དམ་ཚིག་གསུམ་བཀོད་པའི་དཀྱིལ་འཁོར་གྱི་ཆོ་ག་བྱ་བའི་རྒྱུད་མཐའ་དག་ལ་འཇུག་པ།
དམ་ཚིག་གསུམ་བཀོད་པའི་དཀྱིལ་འཁོར་གྱི་ཆོ་ག་བྱ་བའི་རྒྱུད་མཐའ་དག་ལ་འཇུག་པ་ཞེས་བྱ་བ་བཞུགས།
ཨོཾ་སྭཱ་སྟི། དམ་ཚིག་གསུམ་བཀོད་པའི་དཀྱིལ་འཁོར་གྱི་ཆོ་ག་བྱ་བའི་རྒྱུད་མཐའ་དག་ལ་འཇུག་པ་ཞེས་བྱ་བ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །ཡང་དག་རིག་པ་བླ་མེད་འགྲོ་རྣམས་ལ། །མཆོག་སྩོལ་བདེ་གཤེགས་ཀུན་གྱི་སྙིང་པོ་དེ། །མཁའ་མཉམ་འགྲོ་བས་མྱུར་དུ་གྲུབ་སླད་དུ། །དམ་ཚིག་གསུམ་བཀོད་རྒྱལ་ལ་ཕྱག་བགྱིའོ། །འདིར་སྡོམ་ནི། དམ་རྒྱ་བཅིང་དང་ཕྱག་འཚལ་བདག་ཉིད་འབུལ། །སེམས་བསྐྱེད་བགེགས་སྲུང་བྱིན་རླབས་རྣམ་དག་བསྒོམ། །བདུན་པོ་དེ་རྣམས་རང་རྒྱུད་སྦྱང་བ་ཡིན། །ཕྱི་ཡི་འཁྲུས་དང་བསྲུང་བ་ཁྲུས་ཆུ་སྒྲུབ། །བསངས་གཏོར་ཁྲུས་ས་བྱིན་རླབས་བྱུག་པ་བྱ། །ལུས་སོགས་བཀྲུ་དང་གནས་སུ་འཇུག་པ་སྟེ། །བརྒྱད་པོ་ཁྲུས་ཀྱི་ཆོ་ག་ཡིན་པར་ཤེས། །བདག་སྲུང་མཆོད་པའི་བགེགས་བསལ་གཟི་བྱིན་བསྐྱེད། །མཆོད་པ་བྱིན་རླབས་ཕུར་བུ་གདབ་པ་དང༌། །ཕྱོགས་བཅིང་
བ་ལ་རིམ་པ་གསུམ་ཡོད་ཅིང༌། །དྲྭ་གུར་མཚམས་གཅོད་དོན་ཚན་བཅུ་པོ་ནི། །བགེགས་རྣམས་བསལ་བའི་སྡེ་ཚན་ཉིད་དུ་གཏོགས། །རྒྱུད་སྦྱང་བ་དང་ཁྲུས་བྱ་བགེགས་བསལ་བ། །སྡེ་ཚན་གསུམ་པོ་འཇུག་པའི་སྔོན་འགྲོ་ཡིན། །རྣལ་འབྱོར་འཇུག་པའི་བྱ་བ་དྲུག་ཡིན་ཏེ། །འབགས་པ་བསལ་དང་གཏན་ལ་འདུག་པ་དང༌། །རྡོ་རྗེ་ལེན་དང་གདུ་བུ་གདགས་པ་དང༌། །བསད་བྱེད་བཟུང་དང་ཟེའུ་ཁ་བཅིང་བའོ། །དངོས་གཞིའི་ཆོ་གའང་རྣམ་པ་དྲུག་ཡོད་དེ། །བདག་གི་དེ་ཉིད་རྟེན་བསྐྱེད་སྤྱན་དྲངས་དང༌། །བཞུགས་གསོལ་དམ་བཞག་ཚོགས་བསགས་དེ་ལ་བརྒྱད། །མཆོད་པ་བསྟོད་པ་བཤགས་པ་སྐྱབས་འགྲོ་དང༌། །གསོལ་གདབ་སེམས་བསྐྱེད་ཚད་མེད་བཟླས་པའོ། །སླར་བཏང་བ་དང་ཐུན་མཚམས་རྣལ་འབྱོར་གཉིས། །འཇུག་ཆོག་ཡིན་ཏེ་ཐུན་མཚམས་རྭ་བ་བཀྲོལ། །གླེགས་བམ་བཀླག་དང་རྗེས་དྲན་དྲུག་སྒོམ་དང༌། །མཎྜལ་འབུལ་ཞིང་སཱའ་ཙྭ་
གདབ་པ་སོགས། །སྣོད་གོས་བཀྲུ་བའམ་སྔགས་པའམ་བསངས་གཏོར་བྱ། །བསྲུངསྐུད་བྱ་ཞིང་བཟའ་མིན་ཟོས་པ་སྦྱངས། །སླར་བཏང་མན་ཆད་རྗེས་ཀྱི་བྱ་བར་བསྡུ། །བྱ་བའི་རྒྱུད་ཀྱི་ཆོ་ག་རྒྱས་པ་ལ། །བསྙེན་པའི་རིམ་པ་དེ་ལྟར་ཡིན་པར་ཤེས། །དེ་ལྟར་སྡོམས་སུ་བསྒྲིགས་པའི་དོན་ཅུང་ཟད་ཕྱེ་སྟེ་བཤད་ན། བྱ་བའི་རྒྱུད་ལས་བྱུང་བ་བསྙེན་པའི་ཆོ་ག་རྒྱས་པའི་རིམ་པ་ལ། རྣལ་འབྱོར་གྱི་ཡན་ལག་བཞི་སྟེ། རྣལ་འབྱོར་གྱི་སྔོན་དུ་བྱ་བའི་རིམ་པ། རྣལ་འབྱོར་ལ་འཇུག་པའི་བྱ་བ། རྣལ་འབྱོར་དངོས་གཞིའི་ཉམས་ལེན། རྣལ་འབྱོར་རྗེས་ཀྱི་རིམ་པའོ། ། །དང་པོ་ལ་རྒྱུད་སྦྱང་བ། ཁྲུས་བྱ་བ། བགེགས་གསལ་བ་གསུམ་མོ། །དེའི་དང་པོ་ལ། དམ་ཚིག་གི་སྔགས་རྒྱ་བཅིང་བ། ཕྱག་འཚལ་བ། བདག་ཉིད་འབུལ་བ། སེམས་བསྐྱེད་པ། བགེགས་སྲུང་བ། བྱིན་གྱིས་བརླབས་པ། རྣམ་དག་སྟོང་ཉིད་སྒོམ་པ་སྟེ་བདུན་ནོ། །གཉིས་པ་ཁྲུས་ཀྱི་བྱ་བ་ལ། ཕྱིའི་ཁྲུས་དངོས་དང༌། ཁྲུས་ཀྱི་སྲུང་བ་དང༌། ཁྲུས་ཆུ་སྒྲུབ་པ་དང༌། བསངས་གཏོར་དང༌། ས་ཁྲུས་ཀྱི་ས་བྱིན་གྱིས་བརླབས་པ་དང༌། བྱུག་པ་སའི་ཁྲུས་དང༌། ལུས་དང་གདོང་དང་ལག་པ་བཀྲུ་བ་དང༌། ལྷའི་གནས་སུ་འཇུག་པ་སྟེ་བརྒྱད་དོ། །གསུམ་པ་བགེགས་བསལ་བ་ལ། བདག་སྲུང་བ། མཆོད་པ་སྲུང་བ། གནས་སྲུང་བ་གསུམ། དེའི་གཉིས་པ་མཆོད་པ་སྲུང་བ་ལ། མཆོད་པའི་བགེགས་བསལ། མཆོད་པ་གཟི་བྱིན་བསྐྱེད། མཆོད་པ་བྱིན་གྱིས་རླབས་པ་གསུམ། གསུམ་པ་གནས་སྲུང་བ་ལ། ཕུར་བུ་གདབ་པ་དང༌། སྟེང་ཕྱོགས་བཅིང་བ་དང༌།
འཁོར་ཡིག་བཅིང་བ་དང༌། རྭ་བ་བཅིང་བ་དང༌། རཱ་གུར་ཕུབ་པ་དང༌། མཚམས་གཅོད་པ་སྟེ་རིམ་པ་དྲུག་གོ །གཉིས་པ་རྣལ་འབྱོར་ལ་འཇུག་པའི་བྱ་བ་དྲུག་སྟེ། འབགས་པ་བསལ་བ། གདན་ལ་འདུག་པ། དམ་ཚིག་རྡོ་རྗེ་ལེན་ཞིང་བཅིང་བ། གདུ་བུ་གདགས་པ། བསངས་བྱེད་བཟུང་བ། ཟེའུ་ཁ་བཅིང་བའོ། གསུམ་པ་རྣལ་འབྱོར་དངོས་གཞིའི་ཉམས་ལེན་ལ། བདག་གི་དེ་ཁོ་ན་ཉིད་སྒོམ་པ་དང༌། རྟེན་གྱི་དཀྱིལ་འཁོར་བསྐྱེད་པ་དང༌། ཡེ་ཤེས་ཀྱི་ལྷ་སྤྱན་དྲངས་པ་དང༌། བཞུགས་སུ་གསོལ་བ་དང༌། དམ་ལ་གཞག་པ་དང༌། ཚོགས་བསགས་པའོ། དྲུག་པ་ཚོགས་བསགས་དེ་ལ་དབྱེ་ན། མཆོད་པ། བསྟོད་པ། བཤགས་པ། སྐྱབས་འགྲོ། གསོལ་གདབ། སེམས་བསྐྱེད། ཚད་མེད་བཞི། སྔགས་བཟླས་པ་སྟེ་བརྒྱད་དོ། །རྣལ་འབྱོར་རྗེས་ཀྱི་རིམ་པ་ལ། སླར་བཏང་བ་དང༌། ཐུན་མཚམས་ཀྱི་བྱ་བ་གཉིས་སོ། །དེ་ལྟར་ན་སྔོན་འགྲོ་དངོས་གཞི་རྗེས་ཀྱི་སྡེ་ཚན་རྣམས་ངེས་པར་བྱའོ། །དེ་ལ་དང་པོ་ཁོ་ན་ནས་གཙང་སྦྲ་དང་བཅས་ཏེ་བོད་རྣམས་ལག་ལེན་མཛད་པ་ལྟར་ན། སྡོམས་སུ་མ་འདུས་ཀྱང་ཐོག་མ་ཉིད་དུ་སྤྱི་དང་མཚུངས་པར་སྐྱབས་སུ་འགྲོ་བ་དང༌། སེམས་བསྐྱེད་པ་བྱ། ཁྱིམ་པ་ཡིན་ན་བསྙེན་གནས་ཀྱི་གསོ་སྦྱོང་དོན་ཞགས་ཀྱི་ཆོ་ག་ལྟར་བླང༌། དེ་ནས་ཆོ་གའི་རིམ་པ་རྣམས་ཕྲེང་ཆགས་སུ་བགྲངས་ན་འདི་ལྟ་སྟེ། ༡ དམ་ཚིག་གི་སྔགས་རྒྱ་བཅིང་བ། ༢ ཕྱག་འཚལ་བ། ༣ བདག་ཉིད་འབུལ་བ། ༤ སེམས་བསྐྱེད་པ། ༥ བགེགས་སྲུང་བ། ༦ བྱིན་གྱིས་རླབས་པ། ༧ རྣམ་དག་སྒོམ་པ། ༨ ཕྱི་ཁྲུས་བྱ་བ། ༩ ཁྲུས་ཀྱི་སྲུང་བ། ༡༠ བསངས་ཆུ་སྒྲུབ་པ། ༡༡ བསངས་གཏོར་བྱ་བ། ༡༢ ས་བྱིན་རླབས། ༡༣ སས་བྱུག་པ། ༡༤ ལུས་སོགས་བཀྲུ་བ། ༡༥ གནས་སུ་འཇུག་པ། ༡༦ བདག་སྲུང་བ། ༡༧ མཆོད་པའི་བགེགས་བསལ་བ། ༡༨ གཟི་བྱིན་བསྐྱེད་པ། ༡༩ མཆོད་པ་བྱིན་རླབས། ༢༠ ཕུར་བུས་གདབ་པ། ༢༡ སྟེང་ཕྱོགས་
བཅིང་བ། ༢༢ ཁོར་ཡུག་བཅིང་བ། ༢༣ རྭ་བ་བཅིང་བ། ༢༤ གུར་འབུགས་པ། ༢༥ མཚམས་གཅོད་པ། ༢༦ འབགས་པ་བསལ་བ། ༢༧ གདན་ལ་འདུག་པ། ༢༨ རྡོ་རྗེ་བཅིང་བ། ༢༩ གདུ་བུ་གདགས་པ། ༣༠ བསང་བྱེད་བཟུང་བ། ༣༡ ཟེའུ་ཁ་བཅིང་པ། ༣༢ བདག་གི་དེ་ཉིད། ༣༣ རྟེན་བསྐྱེད་པ། ༣༤ ལྷ་སྤྱན་དྲངས་པ། ༣༥ བཞུགས་སུ་གསོལ་བ། ༣༦ དམ་ལ་བཞག་པ། ༣༧ མཆོད་པ། ༣༨ བསྟོད་པ། ༣༩ བཤགས་པ། ༤༠ སྐྱབས་འགྲོ ༤༡ །གསོལ་གདབ། ༤༢ སེམས་བསྐྱེད། ༤༣ ཚད་མེད་བཞི། ༤༤ བཟླས་བརྗོད་བྱེད་པ། ༤༥ སླར་བཏང་བ། ༤༦ ཐུན་མཚམས་ཀྱི་བྱ་བ་སྟེ། །དོན་ཚན་བཞི་བཅུ་ཞེ་དྲུག་ཡོད་པ་ལས། དང་པོ་དམ་ཚིག་གི་སྔགས་དང་ཕྱག་རྒྱ་བཅིང་བ་ནི། ཨོཾ་ཏཱ་ཐཱ་ག་ཏ་ཨུད་བྷ་ཝེ་སྭཱཧཱ། ཞེས་བརྗོད་ཅིང༌། ཐལ་མོ་བཀན་པ་ལས་མཛུབ་མོ་གཉིས་ཅུང་ཟད་བཀུག་པ་མགོ་ལ་བཞག་པ་ནི་དེ་བཞིན་གཤེགས་རིགས་སྤྱིའི་དམ་རྒྱའོ། །གཉིས་པ་ཕྱག་འཚལ་བ་ནི། མགོན་པོ་ཐུགས་རྗེས་ཆེ་ལྡན་པ། །ཐམས་ཅད་མཁྱེན་པ་སྟོན་པ་པོ། །བསོད་ནམས་ཡོན་ཏན་རྒྱ་མཚོའི་ཞིང༌། །དེ་བཞིན་གཤེགས་ལ་ཕྱག་འཚལ་ལོ། །དག་པ་འདོད་ཆགས་བྲལ་བའི་རྒྱུ། །དགེ་བའི་ངན་སོང་ལས་གྲོལ་ཞིང༌། །གཅིག་ཏུ་དོན་དམ་མཆོག་གྱུར་པའི། །ཞི་གྱུར་ཆོས་ལ་ཕྱག་འཚལ་ལོ། །གྲོལ་བས་གྲོལ་བའི་ལམ་ཡང་སྟོན། །བསླབ་པ་དག་ལ་རབ་ཏུ་གུས། །
ཞིང་གི་དམ་པ་ཡོན་ཏན་ཞིང༌། །དགེ་འདུན་ལ་ཡང་ཕྱག་འཚལ་ལོ། །གཞོན་ནུའི་སྐུ་ལུས་འཆང་བ་པོ། །ཡེ་ཤེས་སྒྲོན་མེ་རབ་རྒྱས་ཤིང༌། །འཇིག་རྟེན་གསུམ་གྱི་མུན་སེལ་པ། །འཇམ་པའི་དབྱངས་ལ་ཕྱག་འཚལ་ལོ། །སངས་རྒྱས་ཀུན་གྱིས་རབ་ཏུ་བསྔགས། །ཡོན་ཏན་དམ་པ་ཀུན་གྱིས་བརྒྱན། །སྤྱན་རས་གཟིགས་ཞེས་མཚན་གསོལ་པ། །རྟག་པར་རྩེ་ལ་ཕྱག་འཚལ་ལོ། །སྟོབས་པོ་ཆེ་ལ་དྲག་ཤུལ་ཆེ། །རིགས་སྔགས་རྒྱལ་པོ་དགེ་བ་ཅན། །གདུལ་དཀའ་མཐའ་དག་འདུལ་བ་པོ། །རྡོ་རྗེ་འཛིན་ལ་ཕྱག་འཚལ་ལོ། །དེ་བཞིན་དམ་པ་འགྲུབ་པ་སྟེ། །རིགས་སྔགས་འཆང་ཀུན་དབང་ཕྱུག་རྗེ། །དཔའ་བོ་གཅིག་པུ་དགྲ་ཐུལ་བ། །རྡོ་རྗེ་འཛིན་ལ་ཕྱག་འཚལ་ལོ། །འཕགས་པ་ཤ་ར་དྭ་ཏིའི་བུ། །ལྷ་དང་ལྷ་མིན་དྲི་ཟར་བཅས། །ཀླུ་དང་གནོད་སྦྱིན་ཚོགས་ཀྱིས་མཆོད། །ཐུབ་པ་སངས་རྒྱས་གཉིས་པར་འདུད། །ཅེས་སོ། གཞན་ཡང་ཇི་ལྟར་འོས་པའི་ཕྱག་འཚལ་བ་དག་བསྣན་ཀྱང་མི་འགལ་ལོ། ཁ་ཅིག ཨོཾ་སརྦ་ཏ་ཐཱ་ག་ཏཱ་ཀཱ་ཡ་ཝཱཀ་ཙིཏྟ་བཛྲ་པྲ་ཎ་མེ་ན། སརྦ་ཏ་ཐཱ་ག་ཏ་བཛྲ་བན་ད་ནཱཾ་ཀ་རོ་མི། ཞེས་པས་ཕྱག་བྱེད་དེ། བྱ་རྒྱུད་རང་ལུགས་ཡིན་མིན་བརྟག་དགོས་པས་རེ་ཞིག་མི་བྱའོ། །གསུམ་པ་བདག་ཉིད་འབུལ་བ་ནི། སྙིང་གར་ཐལ་མོ་སྦྱར། བདག་མིང་ཆེ་གེ་མོ་ཞེས་བགྱི་བ། ཆོས་ཀྱི་དབྱིངས་སུ་གཏོགས་པའི་སངས་རྒྱས་དང་བྱང་ཆུབ་སེམས་དཔའ་འཁོར་དང་བཅས་པ་ཐམས་ཅད་
ལ་བདག་འབུལ་བར་བགྱིའོ། །ཐུགས་རྗེ་ཆེན་པོ་དང་ལྡན་པ་དེས་ཀྱང་བདག་ལ་རྣམ་པ་ཐམས་ཅད་དང་དུས་ཐམས་ཅད་དུ་བྱིན་གྱིས་རླབས་པ་དང༌། ཡོངས་སུ་བསྲུང་བར་གྱུར་ཅིག །བདག་ལ་གྲུབ་པ་དང་མཆོག་སྩོལ་ཅིག །ཅེས་རྒྱུད་འདི་ཉིད་ལས་འབྱུང་བའམ། སྤྱི་འགྲོའི་ཚིག་གིས་ཀྱང་རུང་ངོ༌། །བཞི་པ་སེམས་བསྐྱེད་པ་ནི། སངས་རྒྱས་ཆོས་དང་ཚོགས་མཆོག་ལ། བྱང་ཆུབ་བར་དུ་བདག་སྐྱབས་མཆི། །བདག་དང་གཞན་དོན་སྒྲུབ་སླད་དུ། །བདག་གིས་བྱང་ཆུབ་སེམས་བསྐྱེད་དོ། །ཕྱོགས་བཅུ་དག་ན་བཞུགས་པ་ཡི། །སངས་རྒྱས་བྱང་ཆུབ་སེམས་དཔའ་གསོན། །བདག་གིས་རྫོགས་པའི་བྱང་ཆུབ་ཕྱིར། །དེང་ནས་བྱང་ཆུབ་སེམས་བསྐྱེད་དོ། །དེ་ཡན་ཆད་ཀྱི་སྔགས་དང་ཚིགས་ཆ་རྣམས་ལན་གསུམ་གསུམ་བྱའོ། །ལྔ་པ་བགེགས་སྲུང་བ་ནི། ལག་པ་གཉིས་སོར་མོ་ཕན་ཚུན་བསྣོལ་ཏེ་བསྡམས་པའི་ཁུ་ཚུར་རྡོ་རྗེ་ཕྱིར་བསྡམས་སུ་གྲགས་པ་དེ་བྱས་ལ། །མཐེ་ཆུང་གཉིས་གཤིབས་ཏེ་སྒྲེང༌། མཛུབ་མོ་གཉིས་རྩེ་སྦྱར་ཏེ་བརྐྱང་བའི་གཡས་གཡོན་དུ་མཐེ་བོང་གཉིས་སྦྱར་བ་ཁྲོ་བོ་བནོལ་བ་མེད་པའི་ཕྱག་རྒྱ་དེ། སྙིང་ག་དང༌། ལྐོག་མ་དང༌། སྨིན་མཚམས་དང༌། སྤྱི་བོ་རྣམས་སུ་སྔགས་ལན་རེ་རེས་གཏུགས། ཨོཾ་བཛྲ་ཀྲོ་དྷ་མཧཱ་བ་ལ། ཧ་ན་ད་ཧ་པ་ཙ་བི་དྷྭ་ན་ས་ཡ། ཨུ་ཙུཥྨ་ཀྲོ་དྷ་ཧཱུཾ་ཕཊ། ན་མོ་རཏྣ་ཏྲ་ཡཱ་ཡ། ན་མཿཙཎྜ་བཛྲ་པཱ་ཎ་ཡེ། མཧཱ་ཡཀྵ་སེ་ན་པ་ཏ་ཡེ། ན་མོ་བཛྲ་ཀྲོ་དྷཱ་ཡ། མཧཱ་དཾ་ཥྟོ་ད་ཀ་ཊ་བྷཻ་ར་པཱ་ཡ། ཏདྱ་ཐཱ། ཨོཾ་ཨ་མྲྀ་ཏ་ཀུཎྜ་ལི་ཁ་ཁ་ཁཱ་ཧི་ཁཱ་ཧི།
ཏིཥྛ་ཏིཥྛ། བནྡྷ་བནྡྷ། ཧ་ན་ཧ་ན། ད་ཧ་ད་ཧ། གརྫ་གརྫ། བི་སྥོ་ཊ་ཡ། བི་སྥོ་ཊ་ཡ། སརྦ་བིགྷྣ་བི་ནཱ་ཡ་ཀཾ །མཧཱ་ག་ན་པ་ཏི། །ཛི་བི་ཏ་ཨནྟ་ཀ་རཱ་ཡ་སྭཱཧཱ། ཞེས་པ་བདུད་རྩི་ཐབས་སྦྱོར་གྱི་སྔགས་རྒྱས་པས་ཀྱང་ངོ༌། དྲུག་པ་བྱིན་གྱིས་རླབས་པ་ནི། རང་གི་སྙིང་གར་ཟླ་བའི་དཀྱིལ་འཁོར་གྱི་གདན་ལ། རྣམ་པར་སྣང་མཛད་ཀྱི་གསུང་རིགས་སྔགས་ཀྱི་ངོ་བོ་མ་ཡིག་གསེར་གྱི་མདོག་ཅན་དང༌། འཚོགས་མར་ཁྲོ་བོ་མི་གཡོ་བའི་གསུང་རིགས་སྔགས་ཀྱི་ངོ་བོ་ཧ་ཡིག་སྔོན་པོ་འབར་བའི་འཕྲེང་བ་འཁྲུགས་པར་གྱུར། །བདུན་པ་རྣམ་དག་སྟོང་ཉིད་སྒོམ་པ་ནི། ཨོཾ་སྭཱ་བྷཱ་ཝ་ཤུདྡྷཿསརྦ་དྷརྨཱཿསྭཱ་བྷཱ་ཝ་ཤུདྡྷོ྅ཧཾ། ཆོས་ཐམས་ཅད་བདག་ཉིད་ཀྱི་སེམས་སུ་འདུས་ཤིང༌། སེམས་རང་བཞིན་གྱི་རྣམ་པར་དག་པའོ། །ཅེས་བརྗོད་ཅིང་དོན་བསམ། བསྙེན་པའི་ཆོ་ག་བསྡུས་པ་ལ་དགའ་བས་དེ་ཡན་ཆད་བོར་ཀྱང་ཆོག་གོ །བརྒྱད་པ་ཕྱིའི་ཁྲུས་དངོས་ནི། དཔུང་བཟང་གི་རྒྱུད་ལས་གསལ་མོད། བོད་པའི་ཆོག་ཁྲིགས་ཀྱི་དཀྱུས་འཇུག་སྟབས་མི་བདེ་བས། ཁྲུས་དང་གཏོར་མའི་བྱ་བ་སྔོན་རོལ་ནས་གྲུབ་པར་བྱ་སྟེ། འདིར་ཡིད་ཀྱིས་མོས་པ་ཙམ་བྱའོ། །རྡོར་བསྡམས་ལས་མཛུབ་མོ་གཉིས་གཤིབས་ཏེ་བསྒྲེངས། །མཐེ་བོང་གཉིས་དེའི་གཡས་གཡོན་དུ་སྦྱར་ལ། ཨོཾ་ནི་ཁ་ན་བ་སུ་དྷེ་སྭཱཧཱ། ལན་བདུན་ལ་སོགས་པ་མང་དུ་བཟླས་ཏེ། ས་དང་ཆུས་བཀྲུས་པར་བསམ། །དགུ་པ་ཁྲུས་ཀྱི་སྲུང་བ་ནི། །མཐེ་བོས་མཐེ་ཆུང་གི་སེན་མོ་མནན། སོར་མོ་ལྷག་མ་གསུམ་རྡོ་རྗེ་རྩེ་གསུམ་པའི་ཚུལ་དུ་བྱས། ལག་གཉིས་བསྣོལ་ནས་ཕྱག་
རྒྱ་དེ་དཔུང་པ་གཡས་གཡོན་དུ་བཞག །ཡིད་ཙམ་ཨཾ་གཙིགས་བསྡམས། ཁྲོ་བོའི་ལྟ་བ་དང་བཅས་པས། ན་མོ་རཏྣ་ཏྲ་ཡཱ་ཡ། མཧཱ་ཡཀྵ་སེ་ན་པ་ཏ་ཡེ། ན་མོ་བཛྲ་ཀྲོ་དྷཱ་ཡ། ཏདྱ་ཐཱ། ཨོཾ་ཧུ་ལུ་ཧུ་ལུ། ཏིཥྛ་ཏིཥྛ། བནྡྷ་བནྡྷ། ཧ་ན་ཧ་ན། ཨ་མྲྀ་ཏེ་ཧཱུཾ་ཕཊ། ཅེས་བདུད་རྩི་ཐབས་སྦྱོར་གྱི་སྔགས་རྒྱས་བདག་ཉིད་སྲུང་ངོ༌། །འདི་བདུད་རྩིའི་སྔགས་འབྲིང་པོ་ཡིན་ནོ། །བཅུ་པ་བསང་ཆུ་སྒྲུབ་པ་ནི། སྣོད་བཟང་པོར་ཆུ་གཙང་མ་དྲི་ཞིམ་པོས་སྦགས་པ་ལ་དམིགས་ཏེ། ན་མོ་རཏྣ་ཏྲཱ་ཡཱ་ཡ། ན་མཿཙཎྜ་བཛྲ་པཱ་ཎ་ཡེ། ཨོཾ་ཧཱུཾ་ཧ་ན་ཧ་ན་བཛྲེ་བཛྲེ་ཎ་ཧཿ ལན་ཉེར་གཅིག་ནས་བརྒྱའི་བར་དུ་བཟླས། །བཅུ་གཅིག་པ་བསང་གཏོར་ནི། ཨོཾ་ཀཱི་ལི་ཀཱི་ལི་བཛྲ་ཧཱུཾ་ཕཊ། ཅེས་ལན་བདུན་ལ་སོགས་པ་བཟླ་ཞིང༌། གཡོན་པ་རྡོ་རྗེ་རྩེ་གསུམ་པའི་ཕྱག་རྒྱས་བསང་ཆུ་བླངས་ཏེ་བདག་དང༌། གནས་དང༌། ཡོ་བྱད་དང༌། སའི་གོང་བུ་ལ་བསངས་གཏོར་བྱ། བཅུ་གཉིས་པ་ས་བྱིན་གྱིས་རླབས་པ་ནི། ཨོཾ་བཛྲ་ཧ་ར་ཧཱུཾ། ལན་བདུན་ནོ། །བཅུ་གསུམ་པ་ས་ཁྲུས་ནི། ཨོཾ་བྷུ་ར་ཛྭ་ལ་ཧཱུཾ་ཕཊ། ལན་བདུན་ལས་མི་ཉུང་བ་བཟླས་ཏེ། ལག་པ་ལ་སས་བྱུག་ཅིང་འཕྱིས་པར་བྱའོ། །བཅུ་བཞི་པ་ལུས་སོགས་བཀྲུ་བ་ནི། ཨོཾ་ཨ་མྲྀ་ཏེ་ཧཱུཾ་ཕཊ། ལན་ཉེར་གཅིག་ཙམ་ཡིད་ཀྱིས་བཟླ་ཞིང༌། ལུས་དང་གདོང་དང་ལག་པ་རྣམས་འཁྲུས་ཆུས་བཀྲུའོ། །འོན་ཀྱང་ཆོག་ཁྲིགས་ལ་ཡིད་བཟླས་ཁོ་ན་མི་མངོན་པས་ངག་བཟླས་བྱེད་དགོས་སོ། །ཉམས་ལེན་བསྡུད་པའི་སྐབས་གོང་གི་ཕྱི་ཁྲུས་དང༌། ལུས་སོགས་བཀྲུ་བ་འདི་ཁོ་ནས་འགྲུབ་པས་བར་གྱི་རྣམས་བོར་བས་ཆོག་གོ །འདིར་ཁྲུས་ཀྱི་ཆོ་ག་འབྲིང་པོ་
དཀྱུས་སུ་བཤད་པ་འདི་ཉིད་དེ་རྒྱས་པ་ནི་གཞན་ལས་རྟོགས་པར་བྱའོ། །ཐོབ་ཐང་ལ་དེ་ཡན་ཆད་སྒྲུབ་ཁང་གི་ཕྱི་རོལ་ཏུ་བྱེད་པ་ཡིན། དེང་སང་གི་ཆོག་ཁྲིགས་ལྟར་ན་དེ་ལྟར་སྒྲུབ་དཀའ་བས་ནང་དུ་བྱེད་པ་ལས་འོས་མེད་དོ། བཅོ་ལྔ་པ་གནས་སུ་འཇུག་པ་ནི། གོས་གསར་པ་གྱོན། སྒྲུབ་ཁང་དང་ཉེ་བར་རྐང་པ་བཀྲུས། ཉེ་རེག་བྱས་ཁང་པར་ཞུགས། ལྷ་རྣམས་མངོན་སུམ་དུ་དམིགས་པ་ལ་ཕྱག་བྱས་ནས། སྒོ་ནང་དུ་ལྷ་ལ་ཕྱོགས་དེ་འདུག་དགོས་པ་ཡིན་པ་ལས། ཆོག་ཁྲིགས་ཀྱིས་སྐབས་སུ་གཞན་དེ་དག་དམིགས་པར་བྱ་ཞིང༌། ཨ་མྲྀ་ཏ་བཟླ་བཞིན་དུ་ཉེ་རེག་དངོས་སུ་བྱས་ན་ལེགས། མཐར་ཨོཾ་བི་ར་ཛ་བི་ར་ཛ་མཧཱ་བཛྲི་ས་ཏ་ས་ཏ་སཱ་ར་ཏེ་སཱ་ར་ཏེ་ཏྲ་ཡེ་ཏྲ་ཡེ། བིདྷ་མ་ནི་ས་མ་བྷཉྫ་ནི་ཏ་ར་མ་ཏི་སིདྡྷི་ཨ་གྲེ་ཏཾ་སྭཱཧཱ། གནས་སུ་ཞུགས་ཤིང་དམ་ཚིག་ལ་འཇུག་པའི་སྔགས་འདི་ལན་གསུམ་བྱ། །བཅུ་དྲུག་པ་བདག་སྲུང་བ་ནི། ཨོཾཥྟོཾ་བནྡྷ་སྭཱཧཱ། ཞེས་པ་དེ་བཞིན་གཤེགས་རིགས་ཀྱི་ལས་ཐམས་ཅད་པ་ལན་ཉེར་གཅིག་དང༌། ན་མོ་རཏྣ་ཏྲ་ཡཱ་ཡ། མཧཱ་ཡཀྵ་སེ་ནཱ༴ ཞེས་པ་ནས། ཨ་མྲྀ་ཏེ་ཧཱུཾ་ཕཊ། གོང་བཞིན་བདུད་རྩི་ཐབས་སྦྱོར་གྱི་སྔགས་འབྲིང་པོ་ལན་གསུམ་གྱིས་དུང་ཆོས་ལ་སོགས་པ་བསང་ཆུའི་སྣོད་ལག་པ་གཡོན་ཏུ་བཞག །གཡས་པས་རང་གི་ལུས་ལ་གཏོར་རོ། །བཅུ་བདུན་པ་མཆོད་པའི་བགེགས་བསལ་བ་ནི། བདུད་རྩི་ཐབས་སྦྱོར་གྱི་སྔགས་དེ་ཉིད་ལན་གསུམ་དུ་བཟླ་བཞིན་དུ། མཆོད་པ་ལ་མཐོར་ཡབ་ཀྱིས་བསང་ཆུ་གཏོར། ཡང་ཛི་ན་ཛིཀ ཞེས་པ་དེ་བཞིན་གཤེགས་རིགས་ཀྱི་སྙིང་པོ་ལན་བདུན་ལས་མི་ཉུང་བས་ཀྱང་མཆོད་པ་ལ་
བསངས་གཏོར་བྱའོ། །བཅོ་བརྒྱད་པ་གཟི་བྱིན་བསྐྱེད་པ་ནི། གཡོན་པའི་གུང་སྲིན་གཉིས་མཐེ་བོས་མནན། མཛུབ་མོ་དང་མཐེའུ་ཆུང་གཉིས་གདུབ་བུའི་ཚུལ་དུ་གུང་སྲིན་གཉིས་ཀྱི་རྒྱབ་ཏུ་སྦྱར། གཡས་རྡོ་རྗེ་རྩེ་གསུམ་པའི་ཕྱག་རྒྱ་ཁ་གྱེན་དུ་བསྟན་ནས་གཡོན་གྱི་མཐེབ་མཛུབ་གི་འོག་ནས་བཏོན་ཏེ། གུང་མོ་བཟུང་བ་ལྟར་བྱེད་པ་ནི། གཟི་བྱིན་བསྐྱེད་པའི་ཕྱག་རྒྱ་སྟེ། དེ་ཉིད་མཆོད་པ་རྣམས་ཀྱི་སྟེང་ནས། ལྡིང་སྐོར་དང་བྲམ་པའི་ཚུལ་བྱེད་དེ་དེ་ལ་བྲམ་པ་ཞེས་བྱ་བ་ནི་ཅབ་སེ་ཅབ་སེ་རེག་པའི་ཚུལ་དང་ཐིག་གཏོར་གྱི་ཚུལ་བྱེད་པའོ། །ཨོཾ་ཏེ་ཛ་ཏེ་ཛ་སཾ་སུདྡྷེ་སཱདྷ་སྭཱཧཱ། ལན་མང་དུ་བཟླ་སྟེ། འདི་དེ་བཞིན་གཤེགས་རིགས་ཀྱི་གཟི་བྱིན་བསྐྱེད་པའོ། །བཅུ་དགུ་པ་མཆོད་པ་བྱིན་རླབས་ནི། ཡང་གོང་དུ་བཤད་པར་ལྟར་གྱི། ན་མོ་རཏྣ་ཏྲ་ཡཱ་ཡ༴ ནས། ཧ་ན་ཧ་ན་ཨ་མྲྀ་ཏེ་ཧཱུཾ་ཕཊ། ཀྱི་བར་དང༌། ཕྱག་རྒྱ་གོང་བཞིན་ཏེ་ཐབས་སྦྱོར་གྱི་སྔགས་རྒྱ་ལན་བདུན་ལ་སོགས་པས་མཆོད་པ་བྱིན་གྱིས་རླབས། ཛི་ན་ཛིཀ ལན་གསུམ་ལ་སོགས་པས་བརྟན་པར་བྱའོ། །བསྡུ་ན་མཆོད་པའི་བགེགས་བསལ། གཟི་བྱིན་བསྐྱེད་བྱིན་རླབས་ཏེ། གསུམ་པོ་དེ་དག་སྐབས་འདིར་མ་བྱས་ཀྱང་ཆོག་གོ །ཉི་ཤུ་པ་ཕུར་བུས་གདབ་པ་ནི། ལག་པ་གཉིས་ཀའི་གུང་སྲིན་གཉིས་གདུ་བུ་ལྟར་བྱས་ཏེ། རང་རང་ཕྱོགས་ཀྱི་སྤེ་ཤ་ལ་བཙུགས། མཐེའུ་ཆུང་མཛུབ་མོ་གཤིབས་ཏེ་བསྒྲེངས། མཐེ་བོང་རྩེ་སྦྱར་ཏེ་བསྒྲེང་བ་ལས་ལག་མགོའི་རྒྱབ་ནང་དུ་ཕྱོགས་པས་རྩེ་མོ་ཐུར་ལ་བསྟན་པ་ནི་ཕུར་བུའི་ཕྱག་རྒྱ་སྟེ། ཨོཾ་ཀཱི་ལི་ཀཱི་ལ་བཛྲི་བཛྲི་བྷུ་ར་བྷནྡྷ་ཧཱུཾ་ཕཊ། ལན་གསུམ་བཟླས་
པས་བགེགས་ཐམས་ཅད་ལ་ཕུར་བུས་བཏབ་པར་བསམ། ཨོཾ་ཀཱི་ལི་ཀཱི་ལ་བཛྲ་ཧཱུཾ་ཕཊ། ཀྱིས་ཀྱང་བསངས་གཏོར་བྱའོ། །འདི་ཕྱོགས་བཅིང་བའི་ནང་གི་འོག་ཕྱོགས་འཆིང་བ་ཡིན་ཀྱང༌། བགེགས་ལ་ཕུར་བུས་འདེབས་པ་ལ་སོགས་པའི་དགོས་པ་ཁྱད་པར་ཅན་གཞན་ཡོད་པའི་ཕྱིར། ཕྱོགས་བཅིང་བའི་ནང་དུ་མ་བསྡུས་པར་ཕུར་བུས་གདབ་པ་ཞེས་དོན་ཚན་ལ་སོགས་པར་བྱས་སོ། །ཉེར་གཅིག་པ་སྟེང་ཕྱོགས་བཅིང་བ་ནི། ཨོཾ་སུ་སིདྡྷི་ཀ་ར་ཛཱ་ལི་ཏ་ཨ་ནན་ཏ་མུར་ཏ་ཡེ་ཛྭ་ལ་ཛྭ་ལ། བནྡྷ་བནྡྷ། ཧ་ན་ཧ་ན་ཧཱུཾ་ཕཊ། ཅེས་སྤྱི་དང༌། ཨོཾ་ཛྭ་ལ་ཧཱུཾ། ཞེས་ཁྱད་པར་གྱི་སྔགས་ལན་གསུམ་གྱིས་སྟེང་ཕྱོགས་བཅིང་པར་འགྱུར། འདི་སྐབས་བདུག་སྤོས་སྤོར། །ཉེར་གཉིས་པ་འཁོར་ཡུག་བཅིང་བ་ནི། སྤོས་ཆུས་ཕྱོགས་མཚམས་ཐམས་ཅད་དུ་གཏོར་ལ། ཛི་ན་ཛི་ཀ་མང་དུ་བཟླས་པའི་མཐར། བྷྲཱུཾ། ཞེས་ལན་བརྒྱ་རྩ་བརྒྱད་བརྗོད། ཤར་ལ་སོགས་པའི་ཕྱོགས་རྣམས་དང༌། མེ་ལ་སོགས་པའི་ཕྱོགས་མཚམས་ཐམས་ཅད་བཅིངས་པར་གྱུར། །ཉེར་གསུམ་པ་རྭ་བ་བཅིང་བ་ནི། སྔར་གྱི་ཕུར་བུའི་ཕྱག་རྒྱ་དེ་ཉིད་ལས་མཐེ་བོང་གྱེན་དུ་བསྟན་ཞིང་ཁ་ཕྱཻ་བ་ནི། རྭ་བའི་ཕྱག་རྒྱ་སྟེ་དེ་ཉིད་ཕྱོགས་མཚམས་ཀུན་ཏུ་བསྟན་ལ། ན་མོ་རཏྣ་ཏྲ་ཡཱ་ཡ། ན་མ་ཤྩཎྜ་བཛྲ་པཱ་ཎ་ཡེ། མཧཱ་ཡཀྵ་སེ་ན་པ་ཏ་ཡེ། ཏདྱ་ཐཱ། ཨོཾ་ས་ར་ས་ར་བཛྲ། པྲཱ་ཀ་ར་ཧཱུཾ་ཕཊ། རྡོ་རྗེའི་རྭ་བ་བར་འཚམས་མེད་པས་ཕྱོགས་ཐམས་ཅད་བསྐོར་བར་གྱུར། །ཉེར་བཞི་པ་གུར་འབུགས་པ་ནི། རྭ་བའི་ཕྱག་རྒྱ་དེ་ཉིད་ཁ་ཐུར་དུ་བསྟན་ལ་སྟེང་དུ་བསྐོར་བ་དྲ་བའི་ཕྱག་རྒྱ་སྟེ། ན་མོ་རཏྣ་ཏྲ་ཡཱ་ཡ།
ན་མ་ཥྩཎྜ་བཛྲ་པཱ་ན་ཡེ། མཧཱ་ཡཀྵ་སེ་ན་པ་ཏ་ཡེ། ཏདྱ་ཐཱ། ཨོཾ་བི་སྥུ་ར་རཀྵ་བཛྲ་པཱ་ཎི་ཧཱུཾ་ཕཊ། སྟེང་དུ་རྡོ་རྗེའི་གུར་སྲ་ཞིང་འཐུག་ལ་རྩེ་མོ་མཐོན་པོ་གྲུབ་པར་གྱུར། འདི་དག་གི་སྐབས་སུ་གུར་དང་དྲ་བ་དོན་གཅིག་པར་བྱེད་དོ། །ཉེར་ལྔ་པ་མཚམས་གཅོད་པ་ནི། ཨོཾ་ཀཱི་ལི་ཀཱི་ལ་བཛྲི་བཛྲི་བྷུ་ར་བནྡྷ་ཧཱུཾ་ཕཊ། ཀྱི་སྔགས་དང་ཕྱག་རྒྱ་ལན་གསུམ་གྱིས་སྲུང་འཁོར་རྣམས་བྱིན་གྱིས་རླབས་པར་མོས་ཤིང༌། མཐེ་བོས་སོར་མོ་རྣམས་མནན་པའི་ཁུ་ཚུར་བཅིངས་ལ། སྡིགས་འཛུབ་བརྐྱང་སྟེ། དབུས་ན་རྒྱ་ཇེ་ཆེ་ཇེ་ཆེར་ལན་གསུམ་དུ་བསྐོར་ཞིང༌། ན་མཿས་མནྟ་བཛྲ་ཎཱཾ། ཨོཾ་ཏ་ར་ཏ་ར། ཏུ་རུ་ཏུ་རུ། མ་ཊ་མ་ཊ། བནྡྷ་བནྡྷ། སརྦ་ཏྲ་ཨ་པྲ་ཏི་ཧ་ར་ས་སི་མེ་ས་སམྦནྡྷ་ཀུ་རུ་ཀུ་རུ། ཏ་ར་ཏ་ར། ས་མནྟ་བཛྲེ་ས་མནྟ་བཛྲེ། ཀུ་རུ་ཨ་མ་ལེ་ཀ་རུ་ཎ་མ་ཡེ། ཏུ་ཏ་ཡེ་ཏུ་ཏ་ཡེ། བ་ར་བ་ར། ཀ་ར་ཀ་ར། སུ་མི་མ་ས་མནྟ། བི་དྷྭ་ན་ས་ཡ། ཛྭ་ལ་ཡ་སྭཱཧཱ། ལན་གསུམ། རྡོ་རྗེའི་རྭ་བའི་ཕྱི་རོལ་དུ་མེ་དཔུང་འབར་བས་བསྐོར་བར་གྱུར། རྒྱུན་གྱི་ཉམས་ལེན་སྔོན་འགྲོ་བསྡུས་པའི་སྐབས། ཕུར་གདབ་དང་བསངས་གཏོར་དང་མཚམས་གཅོད་པའི་སྔགས་རྒྱ་གཉིས་པ་ཙམ་གྱིས་ཀྱང་ཆོག་པའི་སྐབས་ཡོད་དོ། །ཉེར་དྲུག་པ་འབགས་པ་བསལ་བ་ནི། །སྤོས་ཆུ་ལག་མཐིལ་དུ་བླུག་ལ། ཛི་ན་ཛིཀ་མང་དུ་བཟླས་ཏེ། རང་གི་སྤྱི་བོ་ནས་བསངས་གཏོར་བྱ། །ཉེར་བདུན་པ་གཏན་ལ་འདུག་པ་ནི། རྩ་ཀུ་ཤའི་གདན་སོགས་ལ་འདུག་པར་མོས་ཏེ། ན་མོ་རཏྣ༴ ནས། ཨ་མྲྀ་ཏེ་ཧཱུཾ་ཕཊ། གྱི་བར་བདུད་རྩི་ཐབས་སྦྱོར་བཟླ་བཞིན་དུ།
གཏན་ལ་བསངས་གཏོར་བྱས་ཏེ། སྐྱིལ་མོ་ཀྲུང་གིས་འདུག་གོ།དེ་ཡན་ཆད་གཏན་གཞན་ལ་གནས་པའམ་འགྲེང་སྟཻ་བྱ་བ་ཡིན་ལ། །ཕྱིས་སྒོམ་བཟླས་བྱེད་སའི་གཏན་ལ་འདུག་པའི་མཚམས་ནི་འདིའོ། །ཉེར་བརྒྱད་པ་རྡོ་རྗེ་བཅིང་བ་ནི། སྤྱི་རྒྱུད་ལེགས་གྲུབ་ལས་ཐོག་ཕབ་པའི་ཤིང་ངམ། དུར་ཁྲོད་གྱི་འགལ་དུམ་ལས་བཅོས་པའི་རྡོ་རྗེ་རྩེ་གསུམ་པ་ཙནྡན་དམར་པོས་བསྐུས་པ་དགོས་པར་བཤད་པ་ལས་རྩེ་གསུམ་པ་ཡང་ཕྱོགས་གཅིག་གམ་ཕྱོགས་གཉིས་ཡིན་གྱི་གསལ་ཁ་མེད་པས། གཉིས་ཀ་རུང་བར་མངོན་ལ། འདི་ཁོ་ནར་ནི་མ་ངེས་ཏེ། དཔུང་བཟང་ལས་རྡོ་རྗེའི་རྣམ་གྲངས་དུ་མ་གསུངས་པ་བཞིན། གང་སྐབས་སུ་བབ་པ་ཞིག་བླངས་ཏེ། བཀྲུས་ཤིང་སྦྱངས། གུ་གུལ་གྱིས་བདུགས། ཡུངས་ཀར་གྱི་བྲབས། ལག་ཏུ་བླངས་ཏེ་སྙིང་གར་གཏད་ལ། ཨོཾ་དྷུ་ན་བཛྲ་ཧ། ཞེས་བདུན་ལ་སོགས་པ་མང་དུ་བཟླས་ཏེ། བདག་གི་ལས་ཐམས་ཅད་མཛད་དུ་གསོལ། ཞེས་བརྗོད། དཀྱུས་སུ་དེ་ཙམ་གྱིས་ཆོག་ལ། ཐོག་མའི་རྡོ་རྗེ་རབ་ཏུ་གནས་པ་ལ། །དད་པ་དང་ནི་དམ་ཚིག་གིས། ཞེས་སོགས་ཀྱིས་ཁྲོ་བོ་ལེགས་གྲུབ་སྤྱན་དྲངས་ཏེ། བདེ་བར་གཤེགས་སོ་བཅོམ་ལྡན་འདས༴ སོགས་དང༌། མཆོད་པ་ལྔ་འབུལ། ལེགས་གྲུབ་ཀྱི་སྔགས་སམ། ཨོཾ་དྷུ་ན་བཛྲ་ཧ། ལན་སྟོང་ལ་སོགས་པ་བཟླ། བཅོམ་ལྡན་འདས་བདག་ལ་ཐུགས་བརྩེ་བའི་སླད་དུ། འདི་དག་ཏུ་བཞུགས་ཏེ་བདག་གི་ལས་ཐམས་ཅད་མཛད་དུ་གསོལ། ཞེས་བྱིན་གྱིས་རླབས་པའི་དགོངས་པ་ཞུའོ། །འདི་ལ་སྔགས་བཟླ་བའི་ཚེ་རྡོ་རྗེ་དེ་ཁྲོ་བོ་
ལེགས་གྲུབ་ཀྱི་ཕྱག་ཏུ་བཟུང་པའམ། སྐུའི་མདུན་དུ་བཞག་ནས་བྱིན་གྱིས་རླབས་པར་མོས་པ་ཡིན་ལ། མཐར་རྡོ་རྗེ་ཁྲོ་བོས་རང་ལ་སྩལ་བར་བསམ། དེ་ནས་མཆོད་ཡོན་ཕུལ་ཏེ་ཁྲོ་བོ་གཤེགས་སུ་གསོལ། ཁ་ཅིག་ཁྲོ་བོ་རྡོ་རྗེ་ལ་ཐིམ་པར་བསམ་ནས། གཤེགས་གསོལ་མི་བྱེད་པ་ནི། བྱ་བའི་རྒྱུད་ཀྱི་ཚུལ་ལས་འདས་པའོ། །ཉེར་དགུ་པ་གདུབ་བུ་གདགས་པ་ནི། སྔ་རོལ་ནས་རས་སྐུད་གཙང་མ་སུམ་སྒྲིལ་མདུད་པ་གསུམ་བོར་བ་ལ། བུ་ཏོ་ཙིའི་འབྲུ་གཅིག་བརྒྱུས་པའི་ལག་གདུབ་སྤྱན་མའི་སྔགས་ལན་བརྒྱ་བཟླས་པས་བྱིན་གྱིས་རླབས་པ་དེ་སྐབས་འདིར་གཡས་ཀྱི་འཁྲིགས་མ་ལ་སྐོན་ཏེ། ཨོཾ་རུ་རུ་སྥུ་རུ་ཛྭ་ལ་ཏིཥྛ་སིདྡྷི་ལོ་ཙ་ནི་སརྦ་ཨརྠ་སཱ་དྷ་ནེ་སྭཱཧཱ། ལན་བདུན། ཨོཾ་ཀུ་ལནྡྷ་རཱི་བནྡྷ་བནྡྷ་ཧཱུཾ་ཕཊ། ལན་བདུན་ལ་སོགས་པས་བསྔགས་ཏེ། འདིས་ནི་བགེགས་ཀྱིས་མི་རྫི་བ་དང༌། དངོས་གྲུབ་མྱུར་བ་དང༌། གཙང་བྱེད་དུ་བཤད་དོ། །སུམ་བཅུ་པ་བསང་བྱེད་བཟུང་བ་ནི། ཀུ་ཤའམ་མ་རྙེད་ན། དགེ་ཞིང་བཀྲ་ཤིས་པའི་རྩྭ་སྔོན་པོ་སྲིན་ལག་ལ་བཅིངས་ཏེ། ཛི་ན་ཛི་ཀ་ཉེར་གཅིག་སོགས་མང་དུ་བཟླའོ། །སོ་གཅིག་པ་ཟེའུ་ཁ་བཅིང་བ་ནི། ཨོཾ་རཀྵ་རཀྵ་མཾ། སརྦ་བུདྡྷ་ཨ་དྷིཥྛཱ་ན་ཨཏྨ་ཙི་བ་ར་སྭཱཧཱ། ལན་གསུམ་ལ་སོགས་པ་བཟླས་ཏེ་ཟེའུ་ཁ་བཅིང་པའོ། །དེ་ལ་ཟེའུ་ཁ་ནི་འགྲུབ་ན་རིན་པོ་ཆེའམ་དར་རས་ལ་སོགས་པ་ལས་བཅོས་པའི་དཔྲོག་ཞུ་ཡིན་ལ། གཞན་དུ་ན་ཐོད་བཅིང་པའམ་དར་རས་དམར་པོའམ་སེར་པོའམ་དཀར་པོའི་གཙུག་ཏོར་གྱི་གཟུགས་བརྙན་བཅིངས་ཀྱང་རུང༌། སྐྲ་རིང་པོ་ཅན་ཡིན་ན་སྐྲ་ཉིད་ཐོར་ཚུགས་སུ་བཅིང་བའམ། གཙུག་ཕུད་ཅན་གྱི་གཙུག་ཕུད་འཆིང་བའི། སྐྲ་བྲེགས་པས་ནི་ཐ་ན་དར་རས་
དམར་སེར་དཀར་པོ་ཕྲ་མོ་རྣ་ལྟག་ཏུ་བཅིངས་པས་ཀྱང་འགྲུབ་བོ། །སོ་གཉིས་པ་བདག་གི་དེ་ཁོ་ན་ཉིད་སྒོམ་པ་ནི། མཐའ་ཡས་པའི་འགྲོ་བ་ཐམས་ཅད་སྡུག་བསྔལ་རྒྱུ་དང་བཅས་པ་ལས་བདག་གིས་བསྒྲལ་ཏེ། ཆོས་ཀྱི་དབྱིངས་བྱང་ཆུབ་མཆོག་ལ་བདག་གིས་དགོད་པར་བྱའོ། །ཕྱི་རོལ་དུ་སྣང་བ་འདི་ཐམས་ཅད་བག་ཆགས་ཀྱི་སྟོབས་ལས། ནང་གི་ཤེས་པ་ཉིད་དེ་ལྟར་སྣང་བར་ཟད་ཀྱི། ཕྱི་རོལ་དུ་སྣང་བ་ནི་རྡུལ་ཕྲ་རབ་ཙམ་ཡང་མེད་དོ། །དེ་ལྟར་ན་ཁམས་གསུམ་པོ་འདི་དག་ནི་སེམས་ཙམ་སྟེ། སེམས་དེ་ཡང་དམིགས་པ་མེད་པ་ནམ་མཁའ་ལྟ་བུའོ། །ཐམས་ཅད་ཀྱི་རང་བཞིན་སྤྲོས་པ་དང་བྲལ་བའི་ཡེ་ཤེས་གཙང་བ་དང༌། བདེ་བ་དང་རྟག་པ་དང་བདག་དམ་པའི་ཕ་རོལ་དུ་ཕྱིན་པ་སངས་རྒྱས་ཀྱི་ཆོས་མཐའ་ཡས་པས་ཉེ་བར་བརྒྱན་པའོ། །ཞེས་བརྗོད་ཅིང་དེའི་དོན་རིང་དུ་བསམ་པར་བྱའོ། །སྐབས་འདི་དག་ཏུ་ཆེས་ཆེ་བ་མང་པོ་དག་ཀྱང་རྣམ་འཇོམ་ཀྱི་འགྲེལ་པར་ལུང་དྲངས་པའི་ལྷ་དྲུག་སྟོན་བྱེད་ཀྱི་ཚིག་དང༌། བསམ་གཏན་ཕྱི་མའི་རྒྱུད་དང༌། སངས་རྒྱས་གསང་བ་སོགས་ཀྱིས་བཤད་པ་ལ་བརྟེན་ནས། བྱ་བའི་རྒྱུད་ལ་བདག་བསྐྱེད་དགོས་ཚུལ་བྱེད་ཅིང་ཚད་ལྡན་ཡིན་མིན་ལ་མི་ལྟ་བར་ལུང་རྙེད་ཚད་འདྲེན་ལ། རིགས་པ་ཡང་དག་གིས་མ་ལང་བར་ལྟར་སྣང་གི་དམག་དཔུང་མང་པོ་སྦྲོན་པར་བྱེད་མོད་ཀྱི། ཁས་སླངས་སྐྱོ་མ་སྔ་བཙན་ཐལ་ཆེས་པ་ཁོ་ན་ལས་དོན་དང་ལྡན་པ་མ་ཡིན་ཏེ། བསམ་གཏན་ཕྱི་མ་རྡོ་རྗེ་གཙུག་གཏོར་གྱི་རྒྱུད་ཕྱི་མ་ཡིན་པར་བཤད་ཀྱང༌། རྡོ་རྗེ་གཙུག་ཏོར་གྱི་རྒྱུད་དེ་བྱ་རྒྱུད་ཡིན་པའི་རྒྱུ་མཚན་མེད་ཅིང༌། བོད་ན་དེའི་རྩ་
རྒྱུད་དངོས་སུ་ཡང་མེད་པས་གཙུག་ཏོར་གྱི་རྒྱུད་ཕྱི་མ་ཡིན་པ་ཅི་གཞན་ངོར་རྩོད་པའི་སྐབས་སུ་རྒྱུ་མཚན་དུ་མི་འགྱུར་བ་དང༌། ངེས་པར་ན་བསམ་གཏན་ཕྱི་མ་ནི་སྤྱོད་རྒྱུད་ཡིན་ཏེ། དོན་འདི་ལ་རྣམ་སྣང་མངོན་བྱང་དང་འཆད་ཚུལ་གཅིག་ཁོ་ནར་ཡོད་པའི་ཕྱིར་རོ། །རྣམ་འཇོམས་ཀྱི་འགྲེལ་པར་དྲངས་པའི་ལུང་དེ་ཡང་ད་གདོད་བརྟག་དགོས་པ་ཡིན་གྱི་ད་ལྟ་ངོམ་དུ་རུང་བའི་ལུང་མ་ཡིན་ལ། སངས་རྒྱས་གསང་བ་རྒྱུད་སྡེ་བཞིའི་གྲངས་ངེས་དབྱེ་བ་མི་མཛད་ཅིང༌། རྒྱུད་ཚིག་དངོས་བསྟན་ལ་བདག་བསྐྱེད་སྟོན་མི་སྟོན་གཉིས་ཡོད་ཀྱང༌། གདུལ་བྱའི་བློ་ཚོད་དང་བསྟུན་ནས་གཅིག་གིས་གཅིག་ཤོས་ལ་ཁ་འགེངས་རྒྱུ་ཡིན་ཞེས་བྱ་སྤྱོད་གཉིས་རྒྱུད་སྡེ་གཅིག་ཏུ་འདོད་པའི་ལུགས་དེ་དང༌། རྒྱུད་སྡེ་བཞིར་ཕྱེ་ནས་བྱ་སྤྱོད་སོ་སོར་འདོད་པའི་ལུགས་དེ་ནམ་ཡང་མི་འགྲིག་པས། སངས་རྒྱས་གསང་བས་བཤད་པ་རྣམས་སྐབས་འདིར་ལུང་ཁུངས་སུ་མི་འགྱུར་རོ། །མདོར་ན་བྱ་རྒྱུད་ཡིན་ངེས་རྣམས་ནས། བདག་བསྐྱེད་ཟུར་ཙམ་ཡང་མ་གསུངས་ལ། དམ་ཚིག་པ་བསྐྱེད་པ་ལ་ཡེ་ཤེས་པ་བསྲེ་བའི་ཆོ་ག་སོགས་ཀྱང་ཡེ་མ་བསྟན་ཞིང༌། དེར་མ་ཟད་ལུང་ཁུངས་ཀྱི་གཙོ་བོ་འདའ་བར་མི་རུང་བའི་ངེས་པ་ཅན་ནི། ཡེ་ཤེས་རྡོ་རྗེ་ཀུན་ལས་བཏུས་པའི་རྒྱུད་ལས། བྱ་རྒྱུད་ལ་བདག་བསྐྱེད་ཡེ་མེད་པར་གསུངས་པ་འདི་བྱ་རྒྱུད་རང་སྐད་དུ་བདག་བསྐྱེད་མེད་པར་འདོད་པ་ལ་བསྒྲུབ་བྱེད་བླ་ན་མེད་པ་དང༌། ཡོད་པར་འདོད་པ་རྣམས་ལ་བཟློག་ཏུ་མེད་པའི་གནོད་བྱེད་སྟོབས་ཆེན་པོ་སྟེ་རེ་ཞིག་འདི་ནི་ལུང་གི་སྒོ་ནས་སོ། །རིག་པའི་སྒོ་ནས་ཀྱང་བྱ་རྒྱུད་རང་སྐད་ལ་བདག་བསྐྱེད་ཡོད་ཅིང༌། བདག་བསྐྱེད་ཀྱི་ལྷ་དྲུག་དང༌། བསམ་གཏན་ཕྱི་
