དཔལ་སངས་རྒྱས་ཐོད་པའི་དཀྱིལ་འཁོར་གྱི་ཆོ་ག་དེ་ཁོ་ན་ཉིད་གསལ་བ།
དཔལ་སངས་རྒྱས་ཐོད་པའི་དཀྱིལ་འཁོར་གྱི་ཆོ་ག་དེ་ཁོ་ན་ཉིད་གསལ་བ་ཞེས་བྱ་བ་བཞུགས།
དཔལ་སངས་རྒྱས་ཐོད་པའི་དཀྱིལ་འཁོར་གྱི་ཆོ་ག་དེ་ཁོ་ན་ཉིད་གསལ་བ་ཞེས་བྱ་བ། རྡོ་རྗེ་འཛིན་པ་ལ་ཕྱག་འཚལ་ལོ། །རྡོ་རྗེ་སངས་རྒྱས་རྣམ་སངས་རྒྱས། །སྟོང་པའི་ཡབ་གཅིག་ལྷག་པའི་ལྷ། །གཅིག་པུ་བདེ་བ་ཆེ་རང་བཞིན། །རང་བྱུང་བཅོམ་ལྡན་ལ་ཕྱག་འཚལ། །རྒྱུད་འདི་གཙོར་བྱེད་ཉུང་བའི་ཕྱིར། །ཆོ་ག་རབ་རྒྱས་ཉེར་མཁོ་མེད། །ཟབ་མོའི་ཆོས་མཆོག་མི་ནུབ་ཕྱིར། །དོན་ཚང་མདོར་བསྡུས་ཙམ་ཞིག་འབྲི། །དེ་ལ་འདིའི་དཀྱིལ་ཆོག་རིམ་པ་གསལ་བ་ཞེས་བྱ་བ། བྲམ་ཟེ་ཆེན་པོའི་གཞུང་དུ་གྲགས་པ་འདི་ལས། ས་ཆོག་གི་རིམ་པ་ལ་ཆོ་ག་སྤྱི་ནག་པོ་སྤྱོད་པས་མཛད་པའི་བདེ་མཆོག་གི་དཀྱིལ་ཆོག་དང་འདྲ་རུང་བ་ལས། གསོལ་བཏབ་དང་གཏོར་སྔགས་སོགས་མི་འདྲ་བ་མང་དག་དང་བཅས་པ་འབྱུང་མོད་ཀྱི། ས་ཆོག་ནི་གསང་བ་སྤྱིའི་ཆོ་གའི་རྗེས་སུ་འབྲངས་པས་དོན་གྲུབ་ཅིང་ལེགས་པར་འགྱུར་བའི་ཕྱིར། གཞན་དུ་ཤེས་པར་བྱ་ལ། ཆོ་ག་ལྷག་མ་རྣམས་པ། མི་འཇིགས་པའི་གཞུང་འགྲེལ་ལས་ཀྱང༌། ལག་ལེན་འདེབས་རུང་དུ་གསུངས་མོད་ཀྱི། རྒྱུད་
འདིའི་དཀྱིལ་ཆོག་རང་རྐང་ཚུགས་པ་ཕྱོགས་འདིར་འགྱུར་བ་ནི་རིམ་པ་གསལ་བ་གཅིག་བུ་ཡིན་པའི་ཕྱིར། ཆོ་ག་ལྷག་མ་རྣམས་གཙོ་བོར་དེའི་རྗེས་སུ་བགྲང་བར་བྱའོ། །དེ་ཡང་དང་པོར་སྟ་གོན་གྱི་བྱ་བ་ལ། སྔོན་དུ་བྱ་བའི་རིམ་པ་དང༌། སྟ་གོན་དངོས་སོ། །དང་པོ་ནི། སྔོན་འགྲོ་གཏོར་མ། ཨ་མྲྀ་ཏས་བསངས། སྭ་བྷཱ་ཝས་སྦྱངས། ཨོཾ་ཨཱཿཧཱུཾ་གིས་བྱིན་གྱིས་བརླབས། སྲིད་པ་གསུམ་གྱི་འབྱུང་པོའི་ཚོགས་རྣམས་བཛྲ་ས་མཱ་ཛཿ ཨ་རྒྷཾ་ནས ཤཔྟའི་བར་གྱིས་མཆོད། ཨོཾ་བུདྡྷཱ་ཀ་པཱ་ལ་བཛྲ་ཙེ་ཊེ། ཞེས་པ་ནས། ཡིད་ལ་འདོད་པ་ཀུན་འགྲུབ་ཤོག་གི་བར་སྒྲུབ་ཐབས་ཀྱི་གཏོར་ཆོག་ལྟར་བརྗོད། དེ་ནས་འཕྲིན་བཅོལ་སྤྱི་དང་མཐུན་པར་ཡང་བྱས་ནས། རོལ་མོའི་སྒྲ་དང་བཅས་ཏེ་གཏོར་མ་ཕྱི་རོལ་དུ་དོར་རོ། །དེ་རྗེས་གནས་དང་ཡོ་བྱད་བྱིན་གྱིས་བརླབས་པ་ཡང་བདེ་དགྱེས་སོགས་སྤྱི་དང་འདྲའོ། །དེ་ནས་སྒྲུབ་ཐབས་ལྟར། སྐྱབས་འགྲོ་ནས་བཟླས་པའི་བར་དང༌། དཀྱིལ་འཁོར་ཉེར་བསྡུ་ཏེ། མངོན་རྟོགས་རྒྱས་པ་རྫོགས་པར་སྒོམ། གཉིས་པ་
སྟ་གོན་དངོས་ནི། དཀྱིལ་འཁོར་གྱི་ས་གཞིའམ་མཎྜལ་ལ་ས་ལྷའི་མཆོད་གཏོར་ཚོམ་བུ་དང་བཅས་པ་བཀོད། ཨོཾ་ཧཾ། ཧཾ་གི་སྒྲ་དང་ཧཱུཾ་གི་འོད་ཀྱིས་བསྐུལ་ནས། ས་འོག་ནས་སའི་ལྷ་མོ་འཁོར་དང་བཅས་པ་བྱུང༌། ཚོམ་བུའི་སྟེང་དུ་བྱོན་པ་ནི་སའི་ལྷ་མོ་གསེར་གྱི་མདོག་ཅན་ཞི་བའི་ཉམས་དང་ལྡན་པ། ཕྱག་གཉིས་ཀྱིས་བདུད་རྩིས་གང་བའི་རིན་པོ་ཆེའི་བུམ་པ་བསྣམས་པ། རྒྱན་དང་ན་བཟའ་དཀར་པོ་ཅན་དུ་གྱུར། འབྲུ་གསུམ་གྱིས་མཆོད་པ་བྱིན་གྱིས་བརླབས། ཨོཾ་པྲི་ཐི་ཝཱི་དེ་ཝཱི་བྷྱཿ ཨརྒྷཾ་པྲ་ཏཱིཙྪ་སྭཱཧཱ། དེ་བཞིན་དུ་སྦྱར་ཏེ། པཱ་དྱཾ། པུཥྤེ། དྷཱ་པེ། ཨཱ་ལོ་ཀེ གནྡྷེ། ནཻ་ཝི་དྱ། ཤཔྟ་ཨཱཿཧཱུཾ་གཏོར་མ། ཨ་མྲྀ་ཏས་བསངས། སྭ་བྷཱ་ཝས་སྦྱངས། སྟོང་པའི་ངང་ལས། ཨ་ལས་ཀ་པཱ་ལ་ཡངས་ཤིང་རྒྱ་ཆེ་བའི་ནང་དུ། ཤ་ལྔ་བདུད་རྩི་ལྔ་ཞུ་བ་ལས་བྱུང་བའི་གཏོར་མ་ཡེ་ཤེས་ཀྱི་བདུད་རྩིའི་རྒྱ་མཚོར་གྱུར། ཨོཾ་ཨཱཿཧཱུཾ་ཧ་ཧོ་ཧྲི། ཨོཾ་པྲི་ཐེ་ཝཱི་དེ་ཝཱི་བྷྱཿ ན་མཿསརྦ་ཏ་ཐཱ་ག་ཏ་བྷྱོ་བི་ཤྭ་མུ་ཁེ་བྷྱཿ སརྦ་ཐཱ་ཁཾ་ཨུད་ག་ཏེ་སྥ་ར་ཎ་ཨི་མཾ་ག་ག་ན་ཁཾ་གྲྀཧྞེ་དཾ་བྷ་ལིང་ཏ་ཡེ་སྭཱཧཱ། ལན་གསུམ། ཨོཾ་སྐྱོབ་པ་སངས་རྒྱས་ཐམས་ཅད་ཀྱི། །སྤྱོད་པའི་ཚུལ་དང་ཁྱད་པར་གྱི། །ས་དང་ཕ་རོལ་ཕྱིན་པ་ལ། །ལྷ་མོ་ཁྱོད་ནི་དབང་དུ་གྱུར། །ཧེ་རུ་ཀ་དཔལ་དཔའ་བོ་ཡིས། །ཇི་ལྟར་བདུད་ཀྱི་སྟོབས་བཅོམ་
པ། །དེ་བཞིན་བདག་གིས་བདུད་སྡེ་ལས། །རྒྱལ་བར་བྱས་ཏེ་དཀྱིལ་འཁོར་བྲི། ཨོཾ་པྲི་ཐི་ཝཱི་དེ་ཝཱི་བྷྱཿ ཨརྒྷཾ་པྲ་ཏཱིཙྪ་སྭཱཧཱ། སའི་ལྷ་མོ་སླར་ཡང་ས་དེ་ཉིད་ལ་ཐིམ་པར་གྱུར། དེ་རྣམས་སའི་ལྷ་མོའི་སྟ་གོན་ནོ། །དེ་དག་བསལ་ཏེ་དཀྱིལ་འཁོར་གྱི་ས་གཞིའམ། མཎྜལ་ལ་ལྷ་དང་གྲངས་མཉམ་པའི་ཚོམ་བུ་བཀོད། མཐའ་མཆོད་གཏོར་གྱིས་བསྐོར། དཀྱིལ་འཁོར་གྱི་དབུས་སུ་པད་ཉི་རོའི་གདན་ལ། ཧཱུཾ་དང་རྡོ་རྗེ་ལས། བཅོམ་ལྡན་འདས་ཡབ་ཡུམ་གྲུབ་པ་ན། ནོར་བུ་དང་ནོར་བུའི་འོད་ཟེར་གྱི་ཚུལ་གྱིས་རྣལ་འབྱོར་མ། ཉི་ཤུ་རྩ་བཞི་ཡང་གྲུབ་པ་ནི། དབུས་སུ་བཅོམ་ལྡན་འདས་དཔལ་ཧེ་རུ་ཀ༴ ནས། བརྩེད་འཇོའི་རོལ་པ་ཅན་ནོ། །དེའི་ཕྱི་རོལ་ཤར་དུ་ཕྲེང་བཟང་མ༴ སོགས། དབང་ལྡན་ལ་སོགས་པའི་མཚམས་བཞི་ལ། གཡས་བསྐོར་གྱི༴ ནས། ཐོད་པའོ། །དེའི་ཕྱི་རོལ་ཤར་དུ་དགེ་བའི་སྐེ་རགས་ཅན་མ༴ ནས། སྡུད་བྱེད་མའོ། །དེའི་ཕྱི་རོལ་ཤར་དུ་སྒྲོལ་བྱེད་མ༴ ནས། རླུང་དུ་གྲགས་ཆེན་མའོ། །དེའི་ཡང་ཕྱི་རོལ་ཤར་དུ་མཛེས་སྡུག་མ། བྱང་དུ་ནོར་འཛིན་མ། ནུབ་ཏུ་སྐལ་བཟང་མ། ལྷོར་ཡིད་འོང་མ་སྟེ། རྣལ་འབྱོར་མ་ཉི་ཤུ་རྩ་བཞི་པོ༴ ནས། ཟླ་བའི་རྒྱུན་རབ་ཏུ་འབབ་པའོ། །བཅོམ་ལྡན་འདས་ཀྱི་ཐུགས་ཀར་ཨོཾ༴ ནས། བདུད་རྩིའི་རྒྱ་མཚོ་ཆེན་པོར་གྱུར་
གྱི་བར། གོ་ཆ་གནས་གསུམ་བྱིན་རླབས། ཡེ་ཤེས་པ་བསྟིམས་པ། དབང་བསྐུར་རྒྱས་བཏབ། མཆོད་པ། བསྟོད་པ། ནང་གི་བདུད་རྩི་མྱངས་བ། ཕྱི་རོལ་གྱི་བདུད་རྩི་བྱིན་གྱིས་བརླབས་པ་རྣམས་མངོན་རྟོགས་ལྟར་བྱ། སྙིང་པོའི་མཐར་འབྲུ་གསུམ་བཏགས་པ་ལན་གསུམ་བརྗོད་པས་ནང་མཆོད་ཕུལ། སྤྲོས་པ་ལ་དགའ་ན། མཆོད་བསྟོད་རྣམས་རྒྱས་པ་དངོས་གཞིའི་སྐབས་ནས་ཁ་བསྐང་བས་ཆོག་གོ །གཏོར་མ་ནང་མཆོད་ལྟར་བྱིན་གྱིས་བརླབས་ལ། ཨོཾ་བུདྡྷ་ཀ་པཱ་ལི་ནི་བ་ལིཾ་གྲྀྀཧྞ་ཞེས་པ་ནས། ཀུན་འགྲུབ་ཤོག །གི་བར་གྱི་འཕྲིན་ལས་བཅོལ། སྤོས་དང་བཅས་པས་རྡོར་དྲིལ་འཛིན་པས། གཉིས་མེད་ཡེ་ཤེས་ལས་བྱུང་བའི། ཁྱབ་བདག་དངོས་ཀུན་བདག་ཉིད་ཅན། །སྟོན་པའི་གཙོ་བོ་ཁྲག་འཐུང་དཔལ། །སྣ་ཚོགས་བདེ་མར་ཡང་དག་ལྡན། །ཕྱོགས་མཚམས་རྣམས་ཀྱི་མཁའ་འགྲོ་མ། །རིགས་པའི་ལྷ་མོ་རྫུ་འཕྲུལ་ཅན། །བྱང་ཆུབ་སེམས་དཔའ་ལ་སོགས་ཀུན། །མ་ལུས་བདག་ལ་དགོངས་སུ་གསོལ། །སློབ་མ་ལ་ནི་ཕན་པ་དང༌། ཁྱེད་རྣམས་ལ་ཡང་མཆོད་པའི་ཕྱིར། །རྡོ་རྗེ་ཅན་བདག་འདི་ཞེས་པས། །ནངས་པར་དཀྱིལ་འཁོར་བྲི་བར་བྱ། །རྗེས་སུ་བརྩེ་བས་ཉེར་དགོངས་ཏེ། །ཀུན་གྱིས་བྱིན་གྱིས་བརླབ་ཏུ་གསོལ། །ཞེས་ལན་གསུམ་གསོལ་བ་བཏབ་བོ། །མཆོད་པ་ཁགསོས་ཏེ། འབྲུ་གསུམ་གྱིས་བྱིན་གྱིས་བརླབས། རྩ་བརྒྱད་པོ་ལས་བྱུང་བའི། ཞེས་
