གྲུབ་ཆེན་ཛཱ་ལནྡྷ་རའི་དོ་ཧའི་འགྲེལ་པ་གསང་བའི་མཛོད
གྲུབ་ཆེན་ཛཱ་ལནྡྷ་རའི་དོ་ཧའི་འགྲེལ་པ་གསང་བའི་མཛོད་ཅེས་བྱ་བ་བཞུགས།
ན་མོ་བཛྲ་ཨཱ་ཙཪྱ་མཎྜ་ལ་ཨ་དྷི་པ་ཏ་ཡེ། གྲུབ་ཆེན་ཛཱ་ལནྡྷ་རའི་དོ་ཧའི་འགྲེལ་བ་གསང་བའི་མཛོད་ཅེས་བྱ་བ། བླ་མ་དམ་པ་རྣམས་ལ་ཕྱག་འཚལ་ལོ། །དཔལ་ལྡན་བླ་མེད་ཡེ་ཤེས་ཆེན་པོའི་དངོས། །མ་ལུས་ཆོས་རྣམས་ཐམས་ཅད་མངོན་སུམ་མཛད། །མཐའ་ཡས་འགྲོ་བ་ཀུན་གྱི་སྐྱབས་གཅིག་པོ། །དཔལ་ལྡན་རྡོ་རྗེ་སློབ་དཔོན་མཆོག་ལ་འདུད། །བདེ་ཆེན་མཚར་སྡུག་ལང་ཚོ་རྒྱས་པའི་སྐུ་ནི་མཚན་དཔེའི་རྒྱན་གྱིས་སྤྲས། །ཡན་ལག་དྲུག་ཅུའི་གླུ་དབྱངས་རྔ་ཟླུམ་སྒྲས་བོས་སྲིད་གསུམ་ཀུན་གྱིས་བཏུད། །སྒྱུ་འཕྲུལ་རོལ་པ་བརྒྱ་ཡིས་ཞི་བའི་དཀྱིལ་འཁོར་ངོ་མཚར་སྟོན་མཁས་པ། །ཟུང་འཇུག་ཟློས་གར་རྩེན་པའི་ཁྱབ་བདག་བདག་གི་སྙིང་ལ་འཇུག་གྱུར་ཅིག། ཟབ་མོའི་མཐར་ཐུག་ཟབ་དང་རྒྱ་ཆེ་བ། །སེམས་དཔའ་ཀུན་གྱིས་སེམས་པར་བྱ་བའི་དོན། །ཟུང་འཇུག་ལས་ཀྱང་ཟུང་གི་ཆོས་སྟོན་པ། །བླ་མེད་ཐེག་པ་བླ་མའི་སྙིང་པོ་མཆོག །གྲུབ་པ་ཀུན་གྱི་གཙུག་གི་བསྟེན་གྱུར་པ། །གྲུབ་མཆོག་གསུང་ནི་ལུང་དང་རིགས་པ་ཡིས། །
གྲུབ་གྱུར་འདི་ནི་མཆོག་ཏུ་རྟོན་པའི་གནས། །གྲུབ་བརྙེས་གཞུང་འདི་བདག་གིས་རབ་བཤད་བྱ། །ངེས་པའི་དོན་ནི་ཚིག་གི་ཡུལ་མིན་ཡང༌། །ཡང་དག་འདོམས་མཛད་རྣམས་ཀྱི་གསུང་པའི་དོན། །དོན་མཆོག་རྣམས་ལ་ཅུང་ཟད་ངེས་པ་རྙེད། །རྙེད་བཞིན་ཕན་པའི་སེམས་ཀྱིས་དེང་འདིར་བྲིས། །མན་ངག་ཐོབ་པ་མ་ཡིན་ཞིང༌། །རྒྱུད་སྡེར་རིང་དུ་མ་སྦྱངས་པ། །གཞུང་གཞན་དག་གི་རྒྱས་བཀབ་ནས། །རང་བཟོར་འཆད་ཅིང་བདག་ཉིད་སྒྲོག །མན་ངག་ཇི་བཞིན་ལེགས་རྟོགས་པས། །མདོ་རྒྱུད་ཀུན་ལ་ངེས་སྟེར་ཞིང༌། །རྟོག་གེས་མ་བསླད་རིགས་ཚུལ་ལ། །ལེགས་པར་ཞུགས་འདི་ཡ་མཚན་ནོ། །དེ་ལ་ཕན་པ་དང་བདེ་བ་མ་ལུས་པ་ངེས་པར་དམ་པའི་ཆོས་ལ་བརྟེན་པ་ཡིན་ཅིང༌། དམ་པའི་ཆོས་ཐམས་ཅད་ཀྱི་རབ་དང་ཕུལ་དང་གཙོ་བོ་དང་མཆོག་དང་གྱ་ནོམ་པ་ནི། རྣལ་འབྱོར་བླ་ན་མེད་པའི་ལམ་རྣམས་ཡིན་ལ།
ལམ་དེའི་སྙིང་པོ་ནི་བདེ་སྟོང་གཉིས་སུ་མེད་པ་ལྷན་ཅིག་སྐྱེས་པའི་ཡེ་ཤེས་ཡིན་ཏེ། དེ་ནི་གཞུང་འདིས་ཤིན་དུ་གསལ་བར་མཛད་དོ། །དེ་ལ་འདི་མཛད་པ་པོ་ནི། གྲུབ་པ་བརྙེས་པ་དུ་མས་ཞབས་ལ་བཏུད་པའི་གྲུབ་ཆེན་ཛཱ་ལནྡྷ་རི་པ་ཡིན་ནོ། །འདི་འཆད་པ་ལ་སྤྱི་དོན་དང་གཞུང་དོན་གཉིས་ལས། དང་པོ་ནི། འདི་ཉིད་ཀྱི་བླ་མ་བརྒྱུད་པ་རྣམས་ཀྱིས། གཅིག་ནས་གཅིག་ཏུ་བརྒྱུད་པའི་གསུང་ལས་ཇི་ལྟར་འབྱུང་བའི་མངོན་པར་རྟོགས་པའི་རིམ་པ་ནི་འདི་ལྟར། དང་པོར་རིགས་ལ་གནས་པའི་ཆོས་ལ་མོས་པ་སྐྱེ་བར་འགྱུར་ཞིང༌། མོས་པས་བླ་མ་བསྟེན་པར་འགྱུར་ལ། དེ་ལས་གདམ་ངག་མནོས་སྟེ་ལམ་སྒོམས་པས། འབྲས་བུ་སྐུ་དང་ཡེ་ཤེས་ཟུང་དུ་འཇུག་པ་ཐོབ་པར་འགྱུར་རོ། །དེས་ན་འདི་ལྟར་བྱ་སྟེ། རིགས་དང་མོས་པ་དང༌། བླ་མ་བསྟེན་པ་དང༌། གདམ་ངག་ནོད་པ་དང༌། སྒོམ་བྱ་ལམ་དང༌། སྐུ་དང་ཡེ་ཤེས་ཟུང་དུ་འཇུག་པ་སྟེ་དྲུག་ལས། དང་པོ་རིགས་ལ། རིགས་ཀྱི་ངོ་བོ་དང༌། རིགས་ཐ་དད་པ་དང༌། རྡོ་རྗེ་ཐེག་པའི་རིགས་ངེས་པ་དང༌། མ་ངེས་པ་དང༌། མཆོག་དང་དམན་པ་རྣམས་སོ། །དེ་ལ་དང་པོ་ནི། སེམས་ཀྱི་རྒྱུན་ཀུན་གཞི་ཡེ་ཤེས་རྣམ་པར་ཤེས་པའི་ཚོགས་དང་བཅས་པ་རླུང་སེམས་ཙམ་གྱི་སྣང་བའི་ཡིད་ལུས་དང་ཟུང་དུ་འཇུག་པའོ། །གཉིས་པ་ནི། ཇི་སྐད་དུ། ཁམས་རྣམས་དང་ནི་མོས་པ་དང༌། །སྒྲུབ་པ་ཐ་དད་དབྱེ་བ་དང༌། །འབྲས་བུ་ཐ་དད་དམིགས་པའི་ཕྱིར། །རིགས་ཡོད་ཉིད་དུ་ངེས་པར་བརྗོད། །ཅེས་གསུངས་པ་ལྟར་ཡིན་པས། འདིར་ཐེག་པ་ཆེན་པོ་ལ། རྒྱུ་འབྲས་ཀྱི་ཐེག་པའི་རིགས་གཉིས་སུ་དབྱེ་བར་བྱའོ། ། གསུམ་པ་དང་བཞི་པ་ནི། ཡང་དག་པར་བླངས་པའི་རིགས་ཀྱི་རབ་ཏུ་ཕྱེ་བ་ཡིན་ཏེ། དེ་ལ་རིགས་ངེས་པ་ནི། ཁྱད་པར་བཞི་དང་ལྡན་པ་སྟེ། རྒྱུའི་ཁྱད་པར་སྔགས་ཀྱི་ཐེག་
པར་སྨོན་ལམ་བཏབ་པ། ངོ་བོ་ཁྱད་པར་དབང་སྐུར་བ་སོགས་དགེ་བས་གསོས་བཏབ་པའི་བདེ་བར་གཤེགས་པའི་ཁམས་འཕེལ་བའི་ཆ། ལས་ཀྱི་ཁྱད་པར་ལམ་ལ་འདུན་ཅིང་རྩོལ་བ། རྣམ་པའམ་འཛིན་སྟངས་ཀྱི་ཁྱད་པར་སེམས་ཅན་ཐམས་ཅད་སངས་རྒྱས་ལ་ཆེས་མྱུར་བར་འགོད་པའི་སེམས་བསྐྱེད་དང་འབྲེལ་བ་ཡིན་ལ། གཞན་རྣམས་ནི་མ་ངེས་པ་ཡིན་ནོ། །ལྔ་པ་ནི་ཁྱད་པར་བཞི་ལས། དང་པོའི་སྐབས་སུ་བདེ་ཆེན་ལྷན་ཅིག་སྐྱེས་པའི་ཐེག་པར་ཞེས་དང༌། གསུམ་པའི་སྐབས། ཟུང་འཇུག་གི་ལམ་ལ་འདུན་ཅིང་ཞེས་འདོན་པ་སྤོས་པས་རུང་ངོ༌། །དྲུག་པ་ལ་ནི། སྔར་གྱི་ཁྱད་པར་བཞི་ལྡན་ཙམ་པོ་སྟེ། མཆོག་མ་ཡིན་པ་རྣམས་དང༌། ཁྱད་པར་བཞིར་མ་ཚང་བ་གཅིག་ལྡན་ལ་སོགས་པའོ། །གཉིས་པ་མོས་པ་ལ། མོས་པ་ཆུང་ངུ་དང༌། འབྲིང་དང༌། ཆེན་པོ་དང༌། རབ་དང༌། མཆོག་རབ་དང༌། བླ་ན་མེད་པ་སྟེ་དྲུག་ལས། དང་པོ་འཇིག་རྟེན་པའི་དགེ་བ་དང༌། ཐེག་པ་དམན་པ་གཉིས་ལ་འདུན་པའི་ལས་ཅན་ཏེ། ལས་དང་འབྲས་བུ་རྣམས་དང་ཐར་པའི་ཕན་ཡོན་ལ་ཡིད་ཆེས་པ་ལས་བྱུང་བ། སྙིང་སྟོབས་དང་ཤེས་རབ་དམན་པའི་གྲོགས་དང་ལྡན་པའོ། །གཉིས་པ་ནི། འགྲོ་བ་སྒྲོལ་བར་འདོད་པ་དང༌། ཐེག་པ་མཆོག་ལ་ཡིད་ཆེས་པ་ལས་བྱུང་བ། རང་གཞན་མཉམ་པ་ཉིད་དུ་རྟོགས་པའི་ཤེས་རབ་དང༌། གཞན་དོན་གྱི་སྙིང་སྟོབས་འབྲིང་གི་གྲོགས་ཅན་བླ་ན་མེད་པའི་བྱང་ཆུབ་ལ་དད་པའོ། །གསུམ་པ་ནི། གཞན་རྣམས་དེ་ཉིད་དང་འདྲ་བ་ལས། རིག་པ་འཛིན་པའི་ཐེག་པའི་ཡོན་ཏན་མཐོང་ནས། དེར་སྨོན་ལམ་བཏབ་པའི་རྒྱུས་འགྲོ་བ་རྣམས་མྱུར་དུ་སྒྲོལ་བའི་འདུན་པས་སད་པ་ཞེས་རྒྱུའི་སྐབས་སུ་སྦྱར་བར་
བྱའོ། །བཞི་པ་ནི། ཕལ་ཆེར་དེ་ཉིད་དང་འདྲ་བ་ལས། དུས་ཤིན་ཏུ་མྱུར་བ་ཞེས་དང༌། སྡུག་བསྔལ་དང་ཀུན་འབྱུང་འཕྲལ་དུ་འགོག་པར་འདུན་ལས་བྱུང་བ། དག་པའི་གསལ་སྣང་དང་འབྲེལ་བ་ཞེས་ལྷག་པོར་སྦྱར་རོ། །ལྔ་པ་ནི། བདེ་བ་ཆེན་པོའི་སྡོམ་པ་དང་འབྲེལ་བ་བླ་མེད་བྱང་ཆུབ་ལ་འཕྲལ་དུ་འདུན་པ་མཚན་མེད་ཀྱི་ཤེས་རབ་དང་བདེ་ཆེན་གྱི་དགའ་བའི་གྲོགས་ཅན་ནོ། །དྲུག་པ་བླ་ན་མེད་པའི་དད་པ་ནི། རང་ལམ་དང་ཚོགས་སྦྱོར་གྱི་འབྲས་བུ་མངོན་ཏུ་གྱུར་པའི་ཡིད་ཆེས་སྒོམ་བྱུང་དང༌། སངས་རྒྱས་མང་པོ་ལས་དངོས་སུ་གདམ་ངག་ནོད་པའི་ཐོས་པའི་ཤེས་རབ་ཀྱི་རྒྱུ་ཅན། མཚན་མེད་སྤྲོས་བྲལ་མངོན་སུམ་དུ་རྟོགས་པའི་ཤེས་རབ་ཀྱིས་འགྲོ་བ་ཀུན་སྟོང་བ་ཉིད་ལ་འཇུག་པ་ལམ་དང་བཅས་པ་ལ་མོས་ཤིང་འདུན་པའོ། །གསུམ་པ་ཡོངས་སུ་འཛིན་པའི་བླ་མ་རྣམ་པ་གསུམ་སྟེ་རྐྱེན་གྱི་བླ་མ་རྡོ་རྗེ་སློབ་དཔོན། རྒྱུའི་བླ་མ་ལམ་གྱི་ཡེ་ཤེས། ལྷན་ཅིག་བྱེད་པའི་བླ་མ་ཕྱག་རྒྱ་རྣམ་གསུམ། དེ་གསུམ་ག་ལ། ངོ་བོ། དབྱེ་བ། བསྟེན་ཚུལ་གསུམ་གསུམ་དུ་དབྱེའོ། །དང་པོའི་ངོ་བོ་ནི། རྡོ་རྗེ་ཐེག་པའི་ལམ་ལ་སློབ་མ་འགོད་པར་མཛད་པའོ། །དབྱེ་བ་ནི། ལས་དང་པོའི་སྐབས་རྣལ་འབྱོར་ཅན་གྱི་བླ་མ་དང༌། བརྟན་པ་ཅུང་ཟད་ཐོབ་ནས་འདོད་པའི་ལྷའི་རྣམ་པ་རང་སེམས་གྱི་སྣང་བ་དང༌། བརྟན་པ་ཐོབ་ནས་གནས་གསུམ་གྱི་མཁའ་འགྲོ་མ་སྤྲུལ་པའི་སྐུ་དང༌། བརྟན་པ་ཆེར་ཐོབ་ནས་སྤྲུལ་པའི་སྐུ་དངོས་དང་ལོངས་སྤྱོད་རྫོགས་པའི་སྐུ་ཡིན་ལ། དེའི་དང་པོ་ལ། དམ་ཚིག་བཟླས་པ་སྦྱིན་པ་དང༌། །འཆད་བྱེད་མན་ངག་སྟོན་པ་དང༌། །དབང་བསྐུར་བ་དང་ལས་བྱེད་པ། །ཞེས་པ་ལྟར་དྲུག་གོ །དེ་དག་ཀྱང་རྒྱས་པར་རྒྱུད་ལས་འབྱུང་བ་ལྟར་སྐྱོན་སྤང་ཤིང་ཡོན་ཏན་
དང་ལྡན་པར་ཤེས་པར་བྱའོ། །བསྟེན་ཚུལ་ནི་རྒྱས་པར་གཞན་དུ་གོ་བར་བྱ་བས་འདིར་མ་བཀོད་དོ། །གཉིས་པའི་ངོ་བོ་ནི། གོང་མའི་ཡེ་ཤེས་གསལ་བར་མཚོན་པའི་མཐུ་ཅན་ནོ། དབྱེ་བ་ནི། དང་པོའི་བླ་མ་ཞེས་པ་བསྐྱེད་རིམ་ཤིན་ཏུ་མཐར་ཐུག་པའི་ཡེ་ཤེས་དང༌། ལྷན་ཅིག་སྐྱེས་པའི་བླ་མ་ཞེས་པ་རྫོགས་རིམ་དངོས་གཞིའི་ཞུ་བདེ་སྐད་ཅིག་མ་དང་པོ་དང༌། བདེ་ཆེན་གྱི་བླ་མ་ཞེས་པ་ཕྱག་ཆེན་ལས་ཐོབ་པའི་ཞུ་བདེ་མཐོང་ལམ་གྱི་སྐད་ཅིག་མ་རེ་རེའི་སྔ་ལོགས་སུ་འབྱུང་བ་དེའོ། །ངེས་པར་འབྱིན་པའི་བླ་མ་ཞེས་པ། ས་འོག་མ་ནས་གོང་མར་འཕར་བའི་དུས་ཀྱི་འོག་སའི་ཡེ་ཤེས་ཡན་ལག་བདུན་ལྡན་ནོ། །བསྟེན་ཚུལ་ནི། ལམ་དེ་ཉིད་དང་རྒྱུ་ཚོགས་ཀྱི་རིགས་མཐུན་རྣམས་གོམས་པར་བྱེད་པ་ཡིན་ནོ། །གསུམ་པའི་ངོ་བོ་ནི། ཞུ་བདེའི་ཐུན་མོང་མ་ཡིན་པའི་རྒྱུའོ། །དབྱེ་བ་ནི། ལམ་དང་ཡེ་ཤེས་དང་ཕྱག་རྒྱ་ཆེན་མོའོ། །ཡེ་ཤེས་ལ་དམ་ཚིག་གི་ཕྱག་རྒྱ་དང༌། བརྟགས་པའི་རིག་མའོ། །ཕྱག་ཆེན་ལ། རྣམ་བཅས་དང་རྣམ་མེད་གཉིས་སོ། །དངོས་བཏགས་མ་ཕྱེ་བར་དེ་ཀུན་ལ་དང་པོར་བདེ་བ་སྦྱིན་པ་དབང་གི་དུས་དང་སྨིན་བྱེད་ཀྱི་ཕྱག་རྒྱ་བསྐྱེད་རིམ་པའི་སྐབས་དང༌། ཞུ་བདེ་འབྲས་བུར་བྱེད་པ་རྫོགས་རིམ་དངོས་གཞི་མ་ཐོབ་བར་དང༌། རང་བཞིན་གྱི་བདེ་བ་འབྲས་བུར་བྱེད་པ་རྫོགས་རིམ་དངོས་གཞི་ཐོབ་པའི་སོ་སྐྱེའི་ལམ་དང༌། སྤྲོས་བྲལ་རྣམ་པའི་ཕྱག་རྒྱ་འཕགས་པའི་ལམ་དུ་འབྱུང་བ་རྣམས་སོ། །ཇི་ལྟར་བསྟེན་པའི་ཚུལ་ནི། དེ་སྐད་དུ། ཕྱག་རྒྱ་སྒོམ་པའི་དོན་དུ་གསུངས་ཏེ་ཉིན་མཚན་དུས་སུ་ཆགས་པ་ཟད་པའི་དོན་དུ་མིན་པ་ཉིད། ཅེས་པ་ལྟར་འཛག་མེད་ཀྱི་བདེ་བའི་དོན་དུ་འདོད་ཆགས་སྟོང་པ་ཉིད་དང་བསྲེ་ཞིང་སྒོམ་
པ་ཡིན་ནོ། །བཞི་པ་གདམ་ངག་ལ། དབང་བསྐུར་བ་ལ་གདམས་པ། དམ་ཚིག་ལ་གདམས་པ། བརྟུལ་ཞུགས་ལ་གདམས་པ། གཡོ་མེད་ལ་གདམས་པ། ཟུང་འཇུག་ལ་གདམས་པ། ཉེ་རྒྱུ་ལ་གདམས་པ། ལྟོས་མེད་ལ་གདམས་པ། རང་ཉིད་ལ་གདམས་པ། འབྲས་བུ་ལ་གདམས་པ། ཆ་རྐྱེན་ལ་གདམས་པ་སྟེ་བཅུ་ལས། དང་པོ་ནི། དབང་བསྐུར་བ། འཁོར་གསུམ་མི་དམིགས་པར་སློབ་དཔོན་གྱིས་གདམས་པའོ། །གཉིས་པ་ནི། དགག་སྒྲུབ་ཀྱི་དམ་ཚིག་ཐམས་ཅད་ལ། འཁོར་གསུམ་རང་བཞིན་མེད་པར་རྟོགས་པའི་ཤེས་རབ་དམིགས་པ་མེད་པའི་ཚུལ་གྱིས་འཇུག་པའོ། །གསུམ་པ་ནི། ལུས་ངག་ཡིད་གསུམ་གྱི་བརྟུལ་ཞུགས་མཚན་བཅས་དང་མཚན་མེད་གང་ལ་ཡང་དམིགས་པ་མེད་པའི་ཚུལ་གྱིས་ཆེར་འཛིན་མི་བྱེད་པར་གདམས་པའོ། །བཞི་པ་ནི་སྒོ་གསུམ་གྱི་བྱ་བ་རྣམས་ལ་དམིགས་གཏད་ཞིག་པའི་སྟོང་ཉིད་རྟོགས་པའི་ཤེས་རབ་བདེ་ཆེན་ལྷ་སྐུར་འདྲེས་པས་སྤྱོད་པའོ། །ལྔ་པ་ནི། བདེ་བ་ཆེན་པོ་ལ། སྤྲོས་བྲལ་གྱི་སྟོང་ཉིད་ཀྱི་རྣམ་པ་ཅན་གྱི་དམིགས་ནས་སྒོམ་ཞིང༌། སྟོང་པ་ལ་བདེ་བས་དམིགས་པ་དང༌། གཉིས་ཀ་ཟུང་དུ་འཇུག་པ་ནའང་མཚན་མ་མེད་པར་སྒོམ་པར་བྱའོ། །དྲུག་པ་ནི། རང་དང༌། ཕྱག་རྒྱ་དང༌། བདེ་བ་དང༌། དབང་བསྐུར་བ་བཞི་ཀའང་མཉམ་པ་ཉིད་དུ་སྤྱོད་པའོ། །བདུན་པ་ནི། སྒོ་གསུམ་གྱི་ལོངས་སྤྱོད་ཐམས་ཅད་ལ། རེ་དོགས་ཀྱི་རྩིས་གང་བ་མེད་པ་དང༌། རང་བཞིན་མེད་པ་དང༌། མ་ཆགས་བཞིན་དུ་ཆོ་གའི་སྦྱོར་བ་དང་བཅས་པ་དམིགས་པ་མེད་པར་སྤྱོད་པའོ། །བརྒྱད་པ་ནི། རྣམ་པ་ཐམས་ཅད་དུ་བདག་རང་བཞིན་མི་དམིགས་པ་དང༌། ཀུན་རྫོབ་ཏུ་འགྲོ་བའི་དོན་དུ་བྱང་ཆུབ་ལ་བརྩོན་པ་དང༌། གཞིའི་བྱ་བ་དང་ལམ་ཐམས་ཅད་ཀྱིས་རང་ཉིད་
མཚོན་པར་བྱེད་པའོ། །དགུ་པ་ནི། ཐོབ་བྱ་དང་ཐོབ་བྱེད་བྱང་ཆུབ་མི་དམིགས་བཞིན་དུ་ཐོབ་པར་འདོད་པའི་ཚུལ་སྒོམ་པ་སྟེ་འབྲས་བུ་རང་བཞིན་མེད་བཞིན་དུ་རང་བཞིན་ཡོན་ཏན་ཐམས་ཅད་དང་ལྡན་པ་ལ་མི་དམིགས་པའི་ཚུལ་གྱི་འདུན་པར་བྱེད་པ་ཡིན་ནོ། །བཅུ་པ་ནི། མངོན་པར་ཤེས་པ་སོགས་གཞན་དོན་སྒྲུབ་པའི་ཆ་རྐྱེན་རྣམས་དང་བདུད་དང་ཉོན་མོངས་པ་ལ་སོགས་པའི་བར་ཆད་ཐམས་ཅད་ལ་རང་བཞིན་མེད་པར་ཤེས་བཞིན་དུ་རང་གཞན་གྱི་དོན་སྤྱོད་པ་ཡིན་ནོ། །ལྔ་པ་སྒོམ་བྱ་ལམ་ལ། ལས་ཀྱི་གཞི་དང༌། རྐྱང་པ་སྒོམ་པ་དང༌། བསྡུས་སྒོམ་དང༌། བསྡུས་སྒོམ་རབ་དུ་གྱུར་པ་རྣམས་སོ། །དང་པོ་ནི། ལམ་གང་དང་གང་ལ་ཇི་སྲིད་སེམས་བརྟན་པར་མ་གྱུར་གྱི་བར་ནན་ཏན་དུ་སྒོམ་པ་ཡིན་ནོ། །གཉིས་པ་ནི། བསྐྱེད་རིམ་དང༌། རྫོགས་རིམ་གྱི་རིམ་པ་སོ་སོར་ཡང་སྔར་གང་གོམས་པ་དེ་ཉིད་བརྟན་པའི་ཕྱིར་སྒོམ་པ་ཡིན་ནོ། །གསུམ་པ་ནི། རིམ་པ་གཉིས་དང༌། རྫོགས་རིམ་གྱིའང་རྩ་རླུང་ཐིག་ལེའི་སེམས་གྱི་རྣལ་འབྱོར་རྣམས་ཡན་ལག་བདུན་ལྡན་གྱི་རྣམ་པ་ཅན་དུ་ཕན་ཚུན་རྒྱས་གདབ་ཅིང་ཕྱོགས་གཅིག་ཏུ་སྒོམ་པ་རྩོལ་བས་འཇུག་པའི་བར་དུ་ཡིན་ནོ། །བཞི་པ་ནི། རྩོལ་མེད་དུ་འཇུག་ཅིང་རྣམ་རྟོག་ཤིན་ཏུ་ནུབ་པས་རྒྱས་གདབ་མེད་པར་རྫོགས་རིམ་ཡན་ལག་བདུན་ལྡན་ཁོ་ནར་སྣང་བ་ཡིན་ནོ། །འདིར་ལམ་གྱི་ངོ་བོ་དེ་ཉིད་བཅུ་བཞི་དང༌། རྡོ་རྗེ་གསུམ་དང༌། ཡན་ལག་དྲུག་དང་ཁ་སྦྱོར་བདུན་དང༌། ཆེད་དུ་བྱ་བ་བཞི་ལ་སོགས་པའོ། །དྲུག་པ་ལ་སྐུ་དང་ཡེ་ཤེས་གཉིས་ལས། སྐུ་ལ་གཞི་དུས་དང༌། བསྐྱེད་རིམ་པའི་སྐབས་དང༌། རྫོགས་རིམ་དངོས་མ་ཐོབ་པ་དང༌། ཐོབ་པ་དང༌། འཕགས་པའི་ལམ་དང༌། མཐར་ཐུག་གི་སྐབས་རྣམས་སོ། །དེ་དག་རེ་རེ་ལ་ཡང༌།
སྐུ་བཞི་དང༌། རྡོ་རྗེ་བཞི་དང༌། སྐུ་བཅུ་དྲུག་རྣམས་སུ་དབྱེ་བར་བྱ་སྟེ། གཞི་ལ་ཇི་ལྟར་གནས་པ། ལམ་སྔ་མ་སྔ་མས་སྨིན་ཅིང་ཕྱི་མ་ཕྱི་མ་སྒོམ་པས་ཇེ་བཟང་དུ་སོང་སྟེ་འབྲས་བུ་མངོན་དུ་གྱུར་པ་ཡིན་ནོ། །ཡེ་ཤེས་ནི་དེ་ཁོ་ན་ཉིད་བདུན་ཏེ། ཟབ་པ་དང༌། རྒྱ་ཆེ་བ་དང༌། ཁྱབ་པ་དང༌། རྟག་པ་དང༌། བདེ་བ་དང༌། ཡེ་ཤེས་ཀྱི་སྐུ་དང༌། ཟུང་འཇུག་སྟེ་བདུན་པོ་དེ་དག་ལ་ཡན་ལག་བཞི་བཅུ་རྩ་གཉིས་དང༌། དེ་ཀུན་ལ་ལམ་གྱི་རིམ་པ་ནི། རྡོ་རྗེ་འཆང་བླ་མའི་ཞལ་སྔ་ནས༌། འཇིག་རྟེན་འཇིག་རྟེན་འདས་པའི་དབང༌། །བློ་ལྡན་བསྐྱེད་དང་རྫོགས་འབྱུང་བར། །སངས་རྒྱས་འདི་བཞིན་དེ་ཉིད་བདུན། །འབད་དེ་སྒོམ་པར་བྱའོ་ཀྱེ། །ཞེས་བཀའ་སྩལ་ཏེ། སྐུ་དང་ཡེ་ཤེས་ཀྱི་རྣམ་པར་གཞག་པ་ཞིབ་པར་གཞན་དུ་གཏན་ལ་དབབ་པར་བྱའོ། །གཞུང་བཟང་རྨད་བྱུང་བདུད་རྩའི་རྒྱ་མཚོ་ཆེར། །བླ་མ་དམ་པའི་མན་ངག་ལྷུན་པོ་དང༌། །རྣམ་དཔྱོད་ནོར་རྒྱས་བསྲུབ་ཐག་ལེགས་སྦྱར་བས། །མི་ཤེས་མུན་སེལ་བདུད་རྩིའི་འོད་འདི་བྱུང༌། །ཉི་ཟླའི་ལམ་ལས་གྱ་གྱུ་འགྲོ་མཁས་པ། །བཅུ་གཉིས་འཕོ་བའི་སྦྱིན་སྐྱེས་དཔུང་གི་ཚོགས། །སྒྲ་གཅན་ཁྱིམ་དུ་མཐར་བྱེད་དགའ་སྟོན་བྱས། །གང་འདིར་སྲིད་གསུམ་གཡུལ་ལས་རྒྱལ་འདི་མཚར། །གཉིས་པ་གཞུང་གི་དོན་ནི། གཞུང་འདི་ཉིད་གླུའི་རྒྱུད་སོ་སོར་དོན་ཚན་རྣམས་ཁྲིགས་སུ་མ་མཛད་པར་སྤེལ་མར་བཤད་ཅིང༌། གླུའི་རྒྱུད་རེ་རེར་ཡང་ལམ་ཆ་ཚང་བ་རེ་སྟོན། དེ་ཡང་དང་པོས་མདོར་བསྟན། ལྷག་མ་གསུམ་གྱིས་རྒྱས་པར་བཤད་ཅེས་བླ་མའི་ཞལ་སྔ་ནས་བཞེད་ཅིང་དང་པོས་ལམ་གྱི་རྐང་རྣམས་བསྟན། གཉིས་པས་མ་ཚང་བ་ཁ་སྐོང༌། གསུམ་པས་མན་ངག་གི་གནད་གཅེས་པ་རྣམས་སྟོན། བཞི་པས་དོགས་པ་གཅོད་པ་ཡིན་ཞེས་ཤར་ཕྱོགས་པས་གསུང་ངོ༌། །འོན་ཀྱང་འདི་
ལྟར་བཤད་ན་ལེགས་པ་ཡིན་ཏེ། དེ་ལ་མདོར་བསྟན་པ་དང་རྒྱས་པར་བཤད་པ་གཉིས་ལས། དང་པོ་ནི༌། ཚིགས་བཅད་གཅིག་སྟེ། རང་བཞིན་རྣམ་པར་དག་པ་ཉིད། དག་མ་དག་གི་གནས་སྐབས་ཐམས་ཅད་དུ་ཚུལ་སྣ་ཚོགས་སུ་འཆར་ཡང་འགྱུར་བ་མེད་པ་ཉིད་དོ་ཞེས་སྟོན་པ་ནི། ཨ་རེ་ཧོ་ཞེས་ངོ་མཚར་བའི་ཚིག་སྟེ། གང་ལ་ན་རི་རྒྱལ་ལྷུན་པོ་དང༌། རྒྱ་མཚོ་གླིང་བཞི་ཉི་ཟླ་དང་བཅས་པའི་སྣོད་བཅུད་ཐམས་ཅད་རང་བཞིན་གྱི་དག་པ་ལའོ། ཇི་ལྟར་ན། ཡ་མཚན་དཔལ་ཏེ། བློ་གྲོས་དམན་པ་དག་གི་བློར་མི་ཆུད་ཅིང༌། འགལ་པ་ལྟར་སྣང་ཡང་མི་འགལ་པ་དང༌། བསམ་གྱིས་མི་ཁྱབ་པའི་ཚུལ་གྱིས་ཡ་མཚན་ཅིང༌། རང་གཞན་གྱི་དོན་སྒྲུབ་པའི་དཔལ་ནི་གཞིའི་དུས་སུ། འཁོར་བའི་ཆོས་ཐམས་ཅད་དང༌། ལམ་དུས་སུ་དག་ལམ་དག་གི་སྣང་བ་ཐམས་ཅད་དང༌། འབྲས་བུའི་དུས་རྟེན་བརྟེན་པའི་དཀྱིལ་འཁོར་གཞན་དང་གཞན་དུ་བསྒྱུར་ཡང༌། ངོ་བོ་ཉོན་སྒྲིབ་དག་ཅིང༌། ཤེས་སྒྲིབ་རྣམ་པར་དག་ལ། གློ་བུར་གྱི་དྲི་མ་མེད་ཅིང་གདོད་མ་ནས་སྒྲིབ་པ་དང་བྲལ་བའི་ཡེ་ཤེས་ཀྱི་སྐུ་སེམས་ཀྱི་རང་བཞིན་ནམ་ཡང་འགྱུར་བ་མེད་པ་ནའོ། །སུ་ཞིག་དུས་ནམ་གྱི་ཚེ་ཞེ་ན། ཆོས་ཉིད་རྟོགས་པ་དེང་ནས་ཛཱ་ལནྡྷ་ར་པ་ང་ཡིས་ངོ་མཚར་ཤིན་དུ་ཆེ་བར་མཐོང་ཞེས་སྦྱར་རོ། སྐབས་འདིར་སེམས་ཀྱི་སྟེང་གི་གཉིས་སྣང་སྲབས་པ་ལས་ལམ་གྱི་ཡེ་ཤེས་ཀྱི་སྐུ་དང༌། དག་པ་ལས་འབྲས་བུའི་ཡེ་ཤེས་ཀྱི་སྐུ་འགྲུབ་ཅིང༌། སེམས་རང་བཞིན་གྱི་གཉིས་སྣང་དུ་མ་སྐྱེས་ཤིང༌། ངོ་བོ་ལ་སྔ་ཕྱིར་འགྱུར་བ་བསྟན་པ་མེད་དོ་ཞེས་པ་ནི་གྲུབ་པའི་མཐའ་འོ། །གཉིས་པ་ལ། ལམ་གྱི་སྤྱིའི་འགྲོས་དང་དེ་དག་གི་མཐའ་ཞིབ་མོར་དཔྱད་པ་ལམ་སྒྲུབ་པར་གདམས་པ་གསུམ་ལས། དང་པོ་ལ། བསྐྱེད་རིམ་བཤད་པ་དང༌། རྫོགས་རིམ་
བཤད་པ། དང་པོ་ནི། ཚིགས་བཅད་གཅིག་སྟེ། ཐིག་ལེའི་རྣལ་འབྱོར་དང༌། ཕྲ་མོའི་རྣལ་འབྱོར་ཡེ་ཤེས་ལ་དབང་བའི་སྐབས་ཀྱི་གསལ་སྣང་རབ་འབྱམས་མཆེད་པ་ཡང༌། རྣམ་རྟོག་གི་རབ་ཏུ་བཏགས་པའི་དཀྱིལ་འཁོར་ཏེ། དེའི་ངོ་བོ་ནི་བུད་མེད་དེ། ཕྱག་རྒྱའི་སྦྱོར་བ་ལས། ཧཱུཾ་ཡིག་སོགས་ཀྱི་ཐིག་ལེ་ནོར་བུར་བཀག་པས། རྣམ་རྟོག་ཞི་བར་བྱེད་པས། གཉིད་དང་མཚུངས་པའི་བདེ་བས་མྱོས་པ་སད་པའི་ཚེ། བདེ་བའི་སེམས་དེ། དབང་པོའི་གཞུ་དང་འདྲ་བའི་ལྷ་སྐུར་ཤར་བས། སྣང་བ་ཐམས་ཅད་གང་བ། སེམས་ལྷའི་གཟུགས་སུ་ཤར་བ་དེ་ཡང༌། དངོས་པོ་མེད་པར་རྟོགས་པའི་ཤེས་རབ་དང་རོ་ཅིག་ཏུ་སྒོམས་པའི་གསལ་སྣང་ངོ༌། །འདི་དངོས་རྟོག་མེད་ཡིན་ནའང༌། ཉེ་བའི་རྒྱུ་རྟོག་པ་ཡིན་པས་རབ་བཏགས་ཞེས་གསུང༌། གཉིས་པ་ལ། ཡེ་ཤེས་ཀྱི་སྐུ་རྒྱུ་དང་བཅས་པ་དང་བདེ་ཆེན་རྒྱུ་དང་བཅས་པ་གཉིས་ལས། དང་པོ་ལ། བསྐྱེད་རིམ་རྐྱང་པས་འགྲུབ་པ་བཀག ཡེ་ཤེས་ཀྱི་སྐུའི་ངོ་བོ་དང་ཉེར་ལེན་བསྟན། སྐུ་སྒྲུབ་བྱེད་ཀྱི་ཐབས་གཏུམ་མོ་དང༌། རྩ་རླུང་ཐིག་ལེའི་ངེས་དོན་ནོ། །དང་པོ་ལ། ཟླ་བ་དང༌། ཡི་གེ་ས་བོན་དང་མཚོན་ཆ་སྟེ་ཕྱག་མཚན་རྣམས་ལས་བསྐྱེད་ཅིང་བྱུང་བའི་ཁ་དོག་དང་དབྱིབས་སུ་རྣམ་པར་བརྟགས་པའི་ལྷའི་སྐུ་དེ་ཡིས་ནི། རྫོགས་པའི་སངས་རྒྱས་ཀྱི་ཡེ་ཤེས་སྒྲུབས་ཀྱང༌། བསྐྱེད་རིམ་རྐྱང་པ་དེས་བསྐལ་པ་མཐའ་ཡས་པར་འབད་ཀྱང་དེས་ཐོབ་པ་མ་ཡིན་ནོ། །རྣམ་རྟོག་གི་བཅོས་མའི་རང་བཞིན་དཀྱིལ་འཁོར་དེ་ནི་ཆོས་ཅན་བསྐལ་པར་སྒོམས་ཀྱང་ཡེ་ཤེས་ཀྱི་སྐུ་མི་ཐོབ་སྟེ། རྣམ་པར་རྟོག་པས་ཉམས་པ་སྟེ་མི་རྟོག་པའི་ཡེ་ཤེས་ལ་སྒྲིབ་པའི་ཕྱིར་ན། འབྲས་བུ་ཡང་གཞན་ལ། རྒྱུ་ཡང་གཞན་དུ་རྩོལ་བའི་ཕྱིར། འབྲས་ས་ལུ་པ་འདོད་པས། ཀོ་ཊ་པའི་སྙེ་མ་སྲུང་བའི་ངལ་བ་བཞིན་ནོ། །གཉིས་པ་ནི་རྒྱུ་དང་ངོ་བོ་གཉིས་
ལས། ཉེར་ལེན་གྱི་རྒྱུ་ནི། རླུང་སེམས་ཙམ་གྱི་རང་ལུས་ཏེ། ལུས་ཀྱང་སེམས་ཀྱི་སྣང་བ་ཡིན་པའི་ཕྱིར། ངོ་བོ་གཅིག་པས་ན། ཡེ་ཤེས་ཀྱི་སྐུའི་སྒྲུབ་གཞི་སེམས་ཡིན་པའི་ཆ་ཁོ་ན་ནས་ནན་གྱི་འཇོག་པ་ཚེགས་ཆེ་ཞིང་དོན་ཆུང་བས་ལུས་ཀྱི་ཆ་ནས་འཇོག་པ་ལེགས་སོ། །དེ་ལྟ་བུའི་རང་ལུས་དེ་ནི་ལྷ་ཉིད་དེ། དེ་ཡང་དེ་ཧ་བྷ་བ་ཞེས་པའི་སྒྲ་ལས་དྲངས་ན་ལུས་ལས་བྱུང་བ་དང་ལུས་འབྱུང་བ་གཉིས་ཀ་ལ་འཇུག་པས། རགས་པའི་ལུས་ལ་གནས་པ། ཁམས་ཕྲ་བ་ཐིམ་པ་ལ་སོགས་པའི་རྐྱེན་གྱི་མངོན་པར་གསལ་བར་འབྱུང་བ་དང༌། ལུས་སེམས་གྱི་འབྲེལ་བའི་བག་ཆགས་ཀྱི་སྣང་བ་དེ་ལུས་གསར་པ་ལེན་པའི་ཉེར་ལེན་དུ་འགྱུར་བའི་དོན་ནོ། །ཡང་གཅིག་དུ་ན། བཞིན་ལག་ཁ་དོག་རྣམ་པ་ནི། །སྐྱེས་པ་ཙམ་གྱི་རྣམ་པར་གནས། །ཞེས་པ་ལྟར། རླུང་སེམས་ཀྱི་ལུས་ཞལ་ཕྱག་སོགས་ལྷ་སྐུའི་རིགས་སུ་རང་བཞིན་གྱི་གནས་པའི་དོན་ཡང་ཡིན་ཞེས་གསུང༌། དེའི་རྣམ་པ་ཇི་ལྟར་འཆར་བའི་ཚུལ་ནི། ཡུལ་དུས་ཐམས་ཅད་དུ་སྣ་ཚོགས་པའི་དངོས་པོ་ཐམས་ཅད་ཀྱི་རྣམ་པར་འཆར་ཞིང༌། རྒྱུན་ཆད་པ་མེད་པས་རྟག་པ་ཡིན་ལ་རྒྱུན་གྱི་རྟག་པའི་ཕྱིར། རྡུལ་ཕྲ་རབ་ལས་གྲུབ་པ་མ་ཡིན་ལ། ཡིད་རྣམ་རྟོག་གིས་བསྒོམས་པ་ལས་ཡོངས་སུ་འདས་པ། དེ་ལྟ་བུའི་རྣམ་པ་ཀུན་གྱི་མཆོག་དང་ལྡན་པའི་སྟོང་པ་ཉིད་འདི་ནི་ཀུན་རྫོབ་ཀྱི་དངོས་པོ་ཀུན་རབ་དུ་བྲལ་ཡང༌། དངོས་པོ་ལས་གཞན་པ་མ་ཡིན་ཏེ། ཀུན་རྫོབ་ནི་རང་བཞིན་མེད་པའི་སྟོང་པ། ཇི་སྐད་དུ། གང་ལ་སྟོང་པ་ཉིད་རུང་བ། །དེ་ལ་ཐམས་ཅད་རུང་བ་ཡིན། །ཞེས་པ་ལྟར། གཞི་དང་འབྲས་བུའི་ཆོས་སྣ་ཚོགས་པར་འཆར་བའོ། །དེ་ཉིད་དུས་ནམ་ཞིག་གི་ཚེ་མངོན་དུ་འགྱུར་ཞེ་ན་ནམ་ཞིག་ཀུན་ཏུ་གསལ་བ་སྟེ་མངོན་པར་བྱང་ཆུབ་པའི་དུས་སུ་མངོན་དུ་
བྱེད་ཅིང༌། ཆ་ཤས་ནི་ས་དང་པོའི་རྗེས་ཐོབ་དང༌། རླུང་དྷུ་ཏིར་ཐིམ་པའི་ནུས་པ་མཐར་ཕྱིན་པའི་སྐབས་ཞིག་ཏུ་སོ་སོ་སྐྱེ་བོས་ཀྱང་རྗེས་སུ་མཐུན་པ་མངོན་དུ་བྱེད་དེ། དེ་ཡང་ཀུན་ཏུ་གསལ་བ་ཞེས་པ་ནི། བདེ་སྟོང་གི་ཤེས་པས་སྣང་བ་ཀུན་སྒྱུ་མ་ལྟར་གསལ་བར་རྟོགས་པའི་དོན་ཡིན་ནོ། །གསུམ་པ་ནི། སྟོང་པ་ཉིད་ནི་གཏུམ་མོ་སྟེ། དེ་ཡང༌། ཙཎྜ་ལཱི་ཞེས་པའི་སྒྲ་ལས་དྲངས་ན། ཙཎྜི་ཁྲོ་བ་ལའོ་ཞེས་པའི་བྱིངས་དང༌། ཨ་ལི་ཀ་ཕྱུགས་ལ་འཇུག་པས། ཕྱུགས་དང་འདྲ་བའི་རྣམ་རྟོག་ལ་ཁྲོ་ཞིང་མཐར་བྱེད་པ་སྟེ། གང་མཉམ་པར་བཞག་པས་ཀུན་རྟོག་དྲུང་ནས་འབྱིན་པ་ངེས་དོན་གྱི་གཏུམ་མོ་ནི་མཐའ་བྲལ་སྟོང་པ་ཉིད་ཡིན་ལ། དེ་ཡང་ལྟེ་བར་གནད་དུ་བསྣུན་པའི་ཁྱད་པར་ལས་དེ་རྟོགས་པའི་ཐབས་སུ་འགྱུར་བའི་ཕྱིར། སྟོང་ཉིད་དེ་ལྟེ་བའི་མེ་ཡིན་ཞེས་བྱ་ལ། སྟོང་ཉིད་དེ་ཡང་རྣམ་བཅས་གཙོ་ཆེ་བ་ཡིན་ཞིང༌། བདེ་སྟོང་གིས་འཁོར་བ་དང༌། རྣམ་བཅས་དེས་མྱ་ངན་ལས་འདས་པ་ཟབ་སྟེ་འགོག་ཅིང༌། གཏུམ་མོ་དེ་ཉིད་ཡང་དག་པའི་མཐའ་དང་དེ་བཞིན་ཉིད་ཅེས་བྱའོ། །འདིར་འཕགས་ཡུལ་བ་ཁ་ཅིག་ལྟེ་བའི་མེ་སྟོང་ཉིད་ཀྱི་རང་བཞིན་ཞེས་འཆད་པ་ནུས་པ་ཆུང་ཞིང༌། སྲིད་འདས་ཀྱི་མཐའ་གཉིས་གཡས་གཡོན་གྱི་ལམ་ལ་འཆད་པ་མ་འབྲེལ་ཞེས་གུ་རུ་ལྷོ་ཕྱོགས་པས་གསུང༌། རྩ་སོགས་ཀྱི་ངེས་དོན་ནི་རྐང་པ་དྲུག་སྟེ། རྩ་ནི་ཤིང་ལྟ་བུ་སྦུབས་ཅན་དང༌། ཁམས་ནི་བཅུད་དེ་ཁུ་ཁྲག་ལ་སོགས་པ་དང༌། རླུང་ནི་ཤོར་རླུང་ལྟ་བུ་སྟེ་ཡང་བའི་ཁམས་སུ་ལྟ་བ་དེ་དག་ནི། རྨོངས་པ་བ་ལང་བཞིན་ཏེ། འཁྲུལ་ལ། རྗེ་བཽ་དམ་པ་བླ་མའི་དྲིན་གྱིས་ཡེ་ཤེས་འབར་བ་ང་ནི་འདི་སྐད་སྨྲ་སྟེ། དེ་ལ་རྩ་ནི་ནཱ་ཌ་ཞེས་པའི་སྒྲ་ལས་དྲངས་ན་རྒྱུན་མ་ཆད་པ་ལ་འཇུག་པས། སེམས་སྔ་མ་དང་ཕྱི་མར་རང་
བཞིན་འགྱུར་བ་མི་བརྟན་པ་སྟེ་དེ་ཉིད་རྩ་ཐམས་ཅད་ཀུན་འདར་དུ་དག་པའི་ལག་རྗེས་ཡིན་ལ། དེའི་ཕྱིར་ངེས་པའི་དོན་གྱི་རྩའི་དེ་ཉིད་དུ་བསྟན་ནོ། །དེ་ལ་རྩ་རྣམས་དྷཱུ་ཏཱིར་དག་པའི་དོན་ནི་རྩའི་ཁམས་རགས་པ་ཐམས་ཅད་ཕྲ་བར་ཐིམ་སྟེ། དེ་ཡང་སྟོང་པ་ཉིད་ལ་རབ་ཏུ་ཞུགས་པའི་དོན་ཡིན་ཅིང༌། རྩ་དང་ཁམས་དང་རླུང་འབྱུང་ལུས་སུ་སྣང་བའི་གཉིས་སྣང་གི་བག་ཆགས་ཟད་ནས་ཡེ་ཤེས་ཉིད་དཀྱིལ་འཁོར་དུ་སྣང་བ་ནི། དེ་རྣམས་གནས་གྱུར་པའི་དོན་ཡིན་ནོ། །དེ་ལྟ་ན་གཡོ་བ་མེད་པ་ནི་རྒྱུན་མ་ཆད་པ་སྟེ་ངེས་དོན་གྱི་རྩ་དང༌། སྔ་ཕྱིར་འགྱུར་བ་མེད་པ་དེའི་དབུས་སྟེ་རང་བཞིན་དེའི་ངང་ནས་དཔེ་མེད་པའི་བདེ་བ་སྟེ། ལྷན་ཅིག་སྐྱེས་པའི་བདེ་བར་གནས་པ་ནི། ཁམས་ཐམས་ཅད་འོད་གསལ་དུ་ཞུགས་པ་ལས་མངོན་དུ་འགྱུར་བའི་ཕྱིར། ངེས་པའི་དོན་གྱི་ཁམས་ཀྱི་དེ་ཁོ་ན་ཉིད་དང༌། བསྐྱོད་པ་མེད་པ་སྟེ་རང་བཞིན་མི་འགྱུར་བ་ལས་ཕྱོགས་རྣམས་ཀུན་ཏུ་འགྲོ་བ་སྟེ་ཡུལ་དྲུག་པོ་ཀུན་ལ་སེམས་གཡོ་བའི་ཆ་ནི་རླུང་དང༌། དེ་ཡོངས་སུ་དག་པ་ངེས་དོན་དུ་རླུང་གི་དེ་ཉིད་ཡིན་ཅིང༌། ཆོས་ཀྱི་སྐུ་སྟོང་པ་ཉིད་ལས་བསྐྱོད་པ་མེད་པར་ཡེ་ཤེས་ཀྱི་སྣང་བ་ཕྱོགས་དུས་ཀུན་ཏུ་འགྲོ་བ་རླུང་དག་པའི་ལག་རྗེས་ཡིན་ཏེ་འབྲས་བུ་ལ་སྦྱར་རོ། །དོན་དམ་པའི་སེམས་ནི་ཁ་ཕྱིར་ལྟའི་རྣམ་ཤེས་རྣམས་དང༌། གཉིས་སྣང་ལ། སྒྲོ་འདོགས་པའི་སེམས་བྱུང་རྣམས་དང་ཉོན་ཡིད་རྣམས་མ་ཡིན་ལ། ཀུན་གཞི་ཡང་བག་ཆགས་ཀྱི་བརྟེན་གནས་གྱུར་པ། དྲི་མའི་ཆ་དག་པས་ནམ་མཁའ་བཞིན་གནས་པ་གཉིས་སུ་སྣང་བས་བསམ་དུ་མེད་པ། དངོས་པོ་ཀུན་ཏུ་རང་བཞིན་མེད་པའི་ཚུལ་གྱིས་ཡེ་ཤེས་ཀྱི་སྣང་བ་འཇུག་པ་སྟེ་དོན་དམ་པའི་འོད་
