དཔལ་ཡེ་ཤེས་ཀྱི་མགོན་པོ་ཕྱག་དྲུག་པའི་སྒྲུབ་ཐབས་གཏོར་ཆོག་དང་བཅས་པ།
དཔལ་ཡེ་ཤེས་ཀྱི་མགོན་པོ་ཕྱག་དྲུག་པའི་སྒྲུབ་ཐབས་གཏོར་ཆོག་དང་བཅས་པ་བཞུགས་སོ། །
སྭཱ་སྟི། དཔལ་ཆེན་ཧེ་རུ་ཀ་དཔལ་ཁྲོས་པའི་སྐུ། །འཇིག་རྟེན་དབང་ཕྱུག་ཐུགས་ལས་འཁྲུངས་པ་ཡི། །བླ་མ་མགོན་པོ་དབྱེར་མེད་ལ་བཏུད་ནས། །དེ་ཉིད་མཆོད་པའི་ཆོ་ག་མདོར་བསྡུས་བྲིས། །ཡིད་དང་མཐུན་པའི་གནས་སུ་ཉེར་འཁོ་ཐམས་ཅད་ཚོགས་པར་བྱས་ལ། བདག་བསྐྱེད་གང་ཡང་རུང་བ་སྔོན་དུ་འགྲོ་བས། མཆོད་པ་རྣམས། ཨ་མྲྀ་ཏས་བསངས། སྭ་བྷཱ་ཝས་སྦྱངས། སྟོང་པའི་ངང་ལས་ཨ་ལས་ཀ་པཱ་ལ་རྣམས་ཀྱི་ནང་དུ་ཧཱུཾ་ཞུ་བ་ལས། མཆོད་ཡོན་ནས་རོལ་མོའི་བར་ནམ་མཁའི་ཁམས་ཐམས་ཅད་གང་བར་གྱུར། ཨོཾ་བཛྲ་ཨརྒྷཾ་སྭཱཧཱ་ནས་ཤཔྟ་ཨཱཿཧཱུཾ་གི་བར་བརྗོད། ཨོཾ་སྭ་བྷཱ་ཝས་སྟོང་པར་སྦྱངས། སྟོང་པའི་ངང་ལས་རང་གི་མདུན་དུ་པཾ་ལས་སྣ་ཚོགས་པདྨ་དང་རཾ་ལས་ཉི་མའི་དཀྱིལ་འཁོར་གྱི་སྟེང་དུ་གཾ་ལས་ཚོགས་ཀྱི་བདག་པོ་སྐུ་
མདོག་དཀར་པོ་སྤྱན་གསུམ་པ་གླང་པོའི་གདོང་ཅན། གཡས་ལ་ཕུག་ལོ་མ་དང་བཅས་པ་གསོལ་ཞིང༌། གཡོན་ཐོད་པ་བསྣམས་པ། དར་དང་རིན་པོ་ཆེས་བརྒྱན་པ་ཉལ་སྟབས་སུ་འགྱེལ་བའི་སྟེང་དུ། ཧཱུཾ་མཐིང་ནག་ལས་གྲི་གུག་ཧཱུཾ་གིས་མཚན་པ་ཡོངས་སུ་གྱུར་པ་ལས། མྱུར་མཛད་ཡེ་ཤེས་ཀྱི་མགོན་པོ་སྐྱེ་འགྲོའི་རེ་བ་ཚུལ་བཞིན་དུ་སྐོང་བ། ཞལ་གཅིག་ཕྱག་དྲུག་པ། ཞལ་གདངས་ཤིང་མི་བཟད་པའི་མཆེ་བ་གཙིགས་པས་དྲག་ཏུ་བཞད་པ། སྨ་ར་སྨིན་མ་དབུ་སྐྲ་དམར་སེར་མེ་ལྟར་འབར་བ། དམར་ཤིང་འཁྲུག་པའི་སྤྱན་གསུམ་དང་ལྡན་ཞིང༌། དཔྲལ་བར་སིན་ངྷུ་རའི་ཐིག་ལེས་བྱུགས་པ། ཕྱག་དང་པོ་གཉིས་གྲི་གུག་དང་ཐོད་ཁྲག་ཐུགས་ཀར་སྟེང་འོག་ཏུ་འཛིན་པ། གཡས་གཉིས་
