རྡོ་རྗེ་ཐེག་པའི་གནས་ལུགས་གསལ་བྱེད།
རྡོ་རྗེ་ཐེག་པའི་གནས་ལུགས་གསལ་བྱེད་ཅེས་བྱ་བ་བཞུགས།
ཨོཾ་སྭཱ་སྟི། ཡང་དག་པར་རྫོགས་པའི་སངས་རྒྱས་རྣམས་ཀྱི་ཐུགས་ཀྱི་ཡེ་ཤེས་ལས་བྱུང་བའི་སྔགས་དང༌། དེའི་ཆོ་ག་ལམ་གྱི་གཙོ་བོར་སྟོན་པ་ལ། གསང་སྔགས་རྡོ་རྗེ་ཐེག་པ་ཞེས་བྱ་བ་ཡིན་ཏེ། འདི་ནི་ཐེག་པ་གཞན་ལས་ཁྱད་པར་འཕགས་པའི་ཚུལ་སྤྱིར་མང་དུ་ཡོད་ཀྱང་གཙོ་བོ་ནི་ལས་ཚོགས་དང༌། དངོས་གྲུབ་བསྒྲུབ་ཚུལ་དང། ལྷ་དང༌། སྔགས་དང༌། ལུས་ལ་གནད་དུ་བསྣུན་པ་སོགས། ཐེག་པ་གཞན་ལ་མེད་པའི་ཐབས་མང་བ་སྟེ། སློབ་དཔོན་ཏྲི་པི་ཊ་ཀ་མཱ་ལས་མཛད་པའི་ཚུལ་གསུམ་སྒྲོན་མེ་ལས། དོན་གཅིག་ན་ཡང་མ་རྨོངས་དང༌། །ཐབས་མང་དཀའ་བ་མེད་པ་དང༌། །དབང་པོ་རྣོན་པོའི་དབང་བྱས་པས། །སྔགས་ཀྱི་ཐེག་པ་ཁྱད་པར་འཕགས། །ཞེས་ཐབས་མང་བར་བཤད་པ་ལ་སོགས་པའོ། །
ཞན་ཡང་གསང་བ་མཛོད་ཀྱི་རྒྱུད་ལས། དབང་བསྐུར་ཡང་དག་སྦྱིན་ལྡན་ན། །སྐྱེ་ཤིང་སྐྱེ་བར་དབང་བསྐུར་འགྱུར། །དེ་ཡི་སྐྱེ་བ་བདུན་དག་ན། །མ་བསྒོམ་པར་ཡང་སངས་རྒྱས་འགྱུར། །ཞེས་གསུངས་པ་ལྟར། ཚེ་འདི་ཉིད་ལ་སངས་རྒྱས་ཀྱི་གོ་འཕང་ཐོབ་ནུས་པ་ནས་སྐྱེ་བ་བདུན་ནམ་བཅུ་དྲུག་གམ། བྱ་རྒྱུད་ལྟ་བུར་མ་མཐའ་ཤིན་ཏུ་ཐོགས་ཀྱང་བསྐལ་བ་བརྒྱད་ཀྱིས་སངས་རྒྱས་འགྲུབ་པའི་ཕྱིར་ལམ་མྱུར་བ་སྟེ། གསང་འདུས་ལས། སེམས་ཅན་མཚམས་མེད་ལ་སོགས་པ། །སྡིག་པ་ཆེན་པོ་བྱེད་པ་ཡང༌། །རྡོ་རྗེ་ཐེག་པ་རྒྱ་མཚོ་ཆེ། །ཐེག་པ་མཆོག་ནི་འདི་ལ་འགྲུབ། །ཅེས་གསུངས་ཤིང༌། ཡང་དེ་ཉིད་ལས། འདོད་པའི་ལོངས་སྤྱོད་ཐམས་ཅད་ལ། །བརྟེན་ན་མྱུར་དུ་འགྲུབ་པར་འགྱུར། །ཞེས་པ་ལྟར་རོ། །ཡང་དེར་མ་ཟད། བཀའ་
ཐུབ་དང་དཀའ་སྤྱད་མི་དགོས་པར་འདོད་ཡོན་གྱི་བདེ་བ་བསྟེན་པས་དངོས་གྲུབ་འགྲུབ་པ་སོགས་བདེ་བས་སངས་རྒྱས་ཐོབ་པའང་ཡིན་ཏེ། ཐབས་མང་བ་དང༌། དུས་མྱུར་བ་དང༌། འཇུག་པ་བདེ་བ་སྟེ་ཁྱད་ཆོས་གསུམ་པོ་འདིའི་སྒོ་ནས། ཐེག་པ་གཞན་ཐམས་ཅད་ལས་མཆོག་ཏུ་འགྱུར་པ་ཡིན་ནོ། །དེ་ལ་དབྱེ་ན་རྒྱུད་སྡེ་གཉིས་དང༌། གསུམ་དང༌། བཞི་དང༌། ལྔ་དང༌། དྲུག་ལ་སོགས་པའི་བར་དུ་དབྱེ་བ་ཡོད་པ་ལས། གཙོ་བོར་རྒྱུད་སྡེ་བཞི་ཡིན་ལ། དེའི་ནང་ཚན་རྒྱུད་སྡེ་དང་པོ་བྱ་རྒྱུད་ལ་དབྱེ་ན། དེ་བཞིན་གཤེགས་པའི་རིགས། པདྨའི་རིགས། རྡོ་རྗེ་རིགས་ཏེ་འཇིག་རྟེན་འདས་པའི་རིགས་གསུམ་དང༌། ནོར་བུའི་རིགས་དང༌། ལྔ་རྩེན་གྱི་རིགས། འཇིག་རྟེན་ཕལ་པའི་རིགས་ནི་འཇིག་རྟེན་པ་གསུམ་སྟེ། དེ་ལྟར་རིགས་དྲུག་གོ །དེ་བཞིན་གཤེགས་པའི་རིགས་ལ་དམ་ཚིག་གསུམ་བཀོད། ཚེ་དཔག་མེད། མི་འཁྲུགས་པ། སྨན་བླ་སོགས་སངས་རྒྱས་དངོས་རྣམས་གཙོ་བོའི་རིགས་ཡིན་ལ། འཇམ་དཔལ་གྱི་རིགས་རྣམས་རིགས་ཀྱི་བདག་པོ་དང༌། གཙུག་གཏོར་རྣམ་རྒྱལ་གདུགས་དཀར་དྲི་མེད་སོགས་རིགས་ཀྱི་གཙུག་གཏོར་དང༌། སྤྱན་རས་གཟིགས་དང༌། ཕྱག་རྡོར་འཁོར་བཅས་མ་གཏོགས། བྱང་སེམས་རྣམས་རིགས་ཀྱི་སེམས་དཔའ་དང༌། སངས་རྒྱས་སྤྱན་མ། གཟུངས་གྲྭ་ལྔ་ལ་སོགས་པ་རིགས་ཀྱི་ཡུམ་དང༌། གཤིན་རྗེ་གཤེད་ནི་རིགས་ཀྱི་ཁྲོ་བོ་དང་རིག་པའི་བདག་པོ་དང༌། མི་
གཡོ་བ་ལ་སོགས་པ་རིགས་ཀྱི་ཕོ་ཉ་དང༌། འཕགས་མ་འོད་ཟེར་ཅན་མ་དང༌། རི་ཁྲོད་མ་ལོ་མ་གྱོན་མ་སོགས་དང༌། རྒྱལ་མཚན་རྩེ་མོའི་དཔུང་རྒྱན་དང༌། གཞན་གྱིས་མི་ཐུབ་མ་དང༌། ཕྱིར་བཟློག་ཆེན་མོ་ལ་སོགས་པ་རིགས་ཀྱི་ཕོ་ཉ་མོ་ཡིན་ནོ། །པདྨའི་རིགས་ལ། རིགས་ཀྱི་གཙོ་བོ་འཕགས་པ་སྤྱན་རས་གཟིགས་ཡིན་ལ། བཅོམ་ལྡན་མ་གོས་དཀར་མོ་སོགས་རིགས་ཀྱི་ཡུམ་དང༌། སྒྲོལ་མ་སོགས་རིགས་ཀྱི་ལྷ་མོ་དང་དོན་ཡོད་ཞགས་པ་དང༌། ཧ་ལ་ཧ་ལ་སོགས་རིགས་ཀྱི་སེམས་དཔའ་དང༌། རིགས་ཀྱི་བདག་པོ་ཞེས་བྱ་བ་རིགས་ཀྱི་ཁྲོ་བོ་ནི་རྟ་མགྲིན་ནོ། །རལ་གཅིག་མ་ལ་སོགས་པ་རིགས་ཀྱི་ཁྲོ་མོ་དང། སྲིན་མོ་རལ་གཅིག་མ་དང༌། དཔལ་ཆེན་མོ་ལ་སོགས་པ་ནི་རིགས་ཀྱི་ཕོ་ཉ་མོའོ། །རྡོ་རྗེའི་རིགས་ལ། རིགས་ཀྱི་གཙོ་བོ་ཕྱག་ན་རྡོ་རྗེ། རིགས་ཀྱི་ཡུམ་ལྷ་མོ་མཱ་མ་ཀཱི་དང་མེ་ལྟར་རབ་ཏུ་རྨོངས་བྱེད། རྡོ་རྗེ་མི་ཕམ་མོ་ལ་སོགས་པའོ། ། རིགས་ཀྱི་སེམས་དཔའ་ནི་ཁྲོ་གཉེར་རིམ་པར་ལྡན་ལ་སོགས་པ་ཡིན་ཡང་ཁྲོ་བོའི་ཁོངས་སུ་འདུས། རིགས་ཀྱི་ཁྲོ་བོ་བདུད་རྩི་འཁྱིལ་པ། རིགས་ཀྱི་ཕོ་ཉ་སྟོབས་པོ་ཆེ་ལ་སོགས་པ། རིགས་ཀྱི་ཕོ་ཉ་མོ་རྡོ་རྗེ་ལྕགས་སྒྲོགས་མ་ལ་སོགས་པ་དྲུག་ཅུ་རྩ་བཞི་ཡོད་པར་གསུངས། ནོར་བུའི་རིགས་ཀྱི་རྒྱུད་ནི། གནོད་སྦྱིན་ནོར་བུ་བཟང་པོས་བཤད་པ་སྟེ། ཛམྦྷ་ལ་དང་ནོར་རྒྱུན་མ་ལ་སོགས་པའི་རྒྱུད་དོ། །ལྔ་རྩེན་གྱི་རིགས་ནི། གནོད་སྦྱིན་ལྔ་རྩེན་ཉིད་
དང༌། འཕྲོག་མ་དང༌། བུ་དགའ་བྱེད་ལ་སོགས་པའོ། །འཇིག་རྟེན་པའི་རིགས་ལ་ཚངས་པ། དབང་ཕྱུག ཁྱབ་འཇུག ཟླ་བ། ཉི་མ། མཁའ་ལྡིང་རྣམས་གཙོ་བོར་བཤད་ཅིང་སྤྱིར་ལྷ་ཀླུ་གནོན་སྦྱིན། དྲི་ཟ་མིའམ་ཅི། ལྷ་མ་ཡིན། མཁའ་ལྡིང༌། འབྱུང་པོ་སྟེ་སྡེ་བརྒྱད་ཀྱི་རིགས་མཐའ་ཡས་པ་རྣམས་སོ། །དེ་ལྟར་བྱ་བའི་རྒྱུད་ཀྱི་རིགས་ཀྱི་དབྱེ་བ་རྣམས་བཤད་ནས། རྗོད་བྱེད་ཚིག་གི་རྒྱུད་ལ་དབྱེ་ན། མདོ་སྡེ་དང༌། རྒྱུད་དང༌། རྟོག་པ་དང༌། ཆོ་ག་ཞིབ་མོ་དང༌། གཟུངས་ཏེ་ལྔ་ཡོད། དང་པོ་ནི། གསེར་འོད་དམ་པ་ལྟ་བུ་ཆོ་ག་བསྡུས་ཤིང་ས་ལམ་འབྲས་བུའི་རྣམ་གཞག་མང་བ་གཅིག་ལ་ཟེར། གཉིས་པ་ནི། ཆོ་ག་རྒྱས་ཤིང་ས་ལམ་བསྡུས་པ་སྤྱི་རྒྱུད་གསུམ་དང་ཞལ་བཅུ་གཅིག་པའི་གཟུངས་ལ་སོགས་པའོ། །སྤྱི་རྒྱུད་གསུམ་པ་ནི། གསང་བ་སྤྱི་རྒྱུད་དང༌། དཔུང་བཟང་གིས་ཞུས་པ་དང༌། ལེགས་གྲུབ་ཀྱི་རྒྱུད་གསུམ་མོ། །གསུམ་པ་ནི། གནོད་སྦྱིན་མའི་རྟོག་པ་ལྟ་བུ་ཆོ་གའམ་སྒྲུབ་ཐབས་ཀྱི་རྣམ་གྲངས་གཅིག་ཁོ་ན་ཞིབ་མོར་སྟོན་པའོ། །བཞི་པ་ནི། འཇམ་དཔལ་རྩ་རྒྱུད་དང༌། ཕྱག་ན་རྡོ་རྗེ་རིག་པ་མཆོག་གི་རྒྱུད་སོགས་ཆོ་ག་དང༌། ས་ལམ་གཉིས་ཀ་རྒྱས་པར་བསྟན་པའོ། །ལྔ་པ་ནི་གཟུངས་སྔགས་ཕན་ཡོན་དང་བཅས་པ་ཙམ་སྟོན་པ་འོད་ཟེར་ཅན་མའི་གཟུངས་ལ་སོགས་པའོ། །དེ་ལྟ་བུའི་བྱ་རྒྱུད་ཀྱི་ཉམས་ལེན་ལམ་གྱི་རིམ་པ་ནི། སྨིན་བྱེད་ཀྱི་དབང་ལ་ཆུ་དང་ཅོད་པན་གྱི་དབང་ཙམ་ལས་མེད་ཅིང༌།
དེ་ཡང་བྱ་རྒྱུད་རང་ལུགས་ཀྱི་སློབ་དཔོན་གྱི་གོ་འཕང་ཐོབ་ཕྱིར་དུ་བསྐུར་བ་དང༌། སྔགས་བསྒྲུབ་པའི་དོན་དུ་སློབ་མའི་དབང་བསྐུར་བ་དང༌། བར་ཆད་ཞི་བའི་དོན་དུ་དབང་བསྐུར་བ་དང༌། འབྱོར་བ་ཐོབ་པའི་ཕྱིར་དུ་དབང་བསྐུར་བ་སྟེ། དགོས་པའི་དབང་གིས་ཕྱཻ་བས་དབང་བསྐུར་ཚུལ་བཞི་ཡོད།རྒྱུད་འདིར་རྡུལ་ཚོན་གྱི་དཀྱིལ་འཁོར་དུ་དབང་བསྐུར་བ་ཁོ་ན་བཤད། གྲོལ་བྱེད་ཀྱི་ལམ་ལ་མཚན་བཅས་མཚན་མེད་གཉིས་ཀྱི་དང་པོ་ལ། བདག་བསྐྱེད་ཀྱི་ལྷའི་རྣལ་འབྱོར་མེད་ཅིང༌། མདུན་བསྐྱེད་ལ་ཡང་དམ་ཚིག་པ་བསྐྱེད་པ་མེད་དེ། ཡེ་ཤེས་ཀྱི་ལྷ་སྤྱན་དྲངས་ཕྱག་རྒྱ་བསྟན། མཆོད་པ་ཕུལ་ཏེ་སྔགས་བཟླས་ནས་མཐར་གཤེགས་སུ་གསོལ་བ་ཙམ་ཡིན། གཉིས་པ་ནི་སྟོང་པ་ཉིད་བསྒོམ་པ་སྟེ། མདོ་དང་ཐུན་མོང་བ་ཁོ་ནའོ། ། གྲུབ་པ་འབྲས་བུའི་དུས་ནི། རྒྱུད་སྡེ་འདིར་ཞུགས་ན་དབང་པོ་རྣོན་པོས་བསྐལ་པ་བརྒྱད་ནས་སངས་རྒྱས་ཐོབ་པར་བཞེད། དྲག་པོའི་ལས་ཐོབ་པའི་སྐབས་འགའ་དང༌། ཁྲོ་བོ་འཆོལ་པ་སྟོབས་པོ་ཆེ་བསྒྲུབས་པ་ལ་སོགས་པ་དམིགས་བསལ་ཅན་རྣམས་མ་གཏོགས་ཁྲུས་དང་གཙང་སྦྲ་དང་སྙུང་གནས་ལ་སོགས་པའི་དཀའ་ཐུབ་དང༌། མཆོད་རྫས་ཀྱང་སྲོག་ཆགས་ཀྱི་ལུས་དང་མ་འདྲེས་པ་གཙང་མ་ཁོ་ན་དགོས་པར་བཞེད་ཅིང༌། བསྙེན་པ་དང་བསྒྲུབ་པའི་དུས་ཚངས་སྤྱོད་དགེ་བསྙེན་ཡད་ཆོད་ཀྱི་སྤྱོད་པ་ལ་བརྟེན་དགོས་པ་དང༌། རྒྱུད་ཀྱི་ནང་སེལ་རེ་རེ་ཙམ་ལས་མདུན་
