དཔལ་འཁོར་ལོ་སྡོམ་པའི་དཀྱིལ་འཁོར་གྱི་ཆོ་ག་བདེ་ཆེན་འཇུག་ངོགས།
དཔལ་འཁོར་ལོ་སྡོམ་པའི་དཀྱིལ་འཁོར་གྱི་ཆོ་ག་བདེ་ཆེན་འཇུག་ངོགས་ཞེས་བྱ་བ་བཞུགས།
ཨོཾ་སྭཱ་སྟི། དཔལ་འཁོར་ལོ་སྡོམ་པའི་དཀྱིལ་འཁོར་གྱི་ཆོ་ག་བདེ་ཆེན་འཇུག་ངོགས་ཞེས་བྱ་བ། བླ་མ་དང་དཔལ་ཧེ་རུ་ཀ་ལ་ཕྱག་འཚལ་ལོ། །དཔལ་ལྡན་ཁམས་གསུམ་དབང་ཕྱུག་ཐུགས་རྗེའི་སྟོབས། །བདེ་ཆེན་རྡོ་རྗེ་འཆང་དབང་ཧེ་རུ་ཀ །དཔག་ཡས་མཁའ་འགྲོ་དྲ་བར་མཉམ་སྦྱོར་བ། །ཡེ་ཤེས་ལྷན་ཅིག་སྐྱེས་སྐུ་དེ་ལ་འདུད། །གང་ཞིག་དཀྱིལ་འཁོར་ཆོ་ག་བདུད་རྩིའི་སྒོ། །བརྒྱ་ཕྲག་ཕྱེ་ལས་ཐར་མཆོག་ཁང་བཟང་དུ། །མཐའ་ཡས་སྐྱེ་བོ་འཇུག་པའི་དགའ་སྟོན་ཅན། །གྲུབ་པའི་འབྲས་བུ་སྦྱིན་འདི་ཡ་མཚན་ཆོས། །དེ་ལ་སློབ་དཔོན་དམ་པ་བསྒོམ་པ་དང་བཟླས་པས་རང་ཉིད་བྱིན་གྱིས་རློབས་པའི་གནས་ཐོབ་པ་དག་གིས་སློབ་མ་དམ་པ་ཐེག་པ་མཆོག་འདིར་མོས་པའི་སྐལ་བ་ཅན་དག་དབང་བསྐུར་བ་ཡང་དག་པར་སྦྱིན་ནས་རྗེས་སུ་བཟུང་བར་བྱའོ། །དབང་བསྐུར་བ་དེ་ཡང་དཀྱིལ་འཁོར་བྱ་བ་སྔོན་དུ་འགྲོ་བ་ཅན་ཡིན་ནོ། །དེ་ལ་འདིར་དེ་ཁོ་ན་ཉིད་བཅུ་གཅིག་སྟེ། གསོལ་གདབ་བསྙེན་པ་ས་ཆོག་དང༌། །སྟ་གོན་ཐིག་གདབ་ཚོན་ཡང་དགྱེ། །རྒྱན་དགོད་སྒྲུབ་པ་བདག་ཉིད་འཇུག །སློབ་བཟུང་རྗེས་ཀྱི་བྱ་བའོ། །དེ་ལྟར་ན་སློབ་མའི་གསོལ་བ་གདབ་པ། དབང་གི་དོན་དུ་ཁ་གསོས་བསྙེན་པ། སའི་ཆོ་ག སྟ་གོན་
དུ་གནས་པ། ཐིག་གདབ་པ། ཚོན་དབྱེ་བ། རྒྱན་དང་ཡོ་བྱད་དགོད་པ། དཀྱིལ་འཁོར་བསྒྲུབ་པ། བདག་ཉིད་འཇུག་པ། སློབ་མ་བཟུང་བ། རྗེས་ཀྱི་བྱ་བའོ། །དང་པོ་གསོལ་བ་གདབ་པ་ནི། སློབ་མས་མཎྜལ་ཕུལ་བ་ནི། ཐམས་ཅད་མཁྱེན་པ་སྟོན་པ་པོ། །འཇིག་རྟེན་རྣམས་ཀྱི་འདྲེན་མཛད་ལྷ། །འཁོར་བ་འདམ་གྱི་ཚོགས་ནང་དུ། །བྱིང་བ་སྐྱབས་མེད་བདག་ལ་སྐྱོབས། ཞེས་ལན་གསུམ་གསོལ་བ་གདབ། སློབ་དཔོན་གྱིས། འཁོར་ལོའི་མཆོད་པ་རིམ་ཇི་བཞིན། །ཁྱོད་ཀྱིས་ཐམས་ཅད་འབྱོར་གྱུར་ཏམ། །གུས་པས་རྣལ་འབྱོར་མ་རྣམས་དང༌། །རྣལ་འབྱོར་དགའ་བར་བྱེད་ནུས་སམ། ཞེས་དྲིས་པ་ལས། འབྱོར་གྱུར་ཏེ། ཞེས་དང༌། བྱེད་ནུས་སོ་ཞེས་ལན་བཏབ་བོ། །ཡང་འདི་སྐད་ཅེས། དམ་ཚིག་སྐྱོང་ཞིང་སྟོན་བྱེད་པ། །བུ་ཁྱོད་ཀྱིས་ནི་སྤྲོ་གྱུར་ཏམ། །ཞེས་པ་ལ། བདག་ནི་རབ་ཏུ་སྤྲོ་གྱུར་ཏོ། །ཞེས་ལན་བཏབ། སྐབས་འདིར་སློབ་མ་ལ་བགེགས་དང་སྡིག་པ་སྦྱང་བ་བྱས་པའི་རྗེས་སུ། སྒྲུབ་ཐབས་ནས་འབྱུང་བ་ལྟར་བསྲུང་འཁོར་སྒོམ། ཞལ་བཞི་པ་བཟླས་པའི་སྲུང་སྐུད་མགུལ་བར་བཏགས།
སྨོན་ལམ་དང་བཀྲ་ཤིས་བརྗོད་པ་སོགས་བྱའོ། །གཉིས་པ་བསྙེན་པ་ལ། ལྷ་ཉེ་བའི་བསྙཻན་པ་ནི། སྒྲུབས་ཐབས་བཞིན་ལྷའི་རྣལ་འབྱོར་དཀྱིལ་འཁོར་འཁོར་ལོ་རྫོགས་པར་བསྒོམས་ནས། གཙོ་བོ་ཡབ་ཡུམ་གྱི་སྙིང་པོ་ཁྲི་ཕྲག་གསུམ། སྙིང་པོའི་རྣལ་འབྱོར་མ་བཞི་ལ་ལྔ་སྟོང་ལྔ་བརྒྱ་བཟླ། འཁོར་ལོ་གསུམ་ལ་ཁྲི་ཕྲག་གཉིས་རེ། སྒོ་མཚམས་མ་བརྒྱད་ལའང་ལྔ་སྟོང་ལྔ་བརྒྱ་རེ་བཟླ་སྟེ། རྒྱས་པའི་ལུགས་ཡིན་ལ། འཁོར་ལོ་གསུམ་གྱི་བཟླས་པ་སྤངས་པ་འབྲིང་པོ་དང༌། གཙོ་བོ་ཡབ་ཡུམ་ཁོ་ན་བཟླ་བ་བསྡུས་པའོ། །སྙིང་པོའི་རྣལ་འབྱོར་མ་བཞི་ཞལ་བཞི་པ་དང་སྤེལ་བ་དང༌། སྒོ་མཚམས་མ་བརྒྱད་ལ་ཡབ་ཀྱི་རྐང་བརྒྱད་དང་སྤེལ་བའི་ལུགས་ཀྱང་ཡོད་དེ། དེ་ལྟར་འགྲུབ་ན་ཤིན་ཏུ་ལེགས་སོ། །བགེགས་ཞི་བས་བསྙེན་པ་ནི། འོག་ཏུ་འཆད་པ་ལྟར་ལས་བུམ་དུ་ལས་ཀྱི་ལྷ་སྒྲུབ་པ་ནི་ངེས་པ་ཡིན་ལ། རྒྱ་བོད་ཀྱྀ་བླ་མ་སྔ་རབས་པ་མང་པོའི་བཞེད་པས། བུམ་ཆོག་བཞིན་དུ་དཀྱིལ་འཁོར་གྱི་ལྷ་ཐམས་ཅད་སྒྲུབ་པར་བཤད་དེ། དེ་ལྟར་ཡང་གྲུབ་ན་བཟང་ངོ༌། །ཡེ་ཤེས་དབབ་པའི་བསྙེན་པ་ནི། ཐོད་པའི་ནང་དུ་ཡེ་ཤེས་འབེབས་པས་རྫས་རྣམས་བཞག་ལ། ཨོཾ་ཏིཥྛ་མཧཱ་ཀྲོདྡྷ་སོགས་དང༌། དབྱངས་སྐྱོང་བའི་སྔགས་བཟླ་བ་ཡིན་ཏེ། བདག་ཉིད་གཙོ་བོའི་ང་རྒྱལ་གྱིས་རྫས་ལ་སྔགས་ཀྱི་ཡིག་འབྲུ་འབེབས་པའི་ཚུལ་གྱིས་སོ། །དེ་ལྟར་བསྙེན་པ་གསུམ་ཀ་མ་འགྲུབ་ན། དང་པོ་ལྷ་ཉེ་བའི་བསྙེན་པ་ཉིད་གཙོ་བོ་ཡིན་པའི་དེ་བྱའོ། །བསྙེན་པ་དང་གསོལ་གདབ་ལ་སྔ་ཕྱི་ངེས་པ་མེད་པས་ཇི་ལྟར་བདེ་བ་ཡིན་ནོ། །གསུམ་པ་ས་ཆོག་ལ། ས་བརྟག་པ། ས་བསླང་བ། སྦྱང་བ། བཟུང་བ་བཞི་ལས། དང་པོ་ནི། སྤྱི་དང་འདྲ་ཞིང་གཞུང་དུའང་ལྟའོ། །གཉིས་པ་ལ་གནས་ཀྱི་བདག་པོ་ལས་བསླང་བ། འཇིག་རྟེན་
སྐྱོང་བ་ལས་བསླང་བ། དཀྱིལ་འཁོར་ལྷ་ལས་བསླང་བ། སའི་ལྷ་མོ་ལས་བསླང་བའོ། །དང་པོ་ནི། བདག་ཉིད་དཔལ་ཧེ་རུ་ཀར་གྱུར། གཏོར་མ་དང་མཆོད་པ། སུམྦྷས་བསངས། སྭབྷཱ་ཝས་སྦྱངས། ཨོཾ་ཨཱཿཧཱུཾ། གིས་བྱིན་གྱིས་རླབས། ཨོཾ་གནས་བདག་གཞི་བདག་གྲོང་བདག་གཉུག་མར་གནས་པ་རྣམས་དང༌། སརྦ་ཀྵེ་ཊ་ཕ་ལ་ས་པ་རི་ཝ་རེ་བྷྱ། ཨོཾ་ཨ་ཀཱ་རོ་མུ་ཁཾ་སརྦ་དྷརྨཱ་ཎཱཾ་ཨཱ་ཏྱ་ནུཏྤནྣ་ཏྭ་ཏ་ཨོཾ་ཨཱཿཧཱུཾ་ཕཊ་སྭཱཧཱ། ལན་གསུམ་མམ་ལྔ་སོགས་ཀྱིས་ཕུལ། ཨརྒྷཾ༴ ནས་ཤཔྟའི་བར་གྱིས་མཆོད། གང་ཡང་འདིར་གནས་ལྷ་དང་ཀླུ། གནོད་སྦྱིན་སྲིན་པོའམ་གཞན་དག་ལ། །དཀྱིལ་འཁོར་དོན་དུ་ས་འདི་ནི། །བདག་ཞུ་ཁྱེད་ཀྱིས་སྩལ་དུ་གསོལ། ཞེས་ལན་གསུམ་གསོལ་བ་བཏབ་སྟེ། རོལ་མོའི་སྒྲ་དང་བཅས་ཏེ་ཕྱིར་དོར། གཉིས་པ་ནི། དུར་ཁྲོད་བརྒྱད་ན་གནས་པའི་ཕྱོགས་སྐྱོང་ལ་སོགས་པ་འཇིག་རྟེན་སྐྱོང་བ་ཐམས་ཅད་སྤྱན་དྲངས་པར་མོས་ཏེ། ཨོཾ་ཨཀྐ་དྷ་ན་བསྦན་དྷ་ན་ཁཀྑཱ་ད་ན་སརྦ་དུཥྟ་ན་ཧ་ན་ཧ་ད་གྷཱ་ཏ་ཡ། མ་མ་ཤཱན་ཏི་ཀུ་རུ་ཧཱུཾ་ཧཱུཾ་ཕཊ་ཕཊ་ཛཿསྭཱཧཱ། ཞེས་པས་བཀུག་སྟེ། ཨོཾ་ཁ་ཁ་ཁྭ་ཧི་ཁྭ་ཧི་ནས་མ་མཱ་སརྦ་སིདྡྷི་མེ་པྲ་ཡཙྪནྟུ་སྭཱཧཱ། ལན་གསུམ་སོགས་ཀྱིས་ཕུལ། ཨརྒྷཾ༴ ལ་སོགས་པའི་མཆོད། ཁམས་གསུམ་གནས་པའི་ལྷ་དང་ཀླུ །གནོད་སྦྱིན་དྲི་ཟ་ལྷ་མ་ཡིན། །གང་དག་རྫུ་འཕྲུལ་ཆེ་ལྡན་ཞིང༌། །འབྱུང་པོ་བསྟན་པ་ལ་དགའ་བས། །བདག་ལ་དགོངས་པར་མཛད་དུ་གསོལ། །སངས་རྒྱས་རྣམས་ལ་མཆོད་པ་
དང༌། །སེམས་ཅན་རྣམས་ལ་ཕན་དོན་དུ། །ས་ཕྱོགས་དགེ་བ་འདི་ཉིད་དུ། །དམ་པའི་དཀྱིལ་འཁོར་ཆེར་འབྱུང་བ། །ཇི་ལྟར་བསམ་པའི་ལས་བྱེད་ནི། །ཁྱེད་ཀྱི་བར་ཆད་མ་བྱེད་པར། །དགེ་བའི་གྲོགས་པོ་ཉིད་དུ་མཛོད། ཅེས་ལན་གསུམ། གཙྪ་གཙྪ་སྭ་སྠ་ནཾ། ཞེས་རོལ་མོ་དང་བཅས་ཏེ་གཏོར་མ་ཕྱིར་དོར། གསུམ་པ་ནི་དཀྱིལ་འཁོར་གྱི་ས་གཞིར་སྐྱང་ནུལ་བྱ། ཨོཾ་ཨཱཿཧཱུཾ། ལན་བཞི་བཅུ་ཞེ་གཅིག་བརྗོད་ལ་ལྷའི་གནས་སུ་དྲི་བཟང་གིས་ཐིག་ལེ་བྱ། མཉྫའི་སྟེང་དུ་ཐོད་པ་བཞག་ལ། དེར་མེ་ཏོག་འབུལ་བཞིན་པས། ལྷ་ཐམས་ཅད་ཀྱི་སྙིང་པོ་ལན་གསུམ་གསུམ་བརྗོད། སྤྲོ་ཞིང་དགོས་ན། དབུས་ཀྱི་ལྟེ་བར་འཁོར་ལོ་བདེ་མཆོག །ཅེས་པ་ནས། མེ་དཔུང་རབ་ཏུ་འབར་བའི་དབུས་ན་བཞུགས་པའོ། །ཤར་དུ་མཁའ་འགྲོ་མ་ནག་མོ་ནས། རྡོ་རྗེའི་འཕྲེང་བས་མཚན་པའི་བར་ལ། མཁའ་གསང་བྱིན་རླབས་རྗེས་ཆགས་དང་བཅས་པ་དོར། ལྷག་མ་རྣམས་བརྗོད་དོ། །བསྡུ་ན། འཁོར་ལོ་བདེ་མཆོག་ལྷ་དྲུག་ཅུ་རྩ་གཉིས་སྐད་ཅིག་གིས་གྲུབ་པར་གྱུར། ཞེས་བརྗོད། སྒྲུབ་ཐབས་ནས་འབྱུང་བ་ལྟར། ཨརྒྷཾ༴ ནས་ཤཔྟའི་བར་སྔགས་ཀྱིས་མཆོད། རྐང་བརྒྱད་གཉིས་ཀྱིས་བསྟོད། དུས་གསུམ་འབྱུང་བའི་མགོན་པོ་རྣམས། །བདག་ལ་བརྩེ་བས་དགོངས་སུ་གསོལ། །མགོན་པོ་རྒྱལ་བ་སྲས་མཆོད་ཅིང༌། །སློབ་མ་རྣམས་ལ་སྨན་སླད་དུ། །དཔལ་ལྡན་རྡོ་རྗེ་ཧེ་རུ་ཀའི། །ཀྱིལ་འཁོར་དམ་པ་འབྲི་འཚལ་བས། །དཔའ་བོ་རྣལ་འབྱོར་མ་རྣམས་ཀྱིས། །བདག་ལ་བྱིན་
རླབས་མཆོག་གནང་མཛོད། ཅེས་ལན་གསུམ་གསོལ་བ་གདབ། ཡོ་ག་ཤུདྡྷོ་སོགས་རང་ལ་སྟིམ། ཡང་ན། བཛྲ་མུཿས་གཤེགས་སུ་གསོལ། བཞི་པ་ནི། ས་ནོན་གྱི་ཕྱག་རྒྱས་སོར་མོ་དབུས་མ་གསུམ་པ་ལ་རེག་སྟེ། ཊཀྐི་ནི་ཧཱུཾ་ཛཿ ལན་གསུམ། ཧཾ་གི་སྒྲ་དང་ཧཱུཾ་གི་འོད་ཀྱིས་བསྐུལ་ནས་ས་འོག་ནས་སའི་ལྷ་མོ་འཁོར་དང་བཅས་པ་འབྱུང༌། ཚོམ་བུའི་སྟེང་དུ་བྱོན་པ་ནི་སའི་ལྷ་མོ་གསེར་གྱི་མདོག་ཅན་ཞི་བའི་ཉམས་དང་ལྡན་པ། ཕྱག་གཉིས་ཀྱིས་བདུད་རྩིས་གང་བའི་རིན་པོ་ཆེ་བུམ་པ་བསྣམས་པ་རྒྱན་དང་ན་བཟའ་དཀར་པོ་ཅན། ཀྱེ་རིག་པ་འཛིན་པ་བདག་གིས་དཀྱིལ་འཁོར་གྱི་ལས་ཅི་བགྱི་བ་བཀའ་སྩལ་དུ་གསོལ། ཞེས་གསུང་བར་གྱུར། བདག་བསྐྱེད་ལྟར་མཆོད་པ་བྱིན་གྱིས་བརླབ། ཨོཾ་པྲི་ཐཱི་ཝི་དེ་ཝཱི་བྷྱཿ ཨརྒྷཾ་པྲ་ཏཱིཙྪ་སྭཱཧཱ། དེ་སྔོན་དུ་འགྲོ་བའི་པཱ་དྱཾ། པུཥྤེ། དྷུ་པེ། ཨཱ་ལོ་ཀེ གནྡྷེ། ནཻ་ཝི་ཏེ། ཤཔྟ། གྷཎྜེ་སོགས་རོལ་མོ། གཏོར་མ་སུམ་བྷ་སྭབྷཱ། སྟོང་པའི་ངང་ལས་ཨ་ལས་ཀ་པཱ་ལ་ཡངས་ཤིང་རྒྱ་ཆེ་བའི་ནང་དུ་ཤ་ལྔ་དང་བདུད་རྩི་ལྔ་ཞུ་བ་ལས་བྱུང་བའི་གཏོར་མ་ཡེ་ཤེས་ཀྱི་བདུད་རྩིའི་རྒྱ་མཚོར་གྱུར། ཨོཾ་ཨཱཿཧཱུཾ་ཧ་ཧོ་ཧྲཱིཿ ཨོཾ་པྲི་ཐཱི་ཝི་དེ་ཝཱི་བྷྱཿ ན་མཿསརྦ་ཏ་ཐཱ་ག་ཏ་བྷྱོ་བི་ཤྭ་མུ་ཁེ་བྷྱཿ སརྦ་ཐཱ་ཁཾ་ཨུཏྒ་ཏེ་སྥ་ར་ཎ་ཨི་མཾ་ག་ག་ན་ཁཾ། གྲྀཧྞ་དཾ་བ་ལིཾ་ཏ་ཡེ་སྭཱཧཱ། ལན་གསུམ། ཨོཾ་ཚུར་བྱོན་ཚུར་བྱོན་ས་ཡི་ནི། །ལྷ་མོ་ཆེན་མོ་འཇིག་རྟེན་
ཡུམ། །རིན་ཆེན་ཀུན་གྱི་རབ་གང་མ། །བཟང་པོའི་རྒྱན་གྱི་རྣམ་བརྒྱན་མ། །དོ་ཤལ་རྐང་གདུབ་སྒྲ་ལྡན་མ། །རྡོ་རྗེ་སེམས་དཔའ་རབ་མཆོད་མ། །མཆོད་གཏོར་འདི་དག་མཆོད་ནས་སུ། །དཀྱིལ་འཁོར་ལས་ནི་ལེགས་གྲུབ་མཛོད། །སྐྱོབ་པ་སངས་རྒྱས་ཐམས་ཅད་ཀྱི། །སྤྱོད་པའི་ཚུལ་དང་ཁྱད་པར་གྱི། །ས་དང་ཕ་རོལ་ཕྱིན་པ་ལ། །ལྷ་མོ་ཁྱོད་ནི་དཔང་དུ་གྱུར། །ཧེ་རུ་ཀ་དཔལ་དཔའ་བོ་ཡིས། །ཇི་ལྟར་བདུད་ཀྱི་སྟོབས་བཅོམ་པ། །དེ་བཞིན་བདག་གིས་བདུད་སྡེ་ལས། །རྒྱལ་བར་བྱས་ཏེ་དཀྱིལ་འཁོར་བྲི། ལན་གསུམ། སའི་ལྷ་མོའི་འཁོར་དང་བཅས་པ་རྣམས་མཆོད་གཏོར་དམ་པ་འདིས་ཚིམ་པར་མཛད་པ། བདག་གི་བསྙེན་པ་རྫོགས་པའི་དཔང་པོ་ཡང་མཛད་ཅིང༌། དཀྱིལ་འཁོར་འབྲི་བའི་དོན་དུ་སའི་ཕྱོགས་འདི་བདག་ལ་གནང་བར་མཛད་དུ་གསོལ། ཀྱེ་རིག་པ་འཛིན་པ་ས་གཞི་སེམས་མེད་ཅིང་དག་པར་འཚལ་བའི་ལས་ཅི་བདེ་བར་མཛོད་ཅིག ཨོཾ་པྲ་ཐཱི་དེ་ཝཱི་བྷྱཿཨརྒྷཾ་པྲ་ཏིཙྪ་སྭཱཧཱ། ཨོཾ་བཛྲ་ཨུ་ཏི་ལ་སའི་ལྷ་མོ། ནམ་མཁར་བཞུགས་པར་གྱུར། རྒྱ་བོད་ཁ་ཅིག་ས་ལྷ་ལས་སླངས་པ་མི་བྱེད་པའང་ཡོད་དེ་བྱེད་པ་ལེགས་སོ། །གསུམ་པ་སྦྱངས་པ་ལ་གསུམ་གྱི། མེས་སྦྱངས་པ་ནི། ཞི་བ་དང་དྲག་པོའི་སྦྱིན་བསྲེག་གི་བགེགས་དང་མི་ཤིས་པ་སྦྱངས་པའོ། །གཉིས་པ་ཆུས་སྦྱངས་པ་ནི། ལས་ཐམས་ཅད་པ་འདས་པའི་ཆུས་གཏོར་བའོ། །གསུམ་པ་སའི་
བྱ་བ་སྦྱངས་པ་ནི། རྐོ་སྦྱངས་ཟུག་རྔུ་དབྱུང་བ་སོགས་ཡིན་ལ། དེ་དག་དངོས་སུ་བྱེད་པ་མེད་ན་ཏིང་ངེ་འཛིན་གྱིས་སྦྱངས་ཏེ། ཨོཾ་བྷུ་ཁཾ་ནམ་མཁའི་རང་བཞིན་དུ་གྱུར། ཧཱུཾ་ལཾ་ཧཱུཾ་རྡོ་རྗེའི་རང་བཞིན་དུ་གྱུར། ཨོཾ་མེ་དྷི། ནས་བནྡྷ་ཧཱུཾ། ཞེས་སོ། །རྒྱ་བོད་ཁ་ཅིག་སྒྲུབ་ཐབས་ལྟར། སྐྱབས་འགྲོ་ནས་ཚོགས་ཞིང་སོགས་མཚམས་སུ་འདི་བྱེད་ཅིང༌། དེ་རྣམས་ཀྱིས་ས་བྱིན་གྱིས་རླབས་པར་བསམ་ལ་ཡིག་བརྒྱ་བརྗོད་པ་སོགས་བྱེད་དེ་འགལ་བ་མེད་ལ་ངེས་པར་དགོས་པ་ནི་མ་ཡིན་ནོ། །བཞི་པ་བཟུང་བ་ལ། བྱིན་གྱིས་རླབས་པ་དང་སྲུང་བ་གཉིས་ཀྱི། དང་པོ་ལ་གསུམ། ལྷའི་རྣལ་འབྱོར་གྱིས་བྱིན་གྱིས་རླབས་པ། དྲག་པོའི་འཕྲིན་ལས་ཀྱི་བྱིན་གྱིས་རླབས་པ། སྟང་སྟབས་ཀྱི་བྱིན་གྱིས་རླབས་པའོ། །དང་པོ་ནི་དཀྱིལ་འཁོར་གྱི་ས་གཞིར་འདུག་ལ། སྐྱབས་འགྲོ་ནས་བཟླས་པ་རྫོགས་ཀྱི་བར། སྒྲུབ་ཐབས་ལས་འབྱུང་བ་ལྟར་ཉམས་སུ་ལེན་པའོ། །གཉིས་པ་ནི། ཕྱོགས་བཞི་སློབ་དཔོན་སོ་སོའི། ཐོག་མར་ཤར་ནས་མཆོད་པ་བྱིན་རླབས་བདག་བསྐྱེད་ལྟར་བྱ། ཨརྒྷཾ་སོགས་དང་རྐང་བརྒྱད་ཀྱིས་བསྟོད། མཎྜལ་ཕུལ། རྡོ་རྗེ་སློབ་དཔོན་ཆེན་པོ་ལ་དཀྱིལ་འཁོར་གྱི་སློབ་དཔོན་མཛད་པའི་དོན་དུ་དབུལ་བར། སོགས་བྱ། ལྷོ་མས། དེ་བཞིན་གཤེགས་པ་ཀུན་ཞི་བ། །དེ་བཞིན་གཤེགས་པ་ཀུན་གྱི་གནས། །ཆོས་ཀུན་བདག་མེད་པ་ཡི་མཆོག །དཀྱིལ་འཁོར་དམ་པ་བཤད་དུ་གསོལ། ཤར་མས། མཚན་རྣམས་ཐམས་ཅད་ཡང་དག་རྫོགས། །མཚན་མིན་ཐམས་ཅད་ཡང་དག་སྤངས། །ཀུན་ཏུ་
བཟང་པོ་སྐུ་ཡི་མཆོག །དཀྱིལ་འཁོར་དམ་པ་བཤད་དུ་གསོལ། བྱང་མས། ཞི་བའི་མཆོག་ནི་ཆོས་ལས་བྱུང༌། །ཡེ་ཤེས་སྤྱོད་པ་རྣམ་སྦྱོང་བ། །ཀུན་ཏུ་བཟང་པོ་གསུང་གི་མཆོག །དཀྱིལ་འཁོར་དམ་པ་བཤད་དུ་གསོལ། ནུབ་མས། སེམས་ཅན་ཀུན་གྱི་སེམས་ཆེན་པོ། །རང་བཞིན་དག་ཅིང་དྲི་མ་མེད། །ཀུན་བཟང་ཐུགས་མཆོག་ཁ་ལོ་སྒྱུར། །དཀྱིལ་འཁོར་དམ་པ་བཤད་དུ་གསོལ། །ཨོཾ་བཛྲ་ཨུ་ཏིཥྛ། སྡོམ་པའི་དཀྱིལ་འཁོར་ནམ་མཁར་བཞུགས་པར་གྱུར། རང་གཙོ་བོའི་ཐུགས་ཀ་ནས་གཙོ་བོ་གཉིས་པར་ཆད། སྐབས་འདིར་རྒྱ་བོད་ཀྱི་སློབ་དཔོན་སྤྲོས་པ་ལ་དགྱེས་པ་རྣམས། རང་ཉིད་ཁྲོ་བོ་ཧཱུཾ་མཛད་ཁམས་གསུམ་རྣམ་རྒྱལ་ཞལ་གསུམ་ཕྱག་དྲུག་པར་བསྐྱེད་པར་འདུག་ནའང་བསྡུས་པ་ལ་གཙོ་བོའི་ང་རྒྱལ་གྱིས་ཆོག་གོ །མིག་གཡས་གཡོན་མ་དང་ཊ་ལས་ཉི་མ་དང་ཟླ་བར་མིག་འབྲས་ཧཱུཾ་ལས་རྡོ་རྗེ་ནག་པོ་ཁྲོ་བོའི་ཚོགས་ཀྱི་འོད་ཟེར་འཕྲོ་བ་དང༌། རྐང་མཐིལ་གཉིས་སུ་ཨཱཿལས་སྣ་ཚོགས་རྡོ་རྗེ་འོད་ཟེར་འཕྲོ་བ། ཨོཾ་པྲ་ཎ་མི་སརྦ་ཏ་ཐཱ་ག་ཏཾ་བཛྲ་དྲིཥྟ་མ་ཊ། རྡོ་རྗེ་ལྟ་བས་གཡས་གཡོན་དུ་བསྐོར་ཏེ། ལྟ་བས་བགེགས་བསྐྲད། ས་ཕྱོགས་འདིར་སེམས་ཅན་གྱི་དོན་རྩོམ་གྱིས། ལྷ་དང་ཀླུ་དང་གནོད་སྦྱིན་དང་དྲི་ཟ་དང་སྲིན་པོ་དང་སྲིན་མོ་ལ་སོགས་པ། གང་དག་གནས་པའི་སའི་བདག་པོ་མྱུར་དུ་སོངས་ཤིག །འདིར་དཔལ་ཧེ་རུ་ཀའི་བཀའ་ནོས་ལ་མྱུར་བ་ཉིད་དུ་སོངས་ཤིག །གང་དག་མི་འགྲོ་བ་དེ་ལ་ངའི་ཡེ་ཤེས་ཀྱི་རྡོ་རྗེ་དང་ཁ་ཊྭཾ་ག་འདིས་སྤྱི་བོ་ནས་
