གུར་མགོན་ཕུར་ཞབས་ཅན་གྱི་སྒྲུབ་ཐབས།
ཨོཾ་སྭཱ་སྟི། ཧེ་རུ་ཀ་དཔལ་ལ་བཏུད་ནས། །གུར་མགོན་ལྷ་བརྒྱད་ཅེས་གྲགས་པའི། །སྒྲུབ་ཐབས་རྗེས་གནང་བྱ་བའི་རིམ། ཁྱད་པར་ཅུང་ཟད་བརྗོད་པར་བྱ། །བཤད་མ་ཐག་པའི་མགོན་པོ་ལྕམ་དྲལ་གྱི་སྒྲུབ་ཐབས་དང༌། འོག་ཏུ་འཆད་པར་འགྱུར་བའི་པུ་ཏྲ་ལྕམ་དྲལ་གྱི་སྒྲུབ་ཐབས་བློ་ཡུལ་དུ་ངེས་པར་བྱས་ནས། ཧཱུཾ་དང་བྷྱོཿའི་སྒྲ་སྒྲོག་པ་ཞེས་པ་ནས། མགོན་པོའི་ཐུགས་ཀ་ནས་ལ་དང་ཞེས་སྦྱར་ལ། བསམ་གྱིས་མི་ཁྱབ་པས་བསྐོར་བར་གྱུར། ལྕམ་དྲལ་སྤྱན་དྲངས་པའི་མཐར། རང་གི་སྙིང་ག་ནས་སོགས་ལས་མགོན་སྤྱན་འདྲེན། མཆོད་པ་མཉམ་དུ་འབུལ། དམ་བཞག་ཀྱང་ལྕམ་དྲལ་གྱི་རྗེས་ལ་ལས་མགོན་གྱི་དེ་བཞིན་དུ་གཏོར་འབུལ་དང༌། བསྟོད་པ་རྣམས་ཀྱང་སྦྲེལ་ནས་བྱེད། རྗེས་གནང་གི་སྐབས་མདུན་བསྐྱེད་ལྷ་བརྒྱད་བསྐྱེད། སློབ་མ་མགོན་རྐྱང་དུ་གསལ་བཏབ་ནས། སྐུའི་རྗེས་གནང་གི་སྐབས་སུ་༼བདུན་བཅུ་པའི་སྲི་སྡེབ་སྔོན་ལ་ཡོད།༽
རྣམས་བཀོད། རྒྱབ་ཏུ་འབུལ་གཏོར། མདུན་དུ་སྨན་དང་རཀྟ་བཤམ། གཞན་མཆོད་པ་རྣམས་ཅི་བདེར་བཀོད། བདག་བསྐྱེད་རྡོ་རྗེའི་རིགས་ཀྱི་ཁྲོ་བོ་གང་རུང་གཅིག་སྔོན་དུ་བཏང་ལ། སྔོན་འགྲོ་གཏོར་མ་བཏང༌། མཆོད་པ་བྱིན་རླབས་བྱ། གཏོར་མ་བྱིན་རླབས་ཀྱང་སྤྱི་དང་མཐུན་པར་བྱས་པའི་རྗེས་སུ། ཨོཾ་མཧཱ་བ་ལིཾ་ཏ། ཏེ་ཛོ་བ་ལིཾ་ཏ། བཱ་ལ་བ་ཏེ། གུ་ཧྱེ་སིདྡྷི་ས་མ་ཡ་ཧཱུཾ་ཧྲི་ཋ། ཞེས་ལན་གསུམ་དང༌། ཨ་ལས་བྱུང་བའི་ཐོད་པ་ཡངས་ཤིང་རྒྱ་ཆེ་བ་གཉིས་ཀྱི་ནང་དུ། ཨོཾ་ཧཱུཾ་ཏྲཾ་ཧྲིཿཁཾ་ལས་བྱུང་བའི་སྨན་བདུད་རྩིའི་རྒྱ་མཚོ་ཆེན་པོ་དང༌། རཾ་ལས་བྱུང་བའི་རཀྟ་དགྲ་བགེགས་ཀྱི་ཤ་ཁྲག་གིས་རྒྱ་མཚོར་གྱུར། ཨོཾ་ཨཱཿཧཱུཾ་སརྦ་པཉྩ་ཨ་མྲྀ་ཏ་ཧཱུཾ་ཧྲི་ཋ། ཨོཾ་མཧཱ་རཀྟ་ཛྭ་ལ་མཎྜ་ལ་ཧཱུཾ་ཧྲི་ཋ། ཞེས་ལན་གསུམ་གསུམ། མདུན་བསྐྱེད་བསངས་སྦྱངས། སྟོང་པའི་ངང་ལས་རྡོ་རྗེའི་ས་གཞི་དང་རྭ་གུར་མེ་དཔུང་འབར་བའི་དབུས་སུ། སུཾ་ལས་རིན་པོ་ཆེའི་བྲག་རིའི་སྟེང་དུ། དུར་ཁྲོད་ཆེན་པོའི་ཀློང་དཀྱིལ་དུ་སྣ་ཚོགས་རྡོ་རྗེའི་ལྟེ་བར་ཨེ་ལས་ཆོས་ཀྱི་འབྱུང་གནས་ཀྱི་དབུས་སུ། པཾ་པདྨ་མཎྜལ་ཧཱུཾ་ལས་པདྨ། ཨ་ཙཎྜ་མཎྜལ་ཧཱུཾ་ལས་ཟླ་བ། མ་སུཪྱ་མཎྜལ་ཧཱུཾ་ལས་ཉི་མ། ཎི་ལྗང་ཁུ་ལས་དགྲ་བོའི་བཾ་ཆེན་རྣམས་བརྩེགས་པའི་གདན་དུ་གྱུར། དེའི་སྟེང་དུ་ཧཱུཾ་མཐིང་ནག་གི་འོད་ཀྱི་འཕྲོ་འདུ་ལས། ནག་པོ་ཆེན་པོའི་སྐུར་གྱུར། ཨོཾ་མཧཱ་ཀཱ་ལ་
ཧཱུཾ་ཕཊ། རྡོ་རྗེ་ནག་པོ་ཆེན་པོ་སྐུ་མདོག་མཐིང་ནག་ཞལ་གཅིག་ཕྱག་གཉིས་སྤྱན་གསུམ་པ། གྲི་གུག་དང༌། ཐོད་ཁྲག་ཐུགས་ཀར་སྟེང་འོག་ཏུ་འཛིན་པ། སྨ་ར་སྨིན་མ་དབུ་སྐྲ་གྱེན་དུ་བརྫེས་ཤིང༌། རྡོ་རྗེའི་གཤོག་པ་འབར་པ་བརྡེབ་པ། ཐོད་སྐམ་གྱི་དབུ་རྒྱན། མགོ་རློན་གྱི་དོ་ཤལ། སྦྲུལ་དང་རུས་པ་དང༌། རིན་པོ་ཆེའི་རྒྱན་ཅན། སྟག་ལྤགས་རློན་པའི་ཤམ་ཐབས། མི་ལྤགས་དང་གླང་ཆེན་པགས་པའི་སྟོད་གཡོགས་གསོལ་བ། ཞབས་ཕུར་བུ་འབར་བའི་རྣམ་པ་ཅན་དགྲ་བོའི་སྙིང་གར་གཟེར་བ། ཡེ་ཤེས་ཀྱི་མེ་དཔུང་འབར་བའི་དབུས་ན་བཞུགས་པའོ། །དེའི་སྤྱི་བོར་ཨོཾ། མགྲིན་པར་ཨཱཿ ཐུགས་ཀར་ཧཱུཾ། རང་གི་སྙིང་ག་ནས་འོད་ཟེར་འཕྲོས། རང་དང་མདུན་བསྐྱེད་ཀྱི་བར་དུ་ཉི་མའི་གདན་ལ་གཤིན་རྗེ་གཤེད་དུ་གྱུར་པ་ནི། སྐུ་མདོག་མཐིང་ནག་བེ་ཅོན་དང་ཞགས་པ་འཛིན་པའོ། །དེ་ཉིད་ཀྱི་ཕྱག་མཚན་ལྕགས་ཀྱུར་གྱུར་ཏེ། ཡེ་ཤེས་པ་བཀུག་པར་མོས་ལ། ཧཱུཾ། སྔོན་ཚེ་དཔལ་ཆེན་སྤྱན་སྔ་རུ། །ཇི་ལྟར་ཁས་བླངས་དམ་བཅས་བཞིན། །བྱིན་གྱིས་བརླབས་པའི་གནས་འདི་རུ། །དྲག་པོའི་ལས་ལ་སྤྱན་འདྲེན་གཤེགས། །ཨོཾ་ཨེ་ཧྱེ་ཧི་ཤྲཱི་མཧཱ་ཀཱ་ལ་ཡེ། མཧཱ་ཀཱ་རུ་ཎི་ཀ་ཡ། ས་མ་ཛཿ ཛཿཧཱུཾ་བཾ་ཧོ། ཨོཾ་ཤྲཱི་མཧཱ་ཀཱ་ལ་ཡེ་བྷྱཿ ཨརྒྷཾ་ནས། ཤཔྟའི་བར་གྱིས་མཆོད།
