དཔལ་འཁོར་ལོ་སྡོམ་པའི་དཀྱིལ་འཁོར་རབ་འབྱམས་ཀྱི་སྒྲུབ་ཐབས་དངོས་གྲུབ་ཀྱི་རྒྱ་མཚོ།
དཔལ་འཁོར་ལོ་སྡོམ་པའི་དཀྱིལ་འཁོར་རབ་འབྱམས་ཀྱི་སྒྲུབ་ཐབས་དངོས་གྲུབ་ཀྱི་རྒྱ་མཚོ་ཞེས་བྱ་བ་བཞུགས།
ཨོཾ་སྭཱ་སྟི། དཔལ་འཁོར་ལོ་སྡོམ་པའི་དཀྱིལ་འཁོར་རབ་འབྱམས་ཀྱི་སྒྲུབ་ཐབས་དངོས་གྲུབ་ཀྱི་རྒྱ་མཚོ་ཞེས་བྱ་བ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །དོན་དམ་འགྱུར་མེད་དགའ་བཞིའི་དཔའ་བོ་མཆོག །སྤྲོས་བྲལ་གདོད་མའི་ཤེས་རབ་མས་འཁྱུད་པ། །དཔལ་ཆེན་ཧེ་རུ་ཀ་དཔལ་ཡབ་ཡུམ་གྱིས། །སྲིད་འདིར་མཆོག་ཏུ་དགེ་ཞིང་ཤིས་པར་མཛོད། །ཡོན་ཏན་འཕྲིན་ལས་ནམ་ཡང་ཟད་མི་མངའ། །མཐའ་དག་བརྟན་དང་གཡོ་བའི་དངོས་པོའི་ཚུལ། ཁྱབ་བདག་རང་བཞིན་བདེ་གཤེགས་དཔའ་བོ་ལྔ། །སྙིང་པོའི་རྣལ་འབྱོར་མར་བཅས་རྒྱལ་གྱུར་ཅིག །བསམ་གྱིས་མི་ཁྱབ་ཐུགས་རྗེའི་
མཐུ་སྟོབས་ཀྱིས། །སྒྲུབ་ལ་དངོས་གྲུབ་མ་ལུས་མྱུར་སྩོལ་བ། །རྡོ་རྗེའི་རང་བཞིན་གནས་གསུམ་དཔའ་བོ་དང༌། །མཁའ་འགྲོའི་ཚོགས་ཀྱིས་བདག་ལ་ཐུགས་བརྩེར་མཛོད། །མཚན་ཙམ་བསྒྲགས་པས་བདུད་སྡེའི་སྙིང་འགས་ཤིང༌། །དུས་གསུམ་རྒྱལ་བའི་འཕྲིན་ལས་ཀུན་སྒྲུབ་པ། །རྡོ་རྗེ་ཁྲོ་ཚོགས་རྒྱ་མཚོའི་རོལ་པ་ཅན། །ཡེ་ཤེས་མ་མོ་བརྒྱད་ཀྱིས་འགྲོ་འདི་བསྲུངས། །དེ་ལྟར་དཀྱིལ་འཁོར་འཁོར་ལོ་མ་ལུས་ལ། །དད་པས་དམིགས་མེད་ངང་ནས་ཕྱག་བགྱིད་ན། །ཞིང་སྐྱོང་ལ་སོགས་དུར་ཁྲོད་སྤྱོད་ཡུལ་ཅན། །དེ་དག་ཀུན་གྱིས་བགེགས་རྣམས་ཉམས་པར་མཛོད། །སྡོམ་པའི་རྒྱུད་རྒྱལ་རྒྱ་མཚོ་ལྟ་བུ་སྟེ། །སྒྲུབ་ཐབས་རིན་ཆེན་དཔག་གཡས་འཛིན་མོད་ཀྱང༌། །དེ་ལས་བླ་མ་དམ་པའི་དེད་དཔོན་གྱིས། །གང་བླང་དེ་དག་བྱི་དོར་བྱ་བར་འོས། །འདིར་དཔལ་འཁོར་ལོ་སྡོམ་པའི་རྒྱུད་ནས་འབྱུང་བའི་སྒྲུབ་ཐབས་རྣམ་པ་མང་པོ་དག་བཤད་པར་བྱའོ། །དེ་ཡང་སྒྲུབ་པ་པོ་དགེ་བ་བཅུ་ལ་གོམས་ཤིང་དཀོན་མཆོག་གསུམ་འབའ་ཞིག་བླ་མར་བྱེད་པ། ཐེག་
པ་མཆོག་ལ་གཞོལ་བའི་ལྷག་བསམ་ཅན། རྡོ་རྗེ་ཐེག་པ་ལྷག་པར་མོས་པ། དབང་བསྐུར་བ་ཐོབ་ཅིང་དམ་ཚིག་ཤིན་ཏུ་བསྲུང་བ། རྡོ་རྗེ་སློབ་དཔོན་མཆོག་ཏུ་དགྱེས་པར་བྱ་བའི་བཀའ་དྲིན་ཐོབ་པ་དག་གིས་འདི་བསྒོམ་པར་བྱ་སྟེ། དེ་ལས་བརྩོན་འགྲུས་དང་ལྡན་ན་འདོད་པའི་དངོས་གྲུབ་ཚེ་འདི་ཉིད་ལ་ཐོབ་པར་ཐེ་ཚོམ་མེད་ཅིང༌། གང་དག་སྐྱེ་བ་གཞན་དང་སྐྱེ་བ་འདི་ཉིད་ལ་སྔོན་མི་ཟད་པའི་ལས་བྱས་པ་དག་ཀྱང་དེ་ལྟ་བུའི་རིམ་པ་ལས་མ་ལོག་པར་བསྒྲུབས་ན། ཚེ་འདིའམ་སྐྱེ་བ་བདུན་ཚུན་ཆད་ཀྱི་འདོད་པའི་དངོས་གྲུབ་ཏུ་འགྱུར་ཏེ། འོན་ཀྱང་དམ་པའི་ཆོས་ཀྱི་ནང་དུ་ཞུགས་ནས། མི་དགེ་བ་བཅུ་སྤྱོད་བཞིན་པ་དང༌། དམ་ཚིག་ཉམས་པས་ནི་སྡུག་བསྔལ་གྱི་རྒྱ་མཚོ་ཆེན་པོར་ཕྱིར་ཞིང་བྱིང་བར་འགྱུར་གྱི། གྲུབ་པ་དང་བདེ་བ་བླ་ན་མེད་པ་ག་ལ་ཞིག །དེ་ལྟར་ཡང༌། སྲོག་གཅོད་པ་ཡི་སེམས་ཅན་གང༌། །གཞན་གྱི་ནོར་ལ་དགའ་བ་དང༌། །རྟག་ཏུ་གཡེམ་པར་སྤྱོད་པ་དང༌། །བཤང་གཅི་ཟས་སུ་ཟ་བ་སྟེ། །དེ་དག་སྒྲུབ་པའི་སྣོད་དུ་འགྱུར། །ཞེས་པ་དང༌། སེམས་ཅན་མཚམས་མེད་ལ་སོགས་པ། །སྡིག་པ་ཆེན་པོ་བྱེད་པ་ཡང༌། །རྡོ་རྗེ་ཐེག་པ་རྒྱ་མཚོ་ཆེ། །ཐེག་པ་མཆོག་ནི་འདི་ལ་འགྲུབ། །སྙིང་ནས་སློབ་དཔོན་སྨོད་པ་དག །བསྒྲུབས་ཀྱང་འགྲུབ་པར་ཡོངས་མི་འགྱུར། །ཞེས་གསུངས་སོ། །མཐུན་པའི་རྐྱེན་ནི་འདི་ཡིན་ཏེ། དུར་ཁྲོད་ལ་སོགས་པའི་གནས་དང༌། དམ་ཚིག་གི་རིལ་བུ་ལ་སོགས་པའི་རྫས་དང༌། ཁ་ན་མ་ཐོ་བ་མེད་པའི་ཟས་གོས་སོགས་ཡོ་བྱད་དང༌། རྡོ་རྗེ་དྲིལ་བུ་སོགས་མི་འབྲལ་བའི་དམ་ཚིག་དང༌། མཚན་དང་ལྡན་པའི་སྒྲུབ་གཡོག་སོགས་གྲོགས་དེ་ལྔ་པོ་དེ་དག་སྒྲུབ་པ་པོ་སྔགས་ལ་མཆོག་ཏུ་གཞོལ་བ་རྣམས་ཀྱིས་སྒྲུབ་པའི་
དུས་ན་ཐམས་ཅད་མ་ཉམས་ཤིང་ཚང་བར་དགོས་ལ། བསྙེན་པའི་སྐབས་ནི་ཅི་རིགས་པ་ཚང་བས་ཆོག་གོ །གལ་ཏེ་ནང་ལ་གཞོལ་བའི་རྣལ་འབྱོར་པ་ཞིག་ཡིན་ན་ནི། བསྙེན་པའི་སྐབས་སུ་དེ་དག་ཡིད་ཀྱི་བྱ་བ་ཁོ་ནས་ཆོག་ཅིང༌། སྒྲུབ་པའི་ཚེ་ཡང་དེ་དག་ལས་འབད་རྩོལ་མེད་པར་གང་རྙེད་པ་ཙམ་ཞིག་བཟུང་བར་བྱ་བ་ཡིན་ནོ། །ད་ནི་བསྒོམ་པར་བྱ་བའི་སྒྲུབ་ཐབས་རྣམས་ལས་ཐོག་མར་རྩ་རྒྱུད་ཀྱི་དཀྱིལ་འཁོར་དག་བརྗོད་དེ། ༈ ཨོཾ་ན་མོ་བཛྲ་ཧེ་རུ་ཀ་ཙ་ར་ཎཱ་ཡ། གང་སྐུ་ཡིད་ལ་དྲན་པས་སྲིད་པའི་འཆིང་བ་ལྷོད་པོར་བྱེད། །ཉིན་རེ་བསྒོམ་ན་གཟུང་འཛིན་སྣང་བ་ཡུད་ཀྱི་བཟློག་པར་འགྱུར། །བཟླས་བརྗོད་ཙམ་གྱིས་བྱེ་བ་ཕྲག་བརྒྱའི་འདོད་དོན་འཕྲལ་ཏུ་འགྲུབ། སྒྲུབ་ཐབས་འདི་ལ་ཕུན་ཚོགས་ནུས་མཐུ་མཐའ་ཡས་མཐོང་བ་ཡིན། །འདིར་དཔལ་སྡོམ་པ་ཉུང་ངུའི་འགྲེལ་པ་དང་སྒྲུབ་ཐབས་གསང་བའི་བདག་པོ་རྡོ་རྗེ་འཛིན་པས་གང་གསུངས་པ་དེ་ཉིད་ཀྱི་རྗེས་སུ་འབྲངས་ཏེ། བསྐྱེད་པའི་རིམ་པའི་ཕྱོགས་ལ་བརྟེན་པའི་སྒྲུབ་ཐབས་ལག་ལེན་བླ་མའི་མན་ངག་བཞིན་དུ་བྲི་བར་བྱའོ། །སྐྱབས་འགྲོ་སེམས་སྐྱེད་ཡིག་བརྒྱ་ལ་སོགས་པ་སྔོན་འགྲོ་རྣམ་པ་གསུམ་སྤྱི་དང་མཐུན་པར་བྱས་ནས། དུར་ཁྲོད་ཀྱི་ས་གཞི་ལ་དབུགས་བྲལ་གྱི་གདན་སྟེང་དུ་འདུག་པར་གྱུར། གཟུགས་ཀྱི་ཕུང་པོ་ནི་རྣམ་པར་སྣང་མཛད་དོ། །ཚོར་བའི་ཕུང་པོ་ནི་རྡོ་རྗེ་ཉི་མའོ། །འདུ་ཤེས་ཀྱི་ཕུང་པོ་ནི་པདྨ་གར་གྱི་དབང་ཕྱུག་གོ །འདུ་བྱེད་ཀྱི་ཕུང་པོ་ནི་རྡོ་རྗེ་རྒྱལ་པོའོ། །རྣམ་
པར་ཤེས་པའི་ཕུང་པོ་ནི་རྡོ་རྗེ་སེམས་དཔའོ། །དེ་བཞིན་གཤེགས་པ་ཐམས་ཅད་ཀྱི་བདག་ཉིད་ནི་ཤྲཱི་ཧེ་རུ་ཀ་རྡོ་རྗེའོ། །མིག་གཉིས་ལ་ནི་གཏི་མུག་རྡོ་རྗེའོ། །རྣ་བ་གཉིས་ལ་ནི་ཞེ་སྡང་རྡོ་རྗེའོ། །སྣ་ལ་ནི་སེར་སྣ་རྡོ་རྗེའོ། ཁ་ལ་ནི་འདོད་ཆགས་རྡོ་རྗེའོ། །ལུས་ལ་ནི་ཕྲག་དོག་རྡོ་རྗེའོ། །སྐྱེ་མཆེད་ཐམས་ཅད་ལ་ནི་དབང་ཕྱུག་རྡོ་རྗེའོ། །སའི་ཁམས་ལ་ནི་ལྟུང་བྱེད་མའོ། །ཆུའི་ཁམས་ལ་ནི་གསོད་བྱེད་མའོ། །མེའི་ཁམས་ལ་ནི་འགུགས་བྱེད་མའོ། །རླུང་གི་ཁམས་ལ་ནི་པདྨ་གར་གྱི་དབང་ཕྱུག་མའོ། །ནམ་མཁའི་ཁམས་ལ་ནི་པདྨ་དྲ་བ་ཅན་ནོ། །དེ་དག་ནི་ཕུང་ཁམས་ཀྱི་ང་རྒྱལ་སྐྱེད་པ་སྟེ། རྒྱས་པར་ན་ལཱུ་ཡི་པ་ལྟར་བསྒོམ་མོ། །སུམྦྷ་ལན་གཉིས་ཀྱིས་ཚམས་རྔམ་བྱ། ཕྱོགས་མཚམས་ཐམས་ཅད་དུ་རྡོ་རྗེའི་རཱ་བ་དང༌། སྟེང་དུ་གུར་དང་མདའི་དྲ་བ། འོག་ཏུ་ཧཱུཾ་ལས་བྱུང་བའི་སྣ་ཚོགས་རྡོ་རྗེ་ཁ་བཞི་པའི་རང་བཞིན་གྱི་རྡོ་རྗེའི་ས་གཞི། དེའི་འོག་ཏུ་རཾ་ལས་བྱུང་བའི་ཉི་མའི་དཀྱིལ་འཁོར་ལས་སྤྲོས་པའི་མེ་ལྕེ་གཅིག་ཏུ་གྱུར་པའི་བསྲུང་བའི་འཁོར་ལོར་གྱུར། གནས་བསྲུང་བ་བསྡུ་ན་དེ་ཙམ་གྱིས་ཀྱང་ཆོག་ལ། ཅུང་ཟད་རྒྱས་པར་སྤྲོ་ན། རྒྱལ་པོ་སེངྒེའི་གདན་ཅན་ཁྱབ་འཇུག་སྦས་པའི་ཞབས་ཀྱིས་མཛད་པའི་རྡོ་རྗེ་ཕག་མོའི་སྒྲུབ་ཐབས་ལས་འབྱུང་བ་ལྟར་བསྒོམ་པར་བྱའོ། །དེ་ནི་དེ་དབུས་ཨ་ཡིག་ལས་བྱུང་བའི། འཁོར་ལོ་སེར་པོ་རྩིབས་བརྒྱད་པ། །སྟེང་འོག་སྦུབས་དང་བཅས་པར་གྱུར། །དབུས་དང་རྩིབས་
བརྒྱད་སྟེང་འོག་ཏུ། །རཾ་ལས་ཉི་མ་བཅུ་གཅིག་སྟེ། །དེ་སྟེང་ཧཱུཾ་ཡིག་བཅུ་གཅིག་ལས། །དབུས་སུ་ཧཱུཾ་མཛད་སྔོན་པོ་འཇིགས། །དབུས་ན་གཡས་དམར་གཡོན་དཀར་ཞལ། །རྡོ་རྗེ་གྲི་གུག་རྩེ་གསུམ་གཡས། །དྲིལ་བུ་ཐོད་པ་ཁ་ཊྭཾ་གཡོན། །སྣ་ཚོགས་རྡོ་རྗེ་ཟླ་ཕྱེད་དང༌། །མི་བསྐྱོད་ཅོད་པན་རལ་པ་མཛེས། །ཐོད་སྐམ་ཐོད་རློན་ཕྱག་རྒྱ་ལྔ། །སྟག་ལྤགས་སྦྲུལ་གྱིས་བརྒྱན་པ་སྟེ། །གཡས་བརྐྱང་ཞབས་ཀྱི་འཇིགས་དུས་མནན། །སྤྱན་དགུར་རབ་ཁྲོས་མེ་དཔུང་འབར། །གཤིན་རྗེ་མཐར་བྱེད་ནག་དཀར་དམར། །དབྱུག་པ་འཁོར་ལོ་རྡོ་རྗེ་གཡས། །ཞགས་པ་དྲིལ་བུ་དགྲ་སྟ་གཡོན། །ཤེས་རབ་མཐར་བྱེད་དཀར་སྔོ་དམར། །རལ་གྲི་རྡོ་རྗེ་དབྱུག་པ་གཡས། །ཞགས་པ་དྲིལ་བུ་དགྲ་སྟ་གཡོན། །པདྨ་མཐར་བྱེད་དམར་སྔོ་དཀར། །གཏུན་ཤིང་རྡོ་རྗེ་རལ་གྲི་གཡས། །ཞགས་པ་དྲིལ་བུ་དགྲ་སྟ་གཡོན། །བགེགས་མཐར་བྱེད་པ་སྔོ་དམར་དཀར། །རྒྱ་གྲམ་འཁོར་ལོ་གཏུན་ཤིང་གཡས། །དྲིལ་བུ་ཞགས་པ་དགྲ་སྟ་གཡོན། །དེ་རྣམས་ཤར་སོགས་གཡས་སྐོར་ཏེ། །ཕྱོགས་ཀྱི་རྒྱལ་བས་དབུ་ལ་བརྒྱན། །ཤར་ལྷོ་མི་གཡོ་སྔོ་དམར་དཀར། །རལ་གྲི་རྡོ་རྗེ་འཁོར་ལོ་གཡས། །ཞགས་པ་དྲིལ་བུ་དགྲ་སྟ་གཡོན། །ལྷོ་ནུབ་འདོད་རྒྱལ་སྔོ་དམར་དཀར། །དང་པཽ་གཉིས་ནི་ཧཱུཾ་མཛད་རྒྱ། །ལྷག་མ་རྡོ་རྗེ་རལ་གྲི་གཡས། །གཡོན་རྣམས་ཞགས་པ་ལྕགས་ཀྱུའོ། །ནུབ་བྱང་དབྱུག་སྔོན་སྔོ་དམར་
དཀར། །དབྱུག་པ་རལ་གྲི་རྡོ་རྗེ་གཡས། །ཞགས་པ་པདྨ་ཉི་མ་གཡོན། །བྱང་ཤར་སྟོབས་ཆེན་ནག་དམར་དཀར། །དབྱུག་པ་རལ་གྲི་འཁོར་ལོ་གཡས། །ཞགས་པ་རྩེ་གསུམ་དགྲ་སྟ་གཡོན། །རིམ་བཞིན་རྣམ་སྣང་རིན་འབྱུང་དང༌། །སྣང་མཐའི་དོན་ཡོད་རྒྱས་བཏབ་ཅན། །སྟེང་དུ་གཙུག་ཏོར་ལྗང་དམར་དཀར། །དང་པོ་གཙུག་ཏོར་ཕྱག་རྒྱ་མཛད། །གཡས་གཞན་རྡོ་རྗེ་པདྨ་དང༌། གཡོན་གཞན་སྡིག་མཛུབ་རལ་གྲིའོ། །འོག་ཏུ་གནོད་མཛེས་ནག་དཀར་དམར། །འཁོར་ལོ་རྡོ་རྗེ་རིན་ཆེན་གཡས། །ཞགས་པ་རལ་གྲི་པདྨ་གཡོན། །དེ་གཉིས་མི་བསྐྱོད་དབུ་རྒྱན་ཏེ། །ཀུན་ཀྱང་ཆ་བྱད་གཙོ་བོར་མཚུངས། །ཕྱོགས་བཅུའི་བགེགས་རྣམས་ཞབས་ཀྱིས་མནན། །མེ་དཔུང་འབར་བའི་དབུས་ན་བཞུགས། ཞེས་བྱའོ། །འདིར་ཞགས་པ་རྣམས་སྡིག་མཛུབ་དང་བཅས་ཐུགས་ཀར་གཏོད་པ་ཡིན་ལ། གཤིན་རྗེ་མཐར་བྱེད་ཞབས་བཞི་པར་ཡང་བཤད་དོ། །དེ་ནས་འཁོར་ལོ་དྲག་ཏུ་བསྐོར་བས་གདུག་པ་ཅན་ཐམས་ཅད་ཚར་བཅད་པར་གྱུར། སུམ་བྷ་དྲག་ཏུ་བཟླ། རང་གི་སྙིང་ག་ནས་འོད་ཟེར་འཕྲོས། ཁྲོ་བོ་བཅུ་རང་གི་ལུས་ལ་བསྡུ། ཡཾ་དཔུང་པ་གཡོན་པར་གཤིན་རྗེ་མཐར་བྱེད། པྲཾ་གཡས་པར་ཤེས་རབ་མཐར་བྱེད། པཾ་ལག་པ་གཡོན་པ་ལ་པདྨ་མཐར་བྱེད། བཾ་གཡས་པ་ལ་བགེགས་མཐར་བྱེད། ཨཾ་བརླ་གཡོན་པ་ལ་མི་གཡོ་བ། ཊཾ་གཡས་པ་ལ་འདོད་པའི་རྒྱལ་པོ། ནཾ་རྐང་པ་གཡོན་པ་ལ་དབྱུག་སྔོན་ཅན། མཾ་གཡས་པ་
ལ་སྟོབས་པོ་ཆེ། ཨུཾ་སྤྱི་གཙུག་ཏུ་གཙུག་ཏོར་འཁོར་ལོས་བསྒྱུར་བ། སུཾ་བཤང་ལཾ་དུ་གནོད་མཛེས་རྒྱལ་པོ། བཾ་སྙིང་གར་རྡོ་རྗེ་ཧཱུཾ་མཛད་དོ། །ཡང་སྐད་ཅིག་གིས་ལུས་ཀྱི་ཁྲོ་བོ་བཅུ་ལས་ཁྲོ་བོ་བཅུ་སྤྲོས། གནོད་མཛེས་ལ་བཀའ་བསྒོས་ཏེ། བགེགས་རྣམས་ཐམས་ཅད་ལ་བགེགས་མཐར་བྱེད་ཕུར་བུའི་གཟུགས་ཅན་གྱིས་ཕུར་བུས་བཏབ། ཨོཾ་སུམྦྷ་ནི་སུམྦྷ་ཧཱུཾ་ཧཱུཾ་ཕཊ། ཨོཾ་གྲྀཧྞ་གྲྀཧྞ་ཧཱུཾ་ཧཱུཾ་ཕཊ། །ཨོཾ་གྲྀཧྞ་པཱ་ཡ་གྲྀཧྞ་པཱ་ཡ་ཧཱུཾ་ཧཱུཾ་ཕཊ། ཨོཾ་ཨཱ་ན་ཡ་ཧོ་བྷ་ག་ཝཱན་བིདྱ་རཱ་ཛ་ཧཱུཾ་ཧཱུཾ་ཕཊ། ཨོཾ་གྷ་གྷ་གྷཱ་ཏ་ཡ་གྷཱ་ཏ་ཡ། སརྦ་དུཥྟཾ་ཕཊ། ཀཱི་ལ་ཡ་ཀཱི་ལ་ཡ་སརྦ་པཱ་པཾ་ཕཊ། ཧཱུཾ་ཧཱུཾ་ཧཱུཾ་བཛྲ་ཀཱི་ལ་བཛྲ་དྷ་རོ་ཨཱ་ཛྙཱ་པ་ཡ་ཏི། སརྦ་བིགྷྣན། ཀཱ་ཡ་ཝཱ་ཀ་ཙིཏྟ་བཛྲ་ཀཱི་ལ་ཡ་ཧཱུཾ་ཕཊ། གནོད་མཛེས་ཀྱི་ཕྱག་མཚན་དང་པོ་ཐོ་བར་གྱུར་པ་རྣམས་ཀྱིས་ཕུར་བུ་བརྡུང་བར་གྱུར། ཨོཾ་བཛྲ་མུད་ག་ར་བཛྲ་ཀཱི་ལ་ཡ་ཨ་ཀོ་ཊ་ཡ་ཨ་ཀོ་ཊ་ཡ། ཏིཥྟ་ཏིཥྟ་ད་ཤ་དི་ཀ་ཀཱི་ལ་ཡེད་དུཥྟན་ཙྪ་ཏ་ཡེད་ཧཱུཾ་ཧཱུཾ་ཕཊ། དེའི་ཕྱི་རོལ་དུ་རྡོ་རྗེ་མེ་འབར་བས་བསྐོར་བར་གྱུར། དེ་དག་ནི་གནས་བསྲུང་བའོ། །བདུད་རྩི་བསངས་སྦྱངས། ཡཾ་ལས་རླུང་རཾ་ལས་མེ། ཀཾ་ལས་ཀ་པཱ་ལའི་ནང་དུ་ལི་ཨུ་རྀ་ཨི་ཨ་ལས་སྐྱེས་པའི་བུ་མུ་ར་མ་ཤུ་རྣམས་དང་ཨཱྀ་རཱྀ་ཨུ་ལཱྀ་རྣམས་ལས་བྱུང་བའི། གོ་ཀུ་ད་ཧ་རྣམས་སུ་གྱུར། ཨོཾ་ཨཱཿཧཱུཾ་ཧོཿ ཞེས་བདུད་རྩིར་བྱིན་གྱིས་བརླབས་
སྔགས་དེ་ཉིད་ཀྱིས་ལུས་ལ་གཏོར་དེ་བདག་བསྲུང་བའོ། །དེ་ནས་ཚད་མེད་བཞི་སྤྱི་དང་མཐུན་པར་བསྒོམས་ཏེ། རྣལ་འབྱོར་བསྲུང་བའོ། །རང་གི་སྙིང་གར་ཉི་མ་ལ་གནས་པའི་ཧཱུཾ་དེའི་འོད་ཟེར་གྱིས་བླ་མ་དང་དཀྱིལ་འཁོར་གྱི་འཁོར་ལོ་གཉིས་སུ་མེད་པ་མདུན་གྱི་ནམ་མཁར་ཕཻཾ། གང་གི་དྲིན་གྱིས་བདེ་ཆེན་ཉིད། སོགས་དང༌། དཔལ་ལྡན་རྡོ་རྗེ་མཁའ་འགྲོ་དང༌། མཁའ་འགྲོ་མ་ཡི་འཁོར་ལོ་བསྒྱུར། །ཡེ་ཤེས་ལྔ་དང་སྐུ་གསུམ་བརྙེས། །འགྲོ་བ་སྐྱོབས་ལ་ཕྱག་འཚལ་ལོ། །ཇི་སྙེད་རྡོ་རྗེ་མཁའ་འགྲོ་མ། །ཀུན་ཏུ་རྟག་པའི་འཆིང་གཅོད་ཅིང༌། །འཇིག་རྟེན་བྱ་བ་རབ་འཇུག་མ། །དེ་སྙེད་རྣམས་ལ་ཕྱག་འཚལ་ལོ། །ཨོཾ་བཛྲ་ཨརྒྷཾ་པྲ་ཏཱིཙྪ་ཧཱུཾ། ཨོཾ་བཛྲ་པུཥྤེ་ཨཱཿཧཱུཾ། ནས་ཤཔྟའི་བར་གྱིས་མཆོད། དཀོན་མཆོག་གསུམ་ལ་བདག་སྐྱབས་མཆི། སོགས་རྒྱུན་ཤགས་བྱ། ཤྲཱི་ཧེ་རུ་ཀོ྅་ཧཾ། ཤྲཱི་ནི་གཉིས་མེད་ཡེ་ཤེས་ཏེ། །ཧེ་ནི་རྒྱུ་སོགས་སྟོང་པ་ཉིད། །རུ་ནི་ཚོགས་དང་བྲལ་བ་སྟེ། །ཀ་ནི་གང་དུའང་མི་གནས་པའོ། །དཔྲལ་པར་ཨོཾ། མགྲིན་པར་ཨཱཿ སྙིང་གར་ཧཱུཾ། དེའི་འོད་ཟེར་གྱིས་ཁམས་གསུམ་གྱི་ལུས་ངག་ཡིད་གསུམ་གནས་དང་བཅས་པ་བསྡུས་ནས་རང་ལ་ཐིམ། རང་ཉིད་ཀྱང་ཡི་གེ་གསུམ་ལ་ཐིམ། ཨོཾ་ཨཱཿལ་ཐིམ། ཨཱཿཧཱུཾ་ལ་ཐིམ། ཧཱུཾ་ལྔ་ཆར་རིམ་གྱིས་བསྡུས་ནས་ནཱ་དའི་བར་དུ་ཐིམ། ཨོཾ་སྭ་བྷཱ་ཝ་ཤུདྡྷ་སརྦ་དྷརྨ་ས་བྷཱ་ཝ་ཤུདྡྷོ྅་ཧཾ། ཨོཾ་ཤུ་ནྱ་ཏཱ་ཛྙཱ་བཛྲ་སྭ་བྷཱ་ཝ་ཨཏྨ་ཀོ྅་ཧཾ། སྟོང་པའི་ངང་ལས་
ཧཾ་ལས་བྱུང་བའི་ནམ་མཁའི་ཁམས་ཆོས་འབྱུང་ལྗང་ཁུའི་དབུས་སུ། ཡཾ་ལས་རླུང་གི་དཀྱིལ་འཁོར་ཟླ་གམ་སྔོན་པོ། རཾ་ལས་མེའི་དཀྱིལ་འཁོར་གྲུ་གསུམ་དམར་པོ་བཾ་ལས་ཆུའི་དཀྱིལ་འཁོར་ཟླུམ་པོ་དཀར་པོ། ལཾ་ལས་སའི་དཀྱིལ་འཁོར་གྲུ་བཞི་སེར་པོ། སུཾ་ལས་རིའི་རྒྱལ་པོ་རི་རབ་རྩེ་མོ་བརྒྱད་པ་རྣམས་སྟེང་ནས་སྟེང་དུ་བརྩེགས་པ། དེའི་དབུས་ཧཱུཾ་ལས་སྣ་ཚོགས་རྡོ་རྗེའི་ལྟེ་བར་པཾ་ལས་སྣ་ཚོགས་པདྨ་འདབ་མ་བརྒྱད་པའོ། །དེའི་ལྟེ་བར་རཾ་ལས་ཉི་མའི་དཀྱིལ་འཁོར་ལ་ཧཱུཾ་ལས་དུས་ཀྱི་མེ། ཨཱཿལས་དཀའ་ཟློག་མ། ཨོཾ་ལས་འཇིགས་བྱེད་ཆེན་པོ་གདན་དུ་གནས་པའོ། །འདབ་མ་རྣམས་ལ་ཉི་གདན་གྱི་སྟེང་དུ་ཨ་ཨཱ་ཨཾ་ཨ་བྱུང་བའི་ཡི་དྭགས་ཀྱི་གདན་རྣམས་སོ། །ཡང་ན་ཨཾ་སཾ་མཾ་ཏཾ་རྣམས་ལས་སྐྱེས་པའོ། །མཚམས་རྣམས་སུ་ཟླ་བའི་གདན་ནོ། །ཕྱི་རོལ་མེ་དང་རླུང་གི་དཀྱིལ་འཁོར་ལ་ཉི་གདན་གྱི་སྟེང་དུ་ཕྱོགས་བཞིར་ཤུཾ་ཤཾ་པུཾ་ཀླེཾ། དབང་ལྡན་ལ་སོགས་པ་རྣམས་སུ། བཾ་སོཾ་གོཾ་ཨོཾ་རྣམས་དང༌། བར་གྱི་འཁོར་ལོ་གསུམ་ལ་ཟླ་གདན་ཏེ་ནམ་མཁའི་འཁོར་ལོ་པུ་ཛ་ཨོ་ཨ་གོ་ར་དེ་མ། སའི་དཀྱིལ་འཁོར་ལ་ཀ་ཨོ་ཏྲི་ཀོ་ཀ་ལ་ཀ་ཧི། ཆུའི་དཀྱིལ་འཁོར་ལ་པྲེ་གྲི་སོ་སུ། ན་སི་མ་ཀུ་སྟེ། ཡི་གེ་སུམ་ཅུ་སོ་དྲུག་ཡོངས་སུ་གྱུར་པ་ལས་མི་རོའི་གདན་རྣམས་སུ་གྱུར། དེ་རྣམས་ཀྱི་སྟེང་དུ་ཨ་ཨཱ་ཨི་ཨཱི་ཨུ་ཨཱུ་རྀ་
རཱྀ་ལྀ་ལཱྀ་ཨེ་ཨཻ་ཨོ་ཨཽ་ཨཾ་ཨཿ ཕྲག་གཉིས་ལས་ཟླ་བའི་དཀྱིལ་འཁོར། དེའི་འོག་ཏུ་ཀ་ཁ་ག་གྷ་ང༌། ཙ་ཚ་ཛ་ཛྷ་ཉ། ཊ་ཋ་ཌ་ཌྷ་ཎ། ཏ་ཐ་ད་དྷ་ན། པ་ཕ་བ་བྷ་མ། ཡ་ར་ལ་ཝ་ཤ་ཥ་ས་ཧ་ཀྵ། ཡ་ར་ལ་ཝ་ཌ་ཌྷ། ཕྲག་གཉིས་ལས་ཉི་མའི་དཀྱིལ་འཁོར། ནམ་མཁའི་ནཱ་ད་ལས་ཆ་ལྔའི་རིམ་པས་ཧཱུཾ་ཡིག་རྫོགས། དེ་ཟླ་བའི་དཀྱིལ་འཁོར་ལ་ཞུགས་ཏེ་ཁ་སྦྱོར་གྱི་ནང་དུ་གནས་པར་གྱུར། དེ་ལས་གདན་རྣམས་ཀྱི་སྟེང་དུ་ས་བོན་རྣམས་སྤྲོ་བར་བྱ་སྟེ། ཌཾ་ལཾ་ཁཾ་རུཾ་ཨ་ཨཱ་ཨཾ་ཨཿ ཁ་ཨུཾ་ཤྭཾ་སུཾ་ཡཾ་ཡཾ་ཡཾ་ཡཾ། པྲཾ་ཙཾ་པྲཾ་མུཾ་སུཾ་ཁཾ་ལཾ་དྲུཾ་ཨེཾ་མཾ་བཾ་སུཾ་ཤྱཾ་སུཾ་ཧཾ་ཁཾ་ཙཾ་ཁཾ་ཤཾ་ཙཾ་སུཾ་མཾ་ཙཾ་མཾ། དབུས་ཀྱི་ཧཱུཾ་ཡོངས་སུ་གྱུར་པ་ལ་རྡོ་རྗེ་དཀར་པོ་རྩེ་ལྔ་པ་རྡོ་རྗེ་སེམས་དཔའི་རང་བཞིན་ནོ། །དེ་དག་ནི་རྣལ་འབྱོར་དང་པོའོ། །དེ་ལས་འོད་ཟེར་འཕྲོས་སྲིད་པ་གསུམ་པོ་ཡོངས་སུ་སྦྱངས་ནས། སྣོད་ཐམས་ཅད་གཞལ་མེད་ཁང་དང༌། བཅུད་ཐམས་ཅད་ཧེ་རུ་ཀའི་ལྷ་ཚོགས་སུ་བྱས་ནས། སླར་འདུས་ཏེ་ཟླ་ཉི་ས་བོན་ཕྱག་མཚན་གདན་དང་བཅས་པ་དེ་དག་ཐམས་ཅད་རོ་གཅིག་ཏུ་འདྲེས་པ་ལས། དཔལ་འཁོར་ལོ་སྡོམ་པའི་དཀྱིལ་འཁོར་ཡོངས་སུ་རྫོགས་པར་གྱུར་པ་ནི། རི་རབ་ཀྱི་ལྟེ་བ་རྣམ་པར་དག་པའི་བདེ་བ་ཆེན་པོའི་འཁོར་ལོ། རྭ་བཞིའི་ཕྱོགས་ཀྱི་ནམ་མཁའ་ནྀ་ཐུགས་ཀྱི་འཁོར་ལོ། སའི་དཀྱིལ་འཁོར་ནི་གསུང་གི་འཁོར་ལོ། །ཆུའི་དཀྱིལ་འཁོར་ནི་སྐུའི་འཁོར་ལོ། དེ་
ཕན་ཆད་སྒོས་གནས་དང་ཕྱི་རོལ་གྱི་ཁོར་ཡུག་ནི་མེ་དང་རླུང་གི་དཀྱིལ་འཁོར་རྣམ་པར་དག་པ་སྟེ། དུར་ཁྲོད་ཀྱི་ས་གཞིའོ། །དེ་ཡང་ཕྱི་རོལ་ཏུ་བསྲུང་བའི་འཁོར་ལོ་རབ་ཏུ་ཡངས་པའི་ནང་རྡོ་རྗེའི་ས་གཞི་ཁ་དོག་ནག་པོ་ལ། དུར་ཁྲོད་ཆེན་པོ་བརྒྱད་དེ། ཤར་ནས་གཡས་བསྐོར་གྱིས། མདུང་གིས་འབིགས་དང་རོ་བསྲེགས་དང༌། རྣག་གི་དྲི་དང་རུལ་པ་ཅན། དབང་ལྡན་ནས་གཡོན་བསྐོར་གྱིས། བྱིས་པ་ཤི་དང་སྦྲུལ་གྱིས་བཟུང༌། དྲག་པོའི་གཡུལ་དང་ལྷག་མ་ཅན། ཡང་ན་གཏུམ་གྲགས་ལ་སོགས་པ་སྤྱི་དང་མཐུན་པར་བསྒོམ་ཀྱང་རུང་སྟེ། བཤད་པའི་རྒྱུད་ལས་གསུང་པའི་ཕྱིར་རོ། །དེ་དག་ཏུ་ཕྱོགས་སྐྱོང་བ་དང༌། ཞིང་སྐྱོང་བ་དང༌། ཤིང་དང༌། མེ་དང༌། ཆུ་དང༌། སྤྲིན་དང༌། རི་དང༌། མཆོད་རྟེན་དང༌། གྲུབ་པ་ཐོབ་པའི་དཔའ་བོ་རྣལ་འབྱོར་མ་རྣམས་ཀྱིས་ཡོངས་སུ་གང་བ། དེའི་དབུས་སུ་རིན་པོ་ཆེ་སྣ་ཚོགས་ལས་གྲུབ་པའི་གཞལ་མེད་ཁང་པ། གྲུ་བཞི་པ། སྒོ་བཞི་པ། རྩིག་པ་རིན་པ་ལྔ་དང་ལྡན་པ། ཕ་གུ་དང༌། དྲ་ཕྱེད་དང༌། ཤར་བུ་དང༌། མདའ་ཡབ་དང༌། གཟུངས་མ་རྣམས་དང་བཅས་པའི་ཁ་ཁྱེར་ཏེ། མཚན་ཉིད་ཐམས་ཅད་ཡོངས་སུ་རྫོགས་པ། སྒོ་ཁང་བཞིའི་ཀ་བ་བཞི་བཞིས་བཏེག་པའི་རྟ་བབས། ནོར་བུ་གསེར་གྱི་རང་བཞིན་བརྩེགས་མ་གསུམ་པ། རེ་རེ་ལའང་གདུང་དང༌། མྱོས་སྲུང་དང༌། ཀ་ཐུང་གིས་བཅད་པའི་
ལྷ་མོའི་གནས་གསུམ་གསུམ་དང༌། སྟེང་དུ་ཧར་མི་བུམ་པའི་ཏོག་དང་བཅས་པའོ། །ཕྱི་རོལ་མཆོད་པའི་ས་གཞི་ཕྱོགས་ཀྱི་མདོག་ཅན་ལ། མཆོད་པ་སྣ་ཚོགས་དང་བཅས་པ། མཐའ་ཁ་དོག་དམར་པོས་བསྐོར་བའོ། །ཡང་ན་ཁྱམས་དམར་འཇམ་དུ་བྱས་ཀྱང་རུང་ངོ༌། །ནང་གི་ལྷ་སྣམ་ཤར་ནག ལྷོ་དམར། ནུབ་སེར། བྱང་དཀར་བ་སྒོའི་ཕྱེད་ཀྱི་ཚད་དང་ལྡན་པའོ། །དེའི་ནང་མཐོ་བར་སྐུའི་འཁོར་ལོ་དཀར་པོ་རྩིབས་བརྒྱད་པ། འཁོར་ལོའི་འཕྲེང་བ་ཅན། དེའི་ནང་མཐོ་བར་གསུང་གི་འཁོར་ལོ་དམར་པོ་རྩིབས་བརྒྱད་པ་པདྨའི་འཕྲེང་བ་ཅན། དེའི་ནང་མཐོ་བར་ཐུགས་ཀྱི་འཁོར་ལོ་ནག་པོ་རྩིབས་བརྒྱད་པ་རྡོ་རྗེའི་འཕྲེང་བས་བསྐོར་བ། དེའི་དབུས་སུ་བདེ་ཆེན་འཁོར་ལོ་པདྨ་འདབ་མ་བརྒྱད་པའི་མུ་ཁྱུད་ལ་གྲི་གུག་གི་འཕྲེང་བས་བསྐོར་བ། དབུས་ཕྱུར་བུར་གྱུར་པའི་རྩེ་མོར་རྡོ་རྗེ་རིན་པོ་ཆེའི་ཏོག་གིས་ཉེ་བར་བརྒྱན་པའོ། །དབུས་ཀྱི་གདན་གྱི་སྟེང་དུ་འཁོར་ལོ་བདེ་མཆོག་སྐུ་མདོག་མཐིང་ཀ ཞལ་བཞི་ཕྱག་བཅུ་གཉིས་པ། རྩ་བའི་ཞལ་ནག་པོ། གཡས་ཞལ་དམར་པོ། རྒྱབ་ཞལ་སེར་པོ། གཡོན་ཞལ་དཀར་པོ། དབུ་སྐྲ་སེར་པོ་སྟེང་དུ་འབར་བ། ཐོད་སྐམ་གྱི་དབུ་རྒྱན་དང༌། ཕྱག་རྒྱ་དྲུག་དང༌། ཀླུ་ཆེན་པོ་བཅུའི་རྒྱན་དང༌། མགོ་བོའི་དོ་ཤལ་འཆང་བ། ཐལ་བ་ཆེན་པོས་ཉེ་བར་བྱུགས་པ། ཕྱག་དང་པོ་གཉིས་ཁམས་གསུམ་རྣམ་རྒྱལ་གྱི་ཕྱག་རྒྱས་རྡོ་རྗེ་དང་དྲིལ་བུ་འཛིན་ཞིང་ཡུམ་ལ་འཁྱུད་པ། དེའི་འོག་མ་གཉིས་
ཀྱིས་གླང་པོ་ཆེའི་པགས་པ་རློན་པ་སྟོད་གཡོགས་སུ་བརྒྱངས་པ། ལྷག་མ་གཡས་བཞིས་ཌཱ་མ་རུ་དང༌། དགྲ་སྟ་དང༌། གྲི་གུག་དང༌། རྩེ་གསུམ་བསྣམས་པ། གཡོན་བཞིས་ཁ་ཊྭཾ་ག་དང༌། ཐོད་པ་དང༌། ཞགས་པ་དང༌། ཚངས་པའི་མགོ་བོ་འཛིན་པ། ཞལ་མཆེ་བ་གཙིགས་ཤིང༌། སྤྱན་བཅུ་གཉིས་པ། ཟླ་བ་ཕྱེད་པ་དང༌། སྣ་ཚོགས་རྡོ་རྗེ་ཅོད་པན་ཅན། ཞབས་གཡས་བསྐུམས་པས་འཇིགས་བྱེད་དང༌། གཡོན་བརྐྱང་པས་དུས་མཚན་མ་མནན་པ། གར་གྱི་ཉམས་དགུ་དང་ལྡན་པའོ། །ཡང་ན་ཞབས་གཡས་བརྐྱང་དུ་བྱས་ཀྱང་རུང་ངོ༌། །ཡུམ་རྡོ་རྗེ་ཕག་མོ་སྐུ་མདོག་དམར་པོའམ་ལྗང་ཁུར་ཡང་བྱ་ལ། བཅོམ་ལྡན་འདས་དང་སྐུ་མདོག་མཚུངས་པར་ཡང་རུང་སྟེ། འདོད་ཆགས་དང་ཞེ་སྡང་ལུས་བསམ་གྱིས་སྦྱོར་བ་ཅན་ཡིན་ཞིང༌། རླུང་དང་མེ་ཡང་གསུང་གི་ཕྱོགས་ལ་ཐབས་ཤེས་སུ་སྦྱོར་བའི་ངེས་པས་ནག་པོ་དང་དམར་པོ་སྦྱོར་བ་དང༌། ཡང་དུས་ཀྱི་འཁོར་ལོ་སྡོམ་པ་ཆུང་བའི་སྐབས་སུ་གསུངས་པ་དང་རིགས་པ་མཚུངས་པས་སྔོ་ལྗང་སྦྱོར་བ་དང༌། དཔལ་ཨོ་རྒྱན་པ་སོགས་ཀྱི་བཞེད་པ་དང་མཚུངས་ཤིང༌། མཉམ་ཉིད་ཟུང་འཇུག་མཚོན་པའི་ངེས་པ་ལས་ཡབ་ཡུམ་ཁ་དོག་འདྲ་བ་ཡང་ངོ༌། །གང་ལྟར་ཡང་། ཞལ་གཅིག་ཕྱག་གཉིས་སྤྱན་གསུམ་དྲག་མོ་ཆེན་མོ་གྲི་གུག་དང་ཐོད་པ་འཛིན་པ། རྡུལ་དང་ལྡན་ཞིང་ཕྱག་རྒྱ་ལྔས་བརྒྱན་པ། ཡབ་ཀྱི་ཞབས་དང་ལྷན་ཅིག་གཡས་བརྐྱང་གི་སྟབས་ཀྱིས་བཞུགས་པའོ། །ཤར་དུ་མཁའ་འགྲོ་མ་ནག་མོ། ལྷོར་ལཱ་མ་དམར་མོ། ནུབ་ཏུ་དུམ་སྐྱེས་
མ་སེར་མོ། བྱང་དུ་གཟུགས་ཅན་མ་དཀར་མོ། མཚམས་བཞིར་བདུད་རྩི་ལྔས་གང་བའི་ཐོད་པ་བཞིའོ། །ཤར་སྒོར་ཁྭ་གདོང་མ་ནག་མོ། ལྷོ་སྒོར་འུག་གདོང་མ་དམར་མོ། ནུབ་སྒོར་ཁྱི་གདོང་མ་སེར་མོ། བྱང་སྒོར་ཕག་གདོང་མ་དཀར་མོ། བྱང་ཤར་གྱི་གྲྭར་གཤིན་རྗེ་བརྟན་མ་དཀར་མོ། ནུབ་བྱང་གི་གྲྭར་གཤིན་རྗེ་ཕོ་ཉ་མོ་སེར་མོ། ལྷོ་ནུབ་ཀྱི་གྲྭར་གཤིན་རྗེ་མཆེ་བ་མ་དམར་མོ། ཤར་ལྷོའི་གྲྭར་གཤིན་རྗེ་འཇོམས་མ་ནག་མོ། མ་མོ་བཅུ་གཉིས་པོ་ཐམས་ཅད་ཕྱག་བཞི་གཡས་གཉིས་ན་གྲི་གུག་དང་ཌཱ་མ་རུ། གཡོན་གཉིས་ན་ཐོད་པ་དང་ཁ་ཊྭཾ་གམི་མགོའི་དབུ་རྒྱན་དང༌། དོ་ཤལ་དང༌། ཕྱག་རྒྱ་ལྔ་དང་ལྡན་པ། དྲག་མོ་ཆེན་མོ་ལང་ཚོ་ལ་བབ་པའོ། །ཐུགས་ཀྱི་འཁོར་ལོའི་ཤར་རྩིབས་པུལླི་ར་མ་ལ་ཡར། ཁཎྜ་ཀ་པཱ་ལ་དང༌། རབ་ཏུ་གཏུམ་མོ། ལྷོ་ཕྱོགས་ཛཱ་ལན་དྷ་རར་མཧཱ་ཀཾ་ཀ་ལ་དང་གཏུམ་པའི་མིག་ཅན་མ། ནུབ་ཕྱོགས་ཨོ་ཌི་ཡ་ཎར་ཀཾ་ཀ་ལ་དང་འོད་ལྡན་མ། བྱང་ཕྱོགས་ཨར་བུ་ཏར་མཆེ་བ་རྣམ་པར་གཙིགས་པ་དང་སྣ་ཆེན་མ། བྱང་ཤར་གོ་ད་ཝ་རིར་སུ་ར་བི་རི་དང་བརྟན་པའི་བློ་ཅན་མ། ནུབ་བྱང་རསྨི་ཤྭ་རིར་འོད་དཔག་མེད་དང་མིའུ་ཐུང་མ། ལྷོ་ནུབ་དེ་བཱི་ཀོ་ཊིར་རྡོ་རྗེ་འོད་དང་ལང་ཀའི་དབང་ཕྱུག་མ། ཤར་ལྷོ་མ་ལ་བར་རྡོ་རྗེའི་སྐུ་དང་ཤིང་གྲིབ་མ་སྟེ། དཔའ་བོ་དེ་ཐམས་ཅད་ཕྱག་དང་པོ་གཉིས་ཀྱིས་རྡོ་རྗེ་དང་དྲིལ་བུ་འཛིན་པའོ། །གསུང་འཁོར་གྱི་ཤར་རྩིབས་ཀཱ་མ་རུ་པར་ཨང་གུ་རི་དང་ཨེ་རི་ཝ་ཏི། ལྷོ་རྩིབས་ཨོ་
ཊེར་རྡོ་རྗེ་རལ་པ་ཅན་དང་འཇིགས་བྱེད་ཆེན་མོ། ནུབ་རྩིབས་ཏྲི་ཤ་ཀུ་ནེར་དཔའ་བོ་ཆེན་པོ་དང་རླུང་གི་ཤུགས་ཅན་མ། བྱང་རྩིབས་ཀོ་ས་ལར་རྡོ་རྗེ་ཧཱུཾ་མཛད་དང་ཆང་འཐུང་མ། བྱང་ཤར་ཀ་ལིང་ཀར་རབ་ཏུ་བཟང་པོ་དང་སྔོ་སངས་ལྷ་མོ། ནུབ་བྱང་ལམ་པ་ཀར་རྡོ་རྗེ་བཟང་པོ་དང་ཤིན་ཏུ་བཟང་མོ། ལྷོ་ནུབ་ཀཉྩིར་འཇིགས་བྱེད་ཆེན་པོ་དང་རྟ་སྣ་མ། ཤར་ལྷོ་ཧི་མ་ལ་ཡར་མིག་མི་བཟང་དང་བྱ་གདོང་མ་སྟེ་དཔའ་བོ་དེ་ཐམས་ཅད་ཕྱག་དང་པོ་གཉིས་པདྨ་དང་དྲིལ་བུ་འཛིན་པའོ། །སྐུའི་འཁོར་ལོའི་ཤར་ཕྱོགས་པྲེ་ཏ་པུ་རིར་སྟོབས་པོ་ཆེ་དང་འཁོར་ལོའི་ཤུགས་ཅན་མ། ལྷོ་ཕྱོགས་གྲྀ་ཧ་དེ་པར་རིན་ཆེན་རྡོ་རྗེ་དང་དུམ་སྐྱེས་མ། ནུབ་ཕྱོགས་སཽ་རཥྟར་རྟ་མགྲིན་དང་ཤཽཎ་ཌི་ནི། བྱང་ཕྱོགས་སུ་བརྞ་དྭི་པར་ནམ་མཁའི་སྙིང་པོ་དང་འཁོར་ལོའི་གོ་ཆ་མ། བྱང་ཤར་ན་ག་རར་དཔལ་ཧེ་རུ་ཀ་དང་ཤིན་ཏུ་དཔའ་མོ། ནུབ་བྱང་གི་སིནྡྷུར་པད་མ་གར་གྱི་དབང་ཕྱུག་དང་སྟོབས་ཆེན་མ། ལྷོ་ནུབ་མ་རུར་རྣམ་པར་སྣང་མཛད་དང་འཁོར་ལོས་བསྒྱུར་མ། ཤར་ལྷོར་ཀུ་ལུ་ཏར་རྡོ་རྗེ་སེམས་དཔའ་དང་བརྩོན་འགྲུས་ཆེན་མོ་སྟེ་དཔའ་བོ་དེ་ཐམས་ཅད་ཕྱག་དང་པོ་གཉིས་འཁོར་ལོ་དང་དྲིལ་བུ་འཛིན་པའོ། །འཁོར་ལོ་གསུམ་གྱི་ལྷ་རྣམས་ཀྱང༌། ཤར་དང་ཤར་ལྷོ་བ་རྣམས་ནག་པོ། །ལྷོ་དང་བདེན་བྲལ་བ་རྣམས་དམར་པོ། ནུབ་དང་ནུབ་བྱང་བ་རྣམས་སེར་པོ། །བྱང་
དང་བྱང་ཤར་བ་རྣམས་དཀར་པོ། །ཐམས་ཅད་ཤེས་རབ་གཙོ་བོར་གྱུར་པ་སྟེ། རྣལ་འབྱོར་མ་ཉེར་བཞི་པོ་རྣམས་ཞལ་གཅིག་ཕྱག་གཉིས་མ། གྲི་གུག་དང་ཐོད་པ་འཛིན་པས་ཡབ་ཀྱི་མཆན་ཁུང་ནས་འཁྱུད་པ། ཞབས་གཡས་བརྐྱང་གི་སྟབས་ཀྱིས་བཞུགས་ཤིང༌། །མགོ་བོ་སྐམ་པོའི་དོ་ཤལ་ཅན། ཟླ་བའི་གདན་ལ་གནས་པ། སྐྲ་གྲོལ་བ། དྲག་མོ་ཆེན་མོའོ། །དཔའ་བོ་ཉི་ཤུ་རྩ་བཞི་པོ་རྣམས་ནི་ཕྱག་བཞི་པ། གཡས་འོག་མས་ཌཱ་མ་རུ་འཁྲོལ་ཞིང༌། གཡོན་འོག་མས་ཐོད་པ་དང་ཁ་ཊྭཾ་ལྷན་ཅིག་འཛིན་པ། རྒྱན་དང་ཆ་བྱད་ཐམས་ཅད་འཁོར་ལོའི་དབང་ཕྱུག་དང་ཕྱོགས་མཚུངས་ཤིང༌། གཡོན་བསྐུམ་གཡས་བརྐྱང་གི་སྟབས་ཀྱིས་ཡུམ་དང་མཉམ་པར་སྦྱོར་བ། འཁོར་ཐམས་ཅད་ཀྱང་མི་རོའི་གདན་ལ་བཞུགས་ཤིང༌། དཔྲལ་པར་རྡོ་རྗེའི་འཕྲེང་བས་བརྒྱན་པའོ། །འདིར་ཐུགས་འཁོར་གྱི་ལྷོའི་ཕྱག་གི་ཐོད་ཁྲག་ནི། བདུད་ཀྱི་ཐོད་ཁྲག་དང༌། གསུང་འཁོར་གྱི་ནི་ལྷའི་དང༌། སྐུ་འཁོར་གྱི་རྣམས་ལྷ་མིན་གྱི་དང༌། དམ་ཚིག་འཁོར་ལོ་རྣམས་མིའི་ཐོད་ཁྲག་ཡིན་པར་གསུངས་སོ། །དེ་དག་ནི་དབྱིབས་ཀྱི་དཀྱིལ་འཁོར་རྗེས་སུ་རྣལ་འབྱོར། དེ་ནས་ལུས་ཀྱི་དཀྱིལ་འཁོར་གསལ་གདབ་པར་བྱ་སྟེ། གསང་བའི་འཁོར་ལོའི་དབུས་སུ་དཔལ་ཧེ་རུ་ཀ་དང་རྡོ་རྗེ་ཕག་མོའོ། །སྙིང་ཁའི་འཁོར་ལོའི་དབུས་སུ་མཁའ་འགྲོ་མ། མགྲིན་པའི་པདྨའི་དབུས་སུ་ལཱ་མ། ལྟེ་བའི་ཆུ་སྐྱེས་ཀྱི་དབུས་སུ་ཁཎྜ་རོ་ཧ། དཔྲལ་
པའི་འདམ་སྐྱེས་ཀྱི་དབུས་སུ་གཟུགས་ཅན་མ་སྟེ། རི་རབ་དང་གླིང་བཞིའི་གནས་རྣམ་པར་དག་པའོ། །མདུང་གི་འབིགས་པ་ཁའི་སྒོར་ཁྭ་གདོང་མ། རོ་བསྲེགས་པ་སྣ་བུག་གཡས་ཀྱི་སྒོར་འུག་གདོང་མ། རྣག་གི་དྲིལ་བཤང་སྒོར་ཁྱི་གདོང་མ། རུལ་པ་ཅན་སྣ་བུག་གཡོན་དུ་ཕག་གདོང་མ། བྱིས་པ་ཤི་བ་རྣ་བ་གཡོན་པར་གཤིན་རྗེ་བརྟན་མ། སྦྲུལ་གྱིས་བཟུང་བ་རྣ་བ་གཡོན་པར་གཤིན་རྗེ་ཕོ་ཉ་མ། དྲག་པོའི་གཡུལ་མིག་གཡས་པར་གཤིན་རྗེ་མཆེ་བ་མ། ལྷག་མ་ཅན་མིག་གཡོན་པར་གཤིན་རྗེ་འཇོམས་མའོ། །སྤྱི་བོ་པུལླི་ར་མ་ལ་ཡར་ཁཎྜ་ཀ་པཱ་ལ་དང་རབ་ཏུ་གཏུམ་མོ། སྤྱི་གཙུག་ཛ་ལནྡྷ་རར་མཧཱ་ཀཾ་ཀཱ་ལ་དང་གཏུམ་པའི་མིག་ཅན་མ། རྣ་བ་གཡས་པ་ཨོ་ཊི་ཡ་ནར་ཀཾ་ཀཱ་ལ་དང་འོད་ལྡན་མ། ལྟག་པ་ཨརྦུ་ཏར་མཆེ་བ་རྣམ་པར་གཙིགས་པ་དང་སྣ་ཆེན་མ། རྣ་བ་གཡོན་གོ་ད་བ་རིར་སུ་ར་ཝི་རི་དང་བརྟན་པའི་བློ་ཅན་མ། སྨིན་མའི་དབུས་རསྨི་ཤྭ་རར་འོད་དཔག་མེད་དང་མིའུ་ཐུང་མ། མིག་གཉིས་དེ་བཱི་ཀོ་ཊར་རྡོ་རྗེའི་འོད་དང་ལང་ཀའི་དབང་ཕྱུག་མ། ཕྲག་པ་གཉིས་མཱ་ལ་བར་རྡོ་རྗེའི་སྐུ་དང་ཤིང་གྲིབ་མའོ། །མཆན་ཁུང་གཉིས་ཀ་མ་རུ་པར་ཨང་ཀུ་རི་དང་ཨེ་ར་བ་ཏི། ནུ་མ་གཉིས་ཨོཾ་ཊེར་རྡོ་རྗེ་རལ་པ་ཅན་དང་འཇིགས་བྱེད་ཆེན་པོ། །ལྟེ་བ་ཏྲི་ཤ་ཀུ་ནེར་དཔའ་བོ་ཆེན་པོ་དང་རླུང་གི་ཤུགས་ཅན་མ། སྣ་རྩེ་ཀོ་ས་ལར་རྡོ་རྗེ་ཧཱུཾ་མཛད་དང་ཆང་འཐུང་མ། ཁ་ཀ་
ལིང་གར་རབ་ཏུ་བཟང་པོ་དང་ཤྱ་མ་དེ་བཱི། མགྲིན་པར་ལཾ་པ་ཀར་རྡོ་རྗེ་བཟང་པོ་དང་ཤིན་ཏུ་བཟང་མོ། སྙིང་ག་ཀཉྩིར་འཇིགས་བྱེད་ཆེན་པོ་དང་རྟ་སྣ་མ། འབྲས་བུ་ཧི་མ་ལ་ཡར་མིག་མི་བཟང་དང་ཁ་གཱ་ན་ནའོ། །མཚན་མ་པྲེ་ཏ་པུ་རིར་སྟོབས་པོ་ཆེ་དང་འཁོར་ལོའི་ཤུགས་ཅན་མ། བཤང་ལམ་གྲི་ཧ་དེ་བར་རིན་ཆེན་རྡོ་རྗེ་དང་ཁཎྜ་རོ་ཧི། བརླ་གཉིས་སཽ་རཥྟར་རྟ་མགྲིན་དང་ཤཽཥྟི་ནི། བྱིན་པ་གཉིས་སུ་བརྞ་དྭི་བར་ནམ་མཁའི་སྙིང་པོ་དང་འཁོར་ལོའི་གོ་ཆ་མ། རྐང་སོར་ན་གར་དཔལ་ཧེ་རུ་ཀ་དང་ཤིན་ཏུ་དཔའ་མོ། བོལ་གོང་སིན་དྷུར་པདྨ་གར་གྱི་དབང་ཕྱུག་དང་སྟོབས་ཆེན་མ། རྐང་པའི་མཐེ་བོང་མ་རུར་རྣམ་པར་སྣང་མཛད་དང་འཁོར་ལོའི་བསྒྱུར་མ། པུས་མོ་གཉིས་སུ་ཀུ་ལུ་ཏར་རྡོ་རྗེ་སེམས་དཔའ་དང་བརྩོན་འགྲུས་ཆེན་མོའོ། །ཞེས་བརྗོད་ཅིང་གསལ་བཏབ། ཅུང་ཟད་རྒྱས་པ་ལ་མོས་ན། གོང་བཞིན་རོ་གདན་དང༌། ས་བོན་ལས་ལྷ་རྣམས་བསྐྱེད་ཀྱང་ལེགས་པར་འགྱུར་རོ། །དེ་དག་ནི་སྔགས་ཀྱི་དཀྱིལ་འཁོར་ཏེ་ཤིན་ཏུ་རྣལ་འབྱོར་རོ། །དེ་ནས་ཆོས་ཀྱི་དཀྱིལ་འཁོར་བསྒོམ་པར་བྱ་སྟེ། རྒྱས་པར་ན་སྒྲུབ་ཐབས་ནས་འབྱུང་བ་བཞིན་དག་པ་མཐའ་དག་དྲན་པར་བྱ་ལ། མདོར་བསྡུས་ན། ལུས་རྗེས་སུ་དྲན་པ་ཉེ་བར་བཞག་པ་ནི་མཁའ་འགྲོ་མའོ། །ཞེས་སོགས་ནས། མི་དགེ་བའི་ཆོས་སྐྱེས་པ་རྣམས་སྤོང་བ་ནི་གཤིན་རྗེ་འཇོམས་མའོ། །ཞེས་པའི་བར་ངག་ནས་བརྗོད་ཅིང་བསམས་པའོ། །ཨོཾ་ཨཱཿཧཱུཾ་སརྦ་བཱི་ར་ཡོ་གི་ནི་ཀཱ་ཡ་ཝཱ་ཀ་ཙིཏྟ་བཛྲ་སྭཱབྷ་ཝ་ཨཏྨ་ཀོ྅་ཧཾ། ཨོཾ་བཛྲ་ཤུདྡྷ་སརྦ་དྷརྨ་
བཛྲ་ཤུདྡྷོ྅་ཧཾ། དེ་ལྟར་སྐད་ཅིག་རྣམ་པའི་སྔགས་ཀྱིས་ཕོ་ཉ་གསུམ་བསྲེ་སྟེ། དཀྱིལ་འཁོར་གསུམ་བྱིན་གྱིས་རླབས་པ་ཡིན་ནོ། །སྤྱི་བོར་ཨོཾ་ལས་སྐུའི་མཁའ་འགྲོ་ཧེ་རུ་ཀ་དཀར་པོ། མགྲིན་པར་ཨཱཿལས་གསུང་གི་མཁའ་འགྲོ། ཧེ་རུ་ཀ་དམར་པོ། སྙིང་གར་ཧཱུཾ་ལས་ཐུགས་ཀྱི་མཁའ་འགྲོ་ཧེ་རུ་ཀ་ནག་པོ། ལྟེ་བར་ཧྲཱིཿལས་ཡེ་ཤེས་མཁའ་འགྲོ་ཧེ་རུ་ཀ་སེར་པོའོ། །འདི་རྣམས་ཀྱང་སྤྲོ་ཞིང་ནུས་ན། རིམ་པའི་འཁོར་ལོ་གསུམ་དང་མ་མོ་བཅུ་གཉིས་ཀྱིས་བསྐོར་བ་བསྒོམ་པར་བཤད་དོ། །ཡབ་ཀྱི་སྙིང་གར་ཨོཾ་ཧ་དཀར་པོ་རྡོ་རྗེ་སེམས་དཔའ། མགོ་བོར་ན་མ་ཧི་སེར་པོ་རྣམ་པར་སྣང་མཛད། སྤྱི་གཙུག་ཏུ་སྭཱཧཱ་ཧཱུཾ་དམར་པོ་པདྨ་གར་གྱི་དབང་ཕྱུག ཕྲག་པ་གཉིས་སུ་བཽ་ཥ་ཊ་ཧེ་ནག་པོ་དཔལ་ཧེ་རུ་ཀ མིག་གཉིས་སུ་ཧཱུཾ་ཧཱུཾ་ཧོ་དམར་སེར་རྡོ་རྗེ་ཉི་མ། ཚིགས་ཆེན་བརྒྱད་ལ་ཕཊ་ཧཾ་ལྗང་ཁུ་རྟ་མཆོག་གི་ངོ་བོ་ཡུམ་གྱི་ལྟེ་བར་ཨོཾ་བཾ་དམར་པོ་རྡོ་རྗེ་ཕག་མོ། སྙིང་ཀར་ཧཾ་ཡོཾ་སྔོན་མོ་གཤིན་རྗེ་མ། ཁར་ཧྲིཾ་མོཾ་དཀར་མོ་རྨོངས་བྱེད་མ། དཔྲལ་པར་ཧྲིཾ་ཧྲིཾ་སེར་པོ་སྐྱོང་བྱེད་མ། སྤྱི་གཙུག་ཏུ་ཧཱུཾ་ཧཱུཾ་ལྗང་ཁུ་སྐྲག་བྱེད་མ། ཚིགས་ཆེན་བརྒྱད་ལ་ཕཊ་ཕཊ་དུད་ཁ་ཙནྚི་ཀཱའི་ངོ་བོ། རྡོ་རྗེ་སེམས་དཔའ་དང་རྨོངས་བྱེད་མ་ཟླ་བ་དང༌། གཞན་རྣམས་ཉི་མའི་གདན་ལ་གནས་པའོ། །འདི་དག་ཀྱང་སྤྲོ་ན་ལཱུ་ཡི་པའི་སྒྲུབ་ཐབས་སུ་བཤད་པ་བཞིན་ཞལ་ཕྱག་རྒྱས་པར་གསལ་གདབ་བོ། །རང་གི་སྙིང་ག་ནས་འོད་ཟེར་འཕྲོས། ཡེ་ཤེས་ཀྱི་དཀྱིལ་འཁོར་ཕཻཾ། ཛཿཧཱུཾ་བཾ་ཧོཿ
ཨོཾ་ཡོ་ཀ་ཤུདྡྷ་སརྦ་དྷརྨ་ཡོ་ག་ཤུདྡྷོ྅་ཧཾ། ཡང་ཐུགས་ཀའི་ཧཱུཾ་ལས་འོད་འཕྲོས། དབང་གི་ལྷ་དཀྱིལ་འཁོར་གྱི་འཁོར་ལོ་ཕཻཾ། ཨོཾ་ཨ་བྷི་ཥིཉྩནྟུ་མཾ་སརྦ་ཏ་ཐཱ་ག་ཏ་ཞེས་གསོལ་བ་བཏབ་པས། དབང་གི་ལྷ་རྣམས་ཀྱིས། ཇི་ལྟར་བལྟམས་པ་ཙམ་གྱིས་ནི། །དེ་བཞིན་གཤེགས་ཀུན་ཁྲུས་གསོལ་ལྟར། །ལྷ་ཡི་ཆུ་ནི་དག་པ་ཡིས། །དེ་བཞིན་བདག་གི་ཁྲུས་བགྱིའོ། །ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏ་ས་མ་ཡ་ཤྲཱི་ཧཱུཾ། ཞེས་གསུངས་ཞིང་བདུད་རྩིས་གང་བའི་ཀ་པཱ་ལས་དབང་བསྐུར། སྐུ་ལུས་གང༌། དྲི་མ་དག ཆུའི་ལྷག་མ་ཡར་ལུད་པ་ལས། གཙོ་བོ་ལ་མི་བསྐྱོད་པ། ཡུམ་ལ་རྡོ་རྗེ་སེམས་དཔའ། ཤར་དང་མེའི་ལྷ་ལ་དོན་ཡོད་གྲུབ་པ། ལྷོ་དང་བདེན་བྲལ་པ་ལ་རིན་ཆེན་འབྱུང་ལྡན། ནུབ་དང་རླུང་མཚམས་པ་ལ་རྣམ་པར་སྣང་མཛད་བྱང་དང་དབང་ལྡན་དུ་གནས་པ་ལ་འོད་དཔག་མེད་ཀྱིས་དབུ་རྒྱན། ཡན་ན་གཙོ་བོ་ལ་མི་བསྐྱོད་པ། ཡུམ་ལ་རྣམ་སྣང་སོགས་བདེ་མཆོག་གི་སྒྲུབ་ཐབས་སྤྱི་དང་མཚུངས་པར་རྒྱས་བཏབ་བྱས་ཀྱང་མི་འགལ་ཏེ། ཁྱབ་འཇུག་སྦས་པས་མཛད་པའི་ཡུམ་བཀའི་སྒྲུབ་ཐབས་ཀྱི་དགོངས་པ་དང་ཡང་འབྱོར་བར་འགྱུར་རོ། །རྣལ་འབྱོར་ཆེན་པོའོ། །དེ་ནས། ཨརྒྷཾ་ནས་ཤཔྟའི་བར་གྱིས་མཆོད། རྐང་པ་བརྒྱད་པ་གཉིས་ཀྱིས་བསྟོད། ནང་མཆོད་སླར་ཡང་བྱིན་གྱིས་བརླབས། གཙོ་བོ་བརྩམས་ཏེ་སྔགས་རྣམས་ཀྱི་མཐར་ཡི་གེ་འབྲུ་གསུམ་སྦྱར་བས་མྱང་བར་བྱ་ལ། བོད་ཀྱི་ལག་ལེན་དང་སྦྱར་ནས་ནང་མཆོད་འབུལ་
བའི་ཐོག་མར་རྩ་བརྒྱུད་ཀྱི་བླ་མའི་མཚན་ནས་སྨོས་ཏེ་འབུལ་བར་སྤྲོ་ན། འདི་སྐད་ཅེས་བྱ་སྟེ། ཧེ་རུ་ཀ་དཔལ་རྡོ་རྗེ་རྣལ་འབྱོར་མ། །ཕྱག་ན་རྡོ་རྗེ་རིགས་ལྡན་རྒྱལ་དཀའ་དང༌། །གྲུབ་ཐོབ་བསོད་སྙོམས་པ་དང་གཉིས་སྤངས་ཞབས། །ཞི་བའི་འབྱུང་གནས་སྦས་པའི་བློ་གྲོས་དང༌། །སངས་རྒྱས་བྱེད་པ་སངས་རྒྱས་འོད་བྱེད་དང༌། །སེང་ཧ་ཀེ་ཏུ་དཔལ་གྱི་འགྲམ་པ་དང༌། །རྣམ་གྲོལ་ལྷ་དང་བཛྲ་དེ་བ་དང༌། །ར་ཏི་གུབྟ་གྲུབ་ཆེན་ཞི་བའི་ཞབས། །ལྷ་འབྱུང་གང་བའི་རྡོ་རྗེ་ལ་སོགས་པ། །རྩ་བརྒྱུད་བླ་མ་རྣམས་ལ་མཆོད་པ་འབུལ། །ཡང་ན། ཧེ་རུ་ཀ་དང་ཡེ་ཤེས་བཤེས་གཉེན་དང༌། །ཞི་བའི་ཞབས་དང་ལྷ་ཡི་འབྱུང་ལྡན་དང༌། །གང་བའི་རྡོ་རྗེ་རྩ་བའི་བླ་མ་སྟེ། །ཉེ་བརྒྱུད་བླ་མ་རྣམས་ལ་མཆོད་པ་འབུལ། །ཞེས་བརྗོད་ཀྱང་རུང་ངོ༌། །དེའི་རྗེས་སུ་ཕྲ་ཐིག་གི་རྣལ་འབྱོར་ཅུང་ཟད་བསྒོམས་ཏེ་སྔགས་བཟླས་པར་བྱའོ། །བཟླས་པའི་དམིགས་པ་ནི་འཁོར་ལོའི་བཟླས་པ་གཙོ་བོར་བྱེད་ཅིང༌། བཟླས་བྱའི་སྔགས་ནི་འདི་ཡིན་ཏེ། ཨོཾ་ཤྲཱི་བཛྲ་ཧེ་ཧེ་རུ་རུ་ཀཾ་ཧཱུཾ་ཧཱུཾ་ཕཊ། ཌཱ་ཀི་ནི་ཛཱ་ལ་སམྦྷ་ར་སྭཱཧཱ། རྩ་བའི་སྔགས་སོ། །ཨོཾ་ཧཾ་ཧཾ་ཧྲཱིཿཧཱུཾ་ཕཊ། སྙིང་པོའོ། །ཨོཾ་ཧྲཱིཿཧ་ཧ་ཧཱུཾ་ཧཱུཾ་ཕཊ། ཉེ་བའི་སྙིང་པོའོ། །ཨོཾ་ཧཾ་ཧིཾ་ཧཱུཾ་ཧེཾ་ཧཾ་ཧཱུཾ་ཕཊ། མཚོན་ཆའི་སྔགས་སོ། །ཨོཾ་བཛྲ་བཻ་རོ་ཙ་ནཱི་ཡེ་སྭཱཧཱ། ཡི་གེ་བཅུ་པ་ཡུམ་གྱི་སྙིང་པོའོ། །ཨོཾ་བཾ་ཡོཾ་མོཾ། ཧྲཻཾ་ཧྲཱིཾ་ཧཱུཾ་ཕཊ། གོ་ཆའི་སྔགས་སོ། །ཨོཾ་སུམྦྷ་ནི་སུམྦྷ་བཛྲ་ཌཱ་ཀི་ནི་ཧཱུཾ་ཕཊ། ཅེས་པ་ལ་སོགས་པ་སྙིང་པོའི་རྣལ་འབྱོར་མ་
བཞིའི་སྔགས་དང༌། ཨོཾ་ན་མོ་ག་ཝ་ཏེ་བཱི་རི་ཤཱ་ཡ། བཛྲ་ཀ་ཀཱ་སྱ་ཧཱུཾ་ཧཱུཾ་ཕཊ། ཅེས་པ་ལ་སོགས་པ་སྒོ་མཚམས་མ་བརྒྱད་ཀྱི་སྔགས་སོ། །ཨོཾ་ཀ་ར་ཀ་ར་བཛྲ་པྲ་ཙིཎྜེ་བཛྲ་ཁཎྜ་ཀ་པཱ་ལ་ཧཱུཾ་ཧཱུཾ་ཕཊ། ཅེས་པ་ལ་སོགས་པ་འཁོར་ལོ་གསུམ་གྱི་སྔགས་རྣམས་ཇི་ལྟར་འོས་པ་བཟླ་བར་བྱའོ། །རྗེས་དཀྱིལ་འཁོར་ཉེ་བར་བསྡུ་བ་དང༌། གོ་ཆ་གཉིས་ཀྱི་རྒྱས་འདེབས་པ་དང༌། དག་པ་གསུམ་དྲན་པའི་ཐུན་མཚམས་སུ་འཇུག་པ་ལ་སོགས་སྡོམ་པའི་སྒྲུབ་ཐབས་སྤྱི་དང་འདྲའོ། །གཏོར་མའི་ཆོ་ག་ནི། ཨོཾ་བཛྲ་ཀྲོདྷེ་ཤྭ་རི་སརྦ་དྲ་བྱ་ཎི་བི་ཤུདྡྷེ་ཧཱུཾ་ཕཊ། ཅེས་པའི་སྔགས་ལན་གསུམ་ལ་སོགས་པས་སྦྱངས་ལ། གོང་ནང་མཆོད་ལྟར་བྱིན་གྱིས་རླབས། ཨོཾ་ཤྲཱི་ཧེ་རུ་ཀ་ཨཱ་ཀཌྜཧྱ་ཀ་ཨཱ་ཀཌྜཧྱ་པྲ་བེ་ཤ་ཡ་པྲ་བེ་ཤ་ཡ། བནྡྷ་ཡ་བནྡྷ་ཡ། ཏོ་ཥ་ཡ་ཏོ་ཥ་ཡ། སརྦ་ཌཱ་ཀི་ནི་ནཾ་ཧྲི་ད་ཡཾ་ཛཿཧཱུཾ་བཾ་ཧོཿཧཱུཾ་ཕཊ། ཅེས་པའི་སྔགས་དང་ཧཾ་གི་སྒྲས་སྤྱན་དྲངས། ཨོཾ་སུམྦྷ་སོགས་ཞལ་བཞི་པའི་སྔགས་ཀྱིས་གཙོ་བོ་ལ་ཕུལ། སྐབས་དེར་རྡོ་རྗེ་རྩེ་ལྔ་པའི་ཕྱག་རྒྱས་བཏབ་བོ། །དེ་ནས་འབྱུང་པོ་སྤྱིའི་གཏོར་མ་མཁའ་འགྲོ་སྤྱི་གཏོར་བདེ་མཆོག་སྤྱི་དང་མཐུན་པར་བཏང༌། དེའི་མཐར་ཡུལ་དང་གྲོང་གི་བདག་པོའི་གཏོར་མ་ནི། ཨོཾ་ཨཱཿཧཱུཾ་ཀྵེ་ཏྲ་པཱ་ལ་བ་ལིཾ་གྲྀཧྞ་གྲྀཧྞ་ས་པ་རི་ཝ་རེ་བྷྱོ་སརྦ་ས་ཏྭ་ནཱཾ་ཤིནྟཾ་ཙིཏྟེ་ན་ཀུ་རུ་སྭཱཧཱ། ཞེས་པའམ། བསྡུ་ན། ཨོཾ་ཀྵཾ་ཀྵེ་ཏྲ་པཱ་ལ་ཨ་ཧཱུཾ་ཕཊ། ཅེས་པས་ཀྱང་རུང་ངོ༌། །དེ་ནས་མཆོད་བསྟོད་འདོད་དོན་གསོལ་བཏབ་བྱས་ཏེ། ཡིག་བརྒྱ་དང་བཟོད་གསོལ་གྱི་མཐར། ཨོཾ་ཁྱོད་ཀྱིས་སོགས་དང༌། ཨོཾ་ཨཱཿཧཱུཾ་མུཿ ཞེས་དང༌། ཀྵཿཞེས་མང་དུ་བརྗོད་ཅིང༌།
ལག་པའི་རྒྱབ་ཏུ་སེ་གོལ་གཏོགས་པས་གཤེགས་སོ། །འདིའི་ཕྱི་རོལ་མཆོད་པ་ལ་སོགས་པ་ནི། རྡོ་རྗེ་ཕག་མོའི་སྒྲུབ་ཐབས་རྒྱ་ནག་བྱང་ཕྱོགས་ལམ་གྱི་རིམ་པ་ལས་ཤེས་པར་བྱའོ། ཁ་ཟས་གཏོར་མ་ལྟར་བྱིན་གྱིས་རླབས། ཕུད་ཕུལ་ཏེ་དེའི་འོག་ཏུ། ཨོཾ་ཧ་རི་ཏ་པིཎྜ་ཀེ་པྲ་ཏཱིཙྪ་སྭཱཧཱ། ཞེས་པས་འཕྲོག་མ་བུ་དང་བཅས་པ་ལ་ཆང་བུ་གཉིས་དང༌། ཨོཾ་དཱུ་ཏི་ཀེ་ཨ་གྲ་ཨ་གྲ་སམ་པྲ་ཏཱིཙྪ་སྭཱཧཱ། ཕོ་ཉ་རྣམས་ལ་ཆང་བུ་སྦྱིན། དེ་ནས་འབྲུ་གསུམ་བཟླ་ཞིང་ཟོས་ལ། ལྷག་མའི་ཆང་བུ། ཨོཾ་ཁ་ཁ་ཁཱ་ཧི་ཁཱ་ཧི། ཨོཾ་ཨུ་ཙིཥྟ་བྷ་ཀྵ་ཀ་སྭཱཧཱ། ཞེས་པས་སྦྱིན་ནོ། །དེ་ལ་འདི་ནི་དུས་འཁོར་ཡེ་ཤེས་ལེའུར་བཤད་པའི་སྡོམ་པ་ཆུང་བ་དང་ལྷ་དང་སྔགས་འདྲ་ཡང༌། དེ་ནི་བསྙེན་སྒྲུབ་ཡན་ལག་བཞི་དུས་འཁོར་ཁོ་ནའི་ཆོ་གས་བསྒྲུབ་དགོས་ལ། འདིར་ནི་ཕྱག་རྡོར་སྟོད་འགྲེལ་གྱི་ལུགས་དེ་མཆོག་ཉུང་ངུའི་རང་ལུགས་སུ་སྦྱར་བ། སྒྲུབ་ཐབས་དེ་ཁོ་ན་ཉིད་ཀྱི་སྙིང་པོ་ལས་བྱུང་བ་ལ། ཁ་འགེངས་དགོས་རྣམས་རིག་ལྡན་གྱིས་མཛད་པའི་ཡུམ་དཀའི་སྒྲུབ་ཐབས་ལས་བླངས་ཤིང༌། མི་གསལ་བ་ཅུང་ཟད་ཡོད་པ་རྣམས་གྲུབ་པ་བརྙེས་པའི་བླ་མའི་གསུང་བཞིན་བཀོད་པ་ཡིན་ནོ། །འདིར་ཡང་ན་དབྱིབས་རྫོགས་པ་དཀྱིལ་འཁོར་རྒྱལ་མཆོག དེ་མན་ཆད་ལས་རྒྱལ་མཆོག །དེ་ནས་ཐིག་ཕྲ་གཉིས་ཏེ་ཡན་ཆད་བཞིའི་ཆིངས་བྱས་ཀྱང་རུང་ངོ༌། །ཚུལ་འདིས་ཐུན་བཞིར་བསྒོམས་ཏེ། །ཟླ་བ་དྲུག་ལ་སོགས་པས་སེམས་ཅུང་ཟད་ཙམ་བརྟན་པ་ན། སེམས་འགྲེལ་ཉིད་ལས་བཤད་པ་ལྟར་ལོ་བཅུ་གཉིས་སུ་སྒྲུབ་པ་བྱས་ནས་ཐུན་མོང་གི་དངོས་གྲུབ་ཆེན་པོ་རྣམས་བསྒྲུབ་པར་བྱ་བའམ། ཡང་ན་རྫོགས་པ་
རིམ་པའི་རྣལ་འབྱོར་ལ་བརྟེན་ནས། ཕྱག་རྒྱ་ཆེན་པོའི་དངོས་གྲུབ་བསྒྲུབ་པར་བྱའོ། །སྨྲས་པ། འདི་ནི་སྒྲུབ་ཐབས་ཀུན་གྱི་མཆོག་གྱུར་ཡིན་ཡང་གྲགས་ཆུང་བས། །སེམས་འགྲེལ་ཤེས་པར་རློམ་པའི་ཆེན་པོ་འགས་ཀྱང་འདི་མ་རྟོགས། །གྲུབ་པའི་མན་ངག་འཕགས་ཡུལ་མཁས་པའི་གསུང་ལས་འདི་ཐོབ་པའང༌། །ཀུན་ལས་ཆེས་ཆེར་གྱུར་པའི་བསོད་ནམས་བགོ་སྐལ་ཡོད་པའི་རྟགས། །རྩ་བའི་རྒྱུད་ཀྱི་རྗེས་སུ་བགྲངས་པ་སེམས་འགྲེལ་གྱི་ལུགས། དཔལ་འཁོར་ལོ་སྡོམ་པ་བསྡུས་རྒྱུད་རྩ་བའི་སྒྲུབ་ཐབས་ཀྱི་ལེ་ཚན་ཏེ། དང་པོའོ།། །།ན་མ་ཤྩཀྲ་སམྦྷ་རཱ་ཡ། དཔལ་ལྡན་སྐུ་ནི་ཐམས་ཅད་པ། །རབ་ཏུ་དགའ་བའི་སེམས་དཔའ་བོ། །འགྲོ་བའི་ཡིད་ཀྱི་མུན་འཇོམས་པའི། །བླ་མ་རྡོ་རྗེ་ཅན་ཞབས་ལ། །བཏུད་ནས་དཔའ་བོ་ལཱུ་ཡི་པའི། །བཞེད་དོན་འཇིགས་པ་མེད་པའི་གཞུང༌། །ཇི་བཞིན་སྡོམ་པའི་སྒྲུབ་ཐབས་ནི། །ཤིན་ཏུ་ཉུང་ངུའི་ཚིག་གིས་བརྗོད། །འདིར་དཔལ་འཁོར་ལོ་སྡོམ་པའི་སྒྲུབ་ཐབས་འཁྲུལ་སྤོང་གི་དོན་ཉམས་སུ་ལེན་པར་འདོད་པས། སྐྱབས་སེམས་རྡོར་སེམས་ཀྱི་སྒོམ་བཟླས་རྣམས་སྤྱི་དང་མཐུན་པར་བྱས་ལ། རང་སྐད་ཅིག་གིས་ཧེ་རུ་ཀ་ཕྱག་གཉིས་པ་ཡུམ་དང་བཅས་པའི་སྐུར་གྱུར། ལྟེ་བར་ཨཱ་ལི་ཀཱ་ལི་གཡོན་བསྐོར་དུ་འཁོད་པ་ལས། འཁོར་ལོ་གསུམ་གྱི་ལྷ་ཚོགས་སྤྲོས་ཏེ་བགེགས་ཐམས་ཅད་བཅོམ་པར་གྱུར། ཨོཾ་ཨ་ཨཱཿ ནས། ཧ་ཀྵ་ཧཱུཾ་ཧཱུཾ་ཕཊ། ལན་གསུམ་བརྗོད། གཟུགས་ཀྱི་ཕུང་པོ་ལ་ནི་རྣམ་པར་སྣང་མཛད་དོ། །ཞེས་པ་ནས། ནམ་མཁའི་ཁམས་ནི་པདྨ་དྲ་བ་ཅན་ནོ། ཨོཾ་སུམྦྷ་ནས། བྷ་ག་ཝཱན་བཛྲ་ཧཱུཾ་ཧཱུཾ་ཕཊ་
སྔགས་རྣམས་ནག་པོ་ལྗང་ཁུ་དམར་པོ་སེར་པོའི་འོད་ཀྱིས་ཚངས་པའི་འཇིག་རྟེན་ནས་གསེར་གྱི་ས་གཞིའི་བར་དུ་ཁྱབ་པ། དེ་ལས་འོག་ཏུ་ཧཱུཾ་ལས་སྣ་ཚོགས་རྡོ་རྗེ་ཧཱུཾ་གིས་མཚན་པའི་རང་བཞིན་གྱི་རྡོ་རྗེའི་ས་གཞི། ཕྱོགས་མཚམས་སུ་སྔགས་ཀྱི་འོད་ཟེར་ལས་བྱུང་བའི་རྡོ་རྗེའི་རྭ་བ་གྲུ་བཞི་ཕྱོགས་ཀྱི་མདོག་ཅན། སྟེང་དུ་རྡོ་རྗེའི་བླ་རེ་དང་གུར། དེའི་ཕྱི་རོལ་དུ་རྡོ་རྗེ་རྩེ་ལྔ་པའི་མདའི་དྲ་བ་རྣམས་སུ་གྱུར། ཚམ་རྔམ་དང་བཅས་པས་སུམྦྷ་ཚར་གཅིག་བརྗོད། སྔགས་རེ་རེའི་འོད་ཟེར་ལས་བྱུང་བའི་སྒོ་མ་བཞི་གཉིས་གཉིས་འདྲེས་པའི་འོད་ཟེར་ལས་བྱུང་བའི་མཚམས་མ་བཞི་རྣམས་ཐོ་བ་དང་ཕུར་བུ་ཐོགས་པ་སྤྲོས། ཕྱོགས་བཅུའི་བགེགས་རྣམས་བཀུག ཧཱུཾ་རྭ་བའི་ཕྱི་རོལ་ཕྱོགས་མཚམས་བརྒྱད་དུ། འབྲུབ་ཁུང་བྱུང་བ་རྣམས་སུ་བཅུག །ཕུར་བུས་སྤྱི་བོར་བཏབ། ཨོཾ་གྷ་གྷ་སོགས་བརྗོད་ཐོ་བས་བརྡུངས་ཨོཾ་བཛྲ་མུངྒར༴ སོགས་བགེགས་རྣམས་བདེ་བ་ཆེན་པོའི་དབྱིངས་སུ་བསྒྲལ། རྭ་བ་ལ་ཐིམས། དེ་ལས་བྱུང་བའི་རྡོ་རྗེ་དང་པདྨ་དང་འཁོར་ལོའི་རྭ་བ་རིམ་པ་གསུམ་གྱིས་བསྐོར་ཞིང་ཕྱོགས་ཐམས་ཅད་དུ་ཡེ་ཤེས་ཀྱི་མེ་འབར་བར་གྱུར། རང་གི་སྙིང་གར་ཨཾ་ལས་ཟླ་བའི་སྟེང་དུ་ཧཱུཾ་སྔོན་པོ། དེའི་འོད་ཟེར་གྱིས་བླ་མ་དང་དབྱེར་མེད་པའི་དཀྱིལ་འཁོར་གྱི་འཁོར་ལོ་མདུན་དུ་སྤྱན་དྲངས། ཧཱུཾ་ལས་བྱུང་བའི་རིག་མ་བཅུ་དྲུག་གིས་མཆོད་པར་
གྱུར། ཨོཾ་བཛྲ་བཱི་ནི་ཧཱུཾ་ཧཱུཾ་ཕཊ། སོགས་བརྗོད། རྐང་པ་བརྒྱད་པས་བསྟོད། དཀོན་མཆོག་གསུམ་ལ་བདག་སྐྱབས་སོགས་ཀྱིས་རྒྱུན་སོགས་ཀྱི་རྒྱུན་བཤགས་བྱ། ཚད་མེད་བཞི་སྤྱི་དང་མཐུན་པར་སྒོམ། ཨོཾ་སྭ་བྷཱ་ཝ་ཤུདྡྷཿ སརྦ་དྷརྨཱཿ སྭ་བྷ་ཝ་ཤུདྡྷོ྅་ཧཾ། སྟོང་པའི་དབུས་སུ་རང་གི་ལུས་ངག་ཡིད་གསུམ་ཨོཾ་ཨཱཿཧཱུཾ་དུ་གྱུར། ཨོཾ་ཨཱཿལ་ཐིམ། ཨཱཿཧཱུཾ་ལ་ཐིམ། ཧཱུཾ་ཆ་ལྔ་ནཱ་དའི་བར་དུ་ཐིམ། ཨོཾ་ཤུ་ནྱ་ཏཱ་ཛྙཱ་ན་བཛྲ་སྭཱ་བྷཱ་ཝ་ཨཏྨ་ཀོ྅་ཧཾ། ནཱ་ད་ཡང་སྟོང་པར་ཐིམ། ཅུང་ཟད་མཉམ་པར་བཞགསྟོང་པའི་ངང་ལས་རང་སེམས་ནཱ་ད་དམར་སྐྱ་ནམ་མཁར་གནས་པར་གྱུར། དེ་ལས་སྤྲོས་པའི་ཡཾ་ལས་རླུང་གི་དཀྱིལ་འཁོར་སྔོན་པོ་ཟླ་གམ་བ་དན་གྱིས་མཚན་པ། དེའི་སྟེང་དུ་རཾ་ལས་མེའི་དཀྱིལ་འཁོར་དམར་པོ་གྲུ་གསུམ་འབར་བས་མཚན་པ། དེའི་སྟེང་བཾ་ལས་ཆུའི་དཀྱིལ་འཁོར་དཀར་པོ་ཟླུམ་པོ་བུམ་པས་མཚན་པ། དེའི་སྟེང་དུ་ལཾ་ལས་སའི་དཀྱིལ་འཁོར་སེར་པོ་གྲུ་བཞི་རྡོ་རྗེ་ཕྱེད་པས་མཚན་པ། དེའི་སྟེང་དུ་སུཾ་ལས་རི་རབ་རིན་པོ་ཆེ་སྣ་བཞི་ལས་གྲུབ་པ། དེའི་སྟེང་དུ་བཾ་ལས་སྣ་ཚོགས་པདྨའི་ལྟེ་བར། ཧཱུཾ་ལས་སྣ་ཚོགས་རྡོ་རྗེ་ཧཱུཾ་གིས་མཚན་པ། དེའི་ལྟེ་བར་གཡོན་བསྐོར་གྱིས་ཨ་ཨཱཿ ནས་ཨཾ་ཨཿཉིས་འགྱུར་དང༌། གཡས་བསྐོར་གྱིས་ཀ་ཁ་ག་གྷ་ང་༴ ནས་ཧ་ཀྵ་ཌ་ཌྷ་ད་དྷ། ཡ་ལ་ཉིས་འགྱུར་དུ་གནས་པ་རྣམས་ཡོངས་སུ་གྱུར་པ་ལས། ཟླ་བའི་དཀྱིལ་འཁོར་དཀར་ལ་དམར་བའི་མདངས་ཆགས་པ། ཨཱ་ལི་
བཅུ་དྲུག་དང་ཀཱ་ལི་བཞི་བཅུ་ཉིས་འགྱུར་གྱིས་མཚན་པ། དེའི་དབུས་སུ་ནམ་མཁའི་ནཱ་ད་ཡོངས་སུ་ཞུགས་ཏེ་དེ་ལས་ཐིག་ལེ། དེ་ལས་ཟླ་ཚེས། དེ་ལས་ཧ། དེ་ལས་ཞབས་ཀྱུ་སྟེ། ཧཱུཾ་དཀར་པོ་འོད་ཟེར་འཕྲོ་བ། དེ་ལས་འཁོར་ལོ་ལྔའི་ལྷ་ཚོགས་དཔག་ཏུ་མེད་པ་སྤྲོས། སངས་རྒྱས་མཆོད། སེམས་ཅན་གྱི་དོན་བྱས། གདོད་ནས་གྲུབ་པའི་དཀྱིལ་འཁོར་ཐམས་ཅད་ཅན་སྤྱན་དྲངས། ཚུར་འདུས་ཡོངས་སུ་གྱུར་པ་ལས། རྟེན་དང་བརྟེན་པར་བཅས་པའི་དཀྱིལ་འཁོར་ཐམས་ཅད་ཡོངས་སུ་རྫོགས་པར་གྱུར་པ་ནི། གཞལ་མེད་ཁང་གྲུ་བཞི་སྒོ་བཞི་རྩིག་པ་རིམ་པ་ལྔ་དང་ལྡན་པ། ཕ་གུ་དང༌། གསེར་གྱི་སྣམ་བུ་དང༌། དྲ་བྱེད་དང༌། ཤར་བུ་དང༌། མདའ་ཡབ་དང༌། གཟུངས་མ་རྣམས་དང་བཅས་པའི་ཁ་ཁྱེར་ཏེ། མཚན་ཉིད་ཐམས་ཅད་ཡོངས་སུ་རྫོགས་པ། སྒོ་བཞིའི་སྟེང་དུ་ཀ་བས་བཏེག་པའི་རྟ་བབ་ཀྱིས་མཛེས་པ། ནང་གི་ལྷ་སྣམ་ཤར་དཀར། བྱང་ལྗང༌། ནུབ་དམར། ལྷོ་སེར། མཚམས་རྣམས་སུ་བུམ་པ་བརྒྱད་དང་བཅས་པ། དབུས་སྔོ་བའི་སྟེང་དུ་སྐུའི་འཁོར་ལོ་དཀར་པོ་རྩིབས་བརྒྱད་པ་མུ་ཁྱུད་ལ་འཁོར་ལོའི་འཕྲེང་བས་མཚན་པ། དེའི་ལྟེ་བར་གསུང་གི་འཁོར་ལོ་དམར་པོ་རྩིབས་བརྒྱད་པ་མུ་ཁྱུད་ལ་པདྨའི་འཕྲེང་པས་མཛེས་པ། དེའི་ལྟེ་བར་ཐུགས་ཀྱི་འཁོར་ལོ་སྔོན་པོ་རྩིབས་བརྒྱད་པ་མུ་འཁྱུད་རྡོ་རྗེའི་འཕྲེང་བའི་མཚན་པ། དེའི་ལྟེ་བར་བདེ་བ་ཆེན་པོའི་འཁོར་ལོ་སྣ་ཚོགས་པདྨ་
འདབ་མ་བརྒྱད་པོ་སྡོང་བུ་ཅུང་ཟད་དང་བཅས་པ། མུ་ཁྱུད་ལ་གྲི་གུག་གི་འཕྲེང་བས་མཚན་པ། སྟེང་ཐོག་རིམ་པར་ཕུག་པའི་དབུས་ཕྱུང་བུར་གྱུར་པ། ནང་གི་ལྷའི་གནས་རྣམས་སུ་ཉི་མའི་གདན་སུམ་ཅུ་རྩ་གསུམ་མོ། །གཞལ་མེད་ཁང་གི་ཕྱི་རོལ་མཆོད་པའི་བཀོད་པ་ཐམས་ཅད་དང་བཅས་ཤིང༌། པད་འདབ་ཀྱི་ཁོར་ཡུག་བསྲུང་བའི་འཁོར་ལོ་དང་བཅས་པའི་ཕྱི་རོལ། །དུར་ཁྲོད་ཆེན་པོ་བརྒྱད། ཕྱོགས་སྐྱོང་བ་དང༌། ཞིང་སྐྱོང་བ་དང༌། ཤིང་དང༌། མེ་དང༌། སྤྲིན་དང༌། ཆུ་དང༌། རི་དང༌། །མཆོད་རྟེན་དང༌། གྲུབ་པ་ཐོབ་པའི་དཔའ་བོ་དང་རྣལ་འབྱོར་མ་རྣམས་ཀྱིས་ཡོངས་སུ་ཁྱབ་པའོ། །དབུས་ཀྱི་གདན་གྱི་སྟེང་དུ་བཅོམ་ལྡན་འདས་དཔལ་འཁོར་ལོ་བདེ་མཆོག་སྐུ་མདོག་མཐིང་ག་ཞལ་བཞི་ཕྱག་བཅུ་གཉིས་པ། རྩ་བའི་ཞལ་སྔོན་པོ། གཡོན་ལྗང༌། རྒྱབ་དམར། གཡས་སེར། ཞལ་རྣམ་པར་འགྱུར་བ། སྤྱན་གསུམ་དང་ལྡན་ཞིང་མཆེ་བ་གཙིགས་པ། ཕྱག་དང་པོ་གཉིས་ཀྱིས་རྡོ་རྗེ་དང་དྲིལ་བུ་འཛིན་པས་ཡུམ་ལ་འཁྱུད་པ། དེའི་འོག་མ་གཉིས་ཀྱིས་གླང་པོ་ཆེའི་པགས་པ་བརྒྱང་ཏེ་འཛིན་པ། གཡས་ཀྱི་གསུམ་པ་ན་ཌ་མ་རུ། བཞི་པ་ན་དགྲ་སྟ། ལྔ་པ་ན་གྲི་གུག །དྲུག་པ་ན་མདུང་རྩེ་གསུམ་པ་འཛིན་པ། གཡོན་གྱི་གསུམ་པ་ན་ཁ་ཊྭཾ་ག །བཞི་པ་ན་ཁྲག་གིས་གང་བའི་ཐོད་པ། ལྔ་པ་ན་རྡོ་རྗེ་ཞགས་པ། དྲུག་པ་ན་ཚངས་པའི་མགོ་བོ་གདོང་བཞི་པ་འཛིན་པ། ཞབས་གཡས་
བསྐྱང་བས་དུས་མཚན་མ་དང༌། གཡོན་བསྐུམ་པས་འཇིགས་བྱེད་ནག་པོ་མནན་པ། རལ་པའི་ཐོར་ཚུགས་དང༌། སྣ་ཚོགས་རྡོ་རྗེ་དང༌། ཟླ་བ་ཕྱེད་པ་དང༌། ནོར་བུ་རིན་པོ་ཆེ་དང༌། ཐོད་སྐམ་ལྔས་དབུ་བརྒྱན་པ། ཕྱག་རྒྱ་དྲུག་དང་མགོ་བོའི་འཕྲེང་བ་ཅན། སྟག་གི་པགས་པའི་ཤམ་ཐབས་གྲོལ་བ། གར་གྱི་ཉམས་དགུ་དང་ལྡན། ཡུམ་རྡོ་རྗེ་ཕག་མོ་སྐུ་མདོག་དམར་མོ་ཞལ་གཅིག་ཕྱག་གཉིས་སྤྱན་གསུམ་པ། གཡོན་ཐོད་ཁྲག་འཛིན་པའི་ཡབ་ལ་ཁྱུད་ཅིང༌། གཡས་སྡིགས་མཛུབ་དང་བཅས་པའི་རྡོ་རྗེ་འཕྱང་བ། བྱིན་པ་གཉིས་ཀྱིས་ཡབ་ལ་འཁྲིལ་བ། སྐྲ་གྲོལ་ཞིང༌། ཕྱག་རྒྱ་ལྔས་བརྒྱན་པ། ཐོད་སྐམ་གྱི་དོ་ཤལ་ཅན། ཁྲག་ལ་དགྱེས་ཤིང་ཁྲག་འཛག་པ། གཉིས་ཀའང་བསྐལ་པའི་མེ་ལྟ་བུའི་དབུས་ན་བཞུགས་པར་གྱུར། བདེ་ཆེན་འཁོར་ལོའི་འདབ་མ་བརྒྱད་ལ། ཤར་དུ་མཁའ་འགྲོ་མ་ནག་མོ། བྱང་དུ་ལཱ་མ་ལྗང་ཁུ། ནུབ་ཏུ་དུམ་སྐྱེས་མ་དམར་མོ། ལྷོ་རུ་གཟུགས་ཅན་མ་སེར་མོ། ཐམས་ཅད་ཀྱང་བཅོམ་ལྡན་འདས་མའི་རིགས་ལས་བྱུང་བའོ། །མཚམས་བཞིར་བདུད་རྩི་ལྔས་གང་བའི་ཐོད་པ་བཞིའོ། །ཐུགས་ཀྱི་འཁོར་ལོའི་ཤར་རྩིབས་སུ་ཁཎྜ་ཀ་པཱ་ལ་དང་རབ་གཏུམ་མ། བྱང་དུ་མ་ཧ་ཀང་ཀ་ལ་དང༌། གཏུམ་མིག་མ། ནུབ་ཏུ་ཀང་ཀ་ལ་དང་འོད་ལྡན་མ། ལྷོ་རུ་མཆེ་བ་རྣམ་པར་གཙིགས་པ་དང་སྣ་ཆེན་མ། ཤར་ལྷོར་སུ་ར་བཱི་རི་དང་བརྟན་པའི་བློ་ཅན་མ། ལྷོ་ནུབ་ཏུ་འོད་དཔག་མེད་
དང་མིའུ་ཐུང་མ། ནུབ་བྱང་དུ་རྡོ་རྗེ་འོད་དང་ལང་ཀའི་དབང་ཕྱུག་མ། བྱང་ཤར་དུ་རྡོ་རྗེའི་སྐུ་དང་ཤིང་གྲིབ་མ་སྟེ། ཐམས་ཅད་ཀྱང་སྐུ་མདོག་སྔོན་པོའོ། །གསུང་གི་འཁོར་ལོའི་ཤར་རྩིབས་སུ་ཨང་ཀུ་རི་དང་ཨེ་ར་ཝ་རི། བྱང་དུ་རལ་པ་ཅན་དང་འཇིགས་བྱེད་ཆེན་མོ། ནུབ་ཏུ་དཔའ་བོ་ཆེན་པོ་དང་རླུང་གི་ཤུགས་ཅན་མ། ལྷོ་རུ་རྡོ་རྗེ་ཧཱུཾ་མཛད་དང་ཆང་འཐུང་མ། ཤར་ལྷོར་རབ་ཏུ་བཟང་པོ་དང༌། ཤྱཱ་མ་དེ་བཱི། ལྷོ་ནུབ་ཏུ་རྡོ་རྗེ་བཟང་པོ་དང་ཤིན་ཏུ་བཟང་མོ། ནུབ་བྱང་དུ་འཇིགས་བྱེད་ཆེན་མོ་དང་རྟ་རྣ་མ། བྱང་ཤར་དུ་མིག་མི་བཟང་དང་བྱ་གདོང་མ་སྟེ་ཐམས་ཅད་ཀྱང་སྐུ་མདོག་དམར་མོའོ། །སྐུའི་འཁོར་ལོའི་ཤར་རྩིབས་སུ་སྟོབས་པོ་ཆེ་དང་འཁོར་ལོའོ་ཤུགས་ཅན་མ། བྱང་དུ་རིན་ཆེན་རྡོ་རྗེ་དང་ཁཎྜ་རོ་ཧཱི། ནུབ་ཏུ་རྟ་མགྲིན་དང་སྣ་རིངས་མ། ལྷོ་ནུབ་ནམ་མཁའི་སྙིང་པོ་དང་འཁོར་ལོའི་གོ་ཆ་མ། ཤར་ལྷོར་ཧེ་རུ་ཀ་དང་ཤིན་ཏུ་དཔའ་མོ། ལྷོ་ནུབ་ཏུ་པདྨ་གར་གྱི་དབང་ཕྱུག་དང་སྟོབས་ཆེན་མ། ནུབ་བྱང་དུ་རྣམ་པར་སྣང་མཛད་དང་འཁོར་ལོས་བསྒྱུར་མ། བྱང་ཤར་དུ་རྡོ་རྗེ་སེམས་དཔའ་དང་བརྩོན་འགྲུས་ཆེན་པོ་སྟེ་ཐམས་ཅད་ཀྱང་སྐུ་མདོག་དཀར་པོའོ། །དཔའ་བོ་རྣམས་ཕྱག་བཞི་པ་དང་པོ་གཉིས་ཀྱིས་རྡོ་རྗེ་དང་དྲིལ་བུ་འཛིན་པས་ཡུམ་ལ་འཁྱུད་ཅིང༌། འོག་མ་གཉིས་ཀྱིས་ཌཱ་མ་རུ་དང་ཁ་ཊྭཾ་ག་བསྣམས་པ། ལྷག་མ་དཔལ་ཧེ་རུ་ཀ་དང་མཚུངས་ཤིང༌། ཉི་མ་ལ་གཡས་བརྐྱང་གིས་གནས་པའོ། །དཔའ་མོ་རྣམས་རྡོ་རྗེ་ཕག་མོ་དང་མཚུངས་པ་ལས།
གཡས་ན་གྲི་གུག་འཛིན་པའོ། །ཤར་སྒོར་ཁྭ་གདོང་མ་སྔོན་མོ། བྱང་སྒོར་འུག་གདོང་མ་ལྗང་ཁུ། ནུབ་སྒོར་ཁྱི་གདོང་དམར་མོ། ལྷོ་སྒོར་ཕག་གདོང་མ་སེར་མོ། ཤར་ལྷོ་གཤིན་རྗེ་བརྟན་མ་གཡས་སྔོ་གཡོན་སེར་བ། ལྷོ་ནུབ་ཏུ་གཤིན་རྗེ་ཕོ་ཉ་མོ་གཡས་སེར་གཡོན་དམར་བ། ནུབ་བྱང་དུ་གཤིན་རྗེ་མཆེ་བ་མ་གཡས་དམར། གཡོན་ལྗང་བ། བྱང་ཤར་དུ་གཤིན་རྗེ་འཇོམས་པ་གཡས་ལྗང་གཡོན་སྔོ་བ། སྒོ་མཚམས་མ་བརྒྱད་ནི་དྲག་མོའི་གཟུགས་ཅན་རོའི་གདན་ལ་གནས་པ། མ་མོ་བཅུ་གཉིས་པོ་ཐམས་ཅད་ཀྱང་ཞལ་གཅིག་ཕྱག་བཞིའི་དང་པོ་གཉིས་ཀྱིས་ཌཱ་མ་རུ་དང་ཁ་ཊྭཾ་ག འོག་མ་གཉིས་ཀྱིས་གྲི་གུག་དང་ཐོད་པ་འཛིན་པ། མི་མགོ་རློན་པའི་དོ་ཤལ་ཅན། ཕྱག་རྒྱ་ལྔ་དང་ཐོད་སྐམ་གྱི་ཅོད་པན་དང་ལྡན་པ། གཅེར་བུ་གཡས་བརྐྱང་གི་སྟབས་ཀྱིས་བཞུགས་ཤིང༌། དཔའ་བོ་དང་རྣལ་འབྱོར་མ་ཐམས་ཅད་ཀྱི་དཔྲལ་པར་རྡོ་རྗེའི་འཕྲེང་བས་མཚན་པར་གྱུར། གཙོ་བོ་ཐུགས་ཀར་ཡེ་ཤེས་སེམས་དཔའ་ཧེ་རུ་ཀ་སྐུ་མདོག་དཀར་པོ་ཞལ་གཅིག་ཕྱག་གཉིས་པ། ཡུམ་རྡོ་རྗེ་ཕག་མོས་འཁྱུད་པ། དེའི་ཐུགས་ཀར་ཏིང་ངེ་འཛིན་སེམས་དཔའ་ཉི་མ་ལ་གནས་པའི་ཧཱུཾ། ཡང་ན་སྙིང་གར་ཧཱུཾ་དང༌། ལྟེ་བར་ཨཱ་ལི་ཀཱ་ལིའི་འདུ་འཕྲོ་ལས། ཡེ་ཤེས་སེམས་དཔའ་བསྐྱེད་ཅེས་གསུངས་པ་ལྟར་བྱས་ཀྱང་རུང་ངོ༌། །ཨོཾ་ཨཱཿཧཱུཾ་སརྦ་བཱི་རི་ཡོ་གི་ནཱི་ཀཱ་ཡ་ཝ་ཀ་ཙིཏྟ་བཛྲ་སྭ་བྷཱ་ཝ་ཨཏྨ་ཀོ྅་ཧཾ། ཨོཾ་བཛྲ་ཤུདྡྷ་སརྦ་དྷརྨ་བཛྲ་ཤུདྡྷོ྅་ཧཾ། ཡབ་ཡུམ་གཉིས་ཀའི་མིག་གཉིས་ལ་
ཨོཾ་ལས་གཏི་མུག་རྡོ་རྗེ་དཀར་པོ་འཁོར་ལོ་འཛིན་པ་ལ། ཛ་ལས་གཟུགས་རྡོ་རྗེ་མ་མེ་ལོང་འཛིན་པས་འཁྱུད་པ། རྣ་བ་ལ་ཧཱུཾ་ལ་ཞེ་སྡང་རྡོ་རྗེ་ནག་པོ་ལ། ཧཱུཾ་ལས་སྒྲ་རྡོ་རྗེ་མ་སྔོན་མོ་པི་ཝཾ་འཛིན་མས་འཁྱུད་པ། སྣ་ལ་ཏྲཾ་ལས་སེར་སྣ་རྡོ་རྗེ་སེར་པོ་ལ། བཾ་ལས་དྲི་རྡོ་རྗེ་མ་སེར་མོ་དུང་ཆོས་འཛིན་མས་འཁྱུད་པ། ལྕེར་ཨ་ལས་འདོད་ཆགས་རྡོ་རྗེ་དམར་པོ་པདྨ་འཛིན་པ་ལ། ཧོ་ལས་རོ་རྡོ་རྗེ་མ་དམར་མོ་རོ་དྲུག་གིས་གང་བའི་སྣོད་འཛིན་མས་འཁྱུད་པ། དཔྲལ་པར་ཧཾ་ལས་ཕྲག་དོག་རྡོ་རྗེ་ལྗང་ཀུ་ལ་ཁཾ་ལས་རེག་རྡོ་རྗེ་མ་ལྗང་ཁུ་ན་བཟའ་འཛིན་མས་འཁྱུད་པ། སྙིང་གར་ཧཱུཾ་ལས་དབང་ཕྱུག་རྡོ་རྗེ་དཀར་པོ་རྡོ་རྗེ་དཀར་པོ་འཛིན་པ་ལ་རཾ་ལས་ཆོས་དབྱིངས་རྡོ་རྗེ་མ་དཀར་མོ་ཆོས་འབྱུང་འཛིན་མས་འཁྱུད་པ། སྒྲ་རྡོ་རྗེ་མ་ནི་རིན་ཆེན་འབྱུང་ལྡན་གྱི་དབུ་རྒྱན་ཅན། གཞན་དེ་རྣམས་ཡབ་ཡུམ་མཚུངས་པར་རིམ་པས་རྣམ་སྣང༌། མི་བསྐྱོད་པ། རིན་འབྱུང༌། སྣང་མཐའ། དོན་གྲུབ། རྡོར་སེམས་རྣམས་ཀྱིས་དབུ་བརྒྱན་པ། ཡབ་རྣམས་གཡས་བརྐྱང་གི་སྟབས་ཀྱི་གནས་པའོ། །གཏི་མུག་རྡོ་རྗེ་ཟླ་བ་དང༌། གཞན་རྣམས་ཉི་མ་ལ་གནས་པའོ། །ལྟེ་བར་ལཾ་ལས་ལྟུང་བྱེད་མ་སེར་མོ་གཡས་དང་པོ་ན་འཁོར་ལོ་འཛིན་པ། སྙིང་ཁར་བཾ་ལས་གསོད་བྱེད་མ་སྔོན་མོ་རྡོ་རྗེ། མགྲིན་པར་པཾ་ལས་འགུག་བྱེད་མ་དམར་མོ་པདྨ། སྤྱི་བོར་ཏཾ་ལས་པདྨ་གར་གྱི་དབང་ཕྱུག་ལྗང་ཁུ་རལ་གྲི། ཐམས་ཅད་ཀྱང་ལྷག་མ་གསུམ་གྱིས་གྲི་གུག་དང་ཐོད་པ་ཁ་ཊྭཾ་ཀ་འཛིན་པ། གསང་བར་ཁཾ་ལས་པདྨ་
དྲ་བ་ཅན་དུད་ཁ། དུད་དཀར་དམར་བའི་ཞལ་གསུམ་ཕྱག་དྲུག་གིས་གཡས་གསུམ་ན་གྲི་གུག་ཚངས་མགོ་ལྕགས་ཀྱུ། གཡོན་གསུམ་ན་ཐོད་པ་ཁ་ཊྭཾ་ཞགས་པ་འཛིན་པ། རིམ་པས་བྷྲུཾ་བྷྲུཾ་ཧྲིཿཧོ་ཨཾ་རྣམས་ལས་སྐྱེས་པའི་རྣམ་སྣང༌། མི་བསྐྱོད། འོད་དཔག་མེད། དོན་ཡོད་གྲུབ་པ། རིན་ཆེན་འབྱུང་ལྡན་རྣམས་ཀྱིས་ཡང་དག་པར་འཁྱུད་པ། དེ་ཐམས་ཅད་ཀྱང་ཟླ་བ་ལ་གནས་པ། མགོ་བོར་གཟུགས་ཕུང་བུཾ་ལས་རྣམ་པར་སྣང་མཛད་འཁོར་ལོ་འཛིན་པ། གཡོན་ཡུམ་གྱི་དཀུར་བསྟེན་པ། ལྟུང་བྱེད་མས་འཁྱུད་པ། ལྟེ་བར་ཚོར་ཕུང་ཨོཾ་ལས་རྡོ་རྗེ་ཉི་མ་སེར་པོ་གཡས་རིན་པོ་ཆེ་འཕྱང་བ། གསོད་བྱེད་མས་འཁྱུད་པ། མགྲིན་པར་འདུ་ཤེས་ཀྱི་ཕུང་པོ་ཧྲིཿལས་པདྨ་གར་དབང་པདྨ་འཕྱང་བ། འགུགས་བྱེད་མས་འཁྱུད་པ། ལོང་བུར་འདུ་བྱེད་ཀྱི་ཕུང་པོ་ཧོ་ལས་རྡོ་རྗེ་རྒྱལ་པོ་སྔོ་སངས་སྣ་ཚོགས་རྡོ་རྗེ་འཕྱང་བ། པདྨ་གར་དབང་མས་འཁྱུད་པ། གསུམ་ཆར་ཕྱག་གཡོན་ཐུགས་ཀར་བསྒྱིངས་པ། སྙིང་གར་རྣམ་ཤེས་ཀྱི་ཕུང་པོ་ཧཱུཾ་ལས་རྡོ་རྗེ་སེམས་དཔའ་དཀར་པོ་གཡས་རྡོ་རྗེ་ཐུགས་ཀར་གཏོད་པ། གཡོན་དཀུར་བསྟེན་པ། དྲ་བ་ཅན་མས་འཁྱུད་པ། ཕུང་པོ་ཐམས་ཅད་ཀྱི་སྤྱི་ནི་ཧི་ལས་ཧེ་རུ་ཀ་ནག་པོ་གཡས་རྡོ་རྗེ་དང་བཅས་པའི་ས་གནོན་ཅན། གཡོན་བསྒྱིངས་པ་དང་བཅས་པའི་དཀུར་བསྟེན་པ་ལ། གསོད་བྱེད་མས་འཁྱུད་པ། ཐམས་ཅད་ཀྱང་གཡོན་དྲིལ་བུ་བསྣམས་པའོ། །སྙིང་གར་ཨོཾ་ཧཱ་དཀར་པོ་ལས་རྡོ་རྗེ་
