ལས་དང་པོ་པ་རྣམས་ལ་ཕན་པའི་རབ་ཏུ་བྱེད་པ་བསྟན་པའི་ནོར་རྫས།
ལས་དང་པོ་པ་རྣམས་ལ་ཕན་པའི་རབ་ཏུ་བྱེད་པ་བསྟན་པའི་ནོར་རྫས་ཞེས་བྱ་བ་བཞུགས།
སྭཱ་སྟི། ལས་དང་པོ་པ་རྣམས་ལ་ཕན་པའི་རབ་ཏུ་བྱེད་པ་བསྟན་པའི་ནོར་རྫས་ཞེས་བྱ་བ། བླ་མ་དམ་པ་མཆོག་གི་ཞབས་རྡོ་རྗེ་སེམས་དཔའི་རིགས་ཀྱི་བདག་པོ་ལ་ཕྱག་འཚལ་ལོ། །དཔལ་ལྡན་ཟབ་གསལ་གཉིས་མེད་དཀྱིལ་འཁོར་ལས། །མ་ལུས་རིགས་ཀྱི་སྤྲུལ་པའི་ཚོགས་སྤྲོ་བ། །བདེ་སྟོང་མཁའ་ལ་ཡེ་ཤེས་འོད་རིས་ཤར། །ཟུང་འཇུག་རྡོ་རྗེ་འཆང་ལ་ཕྱག་འཚལ་ལོ། །འདིར་ནི་ལས་དང་པོ་ལ་ཉེར་མཁོ་བ། །ཅུང་ཟད་བདག་གིས་རྣམ་པར་དབྱེ་འདོད་ན། །ཤེས་ལྡན་རྣམས་ཀྱིས་སྔོན་མེད་ཉུང་ངུའི་གཏམ། །འགྲོ་ལ་ཕན་པའི་རྒྱུ་རུ་མཉན་པའི་རིགས། །སྡོམ་ནི། རྒྱུད་ཀྱི་རང་བཞིན་དེ་དོན་སྒོམ་ཚུལ་དང༌། །རྒྱུད་རྣམས་བཤད་པའི་མན་ངག་ཅེས་བྱའོ། །འདིར་རྡོ་རྗེའི་ཐེག་པའི་དོན་ནི་འདི་ཙམ་སྟེ། རྒྱུད་རྣམས་ཀྱི་རང་བཞིན་དང༌། དེའི་དོན་སྒོམ་ཚུལ་དང༌། རྒྱུད་བཤད་ཐབས་ཏེ་གསུམ་པོ་
འདི་དག་གོ །དེ་ལ་རྒྱུད་ཅེས་བྱ་བ་ནི་སྔགས་རྣམས་དང་དེའི་ཆོ་གའོ། ། དེ་སྟོན་པར་བྱེད་པའི་བཀའི་ཚོགས་ལ་ཡང་རྡོ་རྗེ་ཐེག་པའི་སྡེ་སྣོད་དང་རྒྱུད་ཅེས་བྱའོ། །རིག་པ་འཛིན་པའི་སྡེ་སྣོད་དང༌། སྔགས་ཀྱི་སྡེ་སྣོད་དང༌། ཆོས་འདི་པ་རྣམས་ཀྱི་རྒྱུད་དང༌། རྡོ་རྗེ་ཐེག་པའི་སྡེ་སྣཽད་ཅེས་པ་རྣམས་གྲངས་སོ། །རྡོ་རྗེ་ཐེག་པ་དང༌། སྔགས་ཀྱི་ཐེག་པ་དང༌། རིག་པ་འཛིན་པའི་ཐེག་པ་དང༌། འབྲས་བུའི་ཐེག་པ་ཞེས་པ་ཡང་རྣམ་གྲངས་སོ། །ཅི་སྔགས་དང་རྒྱུད་སོ་སོའི་སྐྱེ་བོས་བྱས་པ་དག་ཡོད་དམ། ཡོད་དེ། ཕྱུགས་བདག་གིས་བྱས་པ་དང༌། དྲང་སྲོང་གིས་བྱས་པ་དང༌། ལྷ་དང་འབྱུང་པོ་དང༌། གསང་བ་པ་དག་དང༌། སྔགས་མཁན་དག་གིས་བྱས་པ་དག་ཡིན་ཏེ། དེ་དག་ནི་རྡོ་རྗེ་ཐེག་པ་དང༌། སྔགས་ཀྱི་སྡེ་སྣོད་ནི་མ་ཡིན་ཏེ། གཞན་དུ་སྔགས་དང་རྒྱུད་ཅེས་བྱའོ། །ཡོང་ཡེ་སྔགས་ཀྱི་ཐེག་
པ་ཞེས་བྱ་བ་ནི་ཇི་ཞིག དབྱེ་བ་ནི་གང་དངོས་དང་མིང་གིས་བཏགས་པའི་ཁྱད་པར་ནི་ཅི་ཞེ་ན། རིག་སྔགས་ཀྱི་སྦྱོར་བ་གཅོ་བོར་སྟོན་པའི་ལམ་དང༌། དེའི་འབྲས་བུ་ནི་སྔགས་ཀྱི་ཐེག་པའོ། །དེ་ཡང་རྣམ་པར་དབྱེ་ན། འཇིག་རྟེན་པའི་ཐེག་པ་དང༌། འཇིག་རྟེན་ལས་འདས་པའི་ཐེག་པའོ། །འཇིག་རྟེན་པའི་ཐེག་པ་གང་ཞེ་ན། འདོད་པའི་རིག་པ་འཛིན་པ་དང༌། གཟུགས་ཀྱི་རིག་པ་འཛིན་པ་དང༌། དེ་དག་གི་ལམ་དང༌། གཟུགས་མེད་པའི་ཁམས་སུ་སྐྱེ་བ་གཞན་ལ་སྔགས་ཀྱི་སྦྱོར་བས་བགྲོད་པར་བྱེད་པའི་ལམ་རྣམས་སོ། །འཇིག་རྟེན་ལས་འདས་པའི་ཐེག་པ་གང་ཞེ་ན། ཐེག་པ་གསུམ་པོ་དག་གོ །འཇིག་རྟེན་པའི་ཐེག་པ་ནི་མིང་ཙམ་སྟེ། གོ་འཕང་མི་གཡོ་བ་མ་ཡིན་པའི་ཕྱིར་དང༌། དེ་ལ་ངེས་པར་འཇུག་པ་མ་ཡིན་པའི་ཕྱིར་དང༌། ཡུལ་དུས་ཉེ་ཚེ་བའི་ཕྱིར་རོ། །འཇིག་རྟེན་ལས་འདས་པའི་ནི་དངོས་ཏེ། རྡོ་རྗེའི་ཐེག་པའོ། །དེའི་ཡང་ཉན་ཐོས་དང་རང་སངས་རྒྱས་ཀྱི་ཐེག་པ་ནི་གཙོ་བོ་མ་ཡིན་ནོ། གང་རིག་པ་འཛིན་པའི་སྡེ་སྣོད་འདིར་འཇིག་རྟེན་པའི་སྦྱོར་བ་དེ་དག་འཇིག་རྟེན་པའི་ཐེག་པ་ཞེས་བྱའམ་ཞེ་ན་དེ་ལྟར་ཡིན་ཏེ། འཇིག་རྟེན་པའི་ཐེག་པ་ལ་དངོས་བཏགས་ཀྱིས་དབྱེ་ན། སླར་ཡང་འཇིག་རྟེན་པའི་ཐེག་པ་ཡང་རྣམ་པ་གསུམ་སྟེ། འཇིག་རྟེན་པ་ཉིད་ཀྱི་ཐེག་པ་དང༌། ངེས་པ་ལ་འཇུག་པའི་འཇིག་རྟེན་པ་དང༌། སེམས་ཀྱི་རྟེན་འཇིག་རྟེན་པའོ། །དང་པོ་ནི་སོ་སོའི་སྐྱེ་བོས་བྱས་པའོ། །གཉིས་པ་ནི། རིག་པ་འཛིན་པའི་སྡེ་སྣོད་ལས་འབྱུང་བ་འཇིག་རྟེན་པའི་ཐེག་
པའོ། །གསུམ་པ་ནི། ཚོགས་ཀྱི་ལམ་དང༌། སྦྱོར་བའི་ལམ་མོ། །དེ་ལ་ཕྱི་མ་གཉིས་ནི། འཇིག་རྟེན་ལས་འདས་པའི་སྡེར་གཏོགས་ཏེ། དེ་སྟོན་པར་བྱེད་པ་རྣམས་ཀྱང་དེའི་སྡེ་སྣོད་དུ་གཏོགས་སོ། །འཕགས་པའི་སེམས་ཅན་གྱིས་རང་དགར་བྱས་པ་ཡང༌། དེའི་སྡེར་གཏོགས་མོད་ཀྱི། འོན་ཀྱང་སྡེ་སྣོད་ནི་མ་ཡིན་ནོ། །བར་སྡོམ་ནི། ངོ་བོ་རྣམ་གྲངས་འཇིག་རྟེན་པའི། །རྒྱུད་དང་སྔགས་ཀྱི་ཐེག་པ་ཡི། །རང་བཞིན་དབྱེ་བ་དངོས་བཏགས་ཁྱད། །འཇིག་རྟེན་པ་ཡི་དབྱེ་བའོ། །རྒྱུད་ཀྱི་ངོ་བོ་དང༌། རྣམ་གྲངས་དང༌། འཇིག་རྟེན་པའི་རྒྱུད་དང༌། སྔགས་ཀྱི་ཐེག་པའི་རང་བཞིན་དང༌། དབྱེ་བ་དང༌། འཇིག་རྟེན་པའི་ཐེག་པའི་དབྱེ་བའོ། །འདི་ལ་མདོ་དང་རྒྱུད་ནི་ཅི་ཞེ་ན། འདིར་མདོ་ནི་གཅིག་ལས་འཕྲོས་པ་ལ་སོགས་པ་ཕལ་ཆེར་དག་གོ །རྒྱུད་ནི་མཁའ་ལྡིང་གི་སྦྱོར་བ་ལ་སོགས་པའོ། །མདོ་ཡང་ཡིན་ལ་རྒྱུད་ཀྱང་ཡིན་པ་ནི། སྔགས་ཀྱི་སྡེ་སྣོད་དེ་རྣམས་སོ། །གཉིས་ཀ་མ་ཡིན་པ་ནི་རྟོག་གེ་ལ་སོགས་པའོ། །རྒྱུའི་ཐེག་པ་དང་འབྲས་བུའི་ཐེག་པའི་ཁྱད་པར་གང་ཞེ་ན། འབྲས་བུ་ལམ་དུ་བྱེད་པ་ཞེས་བྱ་བ་ལྷའི་རྣལ་འབྱོར་གྱི་ཁྱད་པར་རོ། །ཕ་རོལ་དུ་ཕྱིན་པའི་ཚུལ་དང༌། སྔགས་ཀྱི་ཚུལ་གྱི་ཁྱད་པར་གང་ཞེ་ན། སྔགས་དང་སྦྱོར་བ་གཙོ་བོར་སྟོན་པ་དང༌། མ་ཡིན་པའི་ཁྱད་པར་རོ། །ཅིའི་ཕྱིར་སྔགས་ཀྱི་ཚུལ་མཆོག་ཏུ་གྱུར་པ་ཡིན། སྔགས་ཀྱི་ཚུལ་རྣམས་ནི་དུ་ཞེ་ན། ལས་དང་པོ་ལ་ཐབས་སུ་གྱུར་པ་སྟེ། མྱུར་བ་དང༌། བདེ་བ་དང༌། ཐབས་
ལ་མཁས་པའི་ཁྱད་པར་གྱིས་མཆོག་ཏུ་གྱུར་པའོ། །ཇི་ལྟར་མྱུར་བ་ཡིན་ཞེ་ན། སྐྱེ་བ་འདིའམ། སྐྱེ་བ་བཅུ་དྲུག་གམ། བསྐལ་པ་གསུམ་མམ། བསྐལ་པ་བརྒྱད་ཀྱི་བྱང་ཆུབ་ཐོབ་པའོ། །རྒྱུ་ཅིས་མྱུར་བ་ཡིན་ཞེ་ན། ཆོ་གའི་ཁྱད་པར་གྱིས་ལྷ་རྣམས་དངོས་སུ་མཆོད་པ་ལེན་པས་ཡོངས་སུ་སྤྱད་པ་ལས་བྱུང་པའི་བསོད་ནམས་ཡོད་པ་དང། སྔགས་ཀྱི་མཐུས་ཆུ་ཐིགས་པ་གཅིག་ལ་ཡང་གངྒཱའི་བྱེ་སྙེད་ཀྱི་བསོད་ནམས་འབྱུང་བ་དང༌། ལས་དང་པོ་པས་མ་དག་པའི་སྣང་བ་འགོག་པའི་ཞིང་སྦྱོང་བའི་ཏིང་ངེ་འཛིན་མངོན་དུ་བྱེད་པ་དང༌། སྔགས་སམ་ཏིང་ངེ་འཛིན་གྱི་ཁྱད་པར་རེ་རེས་ཀྱང་སེམས་ཅན་རྣམས་སྨིན་པའི་རྒྱུ་ཁྱད་པར་ཅན་འདི་དག་ཐེག་པ་ལ་ཞུགས་པ་ཙམ་ལ་ཡང་ཡོད་པ་དང༌། ཏིང་ངེ་འཛིན་གྱི་སྤྱོད་ཡུལ་གྱིས་གཟུགས་བདེན་པ་གཉིས་ཀའི་ཚུལ་གྱིས་འབྲས་བུའི་རྣམ་པ་ལ་དམིགས་པའི་ཤེས་རབ་རྣམས་དང་པོ་དང་ཐ་མའི་བར་དུ་ཡོད་པས་ནའོ། །ཇི་ལྟར་ན་བདེ་བ་ཡིན་ཞེ་ན། ལུས་དང་སེམས་ལ་ཚོར་བ་རྩུབ་པོ་མེད་པ་ཉིད་དོ། །རྒྱུ་ཅིས་བདེ་བ་ཡིན་ཞེ་ན། འདི་ལ་བསྐལ་པ་དྲུག་དང་ལྡན་པའི་ལུས་དང་གྲུབ་པ་དང༌། རྫུ་འཕྲུལ་དང་ཏིང་ངེ་འཛིན་མང་པོ་ཐོབ་པ་དང༌། སྔགས་ཀྱི་མཐུས་སངས་རྒྱས་རྣམས་མངོན་སུམ་དུ་བཞུགས་པ་དང༌། སྔགས་དང་རྒྱུད་ཀྱི་སྦྱོར་བས་འགྲོ་བའི་བསམ་པ་ཐམས་ཅད་བསྒྲུབས་པས་ནའོ། །ཐབསས་ལ་མཁས་པ་གང་ཞེ་ན །ཚུལ་ཁྲིམས་དང༌། ཏིང་ངེ་འཛིན་དང༌། ཤེས་རབ་དང༌། སྤྱོད་ཡུལ་ལ་འཇུག་པ་རྣམས་ཀྱིའོ། །རིག་པ་འཛིན་པ་རྣམས་
