དཔལ་རྡོ་རྗེ་གཞོན་ནུའི་དཀྱིལ་འཁོར་གྱི་ཆོ་ག་བདུད་འཇོམས་རོལ་བ།
དཔལ་རྡོ་རྗེ་གཞོན་ནུའི་དཀྱིལ་འཁོར་གྱི་ཆོ་ག་བདུད་འཇོམས་རོལ་བ་ཞེས་བྱ་བ་བཞུགས་སོ། །
ཨོཾ་སྭཱ་སྟཱི། དཔལ་རྡོ་རྗེ་གཞོན་ནུའི་དཀྱིལ་འཁོར་གྱི་ཆོ་ག་བདུད་འཇོམས་རོལ་བ་ཞེས་བྱ་བ། བླ་མ་དང་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །ཆོ་ག་འདིའི་དབང་དུ་བྱས་ནས་དོན་གསུམ་སྟེ། དམིགས་པར་བྱ་བའི་ཡུལ། བསྒྲུབ་པར་བྱ་བའི་ཐབས། ཉམས་སུ་བླངས་པའི་འབྲས་བུའོ། །དང་པོ་ནི་གཞི་འབྲས་ཀྱི་དེ་ཁོ་ན་ཉིད་ནས་གང་ལ་མངོན་སྤྱོད་བྱ་བའི་ཡུལ་གྱི་བར་རོ། །གཉིས་པ་ལ་དྲུག་སྟེ། ཕུན་ཚོགས་ལྔ་དང་ལྡན་པས་གཞི་བཅའ་ཞིང༌། །སྒྲུབ་པའི་སྔོན་དུ་འགྲོ་བའི་ལས་རིམ་བསྟན། །དཀྱིལ་འཁོར་སྒྲུབ་པའི་རིམ་པ་དངོས་ལ་འཇུག །སློབ་མ་དཀྱིལ་འཁོར་གཞུགས་ཤིང་དབང་བསྐུར་བཤད། །གསུམ་ཚན་གཉིས་ཀྱིས་ཁ་སྐོངས་ལས་འཇུག་བསྡུ། །བཤགས་བསྡོམས་ལས་ཀྱིས་ཕྲ་མོའི་ཉེས་པ་སྦྱང༌། ཞེས་པའོ། །དང་པོ་ནི། སྒྲུབ་པོ་གནས་དང་རྫས་དང་ཡོ་བྱད་དུས། ཞེས་བྱ་བ་སློབ་དཔོན་གྱི་མཚན་ཉིད་སོགས་ཏེ་གཞན་དུ་གསལ་ལོ། །གཉིས་པ་ནི། ཐོག་མར་སྔོན་འགྲོ་གཏོར་མ་ལ་དམིགས་ཏེ། ཨོཾ་བཛྲ་ཨ་མྲྀ་ཏ་
ཀུཎྜ་ལི་ཧཱུཾ་ཚིནྡྷ་ཚིནྡྷ་ཧཱུཾ་ཕཊ། ཀྱིས་བསངས། ཨོཾ་སྭ་བྷ་ཝ་ཤུདྡྷཿསརྦ་དྷརྨཿསྭ་བྷཱ་ཝ་ཤུདྡྷོ྅ཧཾ། གིས་སྦྱངས། སྟོང་པའི་ངང་ལས་བྷྲཱུཾ་ལས་བྱུང་བའི་གཏོར་སྣོད་ཡངས་ཤིང་རྒྱ་ཆེ་བའི་ནང་དུ། ཨོཾ་ཨཱཿཧཱུཾ་ལས་བྱུང་བའི་གཏོར་མ་བདུད་རྩིའི་རྒྱ་མཚོ་ཆེན་པོར་གྱུར། བྷྲུཾ་རཏྣ་པཉྩ་ཨ་མྲྀ་ཏ་ཧཱུཾ་ཨོཾ་ཨཱཿཧཱུཾ། ཕྱོགས་སྐྱོང་བ་བཅུ་གནས་བདག་གཞི་བདག་གྲོང་བདག་གཉུག་མར་གནས་པ། སྲིད་པ་གསུམ་གྱི་འབྱུང་པོའི་ཚོགས་དང་བཅས་པ་ཐམས་ཅད་བཛྲ་ས་མཱ་ཛཿ ཨོཾ་ཨིནྟྲ་ཡེ། ཨགྣ་ཡེ། ཡ་མ་ཡེ། ནི་རྀ་ཏེ། བཱ་རུ་ཎ། བཱ་ཡ་བེ། ཀུ་བེ་ར། ཨི་ཤཱ་ན། པྲཧྨ་པྲི་ཐི་ཝཱི་དེ་ཝཱི་སྭཱཧཱ། ན་མཿསརྦ་ཏ་ཐཱ་ག་ཏ་བྷྱོ་བི་ཤྭ་མུ་ཁེ་བྷྱཿསརྦ་ཐཱ་ཁཾ་ཨུཏ་ག་ཏེ་ས་སྥ་ར་ཎ་ཨི་མཾ་ག་ག་ན་ཁཾ་གྲྀཧྣེ་དཾ་བ་ལིཾ་ཏ་ཡེ་སྭཱཧཱ། ལན་གསུམ། ཨོཾ་གནས་བདག་གཞི་བདག་གྲོང་བདག་གཉུག་མར་གནས་པ་ལ་སོགས་པ། སརྦ་བྷཱུ་ཏེ་བྷྱཽ་ས་པཱ་རི་ཝ་རེ་བྷྱཿ། ཨོཾ་ཨཱ་ཀཱ་རོ་མུ་ཁཾ་སརྦ་དྷརྨཱ་ནཱཾ་ཨདྱ་ནུདྦནྣ་ཏྭ
ད་ཨོཾ་ཨཱཿཧཱུཾ་ཕཊ་སྭཱཧཱ། ལན་གསུམ་ཨརྒྷཾ་ནས་ཤཔྟའི་བར་གྱིས་མཆོད། ལྷ་ཆེན་བརྒྱད་པོ་འཁོར་དང་བཅས།ཞེས་པ་ནས། ཡིད་ལ་འདོད་པ་ཀུན་འགྲུབ་ཤོག གི་བར་སྤྱི་དང་འདྲ། སའི་ཕྱོགས་འདིར་རྣལ་འབྱོར་པ་བདག་ཅག་དཔལ་ཆེན་པོའི་དཀྱིལ་འཁོར་བཞེངས་ཏེ་སྒྲུབ་པ་ལ་འཇུག་པར་འཚལ་གྱི། ཕྱོགས་སྐྱོང་བ་ལ་སོགས་པ་དཀར་ཕྱོགས་སྐྱོང་བ་དམ་ཚིག་ཅན་རྣམས་ཀྱིས་བར་ཆད་སྲུང་བ་དང་དངོས་གྲུབ་སྒྲུབ་པའི་གཏོང་གྲོགས་མཛོད་ཅིག །བར་མ་རྣམས་ཀྱིས་ཀྱང་རུ་མ་ང༌། ཕྲག་མ་དོག །ཕན་པའི་སེམས་ཀྱིས་འགལ་རྐྱེན་ཞི་ཞིང་མཐུན་རྐྱེན་སྒྲུབ་པའི་འཕྲིན་ལས་ཅི་འགྲུབ་ཏུ་མཛད་དུ་གསོལ། མ་རུང་ལོག་འདྲེན་གདུག་ཅིང་སྡང་སེམས་ལྡན་པ་ཐམས་ཅད་གཏོར་མའི་ལྷག་མ་འདིས་ཚིམ་པར་གྱིས་ལ། སའི་ཕྱོགས་འདིར་མ་གནས་པར་གཞན་དུ་སོང་ཤིག །ཅེས་རོལ་མོའི་སྒྲ་དང་བཅས་ཏེ་ཕྱིར་དོར། གནས་དང་རྫས་བྱིན་གྱིས་བརླབ་པ་ནི། གོང་བཞིན་ཨ་མྲྀ་ཏས་བསངས། སྭ་བྷཱ་ཝས་སྦྱངས། སྟོང་པའི་ངང་ལས་གནས་ཁང་ཧཱུཾ་ཡིག་ལས་བྱུང་བའི་སྲུང་འཁོར་ཡངས་ཤིང་རྒྱ་ཆེ་བ། དབུས་སུ་བྷྲཱུཾ་ལས་དུར་ཁྲོད་འབར་བའི་གཞལ་ཡས་ཁང་མཚན་ཉིད་ཐམས་ཅད་ཡོངས་སུ་རྫོགས་པའི་ནང་དུ་ཨོཾ་ལས་བྱུང་བའི་སྣོད་ཡངས་ཤིང་རྒྱ་ཆེ་བ་རྣམས་སུ། ཨོཾ་ཨཱཿཧཱུཾ་རྣམས་ལས་བྱུང་བའི་མཆོད་པའི་སྤྲྀན་གྱི་ཕུང་པོ་བསམ་གྱིས་མི་ཁྱབ་པས་ཡོངས་སུ་གང་བར་གྱུར།
ཨོཾ་བཛྲ་ཨརྒྷཾ་སྭཱཧཱ། ཨོཾ་བཛྲ་པཱདྱཾ་སྭཱཧཱ། ཨོཾ་བཛྲ་པུཥྤེ་ཨཱཿཧཱུཾ་ནས་ཤཔྟ་ཨཱཿཧཱུཾ། ཨོཾ་རཱུ་པ་ཀཱ་མ་གུ་ཎ་ཨཱཿཧཱུཾ། རཱུ་པའི་ཚབ་ཏུ་ཤཔྟ་གནྡྷ་ར་ས་སྤརྴེ་དྷརྨ་དྷཱ་ཏུ། ཞེས་པ་རྣམས་བཅུག་རོལ་མོའི་སྒྲ་བྱ། །མཆོད་པའི་སྤྲིན་གྱི་གཟུངས་འདོན་ནོ། །དེ་ལྟར་སྔོན་འགྲོ་གཏོར་མ་དང་གནས་རྫས་བྱིན་རླབས་ནི་ཉི་མ་ཕལ་ཆེར་ལ་འཇུག་གོ །དེ་ནས་སྐྱབས་འགྲོ་སེམས་བསྐྱེད་རྡོར་སེམས་སྒོམ་བཟླས་རྣམས་སྤྱི་དང་མཐུན་པར་བྱ། ཨོཾ་ཤུུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཏྨ་ཀོ྅ཧཾ། ཨེ་ཡཾ་རཾ་བཾ་ལཾ་རཾ་ཀེཾ་བྷྲཱུཾ་བྷྲཱུཾ་བི་ཤྭ་བི་ཤུདྡྷེ་ཛྙཱ་ནཱ་ཙཀྲ་མཎྜ་ལ་ཧཱུཾ་བྷྲཱུཾ། པཾ་པདྨ་མཎྜ་ལ་ཧཱུཾ། ཨ་ཙནྡྲ་མཎྜ་ལ་ཧཱུཾ། མ་སུརྱ་མཎྜ་ལ་ཧཱུཾ། ཤཾ་རུ་དྲ་རུ་དྲི་ཏི་ར་བཾ། ཧཱུཾ་ཧཱུཾ་སྥ་ར་ཎ་ཕཊ། སཾ་ཧ་ར་ཎ་ཧཱུཾ། ཨོཾ་བཛྲ་ཀཱི་ལི་ཀཱི་ལ་ཡ་སརྦ་བིགྷྣཱན་བཾ་ཧཱུཾ་ཕཊ། བདག་ཉིད་བཅོམ་ལྡན་འདས་དཔལ་ཆེན་པོ་ཧེ་རུ་ཀ་ཞེས་པ་ནས། ཏིང་འཛིན་སེམས་དཔའ་ཨ་ཡིག་གེའི་བར་འོག་ནས་འབྱུང་བ་ལྟར་བརྗོད། ཨོཾ་བཛྲ་ཀྲོ་དྷ་ཧཱུཾ་ཀ་ར་ཧཱུཾ་གརྫ་གརྫ་ཧཱུཾ་ཕཊ། སྟེང་དུ་ཁྲོ་བོ་ཧཱུཾ་མཛད་སྔོ། ཞེས་པ་ནས། མི་རོའི་གདན་ལ་རོལ་གར་མཛད། ཅེས་པའི་བར་དུ་འོག་ནས་འབྱུང་བ་ལྟར་བརྗོད། ཨརྒྷཾ་ནས་ཤཔྟའི་བར་གྱིས་མཆོད། སྒེག་པ་དཔའ་བ་མི་སྡུག་ཚུལ་སྟོན་ཞིང༌།ནས། གནོད་སྦྱིན་འཇིགས་མ་བདུད་རྩི་གསོད་བྱེད་མ། དེ་འདྲའི་ལྷ་ཚོགས་ནས།དབང་དང་དངོས་གྲུབ་སྩོལ་གྱི་བར་བརྗོད། སྙིང་པོ་བརྒྱ་རྩ་སོགས་དང༌། ཁྲོ་བོ་བཅུའི་སྔགས་
ཇི་ལྟར་རིགས་པ་བཟླས་ཏེ། དཀྱིལ་འཁོར་གྱི་འཁོར་ལོ་རང་གི་སྙིང་གར་ཐིམ། ཛཿཧཱུཾ་བཾ་ཧོ། འདི་ནི་ཏིང་ངེ་འཛིན་གྱི་དཀྱིལ་འཁོར་བསྡུས་པ་སྟེ། ཉི་མ་དང་པོ་ཁོ་ན་ལ་འཇུག་གོ།ཆོ་ག་དེ་རྣམས་ནི་བཤད་འབུམ་སོ་སོའི་རྩིས་མགོས་བསྡུས་པ་མིན་ཡང་གསང་སྔགས་སྤྱི་འགྲོས་དང༌། བླ་མ་བརྒྱུད་པའི་ལག་ལེན་ལས་བྱུང་བ་ཡིན་ནོ། །ད་ནི་སྒྲུབ་པའི་སྔོན་འགྲོ་ལས་རིམ་དངོས་ལ། ས་ཆོག་མཚམས་གཅོད་ཕྱི་སྐངས་དང༌། །ལས་གསུམ་ཕུར་བུ་བྱིན་རླབས་དང༌། །ཕུར་བཤར་འདེབས་དང་མཆོད་པ་འགྲམ། །བུམ་པ་འགོད་དང་མ་ཏཾ་སྒྲོལ། དང་པོ་ནི། དེ་ནས་གསེར་སྐྱེམས་དང་གཏོར་མ་བཤམ། སྔོན་འགྲོ་གཏོར་མ་ལྟར་བྱིན་གྱིས་བརླབས། ན་མཿསརྦ་ཏ་ཐཱ་ག་ཏ་ཨ་ཝ་ལོ་ཀི་ཏེ་ཨོཾ་སམྦྷ་ར་སམྦྷ་ར་ཧཱུཾ། ཞེས་ལན་བདུན་ཙམ་གྱིས་བསྔོས། སྤྲོས་པ་བྱེད་ན་གསེར་སྐྱེམས་རྒྱས་པ་གྱེར། ཧཱུཾ་དགོངས་ཤིག་ས་བདག་ལྷ་ཀླུ་སྡེ་དང་དཔུང༌། །བྱིན་རླབས་བསྔོ་བའི་གཏོར་མ་འདི་བཞེས་ལ། །འཕྲིན་ལས་གཉན་པོ་སྒྲུབ་ཕྱིར་ས་སློང་གི །རིན་ཆེན་གཏེར་གྱིས་ས་འདི་སྩལ་དུ་གསོལ། ལན་གསུམ་གྱི་མཐར་ཕུད་གཏོར་གཏོར་མ་ཕྱིར་བཏང༌། རོལ་ཆེན་བྱས་ལ། ས་སློང་ཞིང་བཀའ་བསྒོའོ། །དཀྱིལ་འཁོར་གྱི་སའི་གནས་སུ་དྲི་བཟང་གི་ཐིག་ལེའམ་ཚོམ་བུ་བཀོད་གཏོར་མ་དང་མཆོད་པ་བྱིན་རླབས་སྔར་བཞིན་བྱ་སྟེ་གནས་ཁང་སྲུང་འཁོར་དང་གཞལ་ཡས་ཁང་དུ་བསྐྱེད་པ་མི་དགོས་སོ། །ཧཾ་ཧཾ་ཧཾ་རིམ་པ་བདུན་གྱི་ས་འོག་ནས། །ཀུན་གྱི་ཡུམ་ཆེན་སངས་རྒྱས་སྤྱན། །ནོར་འཛིན་ས་ཡི་ལྷ་མོ་ནི། །འཁོར་དང་བཅས་པ་གཤེགས་སུ་གསོལ། །ཨོཾ་པྲི་ཐི་
ཝཱི་དེ་ཝཱི་ཨཱ་གཙྪ་ཨ་གཙྪ་ཛཿཧཱུཾ་བཾ་ཧོ། ཨོཾ་བ་སུ་དྷ་རི་ཨརྒྷཾ་ནས། ཤཔྟའི་བར་གྱིས་མཆོད། ཁྱོད་ནི་ས་འཇིན་གཙོ་མོ་སྟེ། །རྒྱུ་དང་མི་རྒྱུ་འཇིག་རྟེན་སྐྱོང༌། གསེར་མདོག་ཕྱག་ན་བུམ་པ་བསྣམས། །འཇིག་རྟེན་ཡུམ་གྱུར་ཕྱག་འཚལ་བསྟོད། །སྐྱོབ་པ་སངས་རྒྱས་ཐམས་ཅད་ཀྱི་ནས། རྒྱལ་བར་བྱས་ཏེ་དཀྱིལ་འཁོར་འབྲི། གཙྪ་གཙྪ་སྭཱ་སྠཱ་ནཱཾ་དེ་དག་ནི་ས་བླང་བའོ། ཨོཾ་མ་ཧཱ་ཤུ་ནྱ་ཏ་ཧཱུཾ། ལན་བདུན་བརྗོད། ཏིང་ངེ་འཛིན་གྱིས་སྦྱང་བའོ། །ལས་དང་བྱ་བས་སྦྱང་བ་ནི། སྟེགས་བུ་བྱེད་པ་སོགས་འདིར་མ་བཤད་དོ། །དེ་ནས་སྟང་སྟབས་ཀྱིས་བཟུང་བ་ནི། སྤྲོས་པ་ལ་དགའ་ན། མཆམ་ཡིག་ལས་འབྱུང་བ་ལྟར། དཔལ་ཆེན་པོའིའགྱིང་མཆམ་ལ་སོགས་པ་ཕུར་བུའི་རྩ་མཆམས་སུ་གྲགས་པ་རྣམས་སྐབས་འདིར་བྱེད་པ་ཡིན་ཞིང༌། སྤྲོས་པ་གཙོ་བོར་མི་བྱེད་ན་མཆམ་མེད་ཀྱང་མཆོག་གོ །སླར་ཡང་རང་གི་ཐུགས་ཀ་ནས་ཁྲོ་བོ་བཅུ་སྤྲོས། ཨོཾ་བཛྲ་ཀཱི་ལི་སོགས། ཨོཾ་དཱིབྟ་སོགས། ཨོཾ་བཛྲ་ཀྲོ་དྷ་ཧཱུཾ་ཀ་ར་ནས། སྥོ་ཊ་སྥོ་ཊ་ཧཱུཾ་ཕཊ། བགེགས་སྦྱང་བ་སྤྱི་དང་མཐུན་པར། ཞི་བས་སྦྱང་བ་དང༌། ཞི་དྲག་ཕྱེད་མས་སྦྱང་བ་དང༌། དྲག་པོས་སྦྱང་བ་རྣམས་བྱེད་པ་ལས། ཁྲོ་བོའི་བསྟོད་པའི་འཇུག་ཏུ། དཀྱིལ་འཁོར་ཆེན་པོའི་ས་གཞི་ལ་གནས་པའི་ནས། གདོན་མི་ཟ། ཞེས་པའི་བར་བགེགས་ལ་བཀའ་བསྒོ། ཚིག་ལྷུག་པའི་སྐབས། བདེན་པ་ཆེན་པའི་བྱིན་གྱིས་བརླབས་ཀྱིས། སའི་ཕྱོགས་འདིར་དཔལ་རྡོ་རྗེ་ཕུར་བུ་འཕྲིན་ལས་ཀྱི་སྒྲུབ་པ་ཆེན་པོ་རྩོམ་པ་ཡིན་གྱི། སྲིད་
པ་གསུམ་གྱི་བགེགས་ཀྱི་ཚོགས་གང་ཡིན་པ་དེ་ཐམས་ཅད་སའི་ཕྱོགས་འདིར་མ་གནས་པར།ཞེས་འདོན་པ་སྤོ། རོལ་མོའི་སྒྲ་དང་བཅས་ཏེ་བདུག་རྫས་ཀྱིས་བདུག ཡུངས་ཀར་བྲབས་ཏེ། འབྱུང་བཞིའི་རྫས་ཀྱིས་སྦྱང་བ་ཡང་བྱའོ། །དེ་དག་ནི་སྔགས་དང་ཕྱག་རྒྱས་སྦྱང་བའོ། །ས་བཟུང་པ་ལ་ངེས་པར་བྱ་དགོས་པ་ནི། མཆོད་གཏོར་བཤམ། དཀྱིལ་འཁོར་གྱི་ས་གཞི་ལ་འདུག་ནས། །འོག་ཏུ་འཆད་འགྱུར་ལྟར་ཡཾ་གྱི་མེས་བསྲེགས་ཞེས་རྫས་བྱིན་རླབས་ནས་གཟུང་བཟླས་པའི་འཇུག་གི་བསྟོད་པ། དཔལ་གྱི་བཀའ་སྡོད་སྐུ་ལ་ཕྱག་འཚལ་ལོ། །ཞེས་པའི་བར་དུ་བྱ། སཾ་ཧ་ར་ཎ་ཧཱུཾ། ཛཿཧཱུཾ་བཾ་ཧོཿ ཞེས་དཀྱིལ་འཁོར་རང་གི་ཐུགས་ཀར་བསྡུའོ། ཡང་ན་སྟང་སྟབས་ཀྱིས་བཟུང་བ་སྐབས་འདིར་བྱས་ཀྱང་ཆོག་གོ །གཉིས་པ་མཚམས་བཅད་པ་ནི་ས་སྲུང་བ་སྟེ། དེ་ལ་དང་པོར་རྒྱལ་ཆེན་བཞི་བྱ་ར་བའི་ཚུལ་དུ་བཞག་པ་ནི། མཐོ་བརྩིགས་དེ་ལ་རྒྱལ་ཆེན་གྱི་སྔགས་བྲིས། སོ་སོར་མཆོད་གཏོར་བཤམ། ཐོག་མར་ཤར་གྱི་དེ་ལ་མཆོད་པ་དང་གཏོར་མ་བྱིན་རླབས་སའི་ལྷ་མོའི་སྐབས་བཞིན་བྱ། ཨོཾ་ཌྷྲྀ་ཏ་ར་ཥྟ་ཡ་སྭཱཧཱ། རྒྱལ་པོ་ཆེན་པོ་ཡུལ་འཁོར་སྲུང་སྐུ་མདོག་དཀར་པོ་གོའུ་རྒྱུད་མངས་འཛིན་པ། རང་གི་སྙིང་ག་ནས་འོད་ཟེར་འཕྲོས། རི་རབ་ཀྱི་བཾ་རིམ་ནས་རྒྱལ་པོ་ཆེན་པོ་ཡུལ་འཁོར་སྲུང་འཁོར་བཅས་བཛྲ་ས་མཱ་ཛཿ ཨོཾ་དྷྲི་ཏ་རཥྟ་ཡ། ན་མཿསརྦ་སོགས་ནམ་མཁའ་མཛོད་ཀྱི་སྔགས་བཏགས་པས་གཏོར་མ་འབུལ། ཨརྒྷཾ་ནས་ཤཔྟའི་བར་གྱི་མཆོད། དྲི་ཟ་དག་གི་བདག་པོ་རྒྱལ། །ཤར་གྱི་ཕྱོགས་རྣམས་སྐྱོང་བྱེད་པ། །རྒྱལ་པོ་ཆེན་པོ་གནས་སྲུང་པོ། །བཙུན་མོ་སྲས་དང་བློན་པོར་བཅས། །
དེ་ལ་བསྟོད་དེ་ཕྱག་ཀྱང་འཚལ། །མཆོད་སྦྱིན་གཏོར་མ་འདིས་བཞེས་ལ།ནས། ཀུན་འགྲུབ་ཤོག ཤར་ཕྱོགས་ན་ནི་ཡུལ་འཁོར་སྲུང༌། །འཇིག་རྟེན་སྐྱོང་བ་གྲགས་དང་ལྡན། །སྡེ་བོ་ཆེ་ལ་སྟོབས་པོ་ཆེ། ཁ་དོག་ལྡན་ཞིང་རྫུ་འཕྲུལ་ཆེ། །བདག་ཅག་རེ་བ་བསྐང་བའི་ཕྱིར། །མ་དག་པ་རྣམས་མཚམས་ཆོད་ཅིག །ཤར་ཕྱོགས་བགེགས་ཀྱི་མཚམས་ཆོད་ཅིག །ཞི་བའི་འཕྲིན་ལས་གྲུབ་པར་མཛོད། །བདག་ཅག་སྒྲུབ་པ་མ་ཐོན་གྱི་བར་དུ། རྒྱལ་པོ་ཆེན་པོ་ཡུལ་འཁོར་སྲུང་འཁོར་བཅས་ཀྱིས་གདོན་བགེགས་བར་ཆད་ནང་དུ་མི་བཏང་ཞིང༌། དངོས་གྲུབ་ཕྱི་ལ་ཡལ་དུ་མི་གཞུག་པར་སྒྲུབ་པའི་གཏོང་གྲོགས་དམ་པ་མཛོད་ཅིག ཅེས་བྱ། གཞན་གསུམ་ལའང་དེ་ཁོ་ནས་རིགས་འགྲེ་སྟེ། ཨོཾ་བཻ་རུ་ཌྷ་ཀ་ཡེ་སྭཱཧཱ། རྒྱལ་པོ་ཆེན་པོ་འཕགས་སྐྱེས་པོ། སྐུ་མདོག་སྔོན་པོ་རལ་གྲི་འཛིན་པ་ཞེས་ཚུལ་དེས་སོ་སོའི་མཚན་དང་སྔགས་རྣམས་སྤོས། གྲུལ་བུམ་དག་གི༴ ལྷོ་ཕྱོགས༴ རྒྱལ་པོ་ཆེན་པོ་ལུས་འཕགས་པོ༴ ལྷོ་ཕྱོགས་ན་ནི་འཕགས་སྐྱེས་པོ༴ ལྷོའི་བགེགས་རྣམས༴ མངོན་སྤྱོད་འཕྲིན་ལས༴ ཞེས་འདོན་པ་སྤོའོ། །དེ་བཞིན་དུ། ནུབ་མ་ལ། ཨོཾ་བི་རུ་པཱ་ཀྵ་ཡ་སྭཱཧཱ། རྒྱལ་པོ་ཆེན་པོ་མིག་མི་བཟང་སྐུ་མདོག་དམར་པོ་སྦྲུལ་ཞགས་དང་མཆོད་རྟེན་འཛིན་པ། ཀླུ་རྣམས་དག་གི༴ ནུབ་ཀྱི༴ སྤྱན་མི་བཟང་༴ ནུབ་ཕྱོགས་ན་ནི་སྤྱན་མི་བཟང༴ ནུབ་ཀྱི་བགེགས་རྣམས༴
དབང་གི་འཕྲིན་ལས༴ ཞེས་འདོན་པ་སྤོ། བྱང་གི་ལ། ཨོཾ་བཻ་ཤྲ་ཝ་ཎ་ཡ་སྭཱ་ཧཱ། རྒྱལ་པོ་ཆེན་པོ་རྣམ་ཐོས་སྲས། སྐུ་མདོག་སེར་པོ་བེ་ཅོན་དང་ནེའུ་འཛིན་པ༴ གནོད་སྦྱིན་དག་གི༴ བྱང་གི༴ ངལ་གསོས་པོ༴ བྱང་ཕྱོགས་ན་ནི་རྣམ་ཐོས་བུ༴ བྱང་གི་བགེགས་རྣམས༴ རྒྱལ་བའི་འཕྲིན་ལས༴ ཞེས་འདོན་པ་སྤོ། དེ་ནས་ཁྲོ་བོ་བཅུ་ཇག་པའི་ཚུལ་དུ་བཏང་བ་ནི། སྒྲུབ་ཁང་གི་ཕྱི་རོལ་གོམ་པ་ཉེར་གཅིག་ཙམ་གྱི་མཚམས་སུ་འབྲུབ་ཁུང་བྱེད་པར་བཤད་ཀྱང༌། ཚད་ངེས་བཟུང་མི་དགོས་ཏེ། སྒྲུབ་ཁང་གི་ཕྱི་མཚམས་ཇི་ལྟར་འོས་པར་དོང་ཆུང་ངུ་ཅུང་ཟད་རེ་བྲུས་ལ། ཕུར་ཆུང་བཅུ་ཁྲོ་བོ་བཅུར་མོས། རང་གི་སྙིང་ག་ནས་འོད་ཟེར་འཕྲོས། བགེགས་ཀྱི་གཙོ་བོ་ཕྱོགས་སྐྱོང་བཅུ་རྣམས་བཀུག་སྟེ། འབྲུབ་ཁུང་གི་ནང་དུ་བཅུག་པར་གྱུར། སྟེང་གི་འབྲུབ་ཁུང་དུ་ཕུར་བུ་གཅིག་བཏབ་སྟེ་ཐོ་བས་བརྡུངས། སྙིང་པོའི་མཐར། ཨོཾ་བཛྲ་ཀྲོ་དྷ་ཧཱུཾ་ཀ་ར་ཧཱུཾ། གརྫ་གརྫ་ཧཱུཾ་ཕཊ། ཨེ་མ་བདག་ཉིད་རང་བྱུང་བ། ཁྲོ་བོ་ཆེན་པོ་ཧཱུཾ་ཀ་ར། སྤྲུལ་པའི་ཕོ་ཉའི་ཚོགས་སྤྲོས་ནས། །སྟེང་ན་གནས་པའི་དགྲ་བགེགས་རྣམས། །ལྕགས་ཀྱུས་བཟུང་ལ་ཕུར་བུས་ཐོབ། །མགོ་བོ་ཚལ་པ་བརྒྱ་རུ་ཁོས། །ལུས་ཀྱང་དུམ་བུ་སྟོང་དུ་གཏུབས། སྙིང་ལ་ཀཱི་ལི་ཀཱི་ལ་ཡ། ཞེས་བརྗོད། དེས་ཕྱོགས་བཅུ་གར་ལ་རིགས་འགྲེ་སྟེ། ཧཱུཾ་ཀར་ཞེས་པའི་དོད་དུ། རྣམ་པར་རྒྱལ༴ དབྱུག་སྔོན་ཅན༴ གཤིན་རྗེ་གཤེད། མི་གཡོ་མགོན། རྟ་མཆོག་དཔལ༴ འདོད་པའི་རྒྱལ། བདུད་
རྩི་འཁྱིལ༴ ཁྲོ་བོ་ཁམས་གསུམ་རྣམ་རྒྱལ་ནི། སྟོབས་པོ་ཆེ་ཞེས་སོགས་འདོན་པ་སྤོ་ཞིང༌། སྟེང་གི་དོད་དུ་ཕྱོགས་སོ་སོ་དང༌། ཁྲོ་བོ་བཅུ་པོ་རང་རང་སོ་སོའི་སྔགས་ཀྱི་འདོན་པ་སྤོའོ། །དེ་དག་ནི་ཕྱི་མཚམས་བཅད་པ་ཡིན་པར་འཆད་དོ། །དེ་ནས་དམ་སྲི་མནན་པ་ནི། ལིང་གའི་སྙིང་གར། ཡ་མ་དམ་སྲི་སྟཾ་བྷ་ནི་ཛཿཛཿ ཞེས་པ་འབྲི་བར་བཤད། གྲོག་ལ་བྲིས་པའི་ལིང་གའམ། སྔགས་ཀྱི་ཤོག་རིལ་སྙིང་གར་བཅུག་པས་བག་ཟན་ནམ་ཁཾ་པ་ལ་བྱས་པའི་ལིང་གས་ཀྱང་རུང༌། འབྲུབ་ཁུང་དུ་ལིང་ག་བཅས་ལ། སྡེ་བརྒྱད་ལ་གསེར་སྐྱེམས་བཏང༌། ཨེ་ཡཾ་རཾ་བཛྲ་ཛྭ་ལ་རཾ། འབྲུབ་ཁུང་ཡངས་ཤིང་རྒྱ་ཆེ་བའི་དབུས་སུ། དྲི་ལས་དམ་སྲི་ཕོ་མོ་ལྕགས་སྒྲོག་དང་ཞགས་པས་བཅིངས་པའི་ལུས་ཅན་དུ་གྱུར། བདེན་བརྡར་དང་དགུག་གཞུག་བྱ། །ཕུར་ཆུང་གཅིག་བདུད་རྩི་འཁྱིལ་བར་བསྐྱེད། སྙིང་པོ་དང་བདུད་རྩི་འཁྱིལ་བའི་སྔགས་མང་དུ་བཟླས། ཧཱུཾ། དུར་ཁྲོད་ཆེན་པོའི་གནས་ཆེན་འདིར། །དངོས་གྲུབ་བར་ཆད་བྱེད་པའི་བགེགས། །བཀའ་ལས་འདའ་བྱེད་དམ་སྲི་རྣམས། །མནན་ཞིང་གཟིར་བའི་དུས་ལ་བབ། ལན་གསུམ། ཨོཾ་བཛྲ་ཨ་མྲྀ་ཏ་ཀུཎྜ་ལི་ཧཱུཾ། ཚིནྡྷ་ཚིནྡྷ་ཧཱུཾ་ཕཊ། དང་སྙིང་པོ་སྤེལ་བ་མང་དུ་བཟླས། ཕུར་ཆུང་དེ་ལིང་གའི་སྙིང་གར་བཏབ། བར་མཚམས་རྣམས་སུ་ཡུངས་ཀར་རམ། བལ་ཚོན་ནམ། དྲག་སྔགས་བཟླས་པའི་བྱེ་མས་བཀང༌། རྡོ་རྗེ་རྒྱལ་གྲཾ་བྲིས་པའི་གཡས་པས་མནན། དེ་ཡང་སས་གཡོགས་ཤིང་མནན་ལ། ཧཱུཾ་མནན་ནོ་མནན་ནོ་རི་རབ་འོག །སྤྱིངས་སོ་སྤྱིངས་སོ་རྒྱ་མཚོར་
