དཔལ་འཁོར་ལོ་སྡོམ་པའི་དཀྱིལ་ཆོག་ནག་པོ་ལུགས་ཀྱི་གསལ་བྱེད་བདེ་བ་ཆེན་པོའི་ཆར་ཡངས།
དཔལ་འཁོར་ལོ་སྡོམ་པའི་དཀྱིལ་ཆོག་ནག་པོ་ལུགས་ཀྱི་གསལ་བྱེད་བདེ་བ་ཆེན་པོའི་ཆར་ཡངས་བཞུགས།
ཨོཾ་སྭ་སྟི། དཔལ་འཁོར་ལོ་སྡོམ་པའི་དཀྱིལ་འཁོར་གྱི་ཆོ་ག་སློབ་དཔོན་ཆེན་པོ་སྤྱོད་པ་པའི་ལུགས་ཀྱི་ལག་ལེན་གསལ་བྱེད་བདེ་བ་ཆེན་པོའི་ཆར་ཡངས་ཞེས་བྱ་བ། བླ་མ་དང་དཔལ་ཧེ་རུ་ཀ་ལ་ཕྱག་འཚལ་ལོ། །དཔལ་ལྡན་ལྷན་ཅིག་སྐྱེས་པའི་གཞལ་མེད་ཁང་ན་མཆོག་ཏུ་དགའ་བའི་འབར་འཕྲེང་མེ་ཆེན་རྟག་ཏུ་འཁྲུགས། །མ་ལུས་བདུད་སྡེའི་སྙིང་ཁྲག་རྒྱ་མཚོ་ཞལ་དུ་རྔུབས་ཤིང་དྲག་པོ་སྡེར་བཅས་རྡུལ་ཕྲན་ཕུང་པོར་བཤིག །ཞིང་གི་རྡུལ་སྙེད་རྡོ་རྗེ་མཁའ་འགྲོ་མ་ཚོགས་ཀྱིས་བསྐོར་བདེ་ཆེན་རྩེ་དགའ་བྱེད་པའི་རོལ་པ་འཛིན། །བདག་མེད་མི་ཟད་དུར་ཁྲོད་ཆེན་པོར་ཤེས་རབ་མཚན་རྒྱུའི་ཚོགས་པས་ལེགས་བཏུད་ཧེ་རུ་ཀ་དཔལ་ལ་ཕྱག་འཚལ། །གང་ཞིག་སྒོམས་ན་མཆོག་དང་ཐུན་མོང་གི །དངོས་གྲུབ་ཚེ་འདི་ཉིད་ལ་འབད་མེད་པར། །འགྲུབ་འགྱུར་འདི་ལ་ངོ་མཚར་ཆེར་སྐྱེས་ནས། །བློ་རྨོངས་བདག་ཀྱང་གནས་འདིར་རྩོལ་བར་གྱུར། །ནག་པོ་སྤྱོད་པའི་བཞེད་གཞུང་རྡོ་རྗེའི་ཚིག ། གྲུབ་པའི་གནས་ཐོབ་བྱེ་བས་མངོན་སྒྲོད་པ། །ལམ་འདི་མ་ནོར་གསལ་བར་རྟོགས་པ་འགའ། །དུས་མཐར་
འབྱུང་བ་འདི་ཡང་རྒྱལ་བའི་མཐུ། །འགྲེལ་བཤད་འཁྱམ་པོ་བལྟས་པའི་བློ་གྲོས་ཀྱིས། །གྲུབ་པའི་ཐུགས་བཅུད་ལོངས་པ་ག་ལ་ཞིག །རྒྱ་གཞུང་ཡིན་ཞེས་པཎ་ཆུང་འགའ་ཞིག་གི། གཞུང་ལ་མཆོག་འཛིན་བྱེད་པའང་བྱིས་པའི་ཚུལ། །བླུན་པོ་རང་གི་དེ་ཉིད་རྟོན་པ་ལ། །ཟབ་དོན་མཐར་ཐུག་ཡིན་ཞེས་སྐལ་དམན་འཁྲུལ། །གྲུབ་པའི་དགོངས་བཞེད་རྡོ་རྗེ་འཆང་གི་ལམ། །སྨིན་བྱེད་དབང་གི་ཆུ་བོ་འདི་ན་ཀོ །དེ་ལ་འདིར་དེ་ཁོ་ན་ཉིད་བཅུ་སྟེ། སྙེན་པ་གསོལ་གདབས་ས་ཆོག་དང༌། །སྟ་གོན་དཀྱིལ་འཁོར་དྲི་བ་དང༌། །དཀྱིལ་འཁོར་སྒྲུབ་དང་མཆོད་བདག་འཇུག །དབང་བསྐུར་རྗེས་ཀྱི་བྱ་བའོ། །དེ་ལྟར་ན་སྔོན་དུ་བསྙེན་པའི་བྱ་བ། གསོལ་བ་གདབ་པའི་རིམ་པ། ས་གཞི་ལྷག་པར་གནས་པ། ལྷ་སློབ་སྟ་གོན་གནས་པ། གཟུགས་བརྙན་འདྲི་བའི་རྣམ་གཞག །དཀྱིལ་འཁོར་རྣམ་གསུམ་སྒྲུབ་པ་མཆོད་པ་རྒྱས་པའི་ཆོ་ག །འཇུག་ཅིང་དབང་བླང་བ། གཞུག་ཅིང་དབང་བསྐུར་བ། ཉེར་བསྡུ་རྗེས་ཀྱི་ལག་ལེན་ནོ། །དང་པོ་བསྙེན་པའི་བྱ་བ་ནི། མཚན་ཉིད་དང་ལྡན་པའི་སློབ་དཔོན་དུ་འགྱུར་བས་
དང་པོར་བདག་ཉིད་བྱིན་གྱིས་རླབས་པའི་དོན་དུ་རྩ་བའི་བསྙེན་པ་བྱ་སྟེ། ལྷའི་རྣལ་འབྱོར་ལ་ཅུང་ཟད་སེམས་བརྟན་པ་དང༌། རྣམ་པར་གཡེང་བ་སྤངས་པའི་སྒོ་ནས། ཇི་སྐད་དུ་མངོན་བརྗོད་ལས། སྔོན་དུ་བསྙེན་པ་བྱ་བ་ནི། །ཆོ་ག་བཞིན་དུ་འབུམ་དུ་བཟླ། །འཁོར་ལོའི་གསང་སྔགས་འབུམ་བཟླས་ཞིང༌། །གཞན་ནི་ཁྲི་རུ་བཟླས་པར་བྱ། །ཞེས་གསུངས་ཤིང༌། རྒྱུད་གཞན་ལས་ཀྱང་དེ་ལྟར་གསུངས་པ་དང་དབང་པོ་རྣོན་པོས་ཁྲི་ཕྲག་གིས་ཀྱང་འགྲུབ་པར་འགྱུར་ལ། བཞི་འགྱུར་གྱི་བསྙེན་པ་ལན་གསུམ་རྩོམ་པ་སོགས་བྱ་ཞིང༌། ཡེ་ཤེས་འབེབས་པའི་སྔགས་གཉིས་ཀྱང་སྔ་མའི་བཅུ་ཆ་བཟླ་སྟེ། བཟླས་པའི་བཅུ་ཆ་སྦྱིན་སྲེག་ཀྱང་བྱའོ། །ད་ལྟར་རྩོད་པའི་དུས་ཀྱི་ཐ་མ་སྟེ། གནས་སྐབས་འདི་དག་ཏུ་ཡང་བྱེ་བའམ་བྱེ་བ་ལྔ་བཟླས་ཤིང༌། སྦྱིན་སྲེག་འབུམ་ཕྲག་བཅུ་བྱས་པས་ནི། ངེས་པར་བྱིན་གྱིས་བརླབས་པས་ནུས་པ་ཐོབ་པར་འགྱུར་རོ། །ཕྱིས་སློབ་མ་ལ་དབང་བསྐུར་བའི་དུས་ན། ལྷ་ལ་གནང་བ་ཞུ་བའི་དོན་གྱི་བསྙེན་པ་ལ་ནི། གཙོ་བོ་ཡབ་ཡུམ་གྱི་སྙིང་པོ་ཁྲི་ཕྲག་གསུམ། འཁོར་ལོ་གསུམ་ལ་ཁྲི་ཕྲག་གཉིས་ཏེ། མ་མོ་བཅུ་གཉིས་ལ་ལྔ་སྟོང་ལྔ་བརྒྱ་རེ་བཟླ་བ་རྒྱས་པ་དང༌། དེ་ལས་འཁོར་ལོ་གསུམ་གྱི་བཟླས་པ་སྤངས་པའི་འབྲིང་པོ་དང༌། གཙོ་བོ་ཡབ་ཡུམ་ཁོ་ན་བཟླས་པ་བསྡུས་པའོ། །དེ་དག་ཏུ་གཏོར་མ་དང་མཆོད་པ་ཡང་ནས་ཡང་དུ་ཕུལ་ཏེ། སློབ་མའི་དོན་དུ་གསོལ་བ་བཏབ་པས། རྨི་ལམ་ལ་སོགས་པར་སྣང་བ་རྙེད་པར་འགྱུར་རོ། །གནང་བ་ཐོབ་ན་ཡེ་ཤེས་དབབ་པའི་རྫས་བྱིན་གྱིས་བརླབ་པའི་བསྙེན་པ་ཡང་བྱའོ། །གཉིས་པ་གསོལ་བ་གདབ་པའི་རིམ་པ་ནི་སློབ་མས་མཎྜལ་ཕུལ་ཏེ། རྡོ་རྗེ་འཛིན་པ་བདག་ལ་དགོངས་སུ་གསོལ། ཡོན་ཏན་ཐམས་ཅད་འབྱུང་བའི་གནས། །ཐབས་དང་ཤེས་རབ་བདག་ཉིད་ཅན། །སྟོན་པའི་
བསྟན་པ་ལེགས་གནས་པ། །བདེ་མཆོག་ཆོ་ག་བཤད་དུ་གསོལ། །ཞེས་ལན་གསུམ་གསོལ་བཏབ། སློབ་དཔོན་གྱིས། འཁོར་ལོ་མཆོད་པའི་རིམ་ཇི་བཞིན། ཁྱོད་ཀྱི་ཐམས་ཅད་འབྱོར་གྱུར་རམ། །རྣལ་འབྱོར་མ་དང་རྣལ་འབྱོར་པ། །གུས་པས་དགའ་བར་བྱེད་ནུས་སམ། ཞེས་དྲིས་པ་ལ། འབྱོར་གྱུར་ཏེ། ཞེས་དང༌། བྱེད་ནུས་སོ། །ཞེས་ལན་གདབ་བོ། ཡང་འདི་སྐད་དུ། དམ་ཚིག་སྐྱོང་ཞིང་བརྟན་བྱེད་པ། །བུ་ཁྱོད་ཀྱིས་ནི་སྤྲོ་གྱུར་ཏམ། ཞེས་པ་ལ། བདག་ནི་རབ་ཏུ་སྤྲོ་གྱུར་ཏོ། །ཞེས་ལན་བཏབ་བོ། སྐབས་འདིར་སློབ་མ་ལ་བགེགས་སྦྱང་བ་དང༌། སྡིག་པ་སྦྱངས་པ་བྱས་པའི་རྗེས་སུ་སྒྲུབ་ཐབས་ནས་འབྱུང་བ་ལྟར་སྲུང་འཁོར་སྒོམ། ཞལ་བཞི་པ་བཟླས་པའི་སྲུང་སྐུད་མགུལ་བར་བཏགས། སྨོན་ལམ་དང་ཤིས་བརྗོད་བྱའོ། །གསུམ་པ་ས་གཞི་ལྷག་པར་གནས་པ་ལ། ས་གཞིའི་མཚན་ཉིད། ས་སྦྱང་བ། ས་བསླང་བ། ས་བཟུང་བ་སྟེ་བཞི་ལས། དང་པོ་ནི་སྤྱི་དང་འདྲ་ཞིང་གཞུང་དུའང་ལྟའོ། །གཉིས་པ་ནི། རྐོ་སྦྱང་དང་སྟེགས་བུ་བྱ་བ་ཡིན་ལ། དེ་ལྟར་མ་གྲུབ་ན། ཨོཾ་བྷུ་ཁཱཾ། ཞེས་སོགས་ཏེ་སྤྱི་དང་འདྲའོ། །གསུམ་པ་ནི། སྔོན་འགྲོ་གཏོར་མ་དང་གནས་དང་ཡོ་བྱད་བྱིན་གྱིས་རླབས་པ་སྔོན་དུ་བཏང་ནས། སྐྱབས་འགྲོ་སེམས་བསྐྱེད་ནས་བརྩམས་ཏེ། ཐུན་མཚམས་དག་པ་གསུམ་དྲན་པའི་བར་བདག་བསྐྱེད་སྒྲུབ་ཐབས་ལྟར་རྫོགས་པར་སྒོམ། ས་གནོན་གྱིས་ཕྱག་རྒྱས་སོར་མོ་དབུས་མ་གསུམ་ས་ལ་རེག་སྟེ། ཌཱཀྐི་ནི་ཧཱུཾ་ཛ་ཨོཾ་ཧཾ། ལན་གསུམ། ཧཾ་གི་སྒྲ་དང་ཧཱུཾ་གི་འོད་ཀྱིས་བསྐུལ་ནས། ས་འོག་ནས་སའི་ལྷ་མོ་འཁོར་དང་བཅས་པ་བྱུང༌། ཚོམ་བུའི་སྟེང་དུ་
བྱོན་པ་ནི། སའི་ལྷ་མོ་གསེར་གྱི་མདོག་ཅན་ཞི་བའི་ཉམས་དང་ལྡན་པ། ཕྱག་གཉིས་ཀྱི་བདུད་རྩིས་གང་བའི་རིན་པོ་ཆེའི་བུམ་པ་བསྣམས་པ། རྒྱན་དང་ན་བཟའ་དཀར་པོ་ཅན། ཀྱེ་རིག་པ་འཛིན་པ་བདག་གིས་དཀྱིལ་འཁོར་གྱི་ལས་ཅི་བགྱི་བ་བཀའ་སྩལ་དུ་གསོལ། ཞེས་གསུངས་པར་གྱུར། བདག་བསྐྱེད་ལྟར་མཆོད་པ་བྱིན་གྱིས་རླབས། ཨོཾ་པྲཾ་ཐི་ཝཱི་དེ་ཝཱི་བྷྱཿ ཨརྒྷཾ་པྲ་ཏི་ཙྪ་སྭཱཧཱ། མཚན་སྔགས་ཏེ་སྔོན་དུ་འགྲོ་བའི། པཱ་དྱཾ། པུཥྤེ། དྷུ་པེ། ཨཱ་ལོ་ཀེ། གནྡྷེ། ནཻ་ཝི་དྱ། ཤཔྟ། གྷནྜེ། སོགས་རོལ་མོ། གཏོར་མ། སུམྦྷས་བསངས། སྭ་བྷཱ་ཝས་སྦྱངས། སྟོང་པའི་ངང་ལས་ཨཱ་ལས་ཀ་པཱ་ལ་ཡངས་ཤིང་རྒྱ་ཆེ་བའི་ནང་དུ། ཤ་ལྔ་བདུད་རྩི་ལྔ་ཞུ་བ་ལས་བྱུང་བའི་གཏོར་མ་ཡེ་ཤེས་ཀྱི་བདུད་རྩིའི་རྒྱ་མཚོར་གྱུར། ཨོཾ་ཨཱཿཧཱུཾ་ཧ་ཧོ་ཧྲཱིཿ ཨོཾ་པྲི་ཐི་ཝཱི་དེ་ཝཱི་བྷྱཿ ན་མཿསརྦ་ཏ་ཐཱ་ག་ཏ་བྷྱོཿབི་ཤྭ་མུ་ཁེ་བྷྱཿསརྦ་ཐཱ་ཁཾ་ཨུད་ག་ཏེ། སྥ་ར་ཎ་ཨི་མཾ་ག་ག་ན་ཁཾ། གྲྀཧྞ་དཾ་བ་ལིཾ་ཏ་ཡེ་སྭཱཧཱ། ལན་གསུམ། ཨོཾ་ཚུར་བྱོན་ཚུར་བྱོན་ས་ཡི་ནི། །ལྷ་མོ་ཆེན་མོ་འཇིག་རྟེན་ཡུམ། །རིན་ཆེན་ཀུན་གྱིས་རབ་གང་མ། །བཟང་པོའི་རྒྱན་གྱིས་རྣམ་བརྒྱན་མ། །དོ་ཤལ་རྐང་གདུབ་སྒྲ་ལྡན་མ། །རྡོ་རྗེ་སེམས་དཔའ་རབ་མཆོད་མ། །མཆོད་གཏོར་འདི་དག་མཆོད་ནས་སུ། །དཀྱིལ་འཁོར་ལས་ནི་ལེགས་གྲུབ་མཛོད། །སྐྱོབ་པ་སངས་རྒྱས་ཐམས་ཅད་ཀྱི། །སྤྱོད་པའི་ཚུལ་དང་ཁྱད་པར་གྱིས། །ས་དང་ཕ་རོལ་ཕྱིན་པ་ལ། །ལྷ་མོ་
ཁྱོད་ནི་དཔང་དུ་གསོལ། །ཧེ་རུ་ཀ་དཔལ་དཔའ་བོ་ཡི། །ཇི་ལྟར་བདུད་ཀྱི་སྟོབས་བཅོམ་པ། །དེ་བཞིན་བདག་གིས་བདུད་སྡེ་ལས། །རྒྱལ་བར་བྱས་ནས་དཀྱིལ་འཁོར་བྲི། ལན་གསུམ། སའི་ལྷ་མོ་འཁོར་དང་བཅས་པ་རྣམས་མཆོད་གཏོར་དམ་པ་འདིས་ཚིམ་པར་མཛོད་ལ། བདག་གི་བསྙེན་པ་རྫོགས་པའི་དཔང་པོ་མཛད་ཅིང༌། དཀྱིལ་འཁོར་འདྲི་བའི་དོན་དུ་སའི་ཕྱོགས་འདི་བདག་ལ་གནང་བར་མཛད་དུ་གསོལ། ཀྱེ་རིག་པ་འཛིན་པ་ས་གཞི་བགེགས་མེད་ཅིང་དག་པར་བྱ་བའི་ལས་ཅི་བདེ་བར་མཛོད་ཅིག ཨོཾ་པྲི་ཐི་ཝཱི་དེ་ཝཱི་བྷྱཿ ཨརྒྷཾ་པྲ་ཏཱིཙྪ་སྭཱཧཱ། སའི་ལྷ་མོ་སླར་ཡང་ས་དེ་ཉིད་ལ་ཐིམ་པར་གྱུར། བཞི་པ་ནི། བདག་ཉིད་དཔལ་ཧེ་རུ་ཀ ཐུགས་དམིགས་པ་མེད་པའི་སྙིང་རྗེ་ཆེན་པོ། བགེགས་དང་ལོག་པར་འདྲེན་པ་དང༌། བདུད་ཀྱི་སྡེ་ལ་སོགས་པ་སྡང་བ་དང་གདུག་པ་ཅན་དང་གདུལ་དཀའ་བའི་སེམས་ཅན་རྣམས་རབ་ཏུ་སྡིགས་པར་མཛད་པ་རབ་ཏུ་འཁྲུགས་ཤིང་ཆེར་ཁྲོས་ལ་བཞད་པའི་ཉམས་ཅན། སྤྲུལ་པའི་ཕོ་ཉ་དཔག་ཏུ་མེད་པ་སྤྲོ་བ་དང་བཅས་པར་གྱུར། མིག་གཡས་གཡོན་མ་དང་ཊ་ལས་ཉི་མ་དང་ཟླ་བར་གྱུར། མིག་འབྲས་ཧཱུཾ་ལས་རྡོ་རྗེ་ནག་པོ་ཁྲོ་བོའི་ཚོགས་ཀྱི་འོད་ཟེར་འཕྲོ་བ་དང༌། རྐང་མཐིལ་གཉིས་སུ་ཨཱཿལས་སྣ་ཚོགས་རྡོ་རྗེ་འོད་ཟེར་འཕྲོ་བའོ། །བ་ཛྲ་དྲིཥྟ་མ་ཊ། རྡོ་རྗེ་ལྟ་བས་གཡས་གཡོན་དུ་བསྐོས་ཏེ་བལྟས་པས་
བགེགས་བསྐྲད། དཀྱིལ་འཁོར་གྱི་དབུས་སུ་འགྱིང་བ་དང་བཅས་པས་འདི་སྐད་ཅེས། སའི་ཕྱོགས་འདིར་སེམས་ཅན་གྱི་དོན་རྩོམ་གྱི། ལྷ་དང་ཀླུ་དང་གནོད་སྦྱིན་དང་དྲི་ཟ་དངོ་སྲིན་པོ་དང་སྲིན་མོ་ལ་སོགས་པ། གང་དག་གནས་པའི་སའི་བདག་པོ་མྱུར་དུ་སོང་ཤིག །འདིར་དཔལ་ཧེ་རུ་ཀའི་བཀའ་ནོས་ལ་མྱུར་བ་ཉིད་སོང་ཤིག །གང་དག་མི་འགྲོ་བ་དེ་ལ་ངའི་ཡེ་ཤེས་ཀྱི་རྡོ་རྗེ་དང་ཁ་ཊྭཾ་ག་འདིས། སྤྱི་བོ་ནས་རྣམ་པ་བརྒྱར་འགས་པར་བྱའོ། །ལན་གསུམ། རེ་རེའིམཐར་སུམྦྷ་བཟླས་ཤིང༌། འབུད་དཀྲོལ་བྱ། ཉུང་དཀར་གྱིས་ས་གཞི་ལ་གཏོར་རོ། །དེ་ནས་ཧཱུཾ་གླུར་ལེན་ཞིང་དབང་ལྡན་དུ་སོང་ལ། རྡོ་རྗེ་རྩེ་གཅིག་པ་དང༌། རྩེ་གསུམ་པ་དང༌། རྩེ་ལྔ་པའི་འགྲོས་ཀྱིས་བསྐོར་བ་དང༌། རོལ་པའི་སྐྱོང་བ་དང་བསྟུན་ནས། དབུས་སུ་སྣ་ཚོགས་རྡོ་རྗེ་འབྲི་ཤིང་མཉམ་པའི་རྐང་སྟབས་དང༌། ཤར་དུ་གཡོན་རྐྱང༌། བྱང་དུ་ས་ག། ནུབ་ཏུ་ཟླུམ་པོ། ལྷོར་གཡས་བརྐྱང་རྣམས་ཐབས་ཤེས་ཀྱི་དབྱེ་བས་བརྒྱད་དམ་བཅུར་འགྱུར་བ་དང༌། གྱེན་དུ་འདེགས་པ་དང༌། ཐུར་དུ་སྐྱོད་པ་དང༌། ཐད་དཀར་སྐྱོད་པ་གསུམ་གྱིས་བསྐོར་ཞིང༌། གཡས་དང་གཡོན་དུ་བསྐོར་བ་དང༌། འཁྱུད་དང་ཀུ་ཙ་ཉེད་པ་དང༌། ན་ག་གྲ་ཧ་ད་ན་ད་ཀ་དང༌། ཙཱུ་ཤ་ན་དང་སྐྲ་གྲོལ་བ། ཞེས་བརྒྱད་དང༌། རྐང་པ་སྐྱོད་དང་ལག་པ་སྐྱོད། །སྨིན་མ་ལྡེག་དང་རབ་རྒྱས་བྲང༌། །ཅུང་ཟད་ངོ་ཚའི་ཟུར་མིག་དང༌། །རླ་རྒྱུས་བལྟ་ན་སྡུག་པ་དང༌། །མིག་ཡངས་གར་ནི་བྱེད་འགྱུར་ཞིང༌། །ཁ་ཡི་པདྨ་འཛུམ་པ་དང༌། །ཅུང་ཟད་དམར་བའི་མཆེ་བ་འཆང༌། །ཀུན་ད་ལྟར་དཀར་སོ་ཡི་འཕྲེང༌། །ཞེས་པ་ལྟར་གར་གྱི་རྣམ་པར་རོལ་པ་རྣམས་བྱ་ཞིང༌། སྟངས་སྟབས་ཀྱི་སྤྲོས་པ་ལ་མི་དགའ་ན། ཇི་ལྟར་རིགས་པའི་སྐོར་བ་གསུམ་བྱའོ། །སྲུང་བ་ནི།
དངོས་སུ་ཕུར་བུ་མེད་ན་ཡིད་ཀྱིས་བཏབ་པས་ཀྱང་རུང་ལ། དངོས་སུ་ཡོད་ན། ཕུར་པ་བཅུ་འམ་ལྔ་གདབ་པ་གང་རིགས་པས་བཅུའི་ཕྱོགས་ལ་བསངས་སྦྱངས། སྟོང་པའི་ངང་ལས། སྟེང་དང་ཤར་གྱི་ཕུར་བུ་ཁྭ་གདོང་མ་སྔོ་སེར། བྱང་གི་ཕུར་བུ་འུག་གདོང་མ་ལྗང་སེར། ནུབ་དང་འོག་གི་ཕུར་བུ་ཁྱི་གདོང་མ་དམར་སེར། ཞེས་པ་ནས། བྱང་ཤར་གྱི་ཕུར་བུ་གཤིན་རྗེ་འཇོམ་པ་གཡས་ལྗང་གཡོན་སྔོ་བ། ཐམས་ཅད་ཀྱང་དྲག་མོ་ཆེན་མོ་གྲི་གུག་དང་ཐོད་པ་འཛིན་པ། ལྟེ་བ་མན་ཆད་ཕུར་བུའི་དབྱིབས་ཅན་ནོ། །རང་འདྲའི་ཡེ་ཤེས་སེམས་དཔའི་ཕཻཾ་ཛཿཧཱུཾ་བཾ་ཧོཿ ཨརྒྷཾ་ནས་ཤཔྟའི་བར་གྱིས་མཆོད། སུམྦྷ་མང་དུ་བཟླའོ། །མཐར་ཡི་གེ་བརྒྱ་པ་དང་བརྟན་བཞུགས་བྱ། དེ་ནས་ཞལ་བཞི་པའི་སྔགས་ཚར་གཅིག་བརྗོད། སྔགས་ཀྱི་འོད་ཟེར་ལས་བྱུང་བའི་སྒོ་མཚམས་མ་བརྒྱད་སྤྲུལ། ཁྭ་གདོང་མ་ལས་སྟེང་དུ་ཁཱ་གདོང་མ། ཞེས་པ་ནས། མི་བསྐྱོད་པའི་ཞིང་དུ་སྐྱེས་པར་གྱུར། གྱི་བར་སྒྲུབ་ཐབས་བཞིན་བརྗོད་པ་ལས། ཕུར་གདབ་དང་ཕུར་བུ་བརྡུངས་བའི་སྔགས་ཚར་བཅུ་བཅུ་བརྗོད། ཕུར་བུ་ཡོད་ན་དངོས་སུ་ཡང་གདབ་བརྡུང་བྱའོ། །ཨོཾ་བཛྲ་ཨཱཿཧཱུཾ། རྡོ་རྗེ་སྡམས་པ་ས་ལ་བཞགཨཿ ཡིག་ལས་སྐྱེས་པའི་ས་གཞི་སྣ་ཚོགས་རྡོ་རྗེར་གྱུར། ཨོཾ་བཛྲ་དྲིཥྟི་མ་ཊ། རྡོ་རྗེའི་ལྟ་བས་གཡས་གཡོན་དུ་སྐོར་ཞིང་ལྟས་པས། རྡོ་རྗེའི་བླ་བྲེ་གུར་མདའི་དྲ་བ་མེ་དཔུང་འབར་བ་དང་བཅས་པར་གྱུར། ཨོཾ་མེ་དྷི་ནི་བཛྲི་བྷ་ཝ་བནྡྷ་ཧཱུཾ། སོགས། སྔགས་དྲུག་པོ་ཚར་གསུམ་གསུམ་བརྗོད། སུམ་ཚན་རེ་རེའི་མཐར།
ཨོཾ་ཧྲཱིཿཧ་ཧ་ཧཱུཾ་ཧཱུཾ་ཕཊ། ལན་བཅུའམ་བཞི་ལ་སོགས་པ་བརྗོད། ཕུར་བུ་དང་དེ་སྲུང་བའི་ཕོ་ཉ་རྣམས་ལ། ཨརྒྷ་ལ་སོགས་པས་མཆོད། ཕུར་བུ་ལ་དྲིའི་བྱུགས་པས་བྱུགས་མེ་ཏོག་འཕྲེང་བ་དམར་པོ་དང་མགུལ་བཅིངས་དམར་པོ་དང༌། ཡུངས་དཀར་གྱི་ཐུམ་བུ་རྣམས་མགུལ་དུ་བཏགས་གུ་གུལ་གྱིས་བདུགས་ཏེ། ཨོཾ་བཛྲ་གནྡྷེ་ཨཱཿཧཱུཾ། དེ་བཞིན་དུ། པུཥྤེ་མཱ་ལི། བསྟྲ། སརྒ་པ། ཨོཾ་བཛྲ་དྷཱུ་པེ་ཨཱཿཧཱུཾ། ཇི་སྲིད་དཀྱིལ་འཁོར་ཆེན་པོའི་བྱ་བ་མཐར་མ་ཕྱིན་གྱི་བར་དུ་བགེགས་ཐམས་ཅད་བཟློག་པའི་འཕྲིན་ལས་མཛོད་ཅིག ཅེས་གསོལ་བ་བཏབ། དེ་དག་གི་མཐར་སྨོན་ལམ་དང་བཀྲ་ཤིས་བྱའོ། །ཕུར་བུ་ལྔ་པའི་ཕྱོགས་ལ་ཧཱུཾ་ལྔ་ལས། དབུས་ཀྱི་ཕུར་བུ་གནོད་མཛེས་ནག་པོ་རྡོ་རྗེ་དང་དྲིལ་བུ་འཛིན་པ། ཨོཾ་སུམྦྷ་ར་ཛ་བཛྲ་ཀྲོ་དྷ་མཎྜལ་ལ་ཙཀྲ་རཀྵ་རཀྵ་ཧཱུཾ་ཧཱུཾ་ཕཊ། ཤར་ལྷོའི་ཕུར་བུ་མི་གཡོ་བ་ནག་པོ་རལ་གྲི་དང་སྡིགས་མཛུབ་མཛད་པ། ཨོཾ་ཀ་ནཱི་དྷུ་ནི་བཛྲ་ཀྲོ་དྷ་མཎྜ་ལ་ཙཀྲ་རཀྵ་རཀྵ་ཧཱུཾ་ཧཱུཾ་ཕཊ། ལྷོ་ནུབ་ཀྱི་ཕུར་བུ་དབྱུག་སྔོན་ཅན་དབྱུག་པ་སྔོན་པོ་དང་སྡིགས་མཛུབ་མཛད་པ། ཨོཾ་ནཱི་ལ་དཎྜ་བཛྲ་ཀྲོ་དྷཱ་མཎྜལ་ཙཀྲ་རཀྵ་རཀྵ་ཧཱུཾ་ཧཱུཾ་ཕཊ། ནུབ་བྱང་གི་ཕུར་བུ་རྟ་མགྲིན་དམར་པོ་དབྱུག་པ་དང་སྡིགས་མཛུབ་མཛད་པ། ཨོཾ་ཧ་ཡ་གྲཱྀ་བ་བཛྲ་ཀྲོ་དྷ་མཎྜ་ལ་ཙཀྲ་རཀྵ་རཀྵ་ཧཱུཾ་ཧཱུཾ་ཕཊ། བྱང་ཤར་གྱི་ཕུར་བུ་བདུད་རྩི་འཁྱིལ་བ་ནག་པོ་རྡོ་རྗེ་དང་དྲིལ་བུ་འཛིན་པ། ཨོཾ་ཨ་མྲྀ་ཏ་ཀུཌ་ལི་བཛྲ་ཀྲོ་དྷ་མཎྜ་ལ་ཙཀྲ་རཀྵ་རཀྵ་ཧཱུཾ་ཧཱུཾ་ཕཊ། ཐམས་ཅད་ཀྱང་ལྟེ་བ་མན་ཆད་ཕུར་བུ་རྩེ་གཅིག་པ་འབར་བའི་རྣམ་
པས། བགེགས་ཐམས་ཅད་འཇོམས་པར་མཛད་པ་ཁྲོ་བོའི་རྒྱན་དང་ཆ་ལུགས་ཡོངས་སུ་རྫོགས་པའོ། །ཞེས་བསྐྱེད་པ་དང༌། ཕུར་གདབ་དངོས་ཀྱི་སྐབས། མཚམས་མ་བཞི་པོས་ཕུར་བུས་གདབ་པ་དང༌། སྒོ་མ་བཞི་པོས་ཐོ་བས་བརྡུངས་པར་བསམ། དབུས་ཀྱི་ཕུར་བུ་ནི་སྟེགས་བུའི་དཀྱིལ་འཁོར་གྱི་སའི་ནང་ངམ། ཁང་སྟེང་དུ་དཀྱིལ་འཁོར་འབྲི་ན་དེའི་ཐད་ཀའི་འོག་ཏུ་འདེབས་པ་ཡིན་ཀྱང༌། ཕལ་ཆེར་དབུས་སུ་བཏབ་པར་མོས་ནས། དཀྱིལ་འཁོར་གྱི་ཤར་ཕྱོགས་ཐག་ཉེ་བར་འདེབས། སྟེང་འོག་གི་བགེགས་ལ་དབུས་ཀྱི་ཕུར་བུས་འདེབས་ཤིང༌། ཤར་དང་ཤར་ལྷོའི་བགེགས་སྡོམས་ནས་ཤར་ལྷོར་ཕུར་བུ་འདེབས་པ་སོགས་ཡིན་པས། ཧཱུཾ་ལས་བྱུང་བའི་ཁྲོན་པ་ལྔར་གྱུར། ཞེས་འདོན་པ་སྤོ་དགོས་ལ། ཆོ་ག་ལྷག་མ་ཐམས་ཅད་སྔ་མ་བཞིན་ནོ། །གྲུབ་ཆེན་གྱི་དཀྱིལ་ཆོག་ལས་ཕུར་གདབ་ཙམ་ཞིག་གསུང་པ་མ་གཏོགས་ཕུར་བུའི་ལྷ་གང་ཡིན་དངོས་སུ་མི་གསལ་ཡང་མཁའ་འགྲོ་མ་བརྒྱད་དོན་གྱི་ཐོབ་ལ། ཁྲོ་བོ་ལྔ་ནི་གཞུང་ཚིག་གི་དངོས་ཤུགས་གང་ལའང་མི་གསལ་མོད་སློབ་དཔོན་འདིའི་བཞེད་པའི་རྣམ་གྲངས་སུ་ཡོད་པའི་རྒྱུ་མཚན་གཞན་ཞིག་སྣང་ངོ༌། །བཞི་པ་ལྷ་སློབ་སྟ་གོན་གནས་པ་ལ། སྟ་གོན་གྱི་སྔ་རོལ་དུ་སྒྲུབ་དགོས་པའི་ཆོ་ག་དང༌། སྟ་གོན་དངོས་སོ། །དང་པོ་ནི་སྔོན་འགྲོ་གཏོར་མ། གནས་ཡོ་བྱིན་རླབས། ཞུ་འབུལ་དཀྱིལ་འཁོར་ཆེན་པོའི་ཏིང་ངེ་འཛིན་རྣམས་སོ། །དེ་ཡང་སྔོན་འགྲོ་གཏོར་མ། སུམྦྷས་བསངས། སྭ་བྷཱ་ཝས་སྦྱངས། ཨོཾ་ཨཱཿཧཱུཾ་ཧ་ཧོ་ཧྲཱིཿ ཞེས་བྱིན་གྱིས་རླབས། ཕཻཾ། ཞེས་མགྲོན་རྣམས་སྤྱན་དྲངས། ཨོཾ་ཁ་ཁ་ཁཱ་ཧི་ཁཱ་ཧི། ནས། བྷ་ཝཱནྟུ་ཧཱུཾ་ཧཱུཾ་ཕཊ་ཕཊ་སྭཱཧཱ། ལན་གསུམ། ཨརྒྷཾ་ནས། ཤཔྟའི་བར་གྱི་མཆོད། ལྷ་ཡི་ཚོགས་རྣམས་ནས། འདོད་པ་
ཀུན་གྲུབ་ཤོགདཔལ་ལྡན་བླ་མ་དམ་པ་རྣམས་ཀྱི་ཐུགས་ཀྱི་དགོངས་པ་ཁྱད་པར་ཅན་གོང་ནས་གོང་དུ་ཡོངས་སུ་རྫོགས་པའི་ཕྱིར་དང་འགྲོ་བ་ནམ་མཁའ་དང་མཉམ་པའི་སེམས་ཅན་ཐམས་ཅད་ཕྱག་རྒྱ་ཆེན་པོ་མཆོག་གི་དངོས་གྲུབ་ཀྱི་གོ་འཕང་ཐོབ་པར་བྱ་བའི་ཕྱིར། བཅོམ་ལྡན་འདས་དཔལ་འཁོར་ལོ་སྡོམ་པའི་དཀྱིལ་འཁོར་ཆེན་པོ་བཞེངས་སུ་གསོལ་ཏེ། བདག་ཉིད་འཇུག་ཅིང་དབང་བླང་བ་དང༌། སློབ་མ་གཞུག་ཅིང་དབང་བསྐུར་བར་འཚལ་ན། དཀར་པོའི་ཕྱོགས་ལ་མངོན་པར་དགའ་བའི་ཕྱོགས་སྐྱོང་བའི་སྲུང་མ་ལ་སོགས་པ་རྣམས་མཆོད་སྦྱིན་གྱི་གཏོར་མ་རྒྱ་ཆེན་པོ་འདི་བཞེས་ལ་ཇི་སྲིད་དཀྱིལ་འཁོར་ཆེན་པོའི་བྱ་བ་མཐར་མ་ཕྱིན་གྱི་བར་དུ་བགེགས་རྣམས་བཟློག་ཅིང་འདོད་པའི་དོན་ཐམས་ཅད་སྒྲུབ་པའི་འཕྲིན་ལས་མཛོད་ཅིག གང་དག་ནག་པོའི་ཕྱོགས་ལ་མངོན་པར་དགའ་བ་གསང་སྤྱོད་ལྟ་བར་མི་དབང་བ་ཐམས་ཅད་སའི་ཕྱོགས་འདིར་མ་གནས་པར་གཞན་དུ་སོང་ཞིག །སུམ་བྷ་བཟླས་དྲག་རོལ་བྱ་གཏོར་མ་ཕྱིར་དོར་རོ། །དེ་ནས་གནས་དང་ཡོ་བྱད་བྱིན་གྱིས་རླབས་པ་ནི། སུམ་བྷས་བསངས། སྭ་བྷ་ཝས་སྦྱངས། སྟོང་པའི་ངང་ལས་གནས་ཁང་ཧཱུཾ་ཡིག་ལས་བྱུང་བའི་སྲུང་འཁོར་གྱི་ནང་དུ། བྷྲུཾ་ལས་བྱུང་བའི་གཞལ་མེད་ཁང་གྲུ་བཞི་སྒོ་བཞི་རྟ་བབས་བཞིས་བརྒྱན་པ། མཚན་ཉིད་ཐམས་ཅད་ཡོངས་སུ་རྫོགས་པའི་དབུས་སུ། ཨ་ལས་ཡེ་ཤེས་ཀྱི་ཀ་པཱ་ལ་ཡངས་ཤིང་རྒྱ་ཆེ་བ་རྣམས་ཀྱི་ནང་དུ། ཨོཾ་ཨཱཿ
ཧཱུཾ་ཞུ་བ་ལས་བྱུང་བའི་ལྷ་རྫས་ལས་གྲུབ་པའི་མཆོད་ཡོན། ཞབས་བསིལ། མེ་ཏོག བདུག་སྤོས། མར་མེ། དྲི་ཆབ། ཞལ་ཟས། རོལ་མོ་ལ་སོགས་པའི་མཆོད་པ་རྣམས་རྒྱུ་འཇིག་རྟེན་དང་འཇིག་རྟེན་ལས་འདས་པའི་དགེ་བ་ལས་གྲུབ་པ། ངོ་བོ་བཟང་ཞིང་རྒྱ་ཆེ་བ། ཡུལ་ནམ་མཁའི་མཐས་ཁྱབ་པ། དུས་འཁོར་བ་ཇི་སྲིད་མ་སྟོངས་ཀྱི་བར་དུ། བླ་མ་དང་དཀྱིལ་འཁོར་གྱི་འཁོར་ལོའི་ལྷ་ཚོགས་རྣམས་དང༌། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་སྤྱན་ལམ་དུ་འབྱུང་ཞིང་རྒྱས་པར་གྱུར་ཅིག ཨོཾ་བཛྲ་ཨརྒྷཾ་སྭཱཧཱ། དེ་བཞིན་དུ། པཱདྱཾ། ཨོཾ་བཛྲ་པུཥྤེ་ཨཱཿཧཱུཾ། དེ་བཞིན་དུ་དྷཱུ་པེ། ཨཱ་ལོ་ཀེ གན་དྷེ། ནཻ་ཝེ་ཏེ། ཤཔྟ་ཨཱཿཧཱུཾ། ཨོཾ་སརྦ་བིད་པཱུ་ར་པཱུ་ར། སུ་ར་སུ་ར། ཨཱ་བརྟ་ཡ་ཨཱ་བརྟ་ཡ་ཧོ། ཨོཾ་བཛྲ་སྥཱ་ར་ཎ་ཁཾ། ཨོཾ་བཛྲ་གྷཎྜེ་ར་ཎི་ཏ། པྲ་ར་ཎི་ཏ། སཾ་པྲ་ར་ཎི་ཏ། སརྦ་བུདྡྷ་ཀྵེ་ཏྲ་པྲ་ཙཱ་ལི་ཏེ། པྲཱ་ཛྙཱ་པ་ར་མི་ཏ། ན་ད་སམ་བྷ་ཝེ་ཏ། བཛྲ་དྷརྨཱ་ཧྲི་ད་ཡ་ནི་སནྟོ་ཥ་ནི་ཧཱུཾ་ཧཱུཾ་ཧཱུཾ་ཧོ་ཧོ་ཧོ་ཨ་ཁཾ་སྭཱཧཱ། ཞེས་རོལ་མོ་བྱིན་འབེབས་ཀྱི་སྔགས་དང༌། གཞན་ཡང་མཆོད་པའི་སྤྲིན་གྱི་གཟུངས་ལ་སོགས་པ་ཅི་རིགས་པ་བཟླས་ཤིང་བྱིན་དབབ་བོ། །ཞུ་འབུལ་ནི། ཚོགས་པ་ཡོད་ན་ཚོགས་ཀྱི་གཙོ་བོ་ལ་གསོལ་བ་གདབ་པའི་དོན་ཡིན་པས་བྱས་ན་ལེགས་པར་འགྱུར་ཏེ། བྱེད་ཚུལ་ནི་སྤྱི་དང་འདྲའོ། །
དཀྱིལ་འཁོར་ཆེན་པོའི་ཏིང་ངེ་འཛིན་ནི། སྐྱབས་འགྲོ་ནས་བརྩམས་ཏེ། ཞིང་སྦྱོངས་དག་པ་གསུམ་གྱི་བར་དུ་བདག་བསྐྱེད་ཀྱི་རྣལ་འབྱོར་རྒྱས་པ་ཉིད་རྫོགས་པར་བསྒོམ་པ་ཡིན་ནོ། །གཉིས་པ་སྟ་གོན་དངོས་ལ། གོང་དུ་བཤད་པ་ལྟར་གྱིས་ཆོ་ག་བྱས་ཟིན་ན། སའི་ལྷ་མོའི་སྟ་གོན་ནི་མི་དགོས་ཏེ། གཞུང་ལས་མི་འབྱུང་བའི་ཕྱིར་རོ། །འོན་ཀྱང་རས་བྲིས་ལ་བརྟེན་པའི་ཕྱོགས་སམ། རྡུལ་ཚོན་ལ་བརྟེན་པ་ཡིན་ཀྱང་རུང་སྟེ། ས་ཆོག་མ་བྱས་ན་འདིར་བྱེད་དགོས་ཏེ། གཞན་རྣམས་གོང་དང་འདྲ་བ་ལས། གསོལ་གདབ་ཚིག་ལྷུག་པ་དེ་བོར། ཀྱེ་རིག་པ་འཛིན་པ་དཀྱིལ་འཁོར་གྱི་ལས་ཅི་བདེ་བར་མཛོད་ཅིག ཅེས་སྣང་བ་སྦྱིན་པར་བསམས་པ་ནི་ཁྱད་པར་རོ། དཀྱིལ་འཁོར་ཁང་པ་རྙིང་པར་རྡུལ་ཚོན་ལ་བརྟེན་པ་ལ་ཡང་ས་ཆོག་མེད་པའི་ཆོ་ག་ལ། གནས་གསར་རབ་རས་བྲིས་ལ་ཡང་ས་ཆོག་བྱུང་ན་ལེགས་ཏེ། དེ་ནི་ས་གཞི་ལ་དཀྱིལ་འཁོར་བྲི་བ་ཁོ་ནའི་ཕྱིར་མ་ཡིན་གྱི། ཕྱི་ནང་གི་བདུད་དང་བར་ཆད་གཞོམ་པའི་ཕྱིར་ཡིན་པས་སོ། །ཞེས་པ་ནི་བདག་གི་རྣམ་པར་རྟོག་པ་སྟེ་བོད་ཀྱི་བླ་མ་རྣམས་རས་བྲིས་ཀྱི་ཕྱོགས་ལ་ས་ཆོག་མི་བྱེད་ཅིང་ཕྱིས་བྱུང་མང་པོ་ཞིག་ནི་ལྷ་གནས་ཀྱང་མི་བྱེད་པར་སྣང་ངོ༌། །འདིར་སྟ་གོན་ནི་རྣམ་པ་གཉིས་ཏེ། ལྷའམ་དཀྱིལ་འཁོར་ལྷག་པར་གནས་པ་དང༌། སློབ་མ་ལྷག་པར་གནས་པའོ། །དང་པོ་ནི། ཤར་དང་སྟེང་གི་ཕུར་བུ་ཁཱ་གདོང་མ། ནས། ཕུར་བུའི་དབྱིབས་ཅན་དུ་གྱུར། ཨོཾ་བཛྲ་གནྡྷེ་ནས། བཟློག་པའི་འཕྲིན་ལས་མཛོད་ཅིག གི་བར་གོང་བཞིན་ནམ་ཡང་ཁྲོ་བོའི་ཕུར་བུ་ལྔ་པ་དང་ཡོད་ན། དབུས་ཀྱི་ཕུར་བུ་གནོད་མཛེས་ནག་པོ། ནས། ཡོངས་སུ་རྫོགས་པའོ། །ཨོཾ་བཛྲ་གནྡྷེ་ནས། མཛོད་ཅིག གི་བར་གོང་བཞིན་ནོ། །ཕུར་བུ་སྐྱེད་ཅིང་མཆོད་པ་ནི། ས་ཆོག་མ་བྱས་ན་ལྷ་སྟ་གོན་གྱི་གོང་དུ་ངེས་པར་བྱ་ལ། ས་ཆོག་
