གསང་བའི་དེ་ཁོ་ན་ཉིད་རབ་ཏུ་གསལ་བའི་འགྲེལ་པ་དགོངས་པ་རབ་གསལ།
གསང་བའི་དེ་ཁོ་ན་ཉིད་རབ་ཏུ་གསལ་བའི་འགྲེལ་པ་དགོངས་པ་རབ་གསལ་བཞུགས།
ཨོཾ་སྭཱ་སྟི། དཔལ་གསང་བའི་དེ་ཁོ་ན་ཉིད་རབ་ཏུ་གསལ་བའི་འགྲེལ་པ། དགོངས་པ་རབ་གསལ་ཞེས་བྱ་བ། བླ་མ་དང་རྡོ་རྗེ་སེམས་དཔའ་གཉིས་སུ་མེད་པ་ལ་ཕྱག་འཚལ་ལོ། །གང་ཞིག་ཆོས་ཀྱི་ཕུང་པོ་བརྒྱད་ཁྲི་དག །གདུལ་བྱ་སོ་སོའི་བློ་དང་མཚུངས་པར་བསྟན། །ཐམས་ཅད་ངེས་པའི་དོན་དུ་རོ་གཅིག་པ། །གཉིས་མེད་གསུང་པ་དེ་ལ་ཕྱག་འཚལ་ལོ། །གསང་བའི་དེ་ཉིད་རབ་གསལ་བ། །སྤྱོད་པའི་རྡོ་རྗེས་ངེས་བསྟན་ཏེ། །འདི་ནི་རྙེད་པར་དཀའ་བ་ལ། །ལེགས་པར་རྙེད་འགྱུར་ཐབས་སྦྱིན་བྱ། །དེ་ལ་གཞུང་འདིའི་མཚན་དོན་ནི། རྒྱ་གར་སྐད་དུ། གུ་ཧྱ་ཏ་ཏྭ་པྲ་ཀཱ་ཤ་ནཱ་མ་ཞེས་པ་ནི། བོད་སྐད་དུ་གསང་བའི་དེ་ཁོ་ན་ཉིད་རབ་ཏུ་གསལ་བ་ཞེས་བྱའོ། །དེ་ལ་གུ་ཧྱ་ནི་གསང་བ། ཏ་ཏྭ་ནི་དེ་ཁོ་ན་ཉིད་པྲ་ཀཱ་ཤ་ནི་རབ་ཏུ་
གསལ་བ། ནཱ་མ་ནི་ཞེས་བྱ་བའི་དོན་ནོ། །འབྲོག་མིས་པྲ་ཀཱ་ཤ་ཕྱེ་བ་ཞེས་བྱ་བ་བསྒྱུར་རོ། །བཅོམ་ལྡན་འདས་ཐུགས་རྗེ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་ལ་ཕྱག་འཚལ་ལོ། །ཞེས་པ་ནི། གཞུངའདི་བསྒྱུར་བ་པོ་ལོ་ཙཱ་བ་འགོས་ཁུག་པ་ལྷས་བཙས་ཀྱིས། རང་ཉིད་ཀྱི་འདོད་པའི་ལྷ་ལ་ཕྱག་འཚལ་བ་སྟེ། འགྱུར་གྱི་ཕྱག་ཙམ་ཡིན་ལ། འབྲོག་འགྱུར་གྱི་ཐོག་མར་རྡོ་རྗེ་མཁའ་འགྲོ་ལ་ཕྱག་འཚལ་ལོ། །ཞེས་འབྱུང་བ་ནི། རྒྱ་དཔེ་ལ་ཡོད་པར་ཡང་སྣང་ངོ༌། །གཞུང་དངོས་བཤད་པ་ལ། བཤད་པ་ལ་འཇུག་པའི་བྱ་བ། བཤད་པ་ཉིད་ཉེ་བར་དགོད་པ། བཤད་པ་མཐར་ཕྱིན་པའི་བྱ་བའོ། །དང་པོ་ནི། མཆོད་པར་བརྗོད་ཅིང་རྩོམ་པར་དམ་བཅའ་བ་ཡིན་ཏེ། དེ་ཡང༌། ཐོག་མ་ཐ་མ་ལ་སོགས་རབ་ཏུ་དབྱེ་
བ་སྤངས་ཤིང་དཔེ་མེད་ཀུན་འགྲོ་ནམ་མཁའི་དངོས། ། བསོད་ནམས་ཡེ་ཤེས་བདག་ཉིད་སྦྱོར་བ་གཉིས་ཀས་རྣམ་སྤྲས་རང་གི་རང་བཞིན་ཤར་གང་ཡིན། །རྒྱལ་བ་ཁྱུ་མཆོག་སྐུ་རྣམ་གསུམ་པོ་དེ་ལ་བཏུད་ནས་གསང་བའི་དེ་ཉིད་རབ་གསལ་བ། །སྤྱོད་པའི་རྡོ་རྗེས་རྟོགས་པ་སེམས་ཅན་ཕུང་པོས་གསལ་བར་ལེགས་རྟོགས་བྱ་ཕྱིར་བཤད་པར་བྱ། །གང་ཞིག་རྒྱལ་བ་རྣམས་ཀྱི་ཆོས་སྐུ་ནི། ཐོག་མར་སྐྱེ་བ་དང་མཐར་འགག་པ་དང༌། སོགས་ཀྱི་སྒྲས་བར་དུ་གནས་པ་སྟེ། འདུས་བྱས་ཀྱི་རབ་ཏུ་དབྱེ་བའམ་མཚན་ཉིད་སྤངས་པ་སྟེ། དེ་ཡང་ཐོག་མཐའ་སོགས་མེད་པར་བསྟན་པས། དུས་ལས་གྲོལ་བ་དང༌། རང་བཞིན་འགྱུར་བ་མེད་པ་རྟག་པར་ཡང་བསྟན་ནོ། །དཔེ་མེད་པ་ནི་ལྷན་ཅིག་སྐྱེས་པའི་ཡེ་ཤེས་ཏེ། དཔེ་དང་ཚིག་དང་རྣམ་རྟོག་གང་གིས་ཀྱང་མཚོན་དུ་མེད་པའི་དོན་ཡིན་ལ། དེ་ཉིད་ཡུལ་དང་དུས་ཀུན་ལས་ཡོངས་སུ་གྲོལ་བས། ཡུལ་དང་དུས་ཀྱི་མཚན་གཞི་གང་ལ་ཡང་ཉེ་རིང་གི་དབྱེ་བ་མེད་ལ། དེ་ཉིད་ཀྱི་ཕྱིར་ཡེ་ཤེས་གཅིག་ཉིད་རྒྱར་མ་ཆད་ཅིང་ཕྱོགས་སུ་མ་ལྷུང་བའི་ཚུལ་གྱིས་ཤེས་བྱ་ཀུན་ཏུ་འགྲོ་བ་སྟེ་ཀུན་ལ་ཁྱབ་པ་ཡིན་ནོ། །གང་དངོས་པོ་ཡིན་པ་དེ་ནི་ཀུན་ཏུ་ཁྱབ་པར་མི་རུང་སྟེ། རང་གི་མཚན་ཉིད་མ་འདྲེས་བར་སྣང་བའི་ཕྱིར་དང༌། ཡུལ་དུས་ཉེ་ཚེ་བ་ལ་རྒྱར་ཆད་ཅིང་ཕྱོགས་སུ་ལྷུང་བའི་ཕྱིར་རོ། །གང་དངོས་མེད་དེ་ཡང་ཀུན་ཏུ་ཁྱབ་པ་མི་རུང་སྟེ། བློས་བཏགས་པ་ཙམ་མ་གཏོགས། ངོ་བོས་མེད་པའི་ཕྱིར་དང༌། མཐོང་བ་དང་མྱོང་བའི་སྤྱོད་ཡུལ་གང་དུ་ཡང་མ་གྲུབ་པའི་ཕྱིར། མེད་པ་ཙམ་ལ་ཁྱབ་པ་དང་མ་ཁྱབ་པའི་དབྱེ་བ་མེད་པས་སོ། །དེའི་ཕྱིར་རང་བཞིན་ལྷན་ཅིག་སྐྱེས་པ་འདི་ནི་དངོས་པོ་དང་དངོས་མེད་ལས་གྲོལ་
བ་ཞེས་བྱ་ལ། དེ་ལྟར་ན་ཡང༌། གང་ཤེས་པར་བྱ་བ་དང༌། མྱོང་བར་བྱ་བ་དང༌། རྟོགས་པར་བྱ་རྒྱུ་དང༌། ཡོངས་གཅོད་དུ་གྲུབ་པ་ལ་དངོས་པོ་ཞེས་འདོགས་ན་ནི། འདི་ལ་ཡང་དངོས་པོ་ཞེས་བྱ་ལ། གང་ཞིག་གཅིག་དང་ཐ་དད་དང་འགྲོ་འོང་དང་སྐྱེ་འགག་ལ་སོགས་པའི་སྤྲོས་པ་མེད་པའམ། རྣམ་རྟོག་གིས་སྤྱོད་ཡུལ་ཟད་པ་ལ་དངོས་པོ་མེད་པར་འདོག་ན་ནི། འདི་དངོས་མེད་ཀྱང་ཡིན་ནོ། །དེ་བས་ན་དོན་ལ་ལེགས་པར་མ་དཔྱད་པར་མིང་ཙམ་ལ་རྗེས་སུ་ཆགས་པ་དང་ཞེ་སྡང་བར་བྱེད་པ་ནི་རྨོངས་པ་རྣམས་ཀྱི་དེ་ཉིད་དོ། །ནམ་མཁའི་དངོས་ཞེས་པ་འབྲོག་འགྱུར་ལས་ནམ་མཁའི་ཚུལ་ཞེས་འབྱུང་ངོ༌། །དེ་ནི་ནམ་མཁའ་ལྟར་སྤྲོས་པ་མེད་པའི་དོན་ཡིན་ལ། དངོས་སམ་ཚུལ་ནི་རངབཞིན་ཏེ། གཟུགས་སོགས་ཡུལ་དང༌། མིག་སོགས་དབང་པོ་དང༌། ཆགས་སོགས་རྣམ་པར་རྟོག་པ་ཐམས་ཅད་ལས་འདས་པ། ནམ་མཁའ་དང་མཚུངས་པའི་རངབཞིན་ནོ། །དེ་ལྟར་ན་ཚིག་འདིས་ནི་སྤྲོས་པ་ཐམས་ཅད་སྤངས་ཤིང་ཤེས་བྱ་ཀུན་ལ་ཆོས་ཉིད་ཀྱི་ཚུལ་དུ་ཁྱབ་པའི་ཡེ་ཤེས་སོ་སོར་རང་གིས་རིག་པ་མ་གཏོགས། དཔེ་གང་གིས་ཀྱངམཚོན་དུ་མེད་པ། འདུས་མ་བྱས་རྟག་བརྟན་གཡུང་དྲུང་དེ་ནི་ཆོས་སྐུའི་མཚན་ཉིད་དུ་བཤད་པ་ཡིན་ནོ། །ཡང་ལོངས་སྤྱོད་རྫོགས་པའི་སྐུ་ནི། བླ་མ་དམ་པ་བསྟེན་པ་དང༌། སྦྱིན་སོགས་བསོད་ནམས་ཀྱི་ཚོགས་དང༌། བླ་མའི་བྱིན་རླབས་དང༌། ཤེས་རབ་ཡེ་ཤེས་ཀྱི་ཚོགས་ཡོངས་སུ་རྫོགས་པས། རང་བཞིན་ཆོས་ཉིད་ཀྱི་དྲི་མ་མཐའ་དག་སྤངས་པ་ན། ཆོས་ཉིད་དེ་གདོད་ནས་རྣམ་པ་ཐམས་ཅད་པའི་བསོད་ནམས་དང༌། བདེ་སྟོང་ལྷན་སྐྱེས་ཡེ་ཤེས་ཀྱི་བདག་ཉིད་དུ་གནས་པ་དེ། ལམ་ཚོགས་གཉིས་ཀྱི་སྦྱོར་
བ་དང་འཕྲད་པས་མངོན་དུ་གྱུར་པ། རང་དོན་དང་གཞན་དོན་གྱི་ཡོན་ཏན་གཉིས་ཀས་རྣམ་པར་སྤྲས་པ། དེ་ཡང་གློ་བུར་དུ་བྱུང་བ་མ་ཡིན་ཏེ། གདོད་མ་ནས་རང་གི་རང་བཞིན་དུ་གནས་པ་མངོན་འགྱུར་དུ་ཤར་བ་གང་ཡིན་པའོ། །དེ་ལ་བསོད་ནམས་སྐུ་རྣམ་པ་ཐམས་ཅད་པ། གཞན་དོན་མཛད་པའི་མཐུ་ཅན་དང༌། ཡེ་ཤེས་ཐུགས་བདེ་སྟོང་དང་དོན་གྱི་ངོ་བོ་ཉིད་དེ། དེ་གཉིས་ཟུང་དུ་འཇུག་པའི་ལོངས་སྐུ་ཡིན་ལ། འབྲོག་འགྱུར་ལས། རང་བཞིན་ཤར་གང་ཡིན་ཞེས་པ། རང་བཞིན་གང་གསུངས་པ་ཞེས་པ་བསྒྱུར་བ་ལྟར་ན། གསུང་གི་ཡེ་ཤེས་སྒྲ་དབྱངས་ཐམས་ཅད་པ། ཐེག་པ་ཆེན་པོའི་ཆོས་ཀྱི་སྒོ་ཐམས་ཅད་དུ་ཤར་བ། གཞོམ་མེད་ཀྱི་སྒྲའི་ཡེ་ཤེས་གཅིག་ཉིད་ཆོས་སྒྲ་ཀུན་ཏུ་གཅིག་ཅར་ཤར་བའི་དོན་ཡིན་ཏེ། གསུང་གི་སྒྲ་སྐད་གང་ཡིན་པ་དེ་ཡང་རང་གི་རང་བཞིན་ཏེ་ཆོས་ཉིད་ཡིན་པར་བསྟན་པའོ། །འགྱུར་མི་འདྲ་བ་དེ་གཉིས་ཀྱང༌། ཨུད་ད་ཤར་བ་དང༌། ཨུཀྟ་གསུང་བ་ལ་འཇུག་པའི་རྒྱ་དཔེ་མི་འདྲ་བའི་ཁྱད་པར་དུ་སྣང་ངོ༌། །སྤྲུལ་པའི་སྐུ་ནི་རྒྱལ་བ་ཁྱུ་མཆོག་ཅེས་པ་སྟེ། མ་དག་པ་དང་དག་པའི་ཞིང་ཁམས་རྣམས་སུ་ཆགས་བྲལ་དང་ཆགས་ཆེན་གྱི་སྐུ་སྣ་ཚོགས་པ་སྟོན་མོད་ཀྱི། རྒྱལ་བ་སྟེ་བདུད་བཞི་བཅོམ་པ་ལས། བདག་ཉིད་ཀུན་གྱི་འགྲན་ཟླ་མེད་པར་འགྱུར་པ་དང༌། འགྲོ་བ་རྣམས་ཀྱི་འདྲེན་པ་མཆོག་ཏུ་གྱུར་པའི་ཕྱིར་ཁྱུ་མཆོག་གོ། དེ་ཡང་འཇིག་རྟེན་གྱི་ཁམས་སྣ་ཚོགས་ན་གནས་པའི་སེམས་ཅན་རྣམས་ལ་དངོས་སུ་ཆོས་སྟོན་པ་དང༌། བདུད་བཅོམ་པ་སོགས་རང་རྒྱུད་པ་ཡིན་པ་ལྟར་སྟོན་པས། སེམས་ཅན་གྱི་སྣང་ངོ་དང་བསྟུན་ནས་དེ་ལྟར་བརྗོད་ཀྱི། རྒྱལ་བ་ཁྱུ་མཆོག་དངོས་ནི་སྟུག་པོ་བཀོད་པའི་ཞིང་དུ་རོལ་པའི་ལོངས་
སྐུ་ཉིད་ཡིན་ནོ། །སྤྲུལ་པའི་སྐུ་དངོས་ཀྱང་སྤྲུལ་པ་པོ་ཡིན་པས། སྐུ་སྔ་མ་གཉིས་ཉིད་ཀྱི་གཞན་དོན་གྱི་ཡོན་ཏན་ཉིད་ཡིན་ལ། དེས་བྱས་པའི་སྤྲུལ་པ་ལ་ཡང་དེ་ལྟར་འདོགས་པ་ཙམ་མོ།། དེས་ན་ངོ་བོའི་སྒོ་ནས་དབྱེ་བ་མེད་ཀྱང་མཚན་ཉིད་ཀྱི་དབྱེ་བ་གསུམ་ཉིད་ཀྱི་ཕྱིར། སྐུ་རྣམ་གསུམ་པོ་དེ་ལ་བཏུད་ཅེས་པ་ནི་མཆོད་པར་བརྗོད་པའོ། །བཏུད་ནས་བྱ་བ་ཅི་ཞིག་བྱེད་ཅེ་ན། གསང་བའི་དེ་ཁོ་ན་ཉིད་རབ་ཏུ་གསལ་བ་ཞེས་བྱ་བའི་བསྟན་བཅོས་བཤད་པར་བྱ་ཞེས་པའོ། །སུ་ཞིག་གིས་འཆད་ཅེ་ན་སྤྱོད་པའི་རྡོ་རྗེ་སྟེ་ནག་པོ་སྤྱོད་པ་པས་སོ། །ཚུལ་ཇི་ལྟར་འཆད་ན། སྟོན་པས་རྒྱུད་ལས་གསུངས་པའི་དོན་རྣམས་བླ་མའི་མན་ངག་དང་རང་གི་ཉམས་མྱོང་གིས་ཇི་ལྟར་རྟོགས་པའི་རིམ་པ་བཞིན་དུའོ། །དེ་ལ་རྟོགས་པ་ཞེས་པ་རྒྱུད་དོན་ལ་བསྙེགས་དགོས་པས། རྒྱུད་ལས་གསུངས་པའི་ཕྱིར་རང་བཟོ་སྤོང་ལ། རྒྱུད་དུ་གསུངས་པ་ཉིད་ཀྱིས་ཆོག་མོད། སླར་འདིར་འབྲི་བ་ཟློས་སོ་སྙམ་ན། གསལ་བར་ལེགས་རྟོགས་ཅེས་སྨོས་ཏེ་རྒྱུད་དུ་འཐོར་ཐབས་སུ་གནས་པ་དང༌། ཧ་ཅང་རྒྱ་ཆེས་པ་དང༌། གབ་པའི་ཚུལ་དུ་གནས་པ་རྣམས་འདིར་གཞན་གྱིས་གོ་བླ་བའི་ཕྱིར་ཕྱོགས་གཅིག་ཏུ་བསྡུས་པ་དང༌། ཚིག་ཚོགས་ཉུང་བ་དང༌། གབ་འཁྲུགས་མེད་ཅིང་གསལ་པོར་བྱས་པའི་ཕྱིར་ཞེས་ཟློས་སྐྱོན་སྤངས་པའོ། །འདིས་ནི་དགོས་སོགས་ཆོས་བཞི་ཡང་བསྟན་ཏེ། གསང་བའི་དེ་ཁོ་ན་ཉིད་ནི་བརྗོད་བྱའོ། །རབ་གསལ་བ་ཞེས་པ་ནི་བརྗོད་བྱེད་དོ། །བརྗོད་བྱེད་འདི་ལ་བརྟེན་ནས་བརྗོད་བྱ་དེ་སེམས་ཅན་
རྣམས་ཀྱིས་གསལ་བར་ལེགས་པར་རྟོགས་པ་ནི་དགོས་པའོ། །དེ་ལས་སེམས་ཅན་རྣམས་ཀྱིས་ལེགས་པར་རྟོགས་པ་སྟེ། གསང་བའི་དེ་ཉིད་ཀྱི་གནས་ལུགས་མངོན་སུམ་དུ་མཐོང་བར་འགྱུར་བ་ནི་ཉིང་དགོས་སོ། །འབྲེལ་བ་ནི་སྤྱི་དང་འདྲའོ། །འདི་དག་ལ་བོད་ཡུལ་གྱི་མཁས་པ་སྔོན་བྱོན་མང་པོས། ཐོག་མ་མཆོག་དགའ་བ་དང༌། ཐ་མ་དགའ་བྲལ་ཞེས་སོགས་དང༌། གསུམ་པའི་ཡེ་ཤེས་ཟག་བཅས་སམ། མཚན་བཅས་སམ། འདུས་བྱས་སྐད་ཅིག་མ་ཡིན་པ་དཔེས་མཚོན་ཞིང༌། བཞི་པའི་ཡེ་ཤེས་དེ་ལས་བཟློག་པས་དཔེ་མེད་ཅེས་སོགས་འཆད་པ་དང༌། སེམས་དག་པ་ཆོས་སྐུ་མི་རྟོག་པ། ངག་དག་པ་ལོངས་སྐུ་བདེ་བ། ལུས་དག་པ་སྤྲུལ་སྐུ་གསལ་བ་ཞེས་སོགས་འཆད་པར་སྣང་སྟེ། ཇི་ལྟར་རིགས་པར་སྦྱར་ཡང་རུང་ངོ༌།། གཉིས་པ་བཤད་པ་ཉིད་ཉེ་བར་དགོད་པ་ལ། གསང་བའི་དེ་ཁོ་ན་ཉིད་ལ་འཇུག་པའི་ཐབས་དང༌། གསང་བའི་དེ་ཁོ་ན་ཉིད་དངོས་བཤད་པའོ། །དང་པོ་ནི། གཞུང་འདིའི་ལེའུ་ཐོག་མས་བསྟན་ཏེ། དེ་ལ་གསུམ། གསང་བའི་དེ་ཁོ་ན་ཉིད་ཀྱི་ཆེ་བ། གསང་བའི་དེ་ཁོ་ན་ཉིད་ཀྱི་རང་བཞིན། དེ་རྟོགས་བྱེད་ལམ་གྱི་ཁྱད་པར་རོ། །དང་པོ་ལ་དོན་ཚན་གསུམ་ཡོད་པ་ལས། ཐོག་མ་དེ་ཁོ་ན་ཉིད་བསྟན་བཅོས་ཐམས་ཅད་ཀྱི་བརྗོད་བྱར་བསྟན་པ་ནི། རྒྱུད་རྣམས་ཀུན་ཏུ་གང་གནས་ཤིང༌། །མདོ་སྡེའི་སྡེ་སྣོད་ལ་སོགས་དང༌། །གཞན་ཡང་རིག་བྱེད་དག་གི་ངག །ཚངས་ལ་སོགས་པས་བཤད་པ་དང༌། །གང་དུའང་འདི་ནི་རྙཻད་དཀའ་བའི༌། །བསྟན་བཅོས་གང་ཡང་ཡོད་མིན་ཏེ། །ཆོས་ཀྱི་ཕུང་པོ་བརྒྱད་ཁྲི་དང༌། །བཞི་སྟོང་ཉིད་ལས་གསུངས་པ་ཡིན། །
རྒྱུད་རྣམས་ནི་སངས་རྒྱས་པའི་རྒྱུད་སྡེ་བཞིའོ། །མདོ་སྡེའི་སྡེ་སྣོད་སོགས་ནི་སྡེ་སྣོད་གསུམ་མམ་གསུང་རབ་ཡན་ལག་བཅུ་གཉིས་སོ། །རིག་བྱེད་དག་གི་ཞེས་པ་མང་པོའི་དོན་ལ་གཉིས་པའི་ཚིག་སྟེ། རིག་བྱེད་བཞི་པོ་དག་གོ །ངག་ཅེས་པས་རིག་བྱེད་ཀྱི་ཡན་ལག་རྣམས་ཀྱང་བསྟན་ལ། ཚངས་པ་ལ་སོགས་པའི་སྒྲས་ཁྱབ་འཇུག་དང༌། དབང་ཕྱུག་དང༌། ལྷ་དང༌། ཀླུ་ལ་སོགས་པ་འབྱུང་པོ་གཞན་དག་དང༌། དགེ་སྦྱོང་དང་བྲམ་ཟེ་ཆོས་འདི་ལས་ཕྱི་རོལ་དུ་གྱུར་པ་རྣམས་ཀྱིའོ། །དེ་ལྟར་ན་ཕྱི་དང་ནང་གི་བསྟན་བཅོས་གང་ཅི་ཡང་རུང་བ་དེ་དག་ལས། དེ་ཁོ་ན་ཉིད་འདི་ནི་རྙེད་དཀའ་བ་སྟེ། བརྗོད་བྱར་མི་སྟོན་པའི་བསྟན་བཅོས་དེ་ནི་གང་ཡང་ཡོད་པ་མ་ཡིན་ཏེ། སྟོན་པས་གསུངས་པའི་ཆོས་ཀྱི་ཕུང་པོ་བརྒྱད་ཁྲི་བཞི་སྟོང་གིས་ཀྱང༌། བརྗོད་བྱ་མཐར་ཐུག་གསང་བའི་དེ་ཁོ་ན་ཉིད་འདི་ཁོ་ན་གསུངས་སོ། །དེ་ཡང་རྒྱལ་བའི་གསུང་རྣམས་ཀྱི་དགོངས་པ་ནི་དེ་ཁོ་ན་ཉིད་འདིར་གཅིག་པ་ཡིན་པ་ལས། ཐེག་པ་མཆོག་གི་གཞུང་འགའ་ཞིག་ཏུ་གསལ་ཞིང་རྒྱས་པར་ཡང་བསྟན་ལ། ཐེག་པ་དམན་པར་གྲགས་པ་རྣམས་ལས་ཀྱང༌། ཧ་ཅང་གསལ་བ་མ་ཡིན་པ་དང༌། ཅུང་ཟད་བསྡུས་པ་དང༌། རྣམ་གྲངས་གཞན་གྱི་སྒོ་ནས། དེ་ཁོ་ན་ཉིད་འདི་ཡང་ནས་ཡང་དུ་གསུངས་སོ། །རིག་བྱེད་ལ་སོགས་པ་ཕྱི་རོལ་གྱི་བསྟན་བཅོས་རྩ་བ་རྣམས་ཀྱང༌། བྱེད་པ་པོ་སངས་རྒྱས་དང་བྱང་ཆུབ་སེམས་དཔའི་སྤྲུལ་པས་བྱས་པ་སྟེ། དེ་དག་གི་དོན་མ་ནོར་བར་གོ་ན། དེ་ཁོ་ན་ཉིད་རྒྱས་པར་བསྟན་པའི་ཚུལ་དུ་ཡོད་ལ། རྗེས་འབྲང་མུ་སྟེགས་བྱེད་རྣམས་དང༌།
ནང་པའི་ཡང་མདོ་རྒྱུད་ཀྱི་དགོངས་པ་ཕྱིན་ཅི་ལོག་ཏུ་འགྲེལ་བའི་གཞུང་རྣམས་ནི། དེ་ཁོ་ན་ཉིད་ཚང་ལ་མ་ནོར་པར་སྟོན་པ་མིན་ཡང༌། དམུས་ལོང་གི་ཚོགས་པས་གླང་པོ་ཆེ་ལ་རེག་པ་ལྟར་ཏེ། མཚན་ཉིད་ཀྱི་ཆ་ཤས་ཙམ་རེ་སྟོན་པར་བྱེད་ལ། སྤྱིར་ན་བསྟན་བཅོས་ཡང་དག་པ་དང་ལོག་པ་དེ་ཐམས་ཅད་ཀྱང༌། གནས་ལུགས་དེ་ཁོ་ན་ཉིད་ཀྱི་གསང་བ་འདི་ཁོ་ན་ལ་དམིགས་ཤིང༌། འདི་ལས་བརྩམས་ཏེ་སྨྲ་བར་བྱེད་པའི་ཕྱིར། བསྟན་བཅོས་ཐམས་ཅད་ལས་འདི་འཆད་དོ། །ཞེས་དང༌། དེ་ཉིད་ཤེས་པས་བརྟགས་ན། བསྟན་བཅོས་གང་ཅི་ཡང་རུང་བ་དེ་ཐམས་ཅད་ལས་དེ་ཁོ་ན་ཉིད་ཀྱི་གནས་ལུགས་འདི་རྙེད་པར་ནུས་སོ། །ཞེས་གསུངས་པ་ཡིན་ནོ། །དོན་ཚན་གཉིས་པ་དེ་ཁོ་ན་ཉིད་དེ་ཆོ་ག་སོགས་ཐབས་ཀྱི་བྱ་བྱེད་བསྟན་པ་ཐམས་ཅད་ཀྱིས་མཚོན་བྱར་བསྟན་པ་ནི། བཟླས་དང་བསམ་གཏན་དེ་བཞིན་དུ། །སྦྱིན་སྲེག་སྟོན་དང་དཀྱིལ་འཁོར་འབྲི། །སྤྱོད་པ་རྣམ་པ་སྣ་ཚོགས་དང༌། །ཕྱག་རྒྱ་འཆིང་བ་དེ་བཞིན་དུ། །བརྟུལ་ཞུགས་ཆོ་ག་སྣ་ཚོགས་དང༌། ཆོས་གོས་ལ་སོགས་རྣམས་འཛིན་པ། །མཆོད་རྟེན་ལ་སོགས་པ་ཡི་ལས། །ངེས་པར་བསྙུང་བར་གནས་པ་དང༌། །བྱ་དང་བྱེད་པོའི་དངོས་པོ་ཡི། །དངོས་པོ་ཀུན་ལ་རྟག་བསྟེན་པ། །ཞེས་སོ། །དེ་ལ་ཚིག་རྐང་ཐ་མ་ནི། འགོས་འགྱུར་ལ་མེད་ཀྱང༌། སྤྱིར་ཡོད་པ་ཉིད་ལེགས་ཤིང༌། འབྲོག་མིའི་འགྱུར་ལས། དངོས་པོ་ཀུན་ཏུ་རྟག་ཏུ་འགྲོ། །ཞེས་འབྱུང་བ་ལྟར་ལེགས་སོ། །ཡར་མར་དོན་འགྱུར་གྱི་དཔེ་འགའ་ཞིག་ལས། དངོས་པོ་ཀུན་ལ་རྟག་གྱུར་པ། །ཞེས་
ཀྱང་འབྱུང་ངོ༌། །དེ་ལ་བསམ་གཏན་ནི་ཏིང་ངེ་འཛིན་གསུམ་ལ་སོགས་པ་བསྐྱེད་རིམ་གྱི་བསམ་གཏན་དང༌། སྟོན་དང་ནི་ཆོས་སྟོན་པ་དང༌། སྤྱོད་པ་ནི་ཐུན་མོང་བ་སྦྱིན་སོགས་དང༌། ཐུན་མོང་མ་ཡིན་པ་ཉལ་བ་དང་ལྡང་བའི་རྣལ་འབྱོར་སོགས་དང༌། ཕྱག་རྒྱ་ནི་ལག་པའི་ཕྱག་རྒྱ་འཆང་བ་དང༌། བརྟུལ་ཞུགས་ནི་སྡོམ་པ་སྟེ། ཆོ་ག་ནི་དེའི་བྱ་བའོ། །དེ་ཡང་ཕྱི་རོལ་པ་རྣམས་ནི། དཀའ་ཐུབ་དཀའ་སྤྱད་ལ་སོགས་པ་དང༌། རང་སྡེའི་ཡང་ཐེག་པ་ཐུན་མོང་གི་སྡོམ་པ་དང༌། ཐུན་མོང་མ་ཡིན་པ་རིག་པའི་བརྟུལ་ཞུགས་ལ་སོགས་པའོ། །བྱ་དང་བྱེད་པོ་ཞེས་པ་ལ་བྱ་བ་ནི་བསྒྲུབ་བྱ་འབྲས་བུ་སྟེ་རིལ་བུ་ལ་སོགས་པའི་དངོས་གྲུབ་ཡིན་ལ། བྱེད་པོ་ནི་དེ་སྒྲུབ་བྱེད་ཐབས་ཏེ། དེས་ན་བསྒྲུབ་བྱ་གསང་བའི་དེ་ཁོ་ན་ཉིད་དང༌། སྒྲུབ་བྱེད་དེའི་ལམ་གྱི་དངོས་པོ་སྟེ་ཚུལ་གྱི་ཐབས་བྱ་སྤྱོད་ཀྱི་དངོས་པོ་ཀུན་ལ་གསང་བའི་དེ་ཁོ་ན་ཉིད་རྟག་ཏུ་ཁྱབ་ཅིང་འགྲོ་བའོ། །དེ་ཡང་རང་གཞན་གྱི་ཆོས་ལས་འབྱུང་བའི་ཐབས་སྣ་ཚོགས་པ་དེ་ཀུན་ཡང༌། གསང་བའི་དེ་ཁོ་ན་ཉིད་ཐོབ་པའི་ཕྱིར་རྩོམ་པ་ཡིན་པས། དེ་ཐོབ་བྱེད་ཀྱི་རིང་རྒྱུ་ཙམ་ཡིན་པ་དང༌། བཟླས་པ་ལ་སོགས་པ་ཇི་ཙམ་བསྟན་པ་དེ་རྣམས་ཀྱི་དགོངས་གཞི་ཡང་གསང་བའི་དེ་ཁོ་ན་ཉིད་དངོས་དང༌། རྟོགས་བྱེད་ཀྱི་ཐབས་ཐུན་མོང་མ་ཡིན་པ་རིམ་པ་བཞི་ལ་དགོངས་ནས་གསུངས་པའི་ཕྱིར། ལས་དེ་ཐམས་ཅད་ཀྱང་གསང་བའི་དེ་ཁོ་ན་ཉིད་ཀྱི་སྙིང་པོ་ཅན་དུ་གསུངས་སོ། །འོན་ཀྱང་ཕྱི་རོལ་གྱི་ལས་དེ་དང་དེ་རྣམས་རིམ་པ་བཞིའི་སྙིང་པོ་དང༌། བྲལ་བས་ནི་གསང་བའི་དེ་ཁོ་ན་ཉིད་
རྟོགས་པར་མི་ནུས་སོ། །གསང་བ་གྲུབ་པ་ལས་ཀྱང༌། སྒྲུབ་པོ་དེ་ཉིད་ལ་གཏད་པས། བརྟུལ་ཞུགས་མེད་ཀྱང་འགྲུབ་པར་གྱུར། །བརྟུལ་ཞུགས་བརྒྱ་ཕྲག་ངལ་བྱས་ཀྱང༌། །དེ་ཉིད་དམན་པས་འགྲུབ་མི་འགྱུར། །ཞེས་གསུངས་སོ། །དེས་ན་གོང་དུ་བསྟན་བཅོས་མཐའ་དག་གི་གསང་བའི་དེ་ཁོ་ན་ཉིད་སྟོན་པ་དང༌། འདིར་དགེ་ཆོས་ཀྱི་རིམ་པ་མཐའ་དག་ཀྱང༌། གསང་བའི་དེ་ཁོ་ན་ཉིད་ཀྱི་ལམ་ཡིན་པར་བསྟན་པས། ཆོས་ཚུལ་ཐམས་ཅད་རྒྱལ་པའི་འཕྲིན་ལས་ཁྱད་པར་ཅན་དུ་གྲུབ་ལ། འོན་ཀྱང་ཐུན་མོང་མ་ཡིན་པའི་མན་ངག་དང་བྲལ་བས། འཕྲལ་དུ་མངོན་དུ་བྱེད་པ་ནི་མ་ཡིན་ནོ། །བཟླས་པ་ལ་སོགས་པའི་ནང་གི་ངེས་དོན་ནི། དཔྱིད་ཀྱི་ཐིག་ལེར་མང་དུ་གསུངས་པ་ལྟར་ཡིན་ལ། གྲོལ་བའི་ཐིག་ལེ་ལས་ཀྱང༌། དེ་ནི་ཟབ་གསལ་གཉིས་སྦྱོར་བས། །སྦྱོར་བ་ཞེས་སུ་བཤད་པའོ། །རྩེ་གཅིག་པས་ནི་ཏིང་ངེ་འཛིན། །མཉེས་བྱེད་ཚིམ་པར་བྱེད་པས་ན། །གཏོར་མ་ཞེས་ནི་རབ་ཏུ་བྱ། །སྡིག་པ་ཞི་ཕྱིར་ཞི་བའོ། །བསོད་ནམས་ཀུན་གྱི་རྒྱས་པའོ། །ཆགས་པ་ཆེན་པོའི་དབང་དུ་འདོད། །ཐམས་ཅད་གསོད་ཕྱིར་མངོན་སྤྱོད་དོ། །རྟགས་ཆེན་དགུག་པས་དགུག་པའོ། །ཉན་ཐོས་ལ་སོགས་པ་རྣམས་ནི། །རིང་དུ་ཞི་བྱེད་བསྐྲད་པའོ། །སྔགས་པ་གང་གནས་རྣལ་འབྱོར་པས། རྟོགས་པར་ནུས་པས་བསྲུང་བའོ། །དེ་ཤེས་ཆོས་རྣམས་ངོ་བོ་ཀུན། །གཉིས་མེད་གཅིག་རྟོགས་མིག་རྣོན་ནོ། །རྣམ་པར་རྟོག་པ་མ་ལུས་རྣམས། །ཡེ་ཤེས་ངོ་བོར་དེ་འགྱུར་བས། །དུག་གཞོམ་པ་ཡི་ཆོ་གའོ། །ཕུང་པོ་ལ་སོགས་བླུན་པོའི་རྫས། །ཡེ་ཤེས་མེས་བསྲེགས་སྦྱིན་བསྲེག་གོ །
ཟབ་པ་དང་ནི་གསལ་བ་ཡིས། །ཆོས་ཀུན་བསྙེམས་པས་ཐིག་གདབ་པོ། །གསལ་བ་འཇའ་ཚོན་ལྟ་བུའི་སྐུས། །ཉི་ཤུ་རྩ་གཅིག་ཆོས་ཀུན་ལ། །རང་བཞིན་གྱིས་བཟུང་མཚོན་བཏབ་པའོ། །དེ་ཡི་ངོ་བོར་ཀུན་གནས་པ། །སློབ་དཔོན་སློབ་མ་ཀུན་ཞུགས་པའོ། །མིང་ཙམ་གྱིས་ནི་ལོགས་བྱུང་ཡང༌། །རང་རིག་བདེ་བས་རྟོགས་པས་ན། །དབང་བསྐུར་ཞེས་ནི་བཤད་པ་ཡིན། །དེ་ལ་སོགས་པ་མཐའ་ཡས་ཀྱི། །ཆོས་ཀུན་མིང་ཅན་དེ་ཉིད་མཆོག །ཅེས་གསུངས་སོ། །འོ་ན་འདི་དག་སྒྲ་བཤད་མཚུངས་པ་ཙམ་ཡིན་གྱི། དགོངས་པས་བསྟན་པ་དང༌། དགོངས་གཞི་གཉིས་མ་འབྲེལ་བར་འགྱུར་རོ་སྙམ་ན་མ་ཡིན་ཏེ། དཔེར་ན། ཕྱི་རོལ་གྱི་བཟླས་པ་དང༌། ནང་གི་བཟླས་པ་གཉིས་བྱ་བྱེད་མཚུངས་པས་མ་འབྲེལ་བ་མ་ཡིན་ལ། ནང་གི་བཟླས་པ་ཆེས་ལྷག་པས་བཟང་ངན་བྱེ་བྲག་མེད་པའང་མ་ཡིན་ནོ། །དོན་ཚན་དེ་གཉིས་ཀྱི་དོན་བསྡུ་བ་ནི། སེམས་ཅན་གང་ཞིག་ཅིས་འདུལ་བ། །དེ་རྣམས་ལ་དེའི་གཟུགས་བཟུང་ནས། །སེམས་ཅན་བསམ་པའི་ཁྱད་པར་གྱིས། །རྡོ་རྗེ་འཛིན་པས་གང་གསུངས་པ། །ཞེས་ཏེ་དེའི་གཟུགས་ཞེས་པ་ནི། གང་ལ་གང་འདུལ་གྱི་སྐུ་ཚངས་པ་དང༌། ཐུབ་པ་སེར་སྐྱ་ལ་སོགས་པ་དང༌། ཆགས་བྲལ་གྱི་སྐུ་དང་འཁོར་ལོས་བསྒྱུར་བ་དང༌། ཧེ་རུ་ཀ་ལ་སོགས་པའོ། །དོན་ཚན་གསུམ་པ་དེ་ཁོ་ན་ཉིད་རྟོགས་པའི་ཕན་ཡོན་ནི། གང་ཞིག་ཤེས་པས་ལུས་ཅན་རྣམས། །འགྱུར་བ་མེད་པའི་ངོ་བོ་ཡི། །བྱང་ཆུབ་སྙིང་པོ་བླ་མེད་པར། ཁྱིམ་ན་གནས་ཤིང་མྱུར་འགྲོ་བའོ། །ཞེས་མདོར་བསྟན་ནས། དེ་ཉིད་རྒྱས་པར་བཤད་པ་ནི། བྲམ་ཟེ་རྒྱལ་
རིགས་ལ་སོགས་རིགས། །ལྷ་སོགས་སྐྱེ་གནས་ལས་བྱུང་བ། །ཆགས་དང་འཇིག་པའི་དུས་དག་གི །སྐྱེ་དང་གནས་དང་འཇིག་པ་སྟེ། །རིགས་ངན་སྨིག་མ་མཁན་ལ་སོགས། །གང་གཞན་དམན་ལ་འཇུག་པ་རྣམས། །མ་རུངས་སྲོག་ནི་གཅོད་པ་དང༌། །གང་ཡང་རྫུན་སྨྲ་ལ་བརྩོན་པ། །རྟག་ཏུ་གཞན་གྱི་བུད་མེད་བསྟེན། །དེ་བཞིན་ཚིག་རྩུབ་སྨྲ་བ་དང༌། །དམན་འགྲོ་སློང་མོ་བྱེད་པ་དང༌། །གཞན་གྱི་ནོར་ལ་ལོངས་སྤྱོད་ཅིང༌། །ཆགས་སོགས་ཉོན་མོངས་དྲ་བ་ཡིས། །འཁོར་བའི་དགོན་པར་བཅིངས་པ་དག །དེས་ཀྱང་གང་དུ་ས་མཆོག་ནི། །ཇི་ལྟར་འདོད་པ་ཐོབ་འགྱུར་བའོ། །ཞེས་པ་ལ། གསང་བའི་དེ་ཁོ་ན་ཉིད་གང་ཞིག་ཤེས་ཤིང་རྟོགས་པས། ལུས་ཅན་རྣམས་བླ་ན་མེད་པའི་བྱང་ཆུབ་ཏུ་མྱུར་དུ་འགྲོ་བ་སྟེ་ཐོབ་པར་འགྱུར་བ་ཡིན་ནོ། །དེ་ལ་བྱང་ཆུབ་ཀྱི་ངོ་བོ་ནི་འགྱུར་བ་མེད་པ་སྟེ། གཞིའི་ཆོས་ཉིད་ཅེས་འདོགས་པའི་ཡུལ་ཡིན་ལ། འབྲས་བུའི་དུས་སུའང་རང་བཞིན་མི་འགྱུར་བའོ། །དེ་ལྟར་ཡང༌། སྐྱེ་བ་མེད་ཅིང་འཇིག་པ་མེད། །གནོད་མེད་རྒ་བ་མེད་པ་སྟེ། །དེ་ནི་རྟག་དང་བརྟན་པའི་ཕྱིར་དང༌། །ཞི་བའི་ཕྱིར་དང་གཡུང་དྲུང་ཕྱིར། །ཞེས་པ་དང༌། མི་ཟད་ཡོན་ཏན་དང་ལྡན་ཕྱིར། །གཞན་གྱུར་མིད་བདག་རྟག་པའི་དོན། །མཐའ་ཡི་མུ་དང་མཚུངས་པའི་ཕྱིར། །སྐྱབས་ཀྱི་བདག་ཉིད་བརྟན་པའི་དོན། །རྣམ་པར་མི་རྟོག་རང་བཞིན་ཕྱིར། །གཉིས་མེད་ཆོས་ཉིད་ཞི་བའི་དོན། །མ་བཅོས་ཡོན་ཏན་ཉིད་ཕྱིར་ན། །འཇིག་མེད་དོན་ནི་གཡུང་དྲུང་ཉིད། །ཅེས་གསུངས་པ་ལྟར་རོ། ཁྱིམ་ན་གནས་བཞིན་ཞེས་པ་ནི། ཁྱིམ་གྱི་འོག་
ན་གནས་པའི་གཏེར། ས་འཐུག་པོས་བསྒྲིབས་ཏེ་མ་མཐོང་བ། ཕྱིས་ས་བརྐོས་པ་ན། ལག་ཏུ་ཐོབ་ཅིང་སྤྱད་བྱར་ཡོད་པ་བཞིན། བྱང་ཆུབ་བམ་སངས་རྒྱས་རང་ལ་གནས་ཀྱང་གློ་བུར་གྱི་དྲི་མས་བསྒྲིབས་ཏེ་མངོན་དུ་མ་གྱུར་པ་ལམ་བསྒོམས་པས་དྲི་མ་དག་སྟེ། རང་ལ་གནས་པ་དེ་ཉིད་ཐོབ་པར་འགྱུར་བའོ། །ཞེས་པའོ། །བྲམ་ཟེ་ཞེས་སོགས་ཀྱིས་འཇིག་རྟེན་ཐ་སྙད་ཀྱི་རིགས་གང་ཡིན་ཡང་རུང་བ་དང༌། མ་རུང་སྲོག་གཅོད་ཅེས་སོགས་ཀྱིས། སྔར་སྡིག་པའི་ལས་ཆེན་པོ་བྱས་ཀྱང༌། འདི་བསྒོམ་ན་གྲོལ་བར་འགྱུར་རོ། འཆགས་དང་འཇིག་པའི་སོགས་ལ་སྣོད་འཆགས་པའི་བསྐལ་པ་དང༌། འཇིག་པའི་བསྐལ་པའི་དུས་ཡིན་ཡང་རུང༌། སེམས་ཅན་སྐྱེ་བ་དང་གནས་པ་དང་འཇིག་པའི་སྐབས་གང་དུ་ཡིན་ཡང་རུང་སྟེ། ཕྱི་བསྐལ་པའི་དུས་དང༌། ནང་ལུས་ཀྱི་གནས་སྐབས་ལ་མ་རེག་སྟེ། དེ་ཁོ་ན་ཉིད་ནམ་རྟོགས་པའི་ཚེ་གྲོལ་ལོ་ཞེས་གོང་མ་རྣམས་ཕལ་ཆེར་འཆད་ལ། ཡང་ཁ་ཅིག་སེམས་ཅན་དེ་དག་འཆགས་པ་སྟེ་སྐྱེ་བའི་རིམ་པ་དང༌། འཇིག་པ་སྟེ་འཆི་བའི་རིམ་པ་གཉིས་ཀྱིས་རབ་ཏུ་ཕྱེ་བའི་སྐྱེ་བའི་སྲིད་པ་དང༌། གནས་པ་སྟེ་འཚོ་བའི་གནས་སྐབས་དང༌། འཇིག་པ་སྟེ་འཆི་བའི་གནས་སྐབས་གསུམ་པོ་གང་རུང་དུ་གྲོལ་བར་འགྱུར་ཞེས་འཆད་དོ། །གཉིས་ཀར་ཡང་མི་འགལ་མོད་ཀྱི་སྔ་མ་ལེགས་པར་མཐོང་ལ། འོན་ཀྱང་ཚིག་ཕྱི་མ་འདིས་ཚེ་འདིར་འཚང་རྒྱ་བ་དང༌། འཆི་ཁར་འཚང་རྒྱ་བ་དང༌། སྐྱེ་བ་བླངས་མ་ཐག་ཏུ་འཚང་རྒྱ་བ་རྣམས་ངེས་པར་བསྟན་པ་ཡིན་ཅིང༌། དེའི་ཤུགས་ལ་
བར་དོར་འཚང་རྒྱ་བ་ཡང་བསྟན་ཏོ། །འདིའི་འཚང་རྒྱ་བ་ཡང་ཟུང་འཇུག་ཐོབ་པ་ལ་བྱེད་པ་ཡིན་ནོ། དམན་ལ་འཇུག་པ་ནི་བྱ་བ་ངན་པ་ཁྱི་ཤ་འཚེད་པ་ལ་སོགས་པའོ། །དམན་འགྲོ་ནི་དབུལ་ཞིང་འཕོངས་པའོ། ནོར་ལ་ལོངས་སྤྱོད་ཅེས་པ་ནི་མ་བྱིན་པར་བླངས་པའོ། །ཉོན་མོངས་དྲ་བ་ནི་ཉོན་མོངས་ཤིན་ཏུ་ཤུགས་དྲག་པོ་དང་ལྡན་པའོ། །དེ་ལྟར་ན་རིགས་གང་ཡིན་ཡང་རུང༌། སྔོན་ལས་ཅི་ལྟ་བུ་བྱས་ཀྱང་རུང༌། དུས་ཚོད་གནས་སྐབས་ཇི་འདྲ་ཞིག་ལའང་འདྲ་སྟེ། རིམ་པ་བཞིའི་ལམ་བསྒོམས་པས་གསང་བའི་དེ་ཁོ་ན་ཉིད་རྟོགས་པར་འགྱུར་བ་ལ་ཐེ་ཚོམ་མེད་དེ། རིགས་བཟང་ངན་དང༌། དུས་བཟང་ངན་དང༌། སྔོན་གྱི་སྤྱོད་པ་བཟང་ངན་ལ་མ་ལྟོས་པའོ། །ས་མཆོག་ཅེས་པ་ནི་ཟུང་འཇུག་གི་ཡེ་ཤེས་སོ། །ཇི་ལྟར་འདོད་པ་ནི་དུས་མྱུར་བུ་ལ་ཇི་ལྟར་རིགས་པ་ཞེས་པའི་དོན་ནོ། །གཉིས་པ་གསང་བའི་དེ་ཁོ་ན་ཉིད་ཀྱི་རང་བཞིན་ངོས་བཟུང་བ་ནི། ཆོས་དང་ལོངས་སྤྱོད་སྤྲུལ་པ་ཡི། །ཞེས་པ་ནས། རིན་ཆེན་མཆོག་ནི་བརྟགས་པར་བྱ། ཞེས་པའི་བར་ཏེ། ཆོས་དང་ལོངས་སྤྱོད་སྤྲུལ་པ་ཡི། །སྐུ་གསུམ་ཆོས་ཀྱི་རང་བཞིན་ཅན། །ཡོན་ཏན་སྐྱོན་གྱི་དོན་ངེས་པ། །དེ་ནི་བདག་གིས་བརྟན་པར་བྱ། །འདིས་ནི་རྟོགས་བྱ་གནས་ལུགས་གསང་བའི་དེ་ཁོ་ན་ཉིད་ངོས་བཟུང་བ་སྟེ། དེ་ཡང་གང་ཞེ་ན། ཐུགས་ཆོས་སྐུ་དང༌། གསུང་ལོངས་སྤྱོད་རྫོགས་སྐུ་དང༌། སྐུ་སྤྲུལ་སྟེ། སྐུ་གསུམ་ག་ལྷན་སྐྱེས་ཀྱི་བདེ་ཆེན་ཆོས་སྐུའི་རང་བཞིན་དུ་མཉམ་པ་ཉིད་ནི་སྐུ་གསུང་ཐུགས་ཀྱི་གསང་བ་ཡིན་ལ། དེ་ཉིད་ཤེས་བྱ་ཐམས་ཅད་ཀྱི་གནས་ལུགས་ཡིན་པའི་ཕྱིར། དེ་ཁོ་ན་ཉིད་ཡིན་པས་གསང་བའི་
དེ་ཁོ་ན་ཉིད་དོ། །དེ་ལ་ཡོན་ཏན་གྱི་དོན་ངེས་པ་ནི་དེ་བཞིན་གཤེགས་པའི་ཡོན་ཏན་མ་ལུས་པ་ཆོས་ཉིད་དེ་ལ་ངོ་བོ་ཉིད་ཀྱི་གདོད་མ་ནས་གནས་པ་ཡིན་པས། ལམ་བསྒོམ་པ་ན་ཡོན་ཏན་མངོན་འགྱུར་མཐར་ཐུག་དེ་ནམ་དུ་ཡང་མི་ཉམས་པ་དང༌། སྐྱོན་གྱི་ངེས་པ་ནི༌། སྒྲིབ་གཉིས་བག་ཆགས་སྣང་བ་དང་བཅས་པ་ཐམས་ཅད་ཆོས་ཉིད་དེ་ལ་གདོད་མ་ནས་གོས་མ་མྱོང་བའི་ཕྱིར། ལམ་བསྒོམས་པས་དྲི་བ་རྩ་བ་ནས་སྤངས་པ་དེ་ཉིད། སླར་མི་ལྡོག་པར་འགྱུར་བའི་དོན་ཡིན་ལ། དེ་ལྟ་བུའི་གསང་བའི་དེ་ཁོ་ན་ཉིད་དེ་ནི། ནག་པོ་སྤྱོད་པ་པ་བདག་གིས་བསྟན་པར་བྱའོ་ཞེས་པ་སྟེ། དེ་མ་ཐག་པ་འདིར་ནི་ཅུང་ཟད་ཙམ་དང༌། ལེའུ་གཉིས་པ་སོགས་ལས་རྒྱས་པར་སྟོན་ཞེས་པའི་དོན་ནོ། །དེ་ཡང་ཆོས་དབྱིངས་སྤྲོས་པ་དང་བྲལ་བའི་ཡེ་ཤེས་ཅིག་ཉིད་སྐུ་དང་ཞིང་ཁམས་ལོངས་སྤྱོད་སོགས་རྣམ་པ་ཐམས་ཅད་པར་འཆར་བ་ནི་སྐུ་རྡོ་རྗེ་དང༌། དེ་ཉིད་གསུང་སྒྲ་སྐད་ཐམས་ཅད་པར་འཆར་བ་ནི་གསུང་རྡོ་རྗེ་དང༌། དེ་ཉིད་ཤེས་བྱ་ཐམས་ཅད་ཀྱི་ཇི་ལྟ་བ་རང་བཞིན་དབྱེར་མེད་ཀྱི་ཚུལ་གྱིས་མཁྱེན་ཅིང༌། མི་རྟོག་ཡེ་ཤེས་རྣམ་པ་ཐམས་ཅད་པས་ཇི་སྙེད་པ་གཅིག་ཅར་མ་འདྲེས་པར་མཁྱེན་པ་ནི་ཐུགས་རྡོ་རྗེ་ཡིན་ལ། དེ་རྣམས་ལ་འཆར་བའི་རྣམ་པ་མཐའ་ཡས་པ་དེ་ཡང་བདེ་ཆེན་ཆོས་སྐུ་ཁོ་ནའི་ངོ་བོ་ཉིད་ཡིན་པའི་ཕྱིར། སྐུ་གསུམ་ཆོས་སྐུར་མཉམ་ཞེས་གསུངས་པའི་དོན་དེ། འདིའི་སྐུ་གསུམ་ནི་གནས་ཚུལ་གྱི་སྐུ་གསུམ་ཡིན་ནོ། དཔལ་ལྡན་འདུས་པའི་ལམ་གྱི་ནི། །རིམ་པ་གཉིས་ཀའི་ངོ་བོ་ལ། དཔལ་ལྡན་འདུས་པ་ལྷག་ཡིད་འོང༌། །
རྒྱུད་རྣམས་ཀུན་སོན་གཙོ་བོ་ཡིན། །དུས་ནི་རྣམ་བཞིའི་དབྱེ་བ་ཡི། །རྒྱུད་ནི་རྣམ་པ་བཞིར་འགྱུར་ཏེ། །རྒོད་པ་དང་ནི་བལྟས་པ་དང༌། །དེ་བཞིན་གཞན་ནི་ལག་བཅངས་དང༌། །གཉིས་གཉིས་སྤྲོད་པ་བཞི་པ་སྟེ། །དེ་དག་རྒྱུད་ནི་རྣམ་པ་བཞི། །འདུས་པའང་རྣམ་པ་གཉིས་གསུངས་ཏེ། བསྐྱེད་དང་རྫོགས་བྱུང་རིམ་པའོ། །རྣལ་འབྱོར་བསྐྱེད་པར་བསྟན་པ་སྟེ། །རྫོགས་པ་རྣལ་འབྱོར་མ་རུ་བརྗོད། །དབང་པོ་གཉིས་ཀའི་སྙོམས་འཇུག་པ། །འདུས་པ་ཞེས་བྱར་རྣམ་པར་བརྗོད། །འདིར་ནི་གསང་བའི་དེ་ཁོ་ན་ཉིད་དེ་རྟོགས་པའི་ཐབས་ནི་འདུས་པའི་རྒྱུད་ཀྱི་ལམ་མོ། །ཞེས་པའོ། །དེ་ལ་འདུས་པའི་རྒྱུད་ནི་གསང་བ་འདུས་པ་སྟེ། དེཡང་བརྗོད་བྱེད་ཚིག་གི་གསང་འདུས་ལེའུ་བཅོ་བརྒྱད་དང་ལྡན་པ་ཁོ་ན་ལ་མི་བཟུང་སྟེ། བརྗོད་བྱ་དོན་གྱི་རྒྱུད་གསང་བ་འདུས་པའི་ལམ་གྱིས་བསྡུས་པ་ལ་བཟུང་ངོ༌། །དེ་ཉིད་ཀྱི་ཕྱིར་ན་འདུས་པ་ནི་བདེ་སྟོང་གཉིས་སུ་མེད་པའི་ལམ་ཡིན་པས། རྣལ་འབྱོར་བླ་ན་མེད་པའི་རྒྱུད་མཐའ་དག་གི་བརྗོད་བྱའི་དོན་དང༌། ཆ་ཤས་ཀྱི་སྒོ་ནས་ཐེག་པ་ཐམས་ཅད་ཀྱི་སྙིང་པོར་ཡང་འགྱུར་ཞེས་བྱའོ། །དཔལ་ལྡན་ཏེ་ཕུན་སུམ་ཚོགས་པ་ཐམས་ཅད་ཀྱི་གཞི་འདུས་པ་བདེ་སྟོང་གཉིས་སུ་མེད་པའི་ལམ་གྱི་ནི་ལམ་ཐམས་ཅད་ཀྱི་སྙིང་པོར་བྱས་ཏེ་རིམ་པ་གཉིས་ཀར་གྱི་དུས་སུ། ལམ་གྱི་ངོ་བོ་དཔལ་ལྡན་འདུས་པ་བདེ་སྟོང་དེ་ནི་ལྷག་པར་ཡིད་དུ་འོང་བ་སྟེ་མཆོག་གམ་ལམ་གྱི་གཙོ་བོ་ཡིན་ལ་ལྷའི་རྣམ་པ་ལ་སོགས་པ་གཞན་རྣམས་ནི་ལམ་གྱི་ཡན་ལག་གོ །རྒྱུད་རྣམས་ཀུན་སོན་གཙོ་བོ་ཡིན། །ཞེས་པ་ནི་འབྲོག་
འགྱུར་ལས། ཐམས་ཅད་རྒྱུད་དུ་འགྲོ་བའི་གཙོ། །ཞེས་བསྒྱུར་རོ། །བདེ་སྟོང་གི་ལམ་དེ་ནི་རྒྱུད་ཐམས་ཅད་ཀྱི་གཙོ་བོ་དང༌། རྒྱུད་ཐམས་ཅད་ལ་འགྲོ་བའི་ཁྱབ་བྱེད་ཡིན་ཞེས་པ་སྟེ། རྒྱུད་ཅེས་བྱ་བ་ཆོ་ག་ཡིན་ལ། ཆོ་གའི་དོན་ཡང་སྐབས་འདིར་ལམ་ཡིན་པས། བྱང་ཕྱོགས་དང་ཕྱིན་བཅུ་ལ་སོགས་པ་ལམ་ཐམས་ཅད་ཀྱི་གཙོ་བོ་དང༌། དགེ་ཆོས་དེ་ཐམས་ཅད་ཀྱང་འདིའི་མཚན་ཉིད་ཀྱི་ཆ་ཤས་ལ་བརྟེན་པས་ན། འདི་ཉིད་ལམ་ཐམས་ཅད་ཀྱི་སྙིང་པོར་ཁྱབ་པ་ཡིན་ནོ། །རྒྱུད་ཅེས་པའི་དོན་ནི་དུས་རྣམ་པ་བཞིའི་དབྱེ་བས། རྒྱུད་ཀྱང་རྣམ་པ་བཞིའོ་ཞེས་པ་ལ། སྔ་མ་རྣམས་རྫོགས་ལྡན་ལ་སོགས་པ་དུས་བཞི་དང༌། བྱ་བ་ལ་སོགས་པ་རྒྱུད་བཞི་དང༌། རྒོད་པ་ལ་སོགས་པའི་བདེ་བ་བཞི་སྦྱོར་བའི་བཤད་པ་མཛད་པ་བཤད་ཡམས་ཙམ་ལ་འགལ་བ་མེད་ནའང༌། དེ་ཙམ་ཁོ་ནས་གཞུང་དོན་རྐང་ཚུགས་པར་མ་བྱུང་ངོ༌། །དེས་ན་དུས་བཞི་ནི་སྐད་ཅིག་མ་བཞི་ཡིན་ལ། རྒྱུད་བཞི་ནི་ལམ་གྱི་མངོན་པར་རྟོགས་པ་བཞི་ཡིན་ནོ། །དེ་ཡང་རྣམ་པ་སྣ་ཚོགས་པའི་སྐད་ཅིག་མས་མཚོན་པ། བལྟས་པའི་བདེ་བ་དང་མཚུངས་པ་དགའ་བའི་ས་དང༌། རྣམ་པར་སྨིན་པས་མཚོན་པ་རྒོད་པའི་བདེ་བ་དང་མཚུངས་པ་མཆོག་དགའི་ས་དང༌། དེ་བཞིན་དུ་གཞན་ཡང་རྣམ་ཉེད་ཀྱིས་མཚོན་པ་ལག་བཅངས་ཀྱི་དགའ་བ་ལྟ་བུ་ཁྱད་དགའི་ས་དང༌། མཚན་བྲལ་གྱིས་མཚོན་པ་གཉིས་གཉིས་སྤྲོད་པ་དང་མཚུངས་པའི་བདེ་བ་སྟེ། བཞི་པ་ནི་ལྷན་ཅིག་སྐྱེས་པའི་སའོ། །དེ་ཡང་རིགས་དང་མིང་མཐུན་པའི་དབང་དུ་ནི་བཞི་ཡིན་ལ།
སོ་སོར་ཕྱེ་ན་ཡས་བབས་ཀྱི་ས་གཞི་དང༌། མས་བརྟན་གྱི་ས་གཞིའམ་བཅུ་དྲུག་གོ །དགའ་བའི་ས་མ་ཐོབ་གོང་གི་རྫོགས་རིམ་རྣམས་ཀྱང་དེ་དག་གི་རྒྱུ་ཡིན་པའི་ཕྱིར་དེ་དག་གི་ཁོངས་སུ་བསྡུའོ། །དེ་བཞིན་དུ་ཟུང་འཇུག་ཐོབ་པ་ཕན་ཆད་དེ་བཞི་ཅར་གྱི་རང་བཞིན་ཡིན་ལ། བསྐྱེད་པའི་རིམ་པ་ཡང་དེ་དག་གི་དག་པ་ཅན་གྱི་ཕྱིར་རིམ་པ་གཉིས་ཀ་ལ་རྒྱུད་བཞིས་ཁྱབ་པ་ཡིན་ལ་ཅིའི་ཕྱིར་དགའ་བའི་ས་བཞི་ལ་རྒྱུད་ཅེས་བྱ་ན། འཁོར་ལོ་བཞི་སོགས་བཞི་ཚན་གྱི་ཆོས་རྣམས་དང་ཕན་ཚུན་དུ་འབྲེལ་ཞིང་ས་དེ་རྣམས་ཉིད་རྒྱུ་འབྲས་ཀྱི་ཚུལ་གྱིས་ཕྲེང་ཆགས་སུ་འབྲེལ་བ་དང༌། གཞི་དང་འབྲས་བུའི་སྐུ་བཞི་དང་ཡང་འབྲེལ་པའི་ཕྱིར། ཐགས་ཀྱི་རྒྱུད་ལྟར་འབྲེལ་བས་ན་རྒྱུད་དེ། ཐབས་རྒྱུད་ཀྱི་གཙོ་བོ་ཡིན་པའི་ཕྱིར་ཡང་ངོ༌། ། འདུས་པ་ཞེས་པའི་དོན་གྱི་དབང་དུ་བྱས་ནས། འདུས་པ་བདེ་སྟོང་ཟུང་དུ་འཇུག་པ་ཡང༌། དངོས་བཏགས་མ་ཕྱེ་ན་རྣམ་པ་གཉིས་སུ་འགྱུར་ཏེ། བསྐྱེད་རིམ་གྱི་འདུས་པ་དང༌། རྫོགས་པར་བྱུང་བའི་འདུས་པའི་རིམ་པའོ། །དེ་ཡང་རྟོག་པ་དང་འབྲེལ་བའི་ལྷའི་རྣལ་འབྱོར་དང༌། རྩ་དང་རླུང་དང་དང་ཐིག་ལེ་དང་ཕྱག་རྒྱའི་རྣལ་འབྱོར་ལ་སོགས་པ་དང༌། དེས་མཚོན་པའི་བསོད་ནམས་ཀྱི་ཚོགས་རྣམས་ནི་རྣལ་འབྱོར་ཏེ་ཐབས་ཀྱི་ཕྱཽགས་ཡིན་ལ། དེ་ཉིད་སྤྲོས་པ་དང། བྱ་བ་དང༌། སྩོལ་བ་དང༌། ཀུན་རྫོབ་པའི་འབྲེལ་བ་ཅན་གྱི་ཕྱིར་བསྐྱེད་པའི་རིམ་པ་ཞེས་བྱ་བར་བསྟན་ཅིང། དེ་ཡང་ལས་ཀྱི་ཕྱག་རྒྱ་དང༌། རྟོག་དཔྱོད་དང་འབྲེལ་བའི་སྟོང་པ་སྟེ་བདེ་
སྟོང་རྗེས་མཐུན་པས་བྱིན་གྱིས་བརླབས་པའམ། དེས་ཉེ་བར་མཚོན་པའི་བདེ་སྟོང་དངོས་ཀྱིས་རྒྱས་ཐེབས་པའང་ཡོད་དེ། དེ་ནི་བསྐྱེད་རིམ་གྱི་འདུས་པ་བདེ་སྟོང་ངོ༌། །དཔེའི་ལྷན་ཅིག་སྐྱེས་པས་ཉེ་བར་མཚོན་པར་བྱས་པའི་དོན་རྩ་ཐིག་རླུང་གསུམ་འགྱུར་བ་མེད་པར་བྱས་པའི་བདེ་བ་ནི། གདོད་ནས་སྟོང་པ་ཉིད་དང་ཟུང་དུ་འཇུག་པའི་ངང་ལ་རྩེ་གཅིག་ཏུ་གནས་པའི་ཕྱིར་རྣལ་འབྱོར་མ་སྟེ་ཤེས་རབ་ཡིན་ལ། དེ་ནི་རྫོགས་རིམ་གྱི་འདུས་པ་བདེ་སྟོང་ཟུང་འཇུག་གོ །འདིར་བསྐྱེད་རིམ་དང་རྫོགས་རིམ་ཟུང་དུ་འཇུག་པ་འདུས་པར་འཆད་པ་ནི་སྤྱིར་མི་འགལ་ཡང་གཞུང་དེའི་ཚིག་དོན་མ་ཡིན་ཏེ། དེ་ལྟར་ན་འདུས་པ་གཅིག་ཏུ་འཆད་དགོས་པ་ལས་གཉིས་ཞེས་གསུངས་པའི་ཕྱིར་རོ། །གཞན་ཡང་དབང་པོ་གཉིས་ཀྱི་སྙོམས་པར་འཇུག་པ་ནི་འདུས་པ་ཞེས་བྱའོ། །དེ་ཡང་དཔེའི་དབང་པོ་དང༌། རྒྱུའི་དབང་པོ་དང༌། རང་བཞིན་གྱི་དབང་པོ་སྟེ་གསུམ་ལས། དང་པོ་ནི། ཐབས་ཤེས་ཀྱི་རྡོ་རྗེ་པདྨའི་སྣ་རྩེ་ལ། དེའི་རྩ་དང་རླུང་དང་ཐིག་ལེ་རྣམས་ཏེ། དེ་དག་ཁ་སྦྱོར་ལས་ཐོབ་པའི་དཔེའི་ལྷན་སྐྱེས་ནི་འདུས་པའོ། །གཉིས་པ་ནི་རང་ལུས་ལ་རྩ་འཁོར་ལོ་སོ་སོའི་པདྨ་རྣམས་སུ་རླུང་དང་ཐིག་ལེའི་རྡོ་རྗེ་འདུས་པའི་ལྷན་ཅིག་སྐྱེས་པ་ནི་འདུས་པའོ། །གསུམ་པ་ནི་སྟོང་པ་ཉིད་རྣམ་པ་ཐམས་ཅད་པའི་པདྨ་དང༌། ཐིག་ལེ་མི་འགྱུར་བའི་རྡོ་རྗེ་རོ་གཅིག་ཏུ་གྱུར་པས་སྙོམས་པར་ཞུགས་པ་ནི། ཡང་དག་པའི་ལྷན་ཅིག་སྐྱེས་པ་སྟེ་འདུས་པའོ། །དེ་ལྟར་ན་བདེ་སྟོང་ལྷན་ཅིག་སྐྱེས་པའི་ལམ་དེ་ཡང་གསང་བའི་དེ་ཁོ་ན་ཉིད་ཅེས་བྱ་སྟེ་གནས་ལུགས་དང་རྣམ་པ་མཐུན་པར་སྒོམ་པའི་རིམ་པ་