པས་ཐོད་སྐམ་གྱི་ཕྲེང་བ། གསུམ་པས་ཅང་ཏེའུ་དྲག་ཏུ་འཁྲོལ་བ། གཡོན་གཉིས་པས་མདུང་རྩེ་གསུམ་པ། གསུམ་པས་རྡོ་རྗེ་ཞགས་པ་འཛིན་པ། སྟག་ལྤགས་ཀྱི་ཤམ་ཐབས་ཅན། འཇིགས་སུ་རུང་བའི་ཐོད་སྐམ་ལྔའི་དབུ་རྒྱན་དང༌། རློན་པ་ལྔ་བཅུའི་དོ་ཤལ་ཅན། རུས་པའི་རྒྱན་དྲུག་དང༌། དར་ལྗང་ཁུའི་སྐ་རགས་བཅིངས་པ། ཕྱག་ཞབས་ལ་དྲིལ་བུ་གཡེར་ཁའི་ཕྲེང་བས་བརྒྱན་པ། སྦྲུལ་སྔོན་པོའི་ཐོད་བཅིངས། དམར་པོའི་སྙན་རྒྱན། ཁྲ་བོའི་དཔུང་རྒྱན། དཀར་པོའི་མགུལ་རྒྱན། སེར་པོའི་ལག་གདུབ། ལྗང་ཁུའི་དོ་ཤལ། དཀར་པོས་སྐ་རགས་དང་རྐང་གདུབ་བྱས་པ། སྐུ་ལུས་སྦོམ་ཐུང་རགས་ཤིང༌། ཞབས་གཡོན་བརྐྱང་བའི་གྱད་ཀྱྀ་བགེགས་ཀྱི་རྒྱལ་པོ་མནན་པ། སྤྱི་བོར་མི་བསྐྱོད་པས་རྒྱས་བཏབ་པ། དེའི་གཡོན་ན་ཁྲག་ཞག་འཁྲུག་པའི་རྒྱ་མཚོའི་དབུས་སུ། བྷྱོཿལས་དཔལ་ལྡན་ལྷ་མོ་འདོད་པ་ཁམས་ཀྱི་དབང་ཕྱུག་མ་སྐུ་མདོག་སྔོ་ནག་ཞལ་གཅིག་ཕྱག་བཞི། གཡས་གཉིས་ན། རལ་གྲི་དང་གྲི་གུག །གཡོན་གཉིས་ན་རྒྱལ་མཚན་དང་ཐོད་རློན་ཁྲག་གིས་གང་བ། ཁྲོ་གཉེར་བསྡུས་ཤིང༌། གླང་ཆེན་གྱི་ཀོ་རློན་གྱི་སྟོད་གཡོགས་དང༌། རེ་ལྡེའི་ཤམ་ཐབས། སྦྲུལ་ནག་དུ་མའི་སྐ་རགས་ཅན། ཁྲག་གི་ཐིག་ལེ། ཞག་གི་སོར་རིས། ཐལ་ཆེན་གྱི་ཚོམ་བུ་ཅན། ལྟེ་བའི་ཐད་ཀ་ནས་ཉི་ཟླ་འཆར་བ། དྲེའུ་རྟ་རྐང་གསུམ་ལ་ཆིབས་པ། མ་མོ་དང་
ཤ་ཟའི་ཚོགས་ཀྱིས་བསྐོར་བ། གཙོ་བོའི་མདུན་དུ་ཀྵཾ་ལས་གནོད་སྦྱིན་ཀྵེ་ཏྲ་པཱ་ལ་སྐུ་མདོག་མཐིང་ནགཤངས་ནས་དུས་མཐའི་རླུང་འཚུབ་པ། ཁ་གདངས་ནས་དགྲ་ལ་འོ་དོད་འབོད་པ། གཡས་གྲི་གུག་འཕྱར་ཞིང༌། གཡོན་ཐོད་པ་སྙིང་བཅས་གཙོ་བོ་ལ་སྟོབས་པ། ཤིན་ཏུ་ཁྲོས་ཤིང་མི་གདུག་པ། དོམ་ནག་སྨྱོན་པ་ལ་ཞོན་པ། གཙོ་བོ་གཡས་སུ་པད་ཉི་དང་རོའི་གདན་ལ། ཧཱུཾ་ལས་དབང་ཕྱུག་ཛི་ན་མི་ཏྲ་སྐུ་མདོག་དམར་ནག་གཡས་ཌཱ་མ་རུ་དྲག་ཏུ་འཁྲོལ་ཞིང༌། གཡོན་ཐོད་པ་ཁྲག་དྲོན་གྱིས་གང་བ་བསྣམས་པ། རྒྱབ་ཏུ་པད་ཉི་དང་རོའི་གདན་ལ། ཊཾ་ལས་གཤིན་རྗེ་ཊཀྐི་རཱ་ཛ་སྐུ་མདོག་ནག་པོ་གཡས་ཞགས་པ་དང༌། གཡོན་སྡིགས་མཛུབ། གཤིན་རྗེ་རབ་ཏུ་ཁྲོས་པའི་ཆ་ལུགས་ཅན། ལྷ་མོའི་གཡོན་དུ་