བྱས་ན་སླར་སྐྱེད་ཆོག་མི་དགོས་པར་གུ་གུལ་གྱིས་བདུགས་ཕྱི་མཆོད་ཅི་ནུས་རེ་ཕུལ་ནས་གསོལ་བ་བཏབ། གཏོར་བསྔོའི་ཞོར་ལ་གཏོར་མ་ཕུལ་བ་ཙམ་གྱིས་ཆོག་པར་མངོན་ནོ། །དེ་ནས་རྡུལ་ཚོན་གྱི་ཕྱོགས་ལ་ཐིག་རགས་པ་ཙམ་འོལ་སྤྱི་ཙམ་སྐམ་ཐིག་གི་ཚུལ་དུ་བཏབ་ལ། དྲི་བཟང་དང་ཁྲག་ཆེར་སྦྱར་བས། གཙོ་བོའི་གནས་སུ་གྲུ་བཞི་ཆེ་བ་དང༌། འཁོར་གྱི་གནས་སུ་ཟླུམ་པོ་ཆུང་བ་རེ་བྱུགས་དགོས་ཤིང༌། རས་བྲིས་ལ་ནི་སྟེགས་བུའམ་མཎྜལ་ལ་ཚོམ་བུ་བཀོད་པ་ཙམ་གྱིས་ཆོག་གོ །དེའི་མཐའ་མཆོད་གཏོར་གྱིས་སྐོར། པུ་ཛ་ཨོ་ཨ་གོ་རཱ་དེ་མཱ། ཀཱ་ཨོ་ཏྲི་ཀོ་ཀ་ལ་ཀ་ཧི། པྲི་གྲི་སཽ་སུ་ན་སི་མ་ཀུ། ཞེས་ལན་གསུམ་བརྗོད་སྐབས་རྡོ་རྗེ་སྡམས་པས་སྟེངས་ནས་ཁ་སྦུབ། ཡུལ་ཉི་ཤུ་རྩ་བཞི་དུར་ཁྲོད་བརྒྱད་དང་བཅས་པ་རང་བཞིན་གྱི་གྲུབ་པའི་ངོ་བོར་གྱུར། ལྷ་ཐམས་ཅད་ཀྱི་སྙིང་པོ་ཚར་གསུམ་གསུམ་དང༌། ཐོད་པ་བཞི་དུར་ཁྲོད་བརྒྱད་དང་བཅས་པ་ལ་དམིགས་ནས། ཨོཾ་ཨཱཿཧཱུཾ། ལན་སུམ་ཅུ་སོ་དྲུག་བརྗོད་དེ་ས་གཞི་བྱིན་རླབས་དང་ཚོམ་བུ་དགོད་པའི་ཆོ་གའོ། །དེ་ནས་དེ་རྣམས་སུམྦྷས་བསངས། སྭ་བྷཱ་ཝས་སྦྱངས། སྟོང་པའི་ངང་ལས་ཆོས་ཉིད་དེ་བཞིན་ཉིད་ཀྱི་ངོ་བོ། ནཱ་ད་ལས་བྱུང་བའི་ཧཱུཾ་ཡིག་ནམ་མཁར་གནས་པར་གྱུར། དེ་ལས་བྱུང་བའི་སྲུང་འཁོར་གཞལ་ཡས་ཁང་ཉི་ཟླ་དང་བཅས་པ་རིམ་གྱི་གྲུབ་པར་གྱུར་པ་ནི། འོག་ཏུ་པཾ་ལས་སྣ་ཚོགས་པདྨ། དེའི་སྟེང་དུ་རཾ་ལས་ཉི་མའི་དཀྱིལ་འཁོར་ལ། ཧཱུཾ་ལས་སྣ་ཚོགས་རྡོ་རྗེའི་རྭ་རྣམས༴ནས། བར་དུ་གཅོད་པ་ཐམས་ཅད་སྲུང་བར་མཛད་ཀྱི། བར་སྒྲུབས་ཐབས་བཞིན། སྲུང་བའི་འཁོར་ལོའི་ནང་དུ༴ ནས།
དེའི་དབུས་སུ་ལུང་གི་དཀྱིལ་འཁོར་སྔོན་པོ་ནས། ཐིག་ལེ་སེར་པོ་དང་བཅས་པ། དེའི་སྟེང་དུ། བྷྲུཾ་ལས་ཐར་པ་ཆེན་པོའི་གཞལ་ཡས་ཁང་པ་གྲུ་བཞི་པ། སྒོ་བཞི་པ། ནང་ནས་རིམ་པ་བཞིན་ནས། འཁོར་རྣམས་ལ་མི་རོའི་གདན་རྣམས་སུ་གྱུར། དབུས་ཀྱི་གདན་གྱི་སྟེང་དུ་གཡོན་བསྐོར་གྱི་ཨ་ཨཱ། ནས། མཉམ་པ་ཉིད་ཀྱི་ཡེ་ཤེས། དེ་གཉིས་ཀྱི་བར་དུ་ནམ་མཁའི་ཧཱུཾ་ཡིག་ཞུགས། ཧཱུཾ་དང་ཨཾ་ལས་ནས་ཆོས་ཀྱི་དབྱིངས་ཀྱི་ཡེ་ཤེས་ཀྱི་ངོ་བོ། ལྷ་སུམ་ཅུ་རྩ་བདུན་ཐོད་པ་བཞི་དང་བཅས་པ་སྐད་ཅིག་གིས་གྲུབ་པར་གྱུར་པ་ནི། དབུས་ཀྱི་གདན་གྱི་སྟེང་དུ་བཅོམ་ལྡན་འདས་དཔལ་ཧེ་རུ་ཀ་འཁོར་ལོ་བདེ་མཆོག་ནས། དབུས་ན་བཞུགས་པའོ། །བདེ་བ་ཆེན་པོའི་འདབ་མ་བརྒྱད་ལ། ཤར་དུ་མཁའ་འགྲོ་མ་ནས། རྡོ་རྗེའི་འཕྲེང་བས་མཚན་པའོ། །ཞེས་པའི་བར་མཁའ་ནང་དུ་དཀྱིལ་འཁོར་བསྐྱེད་པ་བཞིན་ནོ། །རང་གི་སྙིང་གིས་ཧཱུཾ་ཡིག ནས ཕཻཾ། གྱི་བར་དཀྱིལ་འཁོར་རྒྱལ་མཆོག་གི་ཡེ་ཤེས་སྤྱན་འདྲེན་བཞིན་དང༌། ཆུ་གཉིས་ཉེར་སྤྱོད་རོལ་མོ་དང་བཅས་པའི་ཕྱི་མཆོད་ཕུལ། སྙིང་པོའི་མཐར་འབྲུ་གསུམ་བཏགས་པའི་ནང་མཆོད་ཕུལ། རྐང་བརྒྱད་གཉིས་ཀྱིས་བསྟོད། ཛཿཧཱུཾ་བཾ་ཧོཿགཉིས་སུ་མེད་པར་ཐིམ། ཡོ་ག་ཤུདྡྷའི་སྔགས་དང་ཕྱག་རྒྱ་བྱ་དེ་ཉིད་བྱིན་གྱིས་རླབས་པའི་དོན་དུ། ལྷ་ཐམས་ཅད་ཀྱི་སྙིང་པོ་ཚར་གཅིག་བརྗོད། དེ་ནས་དབང་ལྷ་སྤྱན་དྲངས་ཏེ་དབང་བསྐུར་བ་ཡང་དཀྱིལ་འཁོར་རྒྱལ་མཆོག་དང་འདྲ་བ་ལས་བདག་ལ་ཞེས་འདོན་པ་སྤོའོ། །དེ་ནས་མཆོད་པ་ནི་ལྷ་སོ་སོའི་སྙིང་པོ་རེ་རེའི་མཐར་མཆོད་སྔགས་རེ་
རེ་བཞིན་བཏགས་ནས། མཆོད་པ་འབུལ་བ་གཞུང་གི་བཤད་ཚོད་ཡིན་ཞིང༌། དོན་ལའང་དེ་བཞིན་དགོས་པས་འགྲུབ་ན་དེ་ལྟར་བྱ་ལ་དེ་ལྟར་མི་ལྕོགས་ན། ཐོག་མར་སྔགས་མཆོད་ཙམ་སོང་བའི་རྗེས་སུ། མཆོད་པ་རྣམས་སྤྱི་མཐུན་དུ་ཕུལ་ན་རུང་ཙམ་གྱི་དབང་དུ་བྱས་ནས། དེང་སང་གི་ལག་ལེན་ལྟར་ན། སྒྲུབ་ཐབས་ལྟར་མཆོད་པ་བྱིན་གྱིས་རླབས་ལ། འོག་དངོས་གཞིའི་སྐབས་སུ་འཆད་པར་འགྱུར་བ་ལྟར་འབུལ་བ་ལས། མཆོད་ཡོན་ནས་རོལ་མོའི་བར་གྱི་ཕྱི་མཆོད་དང༌། རིག་མ་བཅུ་དྲུག་ནང་མཆོད་དང༌། གསང་བའི་མཆོད་པ་དང༌། བསྟོད་པ་རྣམས་ཆད་ན་མི་རུང་ལ། གཞན་རྣམས་རྒྱས་བསྡུས་སྐབས་དང་མཚམས་པར་བྱ་ཞིང༌། གཏོར་མ་གསོལ་གདབ་ཀྱི་རྗེས་སུ་འབུལ་བ་དང༌། འཇིག་རྟེན་འདས་གཏོར་སྐབས་འདིར་ཕུལ། འཇིག་རྟེན་པའི་གཏོར་མ་སྙན་གསན་དབབ་པའི་རྗེས་སུ་འབུལ་བའི་ལུགས་དང༌། གཏོར་ཆོག་ཡོངས་རྫོགས་སྐབས་འདིར་བྱེད་པའི་ལུགས་ཏེ། གསུམ་པོ་གང་ལྟར་བྱས་ཀྱང་དོན་གྱི་གཙོ་བོ་འགྲུབ་པ་ལ་ཁྱད་མེད་ཀྱང༌། གཞུང་གི་དགོངས་པ་ཕྱི་མ་ལྟར་ཡིན་པས་སྐབས་འདིར་བྱ་སྟེ། སྒྲུབ་ཐབས་བཞིན་གཏོར་མ་བྱིན་གྱིས་རླབས། དཀྱིལ་འཁོར་སྤྱན་འདྲེན་མི་དགོས་པས་ཕཻཾ་ཞེས་མགྲོན་རྣམས་སྤྱན་འདྲེན་ལྷག་མ་འདོད་དོན་གསོལ་འདེབས་ཀྱི་བར་སྒྲུབ་ཐབས་བཞིན་ཡིན་པ་ལས། འཇིག་རྟེན་འདས་གཏོར་གྱི་འཇུག་ཏུ་ཕུར་བུའི་ལྷ་ལ་དམིགས་ནས། སུམྦྷའི་མཐར། ཨ་ཀཱ་རོ་བཏགས་པ་ལན་གསུམ་གྱིས་འབུལ། ནག་པོ་ཆེན་པོ་སོགས་སྒོས་ཀྱི་ཆོས་སྐྱོང་འགའ་ལ་གཏོར་མ་འབུལ་བ་སྤྲོ་ནའང་འཇིག་རྟེན་འཇིག་རྟེན་འདས་པའི་གཏོར་ཆོག་གཉིས་ཀྱི་བར་དུ་འབུལ། དེ་ནས་སྙན་གསན་དབབ་པའི་གསོལ་བ་འདེབས་པ་ནི། བདུད་རྩི་ལྔ་དང་ཤ་ཆེན་སྦྱར་བའི་བདུག་སྤོས་སྣོད་དང་བཅས་པ་ཐོགས་ཏེ། གཉིས་མེད་ཡེ་ཤེས་ལས་བྱུང་བའི། །ཁྱབ་བདག་དངོས་ཀུན་བདག་ཉིད་ཅན། །སྟོན་པའི་གཙོ་བོ་ཁྲག་འཐུང་དཔལ། །
ཕག་མོ་ལྷན་ཅིག་ཡང་དག་ལྡན། །གང་ཞིག་ཕྱོགས་བཅུའི་དཔའ་བོ་དང༌། །རིག་པའི་ལྷ་མོ་རྫུ་འཕྲུལ་ཅན། །བྱང་ཆུབ་སེམས་དཔའ་ལ་སོགས་ཀུན། །མ་ལུས་བདག་ལ་དགོངས་སུ་གསོལ། །སློབ་མ་ལ་ནི་ཕན་པ་དང༌། །ཁྱེད་རྣམས་ལ་ཡང་མཆོད་པའི་ཕྱིར། །རྡོ་རྗེ་ཅན་དག་འདི་ཞེས་པས། །ནང་པར་དཀྱིལ་འཁོར་བྲི་བར་བགྱི། །རྗེས་སུ་བརྩེ་བས་ཉེར་དགོངས་ཏེ། །ཀུན་གྱིས་བྱིན་གྱིས་རླབས་ཏུ་གསོལ། །ལན་གསུམ། དེ་ནས་མཆོད་པ་ཁ་གསོས་ལ། སྒྲུབ་ཐབས་ལྟར་བྱིན་གྱིས་རླབས། ཕྱི་མཆོད། ནང་མཆོད། གསང་མཆོད། ཡིད་བྱུང་རྣམས་ཀྱིས་མཆོད། རྐང་བརྒྱད་གཉིས་ཀྱིས་བསྟོད། ཡིག་བརྒྱ་ལན་གསུམ། མ་འབྱོར་པ་དང་སོགས་ཀྱི་བཟོད་པར་གསོལ། བདག་ལ་དངོས་གྲུབ་ཐམས་ཅད་སྩལ་དུ་གསོལ། ཞེས་གསོལ་བ་བཏབ། སླར་ཡང་ཨརྒྷཾ་ནས། ཤཔྟའི་བར་གྱིས་མཆོད། རྐང་བརྒྱད་གཉིས་ཀྱི་བསྟོད། བཅོམ་ལྡན་འདས་དཔལ་འཁོར་ལོ་སྡོམ་པའི་ལྷ་ཚོགས་རྣམས་བདག་གི་སྙིང་གར་བཞུགས་ལ། བདག་དང་སེམས་ཅན་ཐམས་ཅད་ལ་ཐུགས་བརྩེ་བ་ཆེན་པོ་མཛད་དེ། ནང་པར་དཀྱིལ་འཁོར་བྱིན་གྱིས་རླབས་པར་མཛད་དུ་གསོལ། རྟེན་དང་བརྟེན་པར་བཅས་པའི་དཀྱིལ་འཁོར་པ་ཐམས་ཅད། རང་རང་གི་སྣ་བུག་གཡོན་ནས་ཞུགས་ཏེ་སྙིང་ཁར་ཐིམ། གོ་ཆ་གསུམ་གྱིས་རྒྱས་བཏབ། སུམྦྷ ལན་གཉིས་ཀྱིས་ཕྱོགས་བཅིངས། ཞིང་སྦྱོང་དག་པ་གསུམ་དྲན་པར་བྱ། སྨོན་ལམ་དང་བཀྲ་ཤིས་བྱའོ། །འོན་ཀྱང་གཞུང་གི་དགོངས་པ་ནི། སྙན་གསན་དབབ་པ་གྲུབ་པ་ན། སྨོན་ལམ་དང་བཀྲ་ཤིས་བྱས་ནས།
དེ་ཉིད་རྗེས་ཆོག་མ་བྱས་པར། ཉི་མ་དེ་ཉིད་ཀྱི་འཕྲོས་དང་དེའི་མཚན་མོ་ལ། མཆོད་པ་རྒྱ་ཆེར་ཕུལ། ཡོལ་བ་ལ་སོགས་པས་སྒྲིབས་ཏེ་བཞག་གོ །ནང་པར་ཐིག་ཚོན་བྱིན་རླབས་བྱེད་ཁར། རྗེས་ཆོག་རྣམས་བྱེད་པ་ཡིན་ཏེ། གཞུང་གཞན་ཕལ་ཆེར་ལས་ཀྱང་འདི་བཞིན་ཏུ་འབྱུང་ངོ༌། །མཚན་མོ་མཆོད་པའི་རྒྱུན་སོགས་མི་ལྕོགས་ན། ཕྱིས་བོད་རྣམས་ལག་ལེན་བྱེད་པ། ལྷ་སྟ་གོན་གྱི་ཆོ་ག་གྲུབ་མ་ཐག་ཏུ་རྗེས་ཆོག་བྱེད་པ་འདི་ཉིད་ལེགས་སོ། །གཉིས་པ་སློབ་མ་སྟ་གོན་ནི། ཞི་བས་སྦྱང་བ་དང༌། ཞི་དྲག་ཕྱེད་མས་སྦྱང་བ་དང་དྲག་པོའི་སྦྱང་བ་སྟེ། བགེགས་སྦྱང་བ་དང༌། ཏིལ་སྦྱང་གི་སྡིག་པ་སྦྱང་བ་གཉིས། སྔོན་དུ་འགྲོ་བའི་སྒོ་ནས་སྟ་གོན་གྱི་ཆོས་བཅུ་གསུམ་བྱ་སྟེ། བསམ་པ་བརྟན་དང་བུ་རུ་སྒྲུབ། །གསོལ་གདབ་སྔགས་ཀྱི་ཆེ་བ་བརྗོད། །སྡོམ་བཟུང་ལྷར་བསྐྱེད་མཆོད་པ་འབུལ། །སྲུང་སྐུད་ཁྱོར་ཆུ་སོ་ཤིང་དང༌། ཀུ་ཤ་ཟབ་མོའི་ཆོས་བཤད་ཅིང༌། །རྨི་ལམ་བརྟགས་ཏེ་ངན་ན་སྲུང༌། །ཞེས་བྱ་སྟེ། དེ་ཡང་སློབ་མ་རྣམས་འདུས་པ་ལ། སེམས་བསྐྱེད་གསལ་བཏབ། སློབ་མ་རྣམས་ཀྱིས་མཎྜལ་འབུལ། དེ་ནས་མྱ་ངན་ལས་འདས་པའི་བསམ་པ་བརྟན་པོ་བསྐྱེད་པ། སློབ་མ་བུར་སྒྲུབ་པས། གསོལ་བ་བཏབ་པ། གསང་སྔགས་ལ་སྤྲོ་བ་སྐྱེད་པ། སྡོམ་པ་བཟུང་བ། ལྷར་བསྐྱེད་པ། མཆོད་པ་འབུལ་བ། སྲུང་སྐུད་བཅིང་བ། ཁྱོར་ཆུ་སོ་ཤིང༌། ཀུ་ཤ་སྦྱིན་པ། ཟབ་མོའི་ཆོས་བཤད་པས་སྤྲོ་བ་བསྐྱེད་པ། རྨི་ལམ་བརྟགས་ཅིང་ངན་ན་སྲུང་བ་སྟེ། ཆོས་བཅུ་གསུམ་ལས། དང་པོ་ནི། སློབ་དཔོན་གྱིས་འདི་སྐད་ཅེས། སྔགས་ཀྱི་དངོས་གྲུབ་དོན་གཉེར་གང༌། །དཀྱིལ་འཁོར་འདིར་ནི་འཇུག་བྱ་སྟེ། །བསོད་ནམས་འདོད་པའི་དེ་ལས་གཞན། །གཞན་དག་འཇིག་རྟེན་ཕ་རོལ་གཉེར། །དད་པ་ཆེན་པོ་
ལྡན་པ་དག །འཇིག་རྟེན་ཕ་རོལ་ལ་དམིགས་ནས། །བློ་ལྡན་དཀྱིལ་འཁོར་འཇུག་བྱ་སྟེ། །འདི་ཡི་འབྲས་བུ་གཉེར་མི་བྱ། །གལ་ཏེ་འདི་འབྲས་དོན་གཉེར་ན། །འཇིག་རྟེན་ཕ་རོལ་འགྲུབ་མི་འགྱུར། །འཇིག་རྟེན་ཕ་རོལ་ལ་དམིགས་ན། །འབད་པ་མེད་པར་འདི་འབྲས་འགྲུབ། །ཅེས་བརྗོད་དེ་དོན་ཡང་བཤད་དོ། །གཉིས་པ་ནི། སློབ་དཔོན་གྱི་ཐུགས་ཀ་ནས་འོད་ཟེར་འཕྲོས། ཁྱེད་རང་རྣམས་ཀྱི་ལུས་འོད་ཀྱི་གོང་བུར་གྱུར། སློབ་དཔོན་གྱི་ཞལ་དུ་བཅུག སྐུའི་དབྱིབས་རྒྱུད་རྡོ་རྗེའི་ལམ་ནས་ཡུམ་གྱི་མཁའ་ནང་དུ་གནས་པར་གྱུར། སློབ་དཔོན་གྱི་ཐུགས་ཀའི་འོད་ཟེར་གྱིས་སྤྱན་དྲངས་པའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཞལ་དུ་ཞུགས། བྱང་ཆུབ་ཀྱི་སེམས་སུ་ཞུ་བ། རྡོ་རྗེའི་ལམ་ནས་བྱུང་སྟེ་ཁྱེད་རང་རྣམས་ལ་དབང་བསྐུར་བས། ལུས་ངག་ཡིད་གསུམ་གྱི་སྡིག་སྒྲིབ་སྦྱངས་ཏེ་དག་པའི་ཤེལ་ལྟར་གྱུར་པ། མཁའ་ནང་ནས་ཕྱིར་འཕྲོས་ཏེ། པདྨའི་གདན་ལ་འཁོད་པར་གྱུར། ཞེས་བརྗོད། གསུམ་པ་ནི། རྡོ་རྗེ་ཕག་མོས་མགྲིན་འཁྱུད་པའི། །དགའ་ཆེན་ཁྱོད་བདག་སྟོན་པ་སྟེ། །སློབ་དཔོན་ཁྱོད་ནི་དགོངས་སུ་གསོལ། །བྱང་ཆུབ་ཆེན་པོའི་ཚུལ་བསྟན་པ། །མགོན་པོ་ཆེན་པོ་བདག་འཚལ་ལོ། །དམ་ཚིག་དེ་ཉིད་བདག་ལ་སྩོལ། །བྱང་ཆུབ་སེམས་ཀྱང་བདག་ལ་སྩོལ། །སངས་རྒྱས་ཆོས་དང་དགེ་འདུན་ཏེ། །སྐྱབས་གསུམ་
དག་ཀྱང་བདག་ལ་སྩོལ། །ཐར་པ་ཆེན་པོའི་གྲོང་མཆོག་ཏུ། །མགོན་པོས་བདག་ནི་གཞུག་ཏུ་གསོལ། །ཞེས་སློབ་མས་ལན་གསུམ་གསོལ་བ་གདབ། བཞི་པ་ནི། བུ་ཚུར་ཐེག་པ་ཆེན་པོ་ལ། ཁྱོད་ནི་ཚུལ་ཆེན་སྣོད་ཡིན་ཏེ། །གསང་སྔགས་སྤྱོད་ཚུལ་ཆོ་ག་འདི། །ཁྱེད་ལ་ཡང་དག་བཤད་པར་བྱ། །རྫོགས་པའི་སངས་རྒྱས་གང་འདས་དང༌། །དེ་བཞིན་གང་དག་མ་བྱོན་དང༌། །ད་ལྟར་འབྱུང་བ་རྫོགས་སངས་རྒྱས། །འགྲོ་ལ་ཕན་ཕྱིན་བཞུགས་པ་ཀུན། །དེ་དག་ཀུན་གྱི་གསང་སྔགས་ཀྱི། །ཆོ་ག་བཟང་པོ་འདི་མཁྱེན་ནས། །དཔའ་བོས་བྱང་ཆུབ་ཤིང་དྲུང་དུ། །ཐམས་ཅད་མཁྱེན་པ་མཚན་མེད་བརྙེས། །གསང་སྔགས་སྤྱོད་པ་མཉམ་མེད་དེ། །སྐྱོབ་པ་དཔལ་ལྡན་ཧེ་རུ་ཀས། །བདུད་སྡེ་ཤིན་ཏུ་མི་བཟད་པའི། །དཔུང་ཆེན་དག་ཀྱང་དེ་ཡིས་བཅོམ། །དེ་བས་ཀུན་མཁྱེན་ཐོབ་བྱའི་ཕྱིར། །བུ་ཡིས་བློ་གྲོས་འདི་གྱིས་ཤིག །ཅེས་བརྗོད་ཀྱང་དོན་བཤད། ལྔ་པ་ནི། དཀོན་མཆོག་གསུམ་ལ་བདག་སྐྱབས་མཆི། སོགས་ལན་གསུམ་རྗེས་བཟློགས་བྱར་བཅུག་སྟེ། ཐུན་མོང་གི་སྡོམ་པ་བཟུང་བའོ། །སངས་རྒྱས་ཆོས་དང་དགེ་འདུན་ལ། །རྟག་ཏུ་བདག་ནི་སྐྱབས་སུ་མཆི། །རྣལ་འབྱོར་གསང་སྔགས་མཁའ་འགྲོ་མ། །འཁོར་ལོ་གསུམ་གྱི་བདག་ཉིད་ཅན། །ཀུན་ལ་བདག་ནི་སྐྱབས་སུ་མཆི། །དཔའ་བོ་དཔའ་མོ་དབང་ལྷ་མོ། །བྱང་ཆུབ་སེམས་དཔའ་བདག་ཉིད་ཆེ། །ཁྱད་པར་དུ་
ནི་སློབ་དཔོན་ལ། །རྟག་པར་བདག་ནི་སྐྱབས་སུ་མཆི། །དཔལ་ལྡན་ཁྲག་འཐུང་སོགས་དཔའ་བོ། །རྣལ་འབྱོར་མ་དང་སྣང་མཛད་སོགས། །བྱང་ཆུབ་སེམས་དཔའ་དཔག་མེད་པ། །ཐམས་ཅད་བདག་ལ་དགོངས་སུ་གསོལ། །བདག་ནི་དུས་འདི་ནས་བཟུང་སྟེ། ཇི་སྲིད་གཉིས་མེད་ལ་གནས་པར། །དེ་ཡི་ཚངས་སྤྱོད་གཉིས་མེད་པ། །ཉི་ཤུ་རྩ་གཉིས་ལེགས་པར་སྲུང༌། ཞེས་ལན་གསུམ་རྗེས་བཟློས་ཀྱིས་ཐུན་མོང་མ་ཡིན་པའི་སྡོམ་པ་བཟུང་ངོ༌། །དྲུག་པ་ནི། སློབ་མ་ཧེ་རུ་ཀ་ཕྱག་གཉིས་པར་གསལ་བའི་གནས་གསུམ་དུ། སློབ་དཔོན་གྱི་སྲིན་ལག་གཡོན་གྱིས་ཁྲག་གམ། དེ་སྦྱར་དུ་མི་འདོད་ན་ཁྲག་ཆེན་པོ་གཉིས་དང་བདུད་རྩི་ལྔ་སོགས་བྱིན་གྱིས་བརླབ་པའི་ནང་མཆོད་དང་བསྲེས་པས་དཔྲལ་བ་མགྲིན་པ་སྙིང་ག་རྣམས་སུ་ཐིག་ལེ་བྱས་ཏེ། ཨོཾ་ཨཱཿཧཱུཾ། གནས་གསུམ་དུ་ཡི་གེ་འབྲུ་གསུམ་བྱུང༌། ཡང་སྙིང་མགྲིན་དཔྲལ་བ་རྣམས་སུ་རེག་སྟེ་ཧཱུཾ་ཨཱཿཨོཾ། སྙིང་གར་ཐུགས་རྡོ་རྗེ། མགྲིན་པར་གསུང་རྡོ་རྗེ། དཔྲལ་པར་སྐུ་རྡོ་རྗེ་རྣམས་སུ་གྱུར། ཡང་དཔྲལ་བ་ནས་མར་རེག་སྟེ། ཨོཾ་ཨཱཿཧཱུཾ། སངས་རྒྱས་ཐམས་ཅད་སྐུ་གསུང་ཐུགས་རྡོ་རྗེའི་རྣམ་པར་སྤྱན་དྲངས་ནས། སློབ་མའི་གནས་གསུམ་གྱི་སྐུ་གསུམ་ཐུགས་རྡོ་རྗེ་ལ་ཐིམ་པས། ལུས་ངག་ཡིད་གསུམ་སངས་རྒྱས་ཐམས་ཅད་ཀྱི་སྐུ་གསུང་ཐུགས་རྡོ་རྗེ་གྱུར། ཡི་གེ་བདུན་པ་མང་དུ་བཟླས་ཏེ། སློབ་མའི་ལུས་ཀྱི་ཆ་ཐམས་ཅད་ལ་གཏོར་
ཞིང༌། མིག་ལ་སོགས་པ་དབང་པོའི་སྒོ་ཐམས་ཅད་ལ་ཡང༌། སློབ་དཔོན་གྱི་ལག་པ་གཡོན་བདུད་རྩི་དང་བཅས་པ་དེ་ཉིད་ཀྱིས་རེག་ཅིང་སྲུང་བར་བྱའོ། །ལུས་ཀྱི་ཆ་ཐམས་ཅད་ལྷའི་རྡུལ་ཕྲ་རབ་ཏུ་གྱུར་པས་སྲུང་བ་བྱས་པར་མོས། བདུན་པ་ནི། ཨོཾ་བཛྲ་པུཥྤེ་ཨཱཿཧཱུཾ། སོགས་ཉེར་སྤྱོད་ལྔས་སློབ་མ་ལ་མཆོད། བརྒྱད་པ་ནི་བསྲུང་སྐུད་བསངས་སྦྱངས། སྟོང་པའི་ངང་ལས་ཧཱུཾ་ལས་བྱུང་བའི་རྡོ་རྗེའི་སྲད་བུ་དམར་པོ། རྡོ་རྗེའི་མདུད་པ་གསུམ་དང་བཅས་པ། བར་ཆད་སྲུང་བའི་ནུས་པ་དང་ལྡན་པར་གྱུར། ཡེ་ཤེས་ཀྱི་སྲད་བུ་ཕཻཾ། ཛཿཧཱུཾ་བཾ་ཧོཿ གཉིས་སུ་མེད་པར་ཐིམ། ཡི་གེ་བརྒྱ་པ་དང་སུམྦྷ་སྤེལ་བ་བཟླ་ཞིང༌། སྐྱེས་པའི་དཔུང་པ་གཡོན་དང༌། བུད་མེད་ཀྱི་གཡས་སུ་བཅིང་ངོ༌། །ནང་མཆོད་ནས་ཀྱང་གཏོར་ལ་རྡོ་རྗེ་རྒྱ་གྲམ་དུ་རེག་པས། གོ་བསྐོན་པར་མོས། དགུ་པ་ནི། ཨོཾ་ཧྲཱིཿབི་ཤུདྡྷཿསརྦ་དྷརྨཱ་སརྦ་པཱ་པཾ་ནི་ཙ་ཨ་སྱེ་སཾ་ཤོ་དྷ་ཡ་སརྦ་བི་ཀལྤཱ་ན་ཨ་པ་ནཱ་ཡ་ཧཱུཾ། ཅེས་པས་ལན་གསུམ་གྱིས་ཁྱོར་ཆུ་བླུད། བཅུ་པ་ནི། ཧཱུཾ་ལས་བྱུང་བའི་བྱང་ཆུབ་ཀྱི་ཤིང་གི་རང་བཞིན་སོ་ཤིང་དང་རྩེ་མོ་ལ་སྲད་བུ་དམར་པོ་དང་མེ་ཏོག་གི་ཕྲེང་བ་བཅིངས་པ། དངོས་གྲུབ་ཀྱི་ལྟས་བརྟག་པའི་ནུས་པ་དང་ལྡན་པར་གྱུར། སུམྦྷ་བཟླ་བཞིན་དུ་སྦྱིན། དེས་ཀྱང༌། ཨོཾ་བཛྲ་ཧ་ས་ཧ། ཞེས་དྲང་པོར་དོར་ལ། སློབ་དཔོན་གྱིས་དངོས་གྲུབ་ལུང་སྟོན་ནོ། །བཅུ་གཅིག་པ་ནི། ཧཱུཾ་ལས་བྱུང་བའི་ཀུ་ཤ་སྔོ་ལྗང་རྩ་རྩེ་མ་ཉམས་པ། རྨི་ལམ་མི་འཁྲུགས་པར་བྱེད་པའི་ནུས་པ་དང་ལྡན་པར་གྱུར། ཨོཾ་ཧྲཱིཿཧ་ཧ་ཧཱུཾ་ཧཱུཾ་ཕཊ། ལན་གསུམ། དྷཱིཿ ཞེས་ཀུ་ཤ་ཆུང་བ་གཡས་དང༌། ཧཱ་ཞེས་
ཆེ་བ་གཡོན་དུ་གཏད། བཅུ་གཉིས་པ་ནི། འཇིག་རྟེན་དུ་ནི་ཀུན་མཁྱེན་དག །ཨུ་དུམ་ཝ་རའི་མེ་ཏོག་བཞིན། །རྒྱ་ལམ་ན་ནི་རེས་འགའ་ཞིག །འབྱུང་འགྱུར་ཡང་ནི་མི་འབྱུང་ངོ༌། །གསང་སྔགས་སྤྱོད་པའི་ཚུལ་འབྱུང་བ། །དེ་བས་ཀྱང་ནི་དཀོན་པ་སྟེ། །གང་གིས་མཉམ་མེད་སེམས་ཅན་དོན། །མྱ་ངན་མི་འདའ་བྱེད་པར་ནུས། །བསྐལ་བ་བྱེ་བ་དུ་མ་རུ། །སྔོན་དུ་སྡིག་པ་བྱས་པ་གང༌། །དཀྱིལ་འཁོར་འདི་འདྲ་མཐོང་མ་ཐག །དེ་དག་ཟད་པར་འགྱུར་ཡིན་ན། །གྲགས་པ་མཐའ་ཡས་སྔགས་སྤྱོད་པའི། །ཚུལ་ལ་གནས་པས་སྨོས་ཅི་དགོས། །སྐྱོབ་པའི་གསང་སྔགས་བཟླས་ན་ནི། །གོ་འཕང་བླ་ན་མེད་པར་འགྱུར། །གང་དག་སྤྱོད་པ་མཆོག་འདི་ལ། །བློ་གྲོས་བརྟན་ཞིང་མི་གཡོ་ན། །སྡུག་བསྔལ་ཐམས་ཅད་འབྱུང་བ་ཡི། །ངན་འགྲོ་དེ་ཡིས་གཅོད་པར་འགྱུར། །བདག་ཉིད་ཆེན་པོ་ཁྱེད་རྣམས་ཀྱིས། །རྙེད་པ་མཉམ་མེད་དེ་རིང་རྙེད། །གང་ཕྱིར་རྒྱལ་བ་སྲས་བཅས་པའི། །བདག་ཉིད་ཆེན་པོ་ཀུན་གྱིས་ནི། །བསྟན་པ་འདི་ལ་ཁྱེད་རྣམས་ཀུན། །ཡོངས་སུ་བཟུང་སྟེ་སྐྱེ་བཞིན་པ། །དེ་ཕྱིར་ཁྱེད་རྣམས་ཐེག་ཆེན་ལ། །སང་ནི་རབ་ཏུ་སྐྱེ་བར་འགྱུར། །ཐེག་པ་ཆེན་པོ་ཆེར་འབྱུང་བའི། །ལམ་མཆོག་འདི་ནི་དཔལ་དང་ལྡན། །ཁྱེད་རྣམས་དེར་ནི་དོང་བས་ན། །རང་བྱུང་སྐལ་པ་ཆེན་པོ་ལ། །འཇིག་རྟེན་ཐམས་ཅད་མཁྱེན་པ་ཡི། །དེ་བཞིན་གཤེགས་པ་ཉིད་དུ་འགྱུར། །ཅེས་བརྗོད་ཅིང་དོན་བཤད། བཅུ་གསུམ་པ་ནི། རྨི་ལམ་
དགེ་བའམ་མི་དགེ་བ། །ནང་པར་ང་ལ་རབ་ཏུ་སྨྲོས། ཅེས་དང༌། དོ་ནུབ་ཀུ་ཤའི་སྔས་གདན་ལ། སེང་གེའི་ཉལ་སྟབས་དང༌། དགེ་བའི་སེམས་ཀྱིས་ཉོལ་ཞིག་དེ་ལས་རྨི་ལམ་གྱི་མཚན་མ་བཟང་ངན་དག་མཐོང་བར་འགྱུར་རོ། །ཞེས་བརྗོད། སློབ་མ་རྣམས་ཀྱི་ལུས་ལ་གོ་ཆ་གཉིས་དགོད་པའི་དམིགས་པ་ཙམ་སློབ་དཔོན་གྱིས་བྱས་ཏེ། དགེ་བ་བསྔོས་ལ་སློབ་མ་རྣམས་རང་གནས་སུ་བཏང་ངོ༌། །སློབ་མའམ་སློབ་དཔོན་ལ་རྨི་ལམ་མི་དགེ་བ་དག་བྱུང་ན་ཟློག་པའི་ཐབས་ནི། བགེགས་ལ་ཕུར་བུས་གདབ་པ་དང༌། ཞི་བའམ་དྲག་པོའི་སྦྱིན་སྲེག་དང༌། གཏོར་མ་ཆེན་པོའི་ཆོ་ག་ལ་སོགས་པ་བྱ་སྟེ། ཅི་སྟེ་དེ་དག་བྱ་བར་མ་ལྕོགས་ན། སྒྱུ་མ་ལྟ་བུར་ཤེས་པས་བཟློག་པར་བྱའོ། །འདིའི་ལུགས་ལ་བུམ་པ་སྟ་གོན་ནི། བུམ་པའི་ཡོ་བྱད་ཚོགས་པར་བྱས་པ་ཙམ་ཞིག་ཡིན་པས། ཆོ་ག་སོགས་པ་མི་བཞེད་དོ། །ལྔ་པ་གཟུགས་བརྙན་འབྲི་བ་ནི། དཀྱིལ་འཁོར་གྱི་ཞག་གི་བྱ་བ་ཞེས་ཀྱང་བྱ་སྟེ། འདི་ལ་གསུམ་ཐིག་གདབ་པ་དང༌། ཚོན་དབྱེ་བ་དང༌། རྒྱན་དང་ཡོ་བྱད་དགོད་པའོ། །དང་པོ་ནི། སྟ་གོན་གྱི་ཉི་མའི་འཇུག་དེ་ཉིད་ལ། འདི་བྱེད་ན་བདག་བསྐྱེད་གསར་དུ་ལེན་མི་དགོས་མོད། དཀྱིལ་ཆོག་ཐམས་ཅད་ཀྱི་དགོངས་པས་ཉིན་ཞག་སོ་སོར་བྱེད་པ་ཡིན་པས་འདིར་ལུས་དཀྱིལ་དང་བཅས་པའི་བདག་བསྐྱེད་རྒྱས་བསྡུས་གང་རུང་ཞིག་སྒོམ་མོ། །དཀྱིལ་འཁོར་གྱི་ས་ལ་སུམྦྷ་བཟླས་པའི་དྲི་བཟང་གི་ཆུས་གཏོར་རང་དང་གྲོགས་གཙོ་བོ་ཡབ་ཡུམ་དུ་གསལ་བས། ལྔ་ལྔ་ཉི་ཤུ་རྩ་ལྔ་དང་ལྡན་པའི་ཐིག་སྐུད་འདུ་བྱས་ལ། མཆོད་གཏོར་གྱིས་བསྐོར། མཆོད་པ་བྱིན་གྱིས་རླབས། ཐུགས་སྐུད་བསངས་སྦྱངས། སྟོང་པའི་ངང་ལས། དབུས་སུ་ཧཱུཾ་ལས་མི་བསྐྱོད་པ་སྐུ་མདོག་སྔོན་པོ་རྡོ་རྗེ་དང་དྲིལ་
བུ་འཛིན་པས་ཡུམ་མཱ་མ་ཀཱི་ལ་འཁྱུད་པ། ཤར་དུ་བྲུཾ་ལས་རྣམ་པར་སྣང་མཛད་དཀར་པོ། འཁོར་ལོ་དང་དྲིལ་བུ་འཛིན་པ། ཡུམ་སངས་རྒྱས་སྤྱན་མ་ལ་འཁྱུད་པ། བྱང་དུ་ཨཾ་ལས་རིན་ཆེན་འབྱུང་ལྡན་སེར་པོ། རིན་པོ་ཆེ་དང་དྲིལ་བུ་འཛིན་པ། ཡུམ་རིན་ཆེན་སྒྲོལ་མ་ལ་འཁྱུད་པ། ནུབ་ཏུ་ཛྲིཾ་ལས་འོད་དཔག་མེད་དམར་མོ། པདྨ་དང་དྲིལ་བུ་འཛིན་པས་ཡུམ་གོས་དཀར་མོ་ལ་འཁྱུད་པ། ལྷོར་ཁཾཾ་ལས་དོན་ཡོད་གྲུབ་པ་ལྗང་ཁུ་རལ་གྲི་དང་དྲིལ་བུ་འཛིན་པས་ཡུམ་དམ་ཚིག་སྒྲོལ་མ་ལ་འཁྱུད་པ་རྣམ་སྣང་ཟླ་བ་དང༌། གཞན་རྣམས་ཉི་མའི་གདན་ལ་བཞུགས་པ། རིགས་ལྔ་ནི་སྟག་གི་པགས་པའི་སྨད་དཀྲིས་ཅན། རལ་པའི་ཐོར་ཚུགས་དང་ལྡན་པ། ཡུམ་རྣམས་སྐུ་མདོག་ཡབ་དང་མཚུངས་ཤིང་གྲི་ཁུག་དང་ཐོད་པ་འཛིན་པ་དབུ་སྐྲ་གྲོལ་བ། ཐམས་ཅད་ཀྱང་རུས་པའི་རྒྱན་གྱིས་བརྒྱན་པའོ། །དཔྲལ་པར་ཨོཾ་མགྲིན་པར་ཨཱཿ ཐུགས་ཀར་ཧཱུཾ། རང་གི་སྙིང་གའི་ཧཱུཾ་ཡིག་གི་འོད་ཟེར་གྱིས་ནས། ཡེ་ཤེས་སེམས་དཔའ་རིགས་ལྔ་ཡབ་ཡུམ་གྱི་རྣམ་པར་ཕཻཾ། ཛཿཧཱུཾ་བཾ་ཧོཿ གཉིས་སུ་མེད་པར་ཐིམ། གཏོར་མ་བསངས་སྦྱངས། འབྲུ་གསུམ་གྱིས་བྱིན་གྱིས་བརླབས་ནས། ཧཱུཾ་བྷྲུཾ་ཨཾ་ཛྲིཾ་ཁཾ། ཨོཾ་ཨ་ཀཱ་རོ་སོགས་ཀྱི་གཏོར་མ་ཕུལ། ཨརྒྷཾ། ནས། ཤཔྟའི་བར་གྱིས་མཆོད། དེ་ཉིད་ལྔ་པའམ། རིགས་ལྔའི་བསྟོད་པ་གང་ཡང་རུང་བས་བསྟོད། དེ་ལ་དེ་ཉིད་ལྔ་པ་ནི། མི་བསྐྱོད་རྡོ་རྗེ་ཡེ་ཤེས་