གསལ་ལོ། །དེ་ལྟར་ན་རྩ་རླུང་ཐིག་ལེ་ཐིམ་པའི་སེམས་འོད་གསལ་ནི་ཡེ་ཤེས་ཀྱི་སྐུའི་རྒྱུའོ། །གཉིས་པ་བདེ་བ་ཆེན་པོ་རྒྱུ་བཅས་བཤད་པ་ལ། ཞུ་བདེ་དངོས་སུ་འཛིན་ཚུལ་དེ་ཉིད་དོན་དམ་པའི་ལྷན་སྐྱེས་མ་ཡིན་པར་སྟོན་པ། ལྷན་སྐྱེས་སྒྲུབ་པའི་རྐྱེན། ལྷན་སྐྱེས་དངོས་བཤད་པ་བཞི་ལས། དང་པོ་ནི། ཚངས་པའི་མེ་སྟེ། གསང་བའི་གཏུམ་མོ། རྡུལ་གྱི་ཁམས་དབུ་མར་འབར་བས། སྤྱི་བོའི་རི་བོང་འཛིན་པ་སྟེ། བྱང་ཆུབ་ཀྱི་སེམས་ཞུ་བ་དབུ་མའི་ནང་ནས་བབས་པ་ལས། ལྟེ་བ་མན་ཆད་དུ་ཕྱིན་པའི་ཚ། ལྷན་ཅིག་སྐྱེས་པའི་དགའ་བ་བླ་ན་མེད་པ་རྣམ་པར་རྒྱས་པ་སྟེ། དབང་བཞིའི་བདེ་བ་ཡས་བབས་ཀྱི་རིམ་པ་རྫོགས་པར་འགྱུར་ལ། གཏུམ་མོའི་མེ་དེ་ཉིད་ཀྱི་སྟོབས་ཀྱིས་ཞུ་བའི་ཁུ་བ་མ་ལུས་པ་སྤྱི་བོར་འཕངས་ནས་ཐམས་ཅད་ལ་ཁྱབ་པར་གྱུར་བའི་མས་བརྟན་ལྷན་སྐྱེས་གྱི་བདེ་བ་ནི་ཞུ་བདེ་གཞན་གོང་ན་མེད་པས་བླ་ན་མེད་པ་སྟེ་དེ་ལ་ཚད་བཟུང་བ་དང་ངག་གི་བརྗོད་དུ་ཡོད་པ་མ་ཡིན་ནོ། ཕྱི་ནང་གི་སྲོག་རྩོལ་གང་ལས་ཞུ་བདེ་འདྲེན་ཀྱང་ཚུལ་འདི་ཚང་བ་ཡིན་ནོ། །གཉིས་པ་ནི། དགོད་པ་དང་གཉིས་སྤྲོད་འཁྲིག་པ་ལ་སོགས་པ་སྡུག་བསྔལ་མི་བཟད་པ་ནི་དུས་མཐའ་མེད་པའི་བར་དུ་བྱུང་བའི་རྒྱུར་གྱུར་པ་ཡིན་ཏེ། བག་ཆགས་དེའི་སྟོབས་ཀྱིས་ཡང་སྲིད་ལེན་པར་བྱེད་དོ། །དེའི་ཕྱིར་སྟོང་པ་དང་སྦྱོར་བ་མེད་པའི་ཞུ་བདེ་དེ་ལ་ཐབས་ཤེས་གཉིས་མེད་ཀྱི་རྣལ་འབྱོར་དོན་དམ་པའི་བདེ་བ་ཞེས་འཁྲུལ་བ་ནི་བློ་གྲོས་ངན་པ་ཡིན་ཏེ། དེ་དོན་དམ་ལྷན་སྐྱེས་བདེ་ཆེན་དེ་ཡི་ཉེར་ལེན་གྱི་རྒྱུ་ཡིན་པ་ལ་བསམ་ན་ནི་མི་འཐད་ལ། དེ་ཉིད་དངོས་ནི། དེ་བས་ཀྱང་མ་ཡིན་ནོ། གློ་བུར་བ་གཡོ་བའི་སེམས་ལས་སྐྱེས་པའི་རང་བཞིན་བདེ་བ་ཆེན་པོ་གཡོ་མེད་ག་ལ་ཡོད་དེ་མེད་ལ། གློ་བུར་ལས་
རང་བཞིན་འབྱུང་བ་དང༌། གཡོ་བ་ལས་གཡོ་མེད་འབྱུང་ན་ནི་ཉེར་ལེན་གྱི་རྒྱུའི་རྣམ་གཞག་རྣམ་པར་འཁྲུལ་ཞིང༌། མོ་གཤམ་ལས་སྐྱེས་པའི་སྐྱེས་བུ་མཁས་པ་དེ་ལྟ་བུ་ནི་ཨ་ཧོ་རྨད་དུ་བྱུང་ངོ་ཞེས་མི་རིགས་པར་བརྗོད་པའོ། །ནམ་མཁའི་མེ་ཏོག་ཡ་མཚན་ཅན་ལྟར་རང་བཞིན་དང་བཅོས་མའི་གཞི་མཐུན་པ་འདི་ལྟ་བུ་སུ་ཡིས་མཐོང་སྟེ་མ་མཐོང་ལ། དེ་བཞིན་དུ་གཡོ་བའི་བདེ་བ་ཡང་ཡིན་ལ། རང་བཞིན་བདེ་ཆེན་ཡང་ཡིན་པ། མྱོང་བ་དང་མྱོང་བར་འགྱུར་བའི་སྐྱེས་བུ་དེ་གང་གློ་བུར་དང་རང་བཞིན། གཡོ་བ་དང་མི་གཡོ་བ་གཞི་མཐུན་པ་མེད་དེ། འགལ་བ་མ་འཁྲུལ་བ་མི་སྲིད་པའི་ཕྱིར་རོ། །དེ་ལྟར་ཡང༌། བྲམ་ཟེ་ཆེན་པོས། དེ་ལྟར་ཡིན་ཏེ་དེ་ནི་མ་ཡིན་ནོ། །གྲོགས་པོ་ཕག་དང་གླང་པོ་ལྟོས། །ཞེས་གསུངས་སོ། དེའི་ཕྱིར་གང་དག་བདེ་ཆེན་སྟོང་པར་འཆར་བ་མེད་པར། དངོས་དང་ཡིད་ཀྱིས་བསྒོམས་པའི་བུད་མེད་དེ་ཕྱག་རྒྱའི་སྦྱོར་བ་ལས། རང་བཞིན་ལྷན་སྐྱེས་བདེ་ཆེན་སྒྲུབ་པར་འདོད་པ་ནི་རྨོངས་ཏེ། རི་དྭགས་ཤིན་དུ་སྐོམ་པ་ཆུ་འདོད་པས་སྨིག་རྒྱུའི་རྗེས་སུ་འགྲོ་བ་དང་མཚུངས་སོ། །འོ་ན་བདེ་ཆེན་གྱི་དོན་དུ། ལས་ཀྱི་ཕྱག་རྒྱ་བསྟེན་པ་ནི་ཅི་སྙམ་ན། གསུམ་པ་ནི། ཇི་ལྟར་མཚན་མོའི་དུས་སུ་ནོར་བུ་འཚོལ་བ་ན། མར་མེ་བཟུང་བས་བཙལ་ན་མྱུར་དུ་རྙེད་ཅིང༌། རྙེད་པའི་ཕྱི་ནས་སྒྲོན་མེ་རབ་ཏུ་འདོར་བ་བཞིན་དུ། པདྨ་ཅན་ལ་སོགས་པའི་རྩ་རིན་པོ་ཆེའི་ནང་དུ་ཆུད་ཅིང་གནས་པ་ལས་ཐོབ་པའི་ཞུ་བདེར་སྣང་བ་ལྷན་ཅིག་སྐྱེས་པའི་རིན་པོ་ཆེ་རྙེད་ནས། ཕྱི་རོལ་གྱི་ཕྱག་རྒྱའི་བྱ་བ་དང༌། ཡིད་ཀྱི་བསྒོམ་པ་སོགས་རྩོལ་བ་ཅན་གྱི་ངལ་བས་གནས་པར་མི་བྱ་སྟེ། ཞུ་བདེ་ཙམ་གཙོ་བོར་མི་བྱའོ། །བཞི་པ་ལ། ཞུ་བདེའི་དུས་དང། དབྱེ་བ་དང༌། ངོ་བོ་གསུམ་ལས། དང་པོ་ནི། དུས་གང་
གི་ཚེ་ངོས་བཟུང་ཞེ་ན། གང་གི་ཆུ་སྐྱེས་ཏེ་ཕྱག་རྒྱའི་རྡོ་རྗེ་དབྱིངས་ཀྱི་དབང་ཕྱུག་མ་ཞེས་བྱ་བའི་རྩ་དང༌། བུང་བ་སྟེ་ཐབས་ཀྱི་རིན་པོ་ཆེའི་བར་ན་རབ་ཏུ་གནས་སྟེ། ནོར་བུའི་ནང་དུ་སོན་པ་ལྷན་ཅིག་སྐྱེས་པ་འདི་ནི། རང་བཞིན་གྱི་བདེ་ཆེན་སྐྱེད་པའི་དོན་དུ་མཁས་པ་དག་གི་བླང་བ་སྟེ་བསྒོམ་པར་བྱོས་ཤིག །གཉིས་པ་ནི། རྫོགས་རིམ་གྱི་ལྷན་སྐྱེས་དེ་ཡང༌། དགའ་བ་ལ་སོགས་པ་རྣམ་པ་བཞིའི་བདག་ཉིད་ཡིན་ཏེ། དགེས་པའི་རྡོ་རྗེ་ལས། རྫོགས་པའི་རིམ་པའི་ཕྱོགས་ལ་ནི། །འདི་ལྟར་ལྷན་ཅིག་སྐྱེས་རྣམ་བཞི། །ཞེས་རྫོགས་རིམ་མཐོན་པོར་སོང་བའི་སྐབས་ཤིག་གིས། དགའ་བ་བཞི་ཀ་ལྷན་སྐྱེས་ཡིན་པར་གསུངས་པའི་ཕྱིར། འོ་ན། དང་པོ་དགའ་བ་འགྲོ་བའི་གཟུགས། །དེ་བཞིན་མཆོག་དགའ་འགྲོ་བ་ཉིད། །དགའ་བྲལ་དགའ་བར་འགྲོ་བ་ཉིད། །གསུམ་པ་ལྷན་ཅིག་སྐྱེས་པ་མེད། །ཅེས། དགའ་བ་དང་པོ་གསུམ་དང༌། ལྷན་སྐྱེས་གཞི་མཐུན་པ་མེད་པར་གསུངས་པ་མ་ཡིན་ནམ་ཞེ་ན། བཤད་པར་བྱ་སྟེ། དེ་ཉིད་ལས། ཡང་ན་དེ་ཉིད་ཐམས་ཅད་བདག །ཡང་ན་ཀུན་གྱི་རྣམ་པར་སྤངས། །ཞེས་སྐྱེད་རིམ་པ་དང༌། རླུང་དབུ་མར་ཞུགས་གནས་ཐིམ་གསུམ་བྱང་མ་ཆུབ་ཀྱི་བར་དུ་ཞུ་བདེའི་དགའ་བ་དང་པོ་གསུམ་ལ། ལྷན་སྐྱེས་ཀྱི་དོན་མ་ཚང་ཞིང༌། དེ་ཕན་ཆད་ཀྱི་རྫོགས་རིམ་གྱི་མས་བསྟན་དགའ་བཞི་ཐམས་ཅད་ལྷན་སྐྱེས་ཀྱི་དགའ་བ་ཁོ་ན་ཡིན་ལ། ལྷན་སྐྱེས་ཡིན་མིན་གྱི་དོན་ཡང༌། ཁམས་ཕྲ་རགས་ཐམས་ཅད་ཐིམ་པའི་ཐམས་ཅད་སྟོང་པའི་རང་བཞིན་ཡིན་པ་དང༌། བདེ་བ་མྱོང་བས་འབད་རྩོལ་དྲག་པོ་མེད་པར་སྤྲོས་པ་ཐམས་ཅད་དང་བྲལ་བའི་སྟོང་པའི་རྣམ་པ་ངང་གི་འཆར་བ་ཡིན་མིན་གྱི་ཁྱད་པར་རོ། །ཕྱག་ཆེན་ཐིག་ལེར། དགའ་བ་བཞི་དང་སྣང་བ་བཞི་གཅིག་པར་གསུང་ན།
དགའ་བཞི་ལ་ལྷན་སྐྱེས་ཡིན་མིན་གྱི་དབྱེ་བ་ལྟར། ཐམས་ཅད་སྟོང་པ་ཡང་སྣང་བ་གསུམ་ཡིན་མིན་གཉིས་སུ་དབྱེ་མི་དབྱེའི་ཁྱད་པར་དང་འཐད་པ་ཞིབ་མོར་དཔྱོད་ལྡན་ཆེན་པོ་འགས། སྔར་རྣམ་པར་དཔྱད་ཅིང༌། ད་དུང་དཔྱད་པར་བྱ་དགོས་མོད་ཀྱི་ཡི་གེ་མངས་པར་འགྱུར་པའི་ཕྱིར་འདིར་མི་བྲིའོ། །གསུམ་པ་ནི་རྫོགས་རིམ་གྱི་ལྷན་སྐྱེས་ཀྱི་ངོ་བོ་རླུང་དང་ཁམས་གཡོ་བ་མེད་པའི་བདེ་བ་ཡིན་ཏེ། དེ་འདྲའི་བདེ་བ་དེ་ཡིན་ཕྱིན་ཆད། ཞུགས་གནས་ཐིམ་གསུམ་གྱིས་རླུང་གི་གཡོ་བ་འགགས་ཤིང༌། ཐིག་ལེ་འཛག་མེད་ཀྱི་བདེ་བ་ཡིན་པའི་ཕྱིར་རོ། །རྫོགས་རིམ་གྱི་ལྷན་སྐྱེས་ཇི་ལྟར་བཤད་པ་དེ་རྣམས་ལ། ཞུ་བདེ་དང༌། རང་བཞིན་གྱི་དབྱེ་བ་ཞིབ་མོར་འཆད་པ་ནི་འོག་ནས་འབྱུང་ངོ༌། །འདིར་སྨྲས་པ། བདེ་ཆེན་བདེ་བའི་དགའ་སྟོན་རོལ་བ་ཡི། །ཕྱག་ཆེན་ཕྱག་རྒྱའི་མཆོག་གྱུར་ལེགས་བསྟེན་ན། ། ཡེ་ཤེས་ཡེ་ནས་དག་པའི་ལྷ་སྐུ་མཆོག །གཉིས་ཆོས་གཉིས་མེད་ངང་དུ་རོ་མཉམ་གྱུར། །གླུ་ཡི་རྒྱུད་དང་པོ་རྣམ་པར་ཕྱེ་ཟིན་ཏོ། །དེ་ལྟར་ལམ་གྱི་སྤྱིའི་འགྲོས་རྣམས་ལེགས་པར་བསྟན་ནས། གཉིས་པ་དེ་དག་གི་མཐའ་ཞིབ་མོར་དཔྱད་པ་ལ། གླུའི་རྒྱུད་གཉིས་པ་དང༌། གསུམ་པ་དང༌། བཞི་པའི་སྟོད་ཕལ་ཆེ་བ་རྣམས་ཡོད་པ་ལས། གླུའི་རྒྱུད་གཉིས་པ་ལ་དོན་ཚན། བོད་ཀྱི་བཤད་སྲོལ་ལྟར། ས་གཅོད་ཇི་བཞིན་སྒྲིག་དཀའ་ལ༌། རྒྱ་གར་བའི་བཤད་རྒྱུན་ལས་བྱུང་བའི་བསྡུས་དོན་ཇི་ལྟ་བར་བཤད་ན་བདེ་བས་འདི་ལྟར། བདེ་བ་ཆེན་པོའི་རྒྱུ་ཚོགས་དང༌། བདེ་ཆེན་སྒྲུབ་ཚུལ་དང༌། ལས་རྒྱའི་དགོས་པ་དང༌། དེས་ཡེ་ཤེས་ཀྱི་སྐུ་འགྲུབ་ཚུལ་དང༌། ལྷན་སྐྱེས་ཀྱི་ངོ་བོ་དང༌། ལྷན་སྐྱེས་དམན་པའི་སྐྱོན་དང༌། བདེ་སྟོང་སྒོམ་ཚུལ་དང༌། དེས་སེམས་ཀྱི་དྲི་མ་སྦྱོང་ཚུལ་དང༌། ཕྱིའི་ཕྱག་རྒྱ་སྤངས་ནས་ཕྱག་ཆེན་
གྱིས་འགྲུབ་ཚུལ་དང༌། བདེ་སྟོང་སྤྱོད་པ་གསུམ་གྱི་དོགས་སྤྱོད་དང༌། རླུང་ཐིམ་པའི་སྦྱོར་བ་དང༌། བདེ་སྟོང་ལ་ལོག་རྟོག་འགག་པ་དང༌། ལྷན་སྐྱེས་འཆར་བའི་ཐབས་ཀྱི་གཙོ་བོ་ལ་གདམས་པ་དང༌། ལྟ་བ་དང་བཞི་པའི་ཡེ་ཤེས་ལ་འཁྲུལ་པ་དགག་པ་དང༌། སྟོང་པ་རྟོགས་ཚུལ་དང༌། འོད་གསལ་འཆར་ཚུལ་དང༌། སྟོང་པ་སྒོམ་ཚུལ་དང༌། བདེ་བའི་སྐྱོན་མཐའ་གཉིས་དང༌། བདེ་ཆེན་གྱི་ངོ་བོ་དང༌། ཁམས་ཐིམ་ཚུལ་དང༌། ཡེ་ཤེས་ཀྱི་སྐུ་སྒོམ་ཚུལ་དང༌། དེ་རྟོགས་པའི་ཕན་ཡོན་སྤྱོད་ལམ་དང་བཅས་པ་དང༌། མངོན་པར་བྱང་ཆུབ་པའི་ལུས་གནད་དང༌།གནས་དང༌། གྲོགས་དང༌། དུས་དང༌། ལྷན་སྐྱེས་ཕྱི་ནས་ཚོལ་བ་སྤང་བར་གདམས་པ་དང༌། དེ་སྒྲ་རྟོག་གི་ཡུལ་ལས་འདས་པ་དང༌། དེ་ཉིད་འགྲུབ་པའི་ལྟས་དང༌། དོན་དམ་ལ་གཞོལ་བའི་རྣལ་འབྱོར་པས་སེམས་ལུས་འདོད་ཡོན་གསུམ་ལ་གནད་དུ་བསྣུན་པར་གདམས་པ་སྟེ་དོན་ཚན་སུམ་བཅུ་ལས། དང་པོ་ལ། སྣང་བ་ཀུན་ལ་བདེ་བས་རྒྱས་འདེབས་པ། དེས་རྣམ་རྟོག་གཅོད་ཚུལ། བདེ་བ་སྒོམ་ཚུལ། དེ་ཐོབ་བྱེད་རྐྱེན་གྱི་གཙོ་བོ། དེ་འགྲུབ་བྱེད་ཀྱི་སྤྱོད་པ་ལ་འཁྲུལ་པ་བཀག་པ་སྟེ་ལྔ་ལས། དང་པོ་ནི། ཨ་ཨི་ཞེས་བདེ་བ་དང༌། ཨ་རི་ཞེས་སྟོང་པ་ལ་སོ་སོར་ངོ་མཚར་བའི་ཚིག་སྟེ། ཅི་ལྟར་ཞེ་ན། ས་འོག ས་སྟེང༌། ས་བླ་གསུམ་མམ། འདོད་པ་དང༌། གཟུགས་དང༌། གཟུགས་མེད་གསུམ་མམ། ལུས་ངག་ཡིད་ཀྱི་ཁམས་གསུམ་དང༌། ས་ཆུ་མེ་རླུང་དཀྱིལ་འཁོར་བཞི་དང་ཁམས་གསུམ་གྱི་འགྲོ་བ་སྟེ་སྣོད་བཅུད་ཀྱི་འཇིག་རྟེན་བདུན་ནམ། རིག་དྲུག་དང༌། སྲིད་པ་བར་མའི་འཇིག་རྟེན་ཏེ། སེམས་ཅན་གྱི་འཇིག་རྟེན་བདུན་གྱི་གོས་སྣ་ཚོགས་པ་དག་བདེ་བ་ཆེན་པོ་ལྷན་ཅིག་སྐྱེས་པའི་འདོད་ཆགས་ཆེན་པོ་སྟེ་བདེ་ཆེན་གྱི་ཚོན་གྱི་ཁ་དོག་གཅིག་ཏུ་ཁ་བསྒྱུར་པས་ན་ཞེས་
གཟུགས་ཅན་གྱི་རྒྱུན་གྱི་ཚུལ་དུ་སྦྱར་ཞིང༌། ངག་དོན་ནི༌། ལྷན་སྐྱེས་ཆེ་ཆུང་ཅི་རིགས་བརྟན་ནས། སྣང་བ་ཐམས་ཅད་ལ་བདེ་བ་དེས་རྒྱས་བཏབ་པས། སླར་ཡུལ་སྣང་དེས་གྲོགས་བྱས་ནས་བདེ་བ་ཆེར་འཕེལ་ཞིང༌། སྣང་བ་ཐམས་ཅད་བདེ་བ་གཅིག་གི་རྣམ་རོལ་དུ་འཆར་བ་ལྟ་བ་དང་དར་སོགས་དངོས་པོ་ཐ་དད་པ་དག་ཚོས་གཅིག་ལ་བཙོས་པས་ཁ་དོག་གཅིག་ཏུ་སྣང་བ་བཞིན་ནོ་ཞེས་པའོ། །གཉིས་པ་ནི། སྣང་བ་ལ་བདེ་བས་རྒྱས་བཏབ་པས། མ་དག་པའི་སྣང་བ་མེད་པ་སྟེ་མི་སྣང་ཞིང༌། རྣམ་རྟོག་གི་དྲན་པ་ཉམས་ཤིང་མེད་པར་གྱུར་པ་དང༌། བདེ་བར་ཤར་བའི་ཚེ་བདག་དང་གཞན་དུ་འཛིན་ཅིང་རིག་པར་མི་འགྱུར་བ་སྟེ། དེ་འདྲའི་དེ་མངོན་འགྱུར་པ་འགག་པ་ཡིན་ནོ། །ཞེས་ཡུལ་མཐའ་སྟེ་རྒྱལ་ཁམས་ཀུན་དུ་སྨྲས་སོ། །འདིར་བཟང་མོ་ཞེས་པ་ནི་ཤེས་རབ་ལ་བོད་པ་དང༌། ཡུལ་མཐའ་ཀུན་དུ་སྨྲས་པ་ཡིན་ཞེས་བསྐལ་ལྡན་ལྡན་རྣམས་ལའོ། །གསུམ་པ་ནི། ཡིད་རྣམ་པར་རྟོག་པས་གཡོ་བ་མེད་པས་རེངས་པ་དང༌། མིག་གཉིས་ནི་ནམ་མཁའ་ལ་གཡོ་མེད་དུ་ལྟ་བས་རེངས་པ་སྟེ། དེ་ལྟར་ཡང༌། ནམ་མཁའ་ལ་ནི་ཡིད་དང་རླུང་དང་མིག །དུས་ཅིག་ཏུ་ནི་གལ་ཏེ་ངེས་སྦྱར་ན། ། རིན་ཆེན་རྒྱལ་བའི་ཡོན་ཏན་ངེས་པར་སྐྱེ། །འདི་དག་མཐའ་དག་དེ་བཞིན་གཤེགས་པས་གསུངས། །སྣ་ཚོགས་རྣམ་རྟོག་བྲལ་ཞིང་མི་སེམས་པར། །གལ་ཏེ་བར་སྣང་ལ་ནི་མིག་གཏད་ན། །ཕྱོགས་བཅུའི་འཇིག་རྟེན་མཐའ་དག་ཡིན་ནམ་སྙམ། །རྣལ་འབྱོར་དབང་ཕྱུག་ཐམས་ཅད་འདི་ལས་འཐོབ། །ཅེས་བདེ་ཆེན་སྒྲུབ་པར་བྱེད་པའི་མཆོག་རྣམ་བཅས་ཕྱག་ཆེན་སྒྲུབ་པའི་ཐབས་འདི་གཉིས་གཙོ་བོར་གསུངས་སོ། ཁུ་བ་རླུང་དང་རྣལ་འབྱོར་རམ་ཏིང་ངེ་འཛིན་གྱི་སྟོབས་ཀྱིས་མི་གཡོ་བ་སྟེ་འཛག་མེད་དུ་བྱེད་པ་དང༌། རླུང་རྣམས་དྷུ་ཏིར་འཆིང་
བ་དང༌། དེས་གཏུམ་མོ་འབར་བས་ཁམས་ཞུ་ཞིང་འཁོར་ལོ་བཞིར་བརྟན་པར་བྱེད་པ་དང༌། ཁྱད་པར་བྱང་ཆུབ་ཀྱི་སེམས་གྱེན་དུ་གཤེགས་པའི་མཐུ་དང་ལྡན་པའི་ཕྱིར་ཟོ་ཆུན་གྱི་འཁོར་ལོ་དང་མཚུངས་པའི་འཁོར་ལོ་བཞི་ཆུས་ཁེངས་པ་སྟེ་གནས་དེ་དང་དེ་རྣམས་སུ་ཐིག་ལེ་ལུགས་ལྡོག་ཏུ་བརྟན་པར་བྱེད་པའི་བདེ་བ་སྒོམ་པ་དང༌། ལྷན་སྐྱེས་ཀྱི་བདེ་བ་ནམ་ཤར་བ་ན། ལུས་སེམས་ཐམས་ཅད་དགའ་བདེ་རྒྱས་པར་འགྱུར་ཞིང་གཏུམ་མོ་འབར་བས་སྤྱི་བོའི་ཐིག་ལེ་ཞུ་བ་སྙིང་ཁར་ཕྱིན་པ་ནའང་དགའ་བདེ་ཁྱད་པར་ཅན་བསྐྱེད་པས་དཔྱིད་ཀ་དང་མཚུངས་པའི་དུས་ཀྱི་དང་པོ་བདེ་བ་ཤར་བ་རྟེན་མ་ཐག་ཏུ། དེ་ལ་མཚན་མའི་སྤྲོས་པ་དང་བྲལ་བའི་རྣམ་པར་མི་རྟོག་པ་སྒོམ་པ་སྟེ་དྲུག་པོ་འདི་དག་ལ་འབད་པར་གྱིས་ཤིག ཀྱཻ་ཧ་ཊི་བ་ཞེས་གྲུབ་ཆེན་ཉིད་ཀྱི་རང་ལ་རང་ཉིད་ཀྱིས་བསྐུལ་བ་སྟེ། རང་ལ་བོད་པ་སོགས་ནི་ཟབ་མོའི་དོན་གཞན་གྱི་མཚོན་པར་མི་ནུས་པས་རང་ལས་མཚོན་པར་གྱིས་ཤིག་ཅེས་པའི་དོན་ཡིན་གསུང༌། བཞི་པ་ནི། རླུང་བཅུ་པོ་རྣམས་ནི་རྣམ་རྟོག་གི་རི་མོ་སྣ་ཚོགས་འདྲི་བར་བྱེད་ཅིང་ཅུང་ཟད་ཀྱང་གནས་པའི་སྐབས་མེད་ལ། ལས་དང་ཉོན་མོངས་པ་དང་སྡུག་བསྔལ་རྣམ་པ་གསུམ་གྱི་ཐོ་ཆོར་སྤྱོད་པས་འཕྱར་གཡེང་ཅན་ཡིན་ལ། དེ་ཉིད་གཡོ་མེད་དུ་བྱས་ན། དགའ་བའི་གཞིར་གྱུར་པའི་ཕྱིར། བུ་མོ་སྟེ། དེས་རང་གི་ཁྱིམ་དང་འདྲ་བ་དེ་ཉིད་ལས་འབྱུང་ཞིང་དེ་ཉིད་དུ་ཐིམ་པའི་དྷཱུ་ཏཱིའི་ནང་དུ་ཞུགས་གནས་ཐིམ་གསུམ་གྱི་བཀུག་ལ་དབང་དུ་གྱུར་པའི་འདོད་པ་གྱིས་ཤིག ཅི་ལྟར་བགྱི་ཞེ་ན། ལྟེ་བ་དང་གསང་བའི་ཕུག་ཏུ་ཙཎྜ་ལི་མར་མེ་སྤོར་ཞིག ཀྱཻ་ཧ་ཊི་བ་ཞེས་བོས་ནས། ཡན་ལག་རོ་མ་དང་ཡན་ལག་རྐྱང་མའི་སྒོ་བསྡམས་ཤིང་འཁྱུད་པ་སྟེ་དབུ་མར་གཅིག་ཏུ་དྲིལ་བས། དབུ་མར་ཁུ་བ་འབབ་པའི་འདོད་པའི་བདེ་བ་སྤྱད་
པར་བྱའོ། མཚན་མར་འཛིན་པ་ཐམས་ཅད་སྟོང་ཉིད་རྟོགས་པའི་ཤེས་རབ་ཀྱི་ཟ་བ་དང༌། སེམས་ཀྱི་རྒྱུད་བདེ་བ་ཆེན་པོའི་བཅུད་འཐུང་བ་དང༌། འཇུག་གནས་ལྡང་གསུམ་གྱི་རླུང་ཉལ་བ་དང༌། མ་ཆགས་པའི་ཚུལ་གྱིས་འདོད་ཡོན་ལ་རོལ་བའི་རྩེད་མོ་རྣམས་ལས། སྒྲ་དོན་གྱི་རྗེས་སུ་འབྲང་བའི་མཚན་འཛིན་གྱི་ཀློག་པ་དང༌། ཐ་མལ་བའི་ང་རྒྱལ་གྱིས་རླུང་རྒྱུ་བའི་ཁ་དོན་མི་བྱའོ། འདིར་ངག་དོན་ནི། ཞུ་བདེ་ལྷན་སྐྱེས་ཀྱི་རྒྱུའི་གཙོ་བོ་རླུང་དབུ་མར་ཐིམ་པས་གཏུམ་མོ་འབར་བ་ཡིན་ལ། རང་བཞིན་ལྷན་སྐྱེས་ཀྱི་རྒྱུའི་གཙོ་བོ་བདེ་སྟོང་བསྲེ་བའི་ཐབས་ལ་འབད་པ་དང༌། རླུང་གི་བགྲོད་པ་ཕྲ་མོ་འགོག་པར་བྱེད་པ་ཡིན་ལ། སེམས་ཀྱི་རང་བཞིན་བདེ་བ་ཆེན་པོའི་ཁམས་སུ་གནས་པ་ནི་རང་བྱུང་ལྷན་སྐྱེས་སམ་རང་བཞིན་ལྷན་སྐྱེས་ཞེས་བྱ་ལ་ཞུ་བདེའི་བདེ་སྟོང་སྦྱར་བ་ལ་སོགས་པ་ཐབས་ཀྱི་སེམས་དེ་བདེ་ཆེན་དངོས་སུ་གྱུར་པ་ནི་རང་བཞིན་ལྷན་ཅིག་སྐྱེས་པའི་ཡེ་ཤེས་ཡིན་ནོ་ཞེས་བྱའོ། །ལྔ་པ་ནི། ཛཱ་ལནྡྷ་ར་པ་བདག་ནི་རང་གི་ཁྱིམ་སྟེ་གནས་ཅིག་པུ་ན་འདུག་ཅིང་སྤྱོད་པ་སྤྱད་པས་དངོས་གྲུབ་ཐོབ་ལ། ཕྱུགས་རྣམས་ལྟར་རྣམ་པར་རྨོངས་པའི་འགྲོ་བ་ཁ་ཅིག བ་ར་ཎཱ་སི་དང༌། དྭ་རི་ཀ་དག་ཏུ་མི་ལྔ་བསྟེན་པ་སོགས་ཀྱི་རང་ཉིད་སྡུག་བསྔལ་བར་བྱེད་ལ། དེ་ལྟར་ལུས་ལྷ་ཡིན་པ་ལ་བརྙས་ཤིང་གདུང་བ་ཙམ་སྟེ་སྡུག་བསྔལ་སྟེར་བས། བདག་ཉིད་ཀྱི་བདེ་བ་འཕྲོག་པར་བྱེད་པ་འདི་ལྟ་བུའི་ལམ་ངན་པ་སྟོན་པའི་པདྨའི་སྐྱེ་གནས་ཏེ་ཚངས་པ་དེ་ནི་བྱོལ་སོང་ལྟར་བླུན་པ་ཡིན་ཏེ། ལོག་པའི་ལམ་བསྟན་པས། སྡིག་པའི་ཁུར་པོ་ཤིན་ཏུ་ལྕི་བ་དེ་ལྟ་བུ་ཆེད་ཀྱིས་འཆང་བའི་ཕྱིར་རོ། འདིར་ཅུང་ཟད་དཔྱད་ན། ལུས་ལ་གདུང་བ་བརྩམས་པ་ཙམ་གྱིས་ཅི་ལྟར་སྡིག་པར་འགྱུར། བྱང་ཆུབ་སེམས་དཔའ་རྣམས་ཀྱིས་རང་གི་ཤ་སྦྱིན་པ་ལ་སོགས་
པས་ནི། ཐབས་དེས་ཚོགས་གཉིས་རྫོགས་པར་ཡང་མི་འགྱུར་རམ། གལ་ཏེ་མུ་སྟེགས་ཅན་དེ་དག་ལ་ཐབས་དེ་མེད་དོ་སྙམ་ན་དེ་ནི་མེད་མོད་ཀྱི། དེ་ལ་ནི་ངལ་ཞིང་དུབ་པའི་མཐའ་ཞེས་གསུངས་ཀྱི་བསོད་ནམས་ཉམས་པར་བྱེད་པར་མ་གསུངས་པས། འདི་ནི་མི་རིགས་སོ་ཞེ་ན། འདིར་སྡིག་པ་ཞེས་བྱ་བ་ནི་ཡང་དག་པའི་དོན་མཐོང་བ་ལ། སྡིག་པ་དང་འདྲ་བར་གེགས་བྱེད་པ་ལ་སྡིག་པ་ཞེས་བརྗོད་པ་སྟེ། འདིས་ཅི་ལྟར་གེགས་བྱེད་ཅེ་ན། ལྷན་ཅིག་སྐྱེས་པའི་བདེ་བ་རྟོགས་པ་ནི་ལུས་ཀྱི་བདེ་བ་ལ་རག་ལུས་ཤིང་ཡེ་ཤེས་ཀྱི་སྐུ་ཡང༌། ལུས་དང་རོ་གཅིག་དུ་གནས་པའི་རླུང་སེམས་གཉིས་ཀྱི་རང་བཞིན་ཡིན་པའི་ཕྱིར། དེ་ལ་སྨད་ཅིང་བདེ་པའི་མི་མཐུན་ཕྱོགས་ལ་འབད་པས། ཐོག་མ་མེད་པ་ནས་གོམས་པའི་བག་ཆགས་ཐ་མལ་པར་འཛིན་པ་དང༌། སྡུག་བསྔལ་དུ་ཞེན་པ་ལྷག་པར་བརྟན་པ་འགྱུར་ཞིང༌། གཞན་དུ་འགའ་ཞིག་བདེ་བའི་དབང་བསྐུར་བ་ཐོབ་པས་ནི། ཕུང་པོ་སངས་རྒྱས་སུ་གྱུར་པ་ལ་བརྙས་པས་སྡོམ་པ་ཉམས་པར་བྱེད་པའི་རྩ་བའི་ལྟུང་བར་ཡང་འགྱུར་རོ། །གཉིས་པ་བདེ་ཆེན་སྒྲུབ་ཚུལ་ལ། ཤིན་དུ་སྤྲོས་མེད་ཀྱི་སྤྱོད་པའི་ལྷ་དང་གནས་བཤད། དེས་ཕྱག་ཆེན་གྱི་བདེ་བ་སྒྲུབ་ཚུལ། ལས་ཀྱི་ཕྱག་རྒྱས་བདེ་ཆེན་སྒྲུབ་ཚུལ་ལོ། དང་པོ་ལ། ཧ་ཌི་བ་བདག་གིས་སྤྲོས་པ་ལ་དགའ་བའི་རྣལ་འབྱོར་པ་རྣམས་ལ་སྨྲས་པ། ཤིན་དུ་སྤྲོས་མེད་ཀྱི་སྤྱོད་པ་འདི་ལ། ལྷ་དང་གནས་མེད་པ་མ་ཡིན་ཏེ། རང་གི་ལུས་ཉིད་ལ་ཡེ་ཤེས་ཀྱི་སྐུ་རྣམ་པ་གཉིས་གནས་པའི་ཕྱིར་ལྷ་ཡིན་ལ། གནས་དང་ཉེ་གནས་ལ་སོགས་པའི་ཡུལ་ཉེར་བཞི་ཡང༌། སྤྱི་བོ་ལ་སོགས་པ་རང་གི་ལུས་ཀྱི་ཆ་ཤས་དག་ཡིན་པས་ན། ཞིང་ཀུན་བགྲོད་པར་འདོད་པས། ཡུལ་ཀུན་ཏུ་འཁྱམས་པའི་རྣལ་འབྱོར་པ་རྣམས་ངལ་བར་མ་གྱུར་ཏམ་སྟེ། དོན་ཆུང་ལ་ངལ་བ་ཆེ་བ་ཁོ་ནར་ཟད་དོ།
འདིར་སྤྱི་བོ་ལ་སོགས་པའི་རྩ་ཉེར་བཞི་པོ་དེ་རྣམས་ཉིད། གནས་ཉེར་བཞིར་འཇོག་པ་ནི། དེ་དག་གི་རླུང་དང་ཁམས་ཐིམ་པས་ཡུལ་སོ་སོའི་ཕོ་ཉ་མོ་རྣམས་དང༌། འདུ་བ་ཐོབ་ཅིང་ཡུལ་སོ་སོའི་ལྷ་མོ་དང་འདུས་པ་ལས་ཀྱང་རྩ་དང༌། རླུང་དང༌། ཁམས་དེ་དང་དེ་ཐིམ་པའི་ནུས་པ་ཡོད་པའི་ཕྱིར་དེ་ལྟར་གཞག་གོ །གཉིས་པ་ནི། ཞུ་བདེ་ལྷན་སྐྱེས་ཀྱི་བདེ་སྟོང་དང་རང་བཞིན་ལྷན་སྐྱེས་མངོན་དུ་གྱུར་པས་ནི། བྱ་བ་མེད་པ་སྟེ་སྤྲོས་པ་ཐམས་ཅད་དང་བྲལ་བར་མཉམ་པར་གཞག་པ་ན། རྣམ་བཅས་སམ་རྣམ་མེད་ཀྱི་སྟོང་པས་བདེ་ཆེན་འདྲེན་ཅིང་སྟོང་པ་དེའི་རིང་ནས་བདེ་བ་སྒོམ་པ་ལས་ཀྱང་བདེ་བ་ཆེན་པོ་འདྲེན་ཅིང་འབྱུང་སྟེ། དེ་འདྲ་བའི་རྣམ་པ་མང་པོ་དཀྱིལ་འཁོར་གྱི་འཁོར་ལོ་སྣ་ཚོགས་སུ་སྣང་བའི་རྣམ་བཅས་ཀྱི་སྟོང་ཉིད་དང། སྤྲོས་པ་ཐམས་ཅད་རང་བཞིན་མེད་པའི་ཚུལ་ལ་ཞུགས་པ་ཙམ་གྱི་རྣམ་མེད་སྟོང་ཉིད་དེ། བདེ་ཆེན་འདྲེན་པའི་ཕྱག་རྒྱ་ཆེན་མོ་དེ་གཉིས་ནི། དབུགས་དབྱུང་རྣམ་པ་གཉིས་ཀྱི་དོན་དུ་ཤེས་པར་བྱ་སྟེ། བདེ་བ་ཆེན་པོས་སྡུག་བསྔལ་འགོག་ཅིང་དབུགས་འབྱིན་པའི་ཕྱིར་དབུགས་དབྱུང་ཞེས་བྱ་ལ། རྣམ་བཅས་ནི་ཚུལ་ཐ་དད་པར་སྣང་བའི་ཕྱིར། དེ་བཞིན་གཤེགས་པ་རིགས་ལྔའི་དབུགས་དབྱུང་དང༌། རྣམ་མེད་ནི་ཐམས་ཅད་སྟོང་ཉིད་དུ་རོ་གཅིག་པའི་རྣམ་པ་ཅན་གྱི་ཕྱིར། རོ་མཉམ་རྡོ་རྗེ་སེམས་དཔའི་དབུགས་དབྱུང་བའོ། །གསུམ་པ་ནི། ཕྱག་རྒྱ་བཟང་མོ་ཁྱོད་དེ་སྐྱོན་སྤངས་ཤིང༌། ཡོན་ཏན་རྫོགས་པ་གང་ཞིག་རྣལ་འབྱོར་བ་དྲོད་ཐོབ་པའམ་མ་ཡིན་ཀྱང༌། རླུང་དྷུ་ཏཱིར་ཐིམ་པ་དག་གི་མཐོང་བ་སྟེ་བལྟས་པའི་རྗེས་ཆགས་ལས་ཀྱང༌། རླུང་རྣམས་ཉམས་ཤིང་དབུ་མར་ཐིམ་ནས། བདེ་བ་ཆེན་པོ་ལྷན་ཅིག་
སྐྱེས་པ་སྤང་བྱའི་མུན་པ་སེལ་བའི་ཕྱིར་ཉི་མ་དང་འདྲ་བ་འཆར་རོ། །ཀྱཻ་ཞེས་བོད་པའོ། ཁྱད་དགའི་ཡེ་ཤེས་ཁུ་བ་གཡོ་བའི་དྲི་མ་དང་བཅས་ཤིང༌། བདག་ཏུ་རྨོངས་པ་སོགས་མ་རིག་པ་དང་མཚུངས་པར་ལྡན་པས། མུན་པ་ལྟ་བུ་དེར་འོད་གསལ་ཉི་མ་ལྟ་བུ་ཤར་བས་ངོ་མཚར་ཏེ། ཛཱ་ལནྡྷ་ར་བ་ང་གད་མོ་དགོད་དོ། །འདིར་ཤེས་རབ་མ་ལ་བལྟས་པ་སོགས་ལས། བདེ་ཆེན་འདྲེན་ཚུལ་ཐུན་མོང་མ་ཡིན་པ་ནི། རང་བཞིན་ལྷན་སྐྱེས་གསལ་བར་མཚོན་པ་ནི་ཞུ་བདེ་ལྷན་སྐྱེས་ཡིན་ལ། བདེ་བ་དེ་བསྐྱེད་པ་ལ། བྱང་ཆུབ་ཀྱི་སེམས་དབུ་མར་ཞུ་ཞིང་འབབ་དགོས། དེ་ཡང་གཏུམ་མོ་འབར་བ་ལ་རག་ལས། དེ་ཡང་རླུང་ཐིམ་པ་ལས་འབྱུང་བས་ཕོ་ཉ་མོ་མཆོག་ནི་མཐོང་བ་ཙམ་དང༌། ཐོས་པ་ལ་སོགས་པས་ཀྱང་རླུང་བསྡུད་པའི་ཚུལ་ཁྱད་པར་ཅན་གྱིས་བདེ་ཆེན་བསྐྱེད་པ་དེ་ནི། བདེ་བ་དེ་འགལ་རྐྱེན་གང་གིས་ཀྱང་ལྡོག་མི་ནུས་ཤིང་རྒྱུན་མི་འཆད་པར་འབྱུང་བའི་ཕྱིར། ལམ་དེ་མྱུར་བ་ལ་དགོངས་ནས། རྡོ་རྗེ་གུར་དུ་ཡང༌། བུད་མེད་མཆོག་མཐོང་ལས་བདེ་ཞིང༌། །གླུ་ཐོས་པས་ཀྱང་ཡང་དག་བདེ། །དྲི་ཞིམ་མནམ་ལས་བདེ་བ་ཆེ། །སྐྱེ་གནས་རེག་ལས་ཀྱང་བདེ་ཆེན། །རོ་མཆོག་བཏུང་བ་རབ་སྦྱར་བའི། །བདེ་བ་སུས་ཀྱང་ལྡོག་མི་ནུས། །ཞེས་གསུངས་སོ། དེ་ལྟར་གཟུགས་མཛེས་པ་བལྟས་པ་དང༌། དེ་བཞིན་དུ་འདོད་པའི་གཏམ་དང་གླུ་ལེན་པ་མཉན་པ་དང༌། བྷ་ག་སོགས་ལུས་ལས་བྱུང་བའི་དྲི་ཞིམ་མནམ་པ་དང༌། མ་མཆུའི་རོ་མྱངས་པ་དང༌། སྒྱུ་རྩལ་ཀ་ར་ཎའི་གར་གྱི་རོལ་པ་རྣམས་དང༌། སྐྱེ་གནས་ཀྱི་རེག་བྱ་ལ་སོགས་པ་མདོར་ན། བྱ་བ་ཀུན་ལ་བདེ་བ་ཆེན་པོའི་རང་བཞིན་འདི་འདྲ་བ་འཐོབ་པ་ནི་ངོ་མཚར་ཆེའོ་ཞེས་པའོ། །གསུམ་པ་ལས་རྒྱའི་དགོས་པ་ནི། མེ་དོན་དུ་གཉེར་བས་གཙུབ་
ཤིང་གཙུབ་པར་བྱེད་པ་ལྟར། བདེ་བ་ཆེན་པོའི་དོན་དུ། ལས་ཀྱི་ཕྱག་རྒྱ་ཉེ་བར་བསྟེན་པ་ཡིན་ཏེ། ཕྱག་རྒྱ་གསུམ་པོ་གང་ཡང་རུང་བའི་ཤེས་རབ་མ་ལ་སྦྱོར་བ་མེད་པར་ལྷན་ཅིག་སྐྱེས་པ་མངོན་དུ་བྱེད་པ་མེད་ཅིང༌། ཁྱད་པར་རང་བཞིན་ལྷན་སྐྱེས་མཚོན་པའི་ཉེ་རྒྱུ་ཕྱག་ཆེན་དང་སྦྱོར་བ་ཡིན་ལ། ཕྱག་ཆེན་གྱིས་ཞུ་བདེ་རྒྱས་པར་བྱེད་མ་ནུས་པ་དང༌། ཕྱག་རྒྱ་ཆེན་མོ་མ་ཐོབ་པ་ཐོབ་པར་བྱེད་པ་ལ། ལས་དང་ཡེ་ཤེས་ཀྱི་ཕྱག་རྒྱ་ངེས་པར་དགོས་ཤིང༌། བསྒོམས་པའི་ཡིད་ཀྱི་ཕྱག་རྒྱ་ལས། བདེ་བ་ཆེན་པོ་འདྲེན་པ་ལ་ལྷག་པར་སྟོབས་ཆེ་བ་ཡིན་ནོ། །དེའི་ཕྱིར་གཙུབ་ཤིང་གཙུབ་པ་མེད་ན། མེ་ནི་གང་དུ་འབྱུང་སྟེ། མི་འབྱུང་ཞེས་དཔེར་མཛད་དོ། །དེ་ཡང་ཧེ་རུ་ཀ་མངོན་འབྱུང་ལས། དཔའ་བོ་གང་ཞིག་ཕྱག་རྒྱ་དམན། །སྒྲུབ་པོ་མཆོད་པ་བྱེད་པ་ནི། ཕུབ་མ་བརྡུང་དང་མཚུངས་པ་སྟེ། །ཞེས་ཕྱག་རྒྱ་མོ་མེད་པར་ལམ་རིང་ལ་ཡོད་ན་མྱུར་བར་གསུངས་ཤིང༌། འོན་ཀྱང༌། བདེ་མཆོག་གི་རྩ་རྒྱུད་ལས། ཕོ་ཉ་རལ་གྲིའི་སོ་འདྲ་ཞིང༌། །ཞེས་གསུངས་ལ། མངོན་འབྱུང་ལས། རྣལ་འབྱོར་མེད་པར་རྣལ་འབྱོར་ཆོས། །ཕྱག་རྒྱ་ལ་ནི་བགྲོད་འགྱུར་དང༌། །ཡེ་ཤེས་མེད་པར་ཡེ་ཤེས་ཚུལ། །དམྱལ་བར་འགྲོ་བར་ཐེ་ཚོམ་མེད། །ཅེས་ཡུལ་དང་བརྟེན་མཚན་ཉིད་མ་ཚང་ན་ཉེས་དམིགས་ཤིན་ཏུ་ཆེའོ། །འདིར་ཞུ་བདེའི་ལྷན་སྐྱེས་ཐིག་ལེ་དང་མི་དམིགས་སྒོམ་པ་སོགས་རྣལ་འབྱོར་གྱི་གཏུམ་མོ་ལས་ཅི་རིགས་པར་འདྲེན་ནུས་ན་ཡང༌། དེས་གསལ་བར་མ་མཚོན་པའི་རང་བཞིན་དང་སྣང་བ་དང་དགའ་བའི་དབྱེ་བ་དང༌། རྣམ་པ་དང་ཁྱད་པར་རྣམས་ནི་ཕྱི་རོལ་གྱི་ཕྱག་རྒྱས་མཚོན་པར་བྱེད་ཅིང༌། ཞུ་བདེ་ཁྱད་པར་ཅན་གྱི་བདེ་སྟོང་གི་ཕྱག་རྒྱ་ཆེན་མོ་ལས། གཏུམ་མོ་
འབར་ཞིང་བདེ་བ་དྲངས་པའི་ལྷན་སྐྱེས་ཞུ་བདེར་གྱུར་བ་དེས་རང་བཞིན་ལྷན་སྐྱེས་གསལ་བར་མཚོན་པར་བྱེད་ཅིང༌། ཡང་ལས་ཀྱི་ཕྱག་རྒྱའི་བདེ་བས། རླུང་དབུ་མར་གཅིག་དུ་འདུས་པ་མི་ཤིགས་པའི་ཐིག་ལེ་དང་འདྲེས་པས་རྣམ་བཅས་སྟོང་གཟུགས་ཀྱི་རང་བཞིན་ལྷ་མོ་འགྲུབ་ལ། དེ་དང་མཉམ་པར་སྦྱར་བས་ཞུ་བདེ་ལྷན་སྐྱེས་ཀྱིས་ཀྱང༌། རང་བཞིན་ལྷན་ཅིག་སྐྱེས་པ་མཚོན་པ་ཡིན་ནོ། །ཞེས་པ་ནི་གྲུབ་པའི་མཐའ་འོ། །བཞི་པ་ནི། བཅུད་ཀྱི་རེག་པའི་ལྕགས་རྣམས་གསེར་དུ་འགྱུར་བ་ལྟར་བདེ་བ་ཆེན་པོའི་གྲུབ་པའི་དངུལ་ཆུས་ཁམས་བཅོ་བརྒྱད་པོ་རྣམས་ལ་རེག་པས་ལྷན་ཅིག་སྐྱེས་པའི་བདེ་ཆེན་གྱི་གསེར་དུ་འགྱུར་ལ། བསྒྱུར་བ་དེས་དངོས་པོ་ཐམས་ཅད་ལ་རྒྱས་བཏབ་པས་སྣང་བ་ཐམས་ཅད་ཡེ་ཤེས་ཀྱི་སྐུའི་གཟུགས་སུ་འཆར་བར་འགྱུར་ཏེ། ཇི་ལྟར་ལྕགས་གསེར་དུ་འགྱུར་བ་ཡང༌། ལྕགས་ཀྱི་དྭངས་མ་མཉེན་པ་དང༌། ཁ་དོག་གསལ་བའི་ཆ་དེ་ཉིད་གསེར་དུ་འགྱུར་བ་ཡིན་གྱི། ལྕགས་ཉིད་དུ་བྱེད་པའི་ཆོས་སྙིགས་མའི་ཆ་ལྕགས་ཀྱི་ཁམས་ནི་མ་ཟད་པར་གསེར་དུ་ག་ལ་འགྱུར་ཏེ་མི་འགྱུར་བ་བཞིན་དུ། སྙིགས་མའི་ལུས་རྡུལ་ཕྲ་རབ་ཀྱི་ཆོས་གཉིས་སྣང་གི་ཆ་འདི་ནི་ཡེ་ཤེས་ཀྱི་སྐུར་མི་འགྱུར་ལ། སེམས་བདེ་བར་གྱུར་ཅིང་ཁམས་དཀར་དམར་འཆིང་ལུགས་ཁྱད་པར་ཅན་གྱིས་བཅིངས་པས། སྙིགས་མ་འདི་ཟད་ནས་ལྕགས་སྲང་གཅིག་ལ་དྭངས་མའི་ཆ་སྲང་གཅིག་གསེར་དུ་འགྱུར་པ་ལྟར། རླུང་སེམས་ཙམ་གྱི་ལུས་བཞིན་ལག་གི་རྣམ་པར་གནས་པ། དེ་ཉིད་ཡེ་ཤེས་ཀྱི་ལུས་མཚན་དཔེས་སྤྲས་པའོ། །ཞེས་བླ་མ་དམ་པ་གསུང་ངོ༌། །ལྔ་པ་ནི། འདོད་