དང༌། ཚུལ་ཁྲིམས་:མཉམ་[མ་ཉམས་]པས་ལྷ་དགེས་པ་དང༌། སྤྱོད་ཡུལ་ཁྱད་པར་ཅན་དང་འབྲེལ་པའི་ཏིང་ངེ་འཛིན་དང༌། ཤེས་རབ་དང༌། གཞན་དག་ནི་ཐེག་པ་ཆེན་པོ་ཚུལ་ཉིད་ཀྱི་བསླབ་པ་གསུམ་དང༌། སྤྱོད་ཡུལ་ཐམས་ཅད་དུ་ལྷ་དང་སྔགས་ཀྱི་ཐབས་ཡོད་དོ། །བྱ་བའི་རྒྱུད་ཆེན་པོའམ། སྤྱོད་པའི་རྒྱུད་དམ། གཉིས་ཀའི་རྒྱུད་ཅེས་བྱ་བ་འདི་ལྷའི་བསྙེམས་པ་རྒྱས་པའི་ཚུལ་གྱིས་འཇུག་གོ །རྣལ་འབྱོར་གྱི་རྒྱུད་ལ་ནི་ལྷའི་བསྙེམས་པ་ཁྱབ་པའི་ཚུལ་གྱིས་འཇུག་པའོ། །རྣལ་འབྱོར་བླ་ན་མེད་པར་ནི་བདེ་བའི་སྡོམ་པ་ཚུལ་ཁྲིམས་དང༌། བག་ཆགས་དང༌། སྤྱོད་པ་དང༌། གོང་མའི་རྣམ་པའི་ཏིང་ངེ་འཛིན་དང༌། བདེ་བ་ཁྱབ་པ་དང༌། སྤྱོད་ཡུལ་དེ་ཉིད་ལ་དམིགས་པའི་ཤེས་རབ་དང༌། སྙིང་རྗེ་ཆེན་པོ་དང༌། མཉམ་པ་ཉིད་དང༌། རང་བཞིན་མེད་པ་དང༌། བདེ་བ་དང༌། ལྷའི་རྣམ་པས་ཁྱབ་པ་དང༌། དེས་དེ་དག་ཉིད་མཆོག་ལ་སྦྱོར་བས་སྤྱོད་ཡུལ་ལ་འཇུག་གོ །ཚུལ་ཁྲིམས་ནི་ཐུན་མོང་དང་ཐུན་མོང་མ་ཡིན་པ་དང༌། རྒྱ་ཆེ་བ་དང༌། ཟབ་པའི་ཁྱད་པར་དང་ཏིང་ངེ་འཛིན་དང༌། ཤེས་རབ་ཀྱང་ཐུན་མོང་དང༌། ཐུན་མོང་མ་ཡིན་པ་དང༌། རྒྱ་ཆེ་བ་དང༌། ཟབ་པའི་ཁྱད་པར་རོ། །ཅིའི་ཕྱིར་བདེ་བ་ཆེན་པོས་མྱུར་ཞེ་ན། བདེ་བ་ནི་སྙིང་རྗེའི་རང་བཞིན། དེ་ཉིད་རང་བཞིན་མེད་ཅིང༌། དམིགས་པ་མེད་པར་མངོན་སུམ་མམ། མངོན་སུམ་གྱི་ཚུལ་གྱིས་ལས་དང་པོ་བས་བསྐྱེད་པས། བདེ་བས་སྟོང་པ་ཕུལ་དུ་འགྱུར་བ་མངོན་སུམ་གྱི་རྣམ་པ་དང༌། དེས་ཀྱང་
བསོད་ནམས་ཕུལ་དུ་ཕྱིན་པར་འགྱུར་བའི་ཕྱིར་རོ། །བར་བསྡོམ་ནི། རྒྱུད་དང་འབྲས་དང་སྔགས་ཀྱི་ཁྱད། །མྱུར་བདེ་ཐབས་མཁས་རྣམས་ཀྱིས་མཆོག །མྱུར་དང་བདེ་ལ་ཇི་ལྟར་རྒྱུ། །ཡོངས་སྤྱད་འཕེལ་དང་སྦྱོང་དང་སྨིན། །ཤེས་རབ་ཀྱིས་མྱུར་ལུས་ཏིང་འཛིན། །མངོན་སུམ་བཞུགས་དང་བསམ་པ་སྒྲུབ། །བསླབ་གསུམ་སྤྱོད་ཡུལ་བླ་མེད་ལ། །ཐུན་མོང་མིན་དང་རྒྱ་ཆེ་ཟབ། འདིར་སྔགས་ཀྱི་ཚུལ་ནི་གསུམ་སྟེ། མཆོག་དང་དམན་པ་དང་ཡན་ལག་གོ །དེའི་ངོ་བོ་གང་ཞེ་ན། བདེ་བ་ཆེན་པོ་དང༌། ལྷའི་བསྙེམས་པ་དང༌། སྔགས་དང་སྦྱོར་བ་ཙམ་དང་བཅས་པའོ། །དང་པོ་གཉིས་ནི་དངོས་དང༌། སྔགས་ཀྱི་ཐེག་པ་དང༌། རིག་པ་འཛིན་པའི་ཚུལ་དང༌། སྡོམ་པ་དང་འབྲེལ་བ་ཡིན་ནོ། །ཕྱི་མ་ནི་རྣམས་མ་ཡིན་ཏེ་གཞན་དུ་ན། སྔགས་པ་ཞེས་པ་ཙམ་མོ། །ཡང་སྔགས་ཀྱི་ཚུལ་བདུན་ཏེ། གཏན་དུ་བའི་ལམ་དང༌། ཆ་ཤས་ཅན་དང༌། ཁྱད་པར་དུ་གྱུར་པ་དང༌། དང་པོར་བདེན་པ་དང༌། ཕལ་ཆེར་བདེ་ཆེན་གྱི་ཚུལ་དང༌། འགའ་ཞིག་བདེ་ཆེན་དང༌། ཅུང་ཟད་བདེ་ཆེན་གྱི་ཚུལ་ལོ། །འདིར་ཐམས་ཅད་བདེ་ཆེན་ཞེས་བྱ་བ་ཡོད་མོད་ཀྱི། དེ་ནི་གཏན་དུ་བའི་ལམ་ཉིད་དུ་འགྱུར་རོ། །བར་སྡོམ་ནི། གསུམ་ལ་དབྱེ་བ་ངོ་བོ་དང༌། ཁྱད་པར་དང་ནི་ཚུལ་བདུན་ནོ། །སྔོན་ཆད་ཁ་བ་ཅན་འདིར་ནི། །སྔགས་པར་སྨྲ་བ་ཤས་ཆེས་ཀྱང༌། འདི་ནི་མ་རྟོགས་འདི་རྟོགས་པ། བླ་མ་རྣམས་ཀྱི་དྲིན་ཉིད་དེ། །ཚུལ་འདི་ཇི་བཞིན་མ་ཤེས་པས། །མདོ་རྒྱུད་ཁྱད་པར་མཁས་པས་ཀྱང༌། །རྣམ་པ་ཀུན་ཏུ་མ་ཕྱེད་ཅིང༌། །
འཕགས་པ་རྣམས་ཀྱི་གཏམ་འདི་ཡིན། ཞེས་བྱ་བ་ནི་བར་སྐབས་ཀྱི་ཚིགས་སུ་བཅད་པའོ། །དེ་ལ་རྒྱུད་དང་སྔགས་ནི་རྣམ་པར་དབྱེ་བར་བྱ་སྟེ། དེ་ལ་སྔགས་གང་ཞེ་ན། གསང་སྔགས་རྣམས་དང༌། བདེ་བ་ཆེན་པོའི་ཡེ་ཤེས་སོ། །རྒྱུད་གང་ཞེ་ན། དེའི་སྦྱོར་བ་སྟེ། ལས་དང་དངོས་གྲུབ་ཀྱི་ཚོགས་རྣམས་སོ། །སྔགས་དང་རྒྱུད་ཀྱི་རིམ་པར་ཕྱེ་བ་སྟེ་དང་པོའོ། །དེ་ལ་དེ་ཉིད་རྣམ་པར་བཤད་པར་བྱ་སྟེ། རྒྱུའི་རྒྱུད་དང༌། ཐབས་ཀྱི་རྒྱུད་དང༌། འབྲས་བུའི་རྒྱུད་དོ། །དེ་སྐད་དུ་ཡང༌། རྒྱུད་ནི་རྒྱུན་ཞེས་བྱ་བ་སྟེ། །རྒྱུད་དེ་རྣམ་པ་གསུམ་དུ་འགྱུར། །གཞི་དང་ངོ་བོ་རང་བཞིན་དང༌། །མི་འཕྲཽགས་པ་ཡི་རབ་ཕྱེ་བ། ཞེས་པ་འདི་ནི་རེ་ཞིག་ལུང་ངོ༌། །ངོ་བོ་གཙོ་བོ་མཚན་ཉིད་དང༌། ། རྣམ་གྲངས་ལྡན་པ་གནས་སྐབས་དང༌། །མི་འགྱུར་བས་ཀྱང་རྒྱུ་རྒྱུད་བསྡུས། ། རྒྱུའི་རྒྱུད་གང་ཞེ་ན། ཐོག་མ་མེད་པའི་དུས་རྣམས་ནས་རྒྱུད་དེ་འོངས་པ། སེམས་རང་བཞིན་གྱིས་འོད་གསལ་བ་གང་ཡིན་པ་དང༌། སེམས་དང་སེམས་ལས་བྱུང་བ་རྣམས་དང༌། སྣོད་དང་བཅུད་ཀྱི་རང་བཞིན་དང༌། རྩ་དང་རླུང་དང༌། ཁམས་དང༌། ཆོས་ཀྱི་དབྱིངས་གང་ཡིན་པ་དེ་རྣམས་སོ། །དེ་རྣམས་ཀྱི་གཙོ་བོ་ནི་སེམས་ཀྱི་རང་བཞིན་འོད་གསལ་བའོ། །དེ་ཉིད་གང་ཞེ་ན། ཞིང་དང༌། སྐུ་དང༌། ཡེ་ཤེས་ལ་སོགས་པ་འབྲས་བུའི་ཆོས་མཐུན་པའི་ཁྱད་པར་ཅན། རང་བཞིན་བདེ་བ་ཆེན་པོ་རྒྱུན་ཆད་པ་མེད་པ། ཆོས་ཉིད་ཀྱིས་ཐོབ་པ་སྟེ་ཁྱད་པར་བཞི་དང་ལྡན་པའོ། །རྒྱུའི་རྒྱུད་དང༌། སྦྱང་གཞི་དང༌། ཀུན་གཞི་དང༌།
དང་པོའི་སངས་རྒྱས་ནི་རྣམ་གྲངས་སོ། །རྒྱུ་ནི་དུ། གཞི་ནི་དུ། ཀུན་གཞི་ནི་དུ། དང་པོའི་སངས་རྒྱས་ནི་དུ་ཞེ་ན། རྒྱུ་ནི་བཅུ་བཞི་སྟེ། ཉོན་མོངས་པའི་རྒྱུ་དང༌། ལས་ཀྱི་རྒྱུ་དང༌། སྡུག་བསྔལ་གྱི་སྟཻ་ཀུན་ནས་ཉོན་མོངས་པའི་དང༌། སྣོད་དང༌། བཅུད་དང༌། ལམ་གྱི་རྒྱུ་དང༌། སྟོང་པ་དང༌། བདེ་བ་དང༌། ཟུང་དུ་འཇུག་པའི་རྒྱུ་དང༌། རགས་པ་དང༌། ཕྲ་བ་དང༌། ཤིན་ཏུ་ཕྲ་བའི་རྒྱུ་དང༌། གཟུགས་ཀྱི་སྐུ་གཉིས་དང༌། ཆོས་ཀྱི་སྐུའི་རྒྱུ་རྣམས་སོ། །གཞི་ནི་བཅོ་ལྔ་སྟེ། སྣོད་དག་པའི་གཞི་དང༌། བཅུད་དག་པའི་གཞི་དང༌། ཉེར་སྤྱོད་དག་པའི་གཞི་དང༌། རྣམ་པར་འགྱུར་བ་དག་པའི་གཞི་དང༌། རང་བཞིན་དག་པའི་གཞི་དང༌། འཁོར་བའི་གཞི་དང༌། མྱ་ངན་ལས་འདས་པའི་གཞི་དང༌། རང་བཞིན་གྱི་གཞི་དང༌། རྣམ་གྲངས་ཀྱི་གཞི་དང༌། མཐར་གཏུགས་པའི་གཞི་དང༌། ཀུན་རྫོབ་ཀྱི་གཞི་དང༌། དོན་དམ་པའི་གཞི་དང༌། རགས་པའི་གཞི་དང༌། ཕྲ་བའི་གཞི་དང༌། ཤིན་ཏུ་ཕྲ་བའི་གཞི་རྣམས་སོ། །དང་པོ་ལྔ་ནི་ལས་དང་བྱ་བའི་སྒོ་ནས་ཏེ། སྦྱང་བྱའི་རབ་ཏུ་དབྱེ་བའོ། །དེ་ནས་གསུམ་ནི་བཅིངས་གྲོལ་གྱི་རབ་ཏུ་དབྱེ་བའོ། །དེ་ནས་གཉིས་གཉིས་ནི་དངོས་དང་བཏགས་པ་བ་དང༌། རྫས་དང་བཏགས་པའི་རབ་ཏུ་ཕྱེ་བའོ། །ཐ་མར་གསུམ་ནི་རྟོགས་ཚུལ་གྱིས་རབ་ཏུ་ཕྱེ་བའོ། །དེ་ལ་རགས་པའི་གཞི་གང་ཞེ་ན། དགུ་པོ་འདི་དག་སྟེ། གང་ཟག་ཏུ་བཏགས་པས་ཡོད་པ་དག་ལ་བརྗོད་དེ། ཙན་དན་དང༌། ཨུཏྤལ་དང༌། པདྨ་དང༌། པདྨ་དམར་པོ་དང༌། རིན་པོ་ཆེ་ལྟ་བུ་
