕག་གདོང་མ་སེར་སྐྱ། ཤར་ལྷོ་གཤིན་རྗེ་བརྟན་མ་གཡས་སྔོ་གཡོན་སེར་བ། ལྷོ་ནུབ་ཏུ་གཤིན་རྗེ་ཕོ་ཉ་མ་གཡས་སེར་གཡོན་དམར་བ། ནུབ་བྱང་དུ་གཤིན་རྗེ་མཆེ་བ་མ་གཡས་དམར་གཡོན་ལྗང་བ། བྱང་ཤར་དུ་གཤིན་རྗེ་འཇོམས་མ་གཡས་ལྗང་གཡོན་སྔོ་བ། བརྒྱད་པོ་ཐམས་ཅད་ཀྱང་ཆེས་ཆེར་ཁྲོས་པ་འོད་ཟེར་འབར་བ་བཞིན་ཤིན་ཏུ་འགྱུར་ཞིང་སྣ་ཚོགས་སུ་རྣམ་པར་བསྒྱུར་བ། སྟག་གི་པགས་པའི་ཤམ་ཐབས་ཅན་ཞལ་གཅིག་ཕྱག་གཉིས་སྤྱན་གསུམ་མ། སྐྲ་གྲོལ་བ་གཡས་གྲི་གུག །གཡོན་ཐོད་པ་ཁྲག་གིས་གང་བ་བསྣམས་པ། ཐོར་ཚུགས་ཀྱི་ནོར་བུ་དང༌། རྣ་ཆ་དང༌། མགུལ་རྒྱན་དང༌། གདུ་བུ་དང༌། རྡོ་རྗེའི་སྐ་རགས་དང་ཐོད་པའི་འཕྲེང་བས་མགུལ་བ་བརྒྱན་པ། རྐང་པ་གཉིས་ལ་དྲིལ་བུ་གཡེར་ཁས་སྤྲས་པ། ཤིན་ཏུ་གཡོན་བརྐྱང་བས་རོ་གདན་ལ་བཞུགས་པ་སྟེ། དཔའ་བོ་དང་རྣལ་འབྱོར་མ་ཐམས་ཅད་ཀྱི་དཔྲལ་བར་ཐོད་པའི་སྟེང་དུ་རྡོ་རྗེའི་འཕྲེང་བས་མཚན་པའོ།། གསུམ་པ་ནི། བྷ་གའི་གཙོ་བོ་ཡབ་ཡུམ་རྡོ་རྗེའི་ལམ་ནས་ཡར་དྲངས་ཐུགས་ཀ་ནས་ཕྱིར་སྤྲོས། སངས་རྒྱས་ཐམས་ཅད་མཆོད། སེམས་ཅན་ཐམས་ཅད་ཀྱི་དོན་བྱས་སླར་འདུས་གཅིག་ཏུ་འདྲེས་ཡབ་དཔལ་ཧེ་རུ་ཀ་སྙིང་ག་ཆོས་ཀྱི་འཁོར་ལོའི་དབུས་ན་རྩ་ཨ་བ་དྷུ་ཏཱི་ཧཱུཾ་གི་དབྱིབས་ཅན་ཁམས་
དཔྱིད་དང་བཅས་པ་ལ་ཐིམ་པའི་བཅོམ་ལྡན་འདས་དང༌། ཡུམ་རྡོ་རྗེ་ཕག་མོ་ལྟེ་བའི་ཨཾ་ཡིག་དང་རྩའི་གཙོ་མོ་བཞི་ལ་ཐིམས་པས་རྡོ་རྗེ་ཕག་མོར་གྱུར་ཏེ། སྙིང་གར་མཉམ་པར་སྦྱོར་བ་ནི་བཅོམ་ལྡན་འདས་དཔལ་ཧེ་རུ་ཀ་འཁོར་ལོ་བདེ་མཆོག་སྐུ་མདོག་མཐིང་ནག་ཆེས་ཆེར་ཁྲོས་པ། དྲག་ཤུལ་ཆེན་པོ་ཆགས་པའི་ཉམས་དང་འདྲེས་པ། ཞལ་བཞི་ཕྱག་བཅུ་གཉིས་པ། རྩ་བའི་ཞལ་ཤིན་ཏུ་གནག་པ། གཡས་ཞལ་ཀུནྡ་ལྟར་དཀར་བ། གཡོན་ཞལ་པདྨ་རཱ་ག་ལྟར་དམར་བ། རྒྱབ་ཞལ་སེར་པོ་གསེར་ལྟར་འབར་བ། ཞལ་ཐམས་ཅད་རྣམ་པར་འགྱུར་བ། སྤྱན་གསུམ་པ་མཆེ་བ་གཙིགས་པ། ཕྱག་དང་པོ་གཉིས་ཀྱིས་རྡོ་རྗེ་དང་དྲིལ་བུ་འཛིན་པས་ཡུམ་ལ་འཁྱུད་པ། དེའི་འོག་མ་གཉིས་ཀྱིས་གླང་པོ་ཆེའི་པགས་པ་བརྒྱངས་ཏེ་འཛིན་པ། གསུམ་པ་གཉིས་ན་ཌ་མ་རུ་དང་ཁ་ཊྭཱཾ་ག བཞི་པ་གཉིས་ན་དགྲ་སྟ་དང་ཞགས་པ། ལྔ་པ་གཉིས་ན་མདུང་རྩེ་གསུམ་པ་དང་ཁྲག་གིས་གང་བའི་ཐོད་པ། དྲུག་པ་གཉིས་ཀྱིས་གྲི་གུག་དང་ཚངས་པའི་མགོ་བོ་བསྣམས་པ། པདྨ་དང་ཉི་མའི་གདན་གྱི་སྟེང་ན་ཞབས་གཡས་བརྐྱང་པས་དུས་མཚན་མ་དམར་མོའི་ལྟེ་བ་དང་སྐྱེ་གནས་མནན་པ། ཞབས་གཡོན་བསྐུམ་པས་འཇིགས་བྱེད་ནག་པོ་ཁ་བུབ་ཏུ་བསྒྱེལ་བའི་མགོ་བོ་དང་སྙིང་ག་བརྫིས་པ། རལ་པའི་ཐོར་ཚུགས་དང་སྣ་ཚོགས་རྡོ་རྗེ་དང༌། ཟླ་བ་ཕྱེད་པ་དང༌། ཐོད་པ་སྐམ་པོ་ལྔས་དབུ་རྒྱན་པ། གཙུག་གི་ནོར་བུ་རིན་པོ་ཆེ་དང༌།
རྣ་ཆ་དང༌། མགུལ་རྒྱན་དང༌། ཕྱག་གི་གདུ་བུ་དང༌། ཚངས་པའི་སྐུད་པ་དང༌། ཐལ་ཆེན་ཏེ་ཕྱག་རྒྱ་དྲུག་དང༌། སྤྱི་བོའི་འཁོར་ལོ་དང༌། སྐ་རགས་དང༌། ཞབས་གདུབ་གཡེར་ཁའི་འཕྲེང་བ་དང་བཅས་པ་དང༌། དཔུང་རྒྱན་དང་སོར་གདུབ་སྟེ་ཉེ་བའི་ཕྱག་རྒྱ་ལྔས་སྐུ་ལ་བརྒྱན་པ། །མི་མགོ་རློན་པ་ལྔ་བཅུའི་དོ་ཤལ་དང༌། སྟག་གི་པགས་པའི་ཤམ་ཐབས་གྲོལ་བ་སྒེག་པ་ལ་སོགས་པའི་གར་དགུ་དང་ལྡན་པ། དེའི་པང་ན་ཡུམ་རྡོ་རྗེ་ཕག་མོ་སྐུ་མདོག་དམར་མོ་ཞལ་གཅིག་ཕྱག་གཉིས། སྤྱན་གསུམ་མ། དྲག་མོ་ཆེན་མོ་བསྐལ་པའི་མེ་ལྟར་གཟི་བརྗིད་འབར་བ། ཕྱག་གཡོན་པས་བདུད་དང་གདུག་པའི་ཁྲག་དང་མིའི་རྒྱུ་མས་གང་བའི་ཐོད་པ་འཛིན་པས་ཡབ་ལ་འཁྱུད་པའི་ཚུལ་གྱིས་སྟོབ་པ་གཡས་པས་རྡོ་རྗེ་དང་སྡིག་མཛུབ་ཀྱི་ཕྱོགས་ཐམས་ཅད་དུ་བསྡིགས་པ། དབུ་སྐྲ་གྲོལ་བ། ཞབས་གཡོན་བརྐྱངས་ཤིང་གཡས་བསྐུམས་པས་བཅོམ་ལྡན་འདས་ལ་ལེགས་པར་འཁྱུད་པ། གཅེར་བུའི་མཆོག་མི་མགོ་སྐམ་པོ་ལྔའི་དབུ་རྒྱན་དང་སྐམ་པོ་ལྔ་བཅུའི་དོ་ཤལ་ཅན་འཁོར་ལོ་སྙན་རྒྱན། མགུར་ཆུ་གདུ་བུའི་ཚོགས་དང་འོག་པག་སྟེ། རུས་པའི་རྒྱན་ལྔས་བརྒྱན་པ། ཁྲག་གསོལ་བ་ལ་དགེས་ཤིང༌། བྷ་ག་ནས་ཁྲག་འཛག་པའོ། སྣང་བ་དང་ལྷག་མཐོང་དང་ཐུགས་རྗེ་ཆེན་པོའི་ངོ་བོ་ནི་ཡབ་ཡིན་ལ། སྟོང་པ་དང་ཞི་གནས་དང་བདེ་བ་ཆེན་པོའི་ངོ་བོ་ནི་ཡུམ་ཡིན་ཞིང༌། གཉིས་ཀའང་བསྐལ་པའི་མེ་ལྟ་བུའི་དབུས་ན་བཞུགས་པའོ། །དེ་ལྟ་བུའི་
ཡབ་ཀྱི་ཐུགས་ཀར་ཧཱུཾ། ཡུམ་གྱི་ཐུགས་ཀར་བཾ་གནས་པའོ། །མཁའ་ནང་གི་སྙིང་པོའི་རྣལ་འབྱོར་མ་བཞི་རྡོ་རྗེའི་ལམ་ནས་ཡར་དྲངས། སྙིང་ག་ནས་རྒྱུད་སོ་སོའི་གནས་ནས་ཕྱིར་སྤྲོས་རྣམ་པར་དག་པའི་ཁམས་བཞི་ལ་བཞག་སྟེ་ཕྱིའི་བདེ་ཆེན་འཁོར་ལོའི་ཕྱོགས་བཞིར་འཁོད། སྙིང་གའི་ནང་བསྐོར་གྱི་ཕྱོགས་བཞིའི་མཾ་ཏཾ་པཾ་ལཾ་རྣམས་ཀྱང་རྣལ་འབྱོར་མ་བཞིར་གྱུར་ཏེ། དེ་ཡང་ནང་དང་ཕྱིའི་ཤར་དུ་མཁའ་འགྲོ་མ་སྔོ་སྐྱ། བྱང་དུ་ལཱ་མ་ལྗང་སྐྱ། ནུབ་ཏུ་ཁནྜ་རོ་ཧ་དམར་སྐྱ། ལྷོར་གཟུགས་ཅན་མ་སེར་སྐྱ། ཐམས་ཅད་ཀྱང་ཞལ་གཅིག་ཕྱག་གཉིས་སྤྱན་གསུམ་མ། གཡས་གྲི་གུག གཡོན་པ་རྣམས་བདུད་རྩིས་གང་བའི་ཐོད་པ་ལ་རིམ་པས། གླང་པོ་ཆེ། ཅེ་སྤྱང༌། སྐྱེས་པ། བ་ལང་རྣམས་ཀྱིས་མཚན་པ་བསྣམས་པ། སྐྲ་སྒྲོལ་བ། ཕྱག་རྒྱ་ལྔ་སོགས་རྒྱན་ཐམས་ཅད་ཀྱིས་བརྒྱན་པ། མི་རོའི་སྟེང་དུ་གཡས་བརྐྱང་བའི་གར་གྱིས་བཞུགས་པའོ། །མཁའ་ནང་གི་ཐོད་པ་བཞི་རྡོ་རྗེའི་ལམ་ནས་ཡར་དྲངས། སྙིང་ག་ནས་རྒྱུད་སོ་སོའི་གནས་ནས་ཕྱིར་སྤྲོས། རྣམ་པར་དག་པའི་ཕུང་པོ་ལྔ་ལ་བཞག་སྟེ་ཕྱིའི་བདེ་ཆེན་འཁོར་ལོའི་མཚམས་བཞིར་འཁོད། སྙིང་གའི་མཚམས་ཀྱི་བདུད་རྩི་ལྔ་འབབ་པའི་རྩ་རྣམས་ཀྱང་ཐོད་པ་བཞིར་གྱུར། དེ་ཡང་ནང་དང་ཕྱིའི་མཚམས་བཞིར་མ་དང་ཕ་དང་རྒྱལ་པོ་དང༌། རྒྱལ་རིག་གཉིས་ཀྱིས་གང་བའི་ཐོད་པ་བཞི་སངས་རྒྱས་ཀྱི་གཟུགས་ཀྱིས་མཚན་པའོ། །