བསྐྱེད་ལྷ་ཕོ་མོ་ཕན་ཚུན་གཟིགས་པ་ལ་བསྒྲུབ་པ་རང་ཉིད་ཕར་ལྟ་བའི་ཆགས་ལམ་ཙམ་བཤད་དོ། །རྒྱུད་སྡེ་གཉིས་པ་སྦྱོད་བའི་རྒྱུད་ནི། ཕྱིའི་བྱ་བ་དང་ནང་གི་རྣལ་འབྱོར་ཆ་མཉམ་དུ་སྤྱཽད་པས་སྤྱོད་པའི་རྒྱུད་ཅེས་བྱ་ཞིང་རྒྱུ་མཚན་དེ་ཉིད་ཀྱི་ཕྱིར་གཉིས་ཀའི་རྒྱུད་ཅེས་ཀྱང་ཟེར་རོ། །འདི་ལ་དབྱེ་ན་རིགས་གསུམ་སྟེ། སྐུའི་རིགས་དང༌། གསུང་གི་རིགས་དང༌། ཐུགས་ཀྱི་རིགས་སོ། དེ་ལ་སྐུའི་རིགས་ནི། རིགས་གསུམ་གྱི་གཙོ་བོ་ཡིན་ལ། བོད་དུ་འགྱུར་བའི་དབང་དུ་བྱས་ནས་སྤྱོད་རྒྱུད་མཐའ་དག་གི་གཙོ་བོའམ་རྩ་བར་གྱུར་བ་རྣམ་པར་སྣང་མཛད་མངོན་པར་བྱང་ཆུབ་པའི་རྒྱུད་ཡིན་ཅིང༌། དེ་ལས་ལྷའི་རྣམ་གྲངས་མང་པོ་སྟོན་ཀྱང་གཙོ་བོ་སངས་རྒྱས་རྣམ་སྣང་འཁོར་ལོས་བསྒྱུར་བའི་ཆ་ལུགས་ཅན་སྐུ་མདོག་སེར་པོ་ཕྱག་མཉམ་གཞག་མཛད་པ་ཅིག་གསུངས། བྱ་རྒྱུད་དུ་སངས་རྒྱས་རྣམས་རང་བྱུང་ཆགས་བྲལ་གྱི་རྣམ་པ་ཁོ་ནར་བཤད། འདི་ནས་བརྩམས་ཏེ་རྒྱུད་སྡེ་གོང་མ་རྣམས་སུ་སངས་རྒྱས་ཞི་བ་སྐུ་རྒྱན་དང་ལྡན་པ་དང༌། ཁྲོ་ཆགས་ཀྱི་སྐུ་ལ་སོགས་པ་མ་ངེས་པ་མང་དུ་གསུངས་སོ། །དེ་ལྟར་ན་རིགས་ཀྱི་གཙོ་བོ་རྣམ་པར་སྣང་མཛད་དང༌། རིགས་ཀྱི་ཁྲོ་བོ་མི་གཡོ་བ་བརྟུལ་ཕོད་པའི་རྒྱུད་དང༌། གཤིན་རྗེ་གཤེད་རྣམ་པར་རྒྱལ་བའི་རྒྱུད་གཉིས་སོ། །གཉིས་པ་ལ་གསུང་གི་རིགས་ནི་བོད་དུ་མ་འགྱུར། གསུམ་པ་ཐུགས་ཀྱི་རིགས་ནི་ཕྱག་ན་རྡོ་རྗེ་དབང་བསྐུར་བའི་རྒྱུད་ཡིན་ལ། འདི་ལས་ལྷའི་རིགས་མང་དུ་བཤད་ཀྱང༌། གཙོ་བོ་ཕྱག་ན་རྡོ་རྗེ་ཞི་བ་ཡིན། འོད་ཟེར་ཅན་
མ་ལྷ་མང་གི་རྒྱུད་འདི་བོད་དུ་སྔར་བྱ་རྒྱུད་དུ་གྲགས་ཀྱང་རང་ལུགས་སྤྱོད་རྒྱུད་ཡིན་པས་སྐུའི་རིགས་སུ་བསྡུ་དགོས། ངན་སོང་སྦྱོང་རྒྱུད་ཀྱང་རྣལ་འབྱོར་རྒྱུད་ཡིན་པར་གྲགས་ཀྱང༌། རང་ལུགས་སྤྱོད་རྒྱུད་ཡིན། དཀྱིལ་འཁོར་སྐུ་གསུང་ཐུགས་འདྲེས་པར་བསྟན་པས། རིགས་གསུམ་ཀ་འདྲེས་པའི་རྒྱུད་དུ་འགྲོ་ཞིང་འདི་ལས་དཀྱིལ་འཁོར་བཅུ་གཉིས་བཤད་པའི་རྩ་བ་ནི་ཀུན་རིག་ཡིན་ནོ། །དེ་ལྟར་སྤྱོད་རྒྱུད་ཀྱི་དབྱེ་བ་བཤད་ཟིན་ནས། ཉམས་ལེན་གྱི་རིམ་པ་ནི་སྨིན་བྱེད་ཀྱི་དབང༌། གྲོལ་བྱེད་ཀྱི་ལམ་གྲུབ་པ་འབྲས་བུའི་དུས་ཏེ་གསུམ་ལས། དང་པོ་ནི། ཕལ་ཆེར་བྱ་རྒྱུད་དང་འདྲ་བ་ལས། མིག་ཐུར་མེ་ལོང་གི་དབང་བསྐུར་སོགས་མཐའ་རྟེན་ལྷག་པོ་དང་སྤྱོད་རྒྱུད་ཀྱི་ནང་ནས་རིགས་མཐོ་བ་འགའ་ཞིག་ལ་ཆུ་ཅོད་པན་ཕྱག་མཚན་རྡོ་རྗེ་དྲིལ་བུ་ལྟ་བུ་དང༌། མིང་གི་དབང་བདག་པོའི་དབང་སོགས་ཡོད་པས། རིག་པའི་དབང་ལྔ་རྗེས་མཐུན་པ་ཡོད། གྲོལ་བྱེད་ལམ་ལ་མཚན་བཅས་ཀྱི་རྣལ་འབྱོར་གྱི་སྐབས་སུ་བདག་ཉིད་ལྷར་བསྒོམ་པ་ཡང་ཡོད་ཅིང་མདུན་བསྐྱེད་ལ་ཡང་དམ་ཚིག་པ་ལ་ཡེ་ཤེས་པ་བསྲེ་བའི་སྐབས་ཀྱང་ཡོད་པ་དང༌། ཇི་སྐད་དུ། རྒྱུད་ལས། དང་པོར་ཁྲུས་བྱས་རྣལ་འབྱོར་བས། །རྡོ་རྗེའི་གདན་ལ་འདུག་ནས་ནི། །མཆོད་དང་གསོལ་བ་ལྷ་དྲུག་བསྒོམ། །སྟོང་དང་ཡི་གེ་སྒྲ་གཟུགས་དང༌། ཕྱག་རྒྱ་མཚན་མ་དྲུག་ཏུ་འདོད། །ཅེས་འབྱུང་བ་ལྟར། ཕྱི་ནང་གི་ཁྲུས་སྔོན་དུ་འགྲོ་བའི་བསྲུང་འཁོར་བསྒོམ་པ་དང༌། ཡེ་ཤེས་ཀྱི་ལྷ་
སྤྱན་དྲངས་ཏེ་ཕྱག་རྒྱས་བཏབ་ནས་མཆོད་པ་འབུལ། གསོལ་བ་བཏབ། དེ་རྗེས་གནས་ལུགས་ཀྱི་དོན་བསྒོམ་པ་སྟོང་པའི་ལྷ། དེའི་ངང་ལས་སྔགས་ཀྱི་ཡིག་འབྲུ་དང་ས་བོན་བསྒོམ་པ་ཡི་གེའི་ལྷ། སྔགས་ཀྱི་སྒྲ་དང་བཅས་པའི་འོད་ཟེར་སྤྲོ་བསྡུ་བསྒོམ་པ་སྒྲའི་ལྷ། ལྷའི་སྐུ་གཟུགས་སྒཽམ་པ་གཟུགས་ཀྱི་ལྷ། ཐུགས་ཀར་ཕྱག་མཚན་སོགས་བསྒོམ་པ་ཕྱག་རྒྱའི་ལྷ། རང་ལུས་ལ་སྔགས་ཀྱི་བྱིན་གྱིས་བརླབས་པས་ལྷ་སྐུར་བསྒོམ་པ་མཚན་མའི་ལྷ་ཞེས་ལྷ་དྲུག་གི་རྣལ་འབྱོར་གསུངས་སོ། །མཚན་མེད་ཀྱི་རྣལ་འབྱོར་ལ་ཡང་སྙིང་གར་ཕྱག་མཚན་དང་ཡིག་འབྲུ་བསྒོམ་པ་དང༌། རླུང་སྲོག་རྩོལ་དགག་པ་དང༌། ལྷ་ཕོ་མོ་རྒོད་པའི་འདོད་ཆགས་ལམ་བྱེད་སོགས་བྱ་རྒྱུད་ལས་ལྷག་པའི་ཁྱད་ཆོས་ཡོད། སྤྱོད་པ་གཙང་སྒྲ་ལ་གནས་པ་དགོས་ཀྱང་དམིགས་བསལ་རེ་ཙམ་མ་གཏོགས་དཀའ་ཐུབ་དཀའ་སྤྱད་མི་དགོས་ཏེ། བདག་ཉིད་ལྷར་སྒོམ་དགོས་པའི་ཕྱིར་རོ། གྲུབ་པ་འབྲས་བུའི་དུས་ནི། བསྐལ་པ་ཆེན་པོ་གསུམ་ནས་སངས་རྒྱས་ཐོབ་ནུས་པར་བཤད་ལ། འབྲས་བུ་ཇི་ལྟར་བསྒྲུབ་པའི་རིམ་པ་ནི། འདི་དང་བྱ་རྒྱུད་གཉིས་འདྲ་སྟེ། སྤྱོད་པ་བཞི་ཞེས་བྱ་བ། འཇུག་པའི་སྤྱོད་པ་དབང་དང་དམ་ཚིག་རྣལ་འབྱོར་པའི་སྤྱོད་པ་རྣལ་འབྱོར་གཉིས་ལ་བརྟེན་ནས་བསྙེན་པ་བྱེད་པ། སྒྲུབ་པའི་སྤྱོད་པ་རྣལ་འབྱོར་པ་དམིགས་པ་ལ་བརྟན་པ་ཐོབ་ནས། བྲིས་སྐུའམ་དཀྱིལ་འཁོར་བཞེངས་པ་ལ་མཆོད་ཅིང་བསྒྲུབས་པས་དངོས་སམ་རྨི་ལམ་དུ་ལྷའི་སྣང་བ་འབྱུང་བ། སྒྲུབ་པ་ཆེན་པོའི་
མཆོད་པ་སོ་སོའི་རྒྱུད་ལས་འབྱུང་བ་ལྟར་ལས་ཚོགས་དང་དངོས་གྲུབ་བསྒྲུབ་པའོ། །རྒྱུད་སྡེ་གསུམ་པ་རྣལ་འབྱོར་རྒྱུད་ལ་རྩ་རྒྱུད་ནི་དེ་ཉིད་བསྡུས་པ་ཡིན། འདིའི་དུམ་བུ་དང་པོ་ནས་རྡོར་དབྱིངས། གཉིས་པ་ནས་ཁྲོ་བོ་ཁམས་གསུམ་རྣམ་རྒྱལ། གསུམ་པ་ལས་འགྲོ་བ་འདུལ་བ། བཞི་པ་ལས་དོན་ཡོད་གྲུབ་པའི་དཀྱིལ་འཁོར་རྣམས་སྟོན། བཤད་རྒྱུད་རྡོ་རྗེ་རྩེ་མོ་ཡིན། འདི་ཡང་རྒྱས་བསྡུས་མ་གཏོགས་དཀྱིལ་འཁོར་སྟོན་ཚུལ་སྔ་མ་དང་ཕྱོགས་འདྲ། ཡན་ལག་གི་རྒྱུད་ཐམས་ཅད་གསང་བ་དང༌། ཁམས་གསུམ་རྣམ་རྒྱལ་གྱི་སྒོས་རྒྱུད་ཅིག་ཀྱང་ཡོད། ཆ་མཐུན་གྱི་རྒྱུད་དཔལ་མཆོག་དང་པོ་ཡིན། རྒྱུད་འདི་ལས་འབྱུང་བའི་དཀྱིལ་འཁོར་གྱི་གཙོ་བོ་དཔལ་མཆོག་རིགས་བསྡུས་སུ་གྲགས་པ་འདི་ཡིན་ལ། དཀྱིལ་འཁོར་གྱི་གཙོ་བོ་ནི་རྡོ་རྗེ་སེམས་དཔའོ། །ཡོ་ག་རིགས་བཞི་ཞེས་ཀྱང་གྲགས་རྩ་རྒྱུད་ཀྱི་དུམ་བུ་ལ་རིགས་བཞི་ཡོད་པའི་དབང་དུ་བྱས་པ་ཡིན། རྒྱུད་སོ་སོ་བ་རང་ནི་མེད། རྒྱུད་ཀྱི་དབྱེ་བ་ནི་ཐབས་རྒྱུད་ཤེས་རབ་རྒྱུད་གཉིས་སུ་བྱེད། དཔལ་མཆོག་ཤེས་རབ་ཀྱི་རྒྱུད་ཡིན། གཞན་རྣམས་ཐབས་རྒྱུད་དོ། །ཡོ་གའི་སྐོར་ལ་ལུགས་སྲོལ་མང་པོ་བྱུང་ཡང་གསུམ་པོ་འདི་གྲགས་ཆེ་སྟེ་སློབ་དཔོན་ཤཱཀྱ་བཤེས་གཉེན་དང༌། སངས་རྒྱས་གསང་བ་དང༌། ཀུན་དགའ་སྙིང་པོའི་ལུགས་སོ། །དེ་གསུམ་ལས་ཀྱང་ཕྱི་དར་ལ་ཀུན་སྙིང་ཁོ་ནའི་ལུགས་དར་རོ། །འདིའི་ལམ་གྱི་དབང་དུ་བྱས་ན། སྨིན་བྱེད་ཀྱི་དབང་གི་དུས་སུ་ཆུ་ཅོད་པན། རྡོ་རྗེ་དྲིལ་བུ།