དང༌། ཉོན་མོངས་པས་རྣམ་པར་ཕྱེ་བ་དང༌། ལས་ཀྱི་རྣམ་པར་ཕྱེ་བ་དང༌། ལུས་ཀྱི་རྣམ་པར་ཕྱེ་བ་དང༌། རིགས་ཀྱི་རྣམ་པར་ཕྱེ་བའོ། །དང་པོ་ལྔ་ནི་མཚན་ཉིད་ཀྱིས་རབ་ཏུ་ཕྱེ་བའོ། །ཕྱི་མ་བཞི་ནི་རྣམ་གྲངས་ཀྱིས་རབ་ཏུ་ཕྱེ་བའོ། །འདིར་ཀུན་གཞི་ཞེས་བྱ་བ་ནི། སྡེ་སྣོད་ཀྱི་ཚུལ་ལས་འབྱུང་བ་ཁོ་ན་བཞིན་ནོ། །དང་པོའི་སངས་རྒྱས་ནི་གཉིས་ཏེ། རང་བཞིན་གྱི་དང་པོ་དང༌། གློ་བུར་གྱི་དང་པོའི་སངས་རྒྱས་སོ། །འདི་ལ་ཇི་ལྟར་ན་སྐྱོན་དང་ཡོན་ཏན་དང༌། རྒྱུ་དང་འབྲས་བུ་དག་དང་འབྲེལ་བར་ལྡན་ཞེ་ན། སད་་པའི་གནས་སྐབས་དང༌། རྨི་ལམ་གྱི་གནས་སྐབས་དང༌། གཉིད་སྟུག་གི་གནས་སྐབས་དང༌། བཞི་པའི་གནས་སྐབས་ཀྱི་སྒྲིབ་པ་ཞེས་བྱ་བ་གནས་ཏེ། དགའ་བ་བཞིའམ་སྣང་བ་བཞི་དང་ལྷན་ཅིག་གནས་པ་ཡིན་ནོ། །རླུང་བཞི་དང༌། ཐིག་ལེ་བཞི་དང༌། འཁོར་ལོ་བཞི་ལས་དྲི་བཅས་དང༌། ཅུང་ཟད་དྲི་བྲལ་དང༌། ཆོས་དྲི་བྲལ་ལམ། འཛག་བཅས་ཀྱི་དབང་དང༌། འཛག་མེད་ཀྱི་དབང་དང༌། ཤིན་ཏུ་འཛག་པ་དང་བྲལ་བའི་དབང་ལས་རིགས་བཞི་དང༌། རྒྱུད་བཞི་དང༌། འགྲོ་བ་བཞི་དང༌། ཡོན་ཏན་བཞི་དང༌། ཐུན་ཚོད་བཞི་དང༌། བག་ཆགས་བཞིས་རྣམ་པར་རྟོག་པ་བཞི་འབྱུང་སྟེ། ཐམས་ཅད་ཡོད་པར་རྟོག་པ་དང༌། རྡུལ་ཕྲན་དུ་རྟོག་པ་དང༌། སེམས་ཙམ་དུ་རྟོག་པ་དང༌། དེ་ཡང་མི་དམིགས་པ་སྟེ། གྲུབ་མཐའ་བཞི་དང༌། སྡེ་པ་བཞི་དང༌། སྐད་ཅིག་མ་བཞི་དང༌། དགའ་བ་བཞི་དང༌། བདེན་པ་བཞི་ལ་སྒྲོ་འདོགས་པའམ་དེ་དག་ལ་ཇི་བཞིན་དུ་
རྟོགས་པ་སྟེ། དེ་བཞིན་དུ་ཨེ་ཝཾ་མ་ཡཱ་དང༌། གནས་བཞི་དང༌། རིགས་བཞིའི་ཕྱག་རྒྱས་དྲི་མ་སྦྱོང་བའི་ཁྱད་པར་དང༌། སྐུ་བཞི་དང༌། རྡོ་རྗེ་བཞི་ལ་སོགས་པ་ཇི་ལྟར་རྒྱུད་ལས་རྒྱས་པས་འབྱུང་བ་དེ་ལྟར་ཤེས་པར་བྱའོ། །འདིར་གནས་སྐབས་གང་ཞེ་ན། ཐར་པའི་ཆ་མཐུན་མ་བསྐྱེད་པ་དང༌། བསྐྱེད་པ་དང༌། སོ་སོའི་སྐྱེ་བོའི་ལམ་དང༌། སློབ་པའི་ལམ་དང༌། མི་སློབ་པ་རྣམས་སུ་དང་པོའི་སངས་རྒྱས་དང༌། རྒྱུའི་རྒྱུད་དང༌། ལམ་དུ་ཞུགས་པ་དང༌། འཕགས་པ་དང༌། འབྲས་བུའི་རྡོ་རྗེ་འཛིན་པ་ཞེས་མིང་གིས་བཏགས་སོ། །དེ་རྣམས་སུ་འགྱུར་བ་མེད་པ་ཇི་ལྟ་བུ་ཞེ་ན། སྔ་མ་ལས་ཕྱི་མའི་ཚེ་ངོ་བོ་མི་འགྱུར་བ་སྟེ་སྐྱེ་བ་དང༌། རྒ་བ་དང༌། ན་བ་དང༌། འཆི་བ་དང༌། འགྲོ་བ་རྣམས་དང༌། རྟེན་འབྲེལ་རྣམས་དང༌། རིགས་པ་དང༌། བདེན་པ་མཐོང་བ་དང༌། རྣམ་པར་མི་རྟོག་པ་ལ་ཞུགས་པ་དང༌། རྡོ་རྗེ་ལྟ་བུའི་ཏིང་ངེ་འཛིན་གྱིས་ཀྱང་མི་འཇིག་ཅིང་མི་འགྱུར་བའོ། །ཐབས་ཀྱི་རྒྱུད་གང་ཞེ་ན། སྡོམ་ནི། དབང་བསྐུར་དམ་ཚིག་སྡོམ་པ་དང༌། །ཏིང་ངེ་འཛིན་རྒྱུད་ཀྱི་སྦྱོར་བའོ། །ལྔ་པོ་འདི་དག་ནི་ཐབས་ཀྱི་རྒྱུད་དེ། །དབང་བསྐུར་བ་དང༌། དམ་ཚིག་རྣམས་དང༌། སྡོམ་པ་དང༌། ཏིང་ངེ་འཛིན་དང༌། ལས་དང་དངོས་གྲུབ་ཀྱི་སྦྱོར་བའོ། དབང་བསྐུར་བ་གང་ཞེ་ན། བུམ་པ་དང༌། གསང་བ་དང༌། ཤེས་རབ་ཡེ་ཤེས་དང༌། བཞི་པ་དང༌། འཇིག་རྟེན་པ་དང༌། འཇིག་རྟེན་ལས་འདས་པ་དང༌། སློབ་མའི་དབང་དང༌། ཕྱིར་མི་ལྡོག་པ་དང༌། ཐ་མལ་གྱི་དབང་དང༌། མཆོག་གི་དབང་དང༌།
འཇུག་པའི་ཆོ་ག་དང༌། དངོས་གཞི་དང༌། རྗེས་སུ་གནང་བ་དང༌། ལུང་བསྟན་པ་དང༌། གཟེངས་བསྟོད་པ་དང༌། ཡོན་དབུལ་བ་དང་བཅས་པ་རྣམས་སོ། །དམ་ཚིག་གང་ཞེ་ན། ངོ་བོའི་སྒོ་ནས་བསྲུང་བའི་དམ་ཚིག་དང༌། སྒྲུབ་པའི་དམ་ཚིག་གོ །བསྲུང་བའི་དམ་ཚིག་གང་ཞེ་ན། རྩ་བའི་ལྟུང་བ་དང༌། ཡན་ལག་གི་ལྟུང་བ་ལ་སོགས་པ་བསྲུང་བ་ཉིད་དོ། །རྩ་བའི་ལྟུང་བ་གང་ཞེ་ན། བཅུ་བཞི་པོ་རྣམས་སོ། །ཡན་ལག་གི་ལྟུང་བ་གང་ཞེ་ན་བརྒྱད་དམ་དགུ་པོ་རྣམས་སོ། སློབ་དཔོན་སྨད་པར་མི་བྱ་ཞིང༌། བདེ་གཤེགས་བཀའ་ལས་འདའ་མི་བྱ། །སྤུན་ལ་སྨད་པར་མི་བྱ་ཞིང༌། །སེམས་ཅན་རྣམས་ལ་བྱམས་མི་སྤངས། །བྱང་ཆུབ་སེམས་ནི་དོར་མི་བྱ། །རང་གཞན་ཆོས་ལ་སྨད་མི་བྱ། །མ་སྨིན་པ་ལ་གསང་མི་སྒྲག །ཕུང་པོ་རྣམས་ལ་སྨད་མི་བྱ། །དག་པའི་ཆོས་ལ་སོམ་ཉི་སྤངས། །གདུག་པ་ཅན་ལ་བྱམས་པ་སྤངས། ། མིང་སོགས་བྲལ་ལ་དེར་མི་རྟོག །དད་ལྡན་སེམས་ནི་སུན་མི་དབྱུང༌། །དམ་ཚིག་སྤོང་དང་བུད་མེད་སྨོད། །རྩ་བའི་ལྟུང་བ་ཞེས་བརྗོད་དོ། །འདི་དག་མི་ཤེས་མི་རུང་བས། །སྔོན་གྱི་མཁན་པོའི་ལུང་ལས་ཤེས། །ཞེས་པ་ནི་བསྡུ་བའི་ཚིགས་སུ་བཅད་པའོ། །སྒྲིབ་པའི་དམ་ཚིག་གང་ཞེ་ན། ཏིང་ངེ་འཛིན་དང༌།
སྤྱོད་ལམ་དང༌། བཟའ་བའི་དམ་ཚིག་དང༌། མི་འབྲལ་བར་ཡོ་བྱད་ཀྱི་དམ་ཚིག་གོ །རིགས་ལྔ་པོ་རྣམས་ཀྱི་དམ་ཚིག་གང་ཡིན་པ་དེ་རྣམས་ནི་ཏིང་ངེ་འཛིན་གྱི་དམ་ཚིག་གོ ། གཞན་ཡང་དམ་ཚིག་ནི་གསུམ་སྟེ་ལས་དང་པོ་པ་དང༌། བརྟན་པ་ཐོབ་པ་དང༌། བརྟན་པ་ཆེར་ཐོབ་པའི་དམ་ཚིག་རྣམས་སོ། །ཡང་དམ་ཚིག་ནི་གསུམ་སྟེ། སྐུ་དང་གསུང་དང་ཐུགས་ཀྱི་རྡོ་རྗེའི་དམ་ཚིག་གོ། ཡང་གསུམ་སྟེ་བུམ་དབང་གི་དམ་ཚིག་དང༌། གསང་དབང་གི་དང༌། ཤེས་རབ་ཡེ་ཤེས་ཀྱི་དམ་ཚིག་གོ །གཞན་ཡང་བསྙེན་པའི་དམ་ཚིག་དང༌། འཇིག་རྟེན་པ་སོ་སོའི་སྒྲུབ་པའི་དང༌། ལས་སོ་སོའི་དང༌། འཇིག་རྟེན་ལས་འདས་པའི་སྒྲུབ་པའི་དང༌། སྒྲུབ་པ་ཆེན་པོའི་དམ་ཚིག་གོ །དེ་ལ་དམ་ཚིག་ཅེས་བྱ་བ་ནི་བརྟུལ་ཞུགས་སོ། །སྡོམ་པ་ནི། ཐོབ་པར་བྱེད་པའི་ཆོ་ག་དང༌། ཐོབ་པའི་དུས་དང༌། ངོ་བོ་དང༌། དབྱེ་བ་དང༌། གཏོང་བའི་དུས་དང༌། གསོ་བའི་ཆོ་ག་སྡེ་དྲུག་པོ་དེ་དག་གོ །སྡོམ་ནི་ཆོ་ག་དུས་དང་ངོ་བོ་དབྱེ། །གཏོང་དུས་གསོ་བའི་ཐབས་རྣམས་སོ། །དེ་ལ་སངས་རྒྱས་རྣམས་ཀྱིས་མ་བཤད་པའི་ཆོ་ག་ལས་ནི་སྡོམ་པ་མེད་དེ་བརྟུལ་ཞུགས་ཙམ་མོ། །དེའི་ཕྱིར་ཆོ་ག་ནི་རིག་པ་འཛིན་པའི་སྡེ་སྣོད་ལས་བཤད་པའི་དབང་བསྐུར་བའོ། །དུས་ནི་དབང་སོ་སོའི་དངོས་གཞི་རྫོགས་
པ་ནའོ། །ངོ་བོ་ནི་བྱིན་གྱིས་བརླབས་པའི་སེམས་ཀྱི་རྒྱུན་གྱི་ཁྱད་པར་ཉེས་པ་རྣམས་བཟློག་པར་བྱེད་པ་ཡོན་ཏན་གྱི་རྟེན་མཐུ་བརྟས་པའམ། དབྱེ་བ་ནི་ཐུན་མོང་དང༌། ཐུན་མོང་མ་ཡིན་པའི་སྡོམ་པའོ། །ཐུན་མོང་གི་སྡོམ་པ་གང་ཞེ་ན། བྱ་བ་དང་རྣལ་འབྱོར་ཕྱིའི་སྡོམ་པའོ། །ཐུན་མོང་མ་ཡིན་པ་གང་ཞེ་ན། བདེ་བས་བྱིན་གྱིས་བརླབས་པ་སྟེ། སློབ་མ་དང༌། བུམ་པ་དང༌། གསང་བ་དང༌། ཤེས་རབ་ཡེ་ཤེས་ཀྱི་སྡོམ་པ་རྣམས་སོ། །དེ་དག་ཐམས་ཅད་ཀྱང་འཇིག་རྟེན་པ་དང༌། འཇིག་རྟེན་ལས་འདས་པ་གཉིས་གཉིས་སུ་རྟོགས་པར་བྱའོ། །འཇིག་རྟེན་པ་རྣམས་ཀྱང་ཕལ་ཆེར་འདོད་པས་བསྡུས་སོ། །གཟུགས་དང་གཟུགས་མེད་པས་བསྡུས་པ་དག་ཀྱང་ཡོད་དོ། །གཏོང་བའི་དུས་ནི་རྩ་བའི་ལྟུང་བ་དག་འབྱུང་བ་དང༌། སྔགས་ཀྱི་ཐེག་པ་སྤོང་བ་དེའི་ཚེའོ། །ཆ་ཤས་ཆ་ཤས་ནི་རང་རང་གི་རྩ་བའི་དམ་ཚིག་ལས་འདས་པ་ནའོ། །གསོ་བའི་ཆོ་ག་ནི་སྡིག་པ་ཡོངས་སུ་སྦྱངས་ནས་སླར་ཡང་བླང་བ་ཡིན་ནོ། །ཏིང་ངེ་འཛིན་གང་ཞེ་ན། མཚན་མ་དང་བཅས་པ་དང་མཚན་མ་མེད་པའོ། །དེ་ཡང་བྱ་བའི་རྒྱུད་དུ་ནི། བདག་གི་དེ་ཉིད་དང༌། ལྷའི་དེ་ཉིད་དང༌། བཟླས་བརྗོད་ཀྱི་དེ་ཉིད་དང༌། བསམ་གཏན་གྱི་དེ་ཉིད་དོ། །བདག་གི་དེ་ཉིད་དང༌། བསམ་གཏན་