སྤྱིངས། །གཏད་དོ་གཏད་དོ་གཤིན་རྗེའི་ལག །ཐར་མེད་འཆིང་བ་ཐོབ་པར་ཤོག། བྱང་ཆུབ་སེམས་མཆོག་མ་སྐྱེས་པར། །ནམ་ཡང་གཏོང་བར་མ་བྱེད་ཅིག །གཏད་དོ་མ་བཏང་ཤོ་ར་རེ། །སངས་རྒྱས་སྟོང་གི་བཀའ་ཡིན་ནོ། །ཨོཾ་ལཾ་ཧཱུཾ་ལཾ་དཾ་སྲི་སྟཾ་བྷ་ཡ་ནཾ། སྤྲོས་པ་ལ་དགའ་ན་ལས་བཞིའི་བྲོ་བརྡུངས་ཀྱང་བྱ། སུམྦྷ་ཧཱུཾ། བཞི་པ་མང་དུ་བཟླ། དེ་ནས་སྒོ་བྱང་འདོགས་པ་ནི། རའི་སོག་པ་གཉིས་ཀྱི་གཅིག་ལ་གཤིན་རྗེ་གཤེད་དང༌། གཅིག་ལ་བདུད་རྩི་འཁྱིལ་བའི་སྐུ་བྲིས་ལ། གཤིན་རྗེ་གཤེད་སྒོའི་ཡ་ཐེམ་གྱི་ཕྱི་དང༌། བདུད་རྩི་འཁྱིལ་བ་ནང་དུ་འདོགས་པར་བྱེད་དེ། གཅིག་ལ་བསྡུ་ན་གཤེན་རྗེ་གཤེད་གལ་ཆེ་བས། དེ་ཉིད་སྒོའི་ཡ་ཐེམ་གྱི་ནང་དུ་འདོགས་སོ། །གང་ལྟར་ཡང་བསངས་སྦྱངས། སྟོང་པའི་ངང་ལས་ཧཱུཾ་ཡིག་ལས་གཤིན་རྗེ་གཤེད་ནག་པོ། དབྱུག་པ་དང་ཞགས་པ་འཛིན་པ་དང༌། བདུད་རྩི་འཁྱིལ་བ་ལྗང་ཁུ་རྡོ་རྗེ་དང་དྲིལ་བུ་འཛིན་པའོ། །ཡེ་ཤེས་པ་བཛྲ་ས་མཱ་ཛཿ ཛཿཧཱུཾ་བཾ་ཧོཿ དཔྲལ་བར་ཨོཾ། མགྲིན་པར་ཨཱཿ ཐུགས་ཀར་ཧཱུཾ། ཨོཾ་ཨཱཿཀྲོ་དྷཻ་ཀ་ཡ་མནྟ་ཀ་ཧཱུཾ་ཕཊ། ཨོཾ་ཨ་མྲྀ་ཏ་ཀུཎྜ་ལི་ཧཱུཾ་ཕཊ། ཡང་ན་འདི་ཉིད་རང་གི་ཁྲོ་བཅུའི་སྔགས་ཀྱི་ནང་ཚན་གྱིས་ཀྱང་རུང་སྟེ། །སྔགས་གཉིས་པོ་བརྒྱ་རྩ་ཙམ་བཟླས། ཨརྒྷཾ་ནས་ཤཔྟའི་བར་གྱིས་མཆོད། ཧཱུཾ་གསང་ཆེན་ལྷུན་གྲུབ་ཕོ་བྲང་ན། །བཅོམ་ལྡན་ཆོས་རྗེས་བཀའ་སྩལ་ལྟར། །བདག་ཅག་རིག་འཛིན་སྒྲུབ་པ་པོ། །བཀའ་གསང་གཞུང་ཆེན་འདི་སྒྲུབ་བོ། །འདི་ལ་གནོད་ཅིང་བར་
གཅོད་ཀུན། །ས་འདི་ཕན་ཆད་མ་བཏང་ཅིག །ཕྱི་འཁོར་སྐྱོང་བའི་མུ་རན་ལ། །རྡོ་རྗེ་ཡལ་གཾ་ཐུབ་པར་མཛོད། ཨོཾ་བཛྲ་ས་མ་རཱ་ཛ་ས་མ་ཡ་སྟྭཾ། ཧཱུཾ་ལྗང་ནག་འབར་བ་ཆེན་པོའི་ཀློང་དཀྱིལ་ནས། །འཁྱིལ་བའི་དམ་ཚིག་བདུད་རྩི་འབར་བ་ཁྱེད། །རྣལ་འབྱོར་དམ་ཅན་སྒྲུབ་པའི་འབྲས་བུ་རྣམས། །མངོན་སུམ་ཚད་མའི་ཡིད་བཞིན་སྒྲུབ་པར་མཛོད། ཨོཾ་བཛྲ་ཨ་མྲྀ་ཏ་ཀུཎྜ་ལི་ས་མ་ཡ་སྟྭཾ། མེ་ཏོག་དོར། དེ་དག་ནི་བར་མཚམས་བཅད་པའོ། །ནང་མཚམས་གཅོད་པ་ནི། འོག་དངོས་གཞི་གཞུང་ལས་འབྱུང་བ་ལྟར། སྟོང་པའི་ངང་ལས་བདག་ཉིད་དཔལ་ཆེན་པོ། ཞེས་པ་ནས། བྷཉྫ་ར་ཎ་ཧཱུཾ་ཕཊ། ཀྱི་བར་བརྗོད་དེ། དོན་སྲུང་འཁོར་སྒོམ་པ་སྟེ། དེ་ཡན་ཆད་ནི་སའི་ཆོ་ག་ཡན་ལག་དང་བཅས་པའོ། །ས་བཟུང་བ་ཉིད་ཀྱི་ལྷ་སྟ་གོན་གྲུབ་པའི་ཕྱིར། རྙིང་མ་ཚད་ལྡན་ཕལ་ལ་དེ་ནི་ལོགས་སུ་མི་མཛད་དོ། །གསུམ་པ་ཕྱི་བཤགས་དང་ཕྱི་བསྐང་ནི། སཱ་ཙྭ་གདབ་པ། མདོ་སྡེ་བཀླག་པ། འཇིག་རྟེན་པའི་ལྷ་ཚོགས་རྣམས་ལ་གཏོར་མ་གཏོང་བ་སོགས་ཡིན་ཏེ་རང་ངམ་དགེ་འདུན་གྱིས་ཇི་ལྟར་འོས་ཙམ་བྱའོ། །བཞི་པ་དཀྱིལ་འཁོར་བཞེངས་པའི་ལས་གསུམ་བསྟན་པ་ལས་དང་པོ་གོ་མཱ་ཡེ་གཏོང་པ་ནི། འབྱུང་ལྔ་དང་སྦྱར་བའི་སྐུ་གསུང་ཐུགས་ཀྱི་བདུད་རྩིས་ཆག་ཆག་འདེབས་བཞིན་པས། ཧཱུཾ་བཀའ་གསང་རྨད་དུ་བྱུང་བའི་དཀྱིལ་འཁོར་འདིར། །བདུད་རྩི་དྲི་ཆེན་ཡེ་ཤེས་ལྔ་ལྡན་པས། །བདེ་གཤེགས་ཀུན་གྱི་གསང་མཆོད་སྒྲུབ་པའི་ཕྱིར། །གསང་བའི་
དཀྱིལ་འཁོར་ཆེན་པོར་ཆག་ཆག་འདེབས། །ཨོཾ་མ་ཧཱ་མ་ལ་པུ་ཏ་མཎྜ་ལ་ཧཱུཾ། བཀའ་གསང་སོགས། ཚིག་གཞན་གོང་བཞིན་ལས། རྐང་པ་གཉིས་པ་ལས། དམ་རྫས་དག་པའི་བདུད་རྩི་གུར་གུམ་ཆུས། ཞེས་དང༌། སྔགས་ལ་མ་ལ་པུ་ཏའི་གནས་སུ མཧཱ་ཀུད་ཀུ་མཎྜ་ལ་ཞེས་དང༌། འཁོར་བའི་རྒྱུན་གཅོད་བྱང་ཆུབ་སེམས་ཀྱི་དང༌། ཞེས་དང༌། མཧཱ་རཀྟ་མཎྜ་ལ་ཞེས་འདོན་པ་སྤོ་གཉིས་པ་ཐིག་གདབ་པ་ནི། བསངས་སྦྱངས། སྟོང་པའི་ངང་ལས་ཧཱུཾ་ལས་ཐིག་སྐུད་ནག་པོ་མི་བསྐྱོད་པ། ཨོཾ་ལས་ཐིག་སྐུད་དཀར་པོ་རྣམ་སྣང༌། སྭཱ་ལས་ཐིག་སྐུད་སེར་པོ་རིན་འབྱུང༌། ཨཱཿལས་ཐིག་སྐུད་དམར་པོ་སྣང་མཐའ། ཧཱ་ལས་ཐིག་སྐུད་ལྗང་ཁུ་དོན་གྲུབ་ཀྱི་ངོ་བོར་གྱུར། རྒྱལ་བ་རིགས་ལྔ་གཙོ་བོའི་སྐུ་ལ་ཞུགས། བྱང་ཆུབ་ཀྱི་སེམས་སུ་ཞུ་བ་ཐིག་སྐུད་ལ་ཐིམ། ཧཱུཾ་བཛྲ་ཀཱི་ལི་ཀཱི་ལ་ཡ་ཧཱུཾ་ཕཊ། ཨོཾ་བཛྲ༴ སྭཱ་བཛྲ༴ ཨཱཿབཛྲ༴ ཧཱ་བཛྲ་ཀཱི་ལི་སོགས་འདོན་པ་སྤོས་ནས་མང་དུ་བཟླས། སློབ་མ་འཁོར་ལོ་རྒྱས་འདེབས་སུ་གསལ་བས། རྡོ་རྗེ་གཞོན་ནུའི་རིག་འཛིན་རྣམས། སོགས་དང༌། སློབ་དཔོན་གཙོ་བོར་གསལ་བས༌། སྙིང་རྗེས་བསྒྲལ་བའི་སོགས་གླུར་བླངས་ཏེ། ཧཱུཾ་སྟོང་གསུམ་སྟོང་གི་འཇིག་རྟེན་ན། །ང་ནི་དཀྱིལ་འཁོར་ཐིག་འདེབས་ཀྱི། །གདུག་ཅན་ཚོགས་རྣམས་གང་འཁོད་པ། །འདི་རུ་མ་འདུག་གཞན་དུ་དེངས། ཨོཾ་བཛྲ་ཀྲོ་དྷི་ནི་ཧཱུཾ་ཕཊ། ཅེས་ཐིག་སྣ་གཏད། ཧཱུཾ་ནམ་མཁའ་བར་སྣང་ས་གཞི་ཨེ་ཡི་ངང༌། །གསང་བའི་
དཀྱིལ་འཁོར་ཆེན་པོར་ཐིག་བཏབ་པས། །རྡོ་རྗེ་སྲིན་པོའི་ལྷ་ཚོགས་བཞུགས་པའི་གནས། །ཕོ་བྲང་ཡེ་ཤེས་ལྷུན་གྱིས་གྲུབ་པར་གྱུར། བནྡྷ་ཛྙཱ་ན་ཙཀྲ་ཨེ་བྷྲཱུཾ། ཞེས་ཐིག་གདབ་བོ། །གསུམ་པ་ཚོན་གྱི་བྱ་བ་ལ་གཉིས་ཀྱི་ཚོན་བྱིན་གྱིས་བརླབ་པ་ནི། ཐིག་སྐུད་བྱིན་རླབས་འདོན་པ་སྤོས་པས་རྡུལ་ཚོན་གྱིས་བརླབས། ཀཱི་ལ་ཡ་ལན་མང་དུ་བརྗོད། དེ་རྗེས་ཚོན་འགྱེད་པའི་ཚེ། དཀར་པོ་ཨོཾ་གྱི་རང་བཞིན་ལས། །ཟླ་བ་ཤེལ་གྱི་འོད་ཟེར་འཕྲོས། །ཆོས་དབྱིངས་ཡེ་ཤེས་བྱིན་གྱིས་བརླབས། །ཕུར་བུ་དངོས་གྲུབ་ཐོབ་པར་ཤོག །ཀཱི་ལ་ཡ་བཟླས་དེ་བཞིན་དུ་འདོན་པ་སྤོས་ཏེ། མཐིང་ཀ་ཧཱུཾ་གི༴ ཨིནྡྲ་ནི་ལའི༴ མེ་ལོང་ཡེ་ཤེས༴ སེར་པོ་སྭཱ་ཡིག༴ རིན་ཆེན་གསེར་གྱི༴ མཉམ་ཉིད༴ དམར་པོ་ཨཱཿཡི༴ རིན་ཆེན་བྱུ་རུའི༴ སོར་རྟོག་ཡེ་ཤེས༴ ལྗང་ཁུ་ཧཱ་ཡི༴ རིན་ཆེན་གཡུ་ཡི༴ ནན་ཏན་ཡེ་ཤེས༴ ཞེས་སོ། །བར་འདིར་དཀྱིལ་འཁོར་འབྲི་བར་བྱའོ། ལྔ་པ་ཕུར་བུ་བྱིན་གྱིས་བརླབ་པ་ནི། སྔར་བཞིན་སློབ་མས་རྡོ་རྗེ་གཞོན་ནུའི་སོགས་དང༌། སློབ་དཔོན་གྱི་སྙིང་རྗེས་བསྒྲལ་བའི་སོགས་བརྗོད་ཕུར་བུ་རྣམས་རེ་རེ་བཞིན། ཨ་མྲྀ་ཏས་བསངས། རཾ་ཡཾ་ཁཾ། ཨོཾ་སྭ་བྷཱ་ཝ༴ རང་བཞིན་སྟོང་པ་ཉིད་དོ། །ཞེས་ཡུན་རིང་དུ་བསྒོམ། ཧཱུཾ་ལས་བྱུང་བའི་ཕུར་བུ་རྣམས་དཀྱིལ་འཁོར་གྱི་ལྷ་ཚོགས་སུ་གྱུར་པར་མོས་ལ་འོག་ནས་འབྱུང་བའི་ལྷ་བསྐྱེད་སྔགས་རྣམས་ཚར་གཅིག་བརྗོད། སྤྲོ་ཞིང་ནུས་ན་མངོན་རྟོགས་ཀྱི་སྐབས་ལས་འབྱུང་བ་
ལྟར། ཞལ་ཕྱག་རྣམས་གསལ་བཏབ་ཀྱང་ལེགས། ངག་ནས་མི་བརྗོད་ཀྱང་ཡིད་ཀྱིས་དམིགས་པས་གསལ་ཐེབས་པ་ནི་ངེས་པར་དགོས་སོ། །ཡང་སྔགས་དེ་དག་ལན་གཅིག་བརྗོད་པས། ལྷ་ཐམས་ཅད་ལྟེ་བ་མན་ཆད་ཕུར་བུའི་རྣམ་པར་གྱུར། ཧཱུཾ་སྐྱེ་མེད་རྣམ་དག་ནས། སྲས་མཆོག་ཀཱི་ལ་ཡ། སྐྱེ་མེད་ཆོས་ཀྱི་དབྱིངས་ལས་བཞེངས་ནས་ཀྱང༌། །སྲིད་པ་རྡོ་རྗེ་ཕུར་བུ་སྒྲུབ་པར་མཛོད། ཨོཾ་བཛྲ་ཀཱི་ལི་ཀཱི་ལ་ཡ་བཛྲ་ས་མཱ་ཛཿ ཛཿཧུཾ་བཾ་ཧོཿཏིཥྛ་བཛྲ་ཡེ་ཤེས་པ་སྤྱན་དྲངས། ཨོཾ་བཛྲ་ཀཱི་ལི་ཀཱི་ལ་ཡ་མཧཱ་པཉྩ་ཨ་མྲྀ་ཏ་བ་ལིང་ཏ་རཀྟ་ཧོཿ ཧཱུཾ་དིཔྟ་ཙཀྲ་སོགས་ཀྱིས་བསྟོད་པ་ལས་དབུ་ལ་སོགས་ཀྱི་དོད་དུ། རལ་གྲིའི་སྒྲ་ལ་སྤུ་དྲིའི་སོ་ཞེས་འདོན་པ་སྤོ། ཕུར་པའི་ལྷ་ཐམས་ཅད་ཀྱི་དབུ་ལ་ཧཱུཾ་ཨོཾ་སྭཱ་ཨཱཿཧཱ་རྣམས་ལས་བྱུང་བའི་རྒྱལ་བ་རིགས་ལྔ། དེ་རྣམས་ཀྱི་འོད་ཟེར་གྱི་སྐུ་ལུས་གང་བར་གྱུར། སངས་རྒྱས་ཐམས་ཅད་རིགས་ལྔའི་རྣམ་པར་སྤྱན་དྲངས་ཏེ་ཐིམ། །ཕུར་བུའི་སྤྱི་བོར་ཨོཾ་དཀར་པོ། སྐེད་པར་ཧྲཱིཿདམར་པོ། རྩེ་མོར་ཕཊ་སེར་པོ། དེ་རྣམས་ཀྱི་འོད་ཟེར་འཕྲོ་འདུ་ལས་སངས་རྒྱས་ཐམས་ཅད་ཀྱི་སྐུ་གསུང་ཐུགས་ཀྱི་བྱིན་རླབས་འདུས་པར་གྱུར་པ་ནི། དབལ་གྱི་ལོགས་གསུམ་ལ་ཧཱུཾ་རེ། །ཟུར་གསུམ་ལ་ཕཊ་རེ། རྩེ་མོར་ཨ་ཐུང་ནག་པོའོ། །དེ་རྣམས་ལས་འོད་ཟེར་འཕྲོས་འདུས་ཡོངས་སུ་འགྱུར་པ་ལས། དགྲ་བགེགས་ཀྱི་སྡིག་སྒྲིབ་བསྲེག་པའི་ནུས་པ་དང་ལྡན་པ་
མེའི་དབལ་དུ་གྱུར། འོག་ཕུར་པ་རྫས་ཀྱི་དཀྱིལ་འཁོར་གྱི་སྐབས་སུ་འབྱུང་བ་ལྟར། མ་སུརྱ་ནས། ཨེ་བེ་ཤ་ཡ་ཨ། ཨོཾ་བོ་དྷི་ཙིཏྟ་ཨ་བྷི་ཥིཉྩ་ཨ། ཞེས་པ་དང༌། ཨོཾ་བཛྲ་ཀཱི་ལི་ཀཱི་ལ་ཡ་ཛྭ་ལ་ཛྭ་ལ་སོགས་སྔགས་གསུམ་གྱིས་དབང་བསྐུར་བའི་བར་རྣམས་བྱ། ཨོཾ་བཛྲ་ཀཱི་ལི་ཀཱི་ལ་ཡ་བེ་ཏ་ལི་སོགས། ཡུངས་ཀར་གུ་གུལ་རཀྟ་རྣམས་ཀྱིས་གཟི་བྱིན་བསྐྱེད། ཧཱུཾ་ཁྲོ་རྒྱལ་འཇིགས་བྱེད་བཛྲ་ཀཱི་ལ་ཡ། ཟུར་གསུམ་སྐུ་གསུང་ཐུགས་སུ་གཟི་བརྗིད་སྐྱེད། ཟུར་བཞི་ཡེ་ཤེས་བཞི་རུ༴ ཟླུམ་པོ་བྱམས་དང་སྙིང་རྗེར༴ ཟླ་གམ་ཆགས་མེད་དབྱིངས་སུ༴ འབྱུང་ལྔ་ཡུམ་གྱི་དབྱིངས་སུ༴ བཅུ་དྲུག་རོལ་པའི་ཕོ་ཉར༴ མ་སྐྱེས་ལྷུན་གྱིས་གྲུབ་པར༴ གང་ལ་བྱ་བའི་དགྲ་བགེགས་རླག་པའི་ཕྱིར། སུ་ལ་བསྣུན་ཀྱང་ཐམས་ཅད་སྒྲོལ་བར་མཛོད། སྙིང་པོའི་མཐར། བཛྲ་ཀྲོ་དྷ་སརྦ་བུདྡྷ་ཏ་ཐཱ་ག་ཏ་ཧ་ས་ཡ་ན་ཧཱུཾ། ཨ་བེ་ཤ་ཡ་ཨ། ཞེས་མིང་དུ་བཟླས་སོ། །དེ་ལྟར་ན་ཆོས་སྐུར་བྱིན་གྱིས་བརླབ། །ལོངས་སྐུར་བྱིན་གྱིས་བརླབ། སྤྲུལ་སྐུར་བྱིན་གྱིས་བརླབ། ཡེ་ཤེས་ལྔར། སྐུ་གསུང་ཐུགས་སུ་ཐུགས་རྩེ་གཅིག་པར། འགྲོ་དོན་སྲས་མཆོག་ཏུ་དབང་བསྐུར་སྟེ་བདུན་ནོ། །ཡང་སྐད་ཅིག་ལས་བཞེངས་སུ་གསོལ་བ། སྤྱན་འདྲེན་པ། གཉིས་མེད་དུ་སྟིམ་པ། བསྟོད་པ་འབུལ་བ། གཟི་བྱིན་བསྐྱེད་པ། བྱིན་གྱིས་བརླབས་པ། དབང་བསྐུར་བ་སྟེ། བདུན་དུ་བྱེད་པའི་ལུགས་ཀྱང་ཡོད་པ་གང་ལྟར་བྱས་ཀྱང་མི་འགལ་ལོ། །དྲུག་པ་ནི།
ཕུར་བུ་དཀྱིལ་འཁོར་ལ་འགོད་པ་ཡིན་ཏེ། སྔ་རབས་པ་རྣམས་ཕུར་བཤར་འདེབས་པ་ཞེས་ཟེར་རོ། །དབུས་ནས་རང་བྱུང་གྲུབ་པའི་ལྷ། །སངས་རྒྱས་ཀུན་གྱི་ཡེ་ཤེས་སྐུ། །ཆོས་དབྱིངས་རྡོ་རྗེའི་ངང་ཉིད་ལས། །བཅོམ་ལྡན་རྡོ་རྗེ་གཞོན་ནུ་དང༌། །ཡུམ་ཆེན་འཁོར་ལོ་རྒྱས་འདེབས་མ། །ཡབ་ཡུམ་གཉིས་སུ་མེད་པ་ཡང༌། །རུ་དྲ་བསྣོལ་བའི་གདན་སྟེང་དུ། །དགྱེས་ཤིང་བརྟན་པར་བཞུགས་སུ་གསོལ། ཨོཾ་བཛྲ་ཀཱི་ལི་ཀཱི་ལ་ཡ་དཱིཔྟ་ཙཀྲ་བཛྲ་ས་མ་ཡ་ཏིཥྛནྟུ། སྟེང་ནས་རང་འབྱུང་གྲུབ་པའི་ལྷ། །སངས་རྒྱས་ཀུན་གྱི་ཡེ་ཤེས་སྐུ། །ཆོས་དབྱིངས་རྡོ་རྗེའི་ངང་ཉིད་ལས། །ཧཱུཾ་མཛད་རྡོ་རྗེ་སྒྲ་འབྱིན་བཅས། །ཕྲ་མེན་ཕག་དང་རྨིགས་བུའི་མགོ །དབང་དང་དངོས་གྲུབ་བླང་བའི་ཕྱིར། །ཚངས་པ་བསྣོལ་བའི་གདན་སྟེང་དུ། །དགྱེས་ཤིང་བརྟན་པར་བཞུགས་སུ་གསོལ། ཨོཾ་བཛྲ་ཀྲོ་དྷ་ཧཱུཾ་ཀ་ར་ཧཱུཾ་གརྫ་གརྫ་ཧཱུཾ་ཕཊ། བཛྲ་ས་མ་ཡ་ཏིཥྛནྟུ། དེ་བཞིན་དུ་འདོན་པ་བསྒྱུར་ཏེ། ཤར་ནས༴ སངས་རྒྱས་སོགས་རྐང་པ་གཉིས་ཀུན་ལ་སྦྱར། རྣམ་རྒྱལ་རྡོ་རྗེ་སྒེག་སྙེམས༴ ཕྲ་མེན་སྟག་དང་བྱ་རྒོད་མགོ །དབང་དང༌། ཞེས་སོགས་ཀུན་ལ་སྦྱར། བརྒྱ་བྱིན་དགྱེས་ཤིང་སོགས་ནས་སྔགས་བརྗོད་པ་སོགས་ཀུན་ལ་སྦྱར། མེ་ནས༴ དབྱུག་སྔོན་རྡོ་རྗེ་སྡེར་མོར༴ ཕྲ་མེན་གཡག་དང་བྱ་རོག་མགོ །མེ་ལྷ༴ ལྷོ་ནས༴ གཤིན་རྗེ་དུར་ཁྲོད་ལྷ་མོར༴ ཤ་བ་འུག་པའི་མགོ །གཤིན་རྗེ༴ ལྷོ་ནུབ༴ མི་གཡོ་རྡོ་རྗེ་གཏུན་ཁུང་༴
གཟིགས་དང་ཁྭ་ཏའི། སྲིན་པོ༴ ནུབ་ནས༴ རྟ་མགྲིན་རྡོ་རྗེ་གཏུམ་མོར༴ བྱི་ལ་པུ་ཤུད། ཆུ་ལྷ༴ རླུང་ནས༴ གཞན་གྱིས་མི་ཐུབ་མདའ་སྙེམས་བཅས། སྤྱང་ཁུ་ཁྲ་ཡི༴ རླུང་ལྷ༴ བྱང་ནས༴ འཁྱིལ་པ་རྡོ་རྗེ་རླུང་འབྱིན༴ སེང་གེ་ཕ་ཝང༌། གནོད་སྦྱིན༴ བྱང་ཤར༴ ཁམས་གསུམ་རྣམ་རྒྱལ་གསོད་མར༴ དྲེད་དང་སྦྲེ་མོང་༴ དབང་ལྡན༴ འོག་ནས༴ སྟོབས་ཆེན་རྡོ་རྗེ་སྐུལ་བྱེད༴ དོམ་དང་བྱི་བའི༴ ས་བདག༴ ཤར་ནས༴ རང་བྱུང་གྲུབ་པའི་ལྷ། འགུགས་བྱེད་ཆེན་མོ་པུ་ཤུད་མགོ །ཤར་སྒོ་ཉི་སྟེང་མི་རོའི་སྟེང། དགྱེས་ཤིང་སོགས་སྦྱར་བ་དང་རང་སྔགས་བརྗོད། དེ་བཞིན་དུ་གོ་བརྗེས་ཏེ། ལྷོ་ནས༴ འཆིང་བྱེད་ཆེན་མོ་བྱ་རོག་མགོ ལྷོ་སྒོར༴ དགྱེས་སོགས། ནུབ་ནས༴ སྡོམ་བྱེད་ཆེན་མོ་སྲིན་བྱའི་མགོ ནུབ་སྒོར༴ དགྱེས་ཤིང༴ བྱང་ནས༴ མཉེས་བྱེད་ཆེན་པོ་ཁྲ་ཡི་མགོ །བྱང་སྒོར༴ དགྱེས་ཤིང་༴ སོགས་སྦྱར། དམ་ཅན་གྱི་ཕུར་པ་འགོད་ན། ཨོཾ་བཛྲ་ཀཱི་ལ་ཀཱི་ལ་ཡ་མ་ཐ་མ་ཐ་བཛྲ་ཧཱུཾ་ཕཊ། མ་ཐ་སོགས་འདོན་པ་སྤོས་ཏེ། ཛྭ་ལ་ཛྭ་ལ་བཛྲ། སུ་རུ་སུ་རུ་བཛྲ། མུ་རུ་བཛྲ། མ་མ་ཝ་ཤཾ་ཀུ་རུ། མ་ཏེ་ཉ་ཀ་ར། །མ་མ་ཀརྨ་ཤཱིགྷྲཾ་ཀ་ར། ཀ་ཏེ་ཀ་ཡེ། ཨ་ཛི་ཏེ། ཛ་ཡེ་བི་ཛ་ཡེ། ཨ་བ་ར་ཛི་ཏེ། རྣམས་ལ་སྔར་བཞིན་སྦྱར། ཨོཾ་བཛྲ་ཀཱི་ལི་ཀཱི་ལ་ཡ་མ་མ་ཤཱི་གྷྲཾ་ཀ་ར་ཡ་ཧཱུཾ་ཕཊ། ལན་བཞི། དེ་བཞིན་དུ། མ་ར་སྱ་ན་དང༌། པྲ་མརྡྷ་ན་ཡ། ཡང་ལན་བཞི་བཞི་སྦྱར། སྤྱིར་
དེ་ཙམ་གྱིས་ཆོག་ལ། སྤྲོས་པ་ལ་དགའ་ན། ནམ་གྱི་སྲོད་ཀྱི་དམ་ཅན་མ། སོགས་ལ། དུས་ལ་བབ། ཅེས་པ་རྣམས་བཞུགས་སུ་གསོལ། ཞེས་འདོན་པ་བསྒྲུབ་བས་ཆོག་གོ །བདུན་པ་རྒྱན་བཀྲམ་པ་ནི། ས་རྒྱན་གནམ་རྒྱན་མཆོད་རྫས་སོགས་བཤམ། ཤེས་རབ་རལ་གྲི་ཡུམ་གྱི་རང་བཞིན་ལས། །ཐབས་ཀྱི་ཕྱག་རྒྱའི་ཆོ་འཕྲུལ་ཅི་ཡང་རྟགས། །ཐབས་ཤེས་རང་བཞིན་མཆོད་པའི་ལྷ་མོ་རྣམས། །རྒྱན་དང་མཆོད་རྫས་གདན་ལ་བཞུགས་སུ་གསོལ། སརྦ་པཱུ་ཛ་མེགྷ་ས་མ་ཡ་ཏིཥྛ་ལྷན། ཞེས་བརྗོད་དོ། །བརྒྱད་པ་བུམ་པ་འགོད་པའམ་བུམ་པ་སྟ་གོན་ནི། སློབ་མ་དབང་བསྐུར་དང༌། རབ་གནས་དང་བདག་འཇུག་ཕལ་པ་དང༌། སྒྲུབ་པ་དངོས་གྲུབ་གྱི་དབང་ལེན་པ་རྣམས་ལ་བུམ་སྒྲུབ་ངེས་པར་དགོས་ལ། སྒྲུབ་མཆོད་ཙམ་ལ་ནི་བུམ་པ་ངེས་པར་དགོས་པ་མིན་ཡང་འགྲུབ་ན་ནི་ལེགས་སོ། །དེ་ལ་བུམ་སྒྲུབ་དངོས་ནི། བདག་མདུན་བུམ་གསུམ་དབྱེར་མེད་དུ་སྒྲུབ་པ་ཡིན་ལ། འདིར་བུམ་པ་བཤམ་པ་སྟེ། བུམ་པ་རྣམས་ལ་ཡུངས་ཀར་གཏོར་ཞིང་གུ་གུལ་གྱི་གདུག་པས་བགེགས་བསྐྲད། དྲི་བཟང་གི་ཆུ་ལ་བདུད་རྩི་ཨ་མྲྀ་ཏས་བཏབ་པས་བཀང༌། ཤིང་འོ་མ་ཅན་གྱི་ཡལ་གས་ཁ་རྒྱན་བྱ། གཞན་སྤྱི་དང་མཐུན་པར་བཤམས་ཏེ། གཟུངས་ཐག་ནས་བཟུང་ལ། གཙོ་བོ་ཡབ་ཡུམ་གྱི་སྙིང་པོ་བརྒྱ་རྩ་རེ་དང༌། ཁྲོ་བཅུའི་སྔགས་ཉེར་གཅིག་རེ་བཟླ། ཐམས་ཅད་ཀྱི་ཐུན་མོང་དུ། ཀི་ལཱ་ཡ་སྟོང་ཕྲག་སོགས་མང་དུ་བཟླས་ནས་དཀྱིལ་འཁོར་ལ་དགོད་པར་བྱའོ། དེ་ཡང་བུམ་
པ་བཅུ་གཅིག་ཡོད་ན། དབུས་མ་རྣམ་རྒྱལ་བུམ་པ་ལ་གཙོ་བོ་ཡབ་ཡུམ་དང༌། །གཞན་བཅུ་པོ་ལ་ཁྲོ་བཅུ་བཟླ་བ་ཡིན་པས། གཙོ་བུམ་མཉྫི་སོགས་ཀྱི་སྟེང་དུ་བཀོད་ནས། དབུས་སུ་འཇོག་པ་སོགས་ལྷ་སོ་སོའི་རང་གནས་སུ་འགོད་དགོས་རྒྱུ་ཡིན་ཡང་འགོད་ཚུལ་སྟབས་མི་བདེ་ན། གཙོ་བུམ་ཤར་སྒོའི་ཐད་ཀྱི་གཡོན་དང༌། གཞན་རྣམས་རྡོ་རྭའི་ནང་གི་ཕྱོགས་མཚམས་བརྒྱད་ལ་འགོད་དོ། །བུམ་པ་གཅིག་ལས་མེད་ན་ཤར་སྒོའམ་ནུབ་སྒོ་གང་འཐད་དུ་བཀོད་ཀྱང་ཆོག །འདིར་བསང་དགོས་པ་རྣམས་བདུད་རྩིའམ་ཉུང་ཀར་གཏོར་བས་བྱེད་པའི་ཕྱིར། །ལས་བུམ་དང་བསང་ཆུ་མི་དགོས་ལ། ཅི་སྟེ་བྱེད་ན་བྱང་གི་བུམ་པ་ཉིད་ལས་བུམ་ཡིན་པས། བསང་ཆུར་བྱེད་ནའང་ལས་ཐམས་ཅད་པའི་བུམ་ཆུ་དེ་ཉིད་དུང་ཕོར་དུ་བླངས་པས་སོ། །རྙིང་མའི་ཡིག་རྙིང་འགའ་རེ་ན་ཡང་བུམ་པ་སྟ་གོན་སྤྱི་དང་མཐུན་པའི་ལུགས་ཀྱང་འདུག་པས། དེ་ལྟར་འགལ་བ་མེད་མོད་ཀྱི་རང་ལུགས་དེ་ཙམ་གྱིས་ཆོག་གོ །དགུ་པ་མ་ཏཾ་སྒྲོལ་བ་ནི། སློབ་དཔོན་ཧཱུཾ་ཀཱ་རས་མཛད་པའི་སངས་རྒྱས་མཉམ་སྦྱོར་གྱི་དཀྱིལ་ཆོག་ན། དངོས་གཞི་དཀྱིལ་འཁོར་བསྐྱེད་ཟིན་པའི་རྗེས་སུ། །མ་ཏཾ་སྒྲོལ་བ་དྲག་པོའི་རོལ་གར་མང་པོ་དང་བཅས་ཏེ། སྦྱོར་སྒྲོལ་གྱི་མཆོད་པའི་ཚུལ་དུ་མཛད་པ་ཉིད་རྩ་བའི་ཁུངས་ཡིན་པས་སྤྱིར་དེ་དང་མཐུན་ན་ལེགས་ཀྱང༌། གོང་མ་མང་པོ་ཞིག་སྐབས་འདིར་དཀྱིལ་འཁོར་བསྐྱེད་པའི་དོན་དུ། མ་ཏྲཾ་སྒྲོལ་བ་བསྡུས་པ་རེ་མཛད་པ་ཡང་རྙིང་མ་རང་ལུགས་གྱི་རྒྱུད་གཞུང་དོན་ལ་གནས་པའི་ཕྱིར། སྒྲུབ་པར་བྱ་བ་ཁོ་ནའོ། །དེ་ཡང་མ་ཏཾ་གི་ལིང་ག་བཅས་ནས་
བསངས་སྦྱངས། སྟོང་པའི་ངང་ལས་ཡི་གེ་དྲི་ལས་བྱུང་བའི་རྣམ་པ་མ་ཏཾ་ག་རུ་དྲའི་གཟུགས་ཅན། །ངོ་བོ་སྒྲུབ་པ་པོ་དངོས་གྲུབ་སྒྲུབ་པ་ལ་གེགས་བྱེད་པའི་བགེགས་དང་ལོག་འདྲེན་བྱད་མ་ཀུན་འདུས་པའི་ངོ་བོ་གདུག་ཅན་དེ་ཉིད་དབང་མེད་དུ་འགྱེལ་ཞིང་ས་ལ་ལྷུང་བར་གྱུར། བདག་ཉིད་རྡོ་རྗེ་གཞོན་ནུའི་ཐུགས་ཀ་ནས་ཁྲོ་བོ་མི་གཡོ་བ་འཁོར་དང་བཅས་པ་སྤྲོས་པར་གྱུར། ཧཱུཾ་དུར་ཁྲོད་གསང་བའི་དཀྱིལ་འཁོར་འདིར། །ཐབས་དང་ཤེས་རབ་རོལ་པ་ལས། །ཟ་བྱེད་འབར་བའི་རྔམ་སྟབས་ཀྱིས། དགྲ་བགེགས་བསྒྲལ་བའི་དུས་ལ་བབ། །འཇོམས་བྱེད་ཆེན་པོ་ཨཱརྱ་ཨ་ཙ་ལ། །མཉེས་བྱེད་རྡོ་རྗེ་སྲིན་པོ་སེན་རྣོན་མ། རྡོ་རྗེ་ཕྲ་མེན་གཟིག་དང་ཁྭ་ཏའི་མགོ །སྡང་དགྲ་གནོད་བྱེད་སྒྲོལ་བའི་དུས་ལ་བབ། ས་མ་ཡ་སྟྭཾ། ལན་གསུམ། ལིང་ག་བསྐྱེད་ཅིང་ཕོ་ཉ་སྤྲོ་བའོ། །བདེན་བརྡར་བརྗོད་ཅིང༌། དངོས་གྲུབ་ལ་བར་དུ་གཅོད་ཅིང་བསྟན་པ་ལ་གནོད་པར་བྱེད་པའི་སྡང་དགྲ་གནོད་བྱེད་འགེགས་དང་ལོག་འདྲེན་བྱད་མ་ལ་སོགས་པ་མ་ཏཾ་གི་རིགས་སུ་གནས་ཤིང་བདུད་ཀྱིས་བྱིན་བརླབས་པ་གནོད་བྱེད་རུ་དྲ་ཐམས་ཅད། ཅེས་འདོན་པ་སྤོས་ཏེ་དགུག་གཞུག་བྱ། ཐར་པའི་ལམ་འབྱེད་དཀྱིལ་འཁོར་འདིར། །སྐལ་ལྡན་ཚོགས་རྣམས་འོངས་པ་ལྟར། །རུ་དྲ་འདིར་ཤོག་རིགས་ཀྱི་བུ། །བདེ་བར་འོངས་སོ་ལེགས་པར་ཤོག །སྙིང་པོའི་མཐར་མི་གཡོ་བའི་སྔགས་སྦྱར། མ་ཏཾ་ཀ་རུ་ཏྲ་ཨཱ་ཀ་ཤ ཏྲི་ཡཾ་ཛ་བཱ་
མ་ར་ཡ་ཛ་ཛ། ཞེས་ལན་གསུམ་གྱི་ས་བོས་ཏེ་མ་ཏྲཾ་འབོད་ཅིང་དགུག་པའོ། །སྔགས་གཉིས་ཀྱི་མཐར། མ་ཏཾ་ཀ་རུ་ཏྲ་ཨ་བེ་ཤ་ཡ་ཨ་ཨ། ལན་གཉིས་ཤུ་རྩ་གཅིག་གིས་གཟུགས་བརྙན་ལ་དབབ་པའོ། །ཛཿཧཱུཾ་བཾ་ཧོཿ མང་དུ་བཟླས་ཤིང༌། གཟུགས་བརྙན་འབྲུབ་ཁུང་དུ་བཅུག །མགོ་ལྷོ་ནུབ་དང་རྐང་པ་བྱང་ཤར་དུ་བསྟན། ཕོ་མོ་གཉིས་ཡོད་ན་བསྣོལ་མར་བཞག ཞབས་ཀྱི་འོག་དུ་མནན་པར་བསམ། །མཐར་བྱེད་ཆེན་པོའི་འགྱིང་སྟབས་ཀྱིས། །སྒྲོལ་བདག་ཞབས་ནི་གཡས་པ་ཡི། །རུ་དྲ་ཕོ་མོའི་སྟེང་ནས་གནོན། ས་མ་ཡ་ཛྭ་ལ་ཙིཏྟ་ཧཱུཾ་ཕཊ། མ་ཏཾ་མནན་པའོ། །ཕུར་ཆུང་གཅིག་གམ་གཉིས་ལིང་ག་ལ་བཏབ་སྟེ། ཁོག་པ་དྲལ་ཞིང་སྒོ་དབྱེ་སྟེ། །ལྷུན་གྲུབ་དབྱིངས་ཀྱི་སྒོ་དབྱེའོ། །ཡེ་ཤེས་འབར་བའི་ཕུར་པ་ཡིས། །ཡུལ་ལས་འདས་པའི་སྒོ་ཕྱེ་ཤིག སྙིང་པོ་དང་བདུད་རྩི་འཁྱིལ་བའི་སྔགས་ཀྱི་མཐར། མ་ཏཾ་ག་རུ་དྲ་ཨུད་གྷ་ཌ་ཡ། ས་མ་ཡ་པྲ་བེ་ཤ་ཡ་ཕཊ། མ་ཏཾ་ཁོག་པ་དྲལ་བའོ། །རཾ་ཡཾ་ཁཾ་ཞེས་མང་དུ་བཟླས་རུ་དྲའི་སྡིག་སྒྲིབ་ཐམས་ཅད་བསྲེགས་སྦྱངས་པར་བསམ། སྒྲིབ་པ་སྦྱང་བའོ། །ཨོཾ་མ་ཐ་མ་ཐ་སརྦ་པྲེ་ཏ་ག་ཏེ་ཧེ་དུུ་ན་ཧཱུཾ་ཕཊ། ཨོཾ་པ་ཙ་པ་ཙ་སརྦ་ཏིརྱ་ག་ཏེ་ཧེ་དུུ་ན་ཧཱུཾ་ཕཊ། ཨོཾ་ད་ཧ་ད་ཧ་སརྦ་ན་ར་ཀ་ག་ཏེ་ཧེ་དུུ་ན་ཧཱུཾ་ཕཊ། སྔགས་གསུམ་པོ་དེ་མང་དུ་བཟླས་པ་ནི་ངན་སོང་གི་སྒོ་བཀག་པའོ། །དེ་ཡི་ཁམས་དང་སྐྱེ་མཆེད་རྣམས། །སེམས་ཀྱི་ངོ་བོར་རབ་བསྡུས་ཏེ། །བྱང་ཆུབ་སེམས་ཀྱི་དབྱིངས་ཉིད་དུ། ཁམས་གསུམ་འཁོར་བ་ཀུན་བསྡུའོ། །ཏྲི་ཧཱུཾ་
བོདྷི་ཙིཏྟ་སཾ་ཧ་ར་ཎ་ཧཱུཾ། ཞེས་བྱང་ཆུབ་སེམས་སུ་བསྡུས། དེ་ནི་ཧཱུཾ་ལ་བསྡུ་བའོ། །ཟླ་དཀྱིལ་ཧཱུཾ་གི་སྦྱོར་བས་འཕངས། ཕཊ་ཀྱིས་ཤེས་རབ་ལྷུམས་སུ་བསྐྱོད། །བདེ་གཤེགས་རིགས་ཀྱི་སྲས་སུ་སྐྱེས། །འགྲོ་བའི་དོན་དུ་དབང་ཡང་བསྐུར། །ཨཱཿཧཱུཾ་ཡཾ་ཕཊ། བཛྲ་སཏྭ་ཧཱུཾ། ཨ་བྷི་ཥིཉྩ་ཨ། ཞེས་གནས་སྤར་བའོ། །བདག་དང་བདག་གིར་འཛིན་པས་འཇིག །སྡིག་པའི་ལས་ཀྱིས་སྡུག་བསྔལ་བསྐྱེད། །ང་ཡི་བསྟན་པ་འདིར་ཞུགས་ཤིག །འོན་ཏང་འཁོར་བའི་སྡུག་བསྔལ་དྲལ། ཞེས་ཆོས་བསྟན་པའོ། །ཆོས་ཉིད་སྐྱེ་འགག་མེད་པ་ཡང༌། །བདེ་བར་གཤེགས་དང་འགྲོ་བ་ཞེས། །བདག་མེད་པས་ན་མཉམ་ཉིད་སྐུ། །ཐུགས་རྗེ་ཆེན་པོས་ཅིས་མི་འཛིན། ཞེས་ལྟ་བ་བསྟན་པའོ། །མ་ཏཾ་ཆེན་པོའི་ཁོག་པ་ལ། །ཧེ་རུ་ཀ་ཡི་གནས་བཅུ་དང༌། །དུར་ཁྲོད་ཆེན་པོའི་གནས་བརྒྱད་གྱུར། །དཀྱིལ་འཁོར་ཆེན་པོར་བཞུགས་པའོ། །བྷྲཱུཾ་བི་ཤྭ་བེ་ཤུདྡྷེ་ཨེ་ཝཾ་མ་ཡ། མཎྜ་ལ་རཾ། ཞེས་བཟླ་ཞིང༌། ལིང་ག་གཏུབས་ཏེ་མགོ་བོ་བདེན་བྲལ། ལག་གཉིས་ལྷོ་དང་ནུབ། སྐེད་པ་གཡས་གཡོན་མེ་དང་རླུང༌། རྐང་པ་ཤར་དང་བྱང༌། ཕོ་རྟགས་དབང་ལྡན་དུ་བོར་ཏེ། གཞལ་ཡས་ཁང་དུ་བསྟན་པའོ། །དེ་ལྟར་ན། ཕོ་ཉ་སྤྲོས་དང་དགུག་གཞུག་དང༌། གཟུགས་ལ་དབབ་ཅིང་ཞབས་ཀྱི་མནན། ཁོག་པ་དྲལ་དང་སྒྲིབ་པ་སྦྱངས། །ངན་སོང་སྒོ་བཀག་ཧཱུཾ་ལ་བསྡུ། །གནས་སྤར་ཆོས་བཤད་ལྟ་བ་བསྟན། །གཞལ་ཡས་ཁང་བསྒྱུར་བཅུ་གཉིས་སོ། །ཞེས་པ་ནི་མ་ཏཾ་སྒྲོལ་བའི་སྡོམས་སོ། །རྩ་བའི་གསུམ་པ་དཀྱིལ་
འཁོར་སྒྲུབ་པའི་རིམ་པ་དངོས་ལ་འཇུག་པ་ནི། འདིར་དངོས་གཞི་དཀྱིལ་འཁོར་སྒྲུབ་པ་ནི་བདག་མདུན་བུམ་གསུམ་དབྱེར་མེད་ཡིན་པར་གོ་དགོས་སོ། །དེ་ཡང་སྔོན་འགྲོ་གཏོར་མ་བཏང༌། གནས་ཡོའམ། མཆོད་པ་བྱིན་རླབས་ཀྱང་འདིར་བྱས་ན་ལེགས། །སྨན་རག་བྱིན་རླབས་ཀྱི་རྗེས་སུ་བྱས་ཀྱང་རུང་ངོ༌། །དེ་ལ་སྦྱོར་དངོས་རྗེས་གསུམ་ལས། དང་པོ་ལ་སྡོམས་ནི། ཚད་མེད་མཚམས་བཅད་བརྡར་སྒོ་དབྱེ། །བརྡའི་ཕྱག་འཚལ་རྟགས་ཀྱིས་འདེབས། དམ་འཆའ་བཤགས་པ་བྱིན་འབེབས་དང༌། །ཡོ་བྱད་བྱིན་རླབས་བསྙེན་ཕུར་བསྐྱེད། ཅེས་པ་ལྟར་སྦྱོར་བའི་ཆོས་བཅུ་ལས། དང་པོ་ཚད་མེད་སྒོམ་པ་ནི། སེམས་ཅན་བདེ་དང་ལྡན་གྱུར་ཅིག །སྡུག་བསྔལ་ཀུན་དང་བྲལ་བར་ཤོག །བདེ་དང་རྟག་ཏུ་མི་འབྲལ་ཞིང༌། །ཆོས་ཀུན་མཉམ་ཉིད་རྟོགས་པར་ཤོག གཉིས་པ་མཚམས་གཅོད་པ་ནི། ཨོཾ་སྭ་བྷ་ཝ་ཤུདྡྷཿསརྦ་དྷརྨཱཿསྭ་བྷཱ་ཝ་ཤུདྡྷོ྅ཧཾ། ཨོཾ་བཛྲ་ཀཱི་ལི་ཀཱི་ལ་ཡ་སརྦ་བིགྷྣཱན་བཾ་ཧཱུཾ་ཕཊ། སྟོང་པའི་ངང་ལས་བདག་ཉིད་དཔལ་ཆེན་པོ་རྡོ་རྗེ་གཞོན་ནུའི་སྐུར་གྱུར། ཐུགས་ཀར་ཧཱུཾ་ནག་པོ་འོད་ཟེར་འབར་བ། དེ་ལས་ཁྲོ་བོ་བཅུ་སྤྲོས་ཕྱོགས་བཅུར་འཁོད། ཨོཾ་བཛྲ་ཀྲོ་དྷ་ཧཱུཾ་ཀ་ར་ཧཱུཾ། ཨོཾ་བཛྲ་ཀྲོ་དྷ་བི་ཛ་ཡ་ཧཱུཾ། ཨོཾ་བཛྲ་ཀྲོ་དྷཱ་ནི་ལ་དནྜ་ཧཱུཾ། ཨོཾ་བཛྲ་ཀྲོ་དྷ་ཡ་མཱན་ཏ་ཀ་ཧཱུཾ། ཨོཾ་བཛྲ་ཀྲོ་དྷ་ཨཱརྱ་ཨ་ཙ་ལ་ཧཱུཾ། ཨོཾ་བཛྲ་ཀྲོ་དྷ་ཧ་ཡ་གྷྲཱྀ་བ་ཧཱུཾ། ཨོཾ་བཛྲ་ཀྲོདྷ་ཨ་པ་ར་ཛི་ཏ་ཧཱུཾ། །ཨོཾ་བཛྲ་ཀྲོ་དྡྷ་ཨ་མྲྀ་ཏ་ཀུཎྜ་
ལི་ཧཱུཾ། ཨོཾ་བཛྲ་ཀྲོ་དྷ་ཏྲཻ་ལོ་ཀྱ་བི་ཛ་ཡ་ཧཱུཾ། ཨོཾ་བཛྲ་ཀྲོ་དྷ་མཧཱ་བ་ལ་ཧཱུཾ། གདུག་ཅིང་སྡངསེམས་ལྡན་པ་རྣམས། །ལྷའམ་འོན་ཏེ་བདུད་ཀྱང་རུང༌། །ང་ལ་བར་ཆད་བྱེད་པའི་བགེགས། །མཐུ་དང་རྫུ་འཕྲུལ་མེད་པར་བྱོས། །ཁྲག་འཐུང་རྡོ་རྗེ་གཞོན་ནུའི་བཀའ། །སངས་རྒྱས་བྱང་ཆུབ་སེམས་དཔའ་དང༌། །དཀྱིལ་འཁོར་ལྷ་ཚོགས་ཀུན་གྱི་བཀའ། །ཆོས་ཉིད་བདེན་པའི་བཀའ་འདི་ཡིས། །སྲིད་པའི་རྩེ་མོ་མན་ཆད་ནས། །ན་རག་དམྱལ་ཁམས་ཡན་ཆད་ཀྱི། །སྲིད་གསུམ་གནས་པའི་བགེགས་ཀྱི་ཚོགས། །སྒྲུབ་ལ་བར་གཅོད་འཚེ་བ་དང༌། །དཀྱིལ་འཁོར་ལྟ་བར་མི་དབང་ཞིང༌། །ཕྱག་རྒྱ་སྒོམ་དང་བཟླས་པ་དང༌། །གསང་སྤྱོད་ལྟ་བར་མི་དབང་བ། །དེ་དག་ཐམས་ཅད་ད་ལྟ་ཉིད། །མྱུར་བ་ཁོ་ནར་གཞན་དུ་དེངས། །གལ་ཏེ་བཀའ་ལས་འདའ་བྱེད་ན། །ཡཀྴ་མེ་དབལ་རབ་ཁྲོས་ཏེ། །ལུས་སེམས་རྡུལ་དུ་བརླག་ནས་ཀྱང༌། །མི་བཟད་དམྱལ་བ་ཆེན་པོར་ལྷུང༌། །མཚོན་ཆ་རྡོ་རྗེ་འབར་བ་ཡིས། །འཇིགས་པར་འགྱུར་བ་གདོན་མི་ཟ། །ཡང་དག་གསང་བའི་དཀྱིལ་འཁོར་འདིར། །འདུ་བའི་ལྷ་ནི་མ་གཏོགས་པ། །གསང་བའི་དམ་ཅན་སོ་སོ་ནས། །ཀུན་ཀྱང་ཐུགས་དམ་སྐོངས་ཟིན་གྱི། །སོ་སོའི་གནས་སུ་འགྲོ་བར་གྱིས། །ཡུངས་ཀར་གཏོར་ཞིང་དྲག་རོལ་དང་བཅས། ཁྲོ་བོ་བཅུའི་སྔགས་དྲག་ཏུ་བཟླས་ཏེ་བགེགས་བསྐྲད། ང་ཡི་དཀྱིལ་འཁོར་བསྟན་བྱའི་ཕྱིར། ཁྲོ་རྒྱལ་བྱིན་རླབས་ལས་འབྱུང་བའི། །མཚོན་ཆ་རྣམ་པ་སྣ་ཚོགས་ཀྱི། །དཀྱིལ་འཁོར་
རིམ་པ་ཚུལ་བཞིན་སྲུང༌། །ཧཱུཾ་སྟེང་ཡང་རྡོ་རྗེའི་བླ་རེ་གུར། འོག་ཀྱང་རྡོ་རྗེའི་ས་གཞི་ལ། །ཕྱོགས་མཚམས་རྡོ་རྗེ་འབར་བས་གཏམས། རྡོ་རྗེའི་མཚམས་ལས་མ་འདའ་ཞིག། སྟེང་ཡང་འཁོར་ལོའི་བླ་རེ་གུར།སོགས་རྡོ་རྗེའི་དོད་དུ་འཁོར་ལོ་བཅུག་པ་དང༌། རིན་པོ་ཆེ་དང༌། པདྨ་དང༌། རྒྱ་གྲམ་དང༌། རལ་གྲི་དང༌། བེ་ཅོན་ཞེས་པ་རྣམས་བཅུག་སྟེ་འདོན་པ་སྤོ། ཨོཾ་བཛྲ་ཏེ་ཛ་ཏིཥྛ་ཙཀྲ་རཀྵ་ཧཱུཾ་ཕཊ། ལན་གསུམ། ཨོཾ་བཛྲ་ཛྭ་ལ་ཨ་ན་ལ་ཧ་ན་ད་ཧ་པ་ཙ་མ་ཐ་བྷཉྫ་ར་ཎ་ཧཱུཾ་ཕཊ། ལན་གསུམ་སྟེ་མཚམས་བཅད་པའོ། །གསུམ་པ་བརྡ་སྒོ་དབྱེ་བ་ནི། དཀྱིལ་འཁོར་ཤར་ལྷོ་ནུབ་བྱང་ཕྱོགས་བཞི་ནས། ཡེ་ཤེས་བཞི་ཡི་སྒོ་མོ་རབ་ཕྱེ་སྟེ། །བྱམས་དང་སྙིང་རྗེ་དགའ་དང་བཏང་སྙོམས་ཀྱི། །འཕགས་པའི་ཞལ་བཟང་བདག་ལ་བསྟན་དུ་གསོལ། ཨོཾ་བཛྲ་ཙཀྲ་མཎྜ་ལ་པྲ་བེ་ཤ་ཡ་ཕཊ། །བཞི་པ་བརྡ་ཕྱག་འཚལ་བ་ནི། འཇིགས་བྱེད་གསང་བ་མཆོག་གི་དཀྱིལ་འཁོར་དུ། །རྡོ་རྗེ་ཡབ་ཡུམ་མཆེད་དང་ལྕམ་དྲལ་ཚོགས། །མཆོག་གི་སྒོ་གསུམ་དང་བའི་ཚུལ་གྱིས་ནི། །བརྡ་དང་གར་གྱིས་མཆོད་ནས་ཕྱག་བགྱིའོ། །ཨ་ཏི་བྷུ་ཧོ་པྲ་ཏི་བྷུ་ཧོ། །ལྔ་པ་རྟགས་བཏབ་པ་ནི། དུར་ཁྲོད་གསང་བ་མཆོག་གི་དཀྱིལ་འཁོར་དུ། །མཁའ་འགྲོ་གྱིང་དང་མ་མོའི་ཚོགས་ལྷན་ཅིག །རྣལ་འབྱོར་དག་པ་གསུམ་ལ་འགོད་པའི་ཕྱིར། །རཀྟ་ཞག་དང་ཐལ་ཆེན་མཚན་མས་བཏབ། མ་ཧཱ་རཀྟ་ནི་ཧཱུཾ། མ་ཧཱ་སྨིག་ཏ་ཧཱུཾ། མ་ཧཱ་ཀིཾ་ནི་རི་ཏི་བྷསྨ་ཧཱུཾ། །དྲུག་པ་དམ་འཆའ་བ་ནི། ལས་བྱང་
སོ་སོ་ན་ཚིག་རིགས་མི་འདྲ་བ་དུ་མ་ཡོད་ཀྱང་དོན་གཅིག་པས་འགལ་བ་མེད་ལ། འདིར་ནི་རྒྱུན་བཤགས་ཉིད་དམ་བཅའ་ཡིན་ཏེ། ཡན་ལག་བདུན་པའི་ནང་དུ་དེ་ཐམས་ཅད་འདུས་པའི་ཕྱིར་རོ། །དེས་ན་འདི་ལྟར་བྱ་སྟེ། བླ་མ་ཡི་དམ་དཔའ་བོ་མཁའ་འགྲོ་དམ་ཅན་སྲུང་མ་འཕགས་པའི་ཚོགས་དང་བཅས་པ་ཐམས་ཅད་བཛྲ་ས་མཱ་ཛཿ རྡོ་རྗེ་སློབ་དཔོན་སངས་རྒྱས་དཔལ། །དུས་གསུམ་བཞུགས་ལ་ཕྱག་འཚལ་ལོ། །མཆོག་གསུམ་བརྟེན་པའི་ཞིང་གྱུར་ལ། །གཉིས་མེད་ཡིད་ཀྱིས་སྐྱབས་སུ་མཆི། །དངོས་འབྱོར་ཡིད་ཀྱིས་རྣམ་སྤྲུལ་པའི། །དག་པའི་མཆོད་པ་བཞེས་སུ་གསོལ། །དངོས་གྲུབ་ཆུ་བོ་གཅོད་པའི་འགེགས། །ཉེས་བྱས་མ་ལུས་བཤགས་པར་བགྱི། །ཕྱོགས་བཅུ་འཁོར་གསུམ་དག་པའི་ཆོས། །མ་ཆགས་སྤྱོད་ལ་རྗེས་ཡི་རང༌། །དག་པའི་མཐའ་བཞི་དྲི་མ་མེད། །རྫོགས་པའི་བྱང་ཆུབ་སེམས་བསྐྱེད་དོ། །བདེ་གཤེགས་བྱང་ཆུབ་སེམས་དཔའ་ལ། །དགོངས་པ་གསུམ་གྱི་ལུས་འབུལ་ལོ། །ཚེ་རབས་བགྲངས་པའི་ལས་རྣམས་ཀུན། །བསྡུས་ཏེ་བྱང་ཆུབ་ཆེན་པོར་བསྔོ། ཞེས་རྒྱུན་ཆགས་ལན་གསུམ་གྱིས་དམ་བཅས། །བདུན་པ་བཤགས་པ་ནི། དམ་ཚིག་ཉེར་བརྒྱད་ཀྱི་བཤགས་པ་སོགས་དང༌། ཞི་ཁྲོའི་བཤགས་པ་ཡེ་ཤེས་སྐུ་མཆོག་སོགས་རྒྱས་པ་རྣམས་སྤྲོ་ཞིང་ནུས་ན་བྱ་ལ་བསྡུ་ན། ཧཱུཾ་སྐུ་གསུང་ཐུགས་ཀྱི་དམ་ཚིག་ཉམས་པ་དང༌། །རྩ་བ་ཡན་ལག་ཉེས་བྱས་ཕྲ་མོ་དང༌། །དམ་ཚིག་ཆེ་ཆུང་ཚོར་དང་མ་ཚོར་དང༌། །ཟླ་དང་ཞོར་གྱིས་དམ་ཚིག་ཉམས་པ་དང༌།
ཁས་བླངས་ཆེ་ལ་ཉམས་བླངས་ཆུང་བ་དང༌། །བཀའ་ལྟར་མ་བགྱིས་གཞུང་ལྟར་མ་བསྲངས་དང༌། །ཏིང་འཛིན་ལྷོད་གྱུར་འཛབ་བཟླས་ཉུང་པ་དང༌། །ཡི་དམ་ལྷ་ཡི་སྒོམ་པ་གཡེལ་བ་སོགས། །ཉམས་གྲིབ་ཉེས་པའི་ཚོགས་རྣམས་མ་ལུས་དང༌། །སྡོམ་པ་གསུམ་དང་འགལ་བ་ཅི་མཆིས་པ། །ཀུན་རྫོབ་རྒྱུ་མཚན་ཙམ་གྱི་དབང་གིས་ནི། །རང་ནོངས་འགྱོད་པའི་ཚུལ་གྱིས་མཐོལ་ལོ་བཤགས། །བྱམས་པའི་ཐུགས་རྗེས་བདག་ལ་དགོངས་ནས་ཀྱང༌། །གཉིས་མེད་དབྱིངས་ལས་མི་འགྱུར་བདག་བཀོད་ནས། །མི་དམིགས་བཏང་སྙོམས་ངང་དུ་བཞུགས་ནས་ཀྱང༌། །གཉིས་མེད་དོན་གྱི་ཚངས་པར་མཛད་དུ་གསོལ། ཞེས་པའི་བཤགས་པ་ལན་གསུམ་བྱ། ཛཿཧུཾ་བཾ་ཧོཿ ཞེས་བརྗོད། །བརྒྱད་པ་བྱིན་དབབ་པ་ནི། ཧཱུཾ་ནམ་མཁའི་མཐའ་དང་མཉམ་པའི་དཀྱིལ་འཁོར་ནས། །ཞི་ཁྲོ་རབ་འབྱམས་ལྷ་ཚོགས་བྱིན་རླབས་ཅན། །ཚུར་གཤེགས་དཀྱིལ་འཁོར་འདི་ལ་བྱིན་གྱིས་རློབས། །སྒྲུབ་མཆོད་རྣལ་འབྱོར་བདག་ལ་དབང་ཅིག་བསྐུར། ཧཱུཾ་ཨ་ལ་ལ་ཧོ། ཧཱུཾ་ཧཱུཾ་ཧུཾ་ཛཿཧཱུཾ་བཾ་ཧོཿ ས་མ་ཡ་ཧོ། ས་མ་ཡ་སྟྭཾ། ཧཱུཾ། འཕགས་མཆོག་ཐུགས་རྗེའི་དུས་ལ་བབ། ཁྱད་པར་བསྟན་པའི་དུས་ལ་བབ། །མཐུ་རྩལ་དབྱུང་བའི་དུས་ལ་བབ། །བྱིན་གྱིས་རློབས་པའི་དུས་ལ་བབ། །དབང་ཆེན་བསྐུར་བའི་དུས་ལ་བབ། །དངོས་གྲུབ་སྩོལ་བའི་དུས་ལ་བབ། །མཐུ་ཆེན་མཐུན་སྩོལ་བཅོམ་
ལྡན་འདས། །བྱིན་ཆེན་བྱིན་རློབས་བཅོམ་ལྡན་འདས། །དངོས་གྲུབ་མཆོག་སྩོལ་བཅོམ་ལྡན་འདས། །བདག་གི་ལས་ཀྱི་འབྲས་བུ་མཆིས་པར་མཛོད། །དགུ་པ་ཡོ་བྱད་བྱིན་གྱིས་བརླབ་པ་ནི། རྫས་རྣམས་བསངས་སྦྱངས། རཾ་གྱི་མེས་བསྲེགས། ཡཾ་གྱི་རླུང་གིས་གཏོར། ཁཾ་གི་ཆུས་བཀྲུས། སྭ་བྷཱ་ཝས་སྦྱངས། བྷྲཱུཾ་ལས་བནྡྷ་འབར་བའི་སྣོད་ཆེན་པོ་རྣམས་སུ། ཨོཾ་ལས་འདོད་པའི་ཡོན་ཏན་བསམ་ཀྱིས་མི་ཁྱབ་པ། མཁའ་དབྱིངས་ཐམས་ཅད་གང་བར་གྱུར། ཕུད་དང་གཏོར་མའི་གནས་སུ། ཡཾ་ལས་རླུང༌། རཾ་ལས་མེ། ཀཾ་ལས་མི་མགོའི་སྐྱེད་པུ་གསུམ་གྱི་སྟེང་དུ། བྷྲཱུཾ་ལས་ཐོད་པ་ཡངས་ཤིང་རྒྱ་ཆེ་བ། བདུད་རྩིའི་སྣོད་ལ་ཉི་ཟླ་རྡོ་རྗེའི་ཁ་གཅོད་ཅན། །ནང་བདུད་རྩི་ལྔས་གང་བ། ཧཱུཾ་ཨོཾ་སྭཱ་ཨཱཿཧཱ་རྣམས་ཀྱིས་མཚན་པ་དང༌། གཏོར་མའི་སྣོད་དུ་ཤ་ལྔ་ལ་མུཾ་ལཾ་མཱཾ་པཱཾ་ཏཱཾ་གིས་མཚན་པར་གྱུར། རླུང་གཡོས། མེ་སྤར། རྫས་རྣམས་ཞུ། ཨོཾ་བཛྲ་ཌྷྲྀཀ །ཨོཾ་ཛི་ན་ཛི་ཀ །སྭཱ་རཏྣ་ཌྷྲྀ་ཀ ཨཱཿཨ་རོ་ལི་ཀ །ཧཱ་པྲ་ཛྙཱ་དྷྲྀཀ །མུཾ་བཛྲ་དྷཱ་ཏུ། ལཾ་མོ་ཧཱ་རཱ་ཏི། མཱཾ་དྭེ་ཥ་རཱ་ཏི། པཱཾ་རཱ་ག་རཱ་ཏི། ཏཱཾ་བཛྲ་རཱ་ཏི། སྨན་ལ་རྒྱལ་བ་རིགས་ལྔ་དང༌། །གཏོར་མ་ལ་ཡུམ་ལྔ་རྣམས་འཁོད། ས་མ་ཡ་ཧོཿ ཨོཾ་ཨཱཿཧཱུཾ་སརྦ་པཉྩ་སོགས་ལན་གསུམ། འཁོར་འདས་ཀྱི་བདུད་རྩི་ཐམས་ཅད་བཀུག །དེ་ཐམས་ཅད་དམ་རྫས་སྨན་དང་གཏོར་མ་ལ་འདྲེས་པ་ཡེ་ཤེས་
