ཡེ་ཤེས་མགོན་པོའི་སྒྲུབ་ཐབས།
ན་མོ་གུ་རུ་བཛྲ་ཨཱ་ཙརྻ་ཙ་རཱ་ཎ་སམྱཱཀ་ཛྙཱ་ན་བྷ་ས་ན་ཀ་རཱ་ཡ། དུས་མཐའི་སྤྲིན་མཚུངས་ཉི་མ་འབུམ་གྱི་གཟི། །མི་བཟད་མཚོན་ཆའི་ཆར་གྱིས་དགྲ་བགེགས་འཇོམས། །བདུད་བཞིའི་ཁྲག་ལ་རོལ་མཛད་དཔའ་བོ་ཆེ། །ནག་པོ་ཆེན་པོས་འགྲོ་འདི་ཤེས་པར་མཛོད། །ཀུན་རྟོག་ཡིད་སྲུབས་མཐར་བྱེད་གནས་མལ་དུ། །ལན་བརྒྱར་འཇོམས་བྱེད་འགྱུར་བྲལ་སྲིན་པོའི་སྐུ། །གང་དེའི་སྒྲུབ་ཐབས་མ་སྨད་ཡིད་ཀྱི་གཉེན། །དུས་མཐར་འབྱུང་བ་འདི་ཡང་ཤིན་ཏུ་མཚར། །འདིར་བྲིས་སྐུའི་མན་ངག་བཞིན་རྗེ་བཙུན་ནག་པོ་ཆེན་པོའི་བྲིས་སྐུ་འབྲི་སྟེ།
ཤེས་རབ་མ་ཁ་ཊྭཱཾ་གའི་གཟུགས་ཀྱི་མཆན་ཁུང་དུ་གནས་པ། གཡས་སུ་མཁའ་འགྲོ་མ་དམར་མོ་ཐོད་པ་ཁྲག་གིས་གང་བ་ཐོགས་པ། གཡོན་དུ་སྔོན་མོ་བུམ་པ་བདུད་རྩིས་གང་བ་འབུལ་བའི་རྣམ་པ་ཅན་ཏེ་ལྷ་གསུམ་པའམ། འཁོར་རྣམས་ཀྱང་ཇི་ལྟར་འདོད་པ་བྲིས་པ་ཞིག་མདུན་དུ་བཀྲམས་ལ། དེའི་མདུན་དུ་དཀྱིལ་འཁོར་སོགས་གྲུབ་ན་ལེགས། རྒྱུན་གྱི་རྣལ་འབྱོར་ལ་མ་གྲུབ་ཀྱང་རུང༌། གང་ལྟར་ཡང་མཆོད་ཡོན་ལ་སོགས་པའི་མཆོད་པ་དང༌། གཏོར་མ་ཤ་ཁྲག་གིས་བརྒྱན་པ་གཉིས། མྱོས་བྱེད་དང་པཱ་ལས་གང་བའི་སྣོད་བཞི་བཞི་བཤམ། བདག་ཉིད་ཡི་དམ་ལྷའི་རྣལ་འབྱོར་ལ་གནས་པའི་སྒོ་ནས། རང་གི་མདུན་དུ་ནང་མཆོད་འདུས་བྱས་པ་བྱིན་གྱིས་བརླབས། ཐོད་པའང་དུང་ཕོར་དུ། དྲི་བཟང་གི་ཆུ་བདུད་རྩི་ལྔ་དང་བསྲེས་པ་བཞགབདུད་རྩི་འཁྱིལ་བའི་གཟུངས་རིང་ངམ། མདོར་བསྡུ་ན། ན་མཿས་མནྟ་བུདྡྷེ་བྷྱཿ ཨོཾ་བཛྲ་ཨ་མྲྀ་ཏ་ཀུཎྜ་ལི་ཧ་ན་ཧ་ན་ཧཱུཾ་ཕཊ། ཅེས་པ་ལན་བརྒྱ་རྩ་བརྒྱད་བཟླས། དེས་མདུན་གྱི་དངོས་པོ་ཐམས་ཅད་ལ་གཏོར་བས་བགེགས་བསྐྲད་ལ། སྲིན་ལག་གིས་ནང་མཆོད་ཕྱོགས་བཅུར་གཏོར་ཏེ་ཡི་གེ་འབྲུ་གསུམ་བརྗོད་པས། སྐད་ཅིག་གིས་དངོས་པོ་ཐམས་ཅད་བྱིན་གྱིས་བརླབས་པར་མོས། སྭ་བྷཱ་ཝས་སྟོང་པར་སྦྱངས། གནས་ཁང་གཞལ་མེད་ཁང་དུ་གྱུར་པའི་དབུས་སུ། ཨ་ཡིག་ལས་བྱུང་བའི་པདྨའི་སྣོད་ཡངས་ཤིང་རྒྱ་ཆེ་བ་རྣམས་ཀྱི་ནང་དུ། ཨོཾ་ཨཱཿཧཱུཾ་ལས་བྱུང་བའི་མཆོད་རྫས་རྣམས་ནམ་མཁའི་དབྱིངས་ཐམས་ཅད་ཁྱབ་པར་གྱུར། ཨོཾ་ཨཱཿབཛྲ་ཨརྒྷཾ་ཧཱུཾ་
ཕཊ་སྭཱཧཱ། དེ་བཞིན་དུ། ཤཔྟའི་བར་དུ་སྦྱར་ཞིང༌། ལན་གསུམ་གསུམ་བརྗོད། ཆུ་བཞི་དང་དྲི་ཆབ་ལ་དུང་ཆོས་ཀྱི་ཕྱག་རྒྱ་དང༌། མེ་ཏོག་ལ་སྙིམ་པས་འཐོར་ཚུལ། བདུག་སྤོས་ལ་སོར་མོ་བཞི་བརྐྱང་ལ། རྩེ་མོ་སྤྲད་གུང་མོ་མདུང་ལྟར་བསྒྲེང་བ་དང༌། མར་མེ་ལ་རྡོ་རྗེ་བསྡམས་པ་ལས་གཡས་ཀྱི་མཐེབ་མཛུབ་ཟླུམ་པོར་བྱས་པའི་དབུས་སུ་གཡོན་གྱི་མཐེ་བོང་སྡོང་བུ་ལྟར་བསྒྲེང་བ། ཞལ་ཟས་ལ་རྡོ་རྗེ་ཐལ་མོ་ཁ་ཕྱེ་བ། རོལ་མོ་ལ་ལག་མཐིལ་གྱི་ཕེག་རྡོབ་པ་རྣམས་བྱིན་གྱིས་བརླབ་པའི་ཕྱག་རྒྱའོ། །མཆོད་པའི་སྤྲིན་གྱི་གཟུངས་ལན་གསུམ་རོལ་མོའི་སྒྲ་དང་བཅས་ནས་བརྗོད་དོ། །དེ་ནས་མཎྜལ་མེ་ཏོག་དྲི་བཟང་གི་ཆུ་སོགས་འདུས་བྱས། ཨོཾ་ཧྲིཿསྭཱཧཱ། ཁ་བཤལ། ཨོཾ་ཝཿསྭཱཧཱ། གདོང་བཀྲུ། ཇི་ལྟར་བལྟམས་པ་ནས། ཤྲི་ཡེ་ཧཱུཾ། ལུས་ཐམས་ཅད་བཀྲུ་བའམ། ཉེ་རེག་བྱ། ཨོཾ་བཛྲ་རེ་ཁ་ཧཱུཾ། ཞེས་མཎྜལ་དྲི་བཟང་གིས་བྱུགས། ཨོཾ་མ་ཎི་དྷ་རི་བཛྲི་ཎི་མཧཱ་པྲ་ཏི་སཱ་རེ་ཧཱུཾ་ཧཱུཾ་ཕཊ་ཕཊ་སྭཱཧཱ། ཞེས་བྱིན་གྱིས་བརླབས། ཨོཾ་མཧཱ་ཀཱ་ལ་སརྦ་བིགྷྣཱནུ་ཏ་སཱ་ད་ཡ་ཧཱུཾ་ཕཊ། ཡུངས་དཀར་གཏོར་ཞིང་བགེགས་བསྐྲད། ཨོཾ་སརྦ་ཏ་ཐཱ་ག་ཏ་རཀྵ་རཀྵ་མཾ། བསྲུང་བའོ། །བ་བྱུང་ལྔ། བདུད་རྩི་ལྔ། ཁྲག །མྱོས་བྱེད་རྣམས་བསྲེས་པས། རྐྱང་ནུལ་བྱས་པའམ། བྱས་པར་མོས་ལ། ཨོཾ་གཽ་མ་ཡེ་པཉྩ་པཉྩ་ཤོ་ནི་ཏ་མཎྜ་ལ་ཧཱུཾ་སྭཱཧཱ། མེ་ཏོག་འབུལ་བའི་གཟུངས་ལན་གསུམ་གྱིས་མེ་ཏོག་བྱིན་གྱིས་བརླབས། ཨོཾ་ཙནྡྲ་ཨར་ཀ་བི་མ་ལེ་སྭཱཧཱ། ལན་གསུམ་གྱིས་མཐའ་སྐོར་དུ་རི་མོ་བྲིས་ཤིང༌།
མེ་ཏོག་འབུལ་བའི་གཟུངས་ལན་གཅིག་གིས་མེ་ཏོག་བཀྲམ། སྤྲོ་ན། བ་ལྕི་ཆུ་བཅས་སྦྱིན་པ་སྟེ། །ཞེས་པ་ནས། སྐྱེ་བར་འགྱུར་གྱི་བར་བརྗོད། རང་གི་སྙིང་གའི་ཧཱུཾ་ལས་འོད་ཟེར་འཕྲོས། དུར་ཁྲོད་ཆེན་པོའི་གནས་བརྒྱད་དང༌། ཆོས་ཀྱི་དབྱིངས་ཤིན་ཏུ་རྣམ་པར་དག་པ་ནས། ནག་པོ་ཆེན་པོ་འཁོར་དང་བཅས་པ་སྤྱན་དྲངས། ཡི་དམ་གྱི་སྔགས་ཀྱི་མཐར། ཨོཾ་མཧཱ་ཀཱ་ལ་བྷ་ག་ཝཱན། ས་ཧ་ག་ན་དུ་ཏ་ཨཱ་ཀརྵ་ཡ་ཛཿཛཿཨེ་ཧྱེ་ཧི། ཞེས་བརྗོད་བདུད་རྩི་འཁྱིལ་བའི་སྔགས་ཀྱིས་བསང་ཆུ་གཏོར། ཨོཾ་བཛྲ་ཀ་མ་ལ་ཨཱ་ས་ན་ཏིཥྛ་ཧཱུཾ། ཨོཾ་བཛྲ་སཱུརྻ་ཨཱ་ས་ན་ཏིཥྛ་ཧཱུཾ། ཨོཾ་ཤཱ་བ་ཨཱ་ས་ན་ཏིཥྛ་ཧཱུཾ། འཁོར་བཅས་གདན་གྱི་སྟེང་དུ་འགྲེང་བའི་ཚུལ་གྱིས་བཞུགས། དུང་ཆོས་ཀྱི་ཆུའམ། རཀྟའི་ཨརྒྷཾ་འབུལ་ཏེ། ཨོཾ་མཧཱ་ཀཱ་ལ་ས་པ་རི་ཝཱ་རེ་བྷྱཿ ཨརྒྷཾ་པྲ་ཏཱིཙྪ་ན་མཿ དེ་བཞིན་དུ། པདྱཾ་ནས། ཤཔྟའི་བར་གྱིས་མཆོད། སྤྲོ་ན་ལྷ་སོ་སོའི་སྔགས་ཀྱི་མཐར། མཆོད་པའི་སྔགས་སྦྱར་ཏེ། མཆོད་ཡོན་དང་མེ་ཏོག་འབུལ། དཀོན་མཆོག་གསུམ་ལ་བདག་སྐྱབས་མཆི་སོགས་དང༌། དེ་ནས་གཏོར་སྔགས་ཙམ་གྱིས། གཏོར་མ་ཆུང་ངུ་ཞིག་འབུལ། རྐང་པ་བརྒྱད་པའི་ཤོ་ལོ་ཀ་དང་པོ་ལྟ་བུ་ཞིག་གིས་བསྟོད། ཨོཾ་མུཿཞེས་པས་འཁོར་བཅས་གཤེགས་སུ་གསོལ་ལོ། །འདི་ལ་རྒྱས་པར་ན་མཎྜལ་གྱི་ཆོ་ག་རྒྱས་པ་མཛད་ཅིང༌། རྗེས་ཀྱི་ཆོ་གའང་རྒྱས་པར་སྦྱོར་བ་ཡོད་མོད་ཀྱི། འབྲིང་པོའི་དབང་དུ་བྱས་པ་འདི་ཙམ་ལེགས་པར་མངོན་ནོ། །མདོར་བསྡུ་ན།
