ཚིགས་བཅད་བཅུ་པའི་འགྲེལ་པ་ཟིན་བྲིས་སུ་བཀོད་པ།
ཚིགས་བཅད་བཅུ་པའི་འགྲེལ་པ་ཟིན་བྲིས་སུ་བཀོད་པ་བཞུགས།
ཨོཾ་སྭཱ་སྟི། དཔལ་ལྡན་འཁོར་ལོའི་མགོན་པོ་དང༌། །དབྱེར་མེད་རྗེ་བཙུན་ལ་བཏུད་ནས། །གཞུང་བཟང་ཚིགས་བཅད་བཅུ་པ་ཡི། །གོ་དོན་བླ་མའི་གསུང་བཞིན་དུ། །བདག་གིས་འབད་དེ་ཟིན་བྲིས་བྱ། །སྤྱན་ལྡན་རྣམས་ཀྱིས་བཟོད་པར་མཛོད། །དེ་ལ་ཚིགས་བཅད་བཅུ་པ་ཞེས་བྱ་བའི་གཞུང་འདི་འཆད་པ་ལ། བཤད་པ་ལས་འཇུག་པའི་བྱ་བ། བཤད་པ་ཉིད་ཉེ་བར་འགོད་པ་དང་གཉིས་སམ། ཡང་བཤད་པ་མཐར་ཕྱིན་པའི་བྱ་བ་སྟེ་གསུམ་ལས། །༈ དང་པོ་ལ་མཚན་དོན་བཤད་པ་དང༌། འགྱུར་གྱི་ཕྱག་གཉིས་ལས། དང་པོ་མཚན་དོན་ནི། རྒྱ་གར་སྐད་དུ། ད་ཤ་གཱ་ཐཱ་ནཱ་མ་མརྒ་ཀྲ་མ་སྟེ། དེ་ཉིད་བོད་སྐད་དུ་བསྒྱུར་ན། ཚིགས་བཅད་བཅུ་པ་ཞེས་བྱ་བ་ལམ་གྱི་རིམ་པ་ཞེས་བྱ་སྟེ། ད་ཤ་ནི་བཅུ་པ། གཱ་ཐཱ་ནི་ཚིགས་བཅད། ནཱ་མ་ནི་ཞེས་བྱ་བ། མརྒ་ནི་ལམ་གྱི། ཀྲ་མ་ནི་རིམ་པའོ། །༈ གཉིས་པ་ལོ་ཙཱ་བའི་འགྱུར་གྱི་ཕྱག་ནི། དཔལ་
ཧེ་རུ་ཀ་ལ་ཕྱག་འཚལ་ལོ། །ཞེས་པ་སྟེ། དེ་ཡང་དཔལ་ཞེས་བྱ་བའི་སྐད་དོད་ཤྲཱི་སྟེ། གཟུང་འཛིན་གཉིས་སུ་མེད་པའི་ཡེ་ཤེས་འགྲོ་བ་ཐམས་ཅད་ཀྱི་འདོད་བྱ་མཐར་ཐུག་དོན་དམ་པའི་དཔལ་ཕུན་སུམ་ཚོགས་པ་དང་ལྡན་པའོ། །ཧེ་ཞེས་བྱ་བ་ནི་ཧེ་རུ་སྟེ། དང་པོའི་དུས་ན་རྒྱུ་གང་གིས་ཀྱང་མ་བསྐྱེད་ཅིང༌། སྐྱེ་བ་སྤངས་པས་དང་པོ་རྒྱུ་དང་བྲལ་བའི་སྟོང་པ་ཉིད་དང༌། རུ་ནི་རཱུ་པ་སྟེ་གཟུགས་སམ་ཚོགས་པའམ་བཀོད་པ་ལ་འཇུག་པས། བར་དུ་གཟུགས་སམ་བཀོད་པར་གྲུབ་མེད་ལ། དེའི་ཕྱིར་འཇིགས་པ་དང་བྲལ་བའི་སྟོང་པ་ཉིད་དང༌། ཀ་ནི་མཐར་གང་དུ་ཡང་མི་གནས་པ་སྟེ། གནས་པ་དང་བྲལ་བའི་སྟོང་པ་ཉིད་དོ། །དེ་ཡང༌། ཤྲཱི་ནི་གཉིས་མེད་ཡེ་ཤེས་སྟེ། ཧེ་ནི་རྒྱུ་སོགས་སྟོང་པ་ཉིད། །རུ་ནི་ཚོགས་དང་བྲལ་བ་སྟེ། །ཀ་ནི་གང་དུའང་མི་གནས་པའོ། །ཞེས་གསུངས་ཏེ། དེ་ལྟ་བུའི་རྟག་ཆད་སྐྱེ་འགག་གནས་གསུམ་དང་བྲལ་བ་དོན་དམ་པའི་དཔལ་ཧེ་རུ་ཀ་ཆོས་ཉིད་བདེ་གཤེགས་སྙིང་པོ་དེ་ལ་ཕྱག་འཚལ་ལོ། །ཞེས་པ་སྟེ། སུ་ཞིག་གིས་འཚལ་ན། གཞུང་བསྒྱུར་བ་པོའི་ལོ་ཙཱ་བ་རྗེ་བཙུན་
ཉིད་ཀྱིས་སོ། །རྩ་བའི་གཉིས་པ་ལའང༌། མཆོད་པར་བརྗོད་པ་དང༌། རྩོམ་པར་དམ་བཅའ་བ་དང༌། བཤད་པ་དངོས་ཀྱི་བྱ་བ་སྟེ་གསུམ་ལས། ༈ དང་པོ་ནི། མཆོག་ཏུ་བླ་མ་ལ་ནི་དང་པོར་ཕྱག་འཚལ་ཡེ་ཤེས་བཙུན་མོ་རྡོ་རྗེ་བདེ་མར་གུས་བཏུད་ནས། ཞེས་སོ། དེའི་དོན་ནི། མཆོག་ཏུ་དང་བའི་ཡིད་དང་བཅས་པས་བླ་མ་སྟེ་རྡོ་རྗེ་སློབ་དཔོན་འཁོར་ལོའི་དབང་ཕྱུག་དང་དབྱེར་མེད་པ་དེ་ལ། དང་པོར་སྟེ་ཐོག་མར་ཕྱག་འཚལ་ཞིང་དེའི་རྗེས་སུ་ཡི་དམ་ལ་ཕྱག་བྱ་སྟེ། དེ་ཡང་ཡེ་ཤེས་གཙོ་མོ་ནི། ཆོས་དབྱིངས་དོན་དམ་སྟོང་ཉིད་ཤེས་རབ་ལྷ་མོའི་དཀྱིལ་འཁོར་གྱི་གཙོ་མོ་སྟེ། མཚན་གྱི་རྣམ་གྲངས་རྡོ་རྗེ་བདེ་མ་དང༌། སྣ་ཚོགས་ཡུམ་དང་རྡོ་རྗེ་བདག་མེད་མ་དང༌། རྡོ་རྗེ་ཕག་མོ་ལ་སོགས་པ་དུ་མ་ཞིག་ཡོད་པ་ལས། རྡོ་རྗེ་བདེ་མའམ་རྡོ་རྗེ་ཕག་མོ་ལ་གུས་པ་ཆེན་པོ་དང་བཅས་པས་རབ་ཏུ་འདུད་པའོ། །སུ་ཞིག་གིས་ནི་བསྟན་བཅོས་མཛད་པ་པོ་སློབ་དཔོན་བུདྡྷ་ནཱ་ཐ་ཉིད་ཀྱིས་སོ། །འོ་ན་བླ་མ་དང་ཡི་དམ་ལ་ཕྱག་འཚལ་ཞིང་འདུད་དགོས་པས་རྒྱུ་མཚན་ཇི་ལྟར་ཡིན་ཞེ་ན། སྤྱིར་ནས་གསང་སྔགས་པའི་དངོས་གྲུབ་ཐམས་ཅད་ཡི་དམ་ལས་ཐོབ་དགོས་པ་དང༌། དེ་ཡང་བླ་མའི་བྱིན་རླབས་ལ་བརྟེན་ནས་འབྱུང་བའི་ཕྱིར། ཐོག་མར་དེ་དག་ལ་ཕྱག་འཚལ་བ་ཡིན་ལ། སྤྱིར་ནས་མཆོད་པར་བརྗོད་ཅིང་ཕྱག་འཚལ་བ་ནི། བསྟན་བཅོས་རྩོམ་པ་པོ་རང་ཉིད་དམ་པར་གཏོགས་པ་དང༌། རྩོམ་པ་ལ་བར་ཆད་མི་འབྱུང་ཞིང་མཐར་ཕྱིན་པའི་ཕྱིར་དང༌། ཚོགས་རྫོགས་པ་དང༌། གཞན་ཡང་ཚུལ་དེ་ལྟ་བུ་ལ་སློབ་པར་གདམས་པའོ། །༈ གཉིས་པ་ནི། སུ་ཞིག་གི་དོན་དུ་རྩོམ་ཞེ་ན།
པཎྜི་ཏ་ལེགས་པར་གྲགས་པ་སྟེ། སཱ་དྷུ་ཀཱིརྟི་ཞེས་པའི་དོན་དུ་མཛད་པ་ཡིན་ཏེ། དེ་ཡང་རིགས་ཅན་ལེགས་པར་གྲགས་པ་མགུ་བ་སྐྱེད་བྱེད་སྔགས་རྒྱུད་ལམ་ནི་སྤྱན་ལྡན་ཀུན་གྱིས་བཤད་པ་དང༌། བདེ་ཆེན་རྡོ་རྗེའི་ལུང་ནི་ཐོབ་པར་གྱུར་པས་ངེས་པར་བྱོས་ཞེས་གསུངས་ཏེ། དེའི་དོན་ནི། རིགས་ཅན་ཞེས་པ་ལ་ཉན་ཐོས་ཀྱི་ཐེག་པའི་རིགས་ཅན་གྱི་གང་ཟག་དང༌། རང་རྒྱལ་གྱི་རིགས་ཅན་དང༌། ཐེག་པ་ཆེན་པོའི་རིགས་ཅན་གྱི་གང་ཟག་སྟེ་གསུམ་ལས། ཐེག་པ་ཆེན་པོ་དང༌། དེའི་ཡང་འབྲས་བུ་གསང་སྔགས་ཀྱི་ཐེག་པའི་རིགས་ཡིན་པས་ན། རིགས་ཅན་ཞེས་བྱ་ལ། མཚན་ལེགས་པར་གྲགས་པ་ཞེས་བྱ་བའི་པཎྜི་ཏ་དེ་ཉིད་ཡིད་དགའ་ཞིང་མགུ་བ་བསྐྱེད་པའི་ཕྱིར་རྩོམ་པ་ཡིན་ལ། འོ་ན་གཞུང་ཇི་ལྟ་བུ་ཞིག་རྩོམ་ཞེ་ན། གསང་སྔགས་ཀྱི་རྒྱུད་སྡེ་ཟབ་མོ་རྣམས་ལས་གསུངས་པའི་ལམ་གྱི་རིམ་པ་དེ་ཉིད་འཆད་ལ། དེ་ཡང་གྲུབ་ཆེན་རང་ཉིད་ཀྱི་བློ་སྟོབས་ཀྱིས་འཆད་པ་ཡིན་ནམ་ཞེ་ན། མ་ཡིན་ཏེ། གསང་སྔགས་ཟབ་མོའི་གནས་ལུགས་ཀྱི་དོན་དེ་ཁོ་ན་ཉིད་མངོན་སུམ་དུ་གཟིགས་པའི་སྤྱན་དང་ལྡན་པའི་གྲུབ་པའི་སློབ་དཔོན་ཆེན་པོ་རྣམས་ཀྱིས་བཤད་པ་དང༌། ཁྱད་པར་དུ་བདེ་བ་ཆེན་པོ་རྡོ་རྗེའི་ལུང་ཞེས་པ་བདེ་བ་ཆེན་པོ་རྡོ་རྗེའི་ལུང་ནི། གྲུབ་ཆེན་ཞི་བ་སྦས་པའི་གསང་མཚན་ཡིན་ལ། དེའི་ལུང་ནི་དེ་ཉིད་ཀྱི་ཞལ་ནས་གསུངས་པ་དངོས་སུ་ཐོས་པ་དང༌། དེའི་གསུང་རབ་ལ་བརྟེན་ནས་ངེས་པར་བཤད་པ་ཞེས་པའོ། །གསུམ་པ་བརྩམས་པའི་བསྟན་བཅོས་དངོས་བཤད་པ་ནི། རྣམ་པ་བདུན་གྱིས་ངེས་པར་བྱ་བ་ཡིན་ཏེ། བདུན་གྱིས་ངེས་པ་ཞེས་པའི་དོན་ནོ། །དེ་དག་ལ། མདོར་བསྟན་པ་དང༌།