མ་ནས་བཤད་པའི་བཟླས་བརྗོད་དང་བསམ་གཏན་གྱི་རྣལ་འབྱོར་དེ་དག་ཡོད་ན་ནི། བྱ་སྤྱོད་གཉིས་ཀྱི་མཐོ་དམའི་དབྱེ་བ་ལ་ཁ་བཤད་ཀྱི་སྤྲོས་པ་ཇི་ཙམ་མཁས་ཀྱང་ཉམས་ལེན་གྱི་སྐབས་སུ་མཆོག་དམན་དང་བཟང་ངན་གྱི་དབྱེ་བ་ཅུང་ཟད་ཀྱང་མེད་པར་ཐལ་བར་འགྱུར་ཞིང༌། དེ་ཡང་འདོད་ན་རྒྱུད་སྡེ་བཞི་དང་ལྔ་དང་དྲུག་ལ་སོགས་པའི་དབྱེ་བ་བྱེད་པ་བཞད་གད་ཀྱིས་གནས་སུ་འགྱུར་རོ། །འཕྲོས་པས་ཆོག་གོ །སོ་གསུམ་པ་རྟེན་གྱི་དཀྱིལ་འཁོར་བསྐྱེད་པ་ནི། མཎྜལ་ལམ་འབྲས་བྲིས་སྐུ་བཞུགས་པའི་གནས་ལ་ཉེ་བར་དམིགས་ནས་འདི་སྐད་ཅེས་བརྗོད་དེ། ཡང་དག་པའི་སྨོན་ལམ་སྟོབས་ལས་ས་ཕྱོགས་འདིར་རིན་པོ་ཆེ་དུ་མ་ལས་གྲུབ་པའི་ཞིང་ཁམས་ས་གཞི་ཡངས་ཤིང་རྒྱ་ཆེ་བ་གསེར་གྱི་བྱེ་མས་བརྡལ་བར་གྱུར། ཨོཾ་ཨ་ཙ་ལ་བཱི་ར་ཧཱུཾ་སྭཱཧཱ། དེའི་དབུས་སུ་འོ་མའི་རྒྱ་མཚོ་ཆེན་པོ་ཉ་ལྕིབས་ལ་སོགས་པའི་སྐྱོན་དང་བྲལ་བ། པདྨ་དང་ཨུཏྤལ་ལ་སོགས་པའི་མེ་ཏོག་གིས་བརྒྱན་པ། ཡིད་དུ་འོང་བའི་ཉ་དང་འདབས་ཆགས་ལ་སོགས་པ་སྣ་ཚོགས་པས་གང་བར་གྱུར། ཨོཾ་བི་མ་ལ་དྷ་ཧཱ་ཧཱུཾ། དེའི་དབུས་སུ་རི་རབ་རིའི་རྒྱལ་པོ་གྲུ་བཞི་པ། །ངོས་བཞིན་ནས་གསེར་དང་དངུལ་དང༌། ཨིནྡྲ་ནཱི་ལ་དང༌། པདྨ་རཱ་ག་དང་བཅས་པའི་བང་རིམ་གྱིས་བརྒྱན་པ། །ཐ་མ་མཐའ་དག་ཏུ་དཔག་བསམ་གྱི་ཤིང་ལེགས་པར་བསྐྲུན་པ། རི་རབ་དེའི་སྟེང་དུ་དེ་བཞིན་གཤེགས་པ་ཐམས་ཅད་ཀྱི་བྱིན་གྱིས་བརླབས་པའི་ཆོས་ཀྱི་དབྱིངས་ཀྱི་ཕོ་བྲང་རྡོ་རྗེ་འཛིན་ཐམས་ཅད་ཉེ་བར་འདུ་བ། དེ་
བཞིན་གཤེགས་པ་ཐམས་ཅད་ལྷག་པར་དགྱེས་པས་རྣམ་པར་རོལ་པ། རིན་པོ་ཆེའི་རྒྱལ་པོ་རྣམ་པ་སྣ་ཚོགས་ཀྱི་རྒྱུ་ལས་བྱུང་བ། གཞལ་མེད་ཁང་རྡོ་རྗེ་རིན་པོ་ཆེའི་རྩེ་མོ་མཐོན་པོ་ཅན། གྲུ་བཞི་པ། སྒོ་བཞི་པ། རྟ་བབས་བཞིས་བརྒྱས་པ། བཀྲ་བ་བལྟ་ན་སྡུག་པ་ཤིན་ཏུ་རྣམ་པར་ཕྱེ་བ་རིན་པོ་ཆེའི་ཐེམ་སྐས་བཞི་དང་བཅས་པའི་ནང་གི་དབུས་སུ་པདྨའི་སྡོང་པོ་རིན་པོ་ཆེ་དུ་མས་བརྒྱན་པ། རིན་པོ་ཆེ་སྣ་ཚོགས་པའི་འདབ་མ་ཅན། གསེར་གྱི་ཟེ་བ་དང་པུ་ཤ་ར་གའི་ཟེའུ་འབྲུས་བརྒྱན་པ། སྙིང་པོའི་ཐོག་ལ་དངུལ་གྱི་རི་མོས་བསྐོར་བ། དཔག་ཚད་དུ་མའི་ཁྱོན་ཅན། རི་རབ་ཀྱི་དབུས་བརྡོལ་ནས་བྱུང་བའི་ཟེའུ་འབྲུའི་སྙིང་པོར་རྡོ་རྗེ་འབྲེང་བུས་གདོང་ནས་སྤྲས་པའི་སེང་གེའི་ཁྲི་དང་དེའི་སྟེང་དུ་པདྨའི་གདན་ལྟེ་བར་ཟླ་བའི་དཀྱིལ་འཁོར་གྱི་མཛེས་པ། གཞན་ཡང་ལྷ་རྣམས་ཀྱི་གདན་དང་བཅས་པ་དང༌། སྟེང་དུ་རིན་པོ་ཆེའི་བླ་བྲེ་དག་ཀྱང་སྐད་ཅིག་གིས་བྱུང་བར་གྱུར། ཞེས་དང༌། རྡོ་རྗེ་ཐལ་མོ་སོར་མོ་གཡས་པ་སྟེང་དུ་ཡོད་པ་བྱས་ལ། ན་མཿསརྦ་ཏ་ཐཱ་ག་ཏཱ་ནཱཾ་སརྦ་ཐཱ་ཨུངྒ་ཏེ། སྥ་ར་ཎ་ཨི་མཾ་ག་ག་ན་ཁཾ་སྭཱཧཱ། ལན་གསུམ་མོ། །སོ་བཞི་པ་ལྷ་སྤྱན་དྲངས་པ་ནི། སྣོད་གཙང་མར་སྤོས་ཆུ་གཙང་མ་མེ་ཏོག་དཀར་པོ་དང་བཅས་པ་ནི་རྩ་བའི་མཆོད་ཡོན་ཏེ། འདི་ནི་ངེས་པར་བཤམ་དགོས་ལ། གཞན་ཡང་འགྲུབ་ན། ཞི་བ་དང་དངོས་གྲུབ་རབ་ལ་ཛ་བའི་འབྲུ་དང་འོ་མ། རྒྱས་པ་དང་དངོས་གྲུབ་འབྲིང་ལ་ཏིལ་དང་ཞོ། ཐུན་མོང་དུ་འབྲས་ཡོས་སོ། །དེ་དག་སྦྱར་བའི་མཆོད་ཡོན་རྩ་ཀུ་ཤ་དང་བཅས་པའང་དགོས་ན་
དེ་ནི་ལོགས་སུ་བཤམ་པ་ཡིན་གྱི། སྤོས་ཆུ་གཙང་མའི་སྟེང་དུ་དེ་དག་ལྡུགས་པ་ནི་མ་ཡིན་ནོ། །མཆོད་ཡོན་དེ་དག་སྤོས་ཀྱི་བདུགས། རིགས་པའི་རྒྱལ་པོ་བྷྲཱུཾ་བདུན་དང༌། རིགས་ཀྱི་སྙིང་པོ་ཛི་ན་ཛིཀ་བདུན་གྱིས་བྱིན་གྱིས་རླབས་ཅིང༌། ཨོཾ་ཥྟོཾ་བནྡྷ་སྭཱཧཱ། ཞེས་པ་དེ་གཞིན་གཤེགས་རིགས་ཀྱི་ལས་ཐམས་ཅད་པ་མང་ཉུང་ཇི་ལྟར་འོས་པས་ཀྱང་བསྔགས་ལ། མཆོད་ཡོན་གཙང་མ་དེ་མདུན་གྱི་དབུས་སུ་བཞག །གཡོན་དུ་ཁྱད་པར་གྱི་མཆོད་ཡོན་འབྲས་ཡོས་ཅན་དང༌། གཡས་སུ་བདུག་སྤོས་རྣམས་བཤམས་ཏེ། ན་མོ་རཏྣ་ཏྲ་ཡཱ་ཡ། ཞེས་ལན་གསུམ་གྱིས་ཕྱག་བཙལ། རྡོ་རྗེ་ཐལ་མོ་ཁ་ཕྱེ་ལ། མཛུབ་མོ་གཉིས་རྩེ་མོ་སྦྱར་ཏེ་བསྒྲེངས། མཐེ་བོང་གཡབ་ཅིང༌། དད་པ་དང་ནི་དམ་ཚིགས་གིས། །ཚུར་གཤེགས་ཚུར་གཤེགས་བཅོམ་ལྡན་འདིར། །བདག་གི་མཆོད་ཡོན་འདི་བཞེས་ལ། །མཆོད་པས་བདག་ལ་དགེས་པར་མཛོད། བྷྲཱུཾ་ཛི་ན་ཛིཀ །ཤཱཀྱ་མུ་ནེ་ཨེ་ཧྱཻ་ཧི། ཞེས་ལན་གསུམ་ལ་སོགས་པར་གསོལ་བ་འདེབས་པས་ནན་ཏན་གྱིས་སྤྱན་དྲངས། དེ་ཡང་ཕྱག་རྒྱ་སྤྱི་བོའི་ཐད་དུ་བྱས་ཏེ། ལན་དང་པོ་ཕྱག་རྒྱ་ཁོ་ན་བྱ། གཉིས་པ་ལ་ཕྱག་རྒྱ་དེས་མཆོད་ཡོན་གཙང་མ་ཐོགས་ཏེ་སྤྱི་བོའི་ཐད་ནས་བཟེད་ཞལ་དུ་འབུལ། གསུམ་པ་ལ་རྫས་སྦྱར་བའི་མཆོད་ཡོན་ཐོག་ཏེ་འབུལ། རྫས་རྣམས་དངོས་སུ་མེད་ན། ཆུ་གཙང་ངམ་མེ་ཏོག་ཙམ་དང་བཅས་པ་འབུལ་ཞིང༌། ལྷག་མ་དམིགས་པ་ཁོ་ནས་འགྲུབ་བོ། །དེ་ཡང་ལྷ་བཞེངས་པ་ལ་རང་ཡང་འགྲེང་བ་དང༌། བཞུགས་པ་ལ་འདུག་པ་དང༌།
གཟུར་བ་ལ་གཟུར་བས་འབུལ་བར་བཤད་ཀྱང་དངོས་སུ་མ་འགྲུབ་ན་དམིགས་པས་ཆོག་གོ །སོ་ལྔ་པ་བཞུགས་སུ་གསོལ་བ་ནི། དེ་ནས་པདྨའི་རིགས་ཀྱི་དམ་ཚིག་གི་ཕྱག་རྒྱ་ཁ་ཕྱེ་བའི་ཚུལ་ཅན་གྱི། བཅོམ་ལྡན་ཐུགས་རྗེས་བྱོན་པ་ལེགས། །བདག་ཅག་བསོད་ནམས་སྐལ་པར་ལྡན། །བདག་གི་མཆོད་ཡོན་བཞེས་ནས་ཀྱང༌། །མཆོད་པས་བདག་ལ་དགྱེས་པར་མཛོད། ཨོཾ་ཀ་མ་ལ་ཡ་སྭཱཧཱ། ཡང་ཕྱག་རྒྱ་དེ་དང་འདྲ་བ་ལས། གུང་མཛུབ་སྲིན་གསུམ་རྡོ་རྗེ་རྩེ་ལྔ་ལྟ་བུར་བྱས་ལ། བདེ་བར་གཤེགས་སོ་བཅོམ་ལྡན་འདས། །ཚུར་གཤེགས་འདིར་ནི་བཞུགས་སུ་གསོལ། །བདག་གི་མཆོད་ཡོན་བཞེས་ནས་ཀྱང༌། །ཐུགས་རྗེས་ཐུགས་དཔག་མཛད་དུ་གསོལ། །སོགས་ཀྱི་མཐར། ཨོཾ་བཛྲ་ཨཱ་ས་ནི་ཧཱུཾ་ཕཊ། པདྨ་ཁ་ཕྱེ་ལས། སོར་མོ་དབུས་མ་གཉིས་གཤིབས་ཏེ་བསྒྲེང་བ་དང༌། བདག་དང་འགྲོ་ལ་ཐུགས་རྩེའི་ཕྱིར། །ཉིད་ཀྱི་རྫུ་འཕྲུལ་མཐུ་ཡིས་ནི། །ཇི་སྲིད་མཆོད་པ་བདག་བགྱིད་ན། །དེ་སྲིད་བཅོམ་ལྡན་བཞུགས་སུ་གསོལ། །ཨོཾ་བཛྲ་ཀ་ཧཱུཾ་ཕཊ། ཕྱག་རྒྱ་གསུམ་པོ་དེ་ལ་ནི། པདྨའི་གདན་དང༌། རྡོ་རྗེའི་གདན་དང༌། དཔའ་བོའི་གདན་ཞེས་གྲགས་སོ། །དེ་ནས། ཡེ་ཤེས་དཀྱིལ་འཁོར་གྱི་ལྷ་ཚོགས་ཐམས་ཅད་སོ་སོའི་རྫུ་འཕྲུལ་གྱི་འབྱོར་པ་དཔག་ཏུ་མེད་པ་དང་བཅས་ཏེ་ནམ་མཁའི་ལམ་ལས་གཤེགས་ནས་ཐར་པ་ཆེན་པོའི་ཁང་བཟང་གཞལ་མེད་ཁང་གི་ཆབ་སྒོ་ནས་ཡོངས་སུ་བྱོན་ཏེ། རང་རང་སོ་སོའི་གདན་ལ་བཞུགས་པར་གྱུར་པ་ནི་དབུས་ཀྱི་པདྨ་ཆེན་པོའི་སྟེང་གི་རྡོ་རྗེ་རིན་པོ་ཆེའི་བཞུགས་ཁྲི་ལ་པདྨ་དང་ཟླ་བའི་སྟེང་དུ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དཔལ་རྒྱལ་བ་ཤཱཀྱ་ཐུབ་པ་དམ་ཚིག་གསུམ་བཀོད་པའི་རྒྱལ་པོ་
སྐུ་མདོག་སེར་པོ་བཙོ་མའི་གསེར་གྱི་ལྷུན་པོ་ལ་ཉི་མ་འབུམ་དུས་གཅིག་ཏུ་ཤར་བ་ལྟར་གཟི་བརྗིད་ཀྱི་ཕུང་པོ་མཐའ་ཡས་པ་རབ་ཏུ་འབར་བ། ཞབས་རྡོ་རྗེའི་སྐྱིལ་མོ་ཀྲུང་གིས་བཞུགས་ཤིང༌། ཕྱག་གཉིས་ཐུགས་ཀར་ཆོས་ཀྱི་འཁོར་ལོའི་ཕྱག་རྒྱ་མཛད་པས་འགྲོ་བ་ཐམས་ཅད་ལ་ཐར་པའི་ལམ་ཡང་དག་པར་སྟོན་པ། དབུའི་གཙུག་ཏོར་ལྟ་བར་མི་མངོན་པ་དང་སྨིན་མཚམས་མཛོད་སྤུ་དུང་ལྟར་འཁྱིལ་བ་ལ་སོགས་པ་སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་དང༌། དཔེ་བྱད་བཟང་པོ་བརྒྱད་ཅུ་ཡོངས་སུ་རྫོགས་པ་འདོད་ཆགས་དང་བྲལ་བ་ཆེན་པོའི་ཆ་བྱད་ཅན་སྐུ་ལ་ན་བཟའ་ཆོས་གོས་རྣམ་གསུམ་གསོལ་བ། འོད་ཟེར་གྱི་ཚོགས་དཔག་ཏུ་མེད་པ་སྤྲོ་བས་ཕྱོགས་བཅུའི་ཞིང་ཁམས་མ་ལུས་པ་རྒྱས་པར་འགེངས་པ། མ་ལུས་ཤིང་ལུས་པ་མེད་པའི་སྤྲུལ་པའི་ཚོགས་མཐའ་ཡས་པ་འཆར་བ། བསམ་གྱིས་མི་ཁྱབ་ཅིང་ལྷུན་གྱིས་གྲུབ་པའི་སྐུ་དང་གསུང་དང་ཐུགས་དང་ཡོན་ཏན་དང་འཕྲིན་ལས་ལ་མངའ་དབང་བསྒྱུར་བའི་ཚུལ་གྱིས་བཞུགས་པར་གྱུར། བཅོམ་ལྡན་འདས་ཀྱི་ཁྲིའི་གཡས་ལོགས་སུ་འཕགས་པ་རྡོ་རྗེ་འཛིན་ཆེན་པོ་གསེར་མདོག་རལ་པའི་ཅོད་པན་ཅན་ན་བཟའ་སེར་པོ་གྱོན་པ། ཕྱག་གཡས་པས་རྡོ་རྗེ་སེར་པོ་འཛིན་ཞིང༌། གཡོན་པ་གདན་ལ་བརྟེན་པ། འདི་ཡང་ན་གཡས་རིན་པོ་ཆེ་དང༌། གཡོན་ལྕགས་ཀྱུ་འཛིན་པ་ཡང་རུང༌། ལྕགས་ཀྱུ་ཅིག་ཕྱག་གཉིས་ཀར་གྱིས་འཛིན་པར་བྱས་ཀྱང་
ཆོག་གོ །གཡོན་ལོགས་སུ་འཕགས་མ་རྡོ་རྗེ་འཛིན་ལྗང་ཁུའམ་སེར་མོ་དོང་ཀའི་མེ་ཏོག་དང་ཁ་དོག་མཚུངས་པའི་བླ་གོས་ཅན་པུས་མོ་ཕྱོགས་གཅིག་གདན་ལ་བཙུགས་པའི་ཚུལ་གྱི་བཞུགས་ཤིང༌། ཕྱག་གཉིས་ཐལ་མོ་སྦྱར་བས་རྡོ་རྗེ་འཛིན་པའོ། །ད་ལྟའི་རྒྱུད་ལས། འདི་ལྷ་ཕོ་ཡིན་པ་ལྟར་བཤད་པ་ནི། རྒྱ་སྐད་དུ་བཛྲ་དྷརཱ་ཞེས་པའི་ར་ཡིག་གི་རིང་ཆ་མོ་རྟགས་ཡིན་ཡང་ཡིག་གེ་ནོར་ཏེ་རིང་ཆ་ཆད་པ་ལས་བསྒྱུར་བའི་སྐྱོན་ཡིན་ཏེ། འདིར་ལྷ་ལྔ་ལ་དེ་བཞིན་གཤེགས་པ་དང༌། རིགས་ཀྱི་ཡུམ་དང༌། བྱང་ཆུབ་སེམས་དཔའ་དང༌། ཕོ་ཉ་དང་ཕྱག་སྙན་རྣམས་ཚང་དགོས་པའི་ཕྱིར། འདི་ལྷ་མོར་མ་བྱས་ན། ཐུན་མོང་མ་ཡིན་པའི་རིགས་ཀྱི་ཡུམ་མ་ཚང་བར་འགྱུར་བས་སོ། །རྡོ་རྗེ་འཛིན་ཆེན་པོའི་མདུན་ངོས་འོག་གི་ཕྱོགས་སུ་ཁྱིའུ་མཐའ་མེད་པ། ཁོ་ར་ཁོ་ཡུག་ཏུ་མེ་ལྕེ་འབར་བ་ཨ་ཤོ་ཀ་དམར་བའི་མེ་ཏོག་རྒྱས་པ་ལྟ་བུའི་མདོག་ཅན་ཁྲོ་ཞིང་འཁྲུགས་ལ་ནོར་བུའི་ཟུར་ཕུད་ཀྱིས་བརྒྱན་པ། སྦྲུལ་དཀར་པོའི་ཚངས་སྐུད་འཆང་བ། ཕྱག་གཡས་ན་གྲི་གུག་དང༌། གཡོན་ན་ཞགས་པ་འཛིན་ཞིང༌། སྤྱན་གསུམ་མཆེ་བ་གཙིགས་པ་ལ་སོགས་པ་ཁྲོ་བོའི་མཚན་ཉིད་རྫོགས་ཤིང་དར་དང་རིན་པོ་ཆེས་བརྒྱན་པའོ། །འདི་ཡང་ན་སྟག་ལྤགས་ཀྱི་སྨད་དཀྲིས་དང༌། རྒྱན་གཞན་རྣམས་ཀྱང་སྦྲུལ་རྒྱན་ཅན་དུ་བྱའོ། །རྡོ་རྗེ་འཛིན་མའི་མདུན་གྱི་འོག་ཕྱོགས་སུ་བུ་མོ་མཐའ་ཡས་མ་ཞེས་བྱ་བའི་ཕོ་ཉ་མོ་གཞོན་ཞུ་ལང་ཚོ་ཅན་སྐུ་མདོག །ནག་མོའམ། ལྗང་ཁུའམ། སྔོ་སངས་པྲི་ཡཾ་ཀུའི་མེ་ཏོག་ལྟ་བུ་དབུ་སྐྲ་ནག་པོ་ཟུར་ཕུད་གཅིག་པ། དར་སྔོན་པོའི་གོས་ཅན་ཕྱག་
ན་མེ་ཏོག་གི་འཕྲེང་བརྒྱུད་ཐོགས་པ། རྒྱན་ཐམས་ཅད་ཀྱིས་བརྒྱན་པ། སྒེག་པ་དང་བཅས་པས་འཁོར་གྱི་དཀྱིལ་འཁོར་ལ་ལྟ་བ། དེ་ཐམས་ཅད་ཀྱང་རིན་པོ་ཆེའི་དང་པདྨའི་གདན་ལ་གནས་པའོ། །ཕྱི་རོལ་ཕྱོགས་ཐམས་ཅད་དུ་སངས་རྒྱས་དང་བྱང་ཆུབ་སེམས་དཔའ་དང་ཉན་ཐོས་དང་རང་རྒྱལ་དང་ལྷའི་མཆོག་རྣམས་ཀྱིས་ཡོངས་སུ་བསྐོར་ཏེ་བཞུགས་པར་གྱུར། །སོ་དྲུག་པ་དམ་ལ་བཞག་པ་ནི། སྤྱིའི་ཆོ་ག་ལ་གཡས་པའི་མཐེ་བོས་མཐེ་ཆུང་མནན་པ། རྡོ་རྗེ་རྩེ་གསུམ་པ་འདྲ་བ། ཀི་ལི་ཀཱི་ལིའི་དམ་ཚིག་རྡོ་རྗེ་བསྟན་ཏེ། ཤཾ་ཀ་རེ་ས་མ་ཡ་སྭཱཧཱ། ཞེས་པ་དང༌། འདི་ཉིད་ཀྱི་དགོས་ཆོས་ལ་ཕྱག་འཚལ་བའི་ཚུལ་དམ་ཚིག་གི་ཐལ་མོ་ནི་རྩ་བའི་ཕྱག་རྒྱ་སྟེ། ན་མཿསརྦ་བུདྡྷ་བོ་དྷཱི་སཏྭཱ་ནཱཾ། སྟུ་སིདྡྷི་སཱ་དྷ་ནི་ཨ་གྲ་ཀཱ་རུ་ཎ་བ་ར་རེ་ཏྲཱ་ཡི་ཏྲཱ་ཡི་ཨཱ་ཏི་བ་ལེ་ན་མོ་སྟུ་བ་ར་རཱ་ཡི་གྷེ་བྷྱོ་མ་ཧཱ་ཀྲེ་བེ་བྷྱཿསྭཱཧཱ། ཞེས་པ་རྩ་བའི་ཕྱག་རྒྱའི་སྔགས་ཀྱི་གཙོ་བོ་དང༌། ཡང་སྤྱི་འགྲོའི་ཆོ་ག་ནི། ཁུ་ཚུར་བཅིངས་པ་གཤིབས་ཏེ་མཐེ་བོང་གཉིས་སྦྱར་ཏེ་བསྐྱང་བ་དང༌། ཛི་ན་ཛིཀ་ཞེས་པས་འཁོར་གྱི་ལྷ་ཕོ་རྣམས་དང༌། ཕྱག་འཚལ་བའི་ཐལ་མོ་ལས་མཐེ་བོང་གཉིས་ནང་དུ་བཅུག །མཛུབ་མོ་གཉིས་གུང་མོའི་ཚིགས་སྟེང་མར་སྦྱར། ཨོཾ་རུ་རུ་སྥུ་རུ༴ སོགས་ཀྱིས་འཁོར་ལྷ་མོ་རྣམས་དམ་ལ་བཞག་པ་སྟེ། སྔགས་དེ་དག་ཀྱང་ལན་གསུམ་ནས་བདུན་གྱི་བར་ཇི་ལྟར་འོས་པའོ། །དེ་ནས་དམ་ཚིག་ཆེན་པོའི་ཕྱག་རྒྱ་ཞེས་བྱ་བ། རྡོ་རྗེ་ཁུ་ཚུར་གཉིས་ཁ་སྤྲད་པ་ལས། གུང་མོ་དང་མཛུབ་མོ་རྡོ་རྗེ་རྩེ་གསུམ་པ་ལྟར་བྱས། མཐེ་བོང་གཉིས་གུང་མོའི་གློ་ལ་སྦྱར་བ་སྟེང་འོག་དང་ཕྱོགས་ཀུན་ཏུ་བསྐོར་ཞིང༌། ཨོཾ་ཥྟོཾ་བནྡྷ་སྭཱཧཱ། ཞེས་ལན་གསུམ་བརྗོད་པས།
སྔ་ན་གནས་པ་དང༌། ཕྱི་ནས་འབྲངས་པའི་བགེགས་ཐམས་ཅད་བསྐྲད་ཅིང་སྲུང་བ་ཆེན་པོ་བྱས་པར་གྱུར། །སོ་བདུན་པ་མཆོད་པ་ནི། གོང་དུ་བཤད་པ་ལྟར་ཛི་ན་ཛི་ཀ བསང་བ་དང༌། ཨོཾ་ཏེ་ཛ་ཏེ་ཛ་སཾ་སིདྡྷི་སཱ་དྷ་ཡ་སྭཱཧཱ། གཟི་བྱིན་བསྐྱེད་པ་དང༌། ན་མོ་རཏྣ༴ ནས། ཨ་མྲྀ་ཏེ་ཧཱུཾ་ཕཊ། བྱིན་གྱིས་རླབས་པ་དང༌། ཛི་ན་ཛིཀ རྣམས་ཀྱིས་བརྟན་པར་བྱ་སྟེ། མཆོད་པ་གསར་པ་རྣམས་བྱིན་གྱིས་རླབས། རྙིང་པ་རྣམས་ཁ་གསོ་བའོ། །དང་པོ་ཀི་ལི་ཀི་ལིའི་ཕྱག་རྒྱ་ལས་རྡོ་རྗེ་ཐལ་མོར་བྱ། དེ་ནས་མཉམ་པའི་ཐལ་མོར་བྱེད་པ་ནི། མཆོད་པ་ཐམས་ཅད་ཀྱི་སྤྱིའི་སྔོན་འགྲོའོ། །བདེ་བར་གཤེགས་སོ་བཅོམ་ལྡན་འདས་སོགས་དང༌། སྤྱི་འགྲོའི་མཐར་རྡོ་རྗེ་ནང་བསྡམས་ལས། གུང་མཛུབ་རྡོ་རྗེ་རྩེ་གསུམ་པ་འདྲ་རུང༌། མཐེ་བོང་གཉིས་འཛུབ་མོའི་ངོས་ལ་སྦྱར། ཨརྒྷཾ་པྲ་ཏཱིཙྪ་སྭཱཧཱ། ལན་གསུམ་སོགས་མང་དུ་བརྗོད། ཇི་ལྟར་བལྟམས་པ་ཙམ་གྱིས་ནི། །དེ་བཞིན་གཤེགས་ཀུན་བཀྲུས་གྱུར་པ། །དེ་བཞིན་བདག་གིས་ལྷ་རྣམས་ལ། །གཙང་མའི་ཆབ་ཀྱིས་ཁྲུས་གསོལ་ལོ། །ཨོཾ་སརྦ་དེ་བ་ཏ་ཨར་ཙི་ཏ་ཨ་མྲྀ་ཏ་སྭཱཧཱ། འདིར་མེ་ལོང་ལ་གཟུགས་བརྙན་ཤར་བ་ལ་དངོས་སུ་ཁྲུས་གསོལ་ན་ཕྱག་རྒྱ་མི་དགོས། གཞན་དུ་ན་མཉམ་པའི་ཐལ་མོ་ཁ་ཕྱེ། མཐེབ་མཛུབ་རྩེ་སྤྲས་པའི་ཕྱག་རྒྱའོ། །དངོས་སམ་ཡིད་ཀྱི་ན་བཟའ་དང་རྒྱན་གསོལ། དུད་དང་རྫ་རྔ་དང་གླིང་བུ་དང་པི་ཝཾ་ལ་སོགས་པ་འབུད་པ་དང༌། དཀྲོལ་བ་དང༌། བརྡུང་བའི་རོལ་མོ་བྱ་སྟེ། མཆོད་པའི་སྤྲིན་གྱི་གཟུངས་བརྗོད་པར་བྱའོ། །དྲི་མེད་མཚན་ལ་སྒྲིབ་གསལ་མི་མངའ་ཡང༌། །དད་པས་ངུར་སྨྲིག་རྒྱལ་
མཚན་ཕུལ་བ་ཡི། །ནམ་མཁའི་མཐའ་ཀླས་གྱུར་པའི་སེམས་ཅན་རྣམས། །སངས་རྒྱས་བརྟུལ་བཞུགས་མཆོག་ལ་སྤྱོད་པར་ཤོག །སྣ་ཚོགས་དབང་པོའི་གཞི་བཞིན་རབ་བཀྲ་ཡང༌། །གང་ལ་རེག་ན་བདེ་བའི་རྒྱུར་འགྱུར་བའི། །གོས་བཟང་རིན་ཆེན་བདག་བློ་སྦྱང་ཕྱིར་འབུལ། །བཟོད་པ་དམ་པ་གོས་གྱིས་བརྒྱན་པར་ཤོག །བདེ་གཤེགས་སྐུ་མཆོག་མཚན་དང་དཔེ་བྱད་དང༌། །རིན་ཆེན་འོད་ཆགས་འབར་བས་དབུ་རྒྱན་ཞིང༌། །བྱང་ཆུབ་མཆོག་གི་རྒྱན་གྱིས་མཛེས་མོད་ཀྱི། །འཇིག་རྟེན་བཀུར་བསྟི་རིམ་གྲོའི་ཚུལ་ཙམ་དུ། །རིན་ཆེན་འཕྲེང་བ་དོ་ཤལ་སེ་མོ་དོ། །རྒྱན་གྱི་དམ་པ་ཁྱད་པར་མཆོག་ཕུལ་བས། །འགྲོ་ཀུན་བྱང་ཆུབ་མཆོག་གི་རྒྱན་དང་ལྡན། །བླ་མེད་ཐར་པ་མཆོག་ལ་གནས་པར་ཤོག །ཐེག་མཆོག་བླ་བྲེ་མགོན་སྐྱབས་གདུགས་དང་བཅས། །བདུད་བཅོམ་རྒྱལ་མཚན་བ་དན་ཏིང་འཛིན་འཕན། །ལྷ་དང་མི་ཡི་མཆོད་པའི་སྒྲ་དབྱངས་ཀྱིས། །རྒྱལ་བའི་དཀྱིལ་འཁོར་མཛེས་པར་རབ་བརྒྱན་པས། །བླ་བྲེ་འཕན་གདུགས་རྒྱལ་མཚན་རོལ་མོ་བརྗིད། །བདུག་སྤོས་དྲི་ཞིམ་སིལ་སྙན་སྤྲིན་ཚོགས་འཁྲིགས། བདག་དང་འགྲོ་བའི་དོན་དུ་འདི་འབུལ་གྱི། །དབང་མཆོག་དམ་པ་དུས་འདིར་ཐོབ་འགྱུར་ཏེ། །གནོད་པའི་དགྲ་འཇོམས་བླ་མེད་གོ་འཕང་ལ། །ཐེག་པ་མཆོག་གིས་ངེས་པར་བསྒྲོད་པར་ཤོག །ཅེས་པའང་སྤྲོ་ན་བརྗོད་པར་བྱའོ། །དེ་ནས་ཉེར་སྤྱོད་ངེས་པར་འབུལ་ཏེ། གཙང་ཞིང་གཙང་མ་ལས་བྱུང་བའི། ལྷ་རྫས་བཟང་པོའི་དྲི་
འདི་དག །བདག་གི་དད་པས་འབུལ་ལགས་ཀྱི། །བཞེས་ནས་བདག་ལ་དགྱེད་པར་མཛོད། །ཨཱ་ཧ་ར་ཨཱ་ཧ་ར་སརྦ་བིདྱ་དྷ་ར་པཱུ་ཛི་ཏེ་སྭཱཧཱ། ཕྱག་རྒྱ་སྤྱི་འགྲོ་སྔོན་དུ་འགྲོ་བས། ལག་པ་གཡས་སྐྱབས་སྦྱིན་གྱི་འཁྲིག་མ་ནས་གཡོན་པས་གཟུང་བའོ། །གཙང་ཞིང་གཙང་མར་སྐྱེས་པ་ཡི། །ལྷ་རྫས་བཟང་པོའི་མེ་ཏོག་འདི། །བདག་ནི་དད་པས༴ སོགས། ཨཱ་ཧ་ར༴ སོགས། སྤྱི་འགྲོ་སྔོན་དུ་སོང་བའི་ལག་གཉིས་སོར་མོ་གཞན་རྣམས་ཕན་ཚུན་བསྣོལ། མཛུབ་མོ་གཉིས་གདུབ་བུའི་ཚུལ་དུ་རྩེ་སྤྲད། མཐེ་བོང་མཛུབ་མོའི་གློར་བཞག་པའོ། །དྲི་ཡི་སྦྱར་བ་ལྷ་ཡི་རྫས། །ནགས་ཚལ་བཅུད་ནི་ཡིད་འོང་འདི། བདག་ནི༴ ཨཱ་ཧ་ར༴ སྤྱི་འགྲོ་སྔོན་དུ་སོང་བས་མཐེ་ཆུང་སྲིན་ལག་གུས་མོ་རྣམས་སྔ་མ་སྔ་མའི་རྒྱབ་ཏུ་ཕྱི་མ་ཕྱི་མ་སྦྱར། དེ་རྣམས་གཡས་གཡོན་ཕན་ཚུན་རྩེ་སྤྲད། མཛུབ་མོ་བརྐྱང་ཞིང་མཐེ་བོང་དེའི་གློར་བཞག་པའོ། །སྨན་རྣམས་བཅུད་ནི་ཡི་གར་འོང༌། །སྔགས་ཀྱི་ཞལ་ཟས་བཤོས་འདི་དག །བདག་ནི༴ ཨཱ་ཧ་ར༴ སྤྱི་འགྲོ་སྔོན་དུ་སོང་ནས། སྙིམ་པ་ཁ་སྦྱོར་བཟེད་པ་ལས། མཛུབ་མོ་ཅུང་ཟད་བཀུགས་པའོ། །གནོད་རྣམས་འཇོམས་ཤིང་བཀྲ་ཤིས་ལ། དགེ་ཞིང་མུན་པ་རྣམས་སེལ་འདི། བདག་ནི༴ ཨཱ་ལོ་ཀ་ཨཱ་ལོ་ཀ་སརྦ་བིདྱ་དྷ་ར་པཱུ་ཛི་ཏེ་སྭཱཧཱ། སྤྱི་འགྲོ་སྔོན་དུ་བཏང༌། ཁུ་ཚུར་གཉིས་གཤིབས་པ་ལས་མཐེབ་མཛུབ་གཉིས་རྩེ་སྦྱར་ཏེ་བསྒྲེང་བའོ། །ཨོཾ་སེམས་ཅན་གྱི་ཁམས་ན་གང་ང་ཡི་བ་མེད་ཅིང་ཡོངས་སུ་གཟུང་བ་མེད་པའི་མཆོད་པའི་ཚོགས་ཆུ་དང་ཐང་ལས་སྐྱེས་པ། རིན་པོ་ཆེའི་རི་དང༌། རྒྱ་མཚོའི་
རིན་པོ་ཆེ་ལ་སོགས་པ་དེ་དག་ཐམས་ཅད་སངས་རྒྱས་དང་བྱང་ཆུབ་སེམས་དཔའ་རྣམས་ཀྱི་མཆོད་པའི་འཕྲིན་ལས་ཀྱིས་དབུལ་བར་བགྱིའོ། །སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་བྱིན་གྱིས་རླབས་ཀྱི་སྟོབས་དང༌། བདག་གི་བསོད་ནམས་ཀྱི་སྟོབས་དང༌། རིག་པའི་གསང་སྔགས་ཀྱི་སྟོབས་ཀྱིས་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་འཁོར་གྱི་དཀྱིལ་འཁོར་དུ་མཆོག་ཏུ་རྒྱ་ཆེ་བའི་བྱང་ཆུབ་སེམས་དཔའ་ཀུན་ཏུ་བཟང་པོའི་སྤྱོད་པ་མཆོག་རྒྱ་ཆེན་པོའི་གོང་མ་ལས་བླ་མར་མངོན་པར་བསྒྲུབས་པའི་མཆོད་པའི་སྤྲིན་རབ་ཏུ་འབབ་པར་གྱུར་ཅིག །ན་མཿསརྦ་བུདྷ་བོ་དྷི་སཏྭཱ་ནཱཾ། སརྦ་ཐཱ་ཨུད་ག་ཏེ་སྥ་ར་ཎ་ཨི་མཾ་ག་ག་ན་ཁཾ་སྭཱ་ཧཱ། སྔགས་འདི་ལན་བརྒྱད་བརྗོད། །སོ་བརྒྱད་པ་བསྟོད་པ་ནི། ཨོཾ་མཉམ་ཉིད་མི་གཡོ་མཉམ་ཉིད་མཆོག་གི་ཆོས་ཉིད་ཅན། ཞེས་པ་ལ་སོགས་པ་དམ་ཚིག་གསུམ་གྱི་བསྟོད་པས་བསྟོད་དོ། །བོད་དུ་འགྱུར་བ་ལྟར་ན། བྱ་སྤྱོད་ཀྱི་རྒྱུད་ལས་བསྟོད་པ་འདི་མ་བཤད་པ་འདྲ་བ་ཞིག་ཡོད་ཀྱང༌། སྤྱིར་བསྟོད་པ་ཙམ་ལ་ཡི་གེའི་དོན་ལ་བལྟས་ཏེ། ཐུན་མོང་མ་ཡིན་པའི་ཁྱད་ཆོས་གསལ་པོ་མེད་ན། གོང་མའང་འོག་ཏུ་བླངས་པས་ཆོག་པ་ཡིན་མོད་ཀྱི། འདི་ནི་དམ་ཚིག་གསུམ་བཀོད་ཉིད་ཀྱི་བསྟོད་པ་ཡིན་པར་སློབ་དཔོན་རིན་ཆེན་འབྱུང་ལྡན་སྦས་པས་བཤད་དེ། བོད་དུ་མ་འགྱུར་བའི་བྱ་སྤྱོད་ཀྱི་རྒྱུད་ལས་ཀྱང་བཤད་པར་མངོན་ནོ། །མགོན་པོ་ཐུགས་རྗེས་ཆེ་ལྡན་པ༴ སོགས། གཞན་ཡང་ཇི་ལྟར་འོས་པས་བསྟོད་པའི་མཐར། ན་མཿསརྦ་བུདྡྷ་བོ་དྷི་སཏྭ་ནཱཾ།
སརྦ་ཏྲཱ་ས་མ་ཀུ་སུ་མི་ཏ་ཨ་བྷི་ཛྙཱ། རཱ་ཤི་ནི་ན་མ་སྟུ་ཏེ་སྭཱཧཱ། ཞེས་བསྟོད་པ་འབྱུང་བའི་རིག་པའི་རྒྱལ་པོ་ཡང་ལན་བརྒྱད་བརྗོད་དོ། །སོ་དགུ་པ་བཤགས་པ་ནི། འཇིག་རྟེན་དག་གི་ཕྱོགས་ཀུན་ན། ཞེས་པ་ནས། སླན་ཆད་དེ་ལྟར་ཡོངས་མི་བགྱི། ཞེས་པའི་བར་སྤྱི་རྒྱུད་ལེགས་གྲུབ་ལས་འབྱུང་བ་ལྟར་རམ། འདི་ཉིད་ཀྱི་རྒྱུད་ལས་འབྱུང་བ་ལྟར་ན། སངས་རྒྱས་དང་བྱང་ཆུབ་སེམས་དཔའ་ཐམས་ཅད། བདག་ལ་དགོངས་སུ་གསོལ། བདག་མིང་འདི་ཞེས་པའི་འདོད་ཆགས་དང་ཞེ་སྡང་དང༌། གཏི་མུག་ལས་སྐྱེས་པའི་སྡིག་པ་ཐམས་ཅད་སོ་སོར་བཤགས་པར་བགྱིའོ། །སངས་རྒྱས་དང་བྱང་ཆུབ་སེམས་དཔའ་རྣམས་ཀྱི་ཐུགས་བསྐྱེད་པ་གང་གིས་བཤགས་པར་མཛད་པའི་སེམས་བསྐྱེད་པ་དེས་བཤགས་པར་བྱ་སྟེ། ཇི་ལྟར་སངས་རྒྱས་བཅོམ་ལྡན་འདས་ཀྱི་མཁྱེན་པ་ལྟར། དེས་ཀྱང་ཅི་ཙམ་དུ་བཤགས་པར་ནུས་པ་དེ་ཙམ་དུ་བཤགས་པར་བགྱིའོ། སླན་ཆད། དེ་ལྟ་བུ་མི་བགྱིད་དོ། །སྤྱི་རྒྱུད་ཀྱི་ཆོ་ག་ལ་ཡི་རང་ལོགས་སུ་མེད་པས་འདིའི་དོན་ཚན་ཞེ་དྲུག་ལ་མི་བགྲོད་ཡང་རྒྱུད་འདིར་གསུངས་པས་བཤགས་པ་འདིའི་འཕྲོས་ལས་རྗེས་སུ་ཡི་རང་བ་ཡང་བྱ་སྟེ། གང་དུ་གསུམ་དུ་གཤེགས་པའི་སངས་རྒྱས་དང༌། བྱང་ཆུབ་སེམས་དཔའ་དང༌། ཉན་ཐོས་དང་རང་སངས་རྒྱས་དང་སེམས་ཅན་ཐམས་ཅད་ཀྱི་བསོད་ནམས་ཀྱི་ཚོགས་སེམས་ཅན་གྱི་ཁམས་རྣམ་པར་སྦྱོང་བར་བྱེད་པ། སེམས་ཅན་གྱི་ཁམས་ཡོངས་སུ་སྲུང་བར་བྱེད་པ། འཇིག་རྟེན་དང་འཇིག་རྟེན་ལས་འདས་པ་དེ་དག་ཐམས་ཅད་ལ་རྗེས་
སུ་ཡི་རང་བ་བླ་ན་མེད་པས་རྗེས་སུ་ཡིད་རང་བར་བྱ་སྟེ། ཇི་ལྟར་སངས་རྒྱས་དང་བྱང་ཆུབ་སེམས་དཔས་མཁྱེན་པ་ལྟར་བདག་གིས་ཀྱང་ཇི་ལྟར་རྗེས་སུ་ཡིད་རང་བར་ནུས་པ་དེ་ལྟར་རྗེས་སུ་ཡི་རང་བར་བྱའོ། །བཞི་བཅུ་པ་སྐྱབས་འགྲོ་ནི། སྲོག་ཆགས་སྡུག་བསྔལ་ཞི་བྱའི་ཕྱིར། །བདག་ནི་ཇི་སྲིད་འཚོ་བར་དུ། །སངས་རྒྱས་ཆོས་དང་དགེ་བདུན་ལ། །གུས་པས་ཡང་དག་སྐྱབས་སུ་འཆི། །ཞེ་གཅིག་པ་གསོལ་གདབ་ནི། མི་རྟོག་བློ་གྲོས་བསྐྱེད་པའི་ཕྱིར། །ཆོས་ཀྱི་འཁོར་ལོ་བསྐོར་བ་དང༌། །གདུལ་བྱ་ཇི་སྲིད་ཚིམ་བར་དུ། །མྱ་ངན་མི་འདའ་གསོལ་བ་འདེབས། །ཞེ་གཉིས་པ་སེམས་བསྐྱེད་པ་ནི། སེམས་ཅན་ཁམས་ནི་མཐའ་ཡས་པའི། །སྡུག་བསྔལ་ཉེ་བར་ཞི་བ་དང༌། །ངན་འགྲོ་རྣམས་ལས་བསྒྲལ་བ་དང༌། །ཉོན་མོངས་རྣམས་ལས་དགྲོལ་བའི་ཕྱིར། །སྲིད་པའི་མི་དགེ་དོག་པ་ན། །སྡུག་བསྔལ་སྣ་ཚོགས་ཅི་མཆིས་པ། །དེ་ལྟར་ཡོངས་སུ་སྐྱབས་པའི་ཕྱིར། །བདག་གིས་བྱང་ཆུབ་སེམས་བསྐྱེད་དོ། །ཞེས་པ་ཙམ་མམ། སྤྲོ་ན། སེམས་ཅན་འཕོངས་པ་ཐམས་ཅད་ཀྱི། །སྐྱབས་སུ་བདག་ཉིད་རྟག་ཏུ་ཤོག །བདག་ནི་མགོན་མེད་རྣམས་ཀྱི་མགོན། །རྟེན་མེད་རྣམས་ཀྱི་རྟེན་དུ་བདག །སྐྱབས་མེད་རྣམས་ཀྱི་སྐྱབས་འགྱུར་ཞིང༌། སྡུག་བསྔལ་བདེ་བར་བྱེད་པ་དང༌། །བདག་ནི་སེམས་ཅན་ཐམས་ཅད་ཀྱི། །ཉོན་མོངས་ཞི་བར་བྱེད་པར་ཤོག །དགེ་བའི་ལས་རྣམས་གང་དང་གང༌། །འདི་དང་གཞན་དུ་བསགས་པ་རྣམས། །བསོད་ནམས་ཡེ་ཤེས་
ཞེས་བྱ་བའི། །ཚོགས་ནི་རྣམ་པ་གཉིས་སུ་ཤོག །ཕ་རོལ་ཕྱིན་པ་དྲུག་བསྒོམས་ནས། །བདག་གིས་བརྩོན་འགྲུས་གང་བརྩམས་པ། །དེ་ཡང་སེམས་ཅན་མ་ལུས་པ། །ཐམས་ཅད་ལ་ནི་ཕན་པར་ཤོག །སྔོོན་གྱི་རྒྱལ་བའི་སྲས་རྣམས་ཀྱིས། །སྨོན་ལམ་ཇི་ལྟར་མཛད་པ་བཞིན། །བདག་ཀྱང་དགེ་བའི་སེམས་ཀྱིས་སུ། །དེ་བཞིན་དུ་ནི་སྨོན་ལམ་འདེབས། །སེམས་ཅན་ཐམས་ཅད་བདེ་བ་དང༌། །ཐམས་ཅད་ནད་ཀྱང་མེད་པར་ཤོག །བདག་ནི་བྱ་བ་ཀུན་ནུས་ཤིང༌། །ཡོན་ཏན་དང་ཡང་ལྡན་པར་ཤོག །ནོར་ལྡན་གཏོང་ཕོད་ཤེས་རབ་ཅན། །བཟོད་ལྡན་དགེ་ལ་དད་པ་དང༌། །སེམས་ཅན་ཚེ་རབས་ཐམས་ཅད་དུ། །སྐྱེ་བ་དྲན་ཞིང་བརྩེ་ལྡན་ཤོག །ཅེས་པའང་བྱ་ཞིང༌། གང་ལྟར་ཡང་མཐར། ཚེ་ཡི་མཐའ་ཀླས་གང་བྱེད་དང༌། །གང་ཡང་ཅུང་ཟད་བྱེད་འགྱུར་པ། །མདོར་ན་སེམས་ཅན་ཐམས་ཅད་ཀྱི། །ཉོན་མོང་ཐམས་ཅད་ཞི་བ་དང༌། །གྲོལ་བར་བྱ་བའི་ཕྱིར་འབད་ཅིང༌། །བྱང་ཆུབ་རབ་ཏུ་དགའ་བརྩོན་ནོ། །ཞེས་པའོ། །ཞེ་གསུམ་པ་ཚད་མེད་བཞི་ནི། །དོན་ཡིད་ལ་དྲན་བཞིན་པས་ཚིག་གི་བརྗོད་ཚུལ་སྤྱི་དང་མཐུན་པར་བརྗོད་དོ། །ཞེ་བཞི་པ་བཟླས་བརྗོད་ཀྱི་རིམ་པ་ལ་སྔོན་འགྲོ་ནི། ཨོཾ་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་ལུས་ཀྱི་སྤྲུལ་པའི་སྤྲིན་སེམས་ཅན་ཐམས་ཅད་ཀྱི་དམིགས་པ་ལས་བྱུང་བ། སེམས་ཅན་གྱི་ཁམས་ཐམས་ཅད་ཀྱི་སྡུག་བསྔལ་ཐམས་ཅད་ཞི་བ། བདེ་བ་ཐམས་ཅད་མྱུར་དུ་སྩོལ་བ། ཟག་པ་མེད་པའི་དགེ་བ་འབྱུང་
བའི་སྦྱོར་བ་ཡང་དག་པར་འབྱུང་བ། དེ་བཞིན་གཤེགས་པ་རྣམས་ཀྱི་གྲུབ་པའི་མཆོག་དེ་སེམས་ཅན་ཐམས་ཅད་ཀྱིས་ཐོབ་པར་གྱུར་ཅིག ན་མཿསརྦ་བུདྡྷ་བོདྷཱི་སཏྭཱ་ནཱཾ། ན་མསྟུ་ཏེ་མཧཱ་བཛྲ་སརྦ་སཏྭ་ཧི་ཏཾ་ཀ་ར་ཏིཥྛ། སརྦ་ཏྲ་སརྦེ་ཁཱཾ། དྷརྨཱ་ཎཱཾ་ཨ་དྷིཥྛཱ་ཡ་སྭཱཧཱ། སྨོན་ལམ་དང་སྔགས་དེ་སྦྱར་བ་ལན་བརྒྱད་དམ་སྨོན་ལམ་ཚར་གཅིག་གི་མཐར་སྔགས་ལན་བརྒྱད་བརྗོད། དེ་ལྟར་མངོན་པར་འདུས་བྱས་པའི་དགེ་བའི་རྩ་བ་བླ་ན་མེད་པའི་བསོད་ནམས་དང༌། ཡེ་ཤེས་ཀྱི་ཚོགས་ཀྱི་བསྡུས་པ་འདི་ཐམས་ཅད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་བསྔོ་བར་བགྱིའོ། །ཞེས་བསྔོ་བ་དང༌། བདག་སྡུག་བསྔལ་པར་གྱུར་པ་ལ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱིས་རྣམ་པ་ཐམས་ཅད་དུ་བྱིན་གྱིས་རླབས་པ་དང༌། བདག་ལ་གྲུབ་པའི་མཆོག་སྩོལ་ཅིག །ཅེས་གསོལ་བ་གདབ་བོ། །བཟླས་པའི་སྔོན་འགྲོ་གསུམ་པོ་དེ་དག་ནི་དམ་ཚིག་གསུམ་བཀོད་ཁོ་ནའི་དགོས་ཆོས་ཏེ། སངས་རྒྱས་ཀྱི་སྤྲུལ་པའི་སྤྲིན་སྒྲུབ་པ་དང༌། སེམས་ཅན་གྱི་ཁམས་ཐམས་ཅད་སྦྱོང་བ་དང༌། སྡུག་བསྔལ་ཞི་བར་བྱེད་པའི་རིགས་པའི་རྒྱལ་པོའི་ཆོ་གའོ། །སྤྱིའི་ཆོ་གའི་ལུགས་ལ་ཡོངས་ནས་བསྔོ་བ་ནི་དགོས་མོད་ཀྱང༌། སེམས་བསྐྱེད་ཀྱི་ནང་ན་ཡོད་པས་ལོགས་སུ་མེད་ཀྱང་དེའི་ཆོག་གོ །ན་མོ་གུ་རུ་བྷྱཿ ཞེས་ལན་མང་དུ་བརྗོད་པས་བླ་མ་ལ་ཕྱག་བྱའོ། །དེ་ནས་པུ་ཏོ་ཙེའི་འབྲུའམ་དགེ་བའི་ཤིང་ལ་རིལ་བུས་བྱས་པའི་རིལ་བུ་སྟོང་རྩ་བརྒྱད་དམ། བརྒྱ་རྩ་བརྒྱད་དམ། ལྔ་བཅུ་རྩ་བཞིའམ།
ཉི་ཤུ་རྩ་གཅིག་བླངས་ལ། མདུན་དུ་ཁྲོ་བོ་ལེགས་གྲུབ་བམ། བཅོམ་ལྡན་འདས་ཕྱག་ན་རྡོ་རྗེ་སྐད་གཅིག་གིས་བསམ་ཏེ། ན་མོ་རཏྣ་ཏྲཱ་ཡཱ་ཡ། ཨོཾ་ཨཏ་བྷུ་ཏི་བི་ཛ་ཡ་སིདྡྷི་སིདྡྷཱ་རྠེ་སྭཱཧཱ། ཞེས་པ་དེ་བཞིན་གཤེགས་རིགས་སྤྱི་ཁྱབ་ཀྱི་རིགས་ཀྱི་བདག་པོའི་སྔགས་ལན་བདུན་བཟླས། དེ་ནས་མིག་ཕུག་ལྟེ་བའི་རྣམ་པ་ལྔས་བཀྲུས་ལ། གཞོན་ནུ་མས་བཀལ་བའི་སྐུད་པ་སུམ་སྒྲིལ་གྱིས་བརྒྱུས། མདུད་པ་བཏབ་སྟེ་ལྷ་ལ་མཆོད་པར་བྱས་ནས་བསྙིམ་པར་བཅུག་སྟེ། དེ་བཞིན་གཤེགས་རིགས་ཀྱིས་འཕྲེང་བའི་སྔགས་བརྒྱ་རྩ་བརྒྱད་བཟླའོ། །དེ་ཡང་འདི་ལྟ་སྟེ། ཨོཾ་ན་མོ་བྷ་ག་ཝ་ཏེ། སིདྡྷི་སཱདྷ་ཡ་སཱདྷ་ཡ། སིདྡྷ་རྠེ་སྭཱཧཱ། ཞེས་པའོ། །འདི་ནི་བགྲང་འཕྲེང་རབ་གནས་ཡིན་པས་དང་པོར་ངེས་པར་བྱ་ལ། གཞན་གྱི་མཐོང་བའམ་རེག་པའང་འབགས་པ་ལ་སོགས་པ། རབ་གནས་ཉམས་པའམ་ཉམས་པར་དོགས་ན། སྤོས་ཆུས་བཀྲུས་ཤིང་བདུག་སྤོས་ཀྱི་བདུགས་ལ་སླར་རབ་གནས་དེ་ཉིད་བསྐྱར་ཏེ་བྱ། དཀྱུས་ཀྱི་ཉམས་ལེན་ལ་ནི། བགྲང་འཕྲེང་རབ་གནས་མི་དགོས་ཀྱང༌། བྱིན་རླབས་གསོ་བའི་ཕྱིར་དང་བློ་བྱང་བའི་ཕྱིར། སྔགས་གཉིས་པོ་དེ་ཚར་རེའམ་གསུམ་ཏེ་བརྗོད་དོ། །དེ་ནས་ལག་པ་གཡས་ཀྱིས་བགྲང་འཕྲེང་བཟུང་བའམ། དལ་བར་གྱུར་ན་ངལ་གསོ་བའི་དོན་དུ་གཡོན་པས་ཀྱང་བཟུང༌། གང་ལྟར་ཡང་བགྲང་འཕྲེང་སྙིང་གར་བཟུང་སྟེ། གུང་མོ་དང་མཐེ་ཆུང་བསྐྱང༌། མཛུབ་མོ་གུང་མོའི་རྒྱབ་ཏུ་བཀུག་ཅིང་སྦྱར། སྲིན་ལག་གི་སྟེང་ནས་མཐེ་བོང་བགྲོང་བ་ཡིན་ལ། དམིགས་པ་ནི། མདུན་དུ་བཞུགས་པའི་གཙོ་བོའི་ཐུགས་ཀར་ཟླ་བ་ལ་སྔགས་འཕྲེང་བཀོད་པ་ལ་དམིགས་པ་སྟེ་དེ་ནས་བཟླས་པ་བྱའོ། །འདིར་བཟླས་བྱའི་སྔགས་ཀྱི་གཙོ་བོ་ནི་དེ་བཞིན་