མཁའ་ནང་གི་འཁོར་ལོ་གསུམ་གྱི་ལྷ་རྣམས་རྡོ་རྗེའི་ལམ་ནས་ཡར་དྲངས། སྙིང་ཁ་ནས་རྒྱུད་སོ་སོའི་གནས་ནས་ཕྱིར་སྤྲོས། རྣམ་པར་དག་པའི་ཡུལ་དང་ཡུལ་ཅན་ལ་བཞག་སྟེ་ཕྱིའི་འཁོར་ལོ་གསུམ་ལ་འཁོད། སྤྱི་བོ་ལ་སོགས་པའི་གནས་སོ་སོར། པུ་ཛ་ཨོ་ཨ་གོ་ར་དེ་མཱ། ཀ་ཨོ་ཏྲི་ཀོ་ལ་ཀཱ་ཧི། པྲེ་གྲི་སཽ་སུན་སི་མ་ཀུ་སྟེ། གནས་རྣམས་ཡུལ་ཉི་ཤུ་རྩ་བཞི་དང༌། ཁམས་རྣམས་དཔའ་བོ་ཉེར་བཞི་དང༌། རྩ་རྣམས་དཔའ་མོ་ཉེར་བཞིར་གྱུར། དེ་ཡང་སྤྱི་བོ་དང་ཐུགས་ཀྱི་འཁོར་ལོའི་ཤར་རྩིབས་པུ་ལཱི་ར་མ་ལ་ཡར་ཁནྜ་ཀ་པཱ་དང་རབ་གཏུམ་མོ། སྤྱི་གཙུག་དང་བྱང་རྩིབས་ཛཱ་ལནྡྷ་རར་མ་ཧཱ་ཀཾ་ཀཱ་ལ་དང་གཏུམ་པའི་མིག་ཅན་མ་རྣ་བ་གཡས་དང་ནུབ་རྩིབས་ཨོ་ཌི་ཡ་ནར་ཀཾ་ཀ་ལ་དང་འོད་ལྡན་མ། ལྟག་པ་དང་ལྷོ་རྩིབས་ཨརྦུ་ཏར་མཆེ་བ་རྣམ་པར་གཙིགས་པ་དང་སྣ་ཆེན་མ་སྟེ་གནས་སོ། །རྣ་བ་གཡོན་དང་ཤར་ལྷོ་གོ་ད་ཝ་རིར་སུ་ར་བཻ་རི་དང་བརྟན་པའི་བློ་ཅན་མ། སྨིན་མའི་དབུས་དང་ལྷོ་ནུབ་རསྨི་ཤྭ་རར་འོད་དཔག་མེད་དང་མིའུ་ཐུང་མ། མིག་གཉིས་དང་ནུབ་བྱང་དེ་ཝཱི་ཀོ་ཊར་རྡོ་རྗེའི་འོད་དང་ལངྐའི་དབང་ཕྱུག་མ། ཕྲག་པ་གཉིས་དང་བྱང་ཤར་མཱ་ལ་བར་རྡོ་རྗེའི་སྐུ་དང་ཤིང་གྲིབ་མ་སྟེ་ཉེ་བའི་གནས་སོ། །ཐུགས་ཀྱི་གསང་བ་བསམ་གྱི་མི་ཁྱབ་པའི་ངོ་བོ་ཁ་དོག་ནག་པོའོ། །མཆན་ཁུང་གཉིས་དང་གསུང་འཁོར་གྱི་ཤར་རྩིབས་ཀཱ་མ་རཱུ་པར་ཨཾ་ཀུ་རི་དང་ཨེ་ར་བ་ཏི། ནུ་མ་གཉིས་དང་བྱང་རྩིབས་
ཨོ་ཏྲེར་རྡོ་རྗེ་རལ་པ་ཅན་དང་འཇིགས་བྱེད་ཆེན་མོ་སྟེ་ཞིང་ངོ༌། །ལྟེ་བ་དང་ནུབ་རྩིབས་ཏྲི་ཤ་ཀུ་ནེར་དཔའ་བོ་ཆེན་པོ་དང་རླུང་གི་ཤུགས་ཅན་མ། སྣ་རྩེ་དང་ལྷོ་རྩིབས་ཀོ་ས་ལར་རྡོ་རྗེ་ཧཱུཾ་མཛད་དང་ཆང་འཐུང་མ་སྟེ་ཉེ་བའི་ཞིང་ངོ༌། ཁ་དང་ཤར་ལྷོ་ཀ་ལིངྐར་རབ་ཏུ་བཟང་པོ་དང་ཤྱཱ་མ་དེ་ཝཾ། མགྲིན་པར་དང་ལྷོ་ནུབ་ལཾ་པ་ཀར་རྡོ་རྗེ་བཟང་པོ་དང་ཤིན་ཏུ་བཟང་མོ་སྟེ་ཚནྡྷོ་ཧའོ། །སྙིང་ཁ་དང་ནུབ་བྱང་ཀཉྩིར་འཇིགས་བྱེད་ཆེན་པོ་དང་རྟ་སྣ མ། འབྲས་བུ་དང་བྱང་ཤར་ཧི་མ་ལ་ཡར་མིག་མི་བཟང་དང་ཁ་གཱ་ན་ན་སྟེ་ཉེ་བའི་ཚནྡྷོ་ཧའོ། །གསུང་གིས་གསང་བ་བསམ་གྱིས་མི་ཁྱབ་པའི་ངོ་བོ་ཁ་དོག་དམར་པོའོ། །མཚན་མ་དང་སྐུ་འཁོར་གྱི་ཤར་རྩིབས་པྲེ་ཏ་པུ་རིར་སྟོབས་པོ་ཆེ་དང་འཁོར་ལོའི་ཤུགས་ཅན་མ། བཤང་ལམ་དང་བྱང་རྩིབས་གྲྀ་ཧ་དེ་བར་རིན་ཆེན་རྡོ་རྗེ་དང་ཁནྜ་རོ་ཧི་སྟེ་འདུ་བའོ། །བརླ་གཉིས་དང་ནུབ་རྩིབས་སཽ་རཥྟར་རྟ་མགྲིན་དང་ཤཽནྚི་ནཱི། བྱིན་པ་གཉིས་དང་ལྷོ་རྩིབས་སུ་ཝརྞ་དྭི་པར། ནམ་མཁའི་སྙིང་པོ་དང་འཁོར་ལོའི་གོ་ཆ་མ་སྟེ་ཉེ་བའི་འདུ་བའོ། །སོར་མོ་བརྒྱད་དང་ཤར་ལྷོ་ན་ག་རར་དཔལ་ཧེ་རུ་ཀ་དང་ཤིན་ཏུ་དཔའ་མོ། བོལ་གོང་གཉིས་དང་ལྷོ་ནུབ་སིནྡྷུར་པདྨ་གར་གྱི་དབང་ཕྱུག་དང་སྟོབས་ཆེན་མ་ཏེ་དུར་ཁྲོད་དོ། །མཐེ་བོང་གཉིས་དང་ནུབ་བྱང་མ་རུར་རྣམ་པར་སྣང་མཛད་དང་འཁོར་ལོས་བསྒྱུར་མ། པུས་མོ་གཉིས་དང་བྱང་ཤར་ཀུ་ལུ་ཏར་རྡོ་རྗེ་སེམས་དཔའ་དང་
བརྩོན་འགྲུས་ཆེན་མོ་སྟེ་ཉེ་བའི་དུར་ཁྲོད་དོ། །སྐུའི་གསང་བ་བསམ་གྱིས་མི་ཁྱབ་པའི་ངོ་བོ་ཁ་དོག་དཀར་པོའོ། ཁཎྜ་ཀ་པཱ་ལ་ལ་སོགས་པའི་དཔའ་བོ་ཉེར་བཞི་ཐམས་ཅད་དཔལ་ཧེ་རུ་ཀའི་རིགས་ལས་བྱུང་བ། ཧེ་རུ་ཀ་ཉིད་དང་མཚུངས་པ་ཞལ་གཅིག་ཕྱག་གཉིས་རྡོ་རྗེ་དང་དྲིལ་བུ་འཛིན་པས་ཡུམ་ལ་འཁྱུད་པ། དབུགས་བྲལ་གྱི་གདན་ལ་གནས་པའོ། །རབ་གཏུམ་མ་ལ་སོགས་པའི་ལྷ་མོ་ཉེར་བཞི་རྣམས་རྡོ་རྗེ་ཕག་མོའི་རིགས་ལས་བྱུང་བ་ཕག་མོ་ཉིད་དང་མཚུངས་པ་ལས། ཕྱག་གཡས་རྡོ་རྗེ་མཚན་པའི་གྲི་གུག་དང༌། གཡོན་ཐོད་པ་ཁྲག་གིས་གང་བ་བསྣམས་པའོ། །མཁའ་ནང་གི་སྒོ་མཚམས་མ་བརྒྱད་རྡོ་རྗེའི་ལམ་ནས་ཡར་དྲངས། སྙིང་ག་ནས་རྒྱུད་སོ་སོའི་གནས་ནས་ཕྱིར་སྤྲོས་རྣམ་པར་དག་པའི་ལས་དང་བྱེད་པ་ལ་བཞག་སྟེ་དམ་ཚིག་འཁོར་ལོའི་སྒོ་མཚམས་བརྒྱད་དུ་འཁོད། སྙིང་ཁའི་ཕྱི་བསྐོར་དང་འབྲེལ་བའི་བུ་ག་བརྒྱད་ཀྱི་རྩ་རྣམས་ཀྱང་སྒོ་མཚམས་མ་བརྒྱད་དུ་གྱུར། དེ་ཡང་ཁ་དང་ཤར་སྒོར་ཁྭ་གདོང་མ་སྔོ་སྐྱ། ཆུ་ལམ་དང་བྱང་སྒོར་འུག་གདོང་མ་ལྗང་སྐྱ། བཤང་ལམ་དང་ནུབ་སྒོར་ཁྱི་གདོང་མ་དམར་སྐྱ། སྣ་བུག་གཉིས་ཀྱི་འདོམ་སོ་དང་ལྷོ་སྒོར་ཕག་གདོང་མ་སེར་སྐྱ། རྣ་བ་གཡས་དང་ཤར་ལྷོར་གཤིན་རྗེ་བརྟན་མ་གཡས་སྔོ་གཡོན་སེར་བ། རྣ་བ་གཡོན་དང་ལྷོ་ནུབ་ཏུ་གཤིན་རྗེ་ཕོ་ཉ་མ་གཡས་སེར་གཡོན་དམར་བ། མིག་གཡས་དང་ནུབ་
བྱང་དུ་གཤིན་རྗེ་མཆེ་བ་མ་གཡས་དམར་གཡོན་ལྗང་བ། མིག་གཡོན་དང་བྱང་ཤར་དུ་གཤིན་རྗེ་འཇོམས་མ་གཡས་ལྗང་གཡོན་སྔོ་བ། བརྒྱད་པོ་ཐམས་ཅད་ཀྱང་ཆེས་ཆེར་ཁྲོས་པ་འོད་ཟེར་འབར་བ་བཞིན་ཤིན་ཏུ་འགྱུར་ཞིང་སྣ་ཚོགས་སུ་རྣམ་པར་བསྒྱུར་བ་སྟག་གི་པགས་པའི་ཤམས་ཐབས་ཅན་ཞལ་གཅིག་ཕྱག་གཉིས་སྤྱན་གསུམ་མ། སྐྲ་གྲོལ་བ་གཡས་གྲི་གུག གཡོན་ཐོད་པ་ཁྲག་གིས་གང་བ་བསྣམས་པ་ཐོར་ཚུགས་ཀྱི་ནོར་བུ་དང༌། རྣ་ཆ་དང༌། མགུལ་རྒྱན་དང༌། གདུ་བུ་དང༌། རྡོ་རྗེའི་སྐ་རགས་དང་ཐོད་པའི་འཕྲེང་བས་མགུལ་བ་བརྒྱན་པ། རྐང་པ་གཉིས་ལ་དྲིལ་བུ་གཡེར་ཁས་སྤྲས་པ། ཤིན་ཏུ་གཡོན་བརྐྱང་བས་རོ་གདན་ལ་བཞུགས་པ་སྟེ། དཔའ་བོ་དང་རྣལ་འབྱོར་མ་ཐམས་ཅད་ཀྱི་དཔྲལ་བར་ཐོད་པའི་སྟེང་དུ་རྡོ་རྗེའི་འཕྲེང་བས་མཚན་པའོ། །མཁའ་ནང་གི་རྟེན་གྱི་དཀྱིལ་འཁོར་རྡོ་རྗེའི་ལམ་ནས་ཡར་དྲངས། སྙིང་ཁ་ནས་ཕྱིར་སྤྲོས་རྣམ་པར་དག་པའི་ཞིང་ཁམས་ལ་བཞག་སྟེ་ཕྱིའི་རྟེན་གྱི་དཀྱིལ་འཁོར་ལ་ཐིམ། རང་ལུས་ཀྱི་སྐྲ་སེན་པགས་པ་རུས་ཚིགས་རྣམས་བསྲུང་བའི་འཁོར་ལོ་བུ་ག་བརྒྱད་ནི་དུར་ཁྲོད་བརྒྱད་རྐང་མཐིལ་རླུང་གི་དཀྱིལ་འཁོར། གསུམ་མདོ་མེ། ལྟོ་བ་ཆུ། སྙིང་ཁ་ས། སྒལ་ཚིགས་རིའི་རྒྱལ་པོ་རི་རབ། མགོ་བོ་རི་རབ་ཀྱི་སྟོད་ཀྱི་ཆ། ལུས་མི་མཉམ་པ་མེད་པ་གྲུ་བཞི་ནི་གཞལ་ཡས་ཁང་གྲུ་བཞི་ལུས་ངག་
ཡིད་གསུམ་འཁོར་ལོ་གསུམ། སྙིང་ག་ཆོས་ཀྱི་འཁོར་ལོ་ནི་བདེ་བ་ཆེན་པོའི་འཁོར་ལོ། འབྱུང་བ་བཞིའི་རླུང་རྒྱུ་བ་ནི་སྒོ་བཞི། རྐང་བརྒྱད་ནི་ཀ་བ་བརྒྱད། མིག་དང་རྣ་བ་དང༌། སྣ་དང་ལྕེ་དང་མཆུ་དང་རྒྱུ་ལོང་ལ་སོགས་པ་ནི་གཞལ་ཡས་ཁང་གི་རྒྱན་དུ་གྱུར། བཞི་པ་ལ། དག་པའི་རྣལ་འབྱོར། ཡེ་ཤེས་སྤྱན་འདྲེན། དབང་བསྐུར་རྒྱས་གདབ་སྟེ་གསུམ་མོ། །དང་པོ་ལ་གཉིས་ལས་ཕོ་ཉ་གསུམ་བསྲེ་ནི། ཨོཾ་ཨཱཿཧཱུཾ་སརྦ་བཱི་ར་ཡོ་གི་ནཱི་ཀཱ་ཡ་ཝཱཀྩིཏྟ་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། ཞེས་བརྗོད་དེ་དོན་བསམ། རྡོ་རྗེའི་དག་པ་ནི། ཨོཾ་བཛྲ་ཤུདྡྷཿསརྦ་དྷརྨཱ་བཛྲ་ཤུདྡྷོ྅་ཧཾ། ཞེས་བརྗོད། གཉིས་པ་ནི། རང་གི་སྙིང་ཁའི་ཧཱུཾ་ལས་འོད་ཟེར་ལྕགས་ཀྱུ་ལྟ་བུར་འཕྲོས་པས་འཁོར་ལོ་བདེ་མཆོག་ལྷ་དྲུག་ཅུ་རྩ་གཉིས་ཀྱི་དཀྱིལ་འཁོར་སྤྱན་དྲངས། ཕཻཾ། ཞེས་བརྗོད་ཅིང༌། ཛཿཧཱུཾ་བཾ་ཧོ། ལན་ལྔ་བརྗོད། གཉིས་སུ་མེད་པར་ཐིམ། ཨོཾ་ཡོ་ག་ཤུདྡྷ༴ སོགས་བརྗོད་ཅིང༌། རྣམ་ལྔ་འདོད་བསྐོར་དང་འཁྱུད་རྒྱ་བྱ། གསུམ་པ་ནི། སླར་ཡང་སྙིང་ཁའི་ཧཱུཾ་ལས་འོད་ཟེར་ལྕགས་ཀྱུ་ལྟ་བུ་འཕྲོས་པས། དབང་གི་ལྷ་དཔའ་བོ་དང་རྣལ་འབྱོར་མ་ཐམས་ཅད་ཕཻཾ། ཁྱེད་རྣམས་ཀྱིས་བདག་ལ་དབང་བསྐུར་དུ་གསོལ། ཞེས་གསོལ་བ་བཏབ་པས། དེ་བཞིན་གཤེགས་པ་ལྷ་མོའི་ཚོགས་དང་བཅས་པ་རྣམས་ཀྱིས། ཇི་ལྟར་བལྟམས་པ་ཙམ་གྱིས་ནི། །དེ་བཞིན་བཤེགས་ཀུན་ཁྲུས་གསོལ་ལྟར། །ལྷ་ཡི་ཆུ་ནི་དག་པ་ཡིས། །དེ་བཞིན་བདག་གིས་ཁྲུས་བྱའོ།
ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏ་ས་མ་ཡ་ཤྲི་ཧཱུཾ། ཞེས་བརྗོད་ཅིང༌། དབང་བསྐུར་བས་ལུས་ཐམས་ཅད་བྱང་ཆུབ་ཀྱི་སེམས་ཀྱི་ཆུ་རྒྱུན་གྱིས་གང་སྟེ། ལུས་ངག་ཡིད་གསུམ་གྱི་དྲི་མ་སྦྱངས་ནས་ཆུ་ལྷག་མ་ཡར་ལུད་པ་ལས་གཙོ་བོ་ཡབ་ཡུམ་གྱི་རིགས་བདག་རྡོ་རྗེ་སེམས་དཔར་གྱུར་ཞིང༌། བདེ་ཆེན་འཁོར་ལོའི་ལྷ་མོ་བཞི་ལ་རིན་ཆེན་འབྱུང་ལྡན། ཐུགས་འཁོར་བ་རྣམས་ལ་མི་བསྐྱོད་པ། གསུང་འཁོར་བ་རྣམས་ལ་འདོ་དཔག་མེད། སྐུ་འཁོར་བ་རྣམས་ལ་རྣམ་པར་སྣང་མཛད། དམ་ཚིག་འཁོར་ལོ་པ་རྣམས་ལ་དོན་ཡོད་གྲུབ་པ་རྣམས་ཀྱིས་དབུ་རྒྱན་པར་བསམ། བཞི་པ་ལ་དང་པོར་སྔགས་མཆོད་ནི། ཡབ་ཡུམ་གྱི་སྙིང་པོ་དང་མཁའ་འགྲོ་མ་ནས་གཤིན་རྗེ་འཇོམས་མའི་བར་གྱི་སྔགས་རྣམས་ལན་རེ་བརྗོད་པའོ།། ཕྱི་མཆོད་ནི། སུམྦྷས་བསངས། སྭ་བྷཱ་ཝས་སྦྱངས། སྟོང་པའི་ངང་ལས་ཨ་བདུན་ལས་ཐོད་པའི་སྣོད་བདུན་གྱི་ནང་དུ་ཧཱུཾ་བདུན་ལས་ལྷ་རྫས་ལས་གྲུབ་པའི་མཆོད་ཡོན། ཞབས་བསིལ། མེ་ཏོག བདུག་སྤོས། མར་མེ། དྲི། ཞལ་ཟས་དང་གཞན་ཡང་མཆོད་རྫས་རྣམས་དྭངས་ཤིང༌། ཐོགས་པ་མེད་པ་ཡེ་ཤེས་ཀྱི་བདུད་རྩིའི་རང་བཞིན་གྱིས་གང་བར་གྱུར། ཨོཾ་བཛྲ་ཨརྒྷཾ་ཨཱཿཧཱུཾ། ནས། ཤཔྟའི་བར་གྱིས་བྱིན་གྱིས་རླབས། ཨོཾ་སརྦ་ཏ་ཐཱ་ག་ཏ་ཤྲཱི་ཙཀྲ་སཾ་བ་ར་མཎྜལ་ཙཀྲ་སརྦ་བཱི་ར་ཡོ་གི་ནི། བཛྲ་ཨརྒྷཾ་པྲ་ཏཱིཙྪ་སྭཱཧཱ། དེ་བཞིན་དུ། པ་དྱཾ་