རྒྱས་པར་བཤད་པ་གཉིས་ཡོད་པ་ལས། དང་པོ་མདོར་བསྟན་པ་ནི། ལམ་དང་བཅས་པའི་ཟླ་བ་རྟ་དམར་ས་ཡི་ཚུལ་དང་ལག་པའི་རིམ་པ་དེ་རྗེས་སྤྱོད་པ་འབྲས། ཞེས་པ་སྟེ། དེའི་དོན་ཡང༌། ལམ་དང་བཅས་པའི་ཞེས་པ་ལམ་ལྔའི་རིམ་པ་བཤད་པ་དང༌། ཟླ་བ་ཞེས་པ་ཁམས་དཀར་པོ་བྱང་ཆུབ་ཀྱི་སེམས་ཏེ། དེ་ཉིད་འཕོ་བ་འགགས་པའི་རིམ་པ་བཤད་པ་དང༌། རྟ་དམར་ཞེས་པ་རླུང་སྟེ། རླུང་རྒྱུ་བའི་བགྲོད་པ་འགགས་པའི་རིམ་པ་བཤད་པ་དང༌། སའི་ཚུལ་ཞེས་པས་ས་བཅུ་གཉིས་བཤད་པ་དང༌། ལག་པའི་རིམ་པ་ཞེས་པ་ལག་པ་ནི་གཉིས་ཏེ། རིམ་པ་གཉིས་ཀྱི་དོན་བཤད་པ་དང༌། སྤྱོད་པ་ཞེས་པས་སྤྱོད་པའི་རྣམ་གཞག་བཤད་པ་དང༌། འབྲས་ཞེས་པའི་འབྲས་བུ་སངས་རྒྱས་ཀྱི་སའི་རྣམ་གཞག་བཤད་པ་བདུན་ནོ། །ཞེས་པའོ། །༈ གཉིས་པ་རྒྱས་པར་བཤད་པ་ལའང་བདུན་ལས། དང་པོ་ལམ་ལྔའི་རིམ་པ་རྒྱས་པར་བཤད་པ་ནི། རྟོག་པའི་རྣལ་འབྱོར་དང་ནི་དྲན་པ་གཅིག་དང་གསལ་བ་དམིགས་པ་དང་བཅས་རྫོགས་པ་འདི་རྣམས་ལ། རྣམ་གསུམ་ཚོགས་ཀྱི་ལམ་དུ་འགྱུར་ཏེ་ཡེ་ཤེས་གསུམ་དང་རྣམ་པར་རྟོག་པ་གསུམ་བྲལ་ཡེ་ཤེས་སྐུ། ཕྲ་མོ་གསུམ་ཉམས་དེ་བཞིན་བྱང་ཆུབ་སྐད་ཅིག་གསུམ་ནི་བཅུ་གཉིས་སྦྱོར་བའི་ལམ་གྱི་དོན་དམ་གྱི། །དགའ་བའི་བདེན་པ་མངོན་རྟོགས་མཐོང་བའི་ལམ་སྟེ་བཅུ་གཉིས་པ་ནི་ཡན་ལག་བདུན་ནོ་དེ་ལས་འབྲས། ཞེས་གསུངས་པས་བསྟན་ཏེ། ད་ལ་ལམ་ལྔ་རྒྱས་པར་བཤད་པ་ལས། ཚོགས་ལམ་བཤད་པ། སྦྱོར་ལམ་བཤད་པ། མཐོང་ལམ་བཤད་པ། སྒོམ་ལམ་བཤད་པ། མི་སློབ་ལམ་བཤད་པ་སྟེ། དེའི་དང་པོ་ཚོགས་ལམ་ལ། ཚོགས་
ལམ་ཆུང་ངུ་དང༌། འབྲིང་དང་ཆེན་པོ་སྟེ་གསུམ་ལས། རྟོག་པའི་རྣལ་འབྱོར་ཞེས་པ་རྣམ་པར་རྟོག་པའི་སྒོམ་པ་ནི། བསྐྱེད་རིམ་ཡིན་ལ། བསྐྱེད་རིམ་དེ་རགས་པ་ལ་གསལ་སྣང་ཐོབ་པ་ནི་ཚོགས་ལམ་ཆུང་ངུ་དང༌། དྲན་པ་གཅིག་པ་སྟེ་ཕྲ་བ་ལ་གསལ་སྣང་ཐོབ་པ་ནི་ཚོགས་ལམ་འབྲིང་དང༌། གསལ་བ་དམིགས་པ་དང་བཅས་པའི་རྫོགས་རིམ་ལ་བརྟན་པ་ཐོབ་པས་ཚོགས་ལམ་ཆེན་པོ་ཐོབ་པ་ཞེས་བྱ་སྟེ་དེ་ཡང་འཁོར་ལོ་སྡོམ་པའི་དཀྱིལ་འཁོར་ལ་མཚོན་ན། དཀྱིལ་འཁོར་གྱི་གཙོ་བོ་ཧེ་རུ་ཀ་ཡབ་ཡུམ་ནས། མཁའ་འགྲོ་མ་བཞི། འཁོར་ལོ་གསུམ་གྱི་དཔའ་བོ་དཔའ་མོ། སྒོ་མཚམས་མ་བརྒྱད་ཀྱི་བར་ལྷ་ཚོགས་རྣམས་བསྒོམ་བསྒོམ་པ་ལས་ནམ་ཞིག་དམིགས་པ་ལ་གསལ་སྣང་བརྟན་པོ་ཐོབ་པ་ནི། དངོས་སུ་རེག་རྒྱུ་དང་མཐོང་བ་ནི་མཚན་མ་ཐོབ་པ་ཞེས་བྱ་སྟེ། དེ་ལྟ་བུ་ནི་རགས་པའི་བསྐྱེད་རིམ་ལ་བརྟན་པ་ཐོབ་པ་སྟེ། དེ་ནི་ཚོགས་ལམ་ཆུང་ངུ་དང༌། དེའི་སྟེང་དུ་གཙོ་བོའི་སྐུ་ལ་ལུས་དཀྱིལ་གྱི་ལྷ་ཚོགས་ཡོངས་སུ་རྫོགས་པ་དང༌། གོ་ཆའི་ལྷ་རྣམས་དང་བཅས་པ་གསལ་བར་སྒོམ་ནུས་ཤིང༌། གསང་གནས་སམ། སྙིང་གར་རམ། སྣ་རྩེ་ལྟ་བུར་ཐིག་ལེ་ཕྲ་མོའི་ནང་དུ་ཡང་དཀྱིལ་འཁོར་ཡོངས་སུ་རྫོགས་པ་གསལ་ཐེབས་ཤིང༌། རེག་མཐོང་གི་མཚན་མ་མཐོང་བ་ནི་ཕྲ་མོའི་བསྐྱེད་རིམ་ལ་བརྟན་པ་ཐོབ་པ་སྟེ། དེ་ནི་ཚོགས་ལམ་འབྲིང་དང༌། དེ་ནས་གསལ་བར་ཞེས་པ་ནི། ངེས་པར་ཞེས་པའི་དོན་ཡིན་ལ། དམིགས་པ་དང་བཅས་པའི་རྫོགས་པའི་རིམ་པ་སྟེ། ཕྲ་མོ་དང་ཐིག་ལེའི་རྣལ་འབྱོར་ལ་བརྟན་པ་ཐོབ་པས་ནི་ཚོགས་ལམ་ཆེན་པོ་ཐོབ་པར་འགྱུར་རོ་ཞེས་པའོ། །༈ གཉིས་པ་སྦྱོར་ལམ་
ལ་དབྱེ་ན་ས་བཅུ་གཉིས་ཏེ། སྦྱོར་ལམ། དྲོད་དང༌། རྩེ་མོ་དང༌། བཟོད་པ་དང༌། ཆོས་མཆོག་སྟེ་བཞི། དེ་དག་ལའང་ཆུང་ངུ་དང༌། འབྲིང་དང༌། ཆེན་པོ་གསུམ་གསུམ་དུ་དབྱེ་བས་ན་བཅུ་གཉིས་སོ། །དེ་ལ་ཡེ་ཤེས་གསུམ་དང་ཞེས་པས། དགའ་བའི་ཡེ་ཤེས་ཀྱི་རིམ་པའི་ས་ནི་དྲོད་ཆུང་ངུ་དང༌། མཆོག་དགའི་ཡེ་ཤེས་ཀྱི་རིམ་པའི་ས་ནི་དྲོད་འབྲིང་དང༌། དགའ་བྲལ་གྱི་ཡེ་ཤེས་ཀྱི་རིམ་པའི་ས་ནི་དྲོད་ཆེན་པོ་སྟེ། ཡང་འདུས་པ་སོགས་ན། ཕ་རྒྱུད་ལས་སྣང་བའི་རིམ་པའི་སོགས་དང་སྦྱོར་ཀྱང་མིང་འདོགས་ཙམ་ལས་དོན་ཁྱད་མེད་དོ། ། དེ་ལ་ཐོག་མར་ཏིང་ངེ་འཛིན་གྱི་རིམ་པའི་དགའ་བའི་སྐད་ཅིག་མ་དེ་ཉིད་སྒོམ་སྒོམ་པས། ཐོག་མ་རྣམས་སུ་དགའ་བདེ་ཆུང་ངུ་དང༌། མི་བརྟན་ཞིང་འགྱུར་བའི་ཚུལ་དུ་ཡོད་པ་ལས། ནམ་ཞིག་ན་སྔར་ལས་བརྒྱ་འགྱུར་གྱི་བཟང་བའི་བདེ་བའི་སྐད་ཅིག་མ་མི་འབྱུང་བ་ཞེས་སྐྱེ་སྟེ། དེ་ནི་དགའ་བའི་ཡེ་ཤེས་ཀྱི་རིམ་པའི་སའམ། དགའ་བ་སྣང་བའི་རིམ་པའི་ས་ཞེས་བྱ་བ་དྲོད་ཆུང་ངུ་ཡིན་ལ། དེ་བཞིན་དུ་སླར་ཡང་བསྒྲུབས་པས་དེ་བས་ཀྱང་བརྒྱ་འགྱུར་གྱི་བཟང་བ་ཐོབ་པ་ནི། མཆོག་དགའི་ཡེ་ཤེས་ཀྱི་རིམ་པའི་སའམ། དགའ་བ་མཆེད་པའི་རིམ་པའི་ས་སྟེ་དྲོད་འབྲིང་དང༌། དེ་བཞིན་དུ་དེ་བས་ཀྱང་བརྒྱ་འགྱུར་གྱི་བཟང་བ་ཐོབ་པ་ནི། དགའ་བྲལ་གྱི་ཡེ་ཤེས་ཀྱི་རིམ་པའི་སའམ། དགའ་བ་ཐོབ་པའི་ས་སྟེ་དྲོད་ཆེན་པོ་ཐོབ་པ་ཡིན་ནོ། །དེའི་ཚེ་རླུང་སེམས་ཙམ་གྱི་སྒྱུ་ལུས་ཀྱི་སྐུ་གྲུབ་བོ། །དེ་ནས་སྦྱོར་ལམ་རྩེ་མོ་ཆུང་འབྲིང་ཆེན་པོ་གསུམ་བཤད་པ་ནི། རྣམ་པར་རྟོག་པ་གསུམ་བྲལ་ཡེ་ཤེས་སྐུ་ཞེས་པ་སྟེ། དེའི་དོན་ཡང་རྣམ་པར་རྟོག་པ་ནི་རང་བཞིན་བརྒྱད་བཅུའི་རྣམ་རྟོག་ཡིན་ལ། གསུམ་
ནི་དུག་གསུམ་གྱིས་བསྡུས་པ་སྟེ། ཞེ་སྡང་གི་རྣམ་པར་རྟོག་པ་སུམ་ཅུ་རྩ་གསུམ། འདོད་ཆགས་ཀྱི་རྣམ་པར་རྟོག་པ་བཞི་བཅུ། གཏི་མུག་གི་རྣམ་པར་རྟོག་པ་བདུན་ཏེ་རྣམ་པ་གསུམ་ཡིན་ལ། དེ་ཉིད་དང་བྲལ་བ་ནི། རྩེ་མོ་ཆུང་འབྲིང་ཆེན་པོ་གསུམ་གྱི་ཡེ་ཤེས་ཀྱི་སྐུའོ། །དེ་ཡང་གོང་དུ་བཤད་པའི་སྒྱུ་ལུས་ཀྱི་སྐུ་དེ། རིལ་བོར་འཛིན་པ་དང་རྗེས་སུ་གཞིག་པའི་རྣལ་འབྱོར་གྱི་འོད་གསལ་དུ་ཡང་ཡང་བཅུག་པ་ལས། ཞེ་སྡང་གི་རྣམ་པར་རྟོག་པ་སུམ་ཅུ་རྩ་གསུམ་རགས་པ་འགགས་པ་ནི། རྩེ་མོ་ཆུང་ངུའི་ས་ཐོབ་པ་ཡིན་ལ། དེ་ནས་ཡང་སྔར་བཞིན་བསྒོམས་པས། འདོད་ཆགས་ཀྱི་རྣམ་པར་རྟོག་པ་བཞི་བཅུར་རགས་པ་འགགས་པ་ནི་རྩེ་མོ་འབྲིང་གི་ས་དང༌། དེ་བཞིན་དུ་སླར་ཡང་བསྒོམས་པས་གཏི་མུག་གི་རྣམ་པར་རྟོག་པ་བདུན་རགས་པ་འགགས་པ་ནི། རྩེ་མོ་ཆེན་པོའི་ས་ཐོབ་པ་ཡིན་ནོ། །དེ་ནས་སྦྱོར་ལམ་བཟོད་པ་ཆུང་ངུ་དང༌། འབྲིང་དང་ཆེན་པོ་གསུམ་བཤད་པ་ནི། ཕྲ་མོ་གསུམ་མཉམ་ཞེས་པས་བསྟན་ཏེ། དེ་ཡང་ཕྲ་མོ་ཞེས་པས་རང་བཞིན་བརྒྱད་བཅུའི་རྣམ་རྟོག་ཕྲ་མོ་གསུམ་ཉམས་པ་སྟེ། འགགས་པ་ལས་བཟོད་པ་ཆུང་འབྲིང་ཆེན་པོ་གསུམ་ཐོབ་པ་ཡིན་ཏེ་དེ་སླར་ཡང་གོང་བཞིན་བསྒོམ་ཞིང་འོད་གསལ་དུ་བཅུག་པས། ནམ་ཞིག་ན་ཞེ་སྡང་གི་རྣམ་པར་རྟོག་པ་སུམ་ཅུ་རྩ་གསུམ་ཕྲ་མོ་ཡང་འགགས་པས། སྦྱོར་ལམ་བཟོད་པ་ཆུང་ངུའི་ས་ཐོབ་པ་ཡིན་ལ། དེ་བཞིན་དུ་འདོད་ཆགས་ཀྱི་རྣམ་རྟོག་བཞི་བཅུ་ཕྲ་མོ་ཡང་འགགས་པས་ནི། བཟོད་པ་འབྲིང་གི་ས་ཐོབ་པ་དང༌། གཏི་མུག་གི་རྣམ་རྟོག་བདུན་ཕྲ་མོ་ཡང་འགགས་པས་ནི་བཟོད་པ་ཆེན་པོའི་ས་ཐོབ་པ་ཡིན་ནོ། །དེ་ནས་ཆོས་མཆོག་ནི་བྱང་ཆུབ་
