མཁའ་འགྲོའི་སྤྱི་གཏོར་རྒྱས་པ།
མཁའ་འགྲོའི་སྤྱི་གཏོར་རྒྱས་པ་བཞུགས།
ཨོཾ་སྭ་སྟི། དཔལ་འཁོར་ལོ་སྡོམ་པའི་རྣལ་འབྱོར་ལ་བརྩོན་པ་རྣམས་ཀྱིས་མཁའ་འགྲོ་ཐམས་ཅད་པའི་གཏོར་མ་ཆེན་པོ་བྱེད་པར་འདོད་པས། རྩ་རྒྱུད་ཀྱི་དཀྱིལ་འཁོར་དང་འབྲེལ་ན། དཔལ་རྡོ་རྗེ་མཁའ་འགྲོ་ལས་འབྱུང་བའི་ལུགས་འདི་བྱ་སྟེ། ལཱུ་དྲིལ་ནག་གསུམ་སོགས་ཀུན་དང༌། ཁྱད་པར་དུ་ཡང་ནག་པོ་སྤྱོད་པ་པའི་ལུགས་དང་ཤིན་ཏུ་འབྲེལ་བ་ཡིན་ནོ། །དེ་ཡང་རས་བྲིས་ཀྱི་དཀྱིལ་འཁོར་བྱ་བའམ་རྡུལ་ཚོན་ནམ་ཆུ་ཚོན་གྱིས་ཆོས་འབྱུང་གི་དབུས་སུ་འཁོར་ལོ་རྩིབས་བརྒྱད་པ་རིམ་པ་གསུམ། ཟླུམ་སྐོར་རིམ་པ་གསུམ་ལེ་ཚེ་ཉི་ཤུ་རྩ་བཞི་པ་བྱས་ཀྱང་རུང༌། ཟླུམ་སྐོར་ནང་མའི་དབུས་སུ་རེ་མིག་དགུར་བྱ། དབུས་སུ་དྲི་བཟང་དང་ཁྲག་གིས་ཟླུམ་པོར་བྱ། རེ་མིག་བརྒྱད་ལ་ལྷའི་མདོག་དང་མཐུན་པའམ། སྔོན་པོ་ལྟ་བུ་ཇི་ལྟར་འོས་པའི་ཚོམ་བུ་ལྔ་ལྔ་བཀོད། རེ་མིག་ཉི་ཤུ་རྩ་བཞི་ལ་ཡང་ཚོམ་བུ་གཉིས་
གཉིས་འགོད་དོ། །རྡུལ་མཚོན་གྱིས་བྲི་བ་མ་ལྕོགས་ན་ཁྲག་གམ་ཙནྡན་དམར་པོའི་མཎྜལ་ལམ། ཆོས་འབྱུང་གི་དབུས་སུ་མཎྜལ་ཕལ་པ་ཚོམ་བུ་ཙམ་བཀོད་པས་ཀྱང་རུང་ངོ༌། །རྒྱུན་གྱི་ཉམས་ལེན་ལ་ཤིན་ཏུ་བསྡུ་ན་ཏིང་ངེ་འཛིན་ཁོ་ནས་ཀྱང་རུང་བས། གཏོར་མའི་དཀྱིལ་འཁོར་ཀྱི་ཕྱི་རུ་འདུས་བྱས་པ་མེད་ཀྱང་ཆོག་གོ །གཏོར་མ་གཅིག་ཁོ་ན་ཡིན་ན་མཎྜལ་གྱི་མདུན་དང༌། གཉིས་ཡོད་ན་འདས་གཏོར་མཎྜལ་གྱི་བྱང་ཤར་དང༌། འཇིག་རྟེན་པའི་གཏོར་མ་ཤར་ལྷོར་འགོད། བཞི་ཡོད་ན་ཕྱོགས་བཞི་དང༌། བརྒྱད་ཡོད་ན་ཕྱོགས་མཚམས་དང༌། ལྷ་གྲངས་དང་མཉམ་པ་ཡོད་ན་དེའི་རིམ་པས་འགོད་དོ། །མཆོད་ཡོན་མདུན་དང་མཆོད་པ་གཞན་རྣམས་གཡས་གཡོན་དུ་བཤམས། སྒྲུབ་ཐབས་ལས་འབྱུང་བའི་མཆོད་པ་བྱིན་རླབས་དང༌། གཏོར་མ་བྱིན་རླབས་དང༌། དཀྱིལ་འཁོར་གྱི་འཁོར་ལོ་སྤྱན་འདྲེན་པ་
