ཚེ་ཆོག་བདུད་རྩིའི་ཆུ་གཏེར།
ཚེ་ཆོག་བདུད་རྩིའི་ཆུ་གཏེར་བཞུགས།
ཨོཾ་སྭཱ་སྟི། གང་ཞིག་དྲན་པ་ཙམ་གྱིས་ཀྱང༌། །འཆི་མེད་ཚེའི་དཔལ་སྩོལ་བ། །བླ་མ་དང་ནི་ལྷག་པའི་ལྷ། །དབྱེར་མེད་དེ་ལ་གུས་པས་འདུད། །ཟབ་ཅིང་རྒྱ་ཆེ་དབྱེར་མེད་ཡེ་ཤེས་ནི། །ཤེས་བྱ་ཀུན་ཏུ་འཆར་བའི་སྣང་བ་དང༌། །ནམ་ཡང་གཞིག་ཏུ་མེད་པ་རྡོ་རྗེའི་ཚེ། །མཐའ་ཡས་དཔག་པར་དཀའ་བ་དེར་བཏུད་ནས། །གཉིས་སྣང་འཁྲུལ་པའི་དྲྭ་བ་འཆི་བདག་བདུད། །འཇོམས་བྱེད་ཐབས་མཁས་བདུད་རྩིའི་རྒྱ་མཚོ་ལས། །དབང་གི་ཆུ་བོས་རབ་གང་བུམ་བཟང་ཞིག །གང་འདིར་ལེགས་འདོད་རྣམས་ཀྱི་དཔལ་དུ་གྱུར། །འདིར་མཚན་བརྒྱ་རྩ་བརྒྱད་པའི་གཟུངས་ཀྱི་དཀྱིལ་འཁོར་གྱི་ཆོ་ག་ཛེ་ཏཱ་རིའི་ལུགས་ཉམས་སུ་བླང་བ་ལ། སྒྲུབ་པ་པོ་རང་ཉིད་ཀྱི་དོན་གཙོ་བོར་གྱུར་པ་བསྙེན་པའི་ཆོ་ག། རང་གཞན་གཉིས་ཀའི་དོན་དཀྱིལ་འཁོར་གྱི་བྱ་བ། གཞན་དོན་གཙོ་བོར་གྱུར་པ་འཆི་བསླུའི་ཆོ་ག་སྟེ་གསུམ་མོ། །དང་པོ་ནི། སྐྱབས་འགྲོ་སེམས་བསྐྱེད་སྤྱི་དང་མཐུན་པར་བྱས་ལ།
རང་སྐད་ཅིག་གིས་རྒྱལ་བ་ཚེ་དང་ཡེ་ཤེས་དཔག་ཏུ་མེད་པར་གསལ་བའི་ཐུགས་ཀར་ཟླ་བ་ལ་གནས་བའི་ཧྲཱིཿདམར་པོ། དེ་ལས་འོད་ཟེར་འཕྲོས། བླ་མ་དང་གཉིས་སུ་མེད་པའི་མགོན་པོ་ཚེ་དང་ཡེ་ཤེས་དཔག་ཏུ་མེད་པ་ལྷ་དགུའི་དཀྱིལ་འཁོར་ལ། སངས་རྒྱས་དང་བྱང་ཆུབ་སེམས་དཔའི་ཚོགས་དཔག་ཏུ་མེད་པས་བསྐོར་བ་མདུན་གྱི་ནམ་མཁར་ཨོཾ་བཛྲ་ས་མཱ་ཛཿ འཇིག་རྟེན་འདྲེན་པའི་གཙོ་བོ་ཚེ་དཔག་མེད། །དུས་མིན་འཆི་བ་མ་ལུས་འཇོམས་པའི་དཔལ། །མགོན་མེད་སྡུག་བསྔལ་གྱུར་པ་རྣམས་ཀྱི་སྐྱབས། །སངས་རྒྱས་ཚེ་དཔག་མེད་ལ་ཕྱག་འཚལ་ལོ། །ཨོཾ་སརྦ་ཏ་ཐཱ་ག་ཏ་ཨ་པ་ར་མི་ཏ། ཨཱ་ཡུར་ཛྙཱ་ན་ས་པཱ་རི་ཝཱ་ར་ཨརྒྷཾ་པྲ་ཏཱིཙྪ་སྭཱཧཱ། དེ་བཞིན་དུ། པཱདྱཾ༴ ཨོཾ་སརྦ་ཏ་ཐཱ་ག་ཏ་ཨ་པ་ར་མི་ཏ། ཨཱ་ཡུར་ཛྙཱ་ན་ས་པཱ་རི་ཝཱ་ར་བཛྲ་པུཥྤེ་ཨཱཿཧཱུཾ།
དེ་བཞིན་དུ། དྷཱུ་པེ། ཨཱ་ལོ་ཀེ །གནྡྷེ། ནཻ་ཝི་ཏྱེ། ཤཔྟ་ཨཱཿཧཱུཾ། དཀོན་མཆོག་གསུམ་ལ་བདག་སྐྱབས་མཆི། སོགས་རྒྱུན་བཤགས་ལན་གསུམ་བྱ། སེམས་ཅན་ཐམས་ཅད་བདེ་བ་དང་བདེ་བའི་རྒྱུ་དང་ལྡན་པར་གྱུར་ཅིག །སོགས་ཚད་མེད་བཞི་བསྒོམ། ཨོཾ་སྭ་བྷཱ་ཝ་ཤུདྡྷཿསརྦ་དྷརྨཿསྭ་བྷཱ་ཝ་ཤུདྡྷོ྅ཧཾ། ཨོཾ་ཤཱུ་ནྱ་ཏ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། སྟོང་པའི་ངང་ལས། པད་ཉི་ལས་བྱུང་བའི་རྡོ་རྗེའི་ས་གཞི། ར་བ། དྲྭ་བ། གུར་བླ་རེ། ཡེ་ཤེས་ཀྱི་མེ་འབར་བ་དང་བཅས་པའི་བསྲུང་བའི་འཁོར་ལོ་ཡངས་ཤིང་རྒྱ་ཆེའི་ནང་དུ། པཾ་ལས་སྣ་ཚོགས་པདྨ་འདབ་མ་འབུམ་དང་ལྡན་པའི་ལྟེ་བར། རཾ་ལས་ཉི་མའི་དཀྱིལ་འཁོར་གྱི་སྟེང་དུ། ཧཱུཾ་ལས་བྱུང་བའི་སྣ་ཚོགས་རྡོ་རྗེ་རྭ་བཅུ་གཉིས་པ། ཤར་སྔོ། ལྷོ་སེར། ནུབ་དམར། བྱང་ལྗང༌། དབུས་དཀར་བ། དེའི་སྟེང་དུ་བྷྲཱུཾ་ལས་རིན་པོ་ཆེ་སྣ་ཚོགས་ལས་གྲུབ་པའི་གཞལ་ཡས་ཁང་པ་གྲུ་བཞི་པ། སྒོ་བཞི་པ། ནང་ནས་རིམ་པ་བཞིན་དུ་དཀར་སེར་དམར་ལྗང་སྔོ་བའི་རྩིག་པ་རིམ་པ་ལྔ་དང་ལྡན་པ། དེའི་སྟེང་ན་རིན་པོ་ཆེའི་ཕ་གུ་སེར་པོས་བསྐོར་བ། དེའི་སྟེང་ན་རིན་པོ་ཆེའི་བྲེ་ཕུལ་དང་གསེར་གྱི་སྐེ་རགས་བཞིའི་ཕྱི་ངོས་ན། ཆུ་སྲིན་མ་ཀ་རའི་ཁ་ནས་འཕྱང་བའི་མུ་ཏིག་གི་དྲ་བ་དང༌། དྲ་བ་ཕྱེད་པ་དང༌། མེ་ཏོག་གི་འཕྲེང་བ་ལ་སོགས་པ་དཔྱངས་པ། དེའི་སྟེང་དུ་འདའ་ཡབ་དང༌། པུ་ཤུས་བསྐོར་བ། རྩིག་པའི་ཕྱི་རོལ་དུ་འདོད་ཡོན་གྱི་སྣམ་བུ་དམར་པོས་བསྐོར་བ་ལ་མཆོད་པའི་ལྷ་མོ་བཅུ་
དྲུག་འཁོད་པ། སྒོ་ཁང་སོ་སོའི་སྟེང་དུ་ཀ་བ་བཞི་བཞིས་བཏེག་པའི་རྟ་བབས་བང་རིམ་བཞི་དང་ལྡན་པའི་རྩེ་མོར་པདྨ་ལ་གནས་པའི་ཆོས་ཀྱི་འཁོར་ལོ་དང༌། གདུགས་དང་རི་དྭགས་དང་བཅས་པ། སྒོ་དང་སྒོ་ཁྱུད་ཀྱི་མཚམས་དང་གྲྭ་བཞིར་ཟླ་ཕྱེད་རྡོ་རྗེ་དང་ནོར་བུ་ཅན་རྒྱན་ཐམས་ཅད་ཀྱིས་རྣམ་པར་བརྒྱན་ཞིང་ཕྱི་ནང་ཀུན་དུ་འོད་གསལ་བ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་ཡེ་ཤེས་དང༌། སྨོན་ལམ་རྒྱ་མཚོའི་མཐུ་ལས་གྲུབ་པ་རྒྱ་དང་ཚད་ཡོངས་སུ་ཆད་པ་མེད་པ། དེའི་ནང་ཀ་བ་བརྒྱད་དང་ལྡན་པའི་སྟེང་རྡོ་རྗེའི་གདུང་ཟླུམ་པོ་དང༌། དེའི་སྟེང་དུ་རྡོ་རྗེའི་ཐལ་གདུང་བཞིས་མིག་མངས་རིས་སུ་བྲིས་ཤིང་མཛེས་པར་ཕུབ་པ། དབུས་ཕྱུར་བུར་གྱུར་བའི་རྩེ་མོར་རྡོ་རྗེ་རིན་པོ་ཆེའི་ཏོག་གིས་སྤྲས་པ། དེ་ལྟ་བུའི་གཞལ་ཡས་ཁང་གི་ནང་གི་ལྷ་སྣམ་ཤར་སྔོ། ལྷོ་སེར་ནུབ་དམར། བྱང་ལྗང་བ་ལ་བཀྲ་ཤིས་ཀྱི་བུམ་པ་བརྒྱད་དང་བཅས་པ། དབུས་དཀར་བའི་སྟེང་དུ་སྡོང་བུ་ཅུང་ཟད་དང་བཅས་པའི་སྣ་ཚོགས་པདྨ་འདབ་མ་བརྒྱད་པ། དེའི་ལྟེ་བར་ཟླ་བའི་དཀྱིལ་འཁོར་གྱི་སྟེང་དུ། ཧྲཱིཿཡིག་དམར་པོ། དེ་ལས་འོད་ཟེར་འཕྲོས། འཕགས་པ་མཆོད། སེམས་ཅན་ཐམས་ཅད་ཀྱི་དོན་བྱས། སླར་འདུས་ཏེ་ཐིམ་པ་ཡོངས་སུ་གྱུར་པ་ལས། རང་ཉིད་བཅོམ་ལྡན་འདས་དེ་བཞིན་གཤེགས་པ། དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྒྱལ་བ་ཚེ་དང་ཡེ་ཤེས་དཔག་ཏུ་མེད་པ། ཤིན་དུ་རྣམ་པར་
ངེས་པ་གཟི་བརྗིད་ཀྱི་རྒྱལ་པོ་སྐུ་མདོག་པདྨ་རཱ་གའི་ལྷུན་པོ་ལ་ཉི་མ་འབུམ་དུས་ཅིག་ཏུ་ཤར་བ་ལྟར་རབ་ཏུ་དམར་ཞིང༌། འོད་ཟེར་དཔག་ཏུ་མེད་པ་འཕྲོ་བ། ཞི་ཞིང་འཛུམ་ལ་ཆགས་པའི་ཉམས་དང་ལྡན་པ། ཞལ་གཅིག་ཕྱག་གཉིས་མཉམ་བཞག་གི་ཕྱག་རྒྱ་མཛད་པའི་སྟེང་ན་འཆི་མེད་ཡེ་ཤེས་ཀྱི་བདུད་རྩིས་ཕྱུར་བུར་གང་བའི་རིན་པོ་ཆེའི་བུམ་པ་ལོ་འབྲས་ཕུན་སུམ་ཚོགས་པ་དང་བཅས་པའི་དཔག་བསམ་གྱི་ཤིང་གི་ཁ་རྒྱན་ཅན་འཛིན་པ། བུང་བ་ལྟར་གནག་པའི་དབུ་སྐྲ་རལ་པའི་ཐོར་ཚུགས་ཅན་ཞབས་གཉིས་རྡོ་རྗེའི་སྐྱིལ་མོ་ཀྲུང་གིས་བརྟན་པོར་བཞུགས་པ། དར་སྣ་ཚོགས་པའི་ཤམ་ཐབས་དང་སྟོད་གཡོགས་ཅན། སྐུ་ལ་ཚེ་སྤེལ་བའི་ནོར་བུ་དུ་མས་རྣམ་པར་སྤྲས་པ་སྟེ། རིན་པོ་ཆེའི་དབུ་རྒྱན། སྙན་རྒྱན། མགུལ་རྒྱན། དོ་ཤལ། དཔུང་རྒྱན། ཕྱག་གདུབ། ཞབས་གདུབ། མུ་ཏིག་གི་སེ་མོ་དོ་ལ་སོགས་པ་རྒྱན་ཐམས་ཅད་ཀྱིས་བརྒྱན་པ། བསམ་གྱིས་མི་ཁྱབ་ཅིང་ལྷུན་གྱིས་གྲུབ་པའི་མཛད་པ་རྒྱུན་མི་འཆད་པར་སྤྱོད་པའོ། །སྤྱི་བོར་ཨོཾ། མགྲིན་པར་ཨཱཿ ཐུགས་ཀར་ཧཱུཾ། ཐུགས་ཀའི་དབུས་སུ་ཟླ་བ་ལ་གནས་པའི་ཧྲཱིཿཡིག་དམར་པོ། དེ་ལས་འོད་འཕྲོས། རང་བཞིན་གྱི་གནས་ནས། སངས་རྒྱས་དང་བྱང་ཆུབ་སེམས་དཔའ་ཐམས་ཅད་གཅིག་ཏུ་འདུས་པ་རྒྱལ་བ་ཚེ་དཔག་མེད་ཀྱི་རྣམ་པར་ཨོཾ་བཛྲ་ས་མཱ་ཛཿ གོང་བཞིན་མཆོད། ཛཿཧཱུཾ་བཾ་ཧོཿ ཡེ་ཤེས་སེམས་དཔའ་རང་དང་གཉིས་སུ་མེད་པར་ཐིམ། སླར་ཡང་
ཐུགས་ཀའི་ཧྲཱིཿལས་འོད་འཕྲོས་དབང་གི་ལྷ་རྒྱལ་བ་རིགས་ལྔ་འཁོར་དང་བཅས་པ་ཨོཾ་བཛྲ་ས་མཱ་ཛཿ ཨོཾ་སརྦ་ཏ་ཐཱ་ག་ཏ་པཉྩ་ཀུ་ལ་ས་པཱ་རི་ཝཱ་ར་ཨརྒྷཾ་ནས་ཤཔྟའི་བར་གྱིས་མཆོད། ཨོཾ་སརྦ་ཏ་ཐཱ་ག་ཏ་ཨབྷི་ཥིཉྩ་ཏུ་མཾ། ཞེས་གསོལ་བ་བཏབ་པས། དབང་གི་ལྷ་རྣམས་ཀྱིས། ཇི་ལྟར་བལྟམས་པ་ཙམ་གྱིས་ནི། །ལྷ་རྣམས་ཀྱིས་ནི་ཁྲུལ་གསོལ་ལྟར། །ལྷ་ཡི་ཆུ་ནི་དག་པ་ཡིས། །དེ་བཞིན་བདག་གིས་སྐུ་ཁྲུས་གསོལ། །ཨོཾ་སརྦ་ཏ་ཐཱ་ག་ཏ་ཨབྷི་ཥེ་ཀ་ཏ་ས་མ་ཡ་ཤྲཱི་ཡེ་ཧཱུཾ། ཞེས་གསུངས་ཞིང་བུམ་པའི་ཆུས་སྤྱི་བོ་ནས་དབང་བསྐུར། ཡེ་ཤེས་ཀྱི་ཆུས་ལུས་ཀྱི་ནང་ཐམས་ཅད་གང་བས། འཁོར་བ་ཐོག་མ་མེད་པ་ནས་བསགས་པའི་སྡིག་སྒྲིབ་ཐམས་ཅད་དག །དབང་ཐམས་ཅད་ཐོབ། ཆུའི་ལྷག་མ་ཡར་ལུད་པ་ལས། འོད་དཔག་ཏུ་མེད་པས་དབུ་བརྒྱན། རང་གི་ཐུགས་ཀའི་ཧཱུཾ་ཡིག་ལས་འོད་འཕྲོས། སངས་རྒྱས་དང་བྱང་ཆུབ་སེམས་དཔའ་ཐམས་ཅད་མཉེས་པར་བྱས། སེམས་ཅན་ཐམས་ཅད་ཀྱི་སྡིག་སྒྲིབ་སྦྱངས། རྒྱལ་བ་ཚེ་དང་ཡེ་ཤེས་དཔག་ཏུ་མེད་པའི་གོ་འཕང་ལ་བཀོད། སྣོད་ཀྱི་འཇིག་རྟེན་ལ་ཕོག །ཡེ་ཤེས་ཀྱི་གཞལ་མེད་ཁང་དུ་གྱུར། འོད་ཟེར་སླར་འདུས་རང་ལ་ཐིམ། ཐུགས་ཀའི་ཧྲཱིཿཡིག་ལ་སྔགས་ཀྱི་འཕྲེང་བས་བསྐོར་བ་ལ་འོད་ཟེར་སྤྲོ་བསྡུའི་དམིགས་པ་དང་བཅས་བཟླ་བར་བྱའོ། །ཨོཾ་ན་མོ་བྷྲཱུཾ་ཨཱ་ཡུར་ཛྙཱ་ན་ཧྲཱིཿཨ་རོ་ལི་ཀ་ཧཱུཾཿ སྙིང་པོའོ། །ཏདྱ་ཐཱ་ཨ་པ་ར་མི་ཏ་ཨཱ་ཡུར་ཛྙཱ་ན་ཧྲཱིཿཧཱུཾ་
བྷྲཱུཾ་སྭཱཧཱ། ཉེ་སྙིང་ངོ༌། །ཨོཾ་ན་མོ་བྷ་ག་ཝ་ཏེ། ཨ་པ་ར་མི་ཏ། ཨ་ཡུར་ཛྙཱ་ན། སུ་བི་ནི་ཙིཏྟ་ཏེ་ཛོ་རཱ་ཛ་ཡ། ཏ་ཐཱ་ག་ཏ་ཡ། ཨརྟ་ཏེ་སཾ་མྱཀ་སཾ་བུདྡྷ་ཡ། ཏདྱ་ཐཱ། ཨོཾ་པུ་ཎྱེ་པུ་ཎྱེ་མཧཱ་པུཎྱེ་ཨ་པ་ར་མི་ཏ་པུཎྱེ་ཨ་པ་ར་མི་ཏ་པུཎྱེ། ཛྙཱ་ན་སཾ་བྷ་རོ་པ་ཙིཏྟེ། ཨོཾ་སརྦ་སཾ་ཀ་རི་པ་རི་ཤུདྡྷ། དྷརྨ་ཏེ་ག་ག་ན་ས་མུངྒ་ཏེ། སྭ་བྷཱ་ཝ་བི་ཤུདྡྷ་མཧཱ་ནཱ་ཡ་པ་རི་ཝཱ་རེ་སྭཱཧཱ། ཞེས་པ་ནི་གཟུངས་རིངས་ཏེ་རྩ་བའི་སྔགས་སོ། །དེ་དག་ཀྱང་དང་པོ་གཉིས་འབྲུ་འབུམ་དང༌། ཕྱི་མ་ཁྲི་ཕྲག་ཏུ་བཟླས་པས་བསྙེན་པའོ། །ཐུན་གྱི་མཐར་བྱིན་གྱིས་རླབས་པ་བསྒོམ་པ་ནི། རང་གི་སྙིང་ཁར་པདྨ་འདབ་མ་བཞི་པའི་ལྟེ་བ་ལ་རྣམ་པར་སྣང་མཛད་ཚེ་དཔག་མེད། འདབ་མ་བཞི་ལ། ཤར་དུ་རྡོ་རྗེ་ཚེ་དཔག་མེད། ལྷོར་རིན་ཆེན་ཚེ་དཔག་མེད། ནུབ་ཏུ་པདྨ་ཚེ་དཔག་མེད། བྱང་དུ་ལས་ཀྱི་ཚེ་དཔག་མེད། སྤྱི་བོར་ཡེ་ཤེས་ཚེ་དཔག་མེད། སྙིང་ཁའི་ཧྲཱིཿལས་འོད་ཟེར་འཕྲོས། སངས་རྒྱས་བྱང་ཆུབ་སེམས་དཔའ་ཐམས་ཅད་ཀྱི་ཐུགས་ཀ་ནས་འཆི་མེད་ཡེ་ཤེས་ཀྱི་བདུད་རྩི་སྤྱན་དྲངས། སྤྱི་བོའི་ཡེ་ཤེས་ཚེ་དཔག་མེད་ལ་ཐིམ་པས། དེ་ཉིད་འཆི་མེད་ཡེ་ཤེས་ཀྱི་བདུད་རྩིའི་རང་བཞིན་དུ་ཞུ་སྟེ། སྤྱི་བོའི་ཚངས་བུག་ནས་ཞུགས། སྙིང་ཁའི་རིགས་ལྔ་ཚེ་དཔག་མེད་ལ་ཐིམ་པས། དེ་རྣམས་ཀྱང་འཆི་མེད་ཡེ་ཤེས་ཀྱི་བདུད་རྩིའི་རང་བཞིན་དུ་ཞུ། ལུས་ཀྱི་ནང་ཐམས་ཅད་གང་བས་སྡིག་སྒྲིབ་ཐམས་ཅད་དག །འཆི་མེད་ཚེའི་དངོས་གྲུབ་ཐོབ་པར་གྱུར། གོང་གི་སྔགས་གསུམ་