སྐད་ཅིག་གསུམ་ནི་ཞེས་པས་ཏེ། བཟོད་པ་ཆེན་པོའི་མཐར་རིམ་པ་དེ་སྦྱོར་ལམ་ཆོས་མཆོག་ལ་མཚམས་སྦྱོར་ཞིང༌། དེ་དག་གི་རིམ་པ་སོགས་གོང་དང་འདྲ་བ་ལས། སངས་རྒྱས་རྣམས་ཀྱིས་ཉེ་རྒྱུས་དབང་བསྐུར་ཞིང་གྲོགས་རིག་མའི་སྤྱོད་པ་ངེས་པར་འཇུག་པས། དེས་བསྒྲུབས་པས་དགའ་བའི་སྐད་ཅིག་མ་དང༌། དེ་ནས་མཆོག་དགའི་སྐད་ཅིག་མ་དང༌། དགའ་བྲལ་གྱི་སྐད་ཅིག་མའམ། སྣང་མཆེད་ཐོབ་གསུམ་གྱི་སྐད་ཅིག་མ་གསུམ་གྱིས་ནི་གོང་གི་རྣམ་རྟོག་གི་རིགས་གསུམ་པོ་དེ་དག་གི་རིགས་རྒྱུན་ཕྲ་མོ་རྣམས་ཀྱང་སྤོངས་ཏེ། སྦྱོར་ལམ་ཆོས་མཆོག་ཆུང་ངུ་དང༌། འབྲིང་དང༌། ཆེན་པོའི་ས་རྣམས་ཡིན་ལ། དེ་དག་ནི་བཅུ་གཉིས་ཏེ་སྦྱོར་ལམ་ས་བཅུ་གཉིས་ཀྱི་ལམ་མོ་ཞེས་པའོ། །དེའི་མཐར་དོན་གྱི་འོད་གསལ་འགྲུབ་པ་ཡིན་ནོ། །༈ གསུམ་པ་མཐོང་ལམ་བཤད་པ་ནི། དོན་དམ་གྱི་དགའ་བའི་བདེན་པ་མངོན་རྟོགས་མཐོང་བའི་ལམ་སྟེ། ཞེས་གསུངས་པས་ཏེ། དོན་དམ་པའི་དགའ་བའི་བདེན་པ་མངོན་པར་རྟོགས་པ་སྟེ་ཡེ་ཤེས་ཀྱི་སྐུ། དེ་ལ་སངས་རྒྱས་ཀྱི་སྤྲུལ་པའི་སྐུ་རྣམས་ཀྱི་ཉེ་རྒྱུས་དབང་བསྐུར་བའི་རྐྱེན་གྱིས་དོན་གྱི་འོད་གསལ་ཐོག་མར་རྟོགས་ཤིང་མཐོང་བའི་སྐབས་དེ་ནི་མཐོང་ལམ་ཡིན་ནོ། །༈ བཞི་པ་བསྒོམ་ལམ་ནི། བཅུ་གཉིས་ས་ནི་ཡན་ལག་བདུན་ནོ། ཞེས་པ་སྟེ། དེ་ཡང་གོང་གི་དོན་གྱི་འོད་གསལ་མཉམ་གཞག་ལས་ལངས་སློབ་པའི་ཟུང་འཇུག་གི་སྐུ་ཡང་འགྲུབ། ཟུང་འཇུག་གི་རིམ་པའི་འོད་གསལ་དང་སྒྱུ་ལུས་དབྱེར་མེད་མཐོང་ཞིང་རྒྱུད་ལ་སྐྱེས་ནས་དེའི་རིམ་པ་ལ་སློབ་པ་ནི་སྒོམ་ལམ་ཡིན་ཏེ། དེའི་ཚེ་འཕགས་པའི་ས་དང་པོ་ཐོབ་པ་ཡིན་ཞིང་འཕགས་པའི་ས་བཅུའི་བར་
རོ། །དེ་ནི་རྡོ་རྗེ་འཆང་ཆུང་ངུ་ཡན་ལག་བདུན་དང་ལྡན་པ་སྟེ། དེ་ཡང་སློབ་དཔོན་ངག་དབང་གྲགས་པས། ལོངས་སྤྱོད་རྫོགས་དང་ཁ་སྦྱོར་བདེ་ཆེན་རང་བཞིན་མེད། །སྙིང་རྗེས་ཡོངས་གང་རྒྱུན་མི་འཆད་དང་འགག་པ་མེད། །ཅེས་པ་སྟེ། སྐུ་མཚན་དཔེ། གསུང་ཆོས་སྒྲ། འདོད་པའི་ཡོན་ཏན་སྣ་ཚོགས་ལ་ལོངས་སྤྱོད་པ་དང༌། ལོངས་སྤྱོད་རྫོགས་པ་དང༌། ལྷན་ཅིག་སྐྱེས་པའི་བདེ་བ་ལ་རྟག་ཏུ་གནས་པའི་རྒྱུ་རྗེས་ཆགས་པ་ཁ་སྦྱོར་གྱི་རྣམ་པ་དང༌། རང་བཞིན་བདེ་བ་ཆེན་པོ་ཡིན་པ་དང༌། མཚན་མའི་རྣམ་རྟོག་ལ་སོགས་པའི་རང་བཞིན་མེད་པ་དང༌། སྙིང་རྗེ་ཆེན་པོས་རྒྱུད་ཡོངས་སུ་གང་བ་དང༌། དེ་ལྟ་བུའི་སྐུ་དེ་ཉིད་རྒྱུན་མི་འཆད་པ་དང༌། འགོག་པ་ལ་མི་གནས་པ་སྟེ་ཡན་ལག་བདུན་དང་ལྡན་པའོ། །༈ ལྔ་པ་མི་སློབ་ལམ་བཤད་པ་ནི། དེ་ལས་འབྲས་ཞེས་པས་བསྟན་ཏེ། ལམ་བཏགས་པ་བ་དང༌། འབྲས་བུ་མཚན་ཉིད་པ་ཡིན་ལ། དེ་ཡང་སྒོམ་ལམ་གྱི་འཕགས་པའི་ས་བཅུའི་མཐར་སངས་རྒྱས་ལོངས་སྐུ་རྣམས་ཀྱིས་འོད་ཟེར་ཆེན་པོའི་དབང་བསྐུར་ནས་ས་བཅུ་རྒྱུན་མཐའི་སྐད་ཅིག་མ་གཉིས་པ་ལ། གཉིས་སུ་མེད་པའི་ཡེ་ཤེས་ཀྱི་སྐུ་ཟུང་འཇུག་རྡོ་རྗེ་འཆང་ཆེན་པོ་ཐོབ་པ་ཡིན་པས། འབྲས་བུ་མཐར་ཐུག་པ་ཡིན་ནོ། །དེས་ལམ་ལྔའི་འབྲུ་གནོན་ལམ་པ་བཤད་གྲུབ་པའོ། །དོན་ཚན་གཉིས་པ་བྱང་ཆུབ་ཀྱི་སེམས་ཀྱི་བགྲོད་པ་འགགས་ཚུལ་རྒྱས་པར་བཤད་པ་ནི། དྲོ་བ་ནས་ནི་ཆོས་ཀྱི་མཆོག་དང་ཐོག་མ་དེ་བཞིན༌། ་མའི་ས་མཐར་རི་བོང་ཅན་འགག་གོ །ཞེས་གསུངས་ཏེ། ཀུནྡ་བྱང་ཆུབ་ཀྱི་སེམས་ལ་རགས་པ་ཁམས་གསུམ་གྱིས་བསྡུས་པའི་བྱང་ཆུབ་སེམས་ཀྱི་ཐིག་ལེ་དང༌། ཕྲ་བ་རྣམ་ཤེས་ཙམ་གྱི་བྱང་སེམས་ཀྱི་ཐིག་ལེ་
གཉིས་ཡོད་པ་ལས། དེ་དག་འགག་ཚུལ་དྲོ་བ་ནས་ནི་ཞེས་པས། ཐིག་ལེ་རགས་པ་ནི་དྲོད་ཐོབ་ནས་འགག་པའི་འགོ་རྩོམ་པ་དང༌། ཆོས་ཀྱི་མཆོག་དང་ཞེས་པས་སྦྱོར་ལམ་ཆོས་མཆོག་ཆེན་པོ་ཐོབ་ནས། ཐིག་ལེ་ཕྲ་བ་རླུང་སེམས་ལས་གྲུབ་པ་འགགས་པའི་འགོ་རྩོམ་པ་སྟེ། ཐོག་མ་ཞེས་པས་དེ་དག་ཏུ་ཐོག་མར་འགག་པ་བསྟན་ལ། དེ་བཞིན་དུ་ཐ་མ་ནི་ས་བཅུའི་མཐའ་མར་རི་བོང་ཅན་ཏེ་བྱང་ཆུབ་ཀྱི་སེམས་ཕྲ་བ་ཡང་རྩ་བ་ནས་འགག་གོ་ཞེས་པའོ། །༈ གསུམ་པ་རླུང་འགག་ཚུལ་རྒྱས་པར་བཤད་པ་ནི། དང་པོ་རྟོག་དང་གཉིས་པ་སྦྱོར་བའང་དེ་རྣམས་བདེན་པ་མཐོང་བས་འགག་ཅིང་འགག་པ་དེ་ལས་སླར། །ས་བཅུའི་མཐའ་མར་དབུགས་དག་འགོག་པ་རགས་དང་དབུས་མ་དང་ནི་ཕྲ་མོའི་དབྱེ་བ་ཤེས་པར་བྱ། ཞེས་པས་བསྟན་ཏེ། དེ་ལ་རླུང་ལ་དབྱེ་ན། རགས་པའི་རླུང་དང༌། དེ་ལས་ཕྲ་ཤིང་ཤིན་ཏུ་ཕྲ་བ་རང་ཡང་མ་ཡིན་པའི་བར་མའམ་དབུས་མའི་རླུང་དང༌། ཤིན་ཏུ་ཕྲ་བའི་རླུང་སྟེ་གསུམ་ཡོད་པ་ལས། དང་པོ་རྟོག་དང་ཞེས་པ་རྟོག་པའི་རྣལ་འབྱོར་ནི་བསྐྱེད་རིམ་སྟེ་དེ་ལ་བརྟན་པ་ཐོབ་པས་རླུང་རགས་པ་འགགས་པའི་མགོ་རྩོམ་པ་དང༌། གཉིས་པ་སྦྱོར་བ་ཅེས་པས་རླུང་འབྲིང་པོའི་བར་ནི་སྦྱོར་ལམ་དྲོད་ཐོབ་པས་འགག་པ་དང༌། ཕྲ་བ་ནི་བདེན་པ་མཐོང་བས་འགག་པ་ཡིན་ཞིང༌། རྩ་བ་ནས་འགགས་པ་ནི་སླར་འཕགས་ས་བཅུ་པའི་མཐའ་མར། ཤིན་ཏུ་ཕྲ་བའི་རླུང་ས་བོན་དང་བཅས་པ་འགོག་པ་སྟེ་འགག་ཅིང་སྤོང་བར་ཤེས་པར་བྱའོ། །ཞེས་པ་ལ། རགས་དང་དབུ་མ་དང་ནི་ཕྲ་མོའི་དབྱེ་བས་ཤེས་པར་བྱ། ཞེས་པའོ། ། ༈ བཞི་པ་སའི་རྣམ་གཞག་རྒྱས་པར་བཤད་པ་ནི། བྱིས་པའི་ལམ་དང་ཆོས་ཀྱི་སྐུ་ནི་བཅུ་དང་བཅས་པ་འདིར་ནི་ས་ཏེ་རྩ་ལ་སོགས་
