གུར་མགོན་ལྷ་བརྒྱད་མའི་སྒྲུབ་ཐབས།
ཨོཾ་སྭཱ་སྟི། ཁྲག་འཐུང་དཔལ་གྱི་ཕོ་ཉ་མཆོག །གུར་གྱི་མགོན་པོ་ལྕམ་དྲལ་ལ། །བཏུད་ནས་གཏོར་ཆོག་རྗེས་གནང་གི །ཆོ་ག་ཉུང་ངུ་རྣམས་གསལ་བྲི། །མདུན་དུ་ཁ་ཟས་བཟང་དགུ་ལས་གྲུབ་པའི་གཏོར་མ་ཤ་ཁྲག་གིས་བརྒྱན་པ་
བཤམ། དེའི་མདུན་དུ་མཆོད་པ་བཀོད་ལ། བདག་བསྐྱེད་ཧེ་རུ་ཀའི་རིགས་སམ། ཁྲོ་བོའི་རྒྱལ་པོ་གང་ཡང་རུང་བ་ཞིག་བསྒོམས་ནས། མཆོད་པ་སྤྱི་དང་མཐུན་པར་བྱིན་གྱིས་བརླབས། གཏོར་མའང་ཡི་དམ་གང་བྱེད་དེ་ཉིད་ཀྱི་ཆོ་ག་ལྟར་རམ། བླ་མེད་སྤྱི་འགྲོའི་བྱིན་རླབས་བསྡུས་པ་གང་འཐད་བྱ། སྭ་བྷཱ་ཝས་སྟོང་པར་སྦྱངས། སྟོང་པའི་ངང་ལས་མདུན་གྱི་ནམ་མཁའི་གནས་སུ། དུར་ཁྲོད་ཆེན་པོའི་དབུས་ན་དགྲ་བགེགས་མནན་པའི་སྟེང་དུ་པཾ་ལས་པདྨ། རཾ་ལས་ཉི་མའི་སྟེང་དུ་ཧཱུཾ་མཐིང་ནག་ལས་འོད་འཕྲོས། དགྲ་བགེགས་གདུག་པ་ཅན་ཐམས་ཅད་ཚར་བཅད། ཚུར་འདུས་ཡོངས་སུ་གྱུར་པ་ལས། རྡོ་རྗེ་ནག་པོ་ཆེན་པོར་དུས་ཀྱི་མུན་པ་ལྟ་བུའི་སྐུ་མདོག་ཅན་ཆེ་ཞིང་ཆེར་འབར་བ། ཞལ་གཅིག་ཕྱག་གཉིས་གཡས་གྲི་གུག་གཡོན་ཐོད་པ་ཁྲག་གིས་གང་བ། ཐུགས་ཀར་སྟེང་འོག་ཏུ་འཛིན་པ། ཕྱག་གཉིས་ཆར་གྱི་དབུས་ན་རྣམ་འཕྲུལ་གྱི་གཎྜེ་བསྣམས་པ། སྤྱན་གསུམ་དང་ལྡན་པ། ཞལ་མཆེ་བ་གཙིགས་པ། དབུ་སྐྲ་སེར་པོ་གྱེན་དུ་བརྫཻས་པ། མི་མགོ་སྐམ་པོ་ལྔའི་དབུ་རྒྱན་དང༌། རློན་པ་ཁྲག་འཛག་པ་ལྔ་བཅུའི་དོ་ཤལ་ཅན། རུས་པའི་རྒྱན་དྲུག་དང་སྦྲུལ་གྱིས་བརྒྱན་པ། སྟག་གི་པགས་པས་ཤམ་ཐབས་ཅན། དར་སྣ་ཚོགས་ཀྱི་ཅོད་པན་དང་ལྷབ་ལྷུབ་ཀྱིས་ཀླུབས་པ། མིའུ་
ཐུང་གེལ་བའི་འདུག་སྟངས་ཀྱིས་རོའི་སྟེང་ན་བཞུགས་པ། དེའི་གཡས་ན་བྱ་ནག །གཡོན་ན་ཁྱི་ནགརྒྱབ་ན་ལྕགས་སྤྱང༌། མདུན་ན་མི་ནག །སྟེང་ན་ནམ་མཁའ་ལྡིང་གི་སྤྲུལ་པའི་ཕོ་ཉ་འཕྲོ་བ། མི་བསྐྱོད་པའི་དབུ་བརྒྱན་ཅན། ཡེ་ཤེས་ཀྱི་མེ་རབ་ཏུ་འབར་བའི་དབུས་ན་བཞུགས་པ། འཁོར་ལས་བྱེད་སྤྲུལ་པ་ཡང་སྤྲུལ་སྡེ་བརྒྱད་ཀྱི་ཚོགས་དཔག་ཏུ་མེད་པས་བསྐོར་བའོ། །དེའི་གཡོན་དུ་ཏྲག་ལས་ཨེ་ཀ་ཛ་ཊི་སྐུ་མདོག་སྔོན་མོ། ཞལ་གཅིག་ཕྱག་གཉིས་ཀྱིས་བདུད་རྩིས་གང་བའི་བུམ་པ་ཐུགས་ཀར་འཛིན་པ། དར་དཀར་གྱི་ན་བཟས་སྟོད་གཡོགས་པ། སྟག་གི་པགས་པའི་ཤམ་ཐབས་ཅན། རལ་པ་ལན་བུ་གཅིག་ཏུ་གྱུར་ནས་གཡོན་དུ་འཕྱང་བ། ཁྲོ་མོའི་རྣམ་པ་ཅན། དེའི་ལྟོ་བ་ཡངས་པའི་ནང་དུ་ཏྲཀ་ལས་ཁྲག་གི་རྒྱ་མཚོའི་དབུས་སུ་བྷྱོཿལས་དཔལ་ལྡན་ལྷ་མོ་འདོད་པ་ཁམས་ཀྱི་དབང་ཕྱུག་མ་བོང་བུ་གྭ་པ་ལ་ཞོན་པ། སྐུ་མདོག་སྔོ་ནག །ཞལ་གཅིག་ཕྱག་བཞི་མ། གཡས་ཀྱི་དང་པོ་ན་རལ་གྲི། གཉིས་པ་ན་ཐོད་པ་ཁྲག་གིས་གང་བ། གཡོན་གྱི་དང་པོ་ན་མདུང༌། གཉིས་པ་ན་རྩེ་གསུམ་འཛིན་པ། མི་མགོ་སྐམ་པོ་ལྔའི་དབུ་རྒྱན་དང༌། རློན་པ་ལྔ་བཅུའི་དོ་ཤལ་ཅན་རུས་པའི་རྒྱན་དྲུག་དང་ལྡན་པ། གླང་པོ་ཆེའི་ཀོ་བས་སྟོད་གཡོགས་ཤིང༌།
བ་ལང་གི་ཀོ་བས་སྨད་གཡོགས་པ། རེ་ལྡེའི་ཤམ་ཐབས་ཅན། ཀླུའི་དབང་པོའི་སྐེ་རགས་བཅིངས་པ་སྤྱན་གསུམ་དང་ལྡན་ཞིང༌། མི་རོ་རེངས་པ་ཁར་བཅུག་ནས་མཆེ་བ་གཙིགས་པ། སྙན་གཡས་པ་ལ་དུག་སྦྲུལ་དང༌། གཡོན་པ་ལ་སེང་གེས་བརྒྱན་པ། སྐུ་ལ་ཁྲག་གི་ཐིག་ལེ་དང་ཞག་གི་ཟོ་རིས་དང་ཐལ་ཆེན་གྱི་ཚོམ་བུ་བཀོད་པ། ཤིན་ཏུ་རིད་ཅིང་ལྟེ་བའི་ཐད་ཀ་ནས་ཉི་ཟླ་འཆར་བ། མ་མོ་མཁའ་འགྲོ་ཤ་ཟ་འབུམ་སྡེའི་དབུས་ན་ཧཱུཾ་དང་བྷྱོཿའི་སྒྲ་སྒྲོག་པ། ལྕམ་དྲལ་གཉིས་ཀའི་དཔྲལ་བར་ཨོཾ། མགྲིན་པར་ཨཱཿ ཐུགས་ཀར་ཧཱུཾ། ཧཱུཾ་ལས་འོད་འཕྲོས་འོག་མིན་ནས་རྣམ་པར་སྣང་མཛད་ཀྱི་ཐུགས་ཀ་ནས་མགོན་པོ་དང༌། རང་བཞིན་གྱི་གནས་ནས་ལྷ་མོ་སྤྱན་དྲངས་པར་མོས། རྡོར་དྲིལ་འཛིན་པས། མགོན་པོ་ལྕམ་དྲལ་གནས་འདིར་གཤེགས། །ད་ལྟ་སྙིགས་མ་ལྔ་ཡི་དུས། །གཤེགས་ཤིང་བཞུགས་པའི་གནས་ངན་ཡང༌། །ཤཱཀྱའི་བསྟན་པ་བསྲུང་བ་དང༌། །བདག་ཅག་རྣམས་ལ་ཕན་གདགས་ཕྱིར། །གནས་འདི་ཉིད་དུ་གཤེགས་སུ་གསོལ། །ཨོཾ་ཤྲཱི་མཧཱ་ཀཱ་ལ་ཡ། མཧཱ་ཀཱ་ལི་དེ་བཱི་ཨེ་ཧྱེ་ཧི། ཛཿཧཱུཾ་བཾ་ཧོཿ པདྨ་ཀ་མ་ཡ་སྟྭཾ། ཨོཾ་ཤྲཱི་མཧཱ་ཀཱ་ལ་ཡ། མཧཱ་ཀ་ལི་དེ་ཝི་ཡེ། གྲྀཧྞ་དཾ་ཨརྒྷཾ་སྭཱཧཱ་ནས། ཤཔྟའི་བར་གྱིས་མཆོད། ཐལ་མོ་ཁོང་སྟོང་དུ་སྦྱར་
བ་མགོན་པོའི་དམ་ཚིག་གི་ཕྱག་རྒྱ། ཐལ་མོའི་སོར་མོའི་རྩེ་མོ་བསྣོལ་བ་ལྷ་མོའི་དམ་རྒྱའོ། །ཨོཾ་མཧཱ་ཀཱ་ལ་ཡ། མཧཱ་ཀ་ལི་དེ་ཝི་ཡེ། ས་མ་ཡ་སྨ་ར་ས་མ་ཡ། མ་ཏི་ཀྲ་མ་ཡ། ས་མ་ཡ། རཀྵནྟུ། དཔལ་རྡོ་རྗེ་ནག་པོ་ཆེན་པོ་ལྕམ་དྲལ་བྲན་གཡོག་བཀའ་སྡོད་འཁོར་དང་བཅས་པ་ཐམས་ཅད་མཆོད་སྦྱིན་གྱི་གཏོར་མ་རྒྱ་ཆེན་པོ་འདི་བཞེས་ལ། རྩ་བ་དང་བརྒྱུད་པར་བཅས་པའི་དཔལ་ལྡན་བླ་མ་དམ་པ་རྣམས་ཀྱི་བཀའ་དང་དམ་ལས་མ་འདའ་བར་དམ་ཚིག་སྲུངས། བསྟན་པ་སྐྱོངས། དཀོན་མཆོག་གི་དབུ་འཕང་བསྟོད། ཁྱད་པར་དུ་བསྟན་པ་དང༌། བསྟན་པ་འཛིན་པ་རྣམས་དང༌། རྣལ་འབྱོར་བ་བདག་ཅག་འཁོར་དང་བཅས་པ་ལ་གནོད་ཅིང་འཚེ་བ། ལམ་སྒྲུབ་པ་ལ་བར་དུ་གཅོད་པར་བྱེད་པའི་དགྲ་བགེགས་ལོག་པར་འདྲེན་པའི་ཚོགས་རྣམས་ཀྱི་བསམ་ངན་སྦྱོར་རྩུབ་ཐམས་ཅད་ཞི་བའི་ཐབས་ཀྱིས་འདུལ་བར་མཛད་དུ་གསོལ། གལ་ཏེ་ཞི་བས་འདུལ་དུ་མ་འཚལ་ན། གང་ལ་གང་འཚམས་པའི་ཆད་པས་བཅད་པ་དང༌། བསྐྲད་ཅིང་གཟིར་བ་དང༌། དབྱེ་བ་དང༌། སྡིགས་ཤིང་སྤ་སྐོང་བར་མཛད་དུ་གསོལ། མདོར་ན་ཆོས་སྒྲུབ་པའི་བར་ཆད་ཐམས་ཅད་ཞི་བ་དང༌། བསམ་སྦྱོར་ཆོས་དང་མཐུན་པ་ཡིད་བཞིན་དུ་འགྲུབ་ཅིང༌། བསྟན་པ་དང༌། བསྟན་པ་འཛིན་པ་དང༌། འཇིག་རྟེན་པ་ཀུན་དར་ཞིང་
རྒྱས་པར་མཛད་དུ་གསོལ། རྡོ་རྗེ་ཐལ་མོ་ཁ་གྱེན་དུ་ཕྱེ་ལ། ཨོཾ་མཧཱ་ཀཱ་ལཱ་ཡ། མཧཱ་ཀཱ་ལི་དེ་ཝི་ཡེ། ན་མཿསརྦ་ཏ་ཐཱ་ག་ཏེ་བྷྱོ་བི་ཤྭ་མུ་ཁེ་བྷྱཿ སརྦ་ཐཱ་ཁཾ་ཨུངྒ་ཏེ། སྥ་ར་ཎ་ཨི་མཾ་ག་ག་ན་ཁཾ། གྲྀཧྞ་དཾ་བཱ་ལིཾ་ཏ་ཡེ་སྭཱཧཱ། གོང་ལྟར་མཆོད། ཕུད་གཏོར་ཞིང༌། ཨོཾ་ཤྲཱི་མཧཱ་ཀཱ་ལ་ཡ། ཤཱ་ས་ན་ཨུ་པ་ཧ་རི་ཏེ་ཨེ་ཥ་པཉྩི་མ་ཀ་ལོ། ཨ་ཡཾ་ཨི་དཾ། རཏྣ་ཏྲ་ཡཱ་པ་ཀ་རི་ཎེ། ཡ་ཏི་པྲ་ཏིཛྙཾ། སྨ་ར་སི་ཏ་དཱ། ཨི་དཾ་དུཥྟཾ་ཁ་ཁ་ཁཱ་ཧི་ཁཱ་ཧི། མཱ་ར་མཱ་ར། གྲྀཧྞ་གྲྀཧྞ། བནྡྷ་བནྡྷ། ཧ་ན་ཧ་ན། ད་ཧ་ད་ཧ། པ་ཙ་པ་ཙ། དི་ན་མེ་ཀེ་ན་ཧཱུཾ་ཕཊ། ཨོཾ་རོ་རུ་རོ་རུ་བི་ཏིཥྛ་བ་ཏོ་སི་ཀཱ་མ་ལ་རཀྵ་སི་ཧཱུཾ་བྷྱོཿཧཱུཾ། ཧཱུཾ། སྲིན་པོའི་གཟུགས་ཀྱིས་གདུགས་པ་ཅན། །ཚར་གཅོད་བྱང་ཆུབ་སེམས་དཔའ་སྟེ། །གྲོང་ཁྱེར་གསུམ་བརྩེགས་འཇིགས་བྱེད་པ། །གཏུམ་པོ་ཁྱོད་ལ་བདག་བསྟོད་དོ། །མདོག་ནག་གཟུགས་ཐུང་གཟི་བརྗིད་ཆེ། །གདུག་པ་ཚར་གཅོད་གྲི་གུག་གཡས། །གཡོན་པ་གདུག་པའི་ཁྲག་བཀང་སྣོད། །ཐོད་འཕྲེང་ཅན་ལ་བདག་བསྟོད་དོ། ཁྲོས་པས་ཞབས་བརྡབས་ས་གཞི་གཡོ། །འཇིགས་པའི་གད་མོས་རི་རབ་བསྒྱེལ། །དམ་ཚིག་ཉམས་པའི་སྙིང་འབྱིན་པ། །དམ་ཚིག་ཅན་ལ་བདག་བསྟོད་དོ། །དཔལ་