རྣམ་པ་བརྒྱད་དགས་པར་བྱའོ། །ལན་གསུམ། རེ་རེའི་མཐར་སུམ་བྷ་བཟླས་ཤིང་འབུད་དཀྲོལ་བྱ། ཡུངས་དཀར་གྱིས་ས་གཞི་ལ་གཏོར་རོ། །གསུམ་པ་ནི། ཧཱུཾ་གླུར་ལེན་ཅིང་དབང་ལྡན་དུ་སོང་ལ། རྡོ་རྗེ་རྩེ་གཅིག་པ་དང༌། རྩེ་གསུམ་པ་དང༌། རྩེ་ལྔ་པའི་འགྲོས་ཀྱིས་བསྐོར་བ་དང༌། ཤར་དུ་གཡོན་བརྐྱང༌། བྱང་དུ་ས་ག ནུབ་ཏུ་ཟླུམ་པོ། ལྷོར་གཡས་བརྐྱང་རྣམས་ཐབས་ཤེས་ཀྱི་དབྱེ་བས་བརྒྱད་དུ་འགྱུར་བ་རྣམས་དང༌། གཞན་ཡང་དབུས་སུ་སྣ་ཚོགས་རྡོ་རྗེ་འབྲི་ཞིང་མཉམ་པའི་རྐང་སྟབས་དང་ཇི་ལྟར་རིག་པར་གྱེན་དུ་འདེགས་པ། ཐུར་དུ་བསྐྱོད་པ་དང༌། ཐད་ཀར་བསྐྱོད་པ་དང༌། གཡས་དང་གཡོན་དུ་བསྐོར་བ་དང༌། འབྱེད་འཁྱུད་དང་ཀུ་ཙ་ཉེད་པ་དང༌། ནག་ག་ཧ་ད་ན་ད་ཀ། ཙུ་ན་ཤ་དང་སྐྲ་གྲོལ་བ། ཞེས་བརྒྱད་དང༌། རྐང་པ་བསྐྱོད་དང་ལག་པ་བསྐྱོད། །སྨིན་མ་འདེགས་དང་རབ་རྒྱས་གྲང༌། །ཅུང་ཟད་ངོ་ཚའི་ཟུར་མིག་དང༌། །བརླ་རྒྱས་ལྟ་ན་སྡུག་པ་དང༌། །མིག་ཡངས་གར་ནི་བྱེད་འགྱུར་ཞིང༌། ཁ་ཡི་པདྨ་འཛུམ་པ་དང༌། །ཅུང་ཟད་དམར་བའི་མཆེ་བ་འཕྱང༌། །ཀུན་ད་ལྟར་དཀར་སོ་ཡི་འཕྲེང༌། །ཞེས་པ་ལྟར་གར་གྱི་རྣམ་པར་རོལ་པ་རྣམས་བྱ་ཞིང༌། སྟང་སྟབས་ཀྱི་སྤྲོས་པ་ལ་མི་དགའ་ན། ཇི་ལྟར་རིགས་པའི་བསྐོར་བ་གསུམ་བྱའོ། །གཉིས་པ་བསྲུང་བ་ལ་གཉིས་ཀྱི། དང་པོ་ས་གཞི་བསྲུང་བ་ནི། ཕུར་བུ་བཅུའམ་གཅིག་བསངས་སྦྱངས། སྟོང་པའི་ངང་ལས་ཧཱུཾ་བཅུ་ལས་བྱུང་བའི་སྟེང་དང་ཤར་གྱི་ཕུར་བུ་ཁ་གདོང་མ་ནག་མོ། །སོགས་སྒོ་མཚམས་མ་བརྒྱད་མངོན་རྟོག་བཞིན་ནམ། གཅིག་ལས་མེད་ན། བདུད་རྩི་འཁྱིལ་པ་སྐུ་མདོག་ནག་པོ་རྡོ་རྗེ་འཕྱར་ཞིང༌། སྡིགས་མཛུབ་དང་བཅས་པའི་ཞགས་པ་ཐུགས་ཀར་གཏོད་པ་སྟེ། གང་ལྟར་ཡང་ལྟེ་བ་མན་ཆད་ཕུར་བུའི་དབྱིབས་ཅན་དུ་ནས་རང་འདྲའི་
ཡེ་ཤེས་སེམས་དཔའ་ཕཻཾ། ཛཿཧཱུཾ་བཾ་ཧོཿ སུམྦྷ༴ མང་དུ་བཟླས། འདིར་ཡང་རྒྱ་བོད་སྤྲོས་པ་ལ་དགྱེས་པ་རྣམས་མངོན་བརྗོད་ལས་འབྱུང་བའི་ཁྲོ་བོ་བཅུར་བསྐྱེད་པ་བཞེད་དོ། །དེ་ནས། ཨོཾ་སུམྦྷ༴ ཞེས་པ་ནས་སྟེང་འོག་ཕྱོགས་མཚམས་ཐམས་ཅད་བཅིངས་པར་གྱུར། གྱིས་བར་བསྲུང་འཁོར་བཞིན། ཕུར་བུ་བསྲུང་བའི་ཁྲོ་མོ་རྣམས་སྤྲུལ་ཕུར་བུ་བསྲུང་བའི་དོན་དུ་ཕྱོགས་བཅུར་བཞུགས་པར་གྱུར། ཨོཾ་བཛྲ་གནྡྷེ་ཨཱཿཧཱུཾ། དེ་བཞིན་དུ། པུཥྤེ། བསྟྲ། སརྒ་པ། ཨོཾ་བཛྲ་དྷུ་པེ་ཨཱཿཧཱུཾ་ཇི་སྲིད་དཀྱིལ་འཁོར་ཆེན་པོའི་བྱ་བ་མཐར་མ་ཕྱིན་གྱི་བར་དུ་བགེགས་ཐམས་ཅད་བཟློག་པའི་འཕྲིན་ལས་མཛོད་ཅིག གཉིས་པ་བདག་ཉིད་བསྲུང་བ་ནི། རང་གི་སྙིང་གར་ཨོཾ་ཨཾ་ཧེ་ནས་སུམྦྷ༴ ལན་གཉིས་ཀྱིས་ཕྱོགས་བཅིངས་པའི་བར། མཉམ་ལངས་བསྲུང་བའི་རྣལ་འབྱོར་གྱི་སྐབས་དང་འདྲ། སྨོན་ལམ་དང་བཀྲ་ཤིས་ཅི་ལྟར་འོས་པར་བྱ་ཞིང་རས་བྲིས་ཀྱི་ཕྱོགས་ལ་ནི་སའི་ཆོ་ག་འདི་མི་དགོས་སོ། །ཉི་མ་དང་པོའི་ཆོ་གའོ། །བཞི་པ་སྟ་གོན་དུ་གནས་པ་ལ། སྟ་གོན་གྱི་སྔ་རོལ་དུ་སྒྲུབ་དགོས་པའི་ཆོ་ག་དང༌། སྟ་གོན་དངོས་སོ། །དང་པོ་ནི། སྔོན་འགྲོ་གཏོར་མ། གནས་ཡོ་བྱིན་གྱིས་རླབས། ཞུ་འབུལ། དཀྱིལ་འཁོར་ཆེན་པོའི་ཏིང་ངེ་འཛིན་རྣམས་སོ། །དེ་ཡང་སྔོན་འགྲོ་གཏོར་མ་ལ་སུམྦྷས་བསངས། སྭ་བྷ་ཝས་སྦྱངས། ཨོཾ་ཨཱཿཧཱུཾ་ཧ་ཧོ་ཧྲཱིཿ ཞེས་བྱིན་གྱིས་རླབས། ཕཻཾ་ཞེས་མགྲོན་རྣམས་སྤྱན་དྲངས། ཨོཾ་ཁ་ཁ་ཁཱ་ཧྀ་ཁཱ་ཧི་ནས་བྷ་ཝནྟུ་ཧཱུཾ་ཧཱུཾ་ཕཊ་ཕཊ་སྭཱཧཱ། ལན་གསུམ། ཨརྒྷཾ་ནས། ཤཔྟའི་བར་གྱིས་མཆོད། ལྷའི་ཚོགས་རྣམས།
ནས་འདོད་པ་ཀུན་འགྲུབ་ཤོག །དཔལ་ལྡན་བླ་མ་དམ་པ་རྣམས་ཀྱི་ཐུགས་ཀྱི་དགོངས་པ་ཁྱད་པར་ཅན་གོང་ནས་གོང་དུ་ཡོངས་སུ་རྫོགས་པའི་ཕྱིར་དང༌། འགྲོ་བ་ནམ་མཁའ་དང་མཉམ་པའི་སེམས་ཅན་ཐམས་ཅད་ཕྱག་རྒྱ་ཆེན་པོ་མཆོག་གི་དངོས་གྲུབ་ཀྱི་གོ་འཕང་ཐོབ་པར་བྱ་བའི་ཕྱིར། བཅོམ་ལྡན་འདས་དཔལ་འཁོར་ལོ་སྡོམ་པའི་དཀྱིལ་འཁོར་ཆེན་པོ་བཞེངས་སུ་གསོལ་ཏེ། བདག་ཉིད་འཇུག་ཅིང་དབང་བླང་བ་དང༌། སློབ་མ་གཞུག་ཅིང་དབང་བསྐུར་བར་འཚལ་ན། དཀར་པོའི་ཕྱོགས་ལ་མངོན་པར་དགའ་བའི་ཕྱོགས་སྐྱོང་བའི་བསྲུང་མ་རྣམས་མཆོད་སྦྱིན་གྱི་གཏོར་མ་རྒྱ་ཆེན་པོ་འདི་བཞེས་ལ། ཇི་སྲིད་དཀྱིལ་འཁོར་ཆེན་པོའི་བྱ་བ་མཐར་མ་ཕྱིན་གྱི་བར་དུ། བགེགས་རྣམས་བཟློག་ཅིང་འདོད་པའི་དོན་ཐམས་ཅད་སྒྲུབ་པའི་འཕྲིན་ལས་མཛོད། གང་དག་ནག་པའི་ཕྱོགས་ལ་མངོན་པར་དགའ་བ་གསང་སྤྱོད་ལྟ་བར་མི་དབང་བ་ཐམས་ཅད་སའི་ཕྱོགས་འདིར་མ་གནས་པར་གཞན་དུ་སོང་ཤིག །སུམྦྷ་བཟླས་དྲག་རོལ་བྱ་གཏོར་མ་ཕྱིར་དོར་རོ། །དེ་ནས་གནས་དང་ཡོ་བྱད་བྱིན་གྱིས་རླབས་པ་ནི། སུམྦྷས་བསངས། སྭ་བྷཱ་ཝས་སྦྱངས། སྟོང་པའི་ངང་ལས། གནས་ཁང་ཧཱུཾ་ཡིག་ལས་བྱུང་བའི་བསྲུང་འཁོར་གྱི་ནང་དུ། བྷཱུཾ་ལས་བྱུང་བའི་གཞལ་མེད་ཁང་གྲུ་བཞི་སྒོ་བཞི་རྟ་བབས་བཞིས་བརྒྱན་པ་མཚན་ཉིད་ཐམས་ཅད་ཡོངས་རྫོགས་པའི་ནང་དུ་ཨ་ལས་ཡེ་ཤེས་ཀྱི་ཀ་པཱ་ལ་ཡངས་ཤིང་རྒྱ་ཆེ་བ། རྣམས་ཀྱི་ནང་དུ། ཨོཾ་ཨཱཿཧཱུཾ་ཞུ་བ་ལས་བྱུང་བའི། ལྷ་རྫས་ལས་གྲུབ་པའི་མཆོད་ཡོན། ཞབས་བསིལ། མེ་ཏོག བདུག་སྤོས། མར་མེ། དྲི་ཆབ། ཞལ་ཟས། རོལ་མོ་ལ་སོགས་པའི་
མཆོད་པ་རྣམས། རྒྱུ་འཇིག་རྟེན་དང་འཇིག་རྟེན་ལས་འདས་པའི་དགེ་བ་ལས་བྱུང་བ། ངོ་བོ་བཟང་ཞིང་རྒྱ་ཆེ་བ། ཡུལ་ནམ་མཁའི་མཐས་ཁྱབ་པ། དུས་འཁོར་བ་ཇི་སྲིད་མ་སྟོང་གི་བར་དུ། བླ་མ་དང་དཀྱིལ་འཁོར་གྱི་འཁོར་ལོའི་ལྷ་ཚོགས་རྣམས་དང༌། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་སྤྱན་ལམ་དུ་འབྱུང་ཞིང་རྒྱས་པར་གྱུར་ཅིག །ཨོཾ་བཛྲ་ཨརྒྷཾ་སྭཱཧཱ། ཨོཾ་བཛྲ་པདྱཾ། དེ་བཞིན་དུ། པུཥྤེ། དྷུ་པེ། ཨཱ་ལོ་ཀེ་གནྡྷེ། ནཻ་ཝི་ཏེ། ཤཔྟ། ཨཱཿཧཱུཾ། ཨོཾ་སརྦ་བིད་པཱུ་ར་པཱུ་ར། སུ་ར་སུ་ར། ཨ་བརྟ་ཡ། ཨ་བརྟ་ཡ་ཧོ། ཨོཾ་བཛྲ་སྥ་ར་ཎ་ཁཾ། ཨོཾ་བཛྲ་གྷནྡཻ་ར་ཎི་ཏ་པྲ་ར་ཎི་ཏ་སཾ་པྲ་ར་ཎི་ཏ། སརྦ་བུདྡྷ་ཀྵེ་ཏྲ་པྲ་ཙ་ལི་ཏེ། པྲ་ཛྙཱ་པཱ་ར་མི་ཏ་ན་ད་སམྦྷ་ཝེ། བཛྲ་དྷརྨ་ཧྲི་ད་ཡ་ནི་སོནྟོ་ཥ་ཎི་ཧཱུཾ་ཧཱུཾ་ཧཱུཾ་ཧོ་ཧོ་ཧོ་ཨ་ཁཱཾ་སྭཱཧཱ། ཞེས་རོལ་མོ་བྱིན་འབེབ་ཀྱི་སྔགས་དང༌། གཞན་ཡང་མཆོད་པའི་སྤྲིན་གྱི་གཟུངས་ལ་སོགས་པ་ཅི་རིགས་པ་བཟླས་ཤིང་བྱིན་དབབ་བོ། །ཞུ་འབུལ་ནི། ཚོགས་པ་ཡོད་ན་ཚོགས་ཀྱི་གཙོ་བོ་ལ་གསོལ་གདབ་པའི་དོན་ཡིན་པས་བྱས་ན་ལེགས་པར་འགྱུར་ཏེ། བྱེད་ཚུལ་སྤྱི་དང་འདྲའོ། །དཀྱིལ་འཁོར་ཆེན་པོའི་ཏིང་ངེ་འཛིན་ནི། སྐྱབས་འགྲོ་ནས་བརྩམས་ཏེ། མཉམ་ལངས། བསྲུང་བའི་རྣལ་འབྱོར་རྫོགས་ཀྱི་བར་རམ། ཞིང་སྐྱོང་དག་པ་གསུམ་གྱི་བར་དུ་བྱས་ཀྱང་རུང་སྟེ། བདག་བསྐྱེད་ཀྱི་རྣལ་འབྱོར་རྒྱས་པ་ཉིད་རྫོགས་པར་བསྒོམ་པ་ཡིན་ནོ། །གཉིས་པ་སྟ་གོན་དུ་གནས་པ་དངོས་ལ། སའི་ལྷ་མོ་སྟ་གོན་དུ་གནས་པ་དང༌། ལྷ་སྟ་གོན་དུ་གནས་པ་དང༌། བུམ་པ་སྟ་གོན་དུ་གནས་པ་དང༌། སློབ་མ་སྟ་གོན་དུ་གནས་
པའོ། །དང་པོ་ནི་དཀྱིལ་འཁོར་གྱི་ས་བཞིར་ས་བླའི་ཚོམ་བུ་བཀོད་མཆོད་གཏོར་བཤམས། ནམ་མཁར་བཞུགས་པའི་སའི་ལྷ་མོ་འཁོར་དང་བཅས་པ་ཚོམ་བུའི་སྟེང་དུ་བྱོན་པ་ནི། ཞེས་པ་ནས། རྒྱལ་བར་བྱས་ཏེ་དཀྱིལ་འཁོར་འབྲིའི་བར་གོང་བཞིན། ཀྱེ་རིག་པ་འཛིན་པ་དཀྱིལ་འཁོར་གྱི་ལས་ཅི་བདེ་བར་མཛོད་ཅིག ཨོཾ་པྲི་ཐཱི་ཝི་དེ་ཝཱི་བྷྱཿ ཨརྒྷཾ་པྲ་ཏཱིཙྪ་སྭཱཧཱ། སའི་ལྷ་མོ་སླར་ཡང་ས་གཞི་དེ་ཉིད་ལ་ཐིམ་བར་གྱུར། རས་བྲིས་ཀྱི་ཆོ་ག་ལ་ནི་སྔར་ནམ་མཁར་བཞུགས་པའི་བཏེག་པ་མེད་པས། ས་གནོན་གྱི་ཕྱག་རྒྱ་ས་ལ་རེག་པ་ནས་གཟུང༌། དཀྱིལ་འཁོར་འབྲི་ཞེས་པའི་བར་ས་ཆོག་གི་སྐབས་བཞིན་བྱ་བ་ནི་ཁྱད་པར་རོ། །གཉིས་པ་ནི། ཤར་དང་སྟེང་གི་ཕུར་བུ་ཁྭ་གདོང་མ་ནག་པོ་སོགས་ནས། ལྟེ་བ་མན་ཆད་ཕུར་བུའི་དབྱིབས་ཅན་དུ་གྱུར། བཛྲ་གནྡྷ྄ེ་ནས བཟློག་པའི་འཕྲིན་ལས་མཛོད་ཅིག་བར་གོང་བཞིན་ནོ། །དེ་ནས་ད་ལྟའི་ལག་ལེན་ལྟར་ན། ཐིག་བཏབ་ལ། གཙོ་བོའི་གནས་སུ་དྲི་བཟང་གིས་ཐིག་ལེ་གྲུ་བཞི་པ་དང༌། ལྷ་གནས་གཞན་རྣམས་སུ་ཟླུམ་པོར་བྱེད། དེ་རྣམས་སུ་མེ་ཏོག་གི་ཚོམ་བུ་རེ་བཀོད། མཐའ་མཆོད་གཏོར་གྱིས་བསྐོར། སུམ་བྷས་བསངས། སྭ་བྷཱ་ཝས་སྦྱངས། སྟོང་པའི་ངང་ལས། འབྱུང་བཞི་རི་རབ་དང་བཅས་པའི་རྩེ་མོར། བསྲུང་བའི་འཁོར་ལོའི་དབུས་སུ་རིན་པོ་ཆེ་སྣ་ཚོགས་ལས་གྲུབ་པའི་གཞལ་མེད་ཁང་ནས་མཆོད་པ་སྣ་ཚོགས་པས་གང་བའོ། །ཨོཾ་ཨཱཿཧཱུཾ། ལན་བཞི་བཅུ་ཞེ་གཅིག་བརྗོད་དེ། དྲི་བཟང་ཚོམ་བུ་ཐིག་ལེ་དང་བཅས་པ་གདན་དུ་བྱིན་གྱིས་རློབས་པའོ། །དེ་ནས་ལྷ་ཐམས་ཅད་ཀྱི་སྙིང་པོ་
སྔགས་མཆོད་བཞིན་ལས་སོ་སོར་ལན་གསུམ་གསུམ་བརྗོད། བདེ་ཆེན་འཁོར་ལོའི་དབུས་ཀྱི་ལྟེ་བར་ནས། མེ་དཔུང་རབ་ཏུ་འབར་བའི་དབུས་ན་བཞུགས་པའོ། །བདེ་ཆེན་འཁོར་ལོའི་འདབ་མ་བརྒྱད་ལ་ནས། རྡོ་རྗེའི་འཕྲེང་བའི་མཚན་པའོ། །ལྷ་ཐམས་ཅད་ཀྱི་དཔྲལ་པར་ཨོཾ། མགྲིན་པར་ཨཱཿ ཐུགས་ཀར་ཧཱུཾ། རང་གི་སྙིང་གའི་ཧཱུཾ་ཡིག་གི་འོད་ཟེར་གྱིས། ཕྱོགས་བཅུའི་འཇིག་རྟེན་གྱི་ཁམས་ན་བཞུགས་པའི་ནས་དབང་གི་ལྷ་རྣམས་རང་ལ་གཉིས་སུ་མེད་པར་ཐིམ་གྱིས་བར་ཡང་སྒྲུབ་ཐབས་བཞིན་ནོ། །ས་ཆོག་གི་སྐབས་ནམ་མཁའ་བསྐྱེད་པའི་དཀྱིལ་འཁོར་ནི། ཡེ་ཤེས་པའི་ཞོར་ལ་སྤྱན་དྲངས་པ་ཡིན་པས། སྒོས་སུ་སྤྱན་འདྲེན་མི་བྱེད་པའི་ལུགས་ཡིན་ལ། དཀྱིལ་འཁོར་གྱི་ཆོ་ག་གཞན་མང་པོ་དག་ལའང་འདི་ལྟ་བུ་ཡོད་དོ། །དེ་ནས་མཆོད་པ་ནི། རྒྱས་བསྡུས་ཇི་ལྟར་འོས་པ་བྱ། འཇིག་རྟེན་འདས་གཏོར་སྐབས་འདིར་ཕུལ་ཀྱང་ཆོག་སྟེ་མཆོད་པར་འགྲེལ་བའི་ཕྱིར་རོ། །དེ་ནས་སྙན་གསན་དབབ་པ་ནི་བདུད་རྩི་ལྔ་དང་ཤ་ཆེན་སྦྱར་བའི་སྤོས་སྣོད་ཐོགས་ཏེ། གཉིས་མེད་ཡེ་ཤེས་ལས་བྱུང་བ། ཁྱབ་བདག་དངོས་ཀུན་བདག་ཉིད་ཅན། །སྟོན་པའི་གཙོ་བོ་ཁྲག་འཐུང་དཔལ། །ཕག་མོ་ལྷན་ཅིག་ཡང་དག་ལྡན། །གང་ཞིག་ཕྱོགས་བཅུའི་དཔའ་བོ་དང༌། །རིག་པའི་ལྷ་མོ་རྫུ་འཕྲུལ་ཅན། །བྱང་ཆུབ་སེམས་དཔའ་ལ་སོགས་ཀུན། །མ་ལུས་བདག་ལ་དགོངས་སུ་སྩོལ། །སློབ་མ་ལ་ནི་ཕན་པ་དང༌། །ཁྱེད་རྣམས་ལ་ཡང་མཆོད་པའི་ཕྱིར། །རྡོ་རྗེ་ཅན་བདག་འདི་ཞེས་པས། །ནང་པར་དཀྱིལ་འཁོར་འབྲི་བར་བགྱི། །
རྗེས་སུ་བརྩེ་བར་ཉེར་དགོངས་ཏེ། །ཀུན་གྱི་བྱིན་གྱིས་རླབས་ཏུ་གསོལ། ཞེས་ལན་གསུམ་མོ། །ཡང་ན་གསང་བ་སྤྱི་རྒྱུད་ནས་འབྱུང་བ་ལྟར་ལ། ཧེ་རུ་ཀ་དཔལ་བཅོམ་ལྡན་འདས་ནས་ཞེས་དང༌། ཧེ་རུ་ཀ་འབྱུང་དཀྱིལ་འཁོར་འདི། །ཞེས་འདོན་པ་སྤོས་ཏེ་བརྗོད་ཀྱང་རུང་ངོ༌། །ཉི་མ་དེ་ཉིད་ལ་དཀྱིལ་འཁོར་ནམ་མཁར་མི་འདེགས་ན། རྡོ་རྗེའི་ས་གཞི་ལ་སོགས་པའི་སྔགས་ཚན་དྲུག་བསྲུང་འཁོར་ནས་འབྱུང་བ་ལྟར་བརྗོད་ལ། མཚམས་བཅིང་པ་ཡིན་ཀྱང་ལག་ལེན་མི་བདེའོ། །དེ་ནས་གཏོར་མ་འབུལ་བར་བྱ་སྟེ། སུམ་བྷའི་བསངས་བ་ནས། ཨོཾ་ཨཱཿཧཱུཾ། ལན་གསུམ་གྱི་བར། ས་མ་ཡ་སྟཾ་ནས་རྗེས་བརྩེར་མཛད་དུ་གསོལ། །སུམ་བྷའི་མཐར། ཨ་ཀཱ་རོ། །བཏགས་པ་ཕུར་བུ་རྣམས་ལ་ཡང་ཕུལ། བར་འདིར་ནག་པོ་ཆེན་པོ་ལ་སོགས་པ་སྒོས་ཀྱི་ཆོས་སྐྱོང་ལ་གཏོར་མ་འབུལ་བར་སྤྲོ་ན་འབུལ། དེ་ནས་ཨོཾ་ཁ་ཁ་༣ ནས། ཡིད་ལ་འདོད་པ་ཀུན་འགྲུབ་ཤོག་གི་བར་གྱིས་འཇིག་རྟེན་པའི་གཏོར་མ་ཕུལ། རྗེས་ཀྱི་བྱ་བ་ནི། མཚམས་འདི་ནས་ཡིག་བརྒྱས་ཁ་བསྐང་བ་མན་ཆད་བྱས་ཀྱང་ཆོག་ལ། དེང་སང་གི་ལག་ལེན་ལྟར་ན་བུམ་པ་སྒྲུབ་པའི་རྗེས་སུ་བྱེད་དོ། །གསུམ་པ་ནི་རྟག་པའི་རྡོ་རྗེ་ཞེས་བྱ་བའི་ལུགས་ལ། ལྷ་སུམ་ཅུ་སོ་བདུན་ལ་བུམ་པ་རེ་རེ། རྣམ་རྒྱལ་དང་ལས་བུམ་སྟེ་ཞེ་དགུར་འདོད་ཅིང༌། བདེ་ཆེན་འཁོར་ལོའི་ལྔ་དང་སྒོ་མ་བཞིའི་རེ་རེ་སྟེ་དགུར་ཡང་འཆད་དོ། །འོན་ཀྱང་འདིའི་གཙོ་བུམ་དང་རྣམ་རྒྱལ་ཐ་དད་དུ་བྱས་པ་ནི་ཧ་ཅང་ལེགས་པ་མ་ཡིན་ནོ། །འཇིགས་མེད་འབྱུང་གནས་ཀྱི་ཞལ་སྔ་ནས། བདེ་ཆེན་འཁོར་ལོའི་ལྔ། སྒོ་མཚམས་མ་བརྒྱད། འཁོར་ལོ་
གསུམ་ལ་ཕྱོགས་མཚམས་ཕྱེ་བས་དྲུག་སྟེ། ལས་བུམ་གཅིགཉི་ཤུ་འམ། འཁོར་ལོ་ལྔ་ལ་བུམ་པ་རེ་རེ་དང༌། གཙོ་བུམ་ལས་བུམ་སྟེ། བདུན་ནམ། འཁོར་ལོ་ལྔ་དང་ལས་བུམ་སྟེ་དྲུག་ཀྱང་བཞེད་ལ། བདེ་ཆེན་འཁོར་ལོའི་ལྔ་དང༌། འཁོར་ལོ་ལྷག་མ་བཞི་ལ་རེ་རེ་སྟེ་དགུར་ཡང་མཛད་དོ། །བྷུ་བ་བློ་ལྡན་གྱིས་ནི། གཙོ་བོ་ཡབ་ཡུམ་དང༌། རྣལ་འབྱོར་མ་བཞི་དང༌། མཚམས་ཀྱི་བུམ་པ་བཞི་སྟེ་དགུ་ཞེས་དང༌། དགེ་སློང་དཱ་རི་ཀ་པས་བཀྲ་ཤིས་ཁྲུས་ཀྱི་བུམ་པ་བརྒྱད་དང༌། དབང་བསྐུར་རྒྱལ་བའི་བུམ་པ། དུང་ཆོས་རྣམ་རྒྱལ་ཞེས་འདོད་པས་རྒྱལ་བ་རྣམ་རྒྱལ་གྱི་ངོས་འཛིན་དུས་འཁོར་དང་བསྟུན་པར་སྣང་ལ། ལྷག་མ་གྲུབ་ཆེན་ནག་པོ་སྤྱོད་པའི་དགོངས་པ་ཡང་འདི་ཉིད་ཡིན་ནོ། །འདོད་ཚུལ་ཐ་དད་པ་དེ་དག་ལས། བུམ་པ་དགུར་བྱེད་པ་རྣམས་ཀྱི་ལུགས་ཐམས་ཅད་དང་མཐུན་པར། བཅུ་པ་ནི་ལས་བུམ་མོ། །བསྡུ་ན་གཉིས་སུ་བྱེད་པ་ཡང་ཐམས་ཅད་དགོངས་པ་མཐུན་པས། སྐབས་འདིར་འདི་ལྟར་བྱ། བུམ་པ་མང་ན་ལྷ་གྲངས་དང་མཉམ་པ་ཡིན་ཡང༌། ད་ལྟར་ལག་ལེན་བྱེད་པ་ཉུང་ལ། འབྲིང་དུ་ན་བུམ་པ་བཅུ་སྟེ། རྣམ་རྒྱལ་བུམ་པ་དང༌། ཁྲུས་ཀྱི་བུམ་པ་བརྒྱད་དང་ལས་བུམ་མོ། །ཉུང་བ་ལ་གཉིས་ཏེ་རྣམ་རྒྱལ་བུམ་པ་དང་ལས་བུམ་མོ། །དེ་ལ་རྣམ་རྒྱལ་བུམ་པར་དཀྱིལ་འཁོར་གྱི་འཁོར་ལོ་ཡོངས་རྫོགས་བསྐྱེད་དགོས་ཤིང༌། ལས་བུམ་དུ་ནི་ཧཱུཾ་མཛད་འཇིག་རྟེན་གསུམ་རྒྱལ་བསྐྱེད་པ་དང༌། ཧེ་རུ་ཀ་ཡབ་རྐྱང༌། ཤིན་ཏུ་ཁྲོས་པ་ཞིག་བསྐྱེད་པ་དང༌། དུམ་སྐྱེས་མ་བསྐྱེད་པ་དང་བདུད་རྩི་འཁྱིལ་པ་བསྐྱེད་པ་རྣམས་ལ་དཀྱིལ་འཁོར་ཆོག་སོ་སོའི་ཁུངས་རེ་ཐམས་
ཅད་ལ་ཡོད་ཀྱང༌། ལག་ལེན་དུ་དུམ་སྐྱེས་མ་བསྐྱེད་པར་མཛད་དོ། །བུམ་པའི་མཚན་མ་ཡང༌། བུམ་པ་མང་བའི་ཕྱོགས་ལ་ལྷ་སོ་སོའི་ཕྱག་མཚན་གདན་དང་བཅས་པ་འགོད་ཅིང༌། ཡབ་ཡུམ་གཉིས་གཉིས་བཞུགས་པ་ལའང་ཕྱག་མཚན་གཉིས་ཀར་འགོད་པ་དང༌། ཡབ་ཀྱི་ཕྱག་མཚན་ཁོ་ན་འགོད་པའི་ལུགས་གཉིས་ཡོད་ཅིང༌། དགུའི་ཕྱོགས་ལ་འདོད་ཚུལ་སྣ་ཚོགས་ཡོད་ཀྱང༌། སྐབས་འདིར་རྣམ་རྒྱལ་བུམ་པ་ལ་རིགས་ལྔའི་ཕྱག་མཚན། བཀྲ་ཤིས་ཁྲུས་ཀྱི་བུམ་པ་བརྒྱད་ལ་གྲི་གུག །ལས་བུམ་ལའང་རང་ལྷའི་ཕྱག་མཚན་འགོད་དགོས་པས་དུམ་སྐྱེས་མའི་གྲི་གུག་གོ །མཚན་མ་རྣམས་ཀྱང་ལྟོ་བའམ་ཁའི་གཡེལ་ཁའམ། མཆུ་འཕྱང་གང་ལ་བཀོད་ཀྱང་འདྲ་སྟེ་དགོས་དོན་མཚུངས་པའི་ཕྱིར་རོ། །བུམ་པ་རྣམས་གོས་ཟུང་གིས་གཡོགས། མགྲིན་པར་སྲད་བུ་དཀར་པོས་ལན་བདུན་དུ་དཀྲིས། འབྲས་སོ་བ་དང༌། མོན་སྲན་དང༌། ནས་དང༌། གྲོ་དང༌། ཏིལ་ཏེ་འབྲུ་ལྔ་དང༌། མུ་ཏིག གསེར་མུ་མིན། བྱུ་རུ་དངུལ་ཏེ་རིན་པོ་ཆེ་ལྔ་དང༌། ཀནྡྷ་ཀ་རི་དང༌། སླེ་ཏྲེ་དང༌། རྒྱ་མཚོའི་སྦུ་བ་དང༌། ཆུ་སྲིན་སྡེར་མོ་དང༌། ཤུ་ཐག་དཀར་པོ་སྟེ་སྨན་ལྔ་དང༌། གུར་གུམ། ག་བུར་ཙནྡན་དཀར་དམར་གླ་རྩི་སྟེ་དྲི་ལྔ་དང༌། མེ་ཏོག་ཁ་དོག་སྣ་ལྔ་སྟེ་ཉི་ཤུ་རྩ་ལྔ་པོའམ། མེ་ཏོག་གི་དོད་དུ། འོ་མ། མར། སྦྲང་རྩི། བུ་རམ། ལན་ཚྭ་སྟེ། སྙིང་པོ་ལྔ་བྱེད་པའང་ཡོད་པ། སྤྱིར་གཉིས་ཀར་རུང་ཡང་སྐབས་འདིར་མེ་ཏོག་རིགས་ལྔ་གཙོ་བོར་བྱ་སྟེ། དེ་རྣམས། ཨོཾ་ཨཱཿཧཱུཾ། བཟླ་བཞིན་དུ་བུམ་པར་གཞུག་གོ ཁ་རྒྱན། ཡལ་འདབ། མེ་ཏོག །འབྲས་བུ་སོགས་ལྡན་