གྱི་དེ་ཉིད་ནི་མཚན་མ་མེད་པར་གཏོགས་སོ། །བར་པ་གཉིས་ནི་མཚན་མ་ཅན་དུ་གཏོགས་སོ། །ལྷ་དྲུག་ནི། སྟོང་དང་ཡི་གེ་སྒྲ་གཟུགས་དང༌། །ཕྱག་རྒྱ་མཚན་མ་དྲུག་ཏུ་འདོད། །བཟླས་བརྗོད་ནི་གསུམ་སྟེ། སྒྲ་དང་སེམས་དང་གཞི་ལ་གཞོལ། །གསང་སྔགས་མི་འགྱུར་གཞི་ལ་གནས། །ཡན་ལག་མ་ཉམས་གསང་སྔགས་བཟླས། །ངལ་ན་བདག་ལ་ངལ་གསོ་ཞིག །བསམ་གཏན་ནི། གསང་སྔགས་མེར་གནས་དངོས་གྲུབ་སྟེར། །སྒྲར་གནས་རྣལ་འབྱོར་སྟེར་བར་བྱེད། །སྒྲ་མཐའི་ཐར་པ་སྦྱིན་པར་བྱེད། །ཅེས་འབྱུང་ངོ༌། །སྤྲོས་པས་ཆོག་གོ །འདིར་ནི་བསྐྱེད་པའི་རིམ་པ་དང་རྫོགས་པའི་རིམ་པའོ། །དེ་གཉིས་སྒོམ་དགོས་པའི་རྒྱུ་མཚན་དང༌། སྒྲ་དོན་དང༌། གྲངས་དང༌། གོ་རིམ་ངེས་པ་ནི་སྔོན་གྱི་མཁན་པོ་དག་གིས་བཤད་པ་དང༌། གཞན་དུ་སྨྲ་བར་འདོད་དོ། །འདིར་རེ་རེ་ཡང་ངོ་བོ་དང༌། ཡན་ལག་དང༌། དབྱེ་བ་དང༌། གནས་སྐབས་དང༌། དངོས་དང་བཏགས་པའི་ཁྱད་པར་རོ། །བསྐྱེད་པའི་ངོ་བོ་གང་ཞེ་ན། རྣམ་པར་རྟོག་པས་གསར་དུ་བསྒོམ་པ་ལས་བྱུང་བའི་ལྷ་སྐུའི་རྣམ་པ་ཅན་སྲིད་པ་གསུམ་དང་ཆོས་མཐུན་དུ་བསྒོམ་པའི་ཞུ་བདེའི་ཏིང་ངེ་འཛིན་ནོ། །ཡན་ལག་གང་ཞེ་ན། མཐུན་མཚམས་སམ་མཆོད་པ་དང་བསྟོད་པ་ལ་སོགས་པ་དང༌། རྣལ་འབྱོར་བརྒྱད་ལ་
སོགས་པའོ། །ཅིའི་ཕྱིར་ཡན་ལག་ཅེས་བྱ་ཞེ་ན། རང་གི་ངོ་བོའི་སྲིད་པ་དང་འབྲས་བུའི་རྣམ་པ་ལ་ལམ་དུ་མི་བྱེད་པའི་ཕྱིར་རོ། །དབྱེ་བ་གང་ཞེ་ན། དང་པོ་སྦྱོར་བ་དང༌། དཀྱིལ་འཁོར་རྒྱལ་མཆོག་དང༌། ལས་རྒྱལ་མཆོག་དང༌། བསྙེན་པ་དང༌། ཉེར་བསྒྲུབ་དང༌། སྒྲུབ་པ་དང༌། སྒྲུབ་ཆེན་དང༌། རྣལ་འབྱོར་དང༌། རྗེས་སུ་རྣལ་འབྱོར་དང༌། ཤིན་ཏུ་རྣལ་འབྱོར་དང༌། རྣལ་འབྱོར་ཆེན་པོ་རྣམས་སོ། །གནས་སྐབས་གང་ཞེ་ན། ལས་དང་པོ་པ་དང༌། ཡེ་ཤེས་ཕེབས་པ་དང༌། ཡེ་ཤེས་ལ་དབང་བ་དང༌། ཡེ་ཤེས་ལ་ཆེས་དབང་བ་རྣམས་སོ། །དངོས་ནི་ཡན་ལག་བདུན་དང་ལྡན་པ་ཡིན་ལ་གཞན་རྣམས་ནི་བཏགས་པའོ། །བསྐྱེད་རིམ་གྱི་དཔྱད་པའི་གནས་དྲུག་གང་ཞེ་ན། སྨྲས་པ། སྦྱང་གཞི་གང་ཡིན་མཐར་ཐུག་འབྲས་བུ་གང༌། །རྫོགས་རིམ་གང་ཡིན་སྨིན་བྱེད་དགོས་པ་གང༌། །ངོ་བོ་གང་ཡིན་མཐར་ཕྱིན་ཚད་གང་ཡིན། །དཔྱད་པའི་གནས་དྲུག་ཡན་ལག་ཀུན་ལ་སྦྱར། །རྫོགས་པའི་རིམ་པ་གང་ཞེ་ན། སྡོམ་ནི། ངོ་བོ་དབྱེ་བ་སོ་སོ་ཡི། །རང་བཞིན་དང་ནི་དཔྱད་པའི་གནད། །ངོ་བོ་གང་ཞེ་ན། སེམས་དང་ཡིད་དང་རླུང་དབུ་མར་ཐིམ་པས། མངོན་དུ་གྱུར་པའི་བདེ་སྟོང་ངོ༌། །དབྱེ་བ་གང་ཞེ་ན། དངོས་དང༌། བཏགས་པ་དང། མཚན་མ་ཅན་དང༌། མཚན་
མ་མེད་པ་དང༌། ཁྱབ་བྱེད་དང༌། ཁྱབ་བྱ་རྫོགས་པའི་རིམ་པའོ། །དེ་ལ་ཐོག་མ་གཉིས་ནི་རང་བཞིན་གྱི་དབྱེ་བའོ། །ཐ་མ་གཉིས་ནི་ཐ་སྙད་ཀྱིས་ཕྱེ་བའོ། །བར་བ་གཉིས་ནི་རྣམ་པས་རབ་ཏུ་ཕྱེ་བའོ། །དེ་རྣམས་ཉིད་ཀྱི་རང་བཞིན་གང་ཞེ་ན། དེ་ཡང་ཞུ་བའི་བདེ་བ་ལྷན་སྐྱེས་ཆེན་པོ་དང༌། སྒྱུ་མའི་སྐུ་དང༌། རང་བཞིན་ལྷན་སྐྱེས་དང༌། ཟུང་འཇུག་གི་སྐུ་དང༌། རླུང་དབུ་མར་ཐིམ་པའི་མཐར་ཐོབ་པ་ཀུན་ནས་ཉོན་མོངས་པ་དང༌། རྣམ་པར་བྱང་བ་སྣང་བ་གསུམ་དང༌། དགའ་བ་གསུམ་དང༌། དེ་རྣམས་དངོས་སུ་འཐོབ་པའི་ལམ་གང་ཡིན་པ་དེ་རྣམས་རྫོགས་པའི་རིམ་པ་དངོས་ཞེས་བྱའོ། །བཏགས་པ་གང་ཞེ་ན། རྩའི་རྣལ་འབྱོར་དང༌། རླུང་དང༌། ཕྲ་མོ་དང༌། ཐིག་ལེ་དང༌། ཕྱག་རྒྱའི་རིམ་པ་རླུང་དབུ་མར་འཇུག་པ་དང༌། གནས་པ་དང༌། ཐིམ་པར་བྱེད་པའི་ལས་ཅན་རྣམས་སོ། །མཚན་མའི་རྫོགས་པའི་རིམ་པ་གང་ཞེ་ན། ངོ་བོ་ཉིད་ཀྱི་མཚན་མ་དང༌། བཏགས་པའི་མཚན་མ་ཅན་ནོ། །ངོ་བོ་ཉིད་ཀྱི་མཚན་མ་གང་ཞེ་ན། སྣང་བ་གསུམ་སེམས་དང་སེམས་ལས་བྱུང་བའི་མཚན་ཉིད་ཅན་འོད་གསལ་བར་གནས་ཡོངས་སུ་མ་གྱུར་པ་སྟེ་སོ་སོའི་སྐྱེ་བོ་ཐམས་ཅད་དང་གཞན་ལ་ཡང་ཡོད་དོ། །བཏགས་པའི་མཚན་མ་གང་ཞེ་ན། སྒྲ་དོན་ཅན་གྱི་རྟོག་པ་དང་མཚུངས་པར་ལྡན་པ་
གང་ཡིན་པ་སྟེ། དོན་གྱི་འོད་གསལ་མ་ཐོབ་པའི་བར་དག་ཏུ་ཅི་རིགས་པར་ཡོད་དོ། །མཚན་མ་མེད་པ་གང་ཞེ་ན། ངོ་བོ་ཉིད་ཀྱི་མཚན་མ་མེད་པ་དང༌། བཏགས་པའི་མཚན་མ་མེད་པ་སྟེ། དང་པོ་ནི་འཕགས་པ་ཁོ་ན་ལ་ཡོད་དོ། །ཕྱི་མ་ནི་སོ་སོའི་སྐྱེ་བོ་ལ་ཡང་ཡོད་དོ། །ཁྱབ་བྱེད་རྫོགས་པའི་རིམ་པ་གང་ཞེ་ན། སོ་སོར་སྡུད་པ་དང༌། བསམ་གཏན་དང༌། སྲོག་རྩོལ་དང༌། འཛིན་པ་དང༌། རྗེས་སུ་དྲན་པ་དང༌། ཏིང་ངེ་འཛིན་དང༌། དགའ་བ་བཞི་དང༌། སྣང་བ་དང༌། སྣང་བ་མཆེད་པ་དང༌། སྣང་བ་ཉེ་བར་ཐོབ་པ་དང༌། འོད་གསལ་བ་དང་སྣང་ཕྱོགས་དང༌། སྟོང་ཕྱོགས་དང༌། བདེ་བའི་ཕྱོགས་དང༌། ཕྱོགས་དང་བྲལ་བ་རྣམས་སོ། །དེ་ལ་དང་པོ་དྲུག་ནི་ཡན་ལག་གི་རབ་ཏུ་ཕྱེ་བ་དང༌། དེ་ནས་བརྒྱད་ནི་ངོ་བོ་ཉིད་དང༌། དེ་ནས་གསུམ་ནི་རྣམ་པ་དང༌། ཐ་མ་ནི་རང་བཞིན་གྱིས་རབ་ཏུ་ཕྱེ་བའམ། ཡང་ན་བཞི་གའང་རྣམ་པས་རབ་ཏུ་ཕྱེ་བའོ། ཅིའི་ཕྱིར་ཁྱབ་བྱེད་ཅེས་བྱ་ཞེ་ན། གང་རྫོགས་པའི་རིམ་པ་དེ་ཐམས་ཅད་ལ་ཁྱབ་པའི་ཕྱིར་རོ། ཁྱབ་བྱ་གང་ཞེ་ན། ལུས་རྣམ་པར་དབེན་པ་དང༌། ངག་དབེན་པ་དང༌། སེམས་དབེན་པ་དང༌། བདག་བྱིན་རླབས་པ་དང༌། འོད་གསལ་བ་དང༌། ཟུང་འཇུག་དང༌། རྫོགས་པའི་
རིམ་པའི་སྤྱོད་པའི་ཏིང་ངེ་འཛིན་དང༌། བདག་བྱིན་རླབས་པ་དང༌། སྣ་ཚོགས་རྡོ་རྗེ་དང༌། ནོར་བུ་འགེངས་པ་དང༌། ཛ་ལནྡྷ་ར་དང༌། བསམ་མི་ཁྱབ་དང༌། རང་བྱིན་གྱིས་བརླབ་པ་དང༌། དཀྱིལ་འཁོར་འཁོར་ལོ་དང༌། རྒྱུད་ཀྱི་རིམ་པ་དང༌། སྔགས་དང་ཡེ་ཤེས་དང༌། གསང་བའི་རིམ་པ་དང༌། སོ་སོར་སྡུད་པ་ལ་སོགས་པ་ཡང་འགའ་ཞིག་ཏུ་ཡོད་དེ། གཞན་ཡང་སྔགས་དང༌། དབྱིབས་དང༌། ཆོས་དང༌། རྩ་དང༌། རླུང་དང༌། ཐིག་ལེ་དང༌། མེ་དང༌། ལས་ཀྱི་ཕྱག་རྒྱ་དང༌། ཡེ་ཤེས་དང༌། དམ་ཚིག་དང༌། ཕྱག་རྒྱ་ཆེན་པོ་དང༌། སྙིང་གའི་ཐིག་ལེ་དང༌། ནོར་བུ་དང༌། སྤྲུལ་པ་དང༌། མི་ཤིགས་པའི་རྣལ་འབྱོར་དང༌། དེ་དག་ལ་སོགས་པ་དཔག་ཏུ་མེད་པ་དག་གོ །དཔྱད་པའི་གནད་རྣམས་གང་ཞེ་ན། སྨྲས་པ། ངོ་བོ་གང་ཡིན་གང་ལ་གནད་དུ་བསྣུན། །ཇི་ལྟར་གནད་བསྣུན་དེ་ཡི་ཉམས་རྟགས་གང༌། །ཡོན་ཏན་གང་བསྐྱེད་དེ་ཡི་རྒྱུ་མཚན་གང༌། །དངོས་བརྒྱུད་སྤངས་བྱ་གང་སྤོང་མཐར་ཕྱིན་ཚད། །ས་དང་ལམ་གྱི་མཚམས་གང་གེགས་སེལ་དང༌། །བོགས་འདོན་ཅི་ཞིག་གཙོ་འཁོར་ཁྱད་གང་ཡིན། །དཔྱད་པའི་གནས་བཅུ་གཅིག་གི་སྒོ་ནས་དཔྱད། །རྫོགས་རིམ་རིམ་པ་ཀུན་གྱི་གནད་ཤེས་འགྱུར། །གང་ལ་གནད་དུ་བསྣུན་པ་ལུས་ཀྱི་རྣམ་པར་