པ་རྣམས། བགྲོད་པ་འགྱེལ་བའི་སྦྱོར་བ་བཅུ་གཉིས་ས་རུ་འགྱུར་ཏེ་འོད་གསལ་དེ་བཞིན་མཚུངས་པའི་རྡོ་རྗེ་འཛིན། ཡན་ལག་བཅུ་གཉིས་འཕོ་བ་དང་བཅས་ཁུ་བ་འགགས་པས་ལུས་དང་ངག་ཡིད་རྡོ་རྗེའི་སྐུ་ཉིད་དོ། །འཕགས་པ་རྣམས་ཀྱི་བཅུ་གཉིས་ས་ལ་དེ་རྣམས་གཉིས་ཀྱི་ཕྲ་མོ་ས་བོན་དང་བཅས་ཤིན་ཏུ་འགགས། སྣ་ཚོགས་ཡོན་ཏན་རྣམས་ཀྱིས་བརྒྱན་ཞིང་ཆོས་ཀྱི་སྤྲིན་ལས་དབྱེ་བ་ཐ་མའི་གསུམ་པའོ། །ཐ་དད་གཞུང་ལུགས་སྣ་ཚོགས་རྒྱུན་དུ་བསྟན་པ་དག་ནི་ཅུང་ཟད་ཅུང་ཟད་དབྱེ་བ་ཁོ་ནའོ། །བར་ཆད་མེད་དང་རྣམ་པར་གྲོལ་བར་དུས་ཀྱི་འཁོར་ལོ་ལས་འབྱུང་གཞན་དུ་སྦྱོར་དང་བཅས་པ་ཡང༌། ཁྱད་པར་ལམ་ཡང་ཁ་ཅིག་ཏུ་ནི་སྟོང་པ་གསུམ་དང་སྒྲའི་རབ་དབྱེ་རྒྱུད་དང་རྒྱུད་དུ་སྟེ། ཀུན་ཏུ་འོང་སོགས་སློབ་དང་མི་སློབ་ས་རྣམས་རེ་རེར་བཅུ་གཉིས་བཅུ་གཉིས་ཀུན་ལ་དབྱེ་བས་སོ། །ཞེས་པའི་བར་གྱིས་བསྟན་ཏེ། སའི་རྣམ་གཞག་འདི་ལ་སྤྱིར་མང་དུ་ཡོད་པ་ལས། སྐབས་འདིར་ས་ཐམས་ཅད་བཅུ་གཉིས་སུ་བསྡུས་ཏེ་བཤད་པ་དང༌། རྩ་དང་ཐིག་ལེ་རླུང་འགག་ཚུལ་གྱི་རིམ་པས་ས་ཐོབ་ཚུལ་བཤད་པ་དང༌། འཕགས་པའི་ས་བཅུའི་རྣམ་གཞག་བཤད་པ་སྟེ་གསུམ་ཡོད་པ་ལས། དང་པོ་ནི། བྱིས་པའི་ལམ་དང་ཞེས་པས། མོས་སྤྱོད་ཀྱི་ས་དང༌། ཆོས་ཀྱི་སྐུ་ཞེས་པས་སངས་རྒྱས་ཀྱི་ས་དང༌། བཅུ་དང་ཞེས་པས་རབ་ཏུ་དགའ་བ་ལ་སོགས་པ་ས་བཅུ་དང་བཅས་པས་བཅུ་གཉིས་ཏེ། དེ་དག་ཀྱང་སྐབས་འདིར་འཁོར་ལོ་སྡོམ་པའི་གཞུང་རྣམས་དང་བསྟུན་ནས་བཤད་ན། དེ་ཡང་གཞུང་འདི་དག་གི་སྐབས་སུ་དངོས་སུ་གསུང་པ་བཅུར་བཤད་པ་ཤས་ཆེ་ཡང་ས་དེ་དག་གི་འབྲས་བུ་ཡིན་པས།
འཐུང་སྤྱོད་དང་ཉེ་བའི་འཐུང་སྤྱོད་གཉིས་ཀྱང་བསྣན་ནས་བཅུ་གཉིས་སུ་འཆད་པ་ཡིན་ལ། དེ་ལ་རིམ་པ་བཞིའི་ནང་ནས་ཡེ་ཤེས་ཀྱི་རིམ་པའི་སྐབས་སུ། དུར་ཁྲོད་བརྒྱད་དང་དག་པ་སྦྱོར་རྒྱུའི་བུ་ག་བརྒྱད་ཀྱི་རྩ་རྣམས་དག་པས་རྒྱུ་བྱས་ནས། གསང་རིམ་གྱི་ཐོག་མའི་སྐབས་སུ་སྙིང་གའི་རྩ་ནང་བསྐོར་གྱི་རྩ་བ་གསུམ་སྐོར་མ་དང༌། འདོད་མ་དང༌། ཁྱིམ་མ་དང༌། གཏུམ་མོ་སྟེ་བཞི་ཐིག་ལེས་གང༌། ནོར་བུའི་རྩ་མདུད་བཞི་གྲོལ་བ་ནི། འཐུང་སྤྱོད་དམ་མོས་སྤྱོད་ཀྱི་ས་ཐོབ་པའོ། །དེ་བཞིན་དུ་རྡོ་རྗེའི་སྐྱེད་པའི་རྩ་མདུད་བཞི་གྲོལ། མི་ཕྱེད་མ་དང༌། ཕྲག་གཟུགས་མ་དང༌། མཆོག་མ་དང༌། གཡོན་མ་སྟེ་བཞི་བྱང་ཆུབ་སེམས་ཀྱིས་གང༌། གནས་སམ་ས་དང་པོ་རབ་ཏུ་དགའ་བ་ཐོབ། གསང་གནས་ཀྱི་རྩ་མདུད་བཞི་གྲོལ། ཐུང་ངུ་མ་དང༌། རུས་སྦལ་སྐྱེས་མ་དང༌། སྒོམ་མ་དང༌། དབང་བསྒྱུར་མ་བཞི་བྱང་ཆུབ་སེམས་ཀྱིས་གང༌། ཉེ་བའི་གནས་སམ་དྲི་མ་མེད་པའི་ས་དང༌། དེ་ནས་ལྟེ་བའི་རྩ་མདུད་གཉིས་གྲོལ། སྐྱོན་མ་དང༌། བཤང་མ་གཉིས་བྱང་ཆུབ་སེམས་ཀྱིས་གང༌། ཞིང་ངམ་འོད་བྱེད་པའི་ས་དང༌། དེ་ནས་སླར་ཡང་ལྟེ་བའི་རྩ་མདུད་གཉིས་གྲོལ། མ་མོ་དང༌། མཚན་མོ་གཉིས་བྱང་སེམས་ཀྱིས་གང༌། ཉེ་བའི་ཞིང་ངམ། འོད་འཕྲོ་བའི་ས་དང༌། དེ་ནས་སྙིང་གའི་རྩ་མདུད་གཉིས་གྲོལ། སིལ་སྦྱིན་མ་དང༌། དྲོད་མ་གཉིས་བྱང་སེམས་ཀྱིས་གང༌། ཚནྡྷོ་ཧའམ། སྦྱང་དཀའ་བའི་ས་དང༌། དེ་ནས་སླར་ཡང་སྙིང་གའི་རྩ་མདུད་གཉིས་གྲོལ། རྩ་གཞོལ་མ་དང༌། མདོག་ནག་མ་གཉིས་བྱང་སེམས་ཀྱིས་གང༌། ཉེ་བའི་ཚནྡྷོ་ཧའམ། མངོན་དུ་གྱུར་པའི་ས་དང༌། དེ་ནས་མགྲིན་པའི་རྩ་མདུད་གཉིས་གྲོལ། ཤིན་ཏུ་གཟུགས་ཅན་
མ་དང༌། སྤྱི་མ་གཉིས་བྱང་སེམས་ཀྱིས་གང༌། འདུ་བ་དང་རིང་དུ་སོང་བའི་ས་ཐོབ། དེ་ནས་སླར་ཡང་མགྲིན་པའི་རྩ་མདུད་གཉིས་གྲོལ། རྒྱུ་སྦྱིན་དང་སྦྱོར་བྲལ་མ་གཉིས་བྱང་སེམས་ཀྱིས་གང༌། ཉེ་བའི་འདུ་བ་དང་མི་གཡོ་བ་དང་ས་བརྒྱད་པ་དང༌། དཔྲལ་བའི་རྩ་མདུད་གཉིས་གྲོལ། རྩ་སྡུག་གུ་མ་དང༌། གྲུབ་མ་བྱང་སེམས་ཀྱིས་གང༌། དུར་ཁྲོད་དམ་ས་དགུ་པ་ལེགས་པའི་བློ་གྲོས་ཐོབ། ཡང་དཔྲལ་བའི་རྩ་མདུད་གཉིས་གྲོལ། རྩ་འཚེད་མ་དང་ཡིད་བཟང་མ་བྱང་སེམས་ཀྱིས་གང༌། ཉེ་བའི་དུར་ཁྲོད་དམ་ས་བཅུ་པ་ཆོས་ཀྱི་སྤྲིན་ཐོབ། དེའི་མཐར་གཙུག་ཏོར་གྱི་རྩ་མདུད་བཞི་གྲོལ་ཞིང་ཐིག་ལེས་གང༌། རོ་རྐྱང་དབུ་མ་བདུད་བྲལ་མ་བཞི་ཐིག་ལེས་གང་སྟེ། དེ་དང་དུས་མཉམ་དུ་སྙིང་གའི་ཕྱི་སྐོར་གྱི་རྩ་བརྒྱད་དང་བུ་ག་བརྒྱད་དང་བཅས་པའི་རྩ་ཐམས་ཅད་བྱང་སེམས་ཀྱིས་གང་བའི་རྒྱུད་དེ་གང་བ་མཐར་ཐུག ཉེ་བའི་འཐུང་སྤྱོད་དམ་སངས་རྒྱས་ཀྱི་མིག་ཅན་ཏེ་བཅུ་གཉིས་སོ། །དེའི་ཚེ་མཐོང་ལམ་རྣམ་པར་མི་རྟོག་པའི་ཡེ་ཤེས་ཏེ། འོད་གསལ་ཟུང་འཇུག་གི་རྡོ་རྗེ་འཆང་ངམ་རྡོ་རྗེ་འཛིན་པའི་ས་ཆུང་ངུ་ཐོབ་པ་ཡིན་ནོ། །དེ་ནས་རྟེན་འབྲེལ་ཡན་ལག་བཅུ་གཉིས་འགག་ཚུལ་ས་དང་སྦྱར་ནས་བཤད་པ་ནི། ཡན་ལག་བཅུ་གཉིས་འཕོ་བ་དང་བཅས་ཁུ་བ་འགགས་པས་ལུས་དང་ངག་ཡིད་རྡོ་རྗེའི་སྐུ་ཉིད་དོ། །ཞེས་པས་ཏེ། དེ་ཡང་གོང་གི་སྦྱོར་ལམ་ས་བཅུ་གཉིས་པོ་དེ་དག་གི་སྐབས་སུ་རྟེན་འབྲེལ་ཡན་ལག་བཅུ་གཉིས་ལུགས་བཟློག་གི་རིམ་པས་འགགས་པ་ཡིན་ཏེ། ཐོག་མར་རྒ་ཤི་དང་སྐྱེ་བ་དང་སྲིད་པ་གསུམ་འགག་པའི་མ་དག་པའི་ལུས་རགས་པ་འདི་གནས་གྱུར་ཏེ། ཡེ་ཤེས་ཀྱི་ལུས་སུ་གྱུར། སྦྱོར་ལམ་གྱི་ས་དང་པོ་གསུམ་དང་
སྦྱོར། དེ་བཞིན་དུ་ལེན་པ་དང་སྲེད་པ་དང་ཚོར་བ་གསུམ་འགགས་པས། ཐ་མལ་པའི་ངག་རྣམ་པར་དག་སྟེ། གཞོམ་མེད་ཀྱི་སྒྲར་གྱུར་པ་དང༌། རེག་པ་སྐྱེ་མཆེད་དྲུག་དང་མིང་གཟུགས་གསུམ་འགགས་པས་མ་དག་པའི་སེམས་གནས་གྱུར་ཏེ་ཐུགས་བདེ་བ་ཆེན་པོར་གྱུར་པ་དང༌། རྣམ་ཤེས་དང་འདུ་བྱེད་དང་མ་རིག་པ་གསུམ་འགགས་པས། ཐ་མལ་པའི་ཡེ་ཤེས་གནས་གྱུར་ཏེ། དོན་དམ་གྱི་ཡེ་ཤེས་སུ་གྱུར། སློབ་པའི་ཟུང་འཇུག་གི་སྐུའམ་རྡོ་རྗེ་སྐུར་གྱུར་ཏེ། འོ་ན་སྦྱོར་ལམ་སྐབས་སུ་དེ་དག་འགགས་ཤིང་ལུས་ལ་སོགས་པ་གནས་གྱུར། འཕགས་པའི་ས་བཅུ་ལ་སོགས་པར་སྤང་ན་ཇི་ལྟར་ཡིན་ཞེ་ན། འཕགས་པ་རྣམས་ཀྱི་བཅུ་གཉིས་སར་ནི་དེ་རྣམས་ཉིད་ཀྱི་ཕྲ་མོ་ས་བོན་དང་བཅས་ཤིན་ཏུ་འགགས། ཞེས་གསུངས་ཏེ། ཟུང་འཇུག་གི་སྐུ་དེའི་སྐབས་སུ་རྒ་ཤི་སོགས་ཕྲ་མོ་གནས་ངན་ལེན་གྱི་ས་བོན་དང་བཅས་པ་འགགས་ཤིང་དག་པའི་འཕགས་པའི་ས་དང་པོ་ལ་སོགས་པ་ཐོབ་སྟེ། གོང་གི་རིམ་པས་འཕགས་པའི་ས་དགུ་དང༌། རྟེན་འབྲེལ་རྣམ་ཤེས་ལ་སོགས་པ་གསུམ་འགགས་པས། འཕགས་པའི་ས་བཅུ་པ་ཐོབ་ཅིང༌། དེའི་ཁྱད་པར་ནི། སྣ་ཚོགས་ཡོན་ཏན་རྣམས་ཀྱིས་བརྒྱན་ཞིང་ཆོས་ཀྱི་སྤྲིན་ལས་ཤིན་ཏུ་དབྱེ་བ་ཐ་མའི་ས་གསུམ་པོ། ཞེས་གསུངས་པས། ཡོན་ཏན་རྣམ་པ་སྣ་ཚོགས་པ་བརྒྱ་ཕྲག་བཅུ་ལ་སོགས་པ་རྣམས་ཀྱིས་བརྒྱན་པའི་སྐྱེས་བུ་ས་བཅུ་པ་ཆོས་ཀྱི་སྤྲིན་དེ་ལ་ཤིན་ཏུ་སྟེ་ངེས་པར་དབྱེ་བ་ནི་ཐ་མའི་ས་གསུམ་པོ་ཡིན་ནོ། །དེ་ཡང་ཇི་ལྟ་བུ་ཡིན་ཞེ་ན། ས་བཅུ་པ་དེའི་དང་པོའི་གནས་སྐབས་ནི་རྒྱུན་མཐའི་ཡེ་ཤེས་བར་ཆད་མེད་ལམ་ཞེས་བྱ་བ་ས་བཅུ་གཅིག་པ་དང༌། དེའི་རྗེས་ཀྱི་སྐབས་ནས་སྐད་ཅིག་མ་དང་པོ་ཡན་ནི་