རྣམས་བྱས་ལ། ཨོཾ་བཛྲ་ཌཱ་ཀ་ཨི་མཾ་བ་ལིཾ་གྲྀཧྞ་གྲྀཧྞ་ཧཱུཾ་ཕཊ། ཨོཾ་ཛཿཧཱུཾ་བཾ་ཧོ་ས་མ་སྟྭཾ་དྲྀ་ཤྱ་ཧོཿ ཞེས་ལན་ལྔ་དང༌། ཨོཾ་ཀ་ར་ཀ་ར༴ སོགས་ལན་གསུམ་གྱིས་ཕུལ། རྡོ་རྗེ་མཁའ་འགྲོའི་དངོས་བསྟན་ལ། ཀྵྨཾ་ཀྵྨཾ། དང་པོར་བྱས་པའི་སྔགས་དེ་ཡོད་ཀྱང༌། རྩ་རྒྱུད་ཀྱི་དཀྱིལ་འཁོར་ལ་སྦྱོར་བའི་ཚེ་དཀྱུས་བཞིན་མཛད་དོ། །ཨརྒྷཾ། ལ་སོགས་པ་དང༌། ནང་མཆོད་དང༌། ཨོཾ་བཱི་ནི་བཛྲ་ཎི་ཧཱུཾ་ཧཱུཾ་ཕཊ། སོགས་རིག་མ་བཅུ་དྲུག་གིས་མཆོད། རྐང་བརྒྱུད་ཀྱི་བསྟོད་པ་དང༌། སྲིད་དང་ཞི་བ། སོགས་ཀྱིས་གསོལ་བ་གདབ། མཎྜལ་བསངས་སྦྱངས། སྟོང་པའི་ངང་ལས་ཧཱུཾ་ལས་བྱུང་བའི་བསྲུང་འཁོར་གྱི་དབུས་སུ། ཧཱུཾ་རྣམས་ལས་བྱུང་བའི་འཇིག་རྟེན་སྐྱོང་བ། ཀྵེ་ཏྲ་པཱ་ལ་བརྒྱད་མཁའ་འགྲོ་སུམ་ཅུ་རྩ་གཉིས་དང་བཅས་པ་དང༌། ཀྵེཾ་རྣམས་ལས་བྱུང་བའི་གནས་བསྲུང་ཞིང་སྐྱོང་ཉི་ཤུ་རྩ་བཞི་རྣམས་འཁོར་དང་བཅས་པ་གྲུབ་པར་གྱུར། རང་གི་སྙིང་ག་ནས་སྤྲོས་པའི་འོད་ཟེར་གྱིས་ཞིང་སྐྱོང་འཁོར་དང་བཅས་པ་ཕེཾ། ཨོཾ་ཤིང་གཅིག་དང་ནི་དུར་ཁྲོད་དང༌། །རི་དང་བྲག་དང་ཕུག་གི་ས། །ཡུལ་གྱི་འདབས་དང་ལམ་དང་。ཞིང༌། །ཁྱད་པར་དུ་ནི་ཁང་སྟོང་དང༌། །སྣོད་དང་ཐང་དང་ས་སྟོང་དང༌། །ཁྱད་པར་ཆུ་ལ་གནས་པ་ཡི། །ནག་པོ་དྲག་པོ་དྲག་ཆེན་པོ། །ལྷས་སྦྱིན་མཉམ་དུ་བརྟེན་པ་དང༌། །ནག་པོ་གཙིགས་དང་འཇིགས་བྱེད་དང༌། །དགའ་ལས་འདས་དང་ལོག་འདྲེན་རྣམས། །རྒན་བྱད་མ་དང་དྲག་མོ་དང༌། །འཇིགས་