པ་ནས། ཁྱོད་ལ་བདག་འདུད་དོ། །ཞེས་པའི་བར་གྱིས་མཆོད་བསྟོད་དང༌། སྙིང་པོའི་མཐར་འབྲུ་གསུམ་སྦྱར་བས་ནང་མཆོད་ཕུལ། རྟེན་དང་བརྟེན་པར་བཅས་པའི་དཀྱིལ་འཁོར་པ་ཐམས་ཅད་རང་གི་སྣ་བུག་གཡོན་ནས་ཞུགས་ཏེ་སྙིང་གར་ཐིམ། དེ་རྣམས་ལྷ་སྟ་གོན་ནོ། །དེ་ནས་རྒྱས་པར་ན། ལྷ་གྲངས་དང་མཉམ་པའི་བུམ་པ་བྱ་སྟེ། གཙོ་བོའམ་བྱང་སྒོའི་ལྷ་མོ་གང་རུང་ལས། ལས་བུམ་ལོགས་སུ་མི་བྱེད་པ་ལྟར་ན། བུམ་པ་ཉེར་ལྔ་ཡིན་ལ། ལོགས་སུ་བྱེད་པ་ལྟར་ན་ཉེར་དྲུག་གོ །འོན་ཀྱང་དེར་སང་གི་ལག་ལེན་ལྟར་ན། ལས་བུམ་ལོགས་སུ་བྱེད་ཅིང་ལྷ་བུམ་གཅིག་ལ་བསྡུ་བ་ཡིན་པས། བུམ་པ་གཉིས་སྤྱི་དང་མཐུན་པར་བཤམས། ཨོཾ་ཨ་མྲྀ་ཏས་བསངས། སྭ་བྷཱ་ཝས་སྦྱངས། སྟོང་པའི་ངང་ལས་པཾ་ལས་སྣ་ཚོགས་པདྨའི་སྟེང་དུ་ཨ་ལས་ཟླ་བའི་གདན་རེ་རེ། དེའི་སྟེང་དུ་པཾ་ལས་རིན་པོ་ཆེ་བུམ་པ། ལྟོ་བ་ལྡིར་བ། མགྲིན་པ་ཕྲ་བ། མཆུ་འཕྱང་བ། ལྷ་རྫས་ཀྱི་གོས་ཀྱི་མགུལ་བཅིངས་དང༌། དཔག་བསམ་གྱིས་ཤིང་གི་ཁ་བརྒྱན་པ། ནང་ཆུ་དང་བཅུད་ཐམས་ཅད་ཀྱིས་ཡོངས་སུ་གང་བའི་རྣམ་རྒྱལ་བུམ་པའི་དབུས་སུ། པད་ཉིའི་གདན་གྱི་སྟེང་དུ། གཡོན་སྐོར་གྱི་ཨ་ཨཱ་ཨི་ཨཱི་ནས། ཧཱུཾ་ཡིག་དེ་ཉིད་ཀྱི་སྣང་བ་ལས་གྲུབ་སྟེ། བཅོམ་ལྡན་འདས་དཔལ་ཧེ་རུ་ཀ་སྐུ་མདོག་སྔོན་པོ་ནས། རོལ་པ་ཅན་ནོ། །ཤར་དུ་ཕྲེང་
བཟང་མ། ཞེས་པ་ནས། བཛྲ་ཨརྒྷཾ་པྲ་ཏཱིཙྪ་སྭཱཧཱ། ཞེས་པའི་བར། ལྷ་སྟ་གོན་གྱི་སྐབས་དང་སྒྲུབ་ཐབས་བཞིན་བྱ། རྩ་བརྒྱད་པོ་ལས་བྱུང་བའི་ནས། བདག་འདུད་དོ། །ཞེས་མཆོད་བསྟོད་དང༌། སྙིང་པོའི་འབྲུ་གསུམ་གྱིས་ནང་མཆོད་ཕུལ། ཛཿཧཱུཾ་བཾ་ཧོཿ ཡེ་ཤེས་སེམས་དཔའ་དང་རོ་གཅིག་ཏུ་འདྲེས་པས། ལྷ་རྣམས་བྱང་ཆུབ་ཀྱི་སེམས་ཀྱི་ངོ་བོར་གྱུར། གཙོ་བོའི་སྙིང་པོ་ཉིད་ཅི་འགྲུབ་ཏུ་བཟླའོ། །ལས་བུམ་གྱི་ནང་དུ་ཧཱུཾ་དང་སྣ་ཚོགས་རྡོ་རྗེ་ལས། ཁྲོ་བོ་བདུད་རྩི་འཁྱིལ་བ་ལྗང་ཁུ། ལྗང་དཀར་སེར་བའི་ཞལ་གསུམ་ཕྱག་དང་པོ་གཉིས་ཀྱིས་སྣ་ཚོགས་རྡོ་རྗེ་དང་ཐོད་ཁྲག་འཛིན་པས། རང་སྣང་གི་ཡུམ་ལ་འཁྱུད་པ། འོག་མ་གཉིས་ཀྱིས་སྡིགས་མཛུབ་དང་བཅས་པའི་རྡོ་རྗེ་འབར་བ་དང་ཁ་ཊྭཱཾ་ག་བསྣམས་པ། ཁྲོ་བོའི་ཆ་བྱད་ཡོངས་སུ་རྫོགས་པའོ། །དཔྲལ་བར་ཨོཾ། མགྲིན་པར་ཨཱཿ ཐུགས་ཀར་ཧཱུཾ། ཡེ་ཤེས་སེམས་དཔའ་བདུད་རྩི་འཁྱིལ་བ་བཛྲ་ས་མཱ་ཛཿ ཛཿཧཱུཾ་བཾ་ཧོཿ ཨོཾ་བཛྲ་ཀུཎྜ་ལི་བཛྲ་ཧཱུཾ་ཕཊ། ཅེས་ཅི་ནུས་སུ་བཟླས་པའི་མཐར། བུམ་པ་གཉིས་ཀར་ལ་ཐུན་མོང་དུ། ཨརྒྷཾ་ནས། ཤཔྟའི་བར་གྱིས་མཆོད། རྡོ་རྗེ་དང་ནི༴ སོགས་དང༌། འཇིགས་པའི་ཧཱུཾ་སྒྲ༴ སོགས་ཀྱིས་བསྟོད། ཡིག་བརྒྱ་ལན་གསུམ། མ་འབྱོར་པ་དང༴ སོགས་ཀྱིས། བཟོད་པར་གསོལ། དུང་ཕོར་གྱི་ནང་གི་ཧེ་རུ་ཀ་ཡང་ཞུ་བར་
གྱུར། མེ་ཏོག་དང་སྤོས་ལ་སོགས་པས་མཆོད་དོ། །སྐབས་འདིར་གཏོར་མ་འབུལ་བར་བཤད་པ་འགའ་ཞིག་ལ་ཡོད་ཀྱང༌། འདིར་བུམ་པ་ལ་གཏོར་མ་མེད་ལ། མདུན་བསྐྱེད་ལ་གོང་གི་དེས་ཆོག་པས་འདིར་མི་དགོས་སོ། །བུམ་བསྐྱེད་ཀྱི་སྐབས་འདིར། རིམ་པ་གསལ་བ་དང༌། གཞུང་འགྲེལ་དང༌། འགྲེལ་པ་ཡེ་ཤེས་ལྡན་གསུམ་ནས་སོ་སོར་ཅུང་ཟད་མི་འདྲ་བ་ཙམ་ཁོ་ན་བཤད་ཀྱང༌། རྒྱུད་ལས། མདོག་དང་མཚན་མར་ལྡན་པ་ཡི། །དེ་བཞིན་གཤེགས་རྣམས་ས་བོན་གྱི། །འོད་ཟེར་གྱི་ནི་རྣམ་པར་བསམ། །བདག་ཉིད་ཆེན་པོ་གྲགས་ཆེན་པོ། །བུམ་པ་རུ་ནི་ཞུགས་ཙམ་གྱིས། །དམ་ཚིག་དཀྱིལ་འཁོར་ཞུ་བར་གྱུར། ཞེས་གསལ་བར་གསུངས་པའི་རྗེས་སུ་འབྲངས་པའོ། །འདིར་ལས་བུམ་མི་བྱེད་ན་བུམ་པ་གཅིག་གིས་ཀྱང་རུང་བར་མངོན་ནོ། །དེ་རྣམས་བུམ་པ་སྟ་གོན་ནོ། །དེ་ནས་སློབ་མ་རྣམས་ཁྲུས་བྱས། མཎྜལ་ཕུལ། ཐལ་མོ་སྦྱར་ནས། འདིའི་རྗེས་ཟློས་བྱེད་དེ། དགའ་ཆེན་ཁྱོད་བདག་སྟོན་པ་སྟེ། །སློབ་དཔོན་ཁྱོད་ནི་དགོངས་སུ་གསོལ། །བྱང་ཆུབ་ཆེན་པོའི་ཚུལ་སྟོན་པ། །མགོན་པོ་ཆེན་པོ་བདག་འཚལ་ལོ། །དམ་ཚིག་དེ་ཉིད་བདག་ལ་སྩོལ། །བྱང་ཆུབ་སེམས་ཀྱང་བདག་ལ་སྩོལ། །སངས་རྒྱས་ཆོས་དང་དགེ་འདུན་ཏེ། །སྐྱབས་གསུམ་དག་ཀྱང་བདག་ལ་སྩོལ། །ཐར་པ་ཆེན་པོའི་གྲོང་མཆོག་ཏུ། མགོན་པོས་བདག་ནི་གཞུག་
ཏུ་གསོལ། །སློབ་དཔོན་གྱི་ཐུགས་ཀ་ནས་འོད་ཟེར་འཕྲོས། སློབ་མ་རྣམས་ཞལ་དུ་བཅུག །ཐུགས་ཀའི་ཧཱུཾ་ཡིག་གི་འོད་ཟེར་འབར་བས་སྡིག་སྒྲིབ་ཐམས་ཅད་བསྲེགས། ཧེ་རུ་ཀ་ཞལ་གཅིག་ཕྱག་གཉིས་གྲི་ཐོད་འཛིན་པའི་རྣམ་པས་རྡོ་རྗེའི་ལམ་ནས་ལྷ་མོའི་པདྨར་ཕྱུང་ཤིང༌། ཧཱུཾ་ཞེས་གསང་བའི་མཁའ་ནས་སྤྲོས་ཏེ། ཕྱི་རོལ་དུ་པད་ཉི་ལ་འཁོད་པར་མོས། བུ་ཚུར་ཐེག་པ་ཆེན་པོ་ལ། ཁྱོད་ནི་ཚུལ་ཆེན་སྣོད་ཡིན་ཏེ། །གསང་སྔགས་སྤྱོད་ཚུལ་ཆོ་ག་ནི། ཁྱོད་ལ་ཡང་དག་བཤད་པར་བྱ། །རྫོགས་པའི་སངས་རྒྱས་གང་འདས་དང༌། །དེ་བཞིན་གང་དག་མ་བྱོན་དང༌། །ད་ལྟར་བྱུང་བའི་རྫོགས་སངས་རྒྱས། །འགྲོ་ལ་ཕན་ཕྱིར་གང་བཞུགས་པ། །དེ་དག་ཀུན་གྱིས་གསང་སྔགས་ཀྱི། །ཆོ་ག་བཟང་པོ་འདི་མཁྱེན་ནས། །དཔའ་བོས་བྱང་ཆུབ་ཤིང་དྲུང་དུ། །ཐམས་ཅད་མཁྱེན་པ་ཚད་མེད་བརྙེས། །གསང་སྔགས་སྤྱོད་པ་མཉམ་མེད་དེ། །སྐྱོབ་པ་དཔལ་ལྡན་ཧེ་རུ་ཀས། །བདུད་སྡེ་ཤིན་ཏུ་མི་ཟད་པ། །དཔུང་ཆེན་དག་ཀྱང་དེ་ཡིས་བཅོམ། །དེ་བས་ཀུན་མཁྱེན་ཐོབ་བྱའི་ཕྱིར། །བུ་ཡིས་བློ་གྲོས་འདི་གྱིས་ཤིག །གོང་ནས་གོང་མའི་སྡོམ་པ་ནི། །བུ་ཁྱོད་ཀྱིས་ནི་བཟུང་བྱ་སྟེ། །གྲོལ་བའི་རྒྱུ་ནི་དེ་ལས་གཞན། །ཐབས་ནི་ཅི་ཡང་ཡོད་མ་ཡིན། །ཞེས་སློབ་དཔོན་གྱིས་
བརྗོད། དེ་ནས་སློབ་མས་རྒྱུན་བཤགས་ལན་གསུམ་བྱ་སྟེ། བདག་གིས་སྡིག་པ་བགྱིས་པ་དང༌། །བགྱིད་དུ་སྩལ་དང་ཡི་རང་དང༌། །སངས་རྒྱས་སྤྱན་སྔར་མཆིས་ནས་ནི། །མ་ལུས་སོ་སོར་བཤགས་པར་བགྱི། །སངས་རྒྱས་བྱང་ཆུབ་སེམས་དཔའ་དང༌། །རང་རྒྱལ་དགྲ་བཅོམ་འགྲོ་རྣམས་ཀྱི། །བསྒོམ་དང་བཟླས་བརྗོད་བསོད་ནམས་དང༌། །ཚོགས་དག་ལ་ནི་ཡི་རང་ངོ༌། །སངས་རྒྱས་ཆོས་དང་དགེ་འདུན་ལ། །རྟག་ཏུ་བདག་ནི་སྐྱབས་སུ་མཆི། །སངས་རྒྱས་ཐོད་པ་མཁའ་འགྲོ་མ། །འཁོར་ལོ་གསུམ་གྱི་བདག་ཉིད་ཅན། ཀུན་ལ་རྟག་ཏུ་སྐྱབས་སུ་མཆི། །དཔའ་བོ་དཔའ་མོ་དབང་ལྷ་མོ། །བྱང་ཆུབ་སེམས་དཔའི་བདག་ཉིད་ཆེ། ཁྱད་པར་དུ་ཡང་སློབ་དཔོན་ལ། །རྟག་ཏུ་བདག་ནི་སྐྱབས་སུ་མཆི། །དཔལ་ལྡན་ཁྲག་འཐུང་དཔའ་བོ་དང༌། །རྣལ་འབྱོར་མ་དང་སྣང་མཛད་སོགས། །བྱང་ཆུབ་སེམས་དཔའ་དཔག་མེད་སོགས། །ཐམས་ཅད་བདག་ལ་དགོངས་སུ་གསོལ། །ཆེ་གེ་དུས་འདི་ནས་བཟུང་སྟེ། །ཇི་སྲིད་གཉིས་མེད་ལ་གནས་པར། །དེ་ཡི་ཚངས་སྤྱོད་གཉིས་མེད་པ། །བྱང་ཆུབ་མཆོག་སེམས་བསྐྱེད་པར་བགྱི། །བདག་གི་དགེ་བའི་ལས་རྣམས་ཀྱིས། །སངས་རྒྱས་མྱུར་དུ་བསྒྲུབས་བྱས་ཏེ། །སེམས་ཅན་འཁོར་བའི་རྒྱ་མཚོ་ལས། །བླ་མེད་གནས་སུ་བསྒྲལ་བར་བགྱི། །སློབ་མ་སྐད་ཅིག་གིས་ཧེ་རུ་ཀར་བསྐྱེད་པའི་གནས་གསུམ་