ཧཱུཾ་ལས་བདུད་མགོན་ཏྲཀྴད་སྐུ་མདོག་དུད་སྤྲིན་ལྟར་གནག་པ། གཡས་རུ་མཚོན་དམར་པོ་འཕྱར་ཞིང༌། གཡོན་ཐོད་ཁྲག་ཐུགས་ཀར་འཛིན་པ། ཡ་སོས་མ་མཆུ་མནན་ཞིང་མཆེ་བ་གཙིགས་པ། དར་ནག་གི་འཇོལ་བེར་དང༌། སག་ཏིའི་ལྷམ་གྱོན་ནས་རྟ་ནག་རྟིང་དཀར་ལ་ཆིབས་པ། འཁོར་བཞི་ཆར་ཁྲོ་བོའི་རྒྱན་དང་ཆ་ལུགས་ཡོངས་སུ་རྫོགས་པ། རང་རང་གི་འཁོར་འབུམ་འབུམ་དང་བཅས་པ། གཙོ་འཁོར་དྲུག་ཀའང་མེ་དཔུང་འབར་བའི་དབུས་ན་བཞུགས་པ། དེའི་ཕྱི་རོལ་ཏུ་ཤར་དུ་རྒྱ་བྱིན། ཤར་ལྷོར་མེ་ལྷ། ལྷོར་གཤིན་རྗེ། ལྷོ་ནུབ་ཏུ་སྲིན་པོ། ནུབ་ཏུ་
ཆུ་ལྷ། ནུབ་བྱང་དུ་རླུང་ལྷ། བྱང་དུ་གནོད་སྦྱིན། བྱང་ཤར་དུ་དབང་ལྡན། སྟེང་དུ་ཚངས་པ། འོག་ཏུ་སའི་ལྷ་མོ། དེ་ཐམས་ཅད་རང་རང་གི་འཁོར་བྱེ་བ་བྱེ་བའི་ཚོགས་དང་བཅས་པ། གཞན་ཡང་ལྷ་ཆེན་བརྒྱད། ཀླུ་ཆེན་བརྒྱད། གཟའ་ཆེན་བརྒྱད། རྒྱུ་སྐར་ཉི་ཤུ་རྩ་བརྒྱད། འཇིགས་བྱེད་དགུ །རྒྱལ་ཆེན་བཞི་སྟེ། གཙང་རིགས་ཀྱི་མགོན་པོ་བདུད་བཅུ་རྩ་ལྔ། དེའི་ཕྱི་རོལ་དུ་དམ་ཅན་རྒྱ་མཚོའི་དམག་ཚོགས། ཤ་ལ་དགའ་བ། ཁྲག་ལ་རོལ་བ། སྙིང་རྗེ་མེད་པ། གཏུམ་ཞིང་མི་སྡུག་པ། མིག་རྩ་དམར་བ། ཁ་གདངས་པ། མཆཻ་བ་གཙིགས་པ། ལག་ན་གདུག་པའི་མཚོན་ཆ་སྣ་ཚོགས་པ་ཐོགས་པ། སྐད་ཅིག་ལ་སྐྱེ་འགྲོ་ཐམས་ཅད་ཀྱི་སྲོག་དབུགས་བསྡུད་པ། གནོད་སྦྱིན་དང༌། སྲིན་པོ་དང༌། གཤིན་རྗེ་དང་བདུད་ཀྱི་ཆ་ལུགས་ཅན། ས་གཞི་བར་སྣང་ཕྱོགས་བཅུ་ཐམས་ཅད་དུ་སྤྲིན་གཏིབས་པ་ལྟར་འཁོད་པར་གྱུར། མདོར་བསྡུ་ན། མི་བསྐྱོད་པས་རྒྱས་བཏབ་པ། འཁོར་དཔལ་ལྡན་ལྷ་མོ་རེ་མ་ཏཱི། ལས་བྱེད་བཞི། གཙང་རིགས་བདུན་ཅུ་རྩ་ལྔ། དམ་ཅན་རྒྱ་མཚོའི་དམག་ཚོགས་དང་བཅས་པ། ཞེས་པ་ཙམ་གྱི་ཆོགཐམས་ཅད་ཀྱི་སྤྱི་བོར་ཨོཾ་དཀར་པོ། མགྲིན་པར་ཨཱཿདམར་པོ། ཐུགས་ཀར་ཧཱུཾ་སྔོན་པོ། རང་གི་སྙིང་གའི་ཧཱུཾ་གི་འོད་ཟེར་གྱིས་ཤར་ལྷོར་དུར་ཁྲོད་བསིལ་བའི་ཚལ་ཙན་དན་གྱི་ཤིང་རྐང་གཅིག་པའི་དྲུང་ནས། ནག་པོ་ཆེན་པོ་སྟེང་ན་རྩ་བརྒྱུད་ཀྱི་བླ་མ། གཡས་ན་དཔའ་