ལྡན་མགོན་པོ་མཧཱ་ཀཱ་ལ་ཡ། །ལྷ་ཆེན་དཔལ་འབར་ནག་པོ་མཐུ་བོ་ཆེ། །མཧཱ་དེ་བའི་སྲས་པོ་དྲག་ཤུལ་ཅན། །ཚོགས་བདག་ཆེན་པོ་མཧཱ་ཀཱ་ལ་ཡ། །ལེགས་ལྡན་ནག་པོ་གྲོང་ཁྱེད་སུམ་བརྩེགས་དགྲ། །བསྟན་པ་ཡོངས་ཀྱི་སྲུང་མ་ནག་པོ་ཆེ། །ཆོས་འཁོར་ཡོངས་ཀྱི་སྲོག་ཤིང་ནག་པོ་ཆེ། །དམ་ཚིག་ཅན་གྱི་དགྲ་ལྷ་ནག་པོ་ཆེ། །འདིར་གཤེགས་རྒྱན་གྱི་གཏོར་མ་འདི་བཞེས་ཤིག །ཤ་ཁྲག་དམར་གྱི་གཏོར་མ་འདི་བཞེས་ཤིག །ཛམ་བུ་ཏི་བའི་ཞལ་ཟས་འདི་བཞེས་ཤིག །སྨན་རག་ཕུད་ཀྱི་གཏོར་མ་འདི་བཞེས་ཤིག །སྔར་བཅོལ་ལས་ཀྱི་གཏང་རག་གཉན་པོར་འབུལ། །ད་བཅོལ་ལས་ཀྱི་གསོལ་འདེབས་གཉན་པོར་བཞེས། །འཁོར་རྣམས་བསྲུང་ཞིང་རྐྱེན་རྣམས་བཟློག་པ་དང༌། །སྡང་བའི་དགྲ་དང་གནོད་པའི་བགེགས་ལ་སོགས། །བདུད་དང་བར་དུ་གཅོད་བྱེད་རྣམས་མང་པོ། །ཐམས་ཅད་ཉེ་བར་ཞི་བར་མཛད་དུ་གསོལ། །བསྟན་པ་རྒྱས་པའི་ལས་རྣམས་མྱུར་དུ་སྒྲུབས། །ཞེས་དང༌། བྷྱོཿ གང་གི་སྐུ་གསུང་ཐུགས་ཀྱི་མཐུས། །འདོད་པའི་ཁམས་ཀུན་ཟིལ་མནན་ནས། །འདོད་པའི་ཁམས་ལ་དབང་བསྒྱུར་མ། །འདོད་ཁམས་དབང་ཕྱུག་མ་ལ་འདུད། །དཔལ་ལྡན་ལྷ་མོ་ཁྱོད་ཀྱི་སྐུ། །རི་རབ་ལྷུན་པོ་ལྟ་བུར་བརྗིད། །དབང་པོ་སྔོན་པོ་ལྟ་བུ་འབར། །
ཉི་མའི་ཟེར་ལྟར་སྤྲུལ་པ་འགྱེད། །དབུ་སྐྲ་སེར་པོ་གྱེན་དུ་འབར། །སྤྱན་རྩ་དམར་པོ་ཀློག་ལྟར་འཁྱུག །མི་རོ་ཁར་བཅུག་མཆེ་བ་གཙིགས། ཁྲག་གིས་གང་བའི་ཐོད་པ་དང༌། །འཇིགས་པའི་མཚོན་ཆས་ཕྱག་རྣམས་བྲེལ། །མི་མགོ་རིན་ཆེན་རུས་པས་སྤྲས། །ཀླུ་དབང་སེང་གེ་ལྕགས་སྒྲོག་དང༌། ཁྲག་དང་ཞག་གི་ཐིག་ལེས་བརྒྱན། །ཀོ་རློན་རེ་ལྡེ་གོས་སུ་གྱོན། །བོང་བུ་གྭ་ཞོན་མཚན་མོ་རྒྱུ། །ཤིན་ཏུ་རིད་ཅིང་མི་སྡུག་མ། །འཇིགས་གཟུགས་མ་ལ་ཕྱག་འཚལ་ལོ། ཁྱོད་ཀྱི་གསུང་གི་ང་རོའི་དབྱངས། །འབྲུག་སྟོང་ལྡིར་བའི་སྒྲ་སྒྲོག་པས། ཁམས་གསུམ་མ་ལུས་ཟིལ་མནན་ནས། །ས་གསུམ་གཡོ་བར་མཛད་ལ་འདུད། ཁྱོད་ཐུགས་ཞི་ལ་རབ་གཞོལ་ཡང༌། །སྙིང་རྗེའི་དབང་གིས་སྲིད་ལ་བཞུགས། ཁྲོ་དང་འཁྲུགས་དང་རྔམ་པ་ཡིས། །བདུད་དཔུང་ངེས་པར་འཇོམས་ལ་འདུད། །དཔལ་ལྡན་ལྷ་མོ་མི་ཕམ་སྲིད་གསུམ་བདག །འདིར་གཤེགས་སོགས་ཀྱིས་བསྟོད་ཅིང་འཕྲིན་ལས་གཞོལ། འོག་ནས་འབྱུང་བའི་རྗེས་ཀྱི་བྱ་བ་རྣམས་བྱའོ། །རྗེས་གནང་བྱེད་པར་འདོད་ན། བླ་མེད་ཀྱི་དབང་བསྐུར་ཐོབ་པའི་སློབ་མ་ལ། ཉེར་དགུ་ལ་སོགས་པའི་དུས་ཁྱད་པར་ཅན་ལ་ཡོ་བྱད་ཚོགས་པར་བྱས་ནས། མདུན་དུ་མགོན་པོའི་བྲིས་སྐུ་བཀྲམ། རྟེན་གཏོར་གྲུ་གསུམ་ནོར་གཟུགས་མ་མཉྫིའི་སྟེང་དུ་བཀོད། འབུལ་གཏོར་མདུན་
དུ་བཤམས། མཆོད་པ་ཅི་བདེར་བསྒྲིགས། མཎྜལ་ཆོས་འབྱུང་གྲུ་གསུམ་གྱི་དབུས་སུ་གཏོར་མ་འགོད་པའི་ལུགས་ཀྱང་ཡོད༌། སྔོན་འགྲོ་གཏོར་མ་བཏང༌། གནས་ཡོ་བྱིན་རླབས་དང༌། ནང་མཆོད་བྱིན་རླབས་བྱས་ཏེ། ཀྱཻ་རྡོ་རྗེ་ལྟ་བུ་ཧེ་རུ་ཀའམ། རྡོ་རྗེའི་རིགས་ཀྱི་ཁྲོ་བོ་གང་རུང་ཞིག་གི་བདག་བསྐྱེད་སྔོན་དུ་འགྲོ་བས། གོང་བཞིན་གཏོར་ཆོག་རྫོགས་པར་བྱས་ལ། སློབ་མའི་རྒྱུད་བྱིན་གྱིས་བརླབས་པའི་དོན་དུ་བཟླས་པ་ཡང་ཅི་འགྲུབ་བྱེད། དེ་ཡང་ཨོཾ་མཧཱ་ཀཱ་ལ་ཧཱུཾ་ཕཊ། ཉེ་སྙིང་དང༌། ཨོཾ་མཧཱ་ཀཱ་ལ་ཡ་ཧཱུཾ་ཧཱུཾ་ཕཊ་སྭཱཧཱ། སྙིང་པོ། ཤཱ་ས་ན། རྩ་སྔགས་ཏེ་དེ་ལྟར་གསུམ་དང༌། ལྷ་མོའི་སྙིང་པོ་རྣམས་སོ། །དེ་རྗེས་མཁའ་འགྲོ་སྤྱི་གཏོར་སོགས་བཏང༌། དེ་ནས་རྗེས་གནང་དངོས་ཀྱི་བྱ་བ་ནི། ཐུན་མོང་དང༌། ཐུན་མོང་མ་ཡིན་པ་ཕྱག་མཚན་གཏད་པ་གཉིས་ཡོད་ཅིང༌། ཕྱི་མའང་དང་པོ་སྔོན་དུ་འགྲོ་བ་ཅན་ཡིན་པས། ཐོག་མར་དང་པོ་ཉིད་བརྗོད་པར་བྱའོ། །དེ་ཡང་མཚན་ཉིད་དང་ལྡན་པའི་སློབ་མ་ཁྲུས་སྔོན་དུ་འགྲོ་བས་ཕྱག་བྱ། གྲལ་ལ་འཁོད། མཆོད་གཡོག་པས་མེ་ཏོག་བཀྲམ་ཞིང་ཕྱེད་བསྡུས་ལ་མཎྜལ་དབུལ་ཞིང༌། ཕྱེད་སློབ་མའི་སྙིམ་པར་མེ་ཏོག་དང་བཅས་པས་འདུག་པ་ལ། སློབ་དཔོན་གྱིས་སེམས་ཅན་གྱི་དོན་དུ་སྐུ་བཞིའི་དབང་ཕྱུག་རྡོ་རྗེ་འཆང་གི་གོ་འཕང་ཐོབ་པར་བྱ། དེ་སྒྲུབ་པའི་ལམ་གྱི་བར་ཆད་བསལ་བའི་ཕྱིར། རྡོ་རྗེ་ནག་པོ་ཆེན་པོ་ལྕམ་དྲལ་གྱི་རྗེས་སུ་གནང་བ་ཞུ་སྙམ་པའི་འདུན་པ་སྔོན་དུ་བཏང་འཚལ། དེ་ཡང་འཕགས་མ་མཁའ་འགྲོ་མ་རྡོ་རྗེ་གུར་ཞེས་བྱ་བའི་རྒྱུད་ཀྱི་རྒྱལ་པོའི་ལེའུ་བཅོ་