ཡང་དེ་ལྟར་སྦྱར་ཏེ། བཛྲ་པུཥྤེ་ཨཱཿཧཱུཾ། སོགས་ཀྱིས་ཉེར་སྤྱོད་རོལ་མོ་དང་བཅས་པ་དང༌། ཨོཾ་བཛྲ་གྷཎྜེ་ར་ཎི་ཏཱ་པྲ་ཎི་ཏ། སཾ་པྲ་ར་ཎི་ཏ་སརྦ་བུདྡྷ་ཀྵེ་དྲ་པྲ་ཙ་ལི་ཏེ། པྲཛྙཱ་པ་ར་མི་ཏ་ན་ད་སཾ་བྷ་ཝེ་ཏ། བཛྲ་དྷརྨཱ་ཧྲི་ད་ཡ་ནི་སནྟོ་ཥ་ནི་ཧཱུཾ་ཧཱུཾ་ཧཱུཾ་ཧོ་ཧོ་ཧོ་ཨ་ཁཾ་སྭཱཧཱ། དེ་ནས་ནང་མཆོད་ནི་གཏོར་མ་བཞིན་བྱིན་གྱིས་བརླབས་ལ། གཡོན་པའི་མཐེབ་སྲིན་གྱིས་འཐོར་ཞིང༌། རྡོ་རྗེ་འཆང་ཆེན་རང་བཞིན་སྐུ། །ཐུགས་རྗེ་འགྲོ་ཀུན་གདུངས་སེལ་ཞིང༌། །བདག་བློའི་ཀུ་མུད་ཁ་འབྱེད་པ། །རྗེ་བཙུན་དཔལ་ལྡན་བླ་མ་མཆོད། ཨོཾ་ཨཱཿཧཱུཾ། ཧེ་རུ་ཀ་དཔལ་རྡོ་རྗེ་ཕག་མོ་དང༌། །ནག་པོ་སྤྱོད་པ་གུ་ཧྱ་ཨནྟར་པ། །ཏེ་ལོ་ན་རོ་ཕམ་ཏིང་སྐུ་མཆེད་མལ། །རྣམ་དག་བདུད་རྩིའི་མཉེས་མཆོད་དམ་པ་འབུལ། །ཨོཾ་ཨཱཿཧཱུཾ། ས་ཆེན་བསོད་རྩེ་རྗེ་བཙུན་གྲགས་པའི་མཚན། །ས་པཎ་ཡོན་ཏན་དཔལ་དང་ལ་རུ་པ། །གངས་ཁྲོད་པ་དང་ཐེག་ཆེན་ཆོས་རྒྱལ་ལ། །རྣམ་དག་བདུད་རྩིའི༴ ཀཾ་དགོན་པ་དང་པཎ་ཆེན་ཤཱཀྱའི་མཚན། །བྲག་དཀར་སེམས་དཔའ་མཁན་ཆེན་བཀྲས་རྣམ་པ། །གྲོལ་མཆོག་ཞབས་དང་རྗེ་བཙུན་རྡོ་རིང་དབོན། །རྣམ་དག་བདུད་རྩིའི༴ ཡང་ན། ས་པཎ་འཕགས་པ་མང་མཁར་ལོ་ཙཱ་བ། དཔལ་ལྡན་སེང་གེ་བུ་སྟོན་རིན་ཆེན་གྲུབ། །བསོད་ནམས་རྒྱལ་མཚན་བྱང་ཆུབ་སེང་གེ་དང༌། །ཤར་པ་ཡེ་རྒྱལ་ཆོས་རྗེ་ཀུན་བཟང་པ། །རིན་ཆེན་བཀྲ་ཤིས་པཎ་ཆེན་ཤཱཀྱའི་མཚན། ཞེས་དང༌། གྲོལ་
མཆོག་ཞབས་དང་རྗེ་བཙུན་ལྷ་དབང་གྲགས། ཞེས་ཏེ་འདོན་པ་སྤོ། ས་ལུགས་ཀྱི་བརྒྱུད་པའོ། །འདི་ལ་ཚོགས་སྒོམ་པ་ནས་བརྒྱུད་པའང༌། གཡག་སྡེ་ལོ་ཙཱ་བ་དང༌། དགའ་ལྡན་པ་བཀྲ་ཤིས་དཔལ་ནས་བརྒྱུད་པ་སོགས་ས་པཎ་མན་ཆད་བརྒྱུད་ལུགས་མི་འདྲ་བ་སྔ་ཕྱིར་མང་དུ་ཡོད་དོ། ཡང༌། རྡོ་རྗེ་འཆང་དང་རྡོ་རྗེ་རྣལ་འབྱོར་མ། །ཛ་ལནྡྷ་ར་ནག་པོ་སྤྱོད་པ་བ། དགེ་བའི་མགོན་པོ་ཏིལླི་ནཱ་རོ་དང༌། ཤེས་རབ་སྲུང་བ་ཀ་ན་ཀ་ཤྲི །མེ་ཛ་ལིང་པ་རཱ་ལོ་ཆེན་པོ་དང༌། །ཆོས་རབ་ཡེ་ཤེས་སེང་གེ་འབུམ་སེང་དང༌། །རོང་པ་རྒ་ལོ་རོང་པ་ཤེར་སེང་དང༌། །བླ་ཆེན་གྲགས་རྒྱལ་དར་མ་བཟང་པོ་དང༌། །ཆོས་རྗེ་རི་པ་གཉལ་པ་བདེ་ལེགས་དཔལ། །རིན་ཆེན་རྒྱལ་མཚན་གྲགས་པ་རིན་ཆེན་དང༌། །ནམ་མཁའ་རྒྱལ་མཚན་བློ་གྲོས་རྒྱ་མཚོ་དང༌། །དོན་གྲུབ་ལེགས་པ་རྣམས་ལ་མཆོད་པ་འབུལ། ཨོཾ་ཨཱཿཧཱུཾ། རྭ་ལུགས་ཀྱི་བརྒྱུད་པའོ།། མར་དོ་ལུགས་ཀྱང་ཡོད་དེ་འདིར་རེ་ཞིག་མ་བྲིས་སོ། །དེ་ནས་བསྡུ་ན་གཙོ་བོ་ཡབ་ཡུམ་གྱི་སྙིང་པོའི་མཐར་འབྲུ་གསུམ་བཏགས་པའམ། སྤྲོ་ན་ལྷ་ཐམས་ཅད་ཀྱི་སྙིང་པོའི་མཐར་འབྲུ་གསུམ་བཏགས་པའི་ཀྱང་ནང་མཆོད་འབུལ། ཨོཾ་སརྦ་བཛྲ་གཱ་མི་ནི་སརྦ་བྷ་ཀྵཾ་ཤོ་དྷ་ཡ་གུ་ཧྱ་བཛྲི་ཎི་སྭཱཧཱ། ཞེས་ང་རྒྱལ་བཟུང་ངོ༌། །དེ་ནས་གསང་བའི་མཆོད་པ་ནི་ཕྱི་ནང་གི་ལྷ་ཐམས་ཅད་མཉེས་པར་གྱུར་ནས་རྗེས་ཆགས་མཛད་པར་བསམ་ཏེ། ཨོཾ་ཧྲིཿཧ་ཧ་ཧཱུཾ་ཧཱུཾ་ཕཊ། ལན་ལྔའི་མཐར། ཨ་ནུ་རཱ་གའི་སྔགས་བརྗོད་ཅིང༌། རྣམ་ལྔ་འདོད་བསྐོར་དང༌།
མཐར་འཁྱུད་པའི་ཕྱག་རྒྱ་བྱའོ།། ཡིད་མཆོད་ནི། སྤྱི་བོར་ནམ་མཁའ་མཛོད་ཀྱི་ཕྱག་རྒྱ་བཅས་ལ། ངག་ཏུ་ནི། ན་མོ་ཆོས་ཀྱི་དབྱིངས་ཀྱི་བྱིན་རླབས་དང༌། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་ཐུགས་རྗེ་རྣམ་པར་དག་པའི་བྱིན་རླབས་དང༌། གསང་སྔགས་དང་ཕྱག་རྒྱའི་མཐུ་དང༌། བདག་གི་མོས་པ་དང་ཏིང་ངེ་འཛིན་དང༌། སྨོན་ལམ་གྱི་དབང་གིས་འཇིག་རྟེན་གྱི་ཁམས་ན་བདག་པོས་ཡོངས་སུ་མ་བཟུང་བའི་མཆོད་པའི་བྱེ་བྲག་ཇི་སྙེད་ཡོད་པ་དང༌། གཞན་ཡང་བྱང་ཆུབ་སེམས་དཔའ་ཀུན་ཏུ་བཟང་པོའི་རྣམ་པར་ཐར་བ་ལས་བྱུང་བའི་མཆོད་པའི་སྤྲིན་ཕུང་ལྟ་བུར་བསམ་གྱིས་མི་ཁྱབ་པ་ཞིག་བླ་མ་དང་དཀྱིལ་འཁོར་གྱི་ལྷ་ཚོགས་དང༌། སངས་རྒྱས་བྱང་ཆུབ་སེམས་དཔའ་ཐམས་ཅད་ཀྱི་སྤྱན་ལམ་དུ་འབྱུང་ཞིང་རྒྱས་པར་གྱུར་ཅིག །ཅེས་སེ་གོལ་གདབ། ཡང་ཕྱག་རྒྱ་བཅས་ལ། ཨོཾ་སརྦ་བིད་པཱུ་ར་པཱུ་ར། སུ་ར་སུ་ར། ཨཱ་ཝཱརྟཱ་ཡ་ཨཱ་ཝཱརྟཱ་ཡ་ཧོ། ན་མཿས་མནྟ་བུདྡྷ་ནཾ། ཨ་བྷིསྨ་རེ་སྥ་ར་ཎ་ཨི་མཾ་ག་ག་ན་ཁཾ་དྷཱརྨཱ་དྷཱ་ཏུ་ཨཱ་ཀ་ཤ་ས་མནྟ་མཾ། སརྦ་ཏ་ཐཱ་ག་ཏ་ཨ་པ་རི་ཤོ་དྷ་ལེ་མཎྜ་ལེ། མ་མ་པྲི་ཎི་དྷ་ན། པུཎྱ་ཛྙཱ་ན་བ་ལེ་ན། སརྦ་ཏ་ཐཱ་ག་ཏ་བ་ལེ་ན་སབྟ་སྭ་སྠཱ་ན་བ་ལེ་ན་ཙ་སྭཱཧཱ། ཞེས་བརྗོད་ལ་སེ་གོལ་གདབ་བོ།། དེ་ནས་བསྟོད་པ་ནི་ཅང་ཏེའུ་བརྡུང་ཞིང༌། ཨོཾ་ན་མོ་བྷ་ག་ཝ་ཏེ་ཝཱི་རེ་ཤཱ་ཡ་ཧཱུཾ་ཧཱུཾ་ཕཊ། ཨོཾ་མཧཱ་ཀལྤཱགྣི་སན་ནི་བྷ་ཡ་ཧཱུཾ་ཧཱུཾ་ཕཊ། ཨོཾ་ཛ་ཊཱ་མུ་ཀུ་ཊོ་རྐ་ཊཱ་ཡ་ཧཱུཾ་ཧཱུཾ་ཕཊ། ཨོཾ་དཾཥྟ་ཀ་རཱ་ལོ་གྲ་བྷི་ཥ་ཎ་མུ་ཁཱ་ཡ་
ཧཱུཾ་ཧཱུཾ་ཕཊ། ཨོཾ་ས་ཧ་སྲ་བྷུ་ཛ་བྷ་སུ་རཱ་ཡ་ཧཱུཾ་ཧཱུཾ་ཕཊ། ཨོཾ་པ་ར་ཤུ་པཱ་ཤོ་དྱ་ཏ་ཤུ་ལ་ཁ་ཊྭཱཾ་ག་དྷ་རི་ཎི་ཧཱུཾ་ཧཱུཾ་ཕཊ། ཨོཾ་བྱཱ་གྷྲཱ་ཛི་ནཱམྦ་ར་དྷ་རཱ་ཡ་ཧཱུཾ་ཧཱུཾ་ཕཊ། ཨོཾ་མ་ཧཱ་དྷུ་མྲཱནྡྷ་ཀ་ར་ཝ་པུ་ཥཱ་ཡ་ཧཱུཾ་ཧཱུཾ་ཕཊ། ཅེས་ཡབ་ཀྱི་རྐང་བརྒྱད་དང༌། ཨོཾ་ན་མོ་བྷ་ཝ་ག་ཏེ་བཛྲ་བཱ་རཱ་ཧཱི་ཝཾ་ཧཱུཾ་ཧཱུཾ་ཕཊ། ཨོཾ་ན་མོ་ཨཱརྱ་ཨ་པ་ར་ཛི་ཏེ་ཏྲཻ་ལོ་ཀྱ་མཱ་ཏེ་མཧཱ་བིདྱ་ཤྭ་རེ་ཧཱུཾ་ཧཱུཾ་ཕཊ། ཨོཾ་ན་མཿ་སརྦྦ་བྷུ་ཏ་བྷ་ཡཱཾ་ཝ་ཧ་མཧཱ་བཛྲེ་ཧཱུཾ་ཧཱུཾ་ཕཊ། ཨོཾ་ན་མོ་བཛྲ་ཨཱ་ས་ནེ་ཨ་ཛི་དེ་ཨ་པ་ར་ཛི་ཏེ་བཱ་ཤཾ་ཀཱ་རི་ནི་ཏྲ་བྷྲ་མ་ཎེ་ཧཱུཾ་ཧཱུཾ་ཕཊ། ཨོཾ་ན་མཿཤོ་ཥ་ཎི་རོ་ཥ་ཎི་ཀྲོ་དྷ་ནི་ཀ་རཱ་ལི་ནེ་ཧཱུཾ་ཧཱུཾ་ཕཊ། ཨོཾ་ན་མསྟྲཱ་ས་ནི་མཱ་ར་ཎི་པྲ་བྷེ་