བོ་ངར་དང་བཅས་ཤིང༌། གཡོན་ན་དཔའ་མོ་འཛུམ་དང་བཅས་པ། འཁོར་བཀའ་སྡོད་ཀྱི་ཚོགས་དང་བཅས་པ། ཌཱ་མ་རུ་དང་དྲིལ་བུ་གཡེར་ཀའི་སིལ་ཁྲོལ་གྱི་སྒྲ་དང༌། གད་རྒྱངས་འུར་འུར་ཆེམ་ཆེམ་དང་བཅས་བཛྲ་ས་མཱ་ཛཿ བསྐང་བ་སོགས་ཀྱི་ཚེ་སྤྲོ་ན་བཞེངས་ཤིག་སོགས་ནས། དམ་ཚིག་ལྡན་པའི་གནས་འདིར་གཤེགས། །ཞེས་པའི་བར་བྱ། མི་སྤྲོ་ན་རྒྱུན་གཏོར་སོགས་ལ། ཧཱུཾ་དད་པ་དང་ནི་དམ་ཚིག་གིས། །ཚུར་གཤེགས་མཧཱ་ཀཱ་ལ་ཡ། །སྔོན་གྱི་ཐུགས་དམ་རྗེས་དགོངས་ལ། །དཀྱིལ་འཁོར་གནས་འདིར་གཤེགས་སུ་གསོལ། །ཀྵེ་ཏྲ་པཱ་ལ་ལ་སོགས་པ། །འཁོར་གྱི་བཀའ་གཉན་གནོད་སྦྱིན་ཚོགས། །བསྟན་པ་བསྲུང་བར་ཞལ་བཞེས་པའི། །དམ་ཅན་རྒྱ་མཚོ་གཤེགས་སུ་གསོལ། །ཨོཾ་བཛྲ་མཧཱ་ཀཱ་ལ་ས་པ་རི་ཝཱ་ར་ཨེ་ཧྱེ་ཧི། ཀྵིཾ་ཉེར་གཅིག་བརྗོད། ཛཿཧཱུཾ་བཾ་ཧོཿ ཨོཾ་པདྨ་ཀ་མ་ལ་ཡ་སྟྭཾ། ཨརྒྷཾ་ལ་སོགས་པས་མཆོད། ཆོས་དབྱིངས་ངང་ལས་མ་གཡོས་ཀྱང༌། །མ་རུང་འདུལ་ཕྱིར་ཁྲོས་པའི་སྐུ། །བསྟན་པའི་དགྲ་བོ་འཇོམ་མཛད་པའི། །ནག་པོ་ཆེ་ལ་ཕྱག་འཚལ་བསྟོད། །ནང་མཆོད་གཏོར་མ་ལྟར་བྱིན་གྱིས་བརླབས་ལ། སྔགས་རྣམས་ཀྱི་མཐར་འབྲུ་གསུམ་བཏགས་ལ་འབུལ། བསྡུ་ན་མཆོད་བསྟོད་འདི་མེད་ཀྱང་ཆོག མགོན་པོའི་སྤྱི་བོར་རྩ་བའི་བླ་མ་སྐུ་མདོག་སེར་པོ་ནོར་བུ་དང་དྲིལ་བུ་འཛིན་པ། རྡོ་རྗེ་སྐྱིལ་ཀྲུང༌། དར་དང་རིན་པོ་ཆེས་བརྒྱན་པ། བླ་མའི་སྐུ་ལས་འོད་འཕྲོས། མགོན་པོ་ལ་ཕོག་འོད་དང་བདེ་བའི་རང་
བཞིན་དུ་ལྟེམ་ལྟེམ་གྱུར། འུར་འུར་སིལ་སིལ་གར་མཛད། མགོན་པོ་ལས་འོད་འཕྲོས་བླ་མ་ལ་ཕོག །འོད་དང་སོགས་གོང་བཞིན། མགོན་པོ་ཉིད་བླ་མ། བླ་མ་ཉིད་མགོན་པོ། བླ་མ་མགོན་པོ་དབྱེར་མེད་ལ་གསོལ་བ་འདེབས་སོ། །སྤྲོ་ན་བར་འདིར་བརྒྱུད་པའི་བླ་མ་གསོལ་འདེབས་བྱ། དེ་ནས། ན་མོ་བུདྡྷ་ཡ་ནས། དངོས་གྲུབ་མ་ལུས་སྩལ་དུ་གསོལ་གྱི་བར་ཅི་མང་གིས