དུ་དྲིའི་ཐིག་ལེ་དང༌། ཨོཾ་ཨཱཿཧཱུཾ་ལས་འཁོར་ལོ་དང༌། པདྨ་དང་རྡོ་རྗེ་རྣམས་ཡིག་འབྲིས་མཚན་པ་ལས་འོད་འཕྲོས་པས། སངས་རྒྱས་རྣམས་ཀྱི་སྐུ་གསུང་ཐུགས་ཀྱི་ནུས་པ་བཀུག་ནས་བསྟིམས་ལ། སྤྱི་བོར་མེ་ཏོག །མདུན་དུ་སྤོས། སྤྱན་ལ་མར་མེ། ཐུགས་ཀར་དྲི། ཞལ་དུ་ལྷ་བཤོས། སྙན་ལ་རོལ་མོ་རྣམས་འབུལ་ལོ། །དེ་ནས་ཨུ་དུམ་ཝ་རའམ། ཨ་ཤྭཏྠ་ལ་སོགས་པའི་སོ་ཤིང་སོར་བཅུ་གཉིས་པ། རྩེ་མོ་མེ་ཏོག་ལྡན་པ་ལ། ཨོཾ་ཧཱུཾ་ཧེ་བྷ་ག་ཝ་ཏི་མུ་ཁཾ་པ་རི་ཤུདྡྷཾ་ཀུ་རུ་སྭཱཧཱ། ཞེས་ལན་བདུན་བསྔགས་པ་ལག་ཏུ་བྱིན་ནས་ཤར་རམ་བྱང་དུ་ཁ་བལྟས་ཏེ། དོར་བ་ལས་དངོས་གྲུབ་ལུང་བསྟན། དེ་ནས། ཨོཾ་ཧྲིཿབི་ཤུདྡྷ་དྷརྨ་སརྦ་པཱ་པཾ་ནི་ཙ་ཨ་སྱ་བི་ཤོ་དྷ་ཡ་སརྦ་བི་ཀལྤཱན་ཨ་པ་ན་ཡ་ཧཱུཾ། ཞེས་པས་ཁྱོར་ཆུ་བླུད་ནས། གཙོ་བོའི་སྙིང་པོ་བཟླས་པའི་སྲད་བུ་དམར་པོ་ལ་མདུད་པ་གསུམ་དང་ལྡན་པས། སྐྱེས་པའི་དཔུང་པ་གཡོན། བུད་མེད་ཀྱི་གཡས། བྱིས་པའི་མགུལ་དུ་བཅིངས་པ་ལ། འབྲུ་གསུམ་བརྗོད་ནས། ཀུ་ཤ་བྱིན་གྱིས་བརླབས་ཏེ་སྔས་དང་སྟན་དུ་སྦྱིན་པར་བྱའོ། །དེ་ནས། འཇིག་རྟེན་དུ་ནི་ཀུན་མཁྱེན་དག །ཨུ་དུམ་ཝ་རའི་མེ་ཏོག་ལྟར། །བརྒྱ་ལམ་ན་ནི་རེས་འགའ་ཞིག །འབྱུང་འགྱུར་ཡང་ནི་མི་འབྱུང་ངོ༌། །གསང་སྔགས་སྤྱོད་པའི་ཚུལ་འདི་ནི། །དེ་བས་ཀྱང་ནི་རྙེད་དཀའ་སྟེ། །གང་གིས་མཉམ་མེད་སེམས་ཅན་དོན། །བླ་མེད་པར་བྱེད་ནུས་པ་ཡིན། །གཉིས་མེད་ཟབ་མོའི་སྤྱོད་ཡུལ་འདིས། །སེམས་ཅན་
སངས་རྒྱས་ཐོབ་བྱེད་པའོ། །དང་པོ་བསྐལ་པ་གྲངས་མེད་ནས། །བསགས་པའི་སྡིག་པ་གང་དང་གང༌། །དེ་ཀུན་ཟད་པར་འགྱུར་བ་ནི། །ཟབ་མོའི་དཀྱིལ་འཁོར་མཐོང་བས་སོ། །ཞེས་བརྗོད་ཅིང་དོན་ཡང་བཤད་ནས། ཀུ་ཤའི་སྟན་ལ་སེང་གེའི་ཉལ་སྟབས་ཀྱིས་ཉོལ་ལ་རྨི་ལམ་རྟོག་ཤིག །ནངས་པར་དཀྱིལ་འཁོར་ཆེན་པོ་མཐོང་བར་འགྱུར་རོ། །ཞེས་བསྒོ་བར་བྱའོ། །དེ་ནས་ཐུན་མོང་མ་ཡིན་པའི་བསྲུང་བ་ནི། སློབ་དཔོན་གྱི་ལག་པ་གཡོན་པ་དྲིས་བྱུགས་ཤིང༌། མེ་ཏོག་གི་བཀྲ་ཤིས་པར་ཟླ་བའི་དཀྱིལ་འཁོར་བསྒོམས་ལ། སངས་རྒྱས་ཐམས་ཅད་སྤྱན་དྲངས་ཏེ་བྱང་སེམས་སུ་ཞུ་བ་ཟླ་བ་ལ་ཐིམ། དེ་བཞིན་དུ་མགྲིན་པར་ཡང་གསལ་བཏབ་ནས། སློབ་མའི་སྤྱི་བོར་ལག་པ་བཞག་ལ། ཨོཾ་བུདྡྷ་ཨ་ཏ་ཆེ་གེ་མོའི་ཀཱ་ཡ་ཨདྷི་ཏིཥྛ་ཡནྟུ་མ་ཙ་ལ་མ་ཙ་ལ། ཏིཥྛ་ཏིཥྛ། ཧ་ར་ཧ་ར། བི་དྷ་ར་བི་དྷ་ར། དྲ་བ་དྲ་བ། བྷོ་བྷ་ག་ཝན་སརྦ་བུདྡྷ་ཀ་པཱ་ལ་བཛྲ་སྱ་ཡ་ཀ་ཏཾ་མ་ལ་ཀཱ་ཡ་ཤཱི་གྷྲཾ་ཀུ་རུ་ཀུ་རུ་ཧཱུཾ་ཧཱུཾཾ་ཧཱ་ཧཱ། ཞེས་ལན་བདུན་བཟླས། སངས་རྒྱས་ཐམས་ཅད་འདུས་པའི་ངོ་བོ་ཟླ་བ་ཞུ་ནས་སློབ་མའི་ལུས་ལ་ཐིམ་པར་བསམ་མོ། །དེ་རྣམས་སློབ་མ་སྟ་གོན་ནོ། །དེ་ནས་དཀྱིལ་འཁོར་གྱི་ཉི་མ་ལ། ནངས་པར་སྔར་ལངས་ཏེ་ཧེ་རུ་ཀའི་ང་རྒྱལ་དང་ལྡན་པས། ཐོད་པའི་ནང་དུ་བཞག་པའི་ཐིག་སྐུད་ལྔ་སོ་སོའི་ས་བོན་ལས་རྒྱལ་བ་རིགས་ལྔར་བསྐྱེད། མཆོད་བསྟོད་བྱས་ཏེ་
བཞུ་ནས། ཐིག་ཆེན་བརྒྱད་གདབ་པའི་དུས་སུ། འཇིག་རྟེན་ཁམས་ནི་མ་ལུས་པའི། །སངས་རྒྱས་ལ་སོགས་འགྲོ་བའི་དོན། ཁྱེད་ཀྱི་དུས་ནི་འདི་ཡིན་ནོ། །ཞེས་བརྗོད། ཡེ་ཐིག་དང་ལས་ཐིག་མཐའ་དག་ལེགས་པར་བཏབ་ལ། རྡུལ་ཚོན་ཁ་དོག་སྣ་ལྔ་དང༌། ཐིག་སྐུད་བཞིན་བྱིན་གྱིས་བརླབས་ནས། འདི་ནི་ཆོས་དབྱིངས་དག་པ་སྟེ། །སེམས་ཅན་ཁམས་ནི་རབ་སྒྲོལ་བྱེད། །སངས་རྒྱས་ཐོད་པ་རྒྱལ་ཆེན་པོ། །དེ་བཞིན་གཤེགས་པ་ཀུན་ཀྱི་གནས། །ཉེས་པ་ཀུན་ལས་རྣམ་གྲོལ་བ། །ཚོན་གྱི་ལས་ལ་ཡང་དག་འཇུག །ཅེས་བརྗོད་ཅིང་སློབ་དཔོན་གྱི་ཚོན་ཐོག་མར་དབྱེའོ། །ཐིག་ཚོན་བྱིན་བརླབ་ཀྱི་ལག་ལེན་ནི། བདེ་མཆོག་སོགས་སྤྱི་དང་འདྲ་ལ། ཐིག་ཚོན་གྱི་མཚན་ཉིད་ཀྱང་ལོགས་སུ་འཆད་པར་འགྱུར་བས། དེ་དང་དེ་དག་ལས་ཤེས་པར་འགྱུར་བའི་ཕྱིར། འདི་རྒྱས་པར་མ་སྨོས་སོ། །དེ་ལྟར་ན་དཀྱིལ་འཁོར་ཞག་གི་ཆོ་གའོ། །དེ་ནས་རྒྱན་དང་མཆོད་པ་རྣམས་ཀྱང་བཀྲམ་པར་བྱ་སྟེ། རྣམ་རྒྱལ་བུམ་པ་ལྷོར་སྒོ་དང༌། ལས་བུམ་བྱང་སྒོར་འགོད་པར་བཞེད་དེ། དཀྱིལ་འཁོར་གྱི་ཞལ་འཇིག་རྟེན་པའི་ལྷ་ལ་བསྟན་པའི་དབང་དུ་བྱས་པའོ། །རྒྱུད་ལས། བ་དན་རྣམ་པ་བརྒྱད་ཀྱིས་བརྒྱན། །ཞེས་པ་ལྟར། ཕྱོགས་ཀྱི་མདོག་ཅན་གྱི་བ་དན་བརྒྱད་ཀྱང་གཙུགས། གཞན་སྤྱི་དང་འདྲའོ། །སྔོན་འགྲོ་གཏོར་མ་དང༌། གནས་ཡོ་བྱིན་བརླབ་སྔོན་དུ་བཏང༌། སྐྱབས་འགྲོ་ནས་བདུད་རྩི་མྱང་བའི་བར་སྒྲུབ་ཐབས་ནས་འབྱུང་བར་ལྟར་
རྫོགས་པར་སྒོམ། སྤྲོ་ན་བགེགས་སྦྱང་བ་དང༌། ཏིལ་སྦྱང་དང༌། ཁྲུས་གསོལ་བྱ། བྲིས་པའི་དཀྱིལ་འཁོར། ཨ་མྲྀ་ཏས་བསངས། སྭབྷ་ཝས་སྦྱངས། སྟོང་པའི་ངང་ལས་སྔོན་གྱི་སྨོན་ལམ་གྱི༴ ནས། ངོ་མཚར་བར་བྱེད་པའོ། །ཞེས་པའི་བར་གྱི་གཞལ་ཡས་ཁང་གདན་བཅས་བསྐྱེད། གཞལ་ཡས་ཁང་གི་དབུས་ཀྱི། ཞེས་པ་ནས། ཆོས་ཀྱི་དབྱིངས་ཀྱི་ཡེ་ཤེས་སོ། །དེ་ཡང་དབུས་ཀྱི་གདན་གྱི་སྟེང་དུ། བཅོམ་ལྡན་འདས་དཔལ་ཧེ་རུ་ཀ་སྐུ་མདོག་སྔོན་པོ༴ ནས། རྩེད་འཇོའི་རོལ་པ་ཅན་ནོ། །དཔལ་ཧེ་རུ་ཀའི་ཞལ་ནས་ཧཱུཾ་ཞེས་པའི་སྒྲ་བསྒྲགས་པས། རྣལ་འབྱོར་མ་ཉི་ཤུ་རྩ་བཞི་ཡང་སྐད་ཅིག་གིས་གྲུབ་པར་གྱུར་སྟེ། ཐུགས་ཀྱི་འཁོར་ལོའི༴ ནས། ཟླ་བའི་རྒྱུ་འབབ་པའོ། །ཞེས་བརྗོད་ཅིང་སྒོམ་སྟེ་དམ་ཚིག་པ་བསྐྱེད་པའོ། །འདི་སྐབས་རིམ་པ་གསལ་བ་ལས། གཙོ་བོ་ཧཱུཾ་ལས་སྐད་ཅིག་གིས་བསྐྱེད་པར་བཤད་པ་ནི། ཟོར་ཡང་བར་དགོངས་པ་སྟེ་བསྡུ་ན་དེ་ལྟར་རུང་ལ། ཡབ་རྐྱང་དུ་བཤད་པ་ནི་ཅུང་ཟད་མི་ལེགས་ཤིང༌། ཡང་ན་གཙོ་འཁོར་དུས་གཅིག་ཏུ་བསྐྱེད་ཀྱང་ཤིན་ཏུ་ལེགས་སོ། །བདག་སྐྱེད་ཀྱི་བསྒོམ་པའི་དཀྱིལ་འཁོར་དང༌། གཟུགས་བརྙན་གྱི་དཀྱིལ་འཁོར་དབྱེར་མེད་དུ་གྱུར། རང་གི་ཐུགས་ཀ་ནས་སྟ་གོན་གྱི་དཀྱིལ་འཁོར་སྤྲོས་ཏེ་ནམ་མཁར་བཞུགས། ཨརྒྷཾ༴ ནས ཤཔྟའི་བར་གྱིས་མཆོད། རྡོ་རྗེ་དང་ནི༴ སོགས་ཀྱིས་བསྟོད།
ཛཿཧཱུཾ་བཾ་ཧོཿ ཞེས་དམ་ཚིག་གི་དཀྱིལ་འཁོར་དང་གཉིས་སུ་མེད་པར་བསྟིམ། བཅོམ་ལྡན་འདས་ཀྱི་ཐུགས་ཀར་ཨོཾ༴ ནས། དོན་ཡོད་གྲུབ་པས་དབུ་བརྒྱན། རང་ཉིད་དཀྱིལ་འཁོར་གྱི་གཙོ་བོའི་ཐུགས་ཀ་ནས་སྤྲུལ་པའི་ལས་ཀྱི་ཧེ་རུ་ཀ་ཕྱག་གཉིས་པར་གྱུར། བསྒྲུབ་མཆོད་ཞག་སྦྲེལ་མ་བྱེད་པའི་དངོས་གཞིའི་ཉི་མ་རྟིང་མ་རྣམས་ལ། སྐབས་འདིར་སྟ་གོན་གྱི་སྐབས་སུ་བཤད་པ་བཞིན་བུམ་བསྐྱེད་བཟླས་པའི་བར་དུ་བྱའོ། །མཆོད་པ་བྱིན་རླབས་བླ་མེད་སྤྱི་དང་མཐུན་པར་བྱས། དཀྱིལ་འཁོར་དང་བུམ་པའི་ལྷ་ལ་དུས་གཅིག་ཏུ་མཆོད་པར་བསམ་ལ་མཆོད་པ་འབུལ་བ་ནི། བསྡུ་ན་བདག་བསྐྱེད་དམ་སྟ་གོན་གྱི་སྐབས་སུ་བཤད་པ་ལྟར་གྱིས་ཆོག་ལ། ཅུང་ཟད་སྤྲོས་པ་ལ་མོས་ན། དྭངས་ཤིང་དྲི་མེད་ཡིད་འོང་བའི། །སྔགས་ཀྱི་ཡོན་ཆབ་མཆོག་འདི་དག །སོགས་དང༌། ཨོཾ་བུདྡྷ་ཀ་པཱ་ལ། ཛ་ཧཱུཾ་ཁཾ་རཾ་ཨ། དེ་བཞིན་དུ་སྦྱར་ཏེ། ཞབས་བསིལ་དང༌། པཱ་དྱཾ། འཐོར་ཐུང་དང་པྲོཀྵ་ཎཾ་སྟེ་ཆུ་གསུམ་འབུལ། ཨོཾ་ལྷ་ཡྀ་མེ་ཏོག་ཤིན་ཏུ་དམར་སོགས་དང༌། ཨོཾ་བུདྡྷ་ཀ་པཱ་ལི་ནི་མ་ཊ༴ སོགས། ཨོཾ་ཙནྡན་ག་བུར༴ སོགས། ཨོཾ་བུདྡྷ་ཀ་པཱ་ལི་ནི་ཏ་ཊ༴ སོགས་ཨོཾ་མར་མེའི་འོད་ཟེར་འབར་བ༴ སོགས་ཨོཾ་བུདྡྷ་ཀཱ་པཱ་ལི་ནི་གྲྀཧྞ༴ སོགས། སྣ་ཚོགས་ལྷ་ཡི་དྲི་ཞིམ་པ་སོགས་དང༌།（《ཛཾ》+ཨོཾ་）མཧཱ་ཀ་པཱ་ལི༴ སོགས་ཨོཾ་ཁ་དོག་དྲི་དང་༴ སོགས་དང༌། ཨོཾ་བུདྡྷ་ཀ་པཱ་ལི་ནི་གྲྀཧྞ་ནས། ཁཱ་ཁཱ་ཧཱུཾ།