དེ་ལྟར་བཤད་པའི་མཎྜལ་གྱི་ཆོ་ག་མེད་ཀྱང་རུང་ངོ༌། །དེ་ནས་ཚད་མེད་བཞི་སྤྱི་དང་མཐུན་པར་བསྒོམ། ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། སྟོང་པའི་ངང་ལས་ཧཱུཾ་ལས་སྐྱེས་པའི་བསྲུང་བའི་འཁོར་ལོ་ཡངས་ཤིང་རྒྱ་ཆེ་བའི་ནང་དུ་དངོས་གྲུབ་འབྱུང་བའི་དུར་ཁྲོད་ཆེན་པོ་བརྒྱད། ཕྱོགས་སྐྱོང་བ་དང༌། ཞིང་སྐྱོང་བ་དང༌། ཤིང་དང༌། ཀླུ་དང༌། མེ་དང༌། ཆུ་དང༌། མཆོད་རྟེན་དང་བཅས་ཤིང༌། རོ་དང་རོ་ལངས། འབྱུང་པོའི་ཚོགས་ཀྱིས་ལང་ལོང་དུ་གང་བ། བྱ་དང་གཅན་གཟན་སྣ་ཚོགས་རྒྱུ་ཞིང༌། གྲུབ་པ་རིག་པ་འཛིན་པ་དང་དཔའ་བོ་དང་རྣལ་འབྱོར་མ་རྣམས་དམ་ཚིག་གིས་ཀུན་དུ་སྤྱོད་པ་དང༌། མཆོད་རྫས་ཐམས་ཅད་ཀྱིས་རྣམ་པར་བརྒྱན་པ་གནོད་སྦྱིན་དང༌། སྲིན་པོ་དང༌། ཤ་ཟ་དང༌། བྲན་དང་ཕོ་ཉའི་ཚོགས་སྤྱོད་ལམ་སྣ་ཚོགས་པས་ངོ་མཚར་བར་བྱེད་པའི་དབུས་སུ་གཞལ་མེད་ཁང་གྲུ་བཞི་སྒོ་བཞི་མཚན་ཉིད་ཐམས་ཅད་ཡོངས་སུ་རྫོགས་པ། ཕྱི་ནང་ཀུན་དུ་ལྷ་རྫས་ཀྱི་མེ་ཏོགཉམས་པའི་མགོ་བོ་སོགས། ཤ་ཁྲག་གི་མེ་ཏོག་རྣམ་པར་བཀྲམས་པ། དབུས་སུ་ཐོད་པའི་འཕྲེང་བས་བསྐོར་བའི་ནང་དུ། དཀྱིལ་འཁོར་དམར་པོ་ཟུར་གསུམ་པ་དང༌། དཀྱིལ་འཁོར་སྔོན་པོ་ཟུར་གསུམ་པ་བསྣོལ་བས་ཟུར་དྲུག་པ། དེའི་ལྟེ་བར་པདྨ་དང་ཉི་མའི་གདན་ལ་དགྲ་བགེགས་བསྒྲལ་བའི་ཞིང་
ཆེན་བསྣོལ་བ། སྒོ་བཞིར་ཉི་མ་དང་རོའི་གདན། གྲྭ་བཞིར་ཟླ་བ། ཆོས་འབྱུང་སྟེང་མའི་ཟུར་གསུམ་ལ་དབུགས་བྲལ་གྱི་གདན། འོག་མ་ལ་སོ་སོའི་བཞོན་པ་དང་བཅས་པ། དབུས་ཀྱི་གདན་གྱི་སྟེང་དུ་ཟླ་བ་དང་ཉི་མ་ཁ་སྦྱོར་ལ་གནས་པའི་ཧཱུཾ་མཐིང་ག་ལས་གྲི་གུག་ཐོད་ཁྲག་ཧཱུཾ་གིས་མཚན་པ་དེ་ལས་འོད་འཕྲོས། དགྲ་བགེགས་གདུག་པ་ཅན་ཐམས་ཅད་ཚར་བཅད། འཕགས་པ་མཆོད། འཕྲིན་ལས་རྣམ་བཞིས་སེམས་ཅན་གྱི་དོན་བྱས། སླར་འདུས་ཡོངས་སུ་གྱུར་པ་ལས། དཔལ་ནག་པོ་ཆེན་པོ་དུས་མཐའི་སྤྲིན་ལྟར་གནག་ཅིང༌། ཉི་མ་སྟོང་གིའི་གཟི་བརྗིད་ཅན། ཞལ་ཅིག་ཕྱག་བཞི་བནྡྷུ་ལྟར་དམར་བའི་སྤྱན་གསུམ་གཡོ་བ། སྨ་ར་དང༌། སྨིན་མ་དང༌། དབུ་སྐྲ་དམར་སེར་གྱེན་དུ་བརྫཻས་པ། ཕྱག་གཡས་ཀྱི་དང་པོས་གྲི་གུག་དང༌། གཡོན་དང་པོས་ཐོད་ཁྲག་ཐུགས་ཀར་སྟེང་འོག་ཏུ་འཛིན་པ་གཡས་འོག་མས་རལ་གྲི་འབར་བ་དང༌། གཡོན་འོག་མས་སྦྲུལ་དང་བཅས་པའི་ཏྲི་ཤུ་ལ་རྡོ་རྗེས་མཚན་པ་འཛིན་པ། སྟག་གི་ལྤགས་པ་རློན་པས་སྨད་དཀྲིས་པ། རྡོ་རྗེ་ནག་པོའི་རྩེ་ཕྲན་ཅན་གྱི་མི་མགོ་སྐམ་པོ་ལྔས་དབུ་ལ་བརྒྱན་པ། ཁྲག་འཛག་མགོ་བོ་བརྒྱ་ཕྱེད་ཀྱི་དོ་ཤལ་ཅན་རུས་པའི་རྒྱན་དྲུག་དང༌། སྦྲུལ་གྱིས་བརྒྱན་པ། ཧ་ཧ་དང༌། ཧཱུཾ་ཧཱུཾ་དང༌།