་གསོལ་བ་བཏབ། ཡང་སྤྱི་བོའི་བླ་མ་རྡོ་རྗེ་སེམས་དཔའ་དཀར་པོ་གཡས་ཤེལ་གྱི་རྡོ་རྗེ། གཡོན་ཀ་པཱ་ལ་བདུད་རྩིས་གང་བ་འཛིན་པ། སངས་རྒྱས་བྱང་སེམས་དཔའ་བོ་མཁའ་འགྲོ་ཐམས་ཅད་བླ་མའི་གནས་གསུམ་དུ་ཐིམ། བླ་མའི་གནས་གསུམ་ནས་ཡི་གེ་བརྒྱ་པ་དཀར་དམར་མཐིང་གསུམ་བྱུང༌། མགོན་པོའི་གནས་གསུམ་དུ་ཐིམ། སྐུ་གསུང་ཐུགས་ཀྱི་ཉམས་ཆགས་ཐམས་ཅད་དག་པར་གྱུར། ཡིག་བརྒྱ་ཉེར་གཅིག་སོགས་བཟླས་ལ། ལོངས་སྐབས་ཡོད་ན། རྡོ་རྗེ་འཆང་ཆེན་དཔལ་ལྡན་ཤཱ་བཱ་རི་སོགས་དང༌། རིན་ཆེན་བརྒྱུད་པའི་བླ་མ་སོགས་རྒྱས་པར་བྱ། བསྡུ་ན། སྐུའི་དམ་ཚིག་ཉམས་པ་མཐོལ་ལོ་བཤགས་ནས། དུས་འདིར་སྩལ་དུ་གསོལ་གྱི་བར་དང༌། ཁྱེད་ཐུགས་གསང་བ་སོགས་ཤོ་ལོ་ཀ་གཅིག་བྱ། ཡང་མགོན་པོའི་སྤྱི་བོའི་བླ་མ་དམར་པོ་ཌཱ་མ་རུ་དང་ཐོད་པ་འཛིན་པ། ལྟ་བས་མི་ངོམས་ཤིང༌། བཟོད་པར་དཀའ་བའི་གཟི་བརྗིད་ཅན། གཟིགས་པ་ཙམ་གྱི་ཅི་འདོད་དབང་དུ་བསྡུད་པ། དཔྲལ་བའི་སིན་དྷུ་རའི་ཐིག་ལེའི་ནང་དུ། ཧྲཱིཿདམར་པོ་བཅུ་གསུམ་ཡོངས་སུ་གྱུར་པ་ལས། གསང་བའི་
མཁའ་འགྲོ་མ་དམར་མོ་ཌཱ་མ་རུ་དང་ཐོད་ཁྲག་འཛིན་པ་བཅུ་གསུམ་དུ་གྱུར། བླ་མའི་སྐུ་ལས་བྱུང་བའི་འོད་ཟེར་དམར་པོ་མཁའ་འགྲོ་མ་ལ་ཕོག་པས་དེ་རྣམས་ཌཱ་མ་རུ་དང་གཡེར་ཁའི་སྒྲ་ཁྲོལ་ཁྲོལ། ཞབས་གཉིས་གར་སྟབས་ལིང་ལིང་པ། སྤྱན་གསུམ་ནམ་མཁའ་ལ་ཧྲིག་ཧྲིག་གཟིགས་པ། མགོན་པོ་དང་མཁའ་འགྲོ་མའི་འོད་ཟེར་གྱིས་སེམས་ཅན་ཐམས་ཅད་བདག་གི་དབང་དུ་བསྡུས། དགོས་འདོད་ཆར་ལྟར་བབས་པར་གྱུར། ཨོཾ་བཛྲ་ན་ར་ཀྲིཾ་ཀྲིཾ་ཧཱུཾ་ཧཱུཾ་ཕཊ་ཕཊ་སྭཱཧཱ། དེ་ནས་བཟླས་པའི་དམིགས་པ་གསལ་བཏབ་སྟེ། ཨོཾ་བཛྲ་མཧཱ་ཀཱ་ལ་ཀྵིཾ་ཀྵེ་ཏྲ་བིགྷྣཱན་བི་ནཱ་ཡ་ཀ་ཧཱུཾ་ཧཱུཾ་ཕཊ་ཕཊ་སྭཱཧཱ། ཅི་མང་བཟླས་པའི་མཐར་ཤཱ་ས་ན་བཟླ། ཨོཾ་ཏྲག་རག་མོ་རཀྟ་རུ་དྷི་ར་ཧཱུཾ་ཕཊ། ཨོཾ་ཀྵེ་ཏྲ་པཱ་ལ་བིགྷྣཱན་ཧཱུཾ་ཕཊ། ཨོཾ་ཛི་ན་མི་ཏྲ་ཝ་ཤཾ་ཀུ་རུ་ཧཱུཾ་ཕཊ། ཨོཾ་ཊཀྐི་རཱ་ཛ་