སེམས་དཔའ། མགོ་བོར་ན་མ་ཧི་སེར་པོ་ལས་རྣམ་པར་སྣང་མཛད། སྤྱི་གཙུག་ཏུ་སྭཱཧཱ་ཧཱུཾ་དམར་པོ་ལས་པདྨ་གར་གྱི་དབང་ཕྱུག ཕྲག་པ་གཉིས་སུ་བཽ་ཥ་ཊ་ཧེ་ནག་པོ་ལས་མི་བསྐྱོད་པ། མིག་གཉིས་སུ་ཧཱུཾ་ཧཱུཾ་ཧོ་དམར་སེར་ལས་རྡོ་རྗེ་ཉི་མ། ལུས་ཐམས་ཅད་ལ་ཕཊ་ཧཾ་ལྗང་ཁུ་ལས་རྟ་མཆོག །ལྟེ་བར་ཨོཾ་ལཾ་དམར་མོ་ལས་རྡོ་རྗེ་ཕག་མོ། སྙིང་གར་ཧཾ་ཡོཾ་སྔོན་པོ་ལས་གཤིན་རྗེ་མ། ཁར་ཧྲཾ་མོཾ་དཀར་མོ་ལས་རྨོངས་བྱེད་མ། དཔྲལ་པར་ཧྲིཾ་ཧྲིཾ་སེར་མོ་ལས་བསྐྱོད་བྱེད་མ། སྤྱི་གཙུག་ཏུ་ཧཱུཾ་ཧཱུཾ་ལྗང་ཁུ་ལས་སྐྲག་བྱེད་མ། ཡན་ལག་ཐམས་ཅད་ལ་ཕཊ་ཕཊ་དུད་ཁ་ལས་ཙཎྜི་ཀཱ རྡོ་རྗེ་སེམས་དཔའ་གཉིས་དང༌། རྨོངས་བྱེད་མ་ཟླ་བ་དང༌། གཞན་རྣམས་ཉི་མའི་གདན་ལ་གནས་པའོ། །འདི་དག་སྤྱི་དང་འདྲའོ། །ཡབ་ཀྱི་གསང་གནས་ཧཱུཾ་དཀར་པོ་ལས་རྡོ་རྗེ་ནག་པོ། བྱཱཾ་ལས་ནོར་བུ་བྱཱཾ་གྱིས་མཚན་པ། ཡུམ་གྱི་མཁའ་ཨཱཿལས་པདྨ་དམར་པོ་འདབ་མ་གསུམ་པ། དྱཱཾ་ལས་ཟེའུ་འབྲུ་དྱཱཾ་གྱིས་མཚན་པ། ཡབ་ཀྱི་ལྟེ་བ་དང་སྙིང་གར། ཡུམ་གྱི་སྙིང་པོ་དང་ཉེ་སྙིང༌། མགྲིན་པ་དང་མགོ་བོ་ལ་ཡབ་ཀྱི་སྙིང་པོ་དང་ཉེ་སྙིང༌། དེ་བཞིན་དུ་ཡུམ་གྱི་ལྟེ་བ་དང་སྙིང་གར། ཡབ་ཀྱི་སྙིང་པོ་དང་ཉེ་སྙིང༌། མགྲིན་པ་དང་སྤྱི་བོར་ཡུམ་གྱི་སྙིང་པོ་དང་ཉེ་སྙིང༌། ཕན་ཚུན་འཁྱུད་པ་དང་བཙུམ་པས་རྗེས་སུ་ཆགས་པར་བྱས། ཐུགས་ཀའི་འོད་ཟེར་གྱིས་ཡེ་ཤེས་ཀྱི་འཁོར་ལོ་དབང་གི་ལྷ་མཆོད་པའི་ལྷ་མོ་དང་བཅས་པ་སྤྱན་དྲངས། ཕཻཾ་ཛཿཧཱུཾ་བཾ་ཧོ། ཨོཾ་ཡོ་ག་ཤུདྡྷ་སརྦ་དྷརྨཱ་ཡོ་ག་ཤུདྡྷོ྅་ཧཾ།
ལྷ་ཐམས་ཅད་ཀྱི་དཔྲལ་པར་ཨོཾ། མགྲིན་པར་ཨཱཿ ཐུགས་ཀར་ཧཱུཾ། དབང་གི་ལྷ་རྣམས་ལ་རྡོ་རྗེ་རྣལ་འབྱོར་མ་རྣམས་ཀྱིས་མཆོད་པར་གྱུར། རིག་མ་བཅུ་དྲུག་གི་སྔགས་བརྗོད། ཇི་ལྟར་བལྟམས་པ་ཙམ་གྱིས་ནི། །དེ་བཞིན་གཤེགས་ཀུན་ཁྲུས་གསོལ་ལྟར། །ལྷ་ཡི་ཆུ་ནི་དག་པ་ཡིས། །དེ་བཞིན་བདག་གིས་འཁྲུས་བགྱིའོ། །ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏ་ས་མ་ཡ་ཤྲི་ཡེ་ཧཱུཾ་ཧཱུཾ་ཕཊ། ཅེས་གསུང་ཞིང༌། ཐོད་པ་བདུད་རྩིས་གང་བས་དབང་བསྐུར། སྐུ་གང༌། དྲི་མ་དག ཆུ་ལྷག་མ་ཡར་ལུད་པ་ལས། གཙོ་བོ་ལ་མི་བསྐྱོད་པ། ཡུམ་ལ་རྣམ་སྣང༌། སྙིང་པོའི་རྣལ་འབྱོར་མ་བཞི་ལ་རིན་འབྱུང༌། ཐུགས་འཁོར་པ་ལ་མི་བསྐྱོད་པ། གསུང་འཁོར་པ་རྣམས་ལ་འོད་དཔག་མེད། སྐུ་འཁོར་པ་ལ་རྣམ་སྣང༌། དམ་ཚིག་འཁོར་ལོ་པ་ལ་དོན་ཡོད་གྲུབ་པའི་དབུ་རྒྱན། ཕྱི་མཆོད། ནང་མཆོད། གསང་མཆོད་རྣམས་དྲིལ་བུ་ལུས་དཀྱིལ་དང་འདྲ་བ་ལས། ཧེ་རུ་ཀ་དཔལ་རྡོ་རྗེ་རྣལ་འབྱོར་མ། །ལོ་ཨི་དྷ་རི་ཀ་དང་དྲིལ་བུ་པ། །ཛ་ལནྡྷ་རི་པ་དང་དཔེ་མེད་དཔལ། །སཽ་རི་པ་དང་འཇིགས་མེད་འབྱུང་གནས་སྦས། །ལེགས་སྤྱོད་འབྱུང་གནས་མཐའ་ཡས་འབྱུང་གནས་སྦས། །གློ་བོ་ལོ་ཙཱ་འཕགས་པ་ཡེ་རིན་དང༌། །རི་ཁྲོད་ཀུན་འོང་བག་སྟོན་ཚུལ་རྒྱལ་དང༌། །འཇམ་རལ་བློ་བརྟན་རིན་རྒྱལ་ཁྲིམས་ཁང་བ། །བྱམས་པ་ཀུན་དགའ་པདྨ་ཆོས་སྐྱོང་དང༌། །བསོད་ནམས་རྒྱལ་མཆོག་རྗེ་བཙུན་ལྷ་དབང་གྲགས། །ཡང་ན་ཛ་ལནྡྷ་ར་མི་བྱེད།
སྤྱོད་མཛད་ཆོས་ཀྱི་རྡོ་རྗེ་བྱང་ཆུབ་བཟང༌། །ཨ་བྷ་ཡ་དང་ཙ་མི་རྒ་ལོ་ཞང༌། །བྲག་ནག་རི་ཁྲོད་རས་པ་ལྷ་གོང་པ། །དམར་སྟོན་བསོད་འཕེལ་བག་སྟོན་མན་སྔར་བཞིན་ནམ། ཡང་ན། འཇིགས་མེད་བྱུང་གནས་ནཱ་ཡ་ཀ་པ་དང༌། །བི་ཁྱ་ཏ་དང་ཤཱཀྱ་ཤྲཱི་དང༌། །དཱ་ན་ཤཱི་ལ་གཡག་སྡེ་ལོ་ཙཱ་བ། །ཟེ་དམར་བ་དང་ཀུན་མཁྱེན་ཇོ་ནང་པ། །འཆིམས་ཆེན་བློ་བཟང་ཀུན་དགའ་རྒྱལ་མཚན་པ། །གྲུབ་ཤེ་གཞོན་ནུ་དཔལ་དང་ཁྲིམས་ཁང་པ། །བྱས་ཀྱང་རུང་ལ། ཡང་ན་ཞང་འཚལ་པའི་རྗེས་ལ། ཤཱཀྱ་ཡེ་ཤེས་སངས་རྒྱས་སྙིང་པོ་དང༌། །སངས་རྒྱས་གཞོན་ནུ་གསེར་ཁང་སྟེངས་པ་དང༌། །སངས་རྒྱས་རིན་ཆེན་ཤཱཀྱ་འབུམ་པ་དང༌། །ཤཱཀྱ་བསོད་ནམས་དབོན་པོ་ཆོས་བཟང་དང༌། །གྲགས་པ་དོན་མཆོག་བསོད་ནམས་གྲུབ་པ་དང༌། །གྲགས་པའི་མཚན་ཅན་བླ་མ་རྟོགས་ལྡན་པ། །ལྷུན་བདེ་འབྲུག་ཆེན་རྣམ་རྒྱལ་བཀྲ་ཤིས་དང༌། །གྲོལ་མཆོག་རྗེ་དང་ལྷ་དབང་གྲགས་པའི་ཞབས། །ཞེས་པའང་བྱིན་རླབས་དང་ལྡན་པའོ། །རྐང་པ་བརྒྱད་པའི་སྔགས་གཉིས་ཀྱིས་བསྟོད། ཆོས་ཐམས་ཅད་སྟོང་པ་ཉིད་དུ་ཤེས་པའི་སྒོ་ནས། རྗེས་གཞིག་གི་རིམ་པས་དཀྱིལ་འཁོར་འོད་གསལ་དུ་བསྡུས་ལ། སླར་ཡང་རྫོགས་པར་ལྡང་བར་བྱའོ། །དེ་ནས་དག་པ་དྲན་པ་ནི། ལུས་རྗེས་སུ་དྲན་པ་ཉེ་བར་བཞག་པ་ནི། ཞེས་སོགས། རྣལ་འབྱོར་པ་ཀུན་སྤྱོད་བཞིན་དུ་བརྗོད་དོ། །དེ་ནས་བཟླས་པའི་དམིགས་པ་གསལ་བཏབ་ལ། ཇི་ལྟར་བཟླ་བའི་ཚུལ། ལཱུ་ཡི་པ་སྤྱི་དང་མཚུངས་ཤིང༌། འོན་ཀྱང་སྔགས་བཟླ་ཚུལ། ཁ་སྦྱོར་གྱི་བཟླས་པ་ནི་ལུགས་འདི་མི་མཛད་པས། སོ་སོར་བཟླས་པ་བྱའོ།།
མཐར་ཡི་གེ་བརྒྱ་པས་བརྟན་པར་བྱས་ལ། འཁོར་ལོ་ལྔའི་ལྷ་རྣམས་རང་གི་ལུས་ཀྱི་གནས་སོ་སོར་ཐིམ། ལུས་ཀྱི་དཀྱིལ་འཁོར་གྱི་ལྷ་དྲུག་ཅུ་རྩ་གཉིས་གསལ་བར་གྱུར། སྤྱི་བོ་སྤྱི་གཙུག་རྣ་གཡས་ལྟག་པ་དང༌། །རྣ་གཡོན་སྨིན་དབུས་མིག་དང་ཕྲག་པ་དང༌། །མཆན་ཁུང་ནུ་མ་ལྟེ་བ་སྣ་རྩེ་མགྲིན། ཁ་དང་སྙིང་ག་འབྲས་བུས་མཚན་མ་དང༌། །བཤང་ལམ་བརླ་དང་བྱིན་པ་རྐང་སོར་བོལ། །རྐང་མཐེབ་པུས་མོ་ཡུལ་ཆེན་ཉི་ཤུར་གྱུར། །པུ་ཛ་ཨོ་ཨ། གོ་ར་དེ་མ་ཀ་ཨོ་ཏྲི་ཀོ་ཀ་ལ་ཧི། པྲེ་གྲྀ་སཽ་སུ། ན་སི་མ་ཀུ། དེ་དག་ཏུ་གནས་པའི་རྩ་ཉི་ཤུ་རྩ་བཞི་ནི། མི་ཕྱེད་ཕྲ་གཟུགས་རྩེ་མ་གཡོན། །ཐུང་ངུ་རུས་སྦལ་སྒོ་མ་དབང༌། །སྐྱོན་མ་འཇུག་མ་མ་མོ་མཚན། །སིལ་སྦྱིན་ཚ་བ་གཞོལ་མ་རངས། །གཟུགས་ཅན་སྤྱི་མ་རྒྱུ་སྦྱིན་མ། །སྦྱོར་བྲལ་སྡུག་གུ་གྲུབ་མ་འཚེད། །ཡིད་བཟང་སུམ་སྐོར་འདོད་མ་ཁྱིམ། །གཏུམ་མོ་རྣམས་ལ་རིམ་བཞིན་དུ། །རབ་གཏུམ་གཏི་མུག་འོད་ལྡན་སྣ་ཆེན་མ། །བརྟན་བློ་མེའུ་ཐུང་ལས་ཀ་ཤིང་གྲིབ་མ། །ས་སྲུང་འཇིགས་བྱེད་རླུང་ཤུགས་ཆང་འཐུང་མ། །སྔོ་སངས་ཤིན་བཟང་རྟ་རྣ་བྱ་གདོང་མ། །འཁོར་ཤུགས་དུམ་སྐྱེས་ཆང་ཚོང་གོ་ཆ་མ། །དཔའ་མོ་སྟོབས་ཆེན་འཁོར་བསྒྱུར་བརྩོན་ཆེན་མ། ཁམས་ཉི་ཤུ་རྩ་བཞི་དཔའ་བོ་ཉེར་བཞིར་གྱུར་པ་ནི། སོ་སོན་སྐྲ་སྤུ་ལྤགས་པ་དྲི་མ་ཤ །རུས་པ་རྒྱུས་པ་མཁལ་མ་སྙིང་དང་མཆིན། །མིག་འབྲས་མཁྲིས་པ་གློ་བ་རྒྱུ་མ་ཞག །ལྟེ་བ་ཆུ་སོ་འདོམ་པར་བད་
ཀན་རྣག ཁྲག་རྔུལ་ཚིལ་དང་འཆིལ་མ་བརྣབས་ཞེས་ཏེ། །རིམ་བཞིན་ཐོད་དུམ་ཀེང་རུས་ཆེན་པོ་དང༌། །ཀེང་རུས་མཆེ་གཙིགས་ལྷ་དགྲ་འོད་དཔག་མེད། །རྡོ་རྗེ་འོད་དང་རྡོ་རྗེའི་སྐུ་དང་ནི། །མྱུ་གུ་ཅན་དང་རྡོ་རྗེ་རལ་པ་ཅན། །དཔའ་ཆེན་ཧཱུཾ་མཛད་རབ་བཟང་རྡོ་རྗེ་བཟང༌། །འཇིགས་ཆེན་རྟ་རྣ་སྟོབས་ཆེན་རིན་རྡོར་དང༌། །རྟ་མགྲིན་མཁའ་སྙིང་ཁྲག་འཐུང་གར་དབང་ཕྱུག །རྣམ་སྣང་རྡོ་རྗེ་སེམས་དཔའ་རྣམས་སུ་གྱུར། ཁ་དང་རྣ་གཡོན་གསང་བ་སྣ་བུག་གཡས། །རྣ་བ་གཡས་གཡོན་མིག་རྩ་གཡས་གཡོན་ལ། ཁྭ་གདོང་འུག་གདོང་ཁྱི་གདོང་ཕག་གདོང་དང༌། །བརྟན་མ་ཕོ་ཉ་མཆེ་གཙིགས་འཇོམས་མའོ། །སྙིང་མགྲིན་ལྟེ་བ་དཔྲལ་པའི་འཁོར་ལོ་ལ། །མཁའ་འགྲོ་ལཱ་མ་དུམ་སྐྱེས་གཟུགས་ཅན་མ། །སྤྱི་བོ་གསང་བར་ཐིག་ལེ་དཀར་དམར་ནི། །ཧེ་རུ་ཀ་དང་རྡོ་རྗེ་ཕག་མོར་གྱུར། །དེ་ལྟར་ལུས་དཀྱིལ་ལ་རྒྱུན་རིང་དུ་སེམས་གཏད་ཅིང་བསྒོམ་མོ། །དེ་ནས། ཆོས་ཐམས་ཅད་བདེ་བ་ཆེན་པོའི་ལྷག་པར་མོས་ཏེ། གོ་ཆ་གཉིས་བགོས་ལ་ཐུན་མཚམས་ཀྱི་བྱ་བ་ལ་འཇུག་གོ །གཏོར་ཆོག་ནི། སུམྦྷས་བསངས། སྭ་བྷཱས་སྦྱངས། ཡཾ་ལས་རླུང༌། རཾ་ལས་མེ། ཨ་ལས་ཐོད་པ། ཧཱུཾ་བུཾ་ཨཾ་ཧྲཱིཿཁཾ་བྷྲུཾ་ཧཱུཾ་ཧྲཱིཿཏཱཾ་རྣམས་ལས་བདུད་རྩི་ལྔ་དང་ཤ་ལྔ་གྱུར། ཧ་ཧོ་ཧྲིཿཡིག་རྣམས་ཀྱིས་ཁ་དོག་དང་དྲི་དང་རོ་ནུས་པ་ངན་པ་སྦྱངས། རླུང་གཡོས་མེ་སྦར་རྫས་རྣམས་ཞུ་ཞིང་ཁོལ་བས། ཁ་དོག་དམར་སེར་དུ་གྱུར། དེའི་རླངས་པ་ལས་བྱུང་བ་སྟེང་གི་ནམ་མཁའ་ལ་ཧཱུཾ་ལས་ཁ་ཊྭཾ་ག་དཀར་པོ་
བདུད་རྩིའི་རང་བཞིན་ཅན། དེ་ཞུ་ཞིང་ཐིམ་པས་དངུལ་ཆུའི་མདོག་ཅན་རབ་ཏུ་བསིལ་བར་གྱུར། སྟེང་གི་ནམ་མཁའ་ལ་དབྱངས་དང་གསལ་བྱེད་རྣམས་ཡོངས་སུ་གྱུར་པ་ལས་ཧཱུཾ་ཨཱཿཨོཾ་བརྩེགས་པ་ཨོཾ་ལས་བྱུང་བའི་ཟླ་བ་ལ་གནས་པ། དེ་ལས་དཀྱིལ་འཁོར་དཔག་ཏུ་མེད་པ་སྤྲོས། སངས་རྒྱས་ཐམས་ཅད་ཀྱི་བྱང་ཆུབ་ཀྱི་སེམས་དང་རྒྱ་མཚོའི་བཅུད་སོགས་སྣོད་བཅུད་ཀྱི་བདུད་རྩི་ཐམས་ཅད་སྤྱན་དྲངས། འབྲུ་གསུམ་ཟླ་བ་དང་བཅས་པ་ལ་ཐིམ། དེ་ཡང་འོད་དུ་ཞུ་སྟེ་འོག་གི་བདུད་རྩི་དང་འདྲེས། བདུད་རྩིའི་རྒྱ་མཚོ་ཆེན་པོར་གྱུར། ཨོཾ་ཨཱཿཧཱུཾ་ཧ་ཧོ་ཧྲིཿ ལན་མང་དུ་བརྗོད། རང་གི་སྙིང་གའི་ཧཱུཾ་ལས་འོད་ཟེར་འཕྲོས་པས་འཁོར་ལོ་བདེ་མཆོག་ལྷ་དྲུག་ཅུ་རྩ་གཉིས་ཀྱི་དཀྱིལ་འཁོར་བསྲུང་བ་བཀའི་འཁོར་ལོ་ཁྲོ་བོ་བཅུ་དང་བཅས་པ་ཕྱི་རོལ་ཕྱོགས་སྐྱོང་བ་བཅུ་ཁམས་གསུམ་གྱི་སེམས་ཅན་མཐའ་དག་དང་བཅས་པ་ཕེཊ་ཅེས་ཡེ་ཤེས་པ་རྣམས་སྤྱན་དྲངས། ཨོཾ་ཀཀྐ་དྷ་ན། བབྦྷནྡྷ་ན། ཁཁྑ་ད་ན། སརྦ་དུཥྟ་ན་ཧཱ་ན་ཧ་ན། གྷ་གྷ་གྷཱ་ཏ་ཡ། མ་མ་ཤཱིནྟིཾ་ཀུ་རུ་ཧཱུཾ་ཧཱུཾ་ཕཊ་ཕཊ་ཛཿསྭཱཧཱ། ཞེས་འཇིག་རྟེན་པ་རྣམས་བཀུགདེ་ཐམས་ཅད་འོད་གསལ་དུ་བཅུག སྐད་ཅིག་གིས་འཁོར་ལོ་སྡོམ་པའི་སྐུར་བཞེངས་པར་གྱུར། ཨོཾ་ཨཱ་ཧྲཱིཿཔྲ་ཝ་ར་སཏྐ་རཱཏྠཾ་ཨཉྪ་མ་ནཾ་པྲ་ཏིཙྪ་སྭཱཧཱ། པྲོ་ཀྵ་ཎཾ། པཱ་དྱཾ། ཨརྒྷཾ། ཨོཾ་བཛྲ་པུཥྤེ་ཨཱཿཧཱུཾ། སོགས་ཉེར་སྤྱོད་ཕུལ། ཨོཾ་བཛྲ་ཌཱ་
ཀ་ཨི་མཾ་བ་ལིཾ་གྲྀཧྞ་གྲྀཧྞ་ཧཱུཾ་ཕཊ། ཨོཾ་ཛཿཧཱུཾ་བཾ་ཧོཿས་མ་ཡ་སྟཾ། ཧྲྀ་ཤྱ་ཧོཿ ཞེས་ལན་ལྔས་ཧེ་རུ་ཀ་ཡབ་ཡུམ་མོ་བཅུ་གཉིས་དང་བཅས་པ་ལ་ཕུལ། ཨོཾ་ཀ་ར་ཀ་ར་སོགས་ལན་གཅིག་གིས་འཁོར་ལོ་གསུམ་ལ་ཕུལ། ཨོཾ་ཁ་བཛྲ་དྷི་ག་བཛྲ་ཧཱུཾ་ཀཱ་ར་བཛྲ་ཨི་མཾ་བ་ལིཾ་གྲྀཧྞ་མ་མ་ཤིནྟཾ་རཀྵཉྩ་ཀུ་རུ་ཧཱུཾ་ཕཊ། དེ་བཞིན་དུ། བཛྲ་ཙཎྜ་བཛྲ༴ བཛྲ་ན་ལཱརྐ༴ བཛྲོ་ཥྞི་ཥ༴ བཛྲ་ཀུཎྜ་ལི༴ བཛྲ་ཡཀྴ༴ བཛྲ་ཀཱ་ལ༴ བཛྲ་མཧཱ་བཱ་ལ༴ བཛྲ་བྷི་ཥ་ཎ། བཛྲཥྞི་ཥ་ཝརྟི༴ ཨོཾ་བཛྲ་པཱ་ཏཱ་ལ་བཛྲ་ཨི་མཾ་བཱ་ལིཾ་གྲྀཧྞ་གྲྀཧྞ་མ་མ་ཤིནྟཾ་རཀྵ་ཀུ་རུ་ཧཱུཾ་ཕཊ། ཅེས་ཁྲོ་བོ་བཅུ་གཅིག་ལ་ཕུལ། ཨོཾ་ཁ་ཁ་ཁཱ་ཧི་ཁཱ་ཧི་ནས པྲ་ཡཙྪནྟུ་ཧཱུཾ་ཧཱུཾ་ཕཊ་ཕཊ་སྭཱཧཱ། ཞེས་པས་འཇིག་རྟེན་པ་ལ་ཕུལ། འདོད་དོན་གསོལ་བཏབ་སྤྱི་དང་འདྲ། ཧེ་རུའི་ཡིག་བརྒྱའི་མཐར་བཟོད་གསོལ་དང་གཤེགས་གསོལ་རྣམས་བྱའོ། །གལ་ཏེ་མངོན་པར་རྟོགས་པ་བསྡུས་པ་ཉམས་སུ་ལེན་པར་འདོད་ན། ཕུང་ཁམས་སྐྱེ་མཆེད་ཀྱི་དག་པ་བོར་ལ། ཡེ་ཤེས་ཚོགས་བསོགས་ཡན་སྔར་ལྟར་བསྒོམ། བསྲུང་འཁོར་དང་དཀྱིལ་འཁོར་སྐད་ཅིག་གིས་གསལ་བཏབ། གོ་ཆ་གཉིས་བགོ་བ་མན་ཆད་སྔར་ལྟར་བྱས་པས་འགྲུབ་བོ། །ཤིན་ཏུ་བསྡུས་པ་ནི་རྣལ་འབྱོར་རྫོགས་པའི་འཕྲེང་བ་ལྟར་བསྒོམ་པར་བྱའོ། །དེ་ལྟར་བཤད་པར་གྱུར་འདི་ཡང༌། ཕུན་ཚོགས་ཡོན་ཏན་ཚད་མེད་དེ། །གྲུབ་པའི་དགའ་སྟོན་བརྒྱ་ཕྲག་ནི། །བློ་ལྡན་རྣམས་ཀྱིས་རྟག་ཏུ་ཐོབ། །འདི་དངོས་ལཱུ་ཡི་པ་འགྲེལ་ལུགས་ཀྱྀ་སྒྲུབ་ཐབས་མ་ཡིན་ཞིང་ཡིན་པར་ཡང་བཞེད་མོད། ཟུར་དུ་དབང་བསྐུར་བའི་རྒྱུན་མ་ནུབ་པར་ཡོད་པ་དང༌། ཕྱིས་རྒྱ་བལ་རྣམས་ན་འདི་ཁོ་ན་ཆེས་ཆེར་དར་བས་མཁས་གྲུབ་དམ་
པ་མཐའ་ཡས་པའི་ཐུགས་དམ་ཡིན་པས་གལ་ཆེ་བ་དང༌། ལཱུ་ཡི་ལུགས་རྙིང་པ་དང་མི་འདྲ་བར་སྐྱེ་མཆེད་བྱིན་རླབས་དང༌། ལུས་དཀྱིལ་གྱི་དཀྱིལ་ཕྲལ་ཀྱང་ཆོག་པ་སོགས་སློབ་དཔོན་འཇིགས་མེད་ཉིད་ཀྱི་རང་བཞེད་ཀྱང་ཅི་རིགས་ཡོད་པས་ལོགས་སུ་འགྲུབ་ན་ལེགས་པར་མཐོང་ངོ༌། །ལུགས་འདི་ལ་ལོ་ཙཱ་བ་ཏྲེ་བོ་ཤེས་རབ་དཔལ་གྱིས་སྒྲུབ་ཐབས་དང་འཕྲེང་བ་ནས་བཏུས་ཏེ་དཀྱིལ་ཆོག་སྒྱུར་སྒྲུབ་ཐབས་ལ་གཞན་ཡང་དཱ་ན་ཤྲཱི་ལ་དང༌། ཞང་ལོ་གྲུབ་པ་དཔལ་དང༌། ཆག་གི་འགྱུར་ཡོད་བི་བྷུ་ཏིའི་དཀྱིལ་འཁོར་ཆོག་ཀྱང་འདི་དང་སྦྱོར་རྒྱུ་ཡིན། ལར་རྒ་ལོ། སེ་ལོ། ཁ་ཆེ་པཎ་ཆེན། བི་བྷུ་ཏི། ཞང་ལོ། ཆག་ལོ། གློ་བོ་ལོ་ཙཱ། གཡག་སྡེ་ལོ་ཙཱ། ཤུད་གེ་ལོ་ཙཱ། པཎྜི་ཏ་ནག་རིན་ལུགས་སོགས་མང་པོའོ། །སློབ་དཔོན་ཆེན་པོ་འཇིགས་མེད་འབྱུང་གནས་ཀྱི་བཞེད་པ་ལས་འབྱུང་བའི་སྒྲུབ་ཐབས་འཁྲུལ་པ་སྤོང་བའི་ལུགས་ལྟར། དཔལ་འཁོར་ལོ་བདེ་མཆོག་གི་སྒྲུབ་ཐབས་རྣམ་པར་བཀོད་པ་སྟེ། གཉིས་པའོ།། །།༈ ན་མོ་རཏྣ་ཏྲ་ཡཱ་ཡ། སྣ་ཚོགས་སྒེག་པའི་ཉམས་རྒྱས་ཤིང༌། །བཅུ་གཉིས་ཡན་ལག་མ་དང་རོལ། །སྤྲོས་ཀུན་འོད་གསལ་ཆེན་པོར་སྡོམ། །བླ་མ་འཁོར་ལོའི་མགོན་ལ་འདུད། །དབེན་པའི་གནས་སུ་སྟན་བདེ་བ་ལ་འདུག་སྟེ། སྐྱབས་འགྲོ་སེམས་བསྐྱེད་ཧེ་རུ་ཀའི་ཡི་གེ་བརྒྱ་པའི་སྒོམ་བཟླས་བྱེད་ཚུལ་རྣམས་སྤྱི་དང་མཐུན་ལ། སྤྲོ་ཞིང་ནུས་ན་ཕྱི་རོལ་མཆོད་པ་དང་ལག་མཆོད་སྐབས་འདིར་བྱེད་པར་གསུངས་ཤིང༌། དེ་དག་བྱས་ན་དཀྱུས་ཀྱི་ཚོགས་ཞིང་ཚོགས་གསོག་མི་དགོས་ལ་དེ་གཉིས་ཀྱི་བྱེད་ཚུལ་ཡང་བདེ་མཆོག་ལུགས་གཞན་དང་འདྲའོ། །འདིར་སྒོམ་པ་
གཙོ་ཆེ་བའི་དབང་དུ་བྱས་ཏེ། འདི་ལྟར། ཨོཾ་ཤྲཱི་ཧེ་རུ་ཀ་ཧཾ། རང་སྐད་ཅིག་གིས་ཕྱག་གཉིས་པར་གསལ་བའི་ཐུགས་ཀར་ཉི་མ་ལ་གནས་པའི་ཧཱུཾ་སྔོན་པོ། དེ་ལས་འོད་ཟེར་ལྕགས་ཀྱུ་ལྟ་བུ་འཕྲོས་པས། བླ་མ་དང་དཀྱིལ་འཁོར་གྱི་འཁོར་ལོ་མདུན་གྱི་ནམ་མཁར་བཛྲ་ས་མཱ་ཛཿ གང་གི་འཁོར་བའི་ཉེས་པ་ནི། །དྲན་པ་ཙམ་གྱིས་འཇོམས་མཛད་ཅིང༌། །བླ་མེད་བྱང་ཆུབ་ཐོབ་མཛད་པ། །བླ་མའི་ཞབས་ལ་ཕྱག་འཚལ་ལོ། །དཔལ་ལྡན་རྡོ་རྗེ་མཁའ་འགྲོ་མ། །ཞེས་པ་ནས། དེ་སྙེད་རྣམས་ལ་ཕྱག་འཚལ་ལོ། །ཞེས་པའི་བར་གྱིས་ཕྱག་བཙལ། ཨོཾ་ཤྲཱི་བཛྲ་ཧེ་རུ་ཀ་ཨརྒྷཾ་པྲ་ཏཱིཙྪ་སྭཱཧཱ། དེ་བཞིན་དུ། པདྱཱཾ། པུཥྤེ༴ ནས་ཤཔྟའི་བར་གྱིས་མཆོད། དེ་ནས་རྒྱུན་བཤགས་ནི། བྱས་དང་བྱེད་དུ་བཅུག་དང་ཡི་རང་བའི། །སྡིག་པ་མ་ལུས་སྐྱོན་ཀུན་འཇིགས་བྱེད་པའི། །སྤྱན་སྔར་སོ་སོར་བཤགས་ཤིང་སླར་ཡང་ནི། །མི་བྱེད་པ་ཡི་སྡོམ་པ་བླང་བར་བགྱི། །ཉན་ཐོས་རང་རྒྱལ་བླ་མེད་རྒྱལ་བ་དང༌། །རྒྱལ་བའི་སྲས་ཀྱི་དགེ་བ་གང་མཛད་པ། །དེ་དག་ཀུན་ལ་ཡང་དག་ཡིད་རང་ཞིང༌། །བྱང་ཆུབ་ཏུ་ནི་ཡོངས་སུ་བསྔོ་བར་བགྱི། །རྒྱལ་བ་དཀོན་མཆོག་ལ་སོགས་གསུམ་པོ་ལ། །དངོས་པོ་ཀུན་གྱིས་བདག་ནི་སྐྱབས་སུ་མཆི། །བྱང་ཆུབ་མཆོག་གི་སེམས་བསྐྱེད་དེ་བཞིན་དུ། །བླ་ན་མེད་པའི་ལམ་ལ་བརྟེན་པར་བགྱི། །ཞེས་ལན་གསུམ་བྱ། དེ་ནས་ཚད་མེད་བཞི་སྤྱི་དང་མཐུན་པར་བསྒོམ། ཨོཾ་ཤུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཏྨ་ཀོ྅་ཧཾ། སྟོང་པའི་ངང་ལས། ཡཾ་ལས་རླུང་
གི་དཀྱིལ་འཁོར་སྔོན་པོ་ཟླ་གམ་ཡཾ་གྱིས་མཚན་པ། དེའི་སྟེང་དུ་རཾ་ལས་མེའི་དཀྱིལ་འཁོར་དམར་པོ་གྲུ་གསུམ་རཾ་གྱིས་མཚན་པ། དེའི་སྟེང་དུ་བཾ་ལས་ཆུའི་དཀྱིལ་འཁོར་དཀར་པོ་ཟླུམ་པོ་བཾ་གྱིས་མཚན་པ། དེའི་སྟེང་དུ་ལཾ་ལས་སའི་དཀྱིལ་འཁོར་སེར་པོ་གྲུ་བཞི་ལཾ་གྱིས་མཚན་པ། དེའི་སྟེང་སུཾ་ལས་རི་རབ་རིན་པོ་ཆེ་སྣ་བཞི་ལས་གྲུབ་པ། དེའི་སྟེང་དུ་པཾ་ལས་སྣ་ཚོགས་པདྨའི་ལྟེ་བར་ཧཱུཾ་ལས་སྣ་ཚོགས་རྡོ་རྗེའི་ཧཱུཾ་གིས་མཚན་པ་ལས་འོད་འཕྲོས། རྡོ་རྗེའི་ས་གཞི། རྭ་བ། དྲ་བ། གུར་བླ་རེ། མདའི་དྲ་བ། ཕྱི་རོལ་ཀུན་ཏུ་ཡེ་ཤེས་ཀྱི་མེ་འོད་འབར་བའི་བསྲུང་བའི་འཁོར་ལོར་གྱུར། ཨོཾ་མེ་དྷི་ནི་བཛྲི་བྷ་ཝ་བཛྲ་བྷནྡྷ་ཧཱུཾ། ཨོཾ་བཛྲ་པྲ་ཀ་ར་ཧཱུཾ་པཾ་ཧཱུཾ། ཨོཾ་བཛྲ་པཉྩ་ར་ཧཱུཾ་ཡཾ་ཧཱུཾ་ཧཱུཾ། ཨོཾ་བཛྲ་བི་ཏ་ན་ཧཱུཾ་ཁཾ་ཧཱུཾ། ཨོཾ་བཛྲ་ས་རཱ་ཛ་ལ་ཏྲཾ་སཾ་ཏྲཾ། ཨོཾ་བཛྲ་ཛྭ་ལ་ཨ་ན་ལརྐ་ཧཱུཾ་ཧཱུཾ་ཧཱུཾ། བསྲུང་བའི་འཁོར་ལོའི་དབུས་སུ་སྣ་ཚོགས་རྡོ་རྗེའི་ལྟེ་བ་ལ་བྷྲུཾ་ལས་འོད་འཕྲོས་འདུས་ཡོངས་སུ་གྱུར་པ་ལས། རིན་པོ་ཆེ་སྣ་ཚོགས་ལས་གྲུབ་པའི་གཞལ་མེད་ཁང༌། གྲུ་བཞི་སྒོ་བཞི་པ། རྩིག་པ་རིམ་པ་ལྔ་དང་ལྡན་པ། ཕ་གུ་དང༌། དྲ་ཕྱེད་དང༌། ཤར་བུ་དང༌། མདའ་ཡབ་དང་གཟུངས་མ་དང་བཅས་པའི་ཁ་ཁྱེར་ཏེ། མཚན་ཉིད་ཐམས་ཅད་ཡོངས་སུ་རྫོགས་པ། སྒོ་བཞིའི་སྟེང་དུ་ཀ་བས་བཏེགས་པའི་རྟ་བབས་སྣམ་བུ་བཞི་དང་བཅས་པ། ནང་ཀ་བ་བརྒྱད་དང་ལྡན་པ། དབུས་
ཕྱུར་བུར་གྱུར་པའི་ཐོག་ཕུབས་ཅན། ནང་གི་ལྷ་སྣམ་ཤར་དཀར། བྱང་ལྗང༌། ནུབ་དམར། ལྷོ་སེར། མཚམས་རྣམས་སུ་བུམ་པ་བརྒྱད་དང་བཅས་པ། དབུས་སུ་སྣ་ཚོགས་པདྨ་འདབ་མ་བརྒྱད་པའི་ལྟེ་བར་ཉི་མའི་དཀྱིལ་འཁོར་གྱི་གདན། ཕྱོགས་བཞིའི་འདབ་མ་དང༌། སྒོ་མཚམས་བརྒྱད་དུ་རོའི་གདན་དང་བཅས་པ། གཞལ་མེད་ཁང་གི་ཕྱི་རོལ་མཆོད་པའི་བཀོད་པ་ཐམས་ཅད་དང་བཅས་ཤིང༌། པད་འདབ་ཀྱི་འཁོར་ཡུག་བསྲུང་བའི་འཁོར་ལོ་དང་བཅས་པའི་ཕྱི་རོལ་ཏུ་དུར་ཁྲོད་ཆེན་པོ་བརྒྱད། ཕྱོགས་སྐྱོང་བ་དང༌། ཞིང་སྐྱོང་བ་དང༌། ཤིང་དང༌། མེ་དང༌། སྤྲིན་དང༌། ཆུ་དང༌། རི་དང༌། མཆོད་རྟེན་དང༌། གྲུབ་པ་ཐོབ་པའི་དཔའ་བོ་དང་རྣལ་འབྱོར་མ་རྣམས་ཀྱིས་ཡོངས་སུ་གང་བའོ། །དབུས་ཀྱི་གདན་གྱི་སྟེང་དུ་གཡོན་བསྐོར་གྱིས། ཨ་ཨཱ་ནས་ཨཾ་ཨཿ ཞེས་པའི་བར། ཕྲག་གཉིས་ཞུ་བ་ལས་ཟླ་བའི་དཀྱིལ་འཁོར། དེའི་སྟེང་དུ་གཡས་བསྐོར་གྱིས་ཀ་ཁ་ག་ནས་ཧ་ཀྵ་ཡ་ར་ལ་ཝ་ཌ་ཌྷ་ཕྲག་གཉིས་ཞུ་བ་ལས་བྱུང་བའི་ཉི་མའི་དཀྱིལ་འཁོར་དེ་གཉིས་ཀྱི་བར་དུ་ཧཱུཾ་སྔོན་པོ། དེ་ལས་འོད་འཕྲོས། འཕགས་པ་མཆོད། སེམས་ཅན་གྱི་དོན་བྱས། ཚུར་འདུས། དེ་ཐམས་ཅད་གཅིག་ཏུ་འདུས་པ་ཡོངས་སུ་གྱུར་པ་ལས། ལྷ་བཅུ་གསུམ་ཡོངས་སུ་རྫོགས་པར་གྱུར་པ་ནི། དབུས་ཀྱི་གདན་གྱི་སྟེང་དུ་འཁོར་ལོ་བདེ་མཆོག་སྐུ་མདོག་མཐིང་ག་ཞལ་བཞི་ཕྱག་བཅུ་གཉིས་པ།
རྩ་བའི་ཞལ་སྔོན་པོ། གཡོན་ལྗང༌། རྒྱབ་དམར་གཡས་སེར་ཞལ་རྣམ་པར་འགྱུར་བ། སྤྱན་གསུམ་གསུམ་དང་ལྡན་ཞིང༌། མཆེ་བ་གཙིགས་པ། ཕྱག་དང་པོ་གཉིས་ཀྱིས་རྡོ་རྗེ་དང་དྲིལ་བུ་འཛིན་པས་ཡུམ་ལ་འཁྱུད་པ། དེའི་འོག་མ་གཉིས་ཀྱིས་གླང་པོ་ཆེའི་པགས་པ་བརྒྱངས་ཏེ་འཛིན་པ། གཡས་ཀྱི་གསུམ་པ་ན་ཌཱ་མ་རུ། བཞི་པ་ན་དགྲ་སྟ། ལྔ་པ་ན་གྲི་གུག དྲུག་པ་ན་མདུང་རྩེ་གསུམ་པ་འཛིན་པ། གཡོན་གྱི་གསུམ་པ་ན་ཁ་ཊྭཾ་ཀ བཞི་པ་ན་ཁྲག་གིས་གང་བའི་ཐོད་པ། ལྔ་པ་ན་རྡོ་རྗེ་ཞགས་པ། དྲུག་པ་ན་ཚངས་པའི་མགོ་བོ་གདོང་བཞི་པ་འཛིན་པ། ཞབས་གཡས་བརྐྱང་བས་དུས་མཚན་མ་དང༌། གཡོན་བསྐུམ་པས་འཇིགས་བྱེད་ནག་པོ་མནན་པ། རལ་བའི་ཐོར་ཚུགས་དང༌། སྣ་ཚོགས་རྡོ་རྗེ་དང༌། ཟླ་བ་ཕྱེད་པ་དང༌། ནོར་བུ་རིན་པོ་ཆེ་དང༌། ཐོད་པ་སྐམ་པོ་ལྔ་ལྔས་དབུ་བརྒྱན་པ། ཕྱག་རྒྱ་དྲུག་དང་མགོ་བོའི་འཕྲེང་བ་ཅན། སྟག་གི་པགས་པའི་ཤམ་ཐབས་གྲོལ་བ། གར་གྱི་ཉམས་དགུ་དང་ལྡན་པ། ཡུམ་རྡོ་རྗེ་ཕག་མོ་སྐུ་མདོག་དམར་མོ་ཞལ་གཅིག་ཕྱག་གཉིས་སྤྱན་གསུམ་མ། གཡོན་ཐོད་ཁྲག་དང་ཁ་ཊྭཾ་ཀ་འཛིན་པས་ཡབ་ལ་འཁྱུད་ཅིང༌། གཡས་སྡིག་མཛུབ་དང་བཅས་པས་རྡོ་རྗེ་འཕྱར་བ། བྱིན་པ་གཉིས་ཀྱིས་ཡབ་ལ་འཁྲིལ་བ། སྐྲ་གྲོལ་ཞིང་ཕྱག་རྒྱ་ལྔས་བརྒྱན་པ། ཐོད་སྐམ་གྱི་དོ་ཤལ་ཅན། ཁྲག་ལ་དགྱེས་ཤིང་
ཁྲག་འཛག་པ། གཉིས་ཀའང་བསྐལ་པའི་མེ་ལྟ་བུའི་དབུས་ན་བཞུགས་པར་གྱུར། ཤར་གྱི་འདབ་མ་ལ་མཁའ་འགྲོ་མ་ནག་མོ། བྱང་དུ་ལཱ་མ་ལྗང་ཁུ། ནུབ་ཏུ་དུམ་སྐྱེས་མ་དམར་མོ། ལྷོར་གཟུགས་ཅན་མ་སེར་སྐྱ་མཚམས་བཞིར་བུམ་པ་བྱང་ཆུབ་ཀྱི་སེམས་ཀྱིས་གང་བའི་སྟེང་དུ། ཀ་པཱ་ལ་བདུད་རྩིས་གང་བ་དང་བཅས་པ་བཞིའོ། །ཤར་སྒོར་ཁྭ་གདོང་མ་ནག་མོ། བྱང་སྒོར་འུག་གདོང་མ་ལྗང་ཁུ། ནུབ་སྒོར་ཁྱི་གདོང་མ་དམར་མོ། ལྷོ་སྒོར་ཕག་གདོང་མ་སེར་མོ། ཤར་ལྷོར་གཤིན་རྗེ་བརྟན་མ་གཡས་སྔོ་གཡོན་སེར། ལྷོ་ནུབ་ཏུ་གཤིན་རྗེ་ཕོ་ཉ་གཡས་སེར་གཡོན་དམར། ནུབ་བྱང་དུ་གཤིན་རྗེ་མཆེ་བ་མ་གཡས་དམར་གཡོན་ལྗང་བ། བྱང་ཤར་དུ་གཤིན་རྗེ་འཇོམས་མ་གཡས་ལྗང་གཡོན་སྔོ་བ། ཐམས་ཅད་ཀྱང་དྲག་མོའི་གཟུགས་ཅན། ཞལ་གཅིག་ཕྱག་བཞི་སྤྱན་གསུམ་མ། ཕྱག་གཡས་གཉིས་ན་གྲི་གུག་དང་ཌཱ་མ་རུ། གཡོན་གཉིས་ན་ཐོད་པ་དང་ཁ་ཊྭཱཾ་ཀ་འཛིན་པ། གཅེར་བུ་ཕྱག་རྒྱ་ལྔས་བརྒྱན་ཞིང་སྐྲ་གྲོལ་བ། རྡོ་རྗེ་འཕྲེང་བ་དབུ་ལ་བརྒྱན་ཞིང་མི་མགོའི་དོ་ཤལ་ཅན། རོའི་གདན་ལ་གཡོན་བརྐྱང་གི་སྟབས་ཀྱི་གནས་པས་དངོས་གྲུབ་ཐམས་ཅད་སྩོལ་བའོ། །ལྷ་ཐམས་ཅད་ཀྱི་སྤྱི་བོར་ཨོཾ་ལས་འཁོར་ལོ་དཀར་པོ་ཨོཾ་གྱིས་མཚན་པ། མགྲིན་པར་ཨཱཿལས་པདྨ་དམར་པོ་ཨཱས་མཚན་པ། ཐུགས་ཀར་ཧཱུཾ་ལས་རྡོ་རྗེ་སྔོན་པོ་ཧཱུཾ་གིས་མཚན་པ། ཡབ་ཀྱི་སྙིང་
གར་ཨོཾ་ཧ་ལས་རྡོ་རྗེ་སེམས་དཔའ་དཀར་པོ། མགོ་བོར་ན་མ་ཧི་ལས་རྣམ་པར་སྣང་མཛད་སེར་པོ། སྤྱི་གཙུག་ཏུ་སྭཱཧཱ་ཧཱུཾ་ལས། རིན་ཆེན་འབྱུང་ལྡན་ཟེར་ཡང༌། པད་མ་གར་དབང་དམར་པོ། ཕྲག་པ་གཉིས་སུ་བཽ་ཥ་ཊ་ཧེ་ལས་ཧེ་རུ་ཀ་ནག་པོ། མིག་གཉིས་སུ་ཧཱུཾ་ཧཱུཾ་ཧོ་ལས། འོད་དཔག་མེད་ཟེར་ཡང༌། རྡོ་རྗེ་ཉི་མ་མཐིང་ཁ། ཡན་ལག་ཐམས་ཅད་ལ་ཕཊ་ཧཾ་ལས་རྟ་མཆོག་ལྗང་ཁུ་རྣམས་རྡོ་རྗེ་དང་དྲིལ་བུ་འཛིན་པའོ། །ཡུམ་གྱི་ལྟེ་བར་ཨོཾ་བཾ་ལས་རྡོ་རྗེ་ཕག་མོ་དམར་མོ། སྙིང་གར་ཧཾ་ཡོཾ་ལས་གཤིན་རྗེ་མ་སྔོན་པོ། ཁར་ཧྲིཾ་མོ་ལས་རྨོངས་བྱེད་མ་དཀར་མོ། དཔྲལ་པར་ཧྲེཾ་ཧྲིཾ་ལས་བསྐྱོད་བྱེད་མ་སེར་མོ། སྤྱི་གཙུག་ཏུ་ཧཱུཾ་ཧཱུཾ་ལས་སྐྲག་བྱེད་མ་ལྗང་ཁུ། ཡན་ལག་ཐམས་ཅད་ལ་ཕཊ་ཕཊ་ལས་ཙཎྜི་ཀཱ་དུད་ཁ་རྣམས་གྲི་གུག་དང་ཐོད་པ་འཛིན་པ་གྱུར། རང་གི་ཐུགས་ཀའི་ཧཱུཾ་གིས་འོད་ཟེར་གྱིས་ཡེ་ཤེས་ཀྱི་འཁོར་ལོ་སྤྱན་དྲངས། ཕཻཾ་ཛཿཧཱུཾ་བཾ་ཧོཿགཉིས་སུ་མེད་པར་ཐིམ། ཨོཾ་ཡོ་ག་ཤུདྡྷ་སརྦ་དྷརྨ་ཡོ་ག་ཤུདྡྷོ྅་ཧཾ། སླར་ཡང་འོད་འཕྲོས། དབང་གི་ལྷ་རྣམས་སྤྱན་དྲངས། ཕཻཾ། དེ་བཞིན་གཤེགས་པ་ཐམས་ཅད་ཀྱིས་བདག་ལ་དབང་བསྐུར་དུ་གསོལ། ཞེས་གསོལ་བ་བཏབ་པས། ཇི་ལྟར་བལྟམས་པ་ཙམ་གྱིས་ནི། །ལྷ་རྣམས་ཀྱིས་ནི་ཁྲུས་གསོལ་ལྟར། །ལྷ་ཡི་ཆུ་ནི་དག་པ་ཡིས། །དེ་བཞིན་བདག་གིས་སྐུ་ཁྲུས་གསོལ། །ཨོཾ་
སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏ་ས་མ་ཡ་ཤྲཱི་ཧཱུཾ། ཞེས་གསུང་ཞིང་བུམ་པའི་དབང་བསྐུར། སྐུ་གང་དྲི་མ་དགཆུ་ལྷག་མ་ཡར་ལུད་པ་ལས། གཙོ་བོ་ལ་མི་བསྐྱོད་པ། ཡུམ་ལ་རྣམ་སྣང༌། ཕྱོགས་མ་བཞི་ལ་རིན་འབྱུང༌། སྒོ་མ་བཞི་ལ་སྣང་མཐའ། མཚམས་མ་བཞི་ལ་དོན་གྲུབ་ཀྱི་དབུ་རྒྱན་པར་གྱུར། འདུས་པ་ཞབས་ལུགས་ལྟར་མཆོད་ལྷ་མཁའ་ནང་ནས་སྤྲོས་ཏེ། གོང་བཞིན་ཨརྒྒཾ༴ ནས་ཤཔྟའི་བར་གྱིས་མཆོད། ལྷ་རྣམས་ཀྱི་རང་སྔགས་ཀྱི་ནང་མཆོད་མྱང༌། གསང་མཆོད་བྱ། ཁྱོད་ནི་རྣལ་འབྱོར་མ་ཚོགས༴ སོགས་ལ་འཇུག་ཏུ། མགོན་པོ་བདེ་མཆོག་དཔལ་ལྡན་དགྱེས་པས་བཞེངས། །ཞེས་འདོན་པ་སྤོ། རྐང་པ་བརྒྱད་པའི་སྔགས་ཀྱིས་བསྟོད། ནང་མཆོད་གཏོར་མ་ལྟར་བྱིན་གྱིས་རླབས་ནས། འབྲུ་གསུམ་གྱིས་བདུད་རྩི་མྱང༌། འཁོར་ལོའི་དམིགས་པ་གསལ་བཏབ་ལ་བཟླས་པ་བྱ་སྟེ། ཨོཾ་ཤྲཱི་བཛྲ་ཧེ་ཧེ་རུ་རུ་ཀཾ་ཧཱུཾ་ཧཱུཾ་ཕཊ་ཌཱ་ཀི་ནཱི་ཛྭ་ལ་སམྦྷ་ར་སྭཱཧཱ། སྙིང་པོའོ། །ཨོཾ་ཧྲཱི་ཧ་ཧ་ཧཱུཾ་ཧཱུཾ་ཕཊ། ཉེ་བའི་སྙིང་པོའོ། །ཨོཾ་བཛྲ་བཻ་རོ་ཙ་ནི་ཡེ་ཧཱུཾ་ཧཱུཾ་ཕཊ་སྭཱཧཱ། ཡུམ་གྱི་སྙིང་པོའོ། །ཨོཾ་སརྦ་བུདྡྷ་ཌཱ་ཀི་ནཱི་ཡེ་བཛྲ་ཝརྞ་ནཱི་ཡེ་ཧཱུཾ་ཧཱུཾ་ཕཊ་སྭཱཧཱ། ཉེ་བའི་སྙིང་པོའོ། །མ་མོ་བཅུ་གཉིས་ཀྱི་སྔགས་ནི་སྤྱི་དང་མཚུངས་སོ། །རང་གི་སྙིང་གའི་འོད་ཟེར་གྱིས་ཕོག་པའི་སྣང་བ་ཐམས་ཅད་དཀྱིལ་འཁོར་གྱི་འཁོར་ལོར་གྱུར། རྟེན་དང་བརྟེན་པར་བཅས་པའི་དཀྱིལ་འཁོར་ལ་ཐིམ། དཀྱིལ་འཁོར་ཡང་འོད་གསལ་གྱི་དབྱིངས་སུ་ཐིམ། སླར་ཡང་ཕྱག་གཉིས་པའི་རྣམ་པར་ལངས་ཏེ། གོ་ཆ་གཉིས་ཀྱི་རྒྱས་བཏབ་ལ། ཐུན་མཚམས་ལ་འཇུག་གོ་
གཏོར་མ་བྱིན་རླབས་ནི། སུམྦྷས་བསངས། སྭ་བྷཱ་ཝས་སྦྱངས། སྟོང་པའི་ངང་ལས། ཡཾ་ལས་རླུང༌། རཾ་ལས་མེ། ཀཾ་ལས་མི་མགོའི་སྒྱེད་པུ། ཨ་ལས་ཐོད་པ། དེའི་ནང་དུ་གོ་ཀུ་ད་ཧ་ན་ལས་ཤ་ལྔ། བི་ར་ཤུ་མ་མུ་ལས་བདུད་རྩི་ལྔ། དེའི་སྟེང་དུ་ཨོཾ་དང༌། ཨཱཿལས་ཟླ་བ་དང༌། ཧཱུཾ་ལས་རྡོ་རྗེ་ཨཱཿདང་ཧཱུཾ་གིས་མཚན་པ་རྣམས་བརྩེགས་པ། རླུང་གཡོས་མེ་སྦར། རྫས་རྣམས་ཞུ་ཞིང་ཁོལ། འབྲུ་གསུམ་ལས་བདུད་རྩི་བབས། ཨོཾ་གྱི་འོད་ཟེར་གྱིས་ཡེ་ཤེས་ཀྱི་བདུད་རྩི་སྤྱན་དྲངས། འབྲུ་གསུམ་ལ་ཐིམ། དེ་རྣམས་འོག་གི་བདུད་རྩི་ལ་ཐིམ། ཨོཾ་ཨཱཿཧཱུཾ་ཧ་ཧོ་ཧྲཱིཿ ཞེས་བྱིན་གྱིས་བརླབས། རང་གི་སྙིང་གའི་ཧཱུཾ་ལས་འོད་ཟེར་འཕྲོས་དཔལ་འཁོར་ལོ་སྡོམ་པ་བཅུ་གསུམ་གྱི་དཀྱིལ་འཁོར་དམ་ཚིག་ཅན་གྱི་ཚོགས་དང་བཅས་པ་ཕཻཾ། ཞེས་སྤྱན་དྲངས། ཨོཾ་ཨ་རལླི་ཧོཿཛཿཧཱུཾ་བཾ་ཧོཿ བཛྲ་ཌཱ་ཀི་ནཱི་ས་མ་སྟྭཾ་ཌི་ཤྱ་ཧོཿ ལན་བཞིས་དཀྱིལ་འཁོར་ལ་ཕུལ། ཨོཾ་ཁ་ཁ༴ སོགས་ཀྱིས་འཇིག་རྟེན་པ་ལ་ཕུལ། ཕྱི་མཆོད། ནང་མཆོད་བསྟོད་པ་རྣམས་བྱ། ལྷ་ཡི་ཚོགས་རྣམས༴ སོགས་འདོད་དོན་གསོལ་བ་བཏབ། ཡིག་བརྒྱ་བཟླས། ཁྱོད་ཀྱིས་སེམས་ཅན༴ སོགས་དང༌། རྫོགས་སངས་རྒྱས་དང་དེ་ཡི་སྲས༴ སོགས་ཀྱང་སྤྲོ་ན་བརྗོད་ལ། མུཿ ཞེས་གཤེགས། གཙོ་བོ་ནུས་པ་མ་མཆིས༴ སོགས་དང༌། སྔགས་དམན་པ་དང༌། སོགས་དང༌། ལྷ་མོ་ཚད་མ༴ སོགས་བརྗོད། ཚུལ་ཁྲིམས་
ཙནྡན་གྱིས་ལུས་བྱུགས། བསམ་གཏན་གྱིས་ནི་གོས་དག་གྱོན། །བྱང་ཆུབ་ཡན་ལག་མེ་ཏོག་བཀྲམ། །ཇི་ལྟར་བདེ་བར་བཞུགས་སུ་གསོལ། །ཨོཾ་བཛྲ་མཎྜལ་མུཿ དཀྱིལ་འཁོར་རང་ལ་ཐིམ། སྨོན་ལམ་དང་བཀྲ་ཤིས་བརྗོད་དོ། །རྡོ་རྗེ་འཆང་དབང་ཤཱ་བ་རི་པ་དང༌། །མཻ་ཏྲི་ཏི་ཕུ་བ་རེག་རས་ཆུང་པ། །ལོ་སུམ་གླིང་རས་[དགའ་ལྡན་པ་]རྒྱ་རས་བསོད་ནམས་དང༌། ངེས་འབྱུང་[འགིར་བུ་པ་]དར་དང་འོད་ཟེར་རྒྱ་མཚོ་དང༌། །སངས་རྒྱས་རས་པ་སྐྱེས་མཆོག་སྨོན་ལམ་པ། །ཡོན་ཏན་[ལུང་མངས་པ་]བཟང་པོ་ཀུན་དགའ་དཔལ་འབྱོར་དང༌། །ངག་དབང་ཆོས་རྒྱལ་རྣམ་རྒྱལ་བཀྲ་ཤིས་དང༌། །གྲོལ་མཆོག་རྗེ་དང་ལྷ་དབང་གྲགས་པའི་ཞབས། །དེ་རྣམས་ཆོས་རྒྱུད་མང་པོའི་དབང་དུ་བྱས། །དབང་བརྒྱུད་ཙམ་ལ་རྒྱུད་ཚུལ་གཞན་[སེང་གེ་དགུ་]ཡང་ཡོད། །གཉིས་མེད་རྡོ་རྗེའི་དགོངས་པ་བཞིན། །ཉུང་ངུའི་ཚིག་གིས་མདོར་བསྡུས་ནས། །དོན་ཟབ་དོན་ནི་རྒྱ་ཆེ་བ། །བློ་དམན་རྣམས་ལ་གསལ་བར་བྱས། །འཁོར་ལོ་སྡོམ་པ་མཻ་ཏྲི་བཅུ་གསུམ་མའི་སྒྲུབ་ཐབས་ཏེ་གསུམ་པའོ།། །།༈ ན་མོ་གུ་རུ་བཛྲ་ཡོ་གི་ནི་ཙ་རཱ་ཎ་ཡ། མཐའ་དག་རྒྱལ་བ་ཀུན་གྱིས་བདེ་བསྐྱེད་ཡུམ། །ལི་ཁྲིའི་མདངས་འཕྲོག་འཇོ་སྒེག་ལང་ཚོ་ཅན། །མཚར་སྡུག་འོད་འབར་རབ་གྲགས་དཔའ་མོའི་སྐུ། །རྡོ་རྗེ་བཙུན་མོའི་བདག་ལ་དགྱེས་པར་མཛོད། །འདིར་རྡོ་རྗེ་རྣལ་འབྱོར་མ་ལྷ་སུམ་ཅུ་རྩ་བདུན་གྱི་དཀྱིལ་འཁོར་གྱི་སྒྲུབ་ཐབས་ཉམས་སུ་བླང་བར་འདོད་པས། བདེ་བའི་གདན་ལ་ཁ་ནུབ་ཏུ་ཕྱོགས་ནས། སྐྱབས་སེམས་རྡོ་རྗེ་སེམས་དཔའི་སྒོམ་བཟླས་རྣམས་སྔོན་དུ་བཏང་ནས། བཱ་ར་ཧི་ཨ་ཧཾ། རང་
སྐད་ཅིག་གིས་རྡོ་རྗེ་རྣལ་འབྱོར་མར་གྱུར། ཨོཾ་ཨ་ཨཱ ནས་ཨཾ་ཨཿ ཀ་ཁ༴ ནས་ཧ་ཀྵ་ཧཱུཾ་ཧཱུཾ་ཕཊ ལན་གསུམ། ཨཱ་ལི་ཀཱ་ལིའི་འཕྲེང་བ་འོད་ཟེར་ལྔ་ལྡན། ལྟེ་བར་ལན་གསུམ་གཡོན་སྐོར་དུ་འཁྱིལ་བ། དེ་ལས་འཁོར་ལོ་གསུམ་གྱི་ལྷ་ཚོགས་དཔག་ཏུ་མེད་པ་སྤྲོས། བགེགས་རྣམས་བཅོམ་སྟེ་སླར་ཡང་ལྟེ་བའི་སྔགས་འཕྲེང་ལ་ཐིམ། རང་གྀ་མགོ་བོ་ལྟེ་བ། མགྲིན་པ། ལོང་བུ་སྙིང་ཁ། སྤྱི་གཙུག་རྣམས་སུ་རིམ་པས། གཟུགས་ཀྱི་ཕུང་པོ་ཨོཾ་ལས་རྣམ་པར་སྣང་མཛད་དཀར་པོ། ཚོར་བའི་ཕུང་པོ་ཨཾ་ལས་རྡོ་རྗེ་ཉི་མ་སེར་པོ། འདུ་ཤེས་ཀྱིས་ཕུང་པོ་ཧྲིཿལས་པདྨ་གར་དབང་དམར་པོ། འདུ་བྱེད་ཀྱི་ཕུང་པོ་ཧོ་ལས་རྡོ་རྗེ་རྒྱལ་པོ་ལྗང་ཁུ། རྣམ་པར་ཤེས་པའི་ཕུང་པོ་ཧཱུཾ་ལས་རྡོ་རྗེ་སེམས་དཔའ་དཀར་པོ། ཕུང་པོ་ལྔ་ཆར་གྱི་ངོ་བོ་ཧེ་ལས་ཧེ་རུ་ཀ་ནག་པོ། མིག་འབྲས། རྣ་བའི་ཁུང༌། སྣ་བུགལྕེའི་རྩ་བ། དཔྲལ་པ། སྙིང་ག་རྣམས་སུ་རིམ་པས། མིག་ཨོཾ་ལས་གཏི་མུག་རྡོ་རྗེ་དཀར་པོ། རྣ་བ་ཧཱུཾ་ལས་ཞེ་སྡང་རྡོ་རྗེ་ནག་པོ། སྣ་ཏྲཾ་ལས་ཕྲག་དོག་རྡོ་རྗེ་སེར་པོ། ལྕེ་ཨ་ལས་འདོད་ཆགས་རྡོ་རྗེ་དམར་པོ། ལུས་ཁམས་ལས་སེར་སྣ་རྡོ་རྗེ་ལྗང་ཁུ། སྐྱེ་མཆེད་སྤྱི་ཧཱུཾ་ལས་དབང་ཕྱུག་རྡོ་རྗེ་དམར་མོ། ལྟེ་བ། སྙིང་ག །མགྲིན་པ། དཔྲལ་པ། གསང་གནས་རྣམས་སུ་རིམ་པས། ས་ཁམས་ལཾ་ལས་ལྟུང་བྱེད་མ་སེར་མོ། ཆུ་ཁམས་ལཾ་ལས་གསོད་
བྱེད་མ་ནག་མོ། མེ་ཁམས་པཾ་ལས་འགུགས་བྱེད་མ་དམར་མོ། རླུང་ཁམས་ཏཾ་ལས་གར་དབང་མ་ལྗང་ཁུ། མཁའ་ཁམས་ཁཾ་ལས་པདྨ་དྲ་བ་ཅན་མ་དུད་ཁ་རྣམས་སུ་གྱུར། འདི་དག་ཞལ་ཕྱག་རྒྱས་པར་སྒོམ་པར་འདོད་ན། ལཱུ་ཡི་པའི་འགྲེལ་པ་ལཱ་བ་པའི་དང་ཤེས་རབ་བསྲུང་བ་མཛད་པ་ལྟར་ཤེས་པར་བྱ་ལ། བསྡུ་ན་ཡབ་རྣམས་རྡོ་རྗེ་དྲིལ་བུ་དང༌། ཡུམ་རྣམས་གྲི་ཐོད་འཛིན་པའོ། །རང་གི་སྙིང་གར་པཾ་ལས་པདྨ་རཾ་ལས་ཉི་མའི་དཀྱིལ་འཁོར་གྱི་སྟེང་དུ་བཾ་ཡིག་དམར་པོ། དེའི་འོད་ཀྱི་ནང་གི་རྙོགས་པ་བསལ་ཏེ། བླ་མ་དང་དཀྱིལ་འཁོར་གྱི་འཁོར་ལོ། །སངས་རྒྱས་བྱང་ཆུབ་སེམས་དཔའི་ཚོགས་དང་བཅས་པ་སྤྱན་དྲངས། གང་གི་དྲིན་གྱིས་བདེ་ཆེན་ཉིད། སོགས་ནས། སྟོང་ཉིད་སྙིང་རྗེའི་བདག་ཉིད་ཅན། ཁམས་གསུམ་པ་ཡི་ངོ་བོ་ཉིད། །བསྐལ་པའི་མེ་བཞིན་གཟི་བརྗིད་འབར། །རྡོ་རྗེ་ཕག་མོ་ལ་འདུད་དོ། །ཨོཾ་བཱི་ནི་བཛྲི་ཎི་ཧཱུཾ་ཧཱུཾ་ཕཊ། ནས། ཨོཾ་དྷརྨཱ་དྷ་ཏུ་བཛྲ་ནི་ཧཱུཾ་ཧཱུཾ་ཕཊ། ཅེས་རིག་མ་བཅུ་དྲུག་གིས་མཆོད། ཨོཾ་ཨཱཿཧཱུཾ་གིས་ནང་མཆོད་ཕུལ། ཨོཾ་སརྦ་ཐཱ་ག་ཏ་ཨ་ནུ་རཱ་ག་ཎ་བཛྲ་སྭཱ་བྷ་ཝ་ཨཏྨ་ཀོ྅་ཧཾ། ཞེས་གསང་བའི་མཆོད་པས་མཆོད། ཡུམ་གྱི་རྐང་བརྒྱད་ཀྱིས་བསྟོད། བདག་གིས་སྡིག་པ་བགྱིས་པར་གྱུར་པ་མ་ལུས་རྣམས། ཁྱེད་རྣམས་ཀུན་གྱི་མངོན་དུ་སོ་སོར་བཤགས་པར་བགྱི། བླ་མ་ལ་སོགས་རྣམས་ཀྱིས་བསོད་ནམས་བགྱིས་པ་གང༌། དེ་རྣམས་མ་ལུས་ཀུན་ལ་རྗེས་སུ་ཡི་རང་ངོ༌། །བྱ་བ་བྱས་པ་བྱེད་པར་འགྱུར་བ་གང་དག་གི །དགེ་བའི་
དེས་ནི་སེམས་ཅན་མ་ལུས་རྒྱལ་བར་སྨོན། །དཀོན་མཆོག་གསུམ་ལ་ངེས་པར་ཡང་དག་སྐྱབས་སུ་མཆི། །འགྲོ་བ་བདེ་ལ་འགོད་ཕྱིར་ཆོས་ཀྱི་རྒྱལ་པོར་གྱུར། །རྒྱལ་བ་རྣམས་ཀྱི་ལམ་ལ་ཡང་དག་གནས་པར་བགྱི། །མགོན་པོ་བཞེས་ཤིང་བདག་གིས་ལུས་འདི་དབུལ་བ་ལགས། ལན་གསུམ། སེམས་ཅན་ཐམས་ཅད་བདེ་བ་དང་བདེ་བའི་རྒྱུ་དང་ལྡན་པར་གྱུར་ཅིག །ཅེས་སོགས་ཚད་མེད་བཞི་སྤྱི་དང་མཐུན་པར་བྱ། ཨོཾ་སྭཱ་བྷཱ་ཝ་ཤུདྡྷ་སརྦ་དྷརྨ་སྭ་བྷཱ་ཝ་ཨཱཏྨ་ཀོ྅་ཧཾ། ཨོཾ་ཤཱུནྱ་ཏ་ཛྙཱ་ན་བཛྲ་སྭཱ་བྷཱ་ཝ་ཨཏྨ་ཀོ྅་ཧཾ། སྟོང་པའི་ངང་ལས་རང་སེམས་ནཱ་དའི་རྣམ་པར་ལངས་ནས་ནམ་མཁར་གནས་པར་བསམས། འོག་ཏུ་ཡཾ་ལས་རླུང་གི་དཀྱིལ་འཁོར་སྔོན་པོ་ཟླ་གམ། དེའི་སྟེང་དུ་རཾ་ལས་མེའི་དཀྱིལ་འཁོར་དམར་པོ་གྲུ་གསུམ། དེའི་སྟེང་དུ་པཾ་ལས་ཆུའི་དཀྱིལ་འཁོར་དཀར་པོ་ཟླུམ་པོ། དེའི་སྟེང་དུ་ལཾ་ལས་སའི་དཀྱིལ་འཁོར་སེར་པོ་གྲུ་བཞི། དེའི་སྟེང་དུ་སུཾ་ལས་རི་རབ་རིན་པོ་ཆེ་སྣ་བཞི་ལས་གྲུབ་པའོ། །སྡིགས་མཛུབ་བསྐོར་ཞིང་སེ་གོལ་གདབ་པའི་མཚམས་རྔམ་ཕྱོགས་བཞིར་བྱེད་དུ། ཨོཾ་སུམྦྷ་ནི་སུམྦྷ་ཧཱུཾ་ཧཱུཾ་ཕཊ། ནས། བཱི་དྱ་རཱ་ཛ་ཧཱུཾ་ཧཱུཾ་ཕཊ། ཅེས་པའི་བར་བརྗོད། སྔགས་ཀྱི་འོད་ཟེར་ལས་གྲུབ་པའི་རྡོ་རྗེ་ས་གཞི། རྭ་བ་དྲྭ་བ། གུར་བླ་རེ། མདའི་དྲྭ་བ་ཡེ་ཤེས་མེ་དཔུང་འབར་བའི་སྲུང་བའི་འཁོར་ལོ་གྱུར། ཨོཾ་མེ་དྷི་ནི་བཛྲི་བྷ་ཝ་བནྡྷ་ཧཱུཾ། ཨོཾ་བཛྲ་པྲ་ག་ར་ཧཱུཾ་བཾ་ཧཱུཾ། ཨོཾ་བཛྲ་པཉྩ་ར་ཧཱུཾ་ཡཾ་ཧཱུཾ། ཨོཾ་བཛྲ་བི་ཏ་ན་ཧཱུཾ་ཁཾ་ཧཱུཾ་
ཨོཾ་བཛྲ་ས་ར་ཛཱ་ལ་ཏྲཾ་སཾ་ཏྲཾ༌། ཨོཾ་བཛྲ་ཛྭ་ལ་ཨ་ན་ལརྐ་ཧཱུཾ་ཧཱུཾ་ཧཱུཾ། སླར་ཡང་ཕྱོགས་མཚམས་བརྒྱད་དུ་མཚམས་རྔམ་དང་བཅས་པའི། ཨོཾ་སུམྦྷ། སོགས། ཞལ་བཞི་པའི་སྔགས་ལན་གཉིས་བརྗོད། སྔགས་ཀྱི་འོད་ཟེར་ལས་བྱུང་བའི་སྒོ་མཚམས་མ་བརྒྱད་ཁ་དོག་སོ་སོར་ངེས་པ་ཅན། ཐོ་བ་དང་ཕུར་བུ་ཐོགས་པ་སྤྲོས། ཕྱོགས་བཅུའི་བགེགས་རྣམས་ཕྱོགས་སྐྱོང་བཅུའི་རྣམ་པར་བཀུག་སྟེ། ཧཱུཾ་ལས་བྱུང་བའི་ཁྲོན་པ་རྣམས་སུ་བཅུག། དེ་རྣམས་ཀྱི་སྤྱི་བོར་ཕུར་བུས་བཏབ། ཨོཾ་གྷ་གྷ༴ སོགས་ཕུར་བུའི་སྤྱི་བོར་ཐོ་བས་བརྡུངས། ཨོཾ་བཛྲ་མུརྐ་ར༴ སོགས། བགེགས་རྣམས་ཕུར་བུས་བཏབ་པས་འོད་གསལ་ཏུ་ཐིམ་པར་གྱུར། སྲུང་བའི་འཁོར་ལོའི་དབུས་སུ་ཆོས་འབྱུང་དཀར་པོའི་ནང་དུ་སྣ་ཚོགས་པདྨ་དང་སྣ་ཚོགས་རྡོ་རྗེ་ལ་གནས་པའི་བྷྲུཾ་ལས་རྣམ་པར་སྣང་མཛད་ཤེས་རབ་མ་དང་བཅས་པ། དེ་ཡོངས་སུ་གྱུར་པ་ལས་རིན་པོ་ཆེ་སྣ་ཚོགས་ལས་གྲུབ་པའི་གཞལ་མེད་ཁང༌། གྲུ་བཞི། སྒོ་བཞི། རྩིག་པ་རིམ་པ་ལྔ་དང་ལྡན་པ། ཕ་གུ་དང༌། བྲེ་ཕུལ་དང༌། གསེར་གྱི་སྣམ་བུ་དང༌། དྲྭ་ཕྱེད་དང༌། ཤར་བུ་དང་མདའ་ཡབ་དང་གཟུངས་མ་རྣམས་དང་བཅས་པའི་ཁ་ཁྱེར་ཏེ། མཚན་ཉིད་ཐམས་ཅད་ཡོངས་སུ་རྫོགས་པ། སྒོ་བཞིའི་མདུན་དུ་ཀ་བས་བཏེགས་པའི་རྟ་བབས་ཀྱིས་མཛེས་པ། ནང་གི་ལྷ་སྣམ་ཤར་
དཀར་བྱང་ལྗང༌། ནུབ་དམར། ལྷོ་སེར། མཚམས་རྣམས་སུ་བུམ་པ་བརྒྱད་དང་བཅས་པ། དབུས་སྔོ་བའི་སྟེང་དུ་སྐུའི་འཁོར་ལོ་དཀར་པོ་རྩིབས་བརྒྱད་པ། མུ་ཁྱུད་ལ་འཁོར་ལོའི་འཕྲེང་བས་མཚན་པ། དེའི་ལྟེ་བར་གསུང་གི་འཁོར་ལོ་དམར་པོ་རྩིབས་བརྒྱད་པ་མུ་ཁྱུད་ལ་པདྨའི་ཕྲེང་བས་མཛེས་པ། དེའི་ལྟེ་བར་ཐུགས་ཀྱི་འཁོར་ལོ་སྔོན་པོ་རྩིབས་བརྒྱད་པ་མུ་ཁྱུད་ལ་རྡོ་རྗེ་འཕྲེང་བས་མཚན་པ། དེའི་ལྟེ་བར་པཾ་ལས་བདེ་བ་ཆེན་པོའི་འཁོར་ལོ་སྣ་ཚོགས་པདྨ་འདབ་མ་བརྒྱད་པ། སྡོང་བུ་ཅུང་ཟད་དང་བཅས་པ་མུ་ཁྱུད་ལ་གྲི་གུག་གི་འཕྲེང་བས་བསྐོར་བ། སྟེང་ཐོག་རིམ་པར་ཕུག་པའི་དབུས་ཕྱུར་བུར་གྱུར་པ། ནང་གི་ལྷའི་གནས་རྣམས་སུ་ཉི་མའི་གདན་སུམ་ཅུ་རྩ་གསུམ་མོ། །གཞལ་མེད་ཁང་གི་ཕྱི་རོལ་མཆོད་པའི་བཀོད་པ་ཐམས་ཅད་དང་བཅས་ཤིང༌། པད་འདབ་ཀྱི་ཁོར་ཡུག་སྲུང་བའི་འཁོར་ལོ་དང་བཅས་པའི་ཕྱི་རོལ་དུ་དུར་ཁྲོད་ཆེན་པོ་བརྒྱད། ཕྱོགས་སྐྱོང་བ་དང༌། ཞིང་སྐྱོང་བ་དང༌། ཤིང་དང༌། མེ་དང་སྤྲིན་དང༌། ཆུ་དང༌། རི་དང༌། མཆོད་རྟེན་དང༌། གྲུབ་པ་ཐོབ་པའི་དཔའ་བོ་དང༌། རྣལ་འབྱོར་མ་རྣམས་ཀྱིས་ཡོངས་སུ་ཁྱབ་པའོ། །བདེ་ཆེན་འཁོར་ལོའི་ལྟེ་བར་ཉི་མའི་དཀྱིལ་འཁོར་གྱི་སྟེང་དུ། ཨ་ཨཱ༴ ནས་ཨཾ་ཨཱཿ ཕྲག་གཉིས་ལ་ཟླ་བ། དེའི་སྟེང་དུ་ཀ་ཁ་ནས། ཧ་ཀྵ་ཌ་ཌྷ། ད་དྷ། ཡ་ལ་ཕྲག་གཉིས་ཞུ་བ་ལས། ཉི་མའི་དཀྱིལ་འཁོར། དེ་གཉིས་ཀྱི་བར་དུ་བཾ་
ལས་རྡོ་རྗེའི་ལྟེ་བར་བཾ་གྱིས་མཚན་པ། དེ་ལས་འོད་ཟེར་འཕྲོས་སངས་རྒྱས་ཐམས་ཅད་མཆོད། སེམས་ཅན་ཐམས་ཅད་ཀྱི་དོན་བྱས། སླར་འདུས་ཏེ་བཾ་ལ་ཐིམ། དེ་ཐམས་ཅད་ཡོངས་སུ་གྱུར་པ་ལས། ལྷ་ཐམས་ཅད་ཡོངས་སུ་རྫོགས་པར་གྱུར་པ་ནི། དབུས་ཀྱི་གདན་གྱི་སྟེང་དུ་རང་ཉིད་རྗེ་བཙུན་རྡོ་རྗེ་རྣལ་འབྱོར་མ་སྐུ་མདོག་པདྨ་རཱ་ག་ལྟར་དམར་བ། ལོ་བཅུ་དྲུག་ལོན་པ་ལྟར་ལང་ཚོ་ལ་བབ་ཅིང༌། བསྐལ་པའི་མེ་ལྟར་གཟི་བརྗིད་འབར་བ། དྲག་མོ་ཆེན་མོ་ཤིན་ཏུ་འཇིགས་པའི་སྐུ་ཅན་རྗེས་ཆགས་བདེ་བའི་ཉམས་ཀྱིས་མྱོས་པའི་སྐུ་ཅན། ཞལ་གཅིག་ཕྱག་གཉིས་དམར་ཞིང་བཀྲ་ལ་ཟླུམ་པའི་སྤྱན་གསུམ་གཡོ་བ། ཕྱག་གཡས་རྡོ་རྗེས་མཚན་པའི་གྲི་གུག་གམ་རྡོ་རྗེ་མཐུར་དུ་སྡིགས་ཤིང༌། སྡང་བ་དང་གདུག་པ་ཐམས་ཅད་འཇོམས་པ། གཡོན་པ་ཐོད་པ་ཁྲག་གིས་གང་བ་སྟེང་གི་ཕྱོགས་སུ་བཟུང་ནས་ཞལ་དུ་གསོལ་བ། མཆན་ཁུང་གཡོན་པར་ཁ་ཊྭཾ་ག ཐབས་ཀྱི་རང་བཞིན་ཅན་ལ། ཌཱ་མ་རུ་དང་དྲིལ་བུ་གཡེར་ཁ་དང༌། འཕན་ལྕེ་གསུམ་པ་རྣམས་འཕྱང་བཞིན་དུ་བསྣམས་པ། དབུ་སྐྲ་ནག་པོ་སིལ་བུར་གྲོལ་བ། ཞལ་རྣམ་པར་འགྱུར་ཞིང་མཆེ་བ་གཙིགས་པ། མི་མགོ་སྐམ་པོ་ལྔའི་དབུ་རྒྱན་དང༌། རློན་པ་ལྔ་བཅུའི་དོ་ཤལ་ཅན་གཅེར་བུ་རུས་པའི་རྒྱན་ལྔས་བརྒྱན་པ། དམར་ཆེན་གྱི་བཏུང་བས་མྱོས་ཤིང༌། སི་ཧླའི་རྒྱུན་འབབ་པ། ཞབས་གཡོན་བསྐུམས་པས་འཇིགས་བྱེད་ནག་པོ་དང༌། གཡས་བརྐྱང་བས་དུས་མཚན་
མ་དམར་མོ་མནན་པ། ཡེ་ཤེས་ཀྱི་མེ་འབར་བའི་དབུས་ན་བཞུགས་པའོ། །སྙིང་པོ་དང་ཉེ་སྙིང་ཚར་གཅིག་བརྗོད། འདབ་མ་བརྒྱད་ལ། ཤར་དུ་མཁའ་འགྲོ་མ་ནག་མོ། བྱང་དུ་ལཱ་མ་ལྗང་ཁུ། ནུབ་ཏུ་དུམ་སྐྱེས་མ་དམར་མོ། ལྷོར་གཟུགས་ཅན་མ་སེར་མོ། མཚམས་བཞིར་ཁུ་བ་དང༌། ཁྲག་དང༌། བདུད་རྩི་ལྔ་དང༌། སྒྲོན་མ་ལྔས་གང་བའི་ཐོད་པ་བཞིའོ། །དེའི་ཕྱི་རོལ་ཏུ་ཐུགས་ཀྱི་འཁོར་ལོའི་ཤར་རྩིབས་པུ་ལི་ར་མ་ལ་ཡར་རབ་གཏུམ་མ། བྱང་རྩིབས་ཛ་ལནྡྷ་རར་གཏུམ་མིག་མ། ནུབ་ཕྱོགས་ཨོ་ཌི་ཡ་ནར་འོད་ལྡན་མ། ལྷོ་ཕྱོགས་ཨརྦུ་ཏར་སྣ་ཆེན་མ། ཤར་ལྷོ་གོ་དཱ་བ་རིར་དཔའ་བློ་མ། ལྷོ་ནུབ་རསྨི་ཤྭ་རར་མིའུ་ཐུང་མ། ནུབ་བྱང་དེ་ཝི་ཀོ་ཊར་ལང་ཀའི་དབང་ཕྱུག་མ། བྱང་ཤར་མ་ལ་བར་ཤིང་གྲིབ་མ་སྟེ། ཐམས་ཅད་ཀྱང་སྐུ་མདོག་སྔོན་མོའོ། །དེའི་ཕྱི་རོལ་དུ་གསུང་གི་འཁོར་ལོའི་ཤར་རྩིབས་ཀཱ་མ་རུ་པར་ས་བསྲུངས་མ། བྱང་རྩིབས་ཨོ་ཊེར་འཇིགས་བྱེད་ཆེན་མོ། ནུབ་རྩིབས་ཏྲི་ཤ་ཀུ་ནེར་རླུང་གི་ཤུགས་ཅན་མ། ལྷོ་རྩིབས་ཀོ་ས་ལར་ཆང་འཐུང་མ། ཤར་ལྷོ་ཀ་ལིང་ཀར་སྔོ་སངས་ལྷ་མོ། ལྷོ་ནུབ་ལམྦ་ཀར་ཤིན་ཏུ་བཟང་མོ། ནུབ་བྱང་ཀིཉྩིར་རྟ་རྣ་མ། བྱང་ཤར་ཧི་མ་ལ་ཡར་བྱ་གདོང་མ་སྟེ། ཐམས་ཅད་ཀྱང་སྐུ་མདོག་དམར་མོའོ། །དེའི་ཕྱི་རོལ་དུ་སྐུའི་འཁོར་ལོའི་ཤར་རྩིབས་པྲེ་ཏ་པུ་རིར་འཁོར་ལོའི་ཤུགས་ཅན་མ། བྱང་རྩིབས་གྲྀ་ཧཱ་ཧཱ་དེ་ཝ་ཁཎྜ་རོ་ཧི། ནུབ་རྩིབས་
སཽ་རཥྟར་ཤོ་ན་ཊི་ནི། ལྷོ་རྩིབས་སུ་ཝརྞ་དྭི་པར་འཁོར་ལོའི་གོ་ཆ་མ། ཤར་ལྷོ་ན་ག་རར་ཤིན་ཏུ་དཔའ་མོ། ལྷོ་ནུབ་སིནྡྷུར་པདྨ་གར་གྱི་དབང་ཕྱུག ནུབ་བྱང་མ་རུར་རྣམ་པར་སྣང་མཛད། བྱང་ཤར་ཀུ་ལི་ཏར་བརྩོན་འགྲུས་ཆེན་མོ་སྟེ། ཐམས་ཅད་ཀྱང་སྐུ་མདོག་དཀར་མོའོ། །རྣལ་འབྱོར་མ་ཉི་ཤུ་རྩ་བཞི་པོ་དེ་རྣམས་ཞལ་གཅིག་ཕྱག་གཉིས་གྲི་གུག་དང་ཐོད་པ་འཛིན་པའོ། །དམ་ཚིག་འཁོར་ལོའི་ཤར་སྒོར་ཁྭ་གདོང་མ་ནག་མོ། བྱང་སྒོར་འུག་གདོང་མ་ལྗང་ཁུ། ནུབ་སྒོར་ཁྱི་གདོང་མ་དམར་མོ། ལྷོ་སྒོར་ཕག་གདོང་མ་སེར་མོ། ཤར་ལྷོར་གཤིན་རྗེ་བརྟན་མ་གཡས་སྔོ་གཡོན་སེར་བ། ལྷོ་ནུབ་ཏུ་གཤིན་རྗེ་ཕོ་ཉ་གཡས་སེར་གཡོན་དམར་བ། ནུབ་བྱང་དུ་གཤིན་རྗེ་མཆེ་བ་མ་གཡས་དམར་གཡོན་ལྗང་བ། བྱང་ཤར་དུ་གཤིན་རྗེ་འཇོམས་མ་གཡས་ལྗང་གཡོན་སྔོ་བ་སྟེ། སྒོ་མཚམས་མ་བརྒྱད་མི་རོའི་གདན་ལ་གནས་པ། མ་མོ་བཅུ་གཉིས་པོ་ཐམས་ཅད་ཤིན་ཏུ་དྲག་མོའི་གཟུགས་ཅན་ཞལ་གཅིག་ཕྱག་བཞི་སྤྱན་གསུམ་མ། ཕྱག་གཡས་གཉིས་ན་གྲི་གུག་དང་ཌཱ་མ་རུ། གཡོན་གཉིས་ན་ཐོད་པ་དང་ཁ་ཊྭཾ་ག་འཛིན་པ། རྣལ་འབྱོར་མ་སོ་དྲུག་པོ་ཐམས་ཅད་གཅེར་བུ་ཕྱག་རྒྱ་ལྔས་བརྒྱན་ཞིང་སྐྲ་གྲོལ་བ་རྡོ་རྗེའི་འཕྲེང་བས་དབུ་ལ་བརྒྱན་ཞིང༌། མི་མགོའི་ཅོད་པན་དང་དོ་ཤལ་ཅན། གཡས་བརྐྱང་གི་སྟབས་ཀྱིས་གནས་པས་དངོས་གྲུབ་ཐམས་ཅད་སྩོལ་བའོ། །དེ་ལྟ་བུའི་སྒྲུབ་ཐབས་སྙེ་མའི་ལུགས་ཡིན་ལ། ཨུ་མ་པ་ཏི་དཏྟ་ལྟར་ན་མངོན་བྱང་ལྔ་ལས། རྟེན་བརྟེན་
པ་དུས་གཅིག་ཏུ་བསྐྱེད་པར་མཛད་པ་ནི། མ་མོ་བཅུ་གཉིས་ཕྱག་བཞི་པའི་ཕྱོགས་ལ་ལེགས་པའང་ཡིན་ལ། འཁོར་ལོ་གསུམ་གྱི་རྣལ་འབྱོར་མ་རྣམས་ཀྱང་མ་མོ་བཅུ་གཉིས་དང་མཚུངས་པར་ཕྱག་བཞི་མ་མཛད་དོ། །འོན་ཀྱང་འདི་ནི་འཁོར་ལོ་གསུམ་གྱི་ལྷ་ཡུམ་རྐྱང་དུ་བྱེད་ཕྱིན་ཡབ་དང་ཕྱག་མཚན་གྲངས་མཐུན་ན་ལེགས་པར་དགོངས་པ་ཡིན་ཀྱང་དེ་ལྟར་ན་དང་པོ་གཉིས་ཀྱང་རྡོ་དྲིལ་འཛིན་དགོས་པར་འགྱུར་རམ་ཅི། སྤྱིར་འཁོར་ཐམས་ཅད་ཀྱང་ཕྱག་གཉིས་སུ་བྱས་ནའང་ལེགས་པ་ཡིན་ནོ། །ཨོཾ་ཌཱ་ཀི་ནཱི་ཡེ་ཧཱུཾ་ཧཱུཾ་ཕཊ། ཅེས་པ་ནས། ཨོཾ་ཡ་མ་མ་ཐ་ནཱི་ཡེ་ཧཱུཾ་ཧཱུཾ་ཕཊ་ཀྱྀ་བར་རྣམས་ཚར་གཅིག་བརྗོད་པར་བྱའོ། །རྐང་མཐིལ་རླུང༌། སུམ་མདོ་མེ། ལྟོ་བ་ཆུ། སྙིང་ག་ས། སྒལ་ཚིགས་རི་རབ། ལུས་ངག་ཡིད་གསུམ་འཁོར་ལོ་གསུམ། ལུས་འདོམ་གང་གྲུ་བཞི་གཞལ་མེད་ཁང་གྲུ་བཞི། རྐང་བརྒྱད་ནི་ཀ་བ་བརྒྱད། སྤྱི་བོའི་རྩ་འདབས་སོ་གཉིས་པདྨ། དེར་རྒྱུ་བའི་རླུང་དང་ཐིག་ལེ། དབྱངས་དང་གསལ་བྱེད་ཀྱྀ་ངོ་བོ། སྙིང་ག་ནས་འབྱུང་བ་བཞི་རྒྱུ་བའི་རྩ་རྣམས་སྙིང་པོའི་རྣལ་འབྱོར་མ་བཞི་མཆོད་པའི་རྩ་བཞི་ལ་ཐོད་པ་བཞི། སྤྱི་བོ་ལ་སོགས་པའི་གནས་རྣམས་སུ། པུ་ཛ་ཨོ་ཨ། གོ་ར་དེ་མ། ཀ་ཨོ་ཏྲི་ཀོ ཀ་ལ་ཀ་ཧི། པྲེ་གྲྀ་སཽ་སུ། ན་སི་མ་ཀུ་རྣམས་ཡོངས་སུ་གྱུར་པ་ལས། སྤྱི་བོར་རབ་གཏུམ་མ། སྤྱི་གཙུག་ཏུ་གཏུམ་མིག་མ། རྣ་བ་གཡས་སུ་འོད་ལྡན་མ། ལྟག་པར་སྣ་ཆེན་མ། རྣ་བ་གཡོན་དུ་དཔའ་བོའི་བློ་མ། སྨིན་མཚམས་སུ་མིའུ་ཐུང་མ། མིག་གཉིས་སུ་ལང་ཀའི་
དབང་ཕྱུག་མ། དཔུང་པ་གཉིས་སུ་ཤིང་གྲིབ་མ། མཆན་ཁུང་གཉིས་སུ་ས་བསྲུང་མ། ནུ་མ་གཉིས་སུ་འཇིགས་བྱེད་ཆེན་པོ་ལྟེ་བར་རླུང་ཤུགས་མ། སྣ་རྩེར་ཆང་འཐུང་མ། ཁར་སྔོ་སངས་ལྷ་མོ། མགྲིན་པར་ཤིན་ཏུ་བཟང་མོ། སྙིང་ཁར་རྟ་རྣ་མ། འདོམས་བར་ལ་བྱ་གདོང་མ། མཚན་མ་ལ་འཁོར་ལོའི་ཤུགས་ཅན་མ། བརླ་གཉིས་སུ་ཤཽཎྜི་ནི། བྱིན་པ་གཉིས་སུ་འཁོར་ལོའི་གོ་ཆ་མ། སོར་མོ་བརྒྱད་ལ་ཤིན་ཏུ་དཔའ་མོ། བོལ་གོང་གཉིས་སུ་སྟོབས་ཆེན་མ། མཐེ་བོང་གཉིས་སུ་འཁོར་ལོས་བསྒྱུར་མ། པུས་མོ་གཉིས་ལ་བརྩོན་འགྲུས་ཆེན་མོ། ལྕེའི་རྩ་བར་ཁྭ་གདོང་མ། ལྟེ་བར་འུག་གདོང་མ། རྟགས་ཀྱི་སྒོར་ཁྱི་གདོང་མ། བཤང་སྒོར་ཕག་གདོང་མ། མཛོད་པུར་གཤིན་རྗེ་བརྟན་མ། རྣ་བར་ཕོ་ཉ་མ། མིག་ལ་མཆེ་བ་མ། སྣ་བུག་ཏུ་འཇོམས་མའོ། །དེ་ནས་དག་པ་དྲན་པ་ནི། ལུས་དང་ཚོར་བ་དང་ཆོས་དང་༴ ཞེས་པ་ནས། འཇོམས་མ་བཞིའོ། །ཞེས་པའི་བར་བརྗོད་དགོས་པ་ལས། ཡང་དག་པའི་ཏིང་ངེ་འཛིན་ནི་དཔལ་རྡོ་རྗེ་ཕག་མོའོ། །ཞེས་བརྗོད། རང་གི་མིག་ཏུ་བྷྲཱུཾ། རྣ་བར་ཧཱུཾ། སྣ་ལ་ཁཾ། ལྕེ་ལ་ཨཱཿ དཔྲལ་པར་ཧཾ། སྙིང་གར་ཧ། ལྟེ་བར་ཨོཾ་བཾ་དམར་མོ༴ ནས། ཙཎྜི་ཀཱའི་ངོ་བོའི་བར་དཔྲལ་པར་ཨོཾ། མགྲིན་པར་ཨཱཿ ཐུགས་ཀར་ཧཱུཾ། སྙིང་གའི་དབུས་སུ་པད་ཉིའི་སྟེང་དུ། རྡོ་རྗེའི་ལྟེ་བར་བཾ། ཐུགས་ཀའི་འོད་ཟེར་གྱིས་ཡེ་ཤེས་ཀྱི་འཁོར་ལོ་དང་དབང་གི་ལྷ་མཆོད་པའི་ལྷ་མོ་དང་བཅས་པ་སྤྱན་དྲངས། ཕཻཾ། ཨོཾ་བཱི་ནི་བཛྲི་ནི་ཧཱུཾ་ཧཱུཾ་ཕཊ་སོགས་ཀྱིས་
མཆོད། ཛཿཧཱུཾ་བཾ་ཧོཿ ཨོཾ་ཡོ་ག་ཤུདྡྷ་སརྦ་དྷརྨཿཡོ་ག་ཤུདྡྷོ྅་ཧཾ། ཞེས། དེ་བཞིན་གཤེགས་པ་རྣམས་ཀྱིས་བདག་ལ་དབང་བསྐུར་དུ་གསོལ། ཞེས་དབང་གི་ལྷ་རྣམས་ལ་གསོལ་བ་བཏབ་པས། ཇི་ལྟར་བལྟམས་པ་ཙམ་གྱིས་ནི༴ ཞེས་པ་ནས། ཤྲཱི་ཡེ་ཧཱུཾ། ཞེས་གསུང་ཞིང་ཐོད་པ་བདུད་རྩིས་གང་བས་དབང་བཀུར་སྐུ་གང་དྲི་མ་དག་ཆུ་ལྷག་མ་ཡར་ལུད་པ་ལས། གཙོ་མོ་ལ་རྡོ་རྗེ་སེམས་དཔའ། བདེ་ཆེན་འཁོར་ལོ་པ་ལ་རིན་འབྱུང༌། ཐུགས་འཁོར་པ་ལ་མི་བསྐྱོད་པ། གསུང་འཁོར་པ་ལ་འདོད་དཔག་མེད། སྐུ་འཁོར་པ་ལ་རྣམ་སྣང༌། དམ་ཚིག་འཁོར་ལོ་པ་ལ་དོན་གྲུབ་གྱི་དབུ་རྒྱན། ཨརྒྷཾ་ནས། ཤཔྟའི་བར་གྱིས་མཆོད། ནང་མཆོད་གཏོར་མ་ལྟར་བྱིན་གྱིས་བརླབས་ལ། རྡོར་འཛིན་ཕག་མོ་ཨིནྟྲ་བྷུ་ཏི་དང༌། །དཔལ་མོ་བི་རུ་པ་དང་ཌོ་བྷི་པ། །ངོ་མཚར་རྡོ་རྗེ་གརྦྷ་རི་པ་དང༌། །གཾ་ག་དྷ་ར་དགའ་བའི་རྡོ་རྗེ་དང༌། །དཔལ་འཛིན་ཡེ་ཤེས་རྡོ་རྗེ་དགེ་འབྱུང་སྦས། ཁྲག་འཐུང་རྡོ་རྗེ་ལྷན་སྐྱེས་རྡོ་རྗེ་དང༌། །ཆོས་དབང་བདུད་ལས་རྒྱལ་དང་ས་འཛིན་ཞབས། །དཔའ་བོ་དཔལ་གྱི་བཤེས་གཉེན་ཆོས་གྲགས་དང༌། །རིན་ཆེན་གྲགས་པ་ནགས་རིན་བྱམས་གླིང་པ། །བསོད་ནམས་ཚེ་བརྟན་རིན་ཆེན་ཆོས་དབང་དང༌། །བསྟན་བཟང་རིན་ཆེན་གྲགས་པའི་བ་དན་དང༌། །རྩ་བའི་བླ་མ་རྣམས་ལ་མཆོད་པ་འབུལ། །འདིར་ཡེ་ཤེས་རྡོ་རྗེ་ཟེར་བ་ནི་ཨ་བྷ་ཡ་ཀ་ར་ཡིན་གསུང་ལ། དགེ་འབྱུང་སྦས་པ་དང་ཤཱཀྱ་རཀྵི་ཏ་གདམ་ངའོ། །ཡང་ན་འཁྲུལ་སྤོང་གི་དབང་གི་བརྒྱུད་པ་ལྟར་རམ། འཕྲེང་
བའི་བརྒྱུད་པ་ལྟར་བྱས་ཀྱང་རུང་ལ། ཡང་ན། རྡོ་རྗེ་ཕག་མོ་གྲུབ་ཐོབ་སི་རོ་པ། ཨུ་མ་པ་ཏི་དར་ཏ་ངག་དབང་སྦས། ཆོས་རབ་ཡེ་ཤེས་སེངྒེ་འབུམ་སེང་དང༌། །རྒ་ལོ་ཤེར་སེང་བློ་ཆེན་གནས་དྲུག་པ། །ས་བཟང་པཎ་ཆེན་ས་བཟང་འཕགས་པ་དང༌། །དོན་བཟང་[དོན་ཡོད་བཟང་པོ་ཟེར་]རྒྱལ་མཚན་འོད་ཟེར་བྱམས་གླིང་པ། །དེ་མན་ཆད་གོང་བཞིན་ནོ། །སྙིང་པོ་དང་ལྷ་རྣམས་སྔགས་ཀྱི་མཐར་འབྲུ་གསུམ་བཏགས་པས་ཕུལ། མན་ངག་ལྟར་རྗེས་ཆགས་ཀྱི་རྣལ་འབྱོར་བསྒོམས་ཏེ། ཨོཾ་སརྦ་ཏ་ཐཱ་ག་ཏ་ཨ་ནུ་རཱ་ག་ཎ་བཛྲ་སྭ་བྷ་ཝ་ཨཏྨ་ཀོ྅་ཧཾ། ཡུམ་གྱི་རྐང་བརྒྱད་ཀྱིས་བསྟོད། ལྷའི་རྣལ་འབྱོར་ལ་གནས་པའི་སྒོ་ནས། འཁོར་ལོའི་དམིགས་པའམ། སྤྲོ་བསྡུའི་དམིགས་པ་གསལ་བཏབ་ནས། ཨུ་མ་པ་ཏི་དཏྟ་ལྟར་ན། ཨོཾ་ན་མོ་བྷ་ག་ཝ་ཏི་བཛྲ་བཱ་རཱ་ཧི། ཞེས་སོགས་དང༌། སྙེ་མ་ལྟར་ན། ཨོཾ་བཛྲ་བཱ་རཱ་ཧཱི་པྲོ་ཏངྒེ༴ སོགས་རྩ་བའི་སྔགས་དང༌། ལྷ་སོ་སོའི་མཚན་སྔགས་ཅི་འགྲུབ་ཏུ་བཟླ་ཞིང༌། མདོར་བསྡུས་པའི་ཚེ། ཨོཾ་སརྦ་བུདྡྷ་ཌཱ་ཀི་ནཱི་ཡེ། བཛྲ་ཝརྞ་ནཱི་ཡེ་ཧཱུཾ་ཧཱུཾ་ཕཊ་སྭཱཧཱ། ཞེས་པ་ཉེ་སྙིང་དང༌། ཨོཾ་བཛྲ་བཻ་རོ་ཙ་ནཱི་ཡེ་ཧཱུཾ་ཧཱུཾ་ཕཊ་སྭཱཧཱ། ཞེས་པ་སྙིང་པོ་སྟེ། དེ་དག་ཅི་འགྲུབ་ཏུ་བཟླའོ། །ཐུན་བསྡུ་བའི་ཚེ། རང་གི་སྙིང་གའི་ས་བོན་གྱི་འོད་ཟེར་གྱིས་སྣང་བ་ཐམས་ཅད་དཀྱིལ་འཁོར་གྱི་འཁོར་ལོར་སྦྱངས། རྟེན་དང་བརྟེན་པར་བཅས་པའི་དཀྱིལ་འཁོར་ལ་ཐིམ། དཀྱིལ་འཁོར་ཡང་རིམ་པས་བཾ་ཡིག་ལ་ཐིམ། བམ་ཡིག་ཡང་འོད་གསལ་དུ་ཞུགས། སླར་ཡང་རང་ཉིད་རྡོ་རྗེ་བཙུན་མོའི་རྣམ་པར་ལངས་ཏེ།
གོ་ཆས་རྒྱས་བཏབ་ཐུན་མཚམས་ཀྱི་བྱ་བ་ལ་འཇུག་གོ །རྫོགས་པའི་རིམ་པ་བསྒོམ་པར་འདོད་ན་བཟླས་པའི་མཐར་བྱའོ། །གཏོར་མ་འབུལ་བར་འདོད་ན། འཁྲུལ་སྤོང་གི་གཏོར་ཆོག་ཁོ་ན་འདོན་པ་བསྒྱུར་བས་བྱ་བ་ཡིན་པས། སྒྲུབ་ཐབས་སྙིང་པོ་གོང་དུ་བཤད་པར་ཤེས་པར་བྱའོ། །ལག་མཆོད་དང་ཕྱི་རོལ་མཆོད་པ་སོགས་ཀྱང་གཞན་དུ་རྟོགས་པར་འགྱུར་བས་འདིར་མ་བཤད་དོ། །དཔལ་མཐུ་སྟོབས་ཀྱི་མགོན་པོ་བི་རཱ་པ་གང་ལས་མཆོག་གི་གནས་བརྙེས་པའི་ལམ་ཡང་འདི་ལས་གཞན་དུ་མི་བསམ་མོ། །ཞེས་ཚད་དང་ལྡན་པའི་བླ་མ་དག་གསུང་ངོ༌། །རིམ་པ་འདི་ཁོ་ནས་ལྷ་བཅུ་གསུམ་གྱིས་དཀྱིལ་འཁོར་དང༌། ལྷ་ལྔ་དང༌། དཔའ་མོ་གཅིག་པའི་སྒྲུབ་ཐབས་ཀྱང་འདོར་ལེན་ཤེས་པར་སྒྲུབ་ཐབས་གཉིས་ལས་གསུངས་པ་ལྟར་ཡིན། ལྷ་ཉེར་ལྔ་ཡང་རྒྱུད་ཀྱི་རིམ་པས་འབྱུང་ལ། འཕྲེང་བ་ལས་བྱུང་བའི་དཔལ་རྡོ་རྗེ་རྣལ་འབྱོར་མ་སེར་མོ་དང་སྔོན་མོའི་དཀྱིལ་འཁོར་ལ་ཡང་བསྐྱེད་ཚུལ་ཆོ་ག་འདིས་སྒྲུབ་ཅིང་གཙོ་མོ་འདི་ལ་འཁོར་རྣམས་དེ་དེ་བཞིན་དུ་མོས་ནའང་བསྒོམས་སུ་རུང་བ་སྟེ། ཐམས་ཅད་ལ་དག་པའི་རིམ་པ་ནི་འདི་ཉིད་ཁོ་ནས་སོ། །གྲུབ་མཆོག་སྟོང་གིས་གཤེགས་པའི་ལམ་ཡངས་པོར། བློ་གྲོས་ཤིང་རྟས་ཉེ་བར་འཚོ་བ་བདག །རྡོ་རྗེ་བཙུན་མོས་རྟག་ཏུ་རྗེས་བཟུང་ནས། །ཧེ་རུ་ཀ་དཔལ་བདག་པོའི་སར་འགོད་ཤོག །ཅེས་པ་རྡོ་རྗེ་རྣལ་འབྱོར་མ་ལྷ་སུམ་ཅུ་རྩ་བདུན་གྱི་དཀྱིལ་འཁོར་གྱི་འཁོར་ལོ་བསྒྲུབ་པའི་ཐབས་སྟེ་བཞི་པའོ། །༈ ན་མོ་གུ་རུ་ཝེ། ཕུན་ཚོགས་ཀུན་གྱིས་གཏེར་ཆེན་པོ། །མཐའ་ཡས་འགྲོ་བའི་ཉེར་འཚོ་སྟེ། །བླ་མ་རྡོ་རྗེ་ཅན་
ཞབས་ལ། །བཏུད་ནས་སྡོམ་པའི་སྒྲུབ་ཐབས་བྲི། །ད་ནི་བཤད་རྒྱུད་རྣམས་ལས་ཐོག་མར་དཔལ་སྡོམ་པ་འབྱུང་བ་རྩ་བའི་དཀྱིལ་འཁོར་ལྷ་བཅུ་གསུམ་གྱི་བདག་ཉིད་ཅན་གྱི་སྒྲུབ་ཐབས་ཉམས་སུ་ལེན་པར་འདོད་པའི་སྐྱབས་འགྲོ་སེམས་བསྐྱེད་རྡོ་རྗེ་སེམས་དཔའི་སྒོམ་བཟླས་རྣམས་སྔོན་དུ་འགྲོ་བར་བྱས་ལ། ཤྲཱི་ཧེ་རུ་ཀོ྅་ཧཾ། རང་བདེ་མཆོག་ཕྱག་གཉིས་པར་གྱུར། ཨོཾ་ཨ་ཨཱ། ཨི་ཨཱི། ཨུ་ཨཱུ། རྀ་རཱྀ། ལྀ་ལཱྀ། ཨེ་ཨཻ། ཨོ་ཨཽ། ཨཾ་ཨཿ ཀ་ཁ་ག་གྷ་ང༌། ཙ་ཚ་ཛ་ཛྷ་ཉ། ཊ་ཋ་ཌ་ཌྷ་ཎ། ཏ་ཐ་ད་དྷ་ན། པ་ཕ་བ་བྷ་མ། ཡ་ར་ལ་ཝ་ཤ་ཥ་ས་ཧ་ཀྵ་ཧཱུཾ་ཧཱུཾ་ཕཊ། ལན་གསུམ་བརྗོད། གཟུགས་ཀྱི་ཕུང་པོ་རྣམ་པར་སྣང་མཛད། ཚོར་བའི་ཕུང་པོ་རྡོ་རྗེ་ཉི་མ། འདུ་ཤེས་ཀྱི་ཕུང་པོ་པདྨ་གར་གྱི་དབང་ཕྱུག་མ། འདུ་བྱེད་ཀྱི་ཕུང་པོ་རྡོ་རྗེ་རྒྱལ་པོ། རྣམ་པར་ཤེས་པའི་ཕུང་པོ་རྡོ་རྗེ་སེམས་དཔའ། དེ་བཞིན་གཤེགས་པ་ཐམས་ཅད་ཀྱི་བདག་ཉིད་ཤྲཱི་ཧེ་རུ་ཀའོ། །སའི་ཁམས་ལྟུང་བྱེད་མ། ཆུའི་ཁམས་གསོད་བྱེད་མ། མེའི་ཁམས་འགུགས་བྱེད་མ། རླུང་གི་ཁམས་པདྨ་གར་གྱི་དབང་ཕྱུག་ནམ་མཁའི་ཁམས་པདྨ་དྲ་བ་ཅན། མིག་གཉིས་ལ་གཏི་མུག་རྡོ་རྗེ། རྣ་བ་གཉིས་ལ་ཞེ་སྡང་རྡོ་རྗེ། སྣ་ལ་ཕྲག་དོག་རྡོ་རྗེ། ལྕེ་ལ་འདོད་ཆགས་རྡོ་རྗེ། ལུས་ལ་སེར་སྣ་རྡོ་རྗེ། སྐྱེ་མཆེད་ཐམས་ཅད་ལ་དབང་ཕྱུག་རྡོ་རྗེའོ། །སྡིགས་མཛུབ་དང་བཅས་པའི་སེ་གོལ་ཕྱོགས་བཅུར་གདབ་ཅིང༌། ཨོཾ་སུམྦྷ་ནི་སུམྦྷ་ཧཱུཾ་ཧཱུཾ་ཕཊ། ཨོཾ་གྲྀཧྞ་གྲིཧྞ་ཧཱུཾ་ཧཱུཾ་ཕཊ། ཨོཾ་གྲིཧྞ་པཱ་ཡ་གྲྀཧྞ་པཱ་ཡ་ཧཱུཾ་ཧཱུཾ་ཕཊ།
ཨོཾ་ཨཱ་ན་ཡ་ཧོ་བྷ་ཝན་བིདྱཱ་རཱ་ཛ་ཧཱུཾ་ཧཱུཾ་ཕཊ། ལན་གཉིས་བརྗོད། སྔགས་ཀྱི་འོད་ཟེར་ལས་གྲུབ་པའི་རྡོ་རྗེའི་ས་གཞི་རྭ་བ་དྲྭ་བ་གུར་བླ་བྲེ། ཕྱི་རོལ་ཀུན་ཏུ་ཡེ་ཤེས་ཀྱི་མེ་འོད་འབར་བའོ། །སླར་ཡང་སྔགས་ཀྱི་འོད་ཟེར་ལས་སྒོ་མཚམས་མ་བརྒྱད་ཐོད་པ་དང་ཕུར་བུ་ཐོགས་པའི་ཚོགས་སྤྲོས། ཕྱི་རོལ་ཏུ་ཧཱུཾ་ལས་བྱུང་བའི་འབྲུབ་ཁུང་རྣམས་སུ་བགེགས་རྣམས་བཅུག་སྤྱི་བོར་ཕུར་བུས་བཏབ། ཨོཾ་གྷ་གྷ་གྷཱ་ཏ་ཡ་གྷ་ཏ་ཡ་སརྦ་དུཥྟཾ་ཕཊ། ཀཱི་ལ་ཡ་ཀཱི་ལ་ཡ་སརྦ་པཱ་པཾ་ཕཊ། ཧཱུཾ་ཧཱུཾ་ཧཱུཾ། བཛྲ་ཀཱི་ལ། བཛྲ་དྷ་རོཌ་ཨ་ཛྙཱ་པ་ཡ་ཏི། སརྦ་བིགྷྣཱན། ཀ་ཡ་ཝཱཀ་ཙིཏྟ་ཀཱི་ལ་ཡ་ཧཱུཾ་ཧཱུཾ་ཕཊ། ཕུར་བུ་རྣམས་ཀྱི་སྤྱི་བོར་རྡོ་རྗེ་ཐོ་བས་བརྡུངས། ཨོཾ་བཛྲ་མུདྒ་ར་ཡ་ཨ་ཀོ་ཊ་ཡ་ཧཱུཾ། བགེགས་ཀྱི་ཚོགས་རྣམས་བཅོམ་སྟེ་བདེ་བ་ཆེན་པོ་དང་རོ་གཅིག་ཏུ་གྱུར། རང་གི་སྙིང་ཁར་པཾ་ལས་པདྨའི་སྟེང་དུ། ཨཾ་ལས་ཟླ་བའི་དཀྱིལ་འཁོར་ལ་གནས་པའི་ཧཱུཾ་གི་འོད་ཟེར་གྱིས། བླ་མ་སངས་རྒྱས་བྱང་ཆུབ་སེམས་དཔའི་དཀྱིལ་འཁོར་མདུན་གྱི་ནམ་མཁར་སྤྱན་དྲངས། རྣལ་འབྱོར་རོ་གཅིག་བདུད་རྩི་འཐུང་བས་རྣམ་པར་དག་པའི་ཐུགས། །གནས་ལ་སོགས་པ་ཡུལ་དུ་བསྒྲོད་པས་རྣམ་པར་དག་པའི་གསུང༌། དཔལ་ལྡན་གནས་ཀྱི་དབུས་སུ་འཁོར་ལོའི་དཀྱིལ་འཁོར་མགོན་པོ་མཆོག །བླ་མ་མཆོག་ལ་མགོ་བོས་བཏུད་དེ་རྟག་པར་ཕྱག་བགྱིའོ། །ཧེ་རུ་ཀ་དཔལ་དཔའ་བོ་ཆེ། རྣམ་དག་རྡོ་རྗེ་དབང་ཕྱུག་དང༌། །རྗེས་ཆགས་
ཆགས་པ་ཆེ་རྣམས་ཀྱིས། །རྡོ་རྗེ་ཕག་མོ་དེ་ལ་འདུད། །རྣམ་པར་རྟོག་མེད་ཡང་དག་རྟོག །ཡིད་ནི་རབ་ཏུ་མི་གནས་པ། །ཡིད་ལ་མི་བྱེད་དྲན་པ་མེད། །དམིགས་མེད་ཁྱོད་ལ་ཕྱག་འཚལ་ལོ། །ཨོཾ་ཨཱཿཧྲཱི་པྲ་ཝ་ར་སཏྐ་ར་པྲོ་ཀྵ་ནཾ་པྲ་ཏིཙྪ་ཧཱུཾ་སྭཱཧཱ། པྲོ་ཀཱ་ཎཾ་གི་གནས་སུ་ཨཉྩ་མ་ནཾ་དང༌། ཨརྒྷཾ་དང༌། པཱདྱཾ་རྣམས་བཅུག་པ་དང༌། ཨོཾ་བཛྲ་པུཥྤེ་ཨཱཿཧཱུཾ། ནས་ཤཔྟའི་བར་གྱིས་མཆོད། རྐང་པ་བརྒྱད་པས་བསྟོད། དཀོན་མཆོག་གསུམ་ལ་བདག་སྐྱབས་མཆི། སོགས་རྒྱུན་བཤགས་བྱས། སྤྲོ་ན། སྲས་བཅས་སངས་རྒྱས་ཐམས་ཅད་དང༌། །ཞེས་སོགས་སྡོམ་བཟུང་རྒྱས་པ་ཡང་བྱ། ཚད་མེད་བཞི་སྤྱི་དང་མཐུན་པར་བསྒོམ། སྭ་བྷཱ་ཝ་ཤུདྡྷཿསརྦ་དྷརྨཿསྭ་བྷཱ་ཤུདྡྷོ྅་ཧཾ། ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཏྨ་ཀོ྅་ཧཾ། སྟོང་པའི་ངང་ལས་ཆོས་འབྱུང་གི་ནང་དུ་ཡཾ་ལས་རླུང་གི་དཀྱིལ་འཁོར་སྔོན་པོ་ཟླ་གམ། དེའི་སྟེང་དུ་རཾ་ལས་མེའི་དཀྱིལ་འཁོར་དམར་པོ་གྲུ་གསུམ། དེའི་སྟེང་དུ་བཾ་ལས་ཆུའི་དཀྱིལ་འཁོར་དཀར་པོ་ཟླུམ་པོ། དེའི་སྟེང་དུ་ལཾ་ལས་སའི་དཀྱིལ་འཁོར་སེར་པོ་གྲུ་བཞི། དེའི་སྟེང་དུ་སུཾ་ལས་རི་རབ་རིན་པོ་ཆེའི་སྣ་བཞི་ལས་གྲུབ་པ་དེའི་སྟེང་དུ་ཧཱུཾ་ལས་སྣ་ཚོགས་རྡོ་རྗེའི་ལྟེ་བ་ལ། སྣ་ཚོགས་པདྨ་འདབ་བརྒྱད། དེའི་སྟེང་དུ། ཨ་ཨཱ་ནས་ཨཾ་ཨཿརྣམས་ཡོངས་སུ་གྱུར་པ་ལས་ཟླ་བ། དེའི་སྟེང་དུ་ཡང་ཀ་ནས་ཀྵ་རྣམས་ཡོངས་སུ་གྱུར་པ་ལས་ཟླ་བའི་དཀྱིལ་འཁོར། དབུས་སུ་རང་གི་སེམས་ཉིད་ཧཱུཾ་ཡིག་སྔོན་པོ་འོད་ཟེར་སྣ་ཚོགས་པ་འཕྲོ་བ། དེ་ལས་དཀྱིལ་འཁོར་
དཔག་ཏུ་མེད་པ་སྤྲོས། སངས་རྒྱས་མཆོད། སེམས་ཅན་གྱི་དོན་བྱས། བྱང་ཆུབ་ཀྱི་སེམས་ཀྱི་ངོ་བོར་ཚུར་བསྡུས། ཧཱུཾ་གི་ནཱ་ད་ལ་ཐིམ། དེ་ཐམས་ཅད་གཅིག་ཏུ་འདྲེས་པ་ལས། རྟེན་དང་བརྟེན་པར་བཅས་པའི་དཀྱིལ་འཁོར་ཡོངས་སུ་རྫོགས་པར་གྱུར་པ་ནི། རིན་པོ་ཆེ་སྣ་ཚོགས་ལས་གྲུབ་པའི་གཞལ་མེད་ཁང༌། གྲུ་བཞི་སྒོ་བཞི་པ། རྩིག་པ་རིམ་པ་ལྔ་དང་ལྡན་པ། ཕ་གུ་དང༌། དྲ་ཕྱེད་དང༌། ཤར་བུ་དང༌། མདའ་ཡབ་དང༌། གཟུངས་མ་རྣམས་དང་བཅས་པའི་ཁ་ཁྱེར་ཏེ། མཚན་ཉིད་ཐམས་ཅད་ཡོངས་སུ་རྫོགས་པ། སྒོ་བཞིའི་སྟེང་དུ་ཀ་བས་བཏེག་པའི་རྟ་བབས་སྣམ་བུ་བཅུ་གཅིག་དང་བཅས་པ། ནང་ཀ་བ་བརྒྱད་དང་ལྡན་པ། དབུས་ཕྱུར་བུར་གྱུར་པའི་ཐོག་ཕུབས་ཅན། ནང་གི་ལྷ་སྣམ་ཤར་དཀར། བྱང་ལྗང༌། ནུབ་དམར། ལྷོ་སེར། མཚམས་རྣམས་སུ་བུམ་པ་བརྒྱད་དང་བཅས་པ། དབུས་སུ་སྣ་ཚོགས་པདྨ་འདབ་མ་བརྒྱད་པའི་ལྟེ་བར་ཉི་མའི་དཀྱིལ་འཁོར་གྱི་གདན། སྒོ་མཚམས་བརྒྱད་དུ་རོའི་གདན། གཞལ་མེད་ཁང་གི་ཕྱི་རོལ་མཆོད་པའི་བཀོད་པ་ཐམས་ཅད་དང་བཅས་ཤིང༌། དེའི་ཕྱི་རོལ་པད་འདབ་ཀྱི་ཁོར་ཡུག་དང་བསྲུང་བའི་འཁོར་ལོ། ཕྱི་རོལ་དུ་དུར་ཁྲོད་ཆེན་པོ་བརྒྱད། ཕྱོགས་སྐྱོང་བ་དང༌། ཞིང་སྐྱོང་བ་དང༌། ཤིང་དང༌། མེ་དང༌། སྤྲིན་དང༌། ཆུ་དང༌། རི་དང༌། མཆོད་རྟེན་དང༌། གྲུབ་པ་ཐོབ་པའི་དཔའ་བོ་དང༌། རྣལ་འབྱོར་མ་རྣམས་ཀྱིས་
ཡོངས་སུ་གང་བའོ། །དབུས་ཀྱི་གདན་གྱི་སྟེང་དུ་འཁོར་ལོ་བདེ་མཆོག་སྐུ་མདོག་མཐིང་ག་ཞལ་གསུམ་ཕྱག་དྲུག་པ། རྩ་བའི་ཞལ་ནག་པོ། གཡས་དཀར་བ། གཡོན་དམར་བ། ཞལ་རྣམ་པར་འགྱུར་བ། སྤྱན་གསུམ་གསུམ་དང་ལྡན་ཞིང༌། མཆེ་བ་གཙིགས་པ། ཕྱག་དང་པོ་གཉིས་ཀྱིས་རྡོ་རྗེ་དང་དྲིལ་བུ་འཛིན་པའི་ཡུམ་ལ་འཁྱུད་པ། བར་པ་གཉིས་ཀྱིས་གླང་པོ་ཆེའི་པགས་པ་བརྒྱངས་ཏེ་འཛིན་པ། གཡས་གསུམ་པས་ཌཱ་མ་རུ། གཡོན་གསུམ་པས་ཐོད་པ་བདུད་རྩིས་གང་བ་དང་ཁ་ཊྭཾ་ག་བསྣམས་པ། ཞབས་གཡས་བརྐྱང་པས་དུས་མཚན་མ་དམར་མོ། གཡོན་བསྐུམ་པས་འཇིགས་བྱེད་ནག་པོ་མནན་པ། རལ་པའི་ཐོར་ཚུགས་དང་སྣ་ཚོགས་རྡོ་རྗེ་དང༌། ཟླ་བ་ཕྱེད་པ་དང༌། ནོར་བུ་རིན་པོ་ཆེ་དང༌། ཐོད་པ་སྐམ་པོ་ལྔས་དབུ་རྒྱན་པ། ཕྱག་རྒྱ་དྲུག་དང་མགོ་བོའི་འཕྲེང་བ་ཅན། སྟག་གི་པགས་པའི་ཤམས་ཐབས་གྲོལ་བ། གར་གྱི་ཉམས་དགུ་དང་ལྡན་པའོ། །ཡུམ་རྡོ་རྗེ་ཕག་མོ་རྣམ་པར་སྣང་མཛད་མ། སྐུ་མདོག་དམར་མོ། ཞལ་གཅིག་ཕྱག་གཉིས་སྤྱན་གསུམ་མ། གཡོན་ཐོད་ཁྲག་འཛིན་པའི་ཡབ་ལ་འཁྱུད་ཅིང་གཡས་སྡིགས་མཛུབ་དང་བཅས་པའི་རྡོ་རྗེ་འཕྱར་བ། བྱིན་པ་གཉིས་ཀྱིས་ཡབ་ལ་འཁྲིལ་བ། སྐྲ་གྲོལ་ཞིང་ཕྱག་རྒྱ་ལྔས་བརྒྱན་པ། ཐོད་སྐམ་གྱིས་དོ་ཤལ་ཅན། ཁྲག་ལ་དགྱེས་ཤིང་ཁྲག་འཛག་པ། གཉིས་ཀའང་བསྐལ་པའི་མེ་ལྟ་བུའི་དབུས་ན་བཞུགས་པར་གྱུར། ཤར་གྱི་འདབ་
མ་ལ་མཁའ་འགྲོ་མ་ནག་མོ། བྱང་དུ་ལཱ་མ་ལྗང་ཁུ། ནུབ་ཏུ་དུམ་སྐྱེས་མ་དམར་མོ། ལྷོར་གཟུགས་ཅན་མ་སེར་སྐྱ་མཚམས་བཞིར་ཐོད་པ་བདུད་རྩིས་གང་བ་བཞི་དང་བཅས་པ། ཤར་སྒོར་ཁྭ་གདོང་མ་ནག་མོ། བྱང་སྒོར་འུག་གདོང་མ་ལྗང་ཁུ། ནུབ་སྒོར་ཁྱི་གདོང་མ་དམར་མོ། ལྷོ་སྒོར་ཕག་གདོང་མ་སེར་མོ། ཤར་ལྷོར་གཤིན་རྗེ་བརྟན་མ་གཡས་སྔོ་གཡོན་སེར་བ། ལྷོ་ནུབ་ཏུ་གཤིན་རྗེ་ཕོ་ཉ་མ་གཡས་སེར་གཡོན་དམར་བ། ནུབ་བྱང་དུ་གཤིན་རྗེ་མཆེ་བ་མ་གཡས་དམར་གཡོན་ལྗང་བ། བྱང་ཤར་དུ་གཤིན་རྗེ་འཇོམས་མ་གཡས་ལྗང་གཡོན་སྔོ་བ། དེ་ལྟར་སྒོ་མཚམས་མ་བརྒྱད་ནི་ཤིན་ཏུ་དྲག་མོའི་གཟུགས་ཅན་རོའི་གདན་ལ་གནས་པ། ཐམས་ཅད་ཀྱང་ཞལ་གཅིག་ཕྱག་གཉིས་སྤྱན་གསུམ་མ། གྲི་གུག་དང་ཐོད་པ་ཁ་ཊྭཾ་ཀ་བསྣམས་པ། གཅེར་བུ་ཕྱག་རྒྱ་ལྔས་བརྒྱན་ཞིང་སྐྲ་གྲོལ་བ། གཡས་བརྐྱང་གི་སྟབས་ཀྱིས་གནས་པ་དངོས་གྲུབ་ཐམས་ཅད་རྩོལ་བའོ། །གཙོ་བོའི་ཐུགས་ཀར་རང་དང་འདྲ་བའི་ཡེ་ཤེས་སེམས་དཔའ། དེའི་ཐུགས་ཀར་ཏིང་ངེ་འཛིན་གྱི་སེམས་དཔའ་ཉི་མ་ལ་ཧཱུཾ། ཨོཾ་ཨཱཿཧཱུཾ་སརྦ་ཝཱི་ར་ཡོ་གི་ནི་ཀ་ཡ་ཝཀྩིཏྟ་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། ཨོཾ་བཛྲ་ཤུདྡྷ་སརྦ་དྷརྨ་བཛྲ་ཤུདྡྷོ྅་ཧཾ། གཟུགས་ཀྱི་ཕུང་པོ་རྣམ་པར་སྣང་མཛད༴ ཞེས་སོགས་གོང་བཞིན་བརྗོད་ལ། ཡབ་ཀྱི་སྙིང་གར་ཨོཾ་ཧ་དཀར་པོ་རྡོ་རྗེ་སེམས་དཔའ། མགོ་བོར་ན་མ་ཧི་སེར་པོ་རྣམ་པར་སྣང་མཛད། སྤྱི་གཙུག་ཏུ་སྭཱཧཱ་ཧཱུཾ།
དམར་པོ་པདྨ་གར་གྱི་དབང་ཕྱུག ཕྲག་པ་གཉིས་སུ་བཽ་ཥ་ཊ་ཧེ་ནག་པོ་དཔལ་ཧེ་རུ་ཀ མི་གཉིས་སུ་ཧཱུཾ་ཧཱུཾ་ཧོ་དམར་སེར་རྡོ་རྗེ་ཉི་མ། ཚིགས་ཆེན་བརྒྱད་ལ་ཕཊ་ཧཾ་ལྗང་ཁུ་རྟ་མཆོག་གི་ངོ་བོ། ཡུམ་གྱི་ལྟེ་བར་ཨོཾ་བཾ་དམར་མོ་རྡོ་རྗེ་ཕག་མོ། སྙིང་གར་ཧཾ་ཡོཾ་སྔོན་མོ་གཤིན་རྗེ་མ། ཁར་ཧྲིཾ་མོཾ་དཀར་མོ་རྨོངས་བྱེད་མ། དཔྲལ་པར་ཧྲིཾ་ཧྲིཾ་སེར་མོ་བསྐྱོད་བྱེད་མ། སྤྱི་གཙུག་ཏུ་ཧཱུཾ་ཧཱུཾ་ལྗང་ཁུ་སྐྲག་བྱེད་མ། ཚིགས་ཆེན་བརྒྱད་ལ་ཕཊ་ཕཊ་དུད་ཁ་ཙནྜི་ཀཱ །རྡོ་རྗེ་སེམས་དཔའ་དང་རྨོངས་བྱེད་མ་ཟླ་བའི་གདན་དང༌། གཞན་རྣམས་ཉི་མའི་གདན་ལ་གནས་པའོ། །སྤྲོ་ན་གོ་ཆ་ཆེན་མོ་ཡང་བཀོད། ཡུམ་གྱི་མཁའ་ཨ་ལ་པད་འདབ་མ་གསུམ་དྱཱཾ་ལས་ཟེའུ་འབྲུ། ཡབ་ཀྱི་གསང་གནས་ཧཱུཾ་ལས་རྡོ་རྗེ་བྱཱཾ་ལས་ནོར་བུ། ཡབ་ཀྱི་ལྟེ་བ་དང་ཐུགས་ཀར་ཡུམ་གྱི་སྙིང་པོ་དང་ཉེ་སྙིང༌། མགྲིན་པ་དང༌། དཔྲལ་པར་ཡབ་ཀྱི་སྙིང་པོ་དང་ཉེ་སྙིང༌། ཡུམ་གྱི་ལྟེ་བ་དང་སྙིང་གར་ཡབ་ཀྱི་སྙིང་པོ་དང་ཉེ་སྙིང༌། མགྲིན་པར་དང་དཔྲལ་པར་ཡུམ་གྱི་སྙིང་པོ་དང་ཉེ་སྙིང་ཡབ་ཡུམ་སྙོམས་པར་ཞུགས་པའི་བདེ་བའི་སྒྲ་དང༌། ཐུགས་ཀའི་འོད་ཟེར་གྱིས་ཡེ་ཤེས་ཀྱི་འཁོར་ལོ་དབང་གི་ལྷ་དང་བཅས་པ་སྤྱན་དྲངས། འབར་བའི་ཕྱག་རྒྱ་དང་བཅས་ཕཻཾ་ཞེས་བརྗོད་ཛཿཧཱུཾ་བཾ་ཧོཿགཉིས་སུ་མེད་པར་ཐིམ། ཨོཾ་ཡོ་ག་ཤུདྡྷ་སརྦ་དྷརྨ་ཡོ་ག་ཤུདྡྷོ྅་ཧཾ། དེ་བཞིན་གཤེགས་པ་ཐམས་ཅད་ཀྱིས་བདག་ལ་དབང་བསྐུར་དུ་གསོལ། ཞེས་དབང་གི་ལྷ་རྣམས་ལ་
གསོལ་བ་བཏབ་པས། ཇི་ལྟར་བལྟམས་པ་ཙམ་གྱིས་ནི། །དེ་བཞིན་གཤེགས་ཀུན་ཁྲུས་གསོལ་ལྟར། །ལྷ་ཡི་ཆུ་ནི་དག་པ་ཡིས། །དེ་བཞིན་བདག་གིས་སྐུ་ཁྲུས་གསོལ། །ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏ་ས་མ་ཡ་ཤྲཱི་ཧཱུཾ། ཞེས་གསུངས་ཞིང་ཐོད་པ་བདུད་རྩིས་གང་བས་དབང་བསྐུར། སྐུ་གང་དྲི་མ་དག ཆུ་ལྷག་མ་ཡར་ལུད་པ་ལས། གཙོ་བོ་ལ་མི་བསྐྱོད་པ། ཡུམ་དང༌། མཁའ་འགྲོ་མ་ལ་རྣམ་སྣང༌། ལཱ་མ་ལ་རིན་འབྱུང༌། དུམ་སྐྱེས་མ་ལ་འོད་དཔག་མེད། གཞན་རྣམས་ལ་དོན་ཡོད་གྲུབ་པས་དབུ་རྒྱན། གོང་བཞིན་མཆོད། ནང་མཆོད་གཏོར་མ་ལྟར་བྱིན་གྱིས་རླབས་ལ། རྡོ་རྗེ་འཆང་དང་ལཱུ་ཡི་དྷ་རི་ཀ །དྲིལ་བུ་རུས་སྦལ་དཔལ་ཞབས་དང་དཔེ་མེད་དཔལ། ཤཱནྟི་པ་དང་འཇིགས་མེད་འབྱུང་གནས་དང༌། །དགེ་འབྱུང་ལེགས་སྤྱོད་རཏྣ་རཀྵི་ཏ། །ཆག་ལོ་གོ་ལུང་པ་དང་གཡུང་ཕུག་པ། །ཤོང་སྟོན་བློ་བརྟན་ལོ་མཆོག་དཔལ་ལྡན་པ། །བུ་སྟོན་ཁྱུང་ལྷས་པ་དང་བཀྲེས་རིན་པ། །ངོར་ཆེན་རིན་ཆེན་བཀྲ་ཤིས་པཎ་ཆེན་རྗེ། །ཀུན་དགའ་རྒྱལ་མཚན་སངས་རྒྱས་འོད་ཟེར་དང༌། །ཀུན་དགའ་གྲོལ་མཆོག་རྗེ་བཙུན་བླ་མ་སྟེ། །རྩ་བརྒྱུད་བླ་མ་རྣམས་ལ་མཆོད་པ་འབུལ། །ཡང་ན། བུ་སྟོན་ཐུགས་སྲས་ནོར་བཟང་རིན་ཆེན་དང༌། །རིན་རྒྱལ་མཁྱེན་རབ་རྗེ་དང་བཀྲ་ཤིས་དཔལ། །དགོན་སྟོན་པ་དང་བཀྲ་ཤིས་རྒྱལ་མཚན་དང༌། །རྩ་[དཔལ་ཆོས་པ་]བའི་བླ་མ་རྣམས་ལ་མཆོད་པར་འབུལ། །ཞེས་རྩ་བརྒྱུད་བླ་མ་རྣམས་ལ་ཕུལ། སོ་སོའི་སྔགས་
ཀྱིས་ལྷ་ཚོགས་ལ་ཕུལ་རང་གིས་མྱངས། རྐང་པ་བརྒྱད་པའི་སྔགས་ཀྱིས་བསྟོད། ཡབ་ཡུམ་སྙོམས་པར་ཞུགས་པས་བདེ་བ་ཆེན་པོའི་རྐྱེན་གྱིས་སྣོད་བཅུད་ཐམས་ཅད་དཀྱིལ་འཁོར་ལ་ཐིམ། དཀྱིལ་འཁོར་ཡང་འོད་གསལ་གྱིས་ངང་དུ་ཐིམ། སླར་ཡང་སྟོང་པའི་ངང་ལས། དཀྱིལ་འཁོར་ཡོངས་སུ་རྫོགས་པ་གསལ་བར་གྱུར། ཕུང་པོ་ལྔ་དག་ཧེ་རུ་ཀ །ཞལ་གསུམ་རྣམ་པར་ཐར་པ་གསུམ། །ཕ་རོལ་ཕྱིན་པ་དྲུག་གིས་ཕྱག །བདེན་གཉིས་དབྱེར་མེད་ཡུམ་དང་སྦྱོར། །ཡན་ལག་བཅུ་གཉིས་འགགས་པ་དང༌། །བཅུ་གཉིས་ས་ཡི་ངོ་བོ་ནི། །རྣལ་འབྱོར་མ་ཚོགས་བཅུ་གཉིས་ཏེ། །ཚད་མེད་འབྱུང་བ་བསྡུ་དངོས་བཞིའོ། །འཛག་མེད་ཐོད་པའི་སྣོད་བཞི་སྟེ། །བྱང་ཆུབ་ཕྱོགས་མཐུན་ཁང་བརྩེགས་དང༌། །བདུད་བཅོམ་སྲུང་བའི་འཁོར་ལོ་སྟེ། །རྣམ་ཤེས་བརྒྱད་དག་དུར་ཁྲོད་དོ། །དེ་ནས་འཁོར་ལོའི་བཟླས་པའི་དམིགས་པ་གསལ་བཏབ་ལ། ཨོཾ་ཤྲཱི་བཛྲ་ཧེ་རུ་ཀ་ཧཱུཾ་ཧཱུཾ་ཕཊ། སྙིང་པོའོ། །ཨོཾ་ཧྲཱིཿཧ་ཧ་ཧཱུཾ་ཧཱུཾ་ཕཊ། ཉེ་སྙིང་ངོ༌། །ཨོཾ་བཛྲ་བཻ་རོ་ཙ་ནཱི་ཡེ་ཧཱུཾ་ཧཱུཾ་ཕཊ་སྭཱཧཱ། ཡུམ་གྱི་སྙིང་པོའོ། །ཨོཾ་སརྦ་བུདྡྷ་ཌཱ་ཀཱི་ནཱི་ཡེ་བཛྲ་ཝརྞ་ནཱི་ཡེ་ཧཱུཾ་ཧཱུཾ་ཕཊ་སྭཱཧཱ། ཉེ་བའི་སྙིང་པོའོ། །ཨོཾ་ཌཱ་ཀི་ནཱི་ཡེ་ཧཱུཾ་ཧཱུཾ་ཕཊ། ཧཱུཾ་ལཱ་མེ་ཧཱུཾ་ཧཱུཾ་ཕཊ། ཨོཾ་ཁཎྜ་རོ་ཧེ་ཧཱུཾ་ཧཱུཾ་ཕཊ། ཨོཾ་རཱུ་པི་ནཱི་ཡེ་ཧཱུཾ་ཧཱུཾ་ཕཊ། ཨོཾ་ཀ་ཀཱ་སྱཻ་ཧཱུཾ་ཧཱུཾ་ཕཊ། ཨོཾ་ཨུ་ལུ་ཀ་སྱཻ་ཧཱུཾ་ཧཱུཾ་ཕཊ། ཨོཾ་ཤྭཱ་ན་སྱཻ་ཧཱུཾ་ཧཱུཾ་ཕཊ། ཨོཾ་སཱུ་ཀ་ར་སྱཻ་ཧཱུཾ་ཧཱུཾ་ཕཊ། ཨོཾ་ཡ་མ་ཌཱ་ཌྷི་ཧཱུཾ་ཧཱུཾ་ཕཊ། ཨོཾ་ཡ་མ་དུ་ཏཱི་ཡེ་ཧཱུཾ་ཧཱུཾ་ཕཊ། ཨོཾ་ཡ་མ་དཾཥྟི་ཎི་ཡེ་ཧཱུཾ་ཧཱུཾ་ཕཊ། ཨོཾ་ཡ་
མ་མ་ཐ་ནཱི་ཡེ་ཧཱུཾ་ཧཱུཾ་ཕཊ། ཅེས་པ་རྣམས་འཁོར་གྱི་སྔགས་སོ། །ཐུན་མཚམས་ལ་འཇུག་པར་འདོད་ན། གོ་ཆ་བཅིངས་ཏེ་དགེ་བའི་རྩ་བ་བྱང་ཆུབ་ཏུ་བསྔོའོ། །གཏོར་མ་འབུལ་བར་འདོད་ན་གཏོར་མ་གཉིས་བཤམས་ལ། སུམྦྷས་བསངས། སྭ་བྷཱ་ཝས་སྦྱངས། ཡཾ་ལས་རླུང༌། རཾ་ལས་མེ། ཨ་ལས་ཐོད་པ། ཨོཾ་ཏྲཾ་ཨཾ་ཁཾ་ཧཱུཾ་ལས་བདུད་རྩི་ལྔ། ལཾ་མཱཾ་པཾ་ཏཱཾ་བཾ་ལས་ཤ་ལྔ། རླུང་གཡོས་མེ་སྦར། རྫས་རྣམས་ཞུ་ཞིང་ཁོལ་བས་ཁ་དོག་དམར་སེར་དུ་གྱུར། སྟེང་གི་ནམ་མཁའ་ལ་ཁ་ཊྭཾ་ག་དཀར་མོ་བདུད་རྩིས་རང་བཞིན་ཅན། དེ་ཞུ་ཞིང་ཐིམ་པས། དངུལ་ཆུའི་མདོག་ཅན་རབ་ཏུ་བསིལ་བར་གྱུར། ཡང་སྟེང་གི་ནམ་མཁའ་ལ་དབྱངས་དང་གསལ་བྱེད་རྣམས་ཡོངས་སུ་གྱུར་པ་ལས། ཧཱུཾ་ཨཱཿཨོཾ་བརྩེགས་པ། དེ་ལས་དཀྱིལ་འཁོར་དཔག་ཏུ་མེད་པ་སྤྲོས། སངས་རྒྱས་ཐམས་ཅད་ཀྱི་བྱང་ཆུབ་ཀྱི་སེམས་སྤྱན་དྲངས། འབྲུ་གསུམ་ལ་ཐིམ། དེ་ཡང་འོད་དུ་ཞུ་ཞིང་འོག་གི་བདུད་རྩི་དང་འདྲེས་ཏེ། བདུད་རྩིའི་རྒྱ་མཚོ་ཆེན་པོར་གྱུར། ཨོཾ་ཨཱཿཧཱུཾ་ཧ་ཧོ་ཧྲིཿ། ཕཻཾ། ཞེས་པའི་སྔགས་རྒྱས་འཇིག་རྟེན་ལས་འདས་པའི་དཀྱིལ་འཁོར་སྤྱན་དྲངས། ཨིནྡྲ་ས་པ་རི་ཝ་རཱ་ན་ཨ་ཀརྵ་ཡ་ཛཿ ཡ་མ་ས་པ་རི་ཝ་རཱ་ན་ཨ་ཀརྵ་ཡ་ཛཿ དེ་བཞིན་དུ། ཝ་རུ་ཎ༴ ཀུ་ཝེ་ར༴ མ་ཧཱ་བྷུ་ཏ༴ ཨགྣི༴ རཀྵ་སཱ༴ བ་ཡུ་དེ་ཝ་ཏ༴ ཙནྡྲ་སུརྱཱ༴ བྲཧྨ༴ ཨ་དི་དེ་ཝ་ས་པ་རི་ཝ་རཱ་ནཱ་ཨ་ཀརྵ་ཡ་ཛཿ བེ་མ་ཙི་ཏྲི་པྲི་ཐི་བཱི་དེ་ཝ་ཏ་ས་པཱ་
རི་ཝ་རཱ་ན་ཨ་ཀརྵ་ཡ་ཛཿ ཛཿཧཱུཾ་བཾ་ཧོ། སཾ་ཏྲིཔྟ་སརྦ་དེ་ཝ་ཏ། སདྷ་ཀ་སྱ། ཤིནྟཾ་ཀུ་རུ། སརྦ་ཀཱརྻཾ། སབྦྷིརྦྷ་ཝ་རུ་ཡ་ཐཱ་སུ་ཁཾ། མུ་ཁེ། ཞེས་འཇིག་རྟེན་པ་རྣམས་སྤྱན་དྲངས། ཨརྒྷཾ། ནས་ཤཔྟའི་བར་གྱིས་མཆོད། པད་སྐོར་དང་བཅས་ཏེ། མཁའ་འགྲོའི་དྲྭ་བ། དམ་པའི་བདེ་བ། ས་མ་ཡ་སྟྭཾ། ས་མ་ཡ་ཧོ། ས་མ་ཡ་སྟྭཾ། ས་མ་ཡ་ཧོ། ས་མ་ཡ་སྟྭཾ། ས་མ་ཡ་ཧོ། ལྷ་མོ་ཚད་མ་དམ་ཚིག་ཚད་མ་དང༌། །དེས་གསུངས་ཚིག་ཀྱང་ཚད་མའི་མཆོག་ཡིན་ཏེ། །བདེན་པ་དེ་ཡི་ལྷ་མོ་དེ་དག་གིས། །བདག་ལ་རྗེས་སུ་འཛིན་པའི་རྒྱུར་གྱུར་ཅིག །ཨོཾ་ཀ་ར་ཀ་ར་ཀུ་རུ་ཀུ་རུ་ནས་དྷི་ལི་དྷི་ལི་ཧཱུཾ་ཧཱུཾ་ཕཊ། ལན་གསུམ་གྱིས་གཙོ་བོ་ཡབ་ཡུམ་ལ་ཕུལ། ཨོཾ་བཛྲ་ཨ་རལླི་ཧོ། ཛཿཧཱུཾ་བཾ་ཧོཿ། བཛྲ་ཌཱ་ཀི་ནཱི། ས་མ་ཡ་ཧོ། དྲ་ཤྱ་ཧོ་ལན་གསུམ་མམ་ལྔས་འཁོར་རྣམས་ལ་ཕུལ། སྲིད་དང་ཞི་བ་མཉམ་པ་ཆགས་དང་ཀུན་རྟོག་ཆགས་པ་བཅོམ། ཁྱོད་ཀྱིས་དངོས་པོ་མཐའ་དག་ནམ་མཁའ་དང་ནི་འདྲ་བར་གཟིགས། །མགོན་པོ་ཤིན་ཏུ་ལྕི་བའི་ཐུགས་རྗེའི་ཆུས་རླུན་སེམས་ལ་ནི། །མཛོད་ཅིག་མཛོད་ཅིག་ལྷ་མོ་རྣམས་ཀྱིས་བདག་ལ་དགྱེས་པར་མཛོད། །ཅེས་གསོལ་བ་བཏབ། ཨོཾ་ཁ་ཁ་ཁཱ་ཧི་ཁཱ་ཧི་ཞེས་པ་ནས། ས་ཧ་ཡི་ཀ་བྷ་ཝནྟུ་ཧཱུཾ་ཧཱུཾ་ཕཊ་སྭཱཧཱ། ལན་གསུམ་གྱིས་འཇིག་རྟེན་པའི་ཚོགས་ལ་ཕུལ། རྐང་བ་བརྒྱད་པས་བསྟོད་ལ། ལྷ་ཡི་ཚོགས་རྣམས་མ་ལུས་དང༌། ཞེས་པ་ནས། ཡིད་ལ་འདོད་པ་ཀུན་འགྲུབ་ཤོག གི་བར་བརྗོད་ལ། ཨོཾ་ཡོ་ག་ཤུདྡྷ་སརྦ་དྷརྨ་ཡོ་ག་ཤུདྡྷོ྅་ཧཾ།
ཞེས་བརྗོད་པས་མཉེས་པར་བསམ། ཨོཾ་ཁྱོད་ཀྱིས་སེམས་ཅན་དོན་ཀུན་མཛོད། །ཅེས་པའི་མཐར། བཛྲ་མུཿ ཞེས་འཇིག་རྟེན་པ་རྣམས་གཤེགས་སུ་གསོལ། དཀྱིལ་འཁོར་གྱི་འཁོར་ལོ་རང་ཉིད་ལ་གཉིས་སུ་མེད་པར་ཐིམ། དགེ་བའི་རྩ་བ་བྱང་ཆུབ་ཏུ་བསྔོ་བ་དང༌། བཀྲ་ཤིས་ཀྱི་གླུ་དབྱངས་བླངས་པར་བྱའོ། །དངོས་གྲུབ་ཀུན་གྱི་གཏེར་གྱུར་པ། །སྡོམ་པའི་སྒྲུབ་ཐབས་བྲིས་པ་ལས། །བྱུང་བའི་རྣམ་དཀར་དགེ་བ་དེས། །འགྲོ་ཀུན་ཧེ་རུ་ཀ་ཐོབ་ཤོག།ཅེས་པ་སྡོམ་བྱུང་ལྷ་བཅུ་གསུམ་མའི་སྒྲུབ་ཐབས་ཏེ་ལྔ་པའོ།། །།༈ ན་མོ་གུ་རུ་ཙཀྲ་སམྦྷ་ར་མཎྜ་ལ་དེ་ཝི་བྷྱཿ གང་ཞིག་ཐེག་གསུམ་ཆོས་ཀྱི་འཁོར་ལོ་ཡང༌། །བླ་མེད་རྡོ་རྗེ་ཐེག་པར་ངེས་འཇུག་པ། །འདི་ལས་ངོ་མཚར་ཅི་ཡང་སྐྱེས་གྱུར་པས། །སྒྲུབ་ཐབས་འདི་ལ་བདག་སེམས་ལྷག་པར་དགའ། །ད་ནི་བཤད་རྒྱུད་དཔལ་ཨ་བྷི་དྷ་ན་ལས་དངོས་སུ་འབྱུང་བའི་དཀྱིལ་འཁོར་དྲུག་གི་སྒྲུབ་ཐབས་བཤད་པར་བྱ་བ་ལས་ཐོག་མར་ནི་རྣལ་འབྱོར་པ་གང་ཞིག་དབང་བསྐུར་ཐོབ་ཅིང་དམ་ཚིག་དང་ལྡན་པ་དངོས་གྲུབ་མཆོག་ལ་ཉེ་བར་གཞོལ་བ་རྣམས་ཀྱིས་ནན་ཏན་དུ་བྱ་བའི་འོས་ནི་འདི་ཡང་སྟེ། སྐྱབས་སུ་འགྲོ་བ་སྔོན་དུ་འགྲོ་བས། ནང་མཆོད་བྱིན་གྱིས་རླབས་ལ་མྱང་བའམ། བདུད་རྩི་རིལ་བུ་ཁར་བཅུག་ལ། ཨོཾ་ཨཱཿཧཱུཾ། ཞེས་བརྗོད། དེ་ནས་སེམས་བསྐྱེད་དང་རྡོར་སེམས་སྒོམ་བཟླས་སྤྱི་དང་མཐུན་པར་བྱ། རང་གི་སྙིང་གར་རཾ་ལས་ཉི་མའི་དཀྱིལ་འཁོར་གྱི་སྟེང་དུ་ཧཱུཾ། དེའི་འོད་ཀྱིས་ལུས་དག་པས། ཧེ་རུ་ཀ་ཕྱག་གཉིས་པར་གྱུར། འོད་ཟེར་བ་སྤུའི་བུ་ག་ནས་འཕྲོས། དཔལ་བདེ་མཆོག་གི་དཀྱིལ་
འཁོར་ཤར་ཕྱོགས་ཀྱི་དུར་ཁྲོད་ཀྱི་སྟེང་གི་ནམ་མཁའ་ལ་བླ་མ་རྡོ་རྗེ་འཆང་གི་རྣམ་པ་ཅན་བཞུགས་པ་མདུན་གྱི་ནམ་མཁར་སྤྱན་དྲངས། བདག་བླ་མ་རྡོ་རྗེ་འཆང་ཆེན་པོ་ལ་ཕྱག་འཚལ་ལོ། །བདག་བཅོམ་ལྡན་འདས་དཔལ་བདེ་མཆོག་གི་ལྷ་ཚོགས་ལ་ཕྱག་འཚལ་ལོ། །བདག་སངས་རྒྱས་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །སེམས་ཅན་ཐམས་ཅད་རྫོགས་པའི་བྱང་ཆུབ་ཐོབ་པར་བྱ་བའི་ཕྱིར། ལུས་འདི་དག་དབུལ་བར་བགྱིའོ། །རང་གི་སྙིང་ག་ནས་སྤྲོས་པའི་མཆོད་པའི་ལྷ་མོ་བཅུ་དྲུག་གིས་མཆོད་པར་གྱུར། ཨོཾ་ཨཱཿབཛྲ་བཱི་ནི་ཧཱུཾ། ཨོཾ་ཨཱཿབཛྲ་ཝཾ་སེ་ཧཱུཾ། དེའི་བཞིན་དུ་སྦྱར་ཏེ། མུ་ར་ཛེ༴ མུ་ཀུན་དེ༴ ཧ་སྱེ༴ ལཱ་སེ༴ གིརྟི༴ ནིརྟི༴ པུཥྤེ༴ དྷུ་པེ༴ དཱི་པེ༴ གནྡྷེ༴ ཨ་དར་ཤེ༴ ར་སྱ༴ སྤར་ཤེ༴ ཨོཾ་ཨཱཿབཛྲ་དྷརྨེ་ཧཱུཾ། མ་ཏཾ་གི་སོགས་ལྷ་མོ་བཞིས་བདུད་རྩིས་མཆོད་པར་བསམ་ལ། ཨོཾ་ཨཱཿཧཱུཾ། ཞེས་བརྗོད། སྙོམས་འཇུག་གི་བདེ་བ་ཆེན་པོས་དགེས་པར་བསམ་ལ། ཅུང་ཟད་མཉམ་པར་བཞག །ཨོཾ་ཨཱཿབཛྲ་མ་ཧཱ་སུ་ཁཾ། ཞེས་བརྗོད། བདག་གི་སྡིག་པ་ཐམས་ཅད་བླ་མ་དང༌། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་སྤྱན་སྔར་སོ་སོར་བཤགས་ཤིང༌། སླད་ནས་ཀྱང་སྡོམ་པར་བགྱིད་ལགས་སོ། །སངས་རྒྱས་དང༌། བྱང་ཆུབ་སེམས་དཔའ་དང༌། འཕགས་པ་དང༌། སོ་སོ་སྐྱེ་བོའི་དགེ་ཐམས་ཅད་ལ་རྗེས་སུ་ཡི་རང་ངོ༌། །བདག་གི་དགེ་བ་
ཐམས་ཅད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་བསྔོ་བར་བགྱིའོ། །བདག་བྱང་ཆུབ་ཀྱི་བར་དུ་དེ་བཞིན་གཤེགས་པ་ཐམས་ཅད་བསྡུ་བའི་ངོ་བོ་དཔལ་འཁོར་ལོ་བདེ་མཆོག་སངས་རྒྱས་ལ་སྐྱབས་སུ་མཆིའོ། །དེས་བསྟན་པའི་གསང་སྔགས་དང་ཕྱག་རྒྱ་ལ་སོགས་པའི་ངོ་བོ་ཆོས་ལ་སྐྱབས་སུ་མཆིའོ། །དེའི་དཀྱིལ་འཁོར་གྱི་འཁོར་ལོར་གནས་པའི་རྣལ་འབྱོར་མའི་ཚོགས་དགེ་འདུན་ལ་སྐྱབས་སུ་མཆིའོ། །སེམས་ཅན་ཐམས་ཅད་ཀྱི་སྒྲིབ་པ་ཐམས་ཅད་བསལ་བའི་ཕྱིར། ནམ་མཁའི་མཐའ་གཏུགས་པའི་སངས་རྒྱས་ཐམས་ཅད་ཀྱི་ཆོས་ཀྱི་འཁོར་ལོ་བསྐོར་བ་བསྐུལ་ལོ། །རྒྱལ་བ་མྱ་ངན་ལས་འདའ་བར་བཞེད་པ་རྣམས་འགྲོ་བ་ཀུན་ལ་ཕན་པ་དང་བདེ་བའི་དོན་དུ་བསྐལ་བ་ཞིང་གི་རྡུལ་སྙེད་དུ་བཞུགས་པར་གསོལ་བ་འདེབས་སོ། །སེམས་ཅན་ལ་ཕན་པ་དང་བདེ་བ་དང་མཆོག་མཐར་ཕྱིན་པའི་མྱ་ངན་ལས་འདས་པ་སངས་རྒྱས་ཀྱིས་བྱང་ཆུབ་ལ་འགོད་པའི་སླད་དུ། བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་བགྱིའོ། །བདག་བླ་ན་མེད་པའི་བྱང་ཆུབ་ཀྱི་བར་དུ་རྡོ་རྗེ་ཐེག་པ་ལ་བརྟེན་པར་བགྱིའོ། །ཞེས་རྒྱུན་བཤགས་རྒྱས་པའམ། མི་ནུས་ན་གུར་ནས་འབྱུང་བ་བཞིན་བྱ། རྡོ་རྗེ་སེམས་དཔའི་ཡི་གེ་བརྒྱ་པ་ལན་གཅིག་བརྗོད། ཚད་མེད་བཞི་སྤྱི་དང་མཐུན་པར་བསྒོམས། ཨོཾ་སྭ་བྷཱ་ཝ་ཤུདྡྷ་སརྦ་དྷརྨ་སྭ་བྷཱ་ཝ་ཤུདྡྷོ྅་ཧཾ། ཨོཾ་ཤུ་ནྱ་ཏཱ་ཛྙཱ་ན་བཛྲ་སྭ་བྷ་ཝ་
ཨཏྨ་ཀོ྅་ཧཾ། སྟོང་པའི་ངང་ལས་ཨེ་ལས་ཆོས་འབྱུང་དཀར་པོའི་ནང་དུ་ཧཱུཾ་ལས་རང་ཉིད་ཧེ་རུ་ཀ་ཕྱག་གཉིས་པའི་རྣམ་པར་གྱུར། སེ་གོལ་གཏོགས་ཞིང༌། ཨོཾ་སུམྦྷ༴ ནས་བྷ་ག་ཝཱན་བཛྲ་རཱ་ཛ་ཧཱུཾ་ཧཱུྃ་ཕཊ། སྔགས་ཀྱི་ཡིག་འབྲུ་དང༌། དེའི་འོད་ལས་གྲུབ་པའི་སྒོ་མཚམས་མ་བརྒྱད་དམར་མོ་གཡས་ཐོ་བ་དང༌། གཡོན་སྐུ་སྟོད་རང་མཚུངས་ཀྱི་ཕུར་བུ་ཐོགས་པ། དཔག་ཏུ་མེད་པ་སྤྲོས་ནས་བགེགས་ཐམས་ཅད་ཚར་བཅད། སྔགས་ལས་སྤྲོས་པའི་རྭ་བ་དང༌། ས་གཞི་དང༌། གུར་དང༌། བླ་རེ་དང༌། མདའི་དྲ་བ་དང་བཅས་པར་གྱུར། ཨོཾ་བཛྲ་པྲ་ཀ་ར་ཧཱུཾ་པཾ་ཧཱུཾ། ཨོཾ་མེ་དྷི་ནི་བཛྲ་བྷ་ཝ་བནྡྷུ་ཧཱུཾ། ཨོཾ་བཛྲ་པཉྩ་ར་ཧཱུཾ་བཾ་ཧཱུཾ། ཨོཾ་བཛྲ་བཱི་ཏ་ན་ཧཱུཾ་ཁཾ་ཧཱུཾ། ཨོཾ་བཛྲ་ས་ར་ཛྭ་ལ་ཏྲཾ་སཾ་ཏྲཾ། སྒོ་མཚམས་མ་བརྒྱད་ཀྱི་མདུན་དུ་ཧཱུཾ་ལས་བྱུང་བའི་འབྲུབ་ཁུང་རྣམས་སུ་གྱུར། འབར་བའི་འོད་ཟེར་གྱིས་བགེགས་རྣམ་བསྲེགས་ཤིང༌། ལྷག་མ་རྣམས་ལྕགས་ཀྱུས་བཀུག་ནས་འབྲུབ་ཁུང་དུ་བཅུག་པ་ལ། ཕུར་བུས་བཏབ། ཨོཾ་གྷ་གྷ་སོགས་བརྗོད། ཕུར་བུ་རྣམས་ཀྱི་སྤྱི་བོར་རྡོ་རྗེ་ཐོ་བས་བརྡུངས། ཨོཾ་བཛྲ་མུདྒ་ར་བཛྲ་ཀཱི་ལ་ཨ་ཀོ་ཊ་ཡ་ཧཱུཾ་ཕཊ། ཕོ་ཉ་བ་རྣམས་མདའི་དྲྭ་བ་ལ་ཐིམ་པས། ཆུ་ལ་ཆུ་ཐིམ་པས་ཟེགས་མ་ཕྱིར་འཕྲོས་པ་ལྟར། རྡོ་རྗེ་དང་པདྨ་དང་འཁོར་ལོའི་རྭ་བ་གཡོན་སྐོར་དུ་འབར་བའི་མེ་ལྕེའི་འཕྲེང་བ་ཅན་དུ་གྱུར། ཨོཾ་བཛྲ་པྲ་ཀ་ར་ཧཱུཾ། ཧཱུཾ་པདྨ་པྲ་ཀ་ར་ཧཱུཾ། ཨོཾ་ཙཀྲ་པྲ་ཀ་ར་ཧཱུཾ། ཨོཾ་བཛྲ་ཛྭ་ལ་ཨ་ན་ལརྐ་ཧཱུཾ་ཧཱུཾ་ཧཱུཾ།
བདག་ཉིད་སྐད་ཅིག་གིས་མི་སྣང་བར་གྱུར། སྲུང་བའི་འཁོར་ལོའི་དབུས་སུ་ཡཾ་ལས་རླུང་གི་དཀྱིལ་འཁོར་སྔོན་པོ་ཟླ་གམ། དེའི་སྟེང་དུ་རཾ་ལས་མེའི་དཀྱིལ་འཁོར་དམར་པོ་གྲུ་གསུམ། དེའི་སྟེང་དུ་བཾ་ལས་ཆུའི་དཀྱིལ་འཁོར་དཀར་པོ་ཟླུམ་པོ། དེའི་སྟེང་དུ་ལཾ་ལས་སའི་དཀྱིལ་འཁོར་སེར་པོ་གྲུ་བཞི། དེའི་སྟེང་དུ་སུཾ་ལས་རི་རབ་རིན་པོ་ཆེ་སྣ་བཞི་ལས་གྲུབ་པ། དེའི་སྟེང་དུ་པཾ་ལས་སྣ་ཚོགས་པདྨའི་ལྟེ་བ་ལ་ཧཱུཾ་ལས་སྣ་ཚོགས་རྡོ་རྗེ། དེའི་སྟེང་དུ་བྷྲུཾ་དཀར་པོ་ལས་རིན་པོ་ཆེ་སྣ་ཚོགས་ལས་གྲུབ་པའི་གཞལ་མེད་ཁང༌། གྲུ་བཞི་སྒོ་བཞི་རྩིག་པ་རིམ་པ་ལྔ་དང་ལྡན་པ། ཕ་གུ་དང༌། དྲ་ཕྱེད་དང༌། ཤར་བུ་དང༌། མདའ་ཡབ་དང༌། གཟུང་མ་དང་བཅས་པའི་ཁ་ཁྱེར་ཏེ། མཚན་ཉིད་ཐམས་ཅད་ཡོངས་སུ་རྫོགས་པ། སྒོ་བཞིའི་སྟེང་དུ་ཀ་བའྀ་བཏེགས་པའི་རྟ་བབ་ཀྱིས་མཛེས་པ། ནང་ཀ་བ་བརྒྱད་དང་ལྡན་པ། དབུས་ཕྱུར་བུར་གྱུར་པའི་ཐོག་ཕུབས་ཅན། ནང་གི་ལྷ་སྣམ་ཤར་དཀར། བྱང་ལྗང༌། ནུབ་དམར་ལྷོ་སེར། མཚམས་རྣམས་སུ་བུམ་པ་བརྒྱད་དང་བཅས་པ། དབུས་སུ་སྣ་ཚོགས་པདྨ་འདབ་མ་བརྒྱད་པའི་ལྟེ་བར། འཇིགས་བྱེད་དང་དུས་མཚན་མ་བརྩེགས་པའི་སྟེང་དུ་ཉི་མའི་དཀྱིལ་འཁོར། མཚམས་ཀྱི་འདབ་མ་ལ་ཟླ་བའི་སྟེང་དུ་བུམ་ཐོད་བཞི། ཕྱོགས་ཀྱིས་འདབ་མ་དང༌། གཞལ་མེད་ཁང་གི་སྒོ་མཚམས་བརྒྱད་དུ་ཡང༌། མི་རོའི་སྙིང་གར་ཟླ་བ།
གཞལ་མེད་ཁང་གི་ཕྱི་རོལ་མཆོད་པའི་བཀོད་པ་དང་བཅས་ཤིང་པད་འདབ་ཀྱི་ཁོར་ཡུག་གི་ཕྱི་རོལ་དུ། དུར་ཁྲོད་ཆེན་པོ་བརྒྱད། ཕྱོགས་སྐྱོང་བ་དང༌། ཞིང་སྐྱོང་བ་དང༌། ཤིང་དང༌། མེ་དང༌། ཆུ་དང༌། སྤྲིན་དང༌། རི་དང༌། མཆོད་རྟེན་དང༌། གྲུབ་པ་ཐོབ་པའི་དཔའ་བོ་དང་རྣལ་འབྱོར་མ་རྣམས་ཀྱིས་ཡོངས་སུ་གང་བའོ། །དབུས་ཀྱི་གདན་གྱི་སྟེང་དུ་ཨ་ཨཱ༴ ནས་ཨཾ་ཨཱཿཡོངས་སུ་གྱུར་པ་ལས་ཟླ་བའི་དཀྱིལ་འཁོར། དེའི་སྟེང་དུ་ཀ་ཁ༴ ནས་ཧཀྵ། ཌ་ཌྷ་ད་དྷ་ཡ་ལ། ཕྲག་གཉིས་ཞུ་བ་ལས་ཉི་མའི་དཀྱིལ་འཁོར། དབུས་སུ་རང་གི་སེམས་ཉིད་ཧཱུཾ་དཀར་པོ་ཡོངས་སུ་གྱུར་པ་ལས། རྡོ་རྗེ་དཀར་པོ་རྩེ་ལྔ་པའི་ལྟེ་བར་ཧཱུཾ་གིས་མཚན་པ། དེ་ལས་འོད་འཕྲོས་འདུས་ཐམས་ཅད་གཅིག་ཏུ་འདྲེས་ཡོངས་སུ་གྱུར་པ་ལས། གཙོ་འཁོར་ཐམས་ཅད་དུས་གཅིག་ཏུ་གྲུབ་པ་ནི། དབུས་ཀྱི་གདན་གྱི་སྟེང་དུ་རང་ཉིད་འཁོར་ལོ་བདེ་མཆོག་སྐུ་མདོག་སྔོན་པོ་ཞལ་བཞི་ཕྱག་བཅུ་གཉིས་མགྲིན་པ་བཞི་པ། རྩ་ཞལ་སྔོ། གཡས་སེར་གཡོན་དམར། སྟེང་ཞལ་ལྗང་བ། ཞལ་རྣམ་པར་འགྱུར་བ། སྤྱན་གསུམ་གསུམ་དང་ལྡན་ཤིང༌། མཆེ་བ་གཙིགས་པ། ཕྱག་དང་པོ་གཉིས་ཀྱིས་རྡོ་རྗེ་དང་དྲིལ་བུ་འཛིན་པས་ཡུམ་ལ་འཁྱུད་པ། གཡས་ལྷག་མ་རྣམས་ཀྱིས་འཁོར་ལོ། རྩེ་གསུམ། ལྕགས་ཀྱུ། ཌཱ་མ་རུ། གཡོན་པ་རྣམས་ཀྱིས་ཁ་ཊྭཾ་ག །ཐོད་པ། ཞགས་པ། ཚངས་མགོ་རྣམས་འཛིན་
པ། ཕྱག་ཐ་མ་གཉིས་ཀྱི་གླང་ལྤགས་དང་ཞིང་ཆེན་གྱི་གཡང་གཞི་ཉིས་ཕྲུགས་སུ་བསྣམས་ཤིང་འཕྱར་བ། དབུའི་སྟེང་དུ་གདུགས་དཀར་པོ་གསེར་གྱི་ཡུ་བ་ཅན་དང་བཅས་པ། ཞབས་གཡས་བརྐྱང་བའི་སྐྱིལ་ཀྲུང་ཕྱེད་པའི་གར་སྟབས་ཀྱིས་བཞུགས་པ། རལ་པའི་ཐོར་ཚུགས་དང༌། སྣ་ཚོགས་རྡོ་རྗེ་དང༌། ཟླ་བ་ཕྱེད་པ་དང༌། ནོར་བུ་རིན་པོ་ཆེ་དང༌། ཐོད་པ་སྐམ་པོ་ལྔས་དབུ་རྒྱན་པ། ཕྱག་རྒྱ་དྲུག་དང་མགོ་བོའི་འཕྲེང་བ་ཅན། སྟག་གི་པགས་པའི་ཤམས་ཐབས་གྲོལ་བ། གར་གྱི་ཉམས་དགུ་དང་ལྡན་པ། མཚན་དཔེས་སྤྲས་པའོ། །ཡུམ་རྡོ་རྗེ་ཕག་མོ་སྐུ་མདོག་དམར་མོ་ཞལ་གཅིག་ཕྱག་གཉིས་སྤྱན་གསུམ་མ། གཡོན་པ་ཐོད་ཁྲག་འཛིན་པས་ཡབ་ལ་འཁྱུད་ཅིང༌། གཡས་རྔེའུ་ཆུང་འཁྲོལ་བས་ཆོས་ཀྱི་སྒྲ་སྒྲོག་པ། བྱིན་པ་གཉིས་ཀྱིས་ཡབ་ལ་འཁྲིལ་བ། སྐྲ་གྲོལ་ཞིང་ཕྱག་རྒྱ་ལྔས་བརྒྱན་པ། ཐོད་སྐམ་གྱི་དོ་ཤལ་ཅན། ཁྲག་ལ་དགྱེས་ཤིང་ཁྲག་འཛག་པ། གཉིས་ཀའང་བསྐལ་པའི་མེ་ལྟ་བུའི་དབུས་ན་བཞུགས་པའོ། །འདིའི་སྟོད་གཡོགས་ཉིས་ཕྲུགས་ནི། བླ་གོས་དང་སྣམ་སྦྱར་མཚོན་པ་ཡིན། ཁྲོ་བོའི་སྐུ་ལ་ཆགས་བྲལ་གྱི་གོས་ངུར་སྨྲིག་མི་འཚམ་པའི་དབང་དུ་བྱས་པར་མངོན། ཕྱག་མཚན་ཁ་ཊྭཾ་ག་དང༌། ཐོད་པ་མི་བྱེད་པར་མཁར་བསིལ་དང་ལྷུང་བཟེད་དངོས་བྱས་ནའང་ལེགས་ཏེ། འཁོར་རྣམས་ལ་རིགས་འགྲེ་ལ། ཕྱག་མཚན་ལ་མཐའ་མ་བཀག་པས་སོ། །ཐུགས་ཀར་སྣ་ཚོགས་པདྨའི་སྟེང་དུ་
ཉི་མ་ལ་ཧཱུཾ། དཔྲལ་པར་ཨོཾ། མགྲིན་པར་ཨཱ། ཐུགས་ཀར་ཧཱུཾ། རྩ་འཁོར་ལོ་བཞི་ཡི་གེ་དང་བཅས་པ་ཡང་སྐད་ཅིག་གིས་གྲུབ་པར་གྱུར། ཨཾ་ཧཱུཾ་ཨོཾ་ཧཾ་འཁོར་ལོའི་ལྟེ་བ་བཞི་ལའོ། །ཨ་ཀ་ཙ་ཊ་ཏ་པ་ཡ་ཤ ཀ་ཁ་ག་གྷ་ང༌། ཙ་ཚ་ཛ་ཛྷ་ཉ། ཊ་ཋ་ཌ་ཌྷ་ཎ། ཏ་ཐ་ད་དྷ་ན། པ་ཕ་བ་བྷ་མ། ཡ་ར་ལ་ཝ་ཤ་ཥ་ས་ཧ་ཀྵ། ཨ་ཨཱ། ཨི་ཨཱི། ཨུ་ཨཱུ། རྀ་རཱྀ། ལྀ་ལཱྀ། ཨེ་ཨཻ། ཨོ་ཨཽ། ཨཾ་ཨཿལྟེ་བར་རོ། །བྷྲུཾ་ཏྲཾ་ཨཾ་ཁཾ་ལཾ་མཾ་པཾ་ཏཾ་སྙིང་ཁར་རོ། །ཨཱ་ཨཱི་ཨཱུ་ཨེ། ཨ་ཨཱ། ཨི་ཨཱི། ཨུ་ཨཱུ། ཨེ་ཨཻ་ཨོ་ཨཽ། ཨཾ་ཨཿ མགྲིན་པར་རོ། །ཨ་ཨཱ་ནས་ཨཾ་ཨཱཿ ཡང་ཨ་ཨཱ། ནས་ཨཾ་ཨཿ སྤྱི་བོར་རོ། །ཤར་གྱི་འདབ་མར་མ་ཏཾ་གི་སེར་མོ། བྱང་དུ་ཌོམྦི་ནི་སྔོན་མོ། ནུབ་ཏུ་ར་ཛ་གི་དམར་མོ། ལྷོ་པུཀྐ་སི་དུད་ཁ་རྣམས་གཡས་གཉིས་ན་རྔེའུ་ཆུང་དང་གྲི་གུག གཡོན་གཉིས་ན་འཁར་བསིལ་དང་ལྷུང་བཟེད་འཛིན་པ། ཤར་ལྷོའི་གྲྭར་བ་ལ་ཀཱི་དཀར་ཤམ། ལྷོ་ནུབ་ཏུ་ས་ཧ་ཙ་རི་དམར་མོ། ནུབ་བྱང་དུ་བུདྡྷི་ཙ་རི་ལྗང་ཁུ། བྱང་ཤར་དུ་ཤ་བ་རི་དཀར་མོ་རྣམས་དང་པོ་གཉིས་འཁར་བསིལ་དང་ཐོད་པ། འོག་མ་གཉིས་རྔེའུ་ཆུང་དང་གྲི་གུག་འཛིན་པ། ཤར་སྒོར་ཧེ་རུ་ཀའི་འོད་མ། བྱང་དུ་རྡོ་རྗེ་གཏུམ་མོ། ནུབ་ཏུ་རྡོ་རྗེ་སྲིན་མོ། ལྷོ་རྡོ་རྗེ་འཇིགས་བྱེད་མ་རྣམས་རིམ་པས་ཐལ་དཀར་དང༌། ལྗང་ཁུ་དང༌། དམར་པོ་དང༌། སྔོ་བའི་མདོག་ཅན། གཡས་ཆོས་ཀྱི་འཁོར་ལོ་དང་རྔེའུ་ཆུང༌། གཡོན་
ལྷུང་བཟེད་འཁར་བསིལ། མཆན་ཁུང་དུ་ཁ་ཊྭཾ་ག་དང་བཅས་པ། བཅུ་གཉིས་པོ་ཐམས་ཅད་ཀྱང་མི་ལྤགས་ཀྱི་ཆོས་གོས་གསོལ་བ། ཞལ་གཅིག་ཕྱག་གཉིས་སྤྱན་གསུམ་མ། ཕྱག་རྒྱ་ལྔས་བརྒྱན་ཞིང་སྐྲ་གྲོལ་བ། གཡོན་བརྐྱང་གི་གར་སྟབས་ཀྱིས་གནས་པས་དངོས་གྲུབ་ཐམས་ཅད་སྩོལ་བའོ། །བཅོམ་ལྡན་རྡོ་རྗེ་རྣལ་འབྱོར་མ། །ཐབས་དང་ཤེས་རབ་ངོ་བོ་ཉིད། །སྙིང་རྗེ་ཆེ་དང་སྟོང་པ་ཉིད། །ཐ་མི་དད་པའི་བདག་ཉིད་དོ། །བསོད་སྙོམས་པ་དང་ཆོས་གོས་གསུམ། །ཕྱིས་མི་ལེན་དང་ཙོག་པུ་པ། །གཏན་གཅིག་པ་དང་བླ་གབ་མེད། །ཤིང་དྲུང་པ་དང་བས་མཐར་གནས། །དུར་ཁྲོད་པ་དང་ཕྱག་དར་ཁྲོད། །འཕྱིང་བ་ཅན་དག་གཞི་ཇི་བཞིན། །སྦྱངས་པའི་ཡོན་ཏན་བཅུ་གཉིས་ཏེ། །དེ་རྣམས་རྣལ་འབྱོར་མ་རྣམ་དག །མདོ་ཡི་སྡེ་དང་དབྱངས་ཀྱིས་བསྙད། །ལུང་དུ་བསྟན་དང་ཚིགས་སུ་བཅད། །ཆེད་དུ་བརྗོད་དེ་གླེང་གཞི་དང༌། །རྟོགས་པ་བརྗོད་དང་དེ་ལྟར་བྱུང༌། །སྐྱེས་པའི་རབས་དང་ཤིན་ཏུ་རྒྱས། །རྨད་དུ་བྱུང་དང་གཏན་ལ་ཕབ། །གསུང་རབ་ཡན་ལག་བཅུ་གཉིས་ཀྱང༌། །རྣལ་འབྱོར་མ་ཡི་ངོ་བོ་ཉིད། །ཐུགས་ཀའི་འོད་ཟེར་གྱི་ཡེ་ཤེས་ཀྱི་འཁོར་ལོ་དབང་གི་ལྷ་མཆོད་པའི་ལྷ་མོ་དང་བཅས་པ་སྤྱན་དྲངས། ཕཻཾ། ཧཱུཾ་ཞེས་བགེགས་བསྐྲད། ཨོཾ་བཛྲ་ཨརྒྷཾ་ནས། ཤཔྟའི་བར་གྱིས་མཆོད། ཛཿཧཱུཾ་བཾ་ཧོཿ ཨོཾ་ཡོ་ག་ཤུདྡྷ་སརྦ་དྷརྨ་ཡོ་ག་
ཤུདྡྷོ྅་ཧཾ། དེ་བཞིན་གཤེགས་པ་ཐམས་ཅད་ཀྱིས་བདག་ལ་དབང་བསྐུར་དུ་གསོལ་ཞེས་དབང་གི་ལྷ་རྣམས་ལ་གསོལ་བ་བཏབ་པས། ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏ་ས་མ་ཡ་ཤྲཱི་ཧཱུཾ། ཞེས་གསུང་ཞིང་བུམ་པ་བདུད་རྩི་གང་བས་དབང་བསྐུར། སྐུ་གང་དྲི་མ་དག །ཆུའི་ལྷག་མ་ཡར་ལུད་པ་ལས། གཙོ་བོ་ལ་རྡོ་རྗེ་སེམས་དཔའ། ཡུམ་ལ་མི་བསྐྱོད་པ། ཕྱི་ནང་གི་ཕྱོགས་བཞིའི་ལྷ་རྣམས་ལ་ཕྱོགས་ཀྱི་རིམ་པས་རྟག་པ་དོན་གྲུབ། འོད་དཔག་མེད། རིན་འབྱུང་རྣམས་དང༌། གྲྭའི་ལྷ་མོ་རྣམས་ལ་རིམ་པས། སངས་རྒྱས་རིན་ཆེན་པདྨ་དོན་ཡོད་རྡོ་རྗེ་རྣམས་ཀྱིས་དབུ་རྒྱན། གོང་བཞིན། ཨོཾ་ཨཱཿབཱི་ནི་བཛྲི་ཎི་ཧཱུཾ། ཞེས་སོགས་ལྷ་མོ་བཅུ་དྲུག་གིས་མཆོད། རྐང་པ་བརྒྱད་པས་བསྟོད། མཁའ་གསང་གནས་བཞི་བྱིན་རླབས་ཡིད་ཀྱིས་དྲན་པར་བྱས་ཏེ། རྗེས་ཆགས་སྙོམས་འཇུག་གི་བདེ་བ་སྒོམ་པར་བྱ་ཞིང༌། ཨོཾ་ཤྲཱི་མཧཱ་སུ་ཁ་བཛྲ་ཧེ་ཧེ་རུ་རུ་ཀཾ་ཨཱཿཧཱུཾ་ཧཱུཾ་ཕཊ་སྭཱཧཱ། ཞེས་བརྗོད། ནང་མཆོད་བསངས་སྦྱངས། སྟོང་པའི་ངང་ལས་ཡཾ་ལས་རླུང༌། རཾ་ལས་མེ། ཨ་ལས་ཐོད་པ། ཨོཾ་ཁཾ་ཨཾ་ཏྲཾ་ཧཱུཾ། ལཾ་མཾ་པཾ་ཏཾ་བཾ་ལས་ཤ་ལྔ་བདུད་རྩི་ལྔ་རྣམས་ས་བོན་དེ་རྣམས་ཀྱིས་མཚན་པ། རླུང་གཡོས་མེ་སྦར་རྫས་རྣམས་ཁོལ་བས་ཁ་དོག་དམར་སེར་དུ་གྱུར། སྟེང་གི་ནམ་མཁའ་ལ་ཧཱུཾ་ལས་ཁ་ཊྭཾ་ག་དཀར་པོ་བདུད་རྩིའི་རང་བཞིན་ཅན་མགོ་བོ་ཐུར་དུ་བལྟ་བ། དེ་ཞུ་ཞིང་ཐིམ་པས། དངུལ་ཆུའི་མདོག་ཅན་རབ་ཏུ་བསིལ་བར་གྱུར། སྟེང་གི་ནམ་མཁའ་ལ་དབྱངས་
དང་གསལ་བྱེད་རྣམས་ཡོངས་སུ་གྱུར་པ་ལས། ཧཱུཾ་ཨཱཿཨོཾ་བརྩེགས་པ། དེ་ལས་དཀྱིལ་འཁོར་དཔག་ཏུ་མེད་པ་སྤྲོས། སངས་རྒྱས་ཐམས་ཅད་ཀྱི་བྱང་ཆུབ་ཀྱི་སེམས་སྤྱན་དྲངས། འབྲུ་གསུམ་ལ་ཐིམ། དེ་ཡང་འོད་དུ་ཞུ་ཞིང་འོག་གི་བདུད་རྩི་དང་འདྲེས་ཏེ། བདུད་རྩིའི་རྒྱ་མཚོ་ཆེན་པོར་གྱུར། ཨོཾ་ཨཱཿཧཱུཾ་ཧ་ཧོ་ཧྲིཿ རྡོ་རྗེ་འཆང་དབང་རྣལ་འབྱོར་མ། །ལཱུ་ཡི་ཌི་ཀི་ལཱ་བ་པ། །ཨིནྡྲ་བྷུ་ཏི་དྲིལ་བུ་ཞབས། །རུས་སྦལ་ལང་ཀ་ལིང་པ་དང༌། །སྤྱོད་འཆང་དགེ་བའི་མགོན་པོ་དང༌། །ཏི་ལི་ནཱ་རོ་ཡིད་ཅན་དཔལ། །བྷ་དནྟ་པ་མར་དོ་དང༌། །བདེ་མཆོག་རྡོ་རྗེ་བློ་ལྡན་ཞབས། །ལྷོ་ཚད་ལོ་མཆོག་གྲགས་ཆེན་པ། །འཕགས་འོད་བུ་སྟོན་ཁྱུང་ལྷས་པ། །བཀྲ་ཤིས་རིན་ཆེན་ཀུན་དགའ་བཟང༌། །གྲགས་རྒྱལ་བསོད་ནམས་ལྷུན་གྲུབ་དང༌། །གྲོལ་མཆོག་ཞབས་དང་བླ་མ་རྗེ། །དེ་ལྟར་རྩ་བརྒྱུད་བླ་མ་མཆོད། །ཨོཾ་ཨཱཿཧཱུཾ། རང་སྔགས་རྣམས་ཀྱི་མཐར་འབྲུ་གསུམ་བཏགས་པས་མཆོད། འཁོར་ལོའི་བཟླས་པ་གཙོ་བོར་བྱུང་བའི་བཟླས་པའི་དམིགས་པ་རྣམས་གསལ་བཏབ་ལ་བཟླས་པ་བྱའོ། །ཨོཾ་ཤྲཱི་བཛྲ་ཧེ་ཧེ་རུ་རུ་ཀཾ་ཧཱུཾ་ཧཱུཾ་ཕཊ་ཌཱ་ཀི་ནི་ཛྭ་ལ་སཾ་བྷ་ར་སྭཱཧཱ། ཨོཾ་ཧྲཱིཿཧ་ཧ་ཧཱུཾ་ཧཱུཾ་ཕཊ། ལྷའི་སྙིང་པོ་དང་ཉེ་བའི་སྙིང་པོའོ། །ཨོཾ་སརྦ་བུདྡྷ་ཌཱ་ཀི་ནཱི་ཡེ་བཛྲ་ཝརྞ་ནཱི་ཡེ་ཧཱུཾ་ཧཱུཾ་ཕཊ་སྭཱཧཱ། ཨོཾ་བཛྲ་བཻ་རོ་ཙ་ནཱི་ཡེ་ཧཱུཾ་ཧཱུཾ་ཕཊ་སྭཱཧཱ། ལྷ་མོའི་སྙིང་པོ་དང་ཉེ་བའི་སྙིང་པོའོ། །ཨོཾ་མ་ཏཾ་ཀཱི་ཧཱུཾ་ཧཱུཾ་ཕཊ།
ཨོཾ་ཌཱོམྦི་ནཱི་ཧཱུཾ་ཧཱུཾ་ཕཊ། ཨོཾ་རཱ་ཛ་ཀཱི་ཧཱུཾ་ཧཱུཾ་ཕཊ། ཨོཾ་པུཀྐ་སཱི་ཧཱུཾ་ཧཱུཾ་ཕཊ། ཨོཾ་བ་དཱ་ཀི་ཧཱུཾ་ཧཱུཾ་ཕཊ། ཨོཾ་ས་ཧཱ་ཙ་རི་ཧཱུཾ་ཧཱུཾ་ཕཊ། ཨོཾ་བུ་དྷི་ཙ་རི་ཧཱུཾ་ཧཱུཾ་ཕཊ། ཨོཾ་ཤཱ་ཝཱ་རི་ཧཱུཾ་ཧཱུཾ་ཕཊ། ཨོཾ་ཧེ་རུ་ཀ་བྷ་ཧཱུཾ་ཧཱུཾ་ཕཊ། ཨོཾ་བཛྲ་ཙཎྜ་ལི་ཧཱུཾ་ཧཱུཾ་ཕཊ། ཨོཾ་བཛྲ་རཀྵ་སི་ཧཱུཾ་ཧཱུཾ་ཕཊ། ཨོཾ་བཛྲ་བྷཻ་ར་བཱི་ཧཱུཾ་ཧཱུཾ་ཕཊ། དཔའ་མོའི་སྔགས་སོ། །དེ་ལྟར་བཟླས་པ་ཅི་འགྲུབ་བྱའོ། །ཐུན་བསྡུ་བ་འདོད་ན། རང་གི་སྙིང་གའི་ས་བོན་གྱི་འོད་ཟེར་གྱིས་སྣང་བ་ཐམས་ཅད་དཀྱིལ་འཁོར་གྱི་འཁོར་ལོར་སྦྱངས། རྟེན་དང་བརྟེན་པར་བཅས་པའི་དཀྱིལ་འཁོར་ལ་ཐིམ། དཀྱིལ་འཁོར་ཡང་རིམ་གྱིས་ཧཱུཾ་ཡིག་ལ་ཐིམ། སླར་ཡང་ཕྱག་གཉིས་པའི་རྣམ་པར་ལངས་ཏེ། གོ་ཆ་གཉིས་ཀྱིས་རྒྱས་བཏབ་ལ། ཐུན་མཚམས་ལ་འཇུག་གོ །རྫོགས་པའི་རིམ་པ་སྒོམ་པར་འདོད་ན་ཡང༌། དཀྱིལ་འཁོར་བསྡུས་པའི་མཐའ་དེ་ཉིད་དུ་བྱའོ། །ཐུན་མཚམས་སུ་གཏོར་མ་འབུལ་བར་འདོད་ན་ཡང༌། ནང་མཆོད་ལྟར་བྱིན་གྱིས་རླབས་ལ། ཕཻཾ་ཞེས་དཀྱིལ་འཁོར་གྱི་འཁོར་ལོ་མདུན་དུ་སྤྱན་དྲངས་ལ། ཨརྒྷཾ་ནས་ཤཔྟའི་བར་གྱིས་མཆོད། གཙོ་བོའི་སྙིང་པོའི་མཐར་འབྲུ་གསུམ་བཏགས་པས་ནང་མཆོད་ཀྱང་ཕུལ། ཨོཾ་བཛྲ་ཨ་རལླི་ཧོཿཛཿཧཱུཾ་བཾ་ཧོཿས་མ་ཡ་སྟྭཾ་དྲི་ཤྱ་ཧོ། བཛྲ་ཌཱ་ཀི་ནཱི་ཁ་ཁ་ཁཱ་ཧི་ཁཱ་ཧི། ཨི་མི་བ་ལིཾ་བྷུ་ཛ་ཐ། པི་པ་ཐ། མ་མ་ཀཱརྱ་སཱ་དྷ་ཡ། ཨོཾ་ཨཱཿཧཱུཾ་ཕཻཾ་ཕཻཾ། ཞེས་པ་ལན་གསུམ་གྱིས་ཕུལ། རྐང་བརྒྱད་པའི་སྔགས་ཀྱིས་བསྟོད། འཇིག་རྟེན་པའི་གཏོར་མ་ཡོད་ན་མཁའ་འགྲོ་སྤྱི་གཏོར་གྱི་ཆོ་གས་བསྔོས། དངོས་གྲུབ་བླང་པ་དང༌། ཡི་གེ་བརྒྱ་པས་
ལྷག་ཆད་ཁ་བསྐང་བ་ནས། བཀྲ་ཤིས་བརྗོད་པའི་བར་བདེ་མཆོག་སྤྱི་དང་འདྲའོ། །འདི་དག་གི་གོ་དོན་དང༌། འཁོར་ལོས་སྒྱུར་དྲུག་གི་དཀྱིལ་འཁོར་ལ་འདོན་པ་སྤོ་བའི་ཚུལ་སོགས་ཞིབ་མོར་ཤེས་པར་འདོད་ན། སློབ་དཔོན་ཉིད་ཀྱི་གཞུང་དང་ཡིག་སྙིང་སོགས་ལས་ཤེས་པར་བྱའོ། །མངོན་བརྗོད་ཀྱི་དཀྱིལ་འཁོར་གྱི་གཙོ་བོ་འཁོར་ལོས་སྒྱུར་དྲུག་ཡིན་ཡང༌། དགོངས་འགྲེལ་རྒྱ་གཞུང་གི་ཟིན་སོ་ཆེ་བ་དང་དཀྱིལ་འཁོར་གྲགས་ཆེ་བའི་དབང་དུ་བྱས་ཏེ་འདི་ཐོག་མར་བཀོད་པ་ཡིན་ནོ། །རྒྱུད་རྒྱལ་མཐར་ཐུག་མངོན་བརྗོད་ལས་བྱུང་བ། །བཅུ་བཞིའི་ལྷ་ཚོགས་སྦྱངས་པའི་ཡོན་ཏན་གྱི། །དཀྱིལ་འཁོར་འཁོར་ལོ་གྲུབ་པའི་གཙུག་གི་བརྒྱན། །ལྭ་བའི་ཞབས་ཀྱི་བཞེད་ལྟར་སྒྲུབ་ཐབས་བྱས། །འདིར་འབད་རྣམ་དཀར་གང་མཆིས་དེས། །བདག་ཉིད་ཧེ་རུ་ཀར་གྱུར་ནས། །གང་ལ་གང་འདུལ་འཕྲིན་ལས་ཀྱིས། །མཐའ་ཡས་འགྲོ་རྣམས་སྒྲལ་བར་ཤོག།ཅེས་པ་ལྭ་བ་བཅུ་གསུམ་མར་གྲགས་པ། བདེ་མཆོག་སྦྱངས་པའི་ཡོན་ཏན་གྱི་སྒྲུབ་ཐབས་ཏེ་དྲུག་པའོ།། །།༈ ན་མོ་བཛྲ་དྷ་རཱ་ཡ། འཁོར་ལོ་བསྒྱུར་བ་དྲུག་གི་གཙོ། །བླ་མ་མཆོག་ཞབས་ལ་བཏུད་ནས། །དེ་ཡི་སྒྲུབ་ཐབས་རྨད་བྱུང་བ། །ཀུན་ལ་ཕན་ཕྱིར་བྲི་བར་བྱ། །འདིར་འཁོར་ལོས་བསྒྱུར་དྲུག་གི་མངོན་རྟོགས་སྒོམ་པར་འདོད་པས། སྐྱབས་སེམས་རྡོ་རྗེ་སེམས་དཔའི་བསྒོམ་བཟླས་རྣམས་བྱ། ཤྲཱི་ཧེ་རུ་ཀ་ཧཾ། རང་གི་སྙིང་གར་ཉི་མའི་སྟེང་དུ་ཧཱུཾ། དེ་ལས་འོད་ཟེར་དང་མཆོད་པའི་ལྷ་མོ་དཔག་ཏུ་མེད་པ་སྤྲོས། བླ་མ་དཀྱིལ་འཁོར་སངས་རྒྱས་བྱང་
ཆུབ་སེམས་དཔའི་ཚོགས་དང་བཅས་པ་སྤྱན་དྲངས་ལ་མཆོད་པར་གྱུར། གང་གི་དྲིན་གྱིས་བདེ་ཆེན་ཉིད། ཅེས་སོགས་ཤོ་ལོ་ཀ་གཉིས་ཀྱི་ཕྱག་བྱ། ཨརྒྷཾ༴ ནས་ཤཔྟའི་བར་གྱིས་མཆོད། དཀོན་མཆོག་གསུམ་ལ་བདག་སྐྱབས་མཆི༴ སོགས་ཡན་ལག་བདུན་པ་བྱ། སྤྲོ་ན་རིགས་ལྔའི་སྡོམ་པ་ཡང་བཟུང༌། ཨོཾ་མུཿ ཞེས་པས་གཤེགས་སུ་གསོལ་བའམ་མི་དམིགས་པར་བསམ། ཚད་མེད་བཞི་སྤྱི་དང་མཐུན་པར་བསྒོམ། མགོ་བོར་གཟུགས་ཕུང་བྷྲུཾ་ལས་རྣམ་སྣང་དཀར་པོ་གཡས་འཁོར་ལོ། གཡོན་དྲིལ་བུ་དཀུར་བརྟེན་པ། ལྟེ་བར་ཚོར་བ་ཨཾ་ལས་རྡོ་རྗེ་ཉི་མ་སེར་པོ་གཡས་རིན་པོ་ཆེ། །མགྲིན་པར་འདུ་ཤེས་ཧྲི་ལས་པདྨ་གར་དབང་དམར་པོ་གཡས་པདྨ། ལོང་བུར་འདུ་བྱེད་ཧོ་ལས་རྡོ་རྗེ་རྒྱལ་པོ་ལྗང་ཁུ་གཡས་སྣ་ཚོགས་རྡོ་རྗེ། གསུམ་ཀའང་གཡོན་དྲིལ་བུ་ཐུགས་ཀར་འཛིན་ཞིང༌། བཞི་ཀ་ཡང་ཕྱག་གཡས་འཕྱར་བའི་སྟབས་སོ། །སྙིང་གར་རྣམ་ཤེས་ཧཱུཾ་ལས་རྡོ་རྗེ་སེམས་དཔའ་དཀར་པོ་གཡས་རྡོ་རྗེ་ཐུགས་ཀར་གཏོད་པ། སྤྱི་གཙུག་ཏུ་དེ་བཞིན་ཉིད་ཀྱི་ངོ་བོ་ཧི་ལས་ཧེ་རུ་ཀ་ནག་པོ་གཡས་རྡོ་རྗེ་དང་བཅས་པའི་ས་གནོན། དེ་གཉིས་ནི་གཡོན་དྲིལ་བུ་དཀུར་བརྟེན་པའོ། །མིག་ཏུ་ཨོཾ་ལས་གཏི་མུག་རྡོ་རྗེ་དཀར་པོ་གཡས་འཁོར་ལོ། རྣ་བར་ཛྲིཾ་ལས་ཞེ་སྡང་རྡོ་རྗེ་ནག་པོ་གཡས་རྡོ་རྗེ། སྣར་ཏྲཾ་ལས་ཕྲག་དོག་རྡོ་རྗེ་སེར་པོ་གཡས་རིན་པོ་ཆེ། ལྕེ་རྩར་ཨ་ལས་འདོད་ཆགས་རྡོ་རྗེ་དམར་པོ་གཡས་པདྨ། དཔྲལ་པར་ཁཾ་ལས་སེར་སྣ་རྡོ་རྗེ་ལྗང་ཁུ་
གཡས་སྣ་ཚོགས་རྡོ་རྗེ། སྙིང་གར་ཧཾ་ལས་དབང་ཕྱུག་རྡོ་རྗེ་དཀར་པོ་གཡས་རྡོ་རྗེ། གཏི་མུག་རྡོ་རྗེ་ཕྱག་གཡོན་དཀུར་བརྟེན་པ། ཞེ་སྡང་རྡོ་རྗེ་རྡོ་རྗེ་ཐུགས་ཀར་འཛིན་པ། ཁྱད་པར་གཞན་རྣམས་དང་ཁ་དོག་རིམ་བཞིན་རྣམ་སྣང་སོགས་དང་མཚུངས་པ། དེ་ཐམས་ཅད་ཀྱང་རལ་པའི་ཅོད་པན་ཅན། ལྟེ་བར་ས་ཁམས་ལཾ་ལས་ལྟུང་བྱེད་མ་སེར་མོ་གཡས་དང་པོ་འཁོར་ལོ་འཛིན་པ། སྙིང་གར་ཆུ་ཁམས་མཱཾ་ལས་གསོད་བྱེད་མ་ནག་པོ་རྡོ་རྗེ་འཛིན་པ། མགྲིན་པར་མེ་ཁམས་པཱཾ་ལས་འགུགས་བྱེད་མ་དམར་མོ་པདྨ་འཛིན་པ། དཔྲལ་པར་རླུང་ཁམས་ཏཱཾ་ལས་གར་དབང་ལྗང་ཁུ་རལ་གྲི་འཛིན་པ། ཐམས་ཅད་ཀྱང་གཡས་འོག་མས་གྲི་གུག གཡོན་གཉིས་ཐོད་པ་དང་ཁ་ཊྭཾ་ག་འཛིན་པ། གསང་གནས་སུ་ནམ་མཁའི་ཁམས་ཁཾ་ལས་པད་མ་དྲྭ་བ་ཅན་མ་དུད་ཁ། དུད་དཀར་དམར་བའི་ཞལ་གསུམ་ཕྱག་དྲུག་གིས་གཡས་གསུམ་ལྕགས་ཀྱུ་ཚངས་མགོ་གྲི་གུག གཡོན་གསུམ་ཐོད་པ་ཁ་ཊྭཾ་ག་ཞགས་པ་འཛིན་པ། ལྷ་མོ་ལྔ་སྐྲ་གྲོལ་བ། ལྷ་བཅུ་བདུན་པོ་ཐམས་ཅད་སྤྱན་གསུམ་པ་ཕྱག་རྒྱ་ལྔ་ལྡན། གཅེར་བུ་གཡས་བརྐྱང་གིས་བཞུགས་པའོ། །ཨོཾ་པྲ་ཀིར་ཏི་པ་རི་ཤུདྡྷ་སརྦ་དྷརྨ་པྲ་ཀྲི་ཏི་པ་རི་ཤུདྡྷོ྅་ཧཾ། ཨོཾ་སྭ་བྷཱ་ཝ། སོགས་ལན་གསུམ། སྟོང་པའི་ངང་ལས་ཧཱུཾ་ལས་རྡོ་རྗེ་ས་གཞིར་རྭ་བ་དྲྭ་བ། གུར། བླ་རེ། མདའི་དྲྭ་བ། མེ་རི་འབར་བ་དང་བཅས་པར་གྱུར། ཨོཾ་མེ་དྷི་ནི་བཛྲི༴ ནས་ལརྐ་ཧཱུཾ་ཧཱུཾ་ཧཱུཾ། ཞེས་པའི་བར་སྔགས་
ཚན་དྲུག་བརྗོད། སྣ་ཚོགས་རྡོ་རྗེའི་ལྟེ་བར་བྷྲུཾ་ལས་བཀའི་འཁོར་ལོ་སེར་པོ་རྩིབས་བཅུ་པ། འཁོར་ལོའི་ལྟེ་བར་པཾ་ལས་པདྨ་དང༌། རཾ་ལས་ཉི་མའི་སྟེང་དུ་ཧཱུཾ། དེ་ལས་རང་ཉིད་རྡོ་རྗེ་སེམས་དཔའ་དཀར་པོ་མི་བསྐྱོད་པའི་དབུ་རྒྱན་ཅན་དཀར་སེར་ལྗང་བའི་ཞལ་གསུམ། རྩ་ཕྱག་གཉིས་ཀྱིས་རྡོ་རྗེ་དང་དྲིལ་བུ་འཛིན་པའི་རང་སྣང་གི་ཡུམ་ལ་འཁྱུད་པ། ལྷག་མ་གཡས་གཉིས་ལྕགས་ཀྱུ་དང་ཞགས་པ། གཡོན་གཉིས་ན་ཐོད་པ་དང་ཁ་ཊྭཾ་ག་བསྣམས་པ། གཡས་བརྐྱང་གི་སྟབས་ཅན། དེའི་ཐུགས་ཀ་ནས་ཧཱུཾ་བཅུ་སྤྲོས་ཏེ། འཁོར་ལོའི་རྩིབས་བཅུར་འཁོད་པ་ཁྲོ་བོ་བཅུར་གྱུར་པ་དང༌། བདག་ཉིད་རྡོ་རྗེ་འཇིགས་མཛད་ཧེ་རུ་ཀར་གྱུར་པ་ནི། སྐུ་མདོག་མཐིང་ནག །ནག་སེར་ལྗང་བའི་ཞལ་གསུམ། ཕྱག་གི་དང་པོ་གཉིས་རྡོ་རྗེ་དང་དྲིལ་བུ་འཛིན་པ། ཞབས་གཡས་བརྐྱང་པས་འཇིགས་བྱེད་དང་དུས་མཚན་མནན་པ། ཤར་དུ་རྡོ་རྗེ་གཏུམ་པོ་སྔོན་པོ་སྔོ་སེར་ལྗང་བའི་ཞལ་གསུམ། བྱང་དུ་རྡོ་རྗེ་ཉི་མ་སེར་པོ་སེར་ནག་ལྗང་བ། ནུབ་ཏུ་རྡོ་རྗེ་གཙུག་ཏོར་དམར་པོ་དམར་ནག་ལྗང་བ། ལྷོ་རུ་རྡོ་རྗེ་འཁྱིལ་པ་ལྗང་ཁུ་ལྗང་དཀར་སེར་བ། མེར་རྡོ་རྗེ་གནོད་སྦྱིན་དུད་ཁ་དུད་སེར་ལྗང་བ། བདེན་བྲལ་དུ་རྡོ་རྗེ་དུས་དམར་པོ་དམར་སེར་ལྗང་བ། རླུང་དུ་རྡོ་རྗེ་སྟོབས་པོ་ཆེན་པོ་ནག་པོ་ནག་སེར་ལྗང་བ། དབང་ལྡན་དུ་རྡོ་རྗེའི་འཇིགས་རུང་སྔོན་པོ་སྔོ་སེར་ལྗང་བའི་ཞལ་གསུམ་པ། མིག་གཡོ་བ། དེ་
རྣམས་ཕྱག་དང་པོ་གཉིས་ཀྱི་ཅང་ཏེའུ་དང༌། དྲིལ་བུ་འཛིན་པ། སྟེང་དུ་གཙུག་ཏོར་འཁོར་ལོ་བསྒྱུར་བ་དཀར་པོ་དཀར་ནག་ལྗང་བ། ཕྱག་དང་པོ་གཉིས་འཁོར་ལོ་དང་དྲིལ་བུ། འོག་ཏུ་རྡོ་རྗེ་ས་འོག་ནག་པོ་ནག་སེར་ལྗང་བ། ཕྱག་དང་པོ་གཉིས་རྩེ་གསུམ་དང་དྲིལ་བུ། ཁྲོ་བོ་བཅུ་པོ་རྣམས་ནི་ཕྱོགས་སྐྱོང་བ་བཅུ་གནོན་པ། གཙོ་འཁོར་ཐམས་ཅད་རྩ་ཕྱག་གཉིས་ཀྱིས་རང་སྣང་གི་རིག་མ་ལ་འཁྱུད་ཅིང༌། ལྷག་མ་གཡས་གཉིས་ན་ལྕགས་ཀྱུ་དང་ཞགས་པ། གཡོན་གཉིས་ན་ཐོད་པ་དང་ཁ་ཊཱཾ་ག་བསྣམས་པ། སྤྱན་གསུམ་དང་ལྡན་པ། ཆེར་ཁྲོས་ཤིང༌། སྟག་ལྤགས་ཀྱི་ཤམས་ཐབས་ཅན། རུས་པ་དང་སྦྲུལ་གྱིས་བརྒྱན་ཞིང༌། ཐོད་སྐམ་གྱི་དབུ་རྒྱན་དང་མི་མགོའི་དོ་ཤལ་ཅན། པད་ཉི་ལ་གཡས་བརྐྱང་གི་སྟབས་ཀྱིས་བཞུགས་པའོ། །ཨོཾ་སུམྦྷ༴ ཞེས་སོགས་ཀྱི་བཀའ་བསྒོས་པས། ཁྲོ་བོ་རྣམས་ཀྱིས་བགེགས་རྣམས་བཀུག སྤྱི་བོར་ཕུར་བུས་བཏབ། ཨོཾ་གྷ་གྷ༴ སོགས་དེ་རྣམས་ཐོ་བས་བརྡུང༌། ཨོཾ་བཛྲ་མུངྒ་ར༴ སོགས་བགེགས་རྣམས་སྟོང་པ་ཉིད་དུ་བཅོམ་སྟེ། དེ་བཞིན་ཉིད་དང་རོ་གཅིག་ཏུ་གྱུར། ཨོཾ་ཁ་བཛྲ་དྷྲིཀ་བཛྲ་ཧཱུཾ་ཀ་ར་བཛྲ་ཧཱུཾ་ཕཊ། ཨོཾ་བཛྲ་ཙཎྜ་བཛྲ་ཧཱུཾ་ཕཊ། ཨོཾ་བཛྲ་ཛྭ་ལཱ་ན་ལརྐ་བཛྲ་ཧཱུཾ་ཕཊ། ཨོཾ་བཛྲོཥྞི་ཥ་བཛྲ་ཧཱུཾ་ཕཊ། ཨོཾ་བཛྲ་ཀུཎྜ་ལི་བཛྲ་ཧཱུཾ་ཕཊ། ཨོཾ་བཛྲ་ཡཀྵ་བཛྲ་ཧཱུཾ་ཕཊ། ཨོཾ་བཛྲ་ཀ་ལི་བཛྲ་ཧཱུཾ་ཕཊ། ཨོཾ་བཛྲ་མཧཱ་ཀཱ་ལ་བཛྲ་ཧཱུཾ་ཕཊ། ཨོཾ་བཛྲ་བྷི་ཥ་ན་བཛྲ་ཧཱུཾ་ཕཊ། ཨོཾ་བཛྲ་ཨུཥྞི་ཥ་
ཙཀྲ་ཝརྟི་བཛྲ་ཧཱུཾ་ཧཱུཾ་ཕཊ། ཨོཾ་བཛྲ་པཱ་ཏཱ་ལ་བཛྲ་ཧཱུཾ་ཕཊ། གཙོ་བོ་ཉིད་ཀྱི་རྩ་སྔགས་ཞལ་བཞི་པ་གང་འགྲུབ་བཟླ། འདིར་ཐུན་མོང་མ་ཡིན་པའི་སྲུང་འཁོར་བསྡུས་པའི་ཚུལ་བཀོད་པ་ཡིན་གྱི་རྒྱས་འབྲིང་སོགས་སྒོམ་པར་འདོད་ན། ཁྲོ་བོ་རྣམ་རོལ་དུ་རྒྱས་པར་བཤད་ཟིན་པ་བཞིན་བསྒོམ་པར་བྱའོ། །ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཏྨ་ཀོ྅་ཧཾ། ཨོཾ་ཨ་ནི་མི་ཏ་ཛྙཱ་ན་བཛྲ་སྭ་བྷཱ་ཝ་ཨཏྨ་ཀོ྅་ཧཾ། ཨོཾ་ཨ་པྲ་ཎི་ཧི་ཏ་ཛྙཱ་ན་བཛྲ་སྭ་བྷཱ་ཝ་ཨཏྨ་ཀོ྅་ཧཾ། སྟོང་པའི་ངང་ལས་རང་གི་བར་དོའི་རྣམ་པར་ཤེས་པ་ནཱ་དའི་རྣམ་པས་ནམ་མཁར་གནས། འོག་ཏུ་ཡཾ་ལས་རླུང་གི་དཀྱིལ་འཁོར་སྔོན་པོ་ཟླ་གམ། དེའི་སྟེང་དུ་རཾ་ལས་མེའི་དཀྱིལ་འཁོར་དམར་པོ་གྲུ་གསུམ། དེའི་སྟེང་དུ་བཾ་ལས་ཆུའི་དཀྱིལ་འཁོར་དཀར་པོ་ཟླུམ་པོ། དེའི་སྟེང་དུ་ལཾ་ལས་སའི་དཀྱིལ་འཁོར་སེར་པོ་གྲུ་བཞི། དེའི་སྟེང་དུ་སུཾ་ལས་རི་རབ་རིན་པོ་ཆེ་སྣ་བཞི་ལས་གྲུབ་པ། དེའི་སྟེང་དུ་བྷྲུཾ་ལས་འཁོར་ལོ་བྷྲུཾ་གྱིས་མཚན་པ་ལས་རིན་པོ་ཆེ་སྣ་ཚོགས་ལས་གྲུབ་པའི་གཞལ་མེད་ཁང༌། གྲུ་བཞི་སྒོ་བཞི་པ། རྩིག་པ་རིམ་པ་ལྔ་དང་ལྡན་པ། ཕ་གུ་དང༌། དྲྭ་ཕྱེད་དང༌། ཤར་བུ་དང༌། མདའ་ཡབ་དང༌། གཟུངས་མ་རྣམས་དང་བཅས་པའི་ཁ་ཁྱེར་ཏེ། མཚན་ཉིད་ཐམས་ཅད་ཡོངས་སུ་རྫོགས་པ། སྒོ་བཞིའི་སྟེང་དུ་ཀ་བས་བཏེག་པའི་རྟ་བབས་སྣམ་བུ་བཅུ་གཅིག་དང་བཅས་པ། ནང་གི་ལྷ་སྣམ་ཤར་དཀར། བྱང་ལྗང༌། ནུབ་དམར། ལྷོ་སེར། དབུས་སྔོ་བ། ཕྱི་རོལ་མཆོད་པའི་བཀོད་པ་ཐམས་ཅད་དང་བཅས་ཤིང༌། པད་འདབ་ཀྱི་
ཁོར་ཡུག་གི་ཕྱི་རོལ་དུ། དུར་ཁྲོད་ཆེན་པོ་བརྒྱད། ཕྱོགས་སྐྱོང་བ་དང༌། ཞིང་སྐྱོང་བ་དང༌། ཤིང་དང༌། མེ་དང༌། ཆུ་དང༌། སྤྲིན་དང༌། རི་དང༌། མཆོད་རྟེན་དང༌། གྲུབ་པ་ཐོབ་པའི་དཔའ་བོ་དང་རྣལ་འབྱོར་མ་རྣམས་ཀྱིས་ཡོངས་སུ་གང་བ། ཕྱི་རོལ་དུ་སྲུང་བའི་འཁོར་ལོ་དང་བཅས་པའོ། །གཞལ་ཡས་ཁང་གཞི་དཀྱིལ་གྱི་དབུས་སུ་རྡོ་རྗེ་སེམས་དཔའི་དཀྱིལ་འཁོར། ཤར་དུ་རྣམ་པར་སྣང་མཛད་ཀྱི་དཀྱིལ་འཁོར། ལྷོ་སྟོད་དུ་རིན་ཆེན་འབྱུང་ལྡན་གྱི་དཀྱིལ་འཁོར། ལྷོ་སྨད་དུ་སྣང་བ་མཐའ་ཡས་ཀྱི་དཀྱིལ་འཁོར། བྱང་སྟོད་དུ་མི་བསྐྱོད་པའི་དཀྱིལ་འཁོར། བྱང་སྨད་དུ་དོན་ཡོད་གྲུབ་པའི་དཀྱིལ་འཁོར་ཐམས་ཅད་ཀྱང་རྟ་བབས་དང་བྲལ་བ། ལྷག་མ་གཞལ་ཡས་ཁང་གི་མཚན་ཉིད་ཐམས་ཅད་ཡོངས་སུ་རྫོགས་པ། ནང་ཀ་བ་བརྒྱད་བརྒྱད་དང་ལྡན་པ། སྟེང་ཐོག་མཛེས་པར་ཕུབ་ཅིང༌། དབུས་ཕྱུར་བུར་གྱུར་པ། དཀྱིལ་འཁོར་དེ་རྣམས་ཀྱིས་དབུས་སུ་སྣ་ཚོགས་པདྨ་འདབ་མ་བརྒྱད་པའི་གདན་རེ་རེ། དེ་རྣམས་ཀྱི་ལྟེ་བར་རིམ་པས། སེང་ཁྲི་པདྨ་ཉི་མ་འཇིགས་བྱེད་དུས་མཚན་གྱི་གདན་དང༌། སེང་ཁྲི་པདྨ་ཟླ་བ་ཚངས་པ་དང༌། རྟའི་ཁྲི་པདྨ་ཉི་མ་ལྷའི་བུ་ཉི་མ་དང༌། རྨ་བྱའི་ཁྲི་པདྨ་ཉི་མ་དབང་ཕྱུག་ཆེན་པོ་དང༌། གླང་པོ་ཆེའི་ཁྲི་པདྨ་ཉི་མ་དབང་ཆེན་དང༌། མཁའ་ལྡིང་གི་ཁྲི་པདྨ་ཉི་མ་ལྷའི་བུ་ཟླ་བ་སྟེ། གདན་དྲུག་ཆར་
གྱི་སྟེང་དུ་ཨ་ཨཱ༴ ནས། ཨཾ་ཨཿཕྲག་གཉིས་གཉིས་ཡོངས་སུ་གྱུར་པ་ལས་ཟླ་བའི་དཀྱིལ་འཁོར་དྲུག་ཀ་ཁ༴ ནས ཧ་ཀྵ་ཡ་ར་ལ་ཝ་ཌ་ཌྷ་རྣམས་ཕྲག་གཉིས་གཉིས་ཡོངས་སུ་གྱུར་པ་ལས་ཉི་མའི་དཀྱིལ་འཁོར་དྲུག །དེ་རྣམས་ཀྱི་དབུས་སུ་རིམ་པས། ཧཱུཾ་བྷྲུཾ་ཨཾ་ཧྲིཾ་ཁཾ་བཾ་རྣམས་ཡོངས་སུ་གྱུར་པ་ལས། རྡོ་རྗེ་དཀར་པོ་དང༌། འཁོར་ལོ་དང༌། རིན་པོ་ཆེ་དང༌། རྡོ་རྗེ་སྔོན་པོ་དང༌། པདྨ་དང༌། རལ་གྲི་རྣམས་ཡོངས་སུ་གྱུར་པ་ལས། འོད་འཕྲོས་འཕགས་པ་མཆོད། སེམས་ཅན་གྱི་དོན་བྱས། སླར་འདུས་ཤིང་ཐིམ་པ་ལས། རིགས་དྲུག་གི་འཁོར་ལོས་བསྒྱུར་བ། ཡབ་ཡུམ་རང་རང་གི་འཁོར་དང་བཅས་པ་ཡོངས་སུ་རྫོགས་པར་གྱུར་པ་ནི། གཞལ་མེད་ཁང་དབུས་མའི་དབུས་ཀྱི་གདན་གྱི་སྟེང་དུ་རང་ཉིད་ཡེ་ཤེས་མཁའ་འགྲོ རྡོ་རྗེ་སེམས་དཔའ་སྐུ་མདོག་དཀར་པོ་རྡོ་རྗེ་དང་དྲིལ་བུ་འཛིན་པས་ཡུམ་ལ་འཁྱུད་པ། ཡུམ་ཆོས་ཀྱི་དབྱིངས་ཀྱི་དབང་ཕྱུག་མ་དཀར་མོ་གཡས་རྡོ་རྗེ་དང་གཡོན་ཐོད་པ་འཛིན་པ། ཤར་ལྷོར་མཁའ་འགྲོ་མ་སྔོན་པོ། ལྷོ་ནུབ་ཏུ་ལཱ་མ་ལྗང་ཁུ། ནུབ་བྱང་དུ་ཁཎྜ་རོ་ཧ་དམར་མོ། བྱང་ཤར་དུ་གཟུགས་ཅན་མ་སེར་མོ། ཐམས་ཅད་ཀྱང་གཡས་ཌཱ་མ་རུ་དང༌། གཡོན་ཐོད་པ་ཐོགས་པ། ཤར་དུ་ཁཎྜ་ཀ་པཱ་ལ་དང་རབ་གཏུམ་མོ། བྱང་དུ་མ་ཧཱ་ཀཾ་ཀ་ལ་དང་གཏུམ་པའི་མིག་ཅན་མ། ནུབ་ཏུ་ཀཾ་ཀ་ལ་དང་འོད་ལྡན་མ། ལྷོར་མཆེ་བ་རྣམ་པར་
གཙིགས་པ་དང་སྣ་ཆེན་པོ་སྟེ་དཔའ་བོ་རྣམས་སྐུ་མདོག་སྔོན་པོ། རྡོ་རྗེ་དང་དྲིལ་བུ་འཛིན་པ། ཡུམ་རྣམས་དཀར་མོ་རྡོ་རྗེ་ཐོད་ཁྲག་བསྣམས་པ། དཀྱིལ་འཁོར་ཤར་མའི་དབུས་ཀྱི་གདན་གྱི་སྟེང་དུ་དཔལ་རྟགས་པ་སངས་རྒྱས་མཁའ་འགྲོ་དཀར་པོ། འཁོར་ལོ་དང་དེའི་ཡུ་བ་བྱས་པའི་དྲིལ་བུ་འཛིན་པ། ཡུམ་སངས་རྒྱས་མཁའ་འགྲོ་མ་དཀར་མོ། འཁོར་ལོ་དང་ཐོད་ཁྲག་འཛིན་པས་འཁྱུད་པ། ཤར་དུ་སུ་ར་རི་བི་དང༌། བརྟན་པའི་བློ་ཅན་མ། བྱང་དུ་འོད་དཔག་མེད་དང་མིའུ་ཐུང་མ། ནུབ་ཏུ་རྡོ་རྗེའི་འོད་དང་ལང་གའི་དབང་ཕྱུག་མ། ལྷོར་རྡོ་རྗེ་སྐུ་དང་ཤིང་གྲིབ་མ་སྟེ་དཔའ་བོ་རྣམས་སྐུ་མདོག་དཀར་པོ། འཁོར་ལོ་དང་དེའི་ཡུ་བ་བྱས་པས་དྲིལ་བུ་འཛིན་པ། ཡུམ་རྣམས་སེར་མོ་འཁོར་ལོ་དང་ཐོད་པ་འཛིན་པ། དཀྱིལ་འཁོར་ལྷོ་མའི་དབུས་ཀྱི་གདན་གྱི་སྟེང་དུ་རྡོ་རྗེ་ཉི་མ་རིན་ཆེན་མཁའ་འགྲོ་སྐུ་མདོག་སེར་པོ་ཆེན་པོ་ཆེ་དང་དེའི་ཡུ་བ་བྱས་པའི་དྲིལ་བུ་འཛིན་པ། ཡུམ་རིན་ཆེན་མཁའ་འགྲོ་མ་སེར་མོ་རིན་པོ་ཆེ་དང་ཐོད་ཁྲག་འཛིན་པས་འཁྱུད་པ་ཤར་དུ་ཨཾ་ཀུ་རི་དང་ཨེ་ར་བ་ཏི། བྱང་དུ་རལ་པ་ཅན་དང༌། འཇིག་བྱེད་ཆེན་པོ་ནུབ་ཏུ་དཔའ་བོ་ཆེན་པོ་དང་རླུང་གི་ཤུགས་ཅན་མ། ལྷོར་རྡོ་རྗེ་ཧཱུཾ་མཛད་དང་ཆང་འཐུང་མ་སྟེ་དཔའ་བོ་རྣམས་སོ་སོར་རིན་པོ་ཆེ་དང༌། དེའི་ཡུ་བ་བྱས་པའི་དྲིལ་བུ་འཛིན་པ་ཡུམ་རྣམས་ལྗང་ཁུ་རིན་པོ་
ཆེ་དང་ཐོད་ཁྲག་འཛིན་པ། དཀྱིལ་འཁོར་ལྷོ་ནུབ་མའི་དབུས་ཀྱི་གདན་གྱི་སྟེང་དུ། པདྨ་གར་དབང་དང༌། པདྨ་མཁའ་འགྲོ་སྐུ་མདོག་དཀར་པོ། གཡས་པདྨ་དང་གཡོན་དེའི་ཡུ་བ་བྱས་པའི་དྲིལ་བུ་འཛིན་པ། ཡུམ་པདྨ་མཁའ་འགྲོ་མ་དམར་མོ། པདྨ་དང་ཐོད་ཁྲག་འཛིན་མའི་འཁྱུད་པ། ཤར་དུ་རབ་ཏུ་བཟང་པོ་དང་ཤྱ་མ་དེ་ཝི། བྱང་དུ་རྡོ་རྗེ་བཟང་པོ་དང་ཤིན་ཏུ་བཟང་མོ། ནུབ་ཏུ་འཇིགས་བྱེད་ཆེན་པོ་དང་རྟ་རྣ་མ། ལྷོར་མིག་མི་བཟང་དང་བྱ་གདོང་མ་སྟེ་དཔའ་བོ་རྣམས་སྐུ་མདོག་དམར་མོ་པདྨ་དང་དེས་མཚན་པའི་དྲིལ་བུ་འཛིན་པ། ཡུམ་རྣམས་དཀར་མོ་པདྨ་དང་ཐོད་པ་འཛིན་པས་འཁྱུད་པ། དཀྱིལ་འཁོར་ནུབ་བྱང་མའི་དབུས་ཀྱི་གདན་གྱི་སྟེང་དུ། དཔལ་ཧེ་རུ་ཀ་རྡོ་རྗེ་མཁའ་འགྲོ་སྐུ་མདོག་ནག་པོ། ཁྲོ་བོའི་རྡོ་རྗེ་དང་དེས་ཡུ་བ་བྱས་པའི་དྲིལ་བུ་འཛིན་པ། ཡུམ་རྡོ་རྗེ་མཁའ་འགྲོ་མ་སྔོན་མོ་ཁྲོ་བོའི་རྡོ་རྗེ་དང་ཐོད་ཁྲག་འཛིན་མས་འཁྱུད་པ། ཤར་དུ་སྟོབས་པོ་ཆེ་དང་འཁོར་ལོ་ཤུགས་ཅན་མ། བྱང་དུ་རིན་ཆེན་རྡོ་རྗེ་དང་ཁཎྜ་རོ་ཧི། ནུབ་ཏུ་རྟ་མགྲིན་དང་ཤོཎྜི་ནི། ལྷོར་ནམ་མཁའི་སྙིང་པོ་དང་འཁོར་ལོའི་གོ་ཆ་མ་སྟེ་དཔའ་བོ་རྣམས་སྐུ་མདོག་ནག་པོ་ཁྲོ་བོའི་རྡོ་རྗེ་དང་དེས་མཚན་པའི་དྲིལ་བུ་འཛིན་པ། ཡུམ་རྣམས་སེར་མོ་རྡོ་རྗེ་དང་ཐོད་པ་འཛིན་པ། དཀྱིལ་འཁོར་བྱང་མའི་དབུས་ཀྱི་གདན་གྱི་སྟེང་དུ་དཔལ་རྟ་མཆོག་སྣ་ཚོགས་མཁའ་འགྲོ་ལྗང་ཁུ། སྣ་ཚོགས་རྡོ་
རྗེ་དང་དེའི་ཡུ་བ་བྱས་པའི་དྲིལ་བུ་འཛིན་པ། ཡུམ་སྣ་ཚོགས་མཁའ་འགྲོ་མ་ལྗང་སེར། སྣ་ཚོགས་རྡོ་རྗེ་དང་ཐོད་ཁྲག་འཛིན་མས་འཁྱུད་པ། ཤར་དུ་དཔལ་ཧེ་རུ་ཀ་དང་ཤིན་ཏུ་དཔའ་མོ། བྱང་དུ་པདྨ་གར་གྱི་དབང་ཕྱུག་དང་སྟོབས་ཆེན་མ། ནུབ་ཏུ་རྣམ་པར་སྣང་མཛད་དང་འཁོར་ལོས་བསྒྱུར་མ། ལྷོར་རྡོ་རྗེ་སེམས་དཔའ་དང་བརྩོན་འགྲུས་ཆེན་མོ་སྟེ་དཔའ་བོ་རྣམས་སྐུ་མདོག་ལྗང་ཁུ། སྣ་ཚོགས་རྡོ་རྗེ་དང་དེས་མཚན་པའི་དྲིལ་བུ་འཛིན་པ། ཡུམ་རྣམས་སྔོ་སྐྱ། སྣ་ཚོགས་རྡོ་རྗེ་དང་ཐོད་ཁྲག་འཛིན་པ། གཙོ་བོ་བཅོམ་ལྡན་འདས་དྲུག་ནི་རྡོ་རྗེའི་སྐྱིལ་ཀྲུང་ཅན། ཡུམ་དྲུག་ནི་པདྨའི་འདུག་སྟངས་ཀྱིས་ཡབ་ལ་འཁྲིལ་བ། ཕྱག་གཡོན་ཡབ་ལ་འཁྱུད་པ། གཡས་རྡོ་རྗེ་སྡིགས་མཛུབ་དང་བཅས་པས་ཕྱག་མཚན་རྣམས་འཕྱར་བའོ། །དཔའ་བོ་ཉི་ཤུ་རྩ་བཞི་པོ་རྣམས་གཡས་བརྐྱང་བས་བཞེངས་ཤིང༌། དཔའ་བོ་རྣམས་གཡོན་བརྐྱང་གི་འཁྱུད་པ། ཕྱིའི་དཀྱིལ་འཁོར་གྱི་ཤར་སྒོར་ཁྭ་གདོང་མ་སྔོན་མོ། གཡས་ལྕགས་ཀྱུ་འཛིན་པ། བྱང་སྒོར་འུག་གདོང་མ་ལྗང་ཁུ། གཡས་ཞགས་པ་འཛིན་པ། ནུབ་སྒོར་ཁྱི་གདོང་མ་དམར་མོ། གཡས་ལྕགས་སྒྲོགས་འཛིན་པ། ལྷོ་སྒོར་ཕག་གདོང་མ་སེར་མོ། གཡས་དྲིལ་བུ་འཛིན་པ། ཤར་ལྷོར་གཤིན་རྗེ་བརྟན་མ་གཡས་སྔོ་གཡོན་སེར་བ་གཡས་མེ་ལོང་འཛིན་པ། ལྷོ་ནུབ་ཏུ་གཤིན་རྗེ་ཕོ་ཉ་མ་གཡས་སེར་གཡོན་དམར་བ།
གཡས་པས་པི་ཝཾ་འཛིན་པ། ནུབ་བྱང་དུ་གཤིན་རྗེ་མཆེ་བ་མ་གཡས་དམར་གཡོན་ལྗང་བ། དྲི་ཆབ་ཀྱི་དུང་ཆོས་འཛིན་པ། བྱང་ཤར་དུ་གཤིན་རྗེ་འཇོམས་མ་གཡས་ལྗང་གཡོན་སྔོ་བ་གཡས་རོ་དྲུག་གི་གང་བའི་སྣོད་འཛིན་པ། དེ་ལྟར་སྒོ་མཚམས་མ་བརྒྱད་ནི་དྲག་མོའི་ཚུལ་ཅན། མ་མོ་བཅུ་གཉིས་པོ་ཐམས་ཅད་ཀྱང་ཕྱག་གཡོན་ན་ཐོད་པ་དང་གྲུ་མོ་གཡོན་པར་ཁ་ཊྭཾ་ག་འཛིན་པ། མི་རོའི་གདན་ལ་གཡས་བརྐྱང་བའི་སྟབས་ཀྱི་གནས་པ། ཡབ་ཐམས་ཅད་རལ་པའི་ཐོར་ཚུགས་དང༌། སྣ་ཚོགས་རྡོ་རྗེ་དང༌། ཟླ་བ་ཕྱེད་པ་དང༌། ཕྱག་རྒྱ་དྲུག་དང༌། མགོ་བོའི་འཕྲེང་བ་ཅན། སྟག་གི་པགས་པའི་ཤམ་ཐབས་གྲོལ་བ་འཁྱུད་པའི་ཕྱག་རྒྱས་ཡུམ་དང་སྦྱོར་བ། ལྷ་མོ་ཐམས་ཅད་སྐྲ་གྲོལ་བ་ཕྱག་རྒྱ་ལྔས་བརྒྱན་པ། ཐམས་ཅད་ཀྱང་ཞལ་གཅིག་ཕྱག་གཉིས་སྤྱན་གསུམ་མ། མེ་དཔུང་འབར་བའི་དབུས་ན་བཞུགས་པའོ། །དཀྱིལ་འཁོར་དྲུག་ཆར་གྱི་པདྨའི་མཚམས་ཀྱི་འདབ་མ་བཞི་ལ། ཀ་པཱ་ལ་བདུད་རྩི་ལྔས་གང་བ་རེ་རེའོ། །ཨོཾ་ཨཱཿཧཱུཾ་སརྦ་བཱི་ར་ཡོ་གི་ནི་ཀཱ་ཡ་ཝ་ཀ་ཙིཏྟ་བཛྲ་སྭ་བྷཱ་ཝ་ཨཏྨ་ཀོ྅་ཧཾ། ཨོཾ་བཛྲ་ཤུདྡྷ་སརྦ་དྷརྨ་བཛྲ་ཤུདྡྷོ྅་ཧཾ། ལྷ་ཐམས་ཅད་ཀྱི་སྙིང་གར་ཨོཾ་ཧ་དཀར་པོ་རྡོ་རྗེ་སེམས་དཔའ༴ ནས། ཕཊ་ཕཊ་དུད་ཁ་ཙཎྜི་ཀའི་ངོ་བོ། ཞེས་པའི་བར་གོ་ཆ་གཉིས་ཀྱིས་རྒྱས་བཏབ། སྤྲོ་ན་གོང་དུ་བཤད་པའི་ཕུང་ཁམས་ཀྱི་ལྷ་བཅུ་བདུན་པོ་ཡང་བསྐྱེད། བསྡུ་ན་
གཟུགས་ཀྱི་ཕུང་པོ་ལ་ནི་རྣམ་པར་སྣང་མཛད་དོ། །ཞེས་སོགས་དག་པ་དྲན་པར་བྱ། ལྷ་ཐམས་ཅད་ཀྱི་དཔྲལ་པར་ཨོཾ། མགྲིན་པར་ཨཱཿ ཐུགས་ཀར་ཧཱུཾ། འཁོར་ལོས་སྒྱུར་བ་དྲུག་གི་ཐུགས་ཀར་རང་དང་འདྲ་བའི་ཡེ་ཤེས་སེམས་དཔའ། དེའི་ཐུགས་ཀར་ཏིང་ངེ་འཛིན་སེམས་དཔའ་རིམ་པས་ཧཱུཾ་བྷྲུཾ་ཨཾ་ཧྲིཾ་ཧཱུཾ་ཁཾ། ཐུགས་ཀའི་འོད་ཟེར་གྱིས་ཡེ་ཤེས་ཀྱི་འཁོར་ལོ་དབང་གི་ལྷ་མཆོད་པའི་ལྷ་མོ་དང་བཅས་པ་སྤྱན་དྲངས། ཕཻཾ། ཨོཾ་བཱི་ནི་བཛྲི་ཎི་ཧཱུཾ་ཧཱུཾ་ཕཊ་ནས། ཨོཾ་དྷརྨ་དྷཱ་ཏུ་བཛྲི་ཎི་ཧཱུཾ་ཧཱུཾ་ཕཊ་ཀྱི་བར་གྱིས་མཆོད། ཛཿཧཱུཾ་བཾ་ཧོཿ ཨོཾ་ཡོ་ག་ཤུདྡྷ་སརྦ་དྷརྨ་ཡོ་ག་ཤུདྡྷོ྅་ཧཾ། དེ་བཞིན་གཤེགས་པ་ཐམས་ཅད་ཀྱིས་བདག་ལ་དབང་བསྐུར་དུ་གསོལ། ཞེས་དབང་གི་ལྷ་རྣམས་ལ་གསོལ་བ་གདབ་པའམ། གསང་གསུམ་གནས་ལས་བྱུང་བ་ཡི། །རྡོ་རྗེ་རྣལ་འབྱོར་མ་ཀུན་དང༌། །སངས་རྒྱས་འཇིག་རྟེན་མགོན་པོ་ཡིས། །བརྩེ་བས་བདག་ལ་དབང་བསྐུར་རྩོལ། །ཞེས་གསོལ་བ་བཏབ་པས། སངས་རྒྱས་རྣམས་ནི་ཐམས་ཅད་ཀྱི། །གསང་གསུམ་གནས་ལས་བྱུང་བ་ཡི། ཁམས་གསུམ་ཀུན་གྱི་ཕྱག་བྱས་པའི། །རིན་ཆེན་དབང་བསྐུར་ཆེན་པོ་སྦྱིན། ཞེས་གསུངས་ཞིང་བུམ་པ་བདུད་རྩིས་གང་བས་དབང་བསྐུར། སྐུ་གང་དྲི་མ་དག ཆུའི་ལྷག་མ་ཡར་ལུད་པ་ལས་རྡོ་རྗེ་སེམས་དཔའ་ལ་སོགས་པ་རིགས་ལྔ་ལ་རྡོ་རྗེ་མཁའ་འགྲོ་དང༌། རྡོ་རྗེ་མཁའ་འགྲོ་ཉིད་ལ་ཡེ་ཤེས་མཁའ་འགྲོ་དང༌། འཁོར་རྣམས་
ལ་རང་རང་གི་གཙོ་བོ་དང༌། སྒོ་མཚམས་བརྒྱད་ལ། རྡོ་རྗེ་སེམས་དཔའི་དབུ་བརྒྱན། ཕྱི་ནང་གསང་བའི་མཆོད་པ་རྣམས་སྡོམ་པའི་སྒྲུབ་ཐབས་གཞན་དང་མཚུངས་ལ། རྡོ་རྗེ་འཆང་དང་རྡོ་རྗེ་རྣལ་འབྱོར་མ། །ཛ་ལནྡྷ་ར་ནག་པོ་སྤྱོད་པ་དང༌། །དགེ་མགོན་ཏི་ལི་ནཱ་རོ་མ་ཎི་ཀ །ཆོས་དབང་བཟེ་པ་ཡབ་སྲས་རྣམ་པ་གསུམ། །ཤཀ་རྡོར་སངས་རྒྱས་འབུམ་དང་ལོ་མཆོག་པ། །གྲགས་ཆེན་འཕགས་འོད་བུ་སྟོན་བྱང་རྩེ་དང༌། །གྲགས་རྒྱལ་ཆོས་ཀྱི་རྒྱལ་མཚན་མཆོག་གྱུར་པ། །གྲགས་པ་ཡེ་ཤེས་ཀུན་དགའ་གྲོལ་མཆོག་དང༌། །རྡོ་རྗེ་འཆང་ཆེན་རྩ་བའི་བླ་མ་ཆོད། །ཅེས་འདོན་པ་སྤོ། བསྟོད་པ་ནི། ཡབ་ཡུམ་གྱི་རྐང་པ་བརྒྱད་དང་དེ་ཉིད་ལྔ་པས་བསྟོད། ལུས་དང་ཚོར་བ་དང༌། ཞེས་པ་ནས། གཤིན་རྗེ་འཇོམས་མའོ། །ཕུང་པོ་དྲུག་རྣམ་པར་དག་པ་ནི། དེ་བཞིན་གཤེགས་པ་དྲུག ཁམས་དྲུག་རྣམ་པར་དག་པ་ནི་རྡོ་རྗེ་བཙུན་མོ་དྲུག་གོ ། དཀྱིལ་འཁོར་དྲུག་ནི་ས་དྲུག་སྟེ། མཁའ་འགྲོ་བཞིའི་གནས་ནི་ས་ལྷག་མ་བཞིའོ། །བཟླས་པའི་དམིགས་པ་གསལ་བཏབ་ལ། ཨོཾ་ཤྲཱི་མཧཱ་སུ་ཁ་བཛྲ་སཏྭ་ཌཱ་ཀི་ནཱི་ཛྭ་ལ་སཾ་བྷ་རཾ་ཧཱུཾ་ཨཱཿཧཱུཾ་ཕཊ་སྭཱཧཱ། ཨོཾ་ཤྲཱི་བུ་དྷ་ཌཱ་ཀཱ་ཨ་ལ་ལ་ལ་བྷྲུཾ་ཨཱཿ ཨོཾ་ཌཱ་ཀི་ནཱི་ཛྭ་ལ་སཾ་བྷ་རཾ་ཧཱུཾ་ཕཊ་སྭཱཧཱ། ཨོཾ་ཤྲཱི་རཏྣ་ཌཱ་ཀ་ཏྲཾ་ཨཿ ཨོཾ་ཌཱ་ཀི་ནི་ཛྭ་ལ་སཾ་བྷ་རཾ་ཧཱུཾ་ཕཊ་སྭཱཧཱ། ཨོཾ་ཤྲཱི་པདྨ་ཌཱ་ཀི་ཧྲིཿཨཱཿ ཨོཾ་ཌཱ་ཀི་ཛྭ་ལ་སཾ་བྷ་རཾ་ཧཱུཾ་ཕཊ་སྭཱཧཱ། ཨོཾ་ཤྲཱི་བཛྲ་ཌཱ་ཀ་ཨཿཕཊ་སྭཱཧཱ། ཨོཾ་ཤྲཱི་བཛྲི་ཌཱ་ཀ་ཨཿཧཱུཾ་
ཕཊ་ཌཱ་ཀི་ནི་ཛྭ་ལ་སཾ་བྷ་རཾ་ཧཱུཾ་ཕཊ་སྭཱཧཱ། ཨོཾ་ཤྲཱི་བི་ཤྭ་ཌཱ་ཀ་ཧོཿ ཁཾ་ཨཿཧཱུཾ་ཌཱ་ཀི་ནི་ཛྭ་ལ་སཾ་བྷ་རཾ་ཧཱུཾ་ཕཊ་སྭཱཧཱ། འཁོར་གྱི་སྔགས་ནི། ཨོཾ་ཁཾ་ཧཱུཾ་ཕཊ། ནས་ཨོཾ་ཡཾ་ཧཱུཾ་ཕཊ་གྱི་བར། རང་མིང་གི་དང་པོའི་ཡི་གེ་ཉིད་སྔགས་ཀྱི་ངོ་བོར་གསུངས་སོ། །ཐུན་བསྡུ་བར་འདོད་པའི་ཚེ། སེམས་ཅན་ཐམས་ཅད་ལ་བྱང་ཆུབ་ཀྱི་སེམས་ཀྱིས་དབང་བསྐུར་བ། སོགས་བྱས་ནས། དཀྱིལ་འཁོར་བསྡུ་བའི་ཚུལ་གཞན་རྣམས་དང་མཚུངས་པ་ལས། ཐུན་མཚམས་ལ་འཇུག་པའི་ཚེ། རྡོ་རྗེ་སེམས་དཔའ་ཕྱག་གཉིས་པའི་ང་རྒྱལ་བྱའོ། །གཏོར་མའི་ཆོ་ག་ནི་སྦྱངས་པའི་ཡོན་ཏན་བཅུ་གསུམ་པ་ལྟར་བྱ་བ་ལས། འདོད་དོན་གསོལ་བཏབ་ཀྱི་རྗེས་སུ། དཔྱིད་ཀྱི་རྒྱལ་མོའི་གླུ་དབྱངས་ངེས་པར་བརྗོད་པ་ཉིད་ཡིན་ནོ། །ཤིན་ཏུ་ཟབ་ཅིང་གསང་བ་སྟེ། །ངེས་པར་བརྗོད་པའི་རྒྱུད་རྒྱལ་ལས། །ཀུན་གྱི་རིགས་བསྡུས་དཀྱིལ་འཁོར་མཆོག།དཀྱིལ་འཁོར་གཙོ་བོར་བསྔགས་པ་སྟེ། །འདི་ཡི་སྒྲུབས་ཐབས་བྱས་པ་ཡིན། །ཞེས་པ་འཁོར་ལོ་བསྒྱུར་དྲུག་གི་སྒྲུབ་ཐབས་ཏེ་བདུན་པའོ།། །།༈ ན་མ་ཤྲཱི་ཧེ་རུ་ཀ་མཉྫུ་ནཱ་ཐཱ་ཡ། གང་གི་འཁོར་བའི་ཉེས་པ་ཀུན། །དྲན་པ་ཙམ་གྱིས་ཞི་མཛད་ཅིང༌། །ཡེ་ཤེས་སྣང་བ་ཉེར་སྩོལ་བའི། །འཇམ་དབྱངས་ཧེ་རུ་ཀ་ལ་འདུད། །གང་འདིའི་སྒྲུབ་ཐབས་རྨད་བྱུང་བ། །རབ་ཟབ་རྒྱུད་ལས་འབྱུང་བ་བཞིན། བླ་མའི་མན་ངག་དང་ལྡན་པ། རབ་ཏུ་གསལ་བར་བཤད་པར་བྱ། །འདིར་དཔལ་འཁོར་ལོ་སྡོམ་པ་འཇམ་པའི་རྡོ་རྗེ་ངག་གི་དབང་ཕྱུག་ཧེ་རུ་ཀ་ལྷ་ཉི་ཤུ་རྩ་ལྔའི་བདག་ཉིད་ཅན་གྱི་དཀྱིལ་འཁོར་སྒོམ་པར་འདོད་པས་སྐྱབས་འགྲོ་སེམས་བསྐྱེད་རྡོ་རྗེ་སེམས་