གཤེགས་པའི་ཡི་གེ་བརྒྱ་པ་སྟེ། ན་མཿསྟྲཻ་ཡ་དྡྷི་ཀཱ་ནཾ། ཏ་ཐཱ་ག་ཏཱ་ནཱཾ། སརྦ་ཏྲ་ཨ་པྲ་ཏི་ཧ་ཏཱ་བཱསྟི། དྷརྨ་ཏཱ་བ་ལཱི་ནཱཾ། ཨཾ་ཨ་ས་མ་ས་མནྟ་ཏོ་ཨ་ནནྟ་བཱསྟི། ཤཱ་ས་ནི། ཧ་ར་ཧ་ར། སྨ་ར་སྨ་ར་ཎ། བི་ག་ཏ་རཱ་ག་བུདྡྷ་དྷརྨ་ཏེ། ས་ར་ས་ར། ས་མ་བ་ལ། ཧ་ས་ཧ་ས། ཏྲ་ཡ་ཏྲ་ཡ། ག་ག་ན་མཧཱ་བ་ར་ལཀྵ་ཎ། ཛྭ་ལ་ཛྭ་ལ་ན་སཱ་ག་རེ་སྭཱཧཱ། ཞེས་པ་ཉིད་ཅི་ནུས་སུ་བཟླ་བར་བྱའོ། །སྔགས་བསྡུས་པ་ནི། སློབ་དཔོན་ཀུ་མུ་ཏ་འབྱུང་གནས་ཀྱི་སྒྲུབ་ཐབས་ལས། ན་མཿས་མནྟ་བཛྲཱ་ཎཱཾ། ཨཱ་བཱི་ར་ཧཱུཾ་ཁཾ། ཞེས་འབྱུང༌། རྒྱུད་ཉིད་ལས། ན་མཿསརྦྦ་བུདྡྷ་བོ་དྷི་སཏྭཱ་ནཱཾ། ཨཱ་བཱི་ར་ཧཱུཾ་ཁཾ། ཞེས་འབྱུང་ངོ༌། །བཟླས་བརྗོད་ཀྱི་རྗེས་ཀྱི་བྱ་བ་ནི། བཟླས་པའི་མཐར་བུམ་པའི་ཕྱག་བརྒྱ་བཅས་ལ། བདག་གི་བཟླས་བརྗོད་ཀྱི་དགེ་བའི་རྩ་བ་འདི། དམ་ཚིག་ཆེན་པོའི་དངོས་གྲུབ་ཀྱི་དོན་དུ་བཅོམ་ལྡན་འདས་ལ་འབུལ་ལོ། །འཕགས་པ་ཁྱེད་ཀྱིས་བདག་ལ་དམ་ཚིག་ཆེན་པོའི་དངོས་གྲུབ་སྩལ་དུ་གསོལ། ཞེས་བརྗོད། འདི་ནི་མཚོན་བྱེད་དེ་རང་གང་འདོད་པའི་དངོས་གྲུབ་དེ་ཞུའོ། །བུམ་པའི་ཕྱག་རྒྱ་ནི། ལག་གཉིས་སྲིན་ལག་གི་རྒྱབ་ཏུ་གུང་མོ་སྦྱར། དེ་གཉིས་གཡོན་པའི་མདུན་དུ་གཡས་པའི་རྒྱབ་སྦྱར་ཏེ་བསྣོལ། གཡས་ཀྱི་མཛུབ་མོ་གཡོན་གྱི་གུང་སྲིན་དང༌། གཡོན་གྱི་མཛུབ་མོ་གཡས་ཀྱི་གུང་སྲིན་ལ་འཁྱུད། མཐེ་བོང་གཉིས་མཛུབ་མོའི་ཚིགས་དབུས་མ་ལ་བཞག །མཐེ་ཆུང་གཉིས་གཤིབས་ཏེ་བསྒྲེང་བའོ། །དེ་ནས། སངས་རྒྱས་དང་བྱང་ཆུབ་སེམས་དཔའ་ཐུགས་རྗེ་ཆེན་པོ་དང་ལྡན་པ་ཐམས་ཅད་ཀྱིས་སྡུག་བསྔལ་བར་གྱུར་པ་བདག་ཡོངས་
སུ་བཟུང་དུ་གསོལ། བདག་ལ་བྱིན་གྱིས་བརླབ་ཏུ་གསོལ། ཐལ་མོ་ཁོང་སྟོང་དུ་སྦྱར་བའི་ཕྱག་རྒྱ་རང་གི་སྤྱི་བོར་བཞག་ལ། ན་མཿསརྦ་ཏ་ཐཱ་ག་ཏཱ་ནཱཾ་ག་ག་ནེ་ག་ག་ནེ། ཞེས་པ་ལན་གསུམ། ཐུན་མོང་གི་ཆོ་གས་ཛི་ན་ཛིཀ ལན་གསུམ་བརྗོད། མགོ་བོའམ། སྙིང་གར་ཟླ་བ་ལ་བྷྲཱུཾ་ཡིག་བྱུང་བར་བསམ། དེ་ནས་སེམས་ཅན་དོན་གྱི་སྤྱོད་པ་ལ་འཇུག་པའི་སླད་དུ་དངོས་གཞིའི་བཟླས་བརྗོད་དང་ཏིང་ངེ་འཛིན་གྲོལ་བར་བྱའོ། །ཞེ་ལྔ་པ་སླར་བཏང་བ་ནི། ཨརྒྷཾ་པྲ་ཏཱི་ཙྪ་སྭཱཧཱ་དང༌། ཨཱ་ཧ་ར༴ སོགས་ཉེར་སྤྱོད་ལྔའི་སྔགས་དང་ཕྱག་རྒྱ་ཙམ་གྱིས་མཆོད། སྤྲོ་ན། སེམས་ཅན་གྱི་ཁམས་ན༴ ཞེས་པ་ནས། ཁཾ་སྭཱཧཱའི་བར་བརྗོད་ནའང་ལེགས། མགོན་པོ་ཐུགས་རྗེ་ཆེ་ལྡན༴ སོགས་ཤོ་ལོ་ཀ་གསུམ་གྱིས་བསྟོད། བཟོད་གསོལ་གྱི་ཚིག་སྤྱི་འགྲོ་རྣམས་བརྗོད། ཨོཾ་མུ་ནི་མུ་ནི་མཧཱ་མུ་ན་ཡེ་སྭཱཧཱ། ཨོཾ་ཨརྱ་མཧཱ་བཛྲ་དྷ་རཱ་ཡ་སྭཱཧཱ། ཨོཾ་ཨརྱ་བཛྲ་དྷ་རཱ་སྭཱཧཱ། ཨོཾ་དུ་ཏ་ཨ་ནནྟ་ཡ་སྭཱཧཱ། ཨོཾ་དུ་ཏི་ཨ་ནན་ཏྱཻ་སྭཱཧཱ། ཨརྒྷཾ་པྲ་ཏཱིཙྪ་སྭཱཧཱ། དེ་ལྟར་མཆོད་ཡོན་ཕུལ་རྗེས་སྤྱན་འདྲེན་པའི་ཕྱག་བརྒྱ་མཐེ་བོང་གཉིས་ཕྱིར་བསྐྱེད། གཤེགས་གསོལ་གྱི་ཚིག་སྤྱི་འགྲོའི་མཐར། གདོན་མི་ཟ་བར་བདག་ལ་ཡང༌། །རྗེས་སུ་བརྩེ་བར་དགོངས་ནས་ནི། །རྒྱལ་བ་སྲས་དང་བཅས་པ་རྣམས། །ཅི་བདེ་བར་ནི་གཤེགས་སུ་གསོལ། དང་པོ་བཅིངས་པའི་དེ་བཞིན་གཤེགས་རིགས་ཀྱི་དམ་ཚིག་གི་ཕྱག་རྒྱ་དེ་མགོ་བོའི་སྟེང་དུ་བཅས། རྩེ་མོ་གྱེན་དུ་བསྟན། སོར་མོ་བསྐྱོད་ཅིང་དཀྲོལ་ཏེ། སེ་གོལ་གཏོགས་པ་ལན་གསུམ་དང༌། ཨོཾ་ཏ་ཐཱ་ག་ཏོ་ད་བྷ་ཝཱ་ཡ་སྭཱཧཱ། ཞེས་ལན་གསུམ་ཀྱིས། ལྷ་རྣམས་གཞལ་ཡས་ཁང་དང་བཅས་པ་གཤེགས་
སུ་གསོལ། དེའི་རྗེས་སུ་མི་ཉམས་པའི་ཡན་ལག་གི་ཕྱག་རྒྱ་ཞེས་བྱ་བ། གཡོན་པའི་ཐལ་མོ་གན་ཀྱལ་གྱི་སྟེང་དུ་གཡས་པའི་རྒྱབ་སྦྱར། སོར་མོ་རྣམས་བསྣོལ་བའི་རྩེ་མོ་བཀུག་སྟེ། རྩ་བའི་ཕྱོགས་སུ་བསྟན་པ་གཡོན་དུ་བསྐོར་ཏེ། ཨོཾ་ཧུ་ལུ་ཧུ་ལུ་ཙཎྜ་ལི་མ་ཏཾ་གི་སྭཱཧཱ། ཞེས་གཞན་གྱིས་མི་ཐུབ་མའི་རིགས་པས་རྭ་བ་ལ་སོགས་པ་དགྲོལ་བར་བྱའོ། །ཞེ་དྲུག་པ་ཐུན་མཚམས་ཀྱི་བྱ་བ་ནི། བདག་གི་བཟླས་བརྗོད་བགྱིས་པ་དང༌། མཆོད་པ་བྱས་པ་དང༌། ལྷའི་རྣལ་འབྱོར་བསྒོམས་པ་དང༌། སྨོན་ལམ་རྒྱ་ཆེན་པོ་བྱས་པ་དང༌། སྡིག་པ་རྣམས་སོ་སོར་བཤགས་པ་དང༌། དུས་གསུམ་དུ་བྱུང་བའི་བསོད་ནམས་དང་ཡེ་ཤེས་ཀྱི་ཚོགས་འཇིག་རྟེན་དང༌། འཇིག་རྟེན་ལས་འདས་པ་ལ་རྗེས་སུ་ཡི་རང་བ་དང། རྗེས་སུ་ཡི་རང་བ་ཡང་སེམས་ཅན་གྱི་ཁམས་ཐམས་ཅད་ཀྱི་སངས་རྒྱས་ཀྱི་རྒྱུ་ཉིད་དུ་རབ་ཏུ་སྦྱོར་བར་གྱུར་ཅིག །སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་དམིགས་ཤིང༌། སེམས་ཅན་གྱི་དོན་འབྱུང་བར་གྱུར་ཅིག །བདག་གི་བསོད་ནམས་ཀྱི་སྟོབས་དང༌། སྨོན་ལམ་གྱི་སྟོབས་ཀྱིས་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་བདག་ལ་བྱིན་གྱིས་རླབས་ཞིང༌། སེམས་ཅན་ཐམས་ཅད་ཀྱི་དོན་མི་ཟད་པ་ནི་འབྱུང་བར་གྱུར་ཅིག །བསོད་ནམས་དང་ཡེ་ཤེས་ཀྱི་ཚོགས་ཐམས་ཅད་ཡོངས་སུ་རྫོགས་པར་གྱུར་ཅིག །སྟོབས་བཅུ་མཁྱེན་པའི་ས་ལ་སེམས་ཅན་ཐམས་ཅད་སོ་སོར་གནས་པར་གྱུར་ཅིག །ཅེས་སྨོན་ལམ་གདབ། རྒྱས་པར་རྒྱུད་ཉིད་ལས་འབྱུང་བ་ལྟར་སྨོན་ལམ་གཞན་ཡང་གདབ་པར་བྱའོ། །དེ་ནས་གཏན་
དེ་ལས་ལངས་ཏེ། ཁྲིའུ་གཙང་མ་ལ་བཀུར་སྟི་དང་བཅས་པའི་སྒོ་ནས། སྡོང་པོ་བཀོད་པ་ལ་སོགས་པ་ཐེག་པ་ཆེན་པོའི་མདོ་སྡེའི་གླེགས་བམ་དག་བཞུགས་སུ་གསོལ་ནས་བཀླག་པར་བྱ་ཞིང༌། ཐ་ན་ཕྱག་འཚལ་བ་ཙམ་ཡང་ངེས་པར་དགོས་སོ། ཁ་ཟས་ལ་འཇུག་པ་ན། ཨོཾ་ཨོ་ཀ་ཛྭ་ལ་བཛྲ་པཱ་ཎི་ཧཱུཾ་ས་མ་ཡ་མ་ནུ་སྨ་ར་ཧཱུཾ་ཕཊ། བསྲུང་བ་བྱ། ན་མཿས་མནྟ་བུདྡྷ་བོ་དྷི་སཏྭཱ་ནཱཾ། ཨོཾ་བ་ལེ་ན་ད་དེ་ཏེ་ཛོ་མཱ་ལི་ནི་སྭཱཧཱ། ཞེས་ལན་བརྒྱད་ཀྱི་མངགས་ཏེ། ཁམ་དང་པོ་ལྷག་པའི་ལྷ་ལ་འབུལ། དེ་ནས་ཟོས་ཏེ་ཁྲུས་བྱའོ། ཁྲུས་བྱེད་པ་ན་བདུད་རྩི་འཁྱིལ་བའི་སྔགས་བཟླས་སོ། །ཉལ་བ་ན་སྟོབས་པོ་ཆེའི་སྔགས་ཀྱིས་བསྲུངས་ལ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་དང༌། ཕྱག་ན་རྡོ་རྗེ་དང༌། ཤྭ་རིའི་བུ་རྣམས་ལ་ཕྱག་བྱས་ཏེ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱིས་བདག་ལ་བྱིན་གྱིས་རློབས་པ་དང༌། བླ་ན་མེད་པའི་དངོས་གྲུབ་ཀྱི་མཆོག་སྩོལ་ཞིག །རྣམ་པར་འཚེ་བ་ཐམས་ཅད་རབ་ཏུ་ཞི་བར་མཛད་དུ་གསོལ། ཞེས་གསོལ་བ་བཏབ་ལ། ཆོས་ཀྱི་འདུ་ཤེས་ཀྱིས་ཉལ་ལོ། །དེ་བཞིན་དུ་རྗེས་དྲན་དྲུག་དང༌། མཎྜལ་དང༌། སཱ་ཚ་འདེབས་པ་དང༌། སྣོད་དག་པར་བྱེད་པ་དང༌། གོས་བགོ་བའི་སྔགས་དང༌། དངོས་དང་རྨི་ལམ་དུ་འཛག་པ་སྲུང་བ་སོགས་ཀྱང་བྱ་ལ། བ་སེར་སྐྱའི་རྣམ་ལྔ་ལ། ཨོཾ་ན་མོ་བྷ་ག་ཝ་ཏེ་ཨུཥྞི་ཥ་ཡ། ཨོཾ་བི་ཤུདྡྷེ་བི་ར་ཛེ་ཤཱི་བ་ཤཱན་ཏི་ཀ་རེ་སྭཱཧཱ། ཞེས་བརྒྱ་རྩ་བཟླས་ཏེ་བཏུངས་པས་ནི། ཟླ་བ་ཕྱེད་ཀྱི་བཟའ་མིན་གྱི་ཉེས་པ་ཐམས་ཅད་བྱང་བར་གསུངས་སོ། །དེ་ཡན་དམ་ཚིག་གསུམ་བཀོད་པའི་རྒྱལ་པོའི་
རྒྱུད་ལས། དེ་བཞིན་གཤེགས་པའི་སྙིང་པོའི་ལེའུ་ལས་འབྱུང་བར་བསྙེན་པའི་ཆོ་ག་གང་ཡིན་པ་དེ། བྱ་བ་སྤྱི་རྒྱུད་རྣམས་ཀྱི་ཆོ་གས་ཁ་བསྐང་སྟེ་བཤད་ཟིན་ཏོ། །ཡང་རྣམ་པ་གཅིག་ཏུ་ན་བཤགས་པ། སྐྱབས་འགྲོ །གསོལ་བཏབ། སེམས་བསྐྱེད། ཚད་མེད་བཞི་རྣམས་བདག་ཕུལ་བའི་རྗེས་བགེགས་སྲུང་བའི་སྔོན་དུ་བྱས་ན། དེ་སྐབས་གྱི་སེམས་བསྐྱེད་དེ་མི་དགོས་པ་དང༌། འོག་ཏུ་བསྟོད་པའི་དེ་མ་ཐག་པར་བཟླས་པ་བྱས་ན། །མི་རུང་པ་མེད་ཅིང་རྣམ་པ། གཅིག་ཏུ་ན་ལེགས་པའང་ཡིན་ནོ། །འདི་ནི་བསྙེན་པའི་ཆོ་ག་ཡིན་ལ། འདི་ཡིས་ཉེ་བའི་མཚན་མ་མཐོང་བ་ན་སྒྲུབ་པ་ལ་འཇུག་ཅིང༌། ལྷའི་རྣལ་འབྱོར་ལ་སེམས་བརྟན་པ་ཐོབ་ལ། སྟོང་པ་ཉིད་དང་སྙིང་རྗེ་སྔགས་ཀྱི་ནུས་པ་ཤར་བའི་སྒྲུབ་པ་པོའི་དབང་དུ་མཛད་ནས། རྒྱུད་ལས་འདི་སྐད་ཅེས་གསུངས་ཏེ། རི་བོའི་གསེབ་ཏུ་འབུམ་བཟླས་པ་བྱས་ན། འཕགས་པ་ཕྱག་ན་རྡོ་རྗེ་ལ་སོགས་པ་གང་ཡང་རུང་བའི་བྱང་ཆུབ་སེམས་དཔའ་མཐོང་བར་འགྱུར་རོ། །གཉིས་ཀྱིས་ནི་སངས་རྒྱས་བཅོམ་ལྡན་འདས་རྣམས་སོ། །གསུམ་གྱི་ནི་བྱང་ཆུབ་སེམས་པ་རྣམས་དང་སྨྲ་བར་འགྱུར་རོ། །བཞིས་ནི་དེ་བཞིན་གཤེགས་པ་རྣམས་ཀྱི་གསུངས་ཐོས་པར་འགྱུར་རོ། །ལྔས་ནི་གཟུངས་རྣམས་ཐོབ་པར་འགྱུར་རོ། །དྲུག་གིས་ནམ་མཁའ་ལ་འགྲོ་བར་འགྱུར་རོ། །བདུན་གྱིས་མངོན་པར་ཤེས་པ་ལྔ་རབ་ཏུ་ཐོབ་པར་འགྱུར་རོ། །བརྒྱད་ཀྱིས་སངས་རྒྱས་ཐམས་ཅད་ལ་མངོན་པར་མཆོད་པར་འགྱུར་རོ། །དགུས་ནི་མྱ་ངན་ལས་འདས་པ་མངོན་པར་སྒྲུབ་པར་བྱེད་དོ། །བཅུས་ནི་འཇིག་རྟེན་གྱི་ཁམས་རྣམས་སུ་རྒྱུ་བར་འགྱུར་རོ། །འདི་དག་ནི་ཐམས་ལ་མཁས་པའི་བཟླས་པའི་ཆོ་ག་སྟེ། མཐའ་ཡས་པའི་འབྲས་བུ་མངོན་པར་ཤེས་པར་ཐོབ་པའི་རྒྱུར་འགྱུར་པའོ། །ཐབས་
ལ་མི་མཁས་པ་རྣམས་ཀྱིས་ཀྱང༌། བརྩོན་འགྲུས་རབ་དང་འབྲིང་དང་ཐ་མས་ཇི་ལྟར་བསྙེན་པ་དེ་ལྟར་རབ་ཏུ་སྦྱར་ན་ནུབ་གཅིག་གིས་རིག་པ་འཛིན་པར་འགྱུར་ཏེ་སྔ་མ་བཞིན་ནོ། །ཞེས་གསུངས་པའི་འབྲས་བུ་རིམ་པ་བཅུ་པོ་དེ་ནི་མོས་པས་སྤྱོད་པའི་ས་བཅུ་ཡིན་པར་མངོན་ནོ། །སྐབས་འདིར་འདི་སྙམ་དུ་བྱ་བའི་རྒྱུད་ལ་བདག་བསྐྱེད་ཀྱང་མེད་ལ། མདུན་བསྐྱེད་ལ་ཡང་སྔགས་སོགས་ས་བོན་ལས་དམ་ཚིག་གིས་བསྐྱེད་པ་དང༌། ཡེ་ཤེས་པ་སྤྱན་དྲངས་ཏེ་བསྲེ་བ་མེད་ན། ལྷ་དྲུག་གི་དབྱེ་བ་བཤད་པ་དང་འགལ་བར་གྱུར་སྙམ་ན། འདིར་དང་པོར་འཁྲུས་བྱས་རྣལ་འབྱོར་པས་ཞེས་སོགས། ལྷ་དྲུག་སྟོན་བྱེད་ཀྱི་གཞུང་ཚིག་དེ་བོད་དུ་འགྱུར་བའི་རྒྱུད་ན་ནི་མེད་ལ། རྣམ་འཇོམས་ཀྱི་འགྲེལ་པ་སངས་རྒྱས་གསང་བས་མཛད་པར་གྲགས་པ་ན། ལུང་འདྲེན་གྱི་ཚུལ་དུ་ཡོད་པ་ལས་དེ་རྣམ་འཇོམས་རྒྱས་པའི་ལུང་ཡིན་པར་གྲགས་མོད་ཀྱི། རྣམ་འཇོམས་ཀྱི་རྒྱུད་ཡིན་དུ་ཆུག་ཀྱང་རྣམ་འཇོམས་ཀྱི་རྒྱུད་ཡིན་ཚད་བྱ་རྒྱུ་ཡིན་པར་མ་ངེས་པའི་ཕྱིར་དང༌། འགྲེལ་པ་དེ་ཡང་ཚིག་དོན་བཟང་མོད་ཚིག་གི་བབས་ལ་དཔགས་ན་སྔ་འགྱུར་དུས་ཀྱི་ཟིན་བྲིས་བོད་མ་ཞིག་ཏུ་གསལ་བའི་ཕྱིར་དང༌། མཆོད་དང་གསོལ་བ་ལྷ་དྲུག་བསྒོམ། །སྟོང་དང་ཡི་གེ་སྒྲ་གཟུགས་དང༌། ཞེས་པ་ལྟ་བུ་རྒྱ་སྐད་ཚིག་རིང་པོ་ཐུང་ངུར་བསྡུས་པའམ། །རྒྱ་སྐད་རྐང་པ་གསུམ་བོད་སྐད་རྐང་པ་གཉིས་ལ་བསྡུས་པའམ། རྒྱ་སྐད་ཚིག་ལྷུག་པ་ཚིགས་བཅད་ཡི་གེ་ཤིན་ཏུ་ཉུང་ངུར་བསྡུས་པ་ལྟ་བུའམ། ཚིགས་བཅད་ལ་རིག་བྱེད་ཀྱི་གསང་བའི་གབ་ཚིག་སྐད་འདོད་བསྒྲིགས་པ་ལྟ་བུ་ཡོད་ན་མ་གཏོགས། རྗེས་སྔགས་དང༌། ཁ་སྒོ་ལ་སོགས་པ་ཚིགས་བཅད་ཡིག་འབྲུ་བརྒྱད་པའི་སྡེབ་སྦྱོར་གྱི་ཚིག་རྐང་གཉིས་
ལ་འགྲིག་དཀའ་བར་སྣང་ཞིང༌། ཚིག་ལམ་ཡང་བོད་མའི་སྡོམས་འདྲ་རུང་བ་སྣང་བ། དེས་ན་ཚིག་འདི་ནི་བོད་ཀྱི་སྡོམས་ཚིག་སྙིང་པ་ཡིན་ཡང་དག་ཅིང༌། ཆེས་སྔ་བའི་ཡིག་རྙིང་ལས་དཔེ་གསར་དུ་སྤེལ་བ་རྣམས་ལ་མཆན་བུ་དཀྱུས་སུ་ཤོར་བའི་ནོར་བ་ཡང་མང་བས་ལུང་ཁུངས་སྨོས་པ་ཡང་རྩོམ་པ་པོས་བྱས་པར་མ་ངེས་པའི་ཕྱིར་དང༌། བྱ་རྒྱུད་རང་རྐང་ལ་ནི། ལྷ་དྲུག་གི་རྣམ་གཞག་ངེད་པར་འཆད་དགོས་པ་མི་སྣང་བས། དེ་འདྲའི་རྣམ་གཞག་ངེས་པར་དགོས་པ་མིན་ལ། ཅི་སྟེ་བྱེད་ན་སངས་རྒྱས་གསང་བས་བཤད་པ་རྣམས་ནི་སྤྱོད་རྒྱུད་ཀྱི་ལུགས་ཡིན་པས་འདིར་དེ་ལྟར་མི་བྱའོ། །འདིར་ནི་ལྷ་སྐུ་ལ་དམིགས་པའམ་མ་དམིགས་ཀྱང་རུང་སྟེ། བདག་གི་དེ་ཁོ་ན་ཉིད་ལ་དམིགས་པའི་སྐབས་སོགས་སུ། །ཆོས་ཀྱི་བདག་མེད་པའི་དོན་སྒོམ་པ་ནི་སྟོང་པ་ཉིད་ཀྱི་ལྷ། མདུན་སྐྱེད་གཙོ་བོའི་ཐུགས་ཀར་སྔགས་ཀྱི་ཡིག་འབྲུ་བསྒོམ་པ་ནི་ཡི་གེའི་ལྷ། སྔགས་ཀྱི་སྒྲ་ལ་དམིགས་པའི་བསམ་གཏན་ནི་སྒྲའི་ལྷ། །ལྷའི་སྐུ་ལ་དམིགས་པ་ནི་གཟུགས་ཀྱི་ལྷ། ལྷ་སོ་སོའི་དམ་ཚིག་གི་ཕྱག་རྒྱ་བཅིང་བ་ནི་ཕྱག་རྒྱའི་ལྷ། ཐུན་མཚམས་སུ་བར་ཆད་མི་འཇུག་ཅིང་བྱིན་རླབས་བརྟན་པའི་དོན་དུ། ཐུན་གཏོར་ཁར་ཕྱག་རྒྱ་སྤྱི་བོར་བཞག་པས། རྟགས་ཀྱི་ཚུལ་དུ་ཡིག་འབྲུ་བསམ་པ་ནི་མཚན་མའི་ལྷའོ། །འདིར་བསམ་གཏན་གྱི་དེ་ཁོ་ན་ཉིད་ཀྱང༌། ལྷ་དང་ཡི་གེར་དང་སྒྲ་དང་ཕྱག་མཚན་དང་ཐིག་ལེ་དང་འོད་ཟེར་ལ་སོགས་པ་ལ་དམིགས་ནས། སྟོང་ཉིད་སྙིང་རྗེ་སྒོམ་པ་རྣམས་མདུན་སྐྱེད་ཁོ་ན་ལ་དམིགས་ནས་བྱ་བ་ཡིན་གྱི། སྒྲ་དང་སེམས་དང་གཞི་ལ་གཞོལ་ཞེས་སོགས་ཀྱིས་བཟླས་བརྗོད་དང༌།
གསང་སྔགས་མེར་གནས་དངོས་གྲུབ་སྟེར། ཞེས་པ་ལ་སོགས་པའི་བསམ་གཏན་ནི་བྱ་རྒྱུད་རང་རྐང་གི་ལུགས་ལ་མི་སྦྱོར་རོ། །སངས་རྒྱས་གསང་བས། བྱ་རྒྱུད་རྣམས་རང་ལུགས་མི་མཛད་པར་སྦྱོང་རྒྱུད་དུ་འགྲེལ་བར་མཛད་པ་དེ་བོད་པའི་ཆེན་པོ་མང་པོས་མ་དགོངས་པ་དང༌། ཕྱིས་ཀྱི་སྒྲིན་པོ་མང་པོས་རྒྱུད་འབུམ་བཏུ་མཁན་རྣམས་ཀྱིས་བྱ་རྒྱུད་ཀྱི་པོ་ཏིའི་སྡེ་ཚན་གྱི་གསེབ་ལ་རྒྱུད་སྡེ་གོང་མར་གཏོགས་པ་མང་པོ་ངོ་མ་ཤེས་པར་ཤོར་བ་རྣམས་བྱ་རྒྱུད་དུ་བདག་བསྐྱེད་ཡོད་པའི་རྒྱབ་རྟེན་དུ་འདྲེན་པ་སོགས་ཅལ་ཅོལ་དུ་མ་ཡོད་པ་རྣམས་འཛུག་ཚུགས་བསྟན་པ་ཙམ་གྱི་འཁྲུལ་པ་སངས་པར་འགྱུར་རོ། །དེ་ལྟར་ན་དམ་ཚིག་གསུམ་བཀོད་རྒྱལ་པོ་དེ་བཞིན་གཤེགས་པའི་སྙིང་པོའི་ལེའུ་ལས་འབྱུང་བ་ལྷ་ལྔའི་སྒོ་ནས། བསྙེན་པའི་ཆོ་ག་སྤྱི་རྒྱུད་ནས་འབྱུང་བའི་ཁ་སྐོངས་དང་བཅས་པ་ལེགས་པར་བཤད་པ་ཡིན་ནོ། །ད་ནི་དབང་བསྐུར་བ་དང་འབྲེལ་བའི་དཀྱིལ་འཁོར་གྱི་ཆོ་ག་མདོ་ཙམ་བཤད་པར་བྱའོ། །དེ་ལ་སློབ་དཔོན་དང༌། སློབ་མའི་མཚན་ཉིད་དང༌། ཡུལ་ཕྱོགས་དང་དུས་དང༌། དཀྱིལ་འཁོར་ཀྱི་ས་གཞིའི་མཚན་ཉིད་ལ་སོགས་པ་ནི། གསང་བ་སྤྱི་རྒྱུད་ལས་འབྱུང་བ་ལྟར་ཤེས་པར་བྱའོ། །འདིར་ཆོ་ག་དངོས་ལ་སའི་ཆོ་ག་དང༌། སྟ་གོན་དུ་གནས་པ་དང༌། དཀྱིལ་འཁོར་ཞག་གི་ཆོ་ག་དང༌། དཀྱིལ་འཁོར་སྒྲུབ་པ་དང༌། སློབ་མ་དབང་བསྐུར་བ་དང༌། རྗེས་ཀྱི་ཆོ་ག་སྟེ་དྲུག་གོ །དང་པོ་ལས་སྦྱང་བ་དང༌། བཟུང་བ་གཉིས་སོ། དང་པོ་ནི། སྐྱབས་འགྲོ་སེམས་བསྐྱེད་ནས་བརྩམས་ཏེ། སྟོབས་བཅུ་མཁྱེན་པའི་ས་ལ་སེམས་ཅན་ཐམས་ཅད་སོ་སོར་གནས་པར་གྱུར་ཅིག་གི་བར་གོང་དུ་
བསྙེན་པའི་ཆོ་གར་བཤད་པ་ལྟར་གྱི་བསྒྲུབ་ཐབས་རྫོགས་པར་བསྒོམ། །ས་ཕྱོགས་གཙང་ཞིང་བྱི་དོར་བྱས་པ་ལ་མེ་ཏོག་སིལ་མ་ཅུང་ཟད་གཏོར། དཀར་གཏོར་གཅིག་ལ། ཨོཾ་ཨ་མྲྀ་ཏེ་ཧཱུཾ་ཕཊ་ཀྱིས་བསངས། རལ་གྲི་འདེབས་པའི་ཚུལ་ཞེས་བྱ་བ་རྡོར་བསྡམས་ཀྱི་ཕྱག་རྒྱ་བཏབ་ཏེ། ཨོཾ་ཨ་ཀཱ་རོ་མུ་ཁཾ་སརྦ་དྷརྨཱ་ཎཱཾ་ཨ་དྱ་ནུ་ཏྤནྣ་ཏྭཏ། ལན་གསུམ་གྱིས་བྱིན་གྱིས་རླབས། ན་མཿསརྦ་ཏ་ཐཱ་ག་ཏ་བྷྱོ་བི་ཤྭ་མུ་ཀ་བྷྱཿ ཞེས་སོགས་ནམ་མཁའ་མཛོད་ཀྱི་སྔགས་རྒྱ་ལན་གསུམ་གྱིས་རྒྱ་ཆེར་སྤེལ། ན་མཿསརྦ་ཏ་ཐཱ་ག་ཏ་ཨ་བ་ལོ་ཀི་ཏེ་ཨོཾ་སམྦྷ་ར་སམྦྷ་ར་ཧཱུཾ། ལན་བདུན་སོགས་ཀྱིས་ཕུལ། གཏོར་མ་གཟུགས་སྒྲ་དྲི་རོ་རེག་བྱ་འདོད་པའི་ཡོན་ཏན་ལྔ་དང་ལྡན་པ་འདི་ཉིད་ཡུལ་བདག་གནས་བདག་གཞི་བདག་གྲོང་བདག་གཉུག་མར་གནས་པ་ཡུལ་ཕྱོགས་ཀྱི་གཙོ་བོ་དང་སའི་བདག་པོ་ཐམས་ཅད་ལ་འབུལ་ལོ། །མཆོད་ཡོན་དང་དྲི་དང་མེ་ཏོག་དང་བདུག་པ་དང་སྣང་གསལ་དང་ན་བཟའ་ལ་སོགས་པ་ཡོ་བྱད་ཐམས་ཅད་དང་ལྡན་པའི་གཏོར་མ་འདི་བཞེས་ལ། གནོད་སེམས་ཞི་ཞིང༌། ཕན་པ་དང་བདེ་བའི་སེམས་དང་ལྡན་པས་དཀྱིལ་འཁོར་གྱི་དོན་དུ་སའི་ཕྱོགས་འདི་བདག་ལ་སྩོལ་བ་དང་ཞི་བ་དང་བདེ་བ་དང་བཀྲ་ཤིས་པར་མཛད་དུ་གསོལ། གང་ཡང་འདིར་གནས་ལྷ་དང་ཀླུ། །གནོད་སྦྱིན་སྲིན་མོའམ་གཞན་དག་ལ། །ས་འདི་བདག་གིས་སླང་བར་བགྱི། །དཀྱིལ་འཁོར་དོན་དུ་ཁྱོད་ཀྱིས་སྩོལ། ལན་གསུམ། རོལ་མོའི་སྒྲ་དང་བཅས་ཏེ་གཏོར་མ་ཕྱིར་དོར་རོ། །འདི་
དོན་གྱིས་སླང་བ་ཡིན། འགའ་ཞིག་འདི་ལྟ་བུ་བྱ་རྒྱུད་ལས་མ་བཤད་ཅེས་མི་བྱེད་པ་ནི། སྔ་མ་རྣམས་ཀྱི་ལག་ལེན་མ་ནོར་བའི་རྒྱུན་ལ་བརྙས་པ་བྱེད་ཅིང༌། མཐོང་རྒྱ་ཕྲ་མའི་ཁེངས་པས་ཡུལ་དུས་གང་དུ་གང་དགོས་མ་ཤེས་པར་བགེགས་ཀྱི་བར་ཆད་ཆེད་ཀྱིས་ཉོ་བར་ཟད་ལ། འདི་འདྲའི་རིགས་ཀྱི་མཐའ་རྒྱ་བསྐྱེད་དགོས་པའི་ཕྲ་མོ་མང་པོ་ཞིག་ལ། ཡུལ་དུས་དང་བསྟུན་པའི་ལག་ལེན་དགོས་ཀྱི། ག་གེ་མོའི་ལུགས་ལ་དེ་དང་དེ་ཡོད་དོ་མེད་དོ་ཞེས་ཚིག་རྩེག་ཐན་ཐུན་ལ་མགུལ་བ་ཆད་ཆད་དུ་རྩོད་པ་དང༌། བཤད་ཁུངས་ཕྲན་ཚགས་རེ་གདོང་ཐད་དེར་ཡོད་མེད་ཀྱི་དབུ་ཚུགས་མི་འགྲོ་སྟེ། སྔོན་རྒྱ་གར་དུ་པཎྜི་ཏ་གསུམ་གྱིས་གཞུང་ལུགས་དང་བསྟུན་ནས་ལྟོ་གཡོས་པའི་དཔེར་འགྲོ་ཉེན་ཡོད་དོ། །དེ་ནས་དཀྱིལ་འཁོར་གྱི་ས་གཞི་ལ་ལག་པས་བྱུགས་ཤིང༌། ཅབ་བེ་ཅབ་བེ་བྱས་ཏེ། ཨོཾ་ཀི་ལི་ཀཱི་ལ་བཛྲ་བྷི་མ་རཽ་ཏྲི་བ་བི་ཏྲ་མཧཱ་ཀྲོ་དྷ་བི་ཛཱ་ཡ། ནི་ཀྲིན་ཏ་ཧཱུཾ་ཕཊ། བནྡྷ་བནྡྷ་སྭཱཧཱ། ཞེས་མང་དུ་བཟླའོ། །དེ་ནས་ཨོཾ་ཀཱི་ལི་ཀཱི་ལ་བཛྲི་བཛྲི་བྷུ་ར་བནྡྷ་ཧུཾ་ཕཊ། ཅེས་སེང་ལྡིང་གི་ཕུར་བུ་སོར་བརྒྱད་པ་བཏབ། ཀི་ལི་ཀཱི་ལས་བསངས་གཏོར་བྱེད་པ་ནས་བརྩམས་ཏེ། རྡོ་རྗེའི་རྭ་བའི་ཕྱི་རོལ་དུ་མེ་དཔུང་འབར་བས་བསྐོར་བར་གྱུར། ཞེས་པའི་བར་མཚམས་བཅིངས་ཤིང་སླར་ཡང་སེང་ལྡིང་གི་ཕུར་བུ་ལ། ཨོཾ་ཨ་མྲྀ་ཏེ་ཧཱུཾ་ཕཊ། ཅེས་བདུད་རྩི་ཐལ་སྦྱོར་གྱི་སྔགས་བསྡུས་པ་དང༌། ཨོཾཥྟོཾ་བནྡྷ་སྭཱཧཱ། ཞེས་ལས་ཐམས་ཅད་པ་མང་དུ་བཟླས། ན་མཿསརྦ་བུདྡྷ་བོ་དྷི་སཏྭཱ་ནཱཾ། ནཱ་མཿས་མནྟ་བཛྲ་རྞཾ། ཨཱ་ཀོ་ཊ་ཡ། ས་ཧེ་མཧཱ་ཙཎྜ་ལ་ཕཊ་ཕཊ་ཕཊ། སརྦ་ཏྲ་རཀྵཾ་ཏྲ་ཊ་མ་ཊ་མ་ཊ་
ཕཊ། ཅེས་ཕུར་བུ་ཐོ་བས་བརྡུང་བར་བྱའོ། །སྔགས་འདི་དམ་ཚིག་གསུམ་བཀོད་ཉིད་ལས་གསུངས་སོ། །ཕུར་བུ་ནི་ཕྱོགས་མཚམས་བརྒྱད་དམ། མཚམས་བཞིའམ་མ་འབྱོར་ན་དབུས་སུ་གཅིག་གདབ་བོ། །གཉིས་པ་ས་བཟུང་བ་ནི། སྐྱབས་འགྲོ་སེམས་བསྐྱེད་ནས་བརྩམས་ཏེ། སེམས་ཅན་ཐམས་ཅད་སོ་སོར་གནས་པར་གྱུར་ཅིག །གི་བར་སྒྲུབ་ཐབས་རྫོགས་པར་བསྒོམ་ནས་ལས་རྗེས་མི་མངོན་པར་བྱའོ། །དེ་ནས། ཨོཾ་ཛ་ཡ་ཨུཥྞི་ཥ་ཛྭ་ལ་ཛྭ་ལ། བནྡྷ་བནྡྷ།ད་མ་ད་མ།ཨོཾ་ཧཱུཾ་ཧཱུཾ་ཧཱུཾ་ཧོ་ཧ་ན་ཧཱུཾ། ཞེས་གཙུག་ཏོར་རྒྱལ་བའི་སྔགས་ཀྱིས་བསངས་གཏོར་བྱ། བྷྲཱུཾ་དང༌། ཛི་ན་ཛིཀ་དང༌། རྩ་སྔགས་དེ་བཞིན་གཤེགས་པའི་ཡི་གེ་བརྒྱ་པ་བཟླ་བཞིན་དུ། ས་ལ་ལག་པས་བྱུགས་ཤིང་བཅབས་ནས། སའི་ཕྱོགས་འདི་བཅོམ་ལྡན་འདས་དམ་ཚིག་གསུམ་བཀོད་པའི་དཀྱིལ་འཁོར་ཆེན་པོ་བྲི་བར་བྱའོ། །ཞེས་བརྗོད། གཞོན་ནུ་མས་བཀལ་བའི་སྲས་བུ་ལ། ལས་ཐམས་ཅད་པའམ། བདུད་རྩི་ཐལ་སྦྱོར་རྒྱས་འབྲིང་བསྡུས་གསུམ་གངརུང་ཞིག་ལ་ལན་བཞི་བཅུ་རྩ་དགུ་བཟླས། མདུད་པ་གསུམ་མམ་བདུན་བཏབ་སྟེ་སློབ་མར་འགྱུར་བའི་མགུལ་ལམ་དཔུང་པར་བཏགས་པས་སློབ་མ་རྣམས་ཀྱི་བགེགས་ཐམས་ཅད་ཞི་ཞིང་སྲུང་བ་བྱས་པར་འགྱུར། འདི་སྤྱི་ལ་གྲགས་པའི་སློབ་མ་རྗེས་བཟུང་དང་དགོས་དོན་གཅིག་མོད། སྤྱིར་རྒྱུད་ཀྱི་དཔེ་ཁ་ཅིག་ལས། དེ་ནས་སློབ་མ་ཡོངས་བཟུང་ནས། ཞེས་འབྱུང་བ་ནི་ཡིག་ནོར་བརྒྱུད་པ་སྟེ། དཔེ་འགའ་ལས། དེས་ནི་སློབ་མ་ཡོངས་བཟུང་བའི། །ལས་ལ་བགེགས་ནི་མེད་པར་འགྱུར། །ཞེས་
འབྱུང་བ་ལྟར་དག་སྟེ། ཡོངས་སུ་བཟུང་ཟིན་པའི་སློབ་མ་ལ་སྲུང་བ་བྱེད་པའོ། །འདི་ལ་རྗེས་བཟུང་གི་ཐ་སྙད་བྱེད་པ་རྣམས་ནི་སྒྲུབ་བྱེད་དེ་གདོད་ཚོལ་དགོས་སོ། །སྐབས་འདིར་གསང་བ་སྤྱི་རྒྱུད་ལས་སྤྱིར་བཏང་དུ། ས་སྦྱང་བ་ནི་དཀྱིལ་འཁོར་བྲི་བའི་སྔ་རོལ་གྱི་ཞག་བདུན་གྱི་ནང་ལོགས་དང༌། ས་བཟུང་བ་ནི་བྲི་བའི་ཞག་གསུམ་གྱི་སྔོན་ནས་བྱེད་པར་གསུངས་ལ། དམིགས་གསལ་ལ་གཅིག་ཏུ་མ་ངེས་པས་ད་ལྟའི་ལག་ལེན་ལྟར་ན། ཉི་མ་དང་པོ་ལ་ས་སྦྱངས་བ་དང༌། གཉིས་པ་ལ་བཟུང་བ་ལྟ་བུ་བྱས་ནའང་རུང༌། ཡང་སྤྱི་རྒྱུད་ལས། ནུབ་གསུམ་གྱི་ཆོ་ག་རྫོགས་པའི་དབང་དུ་བྱས་ནས། རྣམ་དཔྱད་དང་པོ་ས་གཞི་བཟུང༌། ཞེས་ས་ཆོག་གི་སྡེ་གཉིས་ཀར་ཉི་མ་གཅིག་ལ་ཚང་བར་བྱས་ནའང་ལེགས་པར་འགྱུར་རོ། །དེ་ལ་རྒྱུད་རྣམས་ཀྱི་དགོངས་པས་ནི། སློབ་དཔོན་གྱིས་ཚད་དང་ལྡན་པའི་བསྙེན་པ་སོང་ཞིང་མ་ཉམས་པ་ཡིན་ན། སྐབས་འདིར་ས་ཆོག་གཉིས་ཀྱི་ཆོ་གའི་ཡན་ལག་ཏུ་བསྙེན་པའི་ཆོ་ག་དང་འདྲ་བའི་སྒྲུབ་ཐབས་ཚར་རེ་སྒོམ་པ་དེ་ངེས་པར་སྔོན་དུ་འགྲོ་དགོས་པ་མིན་པས། སྐབས་འདིར་བཟླས་བརྗོད་དང་ལྷའི་རྣལ་འབྱོར་སྒོམ་ཚུལ་ལ་གསུངས་པ་ནི། དོན་ལ་དཀྱིལ་འཁོར་གྱི་ཆོ་ག་ཚང་བར་འགྱུར་བ་ཙམ་ལ། སྐབས་འདིར་སྒྲུབ་ཐབས་བསྒོམ་མི་དགོས་ཀྱང་དང་པོར་ནི་རང་གཞན་གྱི་བསོད་ནམས་སྤེལ་བའི་སླད་དང༌། གཉིས་པར་ན་བྱིན་རླབས་ཉེ་བའི་ཕྱིར་དང༌། གསུམ་པར་ན་ཆོ་ག་མཛེས་པའི་ཆེད་དང༌། བཞི་པར་ན་ད་ལྟའི་གང་ཟག་དམན་པ་ཆོ་ག་ཙམ་དོན་གཉེར་གྱིས་ཀྱང་བསྙེན་པའི་ཆོ་ག་མི་སྤོང་ཞི་བློ་བྱང་བར་འགྱུར་བའི་དགོས་པ་ཁྱད་པར་ཅན་ཡོད་པས། ས་སྦྱངས་
བཟུང་ཉིན་ཞག་སོ་སོར་བྱེད་ན། ཉིན་རེ་བཞིན་སྐྱབས་འགྲོ་ནས་བསམས་ཏེ། ཐ་མའི་སྨོན་ལམ་གྱི་བར་གྱི་སྒྲུབ་ཐབས་ཚར་རེ་སྔོན་དུ་བཏང་ནས། དེ་དང་དེ་ལ་འཇུག་པ་ཡིན་ལ། སྦྱངས་བཟུང་ཉི་མ་གཅིག་ལ་བྱེད་ན་ནི། སྦྱང་བའི་སྔོན་དུ་སྒྲུབ་ཐབས་ཚར་གཅིག་བསྒོམས་པ་དེ་ཀས་ཆོག་གོ །གཉིས་པ་སྟ་གོན་དུ་གནས་པ་ལ། ལྷ་སྟ་གོན་དང༌། སློབ་མ་སྟ་གོན་དང༌། བུམ་པ་སྟ་གོན་གསུམ་མོ། །དང་པོ་ནི། སློབ་དཔོན་ཁྱིམ་པ་ཡིན་ན་ནང་པར་ཐོག་མ་ལ་བསྙེན་གནས་བླངས། ཉི་མ་འཆར་བའི་སྐབས་ཐུར་མའམ་དབྱུག་གུ་བསླང་བས། ཕྱོགས་བརྟགས་དེ་མ་ནོར་བར་སྐམ་ཐིག་ཐིག་ཆེན་བརྒྱད་ཙམ་འདེབས་ཤིང་སྒོ་སྤྲག་གསུམ་མའི་དཀྱིལ་འཁོར་འབྲི་ན་རྩ་ཐིག་རིམ་པ་གསུམ་ཀའི་ཐད་དུ་ཐིག་རེ་གདབ་དགོས་ལ། ལྷ་རྣམས་གང་དུ་འགོད་པའི་གནས་སོགས་ངེས་པར་བྱས་ནས་དེ་དག་ཏུ་རྟགས་བཏབ་བོ། །སྔ་དྲོའམ་ཉིན་གུང་སོགས་ཇི་ལྟར་འོས་པ་སྒྲུབ་ཐབས་ཚར་ཅིག་བསྒོམས་ནས་བཟླས་བརྗོད་ཀྱང་མང་དུུ་བྱ། ཅི་སྟེ་སྔ་དྲོ་ས་ཆོག་དང་དགོང་མོ་སྟ་གོན་བྱེད་པ་ཡིན་ན། ས་ཆོག་གི་མགོར་སྒྲུབ་ཐབས་ཐོག་མར་བསྒོམས་པ་དེ་ཁོ་ནས་ཆོག་གི སླང་ཡང་སྐབས་འདིར་མི་དགོས་མོད། སྤྱིར་ས་ཆོག་དང་སྟ་གོན་ཉིན་ཞག་གཅིག་ལ་བསྒྲུབས་པས་གོ་མི་ཆོད་པ་རང་ཡང་མིན་མོད། ཚུལ་དང་མཐུན་པ་མ་ཡིན་པས་མི་ལེགས་སོ། །དགོངས་ཀའི་དུས་ན་གོང་དུ་བཤད་པ་ལྟར་བསྙེན་པའི་སྐབས་ཀྱི་ལྷ་སྤྱན་འདྲེན་པ་ཡིད་ལ་བཞག་ནས། བྷྲཱུཾ། བདུན་དང༌། ཛི་ན་ཛིཀ་བདུན་དང༌། ཨོཾ་ཥྟོཾ་བནྡྷ་སྭཱཧཱ། ན་མོ་རཏྣ་ཏྲ་ཡཱ་ཡ གསུམ་དང༌།
དད་པ་དང་ནི་དམ་ཚིག་གི༴ ཞེས་པ་ནས། དགྱེས་པར་མཛད། བྷྲཱུཾ་བདུན་དང༌། ཛི་ན་ཛིཀ་བདུན་དང༌། ཨོཾ་བྷ་ག་ཝན་མཧཱ་ཀཱ་རུ་ཎི་ཀ་ཤཱཀྱ་མུ་ནི་ཏྲི་ས་མ་ཡ་རཱ་ཛ་མཎྜལ་དེ་བ་ཏཱ་ས་པཱ་རི་ཝ་ར་ཨེ་ཧྱཻ་ཧི། ལན་གསུམ། དཀྱིལ་འཁོར་གྱི་ས་གཞིར་དབུས་སུ་སོར་བཅུ་གཉིས་ཀྱི་ཚད་ཙམ་དུ་དྲི་བཟང་གི་གྲུ་བཞིར་བྱུག་ཅིང༌། ཛི་ན་ཛིཀ་ཞེས་པ་རིགས་ཀྱི་སྙིང་པོ་ལན་བདུན་དང༌། ཨོཾ་མུ་ནི་མུ་ནི་མཧཱ་མུ་ན་ཡེ་སྭཱཧཱ། གཙོ་བོའི་མཚན་སྔགས་ལན་གསུམ། དབུས་ཀྱི་གདན་གྱི་སྟེངས་སུ་བཅོམ་ལྡན་འདས་སོགས་ནས།ལྷ་གཞན་རྣམས་ཀྱི་གནས་སུ་དྲིའི་ཐིག་ལེ་བྱེད་བཞིན་པས། ཨོཾ་ཨཱརྱ་བཛྲ་དྷ་ར་སྭཱཧཱ། གཡས་སུ་འཕགས་པ་རྡོ་རྗེ་འཛིན་ཆེན་པོ། སོགས་ནས། གདན་ལ་བརྟེན་པ། ཨོཾ་ཨཱརྱ་བཛྲ་དྷ་རཱ་སྭཱཧཱ། གཙོ་བོའི་གཡོན་དུ་འཕགས་མ་རྡོ་རྗེ་འཛིན་སོགས་ནས། རྡོ་རྗེ་འཛིན་པའོ། །ཨོཾ་དུ་ཏ་ཨ་ནནྟཱ་ཡ་སྭཱཧཱ། གཡས་ཀྱི་འོག་ཏུ༴ སོགས་ནས། རིན་པོ་ཆེས་བརྒྱན་པའོ། །ཨོཾ་དུ་ཏི་ཨ་ནནྡྱཻ༴ སོགས་ནས། གཡོན་གྱི་འོག་ཏུ༴ སོགས་ནས། བཞུགས་པར་གྱུར། ལྷ་ལྔ་ཉིད་ལ་དེ་ཙམ་གྱིས་ཆོག་ཅིང༌། ལྷ་ལྔའི་དབང་གིས་གོ་མི་ཆོད་པ་ཏ་མིན་མོད། ཅུང་ཟད་རྒྱུད་སྨིན་སྟོབས་ཆུང་ལ། སྤྱི་རྒྱུད་ལྟར་སྦྱར་ན་སློབ་མ་སྨིན་ཚབས་ཆེ་བར་འོང་བའི་ཕྱིར། སྤྱི་རྒྱུད་ནས་ཁ་འགེངས་བྱེད་དགོས་པས་ན་འདི་ལྟར་བྱ་སྟེ། གཙོ་བོའི་མདུན་ངོས་ཀྱི་འོག་ཏུ། ཨོཾ་མཧཱ་ཀྲོ་དྷ་ཨ་པ་ར་ཛི་ཏ་སྭཱཧཱ། ཁྲོ་བོ་ཆེན་པོ་གཞན་གྱིས་མི་ཐུབ་པ་དང༌།
ཨོཾ་བྷ་ག་ཝ་ཏྱཻ་ཨ་པ་ར་ཛི་ཏཱ་སྭཱཧཱ། བཅོམ་ལྡན་ཁྲོ་མོ་གཞན་གྱིས་མི་ཐུབ་མ་དང༌། ཨོཾ་བུདྡྷ་ལོ་ཙ་ནེ་སྭཱཧཱ། རིགས་སྔགས་ཀྱི་རྒྱལ་མོ་ཆེན་མོ་སངས་རྒྱས་སྤྱན་མ་དང༌། ཨོཾ་ཨུརྞཱི་སྭཱཧཱ། བྱང་ཆུབ་སེམས་དཔའ་མཛོད་སྤུ་ཅན་དང༌། ཨོཾ་ཤཱུ་ལཱི་སྭཱཧཱ། བྱང་ཆུབ་སེམས་དཔའ་མདུང་ཐུང་ཅན་དང༌། ཨོཾ་ཙཀྲ་བརྟི་མཧཱ་ཨུདྦྷ་ཝེ་སྭཱཧཱ།བྱང་ཆུབ་སེམས་དཔའ་འཁོར་ལོས་བསྒྱུར་བ་ཆེར་འབྱུང་དང༌། ཨོཾ་ཙིནྟཱ་མ་ཎི་དྷྭ་ཛཱ་ཡ་སྭཱཧཱ། བྱང་ཆུབ་སེམས་དཔའ་ཡིད་བཞིན་གྱི་ནོར་བུའི་རྒྱལ་མཚན་དང༌། ཨོཾ་མཉྫུ་ཤྲཱི་ཀུ་མཱ་ར་བྷཱུ་ཏཱ་ཡ་སྭཱཧཱ། འཇམ་དཔལ་གཞོན་ནུ་གྱུར་པ་དང༌། ཨོཾ་མཧཱ་སྠཱ་མ། པྲ་སྟཱ་ཡ་སྭཱཧཱ། རྒྱལ་སྲས་མཐུ་ཆེན་ཐོབ་པ་དང༌། ཨོཾ་ཨཱ་ཀ་ཤ་གརྦྷཱ་ཡ་སྭཱཧཱ། བྱང་ཆུབ་སེམས་དཔའ་ནམ་མཁའི་སྙིང་པོ་དང༌། ཨོཾ་སརྦ་ཨརྠ་སིདྡྷི་ཡ་སྭཱཧཱ། བྱང་ཆུབ་སེམས་དཔའ་དོན་ཐམས་ཅད་གྲུབ་པ་དང༌། ཨོཾ་བི་མ་ལ་མ་ཏི་སྭཱཧཱ། བྱང་ཆུབ་སེམས་དཔའ་དྲི་མ་མེད་པའི་བློ་གྲོས་དང༌། ཨོཾ་ཨཱརྱ་མཻ་ཏྲི་སྭཱཧཱ། བྱང་ཆུབ་སེམས་དཔའ་འཕགས་པ་བྱམས་པ་དང༌། ཨོཾ་མཱ་མ་ཀཱི་སྭཱཧཱ། རིགས་སྔགས་ཀྱི་རྒྱལ་མོ་ཆེན་མོ་མཱ་མ་ཀཱི་དང༌། ཨོཾ་མཧཱ་བིརྱ་སྭཱཧཱ། མངགས་གཞུག་པ་བརྩོན་འགྲུས་ཆེན་པོ་དང༌། ཨོཾ་ཨིནྡྲ་ཡ་སྭཱཧཱ། ལྷའི་རྒྱལ་པོ་མཆོད་སྦྱིན་བརྒྱ་པ་དང༌། ཨོཾ་ཨ་དི་ཏྱ་སྭཱཧཱ། ལྷའི་བུ་ཉི་མ་དང༌། ཨོཾ་ཤཱི་ཏ་ཨཾ་ཤུ་སྭཱཧཱ། ལྷའི་བུ་ཟླ་བ་དང༌། ཨོཾ་ཨགྣ་ཡེ་
སྭཱཧཱ། དྲང་སྲོང་ཆེན་པོ་མེ་ལྷ་དང༌། ཨོཾ་ཡ་མ་ཡེ་སྭཱཧཱ། གཤིན་རྗེའི་རྒྱལ་པོ་དང༌། ཨོཾ་རཀྵཱ་ས་ཏི་པ་ཡ་སྭཱཧཱ། སྲིན་པོའི་རྒྱལ་པོ་དང༌། ཨོཾ་བ་རུ་ཎཱ་ཡ་སྭཱཧཱ། ཆུ་ཡི་བདག་པོ་དང༌། ཨོཾ་བཱ་ཡ་བེ་སྭཱཧཱ། རླུང་ལྷའི་རྒྱལ་པོ་དང༌། ཨོཾ་ཀུ་བེ་ར་སྭཱཧཱ། གནོད་སྦྱིན་གྱི་དེད་དཔོན་ལུས་ངན་པོ་དང༌། ཨོཾ་ཨི་ཤཱ་ན་ཡ་སྭཱཧཱ། འབྱུང་པོའི་བདག་པོ་དབང་ལྡན་དང༌། ཨོཾ་པྲི་ཐྭཱི་དེ་ཝཱི་སྭཱཧཱ། སའི་ལྷ་མོ་ཆེན་མོ་དང༌། ཨོཾ་ནནྟ་ནཱ་གཱ་ཡ་སྭཱཧཱ། ཨོཾ་ཨུ་པ་ནནྡ་ནཱ་གཱ་ཡ་སྭཱཧཱ། ཀླུའི་རྒྱལ་པོ་དགའ་བོ་དང༌། གཉེན་དགའ་བོ་དང༌། ཨོཾ་ཧ་རི་ཏྱཻ་སྭཱཧཱ། གནོད་སྦྱིན་མོ་འཕྲོག་མ་དང༌། སྒོ་སྲུང་འཇིག་རྟེན་སྐྱོང་བ་བཞི་བྱེད་ན། ཨོཾ་དྷྲྀ་ཏ་རཥྟ་ཡ་སྭཱཧཱ། ཞེས་སོགས་ཀྱང་བྱ། གཞལ་ཡས་ཁང་འབྱུང་བར་འགྱུར་བའི་ཕྱིའི་ས་གཞི་ལ། ཨོཾ་བཛྲ་སེ་ན་སྭཱཧཱ། རྡོ་རྗེ་སྡེ་དང༌། ཨོཾ་སུ་བ་ཧུ་སྭཱཧཱ། ལག་བཟང་དང༌། ཨོཾ་མུརྟཱ་ན་ཏ་ཀཱ་ཡ་སྭཱཧཱ། བགེགས་ཀྱི་དེད་དཔོན་ཆེན་པོ་ཚོགས་ཀྱི་བདག་པོ་དང༌། ཨོཾ་རུ་ཊ་མ་ཧེ་ཤྭ་རཱ་ཡ་སྭཱཧཱ། དབང་ཕྱུག་ཆེན་པོ་དང༌། ཨོཾ་པྲཧྨཱ་ཡ་སྭཱཧཱ། ཚངས་པ་ཆེན་པོ་དང༌། རིགས་ལྔ་འཆང་གི་རྒྱལ་པོ་ཡང༌། །གླང་པོ་ཆེ་ཞེས་བྱ་བ་དང༌། །ཡན་ལག་བཀྲས་འབྱིན་རྩེ་བྲན་ཅན། །གཡོན་ཕྱོགས་ཅོད་པན་མིག་བཟང་དང༌། །སྣ་ཚོགས་འོད་དང་ལེགས་པར་གྲུབ། །བདུན་པོ་ལྷོ་ཡི་ཕྱོགས་སུ་བཞུགས། །འདིར་ལྷའི་མཚན་བརྗོད་པས་གསལ་འདེབས་པ་ལ། ཁ་གཅིག་ཤཱཀྱ་ཐུབ་པ་ཞེས་པ་ལྟ་བུ་ཁོ་ན་བྱེད་ཟེར་བ་ནི་ལག་ལེན་དང་མན་ངག་མེད་པར་