པའི་ཤིང་དགེ་མཚན་ཅན་གྱི་ལྕུགས་མས་བྱ། གུ་གུལ་གྱིས་བདུགས། ཞལ་བཞི་པས་སྔགས་བཟླས་པའི་ཡུངས་དཀར་གྱིས་བགེགས་བསྐྲད། དྲི་བཟང་གི་ཆུས་དགང་ངོ༌། །དུང་ཆོས་སམ་ཐོད་པ་དྲི་བཟང་གི་ཆུས་གང་བའི་སྟེང་དུ་གཟུངས་ཐག་རྡོ་རྗེ་དང་བཅས་པ་ཡང་སྟེང་དུ་བཞག །དེ་ནས་མཐའ་མཆོད་གཏོར་གྱིས་བསྐོར་ལ། མཆོད་པ་བྱིན་རླབས་བྱ། བུམ་པ་བསངས་སྦྱངས། སྟོང་པའི་ངང་ལས། སྣ་ཚོགས་པདྨ་བཅུའི་སྟེང༌། ཨ་རྣམས་ལས་ཟླ་བའི་གདན་རེ་རེ། དེ་རྣམས་ཀྱི་སྟེང་དུ་བྷྲུཾ་རྣམས་ལས་རིན་པོ་ཆེའི་བུམ་པ་ལྟོ་བ་ལྡིར་ཞིང༌། མགྲིན་པ་ཕྲ་བ། མཆུ་འཕྱང་བ། ལྷ་རྫས་ཀྱི་གོས་ཀྱི་མགུལ་བཅིང་དང༌། དཔག་བསམ་གྱི་ཤིང་གིས་ཁ་བརྒྱན་པ། ནང་ཆུ་དང་བཅུད་ཐམས་ཅད་ཀྱིས་ཡོངས་སུ་གང་བའི་དབུས་ཀྱི་བུམ་པའི་ནང་དུ་འཁོར་ལོ་བདེ་མཆོག༴ ནས་ཡེ་ཤེས་ཀྱི་མེ་འབར་བའི་དབུས་ན་བཞུགས་པའོ། །དེའི་ཤར་དུ་མཁའ་འགྲོ༴ ནས་རྡོ་རྗེའི་འཕྲེང་བས་མཚན་པའོ། །རྣམ་རྒྱལ་བུམ་པའི་སྟེང་གི་མཚན་མ་ཧཱུཾ་ལས་མི་བསྐྱོད་པ་སྔོན་པོ། ཤར་གྱི་མཚན་མ་བྲུཾ་ལས་རྣམ་སྣང་དཀར་པོ། ལྷོའི་མཚན་མ་ཨཾ་ལས་རིན་ཆེན་འབྱུང་ལྡན་སེར་པོ། ནུབ་ཀྱི་མཚན་མ་ཛྲིཾ་ལས་འོད་དཔག་མེད་དམར་པོ། བྱང་གི་མཚན་མ་ཁཾ་ལས་དོན་ཡོད་གྲུབ་པ་ལྗང་ཁུ་རྣམས་རང་སྣང་བའི་ཡུམ་དང་བཅས་པར་གྱུར་པ་བཀྲ་ཤིས་ཁྲུས་ཀྱི་བུམ་པ་བརྒྱད་པོ་ན། ཁྲུས་ཀྱི་བུམ་པ་བརྒྱད་ཀྱི་ནང་དང་ལྷ་མཚན་གྱིས་གནས་སུ་སྒོ་མཚམས་མ་བརྒྱད་གྲུབ་པ་ནི། ཤར་ཁྭ་གདོང་མ་ནས་
གཡས་ལྗང་གཡོན་སྔོ་བ། ལས་བུམ་གྱི་ནང་དང་མཚན་མའི་དབུས་སུ། ཁཎྜ་རོ་ཧ་སྐུ་མདོག་དམར་པོ་སྟེ། དེ་ཐམས་ཅད་ཀྱང་དྲག་མོ་ཆེ་མོ་ཆེར་ཁྲོས་པ༴ ནས་དབུས་ན་བཞུགས་པའོའི་བར། ཁྲུས་བུམ་མེད་ན། བུམ་པ་བརྒྱད་དུ་སྒོ་མཚམས་མ་བརྒྱད་བསྐྱེད་པའི་ཚིགས་རྣམས་དང༌། དེ་ཐམས་ཅད་ཀྱི་ཞེས་པའི་ཚིགས་བོར་བས་འགྲུབ་བོ། །ལྷ་ཐམས་ཅད་ཀྱི་དཔྲལ་བར་ཨོཾ༴ ནས། ལྷ་རྣམས་རང་ལ་གཉིས་སུ་མེད་པར་ཐིམ། གྱི་བར། ལྷ་སྟ་གོན་གྱི་སྐབས་བཞིན་ལས། རྒྱས་བྱེད་ཀྱི་གཞུག་ཏུ་ལས་བུམ་གྱི་ཁཎྜ་རོ་ཧ་ལ་འོད་དཔག་ཏུ་མེད་པས་དབུ་རྒྱན་ཞེས་ལྷག་པོར་བརྗོད། ཕྱི་མཆོད། ནང་མཆོད། གསང་མཆོད། རྐང་བརྒྱད་ཀྱི་བསྟོད་པ་རྣམས་སྒྲུབ་ཐབས་ལས་མཆོད་པའི་རྣལ་འབྱོར་གྱི་སྐབས་སུ་བཤད་པ་བཞིན་ཏེ། འོན་ཀྱང་ནང་མཆོད་བྱིན་རླབས་དང༌། བླ་མ་རྣམས་ཀྱི་མཚན་སྨོས་པ་དག་མི་དགོས་སོ། །རྡོ་རྗེ་དང་འབྲེལ་བའི་མེ་ཏོག་འཕྲེང་བ་ནས་བཟུང་སྟེ། བཟླས་པ་བྱ་ལ། དེ་ཡང་རང་གི་སྙིང་ག་ནས་སྔགས་ཀྱི་འཕྲེང་བ་རྣམས། ཁ་དོག་དམར་པོའི་ཚུལ་གྱིས་སྤྲོས་པ་གཟུངས་ཐག་ལ་འཁྲིལ་ནས་སོང་བ། ལྷ་རྣམས་ཐུགས་ཀར་རེག་པས་ཐུགས་རྒྱུད་བསྐུལ། སྐུ་ལས་བདུད་རྩིའི་རྒྱུན་བབས་པས་བུམ་པ་གང་བར་གྱུར། ཞེས་བརྗོད་ལ། གཙོ་བོ་ཡབ་ཡུམ་གྱི་སྔགས་བརྒྱ་རྩ་བརྒྱད་ལས་མི་ཉུང་བ་བཟླ། འཁོར་རྣམས་ལ་བདུན་ལས་མི་ཉུང་བ་བཟླ་བ་དང༌། ལས་བུམ་ལ་ཁཎྜ་རོ་ཧའི་སྔགས་དང༌། ཡི་གེ་བདུན་པ་རྣམས་ཀྱང་ཅི་རིགས་པར་བཟླ་ཞིང༌། ཁྱད་པར་སུམ་བྷ་ལན་ཉི་ཤུ་རྩ་གཅིག་ལས་མི་ཉུང་བ་བཟླའོ། །
མཐར་ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏ་ས་མ་ཡ་ཤྲཱི་ཧཱུཾ། ཞེས་པའང་ཅི་རིགས་པ་བཟླས། དུང་ཆོས་ལ་དམིགས་ནས། ཨོཾ་བཛྲ་ཨ་མྲྀ་ཏ་ཨུ་ད་ཀ་ཧཱུཾ། ཞེས་པ་ཉེར་གཅིག་ཙམ་བཟླས་ལྷ་སྟ་གོན་གྱི་སྐབས་ལྟར་འཇིག་རྟེན་འདས་པའི་ལྷ་ལ་གཏོར་མ་འབུལ། གོང་བཞིན་མཆོད་བསྟོད་བྱ། ཡིག་བརྒྱ་ཚར་གསུམ། མ་འབྱོར་པ་དང༌། ཞེས་སོགས་ནས། བཟོད་པར་གསོལ། ཨོཾ་ཨཱཿཧཱུཾ། ཞེས་པས་མཆོད་ཡོན་ཕུལ། མཆོད་ཡོན་ཕུལ་བའི་རྐྱེན་གྱིས་ལྷ་རྣམས་འདོད་ཆགས་ཆེན་པོའི་མེས་བྱང་ཆུབ་ཀྱི་སེམས་སུ་ཞུ་བར་གྱུར། ཞེས་བརྗོད་ཅིང་བསམ། དགེ་སློང་དཱ་རི་ཀ་པས་ལྷ་གཞན་རྣམས་ཞུ་ཞིང༌། ལས་བུམ་གྱི་ལྷ་མི་ཞུ་བར་འདོད་ཀྱང་མཐའ་གཅིག་ཏུ་དེ་ལྟར་མི་དགོས་སོ། །ཡལ་འདབ་ཀྱིས་ལས་བུམ་གྱི་ཆུ་བླངས་ལ། ཐམས་ཅད་ལ་བསངས་ཤིང༌། ཇི་སྲིད་དཀྱིལ་འཁོར་ཆེན་པོའི་བྱ་བ་མཐར་མ་ཕྱིན་གྱི་བར་དུ། བགེགས་ཐམས་ཅད་བསྲུང་བའི་འཕྲིན་ལས་མཛད་དུ་གསོལ། ཞེས་བརྗོད་དོ། །ཆོ་ག་ཅུང་ཟད་བསྡུས་པ་བྱེད་ན། བུམ་པའི་མཚན་མ་རྣམས་ལྷར་བསྐྱེད་མི་དགོས། གཏོར་མ་འབུལ་བ་དང༌། བཟླས་པའི་རྗེས་ཀྱི་མཆོད་བསྟོད་ཀྱང་བོར་བས་རུང་ངོ༌། །ད་ལྟར་གྱི་ལག་ལེན་དང་བསྟུན་ནས་སྐབས་འདིར་རྗེས་ཆོག་བྱེད་ན། མཆོད་པ་གསར་དུའང་བཤམ། རྙིང་པ་གསོས་མཆོད་འཕྲེང་བཞིན་བྱིན་གྱིས་རླབས། ཆུ་གཉིས་ཉེར་སྤྱོད་རོལ་མོ་རྣམས་ཚིགས་བཅད་དང་བཅས་པའམ། བསྡུ་ན་སྔགས་ཙམ་གྱིས་ཕུལ། རྐང་བརྒྱད་གཉིས་ཀྱིས་བསྟོད། ཡི་གེ་བརྒྱ་པ་ལན་གསུམ་བརྗོད། མ་འབྱོར་པ་དང༌།
སོགས། བཟོད་པར་གསོལ། བདག་ལ་དངོས་གྲུབ་མ་ལུས་པ་སྩལ་དུ་གསོལ། ཨོཾ་བཛྲ་ཨུ་དྷིཥྛ། ཞེས་པ་དང་རྡོ་རྗེ་ཤུགས་ཀྱི་ཕྱག་རྒྱས། མདུན་བསྐྱེད་ཀྱི་དཀྱིལ་འཁོར་ནམ་མཁར་བཞུགས་པར་བསམ། ཆུ་གཉིས་ཉེར་སྤྱོད་རོལ་མོ་རྐང་བརྒྱད་རྣམས་ཀྱིས་མཆོད་བསྟོད་བྱ། བཅོམ་ལྡན་འདས་དཔལ་འཁོར་ལོ་སྡོམ་པའི་དཀྱིལ་འཁོར་གྱི་ལྷ་ཚོགས་རྣམས་སྤྱན་མ་དྲངས་ཀྱི་བར་དུ། སྟེང་གི་ནམ་མཁར་བཞུགས་ལ། བདག་དང་སེམས་ཅན་ཐམས་ཅད་ལ་ཐུགས་བརྩེ་བ་ཆེན་པོ་མཛད་དེ། ནངས་པར་དཀྱིལ་འཁོར་བྱིན་གྱིས་བརླབ་པར་མཛད་དུ་གསོལ། ཞེས་བརྗོད། དེ་ནས་བདག་ཉིད་བསྲུང་བ་དང་སྨོན་ལམ་དང་བཀྲ་ཤིས་སོགས་བྱའོ། །བཞི་པ་ནི། ཞི་བས་སྦྱང་བ་དང་ཞི་དྲག་ཕྱེད་མས་སྦྱང་བ་དང༌། དྲག་པོའི་སྦྱང་བ་སྟེ་བགེགས་སྦྱང་བ་དང༌། ཏིལ་སྦྱང་གི་སྡིག་པ་སྦྱང་བ་རྣམས་སྔོན་དུ་འགྲོ་བའི་སྒོ་ནས་སྟ་གོན་གྱི་ཆོས་བཅུ་གསུམ་བྱ་སྟེ། བསམ་པ་བརྟན་དང་བུ་རུ་སྒྲུབ། །གསོལ་བཏབ་སྔགས་ཀྱི་ཆེ་བ་བརྗོད། །སྡོམ་བཟུང་ལྷར་བསྐྱེད་མཆོད་པ་འབུལ། །བསྲུང་སྐུད་ཁྱོར་ཆུ་སོ་ཤིང་དང༌། །ཀུ་ཤ་ཟབ་མོའི་ཆོས་བཤད་ཅིང༌། །རྨི་ལམ་བརྟག་སྟེ་ངན་ན་བསྲུང༌། ཞེས་བྱ་སྟེ། དེ་ཡང་སློབ་མ་རྣམས་འདུས་པ་ལ། སེམས་བསྐྱེད་གསལ་བཏབ། སློབ་མ་རྣམས་ཀྱིས་མཎྜལ་ཕུལ། དེ་ནས་མྱ་ངན་ལས་འདས་པའི་བསམ་པ་བརྟན་པོ་བསྐྱེད་པ། སློབ་མ་བུར་སྒྲུབ་པ། གསོལ་བ་བཏབ་པ། གསང་སྔགས་ལ་སྤྲོ་བ་བསྐྱེད་པ། སྡོམ་པ་བཟུང་བ། ལྷར་བསྐྱེད་པ།
མཆོད་པ་འབུལ་བ། བསྲུང་སྐུད་བཅིང་བ། ཁྱོར་ཆུ། སོ་ཤིང༌། ཀུ་ཤ་སྦྱིན་པ། ཟབ་མོའི་ཆོས་བཤད་པས་སྤྲོ་བ་བསྐྱེད་པ། རྨི་ལམ་བརྟག་ཅིང་ངན་ན་བསྲུང་བ་སྟེ། ཆོས་བཅུ་གསུམ་ལས། དང་པོ་ནི་སློབ་དཔོན་གྱིས་འདི་སྐད་ཅེས། སྔགས་ཀྱི་དངོས་གྲུབ་དོན་གཉེར་གང༌། །དཀྱིལ་འཁོར་འདིར་ནི་འཇུག་བྱ་སྟེ། །བསོད་ནམས་འདོད་པས་དེ་ལས་གཞན། །གཞན་དག་འཇིག་རྟེན་ཕ་རོལ་གཉེན། །དད་པ་ཆེན་པོ་ལྡན་པ་དག །འཇིག་རྟེན་ཕ་རོལ་ལ་དམིགས་ནས། །བློ་ལྡན་དཀྱིལ་འཁོར་འཇུག་བྱ་སྟེ། །འདི་ཡི་འབྲས་བུ་གཉེར་མི་བྱ། །གལ་ཏེ་འདི་འབྲས་དོན་གཉེར་ན། །འཇིག་རྟེན་ཕ་རོལ་འགྲུབ་མི་འགྱུར། །འཇིག་རྟེན་ཕ་རོལ་ལ་དམིགས་ན། །འབད་པ་མེད་པར་འདི་འབྲས་འགྲུབ། ཅེས་བརྗོད་ལ་དོན་ཡང་བཤད་དོ། །གཉིས་པ་ནི། སློབ་དཔོན་གྱི་ཐུགས་ཀ་ནས་འོད་ཟེར་འཕྲོས། ཁྱེད་རང་རྣམས་ཀྱི་ལུས་འོད་ཀྱི་གོང་བུར་གྱུར། སློབ་དཔོན་གྱི་ཞལ་དུ་བཅུག །སྐུའི་དབྱིབས་བརྒྱུད་རྡོ་རྗེའི་ལམ་ནས་ཡུམ་གྱི་མཁའ་ནང་དུ་གནས་པ། སློབ་དཔོན་གྱི་ཐུགས་ཀའི་འོད་ཟེར་གྱིས་སྤྱན་དྲངས་པའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཞལ་དུ་ཞུགས། བྱང་ཆུབ་ཀྱི་སེམས་སུ་ཞུ་བ། རྡོ་རྗེ་ལམ་ནས་བྱུང་སྟེ་ཁྱེད་རང་རྣམས་ལ་དབང་བསྐུར་བས། ལུས་ངག་ཡིད་གསུམ་གྱི་སྡིག་སྒྲིབ་སྦྱངས་ཏེ་དག་པའི་ཤེལ་ལྟར་གྱུར་པ། མཁའ་ནང་ནས་ཕྱིར་སྤྲོས་ཏེ། པདྨའི་གདན་ལ་འཁོད་པར་གྱུར། ཞེས་བརྗོད། གསུམ་པ་ནི། རྡོ་རྗེ་ཕག་མོའི་མགྲིན་འཁྱུད་པའི། །
དགའ་ཆེན་ཁྱོད་བདག་སྟོན་པ་སྟེ། །སློབ་དཔོན་ཁྱོད་ནི་དགོངས་སུ་གསོལ། །བྱང་ཆུབ་ཆེན་པོའི་ཚུལ་བསྟན་པ། །མགོན་པོ་ཆེན་པོ་བདག་འཚལ་ལོ། །དམ་ཚིག་དེ་ཉིད་བདག་ལ་སྩོལ། །བྱང་ཆུབ་སེམས་ཀྱང་བདག་ལ་སྩོལ། །སངས་རྒྱས་ཆོས་དང་དགེ་འདུན་ཏེ། །སྐྱབས་གསུམ་དག་ཀྱང་བདག་ལ་སྩོལ། །ཐར་པ་ཆེན་པོའི་གྲོང་མཆོག་ཏུ། །མགོན་པོས་བདག་ནི་གཞུག་ཏུ་གསོལ། །ཞེས་སློབ་མས་ལན་གསུམ་གསོལ་བ་གདབ། བཞི་པ་ནི། བུ་ཚུར་ཐེག་པ་ཆེན་པོ་ལ། ཁྱོད་ནི་ཚུལ་ཆེན་སྣོད་ཡིན་ཏེ། །གསང་སྔགས་སྤྱོད་པའི་ཆོ་ག་འདི། ཁྱོད་ལ་ཡང་དག་བཤད་པར་བྱ། །རྫོགས་པའི་སངས་རྒྱས་གང་འདས་དང༌། །དེ་བཞིན་གང་དག་མ་བྱོན་དང༌། །ད་ལྟར་བྱུང་བ་རྫོགས་སངས་རྒྱས། །འགྲོ་ལ་ཕན་ཕྱིར་བཞུགས་པ་ཀུན། །དེ་དག་ཀུན་གྱི་གསང་སྔགས་ཀྱི། །ཆོ་ག་བཟང་པོ་འདི་མཁྱེན་ནས། །དཔའ་བོས་བྱང་ཆུབ་ཤིང་དྲུང་དུ། །ཐམས་ཅད་མཁྱེན་པ་མཚན་མེད་བརྙེས། །གསང་སྔགས་སྤྱོད་པ་མཉམ་མེད་དེ། །སྐྱོབ་པ་དཔལ་ལྡན་ཧེ་རུ་ཀས། །བདུད་སྡེ་ཤིན་ཏུ་མི་བཟད་པ། །དཔུང་ཆེན་དག་ཀྱང་དེ་ཡིས་བཅོམ། །དེ་བས་ཀུན་མཁྱེན་ཐོབ་བྱས་ཕྱིར། བུ་ཡི་བློ་གྲོས་འདི་གྱིས་ཤིག ཅེས་བརྗོད་ཀྱང་དོན་བཤད། ལྔ་པ་ནི། དཀོན་མཆོག་གསུམ་ལ་བདག་སྐྱབས་མཆི། སོགས་ལན་གསུམ་རྗེས་བཟློས་བྱར་གཞུག་སྟེ་ཐུན་མོང་གི་སྡོམ་པ་བཟུང་བའོ། །སངས་རྒྱས་ཆོས་དང་དགེ་འདུན་ལ། །རྟག་ཏུ་བདག་ནི་སྐྱབས་སུ་མཆི། །རྣལ་འབྱོར་གསང་སྔགས་མཁའ་
འགྲོ་མ། །འཁོར་ལོ་གསུམ་གྱི་བདག་ཉིད་ཅན། །ཀུན་ལ་རྟག་ཏུ་སྐྱབས་སུ་མཆི། །དཔའ་བོ་དཔའ་མོ་དབང་ལྷ་མོ། །བྱང་ཆུབ་སེམས་དཔའ་བདག་ཉིད་ཆེ། །ཁྱད་པར་དུ་ནི་སློབ་དཔོན་ལ། །རྟག་པར་བདག་ནི་སྐྱབས་སུ་མཆི། །དཔལ་ལྡན་ཁྲག་འཐུང་སོགས་དཔའ་བོ། །རྣལ་འབྱོར་མ་དང་སྣང་མཛད་སོགས། །བྱང་ཆུབ་སེམས་དཔའ་དཔག་མེད་པ། །ཐམས་ཅད་བདག་ལ་དགོངས་སུ་གསོལ། །ཆེ་གེ་དུས་འདི་ནས་གཟུང་སྟེ། །ཇི་སྲིད་གཉིས་མེད་ལ་གནས་པར། །དེ་ཡི་ཚངས་སྤྱོད་གཉིས་མེད་པ། །ཉི་ཤུ་རྩ་གཉིས་ལེགས་པར་བསྲུང༌། ཞེས་ལན་གསུམ་རྗེས་བཟློས་ཀྱི་ཐུན་མོངས་མ་ཡིན་པས་སྡོམ་པ་བཟུང་ངོ༌། །དྲུག་པ་ནི། སློབ་མ་ཧེ་རུ་ཀ་ཕྱག་གཉིས་པར་གསལ་བའི་གནས་གསུམ་དུ་བདུད་རྩི་ལྔ་དང་སྦྱར་བའི་དྲི་བཟང་གིས་ཐིག་ལེ་བྱ་ཞིང༌། ཨོཾ་ཨཱཿཧཱུཾ། སྙིང་གར་ཧཱུཾ་སྔོན་པོ། མགྲིན་པར་ཨཱཿདམར་པོ། དཔྲལ་པར་ཨོཾ་དཀར་པོ། ཡང་དཔྲལ་བ་ནས་མར་རེག་སྟེ། ཨོཾ་ཨཱཿཧཱུཾ། སངས་རྒྱས་ཐམས་ཅད་སྐུ་གསུང་ཐུགས་རྡོ་རྗེའི་ལྷ་ཚོགས་ཀྱི་རྣམ་པར་སྤྱན་དྲངས། སློབ་མའི་གནས་གསུམ་དུ་ཐིམ་པར་མོས། བདུན་པ་ནི། ཨོཾ་བཛྲ་པུཥྤེཿཧཱུཾ། སོགས་ཉེར་སྤྱོད་ལྔས་སློབ་མ་ལ་མཆོད། བརྒྱད་པ་བསྲུང་སྐུད་བསངས་སྦྱངས། སྟོང་པའི་ངང་ལས། ཧཱུཾ་ལས་བྱུང་བའི་རྡོ་རྗེའི་སྲད་བུ་དམར་པོ། རྡོ་རྗེའི་མདུད་པ་གསུམ་དང་བཅས་པ། བར་ཆད་ཐམས་ཅད་བསྲུང་བའི་ནུས་པ་དང་ལྡན་པར་གྱུར། ཡེ་ཤེས་ཀྱི་སྲད་བུ་ཕཻཾ། ཛཿཧཱུཾ་བཾ་ཧོཿ གཉིས་སུ་མེད་པར་ཐིམ། ཡི་གེ་བརྒྱ་པ་དང་
སུམ་བྷ། སྤེལ་བས་བཟླ་ཞིང༌། སྐྱེས་པའི་དཔུང་པ་གཡོན་དང༌། བུད་མེད་ཀྱི་གཡས་སུ་བཅིང་ངོ༌། །ལས་བུམ་གྱི་ཆུས་ཀྱང་གཏོར་མ་ལ། རྡོ་རྗེ་རྒྱ་གྲཾ་དུ་རེག་ལ་གོ་སྐོན་པར་མོས། དགུ་པ་ནི། ཨོཾ་ཧྲཱིཿབི་ཤུདྡྷ་སརྦྦ་དྷརྨཱ་སརྦྦ་པཱ་པཾ་ནི་ཙཱ་སྱ་ཤོ་དྷ་ཡ་སརྦ་བི་ཀལྤཱན་ཨ་པ་ནཱ་ཡ་ཧཱུཾ། ཞེས་པས་ལན་གསུམ་ཁྱོར་ཆུ་བླུད། བཅུ་པ་ནི། ཧཱུཾ་ལས་བྱུང་བའི་བྱང་ཆུབ་ཀྱི་ཤིང་གི་རང་བཞིན་སོ་ཤིང་རྩེ་ལ་སྲད་བུ་དམར་པོ་དང་མེ་ཏོག་གི་འཕྲེང་བ་བཅིངས་པ་དངོས་གྲུབ་ཀྱི་ལྟས་བརྟག་པའི་ནུས་པ་དང་ལྡན་པར་གྱུར། སུམ་བྷ། བཟླས་བཞིན་དུ་སྦྱིན། དེས་ཀྱང༌། ཨོཾ་བཛྲ་ཧ་ས་ཧ་ཞེས་དྲང་པོར་དོར་ལ། སློབ་དཔོན་གྱི་དངོས་གྲུབ་ལུང་སྟོན་ནོ། །བཅུ་གཅིག་པ་ནི། ཧཱུཾ་ལས་བྱུང་བའི་ཀུ་ཤ་སྔོ་ལྗང་རྩ་རྩེ་མ་ཉམས་པ། རྨི་ལམ་མི་འཁྲུགས་པ་བྱེད་པའི་ནུས་པ་དང་ལྡན་པར་གྱུར། ཨོཾ་ཧྲཱིཿཧ་ཧ་ཧཱུཾ་ཧཱུཾ་ཕཊ། ལན་གསུམ། དྷིཿ ཞེས་ཀུ་ཤ་ཆུང་བ་གཡས་དང༌། ཧཱ། ཞེས་ཆེ་བ་གཡོན་དུ་གཏད། བཅུ་གཉིས་པ་ནི། འཇིག་རྟེན་དུ་ནི་ཀུན་མཁྱེན་དག །ཨུ་དུམ་ཝ་རའི་མེ་ཏོག་བཞིན། །རྒྱ་ལམ་ན་ནི་རེ་འགའ་ཞིག །འབྱུང་འགྱུར་ཡང་ནི་མི་འབྱུང་ངོ༌། །གསང་སྔགས་སྤྱོད་པའི་ཚུལ་འབྱུང་བ། །དེ་བས་ཀྱང་ནི་དཀོན་པ་སྟེ། །གང་གི་མཉམ་མེད་སེམས་ཅན་དོན། །མྱ་ངན་མི་ཟླ་བྱེད་པར་ནུས། །བསྐལ་པ་བྱེ་བ་དུ་མ་རུ། །སྔོན་དུ་སྡིག་པ་བྱས་པ་གང༌། །དཀྱིལ་འཁོར་འདི་འདྲ་མཐོང་མ་ཐག །དེ་དག་ཟད་པར་འགྱུར་ཡིན་ན། །གྲགས་པ་མཐའ་ཡས་བསྔགས་བརྗོད་པའི། །ཚུལ་ལ་གནས་པས་
སྨོས་ཅི་དགོས། །སྐྱོབ་པའི་གསང་སྔགས་བཟླས་ན་ནི། །གོ་འཕང་བླ་ན་མེད་པར་འགྱུར། །གང་དག་སྤྱོད་པ་མཆོག་འདི་ལ། །བློ་གྲོས་བརྟན་ཞིང་མི་གཡོ་ན། །སྡུག་བསྔལ་ཐམས་ཅད་འབྱུང་བ་ཡི། །ངན་འགྲོ་དེ་ཡིས་གཅོད་པར་འགྱུར། །བདག་ཉིད་ཆེན་པོ་ཁྱེད་རྣམས་ཀྱིས། །རྙེད་པ་མཉམ་མེད་དེ་རིང་རྙེད། །གང་ཕྱིར་རྒྱལ་བ་སྲས་བཅས་པའི། །བདག་ཉིད་ཆེན་པོ་ཀུན་གྱི་ནི། །བསྟན་པ་འདི་ལ་ཁྱེད་རྣམས་ཀུན། །ཡོངས་སུ་བཟུང་སྟེ་སྐྱེ་བཞིན་པ། །དེ་ཕྱིར་ཁྱེད་རྣམས་ཐེག་ཆེན་ལ། །སང་ནི་རབ་ཏུ་སྐྱེ་བར་འགྱུར། །ཐེག་པ་ཆེན་པོར་ཆེར་འབྱུང་བའི། །ལམ་མཆོག་འདི་ནི་དཔལ་དང་ལྡན། །ཁྱེད་རྣམས་དེར་ནི་དོང་བས་ན། །རང་བྱུང་བསྐལ་པ་ཆེན་པོ་ལ། །འཇིག་རྟེན་ཐམས་ཅད་མཁྱེན་པ་ཡི། །དེ་བཞིན་གཤེགས་པ་ཉིད་དུ་འགྱུར། །ཞེས་བརྗོད་ཅིང་དོན་བཤད། བཅུ་གསུམ་པ་ནི། རྨི་ལམ་དགེ་བའམ་མི་དགེ་བ། །ནངས་པར་ང་ལ་རབ་ཏུ་སྨོས། །དོ་ནུབ་ཀུ་ཤའི་སྔས་སྟན་ལ། །སེང་གེའི་ཉལ་སྟབས་དང་དགེ་བའི་སེམས་ཀྱི་ཉོལ་ཞིག །དེ་ལས་རྨི་ལམ་གྱི་མཚན་མ་བཟང་ངན་དག་མཐོང་བར་འགྱུར་རོ། །ཞེས་བརྗོད། སློབ་མ་རྣམས་ཀྱི་ལུས་ལ་གོ་ཆ་གཉིས་དགོས་པའི་དམིགས་པ་ཙམ་བྱས་ཏེ། དགེ་བ་བསྔོས་ལ་སློབ་མ་རྣམས་རང་གནས་སུ་བཏང་ངོ༌། །སློབ་མའམ་སློབ་དཔོན་རྨི་ལམ་མི་དགེ་བ་དག་བྱུང་ན་བཟློག་པའི་ཐབས་ནི། ཞིང་སྐྱོང་མཁའ་འགྲོ་ཐམས་ཅད་ལ། །གཏོར་མ་ཆོ་ག་བཞིན་ཏུ་སྦྱིན། །ཡི་གེ་བརྒྱ་པས་བརྟན་བྱས་ཤིང༌། །བསྲུང་བའི་
