མི་འཁྲུགས་པ་ལྷ་དགུའི་ཆོ་ག་ཉུང་ངུ་རྣམ་གསལ།
མི་འཁྲུགས་པ་ལྷ་དགུའི་ཆོ་ག་ཉུང་ངུ་རྣམ་གསལ་བཞུགས་སོ། །
སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །རིན་ཆེན་མཐིངསྔོན་ལྟ་བུར་གསལ་བའི་སྐུ། །མཚན་དཔེའི་གཟི་ལྡན་འོད་ཀྱི་དྲ་བ་ཅན། །མཐོང་ཐོས་དྲན་པས་ངན་སོང་གནས་སྤོང་བའི། །མི་འཁྲུགས་ལྷ་ཡི་མཆོག་ཁྱོད་ཕྱག་གི་གནས། །རིང་དུ་སྦྱངས་པའི་རྣམ་དཔྱོད་འོད་དཀར་གྱིས། །མཐའ་ཡས་རྒྱུད་དོན་ཀུ་མུད་ཏ་ཡི་ཚལ། །ལེགས་པར་ཕྱེ་བ་ལས་བྱུང་ཆོ་གའི་ཚུལ། །མ་འདྲེས་གོ་བདེའི་ངག་གིས་བཤད་ཀྱིས་ཉོན། འདིར་བཅོམ་ལྡན་འདས་རྡོ་རྗེ་མི་འཁྲུགས་པའི་དཀྱིལ་འཁོར་ལ་བརྟེན་ནས་གཤིན་པོ་རྗེས་སུ་འཛིན་པའི་ཉིན་གཅིག་པའི་ཆོ་ག་ལ། སྦྱོར་དངོས་རྗེས་གསུམ་གྱི། དང་པོ་ནི། གཞི་བཟང་པོའི་སྟེང་དུ། རས་བྲིས་ཀྱི་དཀྱིལ་འཁོར་དགྲམ་མཐའ་བསྐོར་དུ་དབང་ལྡན་ནས་གཡས་བསྐོར་མཚམས་འཛིན་དང༌། ཆུ་གཉིས་སྔོན་དུ་འགྲོ་བའི་མཆོད་པ་ལྔ་ཕྱོགས་མཚམས་སུ་མཛེས་པར་བཤམས། ལྷོར་གཏོར་མ་ཆ་གསུམ་
དང་རང་གི་མདུན་དུ་རྡོ་རྗེ་དྲིལ་བུ་བུམ་པ་ལ་སོགས་པ་འོག་ཏུ་དགོས་པ་ཐམས་ཅད་ཚོགས་པར་བྱས་ཏེ་སྟན་ལ་འདུག་ནས། གཉིས་པ་དངོས་གཞི་ལ། བདག་བསྐྱེད། བུམ་བཟླས། མདུན་བསྐྱེད་བསྒྲུབ་ཅིང་མཆོད་པ། འཇུག་ཅིང་དབང་བླང་བ། ཚེ་འདས་རྗེས་སུ་བཟུང་བ། དཀྱིལ་འཁོར་ཆེན་པོའི་མཇུག་གི་བྱ་བ་དང་དྲུག་ལས། དང་པོ་ནི། ཨོཾ་ཨ་མྲྀ་ཏེ་ཧཱུཾ་ཕཊ། ཅེས་བརྗཽད་པས་བགེགས་བསངས། ཨོཾ་སྭ་བྷཱ་ཝ་ཤུདྡྷ་སརྦ་དྷརྨ་སྭ་བྷཱ་ཝ་ཤུདྡྷོ྅ཧཾ་གིས་སྟོང་པར་སྦྱངས། སྟོང་པའི་ངང་ལས། ཨོཾ་ལས་བྱུང་བའི་རིན་པོ་ཆེ་ལས་གྲུབ་པའི་སྣོད་ཡངས་ཤིང་རྒྱ་ཆེ་བ་རྣམས་ཀྱི་ནང་དུ། ཨོཾ་ཞུ་བ་ལས་འབྱུང་བའི་ལྷས་རྫ་ལས་གྲུབ་པའི་མཆོད་ཡོན། མེ་ཏོག །བདུག་སྤོས། མར་མེ། དྲི། ཞལ་ཟས། གཞན་ཡང་རོལ་མོ་དང་ཕན་གདུགས་ལ་སོགས་པའི་མཆོད་རྫས་བསམ་གྱིས་
མི་ཁྱབ་པ་དྭངས་ཤིང་ཐོག་པ་མེད་པ་ས་དང་ནམ་མཁའི་ཁམས་ཐམས་ཅད་གང་བར་བསམས་ལ། དེའི་སྔགས་དང་ཕྱག་རྒྱས་བྱིན་གྱིས་བརླབས། རོལ་མོ་ཇི་སྙེད་པའི་སྒྲ་བྱ་ཞིང༌། དྷརྨ་ར་ཎི་ལ་སོགས་པ་བརྗོད་དོ། །དེ་ནས་བླ་མ་དང་དཀོན་མཆོག་གསུམ་ལ་སྐྱབས་འགྲོ་ཅི་ནུས་བྱས་ནས། ཆོས་ཐམས་ཅད་སྟོང་ཞིང་བདག་མེད་པ་ཡིན་པ་ལ། དེ་མ་རྟོགས་པའི་སེམས་ཅན་ཐམས་ཅད་ཀྱི་སྡིག་སྒྲིབ་སྦྱངས་ཏེ། སངས་རྒྱས་ཀྱི་ས་ལ་དགོད་པར་བྱ། དེའི་ཆེད་དུ་བཅོམ་ལྡན་འདས་མི་འཁྲུགས་པའི་ཆོ་ག་ཉམས་སུ་བླང་བར་བགྱིའོ། །སྙམ་དུ་སེམས་བསྐྱེད་དེ། རང་ཉིད་སྐད་ཅིག་གིས་རྡོ་རྗེ་མི་འཁྲུགས་པར་གསལ་བའི་ཐུགས་ཀར་ཟླ་བ་ལ་གནས་པའི་ཧཱུཾ་གི་འོད་ཟེར་གྱིས། རང་བཞིན་གྱི་གནས་ནས་བླ་མ་དང་བཅོམ་ལྡན་འདས་མི་འཁྲུགས་པའི་དཀྱིལ་འཁོར་ལ། སངས་རྒྱས་དང་བྱང་ཆུབ་སེམས་དཔའི་ཚོགས་ཀྱིས་བསྐོར་བ་ཨོཾ་བཛྲ་ས་མཱ་ཛཿ ཞེས་རྡོ་རྗེ་བསྡུ་བའི་ཕྱག་རྒྱས་སེ་གོལ་བྱ་ཞིང༌། ནམ་མཁར་སྤྱན་དྲངས་ལ། ན་མོ་གུ་རུ་བྷྱཿ ན་མོ་ཨཀྵོ་བྷྱ་ས་པཱ་རི་ཝཱ་རེ་བྷྱཿ ཆོས་དབྱིངས་མཉམ་པ་ཉིད་ལས་མ་གཡོས་ཀྱང༌། །ཐུགས་རྗེས་རྟག་ཏུ་མྱ་ངན་མི་འདའ་བར། །མཐའ་ཡས་འགྲོ་བའི་དོན་སྒྲུབ་ལྷུར་མཛད་པའི། །བཅོམ་ལྡན་མི་འཁྲུགས་པ་ལ་ཕྱག་འཚལ་ལོ། ཨོཾ་སརྦ་ཏ་ཐཱ་ག་ཏ་ཨཀྵོ་བྷྱ་ས་པཱ་རི་ཝཱ་ར་ཨརྒྷཾ། པུཥྤེ་དྷུ་པེ་ཨཱ་ལོ་ཀེ་གནྡྷེ་ནཻ་ཝི་ཏྱ། ཤཔྟ་པཱུ་ཛ་མེ་གྷ་མུ་དྲ་སྥ་ར་ཎ་ས་མ་ཡེ་ཧཱུཾ། ཞེས་པས་མཆོད། དཀོན་
མཆོག་གསུམ་ལ་བདག་སྐྱབས་མཆི། སོགས་ལན་གསུམ་གྱིས་རྒྱུན་བཤགས་བྱ། ཚད་མེད་པ་བཞི་བསྒོམ་ནས། ཨོཾ་ཤུུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཏྨ་ཀོ྅ཧཾ་གིས་དངོས་པོ་ཐམས་ཅད་སྟོང་པ་ཉིད་དུ་ཡུན་རིང་དུ་བསྒོམ་སྟེ། ཚོགས་གཉིས་བསགས་པའོ། །དེ་ནས་སྟོང་པའི་ངང་ལས་གླང་པོ་ཆེས་བཏེགས་པའི་རིན་པོ་ཆེའི་ཁྲི་པདྨ་དང་ཟླ་བའི་དཀྱིལ་འཁོར་གྱི་སྟེང་དུ། ཧུཾ་ལས་རྡོ་རྗེ་སྔོན་པོ་རྩེ་ལྔ་པ་ཧཱུཾ་གིས་མཚན་པ་དེ་ལས་འོད་འཕྲོས། འཕགས་པ་མཆོད། སེམས་ཅན་ཐམས་ཅད་ཀྱི་སྡིག་སྒྲིབ་སྦྱངས། ཚུར་འདུས་ཧཱུཾ་ལ་ཐིམ། དེ་ཡོངས་སུ་གྱུར་པ་ལས། བདག་ཉིད་བཅོམ་ལྡན་འདས་མི་འཁྲུགས་པ་སྐུ་མདོག་ཨིནྡྲ་ནཱི་ལ་ལྟར་སྔོ་བ། ཞལ་གཅིག་ཕྱག་གཉིས་པ། གཡས་ས་གནོན་དང༌། གཡོན་མཉམ་བཞག་གི་སྟེང་ན་རྡོ་རྗེ་རྩེ་ལྔ་པ་འཛིན་པ། རལ་པའི་ཐོར་ཅོག་ཅན། རིན་པོ་ཆེའི་རྒྱན་སྣ་ཚོགས་དང༌། དར་གྱི་ཤམས་ཐབས་ཅན། མཚན་བཟང་པོ་སུམ་ཅུ་རྩ་གཉིས་དང༌། དཔེ་བྱད་བཟང་པོ་བརྒྱད་ཅུས་སྤྲས་པ། རྡོ་རྗེ་སྐྱིལ་མོ་ཀྲུང་གིས་བཞུགས་པར་བསམ། དེ་ནས་རྡོ་རྗེ་རྩེ་ལྔ་པའི་ཕྱག་རྒྱ་གནས་གསུམ་ཏུ་གཏུགས་ལ། ཀཱཾ་ཀ་ནི། ལན་གསུམ་བཟླས་པས་བྱིན་གྱིས་བརླབས་ཏེ། དམ་ཚིག་པ་བསྐྱེད་པ་ནི་གཞི་དང་པོའོ། །དེ་ནས་སྙིང་གའི་འོད་ཟེར་གྱིས་ཕྱོགས་བཅུའི་སངས་རྒྱས་བྱང་སེམས་ཐམས་ཅད་མི་འཁྲུགས་པ་གཙོ་བོར་གྱུར་བའི་དེ་བཞིན་གཤེགས་པ་རིགས་ལྔའི་རྣམ་པར་ཨོཾ་བཛྲ་ས་མཱ་ཛཿ ཞེས་རྡོ་རྗེ་བསྡུ་བའི་ཕྱག་རྒྱས་སྤྱན་དྲངས། མདུན་གྱི་ནམ་མཁར་བཞུགས་པ་ལ།
ཨོཾ་ཨརྒྷཾ་སྭཱཧཱ། ཞེས་པས་མཆོད་ཡོན་ཕུལ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་འཁོར་དང་བཅས་པས། བདག་དང་སེམས་ཅན་ཐམས་ཅད་ལ་བྱིན་གྱིས་བརླབ་ཏུ་གསོལ། ཞེས་གསོལ་བ་བཏབ་པས། རང་ཉིད་ལ་ཐིམ་ནས། སྙིང་གར་པད་ཟླའི་སྟེང་དུ། དབུས་སུ་མི་བསྐྱོད་པ་སྔོན་པོ་གཡས་ས་གནོན་དང༌། གཡོན་མཉམ་བཞག་གི་ཕྱག་རྒྱ་ཅན། ཤར་དུ་རྣམ་སྣང་དཀར་པོ་བྱང་ཆུབ་མཆོག་གི་ཕྱག་རྒྱ་ཅན། ལྷོར་རིན་ཆེན་འབྱུང་ལྡན་སེར་པོ་གཡས་མཆོག་སྦྱིན། གཡོན་མཉམ་བཞག་གི་ཕྱག་རྒྱ་ཅན། ནུབ་ཏུ་འོད་དཔག་མེད་དམར་པོ་ཏིང་ངེ་འཛིན་གྱི་ཕྱག་རྒྱ་ཅན། བྱང་དུ་དོན་གྲུབ་ལྗང་ཁུ་གཡས་སྐྱབས་སྦྱིན། གཡོན་མཉམ་བཞག་གི་ཕྱག་རྒྱ་ཅན། ཐམས་ཅད་ཀྱང་དར་གྱི་ན་བཟའ་དང༌། རིན་པོ་ཆེའི་རྒྱན་གྱི་བརྒྱན་པ། མཚན་བཟང་པོ་སུམ་ཅུ་རྩ་གཉིས་དང༌། དཔེ་བྱད་བཟང་པོ་བརྒྱད་ཅུས་སྤྲས་པ། རྡོ་རྗེ་སྐྱིལ་མོ་ཀྲུང་གིས་བཞུགས་པ། འོད་དང་འོད་ཟེར་འཕྲོ་བའོ། །དེ་ནི་གཞི་གཉིས་པ་ཞེས་བྱའོ། །དེ་ནས་ཨོཾ་སརྦ་ཏ་ཐཱ་ག་ཏ་ཨཀྵོ་བྷྱ་ས་པཱ་རི་ཝཱ་ར་ཨརྒྷཾ་པྲ་ཏཱི་ཙ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུཾ། དེ་བཞིན་དུ་པཱ་དྱཾ། པུཥྤེ་ལ་སོགས་ལའང་སྦྱར། ཕྱག་རྒྱ་བཅས་པས་མཆོད་ལ། རྡོ་རྗེ་ཐལ་མོ་སྙིང་གར་བཞག་པ་གཡས་སུ་བསྐོར་ཞིང༌། རྣམ་དག་པདྨོའི་དབུས་ཀྱི་ལྟེ་བ་ལ། ཞེས་སོགས་བརྗོད་པས། བསྟོད་པར་བསམ་མོ། །དེ་ནས་རང་གི་སྙིང་གའི་མི་བསྐྱོད་པའི་ཐུགས་ཀར་ཟླ་བའི་སྟེ་དུ། གཟུངས་སྔགས་
སྦྲུལ་འཁྱིལ་བ་ལྟ་བུར་བཀོད་ལ། དེ་ལས་འོད་འཕྲོས་ངན་སོང་ཐམས་ཅད་ཞི་བར་བྱས། སླར་འདུས་སྙིང་གའི་ཆོས་ཀྱི་ཡི་གེ་ལ་ཐིམ་པར་བསམ་ཞིང༌། ན་མོ་རཏྣ་ཏྲ་ཡཱ་ཡ། ཨོཾ་ཀཱཾ་ཀ་ནི་ཀཱཾ་ཀ་ནི། རོ་ཙ་ནི་རོ་ཙ་ནི། ཏྲོ་ཊ་ནི་ཏྲོ་ཊ་ནི། ཏྲ་ས་ནི་ཏྲ་ས་ནི། པྲ་ཏི་ཧ་ན་པྲ་ཏི་ཧ་ན། སརྦ་ཀརྨཱ་པ་རཾ་པ་ར་ཎི་མེ་སྭཱཧཱ། ཞེས་ཅི་ནུས་བཟླས་ལ། མགོན་པོ་ཐུགས་རྗེ་ཆེན་པོ་དང་ལྡན་པས་བདག་དང་སེམས་ཅན་ཐམས་ཅད་ཀྱི་སྡིག་པ་དང་སྒྲིབ་པ་ཐམས་ཅད་བྱང་ཞིང་དག་པར་བྱིན་གྱིས་བརླབ་ཏུ་གསོལ། ཞེས་གསོལ་བ་བཏབ། ཡི་གེ་བརྒྱ་པ་ལན་གསུམ་བརྗོད་པས། བསྒོམ་བཟླས་ཀྱི་བྱིན་རླབས་བརྟན་པར་བསམ་ལ། སླར་ཡང་བདག་ཉིད་ལ་མཆོད་བསྟོད་བྱ་བའི་ཕྱིར། མཆོད་རྫས་རྣམས་བསངས་སྦྱངས་བྱིན་གྱིས་རླབས་ནས་ཐལ་མོ་སྦྱར་ལ། འཇིག་རྟེན་ཁམས་ནི་དཔག་མེད་ན། །མཆོད་ཡོན་ཇི་སྙེད་ཡོད་པ་རྣམས། །རྒྱལ་བ་སྲས་དང་བཅས་ལ་འབུལ། །བཞེས་ནས་འགྲོ་བའི་དོན་ཀུན་མཛོད། །ཨོཾ་སརྦ་ཏ་ཐཱ་ག་ཏ་ཨཀྵོ་བྷྱ་ས་པཱ་རི་ཝཱ་ར་ཨརྒྷཾ་པྲ་ཏཱིཙྪ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུཾ། དེ་བཞིན་དུ་ཚིགས་བཅད་དང༌། སྔགས་རྣམས་གོ་བརྗེས་ལ། མེ་ཏོག་དང་པུཥྤེ་བདུག་སྤོས་དང་དྷུ་པེ་སྣང་གསལ་དང༌། ཨཱ་ལོ་ཀེ དྲི་མཆོག་དང་གནྡྷེ་ཞལ་ཟས་དང་ནཻ་ཝིདྱ་རོལ་མོ་དང་ཤཔྟ་རྣམས་ཀྱིས་མཆོད་ལ། རྡོ་རྗེ་དྲིལ་བུ་དཀྲོལ་ཞིང༌། ཨོཾ་བཛྲ་དྷརྨ་ར་ཎི་ཏཱ། པྲ་ར་ཎི་ཏ། སཾ་པྲ་ར་ཎི་ཏ། སརྦ་བུདྡྷ་ཀྵེ་ཏྲ་པྲ་ཙ་ལི་ནི། པྲ་ཛྙཱ་པཱ་ར་མི་ཏ་ན་ད་སྭ་བྷཱ་ཝཏྭ། བཛྲ་སཏྭ་
ཧྲིཿད་ཡ་སནྟོ་ཥ་ཎི་ཧཱུཾ་ཧཱཾ་ཧཱུཾ་ཧོ་ཧོ་ཧོ་ཨ་ཁཾ་སྭཱཧཱ། ཞེས་པས་རོལ་མོ་ཅི་འབྱོར་བར་འབུལ་ལོ། །དེ་ནས་དྲིལ་བུ་འཛིན་པས། རྣམ་དག་པདྨོའི་དབུས་ཀྱི་ལྟེ་བ་ལ། །རབ་བརྗིད་གླང་པོ་པདྨ་ཟླ་བའི་གདན། །ས་བོན་ཧཱུཾ་ལས་རྒྱལ་བའི་སྐུར་བཞེངས་པའི། །བཅོམ་ལྡན་མི་འཁྲུགས་པ་ལ་ཕྱག་འཚལ་ལོ། །སྐུ་མདོག་སྔོན་པོ་མཚན་དཔེས་ལེགས་བརྒྱན་ཞིང༌། །ཕྱག་གཡས་ས་གནོན་ཕྱག་རྒྱས་འགྲོ་བ་འདུལ། །གཡོན་པ་མཉམ་བཞག་སྟེང་དུ་རྡོ་རྗེ་འཛིན། །བཅོམ་ལྡན་མི་འཁྲུགས་པ་ལ་ཕྱག་འཚལ་ལོ། །ཕྱོགས་བཅུའི་སངས་རྒྱས་ཀུན་ཀྱིས་དབང་བསྐུར་ཞིང༌། །བྱམས་དང་དངོས་གྲུབ་ཀུན་གྱི་རྩ་བ་སྟེ། །སྙིང་རྗེས་སེམས་ཅན་ཀུན་གྱི་སྒྲིབ་པ་སྦྱོང༌། །བཅོམ་ལྡན༴ ཤིན་ཏུ་ཚོགས་བསགས་ཡེ་ཤེས་འབྱོར་པའི་སྐུ། །ངེས་ཚིག་ལྡན་པ་ཡིད་འོང་དག་པའི་གསུང༌། །ནམ་མཁའི་རང་བཞིན་གདོད་ནས་རྣམ་གྲོལ་ཐུགས། །བཅོམ་ལྡན་མི༴ སྟོབས་བཅུའི་དབང་ཕྱུག་རིགས་ལྔའི་སངས་རྒྱས་རྣམས། །མ་ལུས་འདུས་པ་བདེ་གཤེགས་ཀུན་གྱི་གཙོ། །རྒྱལ་བ་ཀུན་ལས་ལྷག་པའི་ཐུགས་རྗེ་ཅན། བཅོམ་ལྡན༴ ཐུགས་ཀྱི་དཀྱིལ་འཁོར་དཔལ་གྱི་བེའུ་ནས། །ས་བོན་སྔགས་ལས་འཕྲོས་པའི་འོད་ཟེར་གྱིས། །ངན་སོང་སྡུག་བསྔལ་མ་ལུས་སྦྱོང་མཛད་པའི། །བཅོམ་ལྡན༴ དེ་ལྟར་བསྟོད་ཅིང་གསོལ་བ་བཏབ་པའི་མཐུས། །བདག་དང་ཁམས་གསུམ་སེམས་ཅན་ཐམས་ཅད་ཀྱི། །ཐོགས་མེད་བསགས་པའི་སྡིག་སྒྲིབ་བག་ཆགས་ཀུན། །
བཅོམ་ལྡན་མི་འཁྲུགས་མགོན་པོས་སྦྱང་དུ་གསོལ། ཞེས་པས་བསྟོད་དེ་བདག་བསྐྱེད་དོ། །གཉིས་པ་བུམ་བཟླས་ནི། རྣམ་རྒྱལ་བུམ་པའི་སྟེང་དུ། དུང་ཆོས་དྲི་བཟང་གི་ཆུས་གང་བ་དང༌། རྡོ་རྗེ་མེ་ཏོག་ཕྲེང་བ་དང་བཅས་པ་བཞག་ལ། ཨ་མྲྀ་ཏས་བསངས། སྭ་བྷཱ་ཝས་སྦྱངས། སྟོང་པའི་ངང་ལས། པཾ་ལས་དང་པདྨ་དང་ཨ་ལས་ཟླ་བའི་དཀྱིལ་འཁོར་གྱི་སྟེང་དུ་བྷྲུཾ་ལས་རིན་པོ་ཆེའི་བུམ་པ་ཡངས་ཤིང་རྒྱ་ཆེ་བ། ལྷའི་གོས་ཀྱིས་མགུལ་པ་བཅིངས་པ། དཔག་བསམ་གྱི་ཤིང་གིས་ཁ་བརྒྱན་པ། ནང་ཆུ་དང་བཅུད་ཐམས་ཅད་ཀྱིས་ཡོངས་སུ་གང་བའི་དབུས་སུ། པཾ་ལས་སྣ་ཚོགས་པདྨ་འདབ་མ་བརྒྱད་པའི་ལྟེ་བར། གླང་པོ་ཆེས་བཏེགས་པའི་རིན་པོ་ཆེའི་ཁྲི། པདྨ་དང་ཟླ་བའི་གདན། འདབ་མ་བརྒྱད་ལ་ཟླ་བའི་གདན། རང་གི་སྙིང་ག་ནས་འོད་ཟེར་འཕྲོས་པས་རང་བཞིན་གྱི་གནས་ནས། རྡོ་རྗེ་མི་འཁྲུགས་པ་འཁོར་དང་བཅས་པ་སྤྱན་དྲངས་པར་བསམས་ནས། རྡོ་རྗེ་བསྡུ་བའི་སྔགས་དང་ཕྱག་རྒྱ་བྱ། དད་པ་དང་ནི་དམ་ཚིག་གིས། །ཚུར་གཤེགས་ཚུར་གཤེགས་བཅོམ་ལྡན་འདས། །བདག་ལ་མཆོད་ཡོན་བཞེས་ནས་ཀྱང༌། །མཆོད་པས་བདག་ལ་དགྱེས་པར་མཛོད། ཨོཾ་སརྦ་ཏ་ཐཱ་ག་ཏ་ཨཀྵོ་བྷྱ་ས་པ་རི་ཝཱ་ར་ཨེ་ཧྱ་ཧི། ཞེས་པས་སྤྱན་དྲངས་ཤིང༌། སྤྱན་དྲངས་པའི་མི་འཁྲུགས་པ་འཁོར་བཅས་བུམ་པའི་ནང་དུ་བྱོན་པར་བསམས་ལ། དབུས་ཀྱི་གདན་གྱི་སྟེང་དུ། བཅོམ་ལྡན་འདས་མི་འཁྲུགས་པར་སྐུ་མདོག་ཨིནྡྲ་ནཱི་ལ་ལྟར་
སྔོ་བ༴ ཞེས་པ་ནས། རྡོ་རྗེ་སྐྱིལ་མོ་ཀྲུང་གིས་བཞུགས་པའོ། །ཞེས་པའི་བར་གྱི་གཙོ་བོ་གསལ་བཏབ། ཤར་དུ་ལྷ་མོ་པདྨ་ཅན་དཀར་མོ་ཞེས་པ་ནས། འོད་ཟེར་དཔག་ཏུ་མེད་པ་འཕྲོ་བའོ། །ཞེས་པས་ལྷ་མོ་རྣམས་གསལ་བཏབ་ལ། ཨོཾ་སརྦ་ཏ་ཐཱ་ག་ཏ་ཨཀྵོ་བྷྱ་ས་པཱ་ཝཱ་ར་ཨརྒྷཾ་པྲ་ཏཱིཙྪ་པཱུ་ཛ་མེགྷ་ས་མུ་དྲ་སྥ་ར་ཎ་ས་མ་ཡེ་ཧཱུཾ། དེ་བཞིན་དུ་རོལ་མོའི་བར་སྔགས་དང་ཕྱག་རྒྱ་དང་བཅས་པས་མཆོད་ལ། རྡོ་རྗེ་དྲིལ་བུ་བསིལ་ཞིང༌། ནམ་མཁའི་མདངས་ལྟར་ཀུན་ནས་གསལ་བའི་སྐུ། །མཚན་དཔེས་རབ་མཛེས་རྡོ་རྗེ་སྐྱིལ་ཀྲུང་བཞུགས། །རྡོ་རྗེ་དང་བཅས་མཉམ་བཞག་ས་གནོན་མཛད། །མི་འཁྲུགས་རྒྱལ་བའི་སྐུ་ལ་ཕྱག་འཚལ་ལོ། །ལྷ་ཡི་རྔ་བོ་ཆེ་ལྟར་རྣམ་ཀུན་ཏུ། །རྣམ་པར་རྟོག་མེད་ལེགས་བཤད་སེང་གེའི་སྒྲ། །ཡན་ལག་དྲུག་ཅུས་བརྒྱན་པ་ལེགས་སྒྲོགས་པའི། །མི་འཁྲུགས་རྒྱལ་བའི་གསུང་ལ༴ ཡེ་ཤེས་རྒྱ་མཚོ་ཡོན་ཏན་ནོར་བུས་གཏམས། །ཆོ་འཕྲུལ་རྣམ་པར་འཁྲུལ་བའི་རྦ་རླབས་ཅན། །སྲིད་ཞི་རླུང་གིས་རྣམ་པར་མི་གཡོ་བའི། །མི་འཁྲུགས་རྒྱལ་བའི་ཐུགས་ལ༴ དུས་གསུམ་རྒྱལ་བའི་ཡོན་ཏན་མ་ལུས་རྣམས། །ཡེ་ཤེས་རང་བཞིན་སྒྱུ་མའི་སྐུར་བསྟན་ནས། །མི་འཁྲུགས་རྒྱལ་བའི་འཕྲིན་ལས་ཀུན་སྒྲུབ་པ། །བཀྲ་ཤིས་ལྷ་མོ་བརྒྱད་ལ་ཕྱག་འཚལ་ལོ། །ཞེས་པས་བསྟོད། བུམ་ནང་གི་མི་འཁྲུགས་པ་འཁོར་དང་བཅས་པའི་ཐུགས་ཀར་ཟླ་བའི་སྟེང་དུ་གཟུངས་སྔགས་ཀྱི་འཕྲེང་བ་བཀོད་པ་ལ་དམིགས་ཏེ། གཙོ་བོ་ལ་ཀཱཾ་ཀ་ནི་དང༌། འཁོར་རྣམས་ལ་རང་རང་གི་སྔགས་ཅི་ནུས་དང༌། ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏ་ས་