ལྕགས་ཀྱུ་འོད་དུ་ཞུ་བ་ལས་བུམ་པར་གྱུར་ཏེ་དབང་བསྐུར། ཨོཾ་སརྦ་ཏ་ཐཱ་ག་ཏ་ཀཱ་ཡ་ཨ་བྷི་ཥིཉྩ་ཨོཾ། ཝཱཀ་ཨ་བྷི་ཥིཉྩ་ཨཱཿ ཙིཏྟ་ཨ་བྷི་ཥིཉྩ་ཧཱུཾ། ཞེས་དབང་བསྐུར། གཤིན་རྗེ་གཤེད་ཉིད་དབུ་རྒྱན་དུ་བཞུགས་པར་གྱུར། ཕྱི་ནང་གི་མཆོད་པ་རྣམས་རིམ་པས་ཕུལ་བར་མོས་ལ། རྡོ་རྗེ་ཁྲོ་རྒྱལ་ནག་པོའི་སྐུ། །རྒྱལ་བ་རྒྱ་མཚོའི་ཡེ་ཤེས་ཀྱི། །སྲིད་པའི་རྒྱ་མཚོ་མཐའ་ཡས་ཀུན། །ཀུན་བཟང་མཆོད་སྤྲིན་མཆོག་ཏུ་རོལ། །ནམ་མཁའ་མཛོད་ཀྱི་སྔགས་རྒྱ་ལན་གསུམ་བརྗོད། རྩ་བརྒྱད་སྟོང་ལ་སྦྱར་བའི་སྨན། །བདག་ཅག་དད་པས་འབུལ་ལགས་ཀྱི། །བཞེས་ཏེ་ཀུན་དུ་དགྱེས་མཛོད་ལ། །འཕྲུལ་གྱི་དངོས་གྲུབ་སྩལ་དུ་གསོལ། །ཨོཾ་ཨཱཿཧཱུཾ་ཤྲཱི་མཧཱ་ཀཱ་ལ་མཧཱ་པཉྩ་ཨ་མྲྀ་ཏ་ཁ་ཁ་ཁཱ་ཧི་ཁཱ་ཧི། ཞིང་ཆེན་གསར་སྙིང་ཏི་རར་བཅས། །དམར་གྱི་མཆོད་པ་རྒྱ་མཚོར་བསྐྱིལ། །འཁོར་བའི་དྲ་བ་གཅོད་པའི་ཕྱིར། །མ་ལུས་གཤེགས་ནས་བསྣམས་དུ་གསོལ། །ཛཿཧཱུཾ་བཾ་ཧོཿ ཤྲཱི་མཧཱ་ཀཱ་ལ་མཧཱ་རུ་དྷི་ར་ཁཱ་ཧི། མཧཱ་མཾ་ས་ཁཱ་ཧི། བླ་མེད་མཆོག་གི་མཆོད་པ་དམ་པ་འདི། །ཡེ་ཤེས་ལྔ་ཡི་འོད་ཟེར་རྣམ་པར་འཕྲོ། །འདོད་པའི་ཡོན་ཏན་ལྔ་ཡིས་རབ་ཏུ་བརྒྱན། །ཐུགས་དམ་བཞིན་དུ་ཅི་བདེར་བཞེས་སུ་གསོལ། །ཛཿཧཱུཾ་བཾ་ཧོཿ ཤྲཱི་མཧཱ་ཀཱ་ལ་ཨི་དཾ་པུཥྤེ་དྷུ་པཾ་གནྡྷཾ་བཱ་ལིཾ་ཏ་པྲ་ཏཱིཙྪ་ཧོ་གྲྀཧྞ་
ཁཱ་ཧི། བཛྲ་མཧཱ་ཀཱ་ལ་ཁ་ཁ་ཁཱ་ཧི་ཁཱ་ཧི། ཞེས་པ་རྣམས་བརྗོད། ནང་མཆོད་རྡོ་རྗེས་དཀྲུགས་ཤིང་གཏོར་མ་ལ་བྲན། འཐུངས་ཤིག་འཐུངས་ཤིག་རྡོ་རྗེའི་ཆུ། །ཞེས་སོགས་བརྗོད། རྡོ་རྗེ་སྙིང་གར་གཏད་ལ། ཧཱུཾ། ཟུང་ཞིག་ཟུང་ཞིག་རྡོ་རྗེ་འདི། །སོགས་བརྗོད། དམ་ལ་བཞག་གོ །ཨོཾ་མཧཱ་ཀཱ་ལ་ཧཱུཾ་ཕཊ། བསྙེན་སྔགས་དང༌། དེ་ལ་མཧཱ་ཀཱ་ལ་ཏྲི་ཡཾ་ཛ་ཛཿ མཧཱ་ཀཱ་ལ་ཏྲི་ཡཾ་དགྲ་བོ་མཱ་ར་ཡ། མཧཱ་ཀཱ་ལ་ཏྲི་ཡཾ་ཐུཾ་རིལ་རྦད། ཀཱི་ལ་ཡ་ཤ་རྦད། དགྲ་བོ་ཎཱི་མཱ་ར་ཡ་ཧཱུཾ་ཕཊ། ས་མ་ཡ་ཧཱུཾ་ཕཊ། སརྦ་བིགྷྣཱན་བཾ་ཧཱུཾ་ཕཊ། ཅེས་བཏགས་པའང་བཟླས་སོ། །མཐར་ཨེ་སྥ་ཎ་ཕཊ། འགྲུབ་ཁུང་དུ་གྱུར། དེར་ཎི་དང་ཏྲི་ལས་བྱུང་བའི་དགྲ་བགེགས་ཤིན་ཏུ་རིད་པའི་རྣམ་པ་ཅན་དུ་གྱུར། མཧཱ་ཀཱ་ལའི་སྤྲུལ་པའི་དམག་ཚོགས་མདུན་དུ་བསམས་ལ། གཏོར་མ་ཁ་གསོས་ལ་གོང་བཞིན་ཕུལ། ཧཱུཾ། ཁྲོས་པའི་གཟུགས་ལྡན་གདུག་པ་གང༌། །ཇི་ལྟར་རྒྱལ་བས་མི་འདུལ་བ། །སྨོན་ལམ་སེམས་ཀྱི་གཟུགས་ཅན་དེ། །བདག་འདོད་ཇི་བཞིན་འདིར་ཁུག་ཅིག །ཞེས་གཟུགས་བརྙན་ལ་ཕབ། ཨོཾ་མཧཱ་ཀཱ་ལ་དགྲ་བགེགས་གདུག་པ་ཅན་མཱ་ར་ཡ་ཧཱུཾ་ཕཊ་ཅེས་བསྐུལ། སྲིན་གཟུགས་ཀྱིས་བསྟོད་ཅིང༌། འདས་དང་མ་བྱོན་སོགས་ཀྱིས་ཀྱང་བསྐུལ། འབར་བ་མེ་ཡི་ཁྲོན་པ་རུ། །རབ་ཏུ་བཅིངས་ནས་མགོན་བྲལ་བའི། །གཟས་པའི་སྤྱི་བོར་ཕུར་བུ་ཆེ། །
ནག་པོ་ཆེན་པོ་ཕྱག་གཉིས་པ། །གནམ་ལྕགས་འབར་བ་ཟུར་གསུམ་དབལ། །རབ་ཏུ་བསྣུན་ནོ་མནར་བའི་སེམས། །རྣམ་པར་མ་རིག་བྲལ་གྱུར་ནས། །དཔལ་གྱིས་རྗེས་སུ་འཛིན་པར་ཤོག །གང་གི་སྔགས་ཤམ་བུ་ཅན་དེ་ཉིད་དང༌། ཨོཾ་སརྦ་བིགྷྣཱན་མུངྒ་ར་ཨ་ཀོ་ཊ་ཡ་ཧཱུཾ་ཕཊ། ཞེས་དྲག་ཏུ་བཟླས། ཨརྒྷཾ་སོགས་དང༌། འབྲུ་གསུམ་གྱིས་མཆོད། བསྟོད་པ་དང་འདོད་དོན་གསོལ་བཏབ་སྤྱི་དང་མཐུན། སློབ་དཔོན་གྱིས་ཀྱང་འོག་གི་དབང་རྣམས་བླང༌། སློབ་མས་མཎྜལ་ཕུལ། སློབ་དཔོན་བདག་ལ་དགོངས་སུ་གསོལ། །སངས་རྒྱས་བསྟན་པ་བསྲུང་བ་དང༌། །སེམས་ཅན་རྣམས་ལ་ཕན་གདགས་ཕྱིར། །དབང་དང་དངོས་གྲུབ་སྩལ་དུ་གསོལ། །ཞེས་ལན་གསུམ་གསོལ་བ་བཏབ། རྒྱུན་བཤགས་ཕུར་པའི་དཀྱིལ་ཆོག་བཞིན་ནམ། གུར་བཞིན་བྱ། སློབ་མ་མགོན་པོར་བསྐྱེད་ནས་དབང་བསྐུར་བའི་བར་ཡང་གོང་དང་མཚུངས། དེ་ནས་དབུས་ཀྱི་ཕུར་བུ་གཏད་ལ། དཔལ་ཆེན་ཁྲག་འཐུང་ནག་པོ་ཆེ། །ཕུར་བུའི་གཟུགས་ཀྱིས་དགྲ་བོ་དང༌། །བགེགས་སྲོག་དབང་དུ་སྡུད་འདི་ལོང༌། །ལྷ་སྐུ་སྒོམ་པའི་དབང་ཐོབ་ཤོག །སྙིང་པོའི་མཐར། ཀཱ་ཡ་ཨ་བྷི་ཥིཉྩ་ཨོཾ། འཕྲེང་བ་གཏད་ལ། སྒྲུབ་པའི་ཡེ་ཤེས་ཚོན་གང་བ། །གསང་བའི་སྔགས་ཀྱིས་རབ་བསྐྱེད་ལ། །དུས་དང་རྒྱུན་དུ་བཟླས་བྱ་བའི། འཛབ་བསྙེན་འཕྲེང་བའི་དབང་བསྐུར་རོ། །སྙིང་པོའི་མཐར།
ཝཱཀ་ཨ་བྷི་ཥིཉྩ་ཨཱཿ གྲི་གུག་གཏད་ལ། གདུག་ཅིང་སྡང་སེམས་ལྡན་པ་རྣམས། །བསྒྲལ་ཕྱིར་གྲི་གུག་དབང་སྦྱིན་པས། །བར་ཆད་བྱེད་པའི་ལྷ་དང་བདུད། །སྒྲོལ་ཞིང་ཉོན་མོངས་གཅོད་པར་ཤོག །སྙིང་པོའི་མཐར། ཙིཏྟ་ཨ་བྷི་ཥིཉྩ་ཧཱུཾ། བྷནྡྷ་གཏད་ལ། ཐོད་པ་བྱང་ཆུབ་སེམས་ཀྱི་རྟགས། །སྨན་མཆོག་ཡེ་ཤེས་ལྔ་ཡིས་གང༌། །ཡོན་ཏན་རྫོགས་པའི་དབང་བསྐུར་བས། །རིགས་ལྔའི་སངས་རྒྱས་ཐོབ་པར་ཤོག །སྙིང་པོའི་མཐར། གུ་ཎ་ཨ་བྷི་ཥིཉྩ་ཏྲཾ། གཏོར་མ་གཏད་ལ། གཏོར་མའི་དབང་བསྐུར་འདི་སྦྱིན་པས། །དགྲ་བགེགས་བསད་ཅིང་བསྐྲད་པ་དང༌། །རྨོངས་ཤིང་རེངས་པའི་འཕྲིན་ལས་དང༌། །དངོས་གྲུབ་འབྱུང་བའི་དབང་ཐོབ་ཤོག །སྙིང་པོའི་མཐར། ཀརྨ་ཨ་བྷི་ཥིཉྩ་ཨ། དེ་ནས་སློབ་མའི་རྗེས་ཀྱི་བྱ་བ་རྣམས་སྤྱི་དང་འདྲ། སླར་ཡང་གཏོར་མ་འབུལ་བ་དང༌། མཆོད་བསྟོད་ཡིག་བརྒྱ། བཟོད་གསོལ། གཤེགས་གསོལ། རྟེན་ལ་བརྟན་བཞུགས། སྨོན་ལམ་བཀྲ་ཤིས་སོགས་ཚང་བར་བྱའོ། །པདྨའི་ཞལ་ལུང་འཁོར་རབས་ཀྱི། །རིག་འཛིན་ཀུན༵་གྱིས་དག༵འ་བར་བླངས། །དེང་སང་མིང་ཡང་ནུབ་ཏུ་ཉེ། །ཕན་སེམས་ཁོ་ནས་སྙིང༵་པོ༵་དྲིལ། །གུར་མགོན་ཕུར་ཞབས་ཅན་གྱི་སྒྲུབ་ཐབས་ཀྱི་ལེ་ཚན་ནོ།། །།དགེ་ལེགས་འཕེལ། །