འཁོར་ལོ་ཀུན་ཏུ་སྤྱད། །དཔའ་བོ་ཞལ་གྱི་སྔགས་ལ་སོགས། །ཐམས་ཅད་ཀྱང་ནི་བཟླས་པར་བྱ། །གོ་ཆས་བདག་ཉིད་སྲུང་བ་དང༌། །དཔའ་བོ་རྣལ་འབྱོར་མ་རྣམས་ལ། །གསོལ་གདབ་བརྒྱན་སོགས་ང་རྒྱལ་བླངས། །མེ་ཡིས་ལས་ལ་ཀུན་བརྩོན་པས། །བགེགས་རྣམས་ཐམས་ཅད་ཞི་བར་བྱ། ཞེས་བཤད་པར་བྱའོ། །དེ་ཡང་གཏོར་མ་སྦྱིན་པ། ཡིག་བརྒྱ་བཟླ་བ། བསྲུང་འཁོར་སྒོམ་པ། ལས་ཐམས་ཅད་པ་བཟླ་བ། གོ་ཆ་གསུམ་བསྒོམ་པ། ལྷ་ལ་གསོལ་བ་གདབ་པ། རྒྱན་བྱིན་གྱིས་རླབས་པ། རང་ལྷའི་ང་རྒྱལ་བསྒོམ་པ། བདག་འཇུག་གི་དབང་བླང་བ། སྦྱིན་སྲེག་བྱེད་པ་སྟེ་བཅུ་པོ་དེ་དག་ལས་ཇི་ལྟར་འོས་པར་སྦྱར་རོ། །ལྔ་པ་ཐིག་གདབ་པ་ལ་ཐོག་མར་ཕུར་པ་བསྐྱེད་ཆོག་མཆོད་པ་གོང་བཞིན་དང༌། གཏོར་མ་བསངས་སྦྱངས་འབྲུ་གསུམ་གྱིས་བྱིན་གྱིས་རླབས་གོང་བཞིན་འབུལ། དེ་ནས་ཐིག་གི་ཆོ་ག་དངོས་ནི། དཀྱིལ་འཁོར་གྱི་ས་ལ་སུམ་བྷ་བཟླས་པའི་དྲི་བཟང་གི་ཆུའི་གཏོར། རང་དང་གྲོགས་གཙོ་བོ་ཡབ་ཡུམ་དུ་གསལ་བས། ལྔ་ལྔ་ཉི་ཤུ་རྩ་ལྔ་དང་ལྡན་པའི་ཐིག་སྐུད་འདུས་བྱས་ལ། མཆོད་གཏོར་གྱིས་བསྐོར། མཆོད་པ་བྱིན་གྱིས་རླབས། ཐིག་སྐུད་བསངས་སྦྱངས། སྟོང་པའི་ངང་ལས་དབུས་སུ་ཧཱུཾ་ལས་མི་བསྐྱོད་པ་སྐུ་མདོག་སྔོན་པོ་རྡོ་རྗེ་དྲིལ་བུ་འཛིན་པས་ཡུམ་མཱ་མ་ཀི་ལ་འཁྱུད་པ། ཤར་དུ་བྷྲུཾ་ལས་རྣམ་པར་སྣང་མཛད་དཀར་པོ་འཁོར་ལོ་དང་དྲིལ་བུ་འཛིན་པ། ཡུམ་སངས་རྒྱས་སྤྱན་མ་ལ་འཁྱུད་པ། བྱང་དུ་ཨཾ་ལས་རིན་ཆེན་འབྱུང་ལྡན་སེར་པོ་རིན་པོ་ཆེ་དང་དྲིལ་བུ་འཛིན་པ། ཡུམ་རིན་ཆེན་
སྒྲོལ་མ་ལ་འཁྱུད་པ། ནུབ་ཏུ་ཛྲིཾ་ལས་འོད་དཔག་མེད་དམར་པོ་པདྨ་དང་དྲིལ་བུ་འཛིན་པས་ཡུམ་གོས་དཀར་མོ་ལ་འཁྱུད་པ། ལྷོར་ཁཾ་ལས་དོན་ཡོད་གྲུབ་པ་ལྗང་ཁུ་རལ་གྲི་དང་དྲིལ་བུ་འཛིན་པས་ཡུམ་དམ་ཚིག་སྒྲོལ་མ་འཁྱུད་པ། སྣམ་སྣང་ཟླ་བ་དང་གཞན་རྣམས་ཉི་མའི་གདན་ལ་བཞུགས་པ། རིགས་ལྔ་ནི་སྟག་གི་པགས་པའི་སྨད་དཀྲིས་ཅན་རལ་པའི་ཐོར་ཚུགས་དང་ལྡན་པའོ། །ཡུམ་རྣམས་སྐུ་མདོག་ཡབ་དང་མཚུངས་ཤིང་གྲི་གུག་དང་ཐོད་པ་འཛིན་པ་དབུ་སྐྲ་གྲོལ་བའོ། །ཐམས་ཅད་ཀྱང་རུས་པའི་རྒྱན་གྱིས་བརྒྱན་པའོ། །དཔྲལ་པར་ཨོཾ། མགྲིན་པར་ཨཱཿ ཐུགས་ཀར་ཧཱུཾ། རང་གི་སྙིང་གའི་ཧཱུཾ་ཡིག་གི་འོད་ཟེར་གྱིས་ནས། ཡེ་ཤེས་སེམས་དཔའ་རིགས་ལྔ་ཡབ་ཡུམ་གྱི་རྣམ་པར་ཕཻཾ། ཛཿཧཱུཾ་བཾ་ཧོཿ གཉིས་སུ་མེད་པར་ཐིམ། གཏོར་མ་བསངས་སྦྱངས། འབྲུ་གསུམ་གྱིས་བྱིན་གྱིས་རླབས་ནས། ཧཱུཾ་བྲུཾ་ཨཾ་ཛྲིཾ་ཁཾ། ཨོཾ་ཨ་ཀཱ་རོ་སོགས་ཀྱིས་གཏོར་མ་ཕུལ། ཨརྒྷཾ༴ ནས་ཤཔྟའི་བར་གྱིས་མཆོད། དེ་ཉིད་ལྔ་པའམ་རིགས་ལྔའི་བསྟོད་པ་གང་ཡང་རུང་བས་བསྟོད། དེ་ལ་དེ་ཉིད་ལྔ་པ་ནི། མི་བསྐྱོད་རྡོ་རྗེ་ཡེ་ཤེས་ཆེ། །རྡོ་རྗེ་དབྱིངས་ནི་མཁའ་ཆེན་པོ། །རྡོ་རྗེ་གསུམ་མཆོག་དཀྱིལ་འཁོར་གསུམ། །རྡོ་རྗེ་མཁའ་འགྲོ་ཕྱག་འཚལ་བསྟོད། །རྣམ་པར་སྣང་མཛད་དག་པ་ཆེ། །རྡོ་རྗེ་ཞི་བ་དགའ་ཆེན་པོ། །རང་བཞིན་གྱིས་ནི་འོད་གསལ་མཆོག །སངས་རྒྱས་མཁའ་འགྲོ་ཕྱག་འཚལ་བསྟོད། །རིན་ཆེན་རྒྱལ་པོ་རབ་ཏུ་ཟབ། །རྡོ་རྗེ་ནམ་མཁའ་དྲི་
མེད་མཁའ། །རང་བཞིན་དག་པ་གོས་པ་མེད། །རིན་ཆེན་མཁའ་འགྲོ་ཕྱག་འཚལ་བསྟོད། །རྡོ་རྗེ་དཔག་མེད་རྒྱལ་པོ་ཆེ། །མི་རྟོག་ནམ་མཁའ་རྡོ་རྗེ་འཛིན། །འདོད་ཆགས་ཕ་རོལ་ཕྱིན་པ་བརྙེས། །པདྨ་མཁའ་འགྲོ་ཕྱག་འཚལ་བསྟོད། །དོན་ཡོད་རྒྱལ་པོ་རྫོགས་སངས་རྒྱས། །བསམ་པ་ཐམས་ཅད་རྫོགས་མཛད་པ། །དངོས་ཉིད་དག་པ་ཉིད་ལས་བྱུང༌། །སྣ་ཚོགས་མཁའ་འགྲོ་ཕྱག་འཚལ་བསྟོད། ཅེས་པའོ། །རིགས་ལྔ་ཡབ་ཡུམ་ཞུ་བ་ལས་བྱུང་བའི་ཐིག་སྐུད་རྣམ་པ་ལྔར་གྱུར། ཨོཾ་ཨཱཿཧཱུཾ་ཧཱུཾ་ཕཊ་སྭཱཧཱ། ཨོཾ་ཨཱཿབྷྲུཾ་ཧཱུཾ་ཕཊ་སྭཱཧཱ། ཨོཾ་ཨཱཿཨཾ་ཧཱུཾ་ཕཊ་སྭཱཧཱ། ཨོཾ་ཨཱཿཛྲིཾ་ཧཱུཾ་ཕཊ་སྭཱཧཱ། ཨོཾ་ཨཱཿཁཾ་ཧཱུཾ་ཕཊ་སྭཱཧཱ། ཞེས་པ་དང༌། གཙོ་བོ་ཡབ་ཡུམ་གྱི་སྙིང་པོ་ཅི་རིགས་པའི་བྱིན་གྱིས་རླབས། ཡང༌། ཨོཾ་ཏྲཾ་ཁཾ་ཧཱུཾ་ཞེས་པ་རྣམས་ས་བོན་དུ་བྱས་ཏེ་གཏོར་སྔགས་དང་བྱིན་རླབས་ཀྱི་སྔགས་སོགས་ལའང་དེའི་རིགས་འགྲེའོ། །དེ་ནས་ཡེ་ཤེས་ཀྱི་ཐིག་ལྔ་ཚན་དུ་བསྒྲིལ་ལ་སྙིང་པོ་བཟླའོ། །ལས་ཐིག་ནི། བྱིན་རླབས་དེ་དང་མཚུངས་པའམ། ལས་ཐམས་ཅད་པའི་ལྷར་བསྐྱེད་ཀྱང་རུང་སྟེ། ཁྲག་ཆེན་གྱིས་སྤགས་ལ་གསུམ་སྒྲིལ་དུ་བསྒྲིལ། བདུད་རྩི་ལྔ་དང་ཙནྡན་གྱིས་བྱུགས། འབྲུ་གསུམ་དང་ཧཱུཾ་ཡིག་གཅིག་པུས་བྱིན་གྱིས་བརླབ་བོ། །ཨོཾ་བཛྲ་ས་མ་ཡ་སུ་ཏྲ་མ་ཏི་ཀྲ་མ་ཧཱུཾ། ཞེས་བཟླ་ཞིང་གྲོགས་ལ་གཏད་ལ། ཛྫཿཛྫཿཛྫཿ ཞེས་བརྗོད། འཇིག་རྟེན་གྱི་ཁམས་མ་ལུས་པ་ན་བཞུགས་པའི་སངས་རྒྱས་ཐམས་ཅད་ཀྱིས་འགྲོ་བའི་དོན་མཛད་པའི་དུས་ནི་འདི་ཡིན་ནོ། །ཞེས་བསམ། མ་ལུས་འཇིག་རྟེན་ཁམས་བཞུགས་པའི། སངས་
རྒྱས་ལ་སོགས་ཁྱེད་རྣམས་ཀྱིས། །འགྲོ་དོན་མཛད་པའི་དུས་འདི་ནི། །ལགས་པས་དེ་ཕྱིར་འདིར་བྱོན་ཅིག །ཅེས་དང་པོར་ནམ་མཁའ་དང་དེ་ནས་ས་ལ་གདབ་བོ། །དེ་ཡང་བྱང་ལྷོ་ནུབ་ཤར་ཚངས་ཐིག་སྟེ། མེ་རླུང་སྲིན་དབང་ཟུར་ཐིག་གོ །རྩེ་མོ་ཅན་དང་འབྱུང་པོས་ཤར། །གཙུག་ཕུད་ཅན་དང་མཚན་རྒྱུས་ལྷོ། །གཡོ་བྱེད་བསྲུང་བས་ནུབ་ཀྱི་སྟེ། །རྟ་དམར་དྲགས་པོ་བྱང་དུའོ། །གཡོན་ནས་བརྩམས་པའི་བསྐོར་བ་དང༌། །སློབ་མའི་སློབ་དཔོན་རྒྱབ་མི་ཕྱོགས། །རྡུལ་ཚོན་གྱི་དཀྱིལ་འཁོར་ལ་ནི། ཤིན་ཏུ་གོ་སྐབས་མི་བདེ་ན་མ་གཏོགས། འཇིག་རྟེན་ལྷོ་ལ་དཀྱིལ་འཁོར་གྱི་ཤར་བསྟན་པར་བྱ་ལ། རས་བྲིས་ཀྱི་དཀྱིལ་འཁོར་ལ་ནི་ངེས་པ་མེད་དོ། །དེ་ནས་ཕྱོགས་ཐམས་ཅད་རང་བཞིན་མཉམ་པ་ཉིད་དུ་ཤེས་པར་བྱའོ། །དེ་ནས་ལས་ཐིག་གདབ་པ་ལ། དཀྱིལ་འཁོར་སྤྱིའི་མཚན་ཉིད་གཞན་དུ་རྟོགས་པར་བྱ་ལ། ནང་གི་ཆ་ནི་དགེ་སློང་དཱ་རི་ཀ་པས། ཚངས་པའི་ཐིག་གི་ངོས་རེར་ཡང་རེ་རེ་ལྔར་བྱ་ཉི་ཤུ་གདབ། ཕོ་བྲང་ལ་གཉིས་གེ་སར་གཅིག །གསུམ་གསུམ་གྱི་ནི་འཁོར་ལོ་རྣམས། །ཀ་བ་གྲི་གུག་རྡོ་རྗེའི་འཕྲེང༌། །པདྨ་འཁོར་ལོ་རེ་རེར་བྱ། །གཅིག་གི་ཕྱི་མའི་ཁྱམས་ཡིན་ཏེ། །ཅེས་པ་ལྟར་ཚངས་ཐིག་ནས་རྩ་ཐིག་གི་བར་ལ་ཆ་ཆེན་བཞི་ཡོད་པ་རེ་རེ་ཡང༌། ལྔ་ཚན་ལྔ་ཚན་དུ་བཀོད། པདྨའི་སྙིང་པོ་ལ་གཉིས། འཁོར་ལོ་བཞི་ལ་གསུམ་གསུམ། གེ་སར་དང་འཕྲེང་བ་བཞི་ལ་རེ་རེ། ལྷ་རྣམས་ལ་གཅིག་གོ །ཡང་ན་གེ་སར་གྱི་དོད་འདབ་མ་ལ་སྣོན་པར་བཤད་ཀྱང༌། དེའི་དོད་ལྷ་རྣམས་ལ་བསྣན་ན་ལེགས་ཏེ། ཡང་ན་འཇིགས་མེད་འབྱུང་གནས་ཞབས་ཀྱིས་གྲུབ་ཆེན་ལཱུ་ཡི་པའི་དགོངས་པ་བསྐང་བ་ལྟར་བཏབ་ཀྱང་རུང་ལ། རྩ་རྒྱུད་ཀྱི་
འགྲེལ་པ་ལཱ་བ་པས་མཛད་པ་ནས་བཤད་པའི་ཐིག་གི་རྣམ་བཞག་ཀྱང་ལཱུ་ཡི་པའི་ལུགས་འདི་དང་འབྲེལ་ཆགས་པ་ཡིན་པས་དེ་དག་གསུམ་པོ་གང་རུང་ཞིག་དང་མཐུན་པར་གདབ་བོ། དུར་ཁྲོད་ནི་བསྲུང་འཁོར་གྱི་ཕྱི་ནང་གང་ཡང་རུང་བར་ཏེ། རྡོ་རྗེའི་ར་བའི་ནང་དུ་འབྲི་ན་ཆ་ཆེན་གཅིག་ཡིན་ལ། ཕྱི་རོལ་དུ་འབྲི་ན་ཚད་ངེས་པ་མེད་དོ། །རྟ་བབས་ཡང་སྒོའི་ཚད་གསུམ་འགྱུར་དང༌། སྒོ་ཚད་གཅིག་ལ་སོགས་པ་དང་སྣམ་བུ་ཡང་བཞི་དང་བརྒྱད་དང་བཅུ་གཅིག་ལ་སོགས་པ་ཚད་དང་ལྡན་པའི་ལུགས་གཅིག་དང་མཐུན་ན་གང་ཡང་འགལ་བ་མེད་དོ། །དེ་ནས་ཐིག་གི་ལྷ་ལ་མཆོད་བསྟོད་ཕུལ། ཨོཾ་ཨཱཿཧཱུཾ་བཛྲ་མུཿ ཞེས་གཤེགས་སུ་གསོལ། སྐབས་འདིར་མིག་ཏུ་ཧཱི་བཀོད་ལ་སྒོའི་རྩ་ཐིག་ཕྱི། འོན་ཀྱང་འདི་བསྐོར་གྱི་གཞུང་ཐུན་མོང་མ་ཡིན་པ་རྣམས་ནས། སྒོའི་རྩ་ཐིག་དབྱིབས་མ་གསུངས་པས། མ་བྱས་ཀྱང་ཆོག་པར་མངོན་ནོ། །དྲུག་པ་རྡུལ་ཚོན་དབྱེ་བ་ནི། རྡུལ་མཚོན་ལྔའམ་ཉི་ཤུ་རྩ་ལྔ་འདུས་བྱས་ལ། མཆོད་གཏོར་གྱིས་བསྐོར། མཆོད་པ་བྱིན་རླབས་ནས། གཙོ་བོ་ཡབ་ཡུམ་གྱི་སྙིང་པོས་བྱིན་གྱིས་རླབས་པའི་བར། ཐིག་སྐུད་བྱིན་རླབས་དང་འདྲ་བ་ལས། རྡུལ་མཚོན་རྣམ་པ་ལྔར་གྱུར། ཞེས་འདོད་པ་སྤོ། ཨོཾ་བཛྲ་ཙི་ཏྲ་ས་མ་ཡ་ཧཱུཾ། ཞེས་ལན་བརྒྱ་རྩ་བརྒྱད་ཀྱིས་བྱིན་གྱིས་བརླབས། སློབ་དཔོན་དཀྱིལ་འཁོར་གྱི་དབུས་སུ་ཁ་ལྷོར་ཕྱོགས་པས་གནས་ཏེ། འདི་ནི་ཆོས་དབྱིངས་དག་པ་སྟེ། །སེམས་ཅན་ཁམས་ནི་སྒྲོལ་བྱེད་པ། །དཔལ་ལྡན་ཁྲག་འཐུང་རྒྱལ་པོ་ཉིད། །དེ་བཞིན་གཤེགས་པ་ཀུན་གྱི་གནས། །ཉེས་པ་ཀུན་ལས་རྣམ་
གྲོལ་བ། །ཚོན་གྱི་ལས་ནི་ཡང་དག་བརྩམ། ཅེས་བརྗོད། ཨོཾ་བཛྲ་ཙི་ཏྲ་ས་མ་ཡ་ཧཱུཾ། གི་སྔགས་བཟླ་ཞིང༌། རྩིག་པ་དཀར་པོ་ནས་བརྩམས་ཏེ། བྲི་བར་བྱའོ། །ཚོན་གྱི་ཁ་དོག་ནི་ཕལ་ཆེར་དཀྱིལ་འཁོར་སྤྱིའི་མཚན་ཉིད། མཚན་རྟོགས་པས་ཤེས་པར་འགྱུར་ལ། ལྷ་རྣམས་ཀྱི་ཕྱོགས་མདོག་ཤར་དཀར་ལྷོ་སེར་སོགས་ཡིན་ལ། ཐུགས་འཁོར་གྱི་གཞི་ལྗང་ཁུ། གསུང་འཁོར་གྱི་དཀར་པོ། སྐུ་འཁོར་གྱི་དམར་པོ་བཤད་པའང་ཡོད་ལ། ཡང་དེ་གསུམ་རིམ་ཅན་དུ་སྔོ་དཀར་དམར་བར་མཛད་པའང་ཡོད་དེ། དེ་གཉིས་ཀའང་རྒྱུད་སོ་སོའི་དགོངས་པའོ། །འདོད་སྣམ་ཡང་དམར་པོ་དང་སེར་པོ་དང་དཀར་པོ་ཇི་ལྟར་བྲིས་ཀྱང་རུང༌། བདེ་ཆེན་འཁོར་ལོའི་མུ་ཁྱུད་སེར་པོ་དང༌། གྲི་གུག་གི་འཕྲེང་བ་སྔོན་པོའོ། །རྡོ་རྗེ་ར་བ་ཡང་གཞི་སྔོན་པོ་ལ་རྡོ་རྗེ་ལྗང་ཁུའི་འཕྲེང་བར་བྱའོ། །ལྷའི་མཚན་མ་ནི། གཙོ་བོའི་གནས་སུ་རྡོ་རྗེ་དང་གྲི་གུག་གམ། ཐོད་པ་ལ་གནས་པ་ཉི་མའི་དཀྱིལ་འཁོར་གྱི་གདན་ལའོ། །ཕྱོགས་ཀྱི་འདབ་མ་བཞི་དང་སྒོ་མཚམས་མ་བརྒྱད་ལ་ཡང་གྲི་གུག་སྟེ་བརྒྱད་པོ་ནི་མི་རོའི་གདན་ལའོ། །མཚམས་ཀྱི་འདབ་མ་བཞི་ལ་ནི་བུམ་ཐོད་དོ། །ཐུགས་ཀྱི་རྩིབས་བརྒྱད་ལ་རྡོ་རྗེ་གྲི་གུག་རེའོ། །གསུང་གི་བརྒྱད་ལ་པདྨ་དང་གྲི་གུག་གོ །སྐུའི་བརྒྱད་ལ་འཁོར་ལོ་དང་གྲི་གུག་གོ །ཡང་ན་གཙོ་བོའི་གནས་དང་ཐུགས་འཁོར་ལོ་རྡོ་རྗེ། གསུང་ལ་པདྨ། སྐུ་ལ་འཁོར་ལོ། རྣལ་འབྱོར་མ་བཅུ་གཉིས་ལ་གྲི་གུག་གོ །ཡང་ན་འཁོར་ལོ་གསུམ་ལ་རྡོ་རྗེ་དང་གྲི་གུག་འབའ་ཞིག་གོ །གཞན་ཡང་གཅིག་ཏུ་གཙོ་བོའི་གནས་སུ་རྡོ་རྗེ་དང༌། ལྷག་མ་རྣམས་ལ་གྲི་གུག་གོ །འགའ་ཞིག་ལས་
ལས་ནི་ཕྱོགས་ཀྱི་འདབ་མ་བཞི་ལ་རིགས་བཞིའི་ཕྱག་མཚན་གྱིས་མཚན་པས་ཁ་ཊྭཾ་ག་རེ་རེའོ། །གཞན་དག་ནི་གྲི་གུག་སུམ་ཅུ་རྩ་བདུན་ཞེས་ཀྱང་འདོད་དོ། །དེ་ཐམས་ཅད་ལ་མི་རུང་བ་མེད་པར་མངོན་ནོ། །དེ་བཞིན་དུ་ས་བོན་དང་སྔགས་ཀྱི་ཡི་གེ་འབྲི་བ་དང་ལུགས་སུ་བྱས་པ་དང་རི་མོར་བྲིས་པའི་སྐུ་གཟུགས་འཇོག་པ་དང༌། རྡུལ་ཚོན་གྱི་ཚོམ་བུ་དང་གདན་གྱི་རྣམ་པར་དགོད་པ་སོགས་ཀྱང༌། ཇི་ལྟར་སྐབས་སུ་བབ་པ་དག་བྱའོ། །དེ་ནས་སློབ་དཔོན་གྱིས་རྡོ་རྗེ་གསོར་ཞིང་དྲིལ་བུ་དཀྲོལ་ལ་དཀྱིལ་འཁོར་ལ་གཡོན་ནས་ལན་གསུམ་དུ་བསྐོར་ནས། ཤར་ལྷོར་ཡི་གེ་བརྒྱ་པ་དང་ཞལ་བཞི་པའི་སྔགས་བཟླས་ནས། བྲིས་ཀྱི་སྐྱོན་དག་པར་བསམ་མོ། །རྡུལ་མཚོན་གྱི་ལྷག་མ་ལ་མཆོད་བསྟོད་གཤེགས་གསོལ་བྱ། ལྷག་མའི་ཐིག་ཚོན་དེ་དག་དབེན་པའི་གནས་སུ་བཞག་གོ། བདུན་པ། རྒྱན་དང་ཡོ་བྱད་དགོད་པ་ནི། བཀྲ་ཤིས་ཀྱི་བུམ་པ་བརྒྱད། སྒོ་མཚམས་མ་བརྒྱད་དུ་དགོས་པ་ལ། དེ་དག་ཏུ་མི་བདེ་ན་རྡོ་རྗེའི་ར་བའི་ནང་གི་ཕྱོགས་མཚམས་བརྒྱད་དུའོ། །རྣམ་རྒྱལ་བུམ་པ་ལ་ནི་གཙོ་བའི་གནས་སུ་འགོད་ཅིང༌། འདིར་ཡང་དེར་མི་བདེ་ན་ཤར་གྱི་བུམ་པའི་ནང་ཚན་དུ་དགོད་པར་བྱའོ། །ལས་བུམ་ནི་འཇིག་རྟེན་གྱི་ལྷོ་དཀྱིལ་འཁོར་ཆེན་པོའི་ཤར་སྒོའི་གཡོན་ལོགས་སུ་འགོད་དོ། །བུམ་པ་རྣམས་ཀྱི་སྟེང་དུ་རིན་པོ་ཆེ་དང་བཟའ་བ་སྣ་ཚོགས་ཀྱིས་བཀང་བའི་ཐོད་པ་བཞག་གོ །གཞན་ཡང་ཇྀ་སྐད་དུ། མེ་ཏོག་སྤོས་དང་མར་མེ་དང༌། །དྲི་དང་བཟའ་བ་རོལ་མོ་དང༌། །གོས་དང་ཀུ་ཤ་རྒྱན་ལ་སོགས། །ཉེ་
འཁོར་དུ་ནི་དགོད་པར་བྱ། །ཆང་དང་ཤ་རློན་གཏོར་མ་དང༌། །འདུ་བ་ཡི་ནི་རྫས་རྣམས་ཀུན། །དེ་ཡིས་ཕྱི་རོལ་དག་ཏུ་བཞག །དར་དང་བླ་བྲེ་གདུགས་དང་ནི། །རྒྱལ་མཚན་རྣམས་ཀྱིས་གནས་བརྒྱན་ཏེ། ཁྲག་འཐུང་ཆ་ལུགས་འཛིན་པ་ཡིས། །སྒོ་གསུམ་བཞི་ནི་བཞག་པར་བྱ། ཞེས་པ་ལྟར། བུམ་པ་འབུལ་བའི་སྐབས་རོལ་མོའི་སྒྲ་དང་བཅས་ཏེ་དཀྱིལ་འཁོར་ལ་བསྐོར་བ་ལན་གཅིག་གམ་གསུམ་བྱས་ནས། བུམ་པ་གཞན་རྣམས་སོ་སོའི་གནས་སུ་འཇོག་རྣམ་རྒྱལ་བུམ་པ་ནི་གཙོ་འཁོར་ཐམས་ཅད་ཀྱི་སྔགས་བཟླས་བཞིན་དུ། སོ་སོའི་གནས་སུ་འཇོག་ཚུལ་ཙམ་བྱས་ནས། མཐར་དབུས་སམ་ཤར་ཕྱོགས་སུ་འཇོག་པ་ལག་ལེན་དུ་མཛད་ཀྱིན་སྣང་བས་སྤྲོས་པ་ལ་དགའ་ན་དེ་ལྟར་བྱ་ལ། འོན་ཀྱང་གཞུང་ནས་བཤད་པ་མ་མཐོང་སྟེ། མདོར་བསྡུས་པའི་ཚེ་མ་བྱས་ཀྱང་ཆོག་གོ །བརྒྱད་པ་དཀྱིལ་འཁོར་སྒྲུབ་པ་ནི། གོང་དུ་བཤད་པ་ལྟར། སྔོན་འགྲོ་གཏོར་མ་ནས་བདག་བསྐྱེད་རྫོགས་པའི་བར་བསྒོམས་ནས། དཀྱིལ་འཁོར་ལ་དམིགས་ཏེ་སྦྱང་བ་གསུམ་བྱེད་དགོས་པ་ལས། བགེགས་གཏོར་བསངས་སྦྱངས། འབྲུ་གསུམ་གྱིས་བྱིན་གྱིས་རླབས། གཏོར་མའམ་མཐེབ་ཀྱུ་གསུམ་པོ་རིམ་གྱིས་བསྐོར་ལ། ཨོཾ་སརྦ་བིགྷྣཱན་བྷྱཿ ན་མཿསརྦ་ཏ་ཐཱ་ག་ཏ་བྷྱོ་བི་ཤྭ་མུ་ཁེ་བྷྱེཿ སརྦ་ཐཱ་ཁཾ་ཨུད་ག་ཏེ་སྥ་ར་ཎ་ཨི་མཾ་ག་ག་ན་ཁཾ། གྲྀཧྞ་དམ་བ་ལིཾ་ཏེ་སྭཱཧཱ། ཞེས་ལན་གསུམ། འདིར་བགེགས་ཀྱིས་ཚོགས་གང་ཡིན་པ་ཐམས་ཅད། མཆོད་