མ་ཡ་ཤྲཱི་ཡེ་སྭཱཧཱ། ཞེས་སོགས་ཅི་འགྲུབ་བཟླས་པས། ལྷ་སོ་སོའི་སྐུ་ལས་ཡེ་ཤེས་ཀྱི་བདུད་རྩི་འཛག་པས་སྡིག་པ་འཁྲུད་ངེས་ཀྱི་ཡེ་ཤེས་ཀྱི་ཆུ་ནུས་ལྡན་དུ་བྱིན་གྱིས་བརླབས་ནས། སྔར་བཞིན་མཆོད་བསྟོད། དུང་ཆོས་ཀྱི་ཆུ་ཕུལ་བས་ཡེ་ཤེས་པ་གཤེགས་པར་བསམས་ལ། ཡི་གེ་བརྒྱ་པ་ལན་གསུམ་གྱིས་བརྟན་པར་བྱའོ། །གསུམ་པ་དཀྱིལ་འཁོར་བསྒྲུབ་པ་ནི། རས་བྲིས་ཞལ་ཕྱེ་ལ། ཨ་མྲྀ་ཏས་བསངས། སརྦབྷཱ་ཝས་སྦྱངས། སྟོང་པའི་ངང་ལས། པཾ་ལས་པདྨ་དང་རཾ་ལས་ཉི་མའི་དཀྱིལ་འཁོར་གྱི་སྟེང་དུ། ཧཱུཾ་ལས་རྡོ་རྗེ་སྔོན་པོ་རྩེ་ལྔ་པ་ཧཱུཾ་གིས་མཚན་པ་དེ་ཡོངས་སུ་གྱུར་པ་ལས། རྡོ་རྗེའི་ས་གཞི་རྭ་བ་གུར་དང་བླ་རེ། ཕྱི་རོལ་ཡེ་ཤེས་ཀྱི་མེ་འབར་བའི་སྲུང་བའི་འཁོར་ལོ་ཡངས་ཤིང་རྒྱ་ཆེ་བར་གྱུར། ཨོཾ་བཛྲ་རཀྵ་རཀྵ་སྭཱཧཱ། དེའི་ནང་དུ་སྣ་ཚོགས་པདྨ་འདབ་མ་སུམ་ཅུ་རྩ་གཉིས་པའི་ལྟེ་བར་ཉི་མའི་དཀྱིལ་འཁོར་གྱི་སྟེང་དུ། བཾ་ལཾ་བྷྲཱུཾལས་བྱུང་བའི་རིན་པོ་ཆེའི་གཞལ་ཡས་ཁང༌། སྣ་ཚོགས་རྡོ་རྗེའི་སྟེགས་བུ་ལ་གནས་པ། གྲུ་བཞི་པ་སྒོ་བཞི་པ་ཕྱི་ནས་རིམ་པ་བཞིན་དུ། དཀར་སེར་དམར་ལྗང་སྔོ་བའི་རྩིག་པ་རིམ་པ་ལྔ་དང་ལྡན་པའི་སྟེང་དུ། །རིན་པོ་ཆེའི་ཕ་གུ་སེར་པོས་བསྐོར་བ། དེའི་སྟེང་དུ་རིན་པོ་ཆེའི་བྲེ་ཕུལ་གྱིས་བཏེག་པའི་གསེར་གྱི་སྐ་རགས་བཞིའི་ཕྱི་ངོས་སུ། ཆུ་སྲིན་གྱི་ཁ་ནས་བྱུང་བའི་དྲ་བ་དང་དྲ་བ་ཕྱེད་པ་དང༌། ཟླ་བ་རླུང་གིས་བསྐྱོད་པ་དང༌། དྲིལ་བུ་དང༌། མེ་ཏོག་གི་འཕྲེང་བ་དང༌། རྔ་ཡབ་ནོར་བུའི་ཡུ་བ་ཅན་འཕྱང་བ།
དེའི་སྟེང་ནས་ཐུར་དུ་འཕྱང་བའི་མདའ་ཡབ་དང༌། དེའི་སྟེང་ན་རིན་པོ་ཆེའི་དྲ་མིག་གསེང་མའི་པུ་ཤུས་བསྐོར་བ། རྩིག་པའི་ཕྱི་རོལ་འདོད་ཡོན་གྱི་སྣམ་བུ་དམར་པོ་ལ་གནས་པའི་མཆོད་པའི་ལྷ་མོ་བཅུ་དྲུག་གིས་མཆོད་རྫས་དུ་མ་ཐོགས་ནས་མཆོད་བྱེད་པ། སྒོ་དང་སྒོ་ཁྱུད་ཀྱི་མཚམས་དང་གྲྭ་བཞིར་ཟླ་བ་ཕྱེད་པ་ལ་གནས་པའི་རྡོ་རྗེ་ནོར་བུས་སྤྲས་པ། ནང་ཀ་བ་བརྒྱད་དང་ལྡན་པའི་སྟེང་དུ། རྡོ་རྗེའི་གདུང་ཟླུམ་དེའི་སྟེང་དུ་རྡོ་རྗེའི་ཐལ་གདུང་བཞིས་མིག་མངས་རིས་སུ་བྲིས་ཤིང་མཛེས་པར་ཕུབ་པ། དབུས་ཕྱུར་བུར་གྱུར་པའི་རྩེ་མོར་རྡོ་རྗེ་དང་ནོར་བུ་རིན་པོ་ཆེའི་ཏོག་གིས་སྤྲས་པ་སྒོ་བཞིའི་སྟེང་གི་ཐད་སོར་ཀ་བ་བཞི་བཞིས་བཏེགས་པའི་རྟ་བབས་རིམ་པ་བཞི་དང་ལྡན་པའི་རྩེར་མོར། པདྨ་ལ་གནས་པའི་ཆོས་ཀྱི་འཁོར་ལོ་དང༌། གདུགས་དང༌། གཡས་གཡོན་དུ་རི་དྭགས་ཕོ་མོ་དང༌། སྣམ་བུ་སོ་སོ་ལ་རྒྱལ་མཚན་དང༌། བ་དན་ལ་སོགས་པའི་རྒྱན་དུ་མས་བརྒྱན་པའི་གཞལ་ཡས་ཁང་གི་ནང་གི་ལྷ་སྣམ་ཤར་དཀར། ལྷོ་སེར་ནུབ་དམར། བྱང་ལྗང༌། དབུས་སྔོ་བའི་དབུས་སུ་སྣ་ཚོགས་པདྨ་འདབ་མ་བརྒྱད་པའི་ལྟེ་བར་གླང་པོ་ཆེས་བཏེགས་པའི་རིན་པོ་ཆེའི་ཁྲི། པདྨ་དང་ཟླ་བའི་གདན་གྱི་སྟེང་དུ། ཧཱུཾ་ལས་རྡོ་རྗེ་ཧཱུཾ་གིས་མཚན་པ་ལས། གཙོ་བོ་སྒྲུབ་ཐབས་ལྟར་བསྐྱེད། འདབ་མ་བརྒྱད་ལ་ཟླ་བའི་དཀྱིལ་འཁོར་གྱི་སྟེང་དུ་ཤར་དུ་ཤཾ་ལས་དཔལ་བེའུ་ཤཾ་གིས་མཚན་པ་ཡོངས་སུ་གྱུར་པ་ལས། ལྷ་མོ་པདྨ་ཅན་དཀར་མོ་གཡས་ན་དཔལ་བེའུ་འཛིན་པ། ལྷོར་པཾ་ལས་
པདྨ་པཾ་གྱིས་མཚན་པ་ཡོངས་སུ་གྱུར་པ་ལས། འོད་ལྡན་མ་དམར་མོ་གཡས་ན་པདྨ་འཛིན་པ། ནུབ་ཏུ་ཚཾ་ལས་གདུགས་ཚཾ་གིས་མཚན་པ་ཡོངས་སུ་གྱུར་པ་ལས། མདངས་ལྡན་མ་སྔོན་མོ་གཡས་ན་གདུགས་འཛིན་པ། བྱང་དུ་ཤཾ་ལས་དུང་ཤཾ་གིས་མཚན་པ་ཡོངས་སུ་གྱུར་པ་ལས་དྲི་མེད་མ་ལྗང་ཁུ་གཡས་ན་དུང་འཛིན་པ། ཤར་ལྷོར་ཙམ་ལས་འཁོར་ལོ་ཙཾ་གིས་མཚན་པ་ཡོངས་སུ་གྱུར་པ་ལས། འཇིགས་བྱེད་མ་དཀར་མོ་གཡས་ན་འཁོར་ལོ་འཛིན་པ། ལྷོ་ནུབ་ཏུ་དྷྭཾ་ལས་རྒྱལ་མཚན་དྷྭཾ་གྱིས་མཚན་པ། ཡོངས་སུ་གྱུར་པ་ལས་གནས་བཅས་མ་སྔོན་མོ་གཡས་ན་རྒྱལ་མཚན་འཛིན་པ། ནུབ་བྱང་དུ་ཀཾ་ལས་བུམ་པ་ཀཾ་གིས་མཚན་པ་ཡོངས་སུ་གྱུར་པ་ལས་དཀར་ཤམ་མ་དམར་སྐྱ་གཡས་ན་བུམ་པ་འཛིན་པ། བྱང་ཤར་དུ་མཾ་ལས་གསེར་ཉ་མཾ་གྱིས་མཚན་པ་ཡོངས་སུ་གྱུར་པ་ལས་ཡིད་གཞུང་མ་ལྗང་ཁུ་གཡས་ན་གསེར་ཉ་འཛིན་པ། ལྷ་མོ་བརྒྱད་པོ་ཐམས་ཅད་ཀྱང་ཞལ་གཅིག་ཕྱག་གཉིས་མ། ཕྱག་གཡས་པ་རང་རང་གི་ཕྱག་མཚན་ཐུགས་ཀར་གཏོད་དེ་འཛིན་པ། ཕྱག་གཡོན་ཁུ་ཚུར་སྟ་ཟུར་གཡོན་དུ་བརྟེན་པ། ཞབས་སེམས་དཔའི་སྐྱིལ་མོ་ཀྲུང་གིས་བཞུགས་པ། འཛུམ་ཞིང་ཡིད་དུ་འོང་བའི་རྣམ་པ་ཅན་རིན་པོ་ཆེའི་རྒྱན་དང༌། དར་སྣ་ཚོགས་ཀྱི་ཤམ་ཐབས་ཀྱིས་མཛེས་པ། ཟླ་བའི་གདན་དང་རྒྱབ་ཡོལ་ཅན། འོད་ཟེར་དཔག་ཏུ་མེད་པ་འཕྲོ་བར་བསམ་མོ། །དེ་ནས་ཛཿཧཱུཾ་བཾ་ཧོཿ ཞེས་བརྗོད་པས།
རང་ཉིད་དཀྱིལ་འཁོར་གྱི་གཙོ་བོ་དང་གཉིས་སུ་མེད་པར་གྱུར་བར་བསམ་སྟེ། དཀྱིལ་འཁོར་བསྐྱེད་པའོ། །དེ་ནས་སྔར་བདག་བསྐྱེད་ཀྱི་སྐབས་ལྟར་སྔགས་དང་ཕྱག་རྒྱས་གནས་གསུམ་བྱིན་གྱིས་རླབས་ལ། རང་གི་སྙིང་ག་ནས་འོད་ཟེར་འཕྲོས་པས། རང་བཞིན་གྱི་གནས་ནས་བཅོམ་ལྡན་འདས་མི་འཁྲུགས་པ་ལྷ་དགུའི་རྟེན་དང་བརྟེན་པར་བཅས་པའི་དཀྱིལ་འཁོར་ལ། སངས་རྒྱས་དང་བྱང་ཆུབ་སེམས་དཔའི་ཚོགས་ཀྱིས་བསྐོར་བ་ཨོཾ་བཛྲ་ས་མཱ་ཛཿ ཞེས་རྡོ་རྗེ་བསྡུ་བའི་སྔགས་དང་ཕྱག་རྒྱས་སྤྱན་དྲངས་པར་བསམས་ལ། སྤོས་དང་བཅས་པས། རྡོ་རྗེ་དྲིལ་བུ་འཛིན་པས། དད་པ་དང་ནི་དམ་ཚིག་གིས། །ཚུར་གཤེགས་ཚུར་གཤེགས་བཅོམ་ལྡན་འདས། །བདག་ལ་མཆོད་ཡོན་བཞེས་ནས་ཀྱང༌། །མཆོད་པས་བདག་ལ་དགེས་པར་མཛོད། །ཨོཾ་སརྦ་ཏ་ཐཱ་ག་ཏ་ཡཀྵོ་བྷྱ་ས་པཱ་རི་ཝཱ་ར་ཨེ་ཧྱ་ཧི། ཛཿཧཱུཾ་བཾ་ཧོཿ པདྨ་ཀ་མ་ལ་ཡེ་སྟྭམ། ཞེས་པས་སྤྱན་དྲངས་ལ། སྤྱན་དྲངས་པའི་བཅོམ་ལྡན་འདས་འཁོར་དང་བཅས་པ་སྟེང་གི་ནམ་མཁར་བཞུགས་པར་བསམས་ལ། མཆོད་པ་རྣམ་པ་ལྔས་མཆོད། རྡོ་རྗེ་རྩེ་ལྔ་པའི་ཕྱག་རྒྱ་བསྟན་ཏེ། ཨོཾ་སརྦ་ཏ་ཐཱ་ག་ཏ་བཛྲ་ཨུད་བྷ་བ་ཡ་སྭཱཧཱ། ཞེས་པས་ལྷ་ཐམས་ཅད་མཉེས་པར་བསམ་སྟེ་ཡེ་ཤེས་པ་སྤྱན་དྲངས་པའོ། །དེ་ནས་ཛཿཧཱུཾ་བཾ་ཧོཿ སྤྱན་དྲངས་པའི་ཡེ་ཤེས་སེམས་དཔའ་རྣམས་ལྷ་རང་རང་གི་ཐུགས་ཀར་བཞུགས་པར་དམིགས་ལ། སེམས་རྩེ་གཅིག་ཏུ་གཏན་ནས། འོད་ཟེར་གྱི་སྤྲོ་བསྡུས་སེམས་ཅན་གྱི་སྡིག་སྒྲིབ་སྦྱངས་བར་བསམས་ལ། གཙོ་བོ་ལ་གཟུངས་ཅི་ནུས་
བཟླ། འཁོར་རྣམས་ལ། ཨོཾ་མངྒ་ལཾ་ཤྲི་བཏ་ས་བཱ་ན་ཡེ་སྭཱཧཱ། ཨོཾ་མངྒ་ལཾ་པདྨ་སྭཱཧཱ། ཨོཾ་མངྒ་ལཾ་ཚ་ཏྲཾ་ག་སྭཱཧཱ། ཨོཾ་མངྒ་ལཾ་ཤཾ་ཁ་སྭཱཧཱ། ཨོཾ་མངྒ་ལཾ་ཙཀྲ་སྭཱཧཱ། ཨོཾ་མངྒ་ལཾ་དྷྭ་ཛ་སྭཱཧཱ། ཨོཾ་མངྒ་ལཾ་ཀ་ལ་ཤ་སྭཱཧཱ། ཨོཾ་མངྒ་ལཾ་མ་ཏསྱ་སྭཱཧཱ། ཞེས་ཅི་ནུས་བཟླས་ལ། དཀྱིལ་འཁོར་བརྟན་བཞུགས་བྱས་ཏེ། མདུན་བསྐྱེད་སྒྲུབ་པའོ། །དེ་ལ་མཆོད་པའི་ཕྱིར་གཙོ་བོ་ལས་ཆ་གཅིག་ཆད་ནས། ཤར་སྒོར་གནས་པར་བསམས་ལ། མཆོད་པ་རྣམས་བྱིན་གྱིས་རླབས་ལ། ཐལ་མོ་སྦྱར་ནས། མཆོད་ཡོན་ཕལ་ཆེར་མཆོད་ཡོན་བླ་རེ་དང༌། །མཆོད་ཡོན་བཀོད་པའི་འོད་ཟེར་རབ་བཀྱེ་སྟེ། །མཆོད་ཡོན་སྣ་ཚོགས་ཀུན་ཏུ་བཀྲམ་བྱས་ནས། །བདག་ཉིད་ཆེན་པོ་རྒྱལ་བ་སྲས་བཅས་མཆོད། ཅེས་དང༌། པད་སྐོར་སྔོན་དུ་འགྲོ་བའི་སོ་སོའི་ཕྱག་རྒྱ་བཅས་ལ། ཨོཾ་སརྦ་ཏ་ཐཱ་ག་ཏ་ཨཀྵོ་བྷྱ་ས་པཱ་རི་ཝཱ་ར་ཨརྒྷཾ་པྲ་ཏིཙྪ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུཾ། ཞེས་པས་མཆོད་ཡོན་དང༌། དེ་བཞིན་དུ་ཚིགས་བཅད་དང་སྔགས་གོང་འོག་ཐམས་ཅད་འདྲ་བར་བྱས་ལ། མེ་ཏོག་ཕལ་ཆེར་དང་པུཥྤེ། བདུག་སྤོས་དང༌། དྷུ་པེ། སྣང་གསལ་དང༌། ཨཱ་ལོ་ཀེ དྲི་ཆབ་དང༌། གནྡྷེ། ཞལ་ཟས་དང༌། ནཻ་ཝི་དྱ། སིལ་སྙན་ཕལ་ཆེར་དང༌། ཨོཾ་སརྦ་ཏ་ཐཱ་ག་ཨཀྵོ་བྷྱ་ས་པཱ་རི་ཝཱ་ར་ཤཔྟ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུཾ། ཞེས་དང་རོལ་མོ་ཇི་སྙེད་པའི་སྒྲ་བྱ་ཞིང༌། དྷརྨ་ར་ཎི་ཏ་ལ་སོགས་པ་བརྗོད། དེ་ནས་བཀྲ་ཤིས་རྟགས་བརྒྱད་འབུལ་བ་ནི། མགོན་པོ་ཐུགས་རྗེ་ཆེན་པོས་བྱིན་རླབས་པའི་
ལྷ་རྫས་ལས་གྲུབ་རིན་ཆེན་དཔལ་བེའུ་མཆོག །རྒྱལ་བ་སྲས་དང་བཅས་ལ་དབུལ་བར་བགྱི། ཐུགས་རྗེས་འགྲོ་བའི་དོན་དུ་བཞེས་སུ་གསོལ། ཞེས་དང༌། པད་སྐོར་སྔོན་དུ་འགྲོ་བའི་སོ་སོའི་ཕྱག་རྒྱ་བཅས་ལ། ཨོཾ་སརྦ་ཏ་ཐཱ་ག་ཏ་ཨཀྵོ་བྷྱ་ས་པཱ་རི་ཝཱ་ར་མངྒ་ལཾ་ཤྲཱི་བདྶ་བཱཾ་ན་པཱུ་ཛ་མེགྷ་ས་མུ་དྲ་སྥ་ར་ཎ་ས་མ་ཡེ་ཧཱུཾ། ཞེས་དང་དེ་བཞིན་དུ་ཚིགས་བཅད་དང༌། སྔགས་གོང་འོག་ཐམས་ཅད་འདྲ་བར་བྱས་ལ། ལྷ་རྫས་ལས་གྲུབ་རིན་ཆེན་པདྨ་མཆོག །ཅེས་དང༌། མངྒ་ལཾ་པདྨ་རིན་ཆེན་གདུགས་མཛེས་མཆོག །དང༌།ཚ་ཏྲཾ་ག །དུང་དཀར་མཆོག་དང༌། ཤཾ་ཁ། འཁོར་ལོ་མཆོག་དང༌། ཙཀྲ །རྒྱལ་མཚན་མཆོག་དང༌། དྷ་ཛ། བུམ་པ་མཆོག་དང༌། ཀ་ལ་ཤ་།གསེར་ཉ་མཆོག་དང༌། མཏྶ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུཾ། དེ་ནས། ཨོཾ་ལས་རིན་པོ་ཆེ་སྣ་བདུན་སྤྲུལ་ཏེ། ཨོཾ་སརྦ་བིད་པཱུ་ར་པཱུ་ར། སུ་ར་སུ་ར། ཨཱ་བརྟ་ཡ། ཨཱ་བརྟ་ཡ་ཧོ། ཞེས་བརྗོད་ཅིང༌། བདེ་བར་གཤེགས་པ་ཐམས་ཅད་ལ། །འཁོར་ལོ་རིན་ཆེན་འདི་ཕུལ་བས། །སྲིད་པའི་འཁོར་ལོ་རྒྱུན་བཅད་ནས། །ཆོས་ཀྱི་འཁོར་ལོ་བསྐོར་བར་ཤོག །ཨོཾ་སརྦ་ཏ་ཐཱ་ག་ཏ་ཨཀྵོ་བྷྱ་ས་པཱ་རི་ཝཱ་ར་ཙཀྲ་རཏྣ་པཱུ་ཛི་ཏེ་ཧཱུཾ། རྒྱལ་བ་སྲས་དང་བཅས་རྣམས་ལ། །ནོར་བུ་རིན་ཆེན་འདི་ཕུལ་བས། །དབུལ་ཞིང་འཕོངས་པ་རྒྱུན་བཅད་ནས། །འབྱོར་པ་ཕུན་སུམ་ཚོགས་པར་ཤོག །མ་ཎི་རཏྣ༴ བཙུན་མོ་རིན་ཆེན་འདི་ཕུལ་བས། །མ་རིག་མུན་པ་རྒྱུན་བཅད་དེ། །ཤེས་རབ་དབྱིངས་ཀྱི་དོན་རྟོགས་ནས། །ཐབས་དང་ཤེས་རབ་འབྲེལ་བར་ཤོག །ཝསྟི་རཏྣ༴
བློན་པོ་རིན་ཆེན་འདི་ཕུལ་བས། །ཕྱི་ནང་གསང་གསུམ་ཐེག་གསུམ་ལྡན། །བསམ་ཡས་བསྟན་པ་རབ་འཛིན་ཞིང༌། །ཡོན་ཏན་ཐམས་ཅད་ལྡན་པར་ཤོག །མ་ཧཱསྟྭ་རཏྣ༴ །གླང་པོ་རིན་ཆེན་འདི་ཕུལ་བས། །ལྟ་ངན་རྣམས་ནི་རབ་བསལ་ནས། །བླ་མེད་ཐེག་པར་རབ་བཞོན་ཏེ། །ཐམས་ཅད་མཁྱེན་གྲོང་བགྲོད་པར་ཤོག །ཧསྟི་རཏྣ༴ །རྟ་མཆོག་རིན་ཆེན་འདི་ཕུལ་བས། །སྲིད་པའི་གཟེབ་ལས་ངེས་གྲོལ་ཏེ། །རྫུ་འཕྲུལ་མཆོག་གི་ཤུགས་ཐོབ་ནས། །སངས་རྒྱས་ཞིང་དུ་བགྲོད་པར་ཤོག །ཏཱུ་རཾ་ག་ཨ་ཤྭ་རཏྣ༴དམག་དཔོན་རིན་ཆེན་འདི་འཕུལ་བས། །ཉོན་མོངས་དགྲ་ལས་རྒྱལ་གྱུར་ནས། །ཕས་ཀྱི་རྒོལ་བ་ཚར་བཅད་དེ། །བསྙེངས་བྲལ་མཆོག་ནི་ཐོབ་པར་ཤོག །ཁཌྒ་རཏྣ༴ ཞེས་བརྗོད་ཅིང་དབུལ། དེ་ནས་འདོད་ཡོན་ལྔ་འབུལ་ཏེ། ཁ་དོག་དབྱིབས་ལེགས་ཡིད་འོང་རྒྱན་ཕྲེང་ལྡན། །ཕྱོགས་དུས་ཀུན་ན་གཟུགས་མཆོག་ཅིང་མཆིས་པ། །མོས་བློས་དཀྱིལ་འཁོར་ལྷ་ལ་བདག་འབུལ་གྱི། །བཞེས་ཤིག་བླ་མེད་གྲུབ་མཆོག་སྩལ་དུ་གསོལ། །ཨོཾ་སརྦ་ཏ་ཐཱ་ག་ཏ་ཨཀྵོ་བྷྱ་ས་པཱ་རི་ཝཱ་ར་རཱུ་པ་ཀ་མ་གུ་ཎ་པཱུ་ཛི་ཏེ་ཧཱུཾ། དེ་བཞིན་དུ། ཕྱོགས་དུས་ཀུན་ན་ཟིན་དང་མ་ཟིན་པའི། །ཡོན་ཏན་ཚིག་མཆོག་སྒྲ་སྙན་ཅི་མཆིས་རྣམས། །མོས་བློས༴ བཞེས་ཤིག༴ ཤཔྟ༴ ཕྱོགས་དུས་ཀུན་ན་ཙནྡ་སྦྲུལ་སྙིང་དང༌། ཨ་ཀར་ནག་སོགས་དབང་པོ་ཚིམ་བྱེད་རྣམས། མོས་བློས༴ བཞེས་ཤིག༴ གནྡྷེ༴ ཕྱོགས་དུས་ཀུན་ན་རོ་དང་བཅུད་ལྡན་པའི། །
ལུས་སེམས་རྟས་བྱེད་རོ་མཆོག་ཅི་མཆིས་རྣམས། མོས་བློས༴ བཞེས་ཤིག༴ ར་ས༴ ཕྱོགས་དུས་ཀུན་ན་འཇམ་མཉེན་འཁྲིས་ཆགས་པའི། །རེག་བྱའི་ཁྱད་པར་ལུས་སེམས་ཚིམ་བྱེད་རྣམས། །མོས་བློས༴ བཞེས་ཤིག༴ ཨོཾ་སརྦ་ཏ་ཐྭ་ག་ཏ་ཨཀྵོ་བྷྱ་ས་པཱ་རི་ཝཱ་ར་སྥ་ར་ཤེ་ཀ་མ་གུ་ཎ་པཱུ་ཛི་ཏེ་ཧཱུཾ། ཞེས་པས་མཆོད་དོ། །དེ་ནས་རྡོ་རྗེ་དྲིལ་བུ་འཛིན་པས་དབྱངས་སྙན་པོས་བསྟོད་དེ། ཆོས་དབྱིངས་ཡེ་ཤེས་བྱང་ཆུབ་སེམས་བདག་ཉིད། །སྐུ་གསུམ་མཆོག་བརྙེས་ཐུགས་རྗེས་ཆེན་པོ་ཡི། །འགྲོ་བའི་ལས་སྒྲིབ་མ་ལུས་སྦྱོང་མཛད་པ། །བཅོམ་ལྡན་མི་འཁྲུགས་མགོན་ལ་ཕྱག་འཚལ་ལོ། ཁྱེད་སྐུ་ཨིནྡྲ་ནཱི་ལའི་ལྷུན་པོ་ལས། །ཉི་མ་བྱེ་བའི་འོད་ཟེར་འཕྲོ་བ་བཞིན། །མཚན་དཔེས་རྒྱན་གསལ་འོད་ཀྱི་དྲ་བ་ཅན། །བཅོམ་ལྡན༴ མི་གཡོ་རྡོ་རྗེ་སྐྱིལ་ཀྲུང་རབ་བཅིངས་ནས། །བདུད་འདུལ་མཉམ་བཞག་སྟེང་ན་རྡོ་རྗེ་ཅན། །ཐོར་གཙུག་ལྷ་ཡི་ན་བཟའ་མཆོག་མཛེས་པ། །བཅོམ་ལྡན༴ ཁྱེད་གསུང་སྔགས་ཟབ་རྟག་ཏུ་དུས་གསུམ་མམ། །ལན་གཅིག་བཟླས་པས་ལས་ཀུན་ཟད་པ་དང༌། །མཚམས་མེད་སྦྱོང་དང་བར་ཆད་ཀུན་སེལ་བའི། །བཅོམ་ལྡན༴ །སྔགས་བྲིས་ལུས་ལ་བཏགས་པ་ཙམ་གྱིས་ཀྱང༌། །དུས་མིན་འཆི་སྤོང་སྙིང་རྗེས་དུད་འགྲོ་སོགས། །འཆི་ཚེ་རྣ་བར་བསྒྲགས་པས་ངན་འགྲོ་བཟློག །བཅོམ་ལྡན་མི༴ གང་གི་ཆེད་དུ་མིང་སྨོས་བརྩེ་བ་ཡིས། །བརྒྱ་སྟོང་འབུམ་ཕྲག་གང་རུང་བཟླས་བརྗོད་ཀྱིས། །དམྱལ་བར་སྐྱེས་པའང་མོད་ལ་