ཡིན་པས་སོ། ལམ་དེས་གནས་ལུགས་ཇི་ལྟར་མངོན་དུ་བྱེད་པའི་ཚུལ་ནི། སངས་རྒྱས་བྱང་ཆུབ་སེམས་རྣམས་དང༌། །དེ་བཞིན་མཁའ་འགྲོ་མ་རྣམས་དང༌། །ཨཱ་ལི་ཀཱ་ལིར་ལྡན་པ་དག །མངོན་པར་བརྗོད་པ་གང་དུ་འཇུག །འདི་ཉིད་དུ་ནི་ཡེ་ཤེས་ཀྱི། །རིན་ཆེན་མཆོག་ནི་བརྟགས་པར་བྱ༌། །རང་བཞིན་གནས་ལུགས་སངས་རྒྱས་དང་བྱང་ཆུབ་སེམས་དཔའ་ཞི་ཁྲཽ་དང༌། མཁའ་འགྲོ་མ་སྟེ་ལྷ་མོའི་ཚོགས་ཀྱི་དཀྱིལ་འཁོར་དུ་དང༌། ཨཱ་ལི་ཀཱ་ལི་སྟེ་ཐབས་ཤེས་ཀྱི་རང་བཞིན་གཞོམ་མེད་དོན་དམ་པའི་ཡི་གེ་དང་ལྡན་པ་སྟེ་གདོད་ནས་གནས་པ་ཡིན་ལ། དེ་ཉིད་དྲི་མས་བསྒྲིབས་པ་བསལ་བའི་དོན་དུ་ལམ་ལྷན་ཅིག་སྐྱེས་པ་བསྒོམས་པས་སངས་རྒྱས་བྱང་ཆུབ་སེམས་དཔའ་ལ་སོགས་པར་མངོན་པར་བརྗོད་པའི་གཞི། གནས་ཚུལ་གྱི་ཡེ་ཤེས་གང་ཡིན་པ་དེར་འཇུག་པར་འགྱུར་རོ། །དེ་ཡང་ཕུང་པོ་རྣམས་བདེ་ཆེན་དུ་བཅུག་པས་སངས་རྒྱས་དང༌། དབང་པོ་རྣམས་ཀྱང་དེར་བཅུག་པས་བྱང་སེམས་དང༌། རྩ་རྣམས་དེར་བཅུག་པས་མཁའ་འགྲོ་མ་དང༌། རོ་རྐྱང་ནས་རྒྱུ་བའི་ཐ་མལ་ལས་རླུང་ཨཱ་ལི་ཀཱ་ལིའི་མཚན་ཉིད་ཅན་རྣམས་ཀྱང་དེར་བཅུག་པས། དོན་དམ་པའི་ཡི་གེ་རྣམས་ལ་འཇུག་ཅིང་ཐོབ་པར་འགྱུར་རོ། །འདིས་སྐུ་དང་གསུང་ལ་འཇུག་ཚུལ་བསྟན་ལ། ཐུགས་བདེ་སྟོང་ལ་འཇུག་ཚུལ་ཞོར་ལ་གོ་བའི་དབང་དུ་མཛད་དོ། །དེ་བས་ན་ཐེག་པ་བླ་ན་མེད་པ་འདི་ཉིད་དུ་ནི་གནས་ལུགས་དང་ལམ་གྱིས་བསྡུས་པའི་ཡེ་ཤེས་ཀྱི་རིན་པོ་ཆེ་ཆོས་ཐམས་ཅད་ཀྱི་མཆོག་ཏུ་གྱུར་པ་དེ་ཉིད་རྟག་པར་བྱ་བ་སྟེ་བརྟག་དཔྱད་བྱས་ནས་བླང་བར་བྱ་བ་ཡིན་ནོ། །འདིར་བརྟག་པར་བྱ་ཅེས་པ་བཤད་པར་དམ་བཅའ་བ་མ་ཡིན་ནོ། །གསུམ་
པ་དེ་རྟོགས་བྱེད་ལམ་གྱི་ཁྱད་པར་བཤད་པ་ནི། སྲེག་དང་བཅད་དང་བརྡར་བ་ཡི། མཁས་པ་དག་གིས་གསེར་བཞིན་དུ། །ཡིད་ཆེས་རྣམ་པ་བཞི་ཡིས་ནི། །ལྷན་ཅིག་སྐྱེས་པ་བརྟན་པར་བཟུང༌། །སེམས་ཅན་ཐ་མལ་ཅིག་ཤོས་ཀྱིའང༌། །ཡིད་ཆེས་རྣམ་པ་བཞིར་གནས་ཏེ། །ལུང་ལས་ཡིད་ནི་ཆེས་པ་དང༌། །དེ་བཞིན་གཞན་ལས་ཡིད་ཆེས་དང༌། །བདག་ཉིད་ལས་ནི་ཡིད་ཆེས་དང༌། །དེ་བཞིན་བླ་མ་ལས་ཡིད་ཆེས། །ཅེས་པ་ནི་ཡིད་ཆེས་པ་རྣམ་པ་བཞི་བཤད་པའོ། །ཡིད་ཆེས་དག་ནི་ཐམས་ཅད་ལ། །བླ་མ་དག་ནི་བྱེད་པོར་འགྲོ། །བླ་མ་རྣམ་པ་གཉིས་གསུངས་ཏེ། །རྒྱུ་འབྲས་འབྱུང་བར་འགྱུར་བའོ། །རྒྱུ་ཡི་ངོ་བོས་མདོར་བསྟན་པ། །འབྲས་བུ་རྒྱས་པར་བསྟན་པ་ཉིད། །མདོར་བསྟན་ལུས་དང་ངག་ཡིན་ཏེ། །རྒྱས་སྟོན་བྱེད་པ་སེམས་ཉིད་ཡིན། །དཀྱིལ་འཁོར་སློབ་དཔོན་ངོ་བོ་ཡི། །ཕྱི་དང་བཅས་པའི་ནང་ན་བཞུགས། །འདི་ནི་སེམས་ཅན་ཐམས་ཅད་ཀྱིས། །བླ་མ་རྣམ་པ་གཉིས་སུ་བརྗོད། །ཅེས་པ་ནི་བླ་མ་ལ་ཡིད་ཆེས་པ་རྒྱས་པར་བཤད་པའོ། །འབད་དང་བཅས་པར་རབ་མཆོད་ན། །སྤྱོད་དང་གྲོལ་བའི་འབྲས་རབ་སྩོལ། །དེ་ནི་ཡི་གེའི་ནང་ན་ཨོཾ། །ཕྱུགས་ནང་རི་དྭགས་རྒྱལ་པོར་མཚུངས། །རིག་བྱེད་ནང་ན་ངེས་བརྗོད་ཡིན། །མེ་ཏོག་པ་རི་ཛྲ་ཏར་མཚུངས། །མཁས་པས་དངོས་གྲུབ་དུ་མ་ནི། །དེ་ཡི་བཀའ་དྲིན་དག་གིས་ཐོབ། །བླ་མ་དག་ནི་མ་གཏོགས་པར། །གཟེགས་མ་ཙམ་ཡངའགྲུབ་མི་འགྱུར། །མཐོ་རིས་ས་སྟེང་ས་འོག་གིས། །དོན་ཀུན་བླ་མ་ཉིད་ཀྱིས་སྒྲུབ། །མཚམས་
མེད་ལྔ་ཡི་ལས་རྣམས་ནི། །བྱས་པའི་མིས་ཀྱང་འགྲུབ་པར་འགྱུར། །དེ་ལ་མ་གུས་བསྐལ་པ་ནི། །གྲངས་མེད་སྐྱེ་བས་གྲུབ་མི་འགྱུར། །ཞེས་པ་ནི་བླ་མ་ལ་ཡིད་ཆེས་པའི་ཆེ་བ་བསྟན་པའོ། །དེ་ལ་ལམ་མཆོག་གི་ཁྱད་པར་ནི། ཡིད་ཆེས་རྣམ་པ་བཞི་དང་ལྡན་པ་ཞིག་དགོས་པ་ཡིན་ཏེ། དཔལ་ཁ་སྦྱོར་ཐིག་ལེ་ལས། ཡང་དག་བསྟན་བཅོས་དེ་ཉིད་ཤེས། །སློབ་དཔོན་ལུང་གི་རྗེས་འགྲོ་ཞིང༌། །གསང་ཆེན་དེ་ཉིད་དོན་སྒོམ་པ། །གཅིག་ནས་གཅིག་བརྒྱུད་དེ་ཉིད་ཅན། །ཞེས་གསུངས་སོ། །དེ་ཡང་གསེར་བརྡར་བ་དང་མཚུངས་པར། ལུང་དང་མཐུན་པ་དང༌། བཅད་པ་དང་མཚུངས་པར་སློབ་དཔོན་ལ་ཡིད་ཆེས་པ་དང༌། བསྲེགས་པ་དང་མཚུངས་པར་བདག་ཉིད་ལ་ཡིད་ཆེས་པའོ། །གཞན་ལས་ཡིད་ཆེས་པ་ནི། ལུང་ངམ་བླ་མ་ལ་ཡིད་ཆེས་པ་གང་རུང་དུ་འདུ་བར་དགོངས་ནས་དཔེ་ལོགས་སུ་མ་བསྟན་ནོ། །དེའི་ཕྱིར་རྒྱུད་ཀྱི་རྒྱལ་པོ་གཞན་ལས་ཀྱང༌། ཡང་དག་པའི་ལམ་ཡིད་ཆེས་གསུམ་ལྡན་དུ་གསུངས་སོ། །དེ་ལྟར་ལྷན་ཅིག་སྐྱེས་པ་སྟོན་པར་བྱེད་པའི་ལམ་ཡིད་ཆེས་རྣམ་པ་བཞི་དང་ལྡན་པ། དེ་ནི་ཐར་པའི་ལམ་དུ་ཡིད་ཆེས་བརྟན་པོར་བཟུང་བར་བྱའོ། །འབྲོག་འགྱུར་ལས། ལྷན་ཅིག་སྐྱེས་པ་བསྐུལ་བར་བསླད། །ཞེས་པར་བསྒྱུར་ཡང༌། མི་ལེགས་སོ། །སེམས་ཅན་ཐ་མལ་ཅིག་ཤོས་ཀྱི་ཞེས་བསྒྱུར་བ་ལྟར་ན། སེམས་ཅན་ཐ་མལ་པའི་དབང་པོ་དམན་པ་དང༌། ཅིག་ཤོས་ཏེ་དབང་པོ་མཆོག་གཉིས་ཀར་ལ་ཡིད་ཆེས་རྣམ་པ་བཞིར་གནས་པའི་ལམ་དགོས་པར་མཚུངས་སོ། །ཅེས་པ་ཡིན་ལ། འབྲོག་འགྱུར་ལས། སེམས་
ཅན་ཕལ་པ་གཞན་དག་ལ། །ཡིད་ཆེས་བཞི་ནི་རྣམ་པར་གནས། །ཅེས་འབྱུང་བ་ལྟར་ན། སྤྱིར་བཏངས་སུ་དབང་པོ་མཆོག་དམན་ཀུན་ལ་ཡིད་ཆེས་བཞི་བཤད་པ་ཡིན་ཀྱང་མཐའ་གཅིག་ཏུ་མ་ཡིན་པས་དབང་པོ་མཆོག་ལ་ཡིད་ཆེས་གསུམ་ལྡན་གྱི་ལམ་ནི་ངེས་པར་དགོས་ཤིང༌། དབང་པོ་དམན་པ་ལ་གཞན་ལས་ཡིད་ཆེས་པ་ཡང་ངེས་པར་བསྣན་ནས། ཡིད་ཆེས་བཞི་ལྡན་ཡང་དགོས་ཅེས་པར་འགྱུར་མོད་ཀྱི། རེ་ཞིག་དཀྱུས་ལྟར་བཟུང་ངོ༌། །ལུས་ལས་ཡིད་ཆེས་པ་ནི། དེ་བཞིན་གཤེགས་པ་ཉིད་ཀྱི་བཀའི་དོན་དུ་གནས་པ་དང༌། གཞན་ལས་ཡིད་ཆེས་པ་ནི། དགོངས་འགྲེལ་མཁན་པོ་ཚད་ལྡན་གྱིས་བཀྲལ་བའི་གཞུང་དོན་དུ་གནས་པ་དང༌། བླ་མ་ལས་ཡིད་ཆེས་པ་ནི། དོན་དེ་དང་མཐུན་པར་རྩ་བའི་བླ་མའི་བར་གྱིས་ཉམས་སུ་བསྟར་བ་དང༌། བདག་ཉིད་ལ་ཡིད་ཆེས་པ་ནི། བླ་མའི་མན་ངག་ལྟར་བསྒོམས་པས། རང་ལ་ཐུན་མོང་མ་ཡིན་པའི་ཉམས་མྱོང་ཅི་རིགས་པར་ཤར་བའོ། །གཉིས་པ་ནི་དང་པོའི་ཡན་ལག་ཡིན་པས། ལོགས་སུ་མ་བགྲངས་ན་ཡིད་ཆེས་གསུམ་མོ། །ཡིད་ཆེས་བཞི་པོ་དེ་རྣམས་ཐམས་ཅད་ལས། བྱེད་པོའམ་གཙོ་བོའམ་སྔོན་དུ་འགྲོ་བ་ནི། བླ་མ་ལ་ཡིད་ཆེས་པ་ཡིན་ནོ། །བླ་མ་ཡང་གཉིས་ཏེ་རྒྱུ་ཡི་དང་འབྲས་བུའི་ཕུན་ཚོགས་འབྱུང་བར་འགྱུར་བའི་བླ་མ་གཉིས་སོ། །དེ་ལ་རྒྱུའི་བླ་མས་ནི་མདོར་བསྟན་པ་སྟེ་དེ་ཁོ་ན་ཉིད་མཚོན་པར་མཛད་པ་ཙམ་ཡིན་ལ། འབྲས་བུའི་བླ་མས་ནི་དེ་ཁོ་ན་ཉིད་མངོན་སུམ་ཉིད་དུ་གསལ་བར་སྟོན་པས་རྒྱས་པར་
སྟོན་པའོ། །མདོར་བསྟན་བརྡ་ཙམ་དེ་ཡང་ལུས་ངག་གི་བྱ་བ་ཀུན་རྫོབ་ཀྱི་ཆོ་གའམ་གདམས་ངག་དག་དང་ཚིག་གིས་སྟོན་པ་ཡིན་ལ། རྒྱས་པར་སྟོན་པར་བྱེད་པ་ནི་སློབ་མའི་རྒྱུད་ཅུང་ཟད་དག་པ་ན། མ་ལུས་ཤིང་ལུས་པ་མེད་པའི་རྒྱལ་བ་སྲས་བཅས་ཀྱི་བྱིན་རླབས་རྣམས་སློབ་དཔོན་ལ་འདུས་ཤིང་བརྒྱུད་ནས། སློབ་མའི་རྒྱུད་ལ་ཞུགས་ཤིང་གཅིག་ཏུ་འདྲེས་པ་ན། ཡང་དག་པའི་ཡེ་ཤེས་རྒྱུད་ལ་སྐྱེ་བ་ནི་ལུས་ངག་གི་བྱ་བ་མེད་དེ། ཆོས་ཉིད་ཀྱིས་འཇུག་པ་ཙམ་ཡིན་ནོ། །གཤེགས་པ་གཤེགས་མ་ཁྲོ་བོ་ཁྲོ་མོ་དཔའ་བོ་རྣལ་འབྱོར་མའི་ཚོགས་ཀྱི་དཀྱིལ་འཁོར་ཐམས་ཅད་སློབ་དཔོན་ལ་འདུས་ཤིང་དེའི་ངོ་བོར་གནས་ལ། དེ་ཉིད་ཕྱི་འཇིག་རྟེན་ཁམས་དང་བཅས་པ་ནང་བཅུད་ཀྱི་སེམས་ཅན་གྱི་ནང་ན་ཆོས་ཉིད་ཀྱི་ཚུལ་དུ་བཞུགས་སོ། །དེ་བས་ན་གཉིས་པོ་འདི་ནི་སེམས་ཅན་ཐམས་ཅད་ཀྱི་བླ་མར་བཞུགས་ཏེ། འབད་པས་མཆོད་ན་སྤྱོད་པ་སྟེ་འཁོར་བའི་བདེ་བ་ཕུན་སུམ་ཚོགས་པ་དང༌། གྲོལ་བ་སྟེ་ཐར་པའི་འབྲས་བུ་རྩོལ་བར་འགྱུར་རོ། །སློབ་དཔོན་ལ་དཀྱིལ་འཁོར་ཀུན་འདུས་པ་སོགས་ཀྱི་དོན་ནི་རྣམ་པ་གཉིས་ཏེ། གནས་ལུགས་ལ་ཇི་ལྟར་གནས་པ་དང༌། སློབ་མའི་བློ་ངོར་ཇི་ལྟར་སྣང་བའོ། །དང་པོ་ནི། སློབ་དཔོན་གྱི་ཕུང་པོ་སོགས་ཀྱི་ཆོས་ཉིད་དེ་བཞིན་གཤེགས་པ་སོགས་ཀྱི་དཀྱིལ་འཁོར་དུ་གདོད་མ་ནས་གནས་པ་དེ་སེམས་ཅན་ཐམས་ཅད་ལ་ཆོས་ཉིད་ཀྱི་ཚུལ་གྱིས་མགོན་དང་སྐྱབས་སུ་གནས་པ་ཡིན་ཏེ། ཆོས་ཉིད་མཉམ་པ་ཉིད་ཀྱི་ཕྱིར་རོ། །འདིར་མགོན་སྐྱབས་ཀྱི་དོན་ནི། སེམས་
ཅན་ཀུན་གྱི་བདེ་དགེ་ཐམས་ཅད་དེའི་མཐུ་ལས་བྱུང་བའི་ཕྱིར་དང༌། དེ་ཡོད་པའི་རྒྱུ་མཚན་གྱིས་སེམས་ཅན་རྣམས་གྲོལ་དུ་རུང་བའོ། །དེ་ལྟར་ན་ཡང་སེམས་ཅན་རྣམས་ནི་དེ་ལ་ཕྱིན་ཅི་ལོག་ཏུ་ཞུགས་པ་ཡིན་ལ། ཡིད་ཆེས་དང་ལྡན་པའི་སློབ་དཔོན་དེ་ནི་དཀྱིལ་འཁོར་དེ་ལ་ཡང་དག་པར་མངོན་དུ་ཕྱོགས་པའི་ཕྱིར། སློབ་དཔོན་གྱི་ལྡོག་པ་བཟུང་ནས་སེམས་ཅན་རྣམས་ཀྱི་འདྲེན་པར་འཇོག་གོ །།གཉིས་པ་ནི་སློབ་མ་གང་ལ་སློབ་དཔོན་དེ་འབྲས་བུའི་བླ་མར་སོང་བ་ན། སློབ་མ་དེ་ཡང་ཆོས་ཉིད་ཀྱི་གནས་ཚུལ་དེ་ཉམས་སུ་མྱོང་བའི་ཕྱིར། སློབ་མ་དེའི་བློ་ངོར་སློབ་དཔོན་དེ་དཀྱིལ་འཁོར་ཀུན་འདུས་དང༌། སྲིད་ཞི་ཀུན་ཁྱབ་དང་ཆོས་ཉིད་ཀྱི་ངོ་བོ་ཡིན་ནོ་ཞེས་རྣམ་བཞག་བྱས་སོ། །ཇི་སྲིད་དུ་སློབ་མ་གང་ལ་འབྲས་བུའི་བླ་མར་མ་སོང་བའི་བླ་མ་དེ་ལ་ནི། དེའི་བློ་ངོར་དེ་ལྟར་སོང་ཞེས་བརྗོད་ཀྱང་མོས་སྒོམ་ཙམ་དུ་ཟད་དེ་མངོན་དུ་བྱས་པ་ནི་མ་ཡིན་ནོ། །འདིར་མང་པོ་དག་རྒྱུའི་བླ་མ་རྡོ་རྗེ་སློབ་དཔོན་དང༌། འབྲས་བུའི་བླ་མ་སློབ་མ་ཉིད་ཀྱི་ཉམས་མྱོང་ཙམ་ལ་འཆད་པ་ནི་ཞལ་ལུང་གྲོལ་ཐིག་སོགས་སུ་བླ་མ་གསུམ་བཤད་པ་སོགས་དང་མཐུན་རུང་ཙམ་གྱི་ལེགས་ཆ་ཡང་ཡོད་མོད་ཀྱི། གཞུང་འདིར་མི་འགྲིགས་ཏེ། ཡིད་ཆེས་བཞིའི་ནང་གི་བླ་མའི་རྒྱས་བཤད་ཡིན་པ་ལས། དེ་དག་གི་འབྲས་བུའི་བླ་མར་ངོས་བཟུང་བ་དེ་ནི་བདག་ཉིད་ཡིད་ཆེས་པར་བསྡུ་དགོས་པའི་ཕྱིར་རོ། །དེའི་འོག་ཏུ་དཔེ་རྣམ་པ་བཞི་བསྟན་པ་ལ། ཨོཾ་ནི་ཡི་གེ་ཐམས་ཅད་ཀྱི་འགོ་འདྲེན་པ་བཞིན་དུ་
དངོས་གྲུབ་ཐམས་ཅད་ཀྱི་སྣེ་འདྲེན་པ་དང༌། རི་དྭགས་རྒྱལ་པོ་སེངྒེས་གཞན་རྣམས་སྐྲག་པར་བྱེད་པ་ལྟར། མི་མཐུན་ཕྱོགས་འཇོམས་པ་དང༌། ངེས་བརྗོད་ཀྱི་རིག་བྱེད་དུ་རིག་བྱེད་གཞན་རྣམས་ཀྱི་བརྗོད་བྱ་འདུས་པ་ལྟར། གོང་དུ་བསྟན་པ་ལྟར་སློབ་དཔོན་གྱི་དེ་ཉིད་ཤེས་པའི་ནང་དུ་ཡེ་ཤེས་ཐམས་ཅད་འདུས་པ་དང༌། པཱ་ར་ཛ་ཏ་ཏེ་ལྷའི་ཤིང་ཡོངས་འདུས་མེ་ཏོག་ནི། མེ་ཏོག་གཞན་ཐམས་ཅད་ལས་མཆོག་ཏུ་གྱུར་ཅིང༌། རྙིང་པར་མི་འགྱུར་བ་བཞིན་དུ། བྱིན་རླབས་ཀྱི་ལམ་ནི་དཀའ་བ་མེད་ཅིང་འཇུག་པ་བདེ་བ་དང་ཉམས་པར་མི་འགྱུར་བའི་དོན་ནོ། དངོས་གྲུབ་དུ་མ་ནི་མཆོག་ཐུན་མོང་གི་དངོས་གྲུབ་རྣམ་གྲངས་མང་པོའོ། །མ་རྟོགས་ཞེས་པ་ནི་བླ་མའི་བྱིན་རླབས་ཡོད་པ་ལ་མ་རྟོགས་པ་སྟེ་མེད་པའོ། །གཟེགས་མ་ནི་ཕྲ་མོའོ། དོན་ཀུན་ནི་དངོས་གྲུབ་ཀུན་ནོ། །དེ་ཡང་མཁས་པས་དངོས་གྲུབ་ཅེས་པ་མན་ཆད་སློབ་དཔོན་གྱི་ཆེ་བ་ཙམ་བསྟན་པ་སྟེ་ཚིག་ལྷག་མ་གོ་སླའོ། །དེ་ནས་ལེའུའི་མཚན་བསྟན་པ་ནི། གསང་བའི་དེ་ཁོ་ན་ཉིད་རབ་ཏུ་གསལ་བ་ལས། བདག་དང་གཞན་གྱི་ཚོགས་ཀྱི་ཚུལ་རྣམ་པར་གནོན་པ་ལ་འཇུག་པ་དང༌། རྒྱུད་དང་སྔགས་དང་ཡེ་ཤེས་དང་གསང་བ་དང་དེ་བཞིན་གཤེགས་པའི་གསུང་རབ་སྟོན་པ་པོ་བླ་མ་མཉེས་པར་བྱ་བ་བསྟན་པ་སྟེ་དང་པོའོ། རྣམ་པར་གནོན་པ་ལ་འཇུག་པ་ཞེས་པ་ནི་རྟོགས་པར་བྱེད་པའི་ཐབས་ཏེ། རྣམ་པར་གནོན་པ་ནི་རྟོགས་པ་དང་འཇུག་པ་ནི་ཐབས་སོ། །ཡང་ན་ཚོགས་རྫོགས་
པར་བྱེད་ཐབས་ནི་ཚོགས་རྣམ་པར་གནོན་པའོ། །རྒྱུད་དང་སོགས་བརྗོད་བྱ་དང་གསུང་རབ་ནི་བརྗོད་བྱེད་དོ། །ལེའུ་དང་པོའི་རྣམ་པར་བཤད་པའོ།། །།གཉིས་པ་གསང་བའི་དེ་ཁོ་ན་ཉིད་དངོས་བཤད་པ་ལ་ལེའུ་གསུམ་གྱི་བདག་ཉིད་ཅན་ནོ། །དེ་ཡང་ལེའུ་གཉིས་པས་མདོར་བསྟན་པ་དང་རྒྱས་པར་བཤད་པའི་ཚུལ་གྱིས་གསང་བའི་དེ་ཁོ་ན་ཉིད་དེ། ཐབས་རྒྱུད་ཀྱི་གླེང་གཞིའི་དོན་དུ་ཞུགས་པར་བསྟན། ལེའུ་གསུམ་པས་དེ་ཉིད་ཀྱི་དོགས་པ་གཅོད་པའི་དོན་དུ་དཔེ་དང་དོན་གྱི་ཡེ་ཤེས་ཀྱི་དབྱེ་བ་སོ་སོར་བཤད། ལེའུ་བཞི་པས་གསང་བའི་དེ་ཁོ་ན་ཉིད་དེ་རྣལ་འབྱོར་མའི་རྒྱུད་ཀྱི་གླེང་གཞིའི་དོན་ལ་བཞུགས་པར་བསྟན་ནོ། །དེ་ལས་ལེའུ་གཉིས་པ་བཤད་པ་ལ། མདོར་བསྟན་རྒྱས་བཤད་དོན་བསྡུ་གསུམ་མོ། །དང་པོ་ནི། བརྗོད་བྱ་དོན་གྱི་གསང་བའི་དེ་ཁོ་ན་ཉིད་ངོས་བཟུང་པ་སྟེ། དེ་ནས་ཆེས་གསང་བཤད་པར་བྱ། །མདོར་བསྡུས་སེམས་ལས་སྤྲུལ་པ་སྟེ། །དབང་པོ་དྲུག་ལས་རྣམ་གྲོལ་བ། །བྱང་ཆུབ་སེམས་ནི་རྟོག་པ་མེད། །དངོས་དང་དངོས་མེད་གཉིས་ཀ་སྤངས། །དང་པོའི་སངས་རྒྱས་རྗེས་འགྲོ་མེད། །བརྟན་པ་དང་ནི་གཡོ་བ་དག །སྤྲོ་ཞིང་སྡུད་པར་བྱེད་པའོ། །འདུས་པ་ཚོགས་པར་གསུངས་པ་སྟེ། །རྫོགས་པའི་རིམ་པའི་རང་བཞིན་ཉིད། །མྱ་ངན་འདས་པ་དམིགས་སུ་མེད། །འཁོར་བ་ཡི་ནི་བདེ་བ་ཆེ། །སྙིང་རྗེ་ཆེན་པོ་ཐབས་ཆེན་པོ། །སེམས་ཅན་དོན་ལ་འཇུག་པར་འགྱུར། །སྐུ་གསུང་ཐུགས་ཀྱི་ཚུལ་ཅན་གྱི། །
དཀྱིལ་འཁོར་གསུམ་པོ་རྣམས་སུ་ནི། །བསྐྱེད་པའི་རིམ་པའི་ངོ་བོ་ཡིས། །འདི་ནི་རྫོགས་པར་བྱེད་པའི་མཆོག །རྣམ་པ་དེ་ལྟའི་ཡེ་ཤེས་ཆེ། །མདོར་བསྡུས་དེ་ནི་བདག་གིས་བརྗོད། །དེ་ལ་འདི་ནི་གསང་བ་འདུས་པ་ཞེས་བྱ་བ་སྒྲ་བཤད་པའི་སྒོ་ནས། གསང་བའི་དེ་ཉིད་བསྟན་པ་ཡིན་པ་ལས། དེ་ནས་སོགས་ཀྱིས་གསང་བ་དང༌། འདུས་པ་ཚོགས་པར་ཞེས་སོགས་ཀྱིས་འདུས་པའི་དོན་བཤད་དེ་སྐུ་གསུང་ཐུགས་ཀྱི་ཞེས་སོགས་ཀྱིས་དེ་གཉིས་ཀའི་དོན་གྱི་སྙིང་པོ་བསྡུས་ནས་རྒྱས་བཤད་སྤྲོ་བར་དམ་འཆའ་བའོ། །དེ་ལྟར་ཡང་དཔལ་གསང་བ་འདུས་པའི་རྒྱུད་ཕྱི་མ་ལས། སྐུ་གསུང་ཐུགས་ནི་རྣམ་པ་གསུམ། །གསང་བ་ཞེས་ནི་བསྟན་པ་ཡིན། །སངས་རྒྱས་ཐམས་ཅད་ཅེས་བྱ་བ། །ཚོགས་པ་འདུས་པར་ཡིན་པར་བཤད། །ཅེས་གསུངས་པའི་དོན་རྒྱས་པར་བཤད་པ་སྟེ། དེ་ཡང་གསང་བའི་དོན་ནི། སྐུ་དང༌། གསུང་དང༌། ཐུགས་ཀྱི་གསང་བ་གསུམ་ཡིན་ལ། གོང་དུ་ཡང་བཤད་མོད་འདིར་ཡང་བསྟན་ན། དེ་ལས་སྐུ་ནི་ཆོས་ཉིད་དོན་དམ་པའི་ཡེ་ཤེས་རྡོ་རྗེ་སེམས་དཔའི་དཀྱིལ་འཁོར་ལ་སོགས་པ་འཁོར་འདས་སྣོད་བཅུད་ཀྱི་རྣམ་པ་ཅན་དོན་དམ་པའི་གཟུགས་རྣམ་པ་ཐམས་ཅད་པ་དེ་ཡིན་ལ། གསུང་ནི་བདེ་བ་ཆེན་པོ་གཅིག་ཉིད་མིང་ཚིག་ཡི་གེ་ལས་འདས་པའི་དོན་དམ་སྲིད་འདས་ཀྱི་སྒྲ་སྐད་ཐམས་ཅད་དུ་ཤར་བ་དང༌། ཐུགས་ནི་རྣམ་པར་མི་རྟོག་པའི་ཡེ་ཤེས་ལྷན་སྐྱེས་བདེ་བ་ཆེན་པོ་དེ་ཉིད་ཀྱིས་ཟག་མེད་དོན་དམ་མྱང་འདས་ཀྱི་ཆོས་ཐམས་ཅད་རང་རིག་གི་ཚུལ་གྱིས་མཁྱེན་
ཅིང༌། ཀུན་རྫོབ་འཁོར་བ་དངོས་སུ་མི་སྣང་ཡང༌། བདེ་ཆེན་རྣམ་པ་ཐམས་ཅད་པ་དེ་ཉིད་ཤེས་བྱ་ཐམས་ཅད་ལ་ཆོས་ཉིད་དུ་སོང་བའི་རྒྱུ་མཚན་གྱིས་འཁྲུལ་བ་ཅན་གྱི་སེམས་ཅན་ལ་དེ་དང་དེ་སྣང་བར་མཁྱེན་ནོ། །ཀུན་རྫོབ་དངོས་སུ་མི་གཟིགས་པ་ནི་ཀུན་རྫོབ་འཁོར་བའི་ཆོས་ཡོད་ཀྱང་མ་གཟིགས་པ་མ་ཡིན་གྱི། གདོད་མ་ནས་ཡོད་མ་མྱོང་བས་ན་གཟིགས་རྒྱུ་མེད་པའི་ཕྱིར་མ་གཟིགས་པའོ། །དེ་དག་ཀྱང་སངས་རྒྱས་ཉག་གཅིག་གི་སྤྱོད་ཡུལ་ལས་གཞན་སུས་ཀྱང་མི་རྟོགས་པའི་ཕྱིར་གསང་བ་ཞེས་བྱའོ། །རྣམ་པ་དེ་གསུམ་ཡང་མཚན་ཉིད་ཀྱི་ལྡོག་ཆའི་དབྱེ་བ་ཁོ་ན་ཡིན་གྱི་ངོ་བོ་ནི་གཅིག་པུ་གཉིས་སུ་མེད་པའོ། །དེ་ལྟར་ཡང་གསང་བ་འདུས་པ་ལས། ཁྱོད་ཀྱིས་སེམས་ལུས་ལྟ་བུ་དང༌། ལུས་སེམས་ལྟ་བུ་དང༌། སེམས་ཚིག་ཏུ་བརྗོད་པ་ལྟ་བུར་བསྐྱེད་ཅིག་ཅེས་སོ། །དེ་ལྟ་བུའི་གསང་བ་དེ་ནི་ཆོས་ཀྱི་དབྱིངས་དང་སྟོང་པ་ཉིད་དང༌། ཤེས་རབ་ཀྱི་ཕ་རོལ་ཏུ་ཕྱིན་པ་དང༌། ལྷན་ཅིག་སྐྱེས་པའི་ཡེ་ཤེས་ལ་སོགས་པ་མིང་དུ་མས་སྙད་ཅིང་སེམས་ཀྱི་རྡོ་རྗེ་དང༌། བྱང་ཆུབ་ཀྱི་སེམས་ཞེས་ཀྱང་བྱའོ། །དེ་ཉིད་རྫོགས་པའི་སངས་རྒྱས་ཀྱི་ཡེ་ཤེས་ཡིན་མོད་ཀྱང་གཞི་དུས་ཀྱི་ཆོས་ཉིད་ལ་དེ་ལྟར་མི་གནས་སོ་སྙམ་ན། དེ་ལྟར་མ་ཡིན་ཏེ་འབྲས་བུའི་སངས་རྒྱས་གང་ཡིན་པ་དེ་ཁོ་ན་གཞིའི་ཆོས་ཉིད་ཀྱང་ཡིན་ནོ། །སེམས་ཀྱི་རང་བཞིན་ལ་སེམས་ཉིད་ཅེས་ཀྱང་བྱའོ། །དེ་ནི་སེམས་ཅན་ཐམས་ཅད་ལ་རྟག་ཏུ་གནས་ཀྱང་
འབད་མེད་དུ་གྲོལ་བའི་སྐྱོན་དུ་མི་འགྱུར་ཏེ། དེ་རྣམས་ཀྱིས་རང་གི་ཆོས་ཉིད་མ་ཐོབ་པའི་ཕྱིར་རོ། །དེ་ལྟར་ན་རྣམ་པ་ཐམས་ཅད་པའི་གསང་བ་དེ་ལ་ནི་སངས་རྒྱས་ཐམས་ཅད་ཅེས་བྱ་ལ། རྣམ་པ་ཐམས་ཅད་པ་དེ་དག་ཀྱང་དམིགས་པ་མེད་པའི་སྙིང་རྗེ་བདེ་ཆེན་གྱི་ཡེ་ཤེས་གཅིག་ཏུ་རོ་མཉམ་པ་ནི་འདུས་པའི་དོན་ཡིན་ཏེ། གསང་བ་ཡང་ཡིན་ལ་འདུས་པ་ཡང་ཡིན་པས་ཟུང་དུ་འཇུག་པའི་མཚན་ཉིད་དོ། །དེ་ཡང་གསང་བ་ནི་རྣམ་པ་ཐམས་ཅད་པ་སྐུའི་ཆོས་དང༌། འདུས་པ་ནི་བདེ་བ་ཆེན་པོ་ཐུགས་ཀྱི་ཆོས་སུ་འཇོག་པས་དེ་གཉིས་ཟུང་འཇུག་ནི་སྐུ་དང་ཡེ་ཤེས་ཟུང་འཇུག་གོ །དོན་གྱི་མདོ་དེ་ལྟར་བློ་ལ་བཞག་ན། གཞུང་འདིའི་ཚིག་བདེ་བླག་ཏུ་རྟོགས་པར་འགྱུར་རོ། །དེ་ཡང་ལེའུ་དང་པོའི་རྗེས་ཐོགས་དེ་ནས། གསང་བའི་སྒྲ་དང་འདུས་པའི་སྒྲ་གཉིས་ལས། ཆེས་གསང་བ་སྟེ་གསང་བའི་སྒྲ་བཤད་པར་བྱའོ། །དེ་ཡང་མདོར་བསྡུས་ཏེ་བསྟན་ན། སེམས་ཀྱི་རྡོ་རྗེ་སེམས་ཉིད་སྤྲོས་བྲལ་ལས། ཡེ་ཤེས་ཀྱི་སྣང་བ་རྣམ་པ་ཐམས་ཅད་པར་སྤྲུལ་བའོ། །སླར་ཡང་གསང་བ་དེའི་ཁྱད་ཆོས་རྒྱས་པར་བཤད་པ་ནི། དབང་པོ་དྲུག་ཡུལ་དྲུག་དང་བཅས་པ་ལས་རྣམ་པར་གྲོལ་ཡང་དོན་དམ་པའི་དབང་པོ་དང་ཡེ་ཤེས་ཀྱི་གཟུགས་སྒྲ་དྲི་རོ་རེག་ཆོས་སུ་ཤར་བ་དོན་དམ་བྱང་ཆུབ་ཀྱི་སེམས་དེ་ནི་གདོད་མ་ནས་རྙོག་མ་མེད་པ་སྟེ་སྒྲིབ་པ་དང་བྲལ་བ། གཟུང་འཛིན་སྤངས་པའི་ཕྱིར་དངོས་པོ་མེད་ལ། ཡེ་ཤེས་ཀྱི་ངོ་བོ་ཉིད་དུ་ཡོད་པའི་ཕྱིར་དངོས་མེད་ཀྱང་
སྤངས་ཏེ། དངོས་པོ་དངོས་མེད་གཉིས་ཀའི་མཚན་ཉིད་སྤངས་པའོ། སེམས་ཉིད་དེ་ནི་དང་པོ་གདོད་མའི་སངས་རྒྱས་ཡིན་ལ། རྗེས་སུ་འགྲོ་བ་སྟེ་རྣམ་པར་རྟོག་པའི་འཁྲུལ་པས་གདོད་ནས་གོས་པ་མེད་པའོ། །ཅིའི་ཕྱིར་རྣམ་རྟོག་ལ་རྗེས་འགྲོ་ཞེས་བྱ་ན། རྣམ་རྟོག་ནི་འཁྲུལ་གཞི་གཞན་གྱི་རྗེས་སུ་འགྲོ་བའི་ཕྱིར་རྗེས་འགྲོ་ཞེས་བྱའོ། །སེམས་ཉིད་རྣམ་པ་ཐམས་ཅད་པ་ཡེ་ཤེས་ཀྱི་སྣང་བ་དེ་ནི། བརྟན་པ་སྣོད་དང་གཡོ་བ་བཅུད་མཐའ་དག་སྤྲོ་ཞིང་སྡུད་པར་བྱེད་པ་སྟེ། ཡེ་ཤེས་དམ་པའི་སྣོད་བཅུད་ཀྱི་སྣང་ཆ་དེའི་གློ་བུར་གྱི་དྲི་མ་ལས་ཐ་མལ་གྱི་སྣོད་བཅུད་དུ་སྣང་བ་བྱུང་ཞིང༌། ནམ་ཞིག་མཐར་ཐུག་ཐོབ་པ་ན་ཡེ་ཤེས་དེ་དེའི་དབྱིངས་སུ་ཐ་མལ་གྱི་སྣོད་བཅུད་དེ་དང་དེ་ཡང་ཐིམ་པར་འགྱུར་བས་སོ། །དེ་བས་ན་སེམས་ཉིད་དང་པོའི་སངས་རྒྱས་རྣམ་པ་ཐམས་ཅད་པའི་ངོ་བོ་ནི་གསང་བ་དང་འདུས་པ་གཉིས་ལས་གསང་བའོ། །འདུས་པའི་དོན་ནི་གོང་དུ་བཤད་པ་ལྟར་ཚོགས་པའི་དོན་དུ་གསུངས་པ་སྟེ། འདིར་རྫོགས་པའི་སྐད་དོད། ནིཥྤནྣ་ཞེས་པ་ནི་མ་བསྐྱེད་པར་རང་གྲུབ་ཏུ་བྱུང་བའི་དོན་ཡིན་ཏེ། དེ་ལ་ཉེར་བསྒྱུར་པ་རི་བསྣན་པས། པ་རི་ནིཥྤནྣ་ཡོངས་སུ་གྲུབ་པའོ། །རིམ་པ་ནི་ལམ་དང་འབྲས་བུའི་རིམ་པའོ། །སེམས་ཉིད་ལྷན་ཅིག་སྐྱེས་པ་བདེ་བ་ཆེན་པོ་རང་བྱུང་དེ་ནི་གཞི་ལམ་འབྲས་བུ་སོགས་ཆོས་ཐམས་ཅད་ཀྱི་རང་བཞིན་ཉིད་དེ། རང་བཞིན་གྱི་མྱ་ངན་ལས་འདས་
པ་ཀུན་རྫོབ་འཁོར་བའི་སྣང་བ་དམིགས་སུ་མེད་པ། འཁོར་བ་འགྱུར་བདེའི་ཆོས་ཉིད་དོན་དམ་པའི་བདེ་བ་ཆེན་པོ་ཐིག་ལེ་འགྱུར་བ་མེད་པ་བདེ་བའི་རང་གདངས་དམིགས་པ་མེད་པའི་སྙིང་རྗེ་ཆེན་པོར་ཤར་ཞིང༌། སྙིང་རྗེ་དེའི་ཡོན་ཏན་སེམས་ཅན་གྱི་དོན་བསྒྲུབ་ཤེས་པའི་ཐབས་མཁས་ཆེན་པོ་དང༌། འཕྲིན་ལས་སེམས་ཅན་གྱི་དོན་ལ་འཇུག་པའི་ངང་ཚུལ་ཅན་དུ་འགྱུར་རོ། །འདིས་ནི་སེམས་ཉིད་དང་པོའི་སངས་རྒྱས་ཏེ། བདེ་སྟོང་གཉིས་སུ་མེད་པ་དང་སྙིང་རྗེ་ཆེན་པོར་བཤད་པས། བདེ་སྟོང་དང་སྙིང་རྗེ་ནི་གསང་བ་དང་འདུས་པ་གཉིས་ལས་འདི་ནི་འདུས་པའོ། །དེ་ལྟ་བུའི་གསང་བ་དང་འདུས་པ་དེ་ཡང་མཚན་ཉིད་སོ་སོར་བཤད་པ་ཙམ་ཡིན་གྱི་ངོ་བོ་ནི་གཅིག་ཁོ་ན་ཏེ། གོང་དུ་བཤད་པ་ལྟར་སྐུ་དང་གསུང་དང་ཐུགས་ཀྱི་རྡོ་རྗེ་གསུམ་གྱི་ཚུལ་ཅན་གྱི་དཀྱིལ་འཁོར་རྣམ་པ་གསུམ་པོ་རྣམས་སུ་གསུངས་པ་དེ་ཡིན་ལ། དེ་ཡང་བསྐྱེད་རིམ་གྱི་ཕྱོགས་ལ། མི་བསྐྱོད་པ་གཙོ་བོར་གྱུར་པ་ཐུགས་ཀྱི་དཀྱིལ་འཁོར་དང༌། འོད་དཔག་མེད་གཙོ་བོར་གྱུར་པ་གསུང་དང༌། རྣམ་སྣང་གཙོ་བོར་གྱུར་པ་སྐུ་དཀྱིལ་དུ་བཤད་པ་ནི་བརྡ་ཙམ་ཡིན་ཏེ། དེས་མཚོན་པའི་ངོ་བོའི་དོན་གྱིས་རྡོ་རྗེ་གསུམ་པོ་འདི་ནི་རྫོགས་པར་བྱེད་པ་སྟེ་རྫོགས་པའི་རིམ་པ་ལམ་དང་འབྲས་བུ་མཆོག་གིས་བསྡུས་པའི་རྣམ་པ་རྣམ་གྲངས་དེ་ལྟ་བུས་ཟུང་འཇུག་གི་ཡེ་ཤེས་ཆེན་པོ་གསང་བ་འདུས་པ་ཞེས་མཚན་གྱི་སྒོ་ནས་མདོར་བསྡུས་སུ་བཤད་ཟིན་པ་དེ་ནི་བདག་གིས་སླར་རྒྱས་བཤད་ཀྱི་སྒོ་ནས་བརྗོད་པར་
བྱའོ། །ཞེས་པའོ། །དེ་ཡང་འདུས་པའི་རྒྱུད་ཀྱི་ལེའུ་བཞི་པ་ལས། དེ་ནས་ཐུགས་ཀྱི་དཀྱིལ་འཁོར་མཆོག །ཐུགས་ཀྱི་རྡོ་རྗེ་རབ་འདྲ་བ། །སྐུ་དང་གསུང་དང་ཐུགས་རྣམས་ཀྱི། །དཀྱིལ་འཁོར་རབ་ཏུ་བཤད་པར་བྱ། ཞེས་དང༌། ཐུགས་ཀྱི་དཀྱིལ་འཁོར་དམ་པ་སྟེ། །ཁྲུ་ནི་བཅུ་གཉིས་ཚད་དུ་བྱ། །ཞེས་དང༌། བཤང་གཅི་ཁུ་བ་ཁྲག་ལ་སོགས། །ལྷ་རྣམས་ལ་ནི་དབུལ་བར་བྱ། །ཞེས་དང༌། ལེའུ་བཅུ་དྲུག་པ་ལས། དེ་ནས་སྐུ་ཡི་དཀྱིལ་འཁོར་མཆོག །ཐུགས་ཀྱི་དཀྱིལ་འཁོར་རབ་འདྲ་བ། །ཞེས་དང༌། གྲུ་ནི་བཅུ་དྲུག་ཚད་དུ་བྱ། །ཞེས་དང༌། དེ་ནས་གསུང་གི་དཀྱིལ་འཁོར་མཆོག །ཐུགས་ཀྱི་དཀྱིལ་འཁོར་རབ་ཏུ་འདྲ། །ཁྲུ་ནི་ཉི་ཤུའི་ཚད་དུ་བྱ། །ཞེས་སོགས་གསུངས་ཏེ། སྐུ་གསུང་ཐུགས་ཀྱི་དཀྱིལ་འཁོར་བཤད་ཅེས་བྱ་བ་ནི། རྡོ་རྗེ་གསུམ་པོ་དེ་ཡང་རེ་རེ་ནས་སྐུ་གསུང་ཐུགས་ཀྱི་རྒྱས་བཏབ་ཅན་དུ་བསྟན་པའི་དོན་ཡིན་ལ། ཐུགས་ཀྱི་དཀྱིལ་འཁོར་ཁྲུ་བཅུ་གཉིས་པ་ནི་དོན་དམ་པའི་གནས་ལ་སོགས་པ་ས་བཅུ་གཉིས་ཀྱི་རབ་དབྱེ་ཅན་བདེ་སྟོང་གཉིས་སུ་མེད་པའི་ཆོས་དབྱིངས་ཡེ་ཤེས་མི་བསྐྱོད་པའི་རང་བཞིན་ཡིན་ལ། གསུང་དཀྱིལ་ཁྲུ་བཅུ་དྲུག་པའི་དོན་ནི། གཏུམ་མོ་འབར་བ་ལས་དགའ་བ་བཞི་བཞི་བཅུ་དྲུག་གི་ཡེ་ཤེས་སུ་ཤར་བ་མཉམ་ཉིད་སོར་རྟོག་བྱ་གྲུབ་གསུམ་འདུས་པ་གསུང་རྡོ་རྗེས་གཙོ་བོ་མཛད་པ་དང༌། སྐུ་དཀྱིལ་ཁྲུ་ཉི་ཤུ་པ་ནི་སྟོང་ཉིད་ཉི་ཤུ་དཀྱིལ་འཁོར་གྱི་འཁོར་ལོ་རབ་
འབྱམས་སུ་ཤར་བ་སྟེ། མེ་ལོང་ཡེ་ཤེས་རྣམ་སྣང་གིས་བྱིན་གྱིས་བརླབས་པའོ། ཐུགས་ནི་ཡེ་ཤེས་ལྔའི་བདག་ཉིད་ཀྱི་ཕྱིར། བདུད་རྩི་ལྔའི་མཆོད་པ་བསྟན་ལ། སྐུ་ལ་ནི་ཡུལ་དང་ཡུལ་ཅན་རྣམ་པར་དག་པའི་ཕྱིར། བཤང་གཅི་གཉིས་དང༌། གསུང་ལ་ནི་གཏུམ་མོ་འབར་བ་ལས། བདེ་བ་གསལ་བ་མི་རྟོག་པ་གསུམ་འབྱུང་བའི་ཕྱིར། བཤང་གཅི་ཁུ་བ་གསུམ་གྱིས་མཆོད་པར་གསུངས་ལ། འདིར་གཏུམ་མོ་ནི་གསུང་སྟེ། ཁམས་དམར་པོ་ངག་གི་ཆོས་དང་འབྲེལ་བའི་ཕྱིར་རོ། །སྐུ་དང་གསུང་གི་དཀྱིལ་འཁོར་ལ། ཁྲུ་ཚད་ཀྱི་གྲངས་བསྣོལ་བ་ནི་བླ་མའི་མན་ངག་ཡིན་གྱི་རྒྱུད་དངོས་བསྟན་ལྟར་ན། གསུང་ལ་སྟོང་ཉིད་ཉི་ཤུ་དང༌། སྐུ་ལ་དགའ་བ་བཅུ་དྲུག་སྦྱར་བར་བྱ་སྟེ། ལུགས་འདི་ལའང་དེ་ལྟར་མི་འགལ་བར་ནི་སྣང་ངོ༌། །གཉིས་པ་རྒྱས་བཤད་ནི། རྗོད་བྱེད་ཚིག་གི་གསང་བའི་དེ་ཁོ་ན་ཉིད་རྒྱུད་གཉིས་ཀྱི་གླེང་གཞི་བཤད་པ་ཡིན་ཏེ། འདི་ལ་གཉིས། བཤད་བྱའི་གཞུང་བཀོད། དེའི་དོན་རྒྱས་པར་བཤད་པའོ། །དང་པོ་ནི། འདི་སྐད་བདག་གིས་ཞེས་བརྗོད་དང༌། །ཐོས་པ་ཞེས་བྱའང་དེ་མ་ཐག །གཞན་ཡང་དུས་ཞེས་བྱ་བ་སྟེ། །གཅིག་ན་ཞེས་བྱ་གསུངས་པ་དང༌། །དེ་བཞིན་གཤེགས་པ་ཐམས་ཅད་ཅེས། །དེ་ལྟར་གཞན་ཡང་དེ་འོག་ཏུ། །སྐུ་དང་གསུང་ཐུགས་རྡོ་རྗེ་ཞེས། །བཙུན་མོའི་བྷ་ག་རྣམས་ལ་འདིར། །བཅོམ་ལྡན་འདས་ནི་བཞུགས་སོ་ཞེས། །རྣལ་འབྱོར་རྒྱུད་ལས་རབ་ཏུ་གྲགས། །གསང་
བ་མཆོག་གིས་དགྱེས་པ་ན། །ཐམས་ཅད་བདག་ཉིད་རྟག་ཏུ་བཞུགས། །མཁའ་འགྲོ་ཀུན་དངོས་སེམས་དཔའ་ནི། །རྡོ་རྗེ་སེམས་དཔའ་བདེ་བའི་མཆོག །ཞེས་བྱ་བ་ཡང་གཞན་དུ་བསྟན། །ཐོག་མ་ཐ་མའི་ཚིག་ལ་གནས། །རྣལ་འབྱོར་མ་རྒྱུད་བསྟན་པ་ནི། །མེ་སྟེ་གཞན་དག་སོག་མ་འདྲ། །རྫོགས་པའི་རིམ་པའི་ངོ་བོ་ཡིས། །རྡོ་རྗེ་སེམས་དཔའ་རབ་སྒོམ་པ། ། གསང་བའི་དེ་ཉིད་འདི་དེ་ནི། །རྒྱུད་གཉིས་ལའང་ཡང་དག་གནས། །དེ་ལ་རྣལ་འབྱོར་ཐབས་ཀྱི་རྒྱུད་གསང་བ་འདུས་པ་ལ་སོགས་པ་རྒྱུད་སྡེ་མང་པོ་ཞིག་ལས། འདི་སྐད་བདག་གིས་ཐོས་པའི་དུས་གཅིག་ན། དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་རྡོ་རྗེ་བཙུན་མོའི་བྷ་ག་རྣམས་ལ་བཅོམ་ལྡན་འདས་བཞུགས་སོ། །ཞེས་གླེང་གཞིའི་ཚུལ་གྱིས་རྒྱུད་དོན་མཐའ་དག་གི་མདོར་བསྟན་གསུངས་སོ་ཞེས་རབ་ཏུ་གྲགས་སོ། དེ་ལ་འདི་སྐད་དང་བདག་དང་ཐོས་པ་དང༌། དུས་དང་གཅིག་ན་དང༌། ཐམས་ཅད་དེ་བཞིན་གཤེགས་པ་དང༌། སྐུ་གསུང་ཐུགས་རྡོ་རྗེ་དང༌། བཙུན་མོའི་བྷ་ག་རྣམས་དང༌། བཅོམ་ལྡན་འདས་དང་བཞུགས་པ་སྟེ་ཚིག་བཅུའོ། །ཡང་འདི་སྐད་དང་བདག་གིས་གཉིས་གཅིག་ཏུ་བསྡོམས་པ་ལ་དོན་ཚན་གཞན་དང༌། བདག་གིས་དང་ཐོས་པ་བསྡོམས་པ་ལ་ཡང་དོན་གཞན་སྟོན་པ་ཡང་ཡོད་དོ། །འདི་རྣམས་ལེགས་པར་སྦྱར་བ་སཾ་སྐྲི་ཏིའི་སྐད་དུ། ཨེ་ཝཾ་མ་ཡཱ་ཤྲུ་ཏཾ་མེ་ཀ་སྨིན་ས་མ་ཡེ་བྷ་ག་ཝཱན་
སརྦ་ཏ་ཐཱ་ག་ཏ་ཀཱ་ཡ་ཝཱཀ་ཙིཏྟ་བཛྲ་ཡོ་ཥི་ཏ་བྷ་གེ་ཥུ། བི་ཛ་ཧ་རཾ་ཞེས་ཡི་གེ་སུམ་ཅུ་སོ་བདུན་གྱིས་བསྟན་པ་ཡིན་པ་ལས། དེ་ལ་ཨེ་ཝཾ་ནི་འདི་སྐད། མ་ཡཱ་ནི་བདག་གིས། ཤྲུ་ཏཾ་ནི་ཐོས་པའི་ཨེ་ཀ་སྨིན་ནི་གཅིག་ན། ས་མ་ཡེ་ནི་དུས་ན། བྷ་ག་ཝཱན་ནི་བཅོམ་ལྡན་འདས། སརྦ་ནི་ཐམས་ཅད། ཏ་ཐཱ་ག་ཏ་དེ་བཞིན་གཤེགས་པ། ཀཱ་ཡ་ནི་སྐུ། ཝཱཀ་ནི་གསུང༌། ཙིཏྟ་ནི་ཐུགས། བཛྲ་ནི་རྡོ་རྗེ། ཡོ་ཥི་ཏ་བཙུན་མོ། བྷ་གེ་ཥུ་ནི་བྷ་ག་རྣམས་ལ། བི་ཛ་ཧ་རཾ་ནི་བཞུགས་སོ་ཞེས་པ་སྟེ་དག་ལས། བྷ་ག་ཝཱན་ཏེ་བཅོམ་ལྡན་འདས་ཞེས་པ་གོང་འོག་འཁྲུགས་བསྡེབས་ཏེ་བཞུགས་སོ་ཞེས་པ་དང་སྦྱར་བར་བྱའོ། །འདུས་པ་ལས་དེ་ལྟར་གསུངས་པ་དེ་བཞིན་དུ་གསང་བ་མཆོག་གོ་ཞེས་སོགས་གཞན་དུ་སྟེ། རྣལ་འབྱོར་མའི་རྒྱུད་འཁོར་ལོ་སྡོམ་པ་ལ་སོགས་པ་གཞན་དུ་ཡང་རྣམ་པར་བསྟན་ཏེ། གླེང་གཞིའི་དོན་དེ་ཉིད་རྒྱུད་ཀྱི་ཐོག་མ་ནས་ཐ་མའི་བར་གྱི་ཚིག་ལ་ཡང་གནས་པ་སྟེ། རྒྱུད་ཚིག་ཐམས་ཅད་ཀྱིས་དོན་དེ་ཉིད་འཆད་པའི་དོན་ནོ། །འདིར་རྣལ་འབྱོར་མ་རྒྱུད་བསྟན་པ་ནི། མེ་སྟེ་གཞན་དག་སོག་མ་འདྲ། །ཞེས་པ་ལྟར་ན། མ་རྒྱུད་ལས་གསལ་བར་བསྟན་པའི་ངེས་གསང་གིས། །རྣལ་འབྱོར་ཕ་རྒྱུད་ཀྱི་དོན་མེ་ལྟར་གསལ་བར་བྱེད་ཀྱི། གཞན་དུ་ན་སོག་མ་དང་འདྲ་བར་སྙིང་པོ་མེད་དོ། །ཞེས་པར་འགྱུར་ཞིང༌། དེ་ལྟར་འཆད་དགོས་མོད་ཀྱི། འབྲོག་མིའི་འགྱུར་ལས། ཞེས་ནི་མཆོག་ཏུ་གསུངས་པ་ནི། །ཐོག་མ་
ཐ་མའི་རྐང་པར་གནས། །རྣལ་འབྱོར་མ་ཡི་རྒྱུད་དུ་གསུངས། །ཞེས་ཚིག་རྐང་དང་པོ་དོན་ཚན་སྔ་མ་ལ་སྦྱར་ཏེ་འཆད་པ་ཉིད་ལེགས་པས། རྣལ་འབྱོར་མའི་རྒྱུད་འགའ་ཞིག་ཏུ་གསང་བ་མཆོག་གི་ཞེས་སོགས་གསུངས་ཞེས་པ་དང༌། རྒྱུད་འདི་གཉིས་ཚིག་ཐ་དད་ཀྱང་དགོངས་དོན་ལྷན་ཅིག་སྐྱེས་པའི་ཡེ་ཤེས་སུ་གཅིག་པར་རྟོགས་ན། མེ་དང་མཚུངས་པར་རྒྱུད་དོན་གསལ་བར་བྱེད་ཀྱི་གཞན་སྙིང་པོ་མེད་དོ་ཞེས་པ་ཡིན་ནོ། །གོང་དུ་བསྟན་པ་ལྟར། རྫོགས་པའི་རིམ་པའི་ངོ་བོའམ་ཚུལ་གྱིས་རྡོ་རྗེ་སེམས་དཔའ་ཟུང་འཇུག་སེམས་ཀྱི་རྡོ་རྗེ་དེ་ཉིད། རབ་ཏུ་བསྒོམ་པའི་ལམ་དང་ཐབས་གསང་བའི་དེ་ཁོ་ན་ཉིད་རིམ་པ་བཞྀ་པོ་འདི་ཡིན་ལ། བརྗོད་བྱ་རིམ་བཞིན་དེ་ནི་ཕ་རྒྱུད་མ་རྒྱུ་སོ་སོའི་དབྱེ་བ་མེད་དེ། རྒྱུད་གཉིས་ཀའི་དོན་ལ་ཡང་དབྱེ་བ་མེད་པར་གནས་སོ། །གཉིས་པ་དེ་དོན་རྒྱས་པར་བཤད་པ་ལ། རྒྱས་བསྟན་བཤད་པར་དམ་བཅའ་བ་དང༌། རྒྱས་བཤད་དངོས་སོ། དང་པོ་ནི། རྣལ་འབྱོར་རྣལ་འབྱོར་མ་རྒྱུད་ཀྱི། །རབ་གསལ་འདི་ཡི་བཤད་བྱ་བ། །རེ་ཞིག་རྣལ་འབྱོར་རྒྱུད་ལས་ནི། །ཇི་སྐད་བསྟན་ཏེ་བདག་གིས་བསྙད། །འགྱུར་འདི་ལྟར་ན། རྒྱུད་གཉིས་ཀྱི་དོན་རབ་ཏུ་གསལ་བར་ལྷན་ཅིག་སྐྱེས་པའི་རྣམ་གཞག་འདི་ཡིས་བཤད་པར་བྱ་བ་ལས། རེ་ཞིག་རྣལ་འབྱོར་ཕ་རྒྱུད་ཀྱི་གླེང་གཞི་ལས། །ཇི་སྐད་བསྟན་པ་སྟེ། བདག་གིས་བསྙད་པར་བྱ་ཞེས་པ་ཡིན་ཡང༌། འབྲོག་འགྱུར་ལས་རྐང་པ་དང་པོ་གཉིས།
རྣལ་འབྱོར་རྣལ་འབྱོར་མ་རྒྱུད་དུ། འདིའི་དབྱེ་བ་བཤད་པར་བྱ། ཞེས་བསྒྱུར་བ་ལེགས་ཏེ། རྒྱུད་གཉིས་སུ་གསུངས་པའི་རིམ་པ་བཞི་པོ་འདིའི་དབྱེ་བ་བཤད་པར་བྱའོ། །ཞེས་འདི་མན་ཆད་ལེའུ་གསུམ་པོ་སྤྱིའི་བཤད་པར་དམ་བཅའ་ཡིན་ལ། ཚིག་རྐང་ཕྱི་མ་གཉིས་ནི་ལེའུ་འདི་ཉིད་ཀྱི་ནང་ནས་འཆད་འགྱུར་རྣམས་ཀྱི་བཤད་པར་དམ་བཅའོ། །ད་ནི་རྒྱས་བཤད་དངོས་ལ། གོང་དུ་བསྟན་པའི་ཚིག་བཅུ་པོ་དེ་དག་ལས། གཅིག་ན་ཞེས་པ་དང༌། དུས་ཞེས་པའི་བཤད་པ་གཉིས་གཞུང་སྡེ་ཚན་གཅིག་ཏུ་བསྡོམས། ཐམས་ཅད་དེ་བཞིན་གཤེགས་པ་ཞེས་པ་དང༌། སྐུ་གསུང་ཐུགས་རྡོ་རྗེ་ཞེས་པ་དང༌། བཙུན་མོའི་བྷ་ག་རྣམས་ལ་ཞེས་པ་སྟེ། གསུམ་པོའི་བཤད་པ་ཡང་སྡེ་ཚན་གཅིག་ཏུ་བསྡོམས། བཞུགས་སོ་ཞེས་པ་བཅོམ་ལྡན་འདས་ཞེས་པ་དང༌། བྷ་ག་རྣམས་ལ་ཞེས་པ་གཉིས་ཀར་གྱི་མཐར་སྦྱར་ཏེ། གཞུང་དུམ་བུ་ལོགས་སུ་མེད་པས། ཚིག་བཅུའི་གོ་རིམ་ལ་གཞུང་དུམ་བུ་དྲུག་ཡོད་ཅིང༌། ཐོག་མར་འདི་སྐད་དང༌། བདག་གིས་ཞེས་པ་སྦྲེལ་བ་ཡི་གེ་བཞིའི་བཤད་པ་དང༌། ཡང་བདག་གིས་དང་ཐོས་པ་ཞེས་པ་སྦྲེལ་བ་ཡི་གེ་བཞིའི་བཤད་པ་སྟེ། སྡེ་ཚན་ལྷག་པོ་གཉིས་བསྣན་པས་གཞུང་ཚོམ་བུ་བརྒྱད་ཡོད་དེ། དེ་ཡང་ཨེ་ཡིག་ས་རུ་ཤེས་བྱ་སྟེ། ཞེས་པ་ལ་སོགས་པས། འདི་སྐད་བདག་གིས་ཞེས་པ་ཡི་གེ་བཞིའི་བཤད་པའོ། །ཨེ་དང་ཝཾ་ཞེས་བྱ་བ་ཉིད། །ཅེས་པ་ལ་སོགས་པས། འདི་སྐད་ཅེས་པ་ཁོ་ན་བཤད་
པ་དང༌། དེ་མཐར་བདག་གིས་ཞེས་གསུངས་པ་ཞེས་པ་ལ་སོགས་པས། བདག་གིས་ཞེས་པ་ཁོ་ན་བཤད་པ་དང༌། གཞན་ཡང་ཐོས་པ་ཞེས་གསུངས་པ། ཞེས་པ་ལ་སོགས་པས་ཐོས་པ་ཞེས་པ་ཁོ་ན་བཤད་པ་དང་ཤེས་རབ་ཐབས་ཀྱི་བདག་ཉིད་སྦྱོར་ཞེས་པ་ལ་སོགས་པས། བདག་གིས་ཐོས་པ་ཞེས་པ་ལ་སོགས་པ་ཡི་གེ་བཞིའི་བཤད་པ་དང༌། གཅིག་ན་ཞེས་བྱའི་ཚིག་གི་ནི་ཞེས་པ་ལ་སོགས་པ་ནི། དུས་གཅིག་ན་ཞེས་པའི་དོན་བཤད་པ་དང༌། དུས་གཅིག་པོ་ནི་དེ་ཉིད་ནའང་ཞེས་པ་ལ་སོགས་པས་ནི། བཅོམ་ལྡན་འདས་བཞུགས་སོ། །ཞེས་པའི་དོན་བཤད་པ་དང། ཐམས་ཅད་སྒྲ་རུ་བརྗོད་པ་ནི། །ཞེས་པ་ལ་སོགས་པས་ཐམས་ཅད་དེ་བཞིན་གཤེགས་པའི་སྐུ་གསུང་ཐུགས་རྡོ་རྗེ་བཙུན་མོའི་བྷ་ག་རྣམས་ལ་བཞུགས་སོ་ཞེས་བཤད་པ་སྟེ། དེ་དག་ལས་གཞུང་ཚོམ་བུ་དང་པོ་གཉིས་ཀྱིས། རྒྱུད་ཀྱི་དངོས་པོ་གཙོ་བོར་བཤད་ཅིང༌། རྒྱུད་རིམ་དང་སྔགས་རིམ་གྱི་ལམ་ཤུགས་ལ་བསྟན་ནོ། །གསུམ་པས་ཡེ་ཤེས་ཀྱི་རིམ་པ་དང༌། བཞི་པས་གསང་རིམ་གྱི་སྤྲུལ་སྐུ་དང༌། ལྔ་པས་གསང་རིམ་འབྲས་བུ་དང་བཅས་པའི་མཚན་ཉིད་དང༌། དྲུག་པས་གསང་རིམ་གྱི་ངོ་བོ་ཉིད་སྐུ་དང༌། བདུན་པས་གསང་རིམ་གྱི་འབྲས་བུ་དང༌། བརྒྱད་པས་རྫོགས་པའི་སངས་རྒྱས་ཀྱི་བཞུགས་ཚུལ་རྣམས་བསྟན་ཏེ། གཞི་ལམ་འབྲས་བུས་བསྡུས་པའི་ཆོས་ཐམས་ཅད་ཀྱི་སྙིང་པོ་གསལ་བར་བཤད་ཅིང༌།
གནད་རྣམས་རྒྱས་པར་བསྟན་པའོ། །དེ་ལྟར་ན་རྒྱས་བཤད་ཀྱི་སྐབས་འདིའི་གཞུང་གི་དོན་འདི་ལྟར་བྱ་སྟེ། དང་པོར་རྒྱུད་ཀྱི་དངོས་པོ་རྒྱུའི་རྫོགས་རིམ་དང་བཅས་པ་བཤད། བར་དུ་འབྲས་བུའི་རྫོགས་རིམ་ཡེ་ཤེས་དང་བཅས་པར་བསྟན། མཐར་རྫོགས་པའི་སངས་རྒྱས་ཀྱི་བཞུགས་ཚུལ་ངོས་གཟུང་བ་སྟེ་གསུམ་ལས། དང་པོ་ལ་གླེང་གཞི་ཡི་གེ་བཞིས་བསྟན་པ་དང༌། ཡི་གེ་གཉིས་ཀྱིས་བསྟན་པའོ། །དེ་ལས་དང་པོ་ཨེ་ཝཾ་མ་ཡཱ་ཡི་གེ་བཞིའི་དོན་བཤད་པ་ནི། ཨེ་ཡིག་ས་རུ་ཤེས་བྱ་སྟེ། །ལས་ཀྱི་ཕྱག་རྒྱ་སྤྱན་མ་ཡིན། །བརྩེ་བ་ཆེ་དང་ཐབས་ཆེན་པོ། །རང་བཞིན་སྣ་ཚོགས་སྤྱོད་ཡུལ་ཏེ། ལྟེ་བར་སྣ་ཚོགས་འདམ་སྐྱེས་ནི། །སྤྲུལ་པའི་འཁོར་ལོར་གནས་པའོ། །ཝཾ་ཡིག་ཆུ་རུ་ཤེས་བྱ་སྟེ། །ཆོས་ཀྱི་ཕྱག་རྒྱ་མཱ་མ་ཀཱི། །བྱམས་དང་སྨོན་ལམ་ངོ་བོ་སྟེ། །ལྷ་མོ་རྡོ་རྗེའི་རིགས་རྗེས་འགྲོ། །སྙིང་གར་ཆུ་སྐྱེས་འདབ་བརྒྱད་པའི། །ཆོས་ཀྱི་འཁོར་ལོར་ཡང་དག་གནས། །མ་ཡིག་མེ་རུ་བསྟན་པ་སྟེ། །ཕྱག་རྒྱ་ཆེན་པོ་གོས་དཀར་མོ། །དགའ་དང་སྟོབས་ཀྱི་སྦྱོར་བ་ཡིས། །ལྷ་མོ་པདྨའི་རིགས་ལས་བྱུང༌། །མགྲིན་པར་ཆུ་སྐྱེས་བརྒྱད་གཉིས་འདབ། །ལོངས་སྤྱོད་འཁོར་ལོར་གནས་པའོ། །ཡཱ་ཡིག་རླུང་གི་གཟུགས་ཅན་ཏེ། །ཉོན་མོངས་ཐམས་ཅད་རབ་འཇོམས་པ། །དམ་ཚིག་ཕྱག་རྒྱ་ཆེན་པོ་སྟེ། ། སྒྲོལ་མ་འཁོར་བ་སྒྲོལ་བྱེད་པ། །བཏང་སྙོམས་ཡེ་ཤེས་སྦྱོར་བ་ཡིས། །ལྷ་མོ་ལས་ཀྱི་རིགས་ལས་བྱུང༌། །སུམ་
ཅུ་གཉིས་འདབ་འདམ་སྐྱེས་ནི། །བདེ་ཆེན་འཁོར་ལོ་ཆེན་པོའོ། །ཚིགས་བཅད་འདི་དག་ནི་ཨེ་ཝཾ་མ་ཡཱ་ཞེས་པའི་ཡི་གེ་བཞིའི་བརྡས་མཚོན་པའི་རྩ་འཁོར་ལོ་བཞི་དང་འབྲེལ་བ་བཞི་ཚན་གྱི་ཆོས་རྣམས་སྟོན་ཏེ། ཨེ་ཡིག་གི་བརྡས་འབྱུང་བ་སའི་ཁམས་སུ་ཤེས་པར་བྱ་ཞིང༌། གཞི་དུས་ལྟེ་བ་སྤྲུལ་པའི་འཁོར་ལོའི་དབུས་སུ་ས་ཁམས་ཀྱི་དྭངས་མ་གཙོ་བོར་གྱུར་པའི་རླུང་དང་ཁམས་གནས་པ་ཡིན་ལ། དེའི་ལམ་གྱི་དག་པ་ནི་ལས་ཀྱི་ཕྱག་རྒྱ་དང་ཐབས་ཀྱི་ཕ་རོལ་ཏུ་ཕྱིན་པ་ཡིན་ལ། འབྲས་བུའི་དག་པ་ནི་སངས་རྒྱས་སྤྱན་མ་དང༌། གཞི་ལམ་འབྲས་བུ་གསུམ་ཅར་དང་འབྲེལ་བའི་དག་པ་ནི་བརྩེ་བ་སྟེ་སྙིང་རྗེ་ཆེན་པོའོ། ། རང་བཞིན་སྣ་ཚོགས་སྤྱོད་ཡུལ་ཞེས་པ་ལ། ལྟེ་བའི་གནས་ན་རྣམ་སྣང་དང་རིན་པོ་ཆེའི་རིགས་ཀྱི་དག་པ་གཙོ་ཆེ་ཡང༌། སྤྱིར་ན་འབྱུང་བ་ལྔ་དང༌། ཕུང་པོ་ལྔ་དང་བདུད་རྩི་ལྔ་དང༌། དབང་ཡུལ་ལ་སོགས་པ་ཁམས་རང་བཞིན་སྣ་ཚོགས་པ་རྒྱུ་བའི་སྤྱོད་ཡུལ་ཉིད་ཡིན་ལ། དེ་ཉིད་ཀྱི་ཕྱིར་རྩ་འཁོར་དེ་ཡང་ཁ་དོག་སྣ་ཚོགས་པ་ཡིན་པའི་ཕྱིར་སྣ་ཚོགས་འདམ་སྐྱེས་སོ། །རིགས་ཀྱི་དག་པ་ཡང་ལྔ་ཅར་འདུས་པའམ། རྣམ་སྣང་དང་རིན་ཆེན་རིགས་གཅིག་ཏུ་བསྲེས་པའོ། །དེ་བཞིན་ཏུ་ཝཾ་ཡིག་གི་བརྡས་མཚོན་པ། སྙིང་ག་ཆོས་ཀྱི་འཁོར་ལོ་ཆུ་སྐྱེས་ཏེ་རྩ་འདབ་མ་བརྒྱད་པ་ལ། ཆུའི་དྭངས་མ་གནས་པར་ཤེས་པར་བྱ་ཞིང༌། ལམ་ཆོས་ཀྱི་ཕྱག་རྒྱ་དང་
སྨོན་ལམ་གྱི་ཕ་རོལ་ཏུ་ཕྱིན་པ། འབྲས་བུ་ལྷ་མོ་མཱ་མ་ཀཱི་དང༌། རྡོ་རྗེའི་རིགས་མི་བསྐྱོད་པ། གཞི་ལམ་འབྲས་ཀུན་ཏུ་བྱམས་པ་ཆེན་པོའོ། །མ་ཡིག་གི་བརྡས་མགྲིན་པ་ལོངས་སྤྱོད་ཀྱི་འཁོར་ལོ་ཆུ་སྐྱེས་ཏེ། རྩ་འདབ་བརྒྱད་གཉིས་བཅུ་དྲུག་གི་འདབ་མ་ཅན་དུ། མེ་ཁམས་ཀྱི་དྭངས་མ་གནས་པར་བསྟན་པ་སྟེ། ལམ་ཕྱག་རྒྱ་ཆེན་པོ་དང༌། སྟོབས་ཀྱི་ཕ་རོལ་ཏུ་ཕྱིན་པའི་རྣལ་འབྱོར་རོ། འབྲས་བུ་ལྷ་མོ་གོས་དཀར་མོ་དང༌། པདྨའི་རིགས་འོད་དཔག་མེད་ལས་བྱུང་བ། གཞི་ལམ་འབྲས་བུ་ཀུན་ཏུ་དགའ་བ་ཚད་མེད་པའོ། །ཡཱ་ཡིག་གི་བརྡས་སྤྱི་བོ་བདེ་བ་ཆེན་པོའི་འཁོར་ལོ་འདབ་མ་སུམ་ཅུ་རྩ་གཉིས་དང་ལྡན་པའི་:འདི་[འདམ]་སྐྱེས་ཏེ་རྩ་འཁོར་ཆེན་པོ་ལ་རླུང་གི་གཟུགས་ཅན་ཏེ་རང་བཞིན་གྱི་དྭངས་མ་རྣམས་གནས་ལ། ལམ་དམ་ཚིག་གི་ཕྱག་རྒྱ་དང༌། ཡེ་ཤེས་ཀྱི་ཕ་རོལ་ཏུ་ཕྱིན་པའི་སྦྱོར་བ་དང༌། འབྲས་བུ་སེམས་ཅན་འཁོར་བའི་སྡུག་བསྔལ་ལས་སྒྲོལ་བར་བྱེད་པ་མོ་ལྷ་མོ་སྒྲོལ་མ་དང༌། ལས་ཀྱི་རིགས་ཏེ་དོན་ཡོད་གྲུབ་པའི་རིགས་ལས་བྱུང་བ་དང༌། གཞི་ལམ་འབྲས་གསུམ་ཀར་དུ་བཏང་སྙོམས་ཚད་མེད་པའོ། །དེ་ལྟར་ན་ཡི་གེ་བཞི་དང༌། འཁོར་ལོ་བཞི་དང༌། འབྱུང་བ་བཞི་དང༌། ཕྱག་རྒྱ་བཞི་དང༌། ཕར་ཕྱིན་བཞི་དང༌། ལྷ་མོ་བཞི་དང༌། རིགས་བཞི་དང༌། ཚད་མེད་བཞི་སྟེ་བཞི་ཚན་བརྒྱད་ལས། ཡི་གེ་བཞི་ནི་སྔགས་ཏེ་བརྡ་ཡིན་ལ། འཁོར་ལོ་བཞི་ནི་གཞི་ལམ་འབྲས་གསུམ་
གཏན་ལ་འབབས་པའི་གཞི་ཡིན་ཞིང༌། འབྱུང་བཞིའི་དྭངས་མ་ནི་འཁོར་བའི་དུས་ཀྱི་ཆོས་ཉིད་དང་ཕྱག་རྒྱ་བཞི་དང༌། ཕར་ཕྱིར་བཞི་འཁོར་ལོ་དེ་དག་ལ་གནད་དུ་བསྣུན་པས་དག་པར་བྱེད་པའི་ལམ་དང༌། ལྷ་མོ་བཞི་དང་རིགས་བཞི་ནི་དག་འབྲས་དཀྱིལ་འཁོར་བཞིར་འཆར་བ་དང༌། ཚད་མེད་བཞི་ནི་གཞི་ལམ་འབྲས་གསུམ་ཀུན་ཏུ་ཁྱབ་པའི་ཡེ་ཤེས་བདེ་བ་ཆེན་པོའོ། །དེ་ལ་ཐབས་ཀྱི་ཕ་རོལ་ཏུ་ཕྱིན་པ་ནི། རང་དོན་ཕ་རོལ་ཏུ་ཕྱིན་པ་དྲུག་དང༌། གཞན་དོན་བསྡུ་བའི་དངོས་པོ་བཞི་ལ་སོགས་པ་སྤྱོད་པ་ཐམས་ཅད་རྣམ་པར་མི་རྟོག་པའི་ཡེ་ཤེས་ཀྱིས་ཟིན་པས། མ་ཆགས་མ་ཐོགས་པའི་མཚན་ཉིད་ཅན་དང༌། ཡི་རང་དང་བསྔོ་བ་དང༌། སེམས་བསྐྱེད་དང༌། གང་ལ་གང་འདུལ་གྱི་སྒོ་ནས། སེམས་ཅན་རྣམས་དང་པོར་ལམ་ལ་ཞུགས་པ་དང༌། སྨིན་པ་དང་གྲོལ་བར་བྱེད་པའི་རྐྱེན་མ་ངེས་པ་སྣ་ཚོགས་པ་རྣམས་ལ་མཁས་པ། ཐེག་པ་མཆོག་འདིར་སྔགས་ཀྱི་མཐུས་ཉོན་མོངས་ལམ་དུ་བྱེད་པ་དང༌། དངོས་གྲུབ་ཀྱི་རྒྱུད་དང་ལས་ཀྱི་རྒྱུད་ལ་མཁས་པ་ལ་སོགས་པའོ། །སྨོན་ལམ་ནི་རང་གཞན་གྱི་སྤྱོད་པ་ཐམས་ཅད་བྱང་ཆུབ་མཆོག་དང་ཕན་བདེའི་འབྲས་བུར་སྒྱུར་བར་བྱེད་པའི་སྨོན་སེམས་དམིགས་པ་མེད་པའི་རྣམ་པ་ཅན་ཏེ། ཐེག་མཆོག་འདིར་ནི་དམིགས་པ་མེད་པ་དེ་ཡང་བདེ་བ་ཆེན་པོའི་རྣམ་པའོ། །སྟོབས་ནི་བྱང་ཆུབ་སེམས་དཔའི་སྟོབས་བཅུ་ལ་སོགས་པ་ཡིན་པར་གྲགས་ལ།
ཤེས་རབ་དང་སྙིང་རྗེ་དང༌། དགེ་རྩ་བསགས་པའི་སྟོབས་ཆེན་པོས། རང་རྒྱུད་ལ་ངོ་སྐལ་གྱི་སྒྲིབ་པས་ཚུར་ཟིལ་གྱིས་མི་གནོན་ཞིང་ཕར་ལ་འཇོམས་པ་དང༌། གཞན་རྒྱུད་ཀྱི་བདུད་བཞིའི་སྟོབས་མ་ལུས་པ་འཇོམས་ཤིང་འཕྲོག་པར་བྱེད་པ་སྟེ། དེ་ནི་ཆོས་སྟོན་པ་དང་རྫུ་འཕྲུལ་གྱིས་སོ། །ཐེག་པ་འདིར་ནི་རླུང་དང་ཐིག་ལེ་རྣམ་པར་དག་པའི་སྟོབས་ཀྱང་བསྣན་པར་བྱའོ། །ཡེ་ཤེས་ནི་སྤྲོས་པ་དང་བྲལ་བའི་མཁྱེན་པ་གཅིག་གིས་ཇི་སྙེད་པའི་ཆོས་ཐམས་ཅད་ཆགས་ཐོགས་མེད་པར་མཁྱེན་པ་ཡིན་ལ། འདིར་ནི་བདེ་བ་ཆེན་པོའི་ཡེ་ཤེས་གཅིག་ཉིད་རྣམ་པ་ཀུན་ལྡན་ནོ་ཞེས་པའི་མཚན་ཉིད་ཀྱི་ཟུར་ཡང་བསྣན་པར་བྱའོ། །འདིར་སྤྱན་མ་ལ་སོགས་པ་ལྷ་མོ་བཞི་འཁོར་ལོ་བཞི་ལ་སྦྱར་བས། སྤྱན་སོགས་ལྷ་མོ་བཞིའི་དག་པ་ཅན་གྱི་པདྨ་ཅན་སོགས་རིག་མ་བཞི་ཡང་བསྟན་པ་ཡིན་ཏེ། དེ་ལ་རིག་མ་བཞི་པོ་རེ་རེས་ཀྱང་འཁོར་ལོ་བཞི་ཀ་དག་པར་བྱེད་པ་ནི་ཡིན་མོད་ཀྱི། གཙོ་བོར་པདྨ་ཅན་མས་ལྟེ་བ་དང༌། གླང་པོ་ཅན་མས་སྙིང་ག་དང༌། རི་མོ་ཅན་མས་མགྲིན་པ་དང༌། དུད་ཅན་མས་སྤྱི་བོ་དག་པར་བྱེད་པས། །དེ་དག་རིམ་བཞིན་སྤྱན་མ་ལ་སོགས་པའི་ངོ་བོར་བཤད་ལ། དག་པ་སྦྱོར་བའི་དོན་ནི། རིག་མ་དེ་དང་དེ་དག་ལ་ཡང་རྩ་འཁོར་དེ་དང་དེ་དག་མཐུ་ཆེན་པོར་ཡོད་པ་དང༌། དེ་དང་དེ་བསྟེན་པས་སྒྲུབ་པ་པོའི་རྩ་འཁོར་དེ་ངག་སོ་སོའི་རྩ་མདུད་གྲོལ་བ་དང༌། དེ་རྣམས་བྱང་ཆུབ་ཀྱི་སེམས་ཀྱིས་གང་བར་འགྱུར་པའི་ནུས་མཐུ་ཡོད་
པའོ། །དེ་ལྟར་ཡང་གསང་བ་འདུས་པ་ལས། རེག་པ་ཆེན་མོ་སྤྱན་ལ་སོགས། །རྟག་ཏུ་འདོད་པའི་དོན་བརྩོན་པ། །འདོད་པའི་ལོངས་སྤྱོད་དག་གིས་ནི། །ཇི་ལྟར་འདོད་པར་བསྟེན་ན་འགྲུབ། །ཅེས་སོ། །འདིར་ཆོས་ཉིད་དོན་དམ་པའི་ཡེ་ཤེས་གདོད་མའི་སྐུ་བཞིའམ་རྡོ་རྗེ་བཞིར་གནས་པ་ལ། རྣམ་པ་ཅན་ཐམས་ཅད་པའི་འཆར་ཚུལ་བཞི་ཚན་དེ་རྣམས་འབྱུང་བ་སྟེ། འཁོར་འདས་ཀྱི་ཆོས་ཐམས་ཅད་རྡོ་རྗེ་བཞིའི་སྣང་ཆ་ལས་འབྱུང་ཚུལ་ལ་ངེས་པ་རྙེད་པར་བྱའོ། །གཉིས་པ་ཐོག་མའི་ཡི་གེ་གཉིས་བྱེ་བྲག་ཏུ་བཤད་པ་ནི། ཨེ་དང་ཝཾ་ཞེས་བྱ་བ་ཉིད། །གཉིས་གཉིས་སུ་ནི་བརྗོད་པ་སྟེ། །འོག་དང་སྟེང་དུ་སྙོམས་འཇུག་པས། །ཤེས་རབ་ཐབས་ཀྱི་རང་བཞིན་ནོ། །ཨེ་ཡིག་ཤེས་རབ་བརྗོད་པ་སྟེ། །ཝཾ་ཞེས་བྱ་བའང་ཐབས་ཡིན་ནོ། །འདི་ནི་ཝཾ་གིས་བརྒྱན་པ་སྟེ། །ཨེ་ཞེས་བྱ་བ་ངེས་པར་མཛེས། །ཝཾ་ནི་སྙིང་ག་མགྲིན་པ་ཡི། །དབུས་ན་རྒྱན་གྱི་མཆོག་ཡིན་ཏེ། །ཨེ་ནི་མགོ་བོ་ལྟེ་བ་ན། །རྒྱན་བྱ་ཕྱི་རོལ་ཡང་དག་གནས། །སངས་རྒྱས་ལྔ་ཡི་བདག་ཉིད་སྐུ། །ཝཾ་ཡིག་རྡོ་རྗེར་བརྗོད་པ་ཡིན། །ལྷ་མོ་ལྔའི་བདག་ཉིད་སྐུ། །ཨེ་ཡིག་པདྨར་བརྗོད་པ་ཡིན། །ཨེ་ཡིག་རྣམ་པ་བཟང་པོ་གང༌། །དབུས་སུ་ཝཾ་གི་རྣམ་པར་བརྒྱན། །བདེ་བ་ཐམས་ཅད་ཀྱི་ནི་གཞི། །སངས་རྒྱས་རིན་ཆེན་ཟ་མ་ཏོག ཁམས་གསུམ་པ་ནི་མ་ལུས་པ། །འདི་སྐད་རྒྱུད་དུ་གསུངས་པ་ཡིན། །
འདི་ནི་ཨེ་དང་ཝཾ་གི་ཡི་གེ་གཉིས་བྱེ་བྲག་ཏུ་བཤད་པ་ཡིན་ཏེ། སྔར་གྱི་འཁོར་ལོ་བཞི་པོ་དེ་ཐབས་ཤེས་སུའང་བསྟན་ནོ། །དེ་ལ་ཨེ་དང་ཝཾ་ཞེས་བྱ་བ་ཉིད་ནི། འོག་གི་སྒོ་དང་འབྲེལ་བའི་ཨེ་ཝཾ་གཉིས་དང༌། སྟེང་གི་སྒོ་དང་འབྲེལ་བའི་ཨེ་ཝཾ་གཉིས་སུ་བརྗོད་པ་སྟེ། དེ་ཐམས་ཅད་ཀྱང་ཐབས་དང་ཤེས་རབ་ཁ་སྦྱོར་གྱི་རང་བཞིན་ནོ། །འོག་དང་སྟེང་དུ་སྙོམས་འཇུག་པ་ཞེས་པ་ལ། རྫོགས་རིམ་སྤྱི་ལ་སྦྱར་ན་འོག་ཏུ་སྙོམས་པར་འཇུག་པ་ཕོ་ཉའི་ལམ་སྟེ། ལས་དང་ཡེ་ཤེས་དང་ཕྱག་རྒྱ་ཆེན་པོ་གསུམ་ཆར་ལ་ཡང༌། ཤེས་རབ་ཀྱི་པདྨ་ནི་ཨེ་ཡིག་དང༌། ཐབས་ཀྱི་རྡོ་རྗེ་ནི་ཝཾ་ཡིག་གོ །སྟེང་དུ་སྙོམས་པར་འཇུག་པ་ནི། རང་ལུས་ཐབས་ལྡན་རང་བྱིན་རླབས་པ་སྟེ། ཕྱི་ཕྱག་རྒྱའི་རྐྱེན་ལ་མ་ལྟོས་པར། རྩའི་རྣལ་འབྱོར་རམ་རླུང་ངམ་ཐིག་ལེའམ། མི་རྟོག་པའམ། འབར་འཛག་གི་དམིགས་པ་སོགས་ཀྱི་སྣ་དྲངས་པ་ལས། རླུང་སེམས་དབུ་མར་ཐིམ་པའི་བདེ་བ་བསྐྱེད་པའི་དབང་དུ་བྱས་ན། ཨེ་ཡིག་ནི་ལྟེ་བའི་གཏུམ་མོ་དང༌། ཝཾ་ཡིག་ནི་འཁོར་ལོ་གོང་མ་གསུམ་གྱི་ཐིག་ལེའོ། །ཡང་རང་ལུས་ཐབས་ལྡན་ཁོ་ན་ལ་སྦྱར་ན། མགྲིན་པ་དང་སྤྱི་བོ་ཁ་སྦྱོར་སྟེང་གི་སྙོམས་འཇུག་དང༌། སྙིང་ག་དང་ལྟེ་བ་ཁ་སྦྱོར་གྱི་འབར་འཛག་འོག་གི་སྙོམས་འཇུག་གོ །ཕོ་ཉའི་ལམ་ཁོ་ན་ལ་སྦྱར་ན། རྡོ་རྗེ་དང་པདྨ་ནི་འོག་གི་སྙོམས་འཇུག་ཡིན་ལ། རྗེས་ཆགས་ཀྱི་མེ་དང་ཞུ་བདེ་ནི་སྟེང་གི་སྙོམས་འཇུག་གོ །
ཡང་ན་མགྲིན་པའི་བརྡས་བོལ་དང༌། སྤྱི་བོའི་བརྡས་ཀཀྐོ་ལ་མཉམ་པར་སྦྱོར་བ་སྟེང་གི་དང༌། སྙིང་གའི་བརྡས་ཤེས་རབ་ཀྱི་སྣ་རྩེ་དང༌། ལྟེ་བའི་བརྡས་ནོར་བུའི་རྩ་འཁོར་ཏེ། འོག་གི་སྙོམས་འཇུག་གོ །དེས་ན་ཝཾ་ནི་སྙིང་ག་དང༌། མགྲིན་པའི་འཁོར་ལོའི་དབུས་ན། རྩ་མདུད་ཟླུམ་པོ་རྒྱན་གྱི་མཆོག་ལྟར་གནས་པ་རྒྱན་པར་བྱེད་པ་པོ་དེ་ཡིན་ལ། ཨེ་ནི་མགོ་བོ་སྟེ། སྤྱི་བོའི་འཁོར་ལོ་དང༌། ལྟེ་བའི་དབུས་ན་རྩ་མདུད་གྲུ་གསུམ་གྱི་རྣམ་པ་ཝཾ་གིས་བརྒྱན་པར་བྱ་རྒྱུ་དེ་ཡིན་ནོ། །ཕྱི་རོལ་ཡང་དག་གནས་ཞེས་པ་ནི། ཨེ་སྣོད་ཀྱི་འཇིག་རྟེན་ལ་ཝཾ་བཅུད་ཀྱི་སེམས་ཅན་གནས་པ་དང༌། བསྐྱེད་རིམ་གྱི་དུས་སུ་ཆོས་འབྱུང་ལ་གཞལ་ཡས་ཁང་གནས་པ་དང༌། ནམ་མཁའ་ལ་འཇིག་རྟེན་གྱི་ཁམས་གནས་པ་དང༌། སྐྱེ་གནས་བཞིས་བསྡུས་པའི་སྐྱེ་བ་ལེན་པའི་གནས་སུ། སྐྱེ་སྲིད་ལ་གནས་པའི་སེམས་ཅན་འབྱུང་བ་དང༌། བསྐྱེད་རིམ་དང་ལས་རྒྱལ་ལྷ་ཡབ་ཡུམ་ཁ་སྦྱོར་དུ་གནས་པ་རྣམས་ཀྱང་སྟོན་ཏེ། ནང་གི་ཨེ་ཝཾ་མཉམ་སྦྱོར་གྱིས་མཐུ་ལས། ཕྱི་སྣོད་བཅུད་ཀྱི་འཇིག་རྟེན་དང༌། ཕྱི་བསྐྱེད་རིམ་དང༌། ཕྱིའི་སྲོག་རྩོལ་ལས་རྒྱ་རྣམས་ལ་ཡང་ཨེ་ཝཾ་ཁ་སྦྱོར་ཡང་དག་པར་གནས་སོ། །དེ་དག་ལས་ཝཾ་ཡིག་གིས་མཚོན་པ་འདི་ནི་དབུས་སུ་བརྒྱན་པར་བྱེད་པ་པོ་སྟེ། གང་ལ་བརྒྱན་ཞིང་མཛེས་པར་བྱ་བའི་ཡུལ་ནི། ཨེ་ཡིག་ཅེས་བྱ་བས་ཉེ་བར་མཚོན་པ་རྣམས་སོ། །
འདི་ནི་ཝཾ་གི་སོགས་པ་འབྲོག་འགྱུར་ལས། ཝཾ་གིས་རྣམ་པར་བརྒྱན་པ་འདི། །ཨེ་ནི་ངེས་པར་མཛེས་པར་འགྱུར། །ཞེས་འབྱུང་བ་གོ་བདེའོ། །དོན་དམ་པའི་ཨེ་ཝཾ་ནི་སངས་རྒྱས་ལྔ་སྟེ། ཕུང་པོ་ལྔའི་དྭངས་མའི་བདག་ཉིད་ཀྱི་སྐུ་སྟེ་ཡེ་ཤེས་ལྔ་ནི་ཝཾ་ཡིག་གི་མཚོན་དོན་བདེ་སྟོང་གཉིས་སུ་མེད་པའི་འོད་གསལ་རྡོ་རྗེར་བརྗོད་པ་ཡིན་ལ། ལྷ་མོ་ལྔ་སྟེ་འབྱུང་བ་ལྔའི་དྭངས་མའི་བདག་ཉིད་ཀྱི་ཡེ་ཤེས་ཀྱི་སྐུ་ནི་ཨེ་ཡིག་ཡིན་ཏེ་རྣམ་པ་ཐམས་ཅད་པའི་སྟོང་ཉིད་པདྨར་བརྗོད་དོ། །འབྱུང་བ་ལྔའི་ནམ་མཁའ་ལ་ཕྱེ་ན། ནམ་མཁའ་རྣམ་ཤེས་གཉིས་སུ་ཡང་འགྱུར་བས། རྒྱུད་གཞན་ལས། ཝཾ་ཡིག་སྟོང་ཆེན་ཡིག་ལྔ་དང༌། ཨེ་ཐིག་ལེ་སྟོང་བ་ཡིག་དྲུག་ཏུ་བཤད་པ་དང་དོན་གཅིག་གོ །མདོར་ན་གདོད་མར་རང་བྱུང་ཡེ་ཤེས་ལྔ་པོ་བདེ་བ་མི་འགྱུར་བའི་ཆ་ནི་ཝཾ་ཡིག་ཡིན་ལ། སྟོང་པ་སྤྲོས་བྲལ་གྱི་ཆ་ནི་ཨེ་ཡིག་ཡིན་ཞིང༌། གཉིས་ཀར་ཡང་རྣམ་པ་ཐམས་ཅད་པ་ཡིན་པས་ན། ཕུང་པོ་དང་འབྱུང་བའི་དྭངས་མར་མཚན་བཏགས་པའོ། །དེ་ལྟར་ན་ཨེ་ཡིག་གི་བརྡས་ནི་ཤེས་རབ་ཀྱི་ཕྱོགས་བརྗོད་པ་དང༌། ཝཾ་ཡིག་ཅེས་བྱ་བ་ཡང་ཐབས་ཅད་ཀྱི་བརྡའ་ཡིན་ནོ། །དེ་ལྟར་ན་རང་ལུས་དང་གཞན་ལུས་ཀྱི་ཨེ་ཡིག་གི་རྣམ་པའམ་དབྱིབས་བཟང་པོ་གྲུ་གསུམ་མམ་ཁོང་སྟོང་གང་ཡིན་པ་དེ་ལ། དབུས་སུ་ཝཾ་ཡིག་གི་རྣམ་པ་གོང་བུ་དང་ཟླུམ་པོས་བརྒྱན་པ་སྟེ་རྩ་འཁོར་ཁ་སྦྱོར་དང༌། རྡོ་རྗེ་དང་པདྨ་ཁ་སྦྱོར་དེ་ནི་ཞུ་བདེ་དགའ་བ་བཞི་པོ་ཐམས་ཅད་འབྱུང་བའི་གཞི་
ཡང་ཡིན་ལ། རྟེན་རྩ་འཁོར་བརྟེན་པ་ཞུ་བདེར་བཅས་པ་དེ་ནི་དོན་དམ་པའི་སངས་རྒྱས་ཀྱི་རིན་པོ་ཆེ་ཡེ་ཤེས་ལྔ་གཉིས་གཅིག་ཏུ་འདྲེས་པ་དེའི་ཟ་མ་ཏོག་སྟེ་སྣོད་ལྟ་བུ་ཡིན་ན། སྣོད་ཀྱི་དོན་ཡང་ད་ལྟ་སྒྲིབ་གཡོགས་སུ་ཡང་ཡོད་ཅིང༌། དེའི་ནང་ན་དེ་གནས་པ་དང༌། ཆུད་མི་འཛའ་བར་འཛིན་ཅིང་དེ་ལས་མངོན་གྱུར་དུ་འབྱུང་བའི་དོན་ནོ། །ཞུ་བདེ་དེ་ནི་རང་བཞིན་གྱི་ཨེ་ཝཾ་དེའི་ཟ་མ་ཏོག་ཡིན་པར་མ་ཟད། ཁམས་གསུམ་འཁོར་བ་ཐམས་ཅད་ཀྱང༌། ཆོས་ཉིད་བདེ་ཆེན་དེའི་ཟ་མ་ཏོག་ཡིན་པས། སྣོད་བཅུད་ལ་སོགས་པ་ཐམས་ཅད་གོང་དུ་བཤད་པ་ལྟར་ཨེ་ཝཾ་དུ་འདུས་ལ། དོན་དམ་ཁམས་གསུམ་ནི། ཡེ་ཤེས་ལྔ་པ་གཉིས་ཏེ་མཐར་ཐུག་གི་ཨེ་ཝཾ་དངོས་ཡིན་པས། འཁོར་འདས་ཀྱི་ཁམས་གསུམ་པོ་མ་ལུས་པ་ནི། འདི་སྐད་དེ། ཨེ་ཝཾ་གི་སྒྲས་རྒྱུད་རྣམས་སུ་གསུངས་པ་ཡིན་ནོ། །འདི་དག་ལ་སྔ་རབས་པ་ཁ་ཅིག ཡི་གེ་བཞིས་རྒྱུད་རིམ་དང༌། ཡི་གེ་གཉིས་ཀྱིས་སྔགས་རིམ་བསྟན་པར་འདོད་པ་དང༌། གཞན་ཁ་ཅིག སངས་རྒྱས་རིན་ཆེན་ཟ་མ་ཏོག་ཅེས་པ་ཡན་ཆད་རྒྱུད་རིམ་དང༌། ཁམས་གསུམ་སོགས་ཀྱིས་སྔགས་རིམ་བསྟན་པར་འདོད་ཀྱང༌། ཨེ་ཡིག་ས་རུ་ཤེས་བྱ་སྟེ་ཞེས་པ་ནས། འདི་ཡན་ཆད་ཀྱི་གཞུང་གི་གཙོ་བོར་གཞིའི་གནས་ལུགས་དོན་དམ་དང་ཀུན་རྫོབ་གང་ཡིན་པ་དེ་བསྟན་ཅིང༌། གང་ལ་གནད་དུ་བསྣུན་ན་ཡེ་ཤེས་འཆར་བར་འགྱུར་བའི་ལུས་སེམས་ཀྱི་གནས་ཐབས་
སམ་རྒྱུད་ཀྱི་དངོས་པོ་གཙོ་བོར་བསྟན་པའོ། །འོན་ཀྱང་ཞོར་བྱུང་གི་ཚུལ་དུ་རང་ལུས་འཁོར་ལོ་བཞི་དང་གཞན་ལུས་རིག་མ་བཞི་ལས། རླུང་སེམས་དབུ་མར་འགག་པར་འགྱུར་བའི་རྒྱུད་རིམ་དང༌། རང་ལུས་ཐབས་ལྡན་དང་གཞན་ལུས་ཤེས་རབ་ཀྱི་ཨེ་ཝཾ་སྙོམས་འཇུག་ཏུ་གཏོགས་པའི་སྔགས་རིམ་ཡང་རྒྱས་པར་བསྟན་པ་ནི་ཡིན་ནོ། །གཉིས་པ་འབྲས་བུའི་རྫོགས་རིམ་ཡེ་ཤེས་དང་བཅས་པ་བཤད་པ་ལ། ཡེ་ཤེས་ཀྱི་རིམ་པ་བཤད་པ། གསང་བའི་རིམ་པ་བཤད་པ། གསང་རིམ་གྱི་འབྲས་བུ་བཤད་པ་སྟེ་གསུམ་ལས། དང་པོ་ནི་ཐོག་མར་ལོངས་སྐུའི་ལམ་ཁྱད་པར་ཅན་གྱི་དབང་དུ་བྱས་ནས་གསུངས་པ། དེ་མཐར་བདག་གིས་ཞེས་གསུངས་པ། །ལོངས་སྤྱོད་རྫོགས་སྐུར་གྲགས་པ་སྟེ། །དེ་ནི་ཁམས་གསུམ་གྱི་བདེ་བ། །ཐམས་ཅད་མྱང་བའི་རྒྱུ་རུ་འགྱུར། །ཡོན་ཏན་གསུམ་བརྒྱན་མཚན་མ་ནི། །མཁའ་དབྱིངས་སྟེང་དུ་ཡང་དག་གནས། །དེ་ཉིད་ངོ་བོས་སྒྲུབ་པ་སྟེ། །མི་ཡི་སྣ་རྩེར་བརྗོད་པ་ཡིན། །དེ་ཡི་དབུས་སུ་གནས་པའི་སེམས། །རྟོག་བཅས་ཟླ་བ་ལྟ་བུ་ནི། །ཀུན་རྫོབ་བྱང་ཆུབ་སེམས་ཞེས་བྱ། །སངས་རྒྱས་གཟུགས་ནི་ཤིན་ཏུ་མཛེས། །དགའ་བའི་རང་བཞིན་གང་དེ་ནི། །ཆགས་པ་ཞེས་བྱར་མངོན་པར་བརྗོད། །ལོངས་སྤྱོད་རྫོགས་པའི་སྐུ་དེ་ནི། །བདག་གིས་ཞེས་བྱར་རབ་ཏུ་གྲགས། །འདི་ནི་ཡི་གེ་བཞིའི་ནང་ནས། །མ་ཡཱ་གཉིས་རྒྱས་པར་བསྟན་པ་སྟེ། སྐབས་འདིར་མ་ཡཱ་ཞེས་པ་བོད་སྐད་དུ་བསྒྱུར་ན།
བདག་གིས་ཞེས་པ་སྟེ། དེ་ལ་མ་ཐིག་ལེའི་རྣམ་པ་སྟེ། བདེ་བ་ཆེན་པོ་བྱང་ཆུབ་ཀྱི་སེམས་ཡིན་ལ། ཡཱ་ནི་ཡ་ཧི་སྟེ་བགྲོད་པ་འགྲོ་འོང་ངོ༌། །དེ་བས་ན་བྱང་ཆུབ་ཀྱི་སེམས་ཀྱི་བགྲོད་པ་འགྲོ་འོང་ལས་བྱུང་བའི་ཡེ་ཤེས། ཞུ་བདེ་འགྱུར་མེད་ཀྱི་རང་བཞིན་དགའ་བའི་ས་བཞི་ནི། བདག་གིས་ཞེས་པའི་དོན་ཡིན་ཞིང༌། དེ་ཉིད་ཁྱད་པར་ཅན་དུ་ན་ཡེ་ཤེས་ཀྱི་རིམ་པ་དང་སྤྱིར་ཡང་ལམ་གྱིས་གནས་སྐབས་ཀྱི་ལོངས་སྤྱོད་རྫོགས་པའི་སྐུའི་ཡེ་ཤེས་ཐམས་ཅད་དོ། །འདི་སྐད་ཅེས་པ་དེའི་མཐར་བདག་གིས་ཞེས་གསུངས་པ་ནི་ལོངས་སྤྱོད་རྫོགས་སྐུར་གྲགས་པ་སྟེ་དེ་ཡང་འདོད་ཁམས་ཀྱི་བརྡས་ཐིག་ལེ་དཀར་པོ་ཞུ་བ་དང༌། གཟུགས་ཁམས་ཀྱི་བརྡས་གཏུམ་མོ་འབར་བ་དང༌། གཟུགས་མེད་ཁམས་ཀྱི་བརྡས་ནས་དེ་དང་དེར་ཐིག་ལེ་གཡོ་བའི་རླུང་ཐིམ་པ་སྟེ། རྒྱུ་གསུམ་འཛོམས་པའི་བདེ་བ་ནི། ཁམས་གསུམ་གྱི་བདེ་བ་ཞེས་བྱ་སྟེ། དེའི་ནང་ཚན་དགའ་བ་བཞི་པོ་ཐམས་ཅད་མྱོང་བ་བརྟན་པའི་རྒྱུ་དགའ་བ་བཞིའི་ས་རེ་རེར་གྱུར་པའོ། །དེ་དག་བཞི་པོ་ཡང་རོ་རྐྱང་དབུ་མ་གསུམ་གྱི་དྭངས་མའམ། ཁུ་རྡུལ་རླུང་གསུམ་གྱི་དྭངས་མའི་ཡེ་ཤེས་ཡིན་པའི་ཕྱིར། སྙིང་སྟོབས་རྡུལ་མུན་ཏེ་ཡོན་ཏན་གསུམ་གྱིས་བརྒྱན་པའི་མཚན་མའམ་རྟགས་བརྟན་པོ་མཁའ་དབྱིངས་ཀྱི་སྒྲས་མགྲིན་སྙིང་ལྟེ་གསང་བཞིའི་རྩ་འཁོར་གྱི་དབུས་ཀྱི་མདུད་པའི་སྟེང་དུ། འཛག་མེད་ཀྱི་ཐིག་ལེ་དང་བདེ་བ་ཡང་དག་པར་གནས་པའོ། །དེ་ལ་དབུ་
མ་དང་རླུང་ནི་མུན་པ་ཡིན་ལ། རོ་མ་དང་ཁྲག་ནི་རྡུལ། རྐྱང་མ་ཁུ་བ་ནི་སྙིང་སྟོབས་ཀྱི་ཡོན་ཏན་ནོ། །སྤྱིར་སྙིང་སྟོབས་ནི་བདེ་བ། དེའི་དྲི་མའི་ཆ་ནི་འདོད་ཆགས། རྡུལ་ནི་གསལ་བ། དེའི་དྲི་མའི་ཆ་ནི་ཞེ་སྡང༌། མུན་པ་ནི་སྟོང་པ། དེའི་དྲི་མའི་ཆ་ནི་གཏི་མུག་གོ །རིམ་པ་དེས་གནས་སྐབས་མང་པོར་སྙིང་སྟོབས་ནི་སྤྱི་བོའི་ཧཾ་ཡིག རྡུལ་ནི་ལྟེ་བའི་གཏུམ་མོ། །མུན་པ་ནི་སྙིང་གའི་དཔྱིད་ལ་ངོས་འཛིན་པའང་ཡོད་ཅིང༌། ཡང་ཚངས་པའི་མེ་ལ་རྡུལ་ཞེས་བྱ་བ་དང༌། དཔྱིད་ཐིག་གཉིས་པོ་མུན་པ་དང༌། མེར་བཤད་པའང་ཡོད་ལ། དོན་དམ་ལུས་ངག་ཡིད་གསུམ་གྱི་ཆོས་ཉིད་དང༌། ཀུན་རྫོབ་དེ་གསུམ་དུ་སྣང་བའི་རྣམ་རིག་དག་པ་ཙམ་ལ། ཡོན་ཏན་གསུམ་དུ་བཤད་པའང་ཡོད་དེ། རྣམ་གྲངས་དུ་མར་བཤད་པ་རྣམས་སྐབས་ཐོབ་ཀྱིས་གོ་བར་བྱ་ལ། དེ་དག་རྩ་བའི་གནད་གཅིག་ལ་འདུས་པའང་ཡིན་ཏེ། སྟོང་པ་དང་སེམས་དང༌། དབུ་མ་དང༌། ཞེ་སྡང་དང༌། དཔྱིད་དང༌། མུན་པའི་ཐིག་ལེ་རྣམས་གནད་གཅིག་སྟེ་ཡིད་ཀྱི་ཆོས་སོ། །གསལ་བ་དང༌། ངག་དང༌། རོ་མ་དང༌། འདོད་ཆགས་དང༌། ལྟེ་བའམ། ཚངས་པའི་མེའི་དམར་ཆ་དང༌། ཁྲག་གི་ཁམས་རྣམས་འགྲོས་གཅིག་སྟེ་ངག་གི་ཆོས་སོ། །བདེ་བ་དང༌། ལུས་དང༌། རྐྱང་མ་དང༌། འདོད་ཆགས་དང༌། ཧཾ་ཡིག་དང༌། ཁུ་བའི་ཁམས་རྣམས་རིགས་གཅིག་སྟེ་ལུས་ཀྱི་ཆོས་སོ། །ཡང་རྩ་ནི་ལུས། རླུང་ནི་ངག ཐིག་ལེ་ཡིད་ཀྱི་ཆོས་སུ་འཇོག་
པའང་ཡོད་ལ། དེ་དག་རེ་རེ་ལ་ཡང་ནང་གསེས་ཡོན་ཏན་གསུམ་གསུམ་དུ་དབྱེ་བ་སོགས་རྣམ་གྲངས་མཐའ་ཡས་པར་འགྱུར་ཏེ། རྟོགས་པར་སླའོ། །དེ་ཉིད་ངོ་བོས་སྒྲུབ་པ་སྟེ་ཞེས་པ་འབྲོག་འགྱུར་ལས། སྒྲུབ་པ་རིན་ཆེན་གཟུགས་ཀྱིས་ནི། །ཞེས་བསྒྱུར་བ་ལྟར་ལེགས་པས། ཐིག་ལེ་དེ་བརྟན་པར་སྒྲུབ་པ་ན། རིན་པོ་ཆེ་ལྟར་ཡོན་ཏན་དུ་མ་དང་ལྡན་པའི་གཟུགས་ཀྱིས་མིའི་སྣ་རྩེ་སྟེ། རྡོ་རྗེ་ནོར་བུ་ཡན་ཆད་དུ་བརྟན་པར་བརྗོད་པ་ཡིན་ནོ། །རྟེན་བྱང་ཆུབ་ཀྱི་སེམས་བརྟན་པོ་དེའི་དབུས་སུ་གནས་པ་ལྟར། བརྟན་པའི་ཚུལ་དུ་བཞུགས་པའི་སེམས་ནི། ཡས་བབས་ཀྱི་བདེ་བ་ཡིན་པའི་ཕྱིར་ན། རྟོག་བཅས་སམ་ཟག་བཅས་ཀྱི་རིགས་ཡིན་ཡང༌། དངོས་སུ་ན་ཟླ་བ་དཀར་པོ་ལྟར། རྣམ་རྟོག་དང་སྲེད་པ་མངོན་གྱུར་པའི་དྲི་མ་ནག་པོས་མ་གོས་པ་དེ་ནི་བདེ་ལ་མི་རྟོག་པ་ཡིན་ཡང༌། ཞུ་བདེ་ཡིན་པའི་ཕྱིར་ན་དོན་དམ་དུ་མི་འཇོག་སྟེ། ཀུན་རྫོབ་བྱང་ཆུབ་ཀྱི་སེམས་ཞེས་བྱའོ། །ནོར་བུར་ལྷན་ཅིག་སྐྱེས་པའི་ས་ཐོབ་པའི་རྗེས་ཐོགས་ནས། མས་བརྟན་གྱི་དགའ་བའི་ས་མ་ཐོབ་ཀྱང༌། སྐད་ཅིག་མས་བསྡུས་པའི་མས་བརྟན་གྱི་དགའ་བ་བཞིའམ་བཅུ་དྲུག་ལ། ཡོན་ཏན་གསུམ་བརྟན་པར་བཅིངས་པའི་སྣང་བ་ལས་བྱུང་བའི་སངས་རྒྱས་ཀྱི་གཟུགས་སྟེ། རང་འདོད་ལྷའི་གཟུགས་གཙོ་བོར་གྱུར་པ། ཁམས་གསུམ་གྱི་གཟུགས་སྒྲ་དྲི་རོ་རེག་ཆོས་མཐའ་ཡས་པའི་
སྣང་བས་ཤིན་ཏུ་མཛེས་པར་འགྱུར་རོ། །འདི་མས་བརྟན་རྗེས་སུ་དྲན་པའི་ས་དངོས་མིན་ཡང༌། མས་བརྟན་གྱི་རྗེས་དྲན་ཙམ་ནི་ཡིན་ལ། རིམ་པ་བཞི་ལས་ནི་ཡེ་ཤེས་ཀྱི་རིམ་པ་ཁོ་ནའོ། །དགའ་བའི་རང་བཞིན་ཞེས་པ། དགའ་བ་བཞིའི་ནང་ཚན་གྱི་དགའ་བ་དང་པོ་ལ་མི་ཟེར་ཡང༌། དགའ་བདེ་ཁྱད་པར་ཅན་གྱི་དོན་ཡིན་ལ། དགའ་བའི་སྐད་དོད་རཱ་མ་ཞེས་པ་ལ། ཡི་གེ་བསྣན་པའི་ངེས་ཚིག་གིས། རཱ་ག་ཆགས་པ། མ་ལི་དྲི་མ་ཅན་གྱི་དོན་ཡིན་ཏེ། མས་བརྟན་གྱི་ཐིག་ལེར་མ་གྱུར་བས་ན། རིམ་པ་གསུམ་པའི་ས་གང་ཡིན་པ་དེ་ནི། ཆགས་པའི་དྲི་མ་ཅན་ཞེས་བྱ་བར་མངོན་པར་བརྗོད་དོ། །དེ་ལྟར་ན་ལམ་དུས་ཀྱི་ལོངས་སྤྱོད་རྫོགས་སྐུའི་རིམ་པ་དེ་ནི། བདག་གིས་ཞེས་བྱ་བའི་བརྡས་རྒྱུད་རྣམས་ལས་བསྟན་པར་རབ་ཏུ་གྲགས་སོ། །ད་ནི་དེའི་འོག་ཏུ་གསང་བའི་རིམ་པ་སྟོན་པར་བཞེད་དེ། གཉིས་པ་ལ། སྤྲུལ་སྐུའི་ལམ་ཁྱད་པར་ཅན་བཤད་པ། ཡེ་ཤེས་མཆོག་གི་ཁྱད་ཆོས་བསྟན་པ། གསང་རིམ་གྱི་བྱེད་ལས་བཤད་པ་གསུམ་ལས། དང་པོ་ནི། གཞན་ཡང་ཐོས་པ་ཞེས་གསུངས་པ། །སྤྲུལ་པའི་སྐུ་རུ་བརྗོད་པ་སྟེ། །གང་ཚེ་ཟླ་བ་ལྟ་བུ་ཡི། སེམས་ཆེན་པོ་ནི་ནུབ་གྱུར་པ། །བྷ་གའི་དབུས་སུ་སོན་གང་དེ༌། །དེ་ནི་ཡུངས་ཀར་ཞེས་བྱར་འདོད། །ཆགས་བྲལ་གྱི་ནི་རང་བཞིན་དེ། །འདི་ནི་ཉི་མ་ལྟ་བུའི་འོད། །དེ་ནི་ཁྲག་ཏུ་ཤེས་བྱ་སྟེ། །སྟེང་དུ་འོད་གསལ་
འཕྲོ་བའོ། །རིག་པའི་སྣ་རྩེར་གནས་ནས་ནི། །པདྨ་བཞི་ནི་གསལ་བྱེད་པ། །རྒྱལ་བ་རྣམས་ཀྱི་སྤྲུལ་སྐུ་སྟེ། །དེ་ནི་ཐོས་པ་ཞེས་བྱར་གྲགས། །འདིས་ནི་གསང་རིམ་དངོས་བསྟན་པ་ཡིན་ཏེ། འདིར་ཐོས་པ་ཞེས་པའི་སྐད་དོད། ཤུཏ་ཞེས་པ་ཡིན་པ་ལས། ཤྲུ་ནི་ཤྲ་བ་སྟེ་འཛག་པ། ཏ་ནི་ཏ་རུ་ཎ་སྟེ་དར་བ་ཡིན་ན། ཏའི་སྲོག་གི་ཨ་ནི་དགག་པའི་དོན་ཏེ། མེ་འཛག་པར་སྟེང་དུ་བསྐྱོད་པའོ། །དེ་ཉིད་ཀྱི་ཐིག་ལེ་རྩ་འཁོར་ལོ་བཞིའམ་བཅུ་དྲུག་ཏུ་བརྟན་པ་བྱས་པས། གསལ་སྣང་ལ་ལྷའི་སྣང་བ་རབ་འབྱམས་མཆེད་པར་འགྱུར་བ་ནི། ལམ་གྱི་སྤྲུལ་པའི་སྐུ་དང་རྗེས་དྲན་ནོ། །རིམ་པ་འདི་ལ་མས་བརྟན་དགའ་བའི་ས་བཅུ་དྲུག་གི་རེ་རེ་བཞིན་དུ། རྒྱུ་རྗེས་དྲན་སྤྲུལ་སྐུ་དང༌། འབྲས་བུ་ཏིང་འཛིན་ངོ་བོ་ཉིད་སྐུའི་ཆ་རེ་སྤེལ་མར་འབྱུང་བ་ཡིན་ཀྱང་སྐབས་འདིར་རྗེས་དྲན་ཁོ་ན་བསྟན་པ་ནི། གཞན་ཡང་ཡི་གེ་བཞིའི་རྗེས་སུ་ཐོས་པ་ཞེས་གསུངས་པ་ནི། ལམ་སྤྲུལ་པའི་སྐུའི་རིམ་པར་བརྗོད་པ་སྟེ། གང་གི་ཚེ་ཟླ་བ་ལྟ་བུ་ཡས་བབས་ཀྱི་དགའ་བའི་ས་བཞི་ལས། སེམས་ཆེན་པོ་ལྷན་སྐྱེས་ཀྱིས། ནོར་བུར་ཐོབ་པ་དེ་ཉིད་ནུབ་པ་ན། ཟག་མེད་མས་བརྟན་དུ་གནས་གྱུར་པ་ནི༌། བྷ་ག་སྟེ་རྩ་དབུ་མའི་དབུས་སུ། ཆ་བཅུ་དྲུག་རེ་རེའི་གནས་སུ་ཐིག་ལེ་སོན་ཅིང་བསྟན་པ་གང་ཡིན་པ་དེ་ནི། རྒྱུད་ལས། སྣའི་རྩེ་མོར་ཡུངས་ཀར་བསམ། །ཞེས་སོགས་ཡུངས་ཀར་ཞེས་བྱ་བའི་བརྔས་
བསྟན་པར་འདོད་ལ། བདེ་བ་ཆེ་ཆེར་འཕེལ་ཡང༌། ཟག་བཅས་སྲེད་པའི་ཆགས་པ་འགགས་པས། ཆགས་བྲལ་གྱི་རང་བཞིན་དེ་ནི། གཏུམ་མོ་ལྷག་པར་འབར་བའི་སྟོབས་ཀྱིས་དབང་དུ་བྱས་ནས། སྟེང་དུ་རིམ་པས་བརྟན་པ་ཡིན་པའི་ཕྱིར། ཉི་མ་ལྟ་བུའི་འོད་དང༌། ཁྲག་གི་དབང་དུ་བྱས་པ་ཞེས་ཤེས་པར་བྱ་ལ། དེ་ལ་འདིར་ཡང་ཐིག་ལེའི་ངོ་བོ་ནི་དཀར་པོ་ཡིན་ལ། གྲོགས་ཀྱི་དབང་དུ་བྱས་ན། ཡས་བབས་ཀྱི་ས་ཡང༌། ཡོན་ཏན་གསུམ་གྱི་རང་བཞིན་ཡིན་པའི་ཕྱིར། འཁོར་ལོར་བརྟན་པའི་ཐིག་ལེ་ལ་གཏུམ་མོའི་ཆ་ཤས་ཡོད་མོད་ཀྱི། དཀར་པོ་ཟག་བཅས་ཉིད་སྟོབས་དང་ལྡན་པའི་ཕྱིར་ཟླ་བའི་བརྡས་བསྟན་ལ། འདིར་ཡེ་ཤེས་ཀྱི་གཏུམ་མོ་ལྷག་པར་སྟོབས་སུ་གྱུར་པ་དང༌། མས་བརྟན་དུ་འགྱུར་བ་ཡང་ངེས་བྱེད་ལས་ཡིན་པའི་ཕྱིར། གཙོ་ཆེ་བའི་དབང་དུ་བྱས་ནས། ཉི་མའི་བརྡས་བསྟན་ཅིང༌། ནོར་བུ་གཙུག་ཏོར་གྱི་བར་སྟེང་ནས་སྟེང་དུ། འོད་གསལ་བའི་སྣང་བ་རབ་འབྱམས་སྤྲོ་བ་སྟེ། རིག་པའི་ལྷ་མོ་དང་མཉམ་པར་སྦྱོར་བའི་སྣ་རྩེ་རྡོ་རྗེ་ནོར་བུར་གཡོ་མེད་དུ་བཅིངས་པ་གནས་པ་ནས་བརྩམས་ཏེ། ལྟེ་སྙིང་མགྲིན་སྤྱི་སྟེ་རྩ་འཁོར་གྱི་པདྨ་བཞི་ནི་བྱང་ཆུབ་ཀྱི་སེམས་ཀྱིས་གང་ཞིང་གསལ་བར་བྱེད་པ་འདི་ནི་རྒྱལ་བ་སངས་རྒྱས་རྣམས་ཀྱི་སྤྲུལ་པའི་སྐུ་ཐོབ་བྱེད་ཀྱི་ལམ་ཐུན་མོང་མ་ཡིན་པའི་ཉིད་དེ། དེ་ནི་ཐོས་པ་ཞེས་བྱ་བའི་སྒྲས་བསྟན་པར་གྲགས་སོ། །གཉིས་པ་ནི། གསང་རིམ་འབྲས་བུར་
བཅས་པ་ལ། ཟུང་དུ་འཇུག་པའི་མཚན་ཉིད་བསྟན་པར་བཞེད་དེ། ཤེས་རབ་ཐབས་ཀྱི་བདག་ཉིད་སྦྱོར། །འདིར་ནི་བདག་གིས་ཐོས་པར་བརྗོད། །ཤེས་རབ་བདག་གིས་ཞེས་བརྗོད་དེ། །ཐོས་པ་ཐབས་ཀྱི་མཚན་ཉིད་དོ། །དམིགས་པར་བཅས་དང་དམིགས་མེད་པའི། །ཤེས་རབ་གཉིས་སུ་བརྗོད་པ་སྟེ། །དམིགས་མེད་བདག་གིས་ཞེས་བྱ་ལ། །དམིགས་དང་བཅས་པ་ཐོས་པར་འདོད། །དམིགས་དང་བཅས་པས་འཁོར་བ་སྟེ། ། དམིགས་སུ་མེད་པས་མྱ་ངན་འདས། །རྡོ་རྗེ་འཛིན་པའི་དབུགས་དབྱུང་ཆེ། །མྱ་ངན་འདས་པར་རྒྱལ་བས་གསུངས། །དེ་བཞིན་གཤེགས་པའི་དབུགས་དབྱུང་ཆེ། །དེ་བཞིན་དུའང་འཁོར་བར་རོ། ཁ་སྦྱོར་དང་ནི་ཕྱེ་བའི་གཟུགས། །བདག་གིས་ཐོས་པ་ཞེས་བྱ་ཡིན། །འདིར་ནི་མང་དུ་སྨོས་ཅི་དགོས། །མདོར་བསྡུས་ནས་དེ་བརྗོད་བྱ་སྟེ། ཁུ་བ་ཉིད་དང་དེ་བཞིན་ཁྲག། །དེ་བཞིན་ཟླ་བ་ཉི་མ་དང༌། །ནུབ་པ་དང་ནི་འཆར་བ་དང༌། །དེ་བཞིན་མཚན་མོ་ཉིན་མོ་དང༌། །སྡུད་པ་དང་ནི་སྤྲོ་བ་ཉིད། །དེ་བཞིན་དུ་ཡང་སྟེང་དང་འོག །བདག་ཉིད་དང་ནི་གཞན་ཉིད་དེ། ། གཅིག་དང་དུ་མ་དེ་བཞིན་ནོ། །བུད་མེད་དང་ནི་སྐྱེས་པའང་རུང༌། །ཆུ་དང་མེ་ཡང་དེ་བཞིན་ཏེ། །བདག་གིས་ཐོས་པ་ཞེས་བཤད་པ། །བདེ་བ་དང་ནི་སྡུག་བསྔལ་ཉིད། །དེ་ལྟར་རྒྱལ་བས་རབ་གསུངས་པའི། །ཚིག་ནི་མཛེས་པ་གཉིས་པོ་དག །འཇུག་པ་དང་ནི་བཟློག་པ་དག །ཡོན་ཏན་སྐྱོན་ནི་
རབ་འཇུག་པའོ། །འདི་ནི་བདག་གིས་ཞེས་པ་དང༌། ཐོས་པ་ཞེས་པ་ཚིག་གཉིས་པོ་དབུགས་དབྱུང་གཉིས་སུ་སྟོན་པར་བྱེད་པ་སྟེ། ཨེ་དང་འབྲེལ་བའི་འཁོར་ལོ་གཉིས་ལས་རྡོ་རྗེ་འཆང་གི་དབུགས་དབྱུང་དང༌། ཝཾ་དང་འབྲེལ་བའི་འཁོར་ལོ་གཉིས་ལས་དེ་བཞིན་གཤེགས་པའི་དབུགས་དབྱུང་འཆར་བ་ཡིན་ནོ། །འོན་ཀྱང་གཞུང་འདིའི་སྐབས་འདི་ཐད་དུ་འཁོར་ལོ་ལ་སྦྱར་བའི་བཤད་པ་མཐའ་གཅིག་ཏུ་མི་དགོས་ཏེ། གསང་རིམ་གྱི་ས་བཞིའམ་བཅུ་གཉིས་སམ། བཅུ་དྲུག་ལ་དང༌། གསང་རིམ་གྱི་འབྲས་བུའི་ས་བཅུ་གཉིས་ལ་ལམ་གྱི་ཡེ་ཤེས་དབུགས་དབྱུང་གཉིས་ལྡན་དུ་འཆར་བ་སྟེ། གསང་རིམ་དངོས་ཀྱི་སྐབས་སུ་ཟུང་འབྲེལ་དང༌། འབྲས་བུའི་སྐབས་སུ་ཟུང་འཇུག་གོ །རྫོགས་པའི་སངས་རྒྱས་ཀྱི་སར་ནི། ཤེས་རབ་དམིགས་བཅས་དམིགས་མེད་ཟུང་འཇུག་མཐར་ཐུག་པ་ཡིན་མོད་ཀྱང༌། དབུགས་ཕྱུང་ཟིན་པ་ཉིད་ཀྱི་ཕྱིར། སངས་རྒྱས་རང་སྣང་ལ་དབུགས་དབྱུང་གཉིས་ཀྱི་ཐ་སྙད་མི་འཇོག་ལ། གཟུགས་སྐུ་གཉིས་ཀྱི་སྒོ་ནས་འགྲོ་བ་གཞན་སྣང་དུ་དབུགས་དབྱུང་གཉིས་ཀྱི་དཀྱིལ་འཁོར་བསྟན་པའི་རྣམ་གཞག་འབྱུང༌། ཡང་གདུལ་བྱ་གཞན་རྣམས་དབུགས་དབྱུང་འབྱིན་པའི་དབུགས་དབྱུང་ངོ༌། །གསང་རིམ་དང་གསང་རིམ་གྱི་འབྲས་བུའི་སྐབས་ཀྱི་དབུགས་དབྱུང་བ་ནི། གཞན་སྣང་དུ་དབུགས་དབྱུང་གི་དཀྱིལ་འཁོར་སྟོན་པ་ཡང་ཅུང་ཟད་སྲིད་མོད་ཀྱི། དེའི་སྒོ་ནས་མི་འཇོག་པར་རང་ཉིད་དབུགས་འབྱིན་ཐོབ་པའི་
ཁྱད་པར་ཁོ་ནས་འཇོག་གོ དེས་ན་སྐབས་འདིར་ནི་བདག་གིས་ཐོས་པ་ཞེས་གསུངས་པ། ཤེས་རབ་དང་ཐབས་གཉིས་སུ་མེད་པའི་བདག་ཉིད་དུ་སྦྱོར་བ་ཟུང་འཇུག་གི་ཚུལ་དུ་བརྗོད་ལ། དེ་ལྟ་བུའི་ཤེས་རབ་ནི་བདག་གིས་ཞེས་པས་བསྟན་ཅིང༌། ཐོས་པ་ཞེས་པས་ཐབས་ཀྱི་མཚན་ཉིད་བསྟན་ཏོ། །ཡང་ཤེས་རབ་རྣམ་པ་གཉིས་སུ་བརྗོད་པར་བྱ་སྟེ་དམིགས་པ་དང་བཅས་པ་དང་དམིགས་པ་མེད་པའི་ཤེས་རབ་བོ། །དེ་ལ་འདིར་ཤེས་རབ་ཅེས་གསུངས་པ་ན། བཤད་མ་ཐག་པའི་ཐབས་ཤེས་གཉིས་ཀྱི་ཡ་རྒྱ྄ལ་དུ་གྱུར་པའི་ཤེས་རབ་ཀྱི་དབྱེ་བ་བསྟོན་པ་མ་ཡིན་ཏེ། དམིགས་བཅས་ཀྱི་ཤེས་རབ་ནི་ཐབས་དང༌། དམིགས་མེད་ཀྱི་ཤེས་རབ་ནི་ཤེས་རབ་ཉིད་དོ། །འདིར་ཤེས་རབ་ནི་གནས་ལུགས་ཆོས་དབྱིངས་རང་གིས་རིག་པའི་ཡེ་ཤེས་ཡིན་ལ། ཡེ་ཤེས་དེ་ཉིད་གདོད་མ་ནས་རྣམ་པ་ཐམས་ཅད་པར་གནས་པའི་སྒོ་ནས། དམིགས་བཅས་ཀྱི་ཤེས་རབ་དང༌། དེ་ཉིད་རང་བཞིན་འགྱུར་མེད་ཀྱི་བདེ་སྟོང་སྤྲོས་བྲལ་དུ་འདུག་པའི་སྒོ་ནས། དམིགས་མེད་ཀྱི་ཤེས་རབ་སྟེ། དམིགས་བཅས་དང་དམིགས་མེད་ནི་མཚན་ཉིད་སོ་སོར་བསྟན་པ་ཙམ་ཡིན་གྱི་གཞི་ཐ་དད་པ་ཡོད་པ་ནི་མ་ཡིན་ནོ། །དེ་ལྟ་བུའི་ཤེས་རབ་གཉིས་ནི། གང་དུ་དབུགས་འབྱིན་པའི་གནས་ཡིན་ལ། ལམ་དམིགས་བཅས་དང་གསལ་བའི་ཡེ་ཤེས་གང་ཡིན་པ་ནི། གོང་དུ་དམིགས་བཅས་དེར་དབུགས་འབྱིན་བྱེད་
ཀྱི་ཤེས་རབ་དམིགས་བཅས་དང༌། ལམ་བདེ་སྟོང་གི་ཡེ་ཤེས་ནི། གོང་གི་དམིགས་མེད་དེར་དབུགས་འབྱིན་བྱེད་ཀྱི་ཤེས་རབ་དམིགས་མེད་དོ། །དེ་འདྲ་བའི་རང་བཞིན་དང་ལམ་གྱིས་བསྡུས་པའི་ཤེས་རབ་དམིགས་མེད་ནི་བདག་གིས་ཞེས་བྱ་བས་བསྟན་ལ། རང་བཞིན་དང་ལམ་གྱིས་བསྡུས་པའི་ཤེས་རབ་དམིགས་པ་དང་བཅས་པ་ནི། ཐོས་པ་ཞེས་པས་བཤད་པར་འདོད་ལ། རང་བཞིན་དམིགས་བཅས་དེ་ནི། འཁོར་བའི་ཆོས་ཉིད་འཁོར་བ་དང་རྣམ་པ་མཚུངས་པ་ཡིན་པས། དོན་དམ་པའི་འཁོར་བ་ཞེས་འཁོར་བའི་མིང་གིས་བསྟན་ལ། དམིགས་སུ་མེད་པའི་ཤེས་རབ་རང་བཞིན་གྱིས་བསྡུས་པ་དེ་ནི། ལམ་དང་འབྲས་བུ་གསར་ཐོབ་རྣམས་དང་རྣམ་པ་མཚུངས་ཤིང༌། ལམ་འབྲས་དེ་དག་གི་ཆོས་ཉིད་ཡིན་པས། དོན་དམ་མྱང་འདས་ཞེས་མྱང་འདས་ཀྱི་བརྡས་བསྟན་ནས། མཚན་ཉིད་གཉིས་ཀས་ཀྱང་རང་གི་ངོ་བོ་ནི་མྱ་ངན་ལས་འདས་པ་ཁོ་ན་བསྟན་པའོ། །རྡོ་རྗེ་འཛིན་པའི་དབུགས་དབྱུང་བ་ཆེན་པོ་སྟེ། ལམ་དམིགས་མེད་ཀྱིས་གནས་ལུགས་དམིགས་པ་མེད་པ་རྟོགས་པ་དེ་ནི་མྱ་ངན་ལས་འདས་པ་རྟོགས་པའི་ཡེ་ཤེས་ཡིན་པར་རྒྱལ་བས་གསུངས་ལ། དེ་བཞིན་གཤེགས་པའི་དབུགས་དབྱུང་ཆེན་པོ་ནི། ལམ་དམིགས་བཅས་ཀྱིས་གནས་ལུགས་ཤེས་རབ་དམིགས་བཅས་རྟོགས་པ་སྟེ། དེ་ནི་དེ་བཞིན་དུ་འཁོར་བའི་གནས་ལུགས་རྟོགས་པའི་ཤེས་རབ་ཡིན་པར་གསུངས་སོ། ཁ་སྦྱོར་དང་ནི་ཕྱི་བའི་གཟུགས་ཞེས་པ་ལ། བདག་གིས་
ཞེས་པས་དམིགས་མེད་དུ་གཏོགས་པའི་ཆོས་ཉིད་གཞི་ལམ་འབྲས་གསུམ་དང་བཅས་པ་བསྟན་ལ། ཐོས་པ་ཞེས་པས་དམིགས་བཅས་སུ་གཏོགས་པའི་ཆོས་ཉིད་གཞི་ལམ་འབྲས་བུར་བཅས་པ་བསྟན་པས། ཕྱེ་བ་སྟེ་ཀུན་རྫོབ་ཏུ་སོ་སོར་ཕྱེ་ནས་བསྟན་པ་ཡིན་ལ། བདག་གིས་ཐོས་པ་ཞེས་ཚིག་གཉིས་གཅིག་ཏུ་སྦྲེལ་བས། ཁ་སྦྱོར་ཏེ་ཆོས་ཉིད་ཀྱི་དམིགས་བཅས་དམིགས་མེད་ངོ་བོ་གཉིས་མེད་ཀྱི་ཟུང་འཇུག་དང༌། གཞི་ལམ་འབྲས་བུའི་དམིགས་བཅས་དམིགས་མེད་ཀྱང་ཟུང་འཇུག་གི་རྒྱས་བཏབ་ཅན་དུ་བསྟན་ཏོ། །དེ་བས་ན་ཁ་སྦྱོར་ཟུང་འཇུག་དང༌། དམིགས་བཅས་དམིགས་མེད་སོ་སོར་ཕྱེ་བའི་ཚུལ་ནི། བདག་གིས་ཐོས་པ་ཞེས་བྱ་བས་བསྟན་པ་ཡིན་ནོ། ། གཟུགས་ཞེས་པ་ཚུལ་ལས་རྣམ་གཞག་གི་དོན་ཡིན་ལ། དེས་ན་འབྲོག་འགྱུར་ལས། ཁ་སྦྱོར་འབྱེད་པའི་ཚུལ་གྱིས་ནི། །བདག་གིས་ཐོས་པ་ཞེས་བྱའོ། ཞེས་བསྒྱུར་བ་གོ་བདེའོ། །ད་ནི་དམིགས་བཅས་དམིགས་མེད་གཉིས་པོ་དེའི་མིང་གི་རྣམ་གྲངས་བཤད་པ་ལ། འདིར་ནི་མང་དུ་སྨོས་ཅི་ཞིག་དགོས་ཏེ། རྒྱུད་རྣམས་ལས་བརྡའ་ཐབས་སུ་བསྟན་པའི་མིང་གི་རྣམ་གྲངས་རྣམས་མདོར་བསྡུས་ནས་བརྗོད་པར་བྱའོ། ཁུ་བ་དང༌། ཟླ་བ་དང༌། ནུབ་པ་དང༌། མཚན་མོ་དང༌། སྡུད་པ་དང༌། སྟེང་ནས་བསྒྲོད་པ་དང༌། བདག་ཉིད་དང༌། གཅིག་དང༌། བུད་མེད་དང༌། ཆུ་དང༌། བདེ་བ་ཞེས་པ་རྣམས་ནི། །