སྤྱི་རྒྱུད་བཀླགས་པ་ཙམ་གྱིས་ཚིམ་པའི་སྐྱོན་ཏེ་རང་ལུགས་ལ་ཐོག་མཐར་ཨོཾ་དང་སྭཱཧཱ་སྦྱོར། དེ་དག་ལ་སྒྲུབ་ཐབས་སུ་བཤད་པའི་ཆོ་གས། ཛི་ན་ཛིཀ་ཨོཾ་ཏེ་ཛ་ཏེ་ཛ༴ ནས། མཉམ་ཉིད་མི་གཡོ་མའི་བར་དུ་མཆོད་པ་བྱིན་རླབས་དང༌། མཆོད་ཡོན་ནས་བརྩམས་ཏེ་བསྟོད་པ་རྫོགས་ཀྱི་བར་མཆོད་བསྟོད་འབུལ། འགྲུབ་ན་ལྷ་མཉེས་པའི་ཕྱིར་སྲེག་བླུགས་ཀྱི་མཆོད་པ་བྱ་ལ། དེ་ནས་དཀྱིལ་འཁོར་གྱི་ལྷ་དང་སངས་རྒྱས་ཀུན་ལ་དམིགས་ནས། ཨཱ་ཧ་ར༴ ལ་སོགས་པའི་སྔགས་ཀྱིས་ཉེར་སྤྱོད་ལྔ་ཕུལ། བདུག་སྤོས་འཐུལ་བཞིན་དུ། དམ་ཚིག་གསུམ་རྒྱལ་བཅོམ་ལྡན་འདས། །རིགས་སྔགས་རྒྱལ་ལ་ཕྱག་འཚལ་ལོ། །སློབ་མ་རྣམས་ལ་བརྩེ་བ་དང༌། ཁྱེད་རྣམས་ལ་ཡང་མཆོད་པའི་ཕྱིར། །མགོན་པོ་ཐུགས་རྗེའི་བདག་ཉིད་ཅན། །སང་ནི་དཀྱིལ་འཁོར་བྲི་བར་བྱ། །དེ་ཕྱིར་བཅོམ་ལྡན་བདག་གུས་ལ། །བཀའ་དྲིན་གནང་བར་མཛད་པའི་རིགས། །སངས་རྒྱས་འཇིག་རྟེན་མགོན་བརྩེ་དང༌། །བྱང་ཆུབ་སེམས་དཔའ་འབྲས་གནས་དང༌། །གཞན་ཡང་གང་དག་གསང་སྔགས་ལྷ། །འཇིག་རྟེན་སྐྱོང་བའི་ལྷ་རྣམས་དང༌། །གང་ཡང་འབྱུང་པོ་མཐུ་ཆེན་དང༌། །སེམས་ཅན་བསྟན་ལ་མངོན་དགའ་བ། །གང་སུ་ལྷ་ཡི་སྤྱན་མངའ་རྣམས། །བདག་ལ་དགོངས་པར་མཛད་དུ་གསོལ། །བདག་མིང་འདི་ཞེས་བགྱི་བ་ཡིས། །དམ་ཚིག་གསུམ་བཀོད་དཀྱིལ་འཁོར་ནི། །ཇི་ལྟར་ནུས་པར་ཉེར་སྦྱོར་བས། །འགྲོ་བ་སྦྱང་ཕྱིར་བྲི་བར་བྱ། །དེ་ཕྱིར་
བདག་དང་སློབ་མ་ལ། །རྗེས་སུ་བརྩེ་བས་ཉེར་དགོངས་ཏེ། །དཀྱིལ་འཁོར་དང་བཅས་ཐམས་ཅད་ནི། །ཉེ་བར་གནས་པོར་མཛད་པའི་རིགས། །ཞེས་ལན་གསུམ་གསོལ་བ་བཏབ། ཁ་ཅིག་བདག་མིང་ཞེས་པའི་ཐད་དུ། གསང་མཚན་འཇུག་པ་སོགས་ནི་རྒྱུད་སྡེ་གོང་མ་ལ་རུང་ཡང༌། འདིར་རང་མིང་ཉིད་འཇུག་པའོ། །མགོན་པོ་ཐུགས་རྗེ་ཆེ་ལྡན་པ༴ སོགས་ཤོ་ལོ་ཀ་གསུམ་གྱིས་ཕྱག་བཙལ། རོལ་མོའི་སྒྲ་དང་བཅས་ཏེ། མཉམ་ཉིད་མི་གཡོས་བསྟོད། རྩ་བའི་སྔགས་དེ་བཞིན་གཤེགས་པའི་ཡི་གེ་བརྒྱ་པའི་མཐར། ཛི་ན་ཛིཀ་གིས་མངགས་པའི་མཆོད་ཡོན། ཨརྒྷཾ་པྲ་ཏཱིཙྪ་སྭཱཧཱས་ཕུལ། ཨོཾ་མུཿཞེས་གཤེགས་སུ་གསོལ། ཁ་གཅིག་སྟ་གོན་གྱི་ལྷ་དྲན་རྫོགས་སུ་བསྐྱེད་པ་ཡིན་པས། སྐབས་འདིར་མི་སྣང་བར་བསམ་པ་ཁོ་ནས་ཆོག་ཅེས་འདོད་ལ། གཞན་དག་སྟ་གོན་གྱི་ལྷ་སྤྱན་འདྲེན་དགོས་པས། འདིར་ཡང་གཤེགས་གསོལ་གྱི་ཆོ་གས་སྤྱན་དྲངས་དགོས་སོ་ཞེས་འདོད་དོ། །དེ་གཉིས་ཀར་རུང་བ་ལས་སྤྱན་དྲངས་ཏེ་གཤེགས་སུ་གསོལ་བ་ཉིད། མཆོག་ཏུ་བཟང་བར་མངོན་ནོ། །བོད་དུ་ཕྱིས་བྱུང་བ་བྱ་རྒྱུད་ཤེས་པར་རློམ་པ་དག་ཅིག །སྙན་གསན་འབེབས་པ་དང་གཤེགས་སུ་གསོལ་བ་འདི། འཁྱོར་ཆུ་དང་ཀུ་ཤ་སྦྱིན་པའི་བར་དུ་བྱེད་པ་རྒྱུད་ཀྱི་ཁྱད་ཆོས་སུ་སྒོམ་པར་འདུག་ནའང་མན་ངག་དང་ལག་ལེན་མེད་པས་ཉེས་ཏེ། རྒྱུད་ཕལ་ཆེར་དུ་ཆོ་གའི་གོ་རིམ་འཁྲུགས་ཅན་དུ་འབྱུང་བ་ལྟར་འདིར་ཡང་སྟེ། སྟ་གོན་གྱི་སློབ་མ་བྱིན་རླབས་དང་སོ་ཤིང་འདོར་བའི་གཞུང་ཚིག་གི་བར་སྐབས་དེར། དབང་བསྐུར་བ་ཡི་བུམ་པ་ནི། ཞེས་སོགས་
བུམ་པ་སྟ་གོན་གསུངས་པ་དང་འདྲ་བས་ཆོ་ག་རིགས་མཐུན་གྱི་གཞུང་རྣམས་སྒྲིག་ལུགས་ཤེས་དགོས་ལ། ལྷ་ལ་སྙན་གསན་འབེབས་པ་ལ་སློབ་མ་དབབ་པོར་དགོས་པ་ག་ལ་ཞིག་སྟེ། ཆོ་གའི་གོ་རིམ་གྱི་ཚོམས་དེ་ལྟ་བུ་མི་བྱའོ། །དེ་དག་ནི་ལྷ་སྟ་གོན་གྱི་རིམ་པ་སྟེ། སྤྱི་དང་མཐུན་ཤས་ཆེ་ལ། ཁ་ཅིག་སྐབས་འདིར་སློབ་མ་ལ་སོ་ཤིང་སྦྱིན་ཏེ། སྦྱིན་སྲེག་བྱེད་དགོས་ཤིང༌། དེ་ཡང་སློབ་མ་རྗེས་བཟུང་ངོ་ཞེས་ཟེར་བ་ནི་སྤྱི་རྒྱུད་ལས། རྩེ་མོ་ནས་ནི་བཙལ་བར་བྱ། ཞེས་སོགས་འཕྲོས་དོན་ལ་འཁྲུལ་གཞི་བྱུང་བར་སྣང་སྟེ། སྐབས་འདིར་སོ་ཤིང་ལ་སོགས་པ་གྲབས་སུ་ཆུད་པར་བྱེད་པ་ཙམ་རྒྱུད་ཀྱི་དགོངས་པ་ཡིན་གྱི་སློབ་མ་ལ་སྟེར་བ་མིན་ནོ། །གཉིས་པ་སློབ་མ་སྟ་གོན་ནི་ཐོག་མར་སློབ་མའི་བར་ཆད་ཞི་བའི་དོན་དུ་ཞི་བའི་སྦྱིན་སྲེག་བྱ། སློབ་མ་དེ་སྔར་ཁྱིམ་པ་ཕལ་པ་ཡིན་ན་དགེ་བསྙེན་སོགས་སོ་ཐར་རིགས་བདུན་པོ་གང་རུང་གཅིག་གི་སྡོམ་པ་ཐོབ་དགོས་ཏེ། དཀྱིལ་འཁོར་ཁང་པར་མ་ཞུགས་པའི་སྔོན་རོལ་དུ་གྲུབ་པ་ཞིག་དགོས་ལ། སྔར་སོ་ཐར་སྡོམ་པ་གང་རུང་ཞིག་ཐོབ་ལ་མ་ཉམས་པ་ཡིན་ན། སྐབས་འདིར་སོ་ཐར་གྱི་ཆོ་ག་མི་དགོས་སོ། །སློབ་མ་རྣམས་དཀྱིལ་འཁོར་གྱི་ཁང་པ་ལྷག་གནས་བྱེད་པའམ་གནས་ཁང་གཞན་དུ་ཡང་རུང་ལ། གང་ལྟར་ནའང་ཁྲུས་བྱས་གྲལ་དུ་འཁོད། མཎྜལ་འབུལ། དགའ་ཆེན་ཁྱོད་བདག་སྟོན་པ་སྟེ། ཞེས་སོགས་ལན་གསུམ་གྱིས་གསོལ་བ་བཏབ། བར་འདིར་སྐྱབས་འགྲོ་དང༌། སེམས་བསྐྱེད་ཀྱི་ཆོ་ག་རྒྱས་པས་སྨོན་འཇུག་གི་སྡོམ་པ་ཕོག་ན་
ཆེས་བཟང་ལ། གལ་ཏེ་མ་འགྲུབ་ན་ཡན་ལག་བདུན་པ་སོགས་ཀྱི་སྤྲོས་པ་སྤངས་ཏེ། སྐྱབས་འགྲོ་དང་སྨོན་པ་སེམས་བསྐྱེད་ཀྱི་དངོས་གཞིའི་ཆོ་གའི་སེམས་བསྐྱེད་འབོགས་སོ། །སྐྱབས་སེམས་ཀྱི་དངོས་གཞི་ཙམ་དུ་འབོགས་པ་འདི་ནི། སྔར་གཞན་དུ་བྱང་སྡོམ་ཐོབ་ལ་མ་ཉམས་པ་ཡིན་ཀྱང༌། སྐབས་འདིར་འབོགས་དགོས་ཏེ་ཆོ་གའི་ཡན་ལག་ཡིན་པའི་ཕྱིར། དཔེར་ན་དཀྱིལ་ཆོག་གཞན་གྱི་རྒྱུན་བཤགས་བཞིན་ནོ། །ཡང་ཆོ་ག་ཤིན་ཏུ་བསྡུས་པ་ལ་མངོན་པར་དགའ་བའི་ཚེ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་བདག་ལ་དགོངས་སུ་གསོལ། སློབ་དཔོན་བདག་ལ་དགོངས་སུ་གསོལ། སྲོག་ཆགས་སྡུག་བསྔལ་ཞི་བྱའི་ཕྱིར། སོགས་དང༌། སེམས་ཅན་ཁམས་ནི་མཐའ་ཡས་པའི། སོགས་ཚིག་རྐང་བརྒྱད་དང༌། ཚེ་ཡི་མཐའ་ཀླས་བྱེད་པ་དང༌། ཞེས་པ་ནས། བྱང་ཆུབ་རབ་ཏུ་དགའ་བརྩོན་ནོ། །ཞེས་པའི་བར་གྱིས་ཀྱང་གྲུབ་བོ། །དེ་ལྟར་རྒྱུད་སྦྱངས་ནས། མྱ་ངན་ལས་འདས་པའི་བསམ་པ་བརྟན་པོ་བསྐྱེད་པ་ནི། སྔགས་ཀྱི་དངོས་གྲུབ་དོན་གཉེར་གང༌། ཞེས་པ་ནས། འབད་པ་མེད་པར་འདི་འབྲས་འགྲུབ། ཅེས་པའི་བར་བརྗོད་ཅིང་དོན་བཤད། དེའི་རྗེས་སུ་བྱིན་གྱིས་རླབས་པ་ནི། ན་མོ་རཏྣ་ནས། ཨ་མྲྀ་ཏེ་ཧཱུཾ་ཕཊ། གྱིས་བར་བདུད་རྩི་ཐབས་སྦྱོར་བཟླ་བཞིན་དུ། དྲི་བཟང་གི་ཆུས་སློབ་མའི་མགོ་ལ་བསངས་གཏོར་བྱ་ཞིང༌། ཡང་མགོ་ལ་ལག་པས་ཐམ་སྟེ། ཨོཾ་ཨ་མྲྀ་ཏེ་ཧུཾ་ཕཊ། ལན་བདུན་བཟླའོ། །ཡང་བྱུགས་སྤོས་ཀྱིས་བཀུས་པའི་ལག་པ་མགོ་ལ་
བཞག་སྟེ། ཐབས་སྦྱོར་ལན་བདུན་ཟླ་བར་ཡང་བཤད། ཡང་དེ་བཞིན་དུ་རིགས་ཀྱི་འཁོར་ལོས་བསྒྱུར་བ་ཡི་གེ་གཅིག་པ། བྷྲཱུཾ་བརྒྱ་ཙམ་བཟླས་ཤིང༌། བདུད་རྩི་ཐབས་སྦྱོར་ལན་གསུམ་བཟླས་པས་ཀྱང་བྱིན་གྱིས་རླབས། དེ་ཉིད་བརྟན་ཞིང་སྲུང་བའི་དོན་དུ། ཨོཾཥྟོཾ་བནྡྷ་སྭཱཧཱ། ཞེས་པས་བསངས་གཏོར་དང་བྲམ་པར་བྱེད་ཅིང་སྤོས་ཀྱིས་བདུག་གོ །སོ་ཤིང་གི་དམིགས་པ་སྤྱི་དང་འདྲ། ཛི་ན་ཛི་ཀ་གིས་གཏད་ལ། བྷྲཱུཾ། ཞེས་དོར་བར་བྱའོ། །དེ་ནས་སློབ་མའི་ལག་ཏུ་དྲི་བཟང་གི་ཆུ་བླུགས་ལ། ཉེ་རེག་བྱེད་དུ་བཅུག ཥྟོཾ་བྷནྡྷ་དང༌། ཨོཾ་ཧུ་ལུ་ཧུ་ལུ་ཙཎྜ་ལི་མ་ཏཾ་གི་སྭཱཧཱ། མང་དུ་བཟླས་པའི་ཁྱོར་ཆུ་ལན་གསུམ་སྔགས་དེ་ཉིད་ཀྱིས་སྦྱིན་པའམ། ཡང་ན། ཨོཾ་ཧྲཱིཿབི་ཤུདྡྷ༴ སོགས་སྤྱི་དང་མཐུན་པར་བྱིན་ཀྱང་རུང་བར་མངོན་ནོ། །སྔགས་དེ་རྒྱུད་སྡེ་གོང་མའི་ཁྱད་ཆོས་ཡིན་པའི་རྒྱུ་མཚན་མེད་ཅིང༌། བྱ་རྒྱུད་ལ་མི་རུང་བའི་རྒྱུ་མཚན་ཡང་ཅི་ཡང་མེད་པའི་ཕྱིར་རོ། ཁ་ཅིག་དེ་ནས་ཆུ་གཞན་ཞིག་གིས་ཁ་བཀྲུ་བར་འདོད་ཀྱང་ལག་ལེན་ལ་མི་མཛད་ལ། དེ་ནས་ལས་ཐམས་ཅད་པ་བཟླས་པའི་རྩ་ཀུ་ཤ་སྔས་དང་གཏན་གྱི་དོན་དུ་སྦྱིན། སྤྱི་རྒྱུད་ལས་སྐབས་འདིར་སྲུང་སྐུད་སྦྱིན་པའི་གསལ་ཁ་མེད་ཀྱང༌། སྔར་ས་སྦྱངས་བའི་སྐབས་སུ་སྲུང་སྐུད་བྱེད་པར་གསུངས་པ་དེ་ཡང་སློབ་མ་ལ་འདོགས་རྒྱུ་ཡིན་པའི་སྐབས་དེར་བཏགས་པའི་དབང་དུ་མཛད་པ་ཡིན་ལ། དེར་མ་བཏགས་ན་འདིར་འདོགས་དགོས་སོ། །དེ་ནས། ཆོས་རྣམས་གང་དག་རྒྱུ་ལས་བྱུང༌། ཞེས་སོགས་དང༌། སྐར་མ་རབ་རིབ་མར་མེ་དང༌། །སྒྱུ་མ་ཟིལ་བ་ཆུ་བུར་དང༌། །
རྨི་ལམ་གློག་དང་སྤྲིན་ལྟ་བུ། །འདུས་བྱས་ཆོས་རྣམས་དེ་ལྟར་བལྟ། །སྡིག་པ་ཅི་ཡང་མི་བྱ་ཞིང༌། །ཞེས་པ་ནས། འོན་ཀྱང་སྐྱོབས་པའི་སྲས་སུ་སྐྱེ། །ཞེས་པའི་བར་བརྗོད་དེ། ཆགས་བྲལ་དང་ལྡན་པའི་ཆོས་བཤད་པའོ། །དེ་ནས། བུ་སྐྱེ་སང་ནི་དཀྱིལ་འཁོར་མཆོག །མཐོང་བར་འགྱུར་རོ་ཉོལ་ཞིག་དང༌། །རྨི་ལམ་མཐོང་བ་གང་ཡིན་པ། །དེ་ཀུན་ང་ལ་ལེགས་པར་སྨྲོས། །ཀྱེ་བཞིན་བཟང་དག་ལོངས་ལ་དེ་བཞིན་གཤེགས་པ་རྣམས་ལ་ཕྱག་བྱོས་ཤིག ཅེས་བརྗོད། ཕྱག་འཚལ་དུ་བཅུག་ལ་རང་གནས་སུ་བཏང་ངོ༌། །གསུམ་པ་བུམ་པ་སྟ་གོན་ནི། བུམ་པ་མཚན་ཉིད་དང་ལྡན་པ། རྣམ་རྒྱལ་བུམ་པའམ་གཙོ་བོའི་བུམ་པར་འོས་པ་གཅིག་དང༌། ཁྲུས་བུམ་མམ་བཀྲ་ཤིས་ཀྱི་བུམ་པ་བརྒྱད་དམ་མ་འགྲུབ་ན་བཞི། ལས་བུམ་གཅིག་སྟེ། བུམ་པ་ཉུང་བའི་ཕྱོགས་འཛིན་ན་བུམ་པ་དྲུག་བྱའོ། །ལས་བཞིའི་དབང་སྐུར་བྱེད་ན་བུམ་པ་རྣམས་ཀྱི་ཕྱི་རོལ་ཕྱོགས་བཞིར། ཤར་དུ་རྒྱས་པ། ལྷོར་མངོན་སྤྱོད། ནུབ་དུ་དབང༌། བྱང་དུ་ཞི་བའི་བུམ་པ་རྣམས་བཅའ། དེ་དག་སོ་སོའི་ཁ་དོག་སོགས་ཀྱི་བྱེད་ལས་བཞི་སོ་སོའི་ལུགས་སུ་གྲུབ་ནའང་ལེགས། དབང་བསྐུར་ཙམ་ལ་སྤྱི་དང་མཐུན་པས་ཀྱང་ཆོག་ལ། ལས་བཞིའི་དབང་བསྐུར་བྱེད་ཀྱང༌། བུམ་པ་སོ་སོ་མ་འབྱོར་ན་ལས་བུམ་ལ་བསྡུས་པས་ཆོག་གོ །དེ་དག་ལེགས་པར་བཀྲུས་ཤིང་གུ་གུལ་གྱིས་བདུགས། འབྲུ་དང་རིན་པོ་ཆེ་ལ་སོགས་པ་ནང་རྫས་རྣམས་ཐོག་མར་བླུགས། ཕྱི་ནས་འབབ་ཆུ་གཙང་མ་ནས་བླང་བའི་ཆུས་སུམ་གཉིས་ཙམ་བཀང༌། གཏན་ནམ་སྟེགས་བུ་གཙང་མ་ལ་གཙོ་བོའི་བུམ་པར་
དབུས་སམ་སྟེགས་མཐོ་སར་བཞག ཁྲུས་བུམ་རྣམས་སྟེགས་བར་མའམ་ཟུར་བཞིར་བཞག ལས་བུམ་ནི་སྟེགས་དམའ་བའི་ཕྱོགས་སམ་དེའི་མདུན་དུ་བཞག དུང་ཆོས་ལ་སོགས་པའི་སྣོད་དུ་དྲི་བཟང་གི་ཆུ་ལ་བྷྲཱུཾ་བརྒྱ་རྩ་བཟླས་ལ་མཆོད་ཡོན་གྱི་ཚུལ་དུ་དབུས་ཀྱི་བུམ་པའི་སྟེང་དུ་བཞག །མེ་ཏོག་འཕྲེང་བའམ་གཟུངས་ཐག་ཀྱང་བཏགས། ན་མོ་རཏྣ༴ ནས། ཨ་མྲྀ་ཏེ་ཧཱུཾ་ཕཊ་ཀྱི་བར་བདུད་རྩི་འཁྱིལ་བའི་སྔགས་ཀྱིས་བསངས་དེ་ནས་འདི་སྐད་ཅེས། བུམ་པ་ནང་རྫས་རྒྱན་དང་བཅས་པ་ཐམས་ཅད་རང་བཞིན་གདོད་ནས་གཉིས་ཆོས་དང་བྲལ་བ་རང་གི་རིག་པའི་ཡེ་ཤེས་ཀྱི་བདག་ཉིད་དོ། །དེ་ཡང་རིན་པོ་ཆེའི་བུམ་པ་ཡངས་ཤིང་རྒྱ་ཆེ་བ། ལྟོ་བ་ལྡིར་ཞིང་མགྲིན་པ་ཕྲ་བ། མཆུ་འཕྱང་བ། དཔག་བསམ་ཤིང་གིས་ཁ་བརྒྱན་པ། ལྷ་རྫས་ཀྱི་གོས་ཟུང་ཅན། ལྷའི་ཆུ་བོ་དང་ནང་རྫས་ཀྱི་གང་ཞིང༌། པདྨའི་གདན་ལ་གནས་པ་རྣམས་སུ་གྱུར། སངས་རྒྱས་དང་བྱང་སེམས་སྔགས་ཀྱི་ལྷ་རྣམས་ཉེ་བར་བཞུགས་པ་ལ་གསོལ་བ་བཏབ་པར་མོས་ཏེ། དབུས་ཀྱི་བུམ་པ་ལ་རིག་པའི་རྒྱལ་པོ་བྷྲཱུཾ་བརྒྱ་སྟོང་དང༌། དེ་བཞིན་གཤེགས་པའི་ཡིག་བརྒྱ་དང༌། སྙིང་པོ་ཡི་གེ་ལྔ་པ་ཡང་ཉེར་གཅིག་སོགས་ཅི་རིགས་པ་བཟླ། ཁྲུས་བུམ་བཞི་ལས་མདུན་ཕྱོགས་ཀྱི་གཡས་གཡོན་ན་གནས་པ་གཉིས་ལ། རིགས་ཀྱི་སྙིང་པོ། ཛི་ན་ཛི་ཀ དང༌། རྒྱབ་ཕྱོགས་ཀྱི་གཉིས་ལ་ལས་ཐམས་ཅད་པ། ཨོཾཥྟོཾ་བནྡྷ་སྭཱཧཱ་དང༌། ལས་བུམ་ལ། ན་མོ་རཏྣ༴ སོགས་
ཐབས་སྦྱོར་གྱི་སྔགས་རིང་བ་དང༌། འབྲིང་པོ་དང༌། ཨོཾ་ཨ་མྲྀ་ཏེ་ཧཱུཾ་ཕཊ། ཐུང་བ་སྟེ། བདུད་རྩི་ཐབས་སྦྱོར་ཇི་ལྟར་འོས་པ་བཟླའོ། །དཀྱིལ་འཁོར་གྱི་ལྷ་ཚོགས་གཞན་རྣམས་ཀྱི་མཚན་སྔགས་ཀྱང་བཟླ་བར་རིགས་མོད་ཀྱི། ངེས་པར་དགོས་པ་མ་ཡིན་པས་འདིར་བཞག་གོ །དེ་ནས་ཞི་བའི་བུམ་པ་ལ། ཨོཾ་རུ་རུ༴ སོགས་སངས་རྒྱས་སྤྱན་མའི་སྔགས་དང༌། རྒྱས་པའི་བུམ་པ་ལ། ཏདྱ་ཐཱ། ཨོཾ་བྷྲཱུཾ། ཞེས་པ་སངས་རྒྱས་རིན་ཆེན་ཏོག་གི་སྔགས་དང༌། དབང་གི་བུམ་པ་ལ། ཨོཾ་ཛི་ཛི་ཛི་ནཾ་ག་ཏཾ་ག་ཡ་ཏེ་དི་ན་སྭཱཧཱ། ཞེས་པ་སྤྱན་རས་གཟིགས་ཀྱི་སྔགས་དང༌། མངོན་སྦྱོད་ཀྱི་བུམ་པ་ལ། ན་མོ་རཏྣ་ཏྲ་ཡཱ་ཡ། ན་མཿཙཎྜ་བཛྲ་པཱ་ཎ་ཡེ། མཧཱ་ཡཀྵ་སེ་ན་པ་ཏ་ཡེ། ཨོཾ་སུམྦྷ་ནི་སུམྦྷ་ནི་ཧཱུཾ། གྲྀཧྞ་གྲྀཧྞ་ཧཱུཾ། གྲྀཧྞ་པཱ་ཡ་གྲྀཧྞ་པཱ་ཡ་ཧཱུཾ། ཨཱ་ན་ཡ་ཧོ་བྷ་ག་ཝཱན་བིདྱཱ་རཱ་ཛ་ཧཱུཾ་ཕཊ། ཅེས་པ་ཧཱུཾ་མཛད་ཀྱི་སྔགས་བཟླའོ། །ཐུན་མོང་དུ། ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏ་ས་མ་ཡ་ཤྲཱི་ཧཱུཾ། ཞེས་པའང་མང་དུ་བཟླ། མཐར། ཛི་ན་ཛིཀ་ལན་བདུན་གྱིས་མེ་ཏོག་དཀར་པོ་དང༌། བྷྲཱུཾ་བཟླས་ཏེ་མཆོད་ཡོན་བླུགས། བདུད་རྩི་ཐབས་སྤྱོར་གྱི་སྔགས་བཟླ་ཞིང༌། གུ་གུལ་ལ་སོགས་པ་བདུག་པས་བདུག་སྟེ། སྟ་གོན་གྱི་ཉིན་པར་བུམ་པའི་བྱ་བ་དེ་ཁོ་ནས་ཆོག་གོ ཁ་ཅིག་བྱ་རྒྱུད་ཀྱི་བུམ་པ་སྟ་གོན་ལ། བུམ་པ་གཞལ་ཡས་ཁང་དུ་བསྐྱེད་ཅིང༌། རྟེན་ལ་སྤྱན་འདྲེན་པ་དགོས་པའི་སྒྲུབ་བྱེད་དུ། ཛེ་ཏ་རིའི་ཚེ་དཔག་མེད་དང༌། ཇོ་བོའི་མི་འཁྲུགས་པའི་ལུང་འདྲེན་མོད་ཀྱང་དེ་དག་བྱ་རྒྱུད་ལ་གོང་མའི་ཆོ་ག་སྦྱར་བའི་ལུགས་ཡིན་པས་
དེའི་རྒྱབ་རྟེན་དུ་མི་འགྲོ་ཞིང་བྱ་རྒྱུད་རང་སྐད་ལ། བུམ་པ་གཞལ་ཡས་ཁང་དུ་བསྐྱེད་པ་ནི་ནམ་ཡང་མི་དགོས་ལ། བུམ་སྒྲུབ་འགའ་ཞིག་ལ་བུམ་པར་ལྷ་སྤྱན་དྲངས་པ་ཡོད་པ་ནི། དཀྱིལ་འཁོར་རྒྱས་པ་མེད་པར་བུམ་པ་ཙམ་ལ་བརྟེན་ནས་གཟུངས་སྒྲུབ་བྱེད་པའི་ཚེ། བུམ་པ་ཉིད་དཀྱིལ་འཁོར་གྱི་དོད་ཡིན་པས། དེའི་ནང་དུ་ལྷ་རྣམས་སྤྱན་དྲངས་ཏེ་བཞུགས་གསོལ་མཆོད་བསྟོད་སོགས་བྱེད་པ་ཡིན་ཞིང༌། དཀྱིལ་འཁོར་མེད་པར་བུམ་པ་རྐྱང་པ་ལ་དབང་བསྐུར་བ་ནི་མི་རུང་ཞིང༌། དབང་བསྐུར་བྱེད་ན་བུམ་པ་ལས་བཟང་བའི་དཀྱིལ་འཁོར་ལོགས་སུ་ཡོན་ཕྱིན། བུམ་པ་ནི་དབང་རྫས་ལ་དགོས་པ་འབའ་ཞིག་ཡིན་པས། བྱ་རྒྱུད་རང་སྐད་གི་དབང་བུམ་ལ་ལྷ་བསྐྱེད་མི་དགོས་སོ། །དབང་གི་དོན་ཙམ་དུ་མི་དགོས་ཀྱང་བུམ་པར་ལྷ་བསྐྱེད་དུ་རུང་བའི་སྐབས་ཡོད་ཕྱིན་ཆོ་ག་རྒྱས་ཤིང་མཛེས་པ་དང༌། བྱིན་རླབས་ཆེ་བའི་ཕྱིར་བྱེད་དོ་སྙམ་ན། །བྱེད་ལ་རག་མོད་ཐོབ་ཐང་མེད་པའི་ལྷག་བཅོས་བྱིན་རླབས་འབྱུང་བ་ནི་དཀའ་འོ། གསུམ་པ་དཀྱིལ་འཁོར་ཞག་གི་ཆོ་ག་ལ། ཐིག་གདབ་པ་དང་དཀྱིལ་འཁོར་བྲི་བའོ། །དང་པོ་ནི། སྔར་ཕྱོགས་ལེགས་པར་བརྟགས་པ་ཡིན་ན་དེས་ཆོག །མིན་ན་སྐབས་འདིར་བརྟགས་སྟེ་ཕྱོགས་ངེས་པོར་བྱས་ལ། སྐྱབས་འགྲོ་སེམས་བསྐྱེད་སྔོན་དུ་སོང་ནས་ཕྱིའི་ཁྲུས་དང༌། གནས་སུ་འཇུག་པ་དང༌། བདག་སྲུང་བ་དང༌། ཕུར་བུས་གདབ་པ་དང༌། སྟེང་བཅིང་བ་དང༌། ཁོར་ཡུག་བཅིང་བ་དང༌། གུར་འབུབས་པ་དང༌། མཚམས་གཅོད་པ་རྣམས་སྔོན་དུ་བཏང༌། བུམ་པ་སྟ་གོན་གྱི་སྐབས་སུ་བཤད་
པ་ལྟར་བུམ་བཟླས་ཁོ་ན་བྱ། བུམ་པ་བསྐྱེད་པ་དང༌། མཆོད་ཡོན་འབུལ་བ་སོགས་ཡན་ལག་རྣམས་མི་དགོས། དེ་ལྟ་བུ་སྔ་དྲོ་དང༌། ཉིན་གུང་དང༌། དགོངས་ཀ་གསུམ་བྱ་བར་བཤད་ཀྱང༌། མ་གྲུབ་ན་ཐུན་གཅིག་ངེས་པར་བྱའོ། །དེ་ནས་དཀྱིལ་འཁོར་གྱི་ལྷ་རྣམས་ཡིད་ལ་དྲན་བཞིན་པས་དྲི་བཟང་གི་ཆུས་དཀྱིལ་འཁོར་གྱི་ས་གཞི་ལ་བསངས་གཏོར་བྱེད་ཅིང༌། ན་མོ་རཏྣ༴ སོགས་བདུད་རྩི་ཐབས་སྦྱོར་དང༌། ལས་ཐམས་ཅད་པ་མང་དུ་བཟླ། ཐིག་སྐུད་ཚོན་སྣ་ལྔ་པ། དཀར་དང་དམར་དང་དེ་བཞིན་སེར། །སྔོ་དང་ལྔ་པ་ནག་པོ་སྟེ། ཞེས་འབྱུང་བ་ལྟར། སྲད་བུ་གསར་པ་དང་ལྡན་པ་ལ། ཨོཾ་ཥྟོཾ་བནྡྷ་སྭཱཧཱ། ལན་བརྒྱ་བཟླས། ཛི་ན་ཛིཀ གིས་མེ་ཏོག་གཏོར། སྤོས་ཀྱིས་བདུག།དྲི་བཟང་བྱུགས། སངས་རྒྱས་བྱང་སེམས་འཕགས་ཚོགས་སྤྱི་ལ་མཆོད་དགོས་པས་མཆོད་པ་བཤམས། ཨ་མྲྀ་ཏས་བསངས། ན་མཿསརྦ་ཏ་ཐཱ་ག་ཏ་བྷྱོ་བི་ཤྭ་མུ་ཁེ་བྷྱཿ་སོགས་ཀྱིས་བྱིན་གྱིས་རླབས། ཨརྒྷཾ་པྲ་ཏཱིཙྪ་སྭཱཧཱ། གཙང་ཞིང་གཙང་མ་ལས་བྱུང་བའི། ཞེས་པ་ནས། ར་ཤི་ནི་ན་མ་སྟུ་རེ་སྭཱཧཱ། ཞེས་པའི་བར་མཆོད་བསྟོད་བྱས། བྱིན་གྱིས་རློབ་པར་གསོལ་བ་གདབ་བོ། །དེ་ནས་ཐིག་འདེབས་ཏེ་འདིར་ཁ་ཅིག་ཟུར་ཐིག་མི་འདེབས་པར་འདོད་པ་ནི། གསང་བ་སྤྱི་རྒྱུད་ཀྱི་དཔེ་སྒྲོགས་ཙམ་བྱས་པ་ལས། དོན་མ་གོ་བར་ཟད་དོ། །དེ་ཡང་སྤྱི་རྒྱུད་ལས། གྲུ་བཞི་ལྷམ་པར་མཉམ་ནས་སུ། །རྒྱ་གྲམ་དུ་ནི་སྲད་བུ་བྲེ། །རྒྱ་གྲམ་ཐམས་ཅད་མཉམ་པར་མཉམ། །དེ་ལྟར་སྲས་བུ་གཏན་ལ་ཕབ། །ཅེས་པ་འདི་ནང་གི་ཆ་དགུ་སོགས་རྒྱ་གྲམ་དུ་གདབ་རྒྱུའི་ཐིག་མང་པོ་ཡོད་པ་རྣམས་སྟོན་པ་ཡིན་ཡང༌།
ཁྱེད་དག་ཚངས་ཐིག་སྟོན་པར་འཁྲུལ་ནས་ཐོག་མར་ལོག་ཐིག་དང༌། དེ་ནས་ཚངས་ཐིག་འདེབས་ཞེས་ཟེར་བ་ནི་གོ་རིམ་གྱ་ཚོམ་དུ་སྨྲ་ཞིང་ཚངས་ཞེས་པའི་འབྲུ་མ་ནོན་པའི་ཕྱིར་རོ། །དེས་ན་ཚངས་ཟུར་གྱི་ཐིག་འདེབས་པ་རྒྱུད་སོ་སོ་མང་པོ་དག་ལས་གསལ་ཞིང་སྤྱི་དང་འདྲ་ལ། གོ་སླ་བས་གཞིར་བཞག་ཏུ་མཛད་ལ། དེ་རྗེས་ལོགས་ཐིག་ནས་བརྩམས་ཏེ་ཕྱོགས་སྐོར་གསུངས་པ་ཡིན་ནོ། །དེ་ལྟར་ན་ཚངས་ཟུར་གྱི་ཐིག་བཏབ། སློབ་དཔོན་མེ་དང་སློབ་མ་དབང་དུ་འདུག་པས་ཤར་གྱི་ལོགས་ཐིག་དང༌། སློབ་མ་གཡས་བསྐོར་བྱས་ཏེ་སློབ་དཔོན་མེ་དང་སློབ་མ་བདེན་བྲལ་དུ་འདུག་པས་ལྷོའི་ཐིགས་དང༌། སློབ་མ་དེ་ཉིད་དང༌། སློབ་དཔོན་རླུང་དུ་སོང་བས་ནུབ་ཐིག་དང༌། སློབ་དཔོན་དེ་ཉིད་དང་སློབ་མ་དབང་ལྡན་དུ་གནས་པས་བྱང་ཐིག་གདབ་བོ། །དེ་ནས་གསང་བ་སྤྱི་རྒྱུད་ཀྱི་རང་ལུགས་ལྟར་ན། རྩ་ཐིག་གྲུ་བཞི་དེ་ཉིད་ཆ་གསུམ་རེ་མིག་དགུ་བྱས། དེ་རེ་རེ་ཡང༌། གསུམ་གསུམ་དུ་བཏང་བའི་རེ་མིག་བརྒྱད་ཅུ་རྩ་གཅིག་འབྱུང་ལ། དེའི་དབུས་མ་ནི་སྒོ་ཚད་ཡིན་ཞིང༌། སྒོ་ཚད་དེ་ཉིད་གསུམ་ཆ་ལྷག་པ་དང་བཅས་པས་ཟུར་དུ་བྱ་རྗེས་བྱས་ནས་དང་པོར་ཐིག་གཉིས་གདབ་ལ། ནང་མ་དབུས་དོར། ཕྱི་མ་ཕྱེད་གདབ་ཕྱི་ཕྱེད་གདབ་ཀྱི་རྩིག་པ་ནས་མདའ་ཡབ་ཀྱི་བར་དང༌། ཚངས་ཐིག་གི་གཡས་གཡོན་དུ་ཐིག་འདེབས་ཚུལ་སྤྱི་དང་འདྲ་བར་བྱས་ནས། སྒོ་ཁང་རྟ་བབས་དང་བཅས་པ་བྱའོ། །རྟ་བབས་ནི་གསལ་ཁ་མེད་པས་ཚད་མེད་དུ་བྱེད་པ་སོགས་ཇི་ལྟར་བདེ་བ་ཡིན་རུང༌། སྣམ་བུ་བཞི་མའམ། བཅུ་གཅིག་ཡིན་རུང་སྒོ་ཚད་གཅིག་མ་
བྱས་པས་ལེགས་པར་མངོན་ནོ། །འགའ་ཞིག་ཕྱག་རྡོར་དབང་བསྐུར་གྱི་དགོངས་པ་ཡིན་ཟེར་ནས། རྟ་བབས་སྣམ་བུ་ལྔ་པར་བྱེད་པ་སྙིང་པོས་དབྱེན་པ་དང༌། གཞན་དག་ལོགས་ཐིག་གི་ནང་དུ་མདའ། ཡབ་ཆུད་པར་འདོད་པ་སོགས་ནི། དཀྱིལ་འཁོར་སྤྱིའི་ལུགས་ལ་ཡང་ཐིག་ཆེན་བརྒྱད་ཀྱི་ལོགས་ཐིག་རྩ་ཐིག་ཡིན་ཞིང༌། ཆ་བཅུ་དྲུག་གི་ཐ་མ་བསྐོར་བའི་ཐིག་གྲུ་བཞི་དེ་ཐིག་ཆེན་བརྒྱད་ཀྱི་ལོགས་ཐིག་མ་ཡིན་པ་གོ་བར་གྱིས་ཤིག །བློ་ཆེན་འགའ་ལ་ཡང་འཁྲུལ་གཞི་བྱུང་གདའོ། །དེ་ལྟ་ན་ཡང་ཐིག་གི་རིམ་པ་སྤྱི་དང་མཐུན་པར་བཏབ་པས་འགལ་བ་མེད་ལ། གང་ལྟར་ཡང་དམ་ཚིག་གསུམ་བཀོད་འདི་ལ་དེ་བཞིན་གཤེགས་པའི་སྙིང་པོའི་དཀྱིལ་འཁོར་ལྷ་ལྔ་ཁོ་ན་བྱེད་ན་སྒོ་རྐྱང་ཡིན་ཡང༌། ལེའུ་བཅུ་གསུམ་པ་དཀྱིལ་འཁོར་ཆེན་པོའི་སྐབས་སུ། དབུས་ཀྱི་གཞལ་ཡས་ཁང་གྲུ་བཞི་སྒོ་བཞི་པ། བར་མ་སྒོ་གཅིག་ནུབ་ཏུ་ལྟ་བ་དང༌། ཕྱི་མ་སྒོ་གཅིག་བྱང་དུ་ལྟ་བ་གསུངས་པས། སྒོ་གསུམ་སྦྲག་ཏུ་བྱུང་བ་དང༌། གསང་བ་སྤྱི་རྒྱུད་ལས། སྤྱི་འགྲོའི་དཀྱིལ་འཁོར་སྒོ་གསུམ་སྦྲག་ལ་ཕྱི་མ་གཉིས་ལ་སྒོ་རེ་རེ་དང༌། ནང་མ་སྒོ་བཞིར་གསུངས་པ་དང་མཐུན་ཞིང༌། ཡང་སྤྱི་རྒྱུད་ལས། གཞན་ནི་ཕྱོགས་ཀྱི་ཆ་བཞིན་དུ། སྒོ་བཞི་སྒོ་མཁྱུད་བཅས་པར་བྱ། ཞེས་དཀྱིལ་འཁོར་ཆེན་པོའམ་རྩ་བའི་དཀྱིལ་འཁོར་རིགས་ལ། སྒོ་རྐྱང་ཡིན་ན་སྒོ་བཞིར་ངེས་པ་དང༌། ཡང་ན་ཐམས་ཅད་དོགས་མེད་པར། སྒོ་ནི་རེ་རེ་བཞིན་བྱ་ཡི། སྙིང་པོའི་དཀྱིལ་འཁོར་ངེས་པར་ནི། རབ་ཏུ་
བཟང་པོ་སྒོ་བཞིར་བྱ། ཞེས་དཀྱིལ་འཁོར་དབུས་མ་ཁོ་ན་སྒོ་བཞི་དང༌། སྒོ་སྦྲག་གཞན་ཐམས་ཅད་སྒོ་གཅིག་ཏུ་བྱེད་པའི་ལུགས་གཅིག་དང༌། དཀྱིལ་འཁོར་ཉིས་རིམ་སུམ་རིམ་བཞི་རིམ་སོགས་རིམ་པ་མང་པོར་བྱས་པ་ལ། ཕྱི་རིམ་གང་ཡིན་དེ་ལ་ནི། སྒོ་གཅིག་པ་དང་རྒྱ་ཆེར་བྱ། ཞེས་སྒོ་སྦྲག་ནང་མ་ཐམས་ཅད་སྒོ་བཞི་པ་དང༌། ཕྱི་མ་ཁོ་ན་སྒོ་གཅིག་པར་བྱེད་པར་གཅིག་རྣམས་འདམ་ཁར་གསུངས་སོ། །འདིར་ནི་དེ་དག་དང་བསྟུན་ནས་གང་ལྟར་བྱས་ཀྱང་རུང་མོད་ཀྱི། ཕྱིས་ཀྱི་རྡོ་རྗེ་སློབ་དཔོན་རྣམས་ཀྱི་ཕྱག་ལེན་མགྲིན་གཅིག་པར་མཐུན་པ་ལྟར་སྒོ་རྐྱང་ངམ་སྒོ་སུམ་སྦྲག་གང་བྱེད་ཀྱང་སྒོ་བཞི་བྱེད་དེ་འགལ་བ་ཡང་མེད་དོ། །དེ་ཡང་དཀྱིལ་འཁོར་ཕྱི་མ་གཉིས་ལ་རྩིག་པའི་ནང་དུ་ལྷ་སྣམ་རེ་འདོན་ཞིང༌། དཀྱིལ་འཁོར་ནང་མ་ལ་ནི། དབུས་སུ་སྤྱི་ལ་གྲགས་པ་དང་མཐུན་པའི་བརྡའ་སྦྱར་ཏེ་ཆ་ཆེན་གཉིས་ཀྱི་ཚད་གྲུ་བཞི་པ་གཙོ་བོའི་གནས་དང༌། དེའི་ཕྱོགས་བཞིའི་ངོས་ནས་རྩིག་པའི་བར་ལ་ཆ་ཆེན་གསུམ་འཁོར་གྱི་གནས་ཡིན་ཏེ། ལྷ་སྣམ་རིམ་པ་གསུམ་གྱི་དོན་ནོ། །གསུམ་བཀོད་ཀྱི་རྒྱུད་འདིར་དཀྱིལ་འཁོར་ཆུང་ཚད་ཁྲུ་ལྔ་པར་བཤད། དེ་ཡང་རྩ་ཐིག་གི་ཚད་ཡིན་ལ་སྒོ་གསུམ་སྦྲག་ཏུ་འབྲི་ན་དཀྱིལ་འཁོར་ཕྱི་མའི་རྩ་ཐིག་གོ །སྒོ་སྦྲག་གསུམ་ཆར་ལ་རྟ་བབས་བྱས་ཀྱང་རུང་ལ། ནང་མ་གཉིས་རྟ་བབས་མེད་པ་དང༌། ཕྱི་མ་རྟ་བབས་ཅན་དུ་བྱེད་པ་སྤྱི་དང་མཐུན་པ་དང༌། ཡང་ཕྱི་མ་དང་ནང་མ་རྟ་བབས་ཅན་བར་མ་རྟ་བབས་དང་བྲལ་བའང་རུང་ངོ༌། །དབུས་ཀྱི་
གྲུ་བཞིའི་གནས་སུ་སླར་ཡང་དེའི་བྱེད་ཀྱི་ཚད་ཀྱི་དབུས་སུ་གྲུ་བཞི་དང༌། དེའི་ནང་དུ་ཟླུམ་པོར་བསྐོར་བའི་པད་ཐིག་བྱ། དེ་བཞིན་དུ་དཀྱིལ་འཁོར་ནང་མའི་ལྷའི་གནས་གཞན་རྣམས་སུ་ཡང་པདྨ་ཆ་ཆུང་གཉིས་པ་རེ་བྱ། དཀྱིལ་འཁོར་ཆེན་པོའི་ཕྱི་རོལ་དུ་འཁྱམས་དང་རྡོ་ར་དང་འོད་ཟེར་འཕྲེང་བའི་ཐིག་ཀྱང་སྤྱི་དང་མཐུན་པར་བཏབ། སྤྱིར་ནི་བྱ་སྤྱོད་འདི་དག་ཏུ་ཕྱིའི་ས་གཞི་ལ་མཐའ་གཅིག་ཏུ་དབྱིབས་དང་མཚན་ཉིད་ངེས་མེད་ཀྱང་དམིགས་བསལ་མེད་པ་རྣམས་སྤྱི་དང་མཐུན་པ་བཟང་ངོ༌། །གཉིས་པ་ཚོན་དགྱེ་བ་ནི། ན་མོ་རཏྣ༴ སོགས་བདུད་རྩི་ཐབས་སྦྱོར་གྱི་སྔགས་དྲག་ཏུ་བཟླ་ཞིང༌། ས་གཞི་དང་ཡོ་བྱད་ལ་བསངས་གཏོར་བྱ། ཕྱི་ཁྲུས་ནས་མཚམས་གཅོད་པའི་བར་ཐིག་གི་སྐབས་སུ་བཤད་པ་ལྟར་གྱི་ཁྲུས་དང་སྲུང་བ་སླར་ཡང་བྱས་ནས། མགོན་པོ་ཐུགས་རྗེ་ཆེ་ལྡན་པ། སོགས་ཀྱིས་ཕྱག་བྱས། ལས་ཐམས་ཅད་པ་བཟླ་བཞིན་དུ་དབང་ལྡན་གྱི་རྩིག་པ་ཐོག་མར་སློབ་དཔོན་གྱིས་འབྲི། ཕྱིས་ནི་སློབ་མ་ལས་བྱེད་པ་རྣམས་ཀྱིས་འབྲི་སྟེ། གཞལ་ཡས་ཁང་དང་གདན་དང་ཕྱག་རྒྱ་དགོད་པ་ཐམས་ཅད་ལ། བྷྲཱུཾ་དང༌། ཛི་ན་ཛིཀ་འབའ་ཞིག་བརྗོད་པས་ཀྱང་འགྲུབ་སྟེ། སྤྱིའི་ཆོ་གའི་ལུགས་སོ། །རྒྱུད་འདི་ཉིད་ལས་དཀྱིལ་འཁོར་རྒྱས་པའི་སྐབས་སུ་གསུངས་ཤིང་སྙིང་པོའི་དཀྱིལ་འཁོར་གྱི་ཆོ་ག་དེ་ལ་ངེས་པར་འཇུག་པ་འདི་ཙམ་ཡིན་ཏེ། གཞལ་ཡས་ཁང་འབྲི་བ་ན། དཀྱིལ་འཁོར་དབུས་མ་དང་བར་མ་ནུབ་སྒོ་ནས་བརྩམས་ཏེ་འབྲི། ཕྱི་མ་བྱང་སྒོ་ནས་བརྩམས་ཏེ་འབྲི། སྔགས་ནི།
ན་མཿསརྦཱ་བུདྡྷ་བོ་དྷི་སཏྭཱ་ནཱཾ། ཨ་མ་ལ་ཨ་མ་ལ་ཧ་ར་གྷ་ཨ་ནནྟཱ་ཤཱ་ཤྭ་ཏ་སརྦ་ཛཱི་ན་ཨ་ཤཱི་ནི། མ་ནི་ཥ་ར་ད་མ་མ་དེནྟུ། ཨ་དི་ཨ་ད་རཾ་བ་ར་ཨ་གྲཾ་ས་མ་སརྦ་ཏཱ་ནཾ། ཏཏྟེ་མེ་བཛྲ་ཨཱཉྫཱ་ཨ་ར་ར། ཨ་ས་མ་ས་མ། ས་མནྟཱ་ཨ་ནནྟཱ་དྷཱརྨྨ་ཏེ། ཁ་ན་ཁ་ནི། མཧཱ་བཱི་རཾ། ཨ་ཙ་ལེ་ས་མ་ས་མ་ཨ་ས་ཧ་མ་བ་ལེ། ཀ་ཎ་ཀ་ཎ། མཧཱ་ར་གྲེ་ཀེ་ཧ་ཧ་ཧ་ཧ། བཛྲ་བཛྲ་ཨཾ་ཀ་མེ་དྷ་ར་དྷ་ར། །ཧཱུཾ་ཧཱུཾ་སཾ་ད་ལཾ་ས་མ་པཱ་ལོ་ཨ་གྲ་བི་གྲ་མེ། ཀུ་རུ་ཀུ་རུ་རུ་རུ། །སརྦ་ཐཱ་སརྦ་ཧི་ཛྭ་ལ་ཛྭ་ལ། ཨ་གྲེ་ཨ་གྲི་ཎི་ཧཱུཾ་ཕཊ་ཕཊ་སྭཱཧཱ། ཞེས་པའི་སྔགས་འདི་བཟླ་བའོ། །མི་ནུས་པས་ཐ་ན་བཀླགས་པས་ཀྱང་ངོ༌། །དཀྱིལ་འཁོར་ནང་མའི་ཉི་ཟླ་སོགས་གདན་རྣམས་འགོད་པ་ན། ན་མཿསརྦ་བུདྷ་བོ་དྷི་སྭཏྭ་ནཾ། ཨ་སརྦ་ཐཱ་སརྦ་ཏྭ་ཎ་ཀེ་སྭཱཧཱ། ཞེས་པ་དང༌། གཙོ་བོའི་མཚན་མ་ལ། ན་མཿས་མནྟ་བཛྲཱ་ཎཾ། ས་མ་ས་མ་ཧཱུཾ། ན་མཿས་མནྟ་བཛྲཱ་ཎཱཾ། ཨ་ས་ཧ་ཧཾ་མཾ། ཞེས་པ་བཟླའོ། །དེ་རྗེས་རྒྱུད་ནས་གསུངས་པའི་བྱང་ཆུབ་སེམས་པའི་ཕྱག་རྒྱ་དགོད་པ་མན་ཆད་དཀྱིལ་འཁོར་རྒྱས་པའི་ཁྱད་ཆོས་ཡིན་པས་སྙིང་པོའི་དཀྱིལ་འཁོར་འདི་ལ་མི་འཇུག་པས་ན། སྤྱི་རྒྱུད་ཀྱི་ཆོ་གས་ཆོ་ག་ཤེས་པར་བྱའོ། །དེ་ལ་ཚོན་གྱི་རིམ་པ་ནི། རྩིག་པ་ནི་ཕྱི་ནས་དཀར་ནག་དམར་སེར་སྔོ་བ་སྟེ། དཀྱིལ་འཁོར་ནང་མ་རིམ་པ་ལྔ་དང༌། བར་པ་ལ་དཀར་སེར་དམར་གསུམ། ཕྱི་མ་ལ་དཀར་པོ་གཅིག་པུའོ། །དབུས་ཀྱི་གཙོ་བོའི་གནས་ནི། ལྗང་ཁུའམ་སྔོན་པོ་སྟེ་སྔོ་ནག་གཅིག་ཏུ་རྩིས་ནས། ལྷོ་སྔོན་པོར་བྱེད་ན་དབུས་ལྗང་ཁུ་དང༌།
སྔོ་ནག་ཐ་དད་པར་རྩིས་ནས་ལྷོ་ནག་པོར་བྱེད་ན་དབུས་སྔོན་པོའོ། །ལྷ་སྣམ་དང་འཁྱམས་རྣམས་ཤར་དཀར། ལྷོ་སྔོའམ་ནག་པོ། ནུབ་དམར། བྱང་སེར་བ་ཡིན། དགོས་པ་ཅན་གྱི་དམིགས་བསལ་ཡོད་ན་མ་གཏོགས། འཇིག་རྟེན་གྱི་ཕྱོགས་དང་དཀྱིལ་འཁོར་གྱི་ཕྱོགས་འགྲིག་པ་ངེས་པར་བྱ་ཞིང༌། གཙོ་བོ་ཡང་དཀྱིལ་འཁོར་གྱི་ནུབ་ཕྱོགས་སུ་ཞལ་གཟིགས་པ་དགོས་ལ། དབུས་ཀྱི་གྲུབ་བཞི་ནང་མ་ལ་བཞུགས་ཁྲི་མཚོན་བྱེད་འོག་གཞི་སྔོན་པོ་ཡིན་ན་ལྗང་ཁུ་དང༌། འོག་གཞི་ལྗང་ཁུ་ཡིན་ན་སྔོན་པོ་ལ་ཚོན་སྣ་ཚོགས་ཀྱིས་བཀྲ་བ། དེའི་དབུས་སུ་དཀར་པོ་ལྟེ་བར་ཟླ་བ་ལ། བཅོམ་ལྡན་འདས་ཀྱི་སྐུ་གཟུགས་དངོས་གཞག་ཀྱང་རུང༌། ཡང་ན་གཙུག་གཏོར་རམ་རྡོ་རྗེ་སེར་པོ་རྩེ་ལྔ་པ་འབྲིའོ། །དེ་ནས་ལྷ་སྣམ་དང་པོ་ལ་གཙོ་བོའི་གདན་གྱི་གཡས་བྱང་དང་གཡོན་ལྷོ་རུ། པདྨའི་གདན་ལ་གཡས་ཕྱོགས་སུ་ལྕགས་ཀྱུ་སེར་པོ་དང༌། གཡོན་ཕྱོགས་སུ་རྡོ་རྗེ་ལྗང་སེར་རོ། །ལྷ་སྣམ་གཉིས་པ་ལ། དེ་ནས་གཡས་གཡོན་ཏུ་བྱེད་པའི་ཟུར་ཐིག་དང་ཉེ་བ་ལ། རླུང་དུ་གྲི་གུག་དང༌། བདེན་བྲལ་དུ་མེ་ཏོག་འཕྲེང་བ་པདྨ་ལ་གནས་པའོ། །ལྷ་སྣམ་གསུམ་པ་ལ་ལྷོ་སྒོའི་ཐད་དུ་བེ་ཅོན་དཀར་པོ་དང༌། བྱང་སྒོའི་ཐད་དུ་ཞགས་པ་སེར་པོ་དང༌། ཤར་སྒོའི་ཐད་དུ་འཁོར་ལོའི་དཀར་པོ་རྣམས་ཀྱང་པདྨ་ལ་གནས་པའོ། །དཀྱིལ་འཁོར་གཉིས་པའི་ལྷ་སྣམ་ལ་ཤར་གྱི་གཡས་གཡོན་དང༌། ལྷོའི་གཡས་གཡོན་དང༌། ནུབ་ཀྱི་གཡོན་དང་བྱང་གི་གཡོན་དང༌། བྱང་ཤར་རྣམས་སུ་པོ་ཏིའི་གཟུགས་བརྙན་རེ། ནུབ་ཀྱི་