ས་མ་ཡ་བྷྱོ་དུ་ཛ་ཧཱུཾ་ཕཊ། ཨོཾ་དུ་ཡོག་ཛ་མཧཱ་ཀཱ་ལ་ཏྲཀ་ཤད་ཧཱུཾ་ཕཊ། རྣམས་ཀྱང་ཅི་རིགས་བཟླ། གཏོར་མ། ཨ་མྲྀ་ཏས་བསངས། སྭ་བྷཱ་ཝས་སྦྱངས། སྟོང་པའི་ངང་ལས། ཡཾ་ལས་རླུང༌། རཾ་ལས་མེ། ཀཾ་ལས་མི་མགོའི་སྒྱེད་པུ་གསུམ། དེའི་སྟེང་དུ་ཨ་ལས་ཐོད་པ་མཚན་ལྡན་ཡངས་ཤིང་རྒྱ་ཆེ་བའི་ནང་དུ་བྲུཾ་ཨཾ་ཛྲིཾ་ཁཾ་ཧཱུཾ་རྣམས་ལས་ཤ་ལྔ། ལཾ་མཾ་པཾ་ཏཾ་བཾ་རྣམས་ལས་བདུད་རྩི་ལྔ། སྟེང་གི་ནམ་མཁའ་ལ་ཨོཾ་དཀར་པོ་ཨ་ལས་ཟླ་བ། ཧཱུཾ་ལས་རྡོ་རྗེ་རྣམས་བརྩེགས་པ། རླུང་གཡོས་མེ་སྦར་ཤ་ལྔ་བདུད་རྩི་ལྔ་འོད་དུ་ཞུ། ཡི་གེ་འབྲུ་གསུམ་ལས་བདུད་རྩིའི་རྒྱུན་བབས། དེ་རྣམས་
ཀྱི་འོད་ཀྱིས་སངས་རྒྱས་ཐམས་ཅད་ཀྱི་རྡོ་རྗེ་གསུམ་ཡེ་ཤེས་ཀྱི་བདུད་རྩིར་སྤྱན་དྲངས་ཏེ་ཐིམ། ཨོཾ་དང་ཟླ་བ་རྡོ་རྗེ་རྣམས་ཀྱང་འོད་དུ་ཞུ་ཞིང་ཐིམ་པས། ཁ་དོག་དྲི་རོ་ནུས་མཐུ་ཕུན་སུམ་ཚོགས་པ་ཟད་མི་ཤེས་པ་བདུད་རྩིའི་རྒྱ་མཚོར་གྱུར། ཨོཾ་ཨཱཿཧཱུཾ་ལན་གསུམ། སྔར་གྱི་སྔགས་རེ་རེའི་མཐར། ཨི་དམ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི་སྭཱཧཱ། བཏགས་པ་ལན་གསུམ་མམ་བདུན་བདུན་གྱི་འབུལ། ཨོཾ་ཤྲཱི་མཧཱ་ཀཱ་ལ་ས་པཱ་རི་བཱ་ར་ཨརྒྷཾ་པྲ་ཏཱིཙྪ་སྭཱཧཱ། དེ་བཞིན་དུ། པཱ་དྱཾ། པུཥྤེ་ཨཱཿཧཱུཾ། དྷུ་པེ། ཨཱ་ལོ་ཀེ གནྡྷེ། ནཻ་བེ་ཏྱ། ཤཔྟ་ཨཱཿཧཱུཾ། སྔགས་སོ་སོའི་མཐར། ཨོཾ་ཨཱཿཧཱུཾ་བཏགས་ལ་ནང་མཆོད་འབུལ། དཔལ་ཡེ་ཤེས་ཀྱི་མགོན་པོ་ལེགས་ལྡན་ནག་པོ། བདུད་གཅོད་ཀྱི་སྐྱེས་བུ། སྲོག་གཅོད་ཀྱི་བཤན་པ། བདུད་འདུལ་གྱི་དམག་དཔོན། སྲིན་པོ་ལང་ཀ་པུ་རི་གྲོང་ཁྱེར་གསུམ་བརྩེགས་བརླག་པར་མཛད་པ། རྣལ་འབྱོར་པའི་དགྲ་ལྷ། རིགས་འཛིན་གྱི་སྲུང་མ། དམ་ཉམས་ཀྱི་སྲོག་བདུད་ཆེན་པོ་འཁོར་དང་བཅས་པ་རྣམས་དམ་རྫས་བརྒྱན་དང་ལྡན་པའི་གཏོར་མ་འདི་བཞེས་ལ། སངས་རྒྱས་ཀྱི་བསྟན་པ་སྲུངས། དཀོན་མཆོག་གི་དབུ་འཕངས་བསྟོད། དགེ་འདུན་གྱི་ཆོས་འཁོར་སྐྱོངས། བླ་མའི་སྐུ་ཚེ་སྲིངས། ཁྱད་པར་དུ་དཀོན་མཆོག་གསུམ་ལ་གནོད་པར་བྱེད་པ་དང༌། བདག་ཅག་འཁོར་དང་བཅས་པ་ལ་བསམ་སྦྱོར་ངན་པ་བྱེད་པ་ཐམས་ཅད་ཞི་བར་མཛོད་ཅིག །གལ་ཏེ་ཞི་བས་འདུལ་དུ་མ་འཚལ་ན། བསད་པ་དང༌། བསྐྲད་པ་དང༌། དབྱེ་བ་དང༌། རེངས་པ་དང༌། གཟིར་བ་
དང༌། སྡིགས་ཤིང༌། དཔའ་སྐོང་བ་ལ་སོགས་པ་དྲག་པོའི་ཕྲིན་ལས་ཀྱི་ཚར་བཅད་དུ་གསོལ། བླ་མ་མགོན་པོ་འཁོར་བཅས་ལ། །བདག་གིས་མཆོད་གཏོར་ཕུལ་བ་ཡིས། །དཀོན་མཆོག་དབུ་འཕངས་སྨོད་པ་དང༌། །ཐེག་པ་ཆེན་པོ་སུན་འབྱིན་དང༌། །བསྟན་པ་འཇིགས་དང་དབྱེན་བྱེད་དང༌། །བླ་མའི་སྐུ་ལ་བརྡོ་བ་དང༌། །རྣལ་འབྱོར་བདག་ལ་སྡང་བ་རྣམས། །དེ་ཀུན་ནག་པོ་ཆེན་པོས་བསྒྲོལ། །མཱ་ར་ཡ་ཕཊ། ས་མ་ཡ། རྒྱས་པ་ལ་སྤྲོ་ན། རྔམ་པ་སྒྲ་སྒྲོག་སོགས་བསྟོད་པ་དང༌། འཁོར་དང་ལྷ་མོའི་བསྟོད་བསྐུལ་ཁྱུང་པོས་མཛད་པ་བྱིན་ཅན་རྣམས་གཙོ་བོར་གྱུར་པའི་ཅི་རིགས་བྱ། འབྲིང་དུ་བྱ་བར་མོས་ན། ཁོ་བོས་ཟུར་དུ་བཀོད་པ་བཞིན་བྱ། རྒྱུན་གཏོར་སོགས་བསྡུས་པའི་སྐབས། མྱུར་མཛད་སྤྱན་རས་གཟིགས་སོགས་ཀྱི་གཙོ་བོ་ལ་བསྟོད། ཁྲག་མཚོ་ཆིལ་ཆིལ་ཁོལ་བའི་ཀློངས་དཀྱིལ་ན། །མཚོ་ཆེན་དྲེའུའི་སྟེང་ན་གཟི་བརྗིད་འབར། །མཐིང་ནག་སྐུ་ལ་ཞལ་གཅིག་ཕྱག་བཞི་མ། །རལ་གྲི་གྲི་གུག་རྒྱལ་མཚན་ཐོད་རློན་བསྣམས། །སྐུའི་སྤྲུལ་པས་སངས་རྒྱས་བསྟན་པ་བསྲུང༌། །གསུང་གི་སྤྲུལ་པས་ཁམས་གསུམ་གཡོ་བར་མཛད། །ཐུགས་ནི་མི་འགྱུར་འགྲོ་བའི་དོན་མཛད་མ། །མ་ཅིག་རེ་མ་ཏཱི་ལ་ཕྱག་འཚལ་ལོ། །དཔལ་ལྡན་མགོན་པོའི་ཕྱོགས་བཞིའི་བཀའ་མཉམ་པ། །ཡེ་ཤེས་བཀའ་བསྒྲུབ་ལས་ཀྱི་ཕོ་ཉ་མཛད། །མ་རུངས་ཀུན་འདུལ་སྤྲུལ་པ་སྣ་ཚོགས་འགྱེད། །ལས་བྱེད་ཕོ་ཉ་བཞི་ལ་ཕྱག་འཚལ་བསྟོད། །དབང་པོ་གཤིན་རྗེ་ཆུ་ལྷ་གནོད་