ཆགས་ཏེ་མཆོག་དགའ་མ་ཡིན་ཞིང༌། ཆགས་བྲལ་ཁྱད་དགའ་འམ་དགའ་བྲལ་ཡང་མ་ཡིན་ལ། དབུ་མ་དགའ་བར་ཡང་ནི་མི་དམིགས་ཏེ། ལྷན་སྐྱེས་འདི་ནི་གསུམ་ག་ལས་འདས་པ་ཡིན་ནོ། །དྲུག་པ་ལ་གཉིས་ལས། བྱང་ཆུབ་ཀྱི་སེམས་བདེ་བ་ཆེན་པོའི་རྟེན་ལྷུང་ཞིང་འདོད་ཆགས་ཏེ་ལྷན་སྐྱེས་ཀྱི་བདེ་བ་ཉམས་པས་ནི། གཏི་མུག་དང་ཞེ་སྡང་གིས་ཀུན་ནས་དཀྲིས་པ་དེས་དམྱལ་བར་འགྲོ་སྟེ། འཁོར་བར་རྣམ་པར་འཁྱམས་པར་འགྱུར་རོ། དེ་ལྟར་ཡང་དྲི་མེད་འོད་ལས། འདོད་ཆགས་ཉམས་པས་སྡིག་སྟེ་གང་ཕྱིར་ཤིན་དུ་སྡུག་བསྔལ་ནི་ཞེ་སྡང་སྐྱེ་ཞེས་གསུངས་སོ། །དེ་ཡང་ཞུ་བདེའི་རྐྱེན་གྱིས་སེམས་བདེ་བར་ཤར་བ་ལ་སྲེད་པས། སེམས་ལ་འདོད་ཆགས་ཀྱི་བག་ཆགས་བསྒོས་ཤིང་བདེ་བ་དེ་ཉམས་པའི་ཚེ། མི་འདོད་པའི་ཡུལ་ལ་སྤོང་བའི་སེམས་དྲག་པོ་ཞེ་སྡང་གི་རྣམ་པ་ཅན་གྱིས་སེམས་རྒྱུད་ལ་ཞེ་སྡང་གི་བག་ཆགས་བསྒོ་བར་བྱེད་དོ། ཞེ་སྡང་དེས་སེམས་འཁྲུགས་པས་ཤེས་བྱའི་གནས་ལ་རྨོངས་པའི་གཏི་མུག་གི་རྣམ་པ་ཅན་གྱི་སེམས་འབྱུང་སྟེ། དེས་གཏི་མུག་གི་བག་ཆགས་བསྒོ་བར་བྱེད་དོ། འདི་ནི་བྱང་ཆུབ་ཀྱི་སེམས་མ་བཅིངས་པ་རྣམས་ཀྱི་བགྲོད་པའི་བདེ་བ་ཙམ་ལ་ཡང་ཡོད་པས། འཛག་བདེ་ཕལ་ཆེར་གྱི་བག་ཆགས་བསྒོ་ཚུལ་ཡང་འདི་ཉིད་ཡིན་པས། འཁོར་བའི་རྩ་བར་གསུངས་ཤིང་ཁྱད་པར་ཚེ་གཅིག་ལ་དངོས་གྲུབ་འགྲུབ་པའི་རྒྱུ། བདེ་ཆེན་གྱི་མི་མཐུན་ཕྱོགས་ཉིད་ཡིན་ལ། དོན་གྱི་དབང་འདི་གཟིགས་ནས། དངོས་གྲུབ་ཀུན་གྱི་གཏེར་གྱུར་པ། །བྱང་ཆུབ་སེམས་ནི་ལྷུང་གྱུར་ན། །རྣམ་ཤེས་ཕུང་པོ་བརྒྱལ་འགྱུར་ན། །མ་སྨད་དངོས་གྲུབ་ག་ལ་ཡོད། །ཅེས་གསུངས་སོ། །
དེ་ཁོ་ན་ཉིད་མེད་པའི་ལྷན་སྐྱེས་ཀྱི་སྐྱོན་ནི། པྲ་ཙོ་ད་ཞེས་བྱ་བ་ནི། དེ་སྐད་དུ། ཞི་བའི་རྒྱུད་ལས། དབང་ཕྱུག་ནུས་མ་མཉམས་སྦྱོར་བས། །ལྟེ་བར་ཕྱིན་པའི་བདེ་བ་ནི། །ཆུ་ནི་འཐུང་བ་མ་ཡིན་པ། །མཚན་ཉིད་བྲལ་བ་རབ་ཏུ་ཞི། །འདིས་ནི་དྲག་པོ་རབ་དུ་བསྐུལ། །ཞེས་དེ་ཁོ་ན་ཉིད། མེད་ཀྱང༌། ཞུ་བདེ་ཙམ་ལ་སེམས་ཟིན་པ་དེ་ཁོ་ན་ཉིད་དུ་རློམ་ཅིང་ཁུ་བ་འཆིང་བ་ཙམ་གྱིས་ལྷན་ཅིག་སྐྱེས་པའི་བདེ་ཆེན་མ་ཉམས་པའི་དོན་དུ་འགྱུར་ལ། འདིས་སྲོག་ཆགས་རྣམས་ཀྱི་ལུས་ལ་ལྷ་ཆེན་པོ་དབང་ཕྱུག་གནས་པ་དེ་ཉིད་བསྐུལ་བས་གྲོལ་བར་འགྱུར་རོ། །ཞེས་པྲ་ཙོ་ད་ཞེས་པ་བོད་སྐད་དུ་རབ་ཏུ་བསྐུལ་བ་སྟེ་ལམ་འདི་མུ་སྟེགས་ཅན་གྱི་ལུགས་ཡིན་ནོ། སངས་རྒྱས་པ་དེ་ཁོ་ན་ཉིད་མེད་པར་བདེ་བ་སྒོམ་པ་རྣམས་ཀྱང་ལུགས་འདི་ཆོས་སུ་སྟོན་པར་བྱེད་པ་སྟེ། ཕྱུགས་བདག་སྟེ་དབང་ཕྱུག་ཆེན་པོས་འདབ་ཆགས་ཏེ་མཁའ་ལྡིང་གི་རྒྱུད་དུ་བཤད་པའི་འདོད་ཆགས་ཀྱི་སྤོང་བའི་ཚུལ་འདི་ནི་དོར་བར་བྱ་སྟེ། སེམས་ཀྱི་དྲི་མ་སྟུག་པོ་དཔག་དུ་མེད་པ་སྔར་ཡོད་པའི་ཆོག་གིད་ནི་འདིས་ཅི་ཞིག་བྱ། དོ་ཧ་མཛོད་ལས། སྙིང་རྗེ་བྲལ་བའི་སྟོང་པ་ཉིད་ཞུགས་པ། །དེས་ནི་ལམ་མཆོག་རྙེད་པ་མ་ཡིན་ནོ། །འོན་སྟེ་སྙིང་རྗེ་འབའ་ཞིག་སྒོམ་ན་ཡང༌། །འཁོར་བ་འདིར་གནས་ཐར་བ་ཐོབ་མི་འགྱུར། །གང་ཡང་གཉིས་པོ་སྦྱོར་བར་ནུས་པ་དེ། །འཁོར་བར་མི་གནས་མྱ་ངན་འདས་མི་གནས། །ཞེས་གསུངས་ལ། འདི་ཡི་རྙིང་རྗེ་ཡང་བདེ་བ་ལྷན་ཅིག་སྐྱེས་པའི་ཆ་ནས་འཇོག་ཅིང་བདེ་བ་ལ་སེམས་ཧར་སྒོམ་དུ་ཟིན་པ་ཙམ་པོས། བདེ་བ་ཙམ་བསྒོམས་པ་ལས་གཞན་སྟོང་པ་སྒོམས་པར་མི་འགྱུར་རོ། གཞན་ཡང་བྲམ་ཟེ་ཆེན་པོས། མ་ལུས་དེ་ཉིད་གང་གིས་མི་ཤེས་པར། །ཀུནྡུ་རུ་ཡི་སྐབས་སུ་བདེ་ཆེན་སྒྲུབ་པ་ནི། །ཇི་ལྟར་སྐོམ་
པས་སྨིག་རྒྱུ་སྙེག་པ་བཞིན། །སྐོམ་ནས་འཆི་ཡང་ནམ་མཁའི་ཆུ་རྙེད་དམ། །རྡོ་རྗེ་པདྨ་གཉིས་ཀྱི་བར་གནས་པ། །བདེ་བ་དེ་བརྟན་ནུས་པ་མེད་པས་ན། །ས་གསུམ་རེ་བ་གང་གིས་རྫོགས་པར་འགྱུར། །ཞེས་རང་བཞིན་སྟོང་པ་ཉིད་མི་ཤེས་པར། བདེ་བ་ཇི་ཙམ་ཆེ་ཞིང་སྲེད་པ་ཡང་ཆེ་བས་དྲི་མའི་བག་ཆགས་ཀྱང་བསྒོས་ཚབས་ཆེ་བར་གསུངས་སོ། །བདུན་པ་ནི། ཡིད་ཅེས་པ། རྣམ་རྟོག་དང་ཁུ་ཁྲག་གི་ཁམས་གཉིས་ཆར་ལ་འཇུག་པས། སྐབས་འདིར་ཡང༌། ཁུ་བ་བཅིངས་པའི་བདེ་བ་དང༌། རྣམ་རྟོག་གི་གཡོ་བ་མཚན་མ་དང་བྲལ་བར་བཅིངས་པས། རྣམ་རྟོག་དང་བདེ་བ་རང་བཞིན་སྟོང་པ་ཉིད་ནམ་མཁའ་ལྟ་བུ་ཡིན་ལ། དེ་ལ་རྣམ་པར་མི་རྟོག་པས་ནམ་མཁའ་ལྟར་སྤྲོས་པ་དང་བྲལ་བའི་རང་བཞིན་དུ་སྒོམ་པར་བྱའོ། །རང་བཞིན་སྟོང་པ་ཉིད་དུ་འཆར་བཞིན་པའི་རྣམ་རྟོག་ལྟར་སྣང་བ་ནི། ཡིད་ནི་གཡོ་ཞིང་བཅིངས་པ་དང་ཞེསཔའི་དོན་ཡིན་ཅེས་འཆད་གསུང༌། །བརྒྱད་པ་ནི། བཅུད་ལེན་ཆེན་པོ་གྲུབ་པའི་དངུལ་ཆུ་དང་མཚུངས་པའི་ཞུ་བདེ་ཁྱད་པར་ཅན་ལ་གོམས་པས། དུས་ཐམས་ཅད་དུ་སྣང་བ་གང་ལྷན་སྐྱེས་དེ་ཉིད་རྟག་དུ་གཡོ་བ་མི་བྱེད་ན། དེའི་ཚེ་སེམས་ཀྱི་ལྕགས་སོ་སོར་རང་གི་རིག་པའི་ཡེ་ཤེས་ཀྱི་གསེར་ནི་དྲི་མ་མེད་པར་གྲུབ་པ་ཡིན་ཏེ། ཇི་ལྟར་དངུལ་ཆུ་གཡོ་བ་མེད་པ་ན་ལྕགས་གསེར་དུ་འགྱུར་བ་བཞིན་ནོ། །འདིར་གྲུབ་པའི་མཐའ་ནི། ཞུ་བདེ་ཕྲ་མོ་རྒྱུན་མཐའི་ཡེ་ཤེས་ཀྱི་བར་དུ་ཡོད་ཅིང༌། སངས་རྒྱས་ཀྱི་ས་ན་མེད་ལ། ཞུ་བདེ་ལྷན་སྐྱེས་བར་མ་ཆད་པར་འཇུག་པ་ནི་འཕགས་པ་ཁོ་ན་ལ་ཡོད་ཅིང༌། རང་བཞིན་ལྷན་སྐྱེས་ཀྱི་བདེ་བ་དེས་ཐམས་ཅད་སྟོང་པ་དང་གཅིག་ཏུ་འདྲིས་པ་ལས་ནམ་ཡང་ལྡང་མི་སྲིད་པ་ནི། ཆོས་སྐུ་མངོན་དུ་བྱས་པ་ཁོ་ན་ལ་ཡོད་
དོ་ཞེས་པ་གསུམ་པོ་འདིའོ། དེའི་ཕྱིར་བཅུད་ལེན་ཞེས་པ་རང་བཞིན་ལྷན་སྐྱེས་ལ་འཆད་པའང་ཡོད་དེ་ལེགས་པ་ཡིན་གསུང༌། འོན་ཀྱང་དཔྱད་ན། དང་པོ་རྒྱུ་མཚན། ལུས་སེམས་རྟེན་བརྟེན་པའི་འབྲེལ་པ་ཁུ་རྡུལ་རླུང་གི་ཚོགས་པ་ཕྲ་མོ་དེ་སྲིད་དུ་ཡོད་པའི་ཕྱིར་དང༌། གཉིས་པའི་རྒྱུ་མཚན་རྩ་ཁམས་རླུང་གསུམ་གྱི་བགྲོད་པ་དངོས་རྣམས་ཐམས་ཅད་དབུ་མར་ཐིམ། ཕྱིན་ཆད་རང་བཞིན་ལྷན་སྐྱེས་དང་སྟོང་བ་ཙམ་བསྒོམས་པས་ཀྱང་ཞུ་བདེ་ངེས་པར་འདྲེན་པའི་རྣམ་མེད་ཕྱག་ཆེན་དངོས་འགྲུབ་པ་ཡིན་ལ། དེ་བས་ན་མཐོང་ལམ་སྐྱེས་ཕན་ཆད། མཉམ་གཞག་གི་ཚེ་འོད་གསལ་ཐམས་ཅད་སྟོང་པའི་སྟོབས་ཀྱི་ཞུ་བདེ་དང་ལྷན་ཅིག་ཏུ་འཇུག་པའི་རང་བཞིན་ལྷན་སྐྱེས་གསལ་བར་སྣང་ལ། རྗེས་ཐོབ་ཀྱི་ཚེ་དེས་དྲངས་པའི་ཞུ་བདེ་ཁོ་ན་རྒྱ་ཆེར་འབྱུང་བ་ཡིན་ནོ། །ཞུ་བདེའི་ལྷན་སྐྱེས་ཀྱི་བདེ་སྟོང་ཁུ་རྡུལ་རླུང་གསུམ་ལས་སྐྱེས་པ་ཡིན་ཀྱང༌། དེ་ཇི་ཙམ་ཡུན་རིང་བ་ཙམ་གྱིས་དེ་གསུམ་གྱི་ཚོགས་པ་འཇིག་ཚབས་ཆེ་བ་འདི་ལ་དགོངས་ནས། སྡིག་པ་དང་ནི་ཤིང་སྲིན་སེམས་ཅན་རྣམས། །གང་ལས་འབྱུང་བ་དེ་དེ་ཉམས་པར་བྱེད། །ཅེས་གསུང་པ་ཡིན་ནོ། །དེ་བས་ན་བཅུད་ལེན་ཞུ་བདེ་དང་གསེར་རང་བྱུང་གི་བདེ་བའི་དཔེར་སྦྱར་བ་ལེགས་སོ་ཞེས་ཁོ་བོ་སྨྲའོ། །གསུམ་པའི་རྒྱུ་མཚན་དྲི་མ་སྤངས་པའི་རང་བཞིན་གྱི་བདེ་ཆེན་དང༌། ཡང་དག་པའི་མཐའ་དོན་གཅིག་ལ། བྱང་སེམས་རྒྱུན་མཐའ་པ་ལ་ཡང་གཉིས་སྣང་གི་བག་ཆགས་ཕྲ་མོ་ཡོད་པའི་ཕྱིར་དེ་ལས་ལྡང་མི་སྲིད་པ་མ་ཡིན་ནོ། །དགུ་པ་ནི། གཟུགས་བཟང་ཞིང་མཛེས་པ་དང་ཡན་ལག་རྣམས་མ་གོད་པའི་ཕྱིར་མཆོག་དང༌། རྡོ་རྗེ་དབྱིངས་ཀྱི་དབང་ཕྱུག་མའི་རྩ་སོགས་ཕྲ་བ་དང༌། བདེ་བ་ཆེན་པོ་མཆོག་
གི་རྟེན་ཀུན་ད་རྒྱས་པའི་སྟོབས་ཀྱི་སྐྲ་བཟང་བ་དང༌། ཐུན་མོང་དང་ཐུན་མོང་མ་ཡིན་པའི་ལམ་ལ་སྦྱངས་པས་དུལ་བ་སྟེ། དངོས་གྲུབ་ཀྱི་དོན་དུ་བསྟེན་པའི་ལས་ཀྱི་ཕྱག་རྒྱ་གང་ཅི་ཡང་རུང་བ་ཐམས་ཅད་ལ། མཚན་ཉིད་དེ་རྣམས་ཚང་དགོས་ཤིང༌། དེ་ལྟ་བུའི་ཕྱག་རྒྱས་གཡས་གཡོན་གྱི་རྒྱུ་བ་དྷཱི་ཏཱིར་ཆུད་པའི་རྐྱེན་གྱིས་ལྷན་སྐྱེས་ཀྱི་བདེ་བ་སྦྱིན་པར་བྱེད་ལ། ཤེས་རབ་ཕྱག་ཆེན་ཐོབ་ནས་ནི། ལས་ཀྱི་ཕྱག་རྒྱས་ཅི་ཞིག་བྱ་སྟེ་གང་གི་དོན་དུ་ཞུ་བདེ་དགོས་པའི་རང་བཞིན་གྱི་བདེ་བ་ཐོགས་པ་མེད་པར་འདྲེན་པའི་ཕྱག་རྒྱ་ཐོབ་ཟིན་པའི་ཕྱིར་རོ། །དེ་ལྟར་ཡང་བྲམ་ཟེ་ཆེན་པོས། མིག་ནི་མི་འཛུམ་སེམས་འགོག་དང༌། །རླུང་འགག་པ་ནི་དཔལ་ལྡན་བླ་མས་རྟོགས། །གང་ཚེ་རླུང་རྒྱུ་དེ་ནི་མི་གཡོ་སྟེ། །འཆི་བའི་ཚེ་ན་རྣལ་འབྱོར་མས་ཅི་བྱ། །ཞེས་བླ་མའི་མན་ངག་གི་སྤྲོས་པ་སྤངས་ནས། རླུང་གཡོ་མེད་དུ་བྱས་པ་ཁོ་ནས་འབྱུང་བ་ཐིམ་རིམ་འཆི་བ་ཇི་ལྟ་བ་བཞིན་དང༌། འོད་གསལ་བདེ་བ་ཆེན་པོ་འདྲེན་ནུས་པ་དེའི་ཚེ། རྣལ་འབྱོར་མ་སྟེ་ལས་ཀྱི་ཕྱག་རྒྱ་ཅི་ཞིག་བྱ་ཞེས་པའོ། །ཕྱག་རྒྱ་ཆེན་པོ་མ་ཧཱ་མ་ཡའི་སྟེ་སྒྱུ་འཕྲུལ་ཆེན་མོའི་དོན་རྣམ་བཅས་ལ་ནི་སྒྱུ་ལུས་ཀྱི་རང་བཞིན། དཔེ་བཅུ་གཉིས་ཀྱིས་མཚོན་པའི་ལྷ་མོར་སྣང་བ་དང༌། རྣམ་མེད་ཀྱི་ཕྱོགས་ལ་སྟོང་པ་ཉིད་ཀྱིས་ཐམས་ཅད་སྤྲུལ་པའི་ཕྱིར་སྒྱུ་འཕྲུལ་ཆེན་མོ་སྟེ། དེ་ལ་རྟག་ཏུ་འཁྱུད་པ་སྟེ་བདེ་སྟོང་སྦྱོར་བས་བསྒོམས་ཤིང༌། རིགས་ངན་ཧ་ཌི་བ་ཞེས་རང་ལ་བོས་པའོ། །བཅུ་པ་ནི། རྟོག་གེ་སྟེ་དཔེ་དང་གཏན་ཚིགས་ཀྱི་སྒོ་ནས་རྗེས་དཔག་ཚད་མས་ངེས་པའི་སྟོང་ཉིད་དུ་འཛིན་པའི་ཤེས་རབ་ནི་སྟོང་ཉིད་སྡིག་བཅས་དང་བུ་མོ་སྟེ་ལས་རྒྱ་ལས་ཐོབ་པའི་བདེ་བའང་བདེ་བ་སྡིག་པ་ཅན་ནོ། །ཧུ་ཞེས་པ་ནི་ཉམས་
ང་བའི་ཚིག་གོ འདིར་སྡིག་པ་དང་བཅས་པའི་དོན་ནི། རང་བཞིན་དགེ་བ་ལ་སྒྲིབ་པའི་དོན་ཡིན་ལ། ལས་དང་པོ་པའི་གནས་སྐབས་སུ་ནི་ཐབས་སུ་གྱུར་པའང་ཡོད་པས་གོང་དུ་བཤད་པ་ནི་ལམ་མཐོན་པོའི་དབང་དུ་བྱས་པའི་ངེས་དོན་ཡིན་ནོ། །རང་གི་ལུས་ལ་སྔར་བཤད་པ་ལྟར་གོམས་པར་བྱས་པས། གནས་ལ་སོགས་པ་ས་བཅུ་ལ་བཞུགས་པའི་ལྷ་མོ་སྟེ་ཕོ་ཉ་མོ་རྣམས་ཀྱིས་འདུ་བ་ཁྱད་པར་ཅན་གྱི་བདེ་བ་སྟེར་བས་ལུས་ཉིད་ཞིང་མཆོག་ཡིན་ཏེ། བྲམ་ཟེ་ཆེན་པོས། ཞིང་ཀུན་གནས་དང་ཉེར་བའི་གནས་ལ་སོགས། །ཕྱིན་ཏེ་བལྟས་པས་རྟོགས་པར་གང་སྨྲ་བ། །ལུས་དང་འདྲ་བའི་མུ་གནས་གཞན་ན་མེད། །དགེ་བ་ང་ཡིས་ངེས་པར་ཡང་དག་མཐོང༌། ཞེས་གསུངས་སོ། །དེ་བས་ན། དེ་ཁོ་ན་ཉིད་མེད་པར་ཡུལ་སྣ་ཚོགས་པ་ཀུན་དག་ཏུ་ཕྱིན་པས་ཐང་ཆད་ན་ཕུང་པོ་སངས་རྒྱས་ཀྱི་རང་བཞིན་ལ་སྡུག་བསྔལ་སྟེར་བའི་སྡིག་པ་བརྩམས་པས་དེ་ཁོ་ན་ཉིད་ལ་སྒྲིབ་པ་མཚམས་མེད་དང་འདྲ་བ་མ་བྱེད་ཅིག །རང་ལ་བདེ་ཆེན་ཐོག་མ་ཉིད་ནས་ཡོད་པས་བདེ་བ་ཅན་ཞེས་སེམས་ཅན་རྣམས་ལ་བོས་པ་སྟེ། ཧ་ཌི་བས་མན་ངག་རྟོགས་ནས་ཇོ་གི་ཀུན་ལ་སྨྲས་པའོ། །དེ་ལྟར་ཡང༌། ཉི་ཤུ་རྩ་བཞིའི་དབྱེ་བ་ཡིས། །གནས་སོགས་འདི་ཁོ་ན་ལ་གནས། །དེ་བས་དེ་རུ་བསྐོར་བ་ཡིས། །སྐྱོ་བྱ་དེ་ཉིད་ཅན་གྱིས་མིན། །ཞེས་དང༌། གལ་ཏེ་དེ་ཉིད་ལྡན་གྱུར་ན། །དེ་རྣམས་བསྐོར་བ་ཅི་ཞིག་དགོས། །ཕྱི་རོལ་རྣལ་འབྱོར་པ་དེ་རྣམས། །བསྐོར་བས་ཁམས་རྣམས་ཟད་པར་འགྱུར། །དེ་བས་ཕྱི་རོལ་སྤངས་ནས་ནི། །རྣལ་འབྱོར་རོལ་པས་གནས་པར་བྱ། །དཔལ་ལྡན་རྡོ་རྗེ་རྣལ་འབྱོར་མ། །རྣམ་དག་ཡེ་ཤེས་སྤྱན་རྣམས་ཀྱིས། །རྡོ་རྗེ་རྣལ་འབྱོར་ཅན་རྣམས་གཟིགས། །ཐུགས་རྗེས་ཁྱབ་པའི་ཐུགས་
རྣམས་ཀྱིས། །དེ་རྣམས་དགྱེས་པས་དངོས་གྲུབ་མཆོག །ཇི་ལྟར་འདོད་བཞིན་སྩོལ་བར་མཛད། །ཅེས་མངོན་སྤྱོད་བླ་མར་གསུངས་སོ། །བཅུ་གཅིག་པ་ལ་གཉིས་ལས། དང་པོ་སྟེང་སྒོའི་རླུང་ཐིམ་པའི་སྦྱོར་བ་དངོས་ནི། འཁོར་ལོ་བརྒྱད་ཀྱི་ལྟེ་བ་སྟེ། སྙིང་མགྲིན་སྤྱི་བོ་གཙུག་ཏོར་ལྟེ་བ་གསང་བ་རྡོ་རྗེ་ནོར་བུ་རྣམས་ཀྱི་དྷཱུ་ཏཱིའི་དབུས་སུ་གནས་པའི་ཐིག་ལེའི་དྭངས་མ་རྣམས་ལ། ཆ་ཤས་དང༌། ཚུལ་དང༌། ཐིག་ལེ་དང༌། ཡེ་ཤེས་དང༌། ཚུལ་དང༌། མཆོག་དང༌། ཡང་དག་དང༌། མཆོག་གཉིས་པ་ཞེས་བྱའོ། །དེ་རྣམས་སུ་སེམས་ཞོག་ཤིག་སྟེ། མན་ངག་དང་བཅས་པའི་སྒོ་ནས་སེམས་ཟུང་ཞིག་དང༌། སོ་སོར་རང་གི་རིག་པ་བརྗོད་པ་ཚིག་གི་ལམ་ལས་འདས་ཤིང་ཆད་པ། རང་བཞིན་དང་ཞུ་བདེས་བསྡུས་པའི་ལྷན་སྐྱེས་མངོན་དུ་འགྱུར་རོ། །དེའི་རྒྱུ་མཚན་རྩ་དང་དཔའ་བོ་སྟེ་ཁམས་དང་རླུང་གི་རྣལ་འབྱོར་བསྒོམས་པས་ཀུན་རྟོག་གི་རྒྱུ་རླུང་རྣམས་རང་ཁྱིམ་ཨ་བ་དྷཱུ་ཏཱིར་ཐིམ་ཞིང་སོང་བའི་ཕྱིར་རོ། །འདིར་ཅུང་ཟད་བཤད་ན། ཞུ་བདེ་དང་རང་བཞིན་ལྷན་སྐྱེས་མངོན་དུ་བྱེད་པའི་རྒྱུ་རྐྱེན་བཤད་པ་ལ། རྒྱུའི་ངོ་བོ། དབྱེ་བ། མཚན་གཞི། ལྷན་སྐྱེས་ཇི་ལྟར་སྐྱེད་པའི་ཚུལ། ས་མཚམས་དང་གནས་སྐབས་ཏེ་ལྔ་ལས། དང་པོ་ལ། སྤྱིར་རྒྱུ་དང་རྐྱེན་གྱི་རྣམ་དབྱེ་མང་མོད་ཀྱང༌། འདིར་ངེས་པར་དགོས་པ་ནི། ཉེར་ལེན་གྱི་རྒྱུ་དང༌། ལྷན་ཅིག་བྱེད་རྐྱེན་གཉིས་ཡིན་ཅིང༌། ལྷན་སྐྱེས་མངོན་དུ་བྱེད་པའི་ནུས་མཐུ་རང་ལ་ཡོད་པ་ཆོས་ཉིད་ཀྱི་ཐོབ་པ་ན་རང་བཞིན་ལྷན་སྐྱེས་ཀྱི་ཉེར་ལེན་དང༌། ལྷན་ཅིག་བྱེད་རྐྱེན་ནི་ཤིན་ཏུ་མང་ཡང་གཙོ་བོར་ཞུ་བདེ་ཡིན་ལ། ཞུ་བའི་ལྷན་སྐྱེས་ཀྱི་ཉེར་ལན་ནི། གཙོ་བོར་ལུས་དབང་དང་ཡིད་ཀྱི་རྣམ་ཤེས་ཡིན་ལ། རྐྱེན་
ནི་རླུང་དབུ་མར་ཐིམ་པས་ཞུ་ཚུལ་ཁྱད་པར་ཅན་གྱིས་བྱང་ཆུབ་ཀྱི་སེམས་ཡིན་ཅིང༌། དེ་ཉིད་ལུས་ཀྱི་ཆ་ནས་རྟེན་དང༌། བདེ་བ་ནི་སེམས་ཀྱི་ཆ་ནས་བརྟེན་པར་བཞག་པས་དེ་ལྟར་ན་འདི་སྐད་ཅེས་བྱ་སྟེ། །དངོས་སམ་ཉེ་བའི་སྒོ་ནས། གཙོ་བོར་ལྷན་སྐྱེས་སྐྱེད་བྱེད་ཀྱི་ཐབས་ནི། ལྷན་སྐྱེས་ཀྱི་རྒྱུའི་ངོ་བོ་སྟེ་མཚན་ཉིད་དོ། །དེ་ལ་ཉེ་བའི་གོ་དོན་ལམ་གཞན་གྱིས་བར་མ་ཆོད་པ་ཡིན་པས་ན། ལས་དང་པོ་པའི་རྫོགས་རིམ་རྣམས་དངོས་བཏགས་ཕྱེ་བའི་ཚེ། རྫོགས་རིམ་དང་དེའི་ལྷན་སྐྱེས་བཏགས་པ་བར་འཇོག་སྟེ། རྫོགས་རིམ་ཉིད་ཀྱི་ལྷན་སྐྱེས་དངོས་རྒྱུ་དང་བཅས་པ་ཁོ་ན་དངོས་སུ་འཇོག་པ་ཡིན་ནོ། །གཉིས་པ་ནི། ངོ་བོའི་སྒོ་ནས་རང་ལུས་ལ་བརྟེན་པ་དང་གཞན་ལུས་ལ་བརྟེན་པ་གཉིས་ཀྱི་དང་པོ་ལ། རྩ་དང་རླུང་དང་ཐིག་ལེ་རེ་རེ་བསྒོམས་ཤིང་དེ་དག་ལ་གནད་དུ་བསྣུན་པ་དང༌། གསུམ་ཆར་སྒོམ་པ་སྟེ་བཞིའོ། །གཞན། ལུས་ཀྱི་རྫོགས་རིམ་ལ་ནི། གསུམ་ཆར་སྒོམ་ཤིང་གནད་དུ་བསྣུན་པ་ཤས་ཆེའོ། །འབྲས་བུ་འགྲུབ་པའི་དུས་ཀྱི་སྒོ་ནས་ཕྱེ་ན། བརྟགས་པ་བ་རིང་རྒྱུ་དང༌། དངོས་ཉེ་རྒྱུའོ། །ཕྱི་མ་ལ་ཉེ་བ་ཙམ་པོ་དང༌། དངོས་རྒྱུའོ། །འབྲས་བུ་སྐྱེ་ཚུལ་གྱི་སྒོ་ནས། ཉེར་ལེན་དང༌། ལྷན་ཅིག་བྱེད་པའོ། །དེ་ཐམས་ཅད་དུ་ལྷན་སྐྱེས་གཉིས་ཀའི་རྣམ་དབྱེ་ཤེས་དགོས་སོ། །གསུམ་པ་ནི། ཅི་ཙམ་དུ་རང་ལུས་ལ་བརྟེན་པ་བཞི་ལ། སྒོམ་པ་དང༌། གནད་དུ་བསྣུན་པ་ལ་མུ་བཞི་ཡོད་དེ། དཔེར་ན། རྩ་སྒོམ་ལ། གནད་དུ་མི་བསྣུན་པ་ནི། རྩ་ཙམ་སྒོམ་པ་ལས་གཞན་དུ་སེམས་འཛིན་ཚུལ་མེད་པ་རྣམ་དང༌། གནད་དུ་བསྣུན་ཀྱང་མི་སྒོམ་པ་ནི་རིམ་འཛིན་རྗེས་གཞིག་དང་འོད་གསལ་འཆར་བ་སོགས་ཏེ། རྩ་ཉིད་མ་བསྒོམས་པར་ཕྱོགས་དེར་
སེམས་གཏད་པས་རླུང་འདུ་བའི་གནད་ཡོད་པ་རྣམས་སོ། །གཉིས་ཀ་ཡོད་པ་ནི་ཤིན་ཏུ་མང་ལ། དང་པོ་ནི། རྫོགས་རིམ་རྣམ་པར་དག་པར་མི་འགྱུར་རོ། །དེས་གཞན་རྣམས་ཀྱང་མཚོན་ཅིང༌། དེས་ན། རྫོགས་རིམ་གྱི་ཡན་ལག་ཁ་ཅིག རྩ་རླུང་ཐིག་ལེ་རེ་རེ་གཉིས་གཉིས་ཙམ་ལ་གནད་དུ་བསྣུན་པའང་ཡོད་ཅིང་རྫོགས་རིམ་གྱི་འགངས་རྣམས་ནི་གསུམ་ག་ལ་གནད་དུ་བསྣུན་པ་ཁོ་ནའོ། །དེ་བཞིན་དུ་རྩ་སྒོམ་ལ་རླུང་མི་སྒོམ་པ་སོགས་རྣམ་དབྱེ་ཞིབ་མོར་བྱའོ། །རྩ་སྒོམ་པ་ནི་ནག་པོ་པའི་རྒྱུད་ཀྱི་རིམ་པ་ལྟ་བུ་དང༌། ཐིག་ལེ་སྒོམ་པ་དྲིལ་བུ་རིམ་ལྔའི་བདག་བྱིན་བརླབ་པ་ལྟ་བུ་དང༌། རླུང་སྒོམ་པ་རྡོ་རྗེའི་བཟླས་པ་ལྟ་བུ་དང༌། གསུམ་ཆར་སྒོམ་པ་མི་དམིགས་ཀྱི་གཏུམ་མོ་ལྟ་བུའོ། །སྤྱིར་གཏུམ་མོ་ལ་རང་བཞིན་གྱི་གཏུམ་མོ་དང༌། རྣལ་འབྱོར་གྱི་གཏུམ་མོ་དང༌། ལས་ཀྱི་གཏུམ་མོ་གསུམ་ལས། དང་པོ་ནི། ལྷན་སྐྱེས་ཀྱི་བདེ་སྟོང་དང༌། གཉིས་པ་ནི། རྩ་འཁོར་དུ་ཐིག་ལེ་སྒོམ་པ་སོགས་དམིགས་བཅས་ཀྱི་རྫོགས་རིམ་སྟེང་སྒོ་ལ་བརྟེན་པ་ཕལ་ཆེ་བ་རྣམས་དང༌། གསུམ་པ་ནི། ལས་རྒྱ་དང༌། ཡེ་རྒྱ་དང༌། དམིགས་བཅས་ཀྱི་ཕྱག་ཆེན་རྣམས་ཡིན་པར་མན་ངག་སྙེ་མ་སོགས་སུ་བཤད་དེ། སྔར་བཤད་པའི་གཏུམ་མོའི་སྒྲ་དོན་ཚང་ཞིང་རྫོགས་རིམ་ཐམས་ཅད་གཏུམ་མོར་བསྡུད་པའི་ལུགས་སོ། །རླུང་མི་སྒོམ་པར་གནད་དུ་བསྣུན་པ་ནི། དུས་ཀྱི་འཁོར་ལོའི་སྦྱོར་དྲུག་གི་སྲོག་རྩོལ་སྐབས་སུ་བསྟན་པའི་བུམ་ཅན་ལྟ་བུ་ཡིན་ལ། ཐིག་ལེའི་དོན་ལས་དང་ཡེ་ཤེས་ཀྱི་ཕྱག་རྒྱའི་གནས་སྐབས་ན་མང་དུ་འབྱུང་ཞིང༌། རྩ་ལ་གནད་དུ་བསྣུན་པ་ནི་རྫོགས་རིམ་ཐམས་ཅད་ཡིན་པས་གོ་སླ་ལ། བཞི་ཀ་མ་སྒོམས་པར་གནད་དུ་བསྣུན་པ་
ཡང་ཡོད་དེ། ཕྱག་ཆེན་གྱི་བདེ་ཆེན་འདྲེན་པ་ཐམས་ཅད་དེ་ལྟ་བུ་ཡིན་ཅིང༌། གཞན་ཡང་འཕགས་རྒྱུད་ཀྱི་རྫོགས་རིམ་ཕལ་ཆེ་བ་དང༌། སོ་སོ་སྐྱེ་བོའི་སྐབས་ན་ཡང་ཅི་རིགས་པ་ཡོད་དོ། །རིང་བའི་རྒྱུ་ནི། རླུང་དབུ་མར་ཐིམ་མ་ཟིན་གོང་གི་རྩ་རླུང་ཐིག་ལེ་ཕྱག་རྒྱའི་རྣལ་འབྱོར་ཐམས་ཅད་ཡིན་ལ། ཉེ་བའི་ཙམ་པོ་ནི། ཐིམ་མ་ཐག་གི་གནས་སྐབས་ཀྱི་རྫོགས་རིམ་རྣམས་དང༌། དངོས་ཀྱི་རྒྱུ་ནི། སྐད་ཅིག་གཉིས་པར་ལྷན་སྐྱེས་སྐྱེ་བར་འགྱུར་བའི་འབར་འཛག་གི་བདེ་སྟོང་དེ་ཉིད་ཡིན་ལ། ལྷན་སྐྱེས་ཀྱི་རིང་རྒྱུ་ནི་དེ་ཡན་ཆད་ཐམས་ཅད་དང༌། སྐད་ཅིག་གཉིས་པར་སྟོང་པ་ལ་ཐིམ་པར་འགྱུར་པའི་སྒྱུ་ལུས་མ་གཏོགས་མ་དག་པའི་སྒྱུ་མའི་སྐུ་ཐམས་ཅད་ཡིན་ལ། དེ་ནི་ཉེ་བའི་རྒྱུ་ཡིན་ཅིང༌། དངོས་རྒྱུ་ནི་སྐུ་དེ་སྟོང་པ་ལ་ཐིམ་པར་བྱེད་པ་པོ། ཕྱག་ཆེན་དང་འབྲེལ་བའི་ཕྱག་རྒྱ་གང་ཡང་རུང་བའི་དྲངས་བའི་ཞུ་བདེ་ནི་དངོས་རྒྱུ་ཡིན་ལ། ལྷན་སྐྱེས་གཉིས་གང་ཡིན་ཡང་རུང་སྟེ། དངོས་ཐོབ་ཕན་ཆད་དུ། རང་འདྲའི་ཉེར་ལེན་དང༌། ཕྱག་རྒྱ་བཞི་པོ་གང་རུང་རྐྱེན་དུ་འབྱུང་བ་ཡིན་ནོ། །སྤྱིར་ཞུ་བདེ་ལྷན་སྐྱེས་ཀྱང་ལས་དང་པོ་ནས་མཐར་ཐུག་པའི་བར་ཡོད་མོད་ཀྱི། དངོས་ལམ་གྱི་ལྷན་སྐྱེས་དངོས་གཞི་ཞུ་བདེ་ཆེན་པོའི་མིང་ཅན་ནི། རླུང་དབུ་མར་ཐིམ་པར་བརྟན་པར་སོང་ཕན་ཆད་ནས་འཇོག་པ་ཡིན་ཅིང༌། དེ་ཡང་འོག་ནས་འཆད་པ་ལྟར། ཁམས་ཕྲ་བ་རྣམས་ཤིན་ཏུ་ཕྲ་བ་ལ་ཐིམ་པའི་སྐབས་ཡིན་ལ། དེས་ན་མིང་གསལ་མེད་པར་ཞུ་བདེ་ལྷན་སྐྱེས་ཞེས་འདིར་བྲིས་པ་རྣམས་ལམ་གྱི་ཞུ་བདེ་ལྷན་སྐྱེས་དངོས་གཞི་ལ་གོ་བར་བྱའོ། །བཞི་པ་ལ། དྷཱུ་ཏཱིར་གནད་དུ་བསྣུན་པས་རླུང་འགོག་ཚུལ། དེ་ལས་ཞུ་བདེ་འཆར་ཚུལ། དེས་ལྷན་སྐྱེས་མཚོན་ཚུལ་ལོ། །དང་པོ་ནི། སྤྱིར་རྩ་འཁོར་གྱི་ལྟེ་བ་བརྒྱད་ཀར་དུ་སྒོམས་པས། གནས་དེ་ནས་ཐོག་མར་རླུང་ཟློག་པ་དང༌། ཕྱིས་བྱང་
སེམས་འབབ་པའི་སྐབས་དེར་རླུང་ཞི་བའི་སྟོབས་ཀྱི་ཡུན་རིང་དུ་གནས་པས། དགའ་བའི་སྐད་ཅིག་མ་སོ་སོ་གསལ་བར་འཆར་བའི་དགོས་པ་ཡོད་དོ། །འོན་ཀྱང་གཙོ་བོ་ནི་སྙིང་ཁ་དང་དབུ་མའི་ཡས་སྣ་དང་མས་སྣ་རྣམས་ཡིན་སྟེ། འོད་གསལ་འཆར་བའི་གནས་ཀྱི་གཙོ་བོ་ཡིན་པ་དང༌། ཡས་བབས་དང་མས་བརྟན་གྱི་ལྷན་སྐྱེས་རྫོགས་པར་འཆར་བའི་གནས་ཡིན་པའི་ཕྱིར་དེ་སྐད་དུ་ཡང༌། མངོན་བརྗོད་བླ་མ་ལས། ཕག་མོ་ལྟེ་བའི་རྩར་གནས་པ༌། །ལྷན་ཅིག་སྐྱེས་པ་ཁྲག་འཐུང་མཆོག །ཅེས་ལྟེ་བ་དང༌། །ལྟེ་བ་སྙིང་པད་ནུ་མའི་དབུས། །ལྕེའི་རྩ་དང་མགོ་སྟེང་དུ། །དགའ་བ་དང་ནི་མཆོག་དགའ་ཉིད། །དམ་པར་དགའ་དང་ལྷན་ཅིག་སྐྱེས། །ཞེས་པ་དང༌། །སྤྲུལ་པའི་འཁོར་ལོ་ལྷན་ཅིག་སྐྱེས། །དགའ་བ་ཉམས་སུ་མྱོང་བར་བྱེད། །ཅེས་སྤྱི་བོ་དང༌། གང་དུ་སྙིང་གི་པདྨ་ཁ་སྦྱོར་དབུས་ན་གསལ། །ཕྲ་བར་ལྟ་བ་རང་བྱུང་མྱོས་པའི་སེམས་འཇུག་པ། ཁམས་གསུམ་མ་ལུས་གཉིས་མེད་པར་ནི་ཉེར་འགྲོ་བ། །བསལ་བའི་ཆོས་ཀྱི་དབྱིངས་མཆོག་དེ་ལ་བདག་ཕྱག་འཚལ། །དབང་པོ་གཡོ་བའི་རྟ་ཀུན་ནང་དུ་ངེས་སྦྱར་བ། །ཡེ་ཤེས་རྒྱལ་བ་མ་ལུས་འདུས་པའི་སྣོད་གྱུར་པ། ཁམས་གསུམ་མ་ལུས་གཉིས་མེད་པར་ནི་ཉེར་འགྲོ་བ། །མཐོང་བ་མཁའ་དང་འདྲ་བ་དྲི་མེད་དཔལ་དུ་གྱུར། །ཅེས་སྙིང་ག་རྣམས་བསྔགས་པ་ཡིན་ནོ། །རླུང་ནི་སྤྱིར་བཅུ་ཀར་ལ་གནད་དུ་བསྣུན་ཀྱང༌། གཙོ་བོ་ནི་སྲོག་ཐུར་གཉིས་ཡིན་ལ། དེའི་ཡང་རྩ་བ་སྲོག་འཛིན་གྱི་རླུང་ཡིན་ནོ། ཁམས་སོ་དྲུག་དང༌། ཉེར་བཞི་དང༌། བཅུ་དྲུག་རྣམས་ཁུ་ཁྲག་གཉིས་ཀྱི་རྣམ་འགྱུར་ཡིན་པས། དེ་གཉིས་སུ་འདུ་ལ། དེའི་གང་ལ་གནད་དུ་བསྣུན་པར་ནི་འཁོར་ལོའི་རྩ་རྣམས་དང༌། རྩ་སུམ་ཅུ་རྩ་གཉིས་ལ་འབབ་པ་རྣམས་ཡིན་ཅིང༌། དེའི་གཙོ་བོ་འཁོར་
ལོ་བཞི་ལ་གནས་པ་དང༌། ཁྱད་པར་སྙིང་ཁའི་མི་ཤིགས་པ་དང༌། ལྟེ་བའི་གཏུམ་མོ་དང༌། སྤྱི་བོའི་ཧཾ་ཡིག་རྣམས་ལ་གནད་དུ་བསྣུན་པ་ཡིན་ནོ། །དེ་ལྟར་ན། ལྟེ་བ་དང་སྤྱི་བོར་གནད་དུ་བསྣུན་ནས་ཀྱང་མཐར་སྙིང་ཁར་ཐིམ་པའི་ཚུལ་དགོས་པས། ཐམས་ཅད་ཀྱི་གཙོ་བོ་སྙིང་ཁའི་རྩ་དང་རླུང་དང་ཐིག་ལེ་རྣམས་ཡིན་ནོ། །དེ་ལྟར་ཡང་མངོན་བརྗོད་ལས། དབུས་ན་གསལ་བྱེད་རྣམ་པར་ཤེས། །ཡེ་ཤེས་མཆོག་ནི་ཤེས་རྣམ་ཀྱིས། །ཤིན་ཏུ་སྒོམ་པ་གོམས་པ་ལས། །འབར་བ་འདི་ལ་ཐེ་ཚོམ་མེད། །གྲོལ་བའི་ཐིག་ལེ་ལས་ཀྱང༌། །དེ་གསལ་མི་ཤིགས་ཐིག་ལེའི་གཟུགས། །ཡུངས་ཀར་གྱི་ནི་འབྲུ་ཚོད་ཙམ། །འོད་ཟེར་སྣ་སྔ་འབར་འཛག་པའི། །ཚུལ་ཅན་སྙིང་དབུས་རྟག་ཏུ་གནས། །དེ་ལ་བལྟས་པའི་ཡེ་ཤེས་ཆེ། །སྐད་ཅིག་ཙམ་གྱི་རྣལ་འབྱོར་ལ། །འབར་བ་འདི་ལ་ཐེ་ཚོམ་མེད། །གཉིས་པ་ནི། རླུང་དབུ་མར་ཐིམ་པས། ཐིམ་མ་ཐག་དུ་དབུ་མར་གཏུམ་མོ་འབར་ཞིང་དེས་དཀར་ཆ་ཞུ་བའི་བདེ་བ་སྐྱེ་ཞིང༌། སྐྱེས་མ་ཐག་ཏུ་ལྷན་ཅིག་སྐྱེས་པའི་རླུང་ཁྲ་མོ་རང་གནས་སུ་གནས་པས་སེམས་རང་བཞིན་མེད་པའྀ་ཚུལ་གྱི་སྟོང་པས། རྣམ་པར་མི་རྟོགས་པ་ལ་འཇུག་སྟེ་བདེ་ལ་མི་རྟོག་པ་ཞེས་བྱའོ། ། དེ་ལྟར་ཡང༌། རྣལ་འབྱོར་མ་ཙི་ན་ཏོས། དཔེར་ན་ནམ་མཁའི་ངོས་སུ་ཁྱབ་པའི་ཆུ་འཛིན་གྱི་ཚོགས་སྟུག་པོ་དེ་ངེས་པར་གྱུར་པ་ན་གང་དུ་སོང་བ་མི་ཤེས་པ་དེ་བཞིན་དུ། རླུང་འདི་ཡང་སྔར་རྒྱུན་མི་འཆད་པར་འབྱུང་བ་ལས། དེ་ལྟར་ཐིམ་པར་གྱུར་པ་ན། མཆོག་ཏུ་ཟློག་ཅིང་ཚིམ་པ་ཐོབ་པས་གང་དུ་འགྲོ་བར་མི་འགྱུར་རོ། །ལྷན་ཅིག་སྐྱེས་པའི་རླུང་རང་གི་གནས་སུ་གནས་པས་རྟོག་པའི་ཚོགས་ལས་གྲོལ་ཞིང༌། སྟོང་པ་ཉིད་ཀྱི་རང་བཞིན་གྱིས་ཐུགས་ཚིམ་པར་བྱེད་པ་ཅི་ཞིག་ལྟར་སྐྱེས་ཏེ། འདི་ལྟར་འཁོར་བ་འདིར་སྔོན་
དུ་ཐུགས་རྗེ་ཆེན་པོ་མང་དུ་ཐུགས་རྗེ་ཆེན་པོ་མང་དུ་རྒྱུན་མི་འཆད་པ་གོམས་པར་བྱས་པས། མཐའ་ཡས་པའི་སེམས་ཅན་རྣམས་ཀྱིས་དོན་མཛད་པའི་རྒྱུ་འཐོབ་བོ་ཞེས་དངོས་པོ་གསལ་བའི་དེ་ཉིད་གྲུབ་པར་གསུང་ཤིང༌། བྲམ་ཟེ་ཆེན་པོས་ཀྱང༌། ཟ་ཞིང་འཐུང་ལ་གཉིས་སྤྲོད་ཀྱིས་དགའ་ཞིང༌། །རྟག་ཏུ་ཡང་དང་ཡང་དུ་འཁོར་ལོ་འགེངས། །ཆོས་འདི་ལྟ་བུས་འཇིག་བརྟེན་ཕ་རོལ་འགྲུབ་འགྱུར་ཏེ། །རྨོངས་པའི་འཇིག་རྟེན་མགོ་བོར་རྡོག་པས་མནན་ནས་སོང༌། །གང་དུ་རླུང་དང་སེམས་ནི་མི་རྒྱུ་ཞིང༌། །ཉི་མ་ཟླ་བ་འཇུག་པ་མེད་གྱུར་པ༌། །མི་ཤེས་པ་དག་གནས་དེར་སེམས་ནི་དབུགས་ཕྱུང་ཞིག །མདའ་བསྣུན་གྱིས་ནི་མན་ངག་ཐམས་ཅད་བསྟན་ནས་སོང༌། །ཞེས་གསུངས་ཤིང༌། མཆོག་གི་དངོས་གྲུབ་ལྷན་སྐྱེས་ཀྱི་བདེ་བ་ལ་རག་ལས་ཤིང༌། དེ་སྲོག་འཛིན་དྷཱུ་ཏཱིར་ཐིམ་པ་ལ་རག་ལས་པས། མཁའ་འགྲོ་རྒྱ་མཚོ་ལས། ཨ་བ་དྷཱུ་ཏཱིར་སྲོག་གི་རླུང༌། །བརྟེན་པ་ཕག་སོགས་རྣལ་འབྱོར་མ། །མ་བརྟེན་སྲོག་གི་རླུང་རྣམས་ཀྱིས། །དངོས་གྲུབ་གསལ་བར་མི་འགྱུར་རོ། །ཞེས་གསུངས་སོ། །འདིར་འཁོར་ལོ་སོ་སོ་རུ་བསྒོམས་པ་ལས། རླུང་འདུས་ནས་དབུ་མར་འཇུག་ལུགས་དང༌། གནས་ཚུལ་དང་ཐིམ་ཚུལ་སོ་སོར་འབྱུང་ཞིང༌། དེས་དྲངས་པའི་བདེ་སྟོང་ཡང་རྒྱ་ཆེ་ཆུང་སྣ་ཚོགས་པ་འབྱུང་ངོ༌། །གསུམ་པ་ནི། ཞུ་བའི་རྐྱེན་གྱིས་ལུས་ཤེས་ཀྱི་འཁོར་དུ་ཚོར་བ་བདེ་བ་ཁྱད་པར་ཅན་སྐྱེ་བ་དེ་ལ་ཞུ་བདེར་རགས་པ་ཞེས་བྱ་ཞིང༌། དེས་ཉེར་ལེན་བྱས་ནས་ཡིད་ཤེས་ཀྱི་འཁོར་དུ་ཚོར་བ་བདེ་བ་ཁྱད་པར་ཅན་འབྱུང་ཞིང༌། དེས་ཡེ་ཤེས་བདེ་བའི་ངོ་བོར་སྐྱེ་བ་ནི། ཞུ་བདེ་ཕྲ་མོ་ཞེས་བྱའོ། །དེ་ཤར་བའི་ཚེ་ཀུན་གཞི་སེམས་རང་བཞིན་གྱིས་འོད་གསལ་བདེ་བ་ལྟ་བུར་སྣང་བའི་དོན་སྤྱིའི་ཚུལ་གྱིས་མཚོན་ཅིང༌། མཐར་ཞུ་བདེ་དེ་སྟོང་པར་