ཐར་མཛད་པ། །བཅོམ་ལྡན་མི༴ གཞན་ཡང་ཁྲུས་དང་བྲབ་སོགས་བྱ་བ་དང༌། །མཆོད་རྟེན་ལ་སོགས་སྡིག་ཆེན་སྦྱོང་བ་ཡིས། །སྣ་ཚོགས་ཐབས་ཀྱིས་ཐར་པའི་བདེ་སྟོན་པ། །བཅོམ་ལྡན་མི༴ ཁྱེད་ཐུགས་མཁའ་ལྟར་སྤྲོས་ཀུན་ཉེར་ཞི་ཡང༌། །སྤངས་རྟོགས་མཁྱེན་བརྩེའི་ཉི་ཟླ་སྐར་ཚོགས་ཀྱིས། །ལོག་བློའི་སྒྲིབ་སེལ་དགེ་ལེགས་ཀུན་མཛད་པའི། །བཅོམ་ལྡན་མི༴ སྟོབས་སོགས་རྒྱལ་བའི་ཡོན་ཏན་རིན་ཆེན་གྱི། །འབྱུང་གནས་འགྲོ་བའི་རེ་བསྐོང་དཔག་བསམ་ཤིང༌། །འཕྲིན་ལས་ཕན་བདེས་ནམ་མཁའ་ཁྱབ་མཛད་པའི། །བཅོམ་ལྡན༴ ཡེ་ཤེས་ཚད་མེད་བཞིའི་ངོ་བོ་ཉིད། །འཕགས་ལམ་རྣམ་ཐར་བརྒྱད་རྣམས་རྣམ་དག་ཅིང༌། །བཅོམ་ལྡན་འཕྲིན་ལས་བཀྲ་ཤིས་ཀུན་མཛད་མ། །བཀྲ་ཤིས་ལྷ་མོ་བརྒྱད་ལ་ཕྱག་འཚལ་ལོ། །དེ་ལྟར་བསྟོད་པའི་དགེ་བའི་འགྲོ་བ་ཀུན། །ཉོན་མོངས་ལས་ཀྱི་སྒྲིབ་པ་ཀུན་བྱང་ནས། །གཟུངས་སྔགས་ཕན་ཡོན་ལ་སོགས་འགྲུབ་པ་དང༌། །ཚོགས་གཉིས་མཐར་ཕྱིན་བྱང་ཆུབ་མཆོག་ཐོབ་ཤོག །ཅེས་པས་བསྟོད་དེ་འདས་པའི་ལྷ་མཆོད་པའི་ཆོ་གའོ། །དེ་ནས་གཏོར་མ་རྣམས་ཆུ་གཙང་མས་བྲན་ལ། དང་པོ་ཕྱོགས་སྐྱོང་དང༌། གཉིས་པ་འབྱུང་པོ་སྤྱི་ལ་ཆ་གསུམ་ལྟར་དབུལ། གསུམ་པ་ཆ་གསུམ་ལྟར་བགེགས་གཏོར་སྦྱིན། གཏོར་མ་ཕྱི་རོལ་དུ་དོར་ལ། ཁྲོ་བོའི་སྔགས་ཀྱིས་མཚམས་བཅད་དེ། འཇིག་རྟེན་པ་གཏོར་མས་མཆོད་པའི་ཆོ་གའོ། །བཞི་པ་འཇུག་ཅིང་དབང་བླང་བ་ནི་དཀྱིལ་འཁོར་གཙོ་བོར་རང་གི་སྔར་མི་འཁྲུགས་པའི་དབང་ཞུས་པའི་བླ་མར་མོས་ལ། འཇུག་པའི་
ཡོན་དུ་མཎྜལ་ཕུལ་ཏེ། དགའ་ཆེན་ཁྱོད་བདག་སྟོན་པ་སྟེ། །སློབ་དཔོན་ཁྱོད་ནི་དགོངས་སུ་གསོལ། །བྱང་ཆུབ་ཆེན་པོའི་ཚུལ་བསྟན་པ། །མགོན་པོ་ཆེན་པོ་བདག་འཚལ་ལོ། །དམ་ཚིག་དེ་ཉིད་བདག་ལ་སྩོལ། །བྱང་ཆུབ་སེམས་ཀྱང་བདག་ལ་སྩོལ། །སངས་རྒྱས་ཆོས་དང་དགེ་འདུན་ཏེ། །སྐྱབས་གསུམ་དག་ཀྱང་བདག་ལ་སྩོལ། །ཐར་པ་ཆེན་པོའི་གྲོང་མཆོག་ཏུ། །མགོན་པོས་བདག་ནི་གཞུག་ཏུ་གསོལ། ཞེས་ལན་གསུམ་བརྗོད་པས་གསོལ་བ་བཏབ། དཀོན་མཆོག་གསུམ་ལ་བདག་སྐྱབས་མཆི། །སྡིག་པ་ཐམས་ཅད་སོ་སོར་བཤགས། །ཞེས་སོགས་བདག་བསྐྱེད་ལྟར་རྒྱུན་བཤགས་ལན་གསུམ་བྱས་ལ། ཨོཾ་ཙཀྵུཿབནྡྷ་ཝ་ར་ཨ་མ་ན་ཡ་ཧཱུཾ། ཞེས་དང༌། རས་དམར་པོས་མིག་དར་བཅིངས་པར་བསམ། ཨ་ཁཾ་ཝཱི་ར་ཧཱུཾ། ཞེས་མེ་ཏོག་གི་འཕྲེང་བ་བླང༌། ཨོཾ་ཨ་མྲྀ་ཏེ་ཧཱུཾ་ཕཊ་ཀྱིས་བགེགས་བསངས་ལ། བུ་ཁྱོད་སུ་ཡིན་ཅི་ལ་དགའ། །སྐལ་བཟང་བདག་བདེ་བ་ཆེན་པོ་ལའོ། །དེ་ཡི་བུ་ལ་ཅི་ཞིག་བྱ། །སངས་རྒྱས་མཆོག་གི་དམ་ཚིག་གོ །དེ་ནས། སྙིང་གར་ཀུན་རྫོབ་བྱང་སེམས་ཀྱི་ངོ་བོ་ཟླ་བའི་དཀྱིལ་འཁོར་བསམ། དེའི་སྟེང་དུ་དོན་དམ་བྱང་ཆུབ་སེམས་ཀྱི་ངོ་བོ་རྡོ་རྗེ་དཀར་པོ་རྩེ་ལྔ་པ་བསམས་ལ། རྡོ་རྗེ་རེག་ཅིང༌། ཨོཾ་སརྦ་ཡོ་ག་ཙིཏྟ་ཨུཏྤ་ཏ་ཡ་མི་སུ་ར་ཏེ་ས་མ་ཡ་སྟཱཾ། ཧོ་སིདྷི་བཛྲ་ཡ་ཐ་སུ་ཁཾ། ཞེས་པས་བརྟན་པར་བསམས་ལ། རྡོ་རྗེ་མགོ་བོར་བཞག་སྟེ། དེང་ཁྱོད་དེ་བཞིན་གཤེགས་པ་ཐམས་ཅད་ཀྱི་རིགས་སུ་ཞུགས་ཀྱིས། དེ་བཞིན་གཤེགས་པ་ཐམས་ཅད་ཀྱི་གསང་ཆེན་དམ་པ་
འདི། དེ་བཞིན་གཤེགས་པ་རྣམས་ཀྱི་དཀྱིལ་འཁོར་དུ་མ་ཞུགས་པ་རྣམས་ཀྱི་མདུན་དུ་སྨྲ་བར་མི་བྱ་སྟེ། མ་དད་པ་རྣམས་ལ་ཡང་མ་ཡིན་ནོ། །ཞེས་པས་གསང་བར་གདམས་ནས་ཨ་ཁཾ་ཝཱེ་ར་ཧཱུཾ། ཞེས་པས་དཀྱིལ་འཁོར་གྱི་ནང་དུ་ཞུགས་པར་བསམས། ཨོཾ་ན་མ་ཏེ་ཧཱུཾ། ཨོཾ་ན་མ་མེ་ཧཱུཾ། ན་མོ་ན་མ་ཧཱུཾ། ཞེས་ལུས་ངག་ཡིད་གསུམ་དང་བས་ཕྱག་བྱས་ལ། ཡེ་ཤེས་དབབ་པའི་དོན་དུ་མཎྜལ་ཕུལ་ནས། དེ་བཞིན་གཤེགས་པ་ཐམས་ཅད་ཀྱིས་བྱིན་གྱིས་རློབས་ཤིག །བཅོམ་ལྡན་འདས་མི་འཁྲུགས་པ་བདག་ལ་དབབ་པར་མཛད་དུ་གསོལ། ཞེས་པས་ལན་གསུམ་གྱིས་གསོལ་བ་བཏབ་ནས། རང་མི་འཁྲུགས་པར་གསལ་བའི་སྐུ་ལུས་ལ། མདུན་བསྐྱེད་ཀྱི་ལྷ་ཐམས་ཅད་ཀྱི་ཐུགས་ཀ་ནས། དེ་བཞིན་གཤེགས་པ་ཐམས་ཅད་ཀྱི་ཐུགས་ཡེ་ཤེས་ལྔའི་རང་བཞིན་ཧཱུཾ་གི་རྣམ་པར་བྱོན་ནས་ལུས་ལ་ཆར་བབ་པ་བཞིན་ཞུགས་ནས། སྙིང་གར་ཟླ་བའི་དཀྱིལ་འཁོར་གྱི་སྟེང་དུ། ཡེ་ཤེས་སེམས་དཔའ་ཧཱུཾ་གི་རྣམ་པར་ཞུགས་པར་བསམ་ལ། དེ་བཞིན་དུ་ཨ་ཡིག་དམར་པོ་དཔག་ཏུ་མེད་པ་བྱུང་སྟེ། བ་སྤུའི་བུ་ག་ནས་སིབ་སིབ་ཐིམ་པས། སེམས་རྒྱུད་ཡེ་ཤེས་ལྔའི་ངོ་བོར་བྱིན་གྱིས་རླབས་པར་མོས་ལ། རྡོ་རྗེ་དང་དྲིལ་བུ་གཉིས་ཀ་ལག་པ་གཡས་ཀྱིས་མགོ་བོའི་སྟེང་དུ་དཀྲོལ་ཞིང༌། གཟུངས་སྔགས་ཀྱི་མཐར། ཨོཾ་བཛྲ་ཨ་བེ་ཤ་ཡ་ཨ་ཨ་ཨ། ཞེས་བརྗོད། སྤྱི་བོར་རྡོ་རྗེ་བཞག་སྟེ། ཏིཥྛ་བཛྲ། ཞེས་བརྗོད་ཅིང་བརྟན་པར་མོས་ལ། ཨོཾ་པྲ་ཏཱིཙྪ་བཛྲ་ཧོ། ཞེས་པས་དཀྱིལ་འཁོར་ལ་མེ་ཏོག་ཕུལ་ནས། ཨོཾ་པྲ་ཏི་གྲྀཧྞ་སྟྭཾ། ཨི་མཾ་སཏྭ་མཧཱ་བ་
ལ། རྡོ་རྗེ་སེམས་དཔའ་དེང་ཁྱོད་ཀྱི། །མིག་འབྱེད་པར་ནི་བརྩོན་པར་མཛད། །ཕྱེ་བས་ཐམས་ཅད་མཐོང་གྱུར་བས། །རྡོ་རྗེའི་མིག་ནི་བླ་ན་མེད། ཛྙཱ་ན་ཙཀྵུ་ཧཱུཾ་ཨ། དཀྱིལ་འཁོར་ལ་ལྟ་བར་བསྐུལ་བའོ། །འཇུག་པའི་ཆོ་གའོ། །གཉིས་པ་ལ་དབང་བསྐུར་བ་དངོས་དང༌། མཐའ་རྟེན་སྦྱིན་པ་གཉིས་ལས། དངོས་གཞི་དོན་དུ་མཎྜལ་ཕུལ་ལ། བྱང་ཆུབ་རྡོ་རྗེ་སངས་རྒྱས་ལ། །མཆོད་ཆེན་ཇི་ལྟར་སྩལ་བ་ལྟར། །བདག་ཀྱང་བསྐྱབ་པའི་དོན་གྱི་ཕྱིར། །ནམ་མཁའི་རྡོ་རྗེ་དེང་བདག་སྩོལ། ཞེས་ལན་གསུམ་གྱིས་གསོལ་བ་བཏབ་ལ། རང་ཉིད་དབང་སྟེགས་ཀྱི་དབུས་ན་རྡོ་རྗེ་མི་འཁྲུགས་པར་གསལ་བའི་སྟེང་དུ་གདུགས་དཀར་པོ་གཡས་སུ་རྒྱལ་མཚན། གཡོན་དུ་བ་དན། ཕྱོགས་ཀུན་ཏུ་རྔ་བོ་ཆེ་དང༌། དུང་ལ་སོགས་པ་མཆོད་པའི་སྤྲིན་ཕུང་བསམ་གྱིས་མི་ཁྱབ་པས་བསྐོར་བ། རང་གི་སྙིང་ག་ནས་འོད་ཟེར་འཕྲོས་པས། དབང་གི་ལྷ་དེ་བཞིན་གཤེགས་པ་རིགས་ལྔ་འཁོར་དང་བཅས་པ་མདུན་གྱི་ནམ་མཁར། ཨོཾ་བཛྲ་ས་མཱ་ཛཿ དེ་བཞིན་གཤེགས་པ་ཁྱེད་རྣམས་ཀྱིས་བདག་ལ་མངོན་པར་དབང་བསྐུར་བ་སྩལ་ཏུ་གསོལ། ཞེས་གསོལ་བ་བཏབ་པས། དབང་ལྷ་རྣམས་ཀྱི་ཐུགས་ཀ་ནས། སངས་རྒྱས་སྤྱན། མཱ་མ་ཀཱི །གོས་དཀར་མོ། སྒྲོལ་མ་སྟེ་རིགས་ཀྱི་ཡུམ་བཞིའི་ཕྱག་ན་བུམ་པ་དག་བྱེད་བདུད་རྩིའི་ཆུས་གཏམས་པ་བསྣམས་ནས་དབང་བསྐུར་བའི་ལས་མཛད། ཇི་ལྟར་བལྟམས་པ་ཙམ་གྱིས་ནི། ལྷ་རྣམས་ཀྱིས་ནི་ཁྲུས་གསོལ་ལྟར། ལྷ་ཡི་ཆུ་ནི་དག་པ་ཡིས། དེ་བཞིན་བདག་གིས་སྐུ་ཁྲུས་གསོལ།
ཀཱཾ་ཀ་ནིའི་མཇུག་ཏུ། ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏ་ས་མ་ཡ་ཤྲི་ཡེ་ཧཱུཾ། ཞེས་བརྗོད་ཅིང༌། བུམ་པའི་ཆུས་སྤྱི་བོ་ནས་དབང་བསྐུར་བས། ཚེ་འཁོར་བ་ཐོག་མ་མེད་པ་ནས་བསགས་པའི་ལས་ངན་སྡིག་སྒྲིབ་དག་པར་བསམ་པ་ནི་ཆུའི་དབང་ངོ༌། །དེ་ནས་རྡོ་རྗེ་རྩེ་ལྔ་པའི་ཕྱག་རྒྱ་སྤྱི་བོར་བཞག་ལ། ཨོཾ་སརྦ་ཏ་ཐཱ་ག་ཏ་བཛྲ་ཨུད་བྷ་ཝེ་སྭཱཧཱ། ཞེས་བརྗོད་ཅིང༌། ཕྱག་རྒྱ་སྤྱི་བོར་བཞག་པའི་རྐྱེན་གྱིས་མི་བསྐྱོད་པ་གཙོ་བོར་གྱུར་པའི་རིགས་ལྔས་དབུ་བརྒྱན་པར་བསམ་པ་ནི་ཅོད་པན་གྱི་དབང་ངོ༌། །དེ་ལྟར་རང་ཉིད་བྱ་བའི་རྒྱུད་ཀྱི་རྡོ་རྗེ་སློབ་དཔོན་ཆེན་པོར་གྱུར་པ་ལ། མཆོད་པ་རྣམ་པ་ལྔས་མཆོད་ནས། བྱ་བའི་རྒྱུད་ཀྱི་དཀྱིལ་འཁོར་ཆེན་པོར་ཞུགས། ཆུ་དང་ཅོད་པན་གྱི་དབང་བསྐུར་བ་ཐོབ། ཉོན་སྒྲིབ་དང་ཤེས་སྒྲིབ་དག །ཆོས་ཅན་དང་ཆོས་ཉིད་གནས་གྱུར། གཟུགས་ཀྱི་སྐུ་དང་ཆོས་ཀྱི་སྐུ་མངོན་དུ་བྱེད་པའི་སྐལ་བ་ཅན་དུ་བྱས་སོ། །ཞེས་དབང་གི་རྟོགས་བསྐྱེད་དྲན་པར་བྱ་སྟེ། དངོས་གཞིའོ། གཉིས་པ་མཐའ་རྟེན་སྦྱིན་པ་ལ། ཁྲུས་བྱབ་བསྲུང་བ་གསུམ་གྱི་དང་པོ་ནི། འདི་ནི་ཁྲུས་མཆོག་དཔལ་དང་ལྡན། །ཐུགས་རྗེའི་ཆུ་ནི་བླ་ན་མེད། །བྱིན་རླབས་ཡེ་ཤེས་ཆུ་ཡིན་ཏེ། །ཅི་འདོད་དངོས་གྲུབ་སྩལ་ཏུ་གསོལ། ཨོཾ་མངྒ་ལཾ་ཤྲཱི་བཏྶ་བཱ་ན་སརྦ་པཱ་པཾ་ཤིནྟཾ་ཀུ་རུ་ཡེ་སྭཱཧཱ། དེ་བཞིན་གཤེགས་པ་རྣམས་དང་དེ་སྲས་ལ། །རིན་ཆེན་བུམ་པ་མང་པོ་སྤོས་ཀྱི་ཆུ། །ཡིད་འོང་ལེགས་པར་བཀང་བས་གླུ་དང་ནི། །རོལ་མོར་བཅས་པ་དུ་མས་སྐུ་ཁྲུས་གསོལ། ཨོཾ་མངྒ་ལཾ་པདྨ་ནས་ཤིནྟཾ་ཀུ་རུ་ཡེ་སྭཱཧཱ། འདི་ནི་སྦྱིན་པའི་རང་བཞིན་
ཆུ། །སེར་སྣའི་དྲི་མ་སྦྱོང་མཛད་པ། །གཏོང་བ་དྲི་ཡིས་ལེགས་བསྒོས་ཆུ། །ཁྲུས་ལེགས་མཛད་ཀྱིས་ཁྲུས་བྱའོ། །ཨོཾ་མངྒ་ལཾ་ཚ་ཏྲཾ་ནས།ཤིནྟཾ་ཀུ་རུ་ཡེ་སྭཱཧཱ། དེ་ནས་ཚིག་རྐང་དང་པོའི་སྦྱིན་པའི་གནས་སུ་ཚུལ་ཁྲིམས་དང་སེར་སྣའི་གནས་སུ་ཁྲིམས་འཆལ་དང༌། གཏོང་བའི་གནས་སུ་ཚུལ་ཁྲིམས་སྦྱར་ལ། ཨོཾ་མངྒ་ལཾ་ཤཾ་ཁ་ནས། ཀུ་རུ་ཡེ་སྭཱཧཱ། དེ་བཞིན་དུ། བཟོད་པ་དང་ཁོང་ཁྲཽ། ཨོཾ་མངྒ་ལཾ་ཙཀྲ་ནས། ཀུ་རུ་ཡེ་སྭཱཧཱ། བརྩོན་འགྲུས་དང་ལེ་ལོ། ཨོཾ་མངྒ་ལཾ་དྷ་ཛ་ནས་ཀུ་རུ་ཡེ་སྭཱཧཱ། བསམ་གཏན་དང་རྣམ་གཡེང༌། ཨོཾ་མངྒ་ལཾ་ཀ་ལ་ཤ་ནས། ཀུ་རུ་ཡེ་སྭཱཧཱ། ཤེས་རབ་དང་ཤེས་འཆལ། ཨོཾ་མངྒ་ལཾ་མཏྶ་སརྦ་ནས། ཀུ་རུ་ཡེ་སྭཱཧཱ་ཞེས་བརྗོད་ཅིང༌། བུམ་ཆུ་ཅུང་ཟད་བཏུང་བ་དང༌། གདོང་པ་ལ་བྱུག་པའི་ཚུལ་བྱས་ནས་གཟུངས་ཚར་གཅིག་བརྗོད་པའི་རྗེས་སུ། སརྦ་པཱ་པཾ་ཤིནྟཾ་ཀུ་རུ་ཡེ་སྭཱཧཱ། སརྦ་བིགྷྣ་ན༴སརྦ་ཛྭ་རེ་བྷྱ་ར༴ སརྦ་ཨུ་པ་དྲ་བེ་ཤིནྟཾ་ཀུ་རུ་ཡེ་སྭཱཧཱ། སརྦ་གྲ་ཧེ་ཤིནྟཾ༴ སརྦ་ཀཱ་ལ་མྲྀ་དྱ༴ སརྦ་དུར་སྭ་བ་ནི་དུར་ནི་མི་ཏྟི༴ སརྦ་ཙི་ཏ་བྷྱཿཀུ་ལེ་ཤིནྟཾ་ཀུ་རུ་ཡེ་སྭཱཧཱ། དེ་ནས་ལག་པ་གཡས་ཀྱིས་རྨ་བྱའི་མཇུག་སྒྲོས་བྱབ་པའི་ཚུལ་དུ་བྱ་ཞིང༌། གཟུངས་ཀྱི་མཐར། སརྦ་པཱ་པཾ་ཨ་པ་ན་ཡེ་སྭཱཧཱ། དེ་བཞིན་དུ་སྦྱར་ཏེ། སརྦ་བིགྷྣན་སོགས་གོང་དུ་བརྗོད་པ་རྣམས་ཀྱི་མཐར། ཨ་པ་ནི་ཡེ་སྭཱཧཱ། ཞེས་བརྗོད་ཅིང༌། དེ་ནས་བགེགས་སླར་མི་འཇུག་པར་བྱ་བའི་ཕྱིར། གཟུངས་ཀྱི་མཐར། སརྦ་བིགྷྣན་བྷྱ་རཀྵ་རཀྵ། ཞེས་བརྗོད་ཅིང་སྤྱི་བོ་ལ་སོགས་པའི་གནས་རྣམས་སུ་རྡོ་རྗེ་བཞག་ལ་བསྲུང་བ་བྱའོ། །དེ་ནས་སྤྱི་བོར་མེ་ཏོག་ཅུང་ཟད་ཅིག་གཞག་
ལ། རྡོ་རྗེ་དྲིལ་བུ་གསིལ་ཞིང༌། སྟོན་མཆོག་དམ་པ་སོགས་ཤོ་ལོ་ཀ་གསུམ་གྱི་མཐར། ཉིན་མོ་བདེ་ལེགས་མཚན་བདེ་ལེགས། །ཉི་མའི་གུང་ལ་བདེ་ལེགས་ཤིང༌། །ཉིན་མཚན་རྟག་ཏུ་བདེ་ལེགས་པ། །སྐྱབས་མཆོག་གསུམ་གྱིས་བདེ་ལེགས་སྩོལ། །ཨོཾ་སུ་པྲ་ཏིཥྛ་བཛྲ་ཡེ་སྭཱཧཱ། གཙོ་བོས་ཇི་ལྟར་བཀའ་སྩལ་པ། །དེ་དག་ཐམས་ཅད་བདག་གིས་བགྱི། །ཞེས་ལན་གསུམ་བརྗོད། དབང་ཐོབ་པའི་བཀའ་དྲིན་གཏང་རགས་ཏུ་མཎྜལ་ཕུལ། དེང་ནས་བརྩམས་ཏེ་བདག་བྲན་དུ། ཁྱེད་ལ་བདག་ནི་འབུལ་ལགས་ན། ཁྱོད་ཀྱི་སློབ་མར་བཟུང་བ་དང༌། །ཆ་ཤས་ཀྱིས་ཀྱང་སྤྱད་དུ་གསོལ། །ཞེས་ལན་གསུམ་བརྗོད་དེ། བདག་ཉིད་འཇུག་ཅིང་དབང་བླང་བའོ། །ལྔ་པ་གནས་སྐབས་འགའ་ཞིག་ཏུ་ཚེ་འདས་རྗེས་སུ་འཛིན་ན། སྔར་སྦྱོར་བའི་སྐབས་སུ་དཀྱིལ་འཁོར་གྱི་ལྷོ་ཕྱོགས་སུ་སྦྱོང་སྟེགས་ཁྲུ་གང་བའི་པདྨ་དཀར་པོ་འདབ་མ་བརྒྱད་པའི་དབུས་སུ། འཁོར་ལོ་དཀར་པོ་རྩིབས་བརྒྱད་པ་བྲི། དེའི་སྟེང་དུ་རུས་པའམ། མིང་བྱང་བཞག །སྦྱང་བའི་ཡོ་བྱད་དང༌། བྱེ་མའམ་ཡུངས་ཀར་ལ་སོགས་གཤིན་དོན་ལ་དགོས་པའི་ཡོ་བྱད་ལ་སོགས་པ་ཐམས་ཅད་བཤམ་མོ། །དེ་ནས་བདག་འཇུག་ཡན་རྫོགས་པར་བྱ། བཟླས་པའི་སྐབས་རྣམས་སུ་བྱེ་མའམ་ཡུངས་ཀར་ལ་སྔགས་ཀྱིས་བྲབས་ལ་བཞག་གོ །དེ་ནས་མིང་བྱང་ལ་སོགས་པའི་རྟེན་དེ། ཨ་མྲྀ་ཏས་བསངས། སྭཱ་བྷཱ་ཝས་སྦྱངས། སྟོང་པའི་ངང་ལས་སྦྱོང་སྟེགས་ཀྱི་སྟེང་དུ། ཚེ་འདས་ཀྱི་མིང་གི་ཡི་གེ་དང་པོའམ། ཎི་ལས་ཚེ་ལས་འདས་པ་ཆེ་གེ་མོ་ཞེས་བྱ་བའི་ཕུང་པོ་
དང༌། ཁམས་དང༌། སྐྱེ་མཆེད་ཐམས་ཅད་ཡོངས་སུ་རྫོགས་པ་གསོན་པོའི་རྣམ་པ་ཇི་ལྟ་བ་བཞིན་དུ་གྱུར་པར་བལྟས་ལ། རང་གི་སྙིང་གའི་ཧཱུཾ་དང་ཚེ་འདས་ཀྱི་སྙིང་གའི་ཎི་ལས་འོད་འཕྲོས་པས། ཚེ་འདས་ཀྱི་རྣམ་ཤེས་ཁམས་གསུམ་གང་ན་གནས་པ་ནས་བཀུག་པར་བསམ། ཁམས་གསུམ་རྣམ་རྒྱལ་གྱི་ཕྱག་རྒྱ་བཅས་ལ། ངག་ཏུ། རྗེ་བཙུན་རྩ་བ་དང་བརྒྱུད་པར་བཅས་པའི་དཔལ་ལྡན་བླ་མ་དམ་པ་རྣམས་ཀྱི་བཀའ་བདེན་པ་དང༌། སངས་རྒྱས་ཀྱི་བདེན་པ་དང༌། ཆོས་ཀྱི་བདེན་པ་དང༌། དགེ་འདུན་གྱི་བདེན་པ་དང༌། གསང་སྔགས་དང་རིག་སྔགས་ཀྱི་རྒྱལ་པོ་ཁྲོ་བོ་རྣམས་ཀྱི༴ བཅོམ་ལྡན་འདས་ངན་སོང་ཐམས་ཅད་ཡོངས་སུ་སྦྱོང་བ་ཐུགས་རྗེའི་བདག་པོ་མི་འཁྲུགས་པ་འཁོར་དང་བཅས་པའི་བདེན་པ་དང༌། བདེན་པ་ཆེན་པོའི་བྱིན་གྱྀས་བརླབས་ཀྱིས་ཚེ་ལས་འདས་པ་ཆེ་གེ་མོ་ཞེས་བྱ་བ། ཁམས་གསུམ་སྐྱེ་གནས་བཞི། །རིགས་དྲུག་གང་ན་གནས་ཀྱང་འདིར་མཆིས་པར་གྱུར་ཅིག །ཨོཾ་ཊཀྐི་ཧཱུཾ་ཛཿ ཞེས་པ་གསུམ་དང༌། བདག་དང་མདུན་བསྐྱེད་ཀྱི་བཅོམ་ལྡན་འདས་འཁོར་དང་བཅས་པའི་ཐུགས་ཀ་ནས་འོད་ཟེར་དཔག་ཏུ་མེད་པ་འཕྲོས། ཚེ་འདས་ལ་ཐིམ་པས་ཚེ་འཁོར་བ་ཐོག་མ་མེད་པ་ནས་བསགས་པའི་སྡིག་པ་དང༌། སྒྲིབ་པ་ཐམས་ཅད་བྱང་ཞིང་དག་ནས་རྣམ་པར་ཤེས་པ་ཨ་དཀར་པོ་དྲི་མ་མེད་པར་བསམ་མོ། །དེ་ནས་བགེགས་སྦྱང་བའི་ཕྱིར། གཏོར་མ་རྟེན་ལ་བསྐོར་ཞིང༌། ཨོཾ་སརྦ་བིགྷྣཱན་ན་མཿསརྦ་ཏ་ཐཱ་ག་བྷྱོ། བི་ཤྭ་མུ་ཁེ་བྷྱཿ སརྦ་ཐཱ་ཁཾ་ཨུད་ག་ཏེ་སྥ་ར་ཎཾ་ཨི་མཾ་ག་ག་ན་ཁཾ་གྲྀཧྣེ་