ཨོཾ་པ་ཊ་པ་ཊ་ཧ་དང་༴ སོགས་དང༌། ཨོཾ་བཛྲ་ཤཔྟ་ཨཱཿཧཱུཾ། གིས་རོལ་མོ་ཕུལ། གོས་ཟུང་འབུལ་བ་ཡང་སྤྱི་དང་འདྲ་བ་ལས། སྔགས་ནི། ཨོཾ་མཧཱ་ཀ་པཱ་ལ༴ བཛྲ་དྷརྨ༴ སོགས་སོ། །གཞན་ཡང་སྤྲོ་ན་ལྷ་མོ་བཅུ་དྲུག་དང༌། རིན་ཆེན་བདུན་དང༌། འདོད་ཡོད་ལྔ་ལ་སོགས་པས་མཆོད། དེ་ནས་བསྟོད་པ་ནི། རྡོ་རྗེ་དང་ནི༴ སོགས་དང༌། ཧཱུཾ་ཆོས་དབྱིངས་རྣམ་དག་དབྱིངས་ལས་བྱུང༌། །གདུག་པ་འདུལ་མཛད་ཁྲོ་བོའི་སྐུ། །མི་བཟད་ཧ་ཧར་བཞད་པ་ཡི། ཁྲག་འཐུང་སྐུ་ལ་ཕྱག་འཚལ་འདུད། །བདུད་ཀྱི་དཀྱིལ་འཁོར་ཕམ་མཛད་ཅིང༌། །རྡོ་རྗེ་ཧཱུཾ་མཛད་ཡི་གེ་ཧཱུཾ། །ཆ་ལུགས་དུ་མ་རབ་ཏུ་འཇིགས། །འཇིགས་བྱེད་འཇིགས་པར་མཛད་ལ་འདུད། །སེང་གེ་འཕྲོག་བྱེད་ཚངས་པའི་གཙོས། །གང་གི་ཞབས་ལ་ཕྱག་འཚལ་བ། ཁམས་གསུམ་དབང་ཕྱུག་སྲིད་གསུམ་འཇོམས། །དཔའ་བོའི་དབང་ཕྱུག་ཁྱོད་ལ་འདུད། །གཉུག་མའི་དགའ་མ་ལྷན་ཅིག་སྐྱེས། །བདག་མེད་དོན་གྱི་ཡེ་ཤེས་དངོས། །སེམས་ཅན་ཀུན་ལ་ཕན་དགྱེས་པ། །སྣ་ཚོགས་བདེ་མ་ལ་ཕྱག་འཚལ། །བསམ་གྱིས་མི་ཁྱབ་པ་ཡི་ཐུགས། །ཤེས་བྱ་ཀུན་ལ་རབ་གཡོ་བ། །མཁའ་སྤྱོད་རྣལ་འབྱོར་སྐུར་སྟོན་པ། །ཕྲེང་བཟང་མ་སོགས་ལ་ཕྱག་འཚལ། །ཟག་མེད་བདེ་བ་བཅུད་ཀྱི་ལེན། །ཡེ་ཤེས་བདུད་རྩིས་གང་བ་ཡིས། །ཐོད་པ་བཞི་པོ་རབ་སྤྲུལ་བ། །མཆོད་པའི་ལྷ་ལ་ཕྱག་འཚལ་
འདུད། །གང་གི་གསུང་དབྱངས་མི་ཟད་པ། །འགྲོ་ཀུན་བསམ་པ་ཇི་བཞིན་འཇུག །ས་སྤྱོད་རྣལ་འབྱོར་མ་ཡི་ཚུལ། །དགེ་བའི་སྐེ་རགས་ཅན་སོགས་འདུད། །ཇི་ལྟ་ཇི་ལྟར་འདུལ་བའི་སྐུ། །སྣ་ཚོགས་སྤྲུལ་པ་ཐབས་ཀྱི་དོན། །ས་འོག་སྤྱོད་པའི་རྣལ་འབྱོར་མ། །སྒྲོལ་བྱེད་མ་སོགས་ཕྱག་འཚལ་འདུད། །ཞི་དང་རྒྱས་དང་དབང་དགུག་དང༌། །མངོན་སྤྱོད་འཕྲིན་ལས་སྤྱོད་མཛད་ཅིང༌། །འགྲོ་བའི་དོན་ལ་གཞོལ་བ་ཡི། །སྒོ་སྐྱོང་རྣམས་ལ་ཕྱག་འཚལ་ལོ། །རྒྱལ་བའི་ཁང་བཟང་ཉམས་དགའ་བ། །ཨེ་ཡིག་བྷ་ག་ཆོས་ཀྱི་དབྱིངས། །རྒྱན་རྣམས་ཀུན་ཀྱིས་རབ་བརྒྱན་པ། །གཞལ་མེད་ཁང་ལ་གུས་ཕྱག་འཚལ། །སྣ་ཚོགས་རྡོ་རྗེ་པདྨ་ཉི། །དུར་ཁྲོད་ཆེན་པོའི་རབ་བསྐོར་ཞིང༌། །རྡོ་རྗེའི་གུར་བཅིངས་ལ་སོགས་པ། །དེ་དག་རྣམས་ལ་ཕྱག་འཚལ་བསྟོད། །ཅེས་པས་བསྟོད་པར་བྱའོ། །དེ་ནས་རོལ་མོའི་སྒྲ་དང་བཅས་ཏེ། སྙིང་གའི་ཧཱུཾ་ལས་ལྷ་མོ་བརྒྱད་ཅིག་ཅར་སྤྲུལ༴ ཞེས་པ་ནས། འདི་དག་གིས་ནི་མཆོད་པར་བྱ། །ཞེས་པའི་བར་བརྗོད་ལ། ཡབ་ཡུམ་སྙོམས་པར་ཞུགས་པའི༴ ཞེས་པ་ནས། ཨོཾ་ཨཱཿཧཱུཾ། ལན་གསུམ་བར་སྒྲུབ་ཐབས་ལྟར་ནང་གི་བདུད་རྩི་མྱང་བ་དང༌། ཕྱིའི་བདུད་རྩི་བྱིན་རླབས་རྣམས་བྱ། དེ་ནས་ནང་མཆོད་འབུལ་བ་ནི། ཧེ་རུ་ཀ་དཔལ་ཡེ་ཤེས་མཁའ་འགྲོ་མ། །བློ་གྲོས་རིན་ཆེན་གྲུབ་ཐོབ་ས་ར་ཧ། །ཀླུ་
སྒྲུབ་ཤཱ་ཝཱ་རི་དང་མཻ་ཏྲི་པ། །མར་པ་ལོ་ཙཱ་ཚུལ་སྟོན་དབང་ངེ་དང༌། །རོ་མཉམ་རྡོ་རྗེ་རྒྱ་སྟོན་ཡོན་ཏན་གྲགས། ཁམ་པ་ཤཀ་རྡོར་བར་བཏང་ཆོས་ཀྱི་གྲགས། །རྒན་ལྷས་པ་དང་ཆོས་རྗེ་བསོད་ནམས་འཕེལ། །བག་སྟོན་གཞོན་ཚུལ་མཁས་གྲུབ་བྲག་དཀར་བ། ཁྱུད་ལྷས་པ་དང་གྲུབ་ཆེན་ཀུན་བློའི་ཞབས། །བླ་ཆེན་གྲགས་རིན་ནམ་མཁའ་ཚུལ་ཁྲིམས་དང༌། །ཟླ་བ་རྒྱལ་མཚན་ཆོས་ཀྱི་སེང་གེ་དང༌། །ནམ་མཁའ་རིན་ཆེན་རྩ་བའི་བླ་མ་སྟེ། །བརྒྱུད་ལྡན་བླ་མ་ཀུན་ལ་མཆོད་པ་འབུལ། ཨོཾ་ཨཱཿཧཱུཾ། གཙོ་བོའི་སྙིང་པོའི་མཐར་འབྲུ་གསུམ་བཏགས་པ། ལན་བདུན་གྱིས་དཀྱིལ་འཁོར་ལྷ་ཚོགས་རྣམས་ལ་འབུལ། མཆོད་པའི་མགྲོན་རྣམས་ལ་འབུལ་ཚུལ་ཡང་བདེ་དགྱེས་སོགས་དང་འདྲ། མཐར་བདག་ཉིད་ཀྱི་བདུད་རྩི་མྱངས་ནས། ཨོཾ་ཨ་མྲྀ་ཏ་སྭཱ་ད་ན་བཛྲ་སྭ་བྷ་ཝ་ཨཏྨ་ཀོ྅ཧཾ། དེའི་རྗེས་སུ་འཇིག་རྟེན་དང་འཇིག་རྟེན་ལས་འདས་པའི་གཏོར་མ་འབུལ་ཏེ། སྟ་གོན་གྱིས་སྐབས་སུ་བཤད་པ་བཞིན་ནོ། །དེ་དག་ནི་དཀྱིལ་འཁོར་སྒྲུབ་ཅིང་མཆོད་པའི་ཆོ་གའོ། །དེ་ནས་ཁྲུས་དང་མཎྜལ་སྔོན་དུ་འགྲོ་བས། ཨཱཿཁཾ་ཝཱི་ར་ཧཱུཾ། གྱིས་མིག་དར་བཅིངས་ཤིང་མེ་ཏོག་བཟུང༌། སངས་རྒྱས་ཀུན་གྱི་རང་བཞིན་སྐུ། །སློབ་དཔོན་ལ་ནི་བདག་སྐྱབས་མཆི། །དཔའ་བོ་རྣལ་འབྱོར་མ་འཁོར་ལོ། །རྣལ་འབྱོར་གནས་ལ་བདག་ཕྱག་འཚལ། །ཐར་པ་ཆེན་པོའི་གྲོང་མཆོག་ཏུ། །མགོན་པོས་བདག་
ནི་གཞུག་ཏུ་གསོལ། །དོན་དམ་སྨྲ་བའི་སེང་གེ་རྣལ་འབྱོར་ཞེས་བྱ་བ། །ཉོན་མོངས་གཅོད་པའི་དོན་ལ་ཤིན་ཏུ་མཁས་གྱུར་པ། །སྲིད་པའི་ཉེས་བརྒྱ་སྐྱེད་རྩ་ཉོན་མོངས་ཆོམས་མཛོད་ལ། །རྣལ་འབྱོར་དོན་དམ་རྒྱལ་པོ་དེ་ཉིད་གྲུབ་པར་མཛོད། །ཅེས་ལན་གསུམ་གསོལ་བ་གདབ། ཀྱེ་ཁྱོད་སུ་ཡིན། ཞེས་དྲིས་པའི་ལན་དུ། བདག་ནི་རྒྱལ་བའི་སྲས་སོ། །དེ་ནས་དཀྱིལ་འཁོར་ལ་གསོལ་བ་གདབ་པ་ནི། དེ་བཞིན་གཤེགས་པ་ཀུན་གྱི་གནས། །ཧེ་རུ་ཀ་དཔལ་གྲོང་ཁྱེར་མཆོག །སྙིང་པོའི་དཀྱིལ་འཁོར་འདི་རུ་ནི། །བདག་གིས་སློབ་མ་གཞུག་པར་བགྱི། །ལན་གསུམ། ལྷས་གནང་བ་སྦྱིན་པར་མོས། ཛཿཧཱུཾ་བཾ་ཧོཿ ཡོལ་བའི་ནང་དུ་བཅུག་པར་མོས། ཨོཾ་ན་མ་སྟེ་ཧཱུཾ། ན་མོ་མེ་ཧཱུཾ། ན་མོ་ན་མཿཧཱུཾ། ཞེས་ཐུན་མོང་དུ་ཕྱག་བྱ། ཨོཾ་སརྦ་བཱི་ར་ཡོ་གི་ནཱི་པུ་ཛ་ཨུ་པ་སྠཱ་ན་ཡ་ཨཱཏྨ་ནཾ་ནི་ཏྱ་ཏ་ཡ་མི། སརྦ་ཏ་ཐཱ་ག་ཏ་ཝཱི་ར་ཡོ་གི་ནཱི་ཨཱཏྨ་སུ་མ་ལ་ཨ་དྷི་ཏིཥྛཱ་སྭ་མཾ། ཞེས་ཤར་སྒོ་དང༌། ཨོཾ་སརྦ་བཱི་ར་ཡོ་གི་ནཱི་པུ་ཛ་ཨ་བྷི་ཥེ་ཀ་ཡ་ཨཱཏྨ་ནཾ་ནིཪྱ་ཏ་ཡ་མི། སརྦ་ཏ་ཐཱ་ག་ཏ་ཝཱི་ར་ཡོ་གི་ནཱི་ཨཱཏྨ་ཀཱ་མ་ནི་ཨ་བྷི་ཥིཉྩནྟུ་མཾ། ཞེས་བྱང་སྒོ་དང༌། ཨོཾ་སརྦ་བཱི་ར་ཡོ་གི་ནཱི་པུ་ཛ་ཨ་པྲ་ཝརྟ་ནཱ་ཡ་ཨཱཏྨ་ནཾ་ནིཪྱ་ཏ་ཡ་མི། སརྦ་ཏ་ཐཱ་ག་ཏ་ཝཱི་ར་ཡོ་གི་ནཱི། ཨཱཏྨ་བྷི་མ་པྲ་ཝརྟ་ཡ་མཾ། ཞེས་ནུབ་སྒོ་དང༌། ཨོཾ་སརྦ་བཱི་ར་ཡོ་གི་ནཱི་པུ་ཛ་ཀརྨ་ཎེ་ཨཱཏྨ་ནཾ་ནིཪྱ་ཏ་ཡ་མི། སརྦ་ཏ་ཐཱ་ག་ཏ་ཝི་ར་ཝོ་གི་ནཱི་