མིང་དབང་རྡོ་རྗེའི་བརྟུལ་ཞུགས། རྡོ་རྗེ་སློབ་དཔོན་ཏེ་བུམ་དབང་བདུན་གྱི་མཐའ་རྟེན་དང་བཅས་བླ་མེད་ཕྱོགས་འདྲ་རུང་ཡོད། གྲོལ་བྱེད་ཀྱི་ལམ་ལ་ལྷའི་རྣལ་འབྱོར་མངོན་པར་བྱང་ཆུབ་ལྔ་བསྐྱེད་པ་སོགས་དང་བདག་བསྐྱེད་དཀྱིལ་འཁོར་རྒྱས་པ་ཡང་ཡོད། དམ་ཚིག་པ་ལ་ཡེ་ཤེས་པ་བསྟིམ་ནས་ཕྱག་རྒྱ་བཞིའི་རྒྱས་བཏབ་བྱེད། དབང་བླངས་ཏེ་བཟླས་བརྗོད་བྱེད་པ་སོགས་མ་དག་པའི་སྣང་བ་སྦྱངས་ནས་དཀྱིལ་འཁོར་བསྒོམས་པའི་བསྙེན་པ་དང་སྒྲུབ་པ་ལས་སྦྱོར་རྒྱས་པར་གསུངས། ལག་བཅངས་བདེ་བ་ལམ་བྱེད་དང༌། མཚན་མེད་ཀྱི་རྣལ་འབྱོར་ཡང་སྤྱོད་རྒྱུད་དང་འདྲ་རུང་བ་ལས་ཟབ་ཁྱད་ཐོན་པ་ཡོད། གྲུབ་པ་འབྲས་བུའི་གནས་སྐབས་ཀྱང་དབང་པོ་རྣོན་པོས་ཚེ་གཅིག་ནས་རྟུལ་པོས་སྐྱེ་བ་བཅུ་དྲུག་ཚུན་ཆོད་ལ་ཕྱག་རྒྱ་ཆེན་པོའི་དངོས་གྲུབ་ཐོབ་པར་བཤད། དེ་ནས་ཀྱང་ལམ་ལ་འབད་པས་མི་རིང་པར་རྫོགས་པའི་སངས་རྒྱས་འགྲུབ་སྟེ་ཤིན་ཏུ་ཐོགས་ཀྱང་བསྐལ་པ་ཆུང་ངུ་གཅིག་ལ་མཐར་ཐུག་གི་སངས་རྒྱས་ཐོབ་པར་འགྱུར་རོ། །རྒྱུད་སྡེ་བཞི་པ་རྣལ་འབྱོར་བླ་མེད་ལ་དབྱེ་ན། ཕ་རྒྱུད་མ་རྒྱུད་གཉིས་ཡོད་ཅིང༌། དེ་ཡང་རྣལ་འབྱོར་བླ་མའི་རྒྱུད་དང་ཐབས་རྒྱུད་དང་ཕ་རྒྱུད་སྐབས་འགར་རྣལ་འབྱོར་ཆེན་པོ་རྣམས་དོན་གཅིག་ཅིང༌། སྐབས་འགར་རྣལ་འབྱོར་བླ་མེད་ཅེས་པའང་མ་རྒྱུད་ཁོ་ན་ལ་འཇུག་པའི་སྐབས་ཡོད། སྤྱིར་ནས་ཤེས་རབ་ཀྱི་རྒྱུད་དང་མ་རྒྱུད་དང་རྣལ་འབྱོར་མའི་རྒྱུད་རྣམས་དོན་གཅིག་གོ །དེ་གཉིས་ཀྱི་ཁྱད་པར་ཐབས་དཀྱིལ་འཁོར་ལྷ་ཡབ་
གཙོ་བོར་གྱུར་པའི་བསྐྱེད་རིམ་གྱི་རྣམ་གཞག་དང་སྔགས་དང་ཆོ་ག་གཙོ་བོར་སྟོན་ཅིང༌། ཤེས་རབ་ལྷ་མོའི་སྔགས་དང་ཆོ་ག་མཆོག་བསྒྲུབ་པའི་དོན་དུ་མི་སྟོན་པ་དེ་ནི་ཐབས་རྒྱུད་ཡིན་ལ། ཐབས་རྒྱུད་ཀྱི་ཁྱད་ཆོས་རྣམས་ཤེས་རབ་ཀྱི་རྒྱུད་ལ་ཚང་ཞིང༌། ཐབས་རྒྱུད་ལ་མེད་པའི་གནད་མང་པོ་ཡང་ཤེས་རབ་ཀྱི་རྒྱུད་ལ་ཡོད་པས། ཐབས་རྒྱུད་ལས་ཤེས་རབ་ཀྱི་རྒྱུད་ཟབ་བོ། །དེས་ན་ཤེས་རབ་རྡོ་རྗེ་ལྷ་མོའི་ཚོགས་ཀྱི་དཀྱིལ་འཁོར་དང༌། སྔགས་དང་ཆོ་ག་རྒྱས་པར་སྟོན་པ་དེ་ནི་མ་རྒྱུད་ཅེས་བྱ་སྟེ། འདི་ལ་ཡང་ཡབ་ཡུམ་ཆ་མཉམ་པར་སྟོན་པ་དང༌། ཡུམ་གྱི་རིགས་ཤས་ཆེར་སྟོན་པ་སྟེ་རིགས་གཉིས་ཡོད་དོ། །གཞན་དག་ཐབས་སྙིང་རྗེ་དང༌། ཤེས་རབ་སྟོང་ཉིད། ཐབས་སྤྱོད་པ་དང༌། ཤེས་རབ་ལྟ་བ། ཐབས་སྒྱུ་ལུས་དང༌། ཤེས་རབ་འོད་གསལ། ཐབས་བསྐྱེད་རིམ་དང༌། ཤེས་རབ་རྫོགས་རིམ། ཐབས་སྣང་བ་བཞི་དང༌། ཤེས་རབ་དག་པ་བཞི་སྟོན་ཚུལ་གྱི་སྒོ་ནས་འབྱེད་པར་འདོད་པ་དང༌། གཞན་ཡང་སྐུའི་རྣམ་འགྱུར་རྒྱན་ཆ་ལུགས་རྩ་དང་རླུང་སོགས་ཀྱི་སྒོ་ནས་དབྱེ་བ་མཛད་པ་དང༌། ཕ་རྒྱུད་མ་རྒྱུད་གཉིས་ཐབས་ཤེས་ཕྱོགས་རེ་དང༌། གཉིས་མེད་ཀྱི་རྒྱུད་ཐབས་ཤེས་ཟུང་འཇུག་ཡིན་ཟེར་བ་སོགས་འདོད་ཚུལ་སྐྱོན་དང་བཅས་པ་ཡིན་པས་རང་ལུགས་ལ་མི་བཞེད་དོ། །དེ་ལས་ཕ་རྒྱུད་ལ་དབྱེ་ན་འདོད་ཆགས་ཀྱི་རིགས་ཀྱི་རྒྱུད་དང༌། ཞེ་སྡང་གི་རིགས་ཀྱི་རྒྱུད་དང༌། གཏི་མུག་གི་རིགས་ཀྱི་རྒྱུད་དོ། །དབྱེ་བ་འདི་རྡོ་
རྗེའི་དཀྱིལ་འཁོར་རྒྱན་གྱི་རྒྱུད་ལས་བཤད། དང་པོ་ནི། གསང་འདུས་ཡན་ལག་དང་བཅས་པ་དང༌། གཤིན་རྗེ་གཤེད་དགྲ་ནག་དང༌། གདོང་དྲུག་པ་དང༌། གཤེད་དམར་དང༌། རྣམ་སྣང་སྒྱུ་འཕྲུལ་དྲ་བ་ལ་སོགས་པའོ། །དང་པོ་གསང་འདུས་ལ་རྒྱུད་ཀྱི་དབང་དུ་བྱས་ན་རྩ་བའི་རྒྱུད་དང༌། རྒྱུད་ཕྱི་མ་དང༌། བཤད་རྒྱུད་ཀྱི་རིགས་ལ་དགོངས་པ་ལུང་སྟོན་རྡོ་རྗེ་འཕྲེང་བ། ལྷ་མོ་བཞིས་ཞུས་པ་ལ་སོགས་པའི། དགོངས་འགྲེལ་མཁན་པོ་སློབ་དཔོན་སོ་སོའི་ལུགས་སྲོལ་ལྟར་ན། སྤྱིར་རྒྱ་གར་ཡུལ་དུ་གསང་འདུས་ལ་ལུགས་ཉི་ཤུ་རྩ་བཞི་ཡོད་པར་གྲགས། བོད་དུ་འགྱུར་བ་ལ་འཕགས་བསྐོར་ཞེས་བྱ་བ་ཀླུ་སྒྲུབ་ལུགས། སློབ་དཔོན་སངས་རྒྱས་ཡེ་ཤེས་ཞབས་ཀྱི་ལུགས། སློབ་དཔོན་ཤནྟི་པའི་ལུགས། རྡོ་རྗེ་བཞད་པའི་ལུགས། པདྨ་བཛྲ་གྱི་ལུགས། ཀུན་སྙིང་གི་ལུགས་ཏེ་དྲུག་གོ །དེའི་ཕྱི་མ་ནི་རྒྱ་གར་མཁས་པས་བཀྲལ་བ་ཙམ་ཡིན་ཡང༌། རྣལ་འབྱོར་བླ་མེད་ཀྱི་རྒྱུད་ཡིན་ངེས་པ་ཞིག ཕྱིས་ཡོ་གའི་ཚུལ་དུ་བཀྲལ་བ་ཡིན་པས་མཁས་པ་ཆེན་པོ་རྣམས་མི་འཐད་པར་བཞེད། གཞན་རྣམས་ལུགས་རྣམ་པར་དག་པ་ཡིན་ནོ། ། དང་པོ་འཕགས་ལུགས་ནི་དབང་ཆོག་ཉི་ཤུ་པ། སྒྲུབ་ཐབས་མདོ་བྱས། རྫོགས་རིམ་རིམ་པ་ལྔ་དང༌། སྤྱོད་བསྡུས་སྒྲོན་མེ། འགྲེལ་པ་སྒྲོན་གསལ་དང་བཅས་པའི་སྐོར་རྣམས་ཡིན། སྔོན་སློབ་དཔོན་ཀླུ་སྒྲུབ་མི་ཡུལ་དུ་མངོན་སུམ་པར་བཞུགས་ཤིང༌། ཚོགས་གསུམ་གྱི་བསྟན་བཅོས་མཛད་པའི་
སྐབས་གདུལ་བྱ་དུས་ལ་མ་བབ་པ་འདི་རྣམས་གཞན་ལ་དངོས་སུ་མ་གྲགས། ཀླུའི་བྱང་ཆུབ་ཅེས་བྱ་བའི་སློབ་མ་གཅིག་ཁོ་ན་ལ་བཤད། དེ་གྲུབ་པ་ཐོབ་ནས་འཆི་བ་མེད་པའི་ཚུལ་གྱིས་བཞུགས་ལ། ཕྱིས་ཀླུ་སྒྲུབ་སྐུ་འདས་ནས་ལོ་བདུན་བརྒྱ་ཙམ་ལོན་པ་ན་ཀླུའི་བྱང་ཆུབ་དངོས་སུ་མཇལ་བའི་སློབ་དཔོན་མ་ཏངྒི་པ་དང༌། རྒྱལ་སྲས་པ་འདྲེས་པ་གཉིས་ལས་རྒྱ་ཆེར་འཕེལ་ཞིང་དར་བ་ཡིན། གཉིས་པ་ཡེ་ཤེས་ཞབས་ལུགས་ནི། བོད་ཀྱི་རྒྱལ་པོ་མེས་ཨག་ཚོམ་ཅན་ཁྲི་ལྡེ་གཙུག་བརྟན་གྱི་དུས་ཙམ་ན་སློབ་དཔོན་འདི་བྱུང་བ་ཡིན། འདིས་སློབ་དཔོན་སེང་གེ་བཟང་པོ་དང་འཇོ་སྒེག་རྡོ་རྗེ་དང༌། རྣལ་འབྱོར་མ་གུ་ཎེ་རུ་དང༌། རྣལ་འབྱོར་མ་ཛ་ཏི་ཛ་ལ་དང༌། སློབ་དཔོན་བྱིས་པའི་ཞབས་དང༌། གྲུབ་ཐོབ་སྲུང་བའི་ཞབས་རྣམས་བསྟེན། ཐུན་མོང་གི་དངོས་གྲུབ་དང་ནུས་མཐུ་དཔག་ཏུ་མེད་པ་ཐོབ། ད་དུང་གནས་ལུགས་མ་རྟོགས་ཏེ་སྒྲུབ་པ་མཛད་པས། འཇམ་དབྱངས་ཀྱིས་རྗེས་སུ་འཛིན་པར་ལུང་བསྟན། ས་ཕྱོགས་ཞིག་ཏུ་འཕགས་པ་འཇམ་དཔལ་ཉིད་ཁྱིམ་བཙུན་རིག་མ་དང་བཅས་པའི་ཚུལ་དུ་གཟིགས། གསོལ་བ་བཏབ་པས་འཇམ་པའི་རྡོ་རྗེ་ལྷ་བཅུ་དགུའི་དཀྱིལ་འཁོར་དངོས་སུ་གྱུར་ཏེ་དབང་བསྐུར། གདམས་པ་བསྟན། ཡེ་ཤེས་ཁྱད་པར་ཅན་བརྙེས། ཟས་དང་སྤྱོད་པ་དང་ཆ་བྱད་གསུམ་ལ་མ་དད་པས་ལུས་གནས་མ་གྱུར། བར་དོར་སངས་རྒྱ་བར་ལུང་བསྟན། བི་ཀྲ་མ་ལ་ཤཱི་ལའི་རབ་གནས་དང༌། རྡོ་རྗེ་