ལྔ་པ་དང༌། རྡོ་རྗེ་གདན་བཞིའི་རྒྱུད་རྒྱས་པ་ལས་བྱུང་ཞིང༌། བྲམ་ཟེ་མཆོག་སྲེད་ལ་སོགས་པའི་གྲུབ་པ་ཐོབ་པ་རྣམས་ལས་བརྒྱུད་དེ། དཔལ་ས་སྐྱ་པ་ཁུ་དབོན་ལ་སོགས་པའི་བླ་མ་རྣམས་ཀྱི་མན་ངག་གིས་བརྒྱན་ཏེ། ཕྱག་ལེན་དང་ཐུགས་དམ་མཛད་པའི་དཔལ་ནག་པོ་ཆེན་པོ་གུར་གྱི་མགོན་པོའི་རྗེས་སུ་གནང་བ་སྒྲུབ་པ་འདི་ལ་གསུམ་སྟེ། སྔོན་དུ་འགྲོ་བ་ཕྱི་ནང་གི་མཁའ་འགྲོ་ལྔ་མཉེས་པར་བྱ་བ། བྱིན་རླབས་ལྡན་པའི་རྗེས་གནང་དངོས། སློབ་དཔོན་གྱི་རྗེས་བསྡུ་བའི་རིམ་པ་རྣམས་སོ། །དང་པོ་ནི། དཀྱིལ་འཁོར་སྒྲུབ་པ་དང་མཆོད་པའོ། །གཉིས་པ་རྗེས་སུ་གནང་བ་ལ། སྔོན་དུ་འགྲོ་བ་དང༌། དངོས་གཞི། འཇུག་གི་ཆོས་གསུམ། དང་པོ་སྔོན་འགྲོ་ལ་ལྔ། མཎྜལ་འབུལ་ཞིང་གསོལ་བ་བཏབ་པ། རྒྱུན་བཤགས་སྔོན་དུ་འགྲོ་བའི་སེམས་བསྐྱེད་པ། རིགས་ལྔའི་སྡོམ་པ་བཟུང་བ། ཁྱད་པར་ཅན་གྱི་དོན་ཞུ་བ། བྱིན་རླབས་ཀྱི་ལུས་ཀྱི་གཞི་སྤྲུལ་པའོ། །དང་པོ་ལ། ཐོག་མར་མཎྜལ་འབུལ་བར་ཞུ། ཞེས་བརྗོད། སློབ་མས་མཎྜལ་འབུལ། དེ་ནས་གསོལ་བ་བཏབ་པ་འདིའི་རྗེས་ཟློས་མཛོད་ཅིགགང་གི་དྲིན་གྱིས་བདེ་ཆེན་ཉིད། །སྐད་ཅིག་ཉིད་ལ་འཆར་བ་གང༌། །བླ་མ་རིན་ཆེན་ལྟ་བུའི་སྐུ། །རྡོ་རྗེ་ཅན་ཞབས་པད་ལ་འདུད། །སངས་རྒྱས་ཀུན་གྱི་རང་བཞིན་སྐུ། །བླ་མ་མཆོག་ལ་གསོལ་བ་འདེབས། །
ཀུན་མཁྱེན་ཡེ་ཤེས་ཕུང་པོ་ཅན། །སྲིད་པའི་འཁོར་ལོ་རྣམས་འཇོམས་པ། །དེ་རིང་བཤད་པའི་རིན་ཆེན་གཏེར། །གཙོ་བོའི་བདག་ལ་བཀའ་དྲིན་སྩོལ། ཁྱོད་ཞབས་པདྨོ་སྤངས་ནས་ནི། །གཙོ་བོ་གཞན་ལ་སྐྱབས་མ་མཆིས། །འགྲོ་བའི་དཔའ་བོ་མཐུ་ཆེན་གྱིས། །བློ་མཆོག་བདག་ལ་སྣང་བར་མཛོད། ཅེས་ལན་གསུམ་གྱིས་གསོལ་བ་བཏབ་ནས། གཉིས་པ་རྒྱུན་བཤགས་སྔོན་དུ་འགྲོ་བའི་སེམས་བསྐྱེད་པ་ནི། འདིའི་རྗེས་ཟློས་མཛོད་ཅིག་བྱས་ལ། དཀོན་མཆོག་གསུམ་ལ་བདག་སྐྱབས་མཆི། །ཞེས་སོགས་བྱས་ནས། གསུམ་པ་རིགས་ལྔའི་སྡོམ་པ་བཟུང་བ་འདིའི་རྗེས་ཟློས་མཛོད་ཅིག་བྱས་ལ། སྲས་བཅས་སངས་རྒྱས་ཐམས་ཅད་དང༌། །ཞེས་བྱ་བ་ལ་སོགས་པ་ལན་གསུམ་བྱ། བཞི་པ་ཁྱད་པར་ཅན་གྱི་དོན་ཞུ་བ་ནི། དུས་གསུམ་སངས་རྒྱས་ཐམས་ཅད་ཀྱི་སྐུ་གསུང་ཐུགས་རྡོ་རྗེའི་ངོ་བོར་གྱུར་པ། བླ་མ་དམ་པ་རིན་པོ་ཆེས་བདག་ལ་དཔལ་རྡོ་རྗེ་ནག་པོ་ཆེན་པོ་ལྕམ་དྲལ་གྱི་སྐུ་གསུང་ཐུགས་ཀྱི་བྱིན་གྱིས་བརླབས་ཤིང༌། རྗེས་སུ་གནང་བ་སྩལ་དུ་གསོལ།ཞེས་ལན་གསུམ། ལྔ་པ་བྱིན་རླབས་ཀྱི་ལུས་གཞི་སྤྲུལ་པ་ནི། སློབ་དཔོན་བཅོམ་ལྡན་འདས་ཀྱཻ་རྡོ་རྗེ་ཞལ་བརྒྱད་ཕྱག་བཅུ་དྲུག ཞབས་བཞི་པ། ཡུམ་རྡོ་རྗེ་བདག་མེད་མ་དང་མཉམ་པར་སྦྱོར་བ་ཡིན་སྙམ་དུ་མོས། མདུན་གྱི་ནམ་