པོ་ལན་རེ་བརྗོད་དོ། །བདག་ཉིད་ཀྱི་ཡེ་ཤེས་སེམས་དཔའ་མདུན་གྱི་ནམ་མཁར་བཞུགས་གོང་ཚོགས་ཞིང་གི་སྐབས་ལྟར་མཆོད་བསྟོད་བྱས་ལ། བཅོམ་ལྡན་འདས་བདག་དང་སེམས་ཅན་ཐམས་ཅད་ལ་མཆོག་དང་ཐུན་མོང་གི་དངོས་གྲུབ་མ་ལུས་པ་སྩལ་དུ་གསོལ། ཁྱད་པར་དུ་ཡང་བདག་ལ་འཆི་བ་མེད་པ་ཚེའི་དངོས་གྲུབ་ད་ལྟ་ཉིད་དུ་སྩལ་དུ་གསོལ། ཕྱི་ནང་གི་བར་དུ་གཅོད་པ་ཐམས་ཅད་ཉེ་བར་ཞི་ནས། བླ་ན་མེད་པའི་བྱང་ཆུབ་ད་ལྟ་ཉིད་དུ་ཐོབ་པར་མཛད་དུ་གསོལ། ཞེས་གསོལ་བ་བཏབ། ཨོཾ་བཛྲ་སཏྭ་ས་མ་ཡ། སོགས་ཡིག་རྒྱ་ལན་གསུམ། མ་འབྱོར་པ་དང་ཉམས་པ་དང༌། །གང་ཡང་བདག་རྨོངས་བློ་ཡིས་ནི། །བགྱིས་པ་དང་ནི་བགྱིས་སྩལ་བ། །དེ་ཀུན་མགོན་པོས་བཟོད་པར་གསོལ། །ཨོཾ་ཁྱོད་ཀྱི་སེམས་ཅན་དོན་ཀུན་མཛད། །རྗེས་སུ་མཐུན་པའི་དངོས་གྲུབ་སྩོལ། །སངས་རྒྱས་ཡུལ་དུ་གཤེགས་ནས་ཀྱང༌། །སླར་ཡང་འབྱོན་པར་མཛད་དུ་གསོལ། བཛྲ་མུཿ ཞེས་ཡེ་ཤེས་པ་གཤེགས། གཞལ་ཡས་ཁང་འོད་དུ་ཞུ་བ་རང་ལ་ཐིམ། དགེ་བ་བསྔོ་ཞིང་ཐུན་མཚམས་ཀྱི་སྤྱོད་ལམ་ལ་འཇུག་གོ། གཉིས་པ་རས་བྲིས་ལ་རྟེན་པའི་ཆོ་གའི་བྱ་བ་རྒྱས་པར་བཤད། རྡུལ་ཚོན་ལ་རྟེན་པའི་ཆོ་གའི་ཁྱད་པར་དབྱེ་བའོ། །དང་པོ་ལ་དཀྱིལ་འཁོར་སྒྲུབ་ཅིང་མཆོད་པ་དང༌། བདག་ཉིད་འཇུག་པ་དང༌། དབང་བསྐུར་བའོ། །དང་པོ་ནི། སྟེགས་བུ་བཟང་པོ་ལ་དཀྱིལ་འཁོར་ཤར་ཕྱོགས་སུ་ཞལ་བསྟན་ཏེ་བཀྲམ་འཇིག་རྟེན་འདས་པའི་གཏོར་མ་དང༌། མཆོད་པ་རྒྱ་
ཆེར་བཤམས། ཕྱི་རོལ་ཕྱོགས་བཞིར་རྒྱལ་ཆེན་བཞིའི་གཏོར་མ་བཤམས། ཤར་དུ་དྲི་བཟང་དང་ཁྲག་བླུག་པ། ལྷོར་ཉ་ཤ་དང་ལ་ཕུག །ནུབ་ཏུ་འོ་མ་དང་སྨན། བྱང་དུ་ཤིང་ཏོག་དང་ཆང་བླུག་པ་རྣམས་སོ། །ཡི་གེ་ཕལ་ཆེར་ན། འདིའི་ཤར་ནུབ་གོ་རྗེས་པར་ཡོད་ནའང༌། ལྷ་དང་གཏོར་མ་ཕྱོགས་མཐུན་པར་བཤམས་པའི་ལུགས་སུ་འདུག་པས། འདི་ཁོ་ནས་འོས་ཤིང༌། གལ་ཏེ་ཤར་གྱི་ལྷའི་གཏོར་མ་ནུབ་ཏུ་བཤོམས་པ་སོགས་ཡིན་ན། ལྷོ་བྱང་གཉིས་ཀྱང་བསྒྱུར་དགོས་སོ། །ཆ་གསུམ་གཏོར་མ་ཕྱོགས་གང་འོས་ཅིག་ཏུ་བཤམས་ཤིང༌། བུམ་པ་བཅུའམ་གཉིས་སྤྱི་དང་མཐུན་པར་བཤམས། མིག་དར་མེ་ཏོག །རྒྱལ་སྲིད་སྣ་བདུན་གྱི་གཟུགས་བརྙན། བཀྲ་ཤིས་རྫས་བརྒྱད་སོགས་འོག་ཏུ་དགོས་པ་རྣམས་ཚོགས་པར་བྱའོ། །ཐོག་མར་མཆོད་པ་བྱིན་རླབས་བྱ་སྟེ། ཨོཾ་ཨ་མྲྀ་ཏ་ཀུནྚ་ལི་ཧ་ན་ཧ་ན་ཧཱུཾ་ཕཊ། ཀྱིས་བསངས། སྭ་བྷཱ་ཝས་སྦྱངས། སྟོང་པའི་ངང་ལས་བྷྲཱུཾ་ལས་བྱུང་བའི་རིན་པོ་ཆེའི་སྣོད་ཡངས་ཤིང་རྒྱ་ཆེ་བ་རྣམས་ཀྱི་ནང་དུ། ཨོཾ་ཞུ་བ་ལས་བྱུང་བའི་ལྷ་རྫས་ལས་གྲུབ་པའི་མཆོད་ཡོན། ཞབས་བསིལ། མེ་ཏོག །བདུག་སྤོས། མར་མེ། དྲི་ཆབ། ཞལ་ཟས། རོལ་མོ། གཟུགས་སྒྲ་དྲི་རོ་རེག་བྱ་ལ་སོགས་པ་མཆོད་པའི་ཡོ་བྱད་བསམ་གྱིས་མི་ཁྱབ་པ་ནམ་མཁའི་མཐའ་ཀླས་པར་གྱུར། ཨོཾ་བཛྲ་ཨརྒྷཾ་སྭཱཧཱ། བཛྲ་པཱ་དྱཾ་སྭཱཧཱ། ཨོཾ་བཛྲ་པུཥྤེ་ཨཱཿཧཱུཾ། ནས་ཤཔྟ་ཨཱཿཧཱུཾ། ཨོཾ་དྷརྨཱ་ར་ཎི་ཏ་སོགས་ཀྱིས་རོལ་མོ་བྱིན་དབབ། སྐྱབས་འགྲོ་ནས་བྱིན་རླབས་ཡན་ཆད་བདག་བསྐྱེད་གོང་བཞིན་བྱ། མདུན་བསྐྱེད་
ཨ་མྲྀ་ཏས་བསངས། སྭ་བྷཱ་ཝས་སྦྱངས། སྟོང་པའི་ངང་ལས། ཧཱུཾ་ལས་བྱུང་བའི་རྡོ་རྗེའི་ས་གཞི་ནས། སྡོང་བུ་ཅུང་ཟད་དང་བཅས་པའི་སྣ་ཚོགས་པདྨ་འདབ་མ་བརྒྱད་པ། དེའི་ལྟེ་བ་དང་འདབ་མ་བརྒྱད་ལ་ཟླ་བའི་དཀྱིལ་འཁོར་གྱི་སྟེང་དུ་ཧྲཱིཿདམར་པོ་རེ་རེ། དེ་ལས་འོད་འཕྲོས་ནས་ཡོངས་སུ་གྱུར་པ་ལས། དབུས་སུ་རྣམ་པར་སྣང་མཛད་ཚེ་དང་ཡེ་ཤེས་དཔག་ཏུ་མེད་པ། ཤར་དུ་རྡོ་རྗེ་ཚེ་དཔག་མེད། ལྷོ་རུ་རིན་ཆེན་ཚེ་དཔག་མེད། ནུབ་ཏུ་པདྨ་ཚེ་དཔག་མེད། བྱང་དུ་ལས་ཀྱི་ཚེ་དཔག་མེད། བྱང་ཤར་དུ་ཀུན་གཟིགས་ཚེ་དཔག་མེད། ཤར་ལྷོ་ཡོན་ཏན་ཚེ་དཔག་མེད། ལྷོ་ནུབ་ཏུ་ཡེ་ཤེས་ཚེ་དཔག་མེད། ནུབ་བྱང་དུ་མི་གཡོ་ཚེ་དཔག་མེད། ཐམས་ཅད་ཀྱང་སྐུ་མདོག་ནས། སྤྱོད་པའོ། །ཐམས་ཅད་ཀྱི་སྤྱི་བོར་ཨོཾ་ནས་ཧྲཱིཿཡིག་དམར་པོ་དེ་ལས་འོད་འཕྲོས། རང་བཞིན་གྱི་གནས་ནས། བཅོམ་ལྡན་འདས་རྒྱལ་བ་ཚེ་དང་ཡེ་ཤེས་དཔག་ཏུ་མེད་པ་ལྷ་དགུའི་དཀྱིལ་འཁོར་ལ། སངས་རྒྱས་བྱང་ཆུབ་སེམས་དཔའི་ཚོགས་ཐམས་ཅད་ཀྱིས་བསྐོར་བ་ཨོཾ་བཛྲ་ས་མཱ་ཛཿ མ་ལུས་སེམས་ཅན་ཀུན་ཀྱི་མགོན་གྱུར་ཞིང༌། ནས། ཡོངས་དག་འཁོར་དང་བཅས་ཏེ་གཤེགས་སུ་གསོལ། ཨོཾ་སརྦ་ཏ་ཐཱ་ག་ཏ་ཨཱ་པ་ར་མི་ཏ། ཨཱ་ཡུར་ཛྙཱ་ན། ས་པཱ་རི་ཝ་ར་ཨེཧྱ་ཧི། ཨ་མྲྀ་ཏ་ལན་གསུམ་གྱིས་ཕྱི་འབྲང་གི་བགེགས་བསྐྲད། བཅོམ་ལྡན་འདིར་ནི་བྱོན་པ་ལེགས། །བདག་ཅག་བསོད་ནམས་སྐལ་བར་
ལྡན། །བདག་གི་མཆོད་ཡོན་བཞེས་ནས་ཀྱང༌། །ཐུགས་ལ་དགོངས་བཞིན་གནང་བར་མཛོད། །ཨོཾ་སརྦ་ཏ་ཐཱ་ག་ཏ་པྲ་ཝ་ར་སཏྒ་ར་ཨརྒྷཾ་པྲ་ཏཱིཙྪ་སྭཱཧཱ། ཇི་ལྟར་བལྟམས་པ༴ ནས། ཤྲཱི་ཡེ་ཧཱུཾ། བདག་དང་འགྲོ་ལ་ཐུགས་བརྩེའི་ཕྱིར། །ཉིད་ཀྱི་རྫུ་འཕྲུལ་མཐུ་ཡི་ནི། །ཇི་སྲིད་མཆོད་པ་བདག་བགྱིད་ན། །དེ་སྲིད་བཅོམ་ལྡན་བཞུགས་སུ་གསོལ། །ཨོཾ་པདྨ་ཀ་མ་ལ་ཡ་སྟྭཾ། ཨོཾ་བཛྲ་པུཥྤེ་ནས། ནཻ་ཝི་དྱེའི་བར་གྱིས་མཆོད། ཛཿཧཱུཾ་བཾ་ཧོཿ གཉིས་སུ་མེད་པར་ཐིམ། སླར་ཡང་ཐུགས་ཀའི་ཧྲཱིཿལས་འོད་འཕྲོས་ནས་ཡར་ལུད་པ་ལས། གཙོ་འཁོར་ཐམས་ཅད་ལ་འོད་དཔག་ཏུ་མེད་པས་དབུ་བརྒྱན། དེ་ནས་གོང་དུ་བཤད་པའི་སྔགས་གསུམ་པོ་ཅི་ནུས་སུ་བཟླས་ལ། མཐར། རྟེན་དང་བརྟེན་པར་བཅས་པའི་དཀྱིལ་འཁོར་བ་ཐམས་ཅད་བརྟན་པར་བཞུགས་ནས། བདག་དང་སེམས་ཅན་ཐམས་ཅད་ལ་མཆོག་དང་ཐུན་མོང་གི་དངོས་གྲུབ་མ་ལུས་པ་སྩལ་དུ་གསོལ། ཞེས་བརྗོད་ལ། གོང་ལྟར་མཆོད་པ་བྱིན་རླབས་བྱ་བ་ལས། རོལ་མོ་བྱིན་དབབ་མི་དགོས་སོ། །དེ་ནས་ཕྱག་རྒྱ་སྤྱི་དང་མཐུན་པར་བཅས་ལ། མཆོད་ཡོན་ཕལ་ཆེར་མཆོད་ཡོན་བླ་རེ་དང༌། །མཆོད་ཡོན་བཀོད་པས་འོད་ཟེར་རབ་བཀྱེ་ཏེ། །མཆོད་ཡོན་སྣ་ཚོགས་ཀུན་ཏུ་བཀྲམ་བྱས་ནས། །བདག་ཉིད་ཆེན་པོ་རྒྱལ་བ་སྲས་བཅས་མཆོད། །ཨོཾ་སརྦ་ཏ་ཐཱ་ག་ཏ་ཨཱ་པ་རི་མི་ཏ། ཨཱ་ཡུར་ཛྙཱ་ན་ས་པཱ་རི་ཝ་ར་ཨརྒྷཾ་པྲ་ཏཱིཙྪ་སྭཱཧཱ། དེ་བཞིན་ཏུ་སྦྱར་ཏེ་མཐར་རོལ་མོ་ལ། སིལ་སྙན་ཞེས་པ་དང༌།
ཤཔྟའི་བར་རོ། གོས་ཟུང་བསངས་སྦྱངས། སྟོང་པའི་ངང་ལས། བྷྲཱུཾ་ལས་བྱུང་བའི་ལྷ་རྫས་ཀྱི་ན་བཟའ་ནམ་མཁའི་མཐའ་ཀླས་པར་གྱུར། སྲབ་འཇམ་ཡང་པ་ལྷ་ཡི་གོས། །མི་ཕྱེད་རྡོ་རྗེའི་སྐུ་བརྙེས་ལ། །མི་ཕྱེད་དད་པས་བདག་འབུལ་ནས། །བདག་ཀྱང་རྡོ་རྗེའི་སྐུ་ཐོབ་ཤོག །ཨོཾ་སརྦ་ནས། བཛྲ་ཝསྟྲ་ཡེ་ཨཱཿཧཱུཾ། སྤྲོ་ན་རྒྱལ་སྲིད་སྣ་བདུན་དང༌། འདོད་ཡོན་ལྔ་རྣམས་སྤྱི་དང་མཐུན་པར་འབུལ། །ལྷ་ཡི་དབང་པོ་ལྷ་མིན་གཡུལ་རྒྱལ་ཚེ། །བཀྲ་ཤིས་ལྷ་མོ་བརྒྱད་ཀྱིས་མཆོད་པ་ལྟར། །རྒྱལ་བ་རྣམས་དང་དཀྱིལ་འཁོར་ལྷ་ཚོགས་ལ། །བཀྲ་ཤིས་རྟགས་བརྒྱད་དག་གིས་མཆོད་པར་བགྱི། །མངྒ་ལ་ཨཥྟ་ཨཾ་ཀ་པུ་ཨཾ་ཀ་པུ་ཛི་ཏེ་ཨཱཿཧཱུཾ། ཚིག་གཞན་རྣམས་དེ་དང་འདྲ་བ་ལ། བཀྲ་ཤིས་རྫས་བརྒྱད་དག་གིས་མཆོད་པར་བགྱི། མངྒ་ལཾ་ཨཥྟ་དྲ་བྱཿཔུ་ཛི་ཏེ༴ བསྟོད་པ་ནི། །ཆོས་ཀྱི་འཁོར་ལོ་རྒྱ་ཆེན་བསྐོར། །སེམས་ཅན་སྡུག་བསྔལ་སྣ་ཚོགས་ཀུན། །མ་ལུས་པར་ནི་སེལ་མཛད་པའི། །སངས་རྒྱས་ཚེ་དཔག་མེད་ཕྱག་འཚལ། །རྡོ་རྗེ་སེམས་དཔའ་ལས་བྱུང་ཞིང༌། །ཉེས་པའི་དྲི་མ་ཀུན་བཅོམ་པ། །རྡོ་རྗེ་ལུས་ཅན་རྡོ་རྗེ་ཅན། །རྡོ་རྗེ་ཚེ་དཔག་མེད་ཕྱག་འཚལ། །བསམ་པའི་དོན་ཀུན་སྐད་ཅིག་གིས། །རང་འདོད་བཞིན་དུ་ཚིམ་མཛད་པ། །མཆོག་གི་བདག་པོ་ཆེན་པོ་སྟེ། །རིན་ཆེན་ཚེ་དཔག་མེད་ཕྱག་འཚལ། །ཇི་ལྟར་ཉོན་མོངས་དྲི་མ་ཡིས། །ཀུན་ནས་གོས་པར་མི་འགྱུར་ཞིང༌། །ཐུགས་རྗེས་ཆགས་ཚུལ་
སྟོན་མཛད་པའི། །པདྨ་ཚེ་དཔག༴ འདོད་པའི་ལས་རྣམས་མ་ལུས་པ། །སྐད་ཅིག་གཅིག་གིས་རྫོགས་པའི་དཔལ། །བསམ་ཀུན་འཕེལ་བྱེད་དཔག་བསམ་ཤིང༌། །ལས་ཀྱི་ཚེ་དཔག༴ ཉེས་པ་ཀུན་ལས་ཁྱོད་གྲོལ་ནས། །སྣ་ཚོགས་ཡོན་ཏན་རྣམས་ཀྱིས་བརྒྱན། །འཁོར་བའི་སྐྱབས་མཛད་དཔའ་བོ་སྟེ། །ཀུན་གཟིགས་ཚེ་དཔག་མེད་ཕྱག་འཚལ། །སྟོབས་ཆེན་རྣམས་ཀྱིས་རབ་བརྒྱན་ཏེ། །མི་མཐུན་ཕྱོགས་རྣམས་མ་ལུས་སྤངས། །སྟོན་པ་སྲེདམེད་བུ་ཡི་སྟོབས། །ཡོན་ཏན་ཚེ་དཔག༴ མེ་ལོང་མཉམ་ཉིད་ལ་སོགས་པ། །ཡེ་ཤེས་མང་པོའི་མཛོད་འཛིན་ཞིང༌། །རྟོག་པ་མ་ལུས་ཁྱོད་ཀྱིས་སྤངས། །ཡེ་ཤེས་ཚེ་དཔག༴ རྣམ་པར་རྟོག་ལས་ཁྱོད་གྲོལ་ནས། །མཐའ་བྲལ་ཏིང་འཛིན་ཞི་བ་ཉིད། །བདུད་དང་མུ་སྟེགས་འཇོམས་མཛད་པའི། །མི་གཡོ་ཚེ་དཔག་མེད་ཕྱག་འཚལ། །འཁོར་བའི་སེམས་ཅན་གང་ཡང་རུང༌། །ཁྱོད་ཀྱི་མཚན་ཙམ་འཛིན་པ་ལ། །ཚེ་དང་ཡེ་ཤེས་སྩོལ་མཛད་པའི། །ཚེ་དཔག་མེད་ལ་ཕྱག་འཚལ་ལོ། །ཞེས་པ་དང༌། སྤྲོ་ན། བཅོམ་ལྡན་དེ་བཞིན་གཤེགས་པ་དགྲ་བཅོམ་པ། །ཡང་དག་རྫོགས་པའི་སངས་རྒྱས་བླ་ན་མེད། །ཚེ་དང་ཡེ་ཤེས་དཔག་མེད་རྣམ་ངེས་པའི། །གཟི་བརྗིད་རྒྱལ་པོའི་ཞབས་ལ་ཕྱག་འཚལ་ལོ། །དྲི་མེད་པདྨ་ར་གའི་མདངས་ལྡན་ཞིང༌། །མཚན་མཆོག་སུམ་ཅུ་རྩ་གཉིས་དཔེ་བྱད་བཟང༌། །བརྒྱད་ཅུས་ལེགས་སྤྲས་བདུད་རྩིའི་བུམ་བཟང་མཆོག །མཉམ་བཞག་ཕྱག་གིས་བསྣམས་ལ་