དཔའི་སྒོམ་བཟླས་རྣམས་བྱ། ཤྲཱི་ཧེ་རུ་ཀོ྅་ཧཾ། རང་གི་སྙིང་གར་ཉི་མའི་སྟེང་དུ་ཧཱུཾ། དེ་ལས་འོད་ཟེར་དང་མཆོད་པ་དཔག་ཏུ་མེད་པ་སྤྲོས། བླ་མ་དཀྱིལ་འཁོར་སངས་རྒྱས་བྱང་ཆུབ་སེམས་དཔའི་ཚོགས་དང་བཅས་པ་སྤྱན་དྲངས་ལ་མཆོད་པར་གྱུར། གང་གི་དྲིན་གྱིས༴ སོགས་དང༌། དཔལ་ལྡན་རྡོ་རྗེ་མཁའ་འགྲོ༴ སོགས་ཀྱིས་ཕྱག་བྱ། ཨརྒྷཾ༴ ནས་ཤཔྟའི་བར་གྱིས་མཆོད། དཀོན་མཆོག་གསུམ་ལ་བདག་སྐྱབས་མཆི། ཞེས་སོགས་ཀྱིས་ཡན་ལག་བདུན་པ་བྱ། ཚད་མེད་བཞི་སྤྱི་དང་མཐུན། ཨོཾ་སྭ་བྷ་ཝ་ཤུདྡྷ་སརྦ་དྷརྨ་སྭ་བྷ་ཝ་ཤུདྡྷོ྅་ཧཾ། སྟོང་པའི་ངང་ལས་ཧཱུཾ་ལས་རྡོ་རྗེ་ས་གཞི། རྭ་བ་དྲྭ་བ་གུར་བླ་རེ། མདའི་དྲ་བ་མེ་རི་འབར་བ་དང་བཅས་པའི་སྲུང་འཁོར་དུ་གྱུར། ཨོཾ་མེ་དྷི་ནི་བཛྲ༴ ནས། ཨ་ནཱ་ལཱརྐ་ཧཱུཾ་ཧཱུཾ་ཧཱུཾ་གི་བར་སྔགས་ལ་ཚན་དྲུག་བརྗོད། སྣ་ཚོགས་རྡོ་རྗེའི་ལྟེ་བར་བྷྲུཾ་ལས་བཀའི་འཁོར་ལོ་སེར་པོ་རྩིབས་བཅུ་པ། དེའི་ལྟེ་བར་རང་ཉིད་རྡོ་རྗེ་ཁྲོ་བོ་ཁམས་གསུམ་ལས་རྣམ་པར་རྒྱལ་བ་སྐུ་མདོག་མཐིང་ནག་ན་གསེར་ལྗང་བའི་ཞལ་གསུམ། ཕྱག་དྲུག་གི་དང་པོ་གཉིས་ཧཱུཾ་མཛད་ཀྱི་ཕྱག་རྒྱས་རྡོ་རྗེ་དང་དྲིལ་བུ་འཛིན་ཞིང་རང་གི་ཡུམ་ལ་འཁྱུད་པ། ལྷག་མ་གཡས་གཉིས་ཀྱིས་ལྕགས་ཀྱུ་དང་ཞགས་པ། གཡོན་གཉིས་ཀྱིས་ཐོད་པ་དང་ཁ་ཊྭཾ་ག་འཛིན་ཞིང༌། ཞབས་གཡས་བརྐྱང་པའི་འཇིགས་བྱེད་དང་དུས་མཚན་མ་མནན་པ། རང་གི་ཐུགས་ཀ་ནས་ཁྲོ་བོ་བཅུའི་ཚོགས་དཔག་ཏུ་མེད་
པ་སྤྲོས། ཨོཾ་སུམྦྷ་སོགས་ཀྱིས་བཀའ་བསྒོས། ཁྲོ་བོ་རྣམས་ཀྱིས་བགེགས་རྣམས་བཀུག ཨོཾ་གྷ་གྷ༴ སོགས། དེ་རྣམས་ཐོ་བས་བརྡུངས། ཨོཾ་མུངྒ་ར༴ སོགས། བགེགས་རྣམས་སྟོང་པ་ཉིད་དུ་སྦྱངས། དེ་བཞིན་ཉིད་དང་རོ་གཅིག་ཏུ་གྱུར། ཨུཥྞི་ཥའམ་ཞལ་བཞི་པའི་སྔགས་ཅི་ནུས་རེ་བཟླ། འདི་ནི་ཤིན་ཏུ་བསྡུས་པའི་ལུགས་ཡིན་ལ། བསྡུས་པ་ནི་འཁོར་ལོ་བསྒྱུར་དྲུག་གི་སྐབས་སུ་བཤད་ཟིན་ལ། རྒྱས་འབྲིང་ནི་ཁྲོ་བོ་རྣམ་རོལ་ལས་ཤེས་པར་བྱའོ། །ཤིན་ཏུ་བསྡུས་པའི་ཚེ་ཐུན་མོང་གི་སྲུང་འཁོར་དྲུག་པོ་ཙམ་གྱིས་ཆོག་གོ །ཨོཾ་ཤཱུ་ནྱ་ཏ་ཛྙཱ་ན་བཛྲ་སྭ་བྷཱ་ཝ་ཨཏྨ་ཀོ྅་ཧཾ། ཨོཾ་ཨ་ནི་ཧི་ཏ་ཛྙཱ་ན་བཛྲ་སྭ་བྷ་ཝ་ཨཏྨ་ཀོ྅་ཧཾ། ཨོཾ་ཨ་པྲ་ནི་ཧི་ཏ་ཛྙཱ་ན་བཛྲ་སྭ་བྷཱ་ཝ་ཨཏྨ་ཀོ྅་ཧཾ། སྟོང་པའི་ངང་ལས། བར་དོའི་རྣམ་ཤེས་མཾ་དམར་སེར་ཧོཿ དམར་པོ་གཉིས་ཀྱིས་མཐའ་རྟེན་པ། དེའི་སྣང་བ་ལས་ཆད་པའི་ཡཾ་ལས་རླུང་གི་དཀྱིལ་འཁོར་ཟླ་གམ། དེའི་སྟེང་དུ་རཾ་ལས་མེའི་དཀྱིལ་འཁོར་དམར་པོ་གྲུ་གསུམ། དེའི་སྟེང་དུ་བཾ་ལས་ཆུའི་དཀྱིལ་འཁོར་དཀར་པོ་ཟླུམ་པོ། དེའི་སྟེང་དུ་ལཾ་ལས་སའི་དཀྱིལ་འཁོར་སེར་པོ་གྲུ་བཞི། དེའི་སྟེང་དུ་སུཾ་ལས་རི་རབ་རིན་པོ་ཆེ་སྣ་བཞི་ལས་གྲུབ་པ། དེའི་སྟེང་དུ་བྷྲུཾ་ལས་འཁོར་ལོ་བྷྲུཾ་གྱིས་མཚན་པ་ལས་རྣམ་པར་སྣང་མཛད་དཀར་པོ་ཞལ་གསུམ་ཕྱག་གསུམ་དྲུག་པ། ཕྱག་དང་པོ་གཉིས་འཁོར་ལོ་དང་དྲིལ་བུ་འཛིན་པ། ལྷག་མ་རྒྱུ་རྡོ་རྗེ་འཛིན་པ་དང་མཚུངས་པའོ། །དེ་ཞུ་བ་ལས། རིན་པོ་
ཆེ་སྣ་ཚོགས་ལས་གྲུབ་པའི་གཞལ་ཡས་ཁང་གྲུ་བཞི་སྒོ་བཞི་པ། སྐུའི་དཀྱིལ་འཁོར་ཏེ་རྩིག་པ་རིམ་པ་ལྔ་དང་ལྡན་པ། ཕ་གུ་དང་དྲྭ་ཕྱེད་དང་ཤར་བུ་དང་མདའ་ཡབ་དང༌། གཟུངས་མ་རྣམས་དང་བཅས་པའི་ཁ་ཁྱེར་ཏེ། མཚན་ཉིད་ཐམས་ཅད་ཡོངས་སུ་རྫོགས་པ། སྒོ་བཞིའི་སྟེང་ན་ཀ་བས་བཏེགས་པའི་རྟ་བབས་སྣམ་བུ་བཅུ་གཅིག་དང་བཅས་པ། ནང་གི་ལྷ་སྣམ་ཤར་དཀར་བྱང་ལྗང་ནུབ་དམར་ལྷོ་སེར་དབུས་སྔོ་བ། ཕྱི་རོལ་མཆོད་པའི་ས་གཞི་ལ། མཆོད་པའི་ལྷ་མོ་སྣ་ཚོགས་པ་མཆོད་པའི་བཀོད་པ་དུ་མ་དང་བཅས་ཤིང་པད་འདབ་ཀྱི་ཁོར་ཡུག་གི་ཕྱི་རོལ་ཏུ་སྣམ་བུ་དམར་པོའི་ཁོར་ཡུག་ལ། རྡོ་རྗེ་གཤིན་རྗེ་རོ་ལངས་ཀྱི་ཚོགས་རྣམས་ཁ་དོག་སྣ་ཚོགས་པ་འཇིགས་སུ་རུང་བ་གར་བྱེད་པ། དེའི་ཕྱིར་རོལ་དུ་དུར་ཁྲོད་ཆེན་པོ་བརྒྱད། ཕྱོགས་སྐྱོང་བ་དང༌། ཞིང་སྐྱོང་བ་དང༌། ཤིང་དང༌།མེ་དང༌། ཆུ་དང༌། སྤྲིན་དང༌། རི་དང༌། མཆོད་རྟེན་དང༌། གྲུབ་པ་ཐོབ་པའི་རྣལ་འབྱོར་བ་རྣམས་ཀྱིས་ཡོངས་སུ་གང་བ། ཕྱི་རོལ་དུ་སྲུང་བའི་འཁོར་ལོ་དང་བཅས་པའོ། །རྩིག་པའི་ཕྱི་འོག་མཐའ་དང༌། སྟེགས་བུ་དང༌། སྒོའི་ཡ་ཕུབས་ཀྱི་ཀ་གདུང་ལ་འཁོར་ལོ་དཀར་པོས་མཚན་པ། ནང་གི་ལྷ་སྣམ་གྱི་དབུས་སུ་གསུང་གི་འཁོར་ལོ་དམར་པོ་རྩིབས་བརྒྱད་པ། པད་མ་དམར་པོས་མཚན་པའི་མུ་ཁྱུད་དང་རྭ་བ་ཀ་བ་གདུང་ཐོག་ཕུབས་ལ་སོགས་པས་མཛེས་པ། དེའི་ནང་ཐུགས་ཀྱི་འཁོར་ལོ་སྔོན་པོ་རྩིབས་བརྒྱད་པ་རྡོ་རྗེ་སྔོན་པོས་
མཚན་པའི་མུ་ཁྱུད་དང་རྭ་བ་ཀ་བ་གདུང་ཐོབ་ཕུབས་ལ་སོགས་པས་མཛེས་པ། དབུས་ཕྱུར་བུར་གྱུར་པའི་རྩེ་མོར་རྡོ་རྗེ་རིན་པོ་ཆེའི་ཏོག་གིས་མཚན་པ། ཐུགས་ཀྱི་འཁོར་ལོའི་སྟེང་དུ་སྣ་ཚོགས་པདྨ་འདབ་མ་བརྒྱད་པ། པད་འདབ་ཀྱིས་ཁེབས་པའི་འཁོར་ལོའི་འོག་ནས་མུ་ཁྱུད་ཅུང་ཟད་མངོན་པའོ། །པདྨའི་ལྟེ་བར་ཟླ་བའི་དཀྱིལ་འཁོར་གྱི་དབུས་སུ་ཨ་ཨཱ་ནས་ཨཾ་ཨཱ། ཀ་ཁ་ནས་ཧ་ཀྵ་ཡོངས་སུ་གྱུར་པ་ལས་ཟླ་བའི་དཀྱིལ་འཁོར་དམར་སྐྱ། དེའི་དབུས་སུ་ཧཱུཾ་དང་བཾ་ལས་རྡོ་རྗེ་དང་གྲི་གུག་ཧཱུཾ་དང་བཾ་གྱིས་མཚན་པའོ། །དེ་ལས་འཕྲོས་པའི་འོད་ཟེར་གྱིས་སྤྱན་དྲངས་པ་གདོད་ནས་གྲུབ་པའི་སངས་རྒྱས་བྱང་ཆུབ་སེམས་དཔའ་དཔའ་བོ་དང་རྣལ་འབྱོར་མའི་ཚོགས་དང་བཅས་པ་དང༌། དེ་ཐམས་ཅད་གཅིག་ཏུ་འདྲེས་པ་ཡོངས་སུ་གྱུར་པ་ལས་རྒྱུ་རྡོ་རྗེ་འཛིན་པ་རྡོ་རྗེ་སེམས་དཔའ་མི་བསྐྱོད་པའི་དབུ་རྒྱན་ཅན། ནག་དཀར་དམར་བའི་ཞལ་གསུམ། ཕྱག་དང་པོ་གཉིས་ཀྱིས་རྡོ་རྗེ་དང་དྲིལ་བུ་འཛིན་པས་ཡུམ་ལ་འཁྱུད་པ། ལྷག་མ་གཡས་གཉིས་ཅང་ཏེའུ་དང་ཚངས་མགོ གཡོན་གཉིས་ཐོད་པ་དང་ཁ་ཊྭཱཾ་ག་འཛིན་པ། གཡས་བརྐྱང་གི་སྟབས་ཀྱིས་བཞུགས་ཤིང༌། རང་དང་མཚུངས་པའི་རྡོ་རྗེ་ཕག་མོ་ལ་འཁྱུད་པ། ལྷའི་གནས་རྣམས་སུ་དཔའ་བོ་དང་དཔའ་མོ་བཞི་བཅུ་ཞེ་བརྒྱད། སངས་རྒྱས་བྱང་སེམས་རིག་པའི་ལྷ་མོ་གྲངས་མེད་པ་དང་བཅས་པ་འཁོད་པར་གྱུར། བྷྲུཾ་
ཨཾ་ཧྲིཿཧོཿཧཱུཾ་ཧ་ཕུང་པོ་རྣམས་དེ་བཞིན་གཤེགས་པ་དྲུག་གི་ངོ་བོར་གྱུར། ཨོཾ་ཧཱུཾ་ཏྲཾ་ཨ་ཁཾ་ཧཾ། སྐྱེ་མཆེད་དྲུག དཔའ་བོ་དྲུག་གི་ངོ་བོར་གྱུར། ལཾ་མཾ་པཾ་ཏཾ་ཁཾ། ཁམས་ལྔ་ཡུམ་ལྔའི་ངོ་བོར་གྱུར་ཞེས་ཡབ་ཡུམ་ག ཉིས་ཀ་ལ་བསམ། འདི་ཤིན་ཏུ་བསྡུས་པ་སྟེ་ཡིག་འབྲུ་དེ་རྣམས་བརྗོད་པས་དེར་གྱུར་པར་མོས་པ་ཡིན་ལ། འབྲིང་པོ་ནི་ས་བོན་ལུས་ལ་བཀོད་པ་ཡིན། རྒྱས་པ་ནི་ལྷ་བཀོད་པའོ། །ཡབ་ཡུམ་གྱི་ཐུགས་ཀར་ཟླ་བ་ལ་ནམ་མཁར་གནས་པའི་བར་དོའི་རྣམ་ཤེས་ཀྱི་ངོ་བོ་ཡི་གེ་གསུམ་བབས། ཡབ་ཡུམ་གཉིས་ཀྱི་སྤྱི་བོ་དང༌། གསང་བར་ཡང་ཧོཿདམར་པོས་མཚན་པར་གྱུར། ཡབ་ཡུམ་སྙོམས་པར་ཞུགས། ཡི་གེ་རྣམས་ཡུམ་གྱི་པདྨར་བབས་པས་ཡབ་ཡུམ་བྱང་ཆུབ་ཀྱི་སེམས་ཀྱི་གོང་བུར་གྱུར། འཁོར་ལོ་གསུམ་གྱི་དཔའ་བོ་དང་རྣལ་འབྱོར་མ་རྣམས་ལངས་ཏེ། སངས་རྒྱས་བྱང་ཆུབ་སེམས་དཔའ་གྲངས་མེད་པ་དང་བཅས་ཐལ་མོ་སྦྱར་ཞིང༌། རྡོ་རྗེའི་གླུ་དབྱངས་དང་ཅང་ཏེའུའི་སྒྲས་བསྐུལ་བ། ཨེ་མ་ཧོ་ངོ་མཚར་རྨད་ཀྱི་ཆོས། །ཨེ་མ་ཧོ་ངོ་མཚར་རྨད་ཀྱི་ལུགས། ཨེ་མ་ཧོ་ངོ་མཚར་རྨད་ཀྱི་གསང༌། །ཨེ་མ་ཧོ་བདེ་བ་ལས་བྱུང་བ། །ཨེ་མ་ཧོ་ཀུན་ཏུ་བཟང་པོའི་དོན། །ཨེ་མ་ཧོ་བདེ་བས་ཡང་དག་འདུས། །ཨེ་མ་ཧོ་བདེ་ཆེན་དག་པ་སྟེ། །ཨེ་མ་ཧོ་བདེ་བ་བདེ་བའི་མཆོག། ཨེ་མ་ཧོ་གསང་སྔགས་མཉམ་སྦྱོར་བ། །ཨེ་མ་ཧོ་ཐུགས་ཀྱི་སྤྱོད་པ་སྟེ། །ཨེ་མ་ཧོ་མཉམ་ཉིད་ཕྱག་རྒྱ་ལྡན། །ཨེ་མ་ཧོ་སྒྲུབ་པ་རྨད་དུ་བྱུང༌། །
ཨེ་མ་ཧོ་ཕ་རོལ་ཕྱིན་པའི་ས། །ཨེ་མ་ཧོ་རིག་པ་རྗེས་འཇུག་པ། །ཨེ་མ་ཧོ་སྣ་ཚོགས་ལས་ཆེན་པོ། །ཨེ་མ་ཧོ་ཁ་སྦྱོར་གསུམ་དག་པ། །ཨེ་མ་ཧོ་རྡོ་རྗེ་མཉམ་སྦྱོར་བ། །ཨེ་མ་ཧོ་པདྨ་རྣལ་འབྱོར་པ། །ཨེ་མ་ཧོ་དབང་གཉིས་སྙོམས་འཇུག་པ། །ཨེ་མ་ཧོ་རྨད་བྱུང་མཉམ་པ་ཉིད། །ཨེ་མ་ཧོ་དག་པའི་གར་ཆེན་ཏེ། །ཨེ་མ་ཧོ་ཤིན་ཏུ་དྲི་མེད་གླུ། །ཨེ་མ་ཧོ་གླུ་ཡི་ལེགས་སྦྱོར་བ། །ཨེ་མ་ཧོ་ཕེག་རྡོབ་མུན་སེལ་བ། །ཨེ་མ་ཧོ་མེ་ཏོག་ཚོགས་དགའ་བ། །ཨེ་མ་ཧོ་བདུག་པའི་བུམ་པ་བཟང༌། །ཨེ་མ་ཧོ་སྒྲོན་མ་གཏི་མུག་སེལ། །ཨེ་མ་ཧོ་དྲི་མཆོག་བསིལ་བ་སྟེ། །ཨེ་མ་ཧོ་རྣལ་འབྱོར་མཉམ་སྦྱོར་བ། །ཨེ་མ་ཧོ་སྒྱུ་འཕྲུལ་མཁའ་ལྟ་བུ། །ཨེ་མ་ཧོ་གདོད་ནས་སངས་རྒྱས་གདོད་ནས་རྡོ་རྗེ་སྟེ། །ཨེ་མ་ཧོ་གདོད་ནས་རིན་ཆེན་བདེ་བ་རབ་སྩོལ་བ། །ཨེ་མ་ཧོ་པདྨ་གདོད་ནས་བྲིས་པ་སྟེ། །ཨེ་མ་ཧོ་སྒྱུ་འཕྲུལ་སྣ་ཚོགས་རྣམ་པར་འཕྲུལ་པ་ཡིན། །ཨེ་མ་ངོ་མཚར་རྨད་སངས་རྒྱས། །ཨེ་མ་ངོ་མཚར་རྒྱལ་བའི་སྲས། །ཨེ་མ་ངོ་མཚར་སེམས་ཅན་རྣམས། །ཨེ་མ་ངོ་མཚར་ལྷ་མོའོ། །ཞེས་སོ། །གླུས་བསྐུལ་འདི་ནི། འདི་ཉིད་ཀྱི་ཐུན་མོང་མ་ཡིན་པ་སྟེ། འདིའི་ཆོ་ག་སོགས་ལ་ངེས་པར་དགོས་པས་ཚིག་བློ་ལ་ཡོད་ངེས་བྱ། དུས་རྒྱུན་གྱིས་ཉམས་ལེན་ལ་དེ་ཙམ་མི་ལྕོགས་ན། མངོན་སྤྱོད་ལེའུ་དགུ་པར་འབྱུང་བའི་གླུས་བསྐུལ་འདི་ཉིད་བྱ་སྟེ་མངོན་སྤྱོད་ལས་གསུངས་པའི་དཀྱིལ་འཁོར་མཐའ་དག་གི་སྤྱི་འགྲོ་ཡང་ཡིན་ནོ། །དེ་ཡང༌། ཧོཿསྲིད་
པ་གསུམ་གྱི་དེ་རྙེད་གཙོ། ཨ་ལ་ལ་ལ་ཧོ། རྒྱལ་བ་བདེ་ཆེན་དགྱེས་པའི་ཚོགས། །པདྨ་ལ་ནི་རྡོ་རྗེ་རོལ། །ཨ་ལ་ལ་ལ་ཧོ། ཕྱོགས་བཅུར་བདེ་གཤེགས་སྙིང་པོ་སྤྲོས། །ཀུན་གྱི་སྙིང་པོ་བདག་པོར་མཛོད། །སྲིད་པ་གསུམ་གྱི་སྙིང་པོ་ནི། །བདེ་བ་ཆེན་པོ་རྟོགས་པར་མཛོད། །ཨ་ལ་ལ་ལ་ཧོ། །བདག་པོ་དགྱེས་པ་གྲོལ་བར་མཛོད། །བདེ་ཆེན་ཨ་ལ་ལ་ལ་ཧོ། ཞེས་པའོ། །དེ་ལྟར་རབ་ཏུ་བསྐུལ་ནས། བསྐུལ་བ་པོ་རྣམས་ཛཿཛཿ ཞེས་ཐིག་ལེ་ལ་ཐིམ། དེ་ཉིད་ཡོངས་སུ་གྱུར་པ་ལས། མཾ་ལས་རྡོ་རྗེ་དམར་སེར་མཾ་གྱིས་མཚན་པ། དེ་ལས་འོད་ཟེར་འཕྲོས། སྣོད་བཅུད་ཐམས་ཅད་འཇམ་པའི་རྡོ་རྗེའི་དཀྱིལ་འཁོར་དུ་གྱུར། དེ་རྣམས་དང་གདོད་ནས་གྲུབ་པའི་ཡེ་ཤེས་ཀྱི་དཀྱིལ་འཁོར་ཐམས་ཅད་སླར་འདུས་ཏེ་མཾ་ཡིག་ལ་ཐིམ། དེ་ལས་འབྲས་བུ་རྡོ་རྗེ་འཛིན་པ་གཙོ་འཁོར་ཐམས་ཅད་དུས་གཅིག་ཏུ་གྲུབ་པ་ནི། དབུས་སུ་འཇམ་པའི་རྡོ་རྗེ་དཔལ་ཧེ་རུ་ཀ་ཞལ་དྲུག་ཕྱག་བཅུ་གཉིས་པ། སྐུ་མདོག་དང་རྩ་ཞལ་གུར་གུམ་གཞོན་ནུ་ལྟར་དམར་སེར། གཡས་ཞལ་སྔོ་བ་དང་སེར་བ། གཡོན་ཞལ་ལྗང་ཁུ་དང་དམར་པོ། དེ་རྣམས་ཁྲོས་ཤིང་འཇིགས་པའི་ཉམས་ཅན། སྟེང་ཞལ་དཀར་པོ་ཞི་བའོ། །ཐམས་ཅད་བནྡྷ་ལྟར་དམར་བའི་སྤྱན་གསུམ་གསུམ་དང་ལྡན་ཞིང༌། སངས་རྒྱས་ལྔའི་གཟུགས་བརྙན་དང་བཅས་པའི་ཐོད་སྐམ་གྱིས་དབུ་ལ་བརྒྱན་པ། ཕྱག་དང་པོ་གཉིས་ཀྱིས་རྡོ་རྗེ་དང་དྲིལ་བུ་འཛིན་པས་ཡུམ་ལ་
འཁྱུད་ཅིང༌། གཉིས་པ་གཉིས་ཀྱིས་ཚངས་པའི་པགས་པ་སྟོད་གཡོགས་སུ་འཕྱར་བ། གསུམ་པ་གཉིས་ཀྱིས་རལ་གྲི་དང་ཨུཏྤལ། བཞི་པ་གཉིས་ཀྱིས་ལྕགས་ཀྱུ་དང་ཞགས་པ། ལྔ་པ་གཉིས་ཀྱིས་ཅང་ཏེའུ་དང་ཚངས་པའི་མགོ་བོ། དྲུག་པ་གཉིས་ཀྱིས་མདའ་དང་གཞུ་འཛིན་པ། ཞབས་གཡོན་བསྐུམ་པས་འཇིགས་བྱེད་ནག་པོ་དང༌། གཡས་བརྐྱང་བས་དུས་མཚན་མ་དམར་པོ་མནན་པ། འཇིགས་བྱེད་ཆེན་པོའི་པགས་པའི་ཤམ་ཐབས་གྲོལ་བ། ཕྱག་རྒྱ་དྲུག་དང་ལྡན་ཞིང༌། རལ་བའི་ཅོད་པན་ལ་ནོར་བུ་དང་སྣ་ཚོགས་རྡོ་རྗེ་དང་ཟླ་བ་ཕྱེད་པས་བརྒྱན་པ། ཐལ་བ་དང་མི་མགོའི་དོ་ཤལ་གྱིས་སྐུ་ལ་སྤྲས་པ། མེ་དཔུང་འབར་བའི་དབུས་ན་གར་དགུས་རོལ་པའོ། །དེ་ལ་འཁྱུད་པའི་ཡུམ་རྡོ་རྗེ་ཕག་མོ་སྐུ་མདོག་དང་རྩ་ཞལ་དམར་སེར། གཡས་སྔོ་གཡོན་དཀར་བའི་ཞལ། ཕྱག་དང་པོ་གཉིས་རྡོ་རྗེ་དང་དྲིལ་བུ་འཛིན་པས་ཡབ་ལ་འཁྱུད་པ། ལྷག་མ་གཡས་གཉིས་ཅང་ཏེའུ་དང་བདུད་ཀྱི་མགོ་བོ། གཡོན་གཉིས་ཐོད་པ་ཁ་ཊྭཾ་ག་འཛིན་པ། གཡས་བསྐུམ་གཡོན་བརྐྱང་བའི་ཞབས་ཀྱིས་ཡབ་ལ་འཁྱུད་པ། དབུ་སྐྲ་གྲོལ་ཞིང་ཐོད་སྐམ་གྱི་དོ་ཤལ་ཅན། ལྷག་མ་བཅོམ་ལྡན་འདས་དང་མཚུངས་པའོ། །འདི་ལ་ཁྱད་པར་གཞན་ནི། ཁྲོ་ཞལ་རྣམས་ཀྱི་དབུ་སྐྲ་གྱེན་དུ་བརྫེས་པ་དང༌། འཇིགས་བྱེད་ཆེན་པོའི་པགས་པས་སྟོད་གཡོགས་བྱེད་པའང་ཡོད་ལ། གླང་ལྤགས་དང་སྟག་ལྤགས་སྤྱི་དང་མཚུངས་པར་བྱེད་པའང་ཡོད་ཅིང༌། ཞབས་བཞི་རྒྱབ་མ་གཉིས་
གར་གྱི་ཚུལ་དུ་འདོད་པའང་སྣང་ངོ༌། །དེ་བཞིན་དུ་ཡུམ་ཡང་རྒྱུ་རྡོ་རྗེ་འཛིན་པའི་སྐབས་ལྟར། དཀར་མོའང་སྔོན་མོར་འདོད་པ་དང༌། ཡབ་དང་མཚུངས་པའི་རྣམ་པ་ཅན་དང༌། ཞལ་གཅིག་ཕྱག་གཉིས་པར་ཡང་འདོད་ཅིང༌། རྒྱུ་རྡོ་རྗེ་འཛིན་པ་སྐུ་མདོག་དཀར་པོར་འདོད་པའང་ཡོད་དོ། །དེ་དག་ཀྱང་རྒྱུད་ཚིག་འདོན་ཚུལ་དང་མན་ངག་གི་ཁྱད་པར་སོ་སོ་ལས་བྱུང་བ་ཡིན་པའི་ཕྱིར་ཐམས་ཅད་ཀྱང་མི་འགལ་ལོ། །རྒྱུད་ལས་ཡུམ་བྱིན་པ་གཉིས་འཁྱུད་དུ་བཤད་པ་ལ། མཉམ་འཁྱུད་དང་གང་རུང་གིས་ཅི་བདེར་འཁྱུད་པ་གང་བྱས་ཀྱང་ཆོག་ལ། མངོན་བརྗོད་འགྲེལ་པ་ལས། རྩིག་པ་ལ་ཡི་དྭགས་ཕྲེང་བ་དང༌། སྟེགས་བུ་ལ་ལྷ་མོའི་འཁོར་དུ་བཤད་ནའང་མི་ལེགས་སོ། །ཐུགས་འཁོར་གྱི་ཤར་ཕྱོགས་པཱུ་ལི་ར་མ་ལ་ཡར་ཁཎྜ་ཀ་པ་ལ་དག་རབ་གཏུམ་མ། དཀར་སྔོ་ལྗང་བའི་ཞལ་གསུམ། བྱང་ཕྱོགས་ཛཱ་ལནྡྷ་རར་མ་ཧཱ་ཀཾ་ཀ་ལ་དང་གཏུམ་མིག་མ། སེར་སྔོ་ལྗང་བའི༴ ནུབ་ཕྱོགས་ཨོ་ཌི་ཡ་ནར་ཀཾ་ཀ་ལ་དང་འོད་ལྡན་མ། དམར་སྔོ་ལྗང་༴ ལྷོ་ཕྱོགས་ཨརྦུ་ཏར་མཆེ་བ་རྣམ་པར་གཙིགས་པ་དང་སྣ་ཆེན་མ། ལྗང་སེར་སྔོ༴ ཤར་ལྷོ་གཽ་དཱ་ཝ་རིར་སུ་ར་ཝི་རི་དང་བརྟན་པའི་བློ་ཅན་མ། དམར་སེར་ལྗང་བའི༴ ལྷོ་ནུབ་རསྨ་ཤྭ་རར་འོད་དཔག་མེད་དང་མིའུ་ཐུང་མ། དཀར་སེར་ལྗང་༴ ནུབ་བྱང་དེ་ཝཱི་ཀོ་ཊར་རྡོ་རྗེ་དང་ལང་ཀའི་དབང་ཕྱུག་མ། སྔོ་སྐྱ་སེར་ལྗང་༴ བྱང་ཤར་མ་ལ་བར་རྡོ་རྗེའི་སྐུ་དང་ཤིང་གྲིབ་མ། ལྗང་སེར་སྔོ༴ དེ་ལྟར་ཐུགས་འཁོར་བ་རྣམས་
ཕྱག་དང་པོ་གཉིས་རྡོ་རྗེ་དང་དྲིལ་བུ་འཛིན་པ། དེའི་ཕྱི་རོལ་གསུང་གི་འཁོར་ལོའི་ཤར་རྩིབས་ཀཱ་མ་རཱུ་པར་ཨང་ཀུ་རི་དང་ཨེ་ར་ཝ་ཏི། དཀར་སྔོ་ལྗང་བ། བྱང་ཕྱོགས་ཨོ་ཊེར་རྡོ་རྗེ་རལ་པ་ཅན་དང་འཇིགས་བྱེད་ཆེན་མོ། ལྗང་སེར་སྔོ་བ༴ ནུབ་ཕྱོགས་ཏྲི་ཤ་ཀུ་ནིར་དཔའ་བོ་ཆེན་པོ་དང་རླུང་གི་ཤུགས་ཅན་མ། སྔོ་སེར་ལྗང་བ། ལྷོ་ཕྱོགས་ཀོ་ས་ལར་རྡོ་རྗེ་ཨོཾ་མཛད་དང་ཆང་འཐུང་མ། དམར་སེར་ལྗང་བ། ཤར་ལྷོ་ཀ་ལིང་ཀར་རབ་ཏུ་བཟང་པོ་དང་ཤྱ་མ་དེ་ཝཱི། ལྗང་སེར་སྔོ་བ་ལྷོ་ནུབ་ལམྦ་ཀར་རྡོ་རྗེ་བཟང་པོ་དང་ཤིན་ཏུ་བཟང་མོ། སེར་སྔོ་ལྗང་བ་ནུབ་བྱང་ཀཉྩིར་འཇིགས་བྱེད་ཆེན་པོ་དང་རྟ་རྣ་མ། དུད་སེར་ལྗང་བ། བྱང་ཤར་ཧི་མ་ལ་ཡར་མིག་མི་བཟང་དང་བྱ་གདོང་མ། སྔོ་སྐྱ་སེར་ལྗང་བ། དེ་ལྟར་གསུང་གི་འཁོར་ལོ་པ་རྣམས་ཕྱག་དང་པོ་གཉིས་པདྨ་དང་དེའི་ཡུ་བ་བྱས་པའི་དྲིལ་བུ་འཛིན་པ། དེའི་ཕྱི་རོལ་སྐུའི་འཁོར་ལོའི་ཤར་སྒོ་པྲེ་ཏ་པུ་རིར་སྟོབས་པོ་ཆེ་དང་འཁོར་ལོའི་ཤུགས་ཅན་མ། སྔོ་སེར་ལྗང་བ། བྱང་སྒོ་གྲི་ཧ་དེ་ཝར་རིན་ཆེན་རྡོ་རྗེ་དང་ཁཎྜ་རོ་ཧི། སེར་སྔོ་ལྗང་བ། ནུབ་སྒོ་སཽ་རཥྟར་རྟ་མགྲིན་དང་ཤོཎྜི་ནི། དམར་སེར་ལྗང་བ། ལྷོ་སྒོར་སུ་ཝརྞ་དྭི་པར་ནམ་མཁའི་སྙིང་པོ་དང་འཁོར་ལོ་གོ་ཆ་མ། དཀར་སྔོ་ལྗང་བ། ཤར་ལྷོའི་གྲྭ་ན་ག་ར་དཔལ་ཧེ་རུ་ཀ་དང་ཤིན་ཏུ་དཔའ་མོ། སྔོ་སྐྱ་སེར་ལྗང་བ།
ལྷོ་ནུབ་ཀྱི་གྲྭ་སིནྡྷུར། པདྨ་གར་གྱི་དབང་ཕྱུག་དང་སྟོབས་ཆེན་མ། སེར་ལྗང་བ། ནུབ་བྱང་གི་གྲྭ་མ་རུར། རྣམ་པར་སྣང་མཛད་དང་འཁོར་ལོས་བསྒྱུར་མ། དཀར་སྔོ་ལྗང་བ། བྱང་ཤར་གྱི་གྲྭ་ཀུ་ལུ་ཏར་རྡོ་རྗེ་སེམས་དཔའ་དང་བརྩོན་འགྲུས་ཆེན་མོ། དཀར་ནག་ལྗང་བའི་ཞལ་གསུམ། དེ་ལྟར་སྐུའི་འཁོར་ལོ་པ་རྣམས་ཕྱག་དང་པོ་གཉིས་འཁོར་ལོ་དང༌། དེའི་ཡུ་བ་བྱས་པའི་དྲིལ་བུ་འཛིན་པའོ། །ཐམས་ཅད་ཀྱང་ཕྱག་དང་པོ་གཉིས་ཀྱིས་ཕན་ཚུན་དུ་འཁྱུད་ཅིང༌། ལྷག་མ་གཡས་ཀྱི་ཕྱག་གཉིས་ཀྱིས་གྲི་གུག་དང་ཅངཏེའུ། གཡོན་གཉིས་ཀྱིས་ཐོད་ཁྲག་དང་ཁ་ཊྭཾ་ག་བསྣམས་པའོ། །ཡབ་རྣམས་སྟག་ལྤགས་ཀྱི་ཤམས་ཐབས་ཅན་གཡས་བརྐྱང་གི་སྟབས་ཀྱིས་བཞུགས་པ། ཡུམ་རྣམས་གཅེར་བུ་གཡོན་བརྐྱང་གི་སྟབས་ཅན། ཐམས་ཅད་ཀྱང་གཙོ་བོ་ཡབ་ཡུམ་གྱི་རིགས་ལས་བྱུང་བའོ། །བྲམ་ཟེ་རིན་ཆེན་རྡོ་རྗེའི་ཐུགས་དམ་ལ་གཙོ་བོར་འཁོར་ཐམས་ཅད་ཁྲོ་ཉམས་ཆེ་ཞིང་ཅུང་ཟད་སྦོམ་པའི་སྐུ་ཅན་དུ་བྲིས་འདུག་གོ །ཨོཾ་ཨཱཿཧཱུཾ་སརྦ་ཝཱི་ར་ཡོ་གི་ནི་ཀཱ་ཡ་ཝ་ཀ་ཙིཏྟ་བཛྲ་སྭ་བྷཱ་ཝ་ཨཏྨ་ཀོ྅ཧཾ། ཨོཾ་བཛྲ་ཤུདྡྷ་སརྦ་དྷརྨྨ་བཛྲ་ཤུདྡྷོ྅་ཧཾ། རང་གི་སྙིང་ག་ནས་འོད་ཟེར་འཕྲོས། ཡེ་ཤེས་ཀྱི་དཀྱིལ་འཁོར། ཕཻཾ་ཛཿཧཱུཾ་བཾ་ཧོཿ ཨོཾ་ཡོ་ག་ཤུདྡྷ་སརྦ་དྷརྨ་ཡོ་ག་ཤུདྡྷོ྅ཧཾ། ཨརྒྷཾ། ནས་ཤཔྟའི་བར་གྱིས་མཆོད། རྐང་པ་བརྒྱད་པས་བསྟོད། བར་འདིར་ལུས་དཀྱིལ་སྒོམ་པར་འདོད་ན། ལྟེ་བར་གཙོ་བོ་ཡབ་ཡུམ་དང༌། སྤྱི་བོ་
ལ་སོགས་པར་འཁོར་ལོ་གསུམ་གྱི་ལྷ་རྣམས་བཀོད་པའི་ལྷ་ལྔ་བཅུ་པ་བསྒོམ་པར་བྱའོ། །ཅི་སྟེ་མ་མོ་བཅུ་གཉིས་འགོད་པར་འདོད་ན་ཡང༌། མངོན་བརྗོད་ལེའུ་དགུ་པར་གསུངས་པ་ལྟར་ཕྱག་བཅུ་གཉིས་ལ་འགོད་དགོས་ཤིང༌། དེ་ལྟར་ན་ཐོད་པ་བཞི་ཞལ་བཞི་ལའོ། །འོན་ཀྱང་དེ་དག་དཀྱིལ་འཁོར་འདིའི་ལྷ་མ་ཡིན་པའི་ཕྱིར་འགོད་མི་དགོས་སོ། །དེ་ནས་ལྷ་ཐམས་ཅད་ཀྱི་ཕུང་ཁམས་སྐྱེ་མཆེད་བྱིན་གྱིས་རློབས་པ་ནི། རྒྱུ་རྡོ་རྗེའི་འཛིན་པའི་སྐབས་བཞིན་ནོ། སྤྱོད་པ་བཞི་བྱིན་གྱིས་རློབས་པ་ནི། ལྷ་ཐམས་ཅད་ཀྱི་དཔྲལ་པར་ཨོཾ། མགྲིན་པར་ཨཱཿ ཐུགས་ཀར་ཧཱུཾ། ལྟེ་བར་ཧོཿ རང་གི་སྙིང་གར་རང་འདྲ་བའི་ཡེ་ཤེས་སེམས་དཔའ། དེའི་ཐུགས་ཀར་ཏིང་ངེ་འཛིན་སེམས་དཔའ་རྡོ་རྗེ་རྩེ་ལྔ་པ་དམར་སེར་གྱི་ལྟེ་བར་ཟླ་བ་ལ་གནས་པའི་མཾ་གྱིས་མཚན་པའོ། །ཡང་ཐུགས་ཀའི་ཧཱུཾ་ལས་འོད་འཕྲོས། དབང་གི་ལྷ་དཀྱིལ་འཁོར་གྱི་འཁོར་ལོ་ཕཻཾ། ཨོཾ་ཨ་བྷི་ཥིཉྩ་ཏུ་མཾ་སརྦ་ཏ་ཐཱ་ག་ཏ་ཞེས་གསོལ་བ་བཏབ་པས། དབང་གི་ལྷ་རྣམས་ཀྱིས། ཇི་ལྟར་བལྟམས་པ༴ ནས་ཤྲཱི་ཡེ་ཧཱུཾ། ཞེས་གསུང་ཞིང་བདུད་རྩིས་གང་བའི་ཀ་པཱ་ལས་དབང་བསྐུར། སྐུ་ལུས་གང༌། དྲི་མ་ཐམས་ཅད་དག །ཆུའི་ལྷག་མ་ཡར་ལུད་པ་ལས། གཙོ་བོ་ལ་མི་བསྐྱོད་པ། ཡུམ་ལ་རྣམ་སྣང༌། སྔོན་པོ་རྣམས་ལ་མི་བསྐྱོད་པ། དཀར་པོ་རྣམས་ལ་རྣམ་སྣང་ལྗང་ཁུ་རྣམས་དང་དུད་ཁ་ལ་དོན་གྲུབ། དམར་པོ་རྣམས་ལ་སྣང་མཐའ། སེར་པོ་རྣམས་ལ་རིན་འབྱུང་
གི་དབུ་རྒྱན། དེ་ནས་གོ་ཆ་བགོ་བར་བྱ་སྟེ། དཔའ་བོ་ཉི་ཤུ་རྩ་ལྔའི་སྙིང་གར་ཨོཾ་ཧ་དཀར་པོ༴ ནས། རྟ་མཆོག་གི་ངོ་བོ། དཔའ་མོ་ཉི་ཤུ་རྩ་ལྔའི་ལྟེ་བར་ཨོཾ་བཾ༴ ནས། ཙཎྜི་ཀའི་ངོ་བོ། རྡོ་རྗེ་སེམས་དཔའ་དང༌། རྨོངས་བྱེད་མ་ཟླ་བའི་གདན་དང༌། གཞན་རྣམས་ཉི་མའི་གདན་ལ་གནས་པའོ། །དེ་ནས་འདིར་ཡང་སྤྲོ་ན་མཆོད་བསྟོད་བྱ་ཞིང༌། ཁྱད་པར་བདུད་རྩི་མྱང་བ་ནི། སྡོམ་འབྱུང་གི་གཏོར་མཆོག་རྣམས་སུ་བཤད་པ་ལྟར་ནང་མཆོད་བྱིན་གྱིས་རློབས་ཏེ། ཨོཾ་ས་མ་ཡ་ཤུདྡྷ་སརྦ་དྷརྨ་ས་མ་ཡ་ཤུདྡྷོ྅་ཧཾ། ཨོཾ་བཛྲ་ཨ་མྲྀ་ཏ་ཨུ་ད་ཀ་ཧཱུཾ། ཋ་ཋ་སྟྭཾ་ཨ་ཁཾ་ཧཱུཾ། ཞེས་བདུད་རྩི་མྱང་ངོ༌། །བླ་མ་ལ་འབུལ་བར་འདོད་ན། འཇམ་དཔལ་ངག་དབང་གྲགས་པ་བློ་གྲོས་བཟང༌། །བདེ་ཆེན་རྡོ་རྗེ་ལྷ་ཡི་འབྱུང་གནས་དང༌། །མི་འཇིགས་འབྱུང་གནས་རྩ་བའི་བླ་མ་སྟེ། །བཀས་གནང་བླ་མ་རྣམས་ལ་མཆོད་པ་འབུལ། །ཞེས་སོ། །བར་འདིར་རྫོགས་པའི་རིམ་པ་སོགས་བསྒོམ་པར་བྱ་ཞིང༌། དཀྱིལ་འཁོར་གྱི་འཁོར་ལོ་སྒྱུ་མར་ཤེས་པར་བྱས་ཏེ། དེ་ལ་མཉམ་པར་བཞག་གོ །བྱང་ཆུབ་ཕྱོགས་ཀྱི་དག་པ་དྲན་པ་ནི། བྱང་ཕྱོགས་དང་པོ་བརྒྱད་དང༌། ཐ་ལྷག་བཞི་བོར་བ་སྟེ། འདུན་པའི་རྫུ་འཕྲུལ་གྱི་རྐང་པ་ནི་རབ་ཏུ་གཏུམ་མ། ནས་ཡང་དག་པའི་ངག་ནི་བརྩོན་འགྲུས་ཆེན་མོའོ། །ཡང་དག་པའི་ཏིང་ངེ་འཛིན་ནི་དཔལ་ཧེ་རུ་ཀའོ། །ཞེས་སོ། །གཞན་ཡང༌། དབང་པོ་ལྔ་དང་ཡུལ་ལྔ་དང༌། །ཕུང་པོ་ལྔ་དང་འབྱུང་བ་ལྔ། །ཡེ་ཤེས་ལྔ་ནི་རྣམ་དག་པ། །ཉི་ཤུ་རྩ་ལྔའི་
བདག་ཉིད་ལྷ། །ཐབས་དང་ཤེས་རབ་མཉམ་པར་སྦྱོར། །དེ་ཉིད་ཉི་ཤུ་ལྔ་བདག་ཉིད། །བྱང་ཆུབ་ཕྱོགས་ཆོས་སུམ་ཅུ་བདུན། །ཡེ་ཤེས་གཞལ་མེད་ཁང་བཟང་སྟེ། །རྣམ་པར་ཤེས་པ་བརྒྱད་དག་པ། །ཕྱི་རོལ་དུར་ཁྲོད་བརྒྱད་དུ་སྤྲུལ། །སྡང་དང་སྲེད་པ་རབ་འཇོམས་པས། །ལྷ་མོ་རྣམས་དང་ཡི་དྭགས་འཕྲེང༌། །སྣ་ཚོགས་རྡོ་རྗེ་དུད་གཞོམ་སྟེ། །ཡེ་ཤེས་མེ་འོད་རྣམ་པར་སྤྲོ། །སྐུ་དང་གསུང་དང་ཐུགས་དག་པས། །དཀྱིལ་འཁོར་གསུམ་དུ་ཤེས་པར་བྱ། །དམ་པའི་དོན་དུ་དཔའ་བོའི་གཟུགས། །ཡེ་ཤེས་ཀྱིས་ནི་འཇམ་དཔལ་ཉིད། །སྐྱོན་དྲུག་དག་པས་རིགས་དྲུག་ཉིད། །ཡན་ལག་བཅུ་གཉིས་འགག་པ་ཡིས། །ཞལ་དང་ཕྱག་ནི་རྣམ་དག་པ། །མ་རིག་འདུ་བྱེད་ཞབས་ཀྱིས་མནན། །ཞེས་བརྗོད་ཅིང་དོན་བསམ་མོ། །དེ་ནས་འགོག་པའི་བཟླས་པ་དང༌། ངག་བཟླས་ཡིད་བཟླས་རྣམས་རིམ་གྱིས་བྱ་སྟེ། ཨོཾ་ཨཱཿཧཱུཾ། ཉེ་བའི་སྙིང་པོའོ། །ཨོཾ་ཤྲཱི་མཉྫུ་བཛྲ་དྷྲི་ཀ་ཨོཾ་ཧཱུཾ། ཌཱ་ཀི་ནི་ཛཱ་ལ་སམྦྷ་ར་ཧཱུཾ་ཧཱུཾ་ཕཊ་སྭཱཧཱ། སྙིང་པོའོ། ཨོཾ་བཛྲ་ཝ་ར་ཧི་ཧཱུཾ་ཧཱུཾ་ཕཊ་སྭཱཧཱ། ཡུམ་གྱི་སྙིང་པོའོ། འཕྲེང་བའི་སྔགས་ནི་བདེ་མཆོག་སྤྱི་དང་མཐུན་པ་ཡིན་ནའང༌། དེ་གཙོ་བོར་བཟླ་བར་མ་གསུངས་སོ། །འཁོར་གྱིས་སྔགས་ནི། ཨོཾ་ཀ་ར་ཀ་ར་ཁཎྜ་ཀ་པཱ་ལ་ཧཱུཾ་ཧཱུཾ་ཕཊ། ཨོཾ་པྲ་ཙནྚེ་ཧཱུཾ་ཧཱུཾ་ཕཊ། ཅེས་སོགས་སྦྱར་ཏེ་བཟླའོ། །ཐུན་འཇོག་པའི་ཚེ། བདག་བསྐྱེད་ཀྱི་གཏོར་བསྔོ་བྱས་ཏེ་ཐུན་བསྡུ་བའམ། མིན་ཡང་རུང་སྟེ། སྙིང་
གའི་འོད་ཟེར་གྱིས་སྣོད་བཅུད་ཐམས་ཅད་ཉི་ཤུ་རྩ་ལྔའི་བདག་ཉིད་ཅན་གྱི་དཀྱིལ་འཁོར་དུ་གྱུར། དེ་ཐམས་ཅད་བསྒོམས་པའི་དཀྱིལ་འཁོར་ལ་ཐིམ། དཀྱིལ་འཁོར་དང་དཀྱིལ་འཁོར་པ་རྣམས་ཀྱང་བདག་ཉིད་ལ་ཐིམ། དེ་ཡང་ཏིང་ངེ་འཛིན་སེམས་དཔའི་བར་དུ་བསྡུས། དེ་ཡང་འོད་གསལ་བར་བསྡུས་ཏེ་སྟོང་པ་ཉིད་ལ་མཉམ་པར་བཞག་གོ །སླར་ཡང་རང་སྐད་ཅིག་གིས་འཇམ་པའི་རྡོ་རྗེ་ཕྱག་གཉིས་པར་གྱུར། སྤྱོད་པ་བཞི་དང་གོ་ཆ་གཉིས་ཀྱིས་རྒྱས་བཏབ་སྟེ་ཐུན་མཚམས་ལ་འཇུག་གོ །གཏོར་མ་བྱིན་རླབས་འཁྲུལ་སྤོང་གི་སྒྲུབ་ཐབས་སུ་བཤད་པ་ལྟར་བྱ་ཞིང༌། ཕཻཾ་ཞེས་ཡེ་ཤེས་ཀྱི་འཁོར་ལོ། སྲིད་པ་གསུམ་གྱི་འབྱུང་པོའི་ཚོགས་དང་བཅས་པ་སྤྱན་དྲངས། ཨརྒྷཾ་ནས་ཤཔྟའི་བར་གྱིས་མཆོད། ཨོཾ་ཨ་རལླི་ཧོ་ཛཿཧཱུཾ་བཾ་ཧོཿ བཛྲ་ཌཱ་ཀི་ནི་ས་མ་ཡ་སྟྭཾ་དྲྀ་ཤྱ་ཧོ། ཞེས་ལན་གསུམ་གྱིས་སྤྱིར་ཕུལ། ཡབ་ཡུམ་གྱི་སྙིང་པོའི་ཧཱུཾ་ཧཱུཾ་ཕཊ་ཀྱི་སྔོན་དུ་ཨི་མཾ་བ་ལིཾ་གྲྀཧྞ་གྲྀཧྞ་མ་མ་སརྦ་ཀརྻཾ་ཀུ་རུ་ཀུ་རུ་ཞེས་བཅུག་པ་ལན་གསུམ་གསུམ་གྱིས་ཕུལ། ཨོཾ་ཀ་ར་ཀ་ར་ནས། དྷི་ལི་དྷི་ལི་ཧཱུཾ་ཧཱུཾ་ཕཊ། ལན་གཅིག་གིས་འཁོར་ལོ་གསུམ་ལ་ཕུལ། ཧཱུཾ་བཅུ་གཅིག་གི་མཐར་ཨ་ཀཱ་རོ་བཏགས་པས་སྲུང་བའི་འཁོར་ལོ་པ་ལ་ཕུལ། ཡང་ཨརྒྷཾ༴ ནས་ཤཔྟའི་བར་གྱིས་མཆོད། འབྲུ་གསུམ་གྱིས་ནང་མཆོད་ཕུལ། རྐང་བརྒྱད་གཉིས་སམ་གོང་གི་ཞུ་བ་གླུས་བསྐུལ་གྱིས་བསྟོད། ཨོཾ་ཁ་ཁ་ཁཱ་ཧི་ཁཱ་ཧི་ནས་ས་ཧ་ཡི་ཀ་བྷ་ཝནྟུ་ཧཱུཾ་ཧཱུཾ་ཕཊ། ལན་གསུམ་གྱིས་ཕྱི་རོལ་འབྱུང་པོའི་
ཚོགས་ལ་གཏོར་མ་ཕུལ། ཕྱི་མཆོད། ནང་མཆོད། ཨོཾ་ལྷ་ཡི་ཚོགས་རྣམས་ནས་ཀུན་འགྲུབ་ཤོག་གིས་བསྟོད་ཅིང་གསོལ་བ་བཏབ། ཨོཾ་ཁྲོ་བོ་བདེ་བ་དགྱེས་པ་ཡི། །ཞེས་སོགས་དཔྱིད་ཀྱི་རྒྱལ་པོའི་གླུ་བླང༌། སེམས་ཅན་ཐམས་ཅད་ནད་མེད་ཅིང༌། །ཞེས་སོགས་སྨོན་ལམ་བཏབ། ཨོཾ་ཕུན་སུམ་ཚོགས་པ་སོགས་བཀྲ་ཤིས་བརྗོད། ཡིག་བརྒྱ་བཟོད་གསོལ་གཏོར་མགྲོན་གཤེགས་གསོལ་རྣམས་བྱས་ལ། ཡོ་ག་ཤུདྡྷའི་སྔགས་ཀྱིས་ཡེ་ཤེས་ཀྱི་དཀྱིལ་འཁོར་རང་ལ་བསྡུ། སླར་ཡང་བདག་སྲུང་དང༌། སྨོན་ལམ་བཀྲ་ཤིས་གང་འོས་རེ་བྱའོ། །འདིར་སྨྲས་པ། འཇམ་པའི་དབྱངས་ཀྱི་སྒྲུབ་ཐབས་ཆེས་མང་ཡང༌། །རྒྱུད་སྡེ་ཀུན་གྱི་རྩེ་མོར་གྱུར་པ་དང༌། །ལས་ཚོགས་ཙམ་མིན་མཆོག་སྒྲུབ་གཙོར་སྟོན་དང༌། །དག་བྱ་དག་བྱེད་རབ་རྒྱས་དཀྱིལ་འཁོར་དང༌། །རྒྱུད་ལས་ཤིན་ཏུ་གསལ་བར་གསུངས་པའི་ཕྱིར། །སྒྲུབ་ཐབས་འདི་ཉིད་ཁོ་ན་ཆེས་མཆོག་སྟེ། །གསང་ལྡན་ལ་སོགས་རྒྱུ་སྡེ་འོག་མར་མཚུངས། །གུར་ལས་གསུངས་སོགས་ལས་ཚོགས་ལྷ་ཙམ་ཡིན། །མཚན་བརྗོད་སྒྲུབ་ཐབས་བླ་མེད་ལུགས་བྱས་པ། །ཕལ་ཆེར་དག་བྱ་དག་བྱེད་ཤིན་ཏུ་བསྡུས། །འདུག་པའི་འཇམ་རྡོར་མན་ངག་གཙོ་ཆེ་སྟེ། །རྒྱུད་ལས་ཧ་ཅང་གསལ་བ་གསུང་པའང་མེད། །ཅེས་ཆེད་དུ་བརྗོད་པའོ། །དེ་ལྟར་སྒྲུབ་ཐབས་རབ་བཤད་པས། །འགྲོ་ཀུན་རྡོ་རྗེའི་ས་ཐོབ་ཅིང༌། ཁྱད་པར་ལམ་འདིར་འཇུག་པ་རྣམས། །ཚེ་འདིར་འཇམ་པའི་དབྱངས་སུ་གྱུར། །དཔལ་འཁོར་ལོ་བདེ་མཆོག་འཇམ་པའི་རྡོ་རྗེའི་སྒྲུབ་ཐབས་ཏེ་བརྒྱད་པའོ།། །།༈ རབ་འབར་ཡེ་ཤེས་མེ་ལྕེ་ཡིས། །
ཆོས་དབྱིངས་ནམ་མཁའི་མཐའ་ཀླས་པ། །རབ་གསལ་དཀྱིལ་འཁོར་རི་མོ་ནི། །ཅི་ཡང་འཆར་འདི་ངོ་མཚར་རྨད། །འདིར་དཔལ་འཁོར་ལོ་བདེ་མཆོག་དྲག་པོ་ཆེན་པོའི་སྒྲུབ་ཐབས་ཉམས་སུ་བླང་བར་འདོད་པས། སྐྱབས་སེམས་རྡོར་སེམས་སྒོམ་བཟླས་སྤྱི་དང་མཐུན། རང་གི་སྙིང་གར་རཾ་ལས་ཉི་མའི་དཀྱིལ་འཁོར་གྱི་སྟེང་དུ་ཧཱུཾ། དེའི་འོད་ཀྱིས་བདག་ཉིད་ཧེ་རུ་ཀ་ཕྱག་གཉིས་པར་གྱུར། འོད་ཟེར་བ་སྤུའི་བུ་ག་ནས་འཕྲོས། དཔལ་བདེ་མཆོག་གི་དཀྱིལ་འཁོར་བླ་མ་དང་བཅས་པ་མདུན་གྱི་ནམ་མཁར་སྤྱན་དྲངས། སྐབས་འདིར་སྤྲོ་ན་མཎྜལ་མཆོད་པ་རྒྱས་པ་བྱ། བསྡུ་ན། གང་གི་དྲིན་གྱིས༴ སོགས་དང༌། དཔལ་ལྡན་རྡོ་རྗེ་མཁའ་འགྲོ་མ༴ སོགས་ཀྱི་ཕྱག་འཚལ། ཨོཾ་ཨཱཿབཛྲ་བཱི་ནཱི་ཧཱུཾ། ནས་ཨོཾ་ཨཱཿབཛྲ་དྷརྨེ་ཧཱུཾ། ཨོཾ་ཨཱཿཧཱུཾ། ཨོཾ་ཨཱཿབཛྲ་མཧཱ་སུ་ཁཾ། དཀོན་མཆོག་གསུམ་ལ་བདག་སྐྱབས་མཆི༴ སོགས་ལན་གསུམ། རྡོ་རྗེ་སེམས་དཔའི་ཡི་གེ་བརྒྱ་པ་ལན་གཅིག་བརྗོད། ཚད་མེད་བཞི་སྤྱི་དང་མཐུན། ཨོཾ་སྭ་བྷཱ་ཝ་ཤུདྡྷ་སརྦ་དྷརྨ་སྭ་བྷཱ་ཝ་ཤུདྡྷོ྅ཧཾ། ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཏྨ་ཀོ྅ཧཾ། སྟོང་པའི་ངང་ལས་རང་སེམས་ནཱ་ད་ནམ་མཁར་གནས། ཚམས་རྔམ་དང་བཅས་པའི་སུམྦྷ་ལན་གཉིས་བརྗོད། སྔགས་ལས་སྤྲོས་པའི་རྡོ་རྗེའི་ས་གཞི་དང༌། རྭ་བ་དང༌། གུར་དང༌། བླ་རེ་དང༌། མདའི་དྲྭ་བ་ཡེ་ཤེས་ཀྱི་མེ་འབར་བ་དང་བཅས་པར་གྱུར། ཨོཾ་མེ་དྷི་ནི་བཛྲི༴ སོགས་སྔགས་ཚན་དྲུག་བརྗོད། བསྲུང་བའི་འཁོར་ལོའི་དབུས་སུ་ཡཾ་ལས་རླུང་གི་
དཀྱིལ་འཁོར་སྔོན་པོ་ཟླ་གམ། དེའི་སྟེང་དུ་རཾ་ལས་མེའི་དཀྱིལ་འཁོར་དམར་པོ་གྲུ་གསུམ། དེའི་སྟེང་དུ་བཾ་ལས་ཆུའི་དཀྱིལ་འཁོར་དཀར་པོ་ཟླུམ་པོ། དེའི་སྟེང་དུ་ལཾ་ལས་སའི་དཀྱིལ་འཁོར་སེར་པོ་གྲུ་བཞི་རིན་པོ་ཆེ་སྣ་བཞི་ལས་གྲུབ་པ། དེའི་སྟེང་དུ་པཾ་ལས་སྣ་ཚོགས་པདྨའི་ལྟེ་བ་ལ། ཧཱུཾ་ལས་སྣ་ཚོགས་རྡོ་རྗེ་དེའི་སྟེང་དུ་བྷྲུཾ་དཀར་པོ་ལས། རིན་པོ་ཆེ་སྣ་ཚོགས་ལས་གྲུབ་པའི་གཞལ་མེད་ཁང༌། གྲུ་བཞི་སྒོ་བཞི། རྩིག་པ་རིམ་པ་ལྔ་དང་ལྡན་པ། ཕ་གུ་དང༌། བྲེ་ཕུལ་དང༌། གསེར་གྱིས་སྣམ་བུ་དང༌། དྲྭ་ཕྱེད་དང༌། ཤར་བུ་དང༌། མདའ་ཡབ་དང༌། གཟུངས་མ་རྣམས་དང་བཅས་པའི་ཁ་ཁྱེར་ཏེ། མཚན་ཉིད་ཐམས་ཅད་ཡོངས་སུ་རྫོགས་པ། སྒོ་བཞིའི་མདུན་དུ་ཀ་བས་བཏེགས་པའི་རྟ་བབས་ཀྱིས་མཛེས་པ་ནང་གི་ལྷ་སྣམ་ཤར་དཀར། བྱང་ལྗང༌། ནུབ་དམར། ལྷོ་སེར། མཚམས་རྣམས་སུ་བུམ་པ་བརྒྱད་དང་བཅས་པ། དབུས་སྔོ་བའི་སྟེང་དུ་སྐུའི་འཁོར་ལོ་དཀར་པོ་རྩིབས་བརྒྱད་པ་མུ་ཁྱུད་ལ་འཁོར་ལོའི་འཕྲེང་བས་མཚན་པ། དེའི་ལྟེ་བར་གསུང་གྀ་འཁོར་ལོ་དམར་པོ། རྩིབས་བརྒྱད་པ་མུ་ཁྱུད་ལ་པདྨའི་འཕྲེང་བས་མཚན་པ། དེའི་ལྟེ་བར་ཐུགས་ཀྱི་འཁོར་ལོ་སྔོན་པོ་རྩིབས་བརྒྱད་པ་མུ་ཁྱུད་ལ་རྡོ་རྗེའི་འཕྲེང་བས་བསྐོར་བ། དེའི་ལྟེ་བར་པཾ་ལས་བདེ་བ་ཆེན་པོའི་འཁོར་ལོ་སྣ་ཚོགས་པདྨ་འདབ་མ་བརྒྱད་པ། སྡོང་བུ་ཅུང་ཟད་དང་བཅས་པ། གྲི་གུག་གི་འཕྲེང་བས་བསྐོར་བ། སྟེང་ཐོག་རིམ་པར་ཕུབ་པའི་དབུས་སུ་ཕྱུར་བུར་གྱུར་པ། ནང་གི་ལྷའི་
གནས་རྣམས་སུ་ཉི་མའི་གདན་སུམ་ཅུ་རྩ་གསུམ་མོ། །གཞལ་མེད་ཁང་གི་ཕྱི་རོལ་མཆོད་པའི་བཀོད་པ་ཐམས་ཅད་དང་བཅས་ཤིང༌། པད་འདབ་ཀྱི་ཁོར་ཡུག་བསྲུང་བའི་འཁོར་ལོ་དང་བཅས་པའི་ཕྱི་རོལ་དུར་ཁྲོད་ཆེན་པོ་བརྒྱད། ཕྱོགས་སྐྱོང་བ་དང༌། ཞིང་སྐྱོང་བ་དང༌། ཤིང་དང༌། མེ་དང༌། སྤྲིན་དང༌། ཆུ་དང༌། རི་དང༌། མཆོད་རྟེན་དང༌། གྲུབ་པ་ཐོབ་པའི་དཔའ་བོ་དང་རྣལ་འབྱོར་མ་རྣམས་ཀྱིས་ཡོངས་སུ་ཁྱབ་པའོ། །བདེ་ཆེན་འཁོར་ལོའི་ལྟེ་བར་ཉི་མའི་དཀྱིལ་འཁོར་གྱི་སྟེང་དུ་ཨ་ཨཱ༴ ནས། ཨཾ་ཨཿཕྲག་གཉིས་ལས་ཟླ་བ། དེའི་སྟེང་དུ་ཀ་ཁ༴ ནས་ཧ་ཀྵ། ཌ་ཌྷ། ད་དྷ་ཡ་ལ་ཕྲག་གཉིས་ཞུ་བ་ལས་ཉི་མའི་དཀྱིལ་འཁོར། དེ་གཉིས་ཀྱི་བར་དུ་ཧཱུཾ་ལས་རྡོ་རྗེའི་ལྟེ་བར་ཧཱུཾ་གིས་མཚན་པ། དེ་ལས་འོད་ཟེར་འཕྲོས། སེམས་ཅན་ཐམས་ཅད་ཀྱི་དོན་བྱས། སླར་འདུས་ཏེ་ཧཱུཾ་ལ་ཐིམ། དེ་ཐམས་ཅད་ཡོངས་སུ་གྱུར་པ་ལས། ལྷ་ཐམས་ཅད་ཡོངས་སུ་རྫོགས་པར་གྱུར་པ་ནི། དབུས་སུ་འཁོར་ལོ་བདེ་མཆོག་ཆེ། དྲག་པོ་ཆེན་པོ་ཧེ་རུ་ཀ །སྐུ་མདོག་དུས་མཐའི་སྤྲིན་ལྟར་གནག །མི་བཟད་སྣ་ཚོགས་འཇིགས་པའི་སྐུ། ཞལ་དང་ཕྱག་དང་ཞབས་རྣམས་ནི། །ཐམས་ཅད་འབུམ་གྱི་གྲངས་སུ་བྱ། །ཞལ་ནི་ཇི་སྙེད་ཐམས་ཅད་ཀྱང༌། །མདུན་ནག་གཡོན་ལྗང་རྒྱབ་དམར་བ། །གཡས་པ་སེར་པོ་ཤེས་པར་བྱ། །དང་པོ་རྡོ་རྗེ་དྲིལ་བུས་ཁྱུད། །དེ་འོག་ལྷ་མོའི་ནུ་མ་མཚིར། །དེ་འོག་
ཐོད་པ་ཁ་ཊྭཾ་བསྣམས། །གཉིས་ཀྱིས་གླང་ལྤགས་འཛིན་པའོ། །ལྕགས་ཀྱུ་ཞགས་པ་དགྲ་སྟ་དང༌། །མདུང་རྩེ་གསུམ་པ་ངོ་བོ་ཉིད། །ཅང་ཏེའུ་དང་ནི་གྲི་གུག་དང༌། མདའ་དང་གཞུ་ཡང་དེ་བཞིན་ཏེ། །ཐོད་དབྱུག་དང་ནི་མདུང་ཐུང་དང༌། །སྡིག་མཛུབ་དང་ནི་གཏུམ་ཤིང་དང༌། །འཁོར་ལོ་རལ་གྲི་རིན་ཆེན་དང༌། །པདྨ་སྣ་ཚོགས་རྡོ་རྗེ་དང༌། །རྡོ་རྗེ་མཚོན་པའི་དབྱུག་ཐོ་དང༌། །ག་ད་མདུང་རིང་མདུང་ཁ་ལེབ། །ཛ་མ་བེ་ཅོན་ཆུ་གྲི་དང༌། །དུང་དང་རྭ་དུང་པ་ཊ་ཧ། །པི་ཝཾ་གླིང་བུ་རྫ་རྔ་ཆེ། །རྫ་རྔ་རྔ་ཟླུམ་གྲུ་གསུམ་འཁྱོག །ས་ཆུ་མེ་དང་རླུང་དཀྱིལ་འཁོར། །སྒྲ་ཅན་ཀེཾ་རུས་འཇིགས་བྱེད་ཆེ། །ལུས་ལག་རྐང་པ་པགས་པ་དང༌། །ལྕགས་སྒྲོགས་གཡས་པའི་ལྷག་ན་སྟེ། །གཡོན་པའི་ལྷག་མའང་དེ་བཞིན་ནོ། །དེ་ལྟར་ཕྱག་ནི་བརྒྱ་ཕྲག་རྣམས། །རེ་རེ་དང་མཚུངས་སྟོང་ཕྲག་རེའོ། །ཞབས་གཡས་རྣམས་ཀྱིས་རིམ་བཞིན་དུ། །དུས་མཚན་ཚངས་མ་དབང་མོ་དང༌། །དཔལ་མོ་གཾ་ག་དབྱངས་ཅན་མ། །གཞོན་ནུ་མ་དང་དྲུག་ལྡན་མ། །རེ་བ་ཏཱི་དང་དགའ་བྱེད་མ། །ཙ་མུན་ཊི་དང་ཀླུ་མོ་དང༌། །གནོད་སྦྱིན་མོ་དང་ཟླ་བ་མོ། །ཉི་མ་མོ་དང་དགའ་མ་དང༌། །ཚོགས་བདག་མོ་ཡི་སྙིང་གར་མནན། །གཡོན་རྣམས་འཇིགས་བྱེད་ཆེན་མོ་དང༌། །ཚངས་པ་དབང་པོ་ཉེ་དབང་དྲག ཁྱབ་འཇུག་ཀུན་འགྱེད་གཞོན་ནུ་དང༌། །ནག་ཆེན་དགའ་བྱེད་དབང་ཕྱུག་དང༌། །གཤིན་རྗེ་ཆུ་
ལྷ་ལུས་ངན་དང༌། །ཟླ་བ་ཉི་མ་ལུས་མེད་དང༌། །ཚོགས་བདག་ལ་སོགས་ཁ་བུབ་ཏུ། །བསྒྱེལ་བའི་སྟེང་དུ་རྣམ་པར་གནོན། །ལྷག་མའི་ཞབས་རྣམས་ཐམས་ཅད་ཀྱིས། །བགེགས་རྣམས་ཐམས་ཅད་མནན་ཏེ་བཞུགས། །ཞལ་ཐམས་ཅད་རྣམ་པར་འགྱུར་བ། དྲག་པོ་ཆེན་པོ་མཆེ་བ་རྣམ་པར་གཙིགས་པས་འཇིགས་སུ་རུང་བ། བཞད་པ་མི་སྡུག་པ་རབ་ཏུ་འཇིགས་པ། དཔའ་བ། སྒེག་པ། དམ་པ། སྨིན་མ་རྣམ་པར་གཡོ་བ། བསྙེམས་པ། ཞི་བ། གཡོ་བ། མི་གཡོ་བ། ཞལ་རྣམ་པར་གདངས་པ། རྣམ་པར་རོལ་བ། ལྗགས་རྣམ་པར་བསྐྱོད་པ་ལ་སོགས་པ་སྣ་ཚོགས་པའི་ཉམས་ལྟར་བར་མཛད་པའོ། །སངས་རྒྱས་ལྔས་དབུ་ལ་བརྒྱན་པ། རྡོ་རྗེ་སེམས་དཔའ་སྤྱི་བོའི་གཙུག་ཏུ་རྒྱན་བྱས་པ། ཞལ་ཐམས་ཅད་རབ་ཏུ་འབར་བའི་སྤྱན་གསུམ་གསུམ་དང་ལྡན་པའོ། །ཞབས་རྣམས་གཡོན་བསྐུམ་གཡས་བརྐྱང་ཤིང༌། རལ་པའི་ཐོར་ཚུགས་དང༌། སྣ་ཚོགས་རྡོ་རྗེ་དང༌། ཟླ་བ་ཕྱེད་པ་དང༌། ཐོད་པ་སྐམ་པོ་ལྔ་ལྔས་དབུ་རྒྱན་པ། ཕྱག་རྒྱ་དྲུག་དང་མགོའི་འཕྲེང་བ་ཅན། སྟག་གི་པགས་པའི་ཤམས་ཐབས་གྲོལ་བ། གར་གྱི་ཉམས་དགུ་དང་ལྡན་པ། མཚན་དཔེས་སྤྲས་པའོ། །ཡུམ་རྡོ་རྗེ་ཕག་མོ་སྐུ་མདོག་དམར་མོ་ཞལ་གཅིག་ཕྱག་གཉིས་སྤྱན་གསུམ་མ། གཡོན་ཐོད་པ་ཁྲག་གིས་གང་བ་འཛིན་པས་ཡབ་ལ་འཁྱུད་ཅིང༌། གཡས་
སྡིགས་མཛུབ་དང་བཅས་པའི་རྡོ་རྗེ་འཕྱར་བ། བྱིན་པ་གཉིས་ཀྱིས་ཡབ་ལ་འཁྲིལ་བ། སྐྲ་གྲོལ་ཞིང་ཕྱག་རྒྱ་ལྔས་བརྒྱན་པ། ཐོད་སྐམ་གྱི་དོ་ཤལ་ཅན། ཁྲག་ལ་དགྱེས་ཤིང་ཁྲག་འཛག་པ། གཉིས་ཀའང་བསྐལ་པའི་མེ་ལྟ་བུའི་དབུས་ན་བཞུགས་པའོ། །བླ་མའི་མན་ངག་གིས་འདི་ལ་ཞལ་གདོང་གི་རྣམ་པ་ལ་སོགས་པ་མི་འདྲ་བ་གཞན་ཡོད་པ་ནི་ཡི་གེ་གཞན་དུ་གསལ་ལོ། །འདབ་མ་བརྒྱད་ལ་ཤར་དུ་མཁའ་འགྲོ་མ་ནག་མོ་བ་གླང་གི་གདོང་པ་ཅན། བྱང་དུ་ལཱ་མ་ལྗང་ཁུ་རྟའི་གདོང་པ་ཅན། ནུབ་ཏུ་དུམ་སྐྱེས་མ་དམར་མོ་གླང་པོ་ཆེའི་གདོང་པ་ཅན། ལྷོར་གཟུགས་ཅན་མ་སེར་མོ་ཅེ་སྤྱང་གི་གདོང་པ་ཅན། ཐམས་ཅད་རྩ་བའི་ཕྱག་གཉིས་ཀྱིས་གྲི་གུག་དང་ཐོད་པ་འཛིན་པའོ། །མཚམས་བཞིར་ཐོད་པ་བདུད་རྩིས་གང་བ་རྣམས་སོ། །ཐུགས་ཀྱི་འཁོར་ལོའི་ཤར་རྩིབས་པུ་ལི་ར་མ་ལ་ཡར་ཁཎྜ་ཀ་པཱ་ལ་དང༌། རབ་ཏུ་གཏུམ་མོ༴ ནས་བྱང་ཤར་ཀུ་ལུ་ཏ་རྡོ་རྗེ་སེམས་དཔའ་དང་བརྩོན་འགྲུས་ཆེན་མོ་སྟེ་ཐམས་ཅད་ཀྱང་སྐུ་མདོག་དཀར་པོའོ། །ཞེས་པའི་བར་སྤྱིར་དང་འདྲ། ཐམས་ཅད་ཀྱང་ཕྱག་གཉིས་ཀྱིས་རྡོ་རྗེ་དང་དྲིལ་བུ་འཛིན་པ། འཇིགས་བྱེད་ཆེན་པོ་རྣམས་རྣམ་པར་གནོན་པ། ཡབ་རྣམས་བཅོམ་ལྡན་འདས་དང་མཚུངས་པ། ཞལ་ཕྱག་སྣ་ཚོགས་པ། ཡུམ་རྣམས་རྡོ་རྗེ་ཕག་མོ་དང་མཚུངས་པའི་ཞལ་གཅིག་ཕྱག་གཉིས་པའོ། །ཤར་སྒོར་ཁྭ་གདོང་མ་སྔོན་
མོ། བྱང་སྒོར་འུག་གདོང་མ་ལྗང་ཁུ། ནུབ་སྒོར་ཁྱི་གདོང་མ་དམར་མོ། ལྷོ་སྒོར་ཕག་གདོང་མ་སེར་མོ། ཤར་ལྷོར་གཤིན་རྗེ་བརྟན་མ་གཡས་སྔོ་གཡོན་སེར་མ་ཧེའི་གདོང་མ་ཅན། ལྷོ་ནུབ་ཏུ་གཤིན་རྗེ་ཕོ་ཉ་མ་གཡས་སེར་གཡོན་དམར་བ་བོང་བུའི་གདོང་པ་ཅན། ནུབ་བྱང་དུ་གཤིན་རྗེ་མཆེ་བ་མ་གཡས་དམར་གཡོན་ལྗང་བ་རྔ་མོང་གི་གདོང་པ་ཅན། བྱང་ཤར་དུ་གཤིན་རྗེ་འཇོམས་མ་གཡས་ལྗང་གཡོན་སྔོ་བ་ར་སྐྱེས་ཀྱི་གདོང་པ་ཅན། མ་མོ་བཅུ་གཉིས་པོ་རྣམས་ནི། རྩ་བའི་ཕྱག་གཉིས་ཌཱ་མ་རུ་དང་ཐོད་པ་བསྣམས་པ། མཆན་ཁུང་དུ་ཁ་ཊྭཱཾ་ག་དང་བཅས་པ། དབུ་དང་ཕྱག་དང་ཞབས་མཐའ་ཡས་པ། རོའི་གདན་ལ་གཡས་བརྐྱང་གི་སྟབས་ཀྱིས་གནས་པས་དངོས་གྲུབ་སྩོལ་བའོ། །བདག་ཉིད་ཀྱི་ལུས་ལ་རྩ་འཁོར་ལོ་བཞིའི་ཡི་གེ་དང་བཅས་པ་གསལ་བཏབ། ཞལ་བཞི་པའི་སྔགས་བརྗོད། ཨོཾ་དྷརྨ་དྷ་ཏུ་བཛྲ་སྭ་བྷཱ་ཝ་ཨཏྨ་ཀོ྅་ཧཾ། ཡབ་ཀྱི་སྙིང་གར་ཨོཾ་ཧ་དཀར་པོ༴ ནས་ཕཊ་ཕཊ་དུད་ཁ་ཙནྚི་ཀཱའི་ངོ་བོ་གཉིས་ཀའི་དཔྲལ་པར་ཨོཾ། མགྲིན་པར་ཨཱཿ ཐུགས་ཀར་ཧཱུཾ། རང་གི་ཐུགས་ཀའི་ཧཱུཾ་གི་འོད་ཟེར་གྱིས་ཡེ་ཤེས་ཀྱི་འཁོར་ལོ་སྤྱན་དྲངས། ཕཻཾ། ཛཿཧཱུཾ་བཾ་ཧོཿ གཉིས་སུ་མེད་པར་ཐིམ། ཨོཾ་ཡོ་ག་ཤུདྡྷ་སརྦ་དྷརྨ་ཡོ་ག་ཤུདྡྷོ྅་ཧཾ། སླར་ཡང་འོད་འཕྲོས་དབང་གི་ལྷ་རྣམས་སྤྱན་དྲངས། ཕཻཾ། བྱང་ཆུབ་རྡོ་རྗེ་སངས་རྒྱས་ལ། །ཞེས་སོགས་ཀྱིས་གསོལ་བ་བཏབ་པས། དབང་བསྐུར་བ་ནི་རྡོ་རྗེ་
ཆེ། ཁམས་གསུམ་ཀུན་གྱིས་ཕྱག་བྱས་པ། །སངས་རྒྱས་རྣམས་ནི་ཐམས་ཅད་ཀྱི། །གསང་གསུམ་གནས་བྱུང་སྦྱིན་པར་བྱ། །ཨོཾ་བཛྲ་ཨུ་ད་ཀ་ཨབྷི་ཥིཉྩ་ཧཱུཾ། སུ་ར་ཏ་སྟྭཾ་ཨ་ཧཾ། ཞེས་གསུང་ཞིང་ཐོད་པ་བདུད་རྩིས་གང་བས་དབང་བསྐུར། དབང་གི་ལྷ་ཐམས་ཅད་ཀྱང་བདག་ཉིད་ལ་ཐིམ། རིག་མ་བཅུ་དྲུག་གིས་མཆོད། ནང་མཆོད་བྱིན་གྱིས་རླབས་ལ། རྡོ་རྗེ་འཆང་དང་རྡོ་རྗེ་རྣལ་འབྱོར་མ། །ཀ་ཧ་ན་ཏིལླི་ན་རོ་ཙ་ཏྲ་པ། །བསོད་ནམས་འབྱུང་གནས་རིན་ཆེན་འབྱུང་གནས་སྦས། །འཇིགས་མེད་འབྱུང་གནས་ད་ཤ་བ་ལ་དང༌། །འདྲེན་པའི་དཔལ་དང་ཤྲཱི་གུཔྟ་དང༌། །བློ་གྲོས་འབྱུང་གནས་དཀར་མིན་སྤྲིན་གྱི་ཞབས། །ཛྙཱ་ན་མི་ཏྲ་བདེ་ཆེན་རྡོ་རྗེ་དང༌། །རྩ་བའི་བླ་མ་རྣམས་ལ་མཆོད་པར་འབུལ། །རྩ་སྔགས་ཀྱི་མཐར་འབྲུ་གསུམ་བཏགས་པས་དཀྱིལ་འཁོར་གྱི་ལྷ་ཚོགས་རྣམས་ལ་ཕུལ། ཨོཾ་ཨཱཿབཛྲ་མ་ཧཱ་སུ་ཁཾ། ཞེས་གསང་བའི་མཆོད་པ་ཕུལ་ལ། ཡབ་ཡུམ་གྱིས་རྐང་པ་བརྒྱད་པས་བསྟོད། ནག་པོ་པ་ལྟར་དག་པ་དྲན་པར་བྱའོ། །གལ་ཏེ་དྲག་པོའི་ལས་ལ་མོས་ན། འཁོར་ཐམས་ཅད་ཁ་དོག་མཐིང་ཁར་བསྒོམ་ཞིང༌། གཙོ་བོའི་ཞལ་ཡང་རྩ་ཞལ་ཁྲོ་བོའི་ཞལ་ལ། ཞལ་ལྷག་མ་རྣམས་གདོང་བརྙན་དུ་བསྒྱུར་ཏེ། ཁྭ་དང་ཆུ་སྐྱར་བཞད་དང་ནི། ཅེ་སྤྱང་སྐྱེ་གཉིས་སྔགས་ཆེན་པོ། ཁྲུང་ཁྲུང་རི་རྐེག་ཀ་དམ་པ། །ཞེས་པ་སྲོག་ཆགས་བརྒྱད་དང༌། བོང་བུ་དང༌། མི་དང༌། རུས་སྦལ་དང༌། ཁྱི་དང༌། རྔ་མོང་དང༌། རྟ་ལ་སོགས་པའི་ཕྱུགས་སྣ་ཚོགས་པའི་གདོང་བརྙན་དུ་བསྒྱུར་ཞིང༌། གཞན་ཡང་རྩ་བའི་ཕྱག་རྒྱ་
ཕྲག་གཅིག་དང༌། སྟོང་ལ་སོགས་ཇི་ལྟར་མོས་པ་དེ་བཞིན་དུ་བསྒྱུར་བར་བྱའོ། །བཟླས་བའི་དམིགས་པ་ནི་སྤྱི་དང་མཚུངས་ཤིང༌། བཟླས་བྱ་ནི། ཨོཾ་ཤྲཱི་ཧེ་ཧེ་རུ་རུ་ཀཾ ཀ་ར་ཀ་ར། ཀུ་རུ་ཀུ་རུ་ནས་དྷི་ལི་དྷི་ལི་ཧཱུཾ་ཧཱུཾ་ཕཊ། ཌཱ་ཀི་ནི་ཛཱ་ལ་སམྦྷ་རཾ་ཧཱུཾ་ཧཱུཾ་ཕཊ་སྭཱཧཱ། ཡབ་ཀྱི་སྙིང་པོའོ། །ཨོཾ་བཛྲ་བཱི་ར་ཧི། ཏདྱ་ཐཱ། པྲོ་ཏཾ་གི་ཧ་ན་ཧ་ན༴ ནས་ཡོ་གི་ཤོ་རི་ཕཊ་ཧཱུཾ་ཧཱུཾ་ཕཊ། ཅེས་པའི་བར་ཡུམ་གྱི་སྔགས་སོ། །ཡབ་ཡུམ་གྱི་རྐང་པ་བརྒྱད་པའི་སྔགས་ཀྱང་བཟླ་བར་བྱའོ། །ཆེར་ཁྲོས་པས། ཧ་ཧ་ཧི་ཧི་ཧཱུཾ་ཧཱུཾ་ཕཊ། ཅེས་ཀྱང་བཟླས་སོ། །ཐུན་བསྡུ་བར་འདོད་ན། ཨོཾ་ཨཱཿཧཱུཾ་ཞེས་དཀྱིལ་འཁོར་གྱི་ལྷ་ཚོགས་ལ་མཆོད་པར་བསམས། མཚམས་རྔམ་དང་བཅས་པའི་སུམ་བྷ་ལན་གཉིས་སུ་བཟླ། སྒོ་མཚམས་མ་བརྒྱད་སྤྲོས། ཡང་སུམ་བྷ་ཚར་གཅིག་བཟླས་པས་བཀའ་བསྒོས། དེ་རྣམས་ཀྱིས་ཕྱོགས་བཅུའི་དགྲ་བགེགས་རྣམས་བཀུག །བསྲུང་འཁོར་གྱི་ཕྱི་རོལ་དུ་འབྲུབ་ཁུང་དུ་བཅུག་པ་ལ། རང་གི་ཐུགས་ཀ་ནས་སྤྲོས་པའི་ཕུར་བུ་རྣམས་ཀྱིས་བཏབ། ཨོཾ་གྷ་གྷ༴སོགས་ལན་གསུམ་བརྗོད། ཨོཾ་བཛྲ་མུད་ག་ར། སོགས། ཐོ་བས་བརྡུང་བས་བགེགས་རྣམས་མིང་ཡང་མེད་པར་བྱས་པར་བསམས། སླར་ཡང་དཀྱིལ་འཁོར་གྱི་ལྷ་ཚོགས་ལ་གོང་བཞིན་མཆོད་བསྟོད་བྱས་ལ། ལྷ་ཐམས་ཅད་ཀྱི་རྩ་བའི་ཕྱག་གཉིས་ཕུར་བུ་དང་ཐོ་བ་འཛིན་པར་བསྒྱུར་ཏེ། ཨོཾ་གྷ་གྷ༴ སོགས་ཀྱི་བཟླས་པ་ཅི་རིགས་པར་བྱ། རང་གི་སྙིང་ག་ནས་འོད་ཟེར་འཕྲོས། སྣོད་བཅུད་ཐམས་ཅད་དང༌། དཀྱིལ་འཁོར་གྱི་འཁོར་ལོ་འོད་ཟེར་གྱི་རྣམ་པར་
ཞུ་སྟེ། རང་གི་སྣ་བུག་གཉིས་ནས་ཞུགས། སྙིང་གའི་ཧཱུཾ་ལ་ཐིམ། རང་ཉིད་ཀྱང་འོད་གསལ་གྱི་ངང་དུ་ཞུགས། ཕཊ་ཅེས་བརྗོད། སླར་ཡང་སྟོང་པའི་ངང་ལས་ལྷ་སྐུར་གྱུར། སྭཱཧཱ་ཨོཾ་ཞེས་བརྗོད། གོ་ཆ་གཉིས་ཀྱིས་རྒྱས་བཏབ་ནས་ཐུན་མཚམས་ཀྱིས་བྱ་བ་ལ་འཇུག་གོ །འདིའི་ཁ་ཟས་ཀྱི་རྣལ་འབྱོར་ལ། ཁ་ཟས་ཐམས་ཅད་ལིང་གར་བྱས་ཏེ་བསྒྲལ་ནས་བཟའོ། །གཏོར་མའི་ཆོ་ག་ནི་སྡོམ་འབྱུང་གི་མངོན་རྟོགས་སུ་ཤེས་པར་བྱའོ། །སློབ་དཔོན་གང་བའི་རྡོ་རྗེ་ལས་ཐོབ་པའོ། །བདུད་དཔུང་ཕྱེ་མར་བརླག་བྱེད་ཅིང༌། །གྲུབ་པ་བརྒྱད་སོགས་མངག་གཞུག་དང༌། །མཁའ་འགྲོ་མ་དང་སྲིན་པོ་སོགས། །ཚུལ་འདི་སྒོམ་པའི་བྲན་དུ་འགྱུར། །མངོན་བརྗོད་བླ་མ་ལས་གསལ་བར་གསུངས་པ་འཁོར་ལོ་བདེ་མཆོག་དྲག་པོ་ཆེན་པོ་ཕྱག་འབུམ་པའི་སྒྲུབ་ཐབས་ཏེ་དགུ་པའོ།། །།༈ ན་མོ་གརྦ་བ་མུ་ཁ་ཧེ་རུ་ཀཱ་ཡ། རྡོ་རྗེའི་མཐོན་ཀའི་འོད་ཟེར་གྱིས། །བདུད་དཔུང་ལན་བརྒྱར་བཅོམ་བྱས་ནས། །སྒྲུབ་ལ་བདེ་ཆེན་དངོས་གྲུབ་སྩོལ། །རབ་འཇིགས་ཧེ་རུ་ཀ་ལ་འདུད། །འདིར་མཆོག་དང་ཐུན་མོང་གི་དངོས་གྲུབ་ཀྱི་ཁྱད་པར་རབ་འབྱམས་ཞིག་སྒྲུབ་པར་འདོད་པས། སྡོམ་པ་རྩ་བཤད་ཀྱི་རྒྱུད་ནས་འབྱུང་བ་ལྟར་རྡོ་རྗེ་ཁྲག་འཐུང་བོང་བུའི་ཞལ་ཅན་བསྒོམ་པར་བྱའོ། །དེ་ལ་སྐྱབས་འགྲོ་སེམས་བསྐྱེད་ཡིག་བརྒྱའི་སྒོམ་བཟླས་རྣམས་སྔོན་དུ་འགྲོ་བས། ཤྲཱི་ཧེ་རུ་ཀོ྅་ཧཾ། རང་སྐད་ཅིག་གིས་བདེ་མཆོག་ཞལ་གསུམ་ཕྱག་དྲུག་པར་གསལ་བའི་ཐུགས་ཀར་ཉི་མ་ལ་གནས་པའི་ཧཱུཾ་སྔོན་པོ་དེ་ལས་འོད་ཟེར་ལྕགས་ཀྱུ་ལྟ་བུ་འཕྲོས། བླ་མ་དང་དཀྱིལ་འཁོར་གྱི་འཁོར་ལོ་
མདུན་གྱི་ནམ་མཁར་བཛྲ་ས་མཱ་ཛཿ ན་མོ་གུ་རུ་བྷྱཿ ན་མཿཤྲཱི་ཙཀྲ་སམྦ་ར་མཎྜ་ལ་བྷྱཿ ཨོཾ་བཛྲ་ཨརྒྷཾ་ནས། ཤཔྟའི་བར་གྱིས་མཆོད། བྱས་དང་བྱེད་དུ་བཅུག་དང་ཡི་རང་བའི། །སྡིག་པ་མ་ལུས་སྐྱོན་ཀུན་འཇིགས་བྱེད་པའི། །སྤྱན་སྔར་སོ་སོར་བཤགས་ཤིང་སླར་ཡང་ནི། །མི་བྱེད་པ་ཡི་སྡོམ་པ་བླང་བར་བགྱི། །ཉན་ཐོས་རང་རྒྱལ་བླ་མེད་རྒྱལ་བ་དང༌། །རྒྱལ་བའི་སྲས་ཀྱི་དགེ་བ་གང་མཛད་པ། །དེ་དག་ཀུན་ལ་ཡང་དག་ཡི་རང་ཞིང༌། །བྱང་ཆུབ་མཆོག་ཏུ་ཡོངས་སུ་བསྔོ་བར་བགྱི། །རྒྱལ་བ་དཀོན་མཆོག་ལ་སོགས་གསུམ་པོ་ལ། །དངོས་པོ་ཀུན་གྱིས་བདག་ནི་སྐྱབས་སུ་མཆི། །བྱང་ཆུབ་མཆོག་ཏུ་སེམས་བསྐྱེད་དེ་བཞིན་དུ། །བླ་ན་མེད་པའི་ལམ་ལ་བརྟེན་པར་བགྱི། །ཚད་མེད་བཞི་སྤྱི་དང་མཐུན་པར་བསྒོམ། ཨོཾ་སྭ་བྷཱ་ཝ་ཤུདྡྷ་སརྦ་དྷརྨ་སྭ་བྷཱ་ཝ་ཤུདྡྷོ྅་ཧཾ། ཨོཾ་ཤུ་ནྱ་ཏཱ་ཛྙཱ་ན་བཛྲ་སྭབྷཱ་ཝ་ཨཏྨ་ཀོ྅་ཧཾ། སྟོང་པའི་ངང་ལས་ཡཾ་ལས་རླུང་གི་དཀྱིལ་འཁོར་སྔོན་པོ་ཟླ་གམ། དེའི་སྟེང་དུ་རཾ་ལས་མེའི་དཀྱིལ་འཁོར་དམར་པོ་གྲུ་གསུམ། དེའི་སྟེང་དུ་བཾ་ལས་ཆུའི་དཀྱིལ་འཁོར་དཀར་པོ་ཟླུམ་པོ། དེའི་སྟེང་དུ་ལཾ་ལས་སའི་དཀྱིལ་འཁོར་སེར་པོ་གྲུ་བཞི། དེའི་སྟེང་དུ་སུཾ་ལས་རི་རབ་རིན་པོ་ཆེ་སྣ་བཞི་ལས་གྲུབ་པ། དེའི་སྟེང་དུ་པཾ་ལས་སྣ་ཚོགས་པདྨའི་ལྟེ་བར། ཧཱུཾ་ལས་སྣ་ཚོགས་རྡོ་རྗེ་ཧཱུཾ་གིས་མཚན་པ་ལས་འོད་འཕྲོས། རྡོ་རྗེའི་ས་གཞི་རྭ་བ་དྲྭ་བ་གུར་བླ་བྲེ། མདའི་དྲྭ་བ། ཕྱི་རོལ་ཀུན་ཏུ་ཡེ་
ཤེས་ཀྱི་མེ་འོད་འབར་བའི་བསྲུང་བའི་འཁོར་ལོར་གྱུར། ཨོཾ་མེ་དྷི་ནི་བཛྲི་བྷ་ཝ་བཛྲ་བནྡྷ་ཧཱུཾ། ཨོཾ་བཛྲ་པྲ་ཀ་ར་ཧཱུཾ་བཾ་ཧཱུཾ། ཨོཾ་བཛྲ་པཉྩ་ར་ཧཱུཾ་ཡཾ་ཧཱུཾ། ཨོཾ་བཛྲ་བི་ཏ་ན་ཧཱུཾ་ཁཾ་ཧཱུཾ། ཨོཾ་བཛྲ་ས་ར་ཛྭ་ལ་ཏྲཾ་སཾ་ཏྲཾ། ཨོཾ་བཛྲ་ཛྭ་ལ་ཨ་ན་ལརྐ་ཧཱུཾ་ཧཱུཾ་ཧཱུཾ། སྲུང་བའི་འཁོར་ལོའི་དབུས་སུ། སྣ་ཚོགས་རྡོ་རྗེའི་ལྟེ་བ་ལ་བྷྲུཾ་ལས་གཞལ་མེད་ཁང༌། གྲུ་བཞི་སྒོ་བཞི། རྩིག་པ་རིམ་པ་ལྔ་དང་ལྡན་པ། ཕ་གུ་དང༌། གསེར་གྱི་སྣམ་བུ་དང༌། དྲྭ་ཕྱེད་དང༌། ཤར་བུ་དང༌། མདའ་ཡབ་དང༌། གཟུངས་མ་རྣམས་དང་བཅས་པའི་ཁ་ཁྱེར་ཏེ། མཚན་ཉིད་ཐམས་ཅད་ཡོངས་སུ་རྫོགས་པ། སྒོ་བཞིའི་མདུན་དུ་ཀ་བས་བཏེགས་པའི་རྟ་བབས་ཀྱིས་མཛེས་པ། ནང་གི་ལྷ་སྣམ་ཤར་དཀར། བྱང་ལྗང༌། ནུབ་དམར། ལྷོ་སེར། མཚམས་རྣམས་སུ་བུམ་པ་བརྒྱད་དང་བཅས་པ། དབུས་སྔོ་བའི་སྟེང་དུ་སྐུའི་འཁོར་ལོ་དཀར་པོ་རྩིབས་བརྒྱད་པ། མུ་ཁྱུད་ལ་འཁོར་ལོའི་འཕྲེང་བས་མཚན་པ། དེའི་ལྟེ་བར་གསུང་གི་འཁོར་ལོ་དམར་པོ་རྩིབས་བརྒྱད་པ་མུ་ཁྱུད་ལ་པདྨའི་འཕྲེང་བས་མཛེས་པ། དེའི་ལྟེ་བར་ཐུགས་ཀྱི་འཁོར་ལོ་སྔོན་པོ་རྩིབས་བརྒྱད་པ་མུ་ཁྱུད་ལ་རྡོ་རྗེའི་འཕྲེང་བས་བསྐོར་བ། དེའི་ལྟེ་བར་བདེ་བ་ཆེན་པོའི་འཁོར་ལོ་སྣ་ཚོགས་པདྨ་འདབ་མ་བརྒྱད་པ་སྡོང་བུ་ཅུང་ཟད་དང་བཅས་པ་མུ་ཁྱུད་ལ་གྲི་གུག་གི་འཕྲེང་བས་བསྐོར་བ། སྟེང་ཐོག་རིམ་པར་ཕུབ་པའི་དབུས་ཕྱུར་བུར་གྱུར་པ། ནང་གི་ལྷའི་གནས་རྣམས་སུ་ཉི་མའི་གདན་སུམ་ཅུ་རྩ་གསུམ་
མོ། །གཞལ་མེད་ཁང་གི་ཕྱི་རོལ་མཆོད་པའི་བཀོད་པ་ཐམས་ཅད་དང་བཅས་ཤིང༌། པད་འདབ་ཀྱི་ཁོར་ཡུག་སྲུང་བའི་འཁོར་ལོ་དང་བཅས་པའི་ཕྱི་རོལ། དུར་ཁྲོད་ཆེན་པོ་བརྒྱད། ཕྱོགས་སྐྱོང་བ་དང༌། ཞིང་སྐྱོང་བ་དང༌། ཤིང་དང༌། མེ་དང༌། སྤྲིན་དང༌། ཆུ་དང༌། རི་དང༌། མཆོད་རྟེན་དང༌། གྲུབ་པ་ཐོབ་པའི་དཔའ་བོ་དང་རྣལ་འབྱོར་མ་རྣམས་ཀྱིས་ཡོངས་སུ་ཁྱབ་པའོ། །དབུས་ཀྱི་གདན་གྱི་སྟེང་དུ། གཡོན་བསྐོར་གྱི་ཨ་ཨཱ་ཞེས་པ་ནས། ཨཾ་ཨཿ ཞེས་པའི་བར། ཕྲག་གཉིས་ཞུ་བ་ལས་བྱུང་བའི་ཟླ་བའི་དཀྱིལ་འཁོར། དེའི་སྟེང་དུ་གཡས་བསྐོར་གྱི་ཀ་ཁ་ནས་ཧ་ཀྵ་ཡ་ར་ལ་ཝ་ཌ་ཌྷ། ཕྲག་གཉིས་ཞུ་བ་ལས་བྱུང་བའི་ཉི་མའི་དཀྱིལ་འཁོར་རོ། །དེ་གཉིས་ཀྱི་བར་དུ་ཧཱུཾ་དཀར་པོའོ། །ནམ་མཁའི་ནཱ་ད་ཡང་ཧཱུཾ་ཡིག་དེ་ཉིད་ལ་ཐིམ། དེ་ལས་འོད་འཕྲོས། འཕགས་པ་མཆོད། སེམས་ཅན་གྱི་དོན་བྱས། ཚུར་འདུས། དེ་ཐམས་ཅད་གཅིག་ཏུ་འདུས་པ་ཡོང་སུ་གྱུར་པ་ལས། ལྷ་སུམ་ཅུ་རྩ་བདུན་གྱི་དཀྱིལ་འཁོར་གྱི་འཁོར་ལོ་ཡོངས་སུ་རྫོགས་པ་ནི། དབུས་ཀྱི་གདན་གྱི་སྟེང་དུ་འཁོར་ལོ་བདེ་མཆོག་སྐུ་མདོག་མཐིང་ནག་དྲག་པོ་ཆེན་པོ་ཉི་མ་འབུམ་གྱི་གཟི་བརྗིད་ཅན། ཞལ་གསུམ་ཕྱག་དྲུག་པ། རྩ་བའི་ཞལ་མཐིང་ཀ་བོང་བུའི་གདོང་པ་ཅན། ཁྲག་ཆེན་གྱིས་བྱུགས་ཤིང་ཤིན་ཏུ་འཇིགས་པ། གཡས་ཞལ་དཀར་བ་དང་གཡོན་ཞལ་དམར་བ་དག་ནི་ལྷ་ཞལ་ཁྲོ་ཆགས་ཀྱི་ཉམས་ཅན། ཞལ་རྣམ་པར་འགྱུར་བ། སྤྱན་གསུམ་གསུམ་དང་ལྡན་
ཞིང་མཆེ་བ་གཙིགས་པ་ཕྱག་དང་པོ་གཉིས་ཀྱིས་རྡོ་རྗེ་དང་དྲིལ་བུ་འཛིན་པས་ཡུམ་ལ་འཁྱུད་པ། དེའི་འོག་མ་གཉིས་ཀྱིས་མི་ལྤགས་རློན་པ་བརྒྱངས་ཏེ་འཛིན་པ། གཡས་གསུམ་པ་ན་རྩེ་གསུམ། གཡོན་གསུམ་པ་ན་ཐོད་པ་དང་ཁ་ཊྭཾ་ག་ལྷན་ཅིག་པར་འཛིན་པ། ཞབས་གཡས་བརྐྱང་བས་དུས་མཚན་མ་དམར་མོ་དང༌། གཡོན་བསྐུམ་པས་འཇིགས་བྱེད་ནག་པོ་མནན་པ། རལ་བའི་ཐོར་ཚུགས་དང༌། སྣ་ཚོགས་རྡོ་རྗེ་དང༌། ནོར་བུ་རིན་པོ་ཆེ་དང༌། ཐོད་པ་སྐམ་པོ་ལྔ་ལྔས་དབུ་བརྒྱན་པ། ཕྱག་རྒྱ་དྲུག་དང་མགོ་བོའི་འཕྲེང་བ་ཅན། སྟག་གི་པགས་པའི་ཤམས་ཐབས་གྲོལ་བ། གར་གྱི་ཉམས་དགུ་དང་ལྡན་པ། ཡུམ་རྡོ་རྗེ་ཕག་མོ་སྐུ་མདོག་དམར་པོ། ཞལ་གཅིག་ཕྱག་གཉིས་སྤྱན་གསུམ་པ། གཡོན་ཐོད་ཁྲག་འཛིན་པའི་ཡབ་ལ་འཁྱུད་ཅིང༌། གཡས་སྡིགས་མཛུབ་དང་བཅས་པས་རྩེ་གསུམ་འཕྱར་བ། བྱིན་པ་གཉིས་ཀྱིས་ཡབ་ལ་འཁྲིལ་བ། སྐྲ་གྲོལ་ཞིང་ཕྱག་རྒྱ་ལྔས་བརྒྱན་པ། ཐོད་སྐམ་གྱི་དོ་ཤལ་ཅན། ཁྲག་ལ་དགྱེས་ཤིང་ཁྲག་འཛག་པ། གཉིས་ཀའང་བསྐལ་པའི་མེ་ལྟ་བུའི་དབུས་ན་བཞུགས་པའོ། །འདིར་ཞལ་གསུམ་ཕྱག་དྲུག་སྡོམ་འབྱུང་དང་འདྲ་རུང་མཛད་པ་ནི་སློབ་དཔོན་སྐལ་ལྡན་བཟང་པོའི་མན་ངག་ཡིན་ཡང༌། ཕྱག་གཉིས་པར་བསྒོམ་ནའང་ལེགས་སོ། །འདབ་མ་བརྒྱད་ལ་ཤར་དུ་མཁའ་འགྲོ་མ་ནག་མོ། བྱང་དུ་ལཱ་མ་ལྗང་ཁུ། ནུབ་ཏུ་དུམ་སྐྱེས་མ་དམར་མོ། ལྷོར་གཟུགས་ཅན་མ་སེར་མོ། དེ་བཞི་དང་
རྡོ་རྗེ་ཕག་མོ་ཡང་བོང་བུའི་ཞལ་ཅན། ཞལ་གྱི་གྲྭ་ནས་མ་ཧཱ་རུ་དྷི་རའི་རྒྱུན་འབབ་པའོ། །མཚམས་བཞིར་བུམ་པ་བྱང་ཆུབ་ཀྱི་སེམས་ཀྱིས་གང་བའི་སྟེང་དུ། ཀ་པཱ་ལ་བདུད་རྩིས་གང་བ་དང་བཅས་པ་བཞིའོ། །འཁོར་ལོ་གསུམ་གྱི་ཕྱི་རོལ་དམ་ཚིག་འཁོར་ལོའི་ཤར་སྒོར་ཁྭ་གདོང་མ་ནག་མོ། བྱང་སྒོར་འུག་གདོང་མ་ལྗང་ཁུ། ནུབ་སྒོར་ཁྱི་གདོང་མ་དམར་མོ། ལྷོ་སྒོར་ཕག་གདོང་མ་སེར་མོ། ཤར་ལྷོར་གཤིན་རྗེ་བརྟན་མ་གཡས་སྔོ་གཡོན་སེར་བ་མ་ཧེའི་གདོང་པ་ཅན། ལྷོ་ནུབ་གཤིན་རྗེ་ཕོ་ཉ་མས་གཡས་སེར་གཡོན་དམར་བ་རི་དྭགས་ཀྲིཎྵའི་གདོང་པ་ཅན། ནུབ་བྱང་དུ་གཤིན་རྗེ་མཆེ་བ་མ་གཡས་དམར་གཡོན་ལྗང་བ་སྟག་གི་གདོང་པ་ཅན། བྱང་ཤར་དུ་གཤིན་རྗེ་འཇོམས་མ་གཡས་ལྗང་གཡོན་སྔོ་བ་དོམ་གྱི་གདོང་པ་ཅན། ཐམས་ཅད་ཀྱང་ཞལ་གཅིག་ཕྱག་བཞི་སྤྱན་གསུམ་མ། ཕྱག་གཡས་གཉིས་ན་རྩེ་གསུམ་དང་ཌཱ་མ་རུ། གཡོན་གཉིས་ན་ཐོད་པ་དང་ཁ་ཊྭཱཾ་ག་འཛིན་པ། གཅེར་བུ་ཕྱག་རྒྱ་ལྔས་བརྒྱན་ཞིང༌། སྐྲ་གྲོལ་བ། རྡོ་རྗེའི་འཕྲེང་བས་དབུ་ལ་བརྒྱན་ཞིང་མི་མགོའི་དོ་ཤལ་ཅན། རོའི་གདན་ལ་གཡས་བརྐྱང་གི་སྟབས་ཀྱིས་གནས་པ་དངོས་གྲུབ་ཐམས་ཅད་སྩོལ་བའོ། །ཐུགས་ཀྱི་འཁོར་ལོའི་ཤར་ཕྱོགས་པུ་ལི་ར་མ་ལ་ཡར་ཁཎྜ་ཀ་པཱ་ལ་བྱང་ཕྱོགས་ཛ་ལནྡྷ་རར་མ་ཧཱ་ཀཾ་ཀ་ལ། ནུབ་ཕྱོགས་ཨོ་ཊི་ཡ་ནར་ཀཾ་ཀ་ལ། ལྷོ་ཕྱོགས་ཨར་བུ་ཏར་མཆེ་བ་རྣམ་པར་གཙིགས་པ། ཤར་ལྷོ་གོ་ད་ཝ་རིར་ལྷའི་
དགྲ། ལྷོ་ནུབ་རསྨི་ཤྭ་རར་འོད་དཔག་མེད། ནུབ་བྱང་དེ་ཝཱི་ཀོ་ཊར་རྡོ་རྗེ་འོད། བྱང་ཤར་མ་ལ་ཝར་རྡོ་རྗེའི་སྐུ་སྟེ། ཐམས་ཅད་ཀྱང་སྐུ་མདོག་སྔོན་མོ་བྱ་ཁྱུང་གི་གདོང་ཅན། ཕྱག་དང་པོ་གཉིས་ཀྱིས་རྡོ་རྗེ་དང་དྲིལ་བུ་འཛིན་པ། གསུང་གི་འཁོར་ལོའི་ཤར་ཕྱོགས་ཀཱ་མ་རུ་པར་ཨཾ་གུ་རི། བྱང་ཕྱོགས་ཨོ་ཊེར་རྡོ་རྗེ་རལ་པ་ཅན། ནུབ་ཕྱོགས་ཏྲི་ཤ་ཀུ་ནེར་དཔའ་བོ་ཆེན་པོ། ལྷོ་ཕྱོགས་ཀོ་ས་ལར་རྡོ་རྗེ་ཧཱུཾ་མཛད། ཤར་ལྷོ་ཀ་ལིང་ཀར་རབ་ཏུ་བཟང་པོ། ལྷོ་ནུབ་ལམྤ་ཀ་ར་རྡོ་རྗེ་བཟང་པོ། ནུབ་བྱང་ཀཉྩིར་འཇིགས་བྱེད་ཆེན་པོ། བྱང་ཤར་ཧི་མ་ལ་ཡར་མིག་མི་བཟང་སྟེ་ཐམས་ཅད་ཀྱང་སྐུ་མདོག་དམར་པོ་རྨ་བྱའི་གདོང་པ་ཅན། ཕྱག་དང་པོ་གཉིས་ཀྱིས་པདྨ་དང་དྲིལ་བུ་འཛིན་པ། སྐུའི་འཁོར་ལོའི་ཤར་ཕྱོགས་པྲེ་ཏ་པུ་རིར་སྟོབས་པོ་ཆེ། བྱང་ཕྱོགས་གྲི་ཧ་དེ་ཝར་རིན་ཆེན་རྡོ་རྗེ། ནུབ་ཕྱོགས་སོ་རཥྟར་རྟ་མགྲིན། ལྷོ་ཕྱོགས་སུ་ཝརྞ་དྭི་པར་ནམ་མཁའི་སྙིང་པོ། ཤར་ལྷོར་ན་ག་རར་དཔལ་ཧེ་རུ་ཀ ལྷོ་ནུབ་སིན་དྷུར་པདྨ་གར་གྱི་དབང་ཕྱུག །ནུབ་བྱང་མ་རུར་རྣམ་པར་སྣང་མཛད། བྱང་ཤར་ཀུ་ལུ་ཏར་རྡོ་རྗེ་སེམས་དཔའ་སྟེ། ཐམས་ཅད་ཀྱང་སྐུ་མདོག་དཀར་པོ་སེང་གེའི་གདོང་པ་ཅན། ཕྱག་དང་པོ་གཉིས་ཀྱིས་འཁོར་ལོ་དང་དྲིལ་བུ་འཛིན་པ། དཔའ་བོ་ཉེར་བཞི་པོ་ཐམས་ཅད་ཀྱང་ཞལ་གཅིག་ཕྱག་བཞི་
འོག་མ་གཉིས་ཀྱིས་རྩེ་གསུམ་མ་དང་ཁ་ཊྭཾ་ག་བསྣམས་པ། ཉི་མ་ལ་གཡས་བརྐྱང་གི་སྟབས་ཀྱིས་བཞུགས་ཤིང༌། རང་སྣང་གི་ཤེས་རབ་མ་དང་བཅས་པའང་ཐབས་རྐྱང་པ། ཁྱད་པར་གཞན་རྣམས་བཅོམ་ལྡན་འདས་དང་མཚུངས་པའོ། །གཙོ་བོ་ཡབ་ཡུམ་གྱི་ཐུགས་ཀར་རང་འདྲ་བའམ་ཕྱག་གཉིས་པའི་ཡེ་ཤེས་སེམས་དཔའ། དེའི་ཐུགས་ཀར་ཧཱུཾ་དང་བཾ་ཏིང་ངེ་འཛིན་སེམས་དཔའ། དཔྲལ་པར་ཨོཾ། མགྲིན་པར་ཨཱཿ ཐུགས་ཀར་ཧཱུཾ། ཡབ་རྣམས་ཀྱི་ཐུགས་ཀར་ཨོཾ་ཧ་དཀར་པོ་རྡོ་རྗེ་སེམས་དཔའ། མགོ་བོར་ན་མ་ཧི་སེར་པོ་རྣམ་པར་སྣང་མཛད། སྤྱི་གཙུག་ཏུ་སྭཱཧཱ་ཧཱུཾ་དམར་པོ་པདྨ་གར་གྱི་དབང་ཕྱུག ཕྲག་པ་གཉིས་སུ་བཽ་ཥཊ་ཧེ་ནག་པོ་དཔལ་ཧེ་རུ་ཀ མིག་གཉིས་སུ་ཧཱུཾ་ཧཱུཾ་ཧོ་དམར་སེར་རྡོ་རྗེ་ཉི་མ། ཚིགས་ཆེན་བརྒྱད་ལ་ཕཊ་ཧཾ་ལྗང་ཁུ་རྟ་མཆོག་གི་ངོ་བོ། ཡུམ་རྣམས་ཀྱི་ལྟེ་བར་ཨོཾ་བཾ་དམར་མོ་རྡོ་རྗེ་ཕག་མོ། སྙིང་གར་ཧཾ་ཡོཾ་སྔོན་མོ་གཤིན་རྗེ་མ། ཁར་ཧྲིཾ་མོཾ་དཀར་མོ་རྨོངས་བྱེད་མ། དཔྲལ་པར་ཧྲིཾ་ཧྲིཾ་སེར་མོ་སྐྱོང་བྱེད་མ། སྤྱི་གཙུག་ཏུ་ཧཱུཾ་ཧཱུཾ་ལྗང་ཁུ་སྐྲག་བྱེད་མ། ཡན་ལག་ཐམས་ཅད་ལ་ཕཊ་ཕཊ་དུད་ཁ་ཙཎྜི་ཀཱའི་ངོ་བོ། རྡོ་རྗེ་སེམས་དཔའ་དང་རྨོངས་བྱེད་མ་ལ་ཟླ་བའི་གདན་དང༌། གཞན་རྣམས་ཉི་མའི་གདན་ལ་གནས་པའོ། །རང་གི་ཐུགས་ཀའི་ཧཱུཾ་ཡིག་གི་འོད་ཟེར་གྱིས་ཡེ་ཤེས་ཀྱི་འཁོར་ལོ་སྤྱན་དྲངས་ཕཻཾ། ཛཿཧཱུཾ་བཾ་ཧོཿ གཉིས་
སུ་མེད་པར་ཐིམ། ཨོཾ་ཡོ་ག་ཤུདྡྷ་སརྦ་དྷརྨ་ཡོ་ག་ཤུདྡྷོ྅་ཧཾ། སླར་ཡང་འོད་འཕྲོས་དབང་གི་ལྷ་རྣམས་སྤྱན་དྲངས། ཕཻཾ། དེ་བཞིན་གཤེགས་པ་ཐམས་ཅད་ཀྱིས་བདག་ལ་དབང་བསྐུར་དུ་གསོལ། ཞེས་གསོལ་བ་བཏབ་པས། ཇི་ལྟར་བལྟམས་པ་ཙམ་གྱིས་ནི། ལྷ་རྣམས་ཀྱིས་ནི་ཁྲུས་གསོལ་ལྟར། ལྷ་ཡི་ཆུ་ནི་དག་པ་ཡིས། དེ་བཞིན་བདག་གིས་ཁྲུས་གསོལ་ལ། །ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏ་ས་མ་ཡ་ཤྲི་ཡེ་ཧཱུཾ། ཞེས་གསུང་ཞིང་དབང་བསྐུར། སྐུ་གང༌། དྲི་མ་དག་ཆུའི་ལྷག་མ་ཡར་ལུད་པ་ལས། གཙོ་བོ་ལ་མི་བསྐྱོད་པ། ཡུམ་ལ་རྣམ་སྣང༌། བདེ་ཆེན་འཁོར་ལོ་པ་རྣམས་ལ་རིན་འབྱུང༌། ཐུགས་འཁོར་པ་རྣམས་ལ་མི་བསྐྱོད་པ། གསུང་འཁོར་པ་རྣམས་ལ་འོད་དཔག་མེད། སྐུ་འཁོར་པ་རྣམས་ལ་རྣམ་སྣང༌། དམ་ཚིག་འཁོར་ལོ་པ་ལ་དོན་ཡོད་གྲུབ་པས་དབུ་བརྒྱན། ཨོཾ་ཤྲཱི་ཙཀྲ་སམྦྷ་ར་མཎྜལ་བྷྱཿ བཛྲ་ཨརྒྷཾ་ཨཱཿཧཱུཾ་ནས་ཤཔྟའི་བར་གྱིས་ཕྱི་མཆོད་ཕུལ། རྡོ་རྗེ་འཆང་ཆེན་པོའི་ཞལ་དུ་ཨོཾ་ཨཱཿཧཱུཾ། རྡོ་རྗེའི་རྣལ་འབྱོར་མའི༴ སྐལ་ལྡན་བཟང་པོའི༴ སྐྱེ་དགུའི་འཚོ་བ་བཟང་པོའི༴ མཧཱ་བོ་དྷིའི༴ བླ་མ་བསམ་གཏན་འོད་ཟེར་གྱི༴ གུ་གེ་པཎྜི་ཏའི༴ བསོད་ནམས་ལྷུན་གྲུབ་ཀྱི༴ རྗེ་བཙུན་ཀུན་དགའ་གྲོལ་མཆོག་གི༴ རྩ་བའི་བླ་མ་རྡོ་རྗེ་འཆང་ཆེན་པོ་ལྷ་དབང་