རྣམ་པར་གྲོལ་བའི་ལམ་སྟེ་ས་བཅུ་གཉིས་པ་དང༌། དེ་ནས་རྒྱུན་མཐའི་རྗེས་སྐད་ཅིག་མ་གཉིས་པ་ནི་ཁྱད་པར་ལམ་དང་སའི་མིང་ཅན་འབྲས་བུ་མཚན་ཉིད་པ་སྟེ་བཅུ་གསུམ་རྡོ་རྗེ་འཛིན་གྱི་ས་ཞེས་པ་ཡིན་ནོ། དེ་ལྟ་བུའི་ས་འདི་དག་ལ་རྣམ་གྲངས་དང་དབྱེ་བ་མི་འདྲ་བ། ཐ་དད་གཞུང་ལུགས་སྣ་ཚོགས་རྒྱུད་དུ་བསྟན་པ་དག་ནི་ཅུང་ཟད་ཅུང་ཟད་དབྱེ་བ་ཁོ་ན་སྟེ། ཞེས་གསུངས་ཏེ། གཞུང་ལུགས་ཐ་དད་པ་རྣམ་པ་སྣ་ཚོགས་པ་དང༌། གསང་སྔགས་ཀྱི་རྒྱུད་སྡེ་ཆེན་པོ་རྣམས་ནས་ས་ལམ་གྱི་དབྱེ་བ་མི་འདྲ་བ་བསྟན་པ་དག་ནི། ནང་སེལ་དུ་ཅུང་ཟད་ཅུང་ཟད་མི་འདྲ་བ་གསུངས་པ་ཡིན་ཏེ། དོན་གཅིག་པ་ཁོ་ན་ཡིན་ལ། དེ་དག་ཀྱང་ཇི་ལྟ་བུ་ཞེ་ན། བར་ཆད་མེད་དང་རྣམ་པར་གྲོལ་བར་དུས་ཀྱི་འཁོར་ལོ་ལས་འབྱུང་གཞན་དུ་སྦྱོར་དང་བཅས་པ་ཡང༌། ཁྱད་པར་ལམ་ཁ་ཅིག་ཏུ་སྟེ་སྟོང་པ་གསུམ་དང་སྐུའི་རབ་དབྱེ་རྒྱུད་དང་རྒྱུད་དུ་ཞེས་གསུངས་སོ། ས་བཅུ་གཉིས་སུ་བྱེད་པ་དང༌། བཅུ་གསུམ་དུ་བྱེད་པ་དང༌། བཅོ་ལྔར་བྱེད་པའི་ལུགས་སོ། །དེ་ཡང་བཅུ་གཉིས་སུ་བྱེད་པའི་ལུགས་ནི། ཡོངས་སུ་གྲགས་པའི་ས་བཅུའི་སྟེང་དུ་བར་ཆད་མེད་པའི་ས་བཅུ་གཅིག་པ་དང༌། རྣམ་པར་གྲོལ་བའི་ས་བཅུ་གཉིས་པ་སངས་རྒྱས་ཀྱི་ས་ཞེས་པ་བཅུ་གཉིས་ནི་དུས་ཀྱི་འཁོར་ལོ་ལས་གསུངས་པ་དང༌། བཅུ་གསུམ་དུ་བྱེད་པའི་ལུགས་ནི་གཞན་རྒྱུད་དུ་ས་བཅུའི་སྟེང་དུ་སྤོངས་གཉེན་སྦྱོར་བའི་ས་ཞེས་བྱ་བ་ས་བཅུ་གཅིག་པ་དང༌། བར་ཆད་མེད་པའི་ས་བཅུ་གཉིས་པ་དང༌། རྣམ་པར་གྲོལ་བའི་ས་བཅུ་གསུམ་པ་སངས་རྒྱས་ཀྱིས་རྡོ་རྗེ་འཛིན་ཏེ་བཅུ་གསུམ་སྟེ། གཞན་དུ་སྦྱོར་དང་ཞེས་པའི་དོན་ནོ། །བཅུ་བཞིར་བྱེད་པ་ནི། མོས་
སྤྱོད་དང་རབ་ཏུ་དགའ་བ་ལ་སོགས་པ་བཅུ་གཅིག་བཅུ་གཉིས་པ་ཀུན་ཏུ་འོད་ཀྱི་ས་དང༌། ཀུན་ཏུ་སྣང་བའི་བཅུ་གསུམ་པ། ཀུན་ཏུ་ཐོབ་པའི་ས་བཅུ་བཞི་སྟེ་སངས་རྒྱས་ཀྱི་སའོ། །བཅོ་ལྔར་བཤད་པ་ནི་ཕྱག་རྒྱ་ཆེན་པོ་ཐིག་ལེའི་རྒྱུད་ལས་གསུངས་སོ། །དེ་དག་ལའང་ཀུན་ཏུ་འོད་སོགས་སློབ་དང་མི་སློབ་པ་རྣམས་རེ་རེར་བཅུ་གཉིས་བཅུ་གཉིས་ཀུན་ལ་དབྱེ་བས་སོ། །ཞེས་པ་ནི། ཀུན་ཏུ་འོད་ཀྱི་ས་ཆེན་པོ། དེ་ནི་ཉི་མའི་དཀྱིལ་འཁོར་ལས། །བདུད་རྩིའི་འོད་ནི་གཉིས་པ་སྟེ། །ཤིན་ཏུ་འོད་གསལ་ཟླ་བ་འདྲ། །ནམ་མཁའི་འོད་ནི་གསུམ་པ་སྟེ། །ནམ་མཁའ་ཇི་བཞིན་རབ་ཏུ་གནས། །རྡོ་རྗེའི་འོད་ནི་བཞི་པ་སྟེ། །ས་དེའི་འོད་ནི་ཡིད་དགའ་བའོ། །ལྷག་པའི་བསམ་པ་བརྟན་སྦྱོར་བས། །རྡོ་རྗེ་ཞེས་ནི་ཡོངས་སུ་བརྟགས། །ལྔ་པ་རིན་ཆེན་འོད་ཅེས་བྱ། །དབང་བསྐུར་བ་ལ་རབ་ཏུ་གནས། །པད་མའི་འོད་ནི་དྲུག་པ་སྟེ། །པདྨ་བཞིན་དུ་རབ་ཏུ་སྐྱེ། །རང་བཞིན་དག་པའི་སེམས་ཉིད་ཀྱི། །དྲི་མ་མེད་པ་ཡོངས་སུ་འཛིན། །བདུན་པ་ལས་ཀྱི་འོད་ཅེས་པ། །སངས་རྒྱས་འཕྲིན་ལས་བྱེད་པར་འདོད། །བརྒྱད་པ་དཔེ་མེད་ཅེས་པ་སྟེ། །དེ་ལ་དཔེ་ནི་ཡོད་མ་ཡིན། །དཔེ་ལྡན་ཞེས་པ་དགུ་པ་སྟེ། །ཐམས་ཅད་དཔེ་ནི་རྟོགས་པར་བྱེད། །བཅུ་པ་ཤེས་རབ་འོད་ཅེས་པ། །སངས་རྒྱས་ས་ནི་བླ་ན་མེད། །བཅུ་གཅིག་ཐམས་ཅད་མཁྱེན་པ་ཉིད། །ས་ཆེན་རབ་ཏུ་འོད་གསལ་བ། །བཅུ་གཉིས་སོ་སོ་བདག་ཉིད་རིག །རྣལ་འབྱོར་ཡེ་ཤེས་རབ་ཏུ་རྫོགས། ཞེས་གསུངས། །དེ་ཡང་རྣམ་རྟོག་དག་པས་ཤེས་བྱ་ཇི་སྙེད་པ་མཁྱེན་པའི་ཕྱིར་ཀུན་ཏུ་འོད་དང༌། བདེ་བ་ཆེན་པོའི་བདག་ཉིད་རྒྱས་པའི་བདུད་རྩི་འོད་དང༌། སྤྲོས་པའི་སྣང་བ་ཐམས་ཅད་
དག་པའི་ཕྱིར་ནམ་མཁའི་འོད། བདེ་བ་ཆེན་པོ་མི་འགྱུར་ཞིང་རྟག་པའི་ཕྱིར་རྡོ་རྗེ་འོད་དང༌། སངས་རྒྱས་རྣམས་ཀྱིས་ཡང་ཡང་དབང་བསྐུར་བ་ལས་བྱུང་བའི་ཡོན་ཏན་འདོད་དགུར་འབྱུང་བའི་རིན་ཆེན་འོད་དང༌། འདོད་ཆགས་ཆེན་པོའི་བདག་ཉིད་ཡིན་ཡང༌། བདག་ཉིད་ལ་བག་མེད་དང་འདོད་ཆགས་ཀྱིས་མ་གོས་པས་པདྨ་ཆུས་མ་གོས་པ་དང་འདྲ་བའི་པདྨའི་འོད་དང༌། སངས་རྒྱས་ཀྱི་འཕྲིན་ལས་འགྲོ་བའི་དོན་མ་ལུས་པ་བྱེད་པས་ལས་ཀྱི་འོད་དང༌། དཔེ་གང་གིས་ཀྱང་མཚོན་དུ་མེད་པའི་ལྷན་ཅིག་སྐྱེས་པའི་ཡེ་ཤེས་ཡིན་པས་དཔེ་མེད་པའི་ས། རྣམ་པ་ཐམས་ཅད་པ་ཡིན་པའི་ཕྱིར་དཔེ་ཐམས་ཅད་རྫོགས་པའི་དཔེ་ལྡན་གྱི་ས་དང་ཤེས་བྱའི་ཆོས་མཐའ་དག་མཁྱེན་པས་ཤེས་རབ་འོད་དང༌། དེ་བཞིན་གྱི་འོད་གསལ་བ་རང་གི་ངོ་བོ་ནི་ཐམས་ཅད་མཁྱེན་པའི་ས་དང༌། རྣམ་པ་ཐམས་ཅད་པ་དེ་གཉིས་སྣང་གི་ཆོས་དང་བྲལ་ཞིང་འགལ་འདུས་སྐྱོན་མེད་དེ་རང་གིས་རིག་ཅིང་རྟོགས་པས། སོ་སོ་བདག་ཉིད་རིག་པའི་ས་ཞེས་པ་སྟེ། མཚན་ཉིད་འདི་དག་དང་ལྡན་པའི་ས་བཅུ་གཉིས་པོ་འདི་ནི། སྦྱོར་ལམ་གྱི་ས་རྣམས་དང༌། འཕགས་ལམ་གྱི་ས་རྣམས་རེ་རེ་ལ་ཡང་གོང་གི་མཚན་ཉིད་བཅུ་གཉིས་པོའི་དབྱེ་བ་ཚངས་པར་ཡོད་པ་ཡིན་ནོ། །དེས་སའི་རྣམ་གཞག་ལམ་པ་སོང་ནས། དེ་དག་ལས་འཕྲོས་པའི་དོན་འགའ་ཞིག་བཤད་པ་ནི། རིམ་པ་དང་པོ་ཚོགས་ཀྱི་ས་དང་སྐྱེ་བ་གཅིག་གིས་ཐོགས་པར་འགྱུར་ཏེ་གྲོལ་བ་ཆེན་པོར་ནི། ཀུན་ཀྱང་བགྲོད་བ་གཅིག་ཏུ་ཞུགས་ཤིང་སྣང་བ་ལ་སོགས་ཐོབ་ལ་བར་དོར་འདའ་དང་སྐྱེ་བའང་ཡོད། བདག་ལ་བྱིན་རླབས་ཐོབ་ལ་འཆི་བར་མི་འགྱུར་གང་ཕྱིར་གནས་སྐབས་གསུམ་འཕགས་པའི་གནས་ཐོབ་བོ། །གྲུབ་པའི་ཁྱད་པར་འགའ་དང་བརྩོན་