ཨཱཏྨ་ཨཪྱ་གརྨ་ཀུ་རུ་མཾ། ཞེས་ལྷོ་ཕྱོགས་ནས་ཕྱག་འཚལ། སྐབས་འདིར་རིམ་པ་གསལ་བ་ལས། ཐལ་མོ་འགོད་པ་སྤྱི་དང་ཅུང་ཟད་མི་འདྲ་བ་བཤད་མོད་ཀྱང༌། སྤྱི་དང་མཐུན་པར་སྙིང་ག་སྤྱི་གཙུག་མགྲིན་པ་དཔྲལ་བ་རྣམས་སུ་རིམ་བཞིན་སྦྱར་རོ། །དེ་ནས་སྡོམ་པ་བསྒྲགས་པ་ནི། སངས་རྒྱས་ཆོས་དང་དགེ་འདུན་ཏེ། །དཀོན་མཆོག་གསུམ་ལ་སྐྱབས་སུ་སོང༌། །འདི་ནི་སངས་རྒྱས་རིགས་ཡིད་འོང༌། །སྡོམ་པ་བརྟན་པོར་གྱུར་བའོ། །རྡོ་རྗེ་དྲིལ་བུ་ཕྱག་རྒྱ་ཡང༌། །བློ་ཆེན་ཁྱོད་ཀྱི་བཟུང་བར་བྱ། །བྱང་ཆུབ་སེམས་གང་དེ་རྡོ་རྗེ། །ཤེས་རབ་དྲིལ་བུ་ཞེས་བསྒྲགས་སོ། །སློབ་དཔོན་ཁྱོད་ཀྱིས་བཟུང་བར་བྱ། །བླ་མ་སངས་རྒྱས་ཀུན་དང་མཉམ། །འདི་ནི་རྡོ་རྗེའི་རིགས་དག་པའི། །དམ་ཚིག་སྡོམ་པ་ཡིན་པར་བཤད། རིན་ཆེན་རིགས་ལ་རྟག་ཏུ་ནི། །ཉིན་རེ་བཞིན་ཡང་ལན་དྲུག་ཏུ། །ཆོས་དང་ཟང་ཟིང་མི་འཇིགས་བྱམས། །སྦྱིན་པ་རྣམ་བཞི་རྟག་ཏུ་སྦྱིན། །ཕྱི་ནང་གསང་བ་ཐེག་པ་གསུམ། །དམ་པའི་ཆོས་ནི་མ་ལུས་བཟུང༌། །འདི་ནི་པདྨའི་རིགས་དག་པའི། །དམ་ཚིག་ཡིད་དུ་འོང་བའོ། །ལས་ཀྱི་རིགས་མཆོག་ཆེན་པོ་ལ། །སྡོམ་པ་ཐམས་ཅད་ལྡན་པར་ནི། །ཡང་དག་ཉིད་དུ་བཟུང་བར་བགྱི། །མཆོད་པའི་ལས་ཀྱང་ཅི་ནུས་བགྱི། །དེ་ནས་སྡོམ་པ་བཟུང་བ་ནི། གཙོ་བོས་ཇི་ལྟར་བཀའ་སྩལ་པ། །དེ་ལྟར་བདག་གིས་བགྱིད་པར་འཚལ། །ལན་གསུམ་མོ། །རང་གི་སྙིང་གར་ཟླ་བའི་སྟེང་དུ་རྡོ་རྗེ་རྩེ་ལྔ་
པ་གནས་པའོ། །མེ་ཏོག་ཕྲེང་བ་དང་བཅས་པའི་རྡོ་རྗེ་ལྔ་པ་སྙིང་གར་བཟུང་ལ། ཨོཾ་སརྦ་ཡོ་ག་ཙིཏྟ་ཨུ་པ་ཏ་ཡ་མི། ཞེས་སེམས་བསྐྱེད། རྡོ་རྗེ་སྙིང་གར་གཏད། ཨོཾ་སུ་ར་ཏེ་ས་མ་ཡ་སྟཾ་ཧོཿསིདྡྷ་བཛྲ་ཡ་ཐ་སུ་ཁཾ། ཞེས་སོ། །ཨོཾ་བཛྲ་ཀུཎྜ་ལི་བཛྲ་ཧཱུཾ་ཕཊ། ལས་བུམ་གྱི་ཆུས་བསངས། ཨཱ་ཁཾ་ཝཱི་ར་ཧཱུཾ། དཀྱིལ་འཁོར་གྱི་ནང་དུ་ཞུགས་པར་མོས། །དེ་ནས་དམ་ལ་བཞག་པ་ནི། དེང་ཁྱོད་དཔའ་བོ་དང་རྣལ་འབྱོར་མ་ཐམས་ཅད་ཀྱི་རིགས་སུ་ཞུགས་ཀྱི། ངས་ཁྱོད་ལ་དཔལ་ཧེ་རུ་ཀའི་ཡེ་ཤེས་བསྐྱེད་པར་བྱ་སྟེ། ཡེ་ཤེས་གང་གིས་ཁྱོད་དེ་བཞིན་གཤེགས་པ་ཐམས་ཅད་དཔའ་བོ་དང་རྣལ་འབྱོར་མ་ཐམས་ཅད་ཀྱི་དངོས་གྲུབ་ཀྱང་ཐོབ་པར་འགྱུར་ན། དངོས་གྲུབ་གཞན་རྣམས་ལྟ་ཅི་ཞིག་སྨོས། ཁྱོད་ཀྱིས་དཀྱིལ་འཁོར་མ་མཐོང་བ་རྣམས་ཀྱི་མདུན་དུ་སྨྲ་བར་མི་བྱ་སྟེ། དམ་ཚིག་ཉམས་པར་འགྱུར་ཏ་རེ། ཞེས་དང༌། ཧེ་རུ་ཀ་དཔལ་དེང་ཁྱོད་ཀྱི། །སྙིང་ལ་ཡང་དག་ཞུགས་པར་གྱུར། །གལ་ཏེ་ཚུལ་འདི་སྨྲས་གྱུར་ན། །དེ་མ་ཐག་ཏུ་དྲལ་ཏེ་གཤེགས། །ཞེས་དང༌། མནའ་ཆུ་འཐུང་ཞིང༌། འདི་ནི་ཁྱོད་ཀྱི་དམྱལ་བའི་ཆུ། །དམ་ཚིག་འདས་ན་སྲེག་པར་བྱེད། །དམ་ཚིག་བསྲུང་ན་དངོས་གྲུབ་ནི། །རྡོ་རྗེ་བདུད་རྩིའི་ཆུ་འདིས་ཐོབ། ཨོཾ་པཉྩ་ཨ་མྲྀ་ཏ་ཨུ་ད་ཀ་ཋ་ཋ་ཋ་ཧཱུཾ། ཞེས་དང༌། དེ་ནས་བརྩམས་ཏེ་ཁྱོད་ཀྱི་དཔལ་ཧེ་རུ་ཀ་ང་ཡིན་གྱི། གང་ངས་འདི་བྱོས་ཤིག་ཅེས་བསྒོ་བ་དེ་བྱ་དགོས་སོ།
ཁྱེད་ཀྱི་ང་ལ་བརྙས་པར་ཡང་མ་བྱེད་ཅིག ཁྱོད་མི་བདེ་བ་མ་སྤངས་པར་དུས་བྱས་ནས་དམྱལ་བར་ལྟུང་བ་འགྱུར་ཏ་རེ། ཞེས་པའོ། །དེ་ནས་ཡེ་ཤེས་དབབ་པ་ནི། དཔའ་བོ་དང་རྣལ་འབྱོར་མ་ཐམས་ཅད་ཀྱིས་བྱིན་གྱིས་རློབས་ཤིག །དཔལ་ཧེ་རུ་ཀ་དང་རྣལ་འབྱོར་མ་ཐམས་ཅད་ཀྱི་ཡེ་ཤེས་བདག་ལ་དབབ་ཏུ་གསོལ། །རང་གི་སྙིང་གར་ཉི་མའི་དཀྱིལ་འཁོར་གྱི་སྟེང་དུ། དཔལ་སངས་རྒྱས་ཐོད་པ་ཡབ་ཡུམ་ཁ་སྦྱོར་གྱི་སྐུ། འོད་ཟེར་དཔག་ཏུ་མེད་པ་འབར་བ། སྐུ་ཆུང་ལ་ཡན་ལག་དོད་པར་གྱུར། ཡབ་ཡུམ་སྙོམས་པར་ཞུགས་པས་མཁའ་གསང་བསྐྱོད་པ་ལས་བྱུང་བའི་འོད་ཟེར་དམར་པོས་ལུས་ཀྱི་ནང་ཐམས་ཅད་གང་བས་ལུས་སེམས་ཐམས་ཅད་བདེ་བས་ཁྱབ། གཙོ་བོའི་ཐུགས་ཀ་ནས་འོད་ཟེར་འཕྲོས། དཀྱིལ་འཁོར་གྱི་ལྷ་ཚོགས་དང་སངས་རྒྱས་བྱང་ཆུབ་སེམས་དཔའ་ཐམས་ཅད་ཀྱི་ཐུགས་ཀ་ནས། དཔལ་ཧེ་རུ་ཀ་མཁའ་འགྲོ་མའི་ཚོགས་དང་བཅས་པ་སྤྱན་དྲངས་ཏེ། རང་ཉིད་ལ་གཉིས་སུ་མེད་པར་ཐིམ་པར་གྱུར། ཨོཾ་ཏིཥྛ་མཧཱ་ཀྲོ་དྷ་ཨཱ་བེ་ཤ་ཧཱུཾ། ཨོཾ་ཤྲཱི་ཧེ་རུ་ཀ་བིད་མ་ཧེ་བིཏྱ་རཱ་ཛ་ཡ་དྷཱི་མ་ཧེ་སྭཱཧཱ། ཞེས་རོལ་མོའི་སྒྲ་དང་བཅས་ཏེ་དབབ་བོ། །ཨོཾ་ཏིཥྛ་བཛྲ། ཞེས་སྤྱི་བོར་རྡོ་རྗེ་རྒྱ་གྲམ་བཞག་སྟེ་བརྟན་པར་མོས། ལྷ་རྣམས་རིགས་ཀྱི་རིམ་པ་བཞིན། །བསོད་ནམས་
ཅི་འདྲ་དེ་འདྲར་ཤོག །འདི་ཡི་དངོས་གྲུབ་ཅི་འདྲར་འགྱུར། །དཀྱིལ་འཁོར་འདིར་ནི་དེ་བཞིན་ཤོག །པྲ་ཏཱིཙྪ་བཛྲ་ཧོཿ ཞེས་མེ་ཏོག་དང༌། ཨོཾ་པྲ་ཏི་གྲྀཧྞ་ཏྭཾ་ཨེ་མཾ་སཏྭ་མཧཱ་བ་ལ། ཞེས་མེ་ཏོག་རང་གི་སྤྱི་བོར་བཞག །རང་གི་ལས་དང་རྗེས་སུ་མཐུན་པར་ནམ་མཁའི་ཁ་དོག་མཐོང་བར་མོས། སློབ་མ་དབང་བསྐུར་གྱི་དུས། སྐབས་འདིར་ནམ་མཁའི་ཁ་དོག་བརྟག ཧེ་རུ་ཀ་དཔལ་དང་ཁྱོད་ཀྱི། །མིག་འབྱེད་པ་ནི་བརྩོན་པར་མཛད། །བྱེ་བས་ཐམས་ཅད་མཐོང་བར་ཡང༌། །རྡོ་རྗེའི་མིག་ནི་བླ་ན་མེད། བཛྲ་ནཻ་ཏྲ་ཨ་པ་ཧ་ར་པ་ཊ་ལཾ་ཧྲཱིཿ ཞེས་མིག་དར་ཕྱེ། དཀྱིལ་འཁོར་བཟང་པོ་འདི་ལ་ལྟོས། །ད་ནི་དང་བ་རབ་ཏུ་སྐྱེ། ཁྱོད་ནི་རྣལ་འབྱོར་མ་རིགས་སྐྱེས། །སྔགས་དང་ཕྱག་རྒྱས་བྱིན་གྱིས་བརླབས། །འགྲོ་བ་ཕུན་སུམ་ཚོགས་ཀུན་དང༌། །དངོས་གྲུབ་ཀུན་ཁྱོད་མངོན་དུ་གྱུར། །དམ་ཚིག་ཐམས་ཅད་བསྐྱང་བ་དང༌། །སྔགས་རྣམས་ལ་ཡང་བརྩོན་པར་གྱིས། །ཞེས་ལྟ་བར་བསྐུལ། རྟེན་དང་བརྟེན་པར་བཅས་པའི་དཀྱིལ་འཁོར་ཐམས་ཅད་མངོན་སུམ་བཞིན་དུ་གསལ་བར་གྱུར། ཞེས་བརྗོད། སློབ་མ་དབང་བསྐུར་གྱི་སྐབས་སུ། སྐབས་འདིར་མངོན་རྟོག་ལྟར་ལྷ་ངོ་བསྟན་ནོ། །སྣ་ཚོགས་པདྨའི་གདན་སྟེང་ནས། །གཉིས་སུ་མེད་པས་ལེགས་པར་འཁྱུད། །དངོས་པོ་ཀུན་གྱི་རང་བཞིན་ཅན། །དངོས་གྲུབ་མ་ལུས་སྩོལ་བ་པོ། ཁྲག་འཐུང་ཆེ་ལ་བུ་ཁྱོད་ལྟོས། །སྣ་ཚོགས་བདེ་
མས་གཙོར་མཛད་པའི། །ཕྲེང་བཟང་མ་སོགས་ལྷ་མོ་ལྔ། །ཐོད་པ་བཞི་པོར་བཅས་པ་ཡི། །རབ་ཟབ་ཐུགས་ཀྱི་འཁོར་ལོ་དང༌། །དགེ་བའི་སྐེ་རགས་ཅན་ལ་སོགས། གསུང་གི་རྣམ་དག་འཁོར་ལོ་དང༌། །སྒྲོལ་བྱེད་མཁའ་འགྲོ་མ་ལ་སོགས། །རྣམ་དག་སྐུ་ཡི་འཁོར་ལོ་སྟེ། །རབ་དང་འབྲིང་དང་ཐ་མ་ཅན། །མཛེས་སྡུག་ལ་སོགས་ལྷ་མོ་བཞི། །གཟུགས་སོགས་དག་པའི་བདག་ཉིད་འགྱུར། །ལྷ་རྣམས་དེ་ཉིད་མཚན་མ་ཡིན། །ཞེས་བརྗོད། དེ་རྣམས་ནི་འཇུག་པའི་ཆོ་གའོ། །དེ་ནས་དབང་དངོས་ནི་བུམ་དབང་གི་དོན་དུ་མཎྜལ་ཕུལ་ལ། ཧེ་རུ་ཀ་དཔལ་དབང་བསྐུར་བ། །འགྲོ་བ་སྐྱོབ་པའི་གཟི་བརྗིད་ཅན། །ཇི་ལྟར་ཡོན་ཏན་འབྱུང་གནས་སྩལ། །དེ་བཞིན་བདག་ལ་དེང་སྩོལ་ཅིག །དཔའ་བོ་ཆེན་པོ་མི་བཟློག་པའི། །དབང་བསྐུར་བ་ནི་བདག་ལ་སྩོལ། །སེམས་ཅན་ཀུན་ཀྱི་དོན་གྱི་ཕྱིར། །བདག་ནི་རྟག་ཏུ་སློབ་དཔོན་གྱུར། །ལན་གསུམ་གྱིས་གསོལ་བ་བཏབ། དཀྱིལ་འཁོར་གྱི་ཤར་སྒོའི་ཕྱོགས་སུ་དབང་སྟཻགས་སེང་ཁྲི་པདྨ་གདན་ནང་ཚངས་ཅན་བརྩེགས་པའི་སྟེང་དུ། བདག་ཉིད་དཔལ་ཧེ་རུ་ཀ་ཞལ་གཅིག་ཕྱག་བཞི་པ། སྐུ་མདོག་སྔོན་པོ་ཌཱ་མ་རུ་ཁ་ཊྭཱཾ་ག་གྲི་གུག་ཐོད་པ་འཛིན་པ་མཚན་ཉིད་ཐམས་ཅད་ཡོངས་སུ་རྫོགས་པའི་སྐུར་གྱུར། སྟེང་དུ་གདུགས་དང་མཐའ་སྐོར་དུ་མཆོད་པའི་ཚོགས་ཀྱིས་ཡོངས་སུ་གང་བར་བྱས།