གྲགས་པའི་ཞལ་དུ་ཨོཾ་ཨཱཿཧཱུཾ། ལྷ་ཐམས་ཅད་ཀྱི་སྙིང་པོས་དཀྱིལ་འཁོར་ལ་ཕུལ། ཨ་ནུ་ར་གས་རྗེས་ཆགས་ཀྱི་མཆོད་པ་ཡང་ཕུལ་ལ། ཡབ་ཡུམ་གྱི་རྐང་བརྒྱད་ཀྱིས་བསྟོད། དཀྱིལ་འཁོར་གྱི་འཁོར་ལོ་བདེ་སྟོང་དུ་འཆར་བར་བྱས་ཏེ་མཉམ་པར་བཞག །རྫོགས་རིམ་སྒོམ་པར་འདོད་ན་སྐབས་འདིར་བསྒོམ། འཁོར་ལོའི་བཟླས་པའམ། སྤྲོ་བསྡུའི་བཟླས་པ་གསལ་བཏབ་ནས། བཟླས་པ་བྱ་སྟེ། སྔགས་འཕྲེང་རྒྱས་པར་ནི། དཔའ་མོ་ཉེར་བཞི་བོར་ནས་གཞན་ལཱུ་ཡི་པ་དང་མཚུངས་ལ། བཟླས་པའི་སྙིང་པོ་ནི། ཨོཾ་ཧྲཱི་ཧ་ཧ་ཧཱུཾ་ཧཱུཾ་ཕཊ། ཅེས་པའི་ཡི་གེ་བདུན་པ་ཉིད་ལ་ནན་ཏན་དུ་འབད་པར་བྱའོ། །བཟླས་པའི་གཞི་ནི། ལྟེ་བར་ཟླ་བ་ལ་གནས་པའི་ཧཱུཾ་དམར་སྐྱ་ལས། དབུགས་ཕྱི་ནང་དུ་འགྲོ་བ་དང་བསྟུན་ནས་བྱེད་པ་མན་ངག་ཡིན་ནོ། །མཐར་བདེ་བར་གཤེགས་པ་ཐམས་ཅད་ཀྱི་སྐུ་གསུང་ཐུགས་ཡོན་ཏན་འཕྲིན་ལས་དང་བཅས་པས་བྱིན་གྱིས་བརླབ་ཏུ་གསོལ། ཕྱག་རྒྱ་ཆེན་པོ་མཆོག་གི་དངོས་གྲུབ་འཁོར་ལོ་བདེ་མཆོག་གི་གོ་འཕང་ཚེ་འདི་ཉིད་ལ་ཐོབ་པར་མཛད་དུ་གསོལ། ས་བཅུ་དག་གི་རིམ་པ་དང༌། །སྐུ་གསུང་ཐུགས་ཀྱི་སྦྱོར་བ་ཡིས། །ཕྱི་དང་ནང་གི་ཆོས་རྣམས་ཀུན། བྱང་ཆུབ་ཕྱོགས་ཀྱིས་རྣམ་པར་དག །དཔའ་བོའི་རྩ་བའི་སྔགས་སོགས་གང༌། །ཚངས་པའི་སྐུད་པ་ལ་སོགས་རྟག །ལྷ་ཡི་སྙིང་པོའི་སྔགས་ཀྱི་ནི། །འཕྲེང་བ་བརྒྱ་ཡི་ཕྱེད་ཀྱི་མཛེས། །ཡི་གེ་བདུན་པའི་གསང་སྔགས་ཀྱི། །གདུབ་འཁོར་གྱིས་ནི་རྣ་བ་བརྒྱན། །རྡོ་རྗེ་ཕག་མོའི་སྔགས་གང་ཡིན། །མགྲིན་པར་མགུར་ཆུས་མཛེས་པ་ཉིད། །
སངས་རྒྱས་ཀུན་གྱི་མཁའ་འགྲོ་མའི། །པགས་པའི་གོས་མཆོག་འཛིན་པའོ། །རྣལ་འབྱོར་མ་དྲུག་གསང་སྔགས་ཀྱི། །སྐེ་རགས་བྱས་པས་བརྒྱན་པ་ཡིན། །དཔའ་བོའི་གོ་ཆ་དྲུག་པོ་ནི། །ཕྱག་རྒྱ་ལས་ནི་ལུས་མཛེས་པའོ། །འཁོར་ལོ་ཀུན་གྱི་རྣལ་འབྱོར་མའི། །སྔགས་ནི་བཏུང་བའི་ཐོད་པའོ། །རྣམ་སྣང་མཛད་ཅེས་སྔགས་གང་ཡིན། །ཐོད་པས་དབུ་ལ་བརྒྱན་པའོ། །དཔའ་བོ་ཉི་ཤུ་རྩ་བཞི་ཡིས། །ལུས་ཀྱི་ཁམས་ནི་རྣམ་པར་དག ཁ་ཊྭཱཾ་ག་ནི་ལྷ་ཡི་སྐུ། །ཤེས་རབ་ཌཱ་མ་རུ་ཡི་སྒྲ། །ཉིན་མོ་བཅོམ་ལྡན་དཔའ་བ་སྟེ། །རྣལ་འབྱོར་མ་ནི་མཚན་མོར་བརྗོད། །མྱ་ངན་འདས་བྱུང་དཔའ་བོ་ནི། །དྲུག་པ་སེམས་ཀྱི་སྤྲུལ་པ་ཡིན། །དག་པ་ཆོས་ཀྱི་སྤྲུལ་པ་ནི། །ཕག་མོའི་གཟུགས་སུ་བསྟན་པའོ། །ཤྲཱི་ཡིག་གཉིས་མེད་ཡེ་ཤེས་ཏེ། །ཧེ་ནི་རྒྱུ་སོགས་སྟོང་པ་ཉིད། །རུ་ནི་ཚོགས་དང་བྲལ་བ་སྟེ། །ཀ་ནི་གང་དུའང་མི་གནས་པའོ། །ཞེས་དག་པ་དྲན་པར་བྱས་ལ། རང་གི་སྙིང་གའི་འོད་ཟེར་གྱིས་སྣང་བ་ཐམས་ཅད་དཀྱིལ་འཁོར་གྱི་འཁོར་ལོར་གྱུར། རྟེན་དང་བརྟེན་པར་བཅས་པའི་དཀྱིལ་འཁོར་ལ་ཐིམ། དཀྱིལ་འཁོར་ཡང་རིམ་གྱིས་འོད་གསལ་གྱི་དབྱིངས་སུ་ཐིམ། སླར་ཡང་ཕྱག་གཉིས་པའི་ང་རྒྱལ་དུ་ལངས་ཏེ། གོ་ཆ་གཉིས་ཀྱིས་རྒྱས་བཏབ་ལ་ཐུན་མཚམས་ལ་འཇུག་གོ །གཏོར་མའི་ཆོ་ག་ནི། སྡོམ་འབྱུང་བཅུ་གསུམ་མའི་སྒྲུབས་ཐབས་སུ་ཤེས་པར་བྱའོ། །དེ་ལྟར་འཁོར་ལོ་གསུམ་དང་སྒོ་མཚམས་མ་བརྒྱད་ལ་
གདོང་བརྙན་དུ་མཛད་པ་འདི་ནི། བཤད་རྒྱུད་ཨ་བྷི་དྷ་ན་ལས་བཤད་པའི་ལུགས་ཡིན་ལ། རྩ་བཤད་ཀྱི་རྒྱུད་གཞན་ལས་ནི་བདེ་ཆེན་འཁོར་ལོ་པ་རྣམས་བོང་ཞལ་དུ་སྒྱུར་བ་ཙམ་ཞིག་གསུངས་སོ། །གང་ཞིག་སྒོམ་པར་བྱེད་པ་ལ། །ཕུན་ཚོགས་བྱེ་བ་མཐའ་ཡས་པ། །འབྱུང་འགྱུར་དེ་ཡི་ཕ་མཐའ་ནི། །བྱེ་བའི་གདོང་གིས་བརྗོད་ནུས་སམ། །འཁོར་ལོ་བདེ་མཆོག་བོང་ཞལ་ཅན་གྱི་སྒྲུབ་ཐབས་ཏེ་བཅུ་པའོ།། །།༈ ན་མོ་བཛྲ་ཡོ་གི་ནཱི་བྷྱཿ རྨད་བྱུང་མཆོག་ཏུ་ངོ་མཚར་བའི། །རྡོ་རྗེ་བཙུན་མོ་སྒྲུབ་པའི་ཐབས། །རྙེད་པ་འདི་ཡང་སྐལ་བཟང་སྟེ། །ལྷ་མོས་རྗེས་སུ་གནང་བར་མཛོད། །སྒྲུབ་ཐབས་ཀྱི་དམིགས་པ་རྣམས་སྤྱི་དང་མཐུན་པར་བསྒོམ་ཞིང༌། ཨོཾ་ཤྲཱི་ཧེ་རུ་ཀོ྅་ཧཾ། གང་གི་དྲིན་གྱིས༴ སོགས་དང༌། དཔལ་ལྡན་རྡོ་རྗེ་མཁའ་འགྲོ་མ༴ སོགས་ཀྱིས་ཕྱག་འཚལ། ཨརྒྷཾ༴ ནས་ཤཔྟའི་བར་གྱིས་མཆོད། དཀོན་མཆོག་གསུམ་ལ་བདག་སྐྱབས་མཆི། །སོགས་ཡན་ལག་བདུན་པ་བྱ། ཛཿཧཱུཾ་བཾ་ཧོཿ ཚད་མེད་བཞི་སྤྱི་དང་མཐུན། ཤཱུ་ནྱ་ཏས་སྟོངས་པར་སྦྱངས། ཧཱུཾ་སུམྦྷ༴ ལན་གཉིས། ཨོཾ་གྷ་གྷ༴ སོགས། ཨོཾ་བཛྲ་མུད་ག་ར༴ སོགས། ཨོཾ་མི་དྷི༴ ནས། ལརྐ་ཧཱུཾ་ཧཱུཾ་ཧཱུཾ་གི་བར་སྔགས་ཚན་དྲུག་བརྗོད། སྟོང་པའི་ངང་ལས་ཨེ་ཡཾ་རཾ་བཾ་ལཾ་སུཾ་རྣམས་ལས། ཆོས་འབྱུང་འབྱུང་བཞི་རི་རབ་དང་བཅས་པའི་སྟེང་དུ། བྷྲུཾ་ལས་གཞལ་མེད་ཁང༌། ཕྱི་རོལ་དུ་དུར་ཁྲོད་བརྒྱད་ཀྱིས་བསྐོར་བ། ནང་ཤར་དཀར། ལྷོ་སེར། ནུབ་དམར། བྱང་ལྗང༌། དབུས་སུ་པཾ་ལས་པདྨ་དམར་པོ་འདབ་
མ་བརྒྱད་པ། དེའི་ལྟེ་བ་དང་འདབ་མ་བརྒྱད་དང་སྒོ་མཚམས་རྣམས་སུ་ཉི་མའི་གདན་རེ་རེ། དབུས་ཀྱི་ཉི་མའི་སྟེང་དུ་འཇིགས་བྱེད་དང་དུས་མཚན་མ། སྒོ་བཞིར་མི་རོའི་གདན། དབུས་ཀྱི་གདན་གྱི་སྟེང་དུ། ཨཱ་ལི་ལས་ཟླ་བ། ཀཱ་ལི་ལས་ཉི་མ། དེའི་བར་དུ་བཾ་ལས་རྡོ་རྗེ་བཾ་གྱིས་མཚན་པ། དེ་ལས་འོད་འཕྲོས་འདུས། གཅིག་ཏུ་འདྲེས་པ་ཡོངས་སུ་གྱུར་པ་ལས། དབུས་ཀྱི་གདན་གྱི་སྟེང་དུ་རྡོ་རྗེ་ཕག་མོ་བནྡྷུ་དང་སིནྡྷ་རའི་མདོག་ཅན་ཉི་མ་བཅུ་གཉིས་ཀྱི་གཟི་བརྗིད་དང་ལྡན་པ། ཞལ་གསུམ་ཕྱག་དྲུག་པ་ལྟར་ན། དམར་ལྗང་སྔོ་བའི་ཞལ་ལམ། ཡང་ན་ཞལ་གསུམ་ཀ་ཡང་དམར་བ། ཕྱག་དྲུག་གི་དང་པོ་གཉིས་ཀྱིས་རྡོ་རྗེ་དང་དྲིལ་བུ་འཛིན་པས་ཐབས་ཧེ་རུ་ཀ་ཞལ་གཅིག་ཕྱག་གཉིས་རྡོ་རྗེ་དང་དྲིལ་བུ་འཛིན་པ་ལ་འཁྱུད་པ། བར་པ་གཉིས་ཀྱིས་མདའ་གཞུ་འགེངས་པ། ཐ་མ་གཉིས་ཀྱིས་གཡས་ལྕགས་ཀྱུ་དང་གཡོན་ཐོད་པ་དང༌། ཁ་ཊྭཱཾ་ག་ལྷན་ཅིག་འཛིན་པ། ཐབས་ཧེ་རུ་ཀ་ནི་དཀར་པོ་དང་དམར་པོ་དང་མཐིང་ཀ་གདམ་ངའོ། །ཡང་ན་རྩ་བའི་ཞལ་དམར་བ། གཡས་ཞལ་དཀར་པོ་དང་ལྗང་ཁུ། གཡོན་ཞལ་སྔོན་པོ་དང་སེར་པོ། སྟེང་གི་ཞལ་ཕག་གདོང་དམར་པོ་ཕྱག་དང་པོ་གཉིས་ཀྱིས་རྡོར་དྲིལ། དེའི་འོག་མ་གཉིས་ཀྱིས་གླང་ལྤགས། གཡས་ལྷག་མས་ཌཱ་མ་རུ། དགྲ་སྟ། གྲི་གུགརྩེ་གསུམ། གཡོན་ལྷག་མས་ཁ་ཊྭཱཾ་ག ཐོད་པ་ཞགས་པ། ཚངས་པའི་མགོ་བོ་རྣམས་འཛིན་པར་བྱས་ཀྱང་རུང་ངོ༌། །གང་ལྟར་ཡང༌། ཞབས་སེམས་དཔའི་སྐྱིལ་མོ་ཀྲུང་གིས་
བཞུགས་པ། དབུ་སྐྲ་ཕྱེད་བཅིངས་ཤིང༌། ཕྱེད་གྲོལ་བ། ཐོད་པ་སྐམ་པོ་ལྔའི་དབུ་རྒྱན་དང༌། སྐམ་པོ་ལྔ་བཅུའི་དོ་ཤལ་ཅན། རུས་པའི་ཕྱག་རྒྱ་ལྔ་དང༌། རིན་པོ་ཆེ་དང་མེ་ཏོག་ལ་སོགས་པ་རྒྱན་ཐམས་ཅད་ཀྱིས་རྣམ་པར་བརྒྱན་པ། སྤྱན་གསུམ་མཆེ་གཙིགས་དྲག་མོའི་ཚུལ་ཅན་བདེ་བ་རྒྱས་མའོ། །འདབ་མ་བརྒྱད་ལ་ཤར་དུ་རྡོ་རྗེ་གསང་བ་མཆོག་མ། བྱང་དུ་རྡོ་རྗེ་དམ་ཚིག་མཆོག་མ། ནུབ་ཏུ་རྡོ་རྗེ་གཟི་བརྗིད་མཆོག་མ། ལྷོར་རྡོ་རྗེ་རིན་ཆེན་མཆོག་མ། མེར་རྡོ་རྗེ་ཡེ་ཤེས་མཆོག་མ། བདེན་བྲལ་དུ་རྡོ་རྗེ་རིག་མཆོག་མ། རླུང་དུ་རྡོ་རྗེ་གྲུབ་མཆོག་མ། དབང་ལྡན་དུ་རྡོ་རྗེ་ཐལ་བ་མཆོག་མ་ཐམས་ཅད་ཀྱང་ཞལ་གསུམ་ཕྱག་དྲུག་མ། ཞལ་གསུམ་ཀའང་དམར་ཞིང༌། ཕྱག་དང་པོ་གཉིས་ཀྱིས་རྡོ་རྗེ་དྲིལ་བུ་འཛིན་པའི་རང་སྣང་གི་ཐབས་ལ་འཁྱུད། བར་པ་གཉིས་ཀྱིས་ལྕགས་ཀྱུ་དང་ཞགས་པ། ཐ་མ་གཉིས་ཀྱིས་ཐོད་པ་དང་ཁ་ཊྭཱཾ་ག་འཛིན་པ། ཁྱད་པར་གཞན་རྣམས་གཙོ་མོ་ཉིད་དང་མཚུངས་པའོ། །ཤར་སྒོར་རྡོ་རྗེ་འབར་མཆོག་མ། བྱང་སྒོར་རྡོ་རྗེ་བདུད་རྩི་མཆོག་མ། ནུབ་སྒོར་རྡོ་རྗེ་ཁྲོ་བོ་མཆོག་མ། ལྷོ་སྒོར་རྡོ་རྗེ་མཆེ་བ་མཆོག་མ་རྣམས་འདབ་མའི་ལྷ་མོ་རྣམས་དང་འདྲ་བ་ལས། རྡོ་རྗེ་གསོར་ཞིང་ཞགས་པ་དང་བཅས་པའི་སྡིགས་མཛུབ་བརྐྱང་བ། གཡས་བརྐྱང་གི་སྟབས་ཀྱིས་བཞུགས་ཤིང་ཆེར་ཁྲོས་པའོ། །གྲྭ་བཞིར་ལྷ་མོ་མདའ་གཞུ་འགེངས་པ། དཀར་སེར་དམར་ལྗང༌། ལས་ཀྱི་ཕོ་ཉ་མོའི་ཚུལ་དུ་གནས་པར་གྱུར། རང་གི་ཐུགས་ཀར་རང་དང་འདྲ་
བའི་ཡེ་ཤེས་སེམས་དཔའ། དེའི་ཐུགས་ཀར་ཏིང་ངེ་འཛིན་སེམས་དཔའ་བ། ལྷ་ཐམས་ཅད་ཀྱི་དཔྲལ་པར་ཨོཾ། མགྲིན་པར་ཨཱཿ ཐུགས་ཀར་ཧཱུཾ། ལྟེ་བར་ཨོཾ་བཾ་དམར་པོ་སོགས་གོ་ཆས་རྒྱས་བཏབ། ཕཻཾ་ཛཿཧཱུཾ་བཾ་ཧོཿ ཨོཾ་ཡོ་ག་ཤུདྡྷ་སརྦ་དྷརྨ་ཡོ་ག་ཤུདྡྷོ྅་ཧཾ། སླར་ཡང་དབང་གི་ལྷ་རྣམས་ཕཻཾ། ཨོཾ་བཛྲ་བྷ་ཝ་ཨ་བྷི་ཥིཉྩ་ཧཱུཾ། གཙོ་མོ་ལ་རྡོ་རྗེ་སེམས་དཔའ་དང༌། འཁོར་ལོ་རྣམས་ཧེ་རུ་ཀ་ཕྱག་གཉིས་པ་རྣམས་ཀྱིས་དབུ་རྒྱན། དེ་ནས་སྤྲོ་བསྡུས་བཟླས་པའི་དམིགས་པ་གཙོ་བོར་གསལ་བཏབ་སྟེ། ཨོཾ་ཤྲཱི་བཛྲ་བཱ་རཱ་ཧི་ཨ་བཾ་ཧཱུཾ་ཧཱུཾ་ཧཱུཾ་ཕཊ་སྭཱཧཱ། ཨོཾ་ཤྲཱི་བཛྲ་གུ་ཧྱ་ཨུད་ཏ་མེ་ཧཱུཾ་ཧཱུཾ་ཕཊ་སྭཱཧཱ། ཨོཾ་ཤྲཱི་བཛྲ་ས་མཱ་ཡ་ཨུད་ཏ་མེ་ཧཱུཾ་ཧཱུཾ་ཕཊ་སྭཱཧཱ། ཨོཾ་ཤྲཱི་བཛྲ་ཏེ་ཛོད་ཏ་མེ་ཧཱུཾ་ཧཱུཾ་ཕཊ་སྭཱཧཱ། ཨོཾ་ཤྲཱི་བཛྲ་རཏྣོད་ཏ་མེ་ཧཱུཾ་ཧཱུཾ་ཕཊ་སྭཱཧཱ། ཨོཾ་ཤྲཱི་བཛྲ་ཛྙཱ་ནོད་ཏ་མེ་ཧཱུཾ་ཧཱུཾ་ཕཊ་སྭཱཧཱ། ཨོཾ་ཤྲཱི་བཛྲ་བི་དྱ་ཨུད་ཏ་མེ་ཧཱུཾ་ཧཱུཾ་ཕཊ་སྭཱཧཱ། ཨོཾ་ཤྲཱི་བཛྲ་སིདྡྷོཏྟ་མེ་ཧཱུཾ་ཧཱུཾ་ཕཊ་སྭཱཧཱ། ཨོཾ་ཤྲཱི་བཛྲ་བྷསྨོད་ཏ་མེ་ཧཱུཾ་ཧཱུཾ་ཕཊ་སྭཱཧཱ། ཨོཾ་ཤྲཱི་བཛྲ་ཛྲ་ལོད་ཏ་མེ་ཧཱུཾ་ཧཱུཾ་ཕཊ་སྭཱཧཱ། ཨོཾ་ཤྲཱི་བཛྲ་ཨ་མྲྀ་ཏོད་ཏ་མེ་ཧཱུཾ་ཧཱུཾ་ཕཊ་སྭཱཧཱ། ཨོཾ་ཤྲཱི་བཛྲ་ཀྲོ་དྷོད་ཏ་མེ་ཧཱུཾ་ཧཱུཾ་ཕཊ་སྭཱཧཱ། ཨོཾ་ཤྲཱི་བཛྲ་དཾཥྟོད་ཏ་མེ་ཧཱུཾ་ཧཱུཾ་ཕཊ་སྭཱཧཱ། ཐུན་བསྡུ་བའི་སྔོན་དུ་ཨརྒྷཾ་ལ་སོགས་པས་ཕྱི་མཆོད། ནང་མཆོད། གསང་མཆོད། རྐང་བརྒྱད་ཀྱིས་བསྟོད་པ་རྣམས་བྱས་ལ། རང་གི་གནས་གསུམ་གྱི་འོད་ཟེར་གྱིས། སྣོད་བཅུད་ཐམས་ཅད་རྡོ་རྗེ་གསུམ་གྱི་རང་བཞིན་དུ་གྱུར། རང་གི་གནས་གསུམ་
དུ་ཐིམ། དཀྱིལ་འཁོར་གྱི་འཁོར་ལོ་ཡང་རང་གི་སྣ་བུག་གཡོན་ནས་ཞུགས་ཏེ་སྙིང་ཁར་བསྡུ། གོ་ཆས་རྒྱས་བཏབ་ལ། དག་པ་གསུམ་དྲན་བཞིན་པས། ཐུན་མཚམས་ཀྱི་བྱ་བ་ལ་འཇུག་གོ །གཏོར་མའི་ཆོ་ག་ནི་སྡོམ་འབྱུང་བཞིན་དུ་ཤེས་པར་བྱའོ། །རྡོ་རྗེ་འཆང་དབང་རྣལ་འབྱོར་མ། །གསང་བ་བྱིན་དང་མཆོག་གྱུར་པ། །གྲགས་པ་ཡེ་ཤེས་གྲོལ་མཆོག་ཞབས། །བླ་མ་མཆོག་གི་ཞལ་ལས་འོངས། རྒྱུད་སྡེའི་དངོས་བསྟན་ཟབ་མོའི་གནད། །འཇིགས་བྲལ་ཉིད་ཀྱི་ཁྱད་པར་ཆོས། །སྲོག་འཛིན་གདམས་པའི་སྨིན་བྱེད་ཀྱི། །དཀྱིལ་འཁོར་ཡང་ནི་འདི་ཁོ་ན། །དེང་དུས་དེ་ཡི་སྲོག་འཛིན་དུ། །གྲགས་ཤིང་རློམ་པ་རྣམས་ཀྱིས་ནི། །གང་འདིའི་མིང་ཡང་མི་ཤེས་ཏེ། ཁོ་བོས་བསོད་ནམས་སྐལ་བས་ཐོབ། །ཡང་ན་རྡོ་རྗེ་འཆང༌། རྡོ་རྗེ་ཕག་མོ། བི་རཱུ་པ། གོ་ལེན་ནཱ་ཐཱ། ཤཱ་རི་བུ་ཏྲ། གྲུབ་ཆེན་ཀུན་བློ། དགེ་བ་རྒྱལ་མཚན། བློ་གྲོས་དཔལ་འབྱོར། ཟལ་མོ་བྲག་པ་ཞེས་དབང་རྒྱུད་དེད་ཀྱང་ཆོ་ག་འདི་ལ་སྒྲུབ་ཐབས་རྒྱ་གཞུང་གི་ལུང་ཡང་ཡོད་དོ། །ཞེས་པ་མངོན་བརྗོད་ལེའུ་སུམ་ཅུ་རྩ་དྲུག་པ་ལས་བྱུང་བ། མཁན་ཆེན་ཆོས་ཀྱི་རྒྱལ་མཚན་གྱིས་ཞལ་གཟིགས་ཤིང༌། ཤིན་ཏུ་གསང་བར་གྱུར་པ་འདི་ནི། བསོད་ནམས་མཆོག་གྱུར་པའི་སྒྲུབ་ཐབས་ཚིག་རྒྱལ་རྒྱས་པ་ལས། སྙིང་པོ་མཐའ་དག་བསྡུས་པ་སྟེ། མཆོག་གི་རྡོ་རྗེ་ཕག་མོའི་སྒྲུབས་ཐབས་ཏེ་བཅུ་གཅིག་པའོ།། །།༈ ན་མོ་གུ་རུ་བཛྲ་ཌཱ་ཀཱ་ཡ། ཤེས་རབ་གསང་བའི་མཁའ་དབྱིངས་སུ། །རྡོ་རྗེ་སེམས་དཔའ་བདེ་ཆེན་དངོས། །ཐམས་ཅད་བདག་ཉིད་རྟག་བཞུགས་པ། །བླ་མ་མགོན་ལ་ཕྱག་འཚལ་ལོ། །ཟབ་མོ་སྦས་པ་གསང་བའི་དོན། །སྒྲུབ་ཐབས་མདོ་ཙམ་འབྲི་བྱེད་པ། །འདི་ནི་འགྲོ་བའི་དོན་ཕྱིར་ཏེ། །
དེ་ཕྱིར་འཕགས་རྣམས་དགྱེས་པར་མཛོད། །ད་ནི་བཤད་རྒྱུད་རྡོ་རྗེ་མཁའ་འགྲོའི་ཐུན་མོང་མ་ཡིན་པའི་དཀྱིལ་འཁོར་ཧེ་རུ་ཀ་དྲུག་ཅུ་རྩ་གཉིས་ཀྱི་དཀྱིལ་འཁོར་གྱི་སྒྲུབ་ཐབས་བཤད་པར་བྱ་སྟེ། རྣལ་འབྱོར་པ་དཀྱིལ་འཁོར་འདིར་དབང་བསྐུར་བ་ཐོབ་པས། ཐུན་མོང་གི་སྔོན་འགྲོ་སྤྱི་དང་མཐུན་པར་བྱས་ལ། རང་གི་སྙིང་གར་རཾ་ལས་ཉི་མ་ལ་ཧཱུཾ། དེ་ལས་ཁྲོ་བོའི་རྡོ་རྗེ་ནག་པོར་གྱུར་པའི་ལྟེ་བ་ལ་ཡང་ཧཱུཾ་གིས་མཚན་པ། དེ་ཡོངས་སུ་གྱུར་པ་ལས་བདག་ཉིད་ཧེ་རུ་ཀར་གྱུར་པའི་ཐུགས་ཀར། ཟླ་བ་དང་རྡོ་རྗེ་དཀར་པོ་ལ་ཧཱུཾ་གིས་མཚན་པའི་འོད་ཟེར་གྱིས། དཔལ་རྡོ་རྗེ་མཁའ་འགྲོའི་དཀྱིལ་འཁོར་བླ་མ་རྗེ་བཙུན་མཁའ་འགྲོ་མའི་ཚོགས་དང་བཅས་པ་མདུན་གྱི་ནམ་མཁར་སྤྱན་དྲངས། གང་གི་དྲིན་གྱིས་བདེ་ཆེན༴ སོགས་དང༌། དཔལ་རྡོ་རྗེ་མཁའ་འགྲོ་སོགས་ཤོ་ལོ་ཀ་གཉིས། གནས་དང་ཉེ་བའི་གནས་དང་ཞིང༌། །འདུས་དང་དུར་ཁྲོད་གནས་པ་ཡི། །དཔའ་བོ་དཔའ་མོ་དབང་ཕྱུག་མ། །ཀུན་ལ་བདག་ནི་གུས་ཕྱག་འཚལ། །དེ་ནས། ཨརྒྷཾ༴ ནས་ཤཔྟའི་བར་གྱིས་ཕྱི་མཆོད། ཡི་གེ་འབྲུ་གསུམ་ལན་གསུམ་གྱིས་བདུད་རྩི་ལྔ་དང་རྗེས་ཆགས་ཀྱིས་མཆོད། དེ་ཁོ་ན་ཉིད་ཀྱི་མཆོད་པ་དང་ཁུ་རྔུལ་གྱི་མཆོད་པ་ནི་མཆོད་པ་ཆེན་པོ་སྟེ། དེ་གཉིས་ཡིད་ཀྱིས་དྲན་ཙམ་བྱ། རྐང་བརྒྱད་ཀྱིས་བསྟོད། གུར་ནས་བྱུང་བའི་རྒྱུན་བཤགས་ཀྱི་མཐར། བརྒལ་དཀའ་སྲིད་པའི་རྒྱ་མཚོ་ལས། །བདག་གིས་འགྲོ་རྣམས་བསྒྲལ་བའི་ཕྱིར། །རང་གིས་བདག་ཉིད་སྐད་ཅིག་མ། །སངས་རྒྱས་རྣམས་ལ་དབུལ་
བར་བགྱི། །ཞེས་བདག་ཉིད་ཕུལ། རིགས་ལྔའི་སྡོམ་བཟུང་སྤྱི་དང་མཐུན་པར་བྱ། དེ་བཞིན་དུ་ཚད་མེད་བཞི་ཡང་སྤྱི་དང་མཐུན། ཚོགས་ཞིང་རྣམས་རང་ལ་ཐིམ། གཟུགས་ཀྱི་ཕུང་པོ་རྣམ་པར་སྣང་མཛད། ཚོར་བའི་ཕུང་པོ་རྡོ་རྗེ་ཉི་མ། འདུ་ཤེས་ཀྱི་ཕུང་པོ་པདྨ་གར་དབང༌། འདུ་བྱེད་ཀྱི་ཕུང་པོ་རྡོ་རྗེ་རྒྱལ་པོ། རྣམ་ཤེས་ཀྱི་ཕུང་པོ་རྡོ་རྗེ་སེམས་དཔའ། དེ་བཞིན་གཤེགས་པ་ཐམས་ཅད་ཀྱི་བདག་ཉིད་རྡོ་རྗེ་མཁའ་འགྲོ། སའི་ཁམས་ལྟུང་བྱེད་མ། ཆུའི་ཁམས་གསོད་བྱེད་མ། མེའི་ཁམས་འགུགས་བྱེད་མ། རླུང་གི་ཁམས་པད་མ་གར་དབང༌། ནམ་མཁའི་ཁམས་པདྨ་དྲ་བ་ཅན་སྒྱུ་མ་ཆེན་མོའོ། །མིག་གཉིས་གཏི་མུག་རྡོ་རྗེ། རྣ་བ་གཉིས་ཞེ་སྡང་རྡོ་རྗེ། སྣ་སེར་སྣ་རྡོ་རྗེ། ལྕེ་འདོད་ཆགས་རྡོ་རྗེ། ལུས་ཕྲག་དོག་རྡོ་རྗེ། སྐྱེ་མཆེད་ཐམས་ཅད་ལ་དབང་ཕྱུག་རྡོ་རྗེའོ། །ཨོཾ་སྭ་བྷཱ་ཝ་ཤུདྡྷ་སརྦ་དྷརྨཿསྭཱ་བྷཱ་ཝ་ཤུདྡྷོ྅་ཧཾ། ཨོཾ་ཤཱུ་ནྱ་ཏ་ཛྙཱ་ན་བཛྲ་སྭ་བྷཱ་ཝ་ཨཏྨ་ཀོ྅་ཧཾ། སྟོང་པའི་ངང་ལས་པད་ཉིའི་སྟེང་དུ། ཧཱུཾ་ལས་སྣ་ཚོགས་རྡོ་རྗེ་ཧཱུཾ་གིས་མཚན་པ། དེ་ལས་སྒོ་མཚམས་མ་བརྒྱད་དམར་མོ་ཐོ་བ་དང་ཕུར་བུ་ཐོགས་པ་སྤྲོས། ཨོཾ་སུམྦྷ་ནས་བིདྱ་རཱ་ཛ་ཧཱུཾ་ཧཱུཾ་ཕཊ། ཅེས་བཀའ་བསྒོས་པས། ལྷ་མི་ལྷ་མིན་དང་བཅས་པའི་བགེགས་ཐམས་ཅད་བཀུག ཕྱོགས་མཚམས་ཀྱི་ས་གཞིར་ཕུར་བུ་བཏབ་སྟེ་ཚར་བཅད། ཧཱུཾ་ལས་འོད་ཟེར་འཕྲོས། རྡོ་རྗེའི་ས་
གཞི་རྭ་བ་དྲྭ་བ་གུར་བླ་རེ། རྡོ་རྗེ་མེ་ལྕེ་འབར་བའི་བསྲུང་བའི་འཁོར་ལོ་དང་བཅས་པར་གྱུར། སྔགས་རྣམས་སྤྱི་དང་འདྲའོ། །སྲུང་བའི་འཁོར་ལོའི་དབུས་སུ་ཡཾ་ལས་རླུང༌། རཾ་ལས་མེ། བཾ་ལས་ཆུ། ལཾ་ལས་སའི་དཀྱིལ་འཁོར་རྣམས་སྟེང་ནས་སྟེང་དུ་བརྩེགས་པ། དེའི་སྟེང་དུ་སུཾ་ལས་རི་རབ། དེའི་ནང་དུ་ཆོས་འབྱུང་ཤེས་རབ་ཀྱི་གསང་བ། དེའི་ནང་དུ་སྣ་ཚོགས་པདྨའི་ལྟེ་བ་ལ་སྣ་ཚོགས་རྡོ་རྗེ། དེའི་སྟེང་དུ་རྣམ་པར་སྣང་མཛད་ཡོངས་སུ་གྱུར་པ་ལས། རིན་པོ་ཆེ་སྣ་ཚོགས་ལས་གྲུབ་པའི་གཞལ་མེད་ཁང༌། གྲུ་བཞི་སྒོ་བཞི། རྩིག་པ་རིམ་པ་ལྔ་དང་ལྡན་པ། ཕ་གུ་དང༌། གསེར་གྱི་སྣམ་བུ་དང༌། དྲྭ་ཕྱེད་དང༌། ཤར་བུ་དང་མདའ་ཡབ་དང༌། གཟུངས་མ་རྣམས་དང་བཅས་པའི་ཁ་ཁྱེར་ཏེ། མཚན་ཉིད་ཐམས་ཅད་ཡོངས་སུ་རྫོགས་པ། སྒོ་བཞིའི་སྟེང་དུ་ཀ་བས་བཏེག་པའི་རྟ་བབས་ཀྱིས་མཛེས་པ། ནང་གི་ལྷ་སྣམ་ཤར་དཀར། བྱང་ལྗང༌། ནུབ་དམར། ལྷོ་སེར། མཚམས་རྣམས་སུ་བུམ་པ་བརྒྱད་དང་བཅས་པ། དབུས་སྔོ་བའི་སྟེང་དུ་སྐུའི་འཁོར་ལོ་དཀར་པོ་པདྨ་འདབ་མ་བརྒྱད་པ་མུ་ཁྱུད་ལ་འཁོར་ལོའི་འཕྲེང་བས་མཚན་པ། དེའི་ལྟེ་བར་གསུང་གི་འཁོར་ལོ་པདྨ་དམར་པོ་འདབ་མ་བརྒྱད་པ་མུ་ཁྱུད་ལ་པདྨའི་འཕྲེང་བས་བསྐོར་བ། དེའི་ལྟེ་བར་ཐུགས་ཀྱི་འཁོར་ལོ་པདྨ་སྔོན་པོ་འདབ་མ་བརྒྱད་པ་མུ་ཁྱུད་ལ་རྡོ་རྗེའི་ཕྲེང་བས་
བསྐོར་བ། དེའི་ལྟེ་བར་བདེ་བ་ཆེན་པོའི་འཁོར་ལོ་སྣ་ཚོགས་པདྨ་འདབ་མ་བརྒྱད་པ། སྡོང་བུ་ཅུང་ཟད་དང་བཅས་པ་མུ་ཁྱུད་ལ་རིན་པོ་ཆེའི་འཕྲེང་བས་བསྐོར་བ། སྟེང་ཐོག་རིམ་པར་ཕུབ་པའི་དབུས་ཕྱུར་བུར་གྱུར་པ། ནང་གི་ལྷའི་གནས་རྣམས་སུ་ཉི་མའི་གདན་སུམ་ཅུ་རྩ་བདུན་ནོ། །གཞལ་མེད་ཁང་གི་ཕྱི་རོལ་མཆོད་པའི་བཀོད་པ་ཐམས་ཅད་བཅས་ཤིང་པད་འདབ་ཀྱི་ཁོར་ཡུག་སྲུང་བའི་འཁོར་ལོ་དང་བཅས་པའི་ཕྱི་རོལ་དུར་ཁྲོད་ཆེན་པོ་བརྒྱད། ཕྱོགས་སྐྱོང་བ་དང༌། ཞིང་སྐྱོང་བ་དང༌། ཤིང་དང༌། མེ་དང༌། སྤྲིན་དང༌། ཆུ་དང༌། རི་དང༌། མཆོད་བརྟེན། གྲུབ་པ་ཐོབ་པའི་དཔའ་བོ་དང་རྣལ་འབྱོར་མ་རྣམས་ཀྱིས་ཡོངས་སུ་ཁྱབ་པའོ། །འདིར་བྷ་བ་བྷ་དྲའི་འགྲེལ་པ་ལས། ཞི་ཁྲོ་དཀྱིལ་འཁོར་ཐ་དད་དུ་དགོངས་པས་རྒྱུ་རྡོར་འཛིན་ཞལ་ཕྱག་ཅན་ལོགས་པ་མེད། ཟླ་བ་རྡོ་རྗེ་ཉིད་རྒྱུ་རྡོར་སེམས་ཀྱི་ངོ་བོར་འདོད་ལ། ཀ་ལ་ཀལྤའི་སྒྲུབ་ཐབས་ན་རྒྱུ་རྡོ་རྗེ་སེམས་དཔའ་བྱེད་དེ་རྡོ་རྗེ་ཞུ་བའི་ཐིག་ལེ་ལས་རྡོར་སེམས་དཀར་སྔོ་སེར་དམར་བའི་ཞལ་བཞི་པ། ཕྱག་བཞི་རྡོ་རྗེ། ཁ་ཊྭཾ་ག ཐོད་པ། དྲིལ་བུ་འཛིན། གདན་ཐོད་པའི་ནང་གི་སྟེང་དུ་ཕྱེད་ཀྲུང་གར་སྟབས་ཀྱིས་བཞུགས་པ། སྐུ་མདོག་དཀར་པོ་འོད་དམར་པོ་ཅན་རྒྱན་ཐམས་ཅད་ཀྱིས་བརྒྱན་པའོ། །དེ་ནས་འདོད་ཆགས་ཆེན་པོའི་སྤྱོད་པ་དང་སྤྲུལ་པས་སེམས་ཅན་གྱི་དོན་རྒྱ་ཆེར་མཛད་ནས་ཞུ་བ་དང་གླུས་བསྐུལ་བའི་མཛད་པ་ནག་པོ་པའི་སྐབས་དང་འདྲའོ། །ཚུལ་འདི་ཡང་ཆེས་ལེགས་པར་མཐོང་མོད། སྔར་སྲོལ་བཞིན་དཀྱུས་སུ་འགྲེལ་པ་ལྟར་བཤད་ན། དབུས་ཀྱི་
གདན་གྱི་སྟེང་དུ། རང་སེམས་ཟླ་བའི་རྣམ་པ་ཅན། ཨོཾ་ཙིཏྟ་པྲ་ཏེ་བེཏྟཾ་ཀ་རོ་མི། དེ་ལ་ཨ་ཨཱ༴ ནས་ཨཾ་ཨཿས་མཚན་པ། དེའི་འོད་ཟེར་གྱིས་དེ་བཞིན་གཤེགས་པ་རྣམས་སྤྱན་དྲངས་ཏེ། ཐིམ་པ་ལས་ཟླ་བ་གཉིས་པར་གྱུར། ཨོཾ་བོ་དྷི་ཙིཏྟ་ཨུཏྤ་ཏ་ཡ་མི། དེ་ལ་ཀ་ཁ་ནས་ཧ་ཀྵས་མཚན་པ། ཟླ་བ་ཁ་སྦྱོར་གྱི་སྟེང་དུ་ཧཱུཾ་ལས་རྡོ་རྗེ་ཧཱུཾ་གིས་མཚན་པ། ཨོཾ་ཏིཥྛ་བཛྲ། འོད་ཟེར་གྱིས་བསྐུལ་ནས། སངས་རྒྱས་རྣམས་ཞུགས་ཤིང་ཐིམ་པ་ལས། རྡོ་རྗེ་དེ་ཉིད་ཉི་མ་སྟོང་གི་འོད་ཟེར་ལྟར་འབར་བའི་ཐིག་ལེའི་ངོ་བོར་གྱུར། ཨོཾ་བཛྲ་ཨཏྨ་ཀོ྅་ཧཾ། ཕྱོགས་བཅུའི་བདེ་གཤེགས་མ་ལུས་པ་འདུས་ཏེ། ཨོཾ་མཧཱ་སུ་ཁ་བཛྲ། ཛཿཧཱུཾ་བཾ་ཧོཿསུ་ར་ཏ་སྟྭཾ། ཞེས་བསྐུལ་བས། དེ་རྣམས་ཡོངས་སུ་རྫོགས་པར་གྱུར་པ་ནི། རང་ཉིད་དཔལ་ཧེ་རུ་ཀ་བཅོམ་ལྡན་འདས་འཁོར་ལོ་བདེ་མཆོག་སྐུ་མདོག་མཐིང་ཀ་འཇིགས་པ་ཡང་འཇིགས་པར་མཛད་པ། དྲག་པོ་ཆེན་པོ་ཞལ་བཞི་ཕྱག་དྲུག་པ། རྩ་བའི་ཞལ་ནག་པོ། གཡས་དཀར། གཡོན་དམར། རྒྱབ་སེར་བ། ཞལ་རྣམ་པར་འགྱུར་བ། སྤྱན་གསུམ་གསུམ་དང་ལྡན་པ། མཆེ་བ་གཙིགས་པ། སྨིན་མཚམས་ནས་ཧཱུཾ་བཞི་པའི་སྔགས་སྤྲོ་བ། ཕྱག་དྲུག་གི་དང་པོ་གཉིས་འབར་བའི་རྡོ་རྗེ་དང་ཁ་ཊྭཾ་ག་འཛིན་པས་ཡུམ་ལ་འཁྱུད་པ། གཉིས་པ་གཉིས་ཀྱིས་བདུད་རྩིས་གང་བའི་གཤོར་ཐོད་དང༌། ཐོད་ཁྲག་འཛིན་པ། ཐ་མ་གཉིས་ཀྱིས་
མདའ་དང་གཞུ་བསྣམས་པའོ། །ས་འོག་བསྐྱོད་ཅིང་ལྷ་མ་ཡིན་འཇོམས་པའི་གར་གྱི་སྟབས་ཅན། ཞབས་གཉིས་གཡོན་བསྐུམས་གཡས་བརྐྱང་བས་བདུད་བཞི་ཆུང་མ་དང་བཅས་པ་མནན་པ། རལ་པའི་ཐོར་ཚུགས་དང༌། སྣ་ཚོགས་རྡོ་རྗེ་དང༌། ཟླ་བ་ཕྱེད་པ་དང༌། ནོར་བུ་རིན་པོ་ཆེ་དང༌། ཐོད་པ་སྐམ་པོ་ལྔས་དབུ་རྒྱན་པ། ཕྱག་དྲུག་དང་མགོ་བོའི་འཕྲེང་བ་ཅན། སྟག་གི་པགས་པའི་ཤམས་ཐབས་གྲོལ་བ། གར་གྱི་ཉམས་དགུ་དང་ལྡན་པ། བ་སྤུའི་ཁུང་བུ་ནས་སྤྲུལ་པ་འགྱེད་པ། ཡེ་ཤེས་ཀྱི་མེ་འབར་བའི་དབུས་ན་བཞུགས་པ། སྐུ་མི་འགྱུར་བ། གསུང་མ་སྐྱེས་པ། ཐུགས་ནམ་མཁའ་རྡོ་རྗེའི་བདག་ཉིད་དོ། །ཡུམ་སྒྱུ་མ་ཆེན་མོ་ཝ་ར་ཧི། སྐུ་མདོག་དམར་མོ་ཞལ་གཅིག་ཕྱག་གཉིས་སྤྱན་གསུམ་མ། གཡོན་ཐོད་ཁྲག་འཛིན་པས་ཡབ་ལ་འཁྱུད་པ། གཡས་རྡོ་རྗེ་གྲི་གུག་དང་བཅས་པའི་སྡིགས་མཛུབ་ཅན། ཞབས་གཡས་བསྐུམ་གཡོན་བརྐྱང་བས་ཡབ་ལ་འཁྲིལ་བ། སྐྲ་གྲོལ་ཞིང་ཕྱག་རྒྱ་ལྔས་བརྒྱན་པ། ཐོད་སྐམ་གྱི་དོ་ཤལ་ཅན། ཁྲག་ལ་དགྱེས་ཤིང་ཁྲག་འཛག་པ། བསྐལ་པའི་མེ་ལྟར་གཟི་བརྗིད་འབར་བའོ། །ཨོཾ་ཡ་ཐཱ་སརྦ་ཏ་ཐཱ་ག་ཏ་ཐཱ་ཨ་ཧཾ། འདིར་གར་གྱི་སྟབས་ཤེས་པ་སྤྱིར་གར་གྱི་རོལ་བ་མཛད་པའི་དོན་ཡིན་གྱི་སྐྱིལ་ཀྲུང་ཕྱེད་པས་གར་སྟབས་ཁོ་ན་ལ་གོ་བར་མི་བྱའོ། །ཡང་འདི་ལ་གཤོར་དང་ཐོད་པ་འཛིན་པ་གཉིས་བོར་བའི་ཕྱག་བཞི་པ་ཡང་རུང་ངོ། །དེ་བཞིན་དུ་ཞབས་འོག་ཏུ་འཇིགས་དུས་མནན་པར་བྱེད་པ་དང་དཀྱིལ་འཁོར་ལ་བདེ་ཆེན་
འཁོར་ལོ་ལེ་ཚེ་དགུ་པར་བྱེད་པ་དང༌། དེ་ལྟར་གྱི་ཚེ་སྒོ་མ་དང་མཚམས་མ་གོ་བརྗེ་བ་དང༌། སྔོན་འགྲོ་ཅུང་ཟད་བསྡུས་པ་བྱེད་པ་ཡང་ལུགས་གཅིག་གོ །དེ་ནས་འདི་ལྟར། ང་ནི་འདོད་པའི་གཟུགས་ཀྱི་མཆོག ། སངས་རྒྱས་ཀུན་གྱི་བྱིན་རླབས་པ། །ང་ཉིད་ཆོས་ཀྱི་སྐུ་ཡི་མཆོག །སངས་རྒྱས་ཀུན་གྱི་བདག་པོ་ཡིན། ཨོཾ་སུམ་བྷ༴ སོགས། ཨོཾ་དྷརྨ་དྷཱ་ཏུ་བཛྲ་སྭ་བྷཱ་ཝ་ཨཏྨ་ཀོ྅་ཧཾ། ཀ་ལ་ཀལྤས་སྐབས་འདིར་གོ་ཆ་དང་གནས་གསུམ་བྱིན་རླབས་བྱེད་དོ། །བདེ་ཆེན་འཁོར་ལོའི་ཤར་དུ་ལྟུང་བྱེད་མ་སྔོ་སེར། གཡས་རྡོ་རྗེ་དང་ཐོད་པ། གཡོན་ཁ་ཊྭཾ་ག་དང་དྲིལ་བུ་འཛིན་པ། བྱང་དུ་གསོད་བྱེད་མ་ལྗང་སེར། གཡས་རྔེའུ་ཆུང་དང་རལ་གྲི། གཡོན་ཐོད་པར་བཅས་པའི་ཁ་ཊྭཾ་ག་དང་ཞགས་པ་འཛིན་པ། ནུབ་ཏུ་འགུགས་བྱེད་མ་དམར་སེར། གཡས་མདའ་དང་པདྨ། གཡོན་གཞུ་དང་ཐོད་པ་འཛིན་པ། ལྷོར་གར་དབང་མ་དཀར་སེར་གཡས་བ་དན་དང་ཐོད་པ། གཡོན་རྩེ་གསུམ་དང་རིན་པོ་ཆེ་འཛིན་པ། དེ་དག་གི་ཐོད་པ་བཞི་ནི། རིམ་པས་གླང་པོ། ཅེ་སྤྱང༌། མི་བ་གླང་གི་གཟུགས་དང་བཅས་པའོ། །ཐམས་ཅད་ཞལ་གཅིག་ཕྱག་བཞི་མ། གཡས་བརྐྱང་གི་སྟབས་དང་ཉི་མའི་འོད་སྐོར་ཅན་ནོ། །འདི་དག་ལ་འགའ་ཞིག་ཕྱེད་གཟུགས་བྱེད་པ་ནི་མི་ལེགས་ཤིང༌། སྔོ་སེར་ཞེས་སོགས་ཕལ་ཆེར་འདོད་པ་ལྟར་རྒྱུད་དང་འགྲེལ་པ་དང་སྒྲུབ་ཐབས་འགོས་འགྱུར་གྱི་དབང་དུ་བྱས་ཏེ་རིན་ཆེན་གྱི་རིགས་མཚོན་པར་འདོད་པས་དཀྱུས་སུ་བཤད་པ་
ཡིན་ཡང༌། སྔོ་སྐྱ། ལྗང་སྐྱ། དམར་སྐྱ། སེར་སྐྱར་བྱས་ནའང་ལེགས་སོ། །མཚམས་ཀྱི་འདབ་མ་བཞིར་བདུད་རྩི་ལྔས་གང་བའི་ཐོད་པ་རྒྱལ་བའི་སྐུ་གཟུགས་ཀྱིས་ཉེ་བར་བརྒྱན་པའོ། །ཐུགས་ཀྱི་འཁོར་ལོའི་ཤར་གྱི་འདབ་མ་ལ་པུ་ལི་ར་མ་ལ་ཡར་རབ་ཏུ་གཏུམ་མོ་དང༌། ཁཎྜ་ཀ་པཱ་ལ། བྱང་ཕྱོགས་ཛ་ལན་དྷ་རར་གཏུམ་མིག་མ་དང་མ་ཧཱ་ཀཾ་ཀ་ལ། ནུབ་ཕྱོགས་ཨོ་ཊི་ཡ་རར་འོད་ལྡན་མ་དང་ཀཾ་ཀ་ལ། ལྷོ་ཕྱོགས་ཨར་བུ་ཏར་སྣ་ཆེན་མ་དང་མཆེ་བ་རྣམ་པར་གཙིགས་པ། ཤར་ལྷོ་གཽ་ད་བ་རིར། དཔའ་བོ་བློ་གྲོས་མ་དང་ལྷའི་དགྲ། ལྷོ་ནུབ་རསྨི་ཤྭ་རར་མིའུ་ཐུང་མ་དང་འོད་དཔག་མེད། ནུབ་བྱང་དེ་བཱི་ཀོ་ཊར་ལང་ཀའི་དབང་ཕྱུག་མ་དང་རྡོ་རྗེའི་འོད། བྱང་ཤར་མ་ལ་ཝཱར་ཤིང་གྲིབ་མ་དང་རྡོ་རྗེའི་སྐུ་རྣམས་མདོག་སྔོན་པོའོ། །གསུང་གི་འཁོར་ལོའི་ཤར་ཕྱོགས་ཀཱ་མ་རུ་པར་ཨེ་ར་བ་ཏི་དང་མྱུ་གུ་ཅན། བྱང་ཕྱོགས་ཨོ་ཊར་འཇིགས་བྱེད་ཆེན་མོ་དང་རྡོ་རྗེ་རལ་པ་ཅན། ནུབ་ཕྱོགས་ཏྲི་ཤ་ཀུ་ནིར་རླུང་གི་ཤུགས་ཅན་མ་དང་དཔའ་བོ་ཆེན་པོ། ལྷོ་ཕྱོགས་གོ་ས་ལར་ཆང་འཐུང་མ་དང་རྡོ་རྗེ་ཧཱུཾ་མཛད། ཤར་ལྷོ་ཀ་ལིང་ཀར་སྔོ་སངས་ལྷ་མོ་དང་རབ་ཏུ་བཟང་མོ། ལྷོ་ནུབ་ལཾ་བ་ཀར་ཤིན་ཏུ་བཟང་མོ་དང་རྡོ་རྗེ་བཟང་པོའོ། །ནུབ་བྱང་ཀཉྩིར་རྟ་རྣ་མ་དང་འཇིགས་བྱེད་ཆེན་པོ། བྱང་ཤར་ཧི་མ་ལ་ཡར་བྱ་གདོང་མ་དང་མིག་མི་བཟང་རྣམས་སྐུ་མདོག་དམར་པོའོ། །སྐུའི་འཁོར་ལོའི་ཤར་རྩིབས་པྲེ་ཏ་པུ་རིར་འཁོར་ལོའི་
ཤུགས་ཅན་མ་དང་སྟོབས་པོ་ཆེ། བྱང་ཕྱོགས་གྲིར་ཧ་དེ་བར་ཁཎྜ་རོ་ཧི་དང་རིན་པོ་ཆེ་རྡོ་རྗེ། ནུབ་ཕྱོགས་སཽ་རཥྟར་ཤཽནྚི་ནཱི་དང་རྟ་མགྲིན། ལྷོ་ཕྱོགས་སུ་ཝརྞ་དྭི་པར་འཁོར་ལོའི་གོ་ཆ་མ་དང་ནམ་མཁའི་སྙིང་པོའོ། །ཤར་ལྷོ་ནཱ་ག་རར་ཤིན་ཏུ་དཔའ་མོ་དང་དཔལ་ཧེ་རུ་ཀ ལྷོ་ནུབ་སིནྡྷུ་སྟོབས་ཆེན་མ་དང་པདྨ་གར་གྱི་དབང་ཕྱུག ནུབ་བྱང་མ་རུར་འཁོར་ལོས་བསྒྱུར་མ་དང་རྣམ་པར་སྣང་མཛད། བྱང་ཤར་ཀུ་ལུ་ཏར་བརྩོན་འགྲུས་ཆེན་པོ་དང་རྡོ་རྗེ་སེམས་དཔའ་རྣམས་སྐུ་མདོག་དཀར་པོའོ། །དེ་ཐམས་ཅད་ཀྱང་ཤེས་རབ་མ་གཙོ་མོར་གྱུར་པ་སྟེ། དཔའ་མོ་ཐམས་ཅད་ཕྱག་གཉིས་ཀྱིས་གཡས་གྲི་གུག་འཕྱར་བས་བསྡིགས་པ། གཡོན་ཐོད་ཁྲག་འཛིན་པས་ཡབ་ལ་འཁྱུད་པ། ཞབས་གཡོན་བརྐྱང་ཞིང་གཡས་ཐབས་ལ་འཁྲིལ་བས་བདེ་ཆེན་སྦྱོར་བ་ལ་བརྩོན་པ། དཔའ་བོ་ཉི་ཤུ་རྩ་བཞི་པོ་ཐམས་ཅད་ཀྱང་ཞལ་གཅིག་ཕྱག་བཞི། དང་པོ་གཉིས་རྡོ་རྗེ་དང་དྲིལ་བུ་འཛིན་པས་ཡུམ་ལ་འཁྱུད་པ། འོག་མ་གཉིས་ཌཱ་མ་རུ་དང་ཁ་ཊྭཾ་ག་འཛིན་པ། ཕྱག་རྒྱ་དྲུག་དང་རལ་པའི་ཅོད་པན་ཅན། ཉི་མ་ལ་གཡས་བརྐྱང་བའི་སྟབས་ཀྱིས་བཞུགས་པ། ཐོད་རློན་ལྔ་བཅུའི་དོ་ཤལ་འཆང་བའོ། །ཤར་སྒོར་གཤིན་རྗེ་བརྟན་མ། བྱང་སྒོར་གཤིན་རྗེ་ཕོ་ཉ་མ། ནུབ་སྒོར་གཤིན་རྗེ་མཆེ་བ་མ། ལྷོ་སྒོར་གཤིན་རྗེ་འཇོམས་མ། ཤར་
ལྷོར་ཁྭ་གདོང་མ། ལྷོ་ནུབ་ཏུ་འུག་གདོང་མ། ནུབ་བྱང་དུ་ཁྱི་གདོང་མ། བྱང་ཤར་དུ་ཕག་གདོང་མ་སྟེ། དེ་རྣམས་ཐམས་ཅད་སྐུ་མདོག་ལྗང་ཁུ། གཡས་སྡིགས་མཛུབ་དང་བཅས་པའི་གྲི་གུག་འཕྱར་བ། གཡོན་ཐོད་ཁྲག་ཐུགས་ཀར་འཛིན་པ་གྲུ་མོར་ཁ་ཊྭཾ་ག་དང་བཅས་པ། ཉི་མ་དང་རོ་ལ་གཡས་བརྐྱང་གིས་བཞུགས་ཤིང་སྦྲུལ་གྱིས་བརྒྱན་པ། མ་མོ་བཅུ་གཉིས་པོ་ཐམས་ཅད་ཀྱང་ཐོད་རློན་གྱི་དོ་ཤལ་ཅན། རྣལ་འབྱོར་མ་ཐམས་ཅད་ཕྱག་རྒྱ་ལྔས་བརྒྱན་པ། དབུ་སྐྲ་གྱེན་དུ་བརྫེས་པ། ཐམས་ཅད་ཀྱང་སྐྲ་མཚམས་ལ་རྡོ་རྗེའི་འཕྲེང་བ་དང༌། རྐང་བརྒྱན་ལ་དྲིལ་བུ་གཡེར་ཁས་མཛེས་པའོ། །ལུས་དང་ཚོར་བ་དང་ཆོས་དང་༴ ནས་འཇོམས་མ་བཞི་པོའི་བར། དག་པ་དྲན་པར་བྱའོ། །རྐང་པ་གཉིས་རླུང་གི་དཀྱིལ་འཁོར། སུམ་མདོ་མེ། ལྟོ་བ་ཆུ། སྙིང་ག་ས། སྒལ་ཚིགས་རི་རབ། ལུས་ངག་ཡིད་གསུམ་འཁོར་ལོ་གསུམ། འདོམ་གང་གྲུ་བཞི་གཞལ་མེད་ཁང་གྲུ་བཞི། སྤྱི་བོ་པུ་ལི་ར་མ་ལ་ཡར་རབ་གཏུམ་མ་དང་ཁཎྜ་ཀ་པཱ་ལ། སྤྱི་གཙུག་ཛ་ལན་དྷ་རར་གཏུམ་མིག་མ་དང་མཧཱ་ཀཾ་ཀ་ལ། རྣ་བ་གཡས་པ་ཨོ་ཊི་ཡ་ནར་འོད་ལྡན་མ་དང་ཀཾ་ཀ་ལ། ལྟག་པ་ཨར་བུ་ཏར་སྣ་ཆེན་མ་དང་མཆེ་བ་རྣམས་པར་གཙིགས་པ། རྣ་བ་གཡོན་པ་གཽ་ད་པ་རིར་བརྟན་པའི་བློ་ཅན་མ་དང་ལྷའི་དགྲ། སྨིན་མཚམས་རསྨི་ཤྭ་རར་མིའུ་ཐུང་མ་དང་འོད་དཔག་མེད། མིག་དེ་ཝཱི་ཀོ་ཊར་ལང་
ཀའི་དབང་ཕྱུག་མ་དང་རྡོ་རྗེའི་འོད། ཕྲག་པ་མ་ལ་བར་ཤིང་གྲིབ་མ་དང་རྡོ་རྗེའི་སྐུ། མཆན་ཁུང་ཀ་མ་རཱུ་པར་ཨེར་བ་ཏི་དང་ཨཾ་གུ་རི། ནུ་མ་ཨོ་ཊེར་འཇིགས་བྱེད་ཆེན་མོ་དང་རྡོ་རྗེ་རལ་པ་ཅན། ལྟེ་བ་ཏྲི་ཤ་ཀུ་ནེར་རླུང་གི་ཤུགས་ཅན་མ་དང་དཔའ་མོ་ཆེན་པོ། སྣ་རྩེ་ཀོ་ས་ལར་ཆང་འཐུང་མ་རྡོ་རྗེ་ཧཱུཾ་མཛད། ཁ་ཀ་ལིང་ཀར་སྔོ་སངས་ལྷ་མོ་དང་རབ་ཏུ་བཟང་པོ། མགྲིན་པ་ལམྦ་ཀར་ཤིན་ཏུ་བཟང་མོ་དང་རྡོ་རྗེ་བཟང་པོ། སྙིང་གར་ཀཉྩི་རྟ་རྣ་མ་དང་འཇིགས་བྱེད་ཆེན་པོ། འདོམ་བར་ཧི་མ་ལ་ཡར་བྱ་གདོང་མ་དང་མིག་མི་བཟང༌། མཚན་མ་པྲེ་ཏ་པུ་རིར་འཁོར་ལོའི་ཤུགས་ཅན་མ་དང་སྟོབས་པོ་ཆེ། བཤང་ལམ་གྲི་ཧ་དེ་བར་ཁཎྜ་རོ་ཧི་དང་རིན་ཆེན་རྡོ་རྗེ། བརླ་གཉིས་སཽ་རཥྟ་ཤོཎྜི་ནི་དང་རྟ་མགྲིན། བྱིན་པ་གསེར་གླིང་དུ་འཁོར་ལོའི་གོ་ཆ་མ་དང་ནམ་མཁའི་སྙིང་པོ། སོར་མོ་ན་ག་རར་ཤིན་ཏུ་དཔའ་མོ་དང་ཧེ་རུ་ཀ བོལ་གོང་སིནྡྷུར་སྟོབས་ཆེན་མ་དང་པདྨ་གར་གྱི་དབང་ཕྱུག་མཐེ་བོང་མ་རུར་འཁོར་ལོས་བསྒྱུར་མ་དང་རྣམ་པར་སྣང་མཛད། པུས་མོ་ཀུ་ལུ་ཏར་བརྩོན་འགྲུས་ཆེན་མོ་དང་རྡོ་རྗེ་སེམས་དཔའ་འོ།། ཨོཾ་ཨཱཿཧཱུཾ་སརྦ་བཱི་ར་ཡོ་གི་ནཱི་ཀ་ཡ་ཝཱ་ཀ་ཙིཏྟ་བཛྲ་སྭ་བྷཱ་ཝ་ཨཏྨ་ཀོ྅་ཧཾ། ཨོཾ་བཛྲ་ཤུདྡྷཿསརྦ་དྷརྨ་བཛྲ་ཤུདྡྷོ྅་ཧཾ། རང་གི་སྙིང་གར་ཧ་དཀར་པོ་རྡོ་རྗེ་སེམས་དཔའ། མགོ་བོར་ན་མ་ཧི་སེར་པོ་རྣམ་པར་སྣང་མཛད། སྤྱི་གཙུག་ཏུ་སྭཱཧཱ་ཧཱུཾ་དམར་པོ་པདྨ་གར་གྱི་དབང་ཕྱུག་ཕྲག་པ་
གཉིས་སུ་བཽ་ཥ་ཊ་ཧེ་ནག་པོ་དཔལ་ཧེ་རུ་ཀ །མིག་གཉིས་སུ་ཧཱུཾ་ཧཱུཾ་ཧོ་དམར་སེར་རྡོ་རྗེ་ཉི་མ། ཚིགས་ཆེན་བརྒྱད་ལ་ཕཊ་ཧཾ་ལྗང་ཁུ་རྟ་མཆོག་གི་ངོ་བོ། སྙིང་གར་ཧཱུཾ་ཐུགས་རྡོ་རྗེ། མགྲིན་པར་ཨོཾ་ཧྲཱིཿཧ་ཧ་ཧཱུཾ་ཧཱུཾ་ཕཊ་གསུང་རྡོ་རྗེ། དཔྲལ་པར་ཨོཾ་ཤྲཱི་བཛྲ་ཧེ་ཧེ་རུ་རུ་ཀཾ་ཧཱུཾ་ཕཊ་ཌཱ་ཀི་ཛྭཱ་ལ་སམྦྷ་ར་སྭཱཧཱ། སྐུ་རྡོ་རྗེ། གསུམ་ཆར་ཡང་ཟླ་བ་ལ་གནས་པའོ། །ཡུམ་གྱི་ལྟེ་བར་ཨོཾ་བཾ་དམར་མོ་རྡོ་རྗེ་ཕག་མོ། སྙིང་གར་ཧཾ་ཡོཾ་སྔོན་མོ་གཤིན་རྗེ་མ། ཁར་ཧྲཱི་མོཾ་དཀར་མོ་རྨོངས་བྱེད་མ། དཔྲལ་པར་ཧྲིཾ་ཧྲིཾ་སེར་མོ་བསྐྱོད་བྱེད་མ། སྤྱི་གཙུག་ཏུ་ཧཱུཾ་ཧཱུཾ་ལྗང་ཁུ་སྐྲག་བྱེད་མ། དཔྲལ་པར་ཕཊ་ཕཊ་དུད་ཁ་ཙཎྜི་ཀཱའི་ངོ་བོ། ལྟེ་བར་ཨོཾ་སརྦ་བུདྡྷ་ཌཱ་ཀི་ནཱི་ཡེ་བཛྲ་བརྞ་ནཱི་ཡེ་ཧཱུཾ་ཧཱུཾ་ཕཊ་སྭཱ་ཧཱ། ཐུགས་རྡོ་རྗེ། མགྲིན་པར་ཨོཾ་བཻ་རོ་ཧེ་རེ་ཧཱུཾ་ཧཱུཾ་ཕཊ་སྭཱཧཱ། གསུང་རྡོ་རྗེ། སྙིང་གར་ཨོཾ་བཛྲ་བཻ་རོ་ཙ་ནཱི་ཡེ་སྭཱཧཱ། །སྐུ་རྡོ་རྗེའོ། །རང་གི་སྙིང་གར་ཧཱུཾ་ལས་རྡོ་རྗེ་ཧཱུཾ་གིས་མཚན་པ་ཡེ་ཤེས་སེམས་དཔའ། ཐུགས་ཀའི་འོད་ཟེར་གྱིས་ཡེ་ཤེས་ཀྱི་འཁོར་ལོ་དབང་གི་ལྷ་མཆོད་པའི་ལྷ་མོ་དང་བཅས་པ་སྤྱན་དྲངས། ཕཻཾ། ཨོཾ་བཱི་ནི་བཛྲ་ཎི་ཧཱུཾ་ཧཱུཾ་ཕཊ༴ ནས་ཨོཾ་དྷརྨཱ་དྷཱ་ཏུ་བཛྲི་ནི་ཧཱུཾ་ཧཱུཾ་ཕཊ་ཀྱིས་བར་གྱིས་མཆོད། ཛཿཧཱུཾ་བཾ་ཧོཿ ཨོཾ་ཡོ་ག་ཤུདྡྷཿསརྦ་དྷརྨ་ཡོ་ག་ཤུདྡྷོ྅་ཧཾ། དེ་བཞིན་གཤེགས་པ་ཐམས་ཅད་ཀྱིས་བདག་ལ་མངོན་པར་དབང་བསྐུར་དུ་གསོལ། ཞེས་དབང་གི་ལྷ་རྣམས་ལ་གསོལ་བ་བཏབ་པ་དང༌། གསང་གསུམ་
གནས་ལས་བྱུང་བ་ཡི། །རྡོ་རྗེ་རྣལ་འབྱོར་མ་ཀུན་དང༌། །སངས་རྒྱས་འཇིག་རྟེན་མགོན་པོ་ཡིས། །བརྩེ་བའི་བདག་ལ་དབང་བསྐུར་སྩོལ། །ཞེས་ཀྱང་གསོལ་བ་བཏབ་པས། སངས་རྒྱས་རྣམས་ནི་ཐམས་ཅད་ཀྱི། །གསང་གསུམ་གནས་ལས་བྱུང་བ་ཡི། ཁམས་གསུམ་ཀུན་གྱིས་ཕྱག་བྱས་པ། །རིན་ཆེན་དབང་བསྐུར་ཆེན་པོ་སྦྱིན། །ཞེས་གསུང་ཞིང་བུམ་པ་བདུད་རྩིས་གང་བས་དབང་བསྐུར། སྐུ་གང༌། དྲི་མ་དག་ཆུའི་ལྷག་མ་ཡར་ལུད་པ་ལས། གཙོ་བོ་ལ་མི་བསྐྱོད་པ། ཡུམ་ལ་རྣམ་སྣང༌། བདེ་ཆེན་འཁོར་ལོ་པ་ལ་རིན་འབྱུང༌། ཐུགས་འཁོར་པ་ལ་མི་བསྐྱོད་པ། གསུང་འཁོར་པ་ལ་འདོད་དཔག་མེད། སྐུ་འཁོར་པ་ལ་རྣམ་སྣང༌། དམ་ཚིག་འཁོར་ལོ་པ་ལ་དོན་གྲུབ་ཀྱིས་དབུ་རྒྱན། དེ་ནས་བཟླས་པ་བྱ་བར་འདོད་ན། ཡི་གེ་ཉེར་གཉིས་པ་དང༌། བུདྡྷ་ཌཱ་ཀིའི་སྔགས་སྤེལ་ནས་བཟླ་བའམ། ཨོཾ་ཀ་ར་ཀ་ར། ཀུ་རུ་ཀུ་རུ༴ ནས་ཀི་ལི་ཀི་ལི། ཙི་ལི་ཙི་ལི། སི་ལི་སི་ལི། དྷི་ལི་དྷི་ལི་ཧཱུཾ་ཧཱུཾ་ཕཊ། ཅེས་ཅི་ནུས་བཟླས། སྔགས་ཀྱི་རྣམ་གཞག་རྒྱས་པར་རྒྱུད་འགྲེལ་དུ་ཤེས་པར་བྱའོ། །ཨོཾ་སུམྦྷ་ཧཱུཾ་ཧཱུཾ་ཕཊ། ལས་ཐམས་ཅད་པའི་སྔགས་སོ། །བཟླས་པའི་གོང་དུའམ། སྐབས་འདིར་མཆོད་པ་བྱ་སྟེ། ཨརྒྷཾ༴ ནས་ཤཔྟའི་བར་གྱི་མཆོད་པ་ནི་ཕྱི་མཆོད་དོ། །ནང་མཆོད་གཏོར་མ་ལྟར་བྱིན་གྱིས་རླབས་ནས། རྡོ་རྗེ་འཆང་དང་རྡོ་རྗེ་རྣལ་འབྱོར་མ། །ལཱུ་ཡི་ཌེཾ་ཀི་དྷ་རི་དྲིལ་བུ་པ། །ལྭ་བ་ཛ་ལནྡྷ་ར་ནག་པོ་པ། །དགེ་མགོན་ཏི་ལི་ནཱ་རོ་ཕམ་ཏིང་
མཆེད། །མ་ཎི་ཀ་དང་བྱང་ཆུབ་བཟང་པོ་དང༌། །ཆོས་དབང་བདེ་མཆོག་རྡོ་རྗེ་བློ་ལྡན་དང༌། །དོན་གྲུབ་ཡེ་ཤེས་ཤཀྱ་རྡོ་རྗེ་དང༌། །སངས་རྒྱས་འབུམ་དང་ལོ་མཆོག་སེང་གེ་རྒྱལ། །གཡུང་སྟོན་རྡོར་དཔལ་གྲགས་ཚུལ་བྱང་སེང་བ། །གཞོན་བློ་ཀུན་བཟང་གུ་གེ་པཎྜི་ཏ།།མཁན་ཆེན་གྲོལ་མཆོག་ཞབས་དང་བླ་མ་རྗེ། །རྩ་བརྒྱུད་བླ་མ་རྣམས་ལ་མཆོད་པ་འབུལ། །ཨོཾ་ཨཱཿཧཱུཾ། ཡང་ན། རཏྣ་ཤྲཱི་དགེ་ལེགས་ཞི་བའི་བློ། །ས་དབང་བཟང་པོ་ས་དཔལ་དྲི་མེད་དཔལ། །ཤོང་སྟོན་བློ་བརྟན་ལོ་མཆོག་སེང་གེ་རྒྱལ། །གཡུང་སྟོན་མན་ཆད་གོང་བཞིན་ནོ། །སྙིང་པོའི་མཐར་འབྲུ་གསུམ་བཏགས་ལ་ནང་མཆོད་མྱང༌། ཨོཾ་ཨི་ནུ་ར་ག་ན། བཛྲ་སྭ་བྷ་ཝ་ཨཏྨ་ཀོ྅་ཧཾ། ཐབས་དང་ཤེས་རབ་སྣང་སྟོང་གཉིས་སུ་མེད་པའི་ངོ་བོའོ། །ཞེས་པ་གསང་བའི་མཆོད་པའོ།། མཁའ་ནང་དུ་གནས་པའི་ཁུ་རྔུལ་མྱང་བར་མོས་ལ། ཨོཾ་ཨཱཿཧཱུཾ། ཞེས་བརྗོད་པ་ནི་མཆོད་པ་ཆེན་པོའོ། །རྐང་པ་བརྒྱད་པའི་སྔགས་ཀྱིས་བསྟོད། ཐུན་བསྡུ་བར་འདོད་ན། རང་གི་སྙིང་གའི་ས་བོན་གྱི་འོད་ཟེར་གྱིས་སྣང་བ་ཐམས་ཅད་དཀྱིལ་འཁོར་གྱི་འཁོར་ལོར་སྦྱངས། རྟེན་དང་བརྟེན་པར་བཅས་པའི་དཀྱིལ་འཁོར་ལ་ཐིམ། དཀྱིལ་འཁོར་ཡང་རིམ་གྱིས་ཧཱུཾ་ཡིག་ལ་ཐིམ། ཧཱུཾ་ཡང་འོད་གསལ་དུ་ཞུགས། སླར་ཡང་ཕྱག་གཉིས་པའི་རྣམ་པར་ལངས་ཏེ་གོ་ཆ་གཉིས་ཀྱིས་རྒྱས་བཏབ་ལ་ཐུན་མཚམས་ཀྱི་བྱ་བ་ལ་འཇུག་གོ །རྫོགས་པའི་རིམ་པ་བསྒོམ་པར་འདོད་ན། བཟླས་པའི་སྔོན་དུའམ། དཀྱིལ་འཁོར་བསྡུས་པའི་མཐར་བསྒོམ་མོ། །རྒྱུན་གྱི་གཏོར་མའི་ཆོ་ག་བསྡུས་པ་ནི། མཻ་ཏྲི་བཅུ་གསུམ་མའི་སྒྲུབ་
ཐབས་སུ་བཤད་པ་ལྟར་ལས་མི་མགོའི་སྒྱེད་པུ་གསུམ་སྐྱེད་པ་བོར་བ་དང༌། བྲུཾ་ཨཾ་ཛྲིཾ་ཁཾ་ཧཱུཾ་ལས་རྫས་བཅུ་བསྐྱེད་ཅིང་དེ་རྣམས་ཀྱིས་མཚན་པ་བསྐྱེད་པ་ནི་ཁྱད་པར་རོ།། འབྲིང་པོ་ནི་མ་རྒྱུད་སྤྱིའི་ཞིང་སྐྱོང་གི་ཆོ་ག་ཉིད་ཡིན་ཞིང༌། རྒྱས་པར་ཞིང་སྐྱོང་གི་གཏོར་མའི་ཆོ་ག་ཆེན་པོ་ནི་ལོགས་ཤིག་ཏུ་འབྲི་བར་འགྱུར་རོ། །གོ་དོན་རྒྱས་པར་རྒྱུད་འགྲེལ་དང་ཀ་ལ་ཀལྤའི་སྒྲུབས་ཐབས་དང་བླ་མ་སྔ་མ་རྣམས་ཀྱི་ཡི་གེར་བལྟ་བར་བྱའོ། །ཚུལ་འདི་ཕྱི་མའི་དུས་འདིར་ནུབ་མཐོང་ནས། །བློ་དམན་རྣམས་ལ་མཆོག་ཏུ་མཁོ་བའི་ཕྱིར། །དོན་རྒྱས་ཤིན་ཏུ་ཉུང་ངུའི་ཚིག་ཏུ་སྡེབས། །གང་འདིའི་དགེ་བ་འགྲོ་བ་ཡོངས་ལ་བསྔོ། །དཔལ་རྡོ་རྗེ་མཁའ་འགྲོའི་སྒྲུབ་ཐབས་ཏེ་བཅུ་གཉིས་པའོ།། །།༈ ན་མཤྴཾ་ཝ་རཱ་ཡ། གསང་བ་མཆོག་གི་ཕོ་བྲང་དུ། །རྡོ་རྗེ་སེམས་དཔའ་བདེ་བའི་མཆོགགཅིག་པུ་རབ་ཏུ་ཆེ་བའི་ལྷ། །རྟག་ཏུ་བཞུགས་པ་དེ་ལ་འདུད། །སྟོང་ཉིད་ཡེ་ཤེས་རྡོ་རྗེ་ཡི། །ལྷ་མོ་དེ་ལའང་གུས་བཏུད་ནས། །རྡོ་རྗེ་མཁའ་འགྲོ་མ་རྣམས་ཀྱི། །སྒྲུབ་ཐབས་རྒྱ་མཚོ་འདིར་འཇུག་བྱ། །ད་ནི་འདིར་དཔལ་མཁའ་འགྲོ་རྒྱ་མཚོའི་རྒྱུད་ཀྱི་རྩ་བའི་དཀྱིལ་འཁོར་བསྒོམ་པར་འདོད་པ་ལ་དེ་བཤད་པར་བྱ་སྟེ། དེ་ཡང་རྒྱུད་ལས། སྔོན་དུ་ཕག་མོའི་དཀྱིལ་འཁོར་ནི། །བྲི་བྱ་དེ་ནས་ཧེ་རུ་ཀའི་འོ། །རྡོ་རྗེ་བུ་མོའམ་དེ་ནས་གཞན། །དེར་ནི་ཤེས་རབ་གཞུག་པར་བྱ། རྒྱུད་གཞན་དུ་ནི་དབང་བསྐུར་ལ། །ཚུལ་འདི་བསྟན་པར་མི་བྱའོ། །ཞེས་གསུངས། མི་གཡོ་བླ་མེད་ལས་ཀྱང་འདི་དང་འདྲ་བར་བཤད་པ་ལ་ཕྱིས་ཁ་ཅིག་རང་གི་དབང་མ་ཐོབ་ན་དབང་གཞན་ཐོབ་ཀྱང་མི་རུང་བའི་དོན་ཙམ་དུ་འཆད་མོད་ཚིག་དོན་ལ་མ་ཞུགས་ཏེ། རང་གི་དབང་མ་ཐོབ་ན་ཏ་ག་ལ་ཞིག །རང་གི་དབང་ཐོབ་ཀྱང་རྒྱུད་
གཞན་གྱི་དཀྱིལ་འཁོར་དུ་ཞུགས་པ་ལ་འདི་མི་སྟོན་ཞེས་པའི་དོན་དུ་འདུག་པས། མཁས་པ་རང་ཚོ་དང༌། མི་མཁས་ཀྱང་མཁས་པའི་ང་རྒྱལ་ཅན་སྐེ་འཁྲང་པོ་རྣམས་ཚིག་འདི་ལྟ་བུའི་དོན་གང་ཡིན་ད་དུང་རྟོགས་ཤིག །སྐབས་འདིར་རྒྱུད་འདིའི་དབང་བསྐུར་ཐོབ་པས་དེ་ལ་དང་པོར་ཞིང་སྐྱོང་རྣམས་ལ་གཏོར་མ་བྱིན་ཏེ་རང་གནས་སུ་བཏང༌། ཨོཾ་ཧཱུཾ། ཞེས་སྟན་བྱིན་གྱིས་རླབས། ཨོཾ་ཧྲཱིཿསྭཱཧཱ་ལན་གཉིས་ཀྱིས་ཁ་དང་ལག་པ་བྱིན་གྱིས་བརླབ། གཡོན་པའི་མཐིལ་དང་མཐེའུ་ཆུང་ནས་བརྩམས་ནས། སོར་མོ་རྣམས་ཀྱི་རྩ་བ་ལ། ཨོཾ་བཾ་ཧཾ་ཡོཾ་ཧྲིཾ་མོཾ། ཧྲེཾ་ཧྲིཾ། ཕཊ་ཕཊ། ཧཱུཾ་ཧཱུཾ། སོར་མོ་ལྔ་བསྡུས་པའི་འཛོམ་དང༌། མཐེ་བོང་ལ་སོགས་པའི་སེན་མོ་ལ། ཨོཾ་ཧ་ན་མ་ཧི། སྭཱཧཱ་ཧཱུཾ། བོ་ཥ་ཊ་ཧེ། ཧཱུཾ་ཧཱུཾ་ཧོཿ ཕཊ་ཧཾ། རྣམསས་འཁོད། བྱིན་གྱིས་རླབས་པའི་ནང་མཆོད། ལག་མཐིལ་གཡས་སུ་བཞག་སྟེ། སྲིན་ལག་གཡོན་པས་ཆོས་འབྱུང་བྲི། འབྲུ་གསུམ་ལན་མང་དུ་བརྗོད་ལ། ཡན་ལག་ལྔ་དང༌། མཆོད་རྫས་སོགས་ལ་བསང་གཏོར་བྱ། ཨོཾ་བཛྲ་བྷུ་མི་ཧཱུཾ། ཨོཾ་སརྦ་བིགྷྣཱན་ཨུཏྤ་ད་ཡ་ཧཱུཾ། ཨོཾ་ཨ་བཛྲ་རེ་ཁེ་ཧཱུཾ། ཨོཾ་ཧྲཱིཿསྭཱཧཱ། ཨོཾ་ཨརྐ་བུ་མ་ལེ་སྭཱཧཱ། ཨོཾ་ཙནྟྲ་བི་མ་ལེ་སྭཱཧཱ། ཞེས་པ་རྣམས་ཀྱིས་མཎྜལ་བྱ། རྡོ་རྗེའི་ཕྱག་རྒྱས་རེག་ཅིང༌། བྷུ་ར་བྷུ་ཝ་སྭཿ ཞེས་བྱིན་གྱིས་བརླབས། ཨོཾ་ཨཱཿསྠཱ་ནཾ་མེ་རཀྵ་ཧཱུཾ། ཨོཾ་ཨཱཿཨཏྨ་ན་མེ་རཀྵ་ཧཱུཾ། ཨོཾ་ཨཱཿཡོ་གཾ་མེ་རཀྵ་ཧཱུཾ། བར་འདིར་སྐྱབས་འགྲོ་སེམས་བསྐྱེད་བྱ། རྡོ་རྗེ་ཕྱག་རྒྱ་གནས་དྲུག་ཏུ་རེག་ལ། ཨོཾ་ཧཱ་སོགས་བརྗོད་པས་གོ་ཆ་བཅིངས། སྤྲོ་ན་དཔལ་ལྡན་རྡོ་རྗེ་མཁའ་འགྲོ༴ སོགས་ཤློ་ཀ་གཉིས་དང༌། སྲིད་པའི་
རྒྱ་མཚོར་ཡོངས་བྱིང་བ། །ཡང་དག་ཡོངས་སུ་སྒྲོལ་མཁས་པའི། །བླ་མ་དམ་པའི་དྲིན་གང་གིས། །བདག་ལ་ཡེ་ཤེས་འདི་བསྐྱེད་འདུད། །ཅེས་ཕྱག་བྱས་ནས་བཅོམ་ལྡན་འདས་འཁོར་བཅས་ལ་གཏོར་མ་འབུལ་བར་བྱའོ། །མདོར་བསྡུ་བའི་ཚེ། ནང་མཆོད་དང་ལག་པ་བྱིན་རླབས། སྐྱབས་འགྲོ་སེམས་བསྐྱེད་རྣམས་བྱ། གཞན་དེ་རྣམས་མ་གྲུབ་ཀྱང་ཉེས་པ་མེད་དོ། །རང་སྐད་ཅིག་གིས་ཧེ་རུ་ཀ་ཕྱག་བཅུ་གཉིས་པ་ཡུམ་དང་བཅས་པའི་སྐུར་གྱུར། སྙིང་གར་པཾ་ལས་པདྨ་དང་རཾ་ལས་ཉི་མའི་དཀྱིལ་འཁོར་གྱི་སྟེང་དུ། ཧཱུཾ་ནག་པོ། ཨོཾ་ཨ་ཨཱ༴ ནས་ཧ་ཀྵ་ཧཱུཾ་ཧཱུཾ་ཕཊ། ཧཱུཾ་གི་ནཱ་ད་ལས་ཡི་གེའི་འཕྲེང་བ་སྤྲོས། ལུས་ཀྱི་སྟོད་བར་སྨད་རྣམས་སུ། སྔོ་དམར་དཀར་བའི་འཕྲེང་བས་གཡོན་སྐོར་དུ་དཀྲིས། དེ་ལས་ཁམས་གསུམ་དུ་གཏོགས་པ་ཐམས་ཅད་དུ་འཁོར་ལོ་གསུམ་གྱི་ལྷ་ཚོགས་སྤྲོས་ཏེ་སྲིད་པ་གསུམ་གྱི་བགེགས་ཐམས་ཅད་བཅོམ་པར་གྱུར། རང་གི་སྤྱི་བོ་དང༌། དཔྲལ་པ་དང༌། མགྲིན་པ་དང༌། སྙིང་ག་རྣམས་ཀྱི་ཐད་ཀའི་ནམ་མཁའ་ལ། རིམ་པས་ཤྲཱི་ཧེ་རུ་ཀ་ཞེས་པའི་ཡི་གེ་བཞི་ཁ་དོག་སྔོན་པོའོ། །ཤྲཱི་ཧེ་རུ་ཀོ྅་ཧཾ། རྒྱས་པར་སྤྲོ་ན། ཤྲཱི་ཡིག་འབྱུང་བ་ཀུན་གྱི་དོན། ཞེས་སོགས་བརྗོད་ཅིང་དོན་སྒོམ་པར་སློབ་དཔོན་དག་གསུང་མོད། ཚིག་དེ་མ་བརྗོད་ཀྱང་དགོས་ངེས་པའི་ཚིག་དོན་ཆད་པ་མེད་དོ། །གཟུགས་ཀྱི་ཕུང་པོ་ལ་ནི་རྣམ་པར་སྣང་མཛད་དོ། །ཚོར་བའི་ཕུང་པོ་ལ་ནི་རྡོ་རྗེ་ཉི་མའོ། །འདུ་ཤེས་
ཀྱི་ཕུང་པོ་ལ་ནི་པདྨ་གར་གྱི་དབང་ཕྱུག་གོ །འདུ་བྱེད་ཀྱི་ཕུང་པོ་ལ་ནི་རྡོ་རྗེ་རྒྱལ་པོའོ། །རྣམ་པར་ཤེས་པའི་ཕུང་པོ་ལ་ནི་རྡོ་རྗེ་སེམས་དཔའོ། །ཕུང་པོ་ལྔ་པོ་ཐམས་ཅད་ཀྱི་དེ་བཞིན་ཉིད་ནི་ཤྲཱི་ཧེ་རུ་ཀ་རྡོ་རྗེའོ། །མིག་གཉིས་ལ་ནི་གཏི་མུག་རྡོ་རྗེའོ། །རྣ་བ་གཉིས་ལ་ནི་ཞེ་སྡང་རྡོ་རྗེའོ། །སྣ་དག་ལ་ནི་ཕྲག་དོག་རྡོ་རྗེའོ། །ལྕེ་ལ་ནི་འདོད་ཆགས་རྡོ་རྗེའོ། །ལུས་ལ་ནི་སེར་སྣ་རྡོ་རྗེའོ། །སྐྱེ་མཆེད་ཐམས་ཅད་ལ་ནི་དབང་ཕྱུག་རྡོ་རྗེའོ། །སའི་ཁམས་ལ་ནི་ལྟུང་བྱེད་མའོ། །ཆུའི་ཁམས་ལ་ནི་གསོད་བྱེད་མའོ། །མེའི་ཁམས་ལ་ནི་འགུགས་བྱེད་མའོ། །རླུང་གི་ཁམས་ལ་ནི་པདྨ་གར་གྱི་དབང་ཕྱུག་གོ །ནམ་མཁའི་ཁམས་ལ་ནི་པདྨ་དྲ་བ་ཅན་ནོ། །དག་པ་གསུམ་དང་ཕུང་ཁམས་བྱིན་གྱིས་རླབས་པ་དེ་དག་ནི། རྟེན་བྱིན་གྱིས་རླབས་པ་ཞེས་བྱའོ། །སྡིགས་མཛུབ་དང་བཅས་པའི་སེ་གོལ་གདབ་ཅིང༌། ཨོཾ་སུམྦྷ་ནི་སུམྦྷ་ཀཱ་ཡི་ཀཾ་ཧཱུཾ་ཧཱུཾ་ཕཊ། ཨོཾ་གྲྀཧྞ་གྲྀཧྞ་ཝཱ་ཙཱི་ཀཾ་ཧཱུཾ་ཧཱུཾ་ཕཊ། ཨོཾ་གྲྀཧྞ་པཱ་ཡ་གྲྀཧྞ་པཱ་ཡ་ཙ་ར་པི་མཾ་ཧཱུཾ་ཧཱུཾ་ཕཊ། ཨོཾ་ཨཱ་ན་ཡ་ཧོ་བྷ་ག་ཝན་བཛྲ་ཛྙཱ་ནི་ཀཾ་ཧཱུཾ་ཧཱུཾ་ཕཊ། སྔགས་རྣམས་ནག་པོ། ལྗང་ཁུ། དམར་པོ། སེར་པོའི་འོད་ཀྱིས་ཚངས་པའི་འཇིག་རྟེན་ནས་གསེར་གྱི་ས་གཞིའི་བར་དུ་ཁྱབ་པ། འོག་ཏུ་རཾ་ལས་ཉི་མ་ལ་གནས་པའི་ཧཱུཾ་ལས་སྣ་ཚོགས་རྡོ་རྗེ་ཧཱུཾ་གིས་མཚན་པའི་རང་བཞིན་གྱི་རྡོ་རྗེ་ས་གཞི། ཕྱོགས་མཚམས་སུ་སྔགས་ཀྱི་འོད་ཟེར་ལས་བྱུང་བའི་རྡོ་རྗེ་རྭ་བ་གྲུ་བཞི་ཕྱོགས་ཀྱི་མདོག་ཅན། སྟེང་དུ་རྡོ་རྗེའི་བླ་རེ་དང་གུར་
དེའི་ཕྱི་རོལ་དུ་རྡོ་རྗེའི་རྩེ་ལྔ་པ་ལྗང་ཁུའི་མདའི་དྲྭ་བ་རྣམས་སུ་གྱུར། མཚམས་རྔམ་དང་བཅས་པའི་སུམ་བྷ་ཚར་གཉིས་བརྗོད། སྔགས་རེ་རེའི་འོད་ཟེར་ལས་བྱུང་བ། ཁྭ་གདོང་མ་ལ་སོགས་པའི་སྒོ་མ་བཞི། གཉིས་གཉིས་འདྲེས་པའི་འོད་ཟེར་ལས་བྱུང་བ། གཤིན་རྗེ་བརྟན་མ་ལ་སོགས་པའི་མཚམས་མ་བཞི་རྣམས་ཐོ་བ་དང་རང་འདྲའི་ཕུར་བུ་ཐོགས་པ་སྤྲོས། ཨོཾ་བིགྷྣཱན་ཨ་ན་ཡ་ཛཿ ཞེས་བསྐུལ་བས། ཕྱོགས་བཅུའི་བགེགས་རྣམས་བཀུག ཧཱུཾ་རྭ་བའི་ཕྱི་རོལ་དུ་འབྲུབ་ཁུང་མེས་གང་བ་བྱུང་བ་རྣམས་སུ་བཅུག ཕུར་བུས་སྤྱི་བོར་གདབ། ཨོཾ་གྷ་གྷ༴ སོགས་བརྗོད། ཐོ་བས་བརྡུངས། ཨོཾ་བཛྲ་མུཏ་ག་ར༴ སོགས་བརྗོད། བགེགས་རྣམས་སྟོང་པའི་དབྱིངས་སུ་སྦྱངས། ཕོ་ཉ་མོ་རྣམས་ར་བ་ལ་ཐིམ། འོད་ཟེར་གྱི་ཐིག་ལེ་ཕྱིར་འཕྲོས་པས། འཁོར་ལོ་དང༌། པདྨ་དང༌། རྡོ་རྗེ་དང༌། མེའི་རྭ་བ་ཟླུམ་པོ་རྣམས་སུ་གྱུར། འོག་གི་ཧཱུཾ་ཞུ་བས་རྡོ་རྗེ་ཕྲ་མོའི་བར་མཚམས་མེད་པར་གཏམས། བདག་དང་འགྲོ་བ་ཐམས་ཅད་ཀུན་ནས་བགེགས་དང་བྲལ་བའོ། །དེ་དག་ནི་བསྲུང་བའི་འཁོར་ལོའོ། །མཎྜལ་གྱི་དབུས་དང་ཕྱོགས་མཚམས་བརྒྱད་དུ་ཚོམ་བུ་དགོད་ཅིང༌། ཨོཾ་བཛྲ་ཀུ་རུ་སྭཱཧཱ། ཨོཾ་སརྦ་སུནྡ་རི་སྭཱཧཱ། ཨོཾ་པྲི་ཡ་ཨུད་ཏ་མ་སྭཱཧཱ། ཨོཾ་ད་མ་གཱ་ཏཱ་རཱ་སྭཱཧཱ། ཨོཾ་བི་ཝཱ་ས་བཛྲ་སྭཱཧཱ། ཨོཾ་བུདྡྷ་ལོ་ཙ་ནེ་སྭཱཧཱ། ཨོཾ་མཱ་མ་ཀཱི་སྭཱཧཱ། ཨོཾ་པཎྜ་ར་ཝ་སི་སྭཱཧཱ། ཨོཾ་ཏཱ་རཱ་སྭཱཧཱ། རང་གི་
སྙིང་གའི་ས་བོན་ལས་འཕྲོས་པའི་འོད་ཟེར་གྱིས། བླ་མ་དང་དཀྱིལ་འཁོར་གྱི་འཁོར་ལོ་མདུན་དུ་སྤྱན་དྲངས། མཎྜལ་གྱི་དབུས་ཀྱི་མེ་ཏོག་གི་སྟེང་དུ། ལྷ་ཚོགས་རྣམས་རང་རང་གི་རྣམ་པ་དང༌། བླ་མ་རྡོ་རྗེ་སེམས་དཔའི་རོལ་པས་བཞུགས། ཤར་དུ་ཀུན་མཛེས་མ་སྔོན་མོ། བྱང་དུ་དགའ་མཆོག་མ་ལྗང་ཁུ། ནུབ་ཏུ་ཤིན་ཏུ་བརྩེ་མ་དམར་མོ། ལྷོ་རུ་རོལ་པའི་རྡོ་རྗེ་མ་སེར་མོ། བཞི་ཆར་ཡང་སྙེམ་པ་རིན་པོ་ཆེ་དང་མཆོད་པ་སྣ་ཚོགས་ཀྱིས་བཀང་ནས། གཙོ་བོ་ལ་བསྟོད་པ། མེར་སྤྱན་མ་དཀར་མོ་འཁོར་ལོ། བདེན་བྲལ་དུ་མཱ་མ་ཀཱི་སྔོན་མོ་རྡོ་རྗེ། རླུང་དུ་གོས་དཀར་མོ་དམར་མོ་པདྨ། དབང་ལྡན་དུ་སྒྲོལ་མ་ལྗང་ཁུ་ཨུཏྤལ། བཞི་ཆར་ཡང་གཡས་རང་རྟགས་དང༌། གཡོན་མཆོད་པ་སྣ་ཚོགས་འཛིན་པ། ལྷ་མོ་བརྒྱད་པོ་ཐམས་ཅད་ཞི་ཞིང་སྒེག་པ། རོལ་པའི་འདུག་སྟངས་ཅན་ནོ། །ཨོཾ་ཨཱཿཧཱུཾ། ལན་གསུམ་གྱིས་མགྲོན་ལ་བསངས་གཏོར་བྱ། ཨོཾ་པྲ་ཝ་ར་སཏྐ་ར་པཱ་དྱཱཾ་པྲ་ཏཱིཙྪ་སྭཱཧཱ། དེ་བཞིན་དུ། ཨརྒྷཾ༴ བར་འདིར་ལྷ་སོ་སོའི་སྔགས་ཀྱིས་མེ་ཏོག་འབུལ་བར་བཤད་ཀྱང༌། ཡུན་རིང་དུ་ཐོགས་པའི་ཕྱིར་དེང་སང་ལག་ལེན་མི་མཛད་དོ། །ཨོཾ་ཨཱཿབཛྲ་པུཥྤེ་ཧཱུཾ་སོགས་ཉེར་སྤྱོད་ལྔས་མཆོད། སྙིང་གའི་ཧཱུཾ་ལས་བྱུང་བའི་རིག་མ་བཅུ་དྲུག་གིས་མཆོད་པར་གྱུར། ཨོཾ་བཛྲ་ཝཱི་ནི་ཧཱུཾ་ཧཱུཾ་ཕཊ༴ ནས། ཨོཾ་དྷརྨ་དྷ་ཏུ་བཛྲི་ཧཱུཾ་ཧཱུཾ་ཕཊ། རྐང་པ་ཞེ་བརྒྱད་པའི་རྐང་པ་རེ་རེའི་འགོ་རུ་ཨོཾ་རེ་དང༌། མཇུག་ཏུ་ཧཱུཾ་ཧཱུཾ་ཕཊ་རེ་སྦྱར་བས་བསྟོད་དེ། ཨོཾ་ན་མ་ཤྲཱི་བཛྲ་ཌཱ་ཀ་མ་ཧཱ་བཱི་ར་ཝཱི་རེ་ཤྭ་རཱ་ཡ་ཧཱུཾ་ཧཱུཾ་ཕཊ། ཅེས་པ་ནས། ཨོཾ་གྲསྟ་པཱ་ཏ་པྲ་བཱ་ཏ་མ་ཧཱ་མ་ཏེ་ཧཱུཾ་ཧཱུཾ་ཕཊ་ཅེས་
པའི་བར་རོ། །དེ་ལ་སྐབས་འདིར་རྐང་པ་ཞེ་བརྒྱད་པ། ཨོཾ་དང་ཧཱུཾ་ཕཊ་སྤེལ་བས་ནང་མཆོད་འབུལ་ཞིང༌། མ་སྤེལ་བས་བསྟོད་པ་བྱེད་པའི་ལུགས་ནི་མི་ལེགས་པར་སྣང་ལ། ཅི་སྟེ་ནང་མཆོད་འབུལ་བར་འདོད་ན། རང་སྔགས་སམ་འབྲུ་གསུམ་གྱི་ཕུལ་ན་ལེགས་སོ། །སྤྲོ་ན། རྡོ་རྗེ་འཆང་དབང་རྡོ་རྗེ་རྣལ་འབྱོར་མ། །སྤྱན་རས་གཟིགས་དབང་ཤཱ་བཱ་རི་པ་དང༌། །མཻ་ཏྲི་པ་དང་རྒྱ་གར་ཕྱག་ན་དང༌། །པདྨ་རྡོ་རྗེ་ཛ་ཡ་སྱ་ན་དང༌། །སུམ་ལོ་གྲགས་རྒྱལ་ས་པཎ་སྐྱོབ་པ་དཔལ། །རྒྱལ་ཚ་ཆོས་དབང་མང་འཁར་ལོ་ཙཱ་དང༌། །བག་སྟོན་ཚུལ་རྒྱལ་ངག་དབང་བྱང་སེང་བ། །ས་བཟང་འཕགས་པ་མཁན་ཆེན་སེང་གེ་དཔལ། །བྱམས་པ་གླིང་པ་རྡོ་རྗེ་གདན་པ་དང༌། །རྒྱ་སྟོན་བྱང་དབང་རྗེ་བཙུན་གྲོལ་མཆོག་དང༌། །བྱམས་པ་ལྷུན་གྲུབ་རྣམས་ལ་གུས་པས་མཆོད། །ཅེས་པ་འདི་རྗེ་བཙུན་གྲོལ་མཆོག་གིས་གསན་ཡིག་ལྟར་བཀོད་པ་ཡིན། ཡང་ན་སྲིན་པོ་རི་ནས་རྒྱུད་པའམ། རྒྱལ་ཚ་ཆོས་དབང་མང་འཁར་ལོ་ཙཱ་བ། །གློ་ཆེན་ཡེ་ཤེས་མགོན་དང་དར་མ་བཟང༌། །གྲགས་ཆེན་སྤང་ཁང་པ་དང་རིན་རྩོན་པ། །མཁན་ཆེན་བྱང་སེང་ཐེག་ཆེན་ཆོས་རྗེ་དང༌། །བྲག་ཐོག་བསོད་བཟང་འཇིགས་མེད་[རྡོ་རྗེ་གདན་པ་]དཔའ་བོ་དང༌། རྒྱ་སྟོན་མན་གོང་བཞིན། ཡང་ན། སུམ་ལོ་མཁས་པ་མུ་དྲ་པ་དང༌། སེང་གེ་རྒྱལ་མཚན་ཡར་ཀླུངས་ལོ་ཙཱ་བ། རོང་བ་ཤེར་སིང་ཀྱི་སྟོན་གྲགས་རྒྱལ་དང༌། ཀུན་མཁྱེན་ཆེན་པོ་སློབ་དཔོན་ཆོས་གྲགས་དཔལ། བྱང་སེང་སོགས་སུམ་ལོ་མན་ཆད་སྣ་ཚོགས་སུ་གྱེས་པའོ། །ཉེ་རྒྱུད། ཧེ་རུ་ཀ་དཔལ་རྡོ་རྗེ་རྣལ་འབྱོར་མ། །ཤཱ་བཱ་རི་པ་སེམས་ཀྱི་མདུད་[རྗེ་གྲོལ་མཆོག་གོ་]གྲོལ་དང༌།
སངས་རྒྱས་ཀུན་འདུས་ལྷ་དབང་གྲགས་པ་སྟེ། །ཡིད་བཞིན་ནོར་བུའི་བླ་མ་རྣམས་ལ་མཆོད། ཅེས་སོ། །ཀུན་མཁྱེན་ཡེ་ཤེས་ཕུང་པོ་ཅན། །འགྲོ་དོན་རབ་ཏུ་སྒྲུབ་པ་པོ། །ཡིད་བཞིན་ནོར་བུ་འདིར་འབྱུང་བ། །དཔལ་སྡོམ་ཁྱོད་ལ་ཕྱག་འཚལ་ལོ། །སྣ་ཚོགས་ཡེ་ཤེས་ཆེན་པོས་གཡོགས། །ཐམས་ཅད་བདག་ཉིད་རྟག་ཏུ་བཞུགས། །ཐུགས་རྗེས་ཁྲོ་བ་དྲག་ཆེན་པོ། །དཔལ་སྡོམ་ཁྱོད་ལ་ཕྱག་འཚལ་ལོ། །བྱས་དང་བྱེད་དུ་བཅུག་དང་ཡི་རང་བའི། །སྡིག་པ་མ་ལུས་སྐྱོན་ཀུན་བཅོམ་པ་ཡི། །སྤྱན་སྔར་སོ་སོར་བཤགས་ཤིང་སླར་ཡང་ནི། །མི་བྱེད་པ་ཡི་སྡོམ་པ་གཟུང་བར་བགྱི། །ཉན་ཐོས་རང་རྒྱལ་བླ་མེད་རྒྱལ་བ་དང༌། །རྒྱལ་བའི་སྲས་ཀྱིས་བསྔགས་པའི་དགེ་བ་གང༌། །དེ་དག་ཀུན་ལ་བདག་གིས་རྗེས་ཡི་རང༌། །བྱང་ཆུབ་ཡང་དག་ཡོངས་སུ་བསྔོ་བར་བགྱི། །རྒྱལ་བ་དཀོན་མཆོག་ལ་སོགས་གསུམ་པོ་ལ། །དངོས་པོ་ཀུན་གྱིས་བདག་ནི་སྐྱབས་སུ་མཆི། །བྱང་ཆུབ་མཆོག་ཏུ་སེམས་བསྐྱེད་དེ་བཞིན་དུ། །བླ་ན་མེད་པའི་ལམ་ལ་བརྟེན་པར་བགྱིད། །རྒྱུན་བཤགས་འདི་ཛྙཱ་ཛཱ་ཡ་སྱ་ནའི་གཞུང༌། སུམ་པ་ལོ་ཙཱ་བས་བསྒྱུར་བ་ལྟར་ན། རྐང་པ་དྲུག་ལས་མེད་པ་སོགས་འགྱུར་མི་བདེ་བ་བག་རེ་སྣང་བས་གཞུང་གཞན་འགྱུར་བདེ་བ་ལྟར་བྲིས་སོ། །ཨོཾ་བཛྲ་སཏྭ་གུ་རུ་པཱ་དེ་བྷྱཿསརྦ་སཏྭ་ཨུ་པ་ཀཱ་ར་ཎཱ་ཡ་སྭཱཧཱ། ཞེས་མེ་ཏོག་གཏོར། ཚོགས་ཞིང་གི་དཀྱིལ་འཁོར་བཅས་རང་ལ་ཐིམ་པའམ། ཨོཾ་ཨཱཿབཛྲ་མུཿཧཱུཾ་ཞེས་གཤེགས་སུ་གསོལ། དེ་ནས་ཚད་མེད་བཞི་སྤྱི་དང་མཐུན་པར་བསྒོམ་སྟེ། བསོད་ནམས་ཚོགས་གསོག་གོ །ཨོཾ་སརྦ་དྷརྨཱཿཤཱུ་ནྱ་
སྭ་བྷཱ་ཝ་ཤུདྡྷོ྅་ཧཾ། ཨོཾ་སྭ་བྷཱ་ཝ་ཤུདྡྷཿསརྦ་དྷརྨ་སྭཱ་བྷཱ་ཝ་ཤུདྡྷོ྅་ཧཾ། ཨོཾ་ཤུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཏྨ་ཀོ྅་ཧཾ། ཨོཾ་ཡོ་ག་ཤུདྡྷཿསརྦ་དྷརྨ་ཡོ་ག་ཤུདྡྷོ྅་ཧཾ། འདིའི་སྔགས་གཉིས་པ་དེས་ཐམས་ཅད་ལ་འདྲ་མིན་ཞིག་ཡོད་པ་ནི། རྒྱ་དཔེའམ་ཐོག་མའི་བོད་དཔེ་གང་རུང་མ་དག་པར་གསལ་ལོ། །དེ་ལྟ་བུའི་སྔགས་ཀྱི་དོན་སྒོམ་པ་ནི་ཡེ་ཤེས་ཚོགས་གསོག་གོ །སྟོང་པའི་ངང་ལས་རང་གི་སེམས་ཉིད་ནཱ་ད་དམར་སྐྱ་ནམ་མཁར་གནས་པར་གྱུར། དེ་ལས་ཐིག་ལེ། དེ་ལས་ཟླ་ཕྱེད། དེ་ལས་མགོ་བོ། དེ་ལས་ཧ། དེ་ལས་ཨཱུ་ཡིག་གྲུབ་པའི་ཚུལ་གྱིས། ཧཱུཾ་ཡེ་ཤེས་ལྔའི་ངོ་བོ། དེ་དང་ལྷན་ཅིག་གྲུབ་པའི་རྡོ་རྗེའི་ས་གཞི། རྭ་བ། དྲྭ་བ། གུར་བླ་རེ། ཕྱི་རོལ་འཁོར་ལོ་དང༌། པདྨ་དང༌། རྡོ་རྗེ་དང༌། མེའི་རྭ་བས་བསྐོར་བ་ཐམས་ཅད་ཀྱང་དབྱིབས་ཟླུམ་པོའོ། །སྲུང་བའི་འཁོར་ལོ་དེའི་ནང་འོག་གི་ཆར། ཡཾ་ལས་རླུང་གི་དཀྱིལ་འཁོར་སྔོན་པོ་བཟླ་གམ་ཡཾ་དང་བ་དན་གྱིས་མཚན་པ། རཾ་ལས་མེའི་དཀྱིལ་འཁོར་དམར་པོ་གྲུ་གསུམ་རཾ་དང་འབར་བས་མཚན་པ། བཾ་ལས་ཆུའི་དཀྱིལ་འཁོར་དཀར་པོ་ཟླུམ་པོ་བཾ་དང་བུམ་པས་མཚན་པ། ལཾ་ལས་སའི་དཀྱིལ་འཁོར་སེར་པོ་གྲུ་བཞི་ལཾ་དང་རྡོ་རྗེ་རྩེ་གསུམ་པས་མཚན་པ། སུཾ་ལས་རི་རབ་རིན་པོ་ཆེ་སྣ་བཞི་ལས་གྲུབ་པ། ཁ་དོག་བཞི་དང་ཟུར་བཞི་པ། རྩེ་མོ་བརྒྱད་པ་ལ་སུམ་གྱིས་མཚན་པ། པཾ་ལས་སྣ་ཚོགས་པདྨ་ལ་གནས་པའི་ཧཱུཾ། དེ་ཡོངས་སུ་གྱུར་པ་ལས་
སྣ་ཚོགས་རྡོ་རྗེ་ཤར་ནགབྱང་ལྗང༌། ནུབ་དམར། ལྷོ་སེར། ལྟེ་བ་དཀར་བ། འབྱུང་བ་རྣམས་ཞུ་ཞིང་སླ་བའི་ངོ་བོར་གྱུར་པས། རི་རབ་འོག་གི་ཆ་ལ་སོང་ལ། འབྱུང་བཞི་ཞུ་བ་རྣམས་སྣ་ཚོགས་རྡོ་རྗེའི་སྟེང་དུ་གནས་པ་ཡོངས་སུ་གྱུར་པ་ལས། གཞལ་མེད་ཁང་ཆེན་པོ་རྡོ་རྗེའི་རང་བཞིན་གྱིས་ས་གཞི་ལ་གནས་ཤིང་དུར་ཁྲོད་བརྒྱད་ཀྱིས་ཡོངས་སུ་བསྐོར་བ། ཆོས་འབྱུང་གི་ཕྱག་རྒྱའི་ནང་དུ་ཆུད་པ་ཁོ་ན་ཕྱི་ནང་དུ་རིམ་པ་བཞི་ལས། ཕོ་བྲང་ནང་མ་གསུམ་ཟླུམ་པོ། ཕྱི་མ་གྲུ་བཞིའོ། །ཕོ་བྲང་དང་པོ་ལྷན་ཅིག་སྐྱེས་པའི་སྐུའི་འཁོར་ལོ་ནི། ནག་པོ་དང་སྔོན་པོའི་རྩིག་པ་རིམ་པ་གཉིས་དང་ལྡན་པ། ཆོས་འབྱུང་ཟུར་གསུམ་པའི་ནང་དུ་ཆུད་པ། ཕོ་བྲང་གཉིས་པ་ཆོས་ཀྱི་སྐུའི་དཀྱིལ་འཁོར་ནི། ནག་དམར་དཀར་བའི་རྩིག་པ་རིམ་པ་གསུམ་དང་ལྡན་པ། ཆོས་འབྱུང་ཟུར་བཞི་པའི་ནང་དུ་ཆུད་པ། ཕོ་བྲང་གསུམ་པ་ལོངས་སྤྱོད་རྫོགས་པའི་སྐུའི་དཀྱིལ་འཁོར་ནི། སྔོ་སེར་དམར་ལྗང་བའི་རྩིག་པ་རིམ་བཞི་དང་ལྡན་པ། ཆོས་འབྱུང་ཟུར་ལྔ་པའི་ནང་དུ་ཆུད་པ། ཕོ་བྲང་བཞི་པ་སྤྲུལ་པའི་སྐུའི་དཀྱིལ་འཁོར་ནི། སྔོ་སེར་དམར་ལྗང་དཀར་བའི་རྩིག་པ་རིམ་པ་ལྔ་དང་ལྡན་པ། ཆོས་འབྱུང་ཟུར་དྲུག་པའི་ནང་དུ་ཆུད་པའོ། །དཀྱིལ་འཁོར་དང་པོའི་དབུས་སུ་སྣ་ཚོགས་ཐིག་ལེའི་འཁོར་ལོ། པདྨ་འདབ་མ་བཞི་བཅུ་རྩ་བརྒྱད་པ་སྟེ། དེའི་ལྟེ་བར་ཉི་མ་ལ་འཇིགས་བྱེད་ཆེན་པོ་དང་དུས་ཀྱི་མཚན་མའོ། །དེའི་ཕྱི་རོལ་
དུ་རྡོ་རྗེའི་འཁོར་ལོ་སྔོ་ནག་མུ་ཁྱུད་ལ་གྲི་གུག་གི་འཕྲེང་བས་བསྐོར་བ། དེའི་ཕྱི་རོལ་དུ་སྙིང་པོའི་འཁོར་ལོ་དམར་སེར་རིན་པོ་ཆེའི་འཕྲེང་བས་བསྐོར་བ། དེའི་ཕྱི་རོལ་དུ་ཡོན་ཏན་གྱི་འཁོར་ལོ་དཀར་དམར་རྡོ་རྗེའི་འཕྲེང་བའི་བསྐོར་བ། དེའི་ཕྱི་རོལ་སྐལ་བ་བཟང་པོའི་ལྷའི་སྣམ་བུའོ། །སྒོའི་ཕྱི་རོལ་དུ་ནམ་མཁའི་ཁོར་ཡུག་ལ་གནས་པའི་དུར་ཁྲོད་ཆེན་པོ་བརྒྱད་ནི། ཤར་ནས་གཡོན་བསྐོར་གྱིས། གཏུམ་དྲག །ཚང་ཚིང་ཅན། འབར་བ་འཁྲིགས་པའི་ཀེང་རུས། འཇིགས་སྡེ། དབང་སྡེ། དབང་ལྡན་ནས་གཡོན་སྐོར་གྱིས། ཧ་ཧ་རྒོད་པ། དཔལ་གྱི་ནགས། མུན་པ་དྲག་པོ། ཀི་ལི་ཀི་ལིའི་སྒྲ་སྒྲོག་པ་རྣམས་སོ། །དེ་དག་ན་གནས་པའི་ཤིང་ཆེན་པོ་བརྒྱད་ནི། ཤི་རི་ཤ ཨ་ཤྭཏྠ་ཀཾ་ཀ་ལ་ཙུ་ཏ། ནྱ་གྲོ་དྷ། ཀ་རཉྫ། ལ་ཏ་པརྴ་བཱརྠ་པའོ། ཕྱོགས་སྐྱོང་བ་བརྒྱད་ནི། དབང་པོ། གནོད་སྦྱིན། ཀླུའི་དབང་པོ། གཤིན་རྗེའི་བདག་པོ། འབྱུང་པོའི་བདག་པོ། བསྲེག་ཟའི་བདག་པོ། སྲིན་པོའི་བདག་པོ། རླུང་གི་བདག་པོ། ཀླུ་ཆེན་པོ་བརྒྱད་ནི། ནོར་རྒྱས། འཇོག་པོ། སྟོབས་ཀྱི་རྒྱུ། པདྨ། པདྨ་ཆེན་པོ། ཧུ་ལུ་ཧུ་ལུ། རིགས་ལྡན། དུང་སྐྱོང་ངོ༌། །སྤྲིན་གྱི་བདག་པོ་བརྒྱད་ནི། སྒྲ་སྒྲོགས། འུར་སྒྲོགས། དྲག་པོ་འཁྱིལ་བ། འཐུག་པོ། གང་བ། ཆར་འབེབས་གཏུམ་པོའོ། །དཀྱིལ་འཁོར་གཉིས་པའི་དབུས་སུ། ནམ་མཁའི་དཀྱིལ་འཁོར་འདམ་སྐྱེས་སྔོན་པོའི་མདོག་ཅན་པདྨའི་འཕྲེང་བས་བསྐོར་བ། དེའི་ཕྱི་རོལ་དུ་རླུང་གི་འཁོར་ལོ་སྔོ་ལྗང་ངམ་སྣ་ཚོགས་པའི་མདོག་ཅན་འཁོར་ལོའི་
འཕྲེང་བས་བསྐོར་བ། དེའི་ཕྱི་རོལ་དུ་སའི་འཁོར་ལོ་སེར་པོ་རལ་གྲིའི་འཕྲེང་བས་བསྐོར་བ། དེའི་ཕྱི་རོལ་དུ་སྐལ་པ་བཟང་པོའི་ལྷའི་སྣམ་བུའོ། །སྒོའི་ཕྱི་རོལ་དུ་མེའི་ཁོར་ཡུག་ལ་གནས་པའི་དུར་ཁྲོད་བརྒྱད་ནི། གསོད་བྱེད། ཀུན་ཏུ་སྐྲག་བྱེད། འཇིགས་ཆེན། །འཇིགས་བྱེད། སྐྲོད་བྱེད། སྡང་བྱེད། ལྐུགས་བྱེད། རེངས་བྱེད་དོ། །ཤིང་བརྒྱད་ནི། གུ་ཡོ། སྟར་ཀཱ ནཱ་རི་ལ། སེ་འབྲུ བིལ་བ། ཀྱུ་རུ་ར། བི་ཛྙཱ། རག་ཤའོ། །ཕྱོགས་སྐྱོང་མ་བརྒྱད་ནི། དབང་མོ། གནོད་སྦྱིན་མོ། ཆུ་ལྷ་མོ། གཤིན་རྗེ་མོ། འབྱུང་མོ། དྲང་སྲོང་མོ། སྲིན་མོ། རླུང་གི་ཆུང་མའོ། །དཀྱིལ་འཁོར་གསུམ་པའི་དབུས་སུ་མེའི་འཁོར་ལོ་དམར་པོ་སྣ་ཚོགས་རྡོ་རྗེའི་འཕྲེང་བས་བསྐོར་བ། དེའི་ཕྱིར་རོལ་དུ་ཆུའི་འཁོར་ལོ་དཀར་པོ་ཐོད་པའི་འཕྲེང་བས་བསྐོར་བ། དེའི་ཕྱི་རོལ་དུ་ཡེ་ཤེས་ཀྱི་འཁོར་ལོ་ལྗང་ཁུའམ་ཁྲ་བོ་མགོ་བོའི་འཕྲེང་བས་བསྐོར་བ། དེའི་ཕྱི་རོལ་དུ་སྐལ་པ་བཟང་པོའི་ལྷའི་སྣམ་བུའོ། །སྒོའི་ཕྱི་རོལ་དུ་ཆུའི་ཁོར་ཡུག་ལ་གནས་པའི་དུར་ཁྲོད་བརྒྱད་ནི། བྱིས་པ་ཤི་བ། ལྷག་མ་ཟ་བ། མི་བཟད་པའི་གཡུལ། མཆེ་བ་ཀུན། དུ་བ་མུན་ནག ནང་གི་མེ། ཧ་ཧའི་སྒྲ། སྒྲ་ཆེན་པོའོ། །ཤིང་བརྒྱད་ནི། ཙན་དན། ག་བུར། ཛཱ་ཏཱི། ཨེ་ལ། ནཱ་ག་གེ་སར། ཙམ་པ་ཀ ཧུན་ཏུ་རུ། ལྷའི་ཤིང་ངོ༌། །འཇིགས་རྟེན་སྐྱོང་བ་བརྒྱད་ནི། ཉི་མ་མེ་འབར་བ་འཛིན་པ། བསིལ་པ་རལ་གྲི་འཛིན་པ། སའི་བུ་ཆུ་གྲི་འཛིན་པ། རི་བོ་