བདག་གིས་ཞེས་པའི་བརྡས་བསྟན་པ་དམིགས་མེད་ཀྱི་ཤེས་རབ་བོ། ཁྲག་དང༌། ཉི་མ་དང༌། འཆར་བ་དང༌། ཉིན་མོ་དང༌། སྤྲོ་བ་དང༌། འོག་ནས་བསྒྲོད་པ་དང༌། གཞན་དང༌། དུ་མ་དང༌། སྐྱེས་པ་དང༌། མེ་དང༌། སྡུག་བསྔལ་རྣམས་ཐོས་པ་ཞེས་པའི་བརྡས་བསྟན་པ། དམིགས་པ་དང་བཅས་པའི་ཤེས་རབ་བོ། །འདིར་བཤད་པ་དང༌། གསང་བ་འདུས་པའི་རྫོགས་རིམ་གྱི་གཞུང་རིམ་ལྔ་དང༌། སྤྱོད་བསྡུས་ལས། སེམས་དབེན་གྱི་སྐབས་སུ་ཐབས་ཤེས་ཀྱི་མིང་གི་རྣམ་གྲངས་གསུངས་པ་རྣམས་གནད་གཅིག་སྟེ། འོན་ཀྱང་དེར་ཐབས་ཤེས་ཀྱི་མཚན་ཉིད་རྣམས་མཚན་གཞི་སེམས་དབེན་གྱི་སྣང་བ་དང་མཆེད་པའི་སྟེང་དུ་གོ་བར་མཛད་ལ། གཞུང་འདིར་ཡང་བླ་མ་གོང་མ་ཕལ་ཆེ་བ། མཚན་གཞི་ལམ་དུས་ཀྱི་ལོངས་སྐུ་དང་སྤྲུལ་སྐུའི་རིམ་པ་གཉིས་ལ་གོ་བར་མཛད་དོ། །འོན་ཀྱང་འདི་ནི་གོང་དུ་སྨྲོས་པ་ལྟར། གསང་རིམ་འབྲས་བུར་བཅས་པ་ལ་གཙོ་བོར་འཆད་དགོས་པའི་ཕྱིར། མཚན་གཞི་ལམ་གྱི་སྤྲུལ་སྐུ་དང༌། ངོ་བོ་ཉིད་སྐུའི་སྟེང་དུ་དམིགས་བཅས་དང་དམིགས་མེད་ཀྱི་མཚན་ཉིད་གོ་བར་བྱ་ལ། དེ་ལྟར་ན། ཡོན་ཏན་སྐྱོན་ནི་རབ་འཇུག་པའོ། །ཞེས་པ་དང་འགྲིག་པ་ཡིན་གྱི། སྔ་མ་ལྟར་ན་མི་འབྱོར་བར་སྣང་ངོ༌། །སྤྱིར་ནི་གནས་སྐབས་འདི་ཁོ་ནར་མི་སྦྱོར་ཏེ། གོང་དུ་སྨོས་པ་ལྟར། ཐབས་ཤེས་སྤྱིའི་མཚན་ཉིད་དུ་སྦྱོར་རོ། །དེ་བས་ན་དཔལ་ལྡན་འདུས་པ་ལ་སོགས་པའི་རྒྱུད་ཀྱི་གནས་སྐབས་མང་པོ་
ཞིག་ཏུ། ཁུ་ཁྲག་ལ་སོགས་པའི་བརྡའ་འདི་རྣམས་གསུངས་པ་ནི། སྒྲ་ཇི་བཞིན་པ་ཁོ་ནར་མི་བཟུང་གི ཤེས་རབ་དང་ཐབས་འདི་དག་གི་དོན་དང་སྦྲེལ་ཏེ། ཇི་ལྟར་མཐུན་མཐུན་དུ་སྦྱོར་དགོས་པར་དགོངས་སོ། །དེ་ལྟར་ན། ཚིག་འདི་ཙམ་གྱིས་ཀྱང༌། རྒྱུད་ཀྱི་སྦས་དོན་མཐའ་ཡས་པའི་གསང་བའི་སྒོ་འབྱེད་པའི་ལྡེ་མིག་ཏུ་འགྱུར་བར་ཤེས་པར་གྱིས་ཤིག དེ་ལ་ཤེས་རབ་ཁུ་བ་དང༌། ཟླ་བའི་ཆོས་སུ་བཞག་པ་ནི། བདེ་བ་ཆེན་པོ་དམིགས་པ་མེད་པའི་མཚན་ཉིད་ཅན་གྱི་ཕྱིར་དང༌། དེ་བཞིན་དུ་ཐབས་ཁྲག་དང་ཉི་མའི་ཆོས་སུ་བཞག་པ་ནི། ཐབས་ཀྱི་ཡེ་ཤེས་ཤིན་ཏུ་གསལ་བར་སྣང་བའི་ཕྱིར་དང༌། དོན་དམ་གྱི་གཏུམ་མོ་དམར་ཆའི་སྣང་བ་ཡིན་པའི་ཕྱིར་རོ། །སྐུ་རྣམ་པ་ཐམས་ཅད་པ་ཐབས་ཀུན་རྫོབ་བདེན་པ་བདག་བྱིན་རླབས་པ་དང༌། ཐུགས་བདེ་སྟོང་གི་ཡེ་ཤེས་ཤེས་རབ་འོད་གསལ་བར་འཆད་པ་སྟེ། འདུས་པ་སོགས་རྒྱུད་སྡེ་ཕལ་ཆེར་ལ་ཤིན་ཏུ་གྲགས་པའི་འཇོག་ཚུལ་ཡིན་ལ། དེ་བཞིན་དུ་ཤེས་རབ་ལ་ནུབ་པ་དང༌། མཚན་མོ་དང༌། སྡུད་པ་ཞེས་བྱ་བའི་བརྡས་སྟོན་པ་ནི། སྤྲོས་པའི་མཚན་མ་ཐམས་ཅད་ནུབ་པའི་དོན་དང༌། ཐབས་ལ་འཆར་བ་དང༌། ཉིན་མོ་དང༌། སྤྲོ་བ་ཞེས་བྱ་བ་ཡང་ཡེ་ཤེས་ཀྱི་སྣང་བ་རྣམ་པ་ཐམས་ཅད་པར་ཤར་བའི་དོན་ནོ། །ཤེས་རབ་ལ་སྟེང་ནས་འགྲོ་བ་ནི། ཞུ་བདེ་དང་རིགས་མཚུངས་པའི་དོན་དང༌། ཐབས་ལ་འོག་ནས་འགྲོ་
བ་ནི། གཏུམ་མོ་སྟེང་དུ་འགྲོ་བའི་ཤུགས་ལ་ཐོབ་པའི་དོན་ནོ། །དེ་བཞིན་དུ་ཤེས་རབ་ལ་བདག་ཉིད་དང་གཅིག་ཅེས་བྱ་བ་ནི། བདེ་བའི་ལྡོག་པ་ནི་ཡེ་ཤེས་ཀྱི་ལུས་ཡིན་ཅིང་ངོ་བོ་ཐ་དད་མེད་པའི་དོན་དང་ཐབས་ལ་གཞན་དང་དུ་མར་བཞག་པ་ཡང་རྣམ་པ་ཐམས་ཅད་པའི་ལྡོག་པ་ནས། ཡེ་ཤེས་ཀྱི་ཡན་ལག་དང༌། རྣམ་པ་ཐམས་ཅད་པ་འཛིན་པའི་ཕྱིར་རོ། ཤེས་རབ་ཕྲ་ཞིང་བདེ་བའི་ཕྱིར་བུད་མེད་དང༌། ཐབས་རགས་ཤིང་གསལ་བའི་ཕྱིར། སྐྱེས་པའི་ཐ་སྙད་དུ་ཡང་རུང་ལ། ཤེས་རབ་བདེ་ཆེན་ཧཾ་ཡིག་སོགས་དང་འབྲེལ་བའི་ཕྱིར། ཆུ་དང༌། ཐབས་སྒྱུ་ལུས་གཏུམ་མོ་དང་འབྲེལ་བའི་ཕྱིར། མེའི་ཐ་སྙད་ཀྱང་དེ་བཞིན་དུ་སྦྱར་རོ། །ཤེས་རབ་ནི་སྤྲོས་པའི་སྡུག་བསྔལ་ནུབ་པའི་ཕྱིར་བདེ་བ་དང༌། ཐབས་ནི་གཏུམ་མོ་འབར་བ། སྲེག་ཅིང་སྡིགས་པ་དང་རྩུབ་ཉམས་དང་འབྲེལ་བའི་ཕྱིར་རམ། གནས་སྐབས་སྣ་ཚོགས་པའི་རྣམ་པ་འཛིན་པའི་ཕྱིར་སྡུག་བསྔལ་ཉིད་དོ། །དེ་ལྟར་ན་རྒྱལ་བས་རྒྱུད་ཀྱི་གླེང་གཞིར་རབ་ཏུ་གསུངས་པའི་བདག་གིས་ཞེས་པ་དང༌། ཐོས་པའི་ཞེས་བཤད་པའི་ཚིག་མཛེས་པ་སྟེ་བཟང་པོ་གཉིས་པོ་འདི་དག ཤེས་རབ་བདེ་བ་ཆེན་པོ་རྩ་འཁོར་རྣམས་ཐིག་ལེས་གང་བས། ཡོན་ཏན་རབ་ཏུ་འཇུག་པ་སྤྲུལ་པའི་སྐུའི་རིམ་པ་དང༌། དེ་ལ་བརྟེན་ནས་རྩ་ཐིག་རླུང་གསུམ་དག་པས། འཁོར་བའི་སྐྱོན་ལུས་ངག་ཡིད་གསུམ་ཟློག་པ་ངོ་བོ་ཉིད་སྐུའི་རིམ་པ་རབ་ཏུ་འཇུག་པའོ་ཞེས་པ་སྟེ་
འདིར་སྐྱོན་དག་པ་ནི། ཐབས་རྣམ་པ་ཐམས་ཅད་པའི་མཚན་གཞིར་གོ་བར་བྱའོ། །གསུམ་པ་ནི་གསང་བའི་རིམ་པ་ཉིད་ལ་གཙོ་བོར་འཇུག་པ། ངོ་བོ་ཉིད་སྐུའི་རིམ་པ་སྟོན་པར་བཞེད་དེ། གཅིག་ན་ཞེས་བྱའི་ཚིག་གིས་ནི། །དེ་ཉིད་ལས་ནི་གཞན་པ་དག །དུས་ཞེས་བྱ་བའི་རྗེས་འགྲོ་བ། །གཞན་དག་ཀྱང་ནི་བསྟན་པ་ཡི། །ཚིག་གཉིས་ཇི་ལྟར་འབྱུང་བ་བཞིན། །ཡང་དག་ཇི་ལྟར་བཞིན་བཤད་བྱ༌། །ས་མ་ཡ་ནི་དུས་གསུངས་ཏེ། །དུས་ནི་རྣམ་པ་གསུམ་དུ་འདོད། །དུས་བཟང་དང་ནི་དུས་ངན་དང༌། །བསམ་གྱིས་མི་ཁྱབ་དུས་ཉིད་དེ། །སྣ་ཡི་བུ་གའི་སྒོ་གཉིས་ནས། །འོང་བ་དུས་བཟང་ཞེས་བྱ་སྟེ། །འགྲོ་བ་ཉིད་ནི་དུས་ངན་ནོ། །དེ་དག་གཅིག་ཏུ་བརྗོད་པ་སྟེ། །གཅིག་པུ་ཟླ་མེད་པར་གྱུར་པས། །དུས་ནི་བསམ་གྱྀས་མི་ཁྱབ་གྱུར། །སྲོག་དང་རྩོལ་བ་བྲལ་བ་སྟེ། །དབུགས་དབྱུང་རྔུབ་པ་རྣམ་སྤངས་པའོ། །འགྲོ་དང་འོང་བ་ལས་གྲོལ་བ། །དུས་གཅིག་ན་ཞེས་བརྗོད་པ་ཡིན། །འདོད་ཆགས་མ་ཡིན་ཆགས་བྲལ་མིན། །དབུ་མར་ཡང་ནི་མི་དམིགས་པ། །འདོད་ཆགས་དང་ནི་ཆགས་བྲལ་དག །གཉིས་པོ་འདྲེས་པ་མི་ཤིགས་པ། །མར་ལ་མར་བླུག་ཇི་ལྟ་བར། །འདྲེས་པར་གྱུར་པ་རྙོག་པ་མེད། །དེ་བཞིན་འདོད་ཆགས་ཆགས་བྲལ་དང༌། །གཅིག་ཏུ་རོ་མཉམ་པ་ཡི་དུས། །འགོག་པ་ཉིད་དུ་འདོད་པ་དང༌། །དཔྱིད་ཉིད་དུའང་བསྟན་པ་ཡིན། །དུས་གསུམ་མཉམ་པར་སྦྱོར་བ་ལས།
དུས་ནི་གཅིག་ཅེས་བརྗོད་པ་སྟེ། །འདི་ནི་ཉི་མ་ཟླ་བ་དང༌། །འཆར་བ་དང་ནི་ནུབ་པ་དང༌། །སྙིང་སྟོབས་དང་ནི་རྡུལ་ལོག་པ། །མུན་པ་མེ་ཡི་རང་བཞིན་ལས། །བྱང་ཆུབ་སེམས་ནི་བརྟན་གྱུར་པ། །དུས་གཅིག་ན་ཞེས་བརྗོད་པ་ཡིན། །དུས་གཅིག་ན་ཞེས་བྱ་བའི་སྐད་དོད། ཨེ་ཀསྨིན་ས་མ་ཡེ་ཤེས་གཅིག་ན་ཞེས་པའི་སྐད་དོད་སྔོན་ལ་ཡོད་པས། གཞུང་འདིར་ཡང་རིམ་པ་དེ་བཞིན་དུ་བཤད་དོ། །གཅིག་ན་ཞེས་བྱ་བའི་ཚིག་གིས་ནི་བདག་གིས་ཐོས་པ་ཞེས་སྔར་བསྟན་པ་དེ་ཉིད་ལས་སྟོན་ཚུལ་གཞན་པ་དག་སྟོན་ཅིང༌། དུས་ཞེས་བྱ་བའི་ཚིག་གིས་རྗེས་སུ་འགྲོ་བ་སྟེ་གཅིག་ན་ཞེས་པ་དུས་ཞེས་པ་དང༌། ཕན་ཚུན་འབྲེལ་བ་ཅན་དུ་བྱེད་དགོས་པའོ། །གཅིག་ན་ཞེས་པ་ལས་གཞན་པ་དུས་ཞེས་བྱ་བའི་ཚིག་གཉིས་པ་དག་ཀྱང་བསྟན་པའི་ཚིག་གཉིས་ཇི་ལྟར་འབྱུང་བ་བཞིན་གྱི་དོན་ཡང་དག་པ་ཇི་ལྟ་བ་བཞིན་བཤད་པར་བྱའོ། །དེ་ལ་ས་མ་ཡ་ཞེས་པ། དུས་དང་གཞུང་ལུགས་དང༌། མཉམ་པ་དང༌། དམ་ཚིག་དང་འདྲེས་པ་སོགས་ལ་འཇུག་པ་ལས། འདིར་དུས་ཞེས་བསྒྱུར་བ། དུས་དེ་ཡང་རྣམ་པ་གསུམ་དུ་འདོད་དེ། དུས་བཟང་དང༌། དུས་ངན་དང༌། བསམ་གྱིས་མི་ཁྱབ་པའི་དུས་ཉིད་དོ། །སྣའི་བུ་གའི་སོགས་ལ། རླུང་དང་སྦྱར་ཏེ་བཤད་ན། སྣའི་བུ་གའི་སྒོ་ནས་རླུང་ནང་དུ་འོང་བ་ནི། ལུས་ཀྱི་མདངས་སོགས་བསྐྱེད་པའི་ཕྱིར་དུས་བཟང་ཞེས་བྱ་ལ། རླུང་སྣ་སྒོ་ནས་ཕྱྀ་རོལ་དུ་ཐོན་པ་ནི། ལུས་ཀྱི་
མདངས་ཟད་པར་བྱེད་པའི་ཕྱིར། རླུང་འགྲོ་བ་ཉིད་ནི་དུས་ངན་ནོ། །འགྲོ་བ་དང་འོང་བ་དེ་དག་གི་ནུས་པ་གཅིག་ཏུ་གྱུར་ཅིང་འདྲེས་པ་གཅིག་པུ་ཟླ་མེད་པར་གྱུར་ཏེ་གནས་པ་ནི། བསམ་གྱིས་མི་ཁྱབ་པ་ཞེས་བྱ་བའི་དུས་སུ་གྱུར་ཅིང་བརྗོད་པར་བྱའོ། །དེ་ཡང་རླུང་ནང་དུ་བསྡམས་ཏེ་གནས་པ་ཙམ་ལ་མི་བྱེད་དེ། ལས་རླུང་འགྲོ་འོང་གི་རྒྱུ་བ་དང་བྲལ་ཏེ་གཡོ་བ་མེད་པའི་ཡེ་ཤེས་ཀྱི་རླུང་དུ་གྱུར་པའོ། །ཐིག་ལེ་དང་སྦྱར་ཏེ་བཤད་ན། དབུ་མའི་ཡས་སྣ་དང་མས་སྣའི་བུ་གའི་སྒོ་གཉིས་ནས། ཁམས་དཀར་དམར་ནང་དུ་འོང་བ་ནི་དུས་བཟང་དང༌། ཡས་སྣ་ནས་དམར་པོ་དང༌། མས་སྣ་ནས་དཀར་པོ་ཕྱིར་འགྲོ་བ་ནི་དུས་ངན་ཏེ་རྒྱུ་མཚན་གོང་དང་འདྲའོ། ཁམས་དཀར་དམར་དེ་དག་ཁ་སྦྱོར་གཅིག་ཏུ་བཅིངས་ནས། གཅིག་པུ་ཟླ་མེད་པ་སྟོང་པའི་ཡེ་ཤེས་ཀྱི་ངོ་བོར་གྱུར་པ་ནི། བསམ་གྱིས་མི་ཁྱབ་པའི་དུས་སོ། །རྩ་དང་སྦྱར་ན། སྣའི་བུ་གའི་སྒོ་སྟེ་རོ་རྐྱང་གཉིས་སུ་སེམས་ཀྱི་བྱ་བ་བྱེད་པ་ནི་དུས་བཟང་དང༌། རོ་རྐྱང་གི་ནུས་པ་འཆི་བའི་རླུང་གིས་ཟད་ཅིང་འགྲོ་བ་ནི་དུས་ངན་ནོ། །དེ་དག་གཅིག་ཏུ་འདུས་པ་དབུ་མར་ཐིམ་པ་ནི་བསམ་མི་ཁྱབ་ཀྱི་དུས་སོ། །དེས་ན་ལས་རླུང་ཉི་ཁྲི་ཆིག་སྟོང་དྲུག་བརྒྱ་ལས། རླུང་ནང་དུ་འཇུག་པའི་སྲོག་དང༌། ཕྱིར་འགྲོ་བའི་རྩོལ་བའམ་རྐྱང་མའི་སྲོག་དང༌། རོ་མས་རྩོལ་བ་བྲལ་བ་སྟེ། རོ་རྐྱང་ནས་རྒྱུ་བའི་དབུགས་འབྱུང་རྔུབ་རྣམ་
པར་སྤངས་པ་ནི། ཁམས་དཀར་དམར་གྱི་འགྱུར་བ་ཡང་འགགས་པ་དང༌། རོ་རྐྱང་གི་རྩ་ཡང་དབུ་མར་དག་པར་འགྱུར་རོ། །དེ་ཡང་དུས་གཅིག་ཏུ་འགག་པ་ཁོ་ན་མ་ཡིན་ཏེ། རླུང་ཉི་ཁྲི་ཆིག་སྟོང་དྲུག་བརྒྱ་རིམ་གྱིས་འགག་པའི་ཚུལ་གྱིས་ཁམས་དང་རྩ་དག་ཚུལ་ཡང་ཤེས་པར་བྱའོ། །དེ་ལྟར་ན་རླུང་དང་ཁམས་འགྲོ་བ་དང་འོང་བ་ལས་གྲོལ་བའི་ཡེ་ཤེས་དེ་ནི། དུས་གཅིག་ན་ཞེས་བརྗོད་པ་ཡིན་ཏེ། སྔ་ཕྱིར་རྣམ་པ་འགྱུར་བ་མེད་པར། ཡེ་ཤེས་ཀྱི་མཚན་ཉིད་གཅིག་ཁོ་ནས་གནས་པའི་ཕྱིར་རོ། །འདི་ནི་དུས་ཀྱི་འཁོར་ལོར་མི་འགྱུར་བའི་བདེ་བ་ཆེན་པོའི་ཡེ་ཤེས་ལ་སྐད་ཅིག་གཅིག་གིས་མངོན་པར་རྫོགས་པར་བྱང་ཆུབ་པར་བཤད་པ་དང་དོན་གཅིག་གོ །དེ་ལྟར་རྟེན་རྩ་རླུང་ཐིག་ལེའི་འགག་ཚུལ་བཤད་ནས། བརྟེན་པ་བདེ་བའི་མཚན་ཉིད་བཤད་པ་ནི། འདོད་ཆགས་མ་ཡིན་སོགས་ཏེ། བདེ་བ་དེ་ཡང་ལྷན་ཅིག་སྐྱེས་པ་ཁོ་ན་ཏེ། འདོད་ཆགས་ཏེ་མཆོག་དགའ་མ་ཡིན། ཆགས་བྲལ་ཏེ་དགའ་བྲལ་མ་ཡིན། དབུ་མ་སྟེ་དགའ་བ་དང་པོར་ཡང་མི་དམིགས་ལ། འདོད་ཆགས་ཏེ་བདེ་བ་དང༌། ཆགས་བྲལ་ཏེ་སྲེད་པ་སྤངས་པ་དག །གཉིས་པོ་འདྲེན་པ་སྟེ། གཞི་མཐུན་པར་གྱུར་པ་ནི། ཐིག་ལེ་མི་ཤིགས་ཤིང༌། མི་འགྱུར་བའི་བདེ་བའོ། །སྐུ་རྣམ་པ་ཐམས་ཅད་པ་དཀྱིལ་འཁོར་གྱི་འཁོར་ལོ་འཇའ་ཚོན་ནམ། པྲ་སེ་ན་ལྟ་བུ་དང༌། ཐུགས་ལྷན་ཅིག་སྐྱེས་པའི་
བདེ་བ་གཉིས། ཞུན་མར་ལ་ཞུན་མར་བླུགས་པ་ཇི་ལྟ་བར་འདྲེས་པར་གྱུར་པ་ལ། ལུས་ཀྱི་ཕྱོགས་ནས་རྡུལ་ཕྲ་རབ་ཀྱི་ཆོས་དང༌། སེམས་ཀྱི་ཕྱོགས་ནས་རྣམ་རྟོག་གི་རྙོག་པ་མེད་པའོ། །སྐབས་འདིའི་རྣམ་པར་རྟོག་པ་མེད་པ་ནི་མཉམ་གཞག་གི་དུས་སུ་འཛིན་པའི་རྣམ་རྟོག་མེད་པའང་ཡིན་མོད་ཀྱི། གཙོ་བོར་གང་ཞིག་རང་རྒྱུད་ཀྱིས་བསྡུས་པའི་རྟེན་དང་བརྟེན་པ་དབྱེར་མེད་དུ་འདྲེས་པ་དེ་ལ། གཉིས་འཛིན་གྱི་རྣམ་རྟོག་མེད་པའོ། །དེ་ལྟར་ན་དེ་བཞིན་དུ་འདོད་ཆགས་དང་ཆགས་བྲལ་རོ་མཉམ་པ་དེ་ནི། འགོག་པའི་དུས་དང་དཔྱིད་ཀྱི་དུས་རོ་མཉམ་དུ་འདྲེས་པ། བསམ་མི་ཁྱབ་ཀྱི་དུས་སུའང་བསྟན་པ་ཡིན་ནོ། །དེ་ཡང་རླུང་འགགས་པས་སྤྲོས་བྲལ་གྱི་ཡེ་ཤེས་ཤར་བ་ནི། ཆགས་སྲེད་འཛག་བདེ་མངོན་གྱུར་པ་འགགས་པ་ནི་འགོག་པའི་དུས་དང༌། ཐིག་ལེ་བརྟན་པོས་ལྷན་སྐྱེས་ཀྱི་བདེ་བ་ཆེན་པོར་གྱུར་པ་ནི་དཔྱིད་ཀྱི་དུས་ཡིན་ལ། མཚན་ཉིད་དེ་གཉིས་ཡེ་ཤེས་གཅིག་ལ་ཤར་བ་ནི་བསམ་མི་ཁྱབ་ཀྱི་དུས་སོ། ། འགོག་པ་དང་དཔྱིད་ཀྱི་དུས་ཡིན་ཚད་ལ་མཚན་ཉིད་འདི་ཚང་བ་མིན་ཀྱང་ངོ་བོ་ཉིད་སྐུའི་རིམ་པའི་སྐབས་སུ། འགོག་དཔྱིད་གཉིས་ལ་མཚན་ཉིད་དེ་ཁོ་ན་བཞིན་ཡིན་པས། འགོག་དཔྱིད་བསམ་མི་ཁྱབ་ཀྱི་དུས་གསུམ་གཞི་མཐུན་པར་མཉམ་པར་སྦྱོར་བའི་ཡེ་ཤེས་ལ་དུས་གཅིག་ཅེས་བརྗོད་པ་སྟེ། འདི་ནི་ཉི་མ་རོ་མ་དང་ཟླ་བ་རྐྱང་མའི་
རྒྱུ་བ་ནུབ་པ། དཀར་པོ་སྤྱི་བོ་ནས་གསང་བའི་བར་དུ་འཆར་བ་དང༌། གསང་བ་ནས་སྤྱི་བོའི་བར་དུ་ནུབ་པ་སྤངས་ཤིང་དམར་པོ་དེ་ལས་བཟློག་པའི་འཆར་ལུགས་སྤངས་པ། སྙིང་སྟོབས་དཀར་པོའི་བགྲོད་པ་གསང་བ་ནས་ཡར་ལྡོག་ཅིང༌། རྡུལ་དམར་པོའི་བགྲོད་པ་གཙུག་ཏོར་ནས་མར་ལྡོག་པས། དཀར་ཆས་བསྡུས་པ་མཐའ་དག་མུན་པའི་དྭངས་མ་དང༌། དམར་ཆས་བསྡུས་པ་མཐའ་དག་དུས་ཀྱི་མེའི་རང་བཞིན་དུ་གྱུར་པས། རྩ་འཁོར་ཐམས་ཅད་དུ་ཀུན་རྫོབ་དང་དོན་དམ་པའི་བྱང་ཆུབ་ཀྱི་སེམས་བརྟན་ཅིང༌། གང་བར་གྱུར་པ་ལ། དུས་གཅིག་ན་ཞེས་པའི་བརྡས་བསྟན་པ་ཡིན་ནོ། །དེ་ལ་མུན་པ་ནི་དཀར་པོའི་དྭངས་མ་ཆེན་པོ་རྡུལ་གྱིས་བྱིན་གྱིས་བརླབས་པ། ཟུང་དུ་འཇུག་པའི་མཚན་ཉིད་ཅན་མཆོག་ཏུ་བདེ་བའི་རང་བཞིན། ཁམས་ནག་པོའི་དྭངས་མའམ་སྔོན་པོར་གྲགས་པ། མངོན་ཤེས་ལ་སོགས་པ་ཡོན་ཏན་མཐའ་ཡས་པའི་རྒྱུ། ནམ་མཁའི་མཚན་ཉིད་ཅན་ཡིན་ལ། དུས་ཀྱི་མེ་ནི་དམར་པོའི་ཤིན་ཏུ་དྭངས་མ་སྙིང་སྟོབས་ཀྱིས་བྱིན་གྱིས་བརླབས་པས་ཟུང་དུ་འཇུག་པའི་མཚན་ཉིད་ཅན། གང་ལའང་ཆགས་ཐོགས་པ་མེད་པའི་ཡེ་ཤེས་དང༌། ཆགས་སྲེད་སོགས་ཉོན་མོངས་སྤོང་བའི་མཐུ་ཅན། ཐིག་ལེ་སེར་པོའམ་ལྗང་ཁུ་ཞེས་བཏགས་པ། ཡེ་ཤེས་ཀྱི་ཁམས་ཀྱི་མཚན་ཉིད་ཅན་ལུས་མཐའ་ཡས་པ་སྟོན་པ་སོགས་རྣམ་པར་འཕྲུལ་བའི་རྒྱུ་དེ་ཡིན་ལ། ཐིག་ལེ་ཞུ་བའི་མཚན་ཉིད་
མཐར་ཐུགས་པས། མུན་པ་མེ་ལ་འདྲེ་བར་བྱེད་ཅིང༌། གཏུམ་མོ་འབར་བ་མཐར་ཐུག་པའི་མཚན་ཉིད་ཅན་གྱིས། མེ་མུན་པ་ལ་འདྲེས་ཏེ། མེ་དང་མུན་པ་རོ་མཉམ་པ་ན་ཐིག་ལེ་མི་འགྱུར་བའོ། དེ་ལ་མུན་པ་ནི་བདེ་བ་སྟེ་ཀུན་རྫོབ་བྱང་སེམས་དང༌། མེ་ནི་སྟོང་པའི་ཡེ་ཤེས་ཏེ་དོན་དམ་བྱང་སེམས་ཀྱི་རྟེན་ཡིན་ནོ། །གསུམ་པ་གསང་རིམ་གྱི་འབྲས་བུའི་དབང་དུ་བྱས་ཏེ་བཤད་པ། དུས་གཅིག་པོ་ནི་དེ་ཉིད་ནའང༌། བཅོམ་ལྡན་འདས་ནི་བཞུགས་སོ་དེ། ཇི་སྲིད་གཉིས་མེད་གྲུབ་པ་ཡིས། །བདུད་རྣམས་ཉིད་ནི་བཞི་པོ་དང༌། །ཆགས་སོགས་ཉོན་མོངས་དྲ་བ་ནི། །འཇོམས་པས་བཅོམ་པ་ཞེས་བྱའོ། །མཁའ་དབྱིངས་གནས་ཀྱི་རྣམ་པ་ཡི། །ཨེ་ནི་བྷ་ག་ཞེས་ཀྱང་བྱ། །སུ་ལུ་དེ་ཡོད་རྟག་པ་སྟེ། །ཐོག་མཐའ་མེད་པར་འབྱུང་ཕྱིར་རོ། །དེ་ལས་སྐྱེ་དང་འཇིག་པའི་ཕྱིར། །འདེབས་པས་ཀྱང་དེ་ཕྱག་རྒྱའོ། །བྱང་སེམས་རིན་པོ་ཆེ་གང་ཡིན། །ནམ་མཁའི་དབྱིངས་ནི་མ་གཏོགས་པར། །གཞན་དུ་གནས་ནི་མ་མཐོང་སྟེ། །དེས་ན་དེ་འདྲ་འདི་རུ་བརྗོད། །སྐུ་དང་གསུང་ཐུགས་གང་ཡིན་ཉིད། །སྤྲོས་པ་རྣམས་ཀྱིས་མ་སྤྲོས་པ། །སངས་རྒྱས་ཐམས་ཅད་བསྐྱེད་པའོ། །བཅོམ་ལྡན་འདས་སུ་དེ་ལ་བཤད། །བཞུགས་པ་ཞེས་བྱ་གང་གསུངས་པ། །གནས་པར་གྱུར་པ་བརྗེད་པ་ཡིན། །སངས་རྒྱས་བྱང་ཆུབ་སེམས་རྣམས་དང༌། །དུས་གཅིག་ཏུ་ནི་གྱུར་པ་ན། །རྡོ་རྗེ་སེམས་
དཔའ་རང་བཞིན་གྱིས། །འཇིག་རྟེན་རྣམས་ཀྱི་རེ་སྐོང་བྱེད། །སེམས་ཅན་སྣོད་ཀྱི་ཚུལ་གྱིས་ནི། །འཇིག་རྟེན་རྣམ་པ་གཉིས་སུ་གསུངས༌། །གཡོ་བར་གྱུར་པ་སེམས་ཅན་ཏེ། །དེ་བཞིན་གནས་པ་སྣོད་ཡིན་ནོ། །སྐལ་བཟང་དང་ནི་སྐལ་ངན་གཉིས། །རེ་རེ་བཞིན་ཡང་གཉིས་སུ་དབྱེ། །ས་དང་ཆུ་དང་མེ་རླུང་གིས། །རང་བཞིན་རྣམ་པ་བཞི་རུ་བརྗོད། །རྡོ་རྗེ་སེམས་དཔའ་ཚུལ་ཉིད་ཀྱིས། །དེ་རྣམས་རེ་བ་སྐོང་བར་མཛད། །རྡོ་རྗེ་སེམས་སུ་བསྟན་པ་སྟེ། །སེམས་དཔའ་དགའ་བར་བརྗོད་པ་ཡིན། །སྐད་ཅིག་བཞི་ལས་བྱུང་བས་ན། །དགའ་བ་རྣམ་པ་བཞི་རུ་བསྟན། །དགའ་བ་དང་ནི་མཆོག་དགའ་དང༌། །དགའ་བྲལ་གྱིས་ནི་དགའ་བ་དང༌། །ལྷན་ཅིག་སྐྱེས་དགའི་རང་བཞིན་ནི། །སྐད་ཅིག་བཞི་ལས་ཡང་དག་བྱུང༌། །རྣམ་པ་སྣ་ཚོགས་རྣམ་པར་སྨིན། །རྣམ་པར་ཉེད་དང་མཚན་ཉིད་བྲལ། །དེ་དག་ལས་ནི་སྐྱེ་བ་གང༌། །དགའ་བ་བཞི་ནི་དམ་པ་སྟེ། །དགའ་བར་ལྷན་ཅིག་གྱུར་པའི་སེམས། །རྡོ་རྗེ་སེམས་དཔའ་འདིར་བརྗོད་དོ། །འདོད་ཆགས་ཆགས་བྲལ་རྣམ་པར་གྲོལ། །རང་བཞིན་དག་ཅིང་དྲི་མ་མེད། །འཁོར་བའི་རྒྱ་མཚོའི་ཕ་རོལ་སོན། །བཞུགས་པ་ཞེས་བྱར་རྣམ་པར་གྲགས། །འདི་ནི་བཅོམ་ལྡན་འདས་ཞེས་པ་དང༌། བཞུགས་པའི་ཚིག་གཉིས་སྦྱར་ཏེ་སྟོན་པ་ལས། དེ་ཡང་སྔ་མའི་ཚིག་དང་སྦྲེལ་ཏེ། དུས་གཅིག་ན་བཅོམ་ལྡན་འདས་བཞུགས་སོ། །ཞེས་པའི་
དབང་དུ་བྱས་ནས། དུས་གཅིག་པོ་བསམ་མི་ཁྱབ་རྟག་པའི་རང་བཞིན་དེ་ཉིད་ན། སྟོན་པ་བཅོམ་ལྡན་འདས་ནི་བཞུགས་སོ་ཞེས་དེ་ལྟར་བསྟན་པའི་དོན་ནི། ཇི་སྲིད་གཉིས་མེད་དེ་ཟུང་འཇུག་གྲུབ་པའི་རྣལ་འབྱོར་པ། གསང་རིམ་གྱི་ས་རྣམས་ཡོངས་སུ་རྫོགས་པས། ཡེ་ཤེས་བདེ་བ་ཆེན་པོ་དོན་གྱི་ལྷན་ཅིག་སྐྱེས་པ་དང༌། ཐ་མལ་པའི་རྩ་ཁམས་རླུང་གསུམ་གཞན་དུ་གྱུར་ནས། སྣང་སྟོང་སྒྱུ་མ་ལྟ་བུའི་དཀྱིལ་ཁོར་རབ་འབྱམས་ཀྱི་སྐུ་གཉིས་ངོ་བོ་གཅིག་ལ་ལྡོག་པ་ཐ་དད་ཙམ་གྱི་ཟུང་འཇུག་རང་གིས་མངོན་སུམ་དུ་བྱས་ཞིང༌། རྩ་རོ་རྐྱང་རླུང་ལྡང་འཇུག ཁམས་དཀར་དམར་ལུས་དང་སེམས། དབང་པོ་དང་ཡུལ་རྣམས་ཡེ་ཤེས་ཀྱི་དབྱིངས་སུ་ཐིམ་ཞིང་གཅིག་ཏུ་འདྲེས་པའི་ཕྱིར། མཉམ་བཞག་ཏུ་གཉིས་སྣང་སྤངས་ཤིང༌། རྗེས་ཐོབ་ཏུ་ཡང་རང་རྒྱུད་ཀྱིས་བསྡུས་པ་རྣམས་ངོ་བོ་གཅིག་ཏུ་རྟོགས་པར་གྱུར་པ་དེ་ནི་བསམ་གྱིས་མི་ཁྱབ་པའི་དུས་ཀྱི་ཆ་ཤས་རྫོགས་པ་ཞེས་བྱ་སྟེ། དེ་ལྟ་བུ་གཞིར་བྱས་པ་ལ་བཅོམ་ལྡན་འདས་དང་བཞུགས་པའི་ཡོན་ཏན་མངའ་བ་དེ་ནི་འཕགས་པའི་ས་བཅུ་གཉིས་ལ་གནས་པ། སློབ་པའི་ཟུང་འཇུག་གསང་རིམ་གྱི་འབྲས་བུའི་ས་ལ་གནས་པའི་ཡོན་ཏན་ནོ། །གྲུབ་པ་ཡི་ཞེས་པ་ནི། འཇོམས་པས་ཞེས་པ་དག་སྦྲེལ་ཏེ། དེ་འདྲ་དེས་བདུད་བཞི་འཇོམས་པ་སོགས་བྱེད་ཅེས་པའི་དོན་ནོ། །དེ་ལ་བདུད་བཞི་ནི། ལུས་ཀྱི་ཐིག་ལེ་དངོས་སྔ་ནས་བཀགས་
ཟིན། སེམས་ཀྱི་སྣང་བ་ཙམ་བག་ཆགས་ཀྱི་སྣང་བས་བསྡུས་པའི་འགྱུར་བའི་ཆགས་པ་དངོས་སུ་སྤོང་བཞིན་པའི་ཕྱིར་ན། བདེ་ཆེན་འཁོར་ལོ་ཕུང་པོའི་བདུད་བཅོམ་པའོ། །དེ་བཞིན་དུ་ངག་གི་ཐིག་ལེ་ནི། སྒྲ་དོན་འདྲེས་འཛིན་གྱི་རྟོག་པའི་རྒྱུ་ཐིག་ལེ་ཡིན་ཅིང༌། རྟོག་པ་དེ་ཉོན་མོངས་ཀུན་གྱི་གཞིར་གྱུར་པའང་ཡིན་ཏེ། དེར་རགས་པ་སྔར་ནས་འགགས་ཟིན། ཕྲ་མོ་བག་ཆགས་ཀྱིས་བསྡུས་པ་འཇོམས་བཞིན་པའི་ཕྱིར། ལོངས་སྤྱོད་ཀྱི་འཁོར་ལོ་ཉོན་མོངས་ཀྱི་བདུད་བཅོམ་པ་དང༌། འཆི་བ་གཙོ་བོར་གྱུར་པ། གཉིད་འཐུག་སོགས་རྨོངས་པ་ཆེན་པོའི་གནས་སྐབས་ནི་སེམས་ཀྱི་ཐིག་ལེའི་བདེ་བ་ཡིན་ལ། དེའི་ཐོགས་བཅས་ཀྱི་རྫས་ནི་སྔ་ནས་སྤངས་ཟིན་ཀྱང༌། བསྟན་དུ་མེད་ཅིང༌། ཐོགས་པ་མེད་པ་བག་ལ་ཉལ་གྱིས་བསྡུས་པ་རྣམས་འཇོམས་བཞིན་པ་ཡིན་པའི་ཕྱིར། ཆོས་ཀྱི་འཁོར་ལོར་འཆི་བདག་གི་བདུད་འཇོམས་པ་དང༌། ཡུལ་ལ་ཡིད་འོང་གི་ཆགས་སྲེད་ཐམས་ཅད་ཆགས་པའི་ཐིག་ལེས་བསྐྱེད་པ་ཡིན་ལ། དེ་ཉིད་ཁམས་གསུམ་པའི་མཚན་ཉིད་ཅན་ནི་སྔར་ནས་འགགས་ཟིན་ཀྱང༌། འཁོར་བ་ཕྲ་མོ་གནས་ཀྱི་མཚན་ཉིད་ཅན་འཇོམས་པའི་ལས་ལ་ཞུགས་བཞིན་པའི་ཕྱིར། སྤྲུལ་པའི་འཁོར་ལོར་ལྷའི་བུའི་བདུད་བཅོམ་པའོ། །གོང་དུ་རང་བཞིན་སྣ་ཚོགས་སྤྱོད་ཡུལ་ཏེ་ཞེས། ལྟེ་བ་ནི་རྡོ་རྗེ་གསུམ་དང་རིགས་ལྔ་ཅར་འདྲེས་པར་བཤད་པ་ནི། ཡེ་ཤེས་རྡོ་རྗེའི་དག་པ་ཡིན་
པ་ལ་དགོངས་པ་སྟེ། དེ་ལྟར་ན་ལྟེ་བ་ཆགས་པའི་ཐིག་ལེ་དང་སྦྱོར་བ་འདི་ཡིན་ལ། ཡང་ཉོན་མོངས་ཐམས་ཅད་རབ་འཇོམས་པ་ཞེས་པ་ལྟར་ན། ལྟེ་བ་སྐུ་དང་སྤྱི་བོ་ཆགས་པར་འཇོག་སྟེ། དགྱེས་རྡོར་ལས། སྐྱེ་གནས་སྙིང་མགྲིན་མགོ་བོར་ཡང༌། །སྐུ་གསུམ་པོ་ནི་རྣམ་པར་གནས། །ཞེས་གསུངས་ཏེ། རྣམ་གཞག་འདི་གཉིས་ཕན་ཚུན་རྒྱས་བཏབ་ཀྱི་དབང་དུ་བྱས་པ་དང༌། ཡས་བབས་དང་མས་བརྟན་གྱི་ལྷན་སྐྱེས་འཆར་བའི་ཐིག་ལེ་སོ་སོའི་གནས་ཡིན་པ་དང༌། ཆགས་པ་བསྐྱེད་པའི་གནས་ལྟེ་བ་ཡིན་ཅིང༌། ཆགས་པའི་ཡུལ་བདེ་བ་འབྱུང་བའི་གནས་སྤྱི་བོ་ཡིན་པས། རྣམ་གཞག་གཉིས་ཀ་ཡང་ལུགས་གཅིག་ལ་འགལ་མེད་དུ་ཤེས་པར་བྱའོ། །དེ་བཞིན་དུ་ལྟེ་བར་ཐིག་ལེ་འཕོ་བའི་ཆགས་སྲེད་དང༌། སྙིང་གར་ཞེ་སྡང་དང་གཏི་མུག མགྲིན་པར་ལྟ་བ་ངན་པ་དང་འདོད་ཆགས། སྤྱི་བོར་ང་རྒྱལ་དང་ཐེ་ཚོམ་ལ་སོགས་པ་ཉོན་མོངས་པའི་དྲ་བ་ཐམས་ཅད་འཇོམས་ནས། བཅོམ་པའི་ཡོན་ཏན་ལྡན་པ་སྟེ། བཅོམ་ལྡན་ཞེས་བྱ་བས་སྤངས་པ་ཕུན་སུམ་ཚོགས་པ་བསྟན་ཏོ། །མཁའ་དབྱིངས་ཀྱི་གནས་ཆོས་འབྱུང་གི་རྣམ་པའི་ཨེ་ཡིག་གི་དབྱིབས་ཏེ། གྲུ་གསུམ་དང་རྩ་བ་སྟ་ཟུར་བཞི་པའི་རྣམ་པ་ལ་བྷ་ག་ཞེས་བྱ་སྟེ་སྐྱེ་གནས་ཀྱི་དབྱིབས་དང་མཚུངས་པའི་ཕྱིར་རོ། །དེ་ནི་བརྡའ་ཙམ་སྟེ། གང་ནས་བལྟས་ཀྱང་ཟུར་གསུམ་པ་ནི། རྡོ་རྗེ་གསུམ་
གཅིག་ཏུ་འདུས་པའི་ཡེ་ཤེས་ཡིན་པའི་བརྡའ་དང༌། གདེངས་ཀ་ཟུར་གསུམ་ནི་རྣམ་ཐར་སྒོ་གསུམ་དང༌། རྩ་བའི་ཟུར་ནི་རྣམ་པར་ཐར་པ་འདུས་མ་བྱས་པའོ། །དེ་ལ་རྣམ་པར་ཐར་པའི་སྒོ་སྟོང་པ་ཉིད་ནི་འཁོར་འདས་ཐམས་ཅད་སྤྲོས་བྲལ་དུ་གཟིགས་པའི་ཡེ་ཤེས་སོ། །སྨོན་པ་མེད་པས་ནི། འཁོར་བ་ཀུན་རྫོབ་ཏུ་རྟེན་ཅིང་འབྲེལ་འབྱུང་མི་རྟག་སྡུག་བསྔལ་དུ་གཟིགས་ལ། ཡེ་ཤེས་ཀྱི་རང་དོན་གཏན་མེད་དུ་རྟོགས་པའོ། །མཚན་མ་མེད་པ་ནི། ཡེ་ཤེས་ཀྱི་སྣང་བ་ཕྱོགས་མེད་དུ་རྒྱས་པ་ཡིན་ཡང༌། ཐམས་ཅད་བདེ་ཆེན་གཅིག་གི་ངོ་བོར་གྱུར་བ་གཡོ་བ་མེད་པར་ཡང་རྟོགས་པའོ། །འདུས་མ་བྱས་པ་ནི་དེ་ཐམས་ཅད་ཀྱི་རང་བཞིན། དེ་བཞིན་གཤེགས་པའི་སྙིང་པོ་འགྱུར་མེད་རྟག་ཅིང་བརྟན་པའོ། །དེ་ལྟར་རྣམ་ཐར་བཞིའི་ཡོན་ཏན་སུ་ལ་ཡོད་པ་དེ་ནི་རྟག་པ་ཞེས་བྱ་སྟེ་དེ་ལྟ་བུའི་ཡོན་ཏན་སུ་ལ་ཡོད་པ་དེ་ནི་ཆོས་ཀྱི་དབྱིངས་ཀྱི་ཡེ་ཤེས་རང་གིས་རིག་པ་ཡིན་ལ། དེ་ནི་ཐོག་མ་དང་ཐ་མ་མེད་པར་རྟག་ཏུ་གནས་ཤིང་བྱུང་བ་སྟེ་ཡོད་པའི་ཕྱིར་རོ། །འགྱུར་གཞན་ལས་མཐའ་ཞེས་པའི་ཚིག་མེད་དེ། ཐོག་མ་མེད་པར་འབྱུང་ཕྱིར་རོ་ཞེས་དང༌། རྒྱུན་མི་འཆད་པར་འབྱུང་ཕྱིར་རོ་ཞེས་འབྱུང་ངོ༌། །རྣམ་ཐར་བཞིའི་རང་བཞིན་གྱི་ཆོས་ཉིད་དེ་ནི། ཕྱག་རྒྱ་ཆེན་པོ་ཞེས་བྱ་སྟེ། དེ་ལས་འཁོར་འདས་ཀྱི་ཆོས་ཐམས་ཅད་སྐྱེ་བ་དང༌། འཁོར་འདས་ཐམས་ཅད་དེའི་དབྱིངས་སུ་ཐིམ་ཞིང་འཇིག་པའི་ཕྱིར་དང༌། འཁོར་འདས་ཀྱི་སྣང་བ་མ་འགགས་པའི་དུས་ན་
ཡང༌། དེས་རྒྱས་འདེབས་པ་སྟེ་དེའི་རང་བཞིན་ལས་མི་འདའ་བའི་ཕྱིར་རོ། །རྣམ་ཐར་བཞི་པོ་སུ་ལ་མངའ་བའི་སེམས་ཉིད་བདེ་བ་ཆེན་པོ་དོན་དམ་པའི་བྱང་ཆུབ་ཀྱི་སེམས་རྣམ་པར་རྟོག་པ་མེད་བཞིན་དུ་ཡོན་ཏན་ཐམས་ཅད་འབྱུང་བས་རིན་པོ་ཆེ་དང་མཚུངས་པ་གང་ཡིན་པ་དེ་ནི་ནམ་མཁའི་དབྱིངས་ཀྱི་བརྡས་བསྟན་པའི་སྤྲོས་བྲལ་རྣམ་པ་ཐམས་ཅད་པ་ལ་ངོ་བོ་གཅིག་པའི་ཚུལ་གྱིས་གནས་པ་ཡིན་ལ། བྱང་ཆུབ་ཀྱི་སེམས་སྤྲོས་བྲལ་དེ་ནི་མ་གཏོགས་པར་གཞན་དུ་གནས་པ་ནི་མ་མཐོང་སྟེ། དེ་བས་བྱང་སེམས་དེ་འདྲ་མཁའ་དབྱིངས་འདི་རུ་གནས་པར་བརྗོད་དོ། །དེ་བས་ན་རྣམ་པར་ཐར་བ་བཞིའི་ཡེ་ཤེས་ནི་རྟོགས་པ་ཕུན་སུམ་ཚོགས་པ་ཡིན་ལ། དེ་ཉིད་སྐལ་བ་སྟེ། ཕུན་སུམ་ཚོགས་པའི་འབྱོར་བ་ཡིན་པའི་ཕྱིར། དེ་གང་ལ་ཡོད་པ་དེ་ནི་སྐལ་ལྡན་ཏེ་བྷ་ག་ཝཱན་ནོ། །ཡང་ན་བྱང་ཆུབ་ཀྱི་སེམས་བདེ་བ་ཆེན་པོ་གང་ལ་གནས་པའི་སྟོང་པ་ཉིད་ནི། བདེ་བ་ཆེན་པོའི་སྐལ་བ་དང་ལྡན་པའི་སྐལ་ལྡན་ཏེ། སྤངས་རྟོགས་གཉིས་ཀའི་ཆ་ནས་བསྟན་ཏོ། །དེ་བས་ན་སྤངས་པ་དང་ལྡན་པ་དང་རྟོགས་པ་ལྡན་པ་དང༌། རྟོགས་པ་དང་ལྡན་པའི་སྤངས་པ་སྟེ་དོན་ཚན་གསུམ་དུ་ཤེས་པར་བྱའོ། །གོང་དུ་བཤད་པ་ལྟར་སྐུ་གསུང་ཐུགས་ཀྱི་གསང་བ་གང་ཡིན་པ་དེ་ཉིད་སྤྲོས་པ་ཐམས་ཅད་ཀྱིས་མ་སྤྲོས་པ་སྟེ། རང་བཞིན་བརྗོད་བྲལ་ཡིན་ལ། དེ་ཉིད་རྟོགས་པ་ལས་སངས་རྒྱས་རྣམས་
བྱུང་བའི་ཕྱིར། སངས་རྒྱས་ཐམས་ཅད་བསྐྱེད་པ་པོ་ཡིན་པས་རྒྱུད་ཀྱི་གླེང་གཞིའི་སྐབས་འདིར་དེ་ལ་བཅོམ་ལྡན་འདས་སུ་བཤད་དེ། བཅོམ་ལྡན་འདས་བཞུགས་སོ་ཞེས་པའི་བཞུགས་པ་ཞེས་བྱ་བར་གང་གསུངས་པ་ནི། རྟག་ཅིང་བརྟན་ལ་འགྱུར་བ་མེད་པར་གནས་པར་གྱུར་བར་བརྗོད་པ་ཡིན་ཏེ། དེ་ཡང་སངས་རྒྱས་ཏེ་ཕུང་པོ་ལྔའི་ཆོས་ཉིད་དང༌། བྱང་ཆུབ་སེམས་དཔའ་སྟེ་དབང་པོ་ལྔའི་ཆོས་ཉིད་དེ་རྣམས་ཞེས་པས་ཆོས་གཞན་ཐམས་ཅད་ཀྱི་ཆོས་ཉིད་ཀྱང་སྟེ། དེ་རྣམས་ཐ་དད་དུ་འཁྲུལ་པའི་རྒྱུ་རྩ་རླུང་ཐིག་ལེ་གཟུང་འཛིན་གྱི་སྣང་བ་དག་པས། ཡེ་ཤེས་རྟག་པ་དུས་གཅིག་གི་རང་བཞིན་དུ་མངོན་གྱུར་ཐོབ་པ་ན། ཆོས་ཐམས་ཅད་ཀྱི་ཆོས་ཉིད་རྣམས། རྡོ་རྗེ་སེམས་དཔའ་བདེ་བ་ཆེན་པོའི་རང་བཞིན་གྱིས་གནས་པར་གྱུར་ལ། བདེ་ཆེན་རྣམ་པར་རྟོག་མེད་དེ་རང་གཞན་གྱི་ཡོན་ཏན་གྱི་ཚོགས་བསྐྱེད་པས་འཇིག་རྟེན་རང་གཞན་རྣམས་ཀྱི་རེ་བ་སྐོང་བ་སྟེ། ཕན་འདོགས་པར་བྱེད་དོ། །འཇིག་རྟེན་ནི་རྣམ་པ་གཉིས་སུ་གསུངས་ཏེ། སེམས་ཅན་གྱི་འཇིག་རྟེན་དང༌། སྣོད་ཀྱི་འཇིག་རྟེན་གྱིས་སོ། །དེ་ལ་གཡོ་བར་གྱུར་པ་སེམས་ཅན་གྱི་འཇིག་རྟེན་དང༌། དེ་བཞིན་དུ་གནས་པར་གྱུར་པ་སྣོད་ཀྱི་འཇིག་རྟེན་ཡིན་ནོ། །སྐལ་བཟང་དང་ནི་སྐལ་ངན་གཉིས་ཀྱི་དབྱེ་བས། སྣོད་བཅུད་རེ་རེ་བཞིན་ཡང་གཉིས་གཉིས་སུ་དབྱེ་བར་བྱའོ། །དེས་ནི་འདི་སྐད་བསྟན་པར་འགྱུར་ཏེ། ཕྱི་རོལ་དུ་སྣོད་ཀྱི་འཇིག་རྟེན་སྐལ་ངན་མ་དག་
པའི་ཞིང་དང༌། སྐལ་བཟང་སྨོན་ལམ་གྱི་སྟོབས་ལས་བྱུང་བ་དག་པའི་ཞིང་གཉིས་སོ། །བཅུད་ཀྱི་སེམས་ཅན་ལ། སྐལ་ངན་འཁོར་བའི་སྡུག་བསྔལ་ཅན་དང༌། སྐལ་བཟང་ཆོས་ཀྱི་བདེ་བ་ཅན་གཉིས་སོ། །ཕྱི་རོལ་ཏུ་དེ་ལྟར་སྣང་བའི་རྒྱུ་ནང་དུ་སྣོད་སྐལ་ངན་རགས་པ་རྡུལ་ཕྲ་རབ་ཀྱི་རྩ་དང་ཤ་ཁྲག་རུས་པའི་ཚོགས་པ། བཅུད་སྐལ་ངན་ལས་རླུང་དང་ཁམས་སྙིགས་མ། སྣོད་སྐལ་བཟང་ཡེ་ཤེས་ཀྱི་རྩ་གསུམ་འཁོར་ལོ་བཞི་རྩ་སོ་གཉིས་ལ་སོགས་པ་བཅུད་སྐལ་བཟང་ཡེ་ཤེས་ཀྱི་རླུང་དང་དྭངས་མ་མི་ཤིགས་པ་ལ་སོགས་པ། དེ་ལྟར་སྣོད་བཅུད་བརྒྱད་པོ་དེ་དག་ཀྱང༌། ས་དང་ཆུ་དང་མེ་དང་རླུང་གིས་ཁྱབ་པས། རེ་རེ་ཡང་རང་བཞིན་རྣམ་པ་བཞི་བཞིའོ། །དེས་ན་རྣམ་གྲངས་རགས་པའི་སྒོ་ནས་བརྒྱད་ལ་བཞི་བཞི་དབྱེ་བའི་ཕྱིར། སྣོད་བཅུད་སུམ་ཅུ་སོ་གཉིས་སུ་དབྱེ་བར་བྱའོ། །སྤྱིར་ནི་ཐེག་པ་འདིར་མཚན་གཞིའི་ཆོས་གང་ལ་ཡང་འབྱུང་བཞིའི་མཚན་ཉིད་ཀྱིས་མ་ཁྱབ་པ་མེད་ཅིང༌། འབྱུང་བཞིའི་དྭངས་མ་ཡེ་ཤེས་བཞིས་ཀུན་ལ་ཁྱབ་སྟེ་གནས་པ་ཡང་ཡིན་ནོ། །དེ་ལྟར་རྣམ་པ་ཐམས་ཅད་པའི་ཚུལ་དེ་དག་ལ། བདེ་བ་ཆེན་པོ་རྡོ་རྗེ་སེམས་དཔའ་ཉིད། ཁྱབ་བྱེད་ཀྱི་ཚུལ་ཉིད་ཀྱིས་གནས་ནས། དེ་རྣམས་ལ་ཕུན་སུམ་ཚོགས་པའི་ཡོན་ཏན་འཕེལ་བའི་སྒོ་ནས་རེ་བ་སྐོང་བར་མཛད་དོ། །དེ་ལ་ཟག་མེད་ཀྱི་ཡོན་ཏན་རྣམས་ནི་རང་གི་ངོ་བོས་འཕེལ་བར་འགྱུར་ལ། ཟག་བཅས་ཀྱི་ཡོན་ཏན་
རྣམས་ཀྱང་དེའི་སྟོབས་ལས་བྱུང་བ་སྟེ། དེ་ལྟར་ཡང༌། གལ་ཏེ་སངས་རྒྱས་ཁམས་མེད་ན། །སྡུག་ལ་སྐྱོ་བར་མི་འགྱུར་ཞིང༌། །མྱ་ངན་འདས་ལ་འདོད་པ་དང༌། །དོན་གཉེར་སྨོན་པའང་མེད་པར་འགྱུར། །ཅེས་སོ། །རྡོ་རྗེ་སེམས་དཔའི་སྒྲ་བཤད་པ་ནི། རྡོ་རྗེ་ནི་སྤྲོས་པ་དང་བྲལ་བའི་སེམས་སུ་བསྟན་པ་སྟེ། སེམས་དཔའ་ནི་འགྱུར་བ་མེད་པའི་བདེ་བ་དང༌། དགའ་བར་བརྗོད་པ་ཡིན་པས། བདེ་སྟོང་གཉིས་སུ་མེད་པའོ། །བདེ་བ་དེ་ཡང་སྐད་ཅིག་མ་བཞི་ལས་བྱུང་བས་དགའ་བ་རྣམ་པ་བཞིར་བསྟན་ཏེ་རྣམ་པ་སྣ་ཚོགས་པའི་སྐད་ཅིག་མས་མཚོན་པའི་དགའ་བ་དང༌། རྣམ་པར་སྨིན་པས་མཚོན་པའི་མཆོག་དགའ་དང༌། རྣམ་པར་ཉེད་པས་མཚོན་པའི་དགའ་བྲལ་གྱི་དགའ་བ་དང༌། མཚན་ཉིད་བྲལ་བས་མཚོན་པའི་ལྷན་ཅིག་སྐྱེས་དགའི་རང་བཞིན་ཏེ། སྐད་ཅིག་མ་བཞིའི་གནས་སྐབས་ལས། དགའ་བ་བཞི་ཡང་དག་པར་མཚོན་པར་བྱུང་བའོ། །དེ་ལྟར་ན་སྐད་ཅིག་མ་བཞི་ལས། སྐྱེ་བ་དང་མཚོན་པར་ནུས་པའི་དགའ་བ་བཞི་པོ་གང་དག་ནི། དམ་པ་སྟེ་བདེ་བ་ཆེན་པོའི་ཡེ་ཤེས་ཡིན་ལ། དགའ་བ་བཞི་པོ་དེ་དག་དང༌། ལྷན་ཅིག་རོ་མཉམ་པར་གྱུར་པའི་སེམས་འགྱུར་མེད་དེ་ནི་རྡོ་རྗེ་སེམས་དཔའ་ཞེས་སྐབས་འདིར་བརྗོད། དེའི་མཚན་ཉིད་ནི། འདོད་ཆགས་ཀྱི་སྲེད་པ་དང་རྣམ་པར་རྟོག་པ་ལས་གྲོལ་ཞིང༌། ཞུ་བདེ་དང་རྣམ་པ་མཚུངས་རུང་གི་ཡེ་ཤེས་དོན་དམ་པའི་འདོད་ཆགས་བདེ་ཆེན་མཁའ་
ཁྱབ་ཀྱི་ངོ་བོ་ཉིད་ཀྱི་ཕྱིར། ཆགས་བྲལ་གྱི་མཚན་མ་ལས་གྲོལ་ཞིང༌། སྤྲོས་པ་མཚན་མ་ཐམས་ཅད་རང་བཞིན་གྱིས་རྣམ་པར་དག་ལ། རྟེན་ཐིག་ལེ་འགྱུར་བཅས་ཀྱི་དྲི་བ་མེད་པ་དེ་རྣལ་འབྱོར་པ་གང་གིས་ལན་ཅིག་མངོན་སུམ་དུ་ཐོབ་ན། འཁོར་བའི་རྒྱ་མཚོའི་ཕ་རོལ་དུ་སོན་ཅིང༌། སླར་ལྡོག་པ་མི་སྲིད་པས་རྟག་ཏུ་བཞུགས་པ་ཞེས་བྱ་བར་རྣམ་པར་གྲགས་སོ། །དེ་ལྟར་ན། བཞུགས་པའི་དོན་བཤད་པ་ལ་སངས་རྒྱས་བྱང་ཆུབ་སེམས་རྣམས་དང༌། ཞེས་སོགས་ཀྱིས་རྣམ་པ་ཐམས་ཅད་པའི་བཞུགས་ཚུལ་དང༌། རྡོ་རྗེ་སེམས་སུ་བསྟན་པ་སྟེ་སོགས་ཀྱིས་བདེ་བ་ཆེན་པོར་བཞུགས་ཚུལ་ལོ། །འདིར་སྨྲས་པ། སེམས་ཀྱི་ཆོས་ཉིད་དོན་དམ་བདེ་ཆེན་ཏེ། །རང་རིག་ཚུལ་གྱིས་ཉམས་སུ་མྱོང་བའང་ཡིན། །དེ་ཕྱིར་འགྲོ་བ་ཀུན་ཡང་བདེ་འདོད་པའི། །རྣམ་རྟོག་འདི་ནི་ལྷན་སྐྱེས་ཚུལ་གྱིས་འབྱུང༌། །ཆོས་དབྱིངས་མྱོང་བའང་ཚོར་བ་མ་ཡིན་ཏེ། །མྱོང་བྱ་མྱོང་བྱེད་མྱོང་ཚུལ་དབྱེ་བ་མེད། །དོན་དམ་མྱོང་བའམ་དོན་དམ་ཚོར་བ་ཞེས། མྱོང་བའི་ལྡོག་ཆ་ནས་ཀྱང་སྤྲོས་བྲལ་ཡིན། །སྤྲོས་པ་བྲལ་ཙམ་མ་ཡིན་བདེ་ཆེན་མྱོང༌། །སྟོང་པའི་ལྡོག་ཆ་ནས་ཀྱང་བདེ་བར་ཤར། །བདེ་ཆ་སྤྲོས་པ་སྟོང་པ་སྤྲོས་མེད་ཅེས། །བརྫུན་པའི་ཟུང་འཇུག་འཆད་དང་འདི་མི་མཚུངས། །བདེ་དང་སྤྲོས་བྲལ་རྣམ་པར་བཞག་པའི་ཚེ། །རྟོག་པས་གོ་ཚུལ་སོ་སོར་འབྱུང་མོད་ཀྱང༌། །རྒྱུ་མཚན་དེ་ཙམ་ཞིག་གིས་གནས་ཚུལ་ལ། །
དབྱེ་བ་ཡོད་པར་ནམ་ཡང་འགྲོ་བ་མིན། །སེམས་ལ་འཁོར་འདས་ཆོས་ཀུན་འཆར་བ་དང༌། །ལྷན་སྐྱེས་བློ་ལ་དེ་ཡང་འདོད་ཐོག་ཕྱིར། །སེམས་ཀྱི་རང་བཞིན་ཆོས་ཀྱི་དབྱིངས་དེ་ཡང༌། །དོན་དམ་རྣམ་པ་ཀུན་ལྡན་ཡིན་པར་གྲུབ། །སྐབས་འདིའི་དགའ་བ་བཞི་ནི། ཟག་མེད་ལྷན་ཅིག་སྐྱེས་པ་ཁོ་ནས་ལས་ཕྱེ་བ་ཡིན་ཅིང༌། ཆོས་ཉིད་ཀྱི་དགའ་བ་བཞི་ངོ་བོ་གཅིག་ཁོ་ན་ཡིན་ཀྱང༌། སློབ་པའི་ཟུང་འཇུག་གི་གནས་སྐབས་འདིར། ཆོས་དང་ཆོས་ཅན་གྱི་སྣང་བ་ཁྲེའུ་རིས་སུ་འཆར་བས། གཅིག་ཏུ་སྣང་བ་དང་ཐ་དད་པར་སྣང་བ་སྣ་ཚོགས་འབྱུང་ངོ༌། །གཟུང་འཛིན་གྱི་སྣང་བ་སྤངས་ཤིང་ཆོས་ཉིད་མངོན་སུམ་དུ་མཐོང་བའི་ཕྱིར། མཉམ་གཞག་ཕལ་ཆེར་དུ་གཅིག་ཏུ་སྣང་ལ། གཉིས་སྣང་གི་བག་ཆགས་མ་སྤངས་པའི་ཕྱིར། རྗེས་ཐོབ་དང་མཉམ་བཞག་སྐབས་འགར་དུས་མཉམ་པ་ལ་ཐ་དད་པར་སྣང་བ་ཡང་ཡོད། རྟེན་ལུས་ཀྱི་འགྱུར་བའི་གནས་ཀྱི་བག་ཆགས་ཡོད་པའི་ཕྱིར། ཐ་དད་དུ་སྔ་ཕྱི་ཅན་དུ་སྣང་བ་ཡང་ཡོད་དོ། །གང་ལྟར་ཡང་སྐུའི་གསང་བའི་བདེ་བ་ནི་དགའ་བ། གསུང་གི་གསང་བའི་བདེ་བ་ནི་མཆོག་དགའ། ཐུགས་ཀྱི་གསང་བའི་བདེ་བ་ནི་དགའ་བྲལ་ལམ། ཁྱད་པར་གྱི་དགའ་བ། དེ་དག་རོ་མཉམ་ལམ་ཐུགས་ཉིད་འགྱུར་བ་མེད་པར་ཤར་བ་ནི་ལྷན་ཅིག་སྐྱེས་པའོ། །བདེ་བའི་རང་གདངས་ལས་ཁམས་གསུམ་གྱི་གཟུགས་བརྙན་རྣམ་པ་སྣ་ཚོགས་པ་འཆར་བའི་ཕྱིར། རྣམ་པ་སྣ་ཚོགས་པའི་སྐད་ཅིག་མ།