ལྡན་མིན་ཡང་རང་བཞིན་ལྷན་ཅིག་སྐྱེས་པས་ལུས་གཞན་ངེས་པར་བསྒྱུར། ཞེས་གསུངས་ཏེ། འདི་དག་གོང་གི་ས་ལམ་ལ་འཕྲོས་ནས་གསུངས་པ་ཡིན་ཞིང༌། དེ་ཡང་རིམ་པ་དང་པོ་སྟེ་བསྐྱེད་རིམ་མཐར་ཕྱིན་པས། ཚོགས་ཀྱི་ས་ཞེས་པ་ཚོགས་ལམ་ཆེན་པོ་ཐོབ་པ་དང༌། སྐྱེ་བ་གཅིག་གིས་ཐོགས་པར་འགྱུར་ཞེས་པ། དེ་ནས་གང་ཟག་དེ་ཚེ་འཕོས་ན་རིག་པ་འཛིན་པའི་གནས་སུ་སྐྱེ་བའམ་གནས་ཐོབ་པ་ཡིན་ལ། དེའི་རྟེན་ལ་ཟུང་འཇུག་གི་སྐུ་ཐོབ་པ་ཡིན་ཅིང༌། སྐྱེ་བ་གཅིག་བརྒྱུད་པར་སོང་བས་སྐྱེ་བ་གཅིག་གིས་ཐོགས་པའི་གང་ཟག་ཏུ་གྱུར་བ་ཡིན་ལ། དྲོ་བ་ཆེན་པོར་ཞེས་པ་དྲོད་ཆེན་པོ་ཐོབ་པར་གྱུར་ནས་ནི། ལམ་མི་གཅིག་པས་བགྲོད་པ་གཏན་ནས་མེད་པར་གང་ཟག་ཐམས་ཅད་ལམ་བགྲོད་པ་གཅིག་གིས་འཇུག་པ་ཡིན་པས། གཅིག་ཏུ་ཞུགས་ཤིང་ཞེས་པ་དང༌། སྣང་བ་ལ་སོགས་ཐོབ་ལ་ཞེས་པ། ཡང་སྣང་བ་དང་མཆེད་པའི་ས་ཐོབ་ནས་གང་ཟག་དེ་ཤི་ནས། འཆི་སེམས་ཀྱི་དོན་དུ་སེམས་དབེན་པའི་ཡེ་ཤེས་ཐོབ་ནས། བར་དོའི་དོད་ལ་མྱ་ངན་ལས་འདའ་ཞེས་པ་སྟེ། ཟུང་འཇུག་གི་སྐུ་ཐོབ་པ་དང༌། སྐྱེ་བའང་ཡོད་ཅེས་པ་རིག་པ་འཛིན་པ་ལྟ་བུར་སྐྱེ་བ་ལེན་པའང་ཡོད་ཅེས་པའི་དོན་ནོ། །བདག་ལས་བྱིན་རླབས་ཐོབ་ནས་ཏེ། གསོན་པའི་དུས་ན། བདག་བྱིན་རླབས་པའི་སྒྱུ་ལུས་ཀྱི་སྐུ་ཐོབ་ནས་ནི། གང་ཟག་དེ་ལ་འཆི་སྲིད་འབྱུང་བ་མི་འགྱུར་ཏེ། རྒྱུ་གང་གིས་ཕྱིར་ན། གནས་སྐབས་གསུམ་ལ་འཕགས་པའི་ས་ཐོབ་པོ་ཞེས་པ། བདག་བྱིན་རླབས་པ་ཐོབ་པའི་གང་ཟག་དེ་རྩོལ་བ་ཆེན་པོས་སྤྱོད་པ་གསུམ་ལ་སོགས་པ་སྤྱད་ཅིང་སྒྲུབ་ན་ནི། གནས་སྐབས་ཚེ་འདིར་འཕགས་པ་སྟེ་སློབ་པའི་ཟུང་འཇུག་འགྲུབ་པ་དང༌།
ཡང་གང་ཟག་དེས་བདག་བྱིན་རླབས་པའི་སྒྱུ་ལུས་ཀྱི་སྐུ་ཐོབ་ཀྱང་གཡེངས་རྐྱེན་གྱིས་སྒོམ་ལོང་མ་བྱུང་བར་འཆི་བ་བྱུང་ན། དེ་ལ་གཞན་གྱིས་ཤི་བ་ལྟར་མཐོང་ཡང༌། རང་ཉིད་ལ་འཆི་བ་མཚན་ཉིད་པ་མེད་པར་དེའི་ཚབ་ཏུ་ཟུང་འཇུག་གི་སྐུ་ཐོབ་པ་དང༌། ཡང་གང་ཟག་དེའི་ཚེ་འཇུག་ལྟ་བུར་སྒྱུ་ལུས་ཀྱི་སྐུ་ཐོབ་བས་སྒོམ་ལོང་མ་བྱུང་ན། གོང་དུ་བཤད་པ་ལྟར་འཆི་བ་མཚན་ཉིད་པ་མེད་ཀྱང༌། འཆི་སེམས་ཀྱི་ཚབ་ཏུ་ལམ་སྒོམ་ཞིང་བར་དོར་སངས་རྒྱས་རྣམས་ཀྱིས་ཉེ་རྒྱུའི་དབང་བསྐུར་ནས། གནས་སྐབས་དེར་ཟུང་འཇུག་གི་སྐུ་འགྲུབ་པ་ཡིན་ནོ། །དེ་ནས་གྲུབ་པའི་ཁྱད་པར་འགའ་དང༌། བརྩོད་ལྡན་མིན་ཡང་རང་བཞིན་ལྷན་ཅིག་སྐྱེས་པས་ལུས་གཞན་ངེས་པར་བསྒྱུར་ཞེས་པ་ནི། བསྐྱེད་རིམ་གྱི་སྒོ་ནས་རི་ལུ་མིག་སྨན་སོགས་ཀྱི་དངོས་གྲུབ་འགྲུབ་ནས་ཐ་མལ་གྱི་ལུས་གནས་གྱུར་པའང་ཡོད། ཡང་རྫོགས་རིམ་གྱི་སྐབས་སུ་གནས་གྱུར་པའང་ཡོད་པ་སོགས་ལུས་གནས་གྱུར་འགྲོ་མཚམས་མང་ཡང༌། ལྷན་ཅིག་སྐྱེས་པའི་སྐུ་སློབ་པའི་ཟུང་འཇུག་ཐོབ་པའི་ཚེ་ནི། ཆོས་ཉིད་ཀྱི་ངེས་པར་ལུས་དེ་ཉིད་གཞན་དུ་གནས་འགྱུར་བ་ཡིན་ནོ། ། ༈ ལྔ་པ་རིམ་པ་གཉིས་པར་བཤད་པ་ལ། དང་པོ་བསྐྱེད་རིམ་གྱི་མཚན་ཉིད་བཤད་པ་ནི། འབྲས་བུ་དང་མཚུངས་རྟོག་པའི་རྒྱུ་ཅན་བདེ་བ་ཆེ་དང་སྟོང་པའི་རྣམ་པ་ལྷ་ཡི་གཟུགས་བརྙན་ནི། བདེ་བ་ཅུང་ཟད་ལམ་དུ་བྱཻད་ནུས་སྣང་དང་འཛིན་པ་ལྷོད་བྱེད་རྫོགས་པ་སྦྱོར་བ་དང་པོ་སྟེ། ཞེས་གསུངས་ཏེ། བསྐྱེད་རིམ་གྱི་ངོ་བོ་ནི་འབྲས་བུ་སངས་རྒྱས་ཀྱི་རྣམ་པ་བཞུགས་ཚུལ་དང་མཐུན་པ་ཞིག་དང༌། འཁོར་བའི་གནས་ལུས་ལོངས་སྤྱོད་དང་རྣམ་པ་མཐུན་པའི་སྒོ་ནས་སྦྱོངས་ཐུབ་
པ་ཞིག་དང༌། རྫོགས་རིམ་གྱི་ལམ་གྱི་གཞི་འདིངས་ཤིང་སྨིན་བྱེད་དུ་འགྲོ་བ་ཅིག་དང༌། རྟོག་པའི་རྒྱུ་ཅན་ཞེས་པ་ངོ་བོ་མི་རྟོག་པ་ལས་རང་ཤར་བ་མ་ཡིན་པར། རྣལ་འབྱོར་རྟོག་པའི་རྩོལ་བ་ལས་འབྱུང་ཞིང་གོམས་པ་ལས་ལྷ་སྐུར་ཤར་བ་ཡིན་པ། བདེ་བ་ཆེ་དང་ཞེས་པས། དེ་ཡང་བདེ་བ་ཆེན་པོར་ཤར་བ། སྟོང་པའི་རྣམ་པ་ཞེས་པས། དེ་ཐམས་ཅད་སྟོང་པ་ཉིད་དུ་རྟོགས་ཤིང་རྒྱས་ཐེབས་པ། ལྷའི་གཟུགས་ནི་ཞེས་པས། ཐ་མལ་གྱི་སྣང་བ་མ་ཡིན་པ་ལྷ་གང་དང་གང་བསྒོམས་པ་དེ་རྣམ་པ་ཤིན་ཏུ་གསལ་བ་དེ་ལྟ་བུ་ཡིན་ལ། དེ་ཉིད་སྒོམ་པ་གོམས་པས་ནི། བདེ་བ་ཅུང་ཟད་ལམ་དུ་བྱེད་ནུས་པ་ཡིན་ཏེ། ཕྲ་ཐིག་གི་རྣལ་འབྱོར་གྱི་སྒོ་ནས་འབར་འཛག་གི་བདེ་བ་མྱོང་ཞིང་ལམ་དུ་བྱེད་པ་ཡིན་པས། རྫོགས་རིམ་ལྟ་བུའི་བདེ་བ་ཆེན་པོ་མྱོང་མི་ཐུབ་པས། ལམ་དུ་བྱེད་ནུས་ཞེས་པའོ། །སྣང་དང་འཛིན་པ་ལྷོད་བྱེད་ཞེས་པས། དེ་ལྟ་བུའི་བྱེད་ལས་དེའི་བྱེད་པ་ནི། མ་དག་པའི་སྣང་བ་གནས་ལུས་ལོངས་སྤྱོད་ལ་སོགས་པ་རྣམ་པ་སྣ་ཚོགས་པར་ཤར་བའི་སྣང་ཞེན་དམ་པོ་འདི་ལྷོད་པོར་བྱེད་པ་དང། དེ་ལས་གང་ཟག་དང་ཆོས་ལ་སོགས་པ་འདི་དང་འདི་ལྟ་བུའོ་ཞེས་སྙམ་དུ་འཛིན་པའི་གཟུང་འཛིན་གྱི་བློ་བརྟན་པོ་རྣམས་བསྐྱེད་རིམ་གྱི་ལྷ་སྐུ་བསྒོམས་པས། དེ་དག་གི་སྣང་ཞེན་ལ་སོགས་པ་འཛིན་པ་བརྟན་པོ་རྣམས་འགག་ཅིང་ཅིང་ལྷོད་པོ་བྱེད་པ་དང༌། རྫོགས་པ་སྦྱོར་བ་ཞེས་པས། ལམ་གོང་བ་རྫོགས་རིམ་གྱི་སྨིན་བྱེད་དུ་འགྱུར་ཞིང་མཚམས་སྦྱོར་བ་དང༌། རྫོགས་རིམ་སྒོམ་པའི་སྐལ་བ་ཅན་དུ་བྱེད་པ་ཡིན་ནོ། །རིམ་པ་གཉིས་པ་རྫོགས་རིམ་གྱིས་ནི། མ་བརྟགས་ལུས་དང་སེམས་ལ་ཡེ་ཤེས་འབྱུང་བ་དབུ་མར་བྱེད་པ་སྣ་ཚོགས་བཅིངས་པ་ཉིད་ལས་སོ། །ཞེས་གསུངས་
པས། རྫོགས་རིམ་གྱི་སྐད་དོད་ནི། ནིཥྤནྣི་ཀྲ་མ་ཞེས་པ། ནིཥྤནྣི་རྫོགས་པ་སྟེ། རྩོལ་མེད་དུ་ཐོབ་ཤུགས་འབྱུང་དུ་འབྱུང་བའི་དོན་དང༌། ཀྲ་མ་ནི་རིམ་པའོ། །ངོ་བོ་ནི་མ་བརྟགས་པ་ལ་རང་ཤར་བ་ཡིན་པ་སྟེ། དེ་ཡང་རྡོ་རྗེའི་ལུས་ལ་གནད་དུ་བསྣུན་པ་ལས་བྱུང་བ་ཞིག་ཡིན་ཏེ། རྡོ་རྗེའི་ལུས་ལ་གནད་དུ་བསྣུན་པ་ཞིག་མེད་ན། མ་བརྟགས་པ་ལས་འཆར་བ་ཙམ་མདོ་ལམ་ལས་ཀྱང་ཡོད་པས། གསང་སྔགས་ཀྱི་རྫོགས་རིམ་ལ་དེ་གཉིས་ཆར་ཚང་ཞིག་དགོས་པས། རྡོ་རྗེའི་ལུས་དང་སེམས་གཉིས་པོ་དེ་ལས་ཡང་དག་པའི་ཡེ་ཤེས་འབྱུང་བ་ཡིན་ཞིང༌། དེ་ཡང་རགས་པའི་རྩ་དབུས་མར། བྱེད་པ་སྣ་ཚོགས་བཅིངས་པ་སྟེ། བྱེད་བཅིངས་སྦྱོར་བ་སྣ་ཚོགས་ཀྱིས་རྣམ་རྟོག་གི་རྒྱུ་ཐ་མལ་གྱི་རླུང་སེམས་རྣམས་དབུ་མར་བཅུག་ཅིང་འགགས་པར་བྱས་པ་ཉིད་དོ། །དེ་ལ་དབྱེ་ན། བསྐྱེད་པས་དྲངས་དང་ནང་གི་བདེ་རིག་མངོན་སུམ་ལྷ་དག་ལྷན་ཅིག་སྐྱེས་པ་རྒྱུ་དང་བཅས་པར་དབྱེ། ཞེས་པས་ཏེ། བསྐྱེད་རིམ་གྱིས་སྣ་དྲངས་པའི་རྫོགས་རིམ་བཏགས་པ་བ་དང༌། དེ་དག་ལ་མ་ལྟོས་པར་ནང་གི་ཞུ་བདེ་ལྷན་སྐྱེས་རང་གིས་རིག་པ་ནི་པ་རྫོགས་རིམ་མཚན་ཉིད་པ་དང༌། རྣམ་རྟོག་ལ་སོགས་པའི་བློས་གསར་དུ་སྒོམ་པ་ལ་མ་ལྟོས་པར། མི་རྟོག་པའི་རྣལ་འབྱོར་དེ་ཁོ་ན་ཉིད་ཀྱི་སྦྱོར་བས། རྫོགས་རིམ་གྱི་ལྷ་སྐུ་རང་ཤར་དུ་བྱུང་བ་སྟེ། མངོན་སུམ་དང་ནི་དེ་ཉིད་སྦྱོར་བས་མཁའ་ལ་སྐར་མ་བཞིན་དུ་དུ་མ་ལོངས་སྤྱོད་རྫོགས་པའི་སྐུ། །ཞེས་གསུངས་པ་ལྟར་སྟེ། དེ་ལྟ་བུ་ནི་རྫོགས་རིམ་གྱི་མཚན་ཉིད་མཐར་ཐུག་པ་ཡིན་པ་དང༌། སྟོང་གཟུགས་དང་བདེ་ཆེན་གཉིས་ལྷན་ཅིག་པ་ཤར་བ་ཡང༌། རྫོགས་རིམ་གྱི་ཁྱད་ཆོས་གཅིག་དང༌། ཡང་དེ་