ད་ནི་ཨ་པཱ་རཱ་ཛ་ཡེ་ཧཱུཾ་ཧཱུཾ་ཕཊ། ཨོཾ་ན་མོ་བི་ཛ་ཡེ་ཛམྦྷ་ནི་སྟམྦྷ་ནི་མོ་ཧ་ནི་ཧཱུཾ་ཧཱུཾ་ཕཊ། ཨོཾ་ན་མོ་བཛྲ་བཱ་རཱ་ཧཱི་མཧཱ་ཡོ་གི་ནཱི་ཀཱ་མེ་ཤྭ་རཱི་ཁ་གེ་ཧཱུཾ་ཧཱུཾ་ཕཊ། ཅེས་ཡུམ་གྱི་རྐང་བརྒྱད་དོ།། གསུམ་པ་ལས་རྒྱལ་མཆོག་ལ་གཉིས་ལས། དག་པ་དྲན་པ་ནི། ལུས་དང་ཚོར་བ་དང་ཆོས་དང་སེམས་རྗེས་སུ་དྲན་པ་ཉེ་བར་བཞག་པ་བཞི་ནི། མཁའ་འགྲོ་མ། ལཱ་མ། ཁནྚ་རོ་ཧཱ། གཟུགས་ཅན་མ་བཞིའོ། །འདུན་པ་དང་བརྩོན་འགྲུས་དང་སྤྱོད་པ་དང་སེམས་ཏེ། རྫུ་འཕྲུལ་གྱི་རྐང་པ་བཞི་ནི། རབ་གཏུམ་མ། གཏུམ་པའི་མིག་ཅན་མ། འོད་ལྡན་མ། སྣ་ཆེན་མ་རྣམས་སོ། །དད་པ་དང་བརྩོན་འགྲུས་དང་དྲན་པ་དང་ཏིང་ངེ་འཛིན་དང༌། ཤེས་རབ་ཀྱི་དབང་པོ་ལྔ་ནི་བརྟན་བློ་མ། མིའུ་ཐུང་མ། ལངྐའི་དབང་ཕྱུག་མ། ཤིང་གྲིབ་
མ། ས་སྲུངས་མ་རྣམས་སོ། །དད་སོགས་ཀྱི་སྟོབས་ལྔ་ནི། འཇིགས་བྱེད་མ། རླུང་ཤུགས་མ། ཆང་འཐུང་མ། ལྗང་ལྷ་མོ། རབ་བཟང་མ་རྣམས་སོ། །ཏིང་ངེ་འཛིན་དང༌། བརྩོན་འགྲུས་དང༌། དགའ་བ་དང༌། ཤིན་ཏུ་སྦྱངས་པ་དང༌། རྣམ་འབྱེད་དང༌། དྲན་པ་དང༌། བཏང་སྙོམས་ཡང་དག་བྱང་ཆུབ་ཀྱི་ཡན་ལག་བདུན་ནི། རྟ་རྣ་མ། བྱ་གདོང་མ། འཁོར་ཤུགས་མ། དུམ་སྐྱེས་མ། གླང་སྣ་མ། གོ་ཆ་མ། ཤིན་ཏུ་དཔའ་མོ་རྣམས་སོ། །ཡང་དག་པའི་ལྟ་བ་དང༌། རྟོག་པ་དང༌། ངག་དང༌། ལས་ཀྱི་མཐའ་དང༌། འཚོ་བ་དང༌། རྩོལ་བ་དང༌། དྲན་པ་རྣམས་ནི་སྟོབས་ཆེན་མ། འཁོར་སྒྱུར་མ། བརྩོན་ཆེན་མ། ཁྭ་གདོང་མ། འུག་གདོང་མ། ཁྱི་གདོང་མ། ཕག་གདོང་མ་རྣམས་སོ། །ཡང་དག་པའི་ཏིང་ངེ་འཛིན་ནི། དཔལ་ཧེ་རུ་ཀའོ། །དགེ་བའི་ཆོས་མ་སྐྱེས་པ་སྐྱེད་པ་དང༌། སྐྱེས་པ་བསྲུང་བ་དང༌། མི་དགེ་བའི་ཆོས་མ་སྐྱེས་པ་མི་སྐྱེད་པ་དང༌། སྐྱེས་པ་སྤོང་བ་བཞི་ནི། གཤིན་རྗེ་བརྟན་མ། ཕོ་ཉ་མ། མཆེ་བ་མ། འཇོམས་མ་བཞིའོ། །གཉིས་པ་ཕྲ་ཐིག་གི་རྣལ་འབྱོར་ནི། རྣམ་པ་མང་པོ་ཞིག་ཡོད་པ་ལས་སྐབས་འདིར་འཁོར་ལོ་བཞིའི་གཏུམ་མོ་འབར་འཛག་དམིགས་བཅས་ཀྱི་མཐར་དཀྱིལ་འཁོར་གྱི་འཁོར་ལོ་དཔག་ཏུ་མེད་པ་སྤྲོ་བ་སྒྱུ་མ་ལྟ་བུར་ཤེས་པའི་རིམ་པ་ཅན་ནོ། །གཉིས་པ་མཉམ་ལངས་ཀྱི་རྣལ་འབྱོར་ལ་འདིར་སྨོས་པ་བཞི་ལས། དང་པོ་བཟླས་པའི་རྣལ་འབྱོར་ནི། མཆོག་སྒྲུབ་པའམ་རྩ་བའི་བསྙེན་པ་ལ་ཁ་དོག་
སྔོན་པོའམ། དམར་པོ་འོད་ཟེར་སྣ་ཚོགས་འཕྲོ་བ་བསྒོམ་དགོས་ལ། ཞི་བ་ལ་དཀར་པོ་མེ་ཏོག་འཕྲེང་བ་ལྟ་བུ་དལ་ཤིང་ལྷོད་པས་འགྲོ་བ་དང༌། རྒྱས་པ་ལ་སེར་པོ་སྒྲོའི་ཆུན་པོའི་ཚུལ་དང༌། དབང་ལ་དམར་པོ་ལྕགས་སྒྲོག་གི་ཚུལ་དང༌། དྲག་པོ་ལ་ནག་པོ་སྲད་བུའི་ཚུལ་གྱིས་འགྲོ་བར་བསམ་ལ་བཟླའོ། །བཟླ་བྱའི་སྔགས་ནི། ཨོཾ་ན་མོ་བྷ་ག་བ་ཏི་བཱི་རཱེ་ཤཱ་ཡ། མཧཱ་ཀལྤཱགྣི་སནྣ་བྷཱ་ཡ། ཛ་ནཱ་མུ་ཀུ་ཊོཏྐ་ཊཱ་ཡ། དཾཥྟཱ་ཀ་རཱ་ལོ་གྲ་བྷི་ཥ་ཎ་མུ་ཁཱ་ཡ། ས་ཧ་སྲ་བྷུ་ཛ་བྷཱ་སུ་ར་ཡ། པ་ར་ཤུ་པཱ་ཤོ་དྱ་ཏ་ཤུ་ལ་ཁ་ཊྭཱཾ་ག་དྷཱ་རི་ཎེ། བྱཱ་གྷྲཱ་ཛི་ནཱཾ་བ་ར་དྷཱ་རཱ་ཡ། མ་ཧཱ་དྷུ་མྲཱནྡྷ་ཀ་ར་བ་པུ་ཥཱ་ཡ། ཀ་ར་ཀ་ར། ཀུ་རུ་ཀུ་རུ། བནྡྷ་བནྡྷ། ཏྲཱ་ས་ཡ་ཏྲཱ་ས་ཡ། ཀྵོ་བྷ་ཡ་ཀྵོ་བྷ་ཡ། ཧྲཽཾ་ཧྲཽཾ། ཧྲཿཧྲཿ ཕཻཾ་ཕཻཾ། ཕཊ་ཕཊ། ད་ཧ་ད་ཧ། པ་ཙ་པ་ཙ། བྷ་ཀྵ་བྷ་ཀྵ། བ་ས་རུ་དྷི་རཱནྟ་མཱ་ལཱ་བ་ལམྦི་ནི། གྲྀཧྞ་གྲྀཧྞ། སཔྟ་པཱ་ཏཱ་ལ་ག་ཏ་བྷུ་ཛཾ་གསརྦཾ་བ། ཏརྫ་ཡ་ཏརྫ་ཡ། ཨཱ་ཀ་ཌྷྱ་ཨཱ་ཀ་ཌྷྱ། ཧྲིཾ་ཧྲིཾ། ཛྙཽཾ་ཛྙཽཾ༌། ཀྵྨཾ་ཀྵྨཾ། ཧཾ་ཧཾ། ཧིཾ་ཧིཾ། ཧཱུཾ་ཧཱུཾ། ཀི་ལི་ཀི་ལི། སི་ལི་སི་ལི། ཧི་ལི་ཧི་ལི། དྷི་ལི་དྷི་ལི་ཧཱུཾ་ཧཱུཾ་ཕཊ། ཡབ་ཀྱི་རྩ་སྔགས་དང༌། ཨོཾ་ན་མོ་བྷ་ག་བ་ཏཱཻ་བཛྲ་བཱ་རཱ་ཧཱི་བཾ། ཨཱརྱཱ་ཨ་པ་རཱ་ཛི་ཏེ། ཏྲཻ་ལོ་ཀྱ་མཱ་ཏེ་མཧཱ་བི་དྱེ་ཤྭ་རཱི། སརྦ་བྷུ་ཏ་བྷ་ཡཱ་མ་ཧེ་མཧཱ་བཛྲེ། བཛྲ་ཨ་ས་ནེ་ཨ་ཛི་ཏེ་ཨ་པ་རཱ་ཛི་ཏེ་བ་ཤཾ་ཀ་རི་ནཻ་དྲ་བྷྲ་མ་ཎི་ཤོ་ཥ་ཎི་རོ་ཥ་ཎི་ཀྲོ་དྷ་ནི་ཀ་རཱ་ལི་ནཱི། ཏྲཱ་ས་ནི་མཱ་ར་ཎི་པྲ་བྷེ་ད་ནི། ཨ་པ་རཱ་ཛ་ཡེ། བི་ཛ་ཡེ་ཛམྦྷ་ནི་སྟམྦྷ་ནི་མོ་ཧ་ནི། བཛྲ་བཱ་རཱ་ཧི་མཧཱ་ཡོ་གི་ནཱི་ཀཱ་མེ་ཤྭ་
རཱི་ཁ་གེ ཏདྱ་ཐཱ། པྲོ་ཏངྒེ་པྲོ་ཏངྒེ། ཧ་ན་ཧ་ན། པྲཱ་ཎཱ་ན། ཀིཾ་ཀི་ནི། ཁིཾ་ཁི་ནི། དྷུ་ན་དྷུ་ན། བཛྲ་ཧ་སྟེ། ཤོ་ཥ་ཡ་ཤོ་ཥ་ཡ། བཛྲ་ཁ་ཊྭཱཾ་གཀ་པཱ་ལ་དྷཱ་རི་ཎི། མཧཱ་པི་ཤ་ཏ། མཱཾ་སཱ་ཤ་ནི། མ་ནུ་ཥྱཱནྟ་པྲཱ་བྲྀ་ཏེ། སནྣི་དྷྱཱཾ་ན་ར་ཤི་རོ། མཱ་ལཱ་གྲན་ཐི་ཏ་དྷཱ་རི་ཎི། སུམྦྷ་ནི་སུམྦྷ། ཧ་ན་ཧ་ན། པྲཱ་ཎཱཾ། སརྦཱ་པཱ་པཾ་ས་ཏྭཱ་ནཱཾ། སརྦཱ་པཱ་ཤུ་ནཾ། མཧཱ་མཱཾ་ས་ཙྪེ་ད་ནི། ཀྲོདྷཱ་མུརྟི། དཾཥྟཱ་ཀ་རཱ་ལི་ནཱ། མཧཱ་མུ་དྲེ། ཤྲཱི་ཧེ་རུ་ཀ །དེ་བ་སྱ་ཨ་གྲ་མ་ཧི་ཥི། ས་ཧ་སྲ་ཤི་རེ། ས་ཧ་སྲ་བཱ་ཧ་བེ། ཤ་ཏ་ས་ཧ་སྲ་ཨ་ན་ནེ། ཛྭ་ལི་ཏ་ཏེ་ཛ་སེ། ཛྭ་ལ་མུ་ཁེ། པིཾ་ག་ལ་ལོ་ཙ་ནི། བཛྲ་ཤ་རཱི་རེ། བཛྲ་ཨཱ་ས་ནི། མི་ལི་མི་ལི། ཏི་མི་ལི་ཏི་མི་ལི། ཧེ་ཧེ། ཧཱུཾ་ཧཱུཾ། ཁ་ཁ། དྷུ་དྷུ། དྷུ་རུ་དྷུ་རུ། མུ་རུ་མུ་རུ། ཨ་དྭཻ་ཏེ། མཧཱ་ཡོ་གི་ནཱི། པ་ཋི་ཏ། སིདྡྷི་དྲཻཾ་དྷཾ་དྲཻཾ་དྷཾ། གྲཾ་གྲཾ། ཧེ་ཧེ། ཧ་ཧ། བྷཱི་མེ། ཧ་ས་ཧ་ས། བྷི་མེ། ཧ་ས་ཧ་ས། བཱི་རེ། ཧ་ཧ། ཧོཿཧོཿ ཧཱུཾ་ཧཱུཾ། ཏྲཻ་ལོ་ཀྱ་བི་ནཱ་ཤ་ན། ཤ་ཏ་ས་ཧ་སྲ། ཀོ་ཊི་ཏ་ཐཱ་ག་ཏ་པ་རི་བཱ་རེ་ཧཱུཾ་ཧཱུཾ་ཕཊ། སིཾ་ཧ་རཱུ་པེ་ཁཿ ག་ཛ་རཱུ་པེ་གཿ ཏྲཻ་ལོ་ཀྱ་ཨུ་ད་རི་ས་མུ་དྲ། མེ་ཁ་ལེ། གྲ་ས་གྲ་ས། ཧཱུཾ་ཧཱུཾ་ཕཊ། བཱི་རཱ་དྭཻ་ཏེ། ཧཱུཾ་ཧཱུཾ། ཧཱ་ཧཱ། མ་ཧཱ་པ་ཤུ་མོ་ཧ་ནི། མཧཱ་ཡོ་གཱི་ཤྭ་རཱི་ཏཱཾ། ཌཱ་ཀི་ནཱི་སརྦ་ལོ་ཀཱ་ནཱཾ་བནྡྷ་ནཾ་ས་དྱཿཔྲ་དྱ་ཀཱ་རི་ཎེ་ཧཱུཾ་ཧཱུཾ་ཕཊ། བྷཱུ་ཏ་ཏྲཱ་ས་ནི། མཧཱ་བཱི་རེ་པ་ར་མ་སིདྡྷི་ཡོ་གི་ཤྭ་རཱི་ཕཊ། ཧཱུཾ་ཧཱུཾ་ཕཊ་ཧཱུཾ་ཧཱུཾ་ཕཊ། ཡུམ་གྱི་རྩ་སྔགས་དང༌། ཨོཾ་