བདེ་བའི་རང་གདངས་ལས་སེམས་ཅན་སྨིན་པར་བྱེད་པའི་ཆོས་ཀྱི་སྒྲ་འབྱུང་བའི་ཕྱིར། རྣམ་པར་སྨིན་པའི་སྐད་ཅིག་མ། བདེ་བའི་རང་གདངས་ལས་དམིགས་པ་མེད་པའི་སྙིང་རྗེ་སེམས་ཅན་རྣམས་ལ་ཡང་ཡང་འཇུག་པའི་ཕྱིར་ན། རྣམ་པར་ཉེད་པའི་སྐད་ཅིག་མ། དངོས་པོའི་རྣམ་པ་ཐམས་ཅད་པ་ཡིན་ཡང༌། དངོས་པོའི་རང་བཞིན་ཀུན་དང་བྲལ་བ་སོགས་མཚན་ཉིད་ཕྱོགས་རེར་བརྗོད་དུ་མེད་པས་མཚན་ཉིད་དང་བྲལ་བའི་སྐད་ཅིག་མའོ། །འདི་དག་ནི་གནས་ལུགས་དོན་གྱི་དགའ་བ་དང༌། སྐད་ཅིག་མའི་དབྱེ་བ་ཡིན་ལ། ཞུ་བདེ་ཡས་བབས་ཀྱི་དགའ་བ་བཞི་དང༌། ལམ་འགྱུར་མེད་ཀྱི་དགའ་བ་བཞི་དང༌། སྐད་ཅིག་མའི་དགའ་བཞི་དང༌། སའི་དགའ་བཞི་སོགས་དབྱེ་བ་དུ་མ་ཡོད་པ་རྣམས་ཀྱང་སྐབས་འདིར་མཐའ་གཅོད་པའི་ཕྱིར་རྟོགས་པར་བྱ་དགོས་མོད་ཀྱི། དཔྱིད་ཐིག་དང་རིམ་བཞིའི་འགྲེལ་པར་བཤད་ཟིན་པས། འདིར་མ་སྤྲོས་སོ། །གསུམ་པ་མཐར་ཐུག་རྫོགས་པའི་སངས་རྒྱས་ཀྱི་བཞུགས་ཚུལ་ལས་བརྩམས་ཏེ་ཚིགས་སུ་བཅད་པ་གསུངས་པ། ཐམས་ཅད་སྒྲ་རུ་བརྗོད་པ་ནི། །ལྷ་སོགས་འགྲོ་བ་དྲུག་རྣམས་ཀྱི། །གཟུགས་ལ་སོགས་པ་ཡུལ་གྱི་དངོས། །འདོད་པའི་ངོ་བོར་ཡང་དག་གནས། །འཇིག་རྟེན་གསུམ་དུ་གང་བྱུང་དེ། །མ་ལུས་ཐམས་ཅད་ཞེས་བྱར་གསུངས། །དྲུག་པོ་དེ་རྣམས་དེར་འཇུག་པ། །དེ་བཞིན་གཤེགས་པར་བརྗོད་པ་ཡིན། །དབང་པོ་རྣམས་དང་འབྱུང་བ་ཆེ། །
ཕུང་པོའི་དངོས་དེ་ཇི་ལྟར་ན། །གང་ནས་ཇི་ལྟར་འོངས་གྱུར་པ། །དེར་ནི་དེ་ལྟར་འགྲོ་བས་ན། །དེ་ལྟར་དེ་དག་དེ་བཞིན་གཤེགས། །གཅིག་ནས་གཅིག་ཏུ་རིམ་བཞིན་འོངས། །ལྷ་སོགས་འགྲོ་བའི་རང་བཞིན་ཅན། །ཡུལ་རྣམས་དག་ནི་ཐམས་ཅད་ཀྱི། །ཡུལ་ལ་མྱང་བ་ཡོད་པས་ན། །དབང་པོ་དག་ནི་དེ་བཞིན་གཤེགས། །འགྲོ་བ་རྣམས་དང་ཡུལ་རྣམས་ལ། །དངོས་སུ་ཇི་བཞིན་འགྲོ་འགྱུར་བ། །དེ་བཞིན་དངོས་པོ་དེ་ཡི་ནི། །དེ་ཉིད་དུ་ནི་སླར་འགྲོ་བས། །དེ་བཞིན་གཤེགས་པའི་རང་བཞིན་ཅན། །དེ་དག་ཉིད་ནི་ཐམས་ཅད་ཀྱི། །དེ་ལྟར་སྐུ་དང་གསུང་དང་ཐུགས། །རྡུལ་དང་སྙིང་སྟོབས་མུན་པ་སྟེ། །བདེ་དང་སྡུག་བསྔལ་དེ་བཞིན་རྨོངས། །དེ་རྣམས་རྡོ་རྗེ་དེ་ཉིད་དེ། །བྱང་ཆུབ་སེམས་ནི་རིན་པོ་ཆེ། །མི་ཕྱེད་པས་ནི་རྡོ་རྗེར་བརྗོད། །ཟད་དང་སྐྱེ་མེད་ངོ་བོ་ཡིས། །དེ་ནི་མི་ཕྱེད་པ་རུ་གྲགས། ཉོན་མོངས་དྲ་བས་འཆིངས་པའི་ཕྱིར། །དབང་པོ་རྣམས་དང་སངས་རྒྱས་འཇིག །སྦྱོར་བ་དང་ནི་བྲལ་བ་ཡིས། །རྡོ་རྗེ་སེམས་དཔའ་འཇིག་པ་མེད། །དེ་ནི་སྐྱེ་བ་མེད་པ་ཉིད། །དེ་ནི་གང་ནའང་གནས་པ་མིན། །དེ་ཡི་བཙུན་མོ་ཤེས་རབ་གནས། །ལྷ་སོགས་བུ་མོའི་འགྲོ་བར་འགྱུར། །སངས་རྒྱས་ཐམས་ཅད་བསྐྱེད་པ་སྟེ། །སེམས་ཅན་ཀུན་གྱི་དགེ་འབྱུང་མ། །སེམས་ཅན་བསམ་པའི་བྱེ་བྲག་གིས། །སྣ་ཚོགས་གསལ་བར་ཡང་དག་བསྟེན། །ཤེས་རབ་རྡོ་རྗེ་བཙུན་མོར་བརྗོད། །བརྟན་པ་དང་ནི་གཡོ་བར་གནས། །རྡོ་རྗེ་བཙུན་མོ་སངས་
རྒྱས་སྤྱན། །རྡོ་རྗེ་བཙུན་མོ་མཱ་མ་ཀཱི། །རྡོ་རྗེ་བཙུན་མོ་གོས་དཀར་མོ། །རྡོ་རྗེ་བཙུན་མོ་སྒྲོལ་མ་སྟེ། །འཛིན་ཅིང་སྤེལ་བར་བྱེད་པས་ན། །དེ་དག་རྡོ་རྗེ་བཙུན་མོར་བརྗོད། །འཛིན་ཅིང་སྤེལ་བར་བྱེད་པས་ན། །རང་ཉིད་རྡོ་རྗེ་དེ་བཞིན་ནོ། །རྡོ་རྗེའི་འདོད་པའི་ངོ་བོ་ཡིས། །དེ་དག་རྡོ་རྗེ་བཙུན་མོར་གནས། །དེ་ཡི་བྷ་ག་ཞེས་གསུངས་པ། །ཡི་གེ་ཨ་ཡི་ཆ་བྱད་ཉིད། །རིགས་ལྔ་ཡི་ནི་རང་བཞིན་གྱི། །སངས་རྒྱས་དག་གི་གདན་བཞི་ཡིན། །མཚན་ནི་སུམ་ཅུ་རྩ་གཉིས་དང༌། །དཔེ་བྱད་བཟང་པོ་བརྒྱད་ཅུ་དང༌། །ལྡན་པའི་རྡོ་རྗེ་སེམས་དཔའ་ནི། །དཔལ་ལྡན་བདེ་བས་སྤ་པ་སྟེ། །འཁོར་བའི་ཕ་རོལ་མཐར་གནས་པ། །འབྱོར་པ་རང་གི་རང་བཞིན་སྐྱེས། །སྤྱོད་ཅིང་ལྟ་བའི་དྲ་བ་ཡིས། །བཅིངས་ལས་གྲོལ་བ་ཁྱབ་བདག་སྟེ། །བསྐོ་བཤམ་འཕྲོག་པ་འབྱིན་པོ་དང༌། །འཛིན་པོ་ཉིད་དེ་ཡིད་འགྲོ་བའི། །བྷ་ག་ཉིད་ནི་གནས་ཡིན་ཏེ། །དེ་ན་འདི་ནི་རྟག་ཏུ་བཞུགས། །ཞེས་གསུངས་སོ། །འདི་ལ་བདུན་ཏེ། ཐམས་ཅད་ཀྱི་སྒྲས་སྤྲུལ་པའི་སྐུ་བཤད་པ། དེ་བཞིན་གཤེགས་པའི་སྒྲས་ལོངས་སྐུ་བཤད་པ། སྐུ་གསུང་ཐུགས་ཀྱི་སྒྲས་ངོ་བོ་ཉིད་སྐུ་བཤད་པ། རྡོ་རྗེའི་སྒྲས་ཆོས་སྐུ་བཤད་པ། བཙུན་མོའི་སྒྲས་བདེ་བ་ཆེན་པོའི་སྐུའི་རྣམ་པ་ཐམས་ཅད་བསྟན་པ། བྷ་གའི་སྒྲས་ཐུགས་བདེ་ཆེན་བསྟན་པ། རྟག་བཞུགས་ཀྱི་སྒྲས་སྐུ་ཟུང་འཇུག་བསྟན་པའོ། །དང་པོའི་དབང་དུ་བྱས་ནས། ཐམས་ཅད་སྒྲ་རུ་སོགས་
ཏེ། དེ་ལ་ཐམས་ཅད་ཀྱི་སྒྲ་རུ་རྒྱུད་ལས་གསུངས་ཤིང་བརྗོད་པ་ནི། ལྷ་སོགས་འགྲོ་བ་དྲུག་པོ་རྣམས་ཀྱི་ཆོས་ཉིད་དང༌། གཟུགས་ལ་སོགས་པ་ཡུལ་རྣམས་ཀྱི་དངོས་པོ་སྟེ་རང་བཞིན་ནི་ཆོས་དབྱིངས་སོ། །སོགས་པའི་སྒྲས་ནམ་མཁའ་དང་མཉམ་པའི་སྣོད་བཅུད་ཀྱི་འཇིག་རྟེན་ཕུང་ཁམས་དབང་ཡུལ་ལས་དང་བྱ་བྱེད་ཀུན་རྫོབ་ཀྱི་ཆོས་ཤེས་བྱ་ལ་སྲིད་ཚད་ཐམས་ཅད་ཀྱི་རང་བཞིན་ནམ་གནས་ལུགས་སམ། ཆོས་ཉིད་གསལ་ལ་མ་འགགས་པའི་རིག་པ་དེ། སེམས་ཅན་འཁོར་བ་ལས་སྒྲོལ་བར་འདོད་པ་སྙིང་རྗེ་ཆེན་པོའི་ངོ་བོར་གདོད་མ་ནས་ཡང་དག་པར་གནས་པ་དེ་ཉིད། དོན་དམ་འཇིག་རྟེན་གསུམ་ལ་ངོ་བོ་གཅིག་པའི་ཆོས་ཉིད་ཀྱི་ཚུལ་དུ། གང་ཞིག་ཁྱབ་སྟེ་བྱུང་བ་དང༌། སྙིང་རྗེའི་མཐུ་ལས་གདུལ་བྱ་གཞན་སྣང་དུ། གང་ལ་གང་གདུལ་གྱི་ཚུལ་གྱིས་སྣོད་བཅུད་མ་ལུས་པའི་གཟུགས་སུ་འཆར་ཞིང་འབྱུང་བ་དེ་ནི་འཇིག་རྟེན་ན་རྣམ་པ་སྣ་ཚོགས་སྟོན་པའི་ཕྱིར། །ཐམས་ཅད་ཞེས་བྱ་བའི་སྒྲས་གསུངས་ཏེ། སྤྲུལ་གཞི་ཡེ་ཤེས་དང་དེའི་སྤྲུལ་པ་གཉིས་ཀའོ། །དོན་ཚན་གཉིས་པའི་དབང་དུ་བྱས་ནས། འགྲོ་བ་དྲུག་པོ་དེ་རྣམས་ཆོས་དབྱིངས་དེར་འཇུག་ཅིང༌། དེ་ལས་འགྲོ་བ་དྲུག་ཏུ་སླར་འབྱུང་ཞིང་སྟོན་པར་བྱེད་པས། ཡེ་ཤེས་འགྲོ་བ་དྲུག་གི་ཚུལ་ཅན་ལ་ནི་དེ་བཞིན་གཤེགས་པའི་བརྡས་བརྗོད་པར་བཞེད་པ་ཡིན་ནོ། །དེའི་འགྲོ་བ་དྲུག་ནི། ལྷ་སོགས་ལ་བཤད་ཀྱང་རུང་ལ། འོན་ཀྱང་དུས་སྔ་མ་ནས་ཕྱི་མར་འགྲོ་བའི་ཕྱིར། ཀུན་རྫོབ་ཀྱི་ས་ཆུ་མེ་རླུང་
ནམ་མཁའ་རྣམ་ཤེས་དྲུག་ལ་བརྗོད་དེ། དེ་དག་གིས་དྭངས་མ་བདེ་བ་ཆེན་པོ་ནི་བདེ་བ་ཉིད་ཀྱི་ཆ་ནས་ཀྱང་ལོངས་སྤྱོད་རྫོགས་སྐུར་འཇོག་ལ། དེ་ཉིད་དཀྱིལ་འཁོར་གྱི་འཁོར་ལོར་ཤར་བས་ཀྱང་ལོངས་སྤྱོད་རྫོགས་སྐུའོ། ཁམས་དྲུག་གི་ཆོས་ཉིད་དུ་བསྟན་པས་ནི་རྣལ་འབྱོར་མ་རིགས་དྲུག་གི་དཀྱིལ་འཁོར་འཁོར་ལོའི་ཚོགས་མཚོན་པ་ཡིན་ལ། དེ་བས་ན་དབང་པོ་དྲུག་དང༌། འབྱུང་བ་ཆེན་པོ་དྲུག་དང༌། ཕུང་པོ་དྲུག་པོའི་དངོས་པོ་དེ་རྣམས་ཇི་ལྟར་ན། འཁོར་བའི་དུས་སུ་གློ་བུར་གྱི་དྲི་མའི་ཚུལ་གྱིས། གང་ནས་ཇི་ལྟར་ཚུར་ལ་འོངས་ཤིང་གཤེགས་པར་གྱུར་པ། འབྲས་བུའི་དུས་སུ་དེ་ལྟར་ཆོས་དབྱིངས་དེར་ནི་ཕར་ལ་འགྲོ་ཞིང་གཤེགས་པས་ན། ཡེ་ཤེས་དེ་དག་ནི་ཕུང་ཁམས་དེ་དག་གི་འགྲོ་འོང་གི་གཞི་ཡིན་པ་དེ་ལྟར་ན། དེ་བཞིན་གཤེགས་པའི་བརྡས་བསྟན་ཏོ། །འདི་ནི་གདོད་མ་ཆོས་དབྱིངས་ཀྱི་གཤེགས་པ་གཤེགས་མ། སེམས་དཔའ་སེམས་མ་ཁྲོ་བོ་ཁྲཽ་མོ་རིགས་དྲུག་གིས་བསྡུས་པའི་དཀྱིལ་འཁོར་རབ་འབྱམས་དོན་དམ་པའི་ཕུང་ཁམས་དབང་ཡུལ་ལས་དང་བྱ་བར་བཅས་པ་ཡིན་ལ། དེ་ཉིད་མཚན་དཔེ་ཡོངས་སུ་རྫོགས་པའི་ལྷ་དང༌། རྒྱན་ཐམས་ཅད་དང་ལྡན་པའི་ཡེ་ཤེས་ཀྱི་གཞལ་མེད་ཁང་དུ་རང་བཞིན་གྱིས་འགྲུབ་པ་ནི། ལོངས་སྤྱོད་རྫོགས་སྐུ་དངོས་ཡིན་ནོ། །ཡེ་ཤེས་ཀྱི་ཕུང་ཁམས་དེ་ཉིད་ལ་གློ་བུར་གྱི་དྲི་མའི་ཚུལ་དུ་འཁོར་བའི་ཕུང་ཁམས་དབང་ཡུལ་སོགས་འཆར་བ་ནི། ནམ་མཁའ་དག་པ་ལ་སྤྲིན་འཆར་བའི་ཚུལ་
དང༌། ལམ་བསྒོམས་པས་ཀུན་རྫོབ་ཀྱི་ཕུང་སོགས་རྣམས། ཡེ་ཤེས་གདོད་མའི་ཕུང་སོགས་དཀྱིལ་འཁོར་ཆེན་པོའི་ནང་དུ་ཐིམ་པ་ནི། ནམ་མཁའ་ལ་སྤྲིན་དེངས་པ་བཞིན་ནོ། །ཕུང་སོགས་དེ་དག་ཕན་ཚུན་དུ་འཆར་བ་དང་ནུབ་པས། གཤེགས་པའི་གཞི་ཡིན་པའི་ཕྱིར། གཤེགས་པའི་སྒྲར་བརྗོད་ལ། དེ་བཞིན་ཞེས་པའི་དོན་ནི། རྒྱུ་རྐྱེན་ཚོགས་པ་ལས་སྣང་བ་དང་རྒྱུ་རྐྱེན་དང་བྲལ་བའི་ཚེ་ཡལ་བར་གྱུར་པས། ལུགས་དང་མཐུན་པར་བྱུང་བའི་དོན་ནོ། ཡང་རྣམ་པ་གཅིག་ཏུ་ན། གཤེགས་པ་ནི་རྟོགས་པའི་དོན་ཡིན་པས། གཞན་འཁྲུལ་བའི་ཕྱོགས་ལ་མ་སོང་བར། མ་འཁྲུལ་བ་དེ་བཞིན་ཁོ་ནར་རྟོགས་པས། ཏ་ཐཱ་ག་ཏ་ནི་དེ་བཞིན་རྟོགས་པའོ། །དེ་ཡང་ཐོག་མ་མེད་པའི་དུས་ནས། ཀུན་གཞི་སེམས་ཏེ། སྐྱེ་བ་གཅིག་ནས་གཅིག་ཏུ་རིམ་བཞིན་འོངས་པས། ནམ་ཡང་མི་སྡོད་པར་འགྲོ་བའི་རང་བཞིན་ཅན་གྱི་ཕྱིར། ལྷ་ལ་སོགས་པའི་འགྲོ་བ་ཐམས་ཅད་ཀྱི་དབང་པོ་དྲུག་པོ་དག་ནི། གཟུགས་སོགས་ཡུལ་རྣམ་དག་ནི་ཐམས་ཅད་ཀྱི་བདེ་བའི་ཡུལ་ལ་མྱང་བ་ཡོད་པས་ན། བདེ་བ་མྱོང་ཞིང་རྟོགས་པའི་ཕྱིར། འགྲོ་བ་སེམས་ཅན་ཀུན་གྱི་དབང་ཡུལ་ཕྲད་པའི་བདེ་བ་འགྱུར་བཅས་དེ་ལ། དེ་བཞིན་གཤེགས་པ་ཞེས་དཔེའི་སྒོ་ནས་བསྟན་ལ། འདིར་དངོས་སུ་ཞེས་པ་འཇིག་རྟེན་པ་རྣམས་ལ་མངོན་སུམ་དུ་གྲུབ་པའི་དོན་ཡིན་པས། འགྲོ་བ་རྣམས་ཀྱི་དབང་ཤེས་ཡུལ་རྣམས་ལ། དངོས་སུ་
འགྲོ་ཞིང་རྟོགས་པ་ཇི་བཞིན་དུ་འགྲོ་བར་འགྱུར་བ་ཐམས་ཅད་ཀྱི་དངོས་པོ་སྟེ། གནས་ཚུལ་ལ་ཡེ་ཤེས་ཀྱི་སྐུ་ལུས་ཅན་ཐུགས་རང་རིག་དེ་ཡིས་དེ་བཞིན་དུ། བདེ་བ་ཆེན་པོ་དེ་ཉིད་ཀྱི་རང་བཞིན་དུ་ནི་སླར་ཡང་རྟོགས་ཤིང་འགྲོ་བ་སྟེ། སླར་ཡང་ཞེས་པའི་དོན། གདོད་ནས་གནས་ཚུལ་བདེ་བ་ཆེན་པོ་ཡིན་པ་ལ། རྟོགས་ཚུལ་ཡང་དེ་དང་མཐུན་པར་བྱུང་བའི་ཕྱིར་གནས་ཚུལ་དང་རྟོགས་ཚུལ་མཐུན་པ་ནི་སླར་ཡང་ཟློས་པ་དང་འདྲའོ། །དེ་ཉིད་དུ་ནི་ཞེས་པའི་ཆོས་ཉིད་དེའི་མཚན་ཉིད་སྟོན་པ་ནི། དེ་བཞིན་གཤེགས་པའི་རང་བཞིན་ཅན་ཞེས་པ་འགྲོ་བ་རྣམས་ཀྱི་ཆོས་དབྱིངས་དེ་བཞིན་གཤེགས་པའི་རང་བཞིན་ཁོ་ནའོ་ཞེས་པའི་དོན་ནོ། །དོན་ཚན་གསུམ་པའི་དབང་དུ་བྱས་ནས། དེ་དག་ཉིད་ནི་སོགས་ཏེ། སེམས་ཅན་ཐམས་ཅད་ཀྱི་གནས་ལུགས་དེ་དག་ཉིད་ནི། དེ་ལྟར་ཀུན་ཏུ་ཁྱབ་པ་དང༌། བདེ་བ་ཆེན་པོ་ཡིན་ལ། དེ་ཉིད་གོང་དུ་བསྟན་པ་ལྟར་གསང་བ་གསུང་དབྱེར་མེད་པའི་བདག་ཉིད་དུ་བཞུགས་པ་ལས། སྙིང་སྟོབས་ནི་བདེ་བ་དག་པའི་སྐུ་དང༌། རྡུལ་ནི་སྡུག་བསྔལ་དག་པའི་གསུང་དང༌། མུན་པ་ནི་དེ་བཞིན་དུ་རྨོངས་པ་སྟེ། གཏི་མུག་དག་པའི་ཐུགས་སོ། །དེ་ལ་སྙིང་སྟོབས་རྡུལ་མུན་གསུམ་ནི། བདེ་སྡུག་རྨོངས་གསུམ་འཆར་བའི་གཞི་རྣམ་པར་རིག་པ་ཙམ་གཞན་དབང་གི་མཚན་ཉིད་ཅན་ཡིན་ལ། དེ་ལ་གཉིས་སྣང་དུ་འཁྲུལ་པའི་ཀུན་ཏུ་བཏགས་བྱ་ཡུལ་གྱི་ཆ་དང༌། འདོགས་བྱེད་ཡུལ་ཅན་རྣམ་རྟོག་གི་ཆ་ནི་ཀུན་བཏགས་ཏེ་
དེ་ཡང་འཁོར་བར་འཁྲྀད་བྱེད་ཀྱི་སྒོ་ནས་བདེ་སྡུག་རྨོངས་གསུམ་དུ་དབྱེའོ། །དེ་དག་གིས་གདོད་ནས་གོས་མ་མྱོང་བའི་ཡོངས་གྲུབ་ནི། སྐུ་གསུང་ཐུགས་གསུམ་མོ། །དེ་ལྟར་སྐུ་གསུང་ཐུགས་གསུམ་མཉམ་པ་ཉིད་ཀྱི་སྐུ་ནི་ངོ་བོ་ཉིད་ཀྱི་སྐུའོ། །དོན་ཚན་བཞི་པའི་དབང་དུ་བྱས་ནས། སྐུ་གསུང་ཐུགས་དོན་དམ་པ་དེ་རྣམས། རྡོ་རྗེ་ཡང་ཡིན་ལ་གནས་ལུགས་དེ་ཁོ་ན་ཉིད་ཀྱང་ཡིན་ནོ། །དེ་ལ་གསང་གསུམ་མཉམ་པ་ཉིད་ཀྱི་ཡེ་ཤེས་དོན་དམ་བྱང་ཆུབ་ཀྱི་སེམས་རིན་པོ་ཆེ་དེ་ནི། རྡོ་རྗེ་ཞེས་བྱ་བའི་སྒྲར་བརྗོད་དེ། རྐྱེན་གྱིས་མི་ཕྱེད་ཅིང་གཞིག་ཏུ་མེད་པའི་ཕྱིར་རོ། །དེ་ནི་མི་ཕྱེད་པར་གྲགས་པ་ཡིན་ཏེ། ངོ་བོ་རང་བྱུང་ལྷུན་གྲུབ་ཡིན་པས། རྒྱུ་རྐྱེན་གྱིས་མ་བསྐྱེད་པའི་ཕྱིར་སྐྱེ་བ་མེད་ལ། རྟག་པའི་རང་བཞིན་གྱི་ཕྱིར་ཟད་པའམ་འཇིག་པ་མེད་པའོ། །ཉོན་མོངས་པ་སྒྲིབ་པའི་དྲ་བས་བཅིངས་པའི་ཕྱིར། དབང་པོ་ཡུལ་དང་བཅས་པ་རྣམས་དང༌། སངས་རྒྱས་ཏེ་ཕུང་སོགས་ནི་འཇིག་ལ། ཉོན་མོངས་པའི་སྦྱོར་བ་ཐམས་ཅད་བྲལ་བའི་ཕྱིར། དོན་དམ་བྱང་ཆུབ་ཀྱི་སེམས་རྡོ་རྗེ་སེམས་དཔའ་ནི་ནམ་དུ་ཡང་འཇིག་པ་ཡོད་པ་མ་ཡིན་ནོ། །འདིར་མི་འཇིག་པ་ནི་གདོད་ནས་རྟག་པ་སྟེ། དོན་དམ་དཔྱོད་བྱེད་ཀྱི་རིག་ངོར་འཇིག་པ་མ་གྲུབ་པ་ལ་ནི་མི་བྱ་སྟེ། དེའི་ངོར་ནི་ཕུང་སོགས་ལ་ཡང་འཇིག་པ་མེད་པའི་ཕྱིར། ཕུང་སོགས་དང་རྡོ་རྗེ་སེམས་དཔའ་འཇིག་པ་ཡོད་མེད་དབྱེ་བ་མི་ཐུབ་པའི་ཕྱིར་རོ། །དེ་ལ་འཇིག་མི་འཇིག་གི་རྒྱུ་མཚན་དུ་ཉོན་མོངས་ཡོད་མེད་བཀོད་པ་ནི། གློ་བུར་བ་ཡིན་ན་
མི་རྟག་པས་ཁྱབ་པ་དང༌། གདོད་མ་ལ་རྟག་པས་ཁྱབ་པ་ལ་ཐུག་གོ །གང་འཇིག་པ་མེད་པ་དེ་ནི་སྐྱེ་བ་མེད་པ་ཉིད་ཡིན་ལ། དེ་ནི་ཀུན་རྫོབ་ཕྱོགས་ཆས་བསྡུས་པའི་ཆོས་གང་ན་ཡང་གནས་པ་མ་ཡིན་ཅིང༌། དུས་གང་དུ་ཡང་བྱུང་བ་མ་ཡིན་མོད་ཀྱི། རྟག་ཏུ་འགྱུར་བ་མེད་པའི་བཞུགས་པའི་ཕྱིར། ཅི་ཡང་མེད་པ་དང་བདེན་པར་མེད་པའང་མིན་ནོ། དེས་ན་དེ་ནི་ཐམས་ཅད་ཀྱི་ཐམས་ཅད་དུ་སྐྱེ་འཇིག་གནས་གསུམ་གཏན་ནས་ཀྱང་མེད་ལ། ཐམས་ཅད་ཀྱི་ཐམས་ཅད་དུ་སྐྱེ་འཇིག་གནས་གསུམ་ལ་ཀུན་ཏུ་འགྲོ་བ་ཡང་ཡིན་ནོ། །དོན་ཚན་ལྔ་པའི་དབང་དུ་བྱས་ནས། དེའི་བཙུན་མོ་སོགས་ཏེ་རྡོ་རྗེ་དེའི་རང་བཞིན་གྱི་བཙུན་མོ་ནི་ཤེས་རབ་རྣམ་པ་ཐམས་ཅད་པ་ཡོན་ཏན་ཀུན་གྱི་གནས་སོ། །དེ་ཉིད་དོན་དམ་ལྷ་མོའི་ཚུལ་གྱིས་བཞུགས་པའི་ཕྱིར། དེ་དང་རང་བཞིན་མཚུངས་པའི་རྟེན་འབྲེལ་ལས། ཀུན་རྫོབ་ལས་ཀྱི་སྣང་བ་ལ་ཡང་ལྷ་མོ་ཀླུ་མོ་མི་མོ་གནོད་སྦྱིན་མོ་སོགས་སྲིད་པ་གསུམ་གྱི་བུ་མོའི་རྣམ་པར་སྣང་བར་འགྱུར་རོ། །དེ་བས་ན་ཡེ་ཤེས་དོན་དམ་པའི་ལྷ་མོ་རྣམས་ནི། བུད་མེད་ཀྱི་འགྲོ་བ་རྣམས་ཀྱི་ཆོས་ཉིད་དུ་བཞུགས་པ་ཡིན་པས། དེ་རྣམས་ཀྱང་རྡོ་རྗེ་བཙུན་མོའི་དཔེར་བསྟན་པ་ཡིན་ནོ། །ཅིའི་ཕྱིར་བཙུན་མོ་ཞེས་བྱ་ན། ཤེས་རབ་དེ་ཉིད་རྟོགས་པ་དང༌། སངས་རྒྱས་ཐམས་ཅད་བསྐྱེད་པ་དང༌། ཤེས་རབ་དེའི་མཐུ་ལས་སེམས་ཅན་ཀུན་གྱི་དགེ་བ་འབྱུང་བ་ཡིན་ལ། སེམས་ཅན་བསམ་པ་སོ་སོའི་བྱེ་བྲག་གིས།
ཁམས་དང་རིགས་སད་བྱེད་ཀྱི་རྐྱེན་སྣ་ཚོགས་གསལ་བར་ཡང་དག་པར་བསྟེན་པས་ན་བཙུན་མོའོ། །དེ་ཡང་འཁོར་འདས་ཀྱི་དགེ་བ་ཐམས་ཅད་ཆོས་ཉིད་དགེ་བའི་མདངས་སམ་ཁ་བུན་ཡིན་པས། དེ་ལྟར་བཤད་ལ། དཔེ་ལས་ཀྱི་ཕྱག་རྒྱའི་བདེ་བས་ཀྱང་སངས་རྒྱས་ཀྱི་ཡེ་ཤེས་ངོ་སྤྲོད་པ་དང། འགྲོ་བ་རྣམས་ཀྱི་དགའ་བའི་རྒྱུ་དང༌། སེམས་ཅན་སོ་སོའི་བསམ་པ་དང་འབྲེལ་བ་སྟེ། ཇི་ལྟར་ལས་མཐུན་མཐུན་དུ་འགྲོ་བ་མཐའ་དག་གི་གཟུགས་འབྱུང་བའི་ཕྱིར་དེ་དང་རྣམ་པ་མཐུན་པར་ཡང་བསྟན་ཏོ། །ཤེས་རབ་དེ་ཉིད་བརྟན་པ་དང་གཡོ་བ་ཐམས་ཅད་ཀྱི་རང་བཞིན་དུ་གནས་ལ། སའི་དྭངས་མ་རྡོ་རྗེ་བཙུན་མོ་སངས་རྒྱས་སྤྱན་མ། ཆུའི་དྭངས་མ་རྡོ་རྗེ་བཙུན་མོ་མཱ་མ་ཀཱི། མེའི་དྭངས་མ་རྡོ་རྗེ་བཙུན་མོ་གོས་དཀར་མོ། རླུང་གི་དྭངས་མ་རྡོ་རྗེ་བཙུན་མོ་སྒྲོལ་མ་རྣམས། ཆོས་ཉིད་ཡེ་ཤེས་ཀྱི་ལྷ་མོ་བཞི་སྟེ། བརྟན་པ་འབྱུང་བ་བཞི་པོ་ཐམས་ཅད་ལ་ཁྱབ་པ། བཅུད་འགྲོ་བའི་ལུས་སེམས་ཀུན་ལའང་ཁྱབ་ཅིང་གནས་པ་ཡིན་མོད་ཀྱི། ཀུན་རྫོབ་དང་དོན་དམ་པའི་ལུས་རྩ་འཁོར་ལོ་བཞིའི་ལྟེ་བར། བཅིངས་གྲོལ་གྱི་བྱེད་པོའི་ཚུལ་དུ་བཞུགས་སོ་ཞེས་རྣམ་གཞག་བྱའོ། དེ་ནི་རྒྱ་སྐད་དུ་ཡོ་ཥཏ་ཞེས་བྱ་བ། འཛིན་ཅིང་སྤེལ་བ་སྟེ་འཇིག་རྟེན་དུ་བུད་མེད་ནི་མངལ་འཛིན་ཅིང་རིགས་དང་ལོངས་སྤྱོད་སྤེལ་བར་བྱེད་པའི་དོན་ཡིན་པ་ལྟར། འདིར་ཤེས་བྱ་ཐམས་ཅད་ཀྱི་རྣམ་པ་འཛིན་ཅིང༌། གང་ལ་དམིགས་ན་དགེ་ཆོས་མཐའ་དག་འཕེལ་བར་
བྱེད་པའི་ཕྱིར། འབྱུང་བཞིའི་དྭངས་མ་ཆོས་ཉིད་དེ་དག་ལ་རྡོ་རྗེ་བཙུན་མོར་བརྗོད་དོ། །སྟོང་པ་དེ་དང་གཉིས་སུ་མེད་པའི་རང་ཉིད་བདེ་ཆེན་འོད་གསལ་གྱི་རྡོ་རྗེ་དེ་ཡང་འཛིན་ཅིང་སྤེལ་བར་བྱེད་པ་སྟེ། ཤེས་རབ་རྣམ་པ་ཀུན་ལྡན་དེ་ཡང་ཐབས་བདེ་བ་ཆེན་པོས་རྒྱས་བཏབ་ཏུ་བསྟན་པའི་ཕྱིར། རྡོ་རྗེ་བཙུན་མོར་བརྗོད་དོ། །རྡོ་རྗེ་ནི་བཛྲ་ཞེས་པ་བ་ཧུ་རཱ་ཛ་སྟེ་ཞེས་ཡི་གེ་བསྣན་པའི་ངེས་ཚིག་གིས། མང་པོ་གསལ་བར་བྱེད་པ་ཞེས་པ་ཡིན་པས་ན། རྣམ་པ་མང་པོ་འཛིན་ཅིང་ཡོན་ཏན་གསལ་བར་བྱེད་པའོ། །རྡོ་རྗེ་སྟོང་ཉིད་འདོད་པ་ནི་སྙིང་རྗེ་ཆེན་པོའམ་བདེ་བའི་ངོ་བོ་ཡིན་པས། རྣམ་པ་ཀུན་ལྡན་དང་བདེ་ཆེན་དེ་དག་གཉིས་ཀ་ཡང༌། རྡོ་རྗེ་བཙུན་མོའི་དོན་དུ་གནས་སོ། །དེ་ཡང་སྟོང་པ་རྣམ་ཀུན་མཆོག་ལྡན་ཤེས་རབ་ཏུ་འཇོག་པའི་ཚེ། བདེ་སྟོན་ཐབས་སུ་འགྱུར་རོ། །བདེ་སྟོང་གཉིས་སུ་མེད་པའི་ཡེ་ཤེས་ཤེས་རབ་ཏུ་འཇོག་པའི་ཚེ། སྐུ་རྣམ་པ་ཀུན་ལྡན་ཐབས་སུ་འགྱུར་རོ། །དེའི་ཕྱིར་དེ་གཉིས་ཀར་ཡང་འཇོག་ཚུལ་སོ་སོ་ལ་བལྟས་ནས། རྡོ་རྗེ་བཙུན་མོ་སྟེ་ཤེས་རབ་ཀྱི་ཕྱོགས་སུ་བསྟན་ཏོ། །དོན་ཚན་དྲུག་པའི་དབང་དུ་བྱས་ནས། དེའི་བྷ་ག་སོགས་ཏེ། རྡོ་རྗེ་བཙུན་མོ་དེའི་བྷ་ག་ཞེས་གསུངས་པ། ཡི་གེ་ཨེའི་ཆ་བྱད་གྲུ་གསུམ་གྱི་བརྡས་བསྟན་པ། དཔེ་ནི་ཤེས་རབ་མའི་པདྨ་འམ། རྩ་འཁོར་བཞིའི་ལྟེ་བ་ཁོང་སྟོང་གྲུ་གསུམ་རྣམས་ཡིན་ལ། དོན་ནི་བདེ་བ་ཡེ་ཤེས་ལྔའི་རྒྱས་བཏབ་ཅན། རྒྱལ་བ་རིགས་ལྔའི་རང་བཞིན་ནོ། །ཤེས་རབ་བདེ་
སྟོང་གི་བྷ་ག་ཡིན་ཏེ། བྷ་གའི་དབུས་ཀྱི་རྩ་ལྔ་དང་དཔེ་དོན་དུ་སྦྱོར་ལ། སངས་རྒྱས་དག་གི་གདན་ནམ་གནས་བཞི་སྟེ། འཁོར་ལོ་བཞི་རྣམ་པར་དག་པ་ལས། སྐུ་གསུང་ཐུགས་དང་ཡེ་ཤེས་ཀྱི་བདེ་ཆེན་བཞི་ནི། ཤེས་རབ་རྣམ་པ་ཀུན་ལྡན་སངས་རྒྱས་སྤྱན་མ་ལ་སོགས་པ་བཞིའི་བྷ་ག་ཡིན་པར་རིམ་བཞིན་བཤད་དེ། བྷ་གའི་དབྱིབས་གྲུ་གསུམ་པ་ཟུར་བཞི་པས་མཚོན་པའི་དོན་ནོ། །དོན་ཚན་བདུན་པའི་དབང་དུ་བྱས་ནས། མཚན་བཟང་པོ་སུམ་ཅུ་རྩ་གཉིས་དང༌། དཔེ་བྱད་བཟང་པོ་བརྒྱད་ཅུ་སོགས། སྐུ་ལུས་ཀྱི་ཡོན་ཏན་ཐམས་ཅད་དང་ལྡན་པའི་རྡོ་རྗེ་སེམས་དཔའ་ནི་ཐུགས་རྒྱུད་བདེ་བ་ཆེན་པོས་སྤ་བ་སྟེ་བརྒྱན་པར་བྱས་པའོ། །འདིས་ནི་མཚན་དཔེ་ཅན་གྱི་སྐུ་རྟེན་དང༌། ཐུགས་རྒྱུད་བདེ་བ་ཆེན་པོ་བརྟེན་པར་བཞག་གོ །འཁོར་བའི་ཕ་རོལ་གྱི་མཐའ་དོན་དམ་དབྱིངས་ཀྱི་མྱ་ངན་ལས་འདས་པའི་ངོ་བོར་གནས་པ། རང་གི་ངོ་བོ་དབྱེར་མེད་པའི་འབྱོར་པ། ཆོས་ཉིད་རང་གི་རང་བཞིན་དུ་སྐྱེས་པའི་ཡོན་ཏན་གྱི་ཚོགས་མཐའ་ཡས་པས་ཉེ་བར་བརྒྱན་པ་སྟེ། ཤེས་བྱ་ཐམས་ཅད་དང་རྣམ་པ་མཚུངས་པར་སྤྱོད་ཅིང༌། ཀུན་རྫོབ་ཏུ་ཡང་ལྟ་བའི་དྲ་བ་མཐའ་དག་གིས་བཅིངས་པ་ལས་འགྲོལ་བ་སྟེ་དག་པ་གཉིས་ལྡན་དུ་གྱུར་པ། ཤེས་བྱ་ཐམས་ཅད་ཀྱི་ཁྱབ་བདག་གམ། གཙོ་བོའམ། བྱེད་པོར་གནས་པ་ནི། རྣམ་པ་ཀུན་ལྡན་གྱི་ཡེ་ཤེས་ཏེ། དེ་ཉིད་ཤེས་བྱ་ཐམས་ཅད་ཀྱི་རྣམ་པ་འཛིན་པ་ལས། བྱེད་པོར་འཇོག་སྟེ། དོན་དམ་ལ་རྣམ་པ་དེ་དང་དེ་མེད་ན་ཀུན་རྫོབ་
ལ་ཡང་སྟེ་དེ་མི་འབྱུང་བའི་ཕྱིར་རོ། །དེ་བས་ན། བི་དྷི་སྟེ། ཚངས་པ་དང༌། འཕྲོག་པོ་སྟེ་ཁྱབ་འཇུག་དང༌། འབྱིན་པ་པོ་སྟེ་དབང་ཕྱུག་དང༌། འཛིན་པ་པོ་སྟེ་སྲིད་པ་གསུམ་གྱི་རྣམ་པ་འཛིན་པའི་སྐྱེས་བུ་དྲང་སྲོང་ཆེན་པོ་ཉི་མའི་མདོག་དང༌། ཡིད་ཆགས་པ་འགྲོ་བ་སྟེ། འདོད་ཁམས་གནས་པ་ཐམས་ཅད་དགའ་བ་བསྐྱེད་པ་འདོད་པའི་ལྷ་བདུད་དོ། །ཚིག་འདི་གཉིས་ལ་འབྲོག་འགྱུར་ལས། ཡིད་ཀྱི་འགྲོ་བ་འབྱིན་བྱེད་དང༌། །བི་དྷི་བྱེད་པོ་ཁམས་ཉིད་དོ། །ཞེས་བསྒྱུར་ཏེ། ཚིག་དོན་འཆད་ཚུལ་མི་འདྲ་བ་ཆེར་འབྱུང་བར་སྣང་མོད། འོན་ཀྱང་གཙོ་བོའི་དོན། འཁོར་འདས་ཀྱི་བྱེད་པ་པོར་འཆད་པ་ལ་ཁྱད་པར་མེད་དོ། །གནས་ལུགས་ཟུང་འཇུག་དེ་ནི་ཐམས་ཅད་བསྐྱེད་པར་བྱེད་པས་ཚངས་པ། རྣམ་རྟོག་དང་ཉོན་མོངས་པ་འཇོམས་པའི་ཕྱིར་འཕྲོག་པ་པོ། ཡོན་ཏན་དུ་མ་བསྐྱེད་པའི་ཕྱིར་འབྱིན་པ་པོ། རྣམ་འགྱུར་གཟུགས་བརྙན་མཐའ་ཡས་པ་འཛིན་པའི་ཕྱིར་འཛིན་པ་པོ། བདེ་བ་བསྐྱེད་པའི་ཕྱིར་ཡིད་འགྲོ་བ་སྟེ། མདོར་ན་དོན་གྱི་རྣམ་པ་ཕྱོགས་མཚུངས་པར་གནས་པ་ལ། ཕྱི་རོལ་གྱི་གྲུབ་མཐའ་ཐ་དད་པ་རྣམས་ཀྱིས་གཞན་དང་གཞན་དུ་བཏགས་པའོ། །འབྲོག་འགྱུར་ལྟར་ན། རྣམ་པ་ཐམས་ཅད་པ་དེ་ནི། སྲིད་པ་གསུམ་གྱི་འགྲོ་བ་འབྱིན་པར་བྱེད་པ་ཡིན་མོད་ཀྱི། ཡིད་སེམས་ཙམ་གྱི་རང་བཞིན་ལས་སྣང་བ་དང༌། བི་དྷི་བྱེད་པོ་ནི་ཆོ་ག་བྱེད་པོ་སྟེ། སྔགས་རྒྱུད་དང་ལམ་གྱི་རྣལ་འབྱོར་ཐམས་ཅད་
དེ་ལས་བྱུང་བའོ། ཁམས་ནི་དབྱིངས་ཏེ་ཤེས་བྱ་ཐམས་ཅད་ཀྱི་བཅུད་དུ་གནས་པ་ཡིན་ནོ། །ཞེས་པའི་དོན་དུ་འཆད་དགོས་ལ། འདིར་བི་དྷི་ཞེས་པ་ཚངས་པའི་མིང་གི་རྣམ་གྲངས་ཡིན་ཅིང༌། འབྲོག་མི་ལས་གཞན་པའི་ལོ་ཙ་བ་ཐམས་ཅད་སྐབས་འདིར་ཚངས་པ་ལ་འཆད་པར་མཐུན་ཡང༌། བསྐོ་བཤམ་དུ་བསྒྱུར་བ་ནི། ལས་སོ་སོ་ལ་བསྐོ་བ་པོ་དང༌། བཀོད་བཤམས་བྱེད་པ་པོ་ཞེས་བླ་མ་རྣམས་གསུངས་ལ། དཔེ་རྙིང་མང་པོར་ཀོ་ཤམ་ཞེས་པ་སྣང་བས་བརྡ་རྙིང་ཡིན་ནམ། ཇི་ལྟར་ཞེས་བརྟག་དགོས་ལ། འོན་ཀྱང་བོད་སྐད་ལ་དེའི་སྒྲ་བཤད་པར་དཀའོ། །ཡིད་འགྲོ་བའི་ཞེས་ཚིག་ལྷག་མ་ཅན་དུ་ཡོད་པ་ནི། ཁྱབ་བདག་སྟེ་ཞེས་པ་ལ་བསྙེགས་པར་འདོད་དེ། ཡིད་ཀྱི་འགྲོ་བའི་ཁྱབ་བདག་གོ་ཞེས་པའི་དོན་ནོ། །དེ་ལྟར་སྟོང་ཉིད་འདི་ནི་བྷ་ག་ཉིད་དེ། རྟག་ཏུ་གནས་པའི་བདེ་ཆེན་ཡིན་ལ། གནས་དེ་ན་སྟོང་ཉིད་འདི་ནི་རྟག་ཏུ་བཞུགས་པ་སྟེ། འདིས་ནི་བདེ་སྟོང་རྟེན་དང་སྐུ་བརྟེན་པར་བསྟན་ནོ། །འདི་ཡན་ཆད་ཀྱི་གླེང་གཞི་ཡི་གེ་སོ་བདུན་གྱི་དོན་རྒྱས་བཤད་ཀྱི་ཚུལ་བསྟན་ཟིན་ཏོ། །གསུམ་པ་དོན་བསྡུ་ལ། རྗོད་བྱེད་ཚིག་གི་སྙིང་པོ་དང༌། བརྗོད་བྱ་དོན་གྱི་སྙིང་པོའོ། །དང་པོ་ནི་བཞུགས་པ་ཞེས་པའི་ཚིག་ལས་འཕྲོས་ནས། སྔར་རྒྱས་པར་བཤད་པའི་དོན་གྱི་སྙིང་པོ་མདོར་བསྡུས་པས་བསྟན་པ་སྟེ། བཞུགས་པ་ཞེས་པའི་ཚིག་ནི། འདིར་ནམ་མཁའི་ཁམས་ལ་ཡོངས་སུ་བརྗོད། བཅོམ་ལྡན་འདས་ཀྱི་ཚིག་གིས་ཀྱང༌།
བྱང་ཆུབ་སེམས་ལ་ཡོངས་བརྗོད་དེ། །ལུས་ཀྱི་དཀྱིལ་འཁོར་ཞེས་གསུངས་པ། །བྷ་གའི་དཀྱིལ་འཁོར་གནས་པ་དང༌། །བྱང་ཆུབ་སེམས་ཀྱི་དཀྱིལ་འཁོར་ཏེ། །གསུམ་པོ་འདི་དག་དབྱེ་བ་མེད། །འདི་སྐད་ལ་སོགས་ངག་གིས་ནི། །རང་གི་ངོ་བོར་རབ་ཏུ་བསྟན། །འགྲོ་ཀུན་རྣམ་པ་གསུམ་དང་འབྲེལ། །སངས་རྒྱས་ཆོས་དང་དགེ་འདུན་ཏེ། །སྐུ་གསུང་ཐུགས་ཀྱི་ངོ་བོ་ཡིས། །དེ་དག་དཀོན་མཆོག་དམ་པ་གསུམ། །དེ་ལས་རིན་ཆེན་ལྔ་ཉིད་དེ། །རིན་ཆེན་ལྔ་ཡི་རང་བཞིན་ལུས། །སངས་རྒྱས་ཀུན་གྱི་གནས་ཞེས་བརྗོད། །སྐུ་གསུང་ཐུགས་ཀྱི་དཀོན་མཆོག་རྣམས། །འདི་སྐད་ཞེས་བྱ་སོགས་པར་བཤད། །ཅེས་པ་སྟེ། བཞུགས་པ་ཞེས་བྱ་བའི་ཚིག་གིས་ནི། ཀུན་རྫོབ་ཏུ་རྩའི་ནང་གི་ནམ་མཁའི་ཁམས་དང་དོན་དམ་སྟོང་ཉིད་ནམ་མཁའི་ཁམས་ལ་བརྗོད་ཅིང༌། དེར་བཞུགས་མཁན་བཅོམ་ལྡན་འདས་ཞེས་པ། དོན་དམ་བྱང་ཆུབ་ཀྱི་སེམས་བདེ་བ་ཆེན་པོ་ལ་ཡོངས་སུ་བརྗོད་དེ། ནམ་མཁའི་ཁམས་དེ་ཡང་དཀྱིལ་འཁོར་གསུམ་དུ་འགྱུར་བས། ཀུན་རྫོབ་ཏུ་ཕྱི་ལུས་དང་ནང་རྩ་འཁོར་དང་བཅས་པའི་དཀྱིལ་འཁོར་དང༌། རྩ་འཁོར་གྱི་ལྟེ་བ་དང༌། རྩ་སོ་གཉིས་ཀྱི་སྒོ་སོགས་ཡི་གེར་བཅས་པ། བྷ་གའི་དཀྱིལ་འཁོར་གྱི་ངོ་བོར་གནས་པ་དང༌། བྱང་ཆུབ་ཀྱི་སེམས་ཐིག་ལེ་རླུང་དང་བཅས་པའི་དཀྱིལ་འཁོར་དུ་ཡང༌། དཀྱིལ་འཁོར་གསུམ་པོ་འདི་དག་བྱ་བྱེད་འགྲོ་ལྡོག་གཅིག་
པའི་ཕྱིར་དབྱེ་བ་མེད་དོ། །དོན་དམ་གྱི་དབང་དུ་བྱས་ན། ལུས་བྷ་ག་ཐིག་ལེ་གསུམ་གྱི་ཆོས་ཉིད་དང༌། སྐུ་གསུང་ཐུགས་ཀྱི་གསང་བའི་དཀྱིལ་འཁོར་རང་བཞིན་མཉམ་པ་ཉིད་དོ། །ནམ་མཁའི་ཁམས་དཀྱིལ་འཁོར་གསུམ་ཡིན་པ་བཞིན་དུ། བྱང་ཆུབ་ཀྱི་སེམས་ཀྱང་དཀྱིལ་འཁོར་གསུམ་མོ། འདི་སྐད་བདག་གིས་ཐོས་པ་ལ་སོགས་པའི་ངག་ཚིག་གིས། རང་གི་ངོ་བོ་དཀྱིལ་འཁོར་གསུམ་ཁོ་ནར་རབ་ཏུ་བསྟན་ཅིང༌། སྣོད་བཅུད་ཀྱིས་བསྡུས་པ་ཀུན་རྫོབ་དོན་དམ་གྱི་འགྲོ་བ་ཀུན་དཀྱིལ་འཁོར་གསུམ་དངོས་སམ། དེའི་སྣང་བ་ཁོ་ནར་གནས་པའི་ཕྱིར། དེ་གསུམ་དང་འབྲེལ་བ་ཁོ་ནའོ། །དེ་ཉིད་དོན་དམ་པའི་དཀོན་མཆོག་གསུམ་སྟེ། ལུས་རྩའི་དཀྱིལ་འཁོར་རྣམ་པར་དག་པ་སྐུ་སྣ་ཚོགས་སྤྲོ་བ་ནི་དགེ་འདུན་དཀོན་མཆོག་དང༌། ཡི་གེ་བྷ་གའི་དཀྱིལ་འཁོར་ཆོས་ཀྱི་སྒོ་སྣ་ཚོགས་སྤྲོ་བ་ནི་ཆོས་དཀོན་མཆོག་དང༌། བདུད་རྩི་བྱང་ཆུབ་སེམས་ཀྱི་དཀྱིལ་འཁོར་བདེ་བ་ཆེན་པོ་བྱང་ཆུབ་ཀྱི་སེམས་མི་འགྱུར་བས། ཤེས་བྱ་ཐམས་ཅད་མཁྱེན་པ་ནི་སངས་རྒྱས་དཀོན་མཆོག་སྟེ། ཐུགས་གསུང་སྐུའི་ངོ་བོ་སྟེ་དབྱེ་བས། དཀྱིལ་འཁོར་གསུམ་པོ་དེ་དག་དཀོན་མཆོག་དམ་པ་རྣམ་པ་གསུམ་མོ། །དེ་དག་གསུམ་པོ་རེ་རེ་ལས་རྣམ་པར་ཕྱེ་ན། ཆོས་ཀྱི་དབྱིངས་རྣམ་པར་དག་པ་ལ་སོགས་པ་ཡེ་ཤེས་ལྔའི་རིན་ཆེན་ལྔ་ཉིད་དེ། དེ་བས་ན་ཡེ་ཤེས་རིན་ཆེན་ལྔའི་རང་བཞིན་གྱི་ལུས་ཏེ་དཀྱིལ་འཁོར་གསུམ་པོ་ལ་ཁྱབ་པ་ནི་སངས་
རྒྱས་ཀུན་གྱི་གནས་ཞེས་བྱའོ། །དེ་བས་ན་སྐུ་དང་གསུང་ཐུགས་ཀྱི་རྡོ་རྗེ་མཉམ་པ་ཉིད་ཀྱི་རིན་ཆེན་ནམ་དཀོན་མཆོག་རྣམས་ཁོ་ན། འདི་སྐད་ལ་སོགས་པའི་ཚིག་གི་དོན་དུ་བཤད་པ་ཡིན་ནོ། །དེ་ལྟར་ན་གླེང་གཞིའི་དོན་བཤད་ཟིན་ཏོ། །གཉིས་པ་བརྗོད་བྱ་དོན་གྱི་སྙིང་པོ་ནི། །གསང་བའི་དེ་ཉིད་རབ་གསལ་བ། །དེ་ལྟར་མཆོག་ཏུ་མཁྱེན་ནས་ནི། །སངས་རྒྱས་བྱང་ཆུབ་སེམས་དཔའ་རྒྱལ། །སྐྲག་པ་དང་ནི་འཇིགས་པར་འགྱུར། །འདི་དེ་དཀོན་མཆོག་ཉམས་དགའ་གསུམ། །མི་ཕྱེད་པས་ནི་རྟག་ཏུ་གནས། །འདོད་དང་གཟུགས་དང་གཟུགས་མེད་དང༌། །སྣ་ཚོགས་ཁྱབ་སྟེ་རྣམ་པར་བཞུགས། །འདི་སྐད་ཅེས་སོགས་ངོ་བོའོ། །ངག་མཆོག་ཤིན་ཏུ་མཛེས་པ་ཡིན། །འཁོར་བའི་འཁོར་ལོ་བཟློག་བྱ་སྟེ། །མྱ་ངན་འདས་པའི་དབྱིངས་ལ་བརྟེན། །དེ་ལྟར་ན་དཔལ་གསང་བ་འདུས་པའི་རྒྱུད་དུ། སྐུ་གསུང་ཐུགས་ཀྱི་གསང་བའི་དེ་ཁོ་ན་ཉིད་འདི། སྟོན་པ་ཀུན་ཏུ་བཟང་པོས་འཁོར་རྣམས་ལ་རབ་ཏུ་གསལ་བར་བཤད་པ་ན། གོང་དུ་བཤད་པ་དེ་ལྟར་འཁོར་རྣམས་ཀྱིས་མཆོག་ངེས་པའི་དོན་དུ་མཁྱེན་ནས། སྔོན་ཆད་སྔགས་ཀྱི་ཐེག་པར་མ་ཞུགས་པའི་སངས་རྒྱས་ཏེ་ས་བཅུ་པ་པ་དབང་བསྐུར་ཐོབ་པ་རྣམས་དང༌། གཞན་བྱང་ཆུབ་སེམས་དཔའ་འཕགས་པ་རྣམས་ཀྱང༌། ངོ་མཚར་ཆེར་སྐྱེས་ནས། དྲན་མེད་དུ་བརྒྱལ་བ་དང༌། དོན་བློར་ཤོང་དཀའ་བས་སྐྲག་པ་དང་འཇིགས་པར་གྱུར་ཏོ། །ཞེས་པ་སྟེ། །
དེ་ཡང་དངོས་བསྟན་དེ་ཙམ་ནི། ངེས་དོན་གྱི་ཁྱད་པར་དང་ཆེ་བ་སྟོན་པའི་ཕྱིར། ཚུལ་སྟོན་ཙམ་ཡིན་ལ། སྒྲ་ཇི་བཞིན་པ་མ་ཡིན་པ་ནི། ཆེད་དུ་བྱ་བའི་གདུལ་བྱ་དབང་པོ་རྣོན་པོ་ནི་སངས་རྒྱས་དང༌། རྟུལ་པོ་ནི་བྱང་ཆུབ་སེམས་དཔའ་སྟེ། དེ་དག་དང་པོར་ཐེ་ཚོམ་དང་བཅས་པས་སྐྲག་པ་དང༌། བར་དུ་གསལ་སྣང་ཅུང་ཟད་ཐོབ་ཀྱང་མ་འདྲིས་པས་འཇིགས་པ་དང༌། མཐར་བརྒྱལ་བ་ལྟར་དམིགས་པ་མེད་པ་ལ་གནས་པར་གྱུར་ཏོ། །སྐྱེས་བུ་དམ་པ་འགའ་ཞིག་གི་ཞལ་ནས། ད་ལྟ་འོ་སྐོལ་རྒྱུད་མ་སྦྱངས་པ་རྣམས་སྟོང་ཉིད་ལ་སྐྲག་པ་མི་སྐྱེ་བ་ནི། རྒྱུད་ཐོག་ཏུ་བབས་པའི་གོ་བ་ཇི་བཞིན་མ་བྱུང་བས་ཡིན། རྒྱུད་ལ་ཇི་བཞིན་འབྱོར་ན་ལན་གཅིག་མི་སྐྲག་པ་མི་སྲིད་ཅེས་གསུངས་པ་ཡང༌། འདི་འདྲའི་རིགས་སོ། །འདི་ནི་དཔལ་གསང་བ་འདུས་པའི་ལེའུ་བཅུ་པ་ལས། དེ་ཉིད་སྔགས་སྙིང་ཀུན་བསྡུས་པ། །སྐུ་དང་གསུང་ཐུགས་གསང་བར་བསྒྲགས། །དངོས་གྲུབ་ཆེན་པོའི་ཚུལ་གྱི་མཆོག །ཡང་དག་བཅོམ་ལྡན་བཤད་དུ་གསོལ། །དེ་ནས་རྒྱལ་པོ་རྡོ་རྗེ་འཛིན། །ཉོན་མོངས་ཀུན་གྱི་རྒྱ་མཚོ་གཙོ། །འབར་བ་དྲག་པོ་སྤྱན་ཡངས་པས། །གསུང་ནི་འདི་སྐད་བཀའ་སྩལ་ཏོ། །ལུས་དང་ངག་དང་ཡིད་རྣམས་ནི། །རྣམ་པར་མི་རྟོག་མི་དམིགས་པ། སྐུ་གསུང་ཐུགས་ཀྱི་རྡོ་རྗེ་བསྒོམ། །ཞེས་དང༌། དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་རྡོ་རྗེའི་སྔགས་ཀྱི་གསང་བ། སྔགས་ཐམས་ཅད་ཀྱི་
སྙིང་པོ་ཀུན་ཏུ་བསྐུལ་བར་བྱེད་པ་ཞེས་བྱ་བ། རབ་ཏུ་གསང་བ། དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་ཀྱི་དམ་ཚིག་ལ་དམིགས་པ། རྡོ་རྗེ་འཛིན་པ་ཐམས་ཅད་ཀྱི་སྐུ་དང་གསུང་དང་ཐུགས་ཀྱི་དམ་ཚིག་ལ་དམིགས་པ། ཆོས་འཛིན་པ་ཐམས་ཅད་ཀྱི་སྐུ་དང་གསུང་དང་ཐུགས་ཀྱི་དམ་ཚིག་ལ་དམིགས་པ་འདི། ཉིད་ཀྱི་སྐུ་དང་གསུང་དང་ཐུགས་རྡོ་རྗེ་ལས་ཚིག་གི་ལམ་ངེས་པར་བརྗོད་པས། སྔགས་བསྡུས་པ། འདི་ལྟ་བུ་གསུངས་སོ། །ཨོཾ་ཨཱཿཧཱུཾ་སྭཱཧཱ། དེ་ནས་འདི་ནི་གསུངས་ཙམ་གྱིས། །སངས་རྒྱས་སྲས་དང་བཅས་པ་ཀུན། །རབ་ཏུ་འདར་ཞིང་བརྒྱལ་བར་འགྱུར། །རྡོ་རྗེ་སེམས་དཔའ་རྗེས་སུ་དྲན། །ཞེས་གསུངས་པའི་དོན་ཏེ། ཡི་གེ་གསུམ་གྱིས་གསང་བ་གསུམ་དང༌། ཡི་གེ་ལྔས་ཡེ་ཤེས་ལྔ་བསྟན་ཅིང༌། ཁྱད་གཞི་གསང་བ་གསུམ་ལ་ཁྱད་ཆོས་ཡི་གེ་ལྔ་ལྔས་རྒྱས་འདེབས་པའམ། ཡེ་ཤེས་ལྔ་ལ་གསང་བ་གསུམ་གསུམ་གྱིས་རྒྱས་བཏབ་ཀྱང་རུང་སྟེ། དེ་ཁོ་ན་ཉིད་དེ་ལུས་ངག་ཡིད་གསུམ་གྱི་གནས་ལུགས་ཡེ་ཤེས་ཡིན་པ་དང༌། གང་དུ་ཡང་མི་གནས་པའི་སྤྲོས་བྲལ་དང༌། མཉམ་པ་ཉིད་དེ་ནི་ཐམས་ཅད་ལ་ཁྱབ་པ་དང༌། སྐུ་གསུང་ཐུགས་རྡོ་རྗེའི་དཀྱིལ་འཁོར་དུ་གདོད་མ་ནས་ཡོད་པར་བསྟན་སྟེ། སྒོམ་པའི་སྐད་དོད་བྷཱ་བ་ནི་ཡོད་པའི་དོན་དང༌། ཡི་གེ་འབྲུ་གསུམ་ཡང་དོན་དེ་དག་གི་བརྡའ་ཡིན་ལ། ཡང་རྣམ་པ་
གཅིག་ཏུ་ན་ལེའུ་བཅུ་གཅིག་པ་ལས། རྡོ་རྗེ་གསུམ་ཡིག་སྔགས་ཀྱི་མཆོག །ཕྱག་རྒྱ་ཆེན་པོ་རྣམ་བསྒོམ་པ། །བྱང་ཆུབ་ཐམས་ཅད་ཐོབ་བྱའི་ཕྱིར། །ཡེ་ཤེས་རྡོ་རྗེ་ངག་གིས་བྱ། །ཨོཾ་ནི་ཡེ་ཤེས་སྙིང་པོ་སྟེ། །རྡོ་རྗེ་སྐུ་ནི་ཐོབ་བྱེད་པའོ། །ཨཿནི་བྱང་ཆུབ་བདག་མེད་པ། །རྡོ་རྗེ་གསུང་ནི་ཐོབ་བྱེད་པའོ། །ཧཱུཾ་ནི་སྐུ་གསུང་ཐུགས་ཡིན་ཏེ། །རྡོ་རྗེ་མི་ཕྱེད་གསུམ་ཐོབ་པའོ། །ཞེས་གསུངས་ཏེ། ཧཱུཾ་ནི་ཧ་ཨུ་མ་ཧ་ཡིག་ཐུར་སེལ་གྱི་རླུང་གིས་བསྐུལ་བ་ངག་དང༌། ཨུ་ཡིག་གཏུམ་མོ་འབར་བ་ཐུགས་དང༌། མ་ཡིག་ཐིག་ལེ་བཞུ་བར་བྱེད་པ་སྐུ་སྟེ། སྐུ་གསུང་ཐུགས་ཀྱི་ལམ་གསུམ་ཚོགས་པ་ཡིན་ཡང་གཙོ་བོར་ཐུགས་ཏེ་ཆོས་སྐུ་སྔགས་ཀྱི་རིམ་པའོ། །ཨཱཿནི་ཨ་ཨ་ཧ་གསུམ་སྟེ་སྙིང་ག་ཡན་ཆད་ཀྱི་མི་ཤིགས་པའི་ཨ་དང༌། ལྟེ་བའི་ཨ་འདྲེས་ཤིང༌། ཧ་ཡིག་ཐུར་སེལ་གྱི་གནས་གསང་གནས་སུ་བབས། བྱང་ཆུབ་ཞུ་བདེ་དང་སྟོང་པ་རོ་གཅིག་ཏུ་འདྲེས་པའི་ལོངས་སྐུ་ཡེ་ཤེས་ཀྱི་རིམ་པ་དང༌། ཨོཾ་ནི་ཨ་ཨུ་མ་སྟེ། ཨ་ཡིག་མི་ཤིགས་པ་ཞུ་བའི་ཐིག་ལེ་དང༌། ཨུ་ཡིག་གཏུམ་མོའི་མེ་དང༌། མ་ཡིག་ཁམས་དཀར་པོའི་བགྲོད་པ་རྣམས་འདྲེས་པ་མས་བརྟན་གྱི་ཚུལ་གྱིས། རྩའི་སྒོ་རྣམས་ཕྱེ་ནས་གང་བར་བྱེད་པ་ནི། ཡེ་ཤེས་ཀྱི་རང་བཞིན་རྡོ་རྗེའི་སྐུ་སྒྲུབ་པར་བྱེད་པ་སྤྲུལ་སྐུ་གསང་བའི་རིམ་པ་སྟེ། གནས་ལུགས་ཀྱི་གསང་བ་གསུམ་རྟོགས་པར་བྱེད་པའི་ཐབས་ནི་དེ་དག་གོ །སྐབས་འདིར་རྒྱུད་དོན་མཆོག་ཏུ་ཡངས་པ་
རྒྱ་ཆེར་སྤྲོ་བར་ནུས་མོད་ཀྱི། རེ་ཞིག་མི་སྨྲའོ། །ད་ནི་དཀྱུས་ཉིད་ལ་འཇུག་པར་བྱ་སྟེ། འདི་སྟེ་ཉམས་དགའ་བ་ལྷན་སྐྱེས་བདེ་བ་ཆེན་པོའི་རང་བཞིན་གྱི། དཀོན་མཆོག་གསུམ་པོ་ངོ་བོ་དབྱེར་མི་ཕྱེད་པར་གཅིག་པའི་ཚུལ་གྱིས། རང་གི་སེམས་ཉིད་ལ་རྟག་ཏུ་གནས་ཏེ། དེ་ནི་རང་གཅིག་པུར་མ་ཟད་འདོད་པའི་ཁམས་དང་གཟུགས་མེད་ཁམས་དང༌། འགྲོ་བ་དྲུག་གི་གནས་ལུས་ལོངས་སྤྱོད་སྣ་ཚོགས་ལ་ཁྱབ་སྟེ་རྣམ་པར་བཞུགས་པ་ནི། འདི་སྐད་ཅེས་སོགས་ཀྱི་དོན་གྱི་ངོ་བོའམ་སྙིང་པོ་ཡིན་ལ། ངག་ཚིག་མཆོག་དེ་ནི་ངེས་དོན་མཐར་ཐུག་སྟོན་པས་ཤིན་ཏུ་མཛེས་ཤིང་བཟང་བ་ཡིན་ནོ། །ཆོས་ཐམས་ཅད་ཀྱི་གནས་ལུགས་རང་སེམས་ཀྱི་རང་བཞིན་དེ་ནི། སྐུ་གསུང་ཐུགས་རྡོ་རྗེའི་སངས་རྒྱས་སུ་གདོད་མ་ནས་བཞུགས་པའི་ཕྱིར་འཁོར་བའི་འཁོར་ལོ་སྡུག་བསྔལ་དང་ཀུན་འབྱུང་བཟློག་པར་བྱ་ཞིང༌། ལམ་དང་འགོག་པའི་རིམ་པས། མྱ་ངན་ལས་འདས་པའི་དབྱིངས་རང་ལ་གནས་པ་དེ་ཉིད་བསྟེན་པར་བྱའོ། །ལེའུའི་མཚན་བསྟན་པ་ནི་གསང་བའི་དེ་ཁོ་ན་ཉིད་རབ་ཏུ་གསལ་བ་ལས། སྐུ་དང་གསུང་དང་ཐུགས་ཀྱི་མཚན་ཉིད། སྤྲུལ་པ་དང་ལོངས་སྤྱོད་དང་ཆོས་ཀྱི་རང་བཞིན། དཀོན་མཆོག་གསུམ་དུ་མཚོན་པ་སྔོན་དུ་འགྲོ་བ། འདི་སྐད་བདག་གིས་ཞེས་བྱ་བ་ལ་སོགས་པ་བཤད་པ་སྟེ་གཉིས་པའོ། །འདིར་གནས་ལུགས་ཀྱི་སྐུ་གསུང་ཐུགས་དང༌། ལམ་དང་འབྲས་བུའི་སྐུ་གསུམ་དང༌། འབྲས་བུ་དཀོན་མཆོག་གསུམ་པོ་