དཾ་བ་ལིཾ་ཏ་ཡེ་སྭཱཧཱ། ཞེས་ལན་གསུམ་གྱིས་ཞི་བས་སྦྱངས། སུམྦྷ་བརྗོད། རྡོ་རྗེ་གསོར་ཞིང༌། ཏིང་ལོ་དང་ཆང་བུ་རྟེན་ལ་བསྐོར་བ་གསུམ་གྱིས་ཞི་དྲག་ཕྱེད་ནས་སྦྱངས་ནས། ཚེ་ལས་འདས་པ་ཆེ་གེ་མོ་ལ་གསོན་གྱི་དུས་ན་ཚེ་གནས་པ་ལ་བར་དུ་གཅོད་ཅིང༌། གཤིན་གྱི་དུས་ན་སྡིག་པ་སྦྱོང་བ་ལ་བར་ཆད་བྱེད་པའི་གདོན་བགེགས་ལོག་པར་འདྲེན་པ་ཐམས་ཅད་གཏོར་མ་འདི་ལམ་རྔན། ཏིང་ལོ་ལམ་སྒྲོན། ཆང་བུ་ལམ་རྒྱགས་ཀྱི་ཚུལ་དུ་ཁྱེར་ལ་སའི་ཕྱོགས་འདིར་མ་གནས་པར་གཞན་དུ་སོང་ཤིག །ཅེས་བརྗོད་ཅིང་རྡོ་རྗེ་དྲིལ་བུ་འཛིན་པས། ཧཱུཾ་ཡེ་ཤེས་བསྐལ་པ་མེ་ལྟར་འབར་བའི་འོད། །མ་རིག་འདོད་པའི་མུན་ཁམས་ཐམས་ཅད་སྲེག །ཞེ་སྡང་གཤིན་རྗེའི་འཇིགས་པ་ཐམས་ཅད་འཇོམས། །དཔའ་བོ་ཆེན་པོ་དཔའ་མཚན་སྟག་ལྤགས་ཅན། །ལོག་འདྲེན་སྲིན་པོའི་མཐའ་གནོན་དགྲ་འདུལ་བ། །རིག་པའི་རྒྱལ་པོ་ཁྲོ་བོ་བཞུགས་སོ་འཚལ། །ལོག་འདྲེན་འདུལ་བའི་སླད་དུ་སྤྱན་འདྲེན་ན། །འགྲོ་བའི་དོན་དུ་མཆོད་ཀྱི་གཤེགས་སུ་གསོལ། །ཨོཾ་བཛྲ་ཀྲོ་དྷ་རཱ་ཛ་ས་པཱ་རི་ཝཱ་ར་ཨེ་ཧྱེ་ཧིས་སྤྱན་དྲངས། ཨོཾ་པདྨ་ཀ་མ་ལ་ཡ་སྟྭཾ་གྱིས་གདན་ཕུལ། ཨོཾ་ཨརྒྷཾ། པུཥྤེ། དྷུཔེ། ཨཱ་ལོ་ཀེ །གནྡྷེ། ནཻཝིདྱ། ཤཔྟ་ཧཱུཾ་གིས་མཆོད། ཧཱུཾ་ཆོས་ཉིད་སྟོང་པ་གཉིས་མེད་ངང་ཉིད་ལས། །འཇིག་རྟེན་སྤྱོད་པའི་ཚུལ་ཡང་མི་སྤོང་ཞིང༌། །ཐབས་ལ་མཁས་པས་འཇིག་བྱེད་སྐུར་སྟོན་པ། ཁྲོ་ཆེན་འབར་བའི་ཚོགས་ལ་ཕྱག་འཚལ་བསྟོད། །ཡེ་ཤེས་ཞི་བའི་ངང་ལས་མ་གཡོས་ཀྱང༌། །
སྐུ་ཡི་ཆ་ལུགས་ཟ་བྱེད་རྔམ་སྟབས་ཅན། །གསུང་གི་ང་རོ་འབྲུག་སྟོང་ལྡིར་བའི་སྒྲས། །མ་ལུས་དབང་དུ་སྡུད་ལ་ཕྱག་འཚལ་བསྟོད། །ལྷག་པའི་ཡེ་ཤེས་རོལ་པ་སྟོན་མཛད་ཅིང༌། །སྡིག་པའི་མཚོན་ཆ་སྣ་ཚོགས་ཕྱག་ན་བསྣམས། །ཉོན་མོངས་དུག་ཅན་རྩད་ནས་འཇོམས་མཛད་པ། །སྦྲུལ་གདུག་རྒྱན་གྱིས་བརྒྱན་ལ་ཕྱག་འཚལ་ལོ། །བསྐལ་བ་མེ་ལྟར་འབར་བའི་ཀློང་དཀྱིལ་ནས། །དཔའ་བོའི་སྟངས་སྟབས་བརྐྱང་བསྐུམ་ཚུལ་དུ་བཞུགས། །ཉི་ཟླ་འབར་བའི་སྤྱན་གྱི་སྡང་མིག་གིས། །བགེགས་དཔུང་སྲེག་པར་མཛད་ལ་ཕྱག་འཚལ་བསྟོད། །གཏུམ་ཆེན་དུས་མཐའི་མེ་ལྟར་གཟི་བརྗིད་འབར། །གློག་སྟོང་འགྱུ་འདྲའི་ཁྲོ་གཉེར་མཆེ་བ་གཙིགས། །རྔམ་པའི་ང་རོ་འབྲུག་སྒྲ་སྟོང་བཞིན་སྒྲོགས། ཁྲོ་རྒྱལ་བགེགས་ཚོགས་འདུལ་ལ་ཕྱག་འཚལ་བསྟོད། །འཇིགས་པའི་ཧཱུཾ་སྒྲ་ངེས་སྒྲོགས་ཤིང༌། །བགེགས་རྣམས་མ་ལུས་འཇོམས་མཛད་པ། །དངོས་གྲུབ་མ་ལུས་སྩོལ་བའི་ལྷ། །བགེགས་ཀྱི་དགྲ་ལ་ཕྱག་འཚལ་བསྟོད། །རྗེ་བཙུན་རྩ་བ་དང་བརྒྱུད་པར་བཅས་པའི་དཔལ་ལྡན་བླ་མ་དམ་པ་རྣམས་ཀྱི་བཀའ་བདེན་པ་དང༌། ཞེས་པ་ནས། བདེན་པ་ཆེན་པོའི་བྱིན་གྱིས་རླབས་ཀྱིས། ཚེ་ལས་འདས་པ་ཆེ་གེ་མོ་ལ། གནོད་ཅིང་འཚེ་བར་བྱེད་པའི་བགེགས་ཀྱི་རིགས་གང་ཡིན་པ་དེ་དག་ལ་རྒྱུད་སྡེ་དང་མཐུན་པའི་སྦྱང་བ་རྣམ་པར་དག་པ་བྱས་ཟིན་པས་དེས་ཚིམ་པར་གྱིས་ལ་སའི་ཕྱོགས་འདིར་མ་གནས་པར་གཞན་དུ་སོང་ཤིག །གང་དག་མི་འགྲོ་བ་དེ་དག་དེ་བཞིན་
གཤེགས་པ་ཐམས་ཅད་ཀྱི་ཐུགས་གཉིས་སུ་མེད་པའི་ཡེ་ཤེས་ལས་བྱུང་བའི་རྡོ་རྗེ་འབར་ཞིང་ཆེར་འབར་བ་འདིས། ཁྱེད་རྣམས་ཀྱི་མགོ་བོ་ཚལ་པ་བརྒྱར་དགས་པར་བགྱིའོ། །ཞེས་དང༌། རྟེན་ལ་གུ་གུལ་གྱིས་བདུག །ཡུངས་ཀར་གྱིས་བྲབ། རོལ་མོ་རྟག་ཏུ་བྱ། སུམྦྷ་ནི་ལ་སོགས་པའི་དྲག་སྔགས་མང་དུ་བརྗོད་པས། བགེགས་དང་བྲལ་བར་བསམ་མོ། །དེ་ནས། ཚེ་འདས་ཀྱི་སྡིག་པ་ཐམས་ཅད་ཀཾ་ནག་པོའི་རྣམ་པས་སྣ་བུག་ནས་ཐོན། སྡིག་པ་རྭ་ཅན་གྱི་རྣམ་པས་ཏིལ་ལ་ཐིམ། དེའི་གཡས་སུ་མེ་དང༌། གཡོན་དུ་ཆུར་དོར་བས་སྡིག་སྒྲིབ་ཐམས་ཅད་སྲེགས་ཤིང་སྦྱངས་པ་བསམས་ལ། ཨོཾ་སརྦ་པཱ་པཾ་ད་ཧ་ན་བཛྲ་ཡེ་སྭཱཧཱ། ཞེས་བརྗོད་པས་མེར་བསྲེག་ཅིང་ཆུར་དོར་རོ། །དེ་ནས་བྱེ་མའམ་ཡུངས་ཀར་ལ་ཀཱཾ་ཀ་ནི་ལ་སོགས་པ་ལྷ་ཐམས་ཅད་ཀྱི་སྔགས་མང་དུ་བཟླས། དེའི་ནུས་པ་ཐམས་ཅད་བསྟིམ་ལ། རུས་པའམ་མིང་བྱང་མདུན་དུ་བཞག་པ་ལ་བྲབ་སྟེ། ཀཱཾ་ཀ་ནིའི་འཇུག་ཏུ་སརྦ་ན་ར་ཀ་ག་ཏེ་ཧེ་ཏུ་ན་ཧཱུ་ཕཊ། ཚེ་ལས་འདས་པས་གཙོ་བྱས་པའི་སེམས་ཅན་ཐམས་ཅད་ཀྱི་དམྱལ་བར་སྐྱེ་བའི་རྒྱུ་ལས་ངན་སྡིག་སྒྲིབ་ཐམས་ཅད་རྩ་བ་ནས་བྱང་ཞིང་དག་པར་གྱུར་ཅིག །དེ་བཞིན་དུ་ཀཱཾ་ཀ་ནི་དང༌། སརྦ་པྲ་ཏེ་ག་ག་ཏེ་ཧེ་ཏུ་ན་ཧཱུཾ་ཕཊ། ཡི་དྭགས་སུ་སྐྱེ་བོའི་རྒྱུ༴ དེ་བཞིན་དུ་ཏིརྻ་ཀ་ག་ཏེ་ཧེ་ཏུ་ན་ཧཱུཾ་ཕཊ། དུད་འགྲོར་སྐྱེ་བའ༴ སོགས་གོང་བཞིན་སྦྱར་ཞིང༌། དེ་ནས་ཁྲུས་བྱ་སྟེ། རྣམ་རྒྱལ་བུམ་པ་ཐོགས་ལ། ཐོག་མར་དཀྱིལ་འཁོར་མེ་ལོང་བསྟན་ཏེ། ཇི་ལྟ་བལྟམས་པ་སོགས་དང༌། །འདི་ནི་ཁྲུས་མཆོག་དཔལ་དང་ལྡན། །
ཐུགས་རྗེའི་ཆུ་ནི་བླ་ན་མེད། །བྱིན་རླབས་ཡེ་ཤེས་ཆུ་ཡིན་ཏེ། །ཅི་འདོད་དངོས་གྲུབ་སྩོལ་བར་མཛོད། །ཨོཾ་སརྦ་ཏ་ཐཱ་ག་ཏ་སོགས་དང༌། དེ་བཞིན་གཤེགས་པ་རྣམས་དང་དེ་སྲས་ལ། །རིན་ཆེན་བུམ་པ་མང་པོ་སྤོས་ཀྱི་ཆུ། །ཡིད་འོང་ལེགས་པར་བཀང་བའི་གླུ་དང་ནི། །རོལ་མོར་བཅས་པ་དུ་མས་སྐུ་ཁྲུས་གསོལ། །ཨོཾ་སརྦ་ཏ་ཐཱ་ག་ཏ། སོགས་ཀྱིས་ཁྲུས་གསོལ། དེ་དག་སྐུ་ལ་མཚུངས་པ་མེད་པའི་གོས། །གཙང་ལ་དྲི་རབ་བགོས་པས་སྐུ་ཕྱིའོ། །ཨོཾ་ཧཱུཾ་ཏྲཾ་ཧྲཱི་ཨཿཀཱ་ཡ་བི་ཤོ་དྷ་ནི་སྭཱཧཱ། ཞེས་པས་སྐུ་ཕྱིའོ། །དེ་ནས་ཁྲུས་བྱས་པའི་ཆུ་དེ་སླར་ཡང་བུམ་པའི་ནང་དུ་བླུག་ལ་དེ་ནས་བུམ་ཆུས་ནུབ་གོང་མ་རྣམས་ལ་མེ་ལོང་ལ་གཟུགས་བརྙན་ཤར་བ་ལ་བཀྲུ། ཐ་མ་ལ་རྟེན་དངོས་སུ་བཀྲུ་ཞིང༌། འདི་ནི་སྦྱིན་པའི་རང་བཞིན་ཆུ། །སེར་སྣའི་དྲི་མ་སྦྱོང་མཛད་པ། །གཏོང་བ་དྲི་ཡིས་ལེགས་བསྒོས་ཆུ། ཁྲུས་ལེགས་མཛད་ཀྱི་ཁྲུས་བྱའོ། །དེ་བཞིན་དུ་ཚིག་རྐང་དང་པོ་དང༌། གསུམ་པའི་གནས་སུ། ཚུལ་ཁྲིམས། བཟོད་པ། བརྩོན་འགྲུས། བསམ་གཏན། ཤེས་རབ་རྣམས་གཞུག རྐང་པ་གཉིས་པའི་སེར་སྣའི་གནས་སུ། ཁྲིམས་འཆལ། ཁོང་ཁྲོའི། ལེ་ལོ། རྣམ་གཡེང༌། ཤེས་འཆལ་རྣམས་བཅུག་ལ། ཚིག་བཞི་པ་ལྔ་པ་དང༌། ཆུ་བོ་དྲུག་གིས་ཁྲུས་བྱས་ནས། །བག་ཆགས་རྣམ་དྲུག་སྦྱངས་ནས་ནི། །གང་ལ་ཉེས་པ་མི་མངའ་ཞིང༌། ཁྲུས་ལེགས་མཛད་ལ་ཕྱག་འཚལ་ལོ། །དྲི་ཆུ་དྲུག་གིས་ཁྲུས་བྱས་པས། །བག་ཆགས་རྣམ་དྲུག་སྦྱངས་ནས་ནི། །
རྒྱ་ཆེན་ཡོན་ཏན་དྲུག་ལྡན་པ། ཁྲུས་ལེགས་མཛད་ལ་ཉེས་མི་མངའ། །དྲི་མ་རྣམས་དྲུག་དག་པ་ཡིས། །ཡོན་ཏན་ཐམས་ཅད་ལྡན་པ་དང༌། །སངས་རྒྱས་ཐམས་ཅད་མཆོད་དོན་དུ། །དད་པས་བདག་གིས་ཁྲུས་བགྱིའོ། །ཞེས་པའི་ཚིག་བཞི་པ་དང༌། ཀཱཾ་ཀ་ནི། རེ་སྤེལ་ཞིང་བཀྲུས་ནས། མཐར།ཚེ་ལས་འདས་པ་ཆེ་གེ་མོས། གཙོ་བྱས་པའི་སེམས་ཅན་ཐམས་ཅད་ཀྱི་ཕ་རོལ་དུ་ཕྱིན་པ་དྲུག་གི་མི་མཐུན་པའི་ཕྱོགས་དག་ནས། ཕ་རོལ་དུ་ཕྱིན་པའི་ཡོན་ཏན་ཕུན་སུམ་ཚོགས་པ་དང་ལྡན་པར་གྱུར་ཅིག །འདོད་ཆགས་ཞེ་སྡང་གཏི་མུག་གསུམ། །འདི་དག་འཇིག་རྟེན་དུག་གསུམ་སྟེ། །སངས་རྒྱས་བཅོམ་ལྡན་དུག་མི་མངའ། །སངས་རྒྱས་བདེན་པའི་དུག་བཅོམ་མོ། །ཚིག་རྐང་གསུམ་པ་དང་བཞི་པར། བཅོམ་ལྡན་དམ་ཆོས༴ དམ་ཆོས་བདེན་པས༴ འཕགས་པའི་དགེ་འདུན༴ དགེ་འདུན་བདེན༴ ཞེས་སོགས་སྦྱར་བའི་ཚིག་བཞི་པ་གཉིས་བརྗོད་ཅིང༌། དཀོན་མཆོག་གསུམ་གྱི་བདེན་པའི་བྱིན་རླབས་ཀྱིས་ཚེ་ལས་འདས་པ་ཆེ་གེ་མོའི་ཉོན་མོངས་པ་དུག་གསུམ་གྱི་སྒྲིབ་པ་ཐམས་ཅད་བཅོམ་ནས་དགེ་བ་གསུམ་དང་ལྡན་པར་གྱུར་ཅིག །ས་ནི་དུག་གི་ཕ་ཡིན་ཏེ། །ས་ནི་དུག་གི་མ་ཡང་ཡིན། །བདེན་པའི་བདེན་ཚིག་འདི་དག་གིས། །དུག་གསུམ་ས་ཡི་ནང་དུ་སོང༌། །ཆུ་མེ་རླུང་
དུ་འདོན་པ་བསྒྱུར་བའི་ཚིག་བཞི་པ་གསུམ་བརྗོད་པའི་རྗེས་སུ། ཚེ་ལས་འདས་པས་གཙོ་བྱས་པའི་སེམས་ཅན་ཐམས་ཅད་ཀྱི་འབྱུང་བ་བཞི་ལ་བརྟེན་ནས་སྐྱེས་པའི་རྣམ་རྟོག་རྒྱུ་དང་བཅས་པ་ཐམས་ཅད་འབྱུང་བ་བཞིའི་ཆོས་ཉིད་ཀྱི་ངང་དུ་ཐིམ་ནས་སྡུག་བསྔལ་རྒྱུ་དང་བཅས་པ་ཐམས་ཅད་དང་བྲལ་བར་གྱུར་ཅིག །ཅེས་བྱ་བ་དང༌། བུམ་པའི་ཆུ་གཏོར། དྲིལ་བུ་གསིལ་ཞིང༌། གང་ལ་སེ་སྣ་རྣམ་ཆགས་པ། །རྣམ་འཇོམས་དྲི་མ་མེད་མཛད་ཅིང༌། །ཐུགས་ཞི་གནོད་པ་མི་མངའ་དེས། ཁྱེད་ལ་བདེ་ལེགས་མཛད་པར་འགྱུར། །འདྲེན་པ་གང་ཞིག་འགྲོ་བ་རྣམས། །ཐར་པའི་ལམ་དུ་འཇུག་མཛད་ཅིང༌། །ཆོས་རྣམས་ཐམས་ཅད་སྟོན་པ་དེ། ཁྱེད་ལ༴ སྟོན་པ་འགྲོ་བ་རྣམས་ཀྱི་རྟེན། སེམས་ཅན་ཀུན་གྱི་དོན་གྱི་ཕྱིར། །གང་ལ་བདེ་བ་མངའ་མཛད་དེས། ཁྱེད་ལ༴ སྐྱོབ་པ་གང་ཞིག་བྱམས་པ་ཡི། །ཐུགས་ཀྱིས་འགྲོ་བ་འདི་དག་ཀུན། །བུ་གཅིག་བཞིན་དུ་རྟག་བསྐྱངས་དེས། ཁྱེད་ལ༴ །གང་ཞིག་འཁོར་བར་འགྲོ་བ་ཡི། །སེམས་ཅན་ཀུན་གྱི་རྟེན་གྱུར་ཅིག །གླིང་དང་དཔུང་གཉེན་གྱུར་པ་དེས། ཁྱེད་ལ༴ །གང་ཞིག་ཆོས་ཀུན་མངོན་སུམ་གྱུར། །གཙང་ཞིང་བཀྲུ་བ་མི་མངའ་ལ། །གསུམ་གཙང་གཙང་མར་མཛད་པ་དེས། ཁྱེད་ལ༴ དཔའ་བོ་ཆེན་པོ་གང་སྐྱེས་པ། །ཕུན་སུམ་ཚོགས་དོན་གང་འབྱོར་ཞིང༌། །དོན་གྲུབ་ཚོགས་ཀྱང་གྲུབ་པ་དེས། ཁྱེད་ལ༴གང་ཞིག་སྐྱེས་པས་ས་རྣམས་ནི། །ནགས་ཚལ་བཅས་པ་རབ་གཡོས་ཤིང༌། །སེམས་
ཅན་ཐམས་ཅད་རབ་དགའ་དེས། ཁྱེད་ལ༴ བྱང་ཆུབ་སྙིང་པོར་གཤེགས་པ་ན། །ས་དག་རྣམ་དྲུག་གཡོས་གྱུར་ཞིང༌། །བདུད་ཡིད་མི་བདེར་གྱུར་པ་དེས། ཁྱེད་ལ༴ ཆོས་ཀྱི་འཁོར་ལོ་བསྐོར་བ་ན། །འཕགས་པའི་བདེན་པ་རྣམས་གསུངས་ཤིང༌། །ཐུབ་པའི་སྙན་པ་གང་བྱུང་དེས། ཁྱེད་ལ༴ ཡིད་འཕྲོག་གང་ཞིག་མུ་སྟེགས་བྱེད། །ཐམས་ཅད་ཆོས་ཀྱིས་ཕམ་མཛད་ཅིང༌། །ཚོགས་རྣམས་དབང་དུ་མཛད་པ་དེས། ཁྱེད་ལ༴ སངས་རྒྱས་ཁྱེད་ལ་བདེ་ལེགས་མཛད། །བརྒྱ་བྱིན་ཚངས་པའི་ལྷ་རྣམས་དང༌། འབྱུང་པོ་ཀུན་གྱི་བདེ་ལེགས་ནི། ཁྱེད་ལ་རྟག་ཏུ་སྦྱིན་གྱུར་ཅིག །སངས་རྒྱས་བསོད་ནམས་མཐུ་དག་དང༌། །ལྷ་རྣམས་ཀུན་གྱི་བསམ་པ་ཡིས། ཁྱེད་ཀྱི་འདོད་དོན་གང་ཡིན་པ། །དོན་དེ་དེ་རིང་འགྲུབ་གྱུར་ཅིག །རྐང་གཉིས་ཁྱེད་ཅག་བདེ་ལེགས་ཤོག །རྐང་བཞི་ཁྱེད་ཅག་བདེ་ལེགས་ཤོག ཁྱེད་ཅག་ལམ་འགྲོ་བདེ་ལེགས་ཤོག །ཕྱིར་འོང་དག་ཀྱང་བདེ་ལེགས་ཤོག །ཉིན་མོ་བདེ་ལེགས་མཚན་བདེ་ལེགས། །ཉི་མའི་གུང་ལ་བདེ་ལེགས་ཤིང༌། ཁྱེད་ཅག་ཀུན་ཏུ་བདེ་ལེགས་གྱུར། ཁྱེད་ཅག་སྡིག་པར་མ་གྱུར་ཅིག །ཚེ་ལས་འདས་པ་ཆེ་གེ་མོས་གཙོ་བྱས་པའི་སྐྱེ་རྒུ་ཐམས་ཅད་མི་མཐུན་པའི་ཕྱོགས་ཐམས་ཅད་ལས་ཤིན་ཏུ་བཀྲ་ཤིས་ཤིང་རྒྱལ་བར་གྱུར་ཅིག །ཅེས་བརྗོད་ལ། དེ་ནས་བུ་ལ་སོགས་པ་ཉེ་དུ་ཡོད་ན་མིང་བྱང་འཛིན་དུ་བཅུག་ཅིང༌། ཕྱག་བྱེད་དུ་གཞུག་ལ། གཙོ་བོ་རྒྱལ་བ་འགྲོ་བའི་
མགོན། །འགྲོ་བ་སྐྱོབ་པའི་དོན་བརྩོན་པ། །སྟོབས་ཆེན་འཇིགས་པ་ཀུན་སེལ་ལ། །ཚེ་འདས་སྐྱབས་སུ་མཆི་ལགས་སོ། །དེ་ཡི་ཐུགས་སུ་ཆུད་པའི་ཆོས། །འཁོར་བའི་འཇིགས་པ་སེལ་བ་དང༌། །བྱང་ཆུབ་སེམས་དཔའི་ཚོགས་ལ་ཡང༌། །དེ་བཞིན་ཚེ་འདས་སྐྱབས་སུ་མཆི། །ཚེ་འདས་འཇིགས་པ་ཆེ་མཐོང་ནས། །ཀུན་ཏུ་བཟང་ལ་ཚེ་འདས་འབུལ། །འཇམ་པའི་དབྱངས་ལ་ཚེ་འདས་ཀྱི། །ལུས་ནི་བདག་གིས་དབུལ་བར་བགྱི། །ཐུགས་རྗེའི་སྤྱོད་པ་མ་འཁྲུལ་བའི། །སྤྱན་རས་གཟིགས་མགོན་དེ་ལ་ཡང༌། །ཉམ་ཐག་ང་རོས་འོ་དོད་འབོད། །སྡིག་ལྡན་འདི་ལ་སྐྱབ་ཏུ་གསོལ། །འཕགས་པ་ནམ་མཁའི་སྙིང་པོ་དང༌། །ས་ཡི་སྙིང་པོ་དག་དང་ནི། །ཐུགས་རྗེའི་བདག་ཉིད་ཐམས་ཅད་ལ། །སྐྱབས་ཚོལ་སྙིང་ནས་འོ་དོད་འབོད། །གང་ཞིག་མཐོང་ན་གཤིན་རྗེ་ཡི། །ཕོ་ཉ་ལ་སོགས་སྡང་བ་རྣམས། །སྐྲག་ནས་ཕྱོགས་བཅུར་འབྱེར་བྱེད་པ། །རྡོ་རྗེ་ཅན་ལ་སྐྱབས་སུ་མཆི། །སྔོན་ཆད་ཁྱོད་ཀྱི་བཀའ་ལས་འདས། །ད་ནི་འཇིགས་པ་ཆེ་མཐོང་ནས། ཁྱེད་ལ་སྐྱབས་སུ་མཆི་ལགས་ཀྱིས། །འཇིགས་པ་མྱུར་དུ་བསལ་དུ་གསོལ། །ཚེ་ལས་འདས་པ་ཆེ་གེ་མོ། །ཞེས་བགྱི་བ་དུས་འདི་ནས་བཟུང་ནས་བྱང་ཆུབ་སྙིང་པོ་ལ་མཆིས་ཀྱི་བར་དུ། བརྒྱུད་ལྡན་བླ་མ་ཐུགས་རྗེས་ཅན། །ལྷ་ཇོ་བོ་དཀོན་མཆོག་རིན་པོ་ཆེ་རྣམ་པ་གསུམ་དང༌། བཅོམ་ལྡན་འདས་ངན་སོང་ཐམས་ཅད་ཡོངས་སུ་སྦྱོང་བ་ཐུགས་རྗེའི་བདག་པོ་མི་འཁྲུགས་པའི་ལྷ་ཚོགས་འཁོར་དང་བཅས་པ། བྱང་ཆུབ་སེམས་དཔའ་ཉེ་བའི་སྲས་བརྒྱད་དང་བཅས་པ་