གདན་མཆོད་པ་དང༌། ནཱ་ལནྡ་བཏུལ་བ་དང༌། གནོད་གནས་དབང་པོས་ཡོན་བདག་བྱེད་པ་སོགས་ཆེ་བ་སོགས་ཆེ་བ་དཔག་ཏུ་མེད་པ་དང་ལྡན་པའི་སློབ་དཔོན་དེས། འཇམ་དབྱངས་ཀྱི་གསུང་ལ་ཟིན་བྲིས་འཇམ་དཔལ་ཞལ་ལུང་བསྡུས། སྒྲུབ་ཐབས་ཀུན་བཟང༌། རྫོགས་རིམ་གྲོལ་པའི་ཐིག་ལེ་སོགས་མཛད། རྗེས་འབྲང་སོ་སོས་རྒྱུད་བཤད་འགྲེལ་པ་རིགས་མི་གཅིག་པ་མཛད་པ་མང་དུ་ཡོད། དངོས་སློབ་མཐོང་བའི་ཆོས་ལ་མྱ་ངན་ལས་འདས་པ་ཞེས་བྱ་བ་འཇའ་ལུས་ཡེ་ཤེས་ཀྱི་སྐུ་ཐོབ་པ་བཞི་བྱུང་སྟེ། མར་མེ་མཛད་བཟང་པོ། པདྨ་འབྱུང་གནས། རབ་ཞི་བཤེས་གཉེན། རྒྱལ་རིགས་སྒྲ་གཅན་འཛིན་ནོ། གཞན་རྒྱལ་ཚབ་ཀྱི་ས་ལ་གནས་པ་ཞེས་བྱ་བ་བསྐྱེད་རིམ་ལ་བརྟན་པར་ཐོབ། ཐུན་མོང་གི་དངོས་གྲུབ་ཐོབ་པའི་སློབ་མ་བཅོ་བརྒྱད་བྱུང༌། འཕགས་ཞབས་ཀྱི་ལུགས་འདི་གཉིས་རྒྱ་བོད་གཉིས་ཀར་དུ་ཤིན་ཏུ་དར་ལ། སློབ་དཔོན་རབ་ཞི་ཡེ་ཤེས་ཀྱི་འགྲེལ་པ་སོགས་ཞབས་ལུགས་ཅུང་ཟད་ཙམ། སྔ་འགྱུར་གྱི་དུས་སུ་ཡང་བྱུང༌། ཕྱི་དར་ལ་ལོ་ཆེན་རིན་ཆེན་བཟང་པོ་དང༌། གཉན་ལོ་ཙཱ་བ་དར་མ་གྲགས། གཉོས་ལོ་ཙཱ་བ་ཡོན་ཏན་གྲགས། ལོ་ཙཱ་བ་ཡེ་ཤེས་རྒྱལ་མཚན་སོགས་ཀྱིས་ཅུང་ཟད་དར་བར་མཛད། འཕགས་ལུགས་ནི་བསྟན་པ་སྔ་དར་ལ་མ་བྱུང་ཕྱི་འགྱུར་ལ་ལོ་ཆེན་རིན་ཆེན་བཟང་པོ་དང༌། འགོས་ཁུག་པ། ལྷོ་བྲག་མར་བ། ཆག་ལོ་སོགས་ཀྱིས་དར་བར་མཛད་ཅིང༌། བར་སྐབས་སུ་འགོས་ཀྱི་སློབ་བརྒྱུད་སྡོག་སྟོན་ཡབ་སྲས་རྣམས་ཀྱིས་ཤིན་ཏུ་དར་བར་
མཛད། གསུམ་པ་ཤཱནྟི་པའི་ལུགས་ལ། འགྲེལ་ཆེན་སྙིམ་པའི་མེ་ཏོག་ཙམ་ཞིག་འགྱུར་བ་དང༌། བཞི་པ་རྡོ་རྗེ་བཞད་པའི་ལུགས་ནི་སྔ་དར་གྱི་དུས་ལྕེ་བཀྲ་ཤིས་དང་སྐ་བ་དཔལ་བརྩེགས་ཀྱིས་བསྒྱུར། ལྔ་པ་པདྨ་བཛྲ་གྱི་ལུགས་ལ་རྒྱུད་དོན་ཉམས་ལེན་གྱི་རིམ་པ་གསང་བ་གྲུབ་པ་ཞེས་བྱ་བའི་གཞུང་ནག་ཚོ་ལོ་ཙཱ་བ་ཚུལ་ཁྲིམས་རྒྱལ་བས་བསྒྱུར། འདི་གསུམ་ལ་དབང་བཤད་མན་ངག་རིང་དུ་མ་དར་བར་མངོན། རྒྱུད་ཟླ་གསང་ཐིག་ལེ་དང༌། རྡོ་རྗེ་སྙིང་རྒྱན། ནོར་ཐིག་རྣམས་རྒྱུད་ཙམ་ཞིག་འགྱུར་རོ། །གཤིན་རྗེ་གཤེད་ནག་པོ་དང༌། གདོང་དྲུག་དང༌། རྡོ་རྗེ་འཇིགས་བྱེད་དེ་ནག་པོ་སྐོར་གསུམ་དུ་གྲགས་པ་ལ། རྭ་ལོ་ཙཱ་བ་རྡོ་རྗེ་གྲགས་དང༌། སྐྱོ་འོད་འབྱུང་དང༌། ཞང་ལོ་ཤེས་རབ་བླ་མ་དང༌། གཉོས་ལོ་ཙཱ་བ་དང༌། ཀློག་སྐྱ་ཤེས་རབ་བརྩེགས་ཏེ་ལོ་ཙཱ་བ་ལྔ་པོ་དེ་ལས་བརྒྱུད་པ་ད་ལྟའི་བར་མ་ནུབ་པ་ཡོད། གཞན་རོང་ཟོམ་ཆོས་བཟང་དང༌། བ་རི་ལོ་ཙཱ་བ་ནས་བརྒྱུད་པ་སོགས་སྔོན་དུས་ལུགས་གཞན་ཡང་མང་དུ་བྱུང༌། རྒྱ་གར་དུ་ལ་ལཱི་ཏ་བཛྲ་ཆུང་བ་དང༌། ཨ་མོ་གྷ་བཛྲ་ཆེ་ཆུང་དང༌། གྲུབ་ཐོབ་དཔལ་འཛིན་དང༌། སློབ་དཔོན་འཇམ་དཔལ་ཡེ་ཤེས་ལ་སོགས་པས་བསྟན་བཅོས་མང་དུ་མཛད་མོད། ལུགས་སྲོལ་ཐ་དད་པའི་དབྱེ་བ་མ་བྱུང་ངོ༌། །དེ་ལས་དགྲ་ནག་གདོང་དྲུག་གཉིས་འདོད་ཆགས་ཀྱི་རྒྱུད་དུ་གཏོགས་ལ། འཇམ་དཔལ་རྡོ་རྗེ་འཇིགས་བྱེད་ནི་ཞེ་སྡང་གི་རིགས་ཀྱི་རྒྱུད་ཡིན་པར་རྟོག་པ་བདུན་པ་ཉིད་
ལས་བཤད་དོ། །སྒྱུ་འཕྲུལ་དྲ་བ་ནི་བསྟན་པ་སྔ་དར་གྱི་དུས་སུ་འགྱུར་ལ་ཕྱི་འགྱུར་རྒྱུད་འགྲེལ་གཉིས་ཙམ་ལོ་ཆེན་གྱིས་བསྒྱུར། གཞན་ཕྱི་དར་ལ་འགྱུར་བྱེད་མ་བྱུང༌། གཏི་མུག་གི་རིགས་ཀྱི་རྒྱུད་ནི། སྤྱིར་འཇམ་དཔལ་སྒྱུ་འཕྲུལ་དྲ་བ་ཡིན་ཅིང༌། བོད་དུ་འགྱུར་བ་ལ་མཚན་བརྗོད་ཕན་ཡོན་དང་བཅས་པ་ཁོ་ནའོ། །འདི་དངོས་བླ་མེད་ཀྱི་ཕ་རྒྱུད་ཡིན་ཡང་རྒྱུད་ཀུན་གྱི་བདག་པོར་གསུངས་པས་སློབ་དཔོན་སོ་སོས་སྣ་ཚོགས་སུ་བཀྲལ་ཏེ་བྱང་ཆུབ་སེམས་དཔའ་རྣམས་ཀྱིས་དུས་འཁོར་གྱི་ལུགས་སུ་བཀྲལ་ལ། པཎྜི་ཏ་འཇམ་དཔལ་གྲགས་པ་དང༌། འཇམ་དཔལ་བཤེས་གཉེན་གྱིས་ཡོ་གར་བཀྲལ། སློབ་དཔོན་སྒེག་པའི་རྡོ་རྗེས་བླ་མེད་ཕ་རྒྱུད་དུ་བཀྲལ། གཞན་ཡང་བོད་དང་རྫོགས་ཆེན་དང་རྒྱ་གར་དུ་དབུ་མར་བཀྲལ་བ་སོགས་ཀྱང་ཡོད་པར་གྲགས་སོ། དེ་ལྟར་ཕ་རྒྱུད་རིགས་གསུམ་པོ་དེ་དག་མཚན་དང་མཐུན་པའི་བརྗོད་བྱ་སྟོན་ཚུལ་སོ་སོར་ཡོད་དེ་འདུས་པ་སོགས་བསྐྱེད་རིམ་གྱི་སྐབས་སུ་ཡབ་ཡུམ་ཁ་སྦྱོར་གྱི་སྐུ་དང༌། ཞུ་བ་གླུས་བསྐུལ་བ་དང༌། འཁོར་ཚོགས་ཡུམ་གྱི་མངལ་ནས་སྤྲོ་བ་སོགས་དང༌། རྫོགས་རིམ་གྱི་སྐབས་སུ་ལས་རྒྱ་རིག་མ་བསྟེན་པ་གཙོ་བོར་འཆད་པ་སོགས་ཆགས་ལམ་གཙོ་བོར་སྟོན། གནས་ལུགས་གཏན་ལ་འབེབས་པ་དང༌། དྲག་པོ་མངོན་སྤྱོད་ཅུང་ཟད་ཙམ་ལས་རྒྱས་པར་མི་འབྱུང༌། རྡོ་རྗེ་འཇིགས་བྱེད་ལྟ་བུ་ཞེ་སྡང་གི་རྒྱུད་ལས་ནི་ལྷའི་རྣམ་པ་ཡབ་རྐྱང་གཙོ་བོ་དང༌། རྫོགས་རིམ་གྱི་སྐབས་ཀྱང་རླུང་དབུ་མར་འགོག་པའི་ཐབས་
རང་ལུས་གཙོ་ཆེ་བ་དང༌། དྲག་པོ་མངོན་སྤྱོད་ཀྱི་ལས་ཁོ་ན་རྒྱས་པར་འཆད། མཚན་བརྗོད་ལྟ་བུ་གཏི་མུག་གི་རིགས་ཀྱི་རྒྱུད་ལ་ལྷ་ཡབ་རྐྱང་ངམ་ཁ་སྦྱོར་ཡོད་དུ་ཆུག་ཀྱང་ཞུ་བ་གླུས་བསྐུལ་དངགག་འཁོར་རྣམས་མངལ་འབྱིན་མེད་ཅིང༌། གཞི་ལམ་འབྲས་བུ་གསུམ་གྱི་གནས་ཚུལ་རྒྱས་པར་འཆད། རྫོགས་རིམ་ཀྱང་རྣམ་པར་མི་རྟོག་པ་ཉིད་གཙོ་བོར་འདོན། དྲག་ལས་དང་ཆགས་ལམ་སོགས་ཟུར་ཙམ་མ་གཏོགས་རྒྱས་པར་མ་གསུངས་པས། དབྱེ་བ་དེ་ལྟར་ཤེས་དགོས་ཀྱི་ཁ་ཅིག་རྣམ་སྣང་སྒྱུ་དྲ་གཏི་མུག་དང༌། གཤིན་རྗེ་གཤེད་དམར་ནག་ཞེ་སྡང་རིགས་ཀྱི་རྒྱུད་དུ་འདོད་པ་སོགས་རྒྱུད་རང་རང་གི་བརྗོད་བྱའི་དོན་དང་མི་མཐུན། གཤིན་རྗེ་གཤེད་དམར་པོའི་རྒྱུད་ལ་ཕ་རྒྱུད་དང་མ་རྒྱུད། རིགས་གཉིས་ཀ་ཡོད། ལེའུ་བཅུ་དགུ་པ་ནི་ཕ་རྒྱུད་ཡིན། ཆགས་ཅན་གྱི་རྒྱུད་དུ་གཏོགས། ལེའུ་ཉེར་གཉིས་པ་ནི་མ་རྒྱུད་ཧེ་རུ་ཀའི་ཕྱོགས་སུ་གཏོགས་པའི་དབྱེ་བ་ཤེས་པར་བྱའོ། །གཉིས་པ་མ་རྒྱུད་ལ་དབྱེ་ན། རྡོ་རྗེ་སེམས་དཔའི་རིགས། ཧེ་རུ་ཀའི་རིགས། རྟག་པའི་རིགས། རྡོ་རྗེ་ཉི་མའི་རིགས། པདྨ་གར་དབང་གི་རིགས། རྟའི་རྒྱལ་པོའི་རིགས་ཏེ་དྲུག་ཡོད་པ་ལས། དང་པོ་ནི་དུས་ཀྱི་འཁོར་ལོ་དང༌། སངས་རྒྱས་མཉམ་སྦྱོར་ལ་སོགས་པ་ཡིན་ཏེ། དུས་འཁོར་རྒྱ་གར་ཡུལ་དུ་ཤིན་ཏུ་དར་ཡང་རྒྱུད་དང་འགྲེལ་པ་གཉིས་ཀ་ཞལ་གསལ་བས་ལུགས་སྲོལ་མི་འདྲ་བ་མེད། སློབ་དཔོན་དུས་ཞབས་པ་ཆེན་པོ་འཇམ་པའི་རྡོ་རྗེ་དང༌། སློབ་
དཔོན་ཙི་ལུ་པ་དང། པི་ཊྭ་ཨ་ཙརཡ་གསུམ་སོ་སོས་རེ་རེ་ཞིང་ཤམྦྷ་ལ་ནས་སྤྱན་དྲངས་པ་ལ་ཤོ་ལོ་ཀ་རེ་རེ་གཉིས་གཉིས་མང་ཉུང་ཡོད་ཟེར། བོད་ཡུལ་འདིར་སྔ་ཕྱིར་ལོ་ཙཱ་བ་སོ་སོས་བསྒྱུར་བས་འགྱུར་མི་གཅིག་པ་ཉེར་བཞི་ཙམ་ཡོད་པར་གྲགས། དེ་དག་ལས་རྭ་ལོ་ཆོས་རབ། འབྲོ་ལོ་ཤེས་རབ་གྲགས། ཆག་ལོ་ཆོས་རྗེ་དཔལ། ཙ་མི་སངས་རྒྱས་གྲགས། བི་བྷཱུ་ཏི་ཙནྡྲ་ལས་བརྒྱུད་པ་གསུམ་ལ་དབང་བཤད་མན་ངག་གསུམ་ག་ཡོད་ལ། རྫོགས་རིམ་སྦྱོར་དྲུག་ནི། ལུགས་སྲོལ་བཅུ་བདུན་ཙམ་རྒྱུད་མ་ཆད་པར་བཞུགས། རྒྱུད་འདི་ལས་དཀྱིལ་འཁོར་བཅུ་གཉིས་གསུངས་ཏེ་སྒྲུབ་ལེ་ལས་སྐུ་གསུང་ཐུགས་ཡོངས་རྫོགས་ཀྱི་དཀྱིལ་འཁོར་དང༌། ཡེ་ཤེས་ལེའུ་ལས། སྡོམ་ཆེན་སྡོམ་ཆུང་གཉིས། གསང་འདུས་ལྷ་དགུ་མ། བཅུ་གསུམ་མ། བཅུ་བདུན་མ། ཉེར་ལྔ་མ། སོ་གཉིས་མ། སོ་བདུན་མ་སྟེ་གསང་འདུས་རིགས་དྲུག སྒྱུ་འཕྲུལ་དྲ་བ་ཞེ་གཅིག་མ། ཞེ་ལྔ་པ། ཞེ་དགུ་པ་སྟེ་རིགས་གསུམ། དེ་ལྟར་བཅུ་གཉིས་སོ། །དེ་རྣམས་ཀྱི་ནང་སེལ་ཕྱེ་བ་ཤིན་ཏུ་མང༌། སྡོམ་པ་ཆུང་བ་མ་གཏོགས་པའི་དཀྱིལ་འཁོར་བཅུ་གཅིག་པོ་དེ་སྡོམ་པ་ལ་དཔལ་ལྡན་རྒྱུ་སྐར་གྱི་དཀྱིལ་འཁོར་ཞེས་ཟེར་རོ། །སངས་རྒྱས་མཉམ་སྦྱོར་གྱི་རྒྱུད་ནི། སྔ་དར་གྱི་དུས་སུ་སློབ་དཔོན་ཧཱུཾ་ཀ་ར་དང༌། ཐུ་བོ་ར་ཛ་ཧ་ཏི་ལ་སོགས་པ་དང༌། ལོ་ཙཱ་བ་ལྷ་རིན་ཆེན་དང༌། དྲན་པ་ནམ་མཁའ་ལ་སོགས་པས་བསྒྱུར། ཕྱི་དར་ལ་ལོ་ཆེན་རིན་བཟང་གིས་བསྒྱུར།
འདི་ལ་རྒྱ་གར་གྱི་ཡུལ་དུ་ལུགས་སྲོལ་གཉིས་ཙམ་བྱུང་སྟེ། བརྒྱ་བྱིན་སྡོང་པོའི་ལུགས་དང༌། བྲམ་ཟེ་རིན་ཆེན་རྡོ་རྗེའི་ལུགས་གཉིས་བོད་དུ་ཡང་འགྱུར་རོ། །འདི་ལས་དཀྱིལ་འཁོར་རིགས་དྲུག་ཀར་སྟོན་ཀྱང༌། གཙོ་བོ་རྡོ་རྗེ་སེམས་དཔའ་ཡིན་པས། རྡོར་སེམས་ཀྱི་རིགས་སུ་བསྡུ། །གཉིས་པ་ཧེ་རུ་ཀའི་རིགས་ནི་འཁོར་ལོ་བདེ་མཆོག་དང༌། དགེས་པ་རྡོ་རྗེ་དང༌། མ་ཧཱ་མ་ཡ་དང༌། སངས་རྒྱས་ཐོད་པ་དང༌། ཕྱག་ཆེན་ཐིག་ལེ་རྗེས་འབྲངས་དང་བཅས་པ་དང༌། ཨ་རལླིའི་རྒྱུད་གཉིས་དང་བཅས་པ་རྣམས་ཡིན་ལ། དེ་ལས་འཁོར་ལོ་བདེ་མཆོག་ལ་རྒྱུད་ཀྱི་དབང་དུ་བྱས་ན། རྩ་རྒྱུད། བཤད་རྒྱུད་གཉིས། བཤད་རྒྱུད་ཀྱི་ནང་ནས་སྡོམ་པ་འབྱུང་བ། རྡོ་རྗེ་མཁའ་འགྲོ། མཁའ་འགྲོ་རྒྱ་མཚོ་རྣམས་ལ་དབང་བཀའ་རེ་རེ་ཡོད་ཅིང༌། ཨ་བྷི་དྷ་ནའི་ནང་ནས་གསུངས་པའི་འཁོར་ལོ་བསྒྱུར་དྲུག འཇམ་པའི་རྡོ་རྗེ། བོང་ཞལ་ཅན། མཆོག་གི་ཕག་མོ་སོགས་དབང་བཀའ་མང་དུ་ཡོད། རྣལ་འབྱོར་མ་ཀུན་སྤྱོད་དང༌། ཧེ་རུ་ཀ་སྔོན་བྱུང་ལ་སྒོས་བཀའ་མེད། ཐུན་མོང་གི་བཤད་རྒྱུད་སམྦུ་ཊའི་ཁ་སྦྱོར་རྡོར་སེམས་དང་ཧེ་རུ་ཀ་བཞིའི་དཀྱིལ་འཁོར་གྱི་དབང་རྒྱུན་ཡོད། ཀུན་གྱི་རྩ་བ་རྩ་རྒྱུད་ཀྱི་དབང་བཤད་མན་ངག་གསུམ་ལ་སྤྱིར་ལུགས་སྲོལ་ཤིན་ཏུ་མང་བ་ཡོད་པར་གྲགས་ཤིང༌། རྒྱ་གར་གྱི་གྲུབ་ཐོབ་ཤས་ཆེ་བ་ཞིག་རྒྱུད་འདིའི་གྲུབ་ཐོབ་ཡིན་པར་གྲགས་པ་དང༌། བོད་དུ་ཡང་ལོ་དྲིལ་ནག་གསུམ། ལངྐ་རྒྱལ་བཟང༌།
རིན་ཆེན་རྡོ་རྗེ། མི་ཐུབ་ཟླ་བ། བྷ་བ་བྷ་དྲ། ཤར་ཕྱོགས་ལྭ་བ་པ། ཕྱག་རྡོར་སྟོད་འགྲེལ་གྱི་ལུགས། སྟོང་ཉིད་ཏིང་འཛིན་གྱི་ལུགས་རྣམས་འགྱུར་ཡོད། དང་པོ་གསུམ་དང༌། ཕྱག་རྡོར་སྟོད་འགྲེལ་ལུགས་ལ་ད་ལྟའང་དབང་རྒྱུན་ཡོད་མོད། གཙོ་ཆེར་རྒྱ་བོད་གཉིས་ཀར་དུ་ཤིན་ཏུ་གྲགས་ཆེ་བའི་ལུགས་སྲོལ་ནི། ལཱུ་ཡི་བ། དྲིལ་བུ་པ། ནག་པོ་པའི་ལུགས་གསུམ་ཡིན་ལ། དེའི་དང་པོ་ནི། སྟོན་པ་མྱ་ངན་ལས་འདས་ནས་ལོ་སྟོང་དུ་ཉེ་བ་ཙམ་ན་རྒྱ་གར་དུ་སློབ་དཔོན་འཕགས་པ་ཐོགས་མེད་བྱོན་པ་དང་རགས་རྩིས་སུ་དུས་མཉམ་པ། བོད་ཡུལ་དུ་ཆོས་ཀྱི་དབུ་བསྙེངས་པའི་རྒྱལ་པོ་ལྷ་ཐོ་ཐོ་རི་གཉན་བཙན་དང་ཡང་དུས་མཚུངས་པ་ཙམ་ལ་སློབ་དཔོན་ལཱུ་ཡི་བ་བྱོན། འདི་ཨུ་རྒྱན་གྱི་རྒྱལ་པོའི་ཡིག་མཁན་ཡིན། དང་པོའི་བླ་མ་གྲུབ་ཐོབ་ཤཱ་བཱ་རི་པ་ཡིན་ཅིང༌། རྒྱ་གར་ཤར་ཕྱོགས་བྷཾ་ག་ལར་ཉའི་རྒྱུ་ལྟོ་གསོལ་ཞིང་སྒྲུབ་པ་མཛད་པས་རྒྱ་སྐད་དུ་ལཱུ་ཡི་པ་བོད་སྐད་དུ་ཉ་ལྟོ་བར་གྲགས། གྲུབ་པ་བརྙེས་ནས་ཡུལ་ལ་ཨུ་ཌི་བི་ཤའི་རྒྱལ་པོ་དང་བློན་པོ་རྫུ་འཕྲུལ་གྱིས་བཏུལ། ཕྱིས་རྒྱལ་པོས་གྲུབ་པ་ཐོབ་པ་དྷ་རི་ཀ་པ་སྟེ་འཁོར་ཁྲི་དྲུག་སྟོང་དང་བཅས་པ་འཇའ་ལུས་ཐོབ། བློན་པོ་གྲུབ་པ་ཐོབ་པ་ནི་ཌི་ངྒི་པ་སྟེ་འཁོར་ལྔ་བརྒྱ་དང་བཅས་པ་འཇའ་ལུས་བརྙེས་སོ། །སློབ་དཔོན་ལཱུ་ཡི་པ་འདིས་བདེ་མཆོག་གི་སྒྲུབ་ཐབས་ཙམ་ཞིག་མཛད། དེ་ལ་ལཱ་བ་པས་འགྲེལ་པ་མཛད། རྒྱ་བོད་ཐམས་ཅད་དུ་ཤིན་ཏུ་དར་ཤིང་འཁོར་ལོ་སྡོམ་པའི་ཆོས་ཚུལ་ཆུ་མགོ་ལྟ་བུར་གྲགས་
སོ། །འདིའི་མཚན་སཾསྐྲྀ་ཏའི་སྐད་དུ་ལཱུ་ཡི་པ་དང༌། ཟུར་ཆག་གི་སྐད་ལོ་ཨི་པ་ཡིན། ལུ་ཧི་པ་ཟེར་བ་མ་དག་གོ །གཉིས་པ་དྲིལ་བུ་ལུགས་ནི། སློབ་དཔོན་རྡོ་རྗེ་དྲིལ་བུ་པར་གྲགས་པ་འདི། དང་པོ་གྲུབ་ཐོབ་དྷ་རི་ཀ་པའི་སློབ་མ་ཡིན། མཚན་དངོས་བློ་གྲོས་སྙིང་པོའི་དཔལ་ཞེས་བྱ། མུ་སྟེགས་པའི་རྒོལ་བ་འཇོམས་ནུས་པའི་མཁས་པ་ཡིན་པ་ལས་རྡོ་རྗེ་ཕག་མོས་དངོས་སུ་ལུང་བསྟན། ཨོ་ཌི་བི་ཤའི་ཡུལ་དུ་བསྒྲུབ་པ་མཛད་ཚེ། དང་པོ་རྒྱལ་པོས་སྤྱན་དྲངས་པ་ལ་མ་བྱོན། ཕྱིར་རིག་མ་དང་བཅས་པར་གྱུར་པ་ལ་སྐྱེ་བོ་རྣམས་མ་དད་པས་དེ་རྣམས་འདུལ་བའི་དོན་དུ་ཁྱེའུ་གཅིག་དང༌། བུ་མོ་གཅིག་སྤྲུལ། ལན་ཅིག་གྲོང་ཁྱེར་དུ་དེ་དག་བཅས་ཏེ་བྱོན་པས་སྐྱེ་བོ་རྣམས་ཀྱིས་སྨད་པ་ན། རྭའི་གཤོར་ཞལ་ས་ལ་བརྡབས་པས་ས་འོག་ནས་ཆུ་བྱུང༌། ཁྱེའུ་རྡོ་རྗེར་བྱས། བུ་མོ་དྲིལ་བུར་སོང་དེ་གཉིས་ཕྱག་གཉིས་སུ་བསྣམས་སློབ་དཔོན་ཡབ་ཡུམ་བདེ་མཆོག་ལྷན་སྐྱེས་ཀྱི་རྣམ་པར་གྱུར་ནས་ནམ་མཁའ་ལ་གཤེགས་པའི་ཆོ་འཕྲུལ་བསྟན་པས་མཚན་ཡང་རྡོ་རྗེ་དྲིལ་བུ་པར་གྲགས། དེ་ནས་བརྩམས་ཏེ་སྔགས་ཀྱི་ཐེག་པའི་འགྲོ་དོན་མཛད། སློབ་དཔོན་འདིས་བདེ་མཆོག་ལུས་དཀྱིལ་སྒྲུབ་ཐབས། དབང་ཆོག་རྫོགས་རིམ་རིམ་ལྔ་རྣམས་མཛད་དེ་སློབ་མ་ཡང་གྲུབ་པ་ཐོབ་པ་མང་དུ་བྱུང་ངོ༌། །གསུམ་པ་ནག་པོ་ལུགས་ནི། ཤིང་རྟའི་སྲོལ་འབྱེད་སློབ་དཔོན་ནག་པོ་སྤྱོད་པའི་འདི་ནི། དུས་ཀྱི་འཁོར་ལོའི་རྒྱུད་
ཕྱི་མ་དང༌། མགོན་པོ་མངོན་འབྱུང་ལས་ལུང་བསྟན་ཏེ། དུས་འཁོར་ལས། ཁ་ཊཱཾ་ཅང་ཏེ་ཆང་སྣོད་ཐོགས་པ་ནག་པོའི་མིང་ཅན་རྣལ་འབྱོར་འབྱུང་བར་འགྱུར། །ཞེས་དང༌། ནག་པོ་ཆེན་པོ་མགོན་པོ་མངོན་འབྱུང་གི་རྒྱུད་ལས། ཡུལ་ཨུ་རུ་བི་ཤ་དེར་སྐྱེས་བུ་བརྩོན་འགྲུས་དང་ལྡན་ཞིང་སྦྱོར་བ་ལ་བརྩོན་པ། རཱ་མ་ཎའི་བཀའི་འཇུག་པ་དང་མཐུན་པ་སྡེ་ཚན་དང་པོའི་དང་པོ་བདུན་པའི་བཞི་བ་ཅུང་ཟད་ན་ལ་ཞོན་པ་སྐྱེས་བུའི་མཆོག་འདིས་རལ་གྲི་ལ་སོགས་པའི་དངོས་གྲུབ་བརྒྱད་ཐོབ་པར་འགྱུར་རོ། །འཛམ་བུའི་གླིང་དུ་མ་བྱུང་ཞིང་འབྱུང་བར་མི་འགྱུར་རོ། །དེའི་སློབ་མ་དྲུག་གིས་ལུས་ཀྱི་དངོས་པོ་སྤངས་པའི་ཕྱག་རྒྱ་ཆེན་པོའི་དངོས་གྲུབ་ཐོབ་པར་འགྱུར་རོ། །ཞེས་པའོ། །སློབ་དཔོན་འདིའི་བླ་མ་ནི་གྲུབ་ཐོབ་ཛ་ལན་དྷ་ར་པ་ཡིན། འཁྲུངས་སའི་ཡུལ་ཤར་ཕྱོགས་སུ་ཨུ་རུ་བི་ཤའོ། །ཡུལ་དབུས་ནཱ་ལན་དར་པཎྜི་ཏ་ཆེན་པོར་གྱུར། བྱང་ཕྱོགས་ཛལནྡྷ་རར་བླ་མ་དང་མཇལ། བསྐྱེད་རིམ་ལ་བརྟན་པ་ཐོབ་པ་ས་གཡོ་བ་དང་བྲག་ལ་ཐོགས་པ་མེད་པའི་ནུས་པ་བརྙེས། མཁའ་འགྲོ་མ་སྐལ་བ་བཟང་མོའི་ཕྱག་ནས་སམྦྷུ་ཊའི་རྒྱུད་སྤྱན་དྲངས། ཌ་མི་ཌོ་ཞེས་བྱ་བ་འགྲོ་ལྡིང་ཡུལ་དུ་ཕྲ་མིན་པ་ཐམས་ཅད་བཏུལ་ཞིང༌། དེ་རྣམས་ཀྱི་གཙོ་མོ་སྲིན་མོ་སྣ་ཚོགས་གཟུགས་ཞེས་བྱ་བ་འཛམ་བུ་གླིང་པའི་སྐྱེ་བོ་མང་པོའི་སྲོག་འཕྲོག་པ་ཞིག་ཡོད་པ་དེ་འདུལ་བར་བྱོན། དང་པོར་དེས་འཁོར་མང་པོ་དང་ལྷན་ཅིག་འཇིགས་པའི་གཟུགས་ཀྱིས་ནམ་མཁའ་ལ་
འོངས་ཤིང་མཚོན་ཆ་སྣ་ཚོགས་ཀྱི་ཆར་འབེབས་པ་ལ། སློབ་དཔོན་གྱིས་ལྟ་སྟངས་མཛད་པས་ས་ལ་ལྷུང་ཞིང་བརྒྱལ། ཏིང་ངེ་འཛིན་གྱིས་གཟིར་དམ་འོག་ཏུ་བཙུད་པས་དེ་ཕྱིན་ཆད་འབྱོན་པ་ན་ཆིབས་དང༌། བཞུགས་པ་ན་གདན་དུ་ལུས་ཕུལ་ཏེ་གདུག་པའི་སྐྱེ་བོ་མང་པོ་སྐྲག་ཅིང་ཟིལ་གྱིས་གནོན་པར་མཛད་པ་དང༌། གདུགས་བདུན་འཛིན་པ་མེད་པར་རང་འཁོར། ཌ་མ་རུ་བདུན་འཁྲོལ་བ་པོ་མེད་པར་རང་འཁྲོལ། ཁྲུ་གང་གིས་ས་ལ་མ་རེག་པར་རྟག་ཏུ་འབྱོན། དུས་རྟག་ཏུ་སྣང་བའི་འཁོར་བདུན་བརྒྱ་དང༌། མི་སྣང་བའི་འཁོར་བདུན་བརྒྱ་དང༌། གྲུབ་པ་ཐོབ་པ་སྟོང་དང་བཞི་བརྒྱའི་འཁོར་གྱིས་སྐོར་ལ། ཡུལ་གྲུ་ཆེན་པོ་བཅུ་གསུམ་གྱི་སྐྱེ་བོ་ཐམས་ཅད་རྡོ་རྗེ་ཐེག་པའི་ཆོས་ལ་བཀོད་པས་དེ་ཐམས་ཅད་རྣལ་འབྱོར་པོ་མོར་གྱུར་ཏེ་གྲོང་ཁྱེར་རྣམས་སྟོངས་པར་གྱུར་སྐད། བླ་མའི་བཀའ་ཅུང་ཟད་བཅག་པས། སྐུ་ལུས་དེ་ལ་མཆོག་གི་དངོས་གྲུབ་མ་བརྙེས་ཀྱང༌། རལ་གྲི་ལ་སོགས་པ་ཐུན་མོང་གི་དངོས་གྲུབ་བརྒྱད་ཐོབ། བར་དོར་སངས་རྒྱས་ཀྱི་གོ་འཕང་བརྙེས་པ་ཡིན་ནོ། །འདིའི་སློབ་མའི་མཆོག་དྲུག་ནི། ཨེ་ཡ་ལ་དང༌། མ་ཧི་ལ་དང༌། དྷ་མ་པ་དང༌། དྷུ་མ་པ་དང༌། བཟང་པོའི་ཞབས་དང༌། དགེ་ཚུལ་ཚེམ་བུ་པ་རྣམས་སོ། །སློབ་དཔོན་འདིས་འཁོར་ལོ་སྡོམ་པའི་སྒྲུབ་ཐབས་དབང་ཆོག་སྦྱིན་སྲེག་སྟེ་བསྐྱེད་རིམ་གཞུང་གསུམ་དང༌། དཔྱིད་ཀྱི་ཐིག་ལེ་དང་རིམ་པ་བཞི་པ་དང༌། གསང་བའི་དེ་