ཕྱག་འཚལ་ལོ། །ཐེག་མཆོག་སྟོན་པ་ཡན་ལག་དྲུག་ཅུའི་དབྱངས། །སེང་གེའི་སྒྲ་ཡིས་བདུད་དང་གཤིན་རྗེའི་དཔལ། །ཀུན་ཏུ་འཇོམས་བྱེད་གདུལ་བྱའི་ཚོགས་སྐྱོང་བ། །ཚེ་དཔག་མེད་ཀྱི་གསུང་ལ་ཕྱག་འཚལ་ལོ། །རྣམ་པར་མི་རྟོག་མཁྱེན་པས་ཤེས་བྱ་ཁྱབ། །བྱམས་དང་ཐུགས་རྗེས་འགྲོ་ཀུན་རྗེས་འཛིན་ཞིང༌། །དབྱིངས་དང་ཡེ་ཤེས་ཀུན་དུ་རོ་གཅིག་པ། །ཡེ་ཤེས་ལྔ་ཡི་ཐུགས་ལ་ཕྱག་འཚལ་ལོ། །ཡེ་ཤེས་རྒྱ་མཚོ་གཏིང་མཐའ་རབ་ཡངས་པ། །མི་འགྱུར་འགག་མེད་ཚེ་ཡི་ལྷུན་པོས་བརྒྱན། །ཡོན་ཏན་སྣ་ཚོགས་རིན་ཆེན་གཏེར་འཛིན་པ། །དཔག་ཡས་འབྱུང་པོས་བསྟེན་ལ་ཕྱག་འཚལ་ལོ། །རང་བཞིན་ཆོས་སྐུའི་ངང་ལས་མ་གཡོས་ཀྱང༌། །སྣ་ཚོགས་འཕྲིན་ལས་འོད་ཟེར་རབ་བཀྱེ་བས། །མ་རིག་མུན་སེལ་ཚེ་དང་ཡེ་ཤེས་ཀྱི། །སྣང་བ་བསྐྱེད་པར་མཛད་ལ་ཕྱག་འཚལ་ལོ། །ནོར་བུ་དཔག་བསམ་ཤིང་དང་བུམ་པ་བཟང༌། །དྲང་སྲོང་གིས་སྦྱར་རིགས་སྔགས་མཐུ་ཡིས་ཀྱང༌། །འདི་ལྟར་འགྲོ་བའི་དཔལ་འབྱོར་རྒྱས་བྱེད་ཅིང༌། །སྐྱེ་རྒུའི་འདོད་དོན་གང་ལགས་སྒྲུབ་བགྱིད་ན། །སྐྱབས་མཆོག་ཁྱོད་ནི་མགོན་དུ་ལེགས་བགྱིས་ནས། །གསང་སྔགས་རྒྱལ་པོ་རྟག་ཏུ་བརྗོད་བགྱིད་ཅིང༌། །རྩེ་གཅིག་ཡིད་ཀྱི་གུས་པས་གསོལ་བཏབ་ན། །འདིར་ལྟར་སྐལ་བཟང་འགྱུར་བ་སྨོས་ཅི་དགོས། །དེ་ལྟར་དགོངས་ནས་མ་ལུས་མཁྱེན་པའི་ཐུགས། །ཐུགས་རྗེའི་དབང་གི་བདག་ལ་དགོངས་ནས་ཀྱང༌། །ལས་དང་གློ་བུར་རྐྱེན་ལས་བྱུང་བ་ཡི། །གཤིན་རྗེའི་གནོད་པ་མ་ལུས་བཟློག་ཏུ་གསོལ། །ནད་གདོན་བར་ཆད་ཚོགས་ཀུན་ཞི་བ་དང༌། །བུམ་པ་བཟང་སོགས་དངོས་གྲུབ་ཀུན་ཐོབ་ནས། །མི་འགྱུར་
རྡོ་རྗེ་སེམས་དཔའི་ཚེ་འགྲུབ་སྟེ། །ཚེ་དཔག་མེད་མགོན་གོ་འཕང་ཐོབ་པར་མཛོད། །ཅེས་བསྟོད་ཅིང་གསོལ་བ་བཏབ། དེ་ནས་བུམ་བསྐྱེད་ནི། བུམ་པ་བསངས་སྦྱངས། སྟོང་པའི་ངང་ལས། པཾ་ལས་པདྨ་དང༌། ཨ་ལས་ཟླ་བའི་དཀྱིལ་འཁོར་གྱི་གདན་གྱི་སྟེང་དུ་བྷྲུཾ་ལས་རིན་པོ་ཆེའི་བུམ་པ་ཡངས་ཤིང་རྒྱ་ཆེ་བ་ལྟོ་བ་ལྡིར་བ་མགྲིན་པ་ཕྲ་བ། མཆུ་འཕྱང་བ། ལྷའི་གོས་ཀྱིས་མགུལ་བ་བཅིངས་པ། དཔག་བསམ་གྱི་ཤིང་གིས་ཁ་བརྒྱནཔ། ནང་ཆུ་དང་བཅུད་ཐམས་ཅད་ཀྱིས་ཡོངས་སུ་གང་བ་རྣམས་ལས། བུམ་པ་དགུ་པོ་རྣམས་ཀྱི་ནང་དུ་པད་ཟླ་ལ་གནས་པའི་ཧྲཱིཿཡིག་རེ་རེ་ཡོངས་སུ་གྱུར་པ་ལས། དབུས་ཀྱི་བུམ་པར་རྣམ་པར་སྣང་མཛད་ཚེ་དང་ཡེ་ཤེས་དཔག་ཏུ་མེད་པ། ཤར་གྱི་བུམ་པར་རྡོ་རྗེ་ཚེ་དཔག་མེད། ལྷོའི་བུམ་པར་རིན་ཆེན་ཚེ་དཔག་མེད། ནུབ་ཀྱི་བུམ་པ་པདྨ་ཚེ་དཔག་མེད། བྱང་གི་བུམ་པར་ལས་ཀྱི་ཚེ་དཔག་མེད། བྱང་ཤར་གྱི་བུམ་པར་ཀུན་གཟིགས་ཚེ་དཔག་མེད། ཤར་ལྷོའི་བུམ་པར་ཡོན་ཏན་ཚེ་དཔག་མེད། །ལྷོ་ནུབ་ཀྱི་བུམ་པར་ཡེ་ཤེས་ཚེ་དཔག་མེད། །ནུབ་བྱང་གི་བུམ་པར་མི་གཡོ་ཚེ་དཔག་མེད། །ཐམས་ཅད་ཀྱང་ནས་སྤྱོད་པའོ། །གལ་ཏེ་བུམ་པ་གཉིས་ལས་མེད་ན། ཡོངས་སུ་གང་བའི་རྣམ་རྒྱལ་བུམ་པའི་ནང་དུ། སྡོང་བུ་ཅུང་ཟད་དང་བཅས་པའི་སྣ་ཚོགས་པདྨ་འདབ་མ་བརྒྱད་པའི་ལྟེ་བ་དང༌། འདབ་མ་བརྒྱད་ལ་ནས། སྤྱོད་པའོ། །ཞེས་པའི་བར་མདུན་བསྐྱེད་དཀྱིལ་འཁོར་གྱི་སྐབས་བཞིན། ལས་ཐམས་ཅད་པའི་བུམ་པའི་ནང་དུ། པདྨ་དང་ཉི་མའི་སྟེང་དུ་ཧཱུཾ་ལས་བདུད་རྩི་འཁྱིལ་བ་སྐུ་མདོག་ལྗང་ཁུ་ཞལ་གཅིག་ཕྱག་གཉིས་གཡས་སྣ་ཚོགས་རྡོ་རྗེ། གཡོན་དེས་ཡུ་བ་བྱས་པའི་དྲིལ་བུ་འཛིན་པ། སྟག་ལྤགས་ཀྱི་ཤམ་ཐབས་ཅན། སྦྲུལ་དང་རིན་པོ་ཆེས་བརྒྱན་པ། ཁྲོ་བོའི་ཆ་ལུགས་ཡོངས་སུ་
རྫོགས་ཤིང༌། གཡོན་བརྐྱང་གི་སྟབས་ཀྱིས་བཞུགས་པའོ། །ཐམས་ཅད་ཀྱི་སྤྱི་བོར་ཨོཾ་ནས། བཛྲ་ས་མཱ་ཛའི་བར་གོང་བཞིན། ཛཿཧཱུཾ་བཾ་ཧོཿསླར་ཡང་ཐུགས་ཀའི་ཧྲཱིཿལས་ནས། དབུ་བརྒྱན་གྱི་བར་ཡང་མདུན་བསྐྱེད་བཞིན། བདུད་རྩི་འཁྱིལ་བ་ལ་དོན་ཡོད་གྲུབ་པས་དབུ་བརྒྱན། ཨརྒྷཾ་ནས་ཤཔྟའི་བར་གྱིས་མཆོད། འཇིག་རྟེན་འདྲེན་པའི་གཙོ་བོ་སོགས་ཀྱིས་བསྟོད། འཇིགས་པའི་ཧཱུཾ་སྒྲ་ངེས་སྒྲོགས་ཤིང༌། །བགེགས་རྣམས་མ་ལུས་འཇོམས་མཛད་པ། །དངོས་གྲུབ་མ་ལུས་རྩོལ་བའི་ལྷ། །བགེགས་ཀྱི་དགྲ་ལ་ཕྱག་འཚལ་ལོ། །ཞེས་ལས་བུམ་ནང་གི་ལྷ་ལ་ཡང་བསྟོད། རང་གི་སྙིང་ག་ནས་སྔགས་ཀྱི་འཕྲེང་བ་གཟུགས་ཐག་ལ་བརྟེན་ནས་སོང༌། བུམ་ནང་གི་ལྷ་རྣམས་ཀྱི་ཐུགས་རྒྱུད་བསྐུལ། སྐུ་ལས་བདུད་རྩིའི་རྒྱུན་བབས་ཏེ་བུམ་པ་གང་བར་གྱུར། གཟུངས་ཐག་ནས་བཟུང་ལ་སྔགས་གསུམ་པོ་ཅི་རིགས་པར་བཟླ། ལས་བུམ་ལ་དམིག་ནས། ཨོཾ་ཨ་མྲྀ་ཏ་ཀུཎྜ་ལི་ཧ་ན་ཧ་ན་ཧཱུཾ་ཕཊ་ཅེས་པའང་ཉེར་གཅིག་སོགས་བཟླའོ། །མཐར་གོང་བཞིན་མཆོད་བསྟོད། ཡིག་བརྒྱའི་མཐར། མ་འབྱོར་པ་དང༌། སོགས། ཨོཾ་ཨཱཿཧཱུཾ། མཆོད་ཡོན་ཕུལ་བའི་རྐྱེན་གྱིས་བུམ་ནང་གི་ཡེ་ཤེས་པ་གཤེགས། དམ་ཚིག་པ་ཞུ་བ་ལས་བྱུང་བའི་བུམ་པའི་ཆུ་ནུས་པ་ཀུན་དང་ལྡན་པར་གྱུར། ཞེས་བརྗོད་ཅིང་དུང་ཆོས་ཀྱི་ཆུ་བུམ་པ་རྣམས་སུ་བླུག་གོ །དེ་ནས་གཏོར་མ་འབུལ་ཏེ། འཇིག་རྟེན་འདས་པའི་གཏོར་མ་གཞུང་ནས་མ་བཤད་ཀྱང༌། ཕྱིས་ཀྱི་རྣམས་ལག་ལེན་ལ་མཛད་པ་ལྟར་ན། གཏོར་མ་བསངས་སྦྱངས། སྟོང་པའི་ངང་ལས། རིན་པོ་ཆེ་སྣ་ཚོགས་ལས་གྲུབ་པའི་སྣོད་ཡངས་ཤིང་རྒྱ་ཆེ་བ་རྣམས་ཀྱི་ནང་དུ། ཨོཾ་ཞུ་བ་ལས་བྱུང་བའི་གཏོར་མ་ཁ་དོག་དྲི་རོ་ནུས་པའི་མཐུ་ཕུན་སུམ་ཚོགས་པ་བདུད་རྩིའི་རྒྱ་མཚོ་ཆེན་པོར་གྱུར། ཨོཾ་ཨཱཿཧཱུཾ་
གཟུངས་རིང་ཀྱི་མཐར། ཨ་ཀཱ་རོ་བཏགས་པ་ལན་གསུམ་མམ་བདུན་གྱིས་ཕུལ། ན་མཿསརྦ་ཏ་ཐཱ་ག་ཏ་བྷྱོ་བི་ཤྭ་མུ་ཁེ་བྷྱེཿ སརྦ་ཐཱ་ཁཾ་ཨུཏྒ་ཏེ་སྥ་ར་ཎ་ཨེ་མཾ་ག་ག་ཎ་ཁཾ་སྭཱཧཱ། ཞེས་པ་ལན་གསུམ་གྱིས་རྒྱ་ཆེར་སྤེལ་ལ་སྟབས། ཨརྒྷཾ་སོགས་ཀྱིས་མཆོད། འཇིག་རྟེན་འདྲེན་པའི་གཙོ་བོ་སོགས་ཀྱིས་བསྟོད། མཆོད་སྦྱིན་གཏོར་མ་འདི་བཞེས་ལ། ནས།ཀུན་འགྲུབ་ཤོག་གི་བར་གྱིས་འདོད་དོན་གསོལ་བ་བཏབ། རྒྱལ་ཆེན་བཞིའི་གཏོར་མ་ཡང་གོང་བཞིན་བྱིན་གྱིས་རླབས་ནས། རང་གི་སྙིང་ག་ནས་འོད་ཟེར་འཕྲོས། རི་རབ་ཀྱི་ཕྱོགས་བཞི་ནས་རྒྱལ་པོ་ཆེན་པོ་སྡེ་བཞི་འཁོར་དང་བཅས་པ་སྤྱན་དྲངས་པར་གྱུར། ཨོཾ་ཨེ་ཧྱེ་ཧི། ཙ་ཏུར་མཧཱ་རཱ་ཛཱ་ས་པཱ་རི་ཝཱ་ར་བཛྲ་ས་མཱ་ཛཿ ཞེས་བརྗོད། ཨོཾ་དྷྲི་ཏ་རཥྟ་ཡ། ཨོཾ་བི་རུ་ཌྷ་ཀ་ཡ། ཨོཾ་བི་རུ་བྷཀྵ་ཡ། ཨོཾ་བཻ་ཤྲ་ཝ་ཎ་ཡ་ས་པཱ་རི་ཝཱ་ར་བྷྱཿ ན་མཿསརྦ་ཏ་ཐཱ་ག་ཏ་བྷྱོཿནས། ག་ག་ན་ཁཾ་གྲིཧྞ་དཾ་བཱཾ་ལི་ཏ་སྭཱཧཱ། ཞེས་ལན་གསུམ་གྱིས་གཏོར་མ་འབུལ། སྤྲོ་ན་རེ་རེའི་མཚན་སྔགས་ལ་ནམ་མཁའ་མཛོད་ཀྱི་སྔགས་རྒྱ་སྦྱར་བ་ལན་གསུམ་གསུམ་གྱིས་ཕུལ་ན་ཤིན་ཏུ་ལེགས་སོ། །ཨོཾ་ཙ་ཏུ་མཧཱ་རཱ་ཛཱ་ས་པཱ་རི་ཝ་ར་ཨརྒྷཾ་ནས་ཤཔྟའི་བར་གྱིས་མཆོད། རྒྱལ་པོ་ཆེན་པོ་དཔལ་ལྡན་པ། མར་གད་མདོག་ཅན་པི་ཝང་འཛིན། །དྲི་ཟའི་ཚོགས་ལ་དབང་བསྒྱུར་པའི། །ཡུལ་འཁོར་བསྲུང་ལ་ཕྱག་འཚལ་ལོ། །དཔའ་བོ་ཆེན་པོ་སྟོབས་པོ་ཆེ། ཁ་དོག་སྔོན་པོ་རལ་གྲི་འཛིན། །གྲུལ་བུམ་ཚོགས་ལ་དབང་བསྒྱུར་བའི། །འཕགས་སྐྱེས་པོ་ལ༴ །མངའ་བདག་ཆེན་པོ་མཐུ་བོ་ཆེ། ཁ་དོག་དམར་པོ་སྦྲུལ་ཞགས་འཛིན། །ཀླུ་ཡི་ཚོགས་ལ་དབང་བསྒྱུར་བའི། །མིག་མི་བཟང་ལ༴ དེད་དཔོན་ཆེན་པོ་གསེར་མདོག་ཅན། །བེ་ཅོན་དང་ནི་ནེའུ་ལེ་འཛིན། །གནོད་སྦྱིན་ཚོགས་ལ་དབང་བསྒྱུར་པའི། །རྣམ་ཐོས་སྲས་ལ༴ དད་ལྡན་རྒྱལ་བའི་བཀའ་ཐོས་ཞལ་མཐོང་ཞིང༌། །སྒྲུབ་ལ་
བརྩོན་པས་བྱང་ཆུབ་ཐུགས་སུ་ཆུད། །ཐབས་མཁས་སྙིང་རྗེས་ཚོགས་གཉིས་རྫོགས་མཛད་པ། །བདག་དང་གཞན་དོན་འབྱོར་པ་ཁྱོད་ལ་འདུད། །རྒྱལ་ཆེན་སྡེ་བཞི་འཁོར་བཅས་རྣམས། །མཆོད་སྦྱིན་གཏོར་མ་འདི་བཞེས་ལ། ནས། ཀུན་འགྲུབ་ཤོག་གི་བར་བྱ། དེའི་རྗེས་སུ་སྒོས་ཀྱི་ཆོས་སྐྱོང་གི་གཏོར་མ་ཡོད་ནའང་རང་རང་གི་ཆོ་གས་བསྔོ། འདི་ལ་ནག་པོ་ཆེན་པོ་སོགས་ལ་རྒྱལ་ཆེན་གྱི་ཆོ་གའི་རིགས་འགྲོས་སྦྱོང་བའི་ལག་ལེན་འདུག་ནའང་སྙིང་པོས་དབེན་པས་སྒོས་ཀྱི་ཆོས་སྐྱོང་གི་གཏོར་ཆོག་རྣམས་ཡང་ན་མི་བྱེད། བྱེད་ན་རང་གཞུང་གི་འབུལ་དགོས་ཀྱིས། བློ་བཟོ་མི་བྱའོ། །དེའི་རྗེས་སུ་ཕྱོགས་སྐྱོང་དང༌། འབྱུང་པོ་སྤྱི་དང༌། བགེགས་ཀྱི་གཏོར་མ་ཏེ། གཏོར་མ་ཆ་གསུམ་དུ་གྲགས་པའང་ངེས་པར་གཏོང་དགོས་ལ། དེའི་ཆོ་ག་ནི་གཞན་དུ་ཤེས་པར་བྱའོ། །གཉིས་པ་ནི། དེ་ནས་སློབ་མ་ལ་ཇི་ལྟར་བྱ་བའི་དབང་གི་ཆོ་ག་རྣམས་སློབ་དཔོན་ཉིད་ཀྱིས་བདག་འཇུག་ཏུ་བླངས། སླར་ཡང་མཆོད་བསྟོད་བསྡུས་པ་ཞིག་བྱས་ལ། སློབ་མ་ལ་བྱིན་རླབས་འཇུག་པས་དོན་དུ་བཟླས་པ་ཅི་རིགས་པར་བྱའོ། །གསུམ་པ་ལ་དབང་བསྐུར་བ་ནི་སློབ་མ་རྣམས་ཁྲུས་བྱས། གྲལ་ལ་འཁོད། མེ་ཏོག་བཀྱེ་བསྡུ་བྱ། སེམས་བསྐྱེད་གསལ་གདབ། ཆོས་བཤད་ཅི་རིག་པར་བྱ། སྤྲོ་ན་ཆོས་འདི་ཉིད་ཀྱི་ལོ་རྒྱུས་དང་ཆེ་བའང་བརྗོད་ནས་དཀྱིལ་འཁོར་དུ་འཇུག་པའི་དོན་དུ་མཎྜལ་འབུལ་བར་བསྐུལ། དེ་རྣམས་ཀྱིས་ཀྱང་མནྜལ་འབུལ། དེ་ནས། དགའ་ཆེན་ཁྱོད་བདག་སྟོན་པ་སྟེ། སོགས་ལན་གསུམ་ངེས་བཟློས་ཀྱི་སྒོ་ནས་གསོལ་བ་བཏབ། ཨོཾ་ཙཀྵུཿབནྡྷ་ཝཱ་རཱ་ཨཱ་མ་ན་ཡ་ཧཱུཾ། གིས་གདོང་བཅིང༌། ཨཱ་ཁཾ་ཝཱི་ར་ཧཱུཾ། གི་མེ་ཏོག་གི་འཕྲེང་བ་གཏད། སློབ་དཔོན་གྱིས་ཐུགས་ཀ་ནས་སྤྲུལ་པའི་ཁྲོ་བོ་བདུད་རྩི་འཁྱིལ་བའི་ཚོགས་ཀྱིས་བགེགས་བསྐྲད་པར་གྱུར། ལས་བུམ་གྱི་ཆུས་བསངས་ལ། ཨ་མྲྀ་ཏའི་སྔགས་བརྗོད། རིགས་དང་མཐུན་པ་བརྟག་པའི་སླད་དུ། བུ་ཁྱོད་སུ་ཡིན་ཅི་ལ་དགའ། ཞེས་དྲིས་པ་ལ། སྐལ་བཟང་བདག་བདེ་བ་ཆེན་པོ་ལའོ། །ཞེས་