ཐམས་ཅད་ལ་ཕྱག་འཚལ་ཞིང་སྐྱབས་སུ་མཆིའོ། །སྡིག་པ་ཐམས་ཅད་སྦྱང་དུ་གསོལ། ལམ་བསྟན་དུ་གསོལ། མྱུར་དུ་རྣམ་པ་ཐམས་ཅད་མཁྱེན་པ་སངས་རྒྱས་ཀྱི་གོ་འཕང་ཐོབ་པར་མཛད་དུ་གསོལ། ཞེས་སྙིང་ཐག་པ་ནས་བརྗོད་ཅིང༌། གསོལ་བ་འདེབས་པར་བསམ་མོ། །དེ་ནས་གཤིན་པོ་ལ་དབང་མི་བསྐུར་ན་འོག་གི་བྱང་བུ་བསྲེག་པ་དང་ལམ་སྦྱང་བསྟན་སོགས་རྫོགས་པར་བྱ། དབང་བསྐུར་ན་སྐབས་འདིར་བྱ་དགོས་པས། མཎྜལ་ཕུལ་ནས་རྗེས་ཟློས་བྱེད་པར་བསམ་ཞིང༌། དགའ་ཆེན་ཁྱོད་བདག་སོགས་ནས་དབང་ཐམས་ཅད་རྫོགས་པར་བསྐུར་རོ། །དེ་ལྟར་དབང་བསྐུར་བས་ཚེ་འདས་ལྷའི་རང་བཞིན་དུ་གྱུར་པ་ལ་མཆོད་ཡོན་ལ་སོགས་པ་སྔགས་ཙམ་གྱིས་མཆོད། གཟུང་འཛིན་རྡོ་རྗེ་བརྟན་པའི་ས་ལ་སོགས་པ་ཤོ་ལོ་ཀ་གཅིག་གིས་བསྟོད་ལ། ལམ་སྦྱང་བསྟན་བྱའོ། །ཡུལ་ཁ་ཅིག་ན་ཟས་གཏད་དང༌། གོས་ལྷམ་གཏོད་པ་སོགས་ཀྱི་ལུགས་ཡོད་པ་དེ་ལྟར་བྱེད་དགོས་བྱུང་ན། སྔར་ལྟར་མཆོད་བསྟཽད་བྱས་པའི་རྗེས་ལ། འདོད་ཡོན་སྣ་ཚོགས་པས་ཚེ་འདས་ལྷར་གྱུར་པ་མཆོད་པར་བསམ་ཞིང༌། ཁ་དོག་དབྱིབས་ལེགས་སོགས་འདོད་ཡོན་གྱི་ཚིགས་བཅད་བརྗོད་དོ། །ནུབ་ཐ་མ་ལ་བྱང་བུ་སྲེག་པར་བྱེད་ན། ཆོས་ཐམས་ཅད་སྟོང་པ་ཉིད་དུ་བསམས་ལ་མེ་སྦར་ཏེ། སྟོང་ཉིད་ཡེ་ཤེས་འབར་བའི་མེ། །ཚེ་འདས་སྒྲིབ་པའི་བུད་ཤིང་དང༌། །འཁོར་བའི་སྡུག་བསྔལ་མ་ལུས་པ། །ཡེ་ཤེས་སྣང་བར་འབར་གྱུར་ཅིག །ཅེས་དང༌། ཀཱཾ་ཀ་ནི་བརྗོད་ཅིང་བསྲེག་གོ །དེ་ནས་ལམ་སྦྱང་བསྟན་བྱ་སྟེ། ནུབ་གོང་མ་རྣམས་ལ་མཆོད་པའི་རྗེས་ལ། ནུབ་ཐ་མ་ལ་བྱང་བུ་བསྲེགས་པའི་རྗེས་ལ་བྱ་སྟེ་དྲིལ་བུ་བསིལ།
མེ་ཏོག་དོར། དཀོན་མཆོག་རིན་ཆེན་དཔལ་ཞིང་དུ། །དཀོན་མཆོག་རིན་ཆེན་ལས་བྱུང་བའི། །དཀོན་མཆོག་རིན་ཆེན་འོད་ཟེར་གྱིས། །རིན་ཆེན་འཕྲེང་བ་རྣམ་དག་པ། །ཚོགས་ཀྱི་ལམ་དང་སྦྱོར་བའི་ལམ། །མཐོང་བའི་ལམ་དང་སྒོམ་པའི་ལམ། །བྱང་ཆུབ་བར་ཆད་མེད་པའི་ལམ། །བླ་ན་མེད་པའི་ཁྱད་པར་ལམ། །རྣམ་པར་གྲོལ་བའི་ལམ་དག་ལ། །བརྟེན་ནས་སྡིག་པ་ཀུན་སྦྱངས་ཏེ། །འཕགས་པའི་ལམ་དེར་འགྲོ་བར་ཤོག ཨོཾ་རཏྣེ་རཏྣེ། མཧཱ་རཏྣེ། རཏྣ་སམྦྷ་ཝེ། རཏྣ་ཀི་རཏྣེ། རཏྣ་མཱ་ལ་བི་ཤུདྡྷེ། ཤོ་དྷ་ཡ། སརྦ་པཱ་པཾ་ནཱཾ་ཏྲ་ཐ། ཞེས་དང་རོལ་མོ་བྱ། པདྨ་འདམ་གྱིས་མ་གོས་ལྟར། །སྲིད་གསུམ་དྲི་མས་མ་གོས་པའི། །སྲིད་པའི་པདྨ་ལས་བྱུང་བའི། །མངོན་པར་དགའ་བར་སྐྱེ་བར་ཤོག །ཨོཾ་པདྨེ་པདྨེ། པདྨ་སཾ་བྷ་ཝེ་ཨ་བྷི་ནནྡ་གཙྪ་སྭཱཧཱ། ཞེས་བརྗོད་ནས་རོལ་མོ་བྱ་སྟེ། མངོན་པར་དགའ་བར་སྐྱེས་པར་བསམ། དེར་སྐྱེས་པའི་བྱང་སེམས་རྙིང་པ་རྣམས་ཀྱིས་ཕྱིས་དེ་ལ་མཆོད་པར་བསམས་ལ། མཆོད་ཅིང་རོལ་མོ་བྱའོ། །དེས་ཀྱང་སངས་རྒྱས་མི་འཁྲུགས་པ་འཁོར་དང་བཅས་པ་ལ་མཆོད་ཅིང༌། རོལ་མོ་བྱའོ། །དེར་སྐྱེས་པའི་རྒྱུ་བརྟགས་པས་རྡོ་རྗེ་སློབ་དཔོན་གྱི་ཆོ་གའི་ནུས་པ་ཡིན་པར་ཤེས་ཏེ། རྫུ་འཕྲུལ་གྱིས་འདིར་འོངས་ནས། བདག་དང་དཀྱིལ་འཁོར་ལ་མཆོད་ཅིང་རོལ་མོ་བྱས་ལ། ཨེ་མ་སངས་རྒྱས་ཨེ་སངས་རྒྱས། །ཨེ་མ་སངས་རྒྱས་མཛད་པ་ལེགས། །གང་ཕྱིར་ངན་སོང་བདག་ཅག་སྦྱངས། །བྱང་ཆུབ་སྤྱོད་པ་ཉིད་ལ་བཞག །ཅེས་ཆེད་དུ་བརྗོད་པར་བསམས་ལ། བདག་གིས་ཀྱང་སླར་དེ་ལ་མཆོད་པས་མཆོད་ཅིང་རོལ་མོ་བྱ།
སླར་ཡང་མངོན་པར་དགའ་བར་སོང་བར་བསམས་ལ་མེ་ཏོག་དོར། དེ་ནས་ཚེ་འདས་ཀྱི་དོན་དུ་སྨོན་ལམ་རྒྱས་པར་བརྗོད་ཅིང༌། འཁོར་གསུམ་མི་དམིགས་པས་རྒྱས་བཏབ་སྟེ། གཤིན་པོ་རྗེས་སུ་བཟུང་བའི་ཆོ་གའོ། །དྲུག་པ་རྗེས་ཀྱི་ཆོ་ག་ནི། གཤིན་དོན་ཡིན་ན་ལམ་སྦྱང་བསྟན་ཚར་བའི་རྗེས་དང༌། སློབ་མ་དབང་བསྐུར་བ་ཡིན་ན། དབང་ཆོག་ཚར་བའི་རྗེས་སམ། སྒྲུབ་མཆོད་རྐྱང་པ་ཡིན་ན། བདག་འཇུག་ཚར་བའི་རྗེས་ལ་མཆོད་པ་རྣམས་ཁ་གསོས། བསངས་སྦྱངས། བྱིན་གྱིས་རླབས་ནས་མདུན་བསྐྱེད་ལ་ཕུལ་བར་བསམ་ཞིང༌། ངག་ཏུ། དག་ཅིང་དྲི་མེད་ཡིད་འོང་བའི། །སྔགས་ཀྱི་ཡོན་ཆབ་མཆོག་འདི་དག །བདག་གིས་དད་པས་འབུལ་ལགས་ཀྱིས། །ཅི་བདེ་བར་ནི་བཞེས་སུ་གསོལ། །ཨོཾ་སརྦ་ཏཱ་ཐཱ་ག་ཏ་ཨཀྵོ་བྷ་ས་པཱ་རི་ཝཱ་ར་ཨརྒྷཾ་པྲ་ཏཱིཙྪ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུཾ། དེ་བཞིན་དུ་ཚིགས་བཅད་འོག་མ་གཉིས་འདྲ་བ་ལ། ཆུ་སྐྱེས་ཐང་སྐྱེས་ཡིད་ལས་བྱུང༌། །བྱང་ཆུབ་ཡན་ལག་མེ་ཏོག་འདི། པུཥྤེ། ལྷན་ཅིག་སྐྱེས་དང་སྦྱར་ལས་བྱུང༌། །ཨ་ཀར་ལ་སོགས་བདུག་སྤོས་འདི། དྷུ་པེ། རྩི་མར་འབྲུ་མར་མར་མེ་འདི། །མི་ཤེས་མུན་པ་སེལ་བའི་ཕྱིར། ཨཱ་ལོ་ཀེ །ཙནྡན་ག་པུར་ལ་སོགས་པ། །ལྷན་ཅིག་སྐྱེས་སྦྱར་དྲི་མཆོག་འདི། གནྡྷེ། གཟུགས་སྒྲ་དྲི་རོ་རེག་བྱ་ཡིས། ཁ་དོག་དྲི་དང་རོ་ལྡན་པའི། །བླ་མེད་བདུད་རྩིའི་ཞལ་ཟས་འདི། །འབུལ་གྱི་ཡང་དག་བཞེས་སུ་གསོལ། ནཻཝིདྱ༴ དེ་ལས་གཞན་ཡང་མཆོད་པའི་ཚོགས། །རོལ་མོ་དབྱངས་སྙན་ཡིད་འོང་ལྡན། །
བདག་གིས་དད་པས་འབུལ་ལགས་ཀྱིས། །ཅི་བདེ་བར་ནི་བཞེས་སུ་གསོལ། །ཤཔྟ་ཞེས་དང་རོལ་མོ་འབུལ། དེ་ནས་དྲིལ་བུ་བསིལ་ཞིང༌། ནམ་མཁའི་མདངས་ལྟར་ཀུན་ནས་གསལ་བའི་སྐུ། སོགས་བུམ་བསྐྱེད་ཀྱི་སྐབས་ལྟར་ཤོ་ལོ་ཀ་བཞི་ཡིས་བསྟོད་ལ། མགོན་པོ་ཐུགས་རྗེ་ཆེན་པོ་དང་ལྡན་པ་ཁྱེད་རྣམས་ཀྱིས་བདག་དང་སེམས་ཅན་ཐམས་ཅད་ཀྱི་སྡིག་པ་དང་སྒྲིབ་པ་ཐམས་ཅད་བྱང་ཞིང་དག་པར་མཛད་དུ་གསོལ། ཞེས་འདོད་པའི་དོན་ལ་གསོལ་བ་བཏབ། ཡི་གེ་བརྒྱ་པ་ལན་གསུམ་ལ་སོགས་པ་བརྗོད་པའི་རྗེས་ལ། གང་ཡང་བདག་བློ་གཏི་མུག་པས། །ལེགས་སྤྱད་འདི་ལ་ཉེས་པ་གང༌། །གང་ཕྱིར་ལུས་ཅན་སྐྱབས་གྱུར་པ། །དེ་ནི་མགོན་པོས་བཟོད་པར་གསོལ། །གཙོ་བོ་ནུས་པ་མ་མཆིས་པས། །མ་འབྱོར་མ་རྙེད་མ་འཚལ་བས། །འདིར་ནི་བགྱི་བ་གང་བགྱིས་པ། །དེ་དག་ཐམས་ཅད་བཟོད་པར་མཛོད། ཅེས་སོགས་ཀྱིས་ལྷག་ཆད་ཁ་བསྐང་ཞིང་ནོངས་པར་བཟོད་པར་གསོལ། རས་བྲིས་ཀྱི་དཀྱིལ་འཁོར་ལ་དམིགས་ཏེ། མགོན་པོ་ཐུགས་རྗེ་ཆེན་པོ་དང་ལྡན་པ་རྣམས་བདག་ལ་དགོངས་སུ་གསོལ། ཇི་སྲིད་ནམ་མཁའི་མཐའ་དང་མཉམ་པའི་སེམས་ཅན་ཐམས་ཅད་སངས་རྒྱས་ཀྱི་གོ་འཕང་མ་ཐོབ་ཀྱི་བར་དུ་རྒྱལ་བ་ཐམས་ཅད་མྱ་ངན་ལས་མི་འདའ་བར་བརྟན་པར་བཞུགས་སུ་གསོལ། བྱེ་བྲག་ཏུ་ཡང་རས་བྲིས་ཀྱི་དཀྱིལ་འཁོར་འདི་ཉིད་ལ་སྤྱན་དྲངས་པའི་ལྷ་ཚོགས་ཐམས་ཅད་དང༌། སངས་རྒྱས་དང་བྱང་ཆུབ་སེམས་དཔའ་ཐམས་ཅད་བརྟན་པར་བཞུགས་སུ་གསོལ། བཞུགས་ནས་བདག་དང་སེམས་ཅན་ཐམས་ཅད་ལ་དངོས་གྲུབ་
མ་ལུས་པར་སྩལ་དུ་གསོལ། ཞེས་དང༌། ཨོཾ་སུ་པྲ་ཏིཥྛ་བཛྲ་ཡེ་སྭཱཧཱ། ཞེས་ལན་གསུམ་གྱིས་བརྟན་པར་བྱས་ཤིག་མེ་ཏོག་གཏོར། དེ་ནས་དྲིལ་བུ་གསིལ་ཞིང༌། སྟོན་མཆོག་དམ་པ་ལྷ་མོས་མཆོད་འོས་པ། །སངས་རྒྱས་ཕྱག་འཚལ་དེང་འདིར་བདེ་ལེགས་ཤོག། སེམས་ཅན་གང་དག་འགྲོ་དང་མི་འགྲོ་བ། །དེ་དག་ཐམས་ཅད་དེང་འདིར་བདེ་ལེགས་ཤོག །ཞི་བ་ཆགས་བྲལ༴ ཆོས་ལ་ཕྱག་འཚལ༴ སེམས་ཅན་གང་༴ དེ་དག༴ ཚོགས་ཀྱི་དམ་པ༴ དགེ་འདུན་ཕྱག་འཚལ༴ སེམས་ཅན༴ དེ་དག༴ བདག་ཅག་འཁོར་དང་བཅས་པ་ཐམས་ཅད་མི་མཐུན་པའི་ཕྱོགས་ཐམས་ཅད་ལས་ཤིན་ཏུ་རྒྱལ་བར་གྱུར་ཅིག །ཅེས་བརྗོད་ལ་རོལ་མོ་བྱ་ཞིང་མེ་ཏོག་གཏོར་རོ། །སླར་ཡང་བསྔོ་བ་སྨོན་ལམ་རྣམ་པར་དག་པ་བཏབ་ལ། རས་བྲིས་བཀུར་བསྟི་དང་བཅས་པས་བསྡུས་ལ་དབེན་པར་བཞག །མཆོད་རྫས་དམན་པ་རྣམས་མགོན་མེད་པ་དང་འཕོངས་པ་རྣམས་ལ་སྦྱིན། གོས་ཟུང་སོགས་མཆོད་རྟེན་དང་སངས་རྒྱས་ཀྱི་སྐུ་ལ་ཕུལ་ནས་ལས་ཀྱི་རྗེས་མི་མངོན་པར་བྱའོ། །རབ་ཟབ་ངན་སོང་རྒྱུན་གཅོད་ཆོ་གའི་ཚུལ། འཁྲུལ་མེད་བརྒྱུད་པའི་དགོངས་དོན་ཇི་བཞིན་དུ། །རྒྱུད་འགྲེལ་མཁས་པའི་རིང་ལུགས་དཔང་བཞག་ནས། ཉུང་གསལ་གོ་བདེའི་ངག་གིས་རྣམ་པར་བཀོད། །འདི་སྦྱར་དགེ་བས་མར་གྱུར་འགྲོ་བ་ཀུན། །སྡུག་བསྔལ་རྒྱུ་དང་བཅས་ལས་རྣམ་གྲོལ་ཞིང༌། །རྨད་བྱུང་བྱང་ཆུབ་སྤྱོད་པས་རྒྱུད་སྦྱངས་ནས། །མི་འཁྲུགས་རྒྱལ་བའི་ཞབས་དྲུང་སྐྱེ་བར་ཤོག །བཅོམ་ལྡན་འདས་མི་འཁྲུགས་པ་ལྷ་དགུའི་ཆོ་ག་ཉུང་ངུ་རྣམ་གསལ་ཞེས་པ་འདི་ཡང་བརྒྱུད་པ་གོང་མའི་གསུང་ཐོར་བུ་པ་རྣམས། གཞན་ཕན་གྱི་བློས་ཕྱོགས་གཅིག་ཏུ་བསྡེབས་ཏེ།
བཙུན་པ་གྲོལ་མཆོག་གིས་ཡི་གེར་བཀོད་པའོ། །འདིས་ཀྱང་བསྟན་པ་དང་སེམས་ཅན་ལ་ཕན་པར་གྱུར་ཅིག། ། །གཅིག་ཞུས། །མངྒ་ལཾ། །
མི་འཁྲུགས་པའི་ཟུར་འདི་བླ་དང་སྦྱིན་སྲེག་ནི། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །གཟུང་འཛིན་རྟོག་པའི་དྲི་མས་མ་གོས་པའི། །མེ་ལོང་ཡེ་ཤེས་གཟུགས་སྣང་ལྷ་ཡི་སྐུ། །ལེགས་བཞེངས་མི་འཁྲུགས་མགོན་ལ་གུས་བཏུད་ནས། །གང་འདིར་ཆོ་གའི་ཟུར་འདེབས་བཤད་ཀྱིས་ཉོན། འདིར་བཅོམ་ལྡན་འདས་མི་འཁྲུགས་པའི་ཆོ་ག་ལ་རས་བྲིས་དང་རྡུལ་ཚོན་ལ་བརྟེན་པ་གཉིས་ལས། དང་པོ་ཤེས་སླ་བ་དང༌། ཉིན་གཅིག་ལ་ཆོ་ག་རྫོགས་པའི་དབང་དུ་བྱས་ཏེ། དེའི་ཚུལ་ཁོ་བོས་ཉུང་ངུ་རྣམ་གསལ་དུ་བཀོད་ཟིན་ལ། གཞུང་དེ་ལ་བལྟོས་པའི་དབང་དུ་བྱས་ནས། འདིར་རྡུལ་ཚོན་གྱི་ཕྱོགས་བརྗོད་ན་དོན་གཉིས་ཏེ། སྔོན་དུ་བསྙེན་པ་དང༌། དཀྱིལ་འཁོར་ལས་ཀྱི་རིམ་པའོ། །དང་པོ་ལ་གཉིས། རྣལ་འབྱོར་དང་བཅས་པའི་བཟླས་བརྗོད་དང༌། དུས་རྒྱུན་གྱི་བཟླས་བརྗོད་དོ། །དང་པོ་ནི། ཁྲུས་དང་གཙང་སྦྲ་སྔོན་དུ་འགྲོ་བས། གནས་དབེན་པར། སངས་རྒྱས་ཀྱི་རྟེན་གྱི་སྤྱན་སྔར་ཅི་འབྱོར་བའི་མཆོད་པ་
དང༌། གཏོར་མ་གསུམ་བཤམས་ལ། སྟན་བདེ་བ་ལ་འདུག་སྟེ། མཆོད་པ་བྱིན་རླབས་ནས་བརྩམས་ཏེ་བདག་ཉིད་ལྷར་བསྐྱེད་པ་ནས་མཆོད་བསྟོད་ཀྱི་བར་སྔོན་དུ་བཏང་ནས། རང་གི་སྙིང་ག་ན་བཞུགས་པའི་དེ་བཞིན་གཤེགས་པ་རིགས་ལྔའི་དབུས་ཀྱི་གཙོ་བོ་མི་བསྐྱོད་པའི་ཐུགས་ཀར་ཟླ་བའི་དཀྱིལ་འཁོར་གྱི་སྟེང་དུ་སྔགས་ཀྱི་ཡེ་གེ་སྦྲུལ་འཁྱིལ་བ་ལྟ་བུ། དེ་ལས་འོད་ཟེར་འཕྲོས་འཇིག་རྟེན་གྱི་ཁམས་ཐམས་ཅད་སྣང་བར་བྱས། སེམས་ཅན་ཐམས་ཅད་ཀྱི་སྡིག་སྒྲིབ་སྦྱངས། སངས་རྒྱས་ཐམས་ཅད་ཀྱི་ཐུགས་རྒྱུད་བསྐུལ། འོད་ཟེར་སླར་འདུས་ཏེ་རང་ལ་ཐིམ་པས་བདག་ཉིད་ཀྱི་ཚེ་རབས་ཐོག་མེད་ནས་བསགས་པའི་ལས་ངན་སྡིག་སྒྲིབ་ཐམས་ཅད་བྱང་ཞིང་དག་པར་བསམས་ལ། སེམས་མ་ཡེངས་པར་བཟླས་བརྗོད་ཅི་ནུས་བྱ། ཐུན་གཏོང་བའི་ཚེ་སླར་ཡང་མཆོད་བསྟོད་བསྔོ་བ་སྨོན་ལམ་བྱ་སྟེ། ཐུན་མཚམས་སུ་བསྐོར་བ་དང༌། ཚྭ་ཚྭ་ལ་སོགས་དགེ་བའི་བྱ་བས་དུས་འདའ་བར་བྱ་ཞིང༌། སྲོད་ཐུན་གྱི་མཐར་གཏོར་མ་ཆ་གསུམ་བཏང་ལ། ཕྱོགས་སྐྱོང་རྣམས་བསྙེན་པའི་བྱ་བ་མཐར་མ་ཕྱིན་གྱི་བར་དུ་སྒྲུབ་ཁང་གི་ཕྱོགས་མཚམས་སུ་ཞལ་ཕྱིར་བསྟན་ནས་བཞུགས་ཏེ་བར་ཆད་བསྲུང་བའི་ལས་མཛད་པ་བསྒོམ། གཏོར་མ་གཉིས་པའི་སྐབས་སུ། ལྷ་ཀླུ་འབྱུང་པོའི་ཚོགས་རྣམས་སྒྲུབ་པ་པོ་ལ་དགེས་ཤིང་བར་ཆད་བསྲུང་བའི་བསམ་པ་དང་ལྡན་པས་རང་གནས་སུ་བཞུད་པར་བསམ་ཞིང༌། གཏོར་མ་གསུམ་པའི་སྐབས་སུ། འབྱུང་པོ་གདུག་པ་ཅན་རྣམས་དཔག་ཚད་
དམ་རྒྱང་གྲགས་ཀྱི་བར་དུ་བསྐྲད་པར་བསམ་ལ། མཚམས་གཅོད་ཀྱི་སྔགས་ལན་གསུམ་བཟླས། རང་ཉིད་འཁོད་པའི་གནས་ཁང་རྡོ་རྗེའི་ས་གཞི་ར་བ་གུར་བླ་རེ་ཕྱི་རོལ་དུ་ཡེ་ཤེས་ཀྱི་མེ་འབར་བའི་བསྲུང་བའི་འཁོར་ལོ་ཡངས་ཤིང་རྒྱ་ཆེ་བར་བསམ་ལ། ཨོཾ་བཛྲ་རཀྵ་རཀྵ་སྭཱཧཱ། ཞེས་ལན་གསུམ་བརྗོད་དོ། །དེ་ལྟར་བསྙེན་བསྒྲུབ་ཀྱི་བྱ་བ་མཐར་མ་ཕྱིན་གྱི་བར་དུ་དཀར་གསུམ་ལ་བརྟེན་པའི་གདན་གཅིག་གམ་གདན་གཉིས་བྱ། ཕྱི་དྲོའི་ཁ་ཟས། ཤ་ཆང་སྒོག་བཙོང་ལ་ཕུག །རང་གི་ཁམ་འཕྲོ་རྣམས་སྤངས། སྣོད་མཁར་བ་དང་ལོ་མ་དང་ལག་མཐིལ་རྣམས་སུ་མི་ཟ། དེ་ལྟར་གཙང་སྦྲ་དང་ལྡན་པས་འབུམ་ཕྲག་བཞི་ཁ་སྐོང་དང་བཅས་པའི་ཚུལ་དུ་བཟླས་ཏེ། མཐར་གྲུབ་ན་བཅུ་ཆའི་སྦྱིན་སྲེག་བྱ། མ་གྲུབ་ན་ཚ་ཚ་མང་དུ་བཏབ། ཐུན་གསུམ་གྱི་རྣལ་འབྱོར་གྱི་སྒོ་ནས་ཉམས་སུ་བླང་བ་སྟེ། སྔོན་དུ་བསྙེན་པའི་རྣལ་འབྱོར་རོ། །གཉིས་པ་དུས་རྒྱུན་གྱི་བཟླས་བརྗོད་ནི། དེ་བཞིན་གཤེགས་པའི་ཐུགས་བརྒྱུད་བསྐུལ་བས་བསྙེན་པའི་རྒྱུན་དེ་ཉིད་མི་ཉམས་པར་བྱ་བའི་ཕྱིར་ཉིན་རེ་བཞིན་སྐྱབས་འགྲོ་སེམས་བསྐྱེད་སྔོན་དུ་འགྲོ་བས། བདག་བསྐྱེད་བཟླས་པའི་རྣལ་འབྱོར་མཐར་བསྔོ་བ་སྨོན་ལམ་གྱི་བར་དུ་འཆག་མེད་ཀྱི་ཚུལ་གྱིས་ཉམས་སུ་བླངས་པས། ལས་གཅིག་ལས་གཅིག་ཏུ་བརྒྱུད་པ་ཐམས་ཅད་བྱང་བར་འགྱུར་བ་དང༌། མཚམས་མེད་པ་ལྔ་ལ་སོགས་པ་ལས་ཀྱི་སྒྲིབ་པ་མ་ལུས་པར་ཟད་པར་འགྱུར་བ་སོགས་ཕན་ཡོན་དཔག་ཏུ་མེད་པ་མདོ་ལས་བཤད་དོ། །གཉིས་པ་དཀྱིལ་འཁོར་གྱི་རིམ་པ་ལ།
