ཡང་གསང་ཕྱག་མཚན་བཞི་པའི་སྒྲུབ་ཐབས།
ཨོཾ་སྭཱ་སྟི། ནོར་སྦྱིན་དབང་པོ་ལ་བཏུད་ནས། །གསང་སྒྲུབ་ཤིན་དུ་རྙེད་དཀའ་བ། །ཡང་གསང་ཕྱག་མཚན་བཞི་པ་ཡི། ཁྱད་པར་ཅུང་ཟད་བཤད་པ་བྱ། །གོང་དུ་བཤད་པ་ལྟར་རྒྱལ་ཆེན་དམར་པོ་རྟ་སྔོན་ཅན་གྱི་སྒྲུབ་ཐབས་སྤྱི་དང་མཚུངས་པ་ལས། གཞལ་ཡས་ཁང་སེར་ཆེན་བཞིན་བསྐྱེད། དབུས་སུ་སེང་གེའི་གདན་བསྐྱེད་པའི་ས་བོན་ཙ་ཡིག་ལ་བྱེད་པ་དང༌། གཙོ་བོའི་ས་བོན་བཻའམ་ཏྲཾ་གང་རུང་དང༌། རྒྱལ་པོ་ཆེན་པོ་སྐུ་མདོག་དམར་པོ་ཞལ་གཅིག་ཕྱག་གཉིས་གཡས་སྟག་གི་རྒྱལ་མཚན་དང་མདུང་དམར། གཡོན་གྱིས་ནེའུ་ལེ་དང་ལྕགས་ཀྱུ་འཛིན་པ། སྤྱན་གསུམ་ཟླུམ་ཞིང་དམར་ལ་མཆེ་བ་གཙིགས་པ། དར་དམར་པོའི་ཅོད་པན་ཅན་རིན་པོ་ཆེའི་རྒྱན་ཐམས་ཅད་ཀྱིས་བརྒྱན་པ། ཆ་ལུགས་གཞན་རྣམས་རྟ་སྔོན་ཅན་དང་འདྲ། ཕྱོགས་བཞིར་ཏྲག་དམར་པོ་བཞི་ལས། ཤར་དུ་ནོར་རྒྱུན་མ། ལྷོ་རུ་དབྱངས་ཅན་མ། ནུབ་ཏུ་ནོར་སྐྱོང་མ། བྱང་དུ་བྷ་ར་ལི་རྣམས་དམར་མོ་ཞི་མ་ཁྲོ། རུས་པའི་རྒྱན་གྱིས་བརྒྱན་པ། གཡས་ལྕགས་ཀྱུ་དང༌། གཡོན་རྔ་ཡབ་བསྣམས་པ། ཕྱིའི་ཁང་བཟང་བརྒྱད་དུ། སྐད་ཅིག་གིས་རྟ་བདག་བརྒྱད་ནི། སེར་ཆེན་བཞིན་ལས། གཡས་ན་རང་རང་གི་ཕྱག་མཚན་དང་མདུང་དམར། གཡོན་ན་ལྕགས་ཀྱུ་དང་ནེའུ་ལེ་འཛིན་པའོ། །རྗེས་གནང་གི་བྱ་བ་ནི། རྟ་སྔོན་ཅན་དང་འདྲ་བ་ལས་གསང་རྟེན་གྲི་སྙིང་ཡོད་ན། དེ་ཉིད་སྤྱི་བོར་བཞག་སྟེ། འཕྲིན་ལས་གཏོར་མའི་བཀའ་བསྒོ་བཞིན་བཀའ་བསྒོ་དྲག་ཏུ་བྱ། དེ་མེད་ན་སྔགས་
ཀྱི་འཁོར་ལོ་གཏོར་མའི་ནང་དུ་བཅུག་པ་ཞིག་བྱས་ལ་བཀའ་བསྒོ་དྲག་ཏུ་མཛད་པ་ཕྱག་ལེན་ཡིན། སྔགས་ཀྱི་བཟླ་ཚུལ་སོགས་ཤམ་བུ་མི་འདྲ་བ་མང་དུ་ཡོད་ནའང༌། རྗེས་གནང་ཙམ་ལ་མི་དགོས་ལ། ཕྱི་སྒྲུབ་རྟ་སྔོན་ཅན་ཉིད་ཀྱི་རྗེས་གནང་ཐོབ་པས་ནང་སྒྲུབ་གསང་སྒྲུབ་ཡང་གསང་ཐམས་ཅད་ཀྱི་ཉམས་ལེན་བྱས་པས་ཆོག་པར་མངོན་ཡང༌། སོ་སོའི་རྗེས་གནང་མཛད་པའི་ཕྱག་ལེན་ཀྱང་འདུག་ཅིང༌། ཁྱད་པར་ཡང་གསང་འདི་ལ་གལ་པོ་ཆེར་མཛད་དོ། །ཤིན་ཏུ་ཟབ་པར་ཀུན༵་ནས་གྲགས། །སྣ་ཚོགས་སྤྱོད་རྣམས་ཡིད་དག༵འི་གནས། །ལས་ཚོགས་སྒྲུབ་སྐོར་ཆེས་མང་ཡང༌། །རྗེས་གནང་སྙིང༵་པོ༵་ཙམ་འདིས་ཆོག །ཡང་གསང་ཕྱག་མཚན་བཞི་པའི་སྒྲུབ་ཐབས་ཀྱི་ལེ་ཚན་ནོ།། །།