དེ་ནས་དཀྱིལ་འཁོར་གྱི་གཙོ་བོའི་ལྟེ་བར་གཏུམ་མོ་འབར་བས། ཞེས་པ་ནས། མེ་ཏོག་ལ་སོགས་པའི་ཆར་ཕབ་ཅིང༌། དབང་བསྐུར་བར་མཛད་དོ། །ཞེས་བརྗོད། ཡུངས་ཀར་གྱིས་བྲབ་ཅིང་གཙོ་བོའི་སྔགས་བརྗོད། རྣམ་རྒྱལ་བུམ་པ་བཏེག་སྟེ་མེ་ཏོག་འཐོར་ཞིང༌། ཨོཾ་ཕུན་སུམ་ཚོགས་པ་མངའ་བ། སོགས་ཀྱིས་ཤིས་པ་བརྗོད་ཅིང་རོལ་ཆེན་བྱའོ། །དེ་ནས། དབང་བསྐུར་རྡོ་རྗེ་ཆེན་པོ་ནི། ཁམས་གསུམ་ཀུན་གྱིས་ཕྱག་བྱས་པ། །སངས་རྒྱས་ཀུན་གྱི་གསང་གསུམ་གྱི། །གནས་ལས་བྱུང་བ་སྦྱིན་པར་བྱ། །ཨོཾ་ཧེ་རུ་ཀ་ཝཱི་ར་ཏྭཾ་ཨ་བྷི་ཥིཉྩ། ཞེས་བུམ་པའི་ཆུས་དབང་བསྐུར་ཏེ། རིག་པའི་ལྷ་མོ་རྫུ་འཕྲུལ་ཅན་རྣམས་ཀྱིས་དབང་བསྐུར་བར་གྱུར། དབུ་རྒྱན་བསངས་སྦྱངས། སྟོང་པའི་ངང་ལས། ཧཱུཾ་ཨོཾ་སྭཱ་ཧྲཱིཿཁཾ་རྣམས་ལས་བྱུང་བའི་དབུ་རྒྱན་དར་དཔྱངས་དང་བཅས་པ། དེ་བཞིན་གཤེགས་པ་རིགས་ལྔའི་ངོ་བོ། རིགས་ལྔའི་སྐུ་གཟུགས་ཀྱིས་མཚན་པར་གྱུར། དབུ་རྒྱན་དང་དར་དཔྱངས་བཅིངས་ལ། ཐོར་ཚུགས་ཅོད་པན་གྱིས་བརྒྱན་པ། །སངས་རྒྱས་ཀུན་གྱིས་རབ་བསྔགས་པའི། །རིན་ཆེན་དབུ་རྒྱན་དམ་པ་དང༌། །དར་དཔྱངས་དབང་བསྐུར་སྦྱིན་པར་བྱ། །ཨོཾ་པ་ཊ་ཀ་བཛྲ་ཨ་ར་ལི་ཧོ། དེ་ནས་རྡོ་རྗེ་རྩེ་དགུ་པ་བསངས་སྦྱངས། སྟོང་པའི་ངང་ལས་ཧཱུཾ་ལས་དཔལ་རྡོ་རྗེ་སེམས་དཔའ་དཀར་པོ་རྡོ་རྗེ་དང་དྲིལ་བུ་འཛིན་པས་ཡུམ་ལ་འཁྱུད་པ། དེ་ཉིད་
ཞུ་བ་ལས་བྱུང་བའི་སངས་རྒྱས་ཐམས་ཅད་ཀྱི་ཐུགས་ཀྱི་ངོ་བོར་རྡོ་རྗེར་གྱུར། སངས་རྒྱས་ཀུན་གྱི་རྡོ་རྗེ་ཡི། །དབང་གིས་དེ་རིང་ཁྱོད་དབང་བསྐུར། །སངས་རྒྱས་ཀུན་ཏུ་རབ་བསྒྲུབ་ཕྱིར། །རྡོ་རྗེ་འདི་ནི་ཁྱོད་ཀྱིས་ལོང༌། །ཨོཾ་བཛྲ་ཨ་དྷི་པ་ཏི་ཏྭཾ། ཨ་བྷི་ཥིཉྩ་མཾ། རྡོ་རྗེ་གསོར་ཞིང་སྙིང་གར་གཏད་ལ། ཐོག་མཐའ་མེད་པའི་སེམས་དཔའ་ནི། །རྡོ་རྗེ་སེམས་དཔའ་དགའ་བ་ཆེ། །ཀུན་དུ་བཟང་པོ་ཀུན་བདག་ཉིད། །རྡོ་རྗེ་སྙེམས་ཚུལ་བདག་པོའི་བདག །ཅེས་རྡོ་རྗེའི་དེ་ཁོ་ན་ཉིད་བསམ། དྲིལ་བུ་བསངས་སྦྱངས། སྟོང་པའི་ངང་ལས་ཤེས་རབ་ཀྱི་ཕ་རོལ་དུ་ཕྱིན་མ་དཀར་མོ་གྲི་གུག་དང་ཐོད་པ་འཛིན་པ། རང་སྣང་པའི་ཐབས་ཀྱིས་འཁྱུད་པ། དེ་ཞུ་བ་ལས་བྱུང་བའི་རྩེ་དགུ་པའི་མཚན་པའི་དྲིལ་བུར་གྱུར། འདི་ནི་རྣལ་འབྱོར་མ་ཀུན་གྱི། །ཤེས་རབ་དབྱངས་ཀྱི་རྗེས་འགྲོར་བཤད། ཁྱོད་ཀྱིས་ཀྱང་ནི་རྟག་ཏུ་བཅིངས། །བྱང་ཆུབ་མཆོག་ཏུ་རྒྱལ་བ་བཞེད། །ཨོཾ་ཤྲི་ཧེ་རུ་ཀ་ཨ་དྷི་པ་ཏི་ཏྭཾ། ཨ་བྷི་ཥིཉྩ་ཏིཥྛ་བཱི་ར་ས་མ་ཡ་ཏྭཾ། དྲིལ་བུ་ལན་བརྒྱད་དུ་དཀྲོལ་ལ་དཀུར་བསྟེན། སྲིད་པ་ངོ་བོ་ཉིད་ཀྱིས་དག །ངོ་བོ་ཉིད་ཀྱིས་དངོས་མེད་བྱས། །རང་བཞིན་དག་པའི་སེམས་དཔའ་མཆོག །སྲིད་པ་དམ་པ་བྱེད་པར་ཤོག །ཅེས་དྲིལ་བུའི་དེ་ཁོ་ན་ཉིད་དྲན་པར་བྱའོ། །དེ་ལ་རིམ་པ་གསལ་བ་ལས། རྡོ་རྗེ་ཆེན་པོ་
རྩེ་དགུ་པ། །དེ་ཉིད་ལྡན་པས་བྱིན་བརླབས་ནས། །ཞེས་འབྱུང་བ་ནི། རྡོ་རྗེའི་དེ་ཁོ་ན་ཉིད། །བྱང་ཆུབ་སེམས་གང་དེ་རྡོ་རྗེ། །ཞེས་སོགས་དྲན་པ་ཡིན་གྱི། ལྷ་ཉི་ཤུ་རྩ་བདུན་གྱི་དེ་ཉིད་དྲན་པ་ལ་སོགས་པ་ནི་མ་ཡིན་ནོ། །དེས་ན། འདིར་རྡོ་རྗེ་དང་དྲིལ་བུ་རྡོར་སེམས་ཡབ་ཡུམ་དུ་བསྐྱེད། ཡབ་རྡོ་རྗེ་དང་ཡུམ་དྲིལ་བུར་བསྒྱུར་ནས། དབང་དེ་ཉིད་རིམ་ཅན་དུ་བསྐུར་ཡང་ལེགས་པར་འགྱུར་ཏེ། རིམ་པ་གསལ་བའི་བཞེད་པ་ཡང་དེ་ཡིན་ནོ། །རྡོར་དྲིལ་སྙིང་གར་འཁྱུད་རྒྱ་བྱས་ལ། བདག་ཉིད་དཔལ་ཧེ་རུ་ཀ་ཡུམ་སྣ་ཚོགས་བདེ་མས་འཁྱུད་པ། ཐུགས་རྒྱུད་བདེ་བ་ཆེན་པོས་གང་བར་གྱུར། རྡོ་རྗེ་དྲིལ་བུ་ཡང་དག་འཁྱུད། །གཡོན་སྙེམས་པ་དང་སྒྲོས་སྣོན་འཆང༌། །གཉིས་མེད་གཉིས་མེད་རྣལ་འབྱོར་ཏེ། །ཕྱག་རྒྱ་ཆེན་པོར་བྱིན་གྱིས་བརླབས། །ཞེས་ཕྱག་རྒྱ་སྐུའི་དམ་ཚིག་དྲན་པར་བྱའོ། །དཀྱིལ་འཁོར་གྱི་གཙོ་བོའི་ཐུགས་ཀ་ནས་སྔགས་ཀྱི་ཕྲེང་བ་བྱུང༌། ཞལ་ནས་ཐོན། རང་གི་ཁ་སྒོ་ནས་ཞུགས། སྙིང་གའི་ཧཱུཾ་ལ་ཐིམ། སྙིང་པོ་ལན་གསུམ་བརྗོད། བཅོམ་ལྡན་བདག་ལ་སྩལ་ལགས་ཀྱི། །བདག་ལ་འགོ་བར་མཛད་དུ་གསོལ། །ལན་གསུམ། བཅོམ་ལྡན་འདི་ལ་སྩལ་ལགས་ཀྱི། །འདི་ལ་འགོ་བར་མཛད་དུ་གསོལ། །སྔགས་ཀྱི་དངོས་གྲུབ་སྩལ་དུ་གསོལ། །བརྟུལ་ཞུགས་བརྟན་པར་མཛད་དུ་གསོལ། །འདིར་གཞུང་ལས། བྱིན་བརླབ་ཆེ་ལྡན་སྔགས་ཀྱིས་ནི། །སྔགས་ཀྱི་དབང་བསྐུར་སྦྱིན་པར་བྱ།
།ཞེས་འབྱུང་བ་ནི། སྔགས་དབང་སྟེར་དགོས་པའི་དོན་ཡིན་གྱི། ཚིག་དེ་བརྗོད་དགོས་པའི་དོན་མ་ཡིན་ནོ། །དེ་ནས་དཔལ་ཧེ་རུ་ཀ་ཡབ་ཡུམ་གྱི་ངོ་བོ་རྡོ་རྗེ་དྲིལ་བུ་སྤྱི་བོར་བཞག་པས་ལུས་འོད་ཀྱིས་གང་བར་བསམ་ལ། ཨོཾ་ཤྲཱི་ཧེ་རུ་ཀ་ཨ་དྷི་པ་ཏི་ཏྭཾ། ཨ་བྷི་ཥིཉྩ་མཾ། ཤྲཱི་ཧེ་རུ་ཀ་ནཱ་མ་ཨ་བྷི་ཥེ་ཀ་ཏ། ཀྱེ་དཔལ། ཞེས་གསང་མཚན་དྲན་པར་བྱ། མིང་གི་དབང་ངོ༌། །དེ་ལྟར་དབང་དེ་རྣམས་བསྐུར་བས། ཉོན་མོངས་པ་ལྔ་དག །ཕུང་པོ་ལྔ་གནས་གྱུར། ཡེ་ཤེས་ལྔ་མངོན་དུ་བྱའོ། །སངས་རྒྱས་ལྔའི་འཕྲིན་ལས་བསྒྲུབ་པ་ལ་དབང་ངོ༌། །བདག་ཉིད་རྡོ་རྗེ་སེམས་དཔའ་སྐུ་མདོག་དཀར་པོ་རྡོ་རྗེ་དང་དྲིལ་བུ་འཛིན་པར་གྱུར། རྡོ་རྗེ་སེམས་དཔའི་ངོ་བོ་རྡོ་རྗེ་ལག་ཏུ་གཏོད་ལ། འདི་དེ་སངས་རྒྱས་ཐམས་ཅད་དེ། །ཧེ་རུ་ཀ་དཔལ་ཕྱག་ན་འདུག ཁྱོད་ཀྱི་ཀྱང་ནི་རྟག་ཏུ་བཅང༌། །ཧེ་རུ་ཀ་དཔལ་བརྟུལ་ཞུགས་བརྟན། །ཨོཾ་སརྦ་ཏ་ཐཱ་ག་ཏ་སིདྡྷི་བཛྲ་ས་མ་ཡ། །ཏིཥྛ་ཨེ་ཥ་ཏྭཾ། དྷ་ར་ཡཱ་མི་ཧཱུཾ། ཧ་ཧ་ཧ་ཧོཿ རྡོ་རྗེ་བརྟུལ་ཞུགས་སོ། །རང་ཉིད་སངས་རྒྱས་ཐོད་པ་ཧེ་རུ་ཀའི་སྐུར་གྱུར། ཧཱུཾ་ལས་བྱུང་བའི་ཕྱག་མཚན་རྣམས་གཏད། ཧེ་རུ་ཀ་དཔལ་ཁ་ཊྭཱཾ་ག །རྣལ་འབྱོར་མ་ནི་ཌཱ་མ་རུ། །རྡོ་རྗེ་ཁ་ཊྭཱཾ་རྡོ་རྗེར་བཅས། །དྲིལ་བུ་སིལ་སིལ་སྒྲ་སྒྲོག་ཅིང༌། །ཚངས་པའི་སྐུད་ཐོགས་རྣལ་འབྱོར་བདག ཁ་ཊྭཱཾ་ག་
དང་རྣལ་འབྱོར་སྣོད། །དཔའ་བོ་ཆེན་པོས་བླང་བར་བགྱི། །སྤྱོད་པའི་བརྟུལ་ཞུགས་སོ། །དེ་ནས་དབང་གི་ལྷ་རྣམས་གཙོ་བོའི་ཐུགས་ཀའི་རྩ་བརྒྱད་ལ་ཐིམ། སྤྲོས་པ་ལ་དགའ་ན་ཆུ་དབང་ནས་འདིའི་བར་དབང་རྫས་ལ་གནས་གསུམ་བྱིན་རླབས། ཡེ་ཤེས་སྤྱན་འདྲེན། དབང་བསྐུར་རྒྱས་གདབ་རྣམས་བྱེད་པ་དང༌། དབང་ལྔ་ལ་སློབ་མའི་མཆོད་པ་དང༌། རྟོགས་སྐྱེད་སོགས། སྤྱི་དང་མཐུན་པ་དང༌། བར་འདི་ལྷ་མཆོད་པ་དང༌། མིག་ཐུར་སོགས་རྗེས་གནང་རྒྱས་པའང་བྱས་པས་ཆོག་གོ །འོན་ཀྱང་སྤྲོས་པ་ཙམ་དུ་རིག་པར་བྱའོ། །ཞི་དང་རྒྱས་དང་དབང་དང་དགུག །སྡང་དང་དབྱེ་དང་མནན་ལ་སོགས། །བསད་དང་བསྐྲདཔ་ཐམས་ཅད་སྟེ། །ལས་དེ་རྣམས་ནི་བསྒྲུབ་པར་བགྱི། །རལ་གྲི་མིག་སྨན་ས་འོག་དང༌། །མཆིལ་ལྷམ་དེ་བཞིན་རིལ་བུ་སྟེ། །རྣལ་འབྱོར་མ་ཡི་དངོས་གྲུབ་ནི། །དེ་ནི་ཅི་དགར་བསྒུབ་པར་བགྱི། །རྗེས་གནང་ངོ༌། །དེ་ནས་ལུང་བསྟན་ནི། ཧེ་རུ་ཀ་དཔལ་ལུང་སྟོན་བཞིན། །མགྲིན་གཅིག་ཏུ་ནི་ཐམས་ཅད་ཀྱི། །འདི་ལྟར་ང་ཡིས་ལུང་བསྟན་ཏེ། །ཧེ་རུ་ཀ་དཔལ་དེ་བཞིན་གཤེགས། །དངོས་པོ་མཆོག་ཏུ་གྲུབ་པའི་ཕྱིར། །སྲིད་པའི་ངན་འགྲོ་རྣམས་ལས་བཏོན། །ཤྲཱི་ཧེ་རུ་ཀ་ནཱ་མ། ཏ་ཐཱ་ག་ཏ་ཏིཥྛ་སིདྡྷི་ས་མ་ཡ་ཏྭཾ། བྷུ་ར་བྷུཿཝ་སྭཿ གསང་མཚན་དྲན་པར་བྱ་སྟེ། ལུང་བསྟན་ནོ། །མཆོག་ཏུ་གསང་བའི་དཀྱིལ་འཁོར་འདིར། །ཞུགས་པ་དང་ནི་མཐོང་བས་ཀྱང༌། །སྡིག་པ་ཀུན་