བྱེད་ལྷ་མོ་ཨུ་མས་བསྟོད། །རྒྱལ་དང་རྣམ་པར་རྒྱལ་ཉིད་དང༌། །མི་ཐུབ་གཞན་གྱིས་མི་ཐུབ་མ། །ནག་མོ་བཟང་མོ་ནག་ཆེན་མོ། །ནག་སྦོམ་མ་སྟེ་རྣལ་འབྱོར་མ། །དབང་མོ་དང་ནི་ཟླ་བ་མོ། །དྲག་ཏུ་སྡང་དང་འཕྱང་བ་མོ། །བཅུ་གསུམ་དབང་ཕྱུག་མ་དང་ནི། །འཕྲོག་བྱེད་མ་དང་མར་མེ་མ། །འཇིབ་བྱེད་གྲོང་གནས་རྣལ་འབྱོར་མ། །དྲག་མོའི་གཟུགས་ཅན་གཟུགས་ཆེན་མོ། །མཆེ་བ་གཙིགས་དང་ཐོད་ཅན་མ། །ཐོད་ཕྲེང་ཕྲེང་ཅན་ཁ་ཊྭཱཾ་མ། །སྦྲུལ་ཆེན་རལ་གྲི་དགྲ་སྟྭ་ཅན། །རྡོ་རྗེ་དེ་བཞིན་གཞུ་ཅན་མ། །མཁའ་འགྲོ་ལྔ་ཡི་དེ་ཉིད་ཆེ། །ལས་ཀུན་རྗེས་སུ་སྒྲུབ་བྱེད་པ། །སྦྱོར་བའི་དཀྱིལ་འཁོར་རྒྱལ་པོ་ཆེ། །དེ་བཞིན་རྡོ་རྗེ་དབང་ཕྱུག་གཙོ། །དེ་བཞིན་གཤེགས་པའི་སྐུ་ཆེན་ཏེ། །རྡུལ་མེད་རྣལ་འབྱོར་འབྱིན་པ་མོ། །རྡོ་རྗེ་དབང་མོའི་བཀའ་འདི་ཡིས། །ཐམས་ཅད་ཀུན་ནས་འདིར་སྤྱོན་ཅིག །ཨོཾ་ཀཀྐ་དྷ་ན། བབྦྷནྡྷ་ན། ཁཁྑ་ད་ན། སརྦ་དུཥྟཿནཾ་ཧ་ན་ཧ་ན། གྷ་གྷ་གྷ་ཏ་ན། ཆེ་གེ་མོ། ཤིནྟཾ་ཀུ་རུ་ཧཱུཾཧཱུཾ་ཕཊ་ཕཊ་ཛཿསྭཱཧཱ། ཞེས་སྤྱན་དྲངས། སོ་སོའི་གདན་ལ་འཁོད་པ་ནི། དབང་ལྡན་དུ་ནག་པོ་དྲག་པོ་སྐུ་མདོག་དཀར་བ། རྩེ་གསུམ་དང་ཐོད་ཁྲག་འཛིན་པ། རྒན་བྱད་མ་ལ་སོགས་པ་བཞིས་བསྐོར་བ། ཤར་དུ་དྲག་པོ་ཆེན་པོ་སེར་པོ་གླང་པོ་ཆེ་ལ་ཞོན་པ། རྡོ་རྗེ་དང་གདན་ལ་གནོན་པ། རྒྱལ་མ་ལ་སོགས་པ་
བཞིས་བསྐོར་བ། མེར་ལྷས་སྦྱིན་དམར་པོ་ར་སྐྱེས་ལ་ཞོན་པ། ཧོམ་གཟར་དང༌། དབྱུག་གུ་གསུམ་པ་དང༌། བ་དན་དང༌། སྤྱི་བླུགས་འཛིན་པ། ནག་མོ་བཟང་མོ་ལ་སོགས་པ་བཞིས་བསྐོར་བ། ལྷོར་ནག་པོ་སྔོན་པོ་མ་ཧེ་ལ་ཞོན་པ། དབྱུག་པ་དང་མདུང་འཛིན་པ། ཟླ་བ་མོ་ལ་སོགས་པ་བཞིས་བསྐོར་བ། ལྷོ་ནུབ་གཙིགས་བྱེད་སྔོ་ནག་མི་རོ་ལ་ཞོན་པ། རལ་གྲི་དང་ཕུབ་ཆུང་འཛིན་པ། མར་མེ་ལ་སོགས་པ་བཞིས་བསྐོར་བ། ནུབ་ཏུ་མི་སྡུག་པ་དཀར་པོ་ཆུ་སྲིན་ལ་ཞོན་པ། ཞགས་པ་ཐོགས་པ། དྲག་མོའི་གཟུགས་ལ་སོགས་པ་བཞིས་བསྐོར་བ། རླུང་དུ་དགའ་བ་ལས་འདས་པ་ནག་པོ་རི་དྭགས་ལ་ཞོན་པ། བ་དན་ཐོགས་པ། ཐོད་ཕྲེང་མ་ལ་སོགས་པ་བཞིས་བསྐོར་བ། བྱང་དུ་ལོག་འདྲེན་སེར་པོ་གནོད་སྦྱིན་མིའི་གཟུགས་ཅན་ལ་ཞོན་པ། ལྕགས་ཀྱུ་དང་རིན་པོ་ཆེའི་དབྱུག་པ་འཛིན་པ། རལ་གྲི་མ་ལ་སོགས་པ་བཞིས་བསྐོར་བ། གཙོ་བོ་བརྒྱད་པོ་རྣམས་ནི་རང་མཚུངས་ཀྱི་ཡུམ་གྱིས་འཁྱུད་པ། ཕྱག་བཞིའི་འོག་མ་གཉིས་སྤྱི་བོར་ཐལ་མོ་སྦྱར་བས་བཅོམ་ལྡན་འདས་ལ་འདུད་པ། འཁོར་རྣམས་ཐམས་ཅད་རང་རང་གི་གཙོ་བོ་དང་འདྲ་བ་ལས། རལ་གྲི་མ་ལ་སོགས་པ་བཞི་དང༌། ཁ་ཊྭཱཾ་མ་ནི་མིང་དང་མཐུན་པའི་ཕྱག་མཚན་ཅན་དང༌། གཞུ་ཅན་མ་སྙིང་གར་འཁྱུད་རྒྱ་མཛད་པའོ། །དེའི་ཕྱི་རོལ་ཡུལ་ཉི་ཤུ་རྩ་བཞིའི་ངོ་བོ་ཁོར་ཡུག་གསུམ་ལ་ཕྱོགས་གཡོན་བསྐོར་དང་
མཚམས་གཡས་སྐོར་གྱིས་གནས་པ་ནི། དྲག་ཏུ་རྒོད་པར་ཤིང་མཆོག་ཀ་དམ་པ། ཞིང་[འགོས་འགྱུར་དུ། ཡུམ་ཞི་གདོང་དང༌། ཡབ་དྲིལ་ཆེན་དུའང་བཤད།] སྐྱོང་ཞི་གདོང་དྲིལ་བུ་ཆེན་མོར་བཅས། །རྡོ་རྗེ་འཛིན་ཞིང་འཁོར་ལོའི་གདན་ལ་གནས། །ཀོལླ་གི་རིར་རི་རྩེ་ལ་བརྟེན་པའི། །ཞིང་སྐྱོང་མེ་ཞལ་དཔལ་ཆེན་མོ་དང་བཅས། །མི་མགོ་འཛིན་ཞིང་མི་རོའི་གདན་ལ་གནས། །བྷ་ར་ཎ་ཡུལ་ཏཱ་ལའི་ཤིང་ལ་བརྟེན། གཙིགས་[བདེ་བྱེད་མ་དང་སྒྲ་བྱེན་ཟེར།]པ་ཆེན་པོ་སྐྲ་གྱེན་འབར་མར་བཅས། རྩེ་གསུམ་[གཡས་པའི་མཚོན་ཆ་ཟེར།] འཛིན་ཞིང་སིདྡྷི། སིམྦ་ཊི[དངུལ་ཆུའི་གང་བའི་སྣོད།]།དེ་ཝི་ཀོ་ཊི་ར་ཤིང་མཆོག་བཱ་ཊ་ལ། །ལུས་[རྒྱུ་ཅན་ཡང་ཟེར།]ཆེན་པོ་ནི་རྣ་བ་ཆེན་མོར་བཅས། །མདུང་ཐུང་འཛིན་ཞིང་ཡི་དྭགས་གདན་ལ་བཞུགས། །བི་ར་ཛ་ར་ནི་ཨ་མྲ་ལ་བརྟེན་པའི། །ཧ་ཧར་[སྐད་དོད་ཨ་བྷི་