ཁོ་ན་ཉིད་དེ་རྫོགས་རིམ་གཞུང་གསུམ་མོ། །དེ་ལྟར་ན་ནག་པོ་གཞུང་དྲུག་ཏུ་གྲགས་སོ། །སྤྱིར་དོ་ཧ་རྡོ་རྗེའི་གླུ་སོགས་བསྟན་བཅོས་ཕྲ་མོ་བརྒྱ་དང་ཉི་ཤུ་ཙམ་ཡོད་པར་གྲགས། བོད་དུ་ཡང་ཐོར་བུ་མང་དུ་འགྱུར་རོ། ། བརྟུལ་ཞུགས་ཀྱི་སྤྱོད་པ་མཛད་དེ་ཡུལ་ཉི་ཤུ་རྩ་བཞི་དང༌། དུར་ཁྲོད་ཆེན་པོ་བརྒྱད་རྣམས་སུ་བྱོན་ཞིང་མུ་སྟེགས་གྲུབ་ཐོབ་ཀྲིཥྞ་བྷི་མ་དང་ཀཙྪའི་རྒྱལ་པོ་སོགས་བཏུལ། ཤར་ཕྱོགས་བྷང་ག་ལར་རྒྱལ་པོ་ལ་སོགས་པ་སྐྱེ་བོ་ཐམས་ཅད་མུ་སྟེགས་པར་ཡོད་པ། ཧེ་རུ་ཀ་མནན་པའི་དབང་ཕྱུག་གི་བྲིས་སྐུ། དབང་ཕྱུག་མནན་པའི་ཧེ་རུ་ཀར་སོང་བའི་ཆོ་འཕྲུལ་བསྟན་པས། བྷང་ག་ལ་བ་རིལ་གྱིས་སངས་རྒྱས་པར་སོང༌། གྲུབ་པའི་སློབ་དཔོན་ཆེས་ཆེ་བའོ། །བདེ་མཆོག་གི་ཆོས་སྐོར་ཁུང་མ་རྣམས་ཀྱི་ནང་ནས་ལུགས་འདི་རྒྱས་ཤོས་ཡིན། ཕྱིས་ཇོ་བོ་ནཱ་རོ་པའི་ལུགས་འདི་ཁོ་ན་གཙོ་བོར་མཛད་དོ། །འཁོར་ལོ་སྡོམ་པའི་ཆོས་སྐོར་དེ་རྣམས་བོད་དུ་བྱུང་ཚུལ་ནི། སྔ་དར་དུས་འདི་མ་འགྱུར། ཕྱི་དར་གྱི་ཐོག་མ་ལོ་ཙཱ་བ་རིན་ཆེན་བཟང་པོས་རྩ་བའི་རྒྱུད་དང༌། ལངྐ་རྒྱལ་བཟང་གི་ལུགས་དང༌། ལཱུ་ཡི་པའི་ལུགས་དང༌། རིན་ཆེན་རྡོ་རྗེའི་ལུགས་རྣམས་བསྒྱུར། གཞན་ཡང་ལོ་ཙཱ་བ་འབྲོག་མི་ཤཱཀྱ་ཡེ་ཤེས། འགོས་ཁུག་པ་ལྷས་བཙས། གྱི་ཇོ་ཟླ་བའི་འོད་ཟེར། མ་ནང་པ་ཆོས་ཀྱི་ཤེས་རབ། མལ་བློ་གྲོས་གྲགས་པ། མར་པ་ཆོས་ཀྱི་དབང་ཕྱུགཔུ་རངས་ལོ་ཆུང་གྲགས་འབྱོར་ཤེས་རབ། རྭ་ལོ་རྡོ་རྗེ་གྲགས། ཀློག་སྐྱ་ལོ་ཙཱ་བ་ཤེས་རབ་
བརྩེགས། བ་རི་ལོ་ཙཱ་བ་རིན་ཆེན་གྲགས། ཙ་མི་སངས་རྒྱས་གྲགས། སྨོན་འགྲོའི་མར་པ་དང་དར་མ་རྡོ་རྗེ། འཛིམ་ལོ་ཙཱ་བ། བྲ་བོ་ལོ་ཙཱ་བ་སྟེ་ལོ་ཙཱ་བཅོ་ལྔའི་བདེ་མཆོག་རྩ་རྒྱུད་བསྒྱུར་ཅིང་བཤད། དེ་རྣམས་ཀྱི་ནང་ནས་རྭ་ལོ་མལ་མར་དོ། པུ་རངས་ལོ་ཆུང་སྟེ་ལོ་ཙཱ་བ་བཞི་པོ་འདིས་ལཱུ་དྲིལ་ནག་གསུམ་གྱི་མན་ངག་དབང་བཀའ་རྒྱུད་བཤད་དང་བཅས་པ་ཤིན་ཏུ་དར་བར་མཛད་ཅིང༌། ད་ལྟའི་བར་དུ་ཡང་བཞུགས་པ་ཡིན། བཤད་རྒྱུད་མཁའ་འགྲོ་རྒྱ་མཚོའི་སྐོར་ནི་ཕྱིས་གསུམ་པ་ལོ་ཙཱ་བ་དར་མ་ཡོན་ཏན་གྱིས་བསྒྱུར་བ་ཡིན་ནོ། །ཀྱཻ་རྡོ་རྗེའི་རྒྱུད་ནི་རྩ་རྒྱུད་བརྟག་པ་གཉིས་པ་དང༌། དེའི་བཤད་རྒྱུད་དུ་ཡང་སྦྱོར་བར་མཛད་ཅིང་རྒྱུད་རྒྱས་པའི་དོན་བསྡུ་ལྟ་བུའི་རྒྱུད་རྡོ་རྗེ་གུར་གཉིས་ཡིན་ལ། རྒྱ་བོད་མང་པོ་ཞིག་སམྦུ་ཊི་ཡང་ཀྱཻ་རྡོར་གྱི་བཤད་རྒྱུད་དུ་བཞེད་མོད། འདི་ནི་བདེ་མཆོག་དང༌། ཀྱཻ་རྡོར་དང༌། གདན་བཞི་གསུམ་ཆ་མཉམ་པ་ལྟ་བུ་ཡིན་གྱི་ཀྱཻ་རྡོར་ཁོ་ན་མིན་ནོ། །དགེས་རྡོར་ལ་རྒྱ་གར་དུ་གྲུབ་ཐོབ་མང་དུ་བྱོན་ཞིང༌། ལུགས་སྲོལ་མི་འདྲ་བའང་མང་དུ་ཡོད་པར་གྲགས་ནའང༌། སློབ་དཔོན་མཚོ་སྐྱེས་རྡོ་རྗེའི་ལུགས། མི་ཐུབ་ཟླ་བའི་ལུགས། ནག་པོ་དམ་ཚིག་རྡོ་རྗེའི་ལུགས་ཏེ་གསུམ་པོ་མི་འདྲ་བ་ཆེ་བ་ཡོད་ལ། གཞན་ནཱ་རོ་མཻ་ཏྲི་སོགས་ཀྱི་ལུགས་ནི་དེ་གསུམ་ཀས་ལེགས་པར་བསྡུས་པ་ལྟ་བུར་ཡོད་དོ། སྤྱིར་བདག་མེད་མའི་སྒྲུབ་ཐབས་ལ་ཌོམྦྷི་ཧེ་རུ་ཀའི་སྒྲུབ་ཐབས་བདུད་རྩིའི་འོད་དང༌། ཡབ་དཔའ་བོ་ལྷ་དགུའི་སྒྲུབ་ཐབས་ལ་མཚོ་སྐྱེས་
ཀྱིས་མཛད་པའི་སྒྲུབ་ཐབས་དེ་གཉིས་པོ་འདི་ཀྱཻ་རྡོར་གྱི་གཞུང་སྔ་ཤོས་སོ། །བོད་དུ་ལྷ་མངའ་བདག་ཡེ་ཤེས་རྒྱལ་མཚན་གྱིས་ཐོག་མར་བསྒྱུར། གཞན་ཡང་ལོ་ཙཱ་བ་འཚུར་དབྱིག་གི་སྙིང་པོ་དང༌། རྨ་བན་ཆོས་འབར་ལ་སོགས་པས་ཀྱང་བསྒྱུར་ཞིང་བཤད་མོད་ཀྱི། ཤིན་ཏུ་གྲགས་ཆེ་བ་ནི་འབྲོག་འགོས་མར་གསུམ། དཔྱལ་ལོ་བསོད་ནམས་རྒྱལ་མཚན་གྱི་ལུགས་ཏེ་རྣམ་པ་བཞི་ཡིན་ལ། དེ་ལས་དང་པོ་གསུམ་ད་ལྟའི་བར་དུ་ཡང་རྒྱུན་མི་ཆད་པ་ཡོད། གཙོ་བོར་འབྲོག་མིའི་རྗེས་འབྲང་ས་ཆེན་ཡབ་སྲས་ལ་ཌོམྦྷིའི་ལུགས། མན་ངག་ལུགས། མཚོ་སྐྱེས་ལུགས། ནག་པོ་ལུགས། ནཱ་རོ་མཻ་ཏྲིའི་ལུགས་ཏེ་ལུགས་སྲོལ་དྲུག་བྱུང༌། ཕྱི་མ་གཉིས་ད་ལྟར་ཆད། གཞན་རྣམས་ལ་བཀའ་བབས་བཞི་ཞེས་པ་ལུགས་ཕྱི་རབས་པ་རྣམས་ཟེར། འགོས་ལུགས་ལ་མཚོ་སྐྱེས་ལུགས་དང༌། ཤནྟི་པའི་ལུགས་གཉིས་བྱུང༌། མར་ལུགས་དང་དཔྱལ་ལུགས་གཉིས་ཀ་ནཱ་རོ་པའི་རྗེས་འབྲང་ཡིན། མར་ལུགས་ལ་རྔོག་ལུགས། མེས་ཚོམ་པོའི་ལུགས། འཚུར་དབང་གི་རྡོ་རྗེའི་ལུགས་ཏེ་གསུམ་བྱུང་བ་ལས། རྔོག་ལུགས་ད་ལྟའི་བར་དུ་ཡོད་དོ། །དེ་ལ་བརྟག་གཉིས་ལས། སྐུ་ཀྱཻ་རྡོ་རྗེ་ཕྱག་གཉིས། གསུང་ཀྱཻ་རྡོ་རྗེ་ཕྱག་བཞི་པ། ཐུགས་ཀྱཻ་རྡོ་རྗེ་ཞལ་གསུམ་ཕྱག་དྲུག་པ། སྙིང་པོ་དགྱེས་ཞལ་བརྒྱད་ཕྱག་བཅུ་དྲུག་པ། ཡུམ་བདག་མེད་ལྷ་མོ་བཅོ་ལྔའི་དཀྱིལ་འཁོར་རྣམས་གསུངས། རྡོ་རྗེ་གུར་ལས།
དགེས་རྡོར་རིགས་ལྔ་སོ་སོ་དང༌། རིགས་བསྡུས་དང༌། རྡོ་རྗེ་སྒྲོལ་མ་སོགས་གསུངས་ཤིང༌། གཉིས་ཀ་ནས་ཀུ་རུ་ཀུལླེའི་སྒྲུབ་ཐབས་བཤད། སམྦུ་ཊི་ལས། ཀྱཻ་རྡོ་རྗེ་མཚོན་ཆ་ཅན། ཁ་སྦྱོར་རྡོར་སེམས་ཀྱི་དཀྱིལ་འཁོར་ལ་སོགས་པ་གསུངས། སངས་རྒྱས་ཐོད་པ་ནས་རྒྱ་གར་དུ། གྲུབ་ཐོབ་ས་ར་ཧའི་མན་ངག་གི་ལུགས་དང༌། སློབ་དཔོན་ཨ་བྷ་ཡཱ་ཀ་རའི་ལུགས་གཉིས་བྱུང་ཞིང༌། བོད་དུ་ཡང་གྱི་ལོ་ཙཱ་བའི་ལུགས་དང༌། སྤོང་ཞོ་གསལ་བ་གྲགས་ཀྱི་ལུགས་གཉིས་དང༌། མར་པ་ལོ་ཙཱ་བ་ནས་བརྒྱུད་པའི་དབང་ཙམ་ཡོད། མཧཱ་མ་ཡ་ནི་གྲུབ་ཐོབ་ཀུ་ཀུ་རི་པ་ཞེས་བྱ་བས་སྤྱན་དྲངས། དེས་སྒྲུབ་ཐབས་ལ་སོགས་པ་བསྟན་བཅོས་དྲུག་མཛད། སློབ་དཔོན་དེ་ཉིད་རྒྱ་གར་དུ་སློབ་དཔོན་སངས་རྒྱས་ཡེ་ཤེས་ཞབས་དང༌། བོད་ཀྱི་རྒྱལ་པོ་ཁྲི་སྲོང་གི་སྐུ་ཚེའི་སྟོད་དང་དུས་དང་མཉམ། རིག་མ་ཁྱིའི་གཟུགས་སུ་བསྒྱུར་བས། ཀུ་ཀུ་རི་པ་ཞེས་པ་ཁྱི་མོ་ཅན་དུ་གྲགས། གཞན་ཡང་སློབ་དཔོན་འདུལ་བས་བྱིན་དང༌། རིན་ཆེན་འབྱུང་གནས་ཞི་བ་ལ་སོགས་པས་ཀྱང་བཀའ་སྲོལ་མི་འདྲ་བ་རེ་རེ་དར་བར་མཛད། བོད་དུ་འགོས་ལོ། ཇོ་བོ་རྗེ། མར་པ་ལོ་ཙཱ་རྣམས་ཀྱིས་བསྒྱུར་བཤད་དར་བར་མཛད་ཅིང༌། མར་པ་ནས་རྔོག་པ་ལས་བརྒྱུད་པ་ད་ལྟའི་བར་དུ་ཡང་དར་རོ། །ཕྱག་ཆེན་ཐིག་ལེ་སོགས་ཐིག་ལེའི་སྐོར་ནི། དཔལ་ཨུ་རྒྱན་གྱྀ་གནས་སུ་རྒྱལ་པོ་ཨིནྡྲ་བྷུ་ཏི་ཆུང་བའི་དུས་སུ་དར། ལུགས་སྲོལ་མི་འདྲ་བར་དགྱེས་པ་མེད། བྲམ་ཟེ་རིན་ཆེན་རྡོ་རྗེའི་