ཀི་ལི་ཀི་ལིའི་གད་རྒྱང་དྲག་པོ་སྒྲོག་ཅིང༌། སེམས་དཔའི་སྐྱིལ་ཀྲུང་སོགས་སྣ་ཚོགས་པས་རོལ་པས་བཞུགས་པ། མི་བཟད་སྲིན་པོའི་ལུས་ཅན། བོང་ཐུང་གསུས་པ་འཕྱང་བ། ཐུགས་རྗེ་ལྷག་པར་ཁྲོས་པ་ཆེས་ཆེར་འཁྲུགས་པ། རྔམ་པའི་སྟང་སྟབས་ཁྲོ་གཉེར་བསྡུས་ཤིང་མ་རུངས་པའི་མཆེ་བ་གཙིགས་པ། རབ་ཏུ་དཔའ་བས་གཞན་གྱིས་མི་ཐུབ་པ་དགྱེས་ཤིང་དྲེགས་པས་རྒྱ་ཆེར་བཞད་པ་སོགས་མཐའ་ཡས་པའི་ཉམས་དང་འགྱུར་བ་མངའ་ཞིང༌། འཇིག་དུས་ཀྱི་མེ་དཔུང་ལྟ་བུའི་དབུས་ན་དགེས་དགུར་རོལ་པས་འཇིགས་པའང་འཇིགས་པར་བྱེད་པའོ། །དེའི་པང་དུ་ཧྲཱིཿལས་འབྱུང་བའི་ནག་མོ་ཆེན་མོ་དམ་ཚིག་གི་དབང་མོས་འཁྱུད་པ་ནི། སྐུ་མདོག་ནག་མོ་ཁྲོ་ཞིང་སྒེག་པ། གཅེར་མོ་ཐོད་སྐམ་གྱི་དབུ་རྒྱན་དང་འཕྲེང་བ་ཅན། དབུ་སྐྲ་དམར་སེར་གྲོལ་བ། ཕྱག་གཡས་ཌཱ་མ་རུ་འཁྲོལ་ཞིང༌། གཡོན་ཐོད་པ་འཛིན་པས་ཡབ་ལ་འཁྱུད་པ། ལང་ཚོ་གསར་དུ་བདོ་ཞིང༌། ལྷག་མ་རྒྱན་སྤངས་པ། གཙོ་བོ་ཡབ་ཡུམ་གྱི་སྐུ་ལས། བྱ་རོག་དང༌། ཁྱི་དང༌། ཅེ་སྤྱང༌། སེང་གེ་དང༌། འདབ་ཆགས་དང༌། བུད་མེད། གདོལ་པ་ནག་པོའི་ཚོགས་ཕོ་ཉར་འགྱེད་པ། ཆོས་འབྱུང་སྟེང་མའི་གཙོ་བོའི་མདུན་གྱི་ཟུར་ལ། ཙཾ་ལས་ཙ་མུཎྜི་ནག་མོ་ཏྲི་ཤུལ་
དང་ཐོད་ཁྲག་འཛིན་པ། གཡས་ཟུར་དུ་ཧ་ལས་ཨུ་མ་དམར་མོ་གྲི་གུག་དང་ཐོད་པ་འཛིན་པ། གཡོན་ཟུར་དུ་ཧེ་ལས་ཕག་མོ་སྔོ་སྐྱ་ཁ་ཊྭཱཾ་ག་དང་མི་མགོ་འཛིན་པ། ཆོས་འབྱུང་འོག་མའི་གཙོ་མོའི་མདུན་ཟུར་དུ་ཡ་ལས་གཤིན་རྗེ་ནག་པོ་རལ་གྲི་དང་ཐོད་ཁྲག་ཐོགས་པ་མ་ཧེ་ལ་ཞོན་པ། གཡས་ཟུར་དུ་ར་ལས་སྲིན་པོ་སྨུག་ནག་གྲི་གུག་དང་ཐོད་པ་ཤ་ཆེན་གྱིས་གང་བ་འཛིན་པ། ཁྱི་ནག་ལ་གནས་པ། གཡོན་ཟུར་དུ་བྷི་ལས་དབང་ཕྱུག་ཆེན་པོ་ཐལ་སྐྱ་ཌཱ་མ་རུ་དང་རྩེ་གསུམ་འཛིན་པ། སྟག་ལ་གནས་པ། སྒོ་བཞིར་ཧཱུཾ་རེ་རེ་ཡོངས་སུ་གྱུར་པ་ལས། ཤར་དུ་ཐོ་བ་འཇིགས་བྱེད་དཀར་པོ་རྡོ་རྗེ་ཐོ་བ་འཛིན་པ། ལྷོར་དབྱུག་པ་འཇིགས་བྱེད་སེར་པོ་རྡོ་རྗེ་བེ་ཅོན་འཛིན་པ། ནུབ་ཏུ་པདྨ་འཇིགས་བྱེད་དམར་པོ་པདྨ་དམར་པོའི་སྡོང་པོ་འཛིན་པ། བྱང་དུ་རལ་གྲི་འཇིགས་བྱེད་ལྗང་ནག་རལ་གྲི་འཛིན་པ། དེ་བཞི་ཆར་ཡང་ཕྱག་གཡོན་པས་ཞགས་པ་བསྣམས་པ། གྲྭ་བཞིར་ཧྲཱིཿཡིག་བཞི་ཡོངས་སུ་གྱུར་པ་ལས། ཤར་ལྷོར་ལྷ་མོ་ཀུ་ལེ་སེར་མོ་ལྕགས་ཀྱུ་དང་ཞགས་པ་འཛིན་པ། ལྷོ་ནུབ་ཏུ་ཀུ་རུ་ཀུལླེ་དམར་མོ་མདའ་གཞུ་འཛིན་པ། ནུབ་བྱང་དུ་ཕུར་འདེབས་མ་སྔོན་མོ་ཐོ་བ་དང་ཕུར་བུ་འཛིན་པ། བྱང་ཤར་དུ་འཕྲོག་འཆང་མ་ལྗང་ཁུ་ཤཀྟི་དང་ཐོ་བ་འཛིན་པ། དེ་བཞི་ཆར་ཡང་ཅུང་ཟད་ཞི་ཞིང་
ཆགས་པའི་ཉམས་དང་ལྡན་པ། ཕོ་ཉ་ཐམས་ཅད་གཡོན་བརྐྱང་གི་སྟབས་ཀྱིས་གནས་པ། གཙོ་བོ་དང་རྣམ་པ་མཚུངས་ཤིང༌། མ་མོ་རྣམས་ནི་གཡས་བརྐྱང་གི་གནས་ཤིང༌། གཙོ་མོ་དང་མཚུངས་པའོ། །ལྷ་ཐམས་ཅད་ཀྱི་དཔྲལ་བར་ཨོཾ། མགྲིན་པར་ཨཱཿ ཐུགས་ཀར་ཧཱུཾ། གཙོ་བོའི་སྤྱི་བོ་ལ་སོགས་པའི་གནས་རྣམས་སུ། ཨོཾ་ཧ། ན་མ་ཧི། སྭཱཧཱ་ཧཱུཾ། བོ་ཥཊ་ཧེ། ཧཱུཾ་ཧཱུཾ་ཧོཿ ཕཊ་ཧཾ་རྣམས་དང༌། ཡུམ་གྱི་ལྟེ་བ་ལ་སོགས་པའི་གནས་རྣམས་སུ། ཨོཾ་བཾ། ཧཾ་ཡོཾ། ཧྲཱིཾ་མོཾོཾོཾ། ཧྲེཾ་ཧྲེཾ། ཧཱུཾ་ཧཱུཾ། ཕཊ་ཕཊ། ཞེས་པ་རྣམས་ཀྱིས་རྒྱས་བཏབ། རང་གི་སྙིང་ག་ནས་འོད་ཟེར་འཕྲོས། ཡེ་ཤེས་སེམས་དཔའི་ཚོགས་ཐམས་ཅད་ཨོཾ་མཧཱ་ཀཱ་ལ་ནས་ཨེ་ཧྱེ་ཧི་བར་གྱིས་གོང་བཞིན་སྤྱན་དྲངས། ཛཿཧཱུཾ་བཾ་ཧོཿ གཉིས་སུ་མེད་པར་ཐིམ། དབང་གི་ལྷ་རིགས་ལྔ་མདུན་གྱི་ནམ་མཁར་བཛྲ་ས་མཱ་ཛཿ པུཥྤེ་ནས། ཤཔྟའི་བར་གྱིས་མཆོད། བདག་ལ་དབང་བསྐུར་དུ་གསོལ། ཞེས་གསོལ་བ་བཏབས་པས་ཨོཾ་ཀ་ལ་ཤ་ཨ་བྷི་ན་ཡ་ནཾ་སྣཱ་ནཾ། ཨོཾ་ཤཱུ་ནྱ་ཏཱ་ཨ་དྷིཥྛ་ཏེ་སྭཱཧཱ། ཞེས་གསུང་ཞིང་དབང་བསྐུར། སྐུ་ལུས་ཀྱི་ནང་ཐམས་ཅད་གང༌། དྲི་མ་མཐའ་དག་སྦྱངས། ཆུ་ལྷག་མ་ཡར་འཁྱིལ་བ་ལས། གཙོ་བོ་ལ་མི་བསྐྱོད་པ། འཁོར་ཐམས་ཅད་ལ་གཙོ་བོ་ཉིད་ཀྱིས་
དབུ་རྒྱན། ཨོཾ་བཛྲ་མཧཱ་ཀཱ་ལ་ས་པ་རི་ཝཱ་རེ་བྷྱཿ ཨཉྩ་མ་ནཾ་པྲ་ཏཱིཙྪ་སྭཱ་ཧཱ། དེ་བཞིན་དུ། པྲོ་ཀྵ་ཎཾ། པཱདྱཾ། ཨརྒྷཾ་ཞེས་སྦྱར། དེ་ལྟར་ཆུ་བཞི་ལ། རྡོ་རྗེ་བསྡམས་པ་ལས་གུང་མོ་གཉིས་རྩེ་སྦྱར་ཏེ་བརྐྱང་བའི་ཕྱག་རྒྱའོ། །མེ་ཏོག་སོགས་ཕྱག་རྒྱ་སྤྱི་དང་མཐུན་ཞིང༌། སྔགས་ན་མཿའི་མཐའ་ཅན་དུ་བྱ། སྙིང་པོ་སོགས་རང་སྔགས་ཀྱི་མཐར་འབྲུ་གསུམ་བཏགས་པས་ནང་མཆོད་འབུལ། ཡབ་ཀྱི་གསང་གནས་ཧཱུཾ་ལས་བྱུང་བའི་རྡོ་རྗེ། ལྟེ་བར་བྱཱཾ་གྱིས་མཚན་པ་དང༌། ཡུམ་གྱི་པདྨ་ཧྲིཿལས་བྱུང་བའི་ཆུ་སྐྱེས་ཟེའུ་འབྲུའི་སྣ་རྩེར་དྱཾ་གྱིས་མཚན་པ། སྙོམས་པར་འཇུག་པའི་བདེ་བ་ཆེན་པོ་སྐུ་ཉམས་སུ་བསྟར་བར་མཛད། ཨོཾ་བཛྲ་ཨམྦུ་ཛ། དྭ་ན་དྭ་ས་མ་ཡོ་ག་མ་ཧཱཾ་སུ་ཁ་པཱུ་ཛི་ཏེ་ཧཱུཾ། རྐང་པ་བརྒྱད་པའམ་གང་ཡང་རུང་བས་བསྟོད། པད་སྐོར་གྱི་མཐར། ཐལ་མོ་ཁོང་སྟོང་དུ་སྦྱར་བ་ནག་པོ་ཆེན་པོའི་དམ་རྒྱ་དང༌། རྡོ་རྗེ་ཐལ་མོ་བཅིང་བ། ལྷ་མོ་ནག་མོའི་དམ་རྒྱ་སྟེ་ཕྱག་རྒྱ་དེ་དང་ལྡན་པས། ཨོཾ་བཛྲ་མཧཱ་ཀཱ་ལ་དྲྀ་ཤྱ་ཛཿཧཱུཾ་བཾ་ཧོཿས་མ་ཡ་སྟྭཾ། ས་མ་ཡ་ཧོ། ཨོཾ་མཧཱ་ཀཱ་ལ་ཧཱུཾ་ཕཊ། ལན་གསུམ་གྱིས་མགོན་པོ་འཁོར་བཅས་དང༌། ཨོཾ་མཧཱ་ཀ་ལི་དེ་ཝཱི་དྲྀ་ཤྱ་ནས། ས་མ་ཡ་ཧོ། ཨོཾ་སུ་ར་ཏ་ས་མ་ཡེ་ཤྭ་རི་ཧཱུཾ་ཧཱུཾ་ཕཊ་སྭཱཧཱ། ལན་གསུམ་གྱིས་ནག་མོ་ཆེན་མོ་འཁོར་བཅས་དམ་ལ་བཞག་གོ །དེ་ནས་བཟླས་པ་བྱ་བ་ནི། གཙོ་བོ་ཡབ་ཡུམ་གྱི་ཐུགས་ཀར་ཉི་མ་དང་ཟླ་བ་ལ་གནས་པའི་ཕྱག་མཚན་གྲི་གུག་དང་ཐོད་པ་སོ་སོའི་ལྟེ་བར་ས་བོན་སྔགས་ཀྱི་འཕྲེང་བ་དང་
བཅས་པ། རང་གི་སྙིང་ག་ནས་འོད་ཟེར་འཕྲོས། ཡུམ་གྱི་ཐུགས་ཀའི་ས་བོན་སྔགས་འཕྲེང་དང་བཅས་པ་ལ་ཐིམ། དེའི་འོད་ཟེར་གསང་བའི་ལམ་ནས་བྱུང༌། གཙོ་བོའི་ཐུགས་ཀའི་ས་བོང་སྔགས་འཕྲེང་དང་བཅས་པ་བསྐུལ་ཏེ། དེའི་འོད་ཟེད་ཞལ་ནས་འཐོན་ཏེ། བདག་གི་ལྟེ་བ་ནས་ཞུགས་སྙིང་གའི་སྔགས་འཕྲེང་ལ་ཐིམ་པར་བསམ་ལ། ཡབ་ཀྱི་བཟླས་པ་དང༌། ཡང་འཁོར་ཚུལ་གོ་བཟློག་པས་ཡུམ་གྱིས་བཟླས་པ་བྱའོ། །ཨོཾ་མཧཱཀཱ་ལ་ཧཱུཾ་ཕཊ། བོད་པའོ། །ཨོཾ་མཧཱ་ཀཱ་ལ་ཡ་ན་མོ་ཧཱུཾ་ཕཊ། མཉེས་པར་བྱེད་པ་སྟེ། ཡབ་ཀྱི་སྔགས་སོ། །ཨོཾ་སུ་ར་ཏཱ་ས་མ་ཡེ་ཤྭ་རི་ཧཱུཾ་ཧཱུཾ་ཕཊ་སྭཱཧཱ། ཡུམ་གྱི་སྔགས་སོ། །གཙོ་འཁོར་ཐམས་ཅད་ཀྱི་གཟུངས་སྔགསས་ནི། ཤཱ་ས་ནར་ཡོངས་སུ་གྲགས་པའོ། །གཏོར་ཆོག་ཙམ་གྱི་ཚེ། བཟླས་པ་དེ་ཙམ་གྱིས་ཆོག་ལ། རྒྱས་པ་ལ་མོས་ན། གཞུང་ལས་འབྱུང་བ་ལྟར་བཟླས་པར་བྱའོ། །དེ་ནས་གཏོར་མའི་ཆོ་ག་ནི། བདུད་རྩི་འཁྱིལ་བའི་སྙིང་པོས་བསངས། སྭ་བྷཱ་ཝས་སྦྱངས། སྟོང་པའི་ངང་ལས་ཡཾ་རཾ་ལས་རླུང་མེའི་དཀྱིལ་འཁོར་ལ་གནས་པའི་ཀ་པཱ་ལ་ཡངས་ཤིང་རྒྱ་ཆེ་བའི་ནང་དུ། ཧཱུཾ་བྷྲཱུཾ་ཨཾ་ཛྲིཾ་ཁཾ་ལས་ཤ་ལྔ་བཾ་མཾ་ལཾ་པཾ་ཏཾ་ལས་བདུད་རྩི་ལྔ། དེའི་སྟེང་དུ་ཨོཾ་དང་ཟླ་ཕྱེད། རྡོ་རྗེ་ཕྱེད་པ་ཧཱུཾ་གིས་མཚན་པ། རླུང་གཡོས་མེ་སྦར་རྫས་རྣམས་ཞུ། ཨོཾ་ཟླ་བ་ཧཱུཾ་རྣམས་ཀྱི་འོད་ཟེར་གྱིས་ཡེ་ཤེས་ཀྱི་བདུད་རྩི་མཐའ་དག་བཀུག་སྟེ། དེ་ཐམས་ཅད་གཅིག་ཏུ་འདྲེས་པ། དམ་རྫས་འབར་བའི་གཏོར་
མ་མཁའ་དབྱིངས་ཁྱབ་པར་གྱུར། ཨོཾ་ཨཱཿཧཱུཾ་ཧ་ཧོ་ཧྲིཿ ཞེས་བྱིན་གྱིས་བརླབས་ནས། རང་གི་སྙིང་ག་ནས་འོད་ཟེར་འཕྲོས་གཏོར་མའི་མགྲོན་འཇིག་རྟེན་པ་ཐམས་ཅད་ཨཱ་ཀརྵ་ཡ་ཛཿ དུར་ཁྲོད་ཆེན་པོ་བརྒྱད། ཞི་སྐྱོང༌། གནོད་སྦྱིན། སྲིན་པོ། འབྱུང་པོ། མ་མོ། རོ་ལངས། མཁའ་འགྲོ་མའི་ཚོགས་ཐམས་ཅད་ཀྱིས་ཡོངས་སུ་གང་བར་གྱུར། ན་མཿས་མནྟ་ཀ་ཡ་ཝཀྐ་ཙིཏྟ་བཛྲ་ཎཾ། ན་མོ་མཧཱ་བཛྲ་ཀྲོ་དྷ་ཡ། མཧཱ་དཾ་ཏྲོ་ཏྐཊ་བྷི་ཥ་ཎ་བྷཻ་ར་བཱ་ཡ། ཞེས་པ་ལ་སོགས་པ། བདུད་རྩི་འཁྱིལ་བའི་གཟུངས་གསང་བ་འདུས་པ་ནས་འབྱུང་བ་ལྟར། ཚར་གཅིག་གིས་མགོར་དྲངས་ལ། ན་མཿས་མནྟ་ཀཱ་ཡ་ཝཀྐ་ཙིཏྟ་བཛྲ་ཎཾ། ཨོཾ་ཨཱཿཧཱུཾ། མཾ་མཾ། ཧཾ་ཧཾ། ཀཾ་ཀཾ། རཾ་རཾ། ར་ར། མཱ་ཧ་མཱ་ཧ་ཀ་ལ། ད་ཧ་ད་ཧ། པ་ཙ་པ་ཙ། གརྫ་གརྫ། ཀེ་ཤ་བརྟ་མ་ནེ། ཨི་མཾ་བཱ་ལིཾ་གྲྀཧྞ་གྲྀཧྞ། གྲྀཧྞ་པཱ་ཡ། གྲྀཧྞ་པཱ་ཡ། ཨོཾ་ཨཱཿཧཱུཾ། སརྦ་བིགྷྣཱན། བི་ན་ཡ་ཀ ཨོཾ་ཨ་ཀཱ་རོ་མུ་ཁཾ་སརྦ་དྷརྨཱ་ཎཱཾ། ཨཱདྱ་ནུཏྤནྣ་ཏྭ་ཏ། ཨོཾ་ཨཱཿཧཱུཾ་ཕཊ་སྭཱཧཱ། ཞེས་ལན་གསུམ་མམ་བདུན་གྱིས་གཞལ་མེད་ཁང་གི་ནང་ན་བཞུགས་པའི་ལྷ་ཚོགས་རྣམས་ལ་འབུལ། ལྷ་རེ་རེའི་མཚན་ནས་སྨོས་པའི་མཆོད་པའམ་བསྡུ་ན་སྤྱི་ཁྱབ་ཏུ་ཕྱི་ནང་གསང་གསུམ་གྱིས་མཆོད་པ་ཚར་གཅིག་བྱ། གཏོར་མ་གཉིས་པ་དུར་ཁྲོད་ཀྱི་འབྱུང་པོའི་ཚོགས་ལ་དམིགས་ཏེ། བདུད་རྩི་འཁྱིལ་བའི་གཟུངས་ཚར་