ཆེ། །རྡོ་རྗེ་དབྱིངས་ནི་མཁའ་ཆེན་པོ། །རྡོ་རྗེ་གསུམ་མཆོག་དཀྱིལ་འཁོར་གསུམ། །རྡོ་རྗེ་མཁའ་འགྲོ་ཕྱག་འཚལ་བསྟོད། །རྣམ་པར་སྣང་མཛད་དག་པ་ཆེ། །རྡོ་རྗེ་ཞི་བ་དགའ་ཆེན་པོ། །རང་བཞིན་གྱིས་ནི་འོད་གསལ་མཆོག །སངས་རྒྱས་མཁའ་འགྲོ་ཕྱག་འཚལ་བསྟོད། །རིན་ཆེན་རྒྱལ་པོ་རབ་ཏུ་ཟབ། །རྡོ་རྗེ་ནམ་མཁའ་དྲི་མེད་མཁའ། །རང་བཞིན་དག་པ་གོས་པ་མེད། །རིན་ཆེན་མཁའ་འགྲོ་ཕྱག་འཚལ་བསྟོད། །རྡོ་རྗེ་དཔག་མེད་རྒྱལ་པོ་ཆེ། །མི་རྟོག་ནམ་མཁའ་རྡོ་རྗེ་འཛིན། །འདོད་ཆགས་ཕ་རོལ་ཕྱིན་པ་བརྙེས། །པདྨ་མཁའ་འགྲོ་ཕྱག་འཚལ་བསྟོད། །དོན་ཡོད་རྒྱལ་པོ་རྫོགས་སངས་རྒྱས། །བསམ་པ་ཐམས་ཅད་རྫོགས་མཛད་པ། །དངོས་ཉིད་དག་པ་ཉིད་ལས་བྱུང༌། །སྣ་ཚོགས་མཁའ་འགྲོ་ཕྱག་འཚལ་བསྟོད། ཅེས་པའོ། །རིགས་ལྔ་ཡབ་ཡུམ་ཞུ་བ་ལས་བྱུང་བའི་ཐིག་སྐུད་རྣམ་པ་ལྔར་གྱུར། དེ་རིན་པོ་ཆེའི་སྣོད་དུ་བཞག སངས་རྒྱས་ཐམས་ཅད་འཁོར་ལོ་སྡོམ་པའི་དཀྱིལ་འཁོར་གྱི་རྣམ་པར་སྤྱན་དྲངས་ཏེ་ཐིག་སྐུད་ལ་ཡང་ཡང་སྟིམ་ཞིང༌། གཙོ་བོ་ཡབ་ཡུམ་གྱི་སྙིང་པོ་མང་དུ་བཟླས་ལ་བྱིན་གྱིས་རླབས་ཅིང༌། ཁྲག་ཆེན་དང༌། གཞོན་ནུ་མའི་རྔུལ་དང་བདུད་རྩི་ལྔ་དང་ཙནྡ་ལ་སོགས་པས་བྱུག ཡབ་ཡུམ་གྱི་རྩ་སྔགས་བཟླ་བཞིན་དུ་བསྐྱངས་ལ། སྐུ་གསུང་ཐུགས་ཀྱི་དཔའ་བོ་དཔའ་མོའི་སྔགས་བཟླ་བཞིན་དུ་ལྔ་ཚན་ལྔ་ཚན་ལས་མཐར་གཅིག་ཏུ་སྒྲིལ། ཨོཾ་ཨ་ནྱོ་ནྱ་ཨ་ནུ་ག་ཏཱཿསརྦ་དྷརྨཱཿཔ་ར་སྥ་ར་ཨ་ནུ་པྲ་བིཥྟཿསརྦ་དྷརྨཱ་ཨཏྱན་ཏ་
ཨ་ནུ་པྲ་བིཥྟཿསརྦ་དྷརྨཱཿཧཱུཾ། ཞེས་པའང་ལག་ལེན་ལ་བཟླ་བར་སྣང་བས་ཅུང་ཟད་བཟླ། ཨོཾ་བཛྲ་ས་མ་ཡ་སུ་པྲ་མ་ཏི་ཀྲ་མ་ཧཱུཾ། ཞེས་བཟླ་བཞིན་དུ་གྲོགས་ལ་གཏད་ལ། ཛྫཿཛྫཿཛྫཿ ཞེས་བརྗོད། འཇིག་རྟེན་གྱི་ཁམས་མ་ལུས་པ་ན་བཞུགས་པའི་སངས་རྒྱས་ཐམས་ཅད་ཀྱིས་འགྲོ་བའི་དོན་མཛད་པའི་དུས་ནི་འདི་ཡིན་ནོ། །ཅེས་དང་པོ་ནམ་མཁའ་དང་དེ་ནས་ས་ལ་གདབ་བོ། དེ་ཡང་བྱང་ལྷོ་ནུབ་ཤར་ཚངས་ཐིག་སྟེ། མེ་རླུང་སྲིན་དབང་ཟུར་ཐིག་གོ །རྩེ་མོ་ཅན་དང་འབྱུང་པོས་ཤར། གཙུག་ཕུད་ཅན་དང་མཚན་རྒྱུའི་ལྷོ། །གཡོ་བྱེད་སྲུང་བས་ནུབ་ཀྱི་སྟེ། །རྟ་དམར་གྲགས་པོའི་བྱང་དུའོ། །དང་པོ་སློབ་དཔོན་ཕྱི་མ་གྲོགས་གཡོན་ནས་བསྐོར་བའི་རིམ་པ་བྱ། རྡུལ་ཚོན་གྱིས་དཀྱིལ་འཁོར་ལ་ནི། ཤིན་ཏུ་གོ་སྐབས་མི་བདེན་མ་གཏོགས། འཇིག་རྟེན་པའི་ལྷོ་ལ་དཀྱིལ་འཁོར་གྱི་ཤར་ལྟ་བར་བྱ་ལ། རས་བྲིས་ཀྱི་དཀྱིལ་འཁོར་ལ་ནི་ངེས་པ་མེད་དོ། །དེ་ནས་ཕྱོགས་ཐམས་ཅད་རང་བཞིན་མཉམ་པ་ཉིད་དུ་ཤེས་པར་བྱས་ནས། དེའི་རྗེས་སུ་ལས་ཐིག་གདབ་སྟེ། ཇི་སྐད་དུ་གཞུང་ལས། སྒོ་ནི་འཁོར་ལོའི་བརྒྱད་ཆ་སྟེ། །ཁྱམས་ནི་དེ་ཡི་ཕྱེད་དུ་བྱ། །སྒོ་འཁྱུད་དག་ནི་སྒོ་ཡི་ཚད། །ལྷ་ཡི་སྣམ་བུའི་ཚད་དེ་བཞིན། །མཚམས་ཀྱི་ཐིག་ནི་བསྐོར་བ་དག །རྟ་བབས་ཀྱི་ནི་གནས་སུ་བཤད། ཅེས་འབྱུང་ངོ༌། །ཕྱིའི་ཁོར་ཡུག་བསྐོར་ཚུལ་ནི། འོད་ཀྱི་དཀྱིལ་འཁོར་ནང་དུ་ནི། །རིམ་གཉིས་ཐིག་ནི་གདབ་པར་བྱ། ཞེས་སྒྱུར་བ་ལྟར་ན། རྡོ་རྗེའི་རྭ་བ་ཆེན་པོ་དང༌། འཁོར་ལོ་པདྨ་རྡོ་རྗེ་སྟེ་རྭ་བ་ཆུང་ངུ་གསུམ་གྱི་ཐིག་གདབ་པ་སྟོན་པར་འགྲོ་ཡང༌། མར་པ་དོ་བའི་འགྱུར་ལས། ཁོར་ཡུག་གི་ནི་མཐར་ཐུག་པར། །རྡོ་རྗེའི་འཕྲེང་བས་སྔོན་བསྐོར་ཏེ། འོད་ཀྱི་དཀྱིལ་འཁོར་མཐའ་མ་སྟེ། །སློབ་དཔོན་གཉིས་འགྱུར་ཐིག་གདབ་བྱ། །ཚོན་གྱི་ས་ནི་དེ་
ཡི་ཕྱེད། །རྩ་བའི་ཐིག་གི་ཕྱོགས་གནས་སུའོ། །ཞེས་འབྱུང་བ་དག་པར་མངོན་པས། རྡོ་རྗེའི་རྭ་བ་དང༌། དུར་ཁྲོད་དང་འོད་ཀྱི་དཀྱིལ་འཁོར་ལ་དགོངས་པར་གསལ་ལོ། །ནང་གི་ཐིག་ནི། དེ་ཡི་ནང་དུ་པདྨ་སྟེ། །པདྨའི་རྒྱབ་ཏུ་འཁོར་ལོ་བྱ། །རྡོ་རྗེའི་ཐིག་ནི་གཉིས་པོ་དེར། །རྡོ་རྗེ་འཕྲེང་བའི་བསྐོར་བར་བྱ། །འཁོར་ལོ་གསུམ་ནི་ཆ་ཆེན་པོར། །རྡོ་རྗེའི་ཐིག་གིས་བསྐོར་བར་བྱ། །གེ་སར་དང་བཅས་པདྨ་ནི། །འདབ་མ་བཅུ་དྲུག་དག་ཏུ་གནས། ཞེས་གསུངས་ཏེ། རྩ་ཐིག་གི་ནང་དུ་ཕྱོགས་རེ་རེར་ཆ་ཆེན་བཞི་བཞི་ཡོད་པ་ལས། བཞི་པ་རང་སོར་བཞག་ན་འདབ་མ་གསུམ་པོ་ཆ་གསུམ་དུ་བགོས་པས་དགུར་འགྱུར་བ་ལས། དང་པོ་བསྐོར་བས་པདྨའི་ལྟེ་བ། གཉིས་པས་གཙོ་བོའི་གནས་ཀྱི་པད་འདབ་གསུམ་པས་མཁའ་འགྲོ་མ་བཞིའི་པད་འདབ། ལྔ་པ་བདུན་པ་དགུ་པ་རྣམས་བསྐོར་བས། འཁོར་ལོ་གསུམ་གྱི་ཕྱི་མཐའ། དང་པོ། གསུམ་པ། ལྔ་པ། བདུན་པ། དགུ་པ་རྣམས་ཀྱི་ནང་དུ་རང་རང་གི་དྲུག་ཆ་བསྐོར་བས་གེ་སར་དང་མུ་ཁྱུད་བཞིའོ། །འཁོར་ལོ་གསུམ་གྱི་རྩིབས་རྣམས་ཞིང་ཆེ་སར་ཡང་དཀྱུས་དང་མཉམ་མོ། །ཐིག་གི་བྱ་བ་སྤྱི་ནི་གཞན་དུ་ཤེས་པར་བྱའོ། །ཡང་འདི་སྐད་དུ། དང་པོར་རྡོ་རྒྱུས་ཐིག་སོགས་ཏེ། །ཐིག་རྣམས་ཐམས་ཅད་ངེས་པར་བྱ། །དེ་ཡི་སྟེང་དུ་ཡེ་ཤེས་ཐིག །ཀུན་ནས་ཡོངས་སུ་རྐྱང་བར་བྱ། །ཞེས་པ་ལྟར་ན། དང་པོར་ལས་ཐིག་བཏབ་ལ་དེ་བྱིན་གྱིས་བརླབ་པའི་དོན་དུ་ཡེ་ཐིག་འདེབས་པའོ། །དེ་ཡང་རྒྱས་བཤད་ཀྱི་སྐབས་སུ་ཡེ་ཐིག་སྔོན་ལ་གསུངས་ལ། དོན་བསྡུས་སྐབས་སུ་ལས་ཐིག་ཐོག་མར་གསུངས་པ་ནི། འདམ་ཁར་དགོངས་པ་ཡིན་ཞིང༌། ཡེ་ཐིག་དེ་ཉིད་ཀྱིས་ལས་ཐིག་འདེབས་པར་བྱེད་ན་ནི། བྱིན་རླབས་ལ་སོགས་པ་མི་དགོས་ལ། གཞན་དུ་ན་འདི་ལ་ཡང་དགོས་ཏེ་ལས་
བྱེད་པའི་ཧེ་རུ་ཀ་ཕྱག་གཉིས་པའམ། བདུད་རྩི་འཁྱིལ་བའམ། ཧཱུཾ་མཛད་ཁམས་གསུམ་རྣམ་རྒྱལ་གང་རུང་དུ་བསྐྱེད་ལ། ཡེ་ཤེས་པ་སྟིམ། མཆོད་ཅིང་བསྟོད། ཐིག་སྐུད་དུ་བསྒྱུར་ནས། འབྲུ་གསུམ་དང་ཧཱུཾ་ཡིག་དང་རང་སྔགས་བཟླས་པས་བྱིན་གྱིས་བརླབས་སོ། །ཐིག་གི་བྱ་བ་རྫོགས་ནས། ཐིག་སྐུད་ཀྱི་ལྷ་ལ་མཆོད་བསྟོད་ཕུལ། ཨོཾ་ཨཱཿཧཱུཾ་བཛྲ་མུཿ ཞེས་གཤེགས་སུ་གསོལ། གཉིས་པ་ཚོན་དབྱེ་བ་ནི་ཐིག་བཏབ་པའི་ནང་བར་ཡིན་ན། མངོན་རྟོགས་རྫོགས་པར་སྒོམ་པའམ་དག་པ་གསུམ་ནས་སྒྲུབ་པ་ཆེན་པོའི་བར་དུ་སྒོམ། ལུས་ཀྱི་དཀྱིལ་འཁོར་གསལ་བཏབ་ནས་བཟླས་པ་ཅུང་ཟད་བྱའོ། །ཐིག་བཏབ་པའི་ཉི་མ་དེ་ཉིད་ལ་ཚོན་དབྱེ་ཞིང༌། དེའི་ནུབ་མོ་ཉིད་ཟིན་པར་འགྱུར་ན་ཐིག་འདེབས་པའི་སྔོན་གྱི་བདག་བསྐྱེད་ཁོ་ནས་ཆོག་ལ། ཉི་མ་དེ་ཉིད་ལ་ཚོན་འགྱེད་པའི་མགོ་རྩམས་ཀྱང༌། ཉི་མ་དེ་ཉིད་ལ་མི་འགྲུབ་ན། སྐབས་འདིར་བདག་བསྐྱེད་མི་དགོས་ཀྱང༌། ནང་པར་བདག་བསྐྱེད་བྱས་ཏེ་དཀྱིལ་འཁོར་འདྲི་བའི་འཕྲོ་ལ་འཇུག་གོ །རྡུལ་ཚོན་གྱི་རྒྱུ་ནི་དུར་ཁྲོད་ཀྱི་རུས་པས་དཀར་པོ། དེའི་སོལ་བས་ནག་པོ། དེར་སྐྱེས་པའི་ཤིང་ལོས་ཁ་བསྒྱུར་བས་ལྗང་ཁུ། དེའི་སོ་ཕག་གི་ཕྱེ་མས་དམར་པོ། དེ་དང་བབ་ལ་སྲེས་པས་སེར་པོའམ། ཡང་ན་རྡུལ་ཚོན་ཕལ་པའམ། རིན་པོ་ཆེའི་ཕྱེ་མ་ལ་ཐལ་ཆེན་སྲེས་པ་དགོས་པར་བཤད་དོ། །གང་ལྟར་ཡང་རྡུལ་ཚོན་ལྔའམ། ཉི་ཤུ་རྩ་ལྔ་འདུས་བྱས་ལ། མཆོད་གཏོར་གྱི་བསྐོར། མཆོད་པ་བྱིན་གྱིས་རླབས་ནས། གཙོ་བོ་ཡབ་ཡུམ་གྱི་སྙིང་པོས་བྱིན་གྱིས་རླབས་པའི་བར། ཐིག་སྐུད་བྱིན་རླབས་དང་འདྲ་བ་ལས། རྡུལ་ཚོན་རྣམ་པ་ལྔར་གྱུར། ཞེས་འདོན་པ་སྤོས། ཨོཾ་བཛྲ་ཙི་ཏྲ་ས་མ་
ཡ་ཧཱུཾ། ཞེས་ལན་བརྒྱ་རྩ་བརྒྱད་ཀྱི་བྱིན་གྱིས་རླབས། སློབ་དཔོན་དཀྱིལ་འཁོར་དབུས་སུ་ཁ་ལྷོར་ཕྱོགས་པས་གནས་ཏེ། འདི་ནི་ཆོས་དབྱིངས་དག་པ་སྟེ། །སེམས་ཅན་ཁམས་ནི་སྒྲོལ་བྱེད་པ། །དཔལ་ལྡན་ཁྲག་འཐུང་རྒྱལ་པོ་ཉིད། །དེ་བཞིན་གཤེགས་པ་ཀུན་གྱི་གནས། །ཉེས་པ་ཀུན་ལས་རྣམ་གྲོལ་བ། །ཚོན་གྱི་ལས་ནི་ཡང་དག་རྩམ། ཞེས་བརྗོད། ཨོཾ་བཛྲ་ཙི་ཏྲ་ས་མ་ཡ་ཧཱུཾ་གི་སྔགས་བཟླ་ཞིང་རྩིག་པ་དཀར་པོ་ནས་རྩམས་ཏེ་བྲི་བར་བྱའོ། །ཚོན་གྱི་ཁ་དོག་ནི་ཕལ་ཆེར་དཀྱིལ་འཁོར་སྤྱིའི་མཚན་ཉིད་རྟོགས་པས་ཤེས་པར་འགྱུར་ལ། ལྷ་རྣམས་གྱི་ཕྱོགས་མདོག །ཤར་སྔོ་ལྷོ་སེར་སོགས་ཡིན་ཞིང༌། དབུས་ཨིནྡྲ་ནཱི་ལའི་ས་གཞི་གྲུ་བཞི་སྔོན་པོ། སྐུ་གསུང་ཐུགས་ཀྱི་འཁོར་ལོའི་རྩིབས་བར་རྣམས་སྔོ་དཀར་དམར་བ། བདེ་ཆེན་འཁོར་ལོའི་མུ་ཁྱུད་སེར་པོ་ལ། གྲི་གུག་གི་འཕྲེང་བ་ནག་པོའམ། རྡོ་རྗེའི་འཕྲེང་བ་བྲིས་ཀྱང་རུང་ལ། གཙོ་བོའི་གནས་ཀྱི་པད་འདབ་བརྒྱད་ནི། སྣ་ཚོགས་པདྨ་དང༌། སྙིང་པོའི་རྣལ་འབྱོར་མའི་གནས་འདབ་མ་བརྒྱད་ནི་སེར་པོ་སྟེ། ཕྱི་ནང་སྡོམས་པས་བདེ་ཆེན་འཁོར་ལོ་ལ་འདབ་མ་བཅུ་དྲུག་ཡིན་ཞིང༌། གཙོ་བོའི་གནས་ཀྱི་གེ་སར་ཡང་སེར་པོ་བྱ་ལ། དེའི་སྣ་ཚོགས་པདྨ་ཡང་ལྗང་ཁུ་བྱས་ན་འཐད་དམ་སྙམ་པ་ནི་རྣམ་པར་རྟོག་པའོ། །རྡོ་རྗེའི་རྭ་བ་ཡང་གཞི་སྔོན་པོ་ལ་རྡོ་རྗེ་ལྗང་ཁུའི་འཕྲེང་བར་བྱ་ལ། ལྷའི་མཚོན་མ་ཐམས་ཅད་ནི་ཉི་མའི་དཀྱིལ་འཁོར་ལ་འཁོད་དེ། ཕྱོགས་ཀྱི་འདབ་མ་བཞི་དང་སྒོ་མཚམས་མ་བརྒྱད་ལ། གྲི་གུག་ཁོ་ནའམ། ཡང་ན་འདབ་མ་བཞི་ལ་རིགས་བཞིའི་ཕྱག་མཚན་གྱི་མཚན་པའི་ཁ་ཊྭཱཾ་ག་རེའོ། །ཐུགས་འཁོར་བ་ལ་རྡོ་རྗེ། གསུང་འཁོར་བ་ལ་པདྨ།
སྐུ་འཁོར་བ་ལ་འཁོར་ལོའོ། །གཞན་ཡང་ས་བོན་དང་སྔགས་ཀྱི་ཡི་གེ་འབྲི་བ་དང༌། རྐོས་མའམ་ལུགས་སུ་བྱས་པ་དང་རི་མོར་བྱས་པའི་སྐུ་གཟུགས་འཇོག་པ་དང༌། རྡུལ་ཚོན་གྱི་ཚོམ་བུ་དགོད་པ་སོགས་ཇི་ལྟར་སྐབས་སུ་བབ་པ་དག་བྱའོ། །དེ་ནས་སློབ་དཔོན་གྱི་རྡོ་རྗེ་གསོར་ཞིང་དྲིལ་བུ་དཀྲོལ་ལ། དཀྱིལ་འཁོར་ལ་གཡོན་ནས་ལན་གསུམ་དུ་བསྐོར་ནས། ཤར་ལྷོར་ཡི་གེ་བརྒྱ་པ་དང༌། ཞལ་བཞི་པའི་སྔགས་བཟླས་ཏེ། བྲིས་པའི་སྐྱོན་དག་པར་བསམ། རྡུལ་ཚོན་གྱི་ལྷག་མ་མཆོད་བསྟོད་གཤེགས་གསོལ་བྱ། ལྷག་མའི་ཐིག་ཚོན་དེ་དག་དབེན་པའི་གནས་སུ་བཞག་གོ །གསུམ་པ་རྒྱན་དང་ཡོ་བྱད་དགོད་པ་ནི། གཞུང་ལས་བུམ་པ་བཀོད་ཟིན་པའི་རྗེས་སུ་གསུངས་ཤིང༌། དོན་ཐོབ་ཀྱང་དེ་བཞིན་ཡིན་མོད་ཀྱི། ད་ལྟ་དེ་སྐབས་བྱེད་པ་ལག་ལེན་མི་བདེ་བས་བུམ་པ་འགོད་པའི་གནས་བཞག་ལ་སྐབས་འདི་ཉིད་དུ་བྱེད་དེ། འགལ་བ་ཅུང་ཟད་ཀྱང་མེད་དོ། །དེ་ཡང་གཞུང་ལས་ཇི་སྐད་དུ། བླ་རེ་དག་ནི་བྲེ་བྱ་ཞིང༌། །སྣ་ཚོགས་པ་ཡིས་གོས་ཀྱིས་བྲེ། །རྒྱལ་མཚན་གདུགས་སོགས་དར་རྣམས་ཀྱིས། །གནས་དང་གནས་སུ་རྣམ་པར་རྒྱན། །བུམ་པ་བཞག་ནས་མཆོད་པ་ནི། །ཇི་སྐད་བཤད་པ་བཞིན་དུ་བྱ། །རིན་ཆེན་གསེར་གྱི་མཛེས་པར་ནི། །དཀྱིལ་འཁོར་ཀུན་ཏུ་གཏོར་བར་བྱ། །སྤོས་སྣོད་དག་ནི་བརྒྱད་པོ་དང༌། །མར་མེའི་སྡོང་བུའང་དེ་མཉམ་བྱ། །ཏིལ་མར་ཆེན་པོས་རབ་སྦར་ལ། །སྤོས་ནི་ལྔ་པོ་སྔོན་འགྲོ་བའོ། །སྣ་ཚོགས་མེ་ཏོག་འཕྱང་བ་དང༌། །སྣ་ཚོགས་ཆང་དང་ཁུ་བ་ཀུན། །སྣ་ཚོགས་རོལ་མོའི་རབ་དགའ་ཞིང༌། །སྣ་ཚོགས་ཞལ་ཟས་ལྷ་བཤོས་དང༌། །སྣ་ཚོགས་རྣལ་འབྱོར་མ་པད་ན། །དྲི་བཟང་མེ་ཏོག་སྣ་ཚོགས་ལྡན། །སྣ་ཚོགས་པ་ཡི་གླུ་ལེན་ཞིང༌། །སྣ་ཚོགས་གར་གྱི་གར་བཟང་བྱེད། །བཀྲ་ཤིས་
སྒྲ་ནི་སྣ་ཚོགས་པ། །དགེ་སྟོན་ཤྲཱི་ཧེ་རུ་ཀའི། །སྤྱོད་པ་དང་ནི་གྲོལ་བའི་གནས། །འདོད་པ་རྣལ་འབྱོར་མ་ཡི་ལམ། །ཞེས་གསུངས་ཤིང༌། རྒྱུད་ལས་ཀྱང༌། སྒྲུབ་པོ་དངོས་གྲུབ་གང་འདོད་ཀྱང༌། །སྒྲོན་མེ་བརྒྱ་རྣམས་དབུལ་བར་བྱ། །ཞེས་ཤ་ཆེན་པོའི་མཆོད་པ་དང༌། སྒྲུབ་པོ་དངོས་གྲུབ་གང་འདོད་ཀྱང༌། །དྲི་དང་མེ་ཏོག་བདུག་སྤོས་དང༌། །མར་མེ་བརྒྱ་ནི་དབུལ་བར་བྱ། །རྒྱལ་མཚན་དམར་དང་དེ་བཞིན་སེར། །དཀར་དང་ནག་དང་སེར་སྐྱ་དང༌། །དེ་བཞིན་གོས་ནི་སྣ་ཚོགས་དང༌། །མེ་ཏོག་ཕྲེང་བ་དུ་མ་དང༌། །བླ་བྲེ་དག་དང་དར་དཔྱངས་པའི། །མདའ་དང་ཡོལ་བས་ཤིན་ཏུ་མཛེས། །དེ་བཞིན་བཟའ་བཅའ་བཏུང་བ་ཡིས། །རབ་མཉམ་བཞག་པས་མཆོད་པར་བྱ། ཞེས་དང༌། གསེར་དང་དངུལ་ལམ་རིན་ཆེན་དང༌། །མུ་ཏིག་རྣམས་ཀྱིས་མཛེས་པར་བྱ། །དཀྱིལ་འཁོར་ཀུན་ཏུ་རིན་ཆེན་དང༌། །གསེར་རྣམས་ཀྱིས་ནི་མཛེས་པར་སྤྲས། །གྲོགས་མཆོག་ཡིད་འོང་མཆོད་ན་ནི། །འགྲུབ་པ་ཉིད་དུ་ཐེ་ཚོམ་མེད། །བདག་ཉིད་ཐུན་ནས་སྒོ་ཡི་ནི། །དྲྀ་ཡི་ཆུ་ཡི་ལེགས་པར་གདབ། ཅེས་པ་དང༌། དྲིལ་དཔྱངས་མེ་ཏོག་སྤོས་ཀྱིས་བརྒྱན། །ཤིན་ཏུ་སྒྲ་སྙན་དྲིལ་བུ་འཁྲོལ། །སྒྲུབ་པ་པོ་ཡི་རྔ་བརྡུང་ཞིང༌། །ཧ་ཧ་ཞེས་ནི་བརྗོད་པར་བྱ། །ཞེས་གསུངས་པ་ལྟར་རོ། །དེ་ལྟར་ཐིག་གདབ་པ་ནས་བཟུང་སྟེ། འདི་དག་གི་བར་གྱི་ཉི་མ་རྣམས་ལ། སྔ་ཕྱི་གང་ཡང་རུང་བར། ཕུར་བུ་རྣམས་ལ་མཆོད་བསྟོད་དང༌། ཨཱ་ཀཱ་རོའི་སྔགས་ཀྱིས་གཏོར་མ་འབུལ་བར་བྱ་ལ། དངོས་གཞིའི་ཉི་མ་རྣམས་ལ་ནི་དཀྱིལ་འཁོར་གྱི་ཞོར་ལ་མཆོད་བསྟོད་གཏོར་མ་ཕུལ་བར་དམིགས་པས་ཆོག་གའོ། །དྲུག་པ་དཀྱིལ་འཁོར་སྒྲུབ་པ་ལ་དཀྱིལ་འཁོར་སྒྲུབ་པའི་སྔོན་འགྲོ་དང༌། དཀྱིལ་འཁོར་སྒྲུབ་པ་དངོས་གཉིས་ལས། དང་པོ་ནི། སྔོན་འགྲོ་གཏོར་མ་དང༌། གནས་ཡོ་བྱིན་རླབས་དང༌། ཞུ་འབུལ་དང༌། སྐྱབས་འགྲོ་སེམས་
བསྐྱེད་ནས་བརྩམས་ཏེ། རྒྱུན་བཤགས་ཡན་ཆད་བྱས་ལ། ཚོགས་ཞིང་རྣམས་རང་ལ་སྟིམ། ཚད་མེད་བཞི་སྒོམ་པ་ཡན་ཆད་བྱའོ། །དེ་ནས་མདུན་བསྐྱེད་ཀྱི་དཀྱིལ་འཁོར་ལ་སྦྱང་བ་ནི། བགེགས་གཏོར་རྣམས་བཤམས། བསངས་སྦྱངས། འབྲུ་གསུམ་གྱིས་བྱིན་གྱིས་རླབས། གཏོར་མའམ་འཐེབ་ཀྱུ་གསུམ་པོ་རིམ་གྱིས་སྐོར་ལ། ཨོཾ་སརྦ་བིགྷྣ་བྷྱཿན་མཿསརྦ་ཏ་ཐཱ་ག་ཏ་བྷྱོཿབི་ཤྭ་མུ་ཁེ་བྷྱཿསརྦ་ཐཱ་ཁཾ་ཨུད་ག་ཏེ་སྥཱ་ར་ཎ་ཨི་མཾ་ག་ག་ན་ཁཾ་གྲྀཧྞེ་དཾ་བ་ལིཾ་ཏེ་སྭཱཧཱ། ཞེས་ལན་གསུམ། འདིར་བགེགས་ཀྱི་ཚོགས་གང་ཡིན་པ་དེ་ཐམས་ཅད། མཆོད་སྦྱིན་གྱི་གཏོར་མ་རྒྱ་ཆེན་པོ་འདིས་ཚིམ་ནས། ཕན་པ་དང་བདེ་བའི་སེམས་དང་ལྡན་པས་གཞན་དུ་དེངས་ཤིག ཞི་བས་སྦྱངས་པའོ། །ཨོཾ་སུམྦྷ་སོགས་ལན་གསུམ་བཟླས་ཤིང་རྡོ་རྗེ་གསོར་ལ། ཏིང་ལོའམ་ཆང་བུ་བསྐོར། འདིར་བགེགས་ཀྱི་ཚོགས་གང་ཡིན་པ་དེ་ཐམས་ཅད། གཏོར་མ་ལམ་རྔན། ཏིང་ལོ་ལམ་སྒྲོན་ཆང་བུ་ལམ་རྒྱགས་ཀྱི་ཚུལ་དུ་ཁྱེར་ལ། སའི་ཕྱོགས་འདིར་མ་གནས་པར་གཞན་དུ་སོང་ཤིག ཅེས་པ་ནི། ཞི་དྲག་ཕྱེད་མས་སྦྱང་བའོ། །ཧཱུཾ་མཛད་ཀྱི་ཕྱག་རྒྱ་བྱས་ནས་བདེན་སྟོབས་བརྗོད་ལ། མཐར་དྲག་པོའི་མཚམས་རྔམ་རོལ་ཆེན་དང་བཅས་པས་སྤྲད་པ་ནི། འདི་ལྟར། ན་མོ་རྗེ་བཙུན་རྩ་བ་དང་བརྒྱུད་པར་བཅས་པའི་དཔལ་ལྡན་བླ་མ་དམ་པ་རྣམས་ཀྱི་བཀའ་བདེན་པ་དང༌། ཡི་དམ་རྒྱལ་བའི་དཀྱིལ་འཁོར་གྱི་ལྷ་ཚོགས་རྣམས་ཀྱི༴ དཔལ་མགོན་དམ་པ་ཆོས་སྐྱོང་སྲུང་མ་ཡེ་ཤེས་ཀྱི་སྤྱན་དང་ལྡན་པ་རྣམས་ཀྱི༴ སངས་རྒྱས་ཀྱི༴
ཆོས་ཀྱི༴ དགེ་འདུན་གྱི་བཀའ་བདེན་པ་དང༌། ཆོས་ཀྱི་དབྱིངས་རྣམ་པར་དག་ཅིང་བསམ་གྱིས་མི་ཁྱབ་པའི་བདེན་པ་དང༌། ཀུན་རྫོབ་རྒྱུ་འབྲས་བསླུ་བ་མེད་པའི་བདེན་པ་དང༌། བདེན་པ་ཆེན་པོའི་བྱིན་གྱིས་བརླབ་ཀྱིས། འདིར་དཀྱིལ་འཁོར་ཆེན་པོ་སྒྲུབ་ཅིང་མཆོད་པ་དང༌། དབང་གི་ལས་རིམ་ལ་འཇུག་པ་ལ། བར་དུ་གཅོད་པར་བྱེད་པའི་འབྱུང་པོ་གདོན་བགེགས་ཀྱི་རིགས་གང་ཡིན་པ་དེ་དགདེང་དཔལ་ཧེ་རུ་ཀའི་བཀའ་ཐོས་པས། སའི་ཕྱོགས་འདིར་མ་གནས་པར་མྱུར་བ་ཉིད་དུ་སོང་ཤིག གང་དག་མི་འགྲོ་བ་དེ་དག་ཐམས་ཅད། དུས་གསུམ་གྱི་སངས་རྒྱས་ཐམས་ཅད་ཀྱི་ཐུགས་གཉིས་སུ་མེད་པའི་ཡེ་ཤེས་ལས་བྱུང་བའི་ཁྲོ་བོའི་རྡོ་རྗེ་དང་རྡོ་རྗེ་ཁ་ཊཾ་ག་འབར་ཞིང་རབ་ཏུ་འབར་བ་འདིས་ཁྱེད་རྣམས་ཀྱིས་མགོ་བོ་ཚལ་པ་བརྒྱར་དགས་པར་བྱའོ། །ཅེས་དང༌། སུམྦྷ་བཟླས་པས་བགེགས་བསྐྲད་ཞིང་གཏོར་མ་ཕྱི་རོལ་ཏུ་དོར་ཏེ། དྲག་པོས་སྦྱང་བའོ། །བསྡུས་པ་ལ་མོས་ན། བཀའ་བསྒོ་བ་ཡིད་ཀྱིས་བྱས་ནས་སྔགས་ཙམ་བརྗོད་དེ། བདག་གཞན་སེམས་ཅན་ཐམས་ཅད་ཀྱི་འཁོར་བ་ཐོག་མ་མེད་པ་ནས་བསགས་པའི་སྡིག་སྒྲིབ་ཐམས་ཅད་སྙིང་གར་ཡི་གེ་བཾ་གྱི་རྣམ་པར་གནས་པ། ལྟེ་བའི་གཏུམ་མོ་འབར་བའི་འོད་ཟེར་གྱིས་དེང་སྟེ། སྣ་སྒོར་སྡིག་པ་རྭ་ཅན་གྱི་རྣམ་པར་གྱུར་པ་མདུན་གྱི་ཏིལ་ལ་ཐིམ། བསངས་སྦྱངས། འབར་བའི་མེའི་ནང་དུ་ཁྲོ་བོ་རྡོ་རྗེ་མཁའ་འགྲོ་རྡོ་རྗེ་དང་དྲིལ་བུ་འཛིན་པ་ཞལ་གདངས་པའོ། །
ཨོཾ་བཛྲ་ཌཱ་ཀ་ཁ་ཁ་ཁཱ་ཧི་ཁཱ་ཧི། སརྦ་པ་པཱཾ་ད་ཧ་ན་བྷསྨྀ་ཀུ་རུ་སྭཱཧཱ། ལན་གསུམ་བརྗོད་ལས་ཀྱི་རྡོ་རྗེས་ཏིལ་གཡས་གཡོན་དུ་བསྐོར་ནས། གཡས་སུ་མེ་དང་གཡོན་དུ་ཆུ་དོར་བས། རྡོ་རྗེ་མཁའ་འགྲོའི་ཞལ་དུ་གསོལ་བ་དང༌། རྒྱ་མཚོ་ཆེན་པོར་སྐྱུར་བར་བསམ། མཐར་མེ་ཡང་ཆུ་ནང་ལྡུགས་སོ། །སྡིག་པ་སྦྱང་བའོ། །དེ་ནས་མེ་ལོང་བསྟན་ཏེ། ལས་བུམ་བླངས་ནས་ཁྲུས་གསོལ་བྱ་སྟེ། ཇི་ལྟར་བལྟམས་པ༴ ནས། ཤྲཱི་ཡེ་ཧཱུཾ། འདི་ནི་ཁྲུས་མཆོག༴ སོགས་དང༌། དེ་བཞིན་གཤེགས་དང༌། སོགས་ཀྱི་རོལ་ཆེན་དང་བཅས་པས་ཀྱང་ཁྲུས་གསོལ། དེ་དག་སྐུ་ལ༴ ནས། ཨོཾ་ཧཱུཾ་ཏྲཾ་ཧྲཱིཿཨཿཀཱ་ཡ་བི་ཤྭ་དྷ་ན་ཡེ་སྭཱཧཱ། ཞེས་སྐུ་ཕྱིས་ཕུལ། སྤྲོ་ན་དྲིའི་བྱུག་པ་དང༌། གོས་དང་རྒྱན་ཡང་འབུལ་ཏེ་དྲི་མ་སྦྱང་བའོ། །དེ་དག་ནི་དཀྱིལ་འཁོར་སྒྲུབ་པའི་སྔོན་དུ་འགྲོ་བའི་བྱ་བའོ། གཉིས་པ་ལ། སྡོམས་ནི། གཟུགས་བརྙན་བསྐྱེད་དང་བདག་ཉིད་རྫོགས། །བདག་མདུན་བསྲེ་དང་བུམ་པ་སྒྲུབ། །ཐུན་མོང་བྱིན་རླབས་རྣལ་འབྱོར་སྒོམ། །དཀྱིལ་འཁོར་སྒྲུབ་ཚུལ་རྣམ་ལྔའོ། །བསྐྱེད་དང་བདག་དྲན་མཆོད་བསྟོད་གསུམ། །གཟུགས་བརྙན་བསྐྱེད་པའི་ལག་ལེན་ཡིན། །སྒོམ་དང་བཟླས་པ་མཆོད་པ་གསུམ། །བདག་བསྐྱེད་དཀྱིལ་འཁོར་སྒྲུབ་ཚུལ་ཡིན། །གོ་བགོས་བསྲེ་ཞིང་མཆོད་བསྟོད་བྱ། །བདག་མདུན་བསྲེ་བའི་མན་ངག་ཡིན། །བུམ་སྒྲུབ་འགོད་དང་སྐྱོང་བ་འགོད། །བུམ་པའི་དཀྱིལ་འཁོར་སྒྲུབ་པར་འདོད། །བསྲེ་དང་གོ་ཆ་དག་དྲན་དང༌། །སྟ་གོན་ཡེ་ཤེས་དབང་བསྐུར་ནི། །ཀུན་གྱི་ཐུན་མོང་ཆོ་གའོ། །དེ་ཡང་གཟུགས་བརྙན་གྱི་དཀྱིལ་འཁོར་བསྐྱེད་པ། བདག་ཉིད་ཀྱི་དཀྱིལ་འཁོར་རྫོགས་པ། བདག་མདུན་གཅིག་ཏུ་བསྲེ་བ་
བུམ་པའི་དཀྱིལ་འཁོར་སྒྲུབ་པ། ཐུན་མོང་དུ་བྱིན་གྱིས་བརླབ་པའི་ཆོ་ག་སྟེ་ལྔ་ལས། དང་པོ་ནི། རྡུལ་ཚོན་གྱི་དཀྱིལ་འཁོར་སངས་སྦྱངས། སྟོང་པའི་ངང་ལས་སྐད་ཅིག་གིས་རྡོ་རྗེའི་ས་གཞི་རྭ་བ་དྲྭ་བ་གུར་བླ་བྲེ། མདའི་དྲ་བ་ཡེ་ཤེས་ཀྱི་མེ་དཔུང་འབར་བ་དང་བཅས་པའི་དབུས་སུ་ཆོས་ཀྱི་འབྱུང་གནས། ནས། རྡོ་རྗེའི་འཕྲེང་བས་མཚན་པའི་བར། ལྷ་སྟ་གོན་གྱི་སྐབས་དང་འདྲའོ། །འོན་ཀྱང་འདིར་འདམ་ཁའི་རྣམ་གྲངས་གསུངས་པ་ནི། དཀྱིལ་འཁོར་གྱི་གཙོ་བོ་གཡོན་ལྗང་རྒྱབ་དམར་གཡས་སེར་བའི་ཞལ་དང༌། ཕྱག་མཚན་གྱི་གོ་རིམ་ཀྱང་ལཱུ་དྲིལ་གཉིས་དང་མཐུན་པ་དང༌། སྙིང་པོའི་རྣལ་འབྱོར་མ་བཞི་དང་སྒོ་མཚམས་མ་བརྒྱད་པོ་ཕྱག་བཞི་གྲི་གུག་ཐོད་པ་ཌཱ་མ་རུ་ཁ་ཊྭཱཾཾ་ག་རྣམས་འཛིན་པར་དཀྱིལ་ཆོག་ལས་གསུངས་ཏེ། སྒྲུབ་ཐབས་ལས་བཤད་པ་དང་མི་འདྲ་ཡང༌། འདམ་ཁར་དགོངས་པ་ཡིན་ལ། དེས་ན་བདག་བསྐྱེད་ལའང་འདི་བཞིན་སྒོམ་དུ་རུང་བ་ནི་ཡིན་ཞིང༌། བདག་མདུན་གཉིས་པོ་རྣམ་པ་གཅིག་ཁོ་ནར་མཚུངས་པ་དགོས་པའང་མིན་པས། ཇི་ལྟར་བདེ་བར་སྦྱོར་ཏེ། དེས་ན་བདག་མདུན་གཉིས་ཀ་ལ། མ་མོ་བཅུ་གཉིས་ཕྱག་བཞི་པར་མཚུངས་པའམ། གཉིས་པར་མཚུངས་པར་བྱས་ཀྱང་རུང་ལ། སྒྲུབ་དཀྱིལ་གྱི་གཞུང་གི་དངོས་བསྟན་ལྟར། བདག་བསྐྱེད་ཕྱག་གཉིས་པ་དང༌། མདུན་བསྐྱེད་ལ་བཞི་པའམ། དེ་གཉིས་གོ་བཟློག་ཀྱང་རུང་སྟེ། གཙོ་བོའི་ཞལ་ཕྱག་ལའང་དེས་རིགས་འགྲེའོ།། གང་ལྟར་ཡང་དེ་ནས་ལུས་དང་ཚོར་བ་ཞེས་སོགས་བྱང་ཕྱོགས་ཀྱི་དག་དྲན་བྱ། གཟུགས་བརྙན་གྱི་དཀྱིལ་འཁོར་ལ་མཆོད་ཡོན་ནས་རོལ་མོའི་བར་གྱིས་མཆོད་རྐང་བརྒྱད་གཉིས་ཀྱི་བསྟོད་དོ། །གཉིས་པ་ནི་སློབ་དཔོན་
བདག་ཉིད་ཆས་སུ་ཞུགས་ཏེ། དེ་ཐམས་ཅད་སྟོང་པ་ཉིད་དུ་སྦྱངས། ཨོཾ་སྭ་བྷཱ་ཝ་སོགས་ཡེ་ཤེས་ཚོགས་གསོག་ནས་བཟུང་སྟེ་བཟླས་པ་རྫོགས་ཀྱི་བར་དུ་མངོན་རྟོགས་བཞིན་བདག་བསྐྱེད་རྫོགས་པར་སྒོམ། དེ་ནས་ཨརྒྷཾ་ནས། ཤཔྟའི་བར་གྱིས་མཆོད། རྐང་བརྒྱད་གཉིས་ཀྱིས་བསྟོད། གསུམ་པ་ནི། གཟུགས་བརྙན་གྱི་དཀྱིལ་འཁོར་སྔོན་བཞིན་དུ་ཡིད་ཀྱིས་དམིགས་ནས། བདག་བསྐྱེད་དཀྱིལ་འཁོར་གྱི་ལྷ་ཚོགས་རྣམས་དང༌། གཟུགས་བརྙན་གྱི་དཀྱིལ་འཁོར་ལྷ་ཚོགས་ཐམས་ཅད་ཀྱི་སྙིང་ཁར་ཨོཾ་ཨོཾ་ཧ། སོགས་གོ་ཆ་གསུམ་གྱིས་རྒྱས་གདབ། བདག་གིས་བསྒོམ་པའི་ལྷ་དྲུག་ཅུ་རྩ་གཉིས་དང༌། གཟུགས་བརྙན་གྱི་དཀྱིལ་འཁོར་གྱི་ལྷ་དྲུག་ཅུ་རྩ་གཉིས་གཉིས་སུ་མེད་པར་གྱུར། བདག་གིས་སྒོམས་པའི་ཐོད་པ་བཞི་གཞལ་ཡས་ཁང་ལྷའི་གདན་ཕྱི་རོལ་དུར་ཁྲོད་དང་བཅས་པ་དང༌། མདུན་བསྐྱེད་ཀྱི་ཐོད་པ་བཞི་གཞལ་ཡས་ཁང་ལྷའི་གདན་ཕྱི་རོལ་དུར་ཁྲོད་དང་བཅས་པ་གཉིས་སུ་མེད་པར་གྱུར། ཨོཾ་ཨཱ་ཧཱུཾ། ལན་སུམ་ཅུ་སོ་དགུ་བརྗོད། བདག་གིས་སྒོམ་པའི་འབྱུང་བཞི་རི་རབ་ཆོས་འབྱུང་སྲུང་འཁོར་དང་བཅས་པ་དང༌། མདུན་བསྐྱེད་ཀྱི་འབྱུང་བཞི་རི་རབ་ཆོས་འབྱུང་སྲུང་འཁོར་དང་བཅས་པ་གཅིག་ཏུ་འདྲེས་པར་གྱུར། སུམྦྷ་ལན་གསུམ་བཟླའོ། །ཨརྒྷ྄ཾ་ནས་ཤཔྟའི་བར་གྱིས་མཆོད། རྐང་བརྒྱད་གཉིས་ཀྱིས་བསྟོད། བཞི་པ་ནི། བུམ་པ་རྒྱས་པ་ལྟར་ན། ལྷ་བུམ་སུམ་ཅུ་སོ་བདུན། བཀྲ་ཤིས་ཀྱི་བུམ་པ་བརྒྱད། ལས་བུམ་སྟེ་བཞི་བཅུ་རྩ་དྲུག་གོ །འབྲིང་པོ་ནི། གཙོ་བོ་ཡབ་