རྗེས་ཟློས་ཀྱིས་ལན་བཏབ། སླར་ཡང་མཐར་ཐུག་གི་དོན་གཉེར་བརྟག་པའི་སླད་དུ། དེ་ཡི་བུ་ལ་ཅི་ཞིག་བྱ། ཞེས་དྲིས་པ་ལ། སངས་རྒྱས་མཆོག་གི་དམ་ཚིག་གོ །ཞེས་རྗེས་བཟློས་ཀྱི་ལན་འདེབས་སུ་བཅུག །སློབ་མའི་སྙིང་ཁར་ཀུན་རྫོབ་བྱང་སེམས་ཀྱི་ངོ་བོ་ཟླ་བའི་དཀྱིལ་འཁོར་གྱི་སྟེང་དུ་དོན་དམ་བྱང་སེམས་ཀྱི་ངོ་བོ་རྡོ་རྗེ་དཀར་པོ་རྩེ་ལྔ་པ་འཁོད་པར་གྱུར། ཨོཾ་སརྦ་ཡོ་ཀ་ཙིཏྟ་ཨུ་པ་ཏ་ཡ་མི། ཞེས་རྗེས་བཟློས་བྱ། རྡོ་རྗེ་སྙིང་ཁར་གཏུགས་ལ། སུ་ར་ཏེ་ས་མ་ཡ་སྟཾ། ཧོ་སིདྡྷིཿབཛྲ་ཡ་ཐཱ་སུ་ཁཾ། ཞེས་པས་བརྟན་པར་བྱས། རྡོ་རྗེ་མགོ་བོར་བཞག་ལ། དེང་ཁྱོད་དེ་བཞིན་གཤེགས་པ་ཐམས་ཅད་ཀྱི་རིགས་སུ་ཞུགས་ཀྱི། དེ་བཞིན་གཤེགས་པ་ཐམས་ཅད་ཀྱི་མཆོག་ཏུ་གསང་བ་ཆེན་པོ་འདི། དེ་བཞིན་གཤེགས་པ་ཐམས་ཅད་ཀྱི་དཀྱིལ་འཁོར་དུ་མ་ཞུགས་པ་རྣམས་ཀྱི་མདུན་དུ་སྨྲ་བར་མི་བྱ་སྟེ། མ་དད་པ་རྣམས་ལ་ཡང་མ་ཡིན་ནོ། །ཞེས་པ་གསང་བར་གདམ། སློབ་དཔོན་གྱི་ལག་གི་རྡོ་རྗེ་ལ་འཇུས་ཏེ་དཀྱིལ་འཁོར་གྱི་ཤར་གྱི་སྒོ་དྲུང་དུ་ཁྲིད་པར་མོས་ལ། དཀྱིལ་འཁོར་ལ་འདུད་པ་ཙམ་བྱེད་དུ་འཇུག་ཅིང༌། ཧཱུཾ་ཛཿཧཱུཾ། ཞེས་པའི་རྗེས་བཟློས་དང༌། ཡོལ་བ་བསལ། དཀྱིལ་འཁོར་གྱི་ལྷ་ཐམས་ཅད་ལ་ལན་གསུམ་དུ་ཕྱག་འཚལ་བར་མོས་ལ། གནས་གསུམ་དུ་ཐལ་མོ་སྦྱོར་བཞིན་པས། འདིའི་རྗེས་བཟློས། ཨོཾ་ན་མ་ཏེ་ཧཱུཾ། ཨོཾ་ན་མོ་མེ་ཧཱུཾ། ཨོཾ་ན་མོ་ན་མཿ ཧཱུཾ། ཞེས་བརྗོད། དཀོན་མཆོག་གསུམ་ལ་བདག་སྐྱབས་མཆི། སོགས་རྒྱུན་བཤགས་ལན་གསུམ་བྱེད་དུ་བཅུག །མཎྜལ་འབུལ་བར་སྐུལ་ལ། སློབ་མས་ཀྱང་འཆི་མེད་ཚེའི་དངོས་གྲུབ་ཞུ་བའི་དོན་དུ་མཎྜལ་འབུལ། དེ་བཞིན་གཤེགས་པ་ཐམས་ཅད་ཀྱིས་བྱིན་གྱིས་རློབས་ཤིག །བདག་ལ་འཆི་མེད་ཚེའི་དངོས་གྲུབ་མ་ལུས་པ་སྩལ་ཏུ་གསོལ། རྒྱལ་བ་ཚེ་དང་ཡེ་ཤེས་དཔག་ཏུ་མེད་པ་ལྷག་པར་གནས་པ་མཛད་དུ་གསོལ། ཞེས་ལན་གསུམ་གསོལ་བ་བཏབ།
སློབ་མ་སྐད་ཅིག་གིས་རྒྱལ་བ་ཚེ་དཔག་མེད་དུ་གསལ་བའི་སྙིང་ཁར་ཟླ་བ་ལ་གནས་པའི་ཧྲཱིཿཡིག་ལས་འོད་ཟེར་འཕྲོས་པ་དང༌། སློབ་དཔོན་གྱི་ཐུགས་ཀའི་ཧྲཱིཿཡིག་ལས་ཀྱང་འོད་ཟེར་ལྕགས་ཀྱུ་ལྟ་བུ་འཕྲོས། མདུན་བསྐྱེད་དཀྱིལ་འཁོར་གྱི་ལྷ་ཚོགས་ཐམས་ཅད་དང༌། གཞན་ཡང་ཕྱོགས་བཅུའི་ཞིང་རབ་འབྱམས་ན་བཞུགས་པའི་སངས་རྒྱས་བྱང་ཆུབ་སེམས་དཔའ། འཕགས་པ་ཉན་ཐོས་དང༌། རང་སངས་རྒྱས་དང༌། གྲུབ་པ་དང་རིག་པ་འཛིན་པའི་ཚོགས་ཐམས་ཅད་ཀྱི་སྐུ་གསུང་ཐུགས་ཀྱི་བྱིན་རླབས་དང༌། ཡོན་ཏན་དང༌། ནུས་མཐུ་ཐམས་ཅད་དང༌། ལྷ་ཀླུ་གནོད་སྦྱིན་མི་དང་མི་མ་ཡིན་ཐམས་ཅད་ཀྱི་ཚེ་དང་བསོད་ནམས་མཐུ་སྟོབས་མ་ལུས་པ་དང༌། ནོར་བུ་དང༌། སྨན་དང་རིགས་སྔགས་དང༌། བཅུད་ལེན་དང༌། གྲུབ་པའི་རྫས་རྣམས་གཙོ་བོར་གྱུར་པ་འབྱུང་བའི་ཁམས་ཐམས་ཅད་ཀྱི་བཀྲག་མདངས་བཅུད་དེ་མདོར་ན་འཇིག་རྟེན་དང་འཇིག་རྟེན་ལས་འདས་པའི་སྣོད་བཅུད་བརྟན་གཡོ་ཐམས་ཅད་ཀྱི་དྭངས་མ་མི་ཤིགས་པའི་ངོ་བོ་རྣམས་འཆི་མེད་ཡེ་ཤེས་ཀྱི་བདུད་རྩིའི་རང་བཞིན་རྒྱལ་བ་ཚེ་དཔག་མེད་ཀྱིས་སྐུའི་རྣམ་པར་བསྡུས། ནམ་མཁའི་དབྱིངས་ལས་ཁ་བ་བུ་ཡུག་འཚུབས་པ་ལྟར་ཕྱོགས་ཐམས་ཅད་ནས་བྱོན་ཏེ། སློབ་མའི་བ་སྤུའི་བུ་ག་ཐམས་ཅད་ནས་བཞུགས་ཤིང་འདྲེས། ལུས་ཀྱི་ནང་ཐམས་ཅད་འཆི་མེད་ཡེ་ཤེས་ཀྱི་བདུད་རྩི་དང་འོད་ཟེར་དམར་པོའི་རྣམ་པས་གང༌། སྡིག་སྒྲིབ་ཐམས་ཅད་བྱང༌། ལུས་སེམས་ཐམས་ཅད་བདེ་བས་ཁྱབ་པར་གྱུར། སྙིང་པོའི་མཐར། ཨོཾ་བཛྲ་ཨཱ་བེ་ཤ་ཡཿཨཿཨཿཨཿཨཿ ཞེས་བཟླས་ཤིང་སྤོས་དང༌། རོལ་མོ་བྱ། དེ་ནས་སྤྱི་བོར་རྡོ་རྗེ་བསྣོལ་མར་
བཞག་ནས། ཏིཥྛ་བཛྲ་ཞེས་ལན་གཉིས་ཀྱིས་བརྟན་པར་བྱ། ཨོཾ་པྲ་ཏཱིཙྪ་བཛྲ་ཧོ། ཞེས་རྗེས་བཟློས་བྱེད་བཞིན་དུ། དཀྱིལ་འཁོར་གྱི་གཙོ་བོའམ། རིགས་ཀྱི་ལྷ་ལ་མེ་ཏོག་འདོར་དུ་གཞུག །མེ་ཏོག་སློབ་དཔོན་གྱིས་བླངས་ལ་སློབ་མའི་མགོ་བོར་བཅིངས་ཏེ། པྲ་ཏི་གྲྀཧྞ་ཏྭཾ། ཨི་མཾ་སཏྭ་མཧཱ་བཱ་ལ། ཞེས་བརྗོད་དེ་མེ་ཏོག་ཕུལ་བའི་ལྷས་དངོས་གྲུབ་སྩལ་བར་མོས་སུ་བཅུག །ཨོཾ་རྡོ་རྗེ་སེམས་དཔའ་དེང་ཁྱོད་ཀྱི། །མིག་འབྱེད་པར་ནི་བརྩོན་པར་མཛད། །ཕྱེ་བས་ཐམས་ཅད་མཐོང་འགྱུར་བ། །རྡོ་རྗེའི་མིག་ནི་བླ་ན་མེད། །ཨོཾ་ཛྙཱ་ན་ཙཀྵ་ཧཱུཾ་ཨཱ། ཞེས་བརྗོད་དེ་གདོང་གཡོགས་བཀྲོལ། ཧེ་བཛྲ་པ་ཤྱ་ཞེས་ལྟ་བར་བསྐུལ་ཏེ། སྒྲུབ་ཐབས་ནས་འབྱུང་བ་ལྟར་རྟེན་དང་བརྟེན་པར་བཅས་པའི་དཀྱིལ་འཁོར་རྒྱས་པར་བཤད་དོ། །བདག་འཇུག་གི་ཚེ། རྟེན་དང་བརྟེན་པར་བཅས་པའི་དཀྱིལ་འཁོར་ཐམས་ཅད་མངོན་སུམ་བཞིན་དུ་གསལ་བར་གྱུར། ཞེས་བརྗོད། དེ་ནས་དབང་གི་དངོས་གཞིའི་དོན་དུ་མཎྜལ་ཕུལ་ལ། བྱང་ཆུབ་རྡོ་རྗེ་སངས་རྒྱས་ལ། །མཆོད་སྦྱིན་ཇི་ལྟར་སྩལ་བ་ལྟར། །བདག་ཀྱང་སྐྱབ་པའི་དོན་གྱི་ཕྱིར། །ནམ་མཁའི་རྡོ་རྗེས་དེང་བདག་སྩོལ། །ལན་གསུམ། དཀྱིལ་འཁོར་གྱི་ཤར་གྱི་ལྷ་རྣམས་དབང་སྟེགས་རིན་པོ་ཆེའི་ཁྲིའི་སྟེང་དུ། པདྨ་དང་ཟླ་བའི་གདན། དེའི་སྟེང་གི་ཕྱོགས་སུ་གདུགས་དཀར་པོ་གསེར་གྱི་ཡུ་བ་ཅན་མཐའ་བསྐོར་དུ་རྒྱལ་མཚན་དང་བ་དན་དང༌། རོལ་མོ་ལ་སོགས་པ་མཆོད་པའི་ཡོ་བྱད་དཔག་ཏུ་མེད་པས་བསྐོར་བ། གདན་དེ་ཉིད་ཀྱི་སྟེང་དུ་སློབ་མ་ཧྲཱིཿལས་རྒྱལ་བ་ཚེ་དང་ཡེ་ཤེས་དཔག་ཏུ་མེད་པ་སྐུ་མདོག་པདྨ་ར་གའི་ནས། ཐུགས་ཀར་ཧཱུཾ། སློབ་དཔོན་གྱི་ཐུགས་ཀའི་ས་བོན་ལས་
འོད་ཟེར་འཕྲོས། སངས་རྒྱས་དང་བྱང་ཆུབ་སེམས་དཔའ་ཐམས་ཅད་རྒྱལ་བ་ཚེ་དཔག་མེད་ཀྱི་རྣམ་པར་ཨོཾ་བཛྲ་ས་མཱ་ཛཿ ཛཿཧཱུཾ་བཾ་ཧོཿ ཡང་སློབ་དཔོན་གྱི་ཐུགས་ཀའི་ཧྲིཿཡིག་ལས་འོད་ཟེར་འཕྲོས། རང་བཞིན་གྱི་གནས་ནས། དབང་གི་ལྷ་རྒྱལ་བ་ཚེ་དང་ཡེ་ཤེས་དཔག་ཏུ་མེད་པ་ལྷ་དགུའི་དཀྱིལ་འཁོར་ལ་ཐུན་མོང་མ་ཡིན་པའི་འཁོར་གྱི་ཚོགས་ཀྱིས་བསྐོར་བ་ནི། རིགས་སྔགས་འདི་ལ་དགོངས་པ་གཅིག་གྱུར་སངས་རྒྱས་ཚོགས། །བྱེ་བ་གང་གཱའི་ཀླུང་གི་བྱེ་སྙེད་དབུས་སུ་ཏེ། །ཤར་དུ་བྱེ་བ་དགུ་བཅུ་རྩ་དགུ་ལྷོ་ཕྱོགས་སུ། །བྱེ་བ་བདུན་ཅུ་རྩ་བདུན་ནུབ་ཏུ་བྱེ་བ་ཕྲག །བརྒྱད་ཅུ་རྩ་བཞི་བྱང་དུ་བྱེ་བ་དྲུག་ཅུ་ལྔ། །བྱང་ཤར་སོགས་ལ་བྱེ་བ་ཕྲག་གི་གྲངས་སྒྲེས་པ། །ལྔ་བཅུ་རྩ་ལྔ་དང་ནི་བཞི་བཅུ་རྩ་ལྔ་དང༌། །སུམ་ཅུ་རྩ་དྲུག་ཉེར་ལྔ་རྣམས་ནི་སངས་རྒྱས་སོ། །གཞན་ཡང་མཐའ་སྐོར་དུ། སངས་རྒྱས་དང་བྱང་ཆུབ་སེམས་དཔའ་ཚད་མེད་པ་རྣམས་དང༌། འཆི་མེད་ཚེའི་དངོས་གྲུབ་བརྙེས་པའི་ལྷ་དང་དྲང་སྲོང་རིག་པ་འཛིན་པའི་ཚོགས་དཔག་ཏུ་མེད་པས་བསྐོར་བ་ཨོཾ་བཛྲ་ས་མ་ཛཿ ཨརྒྷཾ་ནས་ཤཔྟའི་བར་གྱིས་མཆོད། དེ་བཞིན་གཤེགས་པ་ཐམས་ཅད་ཀྱིས་བདག་ལ་མངོན་པར་དབང་བསྐུར་བ་སྩལ་ཏུ་གསོལ། ཞེས་རྗེས་ཟློས་ཀྱིས་གསོལ་བ་བཏབ་པས། སློབ་དཔོན་དང་རྣམ་སྣང་ཚེ་དཔག་མེད་དབྱེར་མ་མཆིས་པ་འཁོར་དང་བཅས་པ་རྣམས་ཀྱིས། རིན་པོ་ཆེའི་བུམ་པ་འཆི་མེད་ཡེ་ཤེས་ཀྱི་བདུད་རྩིས་གང་བས་དབང་བསྐུར་བར་གྱུར། བུམ་པ་སློབ་མའི་སྤྱི་
བོར་གཏུགས་ཤིང་བུམ་ཆུ་འཐུང་དུ་བཅུགལ། ཨོཾ་བཻ་རོ་ཙཱ་ན་ཨཱ་ཡུར་ཛྙཱ་ན་སིདྡྷི་ས་མ་ཡ་ཨ་བྷི་ཥིཉྩ་ཧཱུཾ། ལུས་ལ་རྣམ་སྣང་ཚེ་དབང་བསྐུར། །བུ་ཁྱོད་འཆི་བདག་ལས་གྲོལ་ཏེ། །བསྐལ་པ་སྟོང་དུ་ཚེ་འཕེལ་ནས། །སྲོག་གཅོད་སྡིག་པ་དག་གྱུར་ཅིག །དེ་ནས་རོལ་ཆེན་དྲིལ་བསིལ་ཙམ་དང་བཅས་པས་ཀྱང་རུང་སྟེ། ཕ་རོལ་དུ་ཕྱིན་པ་དྲུག་གི་ཤིས་པ་བརྗོད་ནས་དབང་བསྐུར་བ་ནི། སྦྱིན་པའི་སྟོབས་ཀྱི་སངས་རྒྱས་ཡང་དག་འཕགས། །མི་ཡིས་སེང་གེ་སྦྱིན་པའི་སྟོབས་རྟོགས་ནས། །སྙིང་རྗེ་ཅན་གྱི་གྲོང་ཁྱེར་འཇུག་པ་ན། །སྦྱིན་པའི་སྟོབས་ཀྱི་སྒྲ་ནི་གྲགས་པར་འགྱུར། དེ་བཞིན་དུ་སྦྱིན་པ་ཞེས་པ་ཐམས་ཅད་དུ། ཚུལ་ཁྲིམས་ཞེས་སྦྱར་བ་དང༌། བཟོད་པ་དང༌། བརྩོན་འགྲུས་དང༌། བསམ་གཏན་དང༌། ཤེས་རབ་ཅེས་པའི་བར་དུ་འདོན་པ་སྤོ། ཤོ་ལོ་ཀ་རེ་རེའི་མཐར། སྦྱིན་པ་མཐར་ཕྱིན་ཚེ་ཡང་འཕེལ་བར་ཤོག །ཅེས་པ་ནས། ཤེས་རབ་མཐར་ཕྱིན་ཚེ་ཡང་འཕེལ་བར་ཤོག །ཅེས་པའི་བར་ཚིག་རྐང་རེ་རེ་འཇུག་པའི་ལག་ལེན་སྣང་བ་བཞིན་བྱས་ཀྱང་འགལ་བ་མེད་པར་མངོན་ལ། འགའ་ཞིག་དཀྱུས་ཀྱི་ཚིག་རྐང་མཐའ་མ་དོར་ནས། དེ་འདོན་པ་ནི་བཀའ་ལ་དབང་ཟ་བར་འགྱུར་བས་སྤང་ངོ༌། །དེ་ནས་འདི་སྐད་ཅེས། ཞེས་གསུངས་ཤིང༌། བུམ་པའི་ཆུས་སྤྱི་བོ་ནས་དབང་བསྐུར། ཡེ་ཤེས་ཀྱི་ཆུས་ལུས་ཀྱི་ནང་ཐམས་ཅད་གང༌། འཁོར་བ་ཐོག་མ་མེད་པ་ནས་བསགས་པའི་སྡིག་སྒྲིབ་ཐམས་ཅད་དང༌། ཁྱད་པར་དུ་ཡང་ཉོན་མོངས་པ་གཏི་མུག་གིས་ཀུན་ནས་སླངས་ཏེ། སེམས་ཅན་གཞན་གྱི་སྲོག་བཅད་པས། ཚེ་འདིར་ཚེ་ཐུང་བའི་ལས་སྒྲིབ་བག་ཆགས་ཐམས་
ཅད་སྦྱངས། རྣམ་སྣང་ཚེ་དང་ཡེ་ཤེས་དཔག་ཏུ་མེད་པས་རྒྱུད་བྱིན་གྱིས་རླབས་པར་མོས་པ་གྱིས། ཞེས་སོགས། ཡང་གོང་བཞིན་གསོལ་བ་བཏབ། རྣམ་སྣང་ཚེ་དང་ཡེ་ཤེས་དཔག་ཏུ་མེད་པ་ཞེས་པའི་ཚབ་ཏུ། རྡོ་རྗེ་ཚེ་དང་ཡེ་ཤེས་དཔག་ཏུ་མེད་པ། བཻ་རོ་ཙཱ་ན་ཞེས་པར། བཛྲ་དེ་བཞིན་དུ། ལུས་ལ་རྡོ་རྗེའི་ཚེ་དབང༌། ཞེས་དང༌། ཁྱད་པར་དུ་ཡང་ཉོན་མོངས་པ་ཞེ་སྡང་གིས་ཀུན་ནས། ཞེས་དང༌། རྡོ་རྗེ་ཚེ་དང་ཡེ་ཤེས་དཔག་ཏུ་མེད་པ། ཅེས་འདོན་པ་སྤོ། དེ་བཞིན་དུ། རིན་ཆེན༴ རཏྣ༴ རིན་ཆེན་ཚེ་དབང༴ ང་རྒྱལ་དང་སེར་སྣས༴ རིན་ཆེན་ཚེ་དང༴ དེ་བཞིན་དུ། པདྨ༴ པདྨ༴ པདྨའི་ཚེ་དབང༴ འདོད་ཆགས་ཀྱིས༴ པདྨ་ཚེ་དང༌། དེ་བཞིན་དུ། ལས་ཀྱི༴ ཀརྨ༴ ཕྲག་དོག་གིས༴ ལས་ཀྱི་ཚེ་དང༌། ཞེས་པ་སྤོ། ལྷ་གྲངས་དང་མཉམ་པའི་བུམ་པ་ཡོད་ན། རིགས་ལྔའི་བུམ་པ་རྣམས་ཀྱིས་རེ་རེ་བཞིན་དབང་བསྐུར་བ་ཡིན་ལ། གཉིས་སུ་བསྡུས་པ་ཡིན་ན། དེ་ཐམས་ཅད་ལ་རྣམ་རྒྱལ་བུམ་པ་ཁོ་ནས་དབང་བསྐུར་བ་ཡིན་ནོ། །དེ་ནས་ཅོད་པན་གྱི་དབང་ནི། དེ་ལྟར་རིགས་ལྔས་བུམ་པའི་ཆུས་སྤྱི་བོ་ནས་དབང་བསྐུར་བས། སྐུ་གང་དྲི་མ་དག །ཆུའི་ལྷག་མ་ཡར་ལུད་པ་ལས་འོད་དཔག་མེད་གཙོ་བོར་གྱུར་པའི་རིགས་ལྔས་དབུ་བརྒྱན། པདྨའི་ཕྱག་རྒྱ་སྤྱི་བོར་གཏུགས་ལ། ཨོཾ་པདྨོ་བྷ་བ་ཨ་བྷི་ཥིཉྩ་ཧཱུཾ། ཞེས་བརྗོད། དེ་ནས་བར་འདིར་སྤྲོ་ན་བཟླས་ལུང་སྦྱིན་པའི་ལུགས་ཀྱང་ཡོད་མོད། ལག་ལེན་མི་མཛད་པ་ཤས་ཆེའོ། །དེ་ནས་བུམ་པ་དགུ་ཡོད་ན་མཚམས་ཀྱི་བུམ་པ་བཞིས། རིམ་པ་བཞིན་འཁྲུད་པའམ། གཉིས་ལས་མེད་ན། ལས་བུམ་གྱིས་ལན་བཞིར་འཁྲུད་དེ། ཀུན་གཟིགས་ཚེ་དང་ཡེ་ཤེས་དཔག་ཏུ་མེད་པ་ལ་སོགས་མཚམས་ཀྱི་ཚེ་