བཞག་པ་གང་ཞེ་ན། ལུས་ཆགས་པ་དང༌། གནས་པ་དང༌། འཇིག་པའི་ཚུལ་ལོ། །བརྗོད་པ། བ་སྤུའི་བུ་གའི་གྲངས་ཉིད་ཀྱི། །རྩ་ནི་བྱེ་བ་ཕྱེད་དང་བཞི། །དེ་ལས་སྟོང་ཕྲག་བདུན་ཅུ་གཉིས། །དེ་ལས་བརྒྱད་ཅུ་གཉིས་ལྷག་བརྒྱ། །དེ་བཞིན་བརྒྱ་དང་ཉི་ཤུ་དང༌། །སུམ་ཅུ་གཉིས་དང་རྩ་གསུམ་མོ། །བསྐྱེད་དང་བསྡུད་པ་ཐམས་ཅད་ཀྱི། །གནས་ནི་སྙིང་ག་ཡིན་པའི་ཕྱིར། །གྲུབ་པ་རྣམས་དང་མཁས་རྣམས་ཀྱི། །སྙིང་ག་ཁོ་ན་བསྔགས་པ་ཡིན། ཁམས་ཀྱང་སོ་གཉིས་བཅུ་དྲུག་དང༌། །ཁུ་ཁྲག་འཁོར་ལོ་གནས་ཚུལ་དང༌། དཀར་དམར་འཕེལ་འགྲིབ་འཕོ་བའི་འགྲོས། །རླུང་ཡང་ཉི་ཁྲི་ཆིག་སྟོང་དང༌། དྲུག་བརྒྱ་བརྒྱད་ལྷག་བརྒྱ་དག་ལས། །བཅུ་ནི་རྣམ་པར་ཤེས་པར་བྱ། །རེ་རེ་ཡང་ནི་གནས་དང་གྲངས། །རྒྱུ་ཚུལ་ཁ་དོག་མགོན་པོ་དང༌། །ལྷ་མོ་རྣམས་ཀྱི་དབྱེ་བ་དང༌། །འཇུག་གནས་འབྱུང་དང་འཕོ་ཚུལ་ལོ། །ཕུང་ཁམས་དབང་ཡུལ་ཡེ་ཤེས་ལྔ༌། །ཉེར་ལྔ་ཕྲ་དང་རགས་པའི་ཚུལ། །སེམས་དེའི་བཞོན་པར་གྱུར་པ་ནི། །རླུང་ཡང་ཕྲ་རགས་རྣམ་གསུམ་མོ། །ཇི་ལྟར་གནད་དུ་བསྣུན་ཞེ་ན། །ཡུལ་གྱི་གནད་དང༌། དུས་དང། ལུས་དང༌། རླུང་དང༌། དམིགས་པའི་གནད་དོ། །དམིགས་པའི་གནད་ཀྱང༌། གང་ལ་སེམས་འཇོག་པ་དང༌། རླུང་སྡུད་ཚུལ་
དང༌། དམིགས་པ་དང་རྣམ་པའི་ཁྱད་པར་ཏེ། བཞི་པོ་དེ་དག་གིས་ཡོན་ཏན་མངོན་དུ་བྱེད་ཅིང༌། དྲི་མ་རྣམས་སྦྱོང་བར་བྱེད་དོ། །ས་དང་ལམ་གྱི་མཚམས་གང་ཞེ་ན། ལམ་ནི་ལྔ་སྟེ། ཚོགས་དང༌། སྦྱོར་བ་དང༌། མཐོང་བ་དང༌། སྒོམ་པ་དང༌། མི་སློབ་པའི་ལམ་མོ། །ཡེ་ཤེས་ཕེབས་པ་ནི་ཚོགས་ལམ་ཆུང་ངུ་སྟེ་དྲན་པ་ཉེ་བར་བཞག་པའོ། །ཡེ་ཤེས་ལ་ཆེས་དབང་བ་ནི་ཡང་དག་སྤོང་བ་སྟེ་ཚོགས་ཀྱི་ལམ་འབྲིང་པོའོ། །དེ་ཉིད་སྤྱོད་པས་མཐར་ཕྱིན་ཅིང་ལྟ་སྟངས་རྣམས་ཐོགས་པ་མེད་པ་དང༌། སངས་རྒྱས་རྣམས་མངོན་དུ་འགྱུར་པ་དང༌། སྐྱེ་བ་གཅིག་གིས་ཐོགས་པ་འདི་ནི་རྫུ་འཕྲུལ་གྱི་རྐང་པ་ཅན། ཚོགས་ལམ་ཆེན་པོའོ། །རྫོགས་རིམ་དངོས་ཀྱི་སེམས་དབེན་པ་ཐོབ་པ་ཞུ་བའི་བདེ་བ་མཐར་ཐུག་པ་དབང་པོ་ལྔའི་རང་བཞིན་དྲོད་དང་རྩེ་མོ་ཞེས་བྱ་ལ། ཡེ་ཤེས་ཀྱི་སྐུ་ནི་ནམ་མཁའ་མཛོད་ཐོབ་པ་སྟོབས་ལྔ་དང་ལྡན་པ་བཟོད་པ་དང་ཆོས་མཆོག་གོ །འདིར་རྩ་དང༌། རླུང་དང༌། ཐིག་ལེ་ཐིམ་པའི་ཡེ་ཤེས་ཡོན་ཏན་གྱི་གཞིར་གྱུར་པ་གོང་མའི་ལམ་དང་མཐུན་པ་བཅུ་གཉིས་སོ། ། དེའི་ཚེ་ཡེ་ཤེས་ཀྱི་སྐུ་ལ་སངས་རྒྱས་ཞེས་བཏགས་སོ། །དེ་ལས་གཞན་པའི་མོས་སྤྱོད་ཀྱི་ས་བཅུ་ཡང་ཡོད་དོ། །འཕགས་པའི་ས་བཅུ་དང༌། མོས་སྤྱོད་ཀྱི་ས་དང༌། སངས་རྒྱས་ཀྱི་ས་སྟེ་བཅུ་
གཉིས་ནི། ལམ་འདིའི་སའོ་ཅོག་ས་བཅུ་གཉིས་སུ་སྡུད་པ་རྒྱུད་ལས་འབྱུང་ཞིང་མཁན་པོ་རྣམས་ཀྱིས་ཀྱང་བཤད་དོ། །དོན་དམ་པའི་སོ་སོ་རང་གི་རིག་པ་ཐམས་ཅད་སྟོང་པ་འོད་གསལ་བ་ནི་དང་པོར་བྱང་ཆུབ་ཡན་ལག་མཐོང་བའི་ལམ་མོ། །འདི་ལ་དགའ་བའི་རང་བཞིན་བདེན་པ་བཅུ་དྲུག་དག་གོ །སློབ་པའི་ཟུང་འཇུག་རྣམ་པ་དགུ་ནི་ས་ལྷག་མ་དགུའོ། །ས་བཅུ་ཙམ་དང༌། རྒྱུན་མཐའི་ཡེ་ཤེས་དག་ལས་རྣམ་གྲོལ་ལམ་དང༌། ཁྱད་པར་ལམ་ནི་ས་བཅུ་གཉིས་སམ་བཅུ་གསུམ་སྟེ། ཡན་ལག་བདུན་དང་ལྡན་པའི་ཡེ་ཤེས་གོང་མའི་གཞིར་གྱུར་པའོ། །འདི་དག་ནི་སྒོམ་པའི་ལམ་འཕགས་ལམ་ཡན་ལག་བརྒྱད་དོ། །མི་སློབ་པའི་ཟུང་འཇུག་ནི་མཐར་ཕྱིན་པའོ། །མན་ངག་ལས་ནི་ཐོག་མར་རྫོགས་པའི་རིམ་པ་དང༌། གཞན་ཡང་སྣ་ཚོགས་པར་འཆད་དོ། །དེ་དག་ལ་ནི་རིམ་པ་མི་འདྲ་བ་དག་འབྱུང་སྟེ། གལ་ཏེ་སྦྱོར་བའི་ལམ་དུ་ཞུགས་ན་ནི་བྱེ་བྲག་མེད་པ་ཁོ་ནའོ། །མོས་པས་སྤྱོད་པ་དང༌། ལྷག་པའི་བསམ་པ་དག་པ་ལ་སྤྱོད་པ། མཚན་མ་ལ་སྤྱོད་པ་དྲུག་དང༌། མཚན་མ་མེད་པ་ལ་སྤྱོད་པ་བདུན་དང༌། མངོན་པར་འདུ་བྱེད་པ་མེད་པར་སྤྱོད་པ་གསུམ་ལ་སོགས་པ་དང༌། ཕ་རོལ་ཏུ་ཕྱིན་པ་བཅུ་ལ་སྤྱོད་པ་དང༌། ཡོན་ཏན་བརྒྱ་ཕྲག་བཅུ་ལ་སོགས་པ་ནི་ཐམས་ཅད་དུ་མདོའི་སྡེ་བཞིན་ཏེ། འོན་
ཀྱང་འདིར་ནི་ཚེ་གཞན་དུ་མ་གྱུར་པ་ཁོ་ན་ཡིན་གྱི་སྐྱེ་བ་གཅིག་གིས་ཐོགས་པའང་མ་ཡིན་ན། བསྐལ་པ་མང་པོ་ནི་ལྟ་སྨོས་ཀྱང་ཅི་དགོས། དེའི་ཕྱིར་དུས་མྱུར་བ་ཁོ་ནས་རྡོ་རྗེ་སེམས་དཔས་ཡང་དང་ཡང་དུ་མ་བསྟན་ནོ། །གཞན་དག་ནི་རང་རང་གི་མན་ངག་ཉིད་དུ་རྣམ་པར་བཞག་གི་འདིར་མི་བརྗོད་དོ། །འདིར་སྨྲས་པ། གྲངས་ངེས་མཚན་ཉིད་གོ་རིམ་ངེས་པ་དང༌། །ངེས་ཚིག་ཡོན་ཏན་སྦྱངས་བྱ་འབྲས་བུ་དང༌། །རྟེན་དང་ཤེས་བྱ་སྤང་བྱ་ཉམས་ལེན་ཚད། །དབྱེ་བསྡུ་འདི་རྣམས་རིམ་པ་ཀུན་ལ་སྦྱར། །ཕུང་ཁམས་ཁམས་གསུམ་འདུས་བྱས་རྫས་ཡོད་དང༌། །ཀུན་རྫོབ་ཡོད་དང་ལུས་སེམས་རྟེན་གྱི་ཁྱད། །བླཽ་རིགས་རྟེན་འབྲེལ་ཟག་མེད་རབ་དབྱེ་བཅུ། །རིམ་པ་གཉིས་ཀྱི་ཁྱད་པར་གཞན་ཡང་ནི། །བཏགས་པ་དང་ནི་མངོན་སུམ་གྱུར་པའི་ལྷ། །རགས་དང་ཕྲ་བའི་སྔགས་དང་རིག་འཛིན་གཉིས། །ལས་དང་དངོས་གྲུབ་སྒྲུབ་པའི་ཁྱད་པར་དང༌། །སྔགས་དང་ཡེ་ཤེས་སྐུ་ཞེས་རྣམ་པར་ཕྱེ། །ཐ་མལ་བག་ཆགས་དངོས་སུ་གནོན་དང་འཇོམས། །རྟོག་པའི་སྲིད་དང་སྣང་བའི་སྲིད་འཇོམས་དང༌། །ལས་དང་ཡེ་ཤེས་སྒྲིབ་སེལ་རྣམ་ཤེས་དང༌། །ཡེ་ཤེས་ཀྱིས་རབ་ཕྱེ་དང་དངོས་གྲུབ་གཉིས། །ཞེས་པ་ནི་བར་སྐབས་ཀྱི་ཚིགས་སུ་བཅད་པའོ། །རྒྱུད་ཀྱི་སྦྱོར་པ་གང་ཞེ་ན། ལས་ཀྱི་རྒྱུད་དང༌། དངོས་གྲུབ་ཀྱི་རྒྱུད་དོ། །དེ་ལ་
ལས་ཀྱི་རྒྱུད་གང་ཞེ་ན། ཁྱད་པར་བཅུའམ། བརྒྱད་དེ། ཕྱོགས་དུས་ལྷ་དང་ཆ་བྱད་བསམ་པ་དང༌། །གནས་དང་ཡུལ་དང་ཟས་དང་ཆོ་ག་སྔགས། དེ་ཡང་བཞི་སྟེ། བསམ་གཏན་གྱི་ལས་དང༌། སྦྱིན་སྲེག་གི་ལས་དང༌། འཁྲུལ་འཁོར་གྱི་ལས་དང༌། སྦྱོར་བའི་ལས་ཕལ་པའོ། །དེ་ཁོ་ན་ལྟར་དངོས་གྲུབ་ཀྱི་རྒྱུད་དེ། འོན་ཀྱང་དམ་ཚིག་གི་ཁྱད་པར་དང༌། ཐུན་མོང་མ་ཡིན་པའི་རྫས་ནི་ལྷག་པའོ། །ལས་ནི་ལས་ཆེན་བཅུ་གཉིས་ལ་སོགས་པའོ། །དངོས་གྲུབ་ཀྱི་རྒྱུད་ནི་གཉིས་ཏེ། །ཐུན་མོང་དང་མཆོག་གི་དངོས་གྲུབ་བོ། །ཐུན་མོང་གི་དངོས་གྲུབ་གང་ཞེ་ན། རྫས་ཀྱི་རིག་པ་འཛིན་པ་དང༌། ལུས་དང༌། ལོངས་སྤྱོད་དང༌། འདོད་པ་དང༌། གཟུགས་ཀྱི་རིག་པ་འཛིན་པ་དང༌། གཟུགས་མེད་པར་འགྲོ་བའོ། །དང་བ་དང༌། མཁའ་ལྡིང་དང༌། ཁྱུ་མཆོག་སོགས་བཞོན་པ་དང༌། རིན་པོ་ཆེ་སྣ་བདུན་དང༌། རྡོ་རྗེ་དང༌། འཁོར་ལོ། པདྨ་ལ་སོགས་པ་དང༌། འཇིག་རྟེན་པ་རྣམས་ཀྱི་མཚོན་ཆ་དང༌། ཡི་གེ་དང༌། མིང་གི་སྔགས་ཀྱི་རིག་པ་འཛིན་པ་ལ་སོགས་པ་དང༌། ལྷ་དང༌། ཀླུ་དང༌། གནོད་སྦྱིན་དང༌། སྲིན་པོ་ལ་སོགས་པ་བསྒྲུབས་པས་གཞན་ལ་བརྟེན་པའི་དངོས་གྲུབ་མཐའ་ཡས་པ་ཡོད་དོ། །འདི་ལས་ཆེ་ལོང་ཙམ་བསྡུས་པ་ནི། ཆུང་ངུ་ནི་བརྒྱད་དེ་