ཡུམ་དང་འཁོར་ལོ་ལྔ་ལ་རེ་རེ། བཀྲ་ཤིས་ཀྱི་བུམ་པ་བརྒྱད་དང་ལས་བུམ་སྟེ་བཅོ་ལྔའོ། །ཅུང་ཟད་བསྡུས་པ་ནི། རྣམ་རྒྱལ་བུམ་པ་དང་བཀྲ་ཤིས་ཀྱི་བུམ་པ་བརྒྱད། ལས་བུམ་སྟེ་བཅུའོ། །ཤིན་ཏུ་བསྡུ་ན་རྣམ་རྒྱལ་དང་ལས་བུམ་མོ། །རྣམ་རྒྱལ་བུམ་པ་ལ་རིགས་ལྔའི་ཕྱག་མཚན་དང༌། ལས་བུམ་ལ་གྲི་གུག་འགོད། བཀྲ་ཤིས་བུམ་པ་བརྒྱད་ལ་ནི། ལྷའི་མཚན་མ་མ་བཀོད་ཀྱང་ཆོག་སྟེ། ཕྱོགས་མཚམས་མི་ནོར་བའི་རྟགས་ཙམ་ནི་བྱའོ། །བུམ་པ་རྣམས་གོས་ཟུང་གིས་གཡོགས། མགྲིན་པར་སྲད་བུ་དཀར་པོ་སྐོར་བདུན་དཀྲི། སོ་བ། མོན་སྲན། ནས། གྲོ། ཏིལ་དཀར་ཏེ་འབྲུ་ལྔ་དང༌། མུ་ཏིག གསེར། མུ་མེན། བྱུ་རུ་དངུལ་ཏེ་རིན་པོ་ཆེ་ལྔ་དང༌། ཀཎྜ་ཀ་རི་སླེ་ཏྲེས་དབང་ལག ཆུ་སྲིན་སྡེར་མོ། ཤུ་ཐག་དཀར་པོ་སྟེ་སྨན་ལྔ་དང༌། གུར་གུམ། ག་པུར། ཙནྡན། ཨ་ཀར། གླ་རྩི་སྟེ་དྲི་ལྔ་དང༌། འོ་མ། མར། སྦྲང་རྩི། བུར་རམ། ལན་ཚྭ་སྟེ་སྙིང་པོ་ལྔའམ། ཁྱད་པར་དུ་མེ་ཏོག་མཐིང་དཀར་སེར་དམར་སྔོ་སངས་ཏེ་མེ་ཏོག་ལྔ་དང༌། ཤ་ལྔ་བདུད་རྩི་ལྔ་རྣམས་ཨོཾ་ཨཱཿཧཱུཾ་བཟླ་བཞིན་དུ་བུམ་པར་གཞུག དགེ་བས་ཤིང་གི་ཡལ་གས་ཁ་བརྒྱན་པར་བྱའོ། །དེང་སང་ལག་ལེན་ལ། བུམ་པ་བཅུའམ་གཉིས་གཙོ་བོར་བྱེད་པས། བཅུ་ཡོད་ན་རྣམ་རྒྱལ་བུམ་པ་ལ་བཀྲ་ཤིས་བུམ་པ་བརྒྱད་ཀྱིས་ཕྱོགས་མཚམས་ནས་བསྐོར། ལས་བུམ་ལོགས་སུ་བཞག །རྣམ་རྒྱལ་གྱི་སྟེང་ཐོད་པའམ། དུང་ཆོས་མཆོད་ཡོན་གྱིས་གང་བ་དང་གཟུང་ཐག་རྡོ་རྗེ་ཡང་བཞག་གོ །གང་ལྟར་ཡང་མཐའ་མཆོད་གཏོར་གྱིས་བསྐོར། མཆོད་པ་བྱིན་རླབས་བྱ། བུམ་པ་རྣམས་བསངས་སྦྱངས། སྟོང་པའི་ངང་ལས། པཾ་ལས་སྣ་ཚོགས་པདྨ་བཅུའི་
སྟེང་དུ། ཨ་ལས་ཟླ་བའི་གདན་རེ་རེ། དེ་རྣམས་ཀྱི་སྟེང་དུ་བྷྲུཾ་རྣམས་ལས་རིན་པོ་ཆེའི་བུམ་པ་ལྟོ་བ་ལྡིར་ཞིང༌། མགྲིན་པ་ཕྲ་བ། མཆུ་འཕྱང་བ། ལྷ་རྫས་ཀྱི་གོས་ཀྱི་མགུལ་བཅིངས་དང༌། དཔག་བསམ་གྱི་ཤིང་གི་ཁ་བརྒྱན་པ། ནང་ཆུ་དང་བཅུད་ཐམས་ཅད་ཀྱིས་ཡོངས་སུ་གང་བ། དབུས་ཀྱི་བུམ་པའི་ནང་དུ་བཅོམ་ལྡན་འདས་དཔལ་ཧེ་རུ་ཀ་འཁོར་ལོ་བདེ་མཆོག་ནས་བསྐལ་པའི་མེ་ལྟ་བུའི་དབུས་ན་བཞུགས་པའོ། །དེའི་ཤར་དུ་མཁའ་འགྲོ་མ་ནས་གཟུགས་ཀྱིས་མཚན་པའོ། །དེའི་ཕྱི་རོལ་ཤར་ཕྱོགས་པུལླྀ་རཱ་མ་ནས་ནག་པོའོ། །དེའི་ཕྱི་རོལ་ཤར༴ སོགས་གསུང་དང་སྐུ་ལའང་འགྲེ་སྟེ། ཐོད་པ་ཁྲག་གིས་གང་བ་བསྣམས་པའོ། །ཞེས་པའི་བར་དང༌། དེའི་ཕྱི་རོལ་ཤར་དུ་ཁྭ་གདོང་མ་སོགས་འཕྲེང་བས་མཚན་པའོ། །ཤར་གྱི་སྟེང་གི་མཚན་མ་ཧཱུཾ་ལས་ཧེ་རུ་ཀ་ནག་པོ། དེའི་འོག་གིས་མཚན་མ་མཾ་ལས་མཁའ་འགྲོ་མ་སྔོ་སྐྱ། བྱང་གི་མཚན་མ་ཏཾ་ལས་ལཱ་མ་ལྗང་སྐྱ། ནུབ་ཀྱི་མཚན་མ་པཾ་ལས་ཁཎྜ་རོ་ཧཱ་དམར་སྐྱ། ལྷོའི་མཚན་མ་ལཾ་ལས་གཟུགས་ཅན་མ་སེར་སྐྱ། ལས་བུམ་གྱི་ནང་དང༌། མཚན་མའི་གནས་སུ་ཁཎྜ་རོ་ཧ། སྐུ་མདོག་དམར་མོ་དྲེགས་ཤིང་ཁྲོས་པ་ཞལ་གཅིག་ཕྱག་གཉིས་གཡས་གྲི་གུག་དང་གཡོན་ཐོད་པ་བསྣམས་པ། གཡས་བརྐྱང་གི་རོ་ལ་གནས་པའོ། །དེ་ནས་གོ་ཆ་དགོད་པ་དང༌། ཡེ་ཤེས་པ་གཞུག་པ་དང༌།
དབང་བསྐུར་རྒྱས་བཏབ་རྣམས་སྒྲུབ་ཐབས་བཞིན་དུ་བྱ་བ་ལས། ཁཎྜ་རོ་ཧ་ལ་འོད་དཔག་མེད་པས་དབུ་བརྒྱན། ཞེས་བརྗོད་པའམ། དེ་ནི་བདེ་ཆེན་འཁོར་ལོ་པའི་ནང་དུ་ཚང་བས་མ་བརྗོད་ཀྱང་ཆོག་གོ །སྤྲོས་པ་ལ་དགའ་བས་བཀྲ་ཤིས་བུམ་པ་བརྒྱད་ལ་ལྷ་བསྐྱེད་པར་འདོད་ན། སྒོ་མཚམས་མ་བརྒྱད་བསྐྱེད་པར་འོས་ཀྱང༌། སྐབས་འདིར་ངེས་པར་དགོས་པ་ནི་མ་ཡིན་ནོ། །དེ་ནས་ཕྱི་མཆོད། ནང་མཆོད། རྐང་བརྒྱད་ཀྱི་བསྟོད་པ་རྣམས། དཀྱིལ་འཁོར་རྒྱལ་མཆོག་གི་སྐབས་བཞིན་དུ་བྱ་སྟེ། འོན་ཀྱང་ནང་མཆོད་བྱིན་རླབས་དང༌། བླ་མ་རྣམས་ཀྱི་མཚན་སྨོས་པ་དག་མི་དགོས་སོ། །དེ་ནས་རྡོ་རྗེ་དང་འབྲེལ་བའི་མེ་ཏོག་ཕྲེང་བ་ནས་བཟུང་སྟེ། འདི་སྐད་ཅེས། རང་གི་སྙིང་ཁ་ནས་སྔགས་ཀྱི་ཕྲེང་བ་རྣམས་ཁ་དོག་དམར་པོའི་ཚུལ་གྱིས་སྤྲོས་པ་རྣམས། གཟུང་ཐག་ལ་འཁྲིལ་ནས་སོང་བ། ལྷ་རྣམས་ཀྱི་ཐུགས་ཀར་རེག་པས་ཐུགས་རྒྱུད་བསྐུལ། སྐུ་ལས་བདུད་རྩིའི་རྒྱུན་བབས་པས་བུམ་པ་གང་བར་གྱུར། གཙོ་བོ་ཡབ་ཡུམ་གྱི་སྔགས་བརྒྱ་རྩ་བརྒྱད་ལས་མི་ཉུང་བ་དང༌། འཁོར་རྣམས་ལ་བདུན་ལས་མི་ཉུང་བ་བཟླས་ཏེ་རྣམ་རྒྱལ་བུམ་པ་ལའོ། །སུམྦྷ་མང་དུ་བཟླ་སྟེ་ལས་བུམ་ལའོ། །སྒོ་མཚམས་མ་བརྒྱད་ཀྱི་སྔགས་དང་ཡི་གེ་བདུན་པ་བཟླ་སྟེ། བཀྲ་ཤིས་ཀྱི་བུམ་པ་བརྒྱད་ལའོ། །ཐོག་མ་དང་ཐ་མར་ཡུམ་གྱི་སྙིང་པོ་མང་དུ་བཟླ་ཞིང༌། ཐམས་ཅད་ཀྱི་མཐར། ཨོཾ་སརྦ་ཏ་ཐཱ་ག་ཏ་ཨཾ་བྷི་ཥེ་ཀ་ཏ་ས་མ་ཡ་ཤྲཱི་ཧཱུཾ། ཞེས་པའང་ཅི་རིགས་པར་བཟླ་སྟེ་བུམ་པ་ཐམས་ཅད་ལའོ། །དེ་ནས་ལྷ་སྟ་གོན་གྱི་སྐབས་སུ་འཇིག་རྟེན་ལས་འདས་པའི་ལྷ་ལ་གཏོར་མ་འབུལ་བ་ལྟར། བུམ་པའི་ལྷ་ལ་ཡང་གཏོར་མ་འབུལ།
གོང་བཞིན་མཆོད་བསྟོད་བྱ། ཡིག་བརྒྱ་ཚར་གསུམ། མ་འབྱོར་པ་དང༌། ཞེས་སོགས་ཀྱིས། བཟོད་པར་གསོལ་མཆོད་ཡོན་བུམ་པ་རྣམས་སུ་ཕུལ་ཏེ། ཨོཾ་ཨཱཿཧཱུཾ། མཆོད་ཡོན་ཕུལ་བའི་རྐྱེན་གྱིས་ལྷ་རྣམས་འདོད་ཆགས་ཆེན་པོའི་མེས་བྱང་ཆུབ་ཀྱི་སེམས་སུ་ཞུ་བར་གྱུར། དེ་ནས་བུམ་པ་ལ་མེ་ཏོག་གཏོར་ཞིང་བཀྲ་ཤིས་བརྗོད། བདུག་སྤོས་ཀྱི་སྣ་དྲངས་རོལ་མོའི་སྒྲ་དང་བཅས་ནས། དཀྱིལ་འཁོར་ལ་གཡོན་བསྐོར་ལན་གསུམ་དུ་བྱས་ནས་དཀྱིལ་འཁོར་གྱི་དབུས་སུ་མཉྫི་ལ་སོགས་པའི་སྟེང་དུ་རྣམ་རྒྱལ་བུམ་པ་འགོད། སྒོ་མཚམས་བརྒྱད་དུ་བཀྲ་ཤིས་ཀྱི་བུམ་པ་དང༌། དཀྱིལ་འཁོར་གྱི་ཤར་སྒོའི་གཡས་ཀྱི་ཁྱམས་ལ་ལས་བུམ་འགོད་དོ། །དེ་ལྟར་མི་བདེ་ན། གཞན་རྣམས་རྡོ་རྗེའི་ར་བའི་ནང་ཙམ་དུ་འགོད་ཅིང༌། རྣམ་རྒྱལ་བུམ་པ་ཤར་སྒོར་བཞག།བུམ་པ་རྣམས་ཀྱི་སྟེང་དུ་ཆང་དང་བདུད་རྩི་ལྔ་དང་བཟའ་བ་དང་བཅའ་བ་དང་རོ་སྣ་ཚོགས་ཀྱིས་གང་བའི་ཐོད་པ་དག་བཞག་པར་བྱའོ། །དེ་ནས་ཇི་སྐད་དུ། སྒོ་བཞི་དག་ནི་རྣལ་འབྱོར་མ། །དཔའ་བོ་གཉིས་མེད་དག་གིས་མཚན། །ཚོན་ཆེན་སོགས་ཀྱིས་གོས་དག་གམ། །དར་ལ་སོགས་པ་དག་གིས་བརྒྱན། །ཕྱག་རྒྱ་ལྔ་ལ་སོགས་པའི་ལུས། །རྩེ་བྲན་ལྔས་ནི་རྣམ་པར་བརྒྱན། །རྡོ་རྗེ་དྲིལ་བུས་ཡང་དག་འཁྱུད། །སྒོ་བརྒྱད་དག་ཏུ་ཁ་སྦྱོར་རོ། །ཚོགས་ཀྱི་གཙོ་བོ་བདག་པོ་ཀུན། །འཁོར་ལོས་བསྒྱུར་བའི་རྣམ་རོལ་ཡིན། །ཞེས་གསུངས་པ་ལྟར། བུམ་པ་སྐྱོང་བ་དང༌། སྦྱིན་སྲེག་ལ་སོགས་པ་མཆོད་པའི་དོན་དུ་ཆས་སུ་ཞུགས་པའི་དཔའ་བོ་རྣལ་འབྱོར་མ་བརྒྱད་པོ་དག་ཀྱང་དགོད་དགོས་མོད་ཀྱི། དངོས་སུ་མེད་ན་ཡིད་ཀྱི་བསམ་མོ། །ལྔ་པ་ནི། མདུན་བསྐྱེད་ཀྱི་དཀྱིལ་འཁོར་དང༌། བུམ་པ་ལ་གནས་པའི་ཡེ་ཤེས་ཀྱི་ལྷ་རྣམས་མཉམ་པ་ཉིད་ཀྱིས་རང་བཞིན་གཉིས་སུ་
མེད་པའི་བདག་ཉིད་དུ་གྱུར། ཨོཾ་ཨཱཿཧཱུཾ། སརྦ་བཱི་ར་ཡོ་གི་ནཱི། སོགས་སྐད་ཅིག་རྣམ་པའི་སྔགས་རིམ་པ་གཉིས་ཀ་ལན་གསུམ་གསུམ་བརྗོད། ལྷ་ཐམས་ཅད་ཀྱི་སྙིང་ཁར་ཨོཾ་ཨོཾ་ཧ་ནས། ཙན་ཌི་ཀའི་ངོ་བོའི་བར་གྱིས་གོ་ཆ་བཀོད། སྐབས་འདིར་ཡང་བྱང་ཕྱོགས་སོ་བདུན་གྱི་དག་པ་དྲན་པར་བྱའོ། །དེ་ནས་བླ་མ་གོང་མ་རྣམས་ཀྱི་བཞེད་པས། རང་གི་སྙིང་ག་ནས་སྟ་གོན་གྱི་དཀྱིལ་འཁོར་སྤྱན་དྲངས་ཕཻཾ། ཨརྒྷཾ་ནས། ཤཔྟའི་བར་གྱིས་མཆོད། རྐང་བརྒྱད་ཀྱིས་བསྟོད། ཛཿཧཱུཾ་བཾ་ཧོཿ ཡོ་ག་ཤུདྡྷོ། སོགས་ཏེ་སྟ་གོན་གྱི་ལྷ་བསྲེ་བའོ། །སླར་ཡང་ཡེ་ཤེས་པ་གཞུག་པ་དང༌། དབང་བསྐུར་བ་ནི་སྟ་གོན་གྱི་སྐབས་ལྟར་བྱ་སྟེ་ཕལ་ཆེར་སྒྲུབ་ཐབས་ཀྱི་དཀྱིལ་འཁོར་རྒྱལ་མཆོག་ལྟར་བྱའོ། །སྐབས་འདིར་འདི་ལྟར་ཤེས་དགོས་ཏེ། སྟ་གོན་གྱི་དཀྱིལ་འཁོར་སྙིང་ཁར་བསྡུས་པའི་ཕྱོགས་འདི་རིགས་ལ། སྙིང་ཁ་ནས་སྟ་གོན་གྱི་དཀྱིལ་འཁོར་སྤྲོ་བ་བྱས་ཀྱང་ལྷག་པའི་སྐྱོན་དུ་མི་འགྱུར་ལ་མེད་ཀྱང་ཆོག་སྟེ། གོང་དུ་བདག་མདུན་བསྲེས་པ་ཉིད་ཀྱིས་དེའི་དོན་གྲུབ་པའི་ཕྱིར་རོ། །གཞུང་ནས་སྟ་གོན་དང་དངོས་གཞིའི་དཀྱིལ་འཁོར་སྒྲུབ་པའི་སྐབས་གཉིས་ཀར་དུ། མདུན་བསྐྱེད་ལ་དབང་བསྐུར་བྱེད་ཚུལ་གསལ་བར་མ་གསུངས་པས་བྱས་ཀྱང་རུང་བ་ཙམ་ཡིན་མོད། ཆོ་ག་སྤྱི་འགྲོས་ལས་དོན་གྱི་ཐོབ་པས་ན་བྱས་ན་ལེགས་པ་ཡིན་ནོ། །བདུན་པ་མཆོད་པ་རྒྱས་པ་ནི་མཆོད་པ་སྤྱི་དང་ཁྱད་པར་གྱི་མཆོད་པའོ། །དང་པོ་ནི། སྒྲུབ་ཐབས་ལྟར་བྱིན་གྱིས་བརླབ་ནས་མཆོད་པ་འབུལ་བ་ལ། སྡོམས་ནི། ཆུར་བཅས་ཉེར་སྤྱོད་དགོས་ཟུང་དང༌། །རིག་མ་བཅུ་དྲུག་རིན་ཆེན་བདུན། །འདོད་ཡོན་ནང་མཆོད་གསང་མཆོད་དང༌། །ཡིད་མཆོད་བསྟོད་པ་ཉེར་མཁོ་དང༌། །གསོལ་གདབ་རྡོ་རྗེའི་གླུ་ཞེས་པ། །
མཆོད་པའི་སྡེ་ཚན་བཅུ་གཉིས་སོ། །དང་པོ་ཆུ་གཉིས་ཉེར་སྤྱོད་དང་བཅས་པ་ནི། དྭངས་ཤིང་དྲི་མེད་ཡིད་འོང་བའི། །སྔགས་ཀྱི་ཡོན་ཆབ་མཆོག་འདི་དག །མཆོག་ཏུ་གུས་པས་ཁྱེད་ལ་འབུལ། །ཅི་བདེ་བར་ནི་བཞེས་སུ་གསོལ། །ཨོཾ་སརྦ་ཏ་ཐཱ་ག་ཏ་ཤྲཱི་ཙཀྲ་སམྦྷ་ར་མཎྜལ་ཙཀྲ་སརྦ་བཱི་ར་ཡོ་གི་ནི་བཛྲ་ཨརྒྷཾ་པྲ་ཏཱིཙྪ་སྭཱཧཱ། དྭངས་ཤིང་དྲི་མེད་ཡིད་འོང་བའི། །སྔགས་ཀྱི་ཞབས་བསིལ་མཆོག་འདི་དག །མཆོག་ཏུ་གུས་པས་ཁྱེད་ལ་འབུལ། །ཅི་བདེ་བར་ནི་བཞེས་སུ་གསོལ། །ཨོཾ་སརྦ་ནས་བཛྲ་པཱདྱཾ་པྲ་ཏཱིཙྪ་སྭཱཧཱ། ཨོཾ་ལྷ་ཡི་མེ་ཏོག་ཤིན་ཏུ་དམར། །དྲི་ཞིམ་ཤིན་ཏུ་མཛེས་པ་ཡི། །མེ་ཏོག་དེ་རིང་བཞེས་ནས་སུ། །འདི་ལ་བྱིན་གྱིས་བརླབ་ཏུ་གསོལ། །ཨོཾ་སརྦ་ནས་བཛྲ་པུཥྤེ་ཨཱཿཧཱུཾ་སྭཱཧཱ། ཨོཾ་ཙནྡན་ག་བུར་དང་བཅས་པའི། །དྲི་ཞིམ་སྤོས་མེ་དགེ་བ་ཡི། །མཐུ་དང་ལྡན་པར་བྱ་བ་འདི། །བཞེས་ནས་བྱིན་གྱིས་བརླབ་ཏུ་གསོལ། །ཨོཾ་སརྦ་ནས་བཛྲ་དྷུ་པཾ་ཨཱཿཧཱུཾ་སྭཱཧཱ། ཨོཾ་མར་མེ་འོད་ཟེར་འབར་བ་འདི། །ངན་འགྲོའི་མུན་པ་འཇོམས་པར་བྱེད། །ལྷ་ཡི་མིག་འབྱེད་བཀྲ་ཤིས་པ། །མར་མེ་ཁྱེད་ཀྱིས་བཞེས་སུ་གསོལ། །ཨོཾ་སརྦ་ནས་བཛྲ་དཱི་པཾ་པྲ་ཏཱིཙྪ་ཨཱཿཧཱུཾ་སྭཱཧཱ། ཨོཾ་སྣ་ཚོགས་ལྷ་ཡི་དྲི་ཞིམ་པ། །སྣ་ཚོགས་ག་པུར་རྣམ་རྒྱན་པ། །སྣ་ཚོགས་ཡི་གེ་ཧཱུཾ་ལས་བྱུང༌། །དྲི་འདི་འབུལ་གྱི་བཞེས་སུ་གསོལ། །ཨོཾ་སརྦ་ནས་བཛྲ་གནྡྷེ་པྲ་ཏཱིཙྪ་ཨཱཿཧཱུཾ་སྭཱཧཱ། ཨོཾ་ཁ་དོག་དྲི་དང་རོ་
ལྡན་པའི། །བཟའ་བ་མཆོག་དང་ཡང་དག་ལྡན། །ཐམས་ཅད་སྦྱར་བའི་བཤོས་འདི་དག །འབུལ་གྱི་ཡང་དག་བཞེས་སུ་གསོལ། །ཨོཾ་སརྦ་ནས་བཛྲ་ནཻ་ཝེ་ཏྱ་པྲ་ཏཱིཙྪ་ཨཱཿཧཱུཾ་སྭཱཧཱ། ཨོཾ་པ་ཊ་ཧ་དང་ཅང་ཏེའུ་སོགས། །དུང་དང་རྔ་སོགས་སྒྲ་དབྱངས་དང༌། །ཡིད་འཕྲོག་སིལ་སྙན་སྣ་ཚོགས་རྣམས། །འབུལ་གྱི་ཡང་དག་བཞེས་སུ་གསོལ། །ཨོཾ་སརྦ་ནས་བཛྲ་ཤཔྟ་པྲ་ཏཱིཙྪ་ཨཱཿཧཱུཾ་སྭཱཧཱ། གཉིས་པ་གོས་ཟུང་འབུལ་བ་ནི། སུམྦྷས་བསངས། སྭ་བྷ་ཝས་སྦྱངས། སྟོང་པའི་ངང་ལས་ཧཱུཾ་ལས་བྱུང་བའི་གོས་སྲབ་པ། འཇམ་པ་ཡང་བ་དྭངས་ཤིང་ཐོགས་པ་མེད་པ་ལྷ་རེ་རེ་ལ་ཡང་ཟུང་དུ་སྦྱར་བ་དང་ལྡན་པར་གྱུར། སྲབ་འཇམ་ཡང་པ་ལྷ་ཡི་གོས། །མི་བསྐྱོད་རྡོ་རྗེའི་སྐུ་ལ་གསོལ། །མི་ཕྱེད་དད་པས་བདག་འབུལ་ན། །བདག་ཀྱང་རྡོ་རྗེའི་སྐུ་ཐོབ་ཤོག །ཨོཾ་སརྦ་ཏཱ་ཐ་ག་ཏ་ཤྲཱི་ཙཀྲ་ནས། ཝཱི་ར་ཡོ་གི་ནཱ་བཛྲ་ཝསྟ་སྱ་ཨཱཿཧཱུཾ་སྭཱཧཱ། གསུམ་པ་རིགས་མ་བཅུ་དྲུག་ནི། ཨོཾ་ཝ་ནཱི་བཛྲཱི་ཎི་ཧཱུཾ་ཨཱཿ རྡོ་རྗེ་ལྷ་མོ་པི་ཝཾ་མ། །སྟོན་ཁའི་མདོག་མཚུངས་པི་ཝཾ་ལག །པི་ཝཾ་སྒྲ་དང་དབྱངས་ལྡན་པ། ནམ་མཁའ་ཁྱབ་པའི་མཆོད་པར་བགྱི། ཨོཾ་སརྦ་ཏ་ཐཱ་ག་ཏ་ཤྲཱི་ཙཀྲ་ནས་ཝི་ནཱི་ཎི་པཱུ་ཛི་ཏི་ཨཱཿཧཱུཾ། ཨོཾ་ཝཾ་སེ་བཛྲི་ཎི་ཧཱུཾ་ཨཱཿ རྡོ་རྗེ་ལྷ་མོ་གླིང་བུ་མ། །གསེར་གྱི་མདོག་མཚུངས་གླིང་བུའི་ལག །གླིང་བུའི་སྒྲ་དང་དབྱངས་ལྡན་པ། །ནམ་མཁའ་ཁྱབ་པས༴ ཨོཾ་སརྦ་ནས་ཝཾ་སེ་བཛྲཱི་ཎི་པཱུ་ཛི་ཏེ་ཨཱཿཧཱུཾ།
ཨོཾ་མྲྀ་ཏཾ་བཛྲཱི་ཎི་ཧཱུཾ་ཨཱཿ རྡོ་རྗེ་ལྷ་མོ་རྔ་ཟླུམ་མ། །བནྡྷུའི་མདོག་ཅན་རྔ་ཟླུམ་ལག །རྔ་ཟླུམ་སྒྲ་དང་༴ ནམ་མཁའ༴ །མྲྀ་ཏཾ་ག༴ ཨོཾ་མུ་ར་ཛེ་བཛྲཱི་ཎི་ཧཱུཾ་ཨཱཿ རྡོ་རྗེ་ལྷ་མོ་རྫ་རྔ་མ། །མར་གད་མདོག་མཚུངས་རྫ་རྔའི་ལག །རྫ་རྔའི་སྒྲ་དང་༴ ནམ་མཁའ༴ མུ་ར་ཛྲེ༴ ཨོཾ་ཧ་སྱེ་བཛྲཱི་ཎི་ཧཱུཾ་ཨཱཿ རྡོ་རྗེ་ལྷ་མོ་བཞད་པ་མོ། །ཀིང་ཤུའི་མདོག་མཚུངས་བཞད་པའི་ཞལ། །འཛུམ་པའི་གཞིན་དང་དབྱངས༴ ནམ་མཁའ༴ ཧ་སྱ༴ ཨོཾ་ལཱ་སྱེ་བཛྲཱི་ཎི་ཧཱུཾ་ཨཱཿ རྡོ་རྗེ་ལྷ་མོ་སྒེག་པ་མོ། །དབང་སྔོན་མདོག་མཚུངས་སྒེག་པའི་ཚུལ། །སྙེམས་པའི་ལུས་དང་གླུར་ལྡན་པས། །ནམ་མཁའ༴ ལཱ་སྱེ། ཨོཾ་གིརྟི་བཛྲཱི་ཎི་ཧཱུཾ་ཨཱཿ རྡོ་རྗེ་ལྷ་མོ་གླུ་དབྱངས་མ།།འཆར་ཀའི་མདོག་མཚུངས་གླུ་ལེན་མ། །གླུ་དང་རོལ་མོའི་སྒྲ་ལྡན་པ། །ནམ་མཁའ༴ གིརྟི༴ ཨོཾ་ནྲི་ཏི་བཛྲི་ཎི་ཧཱུཾ་ཨཱཿ རྡོ་རྗེ་ལྷ་མོ་གར་མཁན་མ། །མར་གད་མདོག་མཚུངས་གར་མཛད་མ། །ལག་པ་གར་བྱེད་རྐང་སྟབས་བསྒྱུར། །ནམ་མཁའ༴ ནྲྀ་ཏེ༴ །ཨོཾ་པུཥྤེ་བཛྲཱི་ཎི་ཧཱུཾ་ཨཱཿ རྡོ་རྗེ་ལྷ་མོ་མེ་ཏོག་མ། །གུར་གུམ་མདོག་མཚུངས་མེ་ཏོག་ལག །མེ་ཏོག་ཆར་དང་རོལ་མོ་བཅས། །ནམ་མཁའ༴ པུཥྤེ༴ ཨོཾ་དྷུ་པེ་བཛྲཱི་ནི་ཧཱུཾ་ཨཱཿ །རྡོ་རྗེ་ལྷ་མོ་བདུག་སྤོས་མ། །དུ་བའི་མདོག་མཚུངས་བདུག་སྤོས་ལག །བདུག་པའི་སྤྲིན་དང་རོལ་མོ་བཅས། །ནམ་མཁའ༴ །དྷུ་པ༴ ཨོཾ་དཱི་པེ་བཛྲཱི་ཎི་ཧཱུཾ་
ཨཱཿ རྡོ་རྗེ་ལྷ་མོ་མར་མེ་མ། གློག་འོད་མདོག་མཚུངས་མར་མེའི་ལག །མར་མེའི་འོད་དང་རོལ་མོར་བཅས། །ནམ་མཁའ༴ དཱི་པེ། ཨོཾ་གནྡྷེ་བཛྲཱི་ཎི་ཧཱུཾ་ཨཱཿ རྡོ་རྗེ་ལྷ་མོ་དྲི་ཆབ་མ། །པྲི་ཡང་མདོག་མཚུངས་དུང་ཆོས་ལག།དྲི་ཡི་ཆར་དང་རོལ་མོར་བཅས། །ནམ་མཁའ༴ གནྡྷེ༴ ཨོཾ་རཱུ་པ་བཛྲཱི་ཎི་ཧཱུཾ་ཨཱཿ རྡོ་རྗེ་ལྷ་མོ་གཟུགས་མཛེས་མ། །སྟོན་ཟླའི་མདོག་མཚུངས་མེ་ལོང་ལག །ཡིད་འོང་གཟུགས་དང་རྒྱན་ལྡན་མ། །ནམ་མཁའ༴ རཱུ་པ། ཨོཾ་ར་ས་བཛྲཱི་ཎི་ཧཱུཾ་ཨཿ རྡོ་རྗེ་ལྷ་མོ་ཞལ་ཟས་མ། །ཛ་བའི་མདོག་མཚུངས་ཞལ་ཟས་ལག །ཞལ་ཟས་བདུད་རྩིའི་ཆར་འབེབས་མ། །ནམ་མཁའ༴ ར་ས༴ ཨོཾ་སྤརྴ་ཎི་ཧཱུཾ་ཨཿ རྡོ་རྗེ་ལྷ་མོ་ན་བཟའ་མ། །མར་གད་མདོག་མཚུངས་ན་བཟའི་ལག །གོས་དང་རེག་དང་འཁྱུད་པར་ལྡན། །ནམ་མཁའ༴ སྤརྴ་ཨོཾ་དྷརྨཱ་དུ་བཛྲཱི་ཎི་ཧཱུཾ་ཨཱཿ རྡོ་རྗེ་ལྷ་མོ་ཆོས་དབྱིངས་མ། ཀུནྡའི་མདོག་མཚུངས་ཆོས་འབྱུང་ལག།ཟག་པ་མེད་པའི་བདེ་སྟེར་མ། །ནམ་མཁའ་ཁྱབ་པའི་མཆོད་པར་བགྱི། །ཨོཾ་སརྦ་ཏ་ཐཱ་ག་ཏ་ཤྲཱི་ཙཀྲ་ནས་ཝཱི་ར་ཡོ་གི་ནི་དྷརྨཱ་དྷཱཏུ་བཛྲཱི་ཎི་པཱུ་ཛི་ཏེ་ཨཱཿཧཱུཾ། བཞི་པ་རྒྱལ་སྲིད་སྣ་བདུན་ནི། བདེ་བར་གཤེགས་པ་ཐམས་ཅད་ལ། །འཁོར་ལོ་རིན་ཆེན་འདི་འབུལ་བས། །སྲིད་པའི་
འཁོར་ལོ་རྒྱུན་བཅད་ནས། །ཆོས་ཀྱི་འཁོར་ལོ་བསྐོར་བར་ཤོག །ཨོཾ་སརྦ་ཏ་ཐཱ་ག་ཤྲཱི་ཙཀྲ་སམྦྷ་ར་མཎྜལ་ཙཀྲ་སརྦ་བཱི་ར་ཡོ་གི་ནཱི་ཙཀྲ་རནྟ་པཱུ་ཛི་ཏེ་ཨཱཿཧཱུཾ། ཞེས་སོགས་སྦྱར་ཏེ། རྒྱལ་བ་སྲས་བཅས་ཐམས་ཅད་ལ། །ནོར་བུ་རིན་ཆེན་འདི་འབུལ༴ དབུལ་ཞིང་འཕོངས་པ་རྒྱུན་བཅད་ནས། །འབྱོར་པ་ཕུན་སུམ་ཚོགས་པར་ཤོག །ཨོཾ་མ་ཎི༴ བཙུན་མོ་རིན་ཆེན༴ མ་རིག་མུན་པ་རྒྱུན་བཅད་ནས། །ཤེས་རབ་དབྱིངས་ཀྱི་དོན་རྟོགས་ཏེ། །ཐབས་དང་ཤེས་རབ་འབྲེལ་བར་ཤོག །ཝ་སྟི༴ བློན་པོ༴ ཕྱི་ནང་གསང་གསུམ་ཐེག་གསུམ་ལྡན། །བསམ་ཡས་བསྟན་པར་རབ་འཛིན་ཞིང༌། །ཡོན་ཏན་ཐམས་ཅད་ལྡན་པར་ཤོག །མཧཱ་སྟ༴ གླང་པོ༴ ལྟ་ངན་རྣམས་ནི་རབ་གསལ་ཞིང༌། །བླ་མེད་ཐེག་པ་རབ་བཞོན་ནས། །ཐམས་ཅད་མཁྱེན་གྲོང་བགྲོད་པར་ཤོག །ཧཱསྟི༴ རྟ་མཆོག༴ སྲིད་པའི་གཟེབ་ལས་ངེས་གྲོལ་ནས། །རྫུ་འཕྲུལ་མཆོག་གི་ཤུགས་ཐོབ་སྟེ། །སངས་རྒྱས་ཞིང་ཀུན་བགྲོད་པར་ཤོག །ཏུ་རཾ་ག་ཨ་ཤྭ༴ དམག་དཔོན༴ ཉོན་མོངས་དགྲ་ལས་རྒྱལ་གྱུར་ནས། །ཕས་ཀྱི་རྒོལ་བ་ཚར་བཅད་དེ། །བསྙེངས་བྲལ་མཆོག་ནི་ཐོབ་པར་ཤོག །ཨོཾ་སརྦ༴ ཁཏྒ་རཏྣ་པཱུ་ཛི་ཏེ་ཨཱཿཧཱུཾ། ལྔ་པ་འདོད་ཡོན་ལྔ་ནི། ཁ་དོག་དབྱིབས་ལེགས་ཡིད་འོང་རྒྱན་འཕྲེང་ལྡན། །ཕྱོགས་དུས་ཀུན་ནས་
གཟུགས་མཆོག་ཅི་མཆིས་རྣམས། །མོས་བློས་དཀྱིལ་འཁོར་ལྷ་ལ་བདག་འབུལ་ན། །བཞེས་ཤིག་བླ་མེད་གྲུབ་མཆོག་སྩལ་དུ་གསོལ། །ཨོཾ་༴ ནས་རཱུ་པ་ཀཱ་མ་གུ་ཎ་པཱུ་ཛི་ཏེ་ཨཱཿཧཱུཾ། ཕྱོགས་དུས་ཀུན་ན་ཟིན་དང་མ་ཟིན་པའི། །ཡོན་ཏན་ཚིག་མཆོག་སྒྲ་དབྱངས་ཅི་མཆིས་རྣམས། །མོས་བློས༴ བཞེས་ཤིག༴ ཤཔྟ། ཕྱོགས་དུས་ཀུན་ན་ཙནྡན་སྦྲུལ་སྙིང་དང༌། །ཨ་གར་ལ་སོགས་དབང་པོ་ཚིམ་བྱེད་རྣམས། །མོས་བློས༴ །བཞེས་ཤིག༴ གནྡྷེ༴ ཕྱོགས་དུས་ཀུན་ན་རོ་དང་བཅུད་ལྡན་པའི། །ལུས་སེམས་བལྟས་བྱེད་རོ་མཆོག་ཅི་མཆིས་རྣམས། །མོས་བློས༴ བཞེས་ཤིག༴ ར་ས༴ ཕྱོགས་དུས་ཀུན་ན་འཇམ་གཉེན་འཁྲིལ་ཆགས་པའི། །རེག་བྱའི་ཁྱད་པར་དབང་པོ་ཚིམ་བྱེད་རྣམས། །མོས་བློས༴ །བཞེས་ཤིག༴ ཨོཾ་སརྦ་ཏ་ཐཱ་ག་ཏ༴ ནས་སྤརྴེ་ཀཱ་མ་གུ་ཎ་པཱུ་ཛི་ཏེ་ཨཱཿཧཱུཾ། དྲུག་པ་ནང་མཆོད་ནི། ཨོཾ་ཨཱཿཧཱུཾ་ཧ་ཧོ་ཧྲཱིཿ རྡོ་རྗེ་འཆང་ཆེན་རང་བཞིན་སྐུ། ཞེས་སོགས། རྩ་བརྒྱུད་ཀྱི་བླ་མ་མངོན་རྟོགས་ལྟར་ཕུལ། གཞན་ཡང་རྩ་བའི་བླ་མ་བརྒྱུད་པའི་བླ་མ་དབང་བསྐུར། རྒྱུད་བཤད། མན་ངག་ནོས། ཆོས་ཀྱི་འབྲེལ་བ་ཐོབ་པའི་དཔལ་ལྡན་བླ་མ་དམ་པ་རྣམས་ཀྱི་ཞལ་དུ་ཨོཾ་ཨཱཿཧཱུཾ། ཨོཾ་ཤྲཱི་བཛྲ་ཧེ་ཧེ་སོགས་སྙིང་པོའི་མཐར་འབྲུ་གསུམ་བཏགས་པའི་གཙོ་བོ་ཡབ་ཡུམ་དང༌། དཀྱིལ་འཁོར་གྱི་ལྷ་རང་རང་སོ་སོའི་སྔགས་ཀྱི་སོ་སོར་ནང་མཆོད་ཕུལ་བའི་
མཐར། བྱ་བའི་རྒྱུད། སྤྱོད་པའི་རྒྱུད། རྣལ་འབྱོར་རྒྱུད། རྣལ་འབྱོར་བླ་ན་མེད་པའི་རྒྱུད་དེ། རྒྱུད་སྡེ་ཆེན་པོ་བཞི་དང་འབྲེལ་བའི་ཡིད་དམ་ལྷ་ཚོགས་རྣམས་ཀྱི་ཞལ་དུ་མཆོད་པ་དམ་པ་འབུལ་ལོ་ཨོཾ་ཨཱཿཧཱུཾ། བར་འདིར་ཆོས་སྐྱོང་གང་བྱེད་ཀྱི་སྙིང་པོའི་མཐར་འབྲུ་གསུམ་བཏགས་ལ་ཕུལ། གཞན་ཡང་ཆོས་འཁོར་སྲུང་ཞིང་བསྟན་པ་སྐྱོང་བར་ཞལ་གྱིས་བཞེས་པའི་ཆོས་སྐྱོང་སྲུང་མ་རྣམས་ཀྱི་ཞལ་དུ་མཆོད་པ་དམ་པ་འབུལ་ལོ། །ཨོཾ་ཨཱཿཧཱུཾ། གནས་དང་ཉེ་བའི་གནས། ཞིང་དང་ཉེ་བའི་ཞིང༌། ཙྪནྡོ་དང་ཉེ་བའི་ཙྪནྡོ། འདུ་བ་དང་ཉེ་བའི་འདུ་བ། མཐུང་སྤྱོད་དང་ཉེ་བའི་མཐུང་སྤྱོད། དུར་ཁྲོད་དང་ཉེ་བའི་དུར་ཁྲོད། ཡུལ་ཉི་ཤུ་རྩ་བཞི། གནས་སུམ་ཅུ་རྩ་གཉིས། དུར་ཁྲོད་ཆེན་པོ་བརྒྱད་ན་བཞུགས་པའི་དཔའ་བོ་དང་རྣལ་འབྱོར་མ་སྤྲུལ་པའི་སྐུ་འགྲོ་བ་སེམས་ཅན་གྱི་དོན་མཛད་པ་རྣམས་ཀྱི་ཞལ་དུ༴ གཞན་ཡང་ཞིང་སྐྱོང་བཞི་བཅུ་ཞེ་བརྒྱད། ཕོ་ཉ་གནས་ལས་སྐྱེས་པ། རིགས་ལས་སྐྱེས་པ། སྔགས་ལས་སྐྱེས་པ། ལས་ལས་སྐྱེས་པ། གནས་གསུམ་གྱི་རྡོ་རྗེ་མཁའ་འགྲོ་མ་རྣམས་ཀྱི་ཞལ་དུ༴ གཞན་ཡང་གནོད་སྦྱིན་སྲིན་པོ། འབྱུང་པོ། ཡི་དྭགས། ཤ་ཟ། སྨྱོ་བྱེད། བརྗེད་བྱེད་མ་མོ། ཞིང་སྐྱོང༌། ཕོ་ཉ། འཕྲོག་མ། གྲུབ་པ་རྣམས་ཀྱི་ཞལ་དུ༴ གཞན་ཡང་བོད་ཁམས་སྐྱོང་བའི་བརྟན་མ་བཅུ་གཉིས་འཁོར་དང་བཅས་པ་རྣམས་ཀྱི་ཞལ་དུ༴ གནས་བདག་
གྲོང་བདག གཞི་བདག་གཉུག་པར་གནས་པ་རྣམས་ཀྱི་ཞལ་དུ། འགྲོ་བ་རིགས་དྲུག་ལམ་རྒྱུད་ལྔ། སྐྱེ་གནས་རྣམ་པ་བཞིས་བསྡུས་པའི་སེམས་ཅན་ཐམས་ཅད་ཟག་པ་མེད་པའི་བདེ་བས་རྒྱུད་ཚིམ་ནས། མྱུར་དུ་སངས་རྒྱས་ཀྱི་གོ་འཕང་ཐོབ་པའི་སྐལ་བ་དང་ལྡན་པར་གྱུར་ཅིག དེ་ནས་བདུད་རྩི་མྱངས་ལ། ཨོཾ་སརྦ་ཏ་ཐཱ་ག་ཏ་ཨ་མྲི་ཏ་སྭཱ་ད་ན་བཛྲ་སྭ་བྷཱ་ཝ་ཨཏྨ་ཀོ྅་ཧཾ། བདུན་པ་གསང་བའི་མཆོད་པ་ནི། ཨོཾ་ཧྲཱིཿཧ་ཧ་ཧཱུཾ་ཧཱུཾ་ཕཊ། རྣམ་ལྔ་འདོད་བསྐོར་དང་བཅས་པས། ཨོཾ་སརྦ་ཏ་ཐཱ་ག་ཏ། ཨ་ནུ་རཱ་གཱ་ཎ་བཛྲ་སྭ་བྷ་ཝ་ཨཏྨ་ཀོ྅་ཧཾ། ཞེས་འཁྱུད་རྒྱ་བྱ། ལྷ་རྣམས་བདེ་བ་ཆེན་པོས་དགེས་པར་བསམ། བརྒྱད་པ་ཡིད་བྱུང་གི་མཆོད་པ་ནི། ན་མོ་ཆོས་ཀྱི་དབྱིངས་ཀྱི། ཞེས་པ་ནས། བཱ་ལེན་ཙ་སྭཱཧཱའི་བར་མངོན་རྟོགས་བཞིན་ནོ། །དེ་ནས་དགུ་པ་བསྟོད་པས་མཆོད་པ་ནི། འབུད་དཀྲོལ་སྣ་ཚོགས་ཀྱི་སྒྲ་དང་བཅས་ཏེ་མངོན་རྟོགས་བཞིན་རྐང་བརྒྱད་གཉིས་བརྗོད་པའི་མཐར། རྡོར་དྲིལ་འཛིན་པས་དབྱངས་དང་བཅས་པའམ་མེད་ཀྱང་རུང་སྟེ། ཁྱེད་ཀྱི་ཞབས་གཉིས་མཉམ་པར་མནན་ན་འོག་གི་ཀླུ་ཡང་འཇིགས་འགྱུར་ཞེས་ཏེ་ཐུགས་རྗེས་ཞབས་གཡོན་བསྐུམ་པར་མཛད། །དབུ་ཡི་གཙུག་ཏོར་དྲང་པོར་བསྲངས་ན་ཚངས་པའི་འཇིག་རྟེན་འཇིགས་འགྱུར་ཞེས་ཏེ་དབུ་ནི་ཅུང་ཟད་ཡོ་བར་མཛད། ཁྱོད་ཀྱི་ཕྱག་རྣམས་དྲངས་པོར་བརྐྱངས་ན་ཕྱོགས་སྐྱོང་རྣམས་ཀྱང་སྐྲག་འགྱུར་ཞེས་ཏེ་ཐུགས་རྗེས་ཕྱག་རྣམས་ཅུང་ཟད་བསྐུམ། །རྗེ་བཙུན་ཁྱོད་ཀྱི་སྐུ་ཡི་གར་ནི་དགོས་པ་