ལས་ངེས་གྲོལ་ཏེ། །དེ་རིང་ཁྱོད་རྣམས་བདེ་བར་གནས། །དབང་འདི་བསྐུར་བ་ཙམ་གྱིས་ནི། །སློབ་མ་ཡོན་ཏན་བདག་པོར་འགྱུར། །སློབ་དཔོན་ཉིད་ཀྱང་བདེ་བ་ཡི། །བརྟན་གཡོ་ཀུན་གྱི་དམ་ཚིག་ཡིན། །ནངས་པར་སྔར་ལངས་སེམས་དག་ཉིད། །མ་ལུས་ལས་ནི་བྱས་ནས་ཀྱང༌། །སྲུང་དང་བཟའ་བ་ལ་སོགས་པ། །སྡོམ་པའི་བདག་ཉིད་ཀྱིས་བསྲུང་ངོ༌། །ལུས་དང་སྲོག་ལ་ལྟོས་མེད་པར། །དམ་ཚིག་དང་ནི་སྡོམ་པ་བསྲུང༌། །ཉིན་དང་མཚན་མོ་ལན་གསུམ་དུ། །ཉིན་རེ་བཞིན་ཡང་བཟླ་བར་བྱ། །གང་ཚེ་ཉམས་གྱུར་རྣལ་འབྱོར་པ། ཁ་ན་མ་ཐོ་སྦོམ་པོར་འགྱུར། །དགུན་ཟླ་འབྲིང་པོ་ནས་བརྩམས་ཏེ། །ཟླ་བ་རེ་རེ་བསྲུང་བ་ནི། །གཉིས་མེད་གཉིས་མེད་འཁོར་ལོ་གནས། །ཚེས་བཅུ་ལ་ནི་དེ་རབ་མཆོད། །ཆང་དང་ཤ་སོགས་གང་ཅིའང་རུང༌། །དཔའ་བོ་རྣལ་འབྱོར་མ་ཡི་ཚོགས། །ཐམས་ཅད་གཉིས་མེད་དབང་ན་གནས། །ཧེ་རུ་ཀ་དཔལ་རབ་ཏུ་མཆོད། །ཐེག་པ་དམན་ལ་འདོད་མི་བྱ། །སེམས་ཅན་ལ་ཡང་རྒྱབ་མི་ཕྱོགས། །འཁོར་བ་དག་ཀྱང་མི་སྤོང་ཞིང༌། །མྱ་ངན་འདས་ལ་དགར་མི་རུང༌། །དཔའ་བོ་རྣལ་འབྱོར་མ་ཀུན་ལ། ཁྱོད་ཀྱིས་བརྙས་པར་མི་བྱ་སྟེ། །ཕྱག་རྒྱ་གཞོམ་པ་མཚོན་ཆ་དང༌། །མཚན་མ་འགོད་པར་མི་བགྱིད་དོ། །དམ་ཚིག་རབ་བསྲུང་བསོད་
ནམས་ཀྱིས། །ཚེ་འདི་ཉིད་ལ་འགྲུབ་པར་འགྱུར། །བུད་མེད་ཐམས་ཅད་མཐོང་བ་ན། །གཡོན་ནས་ལན་གསུམ་བསྐོར་བྱ་ཞིང༌། །སྤྱི་བོས་ཕྱག་ནི་བྱས་ནས་ཀྱང༌། །ལན་གསུམ་བར་དུ་གསོལ་བ་གདབ། །བདག་བུ་ཁྱོད་ཉིད་མ་ཡིན་ཏེ། །ཇི་སྲིད་བྱང་ཆུབ་འབྱུང་བར་དུ། །བྱང་ཆུབ་ཡན་ལག་ནུ་མ་ལས། །བྱུང་བའི་རང་གི་འོ་མས་སྐྱོངས། །གཉིས་མེད་ཡེ་ཤེས་དཔྱོད་ལྡན་པར། །བསླབ་པ་བླངས་པ་སྔོན་འགྲོ་བས། །སྒྲ་སོགས་སྟོང་པ་སྔོན་འགྲོ་བའི། །ཚངས་པར་སྤྱོད་པ་ཤིན་ཏུ་སྲུངས། །དམ་ཚིག་དེ་ལ་རྟག་གནས་ཏེ། །དེ་སྔོན་འགྲོ་བ་སྦས་པའི་ཡིད། །སྤྱོད་དང་གྲོལ་བའི་གནས་འདོད་པའི། །ཡིད་ལ་འདོད་པ་ཀུན་འགྲུབ་འགྱུར། །ཞེས་དཀྱིལ་འཁོར་གྱི་བདག་པོས་གསུངས་པར་བསམ་ཤིང༌། གཙོ་བོས་ཇི་ལྟར་བཀའ་སྩལ་པ། །དེ་ལྟར་བདག་གིས་བགྱིད་པར་འཚལ། །ལན་གསུམ་གྱིས་ཁས་བླང་ངོ༌། །དེ་ལྟར་བུམ་པའི་དབང་ཐོབ་པས། །བསྐྱེད་རིམ་འཕྲིན་ལས་ཀུན་ལ་དབང༌། །ཕྱིར་མི་ལྡོག་པའི་ས་ཐོབ་ཅིང༌། །སྤྲུལ་སྐུའི་གོ་འཕང་མངོན་དུ་འགྱུར། །གསང་བའི་དབང་གི་དོན་དུ་མཎྜལ་ཕུལ། བདག་ནི་འཁོར་བའི་འདམ་དུ་བྱིང༌། །དཔུང་གཉེན་མཛོད་ཅིག་སྐྱོབ་པ་པོ། །བདག་ནི་སྐལ་དམན་རྩོལ་བ་ཆུང༌། །སངས་རྒྱས་ཆོས་
དང་རྣམ་བྲལ་བས། །ཀྱཻ་སྟོན་པ་བླ་མ་ཆེ། །མགོན་པོ་ཁྱོད་ཀྱིས་བརྩེ་བར་མཛོད། །ཅེས་ལན་གསུམ། དེ་ནས། ཨོཾ་ཧེ་རུ་ཀ་ཝཱི་ར་ཏྭཾ། བཛྲ་ཨ་བྷི་ཥིཉྩ། ཞེས་ཆུ་དབང་དང༌། ཨོཾ་པ་ཊཾ་ཀ་བཛྲ་ཨཱ་ར་ལི་ཧོཿ ཞེས་དབུ་རྒྱན་དང༌། ཨོཾ་བཛྲ་ཨ་དྷཱི་པ་དྷི་ཏྭཾ་ཨ་བྷི་ཥིཉྩ་མི། ཞེས་རྡོ་རྗེ་དང༌། ཨོཾ་ཤྲཱི་ཧེ་རུ་ཀ་ཨ་དྷི་པ་དྷི་ཏྭཾ། ཨ་བྷི་ཥིཉྩ་ཏིཥྛ་བཱི་ར་ས་མ་ཡ་ཏྭཾ། ཞེས་དྲིལ་བུ་དང༌། ཨོཾ་ཤྲཱི་ཧེ་རུ་ཀ་ཨ་དྷི་པ་དྷི་ཏྭཾ། ཨ་བྷི་ཥིཉྩ་མི། ཤྲཱི་ཧེ་རུ་ཀ་ནཱ་མ་ཨ་བྷི་ཥེ་ཀ་ཏ། ཞེས་མིང་གི་དབང་བསྐུར་རོ། །འདིར་དེ་ཙམ་གྱི་དོན་འགྲུབ་པར་མཐོང་བས། ཟོར་ཡང་པའི་དབང་དུ་བྱས་ལ། གཞུང་ལས། སྔར་གསུངས་ཆོ་ག་བཞིན་དུ་ནི། །ཆུ་སོགས་དབང་རྣམས་བསྐུར་བར་བྱ། །ཅེས་སྔགས་དབང་མ་གཏོགས་གོང་བཞིན་བསྐུར་བར་བཤད་པ་ཡིན་ཏེ། སྤྲོས་པ་ལ་དགའ་ན་དེ་ལྟར་བྱའོ། །སྒྱུ་ཐོད་ཀྱི་དཀྱིལ་ཆོག་རིམ་པ་གསལ་བ་གཉིས་ཀྱི་ལུགས་ལ། སྐབས་འདིར་འདི་ལྟ་བུ་བཤད་ཀྱི། རྒྱུད་དང་དཀྱིལ་ཆོག་གཞན་ཕལ་ཆེར་ལས་མི་འབྱུང་བས། མི་སྤྲོ་ན་མ་བྱས་ཀྱང་ཆོག་གོ །ཨཱ་ཁཾ་བཱི་ར་ཧཱུཾ་གིས་གདོང་གཡོགས། ཡིད་ཀྱི་ལུས་ནི་བརྟན་པའི་ཕྱིར། །ཕྱག་རྒྱའི་དམ་ཚིག་རབ་ཏུ་བརྗོད། །གང་གི་ལུས་ནི་ཐམས་ཅད་བརྟན། །དེས་ན་ཕྱག་རྒྱར་རབ་ཏུ་བསྒྲགས། །བླ་མ་ཧེ་རུ་ཀ་ཡབ་ཡུམ་སྙོམས་པར་ཞུགས་པའི་དགའ་བའི་སྒྲས་ཕྱོགས་བཅུའི་སངས་རྒྱས་སྲས་དང་བཅས་པ་ཐམས་ཅད་སྤྱན་དྲངས། ཡབ་ཡུམ་
གྱི་སྐུ་ལ་ཞུགས། ཐུགས་ཀར་བྱང་ཆུབ་ཀྱི་སེམས་སུ་ཞུགས། གསང་བར་ལྷན་ཅིག་སྐྱེས་པའི་ཡེ་ཤེས་བརྟན་པར་བྱས་པའི་བྱང་ཆུབ་ཀྱི་སེམས་བདག་གི་ལྕེ་ཐོག་ཏུ་བཞག །འདས་པའི་རྡོ་རྗེ་འཆང་སོགས་ཀྱི། །ཇི་ལྟར་སངས་རྒྱས་སྲས་དབང་བསྐུར། །བྱང་ཆུབ་སེམས་ནི་བཟང་པོ་ཡིས། །དེ་ལྟར་བུ་ཁྱོད་དབང་བསྐུར་རོ། །སྙིང་པོའི་མཐར། ཨོཾ་ཨཱཿཧཱུཾ། ཞེས་བརྗོད། བདུད་རྩི་མྱངས། ཨ་ཏི་སུ་ཁཾ། ཞེས་བརྗོད། གདོང་གཡོགས་བསལ། དེ་ལྟར་གསང་བའི་དབང་ཐོབ་པས། །སྔགས་བཟླས་རླུང་སོགས་སྒོམ་ལ་དབང༌། །ས་བཅུ་པ་དང་སྐལ་བ་མཉམ། །ལོངས་སྐུའི་གོ་འཕང་མངོན་དུ་འགྱུར། །ཤེས་རབ་ཡེ་ཤེས་ཀྱི་དབང་གི་དོན་དུ་མཎྜལ་ཕུལ། བདག་ནི་འཁོར་བའི་འདམ་དུ་བྱིང༌། །རྣམ་རྟོག་མང་དང་བདག་ལྡན་པས། །བག་ཆགས་ཡང་དག་བཅད་པ་ཡི། །མཛེས་མ་ཁྱོད་ཀྱིས་སྐྱོབ་པར་མཛོད། །གྲགས་པ་ཆེན་པོ་སྙིང་རྗེ་ཆེ། །ལྷ་མོ་དེས་ནི་ཞི་བར་མཛོད། །ཅེས་ལན་གསུམ། སློབ་དཔོན་དཀྱིལ་འཁོར་གྱི་གཙོ་བོ་ཧེ་རུ་ཀ་ཡབ་ཡུམ་སྙོམས་པར་ཞུགས་པའི་རྗེས་ཆགས་ཀྱི་རྐྱེན་གྱིས། ལྟེ་བར་གཏུམ་མོ་སྦར་བས་བདེ་བ༴ ཞེས་པ་ནས།གསུང་བཞིན་པར་གྱུར། ཀྱཻ་ཨཱ་ཧོཿ དཔེར་ན་བུ་ཚ་མེད་པའི་ཁྱིམ། །ཤི་མ་ཐག་ཏུ་སྟོང་པར་འགྱུར། །དེ་བཞིན་དབང་དང་བྲལ་ན་ནི། །ཡེ་ཤེས་ཀུན་དུ་སྟོང་པ་ཉིད། །དཔེར་ན་པི་ཝཾ་སྦྱོར་སོགས་ཀུན། །
རྒྱུད་དང་བྲལ་ན་རྡུང་མི་རུང༌། །དེ་བཞིན་དབང་དང་བྲལ་ན་ནི། །སྔགས་དང་བསམ་གཏན་འགྲུབ་མི་འགྱུར། །རྨོངས་པ་གང་ཞིག་དབང་མེད་པར། །བདག་ནི་དབང་བསྐུར་ཞེས་སྨྲ་བ། །ཇི་སྲིད་སངས་རྒྱས་ཞུགས་ཀྱི་བར། །སློབ་མར་བཅས་ཏེ་དམྱལ་བར་འགྲོ། །ཞེས་ཉེས་དམིགས་བསྒྲགས་སོ། །འདི་བྲམ་ཟེ་ཆེན་པོའི་གཞུང་འགྲེལ་དུ་གྲགས་པ་འདི་དག་ཏུ། གོང་མའི་དབང་གསུམ་ལ་སོ་སོར་ཕྲལ་ཏེ་སྦྱར་ཡང༌། དེ་འདྲའི་ངེས་པ་མི་སྣང་བས། འདིར་ཆབས་གཅིག་ཏུ་སྒྲོག་གོ །དེ་ནས་ཡང་དང་ཡང་དུ་ཕྱག་འཚལ་ཏེ། ཞེས་པ་ནས་ཆར་ཕབ་ཅིང་དབང་བསྐུར་བར་མཛད་དོ། །ཞེས་བརྗོད། གོང་གསལ་དབང་གི་སྐབས་ལྟར་དབང་ལྔ་དང༌། ཡིད་ཀྱི་ལུས་སུ༴ སོགས། ཕྱག་རྒྱའི་དམ་ཚིག་དང༌། འདས་པའི་རྡོ་རྗེ༴ སོགས་ཀྱིས་གསང་དབང་ཡང་བསྐུར་བར་མོས། དེ་ནས་ཡང་སྔོན་བཞིན་མིག་དར་བཅིངས། དབང་གི་ལྷ་མཁའ་འགྲོ་མ་རྣམས་ཀྱིས་གདམས་པར་མོས་ལ། བཅུ་གཉིས་ལོ་ལོན་བུ་མོ་ནི། །ཚུལ་ཁྲིམས་མ་ཉམས་ཆགས་ཆུང་བ། །ཐོས་དང་ལྡན་ཞིང་གྲགས་ཆེན་མོ། །ནད་མེད་སྙིང་རྗེ་དང་ལྡན་པ། །སེམས་ཅན་དོན་ལ་གཅིག་ནན་ཏན། །དགོད་ཅིང་པདྨའི་སྤྱན་དང་ལྡན། །ཟླ་བའི་ཆ་འདྲ་གདོང་མཛེས་མ། །མུ་ཅོར་མི་སྨྲ་བརྟན་ཞིང་དུལ། །ཤེས་རབ་པདྨའི་ནང་དབུས་སུ། །དཔག་ཚད་བྱེ་བའི་དཀྱིལ་འཁོར་ལ། །སུམ་བརྩེགས་དག་པའི་བདག་ཉིད་ལུས། །འཁོར་བའི་འཇིགས་