ཡོད་ཟེར།]བཞད་པ་ཡུམ་ནི་མེ་འབར་མ། །བ་དན་འཛིན་ཞིང་ཤིང་ལེབ་ལ་གནས་པའོ། །ཨེ་རུཾ་ཌ་རུ་ཀཾརྞྞའི་ཤིང་གི་དྲུང༌། །དྲིལ་བུའི་སྒྲ་ཅན་མེ་ཡི་གདོང་མ་གཉིས། །རྡོ་རྗེ་ཤཀ་[འཕང་མདུང་ཟེར།]ཏི་འཛིན་ཞིང་ཕག་ལ་ཞོན། །སེར་[ཏཏ་ཕུར།]སྐྱའི་གནས་སུ་ཤིང་མཆོག་ཛ་ཊི་[ཏི་ཟེར།]བྱིན་པ་ཆེན་པོ་དམར་སེར་མ་དང་བཅས། །གཏུན་ཤིང་འཛིན་ཞིང་ཡི་དྭགས་གདན་ལ་བཞུགས། །ཨེ་ལའི་གྲོང་དུ་ཨ་པ་ར་ཛི་ཏིའི་ཤིང༌། །གླང་པོའི་
རྣ་བ་སྟོབས་ཆེན་མ་དང་བཅས། །ཞགས་པ་ཐོགས་པས་བོང་བུའི་སྟེང་དུ་བཞུགས། ཁ་ཆེའི་ཡུལ་དུ་རི་བོ་ལ་བརྟེན་པའི། །འཇིགས་[སྦུ་གུའི་བྱིན་པ་ཅན་ཟེར་རྩ་བའི་བྱིན་ཅན་ཡང་ཟེར།]བྱེད་ཆེན་པོ་བ་ལང་རྣ་བ་མ། །ལག་ན་ལྕགས་སྒྲོགས་ནོར་སྦྱིན་གདན་ལ་བཞུགས། །མ་རུང་མྱ་ངམ་ཐང་ལ་བརྟེན་པ་ཡི། །གཙིགས་[རིམ་པ་མོ་ཡང་ཟེར།] པའི་ཞལ་ཅན་འཇིགས་ཞལ་[སྐད་དོད་ག་ཏ་ལ་ཟེར་བ་ཡོད་ཟེར།]མ་ལྷན་ཅིགལྕགས་ཀྱུ་ཞགས་པ་ཐོགས་ཤིང་མ་ཧེ་ཞོན། །སྤ་ཤིང་ལྡུམ་ར་ལ་བརྟེན་ན་ག་རར། །མཆེ་[སྤུའི་བྱིན་པ།] གཙིགས་ཆེན་པོ་རོ་ལངས་ཅན་མར་བཅས། །ཐོང་གཤོལ་འཛིན་ཞིང་མི་མགོའི་གདན་ལ་བཞུགས། །པུཎྜ་ཝེརྡྷར་ཨ་ཤྭད་ཐ་ཡི་དྲུང༌། །བུམ་པའི་འབྲས་བུ་ཅན་དང་ཙ་[ཀུམྦྷ་ཎྜི་ཟེར།]མུཎྜཱི་ཁ་ཊྭཱཾ་ག་འཛིན་མི་རོའི་གདན་ལ་འགྱིང༌། །ཛ་ཡནྟི་རུ་ཁང་པ་བརྩེགས་པ་ལ། །རལ་[འུག་གདོང་མ་]པ་གསུམ་པ་བཞིན་མཛེས་[བཞིན་དངས་མ་ཟེར།] མ་དང་བཅས། །ལུག་རྒྱུད་འཛིན་ཞིང་ཀེང་རུས་ལ་གནས་པ། པྲེ་ཏ་པུ་པྲཥྟ་པུ་ང་ཟེར་བའང་ཡོད། རི་ར་ཨུ་དཱུཾ་བ་ར་ལ། །འཇིགས་པར་བྱེད་པ་གློག་གི་[དྲིལ་བུའི་སྒྲ་ཟེར་འུག་གདོང་ཡང་ཟེར།] གདོང་མར་བཅས། །གཞལ་ཡས་ཁང་གནས་དབྱུག་པ་མདུང་ཐུང་འཛིན། །སུ་བ་རར་ནི་ཤལ་མ་ལི་ཡི་ནགས། །ཀུན་མཛེས་དང་ནི་མེ་ལྕེའི་གདོང་མ་གཉིས། །ཤ་ཆེན་ཕུང་པོར་གྲི་གུག་མདུང་