དང་ལྡན་མཐོང་བས་དད་དེ་མཆོག་ཏུ་གུས་པས་འདུད། །བསྐལ་པའི་མེ་ལྟར་འབར་བ་འཇིགས་པའི་གཟུགས་ལྡན་པ། ཁྲོས་པས་འཇིགས་མཛད་མཚོ་སྐྱེས་སྔོན་པོའི་སྐུ་མདོག་བཞིན། །ཉི་མའི་དཀྱིལ་འཁོར་སྟེང་བཞུགས་ཁ་ཊཱཾ་ག་དང་ནི། །རྡོ་རྗེ་བསྣམས་ཤིང་ཨོཾ་ཨོཾ་ཡི་གེ་དག་པ་ཡིས། །ཚངས་པ་དང་ནི་ཁྱབ་འཇུག་དྲག་པོའི་ལྷ་དག་གི །མགོ་རྣམས་བཅད་མཛད་ནས་ནི་དབུ་ལ་རྣམ་རྒྱན་པ། །ཧཱུཾ་ཧཱུཾ་ཕཊ་ཕཊ་ཊ་ཊའི་ཡི་གེ་འཁོར་ལྡན་པ། །མི་ཡི་སེང་གེ་ཟིལ་མནན་ནས་ནི་འཇིགས་མཛད་པ། །ཐུགས་རྗེ་ཆེན་པོས་སྤྲུལ་པའི་འཁོར་ལོའི་ཚུལ་བསྐྱེད་པ། །ཛཿཧཱུཾ་བཾ་ཧོཿདཔལ་མོའི་ནུ་མར་རབ་ཏུ་མནན། །བདེ་བར་གཤེགས་པའི་དབུ་གཙུག་ལ་ནི་རྣམ་རྒྱན་པ། །ལྷ་རྣམས་ཀུན་གྱི་དབུ་གཙུག་ཞབས་ཀྱིས་མནན་བཞུགས་པ། །ཨ་ལ་ལ་ཡི་སྒྲས་ནི་བགེགས་རྣམས་སྐྲག་མཛད་པ། །ཅང་ཏེའུ་ཁྲོལ་ཞིང་ཁྱབ་འཇུག་དྲག་པོའི་ལྤགས་པ་བསྣམས། །རྡོ་རྗེ་ལྷ་མོ་རྣམས་ཀྱིས་འཁོར་ལོ་སྒྱུར་མཛད་པ། །ཧུ་ལུ་ཧུ་ལུ་ཛྲིཾ་ཛིཾ་ཏྲཾ་ཏྲཾ་ཛཾ་ཛཾ་སྒྲོགས། །རྒྱུ་མས་བརྒྱུས་པའི་མགོ་བོའི་ཕྲེང་བའི་རྒྱན་ལྡན་པ། །རྡོ་རྗེ་མཁའ་འགྲོའི་གཟུགས་ཀྱིས་འཇིགས་བྱེད་གླུར་ལེན་པ། །ཀྲུཾ་ཀྲུཾ་དང་ནི་ཧུ་ལུ་ཧུ་ལུས་མྱོས་མཛད་པ། །རྡོ་རྗེ་མཁའ་འགྲོས་སྐུ་ལ་རྣམ་པར་བརྒྱན་པ་ཡི། །དུར་ཁྲོད་དུ་ནི་གར་དང་ཧ་ལ་ཧ་ལའི་སྒྲས། །གནོད་སྦྱིན་རྣམས་ནི་རེངས་ཤིང་སྐྲག་པར་མཛད་པ་དེ། །རྡོ་རྗེ་མཁའ་
འགྲོ་མ་ཡིས་གླུས་ནི་རབ་བསྐུལ་བ། །ཤ་དང་ཁྲག་དང་རྒྱུ་མ་ནང་ཁྲོལ་གསོལ་བར་མཛད། །ཧཾ་ཧཾ་ཨ་ཨའི་སྒྲས་ནི་ལྷ་རྣམས་གསལ་མཛད་པ། །ཐོད་པ་ཀླད་པས་བཀང་ནས་གསོལ་ཕྱིར་ཕྱག་ན་བསྣམས། །ཀ་ཧ་ཀ་ཧའི་བཞད་སྒྲས་འཁོར་བ་འཇིག་མཛད་པ། །མི་བཟད་དུར་ཁྲོད་རྣམས་ཀྱི་རུས་པའི་རྒྱན་ལྡན་པ། །རྡོ་རྗེ་ཧ་ཧར་བཞད་པས་ཁམས་གསུམ་བརྒྱལ་མཛད་པ། །ཧ་ཧ་ཧི་ཧི་ཛ་ཛའི་ཡི་གེ་སྡིགས་མཛུབ་མཛད། །ཧ་ཧ་བཞད་པས་རི་བོའི་རྩེ་ནས་བསྒྱེལ་མཛད་པ། །རྣལ་འབྱོར་མ་དང་དཔའ་རྣམས་ཧྲི་ཧྲི་སྒྲོགས་པས་འབོད། །མི་ཡི་སེང་གེ་རྩེ་གསུམ་གྱིས་འགུགས་སེམས་ཅན་དོན་མཛད་པ། །མཆེ་བ་གཙིགས་པའི་ཞལ་བཞི་སྐུ་མདོག་སྔོན་པོར་ལྡན། །བྲུཾ་བྲུཾ་སྒྲོགས་ཤིང་ཕྱག་རྒྱ་ཆེན་པོར་བསྐྱེད་མཛད་པ། །རྡོ་རྗེ་གློ་སྟོང་འགྱུ་བའི་ལྗགས་ནི་ཕྱུང་ནས་ཀྱང༌། །རྡོ་རྗེ་དྲིལ་བུ་མདའ་དང་གཞུ་ལ་ཀྲཾ་ཀྲཾ་སྒྲོག །གཡོན་བརྐྱང་པ་དང་སྦྲུལ་རྣམས་ཀྱིས་ནི་དབུ་བརྒྱན་ཞིང༌། །བསྐལ་པ་གྲངས་མེད་སེམས་ཅན་དོན་བྱེད་མི་འདོར་བ། །ཧ་ན་ཧ་ན་ཕཊ་ཕཊ་སྒྲོགས་ཤིང་སྐྲོད་མཛད་པ། །རྣལ་འབྱོར་སྟོབས་ཀྱིས་རྒྱལ་བའི་མཛད་པ་རྣམས་མཛད་པ། །དངོས་དང་དངོས་མེད་མིན་ཞིང་སྒོམ་དང་རྡོ་རྗེ་ཅན། །ཙ་ཊ་ཙ་ཊ་གྲཾ་གྲཾ་ཁཾ་ཁཾ་སྒྲོག་མཛད་པ། །སངས་རྒྱས་སྐུ་གསུང་ཐུགས་ཀྱི་སྤྲོས་པ་སྟོང་པ་ཉིད། །རོལ་པའི་
ལྟ་བས་དྲི་མ་མ་ལུས་བྲལ་བ་དང༌། གོ་ལུ་གོ་ལུ་ཛཾ་ཛཾ་ཡཾ་ཡཾ་སྒྲོག་པས་ཞི་བ་དང༌། །མཁའ་དང་མཉམ་པའི་ཏིང་འཛིན་བཞུགས་པའི་ཐུགས་མངའ་བ། །མཾ་མཾ་སྒྲས་ནི་བདེ་བ་ཆེན་པོའི་བདག་ཉིད་ཅན། །ཐུགས་རྗེ་ཆེན་པོས་རྗེས་འབྲེལ་སེམས་ཅན་མི་གཏོང་བ། །བརྟན་གཡོའི་རང་བཞིན་ཧེ་རུ་ཀ་དཔལ་ཕྱག་འཚལ་བསྟོད། །མཁའ་འགྲོའི་དམ་ཚིག་ཨ་ལི་ཀཱ་ལི་སྦྱོར་བ་སྟེ། །རིགས་ལྔའི་བདེ་གཤེགས་བཅོམ་ལྡན་འདས་ཀྱི་བཤད་དུ་གསོལ། །ལྷ་དང་དྲང་སྲོང་རྣམས་ནི་ཕྱག་འཚལ་མཆོད་པ་ཡིན། །ཧེ་རུ་ཀ་དཔལ་གསང་བའི་སྐུ་འཛིན་དེར་ངེས་འགྱུར། ཅེས་དང༌། ཧཱུཾ་ཆོས་དབྱིངས་རྣམ་དག་དབྱིངས་ལས་མ་གཡོས་ཀྱང༌། །ཐབས་ཀྱི་ཁྲོ་བོའི་སྐུར་སྟོན་གདུག་པ་འདུལ། །ཆེ་བའི་ཆེ་མཆོག་ལྷ་ཡི་ལྷར་གྱུར་པ། །ཀུན་བཟང་ཧེ་རུ་ཀ་ལ་ཕྱག་འཚལ་ལོ། །བདག་མེད་དབང་ཕྱུག་སྐུ་ལ་དབྱེར་མེད་ཅིང༌། །བདེ་ཆེན་འོད་གསལ་དག་པའི་དཀྱིལ་འཁོར་ནས། །རྒྱལ་བ་སྲས་བཅས་ལ་སོགས་སྤྲིན་སྤྲོ་བ། །རྡོ་རྗེ་ཕག་མོའི་སྐུ་ལ༴ དུས་གསུམ་བདེ་བར་གཤེགས་པ་ཆོས་ཀྱི་སྐུ། །འཁོར་འདས་སྟོང་པར་མཛད་པའི་ཐུགས་རྗེ་ཅན། །གདུལ་བྱ་ཀུན་མཁྱེན་ས་ལ་འགོད་མཛད་པའི། །རིགས་ལྔ་བདེ་བར་གཤེགས་ལ༴ ནམ་མཁའ་ལྟ་བུར་ཐམས་ཅད་ཐོགས་མེད་ཅིང༌། །འདོད་དགུར་བསྒྱུར་བའི་རྫུ་འཕྲུལ་ཤུགས་དང་ལྡན། །ཐུགས་དམ་དབང་གིས་སྒྲུབ་ལ་བརྩེར་དགོངས་པའི། །
གནས་གསུམ་མཁའ་འགྲོའི་ཚོགས་ལ༴ ཉོན་མོངས་རྣམ་དག་ཡེ་ཤེས་སྐུ་བརྙེས་ཏེ། །སྲིད་པའི་འཁོར་ལོ་མ་ལུས་བཅད་པའི་ཕྱིར། །ཐབས་མཁས་ཐུགས་རྗེས་འགྲོ་བ་འདྲེན་མཛད་པའི། །རྒྱལ་གཉིས་རྡོ་རྗེའི་ཞབས་ཀྱི་པདྨོར་འདུད། །འཇིག་རྟེན་མགོན་པོ་ཀུན་གྱི་བརྟེན་འགྱུར་ཅིང༌། །ཡེ་ཤེས་ལས་གྲུབ་མཆོད་པ་ཀུན་དང་ལྡན། །རྡོ་རྗེའི་ས་གཞི་ལ་གནས་གཞལ་མེད་ཁང༌། །བསྲུང་བའི་འཁོར་ལོར་བཅས་ལ་ཕྱག་འཚལ་ལོ། །འཁོར་བ་གནས་འགྱུར་མི་གནས་མྱ་ངན་འདས། །དངོས་གྲུབ་ཀུན་འབྱུང་དུར་ཁྲོད་བརྒྱད་པོ་ལ། །རབ་གནས་དཀྱིལ་འཁོར་པ་ཀུན་མཆོད་བྱེད་དང༌། །དེ་དག་རྣམས་ལ་རྟག་ཏུ་ཕྱག་འཚལ་ལོ། །དེ་ནས་བཅུ་པ་ཉེར་མཁོ་འབུལ་བ་ནི། ཁྲུས་ཀྱི་རྫིང་བུ་དམ་པ་དང༌། །རེག་ན་བདེ་བ་ལྷ་ཡི་གོས། །མཁའ་ལྡིང་ཁྱུ་མཆོག་རྨ་བྱ་དང༌། །གླང་པོ་རྟ་སོགས་ཐེག་པའི་མཆོག །དགོས་འདོད་འབྱུང་བ་འདོད་འཇོའི་བ། །མ་རྨོས་འཁྲུངས་པའི་ལོ་ཐོག་དང༌། །དཔག་བསམ་ཤིང་དང་འབྲས་བུའི་ཚོགས། །བུམ་བཟང་ནམ་མཁའ་གང་བས་མཆོད། །བདག་གི་ལུས་དང་ལོངས་སྤྱོད་དང༌། །དུས་གསུམ་དགེ་བ་ཀུན་ཡང་འབུལ། །མི་འཇིགས་སེང་གེའི་རིན་ཆེན་ཁྲི། །པདྨ་ཉི་ཟླའི་གདན་མཆོག་དང༌། །རྣ་རྒྱན་དང་ནི་གདུབ་བུ་འམ། །མགུལ་རྒྱན་སོར་གདུབ་དམ་པ་དང༌། །གསེར་ལས་བྱས་པའི་མཆོད་ཕྱིར་ཐོག །དབུ་རྒྱན་དར་དཔྱངས་དོ་ཤལ་བཅས། །རྒྱལ་མཚན་དམར་དང་དེ་བཞིན་
སེར། །དཀར་དང་གནག་དང་སེར་སྐྱ་དང༌། །དེ་བཞིན་གོས་ནི་སྣ་ཚོགས་དང༌། །མེ་ཏོག་ཕྲེང་བ་དུ་མ་དང༌། །བླ་རེ་དག་དང་དར་དཔྱངས་པའི། །མདའ་དང་ཡོལ་བས་ཤིན་ཏུ་མཛེས། །དེ་བཞིན་བཟའ་བཅའ་བཏུང་བ་ཡིས། །རབ་མཉམ་གཞག་པའི་མཆོད་པར་བྱ། །གསེར་ནི་བརྒྱ་སྟོང་དུ་མ་དང༌། །རིན་ཆེན་རྣམ་པ་སྣ་ཚོགས་དང༌། །རས་ནི་ཟུང་གྱུར་བརྒྱ་ཉིད་དང༌། །གླང་པོ་རྟ་དང་ཡུལ་འཁོར་དང༌། །ཆུང་མ་བཟང་དང་བུ་མོ་ཉིད། །བྲན་ཕོ་བྲན་མོ་སྲིང་མོ་དང༌། །བློ་ལྡན་ཀུན་ནས་དང་བ་ཡིས། །བདག་ཉིད་ཀྱང་ནི་དབུལ་བར་བགྱི། །ཨོཾ་བཛྲ་ཨུ་པ་སྠ་ན་ནི་རྱ་ཏདྱ་མི། བཅུ་གཅིག་པ་གསོལ་བ་གདབ་པ་ནི། རྣལ་འབྱོར་རོ་གཅིག་བདུད་རྩི་འཐུང་བས་རྣམ་པར་དག་པའི་ཐུགས། །གནས་ལ་སོགས་པའི་ཡུལ་དུ་བགྲོད་པ་རྣམ་པར་དག་པའི་གསུང༌། །དཔལ་ལྡན་གནས་ཀྱི་དབུས་སུ་འཁོར་ལོའི་དཀྱིལ་འཁོར་མགོན་པོ་མཆོག །བླ་མ་མཆོག་ལ་མགོ་བོས་བཏུད་ཏེ་རྟག་པར་ཕྱག་བགྱིའོ། །དེ་ནས་ཞེས་སོགས་དག་ཆེན་པོས། །རྒྱུད་ནི་རྫོགས་པར་གྱུར་པ་གང༌། །འཁོར་ལོ་སྡོམ་པའི་འདྲེན་པ་མོ། །རྡོ་རྗེ་ཕག་མོ་ལ་འདུད་དོ། །ལྷ་མོ་ཕྲེང་བས་བརྒྱན་པའི་སྐུ་ཡི་རིན་པོ་ཆེ། །ལུས་ཀུན་དཔའ་བོའི་དབང་ཕྱུག་མ་ཡིས་རྟག་ཏུ་མཛེས། །འཁོར་ལོའི་གནས་ཀྱི་མགོན་པོ་དྲི་མེད་ལྷན་ཅིག་སྐྱེས། །སྡོམ་པའི་རྣལ་འབྱོར་སྙིང་པོ་ལ་ནི་རྟག་ཕྱག་འཚལ། །ཨེ་ཡིག་རྣམ་པའི་སྙིང་པོ་ཁུ་བའི་གནས་གྱུར་པདྨའི་སྦུབས་ནི་དམ་པ་སྟེ། །དེ་ཡི་
དབུས་སུ་སྐྱེས་པའི་ངང་མོ་དམ་པ་ཀུནྡ་ལྟར་དཀར་ཐམས་ཅད་དག །ཀུན་མཁྱེན་སངས་རྒྱས་ཤིན་ཏུ་རྣམ་པར་དག་པའི་གནས་ཏེ་ལྷ་མོ་མཛེས་མའི་གཞི། །དྲི་མེད་ལྷན་ཅིག་སྐྱེས་པའི་གྲུ་བཞི་འདྲེན་པ་ལ་ནི་བདག་ཕྱག་འཚལ། །སྐྱེ་བ་དང་ནི་འཇིག་པ་དང་བྲལ་མཆོག་གི་ལུས་ཅན་མ། །དམར་བའི་འོད་ཆགས་རྣམ་པར་རྒྱལ་མ་ཁམས་གསུམ་གཟུགས་ཅན་མ། །ཡོན་ཏན་ཚོགས་ཀྱིས་བརྒྱན་པའི་སྐུ་མངའ་རྡོ་རྗེའི་ཡན་ལག་མ། །སངས་རྒྱས་ཀུན་གྱི་བསྐྱེད་མཛད་མ་ལ་རྟག་ཏུ་མངོན་པར་ཕྱག་བགྱིའོ། །དཔལ་ལྡན་རྡོ་རྗེ་མཁའ་འགྲོ་དང༌། །མཁའ་འགྲོ་མ་ཡི་འཁོར་ལོ་བསྒྱུར། །ཡེ་ཤེས་ལྔ་དང་སྐུ་གསུམ་བརྙེས། །འགྲོ་བ་སྐྱོབ་ལ་ཕྱག་འཚལ་ལོ། །ཇི་སྙེད་རྡོ་རྗེ་མཁའ་འགྲོ་མ། །ཀུན་ཏུ་རྟག་པའི་འཆིང་གཅོད་ཅིང༌། །འཇིག་རྟེན་བྱ་བར་རབ་འཇུག་མ། །དེ་སྙེད་རྣམས་ལ་ཕྱག་འཚལ་ལོ། །ཧེ་རུ་ཀ་དཔལ་དཔའ་བོ་ཆེ། །རྣམ་དག་རྡོ་རྗེ་དབང་ཕྱུག་དང༌། །རྗེས་སུ་ཆགས་པ་ཆེ་རྣམས་ཀྱི། །རྡོ་རྗེ་ཕག་མོ་ལ་འདུད་དོ། །རྣམ་པར་རྟོག་མེད་ཡང་དག་རྟོག །ཡིད་ནི་རབ་ཏུ་མི་གནས་པ། །ཡིད་ལ་མེད་ཅིང་དམིགས་པ་མེད། །དམིགས་མེད་ཁྱོད་ལ་ཕྱག་འཚལ་ལོ། །བཅུ་གཉིས་པ། དཔྱིད་ཀྱི་རྒྱལ་པོའི་གླུ་དབྱངསཀྱིས་མཆོད་པ་ནི། ཧཱུཾ་ཁྲོ་བོ་བདེ་བ་དགྱེས་པ་ཡི། །བདེ་བའི་ལོངས་སྤྱོད་ལས་བྱུང་བ། །བདེ་བ་དབབ་པའི་སྦྱོར་བ་ཡི། །རབ་ཏུ་རྨོངས་
པ་བསྟེན་པར་བྱེད། །ཨ་ལ་ལ་ལ་ལ་ཧོ། ཨ་ཨི་ཨཱ། ཨ་ར་ལཱི་ཧོ། བདེ་ཆེན་བདེ་བའི་གར་གྱིས་རོལ། །རྣལ་འབྱོར་མ་མཆོག་པདྨའི་བདེ། །ཨ་ལ་ལ་ལ་ལ་ཧོ། དགྱེས་པ་རྣམས་ཀྱི་བདེ་བ་མཆོག །རྣལ་འབྱོར་མ་མཆོག་མཆོད་པར་མཛོད། །ཨ་ཨི་ཨཱ་ཨ་རལླཱི་ཧོ། རབ་དགྱེས་མགོན་པོ་ཁྱེད་བཞུགས་མཛོད། །མཁའ་འགྲོ་དྲ་བའི་བདེ་བ་སྩོལ། །དགྱེས་པའི་བདེ་བ་གསོལ་བར་མཛོད། །ཞི་བའི་གར་གྱི་གར་མཛད་པ། །བདག་ལ་བདེ་ཆེན་བདེ་བ་སྩོལ། །ཐར་བའི་མཚན་ཉིད་ལྡན་པ་ཁྱོད། །ཨ་ལ་ལ་ལ་ལ་ཧོ། །ཨ་ཨི་ཨཱ་ཨ་རལླཱི་ཧོ། །བདེ་བ་སྤངས་པས་གྲོལ་མི་འགྱུར།།བདེ་མེད་སྡུག་བསྔལ་གྱིས་མི་གྲོལ། །བདེ་དེ་ཆུ་སྐྱེས་དབུས་ན་གནས། །ཆགས་པའི་དངོས་པོར་ཁྱོད་མ་གྱུར། །བདེ་བ་ཆེ་ཡིས་གྲོལ་བར་མཛོད། །པདྨ་རྒྱས་པའི་རོ་ཉིད་ཀྱིས། །བུང་བ་ལྟ་བུར་ཚིམ་པར་མཛོད། །འདི་ཡིས་མགོན་པོ་བསྐུལ་ན་ནི། །དཀྱིལ་འཁོར་དུ་ནི་ངེས་པར་འགྲུབ། །སྙན་ཞིང་འཇེབས་པའི་དབྱངས་ཀྱིས་ནི། །དཔྱིད་ཀྱི་རྒྱལ་པོའི་གླུ་བླངས་པས། །དྲི་མེད་མཁའ་འགྲོ་དྲ་བ་ཡིས། །གཟིགས་ཤིང་ལས་ཀུན་མཛད་པ་ཡིན། ཞེས་གླུར་བླངས་པས་དཀྱིལ་འཁོར་གྱི་ལྷ་རྣམས་མཉེས་པར་བསམ་མོ། །དེ་ལྟར་ན་ཐུན་མོང་གྱི་མཆོད་པ་ཐམས་ཅད་ཀྱིས་ཡང་དག་པར་མཆོད་དོ། །ཅི་སྟེ་བསྡུས་པ་ལ་མངོན་པར་དགའ་བས་ཀྱང༌། བསྟོད་པ་མ་གཏོགས་ཚིག་བཅད་རྣམས་དོར་ཏེ། སྔགས་དང་ཕྱག་རྒྱ་དང་ཏིང་ངེ་འཛིན་གསུམ་འཛོམ་པའི་སྒོ་
ནས། མཐའ་དག་མ་ཚང་བ་མེད་པར་བྱའོ། །གཉིས་པ་ཁྱད་པར་གྱི་མཆོད་པ་ལ་བཞི། བཟླས་པའི་མཆོད་པ། བྱ་བའི་མཆོད་པ། ཚོགས་ཀྱི་མཆོད་པ། གཏོར་མའི་མཆོད་པའོ། །དང་པོ་ནི། ལས་ཀྱི་རྡོ་རྗེ་ལྷོ་ཕྱོགས་སུ་འདུག་ལ། དབྱུག་གུའི་སྣེ་ལ་རྡོ་རྗེ་བཏགས་པས། ལྷ་སོ་སོའི་གནས་སུ་གནོད་པ་མེད་པར་རེག་ཅིང༌། སྔགས་མཆོད་བཞིན་ལྷ་ཐམས་ཅད་ཀྱི་སྙིང་པོ་ཚར་གཅིག་བརྗོད། ཐོད་པ་བཞིའི་གནས་སུ་འབྲུ་གསུམ་ཚར་རེ་བརྗོད་དེ་དང་པོའོ། །འདི་ནི་རེ་རེ་བཞིན་མང་དུ་བཟླས་ནའང་ལེགས་སོ། །དེ་ནས་ལྷ་ཐམས་ཅད་ལ་ཡུམ་གྱི་སྙིང་པོ་བཟླ་སྟེ་གཉིས་པའོ། །ཨོཾ་ཀཱ་ཀ་སྱཱ། ཨ་ལུ་ཀ་སྱཱ་ཤྭ་ན་སྱཱ། སུ་ཀ་ར་སྱཱ་ཧཱུཾ་ཧཱུཾ་ཕཊ། ཅེས་པའམ། སྒོ་མཚམས་མ་བརྒྱད་ཅར་གྱི་སྔགས་བཟླ་སྟེ་གསུམ་པའོ། །ཨོཾ་ཨ་ཨཱ་ཨི་ཨཱི་ཨུ་ཨཱུ་རྀ་རཱྀ་ལྀ་ལཱྀ་ཨེ་ཨཱཻ་ཨོ་ཨཽ་ཨཾ་ཨཿཧཱུཾ་ཧཱུཾ་ཕཊ་སྭཱཧཱ། ཞེས་བཟླས་ཏེ་བཞི་པའོ། །ཨོཾ་ཀ་ཁ་ག་གྷ་ང༌། ཙ་ཚ་ཛ་ཛྷ་ཉ། ཊ་ཋ་ཌ་ཌྷ་ཎ། ཏ་ཐ་ད་དྷ་ན། པ་ཕ་བ་བྷ་མ། ཡ་ར་ལ་ཝ་ཤ་ཥ་ས་ཧཀྵ་ཧཱུཾ་ཧཱུཾ་ཕཊ་སྭཱཧཱ། ཅེས་པ་བཟླ་སྟེ་ལྔ་པའོ། །ལྷ་སོ་སོའི་མཚན་དང་སྤེལ་བའི་ཡི་གེ་བརྒྱ་པའམ། དེ་ཙམ་མ་ལྕོགས་ན་ཧེ་རུ་ཀའི་ཡི་གེ་བརྒྱ་པ་ཉིད། ལྷ་དྲུག་ཅུ་རྩ་གཉིས་ཀྱི་གནས་སུ་སྦྱར་བས་ཆོག་སྟེ་དྲུག་པའོ། །བྱིན་རླབས་བཟླས་པས་འདིའི་མཐར་ཡང༌། ཨརྒྷཾ༴ ནས། ཤཔྟའི་བར་གྱིས་མཆོད། རྐང་བརྒྱད་ཀྱིས་བསྟོད། མཐར། བཅོམ་ལྡན་འདས་ཧེ་རུ་ཀ་དཀྱིལ་འཁོར་གྱི་ལྷ་ཚོགས་དང་བཅས་པ་ཐམས་ཅད་ཀྱི་བདག་ལ་དངོས་གྲུབ་མ་ལུས་སྩལ་དུ་གསོལ། ཞེས་གསོལ་བ་བཏབ་ལ་མེ་ཏོག་དོར་རོ། །གཉིས་པ་ནི། རྗེས་ཆགས་ཀྱི་གར་དང་མཆོད་པའི་གར་སྣ་ཚོགས་པ་རྣམས་དང༌།
རྒྱུད་ལས། བཤད་པའི་རྡོ་རྗེ་གླུ་དང༌། རོལ་མོའི་ཁྱད་པར་ཇི་སྙེད་པ་དག་གིས་མཆོད་པའོ། །གསུམ་པ་ལ་ནང་དང་ཕྱི་རོལ་གྱི་སྦྱིན་སྲེག་གཉིས་སུ་འགྱུར་བ་ལས། ནང་གི་སྦྱིན་སྲེག་ནི་འཁོར་ལོའི་མཆོད་པ་ཡིན་ལ། ཕྱི་རོལ་གྱི་ཡང་ཞི་བ་དང་རྒྱས་པ་གང་རུང་གི་སྦྱིན་སྲེག་གོ །ཕྱི་ནང་གཉིས་ཀར་ལ་རྫས་བྱིན་གྱིས་བརློབ་པའི་སྔགས་ལྷག་པོར་སྔགས་པ་ནི། ཨོཾ་སརྦ་བཛྲ་ག་མི་ནི། སརྦ་བྷ་ཀྵཾ་ཤོ་དྷཱ་ཡ། གུ་ཧྱ་བཛྲ་ཎི་ཧཱུཾ་སྭཱཧཱ། ཞེས་བྱ་བས་སོ། །སྦྱིན་སྲེག་དང་ཚོགས་འཁོར་ནི་གཞན་དུ་ཤེས་པར་བྱའོ། །བཞི་པ་ནི། སྒྲུབ་ཐབས་དང༌། སྟ་གོན་གྱི་སྐབས་སུ་བསྟན་པ་ལྟར། འཇིག་རྟེན་དང་འཇིག་རྟེན་ལས་འདས་པའི་ལྷ་ལ་གཏོར་མ་འབུལ། གཞན་ཡང་སྤྲོ་ཞིང་ནུས་ན་འབྱུང་པོ་སྤྱི་གཏོར་ཆེན་མོ་དང༌། ཞིང་སྐྱོང་གི་གཏོར་མ་ཆེན་མོ་དག་འབུལ་ལོ། །དེ་ལ་ཞིང་སྐྱོང་གི་གཏོར་མ་ཡང༌། རྡོ་རྗེ་མཁའ་འགྲོ་དང༌། མཁའ་འགྲོ་རྒྱ་མཚོ་གཉིས་ལས་གསུངས་ཏེ། འདིར་ནི་རྡོ་རྗེ་མཁའ་འགྲོ་བཞིན་སྦྱར་ན་ལེགས་པར་མཐོང་ངོ༌། །བརྒྱད་པ་བདག་འཇུག་ནི། རང་ཉིད་གཙོ་བོའི་མདུན་ཞལ་གྱི་སྒོ་དང་ཉེ་བར་འདུག་ཅིང༌། གཙོ་བོའི་ཐུགས་ཀ་ནས་སྤྲུལ་པ་ཧེ་རུ་ཀ་ཕྱག་གཉིས་པས་ལས་མཛད་པར་དམིགས་ལ།འཇུག་པའི་ཆོ་ག་རྣམས་ལེན་ཞིང༌། དངོས་གཞི་རྣམས་དཀྱིལ་འཁོར་གྱི་གཙོ་བོ་ཁོ་ན་ལ་དམིགས་ནས་སོ། །འཇུག་པའི་ཆོས་ལ་ཐོག་མར་དཀྱིལ་ཆོག་གཞན་དང་མཐུན་པའི་ཁ་སྐོང་ནི། མཎྜལ་ཕུལ་ལ་བདེན་སྟོབས་བརྗོད། །གསོལ་གདབ་མིག་དར་མེ་ཏོག་བཟུང༌། །གསང་གཏོར་བསྲུང་བ་དྲིས་ལན་གཉིས། །སེམས་བསྐྱེད་གསང་གདམས་ནང་དུ་བཞུག །ཅེས་སྡོམ་ཚིག་བློ་ལ་ངེས་པར་བྱའོ། །དེ་དག་ཀྱང༌། དཀྱིལ་འཁོར་དུ་འཇུག་པའི་ཆོས་རྣམས་ཞུ་བའི་ཡོན་དུ་མཎྜལ་ཕུལ། བདག་ཉིད་རྣམ་པར་སྣང་མཛད་དུ་གྱུར། ཆོས་རྣམས་གཟུགས་བརྙན་
ལྟ་བུ་སྟེ། །དག་ཅིང་གསལ་ལ་རྙོག་པ་མེད། །བཟུང་དུ་མེད་ཅིང་བརྗོད་དུ་མེད། །རྒྱུ་དང་ལས་ལས་ཡང་དག་བྱུང༌། །དེ་བཞིན་དེ་ཉིད་ངེས་པར་བྱུང༌། །བདེན་པ་དེ་ཡིས་དཀྱིལ་འཁོར་ནི། །གཟུགས་བརྙན་གསལ་བར་སློབ་མ་རྣམས། །ཀུན་གྱིས་དྲི་མེད་མཐོང་བར་ཤོག ལན་གསུམ། རྡོ་རྗེ་ཕག་མོས་མགྲིན་འཁྱུད་པའི། །དགའ་ཆེན་ཁྱོད་བདག་སྟོན་པ་སྟེ། སོགས་ལན་གསུམ་གྱི་གསོལ་བ་བཏབ། ཨོཾ་ཙཀྵུར་བནྡྷ་བ་ར་མ་ན་ཡ་ཧཱུཾ། གིས་མིག་དར་བཅིངས། ཨཱ་ཁཾ་བཱི་ར་ཧཱུཾ་གིས་མེ་ཏོག་བཟུང༌། ལས་བུམ་གྱི་ཆུས་གཏོར་ལ། སུམྦྷས་བགེགས་བསྐྲད། དཔྲལ་པར་ཨོཾ། མགྲིན་པར་ཨཱཿ སྙིང་ག་ཧཱུཾ་གིས་སྲུང་བར་བྱ། བུ་ཁྱོད་སུ་ཡིན་ཅི་ལ་དགའ། ཞེས་དྲིས་པ་ལ། སྐལ་བཟང་བདག་བདེ་བ་ཆེན་པོ་ལའོ། །ཞེས་ལན་བཏབ། སླར་ཡང༌། དེ་ཡིས་བུ་ལ་ཅི་ཞིག་བྱ། །ཞེས་དྲིས་པ་ལ། སངས་རྒྱས་མཆོག་གི་དམ་ཚིག་གོ །ཞེས་ལན་བཏབ། རང་གི་སྙིང་གར་ཟླ་བ་ལ་གནས་པའི་རྡོ་རྗེ་དཀར་པོ་རྩེ་ལྔ་པ་འོད་འཕྲོ་བ། ཀུན་རྫོབ་དང་དོན་དམ་པའི་བྱང་ཆུབ་སེམས་ཀྱི་བདག་ཉིད་དོ། །ཨོཾ་བཛྲ་ཡོ་ག་ཙིཏྟ་ཨུ་པ་ད་ཡ་མི། རྡོ་རྗེ་སྙིང་ཁར་གཏད། སུ་ར་ཏེ་ས་མ་ཡ་སྟྭཾ་ཧོ་སིདྡྷི་བཛྲ་ཡ་ཐཱ་སུ་ཁཾ། དེང་ཁྱོད་དེ་བཞིན་གཤེགས་པ་ཐམས་ཅད་ཀྱི་བྱིན་གྱིས་བརླབ་པར་འགྱུར་གྱི། དེ་བཞིན་གཤེགས་པ་ཐམས་ཅད་ཀྱི་གསང་ཆེན་དམ་པ་འདི། དེ་བཞིན་གཤེགས་པ་ཐམས་ཅད་ཀྱི་དཀྱིལ་འཁོར་དུ་མ་ཞུགས་པ་རྣམས་ཀྱི་མདུན་དུ་སྨྲ་བར་མི་བྱ་སྟེ།
མ་དད་པ་རྣམས་ལ་ཡང་མ་ཡིན་ནོ། །དཀྱིལ་འཁོར་ཁང་པའམ་ཡོལ་བའི་ནང་དུ་བཅུག་པར་མོས་ལ། ཧཱུཾ་ཛཿཧཱུཾ ཞེས་བརྗོད། དེ་དག་ནི། བླ་མ་གོང་མ་རྣམས་ཀྱི་ཕྱག་བཞེས་མན་ངག་སྤྱི་དང་མཐུན་པའི་ཁ་སྐོང་ཡིན་ལ་གཞུང་ན་མེད་པས་བསྡུ་ན་མེད་ཀྱང་ཆོག་པ་འགའ་ཞིག་ཡོད་དོ། །དེ་ནི་དཀྱིལ་ཆོག་འདི་ཉིད་ལས་བྱུང་བའི་འཇུག་པ་ལ་སྡོམ་ནི། སྡོམ་པ་མདོར་བསྟན་དམ་རྫས་སྦྱིན། །སྲུང་བ་དཔའ་བོ་སྐུལ་བ་དང༌། །གསོལ་བ་གདབ་ཅིང་གནང་བ་ཞུ། །ཕྱག་འཚལ་སྡོམ་པ་སྦྱིན་པ་དང༌། །དམ་ལ་བཞག་ཅིང་ཡེ་ཤེས་ཕབ། །ནམ་མཁའི་མདོག་འདྲི་མེ་ཏོག་ཕུལ། །མིག་དར་ཕྱེ་ལ་ལྟ་བར་བསྐུལ། །ལྷ་ངོ་བསྟན་ཞིང་དེ་ཉིད་བརྗོད། །ཅེས་བྱའོ། །དེ་ལྟར་དོན་ཚན་བཅུ་དྲུག་ལས། དང་པོ་སྡོམ་པ་མདོར་བསྟན་ནི། གོང་ནས་གོང་མའི་སྡོམ་པ་ནི། །བུ་ཁྱོད་ཀྱིས་ནི་བཟུང་བྱ་སྟེ། །གྲོལ་བའི་རྒྱུན་ནི་དེ་ལས་གཞན། །ཐབས་ནི་ཅི་ཡང་ཡོད་མ་ཡིན། ཞེས་སོ། །གཉིས་པ་དམ་རྫས་བྱིན་པ་ནི། ཨོཾ་ཧྲཱིཿ་ཧ་ཧ་ཧཱུཾ་ཧཱུཾ་ཕཊ། ལན་གསུམ་སོགས་བཟླ་བཞིན་དུ། བདུད་རྩི་མྱང་ཞིང་ལུས་ལ་གཏོར། གསུམ་པ་སྲུང་བ་ནི། རང་ཉིད་འཁོར་ལོ་བདེ་མཆོག་ཞལ་གཅིག་ཕྱག་གཉིས་པའི་སྐུར་གསལ་བའི། སྙིང་གར་ཨོཾ་ཨོཾ་ཧ་དཀར་པོ༴ ནས། ཉི་མའི་འོད་ཅན་ནོ། །སྤྱི་བོ་ལ་སོགས་པའི་ནས། སི་མ་ཀུ་ཁམས་རྣམས་དཔའ་བོ་དང་རྩ་རྣམས་དཔའ་མོའི་བདག་ཉིད་དུ་གྱུར། བཞི་པ་དཔའ་བོ་བསྐུལ་བ་ནི། མདུན་བསྐྱེད་ཀྱི་ཐུགས་ཀ་ནས་འོད་འཕྲོས། སངས་རྒྱས་བྱང་སེམས་ཐམས་ཅད་ཧེ་རུ་ཀའི་རྣམ་པར་སྤྱན་དྲངས། རང་གི་སྙིང་གར་ཐིམ་པས། མི་ཤིགས་པ་དཔྱིད་ཀྱི་རྩ་ཐིག་དཔལ་ཧེ་རུ་ཀ་ཞལ་ཕྱག་ཡོངས་སུ་རྫོགས་པར་གྱུར།
ཨོཾ་ཤྲཱི་ཧེ་རུ་ཀཱ་ཡ་བིད་མ་ཧེ་བི་དྱཱ་རཱ་ཛཱ་ཡ། དྷཱི་མ་ཧེ་སྭཱཧཱ། ཞེས་ལན་ལྔའམ་བདུན་ནོ། །ལྔ་པ་གསོལ་གདབ་པ་ནི། གང་གི་དྲིན་གྱི་བདེ་ཆེན་ཉིད། །སྐད་ཅིག་ཉིད་ལ་འཆར་བ་གང༌། །བླ་མ་རིན་ཆེན་ལྟ་བུའི་སྐུ། །རྡོ་རྗེ་ཅན་ཞབས་པད་ལ་འདུད། །སངས་རྒྱས་ཀུན་གྱི་རང་བཞིན་སྐུ། །སློབ་དཔོན་ལ་ནི་བདག་སྐྱབས་མཆི། །དཔའ་བོ་རྣལ་འབྱོར་མ་འཁོར་ལོ། །རྣལ་འབྱོར་གནས་ལ་བདག་ཕྱག་འཚལ། །དོན་དམ་སྨྲ་བའི་སེངྒེ་རྣལ་འབྱོར་ཞེས་བྱ་བ། །ཉོན་མོངས་གཅོད་པའི་དོན་ལ་ཤིན་ཏུ་མཁས་གྱུར་པ། །སྲིད་པའི་ཉེས་བརྒྱ་སྐྱེད་རྩ་ཉོན་མོངས་ཆོམ་མཛོད་ལ། །རྣལ་འབྱོར་དོན་དམ་རྒྱལ་པོ་དེ་ཉིད་གྲུབ་པར་མཛོད། ཅེས་ལན་གསུམ། དྲུག་པ་གནང་བ་ཞུ་བ་ནི། དེ་བཞིན་གཤེགས་པ་ཀུན་གྱི་གནས། །ཧེ་རུ་ཀ་དཔལ་གྲོང་ཁྱེར་མཆོག །སྙིང་པོའི་དཀྱིལ་འཁོར་འདི་རུ་ནི། །བདག་གི་སློབ་མ་གཞུག་པར་བགྱི། ལན་གསུམ། བདུན་པ་ཕྱག་འཚལ་བ་ནི། གནས་གསུམ་དུ་ཐལ་མོ་སྦྱོར་བཞིན་པས། ཨོཾ་ན་མ་ཏེ་ཧཱུཾ། ན་མ་མེ་ཧཱུཾ། ན་མོ་ན་མཿཧཱུཾ་སྭཱཧཱ། ཞེས་ལན་གསུམ་མོ། །དཀྱིལ་འཁོར་གྱི་ཤར་སྒོ་ནས་ལུས་ཐམས་ཅད་ཀྱིས་ཕྱག་བཙལ་བར་མོས། ཨོཾ་སརྦ་བཱི་ར་ཡོ་གི་ནཱི་པཱུ་ཛ་ཨུ་པསྠ་ན་ཨཱཏྨ་ནཾ་ནིརྱ་ཏདྱ་མི། སརྦ་ཏ་ཐཱ་ག་ཏ་བཱི་ར་ཡོ་གི་ནཱི་ཨཱཏྨ་ཌཱ་ཀི་ནཱི་ཨ་དྷི་ཏིཥྛ་སྭཱ་མཾ། བྱང་སྒོ་ནས་ཐལ་མོ་སྙིང་གའི་གཡོན་ཕྱོགས་སུ་སྦྱར་ཏེ། ཨོཾ་སརྦ་བཱི་ར་ཡོ་གི་ནཱི་པཱུ་ཛ་ཨ་བྷི་ཥེ་ཀ་ཡ། ཨཱཏྨ་ནཾ་ནིརྱ་ཏདྱ་མི་སརྦ་ཐཱ་ག་ཏ་བཱི་ར་ཡོ་ག་ནཱི་
ཨཱཏྨ་ལ་མཱ་ཡེ་ཨ་བྷི་ཥིཉྩནྟུ་མཾ། ནུབ་སྒོ་ནས་ཐལ་མོ་དཔྲལ་བར་བཞག་སྟེ། ཨོཾ་སརྦ་བཱི་ར་ཡོ་གི་པཱུ་ཛ་པྲ་པརྟ་ན་ཡ་ཨཱཏྨ་ནཾ་ནིརྱ་ཏ་ཡ་མི་སརྦ་ཏ་ཐཱ་ག་ཏ་བཱི་ར་ཡོ་གི་ནཱི་ཨཱཏྨ་ཁཎྜ་རོ་ཧཱ་དྷརྨཱ་པྲ་བརྟ་ཡ་མི། ལྷོ་སྒོ་ནས་ཐལ་མོ་མགོ་བོར་བཞག་སྟེ། ཨོཾ་སརྦ་བཱི་ར་ཡོ་གི་ནཱི་པཱུ་ཛ་ཀརྨ་ཎཾ་ཨཱཏྨ་ནཾ་ནིརྱ་ཏ་ཡ་མི། སརྦ་ཏ་ཐཱ་ག་ཏ་བཱི་ར་ཡོ་གི་ནཱི་ཨཱཏྨ་རཱུ་པི་ནི་ཀརྨ་ཀུ་རུ་མཾ། ཞེས་སོ། །བརྒྱད་པ་སྡོམ་པ་སྦྱིན་པ་ལ། སྒྲགས་བཟུང་གཉིས་ལས། སྒྲགས་པ་ནི། སངས་རྒྱས་ཆོས་དང་དགེ་འདུན་ཏེ། །དཀོན་མཆོག་གསུམ་ལ་སྐྱབས་སུ་སོང༌། །འདི་ནི་སངས་རྒྱས་རིགས་ཡིད་འོང༌། །སྡོམ་པ་བརྟན་པོར་གྱུར་པའོ། །རྡོ་རྗེ་དྲིལ་བུ་ཕྱག་རྒྱ་ནི། །བློ་ཆེན་ཁྱོད་ཀྱིས་བཟུང་བར་བྱ། །བྱང་ཆུབ་སེམས་གང་དེ་རྡོ་རྗེ། །ཤེས་རབ་དྲིལ་བུ་ཞེས་བསྒྲགས་སོ། །སློབ་དཔོན་ཁྱོད་ཀྱིས་བཟུང་བར་བྱ། །བླ་མ་སངས་རྒྱས་ཀུན་དང་མཉམ། །འདི་ནི་རྡོ་རྗེ་རིགས་དག་པའི། །དམ་ཚིག་སྡོམ་པ་ཡིན་པར་བཤད། །རིན་ཆེན་རིགས་ལ་རྟག་ཏུ་ནི། །ཉིན་རེ་བཞིན་ཡང་དུས་དྲུག་ཏུ། །ཆོས་དང་ཟང་ཟིང་མི་འཇིགས་བྱམས། །སྦྱིན་པ་རྣམ་བཞི་རྟག་ཏུ་སྦྱིན། །ཕྱི་དང་གསང་བ་ཐེག་པ་གསུམ། །དམ་པའི་ཆོས་ནི་མ་ལུས་བཟུང༌། །འདི་ནི་པདྨའི་རིགས་དག་པའི། །དམ་ཚིག་ཡིད་དུ་འོང་བའོ། །ལས་ཀྱི་རིགས་མཆོག་ཆེན་པོ་ལ། །སྡོམ་པ་ཐམས་ཅད་
ལྡན་པ་ནི། །ཡང་དག་ཉིད་དུ་བཟུང་བར་བགྱི། །མཆོད་པའི་ལས་ཀྱང་ཅི་ནུས་བགྱི། ཞེས་སོ། །གཉིས་པ་སྡོམ་པ་བཟུང་བ་ནི། དཀོན་མཆོག་གསུམ་ལ་བདག་སྐྱབས་མཆི། སོགས་ལན་གསུམ་གྱི་ཐུན་མོང་གི་སྡོམ་པ་བཟུང༌། སྲས་བཅས་སངས་རྒྱས་ཐམས་ཅད་དང༌། །དཔའ་བོ་རྣལ་འབྱོར་མ་རྣམས་ཀུན། །ཐམས་ཅད་བདག་ལ་དགོངས་སུ་གསོལ། །བདག་མིང་འདི་ཞེས་བགྱི་བ་ཡིས། །དུས་འདི་ནས་ནི་བཟུང་ནས་སུ། །ཇི་སྲིད་བྱང་ཆུབ་སྙིང་པོའི་བར། །ཇི་ལྟར་དུས་གསུམ་མགོན་པོ་རྣམས། །བྱང་ཆུབ་ཏུ་ནི་ངེས་མཛད་པའི། །བྱང་ཆུབ་སེམས་ནི་བླ་ན་མེད། །དམ་པ་བདག་གིས་བསྐྱེད་པར་བགྱི། །ཚུལ་ཁྲིམས་ཀྱི་ནི་བསླབ་པ་དང༌། །དགེ་བས་ཆོས་ནི་སྡུད་པ་དང༌། །སེམས་ཅན་དོན་བྱེད་ཚུལ་ཁྲིམས་གསུམ། །སོ་སོར་བརྟན་པོར་བཟུང་བར་བགྱི། །སངས་རྒྱས་ཆོས་དང་དགེ་འདུན་ཏེ། །བླ་ན་མེད་པའི་དཀོན་མཆོག་གསུམ། །སངས་རྒྱས་རྣལ་འབྱོར་ལས་སྐྱེས་པའི། །སྡོམ་པ་དེང་ནས་བརྟན་པོར་བཟུང༌། །རྡོ་རྗེ་རིགས་མཆོག་ཆེན་པོ་ལ། །རྡོ་རྗེ་དྲིལ་བུ་ཕྱག་རྒྱ་ཡང༌། །ཡང་དག་ཉིད་དུ་བཟུང་བར་བགྱི། །སློབ་དཔོན་དག་ཀྱང་བཟུང་བར་བགྱི། །རིན་ཆེན་རིགས་མཆོག་ཆེན་པོ་ཡི། །དམ་ཚིག་ཡིད་དུ་འོང་བ་ལ། །ཉིན་རེ་བཞིན་ཡང་དུས་དྲུག་ཏུ། །སྦྱིན་པ་རྣམ་བཞི་རྟག་ཏུ་སྦྱིན། །བྱང་ཆུབ་