སའི་ཆོ་ག་དང༌། སྟ་གོན་དང༌། དངོས་གཞིའི་ཆོ་ག་དང་གསུམ་གྱི་དང་པོ་ནི། དཀྱིལ་འཁོར་གང་དུ་བྲི་བའི་གནས་སུ་ཆ་གསུམ་ལྟར་གཏོར་མ་གསུམ་བཤམ། མཆོད་པ་ལྔ་དང༌། ཡུངས་ཀར་དང༌། གུ་གུལ་ལ་སོགས་པའི་ཡོ་བྱད་རྣམས་བཤམས་ལ། སློབ་དཔོན་གྱིས་བདག་བསྐྱེད་བཟླས་པ་དང་བཅས་སྔོན་དུ་སོང་ནས། གཏོར་མ་དང་པོ་ཕྱོགས་སྐྱོང་ལ་ཕུལ་བའི་མཐར། ཕྱོགས་སྐྱོང་འཁོར་དང་བཅས་པ་རྣམས་ཀྱི་སའི་ཕྱོགས་འདིར་བདག་ལ་སྩལ་ཞིང་དཀྱིལ་འཁོར་གྱི་ཆོ་ག་མཐར་ཕྱིན་པའི་སྡོང་གྲོགས་མཛད་དུ་གསོལ། ཞེས་བརྗོད་དེ། ཕྱོགས་སྐྱོང་ལས་བསླང་བའོ། །དེ་ནས་གཏོར་མ་གཉིས་པ་འབྱུང་པོ་སྤྱི་ལ་ཕུལ་ལ་འབྱུང་པོའི་ཚོགས་འཁོར་དང་བཅས་པ་རྣམས་ཀྱིས་ས་ཕྱོགས་འདིར་བདག་ལ་གནང་ཞིང་ཞེས་སོགས་བརྗོད་པས་བསླང་སྟེ། འདི་གཉིས་ནི་ཞི་བས་ས་བསླང་བའོ། །དེ་ནས་བགེགས་གཏོར་བསྔོས་ལ་གདོན་ཁྱོད་རང་གི་གནས་སུ་སོང༌། ཞེས་པའི་འཇུག་ཏུ། སའི་ཕྱོགས་འདི་ཉིད་ན་གནས་པའི་འབྱུང་པོ་གསང་སྤྱོད་ལྟ་བར་མི་དབང་བ་རྣམས་དང༌། དཀྱིལ་འཁོར་ཆེན་པོ་སྒྲུབ་པ་ལ་བར་ཆད་བྱེད་པའི་བགེགས་དང་ལོག་འདྲེན་གྱི་རིགས་གང་ཡོད་པ་ཐམས་ཅད་གཏོར་མ་འདིས་ཚིམས་པར་གྱིས་ལ་སའི་ཕྱོགས་འདིར་མ་གནས་པར་གཞན་དུ་སོང་ཤིག །ཅེས་བརྗོད་ལ་གཏོར་མ་སྒོ་དྲུང་དུ་དོར་རོ། ཁྲོ་བོའི་སྔགས་བརྗོད་ཅིང་རོལ་མོ་དྲག་དུ་བྱ། ས་ཕྱོགས་གུ་གུལ་གྱི་བདུག །ཡུངས་ཀར་གྱིས་བྲབས་ལ་བགེགས་རྣམས་བྱེར་བར་བསམས་པ་ནི་དྲག་པོས་བསླང་བ་སྟེ། ས་བསླང་བའི་ཆོ་གའོ། །དེ་ནས་ཕྱོགས་སྐྱོང་དང་འབྱུང་པོ་
རྣམས་གཤེགས་སུ་གསོལ། རང་མི་འཁྲུགས་པའི་ང་རྒྱལ་གྱིས་ཀཱཾ་ཀ་ནི་བཟླ་བཞིན་དུ་དཀྱིལ་འཁོར་གྱི་སའི་དབུས་སུ་ལག་པ་གཉིས་ཀ་བཞག་ལ། ཨོཾ་བྷུ་ཁཾ་ཞེས་ཉེར་གཅིག་བརྗོད་པས། ས་གཞི་ནམ་མཁའི་རང་བཞིན་དུ་བསམ། ཨོཾ་ཧ་ན་ཧ་ན་ཀྲོ་དྷ་ཧཱུཾ་ཕཊ། ཅེས་མང་དུ་བཟླས་པས། ས་གཞི་རྡོ་རྗེའི་རང་བཞིན་དུ་བསམས་ཏེ། སྔགས་དང་ཕྱག་རྒྱས་སྦྱངས་བའོ། །དེ་ནས་ཀཱཾ་ཀ་ནི། བཟླ་བཞིན་དུ་དེ་ཙམ་བྱེད་པའི་ས་གཞི་མཆོད་པའི་གཞི་དང་བཅས་པ་དྲི་བཟང་ཀྱིས་ཆུས་བྱུག །ག་དར་ལེགས་པར་བྱ་བ་ནི་ལས་དང་བྱ་བས་སྦྱང་བ་སྟེ་ས་སྦྱང་བའི་ཆོ་གའོ། །དེ་ནས་སློབ་དཔོན་རྡོ་རྗེ་དྲིལ་བུའི་འཛིན་པས་དཀྱིལ་འཁོར་གྱྀ་དབུས་སུ་འདུག་ལ། ཧཱུཾ་བཛྲ་ཨཀྵོ་བྷྱ། ཨ་ཧཾ། ཞེས་པས་མི་འཁྲུགས་པའི་ང་རྒྱལ་གཟུང་ལ། བདག་གིས་སའི་ཕྱོགས་འདིར། བཅོམ་ལྡན་འདས་ངན་སོང་ཐམས་ཅད་ཡོངས་སུ་སྦྱོང་བ་ཐུགས་རྗེའི་བདག་པོ་མྀ་འཁྲུགས་པའི་དཀྱིལ་འཁོར་བྲིས་པ་སེམས་ཅན་གྱི་དོན་རྒྱ་ཆེན་པོ་བྱའོ། །ཞེས་སེམས་བསྐྱེད་པ་ནི་བློས་བཟུང་བའོ། །དེ་ནས་རྗེས་ཆོག་ཏུ་བཤད་པ་ལྟར་བྱས་ལ། བཀྲ་ཤིས་བརྗོད་དེ་ནུབ་དང་པོའི་ཆོ་གའོ། །གཉིས་པ་སྟ་གོན་ལ་སྦྱོར་དངོས་རྗེས་གསུམ་གྱི་དང་པོ་ནི། ས་ཆོག་བྱས་པའི་གནས་སུ་ཐིག་ཆེན་བརྒྱད་ཙམ་མམ། འོག་ནས་འབྱུང་བ་ལྟར་ལས་ཐིག་རྫོགས་པར་བཏབ་ལ། ལྷའི་གནས་སུ་དྲིའི་ཐིག་ལེ་དང་མེ་ཏོག་གི་ཚོམ་བུ་ཚང་བར་བཀོད། ས་ལྷའི་ཚོམ་བུ་ཡང་བཀོད་ལ་བཞག །མཐའ་སྐོར་དུ་མཆོད་པ་དང་གཏོར་མ་དང༌། བུམ་པ་དང༌། འོག་ཏུ་སློབ་མ་སྟ་གོན་ལ་དགོས་པའི་ཡོ་བྱད་རྣམས་ཀྱང་ཚང་བར་
བཤམས། དེ་ནས་དཔོན་སློབ་རྣམས་སྟན་ལ་འཁོད་དེ་མཆོད་པ་བྱིན་གྱིས་བརླབས་པ་དང༌། སྐྱབས་འགྲོ་ནས་བརྩམས་ཏེ་བདག་བསྐྱེད་རྫོགས་པར་བྱའོ། །གཉིས་པ་ལ་བཞི། ས་ལྷ་སྟ་གོན། བུམ་པ་སྟ་གོན། ལྷ་སྟ་གོན། སློབ་མ་སྟ་གོན་ནོ། །དང་པོ་ནི་སའི་ལྷ་མོའི་ཚོམ་བུ་བསངས་སྦྱངས། སྟོང་པའི་ངང་ལས་པཾ་ལས་པདྨ་དང༌། ཨ་ལས་ཟླ་བའི་དཀྱིལ་འཁོར་བསལ་བཏབ། རང་གི་སྙིང་ག་ནས་འོད་ཟེར་འཕྲོས། ས་འོག་ནས་སའི་ལྷ་མོ་འཁོར་དང་བཅས་པ་སྤྱན་དྲངས་ནས་གདན་ལ་བཞུགས་པར་དམིགས་ལ། སྔར་གྱི་ཟླ་བའི་དཀྱིལ་འཁོར་གྱི་སྟེང་དུ་སའི་ལྷ་མོ་སྐུ་མདོག་སེར་མོ་དགའ་བ་དང་ལྡན་པའི་ཐུགས་ཅན་ཕྱག་གཡས་མི་འཇིགས་པའི་ཕྱག་རྒྱ་མཛད་ཅིང༌། གཡོན་རིན་པོ་ཆེའི་བུམ་པ་ཐུགས་ཀར་འཛིན་པ། དར་མདོག་དཀར་པོའི་ན་བཟས་སྟོད་གཡོགས་ཤིང༌། དར་ཁ་དོག་སྣ་ཚོགས་པའི་ཤམས་ཐབས་ཀྱིས་མཛེས་པར་ཀླུབས་པ། རིན་པོ་ཆེའི་རྒྱན་དུ་མས་སྐུ་ལ་སྤྲས་པ་ཞལ་གྱི་པདྨོ་རབ་ཏུ་བཞད་ཅིང༌། པད་ཟླའི་གདན་ལ་ཕྱེད་ཀྲུང་གིས་བཞུགས་པ་ཀླུ་དང་ས་བདག་ཚོགས་ཀྱིས་ཡོངས་སུ་བསྐོར་བ། དེ་ལ་མཆོད་པ་རྣམས་ཀྱིས་མཆོད་པར་བསམས་ལ། ཨོཾ་པྲི་ཐི་ཝི་དེ་བཱི་ས་པཱ་རི་ཝཱ་ར་ཨརྒྷཾ་པྲ་ཏཱིཙྪ་སྭཱཧཱ། ཞེས་བརྗོད་ལ་པད་སྐོར་སྔོན་དུ་འགྲོ་བའི་སོ་སོའི་ཕྱག་རྒྱ་བཅའ་ཞིང་རོལ་མོའི་བར་དུ་བྱ། གཏོར་མ་བསངས་སྦྱངས་བྱིན་གྱིས་བརླབས་ལ། ཨོཾ་པྲི་ཐི་ཝཱི་དཱེ་བཱི་ས་པཱ་རི་ཝཱ་ར་ན་མཿསརྦ་ཏ་ཐཱ་ག་ཏ་བྷྱོ། ཞེས་སོགས་ལན་གསུམ་དང༌། ནམ་མཁའ་
མཛོད་ཀྱི་ཕྱག་རྒྱས་གཏོར་མ་ཕུལ་ཏེ། རྡོ་རྗེ་དྲིལ་བུ་འཛིན་པས། སྐྱོབ་པ་སངས་རྒྱས་ཐམས་ཅད་ཀྱི། །སྤྱོད་པའི་ཚུལ་དང་ཁྱད་པར་དུ། །ས་དང་ཕ་རོལ་ཕྱིན་པ་ལ། །ལྷ་མོ་ཁྱོད་ནི་དཔང་དུ་གྱུར། །ཤཱཀྱ་སེང་གེ་སྐྱོབས་པ་ཡིས། །ཇི་ལྟར་བདུད་ཀྱི་སྡེ་བཅོམ་པ། །དེ་བཞིན་བདག་གིས་བདུད་སྡེ་ལས། །རྒྱལ་བར་བྱས་ཏེ་དཀྱིལ་འཁོར་བྲི། ལན་གསུམ་གྱི་མཐར། དཔལ་ལྡན་བླ་མ་གོང་མ་རྣམས་ཀྱི་ཐུགས་ཀྱི་དགོངས་པ་ཁྱད་པར་ཅན་གོང་ནས་གོང་དུ་ཡོངས་སུ་རྫོགས་པར་བྱ་བའི་ཕྱིར་དང༌། ནམ་མཁའ་དང་མཉམ་པའི་སེམས་ཅན་ཐམས་ཅད་ཀྱི་སྡིག་སྒྲིབ་བག་ཆགས་དང་བཅས་པ་བྱང་ཞིང་དག་པར་བྱ་བའི་ཆེད་དུ། སའི་ཕྱོགས་འདིར་བཅོམ་ལྡན་འདས་ངན་སོང་ཐམས་ཅད་ཡོངས་སུ་སྦྱོང་བ་ཐུགས་རྗེའི་བདག་པོ་མི་འཁྲུགས་པའི་ལྷ་ཚོགས་ཀྱི་དཀྱིལ་འཁོར་ཆེན་པོ་བསྒྲུབ་ཅིང་མཆོད་པ་དང༌། བདག་ཉིད་འཇུག་ཅིང་དབང་བླང་བ་དང༌། སློབ་མ་ལ་ཡང་དབང་བསྐུར་བར་འཚལ་ན། སའི་ཕྱོགས་འདི་བདག་ལ་གནང་ཞིང་ལས་ཀྱི་དངོས་གྲུབ་ཀྱང་བདག་ལ་སྩལ་དུ་གསོལ། སའི་ལྷ་མོ་འཁོར་དང་བཅས་པའི་ཞལ་ནས་རིག་པ་འཛིན་པ་ཁྱོད་དཀྱིལ་འཁོར་གྱི་ལས་ཅི་བདེ་བར་གྱིས་ཤིག །ཅེས་གནང་བ་སྦྱིན་པ་བསམ། དེ་ནས་མཆོད་ཡོན་ཕུལ་ལ། ཨོཾ་བཛྲ་མུཿ ཞེས་བརྗོད་པས། སའི་ལྷ་མོས་དེ་ཉིད་ལ་ཐིམ་པར་མོས་ལ་ས་ལྷའི་མཆོད་གཏོར་རྣམས་ཕྱིར་བསལ་ཏེ། ས་སྟ་གོན་ནོ། །གཉིས་པ་བུམ་པ་སྟ་གོན་ནི་ཆོ་གའི་བུམ་བསྐྱེད་ཀྱི་སྐབས་ཇི་ལྟ་བ་བཞིན་བསྒྲུབ་པ་ཉིད་ཡིན་ནོ། །གསུམ་པ་ལྷ་སྟ་གོན་ནི།
བསངས་སྦྱངས་བསྲུང་འཁོར་གཞལ་ཡས་ཁང་གདན་དང་བཅས་པ་བསྐྱེད། ཚོམ་བུའི་སྟེང་དུ་ཆོ་ག་གསུམ་གྱི་ལྷ་དགུ་བསྐྱེད་ལ། བདག་གཙོ་བོ་དང་ཐ་མི་དད་དུ་བྱ། གནས་གསུམ་བྱིན་གྱིས་རླབས། ཡེ་ཤེས་ལྷ་དགུའི་དཀྱིལ་འཁོར་གྱི་སྤྱན་དྲངས། ནམ་མཁར་བཞུགས་པ་ལ་མཆོད། དམ་ཚིག་གི་ཕྱག་རྒྱས་མཉེས་པར་བྱས་ནས་རང་ལ་བསྟིམ་པ་སོགས་རས་བྲིས་ཀྱི་ཆོ་ག་ལྟར་བྱ་ཞིང༌། མཆོད་བསྟོད་རྒྱས་པར་བྱ་བ་མདུན་བསྐྱེད་ལྟར་བསྒྲུབས་ནས། དཀྱིལ་འཁོར་ལ་ལྟ་ཞིང་པུས་མོ་གཡས་པ་བཙུགས། སྤོས་དང་བཅས་པའི་རྡོ་རྗེ་དྲིལ་བུ་འཛིན་པས། ནང་པར་སྤྱན་དྲངས་པའི་ཕྱིར་སྙན་གསན་དབབ་སྟེ། མི་འཁྲུགས་མགོན་པོ་བཅོམ་ལྡན་འདས། །རིགས་སྔགས་རྒྱལ་ལ་ཕྱག་འཚལ་ལོ། །བདག་ནི་བརྩེ་བར་གྱུར་ནས་སུ། །སློབ་མ་རྣམས་ལ་བརྩེ་བ་དང༌། ཁྱེད་རྣམས་ལ་ཡང་མཆོད་པའི་ཕྱིར། །བདག་ནི་དཀྱིལ་འཁོར་བྲི་བར་འཚལ། །བཅོམ་ལྡན་བདག་ནི་གུས་པར་ལགས། །དེ་བས་གནང་བ་མཛད་པ་རིགས། །སངས་རྒྱས་འཇིག་རྟེན་མགོན་བརྩེ་དང༌། །བྱང་ཆུབ་སེམས་དཔའ་དགྲ་བཅོམ་དང༌། །གསང་སྔགས་ལྷ་གཞན་གང་ལགས་དང༌། །འཇིག་རྟེན་སྐྱོང་བའི་ལྷ་རྣམས་དང༌། །གང་ཡང་འབྱུང་པོ་མཐུ་ཆེན་དང༌། །གང་ཡང་ལྷ་ཡི་སྤྱན་མངའ་བའི། །སེམས་ཅན་བསྟན་ལ་དགའ་བ་རྣམས། །བདག་ལ་དགོངས་པར་མཛད་དུ་གསོལ། །བདག་མིང་འདི་ཞེས་བྱ་ཡིས། །སང་ནི་དཀྱིལ་འཁོར་བཟང་པོའི་མིང༌། །ངན་སོང་སྦྱོང་བ་ཅི་ནུས་ཀྱིས། །ཆོ་ག་བཞིན་དུ་བྲི་ལགས་ན། །
བདག་དང་སློབ་མར་བཅས་རྣམས་ལ། །ཐུགས་ནི་བརྩེ་བར་དགོངས་ནས་སུ། །ཚོགས་པ་ཐམས་ཅད་དཀྱིལ་འཁོར་དུ། །བྱིན་གྱི་རླབས་པར་མཛད་དུ་གསོལ། །ཞེས་ལན་གསུམ་བརྗོད་པའི་མཐར། དཔལ་ལྡན་བླ་མ་ནས། སྩལ་དུ་གསོལ། གྱི་བར་སྔར་བཞིན་བྱ། གཏོར་མ་ཆ་གསུམ་ཆོ་ག་བཞིན་རྗེས་སུ་སྒྲུབས་ཏེ་ལྷ་སྟ་གོན་ནོ། །བཞི་པ་སློབ་མ་སྟ་གོན་ལ། དཀྱིལ་འཁོར་ཁང་པའི་ཕྱི་རོལ་དུ། མཚན་ཉིད་དང་ལྡན་པའི་སློབ་མ་ཁྲུས་བྱས། དང་པོ་ཕྱག་དང་འཇུག་པའི་ཡོན་ཕུལ་ནས། གྲལ་ལ་འཁོད་ལ། གཉིས་པ་ཐོག་མར་མྱང་འདས་ཀྱི་བསམས་པ་བརྟན་པོ་བསྐྱེད་དུ་གཞུག་པའི་ཕྱིར། རང་གི་བསླབ་ལྡན་འཁོར་བཞི་པོ། །ཐེག་ཆེན་བློ་ཅན་རྣམས་ལ་ནི། །དེ་བཞིན་གཤེགས་པ་གསུངས་པ་ཡི། །ཡང་དག་ཆོ་ག་རྗེས་སུ་གནང༌། ཁ་ཅིག་གསང་སྔགས་སྒྲུབ་དོན་གཉེར། །དཀྱིལ་འཁོར་དུ་ནི་འཇུག་པར་འགྱུར། །དེ་བཞིན་གཞན་གྱི་བསོད་ནམས་འདོད། །གཞན་དག་འཇིག་རྟེན་ཕ་རོལ་གཞོལ། །བློ་བཟང་ཕལ་ཆེར་དད་བྱས་ནས། །འཇིག་རྟེན་ཕ་རོལ་དོན་གཉེར་འཇུག །འཇིག་རྟེན་འདི་འབྲས་དོར་ནས་ནི། །འཇིག་རྟེན་ཕ་རོལ་མགྲོན་གཉེར་ན། །གང་ཕྱིར་ཚེ་འདི་བདེ་བླག་འགྲུབ། །འདི་ཡིས་འཇིག་རྟེན་ཕ་རོལ་མིན། །དེ་ཕྱིར་འཇིག་རྟེན་ཕ་རོལ་གྱི། །དོན་དུ་ཡིད་ནི་བརྟན་པར་གྱིས། ཞེས་པས་དོན་བཤད་ལ། སེམས་ཅན་གྱི་དོན་དུ་སངས་རྒྱས་ཐོབ་འདོད་ཀྱི་སེམས་བསྐྱེད་དུ་གཞུག་གོ །གསུམ་པ་རྣ་བ་གཏད་པར་བསྐུལ་བ་ནི། རྟོག་པ་ཐམས་ཅད་
ལེགས་པར་བསྡུས་ནས་ནི། །ཤིན་ཏུ་བསམ་པ་བརྟན་པོའི་ཡིད་ཀྱིས་ཉོན། །བརྗེད་ངས་བློ་ལ་རྡོ་རྗེ་སེམས་སོགས་དང༌། །བདེ་བར་གཤེགས་པ་རྣམས་ཀྱིས་བྱིན་མི་རློབ། །ཅེས་གདམས། བཞི་པ་ཁྱད་པར་ཅན་གྱི་དོན་ཞུ་བའི་ཕྱིར་དུ་མཎྜལ་ཕུལ་ནས། དགའ་ཆེན་ཁྱོད་བདག་སྟོན་པ་སྟེ། ཞེས་སོགས་ལན་གསུམ་གྱིས་གསོལ་བ་བཏབ་བོ། །ལྔ་པ་སྤྲོ་བ་བསྐྱེད་པ་ནི། བུ་ཚུར་ཤོག་ཤིག་ཐེག་ཆེན་པོའི། །གསང་སྔགས་སྤྱོད་ཚུལ་ཆོ་ག་ནི། ཁྱོད་ལ་ཡང་དག་བསྟན་པར་བྱ། །ཁྱོད་ནི་ཚུལ་ཆེན་སྣོད་ཡིན་ནོ། །སྐུ་གསུང་ཐུགས་ཀྱི་རྡོ་རྗེ་ཅན། །དུས་གསུམ་འབྱུང་བའི་སངས་རྒྱས་རྣམས། །རྡོ་རྗེ་སྔགས་ཀྱི་མཐུ་ཡིས་ནི། །ཡེ་ཤེས་མཉམ་མེད་ཡང་དག་བརྙེས། །གསང་སྔགས་སྦྱོར་བ་མཉམ་མེད་པས། །གང་གིས་ཤཱཀྱ་སེང་གེ་སོགས། །མཆོག་རྣམས་ཀྱིས་ནི་བདུད་ཀྱི་སྡེ། །མི་བཟང་ཆེན་པོ་སྟོབས་ཆེན་བཅོམ། །འཇིག་རྟེན་རྗེས་འཇུག་རྟོགས་ནས་ནི། །འཁོར་ལོ་བསྐོར་ནས་མྱ་ངན་འདས། །དེ་བས་ཀུན་མཁྱེན་ཐོབ་བྱའི་ཕྱིར། །བུ་ཡིས་བློ་གྲོས་འདི་གྱིས་ཤིག ཅེས་བརྗོད་ལ་སྤྲོ་བ་བསྐྱེད། དྲུག་པ་རྒྱུན་བཤགས་བྱ་བ་ནི། མདུན་གྱི་ནམ་མཁར་སོགས་གསལ་བཏབ་ལ། བདག་བསྐྱེད་ལྟར་རྒྱུན་བཤགས་ལན་གསུམ་བྱའོ། །བདུན་པ་དག་པ་ལྷའི་ཏིང་ངེ་འཛིན་ནི། སློབ་མ་རྣམས་སྐད་ཅིག་གིས་མི་འཁྲུགས་པར་བསྐྱེད་ནས། སློབ་དཔོན་གྱིས་རྡོ་རྗེ་རྩེ་ལྔ་པའི་ཕྱག་རྒྱ་བཅས་ཏེ་གནས་གསུམ་དུ་གཏུགས་ལ། ཀཱཾ་ཀཱ་ནི། ལན་རེ་བརྗོད་པས། ཐ་མལ་གྱི་ལུས་ངག་ཡིད་གསུམ་ཀུན་རྟོག་མ་ལུས་
པ་བཅོམ་ནས། དག་པ་དེ་གཞིན་གཤེགས་པའི་སྐུ་གསུང་ཐུགས་ཀྱི་ངོ་བོར་གྱུར་པའི་མོས་པ་བྱའོ། །བརྒྱད་པ་མཆོད་པ་ནི། དེ་ལྟར་ལྷར་གསལ་བ་ལ་དགའ་སྟོན་གྱི་ཚུལ་གྱི་མཆོད་པ་རྣམ་པ་ལྔས་མཆོད། དགུ་པ་སོ་ཤིང་སྦྱིན་པ་ནི། སོ་ཤིང་མེ་ཏོག་གི་རྩེ་མོ་ཅན་རྣམས་དྲི་བཟང་གི་ཆུས་བྱུག་ཅིང༌། ཨ་མྲྀ་ཏས་བསངས། ཀཱཾ་ཀ་ནི་ཚར་གཅིག་གིས་བྱིན་གྱིས་རླབས་ཏེ། སློབ་མ་ལ་བྱིན་ལ། ཁ་ཤར་རམ་བྱང་དུ་བལྟས་ཏེ་ཚོམ་བུའི་མཎྜལ་གྱི་སྟེང་དུ། ཨོཾ་བཛྲ་ཧ་ས་ཧ་ཞེས་བརྗོད་ཅིང་འདོར་དུ་གཞུག དེའི་རྩེ་མོར་ཤར་ལྷོ། ནུབ་བྱང༌། སྟེང་འོག་རྣམས་སུ་བལྟས་ན་ཞི་རྒྱས་དབང་དྲག་མཁའ་སྤྱོད་ས་འོག་རྣམས་འགྲུབ་ཅིང་མཚམས་རྣམས་སུ་བལྟས་ན་བུམ་པ་བཟང་པོ་ལ་སོགས་པ་དངོས་གྲུབ་ཕྲན་ཚེགས་རྣམས་འགྲུབ་ལ། དཀྱིལ་འཁོར་དུ་མ་ལྷུང་ན་དངོས་གྲུབ་མེད་པར་གོ་བར་བྱའོ། །བཅུ་པ་ཁ་དག་པར་བྱ་བའི་ཕྱིར་ཁྱོད་ཆུ་སྦྱིན་པ་ནི། ཀཱཾ་ཀ་ནི། བཟླས་ཏེ་བྱིན་གྱིས་བརླབས་པའི་དྲི་བཟང་གི་ཆུ་ཁྱོར་བར་ལན་གསུམ་བླུད་ཅིང༌། ཨོཾ་ཧྲཱི་བི་ཤུདྡྷ་སརྦ་དྷརྨ། སརྦ་བི་ཀལྤ་ཨ་པ་ན་ཡ་ཧཱུཾ། བཅུ་གཅིག་པ་བསྲུང་སྐུད་ནི། སྐུད་པ་དམར་པོ་ལུས་ཚད་དང་མཉམ་པར་གསུམ་སྦྲིལ་དུ་བྱས་པ་ལ། རྡོ་རྗེའི་མདུད་པ་གསུམ་བོར་ཏེ། སྟོང་པའི་ངང་ལས་ཧཱུཾ་ལས་བྱུང་བའི་སྐུད་པ་དམར་པོ་སློབ་མའི་ལུས་ཚད་དང་མཉམ་པར། རྡོ་རྗེ་མདུད་པ་གསུམ་གྱིས་བསྡམས་པ། ལུས་ངག་ཡིད་གསུམ་གྱི་བར་ཆད་བསྲུངས་བའི་ནུས་པ་དང་ལྡན་པར་གྱུར། སློབ་དཔོན་གྱི་ཐུགས་ཀའི་ཧཱུཾ་ལས་འོད་ཟེར་འཕྲོས་པས་སྟ་གོན་གྱི་