པ་ལས་སྐྱོབ་པ། །དཀྱིལ་འཁོར་དེ་ཡི་དབུས་གནས་པའི། །མཁས་པའི་སློབ་མ་བཟང་དབང་བསྐུར། །གལ་ཏེ་བྱང་ཆུབ་བླ་མེད་འདོད། །ཕྱི་ཡི་དཀྱིལ་འཁོར་བྱ་བ་མིན། །ལྷ་རྣམས་བཤིག་པ་ཙམ་གྱིས་ནི། །སྡིག་པ་ཆེན་པོར་སྐྱེ་བར་འགྱུར། །དེས་ན་རྡུལ་ཚོན་ཙམ་གྱིས་ནི། །དེ་བཞི་ལྷ་རྣམས་དག་མི་འགྱུར། །རྡོ་རྗེ་འཁོར་ལོ་རིན་ཆེན་དང༌། །དེ་བཞིན་པདྨ་རལ་གྲི་ཉིད། །བྱས་ནས་སླར་ཡང་འཇིག་བྱེད་པ། །སྐྱེས་བུ་ཐ་ཤལ་དམྱལ་བར་འགྲོ། །གང་གིས་སངས་རྒྱས་སྤྱན་འདྲེན་ཞིང༌། །གང་གིས་གཤེགས་སུ་གསོལ་བ་ཡིན། །རྡོ་རྗེ་སེམས་དཔའ་བྱོན་པ་དང༌། །དེ་བཞིན་གཤེགས་པ་བྱོན་པ་རྣམས། །གང་ནའང་བཞུགས་པ་མ་ཡིན་ཏེ། །དྲི་མ་མེད་ཅིང་དག་པའི་ལུས། །གང་གིས་སྤྱན་དྲངས་གཤེགས་སུ་གསོལ། །དེ་ཉིད་ཀྱིས་ན་བརྟག་མེད་པར། །དེ་བཞིན་གཤེགས་པ་རྣམས་ཕྱག་བྱ། །དེ་ནས་མཚན་ཉིད་ཐམས་ཅད་ཡོངས་སུ་རྫོགས་པའི་རིག་མ་གཏད་པར་མོས་ལ། གང་གིས་ཤེས་རབ་མ་མཉེས་པར། །སངས་རྒྱས་ཐམས་ཅད་ཀྱིས་ནི་མཆོད། །འདི་ཉིད་ལ་ནི་སངས་རྒྱས་བཞུགས། །གཞན་གང་དངོས་གྲུབ་གཙོ་བོ་དང༌། །སྙིང་རྗེ་ལྡན་པ་གཞན་གང་ཞིག །མཁའ་འགྲོ་མ་ཀུན་འདི་ལ་བཞུགས། །གསང་བ་ཕྱི་ཡི་ལྔ་དང་ནི། །བདུན་དང་བཅུ་བཞིར་བཤད་པ་དང༌། །གཉིས་ཀ་གཅིག་ཏུ་འདུས་པའོ། །ཞེས་སོ། །དེ་ནས་སྤྲོ་ན་བར་འདིར། དྲི་བ་དྲི་ལན་སོགས་
ཀྱང་བྱ། བདག་དང་རིག་མ་གཉིས་ཀ་མི་དམིགས་ཏེ་སྟོང་པ་ཉིད་དུ་གྱུར། སྟོང་པའི་ངང་ལས་བཅོམ་ལྡན་འདས་དཔལ་ཧེ་རུ་ཀ་སྐུ་མདོག་སྔོན་པོ༴ ནས། རྩེད་འཇོའི་རོལ་པ་ཅན་ནོ། །ཡབ་ཡུམ་གཉིས་ཀའི་ཐུགས་ཀར་ཨོཾ༴ ནས། རྡོ་རྗེའི་ལྟེ་བ་ལ་ཧཱུཾ། ཡུམ་གྱི་བྷ་ག་ཧྲཱིཿལས༴ ནས། ཨོཾ་དཀར་པོས་མཚན་པ་ཡབ་ཡུམ་སྙོམས་པར་ཞུགས་པས། ལུགས་འབྱུང་དང་ལུགས་ཟློག་གི་དགའ་བ་བཞི་མངོན་དུ་བྱས་པར་གྱུར། འདོད་ཆགས་མ་ཡིན་ཆགས་བྲལ་མིན། །དབུ་མར་དམིགས་པར་མི་འགྱུར་རོ། །གསུམ་པོ་སྤངས་པ་ཁོ་ན་ལས། །ལྷན་ཅིག་སྐྱེས་པ་བྱང་ཆུབ་བརྗོད། །གང་དུ་དབང་པོ་ཉམས་གྱུར་དང༌། །བདག་གི་རང་བཞིན་རྣམ་པར་ཉམས། །ལྷན་ཅིག་སྐྱེས་དགའ་རྟོགས་དེ་ཡིན། །བླ་མའི་ཞལ་ལས་གསལ་འདྲི་ནའོ། །ཞེས་བརྗོད། གདོང་གཡོགས་བསལ། དེ་ལྟར་ཤེས་རབ་དབང་ཐོབ་པས། །ལས་དང་ཡེ་ཤེས་ལམ་ལ་དབང༌། །བཅུ་གཉིས་པ་དང་སྐལ་མཉམ་ཞིང༌། །ཆོས་སྐུའི་གོ་འཕང་མངོན་དུ་འགྱུར། དེ་ནས་དབང་བཞི་པའི་དོན་དུ་མཎྜལ་ཕུལ། ཁྱོད་ཞབས་པདྨོའི་བཀའ་དྲིན་གྱིས། །གཙོ་བོའི་དབང་བསྐུར་རྣམ་གསུམ་ཐོབ། །དེ་རིང་རིན་ཆེན་བཞི་པ་ཡང༌། །བདག་ལ་བཀའ་དྲིན་སྐྱབས་དུ་གསོལ། །ལན་གསུམ། གང་ཞིག་ཤར་དུས་ཚེ་ན་དབང་པོ་དང༌། །ཡུལ་རྣམས་ནུབ་གྱུར་དེ་ལ་ཕྱག་འཚལ་ལོ། །མཁས་པ་རྣམས་ཀྱི་སྙིང་སྦས་སུ་སད་པ། །
ཕྱིས་ནི་མངོན་དགའ་རྒྱལ་བའི་མཛེས་སྐུ་གཅིག །སོ་སོ་རང་གིས་རིགས་གདོད་མ་ནས་གནས་པའི་ཡེ་ཤེས། མངོན་གསུམ་དུ་ཤར་ན་གཟུང་འཛིན་ནུབ་པར་སྣང་ལ། རྟོགས་བྱ་དང་རྟོགས་བྱེད་དབྱེ་བ་མེད་པས་སེམས་ཉིད་ཀྱི་རང་བཞིན་ལྷན་ཅིག་སྐྱེས་དགའ་རྣམ་པ་ཐམས་ཅད་པའོ། །དེ་ལྟར་ཡང༌། ཕྱག་རྒྱ་ཆེན་པོ་ཐིག་ལེ་ལས། །ཡང་དག་དྲི་མེད་རྣམ་པའི་འོད། །གང་དུ་ཡང་ན་གནས་མེད་དོ། །ཤར་བ་མ་ཡིན་ནུབ་པ་མིན། །རྟག་ཏུ་ཤར་བ་ཆར་ཡང་མཆོག །ཅེས་གསུངས་སོ། །མཚམས་མེད་ལྔ་རེ་བྱེད་པ་དང༌། །རྨོངས་གང་མ་རུང་ལས་བྱེད་དང༌། །སྐྱེ་བ་དམན་གྱུར་འགྲོ་བ་རྣམས། །རྡུལ་ཚོན་མཐོང་བས་གྲོལ་བར་འགྱུར། །དཀྱིལ་འཁོར་དག་ཏུ་མངོན་ཞུགས་པས། །གཙང་མའི་གནས་སུ་སྐྱེ་བར་འགྱུར། །ཤིན་ཏུ་སྦྱོར་བའི་སེམས་ཀྱིས་ནི། །སྐྱེ་འདིར་དངོས་གྲུབ་མ་ཐོབ་ཀྱང༌། །སྐྱེ་གཞན་སྲིད་པར་དངོས་གྲུབ་འགྱུར། །དབང་བསྐུར་ཡང་དག་སྦྱིན་ལྡན་ན། །སྐྱེ་དང་སྐྱེ་བར་དངོས་གྲུབ་འགྱུར། །དེ་ཡི་སྐྱེ་བ་བདུན་ལ་ནི། །མ་བསྒྲུབ་པར་ཡང་དངོས་གྲུབ་ཐོབ། །གང་ཡང་སྒོམ་པ་དང་ལྡན་ཞིང༌། །གལ་ཏེ་དམ་ཚིག་སྡོམ་ལ་གནས། །སྐྱེ་འདིར་ལས་དབང་གིས་མ་གྲུབ། །རེ་ཞིག་དམ་ཚིག་ཉམས་པ་ལ། །དངོས་གྲུབ་ཐོབ་པ་ལྟ་ཞོག་གི །མི་ཡི་སྐྱེ་བའང་རྙེད་པར་དཀའ། །གང་ཡང་བླ་མ་བརྒྱུད་པ་ཡི། །རིམ་འོངས་དེ་ཉིད་རིག་པ་
ཡི། །སྒྲུབ་པ་པོ་ཡིས་འགྲུབ་སྙམ་དགོངས། །ཞེས་དམ་ཚིག་བཤད་དོ། །དེ་ལྟར་བཞི་པའི་དབང་ཐོབ་པས། །ཕྱག་རྒྱ་ཆེན་པོ་བསྒོམ་པར་དབང༌། །རྡོ་རྗེ་འཛིན་དང་སྐལ་མཉམ་སྟེ། །ལྷན་ཅིག་སྐྱེས་སྐུ་མངོན་དུ་འགྱུར། །ཞེས་སོ། །གཙོ་བོས་ཇི་ལྟར༴ སོགས་ལན་གསུམ། གཏང་རག་གི་མཎྜལ་ཕུལ། དེང་ནས་བརྩམས་ཏེ༴ སོགས་དགེ་བ་བསྔོ། སྐབས་འདྀའི་མཆོད་གཏོར་གྱི་མཐར། སྦྱིན་བསྲེག་དང་ཚོགས་ཀྱི་འཁོར་ལོ་སོགས་ཅི་འགྲུབ་ཏུ་བྱའོ། །དེ་དག་ནྀ་བདག་ཉིད་འཇུག་ཅིང་དབང་བླང་བའོ། །སློབ་མ་གཞུག་ཅིང་དབང་བསྐུར་བ་ཡང་དེ་ཉིད་འདོན་པ་སྤོས་པས་འགྲུབ་པར་འགྱུར་བའི་ཕྱིར། ཟློས་ཏེ་བརྗོད་པར་མ་བྱས་སོ། །དེ་ནས་རྗེས་ཆོག་གི་མཆོད་པ་བཤམས་ལ་བྱིན་གྱིས་བརླབས། ཨརྒྷཾ་ནས་ཤཔྟའི་བར་གྱིས་མཆོད། རྡོ་རྗེ་དང་ནི༴ སོགས་ཀྱིས་བསྟོད། བདུད་རྩི་ཕུལ། འདོད་དོན་གསོལ་བཏབ། ཡིག་བརྒྱ་བཟོད་གསོལ་རྡུལ་ཚོན་གྱི་དཀྱིལ་འཁོར་གཤེགས་སུ་གསོལ་བ་དང༌། རས་བྲིས་ཡིན་ན་བརྟན་བཞུགས་བྱ་བ་དང༌། རྡུལ་ཚོན་ཆོ་ག་ཉིན་ཞག་སྦྲེལ་མའི་སྐབས། ཞག་སྔ་མ་རྣམས་ལ་བརྟན་བཞུགས་དང༌། །ཕྱི་མ་ལ་གཤེགས་གསོལ་བྱ་བ་དང༌། མཐར་རང་ལ་གོ་ཆ་དགོད་ཅིང༌། སྨོན་ལམ་དང་བཀྲ་ཤིས་རྣམས་བྱ་སྟེ་སྤྱི་དང་འདྲའོ། །ཟབ་མོ་བློ་མིག་དག་པས་མཐོང་བ་ན། །དད་པའི་སྙིང་ལ་མི་གཡོའི་གོ་སྐབས་ཅི། །ངེས་པའི་གཞུང་དང་མཐུན་པར་ལེགས་སྦྱར་བའི། །དཀྱིལ་ཆོག་འདིས་
ཀྱང་འགྲོ་ལ་ཕན་པར་འགྱུར། །དགེ་དེས་བཅོམ་ལྡན་རྡོ་རྗེ་སྙིང་རྗེའི་སྟོབས། །རྡོ་རྗེ་བཙུན་མོའི་བདེ་བས་རོལ་པ་ཅན། །མཉམ་མེད་དེ་དང་མཉམ་པར་ཉེར་སྤྱོད་པའི། །གསང་བའི་བདག་དང་མཚུངས་པར་ད་གྱུར་ཅིག ཅེས་པ་དཔལ་སངས་རྒྱས་ཐོད་པའི་དཀྱིལ་འཁོར་གྱི་ཆོ་ག་དེ་ཁོ་ན་ཉིད་གསལ་བ་ཞེས་བྱ་བ་འདི་ཡང༌། རྒྱལ་ཁམས་པ་ཏཱ་ར་ནཱ་ཐས་སྨྲས་པའོ། མངྒ་ལཾ། སློབ་དཔོན་ནག་པོ་སྤྱོད་པའི་ལུགས་ཀྱི་འཁོར་ལོ་སྡོམ་པའི་དཀྱིལ་འཁོར་གྱི་ཆོ་ག་ཤེས་པས། འདི་ལ་འཇུག་པར་བྱའོ། །དེ་ཡང་སྐྱེ་འདི་ཉིད་ནས་རབས་བསགས་པ། །བྱ་བ་དོན་ལྡན་ཁོ་ནའི་མཐུ་ལ་བརྟེན་གདོས་བྱས་རྒྱུ་ལུས་འདི་གང་བོར་མ་ཐག །འཁོར་བར་སྐྱེ་གནས་དམ་པ་ཀུན་ལྡོག་ཤོག །