ཆེན་པོ་ལས་བྱུང་བའི། །པདྨའི་རིགས་ཆེན་དག་པ་ལ། །ཕྱི་དང་གསང་བ་ཐེག་པ་གསུམ། །དམ་པའི་ཆོས་ནི་མ་ལུས་བཟུང༌། །ལས་ཀྱི་རིགས་མཆོག་ཆེན་པོ་ལ། །སྡོམ་པ་ཐམས་ཅད་ལྡན་པ་ནི། །ཡང་དག་ཉིད་དུ་བཟུང་བར་བགྱི། །མཆོད་པའི་ལས་ཀྱང་ནི་ནུས་བགྱི། །བྱང་ཆུབ་སེམས་ནི་བླ་མེད་པ། །དམ་པ་དག་གིས་བསྐྱེད་བགྱིས་ནས། །སེམས་ཅན་ཀུན་གྱི་དོན་གྱི་ཕྱིར། །བདག་གིས་སྡོམ་པ་མ་ལུས་བཟུང༌། །མ་རྒལ་བ་རྣམས་སྒྲལ་བར་བགྱི། །མ་གྲོལ་བ་རྣམས་བདག་གིས་བགྲོལ། །དབུགས་མ་འབྱིན་པ་དབུགས་དབྱུང་ཞིང༌། །སེམས་ཅན་མྱ་ངན་འདས་ལ་འགོད། ཅེས་པ་ལན་གསུམ་གྱིས་རིགས་ལྔའི་སྡོམ་པ་བཟུང༌། སངས་རྒྱས་ཆོས་དང་དགེ་འདུན་ལ། ཞེས་པ་ནས། ཉི་ཤུ་རྩ་གཉིས་ལེགས་པར་བཟུང་གིས་བར་ལན་གསུམ་གྱིས་ཐུན་མོང་མ་ཡིན་པའི་སྡོམ་པ་བཟུང་ངོ༌། །དགུ་པ་དམ་ལ་བཞག་པ་ནི། དེང་ཁྱོད་དཔའ་བོ་དང་རྣལ་འབྱོར་མ་ཐམས་ཅད་ཀྱི་རིགས་སུ་ཞུགས་ཀྱི། ངས་ཁྱོད་ལ་དཔལ་ཧེ་རུ་ཀའི་ཡེ་ཤེས་བསྐྱེད་པར་བྱ་སྟེ། ཡེ་ཤེས་གང་གིས་ཁྱོད་དེ་བཞིན་གཤེགས་པ་ཐམས་ཅད་དང༌། དཔའ་བོ་དང་རྣལ་འབྱོར་མ་ཐམས་ཅད་ཀྱི་དངོས་གྲུབ་ཀྱང་ཐོབ་པར་འགྱུར་ན་དངོས་གྲུབ་གཞན་ལྟ་ཅི་སྨོས། །ཁྱོད་ཀྱི་དཀྱིལ་འཁོར་མ་མཐོང་བ་རྣམས་ཀྱི་མདུན་དུ་སྨྲ་བར་མི་བྱ་སྟེ། དམ་ཚིག་ཉམས་པར་འགྱུར་ཏ་རེ།
ཞེས་ཕན་ཡོན་གྱི་སྒོ་ནས་དམ་ལ་བཞག་ལ། རྡོ་རྗེ་སྙིང་གར་རེག་སྟེ། ཧེ་རུ་ཀ་དཔལ་དེང་ཁྱོད་ཀྱི། །སྙིང་ལ་ཡང་དག་ཞུགས་པར་གྱུར། གལ་ཏེ་ཚུལ་འདི་སྨྲས་གྱུར་ན། །དེ་མ་ཐག་ཏུ་དྲལ་ཏེ་གཤེགས། ཐོད་པ་ནས་བདུད་རྩིའི་ཆུ་བཏུངས་ཏེ། འདི་ནི་ཁྱོད་ཀྱི་དམྱལ་བའི་ཆུ། །དམ་ཚིག་འདས་ན་སྲེག་པར་བྱེད། །དམ་ཚིག་བསྲུང་ན་དངོས་གྲུབ་ནི། །རྡོ་རྗེ་བདུད་རྩིའི་ཆུ་འདིས་ཐོབ། །ཨོཾ་པཉྩ་ཨ་མྲྀ་ཏ་ཨུ་ཏ་ཀ་ཋཿཐཿཐཿཧཱུཾ། ཞེས་དམ་ཚིག་སྲུང་བའི་ཕན་ཡོན་དང༌། མ་སྲུངས་པའི་ཉེས་དམིགས་ཀྱི་སྒོ་ནས་དམ་ལ་བཞག དེང་ནས་རྩམས་ཏེ་བུ་ཁྱོད་ཀྱི་དཔལ་ཧེ་རུ་ཀ་ང་ཡིན་གྱི། གང་ངས་འདི་བྱོས་ཤིག་ཅེས་བསྒོ་བ་དེ་བྱ་དགོས་སོ། །ཁྱོད་ཀྱིས་ང་ལ་བརྙས་པར་ཡང་མ་བྱེད་ཅིག །ཁྱོད་མི་བདེ་བ་མ་སྤང་པར་དུས་བྱས་ནས་དམྱལ་བར་ལྷུང་བར་གྱུར་ཏ་རེ། ཞེས་སློབ་དཔོན་གྱིས་བཀའ་ཉན་པའི་སྒོ་ནས་དམ་ལ་བཞག་གོ བཅུ་པ་ཡེ་ཤེས་དབབ་པ་ནི། དཔའ་བོ་དང་རྣལ་འབྱོར་མ་ཐམས་ཅད་ཀྱིས་བྱིན་གྱིས་རློབས་ཤིག།དཔལ་ཧེ་རུ་ཀ་བདག་ལ་དབབ་པར་མཛད་དུ་གསོལ། ལན་གསུམ། རང་ཉིད་ཧེ་རུ་ཀ་ཕྱག་གཉིས་པ་ཞབས་གཡས་བརྐྱང་གི་སྟབས་ཀྱིས་བཞུགས་པར་གྱུར། སྙིང་ག་ཆོས་ཀྱི་འཁོར་ལོ་རྩ་འདབ་བརྒྱད་པའི་ལྟེ་བ་ལ། རྩ་ཨ་ཝ་དྷུ་ཏཱི་ཆུ་ཤིང་གི་མེ་ཏོག་ལྟ་བུའི་ནང་ན། དཔྱིད་དང་ཐིག་ལེ་ཁ་སྦྱོར་བར་གནས་པ་ནི། དཔལ་ཧེ་རུ་ཀ་འཁོར་ལོ་བདེ་མཆོག་ཞལ་བཞི་ཕྱག་བཅུ་གཉིས་པ། ཡུམ་རྡོ་རྗེ་ཕག་མོས་འཁྱུད་པ།
བདེ་བ་ཆེན་པོ་འབར་བའི་འོད་ཟེར་དུ་མ་འཕྲོ་བ། ཕྱོགས་བཞི་མཾ་ཏཾ་བཾ་ལཾ་ཡུམ་བཞི། མཚམས་བཞིར་ཨོཾ་ཡིག་བཞི་ཐོད་པ་བཞིའི་ངོ་བོ། སྤྱི་བོ་ལ་སོགས་པའི་གནས་རྣམས་སུ། པུ་ཛ་ཨོ་ཨ་གོ་ར་དེ་མ། ཀ་ཨོ་ཏྲི་ཀོ་ལ་ཀ་ཧི། པྲེ་གྲི་སོ་སུ་ན་སི་མ་ཀུ་རྣམས་དཔའ་བོ་ཉེར་བཞི་ཡུམ་དང་བཅས་པའི་ངོ་བོ། བུ་ག་བརྒྱད་ལ་ཧཱུཾ་རིང་པོ་བརྒྱད་སྒོ་མཚམས་མ་བརྒྱད་ཀྱི་ངོ་བོ། མདུན་བསྐྱེད་ཀྱི་ཐུགས་ཀ་ནས་འོད་ཟེར་འཕྲོས། རང་བཞིན་གྱི་གནས་ནས་སངས་རྒྱས་དང་བྱང་ཆུབ་སེམས་དཔའ་དཔའ་བོ་དང་རྣལ་འབྱོར་མ་ཐམས་ཅད་དཔལ་ཧེ་རུ་ཀ་རིག་མའི་ཚོགས་དང་བཅས་པ་དང༌། འཁོར་ལོ་གསུམ་གྱི་དཔའ་བོ་དང་རྣལ་འབྱོར་མའི་རྣམ་པར་སྤྱན་དྲངས་ཏེ། ལུས་ཀྱི་སྟོད་ཀྱི་ཆ་ལ་ཐུགས་ཀྱི་འཁོར་ལོ་པ་རྣམས་ནག་པོའི་རྣམ་པས་ཐིམ། བར་གྱི་ཆ་ལ་གསུང་གི་འཁོར་ལོ་པ་རྣམས་དམར་པོའི་རྣམ་པས་ཐིམ། སྨད་ཀྱི་ཆ་ལ་སྐུའི་འཁོར་ལོ་པ་རྣམས་དཀར་པོའི་རྣམ་པས་འཇུག་ཅིང༌། གཙོ་བོ་རིགས་མར་བཅས་པ་དང༌། དེ་མ་ཡིན་པའི་དཔའ་བོ་དང་རྣལ་འབྱོར་མ་དཔག་ཏུ་མེད་པ་ཡང་བ་སྤུའི་བུ་ག་ནས་ཞུགས་ཤིང་སྙིང་གར་ཐིམ་པའི་རྐྱེན་གྱིས། སྙིང་གའི་དཔའ་བོ་ཡབ་ཡུམ་སྙོམས་པར་ཞུགས་པའི་སྦྱོར་མཚམས་ནས་བྱང་ཆུབ་ཀྱི་སེམས་ཀྱི་འོད་ཟེར་འཕྲོས་པས། ལུས་ཐམས་ཅད་བདེ་བ་
ཆེན་པོས་གང༌། དཀྱིལ་འཁོར་གྱི་ལྷ་ཚོགས་རྣམས་ལས་ལྷ་ཚོགས་དཔག་ཏུ་མེད་པ་ཆར་བབས་པ་བཞིན་ཏུ་བྱུང་སྟེ་སྙིང་གར་ཐིམ། ཨོཾ་ཏིཥྛ་མཧཱ་ཀྲོ་དྷཱ་ཨཱ་བེ་ཤ་ཡ་ཧཱུཾ། ཨོཾ་ཤྲཱི་ཧེ་རུ་ཀཱ་ཡ་བིད་མ་ཧེ་བིདྱ་རཱ་ཛ་ཡ་དྷཱི་མ་ཧེ་སྭཱཧཱ། ཞེས་པ་དང༌། གཙོ་བོ་ཡབ་ཡུམ་གྱི་སྔགས་ཀྱང་བཟླ་བཞིན་དུ། རོལ་མོ་སྣ་ཚོགས་པའི་སྒྲ་དང་རྫས་ཀྱི་བདུག་སྤོས་དང་བཅས་པས་དབབ་བོ། ཏིཥྛ་བཛྲ། སྤྱི་བོར་རྡོ་རྗེ་རྒྱ་གྲམ་དུ་བཞགབཅུ་གཅིག་པ་ནམ་མཁའི་ཁ་དོག་བྲི་བ་ནི་བདག་འཇུག་གི་སྐབས་འདིར་མི་དགོས་སོ། །བཅུ་གཉིས་པ་མེ་ཏོག་འབུལ་སྦྱིན་ནི། ཨོཾ་པྲ་ཏཱིཙྪ་བཛྲ་ཧོ། ཞེས་གཙོ་བོ་འམ་རིགས་མཐུན་པའི་ལྷ་ལ་མེ་ཏོག་ཕུལ། སྐབས་འདིར། པྲ་ཏི་གྲྀཧྞ། སོགས་ཀྱིས་མེ་ཏོག་སྤྱི་བོར་བཅིང་བ། འདི་ནི་དཀྱིལ་ཆོག་སྤྱི་དང་མཐུན་པའི་ཁ་སྐོང་སྟེ་འདིར་མེད་ཀྱང་ཆོག་གོ །བཅུ་གསུམ་པ་མིག་དར་དབྱེ་བ་ནི། ཧེ་རུ་ཀ་དཔལ་དེང་ཁྱོད་ཀྱི། །མིག་འབྱེད་པར་ནི་བརྩོན་པར་མཛད། །ཕྱེ་བས་ཐམས་ཅད་མཐོང་གྱུར་པ། །རྡོ་རྗེ་མིག་ནི་བླ་ན་མེད། །ཨོཾ་བཛྲ་ནཻ་ཏྲ་པ་ཊ་ལཾ་ཧྲཱིཿ བཅུ་བཞི་པ་ལྟ་བར་བསྐུལ་བ་ནི། དཀྱིལ་འཁོར་བཟང་པོ་འདི་ལ་ལྟོས། །ད་ནི་དང་བ་རབ་ཏུ་བསྐྱེད། །ཁྱེད་ནི་རྣལ་འབྱོར་མ་རིགས་སྐྱེས། །སྔགས་དང་ཕྱག་རྒྱས་བྱིན་གྱིས་བརླབས། །འགྲོ་བ་ཕུན་སུམ་ཚོགས་ཀུན་དང༌། །དངོས་གྲུབ་ཀུན་ཁྱོད་མངོན་དུ་འགྱུར། །དམ་ཚིག་ཐམས་ཅད་བསྐྱང་བ་དང༌། །སྔགས་རྣམས་ལ་ཡང་བརྩོན་པར་གྱིས། ཞེས་སྤྲོ་བ་བསྐྱེད། བཅོ་ལྔ་པ་ལྷ་ངོ་བསྟན་པ་ནི། རྟེན་དང་བརྟེན་པར་བཅས་པའི་དཀྱིལ་འཁོར་པ་
ཐམས་ཅད་མངོན་སུམ་བཞིན་དུ་གསལ་བར་གྱུར། ཞེས་བརྗོད་ཅིང་ཡིད་ཀྱི་དཀྱིལ་འཁོར་གསལ་གདབ་བོ། །བཅུ་དྲུག་པ་དེ་ཁོ་ན་ཉིད་བརྗོད་པ་ནི། གཞལ་མེད་ཁང་ནི་བྱང་ཆུབ་ཀྱི་ཕྱོགས་ཀྱི་ཆོས་སུམ་ཅུ་རྩ་བདུན་ཡིན་ལ། ལྷ་སུམ་ཅུ་རྩ་བདུན་ཡང་དེ་རྣམས་རྣམ་པར་དག་པའོ། །སྣ་ཚོགས་པདྨའི་ལྟེ་བར་བཞུགས། །གཉིས་མེད་གཉིས་མེད་པང་ན་གནས། །བརྟན་གཡོ་ཀུན་གྱི་བདག་ཉིད་ཅན། །སྤྱོད་དང་གྲོལ་བ་རབ་རྩོལ་བ། །ཀུན་མཁྱེན་ཀུན་མཛད་གཙོ་བོ་སྟེ། །དཔའ་བོ་ཆེ་ལ་བུ་ཁྱོད་ལྟོས། །མཁའ་འགྲོ་མ་ལ་སོགས་པའི་ཚོགས། །གྲུབ་པའི་རྣལ་འབྱོར་མ་ལྔ་པོ། །ཐོད་པའི་དུམ་བུ་ལ་སོགས་ཀུན། །འཁོར་ལོ་མཁའ་ལ་སྤྱོད་པས་བསྐོར། །རབ་གཏུམ་ལ་སོགས་ཡང་དག་འཁྱུད། །གཉིས་པོ་ཐུགས་ཀྱི་སྤྲུལ་པ་ཡིན། །མྱུ་གུ་ཅན་ལ་སོགས་པ་ཀུན། །རྣལ་འབྱོར་མ་བརྒྱད་གཉིས་སུ་མེད། །གསུང་གི་རྣམ་དག་ངོ་བོ་ཡིས། །མི་ཡི་འཇིག་རྟེན་དག་ཏུ་ཁྱབ། །སྟོབས་པོ་ཆེ་སོགས་པད་གནས་པ། །གྲུབ་པ་ས་འོག་གནས་པ་ཡིན། །སྐུ་ཡི་སྤྲུལ་པར་བཤད་པ་སྟེ། །ཆགས་པ་ཀུན་གྱིས་རྗེས་སུ་ཆགས། །ཧེ་རུ་ཀ་དཔལ་སོགས་འཁོར་ལོ། །གཡོན་ནས་འཁྱུད་ཅིང་ནུ་མ་འཛིན། །སྐུ་གསུམ་ཞེས་བྱས་སྤྲུལ་པ་སྟེ། །མཆོག་དང་འབྲིང་དང་ཐ་མའོ། ཁ་ལ་སོགས་པ་བརྒྱད་པོ་ཡི། །གཟུགས་ནི་རྒྱུ་ཡིས་ཡང་དག་བསྟན། །ཁྲོ་བོ་རྣམ་རྒྱལ་ལ་སོགས་བརྒྱད། །
བྱང་ཆུབ་སུམ་ཅུ་བདུན་དུ་སྤྲུལ། །མཁའ་ལ་སྤྱོད་དང་ས་ལ་སྤྱོད། །ས་འོག་དག་གི་མ་མོ་དང༌། །བཞི་པོ་མཆོད་པ་བཞི་ཡིན་ཏེ། །ལྷ་རྣམས་དེ་ཉིད་མཚོན་པ་ཡིན། ཞེས་བརྗོད་དོ། །གཉིས་པ་དབང་གི་ངོས་བཞི་ལ། བུམ་དབང༌། གསང་དབང༌། ཤེས་རབ་ཡེ་ཤེས། དབང་བཞི་པ་སྟེ་བཞི་ལས། དང་པོ་ལ་རང་ལུགས་གཞུང་དོན་གཙང་མ་ཞིབ་མོར་བསྟན་པ་དང༌། རྣམ་གྲངས་སུ་བསྟན་པ་རྒྱ་བོད་ཀྱི་བླ་མ་འགའ་ཞིག་འདོད་པའི་མན་ངག་གིས་ཁ་འགེངས་ཚུལ་གཉིས་ལས། དང་པོ་དབང་གི་སྔོན་འགྲོ་དང༌། དབང་དངོས་གཞི་དང༌། མཐའ་བརྟེན་ཏེ་གསུམ་ལས། དང་པོ་ནི། ཐོག་མར་སློབ་དཔོན་གྱི་དབང་ཞེས་ཀྱང་བྱ་བ་བུམ་དབང་གི་དོན་དུ་མཎྜལ་ཕུལ་ནས། ཧེ་རུ་ཀ་དཔལ་དབང་བསྐུར་བ། །འགྲོ་བ་སྐྱོབ་པའི་གཟི་བརྗིད་ཅན། །ཇི་ལྟར་ཡོན་ཏན་འབྱུང་གནས་རྩལ། །དེ་བཞིན་བདག་ལ་དེང་སྩོལ་ཞིག །དཔའ་བོ་ཆེན་པོ་མི་ལྡོག་པའི། །དབང་བསྐུར་བ་ནི་བདག་ལ་སྩོལ། །སེམས་ཅན་ཀུན་གྱི་དོན་བགྱིད་ཕྱིར། །བདག་ནི་རྟག་ཏུ་སློབ་དཔོན་གྱུར། ཞེས་ལན་གསུམ་གྱིས་གསོལ་བ་གདབ། དཀྱིལ་འཁོར་གྱི་གཙོ་བོའི་སྐུ་ལ་ལུས་དཀྱིལ་གྱི་ལྷ་ཚོགས་ཡོངས་རྫོགས་གསལ་བར་གྱུར། གཞུང་ལས། ཧེ་རུ་ཀ་དཔལ་བདག་ཉིད་སེམས། དཀྱིལ་འཁོར་ལུས་ནང་ཆུད་བྱས་ལ། །པདྨ་འདབ་བརྒྱད་སྟེང་དུ་ནི། །ཞེས་སོགས་ཀྱི་དོན་ནོ། །རང་ཉིད་དབང་སྟེགས་ཀྱི་སྟེང་དུ་ཧེ་རུ་ཀ་ཕྱག་གཉིས་པའི་སྐུར་གསལ་བའི་སྟེང་དུ་གདུགས་དཀར་པོ་གསེར་གྱི་ཡུ་བ་
ཅན། གཡས་སུ་རྒྱལ་མཚན་གཡོན་དུ་བ་དན། མཐའ་བསྐོར་དུ་མཆོད་པའི་སྤྲིན་གྱི་ཕུང་པོ་བསམ་གྱིས་མི་ཁྱབ་པས་ཡོངས་སུ་བསྐོར་བ་གྱུར། གཙོ་བོའི་ཐུགས་ཀ་ནས་འོད་ཟེར་འཕྲོས། དབང་གྀ་ལྷ་དྲུག་ཅུ་རྩ་གཉིས་ཀྱི་དཀྱིལ་འཁོར་སྤྱན་དྲངས་ཕེཾ། པུཥྤེ་སོགས་ཀྱིས་མཆོད། རྡོ་རྗེ་ཅན་གྱི་སངས་རྒྱས་ལ། །འགྲོ་བ་སྐྱོབ་པའི་ཆེད་དུ་དབང༌། །ཡོན་ཏན་འབྱུང་གནས་ཇི་ལྟར་སྩལ། །དེ་བཞིན་འདི་ལ་གནང་བར་མཛོད། ཅེས་ལན་གསུམ་གྱིས་གསོལ་བ་བཏབ། དཀྱིལ་འཁོར་གྱི་ལྷ་ཚོགས་རྣམས་དང༌། དབང་གི་ལྷ་རྣམས་ཀྱི་ཐུགས་ཀ་ནས། སྒོ་མཚམས་མ་བརྒྱད་ལ་སོགས་པ་ཁྲོ་བོ་དང་ཁྲོ་མོ་དཔག་ཏུ་མེད་པ་སྤྲོས་ནས། བགེགས་བསྐྲད་ཅིང་མི་ཤིས་པ་སྦྱངས་པར་གྱུར། ཡབ་ཀྱི་སྙིང་པོ་དང༌། སུམྦྷ་བཟླས་ཤིང་རོལ་མོའི་སྒྲ་སྒྲགས། དབང་རྫས་དང་གང་ཟག་ལ་ཉུང་དཀར་རྡེག་ཅིང་ལས་བུམ་གྱི་ཆུས་བསངས། སྤོས་ཀྱི་བདུགས་ཏེ་བྱུར་བསལ་བའོ། །སྐབས་འདིར་གཞུང་ལས། ཡང་ན་ནུས་པ་མེད་གྱུར་ན། །ཞེས་སོགས་ཀྱི་དོན་ནི། ཏིང་ངེ་འཛིན་གྱི་དཀྱིལ་འཁོར་དངོས་སུ་སྤྲུལ་ནུས་པའམ་ཚོགས་ཀྱི་དཀྱིལ་དང་ཡོ་བྱད་མཐའ་དག་ཚང་ཞིང་བཤམས་ཡོད་ན་དབང་ལྷ་སྤྱན་འདྲེན་མི་དགོས་ཏེ། རྡུལ་ཚོན་ལ་སོགས་པའི་གནས་སུ་སྤྲུལ་པའི་དཀྱིལ་འཁོར་རམ་ཚོགས་ཀྱི་དཀྱིལ་འཁོར་གྱི་ལྷ་རྣམས་ཉིད་ཀྱིས་བྱུར་བསལ། ཤིས་བརྗོད། དབང་བསྐུར་རྣམས་
བྱེད་པར་འགྱུར་བའི་ཕྱིར་རོ། །དེ་ལྟར་མི་ནུས་པའམ་ཡོ་བྱད་མེད་པར་མོས་སྒོམ་ཙམ་གྱི་བྱེད་པ་ལ་ནི་དབང་ལྷ་སྤྱན་འདྲེན་པ་ཡང་དགོས་ཤིང༌། །དམིགས་པའི་རྩོལ་བ་ལ་འབད་པར་བྱའོ། །ཞེས་པའི་དོན་ཡིན་ནོ། །དེ་ལྟར་ན་དཀྱིལ་འཁོར་པ་རྣམས་དང༌། དབང་གི་ལྷའི་གཙོ་བོས་དབང་བསྐུར་བའི་དགོངས་པ་མཛད། རྡོ་རྗེ་ཕག་མོ་དང་ཡུམ་བཞིས་རྡོ་རྗེའི་གླུ་བླངས། དཔའ་བོ་དང་དཔའ་མོ་རྣམས་ཀྱིས་མཆོད་པ་ཕུལ། ནམ་མཁའི་དབྱིངས་གང་བའི་སངས་རྒྱས་བྱང་ཆུབ་སེམས་དཔའ་རྣམས་ཀྱིས་རོལ་མོའི་སྒྲ་སྒྲགས། མེ་ཏོག་གི་ཆར་ཕབ་སྟེ་ཤིས་པ་བརྗོད་པར་གྱུར། ཅུང་ཟད་སྤྲོས་པ་ལ་དགའ་ན་བྲམ་ཟེ་རིན་ཆེན་རྡོ་རྗེས་མཛད་པས་དཀྱིལ་འཁོར་གྱི་བཀྲ་ཤིས་བརྗོད། བསྡུ་ན་དེ་མ་བྱས་ཀྱང་ཆོག་ཅིང་དེའི་ཤོ་ལོ་ཀ་དང་པོ་ཙམ་བརྗོད་ཀྱང་རུང་ངོ༌། །མཐར་ཨོཾ་ཕུན་སུམ་ཚོགས་པ་མངའ་བ་གསེར་གྱི༴ ཞེས་སོགས་ཀྱི་དཀོན་མཆོག་གསུམ་གྱི་བཀྲ་ཤིས་དང༌། ཉིན་མོ་བདེ་ལེགས་སོགས་བརྗོད་ཅིང༌། ཡབ་ཀྱི་སྙིང་པོ་མང་དུ་བཟླས་ལ་མེ་ཏོག་གཏོར། རོལ་ཆེན་བྱ་སྟེ་ཤིས་པ་བརྗོད་པའོ། །མེ་ཏོག་འཕྲེང་བའི་དབང་བསྐུར་བ་ནི་གཞུང་གི་འགྱུར་དང་དཔེ་ཕལ་ཆེར་ལས། ལྷ་ཡི་རིགས་ཀྱི་མཚན་མ་ཡི། །མེ་ཏོག་ཇི་བཞིན་གཏོར་བར་བྱ། །ཞེས་འབྱུང་ཞིང་རིམ་པ་གསལ་བ་དང་ནས་གླིང་མ་སོགས་ཆོ་ག་སྒྲོས་འདི་དང་མཐུན་རུང་འགའ་ཞིག་ལས་ཀྱང་བཤད་པས་ན། སྐབས་འདིར་མེ་ཏོག་འབུལ་བ་ངེས་པར་དགོས་པས། འདིའི་འགྱུར་འགའ་ཞིག་ལས་ཚིག་དེ་མེད་པ་ནི་མ་དག་པར་
སྣང་ལ། འདི་དག་གིས་སྔགས་དབང་བསྟན་པར་འདོད་པ་ནི་མི་ལེགས་སོ། །དེ་ཡང་མེ་ཏོག་གང་ལ་ཕོག་པའི་རིགས་ཀྱི་ལྷ་ངེས་པ་ཅན་ཡོད་ན། དེར་བསྐྱེད་དགོས་པ་ཡིན་ཀྱང༌། དེ་བཞིན་མེད་ན་རིགས་ཐམས་ཅད་ཀྱང་ཁྱབ་བདག་ཡིན་པའི་ཕྱིར། གཙོ་བོ་ཉིད་དུ་སྒོམ་པས་ཆོག་སྟེ། དེས་ན། སྭཱ་བྷཱ་ཝས་སྦྱངས། སྟོང་པའི་ངང་ལས་བདག་ཉིད་དཔལ་ཧེ་རུ་ཀ་ཕྱག་གཉིས་པའི་སྐུར་གྱུར། ཨོཾ་པྲ་ཏཱིཙྪ་བཛྲ་ཧོཿ ཞེས་མེ་ཏོག་ཕུལ། དཀྱིལ་འཁོར་གྱི་ལྷ་ལ་ཕུལ་བའི་མེ་ཏོག་དེ་ཉིད་ལ། གཙོ་བོ་ཡབ་ཡུམ་གྱི་སྙིང་པོ་ལན་བདུན་སོགས་མང་དུ་བཟླས་ནས། དབང་བསྐུར་རྡོ་རྗེ་ཆེན་པོ་ནི། ཁམས་གསུམ་ཀུན་གྱིས་ཕྱག་བྱས་པ། །སངས་རྒྱས་ཀུན་གྱི་གསང་གསུམ་གྱི། །གནས་ལས་བྱུང་བ་སྦྱིན་པར་བྱ། །ཨོཾ་སརྦ་བུདྡྷ་ཌ་ཀི་ནཱི་སོགས་དང༌། ཨོཾ་དྷརྨཱ་ཀུན་ད་ཨ་བྷི་ཥིཉྩ་ཧཱུཾ། ཞེས་མེ་ཏོག་སྤྱི་བོར་བཅིངས། ཨོཾ་པྲ་ཏི་གྲྀཧྞ་སྟཾ་ཨི་མཾ་ས་ཏྭ་མ་ཧཱ་པ་ལ། ཞེས་བདག་གི་སློབ་མ་རིགས་ཀྱི་ལྷ་ལ་གཏད་པར་མོས། མདུན་བསྐྱེད་ཀྱི་ཐུགས་ཀའི་ས་བོན་གྱི་འོད་ཟེར་གྱིས། གཙོ་བོ་ཧེ་རུ་ཀ་ཡབ་ཡུམ་དཔག་ཏུ་མེད་པ་སྤྱན་དྲངས་ཏེ། བ་སྤུའི་བུ་ག་ནས་ཞུགས་པས། ལུས་ཐམས་ཅད་རང་རིགས་ཀྱི་ལྷའི་རྡུལ་ཕྲ་རབ་ཀྱིས་གང་བར་གྱུར། ཞེས་སོ། །སྐབས་འདིར་བ་སྤུའི་བུ་ག་ནས་སངས་རྒྱས་རྣམས་སྟིམ་སྟེ་ལུས་ནང་གང་བར་བྱེད་པ་འདི། གཞུང་ལས་མེ་ཏོག་དབང་བསྐུར་ལ་སོགས་པ་ཐམས་ཅད་ཆོ་ག་བཞིན་སྦྱིན་ཞིང༌། དཀྱིལ་འཁོར་ལུས་ནང་ཆུད་པར་བྱ། ཞེས་གསུངས་པས་བསྟན་ཏེ། བླ་མ་གོང་མ་
རྣམས་དང་ནཱ་རོ་པའི་མན་ངག་འཛིན་པར་གྲགས་པའི་ལོ་ཙཱ་བ་རྣམས་འདི་ལ་ནང་དབང་གི་ཐ་སྙད་མཛད་ལ། འོན་ཀྱང་སྤྱི་སྐད་ལ་སློབ་མ་བུར་བྱ་བ་ལ་ནང་དབང་དུ་གྲགས་ཆེས་པ་དང༌། འཁྲུལ་གཞི་འབྱུང་ཉེ་བའི་ཕྱིར། ལུས་ནང་བྱིན་གྱིས་བརློབས་པའི་དབང་བསྐུར་ཞེས་བྱ་ཡི་ནང་དབང་གི་ཐ་སྙད་སྦྱར་བར་མི་བྱའོ། །འདི་ཆུ་དབང་སོགས་རེ་རེ་བཞིན་ལ་ཡོད་པར་ཐམས་ཅད་མཐུན་ལ། འོན་ཀྱང་མལ་ལུགས་པ་དང༌། རྭ་ལུགས་པ་རྣམས་དབང་སོ་སོའི་རྗེས་ལ་བྱེད་ཅིང༌། མར་དོ་དང་ལོ་ཆུང་ཕྱོགས་རྣམས། དེ་འོག་རྣམ་རྒྱལ་བུམ་པ་དང༌། ཞེས་སོགས་གཞུང་ཚིག་གི་དོན་དུ་བསམས་ནས། །ཐོག་མར་འདི་སྦྱིན་ནས་དེའི་རྐྱེན་གྱིས་སློབ་མ་ལྷར་བསྐྱེད་པར་འདོད་དེ་ལུགས་སྔ་མ་དེ་ལེགས་སོ། །འོན་ཀྱང་ལུས་ནང་གཏོགས་པའི་དཀྱིལ་འཁོར་ནི། མཁས་པའི་ཆོ་ག་བཞིན་དབང་བསྐུར། །ཞེས་པས་ནི། སློབ་མ་བུར་བྱ་བའི་ནང་དབང་ཉིད་བསྟན་གྱི་ཅིག་ཤོས་མིན་པས། དཀྱིལ་འཁོར་ལུས་ནང་ཆུད་པར་བྱ། །ཞེས་པ་དང་དོན་མི་གཅིག་གོ །དེ་ནས་ཆུ་དབང་ནི། །སྭ་བྷ་ཝས་སྦྱངས། དབང་རྫས་རྣམ་རྒྱལ་བུམ་པའི་ཆུ་མི་དམིགས་ཏེ་སྟོང་པར་གྱུར། སྟོང་པའི་ངང་ལས་པདྨ་དང་ཉི་མའི་སྟེང་དུ་མི་བསྐྱོད་པ་སྐུ་མདོག་སྔོན་པོ་གཡས་རྡོ་རྗེ་དང༌། གཡོན་དེས་ཡུ་བ་བྱས་པའི་དྲིལ་བུ་འཛིན་པ། རལ་པའི་ཐོར་ཚུགས་དང༌། ཐོད་པའི་ཕྲེང་བའི་ཅོད་པན་ཅན། རུས་པའི་རྒྱན་དྲུག་གིས་བརྒྱན་པ། ཡུམ་མཱ་མ་ཀི་སྔོན་མོ་གྲི་གུག་དང་ཐོད་པ་འཛིན་པ་དང་མཉམ་པར་སྦྱོར་བ། ཞབས་རྡོ་རྗེའི་སྐྱིལ་མོ་ཀྲུང་གིས་བཞུགས་པ། དཔྲལ་པར་
ཨོཾ། མགྲིན་པར་ཨཱཿ ཐུགས་ཀར་ཧཱུཾ། མདུན་བསྐྱེད་ཀྱི་ཐུགས་ཀ་ནས་འོད་ཟེར་འཕྲོས། ཡེ་ཤེས་སེམས་དཔའ་མི་བསྐྱོད་པ་ཡབ་ཡུམ་སྤྱན་དྲངས། ཕཻཾ་ཛཿཧཱུཾ་བཾ་ཧོཿ གཉིས་སུ་མེད་པར་ཐིམ། །དེ་ཞུ་བ་ལས་བྱུང་བའི་བུམ་པའི་ཆུར་གྱུར། སྐབས་འདིར་རྒྱས་པ་ལ་སྤྲོ་ན་དབང་རྫས་དབང་བསྐུར་བ་དང༌། མཆོད་བསྟོད་བཟླས་པ་སོགས་ཀྱང་བྱ་ལ། བསྡུ་ན་ཡེ་ཤེས་པ་སྤྱན་འདྲེན་པ་ཡང་མ་བྱས་པས་ཆོག་སྟེ། དཀྱུས་སུ་བསྟན་པ་ནི་འབྲིང་པོའི་དབང་དུ་བྱས་པའོ། །གཙོ་བོའི་ཐུགས་ཀ་ནས་སྒོ་མཚམས་མ་བརྒྱད་སྤྲུལ། བཀྲ་ཤིས་ཀྱི་བུམ་པའི་ཆུས་དབང་བསྐུར། ཇི་ལྟར་བལྟམས་པ་ཙམ་གྱི༴ ནས། ཁྲུས་བགྱིའོ། །ཨོཾ་ཀ་ཀ་སྱཻ། ཨུ་ལུ་ཀཱ་སྱཻ། ཤྭ་ན་སྱཻ། སུ་ཀཱ་ར་སྱཻ། ཡ་མ་དན་ཌྷི། ཡ་མ་དུ་ཏི། ཡ་མ་དཾཥྟི་ནི་ཡ་མ་མ་ཐ་ནཱི་ཡེ་ཧཱུཾ་ཧཱུཾ་ཕཊ། ཨོཾ་བཛྲི་བྷཱ་ཝ་ཨ་བྷི་ཥིཉྩ་ཧཱུཾ། དཀྱིལ་འཁོར་གྱི་གཙོ་བོའི་ཐུགས་ཀ་ནས་འོད་ཟེར་འཕྲོས། རང་གི་ལུས་ལ་ཕོག །ལུས་འོད་ཀྱི་གོང་བུར་གྱུར། གཙོ་བོའི་ཐུགས་ཀའི་ས་བོན་གྱི་འོད་ཟེར་གྱིས་དྲངས་ཏེ་ཞལ་དུ་ཞུགས། སྐུའི་དབྱིབས་རྒྱུད་རྡོ་རྗེའི་ལམ་ནས་ཡུམ་གྱི་མཁའ་ནང་དུ་བབས། ཨོཾ་སྭ་བྷཱ་ཝ༴ སོགས། སྟོང་པའི་ངང་ལས་པདྨ་ཉི་མ་འཇིགས་བྱེད་དུས་མཚན་གྱི་སྟེང་དུ་རང་ཉིད་འཁོར་ལོ་བདེ་མཆོག་སྐུ་མདོག་སྔོན་པོ་རྡོ་རྗེ་དང་དྲིལ་བུ་འཛིན་པས་རང་སྣང་བའི་ཡུམ་ལ་
འཁྱུད་པ། རྒྱན་དང་ཆ་བྱད་ཡོངས་སུ་རྫོགས་པ། ལུས་ཀྱི་དཀྱིལ་འཁོར་གྱི་ལྷ་དྲུག་ཅུ་རྩ་གཉིས་དང་བཅས་པ་སྐད་ཅིག་གི་གྲུབ་པར་གྱུར། དཔྲལ་པར་ཨོཾ་ནས། ཐུགས་ཀར་ཧཱུཾ་གི་བར་གོང་བཞིན། གཙོ་བོའི་ཐུགས་ཀའི་ས་བོན་གྱི་འོད་ཟེར་གྱིས་སྤྱན་དྲངས་པའི། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཞལ་དུ་ཞུགས། བྱང་ཆུབ་ཀྱི་སེམས་སུ་ཞུ་བ་རྡོ་རྗེའི་ལམ་ནས་བྱུང་སྟེ། རང་ལ་གཉིས་སུ་མེད་པར་ཐིམ་པའི་ཚུལ་གྱིས་དབང་བསྐུར། ཧུཾ་ཞེས་མཁའ་ནང་ནས་ཕྱིར་སྤྲོས་ཏེ་དབང་སྟེགས་ལ་འཁོད་པར་གྱུར། དཀྱིལ་འཁོར་དང་དབང་གི་ལྷ་རྣམས་ལ་དམིགས་ནས། ཁྱེད་རྣམས་ཀྱིས་བདག་ལ་དབང་བསྐུར་དུ་གསོལ། ཞེས་གསོལ་བ་བཏབ་པས། རྡོ་རྗེ་ཕག་མོ་ལ་སོགས་པའི་ལྷ་ཐམས་ཅད་ཀྱིས། ཐོད་པར་རྣམ་རྒྱལ་བུམ་པའི་ཆུ་བླུག་པ་ཐོགས་ནས། དབང་བསྐུར་རྡོ་རྗེ་ཆེན་པོ་ནི། ཁམས་གསུམ་ཀུན་གྱིས་ཕྱག་བྱས་པ། །སངས་རྒྱས་ཀུན་གྱི་གསང་གསུམ་གྱི། །གནས་ལས་བྱུང་བ་སྦྱིན་པར་བྱ། ཡབ་ཡུམ་གྱི་སྙིང་པོའི་མཐར། །ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏ་ས་མ་ཡ་ཤྲི་ཧཱུཾ། ཞེས་པའི་དབང་བསྐུར། བཀྲ་ཤིས་ཀྱི་བུམ་པ་ལོགས་སུ་མེད་ན། སྔ་མ་ལ་རྣམ་རྒྱལ་ནས་བུམ་ཆུས་གཏོར་བ་ཙམ་བྱའོ། །དེ་ལྟར་ན་བུམ་པའི་ཆུས་དབང་བསྐུར། སྐུ་གང་དྲི་མ་དག ཆུའི་ལྷག་མ་ཡར་ལུད་པ་ལས་མི་སྐྱོད་པའི་དབུ་བརྒྱན། མདུན་བསྐྱེད་ཀྱི་ཐུགས་ཀའི་ས་བོན་གྱི་འོད་ཟེར་གྱིས་མི་བསྐྱོད་
པ་དཔག་ཏུ་མེད་པ་སྤྱན་དྲངས། བ་སྤུའི་བུ་ག་ནས་ཞུགས་པས། ལུས་ཐམས་ཅད་མི་བསྐྱོད་པའི་རྡུལ་ཕྲ་རབ་ཀྱིས་གང་བར་གྱུར། ཨོཾ་བཛྲ་པུཥྤེ་ཨཱཿཧཱུཾ། སོགས། ཉེར་སྤྱོད་ལྔས་མཆོད། དེ་ལྟར་ན་ཆུའི་དབང་ཐོབ། ཞེ་སྡང་དགརྣམ་ཤེས་གནས་གྱུར། མེ་ལོང་ལྟ་བུའི་ཡེ་ཤེས་མངོན་དུ་བྱས་པ་ཡིན་ནོ། །མི་བསྐྱོད་པའི་གོ་འཕང་མངོན་དུ་འགྱུར་བའི་སྐལ་པ་ཅན་དུ་བྱས་པ་ཡིན་ནོ། །སྐབས་འདིར་གཞུང་ལས། ཧེ་རུ་ཀ་དཔལ་བདག་ཉིད་སྤྲུལ། །སྤྱོད་དང་བརྟུལ་ཞུགས་བརྟན་པ་དང༌། །དེ་བཞིན་གཉིས་མེད་ཚངས་སྤྱོད་བརྟན། །ཞེས་དང༌། དཔའ་བོ་རྣལ་འབྱོར་རྣམས་ཀུན། །སྒོམས་ནས་ཐམས་ཅད་དབང་བསྐུར་རོ། །ཞེས་གསུངས་པས་དབང་རྫས་རིགས་ལྔ་སོ་སོར་དམིགས་པ་འཕོ་བ་ཡིན་གྱི། སློབ་མའམ་བདག་འཇུག་ལ་རང་ཉིད་ཧེ་རུ་ཀའི་ང་རྒྱལ་ཁོ་ན་ལ་གནས་དགོས་པ་དང༌། ཐམས་ཅད་དབང་བསྐུར་ཞེས་པས་ལུས་དཀྱིལ་འཁོར་ལྷ་ཐམས་ཅད་ལ་དབང་བསྐུར་བ་གསལ་བའི་ཕྱིར། ལུས་དཀྱིལ་གྱི་མོས་པ་ཙམ་བསྒོམ་དགོས་པའང་ཡིན་ནོ། །ཅོད་པན་གྱི་དབང་ནི། སྭ་བྷཱ་ཝ། དབང་རྫས་རིན་པོ་ཆེའི་དབུ་རྒྱན་མི་དམིགས་ཏེ་སྟོང་པར་གྱུར། སྟོང་པའི་ངང་ལས་པདྨ་དང་ཉི་མའི་སྟེང་དུ། རིན་ཆེན་འབྱུང་ལྡན་སྐུ་མདོག་སེར་པོ། གཡས་རིན་པོ་ཆེ་དང་གཡོན་དེས་ཡུ་བ་བྱས་པའི་དྲིལ་བུ༴ ནས། དྲུག་གིས་བརྒྱན་པ། ཡུམ་རིན་ཆེན་སྒྲོལ་མ་སེར་མོ་གྲི་གུག་དང༴ ནས། འོད་ཟེར་འཕྲོས། ཡེ་ཤེས་སེམས་དཔའ་རིན་ཆེན་འབྱུང་ལྡན་ཡབ་ཡུམ་སྤྱན་དྲངས༴ནས། ཞུ་བ་ལས་བྱུང་བའི་དབུ་རྒྱན་དུ་གྱུར།