དག་གི་རྒྱུ་སྟེ་ལུས་དབེན་ལྟ་བུ་ཡང་རྫོགས་རིམ་དངོས་མ་ཡིན་ཡང༌། རྫོགས་རིམ་གྱི་ཉེ་རྒྱུ་ཡིན་པས་དེའི་མིང་བཏགས་པ་སོགས་དབྱེ་བ་དེ་དག་ཡོད་དོ། ། ༈ དྲུག་པ་སྤྱོད་པའི་རྣམ་གཞག་རྒྱས་པར་བཤད་པ་ནི། གྲུབ་པ་སྤྱོད་པའི་རྒྱུ་ཅན་དང་པོ་ཆེ་དང་སྐུ་ཡི་དོན་དང་དེ་ཉིད་རྣམ་པར་སྦྱོང་བ་དང༌། ཞེས་པས་བསྟན་ཏེ། སྤྱོད་པ་ལ་དབྱེ་ན། བསྐྱེད་རིམ་གྱི་སྤྱོད་པ་དང༌། རྫོགས་རིམ་གྱི་སྤྱོད་པ་གཉིས་སོ། །ཐོག་མར་སྤྱོད་པ་དེ་དག་སྤྱོད་པའི་དུས། རགས་པའི་བསྐྱེད་རིམ་ལ་བརྟན་པ་ཐོབ་ནས། རི་ལུ་ལ་སོགས་པའི་དངོས་སྒྲུབ་རྣམས་མ་གྲུབ་པ་འགྲུབ་པའི་ཕྱིར་སྤྱད་པ་སྤྱོད་པ་དང༌། ཕྲ་བའི་བསྐྱེད་རིམ་ལ་བརྟན་པ་ཐོབ་ནས་འདོད་གཟུགས་ཀྱི་རིག་པ་འཛིན་པ་བསྒྲུབ་པའི་ཕྱིར་སྤྱད་པ་སྤྱོད་པ་ནི་བསྐྱེད་རིམ་གྱི་སྤྱོད་པའི་དུས་དང༌། རྫོགས་རིམ་གྱི་སྤྱོད་པ་ནི། དངོས་གྲུབ་སྦྱོར་ལམ་དྲོད་ཆུང་ངུ་དང་འབྲིང་དང་ཆེན་པོ་གསུམ་གང་ཡང་རུང་བའི་སྐབས་སུ། སྒྱུ་ལུས་བདག་བྱིན་རླབས་པའི་རིམ་པའི་རླུང་སེམས་ཀྱི་སྐུ་སྒྲུབ་དོན་དུ་སྤྱད་པ་སྤྱོད་པ་དང༌། སྦྱོར་ལམ་རྩེ་མོ་སོགས་ཀྱི་སྐབས་སུ་རླུང་སེམས་ཀྱི་སྐུ་དེ་འོད་གསལ་དུ་འཇུག་པའི་ཕྱིར་དང༌། སློབ་པའི་ཟུང་འཇུག་གི་སྐུ་ཐོབ་ན། འཕགས་པའི་ས་བཅུ་པའི་བར་དུ་སྤྱད་པ་སྤྱོད་པ་ནི། གཙོ་བོར་སེམས་ཅན་གྱི་དོན་སྣ་ཚོགས་གྱི་ཕྱིར་དུ་སྤྱོད་པ་དང༌། མངོན་བྱང་གོང་འོག་གི་སྐབས་སུ་ཉེ་རྒྱུའི་སྤྱད་པ་སྤྱོད་པ་ནི། རང་གཞན་གྱི་དོན་ཆེན་པོར་རྒྱུར་ཕྱིར་སྤྱོད་པ་སྟེ། དེ་དག་ཀྱང་ཕལ་ཆེར་གཙོ་ཆེ་བའི་དབང་དུ་བྱས་པ་ཡིན་ལ། དེ་དག་ཏུ་མ་ཟད་གཞན་ཡང་ཉེ་ཚེ་བའི་ལམ་ལ་སྤྱོད་པའི་དུས་སྣ་ཚོགས་ཀྱི་དབྱེ་བ་མཐའ་གཅིག་ཏུ་མ་ངེས་སོ། །སྤྱོད་པའི་ངོ་བོ་ལ་སོགས་པ་ནི། ངོ་བོ་ཉིད་དང་དེ་བཞིན་གཞན་
ནི་སྤྱོད་པའི་དགོས་པ་བདག་སྟེ་སླར་ཡང་དེ་ནས་གཞན། གནས་ཀྱི་དབྱེ་བ་མཛད་དེ་དུས་དང་ཆོ་ག་ན་ཆོད་བསམ་པ་འདོད་ཆགས་ཤེས་རབ་ཀྱིས་ཀྱང་གཞན། ཞེས་པས་བསྟན་ཏེ་སྤྱོད་པའི་ངོ་བོ་ནི། ཡུལ་སྣ་ཚོགས་དང་བདེ་སྡུག་འདོད་ཡོན་ལ་སོགས་པ་ཐམས་ཅད། ནང་ཏིང་ངེ་འཛིན་དང་རོ་གཅིག་ཏུ་བསྲེས་ཏེ་བསྒོམ་པའོ། །ཇི་ལྟར་སྤྱོད་པའི་ཚུལ་ནི། སྤྲོས་བཅས་སྤྲོས་མེད་ཤིན་ཏུ་སྤྲོས་མེད་དམ། ཀུན་དར། ཀུན་བཟང༌། ཕྱོགས་ལས་རྣམ་རྒྱལ་གསུམ་སྟེ། ཕྱག་རྒྱ་རིག་མ་མང་པོ་དང་བཅས་ཏེ་ཡུལ་སྣ་ཚོགས་སུ་རྒྱུ་ཞིང་འདོད་ཡོན་སྣ་ཚོགས་ལ་རོལ་ལ། དེ་དག་ཏུ་བརྡའ་དང་བརྡའི་ལན་དང༌། གླུ་གར་དང་བཅས་པའི་སྤྲོས་པ་རྒྱ་ཆེན་པོ་དང་བཅས་ཏེ་སྤྱོད་པ་ནི་སྤྲོས་བཅས་ཀྱི་སྤྱོད་པ་དང༌། ཕྱག་རྒྱ་ཇི་ལྟར་འོས་པ་དང་བཅས་ཏེ། བརྡའ་ལ་སོགས་པའི་སྤྲོས་པ་ཕལ་ཆེར་སྤངས་ཏེ་སྤྱོད་པ་ནི་སྤྲོས་མེད་ཀྱི་སྤྱོད་པ་དང༌། ལས་རྒྱ་སྤངས་ཏེ་ཡེ་ཤེས་ཀྱི་རིག་མ་ཙམ་དང༌། འདོད་ཡོན་སྤངས་པ་ཤིན་ཏུ་སྤྲོད་མེད་ཀྱི་སྤྱོད་པའོ། །དགོས་པ་ནི་དངོས་གྲུབ་ཀྱི་ཁྱད་པར་འགའ་ཞིག་མ་གྲུབ་པ་འགྲུབ་པའི་ཕྱིར་དང༌། གྲུབ་པ་རྣམས་གོང་འཕེལ་དུ་འགྱུར་པའི་ཕྱིར་སྤྱོད་པའོ། །གནས་ནི་རང་གི་ཁྱྀམ་ཁོ་ནར་འདུག་བཞིན་པས་སྤྱོད་པ་དང༌། པཱུ་ལི་ར་མ་ལ་སོགས་པའི་ཡུལ་ཆེན་པོ་ཉི་ཤུ་རྩ་བཞིར་རྒྱུ་བ་གནས་ཀྱི་ཁྱད་པར་དང༌། དུས་ཀྱི་གོ་རིམ་ནི་ཐོག་མར་སྤྲོས་བཅས་དང༌། དེ་ནས་སྤྲོས་མེད་དང༌། དེ་ནས་ཤིན་ཏུ་སྤྲོས་མེད་ཀྱི་སྤྱོད་པ་སྤྱོད་དོ། །ཆོ་ག་ནི་དེ་དག་ཏུ་ལྷའི་རྣལ་འབྱོར་དང༌། སྔགས་དང༌། ཏིང་ངེ་འཛིན་དང༌། ཕྱག་རྒྱ་ལ་སོགས་པ་ཆོ་གའི་རིམ་པ་རྒྱས་བསྡུས་རྣམས་དང༌། བསམ་པ་ནི། སྒྲུབ་པོ་རང་གི་མོས་པས་སྤྱོད་པ་གསུམ་གང་
འདོད་པ་སྤྱོད་པ་དང༌། ན་ཚོད་ནི། གཞོན་ནུའི་སྐབས་སུ་སྤྲོས་བཅས་དང༌། དར་ལ་བབ་ནས་སྤྲོས་མེད་དང༌། རྒན་པོའི་དུས་ཤིན་ཏུ་སྤྲོས་མེད་ཀྱི་སྤྱད་པ་སྤྱོད་དོ། །དེ་བཞིན་དུ་འདོད་ཆགས་ཤས་ཆེན་སྤྲོས་བཅས་དང༌། དེ་ལས་ཆུང་ནས་སྤྲོས་མེད་དང༌། ཤིན་ཏུ་ཆུང་ན་ཤིན་ཏུ་སྤྲོས་མེད་ཀྱི་སྤྱད་པ་སྤྱོད་དོ། །ཕྱག་རྒྱ་མང་པོ་ནི་སྤྲོས་བཅས་དང༌། ཉུང་ངུ་ནི་སྤྲོས་མེད་དང༌། སྤངས་པ་ཤིན་ཏུ་སྤྲོས་མེད་དོ། །སྤྱོད་པའི་ཡན་ལག་ཏུ་དགོས་པ་དྲག་ཤུལ་གྱི་སྤྱོད་པ་བསྟན་པ་ནི། དྲག་ཤུལ་གྱི་སྦྱོར་བ་རྣམ་པ་གཉིས་སུ་འགྱུར་ཏེ། རིམ་པ་གཉིས་པ་སྟོང་ཉིད་གོམས་པ་དག་གིས་སོ། །གཅིག་ནི་འཇིག་རྟེན་དངོས་གྲུབ་དོན་ནོ་གླང་པོའི་བདག་པོ་རྟ་ཡི་མཐའ་བཞིན་རྫོགས་པ་ལ་གནས་པས། །མཚན་མའི་སྤྱོད་པ་འཇུག་པ་ཉིད་དོ་ཞེས་པས་བསྟན་ཏེ། དེ་ལ་སྡིག་སྦྱོར་གྱི་ལས་སེམས་ཕུར་བུས་གདབ་པའམ། དྲག་ཤུལ་གྱི་སྦྱོར་བ་ཞེས་བྱ་བ། དངོས་གྲུབ་ཀྱི་དོན་དུ་ལྷ་གནད་ལ་དབབ་པ་ཡིན་ཏེ། དེའི་སྦྱོར་བ་ནི་རྣམ་པ་གཉིས་ཡིན་ཏེ། བསྐྱེད་རིམ་དང་རྫོགས་རིམ་ལ་སྟོང་ཉིད་ཀྱི་རྣལ་འབྱོར་གོམས་པ་དག་གིས་བྱ་དགོས་པ་ལས། དང་པོ་བསྐྱེད་རིམ་གྱི་དྲག་ཤུལ་སྦྱོར་བ་ནི་བསྐྱེད་རིམ་གྱི་རྣལ་འབྱོར་ལ་གནས་པའི་གང་ཟག་ལ་གཉིས་ཡོད་དེ། སྔགས་ལ་གཞོལ་བའི་རྣལ་འབྱོར་པ་དང༌། ནང་ལ་གཞོལ་བ་གཉིས་ཡོད་པའི་ནང་ལ་གཞོལ་བའི་རྣལ་འབྱོར་པ་ལ་ནི། དྲག་ཤུལ་གྱི་སྦྱོར་བ་དགོས་པ་མ་ཡིན་ལ། སྔགས་ལ་གཞོལ་བའི་རྣལ་འབྱོར་པ་ལ་དགོས་པ་ཡིན་ཞིང༌། དེ་ཡང་གཅིག་ནི་སོགས་ཀྱི་དོན་དེ། རགས་པའི་བསྐྱེད་རིམ་བརྟན་པ་ནི་སྔགས་ལ་གཞོལ་བ་ཡིན་པས། དེས་རིལ་ལུ་མིག་སྨན་སོགས་དངོས་གྲུབ་སྒྲུབ་པའི་ཕྱིར་དུ།