ལྷའི་ཐུགས་ཀ་ནས་ཡེ་ཤེས་ཀྱི་སྲད་བུ་དཔག་ཏུ་མེད་པར་བྱོན། དམ་ཚིག་གི་སྲད་བུ་ལ་ཐིམ། ཛཿཧཱུཾ་བཾ་ཧོཿ། ཞེས་བྱིན་གྱིས་བརླབས་ནས། སློབ་མའི་དཔུང་པ་གཡོན་པར་ཀཱཾ་ཀ་ནི་བརྗོད་ཅིང་བཅིངས་ལ་བུམ་ཆུས་བྱུག་ཅིང༌། ཨོཾ་བུདྡྷ་མཱ་ཏི་རཀྵ་རཀྵ་སྭཱཧཱ། སརྦ་བུདྡྷ་ཨ་དྷིཥྛ་ན་ཨ་དྷིཥྛི་ཏེ་སྭཱཧཱ། དྷ་ར་ཀ་སྱ་རཀྵ་རཀྵ་ཀུ་རུ་ཀུ་རུ་སྭཱཧཱ། ཞེས་བརྗོད། བཅུ་གཉིས་པ་ཀུ་ཤ་བྱིན་པ་ནི། དྷི་དང་ཧ་ལས་བྱུང་བའི་ཀུ་ཤ་སྔོ་ལྗང་རྩ་བ་དང་རྩེ་མོ་མ་ཉམས་པ། རྨི་ལམ་མི་འཁྲུགས་ཞིང་གསལ་པོ་འབྱུང་བའི་ནུས་ལྡན་དུ་བྱིན་གྱིས་བརླབས་ལ། ཀཱཾ་ཀ་ནིའི་མཐར་དྷི་ཞེས་བརྗོད་ཅིང་ཆུང་བ་ལག་པ་གཡས་པ་དང༌། ཧ། ཞེས་བརྗོད་ཅིང་ཆེ་བ་གཡོན་དུ་སྦྱིན་ནོ། །བཅུ་གསུམ་པ་ཟབ་མོའི་ཆོས་བཤད་པ་ནི། འདི་ལ་གསན་པས་ཁྱབ་པར་གདའ། །འཇིག་རྟེན་དུ་ནི་ཀུན་མཁྱེན་རྣམས། །རེས་འགའ་འབྱུང་ཞིང་མི་འབྱུང་སྲིད། །ཨུ་དུམ་ཝཱ་རའི་མེ་ཏོག་བཞིན། །བརྒྱ་ལམ་ན་ནི་རེས་འགའ་འབྱུང༌། །གང་ཞིག་སེམས་ཅན་མཉམ་མེད་དོན། །མྱ་ངན་མི་འདའ་བྱེད་པར་ནུས། །གསང་སྔགས་སྤྱོད་པ་མཉམ་མེད་དོན། །དེ་བས་ཀྱང་ནི་ཤིན་ཏུ་དཀོན། །བསྐལ་པ་བྱེ་བ་དུ་མ་རུ། །སྔོན་ཆད་སྡིག་པ་ཅི་མཆིས་པ། །དཀྱིལ་འཁོར་འདི་འདྲ་མཐོང་བ་ཡིས། །དེ་དག་ཐམས་ཅད་ཟད་འགྱུར་ན། །གྲགས་པ་མཐའ་ཡས་གསང་སྔགས་ཀྱི། །སྤྱོད་ཚུལ་གནས་ན་སྨོས་ཅི་དགོས། །སྐྱོབ་པའི་གསང་སྔགས་བཟླས་ན་ནི། །
གོང་འཕང་བླ་ན་མེད་པ་འགྱུར། །སྤྱོད་མཆོག་འདི་ལ་གང་རྣམས་ཀྱིས། །བློ་གྲོས་ཤིན་ཏུ་དྲི་མེད་པ། །དེ་རྣམས་ཀྱིས་ནི་སྡུག་བསྔལ་ཀུན། །འབྱུང་བའི་ངན་འགྲོ་ཡང་དག་བཅད། །བདག་ཉིད་ཆེན་པོ་ཁྱེད་རྣམས་ཀྱིས། །དེ་རིང་རྙེད་པ་མཉམ་མེད་རྙེད། །གང་གིས་ཁྱེད་རྣམས་རྒྱལ་བ་ཀུན། །བདག་ཉིད་ཆེན་པོ་སྲས་བཅས་ཀྱི། །བསྟན་པ་འདི་ལ་ཁྱེད་རྣམས་ཀྱིས། །ཡོངས་སུ་བཟུང་སྟེ་སྐྱེ་འགྱུར་བ། །དེ་ཡིས་ཁྱེད་རྣམས་ཐེག་ཆེན་ལས། །ལེགས་པར་སྐྱེ་བ་ཉིད་དུ་འགྱུར། །ཐེག་པ་ཆེན་པོ་ཆེར་འབྱུང་བའི། །ལམ་མཆོག་འདི་ནི་དཔལ་དང་ལྡན། །གང་ལ་ཁྱེད་རྣམས་འགྲོ་འགྱུར་བ། །དེ་བཞིན་གཤེགས་པར་འགྱུར་བ་ཡིན། ཞེས་བརྗོད་ཅིང་དོན་བཤད། བཅུ་བཞི་པ་རྨི་ལམ་བརྟག་པ་ནི། བུ་ཀྱེ་སང་ནི་དཀྱིལ་འཁོར་དག །མཐོང་བར་འགྱུར་གྱིས་ཉོལ་ཅིག་དང༌། །རྨི་ལམ་མཐོང་བ་གང་ཡིན་པ། །དེ་ཀུན་ང་ལ་དྲང་པོར་སྨོས། །ཞེས་བརྗོད་ཅིང་སྔར་བྱིན་པའི་ཤུ་ཀ་ཆེ་བ་གདན་དང༌། ཆུང་བ་སྔས་ཀྱི་ཚུལ་དུ་གྱིས་ལ་ཉོལ་ཅིག་བྱས་ལ། དྲན་པ་གསུམ་གྱིས་གདམས་པ་བྱ་སྟེ། མི་མ་ཡིན་གྱི་བར་ཆད་མི་འབྱུང་བར་བྱ་བའི་དོན་དུ་རང་ལུས་མི་འཁྲུགས་པར་དྲན་པ་དང༌། གཉིད་ཀྱི་མུན་པས་བྱིང་བ་དང་མྱོས་པར་མི་འགྱུར་བའི་དོན་དུ་སྙིང་གར་ཟླ་བའི་དཀྱིལ་འཁོར་དྲི་མ་མེད་པ་དང༌། མ་འོངས་པའི་དངོས་པོ་ད་ལྟར་ཤེས་པར་འགྱུར་བའི་དོན་དུ་ཟླ་བའི་དཀྱིལ་འཁོར་གྱི་སྟེང་དུ་རང་སེམས་ལྷའི་ས་བོན་ཧཱུཾ་དུ་དྲན་པར་བྱས་ནས་ཉོལ་ཅིག །རྨི་ལམ་གང་མཐོང་བ་
སྔ་དྲོ་ང་ལ་སྨྲོས་ཤིག །ཅེས་བརྗོད། རྨི་ལམ་ངན་ན་བསྲུང་བ་དང༌། བཟང་ན་སྤྲོ་བ་སྐྱེད། དེ་ནས་རྗེས་ཆོག་ཏུ་བཤད་པ་ལྟར་མཆོད་བསྟོད་བྱ། ནོངས་པ་བཟོད་པར་གསོལ། དངོས་གྲུབ་བླངས་ལ། ཨོཾ་ཁྱེད་ཀྱིས་སེམས་ཅན་དོན་ཀུན་མཛད། །རྗེས་སུ་མཐུན་པའི་དངོས་གྲུབ་སྩོལ། །སངས་རྒྱས་ཡུལ་དུ་གཤེགས་ནས་ཀྱང༌། །སླར་ཡང་འབྱོན་པར་མཛད་དུ་གསོལ། །ཞེས་ལན་གསུམ་དང༌། ཨོཾ་བཛྲ་མུཿ ཞེས་བརྗོད་ནས། སེ་གོལ་གཏོགས་ལ། ལྷ་རྣམས་སང་འབྱོན་པར་བཞེད་བཞིན་པའི་སྒོ་ནས་གཤེགས་པར་བསམ། བཀྲ་ཤིས་ཀྱི་མཐའ་བརྟེན་པ། ནུབ་གཉིས་པ་སྟ་གོན་གྱི་ཆོ་གའོ། །གསུམ་པ་དངོས་གཞིའི་ཆོ་ག་ལ། རྡོ་རྗེ་སློབ་དཔོན་གྱི་ལས་དང༌། སློབ་མ་གཞུག་པའི་བྱ་བ་གཉིས། དང་པོ་ལ་དཀྱིལ་འཁོར་བྲི་བ་དང༌། སྒྲུབ་པའི་ཆོ་ག་གཉིས། དང་པོ་ནི་ཐིག་གི་བྲི་བ་ལ། ཤར་ནུབ་མ་ནོར་ཚངས་ཐིག་གདབ། །དེ་ཡི་ཕྱེད་བཙལ་མཚན་མ་བྱ། །དེ་སྟེང་ཤར་ནུབ་མཐོ་དེའི་བར། །སླར་ཡང་རྟགས་བྱ་དེ་སྟེང་གཟུང༌། །མཐོ་དེའི་ཚད་ཀྱི་ཐིག་སྐུད་ཀྱིས། །གཡས་གཡོན་གཉིས་སུ་བྱ་རྗེས་བཙལ། །དེ་སྟེང་ཚངས་ཐིག་གཉིས་པ་གདབ། །ཤར་ནུབ་ལྟ་བུར་མཚན་མ་བྱ། །དེ་དང་དབུས་བར་སྲད་བུ་ནི། །ཕྱོགས་བཞི་མཚན་མའི་སྟེང་གཟུང་ནས། །ཟུར་བཞིར་བྱ་རྗེས་བཙལ་བར་བྱ། །དེ་སྟེང་ཟུར་ཐིག་གཉིས་བཏབ་ནས། །དཀྱིལ་འཁོར་ཆེ་ཆུང་གང་བྱེད་ཀྱི། །མདའ་ཐིག་གྲུ་བཞིར་གདབ་པར་བྱ། །ཟུར་བཞི་གསུམ་གཏུབས་རིམ་པ་གསུམ། །ཕྱི་མ་ཕྱེད་དུ་བགོ་བར་བྱ། །ཆ་ཆེན་གཉིས་ནི་འབྱུང་བ་འགྱུར། །ནང་མ་དབུས་དོར་མཐའ་གཉིས་གདབ། །ཕྱི་མ་ཕྱེད་གདབ་དེའི་ཕྱིའང་ཕྱེད། །རྩིག་པ་
འདོད་སྣམ་ཕ་གུ་དང༌། །དྲ་ཕྱེད་ཤར་བུ་མདའ་ཡབ་འབྱུང༌། །དབུས་སུ་བརྒྱད་ཆ་ཕྱིས་བགོའོ། །སྒོ་དེའི་བཞི་ཆ་ཆ་ཆུང་ཡིན། །ཕྱིས་པའི་རྩ་ཐིག་རྩེ་མོ་ནས། །གྱེན་དུ་ཆ་ཆུང་བཞི་བཏབ་ལ། །འཕྲེད་དུ་གཉིས་དང་སྟེང་དུ་གཉིས། །སྒོ་ཁྱུད་སྒོ་འགྲམ་སྒོ་ལོགས་འགྲུབ། །དེ་ཕྱིར་ཆ་ཆུང་རེ་རེའི་སར། །འདོད་ཡོན་སྣམ་བུའི་ཕྱི་ཐིག་ནས། །མདའ་ཡབ་རྩེ་རེག་ཐིགས་གསུམ་བཏབ། །མུན་སྣམ་ཀ་བ་ཀ་རྒྱན་ཡིན། །དེ་བཞིན་གཡོན་ལའང་ཤེས་པར་བྱ། །དེ་སྟེང་རྟ་བབས་སྒོ་ཚད་གཉིས། །སྒོ་ཚད་དང་པོ་ཆ་བཞིར་བགོ །རྟ་བབས་སྣམ་བུ་བཞི་མ་འབྱུང༌། །ཕྱི་མ་དབུས་དོར་མཐའ་གཉིས་གདབ། །པདྨ་ཆོས་འཁོར་གདུགས་ཀྱི་ས། །རྟ་བབས་སྣམ་བུའི་ཕྱིར་མཐའ་ནི། །དང་པོ་ཀ་རྒྱན་མཐའ་དང་མཉམ། །དེ་ནས་ཆ་ཕྲན་རེ་རེས་ཐུང༌། །པདྨ་ཆོས་འཁོར་གདུགས་སོགས་ནི། །དཀྱིལ་འཁོར་སྤྱི་དང་འདྲ་བར་བྱ། །གུ་ཎ་ཧ་རིའི་བསྐོར་ཚུལ་ནི། །སྣམ་བུ་གཉིས་པའི་ཕྱི་ཐིག་དང༌། །ཚངས་ཐིག་འཛོམ་པ་ནས་བཟུང་སྟེ། །ཆ་ཕྲན་གཉིས་ཀྱི་དབུས་མ་བསྐོར། །སྣམ་བུ་དང་པོའི་ཕྱི་ཐིག་དང༌། ཚངས་ཐིག་འཛོམ་པའི་གཡས་གཡོན་ཏུ། །ཆ་ཕྲན་གཉིས་རེ་ཕྱིན་པ་ནས། །ཆ་ཕྲན་གཅིག་གིས་གཡས་གཡོན་བསྐོར། །དེ་རྣམས་ནང་དུ་ཕྱེད་རེ་བསྐོར། །གཡས་གཡོན་རྭ་ཡིས་བསྐོར་ཚུལ་ནི། །ཚངས་ཕྱིར་གསུམ་དང་མདའ་ཕྱིར་གཅིག །ཕྱིན་ཏེ་ཀ་རྒྱན་རྩེ་ནས་བསྐོར། །དེ་ནས་འཕྲེད་གཉིས་གྱེན་དུ་གཅིག །ཕྱིན་ཏེ་སྔ་མའི་ཚད་ཀྱིས་བསྐོར། །དེ་ཡི་ཕྱི་རུ་ཆ་ཕྲན་གཉིས། །པདྨའི་ཁོར་ཡུག་བསྐོར་བར་བྱ། རྡོ་ར་ཆ་ཕྲན་གཉིས་པ་དང༌། མེའི་ས་ཆ་ཆེན་གཅིག་གིས་བསྐོར། །རྩ་ཐིག་
ནང་གི་བྱ་ཚུལ་ནི། །དབུས་ནས་ཟླུམ་པོར་བསྐོར་བྱས་ལ། །དེའི་ནང་མ་ཆ་གསུམ་བགོ །ནང་གི་གསུམ་ཆ་ལྟ་བར་བསྐོར། །དེ་ཡི་ཕྱི་ནས་ཆ་ཕྲན་ཕྱེད། །བསྐོར་བ་དེ་ནི་མུ་ཁྱུད་དོ། །ཕྱི་མ་གཉིས་པོ་པདྨ་སྟེ། །གཅུས་ནས་ཐིག་གདབ་འདབ་བརྒྱད་བྲི། ཞེས་པ་ལྟར་རོ། །དེ་ལྟར་ལས་ཀྱི་ཐིག་གིས་ཆ་དབྱེ་བའི་རྗེས་ཐོགས་སུ། །དཀྱིལ་འཁོར་དབུས་སུ་རས་ལ་སོགས་པའི་གཞིའི་སྟེང་དུ། རྡུལ་ཚོན་སྔོན་པོ་ལ་ཧཱུཾ། དཀར་པོ་ལ་ཨོཾ། སེར་པོ་ལ་ཏྲིཾ། དམར་པོ་ལ་ཧྲཱིཿ ལྗང་ཁུ་ལ་ཨ་བྲིས་ལ་ཕྱོགས་མ་ནོར་བར་བཀོད། རས་ཀྱི་ཐིག་སྐུད་ཁ་དོག་ལྔ་པ་རིང་བ་དཀྱིལ་འཁོར་གྱི་ཉིས་འགྱུར་སྦོམ་ཕྲ་སྒོའི་ཉི་ཤུ་ཆའི་ཚད་དང་ལྡན་པ་རྣམས་རྡུལ་ཚོན་སོ་སོའི་སྟེང་དུ་ཁ་དོག་དང་མཐུན་པ་ཆུན་པོར་གཅུས་ལ་བཞག་པའི་མདུན་དུ་ཉེར་སྤྱོད་ལྔ་བཤམས་ལ། སློབ་དཔོན་རྡོ་རྗེ་དྲིལ་བུ་འཛིན་པས། ཨོཾ་ཨ་མྲྀ་ཏེ་ཧཱུཾ་ཕཊ། ཞེས་བརྗོད་པས་བགེགས་བསངས། སྭབྷཱ་ཝས་སྟོང་པར་སྦྱངས། སྟོང་པའི་ངང་ལས་དབུས་དང་ཕྱོགས་ཀྱི་ཐིག་སྐུད་རྡུལ་ཚོན་རྣམས་པད་ཟླའི་སྟེང་དུ་ཧཱུཾ་ཨོཾ་ཏྲཾ་ཧྲཱིཿཨ་རྣམས་ཡོངས་སུ་གྱུར་པ་ལས། དབུས་སུ་མི་བསྐྱོད་པ་སྔོན་པོ་གཡས་ས་གནོད་དང༌། གཡོན་མཉམ་བཞག་གི་ཕྱག་རྒྱ་ཅན། ཤར་དུ་རྣམ་སྣང་དཀར་པོ་བྱང་ཆུབ་མཆོག་གི་ཕྱག་རྒྱ་ཅན། ལྷོར་རིན་འབྱུང་སེར་པོ་གཡས་མཆོག་སྦྱིན་དང༌། གཡོན་མཉམ་བཞག་གི་ཕྱག་རྒྱ་ཅན། ནུབ་ཏུ་འོད་དཔག་མེད་དམར་པོ་ཏིང་ངེ་འཛིན་གྱི་ཕྱག་རྒྱ་ཅན། བྱང་དུ་དོན་གྲུབ་ལྗང་ཁུ་གཡས་སྐྱབས་སྦྱིན་གཡོན་མཉམ་བཞག་གི་ཕྱག་རྒྱ་ཅན། ཐམས་ཅད་ཀྱང་དར་གྱི་ན་བཟའ་དང༌།
རིན་པོ་ཆེའི་རྒྱན་གྱིས་བརྒྱན་པ། མཚན་བཟང་པོ་སུམ་ཅུ་རྩ་གཉིས་དང་དཔེ་བྱད་བཟང་པོ་བརྒྱད་ཅུས་སྤྲས་པ། རྡོ་རྗེ་སྐྱིལ་ཀྲུང་གིས་བཞུགས་པ། འོད་དང་འོད་ཟེར་འཕྲོ་བའོ། །དེ་ནས་མཆོད་པ་བྱིན་གྱིས་རླབས་ལ། པད་སྐོར་སྔོན་དུ་འགྲོ་བས་སོ་སོའི་ཕྱག་རྒྱ་བཅས་ཏེ། ཨོཾ་སརྦ་ཏ་ཐཱ་ག་ཏ་ཨརྒྷཾ་ནས ཤཔྟ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུཾ། ཞེས་བརྗོད་ལ་དྲིལ་བུ་དཀྲོལ་ཞིང༌། ཆོས་སྐུ་ནམ་མཁའ་བཞིན་དུ་དབྱེར་མེད་ཀྱང༌། །གཟུགས་སྐུ་འཇའ་ཚོན་བཞིན་དུ་སོ་སོར་གསལ། །ཐབས་དང་ཤེས་རབ་མཆོག་ལ་མངའ་བརྙེས་པའི། །རིགས་ལྔ་བདེ་བར་གཤེགས་ལ་ཕྱག་འཚལ་ལོ། །ཞེས་པས་བསྟོད། རང་གི་མིག་གཉིས་ཛ་ལས་ཉི་མ་དང་ཟླ་བར་བསམ་ལ། དིཔྟ་དིཥྟི་ཨཾ་ཀུ་ཤ་ཛཿ ཞེས་པའང་མིག་ལ་བཀོད་དེ། འབར་བའི་ལྟ་སྟངས་ཀྱིས་སངས་རྒྱས་ཐམས་ཅད་ཀྱི་ཐུགས་ཀ་ནས་ཡེ་ཤེས་ཀྱི་ཐིག་ཚོན་རིགས་ལྔའི་རང་བཞིན་སྤྱན་དྲངས་ལ་བསྟིམ་ནས་ཨོཾ་བཛྲ་ཙི་དྲ་ས་མ་ཡ་ཧཱུཾ ཞེས་ཉེར་གཅིག་བརྗོད་པས་བྱིན་གྱིས་རླབས་ཏེ། སླར་ཡང་མཆོད་བསྟོད། ཞུ་བ་ལས་བྱུང་པའི་རིགས་ལྔའི་རྡུལ་ཕྲ་རབ་ཀྱི་རང་བཞིན་གྱི་རྡུལ་ཚོན་དང་ཡེ་ཤེས་ཀྱི་སྲད་བུར་གྱུར་བར་བསམ་ཞིང༌། ཀཱཾ་ཀ་ནི ལན་གསུམ་བཟླ། དེ་ནས་སློབ་མ་དང་ལྷན་ཅིག་ཏུ། ཨོཾ་ཨ་ནྱོ་ནྱ་ཨ་ནུ་ག་ཏེ། སརྦ་དྷརྨ་སྥ་ར་སྥ་ར། ཨ་ནུ་པྲ་བིཥྟ་སརྦ་དྷརྨ་ཨ་དྱན་ཏ་ཨ་ནུ་པྲ་བིཥྟ་སརྦ་དྷརྨ། ཞེས་བརྗོད་ཅིང་ཐིག་སྐུད་རྣམས་དང་པོ་སོ་སོར་བསྒྲིལ། དེ་ནས་གཅིག་ཏུ་
བསྒྲིལ་ལ་ཡང་ཀཱཾ་ཀ་ནི། བཟླ་ཞིང་དྲི་བཟང་གིས་ཕྱུག །རྡོ་རྗེ་བསྡམས་པའི་ཕྱག་རྒྱས་བཟུང་ལ། ཨོཾ་བཛྲ་ས་མ་ཡ་སུ་ཏྲཾ་མ་ཏི་ཀྲ་མ་ཧཱུཾ། ཞེས་བརྒྱད་ཀྱིས་བྱིན་གྱིས་རླབས་སོ། །དེ་ནས་རྡོ་རྗེ་དྲིལ་བུ་དང་ཐིག་སྐུད་བཟུང་ལ། རང་ཉིད་དཀྱིལ་འཁོར་གྱི་བདེན་བྲལ་དང༌། གྲོགས་དབང་ལྡན་དུ་གནས་པས། ཧཱུཾ་བཛྲ་ཨཀྵོ་བྷྱ་ཨ་ཧཾ། ཞེས་པས་སློབ་དཔོན་རང་ཉིད་མི་འཁྲུགས་པའི་ང་རྒྱལ་གཟུང༌། མངྒ་ལ་དེ་བི་ཞེས་པས་གྲོགས་བཀྲ་ཤིས་ཀྱི་ལྷ་མོར་མོས་ལ། ཛཿཛཿཛཿ ཞེས་བརྗོད་ཅིང་ཐིག་སྣ་གཏད། དེས་ཀྱང་ཛཿཛཿཛཿ ཞེས་བརྗོད་ཅིང་བླང༌། གཉིས་ཆར་གྱི་གཡོན་པའི་ཁུ་ཚུར་དྲིལ་བུ་དང་བཅས་པས་ཐིག་སྐུད་ལྟེ་བའི་ཐད་ཀར་བཟུང་ལ། ཕྱོགས་ཐམས་ཅད་མཉམ་པ་ཉིད་དུ་བསམས་ཏེ། སློབ་དཔོན་ནུབ་དང་སློབ་མ་ཤར་དུ་སོང་ལ། ཨོཾ་བཛྲ་ས་མ་ཡ་སུ་ཏྲཾ་མ་ཏི་ཀྲ་མ་ཧཱུཾ། ཞེས་བརྗོད་ཅིང༌། སློབ་དཔོན་གཡས་རྡོ་རྗེ་དང་བཅས་པས་ཐིག་སྐུད་ཀྱི་དབུས་ནས་གཅུས་ཏེ་སྒྲ་དང་ལྡན་པར་གདབ་ཅིང༌། དེའི་ཚེ་སློབ་དཔོན་གྱི་ངག་ནས་བརྗོད་པ་བཞིན་ནམ་མཁའ་ལས་ཀྱང་སྒྲ་བྱུང་བར་བསམས་ལ། ནམ་མཁའ་གང་བའི་དེ་བཞིན་གཤེགས། །འགྲོ་དོན་མཛད་དུས་འདི་ལགས་ན། ཁྱེད་རྣམས་འདིར་ནི་གཤེགས་གསོལ་བར། །ཐིག་སྐུད་སྒྲ་ཡིས་བསྐུལ་མ་འདེབས། །ཞེས་བརྗོད་ལ། ནམ་མཁའ་དང་ས་གཞི་ལ་ཚངས་ཐིག་དང་པོ་གདབ། དེ་བཞིན་དུ་སློབ་དཔོན་ལྷོ་དང་སློབ་མ་བྱང་དུ་གནས་པས་ཚངས་ཐིག་གཉིས་པ་གདབ། སློབ་དཔོན་མེ་དང་སློབ་མ་དབང་ལྡན་དུ་གནས་པས་ཤར་གྱི་རྩ་ཐིག་དང༌། སློབ་དཔོན་རླུང་དང་
སློབ་མ་བདེན་བྲལ་དུ་གནས་པས་ནུབ། སློབ་དཔོན་རླུང་མཚམས་དེ་ཉིད་དང་སློབ་མ་དབང་ལྡན་དུ་གནས་པས་བྱང༌། སློབ་དཔོན་མེ་དང་སློབ་མ་བདེན་བྲལ་དུ་གནས་པས་ལྷོ། སློབ་དཔོན་མེ་མཚམས་ཉིད་དུ་བཞུགས་ནས། སློབ་མ་རླུང་དུ་གནས་པས་ཟུར་ཐིག་དང་པོ་དང༌། སློབ་དཔོན་བདེན་བྲལ་དང་སློབ་མ་དབང་ལྡན་དུ་ཕྱིན་ལ་ཟུར་ཐིག་གཉིས་པ་གདབ་སྟེ། དཀྱིལ་འཁོར་སྤྱི་ལས་འབྱུང་བ་ལྟར། སློབ་དཔོན་དབང་ལྡན་དུ་མི་འགྲོ་ཞིང་སློབ་མ་མེ་མཚམས་མི་འགྲོ་བའི་སྒོ་ནས་ཡེ་ཐིག་འཁྲུལ་མང་དུ་བཏབ་ལ། དེ་ནས་སློབ་དཔོན་ནུབ་སྒོར་ཕྱིན་ནས་རྡོ་རྗེ་གཙུག་གཏོར་གྱི་ཕྱག་རྒྱ་བཅས་ནས། ཨོཾ་བཛྲ་བཻ་ག་ཀྲ་མ་ཧཱུཾ་ཞེས་བརྗོད་པའི་ཡེ་ཐིག་ནམ་མཁར་བཏེག་ལ། དཀྱིལ་འཁོར་གྱི་དབུས་སུ་འཁོད་དེ་རྡོ་རྗེ་རིགས་ཀྱི་ཁྲོ་བོའི་ང་རྒྱལ་དང་ལྡན་པས། མིག་གཉིས་ཧྲི་ལས་ཉི་མ་དང་ཟླ་བ། མིག་འབྲས་ཧཱུཾ་ལས་ཁྲོ་བོའི་རྡོ་རྗེར་མོས་ལ། ཀྲོ་དྷ་ཏིཥྛ་ཧྲཱིཿ ཞེས་བརྗོད་ལ་སྒོ་བཞིར་བལྟས་པས་ཐར་པའི་སྒོའི་བར་ཆད་བསལ་བར་བསམས་ལ། སྒོ་ཕྱི་ནང་གི་རྩ་ཐིག་དབྱེའོ། །ཡེ་ཤེས་ཀྱི་ཐིག་གིས་བྱིན་གྱིས་རླབས་པའོ། །དེ་ནས་སློབ་དཔོན་དབུས་སུ། འདུག་ནས་གཡོན་པའི་ཁུ་ཚུར་གྱིས་ཚོན་བླངས་ལ། ཨོཾ་བཛྲ་ཙི་ཏྲ་ས་མ་ཡ་མ་ཏི་ཀྲ་མ་ཧཱུཾ། ཞེས་བརྗོད་ཅིང་རྩིག་པ་རིམ་པ་ལྔ་ཕྱི་ནས་རིམ་པ་བཞིན་དཀར་སེར་དམར་ལྗང་སྔོ་བའི་པཉྩ་རེ་ཁ་ལྔ་ལྡན་དུ་དབང་ལྡན་ནས་གཡས་བསྐོར་གྱིས་སྒོ་ཚང་གཅིག་གི་བར་དུ་བྲི། དེ་ལ་མཆོད་ནས་རིན་པོ་ཆེའི་སྣོད་བཀབ་ལ་སྟེང་དུ་རྡོ་རྗེ་བཞག་ལ་བསྲུང༌། ཕྱིས་སྦྲེལ་རན་པ་དང་སྣོད་བསལ་ལ། ངན་ན་ཕྱིར་བཟློག་བྱ། བཟང་ན་སྤྲོ་བ་བསྐྱེད་དོ། །དེ་ནས་སློབ་མ་སོགས་ཀྱིས་