ཀྱི་བདུད་རྩིའི་རྒྱ་མཚོ་ཆེན་པོར་གྱུར། ཨོཾ་ཨཱཿཧཱུཾ་སརྦ་པཉྩ་ཨ་མྲྀ་ཏ་ཧཱུཾ་ཧྲཱི་ཐ། ཞེས་པ་ཉེར་གཅིག་གམ་བརྒྱ་རྩ་བརྒྱད། ཨོཾ་ཨཱཿཧཱུཾ་མ་ཧཱ་བ་ལིཾ་ཏ་ཏེ་ལིཾ་ཏ་ཏེ་ཛོ་བ་ལིཾ་ཏ་བ་ལིཾ་བ་ཏེ་གུ་ཧྱ་སིདྡྷ་ས་མ་ཡ་ཧཱུཾ་ཧྲི་ཐ། ར་ཡིག་ལས་རཀྟའི་སྣོད་དང་ཉི་མའི་དཀྱིལ་འཁོར་ར་ཡིག་གིས་མཚན་པའི་གདན་ལ། རཾ་ལས་དགྲ་བགེགས་བསྒྲལ་བའི་ཤ་ཁྲག་རུས་པའི་ཕུང་པོ་མཐའ་ཡས་པར་གྱུར། ཨོཾ་ཨཱཿཧཱུཾ་མ་ཧཱ་རཀྟ་ཛྭ་ལ་མཎྜལ་ཧཱུཾ་ཧྲཱི་ཐ། རྒྱ་ཆེར་འཕེལ་བ་ལ་ཁམས་གསུམ་གྱི་རཀྟ་ཐམས་ཅད་བཀུག་སྟེ་དེ་ལ་ཐིམ་པར་གྱུར། གཏོར་མ་དང་རཀྟ་བྱིན་རླབས་ཀྱི་སྔགས་ཀྱང་བདུན་ནམ་ཉེར་གཅིག་གམ་བརྒྱ་རྩ་སོགས་ཇི་ལྟར་འོས་པ་བརྗོད། མཆོད་པ་བྱིན་རླབས་སྤྱི་འགྲོ་དེ་གོང་དུ་མ་སོང་ན་སྐབས་འདིར་བྱ་མོད། གོང་དུ་བྱེད་པ་ཉིད་ལག་ལེན་གཙོ་ཆེའོ། །བཅུ་པ་བསྙེན་ཕུར་བསྐྱེད་པ་ནི། བསངས་སྦྱངས། ཨེ་ལས་བྱུང་བ་གྲུ་གསུམ་མཐིང་ནག་འབར་བའི་དཀྱིལ་འཁོར་ཀྱི་སྟེང་དུ། པད་ཉི་དང་དགྲ་བགེགས་བསྒྲལ་བའི་གདན་ལ་ཧཱུཾ་སྤྲོས། ཧཱུཾ་སྥ་ར་ཎ་ཕཊ། སཾ་ཧ་ར་ཎ་ཧཱུཾ། བཛྲ་ཀཱི་ལི་ཀཱི་ལ་ཡ། ཕུར་པ་རྡོ་རྗེ་གཞོན་ནུ་ཡུམ་དང་བཅས་པ། ཨོཾ་བཛྲ་ཀི་ལི་ཀཱི་ལ་ཡ་ཧཱུཾ་ཕཊ། ལན་བདུན། དེ་ཞུ་བ་ལས་བྱུང་བའི་ཕུར་བུར་གྱུར། དེའི་རྩེ་མོར་དཔལ་རྡོ་རྗེ་གཞོན་ནུ་ཡབ་ཡུམ། རྒྱ་མདུད་གོང་མ་ལ་ཁྲོ་བོ་བཅུ། ཆང་བཟུང་ལ་ཟ་བྱེད་གསོད་བྱེད་ཉི་ཤུ །རྒྱ་མདུད་འོག་མ་ལ་སྒོ་སྲུངས་བཞི་སོགས་འཁོར་བར་གྱུར། ཀཱི་ལ་ཡ་འབྲུ་བཅུ་དྲུག་པ་ལན་བདུན་བཟླས་ཏེ། བསྙེན་པའི་
ཕུར་བུ་བྱིན་གྱིས་རློབ་པའོ། །འདིར་བསྙེན་ཕུར་དང་སྲས་མཆོག་ཐ་དད་དུ་བྱེད་པའི་དབང་དུ་བྱས་ནས། དངོས་གཞི་དཀྱིལ་འཁོར་བསྐྱེད་པའི་སྐབས། བསྙེན་ཕུར་དང་བདག་ཉིད་དབྱེར་མེད་དུ་དམིགས་པ་ཡིན་ལ། དེ་ལྟར་ན་བསྙེན་ཕུར་དངོས་གྲུབ་ཀྱི་རྫས་ཡིན་གྱི་བསྒྲལ་ལས་ལ་མི་འཇུག་ཅིང༌། བསྒྲལ་ལས་སྲས་མཆོག་གིས་མཛད་ལ། འདི་རྡོ་རྗེའི་ཕུར་བུ་དང༌། སྲས་མཆོག་ནི་རི་རབ་ཕུར་བུར་བྱ་མོད་ཀྱི། སྤྱིར་མཐའ་གཅིག་ཏུ་ངེས་པ་ནི་མ་ཡིན་ནོ། །གཉིས་པ་དངོས་གཞི་ལ། ལྷ་སྒོམས་མཆོད་པ་དང༌། སྔགས་ཀྱི་བཟླས་པ་གཉིས་སོ། །དང་པོ་ལ་གསུམ་སྟེ། རྒྱུ་ཏིང་ངེ་འཛིན་གསུམ། འབྲས་བུ་དཀྱིལ་འཁོར་གསུམ། མཛད་འཕྲིན་མཆོད་པ་གསུམ་ཞེས་བྱའོ། །དང་པོ་ནི། ཧཱུཾ་རྡོ་རྗེ་ཁྲོས་པས་ཞེ་སྡང་གཅོད། །མཚོན་ཆེན་སྔོན་པོ་ཆེར་འབར་བ། །ནམ་མཁའི་དཀྱིལ་དུ་ཐིགས་པ་ཤར། །སྲོག་གི་སྒོ་རུ་ཤར་བ་ན། །སྙིང་གི་གོ་རུ་བསྒོམ་པར་བྱ། ཨོཾ་མ་ཧཱ་ཤུ་ནྱ་ཏ་ཛྙཱ་ན་བཛྲ་སྭ་བྷཱ་ཝ་ཨཏྨ་ཀོ྅ཧཾ། དེ་བཞིན་ཉིད་ཀྱི་ཏིང་ངེ་འཛིན་ནོ། །རང་བཞིན་མ་རྟོགས་པའི་སེམས་ཅན་རྣམས་བྱང་ཆུབ་ལ་འགོད་པར་བྱའོ། །ཀུན་ཏུ་སྣང་བའི་ཏིང་ངེ་འཛིན་ནོ། །སྟོང་ཉིད་སྙིང་རྗེ་ཟུང་དུ་འཇུག་པའི་རང་སེམས་ཧཱུཾ་ཡིག་མཐིང་ནག་ནམ་མཁའི་ཁམས་སུ་གནས་པར་གྱུར། ཨོཾ་དྷརྨྨ་དྷ་དུ་སྭ་བྷཱ་བ་ཨཏྨ་ཀོ྅ཧཾ། དེ་ནི་རྒྱུའི་ཏིང་ངེ་འཛིན་ནོ། །གཉིས་པ་འབྲས་བུ་དཀྱིལ་འཁོར་གསུམ་བསྐྱེད་པ་ལ། རྟེན་གཞལ་ཡས་ཁང་འཁོར་བཅས་བསྐྱེད་པ་དང༌། བརྟེན་པ་དཀྱིལ་འཁོར་རྣམ་གསུམ་
དངོས་བསྐྱེད་པའོ། །དང་པོ་ནི། ནམ་མཁའི་ཧཱུཾ་ལས་སྤྲོས་པའི་རཾ་ཡཾ་ཁཾ་གིས་སྣོད་བཅུད་ཐམས་ཅད་སྦྱངས། ཨེ་ཡཾ་རཾ་བཾ་ལཾ་ཏཾ་ཀེཾ་བྷྲཱུཾ་རྣམས་སྤྲོས་པ་ལས་རྟེན་གྱི་དཀྱིལ་འཁོར་གྲུབ་པ་ནི། ཨེ་ཡིག་ནམ་མཁའི་ཁམས་ཀྱི་དབུས་སུ་ཡཾ་ལས་རླུང༌། རཾ་ལས་མེ། བཾ་ལས་ཆུ། ལཾ་ལས་སའི་དཀྱིལ་འཁོར་རྣམས་བརྩེགས་པའི་སྟེང་དུ་རཾ་ལས་རཀྟའི་རྒྱ་མཚོ། དེའི་དབུས་སུ་ཀེཾ་ལས་ཀེང་རུས་བརྩེགས་པའི་རི་རབ། །བྷྲཱུཾ་བི་ཤྭ་བི་ཤུདྡྷེ་བནྡྷ་ཛྙཱ་ན་ཙཀྲ་མཎྜ་ལ་ཧཱུཾ་བྷྲཱཾ། རི་རབ་ཀྱི་སྟེང་དུ་བྷྲཱུཾ་ལས་གཞལ་ཡས་ཁང་གྲུ་བཞི་སྒོ་བཞི་རྟ་བབས་བཞིས་བརྒྱན་པ། རབ་ཏུ་འཇིགས་ཤིང་ཀྱི་གཡའ་བ། གནམ་ལྕགས་ཨུར་མོའི་གཞི་ལ་གནས་པ། ཐོད་པ་སྐམ་རློན་གྱིས་བརྩིགས་པ་ལ་རཀྟའི་ཞལ་ཆུ་འབབ་ཅིང༌། འདོད་སྣམ་དང་ཕ་གུར་བཅས་པ་རྐང་ལག་གི་ཤར་བུ་དང༌། སྒལ་ཚིགས་ཀྱི་མདའ་ཡབ་ཅན། རུས་པའི་དྲ་ཕྱེད་དང༌། རྒྱུ་རློན་གྱི་ལྡ་ལྡི་དང༌། །སྐྲའི་རྔ་ཡབ་དང༌། ཐོད་ཚལ་གྱི་ཟླ་བ་དང༌། །མི་རོའི་རྒྱལ་མཚན་དང༌། ཞིང་ལྤགས་ཀྱི་འཕན་གདུགས་དང་བླ་རེ་ལ་སོགས་པས་བརྒྱན་པ། རྟ་བབས་དང་སྒོའི་ཕྱི་རོལ་རོ་ལངས་དང་ཀེང་རུས་ཀྱི་ཀ་བ་ཅན། གཞལ་ཡས་ཁང་གི་ནང་དུ་རུས་སྦལ་ཆུ་སྲིན་ལྷ་ཆེན་ཀླུ་ཆེན་གཟའ་སྐར་འབྱུང་པོའི་ཚོགས་རྣམས་བསྒྲལ་བ་ལས་གྲུབ་པའི་ཀ་གདུང་གྲལ་ཕྱམ་ལ་སོགས་པས་
བརྒྱན་པ། བར་བར་ཐམས་ཅད་རིན་པོ་ཆེའི་རང་བཞིན་ཟླ་བ་དང་ཉི་མ་ལྟར་འོད་ཟེར་འཕྲོ་བ། དབུས་ཕྱུར་བུར་གྱུར་པའི་རྩེ་མོར་མི་མགོ་དང་རྡོ་རྗེ་རིན་པོ་ཆེའི་ཏོག་གིས་སྤྲས་པའོ། །འདི་ཁྲོ་དཀྱིལ་གྱི་ལུགས་ཡིན། ཞི་དཀྱིལ་ལྟར་ན་སྤྱི་དང་འདྲ་མོད་དེ་གཙོ་མི་ཆེའོ། །གཞལ་ཡས་ཁང་གི་དབུས་སུ་གནམ་ལྕགས་ཀྱི་འཁོར་ལོ་རྩིབས་བཅུ་པ། དེའི་སྟེང་དུ་པཾ་པདྨ་མཎྜ་ལ་ཧཱུཾ་གིས་སྣ་ཚོགས་པདྨའི་གདན། ཨ་ཙནྡྲ་མཎྜ་ལ་ཧཱུཾ་གིས་ཟླ་བའི་གདན། །མ་སུརྱ་མཎྜ་ལ་ཧཱུཾ་གིས་ཉི་མའི་གདན། ཤཾ་རུ་དྲ་རུ་དྲི་ཏི་ར་བཾ་གྱིས་རུ་དྲ་ཕོ་མོ་གཡས་གཡོན་དུ་མགོ་བསྟན་ཏེ་འགྱེལ་བའི་གདན་རྣམས་སུ་གྱུར། གཉིས་པ་ལ་བདག་ཉིད་རྩ་བའི་དཀྱིལ་འཁོར་སྒོམ་པ། ཕྱོགས་བཅུ་ཁྲོ་བོའི་དཀྱིལ་འཁོར་སྤྲོ་བ། ཕུར་བུ་རྫས་ཀྱི་དཀྱིལ་འཁོར་བསྐྱེད་པ་སྟེ་གསུམ་ལས། དང་པོ་ནི། ནམ་མཁར་གནས་པའི་རང་སེམས་ཧཱུཾ་ཡིག་དེ་གཞལ་མེད་ཁང་གི་དབུས་ཀྱི་གདན་གྱི་སྟེང་དུ་བབས་པ་ལས་འོད་ཟེར་ཕྱོགས་བཅུར་འཕྲོས། སངས་རྒྱས་སྲས་དང་བཅས་པ་ཐམས་ཅད་མཆོད། སེམས་ཅན་ཐམས་ཅད་ཀྱི་དོན་བྱས། ཁྱད་པར་དུ་གདུག་པ་ཅན་ཐམས་ཅད་ཚར་བཅད། ཚུར་འདུས་ཧཱུཾ་ལ་ཐིམ། ཧཱུཾ་སྥ་ར་ཎ་ཕཊ། སི་ཧ་ར་ཎ་ཧཱུཾ། ཨོཾ་བཛྲ་ཀཱི་ལི་ཀཱི་ལ་ཡ་སརྦ་བིགྷྣཱན་བཾ་ཧཱུཾ་ཕཊ། བདག་ཉིད་བཅོམ་ལྡན་འདས་དཔལ་ཆེན་པོ་ཧེ་རུ་ཀ་ཁྲོ་བོའི་རྒྱལ་པོ་རྡོ་རྗེ་གཞོན་ནུའི་སྐུར་གྱུར་པ་ནི། །དུས་མཐའི་སྤྲིན་ལྟར་སྐུ་མདོག་ནག །དབུ་གསུམ་ཕྱག་དྲུག་ཞབས་
བཞི་བགྲད། །རབ་ཁྲོས་ཤིན་ཏུ་འཇིགས་པའི་སྐུ། །སྐུ་ཆེ་རགས་ཤིང་སྦོམ་ལ་ཐུང༌། །གཡས་དཀར་གཡོན་དམར་དབུས་མཐིང་ཞལ། །དམར་ལ་ཟླུམ་པའི་སྤྱན་གསུམ་གཡོ། །ཞལ་གདངས་མཆེ་གཙིགས་ལྗགས་ཀྱང་འགྲིལ། །གཡས་པའི་ཕྱག་གི་དང་པོ་ནི། །རྡོ་རྗེ་རྩེ་དགུ་འཕྱར་ཞིང་གསོར། །གཉིས་པས་རྡོར་རྗེ་རྩེ་ལྔ་བསྣམས། །གཡོན་གྱི་དང་པོ་སྡིགས་མཛུབ་ཅན། །མེ་དཔུང་བསྣམས་པས་གདུག་ཅན་སྲེག །གཉིས་པ་མདུང་རྩེ་གསུམ་པ་ཡིས། །རྩེ་མོར་མཚན་པའི་ཁ་ཊྭཾ་ག །ཐ་མ་མདུན་གྱི་ཕྱག་གཉིས་ཀྱིས། །རི་རབ་ཕུར་བུ་བསྒྲིལ་བའི་ཚུལ། །ཞབས་བཞི་གཡས་བསྐུམ་གཡོན་བརྐྱང་བས། །རུ་དྲ་ཕོ་མོ་མནན་ཞིང་བརྫིས། །སྟག་གི་པགས་པའི་སྨད་དཀྲིས་ཅན། །གླང་ལྤགས་ཞིང་ཆེན་སྟོད་གཡོགས་གསོལ། །ཐོད་པ་ཚར་གསུམ་འཕྲེང་བས་བརྒྱན། །གདུག་པའི་སྤྲུལ་གྱིས་བརྒྱན་པ་སྟེ། །རྒྱལ་རིགས་དཀར་པོ་ཐོད་དུ་བཅིངས། །རྗེ་རིགས་སེར་པོས་མགུལ་པ་བརྒྱན། །དམངས་རིགས་དམར་པོ་སྙན་ཆར་བྱས། །བྲམ་ཟེ་ལྗང་ཁུ་གདུ་བུ་སྟེ། །སྐེ་རགས་དང་ནི་སེ་མོ་དོ། །ཀླུ་ཆེན་གདོལ་པ་ནག་པོའོ། །ཐལ་ཆེན་མཆོག་གི་ཚོམ་བུ་དང༌། །རཀྟ་དམར་གྱི་ཐིག་ལེ་དང༌། །ཞག་ཆེན་ཟོ་རིས་རྣམས་ཀྱིས་མཚན། །སྨ་ར་སྨིན་མ་མེ་ལྟར་འབར། །དབུ་སྐྲ་ཁམས་སེར་གྱེན་དུ་འཁྱིལ། །རྡོ་རྗེའི་གཤོག་པ་གཡས་གཡོན་གདེངས། །སྐུ་ལུས་
རྡོ་རྗེས་གོ་ཆར་གཏམས། །ཡེ་ཤེས་མེ་དཔུང་དབུས་ན་བཞུགས། །ཕུང་པོ་ཁམས་དང་སྐྱེ་མཆེད་དང༌། །སྐྲ་དང་བ་སྤུའི་ཁུང་བུ་སོགས། །ཐམས་ཅད་རྡོ་རྗེ་གཞོན་ནུས་གཏམས། །ཐུགས་ཀར་སོ་བཞིའི་ཚད་ཙམ་གྱི། །གཞལ་མེད་ཁང་པ་སྒོ་གཅིག་པ། །སྒོ་སྲུང་རྟ་མགྲིན་རིམ་པར་བཅས། །དེ་ནང་ཉི་མ་ལ་གནས་པའི། །ཡེ་ཤེས་སེམས་དཔའི་ཐུགས་ཀར་ཧཱུཾ། །མཐའ་སྐོར་སྔགས་འཕྲེང་འཁོད་པར་གྱུར། །ཨོཾ་དཱིཔྟ་ཙཀྲ་ཧ་ན་ཧ་ན་ཧཱུཾ་ཕཊ། ཡུམ་ཆེན་འཁོར་ལོ་རྒྱས་འདེབས་མ། །མཐིང་ནག་ཞལ་གཅིག་ཕྱག་གཉིས་ཀྱི། །གཡས་པས་རྡོ་རྗེ་དྲིལ་བུ་འཛིན། །གཡོན་པ་ཐོད་ཁྲག་ཡབ་ལ་སྟོབ། ཁྲོ་མོའི་ཆ་བྱད་ཡོངས་རྫོགས་པ། །དཔལ་ཆེན་སྐུ་ལ་གཉིས་མེད་འཁྱུད། །ཐུགས་ཀར་ཡེ་ཤེས་སེམས་དཔའ་དང༌། །ཏིང་འཛིན་སེམས་དཔའ་ཨ་ཡིག་གོ །ཧཱུཾ་སྙིང་རྗེས་བསྒྲལ་བའི་དམ་ཚིག་ནི། །བསད་ཅིང་མནན་པ་མ་ཡིན་ཏེ། །ཕུང་པོ་རྡོ་རྗེར་གཏམས་བྱས་ནས། །རྣམ་པར་ཤེས་པ་རྡོ་རྗེར་བསྒོམ། །རང་གི་ཐུགས་ཀའི་ཧཱུཾ་ལས་འོད་ཟེར་འཕྲོས། སྣོད་བཅུད་ཐམས་ཅད་རྟེན་དང་བརྟེན་པའི་དཀྱིལ་འཁོར་དུ་གྱུར། ཧཱུཾ་རྡོ་རྗེ་གཞོན་ནུའི་རིག་འཛིན་རྣམས། །སྲིད་པ་རྡོ་རྗེར་གྲུབ་འཛོད་ཅིག །ཡང་ཧཱུཾ་ལས་འོད་ཟེར་འཕྲོས། ཡེ་ཤེས་སེམས་དཔའི་ལྷ་ཚོགས་ཨོཾ་བཛྲ་ས་མཱ་ཛཿ ཧཱུཾ་སྲིད་པ་རྡོ་རྗེ་ཕུར་པའི་ལྷ། །ཡེ་ཤེས་ཁྲོ་བོ་གྲུབ་པར་མཛད། ཛཿཧཱུཾ་བཾ་ཧོཿ རང་གི་དཔྲལ་བར་ཨོཾ། མགྲིན་པར་ཨཱཿ ཐུགས་ཀར་ཧཱུཾ།
དེ་རྣམས་ལས་འོད་འཕྲོས། སངས་རྒྱས་ཐམས་ཅད་སྐུ་གསུང་ཐུགས་རྡོ་རྗེའི་རྣམ་པར་སྤྱན་དྲངས་གནས་གསུམ་དུ་ཐིམ། ཧཱུཾ་སངས་རྒྱས་ཀུན་གྱི་ཡེ་ཤེས་སྐུ། །དང་ཉིད་རྡོ་རྗེ་ཆོས་དབྱིངས་ལས། །འབར་བའི་ཁྲོ་བོ་མི་ཟད་པ། །སྐུ་ཡི་དབྱིག་ཏུ་བདག་སྐྱེད་ཅིག །ཨོཾ་སརྦ་ཏ་ཐཱ་ག་ཏ་ཀཱ་ཡ་བཛྲ་སྭ་བྷ་ཝ་ཨཏྨ་ཀོ྅ཧཾ། ཨོཾ༴ ཝཀ༴ ཧཾ། ཨོཾ༴ ཙིཏྟ༴ ཧཾ། ཡང་ཐུགས་ཀ་ནས་འོད་འཕྲོས། དབང་གི་ལྷ་ཐམས་ཅད་སྤྱན་དྲངས་མདུན་དུ་བཞུགས་པར་གྱུར། ཧཱུཾ་ཐབས་ཀྱི་སྤྱོད་པའི་འགྲོ་དོན་དུ། །བྱམས་དང་སྙིང་རྗེས་གང་འདུལ་བ། །སངས་རྒྱས་ཕྲིན་ལས་རྫོགས་མཛད་པའི། །དབང་དང་བྱིན་རླབས་བདག་སྩོལ་ཅིག །རིགས་ལྔ་རྣམས་ཀྱིས་དབང་བསྐུར་བར་གྱུར། ཨོཾ་བཛྲ་ཤྲཱི་ཧེ་རུ་ཀ་བཛྲ་ཀྲོ་དྷེ་ཤྭ་ཧཱུཾ། ཨོཾ་བུདྡྷ་ཤྲཱི་ཧེ་རུ་ཀ་བུདྡྷ་དྷེ་ཤྭ་རཱི་ཨོཾ། ཨོཾ་རཏྣ་ཤྲཱི་ཧེ་རུ་ཀ་རཏྣ་ཀྲོ་དྷེ་ཤྭ་རཱི་དྲཱཾ། ཨོཾ་པདྨ་ཤྲཱི་ཧེ་རུ་ཀ་པདྨ་ཀྲོ་དྷེ་ཤྭ་རི་ཧྲཱི། ཨོཾ་ཀརྨ་ཤྲཱི་ཧེ་རུ་ཀ་ཀརྨ་ཀྲོ་དྷི་ཤྭ་རི་ཨ། གཉིས་པ་ཕྱོགས་བཅུ་ཁྲོ་བོའི་དཀྱིལ་འཁོར་སྤྲོ་བ་ནི། རང་གི་ཐུགས་ཀ་ནས་འོད་འཕྲོས། ཕྱོགས་བཅུའི་བགེགས་ཐམས་ཅད་ཀྱི་ངོ་བོ་ཕྱོགས་སྐྱོང་བཅུ་ཆུང་མར་བཅས་པ་བཀུག་སྟེ་འཁོར་ལོའི་རྩིབས་རྣམས་ཀྱི་སྟེང་དུ་པད་ཉི་ལ་བཞག གཙོ་བོའི་ཐུགས་ཀ་ནས་ཧཱུཾ་བཅུ་སྤྲོས་ཏེ་དེ་རྣམས་ཀྱི་སྟེང་དུ་འཁོད། དེ་རྣམས་ཁྲོ་བཅུ་འཁོར་དངབཅས་པར་གྱུར་
བ་ནི། ཨོཾ་བཛྲ་ཀྲོ་དྷ་ཧཱུཾ་ཀ་ར་ཧཱུཾ་གརྫ་གརྫ་ཧཱུཾ་ཕཊ། སྟེང་དུ་ཁྲོ་བོ་ཧཱུཾ་མཛད་སྔོ། །ཞལ་གསུམ་མཐིང་དཀར་དམར་བ་སྟེ། །རྩ་ཕྱག་རྡོ་རྗེ་ཐོད་ཁྲག་དང༌། །བར་པ་འཕྲེང་བ་མདའ་གཞུ་འཛིན། །ཐ་མ་ཕུར་བུ་བསྒྲིལ་ཞིང་འདེབས། །ཚངས་པ་ཕོ་མོ་མནན་ཞིང་བརྫིས། །ལྷ་མོ་རྡོ་རྗེ་སྒྲ་འབྱིན་འཁྱུད། །སྤྲུལ་པ་ཕག་དང་རྨིགས་བུའི་མགོ །ཨོཾ་བཛྲ་ཀྲོ་དྷ་བི་ཛ་ཡ་ཧཱུཾ་ཧ་ན་ཧ་ན་ཧཱུཾ་ཕཊ། །ཤར་དུ་ཁྲོ་བོ་རྣམ་རྒྱལ་དཀར། །ཞལ་གསུམ་དཀར་དམར་ནག་པ་སྟེ། །རྩ་ཕྱག་རྡོ་རྗེ་ཐོད་ཁྲག་དང༌། །བར་མ་རྡོ་རྗེ་འཁོར་ལོ་འཛིན། །མཐའ་གཉིས་ཕུར་བུ་བསྒྲིལ་ཞིང་འདེབས། །བརྒྱ་བྱིན་ཕོ་མོ་མནན་ཞིང་བརྫིས། །ལྷ་མོ་རྡོ་རྗེ་སྒེག་སྙེམས་འཁྱུད། །སྤྲུལ་བ་སྟག་དང་བྱ་རྒོད་མགོ །ཨོཾ་བཛྲ་ཀྲོ་དྷ་ནཱི་ལ་དཎྜ་ཧཱུཾ། ད་ཧ་ད་ཧ་ཧཱུཾ་ཕཊ། ཤར་ལྷོར་ཁྲོ་བོ་དབྱུག་སྔོན་ནག །ཞལ་གསུམ་ནག་དཀར་དམར་བ་སྟེ། རྩ་ཕྱག༴ བར་པ་དབྱུག་ཐོ་མེ་དབལ་བསྣམས། །མཐའ་གཉིས༴ མེ་ལྷ་ཕོ༴ ལྷ་མོ་རྡོ་རྗེ་སྡེར་མོས་འཁྱུད། །སྤྲུལ་པ་གཡག་དང་བྱ་རོག་མགོ །ཨོཾ་བཛྲ་ཀྲོ་དྷ་ཡ་མཱནྟ་ཀ་ཧཱུཾ་པ་ཙ་པ་ཙ་ཧཱུཾ་ཕཊ། ལྷོ་ཕྱོགས་གཤིན་རྗེ་གཤེད་པོ་ནག །ཞལ་གསུམ་མཐིང་དཀར་དམར་བ་སྟེ། རྩ་ཕྱག༴ བར་པ་དབྱུག་ཐོ་དགྲ་སྟ་འཛིན། མཐའ་གཉིས༴ གཤིན་རྗེ་ཕོ་མོ༴ ལྷ་མོ་རྡོ་རྗེ་དུར་ཁྲོད་འཁྱུད། སྤྲུལ་བ་ཤ་བ་འུག་པའི་མགོ །ཨོཾ་བཛྲ་ཀྲོ་དྷ་ཨཱ་རྱ་ཨ་ཙ་ལ་ཧཱུཾ་བནྡྷ་བནྡྷ་ཧཱུཾ་
ཕཊ། ལྷོ་ནུབ་ཁྲོ་བོ་མི་གཡོ་སྨུག ཞལ་གསུམ་སྨུག་དཀར་ལྗང་བ༴ རྩ་ཕྱག༴ བར་པ་རལ་གྲི། ཞགས་པ༴ མཐའ་གཉིས༴ སྲིན་པོ་ཕོ་མོ༴ ལྷ་མོ་རྡོ་རྗེ་གཏུན་ཁུང་༴ སྤྲུལ་པ་གཟིག་དང་ཁྭ་ཏའི་མགོ །ཨོཾ་བཛྲ་ཀྲོ་དྷ་ཧ་ཡ་གྲྀ་བ་ཧཱུཾ་ཧུ་ལུ་ཧུ་ལུ་ཧཱུཾ་ཕཊ། ནུབ་ཏུ་ཁྲོ་བོ་རྟ་མགྲིན་དམར། དམར་དཀར་མཐིང་ནག༴ རྩ་ཕྱག༴ བར་པ་པདྨ་སྤྲུལ་ཞགས༴ མཐའ་གཉིས༴ ཆུ་བདག་ཕོ་མོ༴ རྡོ་རྗེ་གཏུམ་མོ༴ སྤྲུལ་པ་བྱིན་པུ་ཤུད་མགོ །ཨོཾ་བཛྲ་ཀྲོ་དྷ་ཨ་པ་ར་ཛི་ཏ་ཧཱུཾ། ཏིཥྵ་ཏིཥྵ་ཧཱུཾ་ཕཊ། ནུབ་བྱང་གཞན་གྱིས་མི་ཐུབ་དམར། ཞལ་གསུམ་དམར་དཀར་ལྗང་ཁུ༴ རྩ་ཕྱག༴ བར་པ་ལྕགས་ཀྱུ་རྔ་ཡབ༴ མཐའ་གཉིས༴ རླུང་ལྷ་ཕོ་མོ༴ རྡོ་རྗེ་མདའ་སྙེམས༴ སྤྲུལ་པ་སྤྱང་ཀི་བྱ་ཁྲའི་མགོ །ཨོཾ་བཛྲ་ཀྲོ་དྷ་ཨ་མྲྀ་ཏ་ཀུཎྜ་ལི་ཧཱུཾ། ཚིནྡྷ་ཚིནྡྷ་ཧཱུཾ་ཕཊ། བྱང་དུ་བདུད་རྩི་འཁྱིལ་པ་ལྗང༌། ཞལ་གསུམ་ལྗང་དཀར་དམར་པོ༴ རྩ་ཕྱག༴ བར་པ་རྒྱ་གྲམ་དབྱུག་ཐོ༴ གནོད་སྦྱིན་ཕོ་མོ༴ རྡོ་རྗེ་རླུང་འབྱིན༴ སྤྲུལ་པ་སེང་གེ་ཕ་ཝང་མགོ །ཨོཾ་བཛྲ་ཀྲོ་དྷ་ཏྲེ་ལོ་ཀྱ་བི་ཛ་ཡ་ཧཱུཾ། བྷིནྡྷ་བྷིནྡྷ་ཧཱུཾ་ཕཊ། བྱང་ཤར་ཁམས་གསུམ་རྣམ་རྒྱལ་ལྗང༌། །ཞལ་གསུམ་ལྗང་ནག་སེར་པོ༴ རྩ་ཕྱག༴ བར་པ་རྡོ་རྗེ་དྲི་ཤུ །མཐའ་གཉིས༴ དབང་ལྡན་ཕོ་མོ༴ རྡོ་རྗེར་གསོད་བྱེད༴ སྤྲུལ་པ་དྲེད་དང་སྲེ་མོང་མགོ །ཨོཾ་བཛྲ་ཀྲོ་དྷ་མ་ཧཱ་