རིལ་བུ་མིག་སྨན་དངོས་གྲུབ་དང༌། ས་འོག་རལ་གྲི་དངོས་གྲུབ་དང༌། མཁའ་ལ་འཕུར་དང་མི་སྣང་དང༌། །ཤི་བ་མེད་དང་ནད་འཇོམས་སོ། །འབྲིང་ནི་འདོད་པའི་རིག་པ་འཛིན་པ་ཕལ་པའོ། །ཆེན་པོ་ནི་ཚེ་དང༌། ལོངས་སྤྱོད་ལ་སོགས་པ་བསྐལ་པ་དྲུག་པ་དཔག་ཏུ་མེད་པ་འདོད་པ་དང༌། གཟུགས་ཀྱི་རིག་པ་འཛིན་པའོ། །དངོས་གྲུབ་གཉིས་ཀར་སྤྱོད་པ་བསྒྲུབ་པ་ཡིན་ཏེ། ཐུན་མོང་དང་མཆོག་གི་བསྙེན་པ་ལ་ཞི་གནས་དང༌། ལྷག་མཐོང་གྲུབ་པ་ནའོ། །དེ་ལ་སྤྱོད་པ་གང་ཞེ་ན། གང་ཟག་དང༌། འབྲས་བུ་དང༌། དུས་དང༌། ངོ་བོ་དང༌། ངེས་ཚིག་དང༌། དབྱེ་བ་དང༌། ཆོ་གའོ། །དེ་ལ་དབྱེ་བ་གང་ཞེ་ན། སྤྲོས་བཅས་དང༌། སྤྲོས་མེད་དང༌། ཤིན་ཏུ་སྤྲོས་མེད་དང༌། ཡང་ན་གཉིས་སྤངས་དང༌། ཀུན་བཟང་དང༌། ཕྱོགས་ལས་རྣམ་པར་རྒྱལ་བ་དང༌། ཡང་ན་འདོད་འཇུག་དང༌། རྟེན་སློབ་དང༌། རིག་པ་བརྟུལ་ཞུགས་དང༌། ཡང་ན་རེས་འཇོག་དང༌། མཉམ་པོར་སྤྱོད་པ་དང༌། མཉམ་བཞག་དང༌། རྗེས་ཐོབ་དང༌། ཆགས་བྲལ་དང༌། ཆགས་ཅན་དང༌། འདོད་ཆགས་ཆེན་པོའོ། །དེ་ཡང་སྒོམ་བསམ་དང༌། དུས་དང༌། བྱ་བ་དང༌། ངོ་བོའི་སྒོ་ནས་སྤྱོད་པ་གསུམ་དུ་བཞག་གོ །སྨྲས་པ། གནས་དང་ཕྱག་རྒྱའི་གྲངས་དབྱེ་བ། མཚན་ཉིད་ཆ་ལུགས་ཁྱད་པར་རོ། །
ཆོ་ག་དང༌། ངོ་བོ་དང༌། སྤྱོད་ཚུལ་དང༌། དབང་པོ་སྦྱངས་མ་སྦྱངས་དང༌། གནས་སྐབས་དང༌། རང་བཞིན་གྱི་སྒོ་ནས་དེ་རྣམས་སུ་དབྱེའོ། །འདི་དག་ནི་བརྗོད་པར་བྱ་བ་མང་ངོ༌། །མཆོག་གི་དངོས་གྲུབ་གང་ཞེ་ན། འབྲས་བུའི་རྒྱུད་དོ། །སྡོམ་ནི། ཁྱད་པར་ངོ་བོ་དཔེ་རྣམས་དང༌། །དེ་ཡི་རིག་འཛིན་གྱི་ཁྱད་དང༌། །རིག་འཛིན་ཟུང་འཇུག་ཡོན་ཏན་དང༌། །སྐུ་དང་ཡེ་ཤེས་ཉེ་རྒྱུའི་ཚུལ། །འབྲས་བུའི་རྒྱུད་གང་ཞེ་ན། དངོས་དང་བཏགས་པའོ། །དངོས་ནི་རྡོ་རྗེ་འཆང་ཆེན་པོའོ། །བཏགས་པ་ནི་སྒྱུ་མའི་སྐུ་དང༌། ཟུང་འཇུག་གི་སེམས་ཅན་ནོ། །འདི་གཉིས་དྲི་མ་ཅན་དང༌། དྲི་མ་མེད་པའི་ཡེ་ཤེས་ཀྱི་སྐུ་སྟེ། རིག་པ་འཛིན་པ་དང༌། འཇའ་ལུས་ཞེས་བརྗོད་ཀྱི་ཁམས་གསུམ་པ་མ་ཡིན་ནོ། །རྡོ་རྗེ་སྐུའི་དཔེ་བཅུ་གཉིས་གང་ཞེ་ན། སྒྱུ་མ་ཆུ་ཟླ་མིག་ཡོར་སྨིག་སྒྱུ་དང༌། །རྨི་ལམ་བྲག་ཆ་མིག་འཕྲུལ་དྲི་ཟའི་གྲོང༌། །འཇའ་ཚོན་གློག་དང་ཆུ་བུར་མེ་ལོང་གཟུགས། །རིག་པ་འཛིན་པ་གང་ཞེ་ན། འདི་ནི་ཁྱད་པར་བདུན་དང་ལྡན་ཏེ། ཏིང་ངེ་འཛིན་ལ་གནས་པ་དང༌། མངོན་ཤེས་ལྔ་དང་ལྡན་པ་དང༌། ཞིང་སྣ་ཚོགས་སུ་འགྲོ་བའི་དོན་སྤྱོད་པ་དང༌། འདོད་ཅིང་འཆུམས་པ་མེད་པ་དང༌། འདོད་པ་མཐའ་ཡས་པ་ལ་བདེ་བ་ཆེན་པོར་སྤྱོད་པ་དང༌། ཚེ་ཚད་ལས་བརྒལ་བ་དང༌། ཡིད་
ཀྱི་ལུས་སོ། །འདིར་རིག་པ་འཛིན་པ་དང༌། ཡེ་ཤེས་ཀྱི་སྐུ་ལ་ཁྱད་པར་ཅི། ཕུང་པོའི་ཟ་མ་ཏོག་མ་ཉམས་པ་ནི་ཡེ་ཤེས་ཀྱི་སྐུ་ཙམ་མོ། །ལས་སམ་ཏིང་ངེ་འཛིན་གྱིས་ཉམས་པ་དེའི་ཚེ་རིག་པ་འཛིན་པའི་ཡེ་ཤེས་ཀྱི་སྐུ་ཞེས་བྱའོ། །རིག་པ་འཛིན་པ་ཐམས་ཅད་ཀྱང༌། ཡོན་ཏན་བརྒྱད་ཚན་གཉིས་ཏེ་བཅུ་དྲུག་དང་ལྡན་པའོ། །ཟུང་འཇུག་གི་ཡོན་ཏན་གང་ཞེ་ན། རོ་མྱང་བརྒྱད་དང༌། དབང་ཕྱུག་བརྒྱད་དང༌། ཁ་སྦྱོར་བདུན་དང༌། ཡོན་ཏན་བརྒྱད་ཅེས་བྱ་བ་སྟེ། །རྟག་པ་དང་ནི་མི་གདུང་དང༌། །བསིལ་བ་དང་ནི་གཅིག་པ་དང༌། །བདེ་བ་དང་ནི་དྲི་མེད་དང༌། །དགའ་བ་དང་ནི་ཡིད་དང་བ། །སྐུ་ཡི་དབང་ཕྱུག་དང་ནི་གསུང་གི་དབང་ཕྱུག་དང༌། །དེ་བཞིན་དུ་ནི་ཐུགས་ཀྱི་དབང་ཕྱུག་དང༌། །རྫུ་འཕྲུལ་ཀུན་འགྲོ་གནས་ཀྱི་དབང་ཕྱུག་དང༌། །ཅི་འདོད་བྱེད་དང་ཡོན་ཏན་བརྒྱད་པའོ། །ལོངས་སྤྱོད་རྫོགས་དང་ཁ་སྦྱོར་བདེ་ཆེན་རང་བཞིན་མེད། །སྙིང་རྗེས་ཡོངས་གང་རྒྱུན་མི་འཆད་དང་འགོག་པ་མེད། །གཟུགས་ཕྲ་རེག་པ་ཡང་བ་དང༌། །ཁྱབ་པ་ཡང་དག་ཐོབ་པ་ཉིད། །རབ་ཏུ་གསལ་བ་ཉིད་བསྟན་པ། །དབང་ཕྱུག་ཉིད་དང་འདོད་དགུར་བསྒྱུར། །གཞན་ཡང་བྱང་ཆུབ་ཀྱི་ཕྱོགས་དང་ཚད་མེད་དང༌། དབང་བཅུ་དང༌། སྟོབས་བཅུ་དང༌། ཤེས་པ་བཅུ་དང༌། མ་འདྲེས་པ་བཅོ་བརྒྱད་དང༌། མི་འཇིགས་པ་དང༌། ཉོན་མོངས་པ་མེད་པ་དང༌།
སྨོན་ནས་མཁྱེན་པ་དང༌། ཐུགས་རྗེ་ཆེན་པོ་དང༌། ཟད་པར་དང༌། ཟིལ་གནོན་དང༌། རྣམ་ཐར་ལ་སོགས་པའང་བཤད་པར་བྱ་མོད་ཀྱི། དེ་དག་ནི་སྡེ་སྣོད་གསུམ་གྱི་ཚུལ་ལས་འབྱུང་བ་ལྟར་རོ། །སྡེ་སྣོད་འདིར་ཡང་མཚན་ཡང་དག་པ་ལ་སོགས་པར་བཤད་དོ། །སྐུ་གང་ཞེ་ན། ཆོས་དང༌། ལོངས་སྤྱོད་དང༌། སྤྲུལ་པ་དང༌། བདེ་བ་ཆེན་པོ་དང༌། སྐུ་བཅུ་དྲུག་ལ་སོགས་པ་དང༌། རྡོ་རྗེ་རྣམ་པ་བཞི་ཡོངས་སུ་མངོན་དུ་གྱུར་པ་ཡིན་ནོ། །ཆོས་ཀྱི་སྐུ་གང་ཞེ་ན། དེ་བཞིན་ཉིད་ཀྱི་རང་བཞིན་ནོ། །ལོངས་སྤྱོད་རྫོགས་པའི་སྐུ་གང་ཞེ་ན། ཁ་སྦྱོར་གྱི་ཡན་ལག་བདུན་མཐར་ཐུག་པ་གཅིག་ཏུ་གྱུར་པ་ཆོས་ཐམས་ཅད་ལ་རྫོགས་པར་སྤྱོད་པའོ། །དེ་ཡང་བརྡ་དང་དོན་ནོ། །བརྡ་ནི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་མངོན་སུམ་དུ་གྱུར་པའོ། །དོན་ནི་སངས་རྒྱས་རྣམས་ཀྱི་ཡེ་ཤེས་ཁོ་ན་ཏེ། སེམས་ཅན་ལ་སྣང་བ་ནི་མེད་དོ། །སྤྲུལ་པའི་སྐུ་གང་ཞེ་ན། བརྡ་དང་དོན་ནོ། །བརྡ་ནི་སོ་སོའི་སྐྱེ་བོ་འགའ་ཞིག་ལ་ཡང་མངོན་སུམ་དུ་སྣང་བའོ། །དོན་ནི་བཅོམ་ལྡན་འདས་ཀྱི་བྱ་བ་བསྒྲུབས་པའི་ཡེ་ཤེས་ཐུགས་རྗེ་ཆེན་པོའོ། །ལྷན་ཅིག་སྐྱེས་པའི་སྐུ་གང་ཞེ་ན། སེམས་ཅན་གྱི་རང་བཞིན་བདེ་བ་ཆེན་པོ་དང༌། རོ་མྱང་བརྒྱད་དང་ལྡན་པ་དོན་དམ་པར་
སྤྲོས་པ་དང་བྲལ་བ་གང་ཡིན་པ་སྟེ། འདི་ཡང་ཆོས་ཀྱི་སྐུ་ཞེས་བྱའོ། །དབང་ཕྱུག་བརྒྱད་ནི་སྐུ་བཞི་ཀ་ཡང་བསྡུས་པར་རིག་པར་བྱའོ། །སྐུ་བཅུ་དྲུག་གང་ཞེ་ན། བཞི་པོ་དེ་དག་ཐུགས་དང༌། གསུང་དང༌། སྐུ་དང༌། ཡེ་ཤེས་ཀྱིས་ཕྱེ་བས་བཅུ་དྲུག་སྟེ། རླུང་དང་རྡུལ་དང་ཁུ་བ་དང་རྣམ་པར་ཤེས་པ་དག་པ་དང༌། སྡུག་བསྔལ་དང་ཀུན་འབྱུང་གི་གདུང་བ་མེད་པ་དང༌། རྡོ་རྗེ་སྙིང་རྗེས་སེམས་ཅན་སྒྲོལ་བ་དང༌། བདེ་བ་ཆེན་པོ་ཟུང་འཇུག་གི་རང་བཞིན་ནོ། །དེ་ཡང་ཡང་ན་གཉིས་སུ་མེད་པ་དང༌། གཡོ་བ་མེད་པ་དང༌། རིས་མེད་པ་དང༌། འདོད་པ་དང༌། མཆོག་ཏུ་མི་འགྱུར་བ་དང༌། འདོད་ཆགས་ཆེན་པོ་དང༌། དངོས་པོ་དང་དངོས་མེད་ཟད་པ་དང༌། ཡེ་ཤེས་དང༌། སེམས་པ་དང༌། ཀུན་ཏུ་བཟང་པོ་དང༌། ཉོན་མོངས་མེད་པ་དང༌། ཉོན་མོངས་ཆེན་པོ་དང༌། ལྷན་ཅིག་སྐྱེས་པ་དང༌། བྱང་ཆུབ་ཀྱི་སེམས་འཛིན་པ་དང༌། དུས་ཀྱི་འཁོར་ལོ་རྡོ་རྗེ་དང༌། ཐབས་ཤེས་ཀྱི་རྣལ་འབྱོར་རོ། །ཡང་ན་མཉམ་པ་ཉིད་དང༌། ཡིད་ཀྱི་གཟུགས་གཉིས་སྣང་སྤངས་པ་དང༌། ལྷུན་གྱིས་གྲུབ་པའི་ཕྲིན་ལས་དང༌། བག་ཆགས་སྤངས་པ་ཞེས་པ་ནི་སྐུ་བཞིའི་དོན་ནོ། །འདིར་ཚིགས་སུ་བཅད་པ་ཡང་བཤད་པ། སྤྲུལ་པ་ཡི་ནི་སྐུ་གསུང་ཐུགས། །ཡེ་ཤེས་གཅིག་སྦྱོར་སྡོམ་པ་དང༌། །ལོངས་སྤྱོད་རྫོགས་པའི་སྐུ་གསུང་ཐུགས། །