ཅན་སྐྱེས་མདུང་རིང་འཛིན་པ། བླ་མ་སྤུའི་གྲི་འཛིན་པ། ངན་སྤོང་བྲག་རི་འཛིན་པ། ཉི་མའི་བུ་གློག་འཛིན་པ། ལྷ་མིན་མགོ་བོ་མཚོན་ཆ་སྣ་ཚོགས་ཀྱི་ཆར་འབེབས་པ་སྟེ་ཐམས་ཅད་ཀྱང་བཞིན་ཤིན་ཏུ་ཁྲོས་པའོ། །གྲུབ་པའི་སྐྱེས་བུ་བརྒྱད་ནི། རལ་གྲི་མིག་སྨན་རིལ་བུ་རྐང་བྱུག བཅུད་ལེན། མཆིལ་ལྷམ། དངུལ་ཆུ། ས་འོག་ཐོབ་པ་རྣམས་སོ། །དཀྱིལ་འཁོར་བཞི་པའི་དབུས་སུ་ཐུགས་ཀྱི་འཁོར་ལོ་ནག་པོ་ཀེང་རུས་ཀྱི་འཕྲེང་བས་བསྐོར་བ། དེའི་ཕྱི་རོལ་དུ་གསུང་གི་འཁོར་ལོ་དམར་པོ་ཞགས་པའི་འཕྲེང་བས་བསྐོར་བ། དེའི་ཕྱི་རོལ་དུ་སྐུའི་འཁོར་ལོ་དཀར་དམར་སྔོ་བའི་མདོག་ཅན། མུ་ཁྱུད་ལ་ལྕགས་ཀྱུའི་འཕྲེང་བའི་ཡོངས་སུ་བསྐོར་བའོ། །དེའི་ཕྱིར་རོལ་དུ་སྐལ་པ་བཟང་པོའི་ལྷའི་སྣམ་བུའོ། །སྲུང་བའི་འཁོར་ལོའི་ཕྱི་རོལ་ཏུ་རླུང་གི་ཁོར་ཡུག་ལ་གནས་པའི་དུར་ཁྲོད་བརྒྱད་ནི། ཚིག་པ། མ་ཚིག་པ། དུམ་བུར་གྱུར་པ། མ་བརྟུབས་པ། འཇིགས་སུ་རུང་བ། འཇིགས་པར་བྱེད་པ། གསལ་ཤིང་གིས་ཕུག་པ། སྟེང་ནས་བཏགས་པའོ། །ཤིང་བརྒྱད་ནི། ཤལྨ་ལི། མྱ་ངན་མེད་པ། ཡོངས་འདུ། ཨུ་དུམྦ་ར། ཌོམྦ་རི། གམྦྷ་རི། རྒྱ་ཤུག །བ་རུ་རའོ། །འཇིག་རྟེན་སྐྱོང་བ་ནི། དམྱལ་སྲུང་ཆེན་པོ་བརྒྱད་དོ། །དེ་ལ་གཞལ་མེད་ཁང་རིམ་པ་རེ་རེའི་ནང་དུ་
ཆུད་པའི་འཁོར་ལོ་རིམ་པ་གསུམ་གསུམ་སྟེ། བཅུ་གཉིས་པོ་ཐམས་ཅད་ཀྱང་སོ་སོར་རྩིབས་སུམ་ཅུ་རྩ་དྲུག་དང་བཅས་པ། གཞལ་མེད་ཁང་རྣམས་ཀྱང་ཕ་གུ་དང༌། གསེར་གྱི་སྣམ་བུ་དང༌། དྲྭ་ཕྱེད་དང༌། ཤར་བུ་དང༌། མདའ་ཡབ་དང༌། གཟུངས་མ་རྣམས་དང་བཅས་པའི་ཁ་ཁྱེར་ཏེ། མཚན་ཉིད་ཐམས་ཅད་ཡོངས་སུ་རྫོགས་པ། སྒོ་བཞིའི་སྟེང་ན་ཀ་བས་བཏེགས་པའི་རྟ་བབས་ཀྱིས་མཛེས་པ། ཆོས་ཀྱི་འཁོར་ལོ་དང༌། རི་དྭགས་ཀྱི་རྩེ་མོ་བརྒྱན་པ། ནང་གི་ལྷ་སྣམ་ཤར་སྔོ། བྱང་ལྗང༌། ནུབ་དམར། ལྷོ་སེར། དབུས་དཀར་བ། སྟེང་ཐོག་རིམ་པར་ཕུབ་པས་དབུས་ཕྱུར་བུར་གྱུར་པ། རྡོ་རྗེ་རིན་པོ་ཆེའི་ཏོག་གིས་མཛེས་པ། གཞལ་མེད་ཁང་ཕྱི་མའི་ནང་གི་གྲྭ་བཞིར། བཀྲ་ཤིས་ཀྱི་བུམ་པ་བརྒྱད་དང་བཅས་པ། དུར་ཁྲོད་རིམ་པ་བཞི་པོ་རྣམས་ཀྱང༌། རེ་རེ་བཞིན་ཞིང་སྐྱོང་བ་དང༌། མེ་དང༌། སྤྲིན་དང༌། ཆུ་དང༌། རི་དང༌། མཆོད་རྟེན་བརྒྱད་བརྒྱད་རྣམས་དང༌། དཔའ་བོ་དང་རྣལ་འབྱོར་མ། རོ་དང་རོ་ལངས་དང༌། བྱ་དང་གཅན་གཟན་དང༌། འཇིག་རྟེན་སྐྱོང་བ་རྣམས་ཀྱི་འཁོར་གྱི་ཡོངས་སུ་གང་བ། མཆོད་པའི་ཡོ་བྱད་རྣམས་དང་གྲུབ་པའི་རྫས་ཀྱི་ཉེ་བར་བརྒྱན་པ། ཕྱི་རོལ་ན་རྡོ་རྗེ་འཕྲེང་བས་ཡོངས་སུ་བསྐོར་བའོ། །དེ་ལྟར་དཀྱིལ་འཁོར་ཆེན་པོ་དྭངས་ཤིང་སྒྲིབ་པ་མེད་པ་ཕྱི་ནང་ཀུན་ཏུ་འོད་གསལ་བ་མཚན་ཉིད་ཐམས་ཅད་ཡོངས་སུ་རྫོགས་པ་རྒྱན་གྱི་རྣམ་པ་མཆོག་ཏུ་བཀྲ་བ་དུ་མས་
མཛེས་པར་གྱུར། ནང་གི་ལྷའི་གནས་རྣམས་ལས། གཙོ་བོའི་པདྨའི་འདབ་མ་ཉེར་བཞི་དང༌། འཁོར་ལོའི་རྩིབས་རྣམས་དང༌། དཀྱིལ་འཁོར་སོ་སོའི་སྒོ་མཚམས་རྣམས་སུ་རོའི་གདན། སྐལ་བཟང་གི་སྣམ་བུ་ལ་ཟླ་བའི་གདན་རྣམས་སོ། །འདི་དག་ནི་རྟེན་གྱི་དཀྱིལ་འཁོར་བསྐྱེད་པའོ། །དབུས་ཀྱི་གདན་གྱི་སྟེང་དུ་ཨ་ཨཱ༴ ནས་ཨཾ་ཨཿ ཉིས་འགྱུར་གཡོན་སྐོར་དུ་གནས་པ་ཡོངས་སུ་གྱུར་པ་ལས། ཟླ་བའི་དཀྱིལ་འཁོར་དབྱངས་སོ་གཉིས་ཀྱིས་མཚན་པ་མེ་ལོང་ལྟ་བུའི་ཡེ་ཤེས། དེའི་སྟེང་དུ་ཀ་ཁ༴ ནས་ཧ་ཀྵ་ཡ་ར་ལ་ཝ་ཌ་ཌྷ་ཉིས་འགྱུར་གཡོན་སྐོར་དུ་གནས་པ་ཡོངས་སུ་གྱུར་པ་ལས། ཉི་མའི་དཀྱིལ་འཁོར་གསལ་བྱེད་བརྒྱད་ཅུས་མཚན་པ་མཉམ་པ་ཉིད་ཀྱི་ཡེ་ཤེས། དེ་གཉིས་ཀྱི་དབུས་སུ་ནམ་མཁའི་ཧཱུཾ་ཡིག་ཞུགས། དེ་ལས་འཁོར་ལོ་བཅུ་གཉིས་ཀྱི་ལྷ་ཚོགས་རྣམས་སྤྲོས་ཏེ། འགྲོ་བ་ཐམས་ཅད་དེའི་བདག་ཉིད་དུ་བྱས་ནས་སླར་འདུས་ཏེ་ཐིམ་པ་ཡོངས་སུ་གྱུར་པ་ལས། རྡོ་རྗེ་སྔོན་པོ་རྩེ་ལྔ་པ་ལྟེ་བ་ལ་ཧཱུཾ་གིས་མཚན་པ་སོ་སོར་རྟོག་པའི་ཡེ་ཤེས། ཡང་འོད་འཕྲོས་ཐོག་མ་མེད་པ་ནས་གྲུབ་པའི་དཔལ་བོ་དང་རྣལ་འབྱོར་མ་ཐམས་ཅད་ཕྱོགས་བཅུ་ནས་སྤྱན་དྲངས་ཏེ་ཧཱུཾ་ལ་ཐིམ་པ་ནི་བྱ་བ་སྒྲུབ་པའི་ཡེ་ཤེས། དེ་རྣམས་ཡོངས་སུ་གྱུར་པ་ལས་སྐུ་ཡོངས་སུ་རྫོགས་པ་ནི་ཆོས་ཀྱི་དབྱིངས་ཀྱི་ཡེ་ཤེས་སོ། །དེ་ཡང་རང་ཉིད་རྒྱུ་རྡོ་རྗེ་འཛིན་པ་སྐུ་མདོག་དཀར་པོ། དཀར་ལྗང་དམར་སེར་བའི་ཞལ་
བཞི། ཕྱག་དང་པོ་གཉིས་ཀྱིས་རྡོ་རྗེ་དང་དྲིལ་བུ་འཛིན་པའི་རང་འདྲའི་ཡུམ་ལ་འཁྱུད་པ། གཉིས་པ་གཉིས་ཀྱིས་གླང་པོ་ཆེའི་པགས་པ་འཛིན་པ། ལྷག་མ་གཡས་བཞིས་ཅང་ཏེའུ། གྲི་གུག དགྲ་སྟ། རྩེ་གསུམ། གཡོན་བཞིས་ཁ་ཊྭཾ་ག ཐོད་པ། ཞགས་པ། ཚངས་མགོ་རྣམས་འཛིན་པ། བྱིས་པའི་རྒྱན་གྱིས་བརྒྱན་པ། ཞབས་གཉིས་གཡོན་བསྐུམ་པས་འཇིགས་བྱེད། གཡས་བརྐྱང་བས་དུས་མཚན་མོ་མནན་པ། ལྷག་མ་འབྲས་བུའི་ཧེ་རུ་ཀ་དང་མཚུངས་པ་ཐུགས་ཀར་ཉི་མ་ལ་གནས་པའི་ཧཱུཾ་ཡིག་གོ ། དེ་ཡན་ཆད་ནི་བསྙེན་པའོ། །ཡབ་ཀྱི་གསང་གནས་མི་དམིགས་ཏེ་སྟོང་པའི་ངང་ལས་ཧཱུཾ་ལས་རྡོ་རྗེ་ནག་པོ་རྩེ་ལྔ་པ་བྱཱཾ་ལས་བྱུང་བའི་ནོར་བུའི་རྩེ་མོར་བྱཱཾ་དམར་སེར་གྱིས་མཚན་པ། ཡུམ་གྱི་མཁའ་ཁམས་མི་དམིགས་ཏེ་སྟོང་པའི་ངང་ལས་ཨཱཿལས་པདྨ་དམར་པོ་འདབ་མ་གསུམ་པ་དྱཱཾ་ལས་བྱུང་བའི་ཟེ་འབྲུའི་རྩེ་མོར་དྱཱཾ་དཀར་སེར་གྱིས་མཚན་པ། གཉིས་ཀའི་བུ་ག་ཕཊ་སེར་པོས་བཀག་པ། ཡབ་ཀྱི་ལྟེ་བ་དང༌། ཡུམ་གྱི་མགྲིན་པར། ཨོཾ་བཛྲ་བཻ་རོ་ཙ་ནཱི་ཡེ་ཧཱུཾ་ཧཱུཾ་ཕཊ་སྭཱཧཱ། ཡབ་ཀྱི་ཐུགས་ཀ་དང༌། ཡུམ་གྱི་དཔྲལ་པར། ཨོཾ་སརྦ་བུདྡྷ་ཌཱ་ཀི་ནཱི་ཡེ། བཛྲ་ཝརྞ་ནཱི་ཡེ་ཧཱུཾ་ཧཱུཾ་ཕཊ་སྭཱཧཱ། ཡབ་ཀྱི་མགྲིན་པ་དང་ཡུམ་གྱི་ལྟེ་བར། ཨོཾ་ཤྲཱི་བཛྲ་ཧེ་ཧེ་རུ་རུ་ཀཾ་ཧཱུཾ་ཧཱུཾ་ཕཊ། ཌཱ་ཀི་ནཱི་ཛཱ་ལ་ས་མ་ཝ་རཾ་སྭཱཧཱ། ཡབ་ཀྱི་དཔྲལ་པ་དང༌། ཡུམ་གྱི་ཐུགས་ཀར། ཨོཾ་ཧྲཱིཿཧ་ཧ་ཧཱུཾ་ཧཱུཾ་ཕཊ། ཨོཾ་ཨཱཿཧཱུཾ་སྔགས་རྣམས་ཕན་ཚུན་རེག་ཅིང་ཡབ་ཡུམ་རྗེས་སུ་ཆགས་པས་
སྙོམས་པར་ཞུགས་པའི་དགའ་བའི་སྒྲས་དེ་བཞིན་གཤེགས་པ་ཐམས་ཅད་བསྐུལ་ཏེ་ཡབ་ཀྱི་ཞལ་དུ་ཞུགས་ལྷ་མོའི་པད་མར་སོན་པ་ན། ཡབ་ཡུམ་གཉིས་ཀ་བདེ་ཆེན་ལྷན་ཅིག་སྐྱེས་པའི་ངོ་བོ་འོད་ཀྱི་ཐིག་ལེའི་གོང་བུར་ཞུ་བར་གྱུར། ཉེ་བའི་བསྙེན་པའོ། །དེ་ནས་སྙིང་རྗེ་དང་བྱམས་པ་དང་དགའ་བ་དང་བཏང་སྙོམས་ཀྱི་རང་བཞིན་ཐིག་ལེ་ལས་བྱུང་བའི་མཁའ་འགྲོ་མ་ལ་སོགས་པ་ལྷ་མོ་དྲུག་ཚན་བཞི། རང་རང་གི་གནས་ཀྱི་པདྨའི་འདབ་མར་འདུག་ནས་བཞེངས་པར་བསྐུལ་བ་ནི། མངའ་བདག་ཉི་མ་རེ་རེར་འགྲོ་བ་མགྲོན་འབོད་ན། ཁྱོད་ནི་ཅི་ཡི་ཕྱིར་ན་སྟོང་པ་ཉིད་ལ་བཞུགས། །བཞེངས་ཤིག་བཞེངས་ཤིག་བདག་ནི་སྙིང་རྗེའི་རང་བཞིན་ཏེ། །རྡོ་རྗེ་འཛིན་པ་བདེ་ཆེན་བདག་ལ་འདོད་པ་མཛོད། །གསོན་ཞིག་གསོན་ཞིག་གཞན་གྱི་དགོངས་པ་ནུབ། །འཇིག་རྟེན་ཕྱུགས་གང་ཤི་བ་བཞིན་དུ་གྱུར། །བདག་གི་པདྨ་རྒྱས་པ་ལ་འདོད་མཛོད། །དེ་ལྟར་འཇིག་རྟེན་ཀུན་བདེར་འགྱུར་བར་བྱོས། །རྡོ་རྗེ་འཛིན་པ་བདག་ལ་རོལ་ཞིག་རོལ། །ལྷན་སྐྱེས་རང་བཞིན་བརྗོད་དུ་མེད་པ་ཐོབ། །འཇིག་རྟེན་སེམས་ཅན་གཞན་ནི་རྨོངས་གྱུར་པས། །ཇི་ལྟར་ཁྱོད་ནི་སྟོང་པ་དོན་མེད་འགྱུར། ཁྱོད་ནི་ཆོས་རྣམས་ཀུན་གྱི་བྱེད་པོ་སྟེ། །ཅིའི་ཕྱིར་ལྷན་སྐྱེས་རང་བཞིན་འགྲོ་མེད་བཞུགས། །བདག་ལ་མཆོག་གི་དོན་གྱི་འདོད་པ་མཛོད། །ཇི་ལྟར་ཁྱོད་ནི་འཇིག་རྟེན་རྣམས་མཐུན་བཞུད། །ཅེས་བསྐུལ་ནས། ལྷ་མོ་རྣམས་ཐིག་ལེ་ལ་ཐིམ། ཐིག་ལེ་དེ་
ཉིད་ཧཱུཾ་སྔོན་པོ་ལས་རྡོ་རྗེ་སྔོན་པོ་རྩེ་ལྔ་པ། ལྟེ་བར་ཧཱུཾ་ལྗང་སྔོན་གྱིས་མཚན་པར་འགྱུར། ཨོཾ་ཨཱཿཀཱ་ཡ་ཝཱ་ཀ་ཙིཏྟ་བཛྲ་ཧཱུཾ་ཕཊ་ཧོཿ དེ་ཡོངས་སུ་གྱུར་པ་ལས་རང་ཉིད་འབྲས་བུ་རྡོ་རྗེ་འཛིན་པ། བཅོམ་ལྡན་འདས་དཔལ་ཧེ་རུ་ཀ་སྔགས་འདི་འདོན་བཞིན་པར་བཞེངས་པ་ན། དཔའ་བོ་དང་རྣལ་འབྱོར་མའི་དཀྱིལ་འཁོར་པ་ཐམས་ཅད་ཀྱང་སྐད་ཅིག་གིས་རྫོགས་པར་བལྟའོ། །དེ་ཡང་དབུས་ཀྱི་པདྨའི་ལྟེ་བ་ལ། ཉི་མ་དང་དུས་མེའི་དཀྱིལ་འཁོར་གྱི་སྟེང་དུ། འཇིགས་བྱེད་ཆེན་པོ་དང་དུས་མཚན་མོའི་གདན་ལ། བཅོམ་ལྡན་འདས་དཔལ་ཧེ་རུ་ཀ་སྐུ་མདོག་གཡོན་ནག་གཡས་ལྗང་བའི་ཕྱིར་གཟུགས་ལ། ཉི་མ་བྱེ་བའི་འོད་ལྟར་འབར་བའི་གཟི་བརྗིད་ཀྱི་ཕུང་པོ་ཅན། ཞལ་བཅུ་བདུན། ཕྱག་བདུན་ཅུ་རྩ་དྲུག་པ། རྩ་ཞལ་སྐུ་ལུས་དང་མཚུངས་པའི་མདོག་ཅན། རྩ་ཞལ་གྱི་སྟེང་གི་ཞལ་གསུམ་དང༌། ཀུན་གྱི་སྟེང་གི་ཞལ་གཅིག་སྟེ་བཞི་ནི་བུང་བ་ལྟར་གནག་ཅིང་ཆེས་ཁྲོས་པ། གཡོན་ཞལ་བརྩེགས་མ་བཞི་ལྗང་ཁུ། རྒྱབ་ཞལ་བརྩེགས་མ་བཞི་དམར་པོ་གཡས་ཞལ་བརྩེགས་མ་བཞི་སེར་པོ། ཞལ་རེ་རེ་ཞིང་དམར་ཞིང་བཀྲ་ལ་རབ་ཏུ་འཁྲུག་པའི་སྤྱན་གསུམ་གསུམ་དང་ལྡན་ཞིང༌། མཆེ་བ་རྣོན་པོ་བཞི་བཞི་གཙིགས་པ། ཞལ་ཐམས་ཅད་ཀྱང་རྣམ་པར་འགྱུར་བའི་ཁྲོ་གཉེར་ཅན། ཀུན་གྱི་མདུན་མའི་ཕྱག་གཉིས་རྡོ་རྗེ་དང་དྲིལ་བུ་འཛིན་པས་ཡུམ་ལ་འཁྱུད་པ་ཐམས་ཅད་ཀྱི་ཐ་མའི་ཕྱག་གཉིས་ཀྱི་གླང་པོ་ཆེའི་པགས་པ་སྟོད་གཡོགས་
སུ་བསྣམས་པ་སྟེ་རྩ་བའི་ཕྱག་བཞིའོ། །ལྷག་མ་སྤྲུལ་ཕྱག་བདུན་ཅུ་རྩ་གཉིས་ནི། །དང་པོ་གཡས་གཡོན་རལ་གྲི་ཕུབ་ཆེན་བསྣམས། །གཉིས་པ་དག་གིས་མདུང་རིང་ཆེ་བ་འཛིན། །གསུམ་པ་མདུང་རྩེ་གསུམ་དང་གཏུན་ཤིང་ངོ༌། །བཞི་པ་དགྲ་སྟ་ཞགས་པ་སྟེ། །ལྔ་པ་གྲི་གུག་ཐོག་ཁྲག་གོ །དྲུག་པ་མདའ་བོ་ཆེ་དང་གཞུ། །བདུན་པ་གསལ་ཤིང་ཁ་ཊྭཾ་ག །བརྒྱད་པ་ཐོ་བ་པོ་ཏི་དང༌། །དགུ་པ་འཁོར་ལོ་ཕུབ་ཆུང་དང༌། །བཅུ་པ་ཅང་ཏེའུ་སྡིགས་མཛུབ་ཅན། །བཅུ་གཅིག་ཆུ་གྲི་གཡེར་ཁའི་འཕྲེང༌། །བཅུ་གཉིས་དབྱུག་གུ་རྩེ་གཅིག་ལུག་གུ་རྒྱུད།།བཅུ་གསུམ་མཚོན་ཆ་རྩེ་གཅིག་བྲག་རིའོ། །བཅུ་བཞི་དུང་དཀར་དུར་ཁྲོད་རྡུལ། །བཅོ་ལྔ་ཟངས་དུང་བྷོ་ཀཾ་དང༌། །བཅུ་དྲུག་དབྱུག་རྩེ་གསུམ་དང་ཌྷ་ཀ་སྟེ། །བཅུ་བདུན་རྨ་བྱའི་མཇུག་སྒྲོ་པགས་རློན་ནོ། །བཅོ་བརྒྱད་བྱ་རོག་གཤོག་སྒྲོ་སྐྲ་ཐག་དང༌། །བཅུ་དགུ་སྐྲའི་སྤིར་རོ་བསྲེག་བསྐུལ་བའི་ཤིང༌། །ཉི་ཤུ་མེ་ཐབ་ག་དའི་དབྱུག །ཉེར་གཅིག་རི་བོ་ཕུབ་རིངས་དང༌། །ཉེར་གཉིས་དབྱུག་ཏོ་མི་མགོ་དང༌། །ཉེར་གསུམ་མེ་ལོང་ཀེང་རུས་དང༌། །ཉེར་བཞི་པི་ཝཾ་ཟོར་བའོ། །ཉེར་ལྔ་རྐང་པའི་མགོ་དང་མིག །ཉེར་དྲུག་ལག་མགོ་མཁལ་མ་སྟེ། །ཉེར་བདུན་གློ་བ་སྙེ་མ་དང༌། །ཉེར་བརྒྱད་རྒྱུ་མ་སྤེན་པ་དང༌། །ཉེར་དགུ་སྒྲ་ཅན་ཕུར་བུའོ། །སུམ་ཅུ་ལྕགས་སྒྲོག་བི་ཛ་པུར། །སོ་གཅིག་གདོས་དང་སོག་ལེ་སྟེ། །སོ་གཉིས་དུ་བྷུ་ས་དང་ཁབ། །
སོ་གསུམ་ཉ་དོལ་པགས་པ་རླུད་བུ་བཤུས། །སོ་བཞི་མགོ་མེད་རོ་དང་ཆར་འབེབས་སྤྲིན། །སོ་ལྔ་འབར་བའི་མར་ནག་ལྗོན་ཤིང་སྟེ། །སོ་དྲུག་འཇིགས་བྱེད་ཆེ་གཟུགས་ལྕགས་ཀྱུ་བསྣམས། །དེ་དག་ལ་ཕུབ་རིངས་ནི་ཟུར་བཞི་ནར་ཐབས་ཅན། ཕུབ་ཆེན་བསེ་ཕུབ་ལྟ་བུ་ཟླུམ་པོ། ཕུབ་ཆུང་ལག་ཕུབ་ཐུག་མོ་ནང་ན་ལག་འཛིན་གདོང་ཀག་ཡོད་པ། ཆུ་གྲི་ནི་གྲི་ཐུང༌། ལུག་གུ་རྒྱུད་ནི་ཉག་ཐག ཁ་ཅིག་ན་ལུག་རྒྱུད་མེད་པར་སྒྲོག་འཛིན་པ་ཡོད། གདོས་ནི། གྲུ་རྐྱ་དང༌། ཚོང་གེ་དང༌། སྲོག་ཆགས་འཛིན་པའི་རྙིའི་རིགས་གཅིག་ལ་འདོད་པ་སོགས་སྣ་ཚོགས་ཡོད་ཀྱང་ཕྱི་མ་འཐད་པར་སེམས། བྷོ་གཾ་ནི་བླ་མ་རྣམས་མདུང་ཐུང་ཡིན་པར་འཆད་པའི་རྗེས་སུ་འབྲང་བར་བྱ་མོད། ཟངས་དུང་གི་ནང་སེལ་ཡིན་པར་ཡང་མི་འགལ། ཌྷ་ཀ་ནི་རྔ་པ་ཊ་ཧ། དུ་བྷུ་ས་ནི་ཉ་སྐྱོགས་སུ་རླུད་བུ་བཤུས་ནི་ཁ་ཅིག་སེང་གེའི་རླུད་བུ་བཤུས་སུ་བཞེད་དོ། །སྐྱེ་གནས་ཕྱག་རྒྱ་སྐབས་འདིར་ཡུམ་གྱི་ཕྱག་ཡིན་པ་ཡབ་ཀྱི་ཕྱག་ཏུ་འཁྲུལ་བས། ཕྱག་ཐ་མའི་འཇིགས་བྱེད་ལྕགས་ཀྱུ་དང་གླང་ལྤགས་ལྷན་ཅིག་བྱེད་པ་དང༌། དམར་ནག་འཇིགས་བྱེད་ལྷན་ཅིག །ལྗོན་ཤིང་ལྕགས་ཀྱུ་ལྷན་ཅིག་བྱེད་པ་སོགས་སྨྲ་བས་འཕོངས་པ་དག་བྱུང་ཞེས་གཟིགས་པ་ཡངས་པོ་དག་གསུང་པ་ནི་ཤིན་ཏུ་མང་བའོ། །ཡང་དཀྱུས་སུ་འཇུག་སྟེ། ཞབས་གཡས་བརྐྱང་བས་དུས་མཚན་མོ་དམར་མོ་གན་རྐྱལ་དུ་གནས་པའི་ནུ་སྟེང་དང༌། གཡོན་བསྐུམ་པས་འཇིགས་བྱེད་ནག་པོ་ཁ་བུབ་ཏུ་གནས་པའི་རྣ་བ་གཡོན་པའི་སྟེང་ནས་བརྫིས་པ། སྨད་གཡོགས་སྟག་གི་པགས་པའི་ཤམ་ཐབས་གྲོལ་བ།
དབུ་སྐྲ་རལ་བའི་ཐོར་ཅོག་སྤྱི་བོར་བཅིངས་བའི་རྩེ་མོར་འཁོར་ལོ་ལ་གནས་པའི་ཡིད་བཞིན་གྱི་ནོར་བུ་དང༌། གཡོན་ངོས་སུ་ཟླ་བ་ཕྱེད་པ་དང༌། རལ་བའི་མདུན་ངོས་སུ་སྣ་ཚོགས་རྡོ་རྗེས་བརྒྱན་པ། དབུ་རེ་རེ་ལ་རྡོ་རྗེ་ནག་པོའི་འཕྲེང་བ་ལ་བརྒྱུས་པའི་མི་མགོ་སྐམ་པོ་ལྔ་ལྔས་དབུ་རྒྱན་དང༌། དཔའ་བོའི་དར་དཔྱངས་བཅིངས་པ། མི་མགོ་ཁྲག་འཛག་བརྒྱའི་དོ་ཤལ་ཅན། ཕྱག་དྲུག་དང་དཔུང་རྒྱན་དང༌། ཞབས་གདུབ་དང༌། འོག་པག་ལ་སོགས་པ་རྒྱན་ཐམས་ཅད་ཀྱིས་བརྒྱན་པ། གར་གྱི་ཉམས་དགུ་དང་ལྡན་ཞིང༌། སྐུ་ལུས་བ་སྤུའི་འཕྲེང་བ་ཅན། སྐུའི་ཚིགས་ཐམས་ཅད་ལ་བདེ་བས་རླན་པ། སྤྲུལ་པའི་ཧེ་རུ་ཀ་སྣ་ཚོགས་པ་རྣམ་པར་འཕྲོ་བ་དང་བཅས་པའོ། །དེ་ནི་སྒྲུབ་པའོ། །དེ་ལ་འཁྱུད་པའི་ཡུམ་རྡོ་རྗེ་ཕག་མོ་སྐུ་མདོག་དམར་མོ། བསྐལ་པའི་མེ་ལྟར་གཟི་བརྗིད་འབར་བ། དྲག་མོ་ཆེན་མོ་ཞལ་བཞི་ཕྱག་བཅུ་གཉིས་སྤྱན་གསུམ་གསུམ་དང་ལྡན་པ། ཕྱག་དང་པོ་གཉིས་རྡོ་རྗེ་དང་དྲིལ་བུ་འཛིན་པས་ཡབ་ལ་འཁྱུད་པ། ལྷག་མ་གཡས་བཞིས་ཟངས་གྲི་སྟ་རེ་ཌཱ་མ་རུས་ཏྲི་ཤུ་ལ། གཡོན་བཞིས་ཀ་པཱ་ལ། འཆིང་བྱེད་མཁར་དབྱུག །ཚངས་མགོ་རྣམས་འཛིན་པ། ཕྱག་ཐ་མ་གཉིས་སྤྱི་བོའི་སྟེང་དུ་སྐྱེ་གནས་ཀྱི་ཕྱག་རྒྱ་ཡོངས་སུ་བསྐོར་བ། དམར་སེར་སྔོ་ལྗང་བའི་ཞལ་བཞི་དང་ལྡན་པ། གཅེར་བུ་བ་སྤུ་ལངས་ཤིང་རྔུལ་དང་ལྡན་པ། དབུ་
སྐྲ་གྲོལ་བ། ཡན་ལག་ཐམས་ཅད་ལ་ལྷ་རྫས་ཀྱི་དྲིས་ཉེ་བར་བྱུགས་ཤིང་ལྷ་རྫས་ཀྱི་མེ་ཏོག་འཕྲེང་བས་ཀླུབས། དབུ་རྒྱན་ལ་ཟླ་ཕྱེད་རྡོ་རྗེས་མཛེས་པ། ཞབས་གཡས་བསྐུམ་གཡོན་སྐྱང་བའི་སྟབས་ཀྱིས་ཡབ་དཔལ་ཧེ་རུ་ཀ་དང་སྦྱོར་བ། ཕྱག་རྒྱ་ལྔ་དང་ཐོད་པའི་ཅོད་པན་ཅན། མི་མགོ་སྐམ་པོ་ལྔ་བཅུའི་འཕྲེང་བ་དང་ལྡན་པ། སྤྲུལ་པའི་རྣལ་འབྱོར་མ་དཔག་ཏུ་མེད་པ་འཕྲོ་བ། ཡེ་ཤེས་ཀྱི་མེ་དཔུང་རབ་ཏུ་འབར་བའི་དབུས་ན་བཞུགས་པའོ། །དེ་ནི་སྒྲུབ་པ་ཆེན་པོའོ། །འདི་དག་ཏུ་རྣམ་གྲངས་ཀྱི་ངེས་པ་ཅུང་ཟད་བཤད་ན། ཡབ་ཀྱི་ཞབས་གཉིས་སུ་བྱེད་པ་འདི་བསྡུས་པའི་ལུགས་ཡིན། རྒྱུད་ཀྱི་འཁོར་ལོ་བཅུ་གཉིས་སྟོན་པའི་སྐབས་ཀྱི་དགོངས་པའང་ཡིན་པར་འདོད་དེ། ལེའུ་གཉིས་པ་རྡོ་རྗེ་ཕག་མོ་ཕྱག་བཅུ་གཉིས་པའི་སྐབས་དང༌། ལེའུ་བཅོ་ལྔ་པ་འཁོར་ལོ་བཅུ་གཉིས་པའི་སྐབས་འདིར་རྒྱུ་རྡོར་འཛིན་སྐབས་སུ་ཞབས་ཀྱིས་འཇིགས་དུས་མནན་པ་ཙམ་གསུངས་པ་ཞབས་གཉིས་པ་ཡིན་ཕྱིན་འབྲས་བུས་རྡོར་འཛིན་སྐབས་ཀྱང་འཇིགས་དུས་མནན་པར་གསུངས་པས་ཞབས་ཀྱང་སྔར་དང་འདྲ་བར་ཤུགས་ལ་འགྲུབ་པར་བསམས་ཏེ། རྒྱལ་སྡེས་ཀྱང་ཞབས་གཉིས་པར་མཛད་གདའ་བ་ལར་ནས་འགལ་བ་ག་ལ་ཡོད། འོན་ཀྱང་གདན་འཇིགས་དུས་ཙམ་གྱིས་ཞབས་གཉིས་ཁོ་ནར་འགྲུབ་དཀའ་ཞིང༌། སྐབས་གཞན་དུ་བྱུང་བས་ཀྱང་མ་ངེས་ལ་འདི་ལྟ་བུ་སྐུ་འདྲ་འཇིམ་གཟུགས་བཞེངས་པ་སོགས་ལ་ནི་ཅུང་ཟད་མི་བདེ་ཡང་འབྱུང་ངོ༌། །ཕག་མོ་ཆེན་མོའི་སྐབས་སུ་གསུང་པ་ལྟར་ཞབས་བཅོ་བརྒྱད་ཀྱིས་ལྷ་
ཆེན་བཅོ་བརྒྱད་མནན་པ་ནི་འབྲིང་པོ་དང༌། ལེའུ་ལྔ་བཅུ་པ་ལས་བྱུང་བ་ལྟར། ཞལ་སོ་བདུན། ཕྱག་སྟོང་ཕྲག །རྩ་བའི་ཞབས་བཅོ་བརྒྱད་ཀྱིས་ལྷ་ཆེན་བཅོ་བརྒྱད་ཆུང་མར་བཅས་པ་གནོན་པ་ནི་རྒྱས་པའོ། །དུས་གསུམ་སངས་རྒྱས་ཀུན་མཁྱེན་ཆེན་པོས། བསྟོད་པ་མཛད་པ་ན་འཇིགས་དུས་མནན་པ་ཙམ་ཞིག་གསུངས། ཞབས་ཀྱི་གྲངས་གསལ་མ་མཛད། སྒྲུབ་ཐབས་ཉུང་ངུ་དང༌། ཐུགས་དམ་རི་མོར་བྲིས་པ་ལ། ཞབས་བཅོ་བརྒྱད་པ། འོག་ཏུ་འཇིགས་དུས་ཆེ་བ་རེ་བྱས་དེའི་སྟེང་དུ་ལྷ་བཅོ་བརྒྱད་མནན་པ་མཛད་འདུག་པ་ལྟར་ན་བྲིས་འབུར་བཞེངས་པ་དང༌། སྒོམ་པ་སོགས་གང་ལ་ཡང་བདེ་བས་འདམ་ཁ་རྣམས་ཀྱི་ནང་ནས་འདི་ངོས་བཟུང་བར་སེམ་མོ། ཕག་གདོང་ཆེན་མོའི་སྐབས་ན། ལྷ་བཅོ་བརྒྱད་ལ་རླུང་ལྷ་ས་ལྷ་ཆུ་ལྷ། གནོད་སྦྱིན། བདུད། འཁོར་སྒྱུར་རྣམས་ཡོད། སྟོང་ཕྲག་ཕྱག་ཅན་གྱི་སྐབས་སུ་དྲུག་པོ་དེའི་དོད་དུ་ཐགས་བཟང་རིས་དང༌། དགྲ་བཅོམ་དང༌། བླ་མ། སྐྱོབ་པ། བླ་མ་གཉིས་པ་ལོག་འདྲེན་ཞེས་པ་ཡོད་ལ། ཕྱི་མ་ལྔ་པོ་དེ་རྣམས་རྒྱལ་བ་དམ་པ་དང༌། ཕུར་བུ་དང༌། མི་སྦྱིན་དང༌། པ་སངས་དང༌། ཨ་ཤོ་ཀ་རྣམས་ཡིན་ནོ། །སྐབས་འདིར་ཕག་གདོང་ཆེན་མོའི་ལུགས་བཞིན་བྱས་ན་བདེའོ། །ཡུམ་གཙོ་བོ་དང་ཞལ་ཕྱག་མཚུངས་པ་རྒྱས་པ། དཀྱུས་སུ་བཀོད་པ་ལྟར་ཞལ་བཞི་ཕྱག་བཅུ་གཉིས་པ་འབྲིང་པོ་སྟེ་འདི་ནི་འཁོར་ལོ་བཅུ་གཉིས་ཀྱིས་སྐབས་སུ་གསུངས་པའི་དགོངས་དོན་དང༌།
ཞལ་གཅིག་ཕྱག་གཉིས་པ་བསྡུས་པ་སྟེ། རྒྱས་བསྡུས་གཉིས་ལེའུ་ལྔ་བཅུ་པར། ཕག་མོ་ཡིས་ནི་འཁྱུད་པ་སྟེ། །དེ་གཟུགས་ཅན་ནམ་ཕྱག་གཉིས་སྐྱེས། །ཞེས་པས་བསྟན་ལ། ཕྱག་གཉིས་ཀྱི་ཕྱོགས་ལ་སྐྱེ་གནས་ཀྱི་ཕྱག་རྒྱ་མཛད་པ་དང༌། གྲི་ཐོད་འཛིན་པ་གཉིས་སྤྱིར་གང་བྱས་ཀྱང་ཆོག་མོད། ཛ་ཡ་སྱ་ནས་འཁྲུལ་པ་ཅུང་ཟད་མཛད་པའི་ནོར་བ་རྗེས་སུ་འབྲང་བའང་མང་ངོ༌། །རྒྱུད་ལས། དེ་ཡི་མདུན་གནས་ལྷ་མོ་ཆེ། །རྡོ་རྗེ་ཕག་མོ་སྔར་དང་མཚུངས། །ཞེས་སྔར་ལེའུ་གཉིས་པར་ཕག་མོ་ཕྱག་བཅུ་གཉིས་པ་གསུངས་པ་ལ་ཞལ་འཕངས་མཛད་པ་སྟེ། དེར་འཇིགས་དུས་མེ་ལྟ་བུའི་འོད་ཟེར་ཅན། ཞེས་པས་གཟི་བརྗིད་ཀྱི་དཔེའམ། མེ་དཔུང་འབར་བ་བསྟན་པར་མ་ཟད་སྐུ་མདོག་ཀྱང་དམར་མོར་བསྟན་པར་བཞེད་པ་ཡང་ལེགས་ཤིང༌། ཡབ་མིག་སྨན་མདོག་ཏུ་བཤད། ཕག་མོ་གཙོ་བོར་གྱུར་པ་ཐབས་ཀྱིས་འཁྱུད་པའི་སྐབས་དེར་ནི། ཕྱག་ཐ་མས་བདུད་ཀྱི་པགས་པ་འཛིན་པའོ། །ཕག་གདོང་ཆེན་མོ་ལྟ་བུའི་ཡུམ་རྐྱང་ལ་ནི་གླང་ལྤགས་སོ། །དེར་སྐྱེ་གནས་ཕྱག་རྒྱ་གཉིས་ཀྱིས། ལྷག་མ་རྡོ་རྗེ་ཕག་མོའོ། །གལ་ཏེ་ཧེ་རུ་ཀ་གཙོ་བོ། དེ་ཚེ་ཕག་མོའི་ཕྱག་གཉིས་སུའོ། །གླང་པོའི་པགས་པ་འཛིན་པ་པོ། །ཞེས་ཡབ་གཙོ་བོར་གྱུར་པ་ལས། ཡབ་ཀྱིས་གླང་ལྤགས་དང༌། ཡུམ་སྐྱེ་གནས་ཀྱི་ཕྱག་རྒྱ་མཛད་པ་དང༌། ཡུམ་གཙོ་བོར་གྱུར་པ་ལ་དེ་གོ་བཟློག་པར་བཤད་པས། སྒྲུབ་ཐབས་ཛ་ཡ་སྱ་ནས་
མཛད་པ་ལས། གླང་པོའི་པགས་པ་ཕྱག་གཉིས་ཀྱིས། སྐྱེ་གནས་ཕྱག་རྒྱ་དེ་བཞིན་གཞན། །ཞེས་རྒྱུད་ཚིག་ཇི་ལྟ་བ་དྲངས་ནས། སླར་ཡུམ་ཕྱག་གཉིས་གྲི་ཐོད་འཛིན་པར་བྱས་པས་འགལ་བ་འདུས་ཏེ་ཐམས་ཅད་ལ་འཁྲུལ་གཞི་བྱུང་བ་ཡིན་གྱི། རྒྱུད་ཚིག་རང་ལ་འཁྲུལ་གཞི་དེ་མེད་པས་བཤད་པར་བླའོ། །དེ་བཞིན་དུ་མཚོན་ཆ་བདུན་ཅུ་རྩ་གཉིས་སུ་བཤད་པ་ཡང༌། རྩ་ཕྱག་བཞི་མ་བགྲངས་པའི་དབང་དུ་མཛད་པ་ཁོ་ནའོ། །ཞེས་རིག་པར་བྱའོ། །དེ་ཡན་ཆད་ཀྱི་དང་པོ་སྦྱོར་བའི་ཏིང་ངེ་འཛིན་རྫོགས་སོ།། །།སྣ་ཚོགས་ཐིག་ལེའི་འཁོར་ལོའི་པད་མ་འདབ་མ་བཞི་བཅུ་རྩ་བརྒྱད་ལས། བར་བར་དུ་འདབ་མ་རེ་རེ་བོར་བའི་འདབ་མ་ཉི་ཤུ་རྩ་བཞི་ལ། རྣལ་འབྱོར་མ་ཉི་ཤུ་རྩ་བཞི་སྟེ། ཤར་ནས་བྱང་གི་བར་ལ། མཁའ་འགྲོ་མ་དང་གཟུགས་ཅན་ཉིད། །འོ་བྱེད་མ་དང་གཞན་སྒྱུར་མ། །བྱིས་བཅས་མ་དང་རྗེས་འཇུག་མ། །དེ་རྣམས་གཡོན་ནག་གཡས་ལྗང་ཁུ། །བྱང་ནས་ནུབ་ཀྱི་བར་ལ། ལཱ་མ་རྣལ་འབྱོར་དབང་ཕྱུག་མ། །བཟང་མོ་ཐོད་པ་ཅན་མ་དང༌། །ནག་མོ་རྒྱལ་པོས་བསྐོར་མ་རྣམས། །གཡོན་ལྗང་གཡས་དམར་རིམ་པས་སོ། །ནུབ་ནས་ལྷོའི་བར་ལ། དུམ་སྐྱེས་མི་དང་དུར་ཁྲོད་མ། །རྣམ་པར་ཞུ་མ་རིགས་བྱེད་མ། །དུར་བྱེད་མ་དང་གར་མ་རྣམས། །གཡོན་དམར་གཡས་ནི་སེར་བའོ། །ལྷོ་ནས་ཤར་གྱི་བར་ལ། གཟུགས་ཅན་མ་དང་འཇིགས་བྱེད་མ། །གཙུག་ཕུད་མ་དང་ཐོར་
ཚུགས་མ། །རལ་པ་ཅན་མ་དྲག་མོ་རྣམས། །གཡོན་སེར་གཡས་ནི་སྔོ་བའོ། །ཐམས་ཅད་ཀྱང་ཞལ་གཅིག་ཕྱག་གཉིས་སྤྱན་གསུམ་མ། སྐྲ་གྲོལ་བ། ཕྱག་གཡས་གྲི་གུག་དང༌། གཡོན་ཐོད་ཁྲག་འཛིན་པ། ཞབས་གཡས་བརྐྱང་བའི་སྟབས་ཀྱིས་མེ་རི་འབར་བའི་དབུས་ན་བཞུགས་ཤིང་ལྷག་མ་གཙོ་མོ་དང་མཚུངས་པའོ། །ཞེས་ཛ་ཡ་སྱ་ན་དང་བོད་ཐམས་ཅད་འདོད་པ་ལྟར་རུང་བའང་ཡིན་ལ། འོན་ཀྱང་རྒྱུད་ལས་སྐབས་འདིར་གཙོ་བོ་དང་མཚུངས་པར་གསུངས་པས། རྡོ་རྗེ་ཕག་མོ་ཡབ་དང་མཚུངས་ན་ཉེར་བཞི་སྙིང་པོའི་ལྷ་མོ་ཡང་དབུ་མ་ཕྱག་མང། བཅོམ་ལྡན་འདས་མ་ཕྱག་བཅུ་གཉིས་མ་ལྟར་ན། འདི་དག་ཀྱང་དེ་དང་འདྲ་བ། ཡུམ་ཕྱག་གཉིས་མ་ལྟར་ན་འདི་དག་ཀྱང་ཕྱག་གཉིས་པའོ་ཞེས་དོན་ཡིན་ཀྱང་ད་ལྟའི་ལག་ལེན་ལ་དང་པོ་མི་འགྲུབ་པའི་ཕྱི་མ་གཉིས་གང་བདེ་ཡིན་ལ། འོན་ཀྱང་ཕྱག་བཞི་མ་གཡས་གྲི་གུག་ཌཱ་མ་རུ། གཡོན་ཐོད་པ་ཁ་ཊྭཾ་ག་བྱས་ནའང་ལེགས་སོ། །དེ་དག་གི་བར་བར་གྱི་འདབ་མ་རྣམས་ལ་བདུད་རྩི་ལྔས་གང་བའི་བུམ་པའི་སྟེང་དུ། བྱང་ཆུབ་ཀྱི་སེམས་ཀྱིས་གང་བའི་ཐོད་པ་དང་བཅས་པ་ཉེར་བཞིའོ། །དེའི་ཕྱིར་རོལ་དུ་རྡོ་རྗེའི་འཁོར་ལོའི་རྩིབས་རྣམས་ལ། ཤར་ནས་གཡོན་སྐོར་གྱིས། མཁའ་འགྲོ་མ་གཞན་ལཱ་མ་གཞན། །དུམ་སྐྱེས་མ་གཞན་གཟུགས་ཅན་གཞན། །རབ་གཏུམ་མ་དང་གཏུམ་མིག་མ། །འོད་ལྡན་མ་དང་སྣ་ཆེན་མ། །དཔའ་བོའི་བློ་མ་མིའུ་ཐུང་མ། ལངྒའི་
བདག་མོ་ཤིང་གྲིབ་མ། །ས་སྲུང་འཇིགས་བྱེད་ཆེན་མོ་དང༌། །རླུང་ཤུགས་མ་དང་ཆང་འཐུང་མ། །སྔོ་སངས་ལྷ་མོ་རབ་བཟང་མ། །རྟ་རྣ་མ་དང་བྱ་གདོང་མ། །འཁོར་ལོའི་ཤུགས་མ་དུམ་སྐྱེས་མ། །ཆང་ཚོང་འཁོར་ལོའི་གོ་ཆ་མ། །ཤིན་ཏུ་དཔའ་མོ་སྟོབས་ཆེན་མ། །འཁོར་ལོས་བསྒྱུར་མ་བརྩོན་འགྲུས་ཆེན་མ། །གཤིན་རྗེའི་བུ་མོ་གཤིན་རྗེ་མ། །བསྐྱོད་བྱེད་མ་དང་སྐྲག་བྱེད་མ། །གཏུམ་མོ་དང་ནི་དབྱངས་ཅན་མ། །འདོད་གྲུབ་མ་དང་འབར་ཆེན་མོ། །དེ་ཐམས་ཅད་ཀྱང་སྔོ་ནག་བྱེད་པའི་གཟུགས་ཅན་ནོ། །འདི་དག་གི་ཡབ་རྣམས་མཚན་ཐ་དད་པ་ལ་མོས་ན། རྡོ་རྗེ་མཁའ་འགྲོ་ལ་སོགས་པ་བཞི་དང༌། ཁཎྜ་ཀཱ་པཱ་ལ་སོགས་པ་ཉེར་བཞི་དང༌། སྟོབས་པོ་ཆེ། ཡེ་ཤེས་མཁའ་འགྲོ། བློ་བརྟན། བརྟན་པ་ཐར་བ། ཡེ་ཤེས་ཐབས། ཐུགས་ཀྱི་རྡོ་རྗེ་ཞེས་པ་རྣམས་སུ་བཤད་ལ། འཁོར་ལོ་བཅུ་གཉིས་ཀྱི་སྐབས་འདིར། འོག་མ་རྣམས་ཀྱིས་རིགས་འགྲེ་བའི་ཕྱིར་མཚན་ཐ་དད་པ་མ་སྨོས་ཀྱང་ཆོག་གོ །སྙིང་པོའི་འཁོར་ལོ་པ་ཤར་ནས་གཡོན་སྐོར་གྱི། རྡོ་རྗེ་འཆང་མ་མི་བསྐྱོད་མ། །རིན་ཆེན་གཙུག་མ་རྣམ་སྣང་མ། །པདྨ་དཀར་དབང་མ་དང་དོན་ཡོད་མ། །སྤྱན་མ་བདག་མ་གོས་དཀར་མོ་སྒྲོལ་མ། །གཟུགས་ཀྱི་རྡོ་རྗེ་མ་དང་དེ་བཞིན་ཏུ། །སྒྲ་དྲི་རོ་རེག་ཆོས་དབྱིངས་རྡོ་རྗེ་མ། །ས་སྙིང་མོ་དང་ནམ་མཁའི་སྙིང་པོ་མ། །ཕྱག་རྡོར་མ་དང་འཇིག་རྟེན་མགོན་མོ་དང༌། །སྒྲིབ་ཀུན་སེལ་མ་ཀུན་ཏུ་བཟང་མོ་དང༌། །རིན་ཆེན་སྒྲོལ་མ་བདག་མེད་ཁྲོ་གཉེར་ཅན། །རི་ཁྲོད་ལོ་མ་ཅན་མ་དེ་བཞིན་
དུ། །གཤིན་རྗེ་མཐར་མེད་མོ་དང་ཤེས་མཐར་མ། །པད་མཐར་མ་དང་བགེགས་མཐར་བྱེད་མ་དང༌།།མི་གཡོ་མ་དང་དབྱུག་སྔོན་འདོད་རྒྱལ་མ། །སྟོབས་ཆེན་མ་དང་གཙུག་ཏོར་གནོད་མཛེས་མ་ཐམས་ཅད་ཀྱང་དམར་སེར་ཕྱེད་པའི་གཟུགས་ཅན་ནོ། །ཡོན་ཏན་འཁོར་ལོ་ལ།¿བྲམ་ཟེ་རྒྱལ་རིགས་རྗེ་རིགས་མོ། །དམངས་མོ་གཏུམ་མོ་ཁྱི་མཆོད་མ། །གཡུང་མོ་གར་མ་ཐོད་པ་ཅན། །ཉ་པ་མོ་དང་སྨིག་མ་མཁན། །དུང་བཟོད་མཁན་མ་ཐ་ག་མ། །འཁུར་བ་མཁན་མོ་ཤིང་བཟོ་མ། །འཕྲེང་བ་མཁན་མོ་ཏིལ་མར་མཁན། །དེ་བཞིན་ཆོས་མཁན་མོ་དང་ནི། །སྲིན་བལ་བྱེད་མོ་ཕོ་ཉ་མོ། །བཤང་འཕྱག་མོ་དང་བརྩེས་མཁན་མོ། །ཆང་ཚོང་ལྡུམ་རའི་གཉེར་པ་མོ། །རྒྱལ་པོས་བཀྲབས་མ་གཤན་པ་མོ། །སོ་རྩི་ཚོང་པར་བྱེད་མ་དང༌། །གསེར་མགར་མོ་དང་ལྕགས་མགར་མོ། །ནོར་བུ་མཁན་པ་ནག་པ་མོ། །ཀླ་ཀློ་ཨོ་ཊི་ཚོང་པ་མོ། །རྡོ་བཟོ་མ་དང་ཞིང་ལས་མོ། །ཀོ་ལྤགས་མ་སྟེ་རྣལ་འབྱོར་མའོ། །ཐམས་ཅད་ཀྱང་དཀར་དམར་བྱེད་པའི་གཟུགས་ཅན་ནོ། དེའི་ཕྱི་རོལ་སྐལ་བ་བཟང་པོའི་སྣམ་བུ་ལ། བྱམས་པ་ནས་བརྩམས་ཏེ་གློག་གི་ཏོག་གི་བར་དུ་སངས་རྒྱས་ཉིས་བརྒྱ་དང་བཞི་བཅུ་རྩ་དགུའོ། །ཤར་སྒོ་ཁྭ་གདོང་མ། བྱང་སྒོར་འུག་གདོང་མ། ནུབ་སྒོར་ཁྱི་གདོང་མ། ལྷོ་སྒོར་ཕག་གདོང་མ། ཤར་ལྷོར་གཤིན་རྗེ་
བརྟན་མ། ལྷོ་ནུབ་ཏུ་གཤིན་རྗེ་ཕོ་ཉ་མ། ནུབ་བྱང་དུ་གཤིན་རྗེ་མཆེ་བ་མ། བྱང་ཤར་དུ་གཤིན་རྗེ་འཇོམས་མ་རྣམས་སོ། །ནམ་མཁའི་འཁོར་ལོ་ལ། མི་འམ་ཅི་མོ་དྲི་ཟ་མོ། །ཧུ་ཊུ་ཀ་མ་པ་ཕ་ཊ་ཧ། །པི་ཝཾ་གླིང་བུ་མུ་ཀུནྡ། །རྫ་རྔ་གགྒ་རི་མ་དང༌། །ཆ་ལང་ཤེས་ལེནྡྲི་ཀ་མ། །ཀླུ་མ་ཀ་རནྜ་མ་ཏ་མ་ཌ། །གར་མ་སྒེག་མ་དྷ་ཀ་མ་དང་ནི། །ཏཱ་ལི་ཤ་ར་ཎ་མོ་རྔ་ཆེན་མོ། །མཽ་དྲི་རྒྱུད་ཅན་མ་དང་མཱ་རུ་མ། །ན་ལ་བཱ་མོ་ཌྷཾ་བ་ཀ་མ་དང༌། །ཌཱ་མ་རུ་དང་ཌུཎ་ཌུ་ཀ་མ་དང༌། །ཟངས་དུང་མ་དང་རྭ་དུང་མ་དེ་བཞིན། །བྷུ་ཀི་དྲིལ་བུ་མ་དང་དྲིལ་ཆུང་མ།། གཡེར་ཁ་མ་དང་ཀོ་ལི་ཀ་མ་དང༌། །དུང་དཀར་མ་དང་དབྱངས་ལྡན་མ་དེ་བཞིན། །འཁོར་མ་ཞེས་བྱ་སུམ་ཅུ་རྩ་དྲུག་གོ །ཐམས་ཅད་ཀྱང་སྐུ་མདོག་སྔོན་པོའོ། །ཡང་ན་སྣ་ཚོགས་པར་བཀྲ་བའོ། །རླུང་གི་འཁོར་ལོ་ལ། མཁའ་ལྡིང་དང་མོ་བཀྲ་བ་མོ། །བྱ་རོག་བྱ་དཀར་སྲེག་པ་མོ། །རྨ་བྱ་ཟངས་ཀྱི་གཙུག་ཕུད་མ། །གུ་ད་བུ་ལི་འཇམ་པ་མོ། །ཕུག་རོན་བྱ་རོག་ཆེན་མོ་དང༌། ཁ་ཊི་ནི་དང་གོང་མ་སྲེག །ནེ་ཙོ་སྔགས་མ་གཞད་མ་དང༌། །བྱ་རྒོད་འུག་པ་ཙཱ་ཊ་ཀི །ཤིང་བྱེའུ་མ་དང་ངུར་བ་མ། །པྲི་ཀྵི་ར་ནི་ཀཀྐ་སི། །སོ་བྱ་མོ་དང་བི་ལཱ་ཊི། །ལྕུག་མའི་མགྲིན་དང་ཤ་རི་ཀཱི །བྱེའུ་ཁྲ་གུར་བུམ་ལྕེ་མ་དང༌། །བ་ཊི་རི་ཀཱ་ཛཾ་ག་མོ། །ཧོར་པ་ཀཾ་ག་མོ་དེ་བཞིན། །ད་ཏྟ་རི་མོ་རི་དྭགས་དགྲ། །ཐམས་ཅད་ཀྱང་སྔོ་ལྗང་ཕྱེད་པའམ་སྣ་ཚོགས་པའི་ཁ་དོག་བཀྲ་བ་
ཅན་ནོ། །སའི་འཁོར་ལོ་ལ། སེང་གེ་མོ་དང་སྟག་མོ་དང༌། །བྷིཾ་བ་མོ་དང་རི་བོང་མོ། །གླང་ཆེན་རི་དྭགས་བྱི་ལ་མོ། །བ་དང་མ་ཧེ་མོ་རྟ་མོ། །ཅེ་སྤྱང་མོ་དང་བསེ་མོ་འབྲི། །བྱི་བ་བོང་མོ་བྷེ་ཌི་མ། ར་མོ་ལུག་མོ་རིམ་པ་བཞིན། ཁྱི་མོ་ཕག་མོ་དོམ་མོ་དང༌། །དཎྜ་རི་མ་མོ་ཛྙཱ་ཀཱི། །དྲེད་མོ་དང་ནི་སྒེག་མོ་དང༌། །ནགས་མ་དང་ནི་ཁྱི་ཆེན་མོ། །བྱ་རོག་ཆེན་མོ་ཤརྡུ་ལཱི། །སྦྲུལ་མོ་ཁྲ་མོ་རྔ་མོང་དང༌། །སྲེ་མོང་རྩང་མོ་ཕུག་པ་མོ། །གྲོང་ན་གནས་པ་མ་རྣམས་སོ། །ཐམས་ཅད་ཀྱང་སྐུ་མདོག་སེར་པོའོ། །དེའི་ཕྱི་རོལ་གྱི་སྣམ་བུ་ལ། མཆོད་པ་དང་དཔལ་སྦས་ནས་བརྩམས་ཏེ་ཚངས་པའི་ཏོག་གི་བར་དུ་སངས་རྒྱས་ཉིས་བརྒྱ་དང་བཞི་བཅུ་རྩ་དགུའོ། །ཤར་སྒོར་ཚངས་མ། བྱང་སྒོར་དབང་ཕྱུག་མ། ནུབ་སྒོར་གཞོན་ནུ་མ། ལྷོ་སྒོར་ཁྱབ་འཇུག་མ། མེར་ཕག་མོ། བདེན་བྲལ་དུ་དབང་མོ། །རླུང་དུ་གཏུམ་མོ། དབང་ལྡན་དུ་དཔལ་ཆེན་མོ་རྣམས་སོ། །མེའི་འཁོར་ལོ་ལ། ལྷ་མོ་ཀླུ་མོ་གནོད་སྦྱིན་མོ། འབྱུང་མོ་མ་དང་ཆུང་མ་སྲིང༌། བུ་མོ་སྲིང་མོའི་བུ་མོ་དང༌། ཕ་ཡི་སྲིང་མོ་དེ་བཞིན་དུ། ཞང་པོ་ཡི་ནི་ཆུང་མ་དང༌། །ཆུང་མའི་སྤུན་ཟླ་དང་དེའི་མ། །དེ་ཉིད་ཀྱི་ནི་ཕ་ཡི་མ། །ཆུང་མ་ཡི་ནི་ཕྱི་མོ་དང༌། །མ་ཡི་མ་དང་གཉེན་མོ་དང༌། །མའི་སྤུན་སྤུན་ཟླའི་བུ་མོ་དང༌། །རང་གི་ཕྱི་མོའི་སྤུན་ཟླ་དང༌། །སྤུན་ཟླའི་བུ་མོ་དེའི་བུ་མོ། །ཕ་ཡི་མ་དང་ཕྱི་མོ་དང༌། ཁུ་བོ་ཡི་ནི་ཆུང་མ་དང༌། །བུ་མོའི་བུ་ཡི་ཆུང་མ་དང༌། །སླར་ཡང་ཆུང་མའི་སྤུན་ཟླ་མོ། །
ཕ་ཡི་སྲིང་དང་དེའི་བུ་མོ། །དེ་ཉིད་ཀྱི་ནི་རང་རིགས་སྐྱེས། །སྤུན་ཟླའི་ཆུང་མ་སུ་ཏཱི་དང༌། །བུ་ཉིད་ཀྱི་ནི་ཆུང་མ་དང༌། །བུ་མོའི་ཁྱོ་ཡི་མ་ཡི་ནི། །བུ་ཉིད་ཀྱི་ནི་རྒྱུག་མོ་དང༌། །འཇོ་བྱེད་མོ་དང་པཱུ་ཏྲིའོ། །ཐམས་ཅད་ཀྱང་སྐུ་མདོག་དམར་མོའོ། །ཆུའི་འཁོར་ལོ་ལ། མ་ཀ་ར་མོ་ཀུརྨཱི་ཀ །སྲལ་མོ་ཀཙྪི་ཆུ་སྲམ་མོ། །སྡིག་ནག་གགྒ་རཱ་མ་ཤཱི་ལི་མ། །ཆུ་ཡི་ཕུག་མ་སྲིན་བུའི་གདོང་མ་དང༌། །ཆ་ག་ཀརྐ་ཊ་དང་སུ་ཡ་མོ། །ཆུ་བྱི་མོ་དང་གྲོག་མོའི་གདོང་མ་དང༌། །ཆུ་ཡི་མི་མོ་དང་ནི་བ་ཊ་བཱི། །གླང་ཆེན་མོ་དང་སྟག་མོ་ཅེ་སྤྱང་མོ། །ཆུ་སྦྲུལ་མ་དང་དུད་མོ་འགྲོན་བུ་མ། །མུ་ཏིག་མ་ཎཱི་མོ་དང་ཛིཾ་གུ་རཱི། །ལི་ས་མོ་དང་དུང་ངུར་མ་ཀརྞོ་ཊི། །ཕ་ཊ་ཀ་མ་དཱ་ཝ་ཀ་མ་ཀྲི་མ་མོ། །ཛུ་ཥི་ཛུ་ཥ་མོ་དང་ཤ་སྦྲང་ཀ་ལཱ་མོ། །ཐམས་ཅད་ཀྱང་སྐུ་མདོག་དཀར་མོའོ། །ཡེ་ཤེས་ཀྱི་འཁོར་ལོ་ལ། ཐིག་ལེ་མཆོག་མ་ཤིན་ཏུ་བདེ། །ལྷ་ཡི་བུ་མོ་དགའ་ཆེན་མོ། །དགའ་དང་དགའ་གྲགས་པདྨ་ཅན། །དུང་ཅན་སྣ་ཚོགས་གླང་ཆེན་མ། །གཟུགས་ཅན་མ་དང་གཟུགས་མཛེས་མ། །འདོད་ཆགས་རྣམ་སྒེག་བདེ་བ་མོ། །མེ་ཏོག་འདོད་མ་ཀུ་མུ་ད། །ཨུཏྤལ་མ་དང་མཛེས་ལྡན་མ། །འདོད་ཆགས་མོ་དང་འདོད་ཆགས་ཆེ། །རོལ་གྲགས་མ་དང་རོལ་ཆེན་མོ། །མྱོས་མ་དང་ནི་མྱོས་ཆེན་མ། །འདོད་པ་མོ་དང་འདོད་ཆེན་མ། །བདེ་འབྱུང་མ་དང་བདེ་ལྡན་མ། །མཐུན་མཆོག་མ་དང་བྱམས་པ་མོ། །
སྐལ་བཟང་ལྡན་མ་སྐལ་བཟང་མོ། །དམའ་མོ་ཞུམ་མ་སྐྱེས་གཟུགས་མ། །ཐམས་ཅད་ཀྱང་སྐུ་མདོག་སྣ་ཚོགས་བཀྲ་བའོ། །དེའི་ཕྱི་རོལ་གྱི་སྣམ་བུ་ལ། ཟླ་བའི་གདུགས་ནས་མཐུའི་དཔལ་གྱི་བར་དུ་སངས་རྒྱས་ཉིས་བརྒྱ་དང་བཞི་བཅུ་ཞེ་དགུའོ། །སྒོ་མཚམས་བརྒྱད་ལ་ཤར་དུ་གཽ་རཱི། བྱང་དུ་ཙཽ་རཱི། ནུབ་ཏུ་བེ་ཏཱ་ལཱི། ལྷོ་རུ་གྷསྨ་རཱི། བསྲེག་པར་པུ་ཀ་སཱི། སྲིན་པོར་རི་ཁྲོད་མ། རླུང་མཚམས་སུ་ཙཎྜ་ལཱི། འབྱུང་པོར་ཌོམྦྷི་ནཱི་རྣམས་སོ། །ཐུགས་ཀྱི་འཁོར་ལོ་ལ། ཀླུ་མོ་གནོད་སྦྱིན་མོ་འབྱུང་མོ། །ཡི་དྭགས་དམྱལ་མོ་མནར་མེད་མ། །ལྟུང་བ་མ་དང་བར་མེད་མ། །བུམ་པ་མོ་དང་གཤིན་རྗེ་མོ། །ཐིག་ནག་མོ་དང་མེ་མདག་མ། །ཚ་བ་མ་དང་རབ་ཚ་མ། །ངུ་འབོད་མ་དང་ངུ་འབོད་ཆེ། །མར་ནག་དུ་མཆེད་རི་གཉིས་འཚོར། །སྡང་མ་རྨོངས་མ་ཕྲག་དོག་མ། །ཆགས་མ་སེར་སྣས་མྱོས་པ་མ། །སྐུད་པ་མ་དང་གྲང་བ་མོ། །དེ་བཞིན་རལ་གྲིའི་ནགས་མ་ཉིད། །དུ་མ་དང་ནི་མུ་གེ་མ། །ནང་དགོན་མཚོན་དགོན་ཆུའི་དགོན་མ། །རལ་གྲིའི་སོ་མ་རབ་མེད་མ། །སྤུ་གྲིའི་སོ་མ་འཁོར་ལོ་ཅན། །གྲུལ་བུམ་མ་སྟེ་སོ་དྲུག་གོ །ཐམས་ཅད་ཀྱང་སྐུ་མདོག་ནག་མོའོ། །གསུང་གི་འཁོར་ལོ་ལ། ལེ་ལོ་ཆོས་སེམས་སྒོམ་པ་མོ། །མཆོད་སེམས་བཟའ་སེམས་གཉིད་སེམས་མ། ཁྱིམ་སེམས་བུད་མེད་སེམས་མ་དང༌། །དོན་སེམས་
མ་དང་སྦྱོར་བྲལ་མ། །བུ་སེམས་མ་དང་མྱ་ངན་མ། །བསམ་གཏན་མ་དང་སྔགས་ཟློས་མ། །ངོ་མཚར་ང་རྒྱལ་གདུང་བ་མོ། །སེམས་ཅན་དོན་གྱི་རྒྱུར་བརྩོན་མ། །རྒྱལ་པོ་སེམས་མ་གཞན་གནོད་མ། །ཡེ་ཤེས་ཐོབ་མ་དཀའ་ཐུབ་མ། །རྒས་མ་འཆི་བ་སེམས་མ་དང༌། །བདེ་མ་སྡུག་མ་མི་དགེ་མ། །ཡོད་མ་མེད་མ་ཉིད་དང་ནི། །བླ་མ་སེམས་མ་འགྲོ་བ་མོ། །བཟོད་མ་མི་བཟོད་དལ་མ་དང༌། །ངལ་སོས་མ་དང་བཀྲེས་སེམས་མ། །ཐམས་ཅད་ཀྱང་སྐུ་མདོག་དམར་མོའོ། །འདི་ཐམས་ཅད་ཀྱི་མཚན་གྱི་མཐར་སེམས་པ་མ་ཞེས་སྦྱོར་རྒྱུ་ཡིན་ནོ། །སྐུའི་འཁོར་ལོ་ལ་འཁོར་ལོས་བསྒྱུར་མ་རྣམས་ཏེ། རྒྱལ་ཆེན་བཞིའི་རིགས་འཁོར་ལོས་བསྒྱུར་མ་དང༌། །སུམ་ཅུ་རྩ་གསུམ་འཐབ་བྲལ་དགའ་ལྡན་པ། །འཕྲུལ་དགའ་གཞན་འཕྲུལ་དབང་བྱེད་ཚངས་རིས་པ། །ཚངས་པ་འདུན་ན་འདོན་དང་ཚངས་ཆེན་པོ། །འོད་ཆུང་ཚད་མེད་འོད་དང་འོད་གསལ་བ། །དགེ་ཆུང་ཚད་མེད་དགེ་དང་དགེ་རྒྱས་དང༌། །སྤྲིན་མེད་བསོད་ནམས་སྐྱེས་དང་འབྲས་བུ་ཆེ། །མི་ཆེ་མི་གདུང་ཤིན་ཏུ་མཐོང་བ་དང༌། །གྱ་ནོམ་སྣང་བ་དང་ནི་འོག་མིན་པ། །ནམ་མཁའ་མཐའ་ཡས་རྣམ་ཤེས་མཐའ་ཡས་དང༌། །ཅི་ཡང་མེད་དང་འདུ་ཤེས་ཡོད་མིན་ཞིང༌། །འདུ་ཤེས་མེད་མིན་གྱི་ནི་སྐྱེ་མཆེད་དང༌། །དམྱལ་བ་ཡི་དྭགས་དུད་འགྲོ་དང་ནི་མི། །ལྷ་མིན་ཟླ་བ་ཉི་མ་གཤིན་རྗེ་དང༌། །དབང་པོའི་འཁོར་ལོ་བསྒྱུར་བ་ཞེས་རྣམས་སོ། །
ཐམས་ཅད་ཀྱང་སྐུ་མདོག་དཀར་བའམ། སྔོ་དམར་དཀར་བའི་ཁྲོ་བོའོ། །འདི་ཐམས་ཅད་ཀྱི་མཐར་འཁོར་ལོའི་བསྒྱུར་མ་ཞེས་སྦྱོར་བ་ཡིན་ནོ། །དེའི་ཕྱིར་རོལ་གྱི་སྣམ་བུ་ལ། འཕགས་དགྱེས་ནས་སྣང་མཛད་ཀྱི་བར་གྱི་སངས་རྒྱས་ཉིས་བརྒྱ་བཞི་བཅུ་རྩ་དགུའོ། །ཤར་སྒོར་ཆུ་སྐྱེས་དཀར་མོ། བྱང་སྒོར་གནྡྷ་རི། ནུབ་སྒོར་རྡོ་རྗེ་གར་མ། ལྷོ་སྒོར་རྟ་རྒོད་མའི་ཁ་མ། དབང་ལྡན་དུ་རྡོ་རྗེ་འབར་ཞལ་མ། མེར་རྡོ་རྗེ་ཁྲོ་གཉེར་ཅན་མ། བདེན་བྲལ་དུ་རྡོ་རྗེ་དུམ་བུ་མ། རླུང་དུ་རྡོ་རྗེ་གཏུམ་མོ་རྣམས་སོ། །དེ་རྣམས་ལས་འཁོར་ལོ་བཅུ་གཉིས་ཀྱི་རྣལ་འབྱོར་མ་ཐམས་ཅད་ཞལ་གཅིག་ཕྱག་བཞི་སྤྱན་གསུམ་མ། དང་པོ་གཉིས་ཌཱ་མ་རུ་དང་ཁ་ཊྭཾ་ག ལྷག་མ་གཉིས་གྲི་གུག་དང་ཐོད་པ་འཛིན་པ། དྲག་མོ་ཆེན་མོ་མཆེ་བ་གཙིགས་ཤིང་ཆགས་པས་བཞད་པ། གཅེར་མོ་སྐྲ་གྲོལ་ཞིང་ཕྱག་རྒྱ་ལྔ་དང་རྡོ་རྗེའི་འཕྲེང་བ་སོགས་སྣ་ཚོགས་པས་བརྒྱན་པ། རོའི་གདན་ལ་གཡས་བརྐྱང་གིས་བཞུགས་པ། དེ་རྣམས་ལ་འཁྱུད་པའི་དཔའ་བོ་རྣམས་ནི་མཚན་དང་སྐུའི་རྣམ་པ་ཡུམ་དང་འདྲ་བ་ལས། ཕྱག་རྒྱ་དྲུག་དང་རལ་བའི་ཅོད་པན་དང༌། མགོ་རློན་གྱི་དོ་ཤལ་དང༌། སྟག་ལྤགས་ཀྱི་སྨད་དཀྲིས་ཅན། གཡོན་བརྐྱང་གི་སྟབས་ཀྱིས་བཞུགས་པའོ། །དཀྱིལ་འཁོར་རིམ་པ་བཞིའི་སྒོ་མཚམས་མ་བརྒྱད་ནི། སྒྲུབ་ཐབས་དང་བོད་རྣམས་ལྟར་ན། ཤར་དང་བྱང་ཤར་བ་རྣམས་ནི་གཡོན་སྔོ་གཡས་ལྗང་བ། བྱང་དང་ནུབ་བྱང་བ་རྣམས་གཡོན་
ལྗང་གཡས་དམར་བ། ནུབ་དང་ལྷོ་ནུབ་པ་རྣམས་གཡོན་དམར་གཡས་སེར་བ། ལྷོ་དང་ཤར་ལྷོ་བ་རྣམས་གཡོན་སེར་གཡས་སྔོ་བ། ཐམས་ཅད་ཀྱང་ཞལ་གཅིག་ཕྱག་གཉིས་མ་སོགས་སྙིང་པོའི་རྣལ་འབྱོར་མ་རྣམས་དང་མཚུངས་པའོ། །འོན་ཀྱང་རྒྱུད་ཀྱི་ལེའུ་སོ་སོའི་དཀྱིལ་འཁོར་ལ། མཁའ་འགྲོ་མ་ནག་མོ་ཕྱག་བཞི་མར་མཛད། ལཱ་མ་སོགས་ཁ་དོག་མ་གཏོགས་དེ་ལ་ཞལ་འཕངས། གཞན་རྣམས་སྙིང་པོའི་རྣལ་འབྱོར་མའི་ཤུགས་ལ་གོ་བར་དགོངས་པ་ཡིན་པས་འདིར་དེ་ནས་དྲངས་པས་ཕྱག་བཞི་པའང་ལེགས་སོ། །སྐལ་བཟང་གིས་སངས་རྒྱས་རྣམས་ནི། ཤར་ཕྱོགས་པ་རྣམས་སྔོན་པོ། བྱང་ཕྱོགས་པ་རྣམས་ལྗང་ཁུ། ནུབ་ཕྱོགས་པ་རྣམས་དམར་པོ། ལྷོ་ཕྱོགས་པ་རྣམས་སེར་པོ། ཐམས་ཅད་ཀྱང་མཚན་དང་དཔེ་བྱད་རྫོགས་པ་ཆགས་བྲལ་རབ་འབྱུང་གི་ཆ་ལུགས་ཅན་བཞུགས་ཚུལ་དང་ཕྱག་རྒྱ་མ་ངེས་པའོ། །ཞེས་བླ་མ་སྔ་མ་རྣམས་གསུངས། བདག་གི་བླ་མ་རྗེ་བཙུན་གྱི་བཀའ་ལས་གཟུགས་ཕུང་གི་རྣམ་སྣང་སོགས་དང་འདྲ་བ་ཁྲོ་ཆགས་ཉམས་ཅན་ཡིན་ཡང་ཡིན་ལ་བླ་མ་གོང་མས་དེ་ལྟར་ཞལ་གཟིགས་པའང་ཡིན་གསུངས། འདིར་རྒྱས་པར་མ་བྲིས་སོ། །རྒྱུད་ལས་སྤྲུལ་སྐུར་བཤད་པ་ནི་དཀྱིལ་འཁོར་ལྷ་སྡེ་ཚན་སོ་སོས་སྐུ་བཞི་མཚོན་པའི་ནང་ཚན་ནས་སྤྲུལ་སྐུ་མཚོན་བྱེད་ནི་སྐལ་བཟང་འདི་རྣམས་ཡིན་ཞེས་པའི་དོན་ཡིན་ལ། སྤྱིར་ཡང་སྤྲུལ་སྐུར་བཤད་པས་ཆགས་བྲལ་གྱི་རྣམ་པར་སྒྲུབ་ནུས་པ་ག་ལ་ཡིན། འོན་ཀྱང་སྐབས་འདིར། པི་ཝཾ་མ་ལ་སོགས་པས་རྣལ་འབྱོར་མ་རྣམས་ཕྱག་དང་པོ་གཉིས་ཀྱི་རང་མིང་དང་མཐུན་པའི་རོལ་མོ་འཛིན་པ་དང༌། མཁའ་ལྡིང་མ་ལ་
སོགས་པའི་སྲོག་ཆགས་ཀྱིས་མཚན་ཅན་རྣམས། ཞལ་རས་སྲོག་ཆགས་དེ་དག་མཐུན་པའི་ཁ་དོག་དང་གདོང་བརྙན་དུ་བྱེད་པའི་ལུགས་གདམ་ངར་བཤད་ལ། སྙིང་པོའི་རྣལ་འབྱོར་མ་ཉེར་བཞི་ནི། སྒོམ་པར་ནུས་ན་གཙོ་བོ་ལྟར་ཕྱག་མངས་སམ། རྡོ་རྗེ་ཕག་མོ་ལྟར་ཞལ་བཞི་ཕྱག་བཅུ་གཉིས་པར་ཡང་རུང་ཞིང༌། སྒོ་མཚམས་མ་རྣམས་ནི་ཞལ་གཅིག་ཕྱག་གཉིས་མར་ངེས་སོ། །དེ་དག་ནི་དམ་ཚིག་གི་འཁོར་ལོ་བསྐྱེད་པའོ། །གཙོ་བོའི་ཐུགས་ཀར་ཉི་མ་ལ་ཧཱུཾ་ལྗང་སྔོན། སྤྱི་བོར་ཟླ་བ་དང་འཁོར་ལོ་ལ། ཨོཾ་དཀར་པོ། མགྲིན་པར་ཟླ་བ་དང་པདྨ་ལ་ཨཱཿདམར་པོ། ཐུགས་ཀའི་འོག་གི་ཆ་ལ། ཟླ་བ་དང་རྡོ་རྗེ་ལ་གནས་པའི་ཧཱུཾ་ནག་པོ། ལྷ་ཐམས་ཅད་ཀྱི་ཐུགས་ཀར་ཉི་མ་ལ། རང་རང་གི་ཁ་དོག་དང་མཚུངས་པའི་ཧཱུཾ་ཡིག་གོ །གཙོ་བོའི་ཐུགས་ཀའི་ཧཱུཾ་ཡིག་གཉིས་ཀྱི་བར་དུ། རཾ་ལས་བྱུང་བའི་ཉི་མའི་སྟེང་དུ། ཨོཾ་ཧ་བཾ་ཧཱ་བཱཾ། ཧཾ་བིཾ་ཧཱཾ་བིཾ། ཧུ་བུཾ་ཧཱུ་བཱུཾ། ཧེ་བཾ་ཧཻ་བཻཾ། ཧོ་བོཾ་ཧཽ་བཽཾ། ཧཾ་བཾ་ཧཿབཿ ཧཱུཾ་ཧཱུཾ་ཧཱུཾ་ཧཱུཾ། ཕཊ་ཕཊ་ཕཊ་ཕཊ་སྭཱཧཱ་སྭཱཧཱ། དཀར་པོ་དང་དམར་པོ་གཡོན་སྐོར་དུ་སྦྲུལ་འཁྱིལ་བ་ལྟར་གནས་པ། རྡོ་རྗེ་སེམས་དཔའ་དང་ཕག་མོའི་རང་བཞིན་ནོ། །གོ་ཆའི་སྔགས་དྲུག་ཆར་ལ་འགོར་ཨོཾ་དང༌། མཇུག་ཏུ་ཧཱུཾ་བཞི་ཕཊ་བཞི་སྭཱཧཱ་གཉིས་རྣམས་གོང་བཞིན་སྦྱོར་དགོས་ཏེ། མགོ་བོའི་ནང་དུ་ཉི་མ་ལ། ན་ཧཾ་ནཱ་ཧཱཾ། ནི་ཧི་ནཱི་ཧཱི། ནུ་ཧཱུཾ་ནཱུ་ཧཱུཾ། ནེ་ཧེཾ་ནཻ་ཧཻཾ། ནོ་ཧོཾ་ནཽ་ཧཽཾ། ན་ཧཾ་ནཿཧཱཾཿ སེར་པོ་དང་སྔོན་པོ་རྣམ་པར་སྣང་མཛད་དང་གཤིན་རྗེ་མའི་ངོ་བོ། སྤྱི་གཙུག་གི་ནང་དུ་ཉི་མ་ལ། སྭ་ཧྲཾ་སྭཱ་
ཧྲཾ། སྭི་ཧྲི་སྭཱི་ཧྲཱིཾ། སྭུ་ཧྲུཾ་སྭཱུ་ཧྲཱུཾ། སྭེ་ཧྲེཾ་སྭཻ་ཧྲཱཻཾ། སྭོ་ཧྲོཾ་སྭཽ་ཧྲཽཾ། སྭ་ཧྲཾ་སྭཿཧྲཿ ཧཱུཾཧཱུཾ་ཧཱུཾ་ཧཱུཾ། ཕཊ་ཕཊ་ཕཊ་ཕཊ། སྭཱཧཱ་སྭཱཧཱ། དམར་པོ་དང་དཀར་པོ་པདྨ་གར་དབང་དང་རྨོངས་བྱེད་མའི་ངོ་བོ། དཔུང་པ་གཉིས་ཀྱི་ནང་དུ་ཉི་མ་ལ། ཨོཾ་བ་ཧྲཾ་བ་ཧྲཱཾ། བི་ཧྲིཾ་བཱི་ཧྲཱིཾ། བུ་ཧྲུཾ་བཱུ་ཧྲཱུཾ། བེ་ཧྲེཾ་བཻ་ཧྲཻཾ། བོ་ཧྲོཾ་བཽ་ཧྲཽཾ། བ་ཧྲཾ་བཿཧྲཿ ནག་པོ་དང་སེར་པོ་ཧེ་རུ་ཀ་དང་བསྐྱོད་བྱེད་མའི་ངོ་བོ། མིག་གཉིས་ཀྱི་དབུས་སུ་ཉི་མ་ལ། ཧ་ཧཾ་ཧཱ་ཧཱཾ། ཧི་ཧིཾ་ཧཱི་ཧཱིཾ། ཧུ་ཧུཾ་ཧཱུ་ཧཱུཾ། ཧེ་ཧེཾ་ཧཻ་ཧཻཾ། ཧོ་ཧོཾ་ཧཽ་ཧཽཾ། ཧཾ་ཧཾ་ཧཿཧཿ དམར་སེར་དང་ལྗང་ཁུ་རྡོ་རྗེ་ཉི་མ་དང་སྐྲག་བྱེད་མའི་ངོ་བོ། མཛོད་སྤུའི་ཐད་ཀའི་ནང་དུ། ཕ་ཕ། ཕཱ་ཕཱ། ཕི་ཕི། ཕཱི་ཕཱི། ཕུ་ཕུ། ཕཱུ་ཕཱུ། ཕེ་ཕེ། ཕཻ་ཕཻ། ཕོ་ཕོ། ཕཽ་ཕཽ། ཕཾ་ཕཾ། ཕཿཕཿ ལྗང་ཁུ་དང་དུད་ཁ་རྟ་མཆོག་དང་ཙཎྜི་ཀཱའི་ངོ་བོ། །འདི་ལའང་ཕ་ཕཾ་ཕཱ་ཕཱཾ་སོགས་དགོས་པར་མངོན་ཡང་སྔར་གྱི་དཔེ་ཐམས་ཅད་ལ་མེད་པར་མཐུན་པས་རེ་ཞིག་བཞག་གོ། འདི་རྣམས་ལས་ཡི་གེའི་ཚོགས་འཕྲོས། ལུས་ཀྱི་ནང་ཐམས་ཅད་སྔགས་ཀྱི་རྡུལ་ཕྲ་རབ་ཀྱིས་གང༌། སྐུའི་ཕྱི་རོལ་དུ་སྙིང་གར་ཨོཾ་ཧ་དཀར་པོ་རྡོ་རྗེ་སེམས་དཔའ། མགོ་བོར་ན་མ་ཧི་སེར་པོ་རྣམ་པར་སྣང་མཛད། སྤྱི་གཙུག་ཏུ་སྭཱཧཱ་ཧུ་དམར་པོ་པདྨ་གར་གྱི་དབང་ཕྱུག ཕྲག་པ་གཉིས་སུ་བཽ་ཥ་ཊ་ཧེ་ནག་པོ། དཔལ་ཧེ་རུ་ཀ མིག་གཉིས་སུ། ཧཱུཾ་ཧཱུཾ་ཧོ་དམར་སེར་རྡོ་རྗེ་ཉི་མ། ཡན་ལག་ཐམས་ཅད་ལ་ཕཊ་ཧཾ་ལྗང་ཁུ་རྟ་མཆོག་
གི་ངོ་བོ་ཡུམ་གྱི་ལྟེ་བར། ཨོཾ་བཾ་དམར་མོ་རྡོ་རྗེ་ཕག་མོ། སྙིང་གར་ཧཾ་ཡོཾ་སྔོན་མོ་གཤིན་རྗེ་མ། ཁར་ཧྲཱིཾ་མོཾ་དཀར་མོ་རྨོངས་བྱེད་མ། དཔྲལ་པར་ཧྲེཾ་ཧྲིཾ་སེར་མོ་བསྐྱོད་བྱེད་མ། སྤྱི་གཙུག་ཧཱུཾ་ཧཱུཾ་ལྗང་ཁུ་སྐྲག་བྱེད་མ། ཡན་ལག་ཐམས་ཅད་ལ་ཕཊ་ཕཊ་དུད་ཁ་ཙཎྜི་ཀཱའི་ངོ་བོའོ། །དེ་རྣམས་ལས་ཡི་གེའི་ཚོགས་འཕྲོས་ཏེ་ལུས་ཀྱི་ཕྱི་རོལ་ཐམས་ཅད་གང་བར་གྱུར། འདིར་ཡང་སྤྲོ་ན་གོ་ཆའི་ལྷ་རྣམས་ཞལ་ཕྱག་གི་རྣམ་པ་ཅན་དུ་བསྒོམ་སྟེ། ལཱུ་ཡི་པའི་ལུགས་བཞིན་ནོ། །སྙིང་གའི་ས་བོན་གྱི་འོད་ཟེར་གྱིས་བསྐུལ་ནས། གདོད་མ་ནས་གྲུབ་པའི་དཀྱིལ་འཁོར་ཆེན་པོ་མདུན་གྱི་ནམ་མཁར་བྱོན་པར་གྱུར། འབར་བའི་ཕྱག་རྒྱ་དཔྲལ་པར་བསྐོར་ཞིང༌། ཕཻཾ་ཞེས་བརྗོད། ཨོཾ་བཛྲ་ཝཱི་ནཱི། སོགས་རིག་མ་བཅུ་དྲུག་གིས་མཆོད། ཛཿཧཱུཾ་བཾ་ཧོཿ ཞེས་པས་དམ་ཡེ་བསྲེ། སླར་ཡང་སྙིང་གའི་ས་བོན་གྱི་འོད་ཟེར་གྱིས་བསྐུལ་བས། དབང་ལྷ་དེ་བཞིན་གཤེགས་པ་རིགས་ལྔ་ཡབ་ཡུམ་ལ་སོགས་པ་དཀྱིལ་འཁོར་གྱི་འཁོར་ལོ་མདུན་གྱི་ནམ་མཁར་སྤྱན་དྲངས། ཕཻཾ། གོང་བཞིན་རིག་མ་བཅུ་དྲུག་གིས་མཆོད། ཇི་ལྟར་བལྟམས་པ་ཙམ་གྱིས་ནི། །དེ་བཞིན་གཤེགས་རྣམས་ཁྲུས་གསོལ་ལྟར། །དེ་བཞིན་བདག་ལ་ཁྲུས་བྱེད་འགྱུར། །ལྷ་ཡི་ཆུས་ནི་དག་པར་མཛོད། །ཅེས་གསོལ་བ་བཏབ་པས། རིགས་ལྔ་ཡབ་ཡུམ་སྙོམས་པར་ཞུགས་པའི་དགའ་བའི་སྒྲས། ཕྱོགས་བཅུའི་སངས་རྒྱས་ཐམས་ཅད་སྤྱན་དྲངས་ཞལ་དུ་ཞུགས་བྱང་ཆུབ་ཀྱི་སེམས་སུ་ཞུ་བ་སྦྱོར་མཚམས་ནས་བྱུང་ནས། བདུད་རྩི་བདེ་བ་ཆེན་པོའི་རྒྱུན་གྱིས་ལྷ་ཐམས་
ཅད་ཀྱི་སྤྱི་བོར་ནས་བླུགས་ཤིང་དབང་བསྐུར་བས། ལུས་ངག་ཡིད་གསུམ་གྱི་དྲི་མ་ཐམས་ཅད་དག རྡོ་རྗེ་བཞི་མི་ཕྱེད་པའི་རང་བཞིན་དུ་བྱིན་གྱིས་རླབས། སྤྱི་བོའི་སྟེང་དུ་གནས་པའི་བདུད་རྩིའི་ཐིགས་པ་རྣམས་ཡོངས་སུ་གྱུར་པ་ལས། རང་རང་གི་རིགས་ཀྱི་བདག་པོར་གྱུར་པ་ནི། གཙོ་བོ་ལ་མི་བསྐྱོད་པ། རྡོ་རྗེ་ཕག་མོ་ལ་འོད་དཔག་མེད་དམ་ཧེ་རུ་ཀ་རྡོ་རྗེའི་འཁོར་ལོ་པ་དང༌། ནམ་མཁའི་འཁོར་ལོ་པ་དང༌། ཐུགས་འཁོར་བ་རྣམས་ལ་མི་བསྐྱོད་པ། སྙིང་པོའི་འཁོར་ལོ་པ་དང༌། མེའི་འཁོར་ལོ་པ་དང༌། གསུང་གི་འཁོར་ལོ་པ་རྣམས་ལ་འོད་དཔག་མེད། ཡོན་ཏན་གྱི་འཁོར་ལོ་པ་དང༌། ཆུའི་འཁོར་ལོ་པ་དང༌། སྐུའི་འཁོར་ལོ་པ་རྣམས་ལ་རྣམ་པར་སྣང་མཛད། སྣ་ཚོགས་ཐིག་ལེའི་འཁོར་ལོ་ལ་གནས་པའི་རྣལ་འབྱོར་མ་རྣམས་དང༌། སའི་འཁོར་ལོ་པ་རྣམས་ལ་རིན་ཆེན་འབྱུང་ལྡན། རླུང་གི་འཁོར་ལོ་པ་དང༌། ཡེ་ཤེས་ཀྱི་འཁོར་ལོ་པ་དང༌། སྒོ་མཚམས་མ་རྣམས་ལ་དོན་ཡོད་གྲུབ་པས་དབུ་རྒྱན། ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏ་ས་མ་ཡ་ཤྲཱི་ཡེ་ཧཱུཾ། ཞེས་གསུང་ཞིང་དབང་གི་ལྷ་རྣམས་རིགས་བདག་ལ་ཐིམ། དེ་ནས་མཆོད་པ་དངོས་སུ་བཤམས་ཡོད་ན་བྱིན་རླབས་བྱ། ཡིད་སྤྲུལ་ཙམ་ལ་བྱིན་རླབས་མི་དགོས་ཏེ། གང་ལྟར་ཡང་གོང་ཚོགས་གསོག་གི་སྐབས་སུ་བཤད་པ་ལྟར། ཆུ་གཉིས། ཉེར་སྤྱོད་ལྔ། རིག་མ་བཅུ་དྲུག་རྣམས་ཀྱིས་མཆོད། དཀར་མོ་རི་དྭགས་མཚན་མ་འཛིན། །ཞེས་པ་ནས། གཡུང་མོས་སྐུ་ལ་འཁྱུད་པ་ཉིད། །མཚན་ཉིད་
ཐམས་ཅད་རྫོགས་པ་དང༌། །བདེ་ཆེན་སོགས་དང་བཟང་པོ་དང༌། །གཉིས་ཀུན་རྣམ་པར་སྤངས་པ་དང༌། །མཆོད་པ་ཁམས་གསུམ་བདག་ཉིད་ནི། །དངོས་པོ་ཀུན་འབྱུང་རྣམས་ཀྱིས་མཆོད། །དེ་ནས་བསྟོད་པ་ནི། སྔགས་འཕྲེང་ཡོངས་རྫོགས་ཀྱིས་བྱེད་པའང་ཡོད་མོད་ཀྱི། དེ་ལྟར་དགོས་པའི་ཤེས་བྱེད་འཐད་ལྡན་མི་སྣང་བས། བདེ་མཆོག་སྤྱི་དང་མཐུན་པར་ཡབ་ཡུམ་གྱི་རྐང་བརྒྱད་གཉིས་ཀྱིས་བསྟོད། དེ་ནས་སྤྲོ་ན་ཅང་ཏེའུ་སོགས་རོལ་མོའི་སྒྲ་དང་བཅས་ཏེ་རྐང་པ་ཞེ་བརྒྱད་པའི་མཐར། ཧེ་རུ་ཀ་དཔལ་ཡེ་ཤེས་ཆེ། རྣལ་འབྱོར་ཆེན་པོ་ཐུབ་ཆེན་པོ། ཞེས་པ་ནས། སྟོང་པའི་ཐུགས་ལ་ཕྱག་འཚལ་ལོ། །ཞེས་པའི་བར་གྱི་མཚན་བརྒྱས་ཀྱང་བསྟོད། ནང་མཆོད་འབྲུ་གསུམ་གྱིས་མྱངས་ལ། འཇིག་རྟེན་གྱི་ཁམས་ཐམས་ཅད་ན་གནས་པའི་དཔའ་བོ་དང་རྣལ་འབྱོར་མ་མ་ལུས་པ་འདུས་ནས། མྱོས་བྱེད་དང་ཤའི་བྱེ་བྲག་སྣ་ཚོགས་པ་དང༌། དམ་ཚིག་གི་རྫས་ཐམས་ཅད་ཀྱིས་མཆོད་དེ་ཐམས་ཅད་ཀྱང་རང་གི་སྙིང་གར་ཐིམ། དཀྱིལ་འཁོར་བདེ་བ་ཆེན་པོ་སྒོམ་པར་གྱིས། རྣལ་འབྱོར་བཅུ་གཉིས་བསོད་ནམས་སྡིག་མེད་པ། །ཐམས་ཅད་ཟག་མེད་རང་བཞིན་མྱོང་བར་གྱིས། །དཀྱིལ་འཁོར་ངན་པ་དེ་ནི་བདེ་བར་ཤེས་པར་བྱོས། །དབང་པོ་འཁྲུལ་པ་བདེ་བ་ཆེན་པོར་མྱོང་བར་གྱིས། །སྐད་ཅིག་དེ་ལ་རང་དང་གཞན་གྱི་ངོ་བོ་མེད། །གང་དང་གང་གི་རྣམ་པ་སྣ་ཚོགས་གཟུགས་ཅན་གྱི། །ས་གསུམ་གྱིས་ནི་དཀྱིལ་འཁོར་འཁོར་ལོ་སྤྲོ་བར་གྱིས། །དཀྱིལ་འཁོར་གྱི་འཁོར་ལོ་འཇའ་ཚོན་ལྟ་བུ་སྣང་སྟོང་གཉིས་སུ་མེད་པ་ལ་མཉམ་པར་བཞག་གོ །
དེ་དག་ནི་དཀྱིལ་འཁོར་རྒྱལ་པོ་མཆོག་གི་ཏིང་ངེ་འཛིན་ནོ། །དེ་ནས་འདོད་ཆགས་ཆེན་པོའི་ཚུལ་ལམ་དུ་བྱེད་པ། ཀུན་ཏུ་སྤྱོད་པ་ལ་འཇུག་པ་ནི། གཙོ་བོ་ཡབ་ཡུམ་གྱི་མཁའ་གསང་བྱིན་གྱིས་བརླབས་ཏེ། ཡས་བབས་དང་མས་བརྟན་གྱི་དགའ་བཞི་རྒྱུད་ལ་སྐྱེས་པར་མོས་ཤིང༌། ཕག་མོ་མཁའ་འགྲོ་མའི་གནས་སུ་སོང་ལ། མཁའ་འགྲོ་མ་གཙོ་མོའི་གནས་སུ་འོངས་ཏེ་དགའ་བ་རྩོམས་པ་དང༌། དེ་ལཱ་མའི་གནས་སུ་སོང་ཞིང༌། །ལཱ་མ་གཙོ་མོའི་གནས་སུ་འོང་བ་སོགས་རྣལ་འབྱོར་མ་བཞི་ལན་ཅིག་འཁོད་པ་ནི། ལོངས་སྤྱོད་པ་ཞེས་བྱ། ལན་གཉིས་པ་འཁོར་བ་ཐིམ་པ། གསུམ་པ་འཁོར་བ་བདག་པོ། བཞི་པ་འཁོར་བ་ཁྱབ་བདག །དེ་བཞིན་དུ། ཐིག་ལེའི་འཁོར་ལོའི་རྣལ་འབྱོར་མ། ལྔ་ཚན་བཞི་པོ་རྣམས་ལའང་སྦྱར་ཞིང༌། སྒོ་མ་བཞི་ཚན་བཞི་དང༌། མཚམས་མ་བཞི་ཚན་བཞི་ལའང་སྦྱར་རོ། །དེ་ནས་འཁོར་ལོ་བཅུ་གཉིས་ལ་ཀུན་ཏུ་སྤྱོད་པ་ནི། བདག་ཉིད་འདྲེན་པའི་ཧེ་རུ་ཀ་ནག་པོ་ཕྱག་བཅུ་གཉིས་པར་གྱུར་པ་ནི། འདྲེན་པའི་དཀྱིལ་འཁོར་དུ་འགྱུར་རོ། །དེ་བཞིན་དུ་རང་ཉིད་ཆུང་ངུའི་ཧེ་རུ་ཀ་དམར་སེར་དུ་གྱུར་ལ། རྡོ་རྗེའི་འཁོར་ལོ། སྙིང་པོའི་འཁོར་ལོའི་གནས་སུ་སོང་ཞིང༌། སྙིང་པོའི་འཁོར་ལོ་རྡོ་རྗེའི་འཁོར་ལོའི་གནས་སུ་འོངས་པས། འཁོར་ལོ་ཀུན་གྱི་ནང་དུ་གནས་པར་གྱུར་པ་ན། ཆུང་ངུའི་ཧེ་རུ་ཀའི་དཀྱིལ་འཁོར་དུ་གྱུར་རོ། །རིམ་པ་དེ་ཉིད་ནས་བརྩམས་ཏེ། རང་ཉིད་སྐུའི་ཧེ་རུ་ཀ་སྔོ་དམར་དཀར་བའི་མདོག་ཅན། གསུང་གི་འཁོར་ལོ་སྐུའི་འཁོར་ལོའི་གནས་སུ་སོང༌། འཁོར་ལོ་ཐམས་ཅད་ཀྱི་ནང་དུ་སྐུ་འཁོར་སོང་བས་སྐུའི་ཧེ་རུ་ཀའི་དཀྱིལ་འཁོར་དུ་འགྱུར་རོ། །ཚུལ་དེ་ཉིད་ལན་བཅུ་གཅིག་ཏུ་
བསྐོར་བས། རྡོ་རྗེ་འཁོར་ལོ་ནང་དུ་འོང་གི་བར་སྐོར་ནས། སླར་ཡང་རང་ཉིད་མཁའ་འགྲོ་རྒྱ་མཚོ་ཉིད་དུ་བསྒོམ་པར་བྱའོ། །འདིས་ནི་མེ་ཏོག་གང་ལ་ལྷུང་བའི་འཁོར་ལོ་སྒོམ་པ་ཡང་བསྟན་པ་ཡིན་ཞིང༌། དེའི་རྗེས་ལྷ་ཐམས་ཅད་ཀྱི་ཐུགས་ཀ་ནས་འོད་ཟེར་གྱི་སྣེ་ལ་དཀྱིལ་འཁོར་ལྷའི་འཁོར་ལོ་སྤྲོས་པས་དོན་གཉིས་བྱས་ཏེ། སླར་བསྡུ་བ་ཡང་ཡང་སྒོམ་པ་ནི་ལས་རྒྱལ་པོ་མཆོག་གི་ཏིང་ངེ་འཛིན་ནོ། །དེ་ནས། སྙིང་གའི་ས་བོན་དང་ཕྱག་མཚན་ལས་འོད་ཟེར་སྤྲོ་བསྡུའི་རིམ་པས། ཐིག་ལེའི་དབུས་སུ་དཀྱིལ་འཁོར་གྱི་འཁོར་ལོ་སྒོམ་པ་ནི་ཐིག་ལེའི་རྣལ་འབྱོར། དེ་ཡང་འོད་ཟེར་གྱི་སྤྲོ་བསྡུས་ཐིག་ལེར་ཞུ་སྟེ་རྡོ་རྗེ་ནོར་བུར་འོངས་པ་ཕྱག་མཚན་དུ་གྱུར། དེའི་ལྟེ་བར་དཀྱིལ་འཁོར་སྒོམས་པའི་གཙོ་བོའི་ཐུགས་ཀའི་འོད་ཀྱིས། ཕྱི་ནང་གི་དཀྱིལ་འཁོར་མཐའ་དག་གསལ་བར་བསམ། དེ་ལ་སེམས་བརྟན་པ་ཐོབ་པའི་ཚེ། ཕྲ་མོའི་ས་བོན་དེའི་འོད་ཟེར་གྱིས་དྲངས་ཏེ་དཀྱིལ་འཁོར་གྱི་འཁོར་ལོ་མཐའ་དག་ས་བོན་དེའི་ནང་དུ་བསྡུ་བ་ཡང་ཡང་བསྒོམ་པས་རྟགས་ལྔ་མཐར་ཕྱིན་པར་འགྱུར་བར་བཤད་དེ། ཕྲ་མོའི་རྣལ་འབྱོར་རོ། །དེ་ལ་ལས་རྒྱལ་མཆོག་དང་ཕྲ་ཐིག་གི་རྣལ་འབྱོར་དེ་དག་མངོན་རྟོགས་ཀྱི་ངག་འདོན་ལ་ནམ་དུ་ཡང་མི་དགོས་ཤིང༌། འདོད་པའི་དངོས་གྲུབ་མཆོག་སྒྲུབ་པ་ལ་སྤྱིར་ངེས་པར་དགོས་པའི་གལ་པོ་ཆེ་ཡིན་ཡང༌། ལས་དང་པོ་པས་དེ་དག་གོ་ཡུལ་ཙམ་མ་གཏོགས་ཡོངས་རྫོགས་སྒོམ་པར་མི་སྤྱོད་ཅིང་ཡི་གེ་མང་པར་འགྱུར་བའི་ཕྱིར་རྒྱས་པར་མ་སྨོས་སོ། །དེ་དག་ནང་ནས་གཙོ་བོ་ཡབ་ཡུམ་མཉམ་སྦྱོར་གྱི་དགའ་བཞིའི་དོན་སྒོམས་ཤིང༌། དཀྱིལ་འཁོར་སྤྲོ་བསྡུས་མོས་པ་ཙམ་
བྱེད་པའི་ལས་རྒྱལ་མཆོག་དེ་ཙམ་སྒོམ་དགོས་ཏེ། གཞན་དུ་ན་མངོན་རྟོགས་ཀྱི་ཡན་ལག་ཆད་པར་འགྱུར་བས་སོ། །དེ་ཉིད་ལ་ཐིག་ལེ་དང་ཕྲ་མོའི་རྣལ་འབྱོར་ཡང་ཚང་བར་རྒྱུད་ཀྱི་མཐར་ཐུགས་འགའ་ཞིག་ལས་གསུང་ཤིང༌། གོང་དུ་སྨོས་པའི་ཕྲ་ཐིག་དེ་དག་ནི་གསང་འདུས་ཀྱི་མན་ངག་ལས་བླང་བ་ཡིན་པས་སྐབས་འདིའི་དཀྱུས་ལ་མ་བསྒོམས་ཀྱང་ལུགས་འདིའི་བསྐྱེད་རིམ་གྱིས་ཡན་ལག་ཆད་པར་ནི་མི་འགྲོ་བར་མངོན་ལ། གལ་ཏེ་ལས་དང་པོ་པས་བསྒོམ་ན། སྙིང་ག་དང་གསང་བའི་ཐིག་ལེ་ཙམ་ལ་སེམས་གཟུང་ཞིང༌། དེའི་ནང་གི་དཀྱིལ་གྱི་འཁོར་ལོ་ནི་མོས་པ་ཙམ་གྱིས་ཆོག་གོ །དེ་ནས་བཟླས་པའི་དམིགས་པ་གསལ་བཏབ་ལ་སྔགས་བཟླ་བར་བྱ་སྟེ། ཡབ་ཡུམ་གྱི་སྙིང་པོ་དང༌། ཉེ་བའི་སྙིང་པོ་ནི། གོང་དུ་དྲིལ་བུ་ལུས་དཀྱིལ་གྱི་སྐབས་སུ་བཤད་པ་ལྟར་ཏེ། ལཱུ་དྲིལ་སོགས་དང་འདྲ་ལ། ཡུམ་གྱི་འཕྲེང་བའི་སྔགས་རྩ་སྔགས་སུ་གྲགས་པ་ནི། ལཱུ་ཡི་པའི་མན་ངག་གི་ལག་ལེན་དང་མཐུན་ཏེ་རྒྱུད་རྒྱལ་འདིར་སྔགས་བཏུ་ཡང་གསུངས་སོ། །ཡབ་ཀྱི་འཕྲེང་བའི་སྔགས་རྩ་སྔགས་སུ་གྲགས་པ་ནི། ཨོཾ་ན་མཿཤྲཱི་བཛྲ་ཌཱ་ཀ་མཧཱ་བཱི་ར་བཱི་རེ་ཤྭ་རཱ་ཡ། ཏྲི་བྷུ་བཾ་ཀམྤཱ་བ་ཎཱ་ཡ། དཾཥྟོཏྐ་ཊ་བྷི་ཥ་ཎ་བྷཻ་ར་བཱ་ཡ། ཤ་ཏ་ས་ཧ་སྲ་ནེ་ཏྲཱ་ཡ། བིང་ཡུ་ཛྫི་ཧྭཱ་ཡ། ཀཾ་ཀཱ་ལ་མཱ་ལཱ་བྷ་ར་ཎོ྅་གྲཱ་ཡ། ཀོ་ཊི་ལཀྵ་བྷུ་ཛཱ་ཡ། ཛྲཱ་ལཱ་ཝ་ལཱི་ཌ་ལགྣཱ་ཡ། པ་ར་ཤུ་པ་ཤོ་དྱ་ཏ་ཤཱུ་ལཱ། ཀལྤཱནྟ་དྷྲཱུ་མྲུ་གྲ་ཝ་བཱུ་ཥཱ་ཡ། བི་ཀ་ཊ་མུ་ཁ་ཧཱ་ཧཱ་རཱ་བཱ་ཡ། མཱ་ཏྲྀ་ག་ཎ་པ་རི་པཱུ་རི་ཏ་མནྟྲ་ཡ། ས་ཧ་ཛ་སུནྡ་རཱི་བལླ་བྷ་ཀ་རཱ་ཡ། ཧཱུཾ་ཧཱུཾ་ཀཱ་རོཙྩ་ར་ཎ་མུ་ཁཱ་
ཡ། མཧཱ་ཤྨ་ཤ་ན་པྲི་ཡཱ་ཡ། སརྦ་བྷཱུ་ཏ་སཾ་ཏྲཱ་ས་ན་ཀ་རཱ་ཡ། མཧཱ་ཀལྤཱནྟཱགྣི་ཏེ་ཛཱ་ཡ། ཛ་ཊཱ་ཀ་ལཱ་པ་མུ་ཀུ་ཊཱ་ཡ། ཁ་ཊྭཱཾ་ག་ཀ་པཱ་ལ་ཤུ་ལ་བྷིནྣ་དྷ་རི་ཎེ། མཧཱ་ས་མུ་དྲ་མེ་ཁ་ལཱ་ཡ། བྱཱ་གྷྲ་ཙིརྨཱཾ་བ་ར་དྷཱ་རི་ཎེ། བེ་ཏཱ་ལ་སཾ་གྷམརྡྷ་ཎ་ཀ་རཱ་ཡ། མཧཱ་བིགྷྣ་ནི་བཱ་རི་ཎེ། ཤ་ཏྲུ་ནི་སུམྦྷ་ན་ཀ་རཱ་ཡ། ཏྲི་ས་ཧ་སྲ་མཧཱ་སི་ཧསྲེ་ཀ་རོ་མཱ་བ་ལྱཱནྟ་ཝརྟི་ཎེ། ཤ་ཏ་ས་ཧ་སྲ་མུ་ཁཱ་ཡ། ཛྙཱ་ན་སཱ་ག་ར་པྲ་བྷཱ་ཡ། མཧཱ་བི་ཤི་ཏ་རུ་དྷི་ར་བ་སྭཱཧཱ་རི་ཎེ། སརྦ་མཱ་ར་བ་ལ་བི་དྷྭནྶི་ནེ། ཤྲཱིཥྟི་སཾ་ཧཱ་ར་ཀ་ར་ཀཱ་ཡ། སརྦ་ནཱ་གཱ་ནཱཾ་ཤོ་ཥ་ཎ་སྟམྦྷ་ན་བི་དྲ་བ་ཎཱ་ཡ། ཨནྟྲ་མ་ལ་དྷཱ་རི་ཎེ། སུ་མེ་རུ་ཀམྤི་ཏ་ན་དཱ་ཡ། ཀྲོ་དྷ་བི་གྲ་ཧ་དྷཱ་ར་ཎཱ་ཡ། མཧཱ་ཤ་ཏི་ལ་ཀཱཏྨ་ནེ། བུདྡྷ་ཀོ་ཊི་ས་ཧ་སྲ་ཀྵ་ཎཱ་ནིཥྤཱ་ད་ནཱ་ཡ། ཛྙཱ་ན་མྲྀ་ཏ་བརྵ་པ་ཎཱ་ཡ། སརྦ་ཀརྨ་པྲ་ཝརྟ་ནཱ་ཡ། བནྡྷ་ཀ་རཱ་ཡ། སརྦ་བི་ཀལྤ་བྷཉྫ་ན་ཀ་རཱ་ཡ། མུཎྜཱ་བ་ལཱི་ལགྣ་ཤ་རཱི་རཱ་ཡ། པ་ར་ཀྲི་ཏ་ཡནྟྲ་མནྟྲ་ནཱ་ཤ་ནཱ་ཡ། མཧཱ་རཀྵ་ཀ་རཱ་ཡ། དུཥྟཱ་ནཾ་བི་དཱ་ལ་ནེ། དྷརྨོ་ད་ཡ་ཀ་རཱ་ཡ། ཀྲོ་དྷ་སྥཱ་ར་སྥཱ་ར་ཎ་ཡ། ཨིནྟྲ་ཛཱ་ལ་སརྦ་ས་ཏྭཱཏྨ་ནེ། གྲསྟ་བཱ་པྲ་བཱ་ད་མཧཱ་མ་ཏེ། ཨོཾ་ཨ་ཀ་ཨཱ་ཁ་ཨི་ག་ཨཱི་གྷ་ཨུ་ད་ཨཱུ་ཙ་རྀ་ཚ་རཱྀ་ཛ་ལྀ་ཛྷ་ལཱྀ་ཉ་ཨེ་ཊ་ཨཻ་ཋ་ཨོ་ཊ་ཨཽ་ཌྷ་ཨཾ་ཎ་ཨཿཏ། ཨཿཐ་ཨཾ་ད་ཨཽཾ་དྷ་ཨོཾ་ན། ཨཻཾ་པ་ཨེཾ་ཕ་ལཱྀཾ་བ་ལྀཾ་བྷྀཾ་རཱ་མ་རྀཾ་ཡ་ཨཱུཾ་ར་ཨུཾ་ལ་ཨཱིཾ་ཝ་ཨིཾ་ཤ་ཨཾ་ཥ་ཨཱཾ་ས་ཨཿཧ་ཨཱཿཀྵ་ཧཿ
ཀ་ཀཱ་ཁ་ཁཱ་ག་གཱ་གྷ་གྷཱ་ང་ངཱ༌། ཙ་ཙཱ་ཚ་ཚཱ་ཛ་ཛཱ་ཛྷ་ཛྷཱ་ཉ་ཉཱ། ཊ་ཊཱ་ཋ་ཋཱ་ཌ་ཌཱ་ཌྷ་ཌྷཱ་ཎ་ཎཱ། ཏ་ཏཱ་ཐ་ཐཱ་ད་དཱ་དྷ་དྷཱ་ན་ནཱ། པ་པཱ་ཕ་ཕཱ་བ་བཱ་བྷ་བྷཱ་མ་མཱ། ཡ་ཡཱ་ར་རཱ་ལ་ལཱ་ཝ་ཝཱ། ཤ་ཤཱ་ཥ་ཥཱ་ས་སཱ་ཧ་ཧཱ་ཀྵ་ཀྵ། ཀྵཾ་ཀྵཱཾ་ཧཾ་ཧཱཾ་སཾ་སཱཾ་ཥ་ཥཱཾ་ཤཾ་ཤཱཾ་ཝཾ་ཝཱཾ་ལཾ་ལཱཾ་རཾ་རཱཾ་ཡཾ་ཡཱཾ། མཾ་མཱཾ་བྷཾ་བྷཱེཾ་བཾ་བཱཾ་ཕཾ་ཕཱཾ་པཾ་པཱཾ། ནཾ་ནཱཾ་དྷཾ་དྷཱཾ་དཾ་དཱཾ་ཐཾ་ཐཱཾ་ཏཾ་ཏཱཾ། ཎཾ་ཎཱཾ་ཌྷཾ་ཌྷཱཾ་ཌཾ་ཌཱཾ་ཋཾ་ཋཱཾ་ཊཾ་ཊཱཾ། ཉཾ་ཉཱཾ་ཛྷཾ་ཛྷཱཾ་ཛཾ་ཛཱཾ་ཚཾ་ཚཱཾ་ཙཾ་ཙཱཾ། ངཾ་ངཱཾ་གྷཾ་གྷཱཾ་གཾ་གཱཾ་ཁཾ་ཁཱཾ་ཀཾ་ཀཱཾ། ཀ་ཙ་ཁ་ཚ་ག་ཛ་གྷ་ཛྷ་ང་ཉ། ཀ་ཊ་ཁ་ཋ་ག་ཌ་གྷ་ཌྷ་ང་ཎ། ཀ་ཏ་ཁ་ཏ་ཐ་ག་ད་གྷ་དྷ་ང་ན། ཀ་པ་ཁ་ཕ་ག་བ་གྷ་བྷ་ང་མ། ཡ་ར་ལ་ཝ། ཤ་ཥ་ས་ཧ་ཀྵ་ཨཿཨཾ། ཀ་ཧ་ཀ་ཧ། ཀ་ས་ཀ་ས། ཀ་ཥ་ཀ་ཥ། ཀ་ཤ་ཀ་ཤ ཀ་ཝ་ཀ་ཝ། ཀ་ལ་ཀ་ལ། ཀ་ར་ཀ་ར། ཀ་ཡ་ཀ་ཡ། ཀ་མ་ཀ་མ། ཀ་བྷ་ཀ་བྷ། ཀ་བ་ཀ་བ། ཀ་ཕ་ཀ་ཕ། ཀ་པ་ཀ་པ། ཀ་ན་ཀ་ན། ཀ་དྷ་ཀ་དྷ། ཀ་ད་ཀ་ད། ཀ་ཐ་ཀ་ཐ། ཀ་ཏ་ཀ་ཏ། ཀ་ཎ་ཀ་ཎ། ཀ་ཌྷ་ཀ་ཌྷ། ཀ་ཌ་ཀ་ཌ། ཀ་ཋ་ཀ་ཋ། ཀ་ཊ་ཀ་ཊ། ཀ་ཉ་ཀ་ཉ། ཀ་ཛྷ་ཀ་ཛྷ། ཀ་ཛ་ཀ་ཛ། ཀ་ཚ་ཀ་ཚ། ཀ་ཙ་ཀ་ཙ། ཀ་ང་ཀ་ང༌། ཀ་གྷ་ཀ་གྷ། ཀ་ག་ཀ་གཀ་ཁ་ཀ་ཁ། ཀུ་ཧུ་ཀུ་ཧུ། ཀུ་སུ་ཀུ་སུ། ཀུ་ཥུ་ཀུ་ཥུ། ཀུ་ཤུ་ཀུ་ཤུ། ཀུ་ཝུ་ཀུ་ཝུ། ཀུ་ལུ་ཀུ་ལུ། ཀུ་རུ་ཀུ་རུ། ཀུ་ཡུ་ཀུ་ཡུ། ཀུ་མུ་ཀུ་མུ། ཀུ་བྷུ་ཀུ་བྷུ། ཀུ་བུ་ཀུ་བུ། ཀུ་ཕུ་ཀུ་ཕུ། ཀུ་པུ་ཀུ་པུ། ཀུ་ནུ་ཀུ་ནུ། ཀུ་དྷུ་ཀུ་དྷུ། ཀུ་དུ་ཀུ་དུ།