བ་ལ་ཧཱུཾ། སྥོ་ཊ་སྥོ་ཊ་ཧཱུཾ་ཕཊ། འོག་ཕྱོགས་སྟོབས་ཆེན་དུ་བའི་མདོག །ཞལ་གསུམ་དུང་དཀར་དམར་བ༴ རྩ་ཕྱག༴ བར་པ་ཐོ་བ་གཏུན་ཤིང་༴ མཐའ་གཉིས༴ ས་བདག་ཕོ་མོ༴ རྡོ་རྗེ་སྐུལ་བྱེད༴ སྤྲུལ་པ་དོམ་དང་བྱ་བའི་མགོ །ཁྲོ་བོ་ཡབ་ཡུམ་ཉི་ཤུ་ཡང༌། །རྒྱན་དང་ཆ་བྱད་རྣམ་འགྱུར་རྣམས། །དཀྱིལ་འཁོར་གཙོ་བོ་ཡབ་ཡུམ་མཚུངས། །ཡུམ་རྣམས་ཡབ་དང་སྐུ་མདོག་མཚུངས། །གཡས་ཕྱོགས་ཕོ་ཉ་མཆེ་བ་ཅན། །ཟ་བྱེད་ཐམས་ཅད་སྐྱེས་པའི་ཚུལ། །གཡོན་ཕྱོགས་ཕྱག་བརྙན་སྡེར་མོ་ཅན། །གསོད་བྱེད་ཐམས་ཅད་བུད་མེད་ལུས། །སྤྲུལ་པ་ཁྲ་ཐབས་ཉི་ཤུ་རྣམས། །ཐམས་ཅད་རང་རང་ཁྲོ་བོ་ཡི། །སྐུ་མདོག་རྩ་བ་མཚུངས་པ་ལས། །རྣམ་སྤྲུལ་མ་ངེས་ཅིར་ཡང་སྟོན། ཁྲོ་མོ་བཅུ་དང་ཕོ་ཉ་ཀུན། །ཕྱག་ན་ཕུར་བུ་ཐོད་ཁྲག་འཛིན། །ཨོཾ་བཛྲ་ཀཱི་ལི་ཀཱི་ལ་ཡ་བི་ད་ཡ་བཾ་བཾ་ཧཱུཾ་ཕཊ། ཤར་ཕྱོགས་སྒོ་མ་གནོད་སྦྱིན་མོ། །དཀར་མོ་པུ་ཤུད་མགོ་བོ་ཅན། །ཕྱག་གཡས་ལྕགས་ཀྱུ་འབར་བ་ཐོགས། ཨོཾ་བཛྲ་ཀཱི་ལི་ཀཱི་ལ་ཡ་ན་མ་ས་མནྟ་ཧྲིཾ་ཧྲིཾ་ཧཱུཾ་ཕཊ། ལྷོ་ཕྱོགས་སྒོ་མ་འཇིགས་བྱེད་མ། །སེར་མོ་ཀེ་ཀའི་མགོ་བོ་ཅན། །ཕྱག་གཡས་རྡོ་རྗེ་ཞགས་པ་ཐོགས། ཨོཾ་བཛྲ་ཀཱི་ལི་ཀཱི་ལ་ཡ་སུ་རུ་སུ་རུ་པྲ་སུ་རུ་ཧཱུཾ་ཕཊ། ནུབ་ཕྱོགས་སྒོ་མ་བདུད་རྩི་མ། །དམར་མོ་སྲིན་བྱའི་མགོ་བོ་ཅན། །ཕྱག་གཡས་ལུག་བརྒྱུད་ལྕགས་སྒྲོགས་ཐོགས། ཨོཾ་བཛྲ་
ཀཱི་ལི་ཀཱི་ལ་ཡ་མཱ་ར་ཡ་མཱ་ར་ཡ་ཧཱུཾ་ཕཊ། །བྱང་ཕྱོགས་སྒོ་མ་གསོད་བྱེད་མ། །ལྗང་ནག་ཁྲ་ཡི་མགོ་བོ་ཅན། །ཕྱག་གཡས་འབེབས་བྱ་དྲིལ་བུ་འཛིན། །དེ་ལྟར་སྒོ་མ་བཞི་པོ་རྣམས། །ཕྱག་གཡོན་རྡོ་རྗེ་ཕུར་བུ་འདེབས། །མི་རོའི་གདན་ལ་རོལ་གར་མཛད། །འཁོར་རྣམས་ཀུན་ཀྱང་གཤོག་རྒྱངས་ཅན། །ཕྱི་རོལ་དམ་ཅན་ཁོར་ཡུལ་ག །མ་ཐ་མ་ཐ་བཛྲ། ཤར་སྟོད་དུ། ཤོ་ན་མུ་ཁ་མཐིང་ནག་ལྕགས་སྤྱང་མགོ་དགུ་པ་ལ་ཞོན་པ། གཡས་ཐོད་དབྱུག་འཛིན་པ། ཛྭ་ལ་ཛྭ་ལ་བཛྲ། ལྷོ་སྟོད་དུ་ཤྲཱི་ཀ་མུ་ཁ་སེར་ནག་གསེར་གྱི་འཕར་བ་ལྕེ་བརྒྱད་ལ་ཞོན་པ། གཡས་རྡོ་རྗེ་ལྕགས་ཀྱུ་འཛིན་པ། སུ་རུ་སུ་རུ་བཛྲ་ནུབ་སྟོད་དུ་སྲི་ལ་མུ་ཁ་དམར་ནག་ཟངས་ཀྱི་ཝ་མོ་རྐང་གསུམ་ལ་ཞོན་པ། གཡས་རྡོ་རྗེ་འཛིན་པ། མུ་རུ་མུ་རུ་བཛྲ། བྱང་སྟོད་དུ་ཤྭ་ན་མུ་ཁ་ལྗང་ནག་གཡུའི་ཁྱི་མོ་རལ་པ་ཅན་ལ་ཞོན་པ། གཡས་ཞིང་ཆུང་ཞལ་དུ་གསོལ་ཞིང༌། དེ་བཞི་ཆར་ཡང་གཡོན་རང་རིགས་ཀྱི་ཕུར་བུ་ཐོགས་པའོ། །ཧཱུཾ་མ་མ་ཝཱ་ཤྱཾ་ཀ་རི་ཧཱུཾ། ཤར་སྨད་དུ། རེ་མ་ཏཱི་མཐིང་ནག་དྲེའུ་རྐང་གསུམ་ལ་ཞོན་པ། དྲི་ཤུལ་དང་མེ་ལོང་འཛིན་པ། །མ་ཏཾ་ཉ་ཀ་ར། ལྷོ་སྨད་དུ་རེ་མ་ཛ་སེར་མོ་ཤ་བ་ཡུ་མོ་ལ་འཆིབས་ཤིང༌། གཡས་གསེར་གྱི་ཟོར་བ་དང༌། གཡོན་གཡུའི་སྣོད་ཐོགས་པ། ཨི་ནན་ད་དྷི། ནུབ་སྨད་དུ་རེ་མ་ཧྲི་དམར་ནག་ཆུ་གླང་ལ་ཞོན་པ། ལྕགས་ཀྱུ་
དང་བནྡྷ་འཛིན་པ། མ་མ་ཤཱིགྷྲཾ་ཀརྨ་ཀ་ར་ཡེ། །བྱང་སྨད་དུ་རེ་མ་ཛུ་ལྗང་ནག་རྔ་མོང་ལ་ཞོན་པ། ཁྲཾ་ཤིང་དང་མཚོན་གྱི་གྲུབ་གུ་ཐོགས་པའོ། །ཡང་ཐམས་ཅད་ཀྱང་ཕྱག་གཡོན་ན་མཆོག་ཕུར་རོ། །ཀ་ཏང་ཀ་ཡེ། ཤར་དུ་རྡོ་རྗེ་ཡ་སྦྱིན་མཐིང་ནག་ལྕགས་ཀྱུ་དང་བྱ་ཕུར་འཛིན་པ། གཡུ་འབྲུག་ལ་འཆིབས་པ། ལྷོར་རྡོ་རྗེ་དེ་སྦྱིན་སེར་མོ་ཞགས་པ་དང་བྱི་དུར་གྱི་ཕུར་པ་འཛིན་པ། ཆུ་སྲིན་པིར་ལ་ཞོན་པ། ཨ་ཛི་ཏེ། ནུབ་ཏུ་རྡོ་རྗེ་བསེ་སྦྱིན་དམར་མོ་ལྕགས་སྒྲོག་དང་མཆོག་ཕུར་འཛིན་པ། གློག་དམར་ལ་འཆིབས་པ་ཨ་པ་ར་ཛི་ཏི། བྱང་དུ་རྡོ་རྗེ་ཕག་བྱི་ལྗང་ཁུ་དྲིལ་བུ་སེར་ལྡིང་གི་ཕུར་པ་འཛིན་པ། ཆུ་རྟ་སྔོན་པོ་ལ་འཆིབས་པའོ། །མ་མ་ཤཱི་གྷྲཾ་ཀརྨ་ཀ་ར་ཡེ། ཤྭ་ན་མ་བཞིའི་མིང་པོ་ནི། པྲ་མ་རཱ་ཛ་སྲིན་པོའི་གྱིང་དཀར་པོ་དུང་ཕུར་བསྒྲིལ་བ། ཡ་མ་རཱ་ཛ་གཤིན་རྗེའི་གྱིང་སྔོན་པོ་ལྕགས་ཕུར་བསྒྲིལ་བ། ད་ཤ་གྷྲྀ་བ་བདུད་ཀྱི་གྱིང་དམར་པོ་ཟངས་ཕུར་བསྒྲིལ་བ། ཡག་ཤ་གྷྲྀ་བ་གནོད་སྦྱིན་གྱི་གྱིང་སེར་པོ་གསེར་ཕུར་བསྒྲིལ་བ། མཱ་ར་སེ་ན་བདག་ཉིད་ཆེན་མོའི་མིང་པོ་རྣམས་ནི། ཤར་བདུད་དཀར་པོ་མཆེ་བ་འཛིན་པ། ལྷོ་བདུད་སྔོན་པོ་བེ་ཅོན༴ ནུབ་བདུད་དམར་ནག་གཞགས་པ༴ བྱང་བདུད་ལྗང་ནག་རལ་གྲི༴ པྲ་མནྡྷ་ན་ཡ་ཧཱུཾ། ས་བདག་ཆེན་མོ་རྣམས་ཀྱི་མིང་པོ་ནི། །སྲིན་པོའི་གྱད་ཆེན་དཀར་པོ། གཤིན་རྗེའི་གྱད་ཆེན་ནག་པོ། བདུད་ཀྱི་གྱད་ཆེན་མིག་རིང་དམར་པོ།
གནོད་སྦྱིན་གྱད་ཆེན་མོན་པ་སྔོན་པོ་སྟེ། དེ་བཞི་ཆར་ཡང་གཡས་མཚོན་ཆ་སྣ་ཚོགས་པ་དང༌། གཡོན་རང་མདོག་དང་མཚུངས་པའི་ཕུར་བུ་འཛིན་པ། མིང་པོ་ཐམས་ཅད་ཀྱང་སྐུ་ཆེ་ལ་ཡན་ལག་རགས་པ། མི་གདུག་ཅིང་འཇིགས་པའི་ཆ་ལུགས་ཅན། ཟ་ཟ་འཆའ་འཆའ་རྔམ་རྔམ་འདྲ་བའོ། །དེ་ལྟར་དཔལ་ཆེན་པོ་དཀྱིལ་འཁོར་བཀའ་ཉན་ཕོ་ཉའི་ཚོགས་དང་བཅས་པ་ཡེ་ཤེས་ཆེན་པོའི་རོལ་པ་ལས་རང་ཤར་བ། བཀྲག་མདངས་གཟི་བྱིན་དཔག་ཏུ་མེད་པ་དང་བཅས་པ་གྲུབ་པར་གྱུར། རྡོ་རྗེ་གཞོན་ནུའི་རིག་འཛིན་རྣམས། ཞེས་པ་ནས། ཀརྨ་ཀྲོ་དྷེ་ཤྭ་རཱི་ཨ། ཞེས་པའི་བར་གོང་བཞིན་ལས། དབང་དང་བྱིན་རླབས་འདིར་སྩོལ་ཅིག ཅེས་འདོན་པ་སྤོའོ། །གསུམ་པ་ཕུར་པ་རྫས་ཀྱི་དཀྱིལ་འཁོར་བསྐྱེད་པ་ནི། སྲས་མཆོག་རྣམས་བསངས་སྦྱངས། ཨེ་སྥ་ར་ཎ་ཕཊ། ཕུར་གདན་གྲུ་གསུམ་མཐིང་ནག་འབར་བའི་དཀྱིལ་འཁོར་དུ་གྱུར། ཨོཾ་བཛྲ་ཀཱི་ལི་སོགས་སྙིང་པོ་འབྲུ་བཅུ་དྲུག་པ་དང་སྒོ་མ་བཞིའི་སྔགས་བརྗོད། ཨེ་མ་ཨགྣེ་མནྚལ་སརྦ་ཤཱ་ཏྲུན་བགྷྣཱན་ཧཱུཾ། ཛཿཧཱུཾ་བཾ་ཧོཿ ཨོཾ་བཛྲ་ཀཱི་ལི་ཀཱི་ལ་ཡ་བེ་ཏ་ལི་མཎྜ་ལ་རཀྵ་རཀྵ་ཧཱུཾ་ཕཊ། སྲས་མཆོག་གི་ཕུར་བུ་ལ་ཡུངས་ཀར་གཏོར་ཞིང་ཐུམ་བུ་གདགས། ཨོཾ་བཛྲ་ཀཱི་ལི་ཀཱི་ལ་ཡ་མ་གུ་ཏ་ལ་ཏ་ལ་ཏ་ལ་པྲ་ཏ་ལ་ས་མ་ཡ་ཏིཥྛ་ཧཱུཾ་ཕཊ། གུ་གུལ་གྱིས་བདུགས། ཨོཾ་བཛྲ་ཀཱི་ལི་ཀཱི་ལ་ཡ་མ་ཧཱ་རཀྟ་ཛྭ་ལ་ནཾ་ཧཱུཾ་ཕཊ། རཀྟ་བྱུག་པའམ་བྱུག་ཚུལ་ཙམ་བྱ། ཨ་བེ་ཤ་ཡ་ཨ་ཞེས་ཕུར་པ་
ལག་ཏུ་བླངས། ཨོཾ་ཧ་ན་ཧ་ན་དཱིབྷ་ཙཀྲ་ཧཱུཾ་ཕཊ། ཐལ་མོ་ཀ་པུ་ཏས་བཟུང༌། བཛྲ་སཏྭ་རཱ་ཛ་ཡ་ཧཱུཾ། རྡོ་རྗེ་རྩེ་གཅིག་པའི་ཕྱག་རྒྱས་བཟུང༌། ཨོཾ་བཛྲ་ཀཱི་ལི་ཀཱི་ལ་ཡ་ས་མ་ཡ་ཏིཥྛནྟུ། ཞེས་ཕུར་གདན་གྱི་སྟེང་དུ་གཙུག་པ། སྲས་མཆོག་ལྔ་ཡོད་ཅིང་སྤྲོས་པ་ལ་དགའ་ན། སྔགས་དེ་དག་སོ་སོ་ལན་ལྔ་ལྔ་བརྗོད། གང་ལྟར་ཡང༌། སྐྱེ་མེད་རྣམ་དག་ཆོས་སྐུའི་དབྱིངས་ཉིད་ལས། །སྐྱེ་བའི་ཆོ་འཕྲུལ་འཇིགས་པའི་སྐུར་སྟོན་པ། །ཕྱོགས་བཅུའི་རྒྱལ་བ་ཡབ་ཡུམ་མ་ལུས་སྐུ། །སངས་རྒྱས་འདུས་པའི་སྲས་མཆོག་ཀཱི་ལ་ཡ། །སྲིད་པ་རྡོ་རྗེ་ཕུར་བུར་སྒྲུབ་པའི་ཕྱིར། །བཞེངས་ཤིག་བཞེངས་ཤིག་ཆོས་ཀྱི་དབྱིངས་ལས་བཞེངས། བཛྲ་ཨཉྫ་ལི་ཛ་མཉམ་པའི་ཐལ་མོ་བྱ། ཕུར་བུ་རྣམས་གཙོ་བོ་ཡབ་ཡུམ་གྱི་སྐུ་ལ་ཞུགས། སྦྱོར་མཚམས་ནས་རིགས་ལྔ་ཧེ་རུ་ཀར་གྱུར། ཧཱུཾ་དབུས་ཀྱི་མཐིང་ནག་གྲུ་གསུམ་དཀྱིལ་འཁོར་ནས། །རྡོ་རྗེ་འདུས་པའི་སྲས་མཆོག་ཀཱི་ལ་ཡ། །ཞེ་སྡང་བདུད་འདུལ་ཁྲོ་རྒྱལ་དབྱིངས་ནས་བཞེངས། །སྲིད་པ་རྡོ་རྗེ་ཕུར་བུར་སྒྲུབ་པའི་ཕྱིར། །མཐིང་ནག་གྲུ་གསུམ་འབར་བའི་གནས་འདིར་གཤེགས། དེ་ལ་འདོན་པ་བསྒྱུར་ཏེ། དབུས་ཀྱི་ཞེས་པ། ཤར་ཕྱོགས་ལྷོ་ཕྱོགས་ནུབ་ཕྱོགས་བྱང་ཕྱོགས་རྣམས་དང༌། མཐིང་ནག་ཅེས་པར། སྨུག་ནག་སེར་ནག་དམར་ནག་ལྗང་ནག་ཅེས་དང༌། ཞེ་སྡང་ཞེས་པར། གཏི་མུག་ང་རྒྱལ་འདོད་ཆགས་ཕྲག་དོག ཅེས་འདོན་པ་སྤོའོ། །དེ་ལྟར་སྤྲུལ་སྐུ་རིགས་ལྔར་བཞེངས་པར་གསོལ་བ་བཏབ་པས།
ཧེ་རུ་ཀ་རིགས་ལྔ་རྣམས་ལྟེ་བ་མན་ཆད་ཕུར་བུའི་རྣམ་པ་ཅན་དུ་གྱུར། ཨོཾ་དཱིཔྡ་བཛྲ་ཀཱི་ལི་ཀཱི་ལ་ཡ་སརྦ་བིགྷྣཱན་བཾ་ཧཱུཾ་ཕཊ། དེ་བཞིན་དུ། ཨོཾ་དཱིཔྡ་ཙཀྲ་དཱིཔྟ་རཏྣ། དཱིཔྡ་པདྨ། དཱིཔྟཀརྨ་ཞེས་འདོན་པ་སྤོས་ལ་བརྗོད། ཕུར་བུའི་སྤྱི་བོར་ཨོཾ། སྐེད་པར་ཧྲཱིཿ རྩེ་མོར་ཕཊ། རྡོ་རྗེ་གཞོན་ནུའི་རིག་འཛིན་རྣམས། ཞེས་པ་ནས། ཀརྨ་ཀྲོ་དྷ་ཤྭ་རཱི་ཨ་ཞེས་པའི་བར་གོང་བཞིན། མ་སུརྱ་མཎྜ་ལ། ཨ་ཙནྟ་མཎྜ་ལ༴ ལག་མཐིལ་གཉིས་སུ་ཟླ་བ་དང༌། །ཉི་མའི་དཀྱིལ་འཁོར་གཡས་ཀྱི་སོར་མོ་ལྔ་ལ་ཧཱུཾ་ཨོཾ་སྭཱ་ཨཱཿཧ་ལས་རྒྱལ་བ་རིགས་ལྔ། གཡོན་གྱི་སོར་མོ་ལྔ་ལ་མུཾ་ལཾ་མཾ་པཾ་ཏཾ་ཡུམ་ལྔའི་ངོ་བོ། ས་མ་ཡ་སྟྭཾ། བཛྲ་ཨཉྫ་ལཱི་ཧཱུཾ། སོར་མོ་རྣམས་བསྣོལ། བཛྲ་བནྡྷ་རྡོར་བསྡམས་བྱ། བཛྲ་ཨཉྫ་ལི་ཛཿ ཞཻས་ཕུར་བུ་བླངས། ཨ་བེ་ཤ་ཡ་ཨ་ཞེས་ཅུང་ཟད་བསྒྲིལ་ཚུལ་བྱ། རིགས་ལྔ་ཡབ་ཡུམ་ཕུར་བུ་ལ་ཐིམ། །རྒྱ་མདུད་གོང་མ་དང་ཅུང་ཞོགས་བྱེད་ཡན་ཆད་ལ། ཕྱོགས་བཞི་དང་སྟེང་གི་ཁྲོ་བོ། མན་ཆད་ལ་མཚམས་བཞི་དང་འོག་གི་ཁྲོ་བོ་བཞུགས་པར་མོས། ཧཱུཾ་དཱིཔྡ་ཙཀྲ་ཕུར་པའི་ལྷ། མཐིང་ནག་གཅེར་བུ་རལ་པ་ཅན། །སྐུ་སྟོད་ཁྲོ་བོ་ཆེན་པོ་ལ། དབུ་གསུམ་ཕྱག་ཀྱང་དྲུག་པ་སྟེ། །དབུ་ལ་རིགས་ལྔའི་སངས་རྒྱས་རྫོགས། །ལྟེ་བ་མན་ཆད་སྐུ་ཡི་ཆ། །ཨུཏྤལ་སྔོན་པོའི་འདབ་མ་འདྲ། །འབར་བའི་འཕྲེང་བ་འཁྲིགས་པའི་འོད། །
ལྕགས་ཀྱི་ཕུར་བུ་ཟུར་གསུམ་པ། །དྲག་པོར་གྱུར་པའི་ཕུར་པ་སྟེ། །བཏབ་ན་ལྷ་ཡང་རླག་འགྱུར་ན། །གནོད་བྱེད་བགེགས་ལ་སྨོས་ཅི་དགོས། ཀཱི་ལ་ཡ་འབྲུ་བཅུ་དྲུག་པ་ལན་གསུམ་སོགས་ཇི་ལྟར་འོས་པ་བརྗོད། འགྲུབ་ན། མ་སུརྱ་མཎྜལ་མན་ཆད། སྲས་མཆོག་རེ་རེ་བཞིན་དུ་ཚར་རེ་གྲུབ་ན་ལེགས་སོ། །ཨོཾ་བཛྲ་ཀཱི་ལི་ཀཱི་ལ་ཡ་ཛྭ་ལ་ཛྭ་ལ་པྲ་ཛྭ་ལ་སྥུ་ཊ་སྥུ་ཊ་སརྦ་ནཱ་ཤ་ནཱ་ཡ་ཧཱུཾ་ཕཊ། ཅེས་སྲས་མཆོག་གི་གཙོ་བོ་དཔྲལ་བར་རེག ཨོཾ་བཛྲ་ཀཱི་ལི་ཀཱི་ལ་ཡ་བྱ་ཀྲི་པ་ལ་ཧྲི་ཤོ་དྷ་ཡ་ཧཱུཾ་ཕཊ། མགྲིན་པར་རེག ཨོཾ་བཛྲ་ཀཱི་ལི་ཀཱི་ལ་ཡ་ཚིནྡྷ་ཚིནྡྷ་ཧཱུཾ་ཕཊ། སྙིང་གར་རེག་སྟེ། སྐུ་གསུང་ཐུགས་ཀྱི་དབང་བླང་བའོ། །གསུམ་པ་འཕྲིན་ལས་མཆོད་པ་རྣམ་པ་གསུམ་ནི། རང་གི་ཐུགས་ཀའི་ཧཱུཾ་ལས་འོད་འཕྲོས། རང་བཞིན་གྱི་གནས་ནས་སངས་རྒྱས་བྱང་ཆུབ་སེམས་དཔའ་དཔའ་བོ་མཁའ་འགྲོ་ཐམས་ཅད་རྡོ་རྗེ་གཞོན་ནུའི་དཀྱིལ་འཁོར་གྱི་ལྷ་ཚོགས་དམ་ཅན་སྲུངས་མ་དང་བཅས་པའི་རྣམ་པར་མཆོད་པའི་དོན་དུ་བཛྲ་ས་མཱ་ཛཿ ཧཱུཾ་སྲིད་པའི་ཕུར་བུ་སྒྲུབ་པ་དང༌། །དབང་དང་དངོས་གྲུབ་བླང་བའི་ཕྱིར། །ཡེ་ཤེས་ཁྲོ་བོ་གཤེགས་སུ་གསོལ། ཁྲོ་བོ་ཆེན་པོ་གཤེགས་ནས་ཀྱང༌། རྟགས་དང་མཚན་མ་བསྟན་པ་དང༌། །བཛྲ་ཀཱི་ལ་ཡ་ཡི་དངོས་གྲུབ་སྩོལ། ས་མ་ཡ་ཧོཿ ས་མ་ཡ་སྟཾ། ཛཿཧཱུཾ་བཾ་ཧོཿ པྲ་བེ་ཤ་ཡ་ཕཊ། སྲིདགསུམ་གདུག་པ་འདུལ་བ་དང༌། །ང་རྒྱལ་ཆེན་པོ་བསྟན་པའི་ཕྱིར། །རྡོ་རྗེ་
སྲིན་པོའི་ལྷ་ཚོགས་ལ། །རྩེ་གཅིག་ཡིད་ཀྱི་ཕྱག་འཚལ་ལོ། །ཨ་ཏི་བྷུ་ཧོ། པྲ་ཏི་ཛ་ཧོ། ཨོཾ་བཛྲ་ཀཱི་ལི་ཀཱི་ལ་ཡ་ས་པཱ་རི་ཝ་ར་པཱ་ད་བྷནྡྷ་ནཾ་ཀ་རོ་མི། ཛཿཧཱུཾ་བཾ་ཧོཿ གཉིས་སུ་མེད་པར་ཐིམ། དེ་ནས་མཆོད་པ་འབུལ་བ་ལ། མཆོད་པའི་གཙོ་བོ་རྣམ་གསུམ་དང༌། ཞར་བྱུང་གི་མཆོད་པའི་རྣམ་གྲངས་གཞན་ནོ། །དང་པོ་ནི། སྨན་རག་གཏོར་གསུམ་འབུལ་བ་སྟེ། ཨོཾ་སངས་རྒྱས་ཀུན་དང་མཉམ་སྦྱོར་བ། །རང་བྱུང་གདོད་ནས་རྣམ་པར་དག །རྩ་བརྒྱད་སྟོང་ལ་སྦྱར་བའི་སྨན། །རིགས་ལྔ་དམ་ཚིག་ལྔ་ཡི་དངོས། །ཡེ་ཤེས་ལྔ་རྫོགས་གྲུབ་པའི་རྫས། །རྒྱུད་དྲུག་སེམས་ཅན་ཀུན་གྲོལ་ཕྱིར། །དུག་ལྔ་སེལ་བའི་བདུད་རྩི་འདི། །ཇི་སྙེད་སངས་རྒྱས་ཐམས་ཅད་དང༌། །བྱང་ཆུབ་སེམས་དཔའི་ཚོགས་ཆེན་ལ། །ཐུགས་དམ་དབྱིངས་ཉིད་སྐུལ་བའི་ཕྱིར། །བདག་ཅག་དད་པས་འབུལ་ལགས་ཀྱི། །ཐུགས་རྗེས་དགོངས་ལ་བཞེས་སུ་གསོལ། །བཞེངས་ཏེ་ཀུན་ཏུ་དགེས་མཛོད་ལ། །འཕྲུལ་གྱི་དངོས་གྲུབ་སྩལ་དུ་གསོལ། ཨོཾ་བཛྲ་ཀཱི་ལི་ཀཱི་ལ་ཡ། མ་ཧཱ་པཉྩ་ཨ་མྲྀ་ཏ་ཁ་རཾ་ཁཱ་ཧི། བཅོམ་ལྡན་དཔལ་ཆེན་རྡོ་རྗེ་གཞོན་ནུ་དང༌། །དཔལ་གྱི་ཡུམ་ཆེན་འཁོར་ལོ་རྒྱས་འདེབས་མ། །རྣམ་དག་བདུད་རྩིའི་དམ་རྫས་མཉེས་མཆོད་འབུལ། །ཐུགས་རྗེས་བརྩེར་དགོངས་དབང་དང་དངོས་གྲུབ་སྩོལ། ཨོཾ་ཨཱཿཧཱུཾ། ཡེ་ཤེས་ཁྲོ་བོ་ཆེན་པོ་བཅུ་རྣམས་དང༌། །
ཤེས་རབ་དབྱིངས་ཀྱི་ཁྲོ་མོ་བཅུ་རྣམས་ལ། །རྣམ་དག་སོགས་གོང་བཞིན། སྤྲུལ་པ་ཁྲ་ཐབས་ཉི་ཤུ་སྒོ་མ་བཞི། །གདུག་པ་འདུལ་མཛད་སྲས་མཆོག་རྣམ་ལྔ་ལ། རྣམ་དག༴ བཀའ་ཡི་ཕོ་ཉ་ཡང་སྤྲུལ་སུམ་སྤྲུལ་དང༌། །སྲུང་མར་དམ་བཅས་ཞལ་བཞེས་ཐམས་ཅད་ལ། རྣམ་དག༴ ཀུན་བཟང་རིགས་ལྔ་དཔལ་ཆེན་ཁྲག་འཐུང་སོགས། །རྒྱལ་བ་དགོངས་བརྒྱུད་བླ་མ་ཐམས་ཅད་དང༌། །པྲ་བྷ་ཧསྟི་པདྨ་འབྱུང་གནས་སོགས། །རིགས་འཛིན་བརྡ་བརྒྱུད་བླ་མ་ཐམས་ཅད་དང༌། །མཁར་ཆེན་མཚོ་རྒྱལ་རྡོ་རྗེ་བདུད་འཇོམས་སོགས། །གང་ཟག་སྙན་བརྒྱུད་བླ་མ་ཐམས་ཅད་དང༌། །གཞན་ཡང་ཕྱོགས་བཅུའི་རྒྱལ་བ་ཐམས་ཅད་དང༌། །ཡི་དམ་དཀྱིལ་འཁོར་ལྷ་ཚོགས་ཐམས་ཅད་ལ། རྣམ་དག༴ བར་འདིར་སྤྲོས་པ་ལ་དགའ་ན། སྨན་བཤགས་དང་སྐུ་གསུང་ཐུགས་ཀྱི་དངོས་གྲུབ་བླང་པ་སོགས་ཀྱང་བྱེད་དོ། །ཧཱུཾ་མ་ཧཱ་རཀྟ་བསྒྲལ་བའི་ཁྲག །མཱུ་ལ་རཀྟ་རྩ་བའི་ཁྲག །པདྨ་རཀྟ་སྦྱོར་བའི་ཁྲག །ཆུ་དང་མ་འདྲེས་དྭངས་མའི་ཁྲག །བསྒྲལ་བའི་ཤ་ཚོགས་རི་ལྟར་སྤུང༌། །འདོད་ཆགས་ཁྲག་གི་རྒྱ་མཚོ་འཁྱིལ། །ཞེ་སྡང་མཆོག་ཕྲན་གཅལ་དུ་བཀྲམ། །ཙི་ཏའི་ཚོགས་ནི་རྫ་ལྟར་ཀླགས། །དམར་ཆེན་རྒྱ་མཚོ་ཆེན་པོ་ལ། །སྣ་ཚོགས་ཞིང་གི་མེ་ཏོག་ཤར། །དཔལ་ཆེན་འཁོར་བཅས་ཞལ་དུ་འབུལ། །ཐུགས་རྗེས་དགོངས་ལ་བཞེངས་སུ་གསོལ། །ཞེས་ཏེ་ཀུན་ཏུ་དགྱེས་མཛོད་
ལ། །འཕྲུལ་གྱི་དངོས་གྲུབ་སྩལ་དུ་གསོལ། ཨོཾ་བཛྲ་ཀཱི་ལི་ཀཱི་ལ་ཡ་མ་ཧཱ་མཾ་ས་ཁཱ་ཧི། མ་ཧཱ་རཀྟ་ཁཱ་ཧི། མ་ཧཱ་ཨསྠི་ཁཱ་ཧི། མ་ཧཱ་ཙིཏྟ་ཁཱ་ཧི། མ་ཧཱ་གཽ་རོ་ཙ་ན་ཁཱ་ཧི། མ་ཧཱ་བ་སུ་ཏ་ཁཱ་ཧི། རཀྟ་གཏོར་མ་ལ་ལན་གསུམ་དུ་སྦྲན་ཏེ། དང་པོ་གཙོ་བོ་ཡབ་ཡུམ། གཉིས་པ་འཇིག་རྟེན་འདས་པའི་འཁོར་ཚོགས། གསུམ་པ་དམ་ཅན་སྲུང་མ་རྣམས་ལ་འབུལ། རཀྟ་ཚར་གསུམ་གྱི་མཆོད་པ་ཞེས་གྲགས་པའི་ཕྱིར། གྱེར་ཡང་ལན་གསུམ་བྱས་ན་ལེགས་སོ། །དེ་ནས་གཏོར་མ་གསར་པ་ཡོད་ན་སྔར་བཞིན་བྱིན་རླབས་ཀྱང་བྱ། མེད་ན། ཨོཾ་མ་ཧཱ་བ་ལིཾ་ཏ་སོགས་བྱིན་རླབས་ལན་གསུམ་གྱིས་ཁ་གསོས། བླ་མེད་མཆོག་གི་མཆོད་པ་དམ་པ་འདི། །ཡེ་ཤེས་ལྔ་ཡི་འོད་ཟེར་རྣམ་པར་འཕྲོ། །འདོད་པའི་ཡོན་ཏན་ལྔ་ཡི་རབ་ཏུ་བརྒྱན། །དམ་ཚིག་བཞིན་དུ་ནུས་པས་འབུལ་ལགས་ཀྱི། །ཐུགས་དམ་བཞིན་དུ་ཅི་བདེར་བཞེས་ནས་ཀྱང༌། །ཀཱི་ལ་ཡ་ཡི་དངོས་གྲུབ་སྩལ་དུ་གསོལ། ཛཿཧཱུཾ་བཾ་ཧོཿ ཤྲཱི་ཧེ་རུ་ཀ་ཨི་དཾ༴ པུཥྤཾ། དྷུ་པཾ། དཱི་བཾ། གནྡྷཾ། བ་ལིཾ་ཏ་པྲ་ཏཱིཙྪ་ཧོཿ གྲྀཧྣ་ཁཱ་ཧི། བཛྲ་ཡཀྵ་ཀྲོ་དྷ་ཁ་ཁ་ཁཱ་ཧི་ཁཱ་ཧི། གྱེར་དང་བཅས་པ་ལན་གསུམ། དེ་ནི་གཏོར་མ་དངོས་ཡིན་ལ། དེ་རྗེས་མཆོད་པ་རྣམ་པ་གསུམ་ཆར་གྱི་འཇུག་སྡོམས་ནི། སྙིང་པོ་འབྲུ་བཅུ་དྲུག་པའི་མཐར། མ་ཧཱ་བ་ལིཾ་ཏ་ཁཱ་རཾ་ཁཱ་ཧི་མ་ཧཱ་རཀྟ་ཁཱ་རཾ་ཁཱ་ཧི། མ་ཧཱ་པཉྩ་ཨ་མྲྀ་ཏ་ཁཱ་རཾ་ཁཱ་ཧི། ཞེས་བཏགས་པ་ལན་བདུན་ལ་སོགས་པས་ཕུལ། བསྡུ་ན་