མཁར་བཅོམ་ལྡན་འདས་ཀྱཻ་རྡོ་རྗེ་ལྷ་དགུའི་དཀྱིལ་འཁོར། བླ་མ་བརྒྱུད་པ་སངས་རྒྱས་དང༌། བྱང་ཆུབ་སེམས་དཔའ་བསམ་གྱིས་མི་ཁྱབ་པ་དང༌། མདུན་ན་ཡོད་པའི་གཏོར་མ་དང༌། སྐུ་འདི་དག་དུར་ཁྲོད་ཆེན་པོ་བརྒྱད་ཀྱིས་བསྐོར་བའི་དབུས་སུ་པདྨ་དང་ཉི་མ་རོའི་སྟེང་ན་གནས་པའི་རྡོ་རྗེ་ནག་པོ་ཆེན་པོ་གུར་གྱི་མགོན་པོ་ལྕམ་དྲལ་བཀའ་སྡོད་འཁོར་དང་བཅས་པ། དུར་ཁྲོད་ན་གནས་པའི་ཕྱོགས་སྐྱོང༌། ཞིང་སྐྱོང༌། མཁའ་འགྲོ། ཤ་ཟ། ལྷ་སྲིན་སྡེ་བརྒྱད། དྲེགས་པ་ཕོ་རྒྱུད་མོ་རྒྱུད། སྤྲུལ་པ་འབུམ་དང་ཡང་སྤྲུལ་བྱེ་བ། གནས་གསུམ་མཁའ་འགྲོའི་ཚོགས་དང་བཅས་པ་རྣམས་སྐུ་གཟི་བརྗིད་ཕུན་སུམ་ཚོགས་ཤིང༌། གསུང་ཧཱུཾ་དང་བྷྱོཿའི་སྒྲ་འབྲུག་ལྟར་སྒྲོགས་ཤིང༌། ཐུགས་བདེ་གསལ་གྱི་ངང་ལས་བསྟན་པ་བསྲུང་བའི་ལས་ལ་བརྩོན་པར་མངོན་སུམ་དུ་མདུན་འདི་ན་བཞུགས་སྙམ་དུ་མོས་པ་བྱེད་འཚལ། དེ་ནས་བླ་མ་ཧེ་རུ་ཀར་དམིགས་པའི་ཐུགས་ཀ་ནས་འོད་ཟེར་བྱུང༌། མདུན་བསྐྱེད་ཆོས་སྐྱོང་གི་ཐུགས་ཀར་ཕོགཐུགས་བརྒྱུད་བསྐུལ་ཏེ། ཐུགས་ཀ་ནས་ཧཱུཾ་སྔོན་པོ་གཅིག་འཕྲོས། ཤངས་ནས་ཐོན་ཏེ་ཁྱེད་རང་རྣམ་པའི་ལུས་ལ་གཡས་བསྐོར་དུ་ལན་གསུམ་བསྐོར་ནས་ཁ་ནས་ཞུགས། སྙིང་གར་ཉི་མའི་གདན་
གཅིག་བསམས་པའི་སྟེང་དུ་གནས། དེ་ལས་འོད་འཕྲོས། ལས་དང་ཉོན་མོངས་པ་དང་ཐམས་ཅད་དང༌། རྣམ་སྨིན་གྱི་ཕུང་པོ་ཆེན་པོ་ཡེ་ཤེས་ཀྱི་མེས་བསྲེགས། ཧཱུཾ་དེ་ཡང་ཞབས་ཀྱུ་ཁོག་པ་ལ་ཐིམ། ཁོག་པ་མགོ་བོ་ལ་ཐིམ། མགོ་བོ་ཐིག་ལེ་ལ་ཐིམ། ཐིག་ལེ་ནཱ་ད་ལ་ཐིམ། དེ་མེ་ལོང་ལ་ཧས་བཏབ་པ་བཞིན་ཡལ་ནས་སྤྲོས་པ་ཐམས་ཅད་དང་བྲལ་བ་སྟོང་པ་ཉིད་དུ་བསམ། སྟོང་པའི་ངང་ལས་དགྲ་བགེགས་མནན་པའི་སྟེང་དུ། ཞེས་པ་སོགས་གོང་བཞིན་གསལ་བཏབ། གཉིས་པ་དངོས་གཞི་ནི། དེ་ལྟ་བུའི་སྔོན་འགྲོ་སྔོན་དུ་སོང་ནས། རྗེས་གནང་དངོས་ལ་གསུམ། སྐུའི་རྗེས་གནང༌། གསུང་གི༴ ཐུགས་ཀྱི༴ ཐོག་མར་སྐུའི་རྗེས་གནང་གི་དོན་དུ་གསོལ་བ་བདབ་པའི་རྗེས་ཟློས་མཛོད་ཅིགསངས་རྒྱས་ཀུན་གྱི་སྐུ་རྡོ་རྗེ། །ད་ལྟ་ཉིད་དུ་བདག་ལ་སྩོལ། །ཞེས་ལན་གསུམ་དུ་གསོལ་བ་གདབ། མོས་གུས་ཁྱད་པར་ཅན་བྱས་པས། བླ་མ་ཧེ་རུ་ཀར་དམིགས་པའི་ཐུགས་ཀའི་ཧཱུཾ་ལས་འོད་ཟེར་དཔག་ཏུ་མེད་པ་འཕྲོས། མདུན་གྱི་ཆོས་སྐྱོང་ལ་ཕོག་སྟེ་ཐུགས་རྒྱུད་བསྐུལ་བས། ཐུགས་ཀའི་ཧཱུཾ་ལས་ཡེ་ཤེས་ཀྱི་མགོན་པོའི་སྐུ་དཔག་ཏུ་མེད་པ་དང༌། ཡང་འོད་ཟེར་འཕྲོས་པས་རྣམ་པར་སྣང་མཛད་གངས་ཆེན་མཚོའི་ཐུགས་ཀ་ནས་ཀྱང་ཆོས་སྐྱོང་གི་སྐུ་བསམ་གྱིས་མི་ཁྱབ་པ་
སྤྱན་དྲངས་པ་ཆེ་བ་རི་རབ་ཙམ་དང་ཆུང་བ་ཏིལ་གྱི་འབྲུ་ཙམ་ལ་འོད་ཟེར་དུ་མ་འཕྲོ་ཞིང་ཧཱུཾ་དང་ཕཊ་ཀྱི་སྒྲ་སྒྲོག་པ་བྱོན། ཁྱེད་རང་རྣམ་པའི་སྨིན་མཚམས་དང༌། ལུས་ཀྱི་སྟོད་སྨད་བར་གསུམ་དུ་ཐིམ། ཡང་འོད་ཟེར་འཕྲོས་རང་བཞིན་གྱི་གནས་ནས་ལྷ་མོ་བསམ་གྱིས་མི་ཁྱབ་པ་སྤྱན་དྲངས་ལ་ཐིམ། གཞན་ཡང་སངས་རྒྱས་དང་བྱང་ཆུབ་སེམས་དཔའ་དང་རྣལ་འབྱོར་མ་བསམ་གྱིས་མི་ཁྱབ་པ་སྤྱན་དྲངས་པ། མགོན་པོ་ལྕམ་དྲལ་གྱི་སྐུའི་རྣམ་པར་གྱུར་ནས་ཆར་ཆེན་པོ་བབས་པ་བཞིན་ལུས་ལ་ཐིམ་པར་མོས་པ་བྱོས་ཤིགཅེས་བརྗོད་ལ། གུ་གུལ་དང༌། མགོན་པོའི་སྤོས་ཀྱི་དུད་པ་དང༌། ཨཥྟས་ཐོག་དྲངས་པའི་སྙིང་པོ་དང༌། ཤཱ་ས་ན་དང༌། རོ་རུ་ལན་གསུམ་གྱི་བར་ལ་རོལ་མོ་དཀྲོལ་ལ། དྲག་ཏུ་བྱིན་དབབ། དེའི་སྐུའི་རྗེས་གནང་གྲུབ་ཅེས་བརྗོད། གཉིས་པ་གསུང་གི་རྗེས་གནང་གི་དོན་དུ་གསོལ་བ་གདབ་པའི་རྗེས་ཟློས་མཛོད་ཅིགསངས་རྒྱས་ཀུན་གྱི་གསུང་རྡོ་རྗེ། །ད་ལྟ་ཉིད་དུ་བདག་ལ་སྩོལ། ཞེས་ལན་གསུམ། བླ་མ་ཧེ་རུ་ཀར་དམིགས་པའི་ཐུགས་ཀའི་སྔགས་ཀྱི་གསེབ་ན་ཤཱ་ས་ན་ལ་སོགས་པ་སྔགས་གསུམ་ཡོད་པར་བསམ། མདུན་བསྐྱེད་ཀྱི་ནག་པོ་ཆེན་པོའི་ཐུགས་ཀ་ནས་པདྨ་དང་ཉི་མའི་སྟེང་དུ་རྡོ་རྗེ་སྔོན་པོ་རྩེ་ལྔ་པ་ལྟེ་བར་ཉི་མའི་སྟེང་དུ་ཧཱུཾ་གིས་མཚན་པ། དེའི་