ཁྱེད་རྣམས་ཀྱིས་བདག་ལ་མངོན་པར་དབང་བསྐུར་བ་སྩལ་དུ་གསོལ། ཞེས་གསོལ་བ་བཏབ་པས་དབང་གི་ལྷ་རྣམས་ཀྱིས། རལ་པའི་ཐོར་ཚུགས་ཀྱིས་བརྒྱན་པ། །སངས་རྒྱས་ཀུན་གྱིས་བསྔགས་པ་ཡི། །རིན་ཆེན་དབུ་རྒྱན་དམ་པ་དང༌། །དར་དཔྱངས་དབང་བསྐུར་བྱིན་པར་བྱ། ཞེས་སོ། སྤྱི་བོར་སྣ་ཚོགས་རྡོ་རྗེ་ཡང་དངོས་སུ་སྦྱིན་པའམ་ཡིད་ཀྱིས་བསམ། ཨོཾ་སརྦ་བུདྡྷ་ཌཱ་ཀི་ནཱི། སོགས་ཡུམ་གྱི་སྙིང་པོས་དབུ་རྒྱན་དང་དར་དཔྱངས་བཅིངས། ཨོཾ་ཀ་ར་ཀ་ར་ཀུ་རུ་ཀུ་རུ། ནས། དྷི་ལི་ཧཱུཾ་ཧཱུཾ་ཕཊ། ཀྱིས་དཔའ་བོའི་དར་དཔྱངས་བཅིངས། ཨོཾ་ཀཱ་ཀ་སྱ། སོགས་དང༌། གཙོ་བོའི་སྙིང་པོ་བརྗོད་ལ། བུམ་པའི་ཆུས་དབང་བསྐུར༴ནས། ཡར་ལུད་པ་ལས་རིན་ཆེན་འབྱུང་ལྡན་གྱིས་དབུ་བརྒྱན། དེ་ནས་ལུས་ནང་བྱིན་གྱིས་བརློབ་པའི་དབང་བསྐུར་ནི། མདུན་བསྐྱེད་ཀྱི་ཐུགས་ཀའི་ས་བོན་གྱི་འོད་ཟེར་གྱིས། རིན་ཆེན་འབྱུང་ལྡན་དཔག་ཏུ་མེད་པ་སྤྱན་དྲངས། བ་སྤུའི་བུ་ག་ནས་ཞུགས་པས་ལུས་ཐམས་ཅད་རིན་ཆེན་འབྱུང་ལྡན་གྱི་རྡུལ་ཕྲ་རབ་ཀྱིས་གང་བར་གྱུར། པུཥྤེ་སོགས་ཀྱིས་མཆོད། དེ་ལྟར་ན་དབུ་རྒྱན་གྱི་དབང་ཐོབ། ང་རྒྱལ་དང་སེར་སྣ་དག །ཚོར་བ་གནས་གྱུར། མཉམ་པ་ཉིད་ཀྱི་ཡེ་ཤེས་མངོན་དུ་བྱས། རིན་ཆེན་འབྱུང་ལྡན་གྱི་གོ་འཕང་མངོན་དུ་གྱུར་པའི་སྐལ་ཅན་དུ་བྱས་པ་ཡིན་ནོ། །དེ་ལྟར་ན་ཆུ་ཅོད་གཉིས་ལས་དཔག་ཏེ་
འོག་མ་གསུམ་ལ་རིགས་འགྲེ་བ་ནི། ཡེ་ཤེས་སེམས་དཔའ་སྤྱན་འདྲེན་དང༌། དབང་རྫས་ཀྱི་ལྷ་ཞུ་བ་དང༌། རིགས་བདག་རྒྱས་འདེབས་དང༌། ལུས་ནང་བྱིན་གྱིས་བརློབ་པའི་དབང་བསྐུར་གྱི་སྐབས་རྣམས་སུ། མི་བསྐྱོད་པའམ་རིན་ཆེན་འབྱུང་ལྡན་དཔག་ཏུ་མེད་པ་ཞེས་དང༌། མི་བསྐྱོད་པའི་རྡུལ་ཕྲ་རབ་ཞེས་དང༌། དབང་གི་དག་པའི་སྐབས་ཀྱི། མི་བསྐྱོད་པའམ་རིན་ཆེན་འབྱུང་ལྡན་གྱི་བག་ཆགས་ཞེས་པའི་གནས་སུ། འོད་དཔག་མེད་སོགས་ཀྱི་མཚན་འཇུག་ཅིང༌། ལྷག་མཐོང་གོ་རིམ་ཐམས་ཅད་སྔ་མ་བཞིན་དུ་བྱ་བ་ཡིན་ནོ། །དེ་ལ་རྡོ་རྗེའི་དབང་ནི་འདི་ལྟར། དབང་རྫས་རྡོ་རྗེ་འོད་དཔག་མེད་དམར་པོ། པདྨ་དང་ཡུམ་གོས་དཀར་མོ་དམར་མོ། དབང་གི་ལྷ་རྣམས་ཀྱིས། འདི་སྟེ་སངས་རྒྱས་ཐམས་ཅད་ཀྱིས། །ཧེ་རུ་ཀ་དཔལ་དབང་བསྐུར་བས། །དེ་རིང་ཁྱོད་ལ་དབང་བསྐུར་ཏེ། །རབ་ཏུ་གྲུབ་ཕྱིར་རྡོ་རྗེ་ལོང༌། ཨོཾ་ཤྲཱི་ཧེ་རུ་ཀ་ཨ་དྷི་པ་ཏི་སྟྭཾ། ཨ་བྷི་ཥིཉྩ་ཧཱུཾ། ཏིཥྛ་བཱི་ར་ས་མ་ཡ་སྟྭཾ། ཞེས་རྡོ་རྗེ་ལག་ཏུ་བཟུང་བའམ་གཏོད་ཅིང༌། སློབ་མ་དབང་བསྐུར་ན་གཞན་ཡང་གྲི་གུག་དང་འཁོར་ལོ་ལ་སོགས་པ། མཚན་མ་རྣམ་པ་དུ་མ་སྦྱིན་པར་བཤད་དོ། །དེ་ནས་རྡོ་རྗེ་དེ་ཉིད་ལན་གསུམ་དུ་གསོར་ནས་སྙིང་གར་གཏོད་དེ། ཐོག་མཐའ་མེད་པའི་སེམས་དཔའ་ནི། །རྡོ་རྗེ་སེམས་དཔའི་དགའ་བ་ཆེ། །ཀུན་ཏུ་བཟང་པོ་ཀུན་བདག་ཉིད། །རྡོ་རྗེ་སྙེམས་ཚུལ་བདག་པོའི་བདག ཅེས་བརྗོད་ཅིང༌། སེམས་ཉིད་མི་
འགྱུར་བའི་བདེ་བ་ཆེན་པོར་ཤེས་པ་ནི། རྡོ་རྗེའི་དེ་ཁོ་ན་ཉིད་འཛིན་པའོ། །དེ་ནས་སྔར་བཞིན་བརྟན་བྱེད་ཆུ་དབང་བསྐུར་བ་སོགས་བྱ། རྡོ་རྗེའི་དབང༌། འདོད་ཆགས། འདུ་ཤེས། སོ་སོར་རྟོག་པའི། ཞེས་སོགས་འདོན་པ་སྤོ། དྲིལ་བུའི་དབང་ནི་འདི་ལྟར། དབང་རྫས་དྲིལ་བུ། དོན་ཡོད་གྲུབ་པ་ལྗང་ཁུ། རལ་གྲི་དང༌། ཡུམ་དམ་ཚིག་སྒྲོལ་མ་ལྗང་ཁུ། དབང་གི་ལྷ་རྣམས་ཀྱིས། འདི་ནི་རྣལ་འབྱོར་མ་ཀུན་གྱི། །ཤེས་རབ་དབྱངས་ཀྱི་རྗེས་འགྲོར་བཤད། ཁྱོད་ཀྱིས་ཀྱང་ནི་རྟག་ཏུ་བཅང༌། །བྱང་ཆུབ་མཆོག་ཏུ་རྒྱལ་བ་བཞེད། །ཨོཾ་བཛྲ་ཨ་དྷི་པ་ཏི་སྟྭཾ། ཨ་བྷི་ཥིཉྩ་ཧཱུཾ། ཏིཥྛ་བཛྲ་ས་མ་ཡ་སྟྭཾ། ཞེས་དྲིལ་བུ་ལག་ཏུ་གཏད། ལན་གསུམ་མམ་བརྒྱད་དུ་དཀྲོལ། ཁང་ནང་དུ་བསྟན་ཏེ་དཀུ་གཡོན་པའི་ཐད་དུ་བཟུང་བའམ་བཟུང་དུ་གཞུག །སྲིད་པ་ངོ་བོ་ཉིད་ཀྱིས་དག །ངོ་བོ་ཉིད་ཀྱི་སྲིད་བྲལ་བྱས། །རང་བཞིན་དག་པའི་སེམས་དཔའ་མཆོག །སྲིད་པ་དམ་པ་བྱེད་པར་གྱུར། ཞེས་བརྗོད་ཅིང༌། ངག་ཆོས་ཉིད་དོན་གྱི་སྒྲ། གཞོམ་མེད་ཀྱི་ནཱ་དར་ཤེས་པར་བྱེད་པ་ནི། དྲིལ་བུའི་དེ་ཁོ་ན་ཉིད་དོ། །བསྟན་བྱེད་སོགས་གོང་བཞིན་ལས། དྲིལ་བུའི་དབང༌། ཕྲག་དོག་འདུ་བྱེད། བྱ་བ་གྲུབ་པའི་ཞེས་འདོན་པ་སྤོའོ། །དེ་ནས་ཕྱག་རྒྱའི་དབང་བསྐུར་བ་ནི། བདག་ཉིད་དཔལ་ཧེ་རུ་ཀ ཞལ་གཅིག་ཕྱག་གཉིས་པ་ཐབས་དང་ཤེས་རབ་ཀུན་འདུས་པའི་
ངོ་བོ། རྡོ་རྗེ་དང་དྲིལ་བུ་འཛིན་པས། རང་སྣང་བས་ཡུམ་རྡོ་རྗེ་ཕག་མོ་ལོ་བཅུ་དྲུག་ལོན་པ་ལྟ་བུ་ལ་ཡང་དག་པར་འཁྱུད་པ། ལུས་ཀྱི་དཀྱིལ་འཁོར་གྱི་ཕྱག་རྒྱ་ཆེན་པོ་ཡོངས་སུ་རྫོགས་པ་སྟེ། རྩ་བའི་གཙོ་མོ་བཞི་དང༌། ཐིག་ལེ་ནི་རྡོ་རྗེ་ཕག་མོ། དཔྱིད་ཀྱི་རྩ་ཁམས་ནི་དཔལ་ཧེ་རུ་ཀ རྩ་སུམ་ཅུ་རྩ་བདུན་ནི་རྣལ་འབྱོར་མ་སུམ་ཅུ་སོ་བདུན། ཁམས་ཉི་ཤུ་རྩ་བཞི་ནི་དཔའ་བོ་ཉི་ཤུ་རྩ་བཞི། ཐམས་ཅད་ཀྱང་གསལ་ཞིང་དྭངས་ལ་བདེ་བ་ཆེན་པོའི་རང་བཞིན། ཁ་སྦྱོར་དང་འཁྱུད་པ་དང་བཞད་པ་ལས་བྱུང་བའི་དགའ་བའི་ཡེ་ཤེས་ཀྱི་བདག་ཉིད་དོ། །ཡིད་ཀྱི་ལུས་བརྟེན་དེ་ཉིད་ནི། །ཕྱག་རྒྱའི་དམ་ཚིག་རབ་ཏུ་བརྗོད། །གང་གི་ལུས་ནི་ཐམས་ཅད་བརྟན། །དེས་ན་ཕྱག་རྒྱར་རབ་ཏུ་སྒྲགས། །ཤེས་རབ་བཅུ་དྲུག་ལོན་པ་ལ། །ལག་པ་དག་གིས་ཡང་དག་འཁྱུད། །རྡོ་རྗེ་དྲིལ་བུ་མཉམ་སྦྱོར་བ། །སློབ་དཔོན་གྱི་ནི་དབང་དུ་བརྗོད། །རྡོ་རྗེ་ཆེ་དང་དྲིལ་བུ་ཆེ། །ཟུང་ཅིག་རྡོ་རྗེར་བྱིན་གྱིས་བརློབ། །དེ་རིང་རྡོ་རྗེ་སློབ་དཔོན་གྱུར། །སློབ་མའི་ཚོགས་རྣམས་བསྡུད་པར་གྱིས། ལུས་རྣམ་པ་ཐམས་ཅད་པ་རྣམ་པ་ཀུན་གྱི་མཆོག་དང་ལྡན་པའི་སྟོང་པ་ཉིད་དུ་ཤེས་པ་ནི། ཕྱག་རྒྱ་སྐུའི་དམ་ཚིག་གོ །ཞེས་དང༌། གཙོ་བོ་ཡབ་ཡུམ་གྱི་སྙིང་པོ་མང་དུ་བཟླས་ཏེ་བྱིན་གྱིས་བརླབ་བོ། །འདི་ནི་དྲིལ་བུའི་དབང་གི་རྗེས་འབྲང་མ་ཡིན། དྲིལ་
བུའི་དབང་དང་འདི་སྡོམ་པ་ལ་བདག་པོའི་དབང་ཞེས་བྱ་བ་དབང་གཅིག་ཏུ་བྱས་པ་ཡིན་ཞིང༌། མིང་གི་དབང་ནི་སྐུ་བྱིན་གྱིས་བརླབ་པ་འདི་བརྟན་བྱེད་ཀྱི་ཚུལ་དུ་འགྱུར་བ་ཡིན་ནོ། །དེ་ནས་མིང་གི་དབང་བསྐུར་བ་ནི་འདི་ལྟར། དབང་རྫས་རྡོ་རྗེ་དང་དྲིལ་བུ། རྣམ་པར་སྣང་མཛད་དཀར་པོ་འཁོར་ལོ་དང༌། ཡུམ་སངས་རྒྱས་སྤྱན་མ་དཀར་མོ། དབང་གི་ལྷ་རྣམས་ཀྱིས། ཨོཾ་ཤྲཱི་ཧེ་རུ་ཀ་ཨ་དྷི་པ་ཏི་སྟྭཾ། ཨ་བྷི་ཥིཉྩ་མཾ། ཤྲཱི་ཧེ་རུ་ཀ་ནཱ་མ། ཨ་བྷི་ཥེ་ཀ་ཏ། ཀྱེ་དཔལ་གསང་མཚན་དྲན་པར་བྱ། སྔགས་བརྗོད་སྐབས་རྡོ་རྗེ་དྲིལ་བུ་སྤྱི་བོར་འཇོག །དེའི་སྐབས་སུ་རྣམ་སྣང་སྤྱི་བོར་བྱོན་ཏེ། ཡབ་ཡུམ་སྙོམ་པར་ཞུགས་པའི་བྱང་ཆུབ་ཀྱི་སེམས་སུ་ཞུ་བའི། ཡེ་ཤེས་ཆེན་པོའི་འོད་ཟེར་གྱིས། ལུས་ཐམས་ཅད་གང་བར་མོས་དགོས་པ་ཡིན་ནོ། །བརྟན་བྱེད་སོགས་གོང་བཞིན་ལས། མིང་གི་དབང༌། གཏི་མུག །གཟུགས་ཕུང༌། ཆོས་དབྱིངས་ཀྱི། སོགས་འདོན་པ་སྤོ། དེ་ནས་སྔགས་དབང་ནི། མདུན་བསྐྱེད་ཀྱི་གཙོ་བོའི་ཐུགས་ཀ་ནས་སྔགས་ཀྱི་ཕྲེང་བ་བྱུང༌། བདག་གི་སྙིང་གར་ཐིམ། ཞེས་དང་གཙོ་བོ་ཡབ་ཡུམ་གྱི་སྙིང་པོ་ཚར་གསུམ་བཟླས་ཏེ་རྗེས་བཟློས་བྱས་པར་མོས། བཅོམ་ལྡན་བདག་ལ་སྩལ་ལགས་ཀྱི། །བཅོམ་ལྡན་བདག་ལ་བྱིན་གྱིས་རློབས། ལན་གསུམ་བརྗོད་ཅིང་མེ་ཏོག་གཏོར། རང་གི་སྤྱི་བོར་མེ་ཏོག་བཞག་ལ། བཅོམ་ལྡན་འདི་ལ་སྩལ་ལགས་ཀྱི། །བཅོམ་ལྡན་འདི་ལ་བྱིན་གྱིས་རློབ། མེ་ཏོག་གཏོར་ལ།
སྔགས་ཀྱི་དངོས་གྲུབ་སྩལ་དུ་གསོལ། །བརྟུལ་ཞུགས་བརྟན་པར་མཛད་དུ་གསོལ། ཞེས་བརྗོད། སྔགས་དབང་འདི་གཞུང་ལས་རྒྱས་བཤད་ཀྱི་སྐབས་སུ། ཕྱག་རྒྱའི་དམ་ཚིག་དང༌། མིང་དབང་གི་བར་དུ་གསུངས། དོན་བསྡུའི་སྐབས་སུ་མིང་དབང་གི་རྗེས་སུ་གསུངས་པས་གནས་སྐབས་གཉིས་པོ་གང་རུང་བྱས་ཀྱང་འདྲའོ། །བརྟུལ་ཞུགས་ལ་གཉིས་ལས། ཐུན་མོང་བ་རྡོ་རྗེའི་བརྟུལ་ཞུགས་ནི། སྭ་བྷ་ཝ། དབང་རྫས་དང་པོའི་རྡོ་རྗེ། རྡོ་རྗེ་སེམས་དཔའ་དཀར་པོ། ཡུམ་རྡོ་རྗེ་སྙེམས་མ་དཀར་མོ། དབང་གི་ལྷ་རྣམས་ཀྱིས། འདི་ནི་སངས་རྒྱས་ཐམས་ཅད་དེ། །ཧེ་རུ་ཀ་དཔལ་ཕྱག་ན་འདུག །ཁྱོད་ཀྱིས་ཀྱང་ནི་རྟག་ཏུ་བཅང༌། །ཧེ་རུ་ཀ་དཔལ་བརྟུལ་ཞུགས་བརྟན། །ཨོཾ་སརྦ་ཏ་ཐཱ་ག་ཏ་སིདྡྷི་བཛྲ་ས་མ་ཡ་ཏིཥྛ་ཨེ་ཥ་སྟྭཾ། དྷ་ར་ཡ་མི་ཧཱུཾ་ཧ་ཧ་ཧ་ཧ་ཧོ་ཧི། རང་གི་སྙིང་གར་རང་དང་འདྲ་བའི་རྡོ་རྗེ་སེམས་དཔའ་ཧེ་རུ་ཀ་བཞུགས་པར་གྱུར། དེང་ཕྱིན་ཆད་ཐ་མལ་གྱི་སྤྱོད་པ་བརྟུལ་ལ་རྡོ་རྗེ་སེམས་དཔའི་ཚུལ་ལ་ཞུགས་ཤིང༌། རྡོ་རྗེ་ལག་ཏུ་གཏད་ལ་སྙིང་གར་གཏུགས། ཐུན་མོང་མ་ཡིན་པའི་སྤྱོད་པའི་བརྟུལ་ཞུགས་ནི། རང་ཉིད་སྐད་ཅིག་གི་འཁོར་ལོ་བདེ་མཆོག །ཞལ་བཞི་ཕྱག་བཅུ་གཉིས་པའི་སྐུར་གྱུར། རང་གི་སྙིང་གར་ཡང་རང་དང་འདྲ་བའི་ཧེ་རུ་ཀ ཧཱུཾ་ལས་བྱུང་བའི་ཅང་ཏེའུ། ཐོད་པ་ཁ་ཊྭཾ་ག །ཚངས་སྐུད་རྣམས་སུ་གྱུར། ཧེ་རུ་ཀ་དཔལ་ཕྱག་རྒྱ་འདི། །ཕྱི་དང་ནང་དུ་ཡང་དག་གནས། ཁ་ཊྭཾ་ཅང་ཏེའུ་ལྷུང་བཟེད་དག །
བྱིན་པ་དཔའ་བོའི་བཟུང་བར་གྱིས། ཁ་ཊྭཾ་ག་དང་ཌ་མ་རུ། ཧེ་རུ་ཀ་དཔལ་ཁ་ཊྭཾ་ག །རྣལ་འབྱོར་མ་ནི་ཌ་མ་རུ། །རྡོ་རྗེ་ཁ་ཊྭཾ་རྡོ་རྗེར་བཅས། །དྲིལ་བུ་སིལ་སིལ་སྒྲ་སྒྲོགས་ཤིང༌། །ཚངས་པའི་སྐུད་ཐོགས་རྣལ་འབྱོར་བདག ཁ་ཊྭཾ་ག་དང་རྣལ་འབྱོར་སྣོད། །དཔའ་བོ་ཆེན་པོས་བླང་བར་གྱིས། ཌ་མ་རུ་ནི་ཤེས་རབ་སྟོང་པ་ཉིད་ཀྱི་སྒྲ་སྒྲོག་པ། ཁ་ཊྭཾ་ག་ནི་ཐབས་རིག་པ་བྱང་ཆུབ་ཀྱི་སེམས་ལྷའི་སྐུ། ཐོད་པ་བདེ་བ་སྐྱོང་བ། ཚངས་པའི་སྐུད་པ་རྣམ་པར་མི་རྟོག་པ་ཐབས་ཤེས་ཟུང་དུ་འབྲེལ་བ་ཡིན་པས་ན། དེ་ལྟར་ཤེས་པར་གྱིས་ལ་སེམས་ཅན་གྱི་དོན་གྱིས་ཤིག ཅེས་པའོ། ནམ་མཁར་བཞུགས་པའི་དཀྱིལ་འཁོར་གྱི་ལྷ་ཚོགས་ཐམས་ཅད། བདག་ཉིད་ལ་གཉིས་སུ་མེད་པར་ཐིམ། ཨོཾ་ཀཱ་ཀ་སྱ་ཧཱུཾ་ཧཱུཾ་ཕཊ། ཞེས་སོགས་ཀྱི་མཐར། ཛཿཧཱུཾ་བཾ་ཧོཿ ཨོཾ་སུ་པྲ་ཏིཥྛ་བཛྲ་སྭཱཧཱ། ཞེས་མེ་ཏོག་གཏོར་ཞིང་རོལ་མོ་སྒྲགས་ཏེ་བརྟན་བཞུགས་བྱ། གོང་བཞིན་མཆོད་པའམ། ཆུ་གཉིས་ཉེར་སྤྱོད་རོལ་མོ་དང་བཅས་པས་བདག་ཉིད་ལ་མཆོད་དོ། །དེ་ལྟར་ན་ཇི་སྐད་དུ། མེ་ཏོག་ཆུ་ཡི་དབང་བསྐུར་དང༌། །ཅོད་པན་རྡོ་རྗེ་བདག་པོ་དང༌། །མིང་དང་སྔགས་དང་བརྟུལ་ཞུགས་དང༌། །ཞེས་པ་ལྟར་དབང་བརྒྱད་པོ་དེ་དག་ནི། བུམ་དབང་གི་དངོས་གཞི་ཡིན་ལ། འདི་རྣམས་མཐའ་བརྟེན་གྱིས་དབང་དང་བཅས་པ་ནི། རྡོ་རྗེ་སློབ་དཔོན་གྱི་དབང་སྟེ། དབང་འདི་དག་ལས། དམ་ཚིག་གསུམ་སྦྱིན་པ་བོར་ནས། རིགས་པའི་དབང་ལྔའི་མཐར། རྗེས་གནང་གི་ཁྱད་པར་འགའ་
ཞིག་དང༌། དམ་ཚིག་སྦྱིན་པ་ཅི་རིགས་པ་ཙམ་བྱེད་པ་ནི། སློབ་མ་ཁ་ཅིག་སྐྱེ་བ་འདི་ལ་རྡོ་རྗེ་སློབ་དཔོན་གྱི་གནས་ཐོབ་པར་མི་འགྱུར་བ་དག་ལ་སྦྱིན་པར་བྱ་སྟེ། དེ་ལྟར་ན་དེ་ཙམ་ཞིག་རྡོ་རྗེ་སློབ་མའི་དབང་དུ་འགྱུར་གྱི། བུམ་དབང་གི་ཆོ་ག་ཡོངས་སུ་རྫོགས་པ་གཅིག་གི་ཆོ་གའི་སྟོད་སྨད་ལ་སློབ་མ་དང་སློབ་དཔོན་གྱི་དབང་དུམ་བུ་གཉིས་སུ་དབྱེ་བ་ནི། གཞུང་འདིའི་དགོངས་པ་མ་ཡིནཞིང༌། འདི་དང་ཆོ་ག་སྒྲོས་མཐུན་པའི་དཀྱིལ་འཁོར་གྱི་ཆོ་ག་གྲུབ་པའི་སློབ་དཔོན་གཞན་གྱིས་མཛད་པ་མང་པོ་ལས་ཀྱང་མི་འབྱུང་ངོ༌། །དེས་ན་སྐབས་འདིར་སློབ་དཔོན་གྱི་དབང་ཞེས་བྱ་བ་ནི། སློབ་དཔོན་དུ་འགྱུར་བ་ལ་བསྐུར་བར་བྱ་རྒྱུའི་བུམ་དབང་སྤྱིའི་མིང་དུ་བཞེད་ཀྱི། སློབ་མ་དང་སློབ་དཔོན་གྱིས་དབང་ཞེས་སློབ་མ་གཅིག་ལ་བསྐུར་བྱ་ལ་སོ་སོར་ཕྱེ་བའི་ནང་གི་སློབ་དཔོན་གྱི་དབང་ནི་མ་ཡིན་ནོ། །མཐའ་བརྟེན་གྱི་དབང་ནི་ཇི་སྐད་དུ། གནང་དང་དམ་ཚིག་གཟེངས་བསྟོད་དང༌། །དེ་བཞིན་ལུང་བསྟན་དབུགས་དབྱུང་དང༌། །ཞེས་པ་ལྟར་བཞི་ལས། དང་པོ་རྗེས་གནང་གི་དབང་ལ་ལྷ་མཆོད་པའི་རྗེས་གནང་དེ་ཁོ་ན་ཉིད་ཀྱི་རྗེས་གནང༌། སེམས་ཅན་གྱི་དོན་གྱི་རྒྱུའི་རྗེས་གནང༌། ཆོས་བཤད་པའི་རྗེས་གནང༌། ལས་དང་དངོས་གྲུབ་སྒྲུབ་པའི་རྗེས་གནང་དང་ལྔའོ། །དེ་ལ་ལྷ་མཆོད་པའི་རྗེས་སུ་གནང་བ་ནི། དེང་ནས་རྩམས་ཏེ་རྫོགས་སངས་རྒྱས། །རྣལ་འབྱོར་མ་དང་དཔའ་ཚོགས་དང༌། །ཤེས་རབ་ཐབས་བཅས་སྙེམས་ཅན་གྱིས། །གར་མཆོད་བདེ་བའི་དགའ་སྟོན་གྱིས། ཨ། སྒེག་དང་བཅས་པས་ཕྲེང་བ་འཕངས། །སངས་རྒྱས་ཀུན་ཚོགས་རྣལ་འབྱོར་མ། །དེ་ནི་འབྲལ་བར་མི་འགྱུར་ཏེ། །ཕྲེང་བ་དེ་ཡི་རྒྱན་ཡིན་ནོ། ཨོཾ། །ལུས་ཅན་ཀུན་ལ་དམ་ཆོས་ཀྱི། །གླུ་ནི་ཁྱོད་ཀྱིས་བླང་བར་བྱ། །དེའི་ནི་རྣལ་འབྱོར་
མ་དེ་དང༌། །མྱུར་དུ་བདེ་བ་མྱོང་བར་འགྱུར། གཱི། །དེ་ཉིད་ཐལ་མོའི་གར་གྱིས་ནི། །སངས་རྒྱས་ཐམས་ཅད་མཆོད་པར་བྱ། །སངས་རྒྱས་འདུལ་བའི་འཕྲིན་ལས་ཀྱིས། །གར་མཁན་ཚུལ་དུ་བསྒྱུར་བར་གྱིས། ཧོ། སངས་རྒྱས་ཀུན་ལ་མེ་ཏོག་གཏོར། །བྱང་ཆུབ་ཡན་ལག་ཚོགས་གྱུར་པ། །མཚན་དང་དཔེ་བྱད་ལྡན་པ་ཡིས། །བདེ་གཤེགས་སྐུ་ནི་ཐོབ་པར་འགྱུར། བྷྲུཾ། རྫོགས་སངས་རྒྱས་ལ་སྤོས་ཕུལ་བས། །བརྟུལ་ཞུགས་བཟང་པོས་ལེགས་ཚིམ་གྱིས། །ལུས་ཅན་བདེ་གཤེགས་ཆ་ལུགས་སུ། །ཡེ་ཤེས་ཀྱིས་ནི་ཚིམ་པར་འགྱུར། ཨ། ཆོས་ཀྱི་མེ་ནི་ལེགས་སྦར་བས། །པདྨ་གར་དབང་རང་ཉིད་དེ། །སེམས་ཅན་མ་རིག་ལྡོངས་རྣམས་ལ། །ཡེ་ཤེས་སྒྲོན་མེ་སྦར་བར་གྱིས། པྲ། ཁྱོད་ཀྱིས་རྒྱལ་ལ་དྲི་ཕུལ་བས། །ཚུལ་ཁྲིམས་ཏིང་འཛིན་ཤེས་རབ་དང༌། །རྣལ་གྲོལ་ཡེ་ཤེས་མཐོང་བ་ཡིས། །བྱང་ཆུབ་ལུས་ཅན་རྣམས་ལ་བགོས། ག །དེ་ཁོ་ན་ཉིད་ཀྱིས་རྗེས་གནང་ནི། ཇི་ལྟར་མིག་མཁན་རྒྱལ་པོ་ཡིས། །འཇིག་རྟེན་རབ་རིབ་བསལ་བ་ལྟར། །བུ་ཁྱོད་ཀྱི་ནི་མི་ཤེས་པའི། །རབ་རིབ་རྒྱལ་བ་རྣམས་ཀྱིས་བསལ། །ཨོཾ་བཛྲ་ནཻ་ཏྲ་ཨ་པ་ཧ་ར་པ་ཊ་ལཾ་ཧྲི། སེམས་ཅན་གྱི་དོན་གྱི་རྒྱུའི་རྗེས་གནང་ནི་མེ་མོང་བསྟན་ལ། ཆོས་རྣམས་གཟུགས་བརྙན་ལྟ་བུ་སྟེ། །དག་ཅིང་གསལ་ལ་རྙོག་པ་མེད། །བཟུང་དུ་མེད་ཅིང་བརྗོད་དུ་མེད། །རྒྱུ་དང་ལས་ལས་ཀུན་ཏུ་བྱུང༌། །ངོ་བོ་ཉིད་མེད་གནས་མེད་པ། །དེ་ལྟར་ཆོས་རྣམས་ཤེས་གྱིས་ལ། །
སེམས་ཅན་དོན་ནི་མཉམ་མེད་བྱོས། །འོན་ཀྱང་རྣལ་འབྱོར་མ་སྲས་སྐྱེས། ཆོས་བཤད་པའི་རྗེས་སུ་གནང་བ་ནི། སེམས་ཅན་ཀུན་ལ་ཕན་པའི་ཕྱིར། །འཇིག་རྟེན་ཁམས་ནི་ཐམས་ཅད་དུ། །བྱ་བ་སྤྱོད་ཚུལ་གསང་བ་ཡི། །ཆོས་ཀྱི་འཁོར་ལོ་སྐོར་བར་གྱིས། །ཁྱེད་ཀྱི་ཐེ་ཚོམ་དོགས་མེད་པར། །ཡིད་གཉིས་མེད་པའི་སེམས་ཀྱིས་སུ། །ཆོས་ཀྱི་དུང་ནི་བླ་མེད་པ། །དྲི་མེད་ཀུན་ཏུ་གང་བར་གྱིས། ལས་སྒྲུབ་པའི་རྗེས་གནང་ནི། ཞི་དང་རྒྱས་དང་དབང་དང་དགུག །སྡང་བར་བྱ་དང་གནོད་སོགས་དང༌། །གསད་དང་བསྐྲད་པ་ཐམས་ཅད་དེ། །ལས་དེ་རྣམས་ནི་སྒྲུབ་པར་གྱིས། །རལ་གྲི་མིག་སྨན་ས་འོག་དང༌། །མཆིལ་ལྷམ་དེ་བཞིན་རིལ་བུ་སྟེ། །རྣལ་འབྱོར་མ་ཡིས་དངོས་གྲུབ་ནི། །དེ་ནི་ཅི་དགར་སྒྲུབ་པར་གྱིས། གཉིས་པ་དམ་ཚིག་དང་སྡོམ་པ་སྦྱིན་པ་ནི། ནང་པར་སྔར་ལངས་སེམས་དག་ཉིད། །མ་ལུས་ལས་ནི་བྱས་ནས་ཀྱང༌། །བསྲུང་དང་བཟའ་བ་ལ་སོགས་པ། །སྡོམ་པའི་བདག་ཉིད་ཀྱིས་བསྲུང་ངོ༌། །ལུས་དང་སྲོག་ལ་ལྟོས་མེད་པར། །དམ་ཚིག་དང་ནི་སྡོམ་པ་སྲུང༌། །ཉིན་དང་མཚན་མོ་ལན་གསུམ་དུ། །ཉིན་རེ་བཞིན་ནི་བཟླས་པར་བྱ། །གང་ཚེ་ཉམས་གྱུར་རྣལ་འབྱོར་པ། ཁ་ན་མ་ཐོ་སྦོམ་པོར་འགྱུར། །དགུན་ཟླ་འབྲིང་པོ་ནས་བརྩམས་ཏེ། །ཟླ་བ་རེ་རེ་སྲུང་བ་ནི། །གཉིས་མེད་གཉིས་མེད་འཁོར་ལོར་གནས། །ཚེས་བཅུ་ལ་ནི་དེ་རབ་མཆོད། །ཆང་དང་ཤ་སོགས་གང་ཅིའང་རུང༌། །དཔའ་བོ་རྣལ་འབྱོར་མ་ཡི་
ཚོགས། །ཐམས་ཅད་གཉིས་མེད་པང་ན་གནས། །ཧེ་རུ་ཀ་དཔལ་རབ་ཏུ་མཆོད། །ཐེག་པ་དམན་ལ་འདོད་མི་བྱ། །སེམས་ཅན་ལ་ཡང་རྒྱབ་མི་ཕྱོགས། །འཁོར་བ་དག་ཀྱང་མི་སྤོང་ཞིང༌། །མྱ་ངན་འདས་ལ་དགར་མི་འགྲོ། །དཔའ་བོ་རྣལ་འབྱོར་མ་ཀུན་ལ། །ཁྱེད་ཀྱིས་བརྙེས་པར་མི་བྱ་སྟེ། །ཕྱག་རྒྱ་གཞོན་པ་མཚོན་ཆ་དང༌། །མཚན་མ་འགོད་པར་མི་བྱའོ། །དམ་ཚིག་རབ་སྲུང་བསོད་ནམས་ཀྱིས། །ཚེ་འདི་ཉིད་ལ་འགྲུབ་པར་འགྱུར། །བུད་མེད་ཐམས་ཅད་མཐོང་བ་ན། །གཡོན་ནས་ལན་གསུམ་བསྐོར་བྱ་ཞིང༌། །སྤྱི་བོས་ཕྱག་ནི་བྱས་ནས་ཀྱང༌། །ལན་གསུམ་བར་དུ་གསོལ་བ་གདབ། བདག་བུ་ཁྱོད་ནི་མ་ཡིན་ཏེ། །ཇི་སྲིད་བྱང་ཆུབ་འབྱུང་བར་དུ། །བྱང་ཆུབ་ཡན་ལག་ནུ་མ་ལས། །བྱུང་བའི་རང་གིས་འོ་མས་སྐྱོངས། །གཉིས་མེད་ཡེ་ཤེས་སྤྱོད་ལྡན་པའི། །བསླབ་པ་བླངས་པ་སྔོན་འགྲོ་བས། །སྒྲ་སོགས་སྟོང་པ་སྔོན་འགྲོ་བའི། །ཚངས་པར་སྤྱོད་པ་ཤིན་ཏུ་སྲུང༌། །དམ་ཚིག་དེ་ལ་རྟག་གནས་ཏེ། །དེ་སྔོན་འགྲོ་བ་སྦས་པའི་ཡིད། །སྤྱོད་དང་གྲོལ་བའི་གནས་འདོད་པའི། །ཡིད་ལ་འདོད་པ་ཀུན་འགྲུབ་འགྱུར། ཞེས་སྒྲགས་པ་ལ། གཙོ་བོའི་ཇི་ལྟར་བཀའ་སྩལ་པ། །དེ་ལྟར་བདག་གིས་བགྱིད་པར་འཚལ། ཞེས་ལན་གསུམ་བརྗོད། གསུམ་པ་གཟེངས་བསྟོད་པ་ནི། གཉིས་མེད་ཡེ་ཤེས་སེམས་
ལྡན་པས། །མི་བྱ་བ་ནི་ཅི་ཡང་མེད། །ཚངས་པར་སྤྱོད་པ་རྟག་མནོས་ལ། །འདོད་པ་ལྔ་ལ་སྤྱད་པར་གྱིས། །གཉིས་མེད་ལ་གནས་ཟས་ལ་ནི། །རྡོ་རྗེ་སེམས་དཔའ་ལ་སོགས་བརྡས། །གཉིས་མེད་པ་དང་ཐོགས་མེད་པར། །དམ་ཚིག་སྤྱད་པ་སྤྱོད་པར་གྱིས། །སྣ་ཚོགས་དབང་ཕྱུག་ལེགས་སྤྱད་ཅིང༌། །ཚངས་སྤྱོད་བསམ་གཏན་དེ་བཞིན་ནོ། །ཁྲོ་བ་མེད་པའི་རྒྱུན་གཅོད་པ། །སྒྲུབ་པ་པོ་ནི་ཡོངས་སུ་སྲུང༌། །རྟག་ཏུ་སྒྲུབ་ལ་གནས་ནས་ནི། །ཡུལ་ཀུན་ཏུ་ནི་རྣམ་རོལ་བ། །གཉིས་མེད་སྒྲུབ་པའི་རྣལ་འབྱོར་མ། །མི་བརྟན་སྲོག་ནི་ཇི་སྲིད་བར། །བུ་ཁྱོད་ཀྱིས་ནི་སྒྲུབ་པར་བྱ། །འདོད་པའི་ལོངས་སྤྱོད་ཐམས་ཅད་ལ། །ཅི་དགར་བར་ནི་ལོངས་སྤྱོད་ཅིག །ཧེ་རུ་ཀ་དཔལ་རྣལ་འབྱོར་ཆེ། །བསམ་ནས་ཐམས་ཅད་རབ་ཏུ་བརྟག །བདག་ཉིད་སངས་རྒྱས་ཐམས་ཅད་དང༌། །རྣལ་འབྱོར་མ་ནི་ཀུན་གྱི་དངོས། །དེ་བས་འབད་པ་ཐམས་ཅད་ཀྱིས། །ཧེ་རུ་ཀ་དཔལ་བདག་མཆོད་དོ། །འདོད་ཆགས་བྲལ་བ་ལྟ་བུ་ཡི། ཁམས་གསུམ་ན་ནི་སྡིག་མེད་དེ། །དེ་བས་འདོད་ལ་ཆགས་བྲལ་བར། །ཁྱོད་ཀྱིས་ནམ་ཡང་མི་བྱའོ། །ཞེས་སོ། འདིར་བསྲུང་བའི་དམ་ཚིག་གོ །ཞེས་འབྱུང་བའི་སྲུང་བ་ནི་སྐྱོང་བའི་དོན་ཏེ། རིག་བརྟུལ་གྱི་སྤྱོད་པའི་དམ་ཚིག་དང༌། ཐུན་མོང་མ་ཡིན་པའི་དམ་ཚིག་དང༌། གསང་བའི་དམ་ཚིག་གི་སྒོ་ནས། རྣལ་འབྱོར་ཆེན་པོར་སྔགས་པ་
ཡིན་པས་འདི་ཉིད་ཁོ་ན་གཟེངས་བསྟོད་ཀྱི་དོན་ནི། བཞི་པ་ལུང་བསྟན་པའི་དབུགས་དབྱུང་བ་ནི། ཧེ་རུ་ཀ་དཔལ་ལུང་སྟོན་བཞིན། །མགྲིན་གཅིག་ཏུ་ནི་ཐམས་ཅད་ཀྱིས། །འདི་ལྟར་ང་ཡིས་ལུང་བསྟན་ཏེ། །ཧེ་རུ་ཀ་དཔལ་དེ་བཞིན་གཤེགས། །དངོས་པོ་མཆོག་ཏུ་གྲུབ་པའི་ཕྱིར། །སྲིད་པའི་ངན་འགྲོ་རྣམས་ལས་བཏོན། །ཧེ་བཛྲ་ཨཾ་ཀུ་རི་ཤྲཱི་ཧེ་རུ་ཀ་ནཱ་མ་སརྦ་ཏ་ཐཱ་ག་ཏ་སིདྡྷི་ས་མཱ་ཡ་སྟྭཾ་བྷུར་བྷུ་བ་སྭ། གང་ལ་ཚིགས་སུ་བཅད་པ་འདིས་དོན་གྲུབ་པའི་ཕྱག་རྒྱར་གནས་པ་ལ། མཆོག་ཏུ་གྲུབ་པའི་ཚོགས་རྣམས་མགྲིན་གཅིག་ཏུ་རྒྱལ་བ་ཐམས་ཅད་ཀྱི་ལུང་བསྟན་པར་མཛད་དོ། ཁམས་གསུམ་གྱི་ནི་རྒྱལ་སྲིད་ཆེ། །རྒྱལ་བའི་བདག་པོར་གནས་པ་དང༌། །དེར་ནི་བདུད་ལས་རྣམ་རྒྱལ་ཞིང༌། །གྲོང་ཁྱེར་མཆོག་ཏུ་ཞུགས་པ་ཡིན། །དེར་ནི་སངས་རྒྱས་ཉིད་ཐོབ་པར། །ཁྱེད་རྣམས་ཐེ་ཚོ་མེད་པ་ཡིན། །དབང་འདི་བསྐུར་བ་ཙམ་གྱིས་ནི། །སློབ་མ་ཡོན་ཏན་བདག་པོར་འགྱུར། །སློབ་དཔོན་ཉིད་ཀྱི་བདེ་བ་ཡིས། །བརྟན་གཡོ་ཀུན་གྱི་དམ་ཚིག་ཡིན། ཞེས་པའོ། དེ་རྣམས་ཀྱིས་ནི་དཀྱིལ་འཁོར་ལས་རྡུལ་ཚོན་ནམ། རས་བྲིས་ཀྱི་དཀྱིལ་འཁོར་དུ་ཞུགས། བུམ་པའི་དབང་ཐོབ་པས་ལུས་ཀྱི་དྲི་མ་དག་ལམ་བསྐྱེད་པའི་རིམ་པ་སྒོམ་པ་ལ་དབང༌། འབྲས་བུ་སྤྲུལ་པའི་སྐུ་མངོན་དུ་འགྱུར་བའི་སྐལ་པ་ཅན་དུ་བྱས་པ་ཡིན་ནོ། །
ཞེས་དག་པ་དྲན་པར་བྱའོ། །གཉིས་པ་བླ་མའི་མན་ངག་གིས་ཁ་འགེང་བའི་ལུགས་ལྟར་ན། རིག་པའི་དབང་གི་སྐབས་སུ་དམ་ཚིག་གསུམ་མི་སྦྱིན། སྤྱོད་པའི་བརྟུལ་ཞུགས་ཀྱི་མཐར། བརྟན་བཞུགས་མཆོད་པ་རྣམས་སྤང༌། སློབ་དཔོན་གྱི་དབང་གི་དོན་དུ་མཎྜལ་ཕུལ་ནས། རྡོ་རྗེ་ཧཱུཾ་ལས་བྱུང་བའི་རྡོར་སེམས་ཀྱི་ངོ་བོར་མོས། འདི་སྟེ་སངས་རྒྱས་སོགས་དང༌། ཐོག་མཐའ་མེད་པའི༴ སོགས་ཀྱིས་རྡོ་རྗེ་ཐུགས་ཀྱི་དམ་ཚིག་བཟུང༌། དྲིལ་བུ་ཨ་ལས་བྱུང་བའི་སྙེམས་མའི་ངོ་བོ། མོས། འདི་ནི་རྣལ་འབྱོར་མ་ཀུན༴ སོགས་བརྗོད། རང་ཉིད་རྡོར་སེམས་ཡབ་ཡུམ་དུ་བསྒོམ་ནས། ཡིད་ཀྱི་ལུས་བརྟན། སོགས་ཆུ་དབང་བསྐུར། རྡོ་རྗེ་འཆང་ཆེན་པོས་དབུ་བརྒྱན། དབང་ལྷ་སྟིམ། མཆོད་ཅིང་བརྟན་བཞུགས་བྱས་ནས། དེ་རིང་རྡོ་རྗེ་སློབ་དཔོན་གྱུར། ཞེས་སོགས་བཀའི་གནང་བ་སྦྱིན་པ་སྟེ། ལཱུ་ཡི་པའི་དཀྱིལ་ཆོག་ཏུ་རྣམ་པར་ཕྱེ་ཟིན་པ་བཞིན་ནོ། །འོན་ཀྱང་འདི་ནི་གཞུང་དོན་དང་ཅུང་ཟད་མི་འགྲིག་པས་དཀྱུས་སུ་བཤད་པ་ཉིད་བྱའོ། །གཞན་ཡང་ཕམ་ཐིང་བ་དང་རྭ་ལོའི་མན་ངག་ལ། རིག་པའི་དབང་གི་ལུས་ནང་བྱིན་གྱིས་བརློབ་པའི་དབང་གི་སྐབས། སངས་རྒྱས་རྣམས་གང་ལ་སྟིམ་པའི་གཞི་ནི། ཆུ་དང་མིང་ལ་སྤྱི་བོར་ཟླ་བའི་དཀྱིལ་འཁོར་ལ་གནས་པའི་ཨོཾ་དང༌། ཨུ་རྒྱན་དང་དྲིལ་བུ་ལ་སྤྱི་བོར་སྣ་ཚོགས་རྡོ་རྗེ་དང༌། རྡོ་རྗེའི་དབང་ལ། མགྲིན་པར་པདྨ་འདབ་མ་བཅུ་དྲུག་པ་སོགས་བཞེད་དེ། མན་ངག་ཡིན་པའི་ཕྱིར་དེ་ལྟར་ཡང་མི་འགལ་མོད། གཞུང་གི་དགོངས་པ་ནི་དཀྱུས་སུ་བསྟན་པ་ཉིད་དོ། །གཉིས་པ་གསང་བའི་དབང་ནི། མཎྜལ་ཕུལ། ཚོགས་ཀྱི་འཁོར་ལོ་ལ་སོགས་པའི་མཆོད་པ་རྒྱ་ཆེན་པོ་དང་བཅས་ཏེ། གསོལ་བ་བཏབ་པར་མོས།