སྦྱིན་གྱི་གཏོར་མ་རྒྱ་ཆེན་པོ་འདིས་ཚིམ་ནས། ཕན་པ་དང་བདེ་བའི་སེམས་ལྡན་པས་གཞན་དུ་དེངས་ཤིག ཞི་བས་སྦྱང་བའོ། །ཨོཾ་སུམ་བྷ་སོགས་ལན་གསུམ་བཟླས་ཤིང་རྡོ་རྗེ་གསོར་ལ། ཏིང་ལོའམ་ཆང་བུ་སྐོར། འདིར་བགེགས་ཀྱི་ཚོགས་གང་ཡིན་པ་དེ་ཐམས་ཅད། གཏོར་མ་ལམ་རྔན་ཏིང་ལོ་ལམ་སྒྲོན། ཆང་བུ་ལམ་རྒྱགས་ཀྱི་ཚུལ་དུ་ཁྱེར་ལ། སའི་ཕྱོགས་འདིར་མ་གནས་པར་གཞན་དུ་སོངས་ཤིག ཅེས་པས་ནི་ཞི་དྲག་ཕྱེད་མས་སྦྱངས་པའོ། །ཧཱུཾ་མཛད་ཀྱི་ཕྱག་རྒྱ་བྱས་ནས་བདེན་སྟོབས་བརྗོད་ལ་མཐར་དྲག་པོའི་མཚམས་རྔམས་རོལ་ཆེན་དང་བཅས་པས་སྐྲད་པ་ནི། འདི་ལྟར། ན་མོ་རྗེ་བཙུན་རྩ་བ་དང་བརྒྱུད་པར་བཅས་པའི་དཔལ་ལྡན་བླ་མ་དམ་པ་རྣམས་ཀྱི་བཀའ་བདེན་པ་དང༌། ཡི་དམ་རྒྱལ་བ་དཀྱིལ་འཁོར་གྱི་ལྷ་ཚོགས་རྣམས་ཀྱི་བཀའ་བདེན་པ་དང༌། དཔལ་མགོན་དམ་པ་ཆོས་སྐྱོང་བསྲུང་མ་ཡེ་ཤེས་ཀྱི་སྤྱན་དང་ལྡན་པ་རྣམས་ཀྱི་བཀའ་བདེན་པ་དང༌། སངས་རྒྱས་ཀྱི་བཀའ་བདེན་པ་དང༌། ཆོས་ཀྱི་བཀའ་བདེན་པ་དང༌། དགེ་འདུན་གྱི་བཀའ་བདེན་པ་དང༌། ཆོས་ཀྱི་དབྱིངས་རྣམ་པར་དག་ཅིང་བསམ་གྱིས་མི་ཁྱབ་པའི་བདེན་པ་དང༌། ཀུན་རྫོབ་རྒྱུ་འབྲས་བསླུ་བ་མེད་པའི་བདེན་པ་དང༌། བདེན་པ་ཆེན་པོའི་བྱིན་གྱིས་བརླབས་ཀྱིས། འདིར་དཀྱིལ་འཁོར་ཆེན་པོ་སྒྲུབ་ཅིང་མཆོད་པ་དང་དབང་གི་ལས་ལ་འཇུག་པ་ལ། བར་དུ་གཅོད་པར་བྱེད་པའི་འབྱུང་པོ་གདོན་
བགེགས་ཀྱི་རིགས་གང་ཡིན་པ་དེ་དག །དེང་དཔལ་ཧེ་རུ་ཀའི་བཀའ་ཐོས་པས་སའི་ཕྱོགས་འདིར་གནས་པར་མྱུར་བ་ཉིད་དུ་སོངས་ཤིག །གང་དག་མི་འགྲོ་བ་དེ་དག་ཐམས་ཅད་དུས་གསུམ་གྱི་སངས་རྒྱས་ཐམས་ཅད་ཀྱི་ཐུགས་གཉིས་སུ་མེད་པའི་ཡེ་ཤེས་ལས་བྱུང་བའི། ཁྲོ་བོའི་རྡོ་རྗེ་དང་རྡོ་རྗེ་ཁ་ཊྭཾ་ག་འབར་ཞིང་རབ་ཏུ་འབར་བ་འདིས། ཁྱེད་རྣམས་ཀྱི་མགོ་བོ་ཚལ་པ་བརྒྱར་གས་པར་བྱའོ། །ཞེས་བགེགས་བསྐྲད་ཅིང་གཏོར་མ་ཕྱིར་དོར། དྲག་པོས་སྦྱངས་པའོ། །དགེ་སློང་དཱ་རི་ཀ་པས། བགེགས་ལ་གཏོར་མ་སྦྱིན་བྱས་ཏེ། །ཞལ་བཞི་པའི་སྔགས་བཟླས་ཤིང༌། ཆང་བུ་དང་ནི་མར་མེས་སྦྱངས། གུ་གུལ་ཡུང་དཀར་གྱིས་བགེགས་ལ། ཞེས་བཤད་བགེགས་སྦྱང་བ་གསུམ་མོ། །བསྡུས་པ་ལ་མོས་ན། བཀའ་བསྒོ་བ་ཡིད་ཀྱིས་བྱས་ནས་སྔགས་ཙམ་བརྗོད་དོ། །བདག་གཞན་སེམས་ཅན་ཐམས་ཅད་ཀྱི་འཁོར་བ་ཐོག་མ་མེད་པ་ནས་བསགས་པའི་སྡིག་སྒྲིབ་ཐམས་ཅད་སྙིང་གར་ཡི་གེ་བཾ་གྱི་རྣམ་པར་གནས་པ། ལྟེ་བའི་གཏུམ་མོ་འབར་བའི་འོད་ཀྱིས་དེད་དེ། སྣ་སྒོར་སྡིག་པ་རྭ་ཅན་གྱི་རྣམ་པར་གྱུར་པ་མདུན་གྱི་ཏིལ་ལ་ཐིམ། བསངས་སྦྱངས། འབར་བའི་མེ་ནང་དུ་ཁྲོ་བོ་རྡོ་རྗེ་མཁའ་འགྲོ་རྡོ་རྗེ་དང་དྲིལ་བུ་འཛིན་པ་ཞལ་གདངས་པའོ། །ཨོཾ་བཛྲ་ཌ་ཀ་ཁ་ཁ་ཁཱ་ཧི་ཁཱ་ཧི། སརྦ་པཱ་པཾ་ད་ཧ་ན་བྷསྨི་ཀུ་རུ་སྭཱཧཱ། ལན་གསུམ་བརྗོད། ལས་ཀྱི་རྡོ་རྗེ་ཏིལ་གཡས་གཡོན་དུ་བསྐོར་ནས། གཡས་སུ་མེ་དང་གཡོན་དུ་ཆུ་དོར་བས་
རྡོ་རྗེ་མཁའ་འགྲོའི་ཞལ་དུ་གསོལ་བ་དང༌། རྒྱ་མཚོ་ཆེན་པོར་བསྒྱུར་བར་བསམ། མཐར་མེ་ཡང་ཆུ་ནང་དུ་ལུགས་སོ། །སྡིག་པ་སྤྱད་པའོ། །དེ་ནས་མེ་ལོང་བསྟན་ཏེ། ལས་བུམ་བླངས་ནས་ཁྲུས་གསོལ་བྱ་སྟེ། ཇི་ལྟར་བལྟམས་པ་ཙམ་ནས། ཤྲི་ཡེ་ཧཱུཾ། འདི་ནི་ཁྲུས་མཆོག སོགས་དང༌། དེ་བཞིན་གཤེགས་དང༌། སོགས་རོལ་ཆེན་དང༌། བཅས་པས་ཀྱང་ཁྲུས་གསོལ། དེ་དག་སྐུ་ལ་ནས། ཨོཾ་ཧཱུཾ་ཏྲཱཾ་ཧྲིཿཨཿཀཱ་ཡ་བི་ཤྭདྷ་ན་ཡེ་སྭཱཧཱ། ཞེས་སྐུ་ཕྱིས་ཕུལ། སྤྲོ་ན་དྲིའི་བྱུག་པ་དང༌། གོས་བརྒྱན་ཡང་འབུལ་ཏེ། དྲི་མ་སྦྱངས་པའོ། །དེ་ནས་བར་འདིར་ཕུར་བུ་གསལ་བཏབ་ནས་མཆོད་པ་འབུལ་བ་སྟ་གོན་གྱི་སྐབས་བཞིན། མདུན་བསྐྱེད་དཀྱིལ་འཁོར་བསངས་སྦྱངས། ཨོཾ་ཤཱུནྱ་ཏ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། ཨོཾ་ཨ་ནི་མི་ཏ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། ཨོཾ་ཨ་པྲ་ཎི་ཧི་ཏ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། ཞེས་རྣམ་ཐར་སྒོ་གསུམ་གྱི་དོན་བསམ་མོ། །སྟོང་པའི་ངང་ལས། ཡཾ་ལས་རླུང་གི་དཀྱིལ་འཁོར་སྔོན་པོ༴ ནས། ལྕོག་བརྒྱད་དང་ལྡན་པ། དེའི་རྩེ་མོར་བསྲུང་བའི་འཁོར་ལོའི་དབུས་སུ་ནས་གང་བའོ། །བདེ་ཆེན་འཁོར་ལོའི་དབུས་ཀྱི་ལྟེ་བ་རང་ཉིད་ཧཱུཾ་ཡིག་གི་རྣམ་པར་གནས་པར་གྱུར། དེ་ལས་འོད་ཟེར་ཁ་དོག་ལྔ་འཕྲོས། འཁོར་ལོས་ལྔའི༴ ཞེས་པ་ནས། རྗེས་ཆགས་ཀྱིས་ཞུ་བ་ཧཱུཾ་ཡིག་ལ་ཐིམ། དེ་ཡོངས་སུ་གྱུར་པ་ལས་དཀྱིལ་འཁོར་གྱི་ལྷ་ཚོགས་ཡོངས་སུ་རྫོགས་པ་ནི།
བདེ་ཆེན་འཁོར་ལོའི་དབུས་ཀྱི་ལྟེ་བར་འཁོར་ལོ་བདེ་མཆོག༴ ནས་མེ་དཔུང་རབ་ཏུ་འབར་བའི་དབུས་ན་བཞུགས་པའོ། །བདེ་ཆེན་འཁོར་ལོའི་འདབ་མ་བརྒྱད་ལ། ཤར་དུ་མཁའ་འགྲོ་མ༴ ནས་རྡོ་རྗེ་འཕྲེང་བའི་མཚན་པའོ། །ཡབ་ཀྱི་སྙིང་གར་ཨོཾ་ཧ་དཀར་པོ་རྡོ་རྗེ་སེམས་དཔའ་ནས་ཉི་མའི་འོད་ཅན་ནོ། །ལྷ་ཐམས་ཅད་ཀྱི་དཔྲལ་པར་ཨོཾ་ནས་དབང་གི་ལྷ་ཐམས་ཅད་རང་ལ་གཉིས་སུ་མེད་པར་ཐིམ་གྱི་བར་ལྷ་སྟ་གོན་གྱི་སྐབས་དང་འདྲ། སླར་ཡང་རང་གི་སྙིང་གའི་ཧཱུཾ་ཡིག་གི་འོད་ཟེར་གྱིས། སྟ་གོན་གྱི་ལྷ་རྟེན་དང་བརྟེན་པར་བཅས་པའི་དཀྱིལ་འཁོར་ཐམས་ཅད་སྤྱན་དྲངས་པར་གྱུར་ཕཻཾ། སུམྦྷ། ལན་གཅིག་བཟླས་ཤིང་རྡོ་རྗེ་གསོར། ཆུ་གཉིས་ཉེར་སྤྱོད་རོལ་མོ་རྣམས་ཀྱིས་མཆོད། རྐང་བརྒྱད་ཀྱིས་བསྟོད། ཛཿཧཱུཾ་བཾ་ཧོཿ ལན་མང་དུ་བརྗོད། ཨོཾ་ཡོ་ག་ཤུདྡྷ་སརྦ་དྷརྨཱ་ཡོ་ག་ཤུདྡྷོ྅་ཧཾ། ཞེས་བརྗོད་དོ། །སྒྲུབ་མཆོད་ཞག་སྦྲེལ་མ་བྱེད་ན། དངོས་གཞི་ཉི་མ་གཉིས་པ་ཕན་ཆད་ལ། སྟ་གོན་གྱི་ལྷ་སྤྱན་འདྲེན་འདི་མི་དགོས་སོ། །དེ་ནས་བྱིན་རླབས་དྲུག་སྐོར་དུ་གྲགས་པ། མདུན་བསྐྱེད་དཀྱིལ་འཁོར་བྱིན་གྱིས་བརླབས་པའི་བཟླས་པ་སྟེ། ཁ་ཅིག་མཆོད་པའི་རྗེས་སུ་བཟླས་པ་བྱེད་པར་འདོད་པ་ཡང་ཡོད་དོ། །མཆོད་པ་ལན་གཅིག་ལས་མི་བྱེད་ན། མཆོད་པའི་སྔོན་དུ་བཟླས་པ་བྱ་ལ། གཉིས་བྱེད་ན་གཉིས་ཀྱི་བར་དུ་བྱས་པས་ལེགས་པར་འགྱུར་རོ། །གང་ལྟར་ཡང་དཀྱིལ་འཁོར་གྱི་གཙོ་བོ་ལས། ཧེ་རུ་ཀ་གཉིས་པ་ཞིག་ཆད་ནས། བཟླས་པ་དང་མཆོད་པ་བྱེད་ཅིང་བདག་འཇུག་ལེན་པ་ཡིན་ལ། ལས་ཀྱི་རྡོ་རྗེ་
ལྷོ་ཕྱོགས་སུ་འདུག་ལ། དབྱུགས་གུའི་སྣ་ལ་རྡོ་རྗེ་བཏགས་པས། ལྷ་སོ་སོའི་གནས་སུ་གནོད་པ་མེད་པར་རེག་ཅིང༌། སྔགས་མཆོད་བཞིན་ལྷ་ཐམས་ཅད་ཀྱི་སྙིང་པོ་ཚར་གཅིག་བརྗོད། བུམ་ཐོད་ཀྱི་གནས་སུ་འབྲུ་གསུམ་བརྗོད་དེ་དང་པོའོ། །འདིར་རེ་རེ་བཞིན་མང་དུ་བཟླས་ན་ལེགས་སོ། །དེ་ནས་ལྷ་ཐམས་ཅད་ལ་ཡུམ་གྱི་ཉེ་སྙིང་བཟླ་སྟེ་གཉིས་པའོ། །ཨོཾ་ཀ་ཀ་སྱ། ཨུ་ལུ་ཀ་སྱ། ཤྭ་ན་སྱ། སུ་ཀ་རཱ་སྱ་ཧཱུཾ་ཧཱུཾ་ཕཊ། ཞེས་པའམ་སྒོ་མཚམས་མ་བརྒྱད་ཆར་གྱི་སྔགས་བཟླ་སྟེ། གསུམ་པའོ། །ཨོཾ་ཨ་ཨཱ། ཨི་ཨཱི། ཨུ་ཨཱུ། རྀ་རཱྀ། ལྀ་ལཱྀ། ཨེ་ཨཻ། ཨོ་ཨཽ། ཨཾ་ཨཿ ཧཱུཾ་ཧཱུཾ་ཕཊ་སྭཱཧཱ། ཞེས་བཟླ་སྟེ་བཞི་པའོ། །ཨོཾ་ཀ་ཁ་ག་གྷ་ང༌། ཙ་ཚ་ཛ་ཛྷ་ཉ། ཊ་ཋ་ཌ་ཌྷ་ཎ། ཏ་ཐ་ད་དྷ་ན། པ་ཕ་བ་བྷ་མ། ཡ་ར་ལ་ཝ་ཤ་ཥ་ས་ཧ་ཀྵ་ཧཱུཾ་ཧཱུཾ་ཕཊ་སྭཱཧཱ། ཞེས་པའང་བཟླ་སྟེ་ལྔ་པའོ། །ལྷ་སོ་སོའི་མཚན་དང་སྤེལ་བའི་ཡི་གེ་བརྒྱ་པའམ། དེ་མ་ལྕོགས་ན། ཧེ་རུ་ཀའི་ཡི་གེ་བརྒྱ་པ་ཉིད། ལྷ་དྲུག་ཅུ་རྩ་གཉིས་ཀྱི་གནས་སུ་སྦྱར་བས་ཆོག་སྟེ་དྲུག་པའོ། །བྱིན་རླབས་བཟླས་པ་འདིའི་ཐོག་མཐར། ཨརྒྷཾ༴ ནས། ཤཔྟའི་བར་གྱིས་མཆོད་པ་རེ་དང་རྐང་བརྒྱད་ཀྱི་བསྟོད་པ་རེ་བྱ། མཐར། བཅོམ་ལྡན་འདས་དཔལ་ཧེ་རུ་ཀ་དཀྱིལ་འཁོར་གྱི་ལྷ་ཚོགས་དང་བཅས་པ་ཐམས་ཅད་ཀྱིས་བདག་ལ་དངོས་གྲུབ་མ་ལུས་པ་སྩལ་དུ་གསོལ། ཞེས་གསོལ་བ་བཏབ་ལ་མེ་ཏོག་དོར། བུམ་པ་ལ་དམིགས་ནས། སྟ་གོན་གྱི་སྐབས་སུ་བསྟན་པ་ལྟར་སོ་སོའི་སྔགས་བརྒྱ་རྩ་ལ་སོགས་པའི་ཇི་ལྟར་འོས་པ་བཟླའོ། །གཉིས་པ་ནི། ནག་པོ་ཞབས་ལུགས་ཀྱི་དཀྱིལ་མཆོག་ཏུ་བཤད་པ་ལྟར། མཆོད་པ་བྱིན་རླབས་ནས་བརྩམ་སྟེ་
མཆོད་པ་མཐའ་དག་འབུལ་ཞིང༌། ཅི་སྟེ་བསྡུས་པ་ལ་མངོན་པར་དགའ་བས་ཀྱང༌། བསྟོད་པ་མ་གཏོགས་ཚིགས་བཅད་རྣམས་དོར་ཏེ། སྔགས་དང་ཕྱག་རྒྱ་དང་ཏིང་ངེ་འཛིན་གསུམ་འཛོམས་པའི་སྒོ་ནས། ལྷག་མ་མཐའ་དག་མ་ཚང་བ་མེད་པར་བྱའོ། །དེའི་འོག་ཏུ་གཏོར་མ་འབུལ་བ་ཡང་བྱ་སྟེ། སྟ་གོན་གྱི་སྐབས་སུ་བཤད་པ་བཞིན་ནོ། །ཕྱི་རོལ་གཏོར་མ་ཐུན་མོང་མ་ཡིན་པས་གཞུང་རྙིང་པ་རྣམས་ནས་མ་བཤད་པས། ངེས་པར་དགོས་པ་ཡང་མ་ཡིན་ལ། ལག་ལེན་ལ་ཡང་མི་མཛད་པ་ཤས་ཆེ་ཞིང༌། ཅི་སྟེ་བྱེད་པར་སྤྲོ་ན། ཕྱི་རོལ་གཏོར་མ། སྐོར་བ། མེ་ཏོག་འབུལ་བ། སྒོ་དབྱེ་བ། གསོལ་གདབ་རྣམས། རྡོ་རྗེ་འཕྲེང་བ་ནས་འབྱུང་བ་ལྟར་བྱའོ། །སྒྲུབ་མཆོད་ཞག་མང་པོར་སྦྲེལ་བའི་སྐབས། དངོས་གཞི་ཉི་མ་གཉིས་པ་ཕན་ཆད་ལ། སྐབས་འདིར་བུམ་སྒྲུབ་སྟ་གོན་གྱི་སྐབས་སུ་བཤད་པ་ལྟར། ཆོ་ག་རྒྱས་པར་བྱེད་པའི་ལག་ལེན་སྣང་བ། འདིར་བུམ་པ་སྒྲུབ་པའི་ཉི་མ་རྣམས་ལ། དཀྱིལ་འཁོར་སྒྲུབ་པའི་སྐབས་སུ་བུམ་བཟླས་མི་དགོས་སོ། །དགུ་པ་བདག་ཉིད་འཇུག་པ་ནི། གཞུང་ཐ་དད་ནས་རྒྱས་བསྡུས་སྣ་ཚོགས་བཤད་ཀྱང༌། སློབ་མ་ཇི་ཙམ་བསྐུར་བ་དེ་ཙམ་རྫོགས་པར་ལེན་པ་ད་ལྟར་ལག་ལེན་བྱེད་དོ། །དེ་ཡང་རང་ཉིད་གཙོ་བོའི་མདུན་ཞལ་གྱི་སྒོ་དང་ཉེ་བའི་འདུག་ཅིང་གཙོ་བོའི་ཐུགས་ཀ་ནས་སྤྲུལ་པའི་ཧེ་རུ་ཀ་ཕྱག་གཉིས་པས་ལས་མཛད་པར་དམིགས་ལ། དཀྱིལ་འཁོར་དུ་འཇུག་པའི་ཆོས་རྣམས་ཞུ་བའི་དོན་དུ་མཎྜལ་ཕུལ། བདག་ཉིད་རྣམ་པར་སྣང་མཛད་དུ་གྱུར། ཆོས་རྣམས་གཟུགས་བརྙན་ལྟ་བུ་སྟེ། །དག་ཅིང་གསལ་ལ་རྙོག་པ་མེད། །བཟུང་དུ་མེད་ཅིང་བརྗོད་དུ་མེད། །རྒྱུ་དང་ལས་ལས་ཡང་དག་བྱུང༌། །དེ་བཞིན་དེ་
ཉིད་ངེས་པར་འབྱུང༌། །བདེན་པ་དེ་ཡིས་དཀྱིལ་འཁོར་ནི། །གཟུགས་བརྙན་གསལ་བར་སློབ་མ་རྣམས། །ཀུན་གྱི་དྲི་མེད་མཐོང་བར་ཤོག ལན་གསུམ། རྡོ་རྗེ་ཕག་མོས་མགྲིན་འཁྱུད་པའི། །དགའ་ཆེན་ཁྱོད་བདག་སྟོན་པ་སྟེ། སོགས་ལན་གསུམ་གྱིས་གསོལ་བ་བཏབ། ཨོཾ་ཙཀྵུར་བནྡྷ་བ་ར་མ་ན་ཡ་ཧཱུཾ། གིས་མིག་དར་བཅིང༌། ཨཱ་ཁཾ་བཱི་ར་ཧཱུཾ། གིས་མེ་ཏོག་བཟུང༌། ལས་བུམ་གྱི་ཆུས་གཏོར་ལ། སུམྦྷ་བགེགས་བསྐྲད། དཔྲལ་པར་ཨོཾ། མགྲིན་པར་ཨཱཿ སྙིང་གར་ཧཱུཾ་གིས་སྲུང་བར་བྱ། བུ་ཁྱོད་སུ་ཡིན་ཅི་ལ་དགའ། ཞེས་དྲིས་པ་ལ། སྐལ་བཟང་བདག་བདེ་བ་ཆེན་པོ་ལའོ། །ཞེས་ལན་བཏབ། སླར་ཡང༌། དེ་ཡིས་བུ་ལ་ཅི་ཞིག་བྱ། ཞེས་དྲིས་པ་ལ། སངས་རྒྱས་མཆོག་གི་དམ་ཚིག་གོ །ཞེས་ལན་བཏབ། རང་གི་སྙིང་གར་ཟླ་བ་ལ་གནས་པའི་རྡོ་རྗེ་དཀར་པོ་རྩེ་ལྔ་པ་འོད་འཕྲོ་བ། ཀུན་རྫོབ་དང་དོན་དམ་པའི་བྱང་ཆུབ་སེམས་ཀྱི་བདག་ཉིད་དོ། །ཨོཾ་བཛྲ་ཡོ་ག་ཙིཏྟ་ཨུ་པ་ད་ཡ་མི། རྡོ་རྗེ་སྙིང་གར་གཏད། སུ་ར་ཏ་ས་མ་ཡ་སྟྭཾ། ཧོ་སིདྡྷི་བཛྲ་ཡ་ཐཱ་སུ་ཁཾ། རྡོ་རྗེ་མགོ་བོར་བཞག་ལ། དེང་ཁྱོད་དེ་བཞིན་གཤེགས་པ་ཐམས་ཅད་ཀྱི་བྱིན་གྱིས་རླབས་པར་འགྱུར་གྱི། དེ་བཞིན་གཤེགས་པ་ཐམས་ཅད་ཀྱི་གསང་ཆེན་དམ་པ་འདི། དེ་བཞིན་གཤེགས་པ་ཐམས་ཅད་ཀྱི་དཀྱིལ་འཁོར་དུ་མ་ཞུགས་པ་རྣམས་ཀྱི་མདུན་དུ་སྨྲ་བར་མི་བྱ་སྟེ། མ་དད་པ་རྣམས་ལ་ཡང་མ་ཡིན་ནོ། །དཀྱིལ་འཁོར་ཁང་པའམ་ཡོལ་བའི་ནང་དུ་བཅུག་པར་མོས་ལ། ཧཱུཾ་ཛ་ཧཱུཾ། ཞེས་བརྗོད། དེ་ཡན་ཆད་ནི་དཀྱིལ་ཆོག་གི་རྩ་བའི་གཞུང་ན་མི་གསལ་ཡང༌།
དཀྱིལ་ཆོག་གི་གཞུང་ཕྱི་མ་རྣམས་ལས་འབྱུང་ཞིང༌། བླ་མ་གོང་མ་རྣམས་ཀྱི་མན་ངག་གིས་ཁ་སྐངས་པའི་ཕྱག་ལེན་ནོ། །འདི་མན་ཆད་འཇུག་པའི་ཆོས་ནི་འདི་ལྟར། །སྡོམ་པ་མདོར་བསྟན་དམ་རྫས་སྦྱིན། །སྲུང་བ་དཔའ་བོ་བསྐུལ་བ་དང༌། །གསོལ་བ་གདབ་ཅིང་གནང་བ་ཞུ། །ཕྱག་འཚལ་སྡོམ་པ་སྦྱིན་པ་དང༌། །དམ་ལ་བཞག་ཅིང་ཡེ་ཤེས་ཕབ། །ནམ་མཁའི་མདོག་དྲི་མེ་ཏོག་ཕུལ། །མིག་དར་ཕྱེ་ལ་ལྟ་བར་བསྐུལ། །ལྷ་ངོ་བསྟན་ཞིང་དེ་ཉིད་བརྗོད། །ཅེས་བྱའོ། །དེ་ལྟར་དོན་ཚན་བཅུ་དྲུག་ལས། དང་པོ་སྡོམ་པ་མདོར་བསྟན་ནི། གོང་ནས་གོང་མའི་སྡོམ་པ་ནི། །བུ་ཁྱོད་ཀྱིས་ནི་བཟུང་བྱ་སྟེ། །གྲོལ་བའི་རྒྱུ་ནི་དེ་ལས་གཞན། །ཐབས་ནི་ཅི་ཡང་ཡོད་མ་ཡིན། ཞེས་སོ། གཉིས་པ་དམ་རྫས་སྦྱིན་པ་ནི། ཨོཾ་ཧྲཱིཿཧ་ཧ་ཧཱུཾ་ཧཱུཾ་ཕཊ། ལན་གསུམ་སོགས་བཟླ་བཞིན་དུ། བདུད་རྩི་མྱང་ཞིང་ལུས་ལ་གཏོར། གསུམ་པ་བསྲུང་བ་སྦྱིན་པ་ནི། རང་ཉིད་འཁོར་ལོ་བདེ་མཆོག་ཞལ་གཅིག་ཕྱག་གཉིས་པའི་སྐུར་གསལ་བའི། སྙིང་གར་ཨོཾ་ཧ་དཀར་པོ་ནས། ཉི་མའི་འོད་ཅན་ནོ། །སྤྱི་བོ་ལ་སོགས་པའི་ནས་ན་སི་མ་ཀུ། ཁམས་རྣམས་དཔའ་བོ་དང་རྩ་རྣམས་དཔའ་མོའི་བདག་ཉིད་དུ་གྱུར། བཞི་པ་དཔའ་མོ་བསྐུལ་བ་ནི། མདུན་བསྐྱེད་ཀྱི་ཐུགས་ཀ་ནས་འོད་འཕྲོས། སངས་རྒྱས་བྱང་སེམས་ཐམས་ཅད་ཧེ་རུ་ཀའི་རྣམ་པར་སྤྱན་དྲངས། རང་གི་སྙིང་གར་ཐིམ་པས་མི་ཤིགས་པ་དཔྱིད་ཀྱི་རྩ་ཐིག་དཔལ་ཧེ་རུ་ཀ་ཞལ་ཕྱག་ཡོངས་སུ་རྫོགས་པར་གྱུར། ཨོཾ་ཤྲཱི་ཧེ་རུ་ཀ་བིད་མ་ཧེ་བིདྱཱ་རཱ་ཛཱ་ཡ། དྷིཿམ་ཧེ་
སྭཱཧཱ། ཞེས་ལན་ལྔའམ། བདུན་ནོ། །ལྔ་པ་གསོལ་བ་གདབ་པ་ནི། གང་གི་དྲིན་གྱི་བདེ་ཆེན་ཉིད། །སྐད་ཅིག་ཉིད་ལ་འཆར་བ་གང༌། །བླ་མ་རིན་ཆེན་ལྟ་བུའི་སྐུ། རྡོ་རྗེ་ཅན་ཞབས་པད་ལ་འདུད། །སངས་རྒྱས་ཀུན་གྱི་རང་བཞིན་སྐུ། །སློབ་དཔོན་ལ་ནི་བདག་སྐྱབས་མཆི། །དཔའ་བོ་རྣལ་འབྱོར་མ་འཁོར་ལོ། །རྣལ་འབྱོར་གནས་ལ་བདག་ཕྱག་འཚལ། །དོན་དམ་སྨྲ་བའི་སེང་གེ་ཞེས་བྱ་བ། །ཉོན་མོངས་གཅོད་པའི་དོན་ལ་ཤིན་ཏུ་མཁས་གྱུར་པར། །སྲིད་པའི་ཉེས་བརྒྱ་སྐྱེད་རྩ་ཉོན་མོངས་ཆོམ་མཛོད་ལ། །རྣལ་འབྱོར་དོན་དམ་རྒྱལ་པོ་དེ་ཉིད་འགྲུབ་པར་མཛོད། ཅེས་ལན་གསུམ། དྲུག་པ་གནང་བ་ཞུ་བ་ནི། དེ་བཞིན་གཤེགས་པ་ཀུན་གྱི་གནས། །ཧེ་རུ་ཀ་དཔལ་གྲོང་ཁྱེར་མཆོག །སྙིང་པོའི་དཀྱིལ་འཁོར་འདི་རུ་ནི། །བདག་གིས་སློབ་མ་གཞུག་པར་བགྱི། །ལན་གསུམ། བདུན་པ་ཕྱག་འཚལ་བ་ནི། གནས་གསུམ་དུ་ཐལ་མོ་སྦྱོར་བཞིན་པས། ཨོཾ་ན་མ་སྟེ་ཧཱུཾ། ན་མཱ་མེ་ཧཱུཾ། ན་མོ་ན་མཿཧཱུཾ་སྭཱཧཱ། ཞེས་ལན་གསུམ་མོ། །བརྒྱད་པ་སྡོམ་པ་སྦྱིན་པ་ལ་སྒྲགས་བཟུང་གཉིས་ལས། སྒྲགས་པ་ནི། སངས་རྒྱས་ཆོས་དང་དགེ་འདུན་ཏེ། །དཀོན་མཆོག་གསུམ་ལ་སྐྱབས་སུ་སོང༌། །འདི་ནི་སངས་རྒྱས་རིག་ཡིད་འོང༌། །སྡོམ་པ་བརྟན་པོར་གྱུར་པའོ། །རྡོ་རྗེ་དྲིལ་བུ་ཕྱག་རྒྱ་ནི། །བློ་ཆེན་ཁྱོད་ཀྱིས་བཟུང་བར་བྱ། །བྱང་ཆུབ་སེམས་གང་དེ་རྡོ་རྗེ། །ཤེས་རབ་དྲིལ་བུ་ཞེས་བསྒྲགས་སོ། །སློབ་དཔོན་ཁྱོད་ཀྱིས་བཟུང་བར་བྱ། །