མཐའ་མར་ཨོཾ་ཤྲཱི་མཧཱ་ཀཱ་ལ་ཞེས་སོགས་རྫོགས་པར་བརྗོད་ལ། ཕཊ་སྭཱཧཱ། ཞེས་པའི་སྙིང་པོ་དང༌། དེའི་ཕྱི་ནས་ཨོཾ་ཤྲཱི་མཧཱ་ཀཱ་ལ་ཡ། ཤཱ་ས་ན་སོགས་རྫོགས་པར་བརྗོད་ལ། ཕཊ་ཅེས་པའི་རྩ་སྔགས་དང༌། དེའི་ཕྱི་ནས་ཨོཾ་རོ་རུ་ནས། ཧཱུཾ་བྷྱོཿཧཱུཾ་ཞེས་པ་རྣམས་ཀྱིས་བསྐོར་ནས་ཡོད་པར་བསམ། ཁྱེད་རང་རྣམས་ཀྱང་ཆོས་སྐྱོང་དུ་དམིགས་པའི་སྙིང་པདྨ་འདབ་བརྒྱད་ལྟར་ཁ་བྱེ་བའི་ནང་དུ། པཾ་ལས་པདྨ། རཾ་ལས་ཉི་མའི་གདན་ལ་ཧཱུཾ་ཞུ་བ་ལས་རྡོ་རྗེ་སྔོན་པོ་ལྟེ་བ་ལ་ཉི་མའི་སྟེང་དུ་ཧཱུཾ་གིས་མཚན་པ་གཅིག་བསམ། དེ་ནས་མོས་གུས་བྱས་པས། བླ་མའི་ཐུགས་ཀ་ནས་འོད་འཕྲོས། མདུན་གྱི་ནག་པོ་ཆེན་པོ་ལ་ཕོག་པས། དེའི་ཐུགས་ཀའི་སྔགས་འཕྲེང་འོད་ཟེར་རབ་ཏུ་འབར་བ་སྒྲ་དང་བཅས་པ་གཅིག་ལས་གཅིག་ཆད་ཞལ་ནས་འཐོན། ཐུགས་ཀའི་ཧཱུཾ་གི་མཐའ་མར་འཁོད། ལ་ལ་ཧཱུཾ་ལ་ཐིམ། ཡང་བླ་མ་དང་མདུན་བསྐྱེད་ལས་འོད་ཟེར་འཕྲོས། རྣམ་པར་སྣང་མཛད་གངས་ཆེན་མཚོའི་ཐུགས་ཀ་ནས་ཀྱང་རྩ་སྔགས་སྙིང་པོ་རབ་ཏུ་འབར་ཞིང་འབྲུག་གི་སྒྲ་ལྟར་སྐད་སྒྲོག་པ་བསམ་གྱིས་མི་ཁྱབ་པ་སྤྱན་དྲངས། ཁྱེད་རང་རྣམ་པའི་ཞལ་དུ་ཞུགས། གཞན་ཡང་བླ་མ་དང་མདུན་བསྐྱེད་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་གསུང་ཡིག་འབྲུའི་རྣམ་པ་ཨཱ་ལི་ཀཱ་ལིའི་སྔགས་
བསམ་གྱིས་མི་ཁྱབ་པ་སྤྱན་དྲངས་པའང་ཁྱེད་རང་རྣམ་པའི་ཐུགས་ཀའི་ཧཱུཾ་དང་སྔགས་རྣམས་ལ་ཐིམ། དུད་པ་དང་ལྷ་སྔགས་ཀྱིས་ཐོགས་དྲངས་པའི་སྔགས་ལན་གསུམ་གྱི་བར་ལ་རོལ་མོ་དང༌། དམིགས་པས་དྲག་ཏུ་དབབ། ད་ཁྱེད་རང་རྣམ་པ་འཕྲེང་བའམ། མེ་ཏོག་རེ་ལག་ཏུ་བཟུང༌། རྗེས་སུ་བཟླས་པའི་ལུང་བླང་བ་ནི། སློབ་དཔོན་གྱི་ཐུགས་ཀའི་འོད་ཀྱིས། མགོན་པོའི་ཐུགས་རྒྱུད་བསྐུལ་བས། ཐུགས་ཀའི་སྔགས་རྣམས་རེ་རེ་ལས་མར་མེ་གཅིག་ལས་གཅིག་ཆད་པའི་ཚུལ་དུ་སྒྲ་འོད་དང་བཅས་པས་ཞལ་ནས་ཐོན། ཁྱེད་རང་རྣམ་པའི་ཞལ་དུ་ཞུགས། ཐུགས་ཀའི་ཧཱུཾ་གི་མཐའ་མར་སྙིང་པོ་དང༌། རྩ་སྔགས། དེའི་ཕྱིར་རོ་རུ། དེའི་རིམ་པས་སྔགས་སྔ་མ་རྣམས་ལ་ཐིམ་ཞིང་འཁོར་བར་བསམས་ལ། རྗེས་ཟློས་ལན་གསུམ་བགྱིད་པའི་དང་པོ་དམ་ཚིག་པའི་ཚུལ་དང༌། གཉིས་པ་ཡེ་ཤེས་པའི་རྣམ་པ། གསུམ་པ་དམ་ཚིག་པ་ལ་ཡེ་ཤེས་པ་ཤིན་དུ་བརྟན་པའི་ཚུལ་གྱིས་ཐིམ་པར་བསམས་ལ། རྗེས་ཟློས་མཛོད་ཅིག །ཨོཾ་ཤྲཱི་མཧཱ་ཀཱ་ལ་ཡ་ཧཱུཾ་ཧཱུཾ་ཕཊ། ཅེས་པའི་སྙིང་པོ་ལན་གསུམ་དང༌། ཨོཾ་ཤྲཱི་མཧཱ་ཀཱ་ལ་ཡ། ཤཱ་ས་ན་ཨུ་པ་ཧ་རི་ཎཾ། ཨེ་ཀ་པཥྩི་མ་ཀ་ལོ་ཡཾ། ཨི་དཾ་རཏྣ་ཏྲ་ཡཱ་ཡ། ཨ་པ་ཀ་རི་ཎཱཾ། ཡ་ཏི་པྲ་ཏིཛྙཱཾ། སྨ་ར་སཱི་ཏ་ད། ཨི་དཾ་དུཥྟན། ཁ་ཁ་ཁཱ་ཧཱི། མཱ་ར་
མཱ་ར། གྲྀཧྞ་གྲྀཧྞ། བནྡྷ་བནྡྷ། ཧ་ན་ཧ་ན། ད་ཧ་ད་ཧ། པ་ཙ་པ་ཙ། དི་ན་མེ་ཀེ་ན་མཱ་ར་ཡ་ཧཱུཾ་ཕཊ། ཅེས་ལན་གསུམ་དང༌། ཨོཾ་རོ་རུ་རོ་རུ་བྷི་ཏིཥྛ་བ་ཏོ་སི། ཀ་མ་ལ་རཀྵ་སི་ཧཱུཾ་བྷྱོཿཧཱུཾ། ཞེས་ལན་གསུམ་གྱིས་ལུང་ནོད། སློབ་དཔོན་ལ་མེ་ཏོག་འཐོར་ཞིང་འདིའི་རྗེས་ཟློས་མཛོད་ཅིགམགོན་པོ་བདག་ལ་སྩལ་ལགས་ཀྱི། །མགོན་པོ་བདག་ལ་བྱིན་གྱིས་རློབས། །ཞེས་ལན་གསུམ་གསོལ་བ་གདབ། སློབ་དཔོན་གྱིས་རྡོ་རྗེ་སློབ་མའི་མགོ་བོར་བཞགམགོན་པོ་འདི་ལ་སྩལ་ལགས་ཀྱི། །མགོན་པོ་འདི་ལ་བྱིན་གྱིས་རློབས། །ཞེས་ལན་གསུམ། དེས་གསུང་གི་རྗེས་གནང་གྲུབ་པ་ལགས། གསུམ་པ་ཐུགས་ཀྱི་རྗེས་གནང་ཞུ་བའི་དོན་དུ་གསོལ་བ་བཏབ་པའི་རྗེས་བཟློས་མཛོད་ཅིགསངས་རྒྱས་ཀུན་གྱི་ཐུགས་རྡོ་རྗེ། །ད་ལྟ་ཉིད་དུ་བདག་ལ་སྩོལ། ཞེས་ལན་གསུམ། མོས་གུས་བྱས་པས། བླ་མའི་ཐུགས་ཀ་ནས་འོད་ཟེར་འཕྲོས། མདུན་གྱི་ནག་པོ་ཆེན་པོ་ལྕམ་དྲལ་ལ་ཕོག་པས། དེའི་ཐུགས་ཀ་ནས་ཐུགས་གཉིས་སུ་མེད་པའི་ཡེ་ཤེས་ཀྱི་ངོ་བོ་རྡོ་རྗེ་སྔོན་པོ་རྩེ་ལྔ་པའི་རྣམ་པ་ཅན་དང༌། གྲི་གུགཐོད་ཁྲག །རལ་གྲི། མདུང་ཐུང༌། རྩེ་གསུམ་ལ་སོགས་པ་ཕྱག་མཚན་སྔགས་ཀྱི་སྒྲ་དང་འོད་ཟེར་འབར་བ་བསམ་གྱིས་མི་ཁྱབ་པ་བྱོན་པ་
རྣམས་ཐུགས་ཀའི་རྡོ་རྗེ་དང་ས་བོན་ལ་སིབ་སིབ་ཐིམ། ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་རྣམས་ཀྱི་ཐུགས་ཀ་ནས་ཡེ་ཤེས་ཀྱི་ཕྱག་མཚན་དཔག་ཏུ་མེད་པ་བྱོན། འོད་དུ་ཞུ་ནས་ཐུགས་ཀར་ཐིམ། དུད་པ་དང་རྩ་སྔགས་ཀྱིས་ཐོགས་དྲངས་པའི་སྔགས་ལན་གསུམ་གྱིས་བར་ལ་རོལ་མོ་བྱས་ལ་དབབ། དེའི་ཐུགས་ཀྱི་རྗེས་གནང་གྲུབ། དེ་ནས་ཁྱེད་རང་རྣམ་པའི་སྙིང་པདྨ་འདབ་བརྒྱད་ལྟར་ཡོད་པ་དེ་དག་ཁ་ཟུམ་ནས་དེའི་སྟེང་དུ་རྡོ་རྗེ་རྩེ་ལྔ་པ་ཕྱེད་པས་རྒྱས་བཏབ་པས། བདག་ཉིད་ལ་བརྟན་པར་བཞུགས་ནས་གྲོགས་མཛད་པར་སོམས་ཤིགཅེས་བྱས་ལ། སློབ་མའི་མགོ་བོར་རྡོ་རྗེ་བཞག་ལ། ཏིཥྛ་བཛྲ་ལན་གཉིས་བརྗོད། གསུམ་པ་འཇུག་གི་ཆོས་ལ་བཞི། འཕྲིན་ལས་ཀྱི་བཀའ་བསྒོ་བ། སྒྲུབ་པའི་ལུང་སྦྱིན་པ། མི་འབྲལ་ཞིང་གསང་བར་གདམས་པ། མཎྜལ་དབུལ་ཞིང་དམ་ཚིག་ཁས་བླངས་པས་བཟུང་བའོ། །དང་པོ་གཏོར་མར་དཔལ་འབར་གཅིག་བཙུགས། སློབ་མའི་སྤྱི་བོར་བཞག་ལ། གཏོར་མ་འདི་དཔལ་ནག་པོ་ཆེན་པོ་ལྕམ་དྲལ་བྲན་གཡོག་བཀའ་སྡོད་མངག་པ་དང་བཅས་པ་སྤྲིན་སྟིབས་པ་བཞིན་དུ་བསམ། མགོན་པོའི་སྟེང་དུ་རྩ་བའི་བླ་མ་ལ་བརྒྱུད་པའི་བླ་མའི་ཚོགས་ཀྱིས་བསྐོར་བ། སངས་རྒྱས་དང་བྱང་ཆུབ་སེམས་དཔའ་གནས་གསུམ་མཁའ་འགྲོའི་ཚོགས་བསམ་གྱིས་མི་ཁྱབ་པ་དང་བཅས་པ་བཞུགས་
པར་མོས་པ་མཛོད་ཅིགཅེས་བྱས་ལ། དུད་པ་བྱས་ཤིང༌། སྙིང་པོ་དང༌། གཟུངས་རིང་དང༌། ལྷ་མོའི་སྔགས་ཀྱི་མཐར་ས་མ་ཡེ། ས་མ་ཡ་རཀྵནྟུ། དཔལ་རྡོ་རྗེ་ནག་པོ་ཆེན་པོ་ལྕམ་དྲལ་བྲན་གཡོག་བཀའ་སྡོད་དང་བཅས་པ་ཁྱེད་རྣམས་ཀྱིས། བླ་མ་དམ་པ་རྣམས་ཀྱི་དམ་ཚིག་གི་རིམ་པ་ལས་མ་འདའ་བར་དམ་ཚིག་སྲུངས། བསྟན་པ་སྐྱོངས། རིག་པ་འཛིན་པ་འདི་ཞེས་བགྱི་བ་ཇི་སྲིད་སངས་རྒྱས་མ་ཐོབ་ཀྱི་བར་དུ་འགལ་རྐྱེན་བར་ཆད་ཐམས་ཅད་ལས་སྲུངས་ཤིགམི་མཐུན་པའི་ཕྱོགས་ཐམས་ཅད་སོལ་ཅིགམཐུན་རྐྱེན་ཐམས་ཅད་སྒྲུབས་ཤིག །སྤྱིར་སངས་རྒྱས་ཀྱི་བསྟན་པ་དང༌། བྱེ་བྲག་ཏུ་རིག་པ་འཛིན་པ་འདིའི་དགྲ་དང་བགེགས་དང་བར་དུ་གཅོད་པ་ཐམས་ཅད་ཐུལ་ལ་བསྲུང་བ་དང་བསྐྱབ་པར་གྱིས་ཤིགརིག་པ་འཛིན་པ་འདིས་ཆོས་དང་མཐུན་པའི་ཇི་ལྟར་བཀའ་བསྒོ་བ་བཞིན་ཁྱེད་རྣམས་ཀྱིས་སྒྲུབས་ཤིགཅེས་བརྗོད། དེ་ནས་ཡུལ་ཁྱད་པར་ཅན་དེ་རྣམས་ལ་དད་གུས་བྱས་ལ། བླ་མ་ཡི་དམ་སངས་རྒྱས་བྱང་སེམས་མཁའ་འགྲོར་བཅས་པ་འོད་དུ་ཞུ། ནག་པོ་ཆེན་པོ་ལ་ཐིམ། དེ་ལས་འོད་འཕྲོས་ལྷ་མོ་བཀའ་སྡོད་འཁོར་དང་བཅས་པ་ལ་ཕོག་པས་འོད་དུ་ཞུ། ཚུར་འདུས་ནས་ནག་པོ་ཆེན་པོ་ལ་ཐིམ། དེའང་འོད་དུ་ཞུ། ཁྱེད་རང་གི་སྤྱི་གཙུག་ཚངས་