སྦྱར་བས་བདེ་བ་ནམ་ཤར་དུས་སྟོང་པ་ཡུལ་དུ་བྱེད་ནུས་པའི་བདེ་སྟོང་གོམས་པས། སེམས་ཀྱི་དྲི་མ་དག་ནས་རང་བཞིན་ལྷན་སྐྱེས་མངོན་དུ་གྱུར་པ་ཡིན་ནོ། །ལྔ་པ་ནི། ལམ་གྱི་དངོས་གཞིའི་ལྷན་སྐྱེས་ཐོག་མར་ཐོབ་པ་ནས་སྦྱོར་ལམ་དྲོད་ཀྱི་མགོ་འཛིན་པ་ཡིན་པས། ཕྲ་ཐིག་གི་རྣལ་འབྱོར་ལ་ཞི་ལྷག་ཟུང་འཇུག་མཐར་ཕྱིན་ནས། དངོས་གཞིའི་ཞུ་བདེ་དེ་མ་ཐོབ་པའི་གོང་གི་རིམ་གཉིས་ཀྱི་ལམ་ཐམས་ཅད་ཚོགས་ལམ་ཆེན་པོར་བསྡུ་དགོས་ལ། དཔེའི་འོད་གསལ་ཆེན་པོ་དང༌། དངོས་གཞིའི་ཞུ་བདེ་ལྷན་སྐྱེས་ཆེན་པོ་གཉིས་དོན་ཅིག་ཅིང༌། དེ་ཉིད་སེམས་དབྱེ་ན་མཐར་ཐུག་ཡིན་ལ། དེ་ལྟ་བུ་དེ་དྲོད་ཆེན་པོར་འཇོག་ཅིང་དེའི་སྐད་ཅིག་གཉིས་པར་ཐོབ་པའི་ཡེ་ཤེས་ཀྱི་སྐུ་མངོན་དུ་གྱུར་པ་ནས་སྦྱོར་ལམ་རྩེ་མོར་འཇོག་ཅིང༌། དེའི་མཉམ་བཞག་ཏུ་སྐུ་དང་ཡེ་ཤེས་ཟུང་འཇུག་ཁོ་ནར་འབྱུང་བ་ནས་རྗེས་ཐོབ་ཏུ་རང་བཞིན་བརྒྱད་ཅུའི་རྣམ་རྟོག་མངོན་འགྱུར་བ་འགགས་ཀྱི་བར་བཟོད་པར་འཇོག་ཅིང༌། དེ་ནས་དོན་གྱི་འོད་གསལ་ལམ་རང་བཞིན་ལྷན་སྐྱེས་མ་ཐོབ་ཀྱི་བར་དུ་ཆོས་མཆོག་ཡིན་ནོ། །འདིར་ལས་ཀྱི་རླུང་རགས་པ་རྣམས་དབུ་མར་ཐིམ་པ་ལན་ཅིག་བྱུང་ནས་རིང་པོར་མི་ཐོགས་པར་ཡང་ལྡང་ཞིང༌། བརྟན་པོར་སོང་ཀྱང་སླར་ཡེ་མི་ལྡང་བ་མ་ཡིན་ལ། ཤིན་དུ་ཕྲ་བའི་རླུང་མཐོང་ལམ་གྱི་ཚེ་ཐོག་མར་འགག་ཅིང༌། འཚང་རྒྱ་སའི་སྐད་ཅིག་སྔ་མ་ལ་གཏན་ནས་འགག་གོ །ཕྲ་མོ་ཙམ་པོའི་རླུང་ཞུ་བདེ་དངོས་གཞི་ཐོབ་པའི་ཚེ་དང་པོར་འགག་ཅིང༌། །དོན་གྱི་ཡེ་ཤེས་སྐྱེས་པའི་ཚེ་གཏན་ནས་འགག་པ་ཡིན་ནོ། །འདིར་ཞུགས་གནས་ཐིམ་གསུམ་སོགས་ཞིབ་ཏུ་དཔྱད་རྒྱུ་མང་དུ་ཡོད་མོད་ཀྱི་རེ་ཤིག་བཞག་གོ །དེ་ཙམ་ཤེས་པས་ཀྱང་རྫོགས་རིམ་དང་རྫོགས་རིམ་ལྟར་སྣང་གི་རྣམ་དབྱེ་ལ་མཁས་པར་འགྱུར་རོ། །གཉིས་པ་ཕྱི་རོལ་གྱི་ཕྱག་རྒྱའི་སྦྱོར་བའི་རླུང་ཐིམ་ཚུལ་ནི།
ནོར་བུའི་དབུས་སུ་གནས་པའི་ཐབས་ཀྱི་མེའི་འཁོར་ལོ་དང༌། རྡོ་རྗེ་དབྱིངས་ཀྱི་དབང་ཕྱུག་མའི་རྩ་ཤེས་རབ་ཀྱི་མེའི་འཁོར་ལོ་སྟེ། དེ་གཉིས་སྤྲོད་ན། ཞུ་བའི་བདེ་བ་རྒྱ་ཆེན་པོ་འབྱུང་ཞིང༌། བདེ་བའི་དེ་ཉིད་ཡེ་ཤེས་སུ་བྱེད་པའི་སྟོང་པ་དེ་སུ་ཞེ་ན། བདེ་བ་དེ་ནི་ངོ་བོ་རང་བཞིན་དུ་མ་གྲུབ་པས་རང་གི་ངོ་བོས་སྟོང་པ་ཡིན་ཏེ་ཞུ་བདེའི་ལྷན་ཅིག་སྐྱེས་པ་ནི་བདེ་བར་སྣང་བ་མི་འགག་ཀྱང༌། སྣང་བའི་དུས་ཉིད་ན་བརྟགས་ན་མི་རྙེད་ཅིང༌། མ་བརྟགས་གཅིག་པུར་ཉམས་དགའ་བའི་ཚེ་བདེ་བ་སྣ་ཚོགས་པར་སྣང་བ་ཡིན་ཏེ། གྲུབ་ཆེན་ནག་པོ་སྤྱོད་པས། དཔེར་ན་གཙུབ་ཤིང་གཙུབ་སྟན་ལག་པ་ཡིས། །རྩོལ་བ་ལ་བརྟེན་མེའི་རྩེ་དམིགས་པ། །བརྟགས་ན་གཙུབ་ཤིང་དེ་དག་ལ་ཡོད་མིན། །འགྲོ་བ་གཡོ་བ་ལ་སོགས་བཞིན་ནོ། །འགྲོ་བ་མཐའ་དག་སོ་སོར་སྣང་བ་ཙམ། །བདེ་སོགས་ངོ་བོ་མ་བརྟགས་ཉམས་དགའ་བ། །འདི་སྐད་བདག་གིས་ཞེས་བྱ་ལ་སོགས་དག །བསམ་གྱི་མི་ཁྱབ་ཇི་ལྟ་དེ་ལྟའོ། །ཞེས་གསང་བའི་དེ་ཉིད་ལས་གསུངས་སོ། །འདིར་གྲུབ་པའི་མཐའ་ནི། ཕོ་ཉའི་ལམ་གྱི་གནད་ཐབས་ཤེས་ཀྱི་རྩའི་སྦྱོར་ལ་རག་ལས་པ་དང༌། དེ་ལས་ཐོབ་པའི་ཞུ་བདེ་རང་བཞིན་མེད་པའི་སྟོང་པ་ཉིད་སྒོམ་པ་འདི་ཡིན་ནོ། །ཞེས་པའོ། །གཉིས་པའི་རྒྱུ་མཚན་སྔར་བཤད་ཟིན་ལ། དང་པོ་ནི། རྡོ་རྗེ་འཕྲེང་བའི་ལེའུ་བཞི་པར། དཔའ་བོ་དང་ནི་རྣལ་འབྱོར་མ། །གང་ཚེ་གསང་བའི་རྩ་གཉིས་འདི། །ཡང་དག་སྦྱོར་བས་རེག་གྱུར་པ། །དེ་ཚེ་ནམ་མཁའ་རྣམ་རྒྱས་ཉིད། །ནམ་མཁའ་ལས་ནི་སྐྱེས་པའི་རླུང༌། །དེ་ཡི་མེ་ནི་རབ་ཏུ་འབར། །རྩ་ནི་སྟོང་ཕྲག་བདུན་ཅུ་གཉིས། །རྩ་རྣམས་རབ་གསང་མེ་དེ་ཡིས༌། །བདེ་བ་ཀུན་གྱི་གོ་འཕང་མཆོག །བདེ་བ་ཆེན་པོ་བྱང་ཆུབ་སེམས། །རྣམ་པར་
ཞུ་ནས་རྩར་གནས་པ། །ཞེས་གསུངས་ཤིང༌། བདེ་མཆོག་ཉུང་ངུའི་དབུགས་འབྱིན་སྐྱོད་དང་དགོད་པ་དང་ཞེས་པའི་འགྲེལ་པར་གྲུབ་ཆེན་ལྭ་བ་པས་ཤེས་རབ་ཀྱིས་རླུང་རྣམས་ཀྱིས་འབབ་པའོ། །ཞེས་གསུངས་ཤིང༌། སྤྱིར་གཏུམ་མོ་སྦོར་བྱེད་ལས་ཀྱི་རླུང་ནི་དབུ་མའི་མས་སྣར་གསར་དུ་སྐྱེས་པའི་ཐུར་སེལ་གྱི་རླུང་ཞིག་ཡིན་ལ། དེ་ཡང་སྟེང་སྒོ་ལ་བརྟེན་ན་རོ་རྐྱང་གཉིས་ཀྱི་རྒྱུ་བ། དབུ་མར་ཞུགས་གནས་ཐིམ་གསུམ་བྱས་པས། སྔར་དབུ་མའི་མས་སྣ་ཟུམ་ཞིང་ལྟེ་བས་ས་དེ་རྒྱས་པར་འགྱུར་བས། དེར་རླུང་སྐྱེ་བ་ཡིན་ལ། འདིར་ཕྱག་རྒྱའི་དབུ་མའི་རླུང་ཐབས་ཀྱི་དབུ་མར་ཆུད་པས་བཙན་ཐབས་སུ་རོ་རྐྱང་གི་རྒྱུ་བ་འགག་ཅིང༌། དེས་གཏུམ་མོ་འབར་ཕུལ་ཤིན་དུ་ཆེའོ། །དེ་ཙམ་གྱིས་འཁོར་ལོ་རྣམས་ཀྱི་རྩ་མདུད་གྲོལ་བ་ལ་ཡང་སྟོབས་ཆེ་བས། འདི་ཕྱག་རྒྱ་སྲོག་རྩོལ་དུ་འགྲོ་ཚུལ་མཆོག་ཏུ་གྱུར་པ་ཡིན་ལ། འདི་ཉིད་རྟོགས་དཀའ་ཞིང་འདིའི་དོན་ཕྱག་ཆེན་ཐིག་ལེ་ལས་ཀྱང་རྒྱས་པར་གསུངས་སོ། །བཅུ་གཉིས་པ་ནི། བདེ་བ་ལ་སེམས་ཟིན་པ་ཙམ་དང༌། རྣམ་རྟོག་བཀག་པའི་མུན་སྒོམ་ཙམ་གྱིས་རྨོངས་པའི་གནས་ལ་སྟོང་པ་ཉིད་སྒོམ་པ་ཡིན་སྙམ་དུ་མ་སེམས་ཤིག་ཅེས་པའོ། །བཅུ་གསུམ་པ་ནི། གཞན་གྱི་བརྗོད་མིན་ལྷན་ཅིག་སྐྱེས། །གང་དུ་ཡང་ནི་མི་རྙེད་དེ། །བླ་མའི་དུས་ཐབས་བརྟེན་པ་དང༌། །བདག་གིས་བསོད་ནམས་ལས་ཤེས་བ། །ཞེས་ལྷན་སྐྱེས་མཚོན་པའི་རྒྱུ་ཚོགས་ཀྱི་གཙོ་བོ། བླ་མ་དམ་པ་བསྟེན་པ་དང༌། ཀུན་རྫོབ་དང་དོན་དམ་པའི་གཏུམ་མོ་རྒྱས་པ་ལ་རགས་ལས་པས། དང་པོ་ནི། དཔལ་ལྡན་འཁོར་ལོ་སྡོམ་པའི་རྒྱུད་དུ་གསལ་བར་བསྟན་པ་གང་ཡིན་པ་དེ་ཉིད་ཤེས་པ་དང༌། རྣལ་འབྱོར་ཅན་གྱི་དབང་ཕྱུག་ལྭ་བ་པའི་བཀའ་དྲིན་ལས་
ཐོབ་པ་ཡིན་ལ། ཟླ་བ་དང་ཉི་མའི་རླུང་སྟེ་གཡས་གཡོན་དང་སྲོག་ཐུར་གྱི་རྒྱུ་བ་གང་དུ་ཐིམ་པ་དང༌། སེམས་འོད་གསལ་ཐོག་མར་ཤར་བ་མེད་ཅིང༌། མཐར་ནུབ་པ་མེད་པ་མངོན་དུ་གྱུར་པ་ནི། ཀུར་མ་པཱ་དའི་མཚན་ཅན་དཀྱིལ་འཁོར་གྱི་གཙོ་བོ་རྡོ་རྗེ་སྤྱན་དེ་རྡོ་རྗེ་འཆང་གི་རང་བཞིན་ཆོས་ཀྱི་སྐུ་མངོན་དུ་མཛད་པའི་ཕྱིར། དག་པ་གཉིས་ལྡན་དེ་ཆོས་ཐམས་ཅད་ལ་ཉེ་རིང་མེད་པར་ཁྱབ་པས། གདོད་མ་ལྷན་ཅིག་སྐྱེས་པའི་བླ་མ་དེ་བཞིན་གཤེགས་པའི་ས་ལ་སྤྱོད་པའི་ཞལ་སྔ་ནས་ཀྱིས་སེམས་ཅན་ཐམས་ཅད་བདག་ཏུ་ཞེན་པ་ལ་སོགས་པའི་རྣམ་པར་རྟོག་པ་སྡིག་པའི་རང་བཞིན་མ་བྱེད་ཅེས་གདམས་པ་ཐོས་པའི་རྐྱེན་གྱིས་མངོན་དུ་གྱུར་པ་ཡིན་ནོ། །དེ་བས་ན། བདག་གྲོལ་བ་བླ་མའི་དྲིན་ཡིན་པ་བཞིན་དུ། ཐམས་ཅད་ཀྱི་ཡོན་ཏན་ཅུང་ཟད་ཐོབ་པ་གང་ཡིན་པ་དེ་ཐམས་ཅད་ཀྱང་སློབ་དཔོན་གྱིས་དྲིན་ལས་བྱུང་པས་རྣ་རྒྱན་མགོན་པོ་སྟེ་ཛཱ་ལནྡྷ་ར་པ་ངས་ད་སྨྲ་བར་བྱ་བ་ནི་འདི་ཡིན་ཏེ། རྡོ་རྗེ་སློབ་དཔོན་སྟོན་པ་རྡོ་རྗེ་སེམས་དཔའི་ངོ་བོ་ཉིད་མཉེས་པར་མ་བྱས་ན་འདོད་པའི་དངོས་གྲུབ་ཅི་ལྟར་ཐོབ་སྟེ་མི་ཐོབ་ལ། དེའི་རྒྱུ་མཚན་ཡང༌། བྲམ་ཟེ་ཆེན་པོས། དེ་མི་མཚོན་པའི་ལྟ་བ་ཡོད་མིན་ཏེ། འོན་ཀྱང་གཅིག་པུ་བླ་མའི་ཞལ་ལ་བལྟས་པ་ཡིན། ཞེས་གསུངས་ཤིང༌། སློབ་དཔོན་ལེགས་པར་བསྟེན་ཅིང་བཀའ་བཞིན་བསྒྲུབ་ན་དངོས་གྲུབ་ཡུད་ཙམ་གྱིས་འབྱུང་ཞིང་ཐོབ་པ་ཡིན་ཏེ། ཕྱག་རྒྱའི་དངོས་གྲུབ་སྟེ་མཆོག་གི་དངོས་གྲུབ་འདི་ནི་བླ་མའི་ཞལ་གྱི་རྗེས་སུ་འབྲང་བ་ལ་ངོ་མཚར་སྐྱེས་པས་ཨ་ཧོ་ཞེས་བརྗོད་པའོ། །དེ་ལྟར་ཡང༌། གདོད་ནས་སྐྱེ་མེད་རང་བཞིན་ཡིན་པ་ལ། །དེ་རིང་དཔལ་ལྡན་བླ་མའི་བསྟན་པ་རྟོགས། །ཞེས་དང༌། བླ་མས་སྨྲས་པ་གང་གི་སྙིང་ཞུགས་པ། །ལག་པའི་མཐིལ་ན་གནས་བའི་གཏེར་མཐོང་འདྲ། །ཞེས་གསུངས།
གཉིས་པ་གཏུམ་མོ་མི་ཉམས་པར་གདམས་པ་ནི། བདེ་བ་ཆེན་པོའི་རྒྱུར་འགྱུར་བ་ལ་ངོ་མཚར་བའི་ཨ་རེ་ཞེས་བརྗོད་ནས་རྒྱལ་པོ་གོ་བི་ཙཎྜ་ཁྱོད་ལྷན་སྐྱེས་བདེ་བའི་སྟོབས་ཀྱི་སྤང་བྱའི་ཚོགས་ལས་རྒྱལ་བར་གྱུར་ཅིག ཇི་ལྟར་ན། ཀུ་སུམ་བྷ་ཡི་མེ་ཏོག་ནི། ལྟེ་བའི་གཏུམ་མོ་སྟེ་རྡུལ་ལ་མེ་ཏོག་ཅེས་གྲགས་པ་ཡིན་ནོ། །དེ་ལྟ་བུའི་གཏུམ་མོ་དེ་གསོས་ཀ་སྟེ་བྱང་ཆུབ་ཀྱི་སེམས་ལྟེ་བར་ཕྱིན་པ་ལྷན་སྐྱེས་ཀྱི་བདེ་བ་མྱོང་བའི་ཚེ་ལྷག་པར་རྒྱས་པར་འགྱུར་བ་དེ་ལྟ་བུའི་སྒོ་ནས་མེ་ཏོག་སྟེ་གཏུམ་མོ་ཉམས་པར་མ་གྱུར་ཅིག འདིར་གསོས་ཀ་ཞེས་བྱ་བ་རླུང་ཞི་བའི་དུས་ཡིན་པས་གཡས་གཡོན་གྱི་རྒྱུ་བ་དབུ་མར་ཐིམ་པའི་སྐབས་ཏེ་འགོག་པའི་དུས་ལ་སྦྱར་ཞིང་ཉམས་པར་མ་གྱུར་ཅིག་ཅེས་པ། གྲུབ་པའི་དཔྱིད་ཀྱི་སྦྱོར་དུས་ལ་སྦྱར་ན་ལེགས་གསུང༌། བྱང་ཆུབ་ཀྱི་སེམས་ལྟེ་བར་ཕྱིན་པའི་ཚེ་བསིལ་བར་བྱེད་ཅེས་པ་ནི་བདེ་བ་སྐྱེས་པས་གདུང་བ་དང་བྲལ་བའི་དོན་ཡིན་གྱི། མེའི་ཁམས་ཉམས་ཏེ་དྲོད་ཆུང་ངུ་སོང་བ་མ་ཡིན་ནོ། །ཇི་ལྟར་མེ་འབར་བ་ལ་ཞུན་མར་གྱི་ཐིག་པ་བླུག་ན་ཆེར་འབར་བ་ལྟར་ཞུ་བས་ཀྱང་གཏུམ་མོ་ཆེར་འབར་ཏེ་འབར་འཛག་གི་བདེ་བ་འདྲེན་པ་རྒྱུན་མི་འཆད་པར་འབྱུང་བ་ནི། དབུ་མར་ཞུགས་གནས་ཐིམ་གསུམ་བརྟན་པོར་བྱས་པའི་ཞུ་བདེ་ཕལ་ཆེར་ལ་འབྱུང་བ་ཡིན་ནོ། །བཅུ་བཞི་པ་ནི། ནམ་མཁའ་ལྟ་བུ་སྟེ་སྤྲོས་པ་དང་བྲལ་བའི་ཚུལ་ལ་རྗེས་དཔག་གི་དཔྱོད་པ་ལྷུར་ལེན་པ་སྟོང་ཉིད་མཐར་ཐུག་སྒོམ་པར་བྱས་པའི་ལྟ་བ་དང༌། དབང་གསུམ་པའི་ཡེ་ཤེས་ཉིད་ཇེ་བཟང་དུ་སོང་བ་བཞི་པ་དོན་དམ་པའི་ཤེས་རབ་ཡེ་ཤེས་ཡིན་ཅེས། གསུམ་པ་ཞུ་བདེ་ལ་བཞི་པ་རང་བཞིན་གྱི་བདེ་བར་འཁྲུལ་བའི་སྨྲ་བ་པོ་དེ་རྣམས་སངས་རྒྱས་པ་ཡིན་ཡང་ཐོག་མ་དང་བར་དང་ཐ་མར་དགེ་བའི་ལམ་ལས་གོལ་བའི་ཕྱིར་སྡིག་པ་དང་བཅས་པ་ཡིན་ནོ། །དང་པོར་རྟོག་པས་བཏགས་པའི་
ལྷ་སྒོམ་པ་དང༌། དེ་ནས་ལས་ཀྱི་ཕྱག་རྒྱའི་བདེ་བ་སྒོམ་པ་དང༌། དེ་ནས་ཕུང་པོ་རྣམ་དཔྱད་ཀྱི་སྟོང་ཉིད་སྒོམས་པ་བདེ་སྟོང་སྦྱོར་བར་འདོད་པ་ནི་ཐོག་མཐའ་བར་གསུམ་དུ་དགེ་བའི་ལམ་མ་ཡིན་པར་དྲི་མེད་འོད་དུ་གསུངས་པ་དང་འདི་མཐུན་ལ། དེ་ཡང་གཙོ་བོར་ལམ་མཐོན་པའི་སྐབས་ཏེ་ངེས་དོན་གྱི་དབང་དུ་བྱས་པའོ། །ཞི་བའི་རྗེས་སུ་འབྲང་བྱེད་ཅེས་པ་ནི། དབང་ཕྱུག་གིས་བསྟན་པའི་ལམ་གྱི་ཞུ་བདེ་དང༌། ཞི་བ་པ་རྣམས་རྫས་ཡོད་དྲུག་ལས་གཞན་པའི་དངོས་པོ་ཐམས་ཅད་རྗེས་སུ་དཔག་པ་ཡང་དག་དང་ལྟར་སྣང་གི་མེད་པར་སྒོམ་པ་ངེས་པའི་མཐའ་ཡིན་ནོ་ཞེས་སྟོན་པའི་རྗེས་སུ་འབྲང་བར་བྱེད་པ་ཞི་བའི་རིང་ལུགས་ཚད་མར་ཁས་ལེན་པའི་ཕྱིར་ཉེ་དུ་མོ་ལ་བགྲོད་ནས་ཡུལ་པྲ་ཡ་གའི་སའི་ཆར་ཆུ་བོ་གཾ་ག་དང་ཡ་མུ་ན་འདུས་མཚམས་གཾ་གའི་སྒོ་ཞེས་པར་མཆོངས་ནས་འཆི་བའི་དུས་བྱེད་པའི་བརྟུལ་ཞུགས་སམ། ཡང་ན་ཡུལ་འཕྲོག་བྱེད་ཀྱི་སྒོར་བ་ལང་སྟོང་གི་རྗེས་སུ་རང་ཉིད་མཆོད་སྦྱིན་དུ་བྱ་བར་འོས་ཏེ་ཞི་བའི་རྒྱུད་ལས་ནི་དེ་གཉིས་ཀྱང་ཐར་བའི་རྒྱུར་བཤད་པའི་ཕྱིར་རོ། །བཅོ་ལྔ་པ་ནི། འོ་ན་སྟོང་པ་ཉིད་རྟོགས་ཚུལ་ཇི་ལྟ་བུ་ཞེ་ན། རྟོག་པ་དང་བྲལ་བའི་མངོན་སུམ་གྱིས་སྤྲོས་བྲལ་ནམ་མཁའ་ལྟ་བུའི་དོན་རྟོགས་ཤིང་ཚད་མར་བྱས་ཞེས་པ་སྟེ། འདི་དངོས་ནི་སོ་སོ་སྐྱེ་བོ་ལ་མེད་ཀྱང་ཡིད་ལ་མི་བྱེད་པས་སྟོང་པ་ཉིད་སྒོམ་པ་རྣལ་འབྱོར་མངོན་སུམ་གྱི་རྟོགས་ཚུལ་དང་ཆ་འདྲ་བ་ཡོད་ལ། དེས་ན་སོ་སོ་སྐྱེ་བོའི་སྟོང་པ་ཉིད་རྗེས་དཔག་ཁོ་ནས་སྒོམ་དགོས་པ་ཡང་མ་ཡིན་ཅིང་བློ་རིགས་སོ་སོར་བསྡུས་པའི་ཚེ་མ་རྟོགས་པའི་བློར་འདུ་ཡང༌། རྣལ་འབྱོར་མངོན་སུམ་བསྐྱེད་པའི་ཐབས་ཆེན་པོར་འགྱུར་བ་ཡོད་དེ་ཐབས་ལ་མཁས་པའི་ཁྱད་པར་རོ། །བཅུ་དྲུག་པ་ནི། རང་ལུས་ཀྱི་ཡུལ་ཏེ་རྩ་ཁམས་ཀུན་དབུ་མར་ཐིམ་ཞིང་བགྲོད་ན་རྟོག་མེད་
མ་སྟེ་དབུ་མས་ཉི་མ་གཡས་ཀྱི་རྒྱུ་བ་དང་ཟླ་བ་གཡོན་གྱི་རྒྱུ་བ་ཟོས་པས་གཟུང་འཛིན་གཉིས་ཐིམ་པའི་འོད་གསལ། ཉི་ཟླ་མུན་ནག་སོགས་འགྱུར་བྱེད་ཀྱི་རྐྱེན་དང་བྲལ་བའི་ནམ་མཁའ་ལ་སྐྱ་རེངས་ཤར་བ་ལྟ་བུའི་འོད་གསལ་མངོན་དུ་འགྱུར། གཞན་ཡང་རྟོག་མེད་མ་སྙིང་ཀའི་ཐིག་ལེ་ཉི་ཟླ་ཁམས་དཀར་དམར་རྟོག་མེད་མི་ཤིགས་བའི་རླུང་ཉི་ཟླ་སྣང་བ་གསུམ་ལ་འཆད་པའང་ཡོད་དོ། །བཅུ་བདུན་པ་ནི། ཡུལ་ཅན་བསམ་པ་དང༌། ཡུལ་བསམ་པར་བྱ་བ་མཐའ་དག་ཡོངས་སུ་སྤངས་ནས་དངོས་པོ་རྣམས་ཡོད་དང་མེད་པ་དང་གཉིས་ཡིན་དང་གཉིས་མིན་དང་གང་ཟག་རྟག་པ་དང་ཆད་པ་དང་གང་དུ་ཡང་རྣམ་པར་རྟོག་པ་མི་བསམ་ཅིང༌། མི་བསམ་པར་བྱའོ་ཞེས་ཀྱང་མི་བསམ་མོ། །ཞེས་པ་ནི། བྲམ་ཟེ་ཆེན་པོས། བསམ་དང་བསམ་བྱ་ཡོངས་སུ་དོར་ནས་སུ། །ཇི་ལྟར་བུ་ཆུང་ཚུལ་དུ་གནས་བྱ་ཞིང༌། །བསྒྲིམས་ཏེ་བླ་མའི་ལུང་ལ་གུས་འབད་ན། །ལྷན་ཅིག་སྐྱེས་པ་འབྱུང་བར་ཐེ་ཚོམ་མེད། །ཅེས་པ་ལྟར་ཏེ། འོད་གསལ་ཤར་བའི་ཚེ་རྣམ་པར་མི་རྟོག་པའི་བདེ་སྟོང་སྒོམ་ཚུལ་ལོ། །འོན་ཀྱང་པཎྜི་ཏ་མཁས་པ་ཁ་ཅིག་ཡུལ་ཡུལ་ཅན་རྫས་ཐ་དད་པ་དང༌། མཐའ་བཞི་དང༌། རྟག་ཆད་འགོག་པའི་རིག་པ་སྐབས་འདིར་འཆད་ཅིང་སྒོམ་ཅེས་ཀྱང་གསུང༌། བཅོ་བརྒྱད་པ་ནི། ཡུལ་ལ་ཆགས་པ་དང་བྲལ་བ་སྟེ་དབང་པོ་ལྔའི་བདེ་བས་ཞུ་བདེ་འདྲེན་ཚུལ་སྔར་བཤད་པ་ལྟ་བུ་དང་བྲལ་ན་ལྷན་སྐྱེས་མངོན་དུ་བྱེད་མི་ནུས་པས་ཀུན་ཏུ་སྤང་ལ་སྟོང་པ་ཉིད་དང་སྦྱོར་བ་མེད་པའི་འདོད་ཆགས་ཀྱི་བདེ་བས་ནི་སྲིད་པའི་སྐྱེ་བ་སོགས་སྡུག་བསྔལ་གྱི་ཉེས་པ་མཐའ་དག་བསྐྱེད་པ་སྟེ་སྔར་བཤད་པ་ལྟར་རོ། །ཡང་ན་ཡུལ་ལ་ཆགས་བྲལ་ནི་ཡུལ་ལ་ཉེས་དམིགས་སུ་ལྟ་བས་སྤོང་བ་ཡིན་གསུང༌། བཅུ་དགུ་པ་ནི། དགའ་བ་དང་པོ་གསུམ་དང་སྣང་བ་གསུམ་ལས་འདས་པ་རྣམ་རྟོག་གི་མཚན་མ་མཐའ་དག་ནུབ་པས་ཡིད་ལ་མི་བྱེད་པ་སེམས་དབང་ཤེས་ལྔ་དང་སེམས་
བྱུང་འདུ་བྱེད་དང་འདུ་ཤེས་མ་རིག་པ་ཉོན་ཡིད་འཁོར་བཅས་ལས་འདས་པ་རང་བཞིན་བདེ་བ་ཆེན་པོ་སྐད་ཅིག་མ་བཞི་པའི་དུས་སུ་འཆར་བ་ངོས་གཟུང་བར་བྱའོ། །ཉི་ཤུ་པ་ལ་སྤྱི་དོན་ནི། ལུས་ཀྱི་གནས་ཚུལ། སེམས་ཀྱི་གནས་ཚུལ། ལུས་སེམས་ཐུན་མོང་གི་གནས་ཚུལ་ལོ། །དང་པོ་ནི། བཞིན་ལག་དང༌། སྐྲ་སེན་ལ་སོགས་རྡུལ་ཕྲ་རབ་ཀྱི་ཐོགས་བཅས་ནི་ལུས་རགས་པ་ཡིན་ལ། གནས་པ་རྩ། གཡོ་བ་རླུང༌། བཀོད་པ་བྱང་ཆུབ་ཀྱི་སེམས་དཀར་དམར་ནི་ཕྲ་བ་ཡིན། སྣང་བ་གསུམ་གྱི་བཞོན་པའི་རླུང་འོད་ཟེར་ལྔ་པ་དང༌། ཁྱད་པར་དུ་ལྷན་སྐྱེས་ཀྱི་རླུང་ངམ་མི་ཤིགས་པའི་རླུང་འོད་གསལ་གྱི་བཞོན་པ་ནི་ཤིན་དུ་ཕྲ་བའི་ལུས་ཡིན་ནོ། །གཉིས་པ་ནི། དབང་ཤེས་ལྔ་རགས་པའི་སེམས་ཡིན་ལ། ཡིད་དང་སེམས་བྱུང་སོགས་ནི་ཕྲ་བ་དང༌། སྣང་བ་བཞི་དང༌། དགའ་བ་བཞི་དང༌། ཁྱད་པར་འོད་གསལ་ཀུན་གཞི་ནི་ཤིན་ཏུ་ཕྲ་བའོ། །གསུམ་པ་ནི་སྤྱིར། དབང་ཡུལ་བཅུ། ཕུང་ཁམས་བཅུ། ཡེ་ཤེས་ལྔ་སྟེ། རགས་པ་ཉེར་ལྔ། ཕྲ་བ་སྣང་གསུམ། རང་བཞིན་བརྒྱད་བཅུ་དང་བཅས་པ། ཤིན་ཏུ་ཕྲ་བ་འོད་གསལ་བཞོན་པ་དང་བཅས་པའོ། །ཞིབ་མོར་ན་ས་ཆུ་སོགས་ཉེར་ལྔ་པོ། ལྔ་མཚན་ལྔ་ཚན་དུ་སྦྱར་བ་ལྔའི་ཕྱི་མ་ཕྱི་མ་ཕྲ་ཞིང༌། སྣང་གསུམ་ཡང་ཕྱི་མ་ཕྱི་མ་ཆེས་ཕྲ་ལ། བཞོན་པ་ལུས་ཀྱི་ཆོས་ལས་ཀྱང་བརྟེན་པ་སེམས་ཕྲ་བ་དང༌། ཕུང་ཁམས་ཡུལ་དབང་ཡེ་ཤེས་རྣམས་ཀྱང་ཕྱི་མ་ཕྱི་མ་ཕྲའོ། །རགས་པ་མངོན་ཆེ་བའི་ཚེ། ཕྲ་བ་གསལ་བར་མི་སྣང་ལ། རགས་པ་མ་ཐིམ་པར་ཕྲ་བ་མངོན་དུ་མི་འགྱུར་བ་དང༌། ཕྲ་བ་ཉེར་ལེན་དུ་བྱས་ནས་རགས་པ་རྩོམ་པ་ཡིན་ཏེ། དེ་སྐད་དུ། ས་ལ་སོགས་པ་བཞི་པོ་དང༌། །དེ་བཞིན་སྟོང་པ་བཞི་པོ་དག །སྐྱེད་དང་འཇིག་པའི་རྒྱུ་ཉིད་དུ། །དངོས་པོ་བརྒྱད་པོ་རྣམས་ཤེས་བྱ། །ཤིན་ཏུ་ཕྲ་བའི་འོད་གསལ་རླུང་བཞོན་པར་བཅས་པ་དེ་ཉིད་
དངོས་པོའི་སྣང་བ་ཐམས་ཅད་འཆར་བའི་རྒྱུ་ཡིན་ནོ། །ཡན་ལག་གི་དོན་ནི་རྣམ་པ་གཉིས་ཏེ། ནང་ཕྲ་བ་ཐིམ་ཚུལ་དང་ཕྱི་རགས་པ་ཐིམ་ཚུལ་ལོ། །དང་པོ་ནི་ཆུ་སྟེ་སྤྱི་བོའི་ཧཾ་རྩ་བ་ནས་ལྷུང་སྟེ་སྙིང་ཁར་ཕྱིན་པ་དང༌། དེ་བཞིན་དུ་མེ་སྟེ་ལྟེ་བའི་དམར་ཆ་དང༌། ས་སྟེ་ཐུར་སེལ་གྱི་རླུང་དང༌། རླུང་སྟེ་སྲོག་འཛིན་རྣམས་རིམ་པ་བཞིན་གཅིག་ནས་གཅིག་ཏུ་ཐིམ་ཞིང་ལོག་པར་གྱུར་ཅེས་པའོ། །འདི་དག་ཁམས་ཕྲ་བ་ཐིམ་ཚུལ་དུ་འགྱུར་བ་ཡང་འདི་ལྟར་ནམ་མཁའ་རྣམ་པར་ཤེས་པ་ལ་ཐིམ་པའི་སྐབས། ཐོག་མར་སྤྱི་བོའི་ཧཾ་ཡིག་ཆུའི་ཁམས་ལྷག་མ་མེད་པར་ཞུ་སྟེ་སྙིང་ཁར་ཕྱིན་པ་ན་སྣང་བའི་ཡེ་ཤེས་འཆར་ཞིང་ལྟེ་བ་ནས་མ་ལས་ཐོབ་པའི་དམར་ཆའི་དྭངས་མ་ལྷག་མ་མེད་པར་སྙིང་ཁར་ཕྱིན་པ་དཀར་ཆ་དང་འཕྲད་པས་མེའི་ཁམས་དྲོད་བསྟན་ནས་ལོག་པའི་ཚེ་སྣང་བ་མཆེད་པ་འཆར་ཞིང༌། དེ་ལྟར་ཁམས་གཉིས་ཐིམ་པས་ཐོག་མར་རྡུལ་གྱི་ཁམས་ལ་བརྟེན་པའི་ཐུར་སེལ་ཡང་སྙིང་ཁར་ཕྱིན་ཏེ་ལྷག་མ་མེད་པར་ཡལ་ལ་སྔན་ཆད་སྟེང་འོག་གི་རླུང་གཉིས་གོང་བུའི་རྣམ་པ་སྲབ་སའི་ཁམས་ཀྱི་ཆ་ཤས་ཅུང་ཟད་ཡོད་པ་ཡང་དེར་ཐིམ་པ་ན། སྣང་བ་ཐོབ་པའི་ཐོག་མའི་ཆ་བརྩོམ་ཞིང༌། དེ་ནས་སྙིང་ཁའི་གནས་དེར་སྲོག་གི་རླུང་ཕྲ་མོ་ཡང་ཐིམ་པས་ཡིད་ཀྱི་གཡོ་བ་མཐའ་དག་འགགས་ཏེ་ཐམས་ཅད་སྟོང་པ་འོད་གསལ་འཆར་བར་འགྱུར་རོ། །གཉིས་པ་ནི། ས་ཆུ་ལ་ཐིམ་ཞིང༌། དེ་མེ་ལ། དེ་རླུང་ལ། དེ་ཡང་ནམ་མཁའ་ལ་ཐིམ་ཞིང༌། དེ་ནས་ནམ་མཁའི་རླུང་ཕྲ་མོ་ཡང་ནམ་ཞིག་ན་སེམས་ཏེ་སྣང་བ་བཞི་ལ་ཐིམ་པ་ཡིན་ནོ་ཞེས་པ་སྟེ། དེ་ཡང་ས་ཐིམ་པའི་ཚེ་གཟུགས་ཕུང་དང༌། མིག་དང་གཟུགས་དང་མེ་ལོང་ལྟ་བུའི་ཡེ་ཤེས་ཀྱང་ཐིམ་པར་འགྱུར་ཞིང་འོག་མ་རྣམས་ལའང་འདི་བཞིན་དུ་ཤེས་པར་བྱ་ལ། དེ་ལྟར་ནམ་མཁའ་རྣམ་ཤེས་ལ་ཐིམ་ཞེས་བྱ་བ་རྣམ་ཤེས་གསུམ་གཅིག་དུ་བསྡོམས་
པ་ཡིན་ལ། དེ་འོད་གསལ་ལ་ཐིམ་པ་ནི་ཐམས་ཅད་སྟོང་པ་ལ་ཐིམ་པ་ཡིན་ནོ། །འོད་གསལ་དེ་ནི་ལྷན་ཅིག་སྐྱེས་པའི་བདེ་བ་ཡིན་པས། བྲམ་ཟེ་ཆེན་པོས། རླུང་དང་མེ་དང་དབང་ཆེན་འགགས་པ་ན། །བདུད་རྩི་རྒྱུ་བའི་དུས་སུ་སེམས་ནི་རླུང་ལ་འཇུག །ནམ་ཞིག་སྦྱོར་བཞི་གནས་གཅིག་ཏུ་ནི་གྱུར་པ་ཡིས། །བདེ་ཆེན་མཆོག་ནི་ནམ་མཁའི་ཁམས་སུ་མི་ཤོང་ངོ༌། །ཁྱིམ་དང་ཁྱིམ་ན་དེའི་གཏམ་སྨྲ་ཡང༌། །བདེ་ཆེན་གནས་ནི་ཡོངས་སུ་ཤེས་པ་དང༌། །ཞེས་གསུངས་པ་ལྟར། འཆི་བའི་ཚེ་དང༌། ཞུ་བདེ་ལྷན་སྐྱེས་ཆེན་པོའམ། དཔེའི་འོད་གསལ་ཆེན་པོའི་སྐབས། སེམས་དབེན་མཐར་ཐུག་པ་ལ་ཕྲ་རགས་ཡོངས་སུ་རྫོགས་པའི་ཐིམ་ཚུལ་དངོས་སུ་འབྱུང་ཞིང༌། གཉིད་ཀྱི་ཐིམ་རིམ་དང༌། བརྒྱལ་བ་དང༌། དབང་པོ་གཉིས་སྦྱོར་དང༌། གླལ་བ་ལ་སོགས་པའི་གནས་སྐབས་ན་ཡང༌། ཐིམ་རིམ་དེ་རྣམས་ཆ་མཐུན་དུ་འབྱུང་པས་ན། སྐྱེ་བོ་ཐམས་ཅད་འོད་གསལ་འདི་ལ་རྟག་དུ་སྤྱོད་ཀྱང༌། བདེ་བ་ཆེན་པོའི་གནས་ནི་མི་ཤེས་ཤིང་རྨོངས་པ་ཡིན་ནོ། །ཇི་ལྟར་འཆི་བ་འོད་གསལ་གྱི་རང་བཞིན་དང་གཉུག་མ་རླུང་སེམས་ཀྱི་ལུས་ཕྱེ་ནས། དྭངས་མའི་ལུས་བར་དོ་མངོན་དུ་འགྱུར་བ་བཞིན་དུ། འཆི་བའི་དུས་ཀྱི་ཐིམ་རིམ་ཇི་མ་ཇི་བཞིན་གྱི་འོད་གསལ་དེ་ཡང་ཕྲ་རགས་ཀྱི་ལུས་འབྱེད་བྱེད་དུ་འགྱུར་བས་འོད་གསལ་དེའི་རྗེས་ཐོགས་ཉིད་ལ་རླུང་སེམས་དྭངས་མའི་ལུས་མ་དག་པའི་སྒྱུ་མའི་སྐུ་མངོན་དུ་འགྱུར་ཞིང༌། རླུང་གི་བགྲོད་པ་ཕྲ་མོ་རྣམས་གཏན་ནས་ལོག་པའི་དོན་གྱི་འོད་གསལ་ལས་དག་པའི་སྐུར་ལྡང་བ་དང༌། ཤིན་དུ་ཕྲ་བའི་རླུང་སེམས་ཀྱི་བགྲོད་པ་གཞི་ནས་འགགས་པས་ཡང་དག་པའི་མཐའ་ཐོབ་ཅིང་དེ་ལས་ལོངས་སྐུར་སྣང་བ་ཡིན་ཏེ། དེ་སྟོན་པ་ཉེར་གཅིག་པ་ནི། དེ་འདྲའི་བདེ་ཆེན་འོད་གསལ་
དེ་ལས་ནི། འོད་དེ་རླུང་སེམས་ཙམ་ལས་གྲུབ་པའི་དཀྱིལ་འཁོར་མཚན་དཔེས་སྤྲས་པའི་སངས་རྒྱས་ཀྱི་སྐུ་ཐོབ་མ་ཐག་སྣང་བ་ཐམས་ཅད་ལ་སྤྲོས་ཤིང་སྲེས་པས་སྲིད་པ་གསུམ་པོ་ཐམས་ཅད་ཡེ་ཤེས་ཀྱི་སྐུ་གཅིག་པོའི་རང་སྣང་དུ་འགྱུར་བར་བྱོས་ཤིག ཡེ་ཤེས་ཀྱི་སྐུ་དེ་མངོན་དུ་གྱུར་པ་ན་ཆོས་ཀུན་སྒྱུ་མ་ལྟར་རྟོགས་པར་འགྱུར་ཞིང༌། ཆོས་ཐམས་ཅད་རྐྱེན་འདི་བ་ཙམ་མ་གཏོགས་རང་བཞིན་མེད་པས། སྒྱུ་མ་ལྟ་བུ་དང༌། སྐད་ཅིག་གིས་འཇིག་པས་སྨིག་རྒྱུ་ལྟ་བུ་དང༌། བག་ཆགས་ཀྱི་སྟོབས་ཀྱི་སྣང་བ་ཡིན་པའི་ཕྱིར་རྨི་ལམ་ལྟ་བུར་ཤེས་བར་འགྱུར་རོ། །དཔེ་གསུམ་པོ་འདི་སྒྱུ་ལུས་ཀྱི་དཔེ་བཅུ་གཉིས་ལྟར་ཡེ་ཤེས་ཀྱི་སྐུ་ཉིད་ལ་སྦྱར་ནའང་རུང་མོད་ཀྱི། མན་ངག་ལས་སྤྱི་དོན་གྱི་སྒྱུ་ལུས་ལ་སྦྱོར་ཞིང་གནད་ཆེ་བ་ཞིག་ཀྱང་ཡོད་དོ། །ཉེར་གཉིས་པ་ནི། ཡེ་ཤེས་ཀྱི་སྐུ་དེ་ཐོབ་བམ་མ་ཐོབ་ན་ཡང༌། ཆོས་ཐམས་ཅད་སྒྱུ་མ་ལྟར་ཤེས་ནས་ལུས་རྣམས་བསྐྱོད་པ་ཙམ་ལ་ཡང༌། ཕྱག་རྒྱ་བཅིངས་བ་དང་དོན་མཉམ་པར་འགྱུར་ཏེ་ཐམས་ཅད་དག་པའི་ལྷར་སྣང་ཞིང༌། དེའི་ཡན་ལག་གི་འགྱུར་བ་ཡིན་པའི་ཕྱིར། ཅ་ཅོ་སྨྲ་ན་ཡང་སྔགས་སུ་འགྱུར་ཏེ། རླུང་ལྡང་འཇུག་གནས་གསུམ་སྔགས་སུ་ཤེས་པའི་ཕྱིར། ས་ལ་དོན་མེད་པའི་རི་མོ་འབྲི་བར་བྱེད་ན་ཡང་ཇི་ལྟར་དཀྱིལ་འཁོར་བྲིས་པ་དང་དོན་མཉམ་སྟེ། དེ་ཉིད་ཀྱང་དེས་མཐའ་ཡས་པའི་ལྷའི་གནས་སུ་ཤེས་པའི་ཕྱིར། དེ་ལྟར་ཡང༌། ཀྱཻ་རྡོ་རྗེ་ལས། ལག་པ་སྒྱུར་བ་ཕྱག་རྒྱ་ཡིན། །སོར་མོ་ཉེད་པའང་དེ་བཞིན་ནོ། །ཞེས་སོགས་གསུངས་ཤིང༌། རྣལ་འབྱོར་མ་ཀུན་སྤྱོད་ལས་ཀྱང༌། ཧེ་རུ་ཀ་བ་གོ་འཕང་གནས། །ཡན་ལག་གི་ནི་བསྐྱོད་པ་དང༌། །ཚིག་གི་རབ་འབྱམས་ཇི་སྙེད་པ། །དེ་སྙེད་སྔགས་དང་ཕྱག་རྒྱ་ཡིན། །ཅེས་གསུངས་གསུངས་སོ། །དེ་ལྟར་ཕན་ཡོན་བསྟན་ནས་སྤྱོད་
ལམ་ནི་འཛག་མེད་ཀྱི་བདེ་བ་ཆེན་པོའི་དོན་དུ་ཕྱག་རྒྱ་གསུམ་པོ་གང་ཡང་རུང་བ་དང༌། གྲོང་གི་ཆོས་ནི་སྤྱད་པར་བྱ་ཞིང་སངས་རྒྱས་ཀྱི་ངོ་བོ་ཕུང་ཁམས་སྐྱེ་མཆེད་ཐམས་ཅད་བྱང་ཆུབ་ཀྱི་སེམས་བདེ་བ་ཆེན་པོས་མཆོད་པར་བྱ་སྟེ། ལྷན་ཅིག་སྐྱེས་པའི་བདེ་ཆེན་སྒྲུབ་པའི་སྤྱོད་ལམ་ཐམས་ཅད་དུ་འདི་ཉིད་སྒོམ་པར་བྱའོ། །ཉེར་གསུམ་པ་ནི། ལག་པ་གཉིས་རྡོ་རྗེ་ཁུ་ཚུར་རབ་ཏུ་བཅིངས་ཤིང༌། མིག་གཉིས་རྡོ་རྗེའི་ལམ་ཨ་བ་དྷཱུ་ཏཱིའི་སྒོ་སྨིན་མཚམས་སུ་ནམ་མཁའ་ལ་བལྟ་བ་དང༌། སངས་རྒྱས་རྣམས་མངོན་པར་རྫོགས་པར་བྱང་ཆུབ་པའི་འདུག་སྟངས་རྡོ་རྗེ་སྐྱིལ་ཀྲུང་ཅན་དུ་བྱས་ལ་ལྷན་ཅིག་སྐྱེས་པའི་རྣལ་འབྱོར་སྒོམ་པ་འདི་ནི་ཡང་དག་མཁའ་སྤྱོད་ཆེན་པོ་སྟེ་འོད་གསལ་དུ་ཉེ་བར་འགྲོ་ལ། གཞན་མུ་སྟེགས་ཅན་དག་རྐང་བ་ཡ་གཅིག་བགྲེང་བ་དང༌། མེ་ལྔ་བསྟེན་པ་ལ་སོགས་པའི་ངལ་བ་ཅན་རྣམས་ནི་ངལ་བ་དེས་ཀྱང་འཁོར་བར་འཁོར་བ་ལས། གཞན་ཐར་བའི་ཐབས་སུ་མ་སོང་བས་ལུས་ལ་གདུང་བ་བཅོམ་པ་དེ་དག་ནི་དོན་མེད་པའོ། །ཉེར་བཞི་པ་ནི། མངོན་པར་བྱང་ཆུབ་པའི་གནས་ནི་ལུས་ཉིད་ཡིན་ནོ་ཞེས་པ། འབྲས་བུའི་ཡོན་ཏན་ཐམས་ཅད་བསྐྱེད་པའི་ནུས་པ་ནི་རང་གི་ལུས་ལ་གནས་པས་འདི་ལ་གནད་དུ་བསྣུན་པར་རིགས་སོ། །རྣ་ཆ་མགོན་པོ་:ད་[དེ་]བཱི་ཀོ་ཊ་སྟེ་ལྷ་མོའི་མཁར་ཞེས་པ་ལ། ལྷ་མོ་ནི་རྩའི་ཚོགས་ཡིན་ལ། དེའི་མཁར་རམ་གནས་ནི་ཨ་བ་དྷཱུ་ཏཱི་ཡིན་པས། དེར་རང་གི་སེམས་ཐིམ་ཞིང་སོང་ཞེས་པའོ། ཉེར་ལྔ་པ་ནི། གྲོགས་ཀྱི་གཙོ་བོ་རྣམ་པ་གཉིས་ཏེ། ཕྱི་རོལ་དང་ནང་གིའོ། ཕྱི་ནི་མཁའ་འགྲོ་མ་གནས་གསུམ་གྱི་ཕོ་ཉ་མོ་དང་འདུས་པ་ལས་ནང་གི་གྲོགས་ཟླ་བ་བྱང་ཆུབ་ཀྱི་སེམས་ཞུ་བའི་བདེ་བ་སྟོང་ཉིད་ཀྱི་རྣམ་པར་ཤར་བའི་ཕྱག་རྒྱ་ཆེན་མོ་སྟེ་གྲོགས་ནི་དེ་ལྟར་