མཆོད་པ་བསངས་སྦྱངས་འབྲུ་གསུམ་གྱི་བྱིན་གྱིས་བརླབ། སྔགས་དང་ཕྱག་རྒྱ་ཕུལ་ནས། ཀུན་རྟོག་ཐམས་ཅད་རྣམ་སྤངས་པ། །སྟོང་ཉིད་སྙིང་པོ་ཁྱོད་ལ་འདུད། །ཀུན་མཁྱེན་ཡེ་ཤེས་ཕུང་པོ་ཅན། །ཡེ་ཤེས་སྐུ་ཁྱོད་ཕྱག་འཚལ་བསྟོད། །འགྲོ་བའི་མི་ཤེས་བཅད་ནས་སུ། །དེ་ཉིད་དག་པའི་དོན་སྟོན་མཛད། །བདག་མེད་ཆོས་ལས་ཀུན་ཏུ་བྱུང༌། །རྡོ་རྗེ་སེམས་དཔའ་ཕྱག་འཚལ་བསྟོད། །སངས་རྒྱས་བྱང་ཆུབ་སེམས་དཔའ་ཡི། །ཕ་རོལ་ཕྱིན་པའི་ཡོན་ཏན་དག །མགོན་པོ་ཁྱོད་ལས་བྱུང་བ་སྟེ། །བྱང་ཆུབ་སེམས་ལ་ཕྱག་འཚལ་བསྟོད། །དཀོན་མཆོག་གསུམ་དང་ཐེག་པ་ཆེ། ཁམས་གསུམ་འདི་དག་ཐམས་ཅད་ཀྱི། །བརྟན་དང་གཡོ་བ་ཁྱོད་ལས་བྱུང༌། །འགྲོ་བའི་དཔའ་བོ་ཕྱག་འཚལ་བསྟོད། །འགྲོ་བའི་འདོད་དོན་དངོས་གྲུབ་རྣམས། །ཡིད་བཞིན་ནོར་བུ་ལྟར་འབྱུང་ཞིང༌། །དཔལ་ལྡན་བདེ་གཤེགས་ཡེ་ཤེས་གནས། །སངས་རྒྱས་སྲས་ལ་ཕྱག་འཚལ་འདུད། ཅེས་ལན་གཅིག་གིས་བསྟོད། བདག་འཇུག་ཁོ་ན་ལ་འདི་མ་བྱས་ཀྱང་ཆོག་གོ །དེ་ནས་འདི་སྐད་ཅེས། ཡོན་ཏན་རྒྱ་མཚོ་ཁྱོད་མཐུ་ཡིས། །དེ་ཉིད་བླ་མེད་ཤེས་པར་འཚལ། །རྡོ་རྗེ་དབང་བསྐུར་ཀུན་མཁྱེན་གྱིས། །བཀའ་དྲིན་དེ་རིང་བདག་ལ་གསོལ། །བཅོམ་ལྡན་ཁྱོད་ཞབས་པདྨ་ནི། །སྤངས་ནས་གཞན་ན་སྐྱབས་མ་མཆིས། །འཁོར་བའི་འགྲོ་བ་སྤང་པའི་ཕྱིར། །དེ་བས་མགོན་པོས་བརྩེ་བར་མཛོད། །སངས་རྒྱས་
ཀུན་ལ་གསང་བ་ཆེ། །ཇི་ལྟར་དཔལ་ལྡན་ཐུགས་རྡོ་རྗེས། །རྡོ་རྗེ་ཆོས་ནི་བསྟན་པ་བཞིན། །མགོན་པོས་བདག་ལ་བཀའ་དྲིན་སྩོལ། ཞེས་ལན་གསུམ་གསོལ་བ་བཏབ་བོ། མིག་དར་བཅིངས་འབྲུ་གསུམ་གྱིས་བདུད་རྩི་གཏོར་ལ་སྲུང་བ་བྱ། སློབ་དཔོན་རིག་མ་དང་བཅས་པ་དཔལ་ཧེ་རུ་ཀ་ཡབ་ཡུམ་དུ་གྱུར་པས། འདི་སྐད་ཅེས། བྲམ་ཟེ་རྒྱལ་རིགས་རྗེ་རིགས་དང༌། །དམང་རིགས་མཐར་སྐྱེས་བུད་མེད་ཀུན། །གུས་དང་བཅས་པས་མཆོད་པ་དང༌། །གཉིས་མེད་ཚུལ་གྱིས་ཙུམ་པ་ནི། །དཔའ་བོ་ཁྱོད་ནི་སྤྲོ་གྱུར་ཏམ། ཞེས་དྲིས་པ་ལ། ཅི་གསུངས་དམ་ཚིག་བསྟེན་པར་ནི། །ལྷ་མོ་བདག་གིས་བྱེད་པར་ནུས། །ཞེས་ལན་བཏབ་པར་མོས། སློབ་དཔོན་གྱི་ཕྱག་གཡས་ཀྱི་རྡོ་རྗེ་དང༌། རིག་མའི་ཞབས་གཡོན་རང་གི་སྤྱི་བོར་བཞག་སྟེ། དེང་ནས་བརྩམས་ཏེ་བུ་ཁྱོད་ཀྱིས། བརྟུལ་ཞུགས་བཟང་པོས་འགྲོ་དོན་གྱིས། །བྲམ་ཟེ་རྒྱལ་རིགས་རྗེ་རིགས་དང༌། །དམངས་རིགས་ཐ་མ་དག་སྤྱད་ཅིང༌། །པདྨའི་བྷ་གར་ཙུམ་པ་དང༌། །བདུད་རྩི་རྣམས་ནི་སྒྲུབ་པར་གྱིས། ཞེས་བཀའ་བགོས། བདུད་རྩི་གཏོར་ནས་སྲུང་བ་བྱ། བླ་མ་ཧེ་རུ་ཀ་ཡབ་ཡུམ་སྙོམས་པར་ཞུགས་པའི་དགའ་བའི་སྒྲ་དང་ཐུགས་རྗེའི་འོད་ཟེར་གྱིས། སངས་རྒྱས་སྲས་དང་བཅས་པ་ཐམས་ཅད་སྤྱན་དྲངས། ཡབ་ཡུམ་གྱི་སྐུ་ལ་ཞུགས། ཐུགས་ཀར་བྱང་ཆུབ་ཀྱི་སེམས་སུ་ཞུ། གསང་བར་ལྷན་ཅིག་སྐྱེས་པའི་ཡེ་ཤེས་བརྟན་པར་བྱས་པའི་བྱང་ཆུབ་ཀྱི་སེམས་བདག་གི་
ལྕེ་ཐོག་ཏུ་བཞག ཇི་ལྟར་འདས་པའི་སངས་རྒྱས་ཀྱིས། བྱང་ཆུབ་སྲས་རྣམས་དབང་བསྐུར་ལྟར། །བདག་གིས་གསང་བའི་དབང་གིས་ནི། །སེམས་ཀྱི་རྒྱུན་གྱིས་དབང་བསྐུར་རོ། །ཡབ་ཡུམ་གྱི་སྙིང་པོའི་མཐར། ཨོཾ་ཨཱཿཧཱུཾ། བདུད་རྩི་མྱང༌། ཡུམ་གྱི་བྱང་སེམས་མྱངས་པར་མོས་ལ། གོང་བཞིན་བརྗོད་ལ་བདུད་རྩི་མྱང༌། ཨཱ་ཧོ་མཧཱ་སུ་ཁཾ། ཞེས་བརྗོད། འབྲུ་གསུམ་གྱིས་གདོང་གཡོགས་བསལ། དམ་ཚིག་སྒྲགས་པ་ནི། ཁྲག་ཆེན་པོ་ནི་ག་བུར་བཅས། །ཙནྡན་དམར་དང་ཡང་དག་སྦྱར། །དེ་བཞིན་རྡོ་རྗེའི་ཆུ་དང་བཅས། །ལྔ་པ་སེམས་ལས་བྱུང་བར་བཤད། །སངས་རྒྱས་ཀུན་གྱིས་མཐུན་པར་གསུངས། །དམ་ཚིག་འདི་ནི་བླ་ན་མེད། །བཟང་པོ་ཁྱོད་ཀྱིས་བསྐྱར་བར་བྱ། ཞེས་སོ། དེ་ལྟ་ན་བྷ་གའི་དཀྱིལ་འཁོར་དུ་གསང་བའི་དབང་ཐོབ་པས་ངག་གི་དྲི་མ་དག ལམ་བཟླས་པ་དང་རླུང་བསྒོམ་པ་ལ་དབང༌། འབྲས་བུ་ལོངས་སྤྱོད་རྫོགས་པའི་སྐུ་མངོན་དུ་འགྱུར་བའི་སྐལ་བ་ཅན་དུ་བྱས་པ་ཡིན་ནོ། །ཤེས་རབ་ཡེ་ཤེས་ཀྱི་དབང་གི་དོན་དུ་མཎྜལ་ཕུལ། བཅོམ་ལྡན་ཞི་བ་ཆེན་པོ་ཀྱཻ། རྡོ་རྗེ་རྣལ་འབྱོར་གཅིག་བཞེད་པ། །མི་ཕྱེད་ཕྱག་རྒྱ་བསྒྲུབས་པ་པོ། །རྡོ་རྗེ་སྦྱོར་ལས་ཡང་དག་བྱུང༌། །བདག་ཉིད་ཆེན་པོ་ཁྱོད་ཇི་བཞིན། །མངའ་བདག་བདག་ལའང་དེ་ལྟར་མཛོད། །འཁོར་བ་འདམ་གྱི་ཚོགས་ནང་དུ། །བྱིང་བ་སྐྱབས་མེད་བདག་ལ་སྐྱོབ། ལན་གསུམ་གྱིས་གསོལ་བ་བཏབ། ཨོཾ་ཨཱཿཧཱུཾ། མིག་དར་བཅིངས་
རིག་དང་མཐུན་པའི་ཕྱག་རྒྱ་གཏད། འདི་ནི་བྱང་ཆུབ་སྒྲུབ་རྣལ་འབྱོར། ཁམས་ལྔ་བཅུད་ཀྱི་བདག་ཉིད་ཅན། །ཧེ་རུ་ཀ་དཔལ་རྣལ་འབྱོར་པས། །ཡང་དག་བདེ་བ་མྱང་བར་གྱིས། །བདག་ཉིད་ཧེ་རུ་ཀ་ཕྱག་གཉིས་པ་དང༌། ཕྱག་རྒྱ་རྡོ་རྗེ་ཕག་མོར་གྱུར། སྒྲུབ་ཐབས་བཞིན་མཁའ་གསང་བྱིན་རླབས་དང༌། ཡབ་ཡུམ་གཉིས་ཀྱིས་གནས་གསུམ་བྱིན་རླབས་དང༌། གནས་ལྔ་བྱིན་རླབས་རྣམས་བྱ། སངས་རྒྱས་ཐམས་ཅད་བཀུག་ནས། བདག་ཉིད་རིག་མར་བཅས་པ་ལ་ཐིམ། ཡབ་ཡུམ་སྙོམ་བར་ཞུགས་པའི་དགའ་བ་བཞིའི་ཡེ་ཤེས་བརྟན་པར་བྱས། དང་པོ་ཀུན་དགའ་དཔའ་བོ་སྟེ། །མཆོག་ཏུ་དགའ་བ་རྣལ་འབྱོར་མ། །རབ་ཏུ་དགའ་བ་མ་ལུས་ཉིད། །དེ་བདེ་ཐབས་ལས་ཐམས་ཅད་རིག །ཨོཾ་ཨཱཿཧཱུཾ། གདོང་གཡོགས་དཀྲོལ། སྲོག་ཆགས་བསད་པར་མི་བྱ་སྟེ། །བུད་མེད་རིན་ཆེན་སྨད་མི་བྱ། །སློབ་དཔོན་སྨད་པར་མི་བྱ་སྟེ། །དམ་ཚིག་ཤིན་ཏུ་འདའ་བར་དཀའ། ཞེས་སོ། དེ་ལྟར་ན་ཀུན་རྫོབ་བྱང་ཆུབ་སེམས་ཀྱི་དཀྱིལ་འཁོར་དུ། ཤེས་རབ་ཡེ་ཤེས་ཀྱི་དབང་ཐོབ་པས། སེམས་ཀྱི་དྲི་མ་དག ལམ་དངོས་སམ་ཡེ་ཤེས་ཀྱི་རིག་མ་བསྟེན་པ་ལ་དབང༌། འབྲས་བུ་ཆོས་སྐུ་མངོན་དུ་འགྱུར་བའི་སྐལ་བ་ཅན་དུ་བྱས་པ་ཡིན་ནོ། །དབང་བཞི་པའི་དོན་དུ་མཎྜལ་ཕུལ། ཁྱོད་ཞབས་པདྨོའི་བཀའ་དྲིན་གྱིས། །གཙོ་བོའི་དབང་བསྐུར་རྣམ་གསུམ་ཐོབ། །དེ་རིང་རིན་ཆེན་བཞི་པ་ཡང༌། །བདག་ལ་བཀའ་དྲིན་སྐྱབས་དུ་གསོལ།
ལན་གསུམ། དེ་ལྟར་ཡང༌། ཟབ་ཅིང་རྒྱ་ཆེ་ལ་མོས་ན། ཚིག་གིས་རིན་ཆེན་དབང་བསྐུར་བྱ། །ཞེས་གསུངས་པས། བཞི་པའི་ཡེ་ཤེས་ནི། དཔལ་འཁོར་ལོ་སྡོམ་པ་ལས། ཕོ་ཉ་ལྷན་ཅིག་སྐྱེས་གྲུབ་ནི། །མཆོག་དང་འབྲིང་དང་ཐ་མ་སྟེ། །ཡིད་ནི་ནང་དུ་ཆུད་པ་ཡིས། །འདོད་པའི་དངོས་གྲུབ་སྒོམ་པར་བྱ། ཅེས་དང༌། བཤད་པའི་རྒྱུད་ལས་ཀྱང༌། དངོས་དང་དངོས་མེད་བྲལ་བ་ཡི། །དེ་ཉིད་རྣལ་འབྱོར་པས་སྒོམ་བྱ། །དངོས་དང་དངོས་མེད་ལས་གྲོལ་བ། །སྒོམ་ན་མྱུར་དུ་འགྲུབ་པར་འགྱུར། ཞེས་དང༌། རྒྱུད་གཞན་ལས་ཀྱང༌། ཡེ་ཤེས་འདི་ནི་ཆེ་ཕྲ་ཞིང༌། །རྡོ་རྗེ་སྙིང་པོ་མཁའ་དང་མཚུངས། །རྡུལ་བྲལ་མཐར་ཕྱིན་ཞི་བ་ཉིད། ཁྱོད་ཀྱིས་ཕ་ནི་ཁྱོད་ཉིད་དོ། །ཞེས་བསམ་གྱིས་མི་ཁྱབ་པ་ལྷན་ཅིག་སྐྱེས་པའི་དེ་ཁོ་ན་ཉིད། སྐུ་དང་ཡེ་ཤེས་ཟུང་དུ་འཇུག་པ་ནི་དབང་བཞི་པ་སྟེ། གཉིས་མེད་ཡེ་ཤེས་དབང་བསྐུར་ནི། །གསང་བ་ཀུན་ལ་སོགས་པར་བཤད། །ཅེས་གཞུང་ལས་གསུངས་ཤིང༌། དེ་མཚོན་པར་བྱེད་པ་ནི་ཕྱག་རྒྱ་གཏད་པའི་དབང་བསྐུར་ཤེས་རབ་ཡེ་ཤེས་སོ། །དམ་ཚིག་སྒྲགས་པ་ནི། ཁྱོད་ཀྱིས་སྲོག་ཆགས་གསད་པར་བྱ། །རྫུན་གྱི་ཚིག་ཀྱང་སྨྲ་བར་བྱ། །མ་བྱིན་པར་ཡང་ཁྱོད་ཀྱིས་ལོང༌། །ཕ་རོལ་བུད་མེད་བསྟེན་པར་བྱ། །དེ་ལྟར་ན་དོན་དམ་བྱང་ཆུབ་སེམས་ཀྱི་དཀྱིལ་འཁོར་དུ་དབང་བཞི་པ་ཐོབ་པས། ལུས་ངག་ཡིད་གསུམ་གྱི་དྲི་མ་བག་ཆགས་དང་བཅས་པ་དག སྒོ་གསུམ་མི་ཕྱེད་པ་རྡོ་རྗེ་ལྟ་བུར་གྱུར། ལམ་བསམ་མི་ཁྱབ་ཀྱི་རིམ་པ་སྒོམ་པ་ལ་དབང་
འབྲས་བུ་ངོ་བོ་ཉིད་སྐུ་མངོན་དུ་འགྱུར་བའི་སྐལ་བ་ཅན་དུ་བྱས་པ་ཡིན་ནོ། །དབང་རྣམས་ཀྱི་ཐུན་མོང་དུ་རྗེས་གནང་སྦྱིན་པ་ནི། བྱང་ཆུབ་སྙིང་པོའི་མཐར་ཐུག་པར། །ཆོས་ཀྱི་འཁོར་ལོ་ཀུན་ཏུ་ནི། །ཆོས་ཀྱི་འཁོར་ལོ་བླ་མེད་པ། །ཀུན་ནས་རབ་ཏུ་སྐོར་བར་གྱིས། །ཤེས་རབ་ཐབས་ཀྱི་རང་བཞིན་བདག །ཡིད་བཞིན་ནོར་བུ་ཇི་བཞིན་དུ། །སྐྱེ་མེད་དགོས་དང་བྲལ་བ་ཡིས། །ད་ནི་སེམས་ཅན་དོན་རྣམས་ཀྱིས། ཞེས་སོ། །གཙོ་བོས་ཇི་ལྟར་བཀའ་སྩལ་པ། སོགས་ལན་གསུམ། བཀའ་དྲིན་གཏང་རག་གི་མཎྜལ་ཕུལ་ཏེ། དེང་བདག་སྐྱེ་བ་འབྲས་བུར་བཅས། །བདག་གི་གསོན་པའང་འབྲས་བུར་བཅས། །དེ་རིང་སངས་རྒྱས་རིགས་སུ་སྐྱེས། །སངས་རྒྱས་སྲས་སུ་ད་འགྱུར་ཏོ། །ཞེས་དང༌། དེང་ནས་བརྩམ་ཏེ། སོགས་དགེ་བ་བསྔོའོ། །དགུ་པ་སློབ་མ་ལ་དབང་བསྐུར་བ་ནི། ཕལ་ཆེར་བདག་འཇུག་གིས་རིགས་འགྲེ་བ་ཡིན་ལ། སློབ་མ་རྣམས་གྲལ་དུ་འདུས་མ་ཐག་ཏུ། དཀྱིལ་འཁོར་ལ་བྱེད་པ་བཞིན་བགེགས་སྦྱང་རྒྱས་པ་དེ་བྱ། དཀྱིལ་འཁོར་དུ་འཇུག་པའི་སྐབས་ཀྱི་སྡོམ་པ་མདོར་བསྟན་དང༌། དམ་རྫས་སྦྱིན་པ་སོང་མཚམས་སུ། བུ་ཚུར་ཐེག་པ་ཆེན་པོ་ཡི་སོགས་བརྗོད། ཕྱོགས་བཞི་ཕྱག་འཚལ་གྱིས་སྐབས། མཁའ་འགྲོ་མ་བཞིའི་སྔགས་ཀྱིས་ཁྲིད་ནས་སྒོ་ཕྱེ་བ་ཡིན་ཏེ། དང་པོར། ཨོཾ་ཌཱ་ཀི་ནཱི་ཡེ་ཧཱུཾ་ཧཱུཾ་ཕཊ། ཅེས་ཕྱི་རོལ་ནས་སློབ་མ་ཁྲིད་པར་མོས། སྔགས་དེ་ཉིད་དམ་བཛྲ་ཨུད་གྷ་ཊའི་སྔགས་ཀྱི་སྒོ་ཕྱེ་ནས། ཤར་སྒོའི་ཕྱག་འཚལ་བྱེད་པ་སོགས་ཏེ་གཞན་ལའང་རིགས་འགྲེ། ཡེ་ཤེས་འབེབས་པའི་སྦོག་ཆོག་ནི། སློབ་དཔོན་གྱི་ཐུགས་ཀ་ནས་རྡོ་རྗེ་རྒྱ་གྲམ་དམར་པོ་ལས་འོད་འཕྲོས་
ཤངས་བུག་གཡས་ནས་ཐོན་སློབ་མའི་སྣ་བུག་གཡས་ནས་ཞུགས། དཔྲལ་པར་རྡོ་རྗེ་རྒྱ་གྲམ་དམར་པོ་འོད་འཕྲོ་བར་གྱུར། ཡེ་ཤེས་སེམས་དཔའ་ཨཱ་ལི་ཀཱ་ལིའི་རྣམ་པར་སྤྱན་དྲངས་ཏེ་སྟིམ་པས། ལུས་ཀྱི་ནང་སྔགས་ཀྱི་ཡིག་འབྲུས་གང་བ་ལ་སེམས་གཏད་དེ། རོལ་མོའི་སྒྲ་བྱ། དེས་ཀྱང་མ་ཕེབས་ན་སྤྱི་བོར་བླ་མ་རྡོ་རྗེ་སེམས་དཔའ་མཆོག་སྦྱིན་གྱི་ཕྱག་རྒྱ་མཛད་པའི་འོད་ཟེར་གྱིས་ལུས་ཀྱིས་ནང་གང་བར་བསམ་པའོ། །ཞེས་པ་བླ་མ་རྣམས་ཀྱིས་མན་ངག་གོ །ཡེ་ཤེས་ཕབ་པ་བརྟན་བྱེད་བྱས་མ་ཐག་ཏུ་ནམ་མཁའི་ཁ་དོག་དྲིས་ནས། ཁ་ཏོག་དང་མཐུན་པའི་ལས་དང་དངོས་གྲུབ་ཀྱང་ལུང་སྟོན་པ་དགོས་སོ། །ལྷ་ངོ་བསྟན་པ་ལ་ངེས་པར་མངོན་རྟོགས་རྒྱས་པར་སྟོན་དགོས་ལ། བྱུར་བསལ་བའི་སྔོན་དུ། བགེགས་སྦྱང་བ་བྱས་ཀྱང་རུང་ཞིང་ལེགས་ལ། འདིར་བྱས་ན་གོང་དུ་བགེགས་སྦྱར་བ་མི་དགོས་སོ། །གང་ལྟར་ཡང་བདག་འཇུག་གི་སྐབས་སུ་བཤད་པའི་བྱུར་བསལ་བ་དེ་སོང་མ་ཐག་ཏུ། ཟ་བྱེད་རྡོ་རྗེ་མཁའ་འགྲོའི་སྡིག་པ་སྦྱང་བ་ངེས་པར་བྱེད་དགོས་སོ། །ཤིས་བརྗོད་ཀྱི་སྐབས་སུ་འགྲུབ་ན། ཤ་དང༌། ཆང་དང༌། གོང་བུ་དང་ཁུ་བའི་རྫས་སྣ་ཚོགས་པ་བྱིན་གྱིས་རླབས་ཏེ། སློབ་མའི་མཐའ་ཡང་བསྐོར། དབང་གི་ལྷ་རྣམས་ལ་གཏོར་མའི་ཚུལ་དུ་འབུལ་བ་ཡང་བྱ་ཞིང༌། གང་ལྟར་ཡང་རྣམ་རྒྱལ་བུམ་པ་བཏེག་ཅིང་མཆོད་པ་སྣ་ཚོགས་དང་བཅས་ནས་བྱའོ། །སྤྲོ་ཞིང་ནུས་ན་སློབ་དཔོན་དང་སློབ་མའི་ལུས་དཀྱིལ་གསལ་འདེབས་པའི་སྐབས་ཀྱང་རྒྱས་པར་བརྗོད་ན་ལེགས་སོ། །འདི་དག་ཞིབ་མོར་ལག་ལེན་དང་ངག་རྒྱུན་ལས་ཤེས་པར་བྱའོ། །ཁྱད་པར་དངོས་སུ་དབང་སྟེགས་འཆའ་ཐུབ་ན་ཤིན་ཏུ་ལེགས་ཏེ་དཀྱིལ་ཆོག་ཐམས་ཅད་ཀྱི་དགོངས་པ་ཡིན་ལ། ཁྱད་པར་གཞུང་འདི་ལས་སློབ་མའང་རུས་པའི་ཕྱག་རྒྱ་དྲུག་གིས་བརྒྱན་པ་སོགས་ཆས་སུ་འཇུག་པར་བཤད་དོ། །མིང་དབང་སྐབས་མིང་འདོགས་པ་ལ། བཞད་དང་
སྒེག་རོལ་ངོ་མཚར་ཞེ་སྡང་དང༌། །རྡོ་རྗེ་སེམས་དཔའ་རང་བྱུང་རྡོ་རྗེ་སོགས། རྡོ་རྗེའི་རིགས་མེད་དེ་ཉིད་བུད་མེད་ལ། །བདག་མེད་ངོ་མཚར་བདེ་མ་སྒེག་མོའོ། །ཡེ་ཤེས་རྟག་པ་གཏི་མུག་རྣམ་སྣང་དང༌། །སྒྱུ་འཕྲུལ་སྐུ་དང་སངས་རྒྱས་དེ་བཞིན་གཤེགས། །རྣམ་སྣང་རིགས་ཡིན་དེ་བཞིན་བུད་མེད་ལ། །རྡོ་རྗེ་སྤྱན་མ་མཁའ་འགྲོ་མ་སྒྱུ་མ། །ཡན་ལག་མེད་དང་དགའ་བ་ཤིན་ཏུ་བདེ། །གཟི་བརྗིད་སྣང་བྱེད་རྡོ་རྗེ་རིན་ཆེན་ལའོ། །བུད་མེད་ལ་ནི་རྡོ་རྗེ་འབར་མ་དང༌། །མགྱོགས་མ་རོ་ལངས་མ་དང་ལྕགས་ཀྱུ་མའོ། །པདྨ་པད་མྱུག་འདོད་ཆགས་འཇིག་རྟེན་མགོན། །པདྨ་གར་དབང་དང་ནི་རྡོ་རྗེ་ཆོས། །པདྨའི་རིགས་ལའོ་རྡོ་རྗེ་ཕྲེང་བ་མ། །སྒེག་མོ་བཞད་མོ་འཁྱུད་མ་བུད་མེད་ལའོ། །ནམ་མཁའ་ཤེས་རབ་མྱུ་གུ་རྟ་མཆོག་དང༌། །དོན་ཡོད་དོན་ཡོད་གྲུབ་པ་ལས་ཀྱི་སྟེ། །རྡོ་རྗེ་སྒྲོལ་མ་གར་མ་ཀོང་ཀ་ན། །དོ་ཤལ་མ་སྟེ་ལས་རིགས་བུད་མེད་དོ། །རྣམ་རྒྱལ་དཔེ་མེད་རོ་མཉམ་བདེ་ཆེན་དང༌། །དམ་པ་དང་པོ་ཕྱག་ན་རྡོ་རྗེ་ནི། །རྡོ་རྗེ་འཆང་གི་རིགས་ཀྱི་སྐྱེས་པའི་མིང༌། །རྡོ་རྗེ་སྙེམས་མ་རྡོ་རྗེ་མཚོན་ཆ་མ། །ཤེས་རབ་ཕ་རོལ་ཕྱིན་མ་སོགས་བུད་མེད། གཞན་ཡང་མེ་ཏོག་གང་ལ་ཕོག་པ་ཡི། །མཚན་ཡང་ཇི་ལྟར་འོས་པ་གདགས་སུ་རུང༌། །རྒྱས་པར་རྡོ་རྗེ་གུར་ལས་ཤེས་པར་བྱ། །ཞེས་བྱའོ། །སྤྱོད་པའི་བརྟུལ་ཞུགས་རྒྱས་པ་ནི་གཞན་དུ་ཤེས་པར་བྱའོ། །བཅུ་པ་རྗེས་ཀྱི་བྱ་བ་ནི། སྦྱིན་སྲེག་དང་འཁོར་ལོའི་མཆོད་པ་སོགས་བྱས་ནས། ཡང་དཀྱིལ་འཁོར་ལ་མཆོད་པ་རྒྱ་ཆེར་བཤམས། བྱིན་གྱིས་བརླབས། མཆོད་ཡོན་སོགས་སྔགས་ཙམ་མམ་ཚིགས་བཅད་དང་བཅས་པས་ཀྱང་རུང་སྟེ་ཕྱི་མཆོད་ཕུལ། རིག་མ་བཅུ་དྲུག་དང་ནང་མཆོད་དང་གསང་མཆོད་རྣམས་སྔགས་ཙམ་གྱིས་བྱ། རྐང་བརྒྱད་གཉིས་ཀྱིས་བསྟོད། མགོན་པོ་ཐུགས་རྗེ་ཆེན་པོ་དང་ལྡན་པ་རྣམས་བདག་ཅག་ལ་དགོངས་སུ་གསོལ། ཁྱེད་རྣམས་ལ་མཁྱེན་པའི་ཡེ་ཤེས། བརྩེ་བའི་ཐུགས་རྗེ་མཛད་པའི་འཕྲིན་ལས་བསམ་གྱིས་
མི་ཁྱབ་པ་མངའ་བ་ལགས་པས། སྤྱིར་ཕན་བདེའི་འབྱུང་གནས་སངས་རྒྱས་ཀྱི་བསྟན་པ་དར་བ་དང༌། སེམས་ཅན་ལ་བདེ་སྐྱིད་འབྱུང་བ་དང༌། བླ་མ་གོང་མ་རྣམས་ཀྱིས་ཐུགས་དགོངས་རྫོགས་ཤིང༌། ཞལ་བཞུགས་པ་རྣམས་སྐུ་ཁམས་བཟང་བ་དང༌། ཁྱད་པར་དུ་ཡང་བདག་ཅག་དཔོན་སློབ་རྒྱུ་སྦྱོར་བ་དང་བཅས་པས་ཐོག་དྲངས། སེམས་ཅན་ཐམས་ཅད་ཀྱི་རྒྱུད་ལ་ཚོགས་རྫོགས་སྒྲིབ་པ་དག་ནས། མྱུར་དུ་མངོན་པར་རྫོགས་པར་སངས་རྒྱ་བར་བྱིན་གྱིས་བརླབ་ཏུ་གསོལ། ཞེས་གསོལ་བ་བཏབ། ལྷོ་ཕྱོགས་ནས་ཡི་གེ་བརྒྱ་པ་བཟླས། མ་འབྱོར་པ་དང་སོགས་སམ། མ་རྙེད་ཡོངས་སུ་མ་ཤེས་དང༌། ཞེས་སོགས་ཀྱིས་བཟོད་པར་གསོལ་ལོ། །བདག་ཅག་ལས་དང་པོ་པའི་རྟེན་གྱི་གང་ཟག་ཏུ་གྱུར་པས། སེམས་སྒྲིབ་པ་དང་ལྡན་པ་དང༌། ཡོ་བྱད་མ་ཚང་བ་དང༌། ཏིང་ངེ་འཛིན་མི་གསལ་བ་དང༌། སྔགས་མ་དག་པ་དང༌། ཆོ་ག་ལྷག་པ་དང་ཆད་པ་ཐམས་ཅད་ཁ་སྐོང་ཞིང༌། བདག་ཅག་གི་ལམ་དང་དངོས་གྲུབ་ཀྱི་བར་ཆད་དུ་མི་འགྱུར་བར་མཛད་དུ་གསོལ། བདག་གི་ལས་དང་དངོས་གྲུབ་ཐམས་ཅད་ཐོགས་པ་མེད་པར་འགྲུབ་བར་མཛད་དུ་གསོལ། ཞེས་འདོད་དོན་གསོལ་བ་གདབ་བོ། །རས་བྲིས་ཀྱི་དཀྱིལ་འཁོར་ཡིན་ནམ། མ་ཡིན་ཀྱང་རྟེན་གཞན་ཡོད་ན་བརྟན་བཞུགས་བྱ་སྟེ། ཕྱོགས་བཅུ་ན་བཞུགས་པའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་བདག་ལ་དགོངས་སུ་གསོལ། ཇི་སྲིད་ནམ་མཁའི་མཐའ་དང་མཉམ་པའི་སེམས་ཅན་ཐམས་ཅད་མི་གནས་པའི་མྱ་ངན་ལས་འདས་པའི་ས་ལ་མ་བཞག་གི་
བར་དུ་རྒྱལ་བ་རྣམས་མྱ་ངན་ལས་མི་འདའ་བར་བརྟན་པར་བཞུགས་སུ་གསོལ། བྱེ་བྲག་ཏུ་ཡང་སྐུ་གཟུགས་ཀྱི་རྟེན་འདི་རྣམས་ལ། ཞེས་སམ། རས་བྲིས་ཀྱི་དཀྱིལ་འཁོར་ལ་ཞེས་སམ། སྐུ་གཟུགས་ཀྱི་རྟེན་འདི་རྣམས་དང་རས་བྲིས་ཀྱི་དཀྱིལ་འཁོར་ལ། ཞེས་གང་འོས་སྐབས་དང་སྦྱར་ཏེ། བསྐྱེད་ཅིང་སྤྱན་དྲངས་པའི་ལྷ་ཚོགས་ཐམས་ཅད། ཇི་སྲིད་འབྱུང་བ་ཆེན་པོ་ས་ཆུ་མེ་རླུང་གི་གནོད་པས་མ་ཞིག་གི་བར་དུ་བརྟན་པར་བཞུགས་སུ་གསོལ། བརྟན་པར་བཞུགས་ནས་ཀྱང་བདག་དང་སེམས་ཅན་ཐམས་ཅད་ཀྱི་མགོན་དང་སྐྱབས་དང་དཔུང་གཉེན་དམ་པ་མཛད་དུ་གསོལ། ཞེས་མེ་ཏོག་གཏོར། རྡུལ་ཚོན་གྱི་དཀྱིལ་འཁོར་ཡིན་ལ་གཞན་རྟེན་སྐུ་སོགས་མེད་ཅིང༌། སྒྲུབ་མཆོད་ཞག་སྦྲེལ་བྱེད་པའི་སྐབས། ཉི་མ་སྔ་མ་རྣམས་ལ། རྟེན་དང་བརྟེན་པར་བཅས་པའི་དཀྱིལ་འཁོར་པ་ཐམས་ཅད་གཤེགས་གསོལ་གྱི་ཆོ་ག་མ་བྱས་ཀྱི་བར་དུ་བརྟེན་པར་བཞུགས་སུ་གསོལ། བརྟན་པར་བཞུགས་ནས་ཀྱང་བདག་དང་སེམས་ཅན་ཐམས་ཅད་ལ་མཆོག་དང་ཐུན་མོང་གི་དངོས་གྲུབ་མ་ལུས་པ་སྩལ་དུ་གསོལ། ཞེས་པ་ཙམ་གྱི་བརྟན་བཞུགས་བྱ། རྡུལ་ཚོན་གཤེགས་གསོལ་གྱི་ཉིན་མོ་དེ་ཡང་མི་དགོས་སོ། །དེ་ནས་གཤེགས་གསོལ་ནི། ཨོཾ་ཁྱེད་ཀྱི་སེམས་ཅན་དོན་ཀུན་མཛད། །རྗེས་སུ་མཐུན་པའི་དངོས་གྲུབ་སྩོལ། །སངས་རྒྱས་ཡུལ་དུ་གཤེགས་ནས་ཀྱང༌། །སླར་ཡང་འབྱོན་པར་མཛད་དུ་གསོལ། །ཨོཾ་ཨཱཿཧཱུཾ་བཛྲ་མུཿ ཞེས་ཏེ་ཞག་སྦྲེལ་མར་བྱེད་པའི་ཉི་མ་སྔ་མ་རྣམས་ལ་ནི། རྟེན་ལ་མ་བརྟེན་པའི་མགྲོན་ཁོ་ན་[དེ་ཡང་]གཤེགས་སུ་གསོལ་བ་ཡིན་ཞིང༌། རས་བྲིས་ཀྱི་དཀྱིལ་འཁོར་བསྡུ་བའི་སྐབས་
ཡིན་ན། དེ་སྟེང་དུ་བུམ་བསྐྱེད་ཀྱང་གཤེགས་དགོས་ལ། རྡུལ་ཚོན་གྱི་དཀྱིལ་འཁོར་བསྡུ་བའི་དུས་ནི་དཀྱིལ་འཁོར་བ་ཡང་གཤེགས་པ་ཡིན་ཏེ། དེ་ཡང་བཛྲ་མུཿ ཡན་གྱིས་མགྲོན་རྣམས་གཤེགས། བུམ་བསྐྱེད་དང་དཀྱིལ་འཁོར་གྱི་ལྷ་ནི་གཏན་ལས་འཕགས་ཏེ་ནམ་མཁར་བཞུགས་པ་ལ། ཨོཾ་ཡོ་ག་ཤུདྡྷ་སརྦ་དྷརྨ་ཡོ་ག་ཤུདྡྷོ྅་ཧཾ། ཞེས་རྣམ་ལྔ་འདོད་སྐོར་དང༌། འཁྱུད་རྒྱ་བྱས་པས། དེ་རྣམས་རང་ཉིད་ལ་ཐིམ་པར་མོས། དེ་ལྟར་ལན་གསུམ་བྱས་ནས་རྡོ་རྗེའི་རྩེ་མོས་རྩིག་པ་དང་ཐིག་གི་ལམ་དབྱེ་ཞིང༌། ལྷ་མཚན་རྣམས་ལོགས་སུ་བསྡུ་དོན་དུ་གཉེར་བ་ཉིད་ན་ཅུང་ཟད་སྦྱིན། རྡུལ་མཚོན་རྣམས་བུམ་པ་ལ་སོགས་པར་བླུགས་ཏེ། བཀུར་བསྟི་དང་བཅས་པའི་ཆུ་བོར་སྤྱན་འདྲེན། རྡུལ་ཚོན་ཀླུ་ལ་གཏད། བུམ་པར་ཆུ་བོ་དེ་ནས་ཆུ་བླངས་ཏེ། ཐིག་རྣམས་བསྲུབས། ཕུར་བུ་དབྱུང་ངོ༌། །དེ་དག་གི་ཆོ་ག་གཞན་ནི་སྤྱི་དང་མཐུན་ལ། ཕུར་བུ་ནི་རང་རང་གི་སྔགས་ཀྱིས་བཏོན་ལ། ཤུལ་དུ་མར་དང་སྦྲང་རྩིས་བྱུག་མཐར་སྨོན་ལམ་མང་དུ་གདབ། བཀྲ་ཤིས་རྒྱ་ཆེར་བྱའོ། །རས་བྲིས་ཀྱི་ཕྱོགས་ལ་ནི། བརྟན་བཞུགས་བྱས་མ་ཐག་ཏུ་སྨོན་ལམ་དང་བཀྲ་ཤིས་བྱའོ། །འདིར་སྨྲས་པ། སྤྱོད་འཆང་ཞབས་ཀྱི་གཞུང་ལུགས་རྟོགས་དཀའ་ཏེ། །ཕྱོགས་འདིར་འགྲེལ་བརྩམས་པ་མང་ཡོད་ཀྱང༌། །རྣམ་བཤད་ཕལ་ཆེར་འཁྱོག་པོའི་ལམ་དུ་འདྲེན། །དཀྱིལ་ཆོག་རྣམས་ཀྱང་རང་བཟོའི་བཟློས་གར་སྒྱུར། །དགོངས་འགྲེལ་སྒྱུ་མ་མཁན་པོའི་རྣམ་འཕྲུལ་གྱིས། །དོན་གཉེར་སྐྱེ་བོའི་བློ་མིག་ལན་བརྒྱར་བསླངས། །རང་རང་མཐུན་ཕྱིར་གཞུང་ཚིག་དཀྲུག་པ་དང༌། འཁྱོག་བཤད་མང་པོས་གཞུང་བཟང་དྲི་མར་བྱས། མཁས་མཆོག་རྡོ་རྗེ་འཛིན་པར་གྲགས་འགས་ཀྱང༌། །འདི་དོན་ཇི་བཞིན་གསལ་བར་མ་རྟོགས་ན། །ཕྲག་དོག་ཅན་གྱི་བླུན་པོ་མཁས་འདོད་
འགས། །འདི་དོན་ཤེས་སུ་རེ་བ་ཧ་ཅང་འཁྲུལ། །དེ་སླད་ནག་པོའི་དགོངས་དོན་ཇི་བཞིན་དུ། །དག་ཅིང་གསལ་ལ་མ་འཁྲུགས་གོ་བདེ་བ། །མདོར་བསྡུས་ཚིག་གིས་གཞུང་ཆེན་ཤེས་པ་འདི། །གྲུབ་པའི་དབང་ཕྱུག་གང་དེའི་སྨོན་ལམ་མཐུ། །འདི་ལས་དགེ་བ་གང་ཞིག་ཐོབ་གྱུར་པ། །དེ་ནི་འགྲོ་ཀུན་སངས་རྒྱས་ཐོབ་ཕྱིར་བསྔོ། །བདག་ཀྱང་འཁོར་བ་ཇི་སྲིད་གནས་ཀྱི་བར། །སྲིད་པར་གནས་ནས་སེམས་ཅན་དོན་སྒྲུབ་ཤོག །ཅེས་སློབ་དཔོན་ཆེན་པོ་སྤྱོད་པ་པའི་ལུགས་ཀྱི། དཀྱིལ་འཁོར་ཆོ་གའི་ལག་ལེན་གསལ་བྱེད་བདེ་བ་ཆེན་པོའི་ཆར་ཡངས་ཞེས་བྱ་བ་འདི་ཡང་རྒྱལ་ཁམས་པ་ཏཱ་ར་ནཱ་ཐས་ནགས་རྒྱལ་གྱི་དབེན་གནས་སུ་སྦྱར་བའོ། །ལཱུ་ཡི་པའི་དབང་ཆོག་ཀྱང་ནག་པོ་སྤྱོད་པའི་དཀྱིལ་ཆོག་ལ་གཞི་གདན་བྱེད་ཕྱིན་ཆད། དཀྱིལ་ཆོག་གཞན་དང་གོ་བསྟུན་མ་སྦྱར་བར། འདིར་བཤད་པ་ཁོ་ན་བཞིན་བྱས་ན་ཡང་ཤིན་ཏུ་ལེགས་པ་ཡིན་ནོ། །དགེ་ལེགས་འཕེལ།། །།མངྒ་ལཾ། དགེ་ལེགས་ཚོགས་གཉིས་བྱེ་བས་བསྐྲུན་པའི་སྐུ། །མཆོག་སྤྲུལ་དགེ་འཕེལ་ཐུབས་བསྐྱེད་ཆུ་གཏེར་ལས། །ཆུ་སྦྱོར་ཆོས་སྦྱིན་ནོར་བུའི་གཟི་བྱིན་གྱིས། ཁམས་གསུམ་འགྲོ་བའི་རྒྱུད་པ་དབྱིངས་སུ་ཞི། །ཕ་ཡབ་བརྩོན་ལོ། མ་ཡུམ་སྒྱོ་མོ་སོགས། འབྲེལ་ཚད་ཕྲ་རགས་འཁོར་བའི་མཚོ་ལས་སྒྲོལ། འོད་གསལ་གདོད་མའི་ལྷ་སྐུ་མྱུར་མཛོད་ཏེ། བཅུ་གསུམ་ལ་མངའ་དང་ཡོངས་བསྒྱུར་ཤོག །