དཔག་མེད་བཞི་པོ་འཁོར་དང་བཅས་པ་རྣམས་ཀྱིས། སློབ་མའི་སྡིག་སྒྲིབ་ནད་གདོན་ཐམས་ཅད་བཀྲུས་པར་གྱུར། ཞེས་བརྗོད་ལ། སྔགས་གསུམ་གྱི་མཐར། སྡིག་པ་དང་སྒྲིབ་པ་ཐམས་ཅད་ཤིནྟཾ་ཀུ་རུ་སྭཱཧཱ། ནད་ཐམས་ཅད་ཤིནྟཾ་ཀུ་རུ་སྭཱཧཱ། གདོན་ཐམས་ཅད༴ རིམས་ཐམས་ཅད༴ ཉེ་བར་འཚེ་བ་ཐམས་ཅད༴ འཁོན་དང་གྲིབ་དང་མི་གཙང་བ་ཐམས་ཅད༴ བྱད་དང་བྱུར་དང་སྐལ་བ་ངན་པ་ཐམས་ཅད༴ མཚན་མོ་ནག་མོ་དང༌། དུས་ཀྱི་ཞགས་པ་དང༌། གཤིན་རྗེའི་ཕོ་ཉ་ཐམས་ཅད༴ དུས་མ་ཡིན་པའི་འཆི་བ་ཐམས་ཅད༴ བགེགས་དང་ལོག་པར་འདྲེན་པ་ཐམས་ཅད༴ གཟའ་དང་རྒྱུ་སྐར་གྱི་གནོད་པ་ཐམས་ཅད༴ རྒྱལ་པོ་དང་ཐེའུ་བྲང་གི་གནོད་པ་ཐམས་ཅད༴ བཙན་དང་དམུའི་གནོད་ཐམས་ཅད༴ ཀླུ་དང་ས་བདག་གི་གནོད་པ་ལ་སོགས་པ་མདོར་ན་མི་མཐུན་པའི་ཕྱོགས་ཐམས་ཅད་ཤིནྟཾ་ཀུ་རུ་སྭཱཧཱ། ཞེས་བཀྲུའོ། །དེ་ནས་བྱབས་པ་ནི། རྨ་བྱའི་མདོངས་ཀྱི་དབུས་སུ་ཟླ་བའི་དཀྱིལ་འཁོར་གྱི་སྟེང་དུ་ཧྲཱིཿའི་མཐར་སྔགས་ཀྱི་ཕྲེང་བས་བསྐོར་བར་དམིགས་ལ། དེའི་འོད་ཟེར་གྱིས། སློབ་མའི་ནད་གདོན་སྡིག་སྒྲིབ་ཕྲ་ཞིང་ཕྲ་བ་ཐམས་ཅད་ཀྱང་རྡོ་ཁབ་ལེན་གྱི་ལྕགས་ཕྱེ་བླངས་བ་བཞིན་དུ་བླངས་ཏེ་ཕྱིར་དོར་བར་མོས་ཤིག །སྔགས་གསུམ་གྱི་མཐར། སྡིག་པ་དང་སྒྲིབ་པ་ཐམས་ཅད་སོགས་གོང་གི་མཐར། ཤིནྟཾ་ཀུ་རུའི་དོད་དུ། ཨ་པཱ་ན་ཡ་ཞེས་པ་བཞུག་གོ །དེ་ནས་བསྲུང་བ་ནི། སློབ་མའི་གནས་བདུན་དུ་རྡོ་རྗེ་རྒྱ་གྲམ་རེ་རེ་བཞག་པས། རྡོ་རྗེ་དེ་ལས་དེ་འདྲ་བ་བསམ་གྱིས་མི་ཁྱབ་པ་སྤྲོས། ལུས་ལ་རྡོ་རྗེའི་གོ་བཀོན་ཏེ། ཕྱིན་ཆད་གནོད་པ་གང་གིས་
ཀྱང་མི་ཚུགས་པར་བྱས་པའི་མོས་པ་གྱིས། ཞེས་བརྗོད་ལ་སྔགས་གསུམ་གྱི་མཐར། གོང་དང་འདྲ་བ་ལས་ཤིནྟཾ་ཀུ་རུ་ཚབ་ཏུ་རཀྵ་རཀྵ་ཞེས་པ་བཅུག །དེ་ལ་གནས་བདུན་ནི། སྤྱི་བོ། སྙིང་ཁ་སོག་ཕྲག །དཔུང་པ་གཡས་གཡོན། པུས་མོ་གཡས་གཡོན་རྣམས་སོ། །དེ་ནས་ཐུན་མོང་མ་ཡིན་པའི་བྱིན་རླབས་ནི། སློབ་མའི་སྙིང་ཁ་པདྨ་འདབ་མ་བཞི་པའི་ལྟེ་བ་ལ་རྣམ་སྣང་ཚེ་དཔག་མེད། འདབ་མ་བཞི་ལ། ཤར་དུ་རྡོ་རྗེ་ཚེ་དཔག་མེད། ལྷོ་རུ་རིན་ཆེན་ཚེ་དཔག་མེད། ནུབ་ཏུ་པདྨ་ཚེ་དཔག་མེད། བྱང་དུ་ལས་ཀྱི་ཚེ་དཔག་མེད། སྤྱི་བོར་ཡེ་ཤེས་ཚེ་དཔག་མེད། སློབ་དཔོན་དང་དཀྱིལ་འཁོར་གྱི་གཙོ་བོ་དབྱེར་མ་མཆིས་པའི་ཐུགས་ཀ་ནས་འོད་འཕྲོས། སྤྱི་བོའི་ཡེ་ཤེས་ཚེ་དཔག་མེད་ལ་ཐིམ་པས། དེ་ཉིད་འཆི་མེད་ཡེ་ཤེས་ཀྱི་བདུད་རྩིའི་རང་བཞིན་དུ་ཞུ་སྟེ། སྤྱི་བོ་ཚངས་པའི་བུ་ག་ནས་ཞུགས། སྙིང་ཁའི་རིགས་ལྔ་ཚེ་དཔག་མེད་ལ་ཐིམ་པས་དེ་རྣམས་ཀྱང་འཆི་མེད་ཡེ་ཤེས་ཀྱི་བདུད་རྩིའི་རང་བཞིན་དུ་ཞུ་སྟེ་ལུས་ཀྱི་ནང་ཐམས་ཅད་གང༌། བསྐུལ་བའི་བར་དུ་རྐྱེན་གང་གིས་ཀྱང་མི་ཤིགས་པའི་འཆི་བ་མེད་པ་ཚེའི་དངོས་གྲུབ་ཐོབ་པར་གྱུར། གཟུངས་སོགས་གསུམ་པོའི་མཐར། ང་ནི་ཡེ་ཤེས་ཚེ་དཔག་མེད། །ཀུན་ཏུ་བརྙས་པ་སྤང་བར་གྱིས། །འཆི་བདག་ཆེན་པོ་ངས་བཅོམ་ཏེ། །བུ་ཁྱོད་ཚེའི་རིག་འཛིན་བརྙེས། །ཞེས་བརྗོད། རྒྱལ་སྲིད་སྣ་བདུན་གྱི་གཟུགས་བརྙན་རྣམས་སྙིང་པོ་ལན་གསུམ་གྱིས་བྱིན་གྱིས་རླབས་ལ། རིམ་པ་བཞིན་ལག་ཏུ་གཏད་ལ། ལྷ་རྫས་ལས་གྲུབ་ལྟེ་བ་ཤིན་ཏུ་ཟླུམ། །རྩིབས་སྟོང་ལྡན་ཤིང་མུ་ཁྱུད་རབ་
མཉམ་ལྡན། །སྡང་བའི་དགྲ་ལས་རྣམ་པར་རྒྱལ་གྱུར་པའི། །འཁོར་ལོ་རིན་ཆེན་དམ་པའི་དབང་བསྐུར་རོ། །ཨོཾ་ཙཀྲ་རཏྣ་ཨ་བྷི་ཥིཉྩ་མཾ། རིན་ཆེན་ངོ་བོ་ལྷ་རྫས་བཻཌཱུརྱ། །ཀུན་ཏུ་དཔག་ཚད་ཙམ་དུ་སྣང་བྱེད་ཅིང༌། །དྲི་མེད་ཉིན་མོ་ཇི་བཞིན་མཚན་དེ་བཞིན། །ནོར་བུ་རིན་ཆེན་དམ་པས་དབང་བསྐུར་རོ། །ཨོཾ་མཎི་རཏྣ་ཨ་བྷི་ཥིཉྩ་མཾ། གཟུགས་མཛེས་ལྟ་ན་སྡུག་ཅིང་ཚུལ་བཟང་མ། །པགས་པའི་མདོག་ལེགས་འཇམ་ཞིང་དྲི་མཆོག་ལྡན། །ཡིད་འོང་འདོད་དགུའི་རེག་བྱ་དང་ལྡན་པའི། །བཙུན་མོ་རིན་ཆེན༴ ཝ་སྟི་རཏྣ༴ གང་ཡང་རྒྱལ་བས་མུ་ཏིག་མདངས་ལྡན་པའི། །གསེར་སོགས་མང་པོ་ཐུབ་ལ་དབུལ་བ་ལྟར། །བཟོད་ལྡན་མཚུངས་པའི་ཁྱིམ་བདག་ནོར་ལྡན་པའི། །བློན་པོ་རིན་ཆེན༴ མཧཱ་སྟ་རཏྣ༴ ཡན་ལག་ཐམས་ཅད་ལེགས་སྐྱེས་ས་ལ་ནི། །རབ་གནས་གངས་ཆེན་རི་འདྲ་གླང་པོ་ཆེ། །རྒྱལ་པོ་ལ་འོས་མཁའ་ལ་རབ་འགྲོ་བའི། །གླང་པོ་རིན་ཆེན༴ ཧསྟི་རཏྣ༴ ཐོ་རངས་དུས་སུ་ཕྱོགས་རྣམས་མ་ལུས་པའི། །ས་རྣམས་བསྐོར་ཏེ་སླར་ཡང་ལྡོག་ནུས་པའི། །རྨ་བྱའི་མགྲིན་པའི་སྤུ་ལྟར་ཡིད་འོང་བའི། །རྟ་མཆོག་རིན་ཆེན༴ ཨ་ཤྭ་རཏྣ༴ འགྲོ་དང་ལྡོག་དང་ཀུན་ནས་འོང་འགྱུར་བས། །མ་ལུས་བདུད་དཔུང་འཇིག་པར་བྱེད་པ་སྟེ། །དཔའ་བརྟན་འབྱོར་པའི་དཔུང་དང་བཅས་པ་ཡི། དམག་དཔོན་རིན་ཆེན་དམ༴ པུ་རུ་ཥ༴ བཀྲ་ཤིས་རྫས་བརྒྱད་བསངས་སྦྱངས། སྟོང་པའི་ངང་ལས། མཾ་ལས་བྱུང་བའི་བཀྲ་ཤིས་པའི་རྫས་བརྒྱད་སློབ་མ་རྣམས་
ཀྱིས་གཙོ་བྱས་པའི་ནམ་མཁའི་མཐའ་དང་མཉམ་པའི་སེམས་ཅན་ཐམས་ཅད་ཀྱི་ཚེ་དང་བསོད་ནམས་དཔལ་དང་འབྱོར་པ་ཐམས་ཅད་རྒྱས་པར་བྱེད་པའི་ནུས་པ་དང་ལྡན་པར་གྱུར། ཨོཾ་མངྒ་ལ་ཨཥྟ་དྲ་བྱ་སྭཱཧཱ། དེ་ནས་རིམ་པས་སློབ་མའི་ལག་ཏུ་གཏད་ལ། སྔོན་བཅོམ་ལྡན་འདས་ལ་གཟུགས་ཀྱི་ལྷ་མོ་འོད་འཆང་མས་མེ་ལོང་ཕྱག་ཏུ་ཕུལ་བ་ན། བཀྲ་ཤིས་པའི་རྫས་སུ་བྱིན་གྱིས་བརླབས་པ་དེ་བཞིན་དུ། དེང་འདིར་ཡང་རྡོ་རྗེ་སློབ་མས་གཙོ་བྱས་ནམ་མཁའི་མཐའ་དང་མཉམ་པའི་སེམས་ཐམས་ཅད་མེ་ལོང་གི་རྫས་ལ་བརྟེན་ནས། ཤིན་ཏུ་བཀྲ་ཤིས་པར་གྱུར་ཅིག །མེ་ལོང་ཡེ་ཤེས་རྒྱ་མཚོ་ཆེན་པོ་སྟེ། །ཡེ་ཤེས་རྒྱ་མཚོ་མཆོག་ཏུ་དག་གྱུར་ཏེ། །རྣམ་དག་ཆོས་ལ་ཐོགས་མེད་ལོངས་སྤྱོད་པའི། །བཀྲ་ཤིས་དེས་ཀྱང་སྒྲིབ་པ་དག་གྱུར་ཅིག །དེ་བཞིན་དུ། སྔོན་བཅོམ་ལྡན་འདས་ལ་གླང་པོ་ཆེ་ས་བསྲུང་གིས་གི་ཧཾ་ཕྱག་ཏུ་ཕུལ་བ་ཞེས་དང༌། གི་ཧང་གི་རྫས་ལ་ཞེས་འདོན་པ་སྤོ། གི་ཧང་དུག་གསུམ་འཇོམས་པ་ནད་ཀྱི་སྨན། །སྨན་མཆོག་ཆོས་ཉིད་རབ་ཏུ་རྟོགས་གྱུར་ཏེ། །ཉོན་མོངས་ཟུགས་རྔུ་མེད་པར་གྱུར་པ་ཡི། །བཀྲ་ཤིས་དེས་ཀྱང་དུག་གསུམ་ཞི་གྱུར་ཅིག །དེ་བཞིན་དུ། ཞིང་པའི་བུ་མོ་ལེགས་སྐྱེས་མས་ཞོ། ཞོའི་རྫས་ལ་རྟེན་ནས། ཞོ་ནི་ཀུན་གྱི་སྙིང་པོར་གྱུར་པ་སྟེ། །སྙིང་པོ་རྣམ་དག་ཡེ་ཤེས་རྣམ་རྟོགས་ཏེ། །ཡོན་ཏན་ཀུན་གྱི་དབྱིངས་སུ་གྱུར་པ་ཡི། །བཀྲ་ཤིས་དེས་ཀྱང་ནད་ཀུན་ཞི་གྱུར་ཅིག །རྩ་ཚོང་བཀྲ་ཤིས་ཀྱི་རྩ་དུར་བ། དུར་བའི་རྫས་ལ། དུར་བས་
ཚེ་ནི་འཕེལ་བར་བྱེད་པ་སྟེ། །རྡོ་རྗེ་སེམས་དཔའི་ཚེ་ནི་རབ་གྲུབ་སྟེ། །ཉོན་མོངས་སྐྱེ་ཤི་རྒྱུན་ཆད་གྱུར་པ་ཡི། །བཀྲ་ཤིས་དེས་ཀྱང་ཚེ་ཡང་འཕེལ་གྱུར་ཅིགལྷ་ཚངས་པས་ཤིང་ཏོག་བིལ་བ༴ བིལ་བའི་རྫས་ལ། བིལ་བ་རྒྱུ་རྐྱེན་འབྲས་བུར་བཅས་པའི་ཆོས། །འཇིག་རྟེན་འཇིག་རྟེན་འདས་པའི་སྤྱོད་པ་ཀུན། །བྱང་ཆུབ་སྙིང་པོ་མཆོག་ཏུ་གྱུར་པ་ཡི། །བཀྲ་ཤིས་དེས་ཀྱང་དོན་ཀུན་འགྲུབ་གྱུར་ཅིགལྷའི་དབང་པོ་བརྒྱ་བྱིན་གྱིས་དུང་དཀར་པོ་གཡས་སུ་འཁྱིལ་བ༴ དུང་དཀར་གྱི་རྫས་ལ། དུང་ནི་ཆོས་ཀྱི་སྒྲ་རྣམས་སྒྲོག་པའི་ཚུལ། །ཡེ་ཤེས་རྒྱ་མཚོ་མཆོག་ཏུ་དག་གྱུར་ཏེ། །ཆོས་རྣམས་མ་ནོར་ཡོངས་སུ་སྟོན་པ་ཡི། །བཀྲ་ཤིས་དེས་ཀྱང་ཚིག་ལ་དབང་ཐོབ་ཤོག །བྲམ་ཟེ་དཀར་རྒྱལ་གྱི་བུས་ལི་ཁྲི༴ ལི་ཁྲིའི་རྫས། ལི་ཁྲི་དམར་པོ་དབང་གི་རང་བཞིན་ཏེ། །ཆོས་རྣམས་མ་ནོར་དབང་དུ་བསྡུས་བྱས་ནས། །ཆོས་ཀྱི་རྒྱལ་སྲིད་རབ་ཏུ་བརྟན་གྱུར་པའི། །བཀྲ་ཤིས་དེས་ཀྱང་ཁྱེད་སྲིད་བརྟན་གྱུར་ཅིག །ཕྱག་ན་རྡོ་རྗེས་གྲུབ་པའི་རྫས་ཡུངས་དཀར༴ ཡུངས་ཀར་གྱི་རྫས༴ ཡུངས་དཀར་རྡོ་རྗེའི་རིགས་ཏེ་ཐམས་ཅད་དུ། །བགེགས་རྣམས་མ་ལུས་འཇོམས་པར་བྱེད་པ་སྟེ། །མཐུ་སྟོབས་ཡོན་ཏན་ཕུན་སུམ་ཚོགས་པ་ཡིས། །བཀྲ་ཤིས་དེས་ཀྱང་བགེགས་ཀུན་ཞི་བྱེད་ཤོག །དེ་དག་གི་མཐར་སྤྲོ་ན། ཨོཾ་ཕུན་སུམ་ཚོགས་པ་མངའ་བ་སོགས། བཀྲ་ཤིས་ཚིགས་བཅད་གསུམ་བྱའོ། དེ་ནས་གཙོ་བོས་ཇི་ལྟར་སོགས་ཀྱིས་དམ་ཚིག་བསྲུང་བར་ཁས་བླངས། གཏང་རག་གི་ཡོན་འབུལ། དེང་ནས་བརྩམས་ཏེ་སོགས་
སློབ་མར་ཁས་བླངས། དགེ་བ་བྱང་ཆུབ་ཏུ་བསྔོ། དེ་ནས་རྗེས་ཀྱི་བྱ་བ་ནི། མཆོད་པ་གསར་དུ་བཤམས་པའམ་ཁ་གསོས་ལ། བསངས་སྦྱངས། བྱིན་རླབས་གོང་བཞིན་བྱ། གོང་ཚོགས་ཞིང་གི་སྐབས་ལྟར་མཆོད། ཆོས་ཀྱི་འཁོར་ལོ་རྒྱ་ཆེན་བསྐོར། སོགས་སམ་བསྟོད་པ་རྒྱས་བསྡུས་གང་རུང་གིས་བསྟོད། བཅོམ་ལྡན་འདས་རྒྱལ་བ་ཚེ་དང་ཡེ་ཤེས་དཔག་ཏུ་མེད་པའི་ལྷ་ཚོགས་འཁོར་དང་བཅས་པ་རྣམས་ཀྱིས། བདག་དང་སེམས་ཅན་ཐམས་ཅད་ལ་མཆོག་དང་ཐུན་མོང་གི་དངོས་གྲུབ་མ་ལུས་པ་སྩལ་དུ་གསོལ། ཁྱད་པར་དུ་ཡང་བདག་ཅག་སློབ་མར་བཅས་པ་ལ་འཆི་བ་མེད་པར་ཚེའི་དངོས་གྲུབ་སྩལ་བ་དང༌། ཕྱི་ནང་གི་བར་དུ་གཅོད་པ་ཐམས་ཅད་ཞི་ནས། ཚེ་འདི་ཉིད་ལ་རྒྱལ་བ་ཚེ་དང་ཡེ་ཤེས་དཔག་ཏུ་མེད་པའི་གོ་འཕང་ཐོབ་པར་མཛད་དུ་གསོལ། ཞེས་དངོས་གྲུབ་ཞུ། རྡོ་རྗེ་སེམས་དཔའི་ཡིག་བརྒྱ་ལན་གསུམ་སོགས་བརྗོད་པས་ལྷག་ཆད་ཁ་བསྐངས། མ་འབྱོར་པ་དང་སོགས། ཁྱེད་ཀྱིས་སེམས་ཅན་སོགས་བཛྲ་མུཿ མགྲོན་གྱི་ཡེ་ཤེས་པ་རྣམས་གཤེགས། དམ་ཚིག་པ་རྣམས་རང་ལ་ཐིམ། རས་བྲིས་ཀྱི་དཀྱིལ་འཁོར་ལ་བརྟན་བཞུགས་སྤྱི་དང་མཐུན་པར་བྱ། སྨོན་ལམ་དང་བཀྲ་ཤིས་ཀྱང་གང་འགྲུབ་བྱའོ། །གཉིས་པ་ནི། གོང་དུ་བཤད་པའི་ཆོ་ག་དེ་དག་ལྷག་པར་ངེས་པར་བྱས་ནས། ཆོ་གའི་ཁྱད་པར་ལྷག་པོ་རྣམས་བརྗོད་པར་བྱ། ཐོག་མ་ཉིད་དུ། ས་ཆོག །ལྷག་གནས་དཀྱིལ་འཁོར་འབྲི་བ་རྣམས་སྦྱོར་དགོས་ཤིང༌། འོག་མ་སོ་སོའི་སྐབས་སུའང་ཅུང་ཟད་ཅུང་ཟད་འཕེལ་བར་འགྱུར།