རོ་ཞེས་པའོ། །ཉེར་དྲུག་པ་ནི། དེ་ལྟར་ཡང༌། རྡོ་རྗེ་ཉི་མ་ནུབ་ནས་ནི། །སྒྲུབ་པ་ཀུན་ཏུ་བརྩམས་པར་བྱ། །སྐྱ་རེངས་འཆར་བའི་དུས་སུ་ནི། །སྒོམ་པ་མཆོག་ནི་འགྲུབ་པ་འགྱུར། །ཞེས་པའི་དོན་ནི་རྒྱས་པར་གཞན་དུ་ཤེས་ལ། ངག་དོན་ནི་ནང་གི་མངོན་པར་བྱང་ཆུབ་པའི་རྟོག་པ་ཁྱད་པར་ཅན་སྐྱེ་བ་ཡང་ཕྱི་རོལ་གྱི་དུས་ཁྱད་པར་ཅན་ལ་བསྟེན་ནས་འབྱུང་བ་ཡང༌། ཉི་མ་དམར་ཐག་ཆད་ནས་སངས་རྒྱས་དང་བྱང་ཆུབ་སེམས་དཔའ་ནམ་མཁའ་གང་བ་དཀྱིལ་འཁོར་དང་བཅས་པ་རྣམས་ཀྱིས་སྒྲུབ་པ་པོ་ལ་དབང་བསྐུར་བ་ན་ཕྱག་རྒྱ་དང་མཉམ་པར་སྦྱར་བའི་རྐྱེན་གྱི་སྣང་བ་གསུམ་དཔྱིས་ཕྱིན་པར་མངོན་དུ་གྱུར་ནས་ཐོ་རངས་ཀྱི་ཚེ་འོད་གསལ་རབ་གྱི་མཐར་ཐུག་པ་ཞིག་གི་སེམས་རྟེན་ལ་དོན་གྱི་འོད་གསལ་ལམ་ཡང་དག་པའི་མཐའ་མངོན་དུ་བྱེད་ཅིང་ཡེ་ཤེས་དེ་གཉིས་ཀའང་སངས་རྒྱས་ཞེས་མིང་བརྟགས་ལ། དེ་ཉིད་ཀུན་གཞིའི་རང་བཞིན་ཡིན་པའི་ཕྱིར་གཞན་ལ་བཙལ་དུ་མེད་དོ། །དེ་ལྟར་ཡང༌། དེའི་འདོད་པའི་དངོས་གྲུབ་རི་བོང་ཅན་གྱྀ་ཞག་ལ་ཐོ་རངས་དང་ནི་མཚན་མོ་ཕྱེད་ལ་འགྱུར། ཞེས་གསུངས་སོ། །དེ་བས་ན་གཞུང་དོན་ནི་ནམ་ལངས་སུ་ཉེ་བས་ན་བདེ་སྟོང་གཉིས་སུ་མེད་པའི་ཡེ་ཤེས་ཀྱིས་ཚོལ་ཤིག་དང་སངས་རྒྱས་རང་ལ་ཡོད་དོ་ཞེས་པའོ། །ཉེར་བདུན་པ་ནི། རང་གི་སྙིང་པོ་སྟེ་བདེ་བར་གཤེགས་པའི་སྙིང་པོའོ། དེ་གཞན་དུ་རྙེད་པ་མ་ཡིན་ཞིང་སེམས་ཀྱི་རྒྱུད་ཉིད་གློ་བུར་གྱི་དྲི་མས་མ་གོས་ཤིང་ཡོན་ཏན་ཐམས་ཅད་ནུས་པའི་ཚུལ་གྱི་ལྡན་པའོ། །དེ་ལྟར་ཡང༌། གཉིས་མེད་སེམས་ཀྱི་སྡོང་པོ་དམ་པ་ནི། ཁམས་གསུམ་མ་ལུས་པར་ནི་ཁྱབ་པར་སོང༌། །སྙིང་རྗེའི་མེ་ཏོག་གཞན་ཕན་འབྲས་བུ་འཛིན། །མིང་ནི་མཆོག་ཏུ་གཞན་ལ་ཕན་པའོ། །སྟོང་བའི་སྡོང་པོ་དམ་པ་མེ་ཏོག་རྒྱས། །སྙིང་རྗེ་
རྣམ་པ་སྣ་ཚོགས་དུ་མར་ལྡན། །ལྷུན་གྱིས་གྲུབ་པ་ཕྱི་མའི་འབྲས་བུ་སྟེ། །བདེ་བ་འདི་ནི་གཞན་པའི་སེམས་མིན་ནོ། །ཞེས་སྙིང་རྗེ་ཆེན་པོ་གཞན་ཕན་གཟུགས་ཀྱི་སྐུ་དང་ཁམས་གསུམ་ཀུན་ལ་སྟོང་པ་ཉིད་གཅིག་པའི་ཚུལ་གྱིས་ཁྱབ་པའི་དག་པ་གཉིས་ལྡན་གྱི་ཆོས་སྐུ་ཡང་ས་བོན་གྱི་ཚུལ་གྱིས་ལྡན་ཞེས་པའོ། དེས་ན་ཁམས་འདི་ལས་གཞན་ཕྱི་རོལ་ནས་མ་ཚོལ་ཞིག གཞན་ཡང་རང་གི་སེམས་ངོ་བོས་སྟོང་ཡང་རྩལ་འགག་པ་མེད་པའི་སྟོང་ཉིད་དང་རྟེན་འབྲེལ་ཟུང་དུ་འཇུག་པའི་དེ་ཁོ་ན་ཉིད་དང་རྟེན་འབྲེལ་ཟུང་དུ་འཇུག་པའི་དེ་ཁོ་ན་ཉིད་གཞན་ཡི་གེ་དང༌། དཔེ་དང༌། གཏན་ཚིག་སྣ་ཚོགས་ལ་མ་འབྲི་ཞིག སྟོང་བཞིན་དུ་སྣང་བ་འདི་རང་ཉིད་ཀྱི་མཚོན་པར་གྱིས་ཤིག་ཅེས་པའོ། ཉེར་བརྒྱད་པ་ནི། རྟོག་གེ་སྟེ་དངོས་སྟོབས་ཀྱི་རིགས་པ་དང༌། ལུང་ལ་ཡིད་ཆེས་པའི་རྗེས་དཔག་དང༌། འཇིག་རྟེན་ཐ་སྙད་དུ་ཡོངས་སུ་གྲགས་པའི་ཚད་མ་དང༌། མཚོན་བྱེད་ཀྱི་དཔེ་སྣ་ཚོགས་དང༌། མདོར་ན་ཚིག་གི་བརྗོད་པས་ཇི་ཙམ་བསྟན་ཀྱང་ནམ་ཡང་མཚོན་དུ་མེད་ལ། དེའི་ཕྱིར་རྣམ་གཞག་ཐོས་པས་རྟོགས་པ་མ་ཡིན་ཅིང༌། དེ་ཁོ་ན་ཉིད་དེ་རྣལ་འབྱོར་པའི་མངོན་སུམ་གྱི་མཐོང་ན་རྟོགས་པས་གྲོལ་བར་འགྱུར་རོ། །ཉེར་དགུ་པ་ནི། ཕྱག་རྒྱ་ཆེན་པོ་མཆོག་གི་དངོས་གྲུབ་གྲུབ་པར་འགྱུར་པའི་ཚེ་རྣལ་འབྱོར་པ་ལྷའི་དཀྱིལ་འཁོར་དུ་སྣང་བའི་ལུས་ལས་འོད་ཟེར་དཔག་ཚད་བྱེ་བ་འབར་ཞིང་ཁམས་གསུམ་གྱི་ལྷ་མོ་ཐམས་ཅད་ཀྱི་མཆོད་པར་བྱེད་ལ། འོད་ཟེར་གྱི་སྟོང་གསུམ་མཐའ་དག་སྣང་བར་བྱེད་ཅིང༌། སེང་གེ་ཞེས་བྱ་བ་ཁྱབ་འཇུག་དང༌། འཕྲོག་པ་པོ་སྟེ་དབང་ཕྱུག་དང༌། མེས་པོ་ཚངས་པ་རྣམས་ཀྱི་ཕྱག་བྱེད་ཅིང་ལྷ་རྣམས་ཀྱི་རིན་པོ་ཆེ་དང་མེ་ཏོག་གི་ཆར་འབེབས་ལ། ས་རྣམ་པ་དྲུག་ཏུ་
གཡོས་ཤིང༌། ཕྱོགས་ཐམས་ཅད་སྒྲ་འབྱིན། བདུད་ཀྱི་གནས་གཡོས་པས་དེངས་བར་བྱེད་ཅིང་དེར་རྡོ་རྗེ་སྟེ་ཐོག་གི་ཆར་འབབ་ལ། དེར་ཕྱག་རྒྱ་ཆེན་པོའི་རྣལ་འབྱོར་པ་དེ་འགྲོ་བ་ཐམས་ཅད་ལ་ཕན་པའི་བླ་མར་འགྱུར་རོ། །དངོས་གྲུབ་ཀྱི་ལྟས་འདི་རྣམས་སཾ་བྷུ་ཊིར་རྒྱས་པར་བཤད་ཅིང༌། མཐོང་ལམ་ཐོབ་པ་དང་འཚང་རྒྱ་བའི་དུས་གཉིས་ཀར་དུ་འབྱུང་ལ། ཕྱོགས་འདྲ་ཙམ་ནི་སྔ་རོལ་ནས་ཀྱང་འབྱུང་ངོ༌། །གཞན་ཡང་མཆོག་གྀ་དངོས་གྲུབ་ཐོབ་པའི་ལྟས། དབང་ཕྱུག་གི་ཡོན་ཏན་བརྒྱད་འབྱུང་ངོ༌། །སུམ་ཅུ་པ་ནི། རྫོགས་རིམ་དངོས་གཞི་ཐོབ་པ་ཕྱག་ཆེན་གྱི་བདེ་བ་གྲུབ་པ་ཞིག་གིས་ཕྱི་རོལ་གྱི་བྱ་བ་གཙོ་བོ་མི་བྱེད་པ་ནང་ལ་གཞོལ་པས་གང་ལ་གནད་དུ་བསྣུན་པའི་གཙོ་བོ་ནི། སེམས་བདེ་སྟོང་དུ་ཤར་བ་དེ་ཁོ་ན་ཡིན་ལ། ལམ་འདི་ནི་དབང་པོ་རྟུལ་པོ་རྣམས་ཀྱིས་སྒྲུབ་དཀའ་ཞིང༌། ཤིན་ཏུ་མྱུར་བ་ཡིན་ཏེ། འདི་ལ་སྤྲོས་མེད་ཀྱི་ལམ་ཞེས་བྱའོ། །དེ་ལྟར་ན། དཀྱིལ་འཁོར་དང༌། སྔགས་དང༌། ཆོ་ག་དང༌། སྔར་བཤད་པ་ལྟར་རླུང་དང༌། ཐིག་ལེ་དང༌། གཏུམ་མོའི་མེ་དང༌། ཕྱག་ཆེན་གྱི་མེ་མོ་ཐམས་ཅད་སེམས་ཉིད་ལྷན་སྐྱེས་སུ་ཤར་བའི་སྣང་བ་སྟེ། དེ་ཡང་རང་བཞིན་ཉིད་དུ་མ་གྲུབ་པའི་ཕྱིར། དགེ་བ་སྡིག་པ་གང་ཡང་རང་གི་ངོ་བོས་མེད་པས་ན། ཁ་ཏོན་དང་སྨྱུང་བར་གནས་པ་སོགས་ཕྱི་རོལ་གྱི་བྱ་བས་ཅི་ཞིག་བྱ་སྟེ། རང་སེམས་བདེ་སྟོང་སྒོམས་པ་ཉིད་ཀྱིས་གཞན་པས་མྱུར་དུ་གྲོལ་བར་འགྱུར་བའི་ཕྱིར་ཞེས་སེམས་ལ་གནད་དུ་བསྣུན་པ་དང༌། སེམས་ཉིད་བདེ་སྟོང་གི་རྣམ་པར་ཤར་བ་རྒྱས་པར་བྱ་བའི་ཕྱིར་ལུས་ལ་བདེ་བ་སྣ་ཚོགས་པས་མཆོད་པར་བྱེད་པས། རྟེན་བྱང་ཆུབ་ཀྱི་སེམས་སྤེལ་བར་བྱའོ། །ཞེས་ལུས་ལ་གནད་དུ་བསྣུན་པ་དང༌། ཡིད་དུ་འོང་བའི་ཕྱག་རྒྱ་རྣམ་པ་གསུམ་གང་ཡང་རུང་བ་དང༌། འདོད་
པའི་ཡོན་ཏན་ཅི་འདོད་པ་སྤྱད་པར་བྱའོ། །ཞེས་འདོད་ཡོན་གྱི་གཙོ་བོ་རིག་མའི་ཁ་སྦྱོར་གྱི་འདོད་ཡོན་ལ་གནད་དུ་བསྣུན་པ་སྟེ། དེ་ལྟ་བུའི་སྤྲོས་མེད་ཀྱི་ལམ་འདི་སྒོམ་པས་དངོས་གྲུབ་ཐམས་ཅད་གཞན་པས་ཆེས་མྱུར་བར་ཐོབ་བོ་ཞེས་ཡེ་ཤེས་འབར་བ་ངས་སྨྲས་སོ་ཞེས་པའོ། །འདིར་སྨྲས་པ། གང་ལ་བདེ་ཆེན་འོད་བརྒྱའི་མདངས་བཀྲ་བ། །སྔོན་མེད་ལྷན་ཅིག་སྐྱེས་པ་ཨ་དིའི་བུ། །གསུང་རབ་རྒྱ་མཚོ་སྲུབས་པའི་སྙིང་པོ་ཞིག །གང་བློ་རྟ་ལྗང་རོལ་བའི་རྩེ་མོར་སོན། ། གླུའི་རྒྱུད་གཉིས་པ་རྣམ་པར་ཕྱེ་ཟིན་ཏོ།། །།༈ གླུའི་རྒྱུད་གསུམ་པ་ལ། བདེ་བ་གཉིས་སུ་མེད་པའི་ཡེ་ཤེས་འདིར་སྟོན་ནོ་ཞེས་པ། མདོར་བསྟན་པ་ནི་ཡི་གེ་ལྔ་སྟེ། ཨ་ཡིག་གི་ཆོས་ཐམས་ཅད་གཟོད་མ་ནས་མ་སྐྱེས་པའི་སྟོང་པ་ཉིད་དང་ཝ་ཡིག་གསུམ་གྱི་དགའ་བ་དང་པོ་གསུམ་དང༌། ཧོ་ཡིག་གི་ལྷན་ཅིག་སྐྱེས་པ་རྣམས་བསྟན་པ་ཡིན་ནོ། ། དེ་རྒྱས་པར་འཆད་པ་ལ་གསུམ་སྟེ། བདེ་སྟོང་གི་རང་བཞིན་གཏན་ལ་ཕབ་པ་དང། དེ་སྒྲུབ་པར་བྱེད་པའི་ཐབས་དང༌། ལམ་གྱི་འབྲས་བུ་བྱེད་ལས་དང་བཅས་པ་བསྟན་པའོ། ། དང་པོ་ལ་བདེ་བ་བཤད་པ་དང༌། སྟོང་པ་བཤད་པ་དང༌། བདེ་སྟོང་ཟུང་འཇུག་ཏུ་མ་སོང་བའི་སྐྱོན་དང༌། རང་བཞན་གྱི་བདེ་བ་ངོས་འཛིན་པར་གདམས་པའོ། །དང་པོ་ནི། འདིར་འགྱུར་བ་མེད་པ་ཞེས་བྱ་བ་ཁམས་ཀྱི་བགྲོད་པ་འགགས་པའི་བདེ་བ་ཆེན་པོ་ཡིན་ཏེ། དེ་ཡང་འདིར་བརྡའི་སྒོ་ནས་གསུངས་པ་ནི། ལྕི་བའི་ཐལ་བ་སྟེ། ཕྱི་རོལ་དུ་འཕོ་བ་མེད་པའི་བྱངཆུབ་ཀྱི་སེམས་ལུས་ཀུན་ལ་ཁྱབ་པར་བྱུགས་ཤིང༌། འདོམས་དཀྲིས་ནི་ཀཱ་ཙ་ཞེས་པ། སྨད་གཡོགས་ཏེ་རྡོ་རྗེ་ནོར་བུར་ཉི་མ་སྟེ་དམར་ཆ་བཞུ་བའི་ཁུ་བས་རབ་ཏུ་སྦགས་
པ་སྟེ། སྤྱི་བོ་ནས་ནོར་བུའི་བར་གཏུམ་མོ་འབར་བའི་ཁྱིམ་བཅུ་གཉིས་སུ་རྡུལ་གྱི་ཁམས་གཡོ་བ་མེད་པར་བཅིངས་བས་རླུང་གི་བགྲོད་པ་འགགས་པར་འགྱུར་ཞིང༌། ཆ་བཅུ་དྲུག་ཡོངས་སུ་རྫོགས་པའི་རི་བོང་འཛིན་པ་ནོར་བུ་ནས་སྤྱི་བོའི་བར་དུ་ལུགས་ལྡོག་ཏུ་བརྟན་པས་རྒྱན་དུ་བྱས་ཞེས་ཁམས་ཀྱི་འཕོ་བ་བཅུ་དྲུག་འགགས་ཤིང༌། བདག་པོ་སྟེ་ཁྱབ་བདག་གི་ངོ་བོར་འགྱུར་ལ། ཡིད་ཀྱི་ལུས་ཀྱི་སྲིད་པའི་དཀྱིལ་འཁོར་དང༌། ཡེ་ཤེས་ཀྱི་རང་སྣང་ལ་སྲིད་པ་གསུམ་གྱི་ཚོགས་བ་སྤུ་རེ་རེ་ནས་ཀྱང་སྤྲོ་ཞིང་སྡུད་པའི་བདག་ཉིད་ངའོ་ཞེས་པ་སྟེ་ཁམས་ཀྱི་བགྲོད་པ་འགགས་པས་བདེ་བ་ཆེན་པོའི་རང་བཞིན་ཡེ་ཤེས་ཀྱི་སྐུ་གྲུབ་པའོ། །འདིར་བདེ་བ་དང་སྐུ་ཟུང་འཇུག་ཏུ་བསྟན་ནས་སྟོང་པ་ཉིད་:བརྟན་[གཏན་]ལ་འབེབས་པ་གཉིས་པ་ནི། ཀ་ཡེ་ཞེས་བོས་ནས། ཇི་ལྟར་ནམ་མཁའ་ལ་ཐོག་མ་དང་ཐ་མའི་མཐའ་དང་དབུས་མེད་པ་བཞིན་དུ། སེམས་འདི་ལ་ཡང་ཐོག་མཐའ་མེད་ཅིང༌། དེ་མེད་པས་དབུས་ཀྱང་ངས་མ་མཐོང་ཞེས་པས་སེམས་ཅན་སར་དུ་བྱེད་པ་པོས་སྤྲུལ་བ་དང། འཁོར་བ་ལ་ཐོག་མཐའ་མེད་པར་བསྟན་ནོ། །ཇི་ལྟར་རྒྱ་མཚོའི་ཀློངས་ཏེ་སྟེང་ནི་རླུང་དྲག་པོས་ཀྱང་བསྐྱོད་མི་ནུས་པས་ཅི་ཡང་གཡོ་བ་མེད་པ་བཞིན་དུ། སེམས་གྱི་རང་བཞིན་གཟུང་འཛིན་དུ་སྣང་བའི་རྣམ་པར་རྟོག་པས་སླད་ཅིང་འདྲེར་མེད་ལ་སེམས་དྲི་མ་དེའི་ངོ་བོར་ནམ་ཡང་མ་སྐྱེས་པ་ཡིན་ནོ། །འདི་ཡི་སེམས་གཟུང་འཛིན་གཉིས་མ་ཡིན་པར་བསྟན་ཅིང་དཔེར་ན། སྒྱུ་མའི་ཟློས་གར་ཏེ་སྤྲུལ་པ་ལ། རྟེན་འབྲེལ་གྱི་སྟོབས་ལས་རྟ་གླང་སོགས་སུ་སྣང་བ་ཙམ་མ་གཏོགས་ངོ་བོས་གྲུབ་པ་མེད་པ་བཞིན་དུ་གཟུང་འཛིན་གཉིས་ཀྱང་སེམས་ཀྱི་རྟེན་འབྲེལ་ལས་སྣང་བ་མ་གཏོགས་སེམས་ལས་གཞན་དུ་ཕྱི་རོལ་ཏུ་གྲུབ་པའི་སྙིང་པོ་སུ་ཡི་མཐོང་སྟེ་མ་མཐོང་ཞེས་པའི་སེམས་ལས་ལོགས་སུ་
ཡང་དོན་མེད་པར་བསྟན། ཇི་ལྟར་རིན་པོ་ཆེའི་དྭངས་མ་བཻཌཱུཪྱ་ནི་རང་བཞིན་གྱི་འོད་གསལ་བ་བཞིན་དུ་སེམས་ཉིད་དུས་ཀུན་ཏུ་ཀུན་ནས་ཏེ་ཡེ་ནས་གསལ་བའི་ངོ་བོར་གནས་ལ། ཇི་ལྟར་རླུང་གི་མ་བསྐྱོད་པར་རྒྱ་མཚོའི་བརླབས་འབྱུང་བ་མེད་པ་བཞིན་དུ། བག་ཆགས་ལས་གཞན་དུ་གཉིས་སྣང་མི་འབྱུང་ཞེས་པ་སྟེ། འདི་རྣམས་ཀྱིས་གཟུང་འཛིན་གཉིས་པོ་སེམས་ཀྱི་སྣང་བ་ཡིན་ལ་རང་བཞིན་མེད་པར་བསྟན་ནོ། །དེ་ལྟར་ཡང་བྲམ་ཟེ་ཆེན་པོས། ས་བོན་གཅིག་ལ་སྡོང་པོ་གཉིས། །རྒྱུ་མཚན་དེ་ལས་འབྲས་བུ་གཅིག །དེ་ཡང་དབྱེར་མེད་གང་སེམས་དཔའ། །དེས་ནི་འཁོར་དང་མྱ་ངན་འདས་རྣམས་གྲོལ། །གཟུང་འཛིན་གྱི་སྡོང་པོ་གཉིས་ཀའང་བག་ཆགས་ཀྱིས་སླད་པའི་སེམས་ཀྱི་སྣང་བ་འཁྲུལ་པ་མ་གཏོགས། རྩ་བ་ས་བོན་སེམས་གཅིག་པུ་ཡིན་པས། འབྲས་བུ་ཡང་གཉིས་སུ་སྣང་བ་མེད་པ་ཁོ་ནའོ། །གཉིས་སྣང་མེད་པའི་སེམས་དེ་ཡང་ཡུལ་ཅན་བདེ་བ་དང་ཡུལ་སྟོང་ཉིད་མིང་འདོགས་ཐ་དད་མ་གཏོགས་ངོ་བོ་དབྱེར་མེད་ཅིག་དུ་གྱུར་པ་སེམས་ཤིང་བསྒོམས་པས་སྲིད་ཞིའི་མཐའ་ལས་གྲོལ་བར་འགྱུར་ཞེས་པ་ཡིན་ཏེ། ཡང་གཅིག་ཏུ་ན། དེ་ལྟ་བུའི་སེམས་ལ་མཐའ་དབུས་ཏེ་ངོ་བོས་སྐྱེ་འགག་གནས་གསུམ་མེད་པས་རང་བཞིན་མེད་པར་སྟོན་པའང་ཡིན་གསུང༌། ཇི་ལྟར་ཞགས་པས་བཅིངས་པ་རྣམས་ནི་དྲངས་ན་ཆེས་དམ་པོར་འགྱུར་བ་བཞིན། བདེ་སྟོང་ལ་ཞེན་ན་སེམས་འགྱུར་བ་དེའི་ཞགས་པར་ཆུད་པ་དྲངས་པ་ལྟར་སོང་བས་ཆེས་བག་ཆགས་དམ་པོར་འགྱུར་བ་དང༌། ཀླུ་ཡི་སྟེ་སྦྲུལ་ལ་འདུད་པར་བྱས་ན་འདུད་པ་ལྟར་སྣང་ཡང་ངོ་བོ་ཉིད་ཀྱི་རང་སར་གྲོལ་བའི་རང་བཞིན་དུ་འདུག་པ་ལྟར་སྟོང་ཉིད་དང་སྦྱོར་བའི་བདེ་བས་སེམས་འདོད་ཆགས་ལྟར་སྣང་བ་ནི་བདེ་བའི་སེམས་སྐྱེས་ཙམ་ཉིད་ནས་ངོ་བོ་ཉིད་ཀྱི་གྲོལ་བ་ཡིན་ཅིང༌། དེ་ཙམ་དུ་མ་ཟད་སྤང་བྱ་མ་
རིག་པ་འཇོམས་པ་ལ་གཞན་ཐམས་ཅད་པས་ཀྱང་སྟོབས་ཆེ་བ་ཡིན་ནོ། ཚུལ་དེ་ལ་ངོ་མཚར་བས་ཨ་རེ་ཞེས་བརྗོད་ནས། གཽ་བི་ཙ་ཎ་རྒྱལ་གྱུར་ཅིག་ཅེས་པ་ནི་གོང་བཞིན་ནོ། །ཇི་ལྟར་ཆུ་རླབས་ཆུ་ཉིད་མ་ཡིན་པ་གང་དུའང་མ་མཐོང་བ་བཞིན་དུ། གཞི་དང་ལམ་དང་འབྲས་བུ་ཐམས་ཅད་དེ་བཞིན་ཉིད་སྟོང་པ་ལས་གཞན་དུ་མེད་དོ། །སེམས་རང་བཞིན་གྱི་འོད་གསལ་བ་ཅུང་ཟད་གསལ་བར་སྣང་བ་ཐོབ་ནས། རྟོག་གེས་དཔྱད་པའི་ངེས་པའི་ཤེས་པས་ཅི་ཞིག་བྱ་སྟེ། རྣམ་པར་མི་རྟོག་པའི་ཚུལ་གྱིས་འཇུག་པར་བྱའོ། །གསུམ་པ་ནི། སེམས་ཀྱི་རྒྱུད་བདེ་བ་ཆེན་པོ་མི་རྟོགས་པའི་སྟོང་པ་ཉིད་མཐའ་བྲལ་དང་རྟེན་འབྲེལ་ཟུང་འཇུག་ཏུ་གོ་བ་ཡིན་ཡང༌། དེས་ཚེ་གཅིག་གི་སངས་རྒྱས་སྒྲུབ་པ་ལ་ཅི་ཞིག་བྱ་སྟེ། མི་འགྲུབ་ན་ཉི་ཚེ་བའི་སྟོང་ཉིད་རྣམས་ཀྱི་ལྟ་ཅི་སྨོས། དེ་ལྟར་ཡང་དུས་ཀྱི་འཁོར་ལོ་ལས། སྐད་ཅིག་གང་གིས་འགྱུར་བ་དག་དང་རྣམ་པར་བྲལ་བ་གྲུབ་ཅིང་གཡོ་བ་གོས་པ་མེད་གྱུར་པ། །སངས་རྒྱས་བྱ་བ་དེ་སྤངས་ནས་ནི་བདེ་ཉམས་དང་བལ་སྟོང་པ་གཞན་དག་གང་ཞིག་སྒོམ་བྱེད་པ། །དེ་ཡིས་བསྐལ་བ་བྱེ་བ་དུ་མ་རྣམས་ཀྱི་སངས་རྒྱས་ཉིད་དང་ལྷན་སྐྱེས་བདེ་བ་དག་ཀྱང་རིང༌། །ཞེས་གསུངས་སོ། །འོན་ཏེ་ཤེས་རབ་སྟོང་པ་ཉིད་དང་བྲལ་བའི་བདེ་བ་ཙམ་ལ་སེམས་འཛིན་པ་ནི། ཕྱུགས་དང་འདྲ་བར་འདོད་པའི་བདེ་བ་ཙམ་དོན་དུ་གཉེར་བ་ལས། དེ་ཁོ་ན་ཉིད་ཀྱི་ཚུལ་མཐོང་བ་མེད་དེ། འདིར་བདེ་བ་སྐྱེས་པ་ན། སེམས་བདེ་བ་འཆར་ཞིང༌། གང་སྣང་ཐམས་ཅད་དེས་རྒྱས་བཏབ་པས་རོ་གཅིག་ཏུ་སྣང་བ་ན་དེའི་སྟེང་དུ་སྣང་བཞིན་དུ་དམིགས་བཏད་ཐམས་ཅད་ཞིག་བའི་རང་བཞིན་གང་དུ་ཡང་མ་མཐོང་བ་ནི་བདེ་སྟོང་སྦྱོར་བའི་ཚུལ་རྣམ་པར་དག་པ་ཡིན་ཅིང༌། དེའི་ཐབས་སུ་བསམ་བྱུང་དང་སྒོམ་བྱུང་གི་རྗེས་དཔག་དགག་གཞི་བདེ་བའི་སྟེང་དུ་དགག་བྱ་སྤྲོས་
པའི་མཚན་མ་བདག་གཉིས་སུ་འཛིན་པ་བཀག་པའི་ངེས་ཤེས་སྐྱོང་བའང་ཐབས་སུ་འགྱུར་བ་ཡོད་ཀྱང༌། གང་ཟག་ཐམས་ཅད་ལ་མཐའ་གཅིག་ཏུ་དགོས་པ་མ་ཡིན་ལ། འདིར་ཁ་ཅིག་བདེ་ལ་མི་རྟོག་པ་དང་ཐོས་བསམ་གྱི་ལྟ་བ་སྲེ་བ་གཞན་སུ་ལའང་མེད་པའི་སློབ་བཤད་ཀྱི་མན་ངག་ཏུ་བྱེད་ལ། ཉམས་སུ་མྱོང་བ་སྐད་སྨྲ་ཞིང་ཡི་གེར་འབྲི་བ་སྣང་ངོ༌། །འདི་མི་འཐད་པ་ལ་གསུམ། འདི་མན་ངག་གི་མཆོག་མ་ཡིན་པ་དང༌། སློབ་མ་ལ་བཤད་པའི་དོན་དུ་མི་འགྱུར་པ་དང། ཐོས་བསམ་སྒོམ་གསུམ་གྱི་རྣམ་དབྱེ་མ་ཕྱེད་ཅིང་ཉམས་སུ་ལོངས་དཀའ་བའོ། །དང་པོ་ནི། ཁྱེད་ཀྱི་ཐོས་བསམ་གྱི་ལྟ་བ་དེ་ཅི། གཞུང་ལུགས་རྣམས་ལས་མ་བཤད་པའམ། བཤད་ཀྱང་ཤིན་ཏུ་སྦས་པ་སྙན་རྒྱུད་ཁོ་ན་ལས་གསལ་བ་ཞིག་གམ། འོན་ཏེ་གཞུང་རྣམས་ལས་དངོས་སུ་འབྱུང་བ་འདི་ཉིད་ཡིན། དང་པོ་གཉིས་ལྟར་ན་ནི། དེ་དག་གི་ལུང་དང་རིག་པ་སྟོན་ཡང་དགོས་ལ། དེ་ཡང་དཔྱད་དེ་སྒོམ་པ་ཞིག་ཡིན་ན་ནི། རིག་པ་གཞན་གྱིས་མཐའ་བྲལ་དུ་གཏན་ལ་ཕབ་པ་དང་དགོས་ནུས་མཆོག་ཏུ་ཁྱད་ཞུགས་པ་མེད་ཅིང༌། འོན་ཏེ་འཇོག་སྒོམ་ཞིག་ཡིན་ན་ནི། དེར་བདེ་བ་ལ་སེམས་འཛིན་པ་ཉིད་ཡིན་ནམ་གཞན་ཞིག་སྒོམ་པར་བྱེད། དངཔོ་ལྟར་ན་ནི། ལུང་དང་རིག་པ་ལ་མ་བརྟེན་པའི་ཕྱིར་ཐོས་བསམ་གྱི་ལྟ་བར་ཇི་ལྟར་རུང༌། དེ་ཙམ་ནི་མན་ངག་མཆོག་ཀྱང་མ་ཡིན་ནོ། །འོན་ཏེ་བདེ་བ་དོན་དམ་པར་མེད་དོ་ཞེས་པ་ཙམ་ལ་སེམས་འཇོག་ན་ནི། མིང་ཙམ་ལ་སེམས་བཟུང་བར་ཟད་ལ། འོན་ཏེ་ལུང་རིག་གིས་གཏན་ལ་འབེབས་ཤིང་སྒོམ་ན་ནི། སྔ་མ་ལྟར་བས་སོ། །གཞན་ཡང་དེ་འདྲའི་བདེ་སྟོང་སྒོམ་པ་ནི་རྡོ་རྗེ་འཛིན་པ་ལས་དང་པོ་བ་ཤས་ཆེར་ལ་ཡང་ཡོད་པས། གཞན་ལ་མེད་པའང་ག་ལ་ཡིན། གཉིས་པ་ནི། དེ་འདྲ་དེ་
ཡང་སློབ་བཤད་ཀྱི་དོན་ཡིན་ཅེས་པ་ནི་ཅི་སློབ་བཤད་དེ། རྒྱུད་དང་གྲུབ་ཆེན་གྱི་བཤད་པ་ལྟར་རམ། རང་གང་གི་རྗེས་སུ་འབྲང་བའི་ལུགས་ཀྱི་བླ་མ་གོང་མས་བཤད་པ་ལྟར་ཡིན། དང་པོ་ལྟར་ན་ནི། སྟོང་ཉིད་སྒོམ་ཚུལ་དེ་འདྲ་སྤྱི་དོན་ཡིན་ཅིང་དེ་ནི་ཚོགས་ལ་བཤད་པར་གསུངས་པས་མི་འཐད་ལ། གཉིས་པ་ལྟར་ན་ནི། མངོན་རྟོགས་མདོར་བསྡུས་འཆད་པ་ཚོགས་བཤད་དང༌། གཞུང་དོན་ཞིབ་མོར་འཆད་པ་སློབ་བཤད་ཅེས་ཟེར་བས་དགོས་ནུས་གང་ཡང་མ་གྲུབ་བོ། ཁྱེད་ཅག་གི་བསམ་པ་ཁོངས་སུ་ཆུད་པ་དེ་བཤད་པ་བཟང་མི་བཟང་ཙམ་ལ། ཚོགས་སློབ་ཀྱི་བཤད་པར་བཟུང་སྣང་བས་བསྟན་བཅོས་འཆད་པའང་དེ་ཉིད་ཀྱི་དབྱེ་བ་བྱེད་པ་དང་ཚོགས་བཤད་ཚིག་གི་སྤུ་འཕྲེང་ཙམ་ཡིན་པས་སྙིང་པོའི་དོན་ལེན་པའི་ཚེ་མི་དགོས་ཟེར་བ་དང། ཚོགས་སློབ་གཉིས་ཤིང་རྟའི་སྲོལ་ཐ་དད་དུ་འདོད་པ་སོགས་ནི་མཁས་པའི་ཚོགས་སུ་དབྱུང་བྱ་མ་ཡིན་པ། ཤིན་ཏུ་མ་སྦྱངས་བའི་བླུན་པོ་དག་ངོ་མཚར་སྐྱེད་པའོ། །གསུམ་པ་ནི། ཐོས་བསམ་གྱི་ལྟ་བ་དང་སྲེ་ཞེས་པ། གཉིས་ཀའམ་རེ་རེ་དང་སྲེ། དང་པོ་ལྟར་ན་ནི། རྟོག་གཉིས་ཅིག་ཅར་འཇུག་པར་ཐལ་ལ། ཐོས་པ་དང་སྲེ་ན་ནི། རིག་པ་དང་འབྲེལ་ཡང་རུང་ལུང་གི་རྗེས་སུ་འཇུག་པས་ཞུ་བདེ་སྐྱེས་པའི་ཚེ་ལུང་དྲན་དགོས་པའི་གྲུབ་མཐའ་ངོ་མཚར་ཅན་འབྱུང་ལ། བསམ་བྱུངགི་ཤེས་རབ་དགོས་ན་ནི། དཔྱད་སྒོམ་མན་ངག་གི་མཐར་ཐུག་ཏུ་འདོད་དགོས་ན། དེ་ནི་ཁྱེད་ཉིད་མི་སྨྲ་ལ་རག གལ་ཏེ་སྨྲ་ན་ནི་ལེགས་ཏེ། རྒྱ་ཆེར་བརྟགས་པར་བྱའོ། །གལ་ཏེ་འདི་བདེན་མེད་དོ་སྙམ་པ་ཙམ་ཞིག་འཛིན་ན་ནི་ཡིད་དཔྱོད་ཙམ་གྱི་འདུ་ཤེས་ཡིན་གྱི་ངེས་པ་རྙེད་པའི་ཤེས་རབ་ཏུ་མི་རུང་ངོ༌། །འོན་ཏེ་རེས་འཇོག་ཏུ་བྱེད་ན་ནི་སྐྱོན་གཉིས་ཀར་ཐལ་ལ། ཡོངས་ཡེ་དཔྱད་སྒོམ་གྱི་ངེས་ཤེས་སྒོམ་བྱུང་ལ་ཤིན་ཏུ་
མང་བ་དང༌། ཐོས་བསམ་ལས་བྱུང་བའི་ཤེས་རབ་དང་སྒོམ་བྱུང་གཞི་མཐུན་པ་མེད་པ་ཞིག་ཡིན་ནའང་དེ་མ་རྟོགས་ཤིང་ཡིད་ལ་མི་བྱེད་པའི་སྔགས་པས་ཡིད་དྲངས་ཀྱང་བློས་མ་ཁེལ་བའི་ཅལ་ཅོལ་ཙམ་ལས་གྲུབ་མཐའ་རྟིང་མ་ཚུགས་པ་སྟེ། བདེ་བ་ལ་མི་རྟོག་པར་གནས་ན། ཐོས་བསམ་གྱིས་དྲངས་བའི་ངེས་ཤེས་ཅི་ལྟར་འབྱུང༌། ཐོས་བསམ་ཞེས་པའི་ཚིག་ཀྱང་སྤོམས་ཤིང༌། རང་གང་ལ་ཚད་དུ་བྱེད་པའི་བླ་མ་རྣམས་ཀྱིས་ཀྱང༌། ལྟ་བ་དེ་དུག་ཅན་དུ་བཤད་པས་འདིར་ཉེས་པ་ཐམས་ཅད་ནི། ཉམས་སུ་མྱོང་བ་ལྟ་ཅི་སྨོས། བླ་མའི་མན་ངག་མེད་པར་རྩོལ་བཤད་དུ་བྱས་ཤིང་གོ་བ་རགས་པ་ལ་མྱོང་བར་འཁྲུལ་བའི་སྐྱོན་ནོ། །སྤྲོས་པས་ཆོག་གོ །བཞི་པ་ནི། དེ་བས་ན་སེམས་ཀྱི་རང་བཞིན་བདེ་བ་ཆེན་པོ་ནི་ངོས་བཟུང་བར་བྱོས་ཤིག་ཅེས་པའོ། །གཉིས་པ་སྒྲུབ་པར་བྱེད་པའི་ཐབས་ལ་གསུམ་སྟེ། ཐབས་དངོས་བསྟན་པ་དང༌། དེ་གསུང་རབ་ཐམས་ཅད་ཀྱི་སྙིང་པོར་བསྟན་པ་དང༌། མན་ངག་ལས་གཞན་དུ་ལྷན་སྐྱེས་མི་རྙེད་པར་བསྟན་པ་སྟེ་གསུམ་ལས། དང་པོ་ལ། ཡན་ལག་དྲུག་དང༌། གཡོ་མེད་གསུམ་དང༌། རྣལ་འབྱོར་བཞི་དང༌། ཆེད་དུ་བྱ་བ་གཉིས་དང༌། དེ་ཉིད་བཅུ་བཞི་རྣམས་ལས། དང་པོ་ཡན་ལག་དྲུག་ནི། ཨེ་མ་ཞེས་པ་ནི། མན་ངག་འདི་དག་ལས་རང་བཞིན་ལྷན་ཅིག་སྐྱེས་པ་མངོན་དུ་འགྱུར་བའི་ཆོས་ཉིད་ཀྱི་རིག་པ་ལ་ངོ་མཚར་སྐྱེས་པའོ། །དྲུག་ཅེས་བྱ་བ་ནི། རྣལ་འབྱོར་ཡན་ལག་དྲུག་པ་ཡིན་ལ། སླར་ཡང་དྲུག་ཅེས་གསུངས་པ་ནི་ཕུང་ཁམས་དབང་ཡུལ་དྲུག་དྲུག་ཡན་ལག་རེ་རེས་སྦྱོང་བར་འགྱུར་རོ་ཞེས་པ་སྟེ། དེ་ལ་ཡན་ལག་དྲུག་གི་དང་པོ། སོ་སོར་སྡུད་པ་ནི། དབུ་མའི་ཡས་སྣར་རླུང་སེམས་བསྡུད་པར་བྱེད་པའི་ཐབས་དམ་པ་སྟེ། ནམ་མཁའ་ལ་གཡོ་བ་མེད་པར་
སྒོམ་པའོ། །འདིས་རྟགས་མཚན་རྣམས་བརྟན་པོར་གྱུར་པ་ན། བསམ་གཏན་ནི་སྟོང་གཟུགས་ཏེ་ཁྱད་པར་ཅན་དུ་སྒྲུབ་པའི་ཕྱིར་སེམས་དང་སྣང་བ་གཞན་ཐམས་ཅད་སྟོང་གཟུགས་དང་བསྲེས་པས་རྟགས་སྣང་རགས་པ་ཙམ་ལ་སེམས་གནས་པའི་རྟོག་པ་དང༌། སྣང་སེམས་ཞིབ་མོར་ངེས་པའི་སྤྱོད་པ་དང༌། སྣང་སེམས་གཅིག་ཏུ་རྟོགས་པས་དྲངས་པའི་ཡིད་དགའ་བ་དང༌། དེས་དྲངས་བའི་ལུས་སེམས་ཤིན་ཏུ་སྦྱངས་པའི་བདེ་བ་དང༌། ཡུལ་སེམས་གཅིག་ཏུ་ཤེས་པའི་སྤྲོས་བྲལ་གྱི་རྣམ་པ་ཅན་གྱི་ཤེས་རབ་སྟེ་ཡན་ལག་ལྔ་རིམ་གྱིས་སྐྱེ་བར་འགྱུར་བ་ནི་བསམ་གཏན་གྱི་ཡན་ལག་གོ །དེ་ནས་གཟུགས་བརྙན་གྱི་བདེ་བ་འདྲེན་པའི་རྒྱུར་རླུང་དག་པར་བྱ་དགོས་པས། ཐོག་མར་གཡས་གཡོན་གྱི་རྒྱུ་བ་འགག་ཅིང་སྲོག་ཐུར་གོང་བུ་གཅིག་ཏུ་བྱ་བའི་ཕྱིར་སྲོག་རྩོལ་སྒོམ་པར་བྱ་སྟེ། བུམ་པ་ཅན་ལ་སོགས་པའི་སྦྱོར་བས་གཡས་གཡོན་གྱི་རླུང་རྒྱུ་བ་དབུ་མར་འགགས་ཤིང། སླར་ཡང་བུམ་པ་ཅན་གྱི་སྦྱོར་བས་སྲོག་ཐུར་རོ་གཅིག་ཏུ་གྱུར་གྱི་བར་སྒོམ་པར་བྱའོ། །སྲོག་ཐུར་གཅིག་ཏུ་གྱུར་བ་དེ་ཉིད་འཁོར་ལོ་ལྔའི་ཐིག་ལེ་རྣམས་དང། ཁྱད་པར་དུ་ལྟེ་བའི་ཐིག་ལེ་ལ་ཐིམ་གྱི་བར་དུ་ཐིག་ལེ་སྒོམ་པ་ཡིན་ཏེ། འདིས་སྟོང་གཟུགས་ཁྱད་པར་ཅན་དྷཱུ་ཏཱིའི་ནང་དུ་ལྷ་མོའི་རྣམ་པས་ཞུ་བདེ་ཁྱད་པར་ཅན་འདྲེན་པ་ནི་འཛིན་པས་དྲངས་པའི་རྗེས་དྲན་ཞེས་བྱ་སྟེ་འཛིན་པ་རྫོགས་པ་ཡིན་ནོ། །དེ་ནས་གཟུགས་བརྙན་གྱི་བདེ་བ་རྒྱ་ཆེར་འདྲེན་པའི་ཕྱིར་ལས་དང་ཡེ་ཤེས་ཀྱི་ཕྱག་རྒྱ་བསྟེན་པས། མས་བརྟན་གཙོ་བོར་གྱུར་པའི་ཞུ་བདེ་ཡང་ཡང་གོམས་པར་བྱེད་ཅིང་ཞུ་བདེ་དང་སྟོངགཟུགས་གཉིས་གཅིག་གི་གཅིག་འདྲེན་པར་བྱེད་པ་ནི་རྗེས་དྲན་ནོ། །དེ་ནས་སྟོང་གཟུགས་ཀྱི་ཕྱག་རྒྱས་བྱང་ཆུབ་ཀྱི་སེམས་དཀར་པོ་ནོར་བུ་ནས་སྟེང་དུ་རིམ་པས་དབུ་
མའི་ནང་གི་ཡང་གནས་སོ་སོར་འཕོ་བ་མེད་པར་བཅིངས་ཤིང་དམར་པོའང་སྤྱི་བོ་ནས་དེ་བཞིན་དུ་རིམ་པར་བཅིངས་པས་འཕོ་བ་བཅུ་གཉིས་དང་ཁམས་ཀྱི་བགྲོད་པ་བཅུ་དྲུག་འགགས་པས་མ་དག་པའི་ལུས་གནས་གྱུར་ཏེ་རྡོ་རྗེ་སྐུ་འགྲུབ་པ་ནི་ཏིང་ངེ་འཛིན་ཡིན་ནོ། །དེས་མཐོང་བའི་ལམ་མངོན་དུ་གྱུར་ཏེ་བརྟུལ་ཞུགས་ཀྱི་སྤྱོད་པ་སྤྱད་པས་འབྲས་བུ་ལ་སྦྱར་བ་ཡིན་ནོ། །གཉིས་པ་ནི། ལུས་ནི་ཐ་མལ་གྱི་རྣམ་པར་རྟོག་པས་མི་གཡོ་ཞིང་ལུས་ཀྱི་ཐིག་ལེ་གཡོ་བ་མེད་པར་འཆིང་པས་སྐུ་རྡོ་རྗེ་རྣལ་འབྱོར་དུ་བྱེད་པ་དང༌། འདིས་མཚོན་ནས་ངག་དང་ཡིད་ལའང་གསུང་དང་ཐུགས་རྡོ་རྗེ་གཡོ་བ་མེད་པའི་རྣལ་འབྱོར་ཞེས་སྦྱར་ཏེ། མདོར་ན་རྡོ་རྗེ་གསུམ་གྱི་རྣལ་འབྱོར་ཡིན་ནོ། །གསུམ་པ་ནི། དང་པོར་ཙཎྜ་ལིའི་རྣལ་འབྱོར་ཏེ། རླུང་དབུ་མར་ཐིམ་ནས་གཏུམ་མོ་འབར་བར་བྱེད་པའི་སྦྱོར་བ་དང༌། གཉིས་པ་རླུང་གི་རྣལ་འབྱོར་ནི། འབྱུང་བ་རྣམས་རིམ་པས་ཐིམ་པར་འགྱུར་བའི་རླུང་གི་སྦྱོར་བ་དང༌། འོད་གསལ་བས་རིམ་མིན་ཏེ་ལུགས་ལྡོག་ཏུ་ཁམས་ཀྱི་རིམ་པ་འབྱུང་བའི་སྦྱོར་བའོ། །གསུམ་པ་ནི། དགའ་བ་བཞིའི་རྣལ་འབྱོར་ནི་གཏུམ་མོ་འབར་བ་ལས། དགའ་བ་ཡང་ལུགས་འབྱུང་ལུགས་ཟློག་ཏུ་འབྱུང་བའི་སྦྱོར་བའོ། །ཧ་ཧེ་བརྒྱད་དང་ཁྱོགས་སོགས་ལུས་སྒྱུར་དགའ་བའི་སྐད་ཅིག་མ་བརྒྱད་དང་ཁྱོགས་ལ་སོགས་པའི་སྦྱོར་བའི་ཐབས་དྲུག་བཅུ་རྩ་བཞི་པོ་ཡང་ཕྱག་རྒྱ་གཅིག་པུ་དང་སྦྱོར་བའོ། །བཞི་པ་ཕྱག་རྒྱ་གཅིག་པོའི་རྣལ་འབྱོར་ནི་སྔར་བཤད་པའི་རྣམ་མེད་ཀྱི་ཕྱག་ཆེན་དེ་ཉིད་ཡིན་ཏེ། རྣལ་འབྱོར་འདི་བཞི་རྫོགས་རིམ་གྱི་རྟོག་པ་ཆ་ཚང་བ་ཐམས་ཅད་ལ་འབྱུང་བ་ཡིན་ནོ། །བཞི་པ་ནི། གང་གི་ཆེད་དུ་བྱ་བ་རང་གི་སྤང་བྱ་ལས་གྲོལ་བའི་དོན་དང༌། དེ་ཁོ་ན་ཉིད་དེ། རྒྱུ་དངའབྲས་བུའི་བདེ་སྟོང་གི་དོན་དུ་སྒོམས་
པའི་རྫོགས་པའི་རིམ་པ་གཉིས་སོ། །དང་པོ་ལ་སོ་སོ་སྐྱེ་བོའི་དུས་སུ་ཅུད་ཟད་གྲོལ་བའི་ཕྱིར་སྒོམ་པ་དང༌། འཕགས་པའི་ལམ་གྱིས་ས་བོན་སྤོང་བའི་ཆེད་དུ་བྱ་བ་གཉིས། ཕྱི་མ་ལ་སོ་སྐྱེའི་དུས་རྒྱུའི་བདེ་བའི་དོན་དང༌། འཕགས་ལམ་དུ་རང་གི་ངོ་སྐལ་གྱི་སྤང་བྱ་སྤངས་ནས་ས་གོང་མ་ལ་སྦྱོར་བའི་དངོས་ཀྱི་ལམ་མངོན་དུ་མ་བྱས་ཀྱི་བར་དུ་སྔ་མའི་ཡེ་ཤེས་རྣམ་པར་འཕེལ་བའི་དོན་དུ་སྒོམ་པ་ནི་འབྲས་བུའི་བདེ་བ་སྒོམ་པ་ཆེད་དུ་སྦྱར་བའི་སྦྱོར་བས་སོ། །ལྔ་པ་ནི། དེ་དག་བཅུ་བཞི་བཅུ་བཞིའི་བདག་ཉིད་ཅེས་བྱ་བ་ནི། རྫོགས་པའི་རིམ་པའི་རྟོག་པ་ཚང་བ་ཡན་ལག་དངབཅས་པ་ཐམས་ཅད་ལ་དེ་ཁོ་ན་ཉིད་བཅུ་བཞི་ཚང་བ་ཡིན་ཏེ། ཇི་ལྟར་བསྐྱེད་རིམ་ལ་དེ་ཉིད་བཅུ་བཞི་ཡོད་པ་བཞིན་དུ། དེའི་སྔས་དོན་རྫོགས་པའི་རིམ་པ་ལ་ཡང་དེ་ཁོ་ན་ཉིད་བཅུ་བཞི་ཚང་དགོས་པ་ཡིན་པས། དེ་ཡང་རྫོགས་རིམ་གྱི་དེ་ཉིད་བཅུ་བཞི་ལ་མི་འདྲ་བ་མང་དུ་ཡོད་ནའང་འདིར་རང་ལུགས་ནི། དང་པོ་གོས་ཀྱི་དེ་ཉིད་ལ། གོས་ཀྱི་སྐད་དོད་པ་ས་ནམ་ཞེས་པ་གནས་ལ་ཡང་འཇུག་པས། རྫོགས་རིམ་གང་དུ་འཇུག་པའི་གནས་འཁོར་ལོ་བཞི་ལ་སོགས་པའི་ལུས་ཡིན་ལ། གཉིས་པ་ཕྱག་རྒྱ་ལྔའི་དེ་ཉིད་ནི། ལྷའི་ཆས་སུ་འཇུག་པ་སྟེ། སྤྲོས་བཅས་ཀྱི་སྤྱོད་པ་ལ་སོགས་པ་སྤྱོད་པ་ཐམས་ཅད་ཡིན་ལ། གསུམ་པ་ཤེས་རབ་ཡན་ལག་གི་དེ་ཉིད་ནི། ཕྱག་རྒྱ་གསུམ་གང་ཡང་རུང་བའི་སྐྱེ་གནས་ཀྱི་བདེ་བ་ཆེན་པོ་འདྲེན་པ་དང༌། བཞི་པ་ཕུར་བུའི་གུར་ཏེ། བསྲུངའཁོར་གྱི་དེ་ཉིད་ནི། བྱང་ཆུབ་ཀྱི་སེམས་འཁོར་ལོ་ལྔར་གཡོ་མེད་དུ་བཅིངས་པ་དང༌། ལྔ་པ། ཨཱ་ལི་ཀཱ་ལིའི་དེ་ཉིད་ནི། གཡས་གཡོན་དང་སྟེང་འོག་གི་རླུང་དབུ་མ་དང་མི་ཤིགས་པའི་ཐིག་ལེར་འགགས་པ་གང་ཡིན་པ་དང༌། དྲུག་པ། རྒྱུ་སོགས་སྟོང་པའི་དེ་ཉིད་ནི། རྣམ་པར་ཐར་པའི་