ཡེ་ཤེས་གཅིག་སྦྱོར་སྡོམ་པ་དང༌། །དཔལ་ལྡན་ཆོས་ཀྱི་སྐུ་གསུང་ཐུགས། །ཡེ་ཤེས་གཅིག་སྦྱོར་སྡོམ་པ་དང༌། །ལྷན་ཅིག་སྐྱེས་པའི་སྐུ་གསུང་ཐུགས། །ཡེ་ཤེས་གཅིག་སྦྱོར་སྡོམ་པ་ནི། །སད་རྨི་གཉིད་སྡུག་བཞི་པ་ཡི། །དབང་པོ་གཉིས་སྐྱེས་བདེ་མིན་ཞིང༌། ། ཞེས་འབྱུང་བའོ། །ཡེ་ཤེས་གང་ཞེ་ན། ལྔའམ་བདུན་ནོ། །ལྔ་ནི་མེ་ལོང་ལྟ་བུ་དང༌། མཉམ་པ་ཉིད་དང༌། སོ་སོར་རྟོག་པ་དང༌། བྱ་བ་སྒྲུབ་པ་དང༌། ཆོས་ཀྱི་དབྱིངས་ཀྱི་ཡེ་ཤེས་སོ། །བདུན་གང་ཞེ་ན། ཟབ་པའི་ཡེ་ཤེས་དང༌། རྒྱ་ཆེ་བ་དང༌། ཁྱབ་པ་དང༌། རྟག་པ་དང༌། བདེ་བ་དང༌། སྐུ་དང༌། ཟུང་འཇུག་རྣམས་སོ། །ཟབ་པ་གང་ཞེ་ན། རང་བཞིན་མེད་པ་དང༌། རང་རིག་པ་དང༌། འཕེལ་བ་དང༌། བྲི་བ་མེད་པ་དང༌། རྣམ་པར་མི་རྟོག་པ་དང༌། གསལ་བར་སྣང་བའི་མཚན་ཉིད་དོ། །རྒྱ་ཆེ་བ་གང་ཞེ་ན། བསོད་ནམས་དང༌། ཡེ་ཤེས་དང༌། ཡུལ་དང༌། དམིགས་པ་དང༌། འཇུག་པ་དང༌། འཕྲྀན་ལས་རྒྱ་ཆེ་བའི་མཚན་ཉིད་དོ། ཁྱབ་པ་གང་ཞེ་ན། ཡུལ་ཐམས་ཅད་དང༌། དུས་ཐམས་ཅད་དང། རྒྱུད་གསུམ་ལ་ཁྱབ་པ་དང༌། སྟོང་པ་ཉིད་དང༌། མཉམ་པ་ཉིད་ཀྱིས་ཁྱབ་པའི་མཚན་ཉིད་དོ། རྟག་པ་གང་ཞེ་ན། རྒྱུན་མི་འཆད་པ་དང༌། འགོག་པ་མེད་པ་དང༌། རྡུལ་ཕྲ་རགས་ཀྱི་མཚན་ཉིད་
མེད་པ་དང༌། སྔོན་དང་ཕྱི་མར་མི་འགྱུར་པ་དང༌། བསམ་གྱིས་མི་ཁྱབ་པའི་མཚན་ཉིད་དོ། །བདེ་བ་གང་ཞེ་ན། ཁ་སྦྱོར་ཆེན་པོ་དང༌། རང་བཞིན་བདེ་བ་དང༌། སྙིང་རྗེ་གསུམ་དང༌། ཡིད་དང་རླུང་ཐིམ་དང༌། ཞུ་བ་དང༌། འཛག་མེད་ཀྱི་མཚན་ཉིད་དོ། །རྡོ་རྗེའི་སྐུ་གང་ཞེ་ན། སྟོང་པ་ལས་སྐྱེས་པ་དང༌། སྡུག་བསྔལ་འགོག་པ་དང༌། གར་ཡང་ཕྱིན་པ་དང༌། གོ་འཕང་མི་གཡོ་བ་དང༌། ཡིད་ཀྱི་ལུས་དང༌། རླུང་གི་ལུས་དང༌། སྐད་ཅིག་ལ་ཐམས་ཅད་སྤྲུལ་པ་དང༌། མཚན་དང་དཔེ་བྱད་ཀྱི་མཚན་ཉིད་དོ། །ཟུང་འཇུག་གང་ཞེ་ན། གཉིས་ཆོས་མེད་པ་དང༌། ཡང་དག་མིན་རྟོག་མེད་པ་དང༌། རང་བཞིན་ལ་ཞུགས་པ་དང༌། སྣང་བ་མེད་པ་དང༌། ཐམས་ཅད་མཁྱེན་པ་དང༌། ནམ་ཡང་མི་གཡོ་བའི་མཚན་ཉིད་དོ། །ཉེ་རྒྱུ་གང་ཞེ་ན། མཆོག་གི་དངོས་གྲུབ་ལ་དང་པོར་དངོས་སུ་རེག་པ་དང༌། མཐར་ཐུག་པར་དངོས་སུ་རེག་པ་དང༌། གཉིས་ཀར་རྒྱུད་མར་རེག་པའོ། །དང་པོ་ནི་སངས་རྒྱས་རྣམས་ཀྱི་ཡང་དག་པར་དབང་བསྐུར་བ་ལས་བྱུང་བའི་སྤྱོད་པའི་ཡེ་ཤེས་སོ། །གཉིས་པ་ནི། ལོངས་སྤྱོད་རྫོགས་པས་དབང་བསྐུར་བའིའོ། །གསུམ་པ་རིག་མའི་བརྟུལ་ཞུགས་ཀྱི་སྤྱོད་པ་ཐམས་ཅད་དེ། དེ་ཡང་ཚོགས་ཀྱི་དཀྱིལ་འཁོར་དུ་དབང་བསྐུར་བར་བྱ་སྟེ། ཆུ་དང༌།
ཅོད་པན་ལ་སོགས་པ་གསང་བའི་དབང་གི་བར་དུ་སྦྱིན་ནས། ཉི་མ་དམར་ཐག་ཆད་པ་ན་ཤེས་རབ་ཡེ་ཤེས་སྦྱིན་ཏེ་རིག་མ་དང་ལྷན་ཅིག་ཐོ་རངས་མངོན་པར་བྱང་ཆུབ་པ་ཐོབ་པར་འགྱུར་རོ། །དེ་ལྟར་ཡང༌། རྡོ་རྗེ་ཉི་མ་ནུབ་ནས་ནི། །སྒྲུབ་པ་ཀུན་ཏུ་བརྩམས་པར་བྱ། །སྐྱ་རེངས་འཆར་བའི་དུས་སུ་ནི། །སྒོམ་པ་མཆོག་ནི་འགྲུབ་པར་འགྱུར། །ཞེས་པ་འདི་ནི་རེ་ཞིག་ལུང་ངོ༌། །འདི་ལ་དང་པོ་དང་ཐ་མ་ལ་ནི་ཕྱག་རྒྱ་གསུམ་ཀ་ཡང་ཡོད་དོ། །བར་བ་ལ་ནི་ལས་ཀྱི་ཕྱག་རྒྱ་དང༌། ཕྱག་རྒྱ་ཆེན་པོ་ཁོ་ན་ཡོད་དོ། །ཐ་མ་ཁོ་ན་བདེ་ཆེན་གྱི་ལམ་ལ་ནི། དེ་དག་ཕྱག་རྒྱ་ཆེན་པོ་ཁ་ནའོ། །རྒྱུད་གསུམ་གྱི་རིམ་པ་ཕྱེ་བ་སྟེ་གཉིས་པའོ། །རྗོད་བྱེད་ཀྱི་རྒྱུད་བཤད་པར་བྱ་སྟེ། རྒྱུད་ནི་དུ། དབྱེ་བ་ནི་གང༌། མཚན་ཉིད་ནི་གང་ཞེ་ན། རྒྱུད་ནི་གཉིས་དང་གཉིས་དང་བཞི་དང་ལྔ་སྟེ། དང་པོ་ནི་བྱ་བ་དང༌། རྣལ་འབྱོར་དང༌། དེ་ཡང་གཉིས་གཉིས་ཏེ་བྱ་བ་དང༌། སྤྱོད་པ་དང༌། རྣལ་འབྱོར་དང༌། རྣལ་འབྱོར་བླ་ན་མེད་པའོ། །དེ་དག་ཀྱང་ཙམ་པོ་དང༌། ཁྱད་པར་ཅན་གྱི་དབྱེ་བ་སྟེ། མི་དང་མིའི་རྒྱལ་པོ་ཞེས་པ་ལྟ་བུའོ། །བྱ་བའི་རྒྱུད་ནི་དྲུག་གོ །སྤྱོད་པ་ནི་གསུམ་མོ། །རྣལ་འབྱོར་གྱི་ནི་གཉིས་སམ་ལྔའོ། །བླ་ན་མེད་པ་ནི་གཉིས་སོ། །དེ་དག་ཀྱང་གང་ཞེ་ན། གང་དང་གང་གི་
དཀྱིལ་འཁོར་དང༌། སྔགས་གཙོ་བོར་འབྱུང་བ་དེ་དག་གོ །རྒྱུད་ལྔ་ནི། རྩ་བའི་རྒྱུད་དང༌། ཕྱི་མ་དང༌། བཤད་པ་དང༌། ཆ་མཐུན་དང༌། འཕྲོས་པའི་རྒྱུད་དོ། །ཡང་གཉིས་ནི། རྩ་བའི་རྒྱུད་དང་བསྡུས་པའོ། བཞི་ནི་མདོ་སྡེ་དང༌། རྟོག་པ་དང༌། ཆོ་ག་ཞིབ་མོ་དང༌། གཟུངས་ཞེས་པའོ། །ལམ་ནི་རྒྱས་ལ་སྔགས་དང་སྦྱོར་བ་ཉུང་བ་ནི་མདོ་སྡེའོ། །ཆ་ཤས་ཀྱི་རྟོག་པ་ནི་རྟོག་པའོ། །ཐམས་ཅད་ཀྱི་རྟོག་པ་ནི་ཆོ་ག་ཞིབ་མོའོ། །སྔགས་ཙམ་ནི་གཟུངས་སོ། །ཅིའི་ཕྱིར་རྒྱུད་དག་ཏུ་བཞག་ཅེ་ན། ཐབས་ཀྱི་རྒྱུད་བཞིན་དོན་དང་ཚིག་ཏུ་འབྲེལ་བ་དང༌། སྒྲུབ་པ་པོ་ནས་སློབ་དཔོན་དང༌། སློབ་མ་དང་དབང་དང༌། དམ་ཚིག་དང༌། སྔགས་དང༌། སྦྱོར་བ་དང༌། དངོས་གྲུབ་རྣམས་འབྲེལ་ཞིང་རྒྱུན་ཆགས་པའི་ཕྱིར་རོ། །བྱ་དང་རྣལ་འབྱོར་གཙོ་བོའི་ཕྱིར། །རྒྱུད་གཉིས་དང་ནི་ནང་ཡང་སྦྱོད། །རྣལ་འབྱོར་རབ་ཀྱི་ཕུལ་གྱུར་པས། །རྒྱུད་བཞི་རུ་ནི་རབ་ཏུ་བསྒྲགས། །འདོད་ཆགས་བཞི་ལམ་དུ་བྱེད་པ་ཡང་ཡིན་མོད་ཀྱི། དེ་ནི་སྒྲ་དོན་དང་འཇོག་བྱེད་ཀྱང་ཡིན་ཞེས་ཟེར་རོ། །རྣལ་འབྱོར་བླ་མེད་དང༌། རྣལ་འབྱོར་བླ་མ་དང༌། རྣལ་འབྱོར་ཆེན་པོ་དང༌། གཉིས་མེད་ཀྱི་རྒྱུད་ཅེས་པ་ཡང་ཕལ་ཆེར་རྣམ་གྲངས་སོ། །བླ་ན་མེད་པའི་རྒྱུད་གང་ཞེ་ན། ཞུ་བ་དང༌། རང་བཞིན་གྱི་བདེ་སྟོང་
གཉིས་སུ་མེད་པ་སྟོན་པ་གང་ཡིན་པ་སྟེ། དེའི་ཕྱིར་འདི་ཁོ་ནས་སྐྱེ་བ་འདི་ལ་སངས་རྒྱས་སྦྱིན་པར་བྱེད་དོ། །དབྱེ་བ་གང་ཞེ་ན། རྣལ་འབྱོར་དང༌། རྣལ་འབྱོར་མའི་རྒྱུད་དོ། །བུ་ནི་བུ་མོ་དང༌། བུ་ཕོའི་དབྱེ་གཞི་སྟེ། འོན་ཀྱང་བུ་ནི་ཕོ་ཁོ་ན་ལ་བརྗོད་པ་ལྟར་རྣལ་འབྱོར་གྱི་རྒྱུད་དོ། །གང་དུ་རྣལ་འབྱོར་མ་རྣམས་ཀྱི་དཀྱིལ་འཁོར་དང༌། སྔགས་དང༌། སྦྱོར་བ་རྒྱས་པ་དེ་ནི་རྣལ་འབྱོར་མའི་རྒྱུད་དོ། །སངས་རྒྱས་རྣམས་ཀྱི་དཀྱིལ་འཁོར་དང༌། གསང་སྔགས་དང༌། སྦྱོར་བ་ཁོ་ན་རྒྱས་པ་དེ་ནི་རྣལ་འབྱོར་གྱི་རྒྱུད་དོ། །རྫོགས་པའི་རིམ་པའི་ངོ་བོས་ནི་ཐམས་ཅད་ཀྱང་དབྱེ་བ་མེད་དོ། །དོན་འདི་མ་རྟོགས་པར་ཕྱོགས་འདིར་མཁས་པ་དང༌། མི་མཁས་པ་དག་ཁ་ཅིག་ནི་ཆ་ཆུང་དུས་དབྱེ་བར་འདོད། ཁ་ཅིག་ནི་རྣམ་གྲངས་དུ་མར་བྱེད། གཞན་དག་དོན་བཟང་པོ་རློམ་པ་དག་གིས་དབྱེ་བར་འདོད་དེ། མ་ངེས་པ་ཁོ་ན་སྨྲའོ། །རྒྱུད་ཀྱི་གནས་ལྔ་གང་ཞེ་ན། སྡོམ་ནི། ལས་རིམ་དངོས་གྲུབ་དམ་ཚིག་སྡོམ། །ཏིང་འཛིན་རྒྱུད་ཀྱི་སྦྱོར་བའོ། །ལས་ཀྱི་རིམ་པ་ནི་དཔག་ཏུ་མེད་དེ། དེ་ལས་ཆེ་ལོང་ཆེ་ལོང་བསྡུས་པ་ནི། དེ་ཉིད་བཅུ་ཕྱི་ཡི་དང༌། གསང་བའི་དེ་ཉིད་བཅུའོ། །ཡང་ན་བཅུ་གཅིག་སྟེ། སྡོམ་ནི། ས་ཆོག་སྒྲུབ་དང་མཆོད་པ་དང༌། །སྦྱིན་སྲེག་དབང་བསྐུར་