སྦྱིན་དང༌། །མེ་ལྷ་སྲིན་པོ་རླུང་ལྷ་འབྱུང་པོ་དང༌། །སྟེང་གི་ཚངས་པ་སའི་ལྷ་མོ་སྟེ། །སྤྲུལ་པའི་ཕྱོགས་སྐྱོང་བཅུ་ལ་ཕྱག་འཚལ་བསྟོད། །དཔལ་མགོན་བདུན་ཅུ་རྩ་ལྔ་དང༌། །དམ་ཅན་རྒྱ་མཚོའི་དམག་ཚོགས་རྣམས། །ཤ་ཁྲག་གཏོར་མ་འདི་བཞེས་ལ། །རྣལ་འབྱོར་བདག་ཅག་འཁོར་བཅས་ཀྱི། །མི་མཐུན་རྐྱེན་དང་བར་ཆད་སོལ། །འདོད་དོན་ཐམས་ཅད་སྒྲུབ་པ་དང༌། །མཐུན་པའི་དངོས་གྲུབ་སྩོལ་བ་དང༌། །བཅོལ་བའི་འཕྲིན་ལས་སྒྲུབ་པར་མཛོད། །ཅེས་བསྟོད། དེ་ནས་ཐུན་གཏོར་འབུལ་ན། དཔལ་ལྡན་མགོན་པོ་མཧཱ་ཀཱ་ལ་དང་སོགས་སྤྱི་བཏབ་བྱ། རྒྱུན་གཏོར་ལ་འདི་མ་བྱས་ཀྱང་ཆད་པའི་སྐྱོན་མེད་དོ། །དེ་ནས་ཡི་གེ་བརྒྱ་པ་མང་དུ་བཟླས་ལ། མ་འབྱོར་པ་དང་སོགས་ཀྱི་བཟོད་པར་གསོལ། ཁྱེད་ཀྱིས་སེམས་ཅན་དོན་ཀུན་མཛད། སོགས་ཀྱི་གཤེགས་སུ་གསོལ་བའམ། རྟེན་ཡོད་ན་བརྟན་བཞུགས་བྱ། དེ་ནས་སྨོན་ལམ་དང་བཀྲ་ཤིས་ཅི་རིགས་པ་བྱས་ནས། ཐུན་མཚམས་ཀྱི་བྱ་བ་ལ་འཇུག་གོ །མ་ལུས་གཞན་འཕྲུལ་སྡེར་བཅས་འཇོམས་པའི་ལྷ། །ས་སྟེང་དགྲ་བོའི་ཚོགས་རྣམས་རབ་ཉམས་བྱེད། །དངོས་གྲུབ་མ་ལུས་སྩོལ་མཛད་ནག་པོ་ཆེ། །བླ་མ་མགོན་པོ་དབྱེར་མེད་སྒྲུབ་པ་དང༌། །མཆོད་པའི་བྱ་བ་རྒྱས་བསྡུས་སྐྱོན་བྲལ་ཞིང༌། །ཚང་ལ་མ་ནོར་མན་ངག་ལྡན་པ་འདི། །ཀུན་དགའ་སྙིང་པོའི་ཟང་ཟིང་བྲལ་བ་ཡིས། །ཟོལ་མེད་འགྲོ་ལ་ཕན་པའི་བསམ་པས་བྲིས། ཞེས་པའང་སྨྲས་སོ། །འདིར་ཤིན་ཏུ་བསྡུས་པ་དང་བསྙེན་སྒྲུབ་ཀྱི་སྐབས་ཐུན་ཕྱི་མ་གསུམ་ལ་གསར་དུ་བསྐྱེད་ཆོག་མི་དགོས་པར། སྙིང་གའི་འོད་ཀྱིས་སྐད་ཅིག་ལ་སྤྱན་འདྲེན་པ་མན་ཆད་ཚང་བར་བྱས་པས་རུང་བར་ཁྱུང་པོའི་ཡིག་ཆུང་དུ་
བཤད་པས་དེ་ལྟར་བྱའོ། །ཞེས་པ་མྱུར་མཛད་བྱིན་རླབས་ཀྱི་མགོན་པོའི་སྒྲུབ་ཐབས་འདི་ཡང༌། མི་དབང་གཞོན་ནུ་རྣམ་དཔྱོད་ཀྱི་སྤྱན་རས་ལྷག་པར་བསལ་བ་གང་གིས་ཉེ་བར་བསྐུལ་ཏེ། རྒྱལ་ཁམས་པ་ཀུན་དགའ་སྙིང་པོས་རང་ལོ་ཉེར་གསུམ་པ་ཆུ་སྟོད་ཅན་གྱི་མཁའ་འགྲོ་འདུ་བའི་ཚེས་ལ་བྲིས་པ་སྟེ་ཚོང་འདུས་འགུར་མོའི་ཕོ་བྲང་དུའོ།། །།མངྒ་ལཾ། །ཤུ་བྷ་མསྟུ་སརྦ་ཛ་ག་ཏཾ། །ཞུས་སོ།། །།