སྒོ་བཞིའི་རྣམ་པ་ཅན་གྱི་བདག་མེད་རྟོགས་པའི་ཤེས་རབ་བོ། །བདུན་པ་ནཱ་ད་ལ་སོགས་པ་དེ་ཉིད་ནི། རླུང་སེམས་ཙམ་ལས་གྲུབ་པའི་ཡེ་ཤེས་ཀྱི་སྐུ་དང༌། བརྒྱད་པ། བསྡུས་པའི་སྦྱོར་པའི་དེ་ཉིད་ནི། ཕྲ་རགས་ཀྱི་རིམ་པའི་ཁམས་རྣམས་འོད་གསལ་དུ་འཇུག་པ་དང༌། དགུ་པ། བདུད་རྩི་ཚིམ་བྱེད་ཀྱི་དེ་ཉིད་ནི། སྤྱི་བོའི་ཧཾ་ཡིག་ཞུ་བའི་དགའ་བ་བཞིའི་བདེ་སྟོང་རྣམས་དང༌། བཅུ་པ། མི་གནས་པའི་མྱང་འདས་ཀྱི་དེ་ཉིད་ནི། འོད་གསལ་ལས་ལོངས་སྐུར་ལྡང་བ་དང༌། བཅུ་གཅིག་པ་ལག་མཆོད་ཀྱི་དེ་ཉིད་ནི། ཕྱག་རྒྱ་ཆེན་མོ་གཉིས་ཀྱིས་འབྱུང་བ་སོ་སོའི་དྭངས་མ། འཁོར་ལོ་སོ་སོའི་ལྟེ་བའི་རང་གནས་སུ་བཅིངས་པ་དང༌། བཅུ་གཉིས་པ། དབང་བསྐུར་བའི་དེ་ཉིད་ནི། ཉེ་རྒྱུ་སྤྱོད་པའི་མཐར་སངས་རྒྱས་ལ་དབང་བསྐུར་བ་ཐོབ་པའོ། །བཅུ་གསུམ་པ། གོ་ཆའི་དེ་ཉིད་ནི། ཡུལ་ཉེར་བཞིའི་རླུང་ཐིམ་པ་དང༌། ལོངས་སྤྱོད་པ་དང་བདག་པོར་གྱུར་པའི་རིམ་པས་དབུ་མར་ཐིམ་པའོ། །བཅུ་བཞི་པ་སྔགས་མཆོད་ཀྱི་དེ་ཉིད་ནི། རྡོ་རྗེ་བཟླས་པ་དང༌། རླུང་དབུ་མར་གནས་པ་དང་ཐིམ་པ་རྣམས་ཀུན་རྫོབ་དང༌། རང་བཞིན་ལྷན་སྐྱེས་དོན་དམ་གྱི་བསྡུས་པ་སྟེ། དེ་ལྟར་ན། དེ་ཁོ་ན་ཉིད་བཅུ་བཞི་པོ་འདི་དག་གིས་རྫོགས་པའི་རིམ་པ་ཐམས་ཅད་བསྡུས་པ་ཡིན་ནོ། །ཚིགས་སུ་བཅད་པ་གཅིག་པོ་འདི། ཤིན་དུ་བྱིངས་ཆེ་བས་མཐའ་དཔྱོད་རྒྱས་པར་བྲིས་ན་ཡི་གེ་མངས་པར་འགྱུར་བས་རེ་ཤིག་དེ་ཙམ་མོ། ཁྱད་པར་ཡན་ལག་དྲུག་པ་ནི། སེམས་འགྲེལ་བསྐོར་གསུམ་གྱི་ལུགས་དང་ཁྱད་པར་མེད་པས། ལུགས་དེའི་ཕྱོགས་ཀྱང་ཞིབ་མོར་གཏན་ལ་དབབ་པར་བགྱིའོ། །གཉིས་པ་ནི། ཕ་རོལ་དུ་ཕྱིན་པའི་མདོ་སྡེ་རྣམས་དང༌། སློབ་དཔོན་རྣམས་ཀྱི་བྱས་པའི་སྒྲ་སོགས་ཀྱི་གཞུང་ལུགས་དང༌། སྔགས་ཀྱི་རྒྱུད་
རྣམས་ལས། དེ་ཁོ་ན་ཉིད་འདི་ཉིད་སྟོན་ཞེས་པའོ། གསུམ་པ་ནི། དེ་ལྟར་རྒྱས་པར་སྟོན་ཡང༌། བླ་མའི་མན་ངག་མེད་པར་ལྷན་ཅིག་སྐྱེས་པ་རྣམ་པ་གཉིས་ཀྱི་རང་བཞིན་མི་ཤེས་པས། དེ་རྣམས་ཀྱི་ངལ་བ་འབྲས་བུ་མེད་པ་ཡིན་ཏེ། ཐུན་མོང་མ་ཡིན་པའི་བདེན་གཉིས་ཟུང་འཇུག་སྒྲུབ་པའི་ཐབས་མི་ཤེས་པའི་ཕྱིར་རོ། །དེ་སྒྲུབ་པར་བྱེད་པ་ལའང་བླ་མའི་མན་ངག་ལུང་དང་རིག་པས་ཚད་མར་གྲུབ་པ་འདིས་ཆོག་སྟེ། རྟོག་གེ་དང་སྡེབ་སྦྱོར་དང་ཟློས་གར་ལ་སོགས་པ་བློ་གྲོས་ངན་པ་སྤོངས་ཤིག བརྡ་སྤྲོད་ལ་སོགས་པ་དེ་དག་གི་ཐར་པ་འདོད་པ་ཅི་ཞིག་བྱ་སྟེ། ངན་གཡོའི་བློ་གྲོས་ཀྱི་བྱིས་པ་འབྲིད་པར་བྱེད་པ་ཡིན་པའི་ཕྱིར་རོ། །བསྟན་བཅོས་ངན་པ་དེ་དག་ལྷུར་ལེན་པ་སྤང་བར་བྱ་ཞིང༌། སྡེ་སྣོད་གསུམ་དང༌། དགོངས་འགྲེལ་གྱི་གཞུང་ལུགས་རྣམས་དང༌། རྣལ་འབྱོར་གྱི་ཚོགས་ཤིན་ཏུ་རྒྱས་པར་འཆད་པ་རྣལ་འབྱོར་སྤྱོད་པའི་གཞུང་སྟེ། བྱམས་པ་དང་ཐོགས་མེད་ཀྱིས་མཛད་པའི་རང་རྐང་གི་གཞུང་ཤོ་ལོ་ཀ་འབུམ་ཕྲག་ཕྱེད་དུ་ལོངས་པ་རྣམས་ཀྱང་བདག་གིས་མ་ཐོས་ཞེས་ཤིན་ཏུ་འགྱོད་ཅིང་ཆེས་གདུང་བར་ནི་མི་བྱ་སྟེ། བླ་མའི་མན་ངག་ཐོབ་པ་ཉིད་ཀྱིས་ཏིང་ངེ་འཛིན་གྱི་ཚོགས་ལ་མཁས་པར་འགྱུར་བ་ཡིན་ནོ། །ཀྱཻ་བཟང་མོ་ཞེས་བོས་ནས། མན་ངག་གསུང་རབ་ཐམས་ཅད་ཀྱི་བཅུད་བདུད་རྩི་ལྟ་བུ་འདི་ནི་དེ་རིང་བསྟན་པ་ཡིན་ནོ། །ཞེས་སོ། །གསུམ་པ་ལམ་གྱི་འབྲས་བུ་བྱེད་ལས་དང་བཅས་པ་ལ། འབྲས་བུ་དང་བྱེད་ལས་གཉིས་ལས། འབྲས་བུ་ནི་དེ་ཉིད་བདུན་ཏེ་ཤིན་ཏུ་རྟོགས་དཀའ་བའི་ཕྱིར་ཕྲ་བ་ཟག་མེད་ཀྱི་སེམས་ཀྱི་རྒྱུན་ནི་ཟབ་པ་དང། དེ་ཉིད་དངོས་པོ་ཐམས་ཅད་ཀྱི་རྣམ་པར་སྣང་བས་རྒྱ་ཆེ་བ་དང༌། འཇིག་རྟེན་གསུམ་པོ་ཐམས་ཅད་དུ་དངོས་པོ་ཀུན་གྱི་རྣམ་པས་ཡུལ་དུས་ཐམས་ཅད་
དུ་དངོས་པ་ཀུན་གྱི་རྣམ་པས་ཡུལ་དུས་ཐམས་ཅད་དུ་ཆད་པ་མེད་པར་འབྱུང་པའི་ཁྱབ་པ་དང༌། མི་འགྱུར་པའི་བདེ་བ་ཆེན་པོ་རང་བཞིན་གྱི་ངོ་བོར་གནས་པའི་ཕྱིར་བདེ་བ་ཆེན་པོ་དང༌། ངོ་བོ་སྐད་ཅིག་སྔ་ཕྱིར་འགྱུར་བ་མེད་པའི་ཕྱིར་རབ་ཏུ་རྟག་པ་དང༌། ཡེ་ཤེས་གསུམ་དང་ཐམས་ཅད་སྟོང་པའི་དབུས་ཏེ་རང་དུ་གནས་པའི་འཇའ་ཚོན་ལྟར་སྣང་བའི་རྡོ་རྗེ་སྐུ་སྟེ་ཡེ་ཤེས་ཀྱི་སྐུ་དང༌། བདེན་གཉིས་ཟུང་འཇུག་དེ་ཉིད་ཆོས་ཐམས་ཅད་དང་མཉམ་པ་ཉིད་ཀྱི་ངོ་བོར་རྟོགས་པ་ཟུང་འཇུག་སྟེ། དེ་འདྲའི་དེ་ཉིད་བདུན་དང་ལྡན་པ་རིན་པོ་ཆེ་མཆོག་ཡིད་བཞིན་གྱི་ནོར་བུ་ལྟར་འགྲོ་བའི་དོན་བྱེད་པའི་སེམས་ཀུན་གཞིའི་རྣམ་ཤེས་རྣམ་པར་དག་པ་ལ་ཕྱག་འཚལ་ལོ། །དེ་ལྟར་དེ་ཁོ་ན་ཉིད་བདུན་ནི་ལྡོག་ཆས་ཕྱེ་བའི་ཚེ་མིང་ཐ་དད་པ་ཡིན་གྱི་དོན་ནི་གཅིག་པོ་ཉིད་དོ། །དེ་ལྟར་ཡང་རྡོ་རྗེ་འཆང་དང་གཉིས་སུ་མ་མཆིས་པ་རྗེ་བཙུན་བླ་མ་དམ་པའི་ཞལ་སྔ་ནས། ཟབ་དང་རྒྱ་ཆེ་ཁྱབ་པ་དང༌། །རྟག་པ་སྐུ་དང་ཟུང་འཇུག་བདེ། །གཅིག་གི་རང་བཞིན་བདུན་དུ་སྒྲགས། །ངོ་བོ་དང་པོའི་རྒྱུད་དུ་བརྗོད། །ཅེས་བཀའ་སྩལ་ཏོ། །འདི་ནི་ཤིན་ཏུ་གལ་ཆེ་ཞིང་བརྗོད་བྱ་མང་བ་ཡིན་མོད་ཀྱི། རྗེ་བཙུན་བླ་མས་གཞུང་རང་གང་དུ་མཛད་པ་ཉིད་ཀྱི་ཕྱིར་དེ་ཉིད་ལ་རྣམ་བཤད་བྱ་བར་འདོད་པས་འདིར་མ་བྲིས་སོ། གཉིས་པ་ལ། ལྷའི་དེ་ཉིད་ཀྱི་བྱེད་ལས་དང༌། སྔགས་ཀྱི་དེ་ཉིད་ཀྱི་བྱེད་ལས་དང༌། རགས་པའི་སྒྱུ་ལུས་ཀྱི་དེ་ཉིད་ཀྱི་བྱེད་ལས་དང༌། ཡེ་ཤེས་ཀྱི་དེ་ཉིད་ཀྱི་བྱེད་ལས་སོ། །དང་པོ་ལ། བྱེད་ལས་དངོས་དང༌། མིང་དོན་གཉིས་ལས། དང་པོ་ནི། བདེན་པ་གཉིས་ལ་ངོ་མཚར་བས། ཨ་རེ་དང་ཨ་ཧོ་ཞེས་བརྗོད་ནས། རྣམ་པར་རྟོག་པའི་དྲི་མ་དག་པའི་ལྷའི་སྐུ་བསྒོམས་པས། ཕྲ་རགས་ཀྱི་ལུས་ལེན་པས་སྐྱེ་བའི་བག་ཆགས་འགགས་ཏེ། ཕུང་ཁམས་
སྐྱེ་མཆེད་ཀུན་གྱི་རང་བཞིན་གྱི་ཆ་ལ་སྐྱེ་འཇིག་མེད་པའི་བདེ་བ་སྦྱིན་པར་བྱེད་དོ། །དེ་ཉིད་བདེ་བ་ཆེན་པོ་རྣམ་རྟོག་ནུབ་ཅིང་སྤྲོས་པས་རབ་ཏུ་དབྱེ་ན་པ་རྣམ་པར་རྟོག་པ་མང་བའི་ཡེ་ཤེས་ཀྱི་རང་སྣང་སྟེ། འོན་ཀྱང་རྣམ་རྟོག་ལྟ་བུར་སྣང་བའི་འཕེན་པ་རྟོག་མེད་ཀྱི་སྟོབས་ཀྱིས་རྣམ་པ་ཐམས་ཅད་དུ་མཐོང་ཞིང་ཚིག་གི་ལམ་ལས་འདས་པས་རང་བཞིན་ཇི་ལྟ་བ་སྨྲ་རུ་མེད་པ་ཡིན་ནོ། །དེ་ལྟར་ཡང་དུས་ཀྱི་འཁོར་ལོ་ལས། ལྷ་ཡི་རྣལ་འབྱོར་དག་ཀྱང་མངོན་སུམ་དང་ནི་རྗེས་སུ་དཔག་པ་རྣམ་པ་གཉིས་སུ་འགྱུར་བ་སྟེ། །མངོན་སུམ་དག་ནི་དེ་ཉིད་སྦྱོར་བས་མཁའ་ལ་སྐར་མ་བཞིན་དུ་དུ་མ་ལོངས་སྤྱོད་རྫོགས་པའི་སྐུ། །མངོན་སུམ་མེད་ན་རྗེས་སུ་དཔག་པ་ཤི་བའི་ལུས་བཞིན་དེ་ཉིད་མིན་པ་ཡིས་ནི་རྟགས་པ་གང༌། །དེ་ནི་རི་མོ་སོགས་ལ་ལྟ་བྱ་ཡོངས་སུ་མ་སྨིན་བློ་ཅན་རྣལ་འབྱོར་རྣམས་ཀྱིས་བསྒོམས་པའི་དོན། །ཞེས་རྫོགས་རིམ་པའི་ལྷ་ལ་མངོན་སུམ་གྱི་ལྷ་དང༌། བསྐྱེད་རིམ་པ་ལ་རྗེས་དཔག་གི་ལྷ་དང་མ་སྨིན་པས་སྒོམ་པར་གསུངས་པའི་རྫོགས་རིམ་གྱི་སྨིན་བྱེད་དུ་ཡང་བསྟན་ནོ། །གཉིས་པ་ནི། རང་གི་ལུས་ལས་བྱུང་བས་ཕྱིར་ལྷ་ཞེས་བྱ་སྟེ་སྔར་བཤད་ཟིན་ཏོ། །གཉིས་པ་སྔགས་ཀྱི་བྱེད་ལས་ནི། རླུང་ཐིམ་པའི་སྦྱོར་བས་ནང་གི་དཀར་དམར་འདྲེས་པའི་འདུ་འཕྲོ་བ་འབྱུང་ཞིང༌། དེ་ཡང་སྙིང་ཁར་ཁུ་ཁྲག་སྲེས་ཤིང་ཐིམ་པས་འཆི་མེད་འོད་གསལ་སྟོང་པ་ཉིད་ཀྱི་ཁང་པར་མྱུར་དུ་འགྲོ་ཞིང༌། འཁོར་ལོ་སོ་སོའི་ལྟེ་བར་ནུས་པ་མས་རིམས་ཀྱི་བརྟན་པར་བྱས་པས། སྟེང་དུ་འགྲོ་བའི་རང་བཞིན་བྱང་ཆུབ་ཀྱི་སེམས་བདེ་བ་ཆེན་པོའི་ཆུ་བོ་གདུང་བ་སེལ་བའི་ཕྱིར་རི་བོང་ཅན་ཏེ་ཟླ་བ་དེ་ནི་སྤྱི་བོ་ནས་འོག་ཏུ་འབེབས་པས་འཕོ་བའི་བདེ་བ་དང༌། སླར་སྟེང་དུ་འགྲོ་བའི་ཚེ་འཁོར་ལོ་སོ་སོར་བརྟན་པར་བྱས་པས་སྤྱི་བོ་དང་ནོར་བུར་ལྷན་སྐྱེས་ཀྱི་བདེ་བ་རྣམས་
རྫོགས་ཤིང་བརྒྱས་པར་བྱས་ཏེ། མི་འཛག་པའི་བདེ་བ་ཆེན་པོ་དེས་ཐིག་ལེ་བཞིའི་དྲི་མ་རྣམ་པ་བཞི་དང་བྲལ་བས་སྒྲིབ་བྲལ་དུ་བྱེད་དོ། །གསུམ་པ་ནི། ཕྲ་བའི་ཡེ་ཤེས་ཀྱི་སྐུ་རགས་པའི་དངོས་པོར་སྣང་བ་ཐམས་ཅད་ལ་འཇུག་ཚུལ་གྱི་དམིགས་པ་བསྒོམས་པས་སྐྱེ་བའི་མཐའ་མ་ལུས་པ་འཇུག་སྟེ། སྐྱེ་བ་སྤྲུལ་སྐུའི་ཚུལ་ཕྱོགས་བཅུ་དུས་གསུམ་གྱི་སྐྱེ་བའི་རྣམ་པ་མཐའ་ཡས་པས་སེམས་ཅན་གྱི་དོན་བྱེད་དོ། །བཞི་པ་ལ། རྐྱེན་གྱི་ཉེ་བར་མཚོན་པ་དང༌། གནས་ཚུལ་མངོན་དུ་གྱུར་པའི་ཚུལ་ལོ། །དང་པོ་ནི། ཇི་ལྟར་ཆུ་འཛིན་ནམ་མཁའ་ལས་བྱུང་ཞིང༌། ནམ་མཁའ་དེངས་ནས་རྣམ་པར་དག་པ་བཞིན་དུ། ནམ་མཁའི་དབུ་མའི་ལམ་དུ་རླུང་ཐིམ་པས་བདེ་བ་ཐོབ་པར་འགྱུར་ཏེ། ཀུན་རྟོག་གི་གཡོ་བ་ཐིམ་པའི་ཕྱིར་རོ། །གཉིས་པ་ནི། རྣམ་དཔྱད་གྱི་ཕྱོགས་ནས་གང་ཡང་འཆི་བ་སྟེ་འགྱུར་བ་མེད་པ་རྒྱ་མཚོ་ལྟར་གཉིས་སྣང་གིས་གཡོ་བ་མེད་པ་སྟེ་གསེར་གྱི་ངོ་བོ་གཡའ་ནམ་ཡང་མ་ཡིན་པ་བཞིན་དུ་སེམས་ཀྱི་ངོ་བོ་གཟུང་འཛིན་དུ་ནམ་ཡང་མེད་པའོ། །དངོས་པོ་རྟེན་འབྱུང་དང་དངོས་མེད་སྟོང་པ་ཉིད་དུ་འཛིན་པ་དང་རྣམ་པར་བྲལ་བ་སྟེ་དེ་གཉིས་ཀ་མ་དམིགས་པའི་ཕྱིར་གནས་ཚུལ་མངོན་སུམ་དུ་གྱུར་པའོ། །ཡོངས་སྤྱོད་ཀྱི་ཆ་ནས། རང་གི་ངོ་བོ་རིག་ཅིང་གསལ་བ་དང༌། ཕྱི་མའི་མཐའ་མེད་པའི་ཡེ་ཤེས་སྔོན་གྱི་ཐོག་མའི་མཐའ་མེད་པ། ཡེ་ཤེས་དེ་ཁོ་ན་ཉིད་སྤྲོས་བྲལ་རང་བཞིན་ཇི་ལྟ་བ་ཁོ་ན་ལས་སྒྲིབ་བྱེད་མེད་ཅིང་གཞན་གོང་ན་མེད་པའི་ཕྱིར་བླ་ན་མེད་པའི་སྲིད་ཞི་ཀུན་གྱི་གཞིར་གྱུར་པ། ངོ་བོ་ལུས་སེམས་འགྱུར་མེད་ཀྱི་བདེ་ཆེན་ལྷན་སྐྱེས་ཀྱི་དགའ་བའི་སེམས་རྟག་ཆད་གང་དུ་མ་ལྷུང་ཞིང་ཆད་པ་མེད་པ་སྟེ། ངོ་བོ་རྟག་ཆད་གང་ཡང་མ་ཡིན་པའི་ཟག་མེད་ཀྱི་སེམས་འདི་མངོན་སུམ་གྱིས་མཐོང་
བས། དང་པོའམ་གདོད་མའི་མགོན་པོའི་རིགས་སུ་གནས་པ་དེ་ཉིད་མངོན་དུ་གྱུར་པ་ཡིན་ནོ། །འདིར་སྨྲས་པ། རྒྱལ་པོའི་རིང་ལུགས་འཛིན་རྣམས་ཁེངས་པའི་གཏམ། །སྨྲ་བ་དེ་དག་བླུན་པོའི་ཡིད་ཆེས་གནས། །ཟབ་མོའི་དོན་ལ་རིག་དང་གྲོལ་ལྡན་པར། །སྤོབས་པ་ཆུ་བོ་ལྟ་བུ་འདི་ན་སུ། །གླུའི་རྒྱུད་གསུམ་པ་བཤད་ཟིན་ཏོ།། །།གླུའི་རྒྱུད་བཞི་པའི་སྟོད་ལ་ཤར་ཕྱོགས་པའི་ཞལ་ནས་སྔགས་ཀྱི་རྣལ་འབྱོར་དང༌། ཕྱག་རྒྱའི་རྣལ་འབྱོར་དང༌། བདེ་བའི་རྣལ་འབྱོར་དང༌། འབྲས་བུ་སྐུ་བཞིར་བསྡུས་ནས་གསུང་ལ། འདིར་རྗེ་བཙུན་རྡོ་རྗེ་འཆང་ལྷོ་ཕྱོགས་པའི་ཞལ་ནས་འདི་ལྟར་གསུང་སྟེ། ལམ་གྱི་གསང་བ་དང༌། འབྲས་བུའི་གསང་བ་གཉིས་ལས། དང་པོ་ལ་སྲོག་རྩོལ། འཛིན་པ། རྗཻས་དྲན། ཏིང་ངེ་འཛིན་བཞི་ལས། དང་པོ་ལ། སྔགས་ཀྱི་དེ་ཁོ་ན་ཉིད། དེའི་སྦྱོར་བ། སྦྱོར་བའི་བྱེད་ལས་ཏེ་གསུམ་ལས། དང་པོ་ལ་གཉིས་ཀྱི་དང་པོ་དེ་ཁོ་ན་ཉིད་མི་ཤེས་པའི་སྐྱོན་ནི། སྦྱོར་བ་གང་ལས་ཀྱང་སྔགས་ཀྱི་དེ་ཁོ་ན་མི་ཤེས་པའི་བྲམ་ཟེ་ལ་སོགས་པའི་ཨོཾ་ཞེས་གླུར་ལེན་པ་སྐད་གསང་མཐོན་པོས་མགྲིན་པ་བསྔལ་པར་བྱེད་ཅིང༌། མཁན་པོས་རྡེག་པ་དང༌། ངལ་ཤིང་ཐང་ཆད་པའི་བར་དུ་ཀློག་པའི་ངལ་བ་འདིས་ཅི་ཞིག་བྱ་སྟེ། དེ་ཁོ་ན་ཉིད་མི་ཤེས་པས་འབྲས་བུ་མཆོག་མི་ཐོབ་པའི་ཕྱིར་མཁས་པའོ་སྙམ་དུ་ཁེངས་ཀྱང་བོང་བུ་ལྟར་བླུན་ཅིང་སྐད་འབྱིན་པ་དེ་དག་གང་ན་འདུག །རིགས་བཟང་བ་གྲོལ་བའི་རྒྱུ་ནུས་པ་ཐོགས་མེད་དུ་སྨྲ་ན་དེའི་ཕྱིར་ཁྱེད་ཅག་རིགས་མཆོག་མ་ཡིན་པ་རིགས་ངན་ཏེ། མ་གྲོལ་ཞིང་མི་གྲོལ་བའི་ཕྱིར་ཏེ། གྲོལ་བའི་མཚན་མ་ཀུན་ནས་ཉོན་མི་མོངས་པ་ཡིན་ན་ཁྱེད་ཅག་གནས་མ་ཡིན་པར་ཉོན་མོངས་པའི་ཕྱིར་ཞེས་དངོས་འབྲས་མ་དམིགས་པའོ། །ཞེས་ཤར་ཕྱོགས་པའི་ལུགས་ཏེ། འོན་ཀྱང་བླ་མ་རྗེ་ནི་འདི་སྐད་གསུངས་ཏེ། རྒྱལ་བའི་རིགས་འཕེལ་བའམ་སད་པའི་ནུས་པ་དང་རྐྱེན་དམན་པའི་ཕྱིར་རིགས་ངན་ནོ་ཞེས་
གསུངས་སྟེ་འདི་ལེགས་སོ། །གཉིས་པ་དོན་དངོས་ནི། དེ་ཡང་སེམས་འགྲེལ་སོགས་སུ་འབྱུང་བ་གཡོན་དང་འཇུག་པ་གཡས་ལ་སྦྱར་བའི་སྐབས་མང་ཞིང་རླུང་ནང་དུ་མ་བསྡུས་པར་དབུ་མར་མི་འཇུག་ལ། དེ་ལ་ཟླས་པའི་མཐའ་གནས་པ་བྱས་ན་དེ་འགྲུབ་སླ་བ་ཡིན་པས་ཨོཾ་ཨཱཿཧཱུཾ་འབྱུང་འཇུག་གནས་གསུམ་ལ་རིམ་པས་སྦྱར་ཞིང༌། ཨོཾ་ཨཱ་ལི་གཡོན་གྱི་རྒྱུ་བ་དཀར་ཆ་ཟླ་བ་དང་ཨཱཿཚེག་དྲག་གི་ཆོས་ཀཱ་ལི་གཡས་ཀྱི་རྒྱུ་བ་དམར་ཆ་ཉི་མ་དང༌། ཧཱུཾ་མཉམ་རྒྱུ་སྒྲ་གཅན་ཐིག་ལེ་མུན་པའི་ཁམས་ཡིན་ཅིང༌། གཡོན་ཕྱིར་འབྱུང་རིམ་དང། གཡས་ནང་དུ་བསྡུད་རིམ་ཡིན་པ་དང་ཤིན་ཏུ་མཐུན་པ་ཡིན་ནོ། །སྤྱིར་རྫོགས་རིམ་རྣམས་གནས་ཚུལ་བཞིན་བསྒོམས་པ་ཡིན་པས། དང་པོར་གང་ནས་རྒྱུ་བ་དེ་དང་མཐུན་པར་རྣལ་འབྱོར་སྒོམ་པ་དེ་ཉིད་ཀྱི་གཞིའི་གློ་བུར་དྲི་མའི་བྱ་བྱེད་རྣམས་ཇེ་ཕྲར་སོང་ནས་མཐར་བཞིའི་ཆོས་བཟང་ཤོས་གཉུག་མའི་གཞི་དང་ལམ་མཇལ་ཏེ་ཡོན་ཏན་ཇེ་རྒྱས་ཀྱི་འབྲས་བུ་ཐོབ་པ་ཡིན་ལ། དེས་ན་རྡོར་ཟླས་རྩ་ལམ་སྦྱོང་བ་ཙམ་དུ་གོ་བ་དང༌། བུམ་ཅན་དང་པོར་སྒོམ་མི་བཏུབ་ཟེར་བ་དང། རྩ་མ་བསྒོམས་ན་རྡོར་ཟླས་རྐྱལ་སྟོང་བརྡབས་པ་ལྟར་འགྲོ་ཟེར་བ་སོགས་དོན་ཇི་བཞིན་མ་གོ་བའི་ཅལ་ཅོལ་དུ་སྣང་ངོ༌། །རྒྱུ་མཚན་ཞིབ་ཏུ་མ་སྤྲོས་ཀྱི་གཞན་དུ་བཤད་པར་བྱའོ། །དེས་ན་ཇི་སྐད་དུ། ཟླ་བ་ཉི་མ་ཨ་སོགས་ཀ་སོགས་རྣམས་ཀྱིས་རྣམ་གསུམ་བགྲོད་གནས་སྐུ་ཡི་རྡོ་རྗེ་སོགས་ཟླས་པ། །ཞེས་གསུངས་པ་ལྟར། འདིར་ཨཱ་ཨི་ཞེས་པ་གླུ་རྟ་ཡིན་ལ་ཨཱ་ཟླ་བ་གཡོན་ཨོཾ་དང་ཉི་མ་ཨཱཿགཡས་ཀྱི་རླུང་དང་དབུས་ཏེ་མཉམ་རྒྱུ་སྒྲ་གཅན་དང་ཐིག་ལེའི་ཆོས་ཧཱུཾ་སྟེ་སྔགས་ཀྱི་དེ་ཉིད་ནི་འདི་ཡིན་ནོ་ཞེས་ཧ་ཌི་བ་སྨྲ་བར་བྱེད་དོ། །གཉིས་པ་ནི། འདི་ལྟར་རླུང་དྷཱུ་ཏཱིར་འཇུག་གནས་ཐིམ་པའི་སྦྱོར་བ་འདི་ལ་
གཞན་སྤྲོས་པའི་སྔགས་ཟླས་པ་དང་ཆོ་གའི་སྦྱོར་བ་མེད་ཅིང་ལྡང་འཇུག་གནས་པ་གསུམ་ནི་གནས་པ་གཅིག་དུ་བྱ་བ་དང༌། རླུང་གི་རང་བཞིན་གནས་པ་སྟེ་སྟོང་པར་ཐིམ་པ་ཉིད་ལ་ཞོག་ཅེས་རྡོར་ཟླས་ཀྱི་ཐོག་མར་རླུང་གནས་པ་དང་མཐར་ཐིམ་པར་འགྱུར་རོ། །ལྡང་འཇུག་གནས་པ་གསུམ་པོ་འདི་འདྲ་བ་ནི་ཡི་གེ་གསུམ་གྱི་གསང་སྔགས་ཀྱི་གདངས་སུ་ཐོག་མ་ནས་གནས་པ་དང་མཐུན་པར་སྒོམ་པ་ཡིན་ནོ་ཞེས་རྡོར་ཟླས་ཀྱི་སྦྱོར་བ་དང་གསུམ་ལ། བྱེད་ལས་ནི་པདྨ་སྟེ་རྩ་འཁོར་བརྒྱད་པོའི་ལྟེ་པའི་མདུད་པ་ཕུག་ཅིང་གྲོལ་བར་བྱས་ལ། དབུ་མའི་ནང་གི་ལམ་དེ་ནས་འགྲོ་འོང་བྱས་ཤིང་ཕྱིན་པས་ལྟེ་བ་རྣམས་སུ་ཐིམ་ནས་འགྲོ་འོང་ཆད་པ་ངོ་མཚར་ཆེ་སྟེ་ཨཱ་ཧོ་ཧེ྅་ཞེས་བོས་སོ། །འོ་ན་དྷཱུ་ཏཱིར་ཇི་ལྟར་ཐིམ་པར་འགྱུར་ཞིང༌། ཡི་གེ་གསུམ་གྱི་གདངས་སུ་ཇི་ལྟར་འགྱུར་ཞེ་ན། འདི་ལ་བརྗོད་པར་བྱ་བ་ཆེས་མང་མོད་རྒྱས་པར་འདུས་པ་ལུགས་གཉིས་ལས་རྟོགས་པར་བྱ་ལ། མདོར་བསྡུ་ན་སྙིང་པོ་ནི། སྙིང་ཀའི་སྲོག་རླུང་ཨ་ཡིག་གདངས་ཅན་མགྲིན་པའི་གྱེན་རྒྱུ་ཨུའི་གདངས་ཅན་གྱི་གནས་སུ་ཕྱིན་པས་ཨོ་རུ་འགྱུར་ཏེ། ཨ་ཡི་ཡི་གེ་ཨུ་ཡི་ཡི་གེ་ལ་ཨོའོ་ཞེས་པ་ལྟར་རོ། དེ་སྤྱི་བོའི་ཐིག་ལེ་ཁྱབ་བྱེད་ཀྱི་རླུང་དང་འབྲེལ་བས་ཀླད་སྐོར་དུ་གྱུར་པས་ཨོཾ་སྟེ་ཕྱྀར་འགྲོ་བ་དང༌། སྙིང་ཀའི་ཨ་དང་ནང་དུ་འོང་དུས་གྱེན་དུ་རྒྱུ་ཡང་ཨའི་སྒྲར་སོང་སྟེ་མཚུངས་འདྲར་འགྱུར་ལ། དེ་ཐུར་སེལ་ཧ་སྲོག་མེད་དང་འབྲེལ་བས་རྣམ་བཅད་དུ་གྱུར་ནས་ཨཱཿའི་སྒྲར་འགྱུར་རོ། །གནས་པའི་ཚེ་ཐུར་སེལ་ཧ་སྲོག་མེད་དང༌། གྱེན་དུ་རྒྱུ་ཨཱུ་མི་ཤིགས་པའི་ཐིག་ལེ་ལ་རེག་པ་ན་ཧཱུཾ་དུ་འགྱུར་པ་སྟེ་གཞི་དུས་སུ་ཡོད་པ་ལྟར་སྒོམས་པས་དཔེར་ན་སྨྱུག་མའི་སྦུགས་འགགས་པ་ན། དེར་ཐུར་མ་རིང་པོ་འབྱུང་འཇུག་ཡང་ཡང་བྱས་ནས་སེལ་བ་ལྟར་ཟླས་པའི་འབྱུང་འཇུག་གིས་ཀྱང་མདུད་པ་འཇིག་པ་ཡིན་ནོ། །
ནང་གི་སྔགས་བཏུབ་འདི་ཞིབ་ཏུ་རྡོ་རྗེ་ཕྲེང་བར་ཤེས་པར་བྱའོ། །རྡོར་ཟླས་སྔགས་ཀྱི་དེ་ཉིད་འདི་བུམ་པ་ཅན་ལའང་དོན་གྱིས་ཚང་བ་ཡིན་ནོ། །གཉིས་པ་ནི། ཧེ྅ཛཱི་ཞེས་པ་ཀྱཻ་ལགས་ཤེས་བོས་ནས་མཐོ་རིས་སྲོག་དང་ས་འོག་ཐུར་སེལ་ཉི་མའི་རང་དང་ཟླ་བའི་རླུང་གི་ངོ་བོ་དྷཱུ་ཏཱིའི་ལྟེ་བའི་ནམ་མཁའི་དབུས་ཀྱི་ཐིག་ལེར་རླུང་རྣམས་དེངས་ཤིང་ཐིམ་པ་ན། འདི་འདྲ་བ་ལས་ཐོབ་པའི་བདེ་བ་དེ་ནི་གཞན་ཐ་མལ་གྱི་ལས་དང་བྱ་བ་ལ་ལྟ་ཅི་སྨོས། ཏིང་ངེ་འཛིན་གཞན་ལ་འདི་ཡོད་པ་མ་ཡིན་ནོ། རླུང་དང་སེམས་འགགས་པས་སྤྲོས་བྲལ་གྱི་ཡེ་ཤེས་ཤར་བ་ན་དེ་དང་མཉམ་དུ་རྨོངས་པ་སྟེ་གཏི་མུག་གི་རབ་རིབ་འགགས་པ་ཡིན་ལ་རླུང་དྷཱུ་ཏཱིར་ཐིམ་པའི་བདེ་སྟོང་སྒོམ་པ་འདི་མན་ངག་ཐམས་ཅད་ཀྱི་སྙིང་པོ་སྟེ་ངས་ནི་བསྟན་པ་ཡིན་ནོ། །ཇི་སྐད་དུ། ཐིག་ལེར་སྲོག་ནི་རབ་ཏུ་ཞུགས་ཤིང་གཉིས་ཀའི་བགྲོད་པ་བཅོམ་སྟེ་རྩེ་གཅིག་སེམས་དཔའ་འཛིན་པའོ། །ཞེས་གསུངས་ལ། སྲོག་ནི་སྤྱི་བོའི་ཧཾ་དང་འབྲེལ་བས་ཟླ་བ་དང༌། ཐུར་སེལ་གཏུམ་མོ་དང་འབྲེལ་བས་ཉི་མ་ཞེས་བརྟགས་ལ་དེ་འཁོར་ལོ་སོ་སོའི་ལྟེ་བའི་ཐིག་ལེ་དང་ཁྱད་པར་གཙོ་བོར་ལྟེ་བ་དང་སྙིང་ཁའི་མི་ཤིགས་པའི་ཐིག་ལེ་ལ་ཐིམ་པར་བྱེད་པ་ནི་འཛིན་པའོ། །གསུམ་པ་རྗེས་དྲན་ནི། སྲོག་ཐུར་གོང་བུ་གཅིག་ཏུ་སྔ་ནས་གྱུར་ཟིན་པ་བཟུང་བའི་སྐབས་ཁམས་ཕྲ་རགས་ཀྱི་རིམ་པས་རིམ་གྱིས་ཐིམ་པས་དེས་ཞུ་བདེ་ཆེན་པོ་སྐྱེས་ནས་དེ་ལས་ལངས་པའི་སྣང་བ་ལ་རྣམ་ཀུན་མཆོག་ལྡན་གྱི་སྟོང་པའི་སྐུའི་ཕྱག་རྒྱ་སྣང་བར་འགྱུར་བ་ཡིན་ཏེ་དུས་ཀྱི་འཁོར་ལོའི་རྒྱུད་དུའང༌། ས་ནི་ཆུ་ལ་རབ་ཏུ་འཇུག་ཅིང་ཆུ་ཡང་འབར་བྱེད་ལ་དེ་གཙང་བར་བྱེད་པ་རླུང་ལའོ། །རླུང་ནི་སྟོང་པ་ལ་སྟེ་སྟོང་པ་ངེས་པར་མཚན་མ་རྣམས་པ་བཅུ་རུ་འགྱུར་ཞིང་མཚན་མ་ནི། རྣམ་པ་ཐམས་ཅད་པ་རུ་འགྱུར་ཏེ་
མི་བཟད་མཆོག་གི་བདེ་བ་གཞོམ་དུ་མེད་པ་ཡེ་ཤེས་སྐུ། །ཡེ་ཤེས་ལས་ནི་རྫུ་འཕྲུལ་དངོས་གྲུབ་ཏུ་འགྱུར་མི་བདག་སྐྱེ་དགུ་རྣམས་ཀྱི་སྐྱེ་བ་འདི་ཉིད་ལའོ། །ཞེས་གསུངས་སོ། །དེ་བཞིན་དུ། གཏུམ་མོའི་སྣང་བར་གང་ཞིག་གྱུར་བ་ངེས་པར་ལུས་དང་ནམ་མཁའ་ལ་ཡང་རྗེས་སུ་དྲན་པར་འགྱུར། ཞེས་མདོར་ན་ལྟེ་བའི་གཏུམ་མོའི་སྣང་བ་ཕྱག་རྒྱ་ཆེན་མོ་དང་སྦྱོར་བའི་ཞུ་བདེ་འབྱུང་བའི་ཐབས་ལ་འབད་པ་ནི་རྣམ་ཀུན་མཆོག་ལྡན་གྱི་སྟོང་གཟུགས་དངོས་གྲུབ་པའི་སྦྱོར་བ་སྟེ་རྗེས་དྲན་གྱི་ངོ་བོ་འདི་ཁོ་ན་ཡིན་ལ། དེ་འདྲའི་ཕྱག་ཆེན་ཁོ་ནས་བདེ་བ་འཕེལ་མ་ནུས་ན་ཡེ་ཤེས་ཀྱི་ཕྱག་རྒྱ་དང༌། དེས་ཀྱང་མ་ནུས་ན་ལས་རྒྱ་བསྟེན་དགོས་པས། འདི་ལ་གསུམ། ལས་ཀྱི་ཕྱག་རྒྱའི་རྗེས་དྲན། ཡེ་ཤེས་ཀྱི་ཕྱག་རྒྱའི་རྗེས་དྲན། དམ་ཚིག་ཕྱག་རྒྱའི་རྗེས་དྲན། ལས་རྒྱའི་གསང་བ་དང༌། ཕྱག་ཆེན་གྱི་རྗེས་དྲན་ཏེ་ལྔ་ལས། དང་པོ་ནི། རྡོ་རྗེ་མཁའ་འགྲོ་ལས། རྩུབ་ཅེས་བྱ་བ་ནི་བ་ལང་གི་ལྕེ་ལྟར་རྩུབ་པའོ། །འཇམ་པ་ནི་པདྨ་ཅན་ཞེས་བྱ་བའོ། །འཁྲང་བ་ནི་ཁུ་བ་སྲ་བ་སྟེ་གང་གི་ཁུ་བ་འཐས་པར་གྱུར་པའོ། འཛེར་པ་ཅན་ནི་དུང་ཅན་མ་སྟེ་པདྨ་ལ་ཤ་མཛེར་ཡོད་པའོ། །བུད་མེད་འདི་དག་ནི་བཅུད་འཆིང་བ་ལ་དབང་བར་གྱུར་པ་ཡིན་ནོ། །ཞེས་གསུངས་པ་ལྟར། རྩུབ་པ་སྟེ་གླང་པོ་ཅན་མ་དང༌། འཇམ་པ་པད་མ་ཅན་དང༌། སྲ་བ་རི་མོ་ཅན་དང༌། འཛེར་བ་ཅན་ནི་དུང་ཅན་མ་དེ་པད་མ་སྟེ་སྐྱེ་གནས་ཀྱི་རྩ་མཆོག་དང་ལྡན་པའི་རིགས་བཞི་པོ་དང༌། གདོལ་བ་མོ་སོགས་རིགས་ལྔ་དང༌། གླང་ཆེན་མ་ལོ་བཅུ་གཉིས་ལོན་པ་རྡོ་རྗེའི་རིགས་ཀྱི་ཕྱག་རྒྱ་དང༌། དེས་མཚོན་ནས་རི་མོ་ཅན་མ་ལོ་ཉེར་ལྔ་ལ་སོགས་རིན་པོ་ཆེའི་རིགས་སོགས་ཀྱང་བཟུང་ངོ༌། །སྐྱེ་གནས་སྲ་ཞིང་སྐྲ་དང་ཡན་ལག་ཐུང་བ་མྱུར་བ་དང༌། ཡང་ན་སྐྱེ་གནས་སྙི་ཤིང་སྐྲ་དང་ཡན་ལག་རིང་བ་བརྟན་པའི་བདེ་བའི་
དོན་དུ་བསྟེན་པ་དང༌། མ་དང་སྲིང་མོ་སོགས་རིག་མ་བཞིའམ་བརྒྱད་ཀྱང་བསྟེན་ཏེ་འདི་རྣམས་ལས་རྒྱའི་སྐབས་སུ་དབང་བསྐུར་བའི་མ་དང་སྤུན་སོགས་བཟུང་བ་ཡིན་ནོ། །དེ་ལྟར་ལས་ཀྱི་ཕྱག་རྒྱ་དེ་རྣམས་ལ་སྦྱོར་ཐབས་དྲུག་ཅུ་རྩ་བཞི་ལ་སོགས་པ་རྣམ་པ་མང་པོའི་སྦྱོར་བས་སྤྱོད་ཅིང་བྷ་གའི་ཁྱིམ་དུ་རྡོ་རྗེ་ནོར་བུའི་ཐིག་ལེ་འཛག་མེད་དུ་བཀག་ཅིང་ལྷན་ཅིག་སྐྱེས་པའི་བདེ་བ་སྒོམ་པར་བྱ་སྟེ་སླར་ཡང་སྤྱི་བོའི་བར་དུ་ཆ་བཅུ་དྲུག་ཡོངས་སུ་རྫོགས་པར་བྱ་སྟེ། སྔར་སྲོག་མི་ཤིགས་པའི་ཐིག་ལེར་ཐིམ་ཟིན་པ་ཕྱག་ཆེན་མངོན་དུ་མ་གྱུར་པ་ལ་འདིས་མངོན་དུ་འགྱུར་ཞིང༌། འཛིན་པས་དྲངས་པའི་རྗེས་དྲན་ཐོབ་ཀྱང་དེས་བདེ་ཆེན་འདྲེན་མི་ནུས་པ་ལ་ཡང་འདིས་བདེ་བའི་དཀྱིལ་འཁོར་དུ་སྟོང་གཟུགས་ཀྱི་ལྷ་མོ་འགྲུབ་ཅིང་གཞན་ཡང་དེས་དཀྱིལ་འཁོར་དཔག་ཏུ་མེད་པ་བ་སྤུའི་བུ་ག་སོགས་ལུས་ཀྱི་རྩའི་གནས་ཐམས་ཅད་ནས་རབ་ཏུ་འཕྲོ་བའི་ཕྱག་ཆེན་གྱི་རྗེས་དྲན་འཐོབ་པར་འགྱུར་རོ། །གཉིས་པ་ནི་ཡང་ན་ཡིད་ཀྱི་བསྒོམས་པའི་བུ་མོ་ཡེ་ཤེས་ཀྱི་ཕྱག་རྒྱ་ལ་ཡང་ཀ་ར་ཎའི་སྦྱོར་བ་དྲུག་བཅུ་རྩ་བཞི་ལ་སོགས་པ་དངོས་དང་བསྒོམས་པའི་ཁྱད་པར་མ་གཏོགས་ལས་ཀྱི་ཕྱག་རྒྱ་ཇི་ལྟ་བ་བཞིན་དུ་བྱས་པས་ཀྱང་ཕྱག་ཆེན་གྱི་རྗེས་དྲན་ཐོབ་པར་འགྱུར་རོ། །གསུམ་པ་ནི། ཡང་ན་ལྟེ་བའི་དབྱུག་པ་མ་ལ་སྤྱོད་དེ་འབར་འཛག་གི་གཏུམ་མོ་བསྒོམས་པས་ཀྱང་ཕྱག་ཆེན་འདྲེན་པའི་བདེ་བ་རྒྱས་པར་འགྱུར་རོ། བཞི་པ་ནི། རྡོ་རྗེ་དབྱིངས་ཀྱི་དབང་ཕྱུག་མའི་རྩའི་རླུང་གིས་འཁོར་ལོའི་ལྟེ་བའི་ཐིག་ལེ་རྣམས་ཞུ་ཞིང་ནོར་བུར་སོན་པའི་ཚེ་སླར་ཡང་ཤེས་རབ་ཀྱི་རྩའི་རླུང་གི་གཏུམ་མོ་འབར་ཏེ་དབུ་མའི་ལམ་ནས་གྱེན་དུ་ཟློག་པར་བྱེད་ལ། ལྷན་སྐྱེས་རྣམ་པ་གཉིས་ཀྱི་སྦྱོར་བ་ལ་སྐྱེ་བོ་ཀུན་གནས་ཤིང༌། རྟག་ཏུ་བརྩོམ་པར་བྱེད་ལ་གཞན་དག་ལ་སྟོན་པར་ཡང་བྱེད་མོད་ཀྱི།
འོན་ཀྱང་བླ་མ་དམ་པའི་མན་ངག་གི་འདོམས་པ་མེད་པའི་ཕྱིར་སུས་ཀྱང་མ་གོ་བ་ནི་ཀྱེ་མ་ཕྱུགས་ལྟར་བླུན་པའོ་ཞེས་པའོ། །ལྔ་པ་ནི། རང་གི་ལུས་ལས་བྱུང་ཞིང་ནམ་མཁའ་དང་མཉམ་པ་དྲི་མ་མེད་པའི་གློག་གི་མེ་ལྕེ་དང་མཚུངས་པའི་ཕྱག་རྒྱ་ཆེན་པོ་སྟོང་གཟུགས་ཀྱི་རང་བཞིན་མི་འགྱུར་བའི་བདེ་བ་སྦྱིན་པ་ཆུང་མ་དམ་པ་འདི་ལྟ་བུ་རྙེད་ནས། གཞན་སུ་ལ་ཡང་མ་བསྟན་ཞིག་སྟེ། དེ་སྐད་དུ་ཡང་བླ་མས་བསྟན་པར་བྱ་བའང༌། སློབ་མའི་གོ་བྱ་མ་ཡིན་ཏེ། ལྷན་ཅིག་སྐྱེས་པ་བདུད་རྩིའི་རོ།།སུ་ལ་སུ་ཞིག་གིས་ནི་བརྗོད། །ཞེས་པ་ལྟར། ཕྱག་རྒྱ་ཆེན་མོ་དེ་ཡང༌། ངག་གི་ལམ་ལས་འདས་པར་སྟོན་ནོ། །དེ་ལྟར་ཕྱག་རྒྱ་དེ་ནི། ཇི་སྐད་དུ། ཕྱག་རྒྱ་སྒྱུ་མའི་རྗེས་སུ་མཐུན་པ་ཡིད་དང་ནམ་མཁའ་ལ་ནི་མེ་ལོང་དག་ལ་གཟུགས་བཞིན་ཏེ། །འཇིག་རྟེན་གསུམ་པོ་སྣང་བར་བྱེད་ཅིང་དྲི་མེད་གློག་དང་མཚུངས་པའི་འོད་ཟེར་དུ་མ་འཕྲོ་བར་བྱེད། །ཕྱི་དང་ལུས་ནི་དབྱེར་མེད་ཡུལ་དང་རྣམ་པར་བྲལ་བའི་སྣང་བ་ཙམ་ནི་མཁའ་ལ་གནས་པ་ཡི། །སེམས་དང་སེམས་དག་གིས་ནི་བདག་གི་འཁྱུད་དེ་འགྲོ་བ་དུ་མའི་གཟུགས་ཅན་དེ་ནི་གཅིག་པུའོ། །ཞེས་པའི་དོན་གྱི་སྙིང་པོ་གསལ་བར་བརྗོད་ན། གཟུགས་ཀུན་ཉེར་ལེན་ཤིན་དུ་ཕྲ་བའི་རླུང༌། སྤྲོ་བྱེད་ནུས་པའི་ངོ་བོ་ཞེས་བྱ་བ། གཏུམ་མོའི་སྣང་བ་བཞིན་ལག་གི་རྣམ་པ་ཅན་དུ་གདོད་མ་ནས་བཞུགས་པའི་རྐྱེན་གྱི་སར་དུ་འདུས་བྱས་ལ། རླུང་ཐིམ་པ་སོགས་ཀྱི་མངོན་དུ་གྱུར་པ་དེ་ཉིད་བདེ་ཆེན་དུ་ཤར་པ་སྟེ་སེམས་ཀྱི་རང་སྣང་ཡིན་གྱི། ལས་སྣང་གི་དབང་ཡུལ་ལྟར་གྲུབ་པ་མེད་ཅིང་ཡེ་ཤེས་ཀྱི་རང་བཞིན་རླུང་འོད་ཟེར་ལྔ་པས་བེམ་ཆོས་མཐའ་དག་སྲེག་པ་སྲིད་གསུམ་ཅིག་ཆར་སྣང་བར་བྱེད་ནུས་ལ། ངོ་བོ་དངོས་པོ་ཀུན་ལ་ཆ་མེད་དུ་འགྲོ་བས་ཁྱབ་ཀྱང་རྣལ་འབྱོར་པའི་སྣང་བ་ལ་ལྟེ་བའི་དྷཱུ་ཏཱིར་ལྷ་སྐུ་ཡབ་