གཡས་དང་བྱང་གི་གཡས་སུ་རལ་གྲི་རེ། ཤར་ལྷོར་སྤྱི་བླུགས། ལྷོ་ནུབ་ཏུ་རྡོ་རྗེ། ནུབ་བྱང་དུ་ཞགས་པ། དེ་རྣམས་ཇི་ལྟར་འོས་པའི་གདན་ལ་གནས་པའོ། །དཀྱིལ་འཁོར་ཕྱི་མའི་ཤར་གྱི་དབུས་སུ་རྡོ་རྗེ། དེའི་རྒྱབ་ཏུ་ཉི་མའི་དཀྱིལ་འཁོར། ཤར་ལྷོར་མེ་ཐབ། ལྷོར་བེ་ཅོན། ལྷོ་ནུབ་ཏུ་རལ་གྲི །ནུབ་ཏུ་སྦྲུལ་ཞགས། དེའི་རྒྱབ་ཏུ་ཟླ་བའི་དཀྱིལ་འཁོར། གཡས་སུ་བུམ་པ། ནུབ་བྱང་དུ་རླུང་རས། བྱང་དུ་དབྱུག་ཐོ། བྱང་ཤར་དུ་རྩེ་གསུམ་མོ། །སྒོ་བཞིར་སྒོ་སྲུངས་བྱེད་ན་རྒྱལ་ཆེན་བཞིའི་མཚན་མ་བཀོད། འཁོར་གྱི་ལྷའི་གདན་རྣམས་ཁ་དོག་མཛེས་ཚོན་ནོ། །གཞལ་ཡས་ཁང་གི་ཕྱི་རོལ་དུ་འཁྱམས་ལ། ལྷོ་ཕྱོགས་སུ་རིགས་སྔགས་འཆང་གི་རྒྱལ་པོ་བདུན་དང༌། ཤར་དུ་དབང་ཕྱུག་ཆེན་པོ་དང༌། དཀའ་བཟློག་མ་དང༌། གཞོན་ནུ་གདོང་དྲུག །བྱང་དུ་ཚངས་པ་དང་ཁྱབ་འཇུག་ཆེན་པོ། ནུབ་སྒོའི་གཡས་དང་གཡོན་དུ་དགའ་བོ་དང་གཉེན་དགའོ། །ལྷོ་སྒོའི་ཐད་དུ་གནོད་སྦྱིན་མོ་འཕྲོག་མ་སྟེ། དེ་རྣམས་ལ་ལྷ་མཚན་རྒྱས་པ་མ་གྲུབ་ན། སྭ་སྟི་ཀ་ཏེ་དགའ་འཁྱིམ་རེ་བྲི་བར་བྱའོ། །ནུས་ན་གདན་ཟླུམ་པོ་རེ་ལ། དྲག་པོའི་ཕྱག་རྒྱ་རྩེ་གསུམ་རྣོ། དཀའ་བཟློག་ཕྱག་རྒྱ་རྩེ་གསུམ་གདེངས། ཁྱབ་འཇུག་གི་ནི་འཁོར་ལོ་རྣོ། སྡེ་ཆེན་གྱི་ནི་མདུང་ཐུང་རྣོ། ཚངས་པའི་པདྨ་ཡིན་པར་བཤད། ཅེས་པ་ལྟར་དང༌། རིག་པའི་རྒྱལ་པོ་རྣམས་ལ། རྡོ་རྗེ་རྩེ་གསུམ་ཁ་གཅིག་པ་རེ་རེ་བྲི་བར་བྱའོ། །
ཡང་མདོར་བསྡུས་པའི་གནས་སྐབས་སུ། གཞལ་ཡས་ཁང་གི་ཕྱིའི་དཀྱིལ་འཁོར་ལ་མཚན་མ་རྣམས་མ་བྲིས་ཀྱང་ཆོག །ནང་གི་ཡང་གཙོ་བོ་ལས་གཞན་རྣམས་གདན་དུ་འགོད་པའམ་ཐིག་ལེ་ཙམ་གྱིས་ཀྱང་འགྲུབ་བོ། །སྐབས་འདིར་སྒོ་སྦྲག་གསུམ་ཀར་སྒོ་བཞིར་བྱས་ན། ཕྱི་མའི་བྱང་སྒོ་དང༌། བར་མ་དང་ནང་མའི་ནུབ་སྒོ་ཕྱེ་བ་ཡིན་པས། ལྷ་སྣམ་དང་སྒོ་ཁང་དཀྱུས་གཅིག་པ་དང༌། གཞན་རྣམས་བཅད་པ་མཚོན་པའི་ཕྱིར། རྩ་ཐིག་གི་སྟེང་དུ་རེ་ཁ་དཀར་པོ་མངོན་ཙམ་ཕྲ་མོར་བྲིའོ། །དེ་བཞིན་དུ་སྒོ་མཁྱུད་ཀྱི་ནང་དུ་རྡོ་རྗེ་ཕྲ་མོ་རེ་ཡང་སྒོ་གླེག་དང་སྒོ་སྲུང་བའི་དོན་དུ་འབྲི་བར་བྱ་ཞིང༌། འཁྱམས་ལ་རི་དང་ལྗོན་ཤིང་ནགས་ཚལ་དང༌། མཚོ་དང་མེ་ཏོག་ལ་སོགས་པ་ཞིང་ཁམས་ཀྱི་བཀོད་པ་མཚོན་བྱེད་བྱའོ། །གལ་ཏེ་དཀྱིལ་འཁོར་སྒོ་རྐྱང་དུ་བྱེད་ན་དབུས་ཀྱི་ཆ་ཆེན་གཉིས་ལ། གཙོ་འཁོར་ལྔ་པོ་འགོད་ཅིང༌། ལྷ་རྣམས་རིམ་པ་གསུམ་དུ་བྱས་པའི་དང་པོ་ལ། གཞན་གྱི་མི་ཐུབ་པ་གཉིས་དང་སྤྱན་མ་འགོད། གཉིས་པ་ལ་མཛོད་སྤུ་ཅན་སོགས་དང༌། གསུམ་པ་ལ་ཕྱོགས་སྐྱོང་རྣམས་འགོད་པར་བྱའོ། །བཞི་པ་དཀྱིལ་འཁོར་སྒྲུབ་པ་ནི། ཉེ་རེག་བྱས་ཤིང་གཙང་སྦྲ་དང་ལྡན་པས་སྐྱབས་འགྲོ་སེམས་བསྐྱེད་ནས་བརྩམས། ཟེའུ་ཁ་བཅིང་བའི་བར་བསྙེན་པའི་སྐབས་སུ་ཇི་སྐད་བཤད་པ་བཞིན་རྫོགས་པར་བྱས་པའམ། མཆོད་པའི་བགེགས་བསལ་བྱིན་བསྐྱེད་བྱིན་རླབས་གསུམ་པོར། གཞན་རྣམས་ཚང་བར་བྱས་པས་ཀྱང་རུང་ངོ༌། །མཚམས་དེར་ཡོ་བྱད་དག་
ཚོགས་པར་བྱས་ཤིང༌། དཀྱིལ་འཁོར་དང་ཡོ་བྱད་ལ་དམིགས་ནས། བོད་གོང་མ་རྣམས་ཀྱི་ཕྱག་ལེན་ལྟར་ཞི་བས་སྦྱང་བ། ཕྱེད་མས་སྦྱང་བ། དྲག་པོ་སྦྱངས་པ་སྟེ་བགེགས་སྦྱངས་བ་གསུམ་དང༌། ཏིལ་སྦྱངས་ཀྱི་སྒོ་ནས་བྱུར་བསལ་བ་ཡང་བྱ། བདུད་རྩི་ཐབས་སྦྱོར་བཟླས་ཤིང་བསངས་གཏོར་བྱས་ལ། རྣམ་པར་རྒྱལ་བ་གཙོ་བོའི་བུམ་པ་ནི། དབུས་ཀྱི་གཙོ་བོའི་གནས་ལས་ཅུང་ཟད་རྒྱབ་གྱིས་ཕྱོགས་པར་མཉྫི་ལ་སོགས་པའི་སྟེང་དུ་ཡི་གེ་བརྒྱ་པ་དང་བྷྲུཾ་བཟླ་བཞིན་དུ་འཇོག་སྟེ་དབང་གི་བུམ་པའོ། །འདི་ནས་བཟུང་སྟེ་རྗེས་ཆོག་གི་བར་དུ་བུམ་པ་འདི་ནི་མི་བསྒུལ་ལོ། །དེ་བཞིན་དུ་འཁྲུས་བུམ་རྣམས་ནི། རིགས་ཀྱི་སྙིང་པོ་ཁོ་ནའམ། སྟ་གོན་གྱི་སྐབས་སུ་གང་བཟླས་པ་དེ་ཉིད་འདོན་བཞིན་དུ་དཀྱིལ་འཁོར་བར་མའི་གནས་སུ་འཇོག་སྟེ། མདུན་གྱི་གཡས་གཡོན་གཉིས་དཀྱིལ་འཁོར་ནང་མའི་རླུང་སྲིན་གྱི་གྲྭ་དང༌། རྒྱབ་ཀྱི་གཡོན་གཡས་གཉིས་མེ་དབང་གི་གྲྭ་ལ་བཞག་གོ །ཨོཾ་ཨ་མྲྀ་ཏེ་ཧཱུཾ་ཕཊ། ཀྱིས་ལས་བུམ་དཀྱིལ་འཁོར་ཕྱི་མའི་ཤར་སྒོར་བཞག་གོ། གལ་ཏེ་གནས་དེ་དག་ཏུ་འཇོག་སྟབས་མི་བདེ་ན། དེ་དག་ཏུ་སྟངས་ཀ་ཙམ་བྱས་ནས། དཀྱིལ་འཁོར་ཕྱི་མའི་ནུབ་སྒོའི་ཐད་ཙམ་དུ་དབང་བུམ་དང༌། དེའི་གཡོན་དུ་ལས་བུམ་དང༌། ཟུར་ཐིག་གི་ཐད་དུ་ཁྲུས་བུམ་བཞག་གོ །བུམ་པ་གསུམ་ལས།
མ་འབྱོར་ན། ནུབ་སྒོའི་གཡས་སུ་ཁྲུས་བུམ་བཞག །སྤྲོས་པ་ལ་དགའ་ན། ཁྲུས་བུམ་བརྒྱད་སྒོ་མཚམས་བརྒྱད་དུ་བཅའ། ལས་བཞིའི་བུམ་པ་ནི། གཞལ་ཡས་ཁང་གི་ཕྱིའི་ཕྱོགས་བཞིའམ། ཡང་ཞི་བ་བྱང་ཤར། རྒྱས་པ་ལ་ཤར་ལྷོ། མངོན་སྤྱོད་ལྷོ་ནུབ། དབང་ནུབ་བྱང་དུ་བཞག་གོ །འདིར་འཁྲུལ་བུམ་དང་བཀྲ་ཤིས་ཀྱི་བུམ་པ་དོན་གཅིག་མིང་གི་རྣམ་གྲངས་སོ། །ཕྱི་རོལ་ཁོར་ར་ཁོར་ཡུག་ཏུ་མཆོད་ཡོན་གྱི་སྣོད་སྣ་ཚོགས་དང༌། རྒྱལ་མཚན་དང༌། རྨ་བྱའི་མདོངས་དང༌། སྤོས་ཕོར་རྣམས་བརྒྱད་བརྒྱད་དང༌། གཞན་ཡང་མཆོད་པའི་ཁྱད་པར་རྣམ་པ་སྣ་ཚོགས་དང༌། མཆོད་པའི་རྟ་བབས་བཞི་ཡང་རྩིགས་པར་བྱའོ། །སྤྱི་རྒྱུད་ལས། དབང་བསྐུར་ཕྱིར་ནི་འབྲིང་པོ་གཅིག །ཅེས་འབྱུང་བའི་འབྲིང་པོ་ནི་དབུས་མའི་དོན་ཡིན་པས་དབང་བུམ་ཡིན་ལ། གྲྭ་དང་སྒོ་ནི་མ་ལུས་པར། །བུམ་པ་དག་ཀྱང་བཞག་ནས་ནི། ཞེས་པ་ཁྲུས་བུམ་བརྒྱད་དམ། བར་སྒོ་ཚན་པོར་གཉིས་གཉིས་ཤིག །ཁྱད་པར་དུ་ནི་བཞག་པར་བྱ། ཞེས་ཅུང་ཟད་བསྡུད་པ་ལ་ཁྲུས་བུམ་བཞིས་ཆོག་པ་དང༌། བུམ་པ་གཅིག་ནི་ཕྱི་སྒོ་ཡི། །དྲུང་དུ་མངོན་པར་བཞག་པར་བྱ། ཞེས་པས་ལས་བུམ་རྣམས་བསྟན་པ་ཡིན་ནོ། །ཤིན་ཏུ་བསྡུ་ན། ཁྲུས་བུམ་གྱི་བྱ་བ་ལས་བུམ་གྱིས་བྱས་ནས། བུམ་པ་གཉིས་ཀྱིས་ཀྱང་དབང་བསྐུར་བ་རུང་བ་ཙམ་ནི་ཡིན་ནོ། །
གསང་བ་སྤྱི་རྒྱུད་ལས། དཀྱིལ་འཁོར་གྱི་དབུས་སོགས་ཇི་ལྟར་རིགས་པ་ལྷ་མཚན་མེད་པའི་ས་སྟོང་དུ། ཤེས་རབ་ཀྱི་ཕ་རོལ་ཏུ་ཕྱིན་པའི་གླེགས་བམ་སོགས་པོ་ཏི་བཞུགས་པར་གསུངས་ཀྱང་འདི་ལ་གཙོ་བོའི་མདུན་ཕྱོགས་མ་གཏོགས་དེ་ཙམ་གྱི་ས་སྟོང་མེད་ལ། གཙོ་བོའི་མདུན་བཀག་པའང་མི་མཛེས་ན་དེ་འདྲ་ངེས་པར་དགོས་པ་མ་ཡིན་ནོ། །ཕྱི་རོལ་ཤར་དུ་ཤེས་རབ་ཀྱི་ཕ་རོལ་ཏུ་ཕྱིན་པ། བྱང་དུ་གསེར་འོད་དམ་པ། ནུབ་ཏུ་སྐུ་གསུང་ཐུགས་ཀྱི་གསང་བའི་མདོ། ལྷོར་སྡོང་པོ་བཀོད་པ་རྣམས་སྟེགས་བུ་ལ་བཞུགས་ནས། མེ་ཏོག་དང་དྲི་སྤོས་སོགས་ཀྱིས་མཆོད་ཅིང༌། དུས་དུས་སུ་གཙང་སྦྲ་དང་ལྡན་པས་བཀླག་པར་བཤད་དོ། །འཇམ་དཔལ་རྩ་རྒྱུད་ལས་ནི། ལྷོར་ཤེར་ཕྱིན། ནུབ་ཏུ་ཟླ་བ་སྒྲོན་མ། བྱང་དུ་སྡོང་པོས་བརྒྱན་པ། ཤར་དུ་གསེར་འོད་དམ་པ། ཞེས་གསུངས་ཏེ། འདིར་ནི་དེ་དག་ལས་གང་བྱས་ཀྱང་འདྲའོ། །དེ་ནས་འདི་སྐད་དུ། མཐའ་ཡས་པའི་འགྲོ་བ་ཐམས་ཅད༴ ནས། ཉེ་བར་བརྒྱན་པའོའི་བར་གྱིས་བདག་གིས་དེ་ཁོ་ན་ཉིད་བསྒོམ། དཀྱིལ་འཁོར་ཆེན་པོའི་གནས་སུ་སངས་རྒྱས་དང་བྱང་ཆུབ་སེམས་དཔའ་རྣམས་གྱི་སྨོན་ལམ་གྱི་མཐུ་ལས་བྱུང་བ། རིན་པོ་ཆེ་དུ་མ་ལས་གྲུབ་པའི་ཞིང་ཁམས་ས་གཞི་ཡངས་ཤིང་རྒྱ་ཆེ་བ། ཞེས་པ་ནས། སྙིང་པོར་སེང་གེའི་ཁྲི་དང་པདྨའི་གདན། གཞན་ཡང་འཁོར་གྱི་ལྷའི་གདན་བདུན་དང་བཅས་པ་དང༌། སྟེང་དུ་རིན་པོ་ཆེའི་
བླ་བྲེ་དག་ཀྱང་སྐད་ཅིག་གིས་བྱུང་བར་གྱུར་ལ། ཁང་བཟང་དམ་པ་དེ་ཉིད་ཀྱི་ཕྱི་རོལ་དུ་གཞལ་ཡས་ཁང་རིམ་པ་གཉིས་དང་བཅས་པ་དང༌། གཞལ་ཡས་ཁང་བར་པ་ལ་ཡང་ཕྱོགས་བཞིར་གཉིས་གཉིས་དང་མཚམས་བཞིར་རེ་རེ་སྟེ་ལྷའི་གདན་བཅུ་གཉིས་དང༌། གཞལ་མེད་ཁང་ཕྱི་མའི་ནང་གི་ལྷ་རྣམས་ལ་ལྷའི་གདན་བཅུ་གཅིག་དང༌། དེ་བཞིན་དུ་སྒོ་དང་འཁྱམས་རྣམས་ལ་ལྷ་སོ་སོའི་གདན་རྣམས་དང༌། ཁང་བཟང་དབུས་མ་ལ་ཕྱི་ནས་རིམ་པ་བཞིན་དཀར་ནག་དམར་སེར་སྔོ་བའི་རྩེགས་པ་རིམ་པ་ལྔ་དང༌། བར་པ་ལ་དཀར་སེར་དམར་བ་སྟེ་གསུམ་དང༌། ཕྱི་མ་ལ་ཟླ་བ་ཆུ་ཤེལ་ལྟར་དཀར་བའི་རྩིག་པ་གཅིག་པུའོ། །གཙོ་བོའི་གནས་ཀྱི་གཞི་ལྗང་ཁུ། གཞན་དཀྱིལ་འཁོར་གསུམ་ཆར་ལ་མཚུངས་པར། ཕྱི་ནང་གི་ས་གཞི་ཐམས་ཅད་ནུབ་དམར་བྱང་སེར་ཤར་དཀར་ལྷོ་སྔོ་ཐམས་ཅད་རྩིག་པའི་སྟེང་ན། ཕ་ཁུ་སེར་པོ་དང༌། དེའི་སྟེང་དུ་རིན་པོ་ཆེའི་དྲ་ཕྱེད་ཀྱི་གཞི་ལ་རྔ་ཡབ་ལ་སོགས་པ་དུ་མ་དཔྱངས་པ། བ་ཀུ་ལའི་འཕྲེང་བ་དང་སྟེང་དུ་རིན་པོ་ཆེ་ལེབ་ཀན་གྱིས་བསྐོར་བ། རྩིག་པའི་འགྲམ་ན་འདོད་ཡོན་གྱི་སྣམ་བུ་དང་བཅས་པས་ཕྱིར་རོལ་གྱི་འཁྱམས་ལ་རི་དང་ལྗོན་ཤིང་དང་མཚོ་དང་པདྨ་ལ་སོགས་པ་མེ་ཏོག་སྣ་ཚོགས་དང་ཡིད་དུ་འོང་བའི་འདབ་ཆགས་ལ་སོགས་པས་གང་བ་མཆོད་པའི་ཁྱད་པར་རྣམ་པ་སྣ་ཚོགས་ཀྱིས་ཡོངས་སུ་མཛེས་པ། ཕྱི་
རོལ་རྡོ་རྗེ་རིན་པོ་ཆེའི་ལྕགས་རིས་ཤིན་ཏུ་བསྐོར་བ་དང་བཅས་པ། རབ་ཏུ་གསལ་ཞིང་མཛེས་ལ་འབར་བའི་འོད་ཀྱི་སྣང་བས་ཕྱོགས་ཀུན་ཁྱབ་པའོ། །ན་མཿསརྦ་ཏ་ཐཱ་ག་ཏཱ་ནཱཾ། སརྦ་ཐཱ་ཨུང་ག་ཏེ་སྥ་ར་ཎ་ཧི་མཾ་ག་ག་ན་ཁཾ་སྭཱཧཱ། ཞེས་པ་ལན་གསུམ་བརྗོད། དེ་དག་ནི་རྟེན་གྱི་དཀྱིལ་འཁོར་བསྐྱེད་པའོ། །རྣམ་རྒྱལ་གྱི་དཀྱིལ་ཆོག་རྗེ་བྱམས་གླིང་པས་བསྒྲིགས་པ་ན། འདིར་སྤྱན་དྲངས་ནས་མཉེས་པར་བྱེད་པ་ནི་དཀྱིལ་འཁོར་སྒྲུབ་པ་དངོས་ཡིན་པ་ལས། འདིའི་ལུགས་སུ་རློམ་བཞིན་དུ་དམ་ཚིག་བསྐྱེད་པ་ནི། ཆོ་ག་སྲ་བསྲེར་གྱུར་པ་དག་གོ་ཞེས་བྲིས་ཏེ། དེ་ལ་སྨྲས་པ། གཞན་དག་དེ་ལྟར་བྱེད་པ་ལ་འགོག་པ་དེ་ནི་ཁྱེད་བདེན་ཏེ། བྱ་རྒྱུད་རང་སྐད་ལས་དམ་ཚིག་པ་བསྐྱེད་པ་མེད་དོ། །དེ་ལྟ་ན་ཡང་ཁྱེད་ཉིད་ལ་ཤིན་ཏུ་འགལ་ཏེ། །དཀྱིལ་ཆོག་དེ་དང་སྦྱོར་རྒྱུའི་སྒྲུབ་ཐབས་སོགས་ཁྱེད་ཀྱིས་བརྩམས་པའི་བྱ་རྒྱུད་རང་ལུགས་ཡིན་གསུང་པ་ཕལ་ཆེ་ན། ལྷ་དྲུག་གི་སྒོ་ནས་བདག་བསྐྱེད་བྱེད་པ་སྣང་བ། དེ་བས་ལྷག་པའི་དམ་ཚིག་པ་བསྐྱེད་ཚུལ་གྱི་ཆོ་ག་ཅི་ཞིག་ཡོད། མདུན་སྐྱེད་ལ་དམ་ཚིག་པ་བསྐྱེད་པ་ཡང་བྱ་རྒྱུད་རང་རྐང་གི་ཚུལ་དང་མི་མཐུན་པ་ཏ་ངེས་པ་ཡིན་མོད། བདག་བསྐྱེད་ཀྱི་དམ་ཚིག་པ་བསྐྱེད་པ་ནི། དེ་བས་ཀྱང་ཆེས་ཆེར་བྱ་རྒྱུད་ཀྱི་ཚུལ་ལ་འགལ་ཚབ་ཆེ་བ་ཡིན་པ་གོ་བར་གྱིས་ཤིག །དེ་ནས་ཕྱག་རྒྱ་རྣམས་བྱིན་གྱིས་རླབས་པ་ནི། རྒྱུད་འདི་ཉིད་ཀྱི་ཁྱད་ཆོས་ཏེ། ཐལ་མོ་བརྡབ་བཞིན་དུ་དེ་བཞིན་གཤེགས་པའི་ཡི་གེ་བརྒྱ་པ་ལན་བདུན་བརྗོད་དེ། ནང་གི་དཀྱིལ་འཁོར་གྱི་ཕྱག་རྒྱ་ཐམས་ཅད་བྱིན་གྱིས་རློབས་པའོ། །ཡང་ཐལ་མོ་བརྡབ་པ་དང་
བཅས་ཏེ། ན་མཿསརྦ་བུདྡྷ་བོ་དྷི་སཏྭཱ་ནཱཾ། བ་ར་བ་ར། སརྦཾ་སརྦཾ། ས་མ་ས་མ། ཀཱ་རུ་ཎཱཾ་ཀཱ་རུ་ཎཾ། ཏཱ་ར་ཏཱ་ར། ས་རཱ་ས་རཱ། ཨཱཔྡཱི་ཨཱཔྡཱི། ཨ་མི་ཏཾ་ཨ་མི་ཏཾ། ཨ་ཏི་ཨ་ཏི། བི་རཾ་བི་རཾ། ཨ་ཏཱཾ་ཨ་ཏཱཾ། ཤུ་རཾ་ཤུ་རཾ། ཧ་ཧ་ཧ་ཧ། མཧཱ་ས་མ་ཡ། ན་མསྟཱ་ཨ་མ་ལ། སིདྡྷ་ད་ཡ་ཀེ་བྷྱཿ སརྦ་བུདྷ་བོདྷི་སཏྭཱ་ནཱཾ། སརྦ་ཨ་ནནྟ་མ་དྷྱེ་བྷྱཿ མཧཱ་ཀཱ་རུ་ཎ །མཱ་ལཱི་ནཱི། ཏྲི་ས་མ་ཡེ། ཛྲ་ལ་སྭཱཧཱ། ཞེས་བྱང་ཆུབ་སེམས་དཔའ་རྣམས་ཀྱི་སྙིང་པོ་མཚུངས་པ་མེད་པ་ལན་བདུན་བཟླས་པས། དཀྱིལ་འཁོར་ཕྱི་མ་གཉིས་ཀྱི་ཕྱག་རྒྱ་ཐམས་ཅད་བྱིན་གྱིས་རློབས། དེ་ནས་ལྷ་སྤྱན་འདྲེན་པ་ནི། དཀྱིལ་འཁོར་གྱི་དབུས་སུ་འདུག་པར་མོས་ལ་པུས་མོ་གཡས་པ་ས་ལ་གཙུགས་ཏེ། ལག་ཏུ་མེ་ཏོག་བཟུང་ནས། དེ་བཞིན་གཤེགས་པ་རྣམས་ཀྱི་ལྕགས་ཀྱུ་ཞེས་བྱ་བའི་སྔགས་འདི་ལན་ཉེར་གཅིག་བརྗོད་པར་བྱའོ། །ན་མཿསརྦ་བུདྡྷ་བོ་དྷི་སཏྭཱ་ནཱཾ། ས་མནྟ་ཨ་མོ་གྷ་པྲ་ཏི་ཧ་ཏ་བཛྲཱ་ཎཱཾ། ཨ་གྲ་ཨ་གྲ་ཨཱ་ཀརྵ་ཎི་ཧཱུཾ། བེ་གཱི་བེ་གཱི་ནི་མཧཱ་བེ་གཱི་ནི། སརྦཱ་མྤ་བཛྲ་སུ་ལཱ་ནཱཾ། ཨཱ་ཀརྵ་ཡ་ཧཱུཾ། སརྦ་མུ་དྲ་ག་ཎ་ནཱཾ། ཏིཀྟེ་ཏིཀྟེ། ཏི་ཏི་ཏི་ཏི། ཏ་ཋ་ཏ་ཋ། ཨ་ཨ་ནཱ་བྲི་ཏེ། ཨ་པྲ་ཏི་ཧ་ཏ། ཨ་མོ་གྷ་བུ་ཀྲ་མེ། ས་མ་ས་མ་ཨ་མ་ལེ་མཧཱ་མེ། ཨ་ཏི་ཨ་ཏི། བེ་གེ་བ་ཏྭ་ཀེ ས་མ་ཡ་ཨི་དཾ། ཀཱ་རུ་ཎ་ཤྲཱི་ཏཱི་ན་ཡ། ཏ་ཏྭ་ཨདྒི་ནི། ཨཱ་ན་ཡ་ཤཱི་གྷྲཾ་ཏ་ཐཱ་ག་ཏ་ཨདྒུ་ཤཱི་སྭཱཧཱ། ཞེས་པ་སྟེ། མཐར་མེ་ཏོག་ནམ་མཁའ་ལ་དོར་བར་བྱའོ། །འདི་དམ་ཚིག་གསུམ་
བཀོད་ཉིད་ཀྱི་ཐུན་མོང་མ་ཡིན་པའོ། །དེ་ནས་སྤྱི་ཁྱབ་ཀྱི་ཆོ་གས་སྤྱན་འདྲེན་པ་ནི། གོང་བསྙེན་པའི་སྐབས་སུ་བཤད་པ་རྣམས་དྲན་པར་བྱས་ཏེ། བྷྲཱུཾ་བདུན།ཛི་ན་ཛིཀ་བདུན། ཨོཾ་ཥྟོཾ་བནྡྷ་སྭཱཧཱ། གསུམ། ན་མོ་རཏྣ་ཏྲ་ཡཱ་ཡ༴ གསུམ། མ་ལུས་སེམས་ཅན་ཀུན་གྱི་མགོན་གྱུར་ཅིང༌། ཞེས་སོགས་དང༌། ཆོས་རྣམས་ཀུན་གྱི་དབང་ཕྱུག་གཙོ། ཅེས་སོགས་དང༌། ལས་བྱེད་པའི་མཆོད་ཡོན་བསྒྲེང་ཞིང༌། དད་པ་དང་ནི། ནས། དགྱེས་པར་མཛོད། བྷྲཱུཾ་བདུན་ལ་སོགས་པ་དང༌། ཛི་ན་ཛིཀ་བདུན་ལ་སོགས་པ་དང༌། ཨོཾ་རུ་རུ༴ སོགས་སངས་རྒྱས་སྤྱན་མའི་སྔགས་བདུན་ལ་སོགས་པ་དང༌། དེ་བཞིན་གཤེགས་པའི་ཡི་གེ་བརྒྱ་པ་ལན་གསུམ་དང་ཡི་གེ་ལྔ་པ་ལན་བདུན་དང༌། ཨོཾ་མུ་ནི་མུ་ནི༴ སོགས་ལན་མང་དུ་བརྗོད་ཅིང༌། མཐར། ཨོཾ་བྷ་ག་ཝཱན་མཧཱ་ཀཱ་རུ་ཎི་ཀ་ཤཱཀྱ་མུ་ནི་ཏྲི་ས་མ་ཡ་རཱ་ཛ་མཎྜ་ལ་དེ་བ་ཏཱ་ས་པཱ་རི་ཝཱ་ར་ཨེ་ཧྱཻ་ཧི། ལན་གསུམ། འདིར་ཡང་དེ་བཞིན་གཤེགས་པའི་ལྕགས་ཀྱུའི་སྔགས་ལན་གསུམ་བརྗོད། བཅོམ་ལྡན་ཐུགས་རྗེ༴ ནས། འཁོར་གྱི་དཀྱིལ་འཁོར་ལ་བལྟ་བ། ཞེས་བརྗོད་དེ། སྙིང་པོ་རྩ་བའི་ལྷ་ལྔ་གསལ་བཏབ། ལྷ་སྣམ་ཕྱི་མའི་ལྷོ་སྒོའི་ཐད་དུ། ཁྲོ་བོ་གཞན་གྱིས་མི་ཐུབ་པ་དཀར་པོ། སྟག་ལྤགས་དང་སྦྲུལ་གྱིས་བརྒྱན་པ། ཁྲོ་བོའི་ཆ་བྱད་ཡོངས་སུ་རྫོགས་པ། བྱང་སྒོའི་ཐད་དུ་ཁྲོ་མོ་གཞན་གྱིས་མི་ཐུབ་མ་སེར་མོ། །ཞགས་པ་འཛིན་ཞེང༌།
དར་དང་རིན་པོ་ཆེའི་རྒྱན་ཐམས་ཅད་ཀྱིས་བརྒྱན་པ། རོལ་པའི་ཁྲོ་མོའོ། །ཤར་སྒོའི་ཐད་དུ་རིགས་པའི་རྒྱལ་མོ་སངས་རྒྱས་སྤྱན་མ་དཀར་མོ་གཡས་འཁོར་ལོ་འཛིན་ཞིང༌། གཡོན་གདན་ལ་བརྟེན་པ། རིགས་སྔགས་ཀྱི་ལྷ་མོའི་ཆ་བྱད་ཡོངས་སུ་རྫོགས་པའི། དཀྱིལ་འཁོར་གཉིས་པའི་ལྷ་སྣམ་ལ། ཤར་གྱི་གཡས་སུ་བྱང་ཆུབ་སེམས་དཔའ་མཛོད་སྤུ་ཅན། གཡོན་དུ་མདུང་ཐུང་ཅན། ལྷོའི་གཡས་སུ་འཁོར་ལོས་བསྒྱུར་བ་ཆེར་འབྱུང༌། གཡོན་དུ་ཡིད་བཞིན་གྱི་ནོར་བུའི་རྒྱལ་མཚན། ནུབ་ཀྱི་གཡོན་དུ་མཐུ་ཆེན་ཐོབ་པ། བྱང་གི་གཡོན་དུ་དོན་ཐམས་ཅད་གྲུབ་པ། བྱང་ཤར་དུ་དྲི་མ་མེད་པའི་བློ་གྲོས། དེ་རྣམས་གཡས་ཤིང་ཐོག་དང༌། གཡོན་པོ་ཏི་འཛིན་པ། ནུབ་ཀྱི་གཡས་སུ་འཇམ་དཔལ་གཞོན་ནུར་གྱུར་པ། ཆོས་འཆད་ཀྱི་ཕྱག་རྒྱ་མཛད་པའི་ཕྱག་གི་མཐིལ་ལས་གཡས་གཡོན་དུ་གྱེས་པའི་ཨུཏྤལ་སྡོང་བུ་ལ་རལ་གྲི་དང་པོ་ཏིས་མཚན་པ། བྱང་གི་གཡས་སུ་ནམ་མཁའི་སྙིང་པོ། གཡས་མཆོག་སྦྱིན་དང༌། གཡོན་རལ་གྲིས་མཚན་པའི་པདྨ་བསྣམས་པ། ཤར་ལྷོར་འཕགས་པ་བྱམས་པ་སྤྱི་བླུགས་དང་ཀླུ་ཤིང་གི་ཡལ་ག་འཛིན་པ། དེ་ཐམས་ཅད་གསེར་བཙོ་མ་ལྟ་བུའི་མདོག་ཅན་ནོ། །འདིར་གསང་བ་སྤྱི་རྒྱུད་ལས། བྱམས་པ་ལ་སོགས་པ་བྱང་ཆུབ་སེམས་དཔའ་བཅུ་གཉིས་འགོད་པར་བཤད་ཀྱང་ཧ་ཅང་མང་པར་འགྱུར་བས་ན། དེ་རྣམས་ཀྱི་
གཙོ་བོའི་ཕྱིར་བྱམས་པ་ཉིད་ཀྱིས་ཆོག་གོ །ལྷོ་ནུབ་ཏུ་རིགས་སྔགས་ཀྱི་རྒྱལ་མོ་ཆེན་མོ་མཱ་མ་ཀཱི། སྐུ་མདོག་སྔོན་མོ་གཡས་རྡོ་རྗེ་འཛིན་ཞིང༌། གཡོན་གདན་ལ་བརྟེན་པ། ནུབ་བྱང་དུ་མངག་གཞུགས་བརྩོན་འགྲུས་ཆེན་པོ་དཀར་པོ་ཞགས་པ་འཛིན་པ་རོལ་པའི་ཁྲོ་བོའོ། །དཀྱིལ་འཁོར་ཕྱི་མའི་ལྷ་སྣམ་ལ། ཤར་དུ་བརྒྱ་བྱིན་དམར་སེར་གླང་པོ་ཆེ་ལ་ཞོན་པ་རྡོ་རྗེ་འཛིན་པ། དེའི་རྒྱབ་ཏུ་ཉི་མ་དམར་པོ་རྟ་བདུན་གྱིས་དྲངས་པའི་ཤིང་རྟ་ལ་ཞོན་ཞིང་ཉི་མའི་དཀྱིལ་འཁོར་འཛིན་པ། ཤར་ལྷོར་མེ་དམར་པོ་ར་སྐྱེས་ལ་ཞོན་པ་མེ་ཐབ་འཛིན་པ། ལྷོར་གཤིན་རྗེ་སྔོན་པོ་མ་ཧེ་ལ་ཞོན་པ་དབྱུག་ཐོ་འཛིན་པ། ལྷོ་ནུབ་ཏུ་སྲིན་པོ་ནག་པོ་རོ་ལངས་ལ་ཞོན་པ་རལ་གྲི་འཛིན་པ། ནུབ་ཏུ་ཆུ་ལྷ་དཀར་པོ་ཆུ་སྲིན་ལ་ཞོན་པ་སྦྲུལ་ཞགས་འཛིན་པ། དེའི་རྒྱབ་ཏུ་ཟླ་བ་དཀར་པོ་ངང་པ་ལ་ཞོན་པ་ཀུ་མུ་ཏ་འཛིན་པ། གཡས་སུ་སའི་ལྷ་མོ་པདྨའི་དབུས་ན་ལུས་ཕྱེད་ཕྱུར་བའམ། ཕག་ལ་ཆིབས་པ་བུམ་པ་བསྣམས་པ་ནུབ་བྱང་དུ་རླུང་ལྷ་ལྗང་ཁུ་རི་དྭགས་ལ་ཞོན་པ་རྒྱལ་མཚན་འཛིན་པ། འདིར་རྒྱལ་མཚན་ཞེས་པ་ནི་ད་ལྟའི་སྦུབས་ཅན་འདི་མ་ཡིན་གྱི། བ་དན་དང་གཅིག་སྟེ་ཏོག་དང་བཅས་པའོ། །བྱང་དུ་གནོད་སྦྱིན་སེར་པོ་རྟ་ལ་ཞོན་པ་དབྱུག་པ་འཛིན་པ། བྱང་ཤར་དུ་དབང་ལྡན་དཀར་པོ་གླང་ལ་ཞོན་པ་མདུང་རྩེ་གསུམ་པ་འཛིན་པ། ཕྱིའི་གཞལ་ཡས་ཁང་སྒོ་བཞི་པ་ལ་སྒོ་སྲུངས་བྱེད་ན། ཤར་སྒོར་ཡུལ་
འཁོར་སྲུང་དཀར་པོ་རྒྱུད་མང་འཛིན་པ། ལྷོ་སྒོར་འཕགས་སྐྱེས་པོ་སྔོན་པོ་རལ་གྲི་འཛིན་པ། ནུབ་སྒོ་སྤྱན་མི་བཟང་དམར་པོ་སྦྲུལ་ཞགས་འཛིན་པ། བྱང་སྒོར་རྣམ་ཐོས་བུ་སེར་པོ་བེ་ཅོན་དང་ནེའུ་ལེའི་རྐྱལ་པ་འཛིན་པའོ། །ཕྱིའི་གཞལ་ཡས་ཁང་སྒོ་གཅིག་པའམ། སྒོ་བཞི་གང་བྱེད་ཀྱང་སྒོ་སྐྱོང་ངེས་པར་དགོས་པ་ནི་མིན་ནོ། །ནུབ་སྒོའི་གཡས་གཡོན་དུ་ཀླུའི་རྒྱལ་པོ་དགའ་བོ་དང་གཉེན་དགའ་བོ་དཀར་པོ་སྦྲུལ་མགོའི་གདེངས་ཀ་ཅན། སྦྲུལ་འཇུག་ཡོད་པ་ནོར་བུ་རིན་པོ་ཆེ་འཛིན་པའོ། །ལྷོ་སྒོའི་ཐད་ཀྱི་ཕྱི་རོལ་དུ་གནོད་སྦྱིན་མ་འཕྲོག་མ་སེར་མོ་ཆང་བུས་གང་བའི་སྣོད་དང་ནེའུ་ལེའི་རྐྱལ་བ་འཛིན་པ། བུ་ལྔ་བརྒྱ་དང་བཅས་པའོ། །དེ་བཞིན་དུ་དྲག་པོ་དབང་ཕྱུག་ཆེན་པོ་དང༌། གངས་རིའི་བུ་མོ་དབུ་མ་དང༌། གཞོན་ནུ་གདོང་དྲུག་དང༌། ཚངས་པ་དང༌། དབང་ཕྱུག་ཆེན་པོ་དང༌། རིགས་སྔགས་འཆང་གི་རྒྱལ་པོ་གླང་པོ་ཆེ་དང༌། ཡན་ལག་བཀྲ་བས་བྱིན་དང༌། རྩེ་བྲན་ཅན་དང༌། གཡོན་ཕྱོགས་ཅོད་པན་དང༌། མིག་བཟང་པོ་དང༌། སྣ་ཚོགས་འོད་དང༌། ལེགས་པར་སྒྲུབ་པ་ལ་སོགས་པ་དཀྱིལ་འཁོར་དུ་འདུ་བར་འོས་པའི་ལྷ་ཐམས་ཅད་ཀྱང་བཞུགས་ཤིང༌། ཕྱོགས་ཐམས་ཅད་དུ་སངས་རྒྱས་དང་བྱང་ཆུབ་སེམས་དཔའ་དང༌། ཉན་ཐོས་དང༌། རང་རྒྱལ་དང༌། ལྷའི་མཆོག་རྣམས་ཀྱིས་ཡོངས་སུ་བསྐོར་ཏེ་བཞུགས་པར་གྱུར། དེ་ནས། ཤཱཾ་ཀ་རེ་ས་མ་ཡ་སྭཱཧཱ། ཞེས་པ་ནས་བརྩམས་ཏེ།
བདག་ལ་གྲུབ་པའི་མཆོག་སྩོལ་ཅིག །ཅེས་པའི་བར་དམ་ལ་བཞག་པ་དང༌། མཆོད་པ་དང༌། བསྟོད་པ་དང༌། བཤགས་པ་དང༌། ཡི་རང་དང༌། གསོལ་གདབ་དང༌། སེམས་བསྐྱེད་དང༌། ཚད་མེད་བཞི་སྒོམ་པ་དང༌། ཡོངས་སུ་བསྔོ་བ་དང༌། གསོལ་བ་གདབ་པའི་བར་རྣམས་བསྙེན་པའི་སྐབས་སུ་ཇི་སྐད་བཤད་པ་བཞིན་བྱས་པ་ཁོ་ནས་ཀྱང་དགོས་དོན་ཐམས་ཅད་འགྲུབ་ལ། ཅུང་ཟད་སྤྲོས་པ་ལ་དགའ་ན་མཆོད་ཡོན་གྱི་སྐབས་སུ། ལས་ཀྱི་རྡོ་རྗེ་བཟེད་ཞལ་ཀྱི་ནང་དུ་མཆོད་ཡོན་བསྒྲེང་ཞིང༌། དེ་བཞིན་གཤེགས་པའི་ཡི་གེ་བརྒྱ་པ་ལན་གསུམ་དང༌། རིག་པའི་རྒྱལ་པོ་དང༌། རིགས་ཀྱི་སྙིང་པོ་མང་དུ་བཟླ་ཞིང༌། ལྷ་རྣམས་ཀྱི་མཚན་སྔགས་ལན་གསུམ་གསུམ་གྱིས་ཕྱོགས་མཚམས་བརྒྱད་དམ་ཕྱོགས་བཞིའམ། ནུབ་སྒོའི་ཐད་ནས་ཤར་དུ་ཕྱོགས་པས་འབུལ་བར་བྱའོ། །ཁྲུས་གསོལ་གྱི་སྐབས་སུ། ཕར་ཕྱིན་དྲུག་གི་ཚིགས་བཅད་དང་ཡངས་པའི་གྲོང་ཁྱེར་དུ་འཇུག་པའི་ཤིས་བརྗོད་སོགས་ཀྱང་བྱ་ཞིང༌། དེ་བཞིན་དུ། མཆོད་ཡོན་ཕལ་ཆེར། སོགས་དང༌། རབ་འབྱམས་རྒྱ་མཚོ་སོགས་ཀྱི་ཚིགས་བཅད་དང༌། འདོད་ཡོན་ལྔ་དང༌། རྒྱལ་སྲིད་སྣ་བདུན་དང༌། བཀྲ་ཤིས་རྫས་བརྒྱད་དང༌། བཀྲ་ཤིས་རྟགས་བརྒྱད་དང༌། བཀྲ་ཤིས་ལྷ་མོ་བརྒྱད་ཀྱི་མཆོད་པ་སོགས་ཀྱང་ཇི་ལྟར་སྐབས་སུ་བབ་པ་དེ་ལྟར་སྦྱར་བར་བྱ་ལ། བསྟོད་པ་དཀྱུས་ཀྱི་མཐར་ཡང༌། སྐྱེས་བུ་མ་སྐྱེས་ཁྱོད་འཚལ། །སྐྱེས་བུ་དམ་པ་ཁྱོད་ཕྱག་འཚལ། །སྤྱོད་པའི་དོན་ཀུན་གྲུབ་མཛད་པ། །སྐྱེས་བུ་གཙོ་བོ་ཁྱོད་ཕྱག་འཚལ། །
ཕུང་ཁྲོལ་ཐམས་ཅད་བཟློག་པ་པོ། །སྐྱེས་བུ་སེངྒེ་ཁྱོད་ཕྱག་འཚལ། །ངན་འགྲོ་ཐམས་ཅད་འཇོམས་མཛད་པ། །སྐྱེས་བུ་དཔའ་བོ་ཁྱོད་ཕྱག་འཚལ། །བསོད་ནམས་དྲི་ནི་མཐའ་ཡས་པ། །སྐྱེས་བུ་པད་དཀར་ཁྱོད་ཕྱག་འཚལ། །སྲིད་གསུམ་འདམ་རྫབ་རྣམས་སྦྱོང་བ། །སྐྱེས་བུ་པདྨ་ཁྱོད་ཕྱག་འཚལ། །སྡུག་བསྔལ་ཀུན་ལ་རྣམས་གྲོལ་བ། །སྐྱེས་བུ་རྣམ་གྲོལ་ཁྱོད་ཕྱག་འཚལ། །ཀུན་ཏུ་ཞི་ཞིང་ལེགས་ཞི་མཛད། །ཞི་བ་ཁྱོད་ལ་ཕྱག་འཚལ་ལོ། །སྔགས་ཀྱི་སྤྱོད་དོན་ཀུན་སྒྲུབ་པ། །སྒྲུབ་པ་ཁྱོད་ལ་ཕྱག་འཚལ་ལོ། །བཀྲ་ཤིས་ཀུན་ཀྱི་བཀྲ་ཤིས་པ། །བཀྲ་ཤིས་ཁྱོད་ལ་ཕྱག་འཚལ་ལོ། །ཆོས་རྣམས་ཐམས་ཅད་ཐུགས་ཆུད་པ། །སངས་རྒྱས་ཁྱོད་ལ་ཕྱག་འཚལ་ལོ། །ཆོས་རྣམས་ཐམས་ཅད་སྤྲོས་པ་མེད། །དེ་བཞིན་ཉིད་དེ་ཡི་གེ་ཨའི། །རྗེས་ཞུགས་རབ་ཏུ་སྟོན་མཛད་པ། །དེ་བཞིན་གཤེགས་ཁྱོད་ཕྱག་འཚལ་ལོ། །ཤེས་དང་ཤེས་བྱའི་དངོས་ཀུན་དང༌། །འདུས་བྱས་འདུས་མ་བྱས་ཐེག་གསུམ། །ལམ་ལ་རབ་འཇོག་རབ་གནས་པ། །ཐམས་ཅད་མཁྱེན་པ་ཁྱོད་ཕྱག་འཚལ། །ཤཱཀྱའི་རྒྱལ་པོ་བཅོམ་ལྡན་འདས། །གསེར་གྱི་མདོག་ཅན་མཚན་དཔེས་སྤྲས། །ན་བཟའ་ཆོས་གོས་ངུར་སྨྲིག་བསྣམས། །ཆོས་འཆད་ཕྱག་རྒྱ་མཛད་ལ་འདུད། །འཕགས་པ་རྡོ་རྗེ་འཛིན་པ་ཆེ། གསེར་མདོག་རལ་པའི་ཅོད་པན་ཅན། །གོས་སེར་གྱོན་ཞིང་ནོར་བུ་དང༌། །ལྕགས་ཀྱུ་འཛིན་ལ་ཕྱག་འཚལ་ལོ། །
འཕགས་མ་རྡོ་རྗེ་འཛིན་མ་ཡང༌། །ཡིད་འཕྲོག་ཁ་དོག་བླ་གོས་སེར། །རྡོ་རྗེ་དང་བཅས་ཐལ་མོ་སྦྱར། །པུས་བཙུགས་བཞུགས་ལ་ཕྱག་འཚལ་ལོ། །ཕོ་ཉ་མཐའ་ཡས་སྐུ་གདོག་དམར། ཁྲོ་འཁྲུག་ནོར་བུའི་ཟུར་ཕུད་དང༌། །སྦྲུལ་དཀར་མཆོད་ཕྱིར་ཐོགས་ཀྱིས་བརྒྱན། གྲི་གུག་ཞགས་པ་འཛིན་ལ་བསྟོད། །མཐའ་ཡས་མ་ནི་སྔོ་སངས་མདོག །ཟུར་ཕུད་གཅིག་པ་ལང་ཚོར་ལྡན། །སྒེག་དང་བཅས་པ་གོས་སྔོན་གྱོན། །མེ་ཏོག་འཕྲེང་བ་འཛིན་ཕྱག་འཚལ། །གཞན་གྱིས་མི་ཐུབ་དྲག་ཤུལ་ཆེ། །གཏུམ་མོ་གདོལ་མ་གཞན་མི་ཐུབ། །དངོས་གྲུབ་ཀུན་སྩོལ་སངས་རྒྱས་སྤྱན། །གྲུབ་པའི་ལྷ་མཆོག་རྣམས་ལ་འདུད། །རྒྱལ་སྲས་ཀུན་གྱི་གཙོ་བོ་ནི། །གཞོན་ནུའི་ཚུལ་འཛིན་འཇམ་པའི་དབྱངས། །འཁོར་ལོས་བསྒྱུར་རྒྱལ་བྱམས་པ་སྟེ། །ཐབས་མཁས་མཆོག་གྱུར་ལ་ཕྱག་འཚལ། །འཕགས་མཆོག་ནམ་མཁའི་སྙིང་པོ་སོགས། །རིག་རྒྱལ་བྱང་སེམས་དཔའ་རྣམས་དང༌། །མཱ་མ་ཀཱི་དང་བརྩོན་འགྲུས་ཆེ། །ཞི་ཞིང་སྲུང་མཛད་གཙོ་ལ་འདུད། །དབང་པོ་ཟླ་བ་ཉི་མ་སོགས། །ངེས་པ་ཉིད་དུ་རྣམ་དག་ཀྱང༌། །ཐུགས་རྗེས་ཐབས་ཀྱི་སྐུ་སྤྲུལ་པ། །འཇིག་རྟེན་སྐྱོང་བ་རྣམས་ལ་འདུད། །ཀླུ་རྒྱལ་དགའ་བོ་ཉེ་དགའ་བོ། །འཕྲོག་མ་བུ་དང་བཅས་པ་རྣམས། །རྒྱལ་བའི་བསྟན་ལ་མངོན་དགའ་ཞིང༌། །མཐུ་ཆེན་ལྡན་པ་རྣམས་ལའང་འདུད། །སྟོབས་ཆེན་ལྷ་རྣམས་ཐམས་
ཅད་དང༌། །སྔགས་འཛིན་རྒྱལ་པོ་ཐམས་ཅད་དང༌། །ས་གསུམ་གནས་ན་དགེ་བ་ཅན། །དཀྱིལ་འཁོར་གནས་པ་ཀུན་ལ་འདུད། །དེ་ལྟར་བསྟོད་པའི་དགེ་བ་ཡིས། །ནམ་མཁའི་མཐས་གཏུགས་སེམས་ཅན་ཀུན། །སྒྲིབ་སྤངས་ཡོན་ཏན་ཀུན་རྫོགས་ཏེ། །རྡོ་རྗེ་འཛིན་དང་མཉམ་པར་ཤོག །དེ་ནས་སླར་ཡང་མཆོད་ཡོན་དང༌། ཉེར་སྤྱོད་སྔགས་ཙམ་གྱིས་ཕུལ་ལ། ན་མོ་རཏྣ་ཏྲ་ཡཱ་ཡ། ཨོཾ་ཨ་ཏ་བྷུ་ཏི༴ ཞེས་པ་ནས། ཛི་ན་ཛིཀ་ལན་གསུམ་གྱིས་མགོ་བོར་བྷྲཱུཾ་ཡིག་བྱུང་བར་བསམས་པའི་བར་བཟླས་པ་བྱེད་ཚུལ་ཡང་ཕལ་ཆེར་བསྙེན་པའི་སྐབས་དང་འདྲ་ལ། འོན་ཀྱང་འདིར་ཁྱད་པར་ནི། དཀྱིལ་འཁོར་གྱི་བཟླས་པ་སོང་བའི་མཚམས་སུ་བུམ་པ་རྣམས་ཀྱི་བཟླས་པ་སྟེ། དབང་བུམ་ལ་བྷྲཱུཾ་དང༌། ཡི་གེ་བརྒྱ་པ་དང༌། ཡི་གེ་ལྔ་པ་རྣམས་བཟླ། ཁྲུས་བུམ་མདུན་མ་གཉིས་ལ། ཛི་ན་ཛིཀ་དང་རྒྱབ་ཟུར་གྱི་གཉིས་ལ་ལས་ཐམས་ཅད་པ་དང༌། །ལས་བུམ་ལ་བདུད་རྩི་ཐབས་སྦྱོར་བཟླའོ། །འདི་ནས་བཟུང་སྟེ་བསངས་བ་དགོས་ཚད་ལས་བུམ་གྱིས་བྱ་བའོ། །ལས་བཞིའི་དབང་བསྐུར་ན་ཡང་དེའི་སྔགས་བཟླའོ། །དེ་ནས་སླར་ཡང་ཐལ་སྦྱར་གྱེན་དུ་ཁ་ཕྱེས་ལ་མཛུབ་མོ་ཅུང་ཟད་བཀུག་པས། །རྩ་སྔགས་ལན་གསུམ་དང༌། ཛི་ན་ཛིཀ་ལན་གསུམ་གྱི་ས་གཙོ་བོ་དང༌། ཕྱག་རྒྱ་དེ་དང་ཛི་ན་ཛིཀ་ཁོ་ནས་འཁོར་ཐམས་ཅད་ལ་ཡང་ལན་གསུམ་གསུམ་དུ་རྒྱས་བཏབ་བོ། །དེའི་རྗེས་སུ་ཞི་བའི་སྦྱིན་སྲེག་གིས་ལྷ་མཉེས་པར་བྱ་ཞིང༌། ཞི་བ་སྔོན་དུ་སོང་བས་རྒྱས་པ་བསྒྲུབས་ནའང་ལེགས་ལ། ཞི་
བ་ཁོ་ནས་ཀྱང་ངེས་པར་འགྲུབ་བོ། །བར་འདིར་འོག་ཏུ་འཆད་པར་འགྱུར་བའི་གཏོར་མའི་རིམ་པ་རྣམས་བྱ་སྟེ། དེ་ལྟར་ན་རྒྱས་བཏབ་སྦྱིན་སྲེག་གཏོར་མ་གསུམ་པོ་ནི། དཀྱིལ་འཁོར་སྒྲུབ་པའི་ཡན་ལག་ཡིན་པར་ཤེས་པར་བྱའོ། །ལྔ་པ་དབང་བསྐུར་བ་ལ། །སློབ་དཔོན་བདག་ཉིད་འཇུག་པ་དང༌། སློབ་མ་དབང་བསྐུར་བ་གཉིས་སོ། །དང་པོ་ནི། སློབ་མ་ལ་ཇི་ཙམ་བསྐུར་བ་དེ་དག་ལས། སྦྱིན་སྲེག་དང་དབང་སྟེགས་ལ་སོགས་པ་བོར་ཏེ། གཞན་ལྷག་མ་རྣམས་ཚང་བར་བྱའོ། །གཉིས་པ་ནི། བྱ་རྒྱུད་སྤྱི་ལུགས་ལ་སློབ་མ་གཅིག་ཁོ་ན་ལ་ཆོ་ག་གཅིག་གིས་དབང་བསྐུར་གྱི། གཉིས་ཕན་ཆོད་ལ་ཡོ་བྱད་གཅིག་དང༌། ཆོ་ག་གཅིག་གིས་དབང་བསྐུར་མི་བྱ་བར་གསུངས་ལ། དམ་ཚིག་གསུམ་རྒྱལ་གྱི་རྒྱུད་ལས་སློབ་མ་ལྔ་མན་ཆད་ལ་ཟུང་མིན་ལ་དུས་མཉམ་དུ་དབང་བསྐུར་དུ་རུང་བར་གསུངས་ཏེ་དགོས་ཀྱི་ཁྱད་ཆོས་ཡིན་པར་སེམས་ལ། སྤྱིར་ནི་སློབ་མའི་སྣོད་གཙོ་བོར་བརྟགས་དགོས་ཀྱི་སྣོད་ལ་ཅི་ཡང་མི་རྟོག་པར་གྲངས་ཙམ་ཁོ་ན་ལ་ངལ་བས་ཅི་ཞིག་བྱ། རྒྱུད་སྡེ་འདི་ལས་ཀྱང་གྲངས་དང་མི་མཐུན་ན་མི་ཤེས་པར་བཤད་ཀྱི་དབང་མི་ཐོབ་པར་བཤད་པ་ནི་མེད་དོ། །དེ་ནས་སློབ་མ་དབང་བསྐུར་བ་ལ། ཁྲུས་བྱས་བསངས་གཏོར་ཐོག་མའི་རིམ། །གསོལ་བཏབ་སེམས་བསྐྱེད་སྡོམ་པ་བཟུང༌། །མིག་དར་བཅིངས་ནས་མེ་ཏོག་གཏད། །ནང་དུ་ཁྲིད་ནས་བདེན་སྟོབས་བརྗོད། །མེ་ཏོག་འདོར་ཞིང་གདོད་གཡོགས་དཀྲོལ། །ལྷ་ངོ་བསྟན་ཞིང་རིག་པ་གཏད། །ཅེས་དོན་ཚན་
བཅུ་བཞི་པོའི་སྡོམ་ཡིད་ལ་བཞག་ནས། དང་པོ་ནི་སློབ་མ་རྣམས་འཁྲུས་བྱས། དཀྱིལ་འཁོར་ཁང་པའི་སྒོ་དྲུང་དུ་འཁོད། གཉིས་པ་ནི། བདུད་རྩི་ཐབས་སྦྱོར་གྱི་སྔགས་བཟླ་བཞིན་དུ་བསང་ཆུ་ནས་ཀུ་ཤས་བླངས་ཏེ་བསངས་གཏོར་བྱ། ན་མོ་རཏྣ༴ ནས། ཨ་མྲྀ་ཏེ་ཧཱུཾ་ཕཊ། ལན་གསུམ། འདི་ནི་བྱུར་བསལ་བ་དང་བགེགས་བསྐྲོད་པ་ཡིན། ཡང་སྤོད་ཆུས་མགོ་ལ་བྲམ་སྟེ་སྔགས་དེ་ཉིད་ལན་བདུན་བརྗོད་པ་ནི་སྲུང་བ་ཡིན། ཡང་དྲི་བཟང་གིས་བྱུགས་པའི་ལག་པ་སློབ་མའི་མགོ་ལ་བཞག་སྟེ། ཨོཾ་ཛྭ་ལ་ཧཱུཾ། ལན་བདུན་གྱིས་བྱིན་རླབས། ཡང་བྷྲཱུཾ་དང་ལས་ཐམས་ཅད་པས་བསངས་གཏོར་བྱ། གསུམ་པ་ནི། མེ་ཏོག་བཀྱེ་བསྡུ་བྱ། སེམས་བསྐྱེད་གསལ་བཏབ། ཆོས་བཤད། འཇུག་པའི་དོན་དུ་མཎྜལ་འབུལ་ལོ། །བཞི་པ་ནི། དགའ་ཆེན་ཁྱོད་བདག་སྟོན་པ་སྟེ། སོགས་ཀྱིས་སྤྱིར་གསོལ་བ་བཏབ། ལྔ་པ་ནི། སྲོག་ཆགས་སྡུག་བསྔལ་ཞི་བྱའི་ཕྱིར། ཞེས་སོགས་སྟ་གོན་གྱི་སྐབས་ལྟར་སེམས་བསྐྱེད་བྱ། དྲུག་པ་ནི། དེ་ནས་སྡོམ་པ་བཟུང་སྟེ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་བདག་ལ་དགོངས་སུ་གསོལ། བདག་མིང་འདི་ཞེས་བགྱི་བ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་བདག་འབུལ་གྱི། ཐམས་ཅད་ཀྱིས་དུས་ཐམས་ཅད་དུ་བདག་ལ་རབ་ཏུ་བཟུང་དུ་གསོལ། སངས་རྒྱས་དང་བྱང་ཆུབ་སེམས་དཔའ་རྣམས་ཀྱིས་བདག་ལ་བྱིན་གྱིས་རླབས་ཏུ་གསོལ། ཐུགས་རྗེ་ཆེན་པོ་དང་ལྡན་པ་སེམས་ཅན་གྱི་ཁམས་ཐམས་ཅད་ཡོངས་སུ་སྐྱོབ་པར་མཛད་པ་རྣམས་ཀྱིས་བདག་ལ་ཡོངས་སུ་སྐྱབ་ཏུ་གསོལ། ལས་