ཀུ་ཐུ་ཀུ་ཐུ། ཀུ་ཏུ་ཀུ་ཏུ། ཀུ་ཎུ་ཀུ་ཎུ། ཀུ་ཌྷུ་ཀུ་ཌྷུ། ཀུ་ཌུ་ཀུ་ཌུ། ཀུ་ཋུ་ཀུ་ཋུ། ཀུ་ཊུ་ཀུ་ཊུ། ཀུ་ཉུ་ཀུ་ཉུ། ཀུ་ཛྷུ་ཀུ་ཛྷུ། ཀུ་ཛུ་ཀུ་ཛུ། ཀུ་ཚུ་ཀུ་ཚུ། ཀུ་ཙུ་ཀུ་ཙུ། ཀུ་དུ་ཀུ་དུ། ཀུ་གྷུ་ཀུ་གྷུ། ཀུ་གུ་ཀུ་གུ། ཀུ་ཁུ་ཀུ་ཁུ། བནྡྷཱ་ཡ་བནྡྷཱ་ཡ། བནྡྷ་པཱ་ཡ་བནྡྷ་པཱ་ཡ། གརྫྫ་གརྫྫ༌། གརྫྫ་ཡ་གརྫྫ་ཡ། ཤོ་ཥ་ཡ་ཤོ་ཥ་ཡ། ཏརྫ་ཡ་ཏརྫ་ཡ། སྥོ་ཊ་ཡ་སྥོ་ཊ་ཡ། བི་དྷྭཾ་ས་ཡ་བི་དྷྭཾ་ས་ཡ། མོ་ཧ་ཡ་མོ་ཧ་ཡ། ཏྲཱ་ས་ཡ་ཏྲཱ་ས་ཡ། མཱ་ར་ཡ་མཱ་ར་ཡ། ཀཾ་བཱ་ཝ་ཡ་ཀཾ་བཱ་ཝ་ཡ། དུ་ར་དུ་ར། ཁུ་ར་ཁུ་ར། བྷ་ར་བྷ་ར། ཛ་ར་ཛ་ར། བི་ཤ་བི་ཤ །ཧཱུཾ་ཧཱུཾ་ཧཱུཾ་ཧཱུཾ། ད་ཧ་ད་ཧ། པ་ཙ་པ་ཙ། བྷཉྫ་བྷཉྫ། མརྡ་ཡ་མརྡ་ཡ། ཧྲེཾ་ཧྲེཾ། ཙ་ལ་ཙ་ལ། མཱ་ཙ་ལ་མཱ་ཙ་ལ། ཀྲུ་ར་ཙེཏཱ་ཡ་ཕཊ། ཤ་ཏྭཱུ་ནི་བཱ་ར་ཡ་ཧཱུཾ། མེ་གྷ་ནི་ཝཱ་ར་ཡ་ཧྲིཾ། མོ་ཙ་ཡ་མོ་ཙ་ཡ། སྟམྦྷ་ཡ་སྟམྦྷ་ཡ། བྷཀྵ་བྷཀྵ། དུརྶས་པ་ཡ་དུརྶས་པ་ཡ། གྷུཌྷཱན་ཏྲ་མཱ་ལཱ་བ་ལ་བི་ནེ། ཁེ་ཙ་རཱ་ཡ་ཧཱུཾ། བྷུ་ཙ་རཱ་ཡ་ཨཱཿ པཱ་ཏཱ་ལ་ཙ་རཱ་ཡ་ཨོཾ། ཛ་ལ་ཙ་རཱ་ཡ་བཾ། སྠ་ལ་ཙ་རཱ་ཡ་ལཾ། སརྦ་ཏ་ནི་བཱ་ས་ནི་ཧཱུཾ། ནཱ་གཱ་ནཱཾ་སཔྟ་པཱ་ཏཱ་ལ་ག་ཏ་གྲྀཧྞ་རཛྙཱ་གྲྀཧྞ་རཛྙཱཾ། ཛྙཾ་ཛྙཾ། ཛྙཽ་ཛྙཽ། ཀ་ར་ཀ་ར། ཀུ་རུ་ཀུ་རུ། ཁ་ར་ཁ་ར། ཁུ་རུ་ཁུ་རུ། ག་ར་ག་ར། གུ་རུ་གུ་རུ། གྷ་ར་གྷ་ར། གྷུ་རུ་གྷུ་རུ། ང་ར་ང་ར༌། ངུ་རུ་ངུ་རུ། ཙ་ར་ཙ་ར། ཙུ་རུ་ཙུ་རུ། ཚ་ར་ཚ་ར། ཚུ་རུ་ཚུ་རུ། ཛ་ར་ཛ་ར། ཛུ་རུ་ཛུ་རུ། ཛྷ་ར་ཛྷ་ར། ཛྷུ་རུ་ཛྷུ་རུ། ཉ་ར་ཉ་ར།
ཉུ་རུ་ཉུ་རུ། ཊ་ར་ཊ་ར། ཊུ་རུ་ཊུ་རུ། ཋ་ར་ཋ་ར། ཋུ་རུ་ཋུ་རུ། ཌ་ར་ཌ་ར། ཌུ་རུ་ཌུ་རུ། ཌྷ་ར་ཌྷ་ར། ཌྷུ་རུ་ཌྷུ་རུ། ཎ་ར་ཎ་ར། ཎུ་རུ་ཎུ་རུ། ཏ་ར་ཏ་ར། ཏུ་རུ་ཏུ་རུ། ཐ་ར་ཐ་ར། ཐུ་རུ་ཐུ་རུ། ད་ར་ད་ར། དུ་རུ་དུ་རུ། དྷ་ར་དྷ་ར། དྷུ་རུ་དྷུ་རུ། ན་ར་ན་ར། ནུ་རུ་ནུ་རུ། པ་ར་པ་ར། པུ་རུ་པུ་རུ། ཕ་ར་ཕ་ར། ཕུ་རུ་ཕུ་རུ། བ་ར་བ་ར། བུ་རུ་བུ་རུ། བྷ་ར་བྷ་ར། བྷུ་རུ་བྷུ་རུ། མ་ར་མ་ར། མུ་རུ་མུ་རུ། ཡ་ར་ཡ་ར། ཡུ་རུ་ཡུ་རུ། ར་ར་ར་ར། རུ་རུ་རུ་རུ། ལ་ར་ལ་ར། ལུ་རུ་ལུ་རུ། ཝ་ར་ཝ་ར། ཝུ་རུ་ཝུ་རུ། ཤ་ར་ཤ་ར། ཤུ་རུ་ཤུ་རུ། ཥ་ར་ཥ་ར། ཥུ་རུ་ཥུ་རུ། ས་ར་ས་ར། སུ་རུ་སུ་རུ། ཧ་ར་ཧ་ར། ཧུ་རུ་ཧུ་རུ། ཀྵ་ར་ཀྵ་ར། ཀྵུ་རུ་ཀྵུ་རུ། ཧཾ་ཧཱཾ། ཧིཾ་ཧཱིཾ། ཧུཾ་ཧཱུཾ། ཧེཾ་ཧཻཾ། ཧོཾ་ཧཽཾ། ཧཾ་ཧཿ གརྦྷ་གརྦྷ། ཛཱ་ཏི་ཛཱ་ཏི། དེ་ཝཱ་ནཱཾ། དཱ་མ་ཡ་དཱ་མ་ཡ། སརྦ་ཤ་རཱི་རཱ་ཡ་ཧཱུཾ། ཛ་ཡ་ཛ་ཡ་ཧཱུཾ། བི་ཛ་ཡ་བི་ཛ་ཡ་ཧཱུཾ། ས་ར་ས་ར་ཧཱུཾ། བི་ས་ར་བི་ར་ས་ཧཱུཾ། ཨགྣ་ཡེ་ཧཱུཾ། བ་རུ་ཎེ་ཧཱུཾ། ཨ་ན་ལཱ་ཡ་ཧཱུཾ། བཱ་ཡ་ཝེ་ཧཱུཾ། ཨཱ་ཀཱ་ཤཱ་ཡ་ཧཱུཾ། སརྦ་རོ་གོ་བ་ཧ་རཱ་ཡ་ཧཱུཾ། བི་ཥབྷཀྵ་ཎཱ་ཡ་ཧཱུཾ། ཡནྟྲབཱ་ཧ་ནཱ་ཡ་ཧཱུཾ། ཀཱ་ལཱ་གྷ་ཡེ་ཧཱུཾ། དེ་བཱ་ཡ་ཧཱུཾ། ཡ་མཱ་ཡ་ཧཱུཾ། ཀུ་བེ་རཱ་ཡ་ཧཱུཾ། དེ་ཏྱཱ་ཡེ་ཧཱུཾ། ཨིནྡྲཱ་ཡ་ཧཱུཾ། བྷཱུ་ཏཱ་ཡ་ཧཱུཾ། སརྦ་ས་ཏྭཱ་ཡ་ཧཱུཾ། བརྟ་ཙཀྲཱ་ཡ་ཧཱུཾ། དྷརྨ་དྷཱ་ཏ་ཝེ་ཧཱུཾ། མུ་ཁཱ་ཡ་ཧཱུཾ། ནེ་ཏྲཱ་ཡ་ཧཱུཾ། ཀ་པཱ་ལ་མཱ་ལི་ནེ་ཧཱུཾ། བྷུ་ཛཱ་ཡ་ཧཱུཾ།
ཨསྟྲ་ཡ་ཧཱུཾ། ཙ་ར་ཎཱ་ཡ་ཧཱུཾ། ཛ་ཊཱ་མུ་ཀུ་ཊཱ་ཡ། མ་ས་མ་ས། ག་ས་ག་ས། ར་ས་ར་ས། བྷ་ར་བྷ་ར། མ་ཊ་མ་ཊ། ཏྲ་ཊ་ཏྲ་ཊ། གྷ་ཊ་གྷ་ཊ། མུཉྩ་མུཉྩ། གྷོ་རཱན་དྷ་ཀཱ་ར་བྲི་ཡཱ་ཡ། ཕིཾ་ཕིཾ། ཕུ་ད་ཕུ་ད། མ་ར་མ་ར། པ་ར་མཱརྠ་རཱུ་པི་ཎེ། ཤཱནྟི་ཀ་རཱ་ཡ། བུཥྟི་བ་ར་ཌ་ནཱ་ཡ། ལོ་ཀ་པཱ་ལ་རཱུ་པི་ཎེ། སརྦ་ཤ་རཱི་ར་རཱུ་པཱ་ཡ། བྲྀཀྵ་གུལྨོ་ལ་ཏཱ་ཡ། སཔྤ་རཱུ་པཱི་ཎེ། སརྦ་བསྟུ་ནེ་མཱ་ར་ཎཱ་ཡ། རཱུ་པཱ་ཡ། བྷ་ཀྵཱ་ཡ། བྷ་ཀྵ་ཎ་རཱུ་པཱ་ཡ། ནི་རོ་པཱ་མཱ་ཡ། ནི་རོ་པཱ་མ་མུ་ཁ་བེ། ཧ་ས་ཧ་ས། བི་ལཱ་ས་བི་ལཱ་ས། ནྲྀ་ཏྱཱ་བ་ཡ་ནྲྀ་ཏྱཱ་པ་ཡ། དྭཱིནྡྲི་ཡ་ཡོ་གཱ་ཡ། ནིཿསྭ་བྷཱ་ཝ་མ་ཧཱཏྨ་ནེ། ཤཱསྟྲདྷཱ་ར་ཎི་ཝ་ར་ཎཱ་ཡ། ནཱ་ནཱ་བྷི་ཙ་རཙྪེ་ད་ནེ། ཙུམྦ་ཙུམྦ། ཧུ་ལུ་ཧུ་ལུ། ཙུ་ལུ་ཙུ་ལུ། ཧཱུཾ་ཧ་ཧཱུཾ་ཧཱ། ཧཱུཾ་ཧི་ཧཱུཾ་ཧཱི། ཧཱུཾ་ཧུ་ཧཱུཾ་ཧུ། ཧཱུཾ་ཧེ་ཧཱུཾ་ཧཻ། ཧཱུཾ་ཧོ་ཧཱུཾ་ཧཽ། ཧཱུཾ་ཧཾ་ཧཱུཾ་ཧཿ ཧུཾ་ཧཱུཾ། ཧྲིཾ་ཧྲཱིཾ། ཛུཾ་ཛཱུཾ། ཀྲོཾ་ཀྲཽཾ། ཕིཾ་ཕཱིཾ། ཕུཾ་ཕཱུཾ། ཕེཾ་ཕཻཾ། ཕོཾ་ཕཽཾ། ཕཾ་ཕཱཾ། ཕཿཕཿ ཀུ་ཙ་ཀུ་ཙ། ཏྲ་ཊ་ཏྲ་ཊ། མ་ཌ་མ་ཌ། ར་ཋ་ར་ཋ། ད་ཋ་ད་ཋ། ཛ་ཋ་ཛ་ཋ། མ་ད་ན་མ་ད་ན། ཧཱུཾ་ཧཱུཾ་ཧཱུཾ་ཧཱུཾ། ཧཱུཾ་ཧཱུཾ་ཧཱུཾ་ཧཱུཾ། ཧཱུཾ་ཧཱུཾ་ཧཱུཾ་ཧཱུཾ། ཧཱུཾ་ཧཱུཾ་ཧཱུཾ་ཧཱུཕཊ་སྭཱཧཱ། ཞེས་པ་ཡབ་ཀྱི་རྩ་བའི་སྔགས་འདི་ཉིད་དང༌། ཡུམ་གྱི་རྩ་བའི་སྔགས་ཏེ། བཟླས་བྱའི་གཙོ་བོ་ནི་འདི་གཉིས་ཡིན་ལ། དེ་ཙམ་བཟླ་བ་མི་ལྕོགས་ན་རྩ་སྔགས་གཉིས་པོ་ཚར་གཅིག་བཏོན་ནས། ཡབ་ཡུམ་གྱི་སྙིང་པོ་དང་ཉེ་སྙིང་གང་མོས་
པ་ཞིག་བཟླ་བར་བྱའོ། །འཁོར་གྱི་སྔགས་རྣམས་ནི། བདག་བསྐྱེད་བཟླས་པའི་སྐབས་བཟླ་མི་དགོས་ལ། དཀྱིལ་འཁོར་མཆོད་པ་ལ་སོགས་པའི་གནས་སྐབས་འགའ་ཞིག་ཏུ་དགོས་མོད་ཀྱི་གཞན་དུ་བྲི་བར་བྱའོ། །དེ་ནས་དཀྱིལ་འཁོར་ཉེ་བར་བསྡུ་བ་ནི། རིག་མ་བཅུ་དྲུག་གིས་མཆོད། རྐང་བརྒྱད་དམ་མཚན་བརྒྱ་གང་རུང་གིས་བསྟོད། དཀྱིལ་འཁོར་ཆེན་པོའི་ཕྱི་རོལ་གྱི་མེའི་རྭ་བ་ནས་བརྩམས་བདག་ཉིད་ཀྱི་བར་དུ་ཕྱི་མ་ཕྱི་མ་ནང་མ་ནང་མ་ལ་ཐིམ། རང་ཉིད་ཀྱང་སྙིང་གའི་ཧཱུཾ་ལྗང་སྔོན་ལ་ཐིམ། དེ་ཡང་ནཱ་དའི་བར་དུ་བསྡུས་ཏེ་ནཱ་ད་ཡང་དབྱིངས་སུ་ཐིམ་པར་གྱུར། ཅུང་ཟད་མཉམ་པར་བཞག །སྟོང་པའི་ངང་ལས་བདག་དཔལ་མཁའ་འགྲོ་རྒྱ་མཚོའི་གཟུགས་ཀྱིས་གནས་པར་གྱུར། ཞེས་བརྗོད། བར་འདིར་གཏོར་མ་གཏོང་བར་བཤད་ཀྱང༌། ད་ལྟ་ལག་ལེན་དུ་མི་བདེ་བས་མི་མཛད་ལ། དེ་ནས་དག་པ་དྲན་པ་མདོར་བསྡུས་པ་ནི། ཀུན་རྫོབ་དང་ནི་དོན་དམ་པ། །དཀྱིལ་འཁོར་པ་དང་གཙོ་བོའོ། །ཁྲག་འཐུང་གཉིས་མེད་དངོས་པོ་རུ། །འདི་གསུམ་གྱི་ནི་ཁམས་གསུམ་མོ། །ཐམས་ཅད་ཐིག་ལེའི་གཟུགས་བདག་ཉིད། །བདེན་པ་གཉིས་སུ་གཟུང་བ་མེད། །ཡོད་པ་གཟུགས་མེད་བདག་ཉིད་དེ། །རྟོག་པ་ཙམ་དུ་ཁྱབ་བདག་ཆེ། །སྦྱིན་པ་ཀུན་རྫོབ་གཟུགས་བདག་ཉིད། །ཕ་རོལ་ཡང་ནི་དོན་དམ་པའོ། །དང་པོའི་སྦྱོར་བ་དེའི་འགྲུབ་བོ། །ཚུལ་ཁྲིམས་བསྙེན་པ་སོགས་སུ་འདོད། །ཕར་ཕྱིན་རྒྱུ་ཡི་རྡོ་རྗེ་འཆང༌། །སྟོང་
ཉིད་སྙིང་རྗེའི་བདག་ཉིད་དོ། །བཟོད་པ་ཚངས་པར་སྤྱོད་པ་ཡི། །དཀྱིལ་འཁོར་འབྱིན་པ་ཡང་ནི་དེ། །རྒྱལ་པོ་བདེ་བ་ཀུན་ལ་གནས། །མཆོག་ནི་རང་གིས་ཕ་རོལ་ཕྱིན། །བརྩོན་འགྲུས་དགའ་ཆེན་ཐམས་ཅད་ལས། །མདོག་དང་བཞུགས་ཚུལ་བདག་ཉིད་ཀྱིས། །ཕ་རོལ་ཕྱིན་རྣམས་རང་བཞིན་དུ། །ཡེ་ཤེས་རྣམ་པར་ཀུན་ཏུ་འགྱུར། །ཡེ་ཤེས་སེམས་སོགས་བསམ་གཏན་ཏེ། །ཕར་ཕྱིན་འོད་ཟེར་སྤྲོ་བའོ། །ཡེ་ཤེས་དཀྱིལ་འཁོར་དང་དབང་བསྐུར། །ཤེས་རབ་ལས་ཀྱི་རྒྱལ་པོ་མཆོག །རང་རང་མགོ་བོར་རིགས་ཀྱིས་ནི། །རྒྱས་བཏབ་ཕ་རོལ་ཕྱིན་པའོ། །སྟོབས་ནི་སྙིང་རྗེའི་དཔའ་བོ་སྟེ། །སྟོང་པ་ཉིད་ནི་རྣལ་འབྱོར་མ། །ཕ་རོལ་ཕྱིན་མ་གཉིས་མེད་ཀུན། །གཡོན་པར་ཞུགས་སྐྱེས་གང་བདེ་བ། །ཐབས་ནི་ཐིག་ལེའི་རྣལ་འབྱོར་ཏེ། །ཕ་རོལ་ཕྱིན་པ་ཐེག་པ་ཆེ། །སྨོན་ལམ་སྔགས་ཀྱི་བཟླས་པ་སོགས། །ཕར་ཕྱིན་ཕྲ་མོའི་རྣལ་འབྱོར་རོ། །ཡེ་ཤེས་དཀྱིལ་འཁོར་མ་ལུས་པ། །ཕག་མོ་དང་ནི་བསྲེས་པ་ལས། །བསྡུ་བ་ཕ་རོལ་ཕྱིན་པ་སྟེ། །འཇིག་རྟེན་ཁམས་ཀྱི་རྣམ་དག་པའོ། །སྲིད་དང་མྱ་ངན་འདས་གཟུགས་བདག །སྒྱུ་མ་སྙིང་རྗེ་ལས་བྱུང་བའོ། །ཐམས་ཅད་བདེན་མིན་བརྫུན་མིན་པའོ། །སྐྱེ་མིན་མི་སྐྱེ་མིན་སྤངས་པའོ། །ཞེས་བརྗོད་ཅིང་དོན་བསམ་པར་ཛ་ཡ་སྱ་ནཱའི་སྒྲུབ་ཐབས་ཀྱི་གཞུང་ལས་བཤད་དོ། །ཐུན་བཞིའམ་ཐུན་ཐ་མའི་ཐུན་མཚམས་སུ་གཏོར་མ་གཏོང་ཞིང༌། གཞན་ཡང་བཟའ་བའི་རྣལ་འབྱོར་དང༌། སྤྱོད་ལམ་
གྱི་རྣལ་འབྱོར་དང༌། ཉལ་བ་དང་ལྡང་བའི་རྣལ་འབྱོར་རྣམས་ཀྱང་ནན་ཏན་དུ་བྱ་དགོས་ཏེ། དེ་དག་གི་རིམ་པ་ནི་སྤྱི་དང་འདྲ་ལ། དག་དྲན་གྱི་རྗེས་སུ་སྤྱོད་ལམ་གྱི་རྣལ་འབྱོར་ལ་འཇུག་ན། གོང་དུ་བཤད་པ་བཞིན་ལུས་ཀྱི་ཕྱིའི་གོ་ཆ་རྣམས་བཀོད་ནས་སྣང་བ་ཐམས་ཅད་ལྷར་མོས་བཞིན་དུ་དགེ་བའི་རྩ་བ་བསྔོའོ། །གཏོར་མའི་ཆོ་ག་ལ། གཏོར་མ་བྱིན་རླབས་ནི་དྲིལ་བུ་ལུས་དཀྱིལ་གྱི་སྐབས་སུ་བཤད་པ་དང་འདྲ་བ་ལས། རྫས་རྣམས་བསྐྱེད་པའི་སྐབས། ཤར་དུ་བི་དཀར་པོ་ལས་དྲི་ཆེན་བིས་མཚན་པ། བྱང་དུ་མུ་ལྗང་ཁུ་ལས་དྲི་ཆུ་མུས་མཚན་པ། ནུབ་ཏུ་མ་དམར་པོ་ལས་ཤ་ཆེན་མས་མཚན་པ། ལྷོར་རྭ་སེར་པོ་ལས་རང་བྱུང་རས་མཚན་པ། དབུས་སུ་ཨ་དཀར་པོ་ལས་བྱང་སེམས་ཨས་མཚན་པ། མེར་གོ་དཀར་པོ་ལས་བ་ལང་གི་ཤ་གོས་མཚན་པ། སྲིན་པོར་ཀུ་སྔོན་པོ་ལས་ཁྱི་ཤ་ཀུས་མཚན་པ། རླུང་དུ་ད་དམར་པོ་ལས་གླང་པོའི་ཤ་དས་མཚན་པ། དབང་ལྡན་དུ་ཧ་ལྗང་ཁུ་ལས་རྟ་ཤ་ཧས་མཚན་པ། དབུས་སུ་ན་སྔོན་པོ་ལས་ཤ་ཆེན་ནས་མཚན་པ། ཞེས་འདོན་པ་སྤོ་བ་ནི་ཛ་ཡ་སྱ་ནའི་ཁྱད་པར་གྱི་འདོད་པ་ཡིན་ཞིང་འགལ་བ་མེད་ལ་ཐོག་མ་ཁ་ཊྭཾ་ག་བསྐྱེད་ནས་དེ་རྗེས་རྫས་བཅུ་བཞུ་བ་ཛ་ཡ་སྱ་ནའི་གཞུང་ལ་སྣང་ཡང༌། ཚད་ལྡན་རྣམས་དང་ནི་མཐུན་པར་གོ་རིམ་འཁྲུགས་པ་དང་ཡི་གེ་གསུམ་ལས་འཁོར་ལོ་བཅུ་གཉིས་ཀྱི་ལྷ་ཚོགས་སྤྲོ་བསྡུ་བྱེད་པ་ནི་ཐུན་མོང་མ་ཡིན་པའི་ལུགས་སུ་བསམས་ནས་ཆེད་ཀྱིས་བཅོས་པར་སྣང་ཡང༌། ལྷ་ཐམས་ཅད་རྡོ་རྗེ་གསུམ་དུ་འདུ་བས་འཆོས་མི་དགོས་ཤིང༌། དེ་སྐབས་ཐུན་མོང་མ་ཡིན་པས་ཁྱད་ཆོས་དེ་དོན་ལ་གནས་ན།
ཡི་གེ་ཡང་བཅུ་གཉིས་དགོས་པ་ལ་ཡི་གེ་གསུམ་ལས་མི་སྣང་བའི་ཕྱིར་མི་འཐད་དོ། །དེས་ན་གཏོར་མ་བྱིན་རླབས་ལ་མི་འདྲ་བའི་ཁྱད་པར་གཞན་མི་དགོས་སོ། །དེ་ནས་མགྲོན་སྤྱན་དྲངས་ཤིང་གཏོར་མ་འབུལ་བ་ནི། རང་གི་སྙིང་གའི་ས་བོན་ལས་འོད་ཟེར་འཕྲོས། རྣམ་པ་ཐམས་ཅད་ཀྱིས་ཡོངས་སུ་རྫོགས་པའི་དཀྱིལ་འཁོར་ཆེན་པོ་ཕྱི་རོལ་ཕྱོགས་སྐྱོང་བ་དང༌། ཞིང་སྐྱོང་བ་དང༌། སྲིད་པ་གསུམ་གྱི་འབྱུང་པོའི་ཚོགས་ཀྱིས་བསྐོར་བ་སྤྱན་དྲངས། འབར་བའི་ཕྱག་རྒྱ་དཔྲལ་པར་བསྐོར་ཞིང༌། ཕཊ། ཅེས་བརྗོད། རང་གི་མདུན་གྱི་ཆོས་འབྱུང་གི་ནང་དུ། པདྨའི་གདན་ལ་དཀྱིལ་འཁོར་གྱི་འཁོར་ལོ་ཡང་དག་པར་བཞུགས་ཤིང༌། ཕྱོགས་སྐྱོང་བ་ལ་སོགས་པ་ཕྱི་རོལ་ཏུ་འཁོད་པར་གྱུར། སྲིད་པ་གསུམ་གྱི་འབྱུང་པོའི་ཚོགས་དེ་རྣམས་སྐད་ཅིག་གི་འོད་གསལ་དུ་བཅུག་ནས། དཔལ་མཁའ་འགྲོ་རྒྱ་མཚོ་ཤེས་རབ་མ་དང་བཅས་པའི་སྐུར་བཞེངས་པར་གྱུར། དེ་ནས་ཆུ་གཉིས་ཉེར་སྤྱོད་རིག་མ་བཅུ་དྲུག་ལྷ་མོ་བརྒྱད་རྣམས་ཀྱིས་མཆོད། ལག་པ་གཡོན་དུ་ཨཱ་ལི་ལས་ཟླ་བ། གཡས་སུ་ཀཱ་ལི་ལས་ཉི་མ་དབུས་སུ་ཧཱུཾ། ཉི་ཟླ་ཧཱུཾ་དང་བཅས་པ་ཡོངས་སུ་གྱུར་པ་རྡོ་རྗེ་ཐལ་མོར་གྱུར། ཨོཾ་ཨ་ནོ་ནྱ་ཨ་ནུ་ག་ཏཱཿ སརྦ་དྷརྨཱཿཔ་ར་སྤ་ར། ཨ་ནུ་པྲ་པྲྀཥྟ་སརྦ་དྷརྨཿཨཏྱནྟ་ཨ་ནུ་པྲ་པྲྀཥྟ་སརྦ་དྷརྨཱཿཧཱུཾ། ལྷ་མོ་ཚད་མ་དམ་ཚིག་ཚད་མ་དང༌། ནས་རྒྱུར་གྱུར་ཅིག་མགྲོན་རྣམས་ཀྱི་ལྗགས་རྡོ་རྗེའི་སྦུ་གུས་གཏོར་མ་དྲངས་ཏེ་གསོལ་བར་གྱུར། ཨོཾ་བཛྲ་ཨ་རལླི་ཧོཿ ཛཿཧཱུཾ་བཾ་ཧོཿ བཛྲ་ཌཱ་ཀ་ནི་ས་མཱ་ཡ་སྟྭཾ། དྲི་
ཤྱ་ཧོཿ ཞེས་པ་ལན་གསུམ་དང༌། ཨོཾ་བྷཀྵ་བྷཀྵ་སརྦ་ཡོ་གི་ཤྭ་རེ་ཧཱུཾ་ཧཱུཾ་ཛཿསྭཱ་ཧཱ། ཞེས་པ་ལན་ལྔས། དཀྱིལ་འཁོར་པ་རྣམས་ལ་ཕུལ། ཨོཾ་བཛྲ་ཏམྤུ་ལཱ་ཡ་སྭཱཧཱ། ཨོཾ་བཛྲ་ཝས་སྱ་སྭཱཧཱ། ཞེས་པས་སོ་རྩི་དང་ན་བཟའ་ཕུལ། གོང་བཞིན་ཞབས་བསིལ་ཀྱང་ཕུལ། རྐང་པ་བཞི་བཅུ་རྩ་བརྒྱད་པ་དང༌། རྐང་བརྒྱད་གཉིས་ཀྱིས་བསྟོད། སྲིད་དང་ཞི་བ་མཉམ་པ༴ ཞེས་པ་ནས། བདག་ལ་རྗེས་བརྩེར་མཛད་དུ་གསོལ། །གྱི་བར་གྱིས་འདོད་དོན་གསོལ་བ་བཏབ། དེ་ནས་འཇིག་རྟེན་པ་རྣམས་ལ་འབུལ་བ་ནི། རྡོ་རྗེ་ཐལ་མོ་གྱེན་དུ་ཁ་ཕྱེ་ལ། ཨོཾ་ཁ་ཁ་ཁཱ་ཧི་ཁཱ་ཧི། སརྦ་ཡཀྵ། རཀྵ་ས། བྷུ་ཏ་པྲེ་ཏ། པི་ཤ་ཙ་ཨུན་མ་ད། ཨ་པསྨ་ར་ཌཱ་ཀ་ཌཱ་ཀི་ནྱཱ་ད་ཡ། ཨི་མཾ་བཱ་ལིཾ་གྲྀཧྞནྟུ་ས་མ་ཡ་རཀྵནྟུ། མ་མ་སརྦ་སིདྡྷི་མེ་པྲ་ཡཙྪནྟུ། ཨ་ཐཻ་བཾ། ཡ་ཐཻཥྟཾཾ། བྷུཉྫ་ཐ། པི་བ་ཐ། ཛི་གྷྲ་ཐ། མཱ་ཏི་ཀྲ་མ་ཐ། མ་མ་སརྦ་ཀརྟ་ཡ། སཏྶུ་ཁཾ། བི་བྲྀདྡྷ། ས་ཧ་ཡི་ཀ་བྷ་ཝནྟུ་ཧཱུཾ་ཧཱུཾ་ཕཊ་སྭཱཧཱ། ལན་གསུམ་གྱིས་ཕུལ། ཞིང་སྐྱོང་རྣམས་ལ་ཁྱད་པར་གྱི་འབུལ་བ་ནི། ཨོཾ་ཀཀྐ་ཌྷ་ནཾ། བ་བཱནྡྷ་ནཾ། ཁཁྑ་ད་ནཾ། སརྦ་དུཥྟཾ། ཧ་ན་ཧ་ན། གྷཱ་ཏ་ཡ་གྷཱ་ཏ་ཡ། མ་མ་ཀརྻཾ་ཀུ་རུ་ཧཱུཾ་ཧཱུཾ་ཧཱུཾ་ཕཊ་ཕཊ་སྭཱཧཱ། ལན་གསུམ། ཨོཾ་ཧ་ཧོཿཧྲཱི་སྭཱཧཱ། ཞེས་པས་ནང་མཆོད་ཕུལ། ལྷ་ཡི་ཚོགས་རྣམས་མ་ལུས་དང༌། ཞེས་པ་ནས་ཡིད་ལ་འདོད་པ་ཀུན་འགྲུབ་ཤོག །ཅེས་པས་བསྟོད་ཅིང་འདོད་དོན་གསོལ་བ་བཏབ། དྲིལ་བུ་རྒྱུན་དཀྲོལ་དུ་བྱེད་ཅིང༌། འགྲོ་བ་ཀུན་ནི་མཆོག་ཏུ་དགའ་བའི་རང་བཞིན་ཏེ། །རྣལ་འབྱོར་མ་ཡི་འཁོར་ལོའི་རང་བཞིན་དུ་གནས་
གྱིས། །ཨ་རེ་རེ་རེ་གཏི་མུག་ཕྱུགས་ཀྱིས་མི་ཤེས་སོ། །ལྷན་སྐྱེས་མཛེས་མ་བླངས་ནས་བདེ་བ་ཆེ་ལ་མནོས། །ཤམ་བུ་ས་གསུམ་མ་ལུས་འགྲོ་བ་སངས་རྒྱས་ཀྱི་རང་བཞིན། །སྙིང་རྗེའི་གཞོན་ནུ་མ་དང་ལྷན་ཅིག་རོལ་བར་བྱོས། །ཨ་རེ་གང་གི་དོན་དམ་ལ་ནི་མ་བསྒོམས་པས། །དེ་ཡི་སངས་རྒྱས་ཉིད་ནི་ཐོབ་པ་མ་ཡིན་ནོ། །ཨ་རེ་ནང་དང་ཕྱི་ནི་དབྱེ་བ་མེད་པར་ཤེས་པར་གྱིས། །འཇིག་རྟེན་ཐམས་ཅད་བསྒྲལ་བར་ནུས་པའོ། །ཨ་རེ། དེ་ནས་ཡིག་བརྒྱ་ལན་མང་དུ་བརྗོད། མིག་གི་ཕྱག་རྒྱ་བསྟན་ལ། པད་སྐོར་སྔོན་དུ་འགྲོ་བ་ལྟེ་བར་འཁྱུད་རྒྱ་བྱས་པའི་མཐར་སེ་གོལ་གཏོགས་ཏེ། ཨོཾ་བཛྲ་མུཿ དཀྱིལ་འཁོར་པ་བདག་གི་སྨིན་མཚམས་སུ་ཐིམ། འཇིག་རྟེན་པ་རྣམས་རང་གནས་སུ་གཤེགས། མཁའ་འགྲོ་མ་རྣམས་འདུས་ལ་གུས་པས་མཆོད་པ་དང་སོགས་ཤོ་ལོ་ཀ་གཉིས་ཀྱིས་སྨོན་ལམ་གདབ་པར་བཤད་པ་ནི། ཚོགས་དང་གཏོར་མ་ལྷན་ཅིག་ཏུ་བྱེད་པའི་དབང་དུ་བྱས་པ་ཡིན་ལ། ཚོགས་འཁོར་གྱི་བྱ་བ་དང་མ་འབྲེལ་བར། གཏོར་མ་རྐྱང་པ་ལ་ནི། སེམས་ཅན་ཐམས་ཅད་བདེ་གྱུར་ཅིག །སེམས་ཅན་ཐམས་ཅད་ནད་མེད་པར། སངས་རྒྱས་ཉིད་དུ་འགྲོ་བ་ཡིན། །ལམ་དེ་ཉིད་དུ་གྲུབ་གྱུར་ཅིག །མ་བསྒྲལ་བ་རྣམས་བདག་གིས་བསྒྲལ། །མ་གྲོལ་བ་རྣམས་བདག་གིས་དགྲོལ། །རྣལ་འབྱོར་གཙུག་ལག་བསྟན་བཅོས་ལ། །ད་ལྟ་ཉིད་དུ་གནས་པར་བགྱི། །ཞེས་སོགས་སྨོན་ལམ་ཅི་རིགས་པར་གདབ་ཅིང༌། བཀྲ་ཤིས་ཀྱི་གླུ་དབྱངས་ཀྱང་བླང་བར་བྱའོ། །འདི་ནི་རྒྱུན་གྱི་ཉམས་ལེན་གྱི་གཏོར་ཆོག་སྟེ། བསྡུས་
པ་ཡིན་ཞིང༌། འབྱུང་པོ་ཐམས་ཅད་པའི་གཏོར་མ་དང༌། ཕྱོགས་སྐྱོང་གི་གཏོར་མ་ཆེན་པོ་དང༌། ཞིང་སྐྱོང་གི་གཏོར་མ་རྣམས་ནི། ལྷའི་བསྐྱེད་ཆོག་ཤིན་ཏུ་རྒྱས་པས་འདིར་མ་བྲིས་ཏེ་གཞན་དུ་བལྟ་བར་བྱའོ། །འདི་ལས་དགེ་བ་གང་ཐོབ་པ། འགྲོ་ཀུན་སངས་རྒྱས་ཐོབ་ཕྱིར་བསྔོ། །བདག་ཀྱང་དེ་རིང་ཕན་ཆད་དུ། །འགྲོ་བའི་འདྲེན་པ་ཉིད་དུ་ཤོག །དེ་ལ་དཀྱིལ་འཁོར་འདི་ཉིད་ཀྱི་སྒྲུབ་ཐབས་ཤིན་ཏུ་མང་པོ་རྣམས་ཕལཆེར་ཚིག་ཚོགས་ཆེ་བ་ལྷུར་བླངས་པས། ཕན་ཐོགས་ཆུང་བར་མཐོང་ཞིང༌། ཚིགས་བཅད་དུ་སྡེབས་པས་སྒྲུབ་ཐབས་བསྡུས་པ་འགའ་ཟུང་ཡང་སྣང་མོད་ཀྱི། གོ་དཀའ་ཞིང་ངག་འདོན་དང་སྒོམ་དོན་གྱི་དབྱེ་བ་ཕྱེད་དཀའ་བ་དང༌། ཡང་སྒྲུབ་ཐབས་འགའ་ཞིག་ལ་དགོས་པས་དོན་ཆད་པ་ཡང་སྣང་བས། འདིར་ཉུང་ངུ་རྣམ་གསལ་ཡང་དག་རྫོགས། ཞེས་པའི་ཚུལ་དུ་བྱས་པ་ཡིན་ལ། འདི་ལ་རྒྱུད་འགྲེལ་གྱི་དོན་ལག་ལེན་དུ་སྡེབས་པའི་གཞུང་ནི། བར་སྐབས་སུ་བྱུང་བའི་བལ་པོའི་པཎྜི་ཏ་ཛ་ཡ་སྱ་ནས་མཛད་པ་འདི་རྣམས་ལས་གཞན་མེད་ལ། འདི་ལའང་འདི་ཉིད་ཀྱི་རྒྱུད་ཆེན་པོའི་དགོངས་པར་མ་སོང་ངམ་སྙམས་པ་དང༌། བདེ་མཆོག་གི་སློབ་དཔོན་ཚད་ལྡན་རྣམས་ཀྱི་བཞེད་དགོངས་དང་མི་མཐུན་པ་ཅི་རིགས་ཡོད་པར་མངོན་མོད། རེ་ཞིག་དགོངས་འགྲེལ་རྟེན་སོ་གཞན་མེད་པའི་ཕྱིར། འདིར་ཕལ་ཆེར་ཛ་ཡ་སྱ་ནའི། གཞུང་ཉིད་གཙོ་བོར་བྱས་ཏེ་བཤད་པ་ཡིན་ནོ། །དཔལ་མཁའ་འགྲོ་རྒྱ་མཚོའི་སྒྲུབ་ཐབས་ཏེ་བཅུ་གསུམ་པའོ།། །།༈ ན་མོ་གུ་རུ། ན་མོ་བཛྲ་ཡོ་གི་ནྱཻ། བཾ་ཡིག་བདེ་ཆེན་རྟག་འཆར་བའི། །ཨེ་ཡིག་སྟོང་ཆེན་ཀློང་ཡངས་ལ། །གུས་པས་བཏུད་དེ་དེའི་སྒྲུབ་ཐབས། །
བརྩེ་བས་མན་ངག་ཇི་བཞིན་བཤད། །འདིར་མཁའ་འགྲོ་རྒྱ་མཚོའི་རྒྱུད་ལས་འབྱུང་བ། རྡོ་རྗེ་རྣལ་འབྱོར་མ་ཕག་གདོང་མ་ཆེན་མོའི་སྒྲུབ་ཐབས་བསྒོམ་པར་བྱའོ། །དེའི་ཚུལ་ནི། འཁོར་ལོ་བདེ་མཆོག་དྲག་པོ་ཆེན་པོའི་སྒྲུབ་ཐབས་དང་སྤྱི་ནི་འདྲའོ། །འོན་ཀྱང་ཁྱད་པར་ནི། རང་གི་སྙིང་གར་རཾ་ལས་ཉི་མའི་དཀྱིལ་འཁོར་གྱི་སྟེང་དུ་ཧྲཱིཿསེར་པོ། དེའི་འོད་ཀྱིས་བདག་ཉིད་ཕག་མོ་ཕྱག་གཉིས་པར་གྱུར་ནས། རྡོ་རྗེ་ཕག་མོའི་དཀྱིལ་འཁོར་བླ་མ་དང་བཅས་པ། ཞེས་སོགས་འདོན་པ་སྤོ། ལྷ་རྣམས་ཀྱི་ནང་དུ་སྣ་ཚོགས་རྡོ་རྗེའི་ཕྲེང་བ་དང༌། ཕྱི་རོལ་བསྲུང་འཁོར་སྣ་ཚོགས་རྡོ་རྗེ་རྭ་བ་དང༌། མེ་རིའི་ཕྱི་རོལ་དུ་དུར་ཁྲོད་དང༌། དེའི་མཐའ་བསྐོར་གྲི་གུག་དང༌། མི་མགོ་དང་ལག་པའི་འཕྲེང་བས་བསྐོར་བ་དང༌། བདེ་ཆེན་འཁོར་ལོ་ལ་རིན་ཆེན་ཕྲེང་བ། སྒོམ་པ་ནི་ཁྱད་པར་རོ། །དེའི་རྗེས་སུ་བདེ་ཆེན་འཁོར་ལོའི་ལྟེ་བར་ཉི་མ་ཟླ་བ་དུས་མེའི་དཀྱིལ་འཁོར་གྱི་སྟེང་དུ་ཨ་ཨཱ༴ ནས་ཞུ་བ་ལས་ཉི་མའི་དཀྱིལ་འཁོར་རོ། །དེ་གཉིས་ཀྱི་བར་དུ་ཧྲཱིཿལས་རྡོ་རྗེ་ཧྲཱིཿཡིས་མཚན་པ༴ ནས་དབུས་སུ་དཔལ་རྡོ་རྗེ་ཕག་མོ་ཕག་གདོང་མར་གྱུར་པ་ནི། སྐུ་མདོག་སེར་ལ་དམར་བའི་མདངས། །ཅུང་ཟད་སྦོམ་ཐུང་ཆེར་ཁྲོས་ཤིང༌། །འཇིགས་བྱེད་འཇིགས་མཛད་འཇིགས་སུ་རུང༌། །མི་ཟད་ཞལ་ནི་སུམ་ཅུ་དྲུག །བཞི་ལྷག་བདུན་ཅུ་གཉིས་ཀྱི་ཕྱག །ཞབས་ནི་བཅོ་བརྒྱད་གཡོན་བསྐུམ་ཞིང༌། གཡས་བརྐྱང་པ་ཡི་ཚུལ་གྱིས་བཞུགས། །གཅེར་བུ་བ་སྤུའི་འཕྲེང་བ་ཅན། །འདོད་ཆགས་ཆེན་
པོའི་བདེ་བས་མྱོང༌། །བྷ་ག་ནུ་མ་མཐོ་ཞིང་རྒྱས།།རྩ་བའི་ཞལ་གྱིས་གཡས་གཡོན་དུ། །རབ་འཇིགས་ཞལ་ནི་དགུ་དགུའོ། །དེ་སྟེང་བདུན་དང་སླར་ཡང་བདུན། །དེ་སྟེང་དུ་ཡང་ཞལ་གསུམ་མོ། །རྩ་བའི་ཞལ་ནི་ཕག་གདོང་འཇིགས། ཁྱི་དང་ཅེ་སྤྱང་བྱི་ལ་སྟག །སེང་གེ་འཇིགས་བྱེད་[འདི་འབྲུག་འདྲ་བ་ཞིག]གླང་ཆེན་རྟ། །བོང་གདོང་གཡས་ལ་རིམ་པས་སོ། །གཡོན་དུ་བ་གླང་མ་ཧེ་དང༌། །སྤྱང་ཀུ་རུས་སྦལ་བུ་ཤིན་དང༌། །རི་བོང་བསེ་དང་གཡག་མུཉྫ། །སྟེང་དུ་སྦྲུལ་དང་སྲེ་མོང་དང༌། །རྩངས་པ་སྲམ་དང་བྱི་བ་དོམ། །དབུས་སུ་མཁའ་ལྡིང་གདོང་སྟེ་བདུན། །དེ་སྟེང་བྱ་རྒོད་བྱ་རོག་དང༌། །འུག་པ་བྱ་དཀར་བོང་ཁྲ་དང༌། །སྲིན་བྱ་ངུར་པའི་གདོང་སྟེ་བདུན། །ཀུན་གྱི་སྟེང་མའི་དབུས་རྨ་བྱ། །གཡས་གཡོན་ཕུག་རོན་ཁྱིམ་བྱའི་གདོང༌། །ཐམས་ཅད་སྤྱན་གསུམ་ལྡན་པ་ལ། །རང་རང་ཁ་དོག་འཇིགས་པ་ཆེ། །རྩ་བའི་ཕྱག་གཉིས་རྡོ་རྗེ་དང༌། །དྲིལ་བུ་ཐུགས་ཀར་བསྣོལ་ནས་འཛིན། །མི་སྣང་རང་གི་ཐབས་དང་སྦྱོར། །གཡས་པའི་ལྷག་མ་རིམ་པ་བཞིན། །རལ་གྲི་མདུང་རིང་ཏྲི་ཤུ་ལ། །དགྲ་སྟ་གྲི་གུག་མདའ་གསལ་ཤིང༌། །ཐོ་བ་འཁོར་ལོ་ཅང་ཏེའུ་དང༌། །ཆུ་གྲི་དབྱུག་གུ་མཚོན་རྩེ་གཅིག །དུང་དང་ཟངས་དུང་དབྱུག་གུ་གསུམ། །རྨ་བྱའི་མཇུག་མ་བྱ་རོག་སྒྲོ། །རོ་སྐྲའི་པིར་དང་མེ་ཐབ་རི། །དབྱུག་ཏོ་མེ་ལོང་པི་ཝཾ་དང༌། །རྐང་ལག་གློ་བ་རྒྱུ་མ་དང༌། །སྒྲ་གཅན་ལྕགས་སྒྲོག་གདོས་དང་སྐོགས། །ཉ་རྒྱ་དང་ནི་མགོ་མེད་ལུས། །འབར་
བའི་མར་ནག་འཇིགས་བྱེད་གཟུགས། །གཡོན་པའི་ལྷག་རྣམས་རིམ་པ་བཞིན། །ཕུབ་ཟླུམ་མཆེ་བ་གཏུན་ཤིང་ཞགས་པ་དང༌། །ཐོད་པ་གཞུ་དང་ཁ་ཊྭཱཾ་ག །པོ་ཏི་ཕུབ་ཆུང་ཡུ་བ་ཅན། །སྡིགས་མཛུབ་གཡེར་ཁའི་འཕྲེང་བ་དང༌། །ལུག་རྒྱུད་བྲག་དང་དུར་ཁྲོད་རྡུལ། །མདུང་ཐུང་རྔ་དང་པགས་རློན་དང༌། །ལན་བུ་བསྲེགས་ཤིང་གང་དའི་དབྱུག །ཕུབ་རེང་མགོ་བོ་ཀེང་རུས་དང༌། །ཟོར་བ་མིག་དང་མཁལ་མ་བཞག །སྤེན་པ་ཕུར་བུ་བི་ཛ་པུར། །སོག་ལེ་ཁབ་དང་རླུང་བུ་བཤུས། །ཆར་སྤྲིན་ཤིང་སྡོང་ལྕགས་ཀྱུ་བསྣམས། །ཐ་མ་གླང་ཆེན་པགས་རློན་རྒྱངས། །ཞབས་རྣམས་བརྐྱང་བསྐུམ་དོར་སྟབས་ཀྱིས། །གཡས་པས་ཁྱབ་འཇུག་དྲག་པོ་དང༌། །ཚངས་པ་ཉི་མ་མེ་དང་ནི། །དབང་པོ་རླུང་དང་བདེན་བྲལ་དང༌། གནོད་སྦྱིན་ཇི་ལྟར་རིམ་པས་སོ། །གཡོན་པས་གཤིན་རྗེ་འདོད་ལྷ་དང༌། །ཟླ་བ་ཆུ་ལྷ་ནོར་རྒྱས་དང༌། །ས་དང་ཚོགས་ཀྱི་བདག་པོ་དང༌། །སྨིན་དྲུག་བུ་དང་འཁོར་བསྒྱུར་རྣམས། །གནོན་ཞིང་འཇིགས་པར་མཛད་པ་ཡིན། །ཞལ་ཀུན་ཐོད་པའི་ཅོད་པན་ཅན། །མགོ་བོའི་འཕྲེང་བའི་དོ་ཤལ་བྱས། །ཕྱག་རྒྱ་ལྔ་ཡི་རྣམ་པར་བརྒྱན། །རྐང་གདུབ་རྡོ་རྗེ་འཕྲེང་བས་མཛེས། །དབུ་སྐྲ་གྲོལ་ཞིང་མེ་དཔུང་འབར། །གར་གྱི་ཉམས་ལྡན་སྡང་བ་དང༌། །གདུག་པ་ཐམས་ཅད་འཇོམས་མཛད་མའོ། །སྐབས་འདིར་རྒྱུད་གསུམ་པའི་འགྱུར་གྱི་དཔེ་ན། གཡས་ཀྱི་ཕྱག་མཚན་དྲི་ཤུལ་ཆད། །གཡོན་གྱི་ཕྱག་མཚན་ལ་སྤེན་པ་ཡི་ནི་ཕུར་བུ་དང་ཞེས་གཅིག་ཏུ་བྱས་
པ་ཤིན་ཏུ་ནོར། ག་དའི་ཚ་བ་བྲག་རི་དང༌། །གཏུན་ཤིང་དོད་དུ་ཐོ་བ་དང༌། །ལྕགས་ཀྱུའི་གནས་སུ་རལ་གྲི་བྱུང་བ་རྣམས་ཟློས་པ་སྟེ་རྒྱ་དཔེ་མ་དག་པའམ། འགྱུར་སྐྱོན་ནོ། །ཡང་འདི་ཕྱག་བདུན་ཅུ་རྩ་བཞིར་བྱེད་ན་ཐ་མ་གཉིས་སྤངས་པ་ཡིན་ཡང་ཞལ་གྱི་འགོད་ཚུལ་རིམ་པ་གསུམ་དུ་བསྡུ་བའང་ཅུང་ཟད་མི་ལེགས་ཡང་གླང་ལྤགས་བོར་བ་ཁོ་ནས་ཕྱག་དོན་གཉིས་ཡིན་ན། གཡོན་པའི་ཕྱག་མཚན་སུམ་ཅུ་སོ་བདུན་ཡོད་དོན་མེད་པས་ཕྱག་དོན་གཉིས་དཔལ་མཁའ་འགྲོ་རྒྱ་མཚོའི་འཁོར་ལོ་བཅུ་གཉིས་པའི་སྐབས་འདྲ་བར་རིག་གོ །འདབ་མ་རྣམས་ལ། ཤར་དུ་མཁའ་འགྲོ་མ་ནག་མོ། བྱང་དུ་ལཱ་མ་ལྗང་ཁུ་སོགས་སྤྱི་དང་མཐུན་པའམ། ཡང་ན། ཤར་དུ་མཁའ་འགྲོ་མ། གཡོན་ནག་གཡས་ལྗང་བ། བྱང་དུ་ལཱ་མ་གཡོན་ལྗང་གཡས་དམར་བ། ནུབ་ཏུ་དུམ་སྐྱེས་མ་གཡོན་དམར་གཡས་སེར་བ། ལྷོར་གཟུགས་ཅན་མ་གཡོན་སེར་གཡས་ནག་པ། མཚམས་བཞིར་ཐོད་པ་བདུད་རྩི་ལྔས་ཡོངས་སུ་གང་བའོ། །ཐུགས་ཀྱི་འཁོར་ལོའི་ཤར་ཕྱོགས་པུ་ལི་ར་མ་ལ་ཡར་ཁཎྚ་ཀ་པཱ་ལ་དང་རབ་གཏུམ་མོ། །བྱང་ཕྱོགས་ཛ་ལནྡྷ་རར་མ་ཧཱ་ཀཾ་ཀ་ལ་དང་གཏུམ་པའི་མིག་ཅན་མ། ཞེས་པ་ནས། རྡོ་རྗེ་སེམས་དཔའ་དང་བརྩོན་འགྲུས་ཆེན་པོ་སྟེ། ཐམས་ཅད་ཀྱང་སྐུ་མདོག་དཀར་པོའོ། །དཔའ་པོ་ཐམས་ཅད་ཕྱག་དང་པོ་གཉིས་ཀྱིས་རྡོ་རྗེ་དང་དྲིལ་བུ་འཛིན་པའི་ཡུམ་ལ་འཁྱུད་པ། འོག་མ་གཉིས་ཀྱིས་ཌཱ་མ་རུ་དང་ཁ་ཊྭཱཾ་ག་བསྣམས་པ། དཔའ་མོ་
ཐམས་ཅད་གྲི་གུག་དང་ཐོད་པ་འཛིན་པ་གཙོ་མོ་དང་མཚུངས་ཤིང་གཡས་བརྐྱང་གིས་བཞུགས་པ་སྟེ་ཤེས་རབ་མ་གཙོ་བོར་གྱུར་པའོ། །ཤར་སྒོར་ཁྭ་གདོང་མ་སྔོན་མོ༴ ནས་བྱང་ཤར་དུ་གཤིན་རྗེ་འཇོམས་མ་གཡས་ལྗང་གཡོན་སྔོ་བའི་བར་སྤྱི་དང་མཚུངས་མ་མོ་བཅུ་གཉིས་པོ་ཐམས་ཅད་ཀྱང༌། ཕྱག་དང་པོ་གཉིས་ཀྱིས་གྲི་གུག་དང་ཐོད་པ། འོག་མ་གཉིས་ཀྱིས་ཌཱ་མ་རུ་དང་ཁ་ཊྭཱཾ་ག་འཛིན་པ། རྣལ་འབྱོར་མ་སུམ་ཅུ་རྩ་དྲུག་པོ་ཐམས་ཅད་ཀྱང་བཅོམ་ལྡན་འདས་མ་དང་མཚུངས་ཤིང༌། རོའི་གདན་ལ་གནས་པའོ། །རང་གི་སྙིང་གར་ཨོཾ་ཧ་དཀར་པོ༴ ནས་བདུད་རྩིས་གང་བས་དབང་བསྐུར་སྐུ་གང༌། དྲི་མ་དག་ཆུའི་ལྷག་མ་ཡར་ལུད་པ་ལས། གཙོ་བོ་ལ་རྡོ་རྗེ་སེམས་དཔའ། འཁོར་རྣམས་ལ་གཙོ་བོ་ཉིད་གྱིས་དབུ་རྒྱན། དབང་གི་ལྷ་ཐམས་ཅད་ཀྱང་བདག་ཉིད་ལ་ཐིམ། ཞེས་པ་ནས་དག་པ་དྲན་པ་རྫོགས་ཀྱི་བར་དུ་འདྲ་བ་ལས། ཡང་དག་པའི་ཏིང་ངེ་འཛིན་ནི་རྡོ་རྗེ་ཕག་མོའོ། །ཞེས་འདོན་པ་སྒྱུར་བརྒྱུད་རིམ་ནི་བདེ་མཆོག་དྲག་པོ་ཆེན་པོ་ཕྱག་འབུམ་པ་དང་འདྲའོ། །སྐབས་འདིར་རྩ་གསུམ་འཁོར་ལོ་བཞི་ཡི་གེ་དང་བཅས་པ་གསལ་བཏབ། རྫོགས་པའི་རིམ་པ་ཅི་ནུས་སུ་སྒོམས་ལ། བཟླས་པ་ལ་མོས་ན། སྤྲོ་བསྡུའི་བཟླས་པའི་དམིགས་པ་གསལ་བཏབ་ནས། རྡོ་རྗེ་ཕག་མོའི་རྩ་བའི་སྔགས་ཉིད་གཙོ་བོར་བཟླ་ཞིང༌། སྙིང་པོ་དང་ཉེ་བའི་སྙིང་པོ་ཉིད་ཀྱང་ངོ༌། །མདུན་དུ་སྲིན་པོ་དང་བཅས་པའི་མཁའ་འགྲོ་
མ་བསྒོམ་སྟེ། ཨོཾ་ཕཊ་ཆེ་གེ་བྷཀྵ་ཡ་ཕཊ་ཀྵ་ཕཊ། ཅེས་བཟླས་པས་དྲག་ཤུལ་བསྒྲུབ་བོ། །ཐུན་བསྡུ་བར་འདོད་ན། གཞན་རྣམས་བདེ་མཆོག་དྲག་པོ་ཆེན་པོའི་མངོན་རྟོགས་དང་འདྲ་བ་ལས། སྙིང་གའི་ཧཱུཾ་ཞེས་པ་ལ། སྙིང་གའི་ཧྲཱིཿཞེས་འདོན་པ་སྤོ། གཏོར་མའི་ཆོག་མདོར་བསྡུས་པའི་ཚེ་སྡོམ་འབྱུང་དང་འདྲ་བ་ལས། རྒྱས་པ་ལ་སྤྲོ་ན་དཔལ་མཁའ་འགྲོ་རྒྱ་མཚོའི་རྒྱུད་ནས་འབྱུང་བ་ལྟར་འབྱུང་པོ་ཐམས་ཅད་པའི་གཏོར་ཆེན་བྱའོ། །མ་རུང་འཇོམས་ཤིང་སྒྲུབ་པོ་ལ། །མཐའ་དག་བདེ་བའི་མཆོག་སྟེར་བར། །སྒྲུབ་པའི་ཐབས་འདི་སྒོམ་པ་ལས། །ལྟ་སྟངས་བརྒྱད་པོ་འགྲུབ་ཅེས་ཐོས། །རྡོ་རྗེ་ཕག་མོ་ཕག་གདོང་ཆེན་མོའི་སྒྲུབ་ཐབས་ཏེ་བཅུ་བཞི་པའོ།། །།༈ ཨོཾ་སྭ་སྟི། ཧེ་ཡིག་རོལ་པ་རུ་བརྗོད་བྲལ། །ཀ་ཡི་བྱེད་པ་ཤྲཱི་ཡིག་ནི། །ཟུང་འཇུག་ཡེ་ཤེས་སྐུར་གྱུར་པ། །དེ་ལ་བཏུད་ནས་སྒྲུབ་ཐབས་བཤད། །ད་ནི་རྒྱུད་རྩ་བཤད་ཀྱི་ཁོག་སྡེབས་པ་མན་ངག་གཙོ་བོར་གྱུར་པ་གསུམ་ལས། དང་པོ་རྩ་རྒྱུད་ལས་དངོས་སུ་མི་གསལ་ཡང༌། བཤད་རྒྱུད་སྣ་ཚོགས་ཁོག་སྡེབས་པས་རྩ་རྒྱུད་ཀྱི་དགོངས་པར་འགྱུར་བ། གྲུབ་པའི་སློབ་དཔོན་དྲིལ་བུ་པས་དབང་པོ་དམན་པ་ལ་དགོངས་ཏེ་མཛད་པའོ། །འདིར་ལྭ་བ་བཅུ་གསུམ་མར་གྲགས་པའི་སྒྲུབ་ཐབས་བཤད་ཟིན་པ་ལས་འདོན་པ་སྤོས་ཏེ། དྲིལ་བུ་ཕྱི་དཀྱིལ་ལྷ་ལྔ་སྒོམ་པར་འདོད་ན། རྡོར་སེམས་བསྒོམ་བཟླས་ཡན་ཆད་འདྲ། ཤྲཱི་ཧེ་རུ་ཀོ྅་ཧཾ། ཨོཾ་ཨ་ཨཱ༴ ནས་ཧ་ཀྵ་ཧཱུཾ་ཕཊ། ལན་གསུམ་བརྗོད། རང་གི་སྙིང་
གར་རཾ་ལས༴ ནས། དབུལ་བར་བགྱིའོ། །རང་གི་སྙིང་ག་ནས་སྤྲོས་པའི་མཆོད་པའི་ལྷ་མོ་དྲུག་གིས་མཆོད་པར་གྱུར། ཨོཾ་ཨཱཿབཛྲ་ཨ་དརྵེ་ཧཱུཾ། བཱི་ནི༴ གནྡྷེ༴ རཱ་སེ༴ སྤརྵེ༴ ཨོཾ་ཨཱཿབཛྲ་དྷརྨེ་ཧཱུཾ། མཁའ་འགྲོ་མ་ལ་སོགས་པ་ལྷ་མོ་བཞི་བདུད་རྩི་མཆོད་པར་བསམ་ལ། ཨོཾ་ཨཱཿཧཱུཾ། ཞེས་བརྗོད། ཨོཾ་ཨཱཿབཛྲ་མ་ཧཱ་སུ་ཁཾ་ནས། འཇིག་བྱེད་དང་དུས་མཚན་བརྩེགས་པའི་སྟེང་དུ་ཉི་མའི་དཀྱིལ་འཁོར། འདབ་མ་བརྒྱད་གྱི་ཕྱོགས་བཞིར་མི་རོའི་སྙིང་གར་ཟླ་བ། མཚམས་བཞིར་ཟླ་བའི་གདན་ལ་བདུད་རྩིས་གང་བའི་བུམ་ཐོད། སྣ་ཚོགས་པདྨའི་མུ་ཁྱུད་ལ། འཁོར་ལོ་གསུམ་གྱི་རང་བཞིན་གྲི་གུག་གི་འཕྲེང་བས་བསྐོར་བ། གཞལ་མེད་ཁང་གི་ཕྱི་རོལ༴ ཞེས་པ་ནས། དབུས་ཀྱི་གདན་གྱི་སྟེང་དུ་རང་ཉིད་འཁོར་ལོ་བདེ་མཆོག་སྐུ་མདོག་སྔོན་པོ། ཞལ་བཞི་ཕྱག་བཅུ་གཉིས་པ། རྩ་བའི་ཞལ་མཐིང་ཁ། གཡས་སེར་གཡོན་དམར། སྟེང་ཞལ་ལྗང་བ་ཞལ་རྣམ་པར་འགྱུར་བ་སྤྱན་གསུམ་གསུམ་དང་ལྡན་ཞིང༌། མཆེ་བ་གཙིགས་པ། ཕྱག་དང་པོ་གཉིས་ཀྱི་རྡོ་རྗེ་དང་དྲིལ་བུ་འཛིན་པས་ཡུམ་ལ་འཁྱུད་པ། གཉིས་པ་གཉིས་ཀྱིས་གླང་པོ་ཆེའི་པགས་པ་རློན་པ་འཛིན་ཞིང་རླུང་གིས་འཕྱར་བ། གཡས་ཀྱི་གསུམ་པ་ན་ཌཱ་མ་རུ། བཞི་པ་ན་དགྲ་སྟ། ལྔ་པ་ན་གྲི་གུག དྲུག་པ་ན་མདུང་རྩེ་གསུམ་པ། གཡོན་གྱི་གསུམ་པ་ན་རྡོ་རྗེས་མཚན་པའི་ཁ་ཊྭཾ་ག་
བཞི་པ་ན་ཁྲག་གིས་གང་བའི་ཐོད་པ། ལྔ་པ་ན་རྡོ་རྗེའི་ཞགས་པ། དྲུག་པ་ན་ཚངས་མགོ་རྣམས་འཛིན་པ། དབུའི་སྟེང་དུ་གདུགས་དཀར་པོ་གསེར་གྱི་ཡུ་བ་ཅན་དང་བཅས་པ། ཞབས་གཡས་བརྐྱང་བའི་སྐྱིལ་ཀྲུང་ཕྱེད་པའི་གར་སྟབས་ཀྱིས་བཞུགས་པ། རལ་པའི་ཐོར་ཚུགས་དང༌། སྣ་ཚོགས་རྡོ་རྗེ་དང༌། ཟླ་བ་ཕྱེད་པ་དང༌། ནོར་བུ་རིན་པོ་ཆེ་དང༌། ཐོད་པ་སྐམ་པོ་ལྔས་དབུ་རྒྱན་པ། ཕྱག་རྒྱ་དྲུག་དང་མགོ་བོའི་འཕྲེང་བ་ཅན། སྟག་གི་པགས་པའི་ཤམ་ཐབས་གྲོལ་བ། གར་གྱི་ཉམས་དགུ་དང་ལྡན་པ། མཚན་དཔེས་སྤྲས་པའོ། །ཡུམ་རྡོ་རྗེ་ཕག་མོ་སྐུ་མདོག་དམར་མོ་ཞལ་གཅིག་ཕྱག་གཉིས་སྤྱན་གསུམ་མ། གཡོན་ཐོད་ཁྲག་འཛིན་པས་ཡབ་ལ་འཁྱུད་ཅིང༌། གཡས་རྡོ་རྗེ་གྲི་གུག་དང་བཅས་པའི་སྡིགས་མཛུབ་ཅན། ཞབས་གཡས་བསྐུམ་གཡོན་བརྐྱང་བའི་གར་སྟབས་ཀྱིས་ཡབ་ལ་འཁྱུད་པ། སྐྲ་གྲོལ་ཞིང་ཕྱག་རྒྱ་ལྔའི་བརྒྱན་པ། ཐོད་སྐམ་གྱི་དོ་ཤལ་ཅན་ཁྲག་ལ་དགྱེས་ཤིང་ཁྲག་འཛག་པ། གཉིས་ཀའང་བསྐལ་པའི་མེ་ལྟ་བུའི་དབུས་ན་བཞུགས་པའོ། །ཐུགས་ཀར་སྣ་ཚོགས་པདྨའི་སྟེང་དུ་ཉི་མ་ལ་ཧཱུཾ། དཔྲལ་པར་ཨོཾ། མགྲིན་པར་ཨཱཿ ཐུགས་ཀར་ཧཱུཾ། སྙིང་གར་ཨོཾ། ཧ་དཀར་པོ༴ ནས། ཙཎྜི་ཀཱའི་ངོ་བོ་ཞེས་པའི་བར་སྤྱི་དང་མཐུན། ཤར་དུ་མཁའ་འགྲོ་མ་སྔོན་མོ། བྱང་དུ་ལཱ་མ་ལྗང་ཁུ། ནུབ་ཏུ་
དུམ་སྐྱེས་དམར་མོ། ལྷོར་གཟུགས་ཅན་མ་སེར་མོ། ཐམས་ཅད་ཀྱང་ཞལ་གཅིག་ཕྱག་བཞི་སྤྱན་གསུམ་མ། ཕྱག་གཡོན་གཉིས་ན་ཐོད་པ་དང་ཁ་ཊྭཱཾ་ག་གཡས་གཉིས་ན་གྲི་གུག་དང་ཌཱ་མ་རུ་འཛིན་པ། གཅེར་བུ་ཕྱག་རྒྱ་ལྔས་བརྒྱན་ཞིང་སྐྲ་གྲོལ་བ། རྡོ་རྗེའི་འཕྲེང་བས་དབུ་ལ་བརྒྱན་ཞིང༌། མི་མགོའི་དོ་ཤལ་ཅན། གཡོན་བརྐྱང་བའི་སྐྱིལ་ཀྲུང་ཕྱེད་པའི་གར་སྟབས་ཀྱིས་གནས་པས་དངོས་གྲུབ་ཐམས་ཅད་སྩོལ་བའོ། ཁ་ཅིག་གཙོ་འཁོར་རྣམས་གཡས་བརྐྱང་བའི་བརྐྱང་བསྐུམ་སྟབས་སུ་འདོད་པ་ནི་མུན་སྤྲུལ་ལོ། །ལུས་རྗེས་སུ་དྲན་པ་ཉེ་བར་བཞག་པ་ནི། མཁའ་འགྲོ་མའོ། །ཚོར་བ་རྗེས་སུ་དྲན་པ་ཉེ་བར་བཞག་པ་ནི། ལ་མའོ། །ཆོས་རྗེས་སུ་དྲན་པ་ཉེ་བར་བཞག་པ་ནི་དུམ་སྐྱེས་མའོ། །སེམས་རྗེས་སུ་དྲན་པ་ཉེ་བར་བཞག་པ་ནི་གཟུགས་ཅན་མའོ། །ཡང་དག་པའི་ཏིང་ངེ་འཛིན་ནི་དཔལ་ཧེ་རུ་ཀའོ། །དྲན་སོགས་བྱང་ཆུབ་ཡན་ལག་དྲུག་ཕག་མོའོ། །ཡང་དག་སྤོང་བ་དང༌། རྫུ་འཕྲུལ་རྐང་པ་དང་དད་སོགས་བཅུ་འཕགས་ལམ་རྣམས་ནི་བུམ་པ་བཞིའོ། །ཐུགས་ཀའི་ས་བོན་གྱི་འོད་ཟེར་གྱིས་ཡེ་ཤེས་ཀྱི་འཁོར་ལོ༴ ཞེས་པ་ནས། ཡུམ་ལ་མི་བསྐྱོད་པ། ལྷ་མོ་བཞི་ལ་ནི་རིམ་པས། རྟག་པ། དོན་གྲུབ། འོད་དཔག་མེད། རིན་འབྱུང་རྣམས་ཀྱིས་དབུ་རྒྱན། ཚོགས་ཞིང་གི་སྐབས་ལྟར་ལྷ་མོ་དྲུག་དང༌། མཧཱ་སུ་ཁཾ་གྱི་བར་གྱིས་མཆོད། རྐང་པ་བརྒྱད་པས་བསྟོད། ཨོཾ་ཤྲཱི་མཧཱ་
སུ་ཁ་བཛྲ་ཧེ་ཧེ་རུ་རུ་ཀཾ ཨཱཿཧཱུཾ་ཧཱུཾ་ཕཊ་སྭཱཧཱ་ནས། ཧ་ཧོ་ཧྲིཿ རྡོ་རྗེ་འཆང་དབང་རྣལ་འབྱོར་མ། །དྲིལ་བུ་ལྭ་བ་འབར་འཛིན་དང༌། །སྤྱོད་པ་བ་དང་དགེ་བའི་མགོན། །ཏི་ལི་ན་རོ་ཕཾ་ཐིང་པ། །བྷ་དནྟ་པ་མར་དོ་དང༌། །བདེ་མཆོག་རྡོ་རྗེ་བློ་ལྡན་ཞབས། །ལྷོ་ཚད་དབང་ཕྱུག་བརྩོན་འགྲུས་དང༌། །འཕགས་པ་ལོ་མཆོག་གྲགས་ཆེན་པ། །འཕགས་འོད་བུ་སྟོན་ཁྱུང་ལྷས་པ། །ནོར་བཟང་ཀ་བཞི་རིན་རྒྱལ་དང༌། །མཁྱེན་རབ་ཆོས་རྗེ་ལྷ་བོ་པ། །མཁས་པ་ཀུན་དགའ་དོན་གྲུབ་དང༌། །བསོད་ནམས་དཔལ་འབྱོར་བྱང་གླིང་པ། །རྩ་བའི་བླ་མ་རྣམས་ལ་མཆོད། །ཨོཾ་ཨཱཿཧཱུཾ། ཡང་པུ་རངས་ལོ་ཆུང་ནས་བརྒྱུད་པ་ལྟར་ན། བྷ་དནྟ་པ་ལོ་ཆུང་དང༌། །ས་ཆེན་བསོད་རྩེ་གྲགས་པའི་མཚན། །ས་པན་བོ་དོང་རིན་པོ་ཆེ། །སེམས་དཔའ་ཆེ་དང་ཡང་རྩེ་བ། །བུ་སྟོན་རྗེ་དང་ཁྱུང་ལྷས་པ། །མན་ཆད་གོང་བཞིན། རང་སྔགས་ཀྱི་མཐར་འབྲུ་གསུམ་བཏགས་པ་ལྷ་རྣམས་མཆོད། གཙོ་བོའི་བཟླས་པའི་བར་དུ་སྦྱངས་པའི་ཡོན་ཏན་འདྲ་བ་ལས། ཨོཾ་ཌཱ་ཀི་ནཱི་ཡེ་ཧཱུཾ་ཧཱུཾ་ཕཊ། ཨོཾ་ལཱ་མེ་ཧཱུཾ་ཧཱུཾ་ཕཊ། ཨོཾ་ཁཎྜ་རོ་ཧེ་ཧཱུཾ་ཧཱུཾ་ཕཊ། ཨོཾ་རཱུ་པི་ནཱི་ཡེ་ཧཱུཾ་ཧཱུཾ་ཕཊ། ཅེས་པ་ནི་འཁོར་གྱི་སྔགས་སོ། །ཐུན་བསྡུ་བར་འདོད་ན། རང་གི་སྙིང་གའི་ཞེས་སོགས་དང༌། གཏོར་མའི་ཆོ་ག་དང༌། ལཱ་བ་བཅུ་གསུམ་མ་བཞིན་དུ་བྱའོ། །དྲིལ་བུ་ཕྱི་དཀྱིལ་ལྷ་ལྔའི་སྒྲུབ་ཐབས་ཀྱི་དགོངས་འགྲེལ་དུ། ལྭ་བའི་ཞབས་ཀྱིས་སྦྱངས་པའི་ཡོན་ཏན་གྱི་སྒྲུབ་ཐབས་གཙུག་གི་ནོར་བུས་མཛད་པར་གྲགས་ཏེ།
ཡན་ལག་ཕྲ་མོ་འགའ་ཞིག་མ་གཏོགས། ཆོ་གའི་སྒྲོས་གཅིག་པ་ཡིན་པས། འདིར་ཡང་བཅུ་གསུམ་མའི་སྒྲུབ་ཐབས་ལ་འདོན་པ་སྤོས་པས། ལྷ་ལྔའི་སྒྲུབ་ཐབས་དག་ཅིང་གཙང་བར་འབྱུང་ངོ༌། །མཆོག་ཏུ་ངོ་མཚར་གྱི་བསྐྱེད་པའི་གཞུང༌། མཁས་པ་ཀུན་ལ་ཆེར་གྲགས་ཀྱང༌། །གཞན་འགས་མིང་ཡང་མ་ཐོས་པ། །དེ་དོན་རྟོགས་པར་བསླ་ཕྱིར་སྦྱར། །དྲིལ་བུ་ལྷ་ལྔའི་སྒྲུབས་ཐབས་སྟེ་བཅོ་ལྔ་པའོ།། །།༈ གདུལ་དཀའ་འདུལ་བ་གང་གིས་མཚན་ཙམ་ཞིག །དྲན་པའི་མོད་ལ་ཕུན་ཚོགས་ཀུན་ཐོབ་པ། །རྡོ་རྗེ་ཁྲོ་རྒྱལ་ཚོགས་ལ་གུས་པས་འདུད། །བདུད་བཞི་གཡུལ་ངོ་མ་ལུས་བཟློག་པར་མཛོད། །འདིར་འཁོར་ལོ་སྡོམ་པའི་རྒྱུད་ཀྱི་རིམ་པས། ཁྲོ་བོ་རྡོར་སེམས་ཀྱི་དཀྱིལ་འཁོར་སྒོམ་པར་འདོད་ན། ཐོག་མར་དཔལ་འཁོར་ལོ་བསྒྱུར་དྲུག་གི་མངོན་རྟོགས་ལེགས་པར་བྱང་བར་བསླབ་བོ། །དེ་ནས་མི་འདྲ་བའི་ཁྱད་པར་འདི་དག་བསླབས་པས་ཚེགས་མེད་པར་ཤེས་པར་འགྱུར་རོ། །དེ་ལ་སྐྱབས་འགྲོ་སེམས་བསྐྱེད། རྡོར་སེམས་བསྒོམ་བཟླས། དག་པ་གསུམ། ཚོགས་བསག་ཕུང་ཁམས་བྱིན་རླབས། སྲུང་འཁོར་ཐུན་མོང་དང་ཐུན་མོང་མ་ཡིན་པ། ཡེ་ཤེས་ཚོགས་བསག་བར་སྲིད་སྦྱོང་བྱེད། འབྱུང་བཞི་རི་རབ། གཞི་དཀྱིལ་གྱི་གཞལ་ཡས་ཁང་དུར་ཁྲོད་དང་བཅས་པའི་བར་དུ་སྒོམ་ཚུལ་རྣམས་འཁོར་ལོ་བསྒྱུར་དྲུག་གི་སྐབས་བཞིན་ནོ། །དེ་ནས་འདི་སྐད་ཅེས་བྱ་སྟེ། གཞལ་ཡས་ཁང་གཞི་དཀྱིལ་གྱི་དབུས་སུ། སླར་ཡང་གཞལ་མེད་ཁང༌། གྲུ་བཞི། སྒོ་བཞི། རྟ་བབས་དང་བྲལ་བ། ལྷག་མ་མཚན་ཉིད་ཐམས་ཅད་ཡོངས་སུ་རྫོགས་པ། གྲྭ་བཞིར་ཐོད་
པ་བཞི་དང་བཅས་པ། དེའི་དབུས་སུ་འཁོར་ལོ་སེར་པོ་རྩིབས་བཅུ་པ་འཁོར་ལོའི་ལྟེ་བར་པཾ་ལས་པདྨ་འདབ་མ་བརྒྱད་པ། པདྨའི་ལྟེ་བ་དང་འདབ་མ་ལ་ཉི་མའི་དཀྱིལ་འཁོར་གྱི་གདན། འཁོར་ལོ་རྩིབས་བཅུ་ལ། པདྨ་དང་ཉི་མ། སྒོ་བཞིར་མི་རོའི་གདན། གཞལ་ཡས་ཁང་ཕྱི་མའི་ལྷ་སྣམ་ལ་མི་རོའི་གདན་ཕྱོགས་བཞིར་བཞི་བཞི་དང༌། མཚམས་བཞིར་རེ་རེ། སྒོ་མཚམས་བརྒྱད་དུ་ཡང་རོ་གདན་རེ་རེའོ། །དབུས་ཀྱི་གདན་གྱི་སྟེང་དུ་ཨཱ་ལི་ལས་ཟླ་བ། ཀཱ་ལི་ལས་ཉི་མ། དེ་གཉིས་ཀྱིས་བར་དུ་ཧཱུཾ་ལས་རྡོ་རྗེ་ཧཱུཾ་གིས་མཚན་པ་དེ་རྣམས་རོ་གཅིག་ཏུ་འདྲེས་པ་ལས། རང་ཉིད་རྒྱུ་རྡོ་རྗེ་འཛིན་པ་རྡོ་རྗེ་སེམས་དཔའ་དཀར་པོ། དཀར་སེར་ལྗང་བའི་ཞལ་གསུམ། རྩ་ཕྱག་གཉིས་ཀྱིས་རྡོ་རྗེ་དང་དྲིལ་བུ་འཛིན་པས་རང་སྣང་གི་ཡུམ་ལ་འཁྱུད་པ། ལྷག་མ་གཡས་གཉིས་ལྕགས་ཀྱུ་དང་ཞགས་པ། གཡོན་གཉིས་ཀ་པཱ་ལ་དང་ཁ་ཊྭཱཾ་ག་བསྣམས་པ། ཐོད་པའི་ཅོད་པན་ཅན། རྒྱན་ཐམས་ཅད་ཀྱིས་བརྒྱན་པ། གཡས་བརྐྱང་གི་སྟབས་ཅན་ཞི་ཞིང་ཆགས་པའི་ཉམས་དང་ལྡན་པའོ། །ཡབ་ཡུམ་རྗེས་སུ་ཆགས་པ་སྙོམས་པར་ཞུགས་པའི་རྐྱེན་གྱིས་ནམ་མཁའི་ནཱ་ད་ཡབ་ཀྱི་ཞལ་དུ་ཞུགས། སྐར་མདའ་འཕོ་བའི་ཚུལ་གྱིས་ཡུམ་གྱི་མཁའ་ནང་དུ་སོན་པས། ཡབ་ཡུམ་བྱང་ཆུབ་སེམས་ཀྱི་ངོ་བོར་ཞུ། ཐིག་ལེ་ལས་སྤྲོས་པའི་ལྷ་མོ་རྣམས་ཀྱིས་
སྙན་པའི་གླུ་དབྱངས་ཀྱིས་བཞེངས་པར་བསྐུལ་བ་ནི། ཧོ་སྲིད་པ་གསུམ་གྱི་བདེ་སྙེད་གཙོ། །ཨ་ལ་ལ་ལ་ཧོ། རྒྱལ་པོའི་བདེ་ཆེན་དགྱེས་པའི་ཚོགས། །པདྨ་ལ་ནི་རྡོ་རྗེ་རོལ། །ཨ་ལ་ལ་ལ་ཧོ། ཕྱོགས་བཅུ་བདེ་གཤེགས་སྙིང་པོ་སྤྲོས། །ཀུན་གྱི་སྙིང་པོ་བདག་པོར་མཛད། །སྲིད་པ་གསུམ་པོའི་སྙིང་པོ་ནི། །བདེ་བ་ཆེན་པོ་རྟོགས་པར་མཛོད། །ཨ་ལ་ལ་ལ་ཧོ། བདག་པོ་དགྱེས་པ་གྲོལ་བར་མཛོད། བདེ་ཆེན་ཨ་ལ་ལ་ལ་ཧོ། །ཞེས་བསྐུལ། ལྷ་མོ་རྣམས་ཐིག་ལེ་ལ་ཐིམ། དེ་ཉིད་ཧཱུཾ་ལས་རྡོ་རྗེ་ཧཱུཾ་གིས་མཚན་པར་གྱུར། དེའི་འོད་ཟེར་འཕྲོ་འདུ་ལས་ཡོངས་སུ་གྱུར་པ་ནི། འབྲས་བུའི་རྡོ་རྗེ་འཆང་ཧེ་རུ་ཀ་སྐུ་མདོག་མཐིང་ཁ། ནག་སེར་ལྗང་བའི་ཞལ་གསུམ། ཕྱག་དྲུག་གི་དང་པོ་གཉིས་ཧཱུཾ་མཛད་ཀྱི་ཕྱག་རྒྱས་རྡོ་རྗེ་དང་དྲིལ་བུ་ཐུགས་ཀར་འཛིན་པ། ཕྱག་ལྷག་མ་གཡས་གཉིས་ལྕག་ཀྱུ་དང་ཞགས་པ། གཡོན་གཉིས་ཀ་པཱ་ལ་དང་ཁ་ཊྭཱཾ་ག་བསྣམས་པ། ཞབས་གཡས་བརྐྱང་བའི་འཇིགས་བྱེད་དང་དུས་མཚན་མནན་པ། ཁྲོ་བོའི་རྒྱན་དང་ཆ་བྱད་ཡོངས་སུ་རྫོགས་པའོ། །ཨོཾ་བྷ་དྷརྨ་དྷཱ་ཏུ་སྭ་བྷ་ཝ་ཨཱཏྨ་ཀོ྅་ཧཾ། བསྙེན་པའོ། །སྙིང་གར་ཨོཾ་ཧ༴ སོགས་གོ་ཆ་གཉིས་དགོད་དེ། ཉེར་བསྒྲུབ་བོ། །དེ་ནས་གནས་གསུམ་གྱི་བྱིན་གྱིས་རླབས་པ་དང་ཡེ་ཤེས་དགུག་གཞུག་སྒྲུབ་པ་དང༌། དབང་བསྐུར་རྒྱས་བཏབ་བསྒྲུབ་ཆེན་རྣམས་བདེ་ཆེན་རྣམས་བདེ་མཆོག་གཞན་གྱི་ཆོ་ག་བཞིན་དུ་བྱ་སྟེ། དཔལ་རྡོ་རྗེ་ཧཱུཾ་
མཛད་ཁམས་གསུམ་ལས་རྣམ་པར་རྒྱལ་བའི་ཧེ་རུ་ཀ། ཞེས་མཚན་བརྗེ་བ་ཙམ་ཁྱད་པར་རོ། །ཡུམ་གྱི་སྤྱི་བོར་ཨོཾ་དཀར་པོ། ཐུགས་ཀར་ཧཱུཾ་སྔོན་མོ། ལྟེ་བར་སྭ་སེར་པོ། གསང་བར་ཨ་དམར་པོ། བརླ་གཉིས་ལ་ཧ་ལྗང་ཁུ། ཤེས་རབ་ཀྱི་མཁའ་ཨ་ལས་པདྨ་དམར་པོ་འདབ་མ་གསུམ་པ། ཐབས་ཀྱི་གསང་བ་ཧཱུཾ་ལས་རྡོ་རྗེ་སྔོན་པོ་རྩེ་གཅིག་པ། གཉིས་པོའི་བུ་གར་བྱཱཾ་དང་དྱཱཾ་གིས་མཚན་པ། ཨོཾ་ཨཱཿཧཱུཾ། ཡབ་ཡུམ་སྙོམས་པར་ཞུགས་པའི་དགའ་བའི་སྒྲས། སངས་རྒྱས་སྲས་བཅས་དང་བཙུན་མོར་བཅས་པ་ཐམས་ཅད་སྤྱན་དྲངས། ཡབ་ཀྱི་ཞལ་དུ་ཞུགས། ཐུགས་ཀར་བྱང་ཆུབ་ཀྱི་སེམས་སུ་ཞུ། རྡོ་རྗེའི་ལམ་ནས་ཡུམ་གྱི་མཁར་བབས་པ་ལྷ་གྲངས་དང་མཉམ་པའི་ཐིག་ལེར་གྱུར། དེ་རྣམས་ཧཱུཾ་བཅུ་གཅིག །མཾ་ཏཾ་བཾ་ལཾ། ཨོཾ་སྭཱ་ཨཱཿཧཱ། ཕུཾ་ཕྲཻཾ་ཕྲོཾ་ཕྲིཾ། ཧེ་ཉི་ཤུ་རྩ་བཞི་ཛཿཧཱུཾ་བཾ་ཧོ་རྣམས་སུ་གྱུར། དེ་རྣམས་དཀྱིལ་འཁོར་གྱི་ལྷ་ཚོགས་སུ་གྱུར། ཨོཾ་སུམྦྷ་སོགས་ཞལ་བཞི་པའི་སྔགས་བརྗོད། མཁའ་ནང་གི་གཙོ་བོ་ཡབ་ཡུམ་དཔག་ཏུ་མེད་པ་སྤྲོས། བདུད་བཞིའི་བར་དུ་གཅོད་པ་ཐམས་ཅད་བཅོམ། སེམས་ཅན་ཐམས་ཅད་རྡོ་རྗེའི་འཆང་ཆེན་པོའི་གོ་འཕང་ལ་བཀོད། སླར་འདུས་ཏེ་རང་ཉིད་ལ་ཐིམ་པས། རང་དཔལ་བདེ་མཆོག་ཁྲོ་བོ་རྡོ་རྗེ་སེམས་དཔའ་ཁམས་གསུམ་ལས་རྣམ་པར་རྒྱལ་བའི་སྐུར་གྱུར་པ་ནི།
རྩ་ཞལ་དང་སྐུ་མདོག་དུས་མཐའི་སྤྲིན་ལྟར་ནག་པ། གཡས་ཞལ་གསུམ་དཀར་སྔོ་སེར་བ། གཡོན་ཞལ་གསུམ་སྔོ་དཀར་སེར་བ། སྟེང་གིས་ཞལ་དམར་པོ། ཕྱག་བཅུ་དྲུག་གིས་དང་པོ་གཉིས་རྡོ་རྗེ་དྲིལ་བུ་འཛིན་ཞིང་ཐུགས་ཀར་འཁྱུད་པ། གཉིས་པ་གཉིས་ཀྱིས་ཁམས་གསུམ་རྣམ་རྒྱལ་གྱི་ཕྱག་རྒྱ་དཔྲལ་པར་འཇོག་པ། ལྷག་མ་གཡས་པས་ཐོད་པ་རལ་གྲི། འཁོར་ལོ་ཐོ་བ། ཅང་ཏེའུ་རྣམས་དང༌། གཡོན་རྣམས་ཀྱིས་ཁ་ཊྭཾ་ག་ལྕགས་ཀྱུ། སྡིགས་མཛུབ་དང་བཅས་པའི་ཞགས་པ། རིན་པོ་ཆེ། མདུང་རྩེ་གསུམ་པ་དང་ཚངས་པའི་མགོ་བོ་ལྷན་ཅིག་ཏུ་འཛིན་པ། ཐ་མ་གཉིས་ཀྱིས། མིའི་པགས་པ་དང་གླང་པོ་ཆེའི་པགས་པ་ལྷན་ཅིག་ཏུ་སྦྱར་བ་སྟོད་གཡོགས་སུ་བསྣམས་པ། ཞབས་གཡས་བརྐྱང་པས་འཇིགས་བྱེད་དང་དུས་མཚན་མ་མནན་ཞིང༌། ཡུམ་རྡོ་རྗེ་ཕག་མོ་རྡོ་རྗེ་མཁའ་འགྲོ་མ་ཞལ་གསུམ་ཕྱག་དྲུག་པ་སྔ་མ་ལྟ་བུས་འཁྱུད་པའོ། །ཧཱུཾ་ལན་བཅུ། མཁའ་ནང་གི་ཁྲོ་བོ་བཅུ་དཔག་ཏུ་མེད་པ་སྤྲོས། ཕྱོགས་བཅུའི་བགེགས་རྣམས་བཅོམ། སྟོབས་བཅུ་དང༌། ཕ་རོལ་ཏུ་ཕྱིན་པ་བཅུ་ལ་བཀོད། འཁོར་ལོའི་རྩིབས་བཅུ་ལ་འཁོད་པ་ནི། ཤར་དུ་རྡོ་རྗེ་གཏུམ་པོ་སྔོན་པོ་སྔོ་སེར་ལྗང་བའི་ཞལ་གསུམ། བྱང་དུ་རྡོ་རྗེ་ཉི་མ་སེར་པོ་སེར་ནག་ལྗང་བ། ནུབ་ཏུ་རྡོ་རྗེ་གཙུག་ཏོར་དམར་པོ་དམར་ནག་ལྗང་བ། ལྷོར་རྡོ་རྗེ་འཁྱིལ་པ་ལྗང་ཁུ་ལྗང་དཀར་སེར་བ། མེར་རྡོ་རྗེ་གནོད་
སྦྱིན་དུད་ཁ་དུད་སེར་ལྗང་བ། བདེན་བྲལ་དུ་རྡོ་རྗེ་དུས་དམར་པོ་དམར་སེར་ལྗང་བ། རླུང་དུ་རྡོ་རྗེ་སྟོབས་པོ་ཆེ་ནག་པོ་ནག་སེར་ལྗང་བ། དབང་ལྡན་དུ་རྡོ་རྗེ་འཇིགས་རུང་སྔོན་པོ་སྔོ་སེར་ལྗང་བའི་ཞལ་གསུམ་ཀ་མི་གཡོ་བ། དེ་རྣམས་ཕྱག་དང་པོ་གཉིས་ཀྱིས་ཅང་ཏེའུ་དང་དྲིལ་བུ་འཛིན་པ། སྟེང་དུ་གཙུག་ཏོར་འཁོར་ལོས་བསྒྱུར་བ་དཀར་པོ་དཀར་ནག་ལྗང་བ། ཕྱག་དང་པོ་གཉིས་འཁོར་ལོ་དང་དྲིལ་བུ། འོག་ཏུ་རྡོ་རྗེ་ས་འོག་ནག་པོ་ནག་སེར་ལྗང་བ། ཕྱག་དང་པོ་གཉིས་རྩེ་གསུམ་དང་དྲིལ་བུ་འཛིན་པ། ཁྲོ་བོ་བཅུ་པོ་རྣམས་ནི་ཕྱོགས་སྐྱོང་བཅུ་གནོན་ཞིང༌། རྩ་ཕྱག་གཉིས་རང་འདྲའི་རིག་མ་ལ་འཁྱུད་པ། ལྷག་མ་གཡས་གཉིས་ལྕགས་ཀྱུ་དང་ཞགས་པ། གཡོན་གཉིས་ཐོད་པ་དང་ཁ་ཊྭཾ་ག་བསྣམས་པ། གཙོ་འཁོར་ཐམས་ཅད་ཀྱང་ཞལ་རེ་རེ་ལ་སྤྱན་གསུམ་གསུམ་དང་ལྡན་ཞིང༌། སྨ་ར་དང༌། སྨིན་མ་དང༌། དབུ་སྐྲ་སེར་པོ་གྱེན་དུ་བརྫེས་པ། མཆེ་བ་གཙིགས་ཤིང་མི་བཟད་པའི་གད་རྒྱང་དྲག་པོ་སྒྲོག་པ། ཆེར་ཁྲོས་ཤིང་སྟག་ལྤགས་ཀྱི་ཤམ་ཐབས་ཅན། རུས་པ་དང་སྦྲུལ་གྱིས་བརྒྱན་པ། ཐོད་སྐམ་གྱི་དབུ་རྒྱན་དང་མི་མགོའི་དོ་ཤལ་ཅན། པད་ཉི་ལ་གཡས་བརྐྱང་གི་སྟབས་ཀྱི་མེ་དཔུང་འབར་བའི་དབུས་ན་བཞུགས་པའོ། །མཾ་ཏཾ་པཾ་ལཾ་ཨོཾ་སྭཱ་ཨཱཿཧཱ། མཁའ་ནང་གི་རྣལ་འབྱོར་མ་བརྒྱད་དཔག་ཏུ་མེད་པ་སྤྲོས། འབྱུང་བ་བཞི་དང་
ཆུ་བོ་བཞི་སྦྱངས། ཚད་མེད་བཞི་དང་རྣམ་ཐར་བཞི་ལ་བཀོད། སླར་འདུས་ཏེ་ནང་གི་པདྨའི་འདབ་མ་ལ་འཁོད་པ་ནི། ཤར་དུ་མཁའ་འགྲོ་མ་སྔོན་མོ། བྱང་དུ་ལཱ་མ་ལྗང་ཁུ། ནུབ་ཏུ་དུམ་སྐྱེས་མ་དམར་མོ། ལྷོར་གཟུགས་ཅན་མ་སེར་མོ། མེར་སངས་རྒྱས་མཁའ་འགྲོ་མ་དཀར་སྔོ། བདེན་བྲལ་དུ་རིན་ཆེན་མཁའ་འགྲོ་མ་སེར་ལྗང༌། རླུང་དུ་པདྨ་མཁའ་འགྲོ་མ་དམར་སེར། དབང་ལྡན་དུ་སྣ་ཚོགས་མཁའ་འགྲོ་མ་ཁྲ་མོ། ཐམས་ཅད་ཀྱང་ཞལ་གཅིག་ཕྱག་བཞི་གྲི་གུག་དང་ཐོད་པ། ཌ་མ་རུ་ཁ་ཊྭཱཾ་ག་འཛིན་པ། ཆེར་ཁྲོས་པའོ། །ཕུཾ་ཕྲེཾ་ཕྲོཾ་ཕྲིཾ། ནང་གི་སྒོ་མ་བཞི་དཔག་ཏུ་མེད་པ་སྤྲོས། བསྡུ་བའི་དངོས་པོ་བཞི་ལ་བཀོད། སླར་འདུས་ཏེ་སྒོ་བཞིར་འཁོད་པ་ནི། ཤར་དུ་མཁའ་འགྲོ་མ་རྒྱལ་དབང་མ་དཀར་མོ་ལག་པ་གཉིས་ཀྱི་ཐལ་མོའི་རྩེ་མོ་ཁར་བཅུག་པ། བྱང་དུ་འབར་བྱེད་མ་སེར་མོ་ཐལ་མོ་སྤྱི་བོར་བཞག་པ། ནུབ་ཏུ་འཇིགས་བྱེད་མ་དམར་མོ་སྙིམ་པ་ཁྲག་གིས་བཀང་བ་ཞལ་དུ་གསོལ་བ། ལྷོ་རུ་གཡོན་ལྡན་མ་སྔོན་མོ་གཏུན་ཤིང་དང་སྡིགས་མཛུབ་ཅན། ཐམས་ཅད་ཀྱང་དབུ་སྐྲ་དམར་པོ་སིལ་བུར་གྲོལ་བའོ། །ཧེ། ལན་ཉི་ཤུ་རྩ་བཞིར་བརྗོད། མཁའ་འགྲོ་མ་ཉེར་བཞི་དཔག་ཏུ་མེད་པ་སྤྲོས། ཤེས་པ་བཅུ་དང་རྣམ་ཐར་བརྒྱད་དང༌། མངོན་ཤེས་དྲུག་ལ་བཀོད། སླར་འདུས་ཏེ། དཀྱིལ་འཁོར་ཕྱི་མའི་ལྷ་སྣམ་རིམ་པ་གཉིས་ལ་འཁོད། དེ་ཡང་ཤར་དུ། རྟ་གདོང་
མ་དང་དྲག་མོའི་གདོང༌། །རྡོ་རྗེ་སྣ་མ་སྙན་གྲགས་མ། བྱང་དུ། །ཟླ་བའི་སྤྱི་གཙུག་མ་དེ་བཞིན། ཁྲོ་གཉེར་ཅན་མ་སྣ་ཚོགས་གཟུགས། །རྡོ་རྗེ་ཀ་ཏའི་བུ་མོའོ། །ནུབ་ཏུ། རོ་ལངས་མ་དང་རྡོ་རྗེ་ཟླ། དྲི་ལྡན་མ་དང་འཇིགས་བྱེད་ཞལ། ལྷོ་རུ། རྡོ་རྗེ་ཕོ་ཉ་རྡོ་རྗེ་སེན། རྡོ་རྗེ་གཞོན་ནུ་མ་དེ་བཞིན། རྡོ་རྗེ་ཀམྤོ་ཛ་རྣམས་སོ། །མཚམས་རྣམས་ལ་མེ་ནས་བརྩམས་ཏེ་གཡས་བསྐོར་གྱི། རྡོ་རྗེ་ལུ་གུ་རྒྱུད་མ་དང༌། །ལྷ་མོ་སྒྱུ་འཕྲུལ་དྲག་བྱེད་མ། །རྡོ་རྗེ་མེ་ལྟར་འབར་མའོ། །ཕྱིའི་གྲྭ་བཞི་ལ། སྣ་ཚོགས་གཟུགས་ཅན་གཟུགས་བཟང་མ། །རྡོ་རྗེ་མཆུ་དང་འོད་བྱེད་མའོ། །ཛཿཧཱུཾ་བཾ་ཧོཿ རྣལ་འབྱོར་མ་ལྷག་མ་བཞི་དཔག་ཏུ་མེད་པ་སྤྲོས། མི་འཇིགས་པ་བཞི་ལ་བཀོད། ཕྱིའི་སྒོ་བཞིར་འཁོད་པ་ནི། ཤར་ནས་བརྩམས་ཏེ། གཡོན་བསྐོར་གྱིས་རྡོ་རྗེ་སེར་སྐྱ་མ་དང་ནི། །རྡོ་རྗེ་འབར་མ་རྡོ་རྗེ་འཁྱིལ། །རྡོ་རྗེ་འཇིགས་བྱེད་མ་རྣམས་སོ། །དེ་ལ་ཤར་ཕྱོགས་པ་རྣམས་དཀར་བ། བྱང་ཕྱོགས་པ་རྣམས་ལྗང་བ། ནུབ་ཕྱོགས་པ་རྣམས་དང་དམར་བ། ལྷོ་ཕྱོགས་པ་རྣམས་སེར་བ། མཚམས་མ་རྣམས་ཕྱེད་ཀྱི་དབང་ཕྱུགས་མ་སྟེ། ཐམས་ཅད་ཀྱང་རྡོ་རྗེ་གསོར་ཞིང་དྲིལ་བུ་འཁྲོལ་བ། ཞགས་པ་དང༌། ལྕགས་ཀྱུ་དང༌། ཁ་ཊྭཱཾ་ག་དང་ཐོད་པ་འཛིན་པ། རང་མདོག་དང་མཚུངས་པའི་ཞལ་གསུམ་པ། གཅེར་བུ་རུས་
པ་དང༌། སྦྲུལ་གྱིས་བརྒྱན་པ། དྲག་མོ་ཆེན་མོ་དབུ་སྐྲ་གྱེན་དུ་འབར་བ། གཡས་བརྐྱང་གི་སྟབས་ཀྱིས་མེ་དཔུང་འབར་བའི་དབུས་ན་བཞུགས་པའོ། །ཡེ་ཤེས་ཀྱི་ལྷ་དེ་རྣམས་གྲུབ་པ་ན། གཞལ་མེད་ཁང་གི་ཕྱི་རོལ་མཆོད་པའི་ས་གཞི་ལ། ཕྱོགས་སྐྱོང་བ་བཅུ་དང༌། མ་མོ་བརྒྱད་དང༌། གཟའ་ཆེན་པོ་བརྒྱད་དང༌། ཞིང་སྐྱོང་བཞི་བཅུ་དང༌། རྒྱུ་སྐར་ཉི་ཤུ་རྩ་བརྒྱད་ལ་སོགས་པ་རྡོ་རྗེའི་དམ་ཚིག་ལ་གནས་པའི་སྲིད་པ་གསུམ་གྱི་འབྱུང་པོ་ཚོགས་མཐའ་དག་ཀྱང་འཁོད་པར་གྱུར། ཨོཾ་ཨཱཿཧཱུཾ སརྦ་བཱི་ར་ཡོ་གི་ནཱི༴ སོགས། སྐད་ཅིག་རྣམ་པའི་སྔགས་བརྗོད་པ་ནས། དབང་བསྐུར་བའམ་མཐར་ཐུག་པ་འཁོར་ལོ་བསྒྱུར་དྲུག་དང་འདྲ་བ་ལས། གཙོ་བོ་ལ་རྡོ་རྗེ་སེམས་དཔའ་དང༌། འཁོར་རྣམས་ལ་གཙོ་བོ་ཞལ་གསུམ་ཕྱག་དྲུག་པ་རེ་རེས་དབུ་རྒྱན། ཨརྒྷཾ༴ ནས་ཤཔྟའི་བར་གྱིས་ཕྱི་མཆོད་དང༌། རང་སྔགས་ཀྱི་མཐར་འབྲུ་གསུམ་བཏགས་པས་ནང་མཆོད། འདི་སྐབས་བརྒྱུད་པ་ནི་དྲག་པོ་ཆེན་པོ་ཕྱག་འབུམ་པ་དང་འདྲའོ། །ཨ་ནུ་རཱ་གས་གསང་མཆོད། ཧེ་རུ་ཀ་ཡབ་ཡུམ་གྱི་རྐང་བརྒྱད་ཀྱིས་བསྟོད་པ་རྣམས་ཕུལ། དེ་ནས་བཟླས་པའི་དམིགས་པ་གསལ་བཏབ་ལ། སྔགས་བཟླ་བར་བྱ་སྟེ། དེ་ལ་གཙོ་བོའི་སྔགས་ནི། ཨོཾ་སུམྦྷ་སོགས་ཞལ་བཞི་པའི་སྔགས་དང༌། ཨུཥྞི་ཥ་ཡང་བཟླ་བར་བྱ་བ་ཡིན་ལ། སྙིང་པོ་ནི། ཨོཾ་ཁ་བཛྲ་དྷྲིཀ་བཛྲ་ཧཱུཾ་ཀ་རཱ་བཛྲ་ཧཱུཾ་ཕཊ། ཅེས་པའོ། །ཁྲོ་བོ་བཅུ་ལ། ཨོཾ་བཛྲ་ཙཎྜ་བཛྲ་ཧཱུཾ། དེ་བཞིན་དུ་ཐོག་མར་ཨོཾ་བཛྲ་ཞེས་པ་དང༌། མཐར་བཛྲ་ཧཱུཾ་ཕཊ་ཅེས་པ་ཁྲོ་བོ་བཅུ་ཀུན་ལ་སྦྱར། ཛྭ་ལ་
ཨ་ན་ལཱརྐ། ཨུཥྞི་ཥ། ཀུཎྜ་ལི། ཡཀྵ། ཀཱ་ལཱི། མཧཱ་བཱ་ལ། བྷི་ཥ་ཎ། ཨུཥྞི་ཥ་ཙཀྲཱ་ཝརྟི་རྣམས་དང༌། ཨོཾ་བཛྲ་པཱ་ཏཱ་ལ་བཛྲ་ཧཱུཾ་ཕཊ་ཀྱི་བར་རོ། །སྙིང་པོའི་རྣལ་འབྱོར་མ་བཞི་ལ། ཨོཾ་ཤྲཱི་ཌཱ་ཀི་ནི་ཌཾ་ཧཱུཾ་ཧཱུཾ་ཕཊ་སྭཱཧཱ། དེ་བཞིན་དུ་སྦྱར་ཏེ། ལཱ་མེ་ལཾ། ཁཎྜ་རོ་ཧེ་ཁཾ། རུ་བི་ནི་རཱུ། ཞེས་པའོ། །དེ་བཞིན། ཨོཾ་ཤྲཱི་བུདྡྷ་ཌཱ་ཀི་ནཱི་ཧཱུཾ་ཧཱུཾ་ཕཊ་སྭཱཧཱ། དེ་ལྟར་སྦྱར་ཏེ། རཏྣ་ཌཱ་ཀི་ནཱི། པདྨ་ཌཱ་ཀི་ནཱི། བི་ཤྭཱ་ཌཱ་ཀི་ནཱི། ཞེས་སོ། །མཁའ་འགྲོ་ཉི་ཤུ་རྩ་བརྒྱད་ཀྱི། ཐོག་མ་ཉེར་བཞི་ལ། མཚན་སྔགས་ཀྱི་དང་པོ་ཨོཾ་དང༌། མཐར་མར་ཧཱུཾ་ཧཱུཾ་ཕཊ་སྦྱར་བ་ཁོ་ན་དང༌། ཐ་མ་བཞི་པོ་ལ་མཚན་གྱི་མཐར་ས་བོན་ཡང་སྦྱར་རོ། །དེ་ཡང༌། ཨོཾ་ཝ་ཌ་ཝ་མུ་ཁཱི་ཧཱུཾ་ཧཱུཾ་ཕཊ། དེ་བཞིན་དུ་སྦྱར་ཏེ། གྷོ་རི་མུ་ཁི། བཛྲ་གྷྲ་ཎི། ཡ་ཤི་སྭི་ནི། ཙཎྜ་ཤི་ཁ་རེ། བྷྲྀ་ཀུ་ཊི། བི་ཤྭརཱུ་པེ། བཛྲ་ཀ་ཏྱཱ་ཡ་ནཱི། བཛྲ་བཻ་ཏཱ་ལི། བཛྲ་ས་ཡི་ཀི བཛྲ་གྷནྡྷ་ལི། བཛྲ་བྷི་མ་ལཱ་ད་ནི། བཛྲ་དྷཱུ་ཏི། བཛྲ་ན་ཀཱི བཛྲ་ཀཽ་མ་རཱི། ཀམྤོ་ཛཱི། བཱ་ཧུ། རཱུ་པེ། སུ་དཱུ་པེ། བཛྲ་ཏུནྡི། པྲ་བྷ་ཀ་རི་ཞེས་སོ། །ཨོཾ་ཤྲཱི་བཛྲ་པིཾ་ཀ་ལེ་ཛཿཧཱུཾ་ཧཱུཾ་ཕཊ། ཨོཾ་བཛྲ་ཛྭ་ལ་ཧཱུཾ་ཧཱུཾ་ཧཱུཾ་ཕཊ། ཨོཾ་བཛྲ་ཀུཎྜི་བཾ་ཧཱུཾ་ཧཱུཾ་ཕཊ། ཨོཾ་བཛྲ་བྷཻ་ར་ཝེ་ཧོཿ ཧཱུཾ་ཧཱུཾ་ཕཊ། ཅེས་རྣམས་སོ། །ཐུན་མཚམས་ཀྱི་བྱ་བ་དང༌། [དཀྱིལ་འཁོར་བྱ་བ་དང༌།]དཀྱིལ་འཁོར་ཉེར་བསྡུ་སོགས་སྤྱི་དང་འདྲ་ཞིང༌། གཏོར་མའི་ཆོ་ག་ནི་འཁྲུལ་སྤོང་གི་སྒྲུབ་ཐབས་ཀྱི་སྐབས་སུ་བཤད་པ་ལྟར་ལས། ཡེ་ཤེས་ཀྱི་ལྷ་ལ་འབུལ་བའི་སྤྱི་སྔགས་སོང་བའི་རྗེས་
སུ་ལྷ་སོ་སོའི་སྙིང་པོའི་ཧཱུཾ་ཕཊ་གྱི་གོང་དུ། ཨི་མཾ་བཱ་ལིཾ་གྲྀཧྞ་གྲྀཧྞ་སརྦ་སིདྡྷ་པྲ་ཡཙྪནྟུ་ཞེས་པ་བཅུག་ནས། སོ་སོར་འབུལ་བར་བྱ་སྟེ། ཨོཾ་ཁ་བཛྲ་དྷི་ཀ་བཛྲ་ཧཱུཾ་ཀ་ར་བཛྲ་ཨི་མཾ་བཱ་ལིཾ་གྲྀཧྞ་གྲྀཧྞ་སརྦ་སིདྡྷི་མེཾ་པྲ་ཡཙྪནྟུ་ཧཱུཾ་ཧཱུཾ་ཕཊ། ཞེས་པ་ལ་སོགས་པའོ། །རྒྱས་པར་བྱེད་ན་འཇིག་རྟེན་པའི་ལྷ་རྣམས་ལའང༌། དེ་བཞིན་དུ་སྦྱོར་བ་ལས། སརྦ་སིདྡྷི་སོགས་ཀྱི་དོད་དུ། མ་མཱ་ཤནྟེཾ་རཀྵ་ཙ་ཀུ་རུ་ཀུ་རུ་ཧཱུཾ་ཕཊ། ཞེས་པ་ལྟ་བུ་རང་འདོད་པའི་དོན་གང་ཡིན་པའི་ལས་སྔགས་སྦྱར་རོ། །འདོད་དོན་གསོལ་བའི་གཞུག་ཏུ། དཔྱིད་ཀྱི་རྒྱལ་པོའི་གླུ་བླང་བར་བྱ་སྟེ། ཁྲོ་བོ་བདེ་བ་དགྱེས་པ་ཡི། །བདེ་བའི་ལོངས་སྤྱོད་ལས་བྱུང་བ། །བདེ་བ་དབབ་པའི་སྦྱོར་བ་ཡིས། །རབ་ཏུ་རྨོངས་པས་བརྟེན་པར་བྱའོ། །བདེ་ཆེན་བདེ་བའི་གར་གྱིས་རོལ། །རྣལ་འབྱོར་མ་མཆོག་པད་མའི་བདེ། །ཨ་ལ་ལ་ལ་ཧོ། དགྱེས་པ་རྣམས་ཀྱི་བདེ་བ་མཆོག །རྣལ་འབྱོར་མ་མཆོག་མཆོད་པར་མཛོད། །ཨ་ཨཱིཿཨ་ཨཱཿར་ལི་ཧོ། རབ་དགྱེས་མགོན་པོའི་རབ་བཞུགས་མཛོད། །མཁའ་འགྲོ་དྲྭ་བའི་བདེ་བ་སྩོལ། །ཞི་བའི་གར་གྱིས་གར་མཛད་པ། །བདག་ལ་བདེ་ཆེན་བདེ་བ་སྩོལ། །ཐར་པའི་མཚན་ཉིད་ལྡན་པ་ཁྱོད། །བདེ་བ་སྤངས་པས་གྲོལ་མི་འགྱུར། །བདེ་མེད་སྡུག་བསྔལ་གྱིས་མི་གྲོལ། །བདེ་དེ་ཆུ་སྐྱེས་དབུས་ན་གནས། །ཆགས་པའི་དངོས་པོར་ཁྱོད་མ་གྱུར། བདེ་བ་ཆེ་ཡིས་གྲོལ་བར་མཛོད། །པདྨ་རྒྱས་པའི་རོ་ཉིད་ཀྱིས། །བུང་བ་ལྟ་བུར་ཚིམ་པར་མཛོད། །
འདི་ཡིས་མགོན་པོ་བསྐུལ་ན་ནི། །དཀྱིལ་འཁོར་དུ་ནི་ངེས་པར་འགྲུབ། །སྙན་ཅིང་འཇེབས་པའི་དབྱངས་ཀྱིས་ནི། །དཔྱིད་ཀྱི་རྒྱལ་པོའི་གླུ་བླངས་པས། །དྲི་མེད་མཁའ་འགྲོ་དྲ་བ་ཡིས། །འཕྲིན་ལས་ཐམས་ཅད་སྟོན་པར་མཛོད། །ཅེས་སོ། །འདི་ལ་དཀྱིལ་འཁོར་སྒོ་རྐྱང་ལ་ལྷ་གོང་བཞིན་འགོད་པ་དང༌། ཁྲོ་བོ་བཅུ་གཅིག་ཁོ་ནའི་དཀྱིལ་འཁོར་སྒོམ་པར་འདོད་ནའང༌། དེ་དང་དེའི་འདོར་ལེན་ཤེས་པར་བྱའོ། །འདི་ནི་མངོན་བརྗོད་བླ་མའི་ལེའུ་ཡར་མར་གྱི་ཁོག་དོན་སྡེབས་པ་བླ་མའི་མན་ངག་གོ །རབ་ཟབ་སྒྲུབ་ཐབས་རྨད་བྱུང་འདི། །དྲག་ཤུལ་སྒྲུབ་ལ་མཆོག་ཏུ་བསྔགས། །རྒྱུད་དོན་ཤེས་པ་རྣམས་ལ་ནི། །དགའ་བདེའི་དཔལ་འབྱོར་རྒྱས་བྱེད་ཡིན། །དཔལ་བདེ་མཆོག་ཁྲོ་བོ་རྡོ་རྗེ་སེམས་དཔའི་སྒྲུབ་ཐབས་ཏེ་བཅུ་དྲུག་པའོ།། །།༈ བདེ་ཆེན་རྡོ་རྗེ་ཕག་མོ་ནི། །སྤྲོས་བྲལ་དབྱིངས་ལས་མ་གཡོས་ཀྱང༌། །སྲིད་གསུམ་སྒྱུ་མའི་གར་མཁན་མ། །དེ་ལ་དངོས་པོ་ཀུན་གྱིས་འདུད། །འདིར་གྲུབ་པའི་སློབ་དཔོན་བདེ་བ་ཆེན་པོའི་རྡོ་རྗེའམ། ཞི་བ་སྦས་པའི་ཞབས་ཀྱིས་མཛད་པའི་གཞུང་གི་རྗེས་སུ་འབྲང་ནས། རྡོ་རྗེ་བཙུན་མོའི་སྒྲུབ་ཐབས་སྒོམ་པར་འདོད་པས། སྤྲོ་ན་མཎྜལ་མཆོད་པ་དང༌། ལག་མཆོད་དང་གཏོར་མ་རྣམས་སྔོན་དུ་འགྲོ་བར་བྱས་ཏེ། རྣལ་འབྱོར་གྱི་བྱ་བ་ལ་འཇུག་པ་ཡིན་ལ། དེ་ཙམ་མ་ལྕོགས་ན་ནང་མཆོད་བྱིན་གྱིས་རླབས་ཏེ། བླ་མ་དང་དཀྱིལ་འཁོར་འཁོར་ལོའི་ལྷ་ཚོགས་ཐམས་ཅད་མདུན་གྱི་ནམ་
མཁར་སྐད་ཅིག་གིས་མོས་ལ། ཨོཾ་སརྦ་ཏ་ཐཱ་ག་ཏ་ཀཱ་ཡ་ཝཀ་ཙིཏྟ་པྲ་ཎ་མེ་ཎ་བཛྲ་བནྡྷ་ནཾ་ཀ་རོ་མི། ཞེས་ཕྱག་བྱ། གཡོན་པའི་འཐེབ་སྲིན་གྱིས་མེ་ཏོག་ཕུལ་ལ། ཨོཾ་མཆོག་ཏུ་བདེ་བའི་སེམས་ནི་རོལ་པར་ལྡན། སྒེག་པའི་ཕྱག་གིས་བཅོམ་ལྡན་འདས་ལ་འདུད། ཛཿཧཱུཾ་བཾ་ཧོ། རབ་ཏུ་གྲུབ་པར་མཛོད། མགོན་པོ་སྙིམ་པའི་མེ་ཏོག་བཞེས་ཤིག་ཧོཿ མེ་ཏོག་འབུལ་བའི་གཟུངས་ཀྱིས་མེ་ཏོག་ཕུལ་ཀྱང་རུང་ངོ༌། །ཆུ་བཞི་སྔོན་དུ་འགྲོ་བའི་ཉེར་སྤྱོད་ལྔ་འབུལ། ཨོཾ་ཨཱཿབཛྲ་དྷྲི་ཀ་ཧཱུཾ་ཧཱུཾ་བྷྲུཾ་ཨཾ་ཛྲིཾ་ཁཾ་ཧཱུཾ། ཨོཾ་ཨཱཿཧཱུཾ་ཞེས་བླ་མ་ལ་ནང་མཆོད་ཕུལ། ལྷ་སོ་སོའི་སྔགས་ཀྱིས་དཀྱིལ་འཁོར་པ་ལ་ནང་མཆོད་ཕུལ། ཅང་ཏའུ་ལ་སོགས་པའི་སྒྲ་དང་བཅས་ཏེ། ཡུམ་གྱི་རྐང་བརྒྱད་ཀྱིས་བསྟོད། དཀོན་མཆོག་གསུམ་ལ་བདག་སྐྱབས་མཆི་སོགས་རྒྱུན་བཤགས་དང༌། ཇི་ལྟར་དུས་གསུམ་མགོན་པོ་རྣམས་ཞེས་སོགས་ཀྱིས་སྡོམ་པ་བཟུང༌། ཡི་གེ་བརྒྱ་པ་ལན་གསུམ་གྱིས་གསོལ་བ་བཏབ། ཨོཾ་ཨཱཿཧཱུཾ་མུཿ ཞེས་མི་དམིགས་པར་བསམ་མོ། །དེ་དག་ནི་བསོད་ནམས་ཚོགས་ཀྱི་རིམ་པའོ། །དེ་ནས་ཚད་མེད་བཞི་སྤྱི་དང་མཐུན་པར་བསྒོམ་སྟེ། རྣལ་འབྱོར་བསྲུང་བའོ། །གཟུགས་ཀྱི་ཕུང་པོ་ལ་ནི་རྣམ་པར་སྣང་མཛད་དོ། །ཞེས་སོགས་ཕུང་ཁམས་ཀྱི་ལྷ་བཅུ་བདུན་མོས་པ་ཙམ་མམ། དངོས་སུ་སྒོམ་པ་ནི་བདག་བསྲུང་བྱའོ། །ཨོཾ་སྭ་བྷཱ་ཝ་ཤུདྡྷ་སརྦ་དྷརྨཱ་སྭ་བྷཱ་ཝ་ཤུདྡྷོ྅་ཧཾ། སྟོང་པའི་ངང་ལས་ཧཱུཾ་ཡིག་ལས་བྱུང་བའི་རྡོ་རྗེའི་ས་གཞི། རྭ་
བ། དྲྭ་བ། གུར་བླ་རེ་མེ་དཔུང་འབར་བ་དང་བཅས་པའི་བསྲུང་འཁོར་དུ་གྱུར། ཨོཾ་མེ་དྷི་ནི་བཛྲ་བྷ་བཱ༴ ནས། ཨ་ན་ལཱརྐ་ཧཱུཾ། གི་བར་སྔགས་ཚན་དྲུག་བརྗོད། དེའི་ནང་དུ་བྷྲུཾ་ལས་བཀའི་འཁོར་ལོ་སེར་བོ་རྩིབས་བཅུ་པ། དེར་ཧཱུཾ་གི་ས་བོན་འབའ་ཞིག་ལས་བྱུང་བའི་ལྷ་རྣམས་ཏེ། འཁོར་ལོའི་ལྟེ་བར་ཁྲོ་བོ་ཆེན་པོ་འཇིག་རྟེན་གསུམ་རྒྱལ། ཞལ་བཞི་ནག་ལྗང་དམར་སེར་བ། ཕྱག་དང་པོ་གཉིས་ཧཱུཾ་མཛད་ཀྱི་ཕྱག་རྒྱས་རྡོ་རྗེ་དྲིལ་བུ་འཛིན་པས། རྡོ་རྗེ་ཕག་མོ་ཕྱག་གཉིས་མ་ལ་འཁྱུད་པ། གཉིས་པ་གཉིས་ཀྱིས་རལ་གྲི་དང་གཏུན་ཤིང༌། གསུམ་པ་གཉིས་ཀྱིས་མདའ་དང་གཞུ། བཞི་པ་གཉིས་ཀྱིས་ལྕགས་ཀྱུ་དང་ཞགས་པ། ལྔ་པ་གཉིས་ཀྱིས་དགྲ་སྟྭ་དང་རྩེ་གསུམ། དྲུག་པ་གཉིས་ཀྱིས་གླང་པོ་ཆེའི་པགས་པ་སྟོད་གཡོགས་སུ་འཕྱར་པ་དང་ལྷན་ཅིག་ཐོད་ཁྲག་དང་ཁ་ཊྭཱཾ་ག་འཛིན་པ། ཞབས་གཡས་བརྐྱང་བས་འཇིགས་བྱེད་དང་དུས་མཚན་མ་མནན་པ། རྩིབས་བཅུ་ལ་ཤར་དུ་ཁྭ་གདོང་མ་ལ་གཤིན་རྗེ་མཐར་བྱེད་ནག་པོ་ཐོ་བ་འཛིན་པས་འཁྱུད་པ། བྱང་དུ་འུག་གདོང་མ་ལ་བགེགས་མཐར་བྱེད་ལྗང་ཁུ་སྣ་ཚོགས་རྡོ་རྗེ་འཛིན་པས་འཁྱུད་པ། ནུབ་ཏུ་ཁྱི་གདོང་མ་ལ་པདྨ་མཐར་བྱེད་དམར་པོ་པདྨ་འཛིན་པས་འཁྱུད་པ། ལྷོ་རུ་ཕག་གདོང་མ་ལ་ཤེས་རབ་མཐར་བྱེད་སེར་པོ་བེ་ཅོན་འཛིན་པས་འཁྱུད་པ། ལྷོར་གཤིན་རྗེ་བརྟན་མ་ལ་འདོད་རྒྱལ་