སྤྱོད་པ་ལན་གསུམ་བསྐྱར་ནས་ཟླ་བ་དྲུག་ལ་སོགས་པའི་བར་དུ་སྤྱད་ཀྱང་མ་གྲུབ་ན། དེའི་ཚེ་སྔགས་ཀྱི་ལྷ་ལ་ཕུར་བུའི་འདེབས་པ་སོགས་དྲག་ཤུལ་གྱི་སྦྱོར་བ་བྱས་པས་དངོས་གྲུབ་འགྲུབ་པ་ཡིན་ནོ། །རྫོགས་རིམ་གྱི་རྣལ་འབྱོར་པ་ལ་དྲག་ཤུལ་གྱི་སྦྱོར་བ་མི་དགོས་པར་འདོད་པ་ཡང་བྱུང་མོད། རང་ལུགས་ལ་ནི་རྫོགས་རིམ་ལ་ཡང་དགོས་པའི་སྐབས་ཀྱང་ཡོད་པ་ཡིན་ལ། དེ་ཡང་གླང་པོའི་བདག་པོ་སོགས་ཀྱི་དོན་ཏེ། རྫོགས་རིམ་གྱི་རྣལ་འབྱོར་བ་དེས། མཆོག་གི་དངོས་གྲུབ་ཀྱི་དོན་དུ། སྤྱོད་པ་ལན་གསུམ་བསྐྱར་བ་ཟླ་བ་དྲུག་ཏུ་སྤྱད་ཀྱང་མ་གྲུབ་ན། རྫོགས་རིམ་གྱི་འཕྲོས་རེ་ཞིག་བཞག་ནས། མཚན་མ་དང་བཅས་པའི་བསྐྱེས་རིམ་གྱི་སྤྱོད་པ་དྲག་ཤུལ་སྦྱོར་བ་དང་བཅས་པ་ལ་བཞུགས་པས་འགྲུབ་པ་ཡིན་ཏེ། དཔེར་ན་སྐྱེས་བུ་ཞིག་གིས་རི་ལ་བགྲོད་པ་ལ་བཞོན་པ་གླང་པོ་ཆེ་ལ་གནས་ནས་གཡུལ་འཐབ་པ་ལ་འཁྲུགས་པས་རྒྱལ་བར་མ་གྱུར་ན། དེ་ལས་བབས་ཏེ་རྟ་ལ་གནས་ཏེ་འཐབ་པས་རྒྱལ་བ་བཞིན་ནོ། དེས་ན་རྫོགས་རིམ་ལ་གནས་པའི་རྣལ་འབྱོར་བ་འགའ་ཞིག་ལའང་མཚན་བཅས་ཀྱི་སྤྱོད་པ་དྲག་ཤུལ་སྦྱོར་བ་དང་བཅས་པ་ལ་འཇུག་དགོས་པ་ཉིད་དོ། །གཞན་ཡང་འཕྲོས་དོན་ནི། དབང་བསྐུར་བ་དང་ཡོངས་སུ་འབྲེལ་བའི་ཉེ་བའི་རྒྱུ་ཞེས་བྱ་བ། སེམས་དབེན་པ་དང་ངེས་པར་བྱང་ཆུབ་གཉིས་ཀྱང་དབང་ལས་གྱུར་པ་སྤུལ་དང་ལོངས་སྤྱོད་རྫོགས་ལས་སོ། །ཞེས་པ་ནི། སྤྱོད་པ་སྤྱད་པའི་རྣལ་འབྱོར་པ་དེ་ལ་དབང་བསྐུར་བ་དང་ཡོངས་སུ་འབྲེལ་བ་ནི་ཉེ་རྒྱུ་མངོན་བྱང་ཞེས་བྱ་བ་ཡིན་ཏེ། དེ་ཡང་སེམས་དབེན་གྱི་རྣལ་འབྱོར་པ་དེ། སྤྱོད་པའི་སྐབས་སུ་རྡོ་རྗེ་སློབ་དཔོན་མིའི་རྟེན་ཅན་གྱིས་དབང་བསྐུར་བ་ཡིན་ལ། དེ་ཡང་མོས་པ་ལམ་བྱེད་ཙམ་མ་ཡིན་པར་དངོས་སུ་རིག་མ་དངབཅས་པས་དབང་
བསྐུར་བ་ཡིན་ལ། དེའི་རྒྱུད་དམ་ཚིག་མ་ཉམས་པ་དང༌། རྟེན་འབྲེལ་གྱི་ཉེ་རྒྱུས་དབང་བསྐུར་བ་འོག་མར་སངས་རྒྱས་སྤྲུལ་པའི་སྐུ་རྣམས་ཀྱིས་དབང་བསྐུར་བ་ཡིན་ཏེ། སྐུ་དངོས་སམ། སྔར་གྱི་རྡོ་རྗེ་སློབ་དཔོན་དེའི་ཚུལ་བཟུང་ནས་སམ། དེ་ལ་བྱིན་གྱིས་རླབས་ནས་དབང་བསྐུར་བ་དང༌། མངོན་བྱང་གོང་མར་ནི་ལོངས་སྤྱོད་རྫོགས་པའི་སྐུ་རྣམས་ལས་དབང་བསྐུར་བ་ཐོབ་པ་ཡིན་ནོ། །༈ བདུན་པ་འབྲས་བུ་ནི། བཞི་དང་བཅུ་དྲུག་སྐུ་སྟེ་ཡེ་ཤེས་རྣམ་པ་ལྔ་ནི་ཡན་ལག་བདུན་དང་ལྡན་པ་འབྲས་བུ་སྟེ། སྐུ་དང་བརྗོད་ཚུལ་ཞིང་དང་མཛད་པ་འདི་ལ་རང་རྒྱུད་བདེན་པ་གཉིས་ཀྱི་དབྱེ་བས་སོ། །ཞེས་གསུངས་པས། སྤྲུལ་པའི་སྐུ་དང༌། ལོངས་སྤྱོད་རྫོགས་པའི་སྐུ་དང༌། ཆོས་ཀྱི་སྐུ་དང༌། བདེ་བ་ཆེན་པོའི་སྟེ་བཞི་དང༌། དེ་དག་ལས་དབྱེ་བའི་སྤྲུལ་པའི་སྐུའི་སྐུ་དང༌། གསུང་དང༌། ཐུགས་དང༌། ཡེ་ཤེས་ཏེ་བཞི་དང༌། ལོངས་སྐུའི་སྐུ་དང༌། གསུང་དང༌། ཐུགས་དང་ཡེ་ཤེས་ཏེ་བཞི་དང༌། ཆོས་སྐུའི་སྐུ་དང༌། གསུང་དང་ཐུགས་དང༌། ཡེ་ཤེས་ཏེ་བཞི་དང༌། བདེ་བ་ཆེན་པོའི་སྐུ་དང༌། གསུང་དང༌། ཐུགས་དང༌། ཡེ་ཤེས་ཏེ་བཅུ་དྲུག་གོ །ཡེ་ཤེས་རྣམ་པ་ལྔ་ནི། མེ་ལོང་ལྟ་བུའི་ཡེ་ཤེས་དང༌། མཉམ་པ་ཉིད་ཀྱི་ཡེ་ཤེས་དང༌། སོ་སོར་རྟོགས་པའི་ཡེ་ཤེས་དང༌། བྱ་བ་སྒྲུབ་པའི་ཡེ་ཤེས་དང༌། ཆོས་དབྱིངས་ཡེ་ཤེས་ཏེ་ཡེ་ཤེས་ལྔ་དང༌། དེ་དག་ཀྱང་གསང་སྔགས་ཐུན་མོང་མ་ཡིན་པའི་སྐབས་འདིར། གོང་དུ་བཤད་པའི་ཡན་ལག་བདུན་དང་ལྡན་པ་ཉིད་ནི། དེ་ནི་འབྲས་བུ་ཡིན་ལ། དེ་དག་ལས་ལོངས་སྐུ་དང་སྤྲུལ་སྐུ་རྣམ་པ་གཉིས་དང༌། བརྗོད་ཚུལ་ཏེ་གསུང་དམ་ཆོས་དང༌། དེ་དག་གི་ཞིང་ཁམས་དང༌། མཛད་པ་འཕྲིན་ལས་ཏེ། གཞི་པོ་འདི་ལ་རང་རྒྱུད་ཀྱི་བདེན་པ་རེ་དང༌། གདུལ་བྱ་གཞན་སྣང་གིས་བསྡུས་པ་རེ་སྟེ་གཉིས་སུ་དབྱེ་དགོས་པ་
ཡིན་ནོ། ། ༈ རྩ་བའི་གསུམ་པ་མཐར་ཕྱིན་པའི་བྱ་བ་ནི། དེ་ལྟར་བདག་གི་བླ་མ་ཆེན་པོའི་གཞུང་ནི་ཚིགས་བཅད་བརྒྱ་ཕྲག་གཉིས་ལས་སྙིང་པོ་ཙམ་ཞིག་བསྡུས། ལམ་ནི་ལྔ་པ་བསྟན་པའི་དོན་འདིར་འབད་པའི་མཐུ་ལས་འགྲོ་བ་ཀུན་ལ་ཡེ་ཤེས་རྒྱས་གྱུར་ཅིག།ཅེས་པ་སྟེ། དེའི་དོན་ནི། དེ་ལྟ་བུའི་བདག་གི་བཤད་པའི་གཞུང་འདི་ནི། བླ་མ་ཆེན་པོ་སྟེ་གྲུབ་ཆེན་ཞི་བ་སྦས་པས་མཛད་པའི་ལམ་ལྔ་བསྟན་པ་ཞེས་བྱ་བ་གཞུང་ཚིགས་བཅད་བརྒྱ་ཕྲག་གཉིས་ཡོད་པ་དེ་ལས། དོན་གྱི་སྙིང་པོར་གྱུར་པའི་གཞུང་ཚིགས་བཅད་བཅུ་པ་འདི་སློབ་དཔོན་བུདྡྷ་གུཔྟ་ནཱ་ཐ་བདག་གིས་བསྡུས་པ་ཡིན་ལ། དེ་ལྟ་བུའི་ལམ་ལྔ་རྣམ་པ་བསྟན་པའི་དོན་འདིར་འབད་པ་ལས་བྱུང་བའི་དགེ་བ་དེ་དག་གང་ཡིན་པ་དེའི་མཐུ་ལས། འགྲོ་བ་དྲུག་གི་སེམས་ཅན་མ་ལུས་པ་འདི་དག་ཀུན་ལ། བདེ་བ་ཆེན་པོ་མི་འགྱུར་བའི་ཡེ་ཤེས་རྒྱས་པར་གྱུར་ཅིག་ཅེས་དགེ་བ་བསྔོ་བར་མཛད་པའོ། །ཞེས་པས་ཏེ། དེ་ལྟ་བུའི་གཞུང་འདིའི་མིང་ནི་ཚིགས་བཅད་བཅུ་པ་ཞེས་བྱ་བའི་ལམ་གྱི་རིམ་པའོ། གཞུང་འདི་སུ་ཞིག་གིས་མཛད་ཅེ་ན། སློབ་དཔོན་བུདྡྷ་གུཔྟ་ནཱ་ཐས་ཉེ་བར་སྦྱར་བའོ། །ཞེས་པ་སྟེ། བོད་སྐད་དུ་སློབ་དཔོན་སངས་རྒྱས་སྦས་པའི་མགོན་པོས་སྦྱར་བའོ། །ཞེས་པའོ། །འོ་ན་གཞུང་འདི་སུ་ཞིག་གིས་བསྒྱུར་ཞེ་ན། རྗེ་བཙུན་རྡོ་རྗེ་འཆང་ཆེན་པོ་ཀུན་དགའ་སྙིང་པོས་གཞུང་མཛད་པ་པོའི་བླ་མ་དེ་ཉིད་ལ་ལེགས་པར་བསྙེན་བཀུར་ཞིང་བསྟེན་ཅིང་གསན་ནས། སླར་ཡང་བླ་མ་དེ་ཉིད་ཀྱི་སློབ་མར་གྱུར་པ་པཎྜི་ཏ་པཱུརྞ་བཛྲ་སྟེ་གང་བའི་རྡོ་རྗེ་ལ་ཞུས་ནས་ཏཱ་ར་ནཱ་ཐས་བསྒྱུར་བའོ། །ཞེས་པ་སྟེ་ཏཱ་ར་ཐཱ་ནི་སྒྲོལ་བའི་མགོན་པོ་སྟེ་དེས་རང་འགྱུར་དུ་མཛད་པའོ། །གཞུང་འདིའི་འགྲེལ་བ་ཟིན་བྲིས་སུ་བགྱི་བ་པོ་ནི། རྗེ་བཙུན་ཉིད་ཀྱི་ཞབས་རྡུལ་སྤྱི་བོས་ལེན་པའི་དགེ་སློང་ཡེ་ཤེས་རྒྱ་མཚོ་བདག་གིས་རང་རྟོག་གི་དྲི་མས་མ་གོས་པ་བགྱི་བ་ལྷུར་བླངས་པའོ། །གཅིག་ཞུས་དག །སརྦ་མངྒ་ལཾ་ཀརྨ་ཀུ་རུ་མཾ། །