ཐམས་ཅད་གྲུབ་པར་བྱ་བའི་ཕྱིར། དམ་ཚིག་ཆེན་པོ་བདག་ལ་སྩལ་དུ་གསོལ། ཞེས་ལན་གསུམ་རྗེས་བཟློས་བྱེད་དུ་བཅུག སློབ་དཔོན་གྱིས་འདི་སྐད་ཅེས་བྱ་སྟེ། ནམ་མཁའ་མཐའ་ཡས་དང་མཉམ་རྒྱལ་དབང་པོ། །སྲས་བཅས་མ་ལུས་ཀུན་ཀྱི་དམ་ཚིག་སྩོལ། །འཆི་མེད་བསད་མེད་སེམས་ཅན་སྐྱབ་པ་མེད། ཤིན་ཏུ་བརྟན་པས་འདི་ལྟར་བྱ་བ་ཉིད། ཅེས་བརྗོད་དེ། བདག་འབུལ་བའི་སྡོམ་པ་ཞེས་བྱའོ། །འཇམ་དཔལ་རྩ་རྒྱུད་ལས་ནི། བདག་འབུལ་བའི་སྡོམ་པ་འདི་དབང་དངོས་གཞི་སོང་ནས་རྗེས་ཀྱི་སྐབས་ན་ཡོད་ལ། དམ་ཚིག་གསུམ་བཀོད་ཀྱི་རྒྱུད་ལས་སྐབས་འདིར་བཤད་དོ། །གསང་བ་སྤྱི་རྒྱུད་ལ་ཁ་སྐོང་མི་བྱེད་ན་བདག་འབུལ་བ་འདི་མི་དགོས་ལ། སེམས་བསྐྱེད་ཉིད་སྡོམ་པ་བཟུང་བའོ། །བདུན་པ་ནི། དེ་ནས་ལས་ཐམས་ཅད་པ་དང༌། བྷྲཱུཾ་གྱིས་བྱིན་གྱིས་རླབས་པའི་གདོང་གཡོགས་བཅིངས། བརྒྱད་པ་ནི། སློབ་མ་དམ་རྒྱ་འཆིང་དུ་བཅུག་པའི་ལག་ཏུ་ཛི་ན་ཛིཀ་ཞེས་བརྗོད་ཅིང་མེ་ཏོག་གཏད་དོ། །ཡང་ན་དེའི་སྟེང་དུ་མིག་དར་དང་མེ་ཏོག་གི་སྔགས་སྤྱི་དང་འདྲ་བས་ཁ་བསྐང་ཀྱང་རུང་ངོ༌། །དགུ་པ་ནི་ཡང་ཛི་ན་ཛི་ཀ་བཟླ་བཞིན་གཙུག་ཏོར་གྱི་ཕྱག་རྒྱ་བཅིངས། སློབ་མའི་སྤྱི་བོར་བཞག་སྟེ། དཀྱིལ་འཁོར་ཁང་པའམ། ཡོལ་བའི་ནང་དུ་ཁྲིད། བཅུ་པ་ནི། དེ་བཞིན་གཤེགས་པ་ཀུན་གྱི་གནས། །དམ་ཚིག་གསུམ་བཀོད་དཀྱིལ་འཁོར་མཆོག །སྙིང་པོའི་དཀྱིལ་འཁོར་འདི་རུ་ནི། །བདག་གིས་སློབ་མ་གཞུག་པར་བགྱི། །ལྷ་ཡི་
རིགས་ཀྱི་རིམ་པ་དང༌། །བསོད་ནམས་རིམ་པའང་དེ་བཞིན་ཤོག །དེ་ཡི་དངོས་གྲུབ་ཅི་འདྲར་འགྱུར། །རིགས་ནི་གང་གི་སྣོད་དུ་འགྱུར། །ལྷ་རྣམས་རིམ་བཞིན་འབབ་པར་ཤོག །འདི་ལ་བསོད་ནམས་མཐུ་ཡོད་པ། །དཀྱིལ་འཁོར་འདིར་ནི་དེ་བཞིན་ཤོག །བཅུ་གཅིག་པ་ནི། ཨོཾ་པྲ་ཏཱིཙྪ་བཛྲ་ཧོཿ ཞེས་མེ་ཏོག་དོར། བཅུ་གཉིས་པ་ནི། ལས་ཐམས་ཅད་པ་བཟླ་བཞིན་དུ་མིག་དར་དཀྲོལ། ཡང་ན་མིག་དར་དགྲོལ་བ་ལ། ཚིགས་བཅད་དང་སྔགས་སྤྱི་དང་འདྲ་བ་ལས། རྡོ་རྗེ་སེམས་དཔའ་ཞེས་པའི་ཚབ་ཏུ། དེ་བཞིན་གཤེགས་ཀུན༴ ཞེས་འདོན་པ་སྤོས་པས་ཀྱང་རུང་བར་ནི་མངོན་ནོ། །བཅུ་གསུམ་པ་ནི། དེ་ནས་ལྷ་ངོ་སྟོན་ཏོ། །དེ་ཡང་འདི་ན་བཅོམ་ལྡན་འདས་དམ་ཚིག་གསུམ་བཀོད་པའི་དཀྱིལ་འཁོར་མངོན་སུམ་དུ་བཞུགས་པ་ཡིན་ཏེ། སངས་རྒྱས་དང་བྱང་ཆུབ་སེམས་དཔའ་རྣམས་ཀྱི་སྨོན་ལམ་གྱི་མཐུ་ལས་བྱུང་བ། ཞེས་པ་ནས། འབར་བའི་འོད་ཀྱི་སྣང་བས་ཕྱོགས་ཀུན་ཁྱབ་པའོ། །ཞེས་པའི་བར་དཀྱིལ་འཁོར་སྒྲུབ་པའི་སྐབས་ལྟར་དང༌། དབུས་ཀྱི་པདྨ་ཆེན་པོའི་སྟེང་གི༴ ཞེས་པ་ནས། ཚུལ་གྱིས་བཞུགས་པར་གྱུར། ལྷ་སྣམ་ནང་མ་ལ་བཅོམ་ལྡན་འདས་ཀྱི་བཞུགས་ཁྲིའི་གཡས་ལོགས་སུ། ཞེས་པ་ནས། རྡོ་རྗེ་འཛིན་པའོ། །ལྷ་རྣམ་གཉིས་པ་ལ་རྡོ་རྗེ་འཛིན་ཆེན་པོའི་མདུན་ངོས་འོག་ཕྱོགས་སུ། ཞེས་པ་ནས། འཁོར་གྱི་དཀྱིལ་འཁོར་ལ་བལྟ་བའོ། །
ལྷ་སྣམ་ཕྱི་མའི་ལྷོ་སྒོའི་ཐད་དུ༴ ཞེས་པ་ནས། ཡོངས་སུ་བསྐོར་ཏེ་བཞུགས་པར་གྱུར། ཞེས་པའི་བར་དུ་དཀྱིལ་འཁོར་སྒྲུབ་པའི་སྐབས་བཞིན་ནོ། །མེ་ཏོག་གང་ལ་ཕོག་པའི་ལྷ་ངོས་འཛིན་པ་ནི། དེང་སང་ལག་ལེན་མི་བྱེད་པས་དཀྱིལ་འཁོར་གྱི་གཙོ་བོ་ཉིད་ལས་དེར་མོས་པ་བྱས་ལ། དཀྱིལ་འཁོར་བཟང་པོ་འདི་ལ་ལྟོས། །ད་ནི་དད་པ་རབ་ཏུ་བསྐྱེད། ཁྱོད་ནི་སངས་རྒྱས་རིགས་སུ་སྐྱེ། །སྔགས་དང་རིག་པས་བྱིན་གྱིས་རླབས། །འགྲོ་བ་ཕུན་ཚོགས་དངོས་གྲུབ་ཀྱང༌། །ཐམས་ཅད་ཁྱོད་ལ་མངོན་དུ་འགྱུར། །དངོས་གྲུབ་ཐོབ་ཕྱིར་དམ་ཚིག་སྐྱོངས། །གསང་སྔགས་དག་ལའང་བརྩོན་པར་གྱིས། ཞེས་བརྗོད། བཅུ་བཞི་པ་ནི། དེ་ནས་སློབ་མས། མགོན་པོ་ཐུགས་རྗེ་ཆེ་ལྡན་པ། ཞེས་སོགས་ཤོ་ལོ་ཀ་གསུམ་དང༌། ན་མོ་རཏྣ་ཏྲ་ཡཱ་ཡ། ཞེས་བཟླ་བཞིན་དུ། དཀྱིལ་འཁོར་ལ་ཕྱག་འཚལ་ནས་མེ་ཏོག་གཏོར། ཨོཾ་པྲ་ཏཱིཙྪ་བཛྲ་ཧོཿ ཞེས་ལན་གསུམ་བརྗོད། སློབ་དཔོན་གྱིས་མེ་ཏོག་བླངས་ཏེ། སྔར་དང་པོར་ཕུལ་བའི་མེ་ཏོག་དེ་དང་ལྷན་ཅིག་ཏུ་ཛི་ན་ཛིཀ དང་བྷྲཱུཾ་བཟླ་བཞིན་པས་སྤྱི་བོར་བཞག་གོ །གཉིས་པ་དབང་དངོས་གཞི་ལ། །རིམ་པ་བཅུ་དྲུག་ཡོད་དེ། །༡གསོལ་དང་༢སྦྱིན་སྲེག་༣ལས་བུམ་དབང༌། །༤དབང་སྟེགས་༥ཤིས་བརྗོད་༦ཁྲུས་བུམ་དང༌། །༧རྣམ་རྒྱལ་ཆུ་བླངས་༨སྔགས་བཟླས་ནས། །༩སྐོར་དང་༡༠གསོལ་འདེབས་༡༡བཀྲ་ཤིས་བརྗོད། །༡༢རྣམ་རྒྱལ་༡༣བུམ་པ་ལས་བཞིར་བཅས། །༡༤ཅོད་པན་༡༥མཆོད་དང་༡༦ཆེད་བརྗོད་བྱ། །ཅེས་
སོ། །དང་པོ་ནི། སྐབས་འདིར་སློབ་མས་ཡོན་དབུལ་བར་གསུངས་པའི་དོན་ལ་སྤྱི་དང་མཐུན་པར་མཎྜལ་འབུལ། སློབ་དཔོན་གྱིས་བདག་ལ་དམ་ཚིག་གསུམ་བཀོད་རྒྱལ་པོའི་དཀྱིལ་འཁོར་དུ་དབང་བསྐུར་བ་སྩལ་དུ་གསོལ་ཞེས་ལན་གསུམ་གསོལ་བ་བཏབ། གཉིས་པ་ནི། སྐབས་འདིར་འགྲུབ་ན་ངེས་པར་ཞི་བའི་སྦྱིན་སྲེག་བྱ། གསུམ་པ་ནི་མཐར། ཐབ་ཀྱི་ལྷ་རྣམས་ཐབ་ནས་གཤེགས་ཏེ་དཀྱིལ་འཁོར་ལ་སྤྱན་དྲངས་ཟིན་པ་ན། ལས་བུམ་བླངས་ལ་བདུད་རྩི་ཐབས་སྦྱོར་རིང་བའམ་འབྲིང་པོ་བཟླ་བཞིན་དུ། བསངས་གཏོར་བྱས་ཤིང༌། ཨོཾ་ཨ་མྲྀ་ཏེ་ཧཱུཾ་ཕཊ། ཅེས་བཟླ་བཞིན་དུ། མཚན་མོ་བདེ་ལེགས་ཉིན་བདེ་ལེགས་སོགས་ཀྱི་མཐར། ལས་བུམ་གྱི་ཆུས་སྤྱི་བོ་ནས་དབང་བསྐུར་ཏེ་ཐུང་དུ་བཅུག །བཞི་པ་ནི་དེ་ནས་སློབ་མ་རེ་རེ་བཞིན་དབང་སྟེགས་དངོས་སུ་བཅའ་ཐུབ་ན་ལེགས། མིན་ན་གཅིག་ལ་བཅའ་བའམ། མོས་པ་ཙམ་གྱིས་ཀྱང་རུང་མོད། དེ་ལ་དབང་སྟེགས་ནི་ཆུ་ཚོན་ནམ་རྡུལ་ཚོན་དཀར་པོས་སྟེགས་བུ་གྲུ་བཞིའི་ཟུར་ལ་རྡོ་རྗེ་རྩེ་གསུམ་ཕྱེད་པས་མཚན་པ། དབུས་སུ་པདྨ་དཀར་པོའམ་སྣ་ཚོགས་པདྨ་འབྲི། འདབ་མ་བརྒྱད་པ་ལ་བཀྲ་ཤིས་རྟགས་བརྒྱད་ཡོད་པ་བྱ། ཚད་ནི་རྩ་བའི་དཀྱིལ་འཁོར་གྱི་ཕྱེད་ཙམ་ཟེར་ཡང༌། སློབ་མའི་ལུས་དང་འཚམ་པ་ཡིན་པས་ངེས་པ་མེད་དོ། །འདིར་སྒོ་ནུབ་བམ་བྱང་དུ་གཏད་ཅེས་འགའ་ཞིག་འདོད་ཀྱང་ངེས་པར་སྒོ་ཅན་དུ་འབྲི་དགོས་པ་ནི་མིན་ལ། ཅི་སྟེ་སྒོ་ཅན་དུ་བྱེད་ན། དཀྱིལ་འཁོར་གྱི་ནུབ་སྒོ་དང་འཇིག་རྟེན་ནུབ་ཕྱོགས་ལ་གཙོ་བོ་ཞལ་གཟིགས་པ་ཉིད་ཀྱི་ཕྱིར། གཙོ་བོའི་མདུན་ཕྱོགས་སུ་བྱེད་ན་སྒོ་ཤར་བསྟན་དུ་རིགས་
ལ། དེབས་མཚོན་པའི་ཤར་ནས་ནུབ་ཏུ་བསྟན་དང༌། ལྷོ་ནས་བྱང་བསྟན་དུ་ཡང་རུང་ཞིང༌། དྲག་པོའི་ལས་ཀྱི་དབང་ལ་བྱང་ནས་ལྷོར་ཡང་བསྟན་ནོ། །སློབ་མའི་ཕྱོགས་ལ་གཙོ་བོའི་མདུན་རྒྱབ་གང་བསྟན་ཡང་རུང་མོད་ཀྱི། སློབ་མ་གཙོ་བོ་ལ་རྒྱབ་ཀྱིས་ཕྱོགས་པ་ནི་མི་རུང་ལ། དབང་སྟེགས་ཀྱི་སྒོ་ལས་རྒྱབ་སྟོན་པ་ཡང་མི་མཛེས་སོ། །ལྔ་པ་ནི་དེ་ནས་སློབ་མ་དབང་སྟེགས་ལ་བཀོད། ཁྲུས་བུམ་བཞི་དབང་སྟེགས་ཀྱི་གྲྭ་བཞིར་བཞག །སྟེང་དུ་གདུགས་དཀར་པོ་བཟུང༌། མཐའ་སྐོར་དུ་རྔ་ཡབ་ལ་སོགས་པ་མཆོད་པ་སྣ་ཚོགས་ཀྱྀས་བསྐོར་ཏེ། སྟོན་མཆོག་དམ་པ་ལྷ་མིས་མཆོད་འོས་པ། སོགས་ཤིས་བརྗོད་ཀྱི་མཐར་རོལ་མོའི་སྒྲ་ཆེར་བྱ། དྲུག་པ་ཁྲུས་བུམ་གྱི་དབང་ནི། དེ་ནས་ཁྲུམ་བུམ་མདུན་མ་གཉིས་ཛི་ན་ཛིཀ་དང༌། རྒྱབ་མ་གཉིས་ཨོཾ་ཥྟོཾ༴ གིས་དབང་བསྐུར་ཏེ། བུམ་པ་བཞི་ཆར་གྱིས་རིམ་བཞིན་དབང་བསྐུར་རྒྱུ་ཡིན་ལ། །མི་ནུས་ན་གཅིག་ཏུ་སྡོམས་ཏེ་དབང་བསྐུར་ཀྱང་རུང་ངོ༌། །འདི་ནི་ཁྲུས་མཆོག་དཔལ་དང་ལྡན། ཞེས་སོགས་ཀྱི་མཐར། སྔགས་གཉིས་པོ་ལན་གསུམ་ལས་མི་ཉུང་བར་བཟླས། ཨོཾ་ཨ་བྷི་ཥིཉྩ་ཧཱུཾ། ཞེས་བརྗོད་དེ། ཆུ་འཁྱོར་བ་གསུམ་ཙམ་གྱིས་ཁྲུས་བྱར་བཞུག །སློབ་དཔོན་གྱི་དབང་དངོས་ལ་ཁྲུས་བུམ་གྱི་བྱ་བ་དེ་ཁོ་ནས་ཆོག་ཀྱང༌། བགེགས་གཞོམ་པའི་དབང་བྱེད་པ་ལ་དེའི་ཁྱད་ཆོས་རྣམས་ཀྱང་ཐོབ་ན་ལེགས་པས་སློབ་དཔོན་གྱི་དབང་ཡིན་ཡང་སྐབས་འདིར། སྡིག་པ་དང་སྒྲིབ་པ་ཐམས་ཅད་ཤིནྟཾ་ཀུ་རུ་སྭཱཧཱ། ལ་སོགས་པ་བཀྲུ་བྱབ་སྲུང་གསུམ་སྤྱི་དང་མཐུན་པར་བྱས་ན་ཤིན་ཏུ་ལེགས་སོ། །
བདུན་པ་རྣམ་རྒྱལ་ལས་བུམ་ཆུ་བླང་བ་ནི། དེ་ནས་དུང་ཆོས་སོགས་ཨརྒྷཾའི་སྣོད་དམ་བུམ་པ་གཞན་དུ་དབུས་ཀྱི་རྣམ་རྒྱལ་བུམ་པ་ལས་ཆུ་གཅུས་ཏེ་བླུགས། དེའི་ཚེ་ཛི་ན་ཛིཀ་དང། བྷྲཱུཾ་མང་དུ་བརྗོད། བརྒྱད་པ་བུམ་ཆུ་ལ་སྔགས་བཟླ་བ་ནི། བུམ་ཆུ་དེ་ལ་སྙིང་པོ་ཡི་གེ་བརྒྱ་པ་ལན་བདུན་སོགས་ཇི་ལྟར་འོས་པ་དང༌། ཡི་གེ་ལྔ་པ་ལན་བརྒྱ་རྩ་བརྒྱད་བཟླའོ། །དགུ་པ་བསྐོར་བ་དང་བཅུ་པ་གསོལ་བཏབ་ནི། དེ་ནས་རོལ་མོའི་སྒྲ་དང་བཅས་ཏེ། དེ་ལག་ཏུ་ཐོགས་ནས་དཀྱིལ་འཁོར་ལ་བསྐོར་བ་ལན་གསུམ་བྱེད་ཅིང༌། སློབ་དཔོན་གྱིས། ཐུགས་རྗེ་ཆེན་པོ་དང་ལྡན་པ་བཅོམ་ལྡན་འདས་འཁོར་དང་བཅས་པས་སློབ་མ་འདི་རྣམས་ཀྱི་རྒྱུད་དག་པར་མཛད་དུ་གསོལ། བྱིན་གྱིས་རླབ་ཏུ་གསོལ། དབང་བསྐུར་དུ་གསོལ། ཞེས་གསོལ་བ་གདབ། རོལ་མོ་བཞག་སྟེ་སློབ་མ་རྣམས་ཀྱིས་ཐོས་པར་ཡང་ལན་གཅིག་གསོལ་བ་གདབ། སྤྱི་རྒྱུད་ལས་འདི་ཡིད་ཀྱིས་གསོལ་བ་འདེབས་པ་ཁོ་ན་བཤད་ཀྱང༌། ལག་ལེན་ལ་ཚིག་གིས་གསོལ་བ་འདེབས་པ། སློབ་མ་དང་བ་བསྐྱེད་པ་དང༌། ཆོ་ག་མི་ཆད་པ་དང་དམིགས་པ་གསལ་བའི་ཕྱིར་ཡིན་པས་མི་འགལ་ལོ། །བཅུ་གཅིག་པ་བཀྲ་ཤིས་བརྗོད་པ་ནི། སློབ་དཔོན་གྱི་དབང་གི་ཆོ་གའི་ཐོབ་ཐང་དངོས་ལ། ཨོཾ་ཕུན་སུམ་ཚོགས་པ༴ སོགས་ཤིས་བརྗོད་ཁོ་ནས་ཆོག་ལ། སློབ་དཔོན་དུ་གྱུར་ནས་གཞལ་ལ་འབྱོར་བ་ཐོབ་པའི་དབང་བྱེད་ན། དབང་དེའི་ཁྱད་ཆོས་རྣམས་ཀྱང་ཐོབ་ན་བཟང་བས་བཀྲ་ཤིས་རྫས་བརྒྱད་བཤམས་རེ་རེ་བཞིན་ལས་ཐམས་ཅད་པའམ་ཐབས་སྦྱོར་བཟླས་པས་བསངས། བྷྲཱུཾ་དང༌། ཛི་ན་ཛིཀ་གསུམ་གསུམ་གྱིས་བྱིན་གྱིས་
རླབས་ནས། སློབ་མ་ལ་མེ་ཏོག་དཀར་པོ་དང་འབྲས་ཡོས་སོགས་ཐོར་བཞིན་དུ་རོལ་མོའི་སྒྲ་ཅི་རིགས་པ་དང་བཅས་པས། ཨོཾ་ཕུན་སུམ་ཚོགས་པ་མངའ་པ༴ སོགས་དང༌། འགྲོ་ལ་ཕན་ཕྱིར་དེ་བཞིན་གཤེགས་པ་དགའ་ལྡན་ལྷའི། །གཞལ་མེད་ཁང་གི་སྙིང་པོ་ནས་ནི་འདིར་གཤེགས་ཏེ། །དབང་བཅས་ལྷ་ཡིས་བསྐོར་བའི་བཀྲ་ཤིས་གང་བྱུང་བ། །བཀྲ་ཤིས་དེས་ནི་སྐྱེས་དགུ་རྣམས་ལ་ཞི་བྱེད་ཤོག །ལོ་མ་མེ་ཏོག་འོད་འབར་ཉམས་དགའ་ལུམྦའི་ཚལ། །ལྷ་མང་དག་གིས་བསྟེན་པར་མགོན་པོ་བལྟམས་པ་ན། །སྲིད་པ་མཐར་ཕྱིན་པ་ཡི་བཀྲ་ཤིས་གང་བྱུང་བ། །བཀྲ་ཤིས༴ །གྲོང་ཁྱེར་སེར་སྐྱའི་གནས་ནས་རྒྱལ་པོའི་ཕོ་བྲང་དུ། །ལྷུམས་ནས་བལྟམས་པ་སྟོན་པ་བདེ་གཤེགས་ཟས་བཙང་སྲས། །མྱུར་བསྐྲུན་བདུད་རྩིའི་ཆུ་གཏོར་བ་ཡི་བཀྲ་ཤིས་གང༌། །བཀྲ་ཤིས༴ གྲོང་ཁྱེར་དམ་པ་སེར་སྐྱའི་གནས་ཞེས་བྱ་བར་ནི། །རྨང་དུ་གྲགས་པ་ཆེན་པོ་ལྷ་ཡིས་མངོན་བསྟོད་པ། །བསམ་ཡས་དགེ་བསྒྲུབས་བསོད་ནམས་ཕུང་པོའི་བཀྲ་ཤིས་གང༌། །བཀྲ་ཤིས༴ དགྱེས་ཤིང་ནམ་ཕྱེད་གྲོང་ཁྱེར་ནས་ནི་མངོན་བྱུང་སྟེ། །དཀའ་ཐུབ་ཚལ་དུ་མངོན་པར་གཤེགས་ཤིང་ཚངས་ལ་སོགས། །ལྷ་ཡི་ཚོགས་ཀྱིས་ཡོངས་སུ་བསྐོར་བའི་བཀྲ་ཤིས་གང༌། །བཀྲ་ཤིས༴ རབ་ཏུ་འོད་འབར་གསེར་དང་འདྲ་བའི་སྐུ་མངའ་ཞིང༌། །བེཌཱུརྱ་ལྟར་སྔོན་པོའི་རྩ་བཏིང་སྟེང་བཞུགས་ཏེ། །སྐྱིལ་མོ་ཀྲུང་བཅས་མི་གཡོ་མཆོག་གི་བཀྲ་ཤིས་གང༌། །བཀྲ་ཤིས༴
ཆུ་བོའི་འགྲམ་ན་ཙར་ཥའི་འཕྲེང་གིས་ཡོངས་བསྐོར་བ། །ཤིན་ཏུ་རྨད་དུ་བྱུང་བའི་སྲིད་པ་སེལ་མཛད་པ། །ཀླུ་ཡི་རྒྱལ་པོས་ཕྱག་བྱས་པ་ཡི་བཀྲ་ཤིས་གང༌། །བཀྲ་ཤིས༴ ཤིང་རྒྱལ་དྲུང་གཤེགས་བྱམས་པའི་སྟོབས་ཀྱིས་བདུད་ཀྱི་ཕྱོགས། །མང་པོ་བཏུལ་ཚེ་ས་སྟེང་དང་ནི་ནམ་མཁའ་ལ། །བཅོམ་ལྡན་བཀྲ་ཤིས་རྣམ་པ་སྣ་ཚོགས་གང་བྱུང་བ། །བཀྲ་ཤིས༴ སྡུག་བསྔལ་མཐའ་དག་གཞིག་ཕྱིར་རྡོ་རྗེའི་གདན་བཞུགས་ཏེ། །ནམ་གྱི་ཐོ་རངས་བདུད་བཞི་པོ་དག་རྣམ་བཏུལ་བ། །སྟོན་པ་བདེ་བར་གཤེགས་པའི་བཀྲ་ཤིས་གང་ཡིན་པ། །བཀྲ་ཤིས༴ གྲོང་ཁྱེར་ཝ་ར་ན་སིར་དྲང་སྲོངས་མཆོག་བཞུགས་ནས། །ཆོས་ཀྱི་འཁོར་ལོ་མཆོག་བསྟན་པ་ཡི་བཀྲ་ཤིས་གང༌། །ལྷ་ཡུལ་དང་འདིར་ཤིན་ཏུ་རྨད་དུ་བྱུང་གྱུར་པ། །བཀྲ་ཤིས༴ བཀྲ་ཤིས་གང་ཞིག་ཕན་བྱེད་དམ་པ་དག་བྱེད་པ། །བསོད་ནམས་དག་བྱེད་འཕགས་པའི་སྐྱེ་བོས་མངོན་བསྟོད་པ། །བཅོམ་ལྡན་ཤཱཀྱ་ཐུབ་པའི་སེང་གེས་གང་གསུངས་པ། །བཀྲ་ཤིས༴ མུ་སྟེགས་བྱེད་པ་ཀུན་ཀྱི་ང་རྒྱལ་གཞོམ་པ་དང༌། །འགྲོ་ལ་བདེ་བ་བསྐྱེད་ཕྱིར་ཆོ་འཕྲུལ་དམ་པ་དག །ཉེ་བར་སྟོན་པའི་རྒྱལ་པོའི་བཀྲ་ཤིས་གང་ཡིན་པ། །བཀྲ་ཤིས༴ འགྲོ་ལ་ཕན་ཕྱིར་མཐོ་རིས་གནས་ནས་འདིར་གཤེགས་ཏེ། །ཚངས་པ་ལ་སོགས་ལྷ་ཚོགས་ལག་ན་རྔ་ཡབ་གདུགས། །སྣ་ཚོགས་ཐོགས་པས་ཡོངས་སུ་བསྐོར་བའི་བཀྲ་ཤིས་གང༌། བཀྲ་ཤིས༴ དེ་བཞིན་གཤེགས་པ་ཞི་བའི་མཆོག་
ཏུ་ཉེར་གཤེགས་བ། །མནྡྷ་ར་ཡི་མེ་ཏོག་མང་པོས་མངོན་མཆོད་ནས། །ལྷ་མཆོག་རྣམས་ཀྱིས་མངོན་པར་བསྟོད་པའི་བཀྲ་ཤིས་གང༌། བཀྲ་ཤིས༴ ལྷ་དབང་ཀླུ་དང་མི་ཡི་དབང་པོས་ཕྱག་བྱས་པ། །མཁའ་ལྡིང་གནོད་སྦྱིན་དྲི་ཟའི་དབང་པོའི་མཆོད་གྱུར་པ། །དེ་བཞིན་གཤེགས་པ་སྟོབས་བཅུ་ལྡན་པའི་བཀྲ་ཤིས་གང༌། །བཀྲ་ཤིས་དེས་ནི་སྐྱེ་དགུ་རྣམས་ལ་ཞི་བྱེད་ཤོག །ཉིན་མོ་བདེ་ལེགས༴ ནས།དེང་འདིར་སྩོལ། ཞེས་ཤིས་བརྗོད་རྒྱས་པར་བྱེད་ལ། ཤིན་ཏུ་སྤྲོས་པ་ལ་དགའ་ན། ཐོག་མར་བཀྲ་ཤིས་རྫས་བརྒྱད་ཚིགས་བཅད་ཚིག་ལྷུག་ཡོངས་སུ་གྲགས་པ་དང་རྒྱལ་སྲིད་སྣ་བདུན་དང་བཀྲ་ཤིས་རྟགས་བརྒྱད་དམ། བཀྲ་ཤིས་ལྷ་མོ་བརྒྱད་ཀྱི་ཚིགས་བཅད་སྤྱི་དང་མཐུན་པར་བརྗོད་ཅིང༌། སོ་སོའི་གཟུགས་བརྙན་བྲིས་སམ་འབུར་དུ་དོད་པ་སློབ་མ་ལ་གཏད། དེ་རྗེས་ཐམས་ཅད་མདུན་དུ་བསྟན་ནས། ཨོཾ་ཕུན་སུམ༴ སོགས་ཤིས་བརྗོད་རྒྱས་པ་བྱེད་པ་ཡིན་ནོ། །དབང་རྫས་དང་བཅས་པའི་ཤིས་བརྗོད་ཀྱི་སྤྲོས་བ་འདི་འབྱོར་བའི་དོན་གྱི་དབང་ལ་ངེས་པར་དགོས་པ་ཡིན་ནོ། །བཅུ་གཉིས་པ་རྣམ་རྒྱལ་བུམ་པས་དབང་བསྐུར་བ་ནི། སྤྱི་སྔགས་ཛི་ན་ཛི་ཀ་ལན་བདུན་དང༌། ཇི་ལྟར་བལྟམས་པ་ཙམ་གྱིས་ནི། ཞེས་སོགས་ཀྱི་མཐར། སྙིང་པོ་ཡི་གེ་བརྒྱ་པ་ཉིད་བཟླ་བཞིན་དུ་དང་པོར་ཡལ་འདབ་ཀྱི་བུམ་ཆུ་བླངས་ལ་སློབ་མའི་ལུས་ལ་གཏོར། དེ་ནས་བུམ་པའམ་མཆོད་ཡོན་གྱི་སྣོད་སྤྱི་བོར་བཞག །སྤྱི་བོ་ནས་བཀྲུ་ཞིང་མཐར་འཐུང་དུ་བཞུག་གོ །ཆུ་དབང་བསྐུར་བའི་སྤྱིའི་སྔགས་འདི་ཡང་བརྗོད་དེ། སན་དྷཱ་ར་ཎ། ཨུན་
དྷཱ་ར་ཎི་སི་པྲ་ཏིཥྛ་ཏ། སུ་ཏ་མ། སུ་པྲ་ཏིཥྛ་ཏ། བི་ཛ་ཡ་བ་ལ། སྭ་བྷཱ་ཝ། པྲ་ཏེ་ཛྙཱ། ཨ་རོ་ཧ། ཛྙཱ་ན་བ་ཏི། ཨུད་པ་ད་ནི། དཱི་ན་ཨ་མ་ལ་ཨ་བྷི་ཥིཉྩི་མི། ཨ་བྷ་བྷྱ་ཧ་ར་ཤུ་བྷཾ་བ་ཊི། ཨ་ནི་ཤི་ཏ་བ་ཧཱུ་ཀུམྦ། ཨ་བྷི་བ་ཙཿ ཞེས་པའང་བརྗོད་དེ་ཆུའི་དབང་བསྐུར་བའོ། །སྤྱིར་སློབ་དཔོན་གྱི་དབང་ཙམ་ལ་ཆུ་དབང་གི་སྐབས་སུ་དེ་ཙམ་གྱིས་ཆོག་གོ །བཅུ་གསུམ་པ་ལས་བཞིའི་བུམ་པས་དབང་བསྐུར་བ་ནི། སློབ་དཔོན་གྱི་དབང་གི་ཆོ་ག་དངོས་ཡིན་ཡང་སྔགས་སྒྲུབ་པའི་དབང་གི་རིགས་འགའ་ཞིག་ལ་དགོས་པས། གཞན་ལ་སྦྱིན་པའི་དོན་དུ་སློབ་དཔོན་གྱི་འོས་དེས་ཀྱང་དང་པོར་ཐོབ་ན་ལེགས་པས་སྔར་ལས་སྒྲུབ་པའི་དོན་དུ་ལས་བཞིའི་བུམ་པ་བཅས་ཡོད་ན། དེ་དག་གིས་ཀྱང་དབང་བསྐུར་ཏེ། འདི་ནི་ཁྲུས་མཆོག༴ སོགས་ལ་འདོན་པ་སྤོས་ཏེ། ཅི་འདོད་སོགས་ཀྱི་ཚབ་ཏུ། ཞི་བའི་ལས་ཀུན་སྩོལ་བར་མཛོད། ཨོཾ་རུ་རུ༴ སོགས་དང༌། རྒྱས་པའི་ལས་ཀུན༴ ཞེས་དང༌། ཏདྱ་ཐཱ་ཨོཾ་བྷཱུཾ། དབང་གི་ལས་ཀུན༴ ཞེས་དང་། ཨོཾ་ཛི་ཛི༴ སོགས་དང༌། མངོན་སྤྱོད་ལས་ཀུན༴ ཞེས་དང༌། ཧཱུཾ་བཞི་པའི་སྔགས་རེ་བུམ་པ་བཞི་པོ་དེ་དག་གིས་རིམ་པ་ཅན་དུ་དབང་བསྐུར་རོ། །སྤྱི་རྒྱུད་དངོས་བསྟན་གྱི་དགོངས་པ་ནི། །རེ་ཞིག་དངོས་གྲུབ་ཆེན་པོ་དོན་དུ་མི་གཉེར་བར་འཕྲིན་ལས་བཞི་རེ་དོན་གཉེར་ཙམ་ལ་རྣམ་རྒྱལ་བུམ་པའི་ཆུ་དབང་མི་བསྐུར་བར། ལས་བཞིའི་བུམ་པ་འདི་དག་ལས་གང་འདོད་པ་དང་མཐུན་པ་རེ་རེས་དབང་བསྐུར་བ་ཡིན་ཀྱང༌། འདིར་སློབ་དཔོན་གྱི་གནས་ཐོབ་པས་རང་ཉིད་ཀྱིས་ལས་
བཞི་ཀ་སྒྲུབ་དགོས་པའང་ཡིན་ལ། གཞན་ལའང་བཞིའི་དབང་བསྐུར་དགོས་པ་ཡིན་པས། དངོས་སུ་སློབ་དཔོན་ཀྱི་དབང་ཡིན་ཡང༌། སྐབས་འདིར་ལས་བཞིའི་ཆུ་དབང་དེ་བྱེད་པ་ལེགས་སོ། །སྤྱིར་སློབ་དཔོན་གྱི་དབང་དུ་འགྱུར་བ་ཙམ་ལ་གཙོ་བུམ་གྱི་ཆུ་དབང་བསྐུར་བ་ཉིད་ཀྱིས་ཆོག་གི བུམ་པ་གཞན་རྣམས་ཀྱིས་དབང་བསྐུར་མེད་ཀྱང་ཆོག་པའི་སྐབས་ཡོད་དོ། །བཅུ་བཞི་པ་ཅོད་པན་གྱི་དབང་ནི། སློབ་དཔོན་གྱིས་དེ་བཞིན་གཤེགས་པ་རིགས་སྤྱིའི་དམ་རྒྱ་བཅས། སློབ་མའི་སྤྱི་བོར་གཏུགས་ཏེ། ཨོཾ་ཏ་ཐཱ་ག་ཏ་ཨུད་བྷ་ཝ་སྭཱཧཱ། ཨ་བྷི་ཥིཉྩ་ཧཱུཾ། དེ་ནི་སྤྱི་རྒྱུད་ཀྱི་ཆོ་གའི་ལུགས་ཡིན་ལ། རྒྱུད་འདི་ཉིད་ལས་གསུངས་པ་ནི། ཐལ་མོ་ཁོང་སྟོང་དུ་སྤྱར་བ་སྤྱི་བོར་གཏུགས་ལ། ན་མཿསརྦ་བུདྡྷ་བོ་དྷི་སཏྭ་ནཱཾ། ཏྲྀ་ཤི་ཁཱ་ཨ་གྲི་ན་ན་མསྟུ་ཏེ། ས་མནྟ་ཨ་ད་ས་མན་ཏཱ། ཨ་གྲི་ཀུ་ན། ཨ་ཙ་ལ། ཨ་གྲི་དྷརྨྨེ་བི་དུ་ན་ཧི་ཀླེ་ཤ་དུཿཁ་ཛྭ་ལ་ན་ཛཱ་ག་ཏྭ་སརྦྦ་སུ་ཁཾ་ད་དཱ་ཧཱི་ཙ། ཤུ་ཏཱ་ཏྲེ་དཾ་ཏྲེ་ས་མ་ཡེ་ཀུ་རུ་སྭཱཧཱ། ཞེས་བརྗོད་དེ། རྒྱུད་སྡེ་འདིར་དབུ་རྒྱན་སྐོན་པའི་དབང་མ་གསུངས། ཕྱག་རྒྱ་སྤྱི་བོར་འཇོག་པ་ཉིད་ཅོད་པན་གྱི་དབང་ངོ༌། །བཅོ་ལྔ་པ་ནི། དྲི་ཆབ་མེ་ཏོག་བདུག་སྤོས་ཞལ་ཟས་མར་མེ་རྣམས་སློབ་མའི་མདུན་དུ་བཤམས། ནམ་མཁའ་མཛོད་ཀྱི་སྔགས་རྒྱ་ལན་གསུམ་དུ་བརྗོད་དེ། སློབ་མ་ལ་དགའ་སྟོན་གྱི་ཚུལ་དུ་བསྟེར་རོ། །ཡང་ན་གོང་དུ་ཤིས་བརྗོད་རྒྱས་པ་ཚིག་ཙམ་གྱིས་བྱས་ནས། རྫས་བརྒྱད་སོགས་དང་འབྲེལ་བའི་ཤིས་བརྗོད་ནི་བར་འདིས་བྱས་ཀྱང་རུང་ངོ༌། །བཅུ་དྲུག་པ་ནི། སྔགས་དང་
རྒྱུད་རྣམས་འཛིན་གྱུར་པར། །བློ་དང་ལྡན་པས་དབང་བསྐུར་རོ། །ཞེས་བརྗོད་ཅིང༌། སྤྱི་བོར་མེ་ཏོག་དཀར་པོ་འཇོག་ཏེ། མཆོད་པ་དང་ཆེད་བརྗོད་དེ་གཉིས་པོ་དེ་དག་ནི་ཆུ་ཅོད་ཀྱྀ་ཡན་ལག་སྟེ་དེ་ཡན་ཆད་དབང་གི་དངོས་གཞིའོ། །དབང་གི་རྗེས་སུ་འབྲང་བའི་ཆོ་ག་ལ་བརྒྱད་དེ། གསོལ་བཏབ་བཀའ་བསྒོ་ཉེས་པ་སྦྱངས། །རྒྱལ་བསྟན་རྗེས་གནང་ཡོན་བླང་ཞིང༌། །དམ་ཚིག་བསྒྲགས་ལ་གདམས་ངག་འབོག །དང་པོ་ནི། རྩ་སྔགས་ཡི་གེ་བརྒྱ་པས་ཚངས་སྐུད་མཆོད་ཕྱིར་ཐོག་སྦྱིན། དེ་ཡང་སྣ་མའི་མེ་ཏོག་གི་ཕྲེང་བ་ལ་བཤད་ནའང་བོད་དུ་མི་རྙེད་ཅིང༌། ཡང་གསེར་སྐུད་བྱེད་པར་བཤད་ནའང་དཀོན་པར་འགྱུར་བས། ལག་ལེན་ལ་གདབ་རྒྱུ་སྲས་བུ་དཀར་པོ་སུམ་སྒྲིལ་སུམ་སྐོར་སྣེ་མོར་མདུད་པ་གསུམ་དང་བཅས་པའོ། །ཨོཾ་རུ་རུ༴ སོགས་སངས་རྒྱས་སྤྱན་མའི་སྔགས་ཀྱིས་བསྙེན་པའི་སྐབས་སུ་བཤད་པ་དང་འདྲ་བའི་ལག་གདུབ་སྤྱིན། སློབ་མ་ཐལ་མོ་སྦྱོར་དུ་བཅུག་ལ། སྤྱི་བོར་གདུགས་བཟུང་ཞིང༌། རོལ་མོའི་སྒྲ་དང་བཅས་པས་དཀྱིལ་འཁོར་ལ་གཡས་སྐོར་ལན་གསུམ་བྱེད་དུ་འཇུག །དེ་ནས་འཇུག་པའི་སྒོ་ཕྱོགས་ནས་ཕྱག་འཚལ་དུ་བཅུགས་ལ། བླ་མས། སྔགས་དང་རྒྱུད་རྣམས་འཛིན་འགྱུར་བའི། །སློབ་མ་འདི་ནི་འབུལ་བ་ལགས། ལན་གསུམ། དེ་བཞིན་གཤེགས་པ་རྣམས་ཀྱི་གདུང་འཚོབ་པའི་དོན་དང༌། སེམས་ཅན་ཐམས་ཅད་ལ་ཐུགས་རྗེ་ཆེན་པོའི་འཕྲིན་ལས་འཇུག་པའི་དོན་དུ། བདག་སློབ་དཔོན། འདི་ཞེས་བགྱི་བས། དཀྱིལ་འཁོར་གྱི་ལྷ་ཚོགས་རྣམས་ལ་སློབ་མ་འདི་འབུལ་
བ་ལགས་ཀྱི་ཡོངས་སུ་བཟུང་བར་མཛོད་ལ། ཐུགས་བརྩེ་བས་བཀའ་དྲིན་སྩལ་དུ་གསོལ། ཞེས་བརྗོད། གཉིས་པ་ནི། གདུགས་བཞག་ལ་སློབ་མ་དབང་སྟེགས་ལ་བཀོད་དེ། དེ་རིང་དཀྱིལ་འཁོར་སློབ་དཔོན་གྱུར། །སྔགས་དང་རྒྱུད་རྣམས་འཛིན་གྱུར་པ། །སངས་རྒྱས་བྱང་ཆུབ་སེམས་དཔའ་དང༌། །ལྷ་རྣམས་ཀུན་གྱིས་མཐུན་པར་གསུངས། །སེམས་ཅན་རྣམས་ལ་སྙིད་བརྩེ་བས། ཁྱོད་ཀྱིས་དཀྱིལ་འཁོར་ཆོ་ག་བཞིན། །རབ་ཏུ་འབད་དེ་བྲི་བར་བྱ། །སྒྲུབ་པ་པོ་རྣམས་རྒྱུད་ལས་སྦྱོར། །ཞེས་བརྗོད། གསུམ་པ་ནི་སློབ་དཔོན་དང་སློབ་མའི་ཉེས་པ་སྦྱང་བའི་ཕྱིར། ཞི་བའི་སྦྱིན་སྲེག་བྱ་བ་སྟེ། སྐབས་འདིར་མ་གྲུབ་ན། རྗེས་སུ་བྱས་པས་ཀྱང་རུང་ལ། འོན་ཀྱང་དེང་སང་མི་བྱེད་པ་ཤས་ཆེའོ། །བཞི་པ་ནི། ལུགས་འདིའི་དེ་ཁོ་ན་ཉིད་བསྟན་པ་སྟེ། འདི་སྐད་ཅེས་བརྗོད་དོ། །དེ་ལ་ཕྱི་རོལ་དུ་ལྕགས་རིས་བསྐོར་བ་ནི་གེགས་མི་འཇུག་པའི་དོན་ཡིན། སྒོ་སྦྲག་གསུམ་བྲིས་ཡོད་ན། གཞལ་ཡས་ཁང་རིམ་པ་གསུམ་ནི། དངོས་གྲུབ་རབ་འབྲིང་ཐ་གསུམ་སྒྲུབ་པའི་དོན་དུ་དེ་དང་དེ་སྟེར་བ་ལ་མངོན་པར་དགའ་བའི་ལྷ་རྣམས་བཞུགས་པའི་དོན་ཡིན། ཞེས་དང༌། གལ་ཏེ་རིམ་པ་གཅིག་ལས་མེད་ན་གཞལ་མེད་ཁང་དམ་པ་འདི་ནི་གོ་འཕང་མཐོན་པོར་བགྲོད་ཅིང་གྲུབ་པ་ཆེན་པོ་དག་བྱུང་བའི་གནས་ཀྱི་དོན་ཡིན་ཞེས་བརྗོད། ཡང་གཙོ་བོ་བཅོམ་ལྡན་འདས་ནི་ཕྲ་མོ་ལས་བཞི་ནས་བརྩམས་ཏེ་
མཐར་ཐུག་བླ་ན་མེད་པའི་བྱང་ཆུབ་ཀྱི་བར་དུ་འཇིག་རྟེན་དང་འཇིག་རྟེན་ལས་འདས་པའི་ཕུན་ཚོགས་ཐམས་ཅད་ཀྱི་གཞིར་གྱུར་བས་དངོས་གྲུབ་ཐམས་ཅད་སྩོལ་བ་པོ་ཡིན། འཕགས་པ་རྡོ་རྗེ་འཛིན་པ་ནི་རིགས་ཀྱི་བདག་པོ་བྱང་ཆུབ་སེམས་དཔའ་དང༌། རྡོ་རྗེ་འཛིན་མ་ནི་རིགས་ཀྱི་ཡུམ་དང༌། ཁྱེའུ་མཐའ་ཡས་པ་ནི་རིགས་ཀྱི་ཕོ་ཉ་དང༌། བུ་མོ་མཐའ་ཡས་པ་ནི་རིགས་ཀྱི་ཕོ་ཉ་མོ་དང༌། ལྷ་མོ་སངས་རྒྱས་སྤྱན་མ་ནི་དངོས་གྲུབ་ཐམས་ཅད་ཀྱི་དོན་དུ་དེ་བཞིན་གཤེགས་རིགས་སྤྱི་ཁྱབ་ཀྱི་རིགས་ཀྱི་ཡུམ་དང༌། གཞན་གྱིས་མི་ཐུབ་པ་ཕོ་མོ་ནི་རིགས་ཀྱི་ཁྲོ་བོ་ཁྲོ་མོ་སྟེ། འདི་ཐམས་ཅད་དངོས་གྲུབ་མཆོག་གི་དོན་དུ། སོ་སོའི་འཕྲིན་ལས་ཀྱི་དངོས་གྲུབ་སྩོལ་བའི་ཕྱིར་བཞུགས་པ་ཡིན། བྱང་ཆུབ་སེམས་དཔའ་འདི་རྣམས་ནི་སངས་རྒྱས་ཐམས་ཅད་ཀྱི་འཕྲིན་ལས་སྒྲུབ་པའི་དོན་ཡིན། ཡུམ་མཱ་མ་ཀཱི་ནི་ཞི་བ་དང་སྲུང་བའི་དོན་ཡིན། བྲན་པོ་ཕོ་ནི་གདུག་པ་ཚར་གཅོད་པའི་དོན་ཏེ། དེ་དག་ཀྱང་གྲུབ་པ་བར་མ་སྩོལ་བའི་ཚུལ་དུ་བཞུགས། འཇིག་རྟེན་སྐྱོང་བ་རྣམས་ནི་གྲུབ་པ་ཆུང་ངུ་སྩོལ་པ་དང༌། འདོད་དོན་སྣ་ཚོགས་པ་སྒྲུབ་པའི་དོན་དུ་རྒྱལ་བ་སྲས་བཅས་ཀྱི་བཀའ་ལ་སྟོད་པའི་ཚུལ་དུ་བཞུགས་པ་ཡིན། གཞལ་ཡས་ཁང་གི་ཕྱི་རོལ་གྱི་ལྷ་ཚོགས་རྣམས་ནི། དངོས་གྲུབ་རབ་འབྲིང་ཐ་མ་མ་ངེས་པ་སྩོལ་བར་བཞུགས་ཤིང༌། ལས་ཐམས་ཅད་ཀྱི་གདོང་གྲོགས་མཛད་པ་ཡིན་ནོ། །ཞེས་བརྗོད། བྱ་རྒྱུད་ཀྱི་ལུགས་འདིར་དགོས་པ་བསྟན་པའི་ཚུལ་གྱིས་དཀྱིལ་འཁོར་དང་ལྷའི་དེ་ཉིད་བརྗོད་པ་ཡིན་གྱི།
རྒྱུད་སྡེ་གཞན་གྱི་རྒྱས་བཀབ་མི་བྱའོ། །སྐབས་འདིར་སྤྱི་རྒྱུད་ལས་ཕྱག་རྒྱ་ཆེན་པོའང་སྟོན་པར་གསུངས་པས། སྒྲུབ་ཐབས་བསྡུས་པ་ཙམ་དང༌། སྣང་སྟོང་ཟུང་འཇུག་གི་ལྷའི་རྣལ་འབྱོར་སྒོམ་ཚུལ་འཆད་རྒྱུ་ཡིན་ནའང་དཀྱུས་ཀྱི་ལག་ལེན་ལ་མི་བྱེད་པ་ཤས་ཆེའོ། །ལྔ་པ་ནི། སྔགས་ཀྱི་དབང་བསྐུར་ཏེ། དེ་ཡང་མེ་ཏོག་གང་ལ་ཕོག་པའི་ལྷའི་སྔགས་སྦྱིན་པ་ཐོབ་ཐང་ཡིན་ཡང་དེང་སང་ལག་ལེན་མི་བྱེད་པས། འདི་ལྟར་བྱ་སྟེ། དཀྱིལ་འཁོར་གྱི་གཙོ་བོའི་ཐུགས་ཀར་ཟླ་བའི་དཀྱིལ་འཁོར་ལ་སྔགས་ཀྱི་འཕྲེང་བ་ཁ་དོག་དཀར་པོའམ། གསེར་མདོག་འོད་ཟེར་འབར་བ་གཡས་བསྐོར་དུ་འཁོད་པ་གསལ་བཏབ། །སློབ་དཔོན་གྱིས་དཀྱིལ་འཁོར་གྱི་ལྷ་ལ་གསོལ་བ་འདེབས་པའི་བསམ་པའི་མེ་ཏོག་ལག་ཏུ་བཟུང་ནས། བྷྲཱུཾ་དང༌།ཛི་ན་ཛིཀ་དང༌། ཡི་གེ་ལྔ་པ་དང༌། ཡི་གེ་བརྒྱ་པ་རྣམས་གསུམ་གསུམ་བརྗོད་ལ། བཅོམ་ལྡན་འདི་ལ་སྩལ་ལགས་ཀྱི། །འདི་ལ་འགོ་བར་མཛད་དུ་གསོལ། ལན་གསུམ། གཙོ་བོའི་ཐུགས་ཀའི་སྔགས་འཕྲེང་ལ་དམིགས་སུ་བཅུག་སྟེ། སྔགས་དེ་རྣམས་ཀྱི་རྗེས་བཟློས་ལན་གསུམ་གསུམ་བྱ། སློབ་མས་ལྷ་ལ་མེ་ཏོག་འཐོར་བཞིན་པས། བཅོམ་ལྡན་བདག་གིས་བཟུང་ལགས་ཀྱི། །བདག་ལ་འགོ་བར་མཛད་དུ་གསོལ། ལན་གསུམ་རྗེས་བཟློས་བྱ། བྷྲཱུཾ་དང༌།ཛིན་ཛིཀ་བཟླ་བཞིན་དུ། མེ་ཏོག་སློབ་མའི་སྤྱི་བོར་གཏོར་རོ། །བསྡུ་ན་དེ་ཙམ་གྱིས་ཆོག །འདི་ལ་རྒྱས་པ་འགྲུབ་ན་ཤོག་བུ་ལ་གི་ཧང་གུར་གུམ་སོགས་ཀྱིས་སྔགས་བྲིས་ནས་ཟ་མ་ཏོག་ཏུ་བཅུག་སྟེ། དཀྱིལ་འཁོར་གྱི་དབུས་སུ་བུམ་པ་སོགས་དང་ཉེ་བར་བཞག །སྔར་དཀྱིལ་འཁོར་སྒྲུབ་པའི་དོན་དུ་དེ་ལའང་དམིགས་ནས་
བཟླས་བརྗོད་བྱེད། སྐབས་འདིར་དེ་བླངས་ནས་སློབ་མ་ཀློག་ཏུ་བཅུག །བཟུང་བར་མོས་ནས། མཆོག་ཏུ་གྲུབ་པའི་གསང་སྔགས་འདི་ཁྱོད་ཀྱིས་ཁྱེར་ཅིག་ཁྱེར་ཅིག ཅེས་བརྗོད། སྔགས་དབང་འདི་སྤྱི་རྒྱུད་ལས་སྐབས་འདིར་བཤད་པ་བཞིན་མཐའ་བསྟེན་གྱི་ཚུལ་དུ་བཀོད་པ་ཡིན་ལ། འཇམ་དཔལ་རྩ་རྒྱུད་ལས་ནི་དང་པོར་ཅོད་པན་གྱི་དབང་དང༌། དེ་རྗེས་སྔགས་དབང་དང༌། འཇུག་ཏུ་ཆུ་དབང་བསྐུར་བར་ཡང་བཤད་པས། སྤྱིར་གོ་རིམ་གཅིག་ཏུ་མ་ངེས་པ་དང༌། སྒོས་སུ་སྤྱི་འགྲོའི་ཆོ་ག་ལ་ཡང་སྔགས་དབང་འདི་དབང་གི་དངོས་གཞིར་བསྡུས་ཀྱང་ལེགས་པ་ཡིན་ལ། དེ་ལྟ་ན་ཆུ་དབང་གི་ཐོག་མཐའ་གང་རུང་དུ་བྱའོ། །དེ་ཡང་སྤྱི་རྒྱུད་ལས། རིགས་སྔགས་རྒྱལ་པོ་ཀློག་ཏུ་གཞུག ཅེས་སོགས་ཀྱིས་འདི་བསྟན་པ་ཡིན་ལ། འཇུག་པའི་སྐབས་སུ་དཀྱིལ་འཁོར་དེར་ནི་རང་སྔགས་སམ། སྙིང་པོ་སྦྱིན་པ་དེས་ཀྱང་དེ་མནོད་ནས་དཀྱིལ་འཁོར་གཉིས་པར་བཟླས། ཞེས་འབྱུང་བ། ཁ་ཅིག་སྔགས་དབང་དུ་འདོད་ཀྱང་སྔགས་དབང་སྟོན་བྱེད་མིན། གོང་དུ་བཤད་པ་ལྟར་རང་ལྷའི་བྱིན་གྱིས་རླབས་དང་ངོས་བཟུང་བའི་ལྷ་དང་སློབ་མ་སྤྲོས་པའི་དོན་དུ། རིགས་ཀྱི་སྙིང་པོ་བཟླ་བཞིན་དུ་མེ་ཏོག་སྤྱི་བོར་འཇོག་པའི་དོན་ཡིན་ནོ། །དྲུག་པ་ནི། མཆོད་པ་གསར་པ་བཤམས་ཏེ་སློབ་མས་དཀྱིལ་འཁོར་ལ་ཕུལ་བར་མོས་ཏེ། སློབ་མའི་སྙིམ་པས་མེ་ཏོག་འཐོར་བཞིན་དུ་མཆོད་ཡོན་དང་ཉེར་སྤྱོད་ཀྱི་སྔགས་ཙམ་བརྗོད། སྤྲོས་པ་ལ་དགའ་ན། གཙང་ཞིང་གཙང་མ༴ སོགས་གོང་གི་ཚིགས་བཅད་རྣམས་བརྗོད་ཀྱང་ལེགས་སོ། །ཡང་སྐབས་འདིར་སློབ་དཔོན་ལ་ཡོན་འབུལ་བར་བཤད་ཀྱང༌། དེང་སང་ལག་ལེན་ལ་འདེབས་མཁན་མི་འབྱུང་བས། ཡོན་ཕུལ་བར་མོས་ཏེ་ནམ་མཁའ་