སྔོན་པོ་ལྕགས་ཀྱུ་འཛིན་པས་འཁྱུད་པ། བདེན་བྲལ་དུ་གཤིན་རྗེ་ཕོ་ཉ་མོ་དབྱུག་སྔོན་ཅན་ནག་པོ་དབྱུག་པ་འཛིན་པས་འཁྱུད་པ། རླུང་མཚམས་སུ་གཤིན་རྗེ་མཆེ་བ་མ་ལ་སྟོབས་པོ་ཆེ་དུད་ཁ་རྩེ་གསུམ་འཛིན་པས་འཁྱུད་པ། བྱང་ཤར་དུ། གཤིན་རྗེ་འཇོམས་མ་ལ་མི་གཡོ་བ་སྔོ་སངས་རལ་གྲི་འཛིན་པས་འཁྱུད་པ། སྟེང་དུ་མཁའ་སྤྱོད་མ་དཀར་མོ་ལ་གཙུག་ཏོར་འཁོར་ལོས་བསྒྱུར་བ་དཀར་པོ་འཁོར་ལོ་འཛིན་པས་འཁྱུད་པ། འོག་ཏུ་ས་སྤྱོད་མ་ཁ་དོག་སྣ་ཚོགས་པ་ལ་གནོད་འཛེས་རྒྱལ་པོ་ནག་པོ་གཏུན་ཤིང་འཛིན་པས་འཁྱུད་པ། ཁྲོ་བོ་ཐམས་ཅད་ཕྱག་གཡོན་པས་སྡིགས་མཛུབ་དང་བཅས་པའི་སྦྲུལ་ཞག་ཅན། འཁོར་རྣམས་ཤེས་རབ་མ་གཙོ་བོར་གྱུར་པ། ཐམས་ཅད་ཀྱང་རྡོ་རྗེ་འཆང་ཆེན་པོའི་དབུ་རྒྱན་ཅན་ནོ། །ཕྱིར་བཟློག་བྱེད་ན་བར་འདིར་མངོན་བརྗོད་ལས་བྱུང་བའི་ཨུཥྞི་ཥ་བཟླ་ཞིང༌། ཕྱིར་བཟློག་གི་དམིགས་པ་དགོས་པ་ཡིན་ནོ། །དེ་ནས་སུམྦྷ་ལན་གཉིས་བརྗོད་པས། དུར་ཁྲོད་མ་བརྒྱད་ཀྱིས་ཐུགས་ཀ་ནས་དུར་ཁྲོད་མ་བརྒྱད་དམར་མོ། ཐོ་བ་ཕུར་བུ་ལྕགས་ཀྱུ་ཞགས་པ་རྣམས་འཛིན་པ་སྤྲོ་བ། ཡང་སུམྦྷས། བཀའ་བསྒོས་པ་ན་བགེགས་རྣམས་ཕྱོགས་སྐྱོང་བཅུའི་རྣམ་པར་བཀུག་སྟེ། ཧཱུཾ་ལས་བྱུང་བའི་འབྲུབ་ཁང་བཅུའི་ནང་དུ་རྡོ་རྗེ་མོའི་ས་གཞི་ལ་བཞག །ཨོཾ་གྷ་གྷ་སོགས། ཕུར་བུས་བཏབ། ཨོཾ་བཛྲ་མུད་ག་ར་སོགསཀྱིས། ཐོ་བས་བརྡུང་ཏེ། བགེགས་རྣམས་སྟོང་པ་ཉིད་དུ་ཐིམ། སྲུང་བའི་འཁོར་ལོའི་ལྷ་རྣམས་ལ་མཆོད་ཡོན་དང་ཉེར་སྤྱོད་ལྔས་མཆོད། ཕོ་ཉ་མོ་རྣམས་
སླར་བསྡུ། ཡི་གེ་བརྒྱ་པ་ལན་གསུམ་གྱིས་བརྟན་པར་བྱས་ཏེ། གནས་སྲུང་བའོ། །དེ་ལྟར་བསྲུང་བ་གསུམ་ནི་ཚུལ་ཁྲིམས་ཀྱི་ཚོགས་སོ། །ཨོཾ་ཤུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཏྨ་ཀོ྅་ཧཾ། ཨོཾ་ཨཱཿནི་མི་ཏ་ཛྙཱ་ན་བཛྲ་སྭ་བྷ་ཝ་ཨཏྨ་ཀོ྅་ཧཾ། ཨོཾ་ཨ་པྲ་ཎི་ཧི་ཏ་ཛྙཱ་ན་བཛྲ་སྭ་བྷཱ་ཝ་ཨཏྨ་ཀོ྅་ཧཾ། ཨོཾ་ཨཱཿནཱི་བྷི་སང་སྐ་ར་ཛྙཱ་ན་བཛྲ་སྭ་བྷཱ་ཝ་ཨཏྨ་ཀོ྅་ཧཾ། ཞེས་བརྗོད་ཅིང་སྔགས་དོན་བསམ་པ་ནི་ཡེ་ཤེས་ཀྱི་ཚོགས་གསག་པའོ། །དེ་དག་གིས་སྔོན་འགྲོ་རྫོགས་སོ།། །།སྣོད་བཅུད་ཐམས་ཅད་འོད་དུ་ཞུ། རང་རྡོ་རྗེ་ཕག་མོར་གསལ་བ་ལ་ཐིམ། གནས་གསུམ་དུ་ཨོཾ་ཨཱཿཧཱུཾ། རང་ཉིད་ཨོཾ་ལ་ཐིམ་དེ་ཨཱཿལ༴ དེ་ཧཱུཾ་ལ༴ དེ་ཡང་ནཱ་དའི་བར་དུ་བསྡུས། ནཱ་ད་ཡང་མི་དམིགས་པར་བསམ་མོ། །དེ་ནི་འཆི་བདག་བྱེད་དོ། །སྟོང་པའི་ངང་ལས་ནཱ་ད་ཧོ་གཉིས་ཀྱི་མཐའ་བརྟེན་པར་ནམ་མཁར་གནས། དེ་ནི་བར་དོ་དག་བྱེད་དོ། །སྐད་ཅིག་གིས་འབྱུང་བཞི་རི་རབ་དང་བཅས་པའི་རྩེ་མོར། བསྲུང་བའི་འཁོར་ལོ་རབ་ཏུ་ཡངས་པའི་དབུས་སུ་སྐུའི་འཁོར་ལོ་ནི་དུར་ཁྲོད་ཆེན་པོ་བརྒྱད་ཀྱི་ཁོར་ཡུག་གོ །དེའི་ནང་དུ་པདྨའི་ཉི་མ་སྣ་ཚོགས་རྡོ་རྗེ་རྣམས་བརྩེགས་པའི་གཞི་ལ་གཞལ་མེད་ཁང་གྲུ་བཞི་སྒོ་བཞི་མཚན་ཉིད་ཐམས་ཅད་ཡོངས་སུ་རྫོགས་པ། ནང་གི་ལྷ་རྣམས་ཤར་སྔོ། བྱང་ལྗང༌། ནུབ་དཀར། ལྷོ་སེར་བ་ནི་གསུང་གི་འཁོར་ལོའོ། །དབུས་ཀྱི་གཞི་དམར་པོ་ལ། གྲི་གུག་གི་འཕྲེང་བས་བསྐོར་བའི་མུ་ཁྱུད་ཟླུམ་པོའི་ནང་དུ། དཀྱིལ་འཁོར་
དམར་པོ་གྲུ་གསུམ་པ་ནི། ཐུགས་ཀྱི་འཁོར་ལོའོ། །དེའི་སྟེང་དུ་སྣ་ཚོགས་པད་མ་འདབ་མ་བརྒྱད་པ་ལ་ཟླ་བ་ཉི་མ་སྒྲ་གཅན་བརྩེགས་པའི་གདན། རིམ་པ་གཉིས་པའི་གྲྭ་བཞིར་ཟླ་བའི་དཀྱིལ་འཁོར་དང་རྡོ་རྗེའི་གདན། སྒོ་མཚམས་བརྒྱད་དུ་པདྨ་དམར་པོ་དང་རོའི་གདན། དུར་ཁྲོད་བརྒྱད་དུ་འཁོར་ལོ་དཀར་པོ་དང་རོའི་གདན། དབུས་ཀྱི་གདན་གྱི་སྟེང་དུ་ཨཱ་ལི་ལས་ཟླ་བ། ཀཱ་ལི་ལས་ཉི་མ། དེ་གཉིས་ཀྱི་བར་དུ་ནམ་མཁའི་ནཱ་ད་ཧོ་གཉིས་དང་བཅས་པ་ཞུགས། དེ་ཉིད་བཾ་མཾ་ཏཾ་པཾ་ལཾ། ཨ་ཀ་ཙ་ཊ་ཏ་པ་ཡ་ཤ་ཧཱུཾ་བརྒྱད་དང་བཅས་པར་གྱུར། དེ་རྣམས་ལས་འོད་ཟེར་འཕྲོས། སངས་རྒྱས་ཐམས་ཅད་སྤྱན་དྲངས། ཐམས་ཅད་ཞུ་ཞིང་འདྲེས་པ་ལས། དཀྱིལ་འཁོར་པ་རྣམས་ཡོངས་སུ་རྫོགས་པ་ནི། དབུས་ཀྱི་གདན་གྱི་སྟེང་དུ། བཅོམ་ལྡན་འདས་མ་རྡོ་རྗེ་ཕག་མོ་སྐུ་མདོག་དམར་མོ་དྲག་མོ་ཆེན་མོ་ཉི་མ་བྱེ་བའི་གཟི་བརྗིད་འབར་མ། ཞལ་གཅིག་ཕྱག་གཉིས་སྤྱན་གསུམ་དམར་བ། ཕྱག་གཡས་རྡོ་རྗེ་ནག་པོའམ་གྲི་གུག་འཕྱར་བ། གཡོན་ཐོད་པ་བདུད་རྩི་ལྔས་གང་བ་ཐུགས་ཀར་འཛིན་པ། ཞབས་གཡས་བསྐུམ་པས་འཇིགས་བྱེད་ནག་པོ་དང༌། གཡོན་བརྐྱང་བས་དུས་མཚན་མ་དམར་མོ་མནན་པ། ཕྲག་པ་གཡོན་གྱི་ཕྱོགས་སུ་ཉེ་བར་བརྟེན་པའི་ཁ་ཊྭཱཾ་ག་དཀར་པོ་ཟུང་འཇུག་གི་རང་བཞིན་ཅན་འཆང་བ། དྲག་མོ་ཆེན་མོ་མི་མགོ་སྐམ་པོ་ལྔའི་དབུ་རྒྱན་དང༌། རློན་པ་ལྔ་བཅུའི་དོ་ཤལ་ཅན། གཅེར་བུ་ཕྱག་རྒྱ་
ལྔས་བརྒྱན་ཞིང༌། དབུ་སྐྲ་ནག་པོ་སིལ་བུར་གྲོལ་བ་ལ་མེ་ཏོག་སིལ་མས་མཛེས་པ། སྒེག་ཅིང་ལང་ཚོ་ལ་བབ་པ། མི་སྣང་བའི་ཐབས་དང་གཉིས་སུ་མེད་པར་འདུས་ཤིང༌། མ་ལུས་པའི་སྤྲུལ་པ་སྤྲོ་བ་དང་བསྡུད་བའི་ལུས་ཅན། བསྐལ་པའི་མེ་ལྟ་བུའི་མེ་དཔུང་འབར་བའི་དབུས་ན་བཞུགས་པའོ། །རིམ་པ་གཉིས་པའི་བྱང་ཤར་གྱི་གྲྭར་མཁའ་འགྲོ་མ་ནག་མོ། ནུབ་བྱང་གི་གྲྭར་ལཱ་མ་ལྗང་ཁུ། ལྷོ་ནུབ་ཀྱི་གྲྭར་དུམ་སྐྱེས་མ་དཀར་མོ། ཤར་ལྷོའི་གྲྭར་གཟུགས་ཅན་མ་སེར་མོ་རྣམས་གཡས་ཌཱ་མ་རུ་དང༌། གཡོན་ཤ་ལྔས་གང་བའི་ཐོད་པ་འཛིན་པ། ཟུར་གསུམ་དུ་དགའ་བ་འཁྱིལ་བ་གསུམ་དང༌། གྲུ་ཆད་གསུམ་ལ་བུམ་པ་རྣམས་གནས་པར་གྱུར། ཤར་སྒོར་གཽ་རཱི་སེར་མོ། བྱང་སྒོར་ཙཽ་རཱི་དམར་མོ། ནུབ་སྒོར་ཕྲ་མོ་ཧ་སྔོན་མོ། ལྷོར་སྒོར་རོ་ལང་མ་དཀར་མོ། ཤར་ལྷོའི་གྲྭར་པུཀྐ་སི་ཁྲ་མོ། ལྷོ་ནུབ་ཏུ་ཙཎྜ་ལི་ལྗང་ཁུ། ནུབ་བྱང་དུ་གྷསྨ་རི་དུད་ཁ། བྱང་ཤར་དུ་ཧེ་རུ་ཀའི་འོད་མ་ནག་མོ། ཐམས་ཅད་ཀྱང་གཡས་ཁ་ཊྭཾ་ག་འཕྱར་ཞིང་གཡོན་ཐོད་པ་འཛིན་པ། དུར་ཁྲོད་ཀྱི་གདན་རྣམས་ལ། ཤར་དུ་ཁྭ་གདོང་མ། བྱང་དུ་འུག་གདོང་མ། ནུབ་ཏུ་ཁྱི་གདོང་མ། ལྷོར་ཕག་གདོང་མ་རྣམས་གཡས་ཌཱ་མ་རུ་དང༌། གཡོན་སྡིགས་མཛུབ་དང་བཅས་པའི་ཞགས་པ་འཛིན་པ། ཤར་ལྷོར་གཤིན་རྗེ་བརྟན་མ། ལྷོ་ནུབ་ཏུ་ཤིན་རྗེ་ཕོ་ཉ་མོ། ནུབ་བྱང་དུ་གཤིན་རྗེ་མཆེ་བ་མ།
བྱང་ཤར་དུ་གཤིན་རྗེ་འཇོམས་མ་རྣམས་གཡས་གྲི་གུགདང༌། གཡོན་མིའི་མགོ་བོ་འཛིན་པ། བརྒྱད་པོ་ཐམས་ཅད་སྐུ་མདོག་ལྗང་ཁུའོ། །འཁོར་རྣམས་བཅོམ་ལྡན་འདས་མ་དང་མཚུངས་པ་ལས་ཞབས་གཡས་བརྐྱང་བའི་སྟབས་ཅན་ནོ། །འདིར་ལྷའི་རྣམ་པ་གདམ་ང་ནི། གཙོ་བོ་ཞལ་བཞི་ཕྱག་བཅུ་གཉིས་པ། དམར་ལྗང་ནག་སེར་བའི་ཞལ་བཞི། ཕྱག་མཚན་གཞན་རྣམས་ལཱུ་དྲིལ་གྱིས་ཧེ་རུ་ཀ་དང་འདྲ་བ་ལ། གླང་ལྤགས་ཀྱི་དོད་བདུད་ཀྱི་པགས་པ་འཛིན་པ། ཧེ་རུ་ཀ་ནག་པོ་ཞལ་བཞི་ཕྱག་བཅུ་གཉིས་པ། གླང་ལྤགས་ཀྱི་དོད་དུ་འབར་བའི་ཕྱག་རྒྱ་མཛད་པས་འཁྱུད་པའོ། །ཡང་ན་གཙོ་མོ་ཞལ་དྲུག་ཕྱག་བཅུ་གཉིས་རྩ་ཞལ་དང་སྐུ་མདོག་དམར་བ། ཞབས་གཡས་བརྒྱང་གི་གར་སྟབས་ཀྱི་འཇིགས་དུས་བརྩེགས་པ་མནན་པ། ཞལ་གཡས་གཉིས་སྔོན་པོ་དང་སེར་པོ། གཡོན་གཉིས་དཀར་པོ་དང་ལྗང་ཁུ་སྟེ་ཞལ་ཕག་གདོང་དམར་པོ། ཕྱག་དང་པོ་གཉིས་རྡོར་དྲིལ་པདྨའི་སྐོར་བས་ཐུགས་ཀར་འཛིན་པ། གཉིས་པས་འབར་བའི་ཕྱག་རྒྱ་དབུ་ཐོག་ཏུ་འཇོག་པ། གསུམ་པས་མི་ལྤགས་ཀྱི་སྟོད་གཡོགས། བཞི་པས་ཌཱ་མ་རུ་དང༌། ཁ་ཊྭཱཾ་ག་ལྔ་པས་ལྕགས་ཀྱུ་དང་ཞགས་པ། དྲུག་པས་ཚངས་པའི་མགོ་བོ་དང་ཐོད་ཁྲག་གོ །ཡང་ཕྱག་མཚན་དེ་ཉིད་དང་འདྲ་བ་ལས། སྐུ་མདོག་ཕྱེད་གཟུགས་གཡོན་དཀར་གཡས་དམར་བ། ཞལ་བཞི། རྩ་ཞལ་སྐུ་ལུས་དང་མཚུངས་པ། གཡོན་ལྗང༌། རྒྱབ་སེར། གཡས་སྔོ་བའོ། །གཙོ་མོ་ཞལ་དྲུག་པའི་སྐབས། རྣལ་འབྱོར་མ་བཞི་ཡང༌། གླང་པོ་ལ་སོགས་པའི་གདོང་བརྙན་
དུ་བྱ་ལ། གཙོ་མོ་ཕྱེད་གཟུགས་སུ་བྱེད་པའི་ཚེ། དེ་དག་ཀྱང་ཕྱེད་གཟུགས་སུ་བྱ་ཞིང༌། གཙོ་མོ་ཕྱག་མང་གི་ལུགས་གསུམ་པོ་འདི་ལ་སྐུ་ལ་ཕྱག་དྲུག་གིས་བརྒྱན་པ་དང༌། གཽ་རཱི་ལ་སོགས་པ་ལྷ་མོ་བརྒྱད་ཀྱང་མངོན་བརྗོད་བླ་མ་ནས་འབྱུང་བ་བཞིན་ཞལ་གསུམ་ཕྱག་དྲུག་པར་མཛད་དེ་རྒྱ་གཞུང་ལས་ཤེས་པར་བྱའོ། །དེ་དག་ནི་སྐྱེ་བའི་སྲིད་པ་ལས་ལུས་དག་བྱེད་དོ། །རང་གི་སྙིང་གར་རང་དང་འདྲ་བའི་ཡེ་ཤེས་སེམས་དཔའ། དེའི་ཐུགས་ཀར་ཏིང་ངེ་འཛིན་སེམས་དཔའ་རྡོ་རྗེ་དཀར་པོའི་ལྟེ་བ་ལ་བཾ་ཡིག་དམར་པོ་དག་གོ །དམ་ཚིག་སེམས་དཔའ་ཕྱག་མང་སྒོམས་ཀྱང༌། ཡེ་ཤེས་པ་ཕྱག་གཉིས་པར་ངེས་སོ། །དེ་ནས་ལུས་དཀྱིལ་སྐད་ཅིག་གིས་གསལ་འདེབས་ཏེ། ལྟེ་བར་གཟུགས་ཅན་མ་དང་དགའ་འཁྱིལ་གཅིག ལྷག་མ་འཁོར་ལོ་གསུམ་ལ། བུམ་པ་གསུམ་དང་རྣལ་འབྱོར་མ་གསུམ། གཙུག་ཏོར་ཏུ་ཧེ་རུ་ཀ་གསང་བའི་འཁོར་ལོ་ཕྱི་མ་གཉིས་ལ་དགའ་འཁྱིལ་གཉིས། ཟེའུ་འབྲུའི་འཁོར་ལོ་ལ་རྡོ་རྗེ་ཕག་མོ། སྙིང་གའི་རྩ་འདབ་བརྒྱད་ལ་གཽ་རཱི་ལ་སོགས་པ་ལྷ་མོ་བརྒྱད། བུ་ག་བརྒྱད་ལ་ཁྭ་གདོང་མ་ལ་སོགས་པ་བརྒྱད། སྤྱི་བོ་ལ་སོགས་པའི་གནས་ཉི་ཤུ་རྩ་བཞིར། དཔའ་བོ་དང་དཔའ་མོ་བཞི་བཅུ་ཞེ་བརྒྱད། བདེ་མཆོག་གི་ལུས་དཀྱིལ་སྤྱི་དང་མཐུན་པར་འགོད་པ་ལས། འདིར་ཤེས་རབ་མ་རྣམས་གཙོ་བོར་གྱུར་པ་ཡིན་ཞིང༌། སྐུ་མདོག་ཀྱང༌། ཐུགས་ཀྱི་རྣལ་འབྱོར་མ་དཀར་མོ་ལ་དཔའ་བོ་ནག་པོའི་འཁྱུད་པ། གསུང་གི་སྔོན་མོ་ལ་དམར་པོས་འཁྱུད་པ་དང་
སྐུའི་དམར་མོ་ལ་སེར་སྐྱས་འཁྱུད་པ། ཕྱག་མཚན་ནག་པོ་དང་འདྲ་སྟེ་ལུས་དཀྱིལ་རྒྱས་པའོ། །སྐུ་གསུང་ཐུགས་ཀྱི་ལྷ་བཞི་བཅུ་ཞེ་བརྒྱད་སྒོམ་པ་ནི་འབྲིང་པོ་ཡིན་ལ། རྩ་འཁོར་ལོ་བརྒྱད་ཀྱི་ལྟེ་བའི་ལྷ་ཙམ་འགོད་པ་ནི་བསྡུས་པ་ཡིན་ཞིང༌། དང་པོར་སྙིང་གར་ཧེ་རུ་ཀ་དང་ལྟེ་བར་རྡོ་རྗེ་ཕག་མོ་བསྒོམས་ཏེ། སླར་ལྟེ་བར་ཞལ་སྦྱོར་དུ་བསམ་པ་ནི་ཤིན་ཏུ་བསྡུས་པའོ། །དེ་དག་ནི་ངག་དག་པར་བྱེད་པའོ། །དེ་ནས་དག་པ་དྲན་པ་དང་སྐྱེ་མཆེད་བྱིན་རླབས་དང༌། གོ་ཆ་དགོད་པ་དང༌། གནས་གསུམ་བྱིན་རླབས་དང༌། ཡེ་ཤེས་སྤྱན་འདྲེན་དང༌། དབང་བསྐུར་རྒྱས་བཏབ་རྣམས་ཕག་མོ་ལྷ་སོ་བདུན་མའི་སྐབས་དང་འདྲ་བ་ལས། ཕྱི་དཀྱིལ་འཁོར་ལ་གཙོ་མོ་ལ་རྣམ་སྣང་གཙོ་བོར་གྱུར་པའི་རིགས་ལྔ་དང༌། འཁོར་རྣམས་ལ་གཙོ་བོ་མོ་ཉིད་ཀྱིས་དབུ་རྒྱན། ལུས་དཀྱིལ་ལ་ནི་རིགས་བདག་གི་རྒྱས་འདེབས་མི་དགོས་སོ། །དེ་དག་ནི་ཡིད་དག་པར་བྱེད་པའོ། །བར་འདིར་དམིགས་བཅས་ཀྱི་རྫོགས་པའི་རིམ་པ་ཅུང་ཟད་བསྒོམ་སྟེ་ཡེ་ཤེས་དག་པར་བྱེད་པའོ། །དེ་ནས་གོང་བཞིན་ཕྱི་མཆོད་ནང་མཆོད་བསྟོད་པ་རྣམས་བྱ། ནང་མཆོད་ལ་བོད་ལུགས་ལྟར་བརྒྱུད་པའི་མཚན་བརྗོད་འདོད་ན། རྡོ་རྗེ་འཆང༌། རྡོ་རྗེ་རྣལ་འབྱོར་མ། གྲུབ་ཐོབ་ཡེ་ཤེས་བཤེས་གཉེན་གྲུབ་ཆེན་ཞི་བ་སྦས་པ། སློབ་དཔོན་གོ་པི་པ། སློབ་དཔོན་ནི་རྦཱ་ཎ་ཤྲཱི་རྣམས་སོ། །དེ་དག་ནི་དངོས་གཞིའི་རྣལ་འབྱོར་རོ། །དེ་ནས་བཟླས་པ་ནི། མན་ངག་སྤྱི་དང་མཚུངས་པ་ལས། བཟླ་བྱའི་སྔགས་ཀྱིས་གཙོ་བོ་ནི་རྐང་བརྒྱད་སྔོན་དུ་འགྲོ་བའི་རྩ་སྔགས་ཉིད་ཡིན། སྙིང་པོ་ནི་ཡི་གེ་སུམ་ཅུ་རྩ་གཉིས་པའོ། །
ཉེ་བའི་སྙིང་པོ་ནི། ཨོཾ་བཛྲ་བཱ་ར་ཧི། ཨ་ཨཱ། ཨི་ཨཱི། ཨ་ཨཱུ། ཨེ་ཨཻ། ཨོ་ཨཽ། ཨཾ་ཨཿ ཧཱུཾ་ཧཱུཾ་ཕཊ་སྭཱཧཱ། ཞེས་པའོ། །འཁོར་གྱི་སྔགས་ནི་སོ་སོའི་མཚན་སྔགས་དང་སྒོ་མཚམས་བརྒྱད་ལ། ཁ་སྦྱོར་ནས་གསུངས་པའི་འཕྲེང་སྔགས་བཟླ་བར་བཤད་ཅིང༌། ཕྱིར་བཟློག་མའི་ཚེ་སྒྲུབ་ཀྱི་སྔགས་དང༌། ཡེ་ཤེས་འབེབས་པ་དང༌། བདུད་རྩི་འབེབས་པའི་སྔགས་ཀྱང་བཟླ་སྟེ་གཞུང་དུ་བལྟའོ། །བཟླས་པའི་རྗེས་སུ་གཞུང་ནས་ཇི་སྐད་བཤད་པའི་རྫོགས་པའི་རིམ་པ་བསྒོམ་ཞིང༌། དེའི་རྗེས་སུ་དཀྱིལ་འཁོར་ཉེ་བར་བསྡུ་བ་དང༌། ཐུན་མཚམས་ལ་འཇུག་ཚུལ་ནི། སྤྱི་དང་འདྲ་ཞིང༌། གཏོར་མའི་ཆོ་ག་ཡང་འཁྲུལ་སྤོང་གིས་སྐབས་སུ་བཤད་པ་བཞིན་འདོན་པ་སྤོས་པ་སྟེ། ཅུང་ཟད་རྒྱས་པ་ལ་མོས་ན། འཇིག་རྟེན་འདས་གཏོར་སྐབས་ལྷ་སོ་སོའི་སྙིང་པོའི་སྔགས་ལ། ཨི་མཾ་བཱ་ལིཾ་གྲྀཧྞ་གྲྀཧྞ་མ་མ་སརྦ་ཀརྻཾ་སཱ་དྷ་ཡ་ཞེས་པ་སྤེལ་ནས་འབུལ་ལོ། །འདི་ནི་ཕག་མོའི་རྟོག་པ་ཉུང་ངུ་གཅིག་དང༌། རྩ་བཤད་ཀྱི་ཁོག་སྡེབས་ནས་གྲུབ་ཆེན་ཞི་བས་མཛད་པའི་མན་ངག་གོ །དངོས་གྲུབ་ཀུན་གྱི་འབྱུང་གནས་ནི། །སྤྱཽད་དང་གྲོལ་བའི་འབྲས་རྩོལ་བ། །ཤིན་ཏུ་རྙེད་དཀའ་ཚེགས་མེད་པ། །ལག་ཏུ་འོང་བའང་སྐལ་པ་བཟང༌། །རྡོ་རྗེ་ཕག་མོ་འབྱུང་བ་ཞེས་བྱ་བའི་སྒྲུབ་ཐབས་ཏེ་བཅུ་བདུན་པའོ།། །།༈ ཨོཾ་ན་མོ་བཛྲ་ས་ཏྭ་ཡ། དཔལ་ལྡན་ལྷན་སྐྱེས་བདེ་བ་ཡིས། །འོད་ཀྱིས་ཞིང་ཀུན་རབ་བཀང་ནས། །རྒྱལ་བའི་དཀྱིལ་འཁོར་གསལ་མཛད་པའི། །རྡོ་རྗེ་སེམས་དཔའ་ལ་ཕྱག་འཚལ། །དེ་ཡི་སྒྲུབ་ཐབས་རྨད་བྱུང་ནི། ཁ་སྤྱོར་ཐིག་ལེ་ལས་
གསུངས་བཞིན། །འདུས་གསལ་གོ་བདེར་བརྗོད་བགྱི་བས། །འདི་ལས་དགེ་མཚན་ཅི་ཡང་སྤེལ། །ད་ནི་འདིར་དཔལ་ཁ་སྦྱོར་ཐིག་ལེའི་རྩ་བའི་དཀྱིལ་འཁོར་བདེ་མཆོག་ཞི་བ་རྡོར་སེམས་སམ། རྡོ་རྗེ་དབྱིངས་སྒོམ་པར་འདོད་པས། སྐྱབས་འགྲོ་སེམས་བསྐྱེད་ཡིག་བརྒྱའི་རྣལ་འབྱོར་རྣམས་སྔོན་དུ་བཏང༌། ནང་མཆོད་བྱིན་གྱིས་རླབས། སྤྲོ་ན་གཏོར་ཆོག་གིས་གཏོར་མ་འབུལ་བའམ། དེ་ཙམ་མ་ལྕོགས་ན། སྔོན་འགྲོ་གཏོར་མ་བཏང༌། ཨོཾ་ཨཱཿཧཱུཾ། ཞེས་བརྗོད་པའི་བདག་དང་གནས་དང་རྣལ་འབྱོར་བསྲུང་བ་དྲན་པར་བྱས་ལ། རང་སྐད་ཅིག་གིས་རྡོ་རྗེ་སེམས་པར་གྱུར། སྙིང་གར་ཨ་དཀར་པོ་ལས་ཟླ་བའི་དཀྱིལ་འཁོར་ལ་གནས་པའི་ཧཱུཾ་གི་འོད་ཟེར་གྱིས། རྡོ་རྗེ་སེམས་དཔའ་ལྷ་སུམ་ཅུ་རྩ་བདུན་གྱི་དཀྱིལ་འཁོར་མདུན་གྱི་ནམ་མཁར་བཛྲ་ས་མཱ་ཛཿ ཧཱུཾ་ལས་སྤྲོས་པའི་མཆོད་པའི་ལྷ་མོ་བཅུ་དྲུག་གིས་མཆོད་པར་གྱུར། ཨོཾ་ཝཱི་ནི་བཛྲི་ཎི་ཧཱུཾ་ཧཱུཾ་ཕཊ། ཅེས་སོགས་བརྗོད། གང་གི་དྲིན་གྱིས༴ སོགས་དང༌། དཔལ་ལྡན་རྡོ་རྗེ་མཁའ་འགྲོ་མ་དང་སོགས་ཤློཀ་གཉིས་ཀྱིས་ཕྱག་འཚལ། བདག་ཉིད་ཀྱི་སྡིག་པ་ཐམས་ཅད་འཆགས་ཤིང་སླར་མི་བགྱིད་དོ། །སངས་རྒྱས་དང་བྱང་ཆུབ་སེམས་དཔའ་དང་འཕགས་པ་དང༌། སོ་སོ་སྐྱེ་བོ་ཐམས་ཅད་ཀྱི་བསོད་ནམས་ཐམས་ཅད་ལ་རྗེས་སུ་ཡི་རང་ངོ༌། །བདག་ཉིད་དང་འགྲོ་བའི་དགེ་བ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་ཆེད་དུ་ཡོངས་སུ་བསྔོ་བར་བགྱིའོ། །བྱང་ཆུབ་ཀྱི་
བར་དུ་སངས་རྒྱས་དཀོན་མཆོག་དང༌། ཤེས་རབ་ཀྱི་ཕ་རོལ་དུ་ཕྱིན་པའི་ཆོས་དཀོན་མཆོག་དང༌། ཕྱིར་མི་ལྡོག་པ་བྱང་ཆུབ་སེམས་དཔའི་དགེ་འདུན་དཀོན་མཆོག་ལ་སྐྱབས་སུ་མཆིའོ། །ཨེ་མ་མ་ལ་བདག་བླ་ན་མེད་པ་ཡང་དག་པར་བྱང་ཆུབ་པར་བགྱིའོ། །དེའི་ལམ་སྒྲུབ་པས་བདེ་བ་ཆེན་པོ་འཁོར་བའི་སྡུག་བསྔལ་དང་བྲལ་བ། ནམ་མཁའ་ཇི་སྲིད་བར་རྒྱུན་མི་འཆད་པར་འགྱུར་བ་དེ་བཞིན་ཉིད་དང་རོ་གཅིག་པ་ལ་སེམས་ཅན་རྣམས་འགོད་པར་བགྱིའོ། །ཇི་ལྟར་དུས་གསུམ་མགོན་པོ་རྣམས། །བྱང་ཆུབ་ཏུ་ནི་ངེས་མཛད་པའི། ཞེས་པ་ནས། མྱ་ངན་འདས་ལ་འགོད། ཅེས་པའི་བར་རྣམས་ལན་གསུམ་བརྗོད། རང་གི་གནས་གསུམ་དུ་ཡི་གེ་འབྲུ་གསུམ་ཨོཾ་ཨཱཿལ་ཐིམ། ཨཱཿཧཱུཾ་ལ་ཐིམ། ཧཱུཾ་ནཱ་དའི་བར་དུ་བསྡུས། དེ་ཡང་འོད་གསལ་དུ་ཐིམ། ཨོཾ་ཤཱུ་ནྱ་ཏ་ཛྙཱ་ན་བཛྲ་སྭ་བྷཱ་ཝ་ཨཏྨ་ཀོ྅ཧཾ། སྟོང་པའི་ངང་ལས་བར་དོའི་རྣམ་པར་ཤེས་པ་ནཱ་དའི་རྣམ་པ་ནམ་མཁར་བཞག །སྟོང་པའི་ངང་ལས་པདྨ་ལ་གནས་ཤིང་རཾ་ལས་སྐྱེས་པའི་ཉི་མའི་སྟེང་དུ་ཧཱུཾ། དེ་ལས་སྣ་ཚོགས་རྡོ་རྗེ་ཧཱུཾ་གིས་མཚན་པར་གྱུར། ཧཱུཾ་ལས་འོད་འཕྲོས་རྡོ་རྗེའི་ས་གཞི་རྭ་བ་དྲྭ་བ་གུར་བླ་བྲེ། ཡེ་ཤེས་ཀྱི་མེ་དཔུང་འབར་བའི་བསྲུང་འཁོར་དང་བཅས་པ་གྲུབ་པར་གྱུར། བར་འདིར་སྒོམ་པར་སྤྲོ་ཞིང་ནུས་ན། ཐུན་མོང་མ་ཡིན་པའི་བསྲུང་འཁོར་རྒྱས་པ་བསྒོམ་པར་བྱ་སྟེ། དེའི་དབུས་
སུ་པད་ཉི་ལ་བྷྲུཾ་ལས་འཁོར་ལོ་སེར་པོ་རྩིབས་བཅུ་པ། ལྟེ་བར་བདག་ཉིད་འཁོར་ལོའི་དབང་ཕྱུག་རྡོ་རྗེ་སེམས་དཔའ་ཤེས་རབ་དང་བཅས་པར་གྱུར། ཐུགས་ཀ་ནས་འོད་འཕྲོས། སངས་རྒྱས་ཐམས་ཅད་རྒྱལ་བ་མི་བསྐྱོད་པ་ཁྲོ་བོ་བཅུས་བསྐོར་བའི་རྣམ་པར་སྤྱན་དྲངས། ཞལ་དུ་ཞུགས་རྡོ་རྗེའི་ལམ་ནས་མཚོ་སྐྱེས་སུ་བྱོན་པ། ཧཱུཾ་ཞེས་མི་བསྐྱོད་པ་སྤྲོས་ནས་རང་ལ་ཐིམ། རང་ཉིད་ཁམས་གསུམ་རྣམ་རྒྱལ་རྡོ་རྗེ་ཁྲོ་བོའི་རྒྱལ་པོ་ཧཱུཾ་མཛད་དུ་གྱུར་པ་ནི། གོང་དུ་ལན་གཉིས་བཤད་པ་ལྟར་རོ། །ཧཱུཾ། ལན་བཅུ། ཁྲོ་བོ་བཅུ་པོ་པདྨ་ནས་སྤྲོས་རྩིབས་བཅུར་འཁོད་པ་ནི། ཤར་དུ་གཤིན་རྗེ་གཤེད་ནག་པོ་ནག་དཀར་དམར་བའི་ཞལ། གཡས་གསུམ་ལྕགས་ཀྱུ་འཁོར་ལོ་རྡོ་རྗེ། གཡོན་ཞགས་པ་དྲིལ་བུ་དགྲ་སྟའོ། །ལྷོར་གཞན་གྱིས་མི་ཐུབ་པ་དཀར་པོ་དཀར་ནག་དམར་བའི་ཞལ། གཡས་ཞགས་པ་རྡོ་རྗེ་རལ་གྲི། གཡོན་གསུམ་ཞགས་པ་དྲིལ་བུ་དགྲ་སྟའོ། །ནུབ་ཏུ་རྟ་མགྲིན་དམར་པོ་དམར་ནག་དཀར་བའི་ཞལ། གཡས་གསུམ་ལྕགས་སྒྲོག་པདྨ་རལ་གྲི། གཡོན་གསུམ་དྲིལ་བུ་དགྲ་སྟ་ཞགས་པ། བྱང་དུ་བགེགས་དགྲ་སྔོན་པོ་སྔོ་དཀར་དམར་བའི་ཞལ། གཡས་གསུམ་དྲིལ་བུ་སྣ་ཚོགས་རྡོ་རྗེ་འཁོར་ལོ། གཡོན་གསུམ་ཞགས་པ་གཏུན་ཤིང་དགྲ་སྟ། བྱང་ཤར་དུ་གཏུམ་པོ་ནག་པོ་ནག་དཀར་དམར་བའི་ཞལ། གཡས་གསུམ་རལ་གྲི་འཁོར་ལོ་རྡོ་རྗེ། གཡོན་གསུམ་སྡིགས་འཛུབ་སྟ་རེ་ཞགས་པའོ། །ཤར་ལྷོར་
འདོད་རྒྱལ་ནག་པོ་ནག་དཀར་དམར་བའི་ཞལ། ཕྱག་དང་པོ་གཉིས་རང་གི་ཕྱག་རྒྱ། ལྷག་མ་གཡས་ལྕགས་ཀྱུ་རལ་གྲི། གཡོན་རྡོ་རྗེ་ཞགས་པ། ལྷོ་ནུབ་ཏུ་དབྱུག་སྔོན་ནག་པོ་ནག་དཀར་དམར་བའི་ཞལ། གཡས་གསུམ་དབྱུག་པ་རལ་གྲི་འཁོར་ལོ། གཡོན་གསུམ་ཞགས་པ་པདྨ་དགྲ་སྟ། ནུབ་བྱང་དུ་སྟོབས་པོ་ཆེ་ནག་པོ་ནག་དཀར་དམར་བའི་ཞལ་གཡས་གསུམ་རྩེ་གསུམ་རལ་གྲི་འཁོར་ལོ། གཡོན་གསུམ་ཞགས་པ་པདྨ་དགྲ་སྟ། སྟེང་དུ་གཙུག་ཏོར་འཁོར་ལོ་ཅན་སེར་པོ་སེར་དཀར་དམར་བའི་ཞལ། དང་པོ་གཉིས་གཙུག་ཏོར་སྤྱི་བོར་འཛིན་པ། ལྷག་མ་གཡས་འཁོར་ལོ་པདྨ། གཡོན་སྡིགས་འཛུབ་རལ་གྲི། འོག་ཏུ་གནོད་མཛེས་ནག་པོ་ནག་དཀར་དམར་བའི་ཞལ། གཡས་གསུམ་རྡོ་རྗེ་འཁོར་ལོ་རིན་ཆེན། གཡོན་གསུམ་ཞགས་པ་པདྨ་རལ་གྲི། ཐམས་ཅད་རང་འདྲའི་ཡུམ་དང་སྦྱོར་བ་ཕྱོགས་ཀྱི་དེ་བཞིན་གཤེགས་པའི་དབུ་རྒྱན་ཅན་ཕྱག་རྒྱ་ལྔ་དང་ལྡན་པ། ཁྲོ་བོའི་ཆ་བྱད་ཡོངས་སུ་རྫོགས་པའོ། །དེ་རྗེས་ཕུར་གདབ་བྱ་སྟེ་མན་ངག་སྙེ་མར་གསུངས་པ་བཞིན་ནོ། །བསྡུ་ན། བདག་ཉིད་ཁྲོ་བོ་ཁམས་གསུམ་རྣམ་རྒྱལ་དུ་གྱུར། སུམྦྷ་ལན་གཉིས་ཀྱི་ཕོ་ཉ་སྤྲོ། བགེགས་རྣམས་ལ་ཕུར་བས་བཏབ་པར་བསམ་ཏེ། ཨོཾ་གྷ་གྷ༴ སོགས། ཨོཾ་བཛྲ་མུདྒ་ར༴ སོགས་ལན་གསུམ་བརྗོད་པ་ཙམ་གྱིས་ཆོག་གོ །བསྲུང་བའི་འཁོར་ལོའི་ནང་དུ་ཡཾ་ལས་རླུང་གི་དཀྱིལ་འཁོར་སྔོན་པོ་ཟླ་གམ། དེའི་སྟེང་དུ་རཾ་ལས་མེའི་དཀྱིལ་འཁོར་དམར་པོ་
གྲུ་གསུམ། དེའི་སྟེང་དུ་བཾ་ལས་ཆུའི་དཀྱིལ་འཁོར་དཀར་པོ་ཟླུམ་པོ། དེའི་སྟེང་དུ་ལཾ་ལས་སའི་དཀྱིལ་འཁོར་སེར་པོ་གྲུ་བཞི། དེའི་སྟེང་དུ་ཧཱུཾ་སུཾ་ཧཱུཾ་ལས་རི་རབ་རིན་པོ་ཆེ་སྣ་བཞི་ལས་གྲུབ་པའོ། །ཁྲོ་བོ་ཆེན་པོའི་གཟུགས་ཡོངས་སུ་གྱུར་པ་ལས་དེའི་སྟེང་དུ་རྡོ་རྗེ་སེམས་དཔའི་རྣམ་པར་གྱུར། དེ་ཡོངས་སུ་གྱུར་པའི་ཆོས་འབྱུང་གི་དབུས་སུ། སྣ་ཚོགས་པདྨ་ལ་གནས་པའི་སྣ་ཚོགས་རྡོ་རྗེ་རྭ་བཅུ་གཉིས་པ། དེའི་ལྟེ་བར་བྷྲུཾ་ལས་འཁོར་ལོ་བྷྲུཾ་གྱིས་མཚན་པ་ལས་རྣམ་པར་སྣང་མཛད་དེ་ཞུ་བ་ལས་བྱུང་བའི་རིན་པོ་ཆེ་སྣ་ཚོགས་ལས་གྲུབ་པའི་གཞལ་མེད་ཁང༌། སྔོ་ལྗང་དམར་སེར་དཀར་བའི་རྩིགས་པ་རིམ་པ་ལྔ་དང་ལྡན་པ། ཕ་གུ་དང༌། དྲ་ཕྱེད་དང༌། ཤར་བུ་དང༌། མདའ་ཡབ་དང༌། གཟུངས་མ་རྣམས་དང་བཅས་པའི་ཁ་ཁྱེར་ཏེ། མཚན་ཉིད་ཐམས་ཅད་ཡོངས་སུ་རྫོགས་པ། སྒོ་བཞིའི་སྟེང་ན་ཀ་བས་བཏེག་པའི་རྟ་བབས་སྣམ་བུ་བཅུ་གཅིག་དང་བཅས་པ། དབུས་ཕྱུར་བུར་གྱུར་པའི་ཐོག་ཕུབ་ཅན། ནང་གི་ལྷ་སྣམ་གྲུ་བཞི། ཤར་དཀར། ལྷོ་སེར། ནུབ་དམར། བྱང་ལྗང་བ། དེའི་ནང་དུ་ཟླུམ་སྐོར་འཁོར་ལོས་མཚན་པ་ནང་དུ་ལྷ་མོའི་གནས་ཀྱི་ས་གཞི་དང་བཅས་པ། དེའི་ཡང་ནང་དུ་ཟླུམ་སྐོར་པདྨས་མཚན་པ་ནང་དུ་མ་མོའི་ས་གཞི་དང་བཅས་པ། དེའི་ནང་དུ་འོད་ཀྱི་འཕྲེང་བ་དང༌། རྡོ་རྗེའི་གདུང་ཟླུམ་པོ་ནང་ལེ་ཚེ་དགུར་གྱུར་པ། དེའི་དབུས་ཀྱི་གཞི་སྔོན་པོ། ལྷག་མ་ས་གཞི་ཐམས་
ཅད་ཕྱོགས་ཀྱི་མདོག་ཅན་ནོ། །ལྷ་སྣམ་གྱི་ཕྱོགས་རྣམས་སུ་བུམ་པ་བརྒྱད་དང་བཅས་པ། སྣ་ཚོགས་པདྨ་ལ་ཟླ་བ་དང་ཉི་མའི་གདན་སོ་སོ་དང་བཅས་པའོ། །གཞལ་མེད་ཁང་གི་ཕྱི་རོལ་མཆོད་པའི་བཀོད་པ་ཐམས་ཅད་དང་བཅས་ཤིང༌། དེའི་ཕྱི་རོལ་པད་འདབ་ཀྱི་ཁོར་ཡུག་གི་ཕྱི་རོལ་དུ་བསྲུང་བའི་འཁོར་ལོའོ། །འདི་ཞི་བ་གཙོ་ཆེ་བའི་དཀྱིལ་འཁོར་ཡིན་པས། དུར་ཁྲོད་མ་སྒོམས་ཀྱང་རུང་ལ། རྡོ་རྗེ་དྲག་མོ་ལ་སོགས་པ་མ་མོ་འདུས་པའི་གནས་ཡིན་པའི་ཕྱིར་སྒོམས་ཀྱང་མི་འགལ་ལོ། །ནམ་མཁའི་དཀྱིལ་འཁོར་མཐའ་ཡས་པ་ཁྱབ་ཅིང་བྱོན་པའི་དེ་བཞིན་གཤེགས་པ་རྣམས་དབྱངས་དང་གསལ་བྱེད་ཀྱི་ཡི་གེར་གྱུར་པ་ཁང་བརྩེགས་ཀྱི་ནང་ན་གནས་པའི་ནཱ་ད་ལ་ཡོངས་སུ་བཅུག་ཅིང༌། སླར་ཡང་དབུས་ཀྱི་གདན་གྱི་སྟེང་དུ་འཁོད། ཨ་ཨཱ ནས་ཨཾ་ཨཿཕྲག་གཉིས་རྣམས་ཡོངས་སུ་གྱུར་པ་ལས། ཟླ་བ་དཀར་པོ། ཨོཾ་ཙི་ཏ་པྲ་ཏི་བཻ་དྷཾ་ཀ་རོ་མི། ཀ་ཁ༴ ནས་ཧ་ཀྵ་ཡ་ར་ལ་ཝ་ཌ་ཌྷ་ཕྲག་གཉིས་རྣམས་ཡོངས་སུ་གྱུར་པ་ལས་ཟླ་བ་དམར་པོ། ཨོཾ་བོ་དྷི་ཙིཏྟ་ཨུཏྤ་དཱ་ཡ་མི། དེའི་དབུས་སུ་བར་སྲིད་ནཱ་ད་ཡོངས་སུ་ཞུགས་ཏེ་ནཱ་ད་ལས་ཐིག་ལེ་དང༌། ཟླ་ཕྱེད་དང༌། མགོ་བོ་དང༌། ཧ་དང༌། ཨཱུའི་རིམ་པས་རྫོགས་པའི་ཧཱུཾ་ལས་རྡོ་རྗེའི་ལྟེ་བ་ལ་ཧཱུཾ་གིས་མཚན་པར་གྱུར། ཨོཾ་བཛྲ་ཨཏྨ་ཀོ྅་ཧཾ། དེ་ལས་སྤྲོས་པའི་དེ་བཞིན་གཤེགས་པ་རྣམས་ཀྱིས་འགྲོ་བ་རྣམས་སངས་རྒྱས་ཀྱི་ས་ལ་བཀོད། ནམ་མཁའ་གང་བའི་
སངས་རྒྱས་རྣམས་ཀྱང་རྡོ་རྗེ་འཛིན་པའི་གཟུགས་སུ་བྱས། དེ་ཐམས་ཅད་ཚུར་འདུས་ཏེ་ཐིམ། ཨོཾ་མཧཱ་སུ་ཁ་བཛྲ་ས་ཏྭ་ཛཿཧཱུཾ་བཾ་ཧོཿསུ་ར་ཏ་སྟྭཾ། ཞེས་ནང་གི་སྒྲས་ཡོངས་སུ་བསྐུལ། དེ་ལས་བདག་ཉིད་རྡོ་རྗེ་འཆང་སེམས་དཔའ་གསུམ་བརྩེགས་ཀྱི་གཟུགས་སུ་གྱུར། ཨོཾ་ཡ་ཐཱ་སརྦ་ཐཱ་ག་ཏ་ཏ་ཐཱ་ཨ་ཧཾ། དབུས་ཀྱི་གདན་གྱི་སྟེང་དུ་རྡོ་རྗེ་སེམས་དཔའ་སངས་རྒྱས་ལྔའི་ཅོད་པཎ་ཅན་འཛུམ་ཞིང་སྒེག་པ། དཀར་ལ་ཅུང་ཟད་དམར་བའི་མདངས་ཅན། ནག་དཀར་དམར་བའི་ཞལ་གསུམ། སྤྱན་གསུམ་གསུམ་དང་ལྡན་པ། མཆེ་བ་ཅུང་ཟད་གཙིགས་པ། ཕྱག་དང་པོ་གཉིས་ཀྱིས་རྡོ་རྗེ་དང་དྲིལ་བུ་འཛིན་པས་ཡུམ་ལ་འཁྱུད་པ། ལྷག་མ་གཡས་གཉིས་ཀྱིས་རལ་གྲི་དང་ལྕགས་ཀྱུ། གཡོན་གཉིས་ཀྱིས་བདུད་རྩིས་གང་བའི་ཐོད་པ་དང་ཞགས་པ་འཛིན་པ། པདྨ་ཐོད་པ་ཟླ་བ་རྣམས་བརྩེགས་པའི་གདན་ལ་སྐྱིལ་ཀྲུང་ཕྱེད་པའི་གར་སྟབས་ཀྱིས་བཞུགས་པ། རལ་པའི་ཐོར་ཚུགས་དང༌། སྣ་ཚོགས་རྡོ་རྗེ་དང༌། ཟླ་བ་ཕྱེད་པ་དང༌། ནོར་བུ་རིན་པོ་ཆེ་དང༌། ཐོད་པ་སྐམ་པོ་ལྔས་དབུ་བརྒྱན་པ། ཕྱག་རྒྱ་དྲུག་དང་མགོ་བོའི་འཕྲེང་བ་དང་དར་གྱི་ན་བཟའ་ཅན་གར་གྱི་ཉམས་དགུ་དང་ལྡན་པ། རང་དང་འདྲ་བའི་ཡུམ་རྡོ་རྗེ་ཕག་མོ་ཤེས་རབ་ཀྱི་ཕ་རོལ་ཏུ་ཕྱིན་མས་འཁྱུད་པ། ཉི་མའི་འོད་ཀྱི་རྒྱབ་ཡོལ་ཅན་ནོ། །ཐུགས་ཀར་པད་ཟླ་ལ་གནས་པའི་ཡེ་ཤེས་སེམས་དཔའ་ཡབ་ཡུམ་ཕྱག་གཉིས་པ་སེམས་
དཔའི་སྐྱིལ་ཀྲུང་གིས་བཞུགས་ཤིང་རིན་པོ་ཆེའི་རྒྱན་ཅན། དེའི་ཐུགས་ཀར་ཏིང་ངེ་འཛིན་སེམས་དཔའ་ཟླ་བ་ལ་གནས་པའི་ཧཱུཾ་ནག་པོ། བར་འདིར་སེམས་ཅན་རྣམས་ལ་སྙིང་རྗེའི་དབང་བསྐུར་བ་བྱེད་ན། འདུས་པ་ཡེ་ཤེས་ཞབས་ལུགས་ནས་བཤད་པ་བཞིན་དུ་བྱ་ལ་མདོར་བསྡུས་པའི་ཚེ་མ་བྱས་ཀྱང་ཆད་པའི་སྐྱོན་མེད་དོ། །མིག་ཏུ་ཨོཾ་ཛཿལས་གཏི་མུག་རྡོ་རྗེ་དང་གཟུགས་རྡོ་རྗེ་མ། རྣ་བར་ཧཱུཾ་ཧཱུཾ་ལས་ཞེ་སྡང་རྡོ་རྗེ་དང་སྒྲ་རྡོ་རྗེ་མ། སྣ་བུག་ཏུ་ཏྲཾ་བཾ་ལས་སེར་སྣ་རྡོ་རྗེ་དང་དྲི་རྡོ་རྗེ་མ། ལྕེར་ཨཱཿཧོ་ལས་འདོད་ཆགས་རྡོ་རྗེ་མ། དཔྲལ་པར་ཧཾ་ཁཾ་ལས་ཕྲག་དོག་རྡོ་རྗེ་དང་རེག་བྱ་རྡོ་རྗེ་མ། སྙིང་གར་ཧཱུཾ་རཾ་ལས་དབང་ཕྱུག་རྡོ་རྗེ་དང་ཆོས་ཁམས་རྡོ་རྗེ་མ་རྣམས་དང༌། མགོ་བོ་མཻཾ་ལས་བྱམས་པ། དབང་ཤེས་ཀྱི་གནས་ཐམས་ཅད་དུ་མཾ་ལས་འཇམ་དཔལ། དེ་གཉིས་དཔའ་བོ་ཁོ་ནའོ། །ལྟེ་བར་སྤྱན་མ་དང་རྣམ་སྣང༌། སྙིང་གར་མཱ་མ་ཀཱི་དང་མི་བསྐྱོད་པ། མགྲིན་པར་གོས་དཀར་མོ་དང་འོད་དཔག་མེད། སྤྱི་བོར་སྒྲོལ་མ་དང་དོན་ཡོད་གྲུབ་པ། གསང་བར་པདྨ་དྲྭ་བ་མ་དང་རྡོ་རྗེ་སེམས་དཔའ། སྤྱི་བོར་སྐུ་རྡོ་རྗེ། མགྲིན་པར་གསུང་རྡོ་རྗེ། ཐུགས་ཀར་ཐུགས་རྡོ་རྗེ་རྣམས་སུ་གྱུར། ལྷ་དེ་རྣམས་རང་གི་ཕུང་ཁམས་སྐྱེ་མཆེད་དང་རོ་གཅིག་ཏུ་འདྲེས་པར་གྱུར། ཡབ་ཀྱི་སྙིང་གར་ཨོཾ་ཧ་དཀར་པོ་ལས་རྡོ་རྗེ་སེམས་དཔའ། མགོ་བོར་ན་མ་ཧི་སེར་པོ་ལས་རྣམ་པར་སྣང་མཛད། སྤྱི་གཙུག་ཏུ་སྭཱཧཱ་ཧཱུཾ་དམར་པོ་ལས་པདྨ་གར་
གྱི་དབང་ཕྱུག ཕྲག་པ་གཉིས་སུ་བཽ་ཥ་ཊ་ཧེ་ནག་པོ་ལས་ཧེ་རུ་ཀ མིག་གཉིས་སུ་ཧཱུཾ་ཧཱུཾ་ཧོཿདམར་སེར་ལས་རྡོ་རྗེ་ཉི་མ། ཡན་ལག་ཐམས་ཅད་ལ་ཕཊ་ཧཾ་ལྗང་ཁུ་ལས་རྟ་མཆོག་གི་ངོ་བོ་ལྟེ་བར་ཨོཾ་བཾ་དམར་པོ་ལས་རྡོ་རྗེ་ཕག་མོ། སྙིང་གར་ཧཾ་ཡོཾ་སྔོན་མོ་ལས་གཤིན་རྗེ་མ། ཁར་ཧྲིཾ་མོཾ་དཀར་མོ་ལས་རྨོངས་བྱེད་མ། དཔྲལ་པར་ཧྲེཾ་ཧྲིཾ་སེར་མོ་ལས་བསྐྱོད་བྱེད་མ། སྤྱི་གཙུག་ཏུ་ཧཱུཾ་ཧཱུཾ་ལྗང་ཁུ་ལས་སྐྲག་བྱེད་མ། ཡན་ལག་ཐམས་ཅད་ཕཊ་ཕཊ་དུད་ཁ་ལས་ཙཎྜི་ཀ །ཡུམ་གྱི་སྤྱི་བོར་ཨོཾ་དཀར་པོ། ཐུགས་ཀར་ཧཱུཾ་ནག་པོ། ལྟེ་བར་སྭ་སེར་པོ། གསང་བར་ཨཱཿདམར་པོ། བརླ་གཉིས་ལ་ཧ་ལྗང་ཁུ། དེ་རྣམས་ཀྱི་འོད་ཟེར་གྱིས་སྐུ་གང༌། ཡབ་ཀྱི་གསང་གནས་ཧཱུཾ་ལས་བྱུང་བའི་རྡོ་རྗེ། ཨོཾ་ལས་བྱུང་བའི་ནོར་བུ་ཧཱུཾ་དང་ཨོཾ་གྱིས་མཚན་པ། ཡུམ་གྱི་མཁའ་ཧྲིཿལས་བྱུང་བའི་པདྨ། བྷྲུཾ་ལས་བྱུང་བའི་ཟེའུ་འབྲུ་ཧྲཱིཿདང་བྷྲུཾ་གྱིས་མཚན་པ། ཨོཾ་སརྦ་ཏ་ཐཱ་ཏ་ག་ཨ་ནུ་ར་ག་ན་བཛྲ་སྭ་བྷཱ་ཝ་ཨཏྨ་ཀོ྅ཧཾ། སྙིང་ག་ནས་འཕྲོས་པའི་འོད་ཟེར་གྱིས་བཀུག་པའི་དེ་བཞིན་གཤེགས་པ་རྣམས་སྤྱི་བོར་བཞུགས། བྱང་ཆུབ་ཀྱི་སེམས་སུ་ཞུ་བ་ཤེས་རབ་ཀྱི་མཁའ་ནང་དུ་བྱིན་ཏེ་ཡོངས་སུ་གྱུར་པ་ལས། ཧཱུཾ་བྷྲུཾ་ཨཾ་ཧྲཱི་ཁཾ། བྷྲུཾ་ཧཱུཾ་ཧྲིཿཏཾ། ཨཾ་ཨཱཾ། ཨིཾ་ཨཱིཾ། ཨུཾ་ཨཱུཾ། ཨཾ་ཨཱཿ ལཾ་རཱྀཾ་ལཾ་ཛྷཾ། ལྀཾ་གྷཾ་བཾ་ལཱི་ཛཿཧཱུཾ་བཾ་ཧོཿཞེས་པ་རྣམས་སུ་གྱུར། དེ་རྣམས་ལས་མི་བསྐྱོད་པ་སྐུ་མདོག་
ནག་པོ་རྣམ་པ་རྡོ་རྗེ་སེམས་དཔའ་དང་མཚུངས་པ་གཙོ་བོར་གྱུར་པའི་ལྷ་སུམ་ཅུ་རྩ་བདུན་དུ་གྱུར། ཧཱུཾ་བྷྲུཾ་ཨཾ་ཧྲཱི་ཁཾ། མཁའ་ནང་གི་རིགས་ལྔ་དཔག་ཏུ་མེད་པ་སྤྲོས། ཆོས་ཀྱི་འཁོར་ལོ་བསྐོར་བ་ལ་སོགས་པ་སེམས་ཅན་གྱི་དོན་མཛད། འགྲོ་བ་ཐམས་ཅད་ཀྱི་དུག་ལྔ་རྣམ་པར་སྦྱོང༌། ཡེ་ཤེས་ལྔ་ལ་བཀོད། སླར་འདུས་ཏེ་མི་བསྐྱོད་པ་རང་ཉིད་ལ་ཐིམ་ཞིང༌། རིགས་ལྷག་མ་བཞི་ཕྱོགས་བཞིར་འཁོད་པ་ནི། ཤར་དུ་རྣམ་སྣང་དཀར་པོ། ཕྱག་གཡས་གཉིས་འཁོར་ལོ་དང་དྲིལ་བུ། གཡོན་གཉིས་ཀྱིས་ཐོད་པ་དང་ཞགས་པ་འཛིན་པ། ལྷོར་རིན་འབྱུང་སེར་པོ་ཕྱག་གཡས་གཉིས་ཀྱིས་རིན་པོ་ཆེ་དང་ལྕགས་ཀྱུ། གཡོན་གཉིས་ཀྱིས་ཐོད་པ་དང་ཞགས་པ་འཛིན་པ། ནུབ་ཏུ་འོད་དཔག་མེད་དམར་པོ། ཕྱག་གཡས་གཉིས་ན་མདའ་དང་པདྨ། གཡོན་གཉིས་ན་གཞུ་དང་ཞུགས་པ་འཛིན་པ། བྱང་དུ་དོན་ཡོད་གྲུབ་པ་ལྗང་ཁུ་གཡས་གཉིས་ན་རྡོ་རྗེ་དང་ལྕགས་ཀྱུ། གཡོན་གཉིས་ན་དྲིལ་བུ་དང་ཐོད་པ་འཛིན་པ། ཐམས་ཅད་ཀྱང་ཞལ་གཅིག་ཕྱག་བཞི་པ། རྒྱན་དང་བཞུགས་ཚུལ་གཙོ་བོ་དང་མཚུངས་པའོ། །བྷྲུཾ་ཧཱུཾ་ཧྲཱིཿཏཾ། ཡུམ་བཞི་དཔག་ཏུ་མེད་པ་སྤྲོས། སེམས་ཅན་ཐམས་ཅད་ཀྱི་འབྱུང་བ་བཞི་སྦྱངས། ཚད་མེད་བཞི་ལ་བཀོད། སླར་འདུས་ཏེ་ནང་གི་གྲྭ་བཞིར་འཁོད་པ་ནི། བྱང་ཤར་དུ་སྤྱན་མ་དཀར་མོ་ཕྱག་གཡས་བཞིས་འཁོར་ལོ་རྡོ་རྗེ་རལ་གྲི་མདའ། གཡོན་བཞིས་ཐོད་པ་དྲིལ་བུ་ཞགས་པ་གཞུ། ཤར་ལྷོར་མཱ་མ་ཀཱི་སྔོན་མོ་ཕྱག་གཡས་དྲུག་མདའ་རལ་གྲི་རྡོ་རྗེ་འཁོར་ལོ་རིན་ཆེན་པདྨ། གཡོན་དྲུག་གིས་གཞུ་ལྕགས་ཀྱུ་དྲིལ་བུ་ཞགས་པ་ཐོད་པ་ཁ་ཊྭཱཾ་ག །ལྷོ་ནུབ་ཏུ་གོས་དཀར་མོ་དམར་མོ་ཕྱག་གཡས་བཞིས་མདའ་པདྨ་རྡོ་རྗེ་རལ་གྲི། གཡོན་བཞིས་གཞུ་ཐོད་པ་ཞགས་
པ་དྲིལ་བུ། ནུབ་བྱང་དུ་སྒྲོལ་མ་ལྗང་ཁུ་ཕྱག་གཡས་བཞིས་ཨུཏྨལ་དམར་པོ་རལ་གྲི་ལྕགས་ཀྱུ་མདའ། གཡོན་བཞིསའཁོར་ལོ་ཞགས་པ་ཐོད་པ་གཞུ་རྣམས་འཛིན་པ། དེ་དག་ནི་རིགས་སྔགས་ཀྱི་རྒྱལ་མོའི་ཆ་ལུགས་འཛིན་པ། རྒྱན་ཐམས་ཅད་ཀྱི་ཡོངས་སུ་བརྒྱན་པའོ། །ཨཾ་ཨཱཾ་ཨཱིཾ་ཨཱིཾ་ཨུཾ་ཨཱུཾ་ཨཾ་ཨཱཿ རྣལ་འབྱོར་མ་བརྒྱད་དཔག་ཏུ་མེད་པ་སྤྲོས། སེམས་ཅན་ཐམས་ཅད་འཕགས་པའི་ལམ་ཡན་ལག་བརྒྱད་ལ་བཀོད། སླར་འདུས་ཏེ་རིམ་པ་གཉིས་པའི་འཕར་མ་ལ་འཁོད་པ་ནི། ཐམས་ཅད་ཀྱང་ཞལ་གཅིག་ཕྱག་བཞི་མ། རོལ་པའི་ཁྲོ་མོའི་ཚུལ་ཅན་ཏེ། ཤར་དུ་རྡོ་རྗེ་དྲག་མོ་དཀར་མོ་མདའ་ལྕགས་ཀྱུ་གཞུ་བྱང་ཆུབ་ཀྱི་སེམས་ཀྱིས་གང་བའི་ཐོད་པ་འཛིན་པ། ལྷོར་རྡོ་རྗེ་གཟུགས་མ་སེར་མོ་རྡོ་རྗེ་མདུང་ཞགས་པ་རྡུལ་གྱིས་གང་བའི་ཐོད་པ་རྣམས་འཛིན་པ། ནུབ་ཏུ་འདོད་ཆགས་རྡོ་རྗེ་མ་དམར་མོ་རལ་གྲི་རྡོ་རྗེ་དྲི་ཆུས་གང་བའི་ཐོད་པ་དང་དྲིལ་བུ་འཛིན་པ། བྱང་དུ་རྡོ་རྗེ་ཞི་བ་མ་ལྗང་ཁུ་ཕྱག་འཚལ་བའི་ཚུལ་བ་དན་རྩེ་གསུམ་པ་ཁ་ཊྭཱཾ་ག་ཐོད་པ་རྣམས་འཛིན་པ། དབང་ལྡན་དུ་རྡོ་རྗེ་གནོད་སྦྱིན་མ་དཀར་སེར་དབྱུག་པ་ཨུཏྤལ་ཐོད་པ་ཅང་ཏེའུ་རྣམས་འཛིན་པ། ཤར་ལྷོར་རྡོ་རྗེ་མཁའ་འགྲོ་མ་སེར་དམར་པདྨ་མེ་ལོང་ཚིལ་གྱིས་གང་བའི་ཐོད་པ་དང་དགྲ་སྟ་འཛིན་པ། ལྷོ་ནུབ་ཏུ་སྒྲ་རྡོ་རྗེ་མ་དམར་སྔོ་ཤཀྟི་དུང་འཁོར་ལོ་ཐོད་པ་ཁྲག་གང་རྣམས་འཛིན་པ། ནུབ་བྱང་དུ་ས་རྡོ་རྗེ་མ་ལྗང་དཀར་བུམ་པ་རྡོ་རྗེ་ཤ་ལྔ་བདུད་རྩི་ལྔས་གང་བའི་ཐོད་པ་མི་ལྤགས་ཀྱིས་གཡོགས་པ་དང་དྲིལ་བུ་འཛིན་
པའོ། །ལཾ་རྀཾ། ལཾ་ཛྷཾ་ལིཾ་གྷཾ་བཾ་ལིཾ། ལྷ་མོ་བརྒྱད་དཔག་ཏུ་མེད་པ་སྤྲོས་འདོད་པའི་ཡོན་ཏན་ཐམས་ཅད་ཀྱི་དྲི་མ་རྣམས་སྦྱངས། ཡེ་ཤེས་ཀྱི་སྣང་བ་ལ་བཀོད། སླར་ཡང་འདུས་ཏེ་ཕྱི་རོལ་དུ་འཁོད་པ་ནི། ཕྱི་རོལ་གྲུ་ཆད་ཀྱྀ་དབང་ལྡན་དུ་གླིང་བུ་མ་དམར་མོ། མེ་མཚམས་སུ་པི་ཝཾ་མ་སེར་མོ། བདེན་བྲལ་དུ་རྔ་མུ་ཀུནྡ་མ་དཀར་མོ། རླུང་དུ་རྫ་རྔ་མ་དུ་བའི་མདོག་ཅན། ལྷ་རྣམས་ཀྱི་ཤར་ལྷོའི་གྲྭར། མེ་ཏོག་མ་དཀར་མོ་འཁོར་ལོ་དང་མེ་ཏོག་གི་འཕྲེང་བ་འཛིན་པ། ལྷོ་ནུབ་ཏུ་བདུག་སྤོས་མ་སྔོན་མོ་རིན་པོ་ཆེ་དང་སྤོས་སྣོད་འཛིན་པ། ནུབ་བྱང་དུ་མར་མེ་མ་སེར་མོ་པདྨ་དམར་པོ་དང་མར་མེའི་སྡོང་བུ་འཛིན་པ། བྱང་ཤར་དུ་དྲི་ཆབ་མ་དམར་མོ་རལ་གྲི་དང་དྲི་བཟང་གི་དུང་ཆོས་འཛིན་པ། རྣམ་སྣང་ལ་སོགས་པ་དེ་ཐམས་ཅད་ལྷའི་གོས་དང་སྐྱིལ་ཀྲུང་ཕྱེད་པའི་སྟབས་ཅན་ནོ། །མེཾ་ཀྵིཾ་ཛྲིཾ་ཁཾ་གཾ་མཾ་སྐཾ་སཾ། བྱང་ཆུབ་སེམས་དཔའ་བརྒྱད་དཔག་ཏུ་མེད་པ་སྤྲོས། དབང་པོ་རྣམ་པར་དག་པར་བྱས། རྡོ་རྗེ་ཡེ་ཤེས་ཀྱི་དབང་པོ་རྣམས་ལ་བཀོད། སླར་འདུས་ཏེ་རིམ་པ་གསུམ་པའི་འཕར་མ་ལ་འཁོད་པ་ནི། ཤར་གྱི་གཡས་སུ་བྱམས་པ་སེར་པོ་ནཱ་ག་གེ་སར་དང་དྲིལ་བུ་འཛིན་པ། གཡོན་དུ་སའི་སྙིང་པོ་དཀར་པོ་འཁོར་ལོ་དང་དྲིལ་བུ་འཛིན་པ། ལྷོའི་གཡས་སུ་ཕྱག་རྡོར་ནག་པོ་རྡོ་རྗེ་དང་དྲིལ་བུ་འཛིན་པ། གཡོན་དུ་ནམ་མཁའི་སྙིང་པོ་སེར་པོ་ནོར་བུ་དང་དྲིལ་བུ་འཛིན་པ། ནུབ་ཀྱི་
གཡས་སུ་འཇིག་རྟེན་དབང་ཕྱུག་དམར་པོ་པདྨ་དང་དྲིལ་བུ་འཛིན་པ། གཡོན་དུ་འཇམ་དཔལ་གུར་གུམ་གྱི་མདོག་ཅན་རལ་པའི་ཟུར་ཕུད་གསུམ་པ་ཨུཏྨལ་དང་དྲིལ་བུ་འཛིན་པ། བྱང་གི་གཡས་སུ་སྒྲིབ་པ་རྣམ་སེལ་ལྗང་ཁུ་སྣ་ཚོགས་རྡོ་རྗེ་དང་དྲིལ་བུ་འཛིན་པ། གཡོན་དུ་ཀུན་ཏུ་བཟང་པོ་དཀར་པོ་རྡོ་རྗེ་དཀར་པོ་དང་དྲིལ་བུ་འཛིན་པ་ཐམས་ཅད་ཀྱང་ཕྱག་གཉིས་ཐུགས་ཀར་བསྣོལ་བ་གཡས་བརྐྱང་གི་སྟབས་ཅན་ནོ། །ཛཿཧཱུཾ་བཾ་ཧོཿ སྒོ་མ་བཞི་དཔག་ཏུ་མེད་པ་སྤྲོས། བདུད་བཞི་བཅོམ། སྟོབས་བཞི་ལ་བཀོད། སླར་འདུས་ཏེ་སྒོ་བཞིར་འཁོད་པ་ནི། ཤར་སྒོར་རྡོ་རྗེ་ལྕགས་ཀྱུ་མ་སྔོ་སངས་སྔོ་ནག་དཀར་བའི་ཞལ་གསུམ། ཕྱག་གཡས་གསུམ་གྱིས་ལྕགས་ཀྱུ་རལ་གྲི་འཁོར་ལོ། གཡོན་གསུམ་གྱིས་ཞགས་པ་སྡིགས་འཛུབ་དྲིལ་བུ། ལྷོ་སྒོར་རྡོ་རྗེ་ཞགས་པ་མ་དཀར་སེར་དཀར་ནག་དམར་བའི་ཞལ་གསུམ། ཕྱག་གཡས་གསུམ་གྱིས་ཞགས་པ་རྡོ་རྗེ་རལ་གྲི། གཡོན་གསུམ་གྱིས་འཁོར་ལོ་དྲིལ་བུ་སྡིགས་མཛུབ། ནུབ་སྒོར་རྡོ་རྗེ་ལྕགས་སྒྲོགས་མ་དམར་མོ་དམར་ནག་དཀར་བའི་ཞལ་གསུམ། ཕྱག་གཡས་གསུམ་གྱིས་ལྕགས་སྒྲོག་རྡོ་རྗེ་རལ་གྲི། གཡོན་གསུམ་གྱིས་འཁོར་ལོ་དྲིལ་བུ་ལྕགས་ཀྱུ་རྣམས་འཛིན་པ། བྱང་སྒོར་རྡོ་རྗེ་དྲིལ་བུ་མ་ལྗང་ཁུ་ལྗང་ནག་དཀར་བའི་ཞལ་གསུམ། ཕྱག་གཡས་གསུམ་གྱིས་དྲིལ་བུ་རྡོ་རྗེ་རལ་གྲི། གཡོན་གསུམ་གྱིས་འཁོར་ལོ་ལྕགས་ཀྱུ་
ཞགས་པ་རྣམས་འཛིན་པ། དེ་ལྟར་སྒོ་མ་བཞི་ནི་དབུ་སྐྲ་སེར་པོ་གྱེན་དུ་བརྫེས་པ། སྟག་ལྤགས་ཀྱི་ཤམ་ཐབས་ཅན། གཡོན་བརྐྱང་གི་སྟབས་ཀྱིས་བཞུགས་པ། ལྷ་གཞན་རྣམས་ཐམས་ཅད་པདྨ་ཐོད་པ་ཟླ་བ་ལ་གནས་པ། ལྷ་ཚོགས་ཐམས་ཅད་ཀྱང་གཙོ་བོ་དང་མཚུངས་པ་ལས་ཕྱག་རྒྱ་ལྔས་བརྒྱན་པའོ། །གལ་ཏེ་ལྷ་ཉི་ཤུ་རྩ་དགུ་པ་ལ་མོས་ན། ལྷ་སྣམ་གྱི་དབུས་སུ་ཟླུམ་སྐོར་གཅིག་དང༌། དེའི་དབུས་སུ་ལེ་ཚེ་དགུ་པའི་དཀྱིལ་འཁོར་བྱས་ལ། བྱང་ཆུབ་སེམས་དཔའ་བརྒྱད་བཀོད་པའི་སྣམ་བུ་དོར་བའོ། །དེ་དག་ཀྱང་རྒྱུད་ཕྱི་མ་དང༌། རྩ་རྒྱུད་སོ་སོའི་དགོངས་པ་ཡིན་ལ། རྩ་རྒྱུད་ལ་རྒྱུད་གཞན་གྱིས་ཁ་བསྐང་བ་ལྷ་མོ་བཅུ་དྲུག་དགོད་པར་མཛད་པ་ཡང་ཤིན་ཏུ་ལེགས་པ་སྟེ། དེའི་ཚེ་རིམ་པ་གསུམ་པའི་འཕར་མ་ལ་ཕྱོགས་བཞིར་སྒེག་མོ་སོགས་དང༌། མཚམས་བཞིར་པི་ཝཾ་མ་ལ་སོགས་པ་དགོད་ཅིང༌། ལྷ་སྣམ་གྱི་ཕྱོགས་བཞིར་མེ་ལོང་མ་ལ་སོགས་པ་བཞི་འགོད་པ་ནི་ཁྱད་པར་རོ། །གང་དག་རྒྱུད་ཀྱི་དགོངས་པ་ནི་སྒོ་གསུམ་སྒྲ་ཁོ་ནའོ་ཞེས་སྨྲ་བ་དེ་དག་ནི་རྒྱུད་ལ་མངོན་སུམ་དུ་བསྙོན་པར་ཟད་ལ། རྒྱུད་ལས། འཕར་མའི་རིམ་གསུམ་མམ་བཞི་པར་གསུངས་པའི་ཕྱིར་ན་སྒོ་རྐྱང་ཁོ་ན་སྟེ་བདག་མེད་མའི་དཀྱིལ་འཁོར་འཕར་མ་གཉིས་པར་བཤད་པ་བཞིན་ནོ། །དེའི་རྗེས་སུ་ཡན་ལག་ལྷག་མ་རྣམས་ལ་བསྒོམ་པར་བྱ་སྟེ། རང་གི་སྙིང་གའི་འོད་ཟེར་གྱིས་ཡེ་ཤེས་སེམས་དཔའི་དཀྱིལ་འཁོར་བཛྲ་ས་མཱ་ཛཿ ཨོཾ་བཛྲ་ཨརྒྷཾ་པྲ་ཏཱིཙྪ་སྭཱཧཱ། པཱ་དྱཾ༴ ཧཱུཾ། ཨོཾ་ཀུ་རུ་ཀུ་རུ་ས་མ་ཡ་ཨ་དྷྀ་པ་ཏི་ཧཱུཾ་ཛཿསྭཱཧཱ། བཾ་ཧོཿ
ཞེས་པ་དམ་ཡེ་བསྲེས། མིག་ཏུ་ཨོཾ་ཛ༴ ནས་དཔའ་བོ་ཁོ་ནའོ། །སྤྱི་བོར་སྐུ་རྡོ་རྗེ༴ དང་ནས། རྣམས་སུ་གྱུར། གྱི་བར་གོང་བཞིན། ཡང་སྙིང་གའི་ཧཱུཾ་ལས་འོད་ཟེར་འཕྲོས། དབང་གི་ལྷ་རྣམས་བཛྲ་ས་མཱ་ཛཿ ཆུ་གཉིས་དང་ཉེར་སྤྱོད་ཀྱིས་མཆོད། དེ་བཞིན་གཤེགས་པ་ཐམས་ཅད་ཀྱིས་བདག་ལ་དབང་བསྐུར་དུ་གསོལ། ཞེས་པ་ནས། ཆུའི་ལྷག་མ་ཡར་ལུད་པ་ལས། ཞེས་པའི་བར་སྡོམ་འབྱུང་གི་སྐབས་བཞིན། རྡོ་རྗེ་སེམས་དཔའ་ལ་སོགས་པ་དེ་བཞིན་གཤེགས་པ་ལྔ་དང༌། མཱ་མ་ཀཱི། སྒྲ་རྡོ་རྗེ་མ། ཕྱག་ན་རྡོ་རྗེ། ཀུན་ཏུ་བཟང་པོ་རྣམས་ལ་མི་བསྐྱོད་པ། སྤྱན་མ་དྲག་མོ་ས་རྡོ་རྗེ་མ། གླིང་བུ་མ། མེ་ཏོག་མ། བྱམས་པ། སའི་སྙིང་པོ། ལྕགས་ཀྱུ་མ་རྣམས་ལ་རྣམ་སྣང༌། རྡོ་རྗེ་མཁའ་འགྲོ་མ། གཟུགས་མ། བདུག་སྤོས་མ། པི་ཝཾ་མ། ནམ་མཁའི་སྙིང་པོ། ཞགས་པ་མ་རྣམས་ལ་རིན་འབྱུང༌། གོས་དཀར་མོ། འདོད་ཆགས་མ། མར་མེ་མ། དྲི་མ། མུ་ཀུནྡ་མ། འཇིག་རྟེན་དབང་ཕྱུགའཇམ་དཔལ་ལྕགས་སྒྲོག་མ་རྣམས་ལ། འོད་དཔག་མེད། སྒྲོལ་མ། ཞི་བ་མོ། གནོད་སྦྱིན་མོ། རྫ་རྔ་མ། སྒྲིབ་པ་རྣམ་སེལ། དྲིལ་བུ་མ་རྣམས་ལ་དོན་ཡོད་གྲུབ་པས་དབུ་རྒྱན། སྙིང་གའི་ས་བོན་གྱི་འོད་ཟེར་གྱིས་བཀུག་པའི་འདོད་ཡོན་རྣམས་བྱང་ཆུབ་སེམས་ཀྱི་ངོ་བོར་གྱུར། ཤེས་རབ་ཀྱི་པདྨར་མཆོད་པའི་ལྷ་མོ་མཆོད་རྫས་ཐོགས་པ་གྲངས་མེད་པར་གྱུར་ཏེ། ལྷ་མོའི་བ་སྤུའི་བུ་ག་ནས་ཕྱིར་སྤྲོས་ནས་དཀྱིལ་འཁོར་
གྱི་ལྷ་ཚོགས་རྣམས་མཆོད་པར་གྱུར། ཆུ་བཞི་སྔོན་དུ་འགྲོ་བའི་ཉེར་སྤྱོད་རོལ་མོ་དང་བཅས་པས་མཆོད། ཨོཾ་སརྦ་ཏ་ཐཱ་ག་ཏ་པཱུ་ཛ་བཛྲ་སྭ་བྷཱ་ཨཏྨ་ཀོ྅་ཧཾ། འཁོར་ལོ་སྡོམ་པ་ཡབ་ཡུམ་གྱི་རྐང་བརྒྱད་དང༌། སྤྲོ་ན། མཉམ་ཉིད་མི་གཡོ་སོགས་ཀྱིས་ཀྱང་བསྟོད་ལ། ནང་མཆོད་གཏོར་མ་ལྟར་བྱིན་གྱིས་རླབས། འབྲུ་གསུམ་གྱིས་བདུད་རྩི་མྱང༌། ཨོཾ་སརྦ་ཏ་ཐཱ་ག་ཏ་ཨ་མྲྀ་ཏ་སྭ་ད་ན་བཛྲ་སྭ་བྷཱ་ཝ་ཨཏྨ་ཀོ྅་ཧཾ། བླ་མ་བརྒྱུད་པའི་མཚན་ནས་སྨོས་ནས་ནང་མཆོད་འབུལ་བའི་སྲོལ་ལྟར་ན། རྡོ་རྗེ་འཆང་དང་རྡོ་རྗེ་རྣལ་འབྱོར་མ། །ནག་པོ་སྤྱོད་པ་པ་དང་དྷ་མ་པ། །ལངྒ་ལི་པ་ཏིལློ་ནཱ་རོ་དང༌། །ཨ་ཝ་དྷུ་ཏཱི་པ་དང་སཽ་རི་པ། །འཇིགས་མེད་འབྱུང་གནས་སྟོབས་བཅུ་རྡོ་རྗེ་དཔལ། །དགེ་མཚན་དཔལ་དང་མི་དབང་དཔལ་བཟང་པོ། །རཱ་ཝི་མི་ཏྲ་ར་ཏི་གུཔྟ་དང༌། །ཤཱནྟི་གུཔྟ་བི་པུ་ལ་གརྦྷ། །གང་བའི་རྡོ་རྗེ་རྣམས་ལ་མཆོད་པ་འབུལ། །ཞེས་བྱ་ལ། བརྒྱུད་པ་རྙིང་པ་ས་ལུགས་ཀྱི་བརྒྱུད་པ་ལྟར་ན། བིརྦ་ཌོམྦྷི་ངོ་མཚར་རྡོ་རྗེ་དང༌། །ནགས་ཁྲོད་གརྦྷ་རི་དང་རྒྱལ་བ་དཔལ། །མི་ཐུབ་ཟླ་བ་དཔའ་བོའི་རྡོ་རྗེ་དང༌། །འབྲོག་མི་གསལ་སྙིང་སྒྱེ་ཅུ་ས་ཆེན་དང༌། །རྗེ་བཙུན་སྐུ་མཆེད་ས་སྐྱ་པཎ་ཆེན་དང༌། །ཚོགས་སྒོམ་སྙེག་སྟོན་ཞང་སྟོན་བཀྲ་ཤིས་དཔལ། །སྤང་ཁང་གྲགས་དཔལ་མ་ཏི་པན་ཆེན་དང༌། །ཐིག་ཆེན་ཆོས་རྗེ་བྲག་ཐོག་ཆོས་རྗེ་དང༌། །ཀུན་དགའ་རྣམ་རྒྱལ་ཡངས་པ་ཅན་པ་གཉིས། །རྩ་བའི་བླ་མ་རྣམས་ལ་ཞེས་སམ། ཡང་ངོར་ལུགས་ལྟར་ན་མ་ཏིའི་རྗེས་སུ། གཞོན་
བློ་ངོར་ཆེན་དཔལ་ལྡན་པ་དང་ནི། །བསོད་ནམས་ལྷུན་གྲུབ་རྗེ་བཙུན་གྲོལ་མཆོག་དང༌། །བྱམས་པའི་མཚན་ཅན་རྣམས་ལ༴ ཞེས་འདོན། སློབ་དཔོན་འཇིགས་མེད་འབྱུང་གནས་ནས་ཙ་མི་སོགས་ལ་བརྒྱུད་པའང་བྱུང་ངོ༌། །བར་འདིར་དག་པ་དྲན་པར་བྱེད་པ་སྤྲོ་ན་མན་ངག་སྙེ་མར་གསུངས་པ་ལྟར་ཤེས་དགོས་ལ་འོན་ཀྱང་ངག་ཏུ་མི་བརྗོད་དོ། །གཞན་ཡང་དཀྱིལ་འཁོར་སྤྲོ་བསྡུའི་སྒོ་ནས་ལས་རྒྱལ་མཆོག་དང༌། ཐིག་ལེའི་རྣལ་འབྱོར་དང༌། ཕྲ་མོའི་རྣལ་འབྱོར་རྣམས་ཀྱང་བསྒོམ་མོ། །བཟླས་པའི་དམིགས་པ་གསལ་བཏབ་ལ། ཨོཾ་བཛྲ་ཨ་མྲྀ་ཏ་མཧཱ་སུ་ཁ་ཧཾ་སྭཱཧཱ། ཨོཾ་བཛྲ་བཻ་རོ་ཙ་ན་ནཱི་ཡེ་བུདྡྷ་ཌཱ་ཀི་ནཱི་ཡེ་སྭཱཧཱ། ཡུམ་གྱི་སྙིང་པོའོ། །ཨོཾ་ཨཱཿཧཱུཾ་ཧཱུཾ་སྭཱཧཱ། ཨོཾ་བཛྲ་བཻ་རོ་ཙ་ནཱི་ཡེ་སྭཱཧཱ། ཉེ་བའི་སྙིང་པོའོ། །རྩ་བའི་སྔགས་ནི། འཁོར་ལོ་སྡོམ་པ་སྤྱི་དང་མཚུངས་སོ། །ཐུན་འཇོག་པར་འདོད་ན། རང་གི་སྙིང་ག་ནས་འོད་ཟེར་འཕྲོས། དཀྱིལ་འཁོར་གྱི་འཁོར་ལོ་འོད་དུ་ཞུ་ནས་རང་ཉིད་ལ་ཐིམ་པར་གྱུར། དེ་ཡང་ཏིང་ངེ་འཛིན་སེམས་དཔའ་ནཱ་དའི་བར་དུ་བསྡུས་ཏེ། སྟོང་པ་ལ་མཉམ་པ་བཞག །སླར་ཡང་ལྷ་སྐུ་སྒྱུ་མ་ལྟ་བུར་ལངས་ཏེ། སྤྱི་བོར་སྐུ་རྡོ་རྗེ༴ སོགས་གནས་གསུམ་བྱིན་གྱིས་བརླབས་ནས། དགེ་བ་བསྔོའོ། །འདིའི་གཏོར་མའི་ཆོ་ག་འབྲིང་པོ་ནི། ཙནྡན་དམར་པོའི་མཎྜལ་གྲུ་གསུམ་གྱི་དབུས་སུ། གུར་གུམ་གྱིས་ཟླུམ་པོར་བསྐོར་བ་ལ། ལེ་ཚེ་དགུར་བྱས། མ་འབྱོར་ན་རྡུལ་ཚོན་ནམ། ནང་མཆོད་ཀྱིས་དེ་དང་དབྱིབས་མཐུན་ཙམ་བྲི། གཏོར་མ་མཆོད་པའི་ཡོ་བྱད་རྣམས་
བཤམས། མཆོད་པ་བྱིན་རླབས་སྤྱི་དང་མཐུན་པར་བྱ། གཏོར་མ་བྱིན་རླབས་འཁྲུལ་སྤོང་གི་སྐབས་དང་འདྲ། རང་སྐད་ཅིག་གིས་རྡོ་རྗེ་སེམས་དཔའི་སྐུར་གསལ་བའི་ཐུགས་ཀ་ནས་འོད་ཟེར་འཕྲོས། རྡོ་རྗེ་སེམས་དཔའ་ལྷ་སུམ་ཅུ་རྩ་བདུན་གྱི་དཀྱིལ་འཁོར་ཁྲོ་བོ་ཆེན་པོ་བཅུ་ཕྱོགས་སྐྱོང་བ་འཁོར་བཅས་སྲིད་པ་གསུམ་གྱི་འགྲོ་བའི་ཚོགས་དང་བཅས་པ་ཐམས་ཅད་ཕཊ། ཅེས་འབར་བའི་ཕྱག་རྒྱ་བཅས། ཨོཾ་ཀུ་རུ་སོགས་ཀྱིས་སྤྱན་དྲངས། ཨོཾ་ཤིང་གཅིག་དང་ནི་དུར་ཁྲོད་དང༌། །རི་དང་བྲག་དང་ཕུག་གི་ས། །ཡུལ་གྱི་འདབས་དང་ལམ་བཞི་ཡི། ཁྱད་པར་དུ་ནི་ཁང་སྟོང་དང༌། །སྣོད་དང་ཐང་དང་ས་སྟོང་དང༌། ཁྱད་པར་གདོལ་པའི་ཁྱིམ་གནས་པ། །ནག་པོ་དྲག་པོ་དྲག་ཆེན་པོ། །ལྷ་སྦྱིན་མཉམ་དུ་བསྟེན་པ་དང༌། །ནག་པོ་བརྩིགས་དང་འཇིགས་བྱེད་དང༌། །དགའ་བ་ལས་འདས་བགེགས་རྒྱལ་པོ། །རྒན་བྱད་མ་དང་དྲག་མོ་དང༌། །འཇིགས་བྱེད་མ་དང་ཨུ་མས་བསྟོད། །རྒྱལ་མ་རྣམ་པར་རྒྱལ་དབང་མོ། །ཐུབ་མེད་གཞན་གྱིས་མི་ཐུབ་མ། །ནག་མོ་བཟང་མོ་ནག་ཆེན་མོ། །ནག་སྦོམ་མ་དང་རྣལ་འབྱོར་མ། །དབང་མོ་དང་ནི་ཟླ་བ་མོ། །ནག་པོ་སྡང་བ་ལམ་པ་ཀི །འཕྲོག་བྱེད་མ་དང་མར་མེ་མ། །འཇིགས་བྱེད་ཡུལ་གནས་རྣལ་འབྱོར་མ། །དྲག་མོའི་གཟུགས་དང་གཟུགས་ཆེན་མ། །མཆེ་བ་གཙིགས་དང་ཐོད་ཆེན་མ། །ཐོད་འཕྲེང་འཕྲེང་ཅན་ཁ་ཊྭཱཾ་མ། །སྦྲུལ་ཆེན་རལ་གྲི་དགྲ་སྟ་ཅན། །རྡོ་རྗེ་དེ་བཞིན་
གཞུ་ལག་དང༌། །ལྷ་ཡི་དབང་ཕྱུག་མ་རྣམས་ནི། །མཁའ་འགྲོ་ལྔ་ཡི་བདག་ཉིད་དང༌། །ལས་ཀུན་རྗེས་སུ་སྒྲུབ་བྱེད་མ། །སྦྱོར་བའི་དཀྱིལ་འཁོར་རྒྱལ་ཆེན་པོ། །དེ་བཞིན་རྡོ་རྗེ་དབང་ཕྱུག་གཙོ། །དེ་བཞིན་གཤེགས་པའི་སྐུ་ཆེན་པོ། །གོས་མེད་སྦྱོར་བ་བསྐྱེད་བྱེད་མ། །རྡོ་རྗེ་དབང་ཕྱུག་མ་བཀའ་ཡིས། །ཐམས་ཅད་ཐམས་ཅད་འདིར་སྤྱོན་ཅིག །ཨོཾ་ཀཀྐ་ཏ་ན་བབྦྷནྡྷ་ན། ཁཁྑ་ད་ན། སརྦ་དུཥྟཱན། ཧ་ན་ཧ་ན། གྷཱ་ཏ་ཡ་གྷ་ཏ་ཡ། ཨ་མུ་ཀསྱ་ཨི་དཾ་ཀཱརྻ་སཱདྷཱ་ཡ་ཧཱུཾ་ཧཱུཾ་ཧཱུཾ་ཕཊ་ཕཊ་ཕཊ་ཛཿསྭཱཧཱ། དབུས་ཀྱི་རེ་མིག་གི་གནས་ལ་ཡེ་ཤེས་ཀྱི་དཀྱིལ་འཁོར་ལ་བཞུགས་ཤིང༌། རེ་མིག་གཞན་རྣམས་ལ་ཕྱོགས་སྐྱོང་བ་བརྒྱད། ལྷ་མོ་བཞི་བཞི་དང་བཅས་པ་འཁོད་པ་ནི། ཧ་རི་ཀེ་ལར་ཨ་རུ་ར་དྲུང་ཤར། །ཞིང་སྐྱོང་ནག་པོ་དྲག་པོ་འཁོར་བཅས་བཞུགས། །ཀོངྐ་ནར་ནི་སོ་མ་བལླི་བྱང༌། ཞིང་སྐྱོང་དྲག་པོ་ཆེན་པོ། ནུབ་ཕྱོགས་ཨོ་ཊི་ཡ་ཎར་ཨ་ཤོ་ཀ །ཞིང་སྐྱོང་ལྷ་བྱིན་མཉམ་བརྟེན༴ ལྷོ་ཕྱོགས་རྡུལ་བྲལ་ཙུ་ཏའི་ཤིང་གི་དྲུང༌། །ཞིང་སྐྱོང་ནག་མོའི་མིང་ཅན༴ མེར་ནི་ཀ་རཉྫ་ཏེ་ཙ་རི་ཏྲར། །ཞིང་སྐྱོང་རྩིགས་བྱེད་ཆེན་པོ༴ བདེ་བྲལ་དེ་བི་ཀོ་ཊར་བྷ་ཊ་སྟེ། །ཞིང་སྐྱོང་འཇིགས་བྱེད་མི་སྡུག༴ རླུང་མཚམས་འབར་བ་འཛིན་པར་གསེར་ཤིང་ཏེ། །ཞིང་སྐྱོང་དགའ་བ་ལས་འདས༴ དབང་ལྡན་ཨཊྚ་ཧ་སར་ཀ་དཾ་ཤིང༌། ཞིང་སྐྱོང་བགེགས་ཀྱི་རྒྱལ་པོ་འཁོར་བཅས་བཞུགས། ཞེས་བྱ་སྟེ། ས་མཱུ་ཊར་ཞིང་བརྒྱད་བཤད་པ་ཞིང་སྐྱོང་བརྒྱད་དང་སྤྱོད་བརྒྱུད་
ཀྱི་དགོངས་པར་ངེས་ལ། ཕྱོགས་མཚམས་ཇི་ལྟར་ཡིན་ཚུལ་ག་ཡ་དྷ་ར་དང༌། ནཱ་རོ་པ་གཉིས་ཀྱི་མན་ངག་ལྟར་བཀོད་པའོ། །དབང་པོའི་གཡས་སུ་ཚངས་པ་དང་ཟླ་བ་དང་ཉི་མ་ཁྱབ་འཇུག་རྣམས་དང༌། ནོར་བདག་གི་གཡོན་དུ་ཚོགས་ཀྱི་བདག་པོ་དང༌། ཆུ་ལྷའི་གཡས་སུ་ཐབས་བཟང་རིས་དང་སའི་ལྷ་མོ་རྣམས་རང་རང་གིས་འཁོར་ཚོགས་དང་བཅས་ཏེ་བཞུགས་པར་གྱུར། ཆུ་བཞི་དང་ཉེར་སྤྱོད་རོལ་མོ་དང་བཅས་པས་མཆོད། ཨོཾ་བཛྲ་ཌཱ་ཀ་ཨི་མཾ་བ་ལིཾ་གྲྀཧྞ་གྲྀཧྞ་ཧཱུཾ་ཕཊ། ཨོཾ་ཛཿཧཱུཾ་བཾ་ཧོཿས་མ་ཡ་སྟཾ་དྲྀ་ཤྱ་ཧོཿ ཞེས་ལན་ལྔའམ་བདུན་གྱིས་དཀྱིལ་འཁོར་ལ་ཕུལ། ཨོཾ་ཁ་ཁ་ཁཱ་ཧི་ཁཱ་ཧི་ནས། པྲ་ཡཙྪནྟུ་ཧཱུཾ་ཧཱུཾ་ཕཊ་ཕཊ་སྭཱཧཱ། ཞེས་མཁའ་འགྲོ་སྤྱི་གཏོར་གྱིས་སྔགས་བསྡུས་པས་འཇིག་རྟེན་པའི་ཚོགས་ཐམས་ཅད་ལ་ལན་གསུམ་དུ་ཕུལ། མཆོད་སྦྱིན་གཏོར་མ་འདི་སྣོམས་ལ། །རྣལ་འབྱོར་བདག་ཅག་འཁོར་བཅས་ལ། །ནད་མེད་ཚེ་དང་དབང་ཕྱུག་དང༌། །སོགས་ཀྱི་འདོད་དོན་གསོལ་བ་བཏབ། ཨོཾ་ཨཱཿཧྲཱིཿཔྲ་ཝ་ར་སཏྐཱ་ར་ཧཱུཾ་ཨཉྩ་མ་ནཾ་པྲ་ཏཱིཙྪ་སྭཱཧཱ། ཨོཾ་ཧསྟ་པུངཚི་ཡེ་སྭཱཧཱ། ཨོཾ་ཏཾ་བུ་ལ་ཡེ་སྭཱཧཱ། རྡོ་རྗེ་སེམས་དཔའི་ཡིག་བརྒྱའི་མཐར། ཧཱུཾ་ཕཊ་བཏགས་པ་ལན་གསུམ་བཟླ་ཞིང་དྲིལ་བུ་དཀྲོལ། སེམས་ཅན་ཐམས་ཅད་ནད་མེད་ཅིང༌། །སེམས་ཅན་ཐམས་ཅད་བདེ་གྱུར་ཅིག །གང་གི་ལམ་ནས་འགྲོ་བ་ཡི། །སངས་རྒྱས་ཉིད་དུ་གྲུབ་གྱུར་ཅིག །ཅེས་སྨོན་ལམ་བཏབ། ཨོཾ་ཕུན་སུམ་ཚོགས་པ་ཞེས་སོགས་
བཀྲ་ཤིས་ཀྱི་ཚིགས་བཅད་བརྗོད། པད་སྐོར་འཁྱུད་རྒྱ་ལག་གཡས་རེ་མིག་གིས་ས་ལ་བཞག་ཅིང༌། གཡོན་ཁུ་ཚུར་སྙིང་གར་རེག་པ་རྣམས་བྱ་སྟེ། ཨོཾ་ཨཏྨ་ཏིཥྛ་ཧཱུཾ་སྭཱཧཱ། ཡེ་ཤེས་ཀྱི་འཁོར་ལོ་དབུགས་དང་ལྷན་ཅིག་རང་གི་སྙིང་གར་ཐིམ། ཡིད་ཀྱིས་མཆོད། ཨོཾ་སརྦ་དུཥྟཾ་གྲྀཧྞ་གྲྀཧྞ་གཱཙྪ་ཧཱུྃ་ཕཊ། ཅེས་འཇིག་རྟེན་པའི་ལྷ་རྣམས་གཤེགས་སུ་གསོལ། སླར་ཡང་སྨོན་ལམ་དང་བཀྲ་ཤིས་ཅི་རིགས་པ་བྱའོ། །རྣལ་འབྱོར་གྱི་ཡན་ལག་གཞན་རྣམས་ནི། འཇིགས་མེད་འབྱུང་གནས་སྦས་པའི་མན་ངག་ལས་ཤེས་པར་བྱའོ། །རྡོ་རྗེ་མཁའ་འགྲོ་ཞི་བའི་སྒྲུབ་ཐབས་ཉམས་སུ་ལེན་ཚུལ་ཡང་འདི་ཁོ་ན་སྟེ། འཁོར་ལོའི་བདག་པོ་ཞལ་བཞི་ཕྱག་བཞི་བསྒོམ་པ་ནི་ཁྱད་པར་རོ། །ཀུན་ཏུ་ངོ་མཚར་རྨད་བྱུང་བ། །དཀྱིལ་འཁོར་ཆེན་པོའི་སྒྲུབ་ཐབས་ནི། །རབ་རྫོགས་ཉུང་ངུའི་ཚིག་གིས་བྲིས། །འདི་ལས་རྡོ་རྗེ་འཛིན་ཐོབ་ཤོགཁ་སྦྱོར་རྡོར་སེམས་ཀྱི་སྒྲུབ་པའི་ཐབས་ཏེ་བཅོ་བརྒྱད་པའོ།། །།༈ དེ་ལྟར་ན་དེ་དག་རྣམས་ལ་རང་ཉིད་ལྷག་པའི་ལྷའི་ང་རྒྱལ་དང་མ་བྲལ་བའི་ངང་ནས། སྣང་བ་ཐམས་ཅད་སྐུ་གསུང་ཐུགས་སུ་ལྷག་པར་མོས་པས་སྤྱོད་ལམ་གྱི་རྣལ་འབྱོར་ལ་འཇུག་པར་བྱ་ཞིང༌། བཟའ་བཏུང་བདུད་རྩིར་བྱིན་གྱིས་རླབས་ནས། ལྟེ་བའི་གཏུམ་མོ་རབ་ཏུ་འབར་བའི་མེའི་དབུས། སྙིང་གར་ཡེ་ཤེས་ཀྱི་འཁོར་ལོ་དང༌། ལྟེ་བར་ཕྱོགས་སྐྱོང་ལ་སོགས་པ་གསལ་བར་དམིགས་ཏེ། ནང་གི་སྦྱིན་སྲེག་གི་ཚུལ་གྱིས་ལོངས་སྤྱོད་པ་དང༌། གོང་བུ་བསྡུ་བའི་རིམ་པས་འོད་གསལ་གྱི་རྣལ་འབྱོར་ལ་བརྟེན་ནས་གཉིད་ལམ་དུ་འཁྱེར་བ་དང་སླར་ཡང་ལྡང་བ་དང༌།
ཁྲུས་ཀྱི་རྣལ་འབྱོར་ལ་སོགས་པ་ནས་བརྩམས་ཏེ། སྒོམ་པའི་རིམ་པ་ལ་འཇུག་པར་བྱའོ། །འདིར་སྨྲས་པ། སྣ་ཚོགས་བསམ་པ་དང་མཚུངས་ཆོ་ག་སྣ་ཚོགས་ཐ་དད་པ། །རྒྱུད་རྒྱལ་རྣམས་སུ་བསྟན་པ་དེ་ཀུན་ནམ་ཡང་དོན་མེད་མིན། །བྱེ་བ་ཕྲག་བརྒྱའི་ཆུ་ཀླུང་ལམ་རྣམས་སྣ་ཚོགས་ཐ་དད་ལས། །རྒྱ་མཚོར་རོ་གཅིག་གཞོལ་བཞིན་ཐབས་ཚུལ་ཀུན་ཀྱང་ཆོས་ཀྱི་དབྱིངས་སུའོ། །ངེས་པར་ཟབ་བོ་སྦྱང་བྱ་སྦྱོང་བྱེད་ལེགས་པར་འབྱོངས་པའི་བསྐྱེད་རིམ་མོ། །ཡིད་ཆེས་ལྡན་ནོ་རྒྱུད་དང་འཕགས་ཡུལ་མཁས་དང་གྲུབ་པའི་གསུངས་བཞིན་ཏེ། །བྱིན་རླབས་ཆེའོ་རྫོགས་སངས་རྒྱས་ནས་ད་ལྟའི་བར་དུ་རྒྱུན་མ་ཆད། །སྐལ་བ་བཟང་ངོ་དཀོན་ཅིང་རྙེད་དཀའ་འབད་མེད་ལེགས་པར་ཐོབ་འདི་ཀོ །དེ་ལྟར་སྒྲུབ་ཐབས་ཐབས་ཚུལ་དཔག་ཡས་རྣམས། ཚིག་ཚོགས་ཧ་ཅང་ཆེས་ན་འབྲི་དཀའ་ཞིང༌། །ཀློག་དཀའ་འཛིན་དཀའ་འདོན་ཡང་ཁོང་ཆུད་དཀའ། །ཐུན་བཞིར་སྒོམ་པ་སོགས་ཀྱང་ལྷག་པར་དཀའ། །བདག་བློ་དམན་ནོ་སྐྱེ་བོ་ཕལ་ཆེར་ཡང༌། །བློ་དམན་ཉིད་པས་ཉུང་ངུས་ཕན་པར་སེམས། །བདག་ཉིད་སྒོམ་དང་གཞན་ལ་མི་ཕན་ན། །ཚིགས་ཚོགས་ཆེ་བའི་ང་རྒྱལ་དེ་ཡིས་ཅི། །ཐེག་མཆོག་ཉམས་ལེན་མན་ངག་རྒྱ་མཚོ་འདི། །འབད་བརྩོལ་གྲུབ་ཆེན་ཞུགས་པ་དེ་ལས་ཀྱང༌། །སྐལ་བཟང་དོན་མཐུན་སྐྱེ་བོ་བགྲང་ཡས་རྣམས། །ཟུང་འཇུག་ནོར་བུའི་གླིང་དུ་ཕྱིན་པར་ཤོག །དུས་གསུམ་རྒྱལ་བ་ཀུན་གྱི་བགྲོད་གཅིག་ལམ། །རྒྱུད་སྡེའི་མཐར་ཐུག་འཁོར་ལོ་སྡོམ་པ་འདིར། །གུས་པས་ཅུང་ཟད་བརྩོལ་བའི་དགེ་བ་ལས། །
བདག་ཀྱང་འཁོར་ལོའི་མགོན་དེ་ཐོབ་པར་ཤོག །ནམ་མཁའི་མཐས་གཏུགས་སེམས་ཅན་ཇི་སྙེད་པ། །མ་ལུས་བླ་ན་མེད་པའི་བྱང་ཆུབ་ལ། །མྱུར་བ་ཉིད་དུ་འགོད་པར་བྱེད་གྱུར་ཅིག །དེ་སྲིད་བདག་ཀྱང་འགྲོ་བའི་དོན་བྱེད་ཤོག །བདེ་ཆེན་ལམ་མཆོག་ཟབ་ཡངས་པད་ཚལ་དུ། །རྣལ་འབྱོར་དབང་ཕྱུག་བུང་བའི་རྒྱལ་པོ་ནི། །བྱེ་བ་ཕྲག་བརྒྱར་ལྷན་ཅིག་ཟབ་དོན་གྱིས། །སྦྲང་རྩིའི་དགའ་སྟོན་སྤྱོད་པ་ཉིད་དུ་གྱུར། །བསྐྱེད་རིམ་ཕོ་ཉས་རབ་ཏུ་བསྐུལ་ཏེ་རྟགས་བྲལ་དབང་པོ་ཐམས་ཅད་པ་ཡི་ཡེ་ཤེས་དཀྱིལ་འཁོར་ཆེན་པོ་གང༌། །འགྱུར་མེད་བདེ་བའི་འོད་བརྒྱ་འབར་བས་གཟུང་འཛིན་ཚང་ཚིང་སྟུག་པོ་བསྲེགས་ནས་ཕུང་པོ་ཁམས་དང་སྐྱེ་མཆེད་གཞན། །དེ་བཞིན་ཉིད་དབྱིངས་རྒྱལ་བ་རྣམས་ཀྱི་སྙིང་པོ་ཟུང་འཇུག་དཔའ་བོ་དཔྱིད་དང་ཕག་མོ་མཉམ་སྦྱོར་ཞེས་བྱ་བ། །བླ་མེད་བླ་མའི་དྲིན་ལས་དུས་འདི་ཉིད་དུ་མངོན་དུ་འགྱུར་ཞིང་སྲིད་ཞིའི་ཕུན་ཚོགས་ཀུན་གྱི་གཞིར་གྱུར་ཅིག །སྒྲུབ་ཐབས་ངེས་པར་བརྗོད་པའི་ཚིག་འདི་ཡང་རྒྱལ་གསུངས་ཡན་ལག་རྒྱ་མཚོ་དང་འགྲོགས་ཏེ། །ཇི་སྲིད་ནམ་མཁའ་གནས་ཀྱི་བར་དག་ཏུ། །སྐྱེ་བོ་ཀུན་ལ་ཕན་བདེའི་རྒྱུན་བྱེད་ཤོག །ཅེས་པ་དཔལ་འཁོར་ལོ་སྡོམ་པའི་དཀྱིལ་འཁོར་རབ་འབྱམས་ཀྱི་སྒྲུབ་ཐབས་དངོས་གྲུབ་རྒྱ་མཚོ་ཞེས་བྱ་བ། ཡབ་བཀའི་དཀྱིལ་འཁོར་བཅུ་བཞི་དང༌། ཡུམ་བཀའི་དཀྱིལ་འཁོར་བཞིའི་སྒྲུབ་ཐབས་ཕྱོགས་གཅིག་ཏུ་བསྒྲིགས་པ་སྟེ། དེ་ཡང་དང་པོར་བཅོམ་ལྡན་འདས་གསང་བའི་བདག་པོའི་འགྲེལ་པའི་ལུགས་དང༌། དེ་ནས་སློབ་དཔོན་ཨ་བྷ་ཡཱ་ཀ་རའི་སྒྲུབ་ཐབས་འཁྲུལ་སྤོང་གི་ལུགས་དང༌། མཻ་ཏྲི་བཅུ་གསུམ་མ་དང༌། ཡུམ་བཀའི་ལྷ་སུམ་ཅུ་སོ་བདུན་མ་དང༌། སྡོམ་འབྱུང་ལྷ་བཅུ་གསུམ་མ་དང༌། ལྭ་བ་བཅུ་གསུམ་མར་
གྲགས་པ་སྦྱངས་པའི་ཡོན་ཏན་གྱི་དཀྱིལ་འཁོར་དང༌། འཁོར་ལོ་བསྒྱུར་དྲུག་དང༌། འཇམ་རྡོར་ལྷ་ཉེར་ལྔ་མ་དང༌། དྲག་པོ་ཆེན་པོ་ཕྱག་འབུམ་པ་དང༌། བོང་བུའི་ཞལ་ཅན་ལྷ་སོ་བདུན་མ་དང༌། མཆོག་གི་རྡོ་རྗེ་ཕག་མོ་ལྷ་བཅུ་གསུམ་མ་དང༌། རྡོ་རྗེ་མཁའ་འགྲོ་དྲག་པོའི་དཀྱིལ་འཁོར་དང༌། དཔལ་མཁའ་འགྲོ་རྒྱ་མཚོའི་རྩ་བའི་དཀྱིལ་འཁོར་གྱི་སྒྲུབ་ཐབས་དང༌། རྡོ་རྗེ་ཕག་མོ་ཕག་གདོང་ཆེན་མོའི་དཀྱིལ་འཁོར་དང༌། དྲིལ་བུ་ལྷ་ལྔ་དང༌། ཁྲོ་བོ་རྡོར་སེམས་དང༌། ཕག་མོ་འབྱུང་བ་ཞེས་བྱ་བའི་སྒྲུབ་ཐབས་ལས་འབྱུང་བའི་དཀྱིལ་འཁོར་དང༌། ཁ་སྦྱོར་ལས་འབྱུང་བ་ཞི་བ་རྡོར་སེམས་ཀྱི་དཀྱིལ་འཁོར་རྣམས་སོ། །འཁོར་ལོ་སྡོམ་པའི་དབང་བཀའ་ལ། །ལཱུ་དྲིལ་ནག་གསུམ་གྲགས་ཆེ་བས་ལོགས་སུ་གསལ། ཡི་གེ་བདུན་པ་སྒྲུབ་ཐབས་ནི་དཀྱིལ་འཁོར་རྒྱས་པ་ཡིན་ཡང་སློབ་མ་རྗེས་འཛིན་བྱིན་རླབས་ཀྱི་ཆོ་ག་ཙམ་དང་བཅས་པ་ཡིན་པ་གཞན་དུ་བཤད་ཟིན་ནོ།། །།བོད་ཡུལ་འདི་ན་དངོས་སུ་རྒྱུད་དང་རྒྱ་གཞུང་གི་ཁུངས་ལ་མ་རྟེན་པའི་སྒྲུབ་ཐབས་མན་ངག་ཙམ་གྱི་རྗེས་སུ་འབྲང་བ་ཡང་མང་དུ་ཡོད་ཅིང༌། འགའ་ཞིག་ཐོབ་མོད་ཀྱང་འདིར་མ་བཀོད་ལ། གོང་དུ་སྨོས་པ་དེ་རྣམས་ལས་གཞན་པ་རྩ་བཤད་ཀྱི་རྒྱུད་རྣམས་ལས་དཀྱིལ་འཁོར་དཔག་ཏུ་མེད་པ་གསུངས་པ་དང༌། སྒྲུབ་ཐབས་ཀྱི་རྒྱ་གཞུང་བོད་དུ་འགྱུར་པའང་མང་མོད་ཀྱང༌། ཁོ་བོས་ལེགས་པར་ཐོབ་པ་ནི་འདི་ཙམ་ཡིན་ལ།
དེ་ཡང་ཁ་བ་ཅན་གྱི་ཕྱོགས་དེ་དག་ལས་གཞན་ཟུར་བཀའ་གྲགས་པ་ཁུངས་རྣམ་པར་དག་པ་དང་ལྡན་པའི་དབང་བཀའ་གྲགས་ཆེ་བ་ཆེར་མེད་པ་འདྲའོ། །དཀྱིལ་འཁོར་གཅིག་ཉིད་ལ་འདོད་ཚུལ་ཐ་དད་པ་མང་པོ་འབྱུང་བ་ནི་སུ་ཞིག་གིས་བགྲང་བར་སྤྱོད། དེ་ལ་འདིའི་སྡོམ་འབྱུང་གི་སྒྲུབ་ཐབས་ནི་དགེ་བཤེས་དཔལ་ལྡན་ཤཱཀྱ་བསྟན་འཛིན་གྱིས་བསྐུལ་ནས་ཐོག་མར་སྦྱར་བ་ཡིན་ལ། དེས་སྤྲོ་བ་འཕེལ་ནས་སྒྲུབ་ཐབས་བདུན་ཙམ་ཞིག་དེའི་རྗེས་ཐོགས་སུ་བྲིས་ནས་བར་སྐབས་སུ་ལོ་འགའ་ཞིག་ལེ་ལོའི་དབང་གིས་འཕྲོ་བོར་བ་ལས། སླར་ཡང་འཕྲོས་རྣམས་བྲིས་པ་སྟེ། འཁོར་ལོ་སྡོམ་པའི་རྒྱུད་ལ་མོས་པའི་རྣལ་འབྱོར་པ་རྒྱལ་ཁམས་པ་ཏཱ་ར་ནཱ་ཐས་རང་ལོ་སོ་དྲུག་པ་ལ་ནགས་རྒྱལ་གྱིས་དབེན་གནས་དཔལ་ཇོ་མོ་ནང་དུ་ཚང་བར་བསྒྲིགས་པའོ།། །།འདིས་ཀྱང་རྒྱལ་བའི་བསྟན་པ་སྤྱི་དང་ཁྱད་པར་དཔལ་འཁོར་ལོ་སྡོམ་པའི་བསྟན་པ་ཕྱོགས་ཐམས་ཅད་དུ་དར་ཞིང་སངས་རྒྱས་ལ་ཡུན་རིང་དུ་གནས་པར་གྱུར་ཅིག གཅིག་ཞུས་མངྒ་ལཾ།། །།ཤེས་རབ་རྒྱལ་མཚན་ཞབས་ལ་གུས་གསོལ་འདེབས། །བྱིན་བརླབ་སྙིང་ལ་ཞུགས་པར་ཐུགས་རྗེ་གཟིགས། །སྐྱེ་འདིར་བདག་གིས་ཟབ་མོ་གསང་ཆེན་ཐེག །ཀུན་བཟང་ཐུགས་ཀྱི་གསང་བ་བཅུད་རྫོགས་པ་ཆེ། །མངོན་གྱུར་ཁྱད་པར་ངེས་དོན་དབུ་མའི་ལམ། །མཐའ་བྲལ་གནས་ལུགས་མྱུར་དུ་
དུ་རྟོགས་པར་ཤོག །དེར་བརྟེན་ཕྱི་མར་ལས་འབྲེལ་གང་ཡོད་ཞིང་། །པདྨ་ཡོད་དང་དཔལ་ལྡན་ཤམྦ་ལར། །ཟ་བ་དགོངས་སྔགས་རིག་འཛིན་པར་ཡོངས་འཕོས་ནས། །ཚེ་ཅེར་གསང་ཆེན་ལེགས་མཐར་ཕྱིན་གྱུར་ཅིག །སྨྲ་བའི་དབང་ཕྱུག་ཡོན་ཏན་བཟང་པོ་ཡིས། །སྤྱི་ལོ་གཅིག་སྟོང་དགུ་བརྒྱ་གོ་ལྔ་བར་བསྟན་པ་སྤྱི་དང་ཁྱད་པར་ཇོ་ནང་བའི། །བཤད་སྒྲུབ་སླར་གསོ་བྱ་བ་སྤེལ་བའི་ཆེད། འཇམ་མགོན་ཏཱ་ར་ནཱ་ཐའི་གསུང་འབུམ་གྱིས། མ་ཟད་ཆོས་སྦྱིན་དཔལ་ལྡན་འཛམ་ཐང་གི། གཙང་བའི་ཆོས་གྲྭ་བསྐྲུན་པའི་དགེ་བ་ཡིས། མ་གྱུར་འགྲོ་ལ་གནས་སྐབས་བདེ་བ་དང་མཐར་གཏན་པ་དེ་བླ་མེད་བྱང་ཆུབ་མཆོག མྱུར་དུ་ཐོག་པའི་དཔུང་གཉེར་དམ་པ་རུ། གཞི་དབྱིངས་མཆོག་གསུམ་དམ་པས་ཤིས་པ་རྩོལ་འདི་ཡང་བསོད་ནམས་དཔལ་གྱིས་བྲིས་པ་དགེ།
ཤོག་སྟོང་།