ཐུང་འཛིན། །ཙཱ་རི་ཏྲ་རུ་ཀ་རཉྫ་ཤིང་ལ། །དྲིལ་བུ་ཆེན་པོ་ཀ་རཉྫར་གནས་མ། །མདུང་ཐུང་འཛིན་ཞིང་འཇམ་འབྲས་སྡོང་པོར་གནས། །ཨོ་ཊྱན་[ཨོ་ཏྲེ་ཡང་ཟེར།] ཡུལ་དུ་མྱ་ངན་མེད་པའི་ཤིང༌། །ཞིང་སྐྱོང་[དྲག་པོ་སྟོབས་ཆེན།] སྒྲ་ཅན་ཡུམ་ནི་ལྷ་ཆེན་མོ། །རྡོ་རྗེ་ལྕགས་སྒྲོག་འཛིན་ཞིང་འདྲེ་བདུད་མནན། །ཛ་ལན་དྷ་རར་གསེར་ཤིང་ལ་བརྟེན་པའི། །ཞིང་སྐྱོང་བསྐྱེད་[མིག་སྐྱེས་ཡང་ཟེར།] པ་ཞེས་བྱ་གཏུམ་མོར་བཅས། །གྲི་གུག་འཛིན་ཞིང་མི་[བདུད་མནན་པར་བྱས་ཀྱང་ཆོག]རོ་ཞབས་ཀྱིས་མནན། །ཀྵི་ར་ཀ་རུ་སཱ་ལའི་ཤིང་སྡོང་ལ། །རི་རབ་ཆེན་པོ་འཇིག་རྟེན་མ་མོར་བཅས། །རལ་གྲི་འཕྱར་ཞིང་མེ་དཔུང་ལ་གནས་པ། །མཱ་ཡ་པུ་རིར་ཤཱ་ཥོ་ཊ་ཤིང་དྲུང༌། །ཞིང་སྐྱོང་འཇིགས་པ་འདོད་པ་མོ་དང་བཅས། །མི་རོའི་ཕུང་པོར་རྡོ་རྗེ་ཤཀ་ཏི་འཛིན། །ཨམྦྲཻ་ཀ་ཡུལ་དེ་བ་[དྷཱ་དྲི་ཟེར།] ད་རུ་ལ། །བརྟུལ་ཞུགས་ཆེན་པོ་སྲུལ་མོ་དང་ལྷན་ཅིག།ཐོང་གཤོལ་ག་ཡ་[ག་དའི་དབྱུག་པ་ཟེར་ཐོར་བ་དང་དབྱུག་པའང་ཟེར།] འཛིན་ཞིང་སེང་གེ་ཞོན། །རྒྱལ་པོའི་ཁབ་ཏུ་ནེ་ལི[ད་ལི་ཀ་ཟེར་ལྷ་རྟེན་གྱི་ཤིང་གཅིག་ཡིན་ཟེར་]ཀེ་ཤིང་ལ། རྒ་བ་ཆེན་པོ་མི་སྡུག་མ་དང་བཅས། །རྡོ་རྗེ་ལྕགས་ཀྱུ་འཛིན་ཞིང་འཁོར་ལོར་གནས། །བོད་ཡུལ་བྲག་གི་ཕུག་ལ་བརྟེན་པ་ཡི། །ཞིང་སྐྱོང་ལོངས་སྤྱོད་ལྷན་ཅིག་སྐྱེས་མར་བཅས། །
ཆུ་སྲིན་རྒྱལ་མཚན་འཛིན་ཞིང་ཡི་དྭགས་མནན། །མཱ་ལ་བར་ནི་སྦྲང་རྩིའི་ཤིང་གི་དྲུང༌། །སྣ་[སྐྱེས་པའི་ཟེར་]ཚོགས་དབང་ཕྱུག་དབང་བསྐུར་མ་དང་བཅས། །རོ་གདན་ལ་བཞུགས་རྡོ་རྗེ་ཐོ་བ་འཛིན། །ཀུན་ཀྱང་ལས་དང་མཐུན་པའི་ཉམས་འགྱུར