མཛོད་ཀྱི་སྔགས་ཙམ་རྗེས་བཟླཽས་བརྗོད་དོ། །བདུན་པ་ནི། སློབ་དཔོན་ཤེས་རབ་ཀྱི་ཕ་རོལ་ཏུ་ཕྱིན་པའི་སྙིང་པོའི་མདོ་ཚར་གཅིག་སྟོན་ལ། །སློབ་མས་འདི་སྐད་ཅེས་བརྗོད་དེ། །དེ་རིང་ཕན་ཆད་ཁྱེད་རྣམས་ཀྱིས། །སངས་རྒྱས་ཆོས་དང་དགེ་འདུན་དང༌། །བྱང་ཆུབ་སེམས་དཔའ་རྣམས་དང་ནི། །རིགས་སྔགས་ལྷ་ཚོགས་མ་ལུས་ལ། །དད་པ་རབ་ཏུ་བརྟན་པར་བྱ། །རྟག་པར་ཐེག་པ་ཆེན་པོ་ལ། །ཁྱད་པར་དུ་ནི་མོས་པར་བྱ། །དམ་ཚིག་ཅན་དང་མཛའ་བོ་དང༌། །བླ་མ་ལ་ཡང་གུས་པར་བྱ། །ལྷ་རྣམས་ཀུན་ལ་སྡང་མི་བྱ། །དུས་མཚམས་རྟག་ཏུ་མཆོད་པ་བྱ། །སྟོན་པ་གཞན་གྱི་གཞུངས་མི་འཆད། །རྟག་ཏུ་གློ་བུར་མགྲོན་མཆོད་བྱ། །སྲོག་ཆགས་རྣམས་ལ་བྱམས་པའི་སེམས། །རབ་ཏུ་བརྟན་པ་ཉེ་བར་བཞག །ཐེག་ཆེན་ལ་ནི་དགའ་རྣམས་ཀྱིས། །བསོད་ནམས་དག་ལ་ནན་ཏན་བསྐྱེད། །བཟླས་བརྗོད་བྱེད་ལ་འབད་པ་ཡིས། །གསང་སྔགས་སྤྱོད་ལ་བརྩོན་པར་བྱ། །གསང་སྔགས་རྒྱུད་ལས་བསྟན་པ་ཡི། །དམ་ཚིག་རྣམས་ཀྱང་བསྲུང་བར་བྱ། །དམ་ཚིག་མེད་པ་རྣམས་ལ་ནི། །སྔགས་དང་ཕྱག་རྒྱ་མི་སྦྱིན་ནོ། །གསང་སྔགས་རྒྱུད་ནི་ལེགས་བསྲུང་ཞིང༌། །དེ་ཡང་བདག་གིས་རྟོགས་པར་བྱ། །ཞེས་སྤྱི་རྒྱུད་ལས་འབྱུང་ངོ༌། །དམ་ཚིག་གསུམ་བཀོད་འདི་ཉིད་ཀྱི་རྒྱུད་ལས། །ཚིགས་བཅད་འདིའི་དོད་དུ། །ཡང་ཡང་འཆི་བར་མི་འགྱུར་ཞིང། ཞེས་པ་ནས། སེམས་ཅན་དོན་དུ་སྨོན་པར་བྱེད། ཅེས་པའི་བར་དུ་རྒྱས་པར་གསུངས་པ་འགྲུབ་ན་ཆེས་བཟང་མོད་ཀྱང༌། ད་ལྟའི་ལག་ལེན་ལ་སྤྱི་རྒྱུད་ཀྱི་ལུགས་བཞིན་བྱར་རུང་
ཕྱིན་འཁྱེར་བདེ་བ་དང༌། ཐམས་ཅད་དུ་སྤྱི་ཁྱབ་ཏུ་འཇུག་པའི་ཆོ་ག་ཤེས་པའི་དགོས་པ་ཡོད་པའི་ཕྱིར་དཀྱུས་སུ་བཤད་པ་ཉིད་བྱའོ། བརྒྱད་པ་ནི། སྤྱི་རྒྱུད་ལས། དེ་ལྟར་དམ་ཚིག་བསྒོས་ནས་ནི། །ཉིད་ཀྱི་ཕྱག་རྒྱ་རྣམས་བསྟན་པ། །ཉིད་ཀྱི་རིགས་ཀྱི་རིག་པའང་སྦྱིན། ཞེས་གསུངས་པའི་དབང་དུ་བྱ་ན། ཐལ་མོ་ཁོང་སྟོང་བསྟན་ཏེ། འདི་ནི་གཙུག་ཏོར་ཕྱག་རྒྱ་སྟེ། དམ་ཚིག་གསུམ་བཀོད་ཉིད་ཀྱི་ཕྱག་རྒྱ་ཡིན། གཤེགས་རིགས་སྤྱིའི་དམ་རྒྱ་བསྟན། ཛི་ན་ཛིཀ་ཞེས་པ་འདི་དེ་བཞིན་གཤེགས་རིགས་ཐམས་ཅད་ཀྱི་སྙིང་པོ་ཡིན། དེ་ནས་ཡི་གེ་བརྒྱ་པ་དང༌། ཡི་གེ་ལྔ་པ་བཏོན་ཏེ། འདི་ནི་བཅོམ་ལྡན་འདས་དམ་ཚིག་གསུང་བཀོད་ཀྱི་སྔགས་ཏེ། ཕྱོགས་བཅུ་དུས་གསུམ་གྱི་དེ་བཞིན་གཤེགས་པ་ཐམས་ཅད་ཀྱི་ཐུགས་ཀྱི་ཡེ་ཤེས་ལས་བྱུང་བ་ཡིན་ནོ། །ཞེས་སྔགས་དང་ཕྱག་རྒྱ་བསྟན། དེང་ཕྱིན་ཆད་ཁྱེད་སློབ་དཔོན་དུ་གྱུར་བ་ཡིན་ན། དཀྱིལ་འཁོར་བྲི་བ་དང༌། དབང་བསྐུར་བ་དང༌། སློབ་མ་བསྡུ་བ་དང༌། རབ་ཏུ་གནས་པ་དང༌། ཆོས་སྟོན་པ་ལ་སོགས་པ་ནི་སློབ་དཔོན་གྱི་ལས་ཡིན་ནོ། །ཞེས་བརྗོད། གཙོ་བོས་ཇི་ལྟར༴ སོགས་དང་གཏང་རག་གི་མཎྜལ་དང༌། དེང་ནས་བརྩམས་ཏེ༴ སོགས་སྤྱི་དང་མཐུན་པར་བྱ། དྲུག་པ་རྗེས་ཀྱི་ཆོ་ག་ལ། མཆོད་སྦྱིན་བྱ་བ། རྗེས་བསྡུ་བའི་ཚུལ་ཉེས་པ་ཞི་ཞིང་བསྐང་བའི་ཆོ་ག་སྟེ་གསུམ་ལས། དང་པོ་ནི། སླར་ཡང་སློབ་དཔོན་གྱིས་དཀྱིལ་འཁོར་ལ་མཆོད་ཡོན་རྒྱས་པར་འབུལ་ཞིང་ལྷ་རེ་རེ་བཞིན་མེ་ཏོག་ལ་སོགས་པ་མཆོད་པའི་ཁྱད་པར་ཐམས་ཅད་འབུལ། དཀྱིལ་འཁོར་ཁང་པའི་ནང་དུ་སྦྱིན་སྲེག་དང༌། ཕྱི་རོལ་ཏུ་གཏོར་མ་རྒྱ་ཆེར་
སྦྱིན་ནོ། །གོང་དུ་དབང་བསྐུར་བའི་རྗེས་འབྲངགི་སྐབས་སུ་སྦྱིན་སྲེག་མ་གྲུབ་ཀྱང་སླ། སྐབས་འདིར་ངེས་པར་འགྲུབ་པར་བྱ། སྤྱིར་བྱ་བའི་རྒྱུད་ནི། ཕྱིའི་བྱ་བ་གཙོ་བོར་སྟོན་པ་ཉིད་ཀྱི་ཕྱིར། མཆོད་པ་གཏོར་མ་སྦྱིན་སྲེག་སོགས་ཀྱང་བཤད་ཚོད་བཞིན་སྐབས་དེ་དང་དེར་ངེས་པར་བྱ་ཞིང༌། དེ་དག་ཀྱང་ཏིང་ངེ་འཛིན་ཙམ་ལ་སྙད་མ་བཏགས་པར་རྫས་དང་ཆོ་ག་ལུས་ངག་གི་བྱ་བར་ཐོན་པ་ཡང་ཡང་བྱེད་པ་གལ་ཆེ་སྟེ། ཀྲི་ཡའི་རྒྱུད་ཉིད་ཀྱི་རང་ལུགས་ཡིན་པའི་ཕྱིར་རོ། །གཉིས་པ་རྗེས་བསྡུ་བའི་ཚུལ་ནི། ཡང་མཆོད་ཡོན་དང་མཆོད་པའི་སྔགས་ཀྱིས་མཆོད་པ་བསྡུས་པ་ཞིག་ཕུལ་ལ། བཅོམ་ལྡན་འདས་དམ་ཚིག་གསུམ་བཀོད་པའི་དཀྱིལ་འཁོར་གྱི་ལྷ་ཚོགས་ཐམས་ཅད་བདག་ལ་དགོངས་སུ་གསོལ། ཁྱེད་རྣམས་ལ་མཁྱེན་པའི་ཡེ་ཤེས་བརྩེ་བའི་ཐུགས་རྗེ། མཛད་པའི་འཕྲིན་ལས་བསམ་གྱིས་མི་ཁྱབ་པ་མངའ་བ་ལགས་པས། བདག་དང་ནམ་མཁའི་མཐའ་དང་མཉམ་པའི་སེམས་ཅན་ཐམས་ཅད་ལ་རང་རང་གི་སྐལ་བ་དང་འཚམས་པའི་འཕྲིན་ལས་རྣམ་པ་གསུམ་དང་དངོས་གྲུབ་རྣམ་པ་གསུམ་དང་བྱང་ཆུབ་རྣམ་པ་གསུམ་གྱི་བཀའ་དྲིན་སྩལ་ནས། མཐར་ཐུག་ཐམས་ཅད་ཀྱང་རྣམ་པ་ཐམས་ཅད་མཁྱེན་པའི་སངས་རྒྱས་ཀྱི་ས་ལ་འཇོག་པར་མཛད་དུ་གསོལ། གནས་སྐབས་སུ་འཇིག་རྟེན་གྱི་ཁམས་ཐམས་ཅད་དུ་ཡང་ངན་འགྲོའི་འགྲོ་བ་དང༌། སྡུག་བསྔལ་ཐམས་ཅད་རྒྱུན་ཆད་པ་དང༌། སྡིག་པའི་ལས་དང་ཉོན་མོངས་པ་ཐམས་ཅད་རབ་ཏུ་ཞི་བ་དང༌། འདོད་པའམ། བསམ་གཏན་གྱི་བདེ་བ་ཁ་ན་མ་ཐོ་བ་མེད་པས་ཕྱོགས་ཀུན་ཏུ་ཁྱབ་ཅིང་རྒྱས་པ་དང༌། རྣམ་དཀར་དགེ་བ་ཆོས་
ཀྱི་དགའ་སྟོན་བླ་ན་མེད་པ་ཐོབ་པར་མཛད་དུ་གསོལ། གཞན་ཡང་སངས་རྒྱས་ཀྱི་བསྟན་པ་དར་ཞིང་རྒྱས་པ་དང༌། ནད་དང་འཁྲུགས་པ་དང་མུ་གེ་ལ་སོགས་པ་འཇིགས་པ་དང་ཉམས་ང་བ་ཐམས་ཅད་ཞི་ནས། འགྲོ་བ་ཐམས་ཅད་བདེ་ཞིང་སྐྱིད་པ་དང༌། བདག་ཅག་དཀྱིལ་འཁོར་ཆེན་པོ་འདི་ལ་ཡོངས་སུ་བརྟེན་པར་བགྱིད་པ་རྣམས་མཁན་པོ་དང༌། སློབ་དཔོན་དང༌། ཕ་མ་དང༌། གྲོགས་དང༌། འཁོར་དང༌། ཡོན་བདག་དང་བཅས་པ་རྣམས་ལ་ཚེ་དང་འབྱོར་པ་དང་དབང་ཕྱུག་ཕུན་སུམ་ཚོགས་པ་དང༌། ལས་ཀྱི་རྒྱུད་རབ་འབྱམས་འགྲུབ་པ་དང༌། རང་རང་གི་སྐལ་བ་དང་འཚམས་པར་འཇིག་རྟེན་དང་འཇིག་རྟེན་ལས་འདས་པའི་དངོས་གྲུབ་གྱི་ཚོགས་ཐམས་ཅད་སྩལ་དུ་གསོལ། བརྩེ་བས་བཟུང་དུ་གསོལ། བྱིན་གྱིས་རླབས་དུ་གསོལ་བདག་ཅག་རྣམས་ཀྱི་དོན་གྱི་མཆོག་ཐམས་ཅད་འགྲུབ་པར་གྱུར་ཅིག །ཅེས་ལན་གསུམ་གསོལ་བ་བཏབ། མ་འབྱོར་པ་དང་༴ སོགས། ལྷག་པ་དང་ནི། སོགས། བཟོད་གསོལ་གྱི་ཚིགས་བཅད་སྤྱི་འགྲོ་རྣམས་བྱ། སྤྱན་འདྲེན་པའི་ཕྱག་རྒྱ་ལས་མཐེ་བོང་ཕྱིར་བསྐྱེད། ཨོཾ་ཁྱེད་ཀྱིས་སེམས་ཅན༴ སོགས་དང༌། གདོན་མི་ཟ་བར་བདག་ལ་ཡང་༴ ཞེས་པ་ནས། མ་ཏང་གི་སྭཱཧཱའི་བར་བསྙེན་པའི་སྐབས་ཀྱི་སླར་གཏོང་བ་དང་འདྲའོ། །དེ་ནས་སྤྱི་དང་མཚུངས་པར་ལྷ་མཚན་ཡོད་ན་དང་པོར་བསྡུ། གདན་ཙམ་ཡིན་ན་ལོགས་སུ་བསྡུ་མི་དགོས་སོ། །རོལ་མོའི་སྒྲ་དང་བཅས། ཨཱ་ཀཱ་རོའི་སྔགས་ལས། ནུཏ་པ་ནན་ཏྭ་ཏཏ་ཅེས་བཟླ་བཞིན་པས། རྡུལ་ཚོན་དམན་མ་རྣམས་ཕྱགས།
བུམ་ཆུའམ་དྲི་བཟང་གི་ཆུས་ཐིགས་རྣམས་ཀྱང་བསུབ། རྡུལ་ཚོན་རྒྱ་མཚོ་ཆེན་པོ་ལ་འབབ་པའི་ཆུ་བོར་དོར་རོ། །བྱ་རྒྱུད་རང་ལུགས་ལ་དེ་ཙམ་ཁོ་ནས་ཆོག་ཀྱང་ཀླུ་བརྒྱད་ཆོ་ག་སོགས་ཇི་ལྟར་འོས་པ་གཞན་ནས་ཁ་འགེངས་སྦྱར་ནའང་འགལ་བ་ཆེར་མེད་པར་སེམས། ཡུལ་ཕྱོགས་བཀྲ་ཤིས་པ་སོགས་ཀྱི་དགོས་པ་ཡོད་ན། ཆོ་གའི་ཡན་ལག་ཕྲ་མོ་འདྲེས་ཀྱང་ཆོ་ག་འཁྲུགས་བར་མི་འགྱུར་རོ་སྙམ་མོ། །དེ་ནས་སྨོན་ལམ་དང་བཀྲ་ཤིས་ཅི་རིགས་པར་བརྗོད་དོ། །གསུམ་པ་ཉེས་པ་ཞི་ཞིང་སྤོང་བའི་ཆོ་ག་ནི། དེའི་ཕྱི་དེའི་ཉིན་པར་ལྷག་ཆད་འཁྲུལ་པ་ཞི་བའི་ཕྱིར་དཀྱིལ་འཁོར་གྱི་ས་གཞིར་ཞི་བའི་སྦྱིན་སྲེག་བརྒྱ་རྩ་བརྒྱད་བྱའོ། །འདི་ཡང་ལེགས་པའི་ཡན་ལག་ཡིན་གྱི། མ་འགྲུབ་ཀྱང་ཆོ་ག་ཉམས་པར་མི་འགྱུར་རོ། །དེ་ལྟར་ན་འདི་ནི་དམ་ཚིག་གསུམ་བཀོད་རྒྱལ་པོའི་རྒྱུད་ལས། དེ་བཞིན་གཤེགས་པའི་སྙིང་པོའི་ཆོ་གའི་སྐབས་ཀྱི་ལྷ་ལྔའི་དཀྱིལ་འཁོར་ལ་གསང་བ་སྤྱི་རྒྱུད་ལས་འབྱུང་བའི་དཀྱིལ་འཁོར་གྱི་བྱ་བ་དང༌། དབང་བསྐུར་བའི་ཆོ་ག་རྣམས་ཀྱིས་ལེགས་པར་ཁ་བསྐང་སྟེ་བརྗོད་པ་ཡིན་ལ། ཆོ་ག་འདི་དེ་བཞིན་གཤེགས་པའི་རིགས་ཀྱི་དཀྱིལ་ཆོག་ཡིན་མོད། པདྨའི་རིགས་དང་རྡོ་རྗེའི་རིགས་ཀྱི་དཀྱིལ་འཁོར་གྱི་ཆོ་ག་སྤྱི་འགྲོའི་ལུགས་ཀྱང་འདི་ཁོ་ནས་བདེ་བླག་ཏུ་རྟོགས་པར་འགྱུར་ཏེ། རིགས་གཉིས་པོ་དེ་དང་དེའི་རིགས་པའི་རྒྱལ་པོ་དང༌། རིགས་ཀྱི་སྙིང་པོ་དང༌། ལས་ཐམས་ཅད་པ་དང༌། སྤྱིའི་དམ་ཚིག་གི་སྔགས་རྒྱ་སོགས་སོ་སོའི་མི་འདྲ་བའི་ཁྱད་པར་ཅུང་ཟད་ཅུང་ཟད་ཡོད་པ་རྣམས་འདོན་པ་སྤོས་ཤིང༌། ལྷ་དང་སྔགས་དང་དཀྱིལ་
འཁོར་གྱི་བཀོད་པ་རང་རང་གི་ལུགས་དང་སྦྱར་བས་ཆོ་ག་གཞན་རྣམས་འདི་ཁོ་ནས་འགྲུབ་བོ། །དེ་ཡང་དཔེར་མཚོན་ན་འདི་ལྟ་བུ་སྟེ། འདིར་རིགས་ཀྱི་སྙིང་པོ་ཛི་ན་ཛིཀ་གི་དོད་དུ་པད་རིགས་ལ་ཨ་རོ་ལི་ཀ་རྡོ་རྗེའི་རིགས་ལ་བཛྲ་དྷྲི་ཀ །དེ་བཞིན་དུ་ལག་གདུབ་ལ་པདྨས་རིགས་ལ་པདྨའི་ས་བོན་དང༌། རྡོ་རྗེ་ལ་རུ་དྲཱ་ཀྵ། སྤྱན་འདྲེན་སོགས་ལ་འདིར་སངས་རྒྱས་སྤྱན་མའི་སྔགས་ཡོད་སར་པད་རིགས་ལ་ཕྱག་འཚལ་སྔོན་དུ་སོང་ནས། མཐོང་བ་དང་ནི་ཐོས་པ་དང༌། །རེག་པ་དང་ནི་དྲན་པའང་རུང༌། །བདག་ནི་སེམས་ཅན་ཐམས་ཅད་ཀྱི། །ནད་རྣམས་ཀུན་ཀྱི་གསོས་གྲུར་ཅིག །ཏདྱ་ཐཱ། ཀ་ཊེ་བི་ཀ་ཊེ་ནི་ཀ་ཊེ་ཀ་ཊཾ། ཀ་ཊེ་བྷ་ག་བ་ཏེ་བི་ཛ་ཡེ་སྭཱཧཱ། ཞེས་གོས་དཀར་མོ་དང༌། རྡོ་རྗེའི་རིགས་ལ། ཨོཾ་ཀུ་ལན། སོགས་མཱ་མ་ཀའི་སྔགས་སོ། མཱ་མ་ཀཱི་རིགས་ཀུན་ལ་འཇུག་པ་ཡང་བཤད་དོ། །ལས་ཐམས་ཅད་པ་ཡང་པད་རིགས་ལ། ན་མོ་མཧཱ་ཤྲི་ཡ་ཡཻ། ཨོཾ་ཤ་མ་ཡེ་ས་མ་ཡེ། སཽ་མེ་སིདྡྷི་སིདྡྷི་སཱ་དྷ་ཡ། ཤི་བེ་ཤི་བངྐ་རི་ཨ་བ་ཧ་སརྦ་ཨརྠ་སཱ་དྷ་ནི་སྭཱཧཱ། ཞེས་དང༌། རྡོ་རྗེའི་རིགས་ལ་བདུད་རྩི་ཐབས་སྦྱོར་ཉིད་དེ་འོན་ཀྱང་ཐབས་སྦྱོར་ནི་རིགས་གསུམ་ཀ་ལ་འཇུག་གོ །སྟེང་ཕྱོགས་བཅིངས་པ་ཡང་པད་རིགས་ལ། ཨོཾ་པདྨ་ནི་བྷ་ག་བ་ཏེ། མོ་ཧ་ནི་ཛ་གདྨོ་ཧ་ཡ་སྭཱཧཱ། ཞེས་དང༌། རྡོ་རྗེའི་རིགས་ལ་སུ་སིདྡྷི་ཀ་ར་རིང་བ་སྟེ། དེ་ནི་རིགས་གསུམ་ཆར་ལ་ཡང་ངོ༌། །བསངས་བྱེད་དང་བྱིན་རླབས་སོགས་ལ་དགོས་པ་རིག་པའི་རྒྱལ་པོ་ཁྲོ་བོའི་སྔགས་ནི། པད་རིགས་ལ། ཨོཾ་ཨ་མྲྀ་ཏ་བྷ་བོདྦྷ་བ་ཧཱུཾ་ཕཊ་
ཅེས་རྟ་མགྲིན་ཡི་གེ་བཅུ་པ་དང༌། རྡོར་རིགས་ལ་ཧཱུཾ་མཛད་ཀྱི་སྔགས་ཧཱུཾ་བཞི་པའོ། །བཟླས་བརྗོད་ཀྱི་ཐོག་མར་དགོས་པའི་བྱིན་རླབས་སྐུལ་བའི་སྤྱི་སྔགས་རིགས་པའི་རྒྱལ་པོའི་སྔགས་ཀྱང་ཟེར། རིགས་ཀྱི་བདག་པོའི་སྔགས་ཞེས་ཀྱང་བྱ་བ། བགྲང་འཕྲེང་བྱེད་པའི་སྔགས་ལ། འདིར་ཨརྦྷུ་ཏི་སོགས་ཀྱི་དོད་ལ། པད་རིགས་ལ་ན་མོ་རཏྣ་ཏྲ་ཡཱ་ཡ༴ སོགས་ཕྱག་འཚལ་གྱི་རྗེས་སུ། ཨོཾ་ཨ་མྲྀ་ཏ་ག་མོ་ཤྲི་ཡེ་ཤྲེ་ཡ་ནི་སྭཱཧཱ། ཞེས་དང༌། རྡོ་རྗེའི་རིགས་ལ་ཕྱག་འཚལ་སྔོན་དུ་སོངས་ནས། ཨོཾ་ཀི་རི་ཀི་རི་རཽ་ཏྲི་ཏེ་སྭཱཧཱ། ཞེས་པ་དང༌། སྔར་གྱི་ནོར་བུ་འཕྲེང་བ་བྱིན་རླབས་ཀྱི་སྔགས་ནི། པད་རིགས་ལ། ཨོཾ་བ་སུ་མ་ཏི་ཤྲི་ཡེ་སྭཱཧཱ། ཞེས་དང༌། རྡོ་རྗེ་རིགས་ལ། ཨོཾ་བཛྲ་ཨ་ཛི་ཏཾ་ཛ་ཡ་སྭཱཧཱ། ཞེས་པའོ། གཞན་ཡང་བཟའ་མིན་ཟོས་པ་དག་བྱེད་སོགས་རྣམས་གྲངས་མི་འདྲ་བ་མང་དུ་ཡོད་དོ། །ཡང་དོན་ཞགས་ཆེན་མོ་དང་བཅུ་གཅིག་ཞལ་སོགས་སྒོས་ཀྱི་ཁྱད་ཆོས་མང་པོ་ཅན་ཐ་ན་མཆོད་པའི་སྔགས་སོགས་ཀྱང་རྒྱུད་སོ་སོར་མི་འདྲ་བ་མང་པོ་ཡོད་པ་རྣམས་ལ་དེ་དང་དེ་ངེས་པར་དགོས་པ་མ་ཡིན་ནམ་སྙམ་ན། སྤྱིར་རང་རང་གི་ཆོ་ག་དམིགས་བསལ་ཡོད་པ་རྣམས་ལ་དེ་དང་དེ་བྱས་ནས་མི་གསལ་བ་རྣམས་སྤྱི་རྒྱུད་ནས་ཁ་སྐོང་བ་ནི་ཡིན་ནོ། །དེ་ལྟ་མོད་ཀྱི་རྒྱུད་སོ་སོ་ཕན་ཚུན་གཉིས་ཀར་ན་ཐ་དད་པར་གསལ་བའི་ཐུན་མོང་མ་ཡིན་པའི་ཁྱད་ཆོས་རྣམས་རང་རང་ལུགས་སུ་མི་བྱེད་པར་སྒོས་རྒྱུད་གཞན་གྱིས་ཁ་སྐོང་བ་ནི་ཤིན་ཏུ་ལེགས་པ་རང་མིན་ཡང་སྤྱིར་ན་སྤྱི་རྒྱུད་མ་ཡིན་པ་རྣམས་ནས་ཀྱང་ཕན་ཚུན་ཁ་འགེངས་དགོས་པའི་རིགས་ནི་ཡོད་ལ། ངེས་པར་ན་རང་རང་སོ་སོའི་ལུགས་ཀྱི་དམིགས་བསལ་ཡོད་
ཀྱང་དེ་མ་འགྲུབ་ན་སྒོས་རྒྱུད་མ་ཡིན་པར་སྤྱི་རྒྱུད་ཀྱི་ཆོ་གའི་ལུགས་སུ་སྒྲུབ་བ་ནི་ངེས་པར་རུང་བ་ཡིན་ཏེ། དེ་ནས་གཞན་ཡང་གསང་བའི་རྒྱུད། །དཀྱིལ་འཁོར་དག་ནི་ཐམས་ཅད་ཀྱི། །སྤྱི་ཡི་ཆོ་ག་རྒྱས་པ་དག །མདོར་བསྡུས་རབ་ཏུ་བཤད་པར་བྱ། །ཞེས་གསུངས་པས་སོ། །དེས་ན་བྱིན་རླབས་དང་རྒྱུན་ཡོད་པ་གཞིར་བཞག་ལ། ཚེ་འདིར་དངོས་གྲུབ་ཐོབ་པ་དོན་དུ་གཉེར་བ་ཡིན་ན། སོ་སོའི་ཐུན་མོང་མ་ཡིན་པ་རྣམས་རྣོ་ཁྱད་ཆེ་བ་ཡིན་ནོ། །དེ་དང་དེ་བྱ་རྒྱུད་སྤྱི་ལ་མི་འཇུག་པས་དེ་ཤེས་ཀྱང་བྱ་རྒྱུད་སྤྱི་ལ་འཇུག་པའི་ཆོ་གའི་བཞུགས་ཚུལ་བདེ་བླག་ཏུ་གོ་བ་དཀའ་ལ། སྤྱི་རྒྱུད་ཀྱི་ཆོ་ག་ཤེས་ན། སྤྱི་ལ་འཇུག་པའི་ཆོ་ག་ཤེས་པར་མ་ཟད། ཐུན་མོང་མ་ཡིན་པ་རྣམས་ཀྱང༌། མཐོང་བ་ཙམ་གྱིས་གོ་སླ་བར་འགྱུར་བས་རྒྱུད་དོན་ལ་གོ་བ་འཚོལ་ན་སྤྱི་རྒྱུད་ཀྱི་ཆོ་ག་ཤེས་པ་ཁོ་ན་གལ་ཆེའོ། །དེ་ལྟ་ན་ཡང་དམ་ཚིག་གསུམ་བཀོད་ཀྱི་རྒྱུད་ལ་ལེའུ་བཅུ་གཉིས་པ་ཁོ་ན་ནས་དཀྱིལ་འཁོར་རྒྱས་པ་དང༌། དབང་ཆོག་གསུངས་པའི་ཕྱིར། དེའི་ལུགས་བཞིན་མི་བྱེད་པ་ཅི་ཞེ་ན། ཆོ་གའི་རིམ་པ་ནི། དེ་ནས་བཤད་པ་རྣམས་ཀྱང་གོང་དུ་བཤད་ཟིན་པ་འདིར་ཚང་བས་དེའི་ལུགས་ཉིད་ཡིན་ལ། དཀྱིལ་འཁོར་གྱི་རྣམ་པ་དེའི་ལུགས་བཞིན་མི་བྱེད་པའི་རྒྱུ་མཚན་ནི། སྙིང་པོའི་དཀྱིལ་འཁོར་འདི་ལ་དབང་རྒྱུན་མ་ཆད་པར་ཡོད་ཅིང༌། རྒྱས་པ་དེ་ལ་ལོ་པཎ་ནས་བརྒྱུད་པའི་དབང་རྒྱུན་མེད་པའི་ཕྱིར་དང༌། རྒྱུད་འདི་ལ་འགྲེལ་པ་དང་དཀྱིལ་འཁོར་རྒྱས་པའི་སྒྲུབ་ཐབས་མ་འགྱུར་བས་དཀྱིལ་འཁོར་རྒྱས་པའི་ལྷ་རྣམས་ཀྱི་མཚན་ཉིད་ཡིད་ཆེས་ཅན་རྙེད་དཀའ་བས་བྱས་ཀྱང་རང་བཟོར་འགྱུར་བའི་ཕྱིར་རོ། །དེ་བས་ན་དེ་བཞིན་གཤེགས་རིགས་ཀྱི་རྒྱུད་ཐམས་ཅད་ཀྱི་རྩ་བར་གྱུར་པ།
དམ་ཚིག་གསུམ་བཀོད་ཀྱི་སྙིང་པོའི་དཀྱིལ་འཁོར་འདིའི་དབང་བསྐུར་བ་ཐོབ་པས། བྱ་རྒྱུད་རིགས་དྲུག་པོ་ཐམས་ཅད་འཆད་པ་དང་སྒོམ་པ་ལ་དབང་བ་ཡིན་ཏེ། སྤྱི་རྒྱུད་ལས་དེ་བཞིན་གཤེགས་རིགས་ཀྱི་དཀྱིལ་འཁོར་དུ། གང་ཞིག་ལེགས་པར་དབང་བསྐུར་བ། །དེ་ནི་རིགས་རྣམས་གསུམ་ཆར་གྱི། །དཀྱིལ་འཁོར་ལ་སོགས་སློབ་དཔོན་འགྱུར། །འཕགས་པ་སྤྱན་རས་གཟིགས་དབང་གི །དཀྱིལ་འཁོར་དུ་ནི་དབང་བསྐུར་བ། །དེ་ནི་རིགས་གཉིས་དཀྱིལ་འཁོར་གྱི། །སློབ་དཔོན་དུ་ནི་དབང་བསྐུར་གྱུར། །ཕྱག་ན་རྡོ་རྗེ་གཟི་ཆེན་ཀྱི། །དཀྱིལ་འཁོར་དུ་ནི་དབང་བསྐུར་བ། །དེ་ནི་རྡོ་རྗེ་རིགས་གཅིག་གི །དཀྱིལ་འཁོར་དུ་ནི་སློབ་དཔོན་འགྱུར། །མ་མོ་གནོད་སྦྱིན་གསང་སྔགས་ཀྱི། །དཀྱིལ་འཁོར་གང་དག་ཅི་བཞེད་པ། །དེ་དག་ཐམས་ཅད་ཀུན་གྱིས་ཀྱང༌། །དོགས་པ་མེད་པར་བྲི་བར་བྱ། །ཞེས་གསུངས་པས་སོ། །ཡང་རྒྱུད་ལས་འདི་སྐད་དུ། ལྷའི་རིགས་རྣམས་མཐོང་བ་ལ། །དབང་བསྐུར་བ་ནི་རྣམ་པ་བཞི། །བླ་མ་མཉམ་པར་བཞག་པ་ཡིས། །དེ་དག་ཤེས་ནས་ཅི་རིགས་པ། །སློབ་དཔོན་གོ་འཕང་ཐོབ་བྱའི་ཕྱིར། །དང་པོ་ཡོངས་སུ་སྒྲགས་པ་ཡིན། །རིགས་སྔགས་རྣམས་ནི་སྒྲུབ་པའི་ཕྱིར། །གཉིས་པ་ལེགས་པར་བཤད་པ་ཡིན། །བགེགས་རྣམས་རབ་ཏུ་གཞོམ་པའི་ཕྱིར། །གསུམ་པ་རབ་ཏུ་བསྒྲགས་པ་ཡིན། །བཞི་པ་འབྱོར་པ་ཐོབ་པའི་ཕྱིར། །ཆོ་ག་རྒྱས་པ་དེ་བཤད་དོ། །ཞེས་སློབ་དཔོན་གྱི་དབང་དང༌། སྔགས་སྒྲུབ་པའི་དབང་དང༌། བགེགས་གཞོམ་པའི་དབང་དང༌། འབྱོར་པ་ཐོབ་པའི་དབང་སྟེ་བཞིའོ། །དེ་དག་ལས་གོང་དུ་ཞིབ་མོར་བསྟན་ཟིན་པ་ནི་སློབ་དཔོན་གྱི་དབང་ཡིན་ཞིང༌། སྔགས་སྒྲུབ་པའི་དབང་ནི་སློབ་མའི་
དབང་གི་མིང་ཡིན་ལ། འདི་ལ་ཁྱད་པར་ནི། རྣམ་རྒྱལ་བུམ་པ་ལ་མེ་ཏོག་གང་ལ་ཕོག་པའི་ལྷའི་སྔགས་བཟླས་ཏེ་ཆུ་དབང་བསྐུར། ཆུ་དབང་ནི་འདི་གཅིག་པུས་ཀྱང་ཆོག་ལ། ལས་བཞི་སོ་སོའི་འདོད་པ་ཡོད་ན། དེ་དང་དེའི་བུམ་པའི་དབང་ཡང་བསྐུར། རྒྱས་པ་ལ་མོས་ན་ཁྲུས་བུམ་དང་ལས་བུམ་གྱི་དབང་བསྐུར་ཀྱང་ལྷག་པའི་སྐྱོན་མེད་དོ། །སྦྱིན་སྲེག་གི་སྐབས་ཀྱང་མེ་ཏོག་གང་ལ་ཕོག་པའི་སྔགས་ཁོ་ནས་འབུལ། སྔགས་དང་རྒྱུད་རྣམས་འཛིན་གྱུར་པའི། ཞེས་ཚིག་སྔ་ཕྱི་གཉིས་དང༌། ད་ནི་དཀྱིལ་འཁོར་སོགས་གསོལ་བཏབ་དང་བཀའ་བསྒོའི་སྐོར་རྣམས་མི་དགོས། རྒྱས་པར་བསྟན་པ་དང༌། གདམས་ངག་འབོགས་པ་ཡང་མི་དགོས་སོ། །དབང་བསྐུར་གསུམ་པ་དང་བཞི་པ་གཉིས་ནི། ཆ་ཤས་ཀྱིས་ན་སློབ་མའི་དབང་ཡིན་མོད་ཀྱང༌། དེའི་མཚན་ཉིད་རྫོགས་པར་མ་ཚང་བའི་ཕྱིར། སློབ་མའི་དབང་ཞེས་མིང་འདོགས་མི་བྱའོ། །འདི་གཉིས་ལ་སྐྱབས་འགྲོ་ནི་མེད་དུ་མི་རུང༌། སེམས་བསྐྱེད་བྱེད་མི་བྱེད་སྐབས་དང་སྦྱར། བདག་འབུལ་བ་མི་དགོས་ཤིང༌། ཆུ་དབང་གི་ལས་བུམ་དང་ཁྲུས་བུམ་གྱིས་བསྐུར། བཀྲུ་བྱབ་སྲུང་གསུམ་ཚང་བར་བྱ། ཅོད་པན་གྱི་དབང་མི་བསྐུར། སྦྱིན་སྲེག་ཀྱང་ཁྲོ་བོའི་རྒྱལ་པོ་ཁོ་ན་ལ་འབུལ་གྱི་གཞན་ལ་མི་དགོས། རྗེས་འབྲང་གི་ཆོ་ག་གཞན་བདུན་པོ་རྣམས་ཀྱང་མི་བྱེད་པའོ། །བཞི་པ་ཡང་དེ་དང་འདྲ་བ་ལས་ཁྲུས་བུམ་ཁོ་ནས་དབང་བསྐུར་ཞིང༌། ཚིག་ལྷག་པོར་ཤིན་ཏུ་བདེ་བ་དང་ལེགས་པ་དང༌། བཀྲ་ཤིས་པ་དང་རྒྱལ་བར་གྱུར་ཅིག །རྒྱལ་བར་གྱུར་ཅིག །ཅེས་པའི་ཚིག་གིས་དབང་བསྐུར་ཞིང༌། བཀྲུ་བྱབ་སྲུང་གསུམ་མི་དགོས་པས། ཆུ་དབང་གི་མཇུག་ཁོ་ནར་བཀྲ་ཤིས་རྫས་བརྒྱད་ངེས་
པར་སྟེར་དགོས་ལ། རྒྱལ་སྲིད་སྣ་བདུན་དང༌། བཀྲ་ཤིས་རྟགས་བརྒྱད་སོགས་ངེས་པར་དགོས་པ་མ་ཡིན་ཀྱང་སྤྲོས་པ་ལ་དགའ་ན་ཇི་ལྟར་རིགས་པ་སྦྱིན་ཏེ། ཤིས་བརྗོད་རྒྱས་པར་བྱེད་པའོ། །དེ་ཡང་གོང་སློབ་དཔོན་གྱི་སྐབས་སུ་བཤད་པ་ལྟར་བཀྲ་ཤིས་རྫས་བརྒྱད་རེ་རེ་ལ། བྷྲཱུཾ་དང། ཛི་ན་ཛིཀ་བཟླས། སློབ་མའི་མདུན་དུ་བསྟར་ནས། བཀའ་ལས་བྱུང་བས་ཚིག་གི་ཤིས་བརྗོད་ཅིག་བྱས་པ་ཁོ་ནས་དོན་ཐམས་ཅད་འགྲུབ་པ་ཡིན་ལ། སྤྲོས་པ་ལ་མོས་ན་ཀུན་ལ་གྲགས་པའི་ཚིགས་བཅད་རྣམས་བྱས་པས་ཀྱང་ལེགས་ཤིང༌། སྐྱོན་དུ་ནི་མི་འགྱུར་བ་ཁོ་ནའོ། །དེ་ལྟར་བློ་ལ་བཞག་ནས་རྒྱས་པར་ནི། སྤྱི་རྒྱུད་ཉིད་ལས་རྟོགས་པར་བྱའོ། །ད་ནི་སྦྱིན་སྲེག་གི་ཆོ་ག་ཅུང་ཟད་བཤད་པར་བྱའོ། །དེ་ཡང་ལུགས་འདི་ལ་རྒྱས་པ་ཤར་དང་ཞི་བ་བྱང་དུ་ཕྱོགས་པར་གསུངས་པ། སྐབས་འདིར་དཀྱིལ་འཁོར་དང༌། འབྲེལ་བས་ཞི་བའི་ཐབ་ཁུང་དཀྱིལ་འཁོར་གྱི་བྱང་དུ་ཐབ་ཀྱི་ལྷ་རྣམས་ཞལ་དཀྱིལ་འཁོར་ཕྱོགས་ལ་སྟོན། སྦྱིན་སྲེག་བྱེད་པ་པོ་ཐབ་ཁུང་དང་དཀྱིལ་འཁོར་གྱི་བར་དུ་འདུག་སྟེ། དཀྱིལ་འཁོར་ལ་རྒྱབ་བསྟན་ཞིང་ཐབ་ལ་མངོན་དུ་ཕྱོགས་པས་བྱ། རྒྱས་པའི་ཐབ་ཁུང་ཤར་དུ་བཅའ་བ་ལ་ཡང་དེས་རིགས་འགྲེ། ཡང་སྤྱི་དང་མཐུན་པར་ཤར་དུ་ཞི་བ་དང༌། བྱང་དུ་རྒྱས་པ་བྱས་ཀྱང་འགལ་བ་མེད། རྐོས་ཐབ་དང་བྲིས་ཐབ་ཀྱི་ཚུལ་སྤྱི་དང་འདྲ་ལ། ཡང་རྒྱུད་ལས། ལས་སྒྲུབ་ཙམ་གྱི་དངོས་བསྟན་ལ་མུ་རན་ཙམ་མ་གཏོགས། ཁ་ཁྱེར་གསལ་བར་མ་གསུངས་ཀྱང་མཆུ་དང་ཁ་ཁྱེར་གཉིས་ཀར་ཡོད་པ་ལེགས། ལར་རྗེས་མཐུན་གཞན་ལས་ཁ་སྐོངས་དགོས་པ་རྣམས་སྒྲས་ཟིན་འབའ་ཞིག་གི་རྗེས་སུ་འབྲང་ན་དགོས་དོན་སྟོར་
པ་མང་དུ་ཡོང་ཉེན་ཡོད་པས། རྒྱུད་རྐྱང་ལ་དཔེ་སྒྲོགས་ཙམ་གྱི་ང་རྒྱལ་མི་རུང་ངོ༌། །དེས་ན་ཁ་ཁྱེར་ལ་པདྨ་འདབ་མ་བརྒྱད་དམ་བཅུ་དྲུག །གྲྭ་བཞིར་རྡོ་རྗེ་བཞི། དེ་དག་ཀྱང་རྡུལ་ཚོན་དཀར་པོ་ལ་བཅད་དམར་སེར་སྔོ་ལྗང་གང་གིས་བཏབ་ཀྱང་རུང་མོད་ཞི་རྒྱས་ལ་ནག་པོའི་རེ་ཁ་མི་བྱའོ། །དེར་བུད་ཤིང་རྩིག་པ་སོགས་སྤྱི་དང་འདྲ། ཀུ་ཤ་མཚོན་བྱེད་རྩའི་གདན་ལ་གཡས་སུ་མེ་ལྷ་དང་དཀྱིལ་འཁོར་ལྷའི་སྲེག་རྫས་ཏེ་སྲེག་རྫས་ཚར་གཉིས་བསངས་ཆུའམ། དཀྱིལ་འཁོར་དང་འབྲེལ་བའི་ཚེ། ལས་བུམ་དངོས་སམ་བུམ་ཆུ་དུང་ཕོར་སོགས་སུ་བླུགས་པས་ཀྱང་རུང་སྟེ་དེ་རྣམས་བཤམས། གཡོན་དུ་རིགས་སྔགས་ཀྱི་གཟི་བྱིན་བསྐྱེད་པའི་དྲི་ཆབ་གཅིག་དང༌། མཆོད་ཡོན་གཉིས་དང༌། ཉེར་སྤྱོད་ཚར་གཉིས་རྣམས་བཤམས། བསྲེགས་བླུགས་བྱེད་པ་པོའི་མདུན་དུ་མེ་ཡོལ་རྩིགས་པའི་ནང་དུ་བགང་བླུགས་དང༌། དེ་དང་ཉེ་བ་ལེན་སྟབས་བདེ་བའི་ཕྱོགས་གང་ཡང་འོས་པར་མར་ཁུ་ཡམ་ཤིང་ཀུ་ཤ་ལ་སོགས་པ་བཞག་གོ །དེ་ལ་སྲེག་རྫས་ནི། ཞི་བ་ལ། སྦྲང་རྩི་འོ་མ་མར་འོ་ཐུག་ནས་འབྲས་ཏིལ་དང་དུར་པ་ལོ་མ་དང་བཅས་པ་ལ་སོགས་པའོ། །རྒྱས་པ་ལ་ཡང་འོ་མ་དང་འོ་ཐུག་དང་ཞོ་དང་ལག་པན་དང་ནས་ཆན་དང་ཏིལ་དཀར་ནག་དང་སྒྲོན་ཤིང་གི་དུམ་བུ་དང་ན་ག་པུཥྤ་དང༌། ཤུ་ཏི་དང༌། ཉེ་ཤིང་དང༌། བིལ་བ་དང༌། གྲོ་དང༌། སྲན་མ་ལ་སོགས་པའོ། །དེ་ལྟ་ན་ཡང་ཞི་རྒྱས་གཉིས་པོ་འདི་སྲེག་རྫས་གཅིག་གིས་གཅིག་ཤོས་ཁ་བསྐང་པས་ཆོག་ཅིང༌། ཤུ་ཏི་ཉེ་ཤིང་ན་ག་པུཥྤ་གསུམ་ད་ལྟ་བོད་དུ་གྲགས་པ་འདི་རྣམས་མ་ཡིན་པས། དེ་རྣམས་རྙེད་དཀའ་ཡང་མར་དང་ཡམ་ཤིང་འཛོམ་ཕྱིན། རྫས་གཞན་རྣམས་གང་རྙེད་ཀྱིས་ཆོག་པ་ཡིན་
ནོ། །དཀྱིལ་འཁོར་དང་འབྲེལ་ན། ཆུ་དང་ཅོད་པན་གྱི་དབང་ཙམ་རང་ཉིད་ཀྱིས་བླངས་ནས་སྦྱིན་སྲེག་ལ་འཇུག་མ་འབྲེལ་ན་མི་དགོས། ཞི་བ་ལ་པདྨའི་སྐྱིལ་ཀྲུང་དང༌། རྒྱས་པ་ལ་བཀྲ་ཤིས་ཀྱི་སྐྱིལ་ཀྲུང་སྟེ་བཟང་པོའི་འདུག་སྟངས་ཀྱིས་འཁོད། བསངས་ཆུའམ་ལས་བུམ་གྱི་ཆུ་ལ་དམིགས་ཏེ། ན་མོ་རཏྣ༴ ནས། ཨ་མྲྀ་ཏེ་ཧཱུཾ་ཕཊ་ཀྱི་བར་བདུད་རྩི་ཐབས་སྦྱོར་ལན་བདུན་བརྗོད། བསངས་ཆུ་གསར་དུ་སྒྲུབ་དགོས་ན། །བསྙེན་པའི་སྐབས་སུ་བཤད་པ་བཞིན་བྱ། གཟི་བྱིན་བསྐྱེད་པའི་དྲི་ཆབ་ལ་དམིགས་ཏེ། ན་མོ་ལོ་ཀ་དྷྲི་ཏཱ་ཡ། ཨོཾ་ཤང་ཀ་རེ། ཤན་ཏི་ཀ་རེ། གྷུཊྚ་གྷུཊྚ་གྷུཊྚི་ནི་གྷཱ་ཏ་ཡ་གྷུཊྚི་ནི་སྭཱཧཱ། ཨོཾ་ཀུ་ལནྡྷ་རི་བནྡྷ་བནྡྷ་ཧཱུཾ་ཕཊ། ཅེས་མཱ་མ་ཀཱིའི་རིགས་སྔགས་དང་སྙིང་པོ་གཉིས་ཉེར་གཅིག་སོགས་མང་དུ་བཟླས་ལ། ཛྭ་ལ་ཛྭ་ལཱ་ཡ་ཕཊ། སིདྡྷི་སཱ་དྷ་ཡ་ཕཊ། དི་པེ་དི་པཱ་ཡ་ཕཊ། ཅེས་པ་རྣམས་ཀྱང་ཅི་རིགས་པར་བཟླས། དེ་ལྟ་བུའི་དྲི་ཆབ་ཀྱི་མཆོད་རྫས་སྲེག་རྫས་ཐམས་ཅད་ལ་བསངས་གཏོར་བྱས་ཏེ། བདུད་རྩི་ཐབས་སྦྱོར་དང་སྔགས་བཤད་མ་ཐག་པ་དེ་རྣམས་ལན་གཅིག་གི་མཐར། ཨོཾ་གཟི་བརྗིད་ལྡན་པས་རྫས་ནང་དུ། །ཕྱི་བཤོལ་མ་མཛད་བཞུགས་ནས་སུ། །ཀུན་གྱི་གཟི་བརྗིད་སྤེལ་བ་དང༌། །བྱིན་རླབས་ཅན་དུ་མཛད་དུ་གསོལ། །ཨོཾ་བཛྲ་ཧཱུཾ་དྷ། ཞེས་དང༌། ཛི་ན་ཛིཀ་མང་དུ་བརྗོད། རྒྱུད་ལས། ཟློས་བུ་དང་ནི་མ་འདྲེས་དང༌། །བསྣོར་བ་ཡིས་ཀྱང་ཅི་འདོད་པ། །མཁས་པས་རྫས་ཀྱིས་བྱིན་གྱིས་རློབས། ཞེས་སྔགས་དང་ཚིགས་བཅད་དེ་རྣམས་མགོ་ཐོན་རྐང་ཐོན་གྱི་ཚུལ་གྱིས་ལན་
མང་དུ་བརྗོད་པར་གསུངས་ན་ཡང་ད་ལྟ་ཚར་གསུམ་མམ་གཅིག་ཙམ་བྱེད། འདི་སྲེག་རྫས་མཆོད་རྫས་བྱིན་རླབས་ཡིན། བྱིན་རླབས་ཀྱི་ཆོ་ག་འདི་སྦྱིན་སྲེག་ཏུ་མ་ཟད་སྒྲུབ་པའི་སྐབས་ཀྱི་མཆོད་རྫས་ཀུན་ལའང་དགོས་ལ་བསྙེན་པའི་སྐབས་ཀྱི་མཆོད་པ་གཟི་བྱིན་བསྐྱེད་པ་ལའང་འདི་དག་བྱས་ན་ལེགས་པར་འགྱུར་རོ། །དེ་ནས་ཐབ་ཀྱི་ཤར་ལྷོའམ། བྱང་དང་ཤར་གང་རུང་དུ་མེ་ཚང་བཅས་པ་ལ། ཨ་མྲྀ་ཏེ་དང་ཛི་ན་ཛིཀ་བཟླ་བཞིན་དུ་མེ་སྦར། མར་ཁུ་བླུགས་གཟར་གྱིས་ཅུང་ཟད་གཅུས་ཏེ་བླུགས་ལ། གདངས་རིང་པོས་སྭཱཧཱ་དང༌། ཧཱ་ཡིག་རིང་པོ་ལན་མང་དུ་བརྗོད་ཅིང་བསྒྱིངས་པ་དང་བཅས་པར་བྱའོ། །ཨོཾ་དང༌།བྷྲཱུཾ་མང་དུ་བརྗོད། རླུང་ཡབ་ཀྱིས་གཡབས། ཀུ་ཤ་ལ་སོགས་པའི་རྩ་སྔོན་པོའི་བམ་པོ་ཕྱོགས་མཚམས་བརྒྱད་དུ་སྤྱི་དང་མཐུན་པར་བཀྲམ། ཨོཾ་ཚུར་བྱོན་ཚུར་བྱོན་འབྱུང་པོ་ཆེ། །ལྷ་ཡི་དྲང་སྲོང་བྲམ་ཟེ་མཆོག །སྲེག་བླུགས་ཞལ་ཟས་བཞེས་སླད་དུ། །འདི་ཉིད་དུ་ནི་བཞུགས་སུ་གསོལ། །ཨོཾ་ཨགྣ་ཡེ་ཧ་བྱ་ཀ་བྱ་བ་ཧ་ན་ཡ་སྭཱཧཱ། མེ་ལྷའི་སྔགས་ཐུང་བ་དང༌། ལག་གཉིས་ཁུ་ཚུར་ལས་གུང་མོ་སྒྲེང་བའི་ཚིག་གསུམ་པར་མཛུབ་མོའི་རྩེ་མོ་སྦྱར། གཡས་སྙིང་གར་ཕྱིར་བསྟན། གཡོན་དཀུར་བཞག །མཐེ་བོང་ནང་དུ་གཡབ་པའི་སྤྱན་དྲངས། བསངས་ཆུས་གཏོར་ཏེ་ལས་ཐམས་ཅད་པ་བཟླས། སྔགས་དེ་ཉིད་ཀྱིས་སྲེག་བླུགས་ལན་གསུམ་ཕུལ། ཐབས་ཀྱི་དབུས་སུ་དྲང་སྲོང་ཆེན་པོ་མེ་ལྷ་སྐུ་མདོག་དཀར་པོ། ཕྱག་གཡས་གཉིས་ཀྱི་མཆོག་སྦྱིན་དང་བགྲང་འཕྲེང༌། གཡོན་གཉིས་ཀྱིས་དབྱིག་པ་དང་རིལ་བ་སྤྱི་བླུགས་འཛིན་པ། ཞབས་སེམས་དཔའི་སྐྱིལ་མོ་
ཀྲུང་གིས་གནས་པ། འཁོར་དྲང་སྲོང་གི་ཚོགས་ཐམས་ཅད་ཀྱི་བསྐོར་ཏེ་བཞུགས་པར་གྱུར། ཨོཾ་བཛྲ་ཀེ་ལི་ཀཱི་ལ་བཛྲ་བྷི་མ་རཽ་ཏྲི་སོགས་ཀྱིས་བགེགས་བསངས། དེ་ནས་གོང་གི་སྔགས་དང་ཕྱག་བརྒྱ་ལས་མཐེ་བོང་མཛུབ་མོའི་གློར་བཞག་པས་དམ་ལ་བཞག་གོ །ཨོཾ་ཨགྣ་ཡེ་ཧ་བྱ་ཀ་བྱ་བཱ་ཧ་ན་ཨཱ་དི་བྱ་ཨཱ་དི་བྱ་ཡ་སྭཱཧཱ། ཞེས་མེ་ལྷའི་སྔགས་རིང་བས་མར་དང་ཡམ་ཤིང་དང༌། སྔགས་དེ་ཉིད་དམ་འོག་ཏུ་འཆད་པར་འགྱུར་བའི། ཨོཾ་ཏིཥྛ་ཧ་རི་སོགས་ཀྱིས་དཀར་གསུམ་དང་འབྲུ་སྣ་ལ་སོགས་པ་མེ་ལྔ་ཉིད་ཀྱི་སྲེག་རྫས་རྣམས་རིམ་གྱིས་འབུལ། ཡང་གོང་བཞིན། ཨོཾ་ཨགྣ་ཡེ༴ སོགས་སྔགས་ཐུང་བས་བགང་བླུགས་ལན་གསུམ་ལ་སོགས་པ་ཇི་ལྟར་འོས་པ་འབུལ། སྐབས་དེ་དག་ཏུ་མི་བཀྲ་ངན་པ་དག་བྱུང་ན་བདུད་རྩི་ཐབས་སྦྱོར་གྱི་སྔགས་ཀྱིས་བསང་ཆུ་གཏོར་བས་བཟློག་པར་འགྱུར་ལ། །ད་དུང་མ་བཟློག་ན། བདུད་རྩི་ཐབས་སྦྱོར་འམ། སྟོབས་པོ་ཆེ་གང་རུང་སྤྱན་དྲངས་ལ། སོ་སོའི་རང་སྔགས་ཀྱི་བགང་བླུགས་ཕུལ་བས་བྱུར་དང་བགེགས་རྣམས་ཞི་བར་འགྱུར་རོ། །མེ་བཀྲ་ངན་པ་མ་བྱུང་ན་དེ་འདྲ་མི་དགོས་སོ། །དེ་རྗེས། བདག་གི་སྦྱིན་སྲེག་གི་ལས་འདི་བགེགས་མེད་ཅིང་འབྲས་བུའི་མཆོག་དང་ལྡན་པར་མཛད་དུ་གསོལ། ཞེས་མེ་ལྷ་ལ་གསོལ་བ་ལན་གསུམ་བཏབ། དེ་ནས་སྐབས་འདི་ཉིད་དུ་འོག་ཏུ་འཆད་པར་འགྱུར་བའི་མེ་ལྷ་ལ་མཆོད་ཡོན་ཉེར་སྤྱོད་གཏོར་མ་བགང་བླུགས་བསྟོད་པ་རྣམས་གྲུབ་ནས་གཤེགས་གསོལ་བྱས་ན་བྱ་རྒྱུད་རང་ལུགས་ཡིན་པས་ཆོ་གའི་རིམ་པ་འདི་ལྟར་བཟང་ལ།
ཡང་སྐབས་འདིར་མེ་ལྷ་ཐབ་ཀྱི་ཟུར་ནང་ཅི་བདེ་བར་བཞུགས། བར་འདིར་དཀྱིལ་འཁོར་པ་མཆོད། སླར་ཡང་མེ་ལྷའི་རྗེས་ཆོ་ག་བྱེད་པ་སོགས་སྤྱི་འགྲོས་ཀྱི་རིགས་པ་བཀབ་ཀྱང་འགལ་བ་མེད་དོ། །དེ་ལྟ་ན་ཡང་རྒྱུད་སྡེ་གོང་འོག་གི་སྦྱིན་སྲེག་ཐམས་ཅད་ལ་དཀྱིལ་འཁོར་པ་མཆོད་པའི་ཚེ། མེ་ལྷ་གུག་པར་སྡོད་པ་མ་ཡིན་ཏེ། མེ་ཉིད་དང་མེ་ལྷ་གཉིས་སུ་མེད་པའི་ཕྱིར། དཀྱིལ་འཁོར་པ་མཆོད་པའི་ཚེ་དེ་ཡང་མཆོད་པ་ཡིན་ནོ། ཁ་ཅིག་འཇམ་དཔལ་རྩ་རྒྱུད་ལས། །དེ་ཚེ་མེ་ཡི་སྙིང་གར་སྔགས། །བདུན་བཟླས་པ་ཡིས་རྟག་པར་ནི། །མེ་སྤྱན་དྲངས་པ་རིག་པའི་བདག །མེ་ཏོག་དྲི་ནི་ཞིམ་རྣམས་ཀྱིས། །གནས་འབུལ་བ་ནི་སྤྱན་དྲངས་ནས། །རྟག་ཏུའོ་སྔགས་ཤེས་མཁས་པས་སོ། །ཞེས་གསུངས་པའི་དོན་དུ་བསམ་ནས། མེའི་ལྷའི་ཐུགས་ཀར་དཀྱིལ་འཁོར་བ་སྤྱན་དྲངས་ཏེ་བཞུགས་པར་འདོད་པ་ནི། རང་གི་དེ་ཉིད་སྟོན་པར་བྱེད་པ་སྟེ། མེ་སྤྱན་དྲངས་ངོ་ཞེས་པ་ཡན་ཆད་དྲང་སྲོང་མེ་ལྷ་སྤྱན་འདྲེན་དང༌། རིག་པའི་བདག་ཅཻས་པ་མན་ཆད་དཀྱིལ་འཁོར་པ་སྤྱན་འདྲེན་གྱི་ཚིག་ཡིན་པ་མ་གོ་བར་སྣང་བ་དང༌། མེ་སྤྱན་དྲངས་ངོ་ཞེས་པས་དཀྱིལ་འཁོར་བ་སྤྱན་དྲངས་བར་གོ་བ་ནི། ཤིན་ཏུ་བླུན་པོའི་རྣམ་འགྱུར་ཡིན་པས་ཕྱིར་དང༌། མེའི་སྙིང་གར་སྔགས་ལན་བདུན་བཟླ་ཞེས་པ་ནི། མེ་དཔུང་གི་དབུས་སུ་སེམས་གཏད་ནས་མེ་ལྷ་རང་གི་སྔགས་ལན་བདུན་བཟླས་ཏེ་སྦྱན་དྲངས་ཞེས་པའི་དོན་ཡིན་པ་ལ། མེ་ལྷའི་སྙིང་གར་དཀྱིལ་འཁོར་བ་སྤྱན་འདྲེན། ཞེས་པར་གོ་འདུག་སྟེ་དེ་ལྟར་ན་སྔགས་ལན་བདུན་གང་ཡིན་ངོས་འཛིན་རྒྱུ་མེད་པ་དང༌། མེ་སྤྱན་