གཅིག་གི་མཐར། ཨོཾ་སརྦ་ཀྵེ་ཏྲ་པཱ་ལ་ས་ཧ་ག་ཎ་དུ་ཏི་བཱ་ལིཾ་གྲྀཧྞ་གྲྀཧྞ་ཁ་ཁ་ཧཱུཾ་ཕཊ་སྭཱཧཱ། ཞེས་དུར་ཁྲོད་བརྒྱད་ལ་དམིགས་ཏེ། ལན་བརྒྱད་ཀྱིས་འབུལ། ཨརྒྷཾ་ནས་ཤཔྟའི་བར་གྱིས་མཆོད། ཤ་ཆང་དང་ཟས་སྣ་ཚོགས་པ་དང༌། སྲོག་ཆགས་ཀྱི་གཟུགས་བརྙན་མང་པོ་ཡོད་ན། ནམ་མཁའ་མཛོད་ཀྱི་སྔགས་རྒྱས་རྒྱ་ཆེར་སྤེལ་ལ། ཁ་འབར་མའི་སྔགས་རྒྱས་བྱིན། གོང་གི་གཏོར་སྔགས་ཚར་གཅིག་གིས་ཀྱང་བསྔོས་ལ། ཨོཾ། ཤིང་གཅིག་དང་ནི་དུར་ཁྲོད་དང༌། །རི་དང་བྲག་དང་ཕུག་གི་ས། །ཡུལ་གྱི་འདབས་དང་ལམ་དང་བཞི། །མ་མོའི་ཁྱིམ་ན་གང་གནས་པ། །ནག་པོ་འབྱུང་པོ་རོ་ལངས་དང༌། །ཤ་ཟ་གནོད་སྦྱིན་སྲིན་པོའི་ཚོགས། །མཁའ་འགྲོ་མཁའ་འགྲོ་མ་གཞན་སླར། །ཕྱོགས་སྐྱོང་བ་དང་ཞིང་སྐྱོང་བ། །ཆུང་མ་སྡེ་དང་འཁོར་གཡོག་བཅས། །མེ་ཏོག་སྤོས་དང་ན་བཟའ་དང༌། །གཏོར་མ་འདི་ལོང་བདག་ལ་ནི། །བསམ་པའི་དོན་ཀུན་འགྲུབ་པར་མཛོད། །ནད་དང་གདོན་སོགས་ཞི་བ་དང༌། །ལོངས་སྤྱོད་ཚེ་དང་བཀྲ་ཤིས་འཕེལ། །དབང་དང་དགུག་པའི་ལས་མཛོད་ཅིག །དགྲ་དང་འབྱུང་པོ་ཉམས་བྱེད་ཅིང༌། །བསད་དང་བསྐྲད་དང་དབྱེ་བར་མཛོད། །དེའི་ཤ་ཁྲག་ཟ་བ་དང༌། །ལུས་ཀྱང་རྡུལ་ཕྲན་བཞིན་དུ་བཤིག །དགྲ་བོ་སྡེ་བཅས་ནི་མཱ་ར་ཡ་ཕཊ། །གང་ཞིག་དམ་ཆོས་བསྲུང་
མཛོད་ཀྱེ། །ལྷ་མིན་བདུད་བཅས་འཇོམས་པར་མཛོད། །དུལ་ཞིང་དམ་ཚིག་ལྡན་པ་ལ། །ཀུན་དུ་བསྲུང་ཞིང་རྒྱས་པར་མཛོད། །ཅེས་ལས་བཅོལ། སྨོན་ལམ་བཏབ། བཀྲ་ཤིས་ཀྱི་ཚིགས་བཅད་ཅིག་བརྗོད་ལ། ཡི་གེ་བརྒྱ་པ་དང་བཅོ་ལྔ་པ་ལན་གསུམ་གྱིས་ཕྱི་རོལ་གྱི་དུར་ཁྲོད་ན་གནས་པ་རྣམས་གཤེགས་སུ་གསོལ། སླར་ཡང་ཕྱིའི་མཆོད་པས་མཆོད། དེ་ནས་མཚན་བཞི་བཅུ་རྩ་ལྔ་པས་བསྟོད་པར་བྱས་ཏེ། ཨོཾ་ཐུབ་པ་ཉི་མ་ལ་ཕྱག་འཚལ་ལོ། །སངས་རྒྱས་དཔའ་བོ་ལ་ཕྱག་འཚལ་ལོ། །རལ་གྲི་དང་ཐོད་པས་ཕྱག་བྲེལ་བ་ལ་ཕྱག་འཚལ་ལོ། །དཔའ་བོ་དུར་ཁྲོད་ལ་དགེས་པས། །ཕོ་ཉར་བཅས་པའི་ཚོགས་པ་དང༌། །བྱང་ཆུབ་སེམས་དཔའ་རྣམས་ལ་གསུངས། །འབྱུང་པོའི་ཚོགས་རྣམས་ང་ལ་ཉོན། །ནག་པོ་ཆེན་པོའི་མི་འཇིགས་པ། །འདོད་སྦྱིན་གྲུབ་པ་རབ་ཏུ་སྟེར། །ནད་རྣམས་འཕྲོག་པར་བྱེད་པ་འདི། །འགྲོ་བ་རྣམས་ལ་ཕན་ཕྱིར་ཟུང༌། །ན་མོ་ཤྨ་ཤ་ནྲ་བཱ་སི་ནི། མཧཱ་ཀཱ་ལ་ཨ་ནུ་ཙ་རཱ་ཡ། ཏདྱ་ཐཱ། ཙ་ལེ་པྲ་ཙ་ལེ། ལ་ལ་ལ་ལ་ཡ་དེ་བ་ལིཾ་ག་སྭཱཧཱ། ཨོཾ། དགེ་བ་ཅན་ནི་དགེ་བསྙེན་ཏེ། །གཏུམ་པོ་ཀླ་ཀློའི་རིགས་ཀྱི་ནད། །བདུད་དང་བགེགས་ཀྱི་ཁྲག་གསོལ་བ། །ལག་པ་བཞི་པ་སྟོབས་པོ་ཆེ། །དེ་བཞིན་བྱེ་བ་མཐའ་ཡས་ལག །སྲིན་པོའི་ལྷ་སྟེ་སྲིན་པོའོ། །འབྱུང་པོས་བསྐོར་བ་ས་འོག་འདུལ། །ཉི་མའི་བུ་ཡི་མག་པ་
སྟེ། །རྩེ་གསུམ་འཛིན་པ་རྩེ་གསུམ་ལུས། །ཀླུའི་རྒྱལ་པོ་རྒྱན་དུ་བྱས། །མི་གསུམ་ལག་ན་གྲི་གུག་སྟེ། །ཅང་ཏེའི་སྒྲ་ཡིས་བོས་བྱས་ནས། །རྣལ་འབྱོར་མ་ལ་འཁྱུད་པར་བྱེད། །སྟག་དང་སེང་གེ་གླང་པོ་དང༌། །ཅེ་སྤྱང་བྱེ་བས་གར་བྱེད་ཅིང༌། །དྲི་མའི་བ་མོས་གླུ་བླངས་ཏེ། །མ་མོའི་ཚོགས་ཀྱིས་ཕྱག་བྱས་པ། །རོ་ལངས་རྒྱལ་པོ་གདོན་ཀྱི་གདོན། །གཤེད་བྱེད་བྱད་མའི་བདག་པོ་སྟེ། །ཉི་མ་ཟླ་བ་རྒྱུ་སྐར་གཙོ། །ཡང་དག་རིག་པ་ཆུ་བོ་འགྲོལ། །ཐིག་ལེ་བརྒྱ་པ་གདོལ་པའི་རྒྱལ། །ནག་མོའི་བུ་སྟེ་བུམ་པའི་ལྟོ། །སྲེག་བྱེད་གྲོང་ཁྱེར་གསུམ་གྱི་དགྲ། །པགས་པའི་གོས་ཅན་གསུས་པོ་ཆེ། །རོ་ཡི་གདན་གནས་དུར་ཁྲོད་དགྱེས། །སྦྲུལ་དང་ཐོད་པའི་ཐོད་འཆང་བ། །དང་པོའི་ཁྱི་སྟེ་བྱ་རོག་གཟུགས། །མིང་པོ་གསུམ་གྱི་ཕ་ཞེས་གྲགས། །ལོག་སྤྱོད་ལོག་འདྲེན་བགེགས་ཀྱི་བདག །ལྷ་མིན་མཐར་བྱེད་སྲིང་མོའི་ཁྱོ། །ཚོགས་བདག་ཆེན་པོ་ལྷ་ཆེན་བུ། །ཧཱུཾ་སྭཱཧཱ། །གང་ཞིག་མིང་འདི་འཆང་བ་དང༌། །དུས་གསུམ་དུ་ནི་འདོན་བྱེད་པ། །དེ་ལ་འཚེ་རྣམས་བྱེད་པར་འགྱུར། །མངོན་སྤྱོད་སྣ་ཚོགས་འཇིག་རྟེན་སྐྱོང༌། །གཤིན་རྗེ་ཡིས་ཀྱང་མདུན་ནས་འདུད། །གྲུབ་པ་རིག་འཛིན་བུ་མོ་རྙེད། །གསེར་དང་གཏེར་ནི་ཐོབ་འགྱུར་ཞིང༌། །སྔགས་འཆང་མ་དང་ལྷན་ཅིག་རྩེ། །དྲག་པོ་
དུར་ཁྲོད་གནས་པ་རྣམས། །ཡོན་ཏན་ལྡན་པ་དེ་ཡིན་འགྱུར། །འབྱུང་པོ་དག་གིས་ཕྱག་བྱས་པ། །སྲིད་གསུམ་རྡོ་རྗེའི་གནས་ཐོབ་པའོ། །ཧཱུཾ་ཧཱུཾ་ཕཊ་ཕཊ་སྭཱཧཱ། ཞེས་པ་ནི་དཔལ་ནག་པོ་ཆེན་པོའི་བསྟོད་པ་རྗེ་བཙུན་སངས་རྒྱས་ཀྱིས་གསུངས་པའོ། །ཞེས་སོ། །དེ་ནས་འདོད་པའི་དོན་ལ་གསོལ་བ་བཏབ། ཡི་གེ་བརྒྱ་པ་ལན་མང་དུ་བརྗོད། སོ་རྩི། ན་བཟའ། མེ་ཏོག་འཕྲེང་བ་རྣམས་ཕུལ་ལ། བཟོད་པར་གསོལ་ཏེ། བཛྲ་མུཿཞེས་ཡེ་ཤེས་པ་གཤེགས། དམ་ཚིག་པ་རང་ལ་བསྡུ། སྨོན་ལམ་དང་བཀྲ་ཤིས་རྒྱ་ཆེར་བརྗོད་པར་བྱའོ། །འདི་ནི་ཉེ་བསྙེན་དང་འབྲེལ་བ་ཡིན་མོད་ཀྱི། བསྙེན་པ་དང་པོ་སྔོན་དུ་མ་སོང་བས་ཀྱང་མཆོད་མཆོག་གི་ལག་ལེན་འདི་ཁོ་ན་བཞིན་བྱ་བ་ཡིན་ནོ། །སྤྱིར་འདི་ལུགས་ཀྱི་སྒྲུབ་པའི་ཐབས་ཀྱི་གནད་ནི། བསྙེན་པ། ཉེ་བསྙེན། བསྙེན་པ་ཆེན་པོ། ཉེ་བསྙེན་ཆེན་པོ་རྣམས་ཀྱི་རྣམ་གཞག་ལེགས་པར་ཕྱེད་ཅིང༌། དེ་དག་གི་མན་ངག་ཞལ་གྱི་གདམས་པ་ལག་ལེན་དང༌། བཅས་པ་ལ་འདྲེས་པ་གལ་ཆེ་བ་ཡིན་ནོ། །རྗེས་གནང་གི་ཡིག་ཆུང་ནི་ལོགས་སུ་ཤེས་སོ། །ཡེ་ཤེས་གཅིག་ཉིད་སྣ་ཚོགས་ཐ་དད་སྐུ། །གང་དེའི་ཕ་མཐའ་སུ་ཡིས་བརྗོད་པར་ནུས། །འོན་ཀྱང་འཕགས་པའི་ཡུལ་ན་བརྒྱད་ཀྱི་གྲངས། །རབ་གྲགས་དེ་དག་ཀུན་གྱི་སྙིང་པོ་ནི། །ཚུལ་འདི་ལགས་ཤིང་སྒྲུབ་ཐབས་ཐ་དད་པ། །མཐའ་དག་གཅིག་གྱུར་ཞི་བའི་ཞབས་ཀྱིས་མཛད། །དེ་རྗེས་འབྲངས་ནས་མཆོད་ཆོག་མདོ་ཙམ་སྦྱར། །འདི་ནི་ཡེ་ཤེས་མགོན་པོ་ཉིད་སྒྲུབ་ཚུལ། །སྲིད་གསུམ་མིང་པོ་གསུམ་གྱི་སྔགས་རྒྱུད་
དང༌། །བསྲེས་པའི་སྒྲུབ་ཐབས་མང་པོས་ས་སྟེང་ཁྱབ། །བོད་དང་མ་འདྲེས་འཕགས་ཡུལ་མཁས་གྲུབ་གསུང༌། །འདི་ནི་རྒྱལ་བ་དགེས་པའི་ལམ་དུ་ངེས།། །།ཞེས་པ་བླ་མ་དམ་པའི་བཀའ་སྩལ་སྤྱི་བོར་ནོས་ནས། ཏཱ་ར་ནཱ་ཐས་སྟག་ལུང་དུ་སྨྲས་པའོ། །མངྒ་ལཾ།