བརྗོད་བྱའི་སྙིང་པོར་ངེས་པ་རྙེད་ནས། འདི་སྐད་བདག་གིས་ཐོས་པ་ལ་སོགས་པ་གླེང་གཞིའྀ་ཚིག་དོན། འཆད་དགོས་པར་བསྟན་པ་ནི་ཕྱོགས་མཚོན་ཙམ་སྟེ། དེ་དག་ལ་ངེས་པ་རྙེད་པ་སྔོན་དུ་འགྲོ་བ་ནི་རྒྱུད་དོན་ཐམས་ཅད་ལ་ཡང་ངོ༌། །དཀོན་མཆོག་གསུམ་མཐར་ཐུག་གི་འབྲས་བུར་བྱེད་ཅིང༌། གསུམ་པོ་དེ་ཡང་གཅིག་ཁོ་ནར་འདུས་པ་དང༌། དེ་ཉིད་སེམས་ཅན་ཐམས་ཅད་ཀྱི་གནས་ལུགས་སུ་སྟོན་པ་དང༌། དེ་དང་རྣམ་པ་མཐུན་པའི་ལམ་གྱིས་གློ་བུར་གྱི་དྲི་མ་སྦྱོང་བ་སོགས། ཐེག་པ་ཆེན་པོ་མདོའི་ཚུལ་ལས་ཀྱང༌། ཕྱིར་མི་ལྡོག་པ་འཁོར་ལོའི་གཏམ་གྱི་ལམ་རིམ་འབྲས་བུ་དཀོན་མཆོག་གི་འཁོར་ལོར་གྲགས་པ་དང༌། གནད་གཅིག་པར་ཤེས་པར་བྱའོ། །ལེའུ་གཉིས་པའི་རྣམ་པར་བཤད་པའོ།། །།ད་ནི་ལེའུ་གསུམ་པ་དཔེ་དོན་གྱི་ཡེ་ཤེས་རྣམ་པར་དབྱེ་བ་བཤད་པ་ལ། རྗོད་བྱེད་གླེང་གཞིའི་ཚིག་དང་སྦྱར་བ་དང༌། བརྗོད་བྱ་དོན་གྱི་རབ་དབྱེ་བཤད་པའོ། །དང་པོ་ལ་གཉིས་ཀྱི་བཤད་པར་དམ་བཅའ་བ་ནི། དེ་ནས་ཡང་དག་བཤད་བྱ་བ། །ཀུན་རྫོབ་ཇི་བཞིན་དེ་བཞིན་དུའོ། །དེ་ལ་ཀུན་རྫོབ་ནི་དཔེའི་ཡེ་ཤེས་ཏེ། དེའི་མཚན་ཉིད་ཇི་ལྟ་བ་དེ་བཞིན་དུ་བཤད་པར་བྱའོ། །དོན་ཚན་གཉིས་པ་བཤད་པ་དངོས་ནི། ཡང་ནི་ཨེ་ཡིག་ཐིག་ལེ་སྟེ། །ཝཾ་ཞེས་བྱ་བ་སྒྲ་རུ་བརྗོད། །བདག་གིས་ཆགས་པའི་སེམས་ཀྱིས་ནི། །ཐོས་པ་བསྟེན་པ་ཞེས་བྱར་གསུངས། །གཅིག་ན་ཞེས་བྱ་མདོར་བསྟན་པ། །དེ་བཞིན་དུས་ནི་རྒྱས་བསྟན་ཏེ། །མདོར་བསྟན་
པ་ཡི་མཚན་ཉིད་དེ། །ཐབས་ཞེས་བྱ་བར་ཡོངས་སུ་བརྗོད། །རྒྱས་པར་བསྟན་པའི་མཚན་ཉིད་དེའང༌། །ཤེས་རབ་ཏུ་ཡང་ཡོངས་སུ་གྲགས། །མདོར་བསྟན་པ་དང་རྒྱས་བསྟན་པ། །དེར་ནི་གཉིས་སུའང་བརྗོད་པར་བྱ། །རྒྱས་བསྟན་གཙུབ་བྱ་གཙུབ་བྱེད་ནི། །མདོར་བསྟན་སོ་སོའི་གདན་ཡིན་ནོ། །བཅོམ་ལྡན་སེམས་ཀྱི་རྡོ་རྗེ་སྟེ། །བཞུགས་པའི་ཚིག་ནི་གནས་པའོ། །དེ་ཀུན་འབྱུང་བའི་ངོ་བོ་སྟེ། འབྱུང་བ་བཞི་པོ་རྣམས་ནི་ཡུམ། །སངས་རྒྱས་ཕུང་པོ་ལ་སོགས་ཀུན། །སྲས་བཅས་དབང་པོ་དང་ལྷན་ཅིག །སྐུ་གསུང་ཟླ་བ་ཉི་མ་སྟེ། །ཐུགས་རྡོ་རྗེ་ནི་དབྱེར་མེད་པས། །བསྟེན་པའི་ངོ་བོས་གནས་པ་སྟེ། །རྟེན་ནི་བུད་མེད་བྷ་གར་བརྗོད༌། །རྟེན་དང་བརྟེན་པའི་ངོ་བོ་ཡིས། །ཚིག་ནི་གཉིས་གཉིས་དག་གི་ཡང༌། ཕན་ཚུན་འབྲེལ་བ་དེ་དག་ནི། །བརྒྱུད་ནས་རིམ་པ་བཞིན་དུ་རྟོགས། །ཤེས་དང་ཤེས་བྱའི་རབ་དབྱེ་ལས། །དེ་དག་རང་བྱུང་ངོ་བོ་ཡིན། །ཞེས་པ་སྟེ་སྔར་གླེང་གཞིའི་ཡི་གེ་སོ་བདུན། དོན་དམ་གཙོ་ཆེ་བའི་དབང་དུ་བྱས་ཏེ། གཞི་ལམ་འབྲས་གསུམ་དང་སྦྱར་བ་ཤིན་ཏུ་རྒྱས་པར་བསྟན་ལ། འདིར་ནི་སྦས་པ་རྣམ་གསུམ་ལས། འདོད་ཆགས་ཆོས་སྦས་ཀྱི་ཚུལ། དཔེ་ལས་ཀྱི་ཕྱག་རྒྱའི་ཡེ་ཤེས་དང་སྦྱར་ཏེ་བཤད་ན། ཡང་ནི་ཞེས་པ། བཤད་པའི་རྣམ་གྲངས་གཞན་སྟོན་པའི་ཚིག་སྟེ། ཨེ་ཡིག་གིས་ནི་ཐབས་ཀྱི་གཞི་ལུས་སྤྱི་དང་ཁྱད་པར་རྩ་དབུ་མ་ལ་གནས་པའི་ཐིག་ལེའི་དྭངས་མ་དང༌།
ཝཾ་ཡིག་ཅེས་བྱ་བས། ཤེས་རབ་མའི་གཞི་ལུས་སྤྱི་དང༌། ཁྱད་པར་དབུ་མ་དང༌། ཡང་དགོས་པདྨའི་དབུས་སུ་གནས་པའི་རྩ་ཁ་ག་མུ་ཁ་ལ་ཉེ་བར་བསྟེན་པ། རྡུལ་གྱི་དྭངས་མ་རླུང་དང་བཅས་པ་སྒྲ་སྟེ། ནཱ་དའི་མཚན་ཉིད་དུ་གནས་པ་དེའོ། །བདག་གིས་ཞེས་པ་བདེ་བ་ཐོབ་པར་འདུན་པ་འདུ་ཤེས་གསུམ་ལྡན་གྱི་ཆགས་པའི་སེམས་སོ། །ཐོས་པ་ནི་ཐབས་དང་ཤེས་རབ་སྙོམས་པར་འཇུག་པས་བསྟེན་པ་དང༌། གཅིག་ན་ཞེས་བྱ་བ་མདོར་བསྟན་པ་དང༌། དེ་བཞིན་དུ་དུས་ཞེས་བྱ་བ་ནི་རྒྱས་པར་བསྟན་པ་སྟེ། མདོར་བསྟན་པའི་མཚན་ཉིད་ནི། ཐབས་ཀྱི་བདེ་བར་ཡོངས་སུ་བརྗོད་ལ། རྒྱས་པར་བསྟན་པ་ནི། ཤེས་རབ་ཀྱི་བདེ་བར་ཡོངས་སུ་གྲགས་སོ། །དེ་བས་ན་གཅིག་ན་ཞེས་པ་ཐབས་ཀྱི་བདེ་བ་དང༌། དུས་ཞེས་པ་ཤེས་རབ་ཀྱི་བདེ་བ་ཡིན་ལ། མདོར་བསྟན་ནི་མི་གསལ་བ་ལྔ་རྒྱས་བཤད་ནི་གསལ་བའི་དོན་ནོ། །ཡང་རྣམ་གྲངས་གཞན་གྱིས་བསྟན་ན། མདོར་བསྟན་པ་ཐབས་ཀྱི་བདེ་བ་དང༌། རྒྱས་པར་བཤད་པ་ཤེས་རབ་ཀྱི་བདེ་བ་དེ་གཉིས་ཀར་ཡང་གཉིས་གཉིས་སུ་ཤེས་པར་བྱ་སྟེ། རྒྱས་པར་བསྟན་པ་དུས་ཀྱི་བརྡས་ནི། བསྲུབ་བྱ་ཤེས་རབ་ཀྱི་པདྨ་དང༌། སྲུབ་བྱེད་ཐབས་ཀྱི་རྡོ་རྗེ་མཉམ་པར་བསྲུབས་པ་ཡིན་ལ། མདོར་བསྟན་གཅིག་ནའི་བརྡས་ནི། བདེ་བའི་གདན་ནམ་གཞིའམ་གནས་རང་ལུས་ལྟེ་བ་ཡན་ཆད་ཀྱི་འཁོར་ལོ་བཞིར་གཡོ་བའོ། །དེ་བཞིན་དུ་ཤེས་རབ་མའི་དབང་དུ་བྱས་ནའང༌། གཅིག་ནའི་བརྡས་རྒྱས་བསྟན་ནི་བསྲུབ་བྱ་
ཐབས་ཀྱི་ནོར་བུ་དང༌། སྲུབ་བྱེད་ཤེས་རབ་ཉིད་ཀྱི་རྩ་མཛེས་པའི་རྩེ་མོ་མཉམ་པར་བསྲུབས་པའི་ཡེ་ཤེས་དང༌། གཅིག་ནའི་བརྡས་མདོར་བསྟན་ནོ། །བདེ་བའི་གདན་ནམ་གཞིའམ་གནས་ཤེས་རབ་མ་ཉིད་ཀྱི་འཁོར་ལོ་བཞིར་གཡོ་བའི་བྱང་ཆུབ་ཀྱི་སེམས་སོ། །དེས་ན་རྒྱས་བསྟན་གཙུབ་བྱ་གཙུབ་བྱེད་ནི་མདོར་བསྟན་སོ་སོའི་གདན་ཡིན་ནོ། །ཞེས་ལོ་ཙཱ་བས་གོ་རིམ་མ་ནོར་བ་ནི། བོད་སྐད་དུ། དུས་གཅིག་ན་ཞེས་པའི་དུས་དང་གཅིག་ན་ཞེས་པ་ལ་འགྲིག་པའི་ཕྱིར་ཡིན་ཡང༌། རྒྱ་སྐད་ཀྱི་རིམ་པ་ལྟར་གོ་རིམ་བྱས་ན་ལེགས་ཏེ། འབྲོག་འགྱུར་ལས་ཀྱང༌། མདོར་བསྡུས་བསྟན་ནི་ཐ་དད་པ། །རྒྱས་བསྟན་བསྲུབ་དང་སྲུབ་བྱེད་ཉིད། །ཅེས་འབྱུང་བས། འདིར་ཡང་མདོར་བསྟན་སོ་སོའི་གནས་ཡིན་ཏེ། །རྒྱས་བསྟན་བསྲུབ་བྱ་བསྲུབ་བྱེད་ཉིད། །ཅེས་བཅོས་སོ། །དེ་ལ་སོ་སོའི་ཞེས་པ་ནི། ཐབས་ཤེས་ཕོ་མོ་སོ་སོའི་སྟེ། །གདན་ནི་གནས་ཀྱི་དོན་ཡིན་པས། །བདེ་བ་ཆེན་པོའི་གནས་སམ་རྟེན་འཁོར་ལོ་བཞིའི་ཐིག་ལེའོ། །འོ་ན་ཐབས་ཤེས་སོ་སོ་ལ་ཡང་འཁོར་ལོ་བཞིའི་བདེ་བ་གཡོ་བ་སྔོན་དུ་སོང་ནས། གསང་བར་ལྷན་སྐྱེས་ཉམས་སུ་མྱོང་བར་འགྱུར་བས། གདན་གྱི་རྗེས་སུ་བསྲུབས་པ་བཤད་ན་ལེགས་པར་འགྱུར་རོ་སྙམ་པ་དང༌། བསྲུབས་པའི་རྐྱེན་གྱིས་འཁོར་ལོ་བཞིར་འོང་བ་མ་ཡིན་ནམ། གཞུང་དཀྱུས་འགྱུར་ཕྱི་མ་ཉིད་ལེགས་སོ་སྙམ་ན། རྒྱས་བསྟན་
བདེ་བའི་མྱོང་བ་གསལ་བ་ལ་འཆད་དགོས་པས། བསྲུབས་པ་ཙམ་མ་ཡིན་པར། བྱང་ཆུབ་ཀྱི་སེམས་བསྲུབ་བྱ་སྲུབ་བྱེད་ཀྱི་གནས་སུ་འོངས་པ་ལ་འཆད་དགོས་སོ། དེ་ཡན་ཆད་ཀྱིས་འདི་ལྟར་བསྟན་པར་འགྱུར་ཏེ། དཔེའི་ལྷན་ཅིག་སྐྱེས་པ་དེ་ནི། རྒྱུ་བྱང་ཆུབ་ཀྱི་སེམས་འཁོར་ལོ་བཞིའི་དྭངས་མ། རྐྱེན་འདོད་ཆགས་ཀྱི་མེས་བཞུ་བ་རྟེན་ལུས་ཀྱི་ཕྱོགས་ནས་ཐབས་ཤེས་ཀྱི་ཐིག་ལེ་ཁ་སྦྱོར། བརྟེན་པ་སེམས་ཀྱི་ཕྱོགས་ནས་ཐབས་ཤེས་ཀྱི་མཚན་ཉིད་ཅན་བདེ་བ་དང་མི་རྟོག་པ་ཁ་སྦྱོར་ཡིན་ལ། རྟེན་བརྟེན་པ་དབྱེར་མི་ཕྱེད་པའི་ཕྱིར། བཞི་ཀ་ཡང་ལྷན་ཅིག་སྐྱེས་པའི་ངོ་བོར་གཅིག་པའོ། །དེ་ལྟར་ཡང་དགྱེས་པ་རྡོ་རྗེ་ལས། རེ་ཞིག་སྐྱེས་བུ་རྣམ་པ་གཉིས། །དེ་ཡི་ཁུ་བའམ་བདེ་བ་ཉིད། །སྐྱེས་བུ་ཇི་བཞིན་ཤེས་རབ་ལའང༌། །དེ་ཡི་ཁུ་བའམ་བདེ་བ་ཉིད། །དེ་ཉིད་ཕྱིར་ན་དགའ་བ་ནི། །བཞི་ཡི་རབ་ཏུ་དབྱེ་བ་ཡིས། །སྐྱེ་མེད་རིམ་པའི་ཕྱོགས་ལ་ནི། །འདི་ལྟར་ལྷན་ཅིག་སྐྱེས་རྣམ་བཞི། །ཞེས་སོ། །བཅོམ་ལྡན་ཞེས་པ་ནི། སེམས་ཀྱི་རྡོ་རྗེ་སྟེ། དོན་དམ་བདེ་བ་ཆེན་པོ་ཡིན་ལ། བཞུགས་པ་ཞེས་པ་ནི། ཀུན་རྫོབ་ཀྱི་ལྷན་སྐྱེས་ལ་དེ་གནས་པ་ཞེས་བྱའོ། །སངས་རྒྱས་ཕུང་པོ་ལ་སོགས་ཀུན། །ཅེས་པ་སྔོན་ལ་དྲངས་ནས། ཐམས་ཅད་ཀྱི་སྒྲས་ནི། ཕུང་པོ་ལྔ་དང་ཁམས་ལྔ་དང་དབང་པོ་ལྔ་དང་ཡུལ་ལྔ་ལ་སོགས་པ། སྣ་ཚོགས་པ་ནི་ཐམས་ཅད་ཀྱི་བརྡས་སྟོན་ལ།
དེ་རྣམས་ཀྱི་དྭངས་མའི་ཐིག་ལེ་ནི། དེ་ཞིན་གཤེགས་པ་ཐམས་ཅད་དོ། །དེ་ལ་ཕུང་པོ་ལྔ་ནི་སངས་རྒྱས་རྒྱལ་བ་རིགས་ལྔ་དང༌། སོགས་ཀྱི་སྒྲས་འབྱུང་བ་ལྔ་ཡུམ་ལྔ་དང༌། སྲས་བྱང་ཆུབ་སེམས་དཔའི་བརྡས་ནི་དབང་པོ་རྣམས་དང༌། བཅས་པའི་ཚིག་གིས་ལྷ་མོ་རྣམས་ཏེ། དེ་ཡང་དབང་པོ་དང་ལྷན་ཅིག་ཅེས་པ་ཡུལ་རྣམས་སོ། །སོགས་ཀུན་ཅེས་བྱ་བས་ནི། ལས་དང་བྱ་བའི་ཡན་ལག་ཁྲོ་བོ་ཁྲོ་མོ་ཡང་བསྟན་ཏོ། །དེ་རྣམས་ཀྱི་དྭངས་མ་ཐིག་ལེ་ནི། དགའ་བཞི་ལུགས་འབྱུང་ལུགས་བཟློག་ནས། རྩ་འཁོར་རྣམས་སུ་འགྲོ་འོང་བྱེད་ཅིང་གཤེགས་པའི་ཕྱིར། དེ་བཞིན་གཤེགས་པའོ། །སྐུ་ནི་ཟླ་བ་བྱང་ཆུབ་ཀྱི་སེམས་ཞུ་བ། གསུང་ཉི་མས་དབང་དུ་བྱས་པའི་ཐིག་ལེ་རྩ་མཛེས་པའི་རྩེ་མོར་འོངས་པ། ཐུགས་ནི་ཐབས་ཀྱི་ནོར་བུའི་ནང་དུ་རྩ་མཛེས་པའི་རྩེ་མོ་ཆུག་སྟེ། རྩ་ཁ་སྦྱོར་དེ་ལ་གཉིས་ཤོར་གཉིས་མཉམ་གྱི་ཚུལ་གྱི་གནས་པས་ཐིག་ལེ་གཉིས་འདྲེས་པ་དང༌། རྡོ་རྗེ་ནི་བདེ་བ་དང་སྟོང་པ་དབྱེར་མེད་པས་གནས་པས། བརྟེན་པ་ལྷན་ཅིག་སྐྱེས་པའི་བདེ་བའི་ངོ་བོར་གནས་པ་སྟེ་ཉམས་པར་བཟུང་བའོ། །ཡང་ན་སྐུ་དང་གསུང་ནི་ཐབས་ཤེས་གཉིས་ཀར་གྱི་རོ་རྐྱང་གི་རྒྱུ་བ་འགགས་པ། ཐུགས་རྡོ་རྗཻ་དྷཱུ་ཏཱིའི་མས་སྣ་སྤྲད་པས་ཕན་ཚུན་དུ་དབུ་མའི་རླུང་རྒྱས་པའི་བདེ་བའོ། །བརྟེན་པ་ཐབས་ཀྱི་མིང་ཡིན་པས། བརྟེན་པའི་ངོ་བོར་གནས་པ་ནི། ཐབས་ཤེས་
གཉིས་ཀའི་ཐིག་ལེའི་ཐབས་ཀྱི་ནོར་བུར་ཟིན་པའོ། །རྟེན་བྱང་ཆུབ་ཀྱི་སེམས་དང་བརྟེན་པ་བདེ་བ་ཡང༌། འབྱུང་བ་བཞིའམ་ལྔའི་ངོ་བོ་ཡིན་ལ། བཙུན་མོའམ་ཡུམ་ནི་འབྱུང་བ་བཞི་པོ་རྣམས་ཀྱི་བདེ་བ་རྣམས་སོ། །དེ་ཡང་རེག་པ་སྲ་བའི་བདེ་བ་སྤྱན་མ། གཤེར་བ་མཱ་མ་ཀཱི། དྲོ་བ་གོས་དཀར་མོ། གཡོ་བ་སྒྲོལ་མ་སྟེ་བཞི་དང༌། ཁྱབ་བྱེད་དུ་བདེ་བ་རྡོ་རྗེ་དབྱིངས་ཀྱི་དབང་ཕྱུག་མ་སྟེ། དེ་རྣམས་ཀྱི་རྟེན་ནི། བུད་མེད་དེ་ལས་ཀྱི་ཕྱག་རྒྱའི་བྷ་གར་བརྗོད་ལ། ཕྱི་རོལ་དུ་ནི་པདྨ་ཅན་ལ་སོགས་པ་ཕྱག་རྒྱ་རིགས་ལྔའམ་བཞི་ཡུམ་ལྔའི་དག་པ་ཅན་གྱི་ཕྱིར། རྡོ་རྗེ་བཙུན་མོ་ཡིན་ལ། གཉིས་ཀ་ལྟར་ཡང་ལས་ཀྱི་ཕྱག་རྒྱའི་བྷ་ག་ལ། ཐིག་ལེ་མི་འགྱུར་བའི་རྡོ་རྗེ་ཡང་དག་པར་བཀོད་པ་ལ་ལྷན་ཅིག་སྐྱེས་པ་བཞུགས་སོ། །ཞེས་པའོ། །ཨེ་ཝཾ་ཞེས་པ་དང༌། བདག་གིས་ཐོས་པ་དང༌། དུས་གཅིག་ན་སོགས་ཚིག་གཉིས་གཉིས་སྡེབས་པ་དག་གིས་ཀྱང༌། རྟེན་ཤེས་རབ་དང་བརྟེན་པ་ཐབས་ཀྱི་ངོ་བོར་བསྟན་ལ། ཐབས་ཤེས་དེ་དག་ཕན་ཚུན་ཟུང་འབྲེལ་དུ་བྱས་ནས་སྒོམ་པ་དེ་དག་ནི། དགའ་བ་བཞི་དང་བཅུ་དྲུག་གི་དབྱེ་བ་སོགས་རིམ་གྱིས་རྒྱུད་ནས། རིམ་པ་བཞིན་དུ་དཔེ་ལ་བརྟེན་ནས་དོན་གྱི་ཡེ་ཤེས་རྟོགས་པར་འགྱུར་རོ། །དོན་དམ་ནི་རིག་པར་བྱ་རྒྱུ་ཤེས་བྱ་ཡིན་ལ། ཀུན་རྫོབ་ཀྱི་བདེ་ཆེན་ནི། དེའི་ཤེས་པ་པོ་སྟེ་བརྡ་ཐབས་ཡིན་པའི་རབ་ཏུ་དབྱེ་བ་ལས། ཞུ་བདེའི་ཉམས་མྱོང་དེ་ཡང༌། རང་བྱུང་བདེ་བ་
ཆེན་པོའི་ངོ་བོ་དང་དབྱེར་མེད་པ་ཡིན་ནོ། །ཤེས་བྱ་ནི་དོན་ཡིན་ལ་ཤེས་པ་ནི་དཔེ་སྟེ། དཔེས་དོན་རྟོགས་པར་བྱེད་པའི་ཕྱིར་རོ། །འབྲོག་འགྱུར་ལས་ནི། ཤེས་བྱའི་རབ་ཏུ་དབྱེ་བ་ལས། །རང་བྱུང་ཡེ་ཤེས་ངོ་བོ་ཅན། །ཞེས་འབྱུང་བ་ལྟར་ན་ཡང་ཤིན་ཏུ་ལེགས་ཏེ། ཞུ་བདེ་དངོས་དོན་དམ་མིན་ཡང༌། ཤེས་བྱ་ཆོས་ཉིད་ཡུལ་དུ་བྱས་པའི་ཕྱིར། རང་བྱུང་དོན་དམ་གྱི་ཡེ་ཤེས་ལ་འཇུག་ཐབས་བླ་ན་མེད་པོའོ་ཞེས་པར་འགྱུར་རོ། །དཔེ་ལྷན་ཅིག་སྐྱེས་པ་དེ་ཉིད་སྤྲོས་བྲལ་དུ་གཏན་ལ་འབེབ་པ་ནི། བདག་མིན་གཞན་ལས་ཀྱང་མ་ཡིན། །གཉིས་མིན་རྒྱུ་མེད་ལས་ཀྱང་མིན། །དངོས་པོ་སྐྱེ་བའི་ངོ་བོ་དང༌། །དངོས་པོ་མེད་པའི་རང་བཞིན་མིན། །རྟག་དང་མི་རྟག་པ་ཡང་མིན། །འདི་ནི་ཆད་དང་གཞན་མ་ཡིན། །རྟེན་ཅིང་འབྲེལ་འབྱུང་ངོ་བོ་ཡིས། །བརྟན་པ་དང་ནི་གཡོ་བ་དང༌། །དམའ་དང་མཐོ་བ་ཐང་དང་ཆུའི། །སྣ་ཚོགས་ཁྱབ་སྟེ་རྣམ་པར་བཞུགས། །ཨེ་ཡིག་དང་ནི་ཝཾ་ཡིག་དང༌། །བདག་གིས་ཞེས་དང་ཐོས་པ་ཞེས། །དེ་བཞིན་གཤེགས་པ་ཐམས་ཅད་དང༌། །སྐུ་དང་གསུང་ནི་དེ་བཞིན་ཏེ། །ཐུགས་ཀྱི་རྡོ་རྗེ་བཙུན་མོ་ཡི། །བྷ་ག་རྣམས་ལ་ཞེས་བྱ་གཞན། །བཅོམ་ལྡན་འདས་ནི་བཞུགས་ཞེས་པ། །སྒྲ་དང་སྒྲ་ཉམས་སྤངས་པ་ཡིན། །དེ་ལྟར་བྱུང་བའི་རང་བཞིན་ཕྱིར། །མཐའ་དག་ངག་ལས་ངེས་པར་གྲོལ། །འདིར་རྐྱེན་འདི་པ་ཙམ་གྱི་ཆོས་འདི་ཐམས་ཅད་ནི།
འགག་པ་དང༌། གནས་པ་དང༌། རྣམ་པར་འགྱུར་བ་ལ་སོགས་པ་སྣ་ཚོགས་པར་སྣང་ཡང༌། གནས་ཚུལ་དེ་དག་ཡོད་པ་མ་ཡིན་པས་མ་སྐྱེས་པའི་ཕྱིར་རོ། །འདི་ནི་འཐད་དེ། མ་སྐྱེས་པ་ནི་སྲིད་པར་མ་བྱུང་བ་ཡིན་ལ། གང་ཐོག་མ་ཉིད་ནས་མ་བྱུང་བ་ལ། ཕྱིས་གནས་པ་དང༌། འགག་པ་དང༌། འགྱུར་བ་སོགས་ཡོང་བའི་གཞི་སྟོངས་པའི་ཕྱིར་རོ། །དེ་ལྟར་འཐད་དུ་ཆུག་ཀྱང་ཅིའི་ཕྱིར་སྐྱེ་བ་མེད་སྙམ་ན། འདི་ལྟར་ཆོས་འདི་དག་ནི་རང་དང་གཞན་གཉིས་སུ་ཟད་དེ། རང་གཞན་གཉིས་མ་ཡིན་པའི་གསུམ་པ་མེད་དོ། །དཔེར་ན་མྱུ་གུ་ཉིད་ནི་མྱུ་གུ་རང་ཡིན་ལ། མྱུ་གུ་མ་ཡིན་པ་སྲིད་ཚད་ནི་མྱུ་གུ་ལས་གཞན་པ་ཡིན་པའི་ཕྱིར་རོ། །དངོས་པོ་སྐྱེ་བ་ནི་རྒྱུ་མེད་པ་མི་སྲིད་ཀྱང༌། བློས་སྐྱེ་བར་འཛིན་ཚུལ་ལ། འདི་ནི་རྒྱུ་མེད་པའོ་སྙམ་པའི་བློ་འབྱུང་བ་སྲིད་པས། དོགས་པའི་མཐའ་གཞན་དགག་པའི་ཕྱིར་དུ། རྒྱུ་མེད་གཞན་ལ་མི་བལྟོས་ཕྱིར། །རྟག་ཏུ་ཡོད་པའམ་མེད་པར་འགྱུར། །ཞེས་བྱ་བའི་རིགས་པ་དང༌། དངོས་པོ་ཕལ་ཆེར་རྒྱུ་ལས་སྐྱེ་བ་མངོན་སུམ་དུ་མཐོང་བའི་ཕྱིར། རྒྱུ་མེད་མིན་ནོ། །རྒྱུ་ལས་སྐྱེ་ན་རྒྱུ་དེ་ཡང༌། དངོས་པོ་དེ་ཉིད་རང་དང༌། དེ་ལས་གཞན་དང༌། རང་གཞན་གཉིས་ཀ་ལས་སྐྱེ་བ་གསུམ་ལས་འོས་མེད་ན། དང་པོར་རང་ལས་སྐྱེ་བ་མི་རིགས་ཏེ། རང་གྲུབ་ཟིན་ན་སྐྱེ་མི་དགོས་པའི་ཕྱིར་དང༌། སྐྱེས་པའི་རང་མ་གྲུབ་ན་
གང་ལས་སྐྱེས་པའི་རྒྱུ་མེད་པའི་ཕྱིར་རོ། །གཞན་ཉིད་ལས་སྐྱེ་བ་ཡང་མི་འཐད་དེ། རང་རང་གིས་ཉེར་ལེན་གྱི་རྒྱུ་རང་རྒྱུད་དུ་གཏོགས་པ་མེད་ན། གཞན་རྐྱེན་ཇི་ལྟ་བུ་ཞིག་ཚོགས་ཀྱང་མི་སྐྱེ་བར་མཐོང་བའི་ཕྱིར་རོ། །གཉིས་ཀ་ལས་ཀྱང་མ་ཡིན་ཏེ། གཉིས་ལས་སྐྱེ་ན་བདག་ལས་ཀྱང་སྐྱེ་བར་འགྱུར་ཞིང༌། གཞན་ལས་ཀྱང་སྐྱེ་བ་འགྱུར་བས། ཉེས་པ་གཉིས་ཀར་དུ་ཐལ་བར་འགྱུར་ཞིང༌། གལ་ཏེ་རང་ལས་སྐྱཻ་ན་ནི་གཞན་ལས་སྐྱེ་བ་དོན་མེད་ལ། དེ་ལས་སྐྱེ་ན་ཡང་ཅིག་ཤོས་དོན་མེད་པས། རང་ངམ་གཞན་ལས་སྐྱེ་བ་ཞིག་ཡིན་ཀྱང་གཉིས་ཀ་ལས་སྐྱེ་བ་དོན་མེད་དེ། རང་ལས་མི་སྐྱེ་གཞན་ལས་ཀྱང་མི་སྐྱེ་ན་ཡང་གཉིས་ཀ་ལས་མི་སྐྱེ་བར་གྲུབ་བོ། །ཅི་སྟེ་གཉིས་ཀ་ཚོགས་པ་ལས་སྐྱེའོ་སྙམ་ན། ཚོགས་པ་དེ་ཡང་རང་གཞན་གཉིས་པོའི་ངོ་བོ་ཉིད་ཡིན་ནམ། དེ་གཉིས་ཚོགས་པ་ལས་བྱུང་བའི་ངོ་བོ་གཞན་ཞིག་ཡིན། དང་པོ་ལྟར་ན་སྔར་གྱི་སྐྱོན་ཉིད་འཇུག་ལ། ཕྱི་མ་ལྟར་ན་དེ་ནི་གཞན་ཉིད་ཁོ་ན་ཡིན་པས། གཞན་སྐྱེས་ལ་བརྗོད་པའི་སྐྱོན་ཉིད་འཇུག་གོ །དེ་བཞིན་དུ་དངོས་པོ་ད་ལྟ་བ་འདས་པ་ལས་མི་སྐྱེ་སྟེ། རྒྱུ་དེ་འདས་མ་ཟིན་ན། ད་ལྟ་བ་ཁོ་ན་ཡིན་པས་འདས་པར་མི་འགྱུར་ལ། འདས་ཟིན་ན་ནི་འབྲས་བུའི་དུས་ན་དེ་མེད་ཅིང༌། མུ་འབྱོར་བའི་འབྲེལ་མཚམས་ཀྱང་མ་གྲུབ་པས། སྐྱེད་བྱེད་དུ་མི་འབྲེལ་བའི་ཕྱིར་རོ། །ད་ལྟ་བ་ལས་
ད་ལྟར་བ་སྐྱེ་བ་ཡང་མ་ཡིན་ཏེ། དངོས་པོ་ད་ལྟ་བར་སྐྱེས་ཟིན་པ་བསྐྱེད་མི་དགོས་པའི་ཕྱིར་རོ། །མ་འོངས་པའང་ད་ལྟ་བའི་དུས་ན། བྱ་བ་གང་ཡང་མི་བྱེད་པས། བསྐྱེད་པར་བྱ་བ་དང་སྐྱེད་པ་པོ་གཉིས་ཀར་དུ་མི་རུང་ངོ༌། །མ་འོངས་པའི་དུས་ན་མ་འོངས་པའི་དངོས་པོ་བྱ་བ་བྱེད་པར་འགྱུར་དུ་ཆུག་ཀྱང༌། དེའི་དུས་ན་དེ་ནི་བྱུང་ཟིན་མ་འགགས་པའི་ཕྱིར་ད་ལྟ་བ་ཁོ་ནའོ། །མེད་པ་ལས་མེད་པ་སྐྱེ་བ་མི་འཐད་པའི་ཕྱིར། འདས་པ་ལས་འདས་པ་དང༌། མ་འོངས་པ་ལས་མ་འོངས་པ་སྐྱེ་བ་ཡང་མ་ཡིན་ནོ། །འདི་དག་བདག་སྐྱེ་དང་གཞན་སྐྱེའི་སྟེང་དུ་ཡང་སྦྱར་ཏེ། དུས་གསུམ་དུ་རྣམ་པར་དཔྱད་པར་བྱ་སྟེ། བདག་འདས་པ་ལས་བདག་ད་ལྟ་བ་སྐྱེ་སྙམ་ན། དེ་ནི་བདག་ལས་སྐྱེ་བ་མ་ཡིན་ཏེ། གཞན་འདས་པ་ལས་གཞན་ད་ལྟ་བ་བྱུང་བར་ཐལ་བའི་ཕྱིར་རོ། །བདག་ད་ལྟ་བ་གཉིས་གནས་བྱ་དང་གནས་བྱེད་ཀྱི་རྒྱུར་འགྱུར་ན་ཡང༌། འདི་ནི་བདག་སྐྱེ་མ་ཡིན་ཏེ། བསྐྱེད་བྱ་སྐྱེད་བྱེད་ཀྱི་བདག་མཚན་ཉིད་མི་འདྲ་བའི་ཕྱིར་གཞན་ཁོ་ནར་འགྱུར་རོ། །འདས་པའི་བུམ་པ་ལས་ད་ལྟ་བའི་བུམ་པ་གཞན་སྐྱེ་བ་ཡིན་ནོ་སྙམ་ན། བུམ་པ་འདས་པ་དང་ད་ལྟ་བ་གཉིས། ཡུལ་ཡང་གཅིག རྣམ་པ་ཡང་གཅིག མཚན་ཉིད་ཀྱང་མཚུངས་པ། སྐད་ཅིག་སྔ་མའི་རྒྱུད་དེ་ཉིད་ལ་བརྟེན་ནས་ཕྱི་མ་འབྱུང་བའི་ཕྱིར། དེ་གཉིས་གཞན་དུ་མི་འགྱུར་ཏེ་རང་གི་རྒྱུད་གཅིག་ལ་བརྟེན་པའི་ཕྱིར་རོ། །ལྡོག་ཆ་ཐ་དད་པ་ཙམ་གྱིས་
གཞན་ཉིད་དུ་མི་འགྲུབ་པའི་ཕྱིར་རོ། །ཡང་བདག་གཞན་གཉིས་ཀའི་ཚོགས་པ་ལས། བདག་གཅིག་པུ་སྐྱེའམ། གཞན་གཅིག་བུ་སྐྱེའམ། བདག་གཞན་གཉིས་ཀ་སྐྱེའམ། བདག་གཞན་གཉིས་མིན་ཞིག་སྐྱེ་བར་འགྱུར་གྲང་ན། རེ་རེ་ནས་མི་འཐད་དེ། དང་པོ་ལྟར་ན་བདག་གཞན་གྱི་ཚོགས་པ་ལས་སྐྱེ་བར་འགྱུར་བས་གཞན་སྐྱེ་ཉིད་དང༌། བདག་བདག་ཉིད་ལས་སྐྱེ་བའི་སྐྱོན་གཉིས་ཀར་དུ་འགྱུར་ལ། གཉིས་པ་ལྟར་ནའང༌། རྒྱུའི་བདག་གཞན་གཉིས་ཀར་འབྲས་བུ་ལས་གཞན་ཡིན་པའི་ཕྱིར། གཞན་སྐྱེས་ཉིད་དང༌། གསུམ་པ་ལྟར་ནའང༌། འབྲས་བུའི་བདག་གི་ཕྱོགས་ལ་དང་པོ་དང་མཚུངས་ཤིང༌། གཞན་གྱི་ཕྱོགས་ལ་གཉིས་པ་དང་མཚུངས་སོ། །ཅི་སྟེ་གཉིས་སྐྱེའི་སྐབས་འདིར། བདག་ལས་གཞན་དང་གཞན་ལས་གཞན་སྐྱེ་བ་ཡིན་ན་ནི་བདག་སྐྱེ་དང་གཞན་སྐྱེ་ལ་བརྗོད་པའི་སྐྱོན་རྣམས་སོ་ན་འདུག་གོ །དེ་བཞིན་དུ་འདས་པ་ལས་འདས་པ་མི་སྐྱེ་སྟེ། འདས་པ་ཕྱི་མ་དེ་སྐྱེ་བའི་འགོ་བརྩམས་ནས་འདས་པ་ཡིན་ན་ནི། དེ་ལྟ་བ་སྔོན་དུ་མ་སོང་བའི་འདས་པ་ཡོད་པ་དང༌། མ་སྐྱེས་པའི་གོང་ཉིད་ནས་འགགས་པ་ཡོད་པ་ཐལ་བར་འགྱུར་རོ། །དེ་དུས་འདས་པ་མ་ཡིན་ན་ནི། འདས་པ་ལས་འདས་པ་མ་ཡིན་པ་སྐྱེས་པར་སོང་གི འདས་པ་ལས་འདས་པ་ནི་མ་ཡིན་ནོ། །མ་འོངས་པ་ལས་མ་འོངས་པ་ནི་མི་སྐྱེ་སྟེ། མ་སྐྱེས་པའི་ཕྱིར་གཞན་སྐྱེད་པའི་རྒྱུར་ཡང་འགལ་བ་དང༌། སྐྱེས་ཟིན་པ་དང༌། མ་འོངས་
པ་འགལ་བའི་ཕྱིར་རོ། །དེ་ལྟར་ན་མཐའ་བཞིའི་སྐྱེ་བ་མ་གྲུབ་ཅིང༌། དུས་གསུམ་གྱི་སྐྱེ་བ་མ་གྲུབ་པས། གནས་ལུགས་ལ་སྐྱེ་བ་མ་གྲུབ་ཅིང༌། ཀུན་རྫོབ་སྣང་ངོ་ཙམ། འཁྲུལ་ངོ་ཙམ། རྟེན་འབྲེལ་ཙམ། སྒྱུ་མ་ལྟ་བུའི་སྐྱེ་བ་ཡང༌། འཁྲུལ་ངོར་ཡིན་པའི་ཕྱིར་དོན་དམ་པར་མེད་མོད། མ་བརྟགས་མ་དཔྱད་པའི་ངོར་སྣང་བ་བཞིན་དུ་ཀུན་རྫོབ་ཙམ་དུ་སྐྱེ་བ་ཙམ་ཁས་ལེན་པ་བཞིན་དུ། གཞན་ལས་སྐྱེ་བ་ཡང་འབྱུང་སྟེ། ཁ་ཅིག་གཞན་ལས་སྐྱེ་བ་འཇིག་རྟེན་ལས་ཀྱང་མེད་ཅེས་སྨྲ་བ་ནི། ཚིག་ལ་འཁྲྀ་འཚོལ་བ་ཙམ་མ་གཏོགས། འཇིག་རྟེན་གྱི་མྱོང་བ་དང་ཡང་མི་མཐུན་ཏེ། གཞན་སྐྱེའི་དོན་འཇིག་རྟེན་པའི་བློ་ལྷན་སྐྱེས་ལ་སྣང་བའི་ཕྱིར་རོ། །གལ་ཏེ་ཐ་སྙད་མི་བྱེད་པ་ཙམ་གྱིས་དེ་མེད་པར་འགྱུར་ན་ནི། འཇིག་ཚོགས་ལ་ལྟ་བ་སོགས་ཀྱི་ཐ་སྙད་ཀྱང་འཇིག་རྟེན་ལ་མེད་པའི་ཕྱིར། བློ་ལྷན་སྐྱེས་ལ་དེ་མེད་པར་འགྱུར་རོ། །དེ་ཡང་མཐའ་བཞིའི་སྐྱེ་བ་མེད་པས། ཡེ་ཤེས་དེ་སྐྱེ་མེད་ཡིན་ཅིང༌། དེས་མཚོན་པའི་དངོས་པོ་ཐམས་ཅད། སྐྱེས་པའི་ངོ་བོར་གྲུབ་པ་མེད་པས། ཡེ་ཤེས་དེ་ཡང་སྐྱེས་པ་དེ་འདྲར་མེད་ལ། དེ་དངོས་མེད་ཀྱང་མ་ཡིན་ཏེ་མྱོང་བའི་ཕྱིར་རོ། །དེ་སྐད་ཅིག་གི་སྐྱེ་འཇིག་བྱེད་པས་རྟག་པ་མིན་ལ། མི་རྟག་པ་ལ་གནས་པའི་གོ་སྐབས་མེད་ཅིང་མི་གནས་པ་ལ་འཇིག་རྒྱུ་ཡེ་ནས་མེད་པའི་ཕྱིར། མི་རྟག་པ་ཡང་བློས་ཀུན་བཏགས་ཁོ་ན་ལས་གནས་ལུགས་མ་ཡིན་ནོ། །རྒྱུ་རྐྱེན་ཚོགས་
པ་ལས་འགག་མེད་དུ་འཆར་བའི་ཕྱིར། འདི་ནི་ཆད་པའང་མ་ཡིན་ལ། གཞན་ཏེ་རྟག་པའང་མ་ཡིན་ནོ། །འབྲོག་མིའི་འགྱུར་ལས། དངོས་པོ་སྐྱེ་བའི་སོགས་ལ། དངོས་པོའི་ཚུལ་གྱིས་སྐྱེས་པ་སྟེ། དངོས་པོ་རང་གི་ངོ་བོས་ནི། །རྟག་པ་མ་ཡིན་མི་རྟག་མིན། །འདི་ནི་མཆོག་ཏུ་རྒྱུན་མི་ཆད། །ཅེས་འབྱུང་བ་གོ་བདེ་སྟེ། རྒྱ་སྐད་དང་མཐུན་ན་ལེགས་སོ། །དེ་ལྟར་ན་དངོས་པོ་ཀུན་རྫོབ་ཀྱི་ཚུལ་གྱིས་སྐྱེ་བར་སྣང་བ་ཙམ་ཡིན་གྱི། རང་གི་ངོ་བོས་སྐྱེ་བ་གྲུབ་པ་མྀན་པ་དང༌། རང་གི་ངོ་བོས་རྟག་པ་དང་མི་རྟག་པ་མིན་ཡང༌། ཀུན་རྫོབ་ཏུ་རྒྱུན་གྱི་རྟག་པར་གནས་པའོ། །དེ་ལྟར་ན་རྒྱུ་རྐྱེན་ཚོགས་པའི་རྟེན་ཅིང་འབྲེལ་འབྱུང་གི་ངོ་བོའམ་ཚུལ་གྱིས། དམའ་བ་དང༌། མཐོ་བ་དང༌། ཐང་དང་ཆུ་སོགས་ཏེ། བརྟན་པའི་དངོས་པོ་རྣམས་ལ་ཡུལ་ཅན་གྱི་ཚུལ་དང༌། གཡོ་བ་སེམས་ཅན་རྣམས་ལ་རང་མྱོང་གི་ཚུལ་གྱིས་ཏེ། སྣོད་བཅུད་ཀྱི་འགྲོ་བ་ཐམས་ཅད་ལ་ཁྱབ་སྟེ་རྣམ་པར་བཞུགས་སོ། །ཚིག་འདི་རྣམས་ཀྱི་སྐྱེ་འགག་རྟག་ཆད་དངོས་པོ་ཡོད་མེད་སོགས། སྤྲོས་པ་ཐམས་ཅད་དང་བྲལ་བ་ནི་བཤད་ལ། འོན་ཀྱང་མཚན་གཞི་དོན་གྱི་ཡེ་ཤེས་སུ་མ་ངེས་ཏེ། ཆོས་ཐམས་ཅད་སྤྲོས་བྲལ་གྱི་མཚན་ཉིད་ཅན་ཡིན་པའི་ཕྱིར་དང༌། དཔེའི་ཡེ་ཤེས་ཀྱི་འཕྲོས་ཡིན་པའི་ཕྱིར་རོ། །དེས་ན་གོང་དུ་རང་བྱུང་དུ་བཤད་པ་དང༌། གནས་པ་ཞེས་པའི་དོགས་གཅོད་དུ། ཞུ་བདེ་དེ་རང་བྱུང་དང་རྟག་ཏུ་གནས་པ་ཡིན་ན། མ་སྐྱེས་པའི་དངོས་པོ་དང་རྟག་དངོས་སུ་འགྱུར་
རོ་སྙམ་པའི་དོགས་པ་གཅོད་པའི་ཕྱིར་ཡིན་ལ། བཞུགས་སོ་ཞེས་པའི་ཚིག་དོན་འཆད་པའི་སྐབས་ཡིན་པས། རྒྱུན་གྱི་རྟག་པར་བཞུགས། རྟེན་འབྲེལ་གྱི་ཚུལ་གྱིས་བཞུགས། རིགས་མཐུན་གྱིས་ཁྱབ་པར་བཞུགས་ཞེས་འཆད་པས། གླེང་གཞི་ཚིག་དོན་འཆད་པའི་འཕྲོས་ཁོ་ན་ཡིན་ནོ། །ཨེ་ཡིག་དང་ནི་སོགས་ལ། དཔེའི་ཡེ་ཤེས་དེ་འདྲ་ཐིག་ལེའི་བདེ་བ་སོགས་ཀྱི་ཚིག་གིས་སྟོན་པར་རིགས་ཀྱི། ཨེ་ཝཾ་ལ་སོགས་པ་དང་སྒྲ་དོན་གྱི་འབྲེལ་པ་མེད་པའི་ཕྱིར་སྟོན་པར་མི་རིགས་སྙམ་ན། ཡེ་ཤེས་དེ་དང་དེའི་གནས་ཚུལ་དང་མཚན་ཉིད་ནི་སྤྲོས་བྲལ་སོགས་ཀྱི་སྒྲ་དང༌། ཐིག་ལེའི་བདེ་བ་སོགས་ཀྱི་སྒྲ་དང་ཨེ་ཝཾ་ལ་སོགས་པ་སྒྲ་ཉམས་ཀྱིས་ཀྱང༌། མཚོན་དུ་མེད་དེ་ཉམས་མྱོང་ཁོ་ནའི་སྤྱོད་ཡུལ་ཡིན་པའི་ཕྱིར་རོ། །སྒྲ་ཉམས་ནི་འཇིག་རྟེན་དང་བསྟན་བཅོས་ལ་མ་གྲགས་པའོ། །བརྡ་ཐབས་ཙམ་གྱི་སྒོ་ནས་ནི། དེ་དག་གིས་མཚོན་ནུས་པ་བཞིན་དུ། ཨེ་ཝཾ་ལ་སོགས་པས་ཀྱང་མཚོན་ནོ། །དེ་བས་ན་ལེགས་སྦྱར་ལ་སོགས་པ་སྒྲ་གཟུག་པོར་འབབ་པ་རྣམས་དང༌། སྒྲ་ཉམས་ཀླ་ཀློའི་སྐད་དང༌། དེ་བཞིན་གཤེགས་པའི་བརྡའ་འདི་རྣམས་ཀྱང༌། གནས་ལུགས་ལ་སྤངས་ཤིང་ཡོད་པ་མ་ཡིན་ཏེ། བརྗོད་བྲལ་དེ་ནི་སྒྲ་རྟོག་ཐམས་ཅད་ལས་འདས་པའི་ཕྱིར་རོ། །ད་ལྟར་བྱུང་བ་སྟེ། དེ་ཐོག་མཉམ་པའི་རིག་པ་སྐད་ཅིག་མའི་རང་བཞིན་ཙམ་གྱི་ཕྱིར། ངག་མཐའ་དག་གི་ཡུལ་ལས་ངེས་པར་གྲོལ་བའོ། །འབྲོག་
འགྱུར་ལས། ད་ལྟར་བྱུང་བ་ཞེས་པ་མེད་དེ། སོ་སོར་སྐྱེས་པའི་རང་བཞིན་ཞེས་འབྱུང་ན། དབང་གི་དུས་སུ་སོ་སོར་རང་གིས་རིག་པའི་ཉམས་མྱོང་དུ་སྐྱེས་པ་ཁོ་ནའི་སྤྱོད་ཡུལ་ལོ་ཞེས་པའི་དོན་ཡིན་ཏེ། བཤད་ཚུལ་འདི་ངོས་ནུས་པ་ཆེ་བས་ལེགས་སོ། །གཉིས་པ་བརྗོད་བྱ་དོན་གྱི་རབ་དབྱེ་བཤད་པ་ལ་གསུམ་སྟེ། དཔེ་དོན་གྱི་ཡེ་ཤེས་ངོས་བཟུང་བ་དང༌། དེ་ཉིད་སྟོན་པའི་ལུང་དང་སྦྱར་བ་དང༌། ཡོད་མེད་ཀྱི་དབྱེ་བ་དཔེའི་སྒོ་ནས་བསྟན་པའོ། །དང་པོ་ནི། བྱིས་པ་ལྐུགས་སོགས་ཤེས་པ་ཡིས། །ཤེས་བྱ་ལྟ་བུར་དེ་རབ་གྲགས། །བཟུང་དུ་མེད་ཅིང་བརྟག་ཏུ་མེད། །ཀུན་རྫོབ་ཇི་བཞིན་དེ་བཞིན་ཏེ། །དྲི་ཟའི་གྲོང་ཁྱེར་རྣམ་པ་དང༌། །སྒྱུ་མ་སྨིག་རྒྱུ་འདྲ་བ་སྟེ། །སེང་གེ་ཟླ་བའི་གྲོང་ཁྱེར་མཚུངས། །རྨི་ལམ་རྩེད་མོ་བཞིན་དུ་སྣང༌། །དེ་ལྟར་རྫུན་སོགས་ངོ་བོ་ནི། ཁམས་གསུམ་མ་ལུས་རང་བཞིན་ནོ། །དེ་ཉིད་སྐྱེ་ཕྱིར་ཇི་ལྟར་ན། །བདག་གིས་ཐོས་ཞེས་ངེས་པར་རུང༌། །རང་གིས་རིག་པའི་ངོ་བོའི་ཕྱིར། །སངས་རྒྱས་ཀྱིས་ཀྱང་མཁྱེན་མ་ཡིན། །སེམས་ནི་ཕྲད་ཅིང་འདུས་པ་ཉིད། །རྨི་ལམ་སད་པ་ལྟ་བུ་སྟེ། །ཇི་ལྟར་གཞོན་ནུའི་ངོ་བོ་ཡི། །དབང་པོ་གཉིས་ཀ་འདུས་པ་བཞིན། །ཞེས་པ་སྟེ་བྱིས་པ་སྨྲ་མི་ཤེས་པའི་ཉམས་མྱོང་དང༌། ལྐུགས་པའི་ཉམས་མྱོང་གི་ཤེས་པའི་ཡུལ། ཤེས་བྱ་ནི་ཉམས་སུ་མྱོང་ཡང་བརྗོད་དུ་མེད་པ་ལྟ་བུར། གནས་ལུགས་དེ་ཡང་བརྗོད་མེད་ཡིན་པར་
རབ་ཏུ་གྲགས་ལ། དོན་དམ་པའི་ཡེ་ཤེས་དེ་ནི་བློས་བཟུང་དུ་མེད་ཅིང༌། སྒྲ་རྟོག་གིས་བརྟག་ཏུ་མེད་པའོ། །འགྱུར་གཞན་ལས་མ་གསལ་རྟོག་གེ་མེད་པ་ལྟར། ཞེས་པ་ལྟར་ན། མི་གསལ་བ་ནི་དཔེ་ལ་སོགས་པས་མཚོན་དུ་མེད་པའོ། །ཀུན་རྫོབ་ཞུ་བདེ་བརྗོད་བྲལ་དུ་འདུག་པ་ཇི་ལྟ་བ་བཞིན་དུ། དོན་དམ་ཡང་དེ་བཞིན་ཏེ་དྲི་ཟའི་སོགས་ནི་ཀུན་རྫོབ་སྣང་ཡང་བདེན་པར་མེད་པའི་དཔེ་སྟེ། སེངྒེ་ཟླ་བའི་གྲོང་ཁྱེར་ནི། མིག་འཁྲུལ་ལམ་སྒྱུ་མ་ཐམས་ཅད་ཀྱི་བདག་པོ། སྒྱུ་མ་མཁན་རྣམས་ཀྱི་ལྷ། ལྷ་མ་ཡིན་གྱི་རྒྱལ་པོ་ཧ་རི་ཙན་དྲའི་གྲོང་ཁྱེར་ཡིན་ནོ་ཞེས་གྲགས་པ། རྒྱ་མཚོའི་དབུས་སུ་གྲོང་ཁྱེར་དུ་སྣང་བའོ། །རྨི་ལམ་རྩེད་མོ་ནི། རྨི་ལམ་གྱི་རོལ་པ་སྟེ་རྣམ་འགྱུར་སྣ་ཚོགས་འབྱུང་བའོ། །དེ་ལྟར་རྫུན་སོགས་ཞེས་པ་ལ། མགོས་འགྱུར་གཙང་:མ་[བ་]ལས །དེ་ལྟར་ལོག་རྟོག་ཞེས་པ་འབྱུང་སྟེ་དོན་གཅིག་ལ། ལོ་ཆུང་འགྱུར་ལས། དེ་དག་ལ་སོགས་ངོ་བོ་ནི། །ཞེས་འབྱུང་བ། འབྲོག་འགྱུར་ལས། འདི་སྐད་ལ་སོགས་ཚུལ་གྱིས་ནི། ཞེས་པ་དང་མཐུན་ནོ། །འོན་ཀྱང་དཀྱུས་བཞིན་བཤད་ན། རྫུན་པ་སྒྱུར་མ་སོགས་ཀྱི་ངོ་བོ་བསྟེན་ཚུལ་ནི། ཁམས་གསུམ་མ་ལུས་པ་དེའི་ངོ་བོའོ། །འཆད་ཚུལ་འདི་ལྟར་ན། ཁམས་གསུམ་མ་ལུས་ངོ་བོ་ནི། །དེ་ལྟར་རྫུན་སོགས་རང་བཞིན་ནོ། །ཞེས་སྟོན་ན་དོན་ལ་འབྱོར་རོ། །ཀུན་རྫོབ་མཐོང་ཐོས་མྱོང་གསུམ་དང་སྒྲ་རྟོག་གི་ཡུལ་ཐམས་ཅད་བདེན་མེད་ཡིན་པ་
དེ་ཉིད་ཀྱིས་ཕྱིར་ན། གནས་ལུགས་དེ་ཀུན་རྫོབ་ཀྱིས་ཇི་ལྟར་ན་མཚོན་པར་ནུས་ཞེས་པ་སྟེ། འབྲོག་གིས། དེ་ཡི་ཕྱིར་ན་ཇི་ལྟར་མཚོན། །ཞེས་བསྒྱུར་བ་ལེགས་སོ། །གནས་ལུགས་ཀྱི་ཡེ་ཤེས་ནི། རང་གི་རིག་པའི་ངོ་བོ་ལ་རང་ཉིད་ཞུགས་པ་ཙམ་ཡིན་པའི་ཕྱིར། སྒྲ་དང་རྣམ་རྟོག་གི་སྒོ་ནས་སངས་རྒྱས་ཀྱིས་ཀྱང་མཁྱེན་པ་མིན་ནོ། །དེས་ན་རྟོགས་བྱ་རྟོགས་བྱེད་ཐ་དད་པའི་ཚུལ་གྱིས་ནམ་ཡང་རྟོགས་སུ་མེད་པས། བདག་གིས་རྟོགས་ཞེས་མི་བརྗོད་པར་ཐོས་ཞེས་ངེས་པར་རུང་ངོ༌། །ཡང་ཇི་ལྟར་ན་རུང་ཞེས་འཆད་པ་ལྟར་ན། ཐོས་པ་རྟོགས་པའི་དོན་དུ་བཤད་ནས། སངས་རྒྱས་རྣམས་ཀྱིས་མཁྱེན་པ་ཡིན་ཅེས་པ་འདོད་ལན་འདེབས་པར་འཆད་དགོས་ཀྱང༌། གོང་གི་འཕྲོས་ལ་མི་འབྲེལ་ལོ། །འབྲོག་འགྱུར་ལས་ནི། རང་གི་རིག་པའི་ངོ་བོའི་ཕྱིར། །སངས་རྒྱས་རྣམས་ཀྱིས་རྣམ་མི་མཁྱེན། །རང་གིས་རིག་པའི་ངོ་བོའི་ཕྱིར། །སངས་རྒྱས་ཉིད་ཀྱིས་རྣམ་པར་མཁྱེན། །ཞེས་ཚིག་རྐང་གཉིས་ལྷག་པོར་ཡོད་དེ། རིག་བྱ་རིག་བྱེད་ཐ་དད་པས་མི་མཁྱེན་པའི་དོན་དང༌། ངོ་བོ་གཅིག་པས་མཁྱེན་པའི་དོན་ནོ། །སེམས་ནི་ཕྲད་ཅིང་འདུས་པ་ལ་ཞེས་པ་ལ། འགྱུར་རྟིང་མ་རྣམས་ལས། འདུས་པར་སེམས་དང་འཕྲད་པ་ནི། །ཞེས་འབྱུང་ཞིང༌། འདུས་པ་ལྷན་ཅིག་སྐྱེས་པར་སེམས་བདེ་བ་དང་མི་རྟོག་པ་ལྷན་ཅིག་ཕྲད་ཅེས་འཆད་པའང་ཡོད་ལ། དཀྱུས་
ལྟར་ནའང་དེ་བཞིན་དུ་འཆད་དགོས་ཏེ། ཞུ་བདེ་ཁོ་ནའི་དོན་འཆད་པ་ཡིན་ལ། འབྲོག་གིས་འདུས་པ་བསམ་ཡས་མཉམ་སྦྱོར་བ།། ཞེས་བསྒྱུར་བ་ལྟར་ན་དོན་གྱི་ཡེ་ཤེས་བདེ་སྟོང་འདུས་པ་དང་རྣམ་པ་བསམ་ཡས་གཉིས་མཉམ་པར་སྦྱོར་བའི་ཟུང་འཇུག་གི་ཡེ་ཤེས་ཏེ་དཔེའི་ཡེ་ཤེས་ཀྱིས་མཚོན་པ་ནི། རྨི་ལམ་དུ་མཐོང་བའི་སུམ་ཅུ་རྩ་གསུམ་གྱི་གྲོང་ཁྱེར་དེས་སང་དུས་སུ་མཐོང་བར་འགྱུར་བའི་སུམ་ཅུ་རྩ་གསུམ་གྱི་གྲོང་ཁྱེར་དེ་མཚོན་པ་དང༌། གཞོན་ནུའི་བདེ་བས་དབང་པོ་གཉིས་འདུས་ཀྱི་བདེ་བ་མཚོན་པ་བཞིན་ནོ། །གཉིས་པ་ནི། བྷ་གར་ལིང་ག་རབ་བཞག་ལ། །སངས་རྒྱས་རྗེས་སུ་དྲན་པ་བསྒོམ། །ཐོག་མ་དབུས་མཐའ་དྲི་མེད་པའི༌། །ཡེ་ཤེས་ཅི་ཞིག་སྐྱེ་འགྱུར་ཏེ། །ཡེ་ཤེས་དེ་ནི་རང་རིག་པས། །གཞན་དུ་བརྗོད་པར་ནུས་མ་ཡིན། །ནམ་མཁའི་དབྱིངས་ཀྱི་དབུས་གནས་པར། །བླ་མའི་དཀྱིལ་འཁོར་སྒོམ་པར་བྱ། ། ཞེས་སོགས་པ་ཡིས་དེ་ཉིད་གསུངས། །རྗེས་སུ་དྲན་པ་བཅུ་དྲུག་གནས། །བདེ་ཆེན་ནམ་མཁའི་ཁམས་གནས་པ། །བདེ་བ་ཅན་ཞེས་མངོན་པར་བརྗོད། །ཕུང་པོ་དང་ནི་ཁམས་དང་ནི། །སྐྱེ་མཆེད་ཐམས་ཅད་དེ་ལས་འབྱུང༌། །འཇིག་རྟེན་སྐྱོང་བ་ཐམས་ཅད་དང༌། །ཚངས་སོགས་ལྷ་ཡི་སྐྱེ་གནས་དང༌། །ཁམས་གསུམ་པར་ནི་གྱུར་པ་ཀུན། །དེ་ཉིད་ལས་ནི་ངེས་པར་བྱུང༌། །སངས་རྒྱས་བྱང་ཆུབ་སེམས་དཔའ་དང༌། །དེ་བཞིན་ཁྲོ་བོའི་རྒྱལ་པོ་དག །
དེ་ཉིད་ལས་ནི་བྱུང་ནས་སུ། །དེ་ཉིད་དུ་ཡང་མྱ་ངན་འདས། །རིག་བྱེད་གྲུབ་མཐའ་མཐའ་དག་ཏུ། །སྙིང་པོ་གཅིག་པོར་རབ་ཏུ་གྲགས། །བདེ་བ་ཅན་དེ་ལྷ་རྫས་མཆོག །སངས་རྒྱས་རྣམས་ནི་ལྷག་པའི་གནས། །སངས་རྒྱས་ལྔའི་བདག་ཉིད་ཀྱི། །ལྷ་སོགས་འགྲོ་དྲུག་གནས་པ་ཀུན། །དེ་ཉིད་ལས་ནི་བྱུང་བ་སྟེ། །མ་ལུས་སངས་རྒྱས་གར་མཁན་ཡིན། །འདི་དེ་རྣལ་འབྱོར་རྒྱུད་དུ་ནི། །དེ་ཉིད་ངོ་བོ་མི་ཤིགས་པར། །སངས་རྒྱས་བྱེ་བ་སྙེད་རྣམས་ཀྱིས། །བཞེད་པ་གཅིག་གི་དུས་སུ་གསུང༌། །རི་རྒྱལ་ལྷུན་པོའི་རྡུལ་མཉམ་དང༌། །གང་གཱའི་བྱེ་མ་ལྟ་བུར་ནི། །ཀུན་ནས་ཏིལ་གྱི་གང་བུ་ལྟར། །མཁའ་དབྱིངས་ཞེས་གྲགས་འདི་ན་སྣང༌། །གང་གཱའི་བྱེ་མའི་གྲངས་སྙེད་ཀྱིས། །ཡོངས་སུ་གང་བའི་དེ་བཞིན་གཤེགས། །མཐའ་དག་རྣམས་ཀྱིས་རིགས་པ་འདིས། ། དེར་ནི་འདི་སྐད་གསུངས་པ་ཡིན། །དེ་ལ་བྷ་གར་ལིངྒ་ཞེས་སོགས་ཀྱི་ཚིག་འདི་རྣམས་ནི། དཔལ་ཁ་སྦྱོར་ཐིག་ལེའི་རྒྱུད་ལས་བྱུང་བ་སྟེ། འོན་ཀྱང་ཐབས་རྒྱུད་གསང་བ་འདུས་པའི་རྡོ་རྗེའི་ཚིག་གསལ་བར་བྱེད་པ་ཡིན་ནོ། །འདིར་རང་ལུས་ཀྱི་དབང་དུ་བྱས་ན་རྩ་འཁོར་རྣམས་ཀྱི་ལྟེ་བའི་བྷ་གར་ཡས་བབས་ཞུ་བདེའི་རང་བཞིན་གྱིས། ཐིག་ལེའི་ལིང་གར་རབ་ཏུ་བཞག་པ་དང༌། ཕྱི་རོལ་རྐྱེན་གྱི་དབང་དུ་བྱས་ན། ཀུན་རྫོབ་ཀྱི་བྷ་གར་ལིངྒ་རབ་ཏུ་བཞག་པ་སྟེ། དེ་གཉིས་འཛོམས་པ་ལས། སངས་རྒྱས་རྗེས་སུ་དྲན་པ་ལ་སོགས་རྗེས་དྲན་དྲུག སངས་རྒྱས་རྗེས་དྲན་དུ་བསྡུས་ཏེ་སྒོམ་པ་ནི། དཔེའི་ཡེ་ཤེས་ཡིན་ལ། དེ་ལས་ཐོག་མཐའ་དབུས་གསུམ་དུ་
སྐྱེ་འགག་གནས་གསུམ་གྱི་དྲི་མ་དང་བྲལ་བའི་དོན་གྱི་ཡེ་ཤེས་ཅི་ཞིག་ན་སྐྱེ་བར་འགྱུར་ཏེ། ཡེ་ཤེས་དེ་ནི་རང་གི་རིག་པས་ཉམས་སུ་མྱོང་བ་ལས། གཞན་རྟོག་གེ་ལ་སོགས་པས་མཚོན་ཅིང༌། བརྗོད་པར་ནུས་པ་མ་ཡིན་ནོ། །དེ་ལྟར་ཡང༌། གསང་བ་འདུས་པ་ལས། སངས་རྒྱས་རྗེས་སུ་དྲན་པ་དང༌། །ཆོས་ནི་རྗེས་སུ་དྲན་སྒོམ་པ། །སྐུ་དང་གསུང་དང་ཐུགས་རྣམས་སྒོམ། །རྡོ་རྗེ་རྗེས་སུ་དྲན་སྒོམ་པ། །རིགས་ནི་རྗེས་སུ་དྲན་པར་སྦྱོར། ཁྲོ་བོ་རྗེས་སུ་དྲན་སྒོམ་པ། །ལྷ་ནི་རྗེས་སུ་དྲན་པ་སྦྱོར། །བསྒོམ་ན་བྱང་ཆུབ་ཐོབ་པར་འགྱུར། །བུད་མེད་གཟུགས་ལྡན་མདངས་བཟང་བ། །ལོ་གྲངས་བཅུ་དྲུག་ལོན་པ་ལ། །བྱྀིན་གྱིས་བརླབས་ཀྱི་གནས་གསུམ་དུ། །དབེན་པར་མཆོད་པ་རབ་དུ་བརྩམས། །ཞེས་པ་ནས། འབར་བཅས་ཟླ་འོད་བཞིན་དུ་དཀར། །ཡིད་དུ་འོང་བ་བསྒོམ་པར་བྱ། །ཞེས་པའི་བར་དུ་གསུངས་ནས། གོང་དུ་བཤད་པའི་ལོངས་སྐུའི་རིམ་པ་དང༌། གསང་རིམ་གྱི་སྐབས་སུ་ཡང༌། སྤྲུལ་སྐུ་དང་ངོ་བོ་ཉིད་སྐུའི་སྐད་ཅིག་མ་རེ་རེ་སྦྱོར་བའི་ཚུལ་དུ་འདི་འབྱུང་ལ། ལས་རྒྱ་དང་མཉམ་པར་སྦྱར་བ་ལས། ཟླ་འོད་བཞིན་དུ་དཀར་བའི་བརྡས་མཚོན་པ། ཞུ་བདེ་འགྱུར་མེད་ཡོངས་སུ་གང་བར་བྱས་ཤིང༌། སངས་རྒྱས་རྗེས་སུ་དྲན་ཞེས་པ་སྤྱི་ལྡོག་ནས། དངོས་པོ་རྟོགས་ཕྱིར་སངས་རྒྱས་དང༌། །ཞེས་གསུངས་པ་ལྟར། དངོས་པོ་གཏུམ་མོ་དང་ཐིག་ལེའི་འབར་སྣང་གཙོ་བོར་གྱུར་པའི་རང་གི་དམིགས་ཡུལ་ཐམས་ཅད་མི་རྟོག་པའི་ཡེ་ཤེས་ཀྱིས་སྤྲོས་བྲལ་དུ་ཉམས་སུ་མྱོང་བ་སྐད་ཅིག་རེ་རེར་ཡང་ཡང་བསྐྱར་ཞིང་སྒོམ་པ་ནི་སངས་རྒྱས་རྗེས་དྲན་ནོ། །དེའི་ནང་ཚན་ལས་ཕྱེ་ན།
ལུས་ལས་བྱུང་བའི་བདེ་བའི་སྣང་བ་སྤེལ་ཞིང་སྤྲོས་བྲལ་དུ་འཇོག་པ་ལྷ་རྗེས་དྲན། ཡེ་ཤེས་ཉིད་ལ་གཟུགས་སྣང་སྤེལ་ཞིང༌། དེའི་རང་བཞིན་ཤེས་པ་སངས་རྒྱས་རྗེས་དྲན་ནོ། །དེ་བཞིན་དུ་སྦྱར་ཏེ། སྒྲར་སྣང་སྤེལ་བ་ཆོས། དཔེ་མཚོན་བྱེད་ཀྱི་བདེ་བ་དེས་རང་བཞིན་གསལ་བར་མཚོན་དུ་འཇུག་པ་རྡོ་རྗེ། ཀུན་རྫོབ་ཀྱི་འདོད་ཡོན་ལྔའི་སྣང་བ་ལ་ཡེ་ཤེས་ཀྱི་སྣང་བས་འགེབས་པ་ནི་རིགས། འདོད་ཆགས་ཆེན་པོས་བསྐུལ་ཞིང་དབྱིངས་སུ་བསྲེ་བ་ནི་ཁྲོ་བོ་རྗེས་དྲན་ནོ། །དྲུག་པོ་དེ་དག་སྐད་ཅིག་མ་རེ་རེར་ཚང་བར་བྱས་ཤིང་སྒོམ་པ་ནི་དཔེའི་ཡེ་ཤེས་མཐར་ཐུག་པ་ཡིན་ནོ། །འདི་ལ་ཡས་བབས་ཀྱི་དགའ་བཞི་ཕལ་པ་དང༌། དགའ་བཞིའི་ས་གཉིས་ཀར་ཡོད་ལ། མས་བརྟན་གྱི་དགའ་བའི་ས་མེད་ཀྱང་དགའ་བ་བཞི་དང་བཅུ་དྲུག་ནི་ཡང་ཡང་འོང་བས། མས་བརྟན་རྗེས་དྲན་བཅུ་དྲུག་གི་འདྲ་བའི་བཀོད་པ་ཙམ་འདི་ལ་ཡང་ཡོད་དོ། །འདི་ནི་ཞུ་བདེ་འཛག་མེད་ཁོ་ནའི་བདག་ཉིད་ཡིན་ལ། འདི་ཙམ་ཡང་དཔེའི་ཡེ་ཤེས་ཁོ་ན་ཡིན་གྱི། དོན་དམ་པར་མ་སླེབ་ན་ཕྲ་མོ་གཞན་རྣམས་ལྟ་སྨོས་ཀྱང་ཅི་དགོས་ཞེས་ཡས་མཐའ་བཟུང་བའི་ཚུལ་ལོ། །ཐོག་མ་དབུས་མཐའ་སོགས་ལ། ལེའུ་བཅོ་བརྒྱད་པ་ལས། ཨེ་མ་ཧོ་ཀུན་ཏུ་བཟང་པོ་ཡིས། །སྐུ་གསུང་ཐུགས་ཀྱི་ངེས་པ་དག །རྡོ་རྗེ་གསུམ་གྱི་ཀུན་ཏུ་ནི། །རྡོ་རྗེ་གསུམ་ལ་ཀུན་ཏུ་བཞུགས། །སེམས་ཅན་ཐམས་ཅད་དུས་གསུམ་གྱི། །རྡོ་རྗེའི་ངོ་བོར་ཡང་དག་བྱུང༌། །སངས་རྒྱས་རྡོ་རྗེ་རྫུ་འཕྲུལ་ཆེ། །བྱང་ཆུབ་རྡོ་རྗེའི་གནས་ཐོབ་པའོ། །ཨེ་མ་ཧོ་འདི་རབ་ངོ་མཚར་ཆེ། །
ཨེ་མ་ཧོ་དབང་པོ་ཞི་བ་འདས། །ཨེ་མ་ཧོ་འཁོར་བ་དག་གི་རྒྱུན། །ཨེ་མ་ཧོ་མཆོག་ཏུ་མྱ་ངན་འདས། །ཞེས་གསུངས་པ་སྟེ། །ཆོས་ཉིད་ཀུན་ཁྱབ་ཀུན་ཏུ་བཟང་པོའི་སྐུ་གསུང་ཐུགས། མཉམ་པ་ཉིད་དེ་སྐུ་གསུང་ཐུགས་ཀྱི་རྣམ་པས། སེམས་ཅན་རྣམས་ཀྱི་ལུས་ངག་ཡིད་གསུམ་ལ་བཞུགས་ཤིང༌། རྟག་བརྟན་གཡུང་དྲུང་དུས་ལས་གྲོལ་བ་དེ་ནི། དུས་གསུམ་གྱི་སེམས་ཅན་ཐམས་ཅད་ཀྱི་སྒོ་གསུམ་ལ་དབྱེར་མི་ཕྱེད་པ་ལྟར་ཁྱབ་པའི་ཚུལ་གྱི་ཡང་བྱུང་ངོ༌། །དེ་ཉིད་རྫུ་འཕྲུལ་ལམ་འབྱོར་པ་སྟེ། སངས་རྒྱས་ཀྱི་ཡོན་ཏན་ཐམས་ཅད་དང་ཡང་ལྡན་པའོ། །ལུས་ངག་ཡིད་གསུམ་གྱི་གདོད་མའི་གནས་ཚུལ་དེ་མངོན་དུ་གྱུར་པ་ལ་བྱང་ཆུབ་ཐོབ་པ་ཞེས་བྱ་ཞིང༌། དེ་ནི་སེམས་ཅན་རྣམས་ཀྱི་རྒྱུད་ལ་གནས་པའི་སྤྲོས་བྲལ་གྱི་སེམས་ཉིད་འདི་ཁོ་ན་ཡིན་ཏེ། དེ་ཡང་ལྷ་སྦྱིན་དང་ཡོན་ཏན་བཤེས་གཉེན་ལ་སོགས་པ་ལ་ཐ་དད་པར་ཡོད་པ་མ་ཡིན་ཏེ། འཁོར་འདས་བརྟན་གཡོ་ཐམས་ཅད་ལ་ཁྱབ་བྱེད་གཅིག་ཡིན་གྱི་གཉིས་པ་མེད་དོ། །དེའི་རང་བཞིན་ནམ་ཡང་རྟོགས་པར་དཀའ་བས། འཁོར་བ་བ་ལ་ཤིན་ཏུ་ལྐོག་ཏུ་འགྱུར་པའང་ཡིན་ལ། རྣམ་འགྱུར་གྱི་ཆ་ཤས་ཉམས་སུ་མྱོང་བས་མངོན་དུ་གྱུར་པའང་ཡིན། སེམས་ཅན་རྣམས་ལ་རྣམ་ཤེས་ཀྱི་རྒྱུད་སོ་སོར་སྣང་བ་བཞིན་དུ། དེ་ཡང་སོ་སོར་ཡོད་པ་ལྟར་སྣང་ཞིང༌། ཅུང་ཟད་ལྐོག་གྱུར་འཇལ་བྱེད་ཀྱི་བློ་རྗེས་སུ་དཔག་པས་ཀྱང་སོ་སོར་གྲུབ་པ་སྙམ་ན། ཉིན་མོའི་སྣང་བ་ལ་འདབ་ཆགས་འུག་པའི་མིག་ཤེས་བཞིན་དུ། རྗེས་དཔག་དང་སོ་སོ་སྐྱེ་བོའི་མངོན་སུམ་ནི་ཟབ་མོའི་གནས་འདི་ལ། རྟག་ཏུ་ཕྱོགས་བསླད་པ་ཡིན་ཏེ། དཔེར་ན་ལྷའི་དབང་པོའི་
བུད་མེད་དགུ་བཅུ་རྩ་གཅིག་དག་ནི། རང་རང་གི་སྣང་བ་ལ་བརྒྱ་བྱིན་ནི་བདག་ཉིད་ཁོ་ན་དང་རྩེ་བར་སེམས་པ་བཞིན་ནོ། །ཅི་སྟེ་དེ་དག་ཤིན་ཏུ་ཐ་དད་པར་འགྱུར་པ་ཡིན་ན་ནི། སངས་རྒྱས་རྣམས་ལ་འཕྲིན་ལས་རྒྱ་ཆེ་ཆུང་གི་ཁྱད་ཡོད་པར་འགྱུར་ཏེ། ད་ལྟ་དང་མ་འོངས་པའི་སངས་རྒྱས་རྣམས་ཀྱི་འཕྲིན་ལས་འདས་པའི་གདུལ་བྱ་ལམ་ཞུགས་པར་ཐལ་བའི་ཕྱིར་རོ། །འཕྲིན་ལས་ལ་ཁྱད་པར་ཡོད་ན་ནི་ཡེ་ཤེས་ལ་ཡང་ཁྱད་པར་ཡོད་པར་འགྱུར་རོ། །དེ་ལྟར་འཁོར་བའི་རྒྱུན་ལ་ཁྱབ་པའི་སེམས་ཉིད་དེ་ནི་མཆོག་ཏུ་མྱ་ངན་ལས་འདས་པ་སྟེ། ཞི་བདེ་ཡང་སོ་སོ་སྐྱེ་བོའི་དབང་པོའི་སྤྱོད་ཡུལ་ལས་འདས་པའོ། །འཁོར་བའི་རྒྱུན་ལ་ཁྱབ་པ་ལ་འཁོར་བའི་རྒྱུན་ཞེས་མིང་འདོགས་པ་ནི། བུར་ཤིང་གི་རྒྱུན་དང་བུ་རམ་གྱི་རྒྱུན་བཞིན་དུ་དབྱེར་མེད་དུ་འདྲེས་པ་ལྟར་སྣང་བ་དགོངས་སོ། །དོན་འདི་སྟོན་བྱེད་འདུས་པའི་རྒྱུད་ཉིད་ཀྱི་ཡང་ལེའུའི་གནས་སྐབས་ཐམས་ཅད་ན་བཞུགས་མོད་ཀྱི། ཧ་ཅང་མངས་པར་འགྱུར་བའི་ཕྱིར་མ་བྲིས་སོ། །ད་ནི་དཀྱུས་ལ་འཇུག་པར་བྱ་སྟེ། ནམ་མཁའི་དབྱིངས་ཀྱི་དབུས་གནས་པར། །ཟླ་བའི་དཀྱིལ་འཁོར་བསྒོམ་པར་བྱ། །ཞེས་བྱ་བ་ལ་སོགས་པ་གསང་བ་འདུས་པའི་རྒྱུད་དུ་གསུངས་པས་ཀྱང༌། དཔེ་དོན་གྱི་ཡེ་ཤེས་དེ་ཉིད་གསུངས་པ་ཡིན་ལ། དེ་བཞིན་དུ་རྗེས་དྲན་བཅུ་དྲུག་བསྟན་པས་ཀྱང༌། རྗེས་སུ་དྲན་པ་བཅུ་དྲུག་བདེ་བ་ཆེན་པོའི་ཐིག་ལེ། གནས་ཀྱི་ཁྱད་པར་ནམ་མཁའི་ཁམས་ན་གནས་པ་བསྟན་པས་ཀྱང༌། ཡེ་ཤེས་གཉིས་པོ་ཉིད་བསྟན་པའོ། །དེ་ལྟར་ཡང་
འདུས་པ་ལེའུ་དྲུག་པ་ལས། ནམ་མཁའི་དབྱིངས་ཀྱི་དབུས་གནས་པར། །ཟླ་བའི་དཀྱིལ་འཁོར་སྒོམ་པར་བྱ། །སངས་རྒྱས་གཟུགས་ནི་རབ་བསྒོམས་ནས། །ཕྲ་མོའི་སྦྱོར་བ་ཀུན་ཏུ་བརྩམ། །སྣའི་རྩེ་མོར་ཡུངས་ཀར་བསམ། །འགྲོ་དང་མི་འགྲོ་ཡུངས་ཀར་ལ། །ཡེ་ཤེས་གནས་ནི་ཉམས་དགའ་བ། །གསང་བའི་ཡེ་ཤེས་ཀྱིས་བརྟགས་སྒོམ། །ཞེས་གསུངས་ཤིང༌། དེ་བཞིན་དུ། ཉི་མའི་དཀྱིལ་འཁོར་དང༌། གསང་བའི་དཀྱིལ་འཁོར་དང༌། རིན་ཆེན་དཀྱིལ་འཁོར་དང༌། པདྨའི་དཀྱིལ་འཁོར་དང༌། འོད་ཀྱི་དཀྱིལ་འཁོར་སྒོམ་པ་སོགས་གསུངས་ཏེ། མཐར་ཨུཏྤལ་མཐིང་ཀའི་མདོག་འདྲ་བ། །རྩེ་མོ་ལྔ་པ་ཁྱད་པར་དུ། །ནས་ཀྱི་འབྲུ་ཙམ་ནན་ཏན་གྱི། །སྣའི་རྩེ་མོར་རྣམ་པར་བསམ། །ཙ་ན་ཀ་ཡི་འབྲུ་ཚད་ཙམ། །འདབ་མ་བརྒྱད་པ་གེ་སར་བཅས། །སྣའི་རྩེ་མོར་འདི་ཤེས་ཏེ། །བསྒོམས་པས་བྱང་ཆུབ་གཞོལ་བར་འགྱུར། །འཁོར་ལོ་ལ་སོགས་ཁྱད་པར་དུ། །བསྒོམ་པ་དེ་ནི་བརྟག་པར་བྱ། །དངོས་གྲུབ་ཐམས་ཅད་ཡོན་ཏན་གནས༌། །ཉམས་དགའ་བྱང་ཆུབ་གནས་འགྲུབ་འགྱུར། །སངས་རྒྱས་བྱང་ཆུབ་གནས་རྣམས་ནི། །དེ་རུ་མདོར་ན་སྤྲོ་བར་བྱ། །སྐུ་གསུང་ཐུགས་ཀྱི་མཚན་པ་ཡི། །ཆོས་ཀྱི་ཚིག་རྣམས་རབ་ཏུ་བརྗོད། ། ཅེས་གསུངས་པའི་དོན་ནི། །དཔེའི་ཡེ་ཤེས་ཀྱི་དབང་དུ་བྱས་ན། དྷཱུ་ཏཱིའི་མས་སྣ་རྡོ་རྗེ་ནོར་བུའི་མཁའ་དབྱིངས་སུ། ཟླ་བ་སྟེ་བྱང་ཆུབ་ཀྱི་སེམས་ཕྱིན་པའི་ཚེ། སངས་རྒྱས་ཀྱི་གཟུགས་དངོས་པོ་མེད་པའི་རང་བཞིན་སྒོམ་པ་དང༌། ཕྲ་མོའི་སྦྱོར་བ་སྟེ། གནས་དེར་རླུང་ཐིམ་པ་ན། ཡུངས་ཀར་ཏེ་ཐིག་ལེ་གཡོ་མེད་དུ་འགྱུར་ཞིང༌། འགྲོ་བ་རླུང་དང༌། མི་འགྲོ་བ་བདེ་བའི་སེམས། ཡུངས་
ཀར་ཐིག་ལེ་ལ་གནས་པ་ཡུན་རིང་དུ་སྒོམ་པར་བྱའོ། །ཉི་མའི་དཀྱིལ་འཁོར་ནི་སྟོང་ཉིད་དང༌། གསལ་བའི་དཀྱིལ་འཁོར་ལྷར་སྣང་དང༌། རིན་ཆེན་དཀྱིལ་འཁོར་བདེ་བ་ཉིད་དང༌། པདྨའི་དཀྱིལ་འཁོར་བདེ་བའི་རང་བཞིན་ཤེས་པས་མ་ཆགས་པ་དང༌། འོད་ཀྱི་དཀྱིལ་འཁོར་རླུང་གྱེན་དུ་གཡོ་བས་བཟུང་བ་དང༌། རིགས་ལྔའི་ཕྱག་མཚན་སྤྲོ་བ་ནི། མཐར་ཁམས་ལྔ་ཆར་གྱི་དྭངས་མ་མ་ཉམས་པར་མས་བརྟན་གྱི་ཚུལ་གྱིས་སྟེང་གི་འཁོར་ལོ་རྣམས་སུ་སྤྲོ་བའོ། །དོན་གྱི་ཡེ་ཤེས་ཀྱི་དབང་དུ་བྱས་ན། ཟླ་བ་དང༌། ཉི་མ་དང༌། གསལ་བ་དང༌། རིན་ཆེན་དང༌། པདྨ་དང༌། འོད་ཀྱི་དཀྱིལ་འཁོར་ཏེ་དྲུག་ཏུ་བཤད་པ་ན། ནོར་བུ་དང༌། ལྟེ་བ་སོགས་འཁོར་ལོ་བཞི་དང༌། དབུ་མའི་ཡས་སྣ་སྟེ། གནས་དྲུག་ན་གནས་པའི་ཐིག་ལེ་དྭངས་མའི་དབང་དུ་བྱས་པ་སྟེ། དེ་ཡང་ནམ་མཁའི་དབྱིངས་གནས་དེ་རྣམས་ཀྱི་དྷཱུ་ཏཱིའི་དབུས་སུ། ཡས་བབས་ཀྱི་དུས་སུ་ཞུ་བདེའི་བྱང་ཆུབ་ཀྱི་སེམས་བཅིངས། མས་བརྟན་གྱི་དུས་སུ། ཆོས་ཉིད་ཀྱི་ཐིག་ལེ་ལ་ཐིམ་པ་ནི། རྩའི་ནམ་མཁར་ཟླ་བ་སོགས་སྒོམ་པའི་དོན་ཡིན་ལ། སངས་རྒྱས་ཀྱི་གཟུགས་དང༌། སྤྱན་གྱི་ཚུལ་དང༌། གསུང་རྡོ་རྗེའི་ཚུལ་དང༌། འཁོར་ཁྱད་པར་དུ་སྤྲོ་བ་སོགས་ནི། ཡེ་ཤེས་ཀྱི་ལྷར་སྣང་རབ་འབྱམས་དང༌། ཇི་ལྟ་ཇི་སྙེད་པའི་ཤེས་པ་དང༌། གཞོམ་མེད་ཀྱི་སྒྲ་དང་སྤྲུལ་པ་ལ་སོགས་པའི་དོན་ནོ། །ཕྲ་མོའི་སྦྱོར་བ་ནི་ལས་རླུང་ཐིམ་པ་དང༌། ཡུངས་ཀར་བསམ་པ་ནི་ཞུ་བདེ་བཅིང་བ་དང༌། འགྲོ་དང་མི་འགྲོ་སོགས་ནི། ཐིག་ལེ་ཡེ་ཤེས་སུ་གྱུར་པའི་
ཚེ། རྣམ་པ་ཐམས་ཅད་པའི་དཀྱིལ་འཁོར་དུ་གྱུར་པ་དང༌། རིགས་ལྔའི་ཕྱག་མཚན་སྤྲོ་བ་ནི། དབུ་མའི་ཡས་སྣར་རླུང་དང་ཐིག་ལེ་ཐིམ་པ་ན། ཕུང་ཁམས་སྐྱེ་མཆེད་ཐམས་ཅད་འོད་གསལ་གྱི་ཡེ་ཤེས་རབ་འབྱམས་སུ་གནས་གྱུར་པའོ། །དེས་ནི་འདི་ལྟར་བསྟན་པར་འགྱུར་ཏེ། ཆོས་ཉིད་དོན་གྱི་ཡེ་ཤེས་གསང་བ་གསུམ་གྱི་མཚན་ཉིད་ཅན་དེ། རྐྱེན་དབུ་མའི་ནམ་མཁར་ཐིག་ལེ་རྟག་ཏུ་བཅིངས་པའི་ནུས་པ་མཐར་ཕྱིན་པ་ན། རྩ་རླུང་ཐིག་ལེ་རྣམས་ཆ་ཤས་ཆ་ཤས་ནས། འོད་གསལ་དུ་ཇི་ཙམ་ཐིམ་པ་དེ་ཙམ་དུ། གནས་ལུགས་ཀྱི་ཡེ་ཤེས་ཇེ་གསལ་ཇེ་གསལ་དུ་འགྱུར་རོ་ཞེས། དོན་གྱི་ཡེ་ཤེས་དེ་རྟོགས་བྱེད་ཀྱི་ཐབས་ཐུན་མོང་མ་ཡིན་པ་དང་བཅས་པ་བསྟན་པ་ཡིན་ཅིང༌། གནས་དྲུག་པོ་ལ་གཉིས་གཉིས་སུ་ཕྱེ་བས། གསང་རིམ་བཅུ་གཉིས་དང་སྦྱར་བ་དང་དོན་གཅིག་པའོ། །རྗེས་དྲན་བཅུ་དྲུག་ནི་ལེའུ་བདུན་པ་ལས་གསུངས་པ་སྟེ། སངས་རྒྱས། ཆོས་རྡོ་རྗེ། རིགས་རྗེས་དྲན་ཏེ་བཞི་ནི་མགྲིན་པ་ནས་སྤྱི་བོའི་བར་ལྷན་སྐྱེས་ཀྱི་ས་བཞི་དང༌། ཁྲོ་བོ་དམ་ཚིག་དཀྱིལ་འཁོར། སྔགས་ཐམས་ཅད་ཀྱི་སྒོ་གསུམ་རྗེས་དྲན་ནི། སྙིང་ག་ནས་མགྲིན་པའི་བར་ཁྱད་དགའི་ས་བཞི་དང༌། སྐུ་དང༌། གསུང་དང༌། ཐུགས་དང༌། སེམས་ཅན་རྗེས་དྲན་ནི། ལྟེ་བས་ནས་སྙིང་གའི་བར་མཆོག་དགའི་ས་བཞི་དང༌། དམ་ཚིག་གཉིས་པ་དང༌། ཤེར་ཕྱིན་གྱི་དམ་ཚིག་དང༌། མ་སྐྱེས་པ་དང༌། ཞེ་སྡང་གི་རིགས་ཀྱི་མཆོད་པ་རྗེས་སུ་དྲན་པ་རྣམས་ནི། གསང་བ་ནས་ལྟེ་བའི་བར་དགའ་བའི་ས་བཞིའོ། །དེ་ལ་དམ་ཚིག་གཉིས་པ་རྗེས་དྲན་ནི། ཞུ་བདེ་ནོར་བུའི་བར་གྱི་རྩ་ནང་དུ་བྱུང་ཞིང༌། སྟོང་པར་ཡང་ཡང་གསོད་པ་དང༌། ཤེར་ཕྱིན་གྱི་དམ་ཚིག་ནི། སྟོང་པ་ཁོ་ན་
ལ་དམིགས་པ་དང༌། མ་སྐྱེས་པ་ནི། སྟོང་པ་དང་བདེ་བ་རོ་གཅིག་ཏུ་བསྲེ་བ་དང༌། ཞེ་སྡང་གི་རིགས་མཆོད་ནི། ཐབས་ཤེས་ཀྱི་ཐིག་ལེ་ཁ་སྦྱོར་ལ་སྔར་བཞིན་སྒོམ་པ་སྟེ་རྐྱེན་དེ་རྣམས་ལ་བརྟེན་ནས། སྐུ་དང་གསུང་དང་ཐུགས་དང་བདེ་བའི་ཡེ་ཤེས་ཀྱི་སྣང་བ་རབ་འབྱམས་སུ་མཆེད་པ་ནི། རྗེས་དྲན་གྱི་དོན་ཡིན་ཏེ། སྐུ་གསུང་ཐུགས་དང་བདེ་བའི་སྣང་བ་མཆེད་པའི་ཕྱིར། རིམ་པ་བཞིན་དགའ་བའི་དགའ་བ་སོགས་རིམ་པ་བཞིའི་མཐར་འཇོག་ལ། སྣང་བ་སྣ་ཚོགས་པ་སྤྲོ་བའི་ཕྱིར་རྗེས་དྲན་ནོ། །དེ་བཞིན་དུ་ལྟེ་བ་ཡན་ཆད་དུ་གཏུམ་མོའི་འབར་སྣང་དང་བླ་ལྷག་ཏུ་འདྲེས་པས། རིགས་ལྔ་སོགས་ལྷ་སྐུའི་དཀྱིལ་འཁོར་རབ་འབྱམས་དང༌། སངས་རྒྱས་ཀྱི་གསུང་དང་ཐུགས་ཀྱི་རྣམ་པ་རྗེས་མཐུན་པ་དང༌། སེམས་ཅན་རྣམས་ཀྱི་ལུས་ངག་ཡིད་གསུམ་དབྱེར་མེད་དུ་རྟོགས་པ་བཞི་པོ་སྐུ་རྗེས་དྲན་ལ་སོགས་པ་བཞི་དང་རིམ་པ་བཞིན་དུ་སྦྱོར་ཏེ། མཆོག་དགའི་དགའ་བ་ལ་སོགས་པ་བཞིར་སྦྱོར་བའི་རྒྱུ་མཚན་དང༌། རྗེས་དྲན་དུ་འཇོག་ཚུལ་གོང་དང་འདྲའོ། །དེ་བཞིན་དུ་མགྲིན་པའི་ཨོཾ་དང་འདྲེས་པས། ངག་ཚིག་གི་རྣམ་རྟོག་ཤིན་ཏུ་འགགས་པའི་ཕྱིར། ཁྲོ་བོ་དང༌། ལྟེ་བ་དང༌། མགྲིན་པའི་གཏུམ་མོ་འབར་བ་གཉིས་འཛོམས་པས། ཞུ་བའི་ཐིག་ལེ་ལྷག་པར་དམར་ཆད་དང་འདྲེས་པ་དང༌། དེ་ཉིད་དུས་ཀྱི་མེའི་ཐིག་ལེར་གྱུར་པས། དཀྱིལ་འཁོར་གྱི་སྣང་བ་སྔར་ལས་ཆེས་མཆེད་པ་དང༌། སྐུ་གསུང་ཐུགས་ཀྱི་སྣང་བ་གསུམ་རོ་མཉམ་དུ་རྟོགས་པར་གྱུར་པ་སྟེ། ཁྲོ་བོ་དམ་ཚིག་དཀྱིལ་འཁོར། སྔགས་ཀྱི་སྒོ་གསུམ་རྗེས་དྲན་ཏེ། རྒྱུ་མཚན་གཉིས་སྔར་བཞིན་
ལས་སྐུ་དང་གསུང་ཕན་ཚུན་རྒྱས་བཏབ་པའི་ཁྱད་པར་རོ། །སྐུ་དང་གསུང་དང་ཐུགས་ཀྱི་སྣང་བ་དང༌། འཕྲིན་ལས་ཀྱི་སྣང་བ་རྣམས། མཐར་ཐུག་པའི་ཚུལ་དུ་བཤད་པ་ནི། སངས་རྒྱས་རྗེས་དྲན་ལ་སོགས་པ་བཞི་སྟེ། རྒྱུ་མཚན་གཉིས་པོ་སྔ་མ་དང་འདྲའོ། །རྗེས་དྲན་འདི་རྣམས་མཐར་ཕྱིན་པས་ཟུང་འཇུག་གི་སྐུ་འགྲུབ་པའི་ཕྱིར། འདི་ནི་དེ་བཞིན་གཤེགས་པའི་སྐུ། །རྡོ་རྗེ་འཛིན་པའི་ཐུགས་དང་ནི། །ཆོས་འཛིན་མཆོག་གི་གསུང་དག་ཀྱང༌། །ཚེ་འདི་ཉིད་ལ་འགྲུབ་པར་འགྱུར། །སྐུ་དང་གསུང་དང་ཐུགས་ཀྱང་འགྲུབ། །གང་གཞན་ཕྲ་མོར་བཤད་པ་རྣམས། །རྡོ་རྗེ་མི་ཕྱེད་གསུམ་བསྒོམས་ཏེ། །བཟླས་པ་ཙམ་གྱིས་དེ་འགྲུབ་འགྱུར། །ཞེས་གསུངས་སོ། །འདི་དག་ལ་བརྗོད་པར་བྱ་བ་ཤིན་ཏུ་མང་མོད་དེ། ཟུར་མཚོན་ཙམ་མོ། །དེ་ལྟར་ན། རགས་པའི་རྩ་ནང་གི་མཁའ་ཁམས་ལ་ཞུ་བདེའི་ཐིག་ལེ་ཟིན་པ་ལ་བརྟེན་པའི་མས་བརྟན་རྗེས་དྲན་བཅུ་དྲུག་རྗེས་མཐུན་པ་ནི་དཔེའི་ཡེ་ཤེས་ཡིན་ལ། ཡེ་ཤེས་ཀྱི་སྣང་བའི་རྩ་དང༌། སྟོང་པ་རྣམ་པ་ཐམས་ཅད་པའི་མཁའ་ཁམས་སུ་ཐ་མལ་པའི་རྩ་རླུང་ཐིག་ལེ་རྣམས་ཡེ་ཤེས་ཀྱི་གཏུམ་མོ་དང༌། བདེ་བ་ཆེན་པོའི་ཐིག་ལེར་རོ་མཉམ་པར་འགྱུར་པའི་མས་བརྟན་རྗེས་དྲན་བཅུ་དྲུག་ནི་དོན་གྱི་ཡེ་ཤེས་སོ། །དེ་ཡང་གོང་དུ་སྨོས་པ་ལྟར་དོན་གྱི་ཡེ་ཤེས་དངོས་ནི་ཆོས་ཉིད་ཡིན་ཡང༌། དེ་ཉིད་དག་པ་གཉིས་ལྡན་གྱི་ཚུལ་དུ་རྟོགས་པའི་ཐོག་མ། མས་བརྟན་རྗེས་དྲན་གྱི་ས་དང་པོ་ནས་ཡིན་པས། མ་མཐའ་ནས་ངོས་བཟུང་བ་ཡིན་ནོ། །འཕགས་པའི་ས་རྣམས་ཀྱང༌། ས་བཅུ་གཉིས་དང་བཅུ་དྲུག་གི་རབ་ཏུ་དབྱེ་བ། གསང་
རིམ་གྱི་སྐབས་འདི་དག་དང་འདྲ་བའི་ཕྱིར། རྣམ་གཞག་ལོགས་སུ་མ་བྱས་མོད་ཀྱི། འདི་བསྟན་པས་དེ་ཡང་ཤུགས་ལ་གོ་བར་དགོངས་ལ། དེའི་ཕྱིར་དོན་གྱི་ཡེ་ཤེས་ལམ་གྱིས་བསྡུས་པ་ཐམས་ཅད་རྗེས་དྲན་བཅུ་དྲུག་གམ། དཀྱིལ་འཁོར་དྲུག་གི་སྤྲོ་བའི་ནང་དུ་འདུས་པར་ཤེས་པར་བྱའོ། །དེ་ལྟར་ན་ཕྱི་ཤེས་རབ་མའི་བྷ་ག་དང༌། ནང་རྩའི་བྷ་ག་དང༌། མཐར་ཐུག་དེ་ཁོ་ན་ཉིད་སྟོང་པ་ཆེན་པོའི་བྷ་ག་ནམ་མཁའི་ཁམས་དེ་རྣམས་ནི། རིམ་བཞིན་ཞུ་བདེ་ཁོ་ན་དང༌། གཉིས་ཀ་དང༌། རང་བཞིན་ཁོ་ནའི་བདེ་བ་ཆེན་པོ་འབྱུང་བའི་གནས་ཡིན་པའི་ཕྱིར། བདེ་བ་ཅན་ཞེས་མངོན་པར་བརྗོད་དོ། །དེ་ལྟར་སྒྲ་བཤད་ཚང་བར་མ་ཟད། དེ་རྣམས་དག་པའི་རང་སྣང་ལས་སངས་རྒྱས་ཐམས་ཅད་ཀྱི་ཞིང་ཁམས་བདེ་བ་ཅན་བྱུང་བའམ་ཡིན་པས། འབྲེལ་བ་རྒྱུ་མཚན་དུ་བྱས་པ་ཡིན་ནོ། བདེ་ཆེན་དང་ནམ་མཁའ་ཟུང་དུ་འཇུག་པ་དེ་ཉིད་འཁོར་བ་ཐམས་ཅད་ཀྱི་གཞིར་བསྟན་པ་ནི། ཕུང་པོ་དང་ནི་སོགས་ཏེ། ཆོས་གསུམ་དང་འགྲོ་བ་ཐམས་ཅད་བྱུང་བར་བསྟན་ཏོ། །སངས་རྒྱས་ཀྱི་གཞིར་བསྟན་པ་ནི། སངས་རྒྱས་བྱང་ཆུབ་སེམས་དཔའ་སོགས་ཏེ། མྱ་ངན་འདས་ཞེས་པ་ནི། དེའི་རང་བཞིན་དུ་གནས་པ་ཡིན་གྱི། ཞིག་པ་ནི་མ་ཡིན་ནོ། །དེ་ཉིད་གྲུབ་མཐའ་ཐམས་ཅད་ཀྱི་བརྗོད་བྱར་བསྟན་པ་ནི། རིག་བྱེད་སོགས་ཏེ་གྲུབ་མཐའ་ཐམས་ཅད་ཀྱང་ཟུང་འཇུག་འདི་ལ་དམིགས་ནས་སྟོན་པའི་དོན་ནོ། །དོན་དམ་པའི་བདེ་བ་ཅན་དེ་ནི། ཡེ་ཤེས་ཀྱི་སྣང་བའི་ཡིད་དུ་འོང་ཞིང༌། མཆོག་ཏུ་བཀྲ་བའི་རྣམ་པ་འཛིན་པའི་ཕྱིར་ལྷ་རྫས་
ཡིན་ལ། དེ་ནི་སངས་རྒྱས་ཉིད་དང་ངོ་བོ་དབྱེར་མེད་ཀྱང༌། རྟེན་གྱི་ཚུལ་དུ་སངས་རྒྱས་རྣམས་ཀྱི་ལྷག་པའི་གནས་ཏེ་མཆོག་གི་གནས་སུ་བཞག་གོ །ཡེ་ཤེས་ལྔ་ནི་རྟེན་པའི་ཚུལ་གྱིས་དེར་བཞུགས་པའི་སངས་རྒྱས་ཡིན་ལ། །དེའི་བདག་ཉིད་དེ་རྣམ་འཕྲུལ་ལས་བྱུང་བ། ལྷ་སོགས་འགྲོ་དྲུག་གནས་པ་སྟེ་དོན་དམ་སྲིད་གསུམ་ཀུན་ཡང༌། བདེ་བ་ཆེན་པོ་དེ་ཉིད་ལས་རྣམ་འགྱུར་གྱི་ཚུལ་དུ་བྱུང་བ་ཡིན་ཏེ། མ་ལུས་པ་དེ་དག་སངས་རྒྱས་གར་མཁན་ལྟ་བུའི་རྣམ་འགྱུར་རོ། །དེ་ལ་གར་མཁན་ནི། སྐྱེས་བུ་གཅིག་ཉིད་འབག་དང་གོས་དང་ཆ་བྱད་སྣ་ཚོགས་པར་བསྒྱུར་ཡང་ངོ་བོ་གཅིག་ལས་མི་འདའ་བ་བཞིན་ནོ། དེ་དག་ཀྱང་རྩ་བ་གདོད་མའི་ཡེ་ཤེས་གཅིག་ཉིད། སངས་རྒྱས་ཀུན་འདུས་རྣམ་པ་ཀུན་ལྡན་ངོ་བོ་བདེ་ཆེན་འགྱུར་མེད་ཡིན་པ་ལ་ཐུག་ལ། དོན་འདི་དེ་དཔལ་གསང་བ་འདུས་པ་རྣལ་འབྱོར་ཆེན་པོའི་རྒྱུད་དུ་ནི། ཡེ་ཤེས་དེ་ཉིད་ངོ་བོ་མི་ཤིགས་པ་སྟེ། རྟག་པ་འགྱུར་མེད་གཞོམ་དུ་མེད་པར། སངས་རྒྱས་བྱེ་བ་རྙེད་དེ། མང་ཞིང་ཆེས་མང་བ་རྣམས་ཀྱི་བཞེད་པ་སྟེ། དགོངས་པ་གཅིག་པ་དང༌། དབྱངས་གཅིག་གིས། དུས་རྟག་ཏུ་གསུངས་ཏེ། ལེའུ་གཉིས་པ་བྱང་ཆུབ་སེམས་ཀྱི་ལེའུ་ཐམས་ཅད་དང༌། ལེའུ་ལྔ་པར་དེ་བཞིན་གཤེགས་པ་ཐམས་ཅད་ངོ་མཚར་དུ་གྱུར་ནས། །སྐུ་དང་གསུང་ཐུགས་རབ་ཏུ་དག །ནམ་མཁའ་དང་ནི་མཉམ་ཉིད་གནས། །རྣམ་པར་མི་འགྱུར་སྣང་བ་མེད། །རྡོ་རྗེ་སྐུ་ལ་ཕྱག་འཚལ་འདུད། །ཅེས་སྐུ་ལ་མ་དག་པའི་སྣང་བ་མེད་པ་དང་རྟག་པར་གསུངས་ཤིང༌། ཐུགས་ནི་དེ་བཞིན་གཤེགས་པའི་གཙོ། །དུས་གསུམ་དག་གི་ལམ་དུ་འབྱུང༌། །
ནམ་མཁའ་ཆེན་པོའི་དབྱིངས་གྱུར་པ། །ནམ་མཁའི་ལམ་ལ་ཕྱག་འཚལ་འདུད། །ཅེས་ཐུགས་ནམ་མཁའ་ལྟ་བུར་སྤྲོས་བྲལ་དེ་ཉིད། དུས་གསུམ་ཤེས་བྱ་ཀུན་གྱི་ཚུལ་དུ་འབྱུང་བར་བསྟན་ཅིང༌། གཞན་ཡང༌། དེ་ནས་རྒྱལ་པོ་རྡོ་རྗེ་འཛིན། །ཐམས་ཅད་ནམ་མཁའ་མི་འགྱུར་ཆེ། །ཞེས་པ་ལ་སོགས་པས་མི་ཤིགས་པ་སྟེ། འགྱུར་མེད་རྣམ་པ་ཐམས་ཅད་པ་དེ་ཡང་ཡང་གསུངས་ལ། དེ་བཞིན་དུ་རི་རྒྱལ་ལྷུན་པོའི་རྡུལ་གྱི་གྲངས་དང་མཉམ་པའམ། གང་གཱའི་བྱེ་མ་དང་མཉམ་པ་ལྟ་བུར་ཆེས་མང་བའི་སངས་རྒྱས་རྣམས་ཀྱིས་ནམ་མཁའི་དབྱིངས་འདི། ཀུན་ནས་ཏིལ་གྱི་གང་བུ་ལྟར་གོ་མཚམས་མེད་པར་གང་ངོ་ཞེས་གསུངས་པ་ཡང༌། མཁའ་ཁམས་དང་ཐིག་ལེ་འདི་ལ་སངས་རྒྱས་ཐམས་ཅད་གདོད་མ་ནས་བཞུགས་པའི་དོན་ནོ། །དེ་ཡང་དཔལ་འདུས་པའི་གླེང་གཞིའི་ཡི་གེའི་ཚིག་རྣམས་སོང་བའི་རྗེས་སུ། དམ་ཚིག་སེམས་དཔའ་ལ་སོགས་པའི་བྱང་ཆུབ་སེམས་དཔའ་ཞིང་གི་རྡུལ་རྙེད་དང༌། སངས་རྒྱས་མཁའ་དབྱིངས་དང་མཉམ་པ་རིགས་ལྔ་ལ་སོགས་པའི་འཁོར་གྱི་རྣམ་གྲངས་གསུངས་ནས། དེ་དག་ལ་སོགས་པ་ནམ་མཁའི་དབྱིངས་ཐམས་ཅད་དང་མཉམ་པའི་དེ་བཞིན་གཤེགས་པ་རྣམས་དང་ཐབས་གཅིག་ཏུ་བཞུགས་པ་ནི། འདི་ལྟ་སྟེ། དཔེར་ན་ཏིལ་གྱི་གང་བུ་བཞིན་དུ། དེ་བཞིན་གཤེགས་པ་ཐམས་ཅད་ཀྱིས་ནམ་མཁའི་དབྱིངས་ཐམས་ཅད་ཤིན་ཏུ་གང་བར་གྱུར་ཏོ། །ཞེས་གསུངས་པ་འདིའི་དོན་ཏེ། མཁའ་དབྱིངས་སངས་རྒྱས་ཀྱིས་གང་བ་ནི་སེམས་ཉིད་སངས་རྒྱས་
ཀུན་འདུས་ཡིན་པའི་དོན་དེའི་གང་གཱའི་བྱེ་མ་གྲངས་སྙེད་ཀྱི་མཁའ་དབྱིངས་ཡོངས་སུ་གང་བའི་དེ་བཞིན་གཤེགས་པ་མཐའ་དག་རྣམས་ཀྱི་སྤྲོས་བྲལ་རྣམ་པ་ཐམས་ཅད་པར་འཆར་པའི་རིགས་པ་འདི་ཉིད་ཐུགས་ལ་བཞག་ནས། གསང་བ་འདུས་པའི་རྒྱུད་ཀྱི་ཐོག་མ་དེར་ནི། འདི་སྐད་དེ་ཨེ་ཝཾ་གསུངས་པ་ཡིན་ནོ། །དེས་ན་མི་ཤིགས་པའི་བདེ་བ་དེ་ནི་ཝཾ་ཡིན་ལ། སངས་རྒྱས་ཀུན་ལྡན་གྱི་མཁའ་ཁམས་དེ་ནི་ཨེ་ཡིག་གོ །གསུམ་པ་ནི། དཔེར་ན། ཡུངས་མར་གྱིས་བསླན་སྡོང་བུ་ནི། །མར་མེའི་རྩེ་མོའི་རྒྱུན་ནི་རབ་ཏུ་འཇུག །དེ་ནི་ཡུངས་མར་སྡོང་བུ་ཟད་དུས་འགྱུར། །ཞི་བར་གྱུར་ཏེ་ཡེ་ཤེས་འདི་དེ་བཞིན། །ཡུངས་མར་སྡོང་བུ་གང་ཞིག་རྩེའི་རྒྱུན་གང༌། མར་མེའི་ལུས་གང་མེ་ཡི་དངོས་པོ་གང༌། །སྣང་བའི་ངོ་བོའམ་ཡང་ན་མུན་པ་སྟེ། །དེ་ལ་སོགས་པ་ལེགས་པར་རྟོགས་པར་གྱིས། །དཔེར་ན་གཙུབ་ཤིང་གཙུབ་གཏན་ལག་པ་ཡི། །རྩོལ་བ་ལ་བརྟེན་མེ་ཡི་རྩེ་དམིགས་པ། །བརྟགས་ན་གཙུབ་ཤིང་སོགས་ལ་ཡོད་མ་ཡིན། །དེ་བཞིན་འགྲོ་བ་གཡོ་ལ་སོགས་པའོ། །འགྲོ་བ་མཐའ་དག་སོ་སོར་སྣང་བ་ཙམ། །བདེ་སོགས་ངོ་བོ་མ་བརྟགས་ཉམས་དགའ་བ། །འདི་སྐད་བདག་གིས་ཞེས་བྱ་ལ་སོགས་དག །བསམ་མི་ཁྱབ་སྟེ་ཇི་ལྟ་དེ་ལྟའོ། །ཞེས་ཏེ། འོ་ན་ལམ་བསྒོམས་པས་འཁོར་བ་འགག་པའི་ཕྱིར། མ་འགགས་གོང་དུ་འཁོར་བ་གནས་ཚུལ་དུ་ཡོད་པ་མ་ཡིན་ནམ། བདེ་བ་དང་རྣམ་པ་ཐམས་ཅད་ལ་འཁྲུལ་པ་ཙམ་འཁོར་བ་མ་ཡིན་ནོ་སྙམ་ན། དཔེར་ན་ཡུངས་མར་གྱིས་བསླན་པའི་སྡོང་བུ་ནི། མེ་སྤར་ན།
ཡུངས་མར་དང་སྡོང་བུ་ཡོད་ཀྱི་བར་དུ། མར་མེའི་རྩེ་མོ་སྟེ་མེ་ལྕེའི་རྒྱུན་དེ་རབ་ཏུ་འདུག་ལ། ནམ་ཞིག་ཡུངས་མར་དང༌། སྡོང་བུ་ཡོངས་སུ་ཟད་པར་འགྱུར་པའི་དུས་སུ་ནི། མེ་ལྕེ་ཡང་ཞི་ཞིང་མནལ་བར་འགྱུར་ཏེ། དེ་བཞིན་དུ་རྣམ་ཤེས་འདི་ཡང་འཁྲུལ་པའི་རྒྱུ་ཚོགས་ཀྱི་སྣང་བ་ཡོད་ཀྱི་བར་དུ། འཁོར་བ་སྣང་ལ། རྒྱུ་ཚོགས་དེ་ཡང་ནམ་ཞིག་པ་ན་འཁོར་བ་མི་སྣང་ངོ༌། །འོ་ན་རྒྱུ་ལས་བྱུང་བའི་ཕྱིར་བདེན་ནོ་སྙམ་ན་འཁྲུལ་པའི་རྒྱུ་ལས་འཁྲུལ་པའི་འབྲས་བུ་བྱུང་བ་སྟེ། རྒྱུ་ཡུངས་མར་དང་སྡོང་བུ་ཡང་གང་ཞིག་ཡོད་དེ། གཅིག་ཏུ་བྲལ་གྱི་རིག་པ་ལྟ་བུས་བཙལ་ན་མེད་ལ། འབྲས་བུ་རྩེ་མོ་སྟེ་མེ་ལྕེའི་རྒྱུན་ཡང་གང་ལས་སྐྱེ་རྣམ་པར་བརྟགས་ན་སྐྱེ་བ་མི་འགྲུབ་ཅིང༌། རྒྱུན་ལ་བརྟགས་ནའང་རྒྱུན་དེ་རིགས་པས་མི་འགྲུབ་བོ། །དེ་བཞིན་དུ་མར་མེའི་ལུས་ཏེ། གཟུགས་དབྱིབས་དང༌། མེའི་དངོས་པོ་ཚ་བ་སོགས་ཀྱང་བརྟགས་ན་གང་ཞིག་ཡོད་ཏེ་མེད་དོ། །དེ་བཞིན་དུ་སྣང་བ་དང་མུན་པ་ཡང་བློས་བཏགས་པ་ཙམ་ཡིན་གྱི། ངེས་པར་མ་གྲུབ་སྟེ། དེ་ལ་སོགས་པ་ཀུན་རྫོབ་འཁོར་བའི་ཆོས་ཐམས་ཅད་བདེན་མེད་དུ་ལེགས་པར་རྟོགས་པར་གྱིས་ཤིག དཔེར་ན་གཙུབ་ཤིང་དང་གཙུབ་གཏན་དང༌། སྐྱེས་བུའི་ལག་པའི་རྩོལ་བ་ལ་བརྟེན་ནས། མེའི་རྩེ་དམིགས་ཤིང་མཐོང་བར་འགྱུར་ཡང༌། བརྟགས་ན་གཙུབ་ཤིང་ལ་སོགས་པ་རེ་རེ་ལ་མེ་ཡོད་པ་མ་ཡིན་ཞིང༌། རེ་རེ་མ་ཡིན་པའི་ཚོགས་པ་ཡང་མི་འགྲུབ་སྟེ། གང་ལས་ཀྱང་མ་བྱུང་བས་བྱུང་བར་སྣང་བ་ནི་འཁྲུལ་པའོ། །དེ་བཞིན་དུ་སྣོད་བཅུད་ཀྱི་འགྲོ་བ་དང༌། སྐྱེ་འཇིག་ལ་སོགས་པའི་གཡོ་བ་ཡང༌། མེད་སྣང་འཁྲུལ་པའི་
རྒྱུ་ཚོགས་ལས། མེད་སྣང་འཁྲུལ་པའི་འབྲས་བུ་བྱུང་བ་ཡིན་ལ། དེ་ལས་དེ་བྱུང་བའམ་འཁྲུལ་པའོ། །དེའི་ཕྱིར་འགྲོ་བ་མཐའ་དག་རྣམ་ཤེས་ལ་སོ་སོར་སྣང་བ་ཙམ་ཡིན་ཅིང༌། ཚོར་བ་བདེ་བ་ལ་སོགས་པ་བདེ་སྡུག་མྱོང་བ་ཀུན་ཡང༌། མ་བརྟགས་གཅིག་པུར་ཉམས་དགའ་བ་ཙམ་ཡིན་གྱི། བརྟགས་ན་ངོ་བོས་མེད་དོ། །དེ་བས་ན་ཇི་ཙམ་རྣམ་པར་ཤེས་པའི་ཡུལ་དུ་གྱུར་པ་ཐམས་ཅད་ཡོད་པ་མ་ཡིན་ཀྱང༌། འདི་སྐད་བདག་གིས་ཞེས་པ་ལ་སོགས་པའི་ངག་གིས་བསྟན་དོན། བསམ་མི་ཁྱབ་པའི་ཡེ་ཤེས་དེ་ནི་ཇི་ལྟ་བའི་གནས་ལུགས་ལ་དེ་ལྟར་གནས་ཤིང༌། བདེན་པར་གྲུབ་པ་མི་བསླུ་བ་མི་འགྱུར་བའོ། །མར་མེ་དང་གཙུབ་ཤིང་གི་དཔེ་འདི་དག་གིས་ལྷན་ཅིག་སྐྱེས་པ་དོན་གྱི་ཡེ་ཤེས་བདེན་མེད་དུ་བསྟན་པར་འདོད་པ་ནི། གཞུང་གི་སྔ་ཕྱིའི་བབས་མ་གོ་བར་མ་ཟད། ཚིག་རྐང་ཐ་མ་འདི་གཉིས་ཀྱི་དོན་ཡང་མ་གོ་བའི་བབ་བཅོལ་ལོ། ། ལེའུའི་མཚན་བསྟན་པ་ནི། གསང་བའི་དེ་ཁོ་ན་ཉིད་རབ་ཏུ་གསལ་བ་ལས་རྣམ་པར་ཤེས་པའི་ངོ་བོ། ཀུན་རྫོབ་པ་རྐྱེན་ལས་འབྲེལ་ཏེ་འབྱུང་བ་སོ་སོར་སྣང་བ་ཙམ་བསམ་གྱིས་མི་ཁྱབ་པ་ཉིད། འདི་སྐད་བདག་གིས་ཞེས་པ་ལ་སོགས་རྣམ་པས་བཤད་པ་བསྟན་པ་སྟེ་གསུམ་པའོ། །ཞེས་པ་སྟེ་ཀུན་རྫོབ་རྟེན་འབྲེལ་ནི་སྤྱི་ལྡོག་ནས་ཀྱང་བསྟན་ལ། ཁྱད་པར་མཚན་གཞི་དཔེའི་ཡེ་ཤེས་ཀྱི་སྟེང་དུ་ངེས་པར་བྱེད། བསམ་མི་ཁྱབ་ནི་དོན་གྱི་ཡེ་ཤེས་དོན་དམ་པའོ། །དེའི་ཕྱིར་འབྲོག་མིའི་འགྱུར་ལས། ཀུན་རྫོབ་བརྟེན་ཅིང་འབྲེལ་བར་འབྱུང་བ་སོ་སོར་སྣང་བ་ཙམ་དང༌། བསམ་གྱིས་མི་ཁྱབ་པ་སེམས་དཔའ་རབ་ཏུ་ཤེས་པའི་ངོ་བོ། འདི་སྐད་
བདག་གིས་ཐོས་པ་ལ་སོགས་པ་ཞེས་འབྱུང་བ་ལྟར། དཔེ་དང་དོན་ཀུན་རྫོབ་དང་དོན་དམ་སོ་སོར་ཕྱེ་བའི་ཚིག་སྟེ། འགྱུར་དེ་ལྟར་ལེགས་སོ། །ལེའུ་གསུམ་པའི་བཤད་པའོ།། །། ད་ནི་ལེའུ་བཞི་པ་གསང་བའི་དེ་ཁོ་ན་ཉིད་དེ། རྣལ་འབྱོར་མའི་རྒྱུད་ཀྱི་གླེང་གཞིའི་དོན་ལ་བཞུགས་པར་བསྟན་པ་ལ། བཤད་པར་དམ་བཅའ་བ་དང༌། ལེའུ་གཞུང་དངོས་སོ། །དང་པོ་ནི། དེ་ནས་རྣལ་འབྱོར་མ་རྒྱུད་ཀྱི། །རིམ་པ་གཞན་ཡང་བཤད་པར་བྱ། །ཞེས་པ་སྟེ། རྣལ་འབྱོར་མའི་རྒྱུད་ལས་གསུངས་པའི་གཞི་ལམ་འབྲས་བུའི་རིམ་པ། སྔར་ཕ་རྒྱུད་ཀྱི་རིམ་པ་དང་དོན་གྱི་གནད་གཅིག་ཀྱང༌། ཚིག་ཐ་དད་ཅིང་དོན་གྱི་སྡེ་ཚན་ཡང་སྟོན་ཚུལ་མི་འདྲ་བ་གཞན་ཡང་བཤད་པར་བྱ་ཞེས་པའི་དོན་ནོ། །གཉིས་པ་ལེའུའི་གཞུང་དངོས་ལ། མདོར་བསྟན། རྒྱས་བཤད། དོན་བསྡུ་གསུམ་མོ། །དང་པོ་ལ་གཉིས་ཀྱི། དོན་ཚན་དང་པོ་རྒྱུད་གཉིས་དོན་མཚུངས་པར་བསྟན་པ་ནི། རྣལ་འབྱོར་གྱི་ནི་རྒྱུད་དག་ཏུ། །འདི་སྐད་ཅེས་སོགས་གསུངས་པ་གང༌། །དེ་ཉིད་རྣལ་འབྱོར་མ་རྒྱུད་དུ། །མེ་སྟེ་གཞན་དག་སོག་མ་འདྲ། །རང་བཞིན་དབྱེ་བ་ཡོད་མིན་ཞེས། །ཐུགས་ཀྱི་རྡོ་རྗེས་དེ་སྐད་གསུངས། ཞེས་ཏེ་འགོས་འགྱུར་ལས། རྣལ་འབྱོར་རྒྱུད་དུ་དེ་བཞིན་གཤེགས། །ཞེས་འབྱུང་བ་དོན་འདི་དང་འདྲ་ཡང་དེ་བཞིན་གཤེགས་པའི་སྐད་དོད་ཡོད་མེད་བརྟག་གོ །རྣལ་འབྱོར་གྱི་རྒྱུད་གསང་བ་འདུས་པ་ལ་སོགས་པ་དག་ཏུ། འདི་སྐད་ལ་སོགས་པ་གླེང་གཞིའི་ཚིག་ཏུ་གསང་བའི་དོན་གང་ཡིན་པ་དེ་ཉིད་རྣལ་འབྱོར་མའི་རྒྱུད་དུ་ཡང༌།
ཡང་དག་པའི་ཡེ་ཤེས་ཀུན་རྟོག་སྲེག་པའི་མེ་དང་འདྲ་བ་དེ་བསྟན་གྱི། ཅི་སྟེ་རྟག་པ་མཐར་བཟུང་དུ་གཞན་དག་སྟེ། དེ་མི་སྟོན་ན་ནི་སོག་མ་དང་འདྲ་བར་སྙིང་པོ་མེད་དོ། །སྐབས་འདིར། འབྲོག་འགྱུར་ལས་ནི། འདི་སྐད་ལ་སོགས་གསུངས་པ་ནི། །དེ་ཉིད་རྣལ་འབྱོར་མ་རྒྱུད་དོ། །གཞན་དག་སྲིན་བུས་ཟོས་རྩྭ་མཚུངས། །ཞེས་འབྱུང་བ་ལྟར་ན། འདི་སྐད་སོགས་ཀྱི་དོན་དེ་ཉིད། །རྣལ་འབྱོར་མའི་རྒྱུད་དུ་ཡང་བཤད་དོ། །ཟུང་འཇུག་དེ་མ་ཡིན་པའི་དོན་གཞན་སྙིང་པོར་བྱས་ཏེ་སྟོན་ན། །འབུས་ཟོས་རྩྭ་ལྟར་སྙིང་པོ་མེད། །ཅེས་པའོ། །དེས་ན་དེ་གཉིས་གྲུབ་དོན་གཅིག་ཀྱང༌། གཞུང་གི་ས་མཚམས་གཅོད་ལུགས་མི་འདྲ་བར་བྱུང་ཞིང༌། མེ་སྟེ་ཞེས་པའི་དོན་དུ། འབུས་ཟོས་ཞེས་འབྱུང་བ་རྒྱ་དཔེ་རྙེད་ན་རྒྱ་སྐད་ལ་བརྟག་ཅིང༌། སྐད་དོད་ལ་འགྲིག་ན་འབྲོག་འགྱུར་ལེགས་སོ། །དེ་ལྟར་ན་ཕ་རྒྱུད་མ་རྒྱུད་གཉིས་པོ་བརྗོད་བྱའི་དོན་གྱི་རང་བཞིན་ལ་དབྱེ་བ་ཡོད་པ་མ་ཡིན་ནོ་ཞེས་དེ་སྐད་དུ་ཐུགས་རྡོ་རྗེ་སྟེ། རྡོ་རྗེ་འཆང་གིས་ཁ་སྦྱོར་ཐིག་ལེ་ལ་སོགས་པ་ལས་གསུངས་སོ། །དོན་ཚན་གཉིས་པ་ཧེ་རུ་ཀའི་མཚན་དོན་བཤད་པ་ནི། ཧེ་ནི་རྒྱུ་དང་བྲལ་བ་སྟེ། །རུ་ནི་ངོ་བོ་མཉམ་པས་སོ། །ཀ་ནི་གང་ནའང་མི་གནས་པ། །ཤྲཱི་ནི་གཉིས་སུ་མེད་པར་གནས། །ཤྲཱི་ཞེས་བྱ་བྷ་གར་བརྗོད། །ཧེ་རུ་ཀ་ནི་སེམས་ཞེས་བྱ། །མཁའ་དབྱིངས་གནས་པ་དེ་ཉིད་དེ། །ཧེ་རུ་ཀ་དཔལ་ཞེས་བྱར་བརྗོད། །རྒྱུད་བྱེད་པ་ནི་ཡེ་ཤེས་སོ། །དེ་ལས་སྐྱེས་པ་ཞེས་བྱ་སྟེ། །རྣལ་འབྱོར་མ་རྣམས་ལེགས་འདུས་པའི། །ཛ་ལན་དྷ་ར་དཔལ་གནས་སུའོ། །ཞེས་ཏེ། རྒྱུད་བྱེད་པ་ནི་སོགས་ལ། འགོས་
འགྱུར་ཟང་མ་ལས། ཡེ་ཤེས་དེ་དབང་བྱེད་པ་སྟེ། །ཞེས་འབྱུང་ཞིང༌། འབྲོག་འགྱུར་ལས། ཡེ་ཤེས་དེ་ནི་རྒྱས་འབྱེད་ཅིང༌། །ཞེས་འབྱུང་བས། དོན་དེ་བཞིན་དུ་བཤད་ན་ལེགས་སོ། །ཧེ་ཡིག་ནི་རྒྱུ་རྐྱེན་ཐམས་ཅད་དང་བྲལ་བའི་རང་བྱུང་གདོད་མའི་ཡེ་ཤེས་ཆོས་སྐུ་ཐུགས་རྡོ་རྗེ་དང༌། རུ་ཡིག་ནི། སྒྲ་དང་རྟོག་པའི་ངོ་བོ་མཉམ་པའི་གསུང་རྣམ་པ་ཐམས་ཅད་པ་ལོངས་སྐུ་རྡོ་རྗེ་དང༌། ཀ་ཡིག་ནི་འཁོར་བ་རྡུལ་ཕྲ་རབ་དང་རྣམ་ཤེས་ཀྱི་ཆོས་ལ་མི་གནས་ཤིང༌། མྱང་འདས་སྟོང་ཉིད་ཙམ་ལའང་མི་གནས་པར་ཡེ་ཤེས་ཀྱི་དཀྱིལ་འཁོར་འགག་པ་མེད་པ་སྐུ་རྡོ་རྗེ་སྤྲུལ་སྐུ་འཁོར་འདས་གང་ནའང་མི་གནས་པ་དེའོ། །དེ་ལྟར་ན་རྡོ་རྗེ་གསུམ་བདེ་བ་ཆེན་པོའི་ངོ་བོར་མཉམ་པ་ནི། ཧེ་རུ་ཀ་ཡིན་ལ། ཤྲཱི་ནི་གཟུང་འཛིན་གཉིས་སུ་མེད་ཀྱང་གདོད་མ་ནས་གནས་པའི་ཡེ་ཤེས་ཏེ། རང་ཉིད་རྣམ་པ་ཀུན་ཏུ་མི་འགྱུར་བར་གནས་པས་རང་གི་དཔལ་དང༌། དེ་ཉིད་ཆོས་ཐམས་ཅད་ལ་ཆོས་ཉིད་དུ་སོང་བས་གཞན་གྱི་དཔལ་ལོ། །དེས་ན་བདེ་བས་བརྒྱན་པའི་སྟོང་པ་རྣམ་པ་ཐམས་ཅད་པ་ཤྲཱི་ཞེས་བྱ་བ་དེ་ནི་ཨེ་དང་རྡོ་རྗེ་བཙུན་མོའི་བྷ་གར་བརྗོད་ལ། ཧེ་རུ་ཀ་ནི། ཝཾ་ཡིག་དང་བཅོམ་ལྡན་འདས་ཀྱི་དོན་ཏེ། རྣམ་པ་ཐམས་ཅད་པའི་བརྒྱན་པའི་བདེ་ཆེན་གྱི་སེམས་ཞེས་བྱའོ། །དེས་ན་མཁའ་དབྱིངས་གནས་པ་ཞེས་གོང་དུ་བཤད་པ་ལས། ཤྲཱི་ནི་མཁའ་དབྱིངས་དང༌། ཧེ་རུ་ཀ་ནི་དེར་གནས་པ་དེ་ཉིད་དེ། བདེ་བ་དང༌། ཟུང་དུ་འཇུག་པའི་སྟོང་པ་དང༌། སྟོང་པ་དང་ཟུང་དུ་འཇུག་པའི་བདེ་བ་ཡང་མིང་འདོག་ཐ་དད་མ་
གཏོགས། དོན་གྱི་དབྱེ་བ་མེད་པ་ནི་ཟུང་འཇུག་སྟེ། ཧེ་རུ་ཀ་དཔལ་ཞེས་བྱ་བར་བརྗོད་དོ། །རྒྱུད་བྱེད་པ་སྟེ་ཞེས་བསྒྱུར་བ་ལྟར་ན། རྒྱུད་བྱེད་པ་སྟོན་པ་ཕུན་སུམ་ཚོགས་པ་ནི། ཧེ་རུ་ཀའི་ཡེ་ཤེས་དེ་ཡིན་ལ། དེ་ལས་སྐྱེས་པ་སྟེ་ཤྲཱི་ནི། ཛ་ལནྡྷ་ར་སྟེ་གནས་ཕུན་སུམ་ཚོགས་པར་བརྗོད་དོ། །འཁོར་ནི་རྣལ་འབྱོར་མ་རྣམས་ལེགས་བསྡུས་ཞེས་འཆད་པར་སྣང་ངོ༌། །འོན་ཀྱང་འདི་ལྟར་བཤད་ན་ལེགས་ཏེ་གདོད་མ་ནས་ཤྲཱི་ཧེ་རུ་ཀའི་ཡེ་ཤེས་དེ། དབང་དུ་བྱེད་པའམ། རྒྱས་ཤིང་གསལ་བར་འབྱེད་པ་སྟེ། མངོན་དུ་འགྱུར་ཞིང་རྟོགས་པའི་ཐབས་ནི། ཡེ་ཤེས་དེ་ལས་སྐྱེས་པ་སྟེ། དེའི་སྟོབས་ལས་བྱུང་བའི་ཞུ་བདེ་འཛག་མེད་ཀྱི་རང་བཞིན་གྱི་ཡེ་ཤེས་མཚོན་པར་བྱེད་པ་དེ་ཡིན་ལ། དེས་རྣལ་འབྱོར་མ་རྩའི་དྲ་བ་ཐམས་ཅད་ལེགས་པར་འདུས་པ་སྟེ། ཀུན་རྫོབ་ཀྱི་རྩ་རྣམས་དོན་དམ་དབུ་མར་དག་ཅིང༌། ཛ་ལནྡྷ་ར་སྤྱི་གཙུག་གཙུག་ཏོར་གྱི་དབུ་ན་ཟུང་འཇུག་ལ་སོགས་པ་ཡོན་ཏན་བསྐྱེད་པའི་དཔལ་གྱི་གནས་སུ་ཐིམ་པ་ལས་ཤྲཱི་ཧེ་རུ་ཀ་མངོན་དུ་བྱེད་དོ། །འདིར་རྣལ་འབྱོར་མའི་བརྡས་བསྟན་པའི་རྩའི་དྲ་བ་ནི་མཚོན་པ་ཙམ་སྟེ་རླུང་དང་ཁམས་ཀྱི་བསྒྲོད་པ་ཡང་གཙུག་ཏོར་དུ་ཐིམ་པ་ཁོ་ན་ཡིན་ལ། དེ་ལྟ་བུའི་ལམ་གྱིས་ཡེ་ཤེས་དེ་ཡང་ཤྲཱི་ཧེ་རུ་ཀའོ། །དེ་བས་ན་ཡེ་ཤེས་དེ་དབང་བྱེད་པ་ནི། དེ་ལས་སྐྱེས་པ་ཞེས་བྱ་སྟེ། །ཞེས་འདོན་པ་བསྒྱུར་བར་བྱའོ། །ལེའུ་གཉིས་པར་གསང་བ་འདུས་པའི་མཚན་དོན་བཤད་པ་ལྟར། འདིར་ཡང་ཧེ་རུ་ཀའི་མཚན་དོན་དེ་ལྟར་བཤད་དོ། །གཉིས་པ་རྒྱས་པར་བཤད་པ་ནི་གླེང་གཞིའི་ཚིག་འབྲུ་
གཉེར་བ་སྟེ། དེ་ལ་ལུས་སོགས་དཀྱིལ་འཁོར་གསུམ་བསྟན་པས་རྒྱུད་ཀྱི་དངོས་པོ་བཤད་པ་དང༌། གླེང་གཞིའི་ཚིག་རྐང་དྲུག་པོ་ལམ་དང་བཅས་པའི་འབྲས་བུ་ལ་སྦྱར་བའོ། །དང་པོ་ནི་རྐང་མཐིལ་གཞུ་ཡི་རྣམ་པ་ཡི། །རླུང་གི་དཀྱིལ་འཁོར་ཡང་དག་གནས། །ལྟེ་བའི་ཕྱོགས་འདིར་མེ་ཉིད་ནི། །གྲུ་གསུམ་རྣམ་པ་འབར་བའོ། །ལྟོ་བར་ཆུ་ཞེས་གྲགས་པ་ཡི། །དཀྱིལ་འཁོར་ཟླུམ་པོའི་རྣམ་པའོ། །སྙིང་ག་རུ་ནི་ས་ཉིད་དོ། །ཀུན་ནས་གྲུ་བཞི་པ་ཡིན་ནོ། །དེ་སྟེང་མགྲིན་པའི་ཕྱོགས་སུ་ནི། །རི་རབ་རི་ཡི་རྒྱལ་པོ་ཡང༌། རིགས་བརྒྱད་རིམ་པ་བདུན་ཡིན་ཏེ། །རིན་ཆེན་པོ་དང་ལྡན་པའོ། །དེ་ཡི་རྩེ་མོ་མགོར་གསུངས་ཏེ། །འདབ་སྐྱེས་འདབ་མ་སུམ་ཅུ་གཉིས། །དེ་ཡི་དབུས་སུ་ཧཾ་ཡིན་ཏེ། །ཨཱ་ལི་ཀཱ་ལིས་ལས་སྤྲུལ་པ། །མི་ཤིགས་གོ་འཕང་ཉམས་དགའ་བ། །བདེ་བ་ཆེན་པོ་ཞེས་བྱར་བརྗོད། །ཅེས་སོ། །དེ་ཡང་གསང་བ་མཆོག་གི་དགྱེས་པ་ན། །ཐམས་ཅད་བདག་ཉིད་རྟག་ཏུ་བཞུགས། །ཅེས་པ་ལ་གསང་པ་སའི་ཁམས་ཡིན་ནོ། །ཞེས་སོགས་འབྱུང་བ་སྐབས་འདིར་ཡང་སྦྱར་ཏེ། གསང་བས་ནི། སྙིང་ག་ས་མཆོག་གིས་ལྟོ་བ་ཆུ། དགྱེས་པས་སུམ་མདོ་མེ། ཐམས་ཅད་བདག་ཉིད་ཀྱིས་རྐང་མཐིལ་རླུང༌། རྟག་ཏུ་བཞུགས་ཀྱིས་རི་རབ་སྟོད་སྨད་སྒལ་ཚིགས་མགོ་དང་བཅས་པའོ། །ཡང་གསང་བ་ས་ལྟེ་བ་མཆོག་ཆུ་སྙིང་ག་སྟེ། ས་ཆུ་བསྡོམས་པ་ནི་ཨཱ་ལིས་མཚོན་ལ། དགྱེས་པ་མེ་མགྲིན་པ། ཐམས་ཅད་བདག་ཉིད་རླུང་སྤྱི་བོའི་འཁོར་ལོ་འདབ་མ་སུམ་ཅུ་རྩ་གཉིས་པ་ཉིད་དེ། མེ་རླུང་