བླ་མ་སངས་རྒྱས་ཀུན་དང་མཉམ། །འདི་ནི་རྡོ་རྗེའི་རིག་དག་པའི། །དམ་ཚིག་སྡོམ་པ་ཡིན་པར་བཤད། །རིན་ཆེན་རིགས་ལ་རྟག་ཏུ་ནི། །ཉིན་རེ་བཞིན་ཡང་དུས་དྲུག་ཏུ། །ཆོས་དང་ཟང་ཟིང་མི་འཇིགས་བྱམས། །སྦྱིན་པ་རྣམ་བཞི་རྟག་ཏུ་སྦྱིན། །ཕྱི་ནང་གསང་བ་ཐེག་པ་གསུམ། །དམ་པས་ཆོས་ནི་མ་ལུས་བཟུང༌། །འདི་ནི་པདྨའི་རིགས་དག་པའི། །དམ་ཚིག་ཡིད་དུ་འོང་བའོ། །ལས་ཀྱི་རིགས་མཆོག་ཆེན་པོ་ལ། །སྡོམ་པ་ཐམས་ཅད་ལྡན་པར་ནི། །ཡང་དག་ཉིད་དུ་བཟུང་བར་བགྱི། །མཆོད་པའི་ལས་ཀྱང་ཅི་ནུས་བགྱི། །ཞེས་སོ། །གཉིས་པ་སྡོམ་པ་བཟུང་བ་ནི། དཀོན་མཆོག་གསུམ་ལ་བདག་སྐྱབས་མཆི། སོགས་ལན་གསུམ་གྱིས་ཐུན་མོང་གི་སྡོམ་པ་བཟུང༌། སྲས་བཅས་སངས་རྒྱས་ཐམས་ཅད་དང༌། །དཔའ་བོ་རྣལ་འབྱོར་མ་རྣམས་ཀུན། །ཐམས་ཅད་བདག་ལ་དགོངས་སུ་གསོལ། །བདག་མིང་འདི་ཞེས་བགྱི་བ་ཡིས། །དུས་འདི་ནས་ནི་བཟུང་ནས་སུ། །བྱང་ཆུབ་སྙིང་པོར་མཆིས་ཀྱི་བར། །ཇི་ལྟར་དུས་གསུམ་མགོན་པོ་རྣམས། །བྱང་ཆུབ་ཏུ་ནི་ངེས་མཛད་པའི། །བྱང་ཆུབ་སེམས་ནི་བླ་མེད་པ། །དམ་པ་བདག་གི་བསྐྱེད་པར་བགྱི། །ཚུལ་ཁྲིམས་ཀྱི་ནི་བསླབ་པ་དང༌། །དགེ་བའི་ཆོས་ནི་སྡུད་པ་དང༌། །སེམས་ཅན་དོན་བྱེད་ཚུལ་ཁྲིམས་གསུམ། །བདག་གིས་བརྟན་པོར་བཟུང་བར་བགྱི། །སངས་རྒྱས་ཆོས་དང་དགེ་འདུན་ཏེ། །བླ་ན་མེད་པའི་དཀོན་མཆོག་གསུམ། །སངས་རྒྱས་རྣལ་འབྱོར་
ལས་སྐྱེས་པའི། །སྡོམ་པ་དེང་ནས་བརྟན་པོར་བཟུང༌། །རྡོ་རྗེ་རིག་མཆོག་ཆེན་པོ་ལ། །རྡོ་རྗེ་དྲིལ་བུ་ཕྱག་རྒྱ་ཡང༌། །ཡང་དག་ཉིད་དུ་བཟུང་བར་བགྱི། །སློབ་དཔོན་དག་ཀྱང་བཟུང་བར་བགྱི། །རིན་ཆེན་རིག་མཆོག་ཆེན་པོ་ཡི། །དམ་ཚིག་ཡིད་དུ་འོང་བ་ལ། །ཉིན་རེ་བཞིན་ཡང་དུས་དྲུག་ཏུ། །སྦྱིན་པ་རྣམ་བཞི་རྟག་ཏུ་སྦྱིན། །བྱང་ཆུབ་ཆེན་པོ་ལས་བྱུང་བའི། །པདྨའི་རིགས་ཅན་དག་པ་ལ། །ཕྱི་ནང་གསང་བ་ཐེག་པ་གསུམ། །དམ་པའི་ཆོས་ནི་བཟུང་བར་བགྱི། །ལས་ཀྱི་རིགས་མཆོག་ཆེན་པོ་ལ། །སྡོམ་པ་ཐམས་ཅད་ལྡན་པར་ནི། །ཡང་དག་ཉིད་དུ་བཟུང་བར་བགྱི། །མཆོད་པའི་ལས་ཀྱང་ཅི་ནུས་བགྱི། །བྱང་ཆུབ་སེམས་ནི་བླ་མེད་པ། །དམ་པ་དག་གིས་བསྐྱེད་བགྱིས་ནས། །སེམས་ཅན་ཀུན་གྱི་དོན་གྱི་ཕྱིར། །བདག་གི་སྡོམ་པ་མ་ལུས་བཟུང༌། །མ་བརྒལ་བ་རྣམས་སྒྲལ་བར་བགྱི། །མ་གྲོལ་བ་རྣམས་བདག་གིས་དགྲོལ། །དབུགས་མ་ཕྱིན་ལ་དབུགས་དབྱུང་ཞིང༌། །སེམས་ཅན་མྱ་ངན་འདས་ལ་འགོད། །ཅེས་པ་ལན་གསུམ་གྱིས་རིགས་ལྔའི་སྡོམ་པ་བཟུང༌། སངས་རྒྱས་ཆོས་དང་དགེ་འདུན་ལ། ཞེས་པ་ནས། ཉི་ཤུ་རྩ་གཉིས་ལེགས་པར་བཟུང་གི་བར་ན་གསུམ། སློབ་མ་ལྟ་གོན་གྱི་སྐབས་སུ་བཤད་པ་ལྟར་གྱི་རྒྱུད་རྒྱལ་འདི་ཉིད་ཀྱི་ཐུན་མོང་མ་ཡིན་པས་སྡོམ་པ་བཟུང་བར་བཞེད་དོ། །དེ་དག་ནི་སྡོམ་བཟུང་རྒྱས་པའི་ལུགས་ཡིན་ལ། འབྲིང་དུ་ན་ཕྱི་མ་གཅིག་པུས་ཆོག་ཅིང༌། བསྡུས་པ་ནི། གཙོ་བོའི་ཇི་ལྟར་བཀའ་
སྩལ་པ། །དེ་བཞིན་བདག་གིས་བགྱིད་པར་འཚལ། ལན་གསུམ། །དགུ་པ་དམ་ལ་བཞག་པ་ནི། དེང་ཁྱོད་དཔའ་བོ་དང་རྣལ་འབྱོར་མ་ཐམས་ཅད་ཀྱི་རིགས་སུ་ཞུགས་ཀྱི། །ངས་ཁྱོད་ལ་དཔལ་ཧེ་རུ་ཀའི་ཡེ་ཤེས་བསྐྱེད་པར་བྱ་སྟེ། ཡེ་ཤེས་གང་གིས་ཁྱོད་དེ་བཞིན་གཤེགས་པ་ཐམས་ཅད་དང༌། །དཔའ་བོ་རྣལ་འབྱོར་མ་ཐམས་ཅད་ཀྱི་དངོས་གྲུབ་ཀྱང་ཐོབ་པར་འགྱུར་ན་དངོས་གྲུབ་གཞན་ལྟ་ཅི་ཞིག་སྨོས། ཁྱོད་ཀྱིས་དཀྱིལ་འཁོར་མ་མཐོང་བ་རྣམས་ཀྱི་མདུན་དུ་སྨྲ་བར་མི་བྱ་སྟེ། དམ་ཚིག་ཉམས་པར་འགྱུར་ཏ་རེ། ཞེས་ཕན་ཡོན་གྱི་སྒོ་ནས་དམ་ལ་བཞག རྡོ་རྗེ་སྙིང་གར་རེག་སྟེ། ཧེ་རུ་ཀ་དཔལ་དེང་ཁྱོད་ཀྱི། སྙིང་ལ་ཡང་དག་ཞུགས་པར་གྱུར། །གལ་ཏེ་ཚུལ་འདི་སྨྲས་གྱུར་ན། །དེ་མ་ཐག་ཏུ་དྲལ་ཏེ་གཤེགས། །ཐོད་པ་ནས་བདུད་རྩིའི་ཆུ་བཏུང་ལ། །འདི་ནི་ཁྱོད་ཀྱི་དམྱལ་བའི་ཆུ། །དམ་ཚིག་འདས་ན་སྲེག་པར་བྱེད། །དམ་ཚིག་བསྲུང་ན་དངོས་གྲུབ་ནི། །རྡོ་རྗེ་བདུད་རྩིའི་ཆུ་འདིས་ཐོབ། །ཨོཾ་པཉྩ་ཨ་མྲྀ་ཏ་ཨུ་ཏ་ཀ་ཋཿཋཿཋཿཧཱུཾ། ཞེས་དམ་ཚིག་བསྲུང་བའི་ཕན་ཡོན་དང་མ་བསྲུང་བའི་ཉེས་དམིགས་ཀྱི་སྒོ་ནས་དམ་ལ་བཞག དེང་ནས་བརྩམས་ཏེ་བུ་ཁྱོད་ཀྱི་དཔལ་ཧེ་རུ་ཀ་ང་ཡིན་གྱིས། གང་ངས་འདྀ་བྱོས་ཞེས་བསྒོ་བ་དེ་བྱ་དགོས་སོ། །ཁྱོད་ཀྱིས་ང་ལ་བརྙས་པར་ཡང་མ་བྱེད་ཅིག ཁྱོད་མི་བདེ་བ་མ་སྤངས་པར་དུས་བྱས་ནས་དམྱལ་བར་ལྷུང་བར་འགྱུར་ཏ་རེ། ཞེས་སློབ་དཔོན་གྱི་བཀའ། ཉན་པའི་སྒོ་ནས་དམ་ལ་བཞག བཅུ་པ་ཡེ་ཤེས་དབབ་པ་ནི།
དཔའ་བོ་དང་རྣལ་འབྱོར་མ་ཐམས་ཅད་ཀྱི་བྱིན་གྱིས་རློབས་ཤིགདཔལ་ཧེ་རུ་ཀ་བདག་ལ་དབབ་པར་མཛད་དུ་གསོལ། ལན་གསུམ། རང་ཧེ་རུ་ཀ་ཕྱག་གཉིས་པར་གྱུར་པ། གཡས་བརྐྱང་གི་ཞབས་གཉིས་ཀྱི་འོག་ཏུ་ཡཾ་ལས་རླུང་གི་དཀྱིལ་འཁོར་སྔོན་མོ་ཟླ་གམ་གཡོ་བའི་བ་དན་དང་བཅས་པ། རྐང་མཐིལ་གཉིས་སུ་ཡི་གེ་ཛྷཻཾ་ལྗང་ཁུ། སུམ་མདོར་རཾ་ལས་མེའི་དཀྱིལ་འཁོར་དམར་པོ་གྲུ་གསུམ། སྙིང་གར་ལཾ་ལས་སའི་དཀྱིལ་འཁོར་གྲུ་བཞི་སེར་པོ་ལ་རྡོ་རྗེ་དང་ཧཱུཾ་གིས་མཚན་པ། མགྲིན་པར་བཾ་ལས་ཆུའི་དཀྱིལ་འཁོར་དཀར་པོ་ཟླུམ་པོ་ལ་བུམ་པ་དང་ཨས་མཚན་པ། སྤྱི་བོར་ཡཾ་ལས་རླུང་གི་དཀྱིལ་འཁོར་ཟླ་གམ་ནག་པོ་ལ་ཧས་མཚན་པ། རྐང་མཐིལ་གྱི་འོག་གི་ཛྷཻཾ་ཕུལ། དེས་སུམ་མདོའི་མེ་སྦར། དེས་སྙིང་གའི་ས་བསྲེགས། དེས་མགྲིན་པའི་ཆུ་སྐོལ་བ་སྙིང་གའི་ས་ལ་ཐིམ་པས་བདེ་བས་གང༌། རྐང་མཐིལ་གྱི་རླུང་དང་མེས་ནམ་མཁའ་ལ་བཏེག །སྤྱི་བོའི་རླུང་གིས་མར་ཕུལ་བས་འདར་ཡེད་ཡེད་གནས་པ་ལ། ནམ་མཁའ་ནས་ལུས་ཀྱི་སྟོད་ཀྱི་ཆ་ལ་ཐུགས་ཀྱི་འཁོར་ལོ་པ་རྣམས་ནག་པོའི་རྣམ་པས་ཐིམ། བར་གྱི་ཆ་ལ་གསུང་གི་འཁོར་ལོ་པ་རྣམས་དམར་པོའི་རྣམ་པས་ཐིམ། སྨད་ཀྱི་ཆ་ལ་སྐུའི་འཁོར་ལོ་པ་རྣམས་དཀར་པོའི་རྣམ་པས་འཇུག་ཅིང༌། དེ་མ་ཡིན་པའི་དཔའ་བོ་དང་རྣལ་འབྱོར་མ་དཔག་ཏུ་མེད་པ་ཡང་བ་སྤུའི་བུ་ག་ནས་ཞུགས་ཤིང་སྙིང་གར་ཐིམ་པར་
གྱུར། ཡབ་ཡུམ་གྱི་སྙིང་པོ་དང༌། ཨོཾ་སརྦ་བཱི་ར་ཡོ་གི་ནཱི་བཛྲ་ཨཱ་བེ་ཤ་ཡ་སྟཾ་བྷ་ཡ་ར་ར་ར་ར་ཙ་ལ་ཡ་ཙ་ལ་ཡ་ཧཱུཾ་ཧཿཨཿཛྷཻཾ། ཅེས་པའི་དབབ་ཅིང༌། ཨོཾ་ཏིཥྛ་མཧཱ་ཀྲོ་དྷ་ཨཱ་བེ་ཤ་ཡ་ཧཱུཾ། ཨོཾ་ཤྲཱི་ཧེ་རུ་ཀཱ་ཡ་བིད་མ་ཧེ་བིདྱཱ་རཱ་ཛ་ཡདྷི་མ་ཧེ་སྭཱཧཱ། ཞེས་པའང་བཟླ་སྟེ་རོལ་མོའི་སྒྲ་དང་བཅས་དབབ་བོ། །སྤྱིར་འཁོར་ལོ་སྡོམ་པའི་དབང་ལ། ཡེ་ཤེས་འབེབས་པའི་སྔགས་ཕྱི་མ་འདི་གཉིས་ཡིན་ཀྱང༌། འབྱུང་བཞིའི་དཀྱིལ་འཁོར་བཀོད་པ་འདི་བྱས་ཕྱིན། སྔགས་སྔ་མ་ཡང་བཟླས་ན་ལེགས་ཏེ་སྔགས་འདི་དང་འབྲེལ་བའི་དམིགས་པ་ཡིན་པས་སོ། །ཏིཥྛ་བཛྲ། ཞེས་སྤྱི་བོར་རྡོ་རྗེ་རྒྱ་གྲམ་དུ་བཞག བཅུ་གཅིག་པ་ནམ་མཁའི་ཁ་དོག་དྲི་བ་ནི་འདིར་མི་དགོས་ཀྱང༌། སློབ་མ་དབང་བསྐུར་བའི་སྐབས་ཡིན་ན་དགོས་ཏེ། སྐབས་འདིར་ནམ་མཁའི་ཁ་དོག་དྲི་ཞིམ་ལས་བཞི་ལུང་བསྟན། བཅུ་གཉིས་པ་མེ་ཏོག་དོར་བ་ནི། ཨོཾ་པྲ་ཏཱིཙྪ་བཛྲ་ཧོ། ཞེས་མེ་ཏོག་དོར། ཨོཾ་པྲ་ཏི་གྲྀཧྞ་དམ་ཨི་མཾ་སཏྭ་མཧཱ་པ་ལ། ཞེས་མེ་ཏོག་སྤྱི་བོར་བཅིངས། བཅུ་གསུམ་པ་མིག་དར་དབྱེ་བ་ནི། ཧེ་རུ་ཀ་དཔལ་དེང་ཁྱོད་ཀྱི། །མིག་འབྱེད་པར་ནི་བརྩོན་པར་མཛད། །ཕྱེ་བས་ཐམས་ཅད་མཐོང་བར་གྱུར། །རྡོ་རྗེའི་མིག་ནི་བླ་ན་མེད། །ཨོཾ་བཛྲ་ནེ་ཏྲ་ཨ་པ་ཧ་ར་པ་ཊ་ལཾ་ཧྲིཿ ཞེས་མིག་དར་བསལ། བཅུ་བཞི་པ་ལྟ་བར་བསྐུལ་བ་ནི། ལྟོས་ཤིག་ལྟོས་ཤིག་སེམས་དཔའ་ཆེ། །དཀྱིལ་འཁོར་བཟང་པོ་འདི་ལ་ལྟོས། །ད་ནི་དད་པ་རབ་ཏུ་བསྐྱེད། ཁྱོད་ནི་རྣལ་འབྱོར་མ་རིགས་སྐྱེས། །སྔགས་དང་ཕྱག་རྒྱས་བྱིན་གྱིས་རློབས། །འགྲོ་བ་ཕུན་སུམ་ཚོགས་ཀུན་དང༌། །
དངོས་གྲུབ་ཀུན་ཁྱོད་དབང་བསྐུར་གྱུར། །དམ་ཚིག་ཐམས་ཅད་བསྐྱང་བ་དང༌། །སྔགས་རྣམས་ལ་ཡང་བརྩོན་པར་གྱིས། བཅོ་ལྔ་པ་ལྷ་ངོ་བསྟན་པ་ནི། རྟེན་དང་བརྟེན་པར་བཅས་པའི་དཀྱིལ་འཁོར་པ་ཐམས་ཅད་མངོན་སུམ་བཞིན་དུ་གསལ་བར་གྱུར། ཞེས་བརྗོད་ཅིང༌། ཡིད་ཀྱིས་དཀྱིལ་འཁོར་གསལ་བཏབ། སློབ་མ་ལ་དབང་བསྐུར་བའི་དོན་དུ་ནི་སྒྲུབ་ཐབས་ལྟར་ལྷ་ངོ་རྒྱས་པ་བསྟན་དགོས་སོ། །བཅུ་དྲུག་པ་དེ་ཁོ་ན་ཉིད་བརྗོད་པ་ནི། གཞལ་མེད་ཁང་ནི་བྱང་ཆུབ་ཀྱི་ཕྱོགས་ཀྱི་ཆོས་སུམ་ཅུ་རྩ་བདུན་ཡིན་ལ། ལྷ་སུམ་ཅུ་རྩ་བདུན་དེ་རྣམས་རྣམ་པར་དག་པའོ། །བཅོམ་ལྡན་འདས་ནས་དཔལ་ཧེ་རུ་ཀ་ཡབ་ཡུམ་ནི། བརྟན་གཡོ་ཐམས་ཅད་ཀྱི་བདག་ཉིད་ཆོས་ཀྱི་དབྱིངས་ཡིན་ལ། འཁོར་ལོ་ལྔའི་ལྷ་ཚོགས་ནི་ཡེ་ཤེས་ལྔའི་བདག་ཉིད་དོ། །ཞེས་བརྗོད་ཅིང་དོན་བསམ་པའོ། །དེ་ནས་དབང་གི་དངོས་གཞི་ལ། ཐོག་མར་རྡོ་རྗེ་སློབ་མའི་དབང་གི་དོན་དུ་མཎྜལ་ཕུལ་ནས། ཧེ་རུ་ཀ་དཔལ་དབང་བསྐུར་བ། །འགྲོ་བ་སྐྱོབས་པའི་གཟི་བརྗིད་ཅན། །ཇི་ལྟར་ཡོན་ཏན་འབྱུང་གནས་རྩལ། །དེ་བཞིན་བདག་ལ་དེང་སྩོལ་ཅིག ཅེས་ལན་གསུམ་གསོལ་བ་གདབ། །དེ་ནས་དང་པོར་སྔགས་ཀྱི་དབང་བསྐུར་བ་ནི། ཨོཾ་པྲ་ཏཱིཙྪ་བཛྲ་ཧོ། ཞེས་མེ་ཏོག་དོར། གཙོ་བོའི་ཐུགས་ཀ་ནས་སྔགས་ཀྱི་འཕྲེང་བ་བྱུང་བདག་གི་སྙིང་གར་ཐིམ། གཙོ་བོ་ཡབ་ཡུམ་གྱི་སྙིང་པོ་ཚར་གསུམ་རྗེས་བཟློས་བྱས་པར་མོས། སྤྲོ་ན་ལྷ་ཐམས་ཅད་ཀྱི་སྙིང་པོ་ཚར་གསུམ་གསུམ་དང༌། བཅོམ་ལྡན་བདག་ལ་སྩལ་ལགས་ཀྱི། །བཅོམ་ལྡན་
བདག་ལ་བྱིན་གྱིས་རློབས། ལན་གསུམ། སྤྱི་བོར་མེ་ཏོག་བཞག་ལ། བཅོམ་ལྡན་འདི་ལ་སྩལ་ལགས་ཀྱི། །བཅོམ་ལྡན་འདི་ལ་བྱིན་གྱིས་རློབས། ལན་གསུམ་མོ། །དེ་ནས་བདག་དང་དབང་རྫས་ཐམས་ཅད་ལ། ལས་བུམ་གྱི་ཆུས་བསངས་ཤིང༌། སུམ་བྷ་བརྗོད་དོ། །རིག་པའི་དབང་ལྔ་ལས་ཆུ་དབང་ནི། སྭ་བྷཱ་ཝས་སྦྱངས། བདག་དང་དབང་རྫས་རྣམ་རྒྱལ་བུམ་པའི་ཆུ་གཉིས་ཀ་མི་དམིགས་ཏེ་སྟོང་པར་གྱུར། སྟོང་པའི་ངང་ལས་པདྨ་དང་ཉི་མའི་སྟེང་དུ། ཧཱུཾ་ལས་རྡོ་རྗེ་ཧཱུཾ་གིས་མཚན་པ་ལས། གཉིས་ཀའང་མི་བསྐྱོད་པ་སྐུ་མདོག་སྔོན་པོ་གཡས་རྡོ་རྗེ་དང༌། གཡོན་དེས་ཡུ་བ་བྱས་པའི་དྲིལ་བུ་འཛིན་པ། རལ་པའི་ཐོར་ཚུགས་དང༌། ཐོད་པའི་འཕྲེང་བའི་ཅོད་པན་ཅན། རུས་པའི་རྒྱན་དྲུག་གིས་བརྒྱན་པ། ཡུམ་མཱ་མ་ཀི་སྔོན་མོ་གྲི་གུག་དང་ཐོད་པ་འཛིན་པ་དང་མཉམ་པར་སྦྱོར་བ། ཞབས་རྡོ་རྗེའི་སྐྱིལ་མོ་ཀྲུང་གིས་བཞུགས་པའམ། གཡས་བརྐྱང་གི་བཞུགས་པ། དཔྲལ་པར་ཨོཾ། མགྲིན་པར་ཨཱཿ ཐུགས་ཀར་ཧཱུཾ། མདུན་བསྐྱེད་ཀྱི་ཐུགས་ཀ་ནས་འོད་ཟེར་འཕྲོས། ཡེ་ཤེས་སེམས་དཔའ་མི་བསྐྱོད་པ་ཡབ་ཡུམ་སྤྱན་དྲངས་ཕཻཾ། ཛ་ཧཱུཾ་བཾ་ཧོཿ སླར་ཡང་མདུན་བསྐྱེད་ཀྱི་ཐུགས་ཀ་ནས་འོད་ཟེར་འཕྲོས། དབང་གི་ལྷ་འཁོར་ལོ་བདེ་མཆོག་ལྷ་དྲུག་ཅུ་རྩ་གཉིས་ཀྱི་དཀྱིལ་འཁོར་ཕཻཾ། པུཥྤེ། སོགས་ཀྱིས་མཆོད། ཁྱེད་རྣམས་ཀྱིས་འདི་ལ་དབང་བསྐུར་དུ་གསོལ། ཞེས་གསོལ་བ་བཏབ་པས། ཨོཾ་བཛྲི་བྷ་ཝ་ཨ་ཥིཉྩ་ཧཱུཾ། ཞེས་དབང་
རྫས་ལ་དབང་བསྐུར་སྐུ་གང༌། དྲི་མ་དགཆུ་ལྷག་མ་ཡར་ལུད་པ་ལས་མི་བསྐྱོད་པའི་དབུ་རྒྱན། དེ་ཞུ་བ་ལས་བྱུང་བའི་བུམ་པའི་ཆུར་གྱུར། དཀྱིལ་འཁོར་པ་རྣམས་དང༌། དབང་གི་ལྷ་གཙོ་བོས་དབང་བསྐུར་བའི་དགོངས་པ་མཛད། སྒོ་མཚམས་མ་རྣམས་ཀྱིས་བགེགས་བསྐྲད། དཔའ་བོ་རྣམས་ཀྱིས་བཀྲ་ཤིས་བརྗོད། དཔའ་མོ་རྣམས་ཀྱིས་རྡོ་རྗེའི་གླུ་བླངས། དབང་གི་ལྷའི་འཁོར་གཞན་རྣམས་ཀྱིས་རོལ་མོའི་སྒྲ་སྒྲགས། མེ་ཏོག་གི་ཆར་ཕབ་སྟེ་ཤིས་པ་བརྗོད་པར་གྱུར། སྐབས་འདིར་བྲམ་ཟེ་རིན་ཆེན་རྡོ་རྗེས་མཛད་པའི་དཀྱིལ་འཁོར་བཀྲ་ཤིས་བརྗོད་པའི་ཕྱག་ལེན་སྣང་ཞིང༌། བསྡུ་ན་མ་བྱས་ཀྱང་ཆོག །ཨོཾ་ཕུན་སུམ་ཚོགས་པ་མངའ་བ་གསེར་གྱི་རི་བོ་འདྲ། སོགས། དཀོན་མཆོག་གསུམ་གྱི་བཀྲ་ཤིས་ཚིགས་བཅད་གསུམ་དང༌། ཉིན་མོ་བདེ་ལེགས། སོགས་བརྗོད། རོལ་ཆེན་བྱ། ཁྱེད་རྣམས་ཀྱིས་བདག་ལ་དབང་བསྐུར་དུ་གསོལ། ཞཻས་གསོལ་བ་བཏབ། གཙོ་བོའི་ཐུགས་ཀ་ནས་སྒོ་མཚམས་མ་བརྒྱད་སྤྲུལ། བཀྲ་ཤིས་ཀྱི་བུམ་པའི་ཆུས་དབང་བསྐུར། ཇི་ལྟར་བལྟམས་པ་ཙམ་གྱིས༴ ནས་ཁྲུས་ཀྱི་བགྱིའོ། ཨོཾ་ཀཱ་ཀ་སྱཱ། ཨུ་ལུ་ཀཱ་སྱཱ་ཤྭ་ན་སྱཱ། སུ་ཀ་ར་སྱཱ། ཡ་མ་ཌ་ཌྷི། ཡ་མ་དཱུ་ཏི། ཡ་མ་དཥྟི་ནི། ཡ་མ་མཱ་ཐ་ནི་ཡེ། ཨོཾ་བཛྲི་བྷ་ཝ་ཨ་བྷི་ཥིཉྩ་ཧཱུཾ། དེ་ནས་དབང་གི་ལྷ་རྡོ་རྗེ་ཕག་མོ་སྙིང་པོའི་
རྣལ་འབྱོར་མ་བཞི་དང་བཅས་པས། ཌཱ་མ་རུ་དང་བདུད་རྩིས་གང་བའི་ཐོད་པར་རྣམ་རྒྱལ་བུམ་པའི་ཆུ་དང་བཅས་པ་ཐོགས་ནས། དབང་བསྐུར་རོལ་མོ་བདེ་ཆེན་པོ་ཞེས་པ་ནས། ས་མ་ཡ་ཤྲཱི་ཧཱུཾ། དབང་བསྐུར་རྡོ་རྗེ་ཆེན་པོ་ནི། ཁམས་གསུམ་ཀུན་གྱིས་ཕྱག་བྱས་པ། །སངས་རྒྱས་ཀུན་གྱི་གསང་གསུམ་གྱི། །གནས་ལས་བྱུང་བ་སྦྱིན་པར་བྱ། ཨོཾ་ཤྲཱི་བཛྲ་ཧེ་ཧེ་སོགས་སྙིང་པོའི་མཐར། ཨོཾ་བཛྲ་ཨ་བྷི་ཥིཉྩ། ཞེས་པས་དབང་བསྐུར་རོ། །བཀྲ་ཤིས་བུམ་པ་བརྒྱད་ལོགས་སུ་མེད་ན། ཆོ་གས་རིམ་པ་སྔར་ལྟར་ལས། དང་པོ་ལ་རྣམ་རྒྱལ་ནས་བུམ་ཆུ་གཏོར་བ་ཙམ་བྱ་ཞིང༌། གཉིས་པ་ལ་བུམ་པ་ཉིད་དམ་བུམ་ཆུ་ཐོད་པར་བླུག་ནས་དབང་བསྐུར་བ་གང་བདེ་བྱའོ། །དེ་ལྟར་བུམ་པའི་ཆུས་དབང་བསྐུར། སྐུ་གང་དྲི་མ་དག །ཆུའི་ལྷག་མ་ཡར་ལུད་པ་ལས་མི་བསྐྱོད་པས་དབུ་རྒྱན། མདུན་བསྐྱེད་ཀྱི་ཐུགས་ཀའི་ས་བོན་ལས་འོད་ཟེར་གྱི། མི་བསྐྱོད་པ་དཔག་ཏུ་མེད་པ་སྤྱན་དྲངས་ཏེ། བ་སྦུའི་བུ་ག་ནས་ཞུགས་པས། ལུས་ཐམས་ཅད་མི་བསྐྱོད་པའི་རྡུལ་ཕྲ་རབ་ཀྱིས་གང་བར་གྱུར། ཨོཾ་བཛྲ་པུཥྤེ་ཨཱཿཧཱུཾ། སོགས་ཉེར་སྤྱོད་ལྔས་མཆོད། དེ་ལྟར་ན་ཆུས་དབང་ཐོབ། ཞེ་སྡང་དག རྣམ་ཤེས་གནས་གྱུར། མེ་ལོང་ལྟ་བུའི་ཡེ་ཤེས་མངོན་དུ་བྱས། མི་བསྐྱོད་པའི་བག་ཆགས་དང་ས་བོན་ནུས་པ་མཐུ་ཅན་དུ་བྱས་པ་ཡིན་ནོ། །ཅོད་པན་གྱི་དབང་ནི། སྭ་བྷཱ་ཝ། བདག་དང་དབང་རྫས་རིན་པོ་ཆེའི་དབུ་