ཤྲཱི་བཛྲ་ཧེ་ཧེ་རུ་རུ་ཀཾ་ཧཱུཾ་ཧཱུཾ་ཕཊ། ཌཱ་ཀི་ནཱི་ཛྭ་ལ་སམྦ་རཾ་སྭཱཧཱ། ཡབ་ཀྱི་སྙིང་པོ་དང༌། ཨོཾ་སརྦ་བུདྡྷ་ཌཱ་ཀི་ནཱི་ཡེ་བཛྲ་ཝརྞ་ནཱི་ཡེ་ཧཱུཾ་ཧཱུཾ་ཕཊ་སྭཱཧཱ། ཡུམ་གྱི་སྙིང་པོ་དང༌། ཨོཾ་ཧྲཱིཿཧ་ཧ་ཧཱུཾ་ཧཱུཾ་ཕཊ། ཡབ་ཀྱི་ཉེ་སྙིང་དང༌། ཨོཾ་བཛྲ་བཻ་རོ་ཙ་ནཱི་ཡེ་ཧཱུཾ་ཧཱུཾ་ཕཊ་སྭཱཧཱ། ཡུམ་གྱི་ཉེ་སྙིང་དང༌། ཨོཾ་སུམྦྷ་ནི་སུམྦྷཧཱུཾ་ཧཱུཾ་ཕཊ། ཨོཾ་གྲྀཧྞ་གྲྀཧྞ་ཧཱུཾ་ཧཱུཾ་ཕཊ། ཨོཾ་གྲྀཧྞ་པ་ཡ་གྲིཧྞ་པཱ་ཡ་ཧཱུཾ་ཧཱུཾ་ཕཊ། ཨོཾ་ཨཱ་ན་ཡ་ཧོ་བྷ་ག་ཝན་བཛྲ་རཱ་ཛཱ་ཧཱུཾ་ཧཱུཾ་ཕཊ། ཡབ་ཀྱི་ཉེ་བའི་སྙིང་པོའི་སྙིང་པོ་དང༌། ཨོཾ་ཙཽ་རཱི་ཧཱུཾ་ཧཱུཾ་ཕཊ། ཡུམ་གྱི་ཉེ་བའི་སྙིང་པོའི་སྙིང་པོ་དང༌། ཨོཾ་ཌཱ་ཀི་ནཱི་ཡེ་ཧཱུཾ་ཧཱུཾ་ཕཊ། ཨོཾ་ལཱ་མེ་ཧཱུཾ་ཧཱུཾ་ཕཊ། ཨོཾ་ཁནྚ་རོ་ཧེ་ཧཱུཾ་ཧཱུཾ་ཕཊ། ཨོཾ་རཱུ་པི་ཎཱི་ཡེ་ཧཱུཾ་ཧཱུཾ་ཕཊ། སྙིང་པོའི་རྣལ་འབྱོར་མ་བཞིའི་སྔགས་དང༌། ཨོཾ་ཀ་ར་ཀ་ར་ཧཱུཾ་ཧཱུཾ་ཕཊ། ཨོཾ་པྲ་ཙནྚེ་ཧཱུཾ་ཧཱུཾ་ཕཊ། ཨོཾ་ཀུ་རུ་ཀུ་རུ་ཧཱུཾ་ཧཱུཾ་ཕཊ། ཨོཾ་ཙནྚ་ཀྵི་ཡེ་ཧཱུཾ་ཧཱུཾ་ཕཊ། ཨོཾ་བྷནྡྷ་བྷནྡྷ་ཧཱུཾ་ཧཱུཾ་ཕཊ། ཨོཾ་པྲ་བྷ་བ་ཏཱི་ཡེ་ཧཱུཾ་ཧཱུཾ་ཕཊ། ཨོཾ་ཏྲ་ས་ཡ་ཏྲ་ས་ཡ་ཧཱུཾ་ཧཱུཾ་ཕཊ། ཨོཾ་མ་ཧཱ་ནཱ་སེ་ཧཱུཾ་ཧཱུཾ་ཕཊ། ཨོཾ་ཀྵོ་བྷ་ཡ་ཀྵོ་བྷ་ཡ་ཧཱུཾ་ཧཱུཾ་ཕཊ། ཨོཾ་བཱི་རཱ་མ་ཏཱི་ཡེ་ཧཱུཾ་ཧཱུཾ་ཕཊ། ཨོཾ་ཧྲཽཾ་ཧྲཽཾ་ཧཱུཾ་ཧཱུཾ་ཕཊ། ཨོཾ་ཁརྦ་རི་ཡེ་ཧཱུཾ་ཧཱུཾ་ཕཊ། ཨོཾ་ཧྲཿཧྲཿཧཱུཾ་ཧཱུཾ་ཕཊ། ཨོཾ་ལངྐེ་ཤྭ་རི་ཡེ་ཧཱུཾ་ཧཱུཾ་ཕཊ། ཨོཾ་ཕེཾ་ཕེཾ་ཧཱུཾ་ཧཱུཾ་ཕཊ། ཨོཾ་དྲུ་མ་ཙྪ་ཡེ་ཧཱུཾ་ཧཱུཾ་ཕཊ། ཨོཾ་ཕཊ་ཕཊ་ཧཱུཾ་ཧཱུཾ་ཕཊ། ཨོཾ་ཨེ་རཱ་བ་ཏཱི་ཡེ་ཧཱུཾ་ཧཱུཾ་ཕཊ། ཨོཾ་ད་ཧ་ད་ཧ་ཧཱུཾ་ཧཱུཾ་ཕཊ། ཨོཾ་མཧཱ་བ་ར་བཱི་ཡེ་ཧཱུཾ་ཧཱུཾ་ཕཊ། ཨོཾ་པ་ཙ་པ་ཙ་ཧཱུཾ་ཧཱུཾ་ཕཊ། ཨོཾ་བཱ་ཡཱུ་བེ་གེ་ཧཱུཾ་
ཧཱུཾ་ཕཊ། ཨོཾ་བྷཀྵ་བྷཀྵ་བ་ས་རུ་དྷི་རཱནྟྲ་མཱ་ལཱ་བ་ལམྦི་ནེ་ཧཱུཾ་ཧཱུཾ་ཕཊ། ཨོཾ་སུ་ར་བྷ་ཀྵི་ཡེ་ཧཱུཾ་ཧཱུཾ་ཕཊ། ཨོཾ་གྲྀཧྞ་གྲྀཧྞ་སཔྟ་པཱ་ཏཱ་ལ་ག་ཏ་བྷུ་ཛཾ་ག་སརྦ་བཱ་ཏརྫ་ཡ་ཏརྫ་ཡ་ཧཱུཾ་ཧཱུཾ་ཕཊ། ཨོཾ་ཤྱཱ་མཱ་དེ་བཱི་ཡེ་ཧཱུཾ་ཧཱུཾ་ཕཊ། ཨོཾ་ཨཱ་ཀ་ཌྷྱཨཱ་ཀ་ཌྷྱ་ཧཱུཾ་ཧཱུཾ་ཕཊ། ཨོཾ་སུ་བྷ་དྲེ་ཧཱུཾ་ཧཱུཾ་ཕཊ། ཨོཾ་ཧྲཱིཾ་ཧྲཱིཾ་ཧཱུཾ་ཧཱུཾ་ཕཊ། ཨོཾ་ཧ་ཡ་ཀརྞེ་ཧཱུཾ་ཧཱུཾ་ཕཊ། ཨོཾ་ཛྙཽཾ་ཛྙཽཾ་ཧཱུཾ་ཧཱུཾ་ཕཊ། ཨོཾ་ཁ་གཱ་ན་ན་ཧཱུཾ་ཧཱུཾ་ཕཊ། ཨོཾ་ཀྵྨཱཾཀྵྨཱཾ་ཧཱུཾ་ཧཱུཾ་ཕཊ། ཨོཾ་ཙཀྲ་བེ་གེ་ཧཱུྃ་ཧཱུྃ་ཕཊ། ཨོཾ་ཧཱཾ་ཧཱཾ་ཧཱུྃ་ཧཱུྃ་ཕཊ། ཨོཾ་ཁཎྞ་རོ་ཧེ་ཧཱུཾ་ཧཱུཾ་ཕཊ། ཨོཾ་ཧཱིཾ་ཧཱིཾ་ཧཱུཾ་ཧཱུཾ་ཕཊ། ཨོཾ་ཤོནྟི་ནི་ཡེ་ཧཱུཾ་ཧཱུཾ་ཕཊ། ཨོཾ་ཧཱུཾ་ཧཱུཾ་ཧཱུཾ་ཧཱུཾ་ཕཊ། ཧཱུཾ་ཙཀྲ་ཝརྨི་ཎཱི་ཡེ་ཧཱུཾ་ཧཱུཾ་ཕཊ། ཨོཾ་ཀི་ལི་ཀི་ལི་ཧཱུཾ་ཧཱུཾ་ཕཊ། ཨོཾ་སུ་བཱི་རེ་ཧཱུྃ་ཧཱུྃ་ཕཊ། ཨོཾ་སི་ལི་སི་ལི་ཧཱུཾ་ཧཱུཾ་ཕཊ། ཨོཾ་མཧཱ་བ་ལེ་ཧཱུཾ་ཧཱུཾ་ཕཊ། ཨོཾ་ཧི་ལི་ཧི་ལི་ཧཱུཾ་ཧཱུཾ་ཕཊ། ཨོཾ་ཙཀྲ་ཝརྟི་ནཱི་ཡེ་ཧཱུཾ་ཧཱུཾ་ཕཊ། ཨོཾ་དྷི་ལི་དྷི་ལི་ཧཱུཾ་ཧཱུཾ་ཕཊ། ཨོཾ་མཧཱ་བི་དྱེ་ཧཱུཾ་ཧཱུཾ་ཕཊ། འཁོར་ལོ་གསུམ་གྱི་སྔགས་དང༌། ཨོཾ་ཀཱ་ཀཱ་སྱཻ་ཧཱུཾ་ཧཱུཾ་ཕཊ། ཨོཾ་ཨུ་ལུ་ཀཱ་སྱཻ་ཧཱུཾ་ཧཱུཾ་ཕཊ། ཨོཾ་ཤྭ་ནཱ་སྱཻ་ཧཱུཾ་ཧཱུཾ་ཕཊ། ཨོཾ་སཱུ་ཀཱ་རཱ་སྱཻ་ཧཱུཾ་ཧཱུཾ་ཕཊ། ཨོཾ་ཡ་མ་དཱ་ཌྷཱི་ཡེ་ཧཱུཾ་ཧཱུཾ་ཕཊ། ཨོཾ་ཡ་མ་དུ་ཏི་ཡེ་ཧཱུཾ་ཧཱུཾ་ཕཊ། ཨོཾ་ཡ་མ་དཾཥྟི་ཎཱི་ཡེ་ཧཱུཾ་ཧཱུཾ་ཕཊ། ཨོཾ་ཡ་མ་མ་ཐ་ནཱི་ཡེ་ཧཱུཾ་ཧཱུཾ་ཕཊ། སྒོ་མཚམས་མ་བརྒྱད་ཀྱི་སྔགས་དང༌། ཨོཾ་ཨོཾ་ཧ། ཨོཾ་ན་མ་ཧི། ཨོཾ་སྭཱཧཱ་ཧཱུཾ། ཨོཾ་བཽ་ཥཊ་ཧེ། ཨོཾ་ཧཱུཾ་ཧཱུཾ་ཧོ། ཨོཾ་ཕཊ་ཧཾ། ཨོཾ་ཨོཾ་བཾ། ཨོཾ་ཧཱཾ་ཡོཾ། ཨོཾ་ཧྲིཾ་མོཾ། ཨོཾ་ཧྲིཾ་ཧྲཱིཾ། ཨོཾ་ཧཱུཾ་ཧཱུཾ། ཨོཾ་ཕཊ་ཕཊ། ཅེས་པ་ནྀ་གོ་ཆ་གཉིས་སོ། །