བྲིས་སྟེ། ནང་གི་པདྨ་འདབ་བརྒྱད། ཕྱོགས་བཞི་དམར་ལ་མེ་རླུང་སེར། །དབང་ལྡན་སྔོ་ལ་བདེན་བྲལ་ལྗང༌། ཞེས་སོགས་ཀྱི་ལུགས་ལྟར་བྲིས་ལ། དབུས་སུ་ལྷ་མཚན་རྡོ་རྗེ་སྔོན་པོ། ཤར་དུ་དཔལ་བེའུ་དཀར་པོ། ལྷོར་པདྨ་དམར་པོ། ནུབ་ཏུ་གདུགས་སྔོན་པོ། བྱང་དུ་དུང་ལྗང་གུ། ཤར་ལྷོར་འཁོར་ལོ་དཀར་པོ། ལྷོ་ནུབ་ཏུ་རྒྱལ་མཚན་སྔོ་སྐྱ། ནུབ་བྱང་དུ་བུམ་པ་དམར་སྐྱ། བྱང་ཤར་དུ་གསེར་ཉ་ལྗང་གུ་སྟེ་ལྷ་སོ་སོའི་ཁ་དོག་མཚོན་པར་བྱ་བའི་ཕྱིའི་མུ་ཁྱུད་རྡོ་རྗེའི་གདུང་ཟླུམ་སྔོན་པོ་ལ་རྡོ་རྗེ་སེར་པོས་མཚན་པ་བྲི། དཀྱིལ་འཁོར་ཕྱོགས་མདོག །འདོད་ཡོན་དམར་པོ་ཕ་གུ་སེར། དྲ་ཕྱེད་གཞི་སྔོན་པོ་ལ་ཕྲེང་བ་ཅི་མཛེས། མདའ་ཡབ་དང་པུ་ཤུ་ཁྲ་བོ། རྟ་བབས་ཀྱི་ཀ་བ་ཕྱོགས་མདོག །ཀ་རྒྱན་མཛེས་ཚོན་རྟ་བབས་ཀྱི་སྣམ་བུ་དང་པོ་དམར་པོ། གཉིས་པ་སྔོན་པོ། གསུམ་པ་ལྗང་ཁུ། བཞི་པ་སེར་པོ། གླང་པོའི་རྒྱབ་ཀྱི་ནང་སྔོན་པོ་ལ་དྲ་ཕྱེད་སྣ་ཚོགས། པདྨ་དཀར་དམར། ཆོས་འཁོར་སེར་པོ། གདུགས་སྣ་ཚོགས། རྡོ་རྗེའི་རྭ་རྣམས་ཕྱོགས་མདོག །ཁྱམས་ལྗང་ཁུ། ཁོར་ཡུག་གི་པདྨ་ཁ་དོག་སྣ་ཚོགས། རྡོ་རྗེའི་གཞི་སྔོན་པོ་ལ་རྡོ་རྗེ་སེར་པོ་དེའི་ཕྱི་རོལ་མེ་རི་ཁ་དོག་སྣ་ཚོགས་པ་བྲི་སྟེ། དེ་ལྟར་བྲི་བ་རྣམས་ཚར་པ་དང༌། ཐིག་ཚོན་གྱི་ལྷ་ལ་མཆོད་བསྟོད་བྱས་ནས་གཤེགས་སུ་གསོལ་བ་ནི་ཚོན་གྱིས་བྲྀ་བ་སྟེ་དཀྱིལ་འཁོར་བྲྀ་བའི་ཆོ་གའོ། །གཉིས་པ་དཀྱིལ་འཁོར་བསྒྲུབ་པ་ནི། བུམ་པ་འབུལ་བ་སྔོན་དུ་སོང་ནས། རྡུལ་ཚོན་གྱི་མཐར་དྲི་བཟང་པོས་སྦགས་པའི་ཏིལ་དཀར་པོའི་མར་ཁུས་ཁོ་ར་ཁོར་ཡུག་ཏུ་ཕྱེ་མ་མེད་པར་བྱུགས་ལ། མཐའ་
བསྐོར་དུ་མཆོད་པ་དང་གཏོར་མ་དང་འོག་ཏུ་དགོས་པའི་བུམ་པ་ལ་སོགས་པ་རྣམས་ཀྱང་ཚང་བར་བཤམས། དེ་ནས་དཔོན་སློབ་རྣམས་སྟན་ལ་འཁོད་དེ་མཆོད་པ་བྱིན་རླབས་དང༌། སྐྱབས་འགྲོ་ནས་བརྩམས་ཏེ་བདག་བསྐྱེད་རྫོགས་པར་བྱ། བུམ་པ་བཟླ་བ་ནི་སྟ་གོན་གྱི་སྐབས་སུ་བསྒྲུབས་ཟིན་པས་ནུབ་དང་པོ་ལ་མི་དགོས་ལ། སྒྲུབ་མཆོད་སྦྲེལ་མར་བྱེད་ན་འདིའི་སྐབས་སུ་བྱ་ཞིང༌། དེ་ནས་མདུན་བསྐྱེད་སྒྲུབ་པའི་ཕྱིར། རྡུལ་ཚོན་གྱི་དཀྱིལ་འཁོར་བསངས་སྦྱངས་ནས་བརྩམས་ཏེ། བདག་གཙོ་བོ་དང་ཐ་མི་དད་ཀྱི་བར་བྱས། གནས་གསུམ་བྱིན་གྱི་རླབས་པ་དང་གཤེགས་སུ་གསོལ་བའི་ཡེ་ཤེས་སེམས་དཔའི་ངོ་བོར་བསམ། མི་འཁྲུགས་པ་ལྷ་དགུའི་དཀྱིལ་འཁོར་སྤྱན་དྲངས། མདུན་གྱི་ནམ་མཁར་བཞུགས་པ་ལ་མཆོད་པ་ལྔས་མཆོད། དམ་ཚིག་གི་ཕྱག་རྒྱས་མཉེས་པར་བྱས་ནས་རང་ལ་ཐིམ་པས། ལྷ་དགུ་སོ་སོའི་ཐུགས་ཀར་པད་ཟླའི་སྟེང་དུ་རང་འདྲ་བའི་ཡེ་ཤེས་སེམས་དཔའ་མཚོན་གང་པ་རེ་བསམ། དེ་དག་གི་ཐུགས་ཀར་ཡང་པད་ཟླའི་སྟེང་དུ་རང་རང་གི་གཟུངས་སྔགས་ཀྱི་ཕྲེང་བ་སྦྲུལ་འཁྱིལ་བ་ལྟ་བུ་དེ་ལས་འཕྲོས་པའི་འོད་ཟེར་གྱི་སྤྲོ་བསྡུས་བདག་དང་སེམས་ཅན་ཐམས་ཅད་ཀྱི་སྡིག་སྒྲིབ་བྱང་བར་བསམ་ཞིང༌། གཙོ་བོ་ལ་ཀཱཾ་ཀ་ནི་དང༌། འཁོར་རྣམས་ལ་རང་རང་གི་སྔགས་ཅི་ནུས་བཟླས་པའི་མཐར། རྟེན་དང་བརྟེན་པར་བཅས་པའི་དཀྱིལ་འཁོར་པ་ཐམས་ཅད་གཤེགས་གསོལ་མ་བྱས་ཀྱི་བར་དུ་བརྟན་པར་བཞུགས་སུ་གསོལ། བརྟན་པར་བཞུགས་ནས་ཀྱང་བཅོམ་ལྡན་
འདས་ངན་སོང་ཐམས་ཅད་ཡོངས་སུ་སྦྱོང་བ་ཐུགས་རྗེའི་བདག་པོ་མི་འཁྲུགས་པའི་ལྷ་ཚོགས་འཁོར་དང་བཅས་པས་བདག་སོགས་མཐའ་ཡས་པའི་སེམས་ཅན་ཐམས་ཅད་ཀྱི་ལས་ངན་སྡིག་སྒྲིབ་ཐམས་ཅད་ཡོངས་སུ་སྦྱོང་བ་དང༌། མྱུར་དུ་འཁོར་བ་དང་ངན་སོང་ནས་འདོན་པའི་འཕྲིན་ལས་མཛོད་ཅིག །ཅེས་བརྗོད་ལ་དཀུ་གཡོན་དུ་སེ་གོལ་གཏོགས། །བདག་ཉིད་གཙོ་བོ་ལས་ཕྱེ་ནས་ཤར་སྒོར་འཁོད་དེ་མཆོད་བསྟོད་དང༌། གཏོར་མ་དང༌། བདག་འཇུག་རྣམས་ཉུང་ངུ་རྣམ་གསལ་ཉིད་ནས་འབྱུང་བ་ལྟར་རྫོགས་པར་བྱས་ལ་གྲུབ་ན་དཀྱིལ་འཁོར་མཆོད་པའི་ཕྱིར་ཞི་བའི་སྦྱིན་སྲེག་གི་ཆོ་ག་ལག་ལེན་དུ་ཚུལ་བཞིན་བྱ་སྟེ་དཀྱིལ་འཁོར་སྒྲུབ་པའོ། །གཉིས་པ་སློབ་མ་འཇུག་པའི་བྱ་བ་ནི། མཎྜལ་འབུལ་བ་ནས་བརྩམས་ཏེ་རྟོགས་བསྐྱེད་ཀྱི་བར་བདག་འཇུག་བཞིན་བྱས་ལ། མཐའ་རྟེན་གྱི་སྐབས་སུ། ཐོག་མར་ཚིགས་བཅད་དང་སྔགས་རྣམས་སྤེལ་ནས་ཁྲུས་བྱེད་དུ་གཞུག་ཅིང༌། སླར་ཡང༌། རིག་པ་འཛིན་པའི་རྡོ་རྗེ་སློབ་མ་འདི་རྣམས་ཀྱི་སྡིག་པ་དང་སྒྲིབ་པ་ཐམས་ཅད་ཤཱིནྟཾ་ཀུ་རུ་ཡེ་སྭཱཧཱ། དེ་བཞིན་དུ་སྡིག་སྒྲིབ་ཀྱི་ཚབ་ཏུ། ནད་གདོན། ཉེ་བར་འཚེ་བ། དུས་མ་ཡིན་པའི་འཆི་བ། འཁོན་དང་གྲིབ་དང་མི་གཙང་བ། བྱད་དང་བྱུར་དང་སྐལ་བ་ངན་པ། བཀྲ་མི་ཤིས་པ། མཚན་མོ་ནག་མོ། །བདུད་ཀྱི་ཞགས་པ། གཤིན་རྗེའི་ཕོ་ཉ། བགེགས་དང་ལོག་པར་འདྲེན་པའི་གནོད་པ་ཐམས་ཅད། རྒྱལ་པོ་དང་ཐེ་རང་གི་གནོད་པ། ཀླུ་དང་ས་བདག་གིས་གནོད་པ། གཟའ་དང་
རྒྱུ་སྐར་གྱི་གནོད་པ། བཙན་དང་དམུའི་གནོད་པ་ཞེས་ཚན་པ་རེ་རེ་ནས་བཞུག་ཅིང་མཐར། མདོར་ན་མི་མཐུན་པའི་ཕྱོགས་ཐམས་ཅད་ཤཱིནྟཾ་ཀུ་རུ་ཡེ་སྭཱཧཱ། ཞེས་བརྗོད་ཅིང་ཁྲུས་བྱས་ལ། དེ་ནས་བྱབ་པ་ནི། རྨ་བྱའི་མདོངས་ཀྱི་དཀྱིལ་དུ་ཟླ་བ་ལ་ཧཱུཾ་གི་མཐའ་མར་གཟུངས་སྔགས་ཀྱིས་བསྐོར་བར་བསམས་ལ། དེས་སློབ་མ་རྣམས་ཀྱི་ནད་དང་སྡུག་བསྔལ་ཐམས་ཅད་བྱབས་པར་བསམ་ཞིང༌། སྔར་གྱི་ཤཱིནྟཾ་ཀུ་རུའི་ཚབ་ཏུ་ཨ་པ་ན་ཡེ་སྭཱཧཱ། ཞེས་བརྗོད་ཅིང་རྨ་བྱའི་སྒྲོས་བྱབ་བོ། །དེ་ནས་བསྲུང་བ་ནི། ལུས་ཀྱི་གནས་བདུན་ལ་སོགས་པའི་གནས་རྣམས་སུ། རྡོ་རྗེ་རྒྱ་གྲམ་རེ་བཞག་པས། རྡོ་རྗེ་དེ་ལས་རྡོ་རྗེ་དེ་འདྲ་བ་དཔག་ཏུ་མེད་པ་འཕྲོས་ནས་སློབ་མའི་ལུས་གོ་མཚམས་མེད་པའི་རྡོ་རྗེས་བསྡམས་པར་བསམ་ཞིང༌། ཨ་པ་ནའི་ཚབ་ཏུ་རཀྵ་རཀྵ། ཞེས་བརྗོད་ལ། སླར་ཡང་སློབ་མའི་མགོ་བོར་རྡོ་རྗེ་བཞག་ལ། དུས་གསུམ་བདེ་གཤེགས་རྣམས་ཀྱི་བྱིན་རླབས་དང༌། །གསང་སྔགས་རིགས་སྔགས་རྣམས་ཀྱི་ནུས་མཐུ་ཡིས། །འགྲོ་བ་འདི་ལ་བདག་གིས་བསྲུང་ཟིན་གྱིས། །འདི་ལ་སུས་ཀྱང་གནོད་པ་མ་བྱེད་ཅིག །ཅེས་རེ་རེ་ནས་བརྗོད་པའི་མཐར། བཀྲ་ཤིས་ཀྱི་རྫས་རྣམས་བསངས་སྦྱངས་བྱིན་གྱིས་བརླབས་ཏེ། ཨོཾ་ལས་བྱུང་བའི་བཀྲ་ཤིས་ཀྱི་རྫས་བརྒྱད། སློབ་མ་རྣམས་ཀྱི་མི་མཐུན་པའི་ཕྱོགས་ཐམས་ཅད་འཇོམས་ཤིང༌། ཚེ་དང་བསོད་ནམས་དཔལ་དང་འབྱོར་པ་ཐམས་
ཅད་རྒྱས་པའི་ནུས་པ་དང་ལྡན་པར་གྱུར་པར་བསམས་ལ། རྫས་རྣམས་རིམ་པ་བཞིན་དུ་སློབ་མའི་ལག་ཏུ་གཏད་དེ། མེ་ལོང་ཡེ་ཤེས་རྒྱ་མཚོ་ཆེན་པོ་ཡི། ཡེ་ཤེས་རྒྱ་མཚོ་ཉིད་དུ་དག་གྱུར་ཏེ། །རྣམ་དག་ཆོས་ལ་ཐོགས་མེད་ལོངས་སྤྱོད་པའི། །བཀྲ་ཤིས་དེས་ནི་སྒྲིབ་པ་དག་གྱུར་ཅིག །སྔོན་བཅོམ་ལྡན་འདས་ལ་གཟུགས་ཀྱི་ལྷ་མོ་འོད་འཆང་མས་མེ་ལོང་ཕྱག་ཏུ་ཕུལ་བ་ན་བཀྲ་ཤིས་པའི་རྫས་སུ་བྱིན་གྱིས་རླབས་པ་དེ་བཞིན་དུ་དེང་འདིར་ཡང་ཚེ་དང་ལྡན་པ་འདི་རྣམས་མེ་ལོང་གི་རྫས་ལ་བརྟེན་ནས་བཀྲ་ཤིས་པར་གྱུར་ཅིག །དེ་བཞིན་དུ་འོག་མ་རྣམས་ལ་ཡང་འདྲ་བར་བྱས་ལ། གི་ཧཾ་ཐོགས་ལ། གི་ཧཾ་དུག་གསུམ་འཇོམས་པ་ནད་ཀྱི་སྨན། །སྨན་མཆོག་ཆོས་ཉིད་རབ་ཏུ་རྟོགས་གྱུར་ཏེ། །ཉོན་མོངས་ཟུག་རྔུ་མེད་པར་གྱུར་པ་ཡི། །བཀྲ་ཤིས་དེས་ཀྱང་ནད་ཀུན་ཞི་བྱེད་ཤོག །སྔོན་བཅོམ་ལྡན་འདས་ལ་གླང་པོ་ཆེས་སྲུངས་ཀྱིས་གི་ཧཾ་ཕྱག་ཏུ་ཕུལ་བ་ན། སོགས་ཀྱིས་སྦྱིན། ཞོ་ཐོགས་ཏེ། ཞོ་ནི་ཀུན་གྱི་སྙིང་པོར་གྱུར་པ་སྟེ། །སྙིང་པོ་རྣམ་དག་ཡེ་ཤེས་ལེགས་རྟོགས་ནས། །ཡོན་ཏན་ཀུན་གྱིས་དབྱིངས་སུ་གྱུར་པ་ཡི། །བཀྲ་ཤིས་དེས་ཀྱང་དུག་གསུམ་ཞི་བར་ཤོག །སྔོན་བཅོམ་ལྡན་འདས་ལ་ཞིང་བའི་བུ་མོ་ལེགས་སྐྱེས་མས་ཞོ་ཕྱག་ཏུ་ཕུལ་བ་ན། སོགས་ཀྱིས་སྦྱིན། དུར་བ་ཐོགས་ལ། དུར་བས་ཚེ་ནི་འཕེལ་བར་བྱེད་པ་སྟེ། །རྡོ་རྗེ་སེམས་དཔའི་ཚེ་ནི་རབ་བསྒྲུབས་ནས། །ཉོན་མོངས་སྐྱེ་ཤི་རྒྱུན་ཆད་གྱུར་པ་ཡི། །བཀྲ་ཤིས་དེས་ཀྱང་ཚེ་ཡང་འཕེལ་བར་ཤོག །སྔོན་བཅོམ་ལྡན་འདས་ལ་རྩྭ་འཚོང་ཁྱེའུ་བཀྲ་ཤིས་ཀྱིས་རྩྭ་དུར་བ་ཕྱག་ཏུ་ཕུལ་བ་ན།
སོགས་ཀྱིས་སྦྱིན། བིལ་བ་ཐོགས་ལ། བིལ་བ་རྒྱུ་རྐྱེན་འབྲས་བུར་བཅས་པའི་ཆོས། །འཇིག་རྟེན་འཇིག་རྟེན་འདས་པའི་སྤྱོད་པ་ཀུན། །བྱང་ཆུབ་སྙིང་པོ་མཆོག་ཏུ་གྱུར་པ་ཡི། །བཀྲ་ཤིས་དེས་ཀྱང་དོན་ཀུན་གྲུབ་གྱུར་ཅིག །སྔོན་བཅོམ་ལྡན་འདས་ལ་ལྷ་ཚངས་པས་ཤིང་ཐོག་བིལ་བ་ཕྱག་ཏུ་ཕུལ་བ་ན། སོགས་ཀྱིས་སྦྱིན། དུང་ཐོགས་ལ། དུང་ནི་ཆོས་ཀྱི་སྒྲ་རྣམས་སྒྲོགས་པའི་ཚུལ། །ཡེ་ཤེས་རྒྱ་མཚོ་ཉིད་དུ་དག་གྱུར་ཏེ། །ཆོས་རྣམས་མ་འདྲེས་ཡོངས་སུ་སྟོན་པ་ཡི། །བཀྲ་ཤིས་དེས་ཀྱང་ཚིག་ལ་དབང་ཐོབ་ཤོག །སྔོན་བཅོམ་ལྡན་འདས་ལ་ལྷའི་དབང་པོ་བརྒྱ་བྱིན་གྱིས་དུང་དཀར་པོ་གཡས་སུ་འཁྱིལ་བ་ཕྱག་ཏུ་ཕུལ་བ་ན། སོགས་ཀྱིས་སྦྱིན། ལི་ཁྲི་ཐོགས་ལ། ལི་ཁྲི་དམར་པོ་དབང་གི་རང་བཞིན་ཏེ། །ཆོས་རྣམས་མ་ལུས་དབང་དུ་བསྡུས་ནས་ཀྱང༌། །ཆོས་ཀྱི་རྒྱལ་སྲིད་རབ་ཏུ་བརྟན་གྱུར་པའི། །བཀྲ་ཤིས་དེས་ཀྱང་ཁྱོད་སྲིད་བརྟན་གྱུར་ཅིག །སྔོན་བཅོམ་ལྡན་འདས་ལ་བྲམ་ཟེ་སྐར་རྒྱལ་གྱི་བུས་ལི་ཁྲི་ཕྱག་ཏུ་ཕུལ་བ་ན།སོགས་ཀྱིས་སྦྱིན། ཡུངས་ཀར་ཐོགས་ལ། ཡུངས་ཀར་རྡོ་རྗེའི་རིགས་ཏེ་ཐམས་ཅད་དུ། །བགེགས་རྣམས་མ་ལུས་འཇོམས་པར་བྱེད་པ་སྟེ། །མཐུ་སྟོབས་ཡོན་ཏན་ཕུན་སུམ་ཚོགས་པ་ཡི། །བཀྲ་ཤིས་དེས་ཀྱང་བགེགས་རྣམས་ཞི་བར་ཤོག །སྔོན་བཅོམ་ལྡན་འདས་ལ་གསང་བའི་བདག་པོ་ཕྱག་ན་རྡོ་རྗེས་གྲུབ་པའི་རྫས་ཡུངས་ཀར་ཕྱག་ཏུ་ཕུལ་བ་ན། བཀྲ་ཤིས་པའི་རྫས་སུ་བྱིན་གྱི་
རླབས་པ་དེ་བཞིན་དུ། །དེང་འདིར་ཡང་ཚེ་དང་ལྡན་པ་འདི་རྣམས་ཡུངས་ཀར་གྱི་རྫས་ལ་བརྟེན་ནས་བཀྲ་ཤིས་པར་གྱུར་ཅིག །ཅེས་བརྗོད་དོ། །དེ་དག་གིས་གནས་སྐབས་སུ་ཁས་བླངས་པའི་དམ་ཚིག་དང་སྡོམ་པ་བསྲུང་སྙམ་པའི་འདུན་པའི་སྒོ་ནས་འདིའི་རྗེས་ཟློས་མཛོད། གཙོ་བོས་ཇི་ལྟར་བཀའ་སྩལ་པ་སོགས་ལན་གསུམ། གཏང་རག་གི་མཎྜལ་དང༌། དེང་ནས་བརྩམས་ཏེ་བདག་བྲན་དུ། ཁྱེད་ལ་བདག་ནི་འབུལ་ལགས་ཀྱིས། ཁྱོད་ཀྱི་སློབ་མར་གཟུང་བ་དང༌། །ཆ་ཤས་ཀྱིས་ཀྱང་སྤྱད་དུ་གསོལ། ལན་གསུམ་བརྗོད་དེ། སློབ་མ་རྗེས་སུ་བཟུང་བའི་ཆོ་གའོ། །དེ་ནས་རྗེས་ཆོག་ལྟར་བཀྲ་ཤིས་ཀྱི་བར་དུ་ལེགས་པར་བསྒྲུབ་ཅིང༌། སྒྲུབ་མཆོད་ཞག་མང་པོ་བྱེད་ན། རྡུལ་ཚོན་གྱི་དཀྱིལ་འཁོར་འདི་ཉིད་ལ་ཇི་སྲིད་གཤེགས་གསོལ་གྱི་ཆོ་ག་མ་བྱས་ཀྱི་བར་དུ་བརྟན་པར་བཞུགས་སུ་གསོལ། ཞེས་སོགས་བརྗོད། ནུབ་ཐ་མ་ལ་མདུན་བསྐྱེད་ཀྱི་དཀྱིལ་འཁོར་ལ་མཆོད་བསྟོད་བྱས་པའི་རྗེས་སུ་དངོས་གྲུབ་བླང༌། ནོངས་པ་བཟོད་པར་གསོལ། རྡུལ་ཚོན་གྱི་ལྷ་རྣམས་ལ། ཨོཾ་ཁྱེད་ཀྱིས་སེམས་ཅན་དོན་ཀུན་མཛད། །རྗེས་སུ་མཐུན་པའི་དངོས་གྲུབ་གནང༌། །སངས་རྒྱས་ཡུལ་དུ་གཤེགས་ནས་ནི། །སླར་ཡང་འབྱོན་པར་མཛད་དུ་གསོལ། བཛྲ་མུཿ གཤེགས་སུ་གསོལ་ལ། ཆོས་ཐམས་ཅད་བདག་མེད་པའི་དོན་དྲན་པར་བྱས་ལ། རྡོ་རྗེའི་རྩེས་དབང་ལྡན་གྱི་རྩིག་པ་བཤིག་ཅིང༌། ལྷའི་གདན་ལ་སོགས་པའི་མཚན་མ་རྣམས་ཀྱང་བསྡུས་ལ་རོལ་མོ་དང་བཅས་པས་རྡུལ་ཚོན་མཐའ་ནས་
དབུས་སུ་ཕྱོགས་ལ། ཨོཾ་ཨ་ཀཱ་རོ་མུ་ཁཾ་སརྦ་དྷརྨཱ་ཎཾ། ཨདྱ་ནུད་པནྣ་ཏྭ་ད་ཨོཾ་ཨཱཿཧཱུཾ་ཕཊ་སྭཱཧཱ། ཞེས་བརྗོད་ལ་བུམ་པའམ་ཟ་མ་ཏོག་སོགས་སུ་རྡུལ་ཚོན་བཞུགས་སུ་གསོལ་ཞིང༌། ཐིག་རྗེས་རྣམས་དྲི་བཟང་གི་ཆུས་བྱུགས་ལ་མི་མངོན་པར་བྱ་ཞིང༌། མེ་ཏོག་སིལ་མ་གཏོར་ཏེ་བཀྲ་ཤིས་རྒྱ་ཆེར་བྱའོ། །ངན་སོང་རྒྱུན་གཅོད་ཉུང་གསལ་ཆོ་གའི་ཚུལ། །བརྒྱུད་ལྡན་གསུང་གི་བཅུད་བསྡུས་འཐོར་བ་བསྡེབས། །དེ་ཡི་ཟུར་འདེབས་གསལ་བྱེད་ཉེར་འཁོ་འདི། །འགྲོ་ལ་ཕན་པའི་བསམ་པས་འདིར་བཀོད་དོ། །འདིར་འབད་ལས་བྱུང་རབ་དཀར་དགེ་བའི་རྒྱུན། །དུང་དང་ཁ་བའི་དུམ་བུ་བརྩེགས་འདྲ་བ། །བདག་གི་རྒྱུད་ལ་ངེས་པར་ཐོབ་པ་དེས། །འགྲོ་བའི་ལས་སྒྲིབ་མུན་པ་སེལ་གྱུར་ཅིག །བཅོམ་ལྡན་འདས་མི་འཁྲུགས་པ་ལྷ་དགུའི་ཆོ་གའི་ཟུར་འདེབས་འཇུག་བདེ་རྣམ་གསལ་ཞེས་བྱ་བ་འདི་ཡང༌། བརྒྱུད་པ་གོང་མའི་གསུངས་ཐོར་བུར་གནས་པ་རྣམས་གཞན་ལ་ཕན་པའི་བློས་ཕྱོགས་གཅིག་ཏུ་སྡེབས་ཏེ། བཙུན་པ་གྲོལ་མཆོག་གིས་ཉེ་བར་བཀོད་པའོ།། །།འདིས་ཀྱང་བསྟན་པ་དང་སེམས་ཅན་ལ་ཕན་པར་གྱུར་ཅིག། ཤུབྷཾ་མསྟུ་སརྦ་ཛཱ་ག་ཏཾ། །ཞུས་དག། །