རྒྱན་གཉིས་ཀ་མི་དམིགས་ཏེ་སྟོང་པར་གྱུར། སྟོང་པའི་ངང་ལས། པདྨ་དང་ཉི་མའི་སྟེང་དུ་ཨཾ་ལས་རིན་པོ་ཆེ་ཨཾ༴ རིན་ཆེན་འབྱུང་ལྡན་སྐུ་མདོག་སེར་པོ་གཡས་རིན་པོ་ཆེ་དང༌། གཡོན་དེའི༴ ཡུམ་རིན་ཆེན་སྒྲོལ་མ་སེར་མོ་གྲི་གུག༴ དཔྲལ་པར་ཨོཾ༴ ཡེ་ཤེས་སེམས་དཔའ་རིན་ཆེན་འབྱུང་ལྡན་ཡབ་ཡུམ་སྤྱན་དྲངས་ཕཻཾ། ཛཿཧཱུཾ་བཾ་ཧོཿ དབང་གི་ལྷ་རྣམས་ཀྱིས། དབང་རྫས་ལ། ཨོཾ་བཛྲི་བྷ་ཝ་ཨ་བྷི་ཥིཉྩ་ཧཱུཾ། ཞེས་དབང་བསྐུར། སྐུ་གང༌། དྲི་མ་དག།ཆུའི་ལྷག་མ་ཡར་ལུད་པ་ལས། རིན་ཆེན་འབྱུང་ལྡན་གྱིས་དབུ་རྒྱན། དེ་ཞུ་བ་ལས་བྱུང་བའི་རིན་པོ་ཆེའི་དབུ་རྒྱན་དུ་གྱུར། ཁྱེད་རྣམས་ཀྱིས་བདག་ནས། གསོལ་ཞེས་གསོལ་བཏབ་པས། མ་མོ་བརྒྱད་ཀྱི༴ རལ་པའི་ཐོར་ཚུགས་ཀྱིས་བརྒྱན་པ། །སངས་རྒྱས་ཀུན་གྱིས་བསྔགས་པ་ཡི། །རིན་ཆེན་དབུ་རྒྱན་དམ་པ་དང༌། །དར་དཔྱངས་དབང་བསྐུར་སྦྱིན་པར་བྱ། །ཨོཾ་སརྦ་བུདྡྷ་ཊ་ཀི་ནཱི། སོགས་ཡུམ་གྱི་སྙིང་པོའི་དབུ་རྒྱན་དང་དར་དཔྱངས་དང་བཅས་པ་བཅིངས། ཨོཾ་ཀ་ཀཱ་སྱཱ། སོགས་དང་གཙོ་བོའི་སྙིང་པོ་བརྗོད། མདུན་བསྐྱེད་ཀྱི་ཐུགས་ཀའི་ས་བོན་གྱི་འོད་ཟེར་གྱིས་རིན་ཆེན་འབྱུང་ལྡན་དཔག་ཏུ་མེད་པ་སྤྱན་དྲངས། བ་སྤུའི་བུ་ག་ནས་ཞུགས་པས་ལུས་ཐམས་ཅད་རིན་ཆེན་འབྱུང་ལྡན་གྱི་རྡུལ་ཕྲ་རབ་ཀྱིས་གང་བར་གྱུར། མཆོད་པ་ལྔས་མཆོད། དེ་ལྟར་ནང་དབུ་རྒྱན་གྱི་དབང་ཐོབ། ང་རྒྱལ་དང་སེར་
སྣ་དག །ཚོར་བ་གནས་གྱུར། མཉམ་པ་ཉིད་ཀྱི་ཡེ་ཤེས་མངོན་དུ་བྱས། རིན་ཆེན་འབྱུང་ལྡན་གྱི་བག་ཆགས་ས་བོན་ནུས་པ་མཐུ་ཅན་དུ་བྱས་པ་ཡིན་ནོ། །དེ་བཞིན་དུ་འོག་མ་གསུམ་ལའང་ཅོད་པན་གྱི་དབང་གིས་རིགས་འགྲེ་སྟེ། རྡོ་རྗེའི་དབང་ནི། ཛྲིཾ་ལས་པདྨ་བི་བཛྲི༴ འོད་དཔག་མེད་སྐུ་མདོག་དམར་པོ། པདྨ་དང་༴ ཡུམ་གོས་དཀར་མོ་དམར་མོ། འདི་ལྟར་སངས་རྒྱས་ཐམས་ཅད་ཀྱིས། །ཧེ་རུ་ཀ་དཔལ་དབང་བསྐུར་བས། །དེ་རིང་ཁྱོད་ལ་དབང་བསྐུར་ཏེ། །རབ་ཏུ་སྒྲུབ་ཕྱིར་རྡོ་རྗེ་ལོང༌། །ཨོཾ་ཤྲཱི་ཧེ་རུ་ཀ་ཨ་དྷི་པ་ཏི་སྟྭཾ། ཨ་བྷི་ཥིཉྩ་མི་ཏིཥྛ་བཱི་ར་ས་མ་ཡ་སྟྭཾ། ས་བོན་གྱི་འོད་ཟེར་གྱིས་འོད་དཔག་མེད་དཔག་ཏུ་མེད་པ། ལུས་ཐམས་ཅད་འོད་དཔག་ཏུ་མེད་པའི་རྡུལ༴ དེ་ལྟར་ན་རྡོ་རྗེའི༴ འདོད་ཆགས༴ འདུ་ཤེས༴ སོ་སོར་རྟོག་པའི་ཡེ་ཤེས༴ འོད་དཔག་མེད་པའི་ཞེས་འདོན་པ་སྤོའོ། །དྲིལ་བུའི་དབང་ནི། ཁཾ་ལས་རལ་གྲི་ཁཾ༴ དོན་ཡོད་གྲུབ་པ་ལྗང་ཁུ༴ རལ་གྲི་དང༌། ཡུམ་དམ་ཚིག་སྒྲོལ་མ་ལྗང་ཁུ༴ འདི་ནི་རྣལ་འབྱོར་མ་ཀུན་གྱིས། ཤེས་རབ་དབྱངས་ཀྱིས་རྗེས་འགྲོར་བཤད། ཁྱེད་ཀྱིས་ཀྱང་ནི་རྟག་ཏུ་བཤད། བྱང་ཆུབ་མཆོག་ཏུ་རྒྱལ་བ་བཞེད། ས་བོན་གྱི་འོད་ཟེར་གྱིས་དོན་ཡོད་གྲུབ་པ་དཔག་ཏུ་མེད་པ། དོན་ཡོད་གྲུབ་པའི་རྡུལ། དྲིལ་བུའི་དབང༌། ཕྲག་དོག༴ འདུ་བྱེད༴ བྱ་བ་སྒྲུབ་པའི་ཡེ་ཤེས༴ དོན་ཡོད་གྲུབ་པའི། ཞེས་འདོན་པ་སྤོའོ། །མིང་གི་དབང་ནི། འདི་ལ་དབང་རྫས་མེད་པས། བདག་ཉིད་མི་དམིགས་ཏེ༴ ཞེས་བྱ་ཞིང༌།
པདྨ་དང་ཟླ་བའི་སྟེང་དུ། བྲུཾ་ལས་འཁོར་ལོ་བྲུཾ༴ རྣམ་པར་སྣང་མཛད་དཀར་པོ༴ འཁོར་ལོ་དང༌། ཡུམ་སངས་རྒྱས་སྤྱན་མ་དཀར་མོ། དབང་རྫས་ལ་དབང་བསྐུར་བ་དང༌། དབང་རྫས་ཀྱི་ལྷ་ཞུ་བ་མི་དགོས་པས། ཛཿཧཱུཾ་བཾ་ཧོཿ ཁྱེད་རྣམས་ཀྱིས་བདག་ལ། ཞེས་སྦྲེལ་བས་ཆོག ཨོཾ་ཤྲཱི་ཧེ་རུ་ཀ་ཨ་དྷི་པ་ཏི་སྟྭཾ། ཨ་བྷི་ཥིཉྩ་མཾ། ཤྲཱི་ཧེ་རུ་ཀ ནཱ་མཿཨ་བྷི་ཥེ་ཀ་ཏ། ཀྱཻ་དཔལ་གསང་མཚན་དྲན་པར་བྱ། ཨོཾ་ཀཱ་ཀ་སྱཱ། སོགས་དང་གཙོ་བོའི་སྙིང་པོ་བརྗོད། ས་བོན་གྱི་འོད་ཟེར་གྱིས། རྣམ་པར་སྣང་མཛད་དཔག་ཏུ་མེད་པ། རྣམ་པར་སྣང་མཛད་ཀྱི་རྡུལ༴ དེ་ལྟར་ན་མིང་གི་དབང༌། གཏི་མུགགཟུགས་ཕུང་ཆོས་ཀྱི་དབྱིངས་ཀྱི་ཡེ་ཤེས། རྣམ་པར་སྣང་མཛད་ཀྱི་ཞེས་འདོན་པ་སྤོའོ། །དབང་དེ་རྣམས་ཐོབ་པས་བྱ་བ་སྤྱོད་པའི་རྒྱུད་ཉན་པ་དང་བཤད་པ་དང་སྔགས་སྒྲུབ་ལ་དབང་ངོ༌། །སྤང་བྱ་མ་རིག་པ་ལྔ་སྤོང་ཞིང༌། རིག་པ་ཡེ་ཤེས་ལྔ་སྐྱེའོ། །བརྟུལ་ཞུགས་ཀྱི་དབང་ལ་གཉིས་ལས་ཐུན་མོང་བ་རྡོ་རྗེའི་བརྟུལ་ཞུགས་ནི། སྭ་བྷ་ཝ། སྟོང་པའི་ངང་ལས་བདག་ཉིད་མི་བསྐྱོད་པ་ནས་བཞུགས་པའི་བར་གོང་བཞིན། རང་གི་སྙིང་གར་ཡང་རང་དང་འདྲ་བའི་མི་བསྐྱོད་པ། ཐུགས་རྡོ་རྗེ་ངོ་བོ་རྡོ་རྗེ། དེང་ཕྱིན་ཆད་ཐ་མལ་གྱི་སྤྱོད་པ་རྡུལ་ལ་རྡོ་རྗེ་སེམས་དཔའི་ཚུལ་ལ་ཞུགས་ཤིག་འདི་སྟེ་སངས་རྒྱས་ཐམས་ཅད་ཀྱི། །ཧེ་རུ་ཀ་དཔལ་ཕྱག་ན་གནས། །ཁྱོད་ཀྱིས་ཀྱང་ནི་རྟག་ཏུ་བཅངས། །ཧེ་རུ་ཀ་དཔལ་བརྟུལ་ཞུགས་བརྟན། ཨོཾ་སརྦ་ཏ་ཐཱ་ག་ཏ་སིདྡྷི་བཛྲ་ས་མ་ཡ་ཏིཥྛ་ཨེ་ཥ་
སྟྭཾ་དྷར་ཡ་མི་ཧཱུཾ་ཧ་ཧ་ཧ་ཧ་ཧོ། ཞེས་བརྗོད་ཅིང་རྡོ་རྗེ་གནས་གསུམ་དུ་རེག་ལ་སྙིང་གར་བཞག་གོ །ཐུན་མོང་མ་ཡིན་པ་སྤྱོད་པའི་བརྟུལ་ཞུགས་ནི། རང་ཉིད་སྐད་ཅིག་གིས་འཁོར་ལོ་བདེ་མཆོག་ཞལ་བཞི་ཕྱག་བཅུ་གཉིས་པའི་སྐུར་གྱུར། རང་གི་སྙིང་གར་ཡང་རང་དང་འདྲ་བའི་ཧེ་རུ་ཀ་ཧཱུཾ་ལས་བྱུང་བའི་ཅང་ཏེའུ། ཐོད་པ་ཁ་ཊྭཱཾ་ག །ཚངས་སྐུད་རྣམས་སུ་གྱུར། ཧེ་རུ་ཀ་དཔལ་ཕྱག་རྒྱ་འདི། ཕྱི་དང་ནང་དུ་ཡང་དག་གནས། ཁ་ཊྭཱཾ་ཅང་ཏེའུ་ལྷུང་ཟེད་དག །སྦྱིན་པ་དཔའ་བོས་བཟུང་བར་གྱིས། ཁ་ཊྭཱཾ་ག་དང་ཌཱ་མ་རུ། །ཧེ་རུ་ཀ་དཔལ་ཁ་ཊྭཱཾ་ག །རྣལ་འབྱོར་མ་ནི་ཌཱ་མ་རུ། །རྡོ་རྗེ་ཁ་ཊྭཱཾ་རྡོ་རྗེར་བཅས། །དྲིལ་བུ་སིལ་སིལ་སྒྲ་སྒྲོགས་ཤིང༌། །ཚངས་པའི་སྐུད་ཐོགས་རྣལ་འབྱོར་བདག ཁ་ཊྭཱཾ་ག་དང་རྣལ་འབྱོར་སྣོད། །དཔའ་བོ་ཆེན་པོས་བླང་བར་གྱིས། །ཌཱ་མ་རུ་ནི་ཤེས་རབ་སྟོང་པ་ཉིད་ཀྱི་སྒྲ་སྒྲོགས་པ། ཁ་ཊྭཱཾ་ག་ནི་ཐབས་རིག་པ་བྱང་ཆུབ་ཀྱིས་སེམས་ལྷའི་སྐུ། ཐོད་པ་བདེ་བ་སྐྱོང་བ། ཚངས་པའི་སྐུད་པ་རྣམ་པར་མི་རྟོག་པའི་ཐབས་ཤེས་ཟུང་དུ་འབྲེལ་བ་ཡིན་པས་ན། དེ་ལྟར་ཤེས་པར་གྱིས་ལ་སེམས་ཅན་གྱི་དོན་གྱིས་ཤིག ཅེས་པའོ། །རྡོ་རྗེ་སློབ་དཔོན་གྱི་དབང་གི་དོན་དུ་མཎྜལ་ཕུལ་ལ། དཔའ་བོ་ཆེན་པོ་མི་ལྡོག་པའི། །དབང་བསྐུར་བ་ནི་བདག་ལ་སྩོལ། །སེམས་ཅན་ཀུན་གྱི་དོན་བགྱིད་ཕྱིར། །བདག་ནི་རྟག་ཏུ་སློབ་དཔོན་བགྱིད། ལན་གསུམ། རྡོ་རྗེ་འདི་ཉིད་ཧཱུཾ་ལས་རྡོ་རྗེ་སེམས་དཔའི་ངོ་བོ་དང་པོའི་རྡོ་རྗེ། འདི་སྟེ་སངས་རྒྱས་ཐམས་ཅད་དེ། ཧེ་རུ་ཀ་དཔལ་དབང་བསྐུར་
བས། དེ་རིང་ཁྱོད་ལ་དབང་བསྐུར་ཏེ། །རབ་ཏུ་གྲུབ་ཕྱིར་རྡོ་རྗེ་ལོང༌། །ཨོཾ་ཤྲཱི་ཧེ་རུ་ཀ་ཨ་དྷི་པ་ཏི་སྟྭཾ་ཨ་བྷི་ཥིཉྩ་མི། ཏིཥྛ་བཱི་ར་ས་མ་ཡ་སྟྭཾ། ལན་གསུམ་དུ་གསོར་ལ་སྙིང་གར་གཏད། ཐོག་མཐའ་མེད་པའི་སེམས་དཔའ་ནི། །རྡོ་རྗེ་སེམས་དཔའ་དགའ་བ་ཆེ། །ཀུན་ཏུ་བཟང་པོ་ཀུན་བདག་ཉིད། །རྡོ་རྗེ་སྙེམས་ཚུལ་བདག་པོའི་བདག །དྲིལ་བུ་འདི་ཉིད་ཨཱཿལས་སྙེམས་པའི་ངོ་བོ་དང་པོའི་རྡོ་རྗེས་མཚན་པའི་དྲིལ་བུ། འདི་ནི་རྣལ་འབྱོར་མ་ཀུན་གྱིས། །ཤེས་རབ་དབྱངས་ཀྱི་རྗེས་འགྲོར་བཤད། ཁྱོད་ཀྱིས་ཀྱང་ནི་རྟག་ཏུ་བཅངས། །བྱང་ཆུབ་མཆོག་ཏུ་རྒྱལ་བ་བཞེད། ལན་གསུམ་མམ་བརྒྱད་དུ་དཀྲོལ་ལ། ཁ་ནང་དུ་བསྟན་ཏེ་དཀུ་གཡོན་དུ་ཕྱོགས་པར་བཞག་ལ། སྲིད་པ་ངོ་བོ་ཉིད་ཀྱིས་དག །ངོ་བོ་ཉིད་ཀྱིས་སྲིད་བྲལ་བྱས། །རང་བཞིན་དག་པའི་སེམས་དཔའ་ནི། །སྲིད་པ་དམ་པ་བྱེད་པར་གྱུར། །རང་སྐད་ཅིག་གིས་རང་ཉིད་རྡོ་རྗེ་སེམས་དཔའ་སྐུ་མདོག་དཀར་པོ་རྡོ་རྗེ་དྲིལ་བུ་འཛིན་པ། ཡུམ་རྡོ་རྗེ་སྙེམས་མ་གྲི་གུག་དང་ཐོད་པ་འཛིན་པས་འཁྱུད་པ། རུས་པ་དང་རིན་པོ་ཆེའི་རྒྱན་གྱིས་བརྒྱན་པ། ཐོད་པའི་འཕྲེང་བའི་ཅོད་པན་ཅན། །རྡོ་རྗེ་དྲིལ་བུ་སྙིང་གར་བསྣོལ། །ཡིད་ཀྱི་ལུས་བརྟན་དེ་ཉིད་ནི། །ཕྱག་རྒྱའི་དམ་ཚིག་རབ་ཏུ་བརྗོད། །གང་གིས་ལུས་འདི་ཐམས་ཅད་བརྟན། །དེས་ན་ཕྱག་རྒྱར་རབ་ཏུ་སྒྲགས། །ཤེས་རབ་བཅུ་དྲུག་ལོན་པ་ལ། །ལག་པ་དག་གིས་ཡང་དག་འཁྱུད། །རྡོ་རྗེ་དྲིལ་བུ་མཉམ་སྦྱོར་བ། །སློབ་དཔོན་གྱི་ནི་དབང་དུ་བརྗོད། །རྡོ་རྗེ་ཆེ་དང་
དྲིལ་བུ་ཆེ། །ཟུང་ཞིག་རྡོ་རྗེ་བྱིན་གྱིས་རླབས། །དེ་རིང་རྡོ་རྗེ་སློབ་དཔོན་གྱུར། ཨོཾ་ཀ་ཀཱ་སྱཱ། ནས་ཆུའི་ལྷག་མ་ཡར་ལུད་པ་ལས། རྡོ་རྗེ་འཆང་ཆེན་པོས་དབུ་རྒྱན་གྱི་བར་ཆད་དབང་གི་སྐབས་བཞིན། དབང་གི་ལྷ་ཐམས་ཅད་ཀྱང་རང་ལ་གཉིས་སུ་མེད་པར་ཐིམ། ཨོཾ་བཛྲ་པུཥྤེ་ཨཱ་ཧཱུཾ། སོགས་ཉེར་སྤྱོད་ལྔས་ཕུལ། ཨོཾ་སུ་པྲ་ཏིཥྛ་བཛྲ་ཡེ་སྭཱཧཱ། མེ་ཏོག་སྤྱི་བོར་བཞག་སྟེ་བརྟན་བཞུགས་བྱ། དེ་རིང་རྡོ་རྗེ་སློབ་དཔོན་གྱུར། །སྔགས་དང་རྒྱུད་རྣམས་འཛིན་འགྱུར་བར། །སངས་རྒྱས་བྱང་ཆུབ་སེམས་དཔའ་དང༌། །ལྷ་རྣམས་ཀུན་གྱི་བཞེད་པ་ཡིན། །སེམས་ཅན་རྣམས་ནི་རྗེས་བཟུང་ཕྱིར། །ཁྱོད་ཀྱིས་ནན་ཏན་བསྐྱེད་ནས་ནི། །དཀྱིལ་འཁོར་ཆོ་ག་བཞིན་བྲིས་ནས། །སྒྲུབ་པ་པོ་རྣམས་སྔགས་ལ་སྦྱོར། །དེ་ནས་མཐའ་རྟེན་ལ། རྗེས་སུ་གནང་བ། དམ་ཚིག་སྦྱིན་པ། གཟེངས་བསྟོད་པ། དབུགས་དབྱུང་བ་སྟེ་བཞི་ལས། དང་པོ་ལ་ལྷ་མཆོད་པའི་རྗེས་གནང༌། དེ་ཁོ་ན་ཉིད་ཀྱི་རྗེས་གནང༌། གཞན་དོན་ཆོས་བཤད་པའི་རྗེས་གནང༌། གཉིས་དོན་ལས་དང་དངོས་གྲུབ་ཀྱི་རྗེས་གནང་སྟེ་བཞི་ལས་དང་པོ་ནི། སྒེག་སོགས་བརྒྱད་ཀྱི་ཕྱག་རྒྱ་འཆའ་བཞིན་དུ། དེང་ནས་བརྩམས་ཏེ་རྫོགས་སངས་རྒྱས། །རྣལ་འབྱོར་མ་དང་དཔའ་ཚོགས་དང༌། །ཤེས་རབ་ཐབས་བཅས་སྙོམས་ཅན་གྱིས། །གར་མཆོད་བདེ་བའི་མཆོད་པ་བགྱིས། །ཨ་སྒེག་དང་བཅས་པའི་འཕྲེང་བ་འཕྱང༌། །སངས་རྒྱས་ཀུན་སོགས་རྣལ་འབྱོར་པ། །དེ་ནི་འབྲལ་བར་མི་འགྱུར་ཏེ། །ཕྲེང་བ་དེ་ཡི་རྒྱན་ཡིན་ནོ། །ཨོཾ་ལུས་ཅན་ཀུན་ལ་དམ་ཆོས་ཀྱི། །གླུ་ནི་ཁྱོད་ཀྱི་བླང་བར་གྱིས། །
དེས་ནི་རྣལ་འབྱོར་མ་དེ་དང༌། །མྱུར་དུ་བདེ་བ་མྱོང་བར་འགྱུར། གཱི། དེ་ཉིད་ཐལ་མོའི་གར་གྱིས་ནི། །སངས་རྒྱས་ཐམས་ཅད་མཆོད་པར་བྱ། །སངས་རྒྱས་འདུལ་བའི་འཕྲིན་ལས་གྱིས། །གར་མཁན་ཚུལ་དུ་བསྒྱུར་བར་གྱིས། །ཧོ། སངས་རྒྱས་ཀུན་ལ་མེ་ཏོག་གཏོར། །བྱང་ཆུབ་ཡན་ལག་ཚོགས་གྱུར་པའི། །མཚན་དང་དཔེ་བྱད་ལྡན་པ་ཡིན། །བདེ་གཤེགས་སྐུ་ནི་ཐོབ་པར་འགྱུར། །བྷྲཱུཾ། རྫོགས་སངས་རྒྱས་ལ་སྤོས་ཕུལ་བས། །བརྟུལ་བཞུགས་བཟང་པོས་ལེགས་ཚིམ་གྱིས། །ལུས་ཅན་བདེ་གཤེགས་ཆ་ལུགས་སུ། །ཡེ་ཤེས་ཀྱིས་ནི་ཚིམ་པར་འགྱུར། །ཨ ཆོས་ཀྱི་མེ་ནི་ལེགས་སྦར་བས། །པདྨ་གར་དབང་རང་ཉིད་དེ། །སེམས་ཅན་མ་རིག་ལྡོངས་རྣམས་ལ། །ཡེ་ཤེས་སྒྲོན་མེ་སྦར་བར་གྱིས། །པྲ ཁྱོད་ཀྱི་རྒྱལ་ལ་དྲི་ཕུལ་བས། །ཚུལ་ཁྲིམས་ཏིང་འཛིན་ཤེས་རབ་དང༌། །རྣམ་གྲོལ་ཡེ་ཤེས་མཐོང་བ་ཡི། །བྱང་ཆུབ་ལུས་ཅན་རྣམས་ལ་དགོས། །གྷཿགཉིས་པ་ནི། པྲཾ་ལས་བྱུང་བའི་མིག་ཐུར་དུ་གྱུར། ཇི་ལྟར་མིག་མཁན་རྒྱལ་པོ་ཡིས། །འཇིག་རྟེན་རབ་རིབ་བསལ་བ་ལྟར། །བུ་ཁྱོད་ཀྱི་ནི་མི་ཤེས་པའི། །རབ་རིབ་རྒྱལ་བ་རྣམས་ཀྱིས་བསལ། །ཨོཾ་བཛྲ་ནཻ་ཏྲ་ཨ་པ་ཧ་ར་པ་ཊ་ལཾ་ཧྲཱིཿ ཨ་ལ་བྱུང་བའི་མེ་ལོང་དུ་གྱུར། ཆོས་རྣམས་གཟུགས་བརྙན་ལྟ་བུ་སྟེ། དག་ཅིང་གསལ་བ་རྙོག་པ་མེད། །བཟུང་དུ་མེད་ཅིང་བརྗོད་དུ་མེད། །རྒྱུ་དང་ལས་
ལས་ཀུན་ཏུ་འབྱུང༌། །ངོ་བོ་ཉིད་མེད་གནས་མེད་པ། །དེ་ལྟར་ཆོས་རྣམས་ཤེས་ཀྱིས་ལ། །སེམས་ཅན་དོན་ནི་མཉམ་མེད་གྱིས། །འོན་ཀྱང་རྣལ་འབྱོར་མ་སྲས་སྐྱེས། །སྤྲོས་པ་ལ་དགའ་ན་འདིར་དྲིལ་བུ་དང་མདའ་གཞུ་དང་མེ་ལོང་གཉིས་པའི་རྗེས་གནང་ཡང་བྱ། གསུམ་པ་ནི། དུང་དང༌། འཁོར་ལོ་དང༌། པོ་ཏི་དང༌། དྲིལ་བུ་རྣམས་སྦྱིན་པར་བསམས་ལ། ཨོཾ་བཛྲ་ཧེ་རུ་ཀ་མཾ། ཨོཾ་བཛྲ་བྷ་ག་རཾ། ཨོཾ་བཛྲ་གྷཎྜེ་ཨ། ཨཿ སེམས་ཅན་ཀུན་ལ་ཕན་པའི་ཕྱིར། །འཇིག་རྟེན་ཁམས་ནི་ཐམས་ཅད་དུ། །བྱ་བ་སྤྱོད་ཚུལ་གསང་བ་ཡི། །ཆོས་ཀྱི་འཁོར་ལོ་བསྐོར་བར་གྱིས། ཁྱེད་ཀྱི་ཐེ་ཚོམ་དོགས་མེད་པར། །ཡིད་གཉིས་མེད་པའི་སེམས་ཀྱིས་སུ། །ཆོས་ཀྱི་དུང་ནི་བླ་མེད་པ། །དྲི་མེད་ཀུན་ཏུ་གང་བར་གྱིས། །སྤྲོས་པ་ལ་དགའ་ན་འདིར་རིགས་སྤྲུལ་བཤད་ཀྱང་བྱའོ། །བཞི་པ་ནི། ཞི་དང་རྒྱས་དང་དབང་དང་དགུག །སྡང་བར་བྱ་དང་གནོད་སོགས་དང༌། །བསད་དང་སྐྲད་པ་ཐམས་ཅད་དེ། །ལས་དེ་རྣམས་ནི་སྒྲུབ་པར་གྱིས། །རལ་གྲི་མིག་སྨན་ས་འོག་དང༌། །མཆིལ་ལྷམ་དེ་བཞིན་རིལ་བུ་སྟེ། །རྣལ་འབྱོར་མ་ཡི་དངོས་གྲུབ་ནི། །དེ་ནི་ཅི་དགར་སྒྲུབ་པར་གྱིས། །གཉིས་པ་དམ་ཚིག་སྦྱིན་པ་ནི། ནངས་པར་སྔར་ལངས་སེམས་དག་ཉིད། །མ་ལུས་ལས་འདི་བྱས་ནས་ཀྱང༌། །བསྲུང་དང་བཟའ་བ་ལ་སོགས་པ། །སྡོམ་པའི་བདག་ཉིད་ཀུན་སྲུང་ངོ༌། །ལུས་དང་སྲོག་ལ་ལྟོས་མེད་པར། །དམ་ཚིག་དང་ནི་སྡོམ་པ་བསྲུང༌། །ཉིན་དང་མཚན་མོ་ལན་གསུམ་དུ། །ཉིན་རེ་བཞིན་ནི་བཟླ་བར་བྱ། །
གང་ཚེ་ཉམས་གྱུར་རྣལ་འབྱོར་པ། ཁ་ན་མ་ཐོ་སྦོམ་པོར་འགྱུར། །དགུན་ཟླ་འབྲིང་པོ་ནས་བརྩམས་ཏེ། །ཟླ་བ་རེ་རེ་བསྲུང་བ་ནི། །གཉིས་མེད་གཉིས་ལ་མི་གནས་པ། །ཚེས་བཅུ་ལ་ནི་བདེ་རབ་མཆོད། །བསྡུ་ན་དེ་ཙམ་གྱིས་ཆོག་ལ། སྤྲོ་ཞིང་ནུས་ན། དམ་ཚིག་གསུམ་སྦྱིན་པ་ནག་པོ་སྤྱོད་པའི་དཀྱིལ་ཆོག་བཞིན་དུ་རྫོགས་པར་འདོན་ནོ། །གསུམ་པ་གཟེངས་བསྟོད་ནི། ལུགས་འདི་ལ་ལུང་བསྟན་ཡིན་ཏེ། ལག་པ་གཡས་སྐྱབས་སྦྱིན་དང་གཡོན་བླ་གོས་ཀྱི་གྲྭ་ནས་འཛིན་པའི་ཚུལ་བྱེད་ཅིང༌། ཧེ་རུ་ཀ་དཔལ་ལུང་སྟོན་བཞིན། །མགྲིན་གཅིག་ཏུ་ནི་ཐམས་ཅད་ཀྱིས། །འདི་ལྟར་ང་ཡིས་ལུང་བསྟན་ཏེ། །ཧེ་རུ་ཀ་དཔལ་དེ་བཞིན་གཤེགས། །དངོས་པོ་མཆོག་ཏུ་གྲུབ་པའི་ཕྱིར། །སྲིད་པའི་ངན་འགྲོ་རྣམས་ལས་བཏོན། །ཧེ་བཛྲ་ཨཾ་ཀུ་རཱི་ཤྲཱི་ཧེ་རུ་ཀ་ན་མ་སརྦ་ཏ་ཐཱ་ག་ཏ་སིདྡྷི་ས་མཱ་ཡ་བྷུར་བྷུ་བ་སྭ། གང་ལ་ཚིགས་སུ་བཅད་པ་འདི་དོན་འགྲུབ་པའི་ཕྱག་རྒྱར་གནས་པ་ལ། མཆོག་ཏུ་གྲུབ་པའི་ཚོགས་རྣམས་རྒྱལ་བ་ཐམས་ཅད་ཀྱིས་ལུང་སྟོན་པར་མཛོད་དོ། །བཞི་པ་དབུགས་དབྱུང་བ་ནི། ཁམས་གསུམ་གྱི་ནི་རྒྱལ་སྲིད་ཆེ། །རྒྱལ་བའི་བདག་པོར་གནས་པ་དང༌། །དེར་ནི་བདུད་ལས་རྣམ་རྒྱལ་ཞིང༌། །གྲོང་ཁྱེར་མཆོག་ཏུ་ཞུགས་པ་ཡིན། །དེར་ནི་སངས་རྒྱས་ཉིད་ཐོབ་པར། །ཁྱེད་རྣམས་ཐེ་ཚོམ་མེད་པ་ཡིན། །དབང་འདི་བསྐུར་བ་ཙམ་གྱིས་ཀྱང༌། །སློབ་མ་ཡོན་ཏན་བདག་པོར་འགྱུར། །སློབ་དཔོན་ཉིད་ཀྱི་བདེ་བ་ཡི། །བརྟན་གཡོ་ཀུན་གྱི་དམ་ཚིག་ཡིན། །དེ་རྣམས་ཀྱི་ནི་དཀྱིལ་འཁོར་ལས། །རྡུལ་ཚོན་ནམ་རས་བྲིས་ཀྱི་དཀྱིལ་