གཉིས་པ་ཉེར་བསྡུའི་རྣལ་འབྱོར་ནི། རང་གི་སྙིང་ཁའི་ཧཱུཾ་ལས་འོད་ཟེར་འཕྲོས་ཏེ། ཁམས་གསུམ་སྣོད་བཅུད་ཐམས་ཅད་གཞལ་ཡས་ཁང་དང་ལྷའི་དཀྱིལ་འཁོར་དུ་གྱུར། དེ་བསྲུང་བའི་འཁོར་ལོ་ལ་ཐིམ། དེ་དུར་ཁྲོད་བརྒྱད་ལ་ཐིམ། དེ་གཞལ་ཡས་ཁང་ལ་ཐིམ། དེ་དམ་ཚིག་གི་འཁོར་ལོ་ལ། དེ་ཡང་སྐུའི་འཁོར་ལོ་ལ། དེ་ཡང་གསུང་གི་འཁོར་ལོ་ལ། དེ་ཡང་ཐུགས་ཀྱི་འཁོར་ལོ་ལ། དེ་ཡང་བདེ་བ་ཆེན་པོའི་འཁོར་ལོ་ལ། དེ་རང་ཉིད་ལ་ཐིམ། ལྷ་རྣམས་ཕྱོགས་གཡོན་བསྐོར་དང༌། མཚམས་གཡས་བསྐོར་གྱི་སྣ་བུག་ནས་སྙིང་གར་བསྡུའོ།། གསུམ་པ་སྤྱོད་ལམ་གྱི་རྣལ་འབྱོར་ནི། རང་ཉིད་ཧེ་རུ་ཀ་ཕྱག་གཉིས་པར་གྱུར། སྙིང་ཁར་ཨོཾ་ཨོཾ་ཧ་དཀར་པོ་རྡོ་རྗེ་སེམས་དཔའ། མགོ་བོར་ཨོཾ་ན་མ་ཧི་སེར་པོ་རྣམ་པར་སྣང་མཛད། སྤྱི་གཙུག་ཏུ་ཨོཾ་སྭཱཧཱ་ཧཱུཾ་དམར་པོ་པདྨ་གར་གྱི་དབང་ཕྱུག །ཕྲག་པ་གཉིས་སུ་ཨོཾ་བོ་ཥ་ཊ་ཧེ་ནག་པོ་དཔལ་ཧེ་རུ་ཀ །མིག་གཉིས་སུ་ཨོཾ་ཧཱུཾ་ཧཱུཾ་ཧོཿདམར་སེར་རྡོ་རྗེ་ཉི་མ། ཚིགས་ཆེན་བརྒྱད་ལ་ཨོཾ་ཕཊ་ཧཾ་ལྗང་ཁུ་རྟ་མཆོག་གི་ངོ་བོ། ལྟེ་བར་ཨོཾ་ཨོཾ་བཾ་དམར་མོ་རྡོ་རྗེ་ཕག་མོ། སྙིང་ཁར་ཨོཾ་ཧཾ་ཡོཾ་སྔོན་མོ་གཤིན་རྗེ་མ། ཁར་ཨོཾ་ཧྲིཾ་མོཾ་དཀར་མོ་རྨོངས་བྱེད་མ། དཔྲལ་པར་ཨོཾ་ཧྲིཾ་ཧྲིཾ་སེར་མོ་བསྐྱོད་བྱེད་མ། སྤྱི་གཙུག་ཏུ་ཨོཾ་ཧཱུཾ་ཧཱུཾ་ལྗང་ཁུ་སྐྲག་བྱེད་མ། ཚིགས་ཆེན་བརྒྱད་ལ་ཨོཾ་ཕཊ་ཕཊ་དུད་ཁ་ཙཎྜི་ཀའི་ངོ་བོ། རྡོ་རྗེ་སེམས་
དཔའ་དང་རྨོངས་བྱེད་མ་ཟླ་བའི་གདན། གཞན་རྣམས་ཉི་མའི་གདན་ལ་གནས་པ་སྟེ་ཡབ་ཀྱི་གནས་སུ་ཡང་ཡུམ་དང༌། ཡུམ་གྱི་གནས་སུ་ཡང་ཡབ་གཉིས་སུ་མེད་པར་གྱུར། སྤྱི་བོ་ལ་སོགས་པའི་གནས་རྣམས་སུ་པུ་ཛ་ཨོ་ཨ་གོ་ར་དེ་མ། ཀ་ཨོ་ཏྲི་ཀོ་ཀ་ལ་ཀཱ་ཧི། པྲེ་གྲི་སཽ་སུ་ན་སི་མ་ཀུ། སུམྦྷ་ལན་གཉིས་ཀྱིས་ཕྱོགས་བཅིངས་ཡབ་ཀྱི་རྐང་བརྒྱད་ཚར་གཅིག་བརྗོད། བདག་དང་སྣང་བའི་དངོས་པོ་ཐམས་ཅད་འཁོར་ལོ་སྡོམ་པའི་སྐུའི་རང་བཞིན། བརྗོད་པ་དང་གྲགས་པའི་སྒྲ་ཐམས་ཅད་གསུང་གི་རང་བཞིན། དྲན་རིག་རྣམ་རྟོག་ཐམས་ཅད་ཐུགས་བདེ་བ་ཆེན་པོའི་རང་བཞིན་དུ་རྣམ་པར་དག་གོ །བདག་གིས་དུས་གསུམ་དགེ་བ་སོགས་དང༌། ལྷ་མོ་ཚད་མ་སོགས་དང༌། སྲིད་པ་གསུམ་འབར་སོགས། སྨོན་ལམ་ཅི་རིགས་པ་བཏབ་ནས་སྤྱོད་ལམ་འཇུག་སྟེ་དག་པ་རྣམ་པ་གསུམ་དང་མ་བྲལ་བས་སོ། །བཞི་པ་གཏོར་མའི་རྣལ་འབྱོར་ནི། གཏོར་མ་གཉིས་སམ། གཅིག་གིས་ཀྱང་རུང་སྟེ། ཆང་ཆུ་ནང་མཆོད་ཀྱིས་སྦྱངས། སུམྦྷས་བསངས། སྭ་བྷཱ་ཝས་སྦྱངས། སྟོང་པའི་ངང་ལས་ཡཾ་ལས་རླུང་གི་དཀྱིལ་འཁོར་ཟླ་བ་ཕྱེད་པ་ལྟ་བུ། ཁ་དོག་སྔོན་པོ་བ་དན་གྱིས་མཚན་པ། དེའི་སྟེང་དུ་རཾ་ལས་མེའི་དཀྱིལ་འཁོར་ཟུར་གསུམ་པ། ཁ་དོག་དམར་པོ་འབར་བས་མཚན་པ། དེའི་སྟེང་དུ་ཨཱཿལས་ཐོད་པ་དཀར་པོ་དུམ་བུ་གསུམ་པ་དཔྲལ་པ་རང་ལ་བསྟན་པ་ཤིན་ཏུ་རྒྱ་ཆེ་བ་ཨས་མཚན་པ། དེའི་ནང་དུ་ཨ་ལས་ཟླ་བའི་དཀྱིལ་འཁོར་རོ། །དེའི་སྟེང་དུ་དབུས་
སུ་ན་ལས་མིའི་ཤ ཤར་དུ་གོ་ལས་བ་གླང་གི་ཤ བྱང་དུ་ད་ལས་གླང་པོ་ཆེའི་ཤ ནུབ་ཏུ་ཧ་ལས་ཏའི་ཤ ལྷོར་ཀུ་ལས་ཁྱིའི་ཤ ཤ་རེ་རེའི་སྟེང་དུ། དབུས་སུ་མུ་ལས་དྲི་ཆུ། ཤར་དུ་བི་ལས་དྲི་ཆེན། བྱང་དུ་མ་ལས་ཤ་ཆེན་གྱི་དྭངས་མ། ནུབ་ཏུ་ཤུ་ལས་བྱང་སེམས། ལྷོར་ར་ལས་རཀྟ། དེ་རྣམས་ཀྱི་སྟེང་དུ་དབུས་སུ་ཧཱུཾ་ཆོས་ཀྱི་དབྱིངས་ཀྱི་ཡེ་ཤེས། ཤར་དུ་བྲུཾ་མེ་ལོང་ལྟ་བུའི་ཡེ་ཤེས། བྱང་དུ་ཁཾ་བྱ་བ་གྲུབ་པའི་ཡེ་ཤེས། ནུབ་ཏུ་ཛྲིཾ་སོ་སོར་རྟོགས་པའི་ཡེ་ཤེས། ལྷོར་ཨཾ་ལས་མཉམ་པ་ཉིད་ཀྱི་ཡེ་ཤེས། དེའི་སྟེང་གི་ནམ་མཁའ་ལ་ཨོཾ་དཀར་པོ་མགོ་བོ་ཐུར་དུ་ལྟ་བ། དེའི་སྟེང་དུ་ཨཱཿལས་ཟླ་བའི་དཀྱིལ་འཁོར་ཨཱཿཡིས་བརྒྱན་པ། དེའི་སྟེང་དུ་ཧཱུཾ་ལས་བདུད་རྩིའི་རང་བཞིན་གྱི་ཁ་ཊྭཾ་ག་དཀར་པོ་མགོ་བོ་ཐུར་དུ་བསྟན་པའམ་རྡོ་རྗེ་དཀར་པོ་རྩེ་ལྔ་པ་ཧཱུཾ་གིས་མཚན་པ། ཧཱུཾ་དེ་ལས་འོད་ཟེར་འོག་ཏུ་འཕྲོས་པས་རླུང་གི་བ་དན་ལ་ཕོག།རླུང་གཡོས། མེ་སྦར། ཤ་ལྔ་བདུད་རྩི་ལྔ་ཡེ་ཤེས་ལྔ་འོད་དུ་བཞུ་ཞིང་བསྐོལ་ཏེ་ཐ་མལ་པ་སྦྱངས། དེའི་རླངས་ཀྱི་འོད་ཟེར་སྟེང་དུ་འཕྲོས་པས་ཨོཾ་མགོ་བོ་ཐུར་དུ་ལྟ་བ་དང༌། ཟླ་བ་དང་ཁ་ཊྭཾ་གའམ་རྡོ་རྗེའི་ལྟེ་བའི་ཧཱུཾ་ལས་བདུད་རྩྀའི་རྒྱུན་འཛག་པ་དང་འདྲེས་པས་བདུད་རྩིར་རྟོགས་པར་བྱ། ཁ་ཊྭཾ་གའམ་རྡོ་རྗེ་ཧཱུཾ་ལས་འོད་ཟེར་འཕྲོས་པས། ཕྱོགས་བཅུའི་དེ་བཞིན་གཤེགས་པ་ཐམས་ཅད་ཀྱི་ཐུགས་ཀ་ནས་ཡེ་ཤེས་ཀྱི་རང་
བཞིན་ཐོད་པ་བདུད་རྩི་བཀང་བ་དཔག་ཏུ་མེད་པ་སྤྱན་དྲངས་ཏེ། མདུན་གྱི་བདུད་རྩི་ལ་ཐིམ་སྟེ་ཡེ་ཤེས་ཀྱི་བདུད་རྩི་དང་གཉིས་སུ་མེད་པར་གྱུར་པས་མཐའ་མེད་དུ་སྦར། ཁ་ཊྭཱཾ་གའམ་རྡོ་རྗེ་དང་ཟླ་བ་དང་ཨོཾ་ཡང་ལྷུང་སྟེ། ཞུ་ནས་ཁ་དོག་དང་དྲི་དང་རོ་དང་ནུས་པའི་མཐུ་ཕུན་སུམ་ཚོགས་པ་བདུད་རྩིའི་རྒྱ་མཚོ་ཆེན་པོར་གྱུར། ཨོཾ་ཨཱཿཧཱུཾ་ཧ་ཧོ་ཧྲིཿ ཡང་ཡང་བརྗོད་དོ། །འཇིག་རྟེན་འདས་པའི་གཏོར་ཆོག་ལ། མགྲོན་བསྐྱེད་པ་ནི། མདུན་གྱི་ནམ་མཁར་སྐད་ཅིག་གིས་རྟེན་དང་བརྟེན་པར་བཅས་པའི་དཀྱིལ་འཁོར་དུར་ཁྲོད་བརྒྱད་དང་བཅས་པ་བཞུགས་པར་གྱུར། ཞེས་པའོ། །ཡེ་ཤེས་འཁོར་ལོ་སྤྱན་དྲངས་པར་བསམ་སྟེ། འབར་བའི་ཕྱག་རྒྱ་དང་བཅས་ལ། ཕཻཾ། ཞེས་བརྗོད། ཛཿཧཱུཾ་བཾ་ཧོཿ དགུགས་གཞུག་བཅིང་དབང་དུ་བྱའོ། །ཨོཾ་ཡོ་ག་ཤུདྡྷ་སརྦ་དྷརྨཱཿཡོ་ག་ཤུདྡྷོ྅་ཧཾ། ཞེས་བརྗོད། འཁྱུད་རྒྱ་བྱ། ལྗགས་ཧཱུཾ་ལས་བྱུང་བའི་རྡོ་རྗེ་དཀར་པོ་འོད་ཀྱི་སྦུ་གུ་ཅན་ཧཱུཾ་གིས་མཚན་པས་གསོལ་བར་བསམ་ཞིང༌། ཨོཾ་ཨར་ལླི་ཧོཿ ཛཿཧཱུཾ་བཾ་ཧོཿ ས་མ་ཡ་སྟྭམ་དྲི་ཤྱ་ཧོ། བཛྲ་ཌཱ་ཀི་ནཱི་ཁ་ཁ་ཁཱ་ཧི་ཁཱ་ཧི། ཨི་མཾ་བ་ལིཾ་བྷུ་ཛ་ཐཱ་བི་པ་ཐ། མ་མ་ཀཱརྻ་སཱ་དྷ་ཡ། ཨོཾ་ཨཱཿཧཱུཾ་ཕཻཾ་ཕཻཾ་སྭཱཧཱ། ཞེས་ལན་བདུན་སོགས་བརྗོད། ཨརྒྷཾ ལ་སོགས་པས་མཆོད། ཧཱུཾ་ཨཾ་མཾ་ཏཾ་པཾ་ལཾ། པུ་ཛ་ཨོ་ཨ། གོ་ར་དེ་མ། ཀཱ་ཨོ་ཏྲི་ཀོ །ཀ་ལ་ཀ་ཧི། པྲེ་གྲི་སོ་སུ་ན་སི་མ་ཀུ། ཧཱུཾ་བརྒྱད་ཀྱི་མཐར། ཨོཾ་ཨཱཿཧཱུཾ། གིས་ནང་མཆོད་འབུལ། རྐང་བརྒྱད་གཉིས་ཀྱིས་བསྟོད། སྲིད་དང་ཞི་བ་མཉམ་