དེ་ཙམ་གྱིས་ཀྱང་ཆོག དེ་ནས་སྤྲོ་ན་རྩ་བརྒྱུད་བླ་མའི་མཚན་ནས་སྨོད་པ་དང༌། །དཀྱིལ་འཁོར་གྱི་ལྷ་ཚོགས་ཐམས་ཅད་དང༌། སྲས་མཆོག་རྣམས་དང༌། དམ་ཅན་རྣམས་ཀྱིས་བསྐྱེད་སྔགས་ཀྱི་མཐར་ཡང་དེ་ཞིན་བཏགས་ཏེ་འབུལ། ཁྱད་པར་དུ་ཧ་ས་ཡ་ར་ལ་སོགས་པ་ལས་སྔགས་དྲུག་གི་མཐར་ཨོཾ་བཛྲ་ཡཀྵ་ཀྲོདྷ་མ་ཧཱ་བ་ལིཾ་ཏ་སོགས་བཏགས་པས་ལན་མང་དུ་འབུལ། ལྷ་རྣམས་དགྱེས་ནས་ཧ་ཧཱ་ཞེས་གསུངས། ཧཱུཾ་ཧཱུཾ་ཞེས་བདག་ལ་བྱིན་གྱིས་རླབས། ཕཊ་ཕཊ་ཅེས་དགྲ་བགེགས་བསྒྲལ་ཏེ་ཆོས་ཉིད་དུ་སྤར་བར་གྱུར། འདི་ནི་སྨན་རཀ་གཏོར་གསུམ་ཞེས་པའི་གོ་རིམ་ལྟར་བྱས་པ་ཡིན་ལ། ཡང་ཕུད་སྨན་རཀྟ་གསུམ་ཞེས་པ་ལྟར་གཏོར་མ་ཐོག་མར་བྱས་ཀྱང་རྙིང་མར་ལུགས་མང་པོ་ལ་ཡོད་པས་མི་ལེགས་པ་མ་ཡིན་ནོ། །གཉིས་པ་ཞོར་བྱུང་མཆོད་པའི་རྣམ་གྲངས་ལ། འདོད་ཡོན་སྣ་ཚོགས་ཀྱི་མཆོད་པ་ནི། རྡོ་རྗེ་སྒེག་མོའི་དགའ་བས་མཆོད་བྱ་ཞིང༌། །རྡོ་རྗེ་འཕྲེང་མོས་རབ་ཏུ་བརྒྱན་བྱས་ཏེ། །རྡོ་རྗེ་གླུ་མས་གསང་བའི་གླུ་བླངས་ནས། །རྡོ་རྗེ་གར་མས་མཛོད་པའི་གར་བསྒྱུར་མ། །ཕྱོགས་བཅུའི་འཇིག་རྟེན་ནམ་མཁའི་ཁམས་གང་ནས། །བླ་མ་དཀྱིལ་འཁོར་དམ་ཅན་སྲུང་མ་ལ། །རྣམ་དག་མོས་པའི་བློ་ཡིས་བདག་འབུལ་ལོ། །བཞེས་ཤིག་ཀཱི་ལ་ཡ་ཡི་དངོས་གྲུབ་སྩོལ། །རྡོ་རྗེ་བདུག་པས་མ་ལུས་ཚིམ་བྱས་ནས། །རྡོ་རྗེ་མེ་ཏོག་མ་ཡིས་མཛེས་པར་བཀྲམ། །རྡོ་རྗེ་སྒྲོན་མེ་མ་ཡི་དགྱེས་པ་བསྐྱེད། །དྲི་མཆོག་མ་ཡི་དྲི་ཞིམ་བྱུག་བྱ་བ། ཕྱོགས་བཅུའི་
སོགས་གོང་བཞིན། ཨོཾ་བཛྲ་ལཱ་སྱ་ཧཱུཾ། ཨོཾ་བཛྲ་མཱ་ལེ་ཏྲཱཾ། ཨོཾ་བཛྲ་གིརྟི་ཧྲཱིཿ ཨོཾ་བཛྲ་ནིརྣཱི་ཨ། ཨོཾ་བཛྲ་དྷུ་པེ་ཧཱུཾ། ཨོཾ་བཛྲ་པུཥྤེ་དྲཱཾ། ཨོཾ་བཛྲ་ཨཱ་ལོ་ཀེ་ཧྲཱིཿ ཨོཾ་བཛྲ་གནྡྷེ་ཨ། འདི་ནི་སྨན་མཆོད་ཀྱི་འཕྲོས་དོན་ཡིན་ནོ། །མཆོག་ཏུ་གཙང་བའི་མཆོད་ཡོན་འདི། །རྡོ་རྗེ་ཁྲོ་བོའི་ཚོགས་ལ་འབུལ། །དགྱེས་པའི་ཚུལ་གྱིས་བཞེས་ནས་ཀྱང༌། །འཕྲུལ་གྱི་དངོས་གྲུབ་སྩལ་དུ་གསོལ། །ཨོཾ་བཛྲ་ཀཱི་ལི་ཀཱི་ལ་ཡ་ཨརྒྷཾ་པྲ་ཏཱིཙྪ་སྭཱཧཱ། །མཆོག་ཏུ་གཙང་བའི་ཞབས་བསིལ་འདི། ༴པཱ་ཏྱཾ། ༴རིན་ཆེན་མཛེས་པའི་མེ་ཏོག་འདི། ༴པུཥྤཾ༴ ཞིང་ཀུན་ཁྱབ་པའི་བདུག་སྤོས་འདི། ༴དྷཱུ་པཾ༴ སྒྲོན་མེ་རིན་ཆེན་སྣང་གསལ་འདྀ། ༴དཱེ་པཾ༴ དྲི་ཞིམ་ངད་ལྡང་བྱུག་པ་འདི། ༴གནྡྷཾ༴ རོ་མཆོག་བརྒྱ་ལྡན་ཞལ་ཟས་འདི། ༴ ནེ་བེ་ཏྱཾ༴ རྣམ་མང་རོལ་མོ་སིལ་སྙན་འདི ༴ཤབྷ་པྲ་ཏཱིཙྪ་སྭཱཧཱའི་བར་དུ་སྦྱར་ཏེ། འདི་ནི་གཏོར་མའི་ཡན་ལག་གོ །དེ་ནས་སྦྱོར་བའི་མཆོད་པ་ནི། ཧཱུཾ་འཁྲིལ་པའི་མཆོད་ཆེན་མཉམ་སྦྱོར་བ། །ཐབས་དང་ཤེས་རབ་གཉིས་མེད་པའི། །པདྨ་ལ་ནི་རྡོ་རྗེ་ཞུགས། །བདག་ཉིད་མཆོད་པས་མཉེས་པར་ཤོག །མི་མོ་རྣམས་ཀྱི་རེག་བྱའི་མཆོག །བྱིན་གྱིས་རློབས་ཤིག་རྣལ་འབྱོར་པ། །སྒྲ྄ུབ་པའི་རྫས་འདི་ཐམས་ཅད་ལ། །ཧཱུཾ་དང་ཕཊ་ཀྱིས་ལྡན་པར་མཛོད། །མཉམ་པའི་སྒྲུབ་རྫས་ཆེན་པོ་དག །ལོངས་སྤྱོད་ལྔ་ལྡན་ཐམས་ཅད་ནི། །དཀྱིལ་འཁོར་ལ་ཡང་དཀྱིལ་འཁོར་
ཐིམ། །ཨ་ལ་ལ་ཏེ་བཞེས་སུ་གསོལ། ཨོཾ་བཛྲ་ཀཱི་ལི་ཀཱི་ལ་ཡ། ཛཿཧཱུཾ་བཾ་ཧོ་བོཿབྷྲི་ཙིཏྟ་མ་ཧཱ་སུ་ཁཾ། ཨ་ནུ་རཱ་ག་ཡ་མི་དེ་ནས་བསྒྲལ་མཆོད་ནི། དངོས་སུ་ལིང་ག་བཅས་ན་དགུག་བཞུག་བྱ། མེད་ན་ཡིད་ཀྱི་བྱས་པར་མོས་ཏེ། ཛཿདམ་ཚིག་ཆེན་པོའི་དུས་ལ་བབ། །སྤྲུལ་པ་ཆེན་པོའི་དུས་ལ་བབ། །ཕྱག་བརྙན་ཆེན་པོའི་དུས་ལ་བབ། །ཤྭ་ན་མུ་ཁའི་དུས་ལ་བབ། །བདག་ཉིད་ཆེན་མོའི་དུས་ལ་བབ། །ས་བདག་ཆེན་མོའི་དུས་ལ་བབ། །བསྒྲལ་བར་བྱ་བའི་དུས་ལ་བབ། ཁྱོད་ཀྱི་འཕྲིན་ལས་དུས་ལ་བབ། །མཐུ་རྩལ་དབྱུང་བའི་དུས་ལ་བབ། །བྱང་ཆུབ་མཆོག་ཏུ་སེམས་བསྐྱེད་ཅིང༌། །དུས་གསུམ་རྒྱལ་བའི་གདུང་འཚོ་པ། །རིག་འཛིན་བདག་ཅག་རྣམས་ལ་ནི། །གནོད་ཅིང་གདུག་པའི་དགྲ་དང་བགེགས། །བདུད་དང་བར་དུ་གཅོད་པ་རྣམས། །ཁྲོ་བོ་ཆེན་པོའི་བྱིན་རླབས་ཀྱིས། །ཡུད་ཙམ་གྱིས་ནི་འདིར་བཀུག་ནས། །མངོན་སྤྱོད་ཚུལ་བཞིན་བསྒྲལ་བ་དང༌། །ལུས་ངག་རྡུལ་དུ་བརླགས་ནས་ཀྱང༌། །སྡུག་བསྔལ་ཉམས་སུ་མྱོང་བར་མཛོད། ཨོཾ་ལཾ་ཧཱུཾ་ལཾ་སྟཾ་བྷ་ནཾ་མོ་ཧཾ་གྷ་ཏ་ཡ། བྷ་ག་ཝན་ཧྲཱིཿཥྟྀ་བི་ཀྲི་ཏ་ཤྲཱི་བཛྲ་ཧཱུཾ་ཀ་ར་ཧཱུཾ་ཧཱུཾ་ཕཊ་ཕཊ། བཛྲ་ཀཱི་ལི་ཀཱི་ལ་ཡ་ཛཿཧཱུཾ་བཾ་ཧོཿ སརྦ་བིགྷྣཱན་བཛྲ་ཀཱི་ལི་ཀཱི་ལ་ཡ་ཧཱུཾ་ཧཱུཾ་ཕཊ་ཕཊ། བཛྲ་ཧཱུཾ་ཀ་ར་ཧཱུཾ་ཨ། དངོས་གྲུབ་བར་ཆད་བྱེད་པའི་བགེགས། །གདུག་ཅིང་སྡང་སེམས་ལྡན་པ་རྣམས། །ཟུང་ཞིག་སྡོམས་ཤིག་རྣམ་པར་ཆིངས། །གཏོགས་ཤིག་གྲོགས་དང་བྲལ་བར་གྱིས། །རིངས་པར་ཁུག་
ལ་སྨྲ་རུ་ཆུག །ཕོབ་ཅིག་རྣམ་པར་གཟིར་པར་གྱིས། །ང་ཡིས་དབང་དུ་གྱུར་ནས་ནི། །བསྒོ་བའི་ལས་རྣམས་ཉན་པར་གྱིས། །ཧཱུཾ་པ་ར་བི་དྱཾ་ཚིནྡྷ་ཚིནྡྷ་ཧཱུཾ་ཕཊ། དྷིནྡྷ་དྷིནྡྷ་ཧཱུཾ་ཕཊ། གྲྀཧྞ་གྲྀཧྞ་ཧཱུཾ་ཕཊ། ཧ་ན་ཧ་ན་ཧཱུཾ་ཕཊ། བནྡྷ་བནྡྷ་ཧཱུཾ་ཕཊ། ཏཱཾ་ཌ་ཡ་ཏཱཾ་ཌ་ཡ་ཧཱུཾ་ཕཊ། ཧ་ས་ཡ་ར་ཧ་ས་ཡ་ར་ཧྲི་དཎྜཧཱུཾ་ཕཊ། ཤཱི་གྷྲཾ་ཨ་ན་ཡ་ཧཱུཾ་ཕཊ། ཛ་ལ་པཱ་ཡ་ཛ་ལ་པཱ་ཡ་ཧཱུཾ་ཕཊ། ཨ་བེ་ཤ་ཡ་ཨ་བེ་ཤ་ཡ་ཧཱུཾ་ཕཊ། བི་དྷ་ཡ་བི་དྷ་ཡ་ཧཱུཾ་ཕཊ། ཨོ་བཛྲ་ཡཀྵ་ཀྲོ་དྷ་ཁཱ་ཧི། བི་ད་ཡ་བི་ད་ཡ་བཛྲ་ཡཀྵ་ཀྲོ་དྷ་ཁཱ་ཧེ། ཛཿ བྲན་དང་བཀའ་ཉན་ཕོ་ཉའི་ཚོགས། ཁྱོད་ཀྱི་དམ་ཚིག་དུས་ལ་བབ། །སྔོན་ཆད་ཇི་ལྟར་དམ་བཅས་པའི། །མངོན་སྤྱོད་འཕྲིན་ལས་མྱུར་དུ་མཛོད། ཧ་ན་ཧ་ན་བཛྲ། ད་ཧ་ད་ཧ་བཛྲ། པ་ཙ་པ་ཙ་བཛྲ། མ་ཐ་མ་ཐ་བཛྲ། ཛཱ་ལ་ཛཱ་ལ་བཛྲ། སུ་རུ་སུ་རུ་བཛྲ། མུ་རུ་མུ་རུ་བཛྲ། ཀ་ཏཾ་ཀ་ཊ་ཡེ་ཛ་ཡེ་བི་ཛ་ཡེ། ཨ་ཛི་ཏེ་ཨ་པ་ར་ཛི་ཏེ། མ་ར་སྱ་ན། པྲ་མརྡ་ནེ་ཧཱུཾ་ཕཊ། རྡོ་རྗེ་གསང་བའི་བཀའ་ལས་ནི། །སྡིག་ཅན་གང་ཞིག་འདའ་བྱེད་པ། །སྟོབས་ཆེན་ཁྲོ་བོ་ཆེན་པོ་ཡིས། །ཀླད་པ་ཚལ་པ་བརྒྱ་རུ་ཁོས། །ཉོན་ཅིག་བགེགས་དང་ལོག་འདྲེན་རྣམས། །ང་ཡི་བཀའ་ལས་འདའ་མ་བྱེད། མ་མ་ཝ་ཤཾ་ཀུ་རུ་ཏང་ཉ་ཀ་ར་ཨི་ནན་ད་དྷེ་མ་མ་ཀརྨ་ཤཱི་གྷྲཾ་ཀ་ར་ཡེ། གདུག་ཅིང་སྡང་སེམས་ལྡན་པ་ཡི། །ལྷའང་འོན་ཏེ་བདུད་ཀྱང་རུང༌། །ང་ལ་
བར་ཆད་བྱེད་པའི་བགེགས། །མཐུ་དང་རྫུ་འཕྲུལ་མེད་པར་བྱོས། །སརྦ་ཨཱ་ན་ཡ་ཧཱུཾ་ཕཊ། །ཏཱ་ཊ་ཡ་ཏཱ་ཊ་ཡ་ཧཱུཾ་ཕཊ། བརྡུངས་ཤིག་རྡོ་རྗེ་འབར་བའི་གཏུན། །བཀའ་ལས་འདའ་བྱེད་སྡིག་ཅན་རྣམས། །རྡོ་རྗེ་མེ་དབལ་སྙིང་བསྲེགས་ནས། །ལུས་ངག་རྡུལ་ཕྲན་བཞིན་དུ་རློགས། ཁྲོ་མོ་འབར་བའི་གཏུན་ཁུང་དུ། །རྡོ་རྗེ་ཐོ་བས་བརྡུངས་བྱས་ནས། །ལྷ་ཡང་རུང་སྟེ་བསྒྲལ་བར་བྱའོ། ཁ་ཏཱཾ་ཁ་ཏཱཾ་ཁ་ཏཱཾ་ཧཱུཾ་ཧཱུཾ་ཧཱུཾ་ཕཊ་ཕཊ་ཕཊ་བཛྲ་ཡཀྵ་ཀྲོ་དྷ་ཁ་ཁ་ཁཱ་ཧི་ཁཱ་ཧི། ཧ་ཧ་ཧཱུཾ་ཧཱུཾ་ཕཊ་ཕཊ། དེ་ནས་ཞལ་དུ་སྟབས་པ་ནི། ཧཱུཾ་ཧེ་རུ་ཀ་ཡི་གནས་བཅུ་དང༌། །དུར་ཁྲོད་ཆེན་པོའི་གནས་བརྒྱད་ནས། །དཔལ་ཆེན་འཁོར་བཅས་སྤྱན་འདྲེན་ནོ། །དུར་ཁྲོད་མཆོག་གི་གནས་འདི་རུ། །ཞིང་ཆེན་གསར་རྙིང་ཏི་རའི་ཚོགས། །དམར་གྱི་ཨརྒྷཾ་རྒྱ་མཚོར་འཁྱིལ། །མཁའ་འགྲོ་འབར་མའི་ཚོགས་རྣམས་ཀྱང༌། །མ་ལུས་གཤེགས་ནས་བསྣམས་སུ་གསོལ། ཛཿཧཱུཾ་བཾ་ཧོཿ ཤྲཱི་ཧེ་རུ་ཀ་མ་ཧཱ་ས་མ་ཡ། ཁ་ཁ་ཁཱ་ཧི་ཁཱ་ཧི། དེ་ལྟར་སྦྱོར་སྒྲོལ་ཀྱི་མཆོད་པ་དེ་གཉིས་ནི། རཀྟའི་མཆོད་པ་དང་འབྲེལ་བའོ། །དེ་རྗེས་བསྟོད་པས་མཆོད་པ་ནི། ཧཱུཾ བསྐལ་མེ་འབར་བའི་ཀློང་དཀྱིལ་ནས། །དཔལ་ཆེན་རྡོ་རྗེ་གཞོན་ནུའི་སྐུ། །སྐུ་མདོག་དབུས་ཞལ་མཐིང་ཀ་ནི། །ཆོས་ཉིད་འགྱུར་བ་མེད་པའི་རྟགས། །གཡས་ཀྱི་ཞལ་མདོག་དཀར་བ་ནི། །བག་ཆགས་སྐྱོན་གྱིས་མ་གོས་རྟགས། །གཡོན་གྱི་ཞལ་མདོག་དམར་བ་ནི། །
འགྲོ་བའི་དོན་ལ་ཆགས་པའི་རྟགས། །དབུ་སྐྲ་གྱེན་དུ་འབར་བ་ནི། །སྲིད་གསུམ་ཟིལ་གྱིས་གནོན་པའི་རྟགས། །སྤྱན་དགུ་སྡང་མིག་གཟིགས་པ་ནི། །ཐིག་དགུ་མཐའ་རུ་ཕྱིན་པའི་རྟགས། །རྣམ་ཐར་ཞལ་གསུམ་མཆེ་བ་གཙིགས། །དུག་གསུམ་རྩད་ནས་གཅོད་པའི་རྟགས། །ཕ་རོལ་ཕྱིན་པའི་ཕྱག་དྲུག་སྟེ། །རྩེ་དགུ་ས་དགུ་འཇོམས་པའི་རྟགས། །རྩེ་ལྔ་འབར་བ་ཡེ་ཤེས་ལྔ། །མེ་དཔུང་ཉོན་མོངས་བག་ཆགས་བསྲེག །ཁ་ཊྭཱཾ་རྩེ་གསུམ་སྲིད་གསུམ་གཅོད། །རི་རབ་ཕུར་པ་འགྲིལ་བ་ནི། །དབྱིངས་དང་ཡེ་ཤེས་དབྱེར་མེད་རྟགས། །ཚར་གསུམ་འཕྲེང་བས་བརྒྱན་པ་ནི། དུས་གསུམ་སངས་རྒྱས་རྫོགས་པའི་རྟགས། །ང་རྒྱལ་ཕྲག་དོག་ལྟ་ངན་རྣམས། །དབྱིངས་སུ་དག་པའི་ན་བཟའ་གསུམ། །སངས་རྒྱས་ཀུན་གྱི་སྐུ་གསུང་ཐུགས། །རྟགས་མཚན་གསུམ་གྱིས་སྐུ་ལ་བརྒྱན། །ཀླུ་ཆེན་བརྒྱད་ཀྱིས་བརྒྱན་པ་ནི། །རྣམ་ཐར་བརྒྱད་པོ་རྫོགས་པའི་རྟགས། །ཞབས་བཞི་བརྐྱང་བསྐུམ་བཞུགས་པ་ནི། །བདུད་བཞི་ཟིལ་གྱིས་གནོན་པའི་རྟགས། །ཡབ་ཡུམ་གཉིས་སུ་མེད་པར་སྦྱོར་བ་ནི། །དབྱིངས་དང་ཡེ་ཤེས་དོན་དམ་གཅིག་པའི་རྟགས། །ཁྲོ་བོ་ཡབ་ཡུམ་ཉི་ཤུས་བསྐོར་བ་ནི། །ཕ་རོལ་ཕྱིན་དང་ཤེས་བཅུ་རྫོགས་པའི་རྟགས། །ཁྲ་ཐབས་སྒོ་མ་སྲས་མཆོག་ཚོགས་ཀྱིས་བསྐོར། །སྣ་ཚོགས་སྤྲུལ་པས་གདུག་པ་འདུལ་བའི་རྟགས། །མ་བདུན་
སྲིང་མོས་བསྐོར་སོགས་དམག་དཔུང་འགྱེད། །བསེ་ལྕགས་དུང་གསུམ་འཁོར་གྱི་བསྐོར་བ་ནི། །གྲུབ་པའི་རྟགས་འབྱིན་ཞིང་བཅུ་སྒྲོལ་བའི་རྟགས། །དེ་ལྟར་ཆེ་བའི་ཡོན་ཏན་ཀུན་རྫོགས་པའི། །དཔལ་བོ་ཆེན་པོ་འཁོར་དང་བཅས་ལ་བསྟོད། ཅེས་ཕྱོགས་གཞན་ལས་དག་དྲན་བཤད་པའི་དོད་དུ་སྐབས་འདིར་རྟགས་བསྡོད་བྱ། དེ་རྗེས་དོན་བསྟོད་བྱེད་པར་སྤྲོ་ནའང༌། འོག་ཏུ་འབྱུང་བའི་བསྐལ་པ་མེ་ལྟར་འབར་བའི་ཀློང་དཀྱིཔ་སོགས་བྱ། ཅུང་ཟད་རྒྱས་པ་ལ་མོས་ན་ཡིག་རྙིང་རྣམས་ཀྱང་ཤེས་པར་བྱའོ། །དེ་རྗེས་ལ་བཟླས་པ་ལ་འཇུག་དགོས་ཏེ། །གཉིས་པ་ལ་བཟླས་པའི་སྔོན་འགྲོ བཟླས་པ་དངོས་རྗེས་བསྟོད་པ་སྟེ་གསུམ་ལས། དང་པོ་ལ་རིག་འཛིན་བསྐུལ་བ་དང༌། །འཛབ་ཁ་དབྱེ་བ་གཉིས་ལས། ཐོག་མ་ནི། ཧཱུཾ་མ་གཡེལ་མ་འཕངས་རིག་འཛིན་ཚོགས། །སྔོན་གྱི་ཐུགས་དམ་རྗེས་དགོངས་ལ། །སྲིད་པའི་ཕུར་བུ་བདག་སྒྲུབ་ཀྱི། །བྱིན་གྱིས་རློབ་ཅིང་གཤེགས་སུ་གསོལ། །ཨུ་རྒྱན་ཡུལ་གྱི་ནུབ་བྱང་མཚམས། །པདྨ་གེ་སར་སྡོང་པོ་ལ། །ཡ་མཚན་མཆོག་གི་དངོས་གྲུབ་བརྙེས། །པདྨ་འབྱུང་གནས་ཞེས་སུ་གྲགས། །འཁོར་དུ་མཁའ་འགྲོ་མང་པོས་བསྐོར། །ཁྱེད་ཀྱི་རྗེས་སུ་བདག་སྒྲུབ་ཀྱི། །བྱིན་གྱིས་རློབས་ཕྱྀར་གཤེགས་སུ་གསོལ། །རིགས་ནི་ཟ་ཧོར་རྒྱལ་པོའི་རིགས། །སློབ་དཔོན་པྲ་བྷ་ཧ་ཏི་རྩལ། སྲིད་པའི་ཕུར་བུ་བདག༴ བྱིན་གྱིས༴ དུར་ཁྲོད་མིང་ནི་བསིལ་པ་ཚལ། །སློབ་དཔོན་དྷ་ན་སང་ཀྲི་ཏ།
སློབ་དཔོན་དྷ་ན་སང་ཀྲི་ཏ༌། །སློབ་དཔོན་བློ་ལྡན་མཆོག་སྲེད་རྩལ། །རྒྱ་མཚོའི་གླིང་དུ་བསྒྲུབས་པའི་ཚེ། །ས་བདག་ཀླུ་གཉན་བཏུལ་བ་བཞིན། །དམ་སྲིད་འདུལ་ཞིང་གཤེགས་སུ་གསོལ། །གཟའ་དང་རྒྱུ་སྐར་བཏུལ་བ་བཞིན། །དགྲ་བགེགས་འདུལ་ཞིང་གཤེགས་སུ་གསོལ། །སྲིད་པའི་ཕུར་བུ༴ བྱིན་གྱིས་༴ རྒྱ་གར་ཡུལ་དུ་གྲུབ་ཐོབ་པ། །སློབ་དཔོན་པདྨའི་འབྱུང་གནས་ཀྱིས། །ལྷོ་ཕྱོགས་ཙན་དན་ནགས་ཚལ་ན། །ཇི་ལྟར་རྟགས་ཕྱུང་བསྙེལ་ལམ་ཅི། །ཕུར་བུ་སྒྲུབ་པའི་གྲོགས་མཛོད་ཅིག །སྲིད་པའི༴ བྱིན་གྱིས༴ བི་མ་ལ་ཡི་མི་ཏྲ་ཡིས། གངྒ་ལྷ་ཡི་ཆུ་བོ་ལ། །ཇི་ལྟར་རྟགས་ཕྱུང་བསྙེལ་ལམ་ཅི། །ཕུར་བུ་སྒྲུབ་པའི་གྲོགས་མཛོད་ཅིག །སྲིད་པའི༴ བྱིན་གྱིས༴ བལ་པོའི་ཡུལ་དུ་གྲུབ་ཐོབ་པ། །རིག་འཛིན་ཤཱི་ལ་མཉྫུ་ཡིས། །མནྡྷ་ལ་ཡི་མཁར་སྒོང་ལ། །ཇི་ལྟར་རྟགས་སོགས་གོང་བཞིན། བོད་ཀྱི་ཡུལ་དུ་གྲུབ་ཐོབ་པ། །སྣ་ནཾ་རྡོ་རྗེ་བདུད་འཇོམས་ཀྱིས། །ཡར་ཀླུང་སྒྲགས་ཀྱི་ཕུ་ཆུ་ལ། ཇི་ལྟར་རྟགས༴ ཤུད་པུ་དཔལ་གྱི་སེང་གེ་ཡིས། ཧས་པོ་རི་ཡི་སྤང་པོ་ལ། ཇི་ལྟར་རྟགས༴ འཆིམས་ཆེན་ཤཱཀྱ་པྲ་བྷ་ཡིས། །འོན་ཅང་རྡོ་ཡི་བྲག་དམར་ལ། ཇི་ལྟར་རྟགས༴ མཁར་རྗེ་ཟ་ཡི་མཚོ་རྒྱལ་གྱིས། །དགུང་གི་ཕོ་རོག་ནག་པོ་ལ། ཇི་ལྟར་རྟགས༴ མཁར་ཆེན་དཔལ་གྱི་དབང་ཕྱུག་གིས། །རྩིས་ཀྱི་
སྤྱང་ཁུ་སྔོན་པོ་ལ། ཇི་ལྟར་རྟགས༴ ཕུར་བུ༴ སྲིད་པའི༴ བྱིན་གྱིས་རློབས་ཕྱིར་གཤེགས་སུ་གསོལ། །སངས་རྒྱས་ཀུན་གྱི་གདུང་འཚོབ་པ། །རྩ་བརྒྱུད་བླ་མའི་ཚོགས་རྣམས་དང༌། །རིག་འཛིན་སྤྲུལ་པའི་ཚོགས་ཐམས་ཅད། །བདག་ལ་བྱིན་གྱིས་རླབས་ཏུ་གསོལ། ཞེས་གྱེར་རོ། །སྔོན་འགྲོ་གཉིས་པ་འཛབ་ཁ་དབྱེ་བ་ནི། སྒེག་པ་དཔའ་བ་མི་སྡུག་ཚུལ་སྟོན་ཞིང༌། །རྒོད་དང་གཤེ་དང་འཇིགས་སུ་རུང་བ་དང༌། །སྙིང་རྗེ་མ་དང་ཞི་བ་ལ་སོགས་པ། །སྐུ་ཡི་དངོས་པོ་གར་དགུར་བསྒྱུར་བ་ནི། །རྒྱན་དང་ཆ་ལུགས་ལྡན་པས་སྒེག་སྒེག་འདྲ། །བདུད་བཞི་གདན་དུ་བཏིང་བས་དཔའ་དཔའ་འདྲ། །སྐུ་ཆེ་ཡན་ལག་རགས་པས་འཇིགས་འཇིགས་འདྲ། །གཡས་ཞལ་དཀར་ལ་འཛུམ་པ་སྒེག་སྒེག་འདྲ། །གཡོན་ཞལ་དམར་ལ་གདངས་པས་གཤེ་གཤེ་འདྲ། །དབུས་ཞལ་མཐིང་ལ་རྔམ་པ་ཁྲོ་ཁྲོ་འདྲ། །རྒྱུད་དྲུག་རྗེས་སུ་འཛིན་པས་བརྩེ་བརྩེ་འདྲ། །དགྱེས་བདེ་ཆགས་པས་རོལ་པ་དམ་དམ་འདྲ། །ཆོས་སྐུ་མཚན་མ་མེད་པས་ཞི་ཞི་འདྲ། །རྡོ་རྗེ་རྩེ་དགུས་ས་དགུའི་རྟོག་པ་འཇོམས། །རྩེ་ལྔ་གདེངས་པས་དུག་ལྔ་དབྱིངས་སུ་སྒྲོལ། །མེ་དཔུང་འབར་བས་འཁོར་བའི་ཉོན་མོངས་སྲེག །ཁ་ཊྭཱཾ་རྩེ་གསུམ་དུག་གསུམ་རྩད་ནས་གཅོད། །རི་རབ་ཕུར་བུས་དགྲ་བགེགས་གཟིར་བར་བྱེད། །དེ་འདྲའི་ཁྲོ་བོ་འཇིགས་པའི་སྐུར་སྟོན་པ། །ཚུར་གཤེགས་ཚུར་གཤེགས་མཆོད་པ་འདི་བཞིས་ལ། །
ཐུགས་རྗེས་བརྩེར་དགོངས་དབང་དང་དངོས་གྲུབ་སྩོལ། །བཅོམ་ལྡན་དཔལ་ཆེན་ཐུགས་ཀྱི་དགྱེས་བདེ་མོ། །འཁོར་ལོ་རྒྱས་འདེབས་མཁའ་འགྲོ་གསང་བའི་ཡུམ། །ཚུར་གཤེགས་སོགས་གོང་བཞིན། ཧཱུཾ་མཛད་སྒྲ་འབྱིན་ཕག་དང་རྨིགས་བུའི་མགོ །རྣམ་རྒྱལ་སྒེག་སྙེམས་སྟག་དང་བྱ་རྒོད་མགོ །དབྱུག་སྔོན་སྡེར་མོ་གཡག་དང་བྱ་རོག་མགོ །གཤིན་རྗེ་དུར་ཁྲོད་ཤྭ་བ་འུག་པའི་མགོ །མི་གཡོ་གཏུན་ཁུང་གཟིག་དང་ཁྭ་ཏའི་མགོ །རྟ་མགྲིན་གཏུམ་མོ་བྱི་ལ་པུ་ཤུད་མགོ །གཞན་གྱིས་མི་ཐུབ་མདའ་སྙེམས་སྤྱང་ཁྲའི་མགོ །འཁྱིལ་པ་རླུང་འབྱིན་སེང་གེ་ཕ་ཝང་མགོ །ཁམས་གསུམ་གསོད་བྱེད་དྲེད་དང་སྲེ་མོང་མགོ །སྟོབས་ཆེན་བསྐུལ་བྱེད་དོམ་དང་བྱི་བའི་མགོ །གནོད་སྦྱིན་འཇིགས་མ་བདུད་རྩི་གསོད་བྱེད་མ། །དེ་འདྲའི་ལྷ་ཚོགས་འཇིགས་པའི་སྐུར་སྟོན་པ། །ཚུར་བྱོན་སོགས། ཞེ་སྡང་ཁྲོས་པའི་མེ་ནི་མཐིང་ནག་འབར། །གཏི་མུག་ཁྲོས་པའི་མེ་ནི་སྨུག་ནག་འབར། །འདོད་ཆགས་ཁྲོས་པའི་མེ་ནི་དམར་ནག་འབར། །ཕྲག་དོག་འཁྲོས་པའི་མེ་ནི་ལྗང་ནག་འབར། །གྲུ་གསུམ་འོད་ལྔ་འབར་བའི་དཀྱིལ་འཁོར་ནས། ཁྲོ་རྒྱལ་འདུས་པའི་སྲས་མཆོག་ཀཱི་ལ་ཡ། །རིགས་ལྔ་རྡོ་རྗེ་གཞོན་ནུ་སྐུ་བཞེངས་ཤིག །བདུད་དང་ལོག་འདྲེན་མ་ལུས་འདུས་པའི་ཕྱིར། དེ་འདྲའི་ལྷ་ཚོགས་འཇིགས་པའི་སྐུར་སྟོན་པ། །