པའི་བུ་ག་ནས་ཞུགས། ཁྱེད་རང་དང་གཉིས་སུ་མེད་པར་གྱུར་པས་ནུས་མཐུ་ཕུན་སུམ་ཚོགས་པར་བསམ། རོལ་མོ་མཛད་དོ། །གཉིས་པ་སྒྲུབ་པའི་ལུང་སྦྱིན་པ་ནི། ཆོས་སྐྱོང་འདི་ཉིད་ལ་ཚོགས་བདག་གི་ཚུལ་དུ་སྒྲུབ་པ་དང༌། བཀའ་སྡོད་ལྟར་སྒྲུབ་པ། གཤིན་རྗེ་ལྟར་སྒྲུབ་པ། གནོད་སྦྱིན་ལྟར་སྒྲུབ་པ་དང་བཞི་གདོག །བཀའ་སྡོད་ཀྱི་ལུགས་ལ་ཕོ་རྐྱང་དུ་སྒྲུབ་པ། མོ་རྐྱང་དུ་སྒྲུབ་པ། ཡབ་ཡུམ་སྦྲགས་ཏེ་སྒྲུབ་པ་གསུམ་ཡོད། དེ་ལྟར་སྒྲུབ་ལུགས་དེ་དག་ཐམས་ཅད་ལའང༌། བསྙེན་པ་སྒྲུབ་པ། ལས་ལ་སྦྱོར་བ་གསུམ་གྱི་མན་ངག་ཡོད་པ་དག་སྐབས་སུ་སྦྱིན་གྱི་ཉམས་སུ་ལེན་པ་ལ་དབང་བ་ཡིན་ནོ། །གསུམ་པ་མི་འབྲལ་ཞིང་གསང་བར་གདམས་པ་ནི། དེ་ལྟར་རྗེས་གནང་ལུང་སྦྱིན་པའི་དབང་གིས་བསྲུང་སྐྱོབ་བྱེད། ལུས་དང་གྲིབ་མའི་ཚུལ་གྱི་འཁོར་བ་ཆོས་ཉིད་ཡིན། ཁྱེད་རང་རྣམ་པ་ཡང་དམ་ཚིག་རྣམ་དག་བསྲུངས་ཏེ། གཏོར་མ་དང་ཚོགས་ལ་བརྩོན་པར་མཛོད། དམ་ཚིག་དང་མི་ལྡན་པ་དང༌། གསང་སྔགས་ཀྱི་སྣོད་དུ་མ་གྱུར་པ་རྣམས་ལ་དཔལ་མགོན་པོ་འཁོར་བཅས་ཀྱི་མཚན་ཙམ་ཡང་བསྟན་པར་བྱ་བ་མ་ཡིན་ནོ། །བཞི་པ་མཎྜལ་དབུལ་ཞིང༌། དམ་ཚིག་ཁས་བླངས་པ་བཟུང་བ་ནི། མཎྜལ་འབུལ་དུ་འཇུག
དེས་མཎྜལ་ཕུལ་ནས་འདིའི་རྗེས་ཟློས་མཛོད་ཅིག གཙོ་བོས་ཇི་ལྟར་བཀའ་སྩལ་པ། །དེ་དག་ཐམས་ཅད་བདག་གིས་བགྱིད། །ལན་གསུམ། འདིའི་རྗེས་ཟློས་མཛོད། དེང་ནས་བརྩམས་ཏེ་བདག་བྲན་དུ། ཁྱོད་ལ་བདག་ནི་འབུལ་ལགས་ན། ཁྱེད་ཀྱི་སློབ་མར་བཟུང་བ་དང༌། །ཆ་ཡིས་ཀྱང་ནི་སྤྱད་དུ་གསོལ། །ཞེས་ལན་གསུམ། དེ་རྗེས་གནང་གྲུབ་པ་ལགས། ཞེས་བརྗོད། བསོད་ནམས་འདི་ཡིས་སོགས་སྨོན་ལམ་དང་བཀྲ་ཤིས་ཅི་རིགས་བརྗོད། སླར་ཡང་མཆོད་པ་ཁ་གསོས། སྤྱི་དང་མཐུན་པར་བྱིན་གྱིས་བརླབས། ཨོཾ་མཧཱ་ཀཱ་ལ་ཡ་ཀཱ་ལི་དེ་བཱི་གྲྀཧྞེ་དཾ། ཨརྒྷཾ་སོགས་ཕྱི་མཆོད་དང༌། སྙིང་པོའི་མཐར་འབྲུ་གསུམ་བཏགས་པས་ནང་མཆོད་དང༌། སྲིན་པོའི་གཟུགས་ཀྱི་སོགས་ཤོ་ལོ་ཀ་གསུམ་དང༌། གང་གི་སྐུ་གསུང་ཐུགས་སོགས་ཤོ་ལོ་ཀ་གཅིག་གིས་བསྟོད། བདག་དང་སློབ་མར་བཅས་པ་ལ། བར་ཆད་ཞི་བ་དང༌། དངོས་གྲུབ་སྩོལ་བ་དང༌། བསམ་པའི་དོན་ཐམས་ཅད་འགྲུབ་པར་མཛད་དུ་གསོལ། ཞེས་གསོལ་བ་བཏབ། ཧེ་རུ་ཀའི་ཡིག་བརྒྱ་ལན་མང་དུ་བརྗོད། མ་འབྱོར་བ་དང་སོགས་བཟོད་པར་གསོལ། ཁྱེད་ཀྱིས་སེམས་ཅན་དོན་ཀུན་སོགས་ཀྱི་མཐར། ཨོཾ་བཛྲ་མཧཱ་ཀཱ་ལ་ས་པ་རི་ཝཱ་ར་ཡ་ཧི་གཙྪ། ཞེས་པའམ། ཨོཾ་བཛྲ་མུཿ ཞེས་ཡེ་ཤེས་པ་གཤེགས། དམ་ཚིག་པ་རང་ལ་གཉིས་སུ་མེད་པར་ཐིམ། སྨོན་ལམ་དང་བཀྲ་ཤིས་ཅི་རིགས་པར་བྱའོ། །འདི་ཉིད་ལ་
ལྷ་བརྒྱད་ཀ་བསྟིམ། བཟླས་ལུང་གི་སྐབས། ཐོག་མར་མགོན་པོའི་སྔགས། དེའི་ཕྱི་རོལ་དུ་ལྷ་མོའི་སྔགས། མདུན་བསྐྱེད་མགོན་པོའི་ཐུགས་ཀའི་འོད་ཟེར་གྱིས་ལས་མགོན་རྣམས་བསྐུལ་ཏེ། དེ་རྣམས་ཀྱི་ཐུགས་ཀ་ནས། སྔགས་འཕྲེང་བྱུང༌། ལྕམ་དྲལ་གྱི་སྔགས་ཀྱི་མཐར་འཁོད་པར་སྒོམ་དུ་བཅུག་ལ། གཙོ་བོའི་སྙིང་པོ། ཉེ་སྙིང༌། རྩ་སྔགས། ལྷ་མོའི་སྙིང་པོ། ལས་མགོན་གྱི་བོད་རྦད་གསད་གསུམ་རྣམས་རིམ་པས་རྗེས་ཟློས་བྱ། ལས་མགོན་གྱི་སྔགས་བོད་པ་གཅིག་པུས་ཀྱང་ཆོག་པ་ཙམ་ཡིན། ཐུགས་ཀྱི་རྗེས་གནང་གི་ཕྱག་མཚན་སྐབས། གཙོ་འཁོར་ཐམས་ཅད་ཀྱི་ཕྱག་མཚན་བསྒོམ། དེ་རྣམས་མི་འདྲ་བའི་ཁྱད་པར་ཡིན། གནོད་སྦྱིན་ཡབ་ཡུམ་སོགས་ཀྱི་ཕྱག་མཚན་ལས། ཐུན་མོང་དང་ཐུན་མོང་མ་ཡིན་པའི་ཁྱད་པར་འབྱེད་པའང་ཡོད་མོད། རང་ལུགས་ནི་ལྕམ་དྲལ་དང་ལྷ་བརྒྱད་གང་ཡིན་ཡང་རུང་སྟེ། རྗེས་གནང་གི་འདོགས་ཡོད་མེད་ལས་ཁྱད་པར་བྱེད་དོ། །དེང་སང་ས་སྐྱའི་རིང་ལུགས་པ། །ཀུན༵་ཀྱང་འདི་ཉིད་ཁོ་ནར་དག༵འ། །སྙིང༵་གི་ཐིག་ལེ་ལོན་པ་དཀོན། །འོན་ཀྱང་མང་པོ༵ས་དོན་རྟོགས་ཤོག །གུར་མགོན་ལྷ་བརྒྱད་མའི་སྒྲུབ་ཐབས་ཀྱི་ལེ་ཚན་ནོ།། །།མངྒ་ལཾ། །