ཡུམ་དུ་ཤར་ནས་མི་འགྱུར་བའི་བདེ་བ་གཏེར་བ་ཤེས་རབ་ཀྱི་ཕ་རོལ་ཏུ་ཕྱིན་པའོ། །ཕྱག་རྒྱ་དེ་ཐོབ་ནས་ཕྱི་རོལ་གྱི་ཕྱག་རྒྱ་སོགས་སྤྲོས་པ་སྤང་བ་ནི་ཕྱག་ཆེན་གྱི་བདེ་ཆེན་རྒྱུན་ཆད་མེད་པར་འདྲེན་ནུས་ན། རྣམ་རྟོག་གི་བསྒོམ་པའི་ཡེ་རྒྱ་དང་མི་མོའི་ལས་རྒྱས་ཁྱོད་ལ་ཅི་ཞིག་བྱ། དེ་ལྟར་ཡང༌། སྙིང་ནི་སྙོག་པ་དང་བཅས་ལས་ཀྱི་ཕྱག་རྒྱ་འདི་དང་བཏགས་པའི་ཡེ་ཤེས་ཕྱག་རྒྱ་བཏང་བྱས་ནས། །ཡང་དག་རྫོགས་པའི་བྱང་ཆུབ་སླད་དུ་རྒྱལ་བ་མཆོག་གི་བསྐྱེད་མ་མཆོག་གི་ཕྱག་རྒྱ་གོས་པ་མེད། །རྣམ་པར་འགྱུར་བ་མེད་ཅིང་མཁའ་མཉམ་མུན་བཅོམ་ཁྱབ་བྱེད་རྣལ་འབྱོར་དག་གི་བགྲོད་བྱ་ཐེར་ཇུག་གནས། །ཡེ་ཤེས་གཟི་བརྗིད་སྲིད་པའི་དྲི་མ་འཕྲོག་བྱེད་དུས་ཀྱི་འཁོར་ལོ་རྗེས་སུ་རིག་པ་བསྒོམ་པར་བྱ། །ཞེས་གསུངས་སོ། དེ་ལྟར་ན། ལས་རྒྱ་ལ་བསྟེན་པས་བྱང་ཆུབ་ཀྱི་སེམས་དབུ་མའི་ནང་གི་འཁོར་ལོ་སོ་སོར་འཇོག་པས་ལས་རྒྱ་འཛག་པའི་བདེ་བ་སྦྱིན་པ་དང་ཡེ་རྒྱ་དང་སྦྱར་བ་ལས་འཁོར་ལོ་སོ་སོའི་ལྟེ་བ་ནས་གཞན་དུ་མི་འཕོ་ཡང་དེ་ཉིད་དུ་གཡོ་ཞིང་གནས་པའི་ཕྱིར་གཡོ་བའི་བདེ་བ་སྦྱིན་པ་དང་ཕྱག་ཆེན་གྱིས་རང་གནས་སུ་མི་གཡོ་བར་བྱེད་པས་ན་མི་འགྱུར་བའི་བདེ་བ་སྦྱིན་པར་བཞག་ལ། ཕྱག་རྒྱ་གོང་མ་གཉིས་བརྟེན་པ་ཡང་སྟོང་གཟུགས་ཕྱག་ཆེན་སྒྲུབ་པ་ཁོ་ནའི་ཆེད་ཡིན་ཏེ། སེམས་འགྱུར་མེད་ཐོབ་པ་ལ་བརྟེན་ཐིག་ལེ་འགྱུར་མེད་ཐོབ་དགོས་པའི་ཕྱིར་རོ། །དབང་མདོར་བསྟན་ལས་ཀྱང༌། ཁུ་བ་མི་འགྱུར་རང་བཞིན་གྱིས། །མཆོག་ཏུ་མི་འགྱུར་སྒྲུབ་པར་བྱ། །བརྟེན་ནི་འཕོ་བ་ཐོབ་པ་ན། །བརྟེན་པའི་འདོད་ཆགས་བྲལ་བ་ཉིད། །ཅེས་གསུངས་སོ། །བཞི་པ་ནི། ཏིང་ངེ་འཛིན་གྱི་ཡན་ལག་གི་ངོ་བོ་མི་འགྱུར་བའི་བདེ་བ་ཡིན་ནོ་ཞེས་སྟོན་པ། ལུས་ཀྱི་རེག་པའི་བདེ་བ་ནི་འགྱུར་བའི་
སྡུག་བསྔལ་གཅིག་པུ་ཡིན་པས། སེམས་རང་བཞིན་ལྷན་སྐྱེས་ཀྱི་བདེ་བ་ཁོ་ན་ནི་དོན་དམ་པའི་བདེ་བ་ཡིན་ནོ་ཞེས། རང་བཞིན་སྔོན་དུ་མ་བྱས་གོང་གི་བདེ་ནི་དོན་དམ་ཡིན་པ་བཀག ལུས་ཀྱི་སེམས་ཀྱི་རང་སྣང་ཡིན་པའི་ཕྱིར་སེམས་ལས་གཞན་ན་ལུས་མེད་པས་ལུས་སེམས་མཉམ་པ་ཉིད་དུ་ཤེས་པའི་འཕགས་ལམ་ན་ལུས་ཀྱི་བདེ་བར་སྣང་ཡང་རང་བཞིན་གྱི་བདེ་བ་དང་རོ་གཅིག་ཏུ་འཇུག་པའི་ཕྱིར་དྲི་མེད་དེ་ཟག་མེད་ཡིན་ནོ། །དེས་ན། འགྱུར་མེད། བདེ་བའི་བརྟེན་ཁུ་བ་རྡོས་བཅས་རིམ་པར་བརྩེགས་པར་འདོད་པ་དང༌། ལོངས་སྤྱོད་རྫོགས་སྐུ་བེམ་ཆོས་ཕྲ་མོའི་རླུང་ལས་གྲུབ་པར་འདོད་པ་ནི་མེ་ལོང་ཡེ་ཤེས་ཀྱི་ངོས་འཛིན་རྗེ་བཙུན་གྱི་ལོངས་སྤྱོད་རྫོགས་པའི་སངས་རྒྱས་ཉིད། ཅེས་གསུངས་པ་ལ། སེམས་ཙམ་པའི་ལུགས་སོ་ཞེས་འདོར་ན་ཡང༌། དབང་མདོར་བསྟན་དུ། རྟེན་དང་བརྟེན་པ་ལེགས་རྫོགས་པས། །ཇི་སྲིད་འགྱུར་མེད་ཉིད་དུ་འགྲོ། །སེམས་ནི་འགྱུར་མེད་ཉིད་ཐོབ་ན། །རྟེན་དང་བརྟེན་པའི་མཚན་ཉིད་མེད། །ཅེས་སངས་རྒྱས་ལ་ལུས་སེམས་ཐ་དད་མེད་པར་བཤད་པ་དང་འགལ་ཞིང༌། བེམ་ཆོས་ཕྲ་མོའི་སྐུ་དེ་ཡེ་ཤེས་དང་ངོ་བོ་གཅིག་ཅེས་སྨྲས་པས་བེམ་ཤེས་གཞི་མཐུན་པ་ཁས་བླངས་པ་སོགས་འཁྲུལ་པ་དཔག་ཏུ་མེད་པ་བྱུང་བ་ཡིན་ཏེ་གཞན་དུ་རྒྱ་ཆེར་བརྟག་པར་བྱའོ། །ནོར་བ་འདི་འབྱུང་བའི་རྩ་བ་ནི་སྣང་བ་སེམས་སུ་བཤད་པ་བློར་མ་ཆུད་ཅིང༌། ཕྱི་དོན་ཚད་གྲུབ་ཏུ་ཞེན་པ་ལས་བྱུང་ངོ༌། །གཉིས་པ་ལ། བདེ་བས་སྟོང་པ་རྟོགས་ཚུལ་དང༌། བདེ་སྟོང་གཉིས་ཀྱི་མཐའ་གཉིས་སེལ་ཚུལ། དེས་འབྲས་བུ་ལ་སྦྱོར་ཚུལ། འབྲས་བུ་སྐུའི་འགྲུབ་ཚུལ་ཏེ་བཞི་ལས། དང་པོ་ནི། གང་གི་བློ་སྟེ་སེམས་ཀྱི་རྒྱུད་བདེ་བ་དམ་པར་གནས་པ་ནི་ཤིན་དུ་ཕྲ་བ་ཡིན་ལ་སྤྲོས་པ་ཐམས་ཅད་བྲལ་བའི་སྟོང་པ་ཉིད་ཀྱང་
ཤིན་ཏུ་ཕྲ་བ་ཡིན་ཏེ། ཤིན་དུ་ཕྲ་བ་དེ་དག་ཡུལ་ཡུལ་ཅན་གྱི་ཐ་སྙད་དུ་འགྱུར་པ་ཡིན་པས། སེམས་བདེ་གསལ་མི་རྟོག་པས་ནམ་མཁའ་ལྟར་ཕྲ་བའི་སྟོང་པ་ཉིད་ལ་གཏད་ཅིང་བསྒོམས་ན། སྤྲོས་བྲལ་གྱི་དབྱིངས་ཡིད་ཀྱི་རྟོགས་པར་འགྱུར་རོ། །དེ་ལ་ལོག་རྟོག་དགག་པ་ནི། དངོས་པོ་དང༌། རང་བཞིན་གྱི་གྲུབ་པའི་དངོས་པོར་མེད་པར་རྣམ་པར་དཔྱད་ཅིང་བསྒོམས་པས་ནི་བདེ་བ་ཆེན་པོ་མི་གཏེར་ཏེ། ཤེས་རབ་ངན་པ་རྗེས་དཔག་དེ་ཁོ་ན་ལ་ཇི་ཙམ་འབད་ཀྱང་ལམ་གྱི་རྟགས་དུ་བ་ཙམ་ཡང་མི་མཐོང་ན་དག་པའི་དཀྱིལ་འཁོར་ཕྱག་ཆེན་མཐོང་བ་མེད་པར་ལྟ་ཅི་སྨོས། ནམ་མཁའ་ལག་པས་འཛིན་ནོ་ཞེས་པ་ལྟར་ཤིན་ཏུ་ཕྲ་བའི་སྤྲོས་བྲལ་གྱི་དབྱིངས་རྗེས་དཔག་གི་རྟོག་པ་རགས་པས་རྟོགས་ཤིང་འཛིན་པར་བྱེད་དོ་ཞེས་རྟོག་གེ་བ་རྣམས་སྨྲ་བ་དེ་ནི་མི་འཐད་དེ། ཡུལ་ཕྲ་མོ་ཡུལ་ཅན་རགས་པས་འཛིན་མི་ནུས་པའི་ཕྱིར་རོ། །དེ་བས་ན་གྲུབ་པའི་དོན་ནི་ཤེས་པ་རྣམ་པ་གསུམ་པོ་སྔ་མ་སྔ་མ་ལས་ཕྱི་མ་བཟང་ཞིང་རྣོ་བ་དང་ཁྱད་པར་དུ་ཟབ་མོའི་དབྱིངས་ལ་ཅུང་ཟད་ཀྱང་བསམ་དུ་མེད་ཅིང་མི་དམིགས་པར་བསྒོམས་པས་ཏིང་ངེ་འཛིན་གྱི་སྤྱོད་ཡུལ་གྱི་གཟུགས་ཁྱད་པར་ཅན་མྱུར་དུ་མཐོང་ཞིང་མཐོང་མ་ཐག་ཏུ་འོད་གསལ་གྱི་སེམས་རྗེས་མཐུན་ཐོབ་པ་ཡིན་པས་ན། དང་པོའི་ལས་ཅན་གྱིས་ཀྱང་འོད་གསལ་གྱི་དཀྱིལ་འཁོར་དུ་བ་སོགས་མཐོང་ཞིང་ཡེ་ཤེས་མེ་ལྟ་བུ་སྐྱེ་བའི་སྔ་རྟགས་སྟོང་གཟུགས་དུ་བ་ལྟ་བུ་མཐོང་བའི་ཕྱི་རོལ་གྱི་དོན་སོགས་ལ་བདེན་པར་ཞེན་པའི་རབ་རིབ་ཞི་བར་འགྱུར་རོ་ཀྱཻ་ཞེས་བོས་སོ། །དེས་ན་སྒཽམ་བྱུང་གི་ཚེ་ཡང་འཕགས་ལམ་རྒྱུད་ལ་མ་སྐྱེས་ཀྱི་བར་དུ་རྗེས་དཔག་ཁོ་ན་དགོས་ན། འཕགས་པའི་མི་རྟོག་ཡེ་ཤེས་ལ་མི་རྟོག་པའི་ཉེར་ལེན་མེད་པར་འགྱུར་བ་དང༌། ལས་དང་པོ་
པས་ཀྱང་བསམ་མེད་སྒོམ་ཚུལ་དྲི་མེད་འོད་དུ། དང་པོར་སྟོང་ཉིད་བྱང་ཆུབ་ནི། མུན་པ་ལ་ཅུང་ཟད་ཀྱང་བསམ་པར་མི་བྱའོ། །ཞེས་གསུངས་ཤིང༌། གཞན་དུའང༌། རྟོག་པ་ཉམས་པས་བློ་ཉམས་ཤེས། །བློ་ངན་རྗེས་སུ་རྟོག་བྱེད་ལོ། །དེ་ཉིད་ལས་ནི་བློ་བཟང་པོ། །ནམ་མཁའ་ལས་ལྷག་ཅི་ཡང་འབྱུང༌། །ཞེས་རྣམ་རྟོག་ཉམས་པས་བློ་སྟེ་ཤེས་རབ་ཀྱང་ཉམས་ནས་རྨོངས་པར་འགྱུར་བས་རྟག་ཏུ་རྗེས་སུ་བརྟག་པར་བྱའོ་ཞེས་བློ་ངན་དག་ཟེར་རོ་ཞེས་འདི་ལ་དམིགས་ཀྱིས་བཀར་བའོ། །གཞན་ཡང་རྨོངས་པ་ནམ་མཁའི་ཚད་མ་ནི། །གལ་ཏེ་ཤེས་ན་རྨོངས་ཚོགས་གཅོད། །དང་པོར་མཉམ་བཞག་ནམ་མཁའ་ལ། །ལྟས་ཤིང་ལྟས་ཤིང་མཐོང་བ་འགག །ཅེས་པ་དང་སེམས་ཀྱི་རྩ་བ་དབྱུང་བྱས་ཏེ། །སྟོང་པ་ཉིད་ལ་གོམས་བྱེད་པ། །མ་རིག་རབ་རིབ་ཀྱིས་ལྡོངས་ལ། །མིག་སྨན་འདི་ལས་གཞན་ཅི་ཡོད། །ཅེས་དང༌། གཞག་པར་བྱ་བ་ཅུང་ཟད་མེད། །ཅེས་སོགས་ཀྱང༌། འདིའི་དོན་ཡིན་ཏེ། འདིར་རིགས་པས་དཔྱད་པའི་སྟོང་ཉིད་དང༌། ཧར་སྒོམ་གཉིས་ཀའང་ལུང་རིགས་ཚད་མས་གྲུབ་པའི་ཕྱིར། གཅིག་བློ་ལ་འཛེམ་པ་ན། ཅིག་ཤོས་ལ་དགྲ་ལྟར་ལྟ་བར་མི་བྱའོ། །འོ་ན་བརྒྱལ་བ་དང་གཉིད་འཐུག་པོས་ཀྱང་གྲོལ་པར་འགྱུར་རོ་ཞེ་ན། མ་ཡིན་ཏེ་དེ་དག་ནི་ཡིད་བྱེད་བཀག་ཙམ་གྱི་ཧར་སྒོམ་ཡིན་ན་ཐལ་བར་འགྱུར་གྱི། འདི་ནི་སེམས་ཀྱི་གསལ་རིག་གི་ཆ་ལ་བརྟེན་ནས་མི་དམིགས་པར་འཇུག་པས་སོ། །དེ་ལྟར་ན་ཡང་འདོད་སེམས་རྩེ་གཅིག་པའི་བདེ་གསལ་མི་རྟོགས་པ་དང༌། བསམ་གཏན་གྱི་ས་བའི་ཞི་གནས་ཐམས་ཅད་ཀྱང་དེ་ཁོ་ན་ཉིད་སྒོམ་པར་ཐལ་བར་འགྱུར་རོ་སྙམ་ན། བདེན་མོད་ཀྱི་འོན་ཀྱང༌། རྣལ་འབྱོར་ལ་གོམས་པ་རྣམས་ལ་ནི་དོགས་པ་དེ་མི་འབྱུང་སྟེ། འདིར་ནི་གང་སྣང་ཐམས་ཅད་ལ་ཆེར་གྱིས་བརྟགས་པའི་ཚེ་དམིགས་གཏད་ཀྱི་ཡུལ་རང་སར་ཞིག་པའི་བརྗོད་
བྲལ་ལ་དམིགས་སུ་མེད་པར་སྒོམ་པ་ཡིན་ལ། དེ་དག་ལ་ནི་སེམས་གསལ་ཙམ་ལ་དམིགས་ནས་འཇོག་པ་ཙམ་ཡོད་ཀྱི་ཚུལ་འདི་ནི་མེད་པས་ཁྱད་ཆེ་ལ། གལ་ཏེ་མི་རྟོག་པས་ཆོག་ན་རིག་པས་དཔྱོད་པ་དཀའ་ལ་དོན་ཆུང་ཞིང༌། དེ་དགོས་ན་ཐོག་མ་ནས་ཧར་སྒོམ་བྱེད་པ་འཁྲུལ་སྙམ་ན། འདི་གཉིས་གནོད་བྱ་གནོད་བྱེད་ཡིན་ན་བདེན་མོད་ཀྱི། དེ་གཉིས་འགལ་བ་མ་ཡིན་པས་ཕྱིར་རིགས་པས་དཔྱད་པའི་སྟོང་ཉིད་ཀྱི་སྒྲུབ་བྱེད་རྣམས། ཧར་སྒོམ་འགོག་བྱེད་དོ་སྙམ་པ་འདི་རང་བློ་དམན་པའོ། །དེ་བཞིན་དུ་དེ་གཉིས་སྟོང་ཉིད་སྒོམ་པ་ལ་ཕུང་གསུམ་སེལ་བའི་འགལ་བ་ཡིན་ན་དེ་ཡང་རིགས་པ་ལྟར་སྣང་མོད། སྟོང་ཉིད་ལ་འཇུག་པ་ལ་རྟོག་པ་དང་མི་རྟོག་པ་ཕུང་གསུམ་སེལ་བ་ཡིན་ཡང༌། རིག་པའི་དཔྱད་སྒོམ་དང༌། བརྗོད་བྲལ་གྱི་ཧར་སྒོམ་གཉིས་ཀ་མ་ཡིན་པ་སྟོང་ཉིད་ལ་དམིགས་པའི་ཕུང་གསུམ་མང་དུ་ཡོང་བ་ཡིན་ནོ། །སྤྲོས་པས་ཆོག་གོ །གཉིས་པ་ནི། ཨཱ་རེ་ཞེས་ངོ་མཚར་བའི་ཚིག་སྟེ་གང་ལ་ན་བདེ་བ་ཆེན་པོས་སྡུག་བསྔལ་ཏེ་མ་དག་པའི་ལས་སྣང་མཐའ་དག་ལས་སྐྱོབ་ཅིང་སྡུག་བསྔལ་འགོག་པ་སྟེ་འདི་སྙིང་རྗེའི་རང་བཞིན་ཡིན་ལ། སྙིང་རྗེ་ཡང་ཇི་སྐད་དུ། སྡུག་བསྔལ་ཅན་རྣམས་ཡོངས་སྐྱོབ་པ། །ཐུགས་རྗེ་ཆེན་པོའོ། ཞེས་པ་ལྟར་རོ། གཞན་ཡང༌། བདེ་བ་ཆེན་པོས་དངོས་པོ་ཀུན་ལ་རྒྱས་བཏབ་པའི་ཚེ་ཞིང་སྦྱོང་བ་དང་སེམས་ཅན་སྨིན་པའི་རྟེན་འབྲེལ་ཁྱད་པར་ཅན་དུ་འགྱུར་རོ། །གཉིས་སུ་སྣང་བ་ནུབ་པར་འགྱུར་བ་ནི་དགེ་བའི་མགོན་པོས་ཀྱང༌། །གང་ཚེ་སྐྱེས་པའི་བདེ་བ་ཆེ་གོམས་པ། །བདེ་ལས་གཞན་པའི་དངོས་པོ་མཐོང་མེད་ཅིང༌། །སྣ་ཚོགས་སྣང་བའི་དངོས་ནི་མ་ལུས་པ། །རང་བཞིན་བདེ་བ་ཆེན་པོ་འཆར་བར་འགྱུར། །དེ་ཚེ་མིག་སོགས་དབང་པོའི་ཡུལ་སྣང་བའི། །
གཟུགས་ལ་སོགས་པའི་དངོས་འདི་མ་ལུས་པ། །སྒྱུ་མ་སྨིག་སྒྱུ་དྲི་ཟའི་གྲོང་ཁྱེར་དང༌། །བར་མའི་སྲིད་དང་ཆུའི་ཟླ་བ་དང༌། །སྣང་བརྙན་སེང་གེ་ཟླ་བའི་གྲོང་བཞིན་དུ། །མ་ལུས་རང་བཞིན་གཅིག་པ་སྣང་བར་འགྱུར། །ཞེས་པ་ལྟར། བདེ་སྟོང་སྤྲོས་བྲལ་གྱིས་མ་དག་པའི་ལས་སྣང་འགགས་ནས་བདེ་ཆེན་གཅིག་པུར་སྣང་བ་ཡིན་ནོ། །རྣམ་པ་ཐམས་ཅད་པའི་སྟོང་ཉིད་ཀྱི་གསལ་སྟོང་གཟུགས་ཀྱི་དཀྱིལ་འཁོར་མཐའ་ཡས་པས་ནི་ཞི་བའི་མཐར་མི་ལྟུང་ཞིང་མཐའ་དེ་ལས་བརྒལ་བར་འགྱུར་ཏེ་དེ་ནི་གཟུགས་སྐུའི་རྒྱུ་དངོས་ཡིན་ལ་གཟུགས་སྐུས་འཁོར་བ་ཇི་སྲིད་པར་འགྲོ་བའི་དོན་མཛད་པའི་ཕྱིར་རོ། །དངོས་བསྟན་འདིར་མ་ཟད་སྟོང་གཟུགས་ཀྱིས་ཀྱང་འཁོར་བའི་བེམ་ཆོས་ཟློག་པ་དང༌། བདེ་སྟོང་འགྱུར་མེད་ཀྱིས་ཀྱང་རང་གཞན་གྱི་སྡུག་བསྔལ་ཐམས་ཅད་མི་བཟློག་པར་རང་འཁོར་བ་ལས་ཐར་ཙམ་གྱི་མྱང་འདས་དོན་གཉེར་ཟློག་ཚུལ་ནི་རང་གཞན་སྲིད་གསུམ་ཐམས་ཅད་བདེ་ཆེན་གཅིག་ཏུ་སྣང་བ་དང༌། དེས་འོད་གསལ་གྱི་དཀྱིལ་འཁོར་རབ་འབྱམས་སྤྲོ་བས་བཟློག་པ་ཡྀན་ཏེ་དེ་ལྟར་ན་བདེ་སྟོང་ངོ་བོ་གཅིག་ཀྱང་ལྡོག་ཆའི་སྒོ་ནས་ཕན་ཚུན་རྒྱས་བཏབ་པ་ཡིན་ནོ།། དེའི་ཕྱིར་གཟུང་འཛིན་གཉིས་ཀྱི་སྣང་བ་སྡུག་བསྔལ། ཐམས་ཅད་མི་སྣང་སྟེ་ཐ་ན་རྣམ་བྱང་གི་སྡུག་བསྔལ་བདེན་པ་ཡིན་གྱི་ལུས་དང་ཞིང་ཙམ་ཡང་མི་སྣང་བར་གཞན་བདེ་བ་ཆེན་པོས་སྤྲོས་བྲལ་སྟོང་པ་ཉིད་དུ་སྣང་བ་དང་དག་པའི་སྣང་བ་རབ་འབྱམས་སུ་སྣང་ངོ༌། །དེ་ལྟར་གྲུབ་ཆེན་མཚོ་སྐྱེས་ཀྱིས་ཀྱང༌། རང་རིག་བདག་ཉིད་དག་པ་ཉིད། །དག་པ་གཞན་གྱིས་རྣམ་གྲོལ་མིན། །ཞེས་པས་འགྲེལ་བར། རང་གིས་རིག་པ་བདེ་བ་ཆེན་པོའི་བདག་ཉིད་ཀྱི་དག་པའི་རྣམ་པར་དག་པ་ཡིན་གྱི། གཞན་ཕ་རོལ་དུ་ཕྱིན་པ་ལ་སོགས་པའི་དག་པའི་རྣམ་པར་གྲོལ་བ་ནི་མ་ཡིན་ནོ། །
ཞེས་གསུངས་པ་ལྟར་རང་གིས་རིག་པ་ཙམ་ཕར་ཕྱིན་ཐེག་པར་ཡང་བཤད་ཀྱི་དེ་བདེ་བ་ཆེན་པོར་ནི་བླ་མེད་ཀྱི་རྒྱུད་སྡེ་ཁོ་ནར་བསྟན་ཏེ། དེས་ན། རང་རིག་དང་བདེ་བ་ཆེན་པོ་ནི་འདིར་ཤིན་ཏུ་གལ་ཆེ་བས་སྡང་སྨྲས་མི་བྱའོ། གསུམ་པ་ནི། དེ་ལྟ་བུའི་བདེ་སྟོང་དབྱེར་མེད་འདིས་སེམས་ཀྱི་འོད་གསལ་གྱི་དྲི་མའམ་ལྷན་ཅིག་སྐྱེས་པའི་དྲི་མ་འགྱུར་བདེའི་བག་ཆགས་ཕྲ་མོ་ཡང་བྲལ་བར་བྱེད་ཅིང༌། སྙིང་ཁ་མན་ཆད་དབུ་མ་ན་མུན་པའི་དབུགས་རྒྱུ་བ། སྙིང་ཁ་མན་ཆད་ཀྱི་སྣང་བ་རླུང་གིས་ཕུག་པ་ཐིག་ལེ་འབར་འཛག་གི་ཐ་མ་འདིས་ཁུ་རྡུལ་གྱི་ཚོགས་པ་ཞིག་ནས་སྣང་བའི་རླུང་སྟེ་འོད་གསལ་མཐར་ཐུག ཆོས་སྐུ་འཆར་ལ་དེ་དང་མཉམ་དུ་རླུང་གི་སྒྲོད་པ་དེ་སྙིང་ཁའི་དབུས་དང་ཁམས་ཀྱི་སྒྲོད་པ་དེ་སྤྱི་བོར་ཐིམ་ལ། སོ་སོར་རང་གི་རིག་པའི་ཡེ་ཤེས་སུ་གྱུར་པའི་ཟག་མེད་སེམས་ཀྱི་རྒྱུན་འདི་ནི། འོད་གསལ་མཐར་ཐུག་བ་གསར་དུ་ཐོབ་པ་ཡིན་ཡང་རང་བཞིན་གྱིས་དག་པ་ལ་ཐོག་མཐའི་དབྱེ་བ་མེད་པ་སྟེ། རང་བཞིན་ལྷན་སྐྱེས་ཀྱི་ཡེ་ཤེས་བདེ་བ་ཆེན་པོ་སྤྲོས་པ་གང་ཡིན་ཐམས་ཅད་ཉེ་བར་ཞི་བའི་སེམས་རྫོགས་སངས་རྒྱས་ཀྱི་ཡེ་ཤེས་འདི་ངོ་མཚར་ཆེའོ། །ཞེས་འབྲས་བུ་རང་བཞིན་ལྷན་སྐྱེས་ཀྱི་ངོ་བོ་བཤད་དེ། གྲུབ་པའི་དོན་ནི་རླུང་དང་ཁམས་ཟད་པ་དང་འདི་མངོན་དུ་བྱེད་པ་དུས་མཉམ་ཞེས་པ་ཡིན་ནོ། །བཞི་པ་ནི། རླུང་གི་རང་བཞིན་རྣམ་པར་དག་པའི་སྣང་བ་གཟུགས་སྐུ་དང་སེམས་ཀྱི་རང་བཞིན་དག་པ་ཆོས་སྐུ་ནི་མིང་ཐ་དད་ཀྱང་ངོ་བོ་དབྱེར་མེད་པས་གཅིག་ཡིན་ནོ། །འབྱུང་བ་ཕྲ་མོ་དང་ཡང་བྲལ་བར་མ་ཟད། ཟག་མེད་ལས་ཀྱིས་སད་པར་བྱས་པའི་མ་རིག་བག་ཆགས་ཀྱི་འཁྲུལ་སྣང་དང་མ་འདྲེས་པས་སེམས་ཅན་གྱི་སྤྱོད་ཡུལ་མ་ཡིན་ཅིང༌།
ལྷ་སྐུ་ཡང་ཡིན་ལ་བདེ་བ་ཡང་ཡིན་པ་ནི་ལྷན་སྐྱེས་ཀྱི་སྐུའམ་ངོ་བོ་ཉིད་སྐུའོ། །ཐུགས་མི་འགྱུར་བའི་བདེ་བ་ནི་སྒྲིབ་པ་ཕྲ་མོ་ལས་ཀྱང་གྲོལ་བའི་ཡེ་ཤེས་ཆོས་སྐུ་དང༌། གསུང་རྣམ་པ་ཐམས་ཅད་པའི་སྐད་ཀྱིས་འགྲོ་བའི་སྙིང་ལ་བརྟེན་འབྱུང་གི་ཚུལ་གྱིས་འཇུག་པ་གཞོམ་མེད་ནཱ་དའི་ངོ་བོ་མཐར་ཐུག་རླུང་སེམས་ཟག་པ་མེད་པའི་ལས་སྣང་གི་རྣམ་པ་ཅན་ས་བཅུའི་སེམས་དཔའ་ལ་སྣང་བ་ལོངས་སྐུ་དང༌། ཟག་བཅས་དག་པའི་ལས་སྣང་ལ་འབྱུང་ལུས་ཕྲ་རགས་སུ་སྣང་བ་གང་ལ་གང་འདུལ་གྱི་འཕྲིན་ལས་ཅན་སྤྲུལ་པའི་སྐུ་རྣམས་ལ་རིམ་པའི་རྣམ་པའི་མཆོག་ཀུན་དང་ལྡན་པའི་སྐུ་དང༌། རབ་མཆོག་ལྷན་སྐྱེས་བདེ་བའི་སྐུ་དང༌། མཆོག་གི་སྐུ་དང་འབྱུང་བའི་སྐུ་ཞེས་བྱ་སྟེ། གཞི་ལ་དེ་ལྟར་གནས་པ་དེ་བཞིན་དུ་ལམ་ཡང་བསྒོམས་པས་ཁམས་འགགས་པ་སོགས་ཚུལ་དེ་འདྲ་བས་འབྲས་བུ་སྐུ་བཞི་དེ་ལྟ་བུ་ནི། ཐེ་ཚོམ་མེད་པར་ཐོབ་ཅེས་ཧ་ཊི་བས་ཧ་ཐ་སྟེ་བོད་སྐད་ཚོང་འདུས་ཀྱི་སའི་དབུས་སུ་དེ་རིང་བསྟན་པ་ཡིན་ནོ། །གཞི་ཇི་ལྟར་གནས་ཤེ་ན། ཟག་མེད་ཀྱི་སེམས་རྒྱུན་དེ་རྣམ་པ་ཐམས་ཅད་དུ་རྩལ་མ་འགགས་པར་འཆར་བ་དང་རང་བཞིན་བདེ་བར་ཡོད་པ་དང༌། རླུང་སེམས་ཙམ་གྱི་ལུས་དང༌། སྐྱེ་བའི་སྲིད་པ་ལེན་ཅིང་གནས་པ་སྟེ་དེ་ལྟར་རིམ་པས་ཡིན་ནོ། །དེས་ན་སེམས་དང་ཐིག་ལེ་དང་རླུང་དང་རྩ་རྣམས་གནས་གྱུར་ཅིང་འགགས་པའི་འབྲས་བུ་རིམ་པས་སྐུ་བཞིའོ། །དེ་སྐད་དུ། ལུས་ནི་དྭངས་ཞིང་རྡུལ་ཕྲན་ཉམས་པ་ནམ་མཁའ་དང་མཚུངས་མཚན་ལ་སོགས་པ་རྣམས་ཀྱིས་རབ་རྫོགས་འགྱུར། །སྣ་ཚོགས་འཇིག་རྟེན་གསུམ་པོ་ཉིད་ནི་དྭངས་ཤིང་སྒྲིབ་པ་རྣམ་པར་བྲལ་བ་རྨི་ལམ་བཞིན་དུ་སྣང༌། །སྐད་ནི་ཀུན་ཏུ་ཆད་པ་མེད་པ་དུ་མའི་སྐད་གཞན་དག་གིས་གཞན་གྱི་སྙིང་ལ་འཇུག་པ་སྟེ། །སེམས་ནི་དམ་པའི་བདེ་བས་གང་ཞིང་མི་གཡོ་ཐམས་ཅད་དུས་སུ་ལྷན་
ཅིག་སྐྱེས་པས་འཁྱུད་པའོ། །ཞེས་གསུངས་སོ། །དེ་ལྟ་བུའི་སངས་རྒྱས་ནམ་མཁའ་ལྟ་བུ་དངོས་མེད་ཡིན་ན་ཡེ་ཤེས་གཞན་ནས་ཚོལ་དགོས་ནའང་དེ་ལྟར་མ་ཡིན་པས་གཞན་དུ་མ་ཚོལ་ཅིག་ཅེས་ནམ་མཁའ་ལྟ་བུར་མ་ཚོལ་སེམས་ལས་གཞན་དུ་མ་ཚོལ་ཞེས་སོ། །དེ་ལྟར་སྐུ་བཞི་སྤྱིར་བསྟན་ནས་ཡེ་ཤེས་ཀྱི་སྐུ་དང་བདེ་ཆེན་གྱི་སྐུ་རང་ལ་གནས་པ་བསྟན་པ་ལ་ཡེ་ཤེས་ཀྱི་སྐུ་རང་ལ་གནས་པར་བསྟན་པ་དང༌། རང་ལ་གནས་པའི་བདེ་ཆེན་གྱི་སྐུ་བཤད་པའོ། དང་པོ་ལ། ཡེ་ཤེས་ཀྱི་སྐུ་དངོས་བཤད། དེའི་བྱེད་ལས་བསྟན་ཅིང་དོགས་པ་བཅད་པའོ། །དང་པོ་ནི། ཁྱད་པར་བྱེད་བཞི་ལྡན་ཏེ། དུས་ཀྱི་ཁྱད་པར་རང་ལ་ཐོག་མ་མེད་པའི་དུས་ནས་ཡོད་པའི་སེམས་ཀྱི་སྣང་ཡུལ་རང་བཞིན་གྱི་ཁྱད་པར་ལྟེ་བས་དབུས་སུ་གནས་པའི་གཏུམ་མོ་མཆོག་གི་དབང་ཕྱུག་མའི་མིང་ཅན། ངོ་བོ་ཁྱད་པར་ནམ་མཁའ་དང་མཉམ་པར་ཁྱབ་པའི་སྟོང་པ་ཉིད་གཞིའམ་བརྟེན་གྱི་ཁྱད་པར་རང་གི་ལུས་ལ་གསེར་དང་དངུལ་ཆུ་ལྟར་ཁྱབ་ཅིང་ཞལ་ཕྱག་ལ་སོགས་པ་ལྷའི་རྣམ་པའི་གཟུགས་ཅན་དུ་འགྲོ་བ་དྲུག་དང་བར་དོར་སྐྱེས་པ་ཙམ་གྱིས་མཚན་དཔེ་ལ་སོགས་པའི་རྣམ་པར་གནས་པའོ། །འོན་ཀྱང་ལམ་གྱི་དུས་སུ་རྣལ་འབྱོར་བས་ནི་ཉི་ཁྲི་གཅིག་སྟོང་དྲུག་བརྒྱའི་རླུང་འགགས་པ་ན། དྷཱུ་ཏཱིའི་ནང་དེ་ཉིད་ཀྱི་ཁུ་རྡུལ་གྱི་ཐིག་ལེ་ཡས་མས་སུ་བརྩེགས་པར་སྣང་བས་གདོད་པའི་ཡེ་ཤེས་བསྐྱེད་པར་བྱེད་པའོ། །གཉིས་པ་ནི། དེ་ལྟ་བུའི་ཡེ་ཤེས་ཀྱི་སྐུ་ལམ་དུས་སུ་མངོན་དུ་གྱུར་པས་ནི། བེམ་པོ་ལུས་ཀྱིས་མས་རིམ་གྱི་གཅོད་པར་བྱེད་དོ། །འོ་ན་སངས་རྒྱས་ཀྱི་ཡེ་ཤེས་ཀྱི་སྐུ་འབྱུང་ལུས་ལས་གྲུབ་པ་མ་ཡིན་ནམ་ཞེ་ན། ཡེ་ཤེས་ཀྱི་སྐུ་བེམ་པོ་རྡུལ་ཕྲ་རབ་ལས་གྲུབ་པར་མ་ལྟ་ཞིག་ཅེས་པའོ། །གཉིས་པ་ལ། འགྱུར་བས་འགྲོ་བའི་ཚུལ་དང༌། རྟེན་བརྟེན་པ་འགྱུར་མེད་ཀྱི་ཚུལ་གཉིས་ལས། དང་པོ་ནི། ཉི་མ་རྡུལ་དང་ཟླ་བ་
ཁུ་བའི་དབུས་ན་རླུང་སེམས་དབྱེར་མེད་གཞོམ་དུ་མེད་པའི་ནཱ་ད་གནས་པ་འདི་ནི་ཁུ་རྡུལ་རླུང་གི་ཚོགས་པ་ཕྲ་མོ་ཞེས་བྱ་བ་མི་ཤིགས་པའི་ཐིག་ལེ་ཡིན་ཏེ། དུས་ཀྱི་འཁོར་ལོའི་འགྲེལ་བར་སྤྱན་རས་གཟིགས་ཀྱིས། འདིར་སེམས་ཅན་ཐམས་ཅད་ཀྱི་སྙིང་གི་ནང་ན་གནས་པ་ནི་ཡེ་ཤེས་སོ། །དེ་ཡང་གཞོམ་དུ་མེད་པའི་སྒྲ་སྟེ་རྟག་ཏུ་ནཱ་དའི་མཚན་ཉིད་དོ། །ཞེས་སོ། །དེས་ན་འདིའི་སེམས་ཀྱི་རང་བཞིན་ལ་ཐོག་མཐའ་མེད་པའི་སེམས་དཔའ་དང༌། ལུང་འདི་ཉིད་དུ་ཡེ་ཤེས་ཞེས་ཀྱངགསུངས་པས། ཁ་བ་ཅན་གྱི་ཕྱོགས་འདིར་ཀུན་མཁྱེན་གཉིས་པའི་ཞལ་སྔ་ནས། མ་རིག་པ་གཞོམ་མེད་ཅེས་གསུང་བ་དང༌། དེ་སངས་རྒྱས་ཀྱི་ཡེ་ཤེས་ཀྱིས་འཇོམས་ཞེས་གསུངས་བའང་མི་ལེགས་ཏེ། ཡེ་ཤེས་དང་མ་རིག་པ་འགལ་ཞིང༌། སངས་རྒྱས་ཀྱི་ཡེ་ཤེས་ཀྱིས་བཅོམ་ནས་ཕྱི་མཐའ་བྱུང་བའི་ཕྱིར། དེས་ན་ཁམས་ཀྱི་ཚོགས་པ་དྲི་མ་རྣམ་ཤེས་ཀྱི་ཆ་དེས་འཇོམས་ཀྱི་སེམས་ཀྱི་ཁམས་ཡེ་ཤེས་ཀྱི་ཆ་མི་འཇོམས་པ་ཡིན་ནོ། །གང་ལྟར་ཐིག་ལེ་འདི་ལ་བརྟེན་ནས་རླུང་འཕོ་བ་བཅུ་གཉིས་འབྱུང༌། དེས་རྡུལ་གྱི་ཁམས་འབར་ཏེ་དཀར་ཆ་འཛུལ། དེ་ལ་དགའ་བ་བཅུ་དྲུག་འབྱུང༌། དེར་ཐིག་ལེ་ཉམས་པས་མ་རིག་པ་སོགས་རྟེན་འབྲེལ་བཅུ་གཉིས་འབྱུང༌། དེས་རྒྱུད་ལ་བག་ཆགས་བརྟས་ཏེ་འཕོ་བའི་རྒྱུ་བ་སོགས་འཁོར་ལོ་ལྟར་འཁོར་བའི་འཁོར་ལོ་བསྐོར་བས། ས་ཆུ་མེ་རླུང་ཁུ་རྡུལ་ནམ་མཁའ་རྣམ་ཤེས་ཏེ་ཡོན་ཏན་བརྒྱད་བོ་རགས་པ་བླངས་པས་བག་ཆགས་བསྒོས་ནས་རགས་པ་དོར་བའི་ཚེ་ཕྲ་བ་ཙམ་ལ་སེམས་བརྟེན། ཡང་བག་ཆགས་དང་བརྟེན་གྱི་དབང་གིས་རགས་པ་ལེན་པར་བྱེད་པ་ཡང་འཁོར་ལོ་འཁོར་བ་ལྟར་རམ། ས་བོན་དང་ལོ་ཏོག་ལྟར་འབྱུང་ངོ༌། །གཉིས་པ་ནི། དེ་འདྲའི་འཁོར་བ་གང་དུ་ལྡོག་པའི་དུས་ཡོད་དམ་ཞེ་ན། ལུས་དང་སེམས་དབྱེར་མེད་
རོ་གཅིག་དུ་རྟོགས་པར་གྱུར་པ་དེའི་ཚེ་རྫོགས་པའི་སངས་རྒྱས་ལུས་སེམས་འགྱུར་བ་མེད་པ་ཐོབ་པ་ཡིན་ནོ། །གང་འགྱུར་བ་མེད་པ་ཡིན་ཅེ་ན། གཙོ་བོ་ནི་ཐིག་ལེ་ཡིན་མོད་ཀྱི་སྤྱིར་རྟེན་བརྟེན་པ་བཅུ་གཉིས་འགྱུར་བ་མེད་པ་སྟེ། བླ་མའི་ཞལ་སྔ་ནས། འདིར་ནི་རེ་ཤིག་ཁུ་བ་གསུམ། །དོན་ནི་རླུང་ཡང་རྣམ་པ་གསུམ། །སེམས་དང་ཡེ་ཤེས་རྣམ་གསུམ་ནི། །འགྱུར་མེད་བདེ་བ་དམ་པ་ཡིན། །ཅེས་སོ། ཁམས་དང༌། རླུང་དང༌། སྣང་བ་དང༌། དགའ་བ་རྣམས་ལ་གསུམ་གསུམ་དུ་ཕྱེ་བ་རྟེན་བརྟེན་པ་བཅུ་གཉིས་སོ། །དེ་ལྟར་བཤད་པས་གྲུབ་པའི་དོན་ནི་འདི་ལྟར་སྟེ། སེམས་འཁོར་འདས་ཀུན་གྱི་ཉེར་ལེན་དུ་བསྟན་པ། སངས་རྒྱས་ཀྱི་སྐུའི་སྒྲུབ་བཞིར་བཤད་པ། ཇི་ལྟར་འཁོར་བ་འབྱུང་བའི་ཚུལ་ལོ། །འདི་ལས་བརྩམས་ཏེ་ལུང་རིགས་ཀྱི་དགག་སྒྲུབ་རྒྱ་ཆེར་སྤྲོ་བས་དཔྱོད་ལྡན་དགའ་བར་བྱེད་པ་ཡིན་མོད་ཀྱི་འདིར་ཡང་སྙིང་པོ་བསྡུ་ན་དང་པོ་ནི་རིམ་ལྔ་ལས། འགྲོ་ཀུན་རང་དབང་མེད་པ་སྟེ། །རང་དབང་དུ་ནི་འབྱུང་མ་ཡིན། །དེའི་རྒྱུ་ནི་འོད་གསལ་བ། །འོད་གསལ་ཐམས་ཅད་སྟོང་པའོ། །ཞེས་དང༌། འདིར་ནི་འགའ་ཡང་སྐྱེ་བ་མེད། །འགའ་ཡང་འཆི་བ་ཡོད་མ་ཡིན། །སེམས་ཀྱི་རང་བཞིན་རྣམ་གནས་པར། །འཁོར་བ་ཉིད་ནི་ཤེས་པར་བྱ། །ཞེས་པའི་དོན་སེམས་ཀྱི་རང་བཞིན་ནམ་འོད་གསལ་གྱི་རང་བཞིན་ནི་འཁོར་བའི་རྒྱུ་མ་ཡིན་ཏེ་གྲོལ་ཐིག་ལས་ཀྱང༌། ཐམས་ཅད་རྣམ་རྟོག་དང་བྲལ་བས། །འཁོར་བ་ཞེས་བྱ་ཡོད་མ་ཡིན། །འོན་ཀྱང་ཐག་པའི་སྦྲུལ་ལྟ་བུར། །སྣང་ཞིང་མེད་པ་ཉིད་དུ་འདོད། །ཅེས་དོན་མེད་བཞིན་སྣང་བའི་འཁྲུལ་པ་ཡིན་ལ། སེམས་ཀྱི་རང་བཞིན་སེམས་ཅན་ནས་སངས་རྒྱས་ཀྱི་བར་དུ་འགྱུར་བ་མེད་པའི་ཕྱིར་རོ། །དེས་ན་དྲི་བཅས་འོད་
གསལ་གྱི་ཆ་འཁོར་བ་སྟེ། དྲི་མ་ཅུང་ཟད་ཡོད་པའི་སྐབས་ནའང་འཁོར་བའི་སྣང་བ་ཅུང་ཟད་ཡོད་དོ། །སྨྲས་པ། ཆོས་ལྔ་རང་བཞིན་གསུམ་དང་རྣམ་ཤེས་བརྒྱད། །བདག་མེད་རྣམ་གཉིས་ཐེག་ཆེན་ཁྱད་ཆོས་སུ། །གསུངས་པའི་རྣམ་ཤེས་བརྒྱད་ལ་བཀུར་མི་བཏབ། །ཟག་མེད་སེམས་རྒྱུན་རྣམ་དག་ལ་སྡང་བས། །ངེས་དོན་མདོ་ལ་སྡང་སྨྲ་མི་འཚལ་ལོ། །སློབ་དཔོན་རྣམས་ཀྱི་གཞུང་ནི་དམད་ཀྱང་སླ། །རྒྱལ་བའི་བཀའ་ལ་དམད་ན་དམ་ཆོས་སྤོང༌། །སྡིག་པའི་རི་བོ་འདི་འདྲ་སུ་ཡིས་འཇོམས། །ནོར་པ་རྒྱུད་མར་འབྱུང་ཕྱིར་མཁས་རྣམས་ཁྲེལ། །འདིར་འཁོར་ལོ་རིམ་པ་གསུམ་གྱི་གནས་སྐབས་དང་མཐར་ཐུག་གི་ངེས་དོན་གདན་ཐོག་གཅིག་ཏུ་འགལ་མེད་དུ་ཉམས་སུ་ལེན་ཤེས་པ་ཤིན་ཏུ་གལ་ཆེ་ནའང་རེ་ཤིག་མ་སྦྲོས་སོ། །གཉིས་པ་ལ་སྐུ་གཉིས་དང༌། སྐུ་བཞིའི་སྒྲུབ་གཞི་སྟེ། ཕྱི་མ་ནི་ཤེས་རབ་ཕལ་པ་ཐོས་བསམ་ལས་བྱུང་བས་ནི་གནས་ལུགས་ལ་དམིགས་ཀྱང་ལམ་གྱི་མཚན་མ་ཙམ་ཡང་མྱུར་བར་འབྱུང་དཀའ་ཞིང༌། དཔྱད་འཇོག་གི་སྒོམ་བྱུང་ཕལ་བས་མཚན་མ་ཙམ་འབྱུང་སླ་ཡང་ཇི་བཞིན་མི་རྟོགས་ལ། མཚན་མེད་ཀྱིས་འཇུག་ན་སྤྱིར་ཇི་བཞིན་རྟོགས་མོད་ཀྱི་འོན་ཀྱང་བདེ་ཆེན་དང་མ་འབྲེལ་ན་ཡུན་རིང་དུ་ཐོགས་པ་ལས་ཡུལ་ཅན་བདེ་ཆེན་གྱིས་ནི་མྱུར་དུ་རྟོགས་པ་ཡིན་ནོ། དེ་ལ་གཞི་ཟག་མེད་ཀྱི་སེམས་ལ་འཛིན་སྟངས་སྤྲོས་པ་ཐམས་ཅད་ཉེར་ཞིའི་རྣམ་པ་ཅན་དུ་གཞི་དུས་ནས་ཡོད་ལ། དེ་ཡང་རང་བཞིན་ལྷན་སྐྱེས་སུ་གནས་པ་ནི་ཐུགས་ཆོས་སྐུའི་ཉེར་ལེན་ཡིན་ཅིང༌། ངའི་སྣང་ཡུལ་སེམས་ཀྱི་བཞོན་པའི་རླུང་ལུས་ཀྱི་ཆོས་སྣང་བའི་ཆ། མཚན་དཔེ་སོགས་རྗེས་མཐུན་པ་ལོངས་སྐུའི་རྣམ་པ་ཅན་ཏེ། མདོ་རྣམས་སུ་མཚན་དཔེ་
རྫོགས་པའི་སྐུ་སེམས་ཅན་ལ་ཡོད་པར་གསུངས་བའང་འདི་ལ་དགོངས་སོ། །འདི་སྐུའི་ཉེར་ལེན་དང་སྒྲུབ་བཞི་ཡིན་པ་རང་ལ་གདོད་མ་ནས་ཡོད་པ། དབང་པོའི་རིམ་པས་རིམ་གྱི་རང་ངོ་ཤེས་ནས་ཇེ་བཟང་དུ་སོང་ནས་མངོན་དུ་གྱུར་པ་ཡིན་ནོ། །དོན་དམ་པར་འཁོར་བ་དང་དྲི་མ་མེད་ཀྱང་མ་དཔྱད་འཁྲུལ་ངོར་བཅིངས་གྲོལ་གཉིས་ཀའི་བྱེད་ལས་མི་འགལ་ཤིང་ལམ་ལ་འབད་མི་དགོས་པའི་སྐྱོན་མེད་དེ་[དོ]། བདེན་ཏེ་འོན་ཀྱང་རྨོངས་ལས་འདོད། །ཅེས་པ་ལྟར་རོ། །ཀུན་གཞི་ལ་རྣམ་ཤེས་ཡེ་ཤེས་ཀྱི་ཆ་གཉིས་ལས་ཡེ་ཤེས་ཀྱི་ཆ་ལ་འགྱུར་མེད་ཀྱི་ཐིག་ལེ་བཞིའི་ཆ་གནས་པ་ནི་ངོ་བོ་དྲི་བྲལ་ཟད་དེ་སྐུ་བཞིའི་སྒྲུབ་གཞི་སངས་རྒྱས་ཀྱི་རྒྱུད་དངོས་འདི་ངོ་བོ་མི་འགྱུར་བ་ནི་ཐོག་མ་མེད་པའི་དུས་ཀྱི་དེ་ནས་སངས་རྒྱས་པའི་སྐབས་ཀྱི་ལ་བཟང་ངན་དང་རྣམ་པ་སོགས་སྐད་ཅིག་མ་སོ་སོར་མི་འདྲ་བ་ཡེ་མི་འབྱུང་བ་དང༌། ལམ་སོགས་ཀྱི་འགོག་པ་དང་འཇོམས་པ་མེད་པས་གཞོམ་མེད་དོ། །གསུམ་པ་ནི། འདི་ཡོད་ཙམ་ཉིད་ནས་སྐྱེས་པའི་དྲི་མ་ཀུན་གཞི་རྣམ་ཤེས་ནི་གསེར་དང་གཡའ་ལྟར་རྣམ་པ་དབྱེར་མེད་དུ་འདྲེས་པ་སྔ་མ་ལས་རགས་ཤིང་ངོ་བོ་དབྱེར་ཡོད་པ། དྲི་མ་སོགས་པའི་གཞིའམ་བརྟེན་དྲི་བཅས་རྣམ་ཤེས་ཕྲ་མོ་འདིའི་སྟེང་གི་འགྱུར་བཅས་ཀྱི་ཐིག་ལེ་བཞི་ལས་གནས་སྐབས་གཞིའི་བག་ཆག་སོགས་འཁྲུལ་པ་རྣམས་འབྱུང་ངོ༌། །འདི་ལའང་གཞོམ་མེད་དང་མི་ཤིགས་པའི་མིང་འདོགས་ཏེ་ལྷན་སྐྱེས་ཀྱི་སྒྲིབ་པ་དང་མ་རིག་བག་ཆགས་ཀྱི་སའོ། །དེས་ན་དྲི་བཅས་ཀྱི་སྐབས་ལྟར་བཤད་པ་ལྟར་གཞོམ་མེད་ཀྱི་ནད་ལས་བག་ཆགས་ཀྱི་སྟོབས་ཀྱིས་གཉིས་སྣང་འབྱུང་ཤིང་དེར་གཟུང་འཛིན་གྱི་རླུང་ཕྲ་མོ་རྣམས་འབྱུང་ངོ༌། །དེས་རྐྱེན་བྱས་རླུང་ཅུང་ཟད་ཕྲ་བ་རྣམ་པ་བཅུ་རྩ་དང་བཅས་པ་འགྲུབ་པར་བྱེད། དེ་ནས་