དེ་ཡང་དང་པོ་ནི། དཀྱིལ་འཁོར་བྱ་བའི་ས་གཞིའི། དབུས་ཀྱི་ཆར་དཀར་གཏོར་གཉིས། རང་གི་མདུན་དུ། དུང་ཆོས་དྲི་བཟང་གི་ཆུས་གང་བ། རྡོ་རྗེ་དྲིལ་བུ་ཉེར་སྤྱོད་ལྔ་སོགས་བཤམས། ཨ་མྲྀ་ཏས་བསངས། སྭབྷཱ་ཝས་སྦྱངས། སྟོང་པའི་ངང་ལས། ཨོཾ་ལས་གྲུབ་པའི་རིན་པོ་ཆེའི་སྣོད་ཡངས་ཤིང་རྒྱ་ཆེ་བར་བྷྲཱུཾ་ལས་གཏོར་མ་འདོད་པའི་ཡོན་ཏན་མ་ཚང་བ་མེད་པ་ཡེ་ཤེས་ཀྱི་བདུད་རྩིའི་རང་བཞིན་ནམ་མཁའ་དང་མཉམ་པར་གྱུར། ཨོཾ་ཨཱཿཧཱུཾ། རང་གི་སྙིང་ཁ་ནས་འོད་ཟེར་འཕྲོས། ཕྱོགས་སྐྱོང་འཁོར་དང་བཅས་པ་ཨོཾ་བཛྲ་ས་མཱ་ཛཿ རྒྱས་པ་ལ་དགའ་ན་ཆ་གསུམ་གཏོར་མ་བཞིན་ཕྱོགས་སྐྱོང་གི་གཏོར་མ་བཏང༌། བསྡུ་ན ཨོཾ་དཱ་ཤ་དི་ཀ་ལོ་ཀ་པཱ་ལ་ས་པཱ་རི་ཝཱ་ར་བྷྱཿཨརྒྷཾ་པྲ་ཏཱིཙྪ་སྭཱཧཱ། དེ་བཞིན་དུ། པཱའ་ཏྱཾ་ཨོཾ་དཱ་ཤ་དིཀ་ལོ་ཀ་པཱ་ལ་ས་པཱ་རི་ཝཱ་ར་བྷྱཿཨ་ཀཱ་རོ་སོགས་བཏགས་པ་ལན་གསུམ་གྱིས་ཕུལ། པུཥྤེ་ནས། ཤཔྟའི་བར་གྱིས་མཆོད། ཤར་ཕྱོགས་རྡོ་རྗེ་ཅན་གྱི་ལྷ་ཚོགས་འཁོར་དང་བཅས། སོགས་ཀྱིས་གསོལ་བ་བཏབ། ཡིག་བརྒྱ། བཟོད་གསོལ། བཛྲ་མུཿ ཞེས་སོགས་ཀྱིས་གཤེགས་སུ་གསོལ། རང་གི་སྙིང་ཁ་ནས་འོད་ཟེར་འཕྲོས། གནས་བདག་གཞི་བདག་གྲོང་བདག་གཉུག་མར་གནས་པ་ཐམས་ཅད་ཨོཾ་བཛྲ་ས་མཱ་ཛཿ ཨོཾ་བྷུ་མི་པཱ་ལ་ས་པཱ་རི་ཝཱ་ར་བྷྱཿ ཞེས་པ་ཐམས་ཅད་ཀྱི་མགོར་སྦྱར་ནས་ཨརྒྷཾ་པཱདྱཾ་གིས་ཆུ་གཉིས། ཨ་ཀཱ་རོ། ལན་གསུམ་གྱིས། གཏོར་ལ། པུཥྤེ་ནས་ཤཔྟའི་བར་གྱིས་ཉེར་སྤྱོད་དང༌། རོལ་མོ་ཕུལ། སའི་ཕྱོགས་འདིར་དཀྱིལ་འཁོར་གྱི་ལས་རྩོམ་ན།
གཉེན་གཤིན་དུ་གྱུར་པའི་སེམས་ཀྱིས་སའི་ཕྱོགས་འདི་བདག་ལ་ཅི་བདེ་བར་སྩོལ་ལ། དགེ་བའི་སྡོང་གྲོགས་རྒྱ་ཆེན་པོས་མཛོད་ཅིག །ཅེས་པའི་མཐར་གཏོར་མ་བཏང༌། གཙྪ་གཙྪ་སྭ་བྷཱ་ཝ་ནཾ། ཞེས་བརྗོད། ཨོཾ་ཨ་མྲྀ་ཏ་ཀུནྚ་ལི་ཧ་ན་ཧ་ན་ཧཱུཾ་ཕཊ། ཞེས་པ་བཟླ་བཞིན་དུ། ས་གཞི་ལ་ཡུངས་དཀར་དང༌། ཐལ་བས་གཏོར། སྤོས་ཆུས་ཆག་ཆག་བཏབ། ལག་པ་གཡས་ས་གནོན་གྱི་ཕྱག་རྒྱ་ས་ལ་རེག་སྟེ་གཟུངས་སམ་སྙིང་པོ་ལན་བརྒྱ་རྩ་བརྗོད་ལ། སའི་ཕྱོགས་འདིར་བཅོམ་ལྡན་འདས་རྒྱལ་བ་ཚེ་དང་ཡེ་ཤེས་དཔག་ཏུ་མེད་པའི་དཀྱིལ་འཁོར་ཆེན་པོ་བྲི་བར་བྱའོ། །ཞེས་བློས་བཟུང་ཞིང་ངག་ཏུ་བརྗོད། ཨོཾ་བྷུ་ཁཾ། ས་གཞི་ནམ་མཁའི་རང་བཞིན་དུ་གྱུར༌། ཧཱུཾ་ལཾ་ཧཱུཾ། རྡོ་རྗེའི་རང་བཞིན་དུ་གྱུར། ཨོཾ་མེ་དྷི་ནི་བཛྲ་བྷ་ཝ་བནྡྷ་ཧཱུཾ། ཕྱོགས་ཐམས་ཅད་ཡོངས་སུ་བཅིང་བར་གྱུར། ཞེས་བརྗོད་དོ། །གཉིས་པ་ནི། གོང་དུ་བཤད་པའི་བདག་བསྐྱེད་སྔོན་དུ་འགྲོ་བས། མདུན་དུ་དྲིའི་མཎྜལ་གྱི་དབུས་སུ་ཚོམ་བུ། མཆོད་གཏོར་དང་བཅས་པ་བཤམས་ལ། མཆོད་པ་གཏོར་མ་གོང་བཞིན་བྱིན་གྱིས་རླབས། རང་གི་སྙིང་ཁ་ནས་འོད་ཟེར་འཕྲོས། ས་འོག་ནས་སའི་ལྷ་མོ་འཁོར་དང་བཅས་པ་ཚོམ་བུའི་སྟེང་དུ་བྱོན་པ་ནི། སྐུ་མདོག་སེར་མོ་རྒྱན་ཐམས་ཅད་ཀྱིས་བརྒྱན་པ། གསེར་གྱི་བུམ་པ་ཐུགས་ཀར་འཛིན་པ། སའི་ལྷ་མོ་དཔག་ཏུ་མེད་པས་བསྐོར་བ་དང་བཅས་པར་གྱུར། ཨོཾ་པྲ་ཐི་ཝི་དེ་ཝི་བྷྱཿ ཞེས་ཐམས་ཅད་ལ་སྦྱར་ཏེ། ཆུ་གཉིས་སྔོན་དུ་འགྲོ་བའི་ཉེར་སྤྱོད་དང་གཏོར་མ་གོང་བཞིན་འབུལ།
སྐྱོབ་པ་སངས་རྒྱས་ཐམས་ཅད་ཀྱི། །སྤྱོད་པའི་ཚུལ་དང་ཁྱད་པར་གྱི། །ས་དང་ཕ་རོལ་ཕྱིན་པ་ལ། །ལྷ་མོ་ཁྱོད་ནི་དཔང་དུ་གྱུར། །ཤཱཀྱ་སེང་གེ་སྐྱོབ་པ་ཡི། །ཇི་ལྟར་བདུད་ཀྱི་སྡེ་བཅོམ་པ། །དེ་བཞིན་བདག་གིས་བདུད་སྡེ་ལས། །རྒྱལ་བར་བྱས་ཏེ་དཀྱིལ་འཁོར་འབྲི། ཞེས་ལན་གསུམ་གསོལ་བ་བཏབ། སླར་ཡང་ཨརྒྷཾ་གྱིས་མཆོད་ཡོན་ཕུལ་ཏེ། སའི་ལྷ་མོ། སླར་ཡང་ས་དེ་ཉིད་ལ་ཐིམ། ཞེས་བརྗོད། ཚོམ་བུ་དེ་བསལ་ནས་སླར་ཡང་དྲིའི་མཎྜལ་གྱི་དབུས་སུ་ཚོམ་བུ་དགུ་བཀོད། མཆོད་པ་རྒྱ་ཆེར་བཤམས། མདུན་བསྐྱེད་བསངས་སྦྱངས། སྟོང་པའི་ངང་ལས། ས་གཞི་རྡོ་རྗེའི་རང་བཞིན་དུ་གྱུར་པའི་སྟེང་དུ། དྲི་བཟང་གི་ཐིག་ལེ་རྣམས་པདྨ་དང་ཟླ་བའི་གདན་གྱི་བཀོད་པ་ཕུན་སུམ་ཚོགས་པ་དང་བཅས་པར་གྱུར། རང་གི་སྙིང་ཁ་ནས་འོད་ཟེར་ལྕགས་ཀྱུ་ལྟ་བུའི་ཚོགས་བསམ་གྱིས་མི་ཁྱབ་པ་སྤྲོས་ཏེ། རང་བཞིན་གྱི་གནས་ནས། སངས་རྒྱས་དང་བྱང་ཆུབ་སེམས་དཔའ་ཐམས་ཅད་རྒྱལ་བ་ཚེ་དཔག་མེད་ལྷ་དགུའི་རྣམ་པར་བཛྲ་ས་མཱ་ཛཿ མ་ལུས་སེམས་ཅན་སོགས་ཀྱི་མཐར་མཆོད་བསྟོད་བསྡུས་པ་ཞིག་བྱས་ལ། པད་ཟླའི་གདན་རྣམས་ཀྱི་སྟེང་དུ་ཡོངས་སུ་འཁོད་པར་གྱུར། མཆོད་པ་རྣམས་གོང་བཞིན་བྱིན་གྱིས་རླབས། དཀྱིལ་འཁོར་སྒྲུབ་པའི་སྐབས་སུ་བཤད་པ་ལྟར་འབུལ། བཅོམ་ལྡན་འདས་རྒྱལ་བ་ཚེ་དང་ཡེ་ཤེས་དཔག་ཏུ་མེད་པའི་ལྷ་ཚོགས་འཁོར་དང་བཅས་པ་རྣམས་ཀྱིས། བདག་དང་སློབ་མར་བཅས་པ་ལ་རབ་ཏུ་གཉེན་གཤིན་པའི། ཐུགས་ཀྱིས་སའི་ཕྱོགས་
འདིར་ལྷག་པར་གནས་པ་མཛད་ཅིང༌། ནང་པར་དཀྱིལ་འཁོར་ཆེན་པོ་བྱིན་གྱིས་རླབས་པར་མཛད་དུ་གསོལ། ཞེས་གསོལ་བ་བཏབ། སྤྲོ་ན། ཚེ་དཔག་མེད་མགོན་བཅོམ་ལྡན་འདས། ཞེས་འདོན་པ་བསྒྱུར་ཏེ། སྤྱི་རྒྱུད་ལྟར་སྙན་གསན་དབབ་ནའང་ཤིན་ཏུ་ལེགས་སོ། །ནང་པར་འདེགས་པའི་ལུགས་ཡོད་ཀྱང་སྐབས་འདི་ཉིད་དུ་བྱས་ན་ལག་ལེན་བདེ་སྟེ། ཨོཾ་བཛྲ་ཨུ་ཏིཥྠ། ཞེས་རྡོ་རྗེ་གཙུག་གཏོར་གྱི་ཕྱག་རྒྱ་སྤྱི་བོར་བཟློག་ཏེ། མདུན་བསྐྱེད་ཀྱི་ལྷ་སྣམ་མཁར་བཏེགས། མཆོད་བསྟོད་བསྡུས་པ་ཞིག་བྱ། ཨོཾ་བཛྲ་རཀྵ་རཀྵ་ཧཱུཾ་ཧཱུཾ་ཧཱུཾ་ཕཊ་སྭཱཧཱ། ཞེས་ལན་གསུམ་གསུམ་གྱིས་ནམ་མཁའི་དཀྱིལ་འཁོར་དང་ས་གཞི་ལ་བསྲུང་བ་བྱའོ། །དེ་ནས་གོང་དུ་བཤད་པ་ལྟར་བུམ་པ་ལྷག་གནས་བྱ། །སློབ་མ་ལྷག་པར་གནས་པ་ནི་གཅིག་ཏུ་དགོས་པ་མ་ཡིན་ཞིང་དེང་སང་ཕལ་ཆེར། ལག་ལེན་ལ་མི་མཛད་མོད། འཆི་མེད་རྔ་སྒྲའི་དབང་བསྐུར་སོགས་འགའ་ཞིག་ལ་མཛད་པ་ལྟར་ནའང་ལེགས་པ་ཡིན་ནོ། །དེ་ལྟར་ན། མྱ་ངན་ལས་འདས་པའི་བསམ་པ་བརྟན་པོ་བསྐྱེད་པ་དང༌། གསོལ་བཏབ་དང་སྤྲོ་བ་བསྐྱེད་པ་དང༌། རྒྱུན་བཤགས་དང༌། སྒོ་གསུམ་གྱི་བྱིན་གྱིས་བརླབས་ཞིང་མཆོད་པ་དང། སོ་ཤིང་དང༌། ཁྱོར་ཆུ་དང༌། ཀུ་ཤ་དང༌། བསྲུང་སྐུད་དང༌། ཟབ་མོའི་ཆོས་བཤད་པ་དང༌། རྨི་ལམ་བརྟག་པ་རྣམས་སྤྱི་དང་མཐུན་པར་བྱའོ། །གསུམ་པ་ནི། ཐིག་སྐུད་སྣ་ལྔ་གཅིག་ཏུ་སྒྲིལ་བ་ཞིག་བསངས་སྦྱངས། སྟོང་པའི་ངང་ལས། ཨོཾ་ཧཱུཾ་ཏྲཱཾ་ཧྲཱི་ཨ་ཡོངས་སུ་གྱུར་པ་ལས་བྱུང་བའི་ཐིག་སྐུད་སྣ་
ལྔ་དེ་བཞིན་གཤེགས་པ་ལྔའི་བདག་ཉིད་དུ་གྱུར། རང་གི་སྙིང་ཁ་ནས་འོད་ཟེར་འཕྲོས། སྟ་གོན་གྱི་ལྷའི་ཐུགས་ཀ་ནས། ཡེ་ཤེས་ཀྱི་ཐིག་སྐུད་སྤྱན་དྲངས་ཏེ། དམ་ཚིག་གི་ཐིག་སྐུད་ལ་ཐིམ། ཨོཾ་བཛྲ་ས་མ་ཡ་སཱུ་ཏྲ་མ་ཏི་ཀྲ་མ་ཧཱུཾ། ཞེས་ལན་མང་དུ་བསྔགས། ཐིག་ཆེན་བརྒྱད་གདབ་ཚུལ་སྤྱི་དང་མཐུན་པར་གདབ། དཀྱིལ་འཁོར་གྱི་སྒོ་རྐྱང་རྟ་བབས་སྒོ་ཚད་གཅིག་ལ་སྣམ་བུ་བཞི་པར་བྱ་ཞིང༌། རྩ་ཐིག་ལ་རེག་ཏུ་ཉེ་བར་ནང་གི་པདྨའི་མུ་ཁྱུད་ཀྱི་ཕྱི་ཐིག་བསྐོར། ལྷག་མ་སྤྱི་དང་འདྲའོ། །མཐར་བཛྲ་མུཿ ཞེས་ཐིག་སྐུད་ཀྱི་ཡེ་ཤེས་པ་གཤེགས་ཏེ་ཐིག་སྐུད་བྱིན་རླབས་སོ། །རྡུལ་ཚོན་བྱིན་རླབས་ནི། ཐིག་སྐུད་ཅེས་པ་ཐམས་ཅད་རྡུལ་མཚོན་ཞེས་པ་དང༌། མཐར་ཨོཾ་བཛྲ་ཙི་ཏྲ་ས་མ་ཡེ་ཧཱུཾ། ཞེས་བསྔགས་པ་ལས་གཞན་རྣམས་དེ་ཉིད་དང་འདྲ་བ་ནི་རྡུལ་ཚོན་གྱིས་བྱིན་གྱིས་རླབས་པའོ། །དཀྱིལ་འཁོར་འབྲི་ཚུལ་ཡང་སྤྱི་དང་མཐུན། རྟེན་གྱི་དཀྱིལ་འཁོར་སྒྲུབ་ཐབས་ལས་འབྱུང་བ་བཞིན་འབྲི་ཞིང༌། ལྷ་མཚན་ནི་བུམ་པ་སེར་པོ་དཔག་བསམ་ཤིང་གི་ཁ་རྒྱན་དང་བཅས་པ་ཟླ་བའི་གདན་ལ་གནས་པ་བྲིའོ། །འདི་ཉིད་ཀྱི་གཞུང་ཁོ་བོས་མཐོང་བ་ཕལ་ཆེར་ན། ལྷ་དགུ་ཉི་མའི་གདན་ལ་བཞུགས་པར་བྱས་འདུག་ནའང༌། བོད་ཀྱི་ཡི་གེ་སྔ་ཕྱི་ཐམས་ཅད་ན་ཟླ་གདན་ཁོ་ནར་ཡོད་པའི། ཟླ་གདན་དུ་འོས་པར་ཡང་མངོན་ལ། ལག་ལེན་གྱི་རྒྱུན་ལའང་ཟླ་གདན་ཁོ་ནར་སྣང་ལ། ཟླ་གདན་དུ་བྱ་ལ། ཁྱད་པར་ཅན་གྱི་རྒྱུ་མཚན་ཞིག་ཡོད་ན་མ་གཏོགས། རྒྱ་གཞུང་གི་ཡི་གེ་མ་དག་པར་སེམ་མོ། །མཐར་རྒྱན་དགྲམ་པ་སོགས་སྤྱི་དང་འདྲའོ། །དངོས་གཞི་
དཀྱིལ་འཁོར་སྒྲུབ་པའི་གནས་སྐབས་སུ། ཡེ་ཤེས་པ་སྤྱན་འདྲེན་དངོས་དེ་སྟ་གོན་གྱི་ལྷ་སྤྱན་འདྲེན་པ་ཡིན་པས། རང་བཞིན་གྱི་གནས་ནས་ཞེས་པ། ནམ་མཁའི་དབྱིངས་ནས་ཞེས་འདོན་པ་སྤོ། གཉིས་སུ་མེད་པར་ཐིམ། ཞེས་པའི་རྗེས་སུ། ཡང་ཐུགས་ཀའི་ཧྲཱི་ལས་འོད་ཟེར་འཕྲོས། སངས་རྒྱས་དང་བྱང་ཆུབ་སེམས་དཔའ་ཐམས་ཅད་རྒྱལ་བ་ཚེ་དཔག་མེད་ཀྱི་ལྷ་ཚོགས་ཀྱི་རྣམ་པར་ཨོཾ་བཛྲ་ས་མཱ་ཛཿ ཚོགས་ཞིང་གི་སྐབས་བཞིན་མཆོད། ཛཿཧཱུཾ་བཾ་ཧོཿ དེ་ནས་སླར་ཡང་ཐུགས་ཀའི་སོགས་དབང་བསྐུར་རྒྱས་བཏབ་བྱ། རྗེས་ཆོག་གི་ཚེ། རྡུལ་ཚོན་གཤེགས་གསོལ་སྤྱི་དང་མཐུན་ནོ། །རས་བྲིས་སམ་རྡུལ་ཚོན་གང་ཡིན་ཀྱང་རུང་སྟེ། ཆོ་ག་ཉིན་ཞག་སྦྲེལ་མ་བྱེད་པའི་ཚེ། བདག་བསྐྱེད་ཀྱི་ཡེ་ཤེས་པ་བཤེགས་པ་ཉིན་རེ་བཞིན་བྱེད་དགོས་ལ། རྡུལ་ཚོན་ལ་དངོས་གཞིའི་ཉི་མ་གཉིས་པ་ཕན་ཆད་ལ། སྟ་གོན་གྱི་ལྷ་སྤྱན་འདྲེན་མི་བྱེད་པ་ཉིད་དག་པས། ངག་འདོན་རས་བྲིས་ཀྱི་སྐབས་སུ་བཤད་པ་ཉིད་ཁོ་ནས་ཆོག་གོ །དེ་བཞིན་དུ་བུམ་པ་སྒྲུབ་ཚུལ་ཡང་རས་བྲིས་གཞན་ནོ། །གསུམ་པ་ནི། རྡུལ་ཚོན་ནམ་རས་བྲིས་ཀྱི་དཀྱིལ་འཁོར་གྱི་ཆོ་ག་གང་ལ་རྟེན་ཀྱང་འདྲ་སྟེ། ལས་བུམ་མམ་ལས་ཐམས་ཅད་པ་བཟླས་པའི་སྤོས་ཆུས། སྒྲུབ་བྱའི་ལས་ཐམས་ཅད་དམ། ཡན་ལག་ལྔ་ལེགས་པར་བཀྲུས་ཏེ། ཁྲུས་ཁུ་ཕྱེད་ཁམས་ཕོར་སོ་མར་བཞག །ཕྱེད་ས་ནག་དང༌། མཆོད་རྟེན་རྙིང་པའི་ས། རོ་ཐལ། རྫ་ཐལ། ཚིག་སྣག་རྣམས་དང་བསྲེས་ཏེ། གཤིན་རྗེའི་གཟུགས་ནག་པོ་དབྱུགས་པ་དང་ཞགས་པ་འཛིན་པ་ཞིག་བཅོས་ལ།