ཚུར་བྱོན་སོགས། དཀྱིལ་འཁོར་ཆེན་པོའི་བཀའ་སྲུང་དམ་ཅན་ཚོགས། །བདག་ཉིད་ཆེན་མོ་བཞི་དང་ཤྭ་ན་བཞི། །བསྲེ་བའི་ལྷ་མོ་བཞི་རྣམས་མིང་པོར་བཅས། །ཕོ་བདུད་ཉི་ཤུ་གཅིག་སོགས་སྡེ་བརྒྱད་ཚོགས། །རང་རང་ལས་ལ་བརྩོན་པའི་ཕོ་ཉ་རྣམས། །ཚུར་བྱོན་སོགས་གོང་བཞིན་ནོ། །གཉིས་པ་དངོས་གཞི་ནི། བཟླས་པའི་དམིགས་པ་གསལ་བཏབ་ལ། བཅོམ་ལྡན་ཡབ་ཡུམ་ཐབས་ཤེས་གཉིས་སུ་མེད། །རྣམ་སྤྲུལ་ཁྲོ་བོ་ཡབ་ཡུམ་ཕོ་ཉའི་ཚོགས། །ཡུམ་རིང་དུས་ནས་བསྙེན་ཞིང་བསྒྲུབས་པའི་ལྷ། །དྲག་པོ་རང་བྱུང་དབང་དང་དངོས་གྲུབ་སྩོལ། ཞེས་ལན་གསུམ་སོགས་གསོལ་བ་བཏབ་ནས་བཟླས་པ་བྱ་སྟེ། སྒྲུབ་མཆོད་སོགས་ཀྱི་སྐབས་སུ་ཀཱི་ལ་ཡ་འབྲུ་བཅུ་དྲུག་པ་ཉིད་ཅི་ནུས་སུ་བཟླ་ཞིང༌། ཁྲོ་བཅུ་ལས་སྔགས་དང་བཅས་པ་དང༌། སྒོ་མའི་སྔགས་རྣམས་ཅུང་ཟད་རེ་བཟླ་ཡི། གྲངས་ངེས་གཟུང་ཅན་མི་དགོས་སོ། །གསུམ་པ་རྗེས་བསྟོད་པའི་མཆོད་པ་ནི། །ཡིད་ཀྱིས་སྒྲུབ་སྤྲུལ་པའི་མཆོད་པ་དང་བཅས་ཏེ། ཧཱུཾ་བསྐལ་པ་མེ་ལྟར་འབར་བའི་ཀློང་དཀྱིལ་ནས། །བཅོམ་ལྡན་དཔལ་ཆེན་རྡོ་རྗེ་གཞོན་ནུའི་སྐུ། །འཁོར་ལོ་རྒྱས་འདེབས་དབྱིངས་ཕྱུག་ཤེས་རབ་བཅས། །གཙོ་བོ་ཡབ་ཡུམ་སྐུ་ལ་ཕྱག་འཚལ་བསྟོད། །ཕྱོགས་བཅུ་དྲེགས་པ་བསྣོན་པའི་གདན་སྟེངས་སུ། །མཐུ་ཆེན་བདུད་འདུལ་ཁྲོ་རྒྱལ་འབར་བའི་ཚོགས། །ཧཱུཾ་དང་ཕཊ་ཀྱིས་སྲིད་གསུམ་འཁོར་བ་འཇིག །འཇིགས་བྱེད་ཁྲོ་རྒྱལ་ཚོགས་ལ་ཕྱག་འཚལ་ལོ། །
བདེ་ཆེན་དབྱིངས་ནས་འབར་བའི་སྐུ་བཞེངས་མ། །ཐབས་མཆོག་སྐུ་ལ་སོ་སོར་དགྱེས་པས་འཁྱུད། །ཤེས་རབ་ཚུལ་གྱིས་འགྲོ་བའི་དོན་མཛད་མ། །ཡེ་ཤེས་ཁྲོ་མོ་བཅུ་ལ་ཕྱག་འཚལ་བསྟོད། ཁམས་གསུམ་དབང་བསྡུད་ཐུགས་རྗེ་སྤྲུལ་པའི་སྐུ། །གཏུམ་ཁྲོས་ཟ་གསོད་རྣམ་འཕྲུལ་ཕོ་ཉའི་ཚོགས། །ཕྱག་རྒྱ་རྣམ་བཞིས་འདུལ་མཛད་སྒོ་སྐྱོང་མ། །རྡོ་རྗེ་ཕྲ་མེན་ཚོགས་ལ་ཕྱག་འཚལ་བསྟོད། །དཔལ་གྱི་སྲས་མཆོག་རྣམ་བཞིའི་འཕྲིན་ལས་མཛད། །ཡཀྵ་མེ་དབལ་སྤྲུལ་པའི་ཚོགས་རྣམས་དང༌། །སྨོན་ལམ་དབང་གི་དྲེགས་པའི་ཚུལ་འཛིན་པ། །དཔལ་གྱི་བཀའ་སྡོད་སྐུ་ལ་ཕྱག་འཚལ་ལོ། །དེ་རྣམས་ཀྱིས་དངོས་གཞིའི་ཆོ་ག་བསྟན་ཟིན་ནོ། །རྙིང་མའི་ལུགས་ཀྱི་སྒྲུབ་མཆོད་ལ་བདག་འཇུག་གི་ལག་ལེན་མཛད་པ་ཉུང་བས་སྒྲུབ་མཆོད་ཙམ་ལ་བདག་འཇུག་མ་གྲུབ་ཀྱང་མི་འགལ་མོད། སྤྱིར་འགྲུབ་ན་ལེགས་པས་གལ་ཏེ་བྱེད་ན་སྐབས་འདིར་བཟང་སྟེ། བདག་འཇུག་ནི་དངོས་གཞིའི་ཆོ་ག་ཡིན་པས་སོ། །འོན་ཀྱང་ཕུར་ཆོག་གསར་པ་རྣམས་ཀྱི་ལག་ལེན་ལ་ནི། འདི་ནས་ལྷག་མའི་རྗེས་ཡན་ཆད་དུ་བདག་འཇུག་གི་དུས་མ་ངེས་པར་བྱེད་པའང་སྣང་ངོ༌། །དེ་ལ་བདག་འཇུག་ནི་དབང་གི་ཡི་གེ་ལས་ཤེས་པར་བྱའོ། །གསུམ་པ་རྗེས་ཀྱི་བྱ་བ་ལ་གསུམ་ལས། དང་པོ་ཚོགས་ཀྱི་བྱ་བ་ནི། ཚོགས་རྫས་རྣམས་བཤམས། བདུད་རྩི་གཏོར་ལ། བསངས་སྦྱངས། རཾ་གྱི་མེས་བསྲེགས་ཞེས་པ་ནས། བདུད་
རྩིའི་རྒྱ་མཚོ་ཆེན་པོར་གྱུར་གྱི་བར་གཏོར་མ་བྱིན་རླབས་དང་འདྲ། སྲིད་པའི་ཕུར་བུ་སྒྲུབ་པ་དང། ཞེས་པ་ནས། དངོས་གྲུབ་སྩོལ། དམ་ཚིག་ཆེན་པོ་གཤེགས་སུ་གསོལ། །སྤྲུལ་པ་ཆེན་པོ་གཤེགས་སུ་གསོལ། ཕྱག་བརྙན་ཆེན་པོ༴ ཤྭ་ན་མུ་ཁ༴ བདག་ཉིད་ཆེན་མོ༴ ས་བདག་ཆེན་མོ༴ བྲན་དང་ཕོ་ཉ༴ འཁོར་བཅས་ཐམས་ཅད༴ ཁྲོ་བོ་འཁོར་བཅས་གཤེགས་ནས་ཀྱང༌། རྟགས་དང་མཚན་མ་བསྟན་པ་དང༌། །ཀཱི་ལ་ཡ་ཡི་དངོས་གྲུབ་སྩོལ། བཛྲ་ས་མཱ་ཛཿ ཛཿཧཱུཾ་བཾ་ཧོཿ ཚོགས་ཕུད་ཆ་གསུམ་དུ་བྱ། །དང་པོ་སྣོད་དུ་བཅུག་ལ་སྟེགས་མཐོ་བར་བཞག བླ་མེད་མཆོག་གི་མཆོད་པ་དམ་པ་འདི། ཞེས་པ་ནས། ཡཀྵ་ཀྲཽ་དྷ་ཁ་ཁ་ཁཱ་ཧི་ཁཱ་ཧིའི་བར་གོང་གཏོར་མའི་སྐབས་བཞིན། གར་བྱས་འགྲུབ་བོ་རྣལ་འབྱོར་པ། །གར་གྱི་དབང་ཕྱུག་གཙོ་བོ་ཆེ། །ཟླ་བ་ལ་སོགས་སྙིང་པོ་ཅན། མཾ་ས་ལ་སོགས་རོ་མཆོག་གསོལ། མེ་ཏོག་ལ་སོགས་ཙན་དན་འཕྲེང༌། །བཟང་རྒུ་འབུལ་ལོ་བཞེས་སུ་གསོལ། །མཛེས་རྒུ་འབུལ་ལོ་གཟིགས་སུ་གསོལ། །བདའ་རྒུ་འབུལ་ལོ་རོལ་དུ་གསོལ། །སྙན་རྒུ་འབུལ་ལོ་གསན་དུ་གསོལ། །མི་མོ་རྣམས་ཀྱི་རེག་བྱ་སོགས། གོང་བཞིན། ཚོགས་བར་པ་ལ་དམིགས་ཏེ། ཚེ་རབས་བསྐལ་པ་ཐོག་མ་མེད་པ་ནས། །ད་ལྟ་ལུས་འདི་བླངས་པ་ཚུན་ཆོད་དུ། །ལུས་ཀྱི་སྡིག་བྱས་སྡིག་པ་དངོས་སུ་བགྱིས། །ངག་གི་འཁྱལ་ཚིག་སྨྲ་བ་ངན་དུ་ཆུག །སེམས་ཀྱི་
བློ་ནོར་ལོག་པར་བསམ་པ་སོགས། །འདོད་ཁྲོ་གཏི་མུག་དབང་གིས་ནོངས་བགྱིས་པ། །བཀྲ་བའི་ལྷ་ཚོགས་ཁྱེད་ལ་བཟོད་པར་གསོལ། །ཡེ་ཤེས་ལྷ་ལ་རྟོག་པ་མི་མངའ་ཡང༌། །དེའི་འཁོར་དུ་གཏོགས་པའི་ལྷ་སྲིན་རྣམས། །མི་ཡི་སྐྱོན་མཐོང་ཙ་ན་ཆད་པས་གཅོད། །ནོངས་པར་གྱུར་ཀྱང་བཀའ་ཆད་མ་གཅོད་ཅིག །མཐུ་རྩལ་ཅི་ཡོད་དགྲ་དང་བགེགས་ལ་སྤྲུགས། །བསྟན་པ་འཇིག་སོགས་ཉེས་སྐྱོན་མ་གཟིགས་སམ། །སྒྲུབ་པོའི་ཉེས་པ་ཕྲན་ཚོགས་དབྱིངས་སུ་ཐིམ། །ཉམས་པར་གྱུར་པ་ལོངས་སྤྱོད་ཚོགས་ཀྱིས་བསྐང༌། །དམ་བསྐོང་དབང་དང་དངོས་གྲུབ་སྩལ་དུ་གསོལ། ཚོགས་ཐ་མ་ནི། གཟུགས་བརྙན་དུ་བྱས་ལ། སྤྲོས་པ་ལ་དགའ་ན། ཁྲོ་བོ་བཅུ་ནས་ཕུར་སྲུངས་ཀྱི་བར་གྱིས་བསྐུལ་རྣམས་བྱ། བསྡུ་ན་དམ་ཚིག་ཆེན་པོའི་དུས་ལ་བབ། སོགས་ལ་ཚང་པས་བསྐུལ་ལོགས་པ་མེད་ཀྱང་ཆོག །བདེན་པ་བརྡར་བ་སྤྱི་དང་འདྲ་བ་ལས། འཇམ་དཔལ་སྐུ། པདྨ་གསུང༌། ཡང་དག་ཐུགས། བདུད་རྩི་ཡོན་ཏན། ཕུར་པ་འཕྲིན་ལས། མ་མོ་རྦོད་གཏོང༌། འཇིག་རྟེན་མཆོད་བསྟོད། སྨོད་པ་དྲག་སྔགས། འདུས་པ་མདོ། རྒྱུ་འཕྲུལ་རྒྱན། འཆི་མེད་ཚེ། ལྷུན་གྲུབ་རིག་འཛིན་གྱི་ལྷ་ཚོགས་རྣམས་ཀྱིས་བཀའ་བདེན་པ་དང༌། བདེན་པ་ཆེན་པོའི་བྱིན་རླབས་ཀྱིས། དཔལ་ལྡན་བླ་མའི་སྐུ་དགྲ། སངས་རྒྱས་བསྟན་པའི་སྤྱི་དགྲ །རྣལ་འབྱོར་དམ་ཚིག་ཅན་གྱི་
སྡང་དགྲ། སེམས་ཅན་ཡོངས་ལ་འཚེ་བར་བྱེད་པའི་དགྲ་བགེགས་གདུག་པ་ཅན་ཐམས་ཅད་དང༌། ཁྱད་པར་དུ་འདི་ཞེས་བྱ་བ་སྐད་ཅིག་ཐད་ཅིག་ཡུད་ཙམ་ལ་བསྒྲལ་བའི་ལས་ཀྱི་གནས་འདིར་མཆིས་པར་གྱུར་ཅིག །ཆེ་གེ་མོ་འདིའི་རྒྱབ་བརྟེན་དང་དཔུང་གཉེན་བྱེད་པའི་ཕོ་ལྷ་དང་ཡུལ་ལྷ་དང་སྲོག་ལྷ་དང༌། དགྲ་ལྷ་དང་ཞང་ལྷ་ལ་སོགས་པ་ཉོན་ཅིག །གནོད་བྱེད་དགྲ་བགེགས་འདི་དག་གི །དཀོན་མཆོག་གསུམ་གྱི་དབུ་འཕང་སྨད། སངས་རྒྱས་ཀྱི་བསྟན་པ་བཤིག རྣལ་འབྱོར་པའི་སྐུ་ལ་བདོས། དབེན་གནས་དང་ཆོས་གཞི་དབྲལ། ལས་བཟང་རྒུ་ནི་སྤངས། ལས་ངན་རྒུ་ནི་བྱས་པ་ཡིན་པས། འདི་ལ་སྲུང་བ་མ་བྱེད། མགོན་སྐྱབས་མ་བྱེད། ཡལ་བར་ཐོང་ཅིག །གལ་ཏེ་འདིའི་རྒྱབ་རྟེན་དང་དཔུང་གཉེན་བྱེད་ན། ཁྱེད་ཅག་རྣམས་དཀོན་མཆོག་གསུམ་གྱི་བཀའི་ཆད་པས་བཅད་ནས། མནར་མེད་པའི་སེམས་ཅན་དམྱལ་བར་སྐྱེས་ཏེ། ཐར་མེད་ཀྱི་སྡུག་བསྔལ་མྱོང་བར་ཐེ་ཚོམ་མེད་དོ། །ཡུལ་ཕྱོགས་འདི་དག་ན་གནས་པའི་ཡུལ་བདག་གནས་བདག་ཀླུ་གཉན་ས་བདག་ལ་སོགས་པ་འཇིག་རྟེན་དྲེགས་པ་ཅན་ཐམས་ཅད་ཀྱང་ཉོན་ཅིག །བདག་ཅག་ཁྱེད་རྣམས་ལ་གནོད་པ་མི་བྱེད་དོ། །དྲག་སྔགས་ཀྱི་མེ་དབལ་མི་གཏོང༌། །ཕུར་པའི་རྩེ་མི་གཏོད། ཡུངས་ཀར་གྱི་རྦབ་མི་སྒྲིལ། དྲག་རྫས་ཀྱི་ཐུན་ཟོར་མི་བརྡེག །དྲག་པོའི་ཕོ་ཉ་མི་འགྱེད་དོ། །བདག་ཅག་ནི་དགྲ་བགེགས་གདུག་པ་ཅན་བསྒྲལ་
བའི་ཞིང་བཅུ་འདི་རྣམས་འགུགས་པ་ཡིན་པས། ཁྱེད་རྣམས་ཀོ་ལོང་མ་སྡོམ། མ་འཇིགས། མ་སྐྲག །མ་བསྡངས་བར་དཀོན་མཆོག་གསུམ་གྱི་བཀའ་རྟགས་འཛིན་པར་ང་ཡི་རྒྱབ་དང་དཔུང་གྱིས་ཤིག །གདུག་པ་ཅན་འདི་ད་ལྟ་ཉིད་དུ་ཁུག་ལ་བསྒྲལ་བའི་ལས་མཛོད་ཅིག ཅེས་སྙན་གསན་དབབ་པ་ལན་གསུམ་བྱ། དེ་ནས་རྒྱས་པ་ལ་མོས་ན། ཁྲོ་བོ་བཅུ་ནས་ཕུར་སྲུངས་བར་གྱི་བསྐུལ་རྣམས་བྱ་སྟེ་ཕོ་ཉ་གཏོང་བ་ཡིན། བསྡུ་ན། སྤྲུལ་པ་ཆེན་པོའི་དུས་ལ་བབ། སོགས་ལ་ཚང་བས་འདིར་མ་བརྗོད་ཀྱང་ཆོག །དེ་ནས་བདེན་བརྡར་སོགས་གོང་དུ་བཤད་པ་དང་སྤྱི་འགྲོས་དང་མཐུན་པའི་ཚིག་གིས་ལིངྒ་དགུག་འདྲེན་བྱ། ཛཿ དམ་ཚིག་ཆེན་པོའི་དུས་ལ་བབ། ཅེས་པ་ནས། ཞལ་དུ་སྟབ་པའི་བར་གོང་བསྒྲལ་མཆོད་ཀྱི་སྐབས་བཞིན་ནོ། །འདི་ཙམ་ནི་བསྡུས་པའི་ལུགས་ཡིན་ལ། རྒྱས་པ་ནི། གོང་མ་རྣམས་ཀྱིས་མཛད་ཟིན་པ་ལས་ཤེས་པར་བྱ་ལ། འབྲིང་པོ་འཚམ་པ་ཞིག་གཞན་དུ་ཡང་འབྲི་བར་འགྱུར་རོ། །འདི་སྐབས་ལིང་རོ་རྣམས་གཏོར་མ་ལ་བཏབ། ཆ་ཤས་ཅུང་ཟད་ཙམ་ཚོགས་རྫས་དང་ཡང་བསྲེ། ཅུང་ཟད་ཅིག་ལྷག་གཏོར་གཙང་མ་དང་ཡང་བསྲེའོ། །དེ་རྗེས་བརྡ་དང་བརྡའི་ལན་དང་འབུལ་ལེན་སོགས་སྤྱི་དང་འདྲ་བར་བྱས་ནས། རྣལ་འབྱོར་པ་རྣམས་ཚོགས་ལ་རོལ་ལོ། །རྗེས་ཆོག་གཉིས་པ་ལྷག་མའི་གཏོར་མ་ནི། ལྷག་མ་རྣམས་སྣོད་ཅིག་ཏུ་བསྡུས་ནས་རྨེ་གཏོར་གྱི་ཚུལ་དུ་བཤམ། དེའི་འགྲམ་དུ་ལྷག་མ་གཙང་གཏོར་ཡང་བཞག །བདུད་རྩིས་བྲན། ཨོཾ་མཧཱ་
བ་ལིཾ་ཏ། སོགས་ལན་གསུམ་གྱིས་བྱིན་གྱིས་རླབས། ཧཱུཾ་བཅོམ་ལྡན་རྡོ་རྗེ་གཞོན་ནུ་དང༌། །ཡུམ་ཆེན་འཁོར་ལོའི་རྒྱས་འདེབས་ཀྱི། །སྤྲུལ་པའི་ཕོ་ཉ་དཔག་ཡས་དང༌། །གྲུབ་པ་གསང་བ་འབར་མའི་ཚོགས། ཁྱོད་ཀྱི་ཐུགས་དམ་དུས་ལ་བབ། །ཚུར་གཤེགས་གཏོར་མ་འདི་ལ་བཞེས་ལ། །རྡོ་རྗེ་ལྕམ་དྲལ་སྲུང་བ་དང༌། །རྐྱེན་ལས་བྱུང་བའི་དགྲ་བོ་རྣམས། །ཡུད་ཙམ་གྱིས་ནི་མེད་པར་མཛོད། །རྣལ་འབྱོར་བདག་ཅག་འཁོར་བཅས་ཀྱི། །མི་མཐུན་བར་ཆད་ཞི་བ་དང༌། །རེ་སྨོན་ཐམས་ཅད་འགྲུབ་པར་མཛོད། དེ་ནས་ལྷག་གཏོར་གཉིས་དང༌། འཇིག་རྟེན་པའི་སྤྱི་གཏོར་གཏོར་གྲལ་ནས་བླངས་པ་ནས་བླངས་པ་རྣམས་རྡོ་རྗེ་འགྲོས་ཀྱིས་ཕྱི་སྣུར་དུ་བཞག །རཀྟས་བྲན། འདི་སྐད་ཅེས། འཇིག་རྟེན་ལས་འདས་ཕོ་ཉ་མོ། །ཡང་དག་སྐུ་གཅིག་བྱུང་བ་ནི། །དཔལ་གྱི་ཕོ་ཉ་ལྕགས་ཀྱུ་འཛིན། །འདི་འདྲ་གཅིག་པུར་མ་ངེས་ཏེ། །སྟོང་ཁམས་ཁྱབ་པར་སྤྲུལ་བྱེད་མ། །ཤར་གྱི་ཕྱོགས་ནས་གཤེགས་སུ་གསོལ། །འཇིག་རྟེན་ལས་འདས་ཕོ་ཉ་མོ། །ཡང་དག་སྐུ་གཅིག་བྱུང་བ་ནི། །དུང་གི་སྤྱང་མོ་མགོ་དགུ་མ། །རལ་པ་ལྕང་ལོ་རེ་རེ་ལ། །ཕོ་ཉ་ཀྱུ་ཐོགས་སྤྲིན་ལྟར་གཏིབས། །ཤར་ལྷོ་མཚམས་ནས་གཤེགས་སུ་གསོལ། དེ་གཉིས་ཀུན་ལ་འགྲེ་སྟེ། དཔལ་གྱི་ཕོ་ཉ་ཞགས་པ་ཐོགས། འདི་འདྲ༴ སྟོང་ཁམས༴ ལྷོ་ཡི༴ ལྕགས་ཀྱི་སྤྱང་མོ་མགོ་དགུ་མ། རལ་པ༴ ཕོ་ཉ་ཞགས་ཐོགས༴ ལྷོ་ནུབ་མཚམས༴ དཔལ་གྱི་ལྕགས་
སྒྲོག༴ འདི་འདྲ༴ སྟོང་ཁམས༴ ནུབ་ཀྱི༴ ཟངས་ཀྱི་སྤྱང་མོ༴ རལ་པ༴ ཕོ་ཉ་སྒྲོག་ཐོགས༴ ནུབ་བྱང་༴ དཔལ་གྱི༴ དྲིལ་བུ༴ འདི་འདྲ༴ སྟོང་ཁམས༴ བྱང་གི་ཕྱོགས༴ གཡུ་ཡི་སྤྱང་མོ༴ རལ་པ༴ ཕོ་ཉ་དྲིལ་ཐོགས༴ བྱང་ཤར༴ ལྕགས་ཀྱི་བྱི་བ་ཆེན་པོ་ལ། །མི་མོ་ལྕགས་ཀྱི་ཚུལ་ཅན་ཞོན། །ལྷ་སྲིན་སྡེ་བརྒྱད་ཕུང་བྱེད་མ། །འོག་གི་ཕྱོགས་ནས༴ ལྕགས་ཀྱི་བྱ་ཁྲ་བརྒྱད་ཁྲི་ལ། །མི་མོ་ལྕགས་ཀྱི༴ ལྷ་སྲིན་སྡེ་བརྒྱད་སྐྱོང་བྱེད་མ། སྟེང་གི་ཕྱོགས་ནས༴ སྔོན་ཀྱི་ཐུགས་དམ་རྗེས་དགོངས་ལ། །ཤ་ཁྲག་དམར་གྱི་མཆོད་པས་མཆོད། །ཆེམ་ཆེམ་དགོངས་ཤིག་ས་མ་ཡ། །འདིར་གཤེགས་བཅོལ་བའི་འཕྲིན་ལས་མཛོད། །གཞན་ཡང་དཔལ་གྱི་བཀའ་ཉན་པ། །ཁྱབ་བྱེད་ཆེན་པོ་ཁྱུང་གི་མགོ །འཇིགས་བྱེད་ཆེན་པོ་སྤྱང་ཀིའི་མགོ །གསོད་བྱེད་ཆེན་པོ་དྲེད་ཀྱི་མགོ །འབྱིན་བྱེད་བྱི་ལ་པུ་ཤུད་མགོ །སྨྱོ་བྱེད་ལྟོས་འཕྱེ་རྨིགས་བུའི་མགོ །རྐུན་བྱེད་ཆེན་པོ་བྱི་བའི་མགོ །ཟ་བྱེད་ཆེན་པོ་སྟག་གི་མགོ །སྒྲོན་བྱེད་སེང་གེ་ཕ་ཝང་མགོ །ཕྲ་མེན་ཆེན་པོ་ཁྱེད་རྣམས་ཀྱང༌། བྱེ་བ་བརྒྱ་སྟོང་འཁོར་དང་བཅས། སྔོན་གྱི་ཐུགས་དམ༴ ༴ ༴ ༴ འབར་མའི་ཚོགས་ཀྱིས་བསྐོར་བ་ནི། །འབར་བ་ཆེན་མོ་ལུས་འབར་རྣམས། །དཔལ་ཆེན་སྐུ་ལ་འཕྲོ་ཞིང་འདུ། །འབར་མ་ཉི་མའི་ཞགས་པ་འདེབས། །འབར་མ་མེ་ཁྱེར་གློག་
འཕྲེང་འཛིན། །འབར་མ་གཤིན་རྗེ་སྐར་མདའ་འཕེན། །འབར་མ་སེར་མོ་མདུན་ཐུང་འཕེན། །འབར་མ་ཀླུ་མོ་ལྕེ་འབེབས་མ། །འབར་མ་རླུང་བདག་རལ་གྲིའི་སྐྲ། །འབར་མ་གནོད་སྦྱིན་ཁྱུང་ཐོགས་མ། །འབར་མ་གཏུམ་མོ་བ་ལང་རྣ། །འབར་མ་ཆེན་པོ་ཁྱེད་རྣམས་ཀྱང༌། སྔོན་གྱི༴ ༴ ༴ ༴ ཨོཾ་བཛྲ་ཌཱ་ཀི་ནི་པྲ་ཏཱིཙྪ་ཨི་མཾ་ལིཾ་ཧཱུཾ། ཨོཾ་བུདྡྷ་ཊཱ་ཀི་ནི་པྲ་ཏཱིཙྪ་ཨི་མཾ་བ་ལིཾ་ཨོཾཿ ཨོཾ་རཏྣ་ཊཱ་ཀི་ནི་པྲ་ཏཱིཙྪ་ཨི་མཾ་བ་ལིཾ་དྲྭཾ། ཨོཾ་པདྨ་ཌཱ་ཀི་ནི་པྲ་ཏཱིཙྪ་ཨི་མཾ་བ་ལིཾ་ཧྲཱིཿ ཨོཾ་ཀརྨ་ཌཱ་ཀི་ནི་པྲ་ཏཱིཙྪ་ཨི་མཾ་བ་ལིཾ་ཨ། ཨོཾ་སརྦ་ཌཱ་ཀི་ནི་པྲ་ཏཱིཙྪ་ཨི་མཾ་བ་ལིཾ་ཧོ། ལན་གསུམ་གྱིས་སྟབ། དེ་ནས་ལྷག་མ་རྨེ་གཏོར་གཙང་གཏོར་གཉིས་བསྲེས། ཚོགས་ཕུད་བར་པ་ལ་བླུགས། ཁ་ཁྲུས་བཏབ་ལ། །སྤྱི་གཏོར་ནི་དེ་ལ་བསྲེས་ཀྱང་ཆོག་མ་བསྲེས་ཀྱང་ཆོག །ཡང་ཅུང་ཟད་ཕྱིར་སྣུར་ལ། །སྨན་དང་རཀྟ་ཅུང་ཟད་བྲན། འབྲུ་གསུམ་ལན་མང་དུ་བརྗོད། ཧཱུཾ་སྔོན་ཚེ་དཔལ་ཆེན་ཧེ་རུ་ཀའི། །སྤྱན་སྔར་ཁས་བླངས་དམ་བཅས་པ། །གྲུབ་པ་དབང་ཕྱུག་མ་ཚོགས་མ། །ཀླས་དང་བྱི་མོ་བྲན་མོའི་ཚོགས། །རྒྱལ་མོ་བློན་མོ་དེད་དཔོན་མ། །གཡོག་མོ་དང་ནི་ཡང་གཡོག་མ། །བྲན་དང་ཡང་བྲན་འཁོར་དང་བཅས། སྔོན་གྱི༴ ༴ ༴ ༴ སྔོན་ཚེ་དཔལ༴ སྤྱན་སྔར༴ །ཤར་གྱི་ཕྱོགས་ཀྱི་མ་མོ་ནི། །དཀར་མོ་དུང་གི་ཐོར་ཚུགས་ཅན། །ལྷོ་ཡི་ཕྱོགས་ཀྱི་མ་མོ་ནི། །སྔོན་མོ་གཟིག་གི་ཤམ་ཐབས་ཅན། །ནུབ་ཀྱི་ཕྱོགས་ཀྱི་མ་མོ་ནི། །དམར་མོ་ཟངས་ཀྱི་ལན་ཕྲན་ཅན། །
བྱང་གི་ཕྱོགས་ཀྱི་མ་མོ་ནི། །གསེར་གྱི་འོད་ཟེར་མདའ་འཕེན་མ། སྟེང་གི་ཕྱོགས་ཀྱི་མ་མོ་ནི། །རྣམ་སྤྲུལ་མ་ངེས་ཅིར་ཡང་སྟོན། །འོག་གི་ཕྱོགས་ཀྱི་མ་མོ་ནི། །རུ་དྲ་སྒྲོལ་བའི་མཐུ་མོ་ཆེ། དཔལ་གྱི་ལྷ་མོ་ཤུགས་འགྲོ་མ། ཁྱོད་ནི་ནམ་མཁའི་རྒྱལ་མོ་སྟེ། སྔོན་གྱི༴ ༴ ༴ ༴གླིང་བཞི་མགྱོགས་མ་ལྷ་ཡི་སྲིང༌། །ཤར་གྱི་མགྱོགས་མ་གཤེགས་སུ་གསོལ། །མཁའ་ལ་ཁྱུང་ལྡིང་གཤིན་རྗེའི་ལྕམ། །ལྷོ་ཡི་མགྱོགས་མ༴ དཀར་ཤམ་གཡས་ཐོད་ཀླུ་ཡི་སྲིང༌། །ནུབ་ཀྱི་མགྱོགས༴ ནག་མོ་སྡེར་ཆེན་གནོད་སྦྱིན་སྲིད། །བྱང་གི་མགྱོགས་མ༴ སྲིང་མོ་ཆེན་མོ་ཁྱེད་བཞི་ཡང༌། སྔོན་ཚེ༴ སྤྱན་སྔར༴ ཚངས་མ་ལ་སོགས་ཉི་ཤུ་བརྒྱད། གར་མ་ལ་སོགས་ཉི་ཤུ་བརྒྱད། །མ་སྲིང་ལ་སོགས་ཉི་ཤུ་བརྒྱད། །འབར་མ་ལ་སོགས་ཉི་ཤུ་བརྒྱད། །དབང་ཕྱུག་ཉི་ཤུ་རྩ་བརྒྱད་དང༌། །ཕོ་ཉ་སུམ་བརྒྱ་དྲུག་ཅུ་རྣམས། །སྔོན་གྱི་སོགས་གོང་བཞིན། བར་འདི་སྲུང་མ་རྣམས་ལ་ལས་བརྩེ་བ་སྟཻ། བདག་ཉིད་ཆེན་མོའི་དུས་ལ་བབ། །ནམ་མཁའི་ཁམས་ཀྱི་དཔལ་ས་བཙན། །བར་སྣང་ཁམས་ཀྱི་མཐུན་མོ་ཆེ། །ཆོས་ཀྱི་དབྱིངས་ན་བཞུགས་ཙ་ན། །རྡོ་རྗེ་གར་གྱི་དབང་ཕྱུག་མ། །རྒྱ་མཚོའི་གཏིང་ན་བཞུགས་ཙ་ན། །རྡོ་རྗེ་མེ་ཟ་བྲག་གྱོན་མ། །བྷ་གའི་ཀློང་ན་བཞུགས་ཙ་ན། །ཡུམ་ཆེན་བྷ་ག་ཧྲི་ཏི་མ། །བར་སྣང་ཁམས་ན་རྒྱུ་བས་རྡོ་རྗེ་མཁའ་འགྲོ་མ། །སྟོན་བཞིན་ཤ་བ་ཞོན་པ་