པ་ཆགས་དང་ཀུན་རྟོག་ཆགས་པ་བཅོམ། ཁྱོད་ཀྱིས་དངོས་ཀུན་རང་བཞིན་ནམ་མཁའ་དང་ནི་འདྲར་གཟུགས་ཀྱང༌། །མགོན་པོ་ཤིན་ཏུ་ལྕི་བའི་ཐུགས་རྗེའི་ཆུས་རྒྱས་སེམས་ལ་ནི། །མཛོད་ཅིག་ལྷ་མོ་རྣམས་ཀྱིས་བདག་ལ་རྗེས་བརྩེར་མཛད་དུ་གསོལ། །བདག་ལ་འཕྲིན་ལས་དང་དངོས་གྲུབ་ཐམས་ཅད་གེགས་མེད་པར་སྩལ་བ་དང༌། མྱུར་དུ་དཔལ་ཧེ་རུ་ཀ་ཉིད་ཀྱི་གོ་འཕང་ཐོབ་པར་མཛད་དུ་གསོལ། ཅེས་གསོལ་བ་བཏབ་པའོ། །འཇིག་རྟེན་པའི་གཏོར་ཆོག་ནི། འབར་བའི་ཕྱག་རྒྱ་སྔོན་དུ་འགྲོ་བའི་པད་ཀོར་དང༌། ཕཻཾ་བཛྲ་ཨ་རལླྀ་ཧོཿ ཛཿཧཱུཾ་བཾ་ཧོཿ བཛྲ་ཌཱ་ཀི་ནི་ས་མ་ཡ་སྟྭམ་དྲི་ཤྱ་ཧོཿ རྡོ་རྗེ་ཐལ་མོ་ཁ་གྱེན་དུ་ཕྱེ་བས། ཨོཾ་ཁ་ཁ། ཁ་ཧཱི་ཁ་ཧཱི། སརྦ་ཡཀྵ། རཀྵ་ས། བྷཱུ་ཏ། པྲེ་ཏ། པི་ཤཱ་ཙ། ཨུནྨཱ་དཱ། ཨ་པ་སྨ་ར། ཌཱ་ཀ་ཌཱ་ཀི་ནྱཱ་ད་ཡ། ཨི་མཾ་བ་ལིཾ་གྲྀཧྞཱནྟུ། ས་མ་ཡ་རཀྵནྟུ། མ་མ་སརྦ་སིདྡྷི་མ་པྲ་ཡ་ཙྪན་ཏུ་ཡ་ཐཻ་བཾ། ཡ་ཐཻཥྟཾ། བྷུཉྫ་ཐཱ། པི་པ་ཐ། ཛི་གྷྭ་ཐ། མཱ་ཏི་ཀྲ་མ་ཐ། མ་མ་སརྦཱ་ཀཱ་ར་ཏ་ཡ་སདྶུ་ཁཾ་བི་ཤུདྡྷ་ཡེ། ས་ཧཱ་ཡི་ཀཱ་བྷ་ཝནྟུ་ཧཱུཾ་ཧཱུཾ་ཕཊ་ཕཊ་སྭཱཧཱ། ཞེས་པ་ལན་གསུམ་མོ། །རྡོ་རྗེ་དྲིལ་ཐབས་དང་བཅས་པས། ལྷ་ཡི་ཚོགས་རྣམས་མ་ལུས་དང༌། །ཀླུ་ཡི་ཚོགས་རྣམས་མ་ལུས་དང༌། གནོད་སྦྱིན༴ སྲིན་པོའི་ཚོགས༴ འབྱུང་པོའི༴ ཡི་དྭགས༴ ཤ་ཟའི༴ སྨྱོ་བྱེད༴ བརྗེད་བྱེད༴ མཁའ་འགྲོའི་ཚོགས༴ མ་མོའི་ཚོགས་རྣམས་མ་ལུས་དང༌། །མ་ལུས་པ་ནི་ཐམས་ཅད་དག །འདིར་གཤེགས་
བདག་ལ་དགོངས་སུ་གསོལ། །བསྟན་པ་བསྲུང་དང་འགྲོ་བའི་དོན་མཛད་ཕྱིར། །ཐུགས་དམ་བཅས་ཤིང་ཞལ་གྱིས་འཆེས་པ་རྣམས། །དཔལ་ཆེན་བཀའ་སྡོད་ཡིད་ལྟར་མགྱོགས་པ་ཡི། །འཇིགས་པའི་གཟུགས་ཅན་དྲག་གཏུམ་མི་ཟད་པ། །གདུག་པ་འདུལ་མཛད་ནག་པོའི་ཚོགས་རྣམས་འཇོམས། །རྣལ་འབྱོར་ལས་ལས་འབྲས་བུ་སྟེར་མཛད་ཅིང༌། །མཐུ་སྟོབས་བྱིན་རླབས་བསམ་གྱིས་མི་ཁྱབ་པའི། །གནོད་སྦྱིན་ཚོགས་སོགས་བརྒྱད་ལ་ཕྱག་འཚལ་བསྟོད། །སྡེ་བརྒྱད་བཙུན་མོ་སྲས་དང་གཡོག་བཅས་པས། །དངོས་གྲུབ་ཀུན་གྱི་བཀའ་དྲིན་བདག་ལ་རྩོལ། །རྣལ་འབྱོར་བདག་ཅག་འཁོར་བཅས་ལ། །ནད་མེད་ཚེ་དང་དབང་ཕྱུག་དང༌། །དཔལ་དང་གྲགས་དང་སྐལ་པ་བཟང༌། །ལོངས་སྤྱོད་རྒྱ་ཆེན་ཀུན་ཐོབ་ཅིང༌། །ཞི་དང་རྒྱས་ལ་སོགས་པ་ཡི། །ལས་ཀྱི་དངོས་གྲུབ་བདག་ལ་རྩོལ། །དམ་ཚིག་ཅན་གྱིས་བདག་ལ་བསྲུང༌། །སྲུང་མས་རྟག་ཏུ་གྲོགས་མཛོད་ཅིག །དུས་མིན་འཆི་དང་ནད་རྣམས་དང༌། །གདོན་དང་བགེགས་རྣམས་མེད་པར་མཛོད། །རྨི་ལམ་ངན་དང་མཚན་མ་ངན། །བྱ་བྱེད་ངན་པ་མེད་པར་མཛོད། །འཇིག་རྟེན་བདེ་ཞིང་ལོ་ལེགས་དང༌། །འབྲུ་རྣམས་འཕེལ་ཞིང་ཆོས་འཕེལ་དང༌། །བདེ་ལེགས་ཐམས་ཅད་འབྱུང་བ་དང༌། །ཡིད་ལ་འདོད་པ་ཀུན་འགྲུབ་ཤོག །ཅེས་བརྗོད་ཅིང་འཕྲིན་ལས་གཞོལ། ཡིག་བརྒྱ་དང་བཟོད་གསོལ་སྔོན་དུ་འགྲོ་བས། ཨོཾ་ཁྱོད་ཀྱི་
སོགས་དང་མགྲོན་རྣམས་རང་བཞིན་གྱི་གནས་སུ་གཤེགས་སུ་གསོལ། ཨོཾ་ཡོ་ག་ཤུདྡྷོ སོགས། ཡེ་ཤེས་ཀྱི་འཁོར་ལོ་རང་གི་ལུས་ལ་བསྡུ་སྨོན་ལམ་དང་བཀྲ་ཤིས་བྱའོ། །ལྔ་པ་ཁ་ཟས་ཀྱི་རྣལ་འབྱོར་དང༌། དྲུག་པ་བྱ་སྤྱོད་ཀྱི་རྣལ་འབྱོར་དང༌། བདུན་པ་རྗེས་ཆགས་ཀྱི་རྣལ་འབྱོར་དང༌། བརྒྱད་པ་གཉིད་ཀྱི་རྣལ་འབྱོར་དང༌། དགུ་པ་ལྡང་བའི་རྣལ་འབྱོར་དང༌། བཅུ་པ་ཁྲུས་ཀྱི་རྣལ་འབྱོར་རྣམས་ཀྱང་ཕལ་ཆེར་སྤྱི་དང་མཚུངས་ཤིང༌། ཁྱད་ཆོས་ཅི་རིགས་པ་དང་བཅས་པ་ཡང་གཞུང་དང་མན་ངག་གི་རིམ་པས་རྟོགས་པར་བྱའོ། །འདིར་སྨྲས་པ། བརྟུལ་ཞུགས་ཞལ་སྔའི་བཞེད་དོན་ཤིན་ཏུ་རྟོགས་པར་དཀའ། །དེ་ཕྱིར་བློ་དམན་བདག་ལྟས་གསལ་བར་མི་ནུས་མོད། །བླ་མའི་མན་ངག་ཀུན་རིག་བྱིན་རླབས་ཞུགས་གྱུར་པས། །རྒྱུད་གཞུང་དོན་ལ་ངེས་པ་རྙེད་དེ་འདི་བྲིས་སོ། །མངོན་ཤེས་མེད་པར་རྒྱུད་དོན་རྒྱ་མཚོའི་སྤངས་རྣམས་ལ། །གཞུང་བཟང་འདི་དོན་ས་འོག་གནས་པའི་གཏེར་བཞིན་གྱུར། །རྒྱུད་རིམ་མན་ངག་ཤེས་པའི་ལྟས་ན་གསལ་འགྱུར་མོད། །འོན་ཀྱང་རྡོ་རྗེ་ཐེག་འདི་བྱིན་རླབས་རྗེས་སུ་འབྲངས། །འདི་ལས་ལེགས་བྱས་ཅི་ཡོད་པ། །དེས་ནི་འགྲོ་ཀུན་དོན་གཉིས་མཆོག། དཔལ་ལྡན་ཧེ་རུ་ཀར་གྱུར་ནས། །ཆོས་དབྱིངས་རྒྱ་མཚོར་མཉམ་གྱུར་ཅིག །ཅེས་པ་འདི་ཡང་རྒྱལ་ཁམས་པ་ཏྭ་ར་ནཱ་ཐས་གྲུབ་ཆེན་ནག་པོ་སྤྱོད་པའི་གཞུང་གི་དགོངས་དོན་ཇི་ལྟ་བ་བཞིན་དུ་ངེས་པར་བརྗོད་པ་སྟེ་རང་ལོ་ཞེ་གཅིག་པ་ལ་རི་ཁྲོད་ཇོ་ནང་དུའོ། །བཀྲ་ཤིས། དགེའོ། །ཤུམྦྷ། །
ཤོག་སྟོང་།