་དང༌། །རྒྱན་དང་ན་བཟའ་ཁ་དོག་འོད་ཟེར་འབར། །ཡང་ན་ཕྱོགས་དང་མཐུན་པའི་ཁ་དོག་བཅས། །འབྱུང་པོའི་ཚོགས་རྣམས་ཀུན་གྱིས་བསྐོར་བར་འགྱུར། །ཡུལ་ཉི་ཤུ་རྩ་བཞིའི་བདག་ཉིད་འཁོར་ལོའི་རྩིབས་སམ་རེ་མིག་སོ་སོ་ལ་བཞུགས་པའོ། །ཨརྒྷཾ། ནས། ཤཔྟའི་བར་གྱིས་མཆོད། སུམྦྷའི་མཐར། ཨོཾ་སརྦ་ཀྵེ་ཏྲ་པཱ་ལ་ས་པ་རི་ཝ་ར་ས་མ་ཡ་སྟྭཾ། ཞེས་དམ་ལ་བཞག ཞིང་སྐྱོང་ཐམས་ཅད་ལ་ལྷན་ཅིག་ཏུ་གཏོར་མ་འབུལ་ཏེ། ལག་པ་གཡོན་གཏོར་སྣོད་སྙིང་གར་འཛིན་ཚུལ་དང༌། གཡས་སྡིགས་མཛུབ་གཏོར་མ་ལ་བསྟན་ཏེ། ཨོཾ་བྷ་ཀྵ་བྷ་ཀྵ་སརྦ་ཡོ་ག་ཡོ་གི་ཤྭ་རཱི་ཧཱུཾ་ཧཱུཾ་ཛཿསྭཱཧཱ། ཞེས་པ་བདུན་ལ་སོགས་པས་འབུལ། མན་རྙེ་ལས་འདི་ཡེ་ཤེས་དབང་ཕྱུག་མ་ཁོ་ནས་གཏོར་སྔགས་སུ་བཤད་པ་ནི་སཾ་པུ་ཊ་དང་རང་རྐང་གི་དབང་དུ་བྱས་པའོ། །ཨོཾ་བཛྲ་ཏིཥྛ་བྷ་ཀྵ་བྷ་ཀྵ་ཛཿསྭཱཧཱ། ཞེས་པས་ཀྱང་ལྷ་གྲངས་དང་མཉམ་པ་སོགས་ལན་མང་དུ་འབུལ་ཞིང༌། མཐར། ཨོཾ་ཁ་ཁ། ནས། ས་ཧཱ་ཡི་ཀ་བྷ་ཝནྟུ་ཧཱུཾ་ཧཱུཾ་ཕཊ་སྭཱཧཱའི་བར་མཁའ་འགྲོ་སྤྱི་གཏོར་གྱི་སྔགས་ལན་གསུམ་ནས་བདུན་གྱི་བར་དུ་ཕུལ། ཨརྒྷཾ། ནས། ཤཔྟའི་བར་གྱིས་ཕྱི་མཆོད་དང་འབྲུ་གསུམ་གྱི་ནང་མཆོད་ཕུལ། སྤྲོ་ན་ཞབས་བསིལ་ཕྱག་ཕྱིས་སོ་རྩི་སོགས་མཆོད་པ་གཞན་
ཡང་མང་དུ་བསྟབས། གང་ལྟར་ཡང་མཐར་རོལ་མོའི་སྒྲ་དང་བཅས་ཏེ། ཨོཾ་ཤིང་གཅིག་དང་ནི། ནས། གོས་མེད་སྦྱོར་བ་སྐྱེད་བྱེད་མ། །རྡོ་རྗེ་དབང་མོ་འཁོར་དང་བཅས། །ཉི་ཤུ་རྩ་བཞིའི་ཞིང་རྣམས་ལ། །རབ་དགས་ཞིང་སྐྱོང་རིག་མར་བཅས། །བཞི་བཅུ་རྩ་བརྒྱད་འབྱུང་པོ་ཡི། །ཚོགས་དང་བཅས་པ་ཐམས་ཅད་དང༌། །ལྷའི་ཚོགས་རྣམས་མ་ལུས་དང་ཞེས་པ་ནས། ཡིད་ལ་འདོད་པ་ཀུན་འགྲུབ་ཤོག།ཅེས་པའི་བར་བརྗོད། ལས་སོ་སོའི་དམིགས་བསལ་ཡོད་ན