པརྞ་ཤ་བ་རི། །ནམ་གྱི་གུང་ཕྱེད་རྒྱུ་བས་ནམ་གྲུ་མཐུ་མོ་ཆེ། །རི་རབ་རྩེ་ལ་བཞུགས་ནས་གླིང་བཞི་སྐྱོང་མཛད་མ། གླིང་བཞི་ཀུན་བྱམས་དྲག་མོ་རྒྱལ། །མི་གཅིག་མ་ལ་མིང་དགུ་མ། །མཁན་བརྒྱ་མ་ལ་མཚན་སྟོང་མ། །གང་ལ་བྱ་བ་ནོར་ར་རེ། །སྐྱོད་ཅིག་རྒྱ་མཚོའི་གཏིང་ནས་བསྐྱོད། །མ་གཡེལ་མ་གཡེལ་ཡལ་གམ་ཅན། །བཅོལ་བའི་འཕྲིན་ལས་གྲུབ་པར་མཛོད། །ཤྭ་ན་མུ་ཁའི་དུས་ལ་བབ། །ཟངས་ཀྱི་ཝ་མོ་རྐང་གསུམ་ལ། །ཟངས་ཀྱི་མི་མོ་ཆེན་མོ་ཞོན། །མིག་ནི་ཉི་མའི་ཟེར་ལས་འཚེར། །སྤུ་ནི་རལ་གྲིའི་སོ་བས་རྣོ། །སྡེར་མོ་ལྕགས་ཀྱུ་འབར་བ་འདྲ། །འཇུག་མ་ལྕགས་ཀྱུ་བསྡོགས་པ་བཞིན། །བང་ནི་གློག་གི་བསྐྱོད་དུ་མེད། །སྐད་ནི་སྟོང་ཁམས་ཁྱབ་པར་སྒྲོག །གཡས་པ་རྡོ་རྗེ་རི་རབ་བརྙེལ། །གཡོན་པ་ཟངས་ཀྱི་ཞགས་པ་ཐོགས། །གང་ལ་བྱ་བ་ནོར་ར་རེ། །སྐྱོད་གཅིག་རི་རབ་རྩེ་ནས་བསྐྱོད། །མ་གཡེལ་བཅོལ་བའི༴ ས་བདག་ཆེན་མོའི་དུས་ལ་བབ། །བསེ་ཡི་ལྷ་མོ་ཆེད་བཞི་ལས། །གཅིག་ནི་བལ་ཡུལ་མཐིལ་ན་བཞུགས། །མར་ཁུའི་མཚོ་ལ་གནས་བཅས་ཤིང༌། ཁྱོད་ཀྱི་བཀའ་ཉན་འབུམ་སྡེ་ནི། །ནང་ཡང་མར་ཁུའི་མཚོ་ལ་འདུ། །ནུབ་ཀྱང་མར་ཁུའི་མཚོ་ལ་འདུ། །རྒྱ་མཚོའི་གཏིང་ན་འདུ་འདུ་བ། །མཐིང་ནག་རལ་པ་ཤ་ར་ར། །དབང་གི་བསེ་ཁྲབ་སི་ལི་ལི། །བསེ་ཡི་རལ་པ་སི་ལི་ལི། །རལ་པ་རེ་ལ་ཕུར་པ་རེ། ཁྱོད་ནི་བདུད་ཀྱི་བུ་མོ་སྟེ། །འཆིབས་སུ་བདུད་རྟ་ནག་པོ་
འཆིབས། །ན་བཟའ་བེར་ཆེན་མཐིང་ནག་གསོལ། །བརྡ་ནི་མི་འཕྲཽད་ལྷོ་བལ་མོན། །སྐད་ནི་མི་གོ་ལྡབ་མ་ལྡིབ། །དྲི་ནི་མི་ཞིམ་ཆི་ལི་ལི། །གཟུགས་ནི་མི་སྡུག་ལག་བརྒྱ་མ། །གཡོན་པ་ལྔ་བཅུ་ལྕགས་ཀྱུ་འཛིན། །གཡས་པ་ལྔ་བཅུ་ཕུར་བུ་བསྒྲིལ། །ལྕགས་ཀྱུས་བཟུང་ལ་ཕུར་བུས་ཐོབ། བཛྲ་ཀུ་ལནྡྷ་རའི་དུས་ལ་བབ། །དེ་ཡིས་རིགས་འགྲེ་སྟེ། ས་བདག༴ བསེ་ཡི༴ གཅིག་ནི་ཚ་བའི་རོང་ན་བཞུགས། ཞག་གི་མཚོ་ལ༴ ཁྱོད་ཀྱི་བཀའ་ཉན༴ ནང་ཡང་ཞག་གི༴ ནུབ་ཀྱང་ཞག་གི༴ རྒྱ་མཚོའི་གཏིང་༴ མཐིང་ནག༴ དབང་གི༴ བསེ་ཡི༴ རལ་པ་རེ༴ ཁྱོད་ནི་གཟའ་ཡི༴ འཆིབས་སུ་གཟའ་རྟ་ཞུར་པོ༴ ནབ་བཟའ་བེར་ཆེན་སེར་ཁྲ༴ བརྡ་ནི༴ སྐད་ནི༴ དྲི་ནི༴ གཟུགས་ནི༴ གཡོན་པ༴ གཡས་པ༴ ལྕགས་ཀྱུས༴ བཛྲ་ཤུ་ལནྡྷ་རའི། དེ་བཞིན་དུ་སྦྱར་ནས། གཅིག་ནི་མང་ཡུལ་བསེ་ན༴ རཀྟའི་མཚོ༴ ཁྱོད་ཀྱི༴ ནང་ཡང་༴ ནུབ་ཀྱང་༴ རྒྱ་མཚོའི༴ མཐིང་ནག༴ དབང་གི༴ བསེ་ཡི༴ རལ་པ༴ ཁྱོད་ནི་བཙན་གྱི༴ འཆིབས་སུ་བཙན་རྟ་དམར་པོ༴ ནབ་བཟའ་བེར་ཆེན་དམར་ཁྲ༴ བརྡ་ནི༴ སྐད་ནི༴ དྲི་ནི༴ གཟུགས་ནི༴ གཡོན་པ༴ གཡས་པ༴ ལྕགས་ཀྱུས། བཛྲ་ཙ་མུནྡྷ་རའི་དུས་ལ་བབ། །གཅིག་ནི་གཉའ་ནམ་བྲི་ན་བཞུགས། །འོ་མའི༴ ཁྱོད་ཀྱི༴ ནང་ཡང་༴ ནུབ་ཀྱང་འོ་མའི།
རྒྱ་མཚོ༴ མཐིང་ནག༴ དབང་གི༴ བསེ༴ རལ་པ༴ ཁྱོད་ནི་ཀླུ་ཡི༴ འཆིབས་སུ་ཀླུ་རྟ་སྔོན་པོ༴ ནབ་བཟའ་བེར་ཆེན་སྔོན་པོ༴ བརྡ་ནི༴ སྐད་ནི༴ དྲི་ནི༴ གཟུགས་ནི༴ གཡོན་པ༴ གཡས་པ༴ ལྕགས་ཀྱུས༴ བཛྲ་ཀང་ཀ་དྷ་རའི་དུས་ལ་བབ། ཧཱུཾ། ཕོ་ཉ་བྲན་དང་མངགས་པའི་ཚོགས། ཁྱོད་ཀྱི་ཐུགས་དམ་དུས་ལ་བབ། །བདུད་ནག་ཆེན་པོ་རལ་ཆེན་དང༌། །བདུད་རྗེ་ཟླ་བ་ཀ་ལ་དྲག །བདུད་རྗེ་རོ་ལངས་ཁྲག་མིག་དང༌། །དུར་ཁྲོད་ནག་པོ་སྙིང་དཀར་ཏེ། །དུང་གི་སྐྱེས་བུ་མཆེད་བཞི་དང༌། །ཚངས་པ་དུང་གི་ཐོར་ཚུགས་ཅན། །ཤིང་གྱི་དམར་པོ་མ་རུ་རྩེ། སྐྱེས་བུ་ཕྱ་སངས་དཀར་པོ་དང༌། །ནག་པོ་སྲོག་བདུད་ཆེན་པོ་སྟེ། །ལྕགས་ཀྱི་སྐྱེས་བུ་བཞི་པོ་དང༌། །སྐྱེས་བུ་གྱིང་ཆེན་མ་རུ་རྩེ། །སྐྱེས་བུ་གཤིན་རྗེ་མ་རུ་རྩེ། །སྐྱེས་བུ་བདུད་ནག་མ་རུ་རྩེ། །སྐྱེས་བུ་གནོད་སྦྱིན་མ་རུ་རྩེ། །བསེ་ཡི་སྐྱེས་བུ་མཆེད་བཞི་དང༌། ཁྱབ་པ་ལྕེ་རིངས་སྐྱ་གཅིག་པུ། །ནག་པོ་འཛུམ་མེད་སོ་བརྡར་འཁྲིགས། །ནག་པོ་སྐྲག་མེད་གཤིན་རྗེའི་གཙོ། །གསོད་བྱེད་འབར་མ་འཇོག་པོ་ཀླུ། །སྲོག་གཅོད་ཤན་པ་མཆེད་བཞི་དང༌། །ས་བདག་བློན་པོ་རྩང་ཀུན་དང༌། །བདུད་ཀྱི་བློན་པོ་སྤྱང་ཀིའི་མགོ །གདེང་པ་སྙིང་དཀར་ཀླུ་ཡི་བློན། །འབྲོག་གནས་གནོད་སྦྱིན་བློན་པོ་དང༌། །འབྱུང་པོ་སེར་པོ་སྣ་ཡོན་པོ། །དེ་ལྟར་ཕོ་བདུད་ཉེར་གཅིག་རྣམས། །རྒྱན་གྱི་གཏོར་མ་འདི་བཞེས་ལ། །ཡིད་ལ་བརྣགས་པའི་ལས་མཛོད་ཅིག །
བདུད་འདུལ་ནག་མོ་མཆེད་བཞི་ནི། །ནག་མོ་ཁྲག་གི་རལ་པ་ཅན། །སྲོད་ལ་དགྲ་བོའི་སྙིང་འབྱིན་མ། །ནག་མོ་ཞག་གི་རལ་པ་ཅན། །ནམ་ཕྱེད་དགྲ་བོའི་སྲོག་གཅོད་མ། །ནག་མོ་དུང་གི་རལ་པ་ཅན། །ཉི་ཤར་དགྲ་བོའི་བླ་དགུགས་མ། །ནག་མོ་ཟངས་ཀྱི་རལ་པ་ཅན། །ཐོ་རངས་དགྲ་བོའི་ཤ་ལ་རོལ། །དེ་ལྟར་ནག་མོ་མཆེད་བཞི་པོ། །ཁྱོད་ཀྱི་ཐུགས་དམ་དུས་ལ་བབ། །བཅོལ་བའི་འཕྲིན་ལས་གྲུབ་པར་མཛོད། །སརྦ་ཨ་ན་ཡ་ཧཱུཾ་ཕཊ། ཏ་ཐ་ཡ་ཧཱུཾ་ཕཊ། ཅེས་རོལ་མོའི་སྒྲ་དང་བཅས་ཏེ་ལྷག་གཏོར་ཕྱི་རོལ་དུ་དོར་རོ། །གསུམ་པ་ཉེར་བསྡུའི་བྱ་བ་ལ། བསྟན་མ་བསྐུལ་བ། དངོས་གྲུབ་བླང་བ། བཟོད་གསོལ། དཀྱིལ་འཁོར་བསྡུ་བ། བདག་ཉིད་སྲུང་བ། སྨོན་ལམ་གདབ་པ་རྣམས་ཡོད་པ་ལས། དང་པོ་ནི། ཧོ་བོད་ཁམས་སྐྱོང་བའི་བསྟན་མ་བཅུ་གཉིས་འཁོར་དང་བཅས་པ་རྣམས། སྔོན་གྱི་དམ་བཅའ་ལས་མི་འདའ་བར། དཔལ་ཆེན་པོའི་ཕམ་ཕབས་ལ་གནོས་ཏེ། རྣལ་འབྱོར་པ་བདག་གི་གདོང་གྲོགས་ལ་འདིར་གཤེགས་ཤིག ཛཿཧཱུཾ་བཾ་ཧོཿ ཨེ་ཨ་ར་ལི་ཧྲིཾ་ཧྲིཾ་ཛ། ཧཱུཾ་བཀའ་ཡི་ཚོགས་དང་བཅས་ཉིད་དུ། ཁྲག་འཐུང་དེ་བཞིན་ནམ་མཁའི་སྐུ། །ཚུར་གཤེགས་ཚུར་གཤེགས་སྐྱོང་མ་རྣམས། །སྔོན་གྱི་ཐུགས་དམ་རྗེས་དགོངས་ཏེ། །འདིར་གཤེགས་དམ་དགོངས་གཏོར་མ་བཞེས། །རྣལ་འབྱོར་བཅོལ་བའི་འཕྲིན་ལས་མཛོད། །བདག་ཉིད་ཆེན་པོ་རྡོ་རྗེ་ཀུན་གྲགས་མ། །དཔལ་ལྡན་ལྷ་
རི་རྡོ་རྗེ་གཡའ་མ་སྐྱོང༌། །གངས་ཀྱི་ཡུམ་ཆེན་རྡོ་རྗེ་ཀུན་དུ་བཟང༌། །འབྲོག་ཆེན་འཁོར་འདུལ་རྡོ་རྗེ་བགེགས་ཀྱི་གཙོ། །བདུད་ཀྱི་བུ་མོ་ཆེན་མོ་ཁྱེད་བཞི་དང༌། །གངས་དཀར་ཤ་མེད་རྡོ་རྗེ་གཡུ་བུན་མ། །མཁའ་རག་ཁྱུང་བཙུན་རྡོ་རྗེ་དཔལ་གྱི་ཡུམ། །གསེར་ཆེན་མཁའ་ལྡིང་རྡོ་རྗེ་རླུང་མོ་དང༌། །སྨངས་རི་རབ་འཇོམ་རྡོ་རྗེ་གྲགས་མོ་རྒྱལ། །གནོད་སྦྱིན་བུ་མོ་ཆེན་མོ་ཁྱེད་བཞི་དང༌། །ཀོང་བཙུན་དེ་མོ་རྡོ་རྗེ་བོད་ཁམས་སྐྱོང༌། །བཙན་ལ་ལ་རོ་རྡོ་རྗེ་སྨན་གཅིག་མ། །སྨན་བཙུན་ཨུག་ཆོས་རྡོ་རྗེ་གཡར་མོ་སིལ། །གཡུའི་དྲིལ་སྙན་རྡོ་རྗེ་ཟུར་ལེ་མ། །སྨན་བཙུན་བུ་མོ་ཆེན་མོ་ཁྱེད་བཞི་སྟེ། །བསྟན་མ་བཅུ་གཉིས་འཁོར་དང་བཅས་རྣམས་ཀྱང༌། །སྔོན་གྱི་ཐུགས་དམ་དམ་ཚིག་རྗེས་དགོངས་ནས། །ལྷབ་ལྷུབ་རིན་ཆེན་མང་པོའི་རྒྱན་དང་བཅས། །ཕོ་ཉ་བྲན་གཡོག་མང་པོའི་འཁོར་དང་བཅས། །སིལ་སྙན་རོལ་མོ་མང་པོའི་སྒྲ་དང་བཅས། །རྣལ་འབྱོར་བཅོལ་བའི་འཕྲིན་ལས་གྲུབ་པར་མཛོད། །ཆེ་གེ་ཆེན་མོ་ཁྱེད་རྣམས་ཀྱང༌། །རྡོ་རྗེ་ཐོད་འཕྲེང་སྤྱན་སྔ་རུ། །ཞིང་ཆེན་ཚོགས་ཀྱི་མཆོད་བཀྲམ་ནས། །རྣམ་ལྔ་བདུད་རྩིའི་ལོངས་སྤྱོད་ཀྱིས། །དབང་བསྐུར་མིང་བཏགས་དམ་མནོས་ཏེ། །ཐར་པ་ཐོབ་པར་མིང་ཡང་གྲགས། །ལག་ཏུ་རྡོ་རྗེ་བྱིན་ནས་ནི། །རྡོ་རྗེ་འཛིན་པའི་གྲལ་དུ་བཞག །ཇི་ལྟར་ཁས་བླངས་དམ་བཅས་བཞིན། །རྣལ་འབྱོར་སྒྲུབ་པོའི་གྲོགས་མཛོད་ཅིག །བཀའ་ཡི་གཏོར་མ་འདི་ལོང་ལ། །
བཅོལ་བའི་ལས་རྣམས་གྲུབ་བར་མཛོད། ཅེས་བསྟན་མ་བསྐྱང་ངོ༌། །དེ་ནས་གཏོར་མ་ཟོར་དུ་འཕང་པའི་སྲོལ་ཡང་ཡོད་མོད། དཀྱུས་ལ་མི་དགོས་པས་ཇི་ལྟར་བདེ་བར་གཤེགས་ལས་བཞིའི་བྲོ་བརྡུང་བ་ནི། གཏོར་སྣོད་ཁ་སྦུབ་ལ། ཧཱུཾ་དང་པོ་གཏི་མུག་ཉིད་ལས་བྱུང༌། །བར་དུ་གཏི་མུག་ཉིད་ལ་འཁོར། །ཐ་མར་གཏི་མུག་ཉིད་ཀྱིས་འདུལ། །གཏི་མུག་རྡོ་རྗེའི་འཕྲིན་ལས་མཛད། །དངུལ་ལམ་དཀར་པོའི་ཤིང་དག་ལ། །མགོ་བོ་རྒྱ་མདུད་རྩེ་མོ་ཟླུམ། །ལོགས་ལ་བཞི་བའི་ལྷ་བསྒོམས་ཏེ། ཁོང་སྟོང་བྱང་ཆུབ་སེམས་ལུང་བསྟན། །རྩེ་མོ་ཟླུམ་པོ་ལྟ་བ་ཡིས། །ཐམས་ཅད་མ་ལུས་ཞི་བར་འགྱུར། །ཞི་བར་མ་གྱུར་གང་ཡང་མེད། །ཞི་བའི་ལྷ་ལ་ཕྱག་འཚལ་ལོ། །དེ་བཞིན་དུ་འདོན་པ་སྤོས་ལ། གཏི་མུག་ཅེས་པར། ང་རྒྱལ་ཞེས་དང༌། གསེར་རམ་སེར་པོའི་ཤིང་༴ མགོ་བོ་རྒྱ་མདུད་ཟུར་བཞི་རྩེ། །ལོགས་ལ་རྒྱས་པའི༴ ཁོང་སྟོང་༴ རྩེ་མོ་ཟུར་བཞི༴ ཞི་བ་ཞེས་པ་རྣམས་སུ་རྒྱས་པ། ཡང་དེ་བཞིན་དུ་གཏི་མུག་ཅེས་པར། འདོད་ཆགས། ཟངས་སམ་དམར་པོའི༴ རྩེ་ཟླ་གམ། ལོགས་ལ་དབང་གི༴ ཁོང་སྟོང་༴ རྩེ་མོ་ཟླ་གམ༴ ཞི་བའི་གནས་སུ་དབང་གི་དང༌། དབང་དུ༴ དབང་སྡུད་ལྷ༴ དེ་བཞིན་དུ །གཏི་མུག་ཅེས་པར། ཞེས་སྡང༌།ལྕགས་སམ་ནག་པོའི༴ ༴རྩེ་ཟུར་གསུམ། ལོགས་ལ་དྲག་པོའི༴ ཁོང་སྟོང་༴ རྩེ་མོ་ཟུར་གསུམ༴ མ་ལུས་
རླག་པར་འགྱུར། འཇོམས་པར་མ་གྱུར་འཇོམས་མཛད་ལྷ༴ རེ་རེའི་མཐར་ཀཱི་ལ་ཡ་སྦྱར་རོ། །དངོས་གྲུབ་བླང་བ་ནི། དཔལ་ཆེན་རྡོ་རྗེ་གཞོན་ནུ་དང༌། །འཁོར་ལོ་རྒྱས་འདེབས་དགོངས་སུ་གསོལ། །དང་པོ་བསྙེན་པའི་དབུ་བཙུགས་ནས། །བསྙེན་པའི་དུས་ཀྱང་མཐའ་རུ་ཕྱིན། །དཀྱིལ་འཁོར་སྒྲུབ་པའི་སྒོ་རུ་ཞུགས། །དོ་ནུབ་ཡན་ཆད་ཞག་གྲངས་ཐེམས། །བཟླས་བརྗོད་གྲངས་ཀྱང་ཐེམས་ལགས་ཀྱི། །དངོས་གྲུབ་སྩོལ་བའི་དུས་ལ་བབ། །མགོན་པོ་ཐུགས་རྗེ་བྱོན་པ་ན། ཁྱེད་ཀྱི་ཐུགས་དམ་སྩལ་བས་ན། །འགྲོ་བ་མང་པོ་གྲོལ་སླད་དུ། །ཀཱི་ལ་ཡ་ཡི་དངོས་གྲུབ་སྩོལ། །གྲུ་གསུམ་མཐིང་ནག་འབར་བའི་དཀྱིལ་འཁོར་ནས། །དཔལ་ཆེན་རྡོ་རྗེ་གཞོན་ནུ་ཡབ་ཡུམ་གྱི། །སྒྲུབ་མཆོག་བདག་གི་རྣམ་རྟོག་སྦྱངས་པའི་ཕྱིར། །གསང་བ་བྱང་ཆུབ་སེམས་ཀྱི་དངོས་གྲུབ་སྩོལ། །བདེ་གཤེགས་ཀུན་འདུས་ཐུགས་དམ་རྒྱུད་བསྐུལ་ནས། །འགྲོ་བ་མ་ལུས་བྱང་ཆུབ་དོན་བྱས་ཏེ། །དཔལ་ཆེན་ཧེ་རུ་ཀ་ཡི་གོ་འཕང་མཆོག །ད་ལྟ་ཉིད་དུ་ཐོབ་པའི་དངོས་གྲུབ་སྩོལ། །ཧཱུཾ་མཛད་སྒྲ་འབྱིན་ཕག་དང་རྨིགས་པའི་མགོ །ཞེས་པ་ནས། གནོད་སྦྱིན་འཇིགས་མ་བདུད་རྩི་གསོད་བྱེད་མ། །དཔལ་གྱིས་བཀའ་གཉན་ཡེ་ཤེས་ལྷ་ཀུན་གྱི། །སྒྲུབ་མཆོག་བདག་ལ་དངོས་གྲུབ་སྩལ་དུ་གསོལ། །འགྲོ་བ་དྲུག་ལ་ཐུགས་རྩེར་དགོངས་སུ་གསོལ། །རྫུ་འཕྲུལ་དབང་བའི་དངོས་གྲུབ་
སྩལ་དུ་གསོལ། །སེམས་ལ་དབང་བའི༴ ཡེ་ཤེས༴ ཚེ་ལ༴ སྐྱེ་བ༴ ཆོས་ལ༴ ཡོ་བྱད༴ ལས་ལ༴ སྨོན་ལམ༴ མོས་པ༴ བསྡུ་དངོས་བཞི་ཡི༴ མཆོག་དང་ཐུན་མོང་དངོས་གྲུབ་སྩལ་དུ་གསོལ། ཁྲོ་རྒྱལ་འདུས་པའི་སྲས་མཆོག་ཀཱི་ལ་ཡ། ཁམས་གསུམ་བསྒྲལ་བའི་དངོས་གྲུབ་སྩལ་དུ་གསོལ། ཁྲོ་རྒྱལ་སྐུ་ཡི༴ གསུང་གི༴ ཐུགས་ཀྱི༴ ཡོན་ཏན་འཕྲིན་ལས་དངོས་གྲུབ་སྩལ་དུ་གསོལ། །རྡོ་རྗེ་ཚེ་ཡི་དངོས་གྲུབ་སྩལ་དུ་གསོལ། །ཤྭ་ན་ལ་སོགས་བཀའ་ཡི་ཕོ་ཉའི་ཚོགས། །སྒྲུབ་པ་རྟགས་ཀྱི་དངོས་གྲུབ་སྩལ་དུ་གསོལ། །མ་ཚོགས་ནམ་གྲུ་རེ་མ་ཏཱི་ཡི་ཚོགས། །ཕོ་ཉ་བཀའ་སྡོད་དངོས་གྲུབ་སྩལ་དུ་གསོལ། །རྡོ་རྗེ་ཡ་སྦྱིན་ལ་སོགས་དམ་ཅན་ཚོགས། །རྫུ་འཕྲུལ་དྲག་པོའི་དངོས་གྲུབ་སྩལ་དུ་གསོལ། །ཡེ་ཤེས་ལྷ་དང་མཁའ་འགྲོ་སྲུངས་མའི་ཚོགས། །སྐུ་གསུང་ཐུགས་ཀྱི་དངོས་གྲུབ་སྩལ་དུ་གསོལ། །དཀྱུས་ཀྱི་ཆོ་གའི་ཡན་ལག་ལ་ངེས་པར་དགོས་པ་མིན་ཡང་སྐབས་འདིའམ། གོང་འཛབ་བཟླས་ཀྱི་མཐར། ཚེ་ཆོག་ལོགས་སུ་ཡོད་པ་ལྟར་རང་གཞན་གྱི་དོན་དུ་སྤྲོ་ན་བྱ་སྟེ། དེའི་ཚེ་ཚེ་ཆོག་གི་མཐར་མཆོད་བསྟོད་ཀྱང་བྱའོ། །གང་ལྟར་ཡང་དེ་རྗེས་ཡིག་བརྒྱ་མང་དུ་བཟླས་པའི་མཐར། ལྟ་བ་སྤངས་པས་ཆོས་ཉིད་དོན་མ་རྟོགས། །སྒོམ་པ་ཡུན་ཐུང་ཡི་དམ་ལྷ་མ་གསལ། །བསྙེན་སྒྲུབ་ཡུན་ཐུང་དངོས་གྲུབ་མཐུ་མ་བརྙེས། །འབད་རྩོལ་ཆུང་བས་སློབ་དཔོན་ཐུགས་མ་དགྱེས། །
བརྩེ་གདུང་ཆུང་པས་མཆེད་ལྕམ་ཐུགས་དང་འགལ། །ལེ་ལོ་སྙོམས་ལས་མཆོད་པ་མ་ཚང་བས། །ཡེ་ཤེས་ལྷ་སྤངས་དངོས་གྲུབ་གཡེལ་བའི་རྒྱུ། །དེ་སོགས་ནོངས་པར་གྱུར་པ་ཅི་བགྱིས་པ། །བཀྲ་བའི་ལྷ་ཚོགས་སྤྱན་སྔར་མཐོལ་ལོ་བཤགས། །ཉེས་སྐྱོན་ཐམས་ཅད་དབྱིངས་སུ་དག་གྱུར་ཅིག །མ་འབྱོར་པ་དང༌། སོགས་སྤྱི་དང་འདྲ་བར་བཟོད་གསོལ་བྱས། ཨོཾ་ཁྱོད་ཀྱིས་སེམས་ཅན་སོགས། འཇིག་རྟེན་པ་རྣམས་གཤེགས་སུ་གསོལ། ཉི་མ་ཐ་མ་ལ་ཡིན་ན་དཀྱིལ་འཁོར་གྱི་འཁོར་ལོ་རང་གི་སྙིང་གར་བསྡུས་ནས་འོད་གསལ་དུ་མཉམ་པར་བཞག །ཨཱ་ཀ་རོའི། སྔགས་ཀྱིས་ལས་རྗེས་བསྡུ་བ་སྤྱི་དང་འདྲ། དགེ་འདིས་མཐའ་ཡས་སེམས་ཅན་ཀུན། །རྡོ་རྗེ་གཞོན་ནུའི་ཀཱི་ལ་ཡའི། །གོ་འཕང་བྱང་ཆུབ་མྱུར་ཐོབ་ནས། །བདུད་ལས་རྣམ་པར་རྒྱལ་བར་ཤོག །ཅེས་སོགས་སྨོན་ལམ་གདབ་ཅིང༌། ཧུཾ་སྐྱེ་མེད་ཆོས་སྐུའི་རང་བཞིན་རྣམ་དག་ལས། །ཐུགས་དམ་དབང་གིས་གཟུགས་ཀྱི་སྐུ་སྤྲུལ་པ། །བཅོམ་ལྡན་དཔལ་ཆེན་རྡོ་རྗེ་གཞོན་ནུའི་སྐུ། །མི་འགྱུར་རྟག་པའི་དོན་གྱི་བཀྲ་ཤིས་ཤོག །འཁོར་ལོ་རྒྱས་འདེབས་ཡུམ་གྱི་བཀྲ་ཤིས་ཤོག །སྤྲུལ་པའི་ཁྲོ་རྒྱལ་བཅུ་ཡི་བཀྲ་ཤིས་ཤོག །ཤེས་རབ་ཁྲོ་མོ་བཅུ་ཡི་བཀྲ་ཤིས་ཤོག །ཡང་སྤྲུལ་ཕྱག་བརྙན་ཚོགས་ཀྱི་བཀྲ་ཤིས་ཤོག །ཡེ་ཤེས་སྒོ་སྐྱོང་བཞི་ཡི་བཀྲ་ཤིས་ཤོག །འཕྲིན་ལས་སྲས་མཆོག་རྣམས་ཀྱི་བཀྲ་ཤིས་ཤོག །དམ་ཅན་བཀའ་སྡོད་ཚོགས་ཀྱི་བཀྲ་ཤིས་ཤོག །དགེ་ལེགས་འབྲས་བུར་སྨིན་པའི་བཀྲ་ཤིས་ཤོག །
གཞན་ཡང་ཤིས་བརྗོད་ཀྱི་ཁྱད་པར་ཇི་ལྟར་འོས་པ་བརྗོད་དོ། །དེ་ལྟར་དཔལ་རྡོ་རྗེ་གཞོན་ནུའི་དཀྱིལ་འཁོར་གྱི་ཆོ་ག་བདུད་འཇོམས་རོལ་པ་ཅེས་བྱ་བ་འདི་ནི། འཁོན་ལུགས་ཀྱི་ལས་བྱང་རྙིང་པ་ས་ཆེན་གྱིས་མཛད་པར་ཡངབྱེད་པ་འདི་ལ་གཙོ་བོར་བརྟེན། དེ་ཡང་སྣུབས་ལུགས་ཀྱི་ལས་བྱང་དང་ཕལ་ཆེར་མཐུན་པར་འདུག་ཅིང༌། གཞན་ཁ་སྐོངས་དགོས་པ་ཡང་གདམས་ངག་དྲུག་པ་དང༌། །སྐྱི་ལུགས་སོགས་སྔགས་རྙིང་བཀའ་མ་རྣམས་ཀྱི་རྗེས་སུ་འབྲངས་ཤིང༌། གསར་མའི་རྒྱས་འགེབས་སོགས་སྤངས་ཏེ་རང་ལུགས་གཙང་ཞིང་དག་པར་བརྗོད་པ་ནི། རྒྱལ་ཁམས་པ་ཏཱ་ར་ནཱ་ཐའི་སུག་ལས་སོ།། །།ཞུས་དག། རབ་ཏུ་དཀར་བའི་རྟེན་བཞེངས་འདིས། །བདག་ཅག་གིས་ནི་ཐོག་མེད་ནས། །སྡིག་ལྟུང་གང་བསགས་ཡོངས་དག་སྟེ། །རླབས་ཆེན་ཚོགས་གཉིས་མཐར་ཕྱིན་ཤོག །འདི་ཡང་གྲོགས་ལ་མཁོ་ཕྱིར། མ་ཏིས་བྲིས། །