རབ་གནས་དང༌། །ཡོ་བྱད་དཀྱིལ་འཁོར་མཚན་ཉིད་དང༌། །ཚོགས་འཁོར་བསྙེན་པ་ལས་ཚོགས་སོ། །ཡོ་བྱད་ནི་རྡོ་རྗེ་དང༌། དྲིལ་བུ་དང༌། ཕྱག་མཚན་དང༌། རྒྱན་དང་དེ་དག་ལ་སོགས་པའོ། །དཀྱིལ་འཁོར་གྱི་མཚན་ཉིད་ནི་བྲི་བ་དང༌། བསླང་བ་དང༌། ལུས་དང༌། བསམ་གཏན་ནོ། །སྔགས་ཀྱི་སྟོབས་ལས་བསོད་ནམས་འཕེལ་ཚུལ་དང༌། །བདེ་བས་སྟོང་པ་རྟོགས་པའི་ཚུལ་མཆོག་དང༌། །བདེ་དང་མྱུར་དང་ཐབས་མཁས་ཁྱད་པར་དང༌། །བསླབ་གསུམ་ཉོན་མོངས་ལམ་སྦྱོད་འབྲས་བུའི་ཚུལ། །དམིགས་པ་དམ་ཚིག་རྒྱུད་གཞན་བསྐུལ་བ་ཡིས། །ལམ་འདིར་ཁྱད་པར་འཕགས་པར་ཀུན་གྱིས་བཤད། །བཅུ་གཅིག་པོ་འདི་གཞན་ལ་ཡོད་མ་ཡིན། །འདི་གཉིས་བྱང་ཆུབ་མཆོག་ལ་ཁྱད་པར་མིང༌། །ཅེས་པ་ནི་བསྡུ་བའི་ཚིགས་སུ་བཅད་པའོ། །རྗོད་བྱེད་ཀྱི་རིམ་པར་ཕྱེ་བ་སྟེ་གསུམ་པའོ།། སྒོམ་པའི་ཚུལ་གང་ཞེ་ན། བསྐྱེད་པའི་རིམ་པ་ནི་སོ་སོར་བྱའོ། །རྫོགས་པའི་རིམ་པ་འདི་ལྟར་སྒོམ་སྟེ་ཐོག་མར་སྙིང་གར་དྷཱུ་ཏཱིའི་ནང་དུ་ཉི་ཟླ་ཁ་སྦྱོར་གྱི་དབུས་སུ་ཧཱུཾ་བསྒོམ་མོ། །ཡང་ན་ནོར་བུ་ཞུ་བའི་ཐིག་ལེ་དམར་སྐྱ་ཡུང་འབྲུ་ཙམ་བསྒོམ་མོ། །དབང་པོའི་སྒོ་རྣམས་སུ་ཡི་གེའམ། ཐིག་ལེ་བསྒོམས་པས་རླུང་བཟློག་ཅིང༌། མངོན་ཤེས་ཀྱང་འགྲུབ་བོ་ཞེས་སོ། །དེ་ལྟར་ལྟེ་བའི་གཏུམ་མོ་སྤར་ཏེ་སྤྱི་བོའི་ཧཾ་ཞུ་སྟེ་
སྙིང་གའམ་ལྟེ་བར་འབར་འཛག་བསྒོམ་མོ། །གཞན་ཡང་རིལ་འཛིན་དང་རྗེས་གཞིག་གིས་འོད་གསལ་དུ་འཇུག་གོ །གཏུམ་མོ་ནི་གསུམ་སྟེ། ལས་དང་རྣལ་འབྱོར་དང་རང་བཞིན་གྱི་གཏུམ་མོའོ། །གལ་ཏེ་བསྐྱེད་རིམ་སོ་སོར་སྒོམ་མི་ནུས་ན། བསྙེན་པ་ལ་སོགས་པ་སྤྱིའི་ཆོ་གས་བྱའོ། །རིམ་པར་ཕྱེ་བ་འདི་ནི་ཤིན་ཏུ་མང་པོའི་མན་ངག་སོ་སོ་ལས་རྟོགས་པར་འགྱུར་བས་འདིར་མི་བྲིའོ། །བསྒོམ་པའི་རིམ་པར་ཕྱེ་བ་སྟེ་བཞི་པའོ། །རྒྱུད་བཤད་པའི་ཐབས་གང་ཞེ་ན། འདི་ལ་བྱ་བ་དང་རྣལ་འབྱོར་ཕྱི་ལ་ནི་དགོས་པའི་དོན་དང༌། བསྡུས་པའི་དང༌། ཚིག་གི་དོན་དང༌། མཚམས་སྦྱོར་དང༌། བརྒལ་ལན་གྱི་སྒོ་ནས་དང༌། གླེང་གཞི་དང༌། གཏམ་གྱི་སྦྱོར་བ་ནི་སྔོན་བྱུང་དང༌། རྗེས་འཇུག་གི་དབྱེ་བས་བཤད་དོ། །རེ་རེ་ཙམ་ནི་མཐའ་དྲུག་གིས་བཤད་དེ། དེ་སྐད་དུ་ཐམས་ཅད་ཟོས་ཤིང་ཀུན་བྱས་ཀྱང༌། །འགྲུབ་འགྱུར་ཉེས་པས་མི་གོས་ན། །ཞེས་པ་ལྟ་བུའོ། །རྣལ་འབྱོར་བླ་ན་མེད་པ་ལ་ནི་རྒྱན་བདུན་དང༌། དེའི་གཏམ་གྱི་སྦྱོར་བ་ལ་ནི། སྔོན་བྱུང་དང༌། རྗེས་འཇུག་དང༌། རྒྱུད་འགའ་ཞིག་ལ་ནི་ཕྱི་དང་གསང་བ་དེ་བཞིན་ནང༌། །དེ་བཞིན་ཉིད་དོན་རྣམ་པ་བཞི། །ཞེས་དང༌། ཕྱི་དང༌། ནང་དང༌། གཞན་དང༌། བརྟོན་པ་བཞིར་བཤད་པ་དག་གོ །ཤིན་ཏུ་སྦས་པའི་རྒྱུད་
ལ་ནི་ཚུལ་བཞིའོ། །མཐའ་དྲུག་ནི་ཐམས་ཅད་ལ་སྟེ། ངེས་པ་དང་དྲང་དོན་ལ་ལྷག་མ་བཞི་བཞིས་ཕྱེ་བས་བརྒྱད་དོ། །དེ་བཞིན་དུ་གཞན་ལ་ཡང་སྟེ་ཉི་ཤུ་རྩ་བཞི་ཡོད་དོ། །ཚུལ་བཞིར་འཆད་པ་མེད་པ་ལ་ནི་ཚོགས་དང༌། སློབ་མའི་དབྱེ་བ་མེད་དོ། །ཡི་གེ་གསང་ཆེན་དུ་བཤད་པ་ནི་ཡི་གེའི་དོན་མ་ཡིན་ཞེས་ཁོ་བོ་སྨྲའོ། །ཚིག་གཅིག་དོན་གཅིག་གམ་གཉིས་སུ་སྟོན་པ་ནི་མཐའ་དྲུག་དང༌། དོན་རྣམ་གྲངས་དུ་མ་ནི་ཚུལ་བཞིས་འཆད་དོ། །དེ་ཡང་མཐའ་གཅིག་ཏུ་ནི་མ་ཡིན་ཏེ། སྤྱིའི་དོན་ཉིད་གསུམ་མམ་བཞི་ལ་སོགས་པར་བཤད་པ་ཡང་ཡོད་དེ། དེ་དག་ལ་རྒྱུད་གསུམ་གྱི་སྒོ་ནས་བཤད་པ་ལ་སོགས་མན་ངག་ཡོད་པར་ཡང་འདོད་དོ། །གལ་ཏེ་ཚེ་འདི་ཉིད་ལ་སངས་རྒྱས་ཐོབ་པར་འདོད་པས་རྒྱུད་མཉན་པར་བྱའོ། །དེ་ལ་སློབ་དཔོན་དང༌། སློབ་མའི་མཚན་ཉིད་ཤེས་པས་བརྟགས་ནས་བླངས་ལ་དབང་བསྐུར་བ་ནོད་པར་བྱའོ། །དམ་ཚིག་དང༌། སྡོམ་པ་ལ་གནས་པས། རིམ་པ་གཉིས་ལ་ཞིབ་མོར་མཁས་པར་བྱས་ལ་རྒྱུད་མཉན་ནོ། །བསྲུང་བའི་འཁོར་ལོ་ཡང་སྒོམ་པ་དང༌། གཏོར་མ་ཡང་སྦྱིན་པ་དང༌། ཐམས་ཅད་དཀྱིལ་འཁོར་དུ་བལྟས་ལ། སློབ་དཔོན་རྡོ་རྗེ་སེམས་དཔའ་ལ་ཡོན་དང༌། མཎྜལ་བྱས་ལ། སྔོན་བྱུང་ཇི་ལྟ་བར་སྒོམ་པ་ནི། སློབ་དཔོན་སློབ་མ་གཉིས་ཀས་སོ། །ལུས་དང༌།
ངག་དང༌། སེམས་ཀྱི་སྐྱོན་བཅུ་གཅིག་སྤངས་ཏེ། དེ་དག་གང་ཞེ་ན། ཉལ་བ་ལ་སོགས་པ་ལུས་ཀྱི་གནས་ངན་ལེན་དང༌། རྩེད་མོ་དང་ཀྱལ་ཀ་དང༌། ཞེ་སྡང་བའི་བརྒལ་ལན་དང༌། ཅ་ཅོ་དང༌། ཧ་ཅང་རྟོག་གེ་ལ་དགའ་བས་གཏན་ཚིགས་དང་ཐལ་འགྱུར་གྱི་རྣམ་གཞག་ཐལ་བ་དང༌། མན་ངག་མེད་པ་དང༌། རྫུན་གྱི་མན་ངག་དང༌། མ་སྨིན་པའི་སྐྱེས་བོས་ཐོས་པ་དང༌། འགྲན་པ་དང༌། རྙེད་པའི་སེམས་སོ། །གཞན་ཡང་སྨྲ་བའི་རྒྱུན་དང་ལྡན་པས་བརྗོད་དེ། རྣལ་འབྱོར་ལ་ནི་མི་གཡེང་བས་འཆད་པ་དང༌། མཉན་པ་ལ་ནི་རྡོ་རྗེ་འཛིན་པ་རྣམས་ལྷག་པར་ཡང་གཟིགས་སོ། །རྒྱུད་བཤད་ཐབས་ཀྱི་རིམ་པར་ཕྱེ་བ་སྟེ་ལྔ་པའོ།། བསྟན་བཅོས་འདིའི་མིང་ཅི། ལས་དང་པོ་ལ་ཕན་པའི་རབ་ཏུ་བྱེད་པ་ཞེས་བྱའོ། །འདི་ནི་རིག་པ་འཛིན་པའི་མ་མོའི་སྙིང་པོ་བསྡུས་པ་ཡིན་ཏེ། སྔགས་ཀྱིས་གཏན་ལ་དབབ་པ་ཞེས་ཀྱང་བྱའོ། །འདི་དག་རྒྱ་ཆེ་བར་བླ་མའི་ངག་ལས་རིག་པར་བྱའོ། །དེ་ཅི་རིག་པ་འཛིན་པའི་ཐེག་པ་ཡང་ཤིན་ཏུ་རྒྱས་པའི་སྡེ་སྣོད་དེ། མངོན་པ་ནི་བར་བར་དག་ལས་བསྡུ་བར་བྱ་དགོས་སོ། ཁ་ཅིག་འདི་ནི་གཙོ་བོ་ཡིན་ཏེ་དེའི་ཕྱིར་སྡེ་སྣོད་གསུམ་དུ་མི་བསྡུའོ། །ཞེས་པ་ནི་འཐད་པར་མི་སྣང་སྟེ། དཔེར་ན་བརྒྱ་བྱིན་ནི་སུམ་ཅུ་རྩ་གསུམ་པའི་གཙོ་བོ་ཡིན་ལ། དེ་ནི་བརྒྱ་བྱིན་མ་ཡིན་ནོ། །ཞེས་
བརྗོད་དོ། །དེ་ལྟར་ན་འདི་ཡང་ཆོས་ཡང་དག་པར་བསྡུད་པ་གཏན་ལ་དབབ་པ་སྟེ། འདི་ཁོ་ན་བཟུང་བས་ཀྱང་སྔགས་ཀྱི་ཐེག་པའི་བརྡ་རྣམས་ལ་རྨོངས་པར་མི་འགྱུར་རོ། །འདིའི་དགེ་བ་ཡང༌། སྐྱེ་བ་འདི་ཁོ་ན་ལ་རྡོ་རྗེ་སེམས་དཔའ་ཞེས་བྱ་བ་འགྲོ་བ་ལ་ཕན་པའི་རྒྱུར་བསྔོའོ། །ལས་དང་པོ་པ་ལ་ཕན་པའི་རབ་ཏུ་བྱེད་པ་རྫོགས་སོ། །རྡོ་རྗེ་ཐེག་པའི་ལམ་ལས་ཆོས་ཀྱི་རྒྱུན་གྱི་ཏིང་ངེ་འཛིན་བརྙེས་པ་རྗེ་བཙུན་གྲུབ་པའི་དབང་ཕྱུག་གུ་རུ་ལྷོ་ཕྱོགས་པའི་ཞབས་ཀྱི་ཟེའུ་འབྲུ་ལ་སྤྱི་བོས་རེག་པ་ཏཱ་ར་ནཱ་ཐ་ཀུན་དགའ་སྙིང་པོས་སྔཽན་མེད་པའི་གཏམ་བཟང་པོ་དག་ལས་ཅི་རིགས་པར་རང་ལོ་ཉེར་གསུམ་པའི་དང་པོ་ནག་པོའི་ཉ་ལ་གནས་རི་བོ་མཐོན་པོའི་མགུལ་བསམ་གཏན་སྡིངས་སུ་ཐུན་གསུམ་ལ་མྱུར་བར་སྦྱར་བའོ།། །།ཞུས་དག། །།མངྒལ་བིསྟཱརཾ།།