ཆེས་རགས་པའི་འབྱུང་འཇུག་གིས་སྡུག་བསྔལ་འཁོར་ལོ་སྣ་ཚོགས་པ་འབྱུང་ངོ༌། །ནད་སྐྱོད་པའི་ཚེ་གཟུང་འཛིན་གྱི་རྣམ་རྟོག་གིས་ལས་དང་ཉོན་མོངས་སྣ་ཚོགས་པས་སྣོད་བཅུད་སྣ་ཚོགས་པར་འགྲུབ་པ་ཡིན་ལ། རླུང་གིས་མེ་སྦར་དེས་དགའ་བ་བཅུ་དྲུག་ཤར། དེའི་ལྷན་སྐྱེས་ཀྱི་མཐར་ཉམས་ནས་དུག་གསུམ་གྱི་དྲི་མ་བགོ་ཚུལ་སྔར་བཤད་ལ། ཁྱད་པར་མ་རིག་པའི་སྐབས་སུ་ཕྱིན་ཅི་ལོག་བཞི་དངགཟུང་འཛིན་རང་བཞིན་གྱིས་གྲུབ་པར་རྨོངས་ཤིང་ང་རྒྱལ་བའི་མ་རིག་པ་འབྱུང་ངོ༌། །དེས་ལས་བྱས་པ་ནས་སྲིད་པ་གསུམ་གྱི་མཐར་རྒ་ཤིའི་སྐབས་འབྱུང་བ་ན་ཕྲ་རགས་རིམ་པས་ཐིམ་ཞིང༌། སྤྱི་བོ་ཧཾ་གི་ཆུས་ལྟེ་བའི་མེབསང་ཁུ་རྡུལ་རགས་པའི་ཚོགས་པ་དེར་ཞིག་ནས་ཡོན་ཏན་བརྒྱད་རགས་པ་དོར་ཕྲ་བ་ཙམ་གནས་ཤིང་ཡང་རགས་པ་ལ་འཇུག་གོ ། འདིར་ཀུན་གཞིའི་ཡེ་ཤེས་དེ་རང་བཞིན་གྱི་གྲུབ་བམ་མ་གྲུབ་ཞེ་ན་འདིར་བླ་མའི་བཞེད་པས། བྲམ་ཟེ་ཆེན་པོའི་ཞལ་ནས། ཐམས་ཅད་རོ་མཉམ་རང་བཞིན་པས། །བསམ་པའི་ཡེ་ཤེས་བླ་མེད་པའོ། ཁ་སང་དེ་རིང་དེ་བཞིན་སང་ནི་གཞན། །དོན་རྣམས་ཕུན་སུམ་ཚོགས་པར་སྐྱེ་བོ་འདོད། །ཀྱེ་ཧོ་བཞིན་བཟང་སྙིམ་པ་ཆུས་བཀང་བ། །འཛག་པ་བཞྀན་དུ་ཉམས་པ་མ་ཚོར་རོ། །བྱ་བ་བྱེད་དང་བྱ་བ་མི་བྱེད་པ། །ངེས་པར་རྟོགས་ན་འཆིང་གྲོལ་མེད། །ཅེས་པའི་ཁ་སང་གི་སེམས་དེ་རིང་བཟང་དུ་སོང་ཟེར་བ་ལྟ་བུ། སྙིམ་པ་ཆུས་གང་བ་ཟགས་པ་མ་ཚོར་བ་དང་འདྲའོ་ཞེས་པས་དུས་ལ་ལྟོས་ནས་གཅིག་དུ་བྲལ་གྱིས་གཏན་ལ་ཕབ་པ་ཡིན་པའི་རིགས་པས་དཔྱད་མི་བཟོད་པས་རང་བཞིན་མེད་པ་ཡིན་གསུང༌། བོད་ཀྱི་སློབ་དཔོན་མཁས་པའི་ཞལ་ནས་ཀྱང༌། སངས་རྒྱས་ཉིད་ཀྱང་ཡང་མིན་ན། །ཞེས་གསུང་པ་དང་མཐུན་པར་སྣང་ངོ༌། །གསུམ་པ་ལམ་སྒྲུབ་པར་གདམས་པ་ལ། ལམ་གྱི་རྩ་བ་གཡོ་མེད་ལ་གདམས་པ། ལམ་
གྱི་ངོ་བོ་ཟུང་འཇུག་ལ་གདམས་པ། ལམ་གྱི་མཐར་ཐུག་ཉེ་རྒྱུ་ལ་གདམས་པ། ལམ་གྱི་ཆ་རྐྱེན་ལྟོས་མེད་ལ་གདམས་པ། ལམ་གྱི་རང་བཞིན་རྩ་བྲལ་དུ་གདམས་པ་སྟེ་ལྔ་ལས། དངཔོ་ལ་གཡོ་མེད་ཀྱི་རྒྱུ་དང༌། གཡོ་མེད་དངོས་དང༌། དེའི་འབྲས་བུ་གསུམ་ལས་དང་པོ་ནི། ལྟོས་མེད་ཆུང་ངུ་སྟེ། འདོད་ཡོན་ལ་བརྐམ་ཞིང་ཆགས་ལ་ཡིད་གཡེང་བས་རྨོངས་ན་དཀའ་བ་ཇི་ཙམ་བྱས་ཀྱང་དངོས་གྲུབ་མི་འགྲུབ་སྟེ། དེ་བས་ན་འདོད་ཡོན་ལ་གཡེང་པའི་གནས་ཁྱིམ་ནི་འཆིལ་མའི་ཐལ་བ་སྟར་ཡིད་འཁྲེན་པ་དང་འགྱོད་པ་མེད་པར་བོར་བར་བྱས་ལ། སྒེག་འཆོས་མི་བྱེད་པར་མགོ་བོའི་སྐྲ་ཅི་དགར་བྲེགས་ཤིང་ལག་ཏུ་དབྱུག་པ་དང་ཁ་ཕོར་ངན་པ་གཞན་གྱིས་བོར་བ་ཐོགས་ནས་སློང་མོ་སྤྱོད་པར་བྱའོ། །གཉིས་པ་ནི། རྣམ་རྟོག་སྣ་ཚོགས་པའི་བསམ་པ་དང་ལུས་ངག་བྱ་བ་བྱེད་པའི་སྡུག་བསྔལ་དེ་བོར་ལ། ལྐུག་པའི་དངོས་པོ་ཇི་ལྟ་བར་ངག་མི་སྨྲ་བས་སེམས་གཉུག་མ་སྟེ་སྟོང་པ་ཉིད་ལ་ཞོག་ཤིག ཅེས་ལུས་དང་ངག་དང་སེམས་མི་གཡོ་བར་སྒོམ་ཅེས་པའོ། །སྒོམ་པ་དང་སྒོམ་བྱ་སྒོམ་བྱེད་གསུམ་མ་དམིགས་པས་ཅུང་ཟད་ཀྱང་སྒོམ་དུ་མེད་པར་སེམས་ཞོག་ཤིག་ཀྱཻ་ཧ་ཌི་བ་ཞེས་བོས་སོ། །འཕྲོས་པའི་དོན་ནི། དེའི་རྒྱུ་མཚན་ཇི་ཙམ་རྩོལ་བས་མཚན་མ་སྒོམ་པ་དང་ངག་གི་ཀློག་པ་དང་ཁྱིམ་གྱི་ལས་སོགས་གཡེང་བ་མང་པོས་ལམ་གྱི་ལྷན་སྐྱེས་དངོས་གཞི་ཐོབ་པ་རྣམས་ཀྱང་དངོས་གྲུབ་མྱུར་དུ་མི་འགྲུབ་ཅིང་སྔར་མ་ཐོབ་ན་ཐོབ་པ་ལ་གེགས་བྱེད་པའི་ཕྱིར། ལུས་སེམས་དུབ་ཅིང་ངལ་བས་སྡུག་བསྔལ་གྱི་རྒྱུའོ། །དེ་བས་ན་རྒྱལ་པོ་གོ་བི་ཙཎྜ་ཁྱོད་ཀྱང་རྒྱལ་སྲིད་ཀྱི་རང་གཞན་གྱི་ཕན་བདེ་རྒྱ་ཆེན་པོ་འགྲུབ་སྙམ་ན། ཕན་པ་དང་བདེ་བ་ལྟར་སྣང་ཉི་ཚེ་འགྲུབ་ཀྱང་འདི་ཡི་ཆེད་དུ། རང་གཞན་ལ་གནོད་པ་དཔག་ཏུ་མེད་པ་འབྱུང་བའི་རྒྱལ་སྲིད་དེ་བོར་ན་རུང་སྟེ་འདི་ལ་གཡེང་བས་ཏིང་
འཛིན་མི་འགྲུབ་ལ་ཕན་བདེ་ཤིན་དུ་རྒྱ་ཆེ་བ་ནི་ཏིང་ངེ་འཛིན་ལས་འབྱུང་བའི་ཕྱིར་རོ། །གསུམ་པ་ནི། བདག་གིས་རྒྱལ་སྲིད་ཀྱི་བདེ་བ་སྤོང་བར་མི་ནུས་སྙམ་ན། གཡོ་མེད་གསུམ་གོམས་པའི་འབྲས་བུ་སེམས་གཉུག་མའི་བདེ་བར་ཤེས་པའི་ཚེ་ནང་གི་བདེ་བ་དེ་ལ་མ་ཆགས་བཞིན་དུ་དགའ་བ་སྐྱེས་པ་དེས་དེ་དགའ་བདེ་དེ་ཉིད་ལ་ཡང་མི་ཆགས་ན་རྒྱལ་སྲིད་སོགས་འཁོར་བར་འདོད་པའི་བདེ་བ་མི་གཙང་བ་གྱ་ནོམ་པ་སྡུག་བསྔལ་གྱི་རྒྱུར་འགྱུར་བ་ལ་ག་ལ་ཆགས། གཉིས་པ་ལ་ཐབས་ལ་འབད་པར་གདམས་པ་དང༌། ཟུང་འཇུག་དངོས་ལ་གདམས་པ་གཉིས་ལས་དང་པོ་ནི། གཟུགས་གང་ཡང་རུང་བ་ཅི་མཐོང་བ་དང་སྒྲ་གང་ཐོས་པ་དང༌། དྲི་གང་སྣམ་པ་དང་རོ་གང་མྱངས་བ་དང༌། རེག་བྱ་གང་རེག་པ་ཐམས་ཅད་ལས་གཉུག་མ་བདེ་བ་ཆེན་པོ་མཚོན་པར་བྱེད་དེ། བདེ་སྟོང་ཤར་བ་ན་དེས་རྒྱས་བཏབ་པས། ཡུལ་སྣང་དེས་ཀྱང་བདེ་བ་ཆེར་འབར་བའི་རྐྱེན་དུ་སོང་ནས། བདེ་ཆེན་ཚད་མེད་པས་དུས་འདས་པས་བཟའ་བཏུང་ཉེར་སྤྱོད་སོགས་ལ་དགའ་བ་མེད་པར་སྨྱོན་པའི་སྤྱོད་པ་སྤྱོད་པའི་རྣལ་འབྱོར་པ་ཧ་ཌི་བ་ངས་ནི་ནགས་སུ་གནས་ནས་འདུ་འཛིའི་ལང་ལོང་སྤངས་བ་ཡིན་ཏེ། ཁྱོད་ཀྱང་ཁྱིམ་སྤོངས་ཤིག་སྤངས་ནས་སླར་ཡང་དགོན་པར་འདུ་འཛི་མ་བྱེད་ཅིག་ཅེས་པ་སྟེ་འདིས་བདེ་སྟོང་འཕེལ་བའི་ཐབས་བསྟན་ནོ། །གཉིས་པ་དངོས་ནི། བདེ་བས་སྟོང་ཉིད་མཐོང་ཡང་ཡུལ་ཡུལ་ཅན་རྒྱང་ཆད་ཐ་དད་པའི་ཚུལ་གྱིས་གཉིས་སུ་མཐོང་བ་མེད་དེ། གཉིས་སུ་བལྟས་ན་དེ་ཡང་གཟུང་འཛིན་གཉིས་ཀྱི་སྣང་བའི་འཁྲུལ་བ་ཡིན་པས་དེས་ཐར་པ་ག་ལ་ཐོབ། དེ་བས་ན་བདེ་བ་དང་སྤྲོས་པའི་མཚན་མའི་དམིགས་བཏད་གདོད་མ་ནས་རང་ཞིག་ཏུ་རྟོགས་པའི་སྟོང་པ་གཉིས་སུ་ཐ་དད་མི་བྱ་བར་རོ་གཅིག་སྲེ་བར་བྱོས་ཤིག འདིའི་ཟུང་འཇུག་ནི་བདེ་
སྟོང་ཟུང་འཇུག་སྟེ། དེ་ལྟར་ཡང༌། མདུན་དང་རྒྱབ་དང་ཕྱོགས་བཅུ་རུ། །གང་གང་མཐོང་བ་དེ་དེ་ཉིད། །དེ་རིང་ཉིད་དུ་མགོན་པོ་ད་ལྟར་འཁྲུལ་པ་ཆད། །ད་ནི་སུའང་བྲི་བར་མི་བྱའོ། །ཞེས་ཡུལ་སྣང་གི་བདེ་བ་སེམས་སུ་བསྟན་པ་དང༌། དེ་ཡང་རང་བཞིན་མེད་པའི་སྟོང་པར་བསྟན། འདི་རྟོགས་པས་བདག་ཉིད་གཉིས་འཛིན་གྱི་འཁྲུལ་པའི་སེམས་ཆད་ཅིང༌། ཐེ་ཚོམ་ལས་གྲོལ་བར་བསྟན་ནོ། །གསུམ་པ་ཉེ་རྒྱུ་ལ། གནས་ལ་གདམས་པ། གྲོགས་ལ་གདམས་པ། དབང་བསྐུར་པ་པོ་ལ་གདམས་པ། དབང་གི་ཡེ་ཤེས་ལ་གདམས་པ། འབྲས་བུ་ལ་གདམས་པ་ལྔའི་དང་པོ་ནི། ཡུལ་དང་ཡུལ་འཁོར་ཐམས་ཅད་ས་བཅུ་སྟེ་ཡུལ་ཉེར་བཞིའི་རང་བཞིན་ཡིན་པ་ཐམས་ཅད་རང་བཞིན་སྟོང་པ་ཉིད་དང་ཀུན་རྫོབ་ནུས་པ་མཉམ་པར་ཤེས་པས་ཡུལ་འཁོར་གང་ཡང་རུང་བར་སྤྱོད་པའོ། །གཉིས་པ་ལ། སྤྱི་དང་ཁྱད་པར་གྱི་གྲོགས་བཤད་པ་དང༌། གྲོགས་ཀྱི་མཆོག་བསྟན་པ་གཉིས་ལས། དང་པོ་ནི་། རྣལ་འབྱོར་པ་ཡེ་ཤེས་དང་ལྡན་པ་ལ་འཇིག་རྟེན་པའི་ཕོ་ཉ་མོ་སྔགས་སྐྱེས་རྣམས་དང་ཞིང་ལས་སྐྱེས་པའི་ཕོ་ཉ་མོ་ས་ལ་གནས་པ་དང༌། མཆོག་སྟེ་སངས་རྒྱས་ཀྱི་རྣམ་པར་འཕྲུལ་པའི་མཁའ་འགྲོ་མ་རྣམས་མངོན་ཤེས་དང་རྫུ་འཕྲུལ་གྱི་རྐང་པར་ལྡན་པས་ན། དེ་དག་བགྲོད་པ་ལ་ཐག་རིང་ཐུང་བྱེ་ཕྲག་མེད་པའི་ཕྱིར། རིང་ནས་ཀྱང་མྱུར་དུ་འོངས་ནས་རིག་པའི་དངོས་གྲུབ་གྲུབ་པའི་སྐྱེས་བུ་ལ་སྙོམས་པར་འཇུག་པ་དང་གདམས་པ་སོགས་ཀྱི་སྒོ་ནས་དངོས་གྲུབ་དམ་པ་ཀུན་སྟེར་བར་མཛད་པས་ན། པུརྞཱ་གི་རི་སོགས་སུ་ལུས་ཀྱི་དངོས་སུ་འགྲོ་ཡང་མི་དགོས་ལ། འགྲོ་དགོས་ཀྱང་ཡེ་ཤེས་ཀྱི་སྐུས་སྐད་ཅིག་ལ་འགྲོ་བས་ཛ་ལནྡྷ་ར་པ་ང་ཡིས་ཡུལ་གཞན་མི་སྐོར་
རོ། དེ་ལྟར་ཡང༌། མངོན་བརྗོད་བླ་མར། ཡེ་ཤེས་འོད་ཟེར་མཆོག་མཐོང་ནས། །རྣལ་འབྱོར་མ་རྣམས་ལེགས་འདུ་སྟེ། །པད་མའི་འབྱུང་གནས་ཉམས་དགའ་ལ། །ངང་བའི་ཚོགས་འདུ་ཇི་བཞིན་ནོ། །ཞེས་དང༌། བདེ་མཆོག་ཉུང་ངུར་ཡང༌། དམ་ཚིག་གནས་ལ་མཁའ་འགྲོ་མ། །རིང་པོ་ནས་ཀྱང་གཟིགས་པར་འགྱུར། །ཞེས་གསུངས་སོ། །གཉིས་པ་ནི། དེ་ལྟར་སྔགས་སྐྱེས་སོགས་གསུམ་གྱིས་བདེ་བ་སྦྱིན་པ་ལས་དེའི་ནང་གི་ཁྱད་པར་གྱི་ཕྱག་རྒྱ་ནི། ལྷ་མོ་སོགས་མཁའ་ལ་སྤྱོད་མ་དང༌། གླུ་མོ་སོགས་ས་འོག་ན་སྤྱོད་མ་དང༌། མི་མོ་སོགས་ས་སྟེང་ན་སྤྱོད་མ་དང༌། གནོད་སྦྱིན་མོ་དང་རིག་འཛིན་མོ་སོགས་གསུམ་ཅར་དུ་སྤྱོད་མ་རྣམས། ཕྱིའི་ཡུལ་ཉེར་བཞི་སོ་སོར་རྒྱུ་བ་དང༌། ནང་གི་རྩ་ཁམས་རླུང་སོ་སོར་ཐིམ་པར་བྱེད་པ་ལ་སྔགས་པ་ནི། དཔེར་ན་ལྷ་མོ་སོགས་མཁའ་སྤྱོད་མའི་ཕོ་ཉ་མོ། ཡུལ་པུརྞགི་རི་སོགས་ཞིང་བཞིར་སྤྱོད་པ་ལ་ཕྱག་རྒྱའི་དངོས་གྲུབ་སྟེར་བ་མང་ཞིང༌། རྣལ་འབྱོར་པའི་སྤྱི་བོ་སོགས་ཀྱི་རླུང་ཐིམ་པར་བྱེད་པ་ལ་མཐུ་ཆེ་བ་ཡིན་ནོ། །དེ་ལ་ལྷ་མོ་ནི་ཐིག་ལེ་མཆོག་མ་སོགས་དང༌། གནོད་སྦྱིན་མོ་ནོར་རྒྱུན་མ་ལྟ་བུ་དང༌། རིག་པ་འཛིན་པའི་བུ་མོ་དཀའ་ཟློག་མ་ལ་སོགས་པ་མ་མོ་རྣམས་ཡིན་ནོ། །གཉིས་པ་ནི། ལྷན་ཅིག་སྐྱེས་མ་དང༌། མཉམ་པར་སྦྱར་བས་ཉི་མ་གཅིག་གིས་ཀྱང་དངོས་གྲུབ་མཆོག་འགྲུབ་སྟེ། དེ་ཡང་སྤྱངས་པ་ལས་བྱུང་བའི་ཕྱག་རྒྱའི་སྟོབས་ཀྱིས་བདེ་སྟོང་འདྲེན། དེས་ཁམས་དང་རླུང་འགགས་པས་སྔགས་སྐྱེས་སོགས་ཀྱི་འདུ་བ་རིམ་གྱིས་ཐོབ་ནས། དང་པོར་དངོས་གྲུབ་མཆོག་མཐོང་ལམ་དང༌། མཆོག་མཐར་ཐུག་པ་སངས་རྒྱས་ལ་སྦྱོར་བ་ན་ངེས་པར་ཞིང་སྐྱེས་ཀྱིས་
བསྐུལ་ནས་ལྷན་སྐྱེས་ལ་སྦྱོར་བས། དེ་ལ་ནི་བདེ་སྟོང་གི་ཡེ་ཤེས་སྐྱེད་པ་ལ་གང་དང་ཡང་མི་མཉམ་པའི་སྟོབས་ཡོད་པས་ཉི་མ་གཅིག་ཁོ་ནས་འགྲུབ་བོ། །གསུམ་པ་དབང་བསྐུར་བ་པོ་ནི། སངས་རྒྱས་གཤེགས་པ་གཤེགས་མ་རྣམས་དང༌། ས་སྙིང་དང་གཟུགས་རྡོ་རྗེ་མ་སོགས་བྱང་ཆུབ་སེམས་དཔའ་དང་སེམས་མ་རྣམས་དང༌། ཁྲོ་བོ་ལྷ་མོ་དང་བཅས་པ་རྣམས་སྐད་ཅིག་གཅིག་པོ་དེ་ལ་ནམ་མཁའ་ཐམས་ཅད་བར་སྐབས་མེད་པར་གང་བར་སྣང་བའི་དབང་བསྐུར་ཞིང་མཆོད་པ་དང་གདམས་པ་ཐོབ་པ་སྟེ། མཐོང་ལམ་ཐོབ་པའི་དུས་སྤྲུལ་སྐུ་དང༌། རྒྱུན་མཐའི་སྐབས་ལོངས་སྐུའི་དཀྱིལ་མཁོར་དུ་དབང་བསྐུར་བ་མནོས་པ་དང༌། རྫོགས་རིམ་དངོས་གཞིའི་དུས་བླ་མས་དབང་བསྐུར་བ་གཙོ་བོ་ཆེ་བ་ཡིན་ནོ། །དེ་སྐད་དུ་དུས་ཀྱི་འཁོར་ལོར། ཁྲོ་བོ་སངས་རྒྱས་ལྷ་མོ་དང་བཅས་ངེས་པར་རོ་ཡི་རྡོ་རྗེ་མ་སོགས་ས་ཡི་སྙིང་པོ་སོགས། །རབ་ཏུ་དགའ་བའི་ཐུགས་རྣམས་རྣལ་འབྱོར་པ་ལ་གྲུབ་པའི་དུས་སུ་ནམ་མཁའ་ལ་ནི་མངོན་སུམ་འགྱུར། །དེ་ཡི་འདོད་པའི་དངོས་གྲུབ་རི་བོང་ཅན་གྱི་ཞག་གི་ཐོ་རངས་དང་ནི་མཚན་མོ་ཕྱེད་ལ་འགྱུར། །རིན་པོ་ཆེའམ་མེ་ཏོག་ཆར་ནི་མཆོག་གྱུར་དུས་ཀྱི་སྦྱོར་བས་ས་ཡི་སྟེང་དུ་འབབ་པར་འགྱུར། །ཞེས་གསུངས་སྟེ་གོ་སླའོ། །བཞི་པ་ནི། གླུ་གར་མཁན་གྱི་བུ་མོ་སོགས་ལས་ཀྱི་ཕྱག་རྒྱ་དང་ཡིད་ཀྱི་ཕྱག་རྒྱ་ཡང་གནས་སྐབས་དང་པོ་གཉིས་སུ་ཡོད་ཅིང༌། སྐབས་གསུམ་པའི་ཚེ་ནི་ལས་རྒྱ་དང་རྣམ་བཅས་དང་རྣམ་མེད་ཀྱི་ཕྱག་ཆེན་གསུམ་པོ་ཁོ་ན་ལ་བརྟེན་པ་ཡིན་པས། ཕྱག་རྒྱ་སྔོན་མ་དེ་གཉིས་ཀྱི་ཆོས་འབྱུང་བྷ་གས་དྲངས་པའི་བདེ་བ་དང་ལྷན་ཅིག་ཕྱག་རྒྱ་ཆེན་པོའི་ལྷན་སྐྱེས་ཀྱི་རྒྱལ་
སྲིད་ཆོས་ཀྱི་སྐུ་ལ་ཧ་ཌི་བ་བདག་སྤྱོད་བར་བྱེད་དོ། །ལྔ་པ་ནི། ནམ་མཁའ་དང་རོ་མཉམ་པའི་སྤྲོས་བྲལ་ངང་སེམས་ཀྱི་བདེ་དགའ་དང་རོ་གཅིག་པའི་རྡོ་རྗེ་སེམས་དཔའ་རྡོ་རྗེ་རྩེ་གཅིག་པའི་ངེས་པའི་དོན་ཡིན་ཏེ་དེ་ཡན་ཆད་ཐམས་ཅད་དུ་ཡང་གདམས་པའི་དོན། འཁོར་གསུམ་ཡོངས་སུ་མི་དམིགས་པར་སྒོམས་ཤིག་ཅེས་བཤེས་གཉེན་ཀྱིས་གདམས་པར་བྱའོ། །བཞི་པ་ནི། ཁྱིམ་དང་ལྷ་ཁང་གི་ཡོ་བྱད་དེ་གཙུག་ལག་ཁང་དང༌། འཁོར་གཡོག་མང་པོ་སྐྱོང་བ་དང༌། གཉེན་འདུན་གྱི་ཕྱིར་དང་མཐོ་བ་དང་གཞན་དམན་པར་སྟོན་པའི་ཕྱིར་རང་གཞན་འབད་བ་ཆེ་ཐད་དུ་བྱེད་པའི་བྱ་བས་བཅིངས་པའི་གང་ཟག །དཔའ་བ། བརྟུལ་ཕོད་པ། ཡིད་གཞུང་པ། ཚིག་འཛིན་པ་དང་དོན་དཔྱོད་པའི་བློ་རྣོ་ཞིངབཟང་བ་དེ་ལྟ་བུ་ནི་རང་གི་རང་ལ་ཆེན་པོར་ལྟ་བའི་ང་རྒྱལ་དང་ལྡན་ཡང་དོན་གྱི་མཆོག་ལས་བསྟན་ནས་འཁྱམས་པ་ཤེས་རབ་འཆལ་པའོ། །ཞེས་ལོངས་སྤྱོད་དང་བྱ་བ་ལ་ལྟོས་པ་མེད་པའི་ལྟོས་མེད་ཆུང་ངུ་དང༌། ཁྱད་པར་དུའང་རང་ལ་ཆེད་དུ་ཆེ་བ་སྟེ་བདག་ལ་ཆགས་པས་མཚན་མར་བཟུང་སྟེ། ཐ་ན་བྱང་ཆུབ་ཀྱི་ཆེད་དུ་ཡང་ཡིད་ཀྱིས་ཀུན་ནས་སླངས་བའི་ཆེ་ཐབས་མ་བྱེད་ཅིག་ཅེས་ལམ་སྒྲུབ་པའི་དུས་བྱ་བྱེད་གང་ལའང་མཚན་མར་མི་འཛིན་ན། རང་ལ་གཅེས་འཛིན་ཕལ་པ་ལྟ་ཅི་སྨོས། དེ་བས་ན་རང་གིས་རང་ཉིད་ཅི་དགའ་བར་བོར་ན་རུང་སྟེ་རང་གི་ཆེད་དུ་རྩོལ་བར་མི་བྱའོ། །འདིར་གནས་ལུས་ལོངས་སྤྱོད་གང་ལའང་མ་ལྟོས་མ་ཞེན་པ་ནི་ལྟོས་མིང་ཆུང་ངུ་དང༌། རང་གཞན་ལ་གང་དུའང་མཚན་མར་མི་འཛིན་པ་དམིགས་སུ་མེད་པ་ནི་ལྟོས་མེད་ཆེན་པོ་སྟེ་གཉིས་ཀ་ལ་ཡང༌། ལུས་ངག་ཡིད་གསུམ་གྱི་བྱ་བ་ལ་ལྟོས་པ་མེད་པ་དང༌། ལོངས་སྤྱོད་ལ་ལྟོས་པ་མེད་པ་སྟེ་དྲུག་དྲུག་གོ དེ་བས་ན་གནས་
མཆོག་ཏུ་འཛིན་པ་སྟེ། ད་ནི་གཙོ་བོའི་གནས་ཐོབ་བོ་མཁས་པའི་གནས་དང་རྒྱལ་པོ་གནས་ཐོབ་པོ་སེམས་ཀྱི་བརྟེན་འདི་ཙམ་ཐོབ་བོ་ཞེས་པ་ལྟ་བུ་དང་ལུས་མཆོག་ཏུ་འཛིན་པ་སྟེ། ད་ནི་མིའི་ལུས་ཏེ་བ་ལང་ལས་ལྷག་གོ་ཞེས་པ་ལྟ་བུ་གནས་དང་ལུས་ལ་ཁྱད་པར་དུ་སྒྲོ་འདོགས་པ་བོར་ནས་བསམ་མེད་དུ་བཞག་ན་ཤིན་ཏུ་རུང་སྟེ་འདིས་སྟོང་ཉིད་རྟོགས་པའི་ཐབས་ཀྱི་མཆོག་དུ་གྱུར་ཏེ། དེ་སྐད་དུ། མ་རིག་རབ་རིབ་ཀྱིས་ལྡོང་ལ། །མིག་སྨན་འདི་ལས་གཞན་ཅི་ཡོད། །ཅེས་གསུངས། དེ་ལྟར་ན་སྒོ་གསུམ་གྱི་ལོངས་སྤྱོད་ཀུན་གྱིས་བཅིངས་པ་མེད་པར་སྤྱད་པར་བྱའོ། །བཅིངས་པ་ནི་སྒྲོག་གི་མིང་ངོ༌། །ལྔ་པ་ནི། གང་སྣང་ཐམས་ཅད་རྩ་བ་དང་བྲལ་བའི་བདེ་བ་རྒྱུན་མི་འཆད་པར་བསྒོམས་པས་ཡེ་ཤེས་རྟག་ཏུ་ཆད་པ་མེད་པ་སངས་རྒྱས་ཐོབ་པར་བྱ་ཞེས་པའོ། ཅི་ལྟར་རྩ་བྲལ་ཡིན་ཞེ་ན། གཟུང་འཛིན་གྱི་སྣང་བ་ཀུན་ལ་ཉེ་བར་ལེན་པའི་རྒྱུ་དང་ལྷན་ཅིག་བྱེད་པའི་རྐྱེན་རང་བཞིན་མ་དམིགས་པས་སེམས་ཀྱི་ངོ་བོ་རྐྱེན་གྱིས་སྒྱུར་བས་འགྱུར་བ་མི་རྟེན་ཅིང༌། སེམས་ངོ་བོ་རང་བཞིན་སྤངས་པར་རང་ངོ་ཤེས་པའོ། །དེ་ལ་རྩ་བྲལ་གྱི་དོན་ནི་འདི་ལྟར། ཤེས་རབ་ཀྱི་ཕ་རོལ་དུ་ཕྱིན་པའི་མདོར་ཡང་བསྟན་པ་ཡིན་གསུངས་ཏེ། ཇི་སྐད་དུ། ཀཽ་ཤི་ཀ དེ་ལ་ཤེས་རབ་ཀྱི་ཕ་རོལ་ཏུ་ཕྱིན་པའི་དོན་ནི་འདི་ཡིན་ཏེ། ཤེས་རབ་ཀྱི་ཕ་རོལ་ཏུ་ཕྱིན་མ་ནི། གཉིས་སུ་ལྟ་བ་མ་ཡིན། གཉིས་མེད་པར་ལྟ་བ་མ་ཡིན། མཚན་མར་མ་ཡིན། མཚན་མ་མེད་པར་མ་ཡིན། བླང་བར་མ་ཡིན། དོར་བ་མ་ཡིན། དབྲི་བར་མ་ཡིན། བསྣན་པར་མ་ཡིན། ཀུན་ནས་ཉོན་མོངས་པར་མ་ཡིན། རྣམ་པར་བྱང་བར་མ་ཡིན། སྐྱེ་བར་མ་ཡིན། འགག་པར་མ་ཡིན།
བཟུང་བར་མ་ཡིན། མི་བཟུང་པར་མ་ཡིན། ལེན་པར་མ་ཡིན། དོར་བར་མ་ཡིན། གནས་པར་མ་ཡིན། མི་གནས་པ་མ་ཡིན། ཡང་དག་པར་མ་ཡིན། ལོག་པར་མ་ཡིན། ལྡན་པར་མ་ཡིན། མི་ལྡན་པར་མ་ཡིན། འདྲེ་བར་མ་ཡིན། མི་འདྲེ་བར་མ་ཡིན། རྐྱེན་དུ་མ་ཡིན། རྐྱེན་མེད་པར་མ་ཡིན། ཆོས་སུ་མ་ཡིན། ཆོས་མ་ཡིན་པར་མ་ཡིན། དེ་བཞིན་ཉིད་དུ་མ་ཡིན། དེ་བཞིན་ཉིད་དུ་མ་ཡིན་པར་མ་ཡིན། ཡང་དག་པའི་མཐར་མི་དམིགས། ཡང་དག་པའི་མཐའ་མ་ཡིན་པར་མ་ཡིན་ཏེ་ཞེས་གསུངས་པ་ལ། གཉིས་སུ་ལྟ་བ་ནི་ཡུལ་དང་ཡུལ་ཅན་ཐ་དད་པ་སྣང་ཞིང་འཛིན་པ་ལ་བྱ་ཞིང༌། གཉིས་སུ་མེད་པ་ནི་གཅིག་ཏུ་ཞེན་པའི་དོན་ནོ། །དེ་ཡང་ཐ་མལ་གྱི་སྣང་བ་ཕལ་པ་ཙམ་ལ་མི་བྱ་ཡི། ཡུལ་ཅན་སེམས་དང་ཡུལ་སྟོང་པ་ཉིད། གཅིག་དང་ཐ་དད་པར་རྟོགས་པར་མ་ཡིན་ཞེས་པའོ། །མཚན་མར་འཛིན་པ་མ་ཡིན་པ་དང༌། ལས་རྣམས་བླངས་ཤིང་བྱར་འོས་པ་དང་རྣམ་སྨིན་དོར་བྱར་མི་རྟོག སོ་སོ་སྐྱེ་བོའི་དུས་ནའང་ཀུན་ནས་ཉོན་མོངས་དབྲི་བར་བྱ་བར་རང་བཞིན་མེད་པ་དང༌། འཕགས་དུས་རྣམ་བྱང་བསྣན་པར་བྱ་རྒྱུར་རང་བཞིན་མེད་པ་དང༌། རང་བཞིན་གྱི་སྐྱེ་འགག་མེད་པ་དང༌། ལམ་ལ་སློབ་པའི་ཚེ་ཡོན་ཏན་རང་བཞིན་གྱིས་བཟུང་བ་མེད་པ་དང༌། བླང་དོར་རང་བཞིན་གྱིས་མ་གྲུབ་པ་དང༌། ས་གོང་འོག་དུ་གནས་མི་གནས་དང༌། སྒྲུབ་པ་ཡང་དག་དང་ལོག་པ་དང༌། རིགས་མི་རིགས་ཀྱི་ཡིད་བྱེད་ལྡན་མི་ལྡན་དང༌། སེམས་ཀྱི་ངོ་བོ་སྒྲིབ་པ་དང་མི་འདྲེ་བ་དང༌། རྐྱེན་མེད་པར་ཡོན་ཏན་གོང་མ་མི་སྐྱེད་ཀྱང་རྐྱེན་རང་བཞིན་མ་དམིགས་པ་དང༌། ཆོས་ཆོས་མིན་རང་བཞིན་མེད་པར་མཉམ་པ་དང༌། སེམས་དམིགས་སུ་མེད་
པས་སེམས་དེ་བཞིན་ཉིད་མ་ཡིན། ལོགས་སུ་དེ་བཞིན་ཉིད་མ་དམིགས་པ་དེ་རང་བཞིན་མེད་པས་དེ་བཞིན་ཉིད་དོ་ཞེས་དང༌། དོན་དམ་པ་ནི་འབྲས་བུ་ཡང་དག་མཐའ་དམིགས་སུ་མེད་པས་དེ་དང༌། དེ་མ་ཡིན་པའང་དམིགས་སུ་མེད་པས་མ་ཡིན་པ་མ་ཡིན་ཞེས་པ་སྟེ། མདོར་ན་སེམས་རིག་ཙམ་གནས་སམ་འགྱུ་ཡང་ཁྱད་མེད་དུ་དྲན་པས་ཟིན་པ་ཙམ་དང༌། ཧར་སྒོམ་ལ་གང་གཞག་འཇོག་ཐོབ་ཙམ་མམ། ཡིད་ཡུལ་གང་ཤར་ལ་བདེན་མེད་དོ་ཞེས་འདུན་པ་རྒྱུན་ཆགས་ལ་རྩ་བྲལ་ཞེས་མི་བྱ་ཡི། མཉམ་གཞག་གམ་ཕྱི་ཡུལ་སྣང་ལ་སེམས་འཕྲོ་བ་གང་ལ་རྩོལ་མེད་དོ་ཡང་ཤེས་ཤིང༌། དེར་མ་ཟད་རྣམ་རྟོག་སོགས་ནམ་སྐྱེ་བ་ལྟར་སྣང་བ་བྱུང་བའི་དུས་ཉིད་ནས་དེ་ཉིད་རང་བཞིན་མེད་པའི་ཚུལ་རང་གི་ཆེད་དུ་མ་རྩོལ་ཞིང་ངོ་ཤེས་རྟག་དུ་འབྱུང་བ་རྣམ་རྟོག་སོགས་ཡེ་སྐྱེ་རྒྱུ་མེད་པ་ལ་འཆར་སྒོ་ཅུང་ཟད་ཀྱང་མ་འགགས་པ་དེའི་ཚེ་སྟོང་པ་དང་རྟེན་འབྲེལ་མི་འགལ་བ་རྩ་བྲལ་ཤེས་པ་ཞེས་བྱ་སྟེ། འདི་ལའང་དངོས་འཕགས་ལམ་དང་རྗེས་མཐུན་ནི་སྔ་མོ་ནས་ཀྱང་འབྱུང་ངོ༌། །རྩ་བའི་དོན་ནི་རང་གི་ངོ་བོས་གྲུབ་པའི་དོན་ཡིན་ལ། དེ་དང་བྲལ་ཡང་བཏགས་པ་ཙམ་དུ་སྣང་བ་མི་འགལ་བར་མ་ཟད་རང་བཞིན་གྱི་གྲུབ་པས་སྟོང་བའི་ཕྱིར་བྱ་བྱེད་ཐམས་ཅད་འབྱུང་ལ། བྱ་བྱེད་ཀུན་རྟེན་ཅིང་འབྱུང་ལ་ལྟོས་པའི་གྲུབ་པའི་ཕྱིར་དོན་དུ་མེད་པ་ཡིན་ཏེ། དེ་སྐད་དུ། བཏགས་པའི་ཆོས་ཉིད་མི་འགལ་བར། སྟན་པའི་རྣམ་པ་དྲོད་འགྱུར་ཏེ། །ཞེས་དང༌། བཅོམ་ལྡན་འདས་མ་ལས་ཀྱང༌། དེའི་མདོར། ཀཽའུ་ཤི་ཀ་གཟུགས་ནི་བཏགས་པ་ཙམ་མོ། །བཏགས་པ་ཙམ་གང་ཡིན་པ་དེ་ནི་གནས་བརྟན་རབ་འབྱོར་གྱིས་མི་འགལ་བར་བསྟན་ནོ། །ཞེས་སོགས་རྣམ་མཁྱེན་གྱི་
བར་དུ་གསུངས་ནས། དེ་ཅིའི་ཕྱིར་ཞེ་ན། ཆོས་རྣམས་ཀྱི་ཆོས་ཉིད་གང་ཡིན་པ་དེ་ནི་མི་འགལ་རྣམ་པར་མི་འགལ་ལོ་ཞེས་འཇིག་རྟེན་གྱི་བཏགས་པ་དང་མི་འགལ་ལ་ཆོས་ཉིད་ཀྱང་སྟོན་པར་བཤད་པ་ནི་དེ་ལྟར་ཡིན་ཏེ། འགའ་ཞིག་ལྟར་གཞན་སྟོང་ལ་སྡང་བས་ཀུན་གཞི་དངོས་འབད་ནས་འགོག་པ་དང༌། སེམས་ཀྱི་ངོ་བོ་རང་བཞིན་མེད་ན་སངས་རྒྱས་གང་ལས་སྒྲུབ་ཅེ་སྨྲར་གཉི་ག་མི་འབྱུང་བའི་ལྟ་བ་བཟང་པོ་འབྱུང་བ་ཡང་འདི་རྟོགས་པ་ལ་རག་ལས་པའི་དོན་གྱི་དབང་འདི་ལ་དགོངས་ནས། བྲམ་ཟེ་ཆེན་པོས་ཀྱང༌། རྩ་བར་བྲལ་བར་དེ་ཉིད་གང་སེམས་པ། །བླ་མའི་མན་ངག་ཐོབ་པ་དེ་ཡིས་ཆོག །ཅེས་གསུངས་སོ། འདིར་སྨྲས་པ། གངས་བ་མཆོག་གི་ཐེག་པར་ལམ་བཟང་གི། ཇི་བཞིན་རིམ་པའི་མཚན་མ་ལེགས་ཤེས་ནས། །ངེས་དོན་རྒྱུད་སྡེ་རྒྱ་མཚོར་འཇུག་འདོད་ན། །གྲུབ་མཆོག་གསུང་གི་གྲུ་ཆེན་འདིར་ཞུགས་ཤིག ། དེ་ལྟར་བཤད་ཟིན་པའི་བྱ་བ་ནི་ངེས་པའི་དོན་ཤིན་ཏུ་གསལ་བར་འདོམས་པའི་ཚིག་འདི་ཡང༌། རྣམ་པར་གྲོལ་བའི་ཡེ་ཤེས་ཁྱད་པར་ཅན་རང་གིས་ཐོབ་པའི་འབྲས་བུ་ཡིན་པའི་ཕྱིར་རྣམ་པར་གྲོལ་པའི་སྙེ་མ་ཞེས་བསྟན་བཅོས་འདི་ལ་ཡང་མིང་དུ་བཏགས་ལ། དེ་ལྟར་ན་ཨ་རེ་ཧོ་ཞེས་པ་ནས་བཅིང་བ་མེད་པར་སྤྱད་ཅེས་པའི་བར་གྱི་ཚིག་འདི་རྣམས་ནི་རྣམ་པར་གྲོལ་བའི་སྙེ་མ་ཞེས་བྱ་སྟེ། དོན་དམ་གསལ་བར་སྟོན་པའི་གླུ་དབྱངས་བདེ་བ་དང་སྟོང་པ་མཉམ་པ་སྟེ་ཟུང་འཇུག་ངེས་པར་བྱེད་པ། རྒྱུད་ཐམས་ཅད་ཀྱི་ཡི་གེ་སྟེ་འགྱུར་བ་མེད་པའི་ཚིག་ངེས་དོན་མཆོག་གི་དོན་དང་ལྡན་པའི་
བསྟན་བཅོས་མཆོག་འདི་ནི། དང་པོ་མགོན་པོ་ཛཱ་ལནྡྷ་རའི་ཞབས་ཀྱིས་མཛད་པ་སྟེ་རྫོགས་སོ། །གཞུང་ཤོ་ལོ་ཀ་ནི་དགུ་བཅུ་རྩ་གཅིག་གོ །རྒྱུད་སྡེ་ཀུན་གྱི་ངེས་གསང་ལྷན་སྐྱེས་དགའ། །སྙིང་པོའི་དོན་ལ་ཐེ་ཚོམ་ཀུན་སེལ་བ། །འགྲན་ཟླ་ཀུན་བྲལ་གཞུང་བཟང་རིན་ཆེན་འདི། །ཕྱོགས་འདིར་རྙེད་པ་བདག་ཀྱང་སྐལ་བ་བཟང༌། །བསམས་ཤིང་དཔལ་ལྡན་བླ་མ་རྡོ་རྗེ་འཆང༌། །དེ་འི་བཀའ་དྲིན་སྙིང་ནས་དྲན་གྱུར་པས། །རྟག་ཏུ་གུས་པས་གསོལ་བ་འདེབས་ལགས་ན། །མྱུར་དུ་བྱིན་གྱིས་རློབས་ཤིག་ཐུགས་རྗེ་ཅན། །ཇི་ལྟར་སྐྱལ་བས་རྒྱ་མཚོ་རྒལ་འདོད་བཞིན། །བདག་ཀྱང་གནས་འདིར་བརྩོལ་བར་གྱུར་མོད་ཀྱི། །བྱིས་པའི་བློ་ཡིས་འཁྲུལ་པར་བཤད་སྲིད་ན། །འཕགས་པ་རྣམས་ཀྱིས་དེ་དག་བཟོད་མཛད་རིགས། །འོན་ཀྱང་དིང་སང་ཕྱོགས་འདིར་ངེས་དོན་ལ། །བློ་གྲོས་སྐྱེས་པ་ཤིན་ཏུ་ཉུང་བའི་ཕྱིར། །བདག་གི་བཤད་པ་འདི་ཙམ་ངེས་གྱུར་ཀྱང༌། །མཁས་པའི་མདུན་སར་སྤོབས་པ་མཆོག་ཏུ་འགྱུར། །དེ་ལྟར་
རྒྱལ་བ་རྣམས་ཀྱི་བསྐྱེད་མཛད་ཤེས་རབ་ཕ་རོལ་ཕྱིན་ཟབ་མོ། །ཐུན་མོང་མིན་པའི་ཐེག་པའི་ཚུལ་ལས་བྱུང་རྣམས་ཇི་བཞིན་འདིར་བཤད་ལས། །བསོད་ནམས་གང་ཐོབ་དེས་ནི་རྒྱལ་བ་སྲས་བཅས་ཕྲིན་ལས་མ་ལུས་པ། །བདག་གི་སྐད་ཅིག་རེ་རེར་སྤྱོད་ཅིང་འགྲོ་བའི་མགོན་པོ་མཆོག་ཐོབ་ཤོག །བླ་མའི་ཞལ་ནས་སྤྱིར་གཞུང་འདི་ལ་རྒྱལ་པོ་གོ་བི་ཙཎྜའི་ཞུ་བའི་གླུ་དབྱངས་དང་སྦྲེལ་བར་སྦྱར་བ་ཞིག་རྒྱ་གར་ནུབ་ཕྱོགས་ན་ཡོད་པར་སྣང་ཡང་མ་གསན། །ཤར་ལྷོ་དབུས་སོགས་ན་འདི་ཁོ་ན་ཡིན་གསུངས། ཞེས་ཛཱ་ལནྡྷ་རའི་དོ་ཧ་རྣམ་གྲོལ་སྙེ་མའི་འགྲེལ་བ་གསང་བའི་མཛོད་བཅས་བྱ་བ་འདི་ནི་བཤད་པ་དངོས་རྣམས་དང་གྲུབ་མཐའི་འཇོག་མཚམས་བླ་མའི་བཞེད་པ་ཁོ་ན་དང་བསྟུན་ཅིང་མཐའ་བཅོད་ཐོར་བུ་དང་བོད་དང་མཐུན་པར་ས་སྤྱད་[བཅད་]རྣམས་སྦྱར་བའང་ངེས་དོན་གྱི་ཕྱོགས་ལ་ལེགས་པར་འགྲིས་པར་བྱས་ཏེ། རང་གི་བློ་གྲོས་ཀྱི་རྣམ་པར་གཞག་པའང་ཅུང་ཟད་དང་བཅས། འཕགས་ཡུལ་གྱི་བླ་མ་དམ་པ་རྣམ་པ་གསུམ་གྱི་བཞེད་པ་སོ་སོའང་ཅི་རིགས་སུ་བཀོད་པ་སྟེ། ལུང་འདྲེན་དང༌། མཐའ་གཅོད་སོགས་མ་སྤྲོས་པར་གོ་བདེའི་
ངག་གིས་ཤིན་ཏུ་འཁྱེར་བདེ་བར་ཤཱཀྱའི་དགེ་སློང་རྒྱལ་ཁམས་པ་ཏཱ་ར་ནཱ་ཐས་རང་ལོ་ཉེར་གསུམ་པ་ལ་སེར་འཕྱང་གི་ལོ་ཁྲུམས་སྟོད་ཀྱི་ཡར་ཚེས་བཅུ་ལ་ནགས་རྒྱལ་གྱི་དབེན་གནས་སུ་སྦྱར་བའི་ཡི་གེ་པ་ནི་གྲགས་པ་བཟང་པོའོ།། །།དགེ་འོ། འདི་ལྟར་པ་གྱིས་པའི་རྣམ་དཀར་དགེ་བའི་མཐུས། །བདག་ལ་དྲིན་གྱིས་བརྐྱང་བའི་ཕ་མ་དང་། །སེམས་བསྐྱེད་ཞུ་སའི་བླ་མ་སློབ་དཔོན་དང་། །དམ་ཆོས་གཅིག་པའི་རྡོ་རྗེ་སྟུན་གྲོགས་དང་། །རྒྱུ་རྫས་འབྲེལ་བ་ཡོད་པའི་མི་རྣམས་ཀུན། །ཞོན་བཀླ་སྲོག་གཅོད་འོ་ཞོ་འཐུང་བ་དང་། །ཤ་ཁྲག་ཟོས་པའི་དུད་འགྲོ་མ་ལུས་པ། མྱུར་དུ་སངས་རྒྱས་ས་ལ་འགོད་པར་ཤོག །སྐྱེ་བ་ཀུན་ཏུ་ཡང་དག་བླ་མ་དང་། འབྲལ་མེད་ཆོས་ཀྱིས་དཔལ་ལ་ལོངས་སྤྱོད་ཅིང་། །ས་དང་ལམ་གྱིས་ཡོན་ཏན་རབ་རྫོགས་ནས། །རྡོ་རྗེ་འཆང་གི་གོ་འཕང་མྱུར་ཐོབ་ཤོག ། བཀྲ་ཤིས་པར་གྱུར་ཅིག །