དྲངས་ཞེས་པ་དཀྱིལ་འཁོར་པ་ཡིན་ན། སྤྱན་དྲངས་ནས་རྟག་ཏུའོ་ཞེས་པ་ནི་ངེས་པར་ཡང་དཀྱིལ་འཁོར་པ་ལས་འོས་མེད་པས་དཀྱིལ་འཁོར་བ་ལན་གཉིས་སྤྱན་འདྲེན་དགོས་པར་ཐལ་བར་འགྱུར་རོ། །དེ་ན་འབར་བའི་མེའི་ནང་དུ་གནས་སམ་གདན་བཀོད་པ་ལ་དཀྱིལ་འཁོར་བ་རྣམས་སྤྱན་འདྲེན་པ་ཡིན་ནོ། །དེ་ཡང་འདི་ལྟར་བྱ་སྟེ། ན་མཿསརྦ་ཏ་ཐཱ་ག་ཏཱ་ནཱཾ། སརྦ་ཐཱ་ཨུད་ག་ཏ་སྥ་ར་ཎ་ཨི་མཾ་ག་ག་ན་ཁཾ་སྭཱཧཱ། ལན་གསུམ་གྱི་ལྷའི་གདན་གྲུབ་པར་གྱུར། དེ་ནས་བྷྲཱུཾ་དང་ཛི་ན་ཛིཀ་བདུན་བརྗོད་པ་ནས་བརྩམས། ཡོངས་སུ་བསྐོར་ཏེ་བཞུགས་པར་གྱུར། ཞེས་པའི་བར་བསྙེན་པའི་སྐབས་སུ་བཤད་པ་དང་འདྲ་བ་ལས། ཡེ་ཤེས་དཀྱིལ་འཁོར་ལྷ་ཚོགས་ཐམས་ཅད་རང་རང་སོ་སོའི་གདན་ལ་བཞུགས་པར་གྱུར་པ་ནི། ཞེས་སྦྲཻལ། འདི་དཀྱིལ་འཁོར་དང་འབྲེལ་བའི་ཚད་དཀྱིལ་འཁོར་གྱི་ལྷ་ཚོགས་སྤྱན་དྲངས་པ་ཡིན་པས། དཀྱིལ་འཁོར་གྱི་དྲུང་ནས་མེ་ཏོག་གི་སྣོད་བླངས་ཏེ། འབྲུ་ཚོམ་ཞིག་ཐབ་ནང་དུ་འདོར་བ་སོགས་བོད་རྙིང་པའི་ལག་ལེན་བཞིན་བྱས་ཀྱང་རུང་ཞིང༌། དཀྱིལ་འཁོར་དང་འབྲེལ་བའི་ཚེ་འདིར་དམ་བཞག་མི་དགོས་ཏེ་སྔར་གྲུབ་པ་ཉིད་ཀྱིས་སོ། །དཀྱིལ་འཁོར་མེད་ན་ཤང་ཀ་རེ་ནས། བནྡྷ་སྭཱཧཱའི་བར་སྒྲུབ་ཐབས་བཞིན་དམ་བཞག་བྱ། བདེ་བར་གཤེགས་སོ་བཅོམ་ལྡན་འདས་ནས། ཨ་མྲྀ་ཏ་སྭཱཧཱ། གཙང་ཞིང་གཙང་མ༴ ནས། མཉམ་ཉིད་མི་གཡོ༴ མས་བསྟོད་པའི་བར་མཆོད་བསྟོད་ཀྱང་བསྙེན་པའི་སྐབས་བཞིན་ནོ། །དེ་ནས་ཛི་ན་ཛིཀ་དང༌། ཡི་གེ་ལྔ་པ་དང༌། ཡི་གེ་བརྒྱ་པ་རྣམས་
བཟླ་བཞིན་དུ་བགང་བླུགས་ལན་གསུམ་ལ་སོགས་པ་ཕུལ། དེ་ནས་བརྩམས་ཏེ་ཡི་གེ་ལྔ་པའམ། མུ་ནིའི་སྔགས་སམ། ཡིག་བརྒྱ་སྟེ་གསུམ་པོ་གང་རུང་གཅིག་ཁོ་ནས། ཡམ་ཤིང་ལ་སོགས་པའི་སྲེག་རྫས་གཞན་རྣམས་འབུལ་ལ། བགང་བླུགས་ཀྱང་བརྒྱ་རྩ་སོགས་ཇི་ལྟར་འོས་པ་འབུལ་དགོས་ཀྱང་གྲངས་གཅིག་ཏུ་ངེས་པ་མེད་དོ། །ཡང་ངེས་པར་དགོས་པ་ནི་མིན་ཡང་འཁོར་རྣམས་ལ་མཚན་སྔགས་ཀྱི་སྒོ་ནས་བགང་བླུགས་རེ་ཙམ་ཕུལ་ཀྱང་ལེགས་ལ། སྲེག་རྫས་གཞན་རྣམས་ནི་སྒོས་སུ་འབུལ་མི་དགོས་སོ། །སྤྱིར་ནི་གཙོ་བོ་དང༌། རང་སྔགས་ཁོ་ན་ལ་ཕུལ་བས་ལྷ་གཞན་ཐམས་ཅད་ཀྱང་ཚིམ་པར་འགྱུར་བའི་ཕྱིར། འཁོར་ལ་སྒོས་ཀྱི་འབུལ་བ་མེད་ཀྱང་ཆོག་གོ །དབང་བསྐུར་དངོས་གཞིའི་སྐབས་ཀྱི་སྦྱིན་སྲེག་ཡིན་ན། དེའི་རྗེས་སུ་སློབ་དཔོན་གྱི་མདུན་དུ་སློབ་མ་བཞག །སློབ་དཔོན་གྱིས་ལག་པ་གཡོན་པས། དེའི་གཡས་ཀྱི་མཐེ་བོང་བཟུང་བའམ། དེའི་གོས་ཀྱི་མཐའ་ནས་བཟུང་བ་ལྟ་བུས་ཀྱང་ཆོག །བླུགས་གཟར་མར་གྱི་བཀང་ལ་ཡི་གེ་བརྒྱ་པ་དང༌། ན་མོ་ལོ་ཀ་སོགས་མཱ་མ་ཀཱའི་སྔགས་བཟླས་ཏེ། སློབ་མའི་ལུས་ལ་ལན་གཅིག་བསྐོར་ནས། སློབ་མ་ཉིད་ཀྱིས་འབུལ་དུ་འཇུག་པ་ལན་བདུན་བྱ། སློབ་མ་མང་པོ་སོགས་ལ་དེ་ལྟར་མི་ནུས་ན་མོས་པ་བརྟན་པོས་དམིགས་པ་སྒོམ་དུ་བཅུག་ནས་སློབ་དཔོན་གྱིས་ཕུལ་བས་ཆོག་ལ། ཡང་ན་ལས་ཀྱི་རྡོ་རྗེས་བགང་བླུགས་བསྐོར་ཀྱང་རུང་བ་ཉིད་དོ། །དེ་ནས་སློབ་མ་ལ་ཐབས་སྦྱོར་བཟླས་པའི་དཔུང་སྐུད་བཅིངས། ལས་སྔགས་ཀྱིས་སྙིང་གར་བསངས་གཏོར་བྱ། སླར་ཡང་སློབ་དཔོན་གྱིས་དཀྱིལ་འཁོར་ལ་བགང་བླུགས་ལན་གསུམ་འབུལ་ལོ། སྤྱིན་སྲེག་ལོགས་སུ་བྱེད་པ་ཡིན་ན། ཨརྒྷཾ་པྲ་ཏཱིཙྪ་སྭཱཧཱ་ནས། མ་ཏང་གི་སྭཱ་ཧཱའི་བར་
སླར་བཏང་བའི་ཆོ་ག་བསྙེན་པའི་སྐབས་དང་འདྲ་ལ། དཀྱིལ་འཁོར་དང་འབྲེལ་བའི་སྐབས་ནི། ཨརྒྷཾ་ནས། ནཻ་བེ་ཏྱ་སྭཱཧཱ། དཀྱིལ་འཁོར་ལ་མེ་ཏོག་དོར་ཤིང༌། སྔར་གྱི་མེ་ཏོག་གི་སྣོད་དཀྱིལ་འཁོར་གྱི་དྲུང་དུ་བསྐྱལ། མེ་ཏོག་ཅུང་ཟད་ཙམ་དཀྱིལ་འཁོར་ལ་གཏོར། མེ་ནང་དུ་བཞུགས་པའི་དཀྱིལ་འཁོར་གྱིས་ལྷ་ཚོགས་རྣམས་སླར་ཕྱིར་ལ་གཤེགས་ཏེ། དཀྱིལ་འཁོར་ཆེན་པོའི་གནས་སུ་རང་རང་གི་གདན་ལ་བཞུགས་པར་གྱུར། ཞེས་བརྗོད། དེ་ནས་སྲེག་རྫས་ཀྱི་ལྷག་མ་རྣམས་སྲེག་བཞིན་དུ། ཨོཾ་ཏིཥྛ་ཧ་རི་པིངྒ་ལ་ལོ་ཧི་ཏ་ཨཀྵ་དེ་ཧི་ད་དཱ་པ་ཡ་ཧཱུཾ་ཕཊ་ཕཊ། སརྦ་བིགྷྣན་ན་ཤ་ཡ་སྭཱ་ཧཱ། ཞེས་པས་འབུལ་ཞིང༌། མཆོད་ཡོན་དང་ཉེར་སྤྱོད་རྣམས་ཀྱང་སྔགས་དེ་ཉིད་ཁོ་ནས་འབུལ་བའམ། སྭཱཧཱས་གོང་དུ་ཨརྒྷཾ་ནས། ཨཱ་ལོ་ཀེའི་བར་དུ་སྦྱར་བ་དང༌། གཏོར་མ་ཡོད་ན་བ་ལིཾ་སྦྱར་བ་རྣམས་ཀྱིས་ཀྱང་ཕུལ། སླར་ཡང་སྔགས་རིང་བས་བགང་བླུགས་བདུན་ཕུལ། ཚངས་དབང་འཇིག་རྟེན་མགོན་གྱི་སྲས། ཞེས་སོགས་བསྟོད་པ་ཇི་ལྟར་འོས་པས་བསྟོད་ཏེ། སྤྱན་འདྲེན་པའི་ཕྱག་རྒྱ་ལས་མཐེ་བོང་ཕྱིར་བསྐྱེད། ཨོཾ་ཨགྣ་ཡེ༴ སོགས་སྔགས་ཐུང་བའི་མཐར། གཙྪ་གཙྪ་ཞེས་བརྗོད་པས་གཤེགས་སུ་གསོལ། བཞུད་ཅིག་ཅེས་ནི་བདག་པོའི་བཀའ། །བཟློས་པས་རབ་ཏུ་བསྒྲགས་ནས་བཞུད། སྤྱན་ཡང་དྲངས་མ་ཐག་ཏུ་ནི། གསང་སྔགས་དགྱེས་ནས་འབྱོན་པར་འགྱུར། ཞེས་གསུངས་པ་ལ། འབྱོན་པར་མཛོད་ཅིག་ཅེས་བསྒྱུར་ནས། གཤེགས་གསོལ་གྱི་ཚིག་བྱེད་པའང་ཡོད་དེ་འགལ་བ་མེད་པར་འདྲའོ། །དེ་རྗེས་སྨོན་ལམ་དང་ཤིས་པ་བརྗོད་
དོ། །ལས་རྗེས་མི་མངོན་པར་བྱེད་ཚུལ་སྤྱི་དང་འདྲ། འདི་ནི་ཞི་བའི་སྦྱིན་སྲེག་སྟེ་འདི་ཙམ་གྱིས་ཀྱང་བྱ། རྒྱུད་རང་ལུགས་ཀྱི་སྦྱིན་སྲེག་གི་ཆོ་ག་ཇི་ལྟར་ཡིན་པ་གོ་བར་ནུས་སོ། །ད་ནི་གཏོར་མའི་ཆོ་ག་བཤད་པར་བྱའོ། །བྱ་རྒྱུད་རང་ལུགས་ལ་འཇིག་རྟེན་འདས་པའི་དཀྱིལ་འཁོར་པ་ལ་གཏོར་མ་མ་བཤད་ཅེས་གྲགས་པ་དང༌། དེར་མ་ཟད་ཀྲི་ཡོ་ག་སྡེ་གསུམ་ཆར་དུ་ཡང་མ་བཤད་དོ་ཞེས་གྲགས་ལ། འཇིག་རྟེན་པའི་གཏོར་མ་ནི་རྣམ་གྲངས་དུ་མ་ཞིག་གསུངས་པ་ཡིན་ནོ། །དེ་ལྟ་ན་ཡང་སྤྱི་རྒྱུད་དཔུང་བཟངས་ཀྱི་དངོས་བསྟན་ལས། འབྱུང་པོ་སྤྱི་དང་ཕྱོགས་སྐྱོང་གི་གཏོར་མ་གཉིས་གསུངས་ཏེ། གོ་རིམ་ཡང་དེ་ལྟར་གདོན་ལ་མཆོད་པ་བྱས་ནས་སུ། དེ་ནས་ཕྱོགས་སྐྱོང་རྣམས་ལ་མཆོད་པ་བྱ། ཞེས་གསུངས་ཤིང༌། ད་ལྟ་གང་ཞིག་མཚན་མོ་རྒྱུ་བ་ལ། ཞེས་སོགས་ནི། གཉིས་པོ་དེའི་མཇུག་སྡོམ་ཕན་ཡོན་སྟོན་པ་ཡིན་ཀྱང༌། ཟུར་གྱིས་བགེགས་གཏོར་ཡང་འཕངས་པར་མངོན་ལ། རྒྱུད་མང་པོར་བགེགས་ལ་གཏོར་མ་སྦྱིན་པ་ཡང་གསུངས་པས། སྤྱིར་བགེགས་གཏོར་དགོས་ལ། གཟུངས་གྲྭ་ལྔ་ལས་རྒྱལ་ཆེན་བཞིའི་གཏོར་མའང་གསུངས་པ་ལྟར་དེ་ཡང་འགྲུབ་ན་ལེགས། ཁྱད་པར་དུ་ཡང་དཀྱིལ་འཁོར་གྱི་སྒོ་སྲུངས་ལ་བཀོད་ཡོད་ན་ངེས་པར་བྱ། སྤྱིར་གཏོར་མ་ཆ་གསུམ་པོ་དེ་གྲུབ་ན། རྒྱལ་ཆེན་གྱི་གཏོར་མ་མ་གྲུབ་ཀྱང་ཆོ་ག་ཆད་པར་མི་འགྱུར་རོ། །དེ་རྣམས་ཆབས་གཅིག་ཏུ་བཤོམ་ན་རྒྱལ་ཆེན་དང་ཕྱོགས་སྐྱོང་གྲལ་འགོ་མའི་སྟེགས་བུ་མཐོ་བ་ལ་བཞག །འབྱུང་པོ་སྤྱིའི་དེ་བར་མ་དང༌། བགེགས་གཏོར་ས་ཕྱོགས་དམའ་བའམ།
དཀྱིལ་འཁོར་དང་འབྲེལ་ན་དཀྱིལ་འཁོར་ཁང་པའི་ཕྱིའི་སྒོ་དྲུང་དུ་བཞག་གོ །ཕྱི་རོལ་གཏོར་མའི་ཚུལ་དུ་བྱེད་ན། དཀྱིལ་འཁོར་ཁང་པའི་ལྷོ་ནུབ་ཕྱོགས་ཐག་བསྲེངས་ནས། སྟེགས་མཐོ་བ་ལ་འབྱུང་པོ་སྤྱི་གཏོར་དང༌། དམའ་བའི་ཕྱོགས་སམ། ས་རྗེན་ལ་བགེགས་གཏོར་བཤམས་ཏེ་གཏོར། བྱང་ཤར་དུ་ཐག་ཉེ་བར་སྟེགས་བུ་མཐོ་བ་ལ་ཕྱོགས་སྐྱོང་གི་གཏོར་མ་འཇོག་ཅིང༌། རྒྱལ་ཆེན་གྱི་གཏོར་མའང་ཕྱོགས་གཏོར་མི་བྱེད་ན་དེ་ཉིད་ནས་གཏོང་བའམ། ལས་དང་རྗེས་སུ་མཐུན་པའི་ཕྱོགས་ནས་གཏོར། ཕྱོགས་གཏོར་བྱེད་ན་ཕྱོགས་བཞི་སོ་སོ་ནས་བཤམས་ཏེ་གཏོད། ཕྱོགས་སྐྱོང་བཅུ་ལ་ཕྱོགས་གཏོར་བྱེད་ན། གཞན་རྣམས་རང་རང་གི་ཕྱོགས་དང་སྟེང་འོག་གཉིས་ཤར་ནུབ་ཐག་རིང་བར་སྐྱེལ་ལོ། །སོ་སོའི་དམ་རྫས་ཀྱི་སྐབས་སུ་སྣ་ཚོགས་ཤིག་ཡོད་ཀྱང༌། སྒྲུབ་མཆོད་སོགས་སྤྱི་གཏོར་གྱི་སྐབས་འདིར་ཆ་གསུམ་ལ་བགེགས་གཏོར་མ་གཏོགས་ཐམས་ཅད་དཀར་གཏོར་དུ་བྱ། དབྱིབས་བཀོད་པ་དེང་སང་གི་ལག་ལེན་སྤྱི་དང་མཐུན་པས་ཆོག །གང་ལྟར་ཡང་ལེགས་པར་བཤམས་ལ་གནས་གཅིག་ཏུ་བཤམས་པ་རྣམས་དུས་གཅིག་ཏུ་བྱིན་གྱིས་རླབས་པས་ཀྱང་རུང༌། གནས་སོ་སོ་ན་ཡོད་པ་རྣམས་འབུལ་བའི་གནས་སྐབས་སོ་སོ་དེ་ཉིད་དུ་བྱིན་རླབས་བྱེད་དགོས་སོ། །དེ་ལ་བྱིན་རླབས་ཀྱི་ཆོ་ག་ནི། ཡོངས་སུ་གྲགས་པའི་སྔགས་དྲུག་ཕྱག་རྒྱ་དྲུག་གིས་བྱིན་གྱིས་རླབས་ཀྱང་རུང༌། །ཡང་བདུད་རྩི་ཐབས་སྦྱོར་གྱིས་བསངས། ཨོཾ་ཏེ་ཛ༴ སོགས་ཀྱི་གཟི་བྱིན་བསྐྱེད་སླར་ཡང་བདུད་རྩི་ཐལ་སྦྱོར་གྱིས་བདུད་རྩིར་
བྱིན་གྱིས་རླབས། ཛི་ན་ཛིཀ་གིས་བརྟན་པར་བྱས། ནམ་མཁའ་མཛོད་ཀྱི་སྔགས་རྒྱས་རྒྱ་ཆེར་སྤེལ་ལོ། །ཡང་ན་སྤྱན་རས་གཟིགས་ཀྱི་ཆོ་ག་ཞིབ་མོ་ལས་འབྱུང་བ་བཞིན། ཨོཾ་ཛྭ་ལ་བ་ཏི་རཏྣ་གྷཱ་ཊ་སྭཱ་རི་ཎི་ཏུ་ཊི་ཏུ་ཊི་སྭཱཧཱ། ཞེས་གཏོར་སྣོད་བྱིན་གྱིས་རླབས། ཨོཾ་ར་སཱ་ར་སཱ་གྲ་བ་ཏི་སརྦ་བིདྱ་ཨ་དྷི་ཥྛི་ཏེ། སཾ་པཱུ་ར་ཡ་ཧཱུཾ། ཞེས་པས་རོ་བྲོ་བར་བྱས། ཨོཾ་ཛྭ་ལ་ཛྭ་ལ་སྥ་ར་པྲ་ར་ས་ར་ས་སཱི་དྷཱ་ཡ་ཧཱུཾ། ཞེས་རྒྱ་ཆེར་སྤེལ་ཞིང་གཟི་བྱིན་བསྐྱེད་དོ། །འདི་ཙམ་ཀྱིས་ཀྱང་ཆོག་སྟེ། གཏོར་ཆོག་གསལ་ཁ་མེད་པའི་བྱ་རྒྱུད་ཀྱི་སྐབས་མང་པོ་ཁ་བསྐང་དུ་རུང་ངོ༌། །དེ་ལྟར་ན་བྱིན་རླབས་གསུམ་པོ་གང་རུང་ཅིག་བྱ། དེ་ནས་བགེགས་གཏོར་ནི། ཆ་གསུམ་གྱི་ཆོ་ག་སྤྱི་དང་འདྲ་བའི་བདེན་བརྡར་བྱས་ཏེ་བགེགས་རྣམས་གཏོར་མའི་གནས་སུ་བཀུག ཨོཾ་གུང་ཀ་རེ༴ སོགས་ལ་སྤྱི་འགྲོ་ལྟར་ན་ནམ་མཁའ་མཛོད་ཀྱི་སྔགས་ཀྱི་མཐར། ག་ག་ན་ཁཾ་གྲྀཧྞེ་དཾ་བ་ལིཾ་ཏ་ཡེ་སྭཱཧཱ། ཞེས་འདོན་པ་བསྒྱུར་བས་སྦྱིན་པའམ། རྒྱུད་འདི་ཉིད་ལས་གསུངས་པའི་སྒོས་ཀྱི་གཏོར་སྔགས་ནི། ན་མཿསརྦ་ཏ་ཐཱ་ག་ཏཱ་ནཱཾ། བ་ལ་བ་ཏི་བ་ལཱིནྡེ་སྭཱཧཱ། ཞེས་པ་བཏགས་པས་སྦྱིན་ནོ། །གང་ཞིང་མཚན་མོ་རྒྱུ་བ་ཡི། ཞེས་སོགས་སྤྱི་དང་མཐུན་པར་བཤད་སྦྱང་བྱས་ལ། གཏོར་མ་རིང་དུ་གཏོང་བ་དང༌། ཐབས་སྦྱོར་གྱི་སྔགས་ཀྱིས་མཚམས་བཅད་ནས་སྙིང་པོ་བཟླ་བཞིན་དུ་ནང་དུ་འོངས་ལ་ཉེ་རེག་བྱའོ། །དེ་ནས་འབྱུང་པོའི་གཏོར་མ་ནི། སྔོན་བཞིན་བྱིན་གྱིས་རླབས། ཨོཾ་ལྷ་དང་ལྷ་མིན་གནོད་སྦྱིན་ལྟོ་འཕྱེ་གྲུལ། ཞེས་པ་ནས། འདིར་
བྱོན་ཅིག ཅེས་པའི་བར་བརྗོད། དོན་ཞགས་ཀྱི་རྒྱུད་ལས། འབྱུང་པོ་སྤྱི་སྤྱན་འདྲེན་པའི་སྔགས་ནི། ཨོཾ་དི་བྱ་ལོ་ཙ་ནི་ཨ་མོ་གྷེ་པྲ་ཝ་རེ་སརྦ་བིདྱ་ཨ་དྷི་ཥྛི་ཏེ་སིདྡྷི་ཤུདྡྷ་བི་ལོ་ཀི་ཏེ་སྭཱཧཱ། ཞེས་པ་སྤྱན་འདྲེན་པར་བཤད་ཀྱང་པདྨའི་རིགས་ཀྱི་ཆོ་གའི་ཁྱད་ཆོས་ཡིན་པར་སེམས། དེས་ན་སྐབས་འདིར་གོང་གི་ཚིགས་བཅད་ཉིད་རྒྱུད་ཀྱི་སྔགས་ཚིག་ཡིན་པས་དེ་ཙམ་གྱིས་ཆོག་པར་མངོན་ལ། དེ་ནས། ཨོཾ་དེ་བཱ་ཡ་སྭཱཧཱ། དེ་བཞིན་ཏུ་སྦྱར་ཏེ། ནཱ་ག་དང༌། ཡཀྵ་དང༌། གནྡྷརྦྷ་དང༌། ཨ་སུ་ར་དང༌། ཀནྣ་ར་དང༌། ག་རུ་ཊཱ་དང༌། མ་ཧོ་རཱ་ག་དང༌། མ་ནུཥྱ་དང༌། ཨོཾ་ཨ་མ་ནུཥྱེ་སྭཱཧཱ། རྣམས་ལ་གོང་དུ་བཤད་པ་ལྟར་རྒྱུད་འདིའི་ཐུན་མོང་མ་ཡིན་པའི་གཏོར་སྔགས་བཏགས་པའམ། ནམ་མཁའ་མཛོད་ཀྱི་སྔགས་བཏགས་པས་གཏོར་མ་འབུལ། དེ་ནས་མཆོད་པ་དང་ཏོར་མ་ཐམས་ཅད་ལྷན་ཅིག་ཏུ་འབུལ་བ་ནི། ཨོཾ་འབྱུང་པོ་གང་དག་རི་རབ་སྟེང་གནས་དང༌། ནས། རབ་ཏུ་དགྱེས་ཤིང་མགུ་བར་གྱུར་ནས་སུ། །འཕྲེང་བ་མེ་ཏོག་དྲི་དང་བདུག་པ་དང༌། །བསྟོད་དང་གཏོར་མ་མར་མེ་གུས་འབུལ་བ། །འདི་དག་བཞེས་ནས་བཏུང་ཞིང་བསྣམས་ནས་སུ། །ལས་འདི་རྣམས་ཀྱི་འབྲས་བུ་མཆིས་པར་མཛོད་སྭཱཧཱ། ལན་གསུམ་གྱི་མཐར་མཆོད་གཏོར་རྣམས་རིང་དུ་གཏོར། ཆོས་རྣམས་གང་དག༴ སོགས་ཀྱིས་ཆོས་བཤད། སརྦ་བྷཱུ་ཏ་གཙྪ་གཙྪ། ཞེས་སེ་གོལ་གཏོགས་ཏེ་གཤེགས་སུ་གསོལ་ལོ། །དེ་ནས་ཕྱོགས་སྐྱོང་གི་གཏོར་མ་སྦྱིན་པར་བྱ་སྟེ། འདི་ནི་འཇིག་རྟེན་པའི་
གཏོར་ཆོག་ཐམས་ཅད་ཀྱི་གཙོ་བོ་ཡིན་པར་ཤེས་པར་བྱའོ། །དེ་ལ་ཐོག་མར་ཕྱག་རྒྱ་རྣམས་གོ་བར་བྱ་སྟེ། ལག་གཉིས་མཐེ་ཆུང་བཀུག་པ་མཐེ་བོས་མནན། སོར་མོ་དབུས་མ་གསུམ་བརྐྱང་བ། གཡོན་སྙིང་གར་བཞག གཡས་དཀུ་ལ་བསྟེན་པ་ནི། དབང་པོའི་དམ་ཚིག་གི་ཕྱག་རྒྱ་སྟེ། དེ་ལས་མཛུབ་མོ་གཉིས་གཡབ་པ་ནི་སྤྱན་དྲངས་པ་དང༌། མཛུབ་མོ་གཉིས་ཕྱིར་བསྐྱེད་པ་ནི། སླར་བཏང་བའི་ཕྱག་རྒྱའོ། །དེ་བཞིན་དུ་གཞན་རྣམས་ཀྱང་ཤེས་པར་བྱ་སྟེ། མེ་ལྷའི་ཕྱག་རྒྱ་ནི་སྦྱིན་སྲེག་གི་སྐབས་སུ་བཤད་པ་བཞིན་ནོ། །རྡོ་རྗེ་ནང་བསྡམས་ལས་སྲིན་ལག་གཉིས་ཕྱིར་བརྐྱང་བ་ནི། གཤིན་རྗེའི་དམ་ཚིག་གི་ཕྱག་རྒྱ་སྟེ་དེ་ཉིད་གཡབ་ཅིང་དྲག་ཏུ་བཀུག་པ་ནི་སྤྱན་འདྲེན་པ་དང༌། དམ་རྒྱ་ལས་མཐེ་བོང་ཕྱིར་བསྐྱེད་པ་ནི། གཤེགས་སུ་གསོལ་བའོ། །རྡོ་རྗེ་ཁུ་ཚུར་ལས་གུང་མཛུབ་ཕྱིར་བརྐྱང་བ་གཤིབས་པ་གཡས་སྙིང་ག་དང༌། གཡོན་དཀུར་བཞག་པ་ནི་སྲིན་པོའི་དམ་རྒྱ་སྟེ། དེ་ཉིད་ལས་གཡོན་གྱི་མཛུབ་མོ་གཡབ་པ་དང༌། ཕྱིར་བསྐྱེད་པ་ཡང་སྤྱན་དྲངས་པ་དང་གཤེགས་སུ་གསོལ་བའོ། །ཁུར་ཚུར་གཉིས་ཀྱི་མཐེབ་མཛུབ་ཞག་མིག་གི་ཚུལ་དུ་སྦྱར་ནས་ཁུ་ཚུར་སྙིང་གར་འཇོག་པ་ནི་ཆུ་ལྷའི་ཕྱག་རྒྱ་སྟེ། གཡོན་པའི་འཛུབ་མོ་གཡབ་པ་དང༌། ཕྱིར་བསྐྱེད་པ་ཡང་ངོ༌། །ལག་གཉིས་ཁུ་ཚུར་ལས། གུང་མོ་བསྒྲེང་བའི་ཚིགས་གསུམ་པར་མཛུབ་མོ་བཀུག་པའི་རྩེ་མོ་བཙུགས་པ། གཡོན་སྙིང་ག་དང་གཡས་དཀུར་བསྟེན་པ་ནི། རླུང་ལྷའི་ཕྱག་རྒྱ་ཡིན་ལ། དེ་ལས་གཡས་ཀྱི་མཐེ་བོང་གཡབ་པ་དང༌། ཕྱིར་བསྐྱེད་པ་ཡང་ངོ༌། རྡོ་རྗེ་ནང་བསྡམས་ལས་
མཐེ་ཆུང་གཤིབས་ཏེ་བརྐྱང་པ་དེ་སྲིན་ལག་བརྐྱང་ཞིང་རྩེ་མོར་སྦྱར་བའི་ནང་དུ་བཅུག་པ་ནི་གནོད་སྦྱིན་གྱི་ཕྱག་རྒྱ་སྟེ། དེ་ཉིད་ལས་གུང་མོ་བརྐྱང་ནས་གཡས་པ་དང༌། ཕྱིར་བསྐྱེད་པ་ཡང་ངོ༌། །རྡོ་རྗེ་ནང་བསྡམས་ལས་གུང་མོ་གཉིས་བརྐྱང་བའི་རྒྱབ་ཏུ་མཛུབ་མོ་གཉིས་ཀྱི་རྩེ་མོ་སྦྱར་བ་ཞེས་བྱ་སྟེ། གུང་མོའི་སེན་མོ་ལ་མཛུབ་མོ་རེག་པ་ཡིན་ལ། མཐེ་བོངགཉིས་སོ་སོའི་ཕྱོགས་ཀྱི་གུང་མོ་ལ་སྦྱར་བ་ནི། དབང་ལྡན་གྱི་ཕྱག་རྒྱ་སྟེ། དེ་ཉིད་ལས་མཛུབ་མོ་གཡབ་པ་དང་ཕྱིར་བསྐྱེད་པ་ཡང་ངོ༌། །མིག་སྟེང་དུ་ཕྱོགས་ཤིང་ཐལ་མོ་ཁོང་སྟོང་ནི། ཚངས་པའི་ཕྱག་རྒྱ་སྟེ། དེ་ལས་མཛུབ་མོ་གཡབ་པ་དང༌། ཕྱི་ལ་དྲག་ཏུ་བརྐྱང་པ་ཡང་ངོ༌། །སྐབས་འདིར་ཟླ་བ་དང་ཉི་མ་ནི་ཚངས་པའི་རྗེས་འབྲང་ཡིན་པའི་ཕྱིར། ཕྱག་རྒྱ་ལོགས་པ་མི་དགོས་སོ། །ལག་གཉིས་ཐལ་མོ་ཁོང་སྟོང་ལས་མཐེ་བོང་གཉིས་ནང་དུ་བཅུག་པ་ཐལ་མོའི་རྩེ་མོ་མཐུར་དུ་བསྟན་པ་ནི་ས་བདག་གི་ཕྱག་རྒྱ་ཡིན་ཏེ། མིག་ཐུར་དུ་བསྟན་ནས་མཛུབ་མོ་གཉིས་གཡབ་པ་དང༌། དེ་ཉིད་ཕྱིར་བསྐྱེད་པ་ཡང་ངོ༌། །སྐབས་འདིར་ཀླུ་དང་ལྷ་མིན་ཡང་ལྷའི་རྗེས་འབྲང་ཡིན་པས་ཕྱག་རྒྱ་ལ་སོགས་པ་མི་དགོས་སོ། །ཕྱོགས་གཏོར་དུ་བྱེད་ན་གཏོར་མ་བཅུ་བྱ་ལ། གཞན་ནི་ཇི་ལྟར་བདེ་བ་སྟེ་བསྡུ་ན་གཅིག་གིས་ཀྱང་ཆོག་གོ །གཏོར་མ་བྱིན་རླབས་སྒོས་སུ་དགོས་མི་དགོས་སྐབས་དང་སྦྱར། མཆོད་པ་བྱིན་རླབས་ཀྱང་དཀྱུས་བཞིན་བྱ། ན་མོ་བཛྲ་ཨ་སྱ་ཤི་བཛྲ་ཕཱ་ཎི་རཀྵ་
རཀྵ་སྭཱཧཱ། ཨེ་ཧྱེ་ཧཾ། དབང་པོ་དང༌། ཨོཾ་ཨགྣེ་ཀ་པི་ལ། ཨཱ་ཀ་སི་ལ་ཛྭ་ལ་ཛྭ་ལ། ད་ཧ་ད་ཧ་ཤི་ཥེ་ཏོ་ལི་བི་རུ་པཱཀྵ་སྭཱཧཱ། ཨེ་ཧྱེ་ཧི། མེ་ལྷ་དང༌། ཨོཾ་ཡ་མ་ཡ་སྭཱཧཱ། གཤིན་རྗེ་དང༌། ཨོཾ་སརྦ་བྷུ་ཏ་བྷ་ཡཾ་ཀ་ར་ཀུ་རུ་ཀུ་རུ་སྭཱཧཱ། སྲིན་པོ་དང༌། ཨོཾ་ཏྲི་ཏྲི་སུ་ཏྲ། ཏྲི་ཏྲི་ཤི་ཥེ། ཏོ་ལི་བི་རུ་པཀྵ་སྭཱཧཱ། ཆུ་ལྷ་དང༌། ཨོཾ་ཤྭ་ས་ཁ་ཁ་ཁུ་ཁ་སྭཱཧཱ། རླུང་ལྷ་དང༌། ཨོཾ་ཀུ་བེ་རཱ་ཡ་སྭཱཧཱ། གནོད་སྦྱིན་དང༌། ཨོཾ་ཛྲུཾ་ཛྲུཾ་ཤི་བ་སྭཱཧཱ། དབང་ལྡན་དང༌། ཨོཾ་ཨུརྡྷཾ་བྲ་ཧྨེ་སྭཱཧཱ། ཚངས་པ་དང༌། ཨོཾ་སུརྻ་གྲ་ཧ་ཨ་དྷི་པ་ཏ་ཡེ་སྭཱཧཱ། ཉི་མ་དང༌། ཨོཾ་ཙནྟྲ་ནཀྵ་ཏྲ་ཨ་ཏི་པ་ཏ་ཡེ་སྭཱཧཱ། ཟླ་བ་དང༌། ཨོཾ་ཨདྷོ་པྲི་ཐྭཱི་བྷྱཿསྭཱཧཱ། ས་ལྷ་དང༌། ཨོཾ་ཨ་སུ་རེ་སྭཱཧཱ། ལྷ་མ་ཡིན་དང༌། ཨོཾ་ནཱ་གེ་བྷྱཿསྭཱཧཱ། ཀླུ་རྣམས་ཏེ་དེ་དག་རེ་རེ་བཞིན་ཡང་ཨེ་ཧྱེ་ཧི་ཞེས་བཏགས་པའི་སྔགས་དང༌། གོང་དུ་བཤད་པའི་སྤྱན་འདྲེན་པའི་ཕྱག་རྒྱས་སྤྱན་དྲངས། ཨོཾ་ཀ་མ་ལ་ཡ་སྭཱཧཱ། གདན་ཕུལ། སྤྲོ་ན་ཞལ་ཕྱག་གི་རྣམ་པ་གསལ་འདེབས་ཤིང་ངག་ཏུ་བརྗོད། བསྡུ་ན་ཡིད་ཀྱིས་བསམ་པས་ཆོག སྔར་གྱི་སྔགས་ལ་ཨེ་ཧྱེ་ཧི་བོར་བ་རེ་རེ་བཞིན་ལན་གསུམ་གསུམ་སྔར་བཤད་པའི་དམ་ཚིག་གི་ཕྱག་རྒྱ་དང་བཅས་པས་དམ་ལ་བཞག །གོང་དུ་བཤད་པའི་སོ་སོའི་སྔགས་སམ། མཚན་སྔགས་ཙམ་གྱི་མཐར། ཨོཾ་ཨརྒྷཾ་པྲ་ཏཱིཙྪ་སྭཱཧཱ། ཨོཾ་གནྡྷེ་སྭཱཧཱ། པུཥྤེ། དྷུ་པེ། ནེ་བེ་ཏྱ་ཨ་ལོ་ཀེའི་བར་དུ་སྦྱར། སྤྱི་འགྲོས་ཀྱི་ལུགས་ལྟར་ན། སྔགས་རེ་རེའི་མཐར། ནམ་མཁའ་མཛོད་ཀྱི་སྔགས་སྦྱར་བ་ལན་གསུམ་
གསུམ་གྱིས་འབུལ། དམ་ཚིག་གསུམ་བཀོད་ཉིད་ལྟར་ན། སྔགས་རེ་རེའི་མཐར་ཐུན་མོང་མ་ཡིན་པའི་གཏོར་སྔགས་སྦྱར་ཏེ་འབུལ། ཐམས་ཅད་ཀྱི་ཐུན་མོང་དུ། ཨོཾ་དབང་བདག་འབྱུང་པོའི་བདག་པོར་བཅས་པ་ཡིས། །གཏོར་མ་ཕུལ་བ་འདི་དག་བཞེས་སུ་གསོལ། །མ་དང་སྲིན་པོ་གཤིན་རྗེ་ཆུ་བདག་དང༌། །རླུང་དང་ལུས་ངན་འབྱུང་པོའི་མགོན་དང་བཅས། །སྟེང་གི་ཉི་ཟླ་ཚངས་པ་ཆེན་པོ་དང༌། །ལྷ་རྣམས་ཀུན་དང་སའི་ཀླུ་རྣམས་དང༌། །རིའི་ལྷ་དང་གནོད་སྦྱིན་ཚོགས་རྣམས་ཀུན། །སོ་སོ་སོ་སོར་གཏོར་མ་ཕུལ་བ་རྣམས། །རབ་ཏུ་དགྱེས་པའི་ཡིད་ཀྱིས་བཞེས་ནས་ཀྱང༌། །རང་རང་ཕྱོགས་སུ་ལེགས་པར་བཞུགས་ནས་སུ། །རང་གི་བུ་སྨད་མཛའ་བཤེས་གཉེན་མདུན་དང༌། །ནང་མི་དམག་དང་དཔུང་བཅས་ཐབས་གཅིག་ཏུ། །མེ་ཏོག་དྲི་དང་བྱུག་པ་གཏོར་མ་བཅས། །འདི་རྣམས་བཏུང་ཞིང་ལེགས་པར་གསོལ་ནས་ཀྱང༌། །བདག་གི་ལས་འདི་འབྲས་བུ་མཆིས་པར་མཛོད་སྭཱཧཱ། ཤྲདྡྷ་ཀ་རའི་ཆ་གསུམ་གཏོར་ཆོག་ཏུ་དྲངས་པ་རྣམས་དང་དཔུང་བཟངས་སྔ་འགྱུར་གཉིས་ལ་འགྱུར་ཁྱད་ཁོ་ན་མ་ཡིན་པའི་ཁྱད་པར་འཕྲན་ཚེགས་འདུག་པ་ལས་འདིར་རྒྱུད་ལྟར་བྲིས་པའོ། །ཞེས་ལན་གསུམ། དབང་པོ་རྡོ་རྗེ་འཆང་བའི་ལྷ། ཞེས་སོགས་ཀྱིས་བསྟོད། ཡང་སྔགས་སོ་སོའམ་མཚན་སྔགས་སྡོམས་པའི་མཐར། ཨརྒྷཾ་པྲ་ཏཱིཙྪ་སྭཱཧཱ། དེ་རྗེས་སྤྲོ་ན། ཆོས་བཤད་བྱས་ཀྱང་ལོགས་ལ་བསྡུ་ན་མ་བྱས་ཀྱང་རུང་ངོ༌། །མཆོད་པ་རྣམས་མས་རིམ་གྱིས་བསྡུས་ནས་གཏོར་མའི་མགོ་
ལ་བླུག །རོལ་མོའི་སྒྲ་དང་བཅས་ཏེ་བསྐྱལ་ལོ། །སོ་སོའི་སྔགས་གྱི་མཐར། གཙྪ་གཙྪ་སྭཱ་སྠཱ་ནཾ། ཞེས་བརྗོད་ཅིང༌། གོང་དུ་བཤད་པའི་གཤེགས་གསོལ་གྱི་ཕྱག་རྒྱས་རང་གི་གནས་སུ་བཏང་ངོ༌། །འདི་ཕྱོགས་གཏོར་དུ་བྱེད་ན། ཕྱོགས་རེ་རེ་བཞིན་གཏོར་མ་བྱིན་རླབས་སྤྱན་འདྲེན་གདན་འབུལ་བསྐྱེད་ཆོག་དམ་ལ་བཞག་པ་མཆོད་པ་གཏོར་མ་བསྟོད་པ་གཤེགས་གསོལ་ཞེས་རིམ་པ་དེ་རྣམས་ཀྱི་དབྱེ་བ་སོ་སོར་ཕྲལ་རེ། ཕྱོགས་ཐ་དད་དུ་འབུལ་ལོ། །དེ་ལས་ཤར་གྱི་རྗེས་སུ་སྟེང་དང༌། ནུབ་ཀྱི་རྗེས་སུ་འོག་བྱེད་པ་ནི་ལག་ལེན་ནོ། །དེ་ནས་རྒྱལ་ཆེན་བཞིའི་གཏོར་མ་ནི། སོ་སོའི་དམ་རྫས་རྣམས་ཀྱང་བཤམས་ཤིང་བྱིན་གྱིས་རླབས། ཨོཾ་དྷྲི་ཏ་རཱཥྟ་ཡ་སྭཱཧཱ། ཨེ་ཧྱེ་ཧི། ཡུལ་འཁོར་སྲུང་དང༌། ཨོཾ་བི་རུ་དྷ་ཀཱ་ཡ་སྭཱཧཱ། ཨེ་ཧྱེ་ཧི། འཕགས་སྐྱེས་པོ་དང༌། ཨོཾ་བི་རུ་པཱཀྵཱ་ཡ་སྭཱཧཱ། ཨེ་ཧྱེ་ཧི། སྤྱན་མི་བཟང་དང༌། ཨོཾ་བཻ་ཤྲ་བ་ཎཱ་ཡ་སྭཱཧཱ། ཨེ་ཧྱེ་ཧི། རྣམ་ཐོས་བུ་རྣམས་སྤྱན་དྲངས། ཨོཾ་ཀ་མ་ལ་ཡེ་སྭཱ་ཧཱས་གདན་ཕུལ། སྤྲོ་ན་བར་འདིར་སྐུའི་རྣམ་པ་སྤྱི་དང་མཐུན་པར་བསྐྱེད་པའི་ཚིགས་རྣམས་ངག་ནས་བརྗོད། བསྡུ་ན་ཡིད་ཀྱིས་བསམ་པ་ཁོ་ནས་ཆོག །ཐལ་མོ་ཁོང་སྟོང་དུ་སྦྱར་བའི་ཕྱག་རྒྱ་ཁོ་ན་བསྟན་ཏེ། སོ་སོའི་སྔགས་རྣམས་རེ་རེ་བཞིན་ཚར་གསུམ་གསུམ་གྱིས་དམ་ལ་བཞག །མཚན་བཞི་པོ་སྦྲེལ་ནས་འགོར་ཨོཾ་དང༌། མཇུག་ཏུ་སྭཱཧཱ་སྦྱར་ནས། ཨོཾ་ཨརྒྷཾ་པྲ་ཏཱིཙྪ་སྭཱཧཱ་དང༌། དེ་བཞིན་དུ་སྦྱར་ནས། ཨོཾ་གནྡྷེ་སྭཱཧཱ། ལ་སོགས་པ་ཉེར་སྤྱོད་ཕུལ། ཨོཾ་དྷྲི་ཏ་རཥྟ་སྭཱཧཱ། ཞེས་སོགས་སྔགས་བཞི་པོ་རེ་རེའི་མཐར་ནམ་མཁའ་མཛོད་བཏགས་པའམ། འདི་ཉིད་ལས་བྱུང་བའི་བ་ལ་བ་ཏའི་གཏོར་སྔགས་བཏགས་པ་ལན་གསུམ་
གསུམ་གྱི་ཕུལ། རོལ་མོ་དང་བཅས་ཏེ། རྒྱལ་པོ་ཆེན་པོ་དཔལ་ལྡན་པ༴ སོགས་ཤོ་ལོ་ཀ་བཞིས་བསྟོད། དེ་ནས་ཤིས་པར་བརྗོད་དེ་ལས་བཅོལ་བྱེད་པ་ནི་འདི་སྐད་ཅེས། ཕྱག་འཚལ་སྐྱེས་བུ་དཔའ་ཁྱོད་ལ། །ཕྱག་འཚལ་སྐྱེས་བུ་མཆོག་ཁྱོད་ལ། །ཐལ་མོ་སྦྱར་ནས་ཕྱག་འཚལ་ལོ། །ཆོས་རྒྱལ་ཁྱོད་ལ་ཕྱག་འཚལ་ལོ། །སངས་རྒྱས་རྣམས་ལ་ཕྱག་འཚལ་ལོ། །རྐང་གཉིས་ཁྱེད་རྣམས་བདེ་ལེགས་ཤོག །རྐང་བཞི་ཁྱེད་རྣམས་བདེ་ལེགས་ཤོག །ལམ་དུ་ཞུགས་རྣམས་བདེ་ལེགས་ཤོག །ཕྱིར་འོད་དག་ཀྱང་བདེ་ལེགས་ཤོག །མཚན་མོ་བདེ་ལེགས་ཉིན་བདེ་ལེགས། །ཉི་མའི་གུང་ལ་བདེ་ལེགས་ཤོག །ཁྱེད་ཅག་ཀུན་ཏུ་བདེ་ལེགས་ཤོག །དེ་དག་སྡིག་པར་མ་གྱུར་ཅིག །ཉི་མ་ཐམས་ཅད་དགེ་བ་ཡིན། །རྒྱུ་སྐར་ཐམས་ཅད་བཟང་པོ་ཡིན། །སངས་རྒྱས་ཐམས་ཅད་རྫུ་འཕྲུལ་ཆེ། །དགྲ་བཅོམ་ཐམས་ཅད་ཟག་པ་མེད། །བདེན་པའི་ཚིག་ནི་འདི་རྣམས་ཀྱིས། །ཀུན་ཏུ་བདེ་ལེགས་འབྱུངའགྱུར་ཅིག །ཏདྱ་ཐཱ། ཧ་རི་ཧ་རི་ཎི་ཧ་རི་ཎི་ཙ་ལི་ཙ་ལི་ནི་ཙ་ལི་ནི་བྷྲ་མ་ཎི་བྷྲ་མ་ཎི། མོ་ཧ་ཎི་སྟི་བྷ་ནི། ཛམྦྷ་ནི་སྭ་ཡཾ་བྷུ་བེ་སྭཱཧཱ། རྒྱལ་པོ་ཆེན་པོ་ཡུལ་འཁོར་སྲུང་འཁོར་དང་བཅས་པ་ཐམས་ཅད་ཀྱི་བདག་ཅག་འཁོར་དང་བཅས་པ་ལ་སྲུང་པ་དང༌། འདོད་པའི་དོན་ཐམས་ཅད་སྒྲུབ་པར་མཛད་དུ་གསོལ། ལོ་བརྒྱ་འཚོ་བར་གྱུར་ཅིག །སྟོན་བརྒྱ་མཐོང་བར་གྱུར་ཅིག ཏདྱ་ཐཱ། སུ་སུ་རུ་སུ་སུ་རུ་སུ་སུ་རུ་སུ་སུ་རུ་མེ་སྭཱཧཱ། རྒྱལ་པོ་ཆེན་པོ་འཕགས་སྐྱེས་པོ་འཁོར་དང་བཅས་པ༴ ནས། མཐོང་བར་གྱུར་ཅིག་གི་བར་གོང་བཞིན།
ཏདྱ་ཐཱ། བེ་ལུ་གི་བེ་ལུ་གི་ཨ་མྲྀ་ཏ་གྷཱ་ཏ་ནི་བཱ་རུ་ཎ་བ་ཏི་སོ་མ་བ་ཏི་བེནྚ་མཱ་ལི་ནི་བེ་ལི་ནི་བེ་ལུ་ནེ་པུ་ཏྲི་ཀེ་ཙོ་ཙུ་ཙོ་ཙུ་སྭཱཧཱ། རྒྱལ་པོ་ཆེན་པོ་མིག་མི་བཟང་འཁོར་དང་བཅས་པ༴ སོགས་གོང་བཞིན། ཏདྱ་ཐཱ། བེ་དུ་རི་བེ་དུ་རི་བེ་དུ་རི་བེ་དུ་རི། མཊྚི་ཏེ་མཊྚི་ཏེ། ཀཽ་ཊི་ཀོ་ཊི། ཀཽ་ཊི་ཀོ་ཊི། བིདྱུ་མ་ཏི་བི་དྱུ་མ་ཏི། ཧུ་ཧུ་ཧུ་ཧུ་ཧུ་ཧུ་ཧུ་ཧུ། རུ་རུ་རུ་རུ་རུ་རུ་རུ་རུ། ཙུ་ཙུ་ཙུ་ཙུ་ཙུ་ཙུ་ཙུ་ཙུ། ཙ་ཙ་ཙ་ཙ་ཙ་ཙ་ཙ་ཙ། རྒྱལ་པོ་ཆེན་པོ་རྣམ་ཐོས་སྲས་འཁོར་དང་བཅས་པ༴ སོགས་གོང་བཞིན། ཤར་ཕྱོགས་ན་ནི་ཡུལ་འཁོར་སྲུང༌། །ལྷོ་ཕྱོགས་ན་ནི་འཕགས་སྐྱེས་པོ། །ནུབ་ཕྱོགས་ན་ནི་མིག་མི་བཟང༌། །བྱང་ཕྱོགས་ན་ནི་རྣམ་ཐོས་བུ། །རྒྱལ་པོ་ཆེན་པོ་འདི་བཞི་དག །འཇིག་རྟེན་སྐྱོང་བ་གྲངས་དང་ལྡན། ཕྱོགས་བཞི་དག་ནི་སྐྱོང་བར་བྱེད། །སྡེ་བོ་ཆེ་ལ་སྟོབས་པོ་ཆེ། །ཕ་རོལ་དགྲ་རྣམས་རབ་ཏུ་འཇོམས། །གཞན་གྱི་མི་ཐུབ་ཐུབ་པར་དཀའ། །རྫུ་འཕྲུལ་ལྡན་ཞིང་འོད་དང་ལྡན། ཁ་དོག་ལྡན་ཞིང་གྲགས་དང་ལྡན། །རྫུ་འཕྲུལ་ཆེན་པོ་ལྷ་མིན་དང༌། །ལྷ་ཡི་གཡུལ་ཡང་མྱོང་བར་བྱེད། །ཁྱེད་རྣམས་ཀྱིས་ཀྱང་བདག་ཅག་འཁོར་དང་བཅས་པ་ལ་སྲུང་བར་མཛོད་ཅིག །མཆོད་སྦྱིན་གཏོར་མ་འདི་བཞེས་ལ། ཞེས་སོགས་སྤྱི་དང་མཐུན་པར་འཕྲིན་ལས་བཅོལ། སྔགས་རེ་རེའི་མཐར། ཨརྒྷཾ་སྦྱར་ཏེ་མཆོད་ཡོན་ཕུལ། དྷྲི་ཏ་རཱཥྟ་ཡ་གཙྪ་གཙྪ་སྭ་སྠཱ་ནཾ། དེ་བཞིན་དུ་གཞན་ལའང་སྦྱར་ནས། རོལ་མོའི་སྒྲ་དང་བཅས་ཏེ་གཏོར་མ་ཕྱི་རོལ་དུ་བཏང་ངོ༌། །འདི་ལའང་ཕྱོགས་གཏོར་བྱེད་ན་སོ་སོར་ཕྲལ་ཏེ་བྱ། དེ་ལྟར་ན་དེ་དག་ནི། གཏོར་མ་རྣམས་མས་རིམ་ནས་གཏོང་བའི་དབང་དུ་བྱས་པ་ཡིན་ལ། །
ཡང་གཏོར་མའི་རིམ་པ་རྣམས་ཡས་རིམ་ནས་བཏང་ཀྱང༌། སྤྱི་འགྲོས་ཀྱི་ལག་ལེན་དང་མཐུན་ཞིང་མི་ལེགས་པ་མ་ཡིན་པས་ཇི་ལྟར་བདེ་བས་ཆོག་ཅིང༌། དེ་དག་ལས་ཇི་ལྟར་བདེ་བ་རེ་རེ་གཉིས་གཉིས་སོགས་དེ་དང་དེ་བསྒྲུབ་པར་བྱའོ། །འདིར་བརྗོད་པ་དམ་ཚིག་གསུམ་བཀོད་དཔལ་ལྡན་ཨ་ཏི་ཤ །དབང་ཕྱུག་རིན་ཆེན་ཤཱཀྱ་རྡོ་རྗེ་དང༌། །སངས་རྒྱས་འབུམ་དང་མང་མཁར་ལོ་ཙཱ་པ། །གཞོན་ནུ་འོད་དང་དོན་རི་གྲགས་ཆེན་པ། །འདི་ནི་བརྒྱུད་པའི་ཁྱད་པར་དང་པོ་ཡིན། ཁ་ཆེའི་མཁས་པ་ཡེ་ཤེས་རྡོ་རྗེ་དང༌། །པུ་རངས་ལོ་ཆུང་ས་ཆེན་ཀུན་སྙིང་དང༌། །རྗེ་བཙུན་གྲགས་རྒྱལ་ནུབ་པ་རིག་འཛིན་གྲགས། །ནམ་མཁའ་བསོད་ནམས་ནུབ་གོག་དར་གཞོན་པ། །སྟོན་པ་དོན་ཡོད་སློབ་དཔོན་རིན་རྒྱལ་བ། །གྲགས་ཆེན་བླ་མ་ཞེས་པའང་བརྒྱུད་པ་གཞན། །དཀོན་མཆོག་རྒྱལ་མཚན་གཞོན་ནུ་ཚུལ་ཁྲིམས་དང༌། །སྔགས་འཆང་ཚུལ་རྒྱལ་ནམ་མཁའ་སྨོན་ལམ་དང༌། །ལོ་གྲགས་ཆོས་ཀྱི་རྒྱལ་མཚན་ངག་དབང་གྲགས། །རྣམ་རྒྱལ་གྲགས་པ་ཚུལ་ཁྲིམས་མཆོག་གྲུབ་དང༌། །རྣམ་རྒྱལ་བཀྲ་ཤིས་མཁན་པོ་རྗེ་བཙུན་ཏེ། །ཡང་ན་རྣམ་རིན་ངག་དབང་རྣམ་པར་རྒྱལ། །བརྒྱུད་པའི་རིམ་པ་འདི་ལས་བྱུང་བ་ཡིན། །འདི་ལ་ལག་ལེན་བྱེད་ན་བྱ་རྒྱུད་ཀྱི། དཀྱིལ་འཁོར་ཆོ་ག་གང་ལའང་དཀའ་བ་མེད། །ཡང་སྨྲས་པ། འདི་ན་རྡོ་རྗེ་འཆང་ཞེས་གྲགས་པ་འགས། །སྤྱི་རྣམ་ཙམ་གྱི་ཁ་བཤད་བྲིས་མེད་ཀྱང༌། །ཀྲི་ཡའི་ཆོ་ག་ཕྱོགས་མཐོང་ཙམ་ཡང་མིན། །སྒྲུབ་ཐབས་གཅིག་ལའང་ལག་ལེན་ཁེལ་བ་མེད། །བྱ་རྒྱུད་ནུབ་པས་སྙིང་རླུང་ལངས་སོ་སྐད། །མཁས་ཆེན་འགའ་ལ་ར་མདའ་བྱས་ཀྱང་བསླུས། །ཞེས་སོགས་ཡུལ་དང་ངག་འཁྱལ་རྟག་སྨྲ་ཡང༌། །སུམ་པའི་འཕྲང་གི་རྣ་རོའི་དཔེ་དང་འདྲ། །ཆེན་པོ་རྣམས་ཀྱང་ཕལ་ཆེར་འདྲེས་མར་སྤྱོད། །
གོང་མའི་ལུགས་སུ་བཀྲལ་ན་མི་འགལ་ཡང༌། །འདྲེས་མའི་ལུགས་ལ་གཙང་མར་འཛིན་པ་འདི། །ལོག་ཤེས་ཡིན་ཕྱིར་མཁས་ལ་མི་མཛེས་སོ། །དམ་ཚིག་གསུམ་བཀོད་ཆོག་ཁྲིགས་རབ་གསལ་བ། །ལེགས་སྦྱར་དགེ་འདིས་མཐའ་དག་འགྲོ་བ་རྣམས། །རབ་མཆོག་དངོས་གྲུབ་ཚོགས་ཀྱི་དཔལ་འབར་བས། །ཤཱཀྱ་སེངྒེ་ཉིད་དང་མཚུངས་པར་ཤོག །ལྷ་དང་སྔགས་དང་ཆོ་ག་སྟེ། འདའ་བར་མི་བྱ་དམ་ཚིག་གསུམ། སྔགས་རིགས་ཀུན་གྱི་འཇུག་ངོགས་ཡིན། །འདི་འདྲ་ཐོབ་པའང་སྐལ་བ་བཟང༌། དམ་ཚིག་གསུམ་བཀོད་པའི་དཀྱིལ་འཁོར་གྱི་ཆོ་ག་བྱ་བའི་རྒྱུད་མཐའ་དག་ལ་འཇུག་པ་ཞེས་བྱ་བ་འདི་ཡང་ཏཱ་ར་ནཱ་ཐས་མི་མཐུན་པའི་ཕྱོགས་དང་སྡིག་པ་དང་སྡུག་བསྔལ་མ་ལུས་པ་ཟད་པའི་ལོ་ལ་སྦྱར་བའོ།། །།ཞུས་དག། བཀྲ་ཤིས། ། །