བསྡོམས་པ་ཀཱ་ལིས་མཚོན་ནོ། །རྟག་ཏུ་བཞུགས་པ་བདེ་བ་ཆེན་པོ་ནི། །སྤྱི་བོའི་ཧཾ་ཡིག་དཔལ་ཧེ་རུ་ཀ་ཉིད་དང༌། རྩ་སུམ་ཅུ་རྩ་གཉིས་ལ་སོག་པ་རྩའི་ཚོགས་པ་མཁའ་འགྲོ་མའི་དྲ་བ་རྣམས་སོ། །པདྨའི་འདབ་མ་ལ་མངོན་པར་བྱང་ཆུབ་པ་འགོད་པ་ནི། འཁོར་ལོ་བཞིའི་དྭངས་མ་རྣམས་སྤྱི་བོར་འདུ་བའི་དོན་ནོ། །ཚིག་དོན་གཞན་རྣམས་གོ་བླ་ལ། ལྟེ་བའི་ཕྱོགས་ཅེས་པ་ལྟེ་འོག་སྟེ་གསང་བའོ། །རིགས་བརྒྱད་ནི་རི་རབ་ཀྱི་རྩེ་མོ་བརྒྱད། རིམ་པ་བདུན་ནི། གསེར་གྱི་རི་བདུན་ནོ། །རི་རབ་ཀྱི་མགོ་ཞེས་བྱ་བ་ནི། རི་རབ་ཀྱི་སྟེང་དུ་ལྷ་རྣམས་སྤྱོད་པའི་གནས་ཡིན་ཏེ། དུས་ཀྱི་འཁོར་ལོ་ལས་མགྲིན་པ་གདོང་དང་གཙུག་ཏོར་སོགས་ཀྱི་ཐ་སྙད་གསུངས་པ་དང་འདྲ་བར་སེམ་མོ། །ཨཱ་ལི་ཀཱ་ལི་ལས་སྤྲུལ་པ། །ཞེས་བྱ་བ་ནི། རྩ་འཁོར་ཐམས་ཅད་ལས་སྤྲུལ་ཞིང་བྱུང་བའི་ཁམས་ཀྱི་དྭངས་མ་འདུས་པ་ནི་ཧཾ་ཡིག་གོ །ཞེས་ཏེ། གཏུམ་མོའི་མེ་ཚད་དུ་ཕྱིན་པས་མ་གཏོགས། རྗེས་ཆགས་གིས་ཕལ་པས་བཞུ་བར་མི་ནུས་པའམ། དེ་ཞུ་བའི་བདེ་བ་དང་མས་བརྟན་གྱི་སྐབས་དེ་ལ་ཐིམ་པའི་བདེ་བ་ནི་རྣམ་རྟོག་གིས་གཞོམ་པར་མི་ནུས་པའི་ཕྱིར། མི་ཤིགས་པའི་གོ་འཕང་ཞེས་བྱ་ལ། གང་ཅི་ཡང་རུང་བའི་ཉམས་མྱོང་དགའ་བ་ཐམས་ཅད་དེའི་མཐུ་ལས་བྱུང་བའི་ཕྱིར་ཉམས་དགའ་བ་སྟེ། ཧཾ་ཡིག་དེ་ལ་བདེ་བ་ཆེན་པོ་ཞེས་ཀྱང་བརྗོད་དོ། །གཉིས་པ་གླེང་གཞིའི་ཚིག་རྐང་དྲུག་ལམ་དང་བཅས་པའི་འབྲས་བུ་ལ་སྦྱར་བ་ནི། ཁྱད་པར་གྱི་ཚིག་ལྔ་བཤད་པ་དང༌། རྩ་བའི་ཚིག་ལྔ་བཤད་པའོ། །དང་པོ་ནི།
བདེ་ཆེན་འཁོར་ལོ་ཆེན་པོ་ན། །སྡེ་ཚན་ཐ་མ་མིང་སྤངས་པ། །ཧེ་རུ་ཀ་དཔལ་རྒྱུད་ཆེན་དུ། །མེ་ཞེས་བྱ་བར་མངོན་པར་བརྗོད། །ཆགས་སོགས་ཉོན་མོངས་དྲ་བ་ཡི། །སོག་མ་སྲེག་པར་བྱེད་ཕྱིར་རོ། །འཁོར་ལོ་གསུམ་གྱི་རྣལ་འབྱོར་མ། །དེ་ཡང་མེ་ཞེས་བྱ་བར་བརྗོད། །རྣལ་འབྱོར་མ་རྩ་སུམ་ཅུ་དྲུག །རྩ་ནི་མགོ་ལ་སྐྱེས་ཞེས་བརྗོད། །དེ་ཡིས་བསྐུལ་པའི་ཡེ་ཤེས་ནི། །མཆོག་ཏུ་དགའ་བའི་ངོ་བོ་སྟེ། །འདི་དེ་རང་བྱུང་གཅིག་པུ་ཉིད། །འདི་ནི་བཅོམ་ལྡན་འདས་སུ་གསུངས། །ཐམས་ཅད་ཞེས་བྱར་རྣམ་གྲགས་པ། །སངས་རྒྱས་ཕུང་སོགས་དེ་བཞིན་ཏེ། །དེ་ཡི་མཁའ་འགྲོ་མ་དེ་དག །རྩ་ནི་སུམ་ཅུ་རྩ་དྲུག་ཉིད། །ཌེ་ནི་ནམ་མཁའ་འགྲོ་མ་ཞེས། །སངས་རྒྱས་ཁམས་ལས་རྣམ་པར་བཏགས། །ནམ་མཁའ་ཀུན་ཏུ་རྒྱུ་གྲུབ་པས། །མཁའ་འགྲོ་མ་ཞེས་བྱ་བར་བརྗོད། །སངས་རྒྱས་ཕུང་པོ་ལ་སོགས་ཏེ། །དེ་ཡི་འབྱུང་བ་ཁམས་ཞེས་བཏགས། །བུད་མེད་:མི་[མེ་]སོགས་རྣམ་རྟོག་ཕྱིར། །རྣམ་རྟོག་རྣམ་པ་གཉིས་སུ་གསུངས། །མཁའ་གྲོ་མ་ནི་ཐམས་ཅད་ཀྱི། །རང་བཞིན་ཉིད་ཕྱིར་དེ་ཡི་དངོས། །སེམས་དཔའ་ཞེས་པའང་འཁོར་བ་ནི། །མཆོག་ཏུ་དགའ་བའི་ངོ་བོ་ཡིན། །བྱང་ཆུབ་སེམས་ནི་མི་ཕྱེད་ཕྱིར། །འདི་ལ་རྡོ་རྗེ་སེམས་དཔར་བརྗོད༌། །དེ་ཡི་ཕྱིར་ན་དེ་འོག་ཏུ། །བདེ་བའི་མཆོག་ཅེས་རྒྱུད་ལས་གསུངས། །ནམ་མཁའི་ཁམས་སུ་གནས་པས་ཀྱང༌། །དེ་ནི་བདེ་བའི་མཆོག་ཏུ་བརྗོད། །ཅེས་སོ། །དེ་ཡང་དཔལ་འཁོར་ལོ་སྡོམ་པ་ཉུང་ངུའི་རྒྱུད་ཀྱི་གླེང་གཞི་ནི། གསང་བ་མཆོག་གིས་དགྱེས་པ་ན། །ཐམས་
ཅད་བདག་ཉིད་རྟག་ཏུ་བཞུགས། མཁའ་འགྲོ་ཀུན་དངོས་སེམས་དཔའ་ནི། །རྡོ་རྗེ་སེམས་དཔའ་བདེ་བའི་མཆོག འདི་ནི་རང་བྱུང་བཅོམ་ལྡན་འདས། །མཁའ་འགྲོ་དྲ་བའི་སྡོམ་པ་ཡིན། །ཅེས་པའི་ཚིག་རྐང་དྲུག་པའི་ཚིགས་བཅད་གཅིག་གོ །དཔལ་སངས་རྒྱས་ཐམས་ཅད་མཉམ་པར་སྦྱོར་བ་དང༌། རྡོ་རྗེ་མཁའ་འགྲོ་སོགས་ཀྱི་གླེང་གཞི་ལ། སེམས་དཔའ་སངས་རྒྱས་ཀུན་གྱི་དངོས། རྡོ་རྗེ་སེམས་དཔའ་བདེ་བའི་མཆོག །གསང་བ་མཆོག་གིས་དགྱེས་པ་ན། །ཐམས་ཅད་བདག་ཉིད་རྟག་ཏུ་བཞུགས། །འདི་ནི་རང་བྱུང་བཅོམ་ལྡན་འདས། །གཅིག་པུར་རབ་ཏུ་ཆེ་བའི་ལྷ། །སངས་རྒྱས་ཐམས་ཅད་མཉམ་སྦྱོར་པ། །མཁའ་འགྲོ་སྒྱུ་མ་བདེ་བའི་མཆོག །ཅེས་གསུངས་ཏེ། དེ་དག་ལས་ཁྱད་པར་གྱི་ཚིག་ལྔ་ནི། མཁའ་འགྲོ་མའི་དྲ་བ་སྡོམ་པ་དང༌། རང་བྱུང་བཅོམ་ལྡན་དང༌། མཁའ་འགྲོ་ཀུན་དངོས་སེམས་དཔའ་དང༌། རྡོ་རྗེ་སེམས་དཔའ་དང༌། བདེ་བ་མཆོག་ཅེས་བྱ་བ་སྟེ། འཁོར་ལོ་སྡོམ་པའི་གླེང་གཞིའི་ཁྱད་པར་གྱི་ཚིག་དེ་ལྟར་ཡིན་ལ། སྒྱུ་མ་བདེ་མཆོག་ལ་ནི། མཁའ་འགྲོ་ཀུན་དངོས་ཀྱི་དོད་དུ། སངས་རྒྱས་ཀུན་དངོས་དང༌། མཁའ་འགྲོ་མའི་དྲ་བ་སྡོམ་པ་ཞེས་པའི་དོད་ལ། སངས་རྒྱས་མཉམ་སྦྱོར་ཅེས་པ་སྣོན་པ་དང༌། རང་བྱུང་བཅོམ་ལྡན་གྱི་ཚབ་ལ་ཡང་གཅིག་པུ་རབ་ཏུ་ཆེ་བའི་ལྷ། །ཞེས་བསྣན་ནས། ཁྱད་པར་གྱི་ཚིག་ཏུ་འདོད་དོ། །དེ་ལ་ཁྱད་པར་གྱི་ཚིག་ཅེས་བྱ་བ་ནི། རྒྱུད་སོ་སོ་དེ་དག་ལ། ཚིག་གི་ངོ་བོ་དང༌། གོ་རིམ་བརྗོད་ཚུལ་མི་འདྲ་བའི་ཁྱད་པར་ཡོད་པའི་དོན་ཡིན་གྱི། གླེང་གཞིའི་སྟོན་པ་ཕུན་སུམ་ཚོགས་པ་འཆད་བྱེད་ཡིན་པས་ཁྱད་པར་རོ་ཞེས་པ་ནི་ཚིག་དོན་ལ་མ་ཞུགས་པའི་བཤད་པ་ཡིན་ཅིང༌། དོན་ཡང་མི་འཐད་དེ། འདི་དག་གིས་སྟོན་པ་དང་འཁོར་གཉིས་ཀར་བསྟན་པ་ཡིན་གྱི། སྟོན་པ་ཁོ་ན་བསྟན་པ་མིན་པའི་ཕྱིར་རོ། །གཞུང་འདིར་ནི། རྒྱུད་དེ་གཉིས་ཀར་གྱི་གླེང་གཞི་འཆད་པ་ཡིན་ཏེ། བདེ་ཆེན་འཁོར་ལོ་ཞེས་སོགས་ཀྱིས། མཁའ་འགྲོ་མ་ཡི་དྲ་བ་སྡོམ་པ་ཞེས་པ་དེ་བཤད་ཅིང༌། དེ་ཡི་བསྐུལ་བའི་ཞེས་སོགས་ཀྱིས། འདི་ནི་རང་
བྱུང་བཅོམ་ལྡན་འདས། །ཞེས་པ་དེ་བཤད་དོ། །ཐམས་ཅད་ཞེས་བྱར་རྣམ་གྲགས་པ་སོགས་ཀྱིས། མཁའ་འགྲོ་ཀུན་དངོས་སེམས་དཔའ་ནི། །ཞེས་པ་དེ་བཤད་དོ། ། བྱང་ཆུབ་སེམས་ནི་མི་ཕྱེད་ཕྱིར། །ཞེས་པས་རྡོ་རྗེ་སེམས་དཔའ་དང༌། དེའི་ཕྱིར་ན་དེ་འོག་ཏུ་སོགས་ཀྱིས། བདེ་བའི་མཆོག་ཅེས་པ་དེ་བཤད་པས། འཁོར་ལོ་སྡོམ་པའི་ཁྱད་པར་གྱི་ཚིག་ལྔ་ནི། གསལ་བར་བྱུང་བ་དེ་ཡིན་ལ། གཅིག་པུ་ཉིད་ཅེས་པ་དང༌། སངས་རྒྱས་ཕུང་སོགས་ཅེས་པ་ལ་སོགས་པས། གཅིག་པུ་རབ་ཏུ་ཆེ་བའི་ལྷ། །ཞེས་པ་དང༌། སངས་རྒྱས་ཀུན་གྱི་དངོས་བྱ་བ་དང༌། །སངས་རྒྱས་ཐམས་ཅད་མཉམ་སྦྱོར་བ། །སོགས་ཀྱིས་འབྲུ་གནོན་པ་བཞེད་པའོ། །རྩ་བའི་ཚིག་ལྔ་ནི་གསང་བ་ལ་སོགས་པ་སྟེ། རྩ་བའི་གོ་དོན་ནི། གསང་བ་མཆོག་གིས་དགྱེས་པ་ན་སོགས་ཀྱི་རྒྱ་སྐད་དུ། ར་ཧསྱ་པ་ར་མ་ར་མེ་སརྦཱཏྨ་ནི་ས་དཱསྠི་ཏ། ཞེས་པ་ཡི་གེ་བཅུ་དྲུག་གིས་གླེང་གཞིའི་ཚིག་ལྷག་མའི་དོན་རྣམས་ཀྱང་བསྡུས་ལ་དེར་མ་ཟད་རྒྱུད་དོན་མཐའ་དག་ཀྱང་འདུས་པའོ། །དེ་བས་ན་རྒྱུད་མཐའ་དག་གི་རྩོམ་བྱེད་ཀྱི་ཚིག་ཡིན་པའི་ཕྱིར། རྩ་བའི་ཚིག་ཅེས་བྱའོ། །ཡང་ཐུན་མོང་གི་ཚིག་ཅེས་ཀྱང་བྱ་སྟེ། ཡི་གེ་བཅུ་དྲུག་ལ་ཚིག་གཉིས་ཡོད་པ་དེ་ནི། གོང་དུ་སྨོས་པ་ལྟར་རྣལ་འབྱོར་མིའི་རྒྱུད་མང་པོ་ཞིག་གི་ཐུན་མོང་དུ་ཚིག་གཉིས་པོ་ཉིད་དུ་མི་འདྲ་བ་མེད་པས། ཐུན་མོང་ཞེས་བྱ་ཞིང༌། གླེང་གཞིའི་ཚིག་ལྷག་མ་རྣམས་ལ་འདྲ་མིན་ཅི་རིགས་པ་ཡོད་པ་ཁོ་ནའོ། །དེ་ལྟར་ན་འདི་སྐད་ཅེས་བྱ་སྟེ་
གོང་དུ་བཤད་པ་ལྟར་གྱི། བདེ་བ་ཆེན་པོ་ཧཾ་ཡིག་དེ་བཞུགས་པའི་ཕྱིར། སྤྱི་བོ་ལ་ཡང་བདེ་ཆེན་འཁོར་ལོ་ཆེན་པོ་ཞེས་བྱ་ཞིང༌། དེ་ན་སྡེ་ཚན་ཐམས་ཅད་ཀྱི་ཐ་མ་ཞེས་བྱ་བ་ཀྵ་ཡིག་སྤངས་པའོ། །མིང་སྤངས་པ་ཞེས་པ་འགྱུར་མི་ལེགས་པས། སྡེ་ཚན་ཐ་མ་ཞེས་སྤངས་པ་ཞེས་འདོན་པ་བསྒྱུར་རོ། །དེ་ལ་གསལ་བྱེད་རྣམས་ཀྱི་ནང་ནས་ཧ་སྟེ་ཧཾ་ཡིག་མིན་ལ། ཧ་ཀྵ་མ་གཏོགས་པ་སུམ་ཅུ་སོ་གཉིས་འདབ་མ་ལ་གནས་པའི་དོན་ནི། ཡ་སོགས་དྲུག་རྩ་བའི་ཁམས་དྲུག་དང༌། སྡེ་པའི་ཡི་གེ་ཉེར་ལྔ། འབྱུང་བ་ལྔ་ལ་ལྔ་ལྔས་ཕྱེ་བའི་དྭངས་མ་ཐིག་ལེ་ཉེར་ལྔ་དང༌། ས་ཀུན་ཁྱབ་ཡེ་ཤེས་ཀྱི་ཁམས་རྣམ་པར་བཅད་པའོ། །དབུས་ཀྱི་ཧཾ་ཡིག་ནི་དྭངས་མ་ཀུན་འདུས་ཡིན་ལ། ཀྵ་ནི་འཇུ་བྱེད་ཁོ་ན་ཡིན་གྱི། བཞུ་བར་བྱ་བའི་བདེ་བ་མི་མཚོན་པའི་ཕྱིར། ཀྵ་སྤངས་སོ་ཞེས་བརྡར་བཏགས་པའོ། །རྩ་སོ་གཉིས་ལ་དབྱངས་སོ་གཉིས་འགོང་པ་ཡང༌། འཕོ་བ་བཅུ་དྲུག་ལ་ཐབས་དང་ཤེས་རབ་ཀྱིས་དབྱེ་བའི་དོན་ནོ། །དེ་ལྟར་ན་འཁོར་ལོ་བཞིའི་འབར་འཛག་གི་ནུས་པ་སྨིན་ཏེ། མི་ཤིགས་པའི་གནས་སུ་བདེ་བ་ཆེན་པོ་འགྱུར་མེད་དུ་གྱུར་པ་ནི། རྣལ་འབྱོར་མ་ཡིས་རྒྱུད་ཆེན་དུ། ཧེ་རུ་ཀ་དཔལ་ཞེས་མཚན་དུ་གསོལ་བ་དང༌། ཀུན་རྫོབ་ཏུ་ཁྲོ་བོ་ཆེན་པོ་མེ་དཔུང་འབར་བའི་སྐུར་སྟོན་པ་ནི། ངེས་དོན་དུ་ཡང་ཆགས་སོགས་ཉོན་མོངས་པའི་དྲ་བའི་སོག་མ་ལ་སོགས་པ་སྲེག་པར་བྱེད་པའི་ཕྱིར། ཧེ་རུ་ཀ་སྐུ་ལ་མེ་འབར་བ་དང་བཅས་པ་ཞེས་བྱ་བའི་བརྡས་མངོན་པར་བརྗོད་དོ། །སྐུ་གསུང་ཐུགས་ཀྱི་
འཁོར་ལོ་གསུམ་ལ་རབ་གཏུམ་མ་ལ་སོགས་པའི་རྣལ་འབྱོར་མ་རྣམས། ཁྲོ་མོ་མེ་དཔུང་གི་དབུས་ན་བཞུགས་པར་བྱེད་པའི་ངེས་དོན་ཡང་མི་ཤིགས་པའི་གནས་སུ་བདེ་ཆེན་འགྱུར་མེད་དུ་གྱུར་པ་ན། མི་ཕྱེད་མ་ལ་སོགས་པའི་རྩ་ཐམས་ཅད་ཀྱང་བདེ་བ་མི་འགྱུར་བས་གང་བའི་ཕྱིར། ཕུང་སོགས་དང་རྣམ་རྟོག་སྲེག་པར་བྱེད་པའི་མེ་དཔུང་འཕྲོ་བའི་ལྷ་ཞེས་བརྗོད་དོ། ཁྲོ་བོ་དང་ཁྲོ་མོ་མེ་དཔུང་འབར་བ་ནི། དོན་དམ་ཡེ་ཤེས་ལ་ཡང་ཡོད་མོད་ཀྱི། དོན་དམ་རྣམ་པ་ཐམས་ཅད་པ་ཡིན་པས། རྣམ་པ་དེ་ཁོ་ནར་མ་ངེས་ལ། འདིར་ཀུན་རྫོབ་བསྐྱེད་རིམ་གྱི་སྐབས་སུ། དཔའ་བོ་དཔའ་མོ་ཁྲོ་གཏུམ་གྱི་སྐུར་སྒོམ་པ་དེ། ཀུན་རྫོབ་འཁྲུལ་པའི་སྣང་བ་མཐའ་དག་འཇོམས་པའི་ཡེ་ཤེས་མེ་དང་འདྲ་བ་མཚོན་ཞེས་པའི་དོན་ནོ། །ཀུན་རྫོབ་འཁོར་བའི་ལུས་ལ་ཡང༌། ཁམས་རྒྱུ་བ་དང་བྲལ་ན་རྩ་སྐམས་པར་འགྱུར་བས་རྩ་གནས་པ་ནི་ཁམས་རྒྱུ་བ་ལ་རག་ལས། ཁམས་ཐིག་ལེ་ཐམས་ཅད་ཀྱི། རྩ་བའི་འབྱུང་ཁུངས་སྤྱི་བོ་ཡིན་པ་དང༌། ལམ་བསྒོམས་པས་སྤྱི་བོར་བདེ་ཆེན་ཐོབ་པ་ན། རྩ་ཐམས་ཅད་ཀྱང་བདེ་ཆེན་གྱིས་ཁྱབ་འགྲོ་བའི་ཕྱིར། རྣལ་འབྱོར་མ་སུམ་ཅུ་རྩ་དྲུག་གི་:ངག་[དག]་པ་རྩ་སུམ་ཅུ་རྩ་དྲུག་ནི། མགོ་བོ་སྟེ་སྤྱི་བོ་བདེ་ཆེན་འཁོར་ལོ་ལས་སྐྱེས་ཞེས་བརྗོད་དེ། སྐྱོར་སྤངས་ཤིང་བསྡུད་པའི་ཕྱོགས་ལྟར་བཤད་ན། རྩ་རླུང་ཐིག་ལེ་ཐམས་ཅད་དབུ་མར་ཐིམ་པ་དང༌། གཙུག་ཏོར་དུ་ཐིམ་ཞེས་བརྗོད་ལ། ཡོན་ཏན་བསྐྱེད་ཅིང་སྤྲོ་བའི་
ཕྱོགས་ནས་བཤད་ན། དབུ་མ་རྩ་ཐམས་ཅད་དུ་ཁྱབ་པ་དང༌། གཙུག་ཏོར་གྱི་ཐིག་ལེ་ཡང་ལུས་ཐམས་ཅད་དུ་ཁྱབ་པ་ཞེས་ཟེར་ཏེ། དོན་གཅིག་ཉིད་དོ། །དེའི་ཕྱིར་མཁའ་འགྲོ་མ་སྟེ། རྩ་ཐམས་ཅད་ཀྱི་ཚོགས་པའམ་དྲ་བ་གཅིག་ཏུ་བསྡོམས་པའི་གནས་ནི་ཧཾ་ཡིག་ཡིན་ལ། རྩ་རྣམས་ཀྱི་ཆོས་ཉིད་རྣམ་པ་ཀུན་ལྡན་གྱི་ཡེ་ཤེས་དེ་ཉིད། ཐིག་ལེ་ཧཾ་ཡིག་གི་ཆོས་ཉིད་བདེ་བ་ཆེན་པོར་སྡོམ་པ་ནི་རྣམ་པ་ཀུན་ལྡན་མཁའ་འགྲོ་མའི་དྲ་བ། བདེ་ཆེན་དུ་སྡོམ་པ་ཞེས་བྱ་སྟེ། འཇིག་རྟེན་གསུམ་ན་ཡེ་ཤེས་ཅན་གྱི་མཁའ་འགྲོ་མ་དཔག་ཏུ་མེད་པའི་ཚོགས་པ་ཐམས་ཅད་རྡོ་རྗེ་ཕག་མོའི་རྗེས་སུ་འབྲང་ཞིང་དེ་ལས་སྤྲོས་པ་ཡིན་ལ། དེ་ཉིད་དཔལ་ཧེ་རུ་ཀ་དང་མཉམ་པར་སྦྱོར་བ་སྟེ། ཧེ་རུ་ཀ་ཉིད་ཀྱི་ཡེ་ཤེས་རང་སྣང་བའི་རིག་མའོ། །དེ་ལ་ནི་གཟུགས་སྐུ་ཀུན་རྫོབ་ཀྱིས་བསྡུས་པ་དང༌། ཆོས་སྐུ་དོན་དམ་གྱིས་བསྡུས་པ་གཉིས་སུ་དབྱེར་ཡོད་ལ། ཆོས་སྐུའི་དེ་ནི་ལྷའི་ལྡོག་ཆ་དང་ཡེ་ཤེས་ཀྱི་ལྡོག་ཆའི་ཁྱད་མ་གཏོགས། གོང་དུ་བསྟན་པ་དེ་ཀ་ཡིན་ལ། གཟུགས་སྐུའི་དེ་ཡང་ཆོས་སྐུ་དེ་ཉིད་ཀྱི་རྣམ་འཕྲུལ་ལོ། །ཀུན་རྫོབ་བསྐྱེད་པའི་རིམ་པ་ལ་ཡང་དེ་ཉིད་མཚོན་པའི་ཕྱིར། རྣལ་འབྱོར་མ་སུམ་ཅུ་རྩ་བདུན་སྤྲུལ་པ་པོ་རྡོ་རྗེ་ཕག་མོ་དང་མཉམ་པར་སྦྱོར་པའི་ཧེ་རུ་ཀའོ། །དེ་ལྟར་ན་དྲ་བ་སྡོམ་པ་རྣམ་གྲངས་བཞི་སྟེ། དཔེ་བསྐྱེད་རིམ་གྱི་མཁའ་འགྲོ་མའི་དྲ་བ་སྡོམ་པ་དང༌། རྟེན་ལུས་ཀྱི་མཁའ་འགྲོ་མའི་དྲ་བ་སྡོམ་པ་དང༌། བརྟེན་པ་ལྷན་ཅིག་སྐྱེས་པའི་མཁའ་འགྲོ་
མའི་དྲ་བ་སྡོམ་པ་དང༌། འབྲས་བུ་སྐུ་གཉིས་ཀྱི་མཁའ་འགྲོ་མའི་དྲ་བ་སྡོམ་པའོ། །མཁའ་འགྲོ་མ་ཡི་དྲ་བ་སྡོམ་ཞེས་པའི་དོན་བཤད་དོ། །རྩ་དེ་རྣམས་ཀྱིས་བསྐུལ་བ་སྟེ། དེ་ལ་གནད་དུ་བསྣུན་པ་ལས་ཐོབ་པའི་ཡེ་ཤེས་ནི་མཆོག་ཏུ་གྱུར་པའི་དགའ་བ་ལྷན་ཅིག་སྐྱེས་པ་འགྱུར་མེད་ཀྱི་ངོ་བོ་སྟེ། ལམ་གྱི་ཡེ་ཤེས་དེས་དངོས་སུ་རྟོགས་བྱའི་ཡུལ་ནི། གདོད་མའི་བདེ་ཆེན་རང་བྱུང་གཅིག་པུ་ཉིད་ཡིན་ལ། དེ་ལྟ་བུའི་ཡུལ་དང་ཡུལ་ཅན་ཐ་དད་དུ་འཛིན་པའི་རྟོགས་པ་སྤངས་པའི་ཕྱིར། གཉིས་པོའི་དབྱེ་བ་མ་བྱས་པར་ཐུན་མོང་དུ་རང་བྱུང་གཅིག་པུའོ་ཅེས་བརྗོད་དོ། །སངས་རྒྱས་ཐམས་ཅད་མཉམ་སྦྱོར་བ་ཞེས་འབྱུང་བའི་དབང་དུ་བྱས་ནས། ཐམས་ཅད་ཅེས་བྱ་བར་རྣམ་པར་གྲགས་པ་ནི། སངས་རྒྱས་ཏེ་ཕུང་པོ་ལྔ་དང༌། ཡུམ་སྟེ་འབྱུང་བ་ལྔ་ལ་སོགས་པ་དེ་བཞིན་དུ་གཞན་ལའང་སྦྱར་ཏེ། ཕུང་ཁམས་ཡབ་ཡུམ་དེའི་སྡེར་གཏོགས་པའི་མཁའ་འགྲོ་མ་ནི། རྩ་སུམ་ཅུ་རྩ་དྲུག་ཉིད་དོ། །དེ་ལ་མཁའ་འགྲོ་མའི་སྒྲ་བཤད་པ་ནི། ཌེ་བཻ་ཧ་ཡ་ས་ཞེས་པ་ནམ་མཁའ་ལ་འགྲོ་བ་མ་ཞེས་བྱ་བ་ཡིན་ཏེ། ཌེཾ་ནམ་མཁའ་ལ་འཕུར་བའོ། །ཞེས་པའི་དབྱིངས་ལས་ཌཱ་ཀི་ནི་ནམ་མཁའ་ལ་འགྲོ་བའོ། །དེ་ཡང་འཇིག་རྟེན་གྱི་སྲིན་མོ་ཆེན་མོ་རྣམས་ནི། གཟུགས་སྣ་ཚོགས་པར་བསྒྱུར་བའི་རོ་ལངས་ལ་བསྐྱོད་དེ། ནམ་མཁར་རྒྱུ་བ་བཞིན་དུ། ཡེ་ཤེས་ཀྱི་རྩའི་ནམ་མཁའ་ལ། བདེ་བ་ཆེན་པོ་ཀུན་ཏུ་རྒྱུ་བ་ནི། མཁའ་འགྲོ་མ་ཞེས་བརྗོད་དེ། བདེ་བ་ཆེན་པོ་དེ་ཡང་ཇི་ལྟ་བུའི་ཚུལ་གྱིས་རྒྱུ་ཞེ་ན། སངས་རྒྱས་དང་
ཁམས་དང༌། རྣམ་པར་བཏགས་པ་སྟེ་རྣམ་པར་རྟོག་པའི་ཚུལ་གྱིའོ། །སངས་རྒྱས་ནི་ཕུང་པོ་ལྔའི་དྭངས་མ་བྱང་ཆུབ་ཀྱི་སེམས་དང༌། དེ་དང་ཚོགས་པ་གཅིག་པའི་འབྱུང་བའི་དྭངས་མ་ནི་ཁམས་ཞེས་རྣམ་པར་བཏགས་ལ། བུད་མེད་དེ་གཟུགས་སོགས་ཡུལ་ལྔའི་དྭངས་མ་དང༌། མི་ནི་སྐྱེས་པ་སྟེ་དེའི་བརྡས་དབང་པོ་ལྔའི་དྭངས་མ་བྱང་ཆུབ་ཀྱི་སེམས་སོ། །དབང་ཡུལ་དེ་དག་ནི་རྣམ་པར་རྟོག་པའི་རྒྱུ་ཡིན་པའི་ཕྱིར། །རྣམ་རྟོག་རྣམ་པར་རྟོག་གམ་རྣམ་པར་བཏགས་ཞེས་པས། དབང་ཡུལ་རྣམ་པ་གཉིས་སུ་གོ་བར་བྱ་བའི་ཕྱིར་རོ། །སོགས་ཀྱི་སྒྲས་ལས་དང་བྱ་བ་བསྟན་ནོ་ཞེས༌། ལོ་ཆུང་གི་རྗེས་འབྲང་འགའ་ཞིག་བཞེད་དོ། །འབྲོག་འགྱུར་ལས། ཤེས་རབ་ཐབས་ཀྱི་རང་བཞིན་ལས། །རྣམ་པ་གཉིས་སུ་བརྟགས་ནས་གསུངས། ཞེས་འབྱུང་སྟེ་རྒྱ་སྐད་ལ་ཁྱད་པར་ཅུང་ཟད་ཡོད་པ་འདུག་ཀྱང་དོན་གཅིག་གོ །ཚིག་འདིའི་རྗེས་སུ་མགོས་[འགོས་]འབྲོག་གཉིས་ཀྱི་འགྱུར་ལས། ཚིགས་བཅད་གཅིག་ལྷག་པོར་བྱུང་སྟེ། མཁས་པས་ནམ་མཁར་བདུད་རྩི་བཟུང༌། །ཀུན་ཞེས་བྱ་བ་ཡུལ་དུ་གསུངས། །དེ་བཞིན་གང་ཞིག་རྒྱུ་བ་དག ། ནམ་མཁའ་ཀུན་ཏུ་རྒྱུ་བར་འདོད། །ཅེས་འགོས་འགྱུར་ལས་འབྱུང་ཞིང་འབྲོག་འགྱུར་ལས་ཀྱང༌། ཀུན་ནི་ཡུལ་དུ་བརྗོད་པ་སྟེ། ནམ་མཁའ་བདུད་རྩིར་གསུངས་པའོ། །གང་གིས་དེར་ནི་སྤྱོད་པ་ནི། །ཀུན་གཅིག་མཁའ་རུ་སྤྱོད་པར་འདོད། །ཅེས་འབྱུང་བ་འགྱུར་ཁྱད་མ་གཏོགས་དོན་གཅིག་ལ། མཁས་པ་སྟེ་དེ་ཁོ་ན་ཉིད་རིག་པས། གནས་ལུགས་དོན་དམ་པའི་རྩའི་ནམ་མཁར་བདུད་རྩི་སྟེ་ཕུང་ཁམས་སྐྱེ་མཆེད་ཀྱི་ཐིག་ལེའི་དྭངས་མ། དགའ་བཞི་ལུགས་ཟློག་
གི་རིམ་པས་འཕོ་བ་མེད་ཅིང་འཛག་མེད་དུ་བཟུང་བས། ཡུལ་རྣམ་པ་ཀུན་ལྡན་གྱི་སྟོང་ཉིད་དང་འདྲེས་ནས། གང་ཞིག་ཐིག་ལེ་རྒྱུ་བ་དེ་དག་དེ་བཞིན་ཏེ། ནམ་མཁའ་འམ་ཀུན་གྱི་དོན། སྟོང་ཉིད་གཏུམ་མོའི་སྣང་བ་ལས་བྱུང་བ། སྤྲོས་བྲལ་ཡང་ཡིན་ལ་དཀྱིལ་འཁོར་ཡང་ཡིན་པ། སེམས་ཉིད་ཀྱི་སྣང་བ་ཙམ་ལ་ཐིམ་པ་ནི། ནམ་མཁའ་ལ་ཀུན་ཏུ་རྒྱུ་བའི་དོན་དུ་འདོད་དེ། གོང་གི་ནམ་མཁའ་ཀུན་ཏུ་རྒྱུ་གྲུབ་པའི་ཅེས་པའི་དོན་གསལ་བར་བཤད་དོ། །ཤོ་ལོ་ཀ་འདི་ག་ཡ་དྷ་རའི་རྒྱ་དཔེ་ལ་ཡོད་པར་སྣང་ལ། ནཱ་རོ་པའི་རྗེས་འབྲང་རྣམས་ཀྱི་དཔེ་ལ་མེད་ཀྱང༌། འདི་ཡོད་པ་ལེགས་པས་དེ་དག་གི་དཔེ་ལ་ཆད་པའོ། །དེ་ལྟར་ན་མཁའ་འགྲོ་མ་སྟེ་རྩ་ཁམས་དག་པའི་རང་བཞིན་ཉིད་ཀྱི་ཕྱིར། དེའི་དངོས་པོ་སྟེ། རྣམ་པ་ཀུན་ལྡན་གྱི་ཡེ་ཤེས་དེའི་རང་གཟུགས་ནི་སེམས་དཔའ་ཞེས་བྱའོ། །སེམས་དཔའི་དོན་ནི། བཅུད་དམ་སྙིང་པོ་ཡིན་པས། འཁོར་བ་སྲིད་གསུམ་གྱི་ངོ་བོའམ། རང་བཞིན་མཆོག་ཏུ་གྱུར་པའི་དགའ་བ་ལྷན་ཅིག་སྐྱེས་པའོ། །དེས་ན་རྣམ་པ་ཀུན་ལྡན་གྱི་རང་གཟུགས་སམ་སྡོད་ལུགས་ནི་བདེ་བ་ཆེན་པོ་ཡིན་ལ། བདེ་ཆེན་གྱིའང་མཐོང་བྱའམ་སྣང་བ་ནི་རྣམ་པ་ཀུན་ལྡན་ནོ།། དེ་ནི་སེམས་དཔའ་སངས་རྒྱས་ཀུན་གྱི་དངོས། །ཞེས་པའི་སེམས་དཔའ་དང༌། མཁའ་འགྲོ་ཀུན་དངོས་སེམས་དཔའ་ནི། །ཞཻས་པའི་སེམས་དཔའ་བཤད་པའོ།། ཀུན་རྫོབ་བྱང་ཆུབ་ཀྱི་སེམས་དབྱིངས་སུ་ཐིམ་པས། བདེན་གཉིས་ཟུང་འཇུག་ཏུ་གྱུར་པའི་བྱང་ཆུབ་ཀྱི་སེམས་དེ་ནི། འཛག་བདེ་དང་རྣམ་རྟོག་གིས་མི་ཕྱེད་ཅིང་མི་འགྱུར་བའི་ཕྱིར་བདེ་བ་འགྱུར་མེད་འདི་ལ་རྡོ་རྗེ་སེམས་དཔའ་
ཞེས་བརྗོད་དེ། རྡོ་རྗེ་ནི་མི་འགྱུར་བ་སེམས་དཔའ་ནི་བདེ་བའོ། །རྒྱུ་མཚན་དེའི་ཕྱིར་ན་ཚིག་དེའི་དེ་མ་ཐག་གི་འོག་ཏུ་བདེ་བའི་མཆོག་ཅེས་གསུངས་ཏེ། རྒྱུ་རྐྱེན་ལས་བྱུང་བའི་བདེ་བ་ནི་འཇིག་པར་འགྱུར་བའི་ཕྱིར་མཆོག་མ་ཡིན་ལ། སྤྲོས་པ་དང་བཅས་པའི་ཕྱིར་གནས་ལུགས་སུ་མི་འགྱུར་རོ། །དེའི་ཕྱིར་ཡང་དེ་འདྲ་མཐར་ཐུག་གི་མཆོག་མ་ཡིན་མོད། དོན་གྱི་བདེ་ཆེན་ནི་རང་བྱུང་སྤྲོས་བྲལ་ཡིན་པའི་ཕྱིར་བདེ་བའི་མཆོག་གོ དེར་མ་ཟད་ནམ་མཁའི་ཁམས་སུ་གནས་པ་སྟེ། ངོ་བོ་སྤྲོས་བྲལ་དུ་ཡང་གནས། རྣམ་པ་ཐམས་ཅད་པར་ཡང་གནས་པས་ཀྱང༌། བདེ་ཆེན་དེ་ནི་བདེ་བའི་མཆོག་ཏུ་བརྗོད་དོ། །གཉིས་པ་རྩ་བའི་ཚིག་ལྔ་བཤད་པ་ནི། གླེང་གཞིའི་ཡི་གེ་བཅུ་དྲུག་གི་དོན་བཤད་པ་སྟེ། གསང་བ་ས་ཡི་ཁམས་ཡིན་ཏེ། །དེ་བཞིན་མཆོག་ནི་ཆུ་ཡིན་ཏེ། །དགྱེས་པ་ཞེས་བྱ་མེ་ཡིན་ཏེ། །རླུང་ནི་ཐམས་ཅད་བདག་ཉིད་གནས། །རྟག་ཏུ་བཞུགས་འདིར་ནམ་མཁའ་སྟེ། །བདེ་བ་ཆེན་པོའི་རང་བཞིན་ནོ། །བཤད་པ་གསང་བ་ཞེས་གསུངས་ཏེ། གཅི་བ་མཆོག་ཅེས་བྱ་བར་བརྗོད། ཁུ་བ་དགྱེས་པ་ཞེས་གསུངས་ཏེ། ཁྲག་ནི་ཐམས་ཅད་བདག་ཉིད་འགྱུར།། ཤ་ནི་རྟག་ཏུ་བཞུགས་པ་ཡིན། །དེ་ཡི་ངོ་བོར་རྟག་ཏུ་གནས། །རྟག་ཏུ་བཞུགས་པར་འདིར་གསུངས་པ། །མཁའ་འགྲོ་མ་རྣམས་རང་བཞིན་ནོ། །བདེ་བ་ཆེན་པོ་ཡེ་ཤེས་མཆོག །མི་ཤིགས་ཧཾ་ཞེས་བྱ་བར་འགྱུར། །འདི་ཉིད་མཆོག་གི་དེ་ཉིད་དེ། བདེ་བ་ཆེན་པོར་བརྗོད་པ་ཡིན། །ཅེས་པའོ། །གསང་བ་ལ་སོགས་པའི་བརྡས། ས་ཁམས་དང་བཤད་པ་ལ་
སོགས་པར་བཤད་པ་ནི། དེ་བཞིན་གཤེགས་པས་བརྡར་མཛད་པ་ཡིན་གྱི་སྒྲ་བཤད་དུ་ཡོད་པ་ནི་མ་ཡིན་ནོ། །འདིས་ནི་གཞི་རྒྱུད་ཀྱི་དངོས་པོ་ལྟར་ན། གསང་བ་སའི་ཁམས་ལྟེ་བ་སྤྲུལ་འཁོར་གྱི་རྩ་ཁམས་ཐིག་ལེ་རྣམས་དང༌། མཆོག་ཆུ་སྟེ་སྙིང་གའི་དེ་རྣམས་དང༌། དགྱེས་པ་མེ་སྟེ་མགྲིན་པའི་དེ་རྣམས་དང༌། རླུང་ནི་ཐམས་ཅད་བདག་ཉིད་དེ། སྤྱི་བོའི་དེ་རྣམས་དང༌། རྟག་ཏུ་བཞུགས་པ་དེ་དག་སྤྱི་ལ་ཁྱབ་པ་རྩ་ཨ་ཝ་དྷཱུ་ཏཱི་སོགས་རྩ་གསུམ་སྟེ། ནམ་མཁའི་ཁམས་བདེ་བ་ཆེན་པོའི་རང་བཞིན་ནོ། །དེ་རྣམས་འབྱུང་བ་ལྔ་སྟེ་རྒྱུའི་ཕྱོགས་ཀྱི་དབང་དུ་བྱས་ལ། གསང་བའི་སྒྲས་བཤད་པའི་དྭངས་མ་ས་ཁམས་སུ་གཏོགས་པ་དང༌། གཅི་བའི་དྭངས་མ་ཆུ་ཁམས་མཆོག་ཅེས་བྱ་བས་བསྟན་པ་དང༌། ཁུ་བའི་དྭངས་མ་མེ་ཁམས་དགྱེས་པའི་སྒྲས་བསྟན་པ་དང༌། ཁྲག་གི་དྭངས་མ་རླུང་ཁམས་ཐམས་ཅད་བདག་ཉིད་ཀྱི་སྒྲས་བསྟན་པ་དང༌། ཤ་ཆེན་གྱི་དྭངས་མ་ནམ་མཁའི་ཁམས་རྟག་ཏུ་བཞུགས་པའི་སྒྲས་བསྟན་པ་སྟེ། འཁོར་ལོ་བཞི་དང་རྩ་གསུམ་ལ་དེ་དང་དེའི་ངོ་བོས་རྟག་ཏུ་གནས་པའོ། །འདིར་དེ་རྣམས་ཕུང་པོ་ལྔ་མཚོན་པ་བདུད་རྩི་ལྔའི་དྭངས་མ་སྟེ། ཁམས་གཙོ་བོར་གྱུར་པ་ཐབས་འབྲས་བུའི་ཆོས་སོ། །དེ་དག་ནི་ཐབས་དང་ཤེས་རབ་ཀྱི་ཡེ་ཤེས་ལྔ་ཡང་མཚོན་པས། རྩ་དེ་རྣམས་ལ་གནད་དུ་བསྣུན་ན་ཡེ་ཤེས་ལྔ་མངོན་དུ་འགྱུར་བ་དང༌། གཞི་དུས་ཀྱི་ཡེ་ཤེས་རྣམས་དེའི་ཆོས་ཉིད་དུ་གནས་པ་ཡང་གོ་བར་ནུས་སོ། །རྟག་ཏུ་བཞུགས་པ་ཞེས་པའི་ཚིག་འདིར་གསུངས་པ་ནི། གང་ལ་རྟག་ཏུ་བཞུགས་པའི་གཞི་མཁའ་འགྲོ་མ་
རྣམས་ཀྱི་རང་བཞིན་རྣམ་པར་དག་པ་རྩ་རྣམས་ཐམས་ཅད་དོ། །དེ་ལ་བཞུགས་པ་པོ་རིགས་ཀྱི་བདག་པོ་ནི། གཞི་དུས་ཀྱི་བདེ་བ་ཆེན་པོའི་ཡེ་ཤེས་མཆོག་དང༌། དེའི་རྟེན་དུ་གྱུར་པ་སྤྱི་བོའི་མི་ཤིགས་པའི་ཐིག་ལེ་ཧཾ་ཞེས་བྱ་བར་འགྱུར་རོ། །རྟེན་འབྱུང་བ་ལྔ་དང༌། བདུད་རྩི་ལྔ་དང༌། རྩ་རྣམས་འཁོར་ཡིན་ཅིང༌། དེ་རྣམས་ལ་དབང་བསྒྱུར་བའི་གཙོ་བོ་ནི་ཧཾ་ཡིག་གོ །བརྟེན་པ་འབྱུང་བ་ལྔའི་དྭངས་མ་དང༌། བདུད་རྩི་ལྔའི་དྭངས་མ་ཐབས་ཤེས་ཀྱི་ཡེ་ཤེས་བཅུ་དང༌། དེ་ལས་ཕྱེ་བའི་རྣམ་པ་ཐམས་ཅད་པ་ནི་འཁོར་ཡིན་ལ། རང་བཞིན་མི་འགྱུར་བའི་བདེ་ཆེན་ནི་གཙོ་བོ་ཡིན་པས། བདེ་ཆེན་ཧཾ་ཡིག་དང་དབྱེར་མེད་པ་འདི་ཉིད་ནི། མཆོག་གི་དེ་ཉིད་ཅེས་པ་གནས་ལུགས་མཐར་ཐུག་པ་ཡིན་ཏེ། རྒྱུད་སྡེ་ཐམས་ཅད་དུ་བདེ་བ་ཆེན་པོར་བརྗོད་པ་དེ་ཡིན་ནོ། །དེ་ལྟར་གནས་ཐབས་རྒྱུད་ཀྱི་དངོས་པོ་བསྟན་པས། རྒྱུད་ཀྱི་རིམ་པ་ཡང་ཞོར་ལ་འཕངས་པ་ཡིན་ཏེ། རྩ་གསུམ་འཁོར་ལོ་བཞི་རྩའི་དྲ་བ་དང་བཅས་པ་ལ། རེ་རེའམ་ཕྱོགས་གཅིག་ཏུ་གནད་དུ་བསྣུན་པས། རྣམ་རྟོག་གི་རླུང་ཕྱི་རོལ་དུ་རྒྱུ་བ་ཞན་པར་སོང་བ་དང༌། ཅུང་ཟད་ནང་དུ་ལྡོག་པ་དང༌། འབྲིང་དུ་ལྡོག་པ་དང༌། ཆེར་ལྡོག་པ་དང༌། གནས་པ་དང་ཐིམ་པའི་བར་ལས་བྱུང་བ་དང༌། དེ་དག་གི་རྟེན་རྩ་དང༌། བརྟེན་པ་ཐིག་ལེའི་གཡོ་བ་ཅུང་ཟད་ཞན་པར་སོང་བ་དང༌། རྩ་མཉེན་པར་འགྱུར་བ་དང༌། ཐིག་ལེ་འདུ་འཕྲོད་ལ་སོགས་པའི་མཐུ་ལས། བདེ་བ་དང༌། སྟོང་པ་དང༌། གསལ་བའི་ཉམས་སྣ་ཚོགས་པ། སད་དུས་དང༌། རྨི་ལམ་དང༌། གཉིད་
འཐུག་པོའི་ཉམས་མྱོང་ངམ་ཞུ་བདེའི་ཉམས་ཕྲ་མོ་མང་པོ་དག་དང་བཅས་པ་ཡིན་ཡང༌། གཏུམ་མོ་དྷཱུ་ཏཱིར་འབར་མི་ནུས་པ་ནི་རྒྱུད་ཀྱི་རིམ་པའོ། །ཡང་དེ་བཞིན་སྔགས་ཀྱི་རིམ་པ་ཡང་བསྟན་ཏེ། གཏུམ་མོའི་ལྟེ་བ་དང༌། སྙིང་ག་དང༌། མགྲིན་པ་དང༌། སྤྱི་བོ་དང༌། རྩ་གནས་ཐམས་ཅད་དུ་ཁྱབ་པའི་དེ་བཞིན་གཤེགས་པའི་རྒྱུད་ལ་འགྲོ་འོང་བྱེད་པ་རྣམས་སོ། །དེ་བཞིན་དུ་ཡེ་ཤེས་ཀྱི་རིམ་པ་ལ་ཡང་སྦྱོར་ཏེ། སྤྱི་བོ་ནས་ཞུ་བ་མགྲིན་པར་བརྟན་པ་ནས། ལྟེ་བ་ནས་ཞུ་བ་གསང་བར་བརྟན་པའི་བར། ཐམས་ཅད་བདག་ཉིད་རླུང་ནས། གསང་བ་སའི་བར་ལ་སྦྱར་རོ། །རྟག་ཏུ་བཞུགས་པ་བདེ་ཆེན་ནི། ནོར་བུར་ཡས་བབས་ཀྱི་ཐིག་ལེ་ནི་བརྟན། མས་བརྟན་གྱི་ས་མ་ཐོབ་ཀྱི་བར་དུ། རྗེས་དྲན་རྗེས་མཐུན་པ་འབྱུང་བ་དེ་ཉིད་དོ། །དེ་བཞིན་དུ་གསང་བའི་རིམ་པ་ལ་ལྟེ་བ་ནས་སྤྱི་བོའི་བར་དུ་མས་བརྟན་གྱི་དགའ་བའི་ས་བཞི་དང༌། རྟག་ཏུ་བཞུགས་ཀྱིས་གསང་རིམ་གྱི་འབྲས་བུའོ། །མཐར་ཐུག་གི་འབྲས་བུའི་དབང་དུ་བྱས་པ་ནི། ཐུགས་ཡེ་ཤེས་ལྔ་དང༌། སྐུ་རིགས་ལྔའི་དཀྱིལ་འཁོར་ཏེ། དཔྱིད་ཀྱི་ཐིག་ལེ་སོགས་སུ་བཤད་པ་བཞིན་ནོ། །དེ་ཐམས་ཅད་ལ་ཡང༌། རྟག་ཏུ་བཞུགས་པ་པོ་བདེ་བ་ཆེན་པོ་རྡོ་རྗེ་སེམས་དཔའ་ལ་མཁའ་འགྲོ་མ་རྩའི་ཚོགས་པའི་འཁོར་གྱིས་བསྐོར་བའི་རྣམ་གཞག་ཤེས་པར་བྱའོ། །དེ་ལྟར་ན་གསང་བ་མཆོག་གིས་དགྱེས་པ་ན། ཐམས་ཅད་བདག་ཉིད་ཅེས་པ་ནི། གནས་ཕུན་སུམ་ཚོགས་པ། རྡོ་རྗེ་བཙུན་མོའི་བྷ་ག་དང་དོན་གཅིག་
སྟེ། ངོ་བོ་རྣམ་པ་ཀུན་ལྡན་གྱི་སྟོང་ཉིད་དོ། །རྟག་ཏུ་བཞུགས་ནི་དུས་ཕུན་སུམ་ཚོགས་པ་སྟེ། དུས་གཅིག་ན་ཞེས་པ་དང་དོན་གཅིག་པ་བསམ་གྱིས་མི་ཁྱབ་པའི་དུས་ལམ་གྱིས་བསྡུས་པའི་བདེ་བ་ཆེན་པོའོ། །མཁའ་འགྲོ་ཀུན་དངོས་སེམས་དཔའ་ནི། །རྡོ་རྗེ་སེམས་དཔའ་བདེ་བའི་མཆོག །ཅེས་པ། སྟོན་པ་ཕུན་སུམ་ཚོགས་པ་སྟེ། བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཞེས་པ་དང་དོན་གཅིག་པ་བདེ་བ་ཆེན་པོ་ཟུང་འཇུག་གི་བདག་ཉིད་དོ། །མཁའ་འགྲོ་དྲ་བའི་སྡོམ་པ་ཞེས་པ་ནི། འཁོར་ཕུན་སུམ་ཚོགས་པ་སྟེ་བདག་གིས་ཞེས་པ་དང་དོན་གཅིག་ཅིང༌། རླུང་འགགས་པ་དང་ཞུ་བདེ་ལ་སོགས་པའི་ཐབས་སྣ་ཚོགས་སོ། །འདི་ན་རང་བྱུང་བཅོམ་ལྡན་འདས་ཞེས་པ་ནི། ཟུང་འཇུག་ལ་ངོ་བོའི་སྒོ་ནས་དབྱེ་བ་མེད་ཀྱང་རྟོགས་བྱ་ཆོས་ཉིད་ཟུང་འཇུག་གི་ལྡོག་པ་ནས་གཞལ་པས། ཆོས་ཕུན་སུམ་ཆོགས་པ་སྟེ། འདི་སྐད་དང་དོན་གཅིག་གོ །ཡང་རྒྱུད་གཞན་ལས་ནི། ཨེ་དང་གསང་བ་གཅིག ཝཾ་དང་རྡོ་རྗེ་སེམས་དཔའ་གཅིག་པར་ཡང་གསུངས་སོ། །བཅོམ་ལྡན་འདས་བཞུགས་པ་ནི། དུས་གཅིག་ན་བཞུགས། བྷ་ག་ལ་བཞུགས་ཞེས་དུས་དང་གནས་གཉིས་ཀར་སྦྱོར་བ་བཞིན་དུ། འདིར་ཡང་རྟག་ཏུ་བཞུགས། གསང་བ་ལ་བཞུགས་ཞེས་གཉིས་ཀ་ལ་སྦྱར་རོ། །འདིར་གཅྀག་པུའི་སྒྲ་དང༌། སངས་རྒྱས་ཞེས་བྱ་བ་ལ་བཤད་པ་མཛད་པ་ནི། འཁོར་ལོ་སྡོམ་པའི་གླེང་གཞིའི་ཚིག་ལ་མེད་ཀྱང༌། མཉམ་སྦྱོར་སོགས་ལ་ཡོད་པ་དེ་ལ་བཤད་པ་མཛད་པའོ། །གསུམ་པ་དོན་བསྡུ་བའི་ཚིགས་སུ་བཅད་པ་ནི་རྣལ་འབྱོར་རྒྱུད་དུ་དེ་བཞིན་གཤེགས། འདི་སྐད་
བདག་གིས་ཞེས་བྱར་གསུངས། །དེ་ཉིད་རྣལ་འབྱོར་མ་རྒྱུད་དུ། །བདེ་བའི་མཆོག་ཏུ་བརྗོད་པ་ཡིན། །འདི་ཉིད་རྣལ་འབྱོར་རྒྱུད་དང་ནི། །རྣལ་འབྱོར་མ་རྒྱུད་ཅེས་བྱར་ཡང༌། །བདེ་བ་ཆེན་པོའི་ཡེ་ཤེས་མཆོག །མེ་ཞེས་བྱ་བར་མངོན་པར་བརྗོད། །ཤེས་རབ་ཐབས་ཀྱི་རང་བཞིན་གྱིས། །ཚོགས་གཉིས་དག་ནི་བསགས་པ་ཡིན། །ཡེ་ཤེས་མཆོག་ནི་འདི་ཉིད་ཀྱང༌། །ཕྱི་དང་བཅས་པར་ནང་ན་གནས༌། ཁམས་གསུམ་རྒྱུ་མི་རྒྱུར་བཅས་ན། །འདི་དེ་སྤངས་ནས་གཞན་མེད་དེ། །དངོས་པོ་ཀུན་གྱི་རང་བཞིན་གྱི། །ཆོ་གའི་ཚུལ་གྱིས་ཡོད་པ་ཡིན། །རྣལ་འབྱོར་ཐབས་ཀྱི་རྒྱུད་དུ། འདི་སྐད་བདག་གིས་ལ་སོགས་པ། དེ་བཞིན་གཤེགས་པས་གསུངས་པའི་བསྟན་དོན། གསང་གསུམ་ཐབས་ཤེས་ཟུང་འཇུག་དེ་ཉིད། རྣལ་འབྱོར་མའི་རྒྱུད་དུ་ནི། བདེ་བའི་མཆོག་ཅེས་བརྗོད་པ་ཡིན་ལ། དེ་བས་ན་བདེ་བ་ཆེན་པོའི་ཡེ་ཤེས་མཆོག་འདི་ཉིད། རྣལ་འབྱོར་རྒྱུད་དང་རྣལ་འབྱོར་མའི་རྒྱུད་གཉིས་ཅར་དུ། ཐ་མལ་གྱི་ཀུན་རྟོག་སྲེག་པའི་ཕྱིར་མེ་ཞེས་བྱ་བར་མངོན་པར་བརྗོད་དོ། །ཤེས་རབ་དང་ཐབས་གཉིས་སུ་མེད་པའི་ཟུང་འཇུག་དེ་ནི། བསོད་ནམས་དང་ཡེ་ཤེས་ཀྱི་ཚོགས་གཉིས་བསགས་པའི་འབྲས་བུ་ཡིན་ནོ། །ཟུང་འཇུག་གི་ཡེ་ཤེས་མཆོག་འདི་ཉིད་ཀྱང༌། ཕྱི་སྣོད་ཀྱི་འཇིག་རྟེན་དང་བཅས་པའི་ནང་སེམས་ཅན་ཐམས་ཅད་ལ་ཆོས་ཉིད་ཀྱི་ཚུལ་དུ་དྲག་ཏུ་གནས་པ་ཡིན་པས། ཁམས་གསུམ་པོ་རྒྱུ་བ་སེམས་ཅན་དང་མི་རྒྱུ་བ་སྣོད་ཀྱི་འཇིག་རྟེན་དང་བཅས་པ་འདི་ན། ཆོས་ཉིད་འདི་ནི་སྤངས་པ་སྟེ། དེ་མ་ཡིན་པ་འདི་ལས་གཞན་ཅུང་ཟད་ཀྱང་ཡོད་པ་མ་ཡིན་ཏེ།
དཔེར་ན་མེ་ལོང་ལ་གཟུགས་བརྙན་ཇི་ཙམ་སྣང་བ་དེ་ཡང༌། བཞིན་ལ་སོགས་པར་སྣང་མོད་ཀྱི། མེ་ལོང་ལས་གཞན་དུ་ཅུང་ཟད་ཀྱང་ཡོད་པ་མ་ཡིན་པ་བཞིན་ནོ། །དེ་ལྟར་ཡང་ཆོས་ཀྱི་དབྱིངས་ནི་མ་གཏོགས་པ་གང་ཕྱིར་ཆོས་མེད་དེ་ཡི་ཕྱིར། །སངས་རྒྱས་རྣམས་ཀྱིས་དེ་དག་ལ། །ངེས་འབྱུང་ཆགས་སོགས་ཡིན་པར་དགོངས། །ཞེས་གསུངས་སོ། །དེ་ལྟ་བས་ན་དངོས་པོ་ཀུན་གྱི་རང་བཞིན་དུ་ཡོད་པ་དེ་ཉིད། ཆོ་ག་སྟེ་སྒྲུབ་པའི་ཐབས་ཀྱི་ཚུལ་གྱིས་ཡོད་པ་སྟེ་མངོན་དུ་གྱུར་པ་ཡིན་ནོ། །ལེའུའི་མཚན་བསྟན་པ་ནི། གསང་བའི་དེ་ཁོ་ན་ཉིད་རབ་ཏུ་གསལ་བ་ལས། རྣལ་འབྱོར་མའི་རྒྱུད་དུ་གསུངས་པའི་རྫོགས་པའི་རིམ་པའི་རང་བཞིན་བསྟན་པ་སྟེ་བཞི་པའོ། །འདིར་གསུངས་པའི་ཞེས་པ། རྫོགས་པའི་རིམ་པ་ངོ་བོ་གཅིག་ཡིན་ཡང་རྣལ་འབྱོར་མའི་རྒྱུད་ལས་གསུངས་ཚུལ་ལོ། །རྩ་བའི་གསུམ་པ་བཤད་པ་མཐར་ཕྱིན་པའི་བྱ་བ་ནི། བླ་མའི་མན་ངག་ལ་བརྟེན་ནས། མཁས་པ་རྣམས་ཀྱིས་གསུངས་པ་ཡི། །གསང་བའི་དེ་ཉིད་རབ་གསལ་བ། །སྡོམ་བརྩོན་ནག་པོས་བྱས་པ་ཡིན། །བླ་མ་ནི་ཛ་ལནྡྷ་ར་བའོ། །མཁས་པ་ནི་སངས་རྒྱས་དང་བྱང་ཆུབ་སེམས་དཔའ་རྣམས་ཏེ། མདོ་རྒྱུད་སྣ་ཚོགས་སུ་གསུངས་པའོ། །སྡོམ་བརྩོན་ནི་རིག་པའི་བརྟུལ་ཞུགས་ཀྱི་སྤྱོད་པ་ལས་གནས་པ་སྟེ། འཕོ་མེད་ཀྱི་ཚུལ་ཁྲིམས་མཆོག་ལ་གནས་པའམ། དེ་བས་ཆེས་ལྷག་པའི་བསླབ་པ་དང་སྤྱོད་པ་གང་ཡང་མེད་པའི་ཕྱིར་རོ། །གསང་བའི་དེ་ཉིད་རབ་གསལ་བ། །བྱེད་ནས་བསོད་ནམས་གང་བསྒྲུབས་པ། །དེ་ཡིས་སྐྱེ་
བོ་ཡང་དག་རྫོགས། །སངས་རྒྱས་སྤྱོད་ཡུལ་སར་འགྲོ་ཤོག །སྤྱོད་ཡུལ་ནི་གོ་འཕང་ངོ༌། །དེའི་སར་འགྲོ་བ་ནི་ཐོབ་པའོ། །རྣལ་འབྱོར་མའི་རྒྱུད་ཀྱི་རྫོགས་པའི་རིམ་པ་བཤད་པ་གསང་བའི་དེ་ཁོ་ན་ཉིད་རབ་ཏུ་གསལ་བ་ཞེས་བྱ་བ། སློབ་དཔོན་ཆེན་པོ་སྤྱོད་པ་པའི་བརྟུལ་ཞུགས་ཅན། ནག་པོའི་ཞལ་སྔ་ནས་གསུངས་པ་རྫོགས་སོ། །ཞེས་པ་ནི་ཕྱིས་སློབ་མ་རྣམས་ཀྱིས་བཅུག་པའི་མཛད་བྱང་ངོ༌། །འབྲོག་འགྱུར་གྱི་འཇུག་ན། གང་ཞིག་མ་ཐོབ་ཀྱཻ་རྡོ་རྗེ། །གང་ཞིག་ཀུན་ཏུ་དབང་མ་ཐོབ། །གསང་བའི་དེ་ཉིད་ཕྱེ་བ་འདི། །དེ་ལ་རབ་ཏུ་བསྟན་མི་བྱ། །ཞེས་འབྱུང་བ་ནི་འཕགས་ཡུལ་དུ་ཕྱིས་བྱུང་བ་ཀྱཻ་རྡོར་མཁན་པོ་འགའ་ཞིག་གིས་རང་འདོད་དབང་གིས་བཅུག་པ་ཡིན་གྱི། དཔེ་གཞན་ལ་མེད་དོ། །རྒྱ་གར་གྱི་མཁན་པོ་ག་ཡ་དྷ་ར་དང༌། བོད་ཀྱི་ལོ་ཙ་བ་འགོས་ལྷས་བཙས་ཀྱི་བསྒྱུར་ཅིང་ཞུས་ཏེ་གཏན་ལ་ཕབ་པའོ། །སླད་ནས་པཎྜི་ཏ་ཆེན་པོ་སུ་མ་ཏི་ཀིརྟིའི་ཞལ་སྔ་ནས་དང༌། བོད་ཀྱི་ལོ་ཙ་བ་མཁས་པ་ཆེན་པོ་ཆོས་ཀྱི་དབང་ཕྱུག་གིས་ཞུས་ཏེ་གཏན་ལ་ཕབ་པ་ཡིན་ནོ། །ཞེས་པ་ནི་འགྱུར་བྱང་ངོ༌། །འདི་ལ་ལོ་ཙཱ་བ་ཤེས་རབ་བརྩེགས་དང༌། རྭ་ལོ་རྡོ་རྗེ་གྲགས་པ་དང༌། མལ་གྱོ་བློ་གྲོས་གྲགས་པ་དང༌། རྗེ་བཙུན་གྲགས་འབྱོར་ཤེས་རབ་ལ་སོགས་པ། འགོས་འགྱུར་ལ་འགྱུར་བཅོས་མཛད་པ་པོ་མི་འདྲ་བ་མ་བྱུང་ཡང༌། འགོས་འགྱུར་ཉིད་ལས་འགྱུར་ཁྱད་ཆེར་མི་སྣང་ལ། གཞུང་དེ་ཐོག་མར་བསྒྱུར་བ་པོ་འབྲོག་མིའི་འགྱུར་དང༌། འགོས་སོགས་ཀྱི་འགྱུར་གཞན་
རྣམས་ལ་འགྱུར་ཁྱད་ཆེར་སྣང་ངོ༌། །བརྗོད་བྱ་རབ་ཟབ་ཟུང་འཇུག་གསང་བ་གསུམ། །རྗོད་བྱེད་རྟོགས་དཀའ་གླེང་གཞི་རྡོ་རྗེའི་ཚིག །འཆད་བྱེད་གཞུང་གི་ཚིག་ཀྱང་རབ་བརླིང་པས། སྤྱོད་པའི་རྡོ་རྗེ་ཉིད་ཀྱི་སྤྱོད་ཡུལ་ལགས། །མཁས་པར་གྲགས་ལྡན་མཁས་རློམ་རྣམས་ཀྱིས་ཀྱང༌། །རྫོགས་རིམ་གཞུང་གསུམ་རྫོགས་པར་བཤད་པ་མེད། །བློ་ལྡན་ཕལ་ཆེར་བློ་གྲོས་རྟག་ངོམ་ཀྱང༌། །རྟོགས་དཀའི་གཞུང་ལུགས་རྟོགས་པར་མ་ནུས་བོར། །སྤྱོད་པའི་རྡོ་རྗེའི་གཞུང་འདིར་མི་འཇུག་དང༌། །ཞུགས་ཀྱང་དགོངས་དོན་ཕྱོགས་ཙམ་མ་རིག་པར། །གོ་བདེའི་གཞུང་ལ་ཡང་ཡང་བསྐྱར་བཤད་མཁན། །དེ་དག་བླུན་པོའི་ཚོགས་པས་མཁས་པར་བཀུར། །རྒྱལ་བ་སྲས་བཅས་ཀུན་དགའ་བསྐྱེད་བྱེད་པ། །ཟུང་འཇུག་སྙིང་པོའི་ངེས་གསང་བླ་མེད་གཏམ། །བསྐལ་བརྒྱར་འཆད་ཀྱང་འཇིགས་མེད་སྤོབས་པ་ཅན། །བརྟུལ་ཞུགས་སྤྱོད་པའི་དབང་ཕྱུག་འདིར་བྱོན་བཞིན། །རྒྱུད་སྡེ་ཀུན་གྱི་གསང་བའི་མཛོད། །ལན་བརྒྱར་འབྱེད་པའི་ལྡེ་མིག་འདི། །རྣམ་བཤད་མཆོག་གིས་བདག་གར་བྱས། །དགེ་བས་རྫོགས་སངས་རྒྱས་ཐོབ་ཤོག །ཅེས་པ་གསང་བའི་དེ་ཁོ་ན་ཉིད་རབ་ཏུ་གསལ་བའི་རྣམ་པར་བཤད་པ། དགོངས་པ་རབ་གསལ་ཞེས་བྱ་བ་འདི་ཡང༌། སྤྱོད་པའི་རྡོ་རྗེའི་མཚན་གྱིས་བྱིན་གྱིས་བརླབས་པ། རྒྱལ་ཁམས་པ་ཏཱ་ར་ནཱ་ཐའམ། མིང་གཞན་ཀུན་དགའ་སྙིང་པོ་ཞེས་བྱ་བས། །དཔལ་ལྡན་ཤམྦྷ་ལ་གཉིས་པ་
རི་ཁྲོད་ཆེན་པོ་ཇོ་ནང་དུ་སྨྲས་པའོ།། དགེ་ལེགས་འཕེལ།། ཞུས་དག །།བཀྲ་ཤིས།། འདི་འབད་དགེ་བ་རྣམ་པར་དཀར་བའི་མཐུས། །བདག་ལུས་བོར་ཚེ་དཔལ་ལྡན་ཤམྦྷ་ལར། །རིགས་ལྡན་རྒྱལ་པོའི་འཁོར་དུ་ལེགས་སྐྱེས་ནས། །སྲོག་དང་ཐུར་སེལ་རྩ་དང་ལྷན་ཅིག་ཏུ། །འཇོམས་པར་ནུས་པའི་ཐབས་ཟབ་ལ་བརྟེན་ནས། །གཞན་ཆོག་བདེ་བཤེགས་སྙིང་པོ་མྱུར་ཐོབ་ཤོག །ཅེས་འདི་ནི་བརྟོན་པ་བཞི་ལྡན་གྱིས་སྨོན་ལམ་མཛད་པའོ། དུས་ཀྱི་འཁོར་ལོ་བླ་མ་དབྱེར་མེད་ལ། །གུས་པས་སྐྱབས་གསོལ་འདིར་བས་གསར་བ་དཀར་མཐུས། །ཤམྦྷ་ལ་རུ་རིགས་ལྡན་སྲས་གྱུར་ཏེ། །བསྟན་འགྲོ་ཡོངས་ལ་རླབས་ཆེན་ཕན་ཐོགས་ཤོག་མ་ཏིས་སོ། །