་ལས་ལ་བསྐུལ་བ་ཡང་བྱས་ཏེ་གཏོར་མ་ཕྱིར་བཏང་ངོ༌། །ཡིག་བརྒྱ་བཟླས། མ་འབྱོར་པ་དང༌། སོགས་བཟོད་པར་གསོལ། ཨོཾ་ཁྱོད་ཀྱིས་སེམས་ཅན། སོགས་ཀྱི་མཐར། གཡོན་རྡོ་རྗེ་ཁུ་ཚུར་སྙིང་གར་བཞགགཡས་ས་ལ་རེག་སྟེ། ཨོཾ་ཨཏྨ་ཏིཥྛ་ཧཱུཾ་སྭཱཧཱ། ཞེས་བརྗོད། ཨོཾ་ཡོ་ག་ཤུདྡྷ་སརྦ་དྷརྨཿཡོ་ག་ཤུདྡྷོ་྅ཧཾ། རྣམ་ལྔ་འདོད་སྐོར་བྱ། ཨོཾ་སརྦ་དུཥྟ་གྲྀཧྞ་གྲྀཧྣ་གཙྪ་ཧཱུཾ་ཕཊ། བཛྲ་མུཿ ཞེས་འཇིག་རྟེན་པ་རྣམས་གཤེགས། དཀྱིལ་འཁོར་པ་བདག་ལ་བསྡུའོ། །དེ་ནས་བདག་བསྲུང་བ་དང༌། མཚམས་རྔམ་དང་བསྟོད་པ་རྣམས་བྱ་ཞིང༌། སྨོན་ལམ་གདབ། བཀྲ་ཤིས་ཀྱང་བྱའོ། །ཡང་ནག་པོ་དྲག་པོ་ལ་སོགས་པ་ཁོ་ན་བཀོད་ན། འཇིག་རྟེན་སྐྱོང་བའི་གཏོར་མ་ཞེས་བྱ་ཞིང༌། ཞིང་སྐྱོང་ཉེར་བཞི་ཁོ་ན་བཀོད་ན་གནས་སྲུང་གིས་གཏོར་མ་ཞེས་བྱ་ལ། དེ་གཉིས་སྡོམ་པ་ནི། མཁའ་འགྲོ་སྤྱི་གཏོར་རྒྱས་པའམ། ཞིང་སྐྱོང་གི་གཏོར་ཆོག་ཆེན་མོ་ཞེས་བྱའོ། །ཡང་ཧཱུཾ་མཛད་འབྱུང་པོ་འདུལ་བ་གཙོ་བོར་
བྱས་པའི་གཏོར་མའི་དཀྱིལ་འཁོར་རྒྱས་པ་འབྱུང་པོ་ཐམས་ཅད་པའི་གཏོར་ཆོག་ཆེན་པོར་གྲགས་པ་གཞན་ཡང་ཡོད་པ། རེ་ཞིག་འདིར་མ་བྲིས་ཏེ་ལོགས་སུ་འབྲི་བར་བྱའོ། །ཞེས་པ་དཔལ་འཁོར་ལོ་སྡོམ་པའི་ཆོ་གའི་ཡན་ལག་ཏུ་མཁོ་བ་འདི་ནི། རྡོ་རྗེ་མཁའ་འགྲོའི་རྒྱུད་ལས་འབྱུང་བ་ལྟར། གཏོར་ཆོག་མདོ་ཙམ་སྨོས་པ་སྟེ། འདི་ཡང་རྒྱལ་ཁམས་པ་ཏཱ་ར་ནཱ་ཐས་ངེས་པར་བརྗོད་པའོ།། །།འདིར་སྔར་གྱི་གཏོར་དཔེ་དང་ངག་སྒྲོས་ཙམ་ལ་མ་བཞག་པར། རྡོ་རྗེ་མཁའ་འགྲོ་རྩ་འགྲེལ་འགྱུར་མི་གཅིག་པ་གསུམ་དང༌། མཁའ་འགྲོ་རྒྱ་མཚོའི་འདི་སྐོར་གྱི་རྩ་འགྲེལ་དང༌། མན་རྙེ་སོགས་ལ་ཞིབ་ཏུ་བརྟགས་ཏེ་ཞུས་དག་ཀྱང་བྱས་པའོ། །བཀྲ་ཤིས། དགེའོ། དགེའོ། དགེའོ།། །།