སློབ་མ་ཨ་ཙ་ར་དམར་པོར་གྲགས་པ་སློབ་དཔོན་ཤེས་རབ་གསང་བས་བོད་ཡུལ་དུ་གཙང་རོང་གི་ལོ་ཙཱ་བ་ཕྱུག་མཚམས་དགྲ་བཅོམ་ལ་བཤད། དེ་དང་འབྲོག་མི་སོགས་ཀྱིས་ཀྱང་བསྒྱུར་ཏེ། རྩ་རྒྱུད་ཕྱག་ཆེན་ཐིག་ལེ་དང་ཕྱོགས་མཐུན་གྱི་རྒྱུད་གསུམ་ཡོད་དེ། ཡེ་ཤེས་ཐིག་ལེ། ཡེ་ཤེས་སྙིང་པོ། རྣལ་འབྱོར་མ་གསང་བའི་སྒྲོན་མ་རྣམས་སོ། རྒྱུད་འདི་རྣམས་ཀྱཻ་རྡོར་གྱི་རྒྱུད་དུ་འདོད་པ་དག་ནི་མི་འཐད་དེ། ཕྱག་ཐིག་ཉིད་ལས། འདུས་པའམ་ནི་ཀྱཻ་རྡོ་རྗེ། །དེར་ཡང་འདི་ནི་མ་བསྟན་ནོ། །ཞེས་ཀྱཻ་རྡོར་ལས་ཕྱག་ཆེན་ཐིག་ལེ་ཉིད་ལྷག་ཅིང་ཟབ་པར་བསྔགས་བརྗོད་མཛད་པས་སོ། །བརྗོད་བྱ་སྟོན་ཚུལ་ཡང་མི་མཚུངས་པ་ཆེར་ཡོད་ཅིང༌། རྒྱུད་འདི་བཞི་ལས་རྩ་རླུང་ཐིག་ལེའི་རྣམ་གཞག་ཤིན་ཏུ་ཞིབ་པ་དང༌། ས་ལམ་མང་པོ་དང་དབང་གསུམ་པའི་ཆགས་ལམ་ཁོ་ན་རྒྱས་པར་བཤད་དོ། །རྡོ་རྗེ་ཨ་རལླི་དང༌། རྀ་གི་ཨ་རལླའི་རྒྱུད་ནི་གྲུབ་ཐོབ་ཌོམྦྷི་ཧེ་རུ་ཀས་མཁའ་འགྲོའི་གནས་ནས་སྤྱན་དྲངས། བོད་ཡུལ་དུ་འབྲོག་མིས་བསྒྱུར། དབང་བཤད་མན་ངག་གི་བཀའ་ནི་མ་བྱུང་མོད། རྒྱུད་གཞན་ལ་མ་ལྟོས་པའི་རང་རྐང་པ་རེ་ཡིན་པ་སྔ་མ་དགེས་རྡོར་དང་མཐུན་ཤས་ཆེ་ལ། ཕྱི་མ་བདེ་མཆོག་དང་མཐུན་ཤས་ཆེའོ། །མི་གཡོ་བ་བླ་མེད་ཀྱི་རྒྱུད་གཉིས་ཀྱང་ཧེ་རུ་ཀའི་རིགས་སུ་བསྡུས་ན་ལེགས་སོ། །གསུམ་པ་རྟག་པའི་རིགས་ནི་བོད་དུ་འགྱུར་བ་གདན་བཞི་ཁོ་ན་ཡིན་ལ། འདི་ལ་གདན་བཞི་རྩ་རྒྱུད། བཤད་རྒྱུད་མནྟྲ་ཨཾ་ས་དང་སྦྱོར་བའི་
རབ་དབྱེ་སྟེ་གཉིས་རྒྱུད་གསུམ་ཡོད། རྒྱ་གར་དུ་རྩ་རྒྱུད་ལ་བརྟེན་པ་ཨཱཪྱ་དེ་བའི་ལུགས་དང༌། བསྡུས་རྒྱུད་ལ་བརྟེན་པ་སློབ་དཔོན་བྷ་བ་བྷ་དྲའི་ལུགས་གཉིས་གསལ་བར་བྱུང་ལ། བོད་དུ་པཎྜི་ཏ་སྨྲྀ་ཏའི་རང་འགྱུར་གྱི་སྐོར་དང༌། འགོས་ཁུག་པའི་ལུགས་དང༌། ལྷོ་བྲག་མར་པའི་ལུགས་རྣམས་བྱུང༌། ད་ལྟ་ཡང་དབང་རྒྱུད་བཤད་མན་ངག་རྣམས་ཚང་བར་བཞུགས་སོ། །དེ་ལྟར་ན་མར་པ་ལ་ནི་གསང་འདུས་འཕགས་སྐོར་དང༌། དགེས་སྐོར་དང༌། མ་ཧཱ་མ་ཡ་དང༌། གདན་བཞིའི་ཆོས་སྐོར་རྣམས་ཟབ་རྒྱས་སུ་བཞུགས། སངས་རྒྱས་ཐོད་པའི་དབང་རྒྱུན་ཙམ་ཡོད། འཁོར་ལོ་སྡོམ་པའི་ཆོས་སྐོར་ནི་རྫོགས་པར་མི་བཞུགས་པས། མར་པ་ནས་བརྒྱུད་པའི་བདེ་མཆོག་གི་སྐོར་ཡིན་ཟེར་བ་རྣམས་ནི་བོད་དུ་གསར་བཅོས་ཡིན་པར་ངེས་སོ། །བཞི་པ་རྡོ་རྗེ་ཉི་མའི་རིགས་ཀྱི་རྒྱུད་ནི། ཕྱོགས་འདིར་འགྱུར་བ་རྡོ་རྗེ་བདུད་རྩི་ཁོ་ན་ཡིན་ཞིང༌། རྒྱུད་འདི་གྲུབ་ཐོབ་བདུད་རྩི་གསང་བས་མཁའ་འགྲོའི་གནས་ནས་སྤྱན་དྲངས། རྒྱ་གར་དུ་སློབ་དཔོན་དྲི་མེད་བཟང་པོའི་ལུགས་དང༌། སློབ་དཔོན་བྷ་གོ་ཞེས་པ་སྐལ་ལྡན་གྱི་ལུགས་ཏེ་གཉིས་བྱུང༌། བོད་དུ་དང་པོ་བྱུང་བ་ནི་ལོ་ཙཱ་བ་ལྕེ་བཙན་སྐྱེས་ཀྱིས་བསྒྱུར། ཕྱིས་སྨྲྀ་ཏི་དང་གྱི་ཅོ་ཟླ་བའི་འོད་ཟེར་གྱིས་ཆོས་སྐོར་ཅི་རིགས་བསྒྱུར། ད་ལྟ་རྡོ་རྗེ་འཕྲེང་བའི་ནང་གི་དབང་རྒྱུན་ཙམ་ཞིག་བཞུགས། ལྔ་པ་པདྨ་གར་དབང་གི་རིགས་ལ། པདྨ་གར་དབང་ཉིད་ཀྱི་རྟོག་པ་བ་རི་ལོ་ཙཱ་བས་བསྒྱུར་བ་དང༌། རིགས་ཀྱི་འཇིག་རྟེན་མགོན་པོ་ལྔ་བཅུ་པ་
ཞེས་བྱ་བའི་རྒྱུད་ཡར་ལུང་ལོ་ཙཱ་བ་གྲགས་པ་རྒྱལ་མཚན་གྱིས་བསྒྱུར། དྲུག་པ་རྟའི་རྒྱལ་པོའི་རིགས་ཀྱི་རྒྱུད་ནི་སྔོན་སྔ་དར་གྱི་དུས་སུ་དཔལ་བདུན་པའི་རྒྱལ་པོ་ཞེས་བྱ་བའི་རྒྱུད་འགྱུར་ཏེ། ད་ལྟ་བཀའ་སོགས་མེད། སྒྲོལ་མའི་ཕྱག་འཚལ་ཉེར་གཅིག་དང༌། ཕུར་པ་རྩ་དུམ་སོགས་ཀྱང་རིགས་འདིའི་ནང་ཚན་ཡིན་ཞིང༌། མགོན་པོ་མངོན་བྱུང་གི་རྒྱུན་ཀྱང་འཕྲིན་ལས་ཀྱི་རིགས་ཡིན་པས་ཕྱོགས་འདིར་བསྡུ། སྒྲོལ་མ་འབྱུང་བའི་རྒྱུད་འདུས་པ་དོན་དམ་པ་ཞེས་བྱ་བ་གསར་དུ་བསྒྱུར་པ་འདི་ནི་གྲུབ་ཐོབ་རོལ་པའི་རྡོ་རྗེ་དང་ལོག་པྲ་ད་གཉིས་ཀྱིས་སྒྲུབ་ཐབས་སོ་སོར་མཛད་པས་ལུགས་མི་འདྲ་བ་གཉིས་ཡོད་ཅིང༌། ཕྱིས་གྲུབ་པའི་དབང་ཕྱུག་ཞི་བ་སྦས་པས་དར་བར་མཛད་དེ། སློབ་དཔོན་པ་བ་དྱཱ་ནཱ་ཐ་དང༌། བུདྡྷ་གུཔྟ་ནཱ་ཐ་དང༌། པུརྞ་བཛྲ་སྟེ་གསུམ་ལས་འཇམ་མགོན་ཏཱ་ར་ནཱ་ཐས་གསན་ཞིང་བསྒྱུར་བར་མཛད་པ་ཡིན། རྒྱུད་འདི་ལས་སྒྲོལ་མའི་སྐུ་གསུང་ཐུགས་ཀྱི་དཀྱིལ་འཁོར་དང༌། དབུགས་དབྱུང་དྲུག་ལ་སོགས་པ་དཀྱིལ་འཁོར་ཡང་མང་དུ་འབྱུང་ཞིང༌། རྫོགས་རིམ་རྒྱས་པར་བཤད་དོ། །དེ་ལྟར་རྣལ་འབྱོར་བླ་ན་མེད་པའི་རྒྱུད་ཀྱི་དབྱེ་བ་རྣམས་བཤད་ནས། དེ་དག་གི་ལམ་གྱི་རིམ་པ་ནི་གསང་འདུས་རྒྱུད་ཕྱི་མ་ལས། རྒྱུད་ནི་རྒྱུན་ཆགས་ཞེས་བྱ་སྟེ། །རྒྱུད་དེ་རྣམ་པ་གསུམ་དུ་འགྱུར། །ཞེས་གསུངས་པ་ལྟར། རྒྱུ་རྒྱུད། ཐབས་རྒྱུད། འབྲས་རྒྱུད་གསུམ་མོ། །དང་པོ་རྒྱུ་རྒྱུད་ནི་སེམས་རང་བཞིན་གྱི་འོད་གསལ་པ་གདོད་མ་ནས་བདེ་བ་དང་སྟོང་པ་དང་གསལ་བ་ཟུང་འཇུག་ཏུ་གནས་པ་དེ་ཡིན་པས་ལམ་ཡང་བདེ་བ་དང༌།
སྟོང་པ་དང་ལྷ་སྐུ་གསལ་བར་བསྒོམས་པས་འབྲས་བུ་སངས་རྒྱས་པའི་དུས་སུ་ཡང་སྟོང་པ་ཆོས་ཀྱི་སྐུ་དང༌། བདེ་བ་ལོངས་སྐུ་དང༌། གསལ་བ་དཀྱིལ་འཁོར་གྱི་འཁོར་ལོ་སྤྲུལ་སྐུ་སྟེ། སྐུ་གསུམ་ཐོབ་ཏུ་རུང་བའི་ནུས་མཐུ་ཅན་སེམས་ལ་སྐུ་གསུམ་ས་བོན་གྱི་ཚུལ་དུ་བཞུགས་པའོ། །གཉིས་པ་ཐབས་རྒྱུད་ནི་སྨིན་གྲོལ་གཉིས་ཏེ། སྨིན་བྱེད་ཀྱི་དབང་ལ་དབང་བཞི་ཚང་བ་སྟེ། དེ་ཡང་དཀྱིལ་འཁོར་སྔོན་དུ་འགྲོ་བ་ཡིན་ལ། བུམ་དབང་གི་དཀྱིལ་འཁོར་ནི་རྡུལ་ཚོན་དང་རས་བྲིས་དང་ལུས་དཀྱིལ་གསུམ་གསལ་བར་གསུངས་ཤིང༌། བློས་སླངས་ལ་སོགས་པ་ཡང་དོན་གྱིས་ཐོབ་པ་ཡིན། དེ་ལྟ་བུའི་དཀྱིལ་འཁོར་དེ་དག་བདག་མདུན་དབྱེར་མེད་དམ་ཐ་དད་གང་རུང་གི་སྒོ་ནས་སྒྲུབས་ཤིང་མཆོད་དགོས་པ་ཡིན་ལ། དབང་བསྐུར་བ་ནི། ཕྱི་ནང་གི་འཇུག་པ་སྔོན་དུ་འགྲོ་བས། ཆུ་ཅོད་པན། རྡོ་རྗེ་དྲིལ་བུ། མིང་སྟེ་རིག་པའི་དབང་ལྔ་དང༌། སློབ་དཔོན་དང༌། བརྟུལ་ཞུགས་དང༌། རྗེས་གནང་དང༌། ལུང་བསྟན་དང༌། དབུགས་དབྱུང་དང༌། གཟེངས་བསྟོད་དེ། དེ་རྣམས་བུམ་དབང་ཡིན་ལ། རྗེས་གསང་བ། བྱང་ཆུབ་སེམས་ཀྱི་དཀྱིལ་འཁོར་དུ་གསང་དབང་དང༌། བྷ་གའི་དཀྱིལ་འཁོར་དུ་ཤེས་རབ་ཡེ་ཤེས་དང༌། དོན་དམ་བྱང་ཆུབ་སེམས་ཀྱི་དཀྱིལ་འཁོར་དུ་དབང་བཞི་པ་རྣམས་བསྐུར་བ་ཡིན། ཡང་དུས་ཀྱི་འཁོར་ལོ་ལས་ནི། བྱིས་འཇུག་བདུན་དང༌། དབང་གོང་མ་བཞི་གསུངས་ཏེ། ཆུ་དང༌། ཅོད་པན་དང༌། དར་དཔྱངས་