འཁོར་དུ་ཞུགས། བུམ་པའི་དབང་ཐོབ་པས། ལུས་ཀྱི་དྲི་མ་དག །དམ་ཚིག་རྩ་བ་དང་ཡན་ལག་གི་ལྟུང་བ་རྣམས་བསྲུང༌། ལམ་བསྐྱེད་པའི་རིམ་པ་སྒོམ་པ་ལ་དབང༌། འབྲས་བུ་སྤྲུལ་པའི་སྐུ་མངོན་དུ་འགྱུར་བའི་སྐལ་པ་ཅན་དུ་བྱས་པ་ཡིན་ནོ། གསང་དབང་གི་དོན་དུ་མཎྜལ་ཕུལ། བཅོམ་ལྡན་ཞི་བ་ཆེན་པོ་ཀྱེ། རྡོ་རྗེ་རྣལ་འབྱོར་གཅིག་བཞེད་པ། །མི་ཕྱེད་ཕྱག་རྒྱ་སྒྲུབ་པ་པོ། །རྡོ་རྗེ་སྦྱོར་བའི་ཡང་དག་བྱང༌། །བདག་ཉིད་ཆེན་པོ་ཁྱོད་ཇི་བཞིན། །མངའ་བདག་ལའང་དེ་ལྟར་མཛོད། །འཁོར་བ་འདམ་གྱི་ཚོགས་ནང་དུ། །བྱིང་བ་སྐྱབས་མེད་བདག་ལ་སྐྱོབས། ལན་གསུམ་གྱིས་གསོལ་བ་བཏབ་མིག་དར་བཅིངས། ཨོཾ་ཨཱཿཧཱུཾ་གིས་བདུད་རྩི་གཏོར། བླ་མེད་ཧེ་རུ་ཀ་ཡབ་ཡུམ་སྙོམས་པར་ཞུགས་པའི་དགའ་བའི་སྒྲ་དང་ཐུགས་ཀའི་འོད་ཟེར་གྱིས། སངས་རྒྱས་སྲས་དང་བཅས་པ་ཐམས་ཅད་སྤྱན་དྲངས། ཡབ་ཡུམ་གྱི་སྐུ་ལ་ཞུགས། ཐུགས་ཀར་བྱང་ཆུབ་ཀྱི་སེམས་སུ་ཞུ། གསང་བར་ལྷན་ཅིག་སྐྱེས་པའི་ཡེ་ཤེས་བརྟན་པར་བྱས་པའི། ཐབས་ཀྱི་བྱང་ཆུབ་ཀྱི་སེམས་བདག་ཉིད་ལྕེ་ཐོག་ཏུ་བཞག ཇི་ལྟར་འདས་པའི་སངས་རྒྱས་ཀྱིས། །བྱང་ཆུབ་སྲས་ལ་དབང་བསྐུར་ལྟར། བདག་གི་གསང་བའི་དབང་གི་ནི། །སེམས་ཀྱི་རྒྱུན་གྱི་དབང་བསྐུར་རོ། །ཡུམ་གྱི་བྱང་ཆུབ་ཀྱིས་སེམས་བདག་གི་ཁར་བབ། འདི་དེ་དཔའ་བོ་ལྷ་མོ་རྣམས། །དམ་ཚིག་ཆེན་པོ་རྨད་བྱུང་བ། ཁམས་ལྔ་ལས་བྱུང་བཅུད་ཀྱི་ལེན། བདེ་བ་དམ་པ་མྱོང་བར་བྱོས། །ཨོཾ་ཨཱཿཧཱུཾ། དེ་ལྟར་ན་ལུས་ཀྱི་དཀྱིལ་འཁོར་དུ་གསང་བའི་
དབང་ཐོབ་པས། ངག་གི་དྲི་མ་དག དམ་ཚིག་ཤ་ལྔ་བདུད་རྩི་ལྔ་བསྟེན། ལམ་རང་ལུས་ཐབས་ལྡན་གྱི་རྫོགས་རིམ་སྒོམ་པ་ལ་དབང༌། འབྲས་བུ་ལོངས་སྐུ་མངོན་དུ་འགྱུར་བའི་སོགས་བརྗོད་དོ། །ཤེས་རབ་ཡེ་ཤེས་ཀྱི་དབང་གི་དོན་དུ་མཎྜལ་ཕུལ། གསང་དབང་ལྟར་གསོལ་བ་བཏབ། མིག་དར་བཅིངས། ཨོཾ་ཨཱཿཧཱུཾ། བདུད་རྩི་གཏོར། མཚན་ཉིད་དང་ལྡན་པའི་རིག་མ་དངོས་གྲུབ་ཀྱི་དོན་ཏུ་ཕྱག་རྒྱར་གཏད། དགའ་སྟེར་གནས་སྟེར་ལྷ་མོ་ནི། །སྣ་ཚོགས་གཟུགས་ཅན་ཡིད་འོང་མ། །ཟུང་ཞིག་ཟུང་ཞིག་སེམས་དཔའ་ཆེ། །ཟུང་ལ་མཆོད་པ་རྟག་ཏུ་གྱིས། །རིག་མ་དེས་ཀྱང་འདི་སྐད་ཅེས། །བཤང་གཅི་དག་ནི་བཟའ་བ་དང༌། ཁྲག་དང་ཁུ་བ་དེ་བཞིན་ཏེ། །ཤ་ཆེན་བསྟེན་པར་བུ་སྤྲོའམ། །བུད་མེད་རྣམས་ལ་རྟག་གུས་དང༌། །བྷ་གའི་པདྨར་ཙུམ་པ་རྣམས། །བུ་ཁྱོད་ཇི་ལྟར་དགའ་བར་སྨོས། ཞེས་དྲིས་པ་ལ། ལྷ་མོ་ཅི་ཕྱིར་བདག་མི་སྤྲོ། ཁུ་ཁྲག་ལ་སོགས་བཟའ་བ་དང༌། །བུད་མེད་རྣམས་ལ་རྟག་གུས་ཤིང༌། །པདྨའི་བྷ་ག་ཅིས་མི་ལེན། ཞེས་ལན་བཏབ། དེས་ཀྱང་སྐྱེ་གནས་མཆོག་གི་རྩ་གསལ་བར་བྱས་ནས། ཨེ་མ་བདག་གི་པདྨ་ནི། །བདེ་བ་ཐམས་ཅད་འབྱུང་བའི་གནས། །གལ་ཏེ་ཆོ་ག་བཞིན་བསྟེན་ན། །དེ་ཡི་མདུན་ན་ང་འདུག་སྟེ། །སངས་རྒྱས་བསྟན་པ་ལ་སོགས་པ། །བྱ་བ་ཐམས་ཅད་པདྨར་བྱེད། །བདེ་ཆེན་རྒྱལ་པོ་རང་ཉིད་ནི། །འདི་ཉིད་དུ་ནི་རྟག་ཏུ་ཞུགས། །བྷཾ་ཛ་མོ་ཀྵ་ཧོ། ཞེས་དབང་དུ་བྱོན། རང་ཉིད་ཧེ་རུ་ཀ་ཕྱག་གཉིས་པ་དང༌། རིག་མ་རྡོ་རྗེ་ཕག་མོར་གྱུར་
ཡབ་ཀྱི་གསང་གནས་མི་དམིགས་ཏེ་སྟོང་པའི་ངང་ལས་ཧཱུཾ་དཀར་པོར་ནས རྒྱས་ཤིང་བརྟན་པར་གྱུར། གྱི་བར་སྒྲུབ་ཐབས་བཞིན། ཨོཾ་ཨཱཿཧཱུཾ་གིས་གདོང་གཡོགས་དཀྲོལ། དེ་ལྟར་ན་བྷ་གའི་དཀྱིལ་འཁོར་དུ། ཤེས་རབ་ཡེ་ཤེས་ཀྱི་དབང་ཐོབ་པས་སེམས་ཀྱི་དྲི་མ་དག དམ་ཚིག་ཏུ་ཤེས་རབ་མའི་རིགས་ལ་སྨད་པར་མི་བྱ། ལམ་དངོས་དང་ཡེ་ཤེས་ཀྱི་རིག་མ་བསྟེན་པ་ལ་དབང༌། འབྲས་བུ་ཆོས་ཀྱི་སྐུ་མངོན་དུ་འགྱུར་བའི་སྐལ་བ་ཅན་དུ་བྱས་པ་ཡིན་ནོ། །དབང་བཞི་པའི་དོན་དུ་མཎྜལ་ཕུལ་ལ། ཁྱོད་ཞབས་པདྨོའི་བཀའ་དྲིན་གྱིས། །གཙོ་བོའི་དབང་བསྐུར་རྣམ་གསུམ་ཐོབ། །དེ་རིང་རིན་ཆེན་བཞི་པ་ཡང༌། །བདག་ལ་བཀའ་དྲིན་སྐྱབས་དུ་གསོལ། །ལན་གསུམ་གྱི་གསོལ་བ་གདབ། དེ་ལྟར་ཡང་སྡོམ་པ་འབྱུང་བ་ལས། །རྣམ་པ་སྣ་ཚོགས་དྲི་མེད་པའི། །དཀྱིལ་འཁོར་དག་ནི་སྤྲོ་བར་གནང༌། །ལྷན་ཅིག་སྐྱེས་པ་བཞི་པའི་མིང༌། །བདེ་བ་ཀུན་གྱི་གནས་དེ་བཞིན།ཞེས་དང༌། ལྷན་ཅིག་སྐྱེས་པའི་སྣང་བརྙན་ཙམ། །རང་བཞིན་གྱིས་ནི་འོད་གསལ་བའོ། །ཞེས་དང༌། ཡུལ་དང་ཡུལ་ཅན་སྦྱོར་བ་ཡིས། །རྟོག་པ་མེད་པའི་གོ་འཕང་འགྱུར། །ཞེས་པའི་དོན་ལ་མཉམ་པར་བཞག །དེ་ལྟར་ན་དོན་དམ་བྱང་ཆུབ་སེམས་ཀྱི་དཀྱིལ་འཁོར་དུ་དབང་བཞི་པ་ཐོབ་པས། ལུས་ངག་ཡིད་གསུམ་གྱི་དྲི་མ་བག་ཆགས་དང་བཅས་པ་དག དམ་ཚིག་ཏུ་དགོངས་ཏེ་གསུངས་པ་བཞིའི་དོན་སྒྲུབ། ལམ་བསམ་གྱིས་མི་ཁྱབ་པའི་རྣལ་འབྱོར་བསྒོམ་པ་ལ་དབང༌། འབྲས་བུ་ངོ་བོ་ཉིད་སྐུ་མངོན་དུ་འགྱུར་བའི་སྐལ་བ་ཅན་དུ་བྱས་པ་ཡིན་ནོ། །གཙོ་བོས་
ཇི་ལྟར་བཀའ་སྩལ་པ། །དེ་དག་ཐམས་ཅད་བདག་གིས་བགྱིད། ལན་གསུམ། བཀའ་དྲིན་གཏང་རག་གི་དོན་དུ་མཎྜལ་ཕུལ། དེང་ནས་བརྩམ་སྟེ་བདག་བྲན་དུ། ཁྱེད་ལ་བདག་ནི་འབུལ་ལགས་ཀྱི། ཁྱེད་ཀྱི་སློབ་མར་བཟུང་བ་དང༌། །ཆ་ཤས་ཀྱིས་སྤྱད་དུ་གསོལ། ལན་གསུམ། དགེ་བ་བསྔོ། སྤྲོས་པ་ལ་དགའ་ན། ཨོཾ་ནམ་མཁའ་སྐྱེ་བ་མཚན་ལྡན་ཕྱིར། ཞེས་སོགས་དམ་ཚིག་གསུམ་གྱི་གླུ་བླང་ངོ༌། །བཅུ་པ་སློབ་མ་བཟུང་བ་ནི། བདག་འཇུག་ལས་དཔག་ཏེ་ཤེས་པར་འགྱུར་ལ། ལག་ལེན་གྱི་ཁྱད་པར་ཕྲ་མོ་རྣམས་སློབ་དཔོན་གྱི་གསུང་དང༌། མཐོང་བ་རྒྱུད་པ་ལས་ཤེས་པར་འགྱུར་ཞིང༌། སློབ་མ་ལ་བགེགས་སྦྱངས་དང༌། སྡིག་པ་སྦྱངས་པ་གཉིས་ལས་སམ། དྲི་མ་སྦྱངས་པ་སྟེ། སྦྱང་བ་གསུམ་ཆར་ཡང་བྱེད་པའི་སྲོལ་ཡོད་པ། འཇུག་པའི་སྐབས་ཀྱི་གནས་སྐབས་སྔ་ཕྱི་མ་ངེས་པ་ཞིག་ལག་ལེན་སོ་སོ་ལ་སྣང་ཡང༌། འཇུག་པའི་གསོལ་གདབ་གྲུབ་མ་ཐག་ཏུ་བྱས་ན་ལེགས་པར་མངོན་ལ། ཡེ་ཤེས་འབེབས་པའི་རྫས་ནི་མི་རོའི་ཁར་བཅུག་པའི་གུ་གུལ་དང་བྱི་ལ་ནག་པོའི་བྲུན། གཞོན་ནུ་མའི་རྔུལ་གྱིས་གོས་པའི་རས། བདུད་རྩི་ལྔ་རྣམས་བསྲེས་པ་ཐོད་པའི་ནང་དུ་དུར་ཁྲོད་ཀྱི་མེ་ལ་བསྲེག་པར་བཤད་ལ། གཞན་མི་འདྲ་བའང་ཅི་རིགས་པར་སྣང་ངོ༌། ཁྱད་པར་ཕྲ་མོ་འགའ་རེ་བདག་འཇུག་གི་ཞོར་ལའང་བཤད་ཟིན་ལ། གོ་དོན་རྒྱས་པ་ནི་གཞན་དུ་ཤེས་པར་བྱའོ། །བཅུ་གཅིག་པ་རྗེས་ཀྱི་བྱ་བ་ནི། སློབ་མ་ལ་དབང་བསྐུར་བ་ཡིན་ན། སློབ་མ་རྣམས་དཀྱིལ་འཁོར་ཁང་པར་བཞག་སློབ་དཔོན་བདག་ཉིད་དཀྱིལ་འཁོར་ཁང་པའི་ཕྱི་རོལ་ཏུ་སོང་ནས། འབྱུང་པོ་ཐམས་ཅད་ཀྱི་གཏོར་མ་རྒྱ་ཆེར་བཏང་ནང་དུ་ཞུགས་ནས་དཀྱིལ་འཁོར་གྱི་གཙོ་བོ་ལ་ཕྱག་བྱའོ། །སྦྱིན་སྲེག་དང༌། ཚོགས་ཀྱི་འཁོར་ལོས་ཀྱང་ལྷ་རྣམས་མཉེས་པར་བྱའོ། །
ཡོངས་ནི་དངོས་གཞིའི་དཀྱིལ་འཁོར་མཆོད་པའི་དུས་དང༌། སློབ་མ་དབང་བསྐུར་ཟིན་པའི་དུས་དང༌། དཀྱིལ་འཁོར་གཤེགས་ཟིན་པའི་ཤུལ་དུ་ཡང་མེའི་ལས་དང་འཁོར་ལོའི་མཆོད་པའི་ལྷ་མཉེས་པར་བྱ་སྟེ། རང་ཉིད་ཁོ་ནས་དོན་གྱི་མཆོད་པ་ལ་ཡང༌། གནས་སྐབས་གཉིས་པོ་དེར་སྒྲུབ་བོ། །དེ་ནས་རྗེས་ཆོག་དངོས་ནི། མཆོད་པ་རྒྱ་ཆེར་བཤམས། བྱིན་གྱིས་རླབས། མཆོད་ཡོན་སོགས་དང༌། རིག་མ་བཅུ་དྲུག་དང༌། ནང་མཆོད་གསང་མཆོད། རྐང་བརྒྱད་ཀྱི་བསྟོད་པ་རྣམས་བྱས་ལ། དཀྱིལ་འཁོར་མཆོད་པ་བྱས་པའི་དགེ་བའི་རྩ་བ་བྱང་ཆུབ་ཏུ་བསྔོས། དཀྱིལ་འཁོར་དུ་ལན་གསུམ་བསྐོར་བ་བྱ། མགོན་པོ་ཐུགས་རྗེ་ཆེན་པོ་དང་ལྡན་པ་རྣམས་བདག་ཅག་ལ་དགོངས་སུ་གསོལ། ཁྱེད་རྣམས་ལ་མཁྱེན་པའི་ཡེ་ཤེས། བརྩེ་བའི་ཐུགས་རྗེས། མཛད་པའི་འཕྲིན་ལས་བསམ་གྱིས་མི་ཁྱབ་པ་མངའ་བ་ལགས་པས། སྤྱིར་ཕན་བདེའི་འབྱུང་གནས་སངས་རྒྱས་ཀྱི་བསྟན་པ་དར་བ་དང༌། སེམས་ཅན་ལ་བདེ་སྐྱིད་འབྱུང་བ་དང༌། བླ་མ་གོང་མ་རྣམས་ཀྱི་ཐུགས་དགོངས་རྫོགས་ཤིང༌། ཞལ་བཞུགས་པ་རྣམས་སྐུ་ཁམས་བཟང་བ་དང༌། ཁྱད་པར་དུ་ཡང་བདག་ཅག་དཔོན་སློབ་རྒྱུ་སྦྱོར་བ་དང་བཅས་པས་ཐོག་དྲངས། སེམས་ཅན་ཐམས་ཅད་ཀྱི་རྒྱུད་ལ་ཚོགས་རྫོགས་སྒྲིབ་པ་དག་ནས། མྱུར་དུ་མངོན་པར་རྫོགས་པར་སངས་རྒྱས་པར་བྱིན་གྱིས་བརླབ་ཏུ་གསོལ། ཞེས་གསོལ་བ་བཏབ། ལྷོ་ཕྱོགས་ནས་ཡིག་བརྒྱ་བཟླ། མ་འབྱོར་པ་དང༌། སོགས་སམ། མ་རྙེད་ཡོངས་སུ་མ་ཤེས་དང༌། ཞེས་སོགས་ཀྱི། བཟོད་པར་གསོལ། བདག་ཅག་ལས་དང་པོ་པའི་རྟེན་གྱི་གང་ཟག་ཏུ་གྱུར་པས། སེམས་སྒྲིབ་པ་དང་ལྡན་པ་དང༌། ཡོ་བྱད་མ་ཚང་བ་དང༌། ཏིང་ངེ་
འཛིན་མི་གསལ་བ་དང༌། སྔགས་མ་དག་པ་དང༌། ཆོ་ག་ལྷག་པ་དང་ཆད་པ་ཐམས་ཅད་ལྷག་ཆད་ཁ་བསྐོང་ཞིང༌། བདག་ཅག་གི་ལམ་དང་དངོས་གྲུབ་ཀྱི་བར་ཆད་དུ་མི་འགྱུར་བར་མཛད་དུ་གསོལ། བདག་གི་ལས་དང་དངོས་གྲུབ་ཐམས་ཅད་ཐོགས་པ་མེད་པར་འགྲུབ་པར་མཛད་དུ་གསོལ། རས་བྲིས་ཀྱི་དཀྱིལ་འཁོར་ཡིན་ནམ། མ་ཡིན་ཀྱང་རྟེན་གཞན་ཡོད་ན་བརྟན་བཞུགས་བྱ་སྟེ། ཕྱོགས་བཅུ་ན་བཞུགས་པའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་བདག་ལ་དགོངས་སུ་གསོལ། ཇི་སྲིད་ནམ་མཁའི་མཐའ་དང་མཉམ་པའི་སེམས་ཅན་ཐམས་ཅད། མི་གནས་པའི་མྱ་ངན་ལས་འདས་པའི་ས་ལ་མ་བཞག་གི་བར་དུ། རྒྱལ་བ་རྣམས་མྱ་ངན་ལས་མི་འདའ་བར་བརྟན་པར་བཞུགས་སུ་གསོལ། བྱེ་བྲག་ཏུ་ཡང༌། སྐུ་གཟུགས་ཀྱི་རྟེན་འདི་རྣམས་ལ་ཞེས་སམ། རས་བྲིས་ཀྱི་དཀྱིལ་འཁོར་ལ་ཞེས་སམ། སྐུ་གཟུགས་ཀྱི་རྟེན་འདི་རྣམས་དང་རས་བྲིས་ཀྱི་དཀྱིལ་འཁོར་ལ། ཞེས་པ་གང་འོས་སྐབས་དང་སྦྱར་ཏེ། བསྐྱེད་ཅིང་སྤྱན་དྲངས་པའི་ལྷ་ཚོགས་ཐམས་ཅད། ཇི་སྲིད་འབྱུང་བ་ཆེན་པོ་ས་ཆུ་མེ་རླུང་གི་གནོད་སའི་མ་ཞིག་གི་བར་དུ་བརྟན་པར་བཞུགས་སུ་གསོལ། བརྟན་པར་བཞུགས་ནས་ཀྱང་བདག་དང་སེམས་ཅན་ཐམས་ཅད་ཀྱི་མགོན་དང་སྐྱབས་དང་དཔུང་གཉེན་དམ་པ་མཛད་དུ་གསོལ། ཞེས་མེ་ཏོག་དོར། རྡུལ་ཚོན་གྱིས་དཀྱིལ་འཁོར་ཡིན་ལ། གཞན་རྟེན་སྐུ་སོགས་མེད་ཅིང་སྒྲུབ་མཆོད་ཞག་སྤྲེལ་བྱེད་པའི་སྐབས། ཉི་མ་སྔ་མ་རྣམས་
ལ་རྟེན་དང་བརྟེན་པར་བཅས་པའི་དཀྱིལ་འཁོར་བ་ཐམས་ཅད་གཤེགས་སུ་མ་གསོལ་བར་གྱིས་བརྟན་བཞུགས་ཀྱི་རྡུལ་ཚོན་གཤེགས་གསོལ་གྱི་ཉིན་མོ་དེ་ཡང་མི་དགོས་སོ། །དེ་ནས་གཤེགས་གསོལ་ནི། ཨོཾ་ཁྱོད་ཀྱིས་སེམས་ཅན་དོན་ཀུན་མཛད། རྗེས་སུ་མཐུན་པའི་དངོས་གྲུབ་སྩོལ། །སངས་རྒྱས་ཡུལ་དུ་གཤེགས་ནས་ཀྱང༌། །སླར་ཡང་འབྱོན་པར་མཛད་དུ་གསོལ། །ཨོཾ་ཨཱཿཧཱུཾ་བཛྲ་མུཿ ཞེས་ཏེ་ཞག་སྦྲེལ་མར་བྱེད་པའི་ཉི་མ་སྔ་མ་རྣམས་ལ་ནི། རྟེན་ལ་མ་བརྟེན་པའི་མགྲོན་ཁོ་ན་གཤེགས་སུ་གསོལ་བ་ཡིན་ཞིང༌། རས་བྲིས་ཀྱི་དཀྱིལ་འཁོར་བསྡུ་པའི་སྐབས་ཡིན་ན། དེའི་སྟེང་དུ་བུམ་བསྐྱེད་ཀྱང་གཤེགས་དགོས་ལ། རྡུལ་ཚོན་གྱི་དཀྱིལ་འཁོར་བསྡུ་བའི་དུས་ནི་དཀྱིལ་འཁོར་བ་ཡང་གཤེགས་པ་ཡིན་ཏེ། དེ་ཡང་བཛྲ་མུཿ ཡན་གྱིས་མགྲོན་རྣམས་གཤེགས། བུམ་བསྐྱེད་དང་དཀྱིལ་འཁོར་གྱི་ལྷ་ཉིད་བསྟན་ལས་འཕགས་ཏེ་ནམ་མཁར་བཞུགས་པ་ལ། ཨོཾ་ཡོ་ག་ཤུདྡྷ་སརྦ་དྷརྨཱཿཡོ་ག་ཤུདྡྷོ྅་ཧཾ། ཞེས་རྣམ་ལྔ་འདོད་བསྐོར་དང་འཁྱུད་རྒྱ་བྱས་པས། དེ་རྣམས་རང་ཉིད་ལ་ཐིམ་པར་མོས་སོ། །གནས་སྐབས་འདི་ལྟ་བུ་ཐམས་ཅད་ལ། སློབ་དཔོན་ཕལ་ཆེར་དམ་ཚིག་པ་རང་ལ་བསྡུ། ཡེ་ཤེས་པ་གཤེགས་པར་མཛད། བོད་ཀྱི་ཆེན་པོ་ཁ་ཅིགདེ་གོ་བཟློག་པར་བཞེད། འགའ་ཞིག་དམ་ཡེ་མ་ཕྱེ་བར་རང་ལ་སྟྀམ་པར་བཞེད་དེ། སོ་སོར་རྒྱུ་མཚན་དང་བཅས་ཏེ་གསུངས་པ། སྤྱིར་ཐམས་ཅད་རུང་བ་ཡིན་ཀྱང༌། ཕྱི་མ་བཟང་བར་མཐོང་བས་འདིར་དེ་ལྟར་བྱའོ། །རྡུལ་ཚོན་གཤེགས་སུ་གསོལ་བའི་ཚེ། དེ་ལྟར་ལན་གསུམ་དུ་བྱས་ནས། རྡོ་རྗེའི་རྩེ་མོའམ། བྱང་ཆུབ་ཤིང་གི་ལོ་མའམ། མེ་ཏོག་པདྨ་ལ་སོགས་པས་
རྩིག་པ་དང་ཐིག་གི་ལམ་ནས་བརྩམ་སྟེ། དབྱེ་ཞིང༌། ལྷ་མཚན་རྣམས་ལོགས་སུ་བསྡུ། དོན་དུ་གཉེར་བ་ཉིད་ལ་རྡུལ་ཚོན་ནས་ཅུང་ཟད་སྦྱིན། བཀུར་བསྟི་དང་བཅས་པས་ཆུ་བོར་སྤྱན་འདྲེན། རྡུལ་ཚོན་ཀླུ་ལ་གཏད། བུམ་པར་ཆུ་བོ་དེ་ནས་ཆུ་བླངས་ཏེ། ཐིག་རྣམས་སུབས་ཕུར་བུ་དབྱུང་ངོ༌། །དེ་དག་གི་ཆོ་ག་ནི་སྤྱི་དང་མཐུན་ལ། ཕུར་བུ་ནི་རང་རང་གི་སྔགས་ཀྱིས་བཏོན་ལ། ཤུལ་དུ་མར་དང་སྦྲང་རྩིས་བྱུག་གོ །མཐར་སྨོན་ལམ་མང་དུ་གདབ། བཀྲ་ཤིས་རྒྱ་ཆེར་བྱ་སྟེ། རས་བྲིས་ཀྱི་ཕྱོགས་ལ་ནི། བརྟན་བཞུགས་བྱས་མ་ཐག་ཏུ་སྨོན་ལམ་དང་བཀྲ་ཤིས་བྱའོ། །འདིར་སྨྲས་པ། གྲུབ་པའི་དབང་ཕྱུག་བྱེ་བས་ཉེར་བསྒྲོད་པའི་འཇུག་ངོགས་དེ་ནི་དཔལ་ལྡན་འཁོར་ལོ་སྡོམ། །བགྲང་ལས་དངོས་གྲུབ་སྒྲུབ་པའི་ལམ་གྱི་གཞི། །རྡོ་རྗེ་ཐེག་པའི་དམ་ཚིག་སྡོམ་པ་ཡིན། །དེ་ཡང་མཚན་ཉིད་ལྡན་པའི་ཆོ་ག་ཡིས། །དབང་བསྐུར་བ་ལ་ངེས་པར་རག་ལས་པས། གསང་སྔགས་དོན་གཉེར་རྣམས་ཀྱིས་དབང་བསྐུར་དང༌། །དཀྱིལ་འཁོར་ཆོ་གའི་གནས་ལ་མཁས་པར་མཛོད། །འདི་བྲིས་པ་ལས་དགེ་བ་ནི། །ཅུང་ཟད་ཐོབ་པར་གང་གྱུར་པ། །དེ་ཡིས་སྐྱེ་བོ་མ་ལུས་ཀུན། །ཧེ་རུ་ཀ་དཔལ་གནས་ཐོབ་ཤོག།དཔལ་འཁོར་ལོ་སྡོམ་པའི་དཀྱིལ་འཁོར་གྱི་ཆོ་ག་བདེ་ཆེན་འཇུག་ངོགས་ཞེས་བྱ་བ་འདི་ཡང་མཁན་པོ་བློ་གྲོས་རྒྱལ་མཚན་ལ་སོགས་པ་དོན་གཉེར་མང་པོས་བསྐུལ་བའི་ངོར། རྒྱལ་ཁམས་པ་ཏཱ་ར་ནཱ་ཐས་རང་ལོ་བཞི་བཅུ་པ་ལ་ནགས་རྒྱལ་གྱི་དབེན་གནས་སུ་སྦྱར་བའོ། །ལཱུ་ཡི་པའི་ཕྱོགས་སུ་གཏོགས་པ་ལ་དཀྱིལ་ཆོག་རྒྱ་གཞུང་མང་དུ་ཡོད་ཀྱང༌། ཕལ་ཆེར་པཎྜི་ཏ་ཕལ་པས་བརྩམས་པ་དང་འགའ་ཞིག་ལ་དེ་ནས་བརྒྱུད་པའི་མན་ངག་མེད་པ་དང༌། ཇོ་བོ་ནཱ་རོ་པ་ལ་སོགས་པའི་བཞེད་པས་
ཀྱང༌། ནག་པོ་པའི་དཀྱིལ་འཁོར་ཆོ་ག་དང་སྦྱོར་བར་མཛད་ཅིང༌། དེའི་མན་ངག་འཛིན་པའི་བླ་མ་གོང་མ་རྣམས་ཀྱི་ཕྱག་ལེན་ལ། བླ་མའི་མན་ངག་གི་དཀྱིལ་ཆོག་གི་གོང་འོག་སྒྱུར་བ་ཅི་རིགས་པ་དང༌། དཀྱིལ་འཁོར་གྱི་ཆོ་ག་སྤྱི་དང་མཐུན་པའི་དབྱེ་བ་ཅུང་ཟད་ཙམ་བྱས་ནས། ཕལ་ཆེར་ནག་པོ་པའི་དཀྱིལ་འཁོར་ཆོ་ག་བཞིན་ཏུ་མཛད་པའི་ལུགས་འདི་ལེགས་པར་མཐོང་ནས། འདིར་དེ་ལྟར་སྦྱར་བ་ཡིན་པས། རྣམ་གྲངས་མི་འདྲ་བས་མགོ་འཛིངས་པར་འགྱུར་ན། ནག་པོ་པའི་དཀྱིལ་འཁོར་གྱི་སྒྲུབ་ཐབས་ལ་ཡང་ཆོ་ག་འདི་ཉིད་སྦྱར་བས་འགྲུབ་བོ། །འོན་ཀྱང་ནག་པོ་སྤྱོད་པའི་ལུགས་ཆོ་ག་མ་འདྲེས་པ་ཞིག་ལོགས་སུ་འཆད་པར་ཡང་འགྱུར་རོ། མངྒ་ལཾ། ཞུ་དག བདག་དང་འགྲོ་བ་སེམས་ཅན་རྣམས་དཔལ་འཁོར་ལོ་སྡོམ་པའི་རྗེས་སུ་བཟུང་དུ་གསོལ།། །།གཤེགས་སྙིང་རིགས་འདུས་སྒྱུ་འཕྲུལ་དྲ་བ་ཆེ། །རྡོར་དབྱིངས་གནས་ལུགས་ཡེ་ཤེས་རྣམ་ལྔའི་བདག དགོངས་ཡིད་རོ་མཉམ་ངང་ནས་སྐྱབས་སུ་བསྟེན། གློ་བུར་སྒྲིབ་ཀུན་མྱུར་ནས་དག་གྱུར་ཅིག འདི་འབུམ་ཕྲག་དད་མོས་ཀྱིས་བཏོན་ན་གནས་ལུགས་ལ་རང་འཚང་གྱི་བག་ཆགས་ཉམས་མྱོང་རེ་ཡོད་སྣང་བས་མ་ཏིས་སོ།།