སླ་ངའི་ནང་དུ་ཁ་ཅུང་ཟད་སྦུབ་པས་མགོ་ལྷོར་བསྟན་ཏེ་དཀྱིལ་འཁོར་གྱི་ལྷོ་ཕྱོགས་སུ་བཞག །དེ་ལ་གདན་གཞི་ནག་པོ་འདིང་ཞིང༌། སྟེང་ནས་ཀྱང་རས་ནག་གིས་ཅུང་ཟད་བཀབ། དེའི་མདུན་དུ་ཁམ་ཕོར་འོ་མས་བཀང་བ་དང༌། ཉའི་བདུག་སྤོས་ཀྱི་སྣོད་དང༌། ཉེར་སྤྱོད་ལྔ་རྣམས་བཤམས། མེ་ཏོག་ནག་པོ་དང༌། འབྲུ་ནག་པོའི་རིགས་དང༌། ཤ་མར་བུ་རམ་གསེར་དངུལ་སོགས་རིན་པོ་ཆེ་དང༌། ཚྭ་སོགས་གཤིན་རྗེའི་རྫོངས་རྣམས་དང༌། དེ་རྣམས་འཇལ་པའི་བྲེ་ལ། ཨོཾ་ཨསྨ་སརྦ་ས་ཙི་སྭཱཧཱ། ཞེས་བྲིས་ཤིང་བཟླ་སྲང་དང་ཞོ་ཆ་ལ། ཨོཾ་ཐིབ་ཏ་མཐོང་བའི་རྒྱལ་པོ་སྭཱཧཱ། ཞེས་བྲིས་ཤིང་བཟླས་ལ་སྔ་མ་དང་ཉེ་བར་བཞག །འབྲང་རྒྱས་ཕྱེད་དཀར་ཕྱེད་ནག་གི་དཀར་པོ་ལ་མར་གྱི་སྡོང་བུ་ལྔ། ནག་པོ་ལ་མར་ནག་གི་སྡོང་བུ་ལྔ་བཙུགས། ཤར་རམ་ནུབ་ཏུ་བཞག །དཀྱིལ་འཁོར་གྱི་བྱང་ཕྱོགས་སུ། ཀུ་ཤའི་གདན་ལ་སྒྲུབ་བྱའི་གླུད་གོས་ཚོན་སྐུད་སྣ་ལྔས་རྒྱ་གྲམ་རིས་སུ་བཅིངས་ནས་བཞག །དུག་སྣ་བཏབ་པའི་ཆུ་ཁམ་ཕོར་གང་འོ་མ་དང་བསྲེས་པ་ཡང་གང་འོས་སུ་བཞག་ཅིང༌། སྟན་དཀར་པོ་དང༌། མེ་ཏོག་དཀར་པོ་སོགས་ཀྱང་འཛོམ་པར་བྱ་སྟེ། དེ་ཡན་ཆད་ནི། དཀྱིལ་འཁོར་གྱི་རྒྱན་དགྲམ་པ་དང་ལྷན་ཅིག་བཤམས་ཀྱང་རུང༌། བུམ་པ་སྒྲུབ་པ་ཡན་ཆད་ཀྱི་བར་གང་ལ་བྱས་ཀྱང་འདྲའོ། །ལྷོ་ཕྱོགས་སུ་སྟེགས་བུའི་སྟེང་དུ་ཚེ་མདོ་བཞུགས་སུ་གསོལ། །བྱང་ཕྱོགས་སུ་སྟེགས་བུའི་སྟེང་དུ་འཆི་མེད་རྔ་སྒྲ་བཞུགས་སུ་གསོལ་ཏེ། དབང་བསྐུར་ཐོས་པ་རེ་རེས་གཙང་སྦྲ་དང་བཅས་ཏེ༌། དེ་གཉིས་ཀློག་
གྲངས་ནི་སྒྲུབ་བྱའི་ལོ་གྲངས་བྱེད་པའི་ལག་ལེན་ཁོ་ན་ཡོད་ཀྱང་བཤད་ཚོད་བཞིན་ལན་བརྒྱ་རྩ་བརྒྱད་ཉིད་བྱས་ན་ལེགས་པ་སྟེ་མ་ཚར་གྱི་དོགས་ན་ཀློག་མཁན་ཆ་གསུམ་བཞི་བྱའོ། །དེ་ཡང་སློབ་དཔོན་གྱི་རྫས་དེ་དག་ཐམས་ཅད་སྔགས་དྲུག་ཕྱག་རྒྱ་དྲུག་གིས་བྱིན་གྱིས་རླབས་པའང༌། བསྡུ་ན་བསངས་སྦྱངས། ནམ་མཁའ་མཛོད་ཀྱི་སྔགས་བརྒྱ་ལན་ཉི་ཤུ་རྩ་གཅིག་གིས་བྱིན་གྱིས་བརླབས། གཟུགས་བརྙན་དེ་གཤིན་རྗེ་འཁོར་དང་བཅས་པ་དངོས་སུ་བསམ། མདོ་ཀློག་མཁན་གཉིས་ལས་ལྷོ་མས་གཟུངས་མདོ་ཚར་རེ་ཐོན་པ་དང༌། མེ་ཏོག་ནག་པོ་སོགས་བྲེ་སྲང་ཞོ་ཆ་རྣམས་ཀྱིས་གཞལ། གཞི་ནག་པོའི་སྟེང་དུ་སྤུངས་ཏེ། ཆོས་ཀྱི་རྒྱལ་པོ་གཤིན་རྗེ་འཁོར་དང་བཅས་པ་ལ་རྫོངས་ཀྱི་དངོས་པོ་འདི་དང་འདི་ལྟ་བུ་ཞེས་མིང་སྨོས་ནས། བྲེ་གཅིག་བཅུ་བརྒྱ་སྟོང་གྲངས་མེད་པའི་བར་དུ་འབུལ་གྱིས། སྒྲུབ་བྱ་འདི་ཞེས་བྱ་བའི་ཚེ་གླུད་དང་སྲོག་གླུད་བཞེས་ལ། གནོད་པའི་སེམས་སྤངས་ནས། ཕན་པ་དང་བདེ་བ་བྱང་ཆུབ་ཀྱི་སེམས་དང་ལྡན་པར་མཛད་དུ་གསོལ། ཞེས་བརྗོད། སྲང་དང་ཞོ་ཆ་ལའང་དེས་འགྲེ། བྱང་མས་མདོ་ཚར་རེ་ཐོན་པ་དང༌། ཚོན་སྐུད་དེ་ལ་ཉའི་དུད་པས་བདུག། དེ་རྣམས་གྲུབ་ཏུ་ཉེ་བ་ན། སློབ་དཔོན་གྱི་འཇིག་རྟེན་འདས་གཏོར་དང༌། རྒྱལ་ཆེན་བཞིའི་གཏོར་མ་དང༌། ཆ་གསུམ་རྣམས་གཏོང༌། མདོ་ཀློག་ཟིན་པ་ན། འབྲང་རྒྱས་ཕྱེད་མར་གཤགས་ལ། ནག་པོ་ངོས་དེ་སྣོད་ཅིག་ཏུ་བཅུག །
མར་ནག་གི་སྡོང་བུ་ལྔ་ཡང་སྤར་ལ། ཁྲུས་ཁུའི་ཁམ་ཕོར་དང་ལྷན་ཅིག་གཤིན་རྗེའི་གཟུགས་ཀྱི་མདུན་དུ་བཞག་ལ། སློབ་དཔོན་ཡི་དམ་གྱི་ང་རྒྱལ་བརྟན་པོས་འདི་སྐད་ཅེས། འདི་ནས་ལྷོ་ཡི་ཕྱོགས་རོལ་ནས། །དཔག་ཚད་བརྒྱད་ཁྲིའི་ཕ་རོལ་ན། །རིམ་པ་བདུན་གྱི་ས་འོག་ན། །ཐོད་པ་ལྕགས་ཀྱི་གྲོང་ཁྱེར་ན། །ཡི་དྭགས་ཀུན་གྱི་སྡཻ་དཔོན་པོ། །མ་མོ་ཀུན་གྱྀ་ཚོགས་རྗེ་བོ། །གསོན་གཤིན་ཀུན་ཀྱི་ཟམ་ཁ་བ། །ཤི་བ་ཀུན་གྱི་གཤིན་བུ་རྗེ། །གསོན་པོ་བཀོས་ལ་འདེབས་པ་པོ། །དགེ་བ་ཅན་གྱི་སྟངས་འཛིན་པ། །སྡིག་པ་ཅན་གྱི་ཆད་པ་མཁན། །ལྷ་དང་བཅས་པའི་འཇིག་རྟེན་ན། །ལེགས་ཉེས་ཆོས་བཞིན་སྤྱོད་པ་པོ། །ཆོས་རྒྱལ་གཤིན་རྗེ་ཞེས་བྱ་བ། །མངོན་ཤེས་རྫུ་འཕྲུལ་མཐུ་རླབས་ཅན། །འདི་སྐད་ཉོན་ཅིག་འཆི་བདག་ཉོན། །ཆོས་ཀྱི་རྒྱལ་པོ་གཤིན་རྗེའི་ཚོགས། །འཆི་བདག་འཁོར་དང་བཅས་རྣམས་ལ། །སྒྲུབ་བྱ་ཆེ་གེ་ཞེས་བྱ་བའི། །ཚེ་དང་སྲོག་གི་གླུད་འབུལ་གྱི། །འདོད་ཡོན་རིན་ཆེན་སྣ་ལྔ་དང༌། །འབྲུ་དང་མཆོད་ཡོན་སྣ་ཚོགས་དང༌། །ཞལ་ཟས་མེ་ཏོག་སོགས་མཆོད་དང༌། །གླུད་འདི་ལུང་ལ་ཚེ་སྲོག་བྱིན། །བཟུང་བ་ཐོང་ལ་བཅིངས་བ་ཁྲོལ། །བཀའ་དང་དམ་ལས་མ་འདའ་ཅིག །ཁྱོད་ཀྱི་འཁོར་གྱི་ཡི་དྭགས་ལ། །བཟའ་བ་བཟང་པོ་འདི་འབུལ་གྱིས། །འདི་ཟོ་འཁོར་གྱི་ཡི་དྭགས་རྣམས། །མ་འཚེ་བར་ནི་གཞན་དུ་དེངས། ཞེས་པའི་མཐར་བདུད་རྩི་འཁྱིལ་བའི་སྔགས་དྲག་ཏུ་བརྗོད་ཅིང༌། གཟུགས་བརྙན།
རྫོངས་ཆས། ཉེར་སྤྱོད། གཏོར་མ། ཁྲུས་ཁུ། གཞི་སྟན་ཁེབས་སོགས་ཐམས་ཅད་ལྷོ་ཕྱོགས་ཀྱི་གྲོད་ཟད་མཐར་སྐྱལ་ལོ། །དེ་ནས་གླུད་གོས་ཀྱི་ཚོན་སྐུད་བཀྲོལ་ལ། དེས་སྒྲུབ་བྱའི་ཡན་ལག་ལྔ་བཅིངས། སློབ་དཔོན་བདུད་རྩི་འཁྱིལ་བའི་ང་རྒྱལ་དང་ལྡན་པས་བདེན་པ་བདར་བའི་མཐར། སྒྲུབ་བྱ་འདི་ཞེས་བགྱི་བའི་སྡིག་སྒྲིབ་ནད་གདོན་འཁོན་གྲིབ་མི་གཙང་བ། ཆགས་ཆེ་ཉམས་ང༌། ལོ་སྐེག །ཟླ་སྐེག །ཞག་སྐེག །བྱད་ཁ། ཕུར་ཁ། མི་མཐུན་པར་བྱེད་པ། མཚན་མོ་ནག་མོ་དང༌། དུས་ཀྱི་ཞགས་པའི་གདོན་ལ་སོགས་པ་མདོར་ན་ཕྱི་ནང་གསང་བའི་བར་ཆད་མི་མཐུན་པའི་ཕྱོགས་གང་ཡིན་པ་ཐམས་ཅད་སྐད་ཅིག་ཐང་ཅིག་ཡུད་ཙམ་ལ། ཚོན་སྐུད་སྣ་ལྔ་པ་འདི་ཉིད་ལ་ཐིམ་པར་གྱུར་ཅིག །ཨོཾ་ཊཀྐི་ཧཱུཾ་ཛཿ ཞེས་ལན་གསུམ་གྱི་མཐར། ཨ་མྲྀ་ཏ་ལན་ཉི་ཤུ་རྩ་གཅིག་བཟླས་པའི་རལ་གྲིས་ཚོན་སྐུད་དེ་གཅོད་ཅིང༌། གང་དག་སངས་རྒྱས་རང་སངས་རྒྱས། །སངས་རྒྱས་རྣམས་ཀྱི་ཉན་ཐོས་དང༌། །ཚངས་པ་དང་ནི་འཇིག་རྟེན་སྐྱོང༌། །གནོད་སྦྱིན་སྡེ་དཔོན་དབང་ཕྱུག་ཆེ། །དེ་བཞིན་གནོད་སྦྱིན་སྟོབས་ཆེན་དང༌། །འཕྲོག་མ་བུ་དང་བཅས་པ་སྟེ། །དེ་དག་རྣམས་ཀྱི་གཟི་བརྗིད་ཀྱིས། །བྱད་སྡེམས་ལས་རྣམས་ཆད་གྱུར་ཅིག །ཨོཾ་སརྦ་བནྡྷ་ཀ་ཁོརྡ་ཙྪེ་ད་ནཱ་ཡ་སྭཱཧཱ། ཞེས་བརྗོད། དེ་ནས་དུམ་བུ་མང་པོར་བཏུབས་ཏེ། ཁམ་ཕོར་སོ་མའི་ནང་དུ། འོ་ཆབ་དང་དུག་ཆུ་བསྲེས་པ་དེ་ལ་ཚོན་སྐུད་དུམ་རེ་དང༌། བུམ་ཆུ་ཐིག་རེ་སྒྲུབ་བྱའི་ལུས་ལ་
བསྐོར། རྗེས་སུ་བླུག །སྙིང་པོའི་མཐར། སྒྲུབ་བྱ་འདི་ཞེས་བྱ་བའི་ལུས་ངག་ཡིད་གསུམ་གྱི་དུག་བཅོམ་པར་གྱུར་ཅིག །ཅེས་བརྗོད། མཐར་རྡོ་རྗེ་གསོར་ཞིང་འདི་སྐད་ཅེས་བརྗོད་དེ། འདོད་ཆགས་ཞེ་སྡང་གཏི་མུག་གསུམ། །འདི་དག་འཇིག་རྟེན་དུག་མསུམ་སྟཻ། །སངས་རྒྱས་བཅོམ་ལྡན་དུག་མི་མངའ། །སངས་རྒྱས་གཟི་ཡིས་དུག་བཅོམ་མོ། །དེ་བཞིན་དུ་ཆོས་དང་དགེ་བདུན་ལའང་སྦྱར། ས་འདི་དུག་གི་མ་ཡིན་ཏེ། །ས་འདི་དུག་གི་ཕ་ཡང་ཡིན། །བདེན་པའི་བདེན་ཚིག་འདི་ཡིས་སུ། །དུག་གསུམ་ས་ཡི་ནང་དུ་སོང༌། །དེ་བཞིན་དུ་ཆུ་དང་མེ་དང་རླུང་རྣམས་ལའང་སྦྱར། སངས་རྒྱས་ཀྱི་གཟི་བརྗིད་ཀྱིས་དུག་ངེས་པར་བཅོམ་མོ། །དེ་བཞིན་དུ་སྦྱར་ཏེ། རང་སངས་རྒྱས་ཀྱི་གཟི་བརྗིད་ཀྱིས༴ དགྲ་བཅོམ་པའི༴ ཕྱིར་མོ་འོང་བའི༴ ལན་གཅིག་ཕྱིར་འོང་བའི༴ རྒྱུན་དུ་ཞུགས་པའི༴ བདེན་པར་སྨྲ་བའི༴ གཟི་བརྗིད་ཀྱིས༴ དེ་བཞིན་དུ་ཚངས་པའི་བེ་ཅོན་གྱིས་དུག་ངེས་པར་བཅོམ་མོ། །དབང་པོའི་རྡོ་རྗེས༴ ཁྱབ་འཇུག་གི་འཁོར་ལོས༴ མེ་ལྷའི་དབལ་གྱི༴ ཆུ་ལྷའི་ཞགས་པས༴ ལྷ་མ་ཡིན་གྱི་སྒྱུ་མས༴ ཀླུའི་རིགས་སྔགས་ཀྱིས༴ དྲག་པོའི་མདུང་རྩེ་གསུམ་པས༴ སྐེམས་བྱེད་ཀྱི་མདུང་ཐུང་གི་དུག་ངེས་པར་བཅོམ་མོ། །དུག་སའི་ནང་དུ་སོང་ཞིག །ཆུའི་ནང་༴ མེའི༴ རླུང་གི་ནང་དུ་སོང་ཞིག །ཅེས་བརྗོད་ལ་དེ་དང་གླུད་གོས་ལྷན་ཅིག་བྱང་ཕྱོགས་ཀྱི་གྲོང་ཁྱེར་ཟད་སར་སྐྱལ་ལོ། གཏོར་མ་དང་གླུད་སྐྱེལ་བ་རྣམས་ཕྱིར་བཟློག་
དུས་ཕྱིར་མིག་མི་ལྟ། སྒྲུབ་བྱ་དེ་ལ་དབང་བསྐུར་རྒྱུ་ཡིན་ན། སྐབས་འདིར་སྟན་བཟང་པོ་ལ་བཞག །འབྲང་རྒྱས་གཏད། ཤིས་པ་བརྗོད་ལ་དབང་བསྐུར། དབང་གི་བཀྲུ་བྱབས་བསྲུང་གསུམ་གྱི་སྐབས། ཅུང་ཟད་འདོན་པ་སྤོས་པས་རུང༌། འཆི་བསླུ་རྐྱང་པ་བྱེད་པའི་ཚེ། ལས་བུམ་གྱིས་ཆུས། བཀྲུ་བ་དང༌། བྱབ་པ་གཉིས་སོང་བའི་མཚམས་སུ། དེ་ལྟ་བུའི་ཁྲུས་ཁུ་དེ་ཆུ་བོའམ། མཚོའམ། ལྟེང་ཀ་སོགས་སུ་དོར་ལ། སྟན་དཀར་པོ་བཏིང་བའི་སྟེང་དུ་མེ་ཏོག་དཀར་པོ་བཀྲམ། སྒྲུབ་བྱ་སློབ་དཔོན་གྱི་ལག་གི་རྡོ་རྗེ་ལ་འཇུས་ཏེ། སྟན་རྙིང་པ་ལས་བསླངས་ནས། གསར་པའི་སྟེང་དུ་འགྲེང་བས་གནས་པ་ལ། སངས་རྒྱས་ཀྱིས་ནི་བདུད་ཕམ་མཛད། །ཆོས་མ་ཡིན་ནི་ཆོས་ཀྱིས་སོ། །དགེ་བདུན་གྱིས་ནི་མུ་སྟེགས་ཕམ། །དབང་པོས་ལྷ་མིན་ཕམ་པར་བྱས། །ལྷ་མིན་གྱིས་ནི་ཟླ་བ་ཕམ། །ནམ་མཁའ་ལྡིང་གིས་རྒྱ་མཚོའོ། །མེ་ཡིས་ཤིང་རྣམས་ཕམ་པར་འགྱུར། །ཆུ་ཡིས་མེ་ཡང་ཕམ་པར་འགྱུར། །རླུང་གི་སྤྲིན་རྣམ་རབ་ཏུ་ཕམ། །རྡོ་རྗེ་ཡིས་ནི་རིན་ཆེན་ཕུག །ལྷ་རྣམས་བདེན་པ་རབ་ཏུ་གནས། །ས་ཡང་བདེན་པར་གནས་པ་ལགས། །སངས་རྒྱས་ཀྱང་བདེན་ཆོས་ཀྱང་བདེན། །བདེན་པས་རྒྱལ་འགྱུར་རྫུན་མ་ལགས། །ཛ་ཡེ་ཛ་ཡེ་སུ་ཛ་ཡེ་སྟུ། ཞེས་བདེན་སྟོབས་བརྗོད། ཀུ་ཤའི་རྩེས་བསངས་གཏོར་བྱས་ལ་སྒྲུབ་བྱ་འདུག་དུ་བཅུག་གོ །དེ་ནས་གོང་བཞིན་སྲུང་བའང་བྱས་ཏེ། འབྲང་རྒྱས་ཀྱི་ཕྱེད་དཀར་པོ་སྒྲུབ་བྱའི་ལག་ཏུ་གཏད་ལ།
བཀྲ་ཤིས་ཚེ་བརྟན་དཔལ་གྱི་ཟས། །སྙིང་པོ་བསྡུས་པའི་བཅུད་འདི་ནི། །དེ་རིང་བུ་ཡིས་བཟའ་བར་གྱིས། །འདི་ཟོས་སངས་རྒྱས་ཚེ་དཔག་མེད། །ཞལ་ཟས་གཏད་པས་ནད་ཀུན་ལས། །གྲོལ་འགྱུར་ཐེ་ཚོམ་མི་དགོས་སོ། །སྙིང་པོ་ལན་གསུམ་བཟླས་ལ་ཅུང་ཟད་བཟར་བཅུག །དེ་ནས་མེ་ཏོག་དཀར་པོ་གཏོར་ལ་རོལ་མོའི་སྒྲ་དང་དབྱངས་སྙན་པ་དང་བཅས་པས། སེམས་ཅན་གང་དག་འགྲོ་དང་མི་འགྲོ་བ། དེ་དག་ཐམས་ཅད་དེང་འདིར་བདེ་ལེགས་ཤོག །སྟོན་མཆོད་དམ་པ་ལྷ་མིས་མཆོད་འོས་པ། སངས་རྒྱས་ཕྱག་འཚལ་དེང་འདིར་བདེ་ལེགས་ཤོག །ཚིག་རྐང་པ་དང་པོ་གཉིས་འདྲ། ཕྱི་མ་གཉིས་ལ། ཞི་བ་ཆགས་བྲལ༴ ཆོས་ལ་ཞེས་དང༌། ཚོགས་ཀྱི་དམ་པ༴ དགེ་བདུན་ཞེས་འདོན་པ་སྤོ། འབྱུང་པོ་གང་དག་སོགས་དང༌། འདི་ན་རྒྱལ་བ་དགྲ་རྒྱལ་བདེན་གང་གིས། །ཤིན་ཏུ་བདེན་པ་གསུངས་ཞིང་རྫུན་མིན་པ། །དེ་ཀུན་འཇིགས་པ་ཆེ་ལས་ཐར་གྱུར་ཅིག།བདེན་པ་དེ་ཡིས་འདིར་ནི་དགེ་བར་ཤོག །ཅེས་པས་ཐོག་དྲངས་པའི་བཀྲ་ཤིས་ཅི་རིགས་པ་བྱའོ། །དེ་ལྟར་ན་ཆོས་འདི་གང་ལས་བརྒྱུད་པ་ནི། བོད་ཀྱི་བརྒྱུད་པ་རྣམས་ལ་མི་འདྲ་བ་སྣ་ཚོགས་ནས་བརྒྱུད་པས་ཆོག་མོད་ཀྱི། འདིར་ཉེ་བར་མཁོ་བ་བརྗོད། རྒྱལ་བ་ཚེ་དཔག་མེད་བྲམ་ཟེའི་རིགས་ལས་བྱུང་བའི་སློབ་དཔོན་སྙིང་པོའི་ཞབས་ཏེ་མཚན་དངོས་སྙིང་པོའི་ལྷ། དེའི་སྲས་སློབ་དཔོན་ཆེན་པོ་ཛེ་ཏཱ་རི། སློབ་དཔོན་བྱང་ཆུབ་བཟང་པོ། སློབ་དཔོན་ཏིང་འཛིན་བཟང་པོ། སློབ་དཔོན་རྡོ་རྗེ་གདན་
པ་བ་རི་ལོ་ཚཱ་བ་ས་སྐྱ་པ་གོང་མ་ལྔ། བདག་ཉིད་ཆེན་པོ་བཟང་པོ་དཔལ། བླ་མ་དམ་པ་བསོད་ནམས་རྒྱལ་མཚན། ཐེག་ཆེན་ཆོས་རྗེ་ཀུན་དགའ་བཀྲ་ཤིས། སྤྱང་ལུང་པ་གཞོན་ནུ་བློ་གྲོས། རྒྱལ་བ་ཤཱཀྱ་མཆོག་ལྡན། སྤྱང་ལུང་གཞོན་ནུ་ཆོས་གྲུབ། རྗེ་བཙུན་ཀུན་དགའ་གྲོལ་མཆོག །དེ་ལ་དོན་གྱི་སླད་དུ་མཚན་ན་སྨོས་ཏེ། འཇམ་དབྱངས་ཀུན་དགའ་རྒྱལ་མཚན་དང༌། མཁན་ཆེན་རིན་པོ་ཆེ་ལུང་རིགས་རྒྱ་མཚོ། རྗེ་ཀུན་དགའ་དཔལ་བཟང་གསུམ་གྱིས་གསན། དེ་རྣམས་ལས་དངོས་ཀྱི་ཐོབ་ཏེ་འཁུམས་སོ། །དེ་ལྟར་མཚན་བརྒྱ་རྩ་བརྒྱད་པའི་གཟུངས་ཀྱི་དཀྱིལ་འཁོར་བཤད་ནས། དེ་དང་འཆི་མེད་རྔ་སྒྲའི་དཀྱིལ་འཁོར་གྱི་ཆོ་ག་ལ་མི་འདྲ་བའི་ཁྱད་པར་ཅུང་ཟད་ཡོད་པ་རྣམས་བརྗོད་ན། བདག་བསྐྱེད་ཀྱི་སྐབས། གཞལ་ཡས་ཁང་བསྐྱེད་མི་དགོས་སོ། །བཟླས་པའི་སྐབས་འཆི་མེད་རྔ་སྒྲའི་གཟུངས་རིང་ཉིད་ཅི་ནུས་སུ་བཟླ་ཞིང༌། ན་མོ་རཏྣ་ཏྲ་ཡཱ་ཡ། ན་མ་ཨཱདྱ་ཨཱ་མི་ཏ་བྷ་ཡ། ཏ་ཐཱ་ག་ཏ་ཡ། ཨརྷ་ཏེ་སཾ་མྱཀྶཾ་བུདྡྷ་ཡ། ཏཏྱ་ཐཱ། ཨོཾ་ཨ་མྲྀ་ཏེ། ཨ་མྲྀ་ཏ་ཨུཏྡྷ་ཝེ། ཨ་མྲྀ་ཏ་སཾ་བྷ་ཝེ། ཨ་མྲྀ་ཏ་གརྡྷེ། ཨ་མྲྀ་ཏ་སིདྡྷི། ཨ་མྲྀ་ཏ་ཏ་ཛེ། ཨ་མྲྀ་ཏ་བི་གྲནྟེ། ཨ་མྲྀ་ཏི་བི་གྲནྟ་ག་མྲི་ནི། ཨ་མྲྀ་ཏ་ག་ག་ན་ཀིརྟི་ཀ་རེ། ཨ་མྲྀ་ཏ་དུནྟུ་བྷི་སྭ་རེ། སརྦ་ཨརྠ་ས་དྷ་ན། སརྦ་ཀརྨ་ཀླེ་ཤ །ཀྵ་ཡཾ་ཀ་རི་སྭཱཧཱ། ཞེས་བྱ་བ་དང༌། ལྷ་དགུའི་སྐབས་སུ་བཤད་པའི་སྙིང་པོ་ཉེ་སྙིང་གཉིས་རྣམས་བཟླ་ཞིང༌། གཞུང་ལས་ཚེ་གཟུངས་ཨོཾ་གཉིས་མར་གྲགས་པའང་བཟླ་བར་བཤད་དོ། །
མདུན་བསྐྱེད་ཀྱི་སྐབས། ལྷ་ལྔར་བྱེད་ན། གཙོ་བོའི་སྐུའི་གཡས་ཀྱི་འདབ་མ་ལ། ཧྲཱིཿལས་སྤྱན་རས་གཟིགས་དཀར་པོ་པདྨ་དང་རྔ་ཡབ་འཛིན་པ། གཡོན་དུ་ཧཱུཾ་ལས་མཐུ་ཆེན་ཐོབ་སྔོན་པོ་ཡིད་ཙམ་ཁྲོ་བ་རྡོ་རྗེ་དང་རྔ་ཡབ་འཛིན་པ། དེ་གཉིས་རྒྱན་དང་ན་བཟའ་གཙོ་བོ་དང་མཚུངས་པ། མཉམ་པའི་སྟབས་ཀྱིས་བཞེངས་པའོ། །མདུན་དུ་ཧཱུཾ་ལས་གཤིན་རྗེ་གཤེད་ནག་པོ་དབྱུག་ཐོ་འཛིན་པ། རྒྱབ་ཏུ་ཧཱུཾ་ལས་རྟ་མགྲིན་དམར་པོ་དབྱུག་པ་དཀར་པོ་འཛིན་པ། དེ་གཉིས་ཀས་གཡོན་བརྐྱང་གི་སྟབས་ཀྱིས་བཞུགས་ཤིང༌། ཁྲོ་བོའི་ཆ་བྱད་ཡོངས་སུ་རྫོགས་པ། མཚམས་བཞིར་བུམ་པ་བདུད་རྩིས་གང་བ་པདྨས་ཁ་བརྒྱན་པ་རྣམས་སོ། །རྒྱས་པ་ལ་མོས་ན། གཤིན་རྗེ་གཤེད་ཀྱིས་འོག་ཏུ། བདུད་མཆོད་པའི་རྒྱལ་པོ་ཞེས་བྱ་བ་དང༌། རྟ་མགྲིན་གྱི་ཞབས་འོག་ཏུ་ལེགས་པར་ལྟ་བ་དང༌། ཞེས་བྱ་བ་མནན་པ། ལྷ་སྣམ་ལ། ལྷོ་རུ་འཁོར་ལོས་བསྒྱུར་བའི་རྒྱལ་པོ་བཟང་པོ་མཆོག །བྱང་དུ་ཡུམ་ལྷ་མོ་གཟི་བརྗིད་ཅན། དེ་གཉིས་སེམས་དཔའ་སེམས་མའི་ཆ་ལུགས་ཅན། ནུབ་ཏུ་བཙུན་མོ་བཟང་སྐྱོང་མ། ཤར་དུ་སྲས་ཟླ་འོད། ཤར་ལྷོར་རིམ་གྲོ་བ་གཉན་པ་དྲི་མེད། ལྷོ་ནུབ་ཏུ་ཤེས་རབ་ཅན་གྱི་མཆོག་བཟང་པོའི་ཏོག། ནུབ་བྱང་དུ་རྫུ་འཕྲུལ་དང་ལྡན་པའི་མཆོག་བཀོད་པ་ཆེན་པོ་སྟེ། དེ་རྣམས་རབ་ཏུ་བྱུང་བའི་ཆ་ལུགས་ཅན་ནོ། །བྱང་ཤར་དུ་ཉན་ཐོས་འདུས་པའི་ཚོགས་ཅི་རིགས་པ་བསྒོམ་པར་བྱའོ། །ཕྱི་ནང་ཐམས་ཅད་དུ་བྱང་ཆུབ་སེམས་དཔའི་
ཚོགས་ཀྱིས་ཡོངས་སུ་གང་བའི་ཤར་སྒོར་ཡུལ་འཁོར་སྲུང་དཀར་པོ་པི་ཝཾ་འཛིན་པ། ལྷོ་སྒོར་འཕགས་སྐྱེས་པོ་སྔོན་པོ་རལ་གྲི་འཛིན་པ། ནུབ་སྒོར་མིག་མི་བཟང་དམར་པོ་སྦྲུལ་ཞགས་འཛིན་པ། བྱང་སྒོར་རྣམ་ཐོས་སྲས་སེར་པོ་བེ་ཅོན་དང་ནེའུ་ལེ་འཛིན་པ། རང་རང་གི་འཁོར་ཚོགས་དུ་མ་དང་བཅས་པའོ། །ཡབ་ཡུམ་མན་ཆད་ཀྱི་ལྷ་འདི་རྣམས་ཡེ་ཤེས་པ་སྤྱན་འདྲེན་གྱི་སྐབས་སྤྱན་དྲངས་ནས། ལྷ་ལྔའི་དམ་ཡེ་བསྲེས་པའི་རྗེས་ལ་བསྐྱེད་པས་ཆོག་གོ། བསྟོད་པའི་སྐབས་སྤྱི་བསྟོད་འདྲ་ཞིང༌། སྒོས་བསྟོད་ནི། གཙོ་བོ་ལ། འཇིག་རྟེན་འདྲེན་པའི་སོགས་དང༌། འཁོར་ལ། བཟང་པོ་སྤྱོད་པས་འགྲོ་བ་འཛིན་མཛད་ཅིང༌། ཐུགས་རྗེ་ཆེན་པོ་འཕགས་པ་སྤྱན་རས་གཟིགས། །སྐྱོན་གྱིས་མ་གོས་སྐུ་ལུས་གངས་རི་འདྲ། །ཐུགས་རྗེ་ཆེན་པོ་ཁྱོད་ལ་ཕྱག་འཚལ་ལོ། །མཐུ་སྟོབས་མཆོག་མངའ་ཡོན་ཏན་བསམ་མི་ཁྱབ། །བདུད་བགེགས་གདུག་པ་ཚར་གཙོད་རྡོ་རྗེ་འཛིན། །ཆོས་ཉིད་སྐྱེ་མེད་དོན་ལྡན་དཔའ་བོ་སྟེ། །རྗེ་བཙུན་རྡོ་རྗེ་འཛིན་ལ་ཕྱག་འཚལ་ལོ། །བགེགས་ཆེན་མ་ལུས་འདུལ་མཛད་གཤིན་རྗེ་གཤེད། ཁྲོ་བོའི་ཚུལ་འཆང་སྟོབས་ཆེན་དཔའ་བོ་སྟེ། །དབྱུག་ཐོ་འབར་བས་དགྲ་བོ་ཐལ་བར་རློག །བཅོམ་ལྡན་གཤིན་རྗེ་གཤེད་ལ་ཕྱག་འཚལ་ལོ། །འཇིགས་པའི་གཟུགས་ཅན་ཧཱུཾ་གི་ང་རོ་ལྡན། །དཔལ་ཆེན་བྱི་རུའི་འོད་འབར་ཉོན་མོངས་སྲེག །བདུད་དཔུང་འཇོམས་ཕྱིར་དབྱུག་པའི་ཕྱག་མཚན་ཅན། །དཔའ་བོ་རྟ་མགྲིན་སྐུ་ལ་ཕྱག་འཚལ་ལོ། །དུས་གསུམ་རྒྱལ་བའི་ཐུགས་ཀྱི་སྲས་པོ་ནི། །བྱང་ཆུབ་
སེམས་དཔའ་སེམས་མའི་ཚོགས་རྣམས་དང༌། །གང་ལ་གང་འདུལ་འགྲོ་བ་འདུལ་བའི་སྐུ། །ཉན་ཐོས་འདུས་པའི་ཚོགས་ལ་ཕྱག་འཚལ་ལོ། །དད་ལྡན་རྒྱལ་བའི་བཀའ་ཐོས་སོགས་ཀྱིས་བསྟོད། དེ་ནི་ཛེ་ཏཱ་རཱིས་མཛད་པ་ཡིན་ལ། བསྟོད་པ་རྒྱས་པ་ལ་དགའ་ན་སྦྱར་བས་རུང་ངོ༌། །འདི་ལ་ལྷག་གནས་བཞི་ཆར་ངེས་པར་མཛད་ཀྱི་འདུག་ཅིང༌། ལྷ་ལྷག་གནས་དང༌། བུམ་པ་བསྒྲུབ་པའི་སྐབས་ཀྱང་འདོན་པ་སྤོ་དགོས་པ་རིགས་འགྲེས་ཤེས་ཤིང༌། ལྷ་ལྔ་ཁོ་ན་བྱའོ། །དབང་གི་དངོས་གཞིའི་སྐབས། ལུས་ལ་རྣམ་སྣང་ཚེ་དབང་བསྐུར། སོགས་ཀྱི་དོད་དུ། ཇི་ལྟར་བལྟམས་པ་ཙམ་གྱིས་ནི། སོགས་ཁོ་ན་སྦྱར། བཻ་རོ་ཙ་ན་ཨཱ་ཡུར་ཛྙཱ་ན་སོགས་ཀྱི་དོད་ལ། གཙོ་བུམ་ལ། ཨོཾ་བྷྲཱུཾ་སོགས་དང༌། ཤར་གྱི་བུམ་པ་ལ། ཨོཾ་ཨཱཿཀྲོ་དྷེ་ཀ་ཧཱུཾ། ཞེས་དང༌། ལྷོའི་ལ། ཨོཾ་བྷ་ར་ཏ་ཀ་ཡེ་སྭཱཧཱ། ནུབ་ཀྱི་ལ། ཨོཾ་ཨཱ་མྲྀ་ཏ་ཨུཏྦྷ་ཝ་ཡེ་སྭཱཧཱ། བྱང་གི་ལ། ཨོཾ་བཛྲ་ཧཱུཾ་ཕཊ། ཞེས་པ་རྣམས་ལ། ཨཱ་ཡུར་ཛྙཱ་ན་སིདྡྷི་ས་མ་ཡ་ཧཱུཾ། ཞེས་པ་བཏགས། ལྷག་མ་གཞན་རྣམས་ལྷ་སྔགས་བརྗེས་པ་ཁོ་ནས་ཆོག་གོ །དེ་ཙམ་གྱིས་འཆི་མེད་རྔ་སྒྲའི་ཆོ་ག་ཡང་ཤེས་པར་འགྱུར་རོ། །འདིའི་བརྒྱུད་པ་ནི། བ་རི་བ་ཡན་ཆད་གོང་དང་འདྲ། མཆིམས་བརྩོན་སེང༌། རྒྱ་ཞང་ཕུག་པ། འཇང་པ་ཤེས་རབ་རིན་ཆེན། ཨེ་པ་འཁོན་སྟོན། འཇམ་དབྱངས་བཞི་ཐོག་པ། བྱང་སེམས་རྒྱལ་ཡེ། བླ་མ་གྲགས་པ་དཔལ་བཟང༌། བླ་མ་ཆོས་འཕགས་རྒྱལ་འཚན། ཡང་རྩེ་བ་རིན་ཆེན་སེང་གེ །བུ་སྟོན་ཆེན་པོ། ཆོས་རྒྱལ་ནམ་མཁའི་མཚན་ཅན། ཆོས་རྗེ་རིན་ཆེན་དཔལ་
གྲུབ། སྐུ་ཞང་མཁྱེན་རབ་ཆོས་རྗེ། སྐུ་ཞང་བསོད་ནམས་མཆོག་གྲུབ། འབྲོག་ཁང་པ་དོན་གྲུབ་རྒྱལ་མཚན། བྱང་གླིང་པ་བཀྲ་ཤིས་རྒྱལ་མཚན། བླ་མ་དམ་པ་དཔལ་ལྡན་ཆོས་བཟང༌། དེས་བདག་ལའོ། །དེ་ལྟར་མཆོག་ཏུ་ངོ་མཚར་རྨད་བྱུང་བའི། །ཚེ་དང་ཡེ་ཤེས་བླ་མེད་སྒྲུབ་པའི་ཐབས། །རྒྱལ་བའི་བདག་པོས་གསུངས་པའི་སྔགས་རྒྱུད་ལམ། །གྲུབ་མཆོག་སྟོང་གི་ཤིང་རྟའི་རྗེས་ཞུགས་པ། །ལམ་འདིར་འཇུག་པ་དག་ཀྱང་སྐལ་བཟང་སྟེ། །ཡིད་ཆེས་ཁུངས་ལྡན་བློ་ཆེན་ཡིད་དགའི་གནས། །གཞན་དུ་ལས་ཚོགས་འགའ་ཞིག་འགྲུབ་མཐོང་ཡང༌། །བླ་མེད་གནས་སུ་འཁྲིད་པ་ནུས་པ་དཀོན། །གཟུངས་མདོ་ལས་འབྱུང་དཀྱིལ་འཁོར་ཆོ་ག་དགྲ་ལས་རྣམ་རྒྱལ་གྱི། །གཞུང་གི་རྗེས་འབྲང་མཆོག་གྱུར་མན་ངག་རྣམས་ཀྱིས་ལེགས་བརྒྱན་ནས། །ཅུང་ཟད་བཤད་པ་འདིས་ཀྱང་འགྲོ་ཀུན་བླ་མེད་བྱང་ཆུབ་ཀྱི། །རྒྱལ་སྲིད་རྡོ་རྗེའི་ཚེ་དང་ཡེ་ཤེས་གནས་ལ་འཁོད་པར་ཤོག །བཅོམ་ལྡན་འདས་རྒྱལ་བ་ཚེ་དང་ཡེ་ཤེས་དཔག་ཏུ་མེད་པའི་དཀྱིལ་འཁོར་གྱི་ཆོ་ག་བདུད་རྩིའི་ཆུ་གཏེར་ཞེས་བྱ་བ་འདི་ཡང༌། སྔ་ཕྱིར་དོན་གཉེར་དུ་མས་བསྐུལ་བའི་ངོར། རྒྱལ་ཁམས་པ་ཏཱ་ར་ནཱ་ཐས། རང་ལོ་སོ་བཞི་པ། དབོའི་ཟླ་བའི་ཡར་ཚེས་བཅོ་ལྔ་པ་ལ། དཔལ་ནགས་རྒྱལ་གྱི་དབེན་གནས་ཇོ་མོ་ནང་དུ་སྦྱར་བའོ།། །།རང་རྒྱའ་བཀྲ་ཤིས། །དགེའོ།། །།དར་རྒྱས་འཕེལ།