དང༌། རྡོར་དྲིལ་དང༌། བརྟུལ་ཞུགས་དང༌། མིང་དང༌། རྗེས་གནང་སྟེ། བྱིས་པ་འཇུག་པའི་དབང་བདུན་ནོ། །དབང་གོང་མ་ལ་སློབ་མའི་དབང་གོང་མ་དང༌། རྡོ་རྗེ་སློབ་དཔོན་བདག་པོའི་དབང་དང༌། སློབ་དཔོན་བདག་པོ་ཆེན་པོའི་དབང་ཏེ་གསུམ་པོ་དེ་དག་རེ་རེ་ལའང་བུམ་གསང་ཤེས་རབ་བཞི་པ་རྣམས་སུ་ཕྱེ་བས་བཅུ་གཉིས་སུ་འགྱུར་ལ། འདི་སྐབས་ཀྱི་བུམ་དབང་ནི་གཞན་གྱི་བུམ་དབང་དང་མི་གཅིག་སྟེ། བུམ་པ་ཞེས་པ་བརྡས་བསྟན་པ་ཡིན་པས་ཕྱག་རྒྱའི་ལུས་མཚོན་པ་ཡིན། དེས་ན་ཕྱག་རྒྱའི་ལུས་ཀྱི་དཀྱིལ་འཁོར་དུ་བུམ་དབང་ཞེས་པའི་ཐ་སྙད་མཛད། གཞན་རྣམས་སྤྱི་འགྲོས་དང་གནད་གཅིག་པ་ཡིན་ནོ། །དེ་ལྟར་ན་བླ་མེད་ཀྱི་རྒྱུད་སྡེ་འདིར་ཁམས་གསུམ་དཀྱིལ་འཁོར་དུ་དག་པ་དང་གཉིས་སྦྱོར་འོད་གསལ་ལམ་དུ་བྱེད་པ་རྒྱས་པར་བཤད་དོ། །གཉིས་པ་གྲོལ་བྱེད་ཀྱི་ལམ་ལ་བསྐྱེད་རིམ་ནི་བརྫུས་སྐྱེས་དང་མཚུངས་པ་སྐད་ཅིག་གིས་བསྐྱེད་པ་དང༌། དྲོད་གཤེར་སྐྱེས་དང་མཚུངས་པར་ས་བོན་ཕྱག་མཚན་ལས་བསྐྱེད་པ་དང༌། སྒོང་སྐྱེས་དང་མཚུངས་པ་མངོན་པར་བྱང་ཆུབ་ལྔ་ལས་བསྐྱེད་པ་དང༌། མངལ་སྐྱེས་དང་མཚུངས་པ་ཞུ་བ་གླུས་བསྐུལ་དང༌། མཁའ་ནང་ནས་སྤྲོ་བ་སོགས་ཡིན་ཅིང༌། མངོན་རྟོགས་ཚར་གཅིག་ལ་འཆི་བ་དང་བར་དོ་དང༌། སྐྱེ་བ་གསུམ་སྦྱང་བའི་ཐབས་ཚང་བ། ཆོས་ལོངས་སྤྲུལ་གསུམ་ལམ་དུ་བྱེད་ནུས་པ་ཅིག་དགོས་ཏེ། དེ་ཡང་ལྷ་གཙོ་བོ་བསྐྱེད་པ་དང་པོ་སྦྱོར་བ། འཁོར་ཚོགས་སྤྲོ་བ་དཀྱིལ་འཁོར་རྒྱལ་མཆོག དག་
པ་དྲན་པ་དང༌། ཕྲ་ཐིག་བསྒོམ་པ་སོགས་ལས་རྒྱལ་མཆོག་སྟེ། ཏིང་ངེ་འཛིན་གསུམ་ཚང་བའམ། བསྙེན་པ། ཉེ་སྒྲུབ། སྒྲུབ་པ། སྒྲུབ་ཆེན་ཏེ་བསྙེན་བསྒྲུབ་ཡན་ལག་བཞི་ཚང་པའི། རྣལ་འབྱོར། རྗེས་སུ་རྣལ་འབྱོར། ཤིན་ཏུ་རྣལ་འབྱོར། རྣལ་འབྱོར་ཆེན་པོ་སྟེ་རྣལ་འབྱོར་བཞི་ཆ་ཚང་བ་གང་རུང་ཞིག་དགོས། བསྐྱེད་རིམ་གྱི་ཡན་ལག་ཏུ་བཟླས་པ་དང་གཏོར་མ་གཉིས། ཁ་ཟས་དང་རྗེས་ཆགས་གཉིས། ཉལ་བ་དང་ལྡང་བ་དང་གཉིས། སྤྱོད་ལམ་དང་མཆོད་པའི་རྣལ་འབྱོར་གཉིས་ཏེ་རྣལ་འབྱོར་བརྒྱད་པོ་དེ་རྣམས་དགོས་ལ། སྦྱིན་སྲེག་དང་འཁོར་ལོའི་མཆོད་པ་སོགས་ལའང་བསླབ་པར་བྱའོ། །རྫོགས་རིམ་ནི་ཀླུ་སྒྲུབ་ཡབ་སྲས་ཀྱི་བཞེད་པས་རྡོ་རྗེའི་བཟླས་པའི་རིམ་པ། སེམས་ལ་དམིགས་པའི་རིམ་པ། བདག་བྱིན་རླབས་པའི་རིམ་པ། མངོན་པར་བྱང་ཆུབ་ཀྱི་རིམ་པ། ཟུང་འཇུག་གི་རིམ་པ་སྟེ་རིམ་པ་ལྔར་བཞེད་ལ། སློབ་དཔོན་སངས་རྒྱས་ཡེ་ཤེས་ཞབས་ནི་སྙིང་གར་མི་ཤིགས་པའི་ཐིག་ལེ། གསང་བར་རྫས་ཀྱི་ཐིག་ལེ། སྣ་སྒོར་སྤྲུལ་པའི་ཐིག་ལེ། ཆོས་ཉིད་ཡེ་ཤེས་ཀྱི་ཐིག་ལེ་སྟེ་ཐིག་ལེའི་རྣལ་འབྱོར་བཞིར་འདུས་པར་བཞེད་ལ། སློབ་དཔོན་རྡོ་རྗེ་དྲིལ་བུ་པའི་བཞེད་པ་ནི། བདག་བྱིན་རླབས་པའི་རིམ་པ། སྣ་ཚོགས་རྡོ་རྗེའི་རིམ་པ། ནོར་བུ་འགེངས་པའི་རིམ་པ། ཛ་ལནྡྷ་རའི་རིམ་པ། བསམ་མི་ཁྱབ་ཀྱི་རིམ་པ་སྟེ་བདེ་མཆོག་རིམ་ལྔར་གྲགས་པ་ལྟར་ཡིན། སློབ་
དཔོན་ནག་པོ་སྤྱོད་པ་ནི་རྒྱུད་ཀྱི་རིམ་པ། སྔགས་ཀྱི་རིམ་པ། ཡེ་ཤེས་ཀྱི་རིམ་པ། གསང་བའི་རིམ་པ་སྟེ་རིམ་པ་བཞི་ལམ་ཐམས་ཅད་བསྡུས་པར་བཞེད་དོ། །དུས་འཁོར་དང་གཞན་ཡང་རྒྱུད་མང་པོར། །སོ་སོར་སྡུད་དང་བསམ་གཏན་དང༌། །སྲོག་རྩོལ་དེ་བཞིན་འཛིན་པ་དང༌། །རྗེས་སུ་དྲན་དང་ཏིང་ངེ་འཛིན། །སྦྱོར་བ་ཡན་ལག་དྲུག་ཏུ་འདོད། །ཅེས་རྣལ་འབྱོར་ཡན་ལག་དྲུག་གིས་བསྡུས་པར་བཞེད་དོ། །ཐམས་ཅད་མཐུན་པར། གང་ལ་གནད་དུ་བསྣུན་པའི་གཞི་རྩ་དང༌། རླུང་དང༌། ཐིག་ལེའི་རྣལ་འབྱོར་ཤེས་ནས་དམིགས་པ་དང༌། རླུང་སྦྱོར་དང༌། འཁྲུལ་འཁོར་གྱི་སྒོ་ནས་རང་ལུས་རྩ་དབུ་མ་ལ་གནད་དུ་བསྣུན་པ་དང༌། བྱང་ཆུབ་ཀྱི་སེམས་ཀུནྡ་ལྟ་བུ་དབབ་བཟུང་བཟློག་ཁྱབ་ཀྱི་རིམ་པས་རྗེས་ཆགས་ཀྱི་དགའ་བ་བཞི་ངོས་འཛིན་པ་གཞན་ལུས་ཤེས་རབ་ཀྱི་ལམ་དང༌། ལུས་ངག་གི་རྩོལ་བ་དང༌། ཡིད་རྣམ་རྟོག་གིས་མ་བརྟགས་པར་སྟོང་གཟུགས་ཕྱག་རྒྱ་ཆེན་པོས་མི་འགྱུར་བའི་བདེ་ཆེན་འདྲེས་པ་སྟེ་རྫོགས་རིམ་ཐམས་ཅད་ཀྱང་གསུམ་དུ་འདུས་སོ། །དེ་ལྟར་བསྐྱེད་རྫོགས་རིམ་པ་གཉིས་ལ་བརྟན་པ་ཐོབ་པ་ན། བརྟུལ་ཞུགས་ཀྱི་སྤྱད་པ་སྤྱོད་དགོས་པ་ལས། དེ་ལ་དབྱེ་ན་སྤྲོས་བཅས་སྤྲོས་མེད། ཤིན་ཏུ་སྤྲོས་མེད་ཀྱི་སྤྱོད་པ་གསུམ་མམ། ཡང་ན་ཀུན་འདར། ཀུན་བཟང༌། ཕྱོགས་ལས་རྣམ་རྒྱལ་གྱི་སྤྱོད་པ་སྟེ་གསུམ་དུ་ཡོད་དོ། །བརྟུལ་ཞུགས་ཀྱི་སྤྱོད་པའི་ངོ་བོ་ནི་སེམས་བདེ་བ་ཆེན་པོར་ཤར་བ་དང་རྐྱེན་
ལས་ཀྱི་ཕྱག་རྒྱ་སོགས་བསྟེན་པའི་བདེ་སྟོང་གི་ཏིང་ངེ་འཛིན་གཅིག་གི་སྟེང་དུ། ཕྱི་བདེ་སྡུག་གི་སྣང་བ་ཐམས་ཅད་རོ་མཉམ་དུ་བསྲེ་བ་ཡིན་ལ། དེ་ལྟར་སྤྱོད་པ་ལ་བརྟེན་ནས་དངོས་གྲུབ་ཐོབ་པར་འགྱུར་རོ། །གསུམ་པ་འབྲས་བུ་རྒྱུད་ལ་ཐུན་མོང་དང་མཆོག་གི་དངོས་གྲུབ་གཉིས་ལས། ཐུན་མོང་ལ་ཕྲ་མོའི་ཆུང་ངུ་ལས་རིམ་སྣ་ཚོགས་ནི་ཞི་རྒྱས་དབང་དགུག་བསད་བསྐྲད་དབྱེ་མནན་ཏེ་ལས་ཆེན་བརྒྱད་ལ་སོགས་པའོ། །འབྲིང་རྫས་ཀྱི་དངོས་གྲུབ་ནི་ས་འོག་དང༌། རལ་གྲི་དང༌། རིལ་བུ་དང༌། མིག་སྨན་དང༌། རྐང་མགྱོགས་དང༌། བཅུད་ལེན་དང༌། རོ་ལངས་དང༌། གཏེར་གྱི་དངོས་གྲུབ་སྟེ་དངོས་གྲུབ་བརྒྱད་དོ། །ཆེན་པོ་ལས་ཀྱི་རིག་འཛིན་ནི། འདོད་ཁམས་ཀྱི་ལྷའི་གཟུགས་ཁམས་ཀྱི་ལྷ་དང་བསྐལ་བ་མཉམ་པའི་རིག་པ་འཛིན་པའི་རྒྱལ་པོའོ། །གཉིས་པ་མཆོག་གི་དངོས་གྲུབ་ལ་གནས་སྐབས་སུ་སྔགས་ཀྱི་ལམ་ལ་བརྟེན་ནས་འཕགས་པའི་ས་ཐོབ་པ་ཟུང་འཇུག་གི་སྐུ་དང༌། མཐར་ཐུག་རྫོགས་པའི་སངས་རྒྱས་གྲུབ་པ་གཉིས་སོ། །སངས་རྒྱས་ནི་སྐུ་བཞི་ཡེ་ཤེས་ལྔ་འཕྲིན་ལས་དང་བཅས་པས་བསྡུས་པའོ། །ཆོས་ལོངས་སྤྲུལ་གསུམ་གྱི་སྟེང་དུ་བདེ་བ་ཆེན་པོའི་སྐུ་བསྣན་པ་ནི་སྐུ་བཞི་དང༌། ཆོས་དབྱིངས་མེ་ལོང་མཉམ་ཉིད་སོར་རྟོག་བྱ་བ་སྒྲུབ་སྟེ་ཡེ་ཤེས་ལྔ་དང༌། འཕྲིན་ལས་ནི་ཐེག་པ་གཞན་དུ་བཤད་པ་དང་ཐུན་མོང་པ་ཡང་ཡོད། རིགས་དྲུག་གི་དཀྱིལ་འཁོར་སྤྲུལ་བཤད་སོགས་ཐུན་མོང་
མ་ཡིན་པ་ཡང་ཡོད་དོ། །དེ་ཐམས་ཅད་བསྡུ་ན་ཡན་ལག་བདུན་དང༌། དབང་ཕྱུག་བརྒྱད་དུ་འདུ། ཇི་སྐད་དུ། སློབ་དཔོན་ངག་དབང་གྲགས་པས་ཡན་ལག་བདུན་པའི་གཞུང་དུ། ལོངས་སྤྱོད་རྫོགས་དང་ཁ་སྦྱོར་བདེ་ཆེན་རང་བཞིན་མེད། སྙིང་རྗེས་ཡོངས་གང་རྒྱུན་མི་འཆད་དང་འགོག་པ་མེད། །ཅེས་ཡན་ལག་བདུན་ནོ། །གསང་འདུས་ཀྱི་འགྲེལ་ཆེན་སྒྲོན་གསལ་ལས། རྒྱུད་རྒྱས་པའི་ལུང་དྲངས་པ་ན། སྐུ་ཡི་དབང་ཕྱུག་དང་ནི་གསུང་གི་དབང་ཕྱུག་དང༌། །དེ་བཞིན་དུ་ནི་ཐུགས་ཀྱི་དབང་ཕྱུག་དང༌། །རྫུ་འཕྲུལ་ཀུན་འགྲོ་གནས་ཀྱི་དབང་ཕྱུག་དང༌། །ཅི་འདོད་བྱེད་དང་ཡོན་ཏན་བརྒྱད་པའོ། །ཞེས་གསུངས་ཏེ་ཕྱི་མ་གཉིས་ནི་འདོད་པའི་དབང་ཕྱུག་དང༌། ཡོན་ཏན་གྱི་དབང་ཕྱུག་ཅེས་བྱའོ། །དེ་ལྟར་ན་རྡོ་རྗེ་ཐེག་པའི་གནས་ལུགས་གསལ་བྱེད་ཅེས་བྱ་བ་འདི་ནི། དཔལ་ལྡན་བླ་མ་དམ་པ་མཁས་གྲུབ་དུ་མའི་གཙུག་རྒྱན་འཇམ་མགོན་ཀུན་དགའ་སྙིང་པོ་བཀྲ་ཤིས་རྒྱལ་མཚན་དཔལ་བཟང་པོའི་རྡོ་རྗེའི་གསུང་ལས་བྱོན་པ་དགས་ལ་སྤྱོད་པའི་དབང་ཕྱུག་རྒྱལ་བའི་བསྟན་པ་རིན་པོ་ཆེ་བླ་ན་བཀུར་བ་དང་འགྲོ་བ་ཀུན་ལ་ཕན་བདེའི་དཔལ་ཡོན་རྟག་ཏུ་སྦྱིན་པའི་སྙིང་སྟོབས་ཅན་ཀུན་དགའ་རབ་བརྟན་དབང་གི་རྒྱལ་པོ་ཞེས་བྱ་བས་གསར་དུ་བསྒྲིགས་པའི་དགེ་བ་འདིས་ཀྱང་སྐྱེ་དགུ་མཐའ་དག་ཟབ་ལམ་རྡོ་རྗེ་ཐེག་པའི་སྤྱོད་པའི་སྐལ་བ་བཟང་པོ་དང་ལྡན་པའི་སྒོ་ནས་རྣམ་པ་ཐམས་ཅད་མཁྱེན་པའི་གོ་འཕང་མྱུར་དུ་ཐོབ་པའི་རྒྱུར་གྱུར་ཅིག །